GEN 1:1 Diyà te keteboan te kedita, mig-inang se Timanem te langit aw keneyonan.
GEN 1:2 Wedad pa bawa te tanà, aw wedad pa awop niyan, aw tomalag mengitngit se kebelad te dagat. Gayed miniwal se Espiritu Santo diyà te lanto te wayeg.
GEN 1:3 Minikagi se Timanem, “Megkedoen den kelowahan.” Penga niyan, doen kelowahan.
GEN 1:4 Kinità te Timanem te mèpiya se kelowahan, aw tinani din se kelowahan aw kengitngitan.
GEN 1:5 Se kelowahan, yan se iningedanan din aldaw. Se kengitngitan, yan se iningedanan din delem. Migkemeapon aw migkeiselem, aw yan nepenga se tagnà aldaw.
GEN 1:6 Minikagi se Timanem, “Megkedoen elet diyà te wayeg amon doen wayeg diatas te tanà aw doen wayeg kidoen te ongan.”
GEN 1:7 Yan ininang te Timanem se elet diyà te wayeg diatas te tanà aw wayeg kidoen te tanà. Neinang iyan.
GEN 1:8 Se lenged diatas te tanà, yan se iningedanan te Timanem langit. Migkemeapon aw migkeiselem, aw yan nepenga se ikedowa te aldaw.
GEN 1:9 Minikagi se Timanem, “Metipon se wayeg te ongan amon doen mepangkag.” Neinang iyan.
GEN 1:10 Se mepangkag, yan se iningedanan te Timanem tanà. Se wayeg netipon, yan se iningedanan din dagat. Kinità te Timanem te mèpiya iyan.
GEN 1:11 Penga niyan, minikagi se Timanem, “Megkedoen medita kemolò te tinemunun kidoen te tanà, aw medita kemolò te kayo. Megkedoen pongo niyan doen didalem amon todà iyan tomobò.” Neinang iyan.
GEN 1:12 Timobò se medita kemolò te tinemunun doen benì, aw medita kemolò te kayo doen pongo. Kinità te Timanem te mèpiya iyan.
GEN 1:13 Migkemeapon aw migkeiselem, aw yan nepenga se iketelo te aldaw.
GEN 1:14 Minikagi se Timanem, “Megkedoen menge somenang doton te langit amon doen elet te aldaw aw delem. Yan se pengilala te menge bolan, menge aldaw, aw menge omay.
GEN 1:15 Yan heman se somenang doton te langit amon melowa se tanà.” Neinang iyan.
GEN 1:16 Dowa se dakel lowa ininang te Timanem. Se aldaw, yan se egsenang dalem te aldaw. Se bolan, yan se egsenang dalem te delem. Ininang din heman se menge bitoen.
GEN 1:17 Yan se insawol te Timanem doton te langit amon melowa se tanà.
GEN 1:18 Yan se egsenang te aldaw aw delem, amon doen elet diyà te kelowahan aw kengitngitan. Kinità te Timanem te mèpiya iyan.
GEN 1:19 Migkemeapon aw migkeiselem, aw yan nepenga se ikeepat te aldaw.
GEN 1:20 Minikagi se Timanem, “Megkedoen medita kinemoloan meg-ogpà doton te wayeg aw dagat, aw manok lomayang diatas te tanà.”
GEN 1:21 Yan ininang te Timanem se kedita te menenanap te dagat, aw kedita te kinemoloan eg-ogpà doton te wayeg aw dagat, aw kedita te kinemoloan te manok. Kinità te Timanem te mèpiya iyan.
GEN 1:22 Mèpiya se imbegay te Timanem diyà te kedita niyan, aw migpunù sikandin diyà te kedita eg-ogpà doton te wayeg aw dagat, “Pegbatà kaw, aw pegkedita kaw amon melegeb se dagat kenyo.” Migpunù heman sikandin diyà te menge manok, “Pegkedita kaw doton te tanà.”
GEN 1:23 Migkemeapon aw migkeiselem, aw yan nepenga se ikelima te aldaw.
GEN 1:24 Minikagi se Timanem, “Megkedoen medita kinemoloan eg-ogpà doton te tanà, menge ayam-ayam aw menenanap te kebenesan dakel aw deitek.” Neinang iyan.
GEN 1:25 Ininang te Timanem se kedita niyan, aw kinità din te mèpiya iyan.
GEN 1:26 Penga niyan, minikagi se Timanem, “Meg-inang kidon den te otaw iling kenitadon. Inangen tadon dan melangkaw diyà te kedita te ininang tadon, menge ikan, manok, ayam-ayam, aw menenanap dakel aw deitek.”
GEN 1:27 Yan ininang te Timanem se otaw iling kandin. Ininang se otaw iling te Timanem. Ininang dan meama aw bayi.
GEN 1:28 Mèpiya se imbegay te Timanem diyà kandan, aw migpunù sikandin, “Pegbatà kaw te medita amon doen bowad-bowad niyo meg-ogpà diyà te kebelad te tanà aw mengibing kenyan. Sikiyo se mengolo diyà te menge ikan, manok, aw kedita te ayam-ayam aw menenanap eg-ogpà dini lanto te tanà.”
GEN 1:29 Minikagi heman se Timanem, “Ibegay ko diyà kenyo se kedita te tinemunun doen benì dini te tanà aw kedita te kayo doen pongo amon doen kànen niyo.
GEN 1:30 Ibegay ko heman se kedita te mèpiya tinemunun diyà te menge ayam-ayam, manok, aw menenanap, amon doen kànen te kedita eg-ogpà dini lanto te tanà.” Neinang iyan.
GEN 1:31 Timengteng se Timanem diyà te kedita te ininang din, aw ontò iyan mèpiya. Migkemeapon aw migkeiselem, aw yan nepenga se ikeenem te aldaw.
GEN 2:1 Yan nepenga se peg-inang te Timanem te kedakel te langit, aw keneyonan, aw awop niyan.
GEN 2:2 Pegdateng te ikepito te aldaw, nepenga den se kedita te ininang te Timanem, aw yan mig-ogpà sikandin te ikepito te aldaw.
GEN 2:3 Ininang din melangkaw aw egpenimeneman se ikepito te aldaw. Yan se aldaw te peg-ogpà din, so nepenga den se peg-inang din.
GEN 2:4 Yan se indan tepad te peg-inang te langit aw keneyonan. Peg-inang te Timanem te keneyonan aw langit,
GEN 2:5 wedad pa tinemunun dini te tanà, aw wedad heman timobò, so wedà pa peodani te Timanem se tanà, aw wedad pa otaw migpawà.
GEN 2:6 Meneng doen wayeg timebol lekat didalem te tanà amon meelem se kebelad te tanà.
GEN 2:7 Penga niyan, inabat te Timanem se tanà, aw yan se ginamit din te pegtiyon din te otaw. Penga niyan, inedop din se idong te otaw, aw yan binegayan din se otaw te pedowan.
GEN 2:8 Penga niyan, ininang te Timanem se kekeyowan kidoen te Eden doton te eglibtakan, aw yan se pineogpaan din te otaw ininang din.
GEN 2:9 Impetilles te Timanem se medita kemolò te kayo kidoen. Mèpiya iyan tengtengen, aw mèpiya heman se pongo niyan. Dowa se kayo intanem din diyà te tengà-tengà te kekeyowan, aw yan se kayo egpemegay te pedowan wedad temanan aw kayo egpemegay te kebiyasa tepad te mèpiya aw medaet.
GEN 2:10 Doen heman wayeg kidoen te Eden gayed eg-elem te tanà te kekeyowan. Doton dibabà te Eden, migsoway-soway se wayeg sìyan, aw neinang iyan olo te epat dakel wayeg.
GEN 2:11 Pison se ngadan te tagnà wayeg, aw minokit iyan te tanà iningedanan Habila.
GEN 2:12 Mèpiya se bolawan egketelaan kidoen, aw doen heman litek te kayo metinadeg aw menge bato meelagà kidoen.
GEN 2:13 Gihon se ngadan te ikedowa te wayeg, aw minokit iyan te tanà iningedanan Cus.
GEN 2:14 Tigris se ngadan te iketelo te wayeg, aw minokit iyan lenged te eglibtakan te tanà iningedanan Asirya. Yofritis se ngadan te ikeepat te wayeg.
GEN 2:15 Impeogpà te Timanem se otaw doton te kekeyowan te Eden amon meg-obong sikandin kenyan aw megtonggò heman kenyan.
GEN 2:16 Migpunù se Timanem diyà kandin, “Mepakay aw kànen no se pongo te kedita te kayo kidoen te kekeyowan,
GEN 2:17 meneng ikà egpengaen te pongo te kayo egpemegay te kebiyasa tepad te mèpiya aw medaet. So aw komaen ka kenyan, ontò ka matay te aldaw sìyan.”
GEN 2:18 Minikagi heman se Timanem, “Kenà mèpiya aw sebad olò se otaw. Yan meg-inang a te doma din meketepad kandin amon doen megtelaban kandin.”
GEN 2:19 Yan inibing te Timanem se kedita te ayam-ayam, menenanap, aw manok ininang din lekat te tanà. Inibing din se kedita niyan doton te otaw amon ingedanan din iyan. Pengkey eden se in-ingadan din kenyan, yan se ngadan niyan.
GEN 2:20 Iningedanan te otaw se kedita te ayam-ayam, menge manok, aw kedita te menenanap, meneng wedad palos diyà kenyan meketepad kandin meinang doma din.
GEN 2:21 Penga niyan, ontò impetedogi te Timanem se otaw. Pegketedogi din, inabat te Timanem se gosok din, aw sinengseng din se awang te onod.
GEN 2:22 Penga niyan, ininang din se bayi lekat te gosok, aw inibing din sikandin doton te meama.
GEN 2:23 Minikagi se meama, “Na, lekat te tòlan ko se kandin tòlan, aw lekat te onod ko se kandin onod. Ingedanan ko sikandin bayi, so inabat sikandin lekat te meama.”
GEN 2:24 Yan se doun te tomanan se meama te amay aw inay din, aw megsebad diyà te esawa din. Se didowa dan meinang sebad.
GEN 2:25 Pengkey migpetabeg-tabeg se meama aw bayi, meneng wedà dan keyàyà.
GEN 3:1 Nayan, diyà te kedita te menge menenanap ininang te Timanem, memokan se ontò biyasa eg-akal. Mig-insà se memokan diyà te bayi, “Benal lay migpunù se Timanem kenyo te eked kaw kaen te pongo te kedita te kayo dini te kekeyowan?”
GEN 3:2 Timaba se bayi, “Mepakay aw komaen kay te pongo te menge kayo dini te kekeyowan.
GEN 3:3 Meneng minikagi se Timanem te keilangan eked kay kaen te pongo te kayo doton te tengà-tengà te kekeyowan, aw keilangan eked kay pemaed kenyan, so matay kay.”
GEN 3:4 Minikagi se memokan, “Eked kaw kematay.
GEN 3:5 Minikagi se Timanem kenyan so netegahan din aw komaen kaw kenyan, megkebiyasa kaw, aw meinang kaw iling kandin, so metaga-taga kaw heman aw eden se mèpiya aw eden se medaet.”
GEN 3:6 Penga niyan, kimità se bayi te mèpiya kànen se pongo te kayo sìyan, aw mèpiya se bawa niyan, aw mig-aneng-aneng sikandin te mèpiya aw megkebiyasa sikandin. Yan se doun te inabat din se pongo niyan aw kinaen din iyan. Doen heman imbegay din diyà te esawa din, aw kinaen din heman iyan.
GEN 3:7 Pegpengaen dan kenyan, migkebiyasa dan aw netegahan dan te migpetabeg-tabeg dan. Yan tinebil dan se dawen te kayo igira amon doen isampeng te sinelowan dan.
GEN 3:8 Te kelikit te meapon, minipanaw se Timanem kidoen te kekeyowan. Meneng te aldaw sìyan, pegdineg dan te tegodtod te peg-ipanaw din, mineles dan doton te menge kayo.
GEN 3:9 Meneng timawal se Timanem diyà te meama, “Kenan ka lay?”
GEN 3:10 Timaba sikandin, “Dinineg ko sikona doton te kekeyowan, meneng nelemitan a so migpetabeg-tabeg a, aw yan mineles a.”
GEN 3:11 Mig-insà se Timanem, “Sinu lay se mig-indan kamno te migpetabeg-tabeg ka? Kimaen ka lay te pongo te kayo impunù ko kamno?”
GEN 3:12 Minikagi se meama, “Se bayi impedoma no diyà kanak, yan se nemegay te pongo diyà kanak, aw kimaen a kenyan.”
GEN 3:13 Mig-insà se Timanem diyà te bayi, “Eden lay se ininang no seini?” Timaba se bayi, “Se memokan, yan se mig-akal kanak, aw yan kimaen a.”
GEN 3:14 Penga niyan, minikagi se Timanem diyà te memokan, “Ipelumun ka tandà te medaet ininang no seini. Diyà te kedita te menge ayam-ayam aw menenanap, olò sikona se ipelumun iling kani. Lekat seini, keilangan domelog se getek nikaw diyà te tanà, aw gayed ka komaen te kepong-kepong te tanà taman te pegkematay nikaw.
GEN 3:15 Inangen ko sikiyo megpepoonay, sikona aw bayi, kamno sakop aw kandin bowad-bowad. Bonalan te bowad-bowad din se olo nikaw, aw bengaen no se palo din.”
GEN 3:16 Minikagi se Timanem diyà te bayi, “Ontò ko dogangan se kelimahan te pegbatà nikaw. Aw tebawan ka, elegen ka. Meneng ontò ka meibeg te kamno esawa, aw mengolo sikandin diyà kamno.”
GEN 3:17 Minikagi se Timanem diyà te meama, “Nenenalan ka diyà te esawa nikaw, aw kimaen ka te pongo te kayo impunù ko kamno. Tandà te salà no sìyan, inangen ko heman medaet se tanà. Keilangan gayed ka megterbaho taman te pegkematay nikaw, amon botong se kànen nikaw.
GEN 3:18 Gayed tomilles se sagbet aw tigis kidoen te tanà, aw keilangan mahà ka heman te kànen egtobò doton te kebenesan tandà te kelimahan nikaw.
GEN 3:19 Keilangan gayed ka megterbaho lamig peg-etingan ka amon doen tomilles kidoen te tanà lamig molì ka doton te tanà, so yan se linekatan nikaw. Ininang ka lekat te tanà, aw todà ka heman meinang tanà.”
GEN 3:20 Iningedanan i Adam (kelebadan niyan, otaw) se esawa din ki Eva (kelebadan niyan, pegkeotaw), so sikandin se neinang inay te kedita te otaw.
GEN 3:21 Doen penenaktun ininang te Timanem lekat te kindal te menge ayam-ayam, aw imbegay din iyan diyà ki Adam aw esawa din amon doen penenaktun dan.
GEN 3:22 Nayan, minikagi se Timanem, “Neinang den se otaw iling kenitadon, so netegahan den dan aw eden se mèpiya aw eden se medaet. Eked den kepakay aw mengabat dan te pongo lekat te kayo mekebegay te pedowan wedad temanan, so aw komaen dan kenyan, eked dan palos kematay te wedad temanan.”
GEN 3:23 Yan impekesayo te Timanem se otaw lekat te kekeyowan te Eden, aw impeobong din sikandin te tanà linekatan din.
GEN 3:24 Penga te pegkesayo te otaw lekat te Eden, insogò te Timanem se iling te anghil iningedanan kirobim lenged te eglibtakan te kekeyowan, aw insawol din se sondang eglegdeg aw gayed egkebiling, amon wedad otaw mekepedapag diyà te kayo egpemegay te pedowan wedad temanan.
GEN 4:1 Nayan, migpeleyokay si Adam aw esawa din, aw miglaman si Eva. Pegtebaw te batà din, minikagi si Eva, “Pineokit te tabang te Timanem, doen den batà ko meama.” Iningedanan din se batà din ki Cain (kelebadan niyan, doen den).
GEN 4:2 Penga niyan, todà sikandin migbatà te doma batà din meama si Abel. Si Abel se biyasa egdiyaga te menge ayam-ayam, aw si Cain se biyasa egpawà.
GEN 4:3 Doen sebad aldaw, nengibing si Cain te menge pongo te tinanem din amon ibegay din iyan diyà te Timanem.
GEN 4:4 Meneng si Abel se nemallì te penganay nati te menge karniro din, aw iniyaw din iyan, aw inibing din se melambò onod niyan amon ibegay din iyan diyà te Timanem. Neluba se Timanem ki Abel aw sìyan imbegay din.
GEN 4:5 Meneng wedà keluba se Timanem ki Cain aw sìyan imbegay din. Yan ontò neopal si Cain aw timàmod.
GEN 4:6 Penga niyan, minikagi se Timanem diyà ki Cain, “Kenà mèpiya se pegkeopal nikaw. Kenà mèpiya se pegtàmod nikaw.
GEN 4:7 Aw metòlid se inangen nikaw, yan meluba a kamno. Meneng aw eked ka peg-inang te metòlid, delisegen ka den i Satanas amon meg-inang ka te salà. Dàgen ka peden te peg-inang no te salà, meneng keilangan domaeg ka kenyan.”
GEN 4:8 Wedà kenamay, minikagi si Cain diyà te kedowa din si Abel, “Taking ka kanak doton te pawà.” Pegdateng dan doton te pawà, inimetayan i Cain se kedowa din.
GEN 4:9 Mig-insà se Timanem diyà ki Cain, “Kenan lay se kedowa no si Abel?” Timaba sikandin, “Inday. Kenà a teletonggò te kedowa ko.”
GEN 4:10 Minikagi se Timanem, “Ontò den medaet se ininang no seini. Iling te egpengenganay se dipanog din diyà kanak lekat te tanà.
GEN 4:11 Lekat seini, ipelumun ko sikona. Eked den kepakay aw meg-obong ka te tanà, so tanà se inegseban te dipanog te kedowa no te pegpengimatay no kandin.
GEN 4:12 Aw todà ka megpawà, eked pongo se tinanem nikaw. Keilangan gayed ka meglegeb dini lanto te tanà.”
GEN 4:13 Minikagi si Cain, “Pelaban melima se pegpelumun no kanak, aw eked a peketayod kenyan.
GEN 4:14 Eked a no den pepewai, aw ipekesayo a no den lekat kamno. Keilangan gayed a meglegeb dini lanto te tanà. Aw ketelaan a te doma otaw, imetayan a din.”
GEN 4:15 Meneng minikagi se Timanem diyà kandin, “Eked iyan ketoman, so aw doen mengimatay kamno, mekepito pa se kedaet te pelumun domateng diyà kandin.” Penga niyan, doen pengilala imbegay te Timanem diyà ki Cain amon eked sikandin imetayi te otaw meketalà kandin.
GEN 4:16 Penga niyan, timanan si Cain te Timanem, aw mig-ogpà sikandin doton te ogpeanan te Nod, lenged te eglibtakan te Eden.
GEN 4:17 Nayan, migpeleyokay si Cain aw esawa din, aw doen batà dan timebaw si Enok. Dalem niyan, mig-inang si Cain te lonsod, aw yan heman se iningedanan din Enok, onawa te ngadan te batà din.
GEN 4:18 Si Enok se amay i Irad. Si Irad se amay i Mehujael. Si Mehujael se amay i Metusael. Si Metusael se amay i Lamek.
GEN 4:19 Migdoway si Lamek. Si Ada se ngadan te sebad esawa din, aw si Sela se doma.
GEN 4:20 Si Ada se inay i Jabal, aw sikandin se neinang kemonaan te kedita te telediyaga te menge ayam-ayam. Mig-ogpà dan diyà te menge tolda.
GEN 4:21 Doen adi i Jabal si Jubal, aw sikandin se neinang kemonaan te kedita te otaw biyasa egpengablit te sista aw egpengedop te seluli.
GEN 4:22 Si Sela se inay i Tubal Cain, aw sikandin se menenayab te tebaga aw kinis. Doen heman etebay i Tubal Cain si Naama.
GEN 4:23 Minikagi si Lamek diyà te didowa esawa din, “Ada aw Sela, penenalan kaw den diyà kanak. E menge esawa ko, seini se kagi ko diyà kenyo. Mekebatog a den mengimatay te otaw menigbas kanak. Pengkey pa telaki se megpeeleg kanak, mengimatay a kandin.
GEN 4:24 Aw mekepito pa se kedaet te pelumun domateng diyà te otaw mengimatay ki Cain, Yan mekekepitowan teg pito pa se kedaet te pelumun domateng diyà te otaw mengimatay peden kanak.”
GEN 4:25 Nayan, penga te pegkematay i Abel, migpeleyokay si Adam aw esawa din, aw doen batà meama timebaw diyà ki Eva. Iningedanan din se batà din ki Set (kelebadan niyan, imbegay), so minikagi sikandin, “Binegayan a te Timanem te sebad batà inselilin ki Abel, so inimetayan sikandin i Cain.”
GEN 4:26 Doen batà meama timebaw diyà te esawa i Set, aw iningedanan din se batà din ki Enos. Nayan, lekat te aldaw sìyan, migtebò se menge otaw migsimba aw migtawal-tawal diyà te Timanem.
GEN 5:1 Seini se ngadan te menge bowad-bowad i Adam. Peg-inang te Timanem te otaw, ininang din dan iling kandin.
GEN 5:2 Ininang din se otaw meama aw bayi. Mèpiya se imbegay din diyà kandan, aw iningedanan din dan otaw.
GEN 5:3 Peg-apet te sebad gatos ketlowan se omay i Adam, timebaw se batà din meama iling kandin. Iningedanan din se batà din ki Set.
GEN 5:4 Penga te pegtebaw i Set, walo gatos se omay minokit te wedà pa kematay si Adam. Dalem niyan, doen pa menge doma batà din timebaw.
GEN 5:5 Siyam gatos ketlowan se omay i Adam te pegkematay din.
GEN 5:6 Peg-apet te sebad gatos aw lima se omay i Set, timebaw se batà din meama si Enos.
GEN 5:7 Penga te pegtebaw i Enos, walo gatos aw pito se omay minokit te wedà pa kematay si Set. Dalem niyan, doen pa menge doma batà din timebaw.
GEN 5:8 Siyam gatos sempolò teg dowa se omay i Set te pegkematay din.
GEN 5:9 Peg-apet te kesyaman se omay i Enos, timebaw se batà din meama si Cainan.
GEN 5:10 Penga niyan, walo gatos sempolò teg lima se omay minokit te wedà pa kematay si Enos. Dalem niyan, doen pa menge doma batà din timebaw.
GEN 5:11 Siyam gatos aw lima se omay i Enos te pegkematay din.
GEN 5:12 Peg-apet te kepitowan se omay i Cainan, timebaw se batà din meama si Mahalaleel.
GEN 5:13 Penga niyan, walo gatos kepatan se omay minokit te wedà pa kematay si Cainan. Dalem niyan, doen pa menge doma batà din timebaw.
GEN 5:14 Siyam gatos aw sempolò se omay i Cainan te pegkematay din.
GEN 5:15 Peg-apet te keneman teg lima se omay i Mahalaleel, timebaw se batà din meama si Jared.
GEN 5:16 Penga niyan, walo gatos ketlowan se omay minokit te wedà pa kematay si Mahalaleel. Dalem niyan, doen pa menge doma batà din timebaw.
GEN 5:17 Walo gatos kesyaman teg lima se omay i Mahalaleel te pegkematay din.
GEN 5:18 Peg-apet te sebad gatos keneman teg dowa se omay i Jared, timebaw se batà din meama si Enok.
GEN 5:19 Penga niyan, walo gatos se omay minokit te wedà pa kematay si Jared. Dalem niyan, doen pa menge doma batà din timebaw.
GEN 5:20 Siyam gatos keneman teg dowa se omay i Jared te pegkematay din.
GEN 5:21 Peg-apet te keneman teg lima se omay i Enok, timebaw se batà din meama si Matusalem.
GEN 5:22 Penga niyan, dalem te telo gatos se omay, migpedomaay si Enok aw Timanem. Dalem niyan, doen pa menge doma batà din timebaw.
GEN 5:23 Minapet se omay din te telo gatos keneman teg lima.
GEN 5:24 Gayed migpedomaay si Enok aw Timanem lamig te aldaw te pegkewedad din, so binaloy sikandin te Timanem.
GEN 5:25 Peg-apet te sebad gatos kewelowan teg pito se omay i Matusalem, timebaw se batà din meama si Lamek.
GEN 5:26 Penga niyan, pito gatos kewelowan teg dowa se omay minokit te wedà pa kematay si Matusalem. Dalem niyan, doen pa menge doma batà din timebaw.
GEN 5:27 Siyam gatos keneman teg siyam se omay i Matusalem te pegkematay din.
GEN 5:28 Peg-apet te sebad gatos kewelowan teg dowa se omay i Lamek, doen batà din meama timebaw.
GEN 5:29 Iningedanan din se batà din ki Noe (kelebadan niyan, peg-etod), so minikagi sikandin, “Seini se otaw megpeetod kenitadon lekat te kelimahan te terbaho tadon dini te tanà seini ininang te Timanem medaet.”
GEN 5:30 Penga te pegtebaw i Noe, lima gatos kesyaman teg lima se omay minokit te wedà pa kematay si Lamek. Dalem niyan, doen pa menge doma batà din timebaw.
GEN 5:31 Pito gatos kepitowan teg pito se omay i Lamek te pegkematay din.
GEN 5:32 Penga te lima gatos se omay i Noe, timebaw se telo batà din meama, si Sem, si Ham, aw si Japet.
GEN 6:1 Nayan, pegkedita-dita te menge otaw dini lanto te tanà, aw pegkedita heman te bayi timebaw,
GEN 6:2 doen menge sakop te Timanem kimità te mèpiya se bawa te menge bayi, aw pengkey sinu se neibegan dan, yan se pinengognan dan.
GEN 6:3 Penga niyan, minikagi se Timanem, “Eked ko pekeleyati se pedowan ko diyà te menge otaw te wedad temanan, so otaw dan olò. Lekat seini, taman olò te sebad gatos kelowan se omay se tegsebad-sebad otaw.”
GEN 6:4 Dalem te aldaw sìyan te pegpengognan te menge sakop te Timanem diyà te menge bayi aw pegbatà dan, aw pengkey pa te pegkepenga niyan, doen menge telandig iningedanan Nefilim. Ontò dan nedengeg gebii, so dakel se nebatog dan.
GEN 6:5 Kinità te Timanem te ontò medaet se eg-inangen te kedita te otaw dini lanto te tanà, aw tomalag medaet se aneng-aneng aw ibeg dan te kelikit te aldaw.
GEN 6:6 Yan miglama-lama sikandin tepad te peg-inang din te otaw aw tepad te pegpeogpà din kandan dini te tanà. Ontò nepuluk se pedowan din,
GEN 6:7 aw minikagi sikandin, “Pegbàtan ko se otaw ininang ko dini te tanà, sipat te menge ayam-ayam, menenanap, aw manok, so miglama-lama a tepad te peg-inang ko kandan.”
GEN 6:8 Meneng neluba se Timanem tepad ki Noe.
GEN 6:9 Seini se indan tepad ki Noe. Diyà te kedita te otaw, olò si Noe se eg-inang te metòlid, aw wedad palos isila kandin. Migpedomaay si Noe aw Timanem.
GEN 6:10 Telo se batà din meama, si Sem, si Ham, aw si Japet.
GEN 6:11 Netegahan te Timanem te medaet se kedita te doma otaw dini lanto te tanà, aw doen samok doton te kedita te ogpeanan.
GEN 6:12 Pegtengteng te Timanem diyà te tanà, kinità din te tomalag iyan medaet, so gayed medaet se eg-inangen te kedita te otaw.
GEN 6:13 Minikagi se Timanem diyà ki Noe, “Tod ko, igelaen ko den se kedita te otaw, so nelegeb den se kebelad te tanà te medaet eg-inangen dan. Yan ontò ko dan bàtan sipat te kedita dini lanto te tanà.
GEN 6:14 Yan peg-inang ka den te arka te mèpiya kemolò te kayo amon doen sekayan nikaw. Peg-inang ka te menge tambì doton te arka, aw pemolit ka kenyan doton didalem aw doton te lowà.
GEN 6:15 Sebad gatos ketlowan teg telo mitro se kelayat niyan, aw kelowan teg dowa mitro se kebelad niyan, aw sempolò teg telo mitro se kelangkaw niyan.
GEN 6:16 Peg-atep ka kenyan, aw peg-inang ka te elet diyà te ampa aw atep taman te tengà mitro se kelangkaw niyan. Peg-inang ka te telo kunsad niyan aw sebad se lelebangan kidoen te ampa.
GEN 6:17 “Linepen ko se tanà te wayeg amon megelà se kedita doen pedowan. Matay se kedita dini lanto te tanà.
GEN 6:18 Meneng doen ipakang ko den kamno. Awop ka diyà te arka sipat te esawa nikaw, menge batà nikaw, aw menge esawa dan.
GEN 6:19 Pengibing ka heman te meama aw bayi lekat te tegsebad-sebad kemolò te ayam-ayam, menenanap, aw manok amon eked iyan kegelà.
GEN 6:21 Peglolan ka heman te medita kemolò te kànen amon doen kànen te kedita niyo.”
GEN 6:22 Timolò si Noe te kedita te impunù te Timanem diyà kandin.
GEN 7:1 Nayan, minikagi se Timanem diyà ki Noe, “Awop ka diyà te arka sipat te kedita diyà te pamilya nikaw, so diyà te kedita te otaw dini lanto te tanà, olò sikona se kinità ko eg-inang te metòlid.
GEN 7:2 Pengibing ka te sebad meama aw sebad bayi lekat te tegsebad-sebad kemolò te ayam-ayam aw menenanap eked kepakay sonogen aw ibegay diyà kanak, meneng pengibing ka te pito meama aw pito bayi lekat te tegsebad-sebad kemolò te ayam-ayam aw manok mepakay sonogen aw ibegay diyà kanak. Peg-inang ka kenyan amon todà megbowad-bowad se kedita te kemolò dini lanto te tanà.
GEN 7:4 Na, pito seini, ipetedak ko se odan, aw eked iyan kedit singed aw kepatan se aldaw aw kepatan se delem amon bàtan ko se kedita ininang ko doen pedowan dini lanto te tanà.”
GEN 7:5 Timolò si Noe te kedita te impunù te Timanem diyà kandin.
GEN 7:6 Enem gatos se omay i Noe te pegkelinep te tanà te wayeg.
GEN 7:7 Minawop sikandin diyà te arka sipat te esawa din, menge batà din, aw menge esawa dan, amon eked dan kegelà aw melinep se tanà te wayeg.
GEN 7:8 Netipon se sebad meama aw sebad bayi lekat te tegsebad-sebad kemolò te menge ayam-ayam, menenanap, aw manok pengkey mepakay sonogen aw eked kepakay sonogen. Dimoton se kedita niyan ki Noe, aw minawop dan diyà te arka, iling te impunù te Timanem diyà ki Noe.
GEN 7:10 Penga te pito se aldaw, migtebò nelinep se tanà te wayeg.
GEN 7:11 Peg-apet te enem gatos se omay i Noe, te pitsa sempolò teg pito te ikedowa te bolan te omay sìyan, neowang se kedita te selep doton didalem te dagat, aw neowang heman se kedita te linekatan te odan doton te langit.
GEN 7:12 Penga niyan, minodan te kepatan se aldaw aw kepatan se delem.
GEN 7:13 Te wedà pa kelinep se tanà, tapay minawop si Noe diyà te arka sipat te esawa din, menge batà din si Sem, si Ham, aw si Japet, aw menge esawa dan.
GEN 7:14 Minawop heman se kedita te kemolò te menge ayam-ayam aw menenanap, dakel aw deitek, aw kedita te kemolò te manok.
GEN 7:15 Doen meama aw bayi diyà te tegsebad-sebad kemolò doen pedowan dimoton ki Noe, aw minawop dan diyà te arka, iling te impunù te Timanem diyà ki Noe. Penga niyan, tinakep te Timanem se lelebangan te arka.
GEN 7:17 Gayed minodan te kepatan se aldaw aw kepatan se delem. Gayed migkedalem se wayeg lamig limepaw se arka.
GEN 7:18 Gayed timilles se wayeg diyà te lanto te tanà, aw miglepaw-lepaw se arka diyà te lanto te wayeg.
GEN 7:19 Gayed timilles se wayeg diyà te lanto te tanà lamig nelinep te wayeg se kedita te melangkaw bontod.
GEN 7:20 Timilles se wayeg lamig pito mitro se kedalem te wayeg limowan diyà te toktok te menge bontod.
GEN 7:21 Yan nelemes se kedita diyà te lanto te tanà, pengkey manok, ayam-ayam, menenanap, aw otaw.
GEN 7:22 Nematay se kedita doen pedowan dini lanto te tanà.
GEN 7:23 Inigelà te Timanem se kedita te otaw, ayam-ayam, menenanap, aw manok. Olò si Noe se nesamà, sipat te menge doma din kidoen didalem te arka.
GEN 7:24 Sebad gatos keliman se aldaw se kenamay te pegkelinep te tanà te wayeg.
GEN 8:1 Wedà kelibeli te Timanem si Noe aw kedita te menenanap aw ayam-ayam doma kandin simakay te arka. Impekedog te Timanem se kelamag, aw migtebò den se wayeg minuyud.
GEN 8:2 Sinengseng din se menge selep doton didalem te dagat aw menge linekatan te odan doton te langit. Kimedit se odan.
GEN 8:3 Minuyud se wayeg te sebad gatos keliman se aldaw.
GEN 8:4 Pitsa sempolò teg pito te ikepito te bolan, nekeselà se arka diyà te bontod te Ararat.
GEN 8:5 Gayed minuyud se wayeg, aw kinità se toktok te menge bontod te pitsa ono te ikesempolò te bolan.
GEN 8:6 Penga te kepatan se aldaw, inowang i Noe se bintanà te arka,
GEN 8:7 aw binoloyan din se sebad owak. Wedà iyan likò doton te arka meneng gayed miglegeb-legeb lamig migkepangkag se tanà.
GEN 8:8 Pegkenamay-namay, binoloyan heman i Noe se sebad selepati, amon ketegahan din aw migkepangkag se tanà.
GEN 8:9 Meneng so nelinep pa se tanà te wayeg, wedad kinità te selepati embongan din, aw yan limikò iyan doton te arka. Impelowà i Noe se belad din aw inabat din se selepati.
GEN 8:10 Penga te sebad simana, todà din binoloyan se selepati.
GEN 8:11 Pegkemeapon niyan, limikò iyan doton ki Noe, aw doen tobed te kayo olibo inibing diyà te toktokay din. Doun niyan, netegahan i Noe te tabag minuyud se wayeg diyà te tanà.
GEN 8:12 Penga niyan, migtagad si Noe te sebad simana, aw todà din binoloyan se selepati. Meneng wedà iyan palos likò.
GEN 8:13 Nayan, peg-apet te enem gatos aw sebad se omay i Noe, te pitsa ono te tagnà bolan te omay sìyan, minuyud se wayeg diyà te tanà. Inabat i Noe se atep te arka amon megpeatap-atap. Kinità din te tabag migkepangkag se tanà.
GEN 8:14 Peg-apet te pitsa kelowan teg pito te ikedowa te bolan, ontò migkepangkag se tanà.
GEN 8:15 Yan minikagi se Timanem diyà ki Noe,
GEN 8:16 “Lowà ka den lekat te arka sipat te esawa nikaw, menge batà nikaw, aw menge esawa dan.
GEN 8:17 Pelowai heman se kedita te manok, ayam-ayam, aw menenanap, amon megbowad-bowad dan aw megkedita dan dini lanto te tanà.”
GEN 8:18 Yan limowà si Noe lekat te arka sipat te esawa din, menge batà din, aw menge esawa dan.
GEN 8:19 Limowà heman se menge ayam-ayam, menenanap, aw manok te tegsebad-sebad kemolò niyan.
GEN 8:20 Penga niyan, miglodok si Noe te menge bato amon meg-inang sikandin te sonoganan te ayam-ayam ibegay diyà te Timanem. Inimetayan din se sebad diyà te tegsebad-sebad kemolò te ayam-ayam aw manok mepakay sonogen aw ibegay diyà te Timanem, aw sinonog din se kedita niyan kidoen.
GEN 8:21 Peg-adek te Timanem te nadeg niyan, neluba sikandin, aw minikagi sikandin diyà te pedowan din, “Eked a todà pegpelumun te tanà tandà te medaet inang te otaw, so netegahan ko te gayed medaet se ibeg te pedowan te otaw lekat te pegtebaw dan. Eked a todà peg-igelà te kedita te otaw aw menenanap iling te ininang ko den.
GEN 8:22 Dalem te doen pa keneyonan, gayed doen pegtanem aw peglegani, pegkegenaw aw pegkeinit, pengaldaw aw pengodan, aldaw aw delem.”
GEN 9:1 Mèpiya se imbegay te Timanem diyà ki Noe aw pamilya din, aw minikagi sikandin, “Pegbatà kaw den te medita, amon doen menge bowad-bowad niyo meg-ogpà doton te kebelad te tanà.
GEN 9:2 Lekat seini, melemitan kenyo se kedita te menenanap, manok, aw ikan. Inangen ko sikiyo olo te kedita niyan.
GEN 9:3 Mepakay den kànen niyo se kedita te ayam-ayam aw menenanap. Tapay ko impekaen kenyo se menge tinemunun, meneng mepakay den heman se pegpengaen niyo te menenanap aw ayam-ayam.
GEN 9:4 Sebad olò se eked niyo kepakay kànen, aw yan se pengelapen doen pa dipanog, so doen pedowan pineokit te dipanog.
GEN 9:5 “Aw memonò se otaw, keilangan ipelumun sikandin. Aw mengimatay se ayam-ayam aw menenanap te otaw, keilangan imetayan heman iyan.
GEN 9:6 Ininang se otaw iling te Timanem, aw yan se doun te keilangan imetayan se otaw memonò te doma.
GEN 9:7 “Pegbatà kaw den te medita amon doen menge bowad-bowad niyo meg-ogpà doton te kebelad te tanà.”
GEN 9:8 Minikagi se Timanem diyà ki Noe aw pamilya din,
GEN 9:9 “Doen ipakang ko diyà kenyo aw menge bowad-bowad niyo,
GEN 9:10 sipat te kedita te manok, ayam-ayam, aw menenanap dimoma kenyo kidoen te arka.
GEN 9:11 Seini se ipakang ko diyà kenyo. Eked todà kegelà se kedita doen pedowan dini lanto te tanà te pegkelinep te tanà te wayeg. Eked todà kebàti se tanà pineokit te pegkelinep te tanà te wayeg.
GEN 9:12 Doen pengilala inangen ko amon ketegahan niyo te gayed ko tomanen se pakang ko kenyo aw kedita doen pedowan dini te keneyonan te wedad temanan.
GEN 9:13 Isawol ko den se binengonan kidoen te labon. Yan se pengilala tepad te pakang ko diyà te otaw eg-ogpà dini lanto te tanà.
GEN 9:14 Aw meglabon dini te tanà, aw kitaen se binengonan kidoen te labon,
GEN 9:15 keeneng-enengan ko se pakang ko kenyo aw kedita doen pedowan dini lanto te tanà, te eked todà kegelà se kedita pineokit te pegkelinep te tanà te wayeg.
GEN 9:16 Aw doen binengonan doton te labon, kitaen ko iyan, aw keeneng-enengan ko se pakang ko wedad temanan diyà te kedita doen pedowan dini lanto te tanà.
GEN 9:17 Yan se pengilala tepad te pakang ko diyà te kedita eg-ogpà dini lanto te tanà.”
GEN 9:18 Se menge batà i Noe timenà lekat te arka, yan si Sem, si Ham (amay i Canaan), aw si Japet.
GEN 9:19 Se ditelo batà i Noe sìyan, yan se menge kemonaan te kedita te otaw eg-ogpà dini te keneyonan.
GEN 9:20 Nayan, so biyasa si Noe egpawà, sikandin se monà nenanem te paras.
GEN 9:21 Peg-inem din te bino ininang din lekat te paras, nelasing sikandin. Minibat sikandin migpetabeg-tabeg kidoen didalem te tolda inogpaan din.
GEN 9:22 Timengteng si Ham amay i Canaan te pegpetabeg-tabeg te amay din, aw penga niyan limowà sikandin aw mig-indan te menge kedowa din.
GEN 9:23 Penga niyan, nengabat si Sem aw si Japet te penenaktun itaklub kandin. Inewidan dan se taklub diyà te getan dan, aw minipanaw dan te getan te peg-awop dan diyà te tambì din, aw tinekluban dan sikandin. Wedà dan lingì amon eked dan kitai se lawa te amay dan migpetabeg-tabeg.
GEN 9:24 Pegkelibwan i Noe te pegkelasing din, aw pegketaga-taga din tepad te ininang i Ham diyà kandin,
GEN 9:25 minikagi sikandin, “Ipelumun te Timanem si Canaan batà i Ham. Meinang sikandin allang te menge kedowa din.
GEN 9:26 Iduyun se Timanem egseligan i Sem. Meinang si Canaan allang i Sem.
GEN 9:27 Inangen te Timanem medita se menge bowad-bowad i Japet (kelebadan niyan, pegkedita). Ipeogpà dan te Timanem doma te menge bowad-bowad i Sem. Meneng meinang se menge bowad-bowad i Canaan allang te menge bowad-bowad i Japet.”
GEN 9:28 Penga te pegkelinep te tanà te wayeg, telo gatos keliman se omay minokit te wedà pa kematay si Noe.
GEN 9:29 Siyam gatos keliman se omay i Noe te pegkematay din.
GEN 10:1 Seini se ngadan te menge bowad-bowad te ditelo batà i Noe, si Sem, si Ham, aw si Japet, so doen menge batà dan timebaw penga te pegkelinep te tanà te wayeg.
GEN 10:2 Se menge batà meama i Japet, yan si Gomer, si Magog, si Madai, si Jaban, si Tubal, si Mesec, aw si Tiras.
GEN 10:3 Se menge batà i Gomer, yan si Askenas, si Rifat, aw si Togarma.
GEN 10:4 Se menge bowad-bowad i Jaban, yan si Elisa, si Tarsis, aw menge tege Kiti aw tege Dodani.
GEN 10:5 Sikandan se menge kemonaan te kedita te otaw eg-ogpà medapag te dagat aw doton te menge polò. Yan se menge bowad-bowad i Japet. Mig-ogpà se tegsebad-sebad pongan doton te kandan ogpeanan, aw doen heman kagi te tegsebad-sebad pongan.
GEN 10:6 Se menge batà meama i Ham, yan si Cus, si Ehipto, si Put, aw si Canaan.
GEN 10:7 Se menge batà meama i Cus, yan si Seba, si Habila, si Sabata, si Raama, aw si Sabaca. Se menge batà meama i Raama, yan si Saba aw si Dadan.
GEN 10:8 Doen batà meama i Cus iningedanan ki Nimrod, aw sikandin se tagnà otaw neinang medengeg tandà te keyseg din.
GEN 10:9 Ontò sikandin metomawan egpemanà pineokit te tabang te Timanem, aw yan se doun te eg-ikagi den se menge otaw, “Inangen ka peden te Timanem ontò metomawan egpemanà iling ki Nimrod.”
GEN 10:10 Pegtebò te peglowan din, limowan sikandin diyà te menge lonsod te Babel, Erac, aw Acad, ditelo lonsod doton te Sinar.
GEN 10:11 Lekat kidoen, dimoton sikandin te Asirya, aw mig-inang sikandin te menge lonsod te Niniba, Rehobot-Ir, Cala,
GEN 10:12 aw Resen diyà te tengà-tengà te Niniba aw dakel lonsod te Cala.
GEN 10:13 Si Ehipto se kemonaan te kedita te otaw mig-ogpà doton te Lud, Anam, Laab, Neftu,
GEN 10:14 Fetrusim, Casluim, aw Caftor linekatan te kedita te tege Filisti.
GEN 10:15 Se menge batà i Canaan, yan si Sidon penganay batà din, aw si Het.
GEN 10:16 Si Canaan heman se kemonaan te menge pongan te otaw iningedanan Jebusi, Amori, Girgasi,
GEN 10:17 Hebi, Arki, Sinai,
GEN 10:18 Arvadi, Semari, aw Hamati. Neteped se tegsebad-sebad pongan te menge bowad-bowad i Canaan
GEN 10:19 lamig nesakop dan se kebelad te tanà lekat te lonsod te Sidon taman te lonsod te Gerara medapag te Gasa, aw nesakop heman se menge lonsod te Sodoma, Gomora, Adma, aw Seboim medapag te Lasa.
GEN 10:20 Yan se menge bowad-bowad i Ham. Mig-ogpà se tegsebad-sebad pongan dan doton te kandan ogpeanan, aw doen heman kagi te tegsebad-sebad pongan.
GEN 10:21 Si Sem kakay i Japet, yan se kemonaan te kedita te otaw nesakop te pongan iningedanan Hebreo.
GEN 10:22 Se menge batà i Sem, yan si Elam, si Asur, si Arfacsad, si Lud, aw si Aram, aw yan heman se ngadan te menge bowad-bowad dan.
GEN 10:23 Se menge batà i Aram, yan si Us, si Hul, si Geter, aw si Mes.
GEN 10:24 Si Arfacsad se amay i Sela, aw si Sela se amay i Eber.
GEN 10:25 Dowa se batà i Eber. Iningedanan se kakay ki Peleg (kelebadan niyan, netani), so pegtebaw din, netani-tani se kedita te otaw dini lanto te tanà. Iningedanan se adi din ki Joctan.
GEN 10:26 Si Joctan se kemonaan te menge pongan iningedanan Almodad, Selap, Hasarmabet, Jera,
GEN 10:27 Hadoram, Usal, Dicla,
GEN 10:28 Obal, Abimael, Seba,
GEN 10:29 Opir, Habila, aw Jobab. Menge batà i Joctan se kedita dan.
GEN 10:30 Mig-ogpà se menge pongan dan doton te tanà lekat te Mesa taman te Separ kidoen te bontod lenged te eglibtakan te aldaw.
GEN 10:31 Yan se menge bowad-bowad i Sem. Mig-ogpà se tegsebad-sebad pongan dan doton te kandan ogpeanan, aw doen heman kagi te tegsebad-sebad pongan.
GEN 10:32 Menge bowad-bowad i Noe se kedita niyan, aw doen pongan aw pamilya te tegsebad-sebad kandan. Penga te pegkelinep te tanà te wayeg, se kedita te otaw diyà te tegsebad-sebad pongan te keneyonan, yan se menge bowad-bowad te menge batà i Noe.
GEN 11:1 Gebii, sebad olò se kemolò te kagi eg-ikegiyen te kedita te otaw dini te keneyonan.
GEN 11:2 Peglegeb-legeb dan, migpesalo dan doton te eglibtakan te aldaw, lamig dimateng dan doton te tanà mebelad aw mepantal kidoen te Sinar, aw mig-ogpà dan kidoen.
GEN 11:3 Migpeikegihay dan, “Ayas kaw den. Loteken tadon den se pasak aw delapen tadon iyan lamig megkagsen, amon doen inangen tadon balay.” Yan linotek dan se pasak inangen dan bato, aw inimon dan se apog ibolit kenyan amon meg-inang dan te balay.
GEN 11:4 Penga niyan, minikagi dan, “Meg-inang kidon den te lonsod aw sebad balay melangkaw lamig mapet se atep niyan doton te langit, aw yan meinang kidon medengeg, aw eked kidon kebilit kidoen te kebelad te keneyonan.”
GEN 11:5 Nayan, dimoton se Timanem amon tomengteng sikandin te lonsod aw balay melangkaw ininang te menge otaw kidoen.
GEN 11:6 Mig-aneng-aneng se Timanem, “Migsebad se pedowan te kedita te otaw seini, aw sebad olò se kagi dan. Migtebò dan olò mig-inang kani. Na, te eked kenamay, pengkey eden se ibeg dan, yan se mebatog dan inangen.
GEN 11:7 Mèpiya aw domoton kidon kandan, aw todaen tadon se kagi dan amon medita kemolò se kagi dan, aw yan eked dan peilebetay.”
GEN 11:8 Yan tandà te peg-inang te Timanem kenyan, migbilit-bilit se kedita dan doton te kebelad te keneyonan, aw yan limengà dan te peg-inang dan te lonsod sìyan.
GEN 11:9 Iningedanan se lonsod sìyan Babel (kelebadan niyan, migkebulung), so ininang te Timanem medita kemolò se kagi te otaw kidoen, aw lekat kidoen binilit-bilit te Timanem se kedita dan doton te kebelad te keneyonan.
GEN 11:10 Seini se ngadan te menge bowad-bowad i Sem. Dowa se omay minokit penga te pegkelinep te tanà te wayeg, minapet te sebad gatos se omay i Sem, aw timebaw se batà din meama si Arfacsad.
GEN 11:11 Penga niyan, lima gatos se omay minokit te wedà pa kematay si Sem. Dalem niyan, doen pa menge doma batà din timebaw.
GEN 11:12 Peg-apet te ketlowan teg lima se omay i Arfacsad, timebaw se batà din meama si Sela.
GEN 11:13 Penga niyan, epat gatos aw telo se omay minokit te wedà pa kematay si Arfacsad. Dalem niyan, doen pa menge doma batà din timebaw.
GEN 11:14 Peg-apet te ketlowan se omay i Sela, timebaw se batà din meama si Eber.
GEN 11:15 Penga niyan, epat gatos telo se omay minokit te wedà pa kematay si Sela. Dalem niyan, doen pa menge doma batà din timebaw.
GEN 11:16 Peg-apet te ketlowan teg epat se omay i Eber, timebaw se batà din meama si Peleg.
GEN 11:17 Penga niyan, epat gatos ketlowan se omay minokit te wedà pa kematay si Eber. Dalem niyan, doen pa menge doma batà din timebaw.
GEN 11:18 Peg-apet te ketlowan se omay i Peleg, timebaw se batà din meama si Reu.
GEN 11:19 Penga niyan, dowa gatos siyam se omay minokit te wedà pa kematay si Peleg. Dalem niyan, doen pa menge doma batà din timebaw.
GEN 11:20 Peg-apet te ketlowan teg dowa se omay i Reu, timebaw se batà din meama si Serug.
GEN 11:21 Penga niyan, dowa gatos aw pito se omay minokit te wedà pa kematay si Reu. Dalem niyan, doen pa menge doma batà din timebaw.
GEN 11:22 Peg-apet te ketlowan se omay i Serug, timebaw se batà din meama si Nahor.
GEN 11:23 Penga niyan, dowa gatos se omay minokit te wedà pa kematay si Serug. Dalem niyan, doen pa menge doma batà din timebaw.
GEN 11:24 Peg-apet te kelowan teg siyam se omay i Nahor, timebaw se batà din meama si Tera.
GEN 11:25 Penga niyan, sebad gatos sempolò teg siyam se omay minokit te wedà pa kematay si Nahor. Dalem niyan, doen pa menge doma batà din timebaw.
GEN 11:26 Peg-apet te kepitowan se omay i Tera, timebaw se menge batà din meama si Abram, si Nahor, aw si Haran.
GEN 11:27 Seini se ngadan te menge bowad-bowad i Tera. Si Tera se amay i Abram, si Nahor, aw si Haran. Si Haran se amay i Lot.
GEN 11:28 Te wedà pa kematay si Tera, nematay se batà din si Haran doton te Ur, sìyan lonsod inogpaan din doton te Caldea.
GEN 11:29 Nengognan si Abram ki Sarai, aw nengognan si Nahor ki Melca, batà bayi te kedowa din nematay si Haran. Doen heman doma batà i Haran si Isca.
GEN 11:30 Wedad batà i Sarai, so eked sikandin pegbatà.
GEN 11:31 Impetaking i Tera se batà din si Abram, aw ogangan din si Sarai esawa i Abram, aw apò din si Lot batà i Haran. Nesayo dan lekat te lonsod te Ur doton te Caldea, aw migpesalo dan doton te Canaan. Meneng pegdateng dan doton te Haran, mig-ogpà dan kidoen.
GEN 11:32 Nematay si Tera kidoen te dowa gatos aw lima se omay din.
GEN 12:1 Nayan, minikagi se Timanem diyà ki Abram, “Tanan ka den te tanà inogpaan no seini. Tanan ka den heman te menge kedomaan nikaw aw pamilya te amay nikaw. Doton ka den te ogpeanan tedoan ko kamno.
GEN 12:2 Medita se bowad-bowad ibegay ko diyà kamno, aw meinang dan dakel pongan. Mèpiya se ibegay ko diyà kamno, aw inangen ko medengeg se ngadan nikaw. Mèpiya heman se ibegay ko diyà te menge doma otaw pineokit kamno.
GEN 12:3 Mèpiya se ibegay ko diyà te kedita te otaw memegay kamno te mèpiya. Meneng ipelumun ko se kedita te otaw megtompuyus kamno. Pineokit kamno, mèpiya se ibegay ko diyà te kedita te otaw dini te keneyonan.”
GEN 12:4 Yan timolò si Abram te punù te Timanem, aw nesayo sikandin tinekingan i Lot. Kepitowan teg lima se omay i Abram te pegkesayo din lekat te Haran.
GEN 12:5 Impetaking i Abram se esawa din si Sarai, aw anak din si Lot, aw inibing din se kedakel te kedònan aw kedita te allang neabat din doton te Haran, aw nesayo dan pesalo doton te Canaan. Pegdateng dan doton te Canaan,
GEN 12:6 dimeleg si Abram lamig dimateng sikandin doton te kayo olayan i More doton te ogpeanan te Sikem. Pegdoton din te Sikem, doen pa menge tege Canaan mig-ogpà kidoen.
GEN 12:7 Migpekità se Timanem diyà ki Abram, aw minikagi sikandin, “Seini se ogpeanan ibegay ko diyà te menge bowad-bowad nikaw.” Yan mig-inang si Abram te sonoganan te ayam-ayam ibegay diyà te Timanem migpekità diyà kandin.
GEN 12:8 Penga niyan, dimeleg sikandin pesalo doton te menge bontod lenged te eglibtakan te lonsod te Betel. Mig-ogpà sikandin diyà te tengà-tengà te lonsod te Betel aw Ai. Lenged te egsellepan se lonsod te Betel, aw lenged te eglibtakan se lonsod te Ai. Mig-inang heman sikandin te sonoganan te ayam-ayam kidoen, aw migsimba sikandin te Timanem.
GEN 12:9 Penga niyan, gayed sikandin mig-alin-alin pesalo doton te Negeb.
GEN 12:10 Nayan, doen bitil doton te Canaan, aw dimeleg si Abram doton te Ehipto amon meg-ogpà dan doton te menamay-namay, so ontò dan nebitilan.
GEN 12:11 Pegkedapag dan doton te Ehipto, minikagi si Abram diyà te esawa din si Sarai, “Mèpiya ka bayi tengtengen.
GEN 12:12 Yan aw komità se menge tege Ehipto kamno, meg-aneng-aneng dan te teleesawa ki, aw yan mengimatay dan kanak amon egawen ka dan.
GEN 12:13 Yan ikagi ka kandan te telekedowa ki amon eked a dan imetayi, meneng segmanen a dan beling so etebay ta.”
GEN 12:14 Pegdateng dan doton te Ehipto, kinità te menge otaw kidoen te mèpiya bayi tengtengen se esawa din.
GEN 12:15 Pegkità te menge opisyal te selotan kandin, mig-indan dan te selotan tepad te kèpiya din, aw yan impeogpà din si Sarai doton te balay din.
GEN 12:16 Mèpiya se imbegay te selotan diyà ki Abram so etebay din si Sarai. Yan binegayan sikandin te medita karniro, kambing, baka, asno, allang, aw kamilo.
GEN 12:17 Meneng so impeogpà te selotan se esawa i Abram si Sarai doton te balay din, doen menge medaet mesakit imbegay te Timanem diyà te selotan aw kedita te doma otaw mig-ogpà kidoen te balay din.
GEN 12:18 Yan impeangay te selotan si Abram, aw minikagi sikandin, “Medaet se ininang no diyà kanak, so wedà a no indani te teleesawa kaw.
GEN 12:19 Meneng minikagi ka beling te telekedowa kaw, aw yan nengognan a kandin. Na, dini den se esawa nikaw. Petekingi sikandin, aw kesayo kaw den.”
GEN 12:20 Penga niyan, insogò te selotan se menge sondalo meg-ated ki Abram, aw esawa din, aw kedakel te kedònan din te pegkesayo dan.
GEN 13:1 Nesayo si Abram lekat te Ehipto aw limikò sikandin doton te Negeb sakop te Canaan sipat te esawa din aw kedakel te kedònan din. Timaking heman si Lot kandin.
GEN 13:2 Ontò meyaman si Abram, so medita se karniro din, kambing, aw baka, aw dakel heman se selapì aw bolawan din.
GEN 13:3 Pegkesayo din lekat te Negeb, mig-alin-alin sikandin pesalo doton te Betel lamig dimateng sikandin doton te tapay ogpeanan din kidoen te tengà-tengà te Betel aw Ai.
GEN 13:4 Yan heman se tapay din ininangan te sonoganan te ayam-ayam. Todà sikandin migsimba te Timanem kidoen.
GEN 13:5 Nayan, timaking heman si Lot ki Abram, aw doen heman menge pamilya din, aw sineligan din, aw menge karniro, kambing, aw baka din.
GEN 13:6 Yan kenà botong se tanà loyawan te kedita te ayam-ayam te didowa dan aw megsebad dan, so pelaban medita se ayam-ayam dan.
GEN 13:7 Yan se doun te migbolaw se menge telediyaga i Abram aw menge telediyaga i Lot. (Doen heman menge tege Canaan aw tege Perisi mig-ogpà pa kidoen.)
GEN 13:8 Yan minikagi si Abram diyà ki Lot, “Eked a keibeg aw megbolaw ki aw megbolaw heman se menge telediyaga ta, so anak ko sikona.
GEN 13:9 Yan mèpiya aw megpeteniyay ki den. Na, pegpeatap-atap ka den te kebelad te tanà seini. Aw pemellien no se tanà lenged te bibang, malin a doton te tanà lenged te kowanan. Aw pemellien no se tanà lenged te kowanan, malin a doton te tanà lenged te bibang.”
GEN 13:10 Migpeatap-atap si Lot, aw kinità din te mèpiya se kebelad te tanà medapag te wayeg te Jordan taman te lonsod te Soar, so dakel se wayeg kidoen iling te kekeyowan intanem te Timanem, aw iling te Ehipto. (Neinang iyan te wedà pa bàti te Timanem se lonsod te Sodoma aw Gomora kidoen medapag te wayeg te Jordan.)
GEN 13:11 Yan pinemallì i Lot se kebelad te tanà medapag te wayeg te Jordan, aw minalin sikandin lenged te eglibtakan. Yan se pegpeteniyay te didowa dan.
GEN 13:12 Mig-ogpà pa si Abram doton te Canaan, meneng minalin si Lot doton te menge lonsod kidoen medapag te wayeg te Jordan, aw mig-ogpà sikandin medapag te lonsod te Sodoma.
GEN 13:13 Ontò medaet se eg-inangen te menge tege Sodoma. Ontò medaet se salà eg-inangen dan diyà te Timanem.
GEN 13:14 Penga te pegkesayo i Lot, minikagi se Timanem diyà ki Abram, “Pegpeatap-atap ka den doton te kebelad te tanà pengkey kenan se kitaen nikaw.
GEN 13:15 Se kebelad te tanà kitaen nikaw, yan se ibegay ko diyà kamno aw menge bowad-bowad nikaw te wedad temanan.
GEN 13:16 Inangen ko medita se bowad-bowad nikaw igsà eked dan kebilang. Labi pa mola se pegbilang te menge napò te tanà.
GEN 13:17 Nayan, peglegeb ka den doton te kebelad te tanà, so yan se ibegay ko diyà kamno.”
GEN 13:18 Penga niyan, minalin si Abram, aw mig-ogpà sikandin kidoen medapag te menge olayan i Mamre doton te Hebron, aw mig-inang sikandin te sonoganan te ayam-ayam kidoen amon megsimba sikandin te Timanem.
GEN 14:1 Nayan, si Amrafel se selotan doton te Sinar, si Arioc se selotan doton te Elasar, si Cadorlahomor se selotan doton te Elam, aw si Tadal se selotan doton te Goyim. Dalem te pegkeselotan dan, migsebad se epat dan migbolaw diyà te doma lima selotan seini, si Bara selotan te Sodoma, si Birsa selotan te Gomora, si Sinab selotan te Adma, si Semeber selotan te Seboyim, aw sìyan selotan te Bela doma ngadan niyan Soar.
GEN 14:3 Migsebad se lima selotan sìyan, aw netipon se kedita te sondalo dan doton medapag te baog te Sidim neinang den songkani Lanaw te Asin.
GEN 14:4 Tapay sinakop i Cadorlahomor se lima selotan sìyan dalem te sempolò teg dowa se omay. Meneng pegdateng te ikesempolò teg telo te omay, minato dan kandin.
GEN 14:5 Pegdateng te ikesempolò teg epat te omay, limompak si Cadorlahomor aw menge doma selotan migsebad diyà kandin. Dinaeg dan se kedita te tege Repai doton te Astarot-carnaim. Dinaeg dan heman se menge tege Susi doton te Ham, aw menge tege Emi doton te kepetagan te Kiriataim.
GEN 14:6 Dinaeg dan heman se kedita te menge tege Hori doton te bontod inogpaan dan doton te Seir, aw pig-alaw dan taman te lonsod te Elparan medapag te kebigtilan.
GEN 14:7 Penga niyan, limikò dan doton te lonsod te Cades (Enmispat se doma ngadan niyan). Dinaeg dan heman se kedita te otaw mig-ogpà doton te tanà te menge Amalek, aw dinaeg dan se menge Amori mig-ogpà doton te Hasason Tamar.
GEN 14:8 Penga niyan, migpetagad se menge selotan te Sodoma, Gomora, Adma, Seboyim, aw Bela te menge sondalo dan. Dimoton dan te baog te Sidim amon mato dan
GEN 14:9 te menge sondalo te epat selotan kidoen, si Cadorlahomor selotan te Elam, si Tadal selotan te Goyim, si Amrafel selotan te Sinar, aw si Arioc selotan te Elasar. Lima se selotan migbolaw te epat selotan.
GEN 14:10 Medita se baog-baog kidoen doen koliko te aspalto ontò melemiket. Pegkedaeg te selotan te Sodoma aw selotan te Gomora, kimadas se menge sondalo dan, aw doen nepolotan kandan kidoen te menge baog-baog sìyan, aw kimadas se menge doma sondalo doton te menge bontod.
GEN 14:11 Penga niyan, mig-agaw se epat selotan te kedakel te kedònan aw kànen kidoen te lonsod te Sodoma aw Gomora, aw nesayo dan.
GEN 14:12 Dinakep dan heman se anak i Abram si Lot, aw inagaw dan se kedònan din, so mig-ogpà sikandin doton te Sodoma.
GEN 14:13 Doen sebad otaw nekelowà mig-indan te kedita niyan diyà ki Abram se Hebreo. Dalem niyan, mig-ogpà si Abram doton medapag te menge olayan i Mamre tege Amori. Gayed egpedepitay si Abram, si Mamre, aw menge kedowa i Mamre, si Escol aw si Aner.
GEN 14:14 Pegketaga-taga i Abram te nedakep se anak din, tinipon din se kedita te sineligan din biyasa eglegamit te kekamang, telo gatos sempolò teg walo se kedita dan, aw mig-alaw dan te epat selotan sìyan taman te lonsod te Dan.
GEN 14:15 Pegkedelem niyan, impeebong-ebong i Abram se menge sineligan din kidoen, aw limompak dan kandan, aw dimaeg dan kandan. Pig-alaw dan i Abram taman te lonsod te Hoba digsel te Damasko.
GEN 14:16 Neabat i Abram se kedakel te kedònan neagaw dan. Impelowà din heman se anak din si Lot, aw in-olì din diyà ki Lot se kedakel te kedònan neagaw lekat kandin. Impelowà din heman se kedita te bayi aw menge doma otaw nedakep.
GEN 14:17 Peg-olì i Abram lekat te pegdaeg din ki Cadorlahomor aw menge doma selotan, simongon se selotan te Sodoma kandin doton te Baog te Sabec (iningedanan heman iyan Baog te Selotan).
GEN 14:18 Penga niyan, sinongon heman si Abram te selotan te Salem si Melkisedec. Sikandin heman se telekagon te Timanem Melangkaw. Inibing din se pan aw bino doton ki Abram.
GEN 14:19 Migtawal-tawal sikandin amon mèpiya se ibegay te Timanem diyà ki Abram. Minikagi sikandin, “Mèpiya se ibegay diyà kamno lekat te Timanem Melangkaw, sìyan mig-inang te langit aw keneyonan.
GEN 14:20 Iduyun se Timanem Melangkaw, so tinebangan ka din te pegdaeg no te menge poon nikaw.” Penga niyan, nemegay si Abram diyà kandin te ikesempolò ketengà te kedita neabat din lekat te epat selotan dinaeg din.
GEN 14:21 Minikagi se selotan te Sodoma diyà ki Abram, “Kamno den se kedakel te kedònan day neabat no lekat te epat selotan mig-agaw kenyan lekat kenami. Olò menge sakop ko se iolì no diyà kanak.”
GEN 14:22 Meneng minikagi si Abram diyà te selotan te Sodoma, “Megsapà a den diyà te Timanem Melangkaw, sìyan mig-inang te langit aw keneyonan.
GEN 14:23 Megpakang a den te wedad palos kedònan no eked ko olii diyà kamno, pengkey sebad sinolib, aw pengkey sebad liston te sepatos. Wedad eked ko olii, so eked a keibeg aw mikagi ka te migkeyaman a pineokit kamno.
GEN 14:24 Wedad palos ebaten ko, meneng se kinaen te menge sineligan ko, yan olò se eked ko olii. Keilangan doen heman talad te menge otaw dimapit kanak, si Aner, si Escol, aw si Mamre.”
GEN 15:1 Penga niyan, migpekità se Timanem diyà ki Abram, aw minikagi sikandin, “E Abram, ikà egkelemitan. Siak se megkelasag kamno amon eked ka peelegi. Ontò dakel se ontong ibegay ko diyà kamno.”
GEN 15:2 Meneng minikagi si Abram, “E Timanem eglowan diyà te kedita, wedad palos ibegay no diyà kanak mekebegay te keluba te pedowan ko dalem te wedad batà ko. Aw matay a, metig-apò i Elieser tege Damasko se kedita te kedònan ko.
GEN 15:3 So wedad batà imbegay no kanak, olò allang ko se meketig-apò te kedakel te kedònan ko aw matay a.”
GEN 15:4 Penga niyan, minikagi se Timanem diyà kandin, “Kenà si Elieser se meketig-apò te kedònan nikaw, so kamno batà meama se meketig-apò te kedònan nikaw.”
GEN 15:5 Inibing te Timanem si Abram doton te lowà te balay, aw minikagi sikandin, “Lengag ka den doton te langit. Pegbilang ka te menge bitoen aw mebatog nikaw. Iling kenyan se kedita te menge bowad-bowad nikaw.”
GEN 15:6 Nemenal si Abram te Timanem, aw yan se doun te mig-aneng-aneng se Timanem te metòlid sikandin.
GEN 15:7 Minikagi heman se Timanem, “Siaken se Timanem nengibing kamno lekat te Ur te Caldea. Tod ko ibegay ko diyà kamno se tanà seini, amon tig-epoen no iyan.”
GEN 15:8 Meneng mig-insà si Abram, “E Timanem eglowan diyà te kedita, eden lay se pengilala ipekità no diyà kanak amon ketegahan ko te metoman a meketig-apò kani?”
GEN 15:9 Minikagi se Timanem, “Ibingi dini kanak se baka, kambing, aw karniro, aw keilangan olò telo se omay te tegsebad-sebad kenyan. Ibingi heman dini kanak se ponay aw selepati.”
GEN 15:10 Inibing i Abram se kedita niyan, aw inimetayan din iyan. Binekas din se lawa niyan, aw binelabay din iyan tegdowa-dowa, aw doen elet diyà te tengà-tengà. Meneng wedà din bekasi se dowa manok.
GEN 15:11 Doen menge dakel manok te kebenesan minembong diyà te lawa niyan, meneng linalag iyan i Abram.
GEN 15:12 Pegsallep te aldaw, ontò sikandin impetedogi te Timanem, aw iling te ontò nelemitan se pedowan din.
GEN 15:13 Minikagi se Timanem diyà kandin, “Metoman meg-ogpà se menge bowad-bowad no doton te tanà tinig-apò te menge doma otaw te sebad pongan. Kelimahan dan aw ellangen dan te doma otaw taman te epat gatos se omay.
GEN 15:14 Meneng ipelumun ko se menge otaw meg-allang kandan, aw penga niyan mekelowà dan lekat kidoen te dakel se kedònan ibingen dan.
GEN 15:15 Meneng sikona se eked kesamok. Eked ka kematay singed aw ontò ka megketemoay, aw penga niyan ilebeng ka.
GEN 15:16 Penga te peg-ogpà te menge bowad-bowad no doton te doma ogpeanan taman te ikeepat kebelikwat se pamilya megpetondogay, molì dan dini, so gayed dogangan te menge otaw Amori se peg-inang dan te salà igsà keilangan ipelumun ko dan.”
GEN 15:17 Pegsallep te aldaw sìyan aw pegkengitngit, tigkan kinità i Abram se iling te depolan minebel aw gansà limegdeg. Minokit iyan diyà te tengà-tengà te lawa te ayam-ayam binekas din.
GEN 15:18 Te delem sìyan, migpakang se Timanem diyà ki Abram, kagi din, “Ibegay ko diyà te menge bowad-bowad nikaw se kebelad te tanà seini. Lekat te wayeg doton te Ehipto taman te dakel wayeg te Yofritis, yan se tanà ibegay ko diyà kandan.
GEN 15:19 Ibegay ko heman diyà kandan se tanà inogpaan te menge pongan te otaw iningedanan Keni, Kenisi, Cadmoni,
GEN 15:20 Heti, Perisi, Repai,
GEN 15:21 Amori, Canaan, Girgasi, aw Jebusi.”
GEN 16:1 Nayan, wedad palos batà i Sarai aw si Abram. Meneng doen allang bayi i Sarai ngadan din si Agar tege Ehipto.
GEN 16:2 Yan minikagi si Sarai diyà ki Abram, “Wedad batà imbegay te Timanem diyà kanak. Yan mèpiya aw lomayok ka den diyà te allang ko amon doen pa peden batà ko pineokit kandin.” Timandù si Abram diyà te inikagi i Sarai,
GEN 16:3 aw yan nemegay si Sarai te allang din diyà ki Abram amon inangen din esawa din. Neinang ini penga te peg-ogpà i Abram doton te Canaan te sempolò se omay.
GEN 16:4 Migpeleyokay dan aw miglaman si Agar. Pegketaga-taga i Agar te miglaman sikandin, migpelangkaw-langkaw sikandin diyà ki Sarai aw piglindoan din.
GEN 16:5 Yan minikagi si Sarai diyà ki Abram, “Sikona se linekatan te salà neinang den diyà kanak. Sikona se binegayan ko ki Agar, aw yan miglaman sikandin, aw yan se doun te eglindoan a din. Netaga-taga se Timanem te doen salà no diyà kanak.”
GEN 16:6 Minikagi si Abram, “Na, kamno allang sikandin. Pengkey eden se ibeg no inangen diyà kandin, mepakay iyan diyà kanak.” Penga niyan, ontò pinemilang i Sarai si Agar igsà kimadas sikandin.
GEN 16:7 Doen anghil te Timanem migpekità diyà ki Agar kidoen te kebigtilan medapag te selep doton te dalan pesalo doton te lonsod te Sur.
GEN 16:8 Minikagi se anghil, “E Agar, allang i Sarai, kenan ka lay lekat, aw kenan ka lay pesalo?” Timaba si Agar, “Kimadas a den lekat te amo ko si Sarai.”
GEN 16:9 Minikagi se anghil, “Olì ka den doton kandin, aw tolò ka kandin.”
GEN 16:10 Minikagi heman se anghil, “Inangen ko ontò medita se bowad-bowad nikaw igsà eked dan kebilang.
GEN 16:11 Doen batà meama tomebaw diyà kamno, aw ingedanan no sikandin ki Ismael, so dimineg se Timanem te pegpengenganay no diyà kandin.
GEN 16:12 Meinang se batà nikaw iling te asno wedà kegnuki, so wedad toloen din. Megpoon sikandin te kedita te otaw, aw megpoon dan heman kandin. Eked sikandin peg-ogpà doma te menge kedowa din.”
GEN 16:13 Minikagi si Agar, “Ontò ko den kinità se Timanem kimità kanak, aw wedà a kematay.” Iningedanan din se migpekità diyà kandin “Timanem egpengità.”
GEN 16:14 Yan se doun te iningedanan se selep sìyan Beer Lahai Roi (kelebadan niyan, selep te Timanem doen pedowan egpengità kanak). Kidoen pa songkani se selep sìyan doton te tengà-tengà te lonsod te Cades aw Bered.
GEN 16:15 Doen batà meama timebaw diyà ki Agar aw si Abram. Iningedanan sikandin i Abram ki Ismael (kelebadan niyan, egpenenalan se Timanem).
GEN 16:16 Kewelowan teg enem se omay i Abram te pegtebaw i Ismael.
GEN 17:1 Peg-apet te kesyaman teg siyam se omay i Abram, migpekità se Timanem diyà kandin, aw minikagi sikandin, “Siak se Timanem eglowan diyà te kedita. Tolò ka kanak. Keilangan gayed ka meg-inang te metòlid.
GEN 17:2 Tomanen ko se pakang ko kamno. Inangen ko ontò medita se bowad-bowad nikaw.”
GEN 17:3 Limongken si Abram lamig minapet se olo din diyà te tanà, aw minikagi heman se Timanem,
GEN 17:4 “Seini se ipakang ko diyà kamno. Inangen ko sikona kemonaan te medita pongan.
GEN 17:5 Lekat seini, eked ka den ingedani ki Abram (kelebadan niyan, melangkaw amay), meneng ingedanan ka den ki Abraham (kelebadan niyan, amay te medita pongan), so inangen ko sikona kemonaan te medita pongan.
GEN 17:6 Inangen ko medita se bowad-bowad nikaw, aw inangen ko dan medita pongan, aw doen heman kandan meinang menge selotan.
GEN 17:7 Tomanen ko se pakang ko diyà kamno aw diyà te menge bowad-bowad nikaw te wedad temanan. Siak se Timanem meg-ipat kamno aw menge bowad-bowad nikaw te modi aldaw.
GEN 17:8 Se kedakel te tanà te Canaan làno nikaw inogpaan, yan se ibegay ko diyà kamno aw diyà te menge bowad-bowad nikaw amon tig-epoen niyo iyan te wedad temanan. Siak se Timanem meg-ipat kandan.”
GEN 17:9 Minikagi se Timanem diyà ki Abraham, “Doen pengilala tepad te pakang ko keilangan inangen no sipat te kedita te bowad-bowad nikaw te modi aldaw.
GEN 17:10 Seini se pengilala tepad te pakang ko keilangan inangen no sipat te kedita te bowad-bowad nikaw. Keilangan tolien se kedita te meama kidoen kamno.
GEN 17:11 Keilangan megpetolì ka, so yan se pengilala tepad te pakang ko kamno.
GEN 17:12 Se menge bowad-bowad nikaw heman te modi aldaw, keilangan tolien se kedita te batà dan meama te ikewalo te aldaw lekat te pegtebaw, sipat te kedita te allang niyo meama, pengkey tomebaw doton kenyo, aw pengkey beyadan diyà te doma otaw.
GEN 17:13 Keilangan tolien se kedita te meama, so pineokit te pengilala sìyan kidoen te lawa niyo, ketegahan niyo te wedad temanan te pakang ko kenyo.
GEN 17:14 Aw eked tolii se meama, eked sikandin pekeakop diyà kenyo, so eked sikandin tolò te punù tepad te pengilala te pakang ko.”
GEN 17:15 Minikagi se Timanem diyà ki Abraham, “Lekat seini, eked den kepakay aw si Sarai se ngadan te esawa nikaw. Keilangan ingedanan no sikandin ki Sara (kelebadan niyan, batà bayi te selotan).
GEN 17:16 Mèpiya se ibegay ko diyà kandin, aw ibegay ko diyà kamno se batà meama tomebaw diyà kandin. Mèpiya se ibegay ko diyà te esawa nikaw, aw meinang sikandin kemonaan te medita pongan. Doen menge bowad-bowad din meinang selotan.”
GEN 17:17 Limongken si Abraham lamig minapet se olo din diyà te tanà. Nebebayat sikandin, so mig-aneng-aneng sikandin, “Pengkey sebad gatos se omay ko, meneng doen kedì batà ko tomebaw. Pengkey kesyaman se omay i Sara, meneng tebawan kedì sikandin te batà.”
GEN 17:18 Minikagi sikandin diyà te Timanem, “Ibeg ko si Ismael peden heman se begayan no te mèpiya.”
GEN 17:19 Meneng minikagi se Timanem, “Esawa no si Sara se tebawan te batà no meama, aw ingedanan no se batà no sìyan ki Isaac (kelebadan niyan, nebebayat). Sikandin aw menge bowad-bowad din se ketomanan te pakang ko te wedad temanan.
GEN 17:20 Dinineg ko se pinemoyò no tepad ki Ismael, aw yan mèpiya heman se ibegay ko diyà kandin. Ibegay ko diyà kandin se medita batà din aw menge bowad-bowad din. Meinang sikandin kemonaan te sempolò teg dowa datò, aw inangen ko dakel pongan se menge bowad-bowad din.
GEN 17:21 Meneng se batà no si Isaac, yan se ketomanan te pakang ko kamno. Tomebaw sikandin diyà ki Sara te iling kani te modi omay.”
GEN 17:22 Penga te peg-ikagi te Timanem diyà ki Abraham, nesayo sikandin.
GEN 17:23 Dalem te aldaw sìyan, timolò si Abraham te Timanem, aw nenolì sikandin te batà din si Ismael, aw kedita te doma sakop din meama, sipat te kedita te allang din, pengkey timebaw kidoen kandin, aw pengkey bineyadan din diyà te doma otaw.
GEN 17:24 Kesyaman teg siyam se omay i Abraham te pegpetolì din,
GEN 17:25 aw sempolò teg telo se omay te batà din si Ismael.
GEN 17:26 Dalem te aldaw sìyan, tinolì se didowa dan,
GEN 17:27 sipat te kedita te allang din meama.
GEN 18:1 Peg-ogpà i Abraham doton te menge olayan i Mamre, migpekità se Timanem diyà kandin. Pegkeinit te aldaw, nenenoo si Abraham doton te lelebangan te tolda inogpaan din.
GEN 18:2 Pegtengteng din kidoen te lowà, kinità din se telo otaw timindeg medapag kidoen. Pegkità din kandan, ayas sikandin simongon kandan. Limongken sikandin lamig minapet se olo din diyà te tanà amon megsagman kandan.
GEN 18:3 Minikagi sikandin, “Sir, apit kaw den dini kanak. Ikà niyo eglaklak.
GEN 18:4 Ibingen ko se wayeg ionaw te benis niyo, aw mekeetod kaw dini te kayo seini.
GEN 18:5 Ipekaen ko heman sikiyo amon todà kaw megkagsen te eked kaw pa deleg. Neluba se pedowan ko so dimini kaw, aw meibeg a megtabang kenyo.” Minikagi dan, “Mepakay iyan diyà kenami.”
GEN 18:6 Ayas minawop si Abraham aw minikagi sikandin diyà ki Sara, “Kegaen ka. Gemiti se sebad sako ontò mèpiya arina, aw inangi se pan ipekaen kandan.”
GEN 18:7 Penga niyan, kimagnan si Abraham doton te menge ayam-ayam din, aw pinemallì din se ontò mèpiya nati te baka. Imbegay din iyan diyà te sebad sineligan din amon iyawen din iyan aw ilegaen te eked kenamay.
GEN 18:8 Pegtegilan dan te kedita, inibing i Abraham se kisiyo, aw gatas, aw pengelapen tinoeg, aw imbayaw din iyan diyà kandan. Dalem te pegpengaen dan, timindeg sikandin medapag doton te siyong te kayo.
GEN 18:9 Mig-insà dan diyà kandin, “Kenan lay se esawa nikaw si Sara?” Timaba si Abraham, “Doton didalem.”
GEN 18:10 Minikagi se sebad, “Doen inangen ko metolos te modi omay, so doen batà meama tomebaw diyà te esawa no si Sara.” Nayan, kidoen si Sara te lelebangan lenged te getan din, aw dinineg din se inikagi dan.
GEN 18:11 Ontò den temoay si Abraham, aw ontò den lokes si Sara. Wedad bayi tebawan aw mapet se omay din iling te omay i Sara.
GEN 18:12 Yan se doun te nebebayat si Sara diyà te kandin pegkeotawun, aw mig-aneng-aneng sikandin, “Meneng ontò a den lokes, aw ontò den temoay se esawa ko. Menonen se pegdateng te keluba sìyan diyà kanak?”
GEN 18:13 Penga niyan, mig-insà se Pengolo diyà ki Abraham, “Nengà lay nebebayat si Sara? Nengà lay minikagi sikandin te menonen se pegtebaw te batà diyà kandin so ontò den sikandin lokes?
GEN 18:14 Wedad palos eked kebatog te Timanem. Doen inangen ko metolos te modi omay, so doen batà meama tomebaw diyà ki Sara.”
GEN 18:15 Nelemitan si Sara, aw yan migkebolalaw sikandin aw minikagi, “Wedà a kebebayat.” Meneng minikagi se Pengolo, “Benal ka nebebayat.”
GEN 18:16 Pegkesayo te telo memanit lekat kidoen, dimoton dan te pemebongan aw migpeatap-atap dan doton te lonsod te Sodoma. Timaking si Abraham kandan amon megtedò kandan te dalan.
GEN 18:17 Mig-aneng-aneng se Pengolo, “Eked ko elesi diyà ki Abraham se tod ko agpet den inangen,
GEN 18:18 so meinang dakel pongan se menge bowad-bowad din, aw mèpiya se ibegay ko diyà te kedita te otaw pineokit kandin.
GEN 18:19 Pinemallì ko sikandin amon megtoladà sikandin te menge batà din aw menge bowad-bowad din te keilangan tomolò dan kanak, aw keilangan meg-inang dan te metòlid. Aw yan se inangen dan, tomanen ko se kedita te impakang ko diyà kandin.”
GEN 18:20 Penga niyan, minikagi se Pengolo diyà ki Abraham, “Medita se minikagi diyà kanak te medaet se eg-inangen te menge tege Sodoma aw tege Gomora. Ontò ekon mebegat se salà dan.
GEN 18:21 Yan domoton a den amon ketegahan ko aw benal se dinineg ko, aw kenà.”
GEN 18:22 Penga niyan, nesayo se didowa otaw migpesalo doton te Sodoma, meneng mig-ogpà pa se Pengolo aw si Abraham kidoen.
GEN 18:23 Migpedapag si Abraham diyà te Pengolo, aw mig-insà sikandin, “Aw igelaen no se menge medaet otaw, ipesipat no lay heman se menge mèpiya otaw?
GEN 18:24 Simpana aw keliman se mèpiya otaw eg-ogpà doton te lonsod sida, tigkan no lay pegbàtan se lonsod? Eked no lay iyan keidowi tandà te keliman mèpiya otaw?
GEN 18:25 Aneng-aneng ko eked no imetayi se menge mèpiya otaw sipat te menge medaet otaw. Eked kepakay aw yan se inangen nikaw. Aw ipelumun no se medaet otaw, eked no pesipati se mèpiya otaw, so sikona se eg-okom te kedita te otaw, aw keilangan metòlid se inangen nikaw.”
GEN 18:26 Timaba se Pengolo, “Aw keliman se mèpiya otaw kitaen ko doton te lonsod sida, keidowan ko se kedakel te lonsod tandà te keliman mèpiya otaw.”
GEN 18:27 Minikagi heman si Abraham, “Sir, pengkey ontò ka melangkaw diyà kanak, meneng pekeleyati se pedowan no diyà kanak te peg-ikagi ko todà diyà kamno.
GEN 18:28 Simpana aw olò kepatan teg lima se mèpiya otaw, pegbàtan no lay se kedakel te lonsod so kolang te lima?” Timaba se Pengolo, “Aw kepatan teg lima se mèpiya otaw kitaen ko kidoen, eked ko pegbàti se lonsod.”
GEN 18:29 Minikagi heman si Abraham, “Simpana aw olò kepatan se kitaen nikaw?” Timaba se Pengolo, “Aw doen kepatan, eked ko iyan pegbàti.”
GEN 18:30 Minikagi si Abraham, “Sir, ikà egkeopal kanak aw todà a mikagi diyà kamno. Simpana aw olò ketlowan se kitaen nikaw?” Timaba se Pengolo, “Aw ketlowan se kitaen ko, eked ko iyan pegbàti.”
GEN 18:31 Minikagi si Abraham, “Sir, pekeleyati se pedowan no diyà kanak te peg-ikagi ko todà diyà kamno. Simpana aw olò kelowan se kitaen nikaw?” Timaba se Pengolo, “Aw kelowan se kitaen ko, eked ko pegbàti se lonsod.”
GEN 18:32 Minikagi si Abraham, “Sir, ikà bag egkeopal kanak, so seini se temanan te peg-ikagi ko. Simpana aw olò sempolò se kitaen nikaw?” Timaba se Pengolo, “Aw doen sempolò, eked ko iyan pegbàti.”
GEN 18:33 Penga te pegpebelaw-belaway te Pengolo aw si Abraham, nesayo se Pengolo, aw minolì si Abraham.
GEN 19:1 Sìyan didowa memanit nekeonà, yan se anghil. Pegkemeapon, dimateng dan doton te Sodoma. Kidoen si Lot nenenoo medapag te lelebangan diyà te melangkaw kotà nekelibed te lonsod sìyan. Pegkità din kandan, timindeg sikandin aw simongon kandan. Limongken sikandin lamig minapet se olo din diyà te tanà,
GEN 19:2 aw minikagi sikandin, “Sir, apit kaw den doton te balay ko. Peonawi niyo se benis niyo, aw idegà kaw dini, aw yan mekedeleg kaw kealdaw te iselem.” Meneng minikagi dan, “Eked kay, so midegà kay dini te plasa.”
GEN 19:3 Meneng gayed dan pig-ibing i Lot lamig timaking dan kandin doton te balay din. Impeinang i Lot se pan aw menge doma mèpiya kànen, aw kimaen dan.
GEN 19:4 Te wedà dan pa ibat te delem, nelibedan se balay te kedita te meama tege Sodoma. Netipon se kedita dan, pengkey telaki aw temoay.
GEN 19:5 Timawal dan diyà ki Lot, kagi dan, “Kenan lay se didowa meama dimateng gina dini kamno te meapon? Pelowai dan diyà kenami amon lomayok kay diyà kandan.”
GEN 19:6 Limowà si Lot te balay din aw tinakep din se lelebangan.
GEN 19:7 Minikagi sikandin, “Menge sigalak ko, eked iyan kepakay. Ikà niyo eg-inang te medaet sìyan.
GEN 19:8 Meneng doen beling dowa batà ko laga wedà pa palos leyoki. Ipelowà ko den dan, aw mepakay kaw meg-inang diyà kandan te pengkey eden se ibeg niyo. Meneng ikà niyo egpeeleg te didowa meama sìyan, so migmemanit dan diyà kanak, aw yan keilangan ipaten ko dan.”
GEN 19:9 Meneng minikagi dan, “Ikà egsagda kenami. Pengkey kenà ka tege dini, meneng mikagi ka peden diyà kenami aw eden se mepakay day inangen. Aw aneng-aneng no medaet se inangen day diyà kandan, labi pa medaet se inangen day diyà kamno.” Sinegseg dan si Lot, aw migpedapag dan diyà te tetakep amon bàtan dan iyan.
GEN 19:10 Meneng inowang te didowa anghil se tetakep, aw ginakgak dan si Lot doton didalem te balay, aw tinakep dan se lelebangan.
GEN 19:11 Penga niyan, pineokit te tolos dan, ininang dan bota se kedita te otaw medapag te lelebangan, amon eked dan kità te lelebangan.
GEN 19:12 Minikagi se didowa anghil diyà ki Lot, “Aw doen menge kedomaan no dini, menge batà nikaw, ogangan nikaw, aw menge doma sakop nikaw mig-ogpà dini te lonsod seini, petekingi dan, aw kesayo kaw den,
GEN 19:13 so pegbàtan day den se lonsod seini. Dinineg te Timanem se insila kandan tepad te medaet eg-inangen dan, aw yan insogò kay din dini amon megbaet kay te kedita.”
GEN 19:14 Yan nesayo si Lot aw dimoton sikandin te salà te dowa batà din bayi, aw minikagi sikandin, “Ayas kaw den kesayo lekat dini, so pegbàtan den te Timanem se lonsod seini.” Meneng eden dan aw kebawol din iyan.
GEN 19:15 Pegkeiselem niyan, ginallat te anghil si Lot, kagi dan, “Kegaen ka den. Petekingi den se esawa no aw dowa batà no laga, aw kadas kaw den amon eked kaw kesàbi te pegbaet te Timanem te lonsod seini.”
GEN 19:16 Meneng gayed pa sikandin mig-alà-alà. Penga niyan, so neidowan dan te Timanem, minawid se didowa anghil te belad i Lot aw belad te esawa din, aw didowa batà dan, aw inibing dan doton te lowà te lonsod.
GEN 19:17 Penga niyan, minikagi se anghil, “Kadas kaw den. Ikà niyo eglengag. Ikà niyo egsagked dini te baog. Meneng kadas kaw den doton te menge bontod amon eked kaw kegelà.”
GEN 19:18 Meneng minikagi si Lot, “Sir, eked a.
GEN 19:19 Pengkey ontò mèpiya se tabang niyo kanak, aw impelowà a niyo lekat te kededàtan, meneng kesàban a den te peg-igelà, aw matay a te eked a pa dateng doton te bontod.
GEN 19:20 Na, doen lonsod sida mebatog ko epetan so medapag iyan, aw deitek iyan ogpeanan. Pekedasi a bag doton. Ontò iyan deitek ogpeanan. Eked a kematay kidoen.”
GEN 19:21 Timaba se anghil, “Mepakay iyan. Mepakay diyà kanak se pinemoyò nikaw. Eked a pegbaet te lonsod sida.
GEN 19:22 Meneng kegaen kaw den kadas, so wedad meinang ko singed aw domateng kaw doton.” Iningedanan se lonsod sìyan Soar (kelebadan niyan, deitek), so minikagi si Lot te deitek iyan.
GEN 19:23 Pegdateng i Lot doton te Soar, limibtak den se aldaw.
GEN 19:24 Tigkan indagdag te Timanem se esopri limegdeg lekat te langit doton te lonsod te Sodoma aw Gomora.
GEN 19:25 Pineokit kenyan, nebàtan se dowa lonsod sìyan aw kedita te doma ogpeanan kidoen te baog sìyan. Negelà se kedita te otaw mig-ogpà kidoen, aw nebàtan se kedita te tinemunun kidoen.
GEN 19:26 Meneng limingì se esawa i Lot te lonsod tinenanan dan, aw yan nebaloy sikandin asin.
GEN 19:27 Pegkeiselem niyan, limapos si Abraham doton te pemebongan pinemoyoan din diyà te Timanem.
GEN 19:28 Migpeatap-atap sikandin doton te Sodoma aw Gomora, aw doton te kebelad te baog sìyan, aw kinità din se ebel minolbo lekat te tanà, iling te ebel te dakel pogon.
GEN 19:29 Meneng pegbaet te Timanem te menge lonsod kidoen te baog sìyan inogpaan i Lot, mig-aneng-aneng se Timanem tepad ki Abraham, aw yan impelowà din si Lot amon eked sikandin kegelà sipat te menge doma otaw.
GEN 19:30 Nayan, so nelemitan si Lot meg-ogpà doton te Soar, minalin sikandin sipat te didowa batà din bayi doton te bontod, aw mig-ogpà dan doton te ilib.
GEN 19:31 Doen aldaw minikagi se batà din kakay diyà te adi din, “Migketemoay den se amay ta, aw wedad palos meama dini te keneyonan mengognan kenita amon megbatà ki.
GEN 19:32 Na, mèpiya aw lesingen ta sikandin, aw yan lomayok ki diyà kandin amon megbatà ki pineokit kandin.”
GEN 19:33 Pegkedelem niyan, linasing dan se amay dan, aw limayok se kakay diyà kandin. Meneng wedà peg-aneng-aneng si Lot kenyan, so ontò sikandin nelasing.
GEN 19:34 Pegkeiselem niyan, minikagi se kakay diyà te adi din, “Siak se limayok diyà ki Amà tidelem. Na, mèpiya aw todà ta sikandin lesingen kwani delem, aw sikona se lomayok diyà kandin amon didowa ki se megbatà pineokit kandin.”
GEN 19:35 Pegkedelem niyan, linasing dan heman se amay dan, aw limayok se adi diyà kandin. Wedà heman sikandin peg-aneng-aneng kenyan, so ontò sikandin nelasing.
GEN 19:36 Yan miglaman se didowa batà i Lot pineokit kandin.
GEN 19:37 Doen batà meama timebaw diyà te kakay, aw iningedanan din ki Moab (kelebadan niyan, lekat te amay). Neinang sikandin kemonaan te kedita te otaw diyà te pongan te Moab songkani.
GEN 19:38 Doen heman batà meama timebaw diyà te adi, aw iningedanan din ki Ben-ami (kelebadan niyan, batà te kemonaan). Neinang sikandin kemonaan te kedita te otaw diyà te pongan te Amoni songkani.
GEN 20:1 Nayan, minalin si Abraham lekat te Mamre doton te Negeb, aw mig-ogpà dan doton te tengà-tengà te lonsod te Cades aw Sur. Peglegeb din doton te lonsod te Gerara,
GEN 20:2 minikagi si Abraham diyà te menge tege Gerara te etebay din se esawa din si Sara. Yan se doun te impeangay si Sara te selotan te Gerara si Abimelec amon inangen din esawa din.
GEN 20:3 Meneng migpekità se Timanem diyà ki Abimelec pineokit te tegeinep, aw minikagi sikandin, “Matay ka den tandà te pegpengabat no te bayi sìyan, so tapay doen esawa din.”
GEN 20:4 Meneng so wedà pa pegpedapag si Abimelec diyà ki Sara, minikagi sikandin diyà te Timanem, “Wedad palos salà ko diyà kandin. Eked kepakay aw imetayan a no sipat te menge sakop ko.
GEN 20:5 Si Abraham se minikagi diyà kanak te etebay din sikandin, aw minikagi heman se bayi te telekedowa dan. Pegpengabat ko kandin, wedad palos medaet ibeg te pedowan ko, aw wedad palos salà ininang ko.”
GEN 20:6 Minikagi se Timanem diyà kandin pineokit te tegeinep, “Ee. Netegahan ko te wedad medaet ibeg te pedowan no te peg-inang no kenyan, aw yan se doun te migsagda a kamno amon eked ka peg-inang te salà diyà kanak. Binelebagan ko se pegpedapag no diyà kandin.
GEN 20:7 Nayan, olii se bayi diyà te esawa din. Si Abraham se telekeliwat te kagi ko, aw megtawal-tawal sikandin tepad kamno amon eked ka kematay. Meneng aw eked no sikandin olii, metoman ka matay sipat te kedita te sakop nikaw.”
GEN 20:8 Pegkeiselem niyan, limapos si Abimelec migtipon te kedita te opisyal din, aw mig-indan sikandin diyà kandan tepad te kedita neinang. Yan ontò dan migpeso.
GEN 20:9 Penga niyan, impeangay i Abimelec si Abraham, aw minikagi sikandin, “Medaet se peg-akal no kenami. Eden lay se salà ininang ko diyà kamno amon ipedateng no se kededàtan diyà kanak aw menge sakop ko? Ininang no den diyà kanak se eked kepakay inangen.
GEN 20:10 Nengà lay ininang no ini?”
GEN 20:11 Timaba si Abraham, “Mig-aneng-aneng a te wedad otaw dini egsagman te Timanem, aw yan doen otaw mengimatay kanak amon egawen dan se esawa ko.
GEN 20:12 Benal se inikagi ko te etebay ko sikandin, so batà te amay ko sikandin, meneng sebad se inay din, aw yan pinengognan ko sikandin.
GEN 20:13 Kedengan te pegpekesayo te Timanem kanak lekat te lonsod inogpaan te amay ko, minikagi a diyà te esawa ko aw ontò a din egkeidowan, yan keilangan mikagi sikandin diyà te kedita te otaw te telekedowa kay.”
GEN 20:14 Penga niyan, in-olì i Abimelec si Sara diyà ki Abraham. Doen heman imbegay din diyà kandin, menge karniro, baka, aw allang.
GEN 20:15 Minikagi heman si Abimelec, “Tengteng ka den diyà te kebelad te tanà ko. Pemellii se ibeg nikaw ogpaan pengkey kenan.”
GEN 20:16 Minikagi heman sikandin diyà ki Sara, “Sebad melalan se kwarta plata imbegay ko den diyà te kedowa nikaw. Yan se pengilala amon metaga-taga se kedita te sakop no te wedad salà ko diyà kamno, aw ontò ka den neosayan.”
GEN 20:17 Penga niyan, migtawal-tawal si Abraham diyà te Timanem, aw pinegolì te Timanem si Abimelec, aw esawa din, aw menge allang din bayi amon todà dan megbatà.
GEN 20:18 Pinegolì dan te Timanem, so doen tapay ininang din diyà kandan amon eked dan peglaman tandà te pegpengabat i Abimelec te esawa i Abraham si Sara.
GEN 21:1 Nayan, tinoman te Timanem se impakang din, aw mèpiya se imbegay din diyà ki Sara.
GEN 21:2 Miglaman sikandin, aw tinebawan sikandin te batà meama i Abraham, pengkey temoay den sikandin. Timebaw se batà te aldaw tapay impakang te Timanem tepad kenyan.
GEN 21:3 Iningedanan i Abraham se batà din ki Isaac (kelebadan niyan, nebebayat).
GEN 21:4 Pegdateng te ikewalo te aldaw lekat te pegtebaw i Isaac, tinolì sikandin i Abraham iling te impunù te Timanem kandin.
GEN 21:5 Sebad gatos se omay i Abraham te pegtebaw i Isaac.
GEN 21:6 Minikagi si Sara, “Binegayan a den te Timanem te keluba, aw yan egkebebayat a den. Mebebayat heman se kedita te otaw domineg tepad kani tandà te keluba dan.”
GEN 21:7 Minikagi heman sikandin, “Kedengan, wedad palos otaw mekeikagi diyà ki Abraham te doen aldaw megpesoso a te batà. Meneng tinebawan a den beling te batà din, pengkey temoay den sikandin.”
GEN 21:8 Timilles si Isaac, aw biningà sikandin. Dakel se kànen ininang i Abraham te aldaw te pegbingà kandin.
GEN 21:9 Meneng se batà i Abraham si Ismael timebaw diyà ki Agar tege Ehipto, yan se gayed migbidò te batà i Sara si Isaac. Pegkità i Sara kenyan,
GEN 21:10 minikagi sikandin diyà ki Abraham, “Pekeseyowi se allang sìyan sipat te batà din, so eked kepakay aw kebegayan se batà te allang te ketengà te keyemanan nikaw aw matay ka, so keilangan ibegay se kedakel niyan diyà te batà ko si Isaac.”
GEN 21:11 Ontò nepuluk se pedowan i Abraham tepad kenyan, so batà din heman si Ismael.
GEN 21:12 Meneng minikagi se Timanem diyà ki Abraham, “Ikà egkepuluk tepad te telaki aw allang no si Agar. Tolò ka te impunù i Sara kamno, so se menge bowad-bowad te batà no si Isaac, yan olò se eneng-enengen ko te ontò bowad-bowad nikaw.
GEN 21:13 Inangen ko heman dakel pongan se menge bowad-bowad te batà te allang, so batà no heman sikandin.”
GEN 21:14 Pegkeiselem niyan, limapos si Abraham nemegay te kànen aw sesalok nepenò te wayeg diyà ki Agar amon bebaen din, aw impekesayo din si Agar aw batà din. Dimoton dan te kebigtilan te Berseba, aw miglegeb-legeb dan kidoen.
GEN 21:15 Pegkeamin te wayeg inibing dan, timanan si Agar te batà din doton te pinonoan te kayo mebabà.
GEN 21:16 Minalin sikandin te menge sebad pawà lekat te batà din aw nenenoo kidoen. Mig-aneng-aneng sikandin, “Eked a keibeg komità te pegkematay te batà ko.” Dalem te pegpenenoo din kidoen, migkelag sikandin.
GEN 21:17 Dinineg te Timanem se pegkelag te batà, aw minikagi se anghil te Timanem lekat te langit, “E Agar, nengà lay migkelag ka? Ikà egkelemitan. Dinineg te Timanem se pegkelag te batà no doton sida.
GEN 21:18 Enaw ka den, aw doton ka te batà nikaw, aw sinelayi sikandin, so inangen ko dakel pongan se menge bowad-bowad din.”
GEN 21:19 Penga niyan, impekità te Timanem se sokian diyà ki Agar. Yan dimoton sikandin, aw inipenò din se sesalok, aw impeinem din se batà din.
GEN 21:20 Mèpiya se imbegay te Timanem diyà te telaki sìyan. Pegtilles din, mig-ogpà sikandin doton te kebigtilan, aw ontò sikandin metomawan egpemanà.
GEN 21:21 Peg-ogpà din doton te kebigtilan te Paran, impepengognan sikandin te inay din diyà te bayi tege Ehipto.
GEN 21:22 Nayan, migpetaking si Abimelec te pengolo te menge sondalo din si Picol, aw dimoton dan ki Abraham. Minikagi si Abimelec, “Netegahan ko te gayed ka egtebangan te Timanem, pengkey eden se inangen nikaw.
GEN 21:23 Yan ibeg ko megsapà ka den diyà te Timanem te eked ka palos peg-akal kanak, menge batà ko, aw menge bowad-bowad ko. Gayed mèpiya se ininang ko diyà kamno, aw yan pegpakang ka den te gayed mèpiya se inangen no diyà kanak aw menge doma otaw eg-ogpà dini te tanà inogpaan nikaw.”
GEN 21:24 Minikagi si Abraham, “Yan se ipakang ko den diyà kamno.”
GEN 21:25 Penga niyan, mig-indan si Abraham kandin te doen sokian pig-agaw te menge sineligan i Abimelec.
GEN 21:26 Meneng minikagi si Abimelec, “Wedà ko ketegahi aw sinu se mig-agaw kenyan. Wedà a no indani, aw wedà ko iyan ketegahi lamig seini.”
GEN 21:27 Penga niyan, nemegay si Abraham te menge karniro aw baka diyà ki Abimelec, aw migpepekangay dan.
GEN 21:28 Meneng tinani i Abraham se pito nati bayi te karniro diyà te menge doma karniro din.
GEN 21:29 Mig-insà si Abimelec, “Nengà lay tinani no iyan?”
GEN 21:30 Timaba si Abraham, “Kinewai se pito nati te karniro seini, aw yan doen pengilala te siak se migpebangbang te sokian seini.”
GEN 21:31 Yan se doun te iningedanan se ogpeanan sìyan Berseba (kelebadan niyan, sokian te pakang), so migpepekangay dan kidoen.
GEN 21:32 Penga te pegpepekangay dan kidoen te Berseba, minolì si Abimelec aw si Picol doton te tanà te menge tege Filisti.
GEN 21:33 Penga niyan, nenanem si Abraham te kayo tamarisko doton te Berseba, aw migtawal-tawal sikandin diyà te Timanem wedad temanan.
GEN 21:34 Nenamay mig-ogpà si Abraham doton te tanà te menge tege Filisti.
GEN 22:1 Pegkenamay-namay, migtandà se Timanem te pegsalig i Abraham diyà kandin. Timawal se Timanem, “E Abraham.” Timaba si Abraham, “Seini a.”
GEN 22:2 Minikagi se Timanem, “Petekingi se batà no temisa si Isaac ontò no egkedekelan te pedowan, aw doton kaw te tanà te Moria. Tikedeg kaw te bontod tedoan ko kamno kidoen, aw imetayi sikandin aw sonogi se lawa din, so ibegay no sikandin diyà kanak.”
GEN 22:3 Pegkeiselem niyan, limapos si Abraham nengayo, aw inlolan din iyan diyà te asno din. Impetaking din se batà din si Isaac aw dowa sineligan din, aw nesayo dan pesalo doton te tanà sinogoan te Timanem kandin.
GEN 22:4 Pegdateng te iketelo te aldaw te peg-ipanaw dan, kinità i Abraham se bontod doton te mediyò-diyò.
GEN 22:5 Minikagi si Abraham diyà te didowa sineligan din, “Peg-ogpà kaw dini sipat te asno, so domeleg kay pa te batà ko doton sida amon megtawal-tawal kay diyà te Timanem. Penga niyan, lomikò kay dini kenyo.”
GEN 22:6 Impeibing i Abraham ki Isaac se kayo itabon, aw inibing i Abraham se pemala aw tigtig bato iantay te apoy. Peg-ipanaw dan,
GEN 22:7 minikagi si Isaac, “Amà.” Timaba si Abraham, “Eden lay, Atò?” Minikagi si Isaac, “Doen tigtig bato aw itabon ta. Meneng kenan lay se nati te karniro sonogen aw ibegay diyà te Timanem?”
GEN 22:8 Timaba si Abraham, “Timanem se memegay kenyan diyà kenita.” Penga niyan, dimeleg dan minipanaw.
GEN 22:9 Pegdateng dan doton te bontod sinogoan te Timanem ki Abraham, mig-inang si Abraham te sonogan din te ayam-ayam ibegay diyà te Timanem, aw insawol din se kayo itabon kidoen te lanto niyan. Penga niyan, ginapos din se batà din aw insawol din heman sikandin diyà te lanto te kayo itabon.
GEN 22:10 Penga niyan, nemaed sikandin te pemala amon mengimatay te batà din.
GEN 22:11 Meneng timawal se anghil te Timanem diyà kandin lekat te langit, “E Abraham, Abraham.” Timaba sikandin, “Seini a.”
GEN 22:12 Minikagi se anghil, “Ikà egmeno te batà nikaw. Ikà egpeeleg kandin. Netegahan ko den te ontò ka egtolò te Timanem, so pengkey batà no temisa, meneng yan se ibegay no diyà kanak.”
GEN 22:13 Penga niyan, doen karniro kinità i Abraham. Nekesaeng se seka din te sagbet. Inangay iyan i Abraham, aw inimetayan din aw sinonog din iyan inselilin te batà din.
GEN 22:14 Penga niyan, iningedanan i Abraham se bontod sìyan “Timanem se Egpemegay.” Pengkey songkani, doen eg-ikegiyen seini, “Doton te bontod te Timanem, Timanem se egpemegay.”
GEN 22:15 Todà timawal se anghil te Timanem diyà ki Abraham lekat te langit,
GEN 22:16 aw minikagi sikandin, “Ontò metoman se pakang ko seini, so siaken se Timanem minikagi diyà kamno. Ontò mèpiya se ibegay ko diyà kamno. So timolò ka kanak aw wedà no temengi se batà no temisa meneng imbegay no sikandin diyà kanak,
GEN 22:17 yan mèpiya se ibegay ko diyà kamno, so inangen ko ontò medita se bowad-bowad nikaw iling te kedita te menge bitoen doton te langit, aw iling heman te kedita te enay doton te dagat. Mekedaeg se menge bowad-bowad no te menge lonsod te poon dan.
GEN 22:18 Tebangan ko se kedita te otaw te keneyonan pineokit te bowad-bowad nikaw. Yan se inangen ko, so timolò ka te impunù ko kamno.”
GEN 22:19 Penga niyan, limikò si Abraham aw si Isaac doton te didowa sineligan, aw minolì dan doton te Berseba, aw mig-ogpà dan kidoen.
GEN 22:20 Nayan, pegkenamay-namay, inindanan si Abraham te doen den menge batà te kedowa din si Nahor, so tinebawan se nayi din si Melca.
GEN 22:21 Si Hus se penganay batà din, si Bus se inolid din, si Camuel amay i Aram,
GEN 22:22 si Cased, si Asau, si Feldas, si Jedaf, aw si Betuel.
GEN 22:23 (Si Betuel se amay i Rebecca.) Yan se ngadan te walo batà i Nahor timebaw diyà ki Melca nayi i Abraham.
GEN 22:24 Doen heman allang i Nahor pig-esawa din ngadan din si Roma tinebawan i Teba, si Gaam, si Taas, aw si Maaca.
GEN 23:1 Nematay si Sara te sebad gatos kelowan teg pito se omay din.
GEN 23:2 Nematay sikandin doton te lonsod te Hebron sakop te Canaan. Dimoton si Abraham amon moloy kandin.
GEN 23:3 Timanan si Abraham te lawa te esawa din, aw dimoton sikandin te menge tege Heti, aw minikagi sikandin,
GEN 23:4 “Kenà a tege dini, so minalin a dini kenyo. Beyadan ko peden kenyo se tanà dini amon doen lebengan ko te esawa ko nematay.”
GEN 23:5 Minikagi se menge tege Heti,
GEN 23:6 “Sir, penenalan ka den kenami. Netegahan day te dakel ka otaw pinemallì te Timanem. Mepakay diyà kenami aw ilebeng no se esawa no dini te ontò mèpiya lebenganan day. Pengkey eden lebengi se pemellien nikaw, meluba se tig-apò memegay kenyan diyà kamno amon doen lebengan no kandin.”
GEN 23:7 Penga niyan, limongken si Abraham diyà kandan,
GEN 23:8 aw minikagi sikandin, “Aw mepakay diyà kenyo se peglebeng ko te esawa ko dini, pemoyoi niyo si Efron batà i Sohar
GEN 23:9 amon ibeligyà din diyà kanak se ilib te Macpela doton medapag te kilid te pawà din. Ikegihi niyo diyà kandin te pengkey pila se ontò elagà niyan, beyadan ko iyan diyà kandin dini kenyo, amon doen kenaken lebenganan.”
GEN 23:10 Kidoen heman si Efron doma te menge tege Heti netipon kidoen te lelebangan te lonsod sìyan, aw dinineg te kedita dan se intaba din diyà ki Abraham,
GEN 23:11 “Sir, penenalan ka den kanak. Tiblug ko ibowang diyà kamno se kedakel te pawà ko sìyan sipat te ilib kidoen. Dalem te pegbantay te kedita te doma ko, ibowang ko den iyan diyà kamno amon lebengan no te esawa nikaw.”
GEN 23:12 Todà limongken si Abraham diyà te menge otaw kidoen,
GEN 23:13 aw minikagi sikandin diyà ki Efron dinineg te kedita dan, “Penenalan ka den te kagi ko seini. Beyadan ko den se pawà no sìyan te kedakel te elagà niyan. Kinewai se ibayad ko, amon doen lebengan ko te esawa ko.”
GEN 23:14 Minikagi si Efron,
GEN 23:15 “Sir, penenalan ka den kanak. Epat gatos te kwarta selapì se elagà niyan, meneng eked ko iyan pebeyadi kamno so sigalak ki. Tiblug ka den peglebeng te esawa no kidoen.”
GEN 23:16 Timandù si Abraham tepad te elagà inikagi i Efron dinineg te kedita te otaw netipon, aw yan pinisar din se epat gatos kwarta selapì, iling te pegpisar te menge tindiro, aw imbegay din iyan diyà ki Efron.
GEN 23:17 Pineokit kenyan, nenig-apò si Abraham te tanà i Efron doton te Macpela medapag te lonsod te Mamre. Bineyadan din se tanà sìyan sipat te ilib kidoen, aw kedita te kayo nesakop te tanà sìyan.
GEN 23:18 Neinang si Abraham tig-apò te tanà sìyan dalem te pegbantay te kedita te tege Heti netipon kidoen te lelebangan te lonsod sìyan.
GEN 23:19 Penga niyan, inlebeng i Abraham se lawa te esawa din si Sara doton te ilib kidoen te Canaan.
GEN 23:20 Yan se indan tepad te pegpenig-apò i Abraham te tanà aw ilib ininang din lebenganan tapay tinig-apò te tege Heti.
GEN 24:1 Nayan, ontò den temoay si Abraham, aw gayed mèpiya se imbegay te Timanem diyà kandin.
GEN 24:2 Minikagi si Abraham diyà te pengolo te menge sineligan din, sìyan egpengibing te kedakel te kedònan din, “Soli se belad nikaw diyà te salad te bobon ko amon ketegahan ko te tomanen no se ipunù ko kamno seini.
GEN 24:3 Ibeg ko megsapà ka pineokit te Timanem mig-inang te langit aw keneyonan. Pegpakang ka diyà kanak te eked no pemellii se bayi pengognanen te batà ko lekat te menge otaw eg-ogpà dini te Canaan.
GEN 24:4 Meneng keilangan lomikò ka doton te tanà tinebawan ko, aw pemellii se bayi lekat te menge kedomaan ko amon doen pengognanen te batà ko si Isaac.”
GEN 24:5 Meneng mig-insà se sineligan, “Megmeno a aw eked keibeg se bayi tomaking kanak aw molì a dini? Ibingen ko lay se batà no doton te tanà tinikedowan nikaw?”
GEN 24:6 Timaba si Abraham, “Ikà palos egpengibing te batà ko doton.
GEN 24:7 Kedengan, inikegiyan a te Timanem eg-ogpà doton te langit te keilangan mesayo a lekat te menge kedomaan te amay ko aw tanà tinebawan ko, aw ontò a din pinekangan te ibegay din se tanà seini diyà te menge bowad-bowad ko. Isogò te Timanem se anghil monà diyà kamno aw megtabang kamno amon mekeabat ka te bayi pengognanen te batà ko.
GEN 24:8 Meneng aw eked keibeg se bayi tomaking kamno, yan wedad keilangan te pegtoman no te pakang no seini. Meneng ikà palos egpengibing te batà ko doton.”
GEN 24:9 Penga niyan, insawol te sineligan se belad din diyà te salad te bobon te amo din si Abraham, aw migsapà sikandin te tomanen din se impunù i Abraham diyà kandin.
GEN 24:10 Penga niyan, nengabat se sineligan te sempolò kamilo te amo din, aw inlolan din se medita kemolò te mèpiya bowang ipeibing te amo din si Abraham. Nesayo sikandin aw dimoton te lonsod inogpaan te kedowa i Abraham si Nahor kidoen te Mesopotamya.
GEN 24:11 Pegdateng din doton, ontò den meapon, aw yan se oras te pegsalok te menge bayi. Minapit sikandin doton te sokian kidoen te lowà te lonsod, aw impeetod din se menge kamilo din kidoen.
GEN 24:12 Penga niyan, migtawal-tawal sikandin, “E Timanem egseligan te amo ko si Abraham, tebangi a den te aldaw seini amon metoman se pakang no diyà te amo ko si Abraham egkeidowan nikaw.
GEN 24:13 Na, dini a den te sokian seini selokan kwani te menge laga eg-ogpà dini.
GEN 24:14 Mikagi a kwani diyà te sebad bayi, ‘Peinemi a bag diyà te tibod nikaw.’ Aw tomaba sikandin, ‘Inem ka, aw somalok a heman te wayeg inemen te menge kamilo nikaw,’ mèpiya aw sikandin se bayi pinemallì no pengognanen i Isaac. Aw meinang iyan, ketegahan ko te netoman den se pakang no diyà te amo ko.”
GEN 24:15 Telobo pa sikandin migtawal-tawal, dimateng si Rebecca batà bayi i Betuel neniang te tibod. Kedowa i Abraham si Nahor se apò din meama, aw si Melca se apò din bayi.
GEN 24:16 Laga pa si Rebecca, aw ontò mèpiya se bawa din. Wedà palos sikandin leyoki te meama. Dimoton sikandin te sokian, aw simalok, aw limikò sikandin.
GEN 24:17 Mig-ayas se sineligan simongon kandin, aw minikagi sikandin, “Atà, peinemi a bag diyà te tibod nikaw.”
GEN 24:18 Minikagi se laga, “Sir, inem ka den.” Ayas din insawol se tibod tiniang din, aw impeinem din sikandin.
GEN 24:19 Penga te peg-inem din, minikagi heman se laga, “Somalok a heman te wayeg inemen te menge kamilo nikaw lamig kebolongan se keleowan dan.”
GEN 24:20 Ayas din in-olà se wayeg doton te loboganan, aw kimagnan sikandin doton te sokian aw todà simalok lamig nebolongan se keleowan te kedita te kamilo din.
GEN 24:21 Wedà ikagi se sineligan, meneng timengteng olò sikandin diyà te terbaho te laga amon metaga-taga sikandin aw tinoman te Timanem se tod din.
GEN 24:22 Pegkebolong te keleowan te menge kamilo din, inokal te sineligan se aritis bolawan meelagà, aw insawol din iyan diyà te idong te bayi, aw intaklay din heman se dowa dedakel taklay bolawan diyà te bebenayen din.
GEN 24:23 Mig-insà sikandin, “Sinu lay se amay nikaw? Doen lay keombaan doton te balay din, amon midegà a sipat te menge doma otaw timaking kanak?”
GEN 24:24 Timaba se bayi, “Si Betuel se amay ko. Si Nahor se amay din aw si Melca se inay din.”
GEN 24:25 Minikagi heman se bayi, “Dakel se legami ibatan te kamilo nikaw aw dakel heman se kànen dan doton kenami, aw doen heman keombaan niyo aw midegà kaw.”
GEN 24:26 Penga niyan, limongken se sineligan, aw dimuyun sikandin te Timanem.
GEN 24:27 Minikagi sikandin, “Iduyun se Timanem egseligan te amo ko, so keseligan sikandin, aw tinoman din se pakang din diyà te amo ko. Yan inelladan a din amon mekepantek a doton te balay te menge kedomaan te amo ko.”
GEN 24:28 Kimagnan se bayi minolì, aw mig-indan sikandin diyà te inay din aw menge kedomaan din tepad kenyan.
GEN 24:29 Doen kedowa meama i Rebecca ngadan din si Laban. Pegkità i Laban te aritis aw taklay te etebay din, aw pegdineg din te kagi te etebay din tepad te inikagi te otaw dimateng, ayas sikandin simongon kandin doton te sokian. Pegdateng i Laban doton te sokian, kidoen pa se sineligan i Abraham sipat te menge kamilo din.
GEN 24:31 Minikagi si Laban, “Mèpiya se imbegay te Timanem diyà kamno. Taking ka den kanak doton te balay ko. Ikà eg-ogpà dini, so doen tambì impetagad ko den kamno, aw doen heman kelokob te menge kamilo nikaw.”
GEN 24:32 Penga niyan, dimoton dan te balay, aw mig-awas dan te karga te menge kamilo, aw impekaen dan iyan. Inibing dan heman se wayeg ionaw te benis te sineligan i Abraham aw menge doma din.
GEN 24:33 Peglamak dan te kànen, minikagi se sineligan, “Eked a kaen singed aw meg-indan a kenyo tepad te tod ko dini.” Minikagi si Laban, “Indani kay den.”
GEN 24:34 Minikagi sikandin, “Siak se sineligan i Abraham.
GEN 24:35 Ontò mèpiya se imbegay te Timanem diyà te amo ko, aw migkeyaman den sikandin. Binegayan sikandin te Timanem te medita karniro, kambing, baka, selapì, bolawan, allang, kamilo, aw asno.
GEN 24:36 Doen batà din meama timebaw diyà te esawa din si Sara te pegkelokes din. Batà din sìyan se binegayan i Abraham te kedakel te keyemanan din.
GEN 24:37 Impesapà a te amo ko te tomanen ko se impunù din kanak. Minikagi sikandin, ‘Keilangan eked no pemellii se bayi pengognanen te batà ko lekat te menge otaw eg-ogpà doton te Canaan.
GEN 24:38 Meneng keilangan lomikò ka doton te menge kedomaan ko, sìyan menge bowad-bowad te amay ko, aw pemellii se bayi doton kandan amon doen pengognanen te batà ko.’
GEN 24:39 “Penga niyan, mig-insà a kandin, ‘Megmeno a aw eked keibeg se bayi tomaking kanak aw molì a?’
GEN 24:40 “Timaba sikandin, ‘Doen anghil ipetaking kamno te Timanem gayed ko egtoloen, amon metoman se tod nikaw doton. Yan mekeabat ka te bayi pengognanen te batà ko doton te menge kedomaan ko, sìyan menge bowad-bowad te amay ko.
GEN 24:41 Meneng aw domoton ka te menge kedomaan ko aw eked dan penenalan kamno, aw temengan dan se bayi, yan wedad keilangan te pegtoman no te pakang no sìyan.’
GEN 24:42 “Nayan, pegdateng ko gina seini doton te sokian, migtawal-tawal a, ‘E Timanem egseligan te amo ko si Abraham, aw mepakay diyà kamno, tomani bag se tod ko dini.
GEN 24:43 Na, dini a den te sokian seini. Aw domini se laga amon somalok, aw mikagi a diyà kandin, “Peinemi a bag diyà te tibod nikaw,”
GEN 24:44 aw tomaba sikandin, “Inem ka, aw somalok a heman te wayeg inemen te menge kamilo nikaw,” mèpiya aw sikandin se bayi pinemallì no Timanem, amon doen pengognanen te batà te amo ko.’
GEN 24:45 “Telobo a pa migtawal-tawal, dimateng si Rebecca neniang te tibod din. Dimoton sikandin te sokian aw simalok, aw minikagi a diyà kandin, ‘Atà, peinemi a bag.’
GEN 24:46 “Ayas din insawol se tibod tiniang din, aw minikagi sikandin, ‘Inem ka den, aw somalok a heman te wayeg inemen te menge kamilo nikaw.’ “Yan mininem a, aw impeinem din heman se menge kamilo ko.
GEN 24:47 Mig-insà a diyà kandin aw sinu se amay din, aw minikagi sikandin, ‘Si Betuel se amay ko. Si Nahor se amay din, aw si Melca se inay din.’ “Penga niyan, insawol ko se aritis diyà te idong din, aw didowa taklay diyà te bebenayen din.
GEN 24:48 Limongken a aw migsimba a diyà te Timanem. Induyun ko se Timanem egseligan te amo ko si Abraham, so inelladan a din amon mekepantek a dini mengabat te apò bayi te kedowa te amo ko pengognanen te batà din meama.
GEN 24:49 Nayan, aw keidowan niyo se amo ko aw mèpiya se inangen niyo diyà kandin, ikagi kaw den kenyan diyà kanak. Meneng aw kenà, ikagi kaw den heman kenyan diyà kanak, amon metaga-taga a aw eden se inangen ko.”
GEN 24:50 Minikagi si Laban aw si Betuel, “Impetaga-taga den te Timanem se ibeg din. Eked day iyan todai.
GEN 24:51 Mepakay diyà kenami aw ibingen no si Rebecca amon pengognanen te batà te amo nikaw, iling te impetaga-taga den te Timanem kenitadon.”
GEN 24:52 Pegdineg te sineligan i Abraham te inikagi dan sìyan, limongken sikandin aw induyun din se Timanem.
GEN 24:53 Penga niyan, inokal din se menge bowang, menge penenaktun, aw selapì aw bolawan, aw imbegay din iyan diyà ki Rebecca. Doen heman menge meelagà imbowang din diyà te kedowa din aw inay din.
GEN 24:54 Penga niyan, kimaen sikandin sipat te menge doma otaw timaking kandin, aw minidegà dan kidoen. Pegkeiselem niyan, minikagi se sineligan, “Ibeg ko, mesayo kay den amon molì a doton te amo ko.”
GEN 24:55 Meneng timaba se kedowa aw inay i Rebecca, “Mèpiya aw eked no pa sikandin ibingi singed aw menge sempolò pa se aldaw. Penga niyan, mepakay aw mesayo kaw.”
GEN 24:56 Meneng minikagi sikandin, “Ikà niyo eg-anggà kenami, so tinoman den te Timanem se tod ko dini. Ibeg ko, mesayo kay den amon molì a doton te amo ko.”
GEN 24:57 Minikagi dan, “Tewalen day si Rebecca, aw insaen day sikandin aw eden se ibeg din.”
GEN 24:58 Penga niyan, tinawal dan si Rebecca, aw mig-insà dan diyà kandin, “Meibeg ka lay tomaking kandin seini?” Timaba sikandin, “Ee, tomaking a den kandin.”
GEN 24:59 Penga niyan, mepakay diyà kandan aw tomaking si Rebecca aw lokes tapay mig-ipat kandin. Impekesayo dan sipat te sineligan i Abraham aw menge doma din.
GEN 24:60 Te wedà dan pa kesayo, nemoyò se menge kedomaan i Rebecca te mèpiya se ibegay te Timanem kandin. Minikagi dan, “Etebay day, ibeg day meinang ka peden kemonaan te minelalan bowad-bowad nikaw. Ibeg day, mekedaeg peden se menge bowad-bowad no te lonsod te kedita te poon dan.”
GEN 24:61 Penga niyan, migtigmes si Rebecca aw menge doma bayi timaking kandin te karga ibingen dan, aw simakay dan te menge kamilo amon tomaking dan te sineligan i Abraham. Penga niyan, nesayo se kedita dan.
GEN 24:62 Nayan, mig-ogpà si Isaac doton te Negeb. Kaling sikandin minolì lekat te kebigtilan te Beer Lahai Roi.
GEN 24:63 Pegkemeapon, dimoton sikandin te pawà din amon megtawal-tawal sikandin, aw kinità din te doen menge otaw dimateng diyà kandin simakay te menge kamilo.
GEN 24:64 Pegkità i Rebecca kandin, kimahang sikandin lekat te kamilo
GEN 24:65 aw mig-insà sikandin diyà te sineligan, “Sinu lay se otaw doton te pawà sida simongon kenitadon?” Timaba sikandin, “Amo ko sikandin.” Penga niyan, sinempengan i Rebecca se bawa din amon segmanen din si Isaac.
GEN 24:66 Penga niyan, mig-indan se sineligan diyà ki Isaac tepad te kedita neinang diyà kandin.
GEN 24:67 Inibing i Isaac si Rebecca doton didalem te tolda tapay inogpaan te inay din si Sara. Pinengognan din si Rebecca, aw ontò dakel se pedowan i Isaac diyà kandin. Yan nesinalay si Isaac tepad te pegkematay te inay din.
GEN 25:1 Nayan, todà nengognan si Abraham, aw si Ketura se ngadan te modi esawa din.
GEN 25:2 Se menge batà meama i Abraham timebaw diyà ki Ketura, yan si Simran, si Jocsan, si Medan, si Midian, si Isbac, aw si Sua.
GEN 25:3 Si Jocsan se amay i Seba aw si Dedan. Se menge bowad-bowad i Dedan, yan se neinang menge pongan te Asur, Letus, aw Leum.
GEN 25:4 Se menge batà meama i Midian, yan si Epa, si Eper, si Hanoc, si Abida, aw si Eldaa. Menge bowad-bowad i Ketura se kedita niyan.
GEN 25:5 Si Isaac se binegayan i Abraham te kedakel te keyemanan din.
GEN 25:6 Meneng te wedà pa kematay si Abraham, doen heman imbowang din diyà te menge batà te menge doma esawa din. Penga niyan, impekesayo din dan pesalo doton te eglibtakan te aldaw amon eked dan pegsamok te batà din si Isaac.
GEN 25:7 Sebad gatos kepitowan teg lima se omay i Abraham te pegkematay din.
GEN 25:8 Ontò sikandin temoay te pegkematay din aw mèpiya se peg-ogpà din, aw yan neketelokon sikandin te menge kemonaan din nematay.
GEN 25:9 Inlebeng te batà din si Isaac aw si Ismael se lawa din diyà te ilib te Macpela kidoen te tanà lenged te eglibtakan te lonsod te Mamre tapay tinig-apò i Efron batà i Sohar tege Heti.
GEN 25:10 Yan se tanà tapay bineyadan i Abraham diyà te menge tege Heti. Yan se linebengan dan ki Abraham sipat te esawa din si Sara.
GEN 25:11 Penga te pegkematay i Abraham, mèpiya se imbegay te Timanem diyà te batà din si Isaac, aw mig-ogpà sikandin doton medapag te Beer Lahai Roi.
GEN 25:12 Seini se menge bowad-bowad i Ismael batà i Abraham timebaw diyà ki Agar tege Ehipto allang i Sara.
GEN 25:13 Seini se ngadan te menge batà i Ismael egpetibos-tibosay dan lekat te penganay. Si Nebaiot se kakay, inolid din si Kedar, si Adbeel, si Mibsam,
GEN 25:14 si Misma, si Duma, si Masa,
GEN 25:15 si Hadad, si Tema, si Jetur, si Napis, aw si Kedema.
GEN 25:16 Yan se menge batà i Ismael, aw neinang dan datò te sempolò teg dowa pongan. Yan heman se in-ingadan te menge lonsod aw ogpeanan dan.
GEN 25:17 Sebad gatos ketlowan teg pito se omay i Ismael te pegkematay din.
GEN 25:18 Mig-ogpà se menge bowad-bowad i Ismael doton te tanà diyà te tengà-tengà te lonsod te Habila aw Sur lenged te eglibtakan te Ehipto pesalo te Asirya. Wedà dan peg-ogpà doma te menge doma bowad-bowad i Abraham.
GEN 25:19 Seini se indan tepad te batà i Abraham si Isaac.
GEN 25:20 Kepatan se omay i Isaac te pegpengognan din ki Rebecca batà i Betuel tege Aramea te Mesopotamya. Si Rebecca se etebay i Laban tege Aramea heman.
GEN 25:21 Nayan, wedad palos batà i Rebecca, aw yan migtawal-tawal si Isaac diyà te Timanem tepad kenyan. Nenenalan se Timanem te pinemoyò din, aw yan miglaman si Rebecca.
GEN 25:22 Doen pingin diyà te belenakan din, aw iling te migbolaw dan te wedà dan pa tebaw. Minikagi si Rebecca, “Nengà lay neinang ini diyà kanak?” Penga niyan, mig-insà sikandin diyà te Timanem tepad kenyan.
GEN 25:23 Minikagi se Timanem, “Se pingin kidoen te belenakan nikaw, yan se meinang kemonaan te dowa pongan. Eked dan pegsebad. Meinang labi pa magsen se sebad pongan, aw meinang sineligan te batà no adi se kakay din.”
GEN 25:24 Pegdateng te aldaw te pegtebaw, pingin se timebaw.
GEN 25:25 Melalag se tagnà timebaw, aw bolbolen se lawa din, aw yan iningedanan dan sikandin ki Esau (kelebadan niyan, bolbolen).
GEN 25:26 Pegtebaw te adi din, minawid sikandin te palo te kakay din, aw yan iningedanan dan sikandin ki Jacob (kelebadan niyan, nengawid te palo, aw doen heman kelebadan niyan, eg-akal). Keneman se omay i Isaac te pegtebaw te didowa dan.
GEN 25:27 Pegketelaki te didowa dan, migketomawan si Esau aw gayed eglegeb doton te kebenesan. Meneng netelek si Jacob, aw gayed sikandin netingen medapag te tolda inogpaan dan.
GEN 25:28 Ontò dakel se pedowan i Isaac diyà ki Esau, so ibeg din egpengànen se menge menenanap te kebenesan egpenaen i Esau. Meneng ontò dakel beling se pedowan i Rebecca diyà ki Jacob.
GEN 25:29 Doen aldaw migpesebo si Jacob te sabaw te temboway melalag. Dimateng si Esau lekat te kebenesan, aw ontò sikandin binallos.
GEN 25:30 Minikagi sikandin diyà ki Jacob, “Begayi a den te melalag sabaw sìyan, so ontò a binallos.” (Yan se doun te doen doma ngadan i Esau si Edom, kelebadan niyan, melalag.)
GEN 25:31 Minikagi si Jacob, “Eked a pemegay kamno singed aw begayan a no te ontong kinewaen no aw matay se amay ta, so sikona se penganay batà din.”
GEN 25:32 Minikagi si Esau, “Mepakay iyan diyà kanak. Pengkey penganay a, meneng wedad ontong ko kenyan aw matay a den tandà te ballos ko.”
GEN 25:33 Minikagi si Jacob, “Eked a pemegay kamno singed aw onà ka megsapà.” Yan migsapà si Esau te ibegay din diyà ki Jacob se ontong ibegay te amay dan diyà te penganay batà din.
GEN 25:34 Penga niyan, nemegay si Jacob diyà ki Esau te pan aw sabaw te temboway melalag. Kimaen si Esau aw mininem. Penga niyan, nesayo sikandin. Yan mig-aneng-aneng sikandin te wedad elagà te ontong ibegay te amay din diyà te penganay batà din.
GEN 26:1 Nayan, doen todà bitil doton te Canaan. Kenà iyan onawa te bitil neokitan i Abraham. Dimoton si Isaac te tanà i Abimelec, selotan te menge tege Filisti doton te lonsod te Gerara.
GEN 26:2 Yan se dinotonan din, so tapay migpekità se Timanem diyà ki Isaac, aw migpunù sikandin, “Ikà egdoton te Ehipto. Peg-ogpà ka doton te tanà tedoan ko kamno.
GEN 26:3 Peg-ogpà ka dini, aw yan megtabang a kamno, aw mèpiya se ibegay ko diyà kamno. Ibegay ko se kedakel te tanà seini diyà kamno aw diyà te menge bowad-bowad nikaw, so tomanen ko se impakang ko diyà te amay no si Abraham.
GEN 26:4 Inangen ko ontò medita se bowad-bowad nikaw, iling te kedita te menge bitoen doton te langit. Ibegay ko diyà kandan se kedakel te tanà seini. Mèpiya se ibegay ko diyà te kedita te otaw te keneyonan pineokit te bowad-bowad nikaw.
GEN 26:5 Inangen ko iyan so timolò si Abraham kanak. Timolò sikandin te kedita te impunù aw intoladà ko diyà kandin.”
GEN 26:6 Yan mig-ogpà si Isaac doton te Gerara.
GEN 26:7 Peg-insà te menge meama kidoen tepad te esawa din, minikagi sikandin, “Etebay ko sikandin.” Wedà sikandin ikagi te teleesawa dan, so nelemitan sikandin. Mig-aneng-aneng sikandin te imetayan sikandin te menge meama kidoen amon egawen dan si Rebecca, so ontò mèpiya se bawa din.
GEN 26:8 Pegkenamay-namay te peg-ogpà i Isaac kidoen te Gerara, dimelowang si Abimelec selotan te menge tege Filisti, aw kinità din si Isaac aw si Rebecca migpekelesay.
GEN 26:9 Yan impeangay din si Isaac, aw minikagi sikandin, “Esawa no kedì sikandin. Nengà lay minikagi ka te telekedowa kaw?” Timaba sikandin, “So mig-aneng-aneng a te imetayan a aw mikagi a te esawa ko sikandin.”
GEN 26:10 Minikagi si Abimelec, “Medaet se ininang no diyà kenami, so simpana leyokan te sakop ko se esawa nikaw, detengan kay te pelumun te Timanem pineokit kamno.”
GEN 26:11 Penga niyan, migpunù si Abimelec diyà te kedita te sakop din, “Aw doen otaw meg-inang te medaet diyà te otaw seini aw esawa din, yan se imetayan.”
GEN 26:12 Te omay sìyan, nenanem si Isaac kidoen, aw minongo iyan te ginatos. Dakel se ginani din so mèpiya se imbegay te Timanem diyà kandin.
GEN 26:13 Gayed nedogangan se keyemanan din lamig ontò sikandin migkeyaman.
GEN 26:14 Ontò medita se karniro din, baka, aw allang din, aw yan se doun te miningà se menge tege Filisti kandin.
GEN 26:15 Yan se doun te binonbonan dan se kedita te sokian tapay binengbangan te menge sineligan te amay din si Abraham te wedà pa sikandin kematay.
GEN 26:16 Penga niyan, minikagi si Abimelec diyà ki Isaac, “Kesayo ka den lekat dini kenami, so neinang ka den beling labi magsen diyà kenami.”
GEN 26:17 Yan nesayo si Isaac, aw minalin doton te baog te Gerara, aw mig-ogpà sikandin kidoen.
GEN 26:18 Todà din impebangbang se menge sokian tapay impebangbang te amay din, so binonbonan iyan te menge tege Filisti penga te pegkematay i Abraham. Iningedanan i Isaac se menge sokian onawa te in-ingadan te amay din kenyan.
GEN 26:19 Nemangbang se menge sineligan i Isaac te kaling sokian doton te baog, aw doen wayeg niyan timebol.
GEN 26:20 Meneng migpedindilay se menge telediyaga tege Gerara aw menge telediyaga i Isaac, aw minikagi se menge tege Gerara, “Kenami se wayeg sìyan.” Yan se doun te iningedanan i Isaac se sokian sìyan Esek (kelebadan niyan, dindil), so migpedindilay dan kidoen.
GEN 26:21 Penga niyan, nemangbang heman se menge sineligan din te doma sokian. Meneng migbolaw heman se tege Gerara tepad kenyan, aw yan iningedanan din se sokian sìyan Sitna (kelebadan niyan, keopal).
GEN 26:22 Minalin sikandin lekat kidoen, aw migpebangbang sikandin te sokian doton. Wedad migbolaw tepad kenyan, aw yan iningedanan din iyan Rehobut (kelebadan niyan, keombaan), so minikagi sikandin, “Doen den keombaan imbegay te Timanem diyà kenitadon, aw mèpiya den se peg-ogpà tadon dini.”
GEN 26:23 Dimeleg si Isaac lekat kidoen aw dimoton sikandin te Berseba.
GEN 26:24 Pegkedelem niyan, migpekità se Timanem diyà kandin, aw minikagi sikandin, “Siaken se Timanem egseligan te amay no si Abraham. Ikà egkelemitan, so egdomaan ta. Mèpiya se ibegay ko diyà kamno, aw inangen ko ontò medita se bowad-bowad nikaw, so yan se impakang ko diyà ki Abraham gayed timolò kanak.”
GEN 26:25 Mig-inang si Isaac te sonoganan te ayam-ayam ibegay diyà te Timanem, aw migsimba sikandin te Timanem kidoen. Mig-ogpà si Isaac kidoen, aw nemangbang se menge sineligan din te sokian.
GEN 26:26 Nayan, limaoy si Abimelec ki Isaac. Dimateng sikandin lekat te Gerara sipat te teleglawong din si Ahusa aw pengolo te menge sondalo din si Picol.
GEN 26:27 Minikagi si Isaac, “Kedengan neopal kaw diyà kanak, aw impekesayo a niyo. Yan nengà lay dimini kaw den kanak?”
GEN 26:28 Timaba dan, “Dimini kay so netegahan day den te gayed ka egtebangan te Timanem. Yan mig-aneng-aneng kay te mèpiya aw megpesepaay kidon. Ibeg day megpakang ka diyà kenami
GEN 26:29 te eked ka pegpeeleg kenami, iling te wedà kay palos pegpeeleg kamno. Mèpiya se ininang day diyà kamno, aw melinaw se pedowan tadon te pegkesayo nikaw. Netegahan day den te mèpiya se ipegbegay te Timanem diyà kamno.”
GEN 26:30 Impeinang i Isaac se dakel kànen, aw kimaen dan aw mininem dan.
GEN 26:31 Pegkeiselem niyan, migpesepaay dan. Penga niyan, impekesayo dan i Isaac te melinaw se pedowan te kedita dan.
GEN 26:32 Dalem te aldaw sìyan, dimateng se menge sineligan i Isaac, aw mig-indan dan diyà kandin tepad te sokian binengbangan dan. Minikagi dan, “Neapet day den se wayeg!”
GEN 26:33 Iningedanan i Isaac se sokian sìyan Seba, aw lamig songkani iningedanan se lonsod kidoen Berseba (kelebadan niyan, sokian te pakang).
GEN 26:34 Peg-apet te kepatan se omay i Esau, pinengognan din si Judita batà i Beeri tege Heti. Pinengognan din heman si Basimat batà i Elon tege Heti heman.
GEN 26:35 Medaet se peg-ogpà i Isaac aw si Rebecca tandà te eg-inangen te didowa ogangan dan sìyan.
GEN 27:1 Nayan, migketemoay den si Isaac, aw wedà den kità. Impeangay din se penganay batà din si Esau, aw minikagi sikandin, “Atò.” Timaba si Esau, “Seini a, Amà.”
GEN 27:2 Minikagi si Isaac, “Temoay a den, aw agpet a den matay.
GEN 27:3 Na, ebati se kekamang nikaw, menge tonod aw bosog nikaw, aw doton ka te kebenesan amon megdansal ka.
GEN 27:4 Peg-elomo ka te pengelapen mèpiya se nanam iling te egkeibegan ko amon kànen ko iyan. Penga niyan te eked a pa kematay, megtawal-tawal a amon mèpiya se ibegay te Timanem diyà kamno.”
GEN 27:5 Dalem te peg-ikagi i Isaac diyà ki Esau, dinineg i Rebecca se kagi din. Pegkesayo i Esau amon megdansal,
GEN 27:6 minikagi si Rebecca diyà te batà din si Jacob, “Na, dinineg ko gina se inikagi te amay no diyà te kakay no si Esau.
GEN 27:7 Minikagi sikandin, ‘Pegdansal ka aw peg-elomo ka te pengelapen mèpiya se nanam amon kànen ko, aw penga niyan te eked a pa kematay, megtawal-tawal a amon mèpiya se ibegay te Timanem diyà kamno.’
GEN 27:8 “Na, Atò, penenalan ka den diyà kanak amon tomolò ka te ipunù ko den kamno seini.
GEN 27:9 Doton ka den te menge ayam-ayam, aw ebati se dowa nati te kambing melambò, aw siak se meg-elomo te kànen din mèpiya se nanam iling te egkeibegan te amay nikaw.
GEN 27:10 Penga niyan, sikona se mengibing te kànen doton te amay no amon sikona beling se begayan te mèpiya aw megtawal-tawal sikandin te eked pa kematay.”
GEN 27:11 Meneng minikagi si Jacob diyà te inay din, “Ontò bolbolen si Esau, meneng ontò a melenas.
GEN 27:12 Megmeno a aw pemàdan a i Amà? Meg-aneng-aneng sikandin te meg-alo-alo a kandin, aw yan wedad ontong ko kandin, meneng detengan a beling te medaet pineokit kenyan.”
GEN 27:13 Minikagi se inay din, “Atò, aw doen medaet domateng, siaken se detengan niyan. Tolò ka olò kanak. Engayi den se menge kambing.”
GEN 27:14 Yan inangay i Jacob se menge kambing aw in-ated din iyan doton te inay din. Mig-elomo sikandin te kànen mèpiya se nanam iling te egkeibegan i Isaac.
GEN 27:15 Penga niyan, inabat i Rebecca se mèpiya saol i Esau intagò kidoen te balay, aw impesaol din iyan ki Jacob.
GEN 27:16 Insawol din se kindal te kambing sipat bolbol niyan diyà te bebenayen aw lieg i Jacob.
GEN 27:17 Imbegay din diyà ki Jacob se mèpiya kànen aw pan ininang din.
GEN 27:18 Dimoton si Jacob te amay din, aw minikagi sikandin, “Amà.” Minikagi si Isaac, “Ee, Atò. Sinu ka lay?”
GEN 27:19 Timaba si Jacob, “Siak se penganay batà no si Esau. Timolò a den te impunù no kanak. Enaw ka den, aw kaen ka den te pengelapen inibing ko, amon megtawal-tawal ka amon mèpiya se ibegay te Timanem diyà kanak.”
GEN 27:20 Mig-insà si Isaac, “Atò, nengà lay wedà kenamay se pegdansal nikaw?” Timaba si Jacob, “Tinebangan a te Timanem egseligan nikaw.”
GEN 27:21 Penga niyan, minikagi si Isaac diyà ki Jacob, “Atò, pegpedapag ka diyà kanak amon pemàdan ta. Ontò ka lay batà ko si Esau?”
GEN 27:22 Migpedapag si Jacob diyà te amay din, aw nemaed si Isaac kandin aw minikagi sikandin, “Iling te kagi i Jacob se kagi nikaw, meneng iling te bebenayen i Esau se bebenayen nikaw.”
GEN 27:23 Wedà din kilelai si Jacob so bolbolen se bebenayen din iling te bebenayen i Esau. Yan se doun te timetoo si Isaac migpeketagad te pegtawal-tawal din tepad kandin.
GEN 27:24 Mig-insà si Isaac, “Ontò ka lay batà ko si Esau?” Timaba si Jacob, “Ee.”
GEN 27:25 Minikagi si Isaac, “Begayi a den te kànen. Penga te pegpengaen ko, megtawal-tawal a amon mèpiya se ibegay te Timanem diyà kamno.” Nemegay si Jacob kandin te kànen aw kimaen si Isaac. Inibing din heman se bino, aw mininem sikandin.
GEN 27:26 Penga niyan, minikagi si Isaac, “Diyà ka Atò, aw pengadek ka kanak.”
GEN 27:27 Dimoton si Jacob aw nengadek te amay din. Peg-adek i Isaac te penenaktun din, migtawal-tawal sikandin, “Mèpiya se nadeg te batà ko, iling te nadeg te tanà binegayan te Timanem te mèpiya.
GEN 27:28 Begayan ka te Timanem te tanà melambò gayed egkeelem te namog, amon dakel se geniyen nikaw, aw amon dakel se bino inangen nikaw.
GEN 27:29 Ibeg ko medita se pongan meinang sineligan nikaw, aw medita se otaw lomongken diyà kamno. Mengolo ka diyà te kedita te kedomaan nikaw, aw toloen ka te kedita te kedowa nikaw. Ipelumun te Timanem se kedita te otaw megtompuyus kamno, aw mèpiya se ibegay din diyà te kedita te otaw memegay te mèpiya diyà kamno.”
GEN 27:30 Penga te pegtawal-tawal i Isaac tepad kandin, nesayo si Jacob, aw dimateng si Esau lekat te pegdansal din.
GEN 27:31 Mig-elomo heman sikandin te kànen mèpiya se nanam, aw inibing din iyan doton te amay din. Minikagi sikandin, “Amà, enaw ka den aw kaen ka den te pengelapen inibing ko, amon megtawal-tawal ka amon mèpiya se ibegay te Timanem diyà kanak.”
GEN 27:32 Mig-insà si Isaac, “Sinu ka lay?” Timaba sikandin, “Siaken se penganay batà no si Esau.”
GEN 27:33 Ontò tinegangtang si Isaac tandà te kepela din, aw mig-insà sikandin, “Aw sikona si Esau, sinu lay se nekeabat gina te pengelapen, aw nemekaen kanak? Te wedà ka pa dateng, kimaen a kenyan, aw migtawal-tawal a amon mèpiya se ibegay te Timanem diyà kandin, aw eked ko den iyan todai.”
GEN 27:34 Pegdineg i Esau te inikagi te amay din, ontò sikandin migkelag aw migkoliyà, aw minikagi sikandin, “Amà, pegtawal-tawal ka heman amon mèpiya se ibegay te Timanem diyà kanak.”
GEN 27:35 Meneng minikagi si Isaac, “Neekalan a te adi nikaw, aw neabat din den se itawal-tawal ko peden tepad kamno.”
GEN 27:36 Minikagi si Esau, “Neketepad se ngadan din si Jacob (kelebadan niyan, eg-akal), so mekedowa den sikandin peg-akal diyà kanak. Kedengan nengagaw sikandin te ontong kinewaen te penganay batà no aw matay ka, aw nengagaw den heman sikandin te mèpiya ibegay peden te Timanem diyà kanak. Doen lay peden mèpiya wedà no pa pemoyoi ibegay te Timanem diyà kandin?”
GEN 27:37 Timaba si Isaac, “Migtawal-tawal a amon meinang sikandin pengolo nikaw, aw meinang heman allang din se kedita te kedomaan din. Nemoyò a diyà te Timanem te dakel se geniyen din aw bino din. Atò, wedad den mèpiya pemoyoen ko ibegay te Timanem diyà kamno.”
GEN 27:38 Minikagi si Esau, “Amà, wedad lay palos nesamà wedà no pemoyoi ibegay diyà kandin? Amà, pegtawal-tawal ka bag heman amon mèpiya se ibegay te Timanem diyà kanak.” Penga niyan, migkelag sikandin.
GEN 27:39 Minikagi si Isaac diyà kandin, “Meg-ogpà ka doton te tanà wedad kelambò aw eked elemi te namog.
GEN 27:40 Keilangan mengabat ka te kelidoan pineokit te pegbolaw nikaw. Meinang ka allang te kedowa nikaw. Meneng aw eked no iyan keteyodi, mekelowà ka lekat te peglowan din.”
GEN 27:41 Gayed nebensi si Esau ki Jacob so migtawal-tawal se amay dan amon si Jacob se begayan te Timanem te ontò mèpiya. Minikagi si Esau, “Eked den kenamay matay si Amà, aw penga niyan imetayan ko si Jacob.”
GEN 27:42 Pegketaga-taga i Rebecca tepad te inikagi i Esau, impeangay din si Jacob, aw minikagi sikandin, “Miglalang den ekon si Esau mengimatay kamno amon meabat se kebensi din.
GEN 27:43 Na Atò, tolò ka den kanak. Kadas ka den, aw doton ka te meama ko si Laban kidoen te Haran.
GEN 27:44 Làno-làno ka peg-ogpà doton lamig megkewedad se keopal te kedowa nikaw.
GEN 27:45 Aw kelibelan din se ininang no diyà kandin, ipeangay ta amon mekeolì ka dini. Keilangan komadas ka den, so eked a keibeg aw dowa kaw telekedowa se matay dalem te sebad se aldaw.”
GEN 27:46 Minikagi heman si Rebecca diyà ki Isaac, “Ontò melima se peg-ogpà ko doma te menge ogangan ta tege Heti. Aw pengognanen i Jacob se tege Heti iling te didowa bayi pinengognan i Esau, labi pa mèpiya aw matay a.”
GEN 28:1 Yan impeangay i Isaac si Jacob, aw migtawal-tawal sikandin amon mèpiya se ibegay te Timanem diyà kandin. Penga niyan, migpunù sikandin diyà ki Jacob, “Ikà egpengognan te bayi dini tege Canaan.
GEN 28:2 Doton ka den beling te Mesopotamya kidoen te balay te apò no si Betuel. Mèpiya aw pengognanen no se batà te emayen no si Laban.
GEN 28:3 Ibeg ko, mèpiya se ibegay te Timanem diyà kamno, aw inangen din medita se bowad-bowad no lamig meinang ka kemonaan te medita pongan te otaw.
GEN 28:4 Ibeg ko, tomanen te Timanem se impakang din diyà ki Abraham amon tig-epoen no sipat te menge bowad-bowad no se tanà seini inogpaan tadon, sìyan tanà impakang din diyà ki Abraham.”
GEN 28:5 Penga niyan, impekesayo i Isaac si Jacob, aw dimoton sikandin te Mesopotamya taman ki Laban batà i Betuel tege Aramea. Si Laban se meama i Rebecca, aw emayen sikandin i Jacob aw si Esau.
GEN 28:6 Nayan, netaga-taga si Esau te migtawal-tawal si Isaac amon mèpiya se ibegay te Timanem diyà ki Jacob, aw insogò din sikandin doton te Mesopotamya amon mengognan kidoen. Netaga-taga heman sikandin te pegtawal-tawal i Isaac tepad kandin, migpunù sikandin te eked din pengognani se bayi tege Canaan.
GEN 28:7 Netaga-taga heman sikandin te timolò si Jacob te amay aw inay din aw dimoton sikandin te Mesopotamya.
GEN 28:8 Pegketaga-taga i Esau te wedà keluba se amay din tepad te menge bayi tege Canaan,
GEN 28:9 dimoton sikandin te emayen din si Ismael batà i Abraham, aw pinengognan din se batà din si Mahalat adi i Nebaiot.
GEN 28:10 Nesayo si Jacob lekat te Berseba aw minipanaw sikandin migpesalo doton te Haran.
GEN 28:11 Meneng pegsallep te aldaw, minidegà sikandin diyà te dalan. Minibat sikandin diyà te tanà amon tomedogi, aw bato se inolonan din.
GEN 28:12 Migtegeinep sikandin. Kinità din se lelebangan impetindeg diyà te tanà aw minapet iyan te langit, aw medita se anghil egpenayit aw egtenà kidoen.
GEN 28:13 Kinità din heman se Timanem timindeg kidoen, aw minikagi sikandin diyà ki Jacob, “Siak se Timanem gayed egseligan te apò no si Abraham, aw amay no si Isaac. Se tanà seini inibatan nikaw, yan se ibegay ko diyà kamno aw diyà te menge bowad-bowad nikaw.
GEN 28:14 Inangen ko medita se bowad-bowad nikaw igsà eked dan kebilang iling te menge napò te tanà. Meg-ogpà se menge bowad-bowad no doton te kebelad te tanà pengkey kenan nikaw kitai. Mèpiya se ibegay ko diyà te kedita te otaw dini te keneyonan pineokit kamno aw bowad-bowad nikaw.
GEN 28:15 Na, domoma a kamno aw meg-ipat a kamno pengkey kenan ka pesalo. Siak se megpeolì kamno dini te tanà seini. Gayed a domoma kamno lamig tomanen ko se kedita te impakang ko diyà kamno.”
GEN 28:16 Neloka si Jacob, aw minikagi sikandin, “Dini se Timanem te ogpeanan seini, meneng wedà a ketaga-taga kenyan.”
GEN 28:17 Migpeso sikandin, aw minikagi, “Kelemitanan se ogpeanan seini. Balay ini te Timanem. Seini se tetakep te lelebangan te langit.”
GEN 28:18 Pegkeiselem niyan, inabat i Jacob se bato inolonan din, aw impetindeg din iyan amon inangen din iyan kekitaan. Penga niyan, tinoyongan din iyan te lana te olibo, so yan se pengilala te ininang din iyan simbahan te Timanem.
GEN 28:19 Iningedanan din se tanà sìyan Betel (kelebadan niyan, balay te Timanem). Meneng iningedanan Luz se lonsod kidoen kedengan.
GEN 28:20 Penga niyan, migpakang si Jacob diyà te Timanem, kagi din, “Aw domoma ka kanak, aw meg-ipat ka kanak te peg-ipanaw ko, aw memegay ka te kànen aw penenaktun diyà kanak
GEN 28:21 lamig molì a doton te balay te amay ko, yan sikona Timanem se gayed ko seligan.
GEN 28:22 Se bato seini impetindeg ko, yan se inangen ko simbahan kamno, aw ibegay ko heman diyà kamno se ikesempolò ketengà te keyemanan ibegay no diyà kanak.”
GEN 29:1 Nayan, dimeleg si Jacob lamig dimateng sikandin doton te tanà inogpaan te menge otaw lenged te eglibtakan.
GEN 29:2 Dimateng sikandin doton te balon te wayeg binengbangan kidoen mediyò te lonsod. Kinità din se telo ebong te menge karniro minibat medapag te balon. Netipon se karniro so eg-inem dan kidoen. Mebelad se bato insampeng diyà te balon sìyan.
GEN 29:3 Aw egketipon se kedita te karniro kidoen, egkeliden te menge telediyaga se bato lekat te awang te balon, aw egsalok dan te wayeg inemen te karniro. Penga niyan, todà dan iyan egsempengan te bato.
GEN 29:4 Mig-insà si Jacob te menge telediyaga, “Elew, kenan kaw lay lekat?” Timaba dan, “Lekat kay te Haran.”
GEN 29:5 Mig-insà si Jacob, “Kinilala niyo lay si Laban apò i Nahor?” Timaba dan, “Ee. Kinilala day sikandin.”
GEN 29:6 Mig-insà heman si Jacob, “Mèpiya lay se pegkesawol din?” Timaba dan, “Mèpiya man. Na, doton sida se batà din bayi si Raquel nengibing te menge karniro din dini.”
GEN 29:7 Minikagi si Jacob, “Melangkaw pa se aldaw. Wedà pa dateng se oras te pegpeawop te menge karniro doton te kelokob. Mèpiya aw ipeinem niyo dan aw todà niyo dan ipeloyaw.”
GEN 29:8 Timaba dan, “Meneng eked day peinemi se menge karniro singed aw metipon se kedita dan. Penga niyan, mengelid kay te bato lekat te awang te balon, aw ipeinem day se menge karniro.”
GEN 29:9 Telobo pa minikagi si Jacob diyà kandan, dimateng si Raquel nengibing te karniro te amay din, so sikandin se migdiyaga kenyan.
GEN 29:10 Pegkità i Jacob ki Raquel nengibing te menge karniro te emayen din si Laban, dimoton sikandin te balon, aw nengelid sikandin te bato insampeng kenyan, aw simalok sikandin te wayeg inemen te karniro te emayen din.
GEN 29:11 Penga niyan, nengadek si Jacob ki Raquel, aw migkelag sikandin tandà te keluba din.
GEN 29:12 Minikagi sikandin diyà ki Raquel, “Anak a te amay nikaw, so etebay din si Rebecca se inay ko.” Penga niyan, kimagnan si Raquel minolì aw mig-indan sikandin te amay din.
GEN 29:13 Pegketaga-taga i Laban te dimateng se anak din si Jacob, ayas sikandin simongon kandin. Kinelesan sikandin i Laban, aw inedekan din, aw inibing din doton te balay din. Pegdateng dan kidoen, mig-indan si Jacob diyà kandin tepad te kedita neinang diyà kandin.
GEN 29:14 Penga niyan, minikagi si Laban, “Ontò ka anak ko.” Penga niyan, mig-ogpà si Jacob kidoen te sebad se bolan.
GEN 29:15 Nayan, minikagi si Laban diyà ki Jacob, “Pengkey anak ko sikona, meneng eked kepakay aw megterbaho ka diyà kanak aw wedad itandan ko kamno. Na, ikegihi a aw eden se itandan ko kamno.”
GEN 29:16 Dowa se batà laga i Laban. Si Lea se kakay, aw si Raquel se adi din.
GEN 29:17 Mèpiya tengtengen se mata i Lea, meneng ontò beling mèpiya se bawa i Raquel egtengtengen.
GEN 29:18 Ontò dakel se pedowan i Jacob diyà ki Raquel, aw yan minikagi sikandin, “Aw mepakay pengognanen ko si Raquel, megterbaho a dini kamno te pito se omay.”
GEN 29:19 Minikagi si Laban, “Mèpiya aw sikona se ipepengognan ko diyà kandin, so sikona se labi mèpiya diyà te menge doma otaw mengognan peden kandin. Na, pegterbaho ka den diyà kanak.”
GEN 29:20 Penga niyan, migterbaho si Jacob te pito se omay amon pengognanen din si Raquel, meneng diyà te aneng-aneng i Jacob, iling te pilabok olò se aldaw sìyan so dakel se pedowan din diyà ki Raquel.
GEN 29:21 Penga niyan, minikagi si Jacob diyà ki Laban, “Netagkas den se pito se omay. Peipidi den se batà no diyà kanak.”
GEN 29:22 Yan migpeinang si Laban te dakel kànen, aw impetanod din se kedita te otaw mig-ogpà kidoen.
GEN 29:23 Meneng pegkedelem niyan, si Lea beling se impeipid i Laban diyà ki Jacob, aw yan se lineyokan i Jacob.
GEN 29:24 Imbegay i Laban se allang din bayi si Zilfa diyà ki Lea amon megtelaban kandin.
GEN 29:25 Pegkeiselem niyan, kinità i Jacob te si Lea se impeipid i Laban diyà kandin, aw yan mig-insà sikandin diyà ki Laban, “Nengà lay mig-inang ka te medaet diyà kanak? Si Raquel se impakang no diyà kanak tepad te terbaho ko. Nengà lay mig-akal ka kanak?”
GEN 29:26 Timaba si Laban, “Doen ketanem day dini te eked kepakay aw ipepengognan se adi laga singed aw onà ipepengognan se kakay din laga.
GEN 29:27 Pegtagad ka den te sebad simana lamig mepenga se peipid no ki Lea. Penga niyan, aw megterbaho ka diyà kanak te pito mendad se omay, ibegay ko heman kamno se adi din si Raquel.”
GEN 29:28 Yan se ininang i Jacob. Penga te sebad simana te peipid sìyan, imbegay heman i Laban se batà din si Raquel diyà ki Jacob amon meinang heman esawa din.
GEN 29:29 Imbegay heman i Laban se allang din bayi si Bilha diyà ki Raquel amon megtelaban kandin.
GEN 29:30 Limayok heman si Jacob diyà ki Raquel. Deitek se pedowan i Jacob diyà ki Lea, meneng dakel se pedowan din diyà ki Raquel. Penga niyan, migterbaho si Jacob diyà ki Laban te pito mendad se omay.
GEN 29:31 Pegketaga-taga te Timanem te deitek se pedowan i Jacob diyà ki Lea, impebatà din si Lea. Meneng wedà beling peglaman si Raquel.
GEN 29:32 Miglaman si Lea aw tinebawan sikandin te batà meama. Iningedanan din se batà din ki Ruben (kelebadan niyan, kinità se kelimahan), so minikagi sikandin, “Kinità te Timanem se kelimahan ko. Kedekelan a den besi te esawa ko te pedowan.”
GEN 29:33 Todà sikandin miglaman, aw tinebawan heman sikandin te batà meama. Minikagi sikandin, “Binegayan a heman te Timanem te batà seini, so dinineg din te deitek se pedowan te esawa ko diyà kanak.” Yan iningedanan din se batà din ki Simeon (kelebadan niyan, egdineg).
GEN 29:34 Todà miglaman si Lea, aw tinebawan heman sikandin te batà meama. Penga niyan, minikagi sikandin, “Kedekelan a den besi te pedowan te esawa ko, so tinebawan a den te telo batà din meama.” Yan iningedanan din se batà din ki Levi (kelebadan niyan, kedekelan).
GEN 29:35 Todà miglaman si Lea, aw tinebawan heman sikandin te batà meama. Penga niyan, minikagi sikandin, “Iduyun ko den se Timanem.” Yan iningedanan din se batà din ki Juda (kelebadan niyan, pegduyun). Penga niyan, wedà den sikandin todà pegbatà.
GEN 30:1 Pegketaga-taga i Raquel te wedad batà timebaw diyà kandin, miningà sikandin te kakay din. Minikagi sikandin diyà ki Jacob, “Aw eked a no pebetai, matay a.”
GEN 30:2 Neopal si Jacob diyà ki Raquel, aw minikagi sikandin, “Kenà a man Timanem! Sikandin se wedà pemebatà kamno.”
GEN 30:3 Minikagi si Raquel, “Ibegay ko diyà kamno se allang ko si Bilha. Layok ka den diyà kandin amon doen peden batà tomebaw diyà kandin pegbetaen ko. Yan doen peden menge batà ko pineokit kandin.”
GEN 30:4 Yan imbegay i Raquel se allang din si Bilha diyà ki Jacob amon inangen din esawa din. Pegpeleyokay dan,
GEN 30:5 miglaman si Bilha, aw tinebawan sikandin te batà meama.
GEN 30:6 Penga niyan, minikagi si Raquel, “Impelangkaw a den te Timanem. Nenenalan sikandin te pinemoyò ko, aw binegayan a din te batà meama.” Yan se doun te iningedanan din se batà din ki Dan (kelebadan niyan, impelangkaw).
GEN 30:7 Todà miglaman si Bilha aw tinebawan sikandin te ikedowa batà din meama.
GEN 30:8 Minikagi si Raquel, “Kedengan dinaeg a te kakay ko, meneng songkani dinaeg ko heman sikandin.” Yan iningedanan din se batà din ki Neftali (kelebadan niyan, bolaw).
GEN 30:9 Na, pegketaga-taga i Lea te wedà todà sikandin pegbatà, imbegay din heman se allang din si Zilfa diyà ki Jacob amon meinang heman sikandin esawa din.
GEN 30:10 Penga niyan, doen batà meama timebaw diyà ki Zilfa.
GEN 30:11 Minikagi si Lea, “Neidowan a te Timanem!” Yan iningedanan din se batà din ki Gad (kelebadan niyan, neidowan).
GEN 30:12 Doen ikedowa batà meama i Jacob timebaw diyà ki Zilfa.
GEN 30:13 Minikagi si Lea, “Ontò neluba se pedowan ko! Mikagi se menge doma bayi te ontò a neluba.” Yan iningedanan din se batà din ki Aser (kelebadan niyan, keluba).
GEN 30:14 Dalem te peglegani te trigo, dimoton si Ruben te pawà, aw neketalà sikandin te menge pongo te sagbet iningedanan mandragora egpengànen te bayi meibeg megbatà. Inibing din iyan doton te inay din si Lea. Minikagi si Raquel diyà ki Lea, “Begayi a heman te menge mandragora inibing te batà nikaw.”
GEN 30:15 Minikagi si Lea, “Pengkey inagaw no se esawa ko, meneng kenà besi botong se medaet ininang no sìyan, so egawen no den heman se menge mandragora inibing te batà ko diyà kanak!” Minikagi si Raquel, “Aw ibegay no den diyà kanak se menge mandragora netelaan te batà nikaw, mepakay diyà kanak aw sikona se leyokan i Jacob kwani delem.”
GEN 30:16 Peg-olì i Jacob lekat te pawà te meapon, simongon si Lea kandin, aw minikagi sikandin, “Keilangan lomayok ka diyà kanak kwani delem, so netelaan te batà ta se menge mandragora, aw yan se imbayad ko kamno diyà ki Raquel.” Yan se doun te si Lea se lineyokan i Jacob te delem sìyan.
GEN 30:17 Nenenalan se Timanem te pinemoyò i Lea, aw yan miglaman sikandin, aw tinebawan te ikelima batà meama i Jacob.
GEN 30:18 Minikagi si Lea, “Mèpiya se ontong imbegay te Timanem diyà kanak, so imbegay ko se allang ko diyà ki Jacob.” Yan iningedanan din se batà din ki Isacar (kelebadan niyan, ontong).
GEN 30:19 Todà miglaman si Lea, aw tinebawan sikandin te ikeenem batà meama i Jacob.
GEN 30:20 Minikagi si Lea, “Ontò meelagà se imbegay te Timanem diyà kanak. Na, segmanen a den besi te esawa ko, so enem den se batà din meama timebaw diyà kanak.” Yan iningedanan din se batà din ki Sabulon (kelebadan niyan, sagman).
GEN 30:21 Pegkenamay-namay, tinebawan si Lea te batà bayi, aw iningedanan din se batà din ki Dina.
GEN 30:22 Wedà kelibeli te Timanem si Raquel, so nenenalan se Timanem te pinemoyò din, aw impebatà din sikandin.
GEN 30:23 Miglaman sikandin aw tinebawan heman te batà meama. Minikagi sikandin, “Inabat den te Timanem se nekeyàyà kanak.”
GEN 30:24 Iningedanan i Raquel se batà din ki Jose (kelebadan niyan, dogangan), so minikagi sikandin, “Ibeg ko begayan a pa te Timanem te doma batà meama.”
GEN 30:25 Penga te pegtebaw i Jose, minikagi si Jacob diyà ki Laban, “Pekeseyowi a lekat dini amon mekeolì a doton te tanà tinebawan ko.
GEN 30:26 Ikà egtameng te menge esawa ko aw menge batà ko, so yan se ontong tepad te terbaho ko diyà kamno. Mesayo kay den. Netegahan no te mèpiya se terbaho ko diyà kamno.”
GEN 30:27 Minikagi si Laban, “Aw doen keido no diyà kanak, peg-ogpà ka pa dini. Ikà egkesayo, so pineokit te pegpeneleseb ko, netegahan ko te mèpiya se imbegay te Timanem diyà kanak tandà te peg-ogpà no dini kanak.
GEN 30:28 Pengkey eden se ibeg no itandan ko diyà kamno, yan se ibegay ko diyà kamno.”
GEN 30:29 Minikagi si Jacob, “Netegahan no te mèpiya se terbaho ko diyà kamno, aw mèpiya heman se pegbowad-bowad te menge ayam-ayam nikaw so siak se migtonggò kenyan.
GEN 30:30 Kedengan te wedà a pa dateng dini, olò deitek se keyemanan nikaw. Meneng ontò ka den migkeyaman, so mèpiya se imbegay te Timanem diyà kamno pineokit te kedita te ininang ko. Meneng songkani, keilangan doen ontong te kenaken pamilya pineokit te inangen ko.”
GEN 30:31 Mig-insà si Laban, “Eden lay se itandan ko diyà kamno?” Timaba si Jacob, “Wedad itandan no diyà kanak. Meneng aw meibeg ka te megtonggò a pa te kamno menge ayam-ayam, keilangan tomandù ka te sebad olò ikegiyen ko kamno seini.
GEN 30:32 Te aldaw seini, tomeped a te kedita te ayam-ayam nikaw, aw ebaten ko se kedita te nati te karniro meitem aw kedita te nati te kambing boling. Taman iyan se ibegay no diyà kanak.
GEN 30:33 Te modi aldaw, ketegahan no aw keseligan a aw kenà, so aw tomengteng ka diyà te menge ayam-ayam imbegay no diyà kanak, aw kitaen no se kambing kidoen kenà boling, aw karniro kenà meitem, ketegahan no te tinakaw ko iyan.”
GEN 30:34 Minikagi si Laban, “Ee. Tomanen ko kamno se inikagi nikaw.”
GEN 30:35 Dalem te aldaw sìyan, inabat i Laban se kedita te kambing boling aw doen bolbol migsanged te mepotì pengkey meama aw bayi, aw kedita te karniro meitem, aw impetonggò din iyan te menge batà din meama.
GEN 30:36 Inibing dan se menge ayam-ayam sìyan doton te mediyò tanà eked keapet singed aw mipanaw se otaw te telo se aldaw. Migtonggò si Jacob te menge ayam-ayam i Laban nesamà.
GEN 30:37 Penga niyan, nengabat si Jacob te menge panga te kayo alamo, almendras, aw platano, aw pinelisan din iyan, meneng doen elet-elet wedà din pelisi amon doen batek niyan.
GEN 30:38 Intollok din se menge panga sìyan medapag te loboganan te menge ayam-ayam amon kitaen dan iyan te peg-inem dan kidoen. Peg-inem te menge kambing, migpebelagay dan.
GEN 30:39 Pegpebelagay dan doton medapag te panga binetekan, boling se menge pispis timebaw kenyan.
GEN 30:40 Tinani i Jacob se menge karniro aw kambing, aw impeasdang din se menge karniro diyà te menge ayam-ayam i Laban boling aw meitem. Pineokit niyan, ininang din medita se kandin ayam-ayam, aw wedà din iyan peeyoni diyà te menge ayam-ayam i Laban.
GEN 30:41 Pegpebelagay te menge ayam-ayam melambò, gayed migsawol si Jacob te menge panga binetekan doton medapag te loboganan, amon kitaen dan iyan te pegpebelagay dan.
GEN 30:42 Meneng aw megasà se menge ayam-ayam, wedà din soli se menge panga binetekan. Wedà kenamay, si Laban se neketig-apò te kedita te ayam-ayam megasà, aw si Jacob se neketig-apò te kedita te melambò.
GEN 30:43 Pineokit kenyan, ontò migkeyaman si Jacob. Medita se ayam-ayam, allang, kamilo, aw asno tinig-apò din.
GEN 31:1 Dinineg i Jacob te migbelisì se menge bayaw din, sìyan menge batà i Laban. Minikagi dan, “Nengabat den si Jacob te kedakel te kedònan i Amà. Lekat ki Amà se kedakel te keyemanan i Jacob.”
GEN 31:2 Kinità heman i Jacob te deitek den se pedowan i Laban diyà kandin, so kenà den iling te kedakel te pedowan din kedengan.
GEN 31:3 Minikagi se Timanem diyà ki Jacob, “Olì ka den doton te tanà inogpaan te amay nikaw, apò nikaw, aw menge kedomaan nikaw. Domaan ta sikona.”
GEN 31:4 Yan intogon i Jacob si Raquel aw si Lea te megkità dan kandin doton te tanà tinonggoan din te menge ayam-ayam.
GEN 31:5 Pegdateng dan doton, minikagi si Jacob, “Kinità ko te deitek den se pedowan te amay niyo diyà kanak, so kenà den iling te kedakel te pedowan din kedengan. Meneng gayed a egdomaan te Timanem egseligan te amay ko.
GEN 31:6 Netegahan niyo te ontò a measeb te pegterbaho ko diyà te amay niyo.
GEN 31:7 Meneng gayed a din beling inekalan, so mekesempolò din todai se pakang din tepad te itandan din diyà kanak. Meneng pineokit te tabang te Timanem kanak, wedà a din peelegi.
GEN 31:8 Te kelikit te pegpakang te amay niyo diyà kanak, ‘Kedita te kambing boling se itandan ko diyà kamno,’ yan tomalag boling se timebaw. Aw te kelikit te pegpakang din diyà kanak, ‘Kedita te kambing beteken se itandan ko diyà kamno,’ yan tomalag beteken se timebaw.
GEN 31:9 Pineokit kenyan, impelowà te Timanem se menge ayam-ayam lekat te belad te amay niyo, aw imbegay din iyan diyà kanak.
GEN 31:10 “Kedengan dalem te pegpebelagay te kambing, migtegeinep a. Kinità ko te beteken aw boling se kedita te kambing meama migbalag.
GEN 31:11 Dalem te pegtegeinep ko, minikagi se anghil te Timanem diyà kanak, ‘E Jacob.’ Timaba a, ‘Seini a.’
GEN 31:12 Minikagi se anghil, ‘Tengtengi iyan. Beteken aw boling olò se kedita te kambing meama migbalag. Inangen ko medita se ayam-ayam nikaw, so kinità ko se kedita te medaet eg-inangen i Laban diyà kamno.
GEN 31:13 Siaken se Timanem migpekità diyà kamno kedengan kidoen te Betel. Kidoen ininang no kekitaan se bato tinoyongan no te lana, aw migpakang ka heman kanak. Na, kesayo ka den lekat te ogpeanan seini, aw olì ka den doton te tanà tinebawan nikaw.’”
GEN 31:14 Minikagi si Raquel aw si Lea, “Wedad den palos nesamà ibegay diyà kenami aw matay se amay day.
GEN 31:15 Eg-aneng-aneng den sikandin te iling kay te kenà batà din. Imbeligyà kay din iling te allang, aw neamin den se imbayad no diyà kandin.
GEN 31:16 Inabat te Timanem se kedakel te keyemanan te amay day, aw kenitadon den iyan sipat te menge batà tadon. Yan keilangan tomolò ka te kedita te impunù te Timanem diyà kamno.”
GEN 31:17 Penga niyan, impesakay i Jacob se menge batà din aw menge esawa din diyà te menge kamilo.
GEN 31:18 Impeipanaw din se kedita te ayam-ayam din doton te monà, aw inlolan din heman se kedakel te kedònan neabat din kidoen te Mesopotamya. Nesayo sikandin migpesalo doton te tanà te amay din si Isaac kidoen te Canaan.
GEN 31:19 Pegkesayo dan, wedad kidoen si Laban, so dimoton sikandin te menge karniro din impeloyaw amon meglegonting kenyan. Nengabat si Raquel te menge inotaw lekat te balay te amay din.
GEN 31:20 Mig-akal si Jacob ki Laban, so wedà din sebihi tepad te pegkesayo din.
GEN 31:21 Inibing i Jacob se kedakel te kedònan din aw kimadas sikandin. Minatas dan te wayeg te Yofritis, aw migpesalo dan doton te bontod te Galaad.
GEN 31:22 Penga te telo se aldaw, inindanan si Laban te kimadas si Jacob.
GEN 31:23 Yan impetaking din se menge kedomaan din, aw mig-alaw dan kandin. Penga te pito se aldaw, nekesaeb dan kandin doton te bontod te Galaad.
GEN 31:24 Te wedà dan pa pekesaeb kandin, migpekità se Timanem diyà ki Laban te delem pineokit te tegeinep, aw minikagi sikandin, “Peg-ahà ka. Ikà egleges ki Jacob.”
GEN 31:25 Mig-ogpà si Jacob doton te bontod te Galaad. Pegpekesaeb i Laban aw menge kedomaan din ki Jacob, mig-ogpà dan heman kidoen.
GEN 31:26 Minikagi si Laban diyà ki Jacob, “Medaet se ininang nikaw. Mig-akal ka kanak, aw inibing no se menge batà ko iling te otaw nedakep te mengengayaw.
GEN 31:27 Nengà lay mig-akal ka kanak? Nengà lay nesayo ka te wedà a no sebihi? Aw simabi ka peden kanak, yan mèpiya se pegpekesayo ko kamno, so mèpiya se keluba tadon, aw pegdelangan tadon, aw pegpedaging tadon te edel aw sista.
GEN 31:28 Wedà a no peedeki te menge apò ko aw batà ko te pegkesayo niyo. Medaet se ininang no sìyan.
GEN 31:29 Pengkey mebatog ko se pegpeeleg kamno, meneng tidelem pinunuan a te Timanem egseligan te amay no te eked kepakay aw megleges a kamno.
GEN 31:30 Netegahan ko te nesayo ka den so ibeg no molì ka doton te amay nikaw. Meneng nengà lay tinakaw no se menge inotaw lekat te balay ko?”
GEN 31:31 Timaba si Jacob, “Mig-akal a kamno so nelemitan a. Mig-aneng-aneng a te ewien no se menge esawa ko.
GEN 31:32 Meneng aw kitaen no se otaw dini nenakaw te inotaw nikaw, imetayan ko sikandin. Na, megsistigos se menge kedomaan ta. Pemahà ka den. Aw doen kedònan no kitaen no dini, ebati iyan.” Yan se inikagi i Jacob so wedà din ketegahi te si Raquel se nengabat te menge inotaw i Laban.
GEN 31:33 Penga niyan, nengemahà si Laban doton te tolda inogpaan i Jacob, aw tolda inogpaan i Lea, aw tolda te didowa allang bayi, meneng wedad palos kinità din kidoen. Penga niyan, minawop sikandin diyà te tolda inogpaan i Raquel.
GEN 31:34 Tapay in-eles i Raquel se inotaw doton te siyà te kamilo din, aw nenenoo sikandin kidoen. Kinelokad i Laban se kedita te kedònan doton te tolda inogpaan din, meneng wedad palos kinità din.
GEN 31:35 Minikagi si Raquel diyà te amay din, “Amà, ikà bag egkeopal diyà kanak, meneng eked a den peketindeg, so pigdònan a den.” Yan pengkey ontò kinelokad i Laban, meneng wedà din kitai se menge inotaw din.
GEN 31:36 Ontò neopal si Jacob, aw nenompelà sikandin ki Laban. Minikagi sikandin, “Eden lay se salà ininang ko diyà kamno? Eden lay se punù linèpangan ko so gayed a no pig-alaw?
GEN 31:37 Kinelokad no den se kedakel te kedònan ko. Eden lay se tinakaw lekat kamno? Aw doen kinità nikaw, soli den iyan dini te menge kedomaan ta amon meg-osay dan kenita.
GEN 31:38 “Migterbaho a den diyà kamno te kelowan se omay. Dalem te pegtonggò ko te kamno menge ayam-ayam, wedà palos keogali se menge karniro aw kambing nikaw. Wedad karniro no kinaen ko.
GEN 31:39 Aw doen ayam-ayam no inimetayan te menenanap te kebenesan, wedà ko iyan ibingi diyà kamno, meneng kanak ayam-ayam se inselilin ko kenyan. Aw doen tinakaw pengkey aldaw aw delem, impebayad no iyan kanak.
GEN 31:40 Melima se terbaho ko. Melikit a egkeilad te aldaw, aw egkegenawan a te delem. Gayed a egkepolaw.
GEN 31:41 Yan se kelimahan ko dalem te kelowan se omay te pegterbaho ko diyà kamno. Sempolò teg epat se omay se pegterbaho ko diyà kamno amon isablag ko te didowa batà nikaw. Enem se omay se pegterbaho ko diyà kamno amon ibayad ko te menge ayam-ayam seini, aw mekesempolò nikaw todai se pakang no tepad te itandan no diyà kanak.
GEN 31:42 Meneng tinebangan a te Timanem egseligan te apò ko si Abraham aw amay ko si Isaac. Aw wedà a din tebangi, nenamay a nikaw den impekesayo te wedad palos ontong ko. Meneng kinità te Timanem se kelimahan ko aw pagod ko, aw yan tinompelà ka din tidelem.”
GEN 31:43 Minikagi si Laban, “Kanak batà se menge esawa nikaw, aw kanak apò se menge batà dan. Kanak heman se menge ayam-ayam seini. Pengkey eden se kitaen no dini, tomalag iyan kanak. Meneng eked kepakay aw megpeeleg a te menge batà ko aw menge apò ko.
GEN 31:44 Mèpiya aw megpepekangay ki den. Mèpiya heman aw doen kekitaan inangen ta amon eked ta kelibeli se pakang ta.”
GEN 31:45 Penga niyan, inabat i Jacob se dakel bato, aw impetindeg din iyan amon meinang kekitaan.
GEN 31:46 Minikagi sikandin diyà te menge kedomaan din, “Pengimon kaw heman te menge doma bato.” Yan nengimon dan te menge bato, aw binonton dan iyan, aw penga niyan kimaen dan doton medapag kenyan.
GEN 31:47 Iningedanan iyan i Laban Jegar Sahaduta diyà te kagi te Aramea (kelebadan niyan, peg-imon te kekitaan), aw iningedanan iyan i Jacob Galeed diyà te kagi te Hebreo (onawa se kelebadan niyan).
GEN 31:48 Minikagi si Laban, “Se menge bato binonton seini, yan se kekitaan ta amon eked ta kelibeli se pakang ta.” Yan se doun te iningedanan se tanà sìyan Galeed.
GEN 31:49 Iningedanan heman iyan Mispa (kelebadan niyan, benteyanan), so minikagi heman si Laban diyà ki Jacob, “Penga te pegsoway ta kwani, Timanem se megbantay diyà te tengà-tengà ta amon eked ki pegbolaw.
GEN 31:50 Aw ipeeleg no se menge batà ko, sìyan esawa nikaw, aw pengognanen no se doma bayi kenà batà ko, pengkey eked ko iyan ketegahi, meneng kitaen iyan te Timanem aw ipelumun ka din.
GEN 31:51 Dini den se menge bato binonton ko diyà te tengà-tengà ta, aw dini den se bato ininang kekitaan ta.
GEN 31:52 Insawol ta iyan dini amon eked ta kelibeli se pakang ta seini. Eked a palos làpang te menge bato seini amon megpeeleg a kamno, aw eked ka palos heman làpang kani amon megpeeleg ka kanak.
GEN 31:53 Aw lèpangan ta se pakang seini, ipelumun ki te Timanem egseligan i Abraham aw si Nahor.” Penga niyan, migsapà heman si Jacob pineokit te ngadan te Timanem egseligan te amay din si Isaac.
GEN 31:54 Inimetayan din heman se ayam-ayam, aw sinonog din iyan, aw imbegay din iyan diyà te Timanem doton te bontod. Mig-inang heman sikandin te kànen, aw impekaen din se menge kedomaan din. Penga te pegpengaen dan, minidegà dan kidoen.
GEN 31:55 Pegkeiselem niyan, nengadek si Laban te menge apò din aw batà din, aw migtawal-tawal sikandin amon mèpiya se ibegay te Timanem diyà kandan. Penga niyan, nesayo sikandin aw minolì.
GEN 32:1 Nayan, dimeleg si Jacob, aw migkità sikandin te menge anghil kidoen te dalan.
GEN 32:2 Pegkità din kandan, minikagi sikandin, “Seini se eg-ogpaan te Timanem.” Yan iningedanan iyan Mahanaim (kelebadan niyan, dowa ogpeanan).
GEN 32:3 Doen menge otaw insogò i Jacob impeonà din doton te kedowa din si Esau kidoen te tanà te Edumea.
GEN 32:4 Migpunù si Jacob diyà kandan, “Keliwati niyo se kagi ko seini diyà te kakay ko si Esau egsegmanen ko. ‘Siaken se sineligan no si Jacob. Mig-ogpà a doton ki Tiyò Laban lamig te peg-olì ko seini.
GEN 32:5 Medita den se baka, asno, karniro, kambing, aw allang tinig-apò ko. Simabi a den kamno Akay, tepad te pegdateng ko, so doen pa besi keido no diyà kanak.’”
GEN 32:6 Peglikò te otaw insogò i Jacob, minikagi dan, “Dimoton kay te kedowa no si Esau, aw nesayo den sikandin amon somongon kamno. Epat gatos se otaw impetaking din.”
GEN 32:7 Yan nelemitan si Jacob, aw netetana se pedowan din. Tinengà din se otaw timaking kandin, aw tinengà din heman se menge karniro, kambing, baka, aw kamilo din.
GEN 32:8 Mig-aneng-aneng sikandin, “Aw lompaken i Esau se monà ebong, mekelowà besi se modi ebong.”
GEN 32:9 Penga niyan, migtawal-tawal si Jacob, “E Timanem egseligan te apò ko si Abraham aw amay ko si Isaac. Pengolo ko, sikona se minikagi diyà kanak te keilangan molì a doton te tanà tinebawan ko aw menge kedomaan ko, aw migpakang ka heman te dakel se ibegay no diyà kanak.
GEN 32:10 Pelaban dakel se keido no diyà kanak wedad temanan niyan, so ontò a medanà diyà kamno. Kedengan te pegbatas ko te wayeg te Jordan pesalo doton ki Laban, wedad palos inibing ko olò bangkà. Meneng songkani doen den dowa dakel ebong ko seini.
GEN 32:11 Tebangi a bag seini amon eked a peelegi te kedowa ko si Esau. Nelemitan a aw lomompak sikandin diyà kenami, aw megelà se kedita day sipat te menge esawa ko aw menge batà ko.
GEN 32:12 Meneng migpakang ka te mèpiya se ibegay no diyà kanak, aw inangen no medita se bowad-bowad ko iling te enay doton te dagat eked kebilang.”
GEN 32:13 Minidegà si Jacob kidoen. Pinemallì din se menge ayam-ayam din kidoen amon doen ibowang din diyà ki Esau.
GEN 32:14 Dowa gatos se kambing bayi, kelowan se kambing meama, dowa gatos se karniro bayi, kelowan se karniro meama,
GEN 32:15 ketlowan se kamilo bayi sipat nati niyan, kepatan se baka bayi, sempolò se baka meama, kelowan se asno bayi, aw sempolò se asno meama.
GEN 32:16 Impeebong-ebong din se kedita dan, aw doen sineligan impetonggò din diyà te tegsebad-sebad ebong. Minikagi sikandin diyà te menge sineligan din, “Keilangan mengibing kaw te menge ayam-ayam doton te monà day, aw keilangan doen heman elet diyà te tegsebad-sebad ebong.”
GEN 32:17 Minikagi si Jacob diyà te sineligan ontò din impeonà, “Aw kitaen no se kedowa ko si Esau, aw meg-insà sikandin aw sinu se amo nikaw aw kenan ka pesalo aw sinu se tig-apò te menge ayam-ayam inibing nikaw,
GEN 32:18 keilangan tomaba ka diyà kandin, ‘Seini se menge ayam-ayam te sineligan no si Jacob. Impeibing din iyan amon ibowang diyà kamno. Doton pa sikandin te modi.’”
GEN 32:19 Yan heman se impunù i Jacob diyà te ikedowa aw iketelo te otaw aw diyà te kedita te doma otaw nengibing te menge ayam-ayam. Minikagi sikandin, “Aw komità kaw kandin, keilangan onawa heman se ikegiyen niyo.
GEN 32:20 Keilangan mikagi kaw diyà kandin, ‘Doton pa te modi se sineligan no si Jacob.’” Yan se impunù din diyà kandan, so mig-aneng-aneng sikandin, “Pineokit te ibowang ko diyà kandin, megkèpiya se pedowan din diyà kanak. Yan aw megkità kay, pegwedaden din besi se salà ininang ko diyà kandin.”
GEN 32:21 Yan impeonà i Jacob se ibowang din, meneng minidegà pa sikandin kidoen.
GEN 32:22 Pegkedelem niyan, minenaw si Jacob aw inibing din se dowa esawa din, aw dowa allang dan, aw sempolò tegusà batà din meama, aw impebatas din dan diyà te wayeg te Jordan kidoen te Jaboc.
GEN 32:23 Penga te pegpebatas din kandan, impebatas din heman se kedita te ayam-ayam tinig-apò din.
GEN 32:24 Olò si Jacob se wedà batas. Penga niyan, doen migpekità diyà ki Jacob aw migpeliyangay dan lamig te iselem.
GEN 32:25 Pegketaga-taga te otaw sìyan te eked dàgi si Jacob, inewidan din se pangkol i Jacob, aw neliyu iyan.
GEN 32:26 Minikagi se otaw sìyan, “Pelowai a den, so agpet den lomibtak se aldaw.” Meneng minikagi si Jacob, “Eked a singed aw begayan a no te mèpiya.”
GEN 32:27 Mig-insà se otaw sìyan, “Sinu lay se ngadan nikaw?” Timaba sikandin, “Siak si Jacob.”
GEN 32:28 Minikagi se otaw sìyan, “Lekat seini, eked ka den ingedani ki Jacob, meneng ingedanan ka beling ki Israel (kelebadan niyan, minato diyà te Timanem). So migpeliyangay ka aw Timanem, domaeg ka heman te menge otaw.”
GEN 32:29 Mig-insà si Jacob, “Sinu ka lay bag?” Timaba se otaw sìyan, “Ikà eg-insà aw sinu a.” Penga niyan, mèpiya se impakang din diyà ki Jacob, aw nesayo sikandin.
GEN 32:30 Iningedanan i Jacob se tanà sìyan Peniel (kelebadan niyan, bawa te Timanem), so minikagi sikandin, “Kinità ko den se bawa te Timanem, meneng wedà a kedì kematay.”
GEN 32:31 Peglibtak te aldaw, nesayo si Jacob lekat te Peniel. Miglengkiyod sikandin tandà te pegkeliyu te pangkol din.
GEN 32:32 Doun niyan, pengkey lamig songkani, kenà egpengànen te menge bowad-bowad i Israel se ogat te pangkol te ayam-ayam eg-iyawen dan, so yan se inewidan te Timanem te pangkol i Jacob.
GEN 33:1 Nayan, pegkità i Jacob ki Esau doton te mediyò sipat te epat gatos otaw timaking kandin, impetonggò din se menge batà din ki Lea aw si Raquel aw sìyan dowa allang dan.
GEN 33:2 Impeonà din se dowa allang aw menge batà dan, aw impetelokon din se Lea aw menge batà din, aw impemodi din si Raquel aw si Jose.
GEN 33:3 Penga niyan, si Jacob se minonà diyà te kedita dan, aw mekepito sikandin longken diyà te tanà te pegpedapag din diyà te kakay din.
GEN 33:4 Meneng kimagnan si Esau simongon ki Jacob, aw kimeles sikandin te adi din, aw nengadek kandin. Didowa dan se migkelag.
GEN 33:5 Penga niyan, kinità i Esau se menge bayi aw mengisù. Mig-insà sikandin, “Sinu lay se menge doma nikaw?” Timaba si Jacob, “Akay, seini se menge batà ko imbegay te Timanem diyà kanak tandà te keido din.”
GEN 33:6 Penga niyan, migpedapag se didowa allang aw menge batà dan, aw limongken dan.
GEN 33:7 Penga niyan, migpedapag si Lea aw menge batà din, aw limongken dan. Penga niyan, migpedapag heman si Jose aw si Raquel, aw limongken dan.
GEN 33:8 Mig-insà si Esau, “Menonen no se medita ayam-ayam nesongonan ko gina? Eden lay se tod no kenyan?” Timaba si Jacob, “Amon keidowan a no peden Akay.”
GEN 33:9 Meneng minikagi si Esau, “Botong den se kanak. Kamno den iyan.”
GEN 33:10 Minikagi si Jacob, “Kenà. Aw doen keido no diyà kanak, kinewai bag se ibowang ko diyà kamno. Pegliyag no kanak, iling te liniyagan a te Timanem, so mèpiya den beling se pedowan no diyà kanak.
GEN 33:11 Kinewai bag se bowang seini impeibing ko diyà kamno, so mèpiya se tabang te Timanem diyà kanak, aw botong se kedònan ko.” Gayed migleges si Jacob kandin, aw yan kiminawà si Esau kenyan.
GEN 33:12 Minikagi si Esau, “Na, mesayo kidon den. Domengan a den kenyo.”
GEN 33:13 Meneng minikagi si Jacob, “Akay, netegahan no te deitek pa se menge batà ko, aw keilangan megpeloway-loway se menge karniro aw baka ko doen nati. Aw pelaban megaen se pegpengibing day kenyan te olò sebad se aldaw, matay se kedita niyan.
GEN 33:14 Mèpiya beling aw monà ka diyà kenami, aw megpeloway-loway kay tomelokon kamno taman te mebatog te menge ayam-ayam aw batà ko lamig mekesaeb kay kamno doton te Edumea.”
GEN 33:15 Minikagi si Esau, “Yan mèpiya aw doen menge otaw ipedengan ko kenyo.” Meneng minikagi si Jacob, “Ikà eg-inang kenyan. Neluba a den so mèpiya se pedowan no diyà kanak.”
GEN 33:16 Penga niyan dalem te aldaw sìyan, nesayo si Esau aw minolì doton te Edumea.
GEN 33:17 Meneng dimeleg beling si Jacob doton te Sucot, aw mig-inang sikandin te menge layag ogpaan dan aw menge kelokob te ayam-ayam. Doun niyan, iningedanan se lonsod sìyan Sucot (kelebadan niyan, menge kelokob).
GEN 33:18 Peg-olì i Jacob lekat te Mesopotamya, dimeleg sikandin doton te lonsod te Sikem kidoen te Canaan te wedad nemeeleg kandin. Mig-ogpà sikandin doton te tanà medapag te lonsod sìyan.
GEN 33:19 Bineyadan din se tanà sìyan inogpaan din. Sebad gatos plata se kwarta dan selapì se imbayad din kenyan diyà te menge bowad-bowad i Hamor amay i Sikem.
GEN 33:20 Mig-inang si Jacob te sonoganan te ayam-ayam ibegay diyà te Timanem, aw iningedanan din iyan El Elohe Israel (kelebadan niyan, magsen se Timanem egseligan i Israel).
GEN 34:1 Na, si Dina se batà laga i Jacob aw si Lea. Doen sebad aldaw, miglegeana si Dina doton te menge laga mig-ogpà kidoen.
GEN 34:2 Kinità sikandin i Sikem batà meama te datò kidoen si Hamor tege Hebi. Dinakep i Sikem si Dina, aw lineyokan din.
GEN 34:3 Neibeg si Sikem ki Dina, aw ontò dakel se pedowan din diyà kandin, aw mèpiya se inikagi din diyà kandin.
GEN 34:4 Minikagi heman si Sikem diyà te amay din, “Ibeg ko megkagon ka tepad te bayi sìyan amon pengognanen ko sikandin.”
GEN 34:5 Dinineg i Jacob tepad te pegleges ki Dina, meneng so migtonggò se menge batà din meama te menge ayam-ayam din doton mediyò te balay, yan wedad ininang din lamig minolì dan.
GEN 34:6 Dimoton si Hamor amay i Sikem ki Jacob amon megsontal dan.
GEN 34:7 Dalem niyan, minolì se menge batà i Jacob. Pegdineg dan te lineges i Sikem si Dina, ontò nepuluk se pedowan dan aw ontò dan neopal, so pigyàyà i Sikem se menge batà i Israel, aw eked iyan kepakay inangen.
GEN 34:8 Meneng minikagi si Hamor diyà kandan, “Ontò dakel se pedowan te batà ko si Sikem diyà te batà no si Dina. Pepengognani niyo bag sikandin diyà kandin.
GEN 34:9 Mèpiya aw gayed megpepengognanay se menge batà ta.
GEN 34:10 Mepakay heman aw meg-ogpà kaw dini kenami. Pemellii niyo se mèpiya ogpaan niyo. Mepakay se peg-ogpà niyo dini, aw pegnigosyo niyo dini, aw pegketig-apò niyo te tanà dini.”
GEN 34:11 Penga niyan, minikagi si Sikem diyà te amay aw menge kedowa i Dina, “Aw keidowan a niyo aw ibegay niyo diyà kanak se bayi sìyan, pengkey eden se pemoyoen niyo, yan se ibegay ko diyà kenyo.
GEN 34:12 Indani a niyo aw eden se isablag ko aw ibowang ko, so pengkey eden se pemoyoen niyo, yan se ibegay ko diyà kenyo. Pepengognani a niyo bag kandin.”
GEN 34:13 Meneng pegtaba te menge batà i Jacob diyà ki Sikem aw amay din si Hamor, mig-akal dan kandan so lineges se etebay dan si Dina.
GEN 34:14 Minikagi dan, “Eked iyan kepakay diyà kenami. Eked kepakay diyà kenami aw pengognanen se etebay day te otaw wedà tolii, so meyàyà kay.
GEN 34:15 Eked iyan kepakay diyà kenami singed aw megpetolì se kedita te meama doton kenyo, amon mekeiling kaw heman kenami.
GEN 34:16 Aw megpetolì kaw, mepakay diyà kenami aw megpepengognanay kidon. Yan meg-ogpà kay doma niyo, aw meinang kidon sebad olò pongan.
GEN 34:17 Meneng aw eked kepakay diyà kenyo aw megpetolì kaw, ibingen day se etebay day aw mesayo kay.”
GEN 34:18 Neluba si Hamor aw batà din si Sikem tepad te inikagi dan sìyan.
GEN 34:19 Melangkaw telaki si Sikem diyà te kedita te kedowa din, aw wedà sikandin peg-alà-alà te pegpetolì din, so ontò dakel se pedowan din diyà te batà bayi i Jacob.
GEN 34:20 Yan dimoton si Hamor aw si Sikem te egludukan te otaw kidoen te lelebangan te kotà nekelibed te lonsod dan, aw minikagi dan diyà te menge doma otaw mig-ogpà kidoen,
GEN 34:21 “Ibeg te menge otaw sida megpesigelakay kidon. Mèpiya aw ipeogpà tadon dan dini kenitadon. Mepakay aw megnigosyo dan heman dini, so doen pa keombaan te tanà seini. Mèpiya heman aw megpepengognanay se menge batà tadon aw menge batà dan.
GEN 34:22 Meneng eked dan keibeg meg-ogpà dini kenitadon amon meinang kidon sebad pongan singed aw megpetolì se kedita tadon meama iling heman kandan.
GEN 34:23 Aw yan se inangen tadon, metig-apò tadon kwani se kedita te ayam-ayam dan aw kedakel te keyemanan dan. Yan mèpiya aw megsebad kidon tepad kenyan amon meg-ogpà dan dini kenitadon.”
GEN 34:24 Migsebad se kedita te otaw mig-ogpà kidoen tepad te inikagi i Hamor aw si Sikem, aw migpetolì se kedita te meama mig-ogpà kidoen te lonsod dan.
GEN 34:25 Pegkepenga te telo se aldaw, dalem te ineleg se kedita dan tandà te pegpemetolì dan, dimoton se dowa batà i Jacob si Simeon aw si Levi ontò meama i Dina. Nengibing dan te sondang, aw miglompak dan te lonsod sìyan. Wedad palos otaw minato kandan, aw yan inigelà dan se kedita te meama.
GEN 34:26 Inimetayan dan heman si Hamor aw batà din si Sikem tinigbas dan te sondang, aw inabat dan si Dina lekat te balay i Sikem aw minolì dan.
GEN 34:27 Penga te peg-igelà dan kandan, dimoton se kedita te batà meama i Jacob, aw linompak dan se kedakel te kedònan kidoen te lonsod sìyan, amon megmalit dan tepad te pegleges te etebay dan.
GEN 34:28 Dinakep dan se kedita te karniro, baka, aw asno, aw inabat dan se kedakel te kedònan doton te lonsod sìyan aw tanà medapag kidoen.
GEN 34:29 Inabat dan se kedakel te keyemanan dan, aw dinakep dan se kedita te bayi aw mengisù, aw inibing dan se kedakel te awop te menge balay dan.
GEN 34:30 Penga niyan, minikagi si Jacob diyà ki Simeon aw si Levi, “Ontò a den nelimahan, so pineokit te medaet ininang niyo sìyan, nebensihan a den te menge tege Canaan aw tege Perisi eg-ogpà dini te tanà seini. Olò kidon pilabok. Aw megtipon dan amon meglompak dan kenitadon, matay se kedita tadon.”
GEN 34:31 Meneng timaba dan, “Eked kepakay diyà kenami aw lindoan se etebay day iling te kepoyun.”
GEN 35:1 Nayan, minikagi se Timanem diyà ki Jacob, “Doton ka den te Betel, aw peg-ogpà ka den kidoen. Peg-inang ka te sonoganan te ayam-ayam kidoen amon megsimba ka kanak, so siak se Timanem migpekità diyà kamno kedengan te pegkadas no lekat te kedowa no si Esau.”
GEN 35:2 Yan minikagi si Jacob diyà te pamilya din aw diyà te menge sakop din, “Pegbàti niyo den se kedita te inotaw niyo, sìyan egsimbahen te menge doma otaw wedà ketaga-taga te Timanem. Pemedigos kaw den aw peg-ekas kaw amon ipetaga-taga niyo te Timanem olò se toloen niyo.
GEN 35:3 Pegpeketagad kaw den, so domoton kidon te Betel. Meg-inang a te sonoganan te ayam-ayam kidoen amon megsimba a te Timanem. Pegdateng te kelimahan diyà kanak kedengan, tinebangan a din, aw gayed a din egdomaan pengkey kenan a pesalo.”
GEN 35:4 Yan imbegay dan diyà ki Jacob se kedita te inotaw dan aw menge belenigan inaritis dan, aw inlebeng din iyan doton te siyong te olayan kidoen te Sikem.
GEN 35:5 Pegkesayo i Jacob aw pamilya din, wedad otaw mig-alaw kandan, so migpeso se kedita te otaw mig-ogpà doton te menge lonsod medapag kidoen tandà te peglamit te Timanem kandan.
GEN 35:6 Dimoton si Jacob te Luz (doma ngadan niyan Betel) kidoen te Canaan sipat te kedita te doma otaw timaking kandin.
GEN 35:7 Mig-inang sikandin te sonoganan te ayam-ayam kidoen, aw iningedanan din se tanà sìyan Timanem te Betel, so migpekità se Timanem diyà kandin kidoen kedengan te pegkadas din lekat te kedowa din.
GEN 35:8 Nematay kidoen si Debora tapay migtonggò ki Rebecca te pegkemengisù din, aw inlebeng se lawa din doton te olayan medapag te Betel. Yan se doun te iningedanan iyan Olayan te Pegkelag.
GEN 35:9 Peg-olì i Jacob lekat te Mesopotamya, todà migpekità se Timanem diyà kandin, aw migpakang sikandin te mèpiya se ibegay din diyà kandin.
GEN 35:10 Minikagi se Timanem, “Iningedanan ka ki Jacob, meneng lekat seini, eked ka den ingedani ki Jacob, so ingedanan ka den beling ki Israel.” Yan iningedanan te Timanem sikandin ki Israel (kelebadan niyan, minato diyà te Timanem).
GEN 35:11 Minikagi heman se Timanem, “Siaken se Timanem eglowan diyà te kedita. Inangen ko medita se menge bowad-bowad nikaw. Inangen ko medita pongan se menge bowad-bowad nikaw, aw doen heman kandan meinang menge selotan.
GEN 35:12 Se kebelad te tanà imbegay ko diyà ki Abraham aw si Isaac, yan se ibegay ko heman diyà kamno, aw ibegay ko heman iyan diyà te menge bowad-bowad nikaw te modi aldaw.”
GEN 35:13 Penga niyan, nesayo se Timanem.
GEN 35:14 Kidoen tepad te inikegiyan te Timanem diyà kandin, impetindeg i Jacob se bato ininang din kekitaan. Penga niyan, tinoyongan din iyan te bino aw lana te olibo, so yan se pengilala te ininang din iyan simbahan te Timanem.
GEN 35:15 Iningedanan din se tanà sìyan Betel (kelebadan niyan, balay te Timanem).
GEN 35:16 Nesayo si Jacob aw pamilya din, aw dimeleg dan. Te wedà dan pa dateng doton te Efrata, dimateng se aldaw te tebawan si Raquel, aw ontò sikandin nelimahan.
GEN 35:17 Aw ontò sikandin ineleg, minikagi se menegemunay diyà kandin, “Ikà egkelemitan, so meama se timebaw diyà kamno.”
GEN 35:18 Penga niyan, nebogtò se pedowan din aw nematay sikandin. Te wedà pa sikandin kematay, iningedanan din se batà din ki Ben-oni (kelebadan niyan, batà te kelimahan). Meneng iningedanan sikandin i Jacob ki Benjamin (kelebadan niyan, batà melangkaw).
GEN 35:19 Pegkematay i Raquel, inlebeng dan se lawa din medapag te dalan pesalo doton te lonsod te Efrata. (Se lonsod te Efrata, yan se iningedanan Bitlihim songkani.)
GEN 35:20 Impetindeg i Jacob se dakel bato kidoen te lebeng din amon doen kekitaan kenyan, aw kidoen pa iyan te lebeng din lamig songkani.
GEN 35:21 Dimeleg si Jacob aw pamilya din, aw mig-ogpà dan doton dibaloy te kotà te Eder.
GEN 35:22 Dalem te peg-ogpà i Jacob kidoen te tanà sìyan, limayok si Ruben diyà te sebad esawa te amay din si Bilha, aw dimineg si Jacob tepad kenyan. Sempolò teg dowa se batà meama i Jacob.
GEN 35:23 Se menge batà din meama timebaw diyà ki Lea, yan si Ruben penganay batà i Jacob, si Simeon, si Levi, si Juda, si Isacar, aw si Sabulon.
GEN 35:24 Se menge batà i Jacob timebaw diyà ki Raquel, yan si Jose aw si Benjamin.
GEN 35:25 Se menge batà din timebaw diyà te allang i Raquel si Bilha, yan si Dan aw si Neftali.
GEN 35:26 Se menge batà i Jacob timebaw diyà te allang i Lea si Zilfa, yan si Gad aw si Aser. Yan se menge batà meama i Jacob timebaw doton te Mesopotamya.
GEN 35:27 Nayan, minolì si Jacob doton te amay din si Isaac kidoen te Mamre medapag te Hebron tapay inogpaan i Abraham aw si Isaac kedengan.
GEN 35:28 Minapet te sebad gatos kewelowan se omay i Isaac.
GEN 35:29 Ontò sikandin temoay te pegkematay din. Nebogtò se pedowan din, aw neketelokon sikandin te menge kemonaan din nematay. Inlebeng te batà din si Esau aw si Jacob se lawa din.
GEN 36:1 Seini se indan tepad te menge bowad-bowad i Esau, doma ngadan din si Edom.
GEN 36:2 Nengognan si Esau te telo bayi mig-ogpà kidoen te Canaan, si Ada batà i Elon tege Heti, si Oholibama batà i Anas aw apò i Sibeon tege Hebi,
GEN 36:3 aw si Basimat batà i Ismael aw etebay i Nebaiot.
GEN 36:4 Si Elifas se batà i Esau timebaw diyà ki Ada. Si Reuel se batà din timebaw diyà ki Basimat.
GEN 36:5 Doen heman batà din timebaw diyà ki Oholibama si Jeus, si Jalam, aw si Coras. Yan se menge batà i Esau timebaw doton te Canaan.
GEN 36:6 Impetaking i Esau se kedita te esawa din, menge batà din, aw menge sakop din, aw inibing dan se kedita te ayam-ayam din aw kedakel te kedònan din inabat din doton te Canaan, aw nesayo dan lekat te kedowa din si Jacob. Minalin dan doton te sebad tanà mediyò lekat kidoen.
GEN 36:7 Minalin si Esau so kenà botong se tanà inogpaan dan si Jacob. Pelaban medita se ayam-ayam dan aw gayed dan megsebad.
GEN 36:8 Yan se doun te mig-ogpà si Esau doton te bontod kidoen te Edumea.
GEN 36:9 Seini se menge bowad-bowad i Esau kemonaan te menge tege Edumea.
GEN 36:10 Doen batà din meama si Elifas timebaw diyà ki Ada, aw si Reuel timebaw diyà ki Basimat.
GEN 36:11 Se menge batà meama i Elifas, yan si Teman, si Omar, si Sefo, si Gatam, aw si Kenas.
GEN 36:12 Doen heman doma esawa i Elifas si Timna, aw tinebawan sikandin i Amalec. Esawa i Esau si Ada se apò bayi te kedita dan.
GEN 36:13 Se menge batà meama i Reuel, yan si Nahat, si Seras, si Samas, aw si Misas. Esawa i Esau si Basimat se apò bayi te kedita dan.
GEN 36:14 Se menge batà meama i Esau timebaw diyà ki Oholibama batà i Anas aw apò i Sibeon, yan si Jeus, si Jalam, aw si Coras.
GEN 36:15 Seini se ngadan te menge bowad-bowad i Esau neinang datò. Se menge batà i Elifas penganay batà i Esau neinang datò, yan si Teman, si Omar, si Sefo, si Kenas,
GEN 36:16 si Coras, si Gatam, aw si Amalec. Yan se menge batà i Elifas tege Edumea neinang datò, aw si Ada se apò bayi te kedita dan.
GEN 36:17 Se menge batà i Reuel batà i Esau neinang datò, yan si Nahat, si Seras, si Samas, aw si Misas. Yan se menge batà i Reuel tege Edumea neinang datò, aw si Basimat se apò bayi te kedita dan.
GEN 36:18 Se menge batà i Esau timebaw diyà ki Oholibama neinang datò, yan si Jeus, si Jalam, aw si Coras. Yan se menge batà te esawa i Esau si Oholibama batà i Anas neinang datò.
GEN 36:19 Yan se menge bowad-bowad i Esau, doma ngadan din si Edom, neinang menge datò.
GEN 36:20 Seini se ngadan te menge batà meama i Seir tege Hori, aw mig-ogpà dan doton te Edumea. Si Lotan, si Sobal, si Sibeon, si Anas,
GEN 36:21 si Dison, si Eser, aw si Disan. Se menge batà i Seir, yan se menge datò te tege Hori mig-ogpà doton te Edumea.
GEN 36:22 Se menge batà meama i Lotan, yan si Hori aw si Heman. Si Timna se etebay i Lotan.
GEN 36:23 Se menge batà meama i Sobal, yan si Alban, si Manahat, si Ebal, si Sefo, aw si Onam.
GEN 36:24 Se menge batà meama i Sibeon, yan si Aias aw si Anas. Si Anas se kimità te selep meinit doton te kebigtilan te pegpeloyaw din te menge asno te amay din.
GEN 36:25 Se menge batà i Anas, yan se meama si Dison, aw bayi si Oholibama.
GEN 36:26 Se menge batà meama i Dison, yan si Hemdan, si Esban, si Etran, aw si Seran.
GEN 36:27 Se menge batà meama i Eser, yan si Bilhan, si Saaban, aw si Acan.
GEN 36:28 Se menge batà meama i Disan, yan si Os aw si Aran.
GEN 36:29 Se menge datò te menge tege Hori, yan si Lotan, si Sobal, si Sibeon, si Anas,
GEN 36:30 si Dison, si Eser, aw si Disan. Yan se menge datò te tegsebad-sebad pongan te tege Hori mig-ogpà doton te Seir.
GEN 36:31 Seini se ngadan te menge selotan migpetibos-tibosay te peglowan dan doton te Edumea te wedad pa selotan limowan diyà te menge bowad-bowad i Israel. Si Bela batà i Beor tege Dinhaba. Si Jobab batà i Sera tege Bosra. Si Husan tege Teman. Si Hadad batà i Bedad tege Abit. (Si Bedad se nekedaeg te menge tege Midian doton te tanà te Moab.) Si Samla tege Masreca. Si Saul tege Rehobot te Yofritis. Si Baal Hanan batà i Acbor. Si Hadad tege Pau. (Se esawa din, yan si Mehetabel batà bayi i Matred aw apò i Mesahab.)
GEN 36:40 Seini se ngadan te menge bowad-bowad i Esau neinang datò kidoen te tegsebad-sebad pongan dan aw ogpeanan dan. Si Timna, si Albas, si Jetet,
GEN 36:41 si Oholibama, si Elas, si Pinon,
GEN 36:42 si Kenas, si Teman, si Mibsar,
GEN 36:43 si Magdiel, aw si Iram. Yan se menge datò te tegsebad-sebad ogpeanan kidoen te Edumea. Si Edom (doma ngadan din si Esau) se kemonaan te kedita te tege Edumea.
GEN 37:1 Mig-ogpà si Jacob doton te Canaan, sìyan tanà inogpaan te amay din.
GEN 37:2 Seini se indan-indan tepad te menge batà i Jacob. Nayan, sempolò teg pito se omay i Jose, aw migtelaban sikandin te menge kedowa din kakay migtonggò te menge ayam-ayam te amay dan. Se menge kedowa din, yan se menge batà meama te doma menge esawa te amay din si Bilha aw si Zilfa. Doen medaet eg-inangen te menge kedowa i Jose, aw dimoton sikandin te amay din aw mig-indan diyà kandin tepad kenyan.
GEN 37:3 Pengkey dakel se pedowan i Jacob diyà te menge doma batà din, meneng labi pa dakel se pedowan din diyà ki Jose, so temoay den si Jacob te pegtebaw i Jose. Yan impeinang din se mèpiya saol melayat se buktun aw imbegay din iyan kandin.
GEN 37:4 Pegkità te menge kedowa din te ontò sikandin nedekelan te pedowan te amay dan, nebensi dan ki Jose, aw wedad palos mèpiya kagi dan diyà kandin.
GEN 37:5 Nayan, migtegeinep si Jose, meneng peg-indan din tepad te tegeinep din diyà te menge kedowa din, labi dan pa nebensi kandin,
GEN 37:6 so minikagi sikandin, “Penenalan kaw tepad te tegeinep ko.
GEN 37:7 Peglegani tadon te trigo doton te pawà, nemagkes kidon te ginani tadon. Tigkan neketindeg se kanak bagkes nelibedan te kenyo bagkes, aw limongken se bagkes niyo aw migsagman dan te bagkes ko.”
GEN 37:8 Minikagi se menge kedowa din, “Eden no aw meinang ka selotan day. Eden no aw lomowan ka diyà kenami.” Penga niyan, labi dan pa nebensi kandin tandà te tegeinep din aw tandà te inikagi din diyà kandan.
GEN 37:9 Todà migtegeinep si Jose, aw yan se in-indan din diyà te menge kedowa din, kagi din, “Todà a migtegeinep, aw kinità ko se aldaw, aw bolan, aw sempolò tegusà se bitoen tigkan limongken diyà kanak.”
GEN 37:10 Meneng peg-indan din kenyan diyà te amay din aw menge kedowa din, nenompelà se amay din kandin, kagi din, “Eden lebò se kedegdagan te sìyan tegeinep nikaw? Lomongken a lay diyà kamno sipat te inay nikaw aw menge kedowa nikaw?”
GEN 37:11 Gayed miningà se menge kedowa i Jose kandin, meneng gayed mig-aneng-aneng se amay din tepad te kedegdagan niyan.
GEN 37:12 Doen sebad aldaw, nengibing se menge kedowa i Jose te menge ayam-ayam te amay dan doton te Sikem amon ipeloyaw kidoen.
GEN 37:13 Minikagi si Jacob diyà ki Jose, “Dimoton te Sikem se menge kedowa no aw migpeloyaw dan te menge ayam-ayam kidoen. Peketagad ka so isogò ta doton kandan.” Minikagi si Jose, “Neketagad a den.”
GEN 37:14 Minikagi se amay din, “Doton ka, aw laoy ka kandan aw menge ayam-ayam egtonggoan dan. Penga niyan, likò ka dini amon ketegahan ko se pegkesawol dan.” Yan timolò si Jose te sogò te amay din, aw nesayo lekat te Baog te Hebron. Pegdateng i Jose doton te Sikem,
GEN 37:15 miglegeb sikandin aw nengemahà te menge kedowa din. Doen otaw kimità kandin aw mig-insà aw eden se inahà din kidoen.
GEN 37:16 Timaba si Jose, “Nengemahà a te menge kedowa ko. Indani a bag aw kenan dan pegpeloyaw te menge ayam-ayam dan.”
GEN 37:17 Minikagi se otaw sìyan, “Dimeleg den dan, so minikagi dan te domoton dan te Dotan.” Yan timelokon si Jose kandan, aw kinità din dan doton te Dotan.
GEN 37:18 Pengkey mediyò pa sikandin, kimilala se menge kedowa din kandin. Te wedà pa sikandin dateng doton kandan, miglalang dan te imetayan dan sikandin.
GEN 37:19 Migpebelaw-belaway dan, “Migpesalo den dini se otaw sìyan gayed egtegeinep.
GEN 37:20 Ayas kaw. Imetayan tadon sikandin aw idagdag tadon se lawa din doton te medalem sokian. Mikagi kidon te doen menenanap te kebenesan nengimatay kandin. Penga niyan, tegadan tadon aw doen ketomanan te menge tegeinep din.”
GEN 37:21 Meneng pegdineg i Ruben te inikagi te menge kedowa din, ibeg din eked dan peelegi se adi dan. Yan minikagi sikandin, “Mèpiya aw eked tadon imetayi.
GEN 37:22 Ikà niyo egpeeleg kandin, meneng botong aw idagdag tadon sikandin doton te medalem sokian doton te kebigtilan amon matay sikandin te wedad megpeeleg kandin.” Yan se inikagi i Ruben so ibeg din ipelowà din si Jose amon ibingen din doton te amay din.
GEN 37:23 Pegdateng i Jose doton kandan, piglowasan dan sikandin te saol din melayat se buktun.
GEN 37:24 Penga niyan, inibing dan sikandin doton te medalem sokian wedad wayeg, aw indagdag dan doton.
GEN 37:25 Penga niyan, dalem te pegpengaen dan, tigkan dan kinità se menge bowad-bowad i Ismael aw menge ayam-ayam dan kamilo minokit kidoen lekat te Galaad. Doen inlolan diyà te menge kamilo dan menge enagay aw bebolong te saka ibingen dan doton te Ehipto.
GEN 37:26 Yan minikagi si Juda diyà te menge kedowa din, “Aw imetayan tadon se adi tadon aw ibolon tadon iyan, wedad ontong tadon.
GEN 37:27 Meneng labi pa mèpiya aw ibeligyà tadon sikandin diyà te menge bowad-bowad i Ismael sida. Eked kepakay aw imetayan tadon sikandin, so telekedowa kidon aw sebad olò se amay tadon.” Yan timandù heman se menge kedowa din.
GEN 37:28 Pegdateng te menge tege Midian doton kandan, impelowà dan sikandin lekat te sokian, aw imbeligyà dan sikandin. Kelowan plata selapì se kwarta imbayad te menge bowad-bowad i Ismael kandin, aw penga niyan, inibing dan sikandin doton te Ehipto.
GEN 37:29 Nayan, pegdoton i Ruben te sokian amon megpelowà ki Jose, kinità din te wedad den kidoen. Yan miglisì sikandin te saol din tandà te puluk din.
GEN 37:30 Dimoton sikandin te menge kedowa din aw minikagi, “Megmeno a? So wedad den kidoen si Jose.”
GEN 37:31 Penga niyan, nengimatay dan te kambing, aw linegeb dan se saol i Jose te dipanog niyan.
GEN 37:32 Penga niyan, impeibing dan se saol din melayat se buktun doton te amay dan, aw minikagi dan, “Seini se netelaan day. Tengtengi aw yan se saol te batà nikaw.”
GEN 37:33 Kinilala din te yan se saol i Jose, aw minikagi sikandin, “Ee, kandin ini. Inimetayan sikandin te mebolot menenanap te kebenesan, aw kinaen se lawa din.”
GEN 37:34 Penga niyan, miglisì si Jacob te saol din aw nengelibaeg sikandin te sako tandà te lano din. Nenamay sikandin minoloy tepad te pegkematay te batà din.
GEN 37:35 Netipon se kedita te batà din amon megsinalay dan kandin, meneng kimulu sikandin, kagi din, “Gayed a moloy tandà te pegkematay te batà ko lamig komità a kandin doton te ogpeanan te otaw nematay.” Yan gayed sikandin minoloy te batà din si Jose.
GEN 37:36 Meneng kenan si Jose? Doton sikandin te Ehipto, so inibing te menge tege Midian aw imbeligyà dan doton. Bineyadan sikandin i Potifar, sebad opisyal migtelaban te selotan te Ehipto si Paraon, aw sikandin se kapitan te menge sondalo din.
GEN 38:1 Nayan, dalem niyan, timanan si Juda te menge kedowa din, aw minalin sikandin doton te balay i Hiras tege Adulam.
GEN 38:2 Kinità i Juda se bayi kidoen tege Canaan batà i Suas, aw yan se pinengognan din.
GEN 38:3 Miglaman se esawa din, aw doen batà meama timebaw diyà kandin iningedanan i Juda ki Er.
GEN 38:4 Todà miglaman se esawa din, aw doen batà meama timebaw diyà kandin iningedanan te inay din ki Onan.
GEN 38:5 Todà doen batà meama timebaw diyà kandin, aw iningedanan iyan te inay din ki Selas. Doton dan te Sesib te pegtebaw i Selas.
GEN 38:6 Nayan, pegkenamay, impeipid i Juda se penganay batà din si Er diyà ki Tamar.
GEN 38:7 Medaet se eg-inangen i Er, aw wedà keluba se Timanem kandin. Yan inimetayan sikandin te Timanem.
GEN 38:8 Penga niyan, minikagi si Juda diyà ki Onan, “Keilangan lomayok ka diyà te nayi no nebalo, so keilangan tomanen no se ketanem tadon tepad te inangen te kedowa te meama nematay te wedad pa batà te esawa din, amon doen peden batà te kedowa nikaw nematay.”
GEN 38:9 Meneng netegahan i Onan te eked kepakay aw kandin se batà tomebaw diyà te nayi din, so meinang iyan batà te kakay din nematay. Doun niyan, peglayok din diyà te nayi din nebalo, gayed din impedelowak se benì din diyà te lowà, amon wedad meinang batà te kakay din nematay.
GEN 38:10 Meneng wedà keluba se Timanem tepad te ininang din sìyan, aw yan inimetayan heman sikandin te Timanem.
GEN 38:11 Penga niyan, minikagi si Juda diyà te ogangan din si Tamar, “Olì ka den aw peg-ogpà ka doton te balay te amay no dalem te wedad pa esawa no lamig megketelaki se doma batà ko si Selas.” Yan se inikagi i Juda so nelemitan sikandin aw matay heman si Selas iling te menge kedowa din. Yan minolì si Tamar doton te balay te amay din.
GEN 38:12 Nayan, pegkenamay-namay, nematay se esawa i Juda batà bayi i Suas. Pegketagkas te menge aldaw te pegkelano i Juda, dimoton sikandin te ogpeanan te Timna sipat te sigalak din si Hiras tege Adulam, so gontingan din se menge karniro din kidoen.
GEN 38:13 Inindanan si Tamar te dimoton se ogangan din te Timna amon meglegonting sikandin te menge karniro din.
GEN 38:14 Pegdineg din kenyan, linowas din se dagom eggemiten te balo aw migdagom sikandin te sebad kemolò, aw sinempengan din heman se bawa din amon eked sikandin kilelai. Dimoton sikandin te dalan medapag te lonsod te Enaim aw nenenoo sikandin kidoen, so yan se dalan okitanan te otaw pesalo doton te Timna. Netegahan din te pengkey migketelaki den si Selas, meneng wedà dan pa peipidi.
GEN 38:15 Na, pegkità i Juda ki Tamar, eden din aw kepoyun, so sinempengan din se bawa din.
GEN 38:16 Yan migpedapag si Juda diyà kandin doton te kilid te dalan, aw minikagi sikandin, “Aw mepakay, lomayok a den diyà kamno.” Wedà din kilelai se ogangan din. Mig-insà si Tamar, “Eden lay se ibayad no aw lomayok ka kanak?”
GEN 38:17 Timaba si Juda, “Ipeibing ko diyà kamno se nati te kambing lekat te menge ayam-ayam ko.” Minikagi si Tamar, “Doen lay ipondo no seini lamig ipeibing no se kambing?”
GEN 38:18 Mig-insà si Juda, “Eden lay se ipondo ko diyà kamno?” Timaba si Tamar, “Se peningsing impeninga nikaw, aw sìyan bangkà diyà te belad nikaw.” Imbegay din iyan diyà kandin, aw limayok diyà kandin, aw miglaman si Tamar.
GEN 38:19 Penga niyan, minolì si Tamar, aw linowas din se insampeng din te bawa, aw todà sikandin migdagom te dagom te balo.
GEN 38:20 Dalem niyan, insogò i Juda se sigalak din si Hiras amon mengibing sikandin te kambing doton te bayi aw amon mengabat te impondo din diyà kandin. Meneng wedà din kitai.
GEN 38:21 Mig-insà si Hiras diyà te menge otaw mig-ogpà kidoen te Enaim, “Kenan lay den se kepoyun nenenoo gina dini medapag te dalan?” Timaba dan, “Wedad palos kepoyun dini.”
GEN 38:22 Penga niyan, limikò si Hiras doton ki Juda, aw minikagi, “Wedà ko kitai. Inikegiyan a te menge otaw eg-ogpà kidoen te wedad palos kepoyun kidoen.”
GEN 38:23 Minikagi si Juda, “Wedad beloyan. Kandin den se impondo ko amon eked ki den keyàyà. So pengkey begayan ko peden sikandin te kambing, meneng wedà no sikandin kitai.”
GEN 38:24 Nayan, penga te menge telo se bolan, inindanan si Juda, “Iling te kepoyun se ogangan no si Tamar, so mebedes den sikandin.” Minikagi si Juda, “Engayi niyo sikandin aw sonogi niyo amon matay.”
GEN 38:25 Dalem te peg-angay dan ki Tamar, doen insogò din amon mikagi diyà te ogangan din, “Mebedes a den pineokit te tig-apò te peningsing seini ipegpeninga aw bangkà. Ketegahan no besi aw sinu se tig-apò kenyan.”
GEN 38:26 Kinilala iyan i Juda, aw minikagi sikandin, “Labi pa medaet se ininang ko diyà te ininang din, so wedà ko sikandin peipidi diyà te batà ko si Selas.” Penga niyan, wedà todà layok si Juda diyà kandin.
GEN 38:27 Pegdateng te aldaw aw agpet tebawan si Tamar, netegahan te pingin se tomebaw.
GEN 38:28 Dalem te pegtebaw, limowà se bebenayen te sebad batà. Binagkes te menegemunay se lelengoan te sinolib ontò melalag, aw minikagi sikandin, “Seini se tagnà limowà.”
GEN 38:29 Meneng linenek te batà se belad din. Kedowa din beling se tagnà timebaw, aw yan minikagi se menegemunay, “Magsen ka limowà.” Yan iningedanan sikandin ki Pares (kelebadan niyan, magsen limowà).
GEN 38:30 Penga niyan, timebaw se kedowa din binagkes se lelengoan te sinolib melalag. Iningedanan sikandin ki Seras (kelebadan niyan, ontò melalag).
GEN 39:1 Nayan, pegpengibing te menge bowad-bowad i Ismael ki Jose doton te Ehipto, imbeligyà dan sikandin diyà ki Potifar. Si Potifar se sebad opisyal migtelaban te selotan te Ehipto si Paraon, aw sikandin se kapitan te menge sondalo din.
GEN 39:2 Tinebangan te Timanem si Jose, aw mèpiya se kedita te eg-inangen din. Ininang sikandin sineligan doton te balay te amo din sìyan tege Ehipto.
GEN 39:3 Kinità te amo din te tinebangan sikandin te Timanem, aw tandà te tabang te Timanem, mèpiya se kedita te eg-inangen din.
GEN 39:4 Yan neluba si Potifar kandin, aw ininang din sikandin sineligan egtelaban kandin. Ininang din sikandin egpengibing te kedita te otaw doton te balay din aw kedakel te kedònan din.
GEN 39:5 Lekat niyan, so kidoen si Jose, tinebangan te Timanem si Potifar aw dakel se ontong din pengkey doton te balay din aw doton te pawà din.
GEN 39:6 Insalig din se kedakel te kedònan din diyà ki Jose, so dalem te pegpengibing i Jose kenyan, wedad palos keilangan eneng-enengen din, olò kànen din se egpemellien din. Nayan, mèpiya se bawa i Jose aw magsen se lawa din.
GEN 39:7 Wedà kenamay, neibeg se esawa i Potifar ki Jose aw minikagi sikandin, “Layok ka den kanak.”
GEN 39:8 Meneng mig-eked si Jose, aw timaba sikandin, “Wedad palos keilangan eneng-enengen te amo ko so sineligan a din. Insalig din se kedakel te kedònan din diyà kanak.
GEN 39:9 Iling te onawa se kelangkaw ko diyà te kelangkaw din dini te balay seini. Wedad palos wedà din seligi diyà kanak olò sikona, so esawa ka din. Eked kepakay aw meg-inang a te medaet iling kenyan. Eked kepakay aw meg-inang a te salà diyà te Timanem.”
GEN 39:10 Pengkey nemoyò sikandin ki Jose te kelikit te aldaw amon lomayok aw domoma kandin, meneng wedà sikandin penenalan kenyan.
GEN 39:11 Doen sebad aldaw, minawop si Jose te balay so doen inangen din doton, aw wedad doma sineligan kidoen.
GEN 39:12 Yan minawid se bayi te buktun te saol i Jose, aw minikagi sikandin, “Layok ka den kanak.” Ayas limowà si Jose lekat te balay aw kimadas sikandin, meneng netenanan din se saol din inewidan te bayi.
GEN 39:13 Pegkità te esawa i Potifar te netenanan i Jose se saol din aw kimadas sikandin lekat te balay,
GEN 39:14 tinawal din se menge doma sineligan, aw minikagi sikandin, “Na, inibing te doma ko dini se Hebreo sìyan amon megyàyà kenitadon. Minawop gina sikandin te tambì ko amon megleges peden kanak, meneng mig-olangag a.
GEN 39:15 Pegdineg din te peg-olangag ko, netenanan din se saol din dini kanak, aw limowà sikandin lekat te balay aw kimadas.”
GEN 39:16 Penga niyan, intagò din se saol i Jose lamig minolì se esawa din.
GEN 39:17 Peg-olì din, onawa se in-indan din, kagi din, “Se Hebreo sìyan sineligan inibing no dini, yan se minawop gina te tambì ko amon megleges peden kanak.
GEN 39:18 Meneng peg-olangag ko, netenanan din se saol din dini kanak, aw limowà sikandin lekat te balay aw kimadas.”
GEN 39:19 Pegdineg te amo i Jose te in-indan te esawa din te medaet se ininang i Jose diyà kandin, ontò sikandin neopal.
GEN 39:20 Impedakep din si Jose aw impekeleboso doton te kotà egsolan te selotan te menge otaw ipegpelumun din. Yan se sinolan ki Jose.
GEN 39:21 Meneng tinebangan sikandin te Timanem, aw gayed dakel se pedowan te Timanem kandin. Neluba se otaw egbantay te keleboso ki Jose,
GEN 39:22 aw ininang din sikandin egpengibing te kedita te otaw kineleboso, aw sikandin se simogò aw eden se inangen dan doton didalem te keleboso.
GEN 39:23 Wedad palos keilangan eneng-enengen te otaw egbantay te keleboso tepad te eg-inangen i Jose, so tinebangan te Timanem si Jose, aw yan mèpiya se kedita te eg-inangen din.
GEN 40:1 Nayan, doen sineligan te selotan te Ehipto egpengibing te bino diyà kandin, aw doen heman sineligan te selotan eg-inang te pan kandin. Pegkenamay-namay, nekesalà dan diyà te amo dan, sìyan selotan te Ehipto.
GEN 40:2 Neopal se selotan kandan,
GEN 40:3 aw impekeleboso din dan doton te kinelebosowan ki Jose. Yan se keleboso egbentayan i Potifar, kapitan te menge sondalo te selotan.
GEN 40:4 Ininang te kapitan si Jose sineligan te didowa otaw sìyan, aw nenamay dan kineleboso.
GEN 40:5 Doen sebad delem migtegeinep dan, sìyan egpengibing te bino aw eg-inang te pan te selotan. Kenà onawa se tegeinep dan, aw kenà heman onawa se kedegdagan niyan.
GEN 40:6 Pegkeiselem niyan te pegdoton i Jose kandan, kinità din te netetana se pedowan dan.
GEN 40:7 Yan mig-insà sikandin, “Nengà lay netetana se pedowan niyo?”
GEN 40:8 Timaba dan, “Migtegeinep kay, aw wedad otaw mekeindan kenami aw eden se kedegdagan niyan.” Minikagi si Jose, “Timanem se egpemegay te kebiyasa diyà te otaw amon mekeindan te kedegdagan te tegeinep. Indani a tepad te tegeinep niyo.”
GEN 40:9 Yan mig-indan se otaw egpengibing te bino tepad te tegeinep din, kagi din, “Pegtegeinep ko, kinità ko se pinonoan te paras
GEN 40:10 doen telo belagen. Dimawen iyan, aw nemokad, aw nemongo, aw neinog se paras.
GEN 40:11 Minawid a te tabò te selotan, aw yan nengipò a te paras aw nengemeg a kenyan. Dimelog se temek niyan diyà te tabò, aw yan se inibing ko doton te selotan.”
GEN 40:12 Minikagi si Jose, “Seini se kedegdagan niyan. Se telo belagen sìyan, yan se telo se aldaw.
GEN 40:13 Telo seini, ipelowà ka te selotan lekat te keleboso, aw todà ka din ipelikò doton te tapay terbaho nikaw. Todà ka mengibing te bino kandin, iling te tapay nikaw ininang.
GEN 40:14 Aw todà megkèpiya se peg-ogpà nikaw, eneng-enengi a bag. Indani bag se selotan tepad kanak amon mekelowà a lekat te keleboso.
GEN 40:15 Tinakaw a lekat te mediyò ogpeanan day menge Hebreo, aw pengkey wedad palos medaet ininang ko, meneng impekeleboso a pa dini te Ehipto.”
GEN 40:16 Nayan, pegketaga-taga te otaw eg-inang te pan te selotan te mèpiya se kedegdagan te tegeinep te egpengibing te bino, minikagi heman sikandin diyà ki Jose, “Doen heman tegeinep ko. Doen telo bigo nepenò te pan insodò ko.
GEN 40:17 Se bigo diyà te lanto, yan se doen medita kemolò te pan ibingen ko doton te selotan, meneng kinaen iyan te menge manok te kebenesan.”
GEN 40:18 Minikagi si Jose, “Seini se kedegdagan niyan. Se telo bigo sìyan, yan se telo se aldaw.
GEN 40:19 Telo seini, ipelowà ka te selotan lekat te keleboso, aw ipesipal din se lieg nikaw. Ipebitin se lawa no doton te tollok aw kànen te menge manok te kebenesan se onod nikaw.”
GEN 40:20 Netoman iyan, so pegkepenga te telo se aldaw, mig-inang se selotan te dakel kànen so yan se aldaw te pegtebaw din, aw impetanod din se kedita te menge opisyal. Impelowà din lekat te keleboso se otaw egpengibing te bino aw otaw eg-inang te pan, aw impeibing din dan doton te menge opisyal netipon.
GEN 40:21 Sìyan otaw egpengibing te bino, yan se impelikò te selotan doton te tapay terbaho din, aw sikandin se todà nengibing te bino kandin.
GEN 40:22 Meneng sìyan otaw eg-inang te pan, yan se impeimatay te selotan. Netoman se kedita te inikagi i Jose diyà kandan.
GEN 40:23 Meneng wedà palos peg-aneng-aneng se egpengibing te bino tepad ki Jose. Nelibelan din sikandin.
GEN 41:1 Nayan, penga te dowa se omay, migtegeinep heman se selotan. Timindeg sikandin doton te kilid te dakel wayeg iningedanan Nilo.
GEN 41:2 Tigkan din kinità se pito baka ontò melambò aw mèpiya se bawa. Minanggin dan lekat te wayeg, aw kimaen dan te sagbet doton te kilid niyan.
GEN 41:3 Tigkan din heman kinità se doma pito baka minanggin lekat te wayeg, meneng ontò dan megasà aw medaet se bawa. Dimoton dan te doma pito baka timindeg kidoen te kilid te wayeg.
GEN 41:4 Se menge baka megasà, yan se kimaen te menge baka melambò. Penga niyan, neloka se selotan.
GEN 41:5 Todà timedogi se selotan aw todà sikandin migtegeinep. Kinità din se sebad ponò te trigo doen pito oway ontò melambò aw mèpiya se bawa.
GEN 41:6 Penga niyan, timilles se doma pito oway nekoped aw kimipes te emiyan.
GEN 41:7 Se oway nekoped, yan se nengame te oway melambò. Penga niyan, neloka se selotan aw netaga-taga sikandin te tegeinep din olò iyan.
GEN 41:8 Pegkeiselem niyan, netetana se pedowan te selotan. Yan impeangay din se kedita te otaw biyasa egselemangka aw menge doma otaw biyasa doton te Ehipto. Mig-indan sikandin diyà kandan tepad te tegeinep din, meneng wedad palos nekeindan kandin aw eden se kedegdagan niyan.
GEN 41:9 Penga niyan, minikagi se otaw egpengibing te bino, “Keilangan meg-indan a den seini tepad te salà ko.
GEN 41:10 Kedengan neopalan kay nikaw sìyan otaw mig-inang te pan, aw impekeleboso kay nikaw doton te balay te kapitan te menge sondalo.
GEN 41:11 Doen sebad delem, migtegeinep kay, meneng kenà onawa se kedegdagan te tegeinep day.
GEN 41:12 Doen Hebreo kidoen, telaki pa, sineligan te kapitan te menge sondalo. Mig-indan kay diyà kandin tepad te tegeinep day, aw in-indan din kenami se kedegdagan niyan.
GEN 41:13 Netoman se kedita te inikagi din, so todà a no impelikò doton te tapay terbaho ko, aw impeimatay no se otaw mig-inang te pan.”
GEN 41:14 Yan impeangay te selotan si Jose, aw ayas sikandin impelowà lekat te keleboso. Migpegopit sikandin, aw mig-ekas, aw dimoton te selotan.
GEN 41:15 Minikagi se selotan diyà ki Jose, “Migtegeinep a, aw wedad otaw nekeindan kanak aw eden se kedegdagan niyan. Inindanan a te biyasa ka eg-indan aw eden se kedegdagan te tegeinep aw iindan iyan diyà kamno.”
GEN 41:16 Timaba si Jose, “Kenà lekat kanak se kebiyasa, meneng Timanem olò se megpetaga-taga kamno te mèpiya kedegdagan niyan.”
GEN 41:17 Minikagi se selotan, “Pegtegeinep ko, timindeg a doton te kilid te wayeg te Nilo.
GEN 41:18 Tigkan ko kinità se pito baka ontò melambò aw mèpiya se bawa. Minanggin dan lekat te wayeg, aw kimaen dan te sagbet doton te kilid niyan.
GEN 41:19 Tigkan ko heman kinità se doma pito baka minanggin lekat te wayeg, meneng ontò dan megasà aw medaet se bawa. Wedad palos baka kinità ko dini te Ehipto labi pa megasà.
GEN 41:20 Penga niyan, se menge baka megasà, yan se kimaen te menge baka melambò.
GEN 41:21 Meneng pengkey kimaen dan te baka melambò, iling te wedad kinaen dan so kunù pa se kegasà dan. Penga niyan, neloka a.
GEN 41:22 “Todà a migtegeinep, aw kinità ko se sebad ponò te trigo doen pito oway ontò melambò aw mèpiya se bawa.
GEN 41:23 Penga niyan, timilles se doma pito oway nekoped aw kimipes te emiyan.
GEN 41:24 Se oway nekoped, yan se nengame te oway melambò. Yan se tegeinep in-indan ko diyà te menge otaw biyasa egselemangka, meneng wedad palos nekeindan kanak aw eden se kedegdagan niyan.”
GEN 41:25 Minikagi si Jose diyà te selotan, “Sir, olò sebad se kedegdagan te didowa tegeinep nikaw. Impetaga-taga te Timanem diyà kamno aw eden se inangen din.
GEN 41:26 Se pito baka melambò, yan se pito se omay. Se pito oway te trigo, yan heman se pito se omay. Olò sebad se kedegdagan te didowa tegeinep nikaw.
GEN 41:27 Se pito baka megasà nekemodi, aw sìyan pito oway nekoped aw kimipes te emiyan, yan se pito se omay te bitil.
GEN 41:28 Ontò benal se inikagi ko gina. Impetaga-taga te Timanem diyà kamno aw eden se inangen din.
GEN 41:29 Domateng den se pito se omay te ontò dakel se geniyen dini te kebelad te Ehipto.
GEN 41:30 Penga te pito se omay mèpiya, domateng se pito se omay te bayil, aw yan se mekebaet te kedita dini te Ehipto igsà kelibelan se pito se omay doen dakel geniyen.
GEN 41:31 Ontò kelibelan se omay te beyang-beyang tandà te kedaet te bayil domateng te modi aldaw.
GEN 41:32 Mekedowa ka pegtegeinep amon ketegahan no te yan se metoman inangen te Timanem, aw tomanen din iyan te eked kenamay.
GEN 41:33 “Nayan, mèpiya aw pemellien no se otaw ontò biyasa, aw inangen no sikandin keseligan dini te Ehipto.
GEN 41:34 Mèpiya heman aw pemellien no se menge doma opisyal doton te tegsebad-sebad ogpeanan amon ebaten dan se tengà te lima diyà te kedakel te trigo geniyen dalem te pito se omay doen dakel geniyen.
GEN 41:35 Sogò ka kandan te keilangan imonen dan se kànen dalem te menge omay doen dakel geniyen amon itagò iyan doton te tegsebad-sebad lonsod aw bentayan iyan.
GEN 41:36 Se itagò, yan se kànen te menge otaw aw domateng se pito se omay te bitil dini te Ehipto, amon eked kematay se otaw te bitil.”
GEN 41:37 Nayan, ontò neluba se selotan aw menge doma opisyal tepad te inikagi i Jose.
GEN 41:38 Minikagi se selotan diyà kandan, “Wedad doma otaw ketelaan tadon labi pa mèpiya ki Jose, so egdomaan sikandin te Timanem.”
GEN 41:39 Minikagi se selotan diyà ki Jose, “So sikona se pinetega-tegahan te Timanem te kedita niyan, wedad palos otaw labi pa biyasa diyà kamno.
GEN 41:40 Inangen ta den melangkaw diyà te gobirno. Pengkey eden se isogò nikaw, yan se keilangan toloen te kedita te otaw. Olò siaken se labi pa melangkaw diyà kamno, so siak se selotan.”
GEN 41:41 Minikagi heman se selotan diyà ki Jose, “Inangen ta den gobirnador dini te kebelad te Ehipto.”
GEN 41:42 Penga niyan, inabat te selotan se peningsing din, sìyan pengilala te peglowan din, aw imbegay din iyan ki Jose. Impesaol din te sapot ontò meelagà, aw impepeninga din te bolawan.
GEN 41:43 Impesakay din heman diyà te kelisa eggemiten te ontò melangkaw sineligan din, aw doen otaw insogò din doton te peselowan i Jose amon tomawal dan, “Peselangi niyo! Peokiti niyo!” Yan se peg-inang ki Jose gobirnador doton te kebelad te Ehipto.
GEN 41:44 Minikagi heman se selotan diyà ki Jose, “Pengkey siak se selotan, meneng wedad palos mepakay inangen dini te kebelad te Ehipto singed aw mepakay iyan diyà kamno.”
GEN 41:45 Sinelilinan te selotan se ngadan i Jose so iningedanan din sikandin ki Sapenat Panea. Pineipidan din ki Asenat, batà i Potiferas. Si Potiferas se egpengibing te menge otaw migsimba te aldaw doton te lonsod te On. Yan ininang si Jose melangkaw doton te kebelad te Ehipto.
GEN 41:46 Peg-inang ki Jose opisyal te selotan te Ehipto, ketlowan se omay din. Nesayo sikandin lekat te balay te selotan, aw timeped sikandin te kedita te ogpeanan doton te kebelad te Ehipto.
GEN 41:47 Dalem te pito se omay mèpiya, dakel se ginani kidoen.
GEN 41:48 Impeimon i Jose se talad te trigo ginani aw impetagò din iyan doton te menge lonsod. Doen intagò doton te tegsebad-sebad lonsod lekat te kedepagan niyan.
GEN 41:49 Se kedakel te trigo intagò, yan se iling te kedakel te enay doton te dagat, so ontò iyan dakel. Yan se doun te impelengà i Jose se pegbilang kenyan so ontò iyan dakel.
GEN 41:50 Te wedà pa dateng se bitil, dowa se batà i Jose timebaw diyà ki Asenat.
GEN 41:51 Iningedanan din se kakay ki Manases (kelebadan niyan, nelibelan), so minikagi si Jose, “Tinebangan a te Timanem aw yan nelibelan ko den se kedakel te kelimahan ko aw tepad te dela ko te amay aw menge gaked ko.”
GEN 41:52 Iningedanan din se adi ki Efraim (kelebadan niyan, migmengisù), so minikagi si Jose, “Tinebangan a te Timanem aw yan migmengisù a den dini te tanà te kelimahan ko.”
GEN 41:53 Minokit se pito se omay dakel se ginani te tege Ehipto.
GEN 41:54 Penga niyan, dimateng se pito se omay te bitil, iling te tapay inikagi i Jose. Nebitilan se menge otaw doton te kedita te doma ogpeanan, meneng doen beling kànen doton te kebelad te Ehipto.
GEN 41:55 Pegkeballos te menge tege Ehipto, nemoyò dan te kànen diyà te selotan. Meneng minikagi sikandin, “Doton kaw ki Jose aw tolò kaw te ipunù din kenyo.”
GEN 41:56 Neinang labi pa medaet se bayil igsà nebitilan se kedita te tege Ehipto. Penga niyan, impeowang i Jose se kedita te pol tinegoan te trigo, aw impebeligyà din iyan diyà te menge tege Ehipto.
GEN 41:57 Medita heman se otaw dimoton te Ehipto lekat te menge doma ogpeanan amon mayad dan te trigo diyà ki Jose, so medaet se bitil doton te kebelad te keneyonan.
GEN 42:1 Nayan, pegketaga-taga i Jacob te doen kànen doton te Ehipto, minikagi sikandin diyà te menge batà din, “Nengà lay olò kaw eg-ogpà?
GEN 42:2 Doen ekon kànen doton te Ehipto. Doton kaw bayad amon eked kidon kematay te bitil.”
GEN 42:3 Yan nesayo se sempolò kedowa i Jose, menge kakay din, aw dimoton dan te Ehipto amon mayad dan te trigo.
GEN 42:4 Meneng se ontò kedowa i Jose si Benjamin, yan se wedà petekingi i Jacob te menge kedowa din, so nelemitan si Jacob te medaet se kegemakan i Benjamin.
GEN 42:5 Dimoton se menge batà i Jacob te Ehipto sipat te menge doma otaw nengemahà te kànen kidoen, so nebitilan heman se menge tege Canaan.
GEN 42:6 Si Jose se gobirnador kidoen te Ehipto, aw sikandin se nemeligyà te kànen diyà te kedita te otaw lekat te menge doma ogpeanan. Yan pegdateng te menge kedowa i Jose doton te Ehipto, dimoton dan kandin aw limongken dan lamig minapet se olo dan diyà te tanà.
GEN 42:7 Pegkità i Jose te menge kedowa din, pengkey kinilala din dan, meneng migpelingo-lingo sikandin te wedà din dan kilelai. Minikagi sikandin te dakel se kagi din, “Kenan kaw lekat?” Timaba dan, “Dimini kay lekat te Canaan amon mayad kay te kànen.”
GEN 42:8 Pengkey kinilala i Jose se menge kedowa din, meneng wedà dan kilala te sikandin se kedowa dan adi.
GEN 42:9 Neeneng-enengan din se tegeinep din tepad kandan, aw minikagi sikandin, “Kenà. Dimini kaw amon megsimà kaw te kelomayan day amon domaeg kaw kenami.”
GEN 42:10 Timaba dan, “Sir, kenà iyan benal. Dimini kay amon mayad kay te kànen.
GEN 42:11 Telekedowa se kedita day. Sir, kenà kay egsimà dini, so ontò kay metinuud.”
GEN 42:12 Minikagi si Jose, “Kenà. Dimini kaw amon megsimà kaw te kelomayan day amon domaeg kaw kenami.”
GEN 42:13 Minikagi dan, “Sir, sempolò teg dowa se kedita day telekedowa, aw sebad olò se amay day eg-ogpà doton te Canaan. Nematay se sebad kedowa day, aw mig-ogpà pa se temanan adi doton te amay day.”
GEN 42:14 Meneng minikagi si Jose, “Benal se inikagi ko gina. Dimini kaw amon megsimà kaw kenami.
GEN 42:15 Meneng seini se inangen ko amon ketegahan ko aw benal se inikagi niyo. Pineokit te ngadan te selotan, ipunù ko den te eked kaw palos pekeolì lekat dini singed aw domini se adi niyo.
GEN 42:16 Ipeolì ko se sebad kenyo amon mangay kandin, meneng kelebosowen ko se kedita te doma niyo lamig ketegahan ko aw benal se inikagi niyo. Aw kenà benal se inikagi niyo, yan ketegahan ko te dimini kaw amon megsimà kaw kenami.”
GEN 42:17 Penga niyan, impekeleboso din dan te telo se aldaw.
GEN 42:18 Pegketagkas te telo se aldaw, minikagi si Jose diyà te menge kedowa din, “Egsagman a te Timanem, aw yan eked kaw imetayi aw seini se inangen niyo.
GEN 42:19 Aw ontò kaw metinuud, sebad kenyo se kelebosowen pa dini dalem te peg-olì te menge doma mengibing te kànen doton te menge pamilya niyo nebitilan.
GEN 42:20 Meneng keilangan ibingen niyo dini kanak se kedowa niyo temanan adi amon ketegahan ko te benal se inikagi niyo, aw yan eked kaw imetayi.” Yan timandù dan kandin.
GEN 42:21 Penga niyan, migpebelaw-belaway dan, “Na, dinetengan kidon den te kelimahan seini tandà te medaet ininang tadon diyà te kedowa tadon kedengan. Pegpengenganay din kenitadon, pengkey kinità tadon se kelimahan din, meneng wedà tadon sikandin penenelani. Yan se doun te dinetengan kidon te kelimahan seini.”
GEN 42:22 Minikagi si Ruben, “Minikagi a diyà kenyo te eked niyo sikandin peelegi, meneng wedà a niyo penenelani. Yan se doun te nelimahan kidon seini tandà te pegkematay din.”
GEN 42:23 Nekelabet si Jose te kedita te inikagi dan, meneng wedà dan iyan ketegahi, so doen telesogpat mig-obad te kagi dan Hebreo diyà ki Jose, aw mig-obad heman te kagi din Ehipto diyà kandan.
GEN 42:24 Penga niyan, nesayo si Jose lekat kandan te wedà kenamay, so migkelag sikandin. Penga niyan, limikò sikandin doton kandan, aw minikagi diyà kandan. Pinemallì din si Simeon, aw impebakwì din sikandin kinità te kedita dan.
GEN 42:25 Doen sineligan insogò i Jose meg-ipenò te sako te kedowa din te trigo. Migpunù heman si Jose kandin te ieles din se kwarta imbayad dan diyà te sako te tegsebad-sebad kandan. Impebegay din heman kandan se kànen dan diyà te dalan. Yan se ininang din diyà kandan.
GEN 42:26 Penga niyan, miglolan dan te sako te trigo diyà te menge ayam-ayam dan asno, aw nesayo dan.
GEN 42:27 Pegkedelem, minapit dan amon midegà. Doen sebad kandan mig-okal te sako din amon ipekaen se asno din, aw kinità din se kwarta diyà didalem te sako imbayad din te trigo.
GEN 42:28 Timawal sikandin diyà te menge kedowa din, “Dini kedì didalem te sako se kwarta imbayad ko te trigo. In-olì besi iyan diyà kanak.” Pegdineg dan kenyan, ontò migpeso se pedowan dan, aw migpeinsaay dan, “Eden lebò se pelumun te Timanem kenitadon seini?”
GEN 42:29 Peg-olì dan doton te amay dan kidoen te Canaan, in-indan dan diyà kandin se kedita te negemakan dan.
GEN 42:30 Minikagi dan, “Nenompelà se gobirnador te Ehipto kenami, aw minikagi sikandin te dimoton kay amon megsimà aw domaeg kay kandan.
GEN 42:31 Timaba kay te kenà iyan benal, so metinuud kay.
GEN 42:32 Mig-indan kay kandin te sempolò teg dowa se kedita day telekedowa aw sebad olò se amay day. Nematay son day se sebad kedowa day, aw mig-ogpà pa se temanan adi doton te amay day kidoen te Canaan.
GEN 42:33 Meneng minikagi se gobirnador diyà kenami, ‘Seini se inangen ko amon ketegahan ko aw metinuud kaw. Sebad kenyo se kelebosowen pa dini, dalem te peg-olì te menge doma niyo amon mengibing te kànen doton te menge pamilya niyo nebitilan.
GEN 42:34 Ibingi niyo dini kanak se kedowa niyo temanan adi amon ketegahan ko te kenà kaw egsimà, meneng metinuud kaw. Yan ipelowà ko se kedowa niyo, aw mepakay kaw mayad dini te Ehipto.’”
GEN 42:35 Penga niyan te peg-awak dan te trigo lekat te menge sako dan, kinità te tegsebad-sebad kandan se kwarta imbayad dan kenyan. Pegkità dan te kwarta, nelemitan si Jacob aw kedita te batà din.
GEN 42:36 Minikagi se amay dan diyà kandan, “Pineokit kenyo, eg-ebaten se kedita te batà ko lekat kanak. Wedad den si Jose, wedad den heman si Simeon, aw ibeg niyo ebaten heman si Benjamin lekat kanak. Ontò a egdetengan te kelimahan.”
GEN 42:37 Minikagi si Ruben diyà te amay din, “Seligi si Benjamin diyà kanak, aw iolì ko sikandin dini kamno. Aw eked ko sikandin keolì, imetayi se dowa batà ko meama.”
GEN 42:38 Meneng minikagi si Jacob, “Eked kepakay diyà kanak aw tomaking si Benjamin kenyo, so nematay se kakay din, aw sikandin olò se nesamà. Ontò a den temoay. Megmeno a aw detengan sikandin te medaet diyà te dalan? Aw matay sikandin, matay a heman tandà te lano ko kandin.”
GEN 43:1 Nayan, neinang labi pa medaet se bitil doton te Canaan.
GEN 43:2 Pegkeamin te kedakel te trigo inabat dan doton te Ehipto, minikagi si Jacob diyà te menge batà din, “Likò kaw den amon beyadan niyo se mekaen tadon.”
GEN 43:3 Timaba si Juda, “Migpunù se otaw doton te eked kay pekelikò doton kandin singed aw tomaking se kedowa day temanan adi.
GEN 43:4 Aw ipetaking no sikandin, lomikò kay doton amon mayad kay te kànen nikaw.
GEN 43:5 Meneng aw eked no sikandin petekingi, eked kay likò, so minikagi se otaw doton te eked kay pekelikò doton kandin singed aw tomaking se kedowa day temanan adi.”
GEN 43:6 Minikagi si Jacob doma ngadan din si Israel, “Nengà lay mig-inang kaw kanak te medaet pineokit te peg-indan niyo kandin te doen pa kedowa niyo?”
GEN 43:7 Timaba dan, “Gayed sikandin mig-insà tepad kenitadon aw tepad te pamilya tadon. Mig-insà sikandin, ‘Wedà lay pa kematay se amay niyo? Doen lay pa doma kedowa niyo?’ Olò kay timaba te menge insà din. Wedà kay palos peg-aneng-aneng te tomogon sikandin te keilangan ibingen day doton se kedowa day.”
GEN 43:8 Minikagi si Juda diyà te amay din, “Seligi si Benjamin diyà kanak, aw mesayo kay den seini amon eked kematay se kedita tadon te bitil sipat te menge mengisù dini kenitadon.
GEN 43:9 Megsapà a den kamno te siaken se megbantay kandin amon wedad megpeeleg kandin. Aw eked ko sikandin keolì dini kamno, yan se salà ko kamno te wedad temanan.
GEN 43:10 Aw wedà kay nikaw keanggà, mekedowa kay den peden likò.”
GEN 43:11 Minikagi se amay dan, “Aw yan se keilangan inangen, mèpiya aw ibingen niyo heman se menge mèpiya pongo lekat dini amon doen ibowang niyo diyà te gobirnador, deitek alay aw teneb, menge enagay, aw pongo te kayo pistasio aw almendras.
GEN 43:12 Doblihi se kwarta ibingen niyo, so keilangan ilikò niyo se kwarta insawol diyà te sako niyo. Kemalì besi iyan.
GEN 43:13 Petekingi niyo heman se kedowa niyo, aw kegaen kaw likò.
GEN 43:14 Ibeg ko tebangan kaw te Timanem amon keidowan kaw te otaw doton aw ipeolì din si Benjamin aw si Simeon. Nayan tepad kanak, aw keilangan kemetayan a te menge batà ko, aw den iyan.”
GEN 43:15 Penga niyan, inibing dan se menge ibowang, aw dobli se kwarta dan, aw dimoton dan te Ehipto sipat si Benjamin. Pegdateng dan, dimoton dan ki Jose.
GEN 43:16 Pegkità i Jose te timaking si Benjamin kandan, minikagi sikandin diyà te sineligan din, “Ibingi se menge otaw sìyan doton te balay ko. Pengiyaw ka te ayam-ayam aw peg-elomo ka te kànen, so komaen dan doma ko te alas dosi.”
GEN 43:17 Timolò se sineligan aw inibing din dan doton te balay i Jose.
GEN 43:18 Pegketaga-taga dan te balay i Jose se ibingan kandan, nelemitan dan, aw migpebelaw-belaway dan, “Ibingen kidon doton tandà te kwarta in-olì diyà te sako tadon kedengan. Dekepen kidon besi kwani, aw egawen se menge asno tadon, aw inangen kidon allang din.”
GEN 43:19 Yan pegdateng dan doton te lelebangan te balay, minikagi dan diyà te sineligan,
GEN 43:20 “Sir, penenalan ka kenami. Dimini kay kedengan amon mayad kay te kànen.
GEN 43:21 Meneng peg-idegà day diyà te dalan te peg-olì day, mig-okal kay te sako day, aw kinità day se kwarta imbayad te tegsebad-sebad kenami te kànen doton te lanto te trigo didalem te sako. Kidoen se kedakel niyan. Todà day heman inibing amon iolì day.
GEN 43:22 Inibing day den heman se doma kwarta ibayad te kànen. Wedà day ketegahi aw sinu se migsawol te kwarta diyà te sako day kedengan.”
GEN 43:23 Minikagi se sineligan, “Ikà niyo egketetana. Ikà niyo egkelemitan. Se Timanem egseligan niyo aw egseligan te amay niyo, yan besi se migsawol te kwarta diyà te sako niyo. Kininawà ko se imbayad niyo.” Penga niyan, inibing din si Simeon doton kandan.
GEN 43:24 Impeawop din dan doton te balay i Jose, aw inibing din se wayeg ionaw te benis dan. Impekaen din heman se menge asno dan.
GEN 43:25 Inokal dan se bowang ibegay dan ki Jose te pegdateng din te alas dosi, so inikegiyan dan te komaen dan doma kandin.
GEN 43:26 Peg-olì i Jose, imbegay dan kandin se bowang inibing dan, aw limongken dan lamig minapet se olo dan diyà te tanà.
GEN 43:27 Mig-insà sikandin tepad te pegkesawol dan. Mig-insà heman sikandin, “Mèpiya lay se pegkesawol te amay niyo, sìyan temoay in-indan niyo kanak kedengan? Wedà lay pa sikandin kematay?”
GEN 43:28 Timaba dan, “Sir, wedà pa kematay se amay day, meneng mèpiya pa se pegkesawol din.” Penga niyan, limongken dan aw migsagman dan kandin.
GEN 43:29 Pegkità i Jose te kedowa din adi si Benjamin, minikagi sikandin, “Sìyan lebò se kedowa niyo temanan adi in-indan niyo kanak kedengan.” Minikagi heman si Jose diyà ki Benjamin, “Atò, ibeg ko keidowan ka te Timanem.”
GEN 43:30 Penga niyan, agpet migkelag si Jose, so dakel se pedowan din diyà te adi din, aw yan tigkan sikandin nesayo. Dimoton sikandin te tambì din aw migkelag kidoen.
GEN 43:31 Pegkenamay-namay, migdàpog sikandin aw limikò doton te menge kedowa din. Tinemengan din se pedowan din, aw migpelamak te kànen.
GEN 43:32 Tinani se kènanan dan, so sebad se lemisa i Jose, aw sebad se lemisa te menge kedowa din, aw sebad heman se lemisa te menge tege Ehipto kimaen kidoen, so eked keibeg se menge tege Ehipto komaen doma te menge Hebreo, so eglindoan te menge tege Ehipto se menge Hebreo.
GEN 43:33 Impepenenoo i Jose se tegsebad-sebad kedowa din, lekat te kakay dan taman te adi. Pegkità dan te pegtapid din kandan, migpetengtengay dan tandà te kepela dan.
GEN 43:34 Impeibing i Jose se kànen lekat te lemisa din doton te menge kedowa din, meneng lima dobli se kedakel te kànen impeibing din diyà ki Benjamin. Dakel heman se ininem dan, aw neluba dan.
GEN 44:1 Nayan, insogò i Jose se sineligan din, kagi din, “Ipenoi se menge sako dan te trigo taman te mebatog ibingen te menge asno dan, aw elesi heman se kwarta imbayad dan didalem te sako te tegsebad-sebad kandan.
GEN 44:2 Soli se tabò ko selapì diyà te sako te temanan adi, sipat te kwarta imbayad din te kànen.” Yan timolò se sineligan te impunù i Jose kandin.
GEN 44:3 Pegkeiselem niyan, impekesayo se menge kedowa i Jose aw menge asno dan.
GEN 44:4 Te wedà dan pa pekeipanaw te mediyò lekat te lonsod, minikagi si Jose diyà te sineligan din, “Ayas ka peg-alaw kandan. Aw mekesaeb ka kandan, peg-insà ka, ‘Nengà lay mig-inang kaw te medaet diyà te otaw mig-inang te mèpiya diyà kenyo?
GEN 44:5 Nengà lay nenakaw kaw te tabò selapì te amo ko? So yan se eg-ineman din, aw eggemiten din te peg-etok. Ontò medaet se ininang niyo.’”
GEN 44:6 Pegkesaeb te sineligan kandan, minikagi sikandin te impunù i Jose kandin.
GEN 44:7 Meneng timaba dan, “Sir, nengà lay minikagi ka kenyan? Megsapà kay te wedad ininang day iling kenyan.
GEN 44:8 Pengkey sìyan kwarta kinità day diyà te sako day doton te Canaan, in-olì day den iyan diyà kamno. Nengà lay menakaw kay te selapì aw bolawan lekat te balay te amo nikaw?
GEN 44:9 Sir, aw kitaen no te tinakaw iyan te otaw doma day, mepakay aw imetayan no sikandin, aw inangen no heman se kedita day menge allang nikaw.”
GEN 44:10 Timaba se sineligan, “Mèpiya se inikagi niyo, meneng olò otaw nenakaw te tabò se inangen ko allang, aw mekelowà se doma.”
GEN 44:11 Penga niyan, ayas dan inawas se sako dan aw mig-okal se tegsebad-sebad kandan kenyan.
GEN 44:12 Ontò nengemahà se sineligan diyà te sako te tegsebad-sebad kandan lekat te kakay taman te adi, aw kinità din se tabò diyà te sako i Benjamin.
GEN 44:13 Yan miglisì se kedita dan te saol dan tandà te puluk dan. Todà dan miglolan te menge sako diyà te menge asno, aw limikò dan doton te lonsod.
GEN 44:14 Pegdateng i Juda aw menge kedowa din doton te balay i Jose, kidoen pa sikandin. Tigkan dan limongken taman te tanà.
GEN 44:15 Minikagi si Jose, “Nengà lay mig-inang kaw te medaet seini? Wedà kaw besi ketaga-taga te mebatog ko kitaen se ininang niyo pineokit te peg-etok.”
GEN 44:16 Timaba si Juda, “Sir, megmeno kay? Iling te wedad itaba day te inikagi nikaw. Impekità den te Timanem te benal doen salà day. Kedita day se meinang allang nikaw sipat sikandin kinitaan no te tabò.”
GEN 44:17 Meneng minikagi si Jose, “Eked a. Eked a keibeg kenyan. Olò otaw kinitaan te tabò se inangen ko allang. Meneng mepakay aw molì se menge doma doton te amay niyo.”
GEN 44:18 Penga niyan, migpedapag si Juda diyà ki Jose aw minikagi sikandin, “Sir, aw mepakay diyà kamno, ibeg ko mikagi a peden diyà kamno. Ikà bag egkeopal diyà kanak. Onawa te kelangkaw te selotan se kelangkaw nikaw.
GEN 44:19 Sir, kedengan mig-insà ka diyà kenami aw doen amay day aw kedowa day.
GEN 44:20 Timaba kay te doen amay day temoay, aw doen adi day timebaw te pegketemoay te amay day. Sikandin olò se nesamà diyà te dowa batà te inay din, so nematay se kakay din. Ontò sikandin egkedekelan te amay day te pedowan.
GEN 44:21 Sir, timogon ka kenami te keilangan ibingen day sikandin dini kamno amon komità ka kandin.
GEN 44:22 Minikagi kay diyà kamno te eked sikandin peketanan te amay day, so aw tomanan sikandin, matay se amay day.
GEN 44:23 Penga niyan, minikagi ka te eked kay pekelikò dini kamno singed aw ipetaking day se kedowa day temanan adi.
GEN 44:24 Peg-olì day doton te amay day, mig-indan kay kandin tepad te inikagi nikaw.
GEN 44:25 “Nayan, doen aldaw minikagi se amay day te keilangan lomikò kay dini amon mayad kay te kànen.
GEN 44:26 Meneng minikagi kay te eked iyan kepakay, so eked kay likò singed aw tomaking se adi day. Aw tomaking sikandin, yan lomikò kay.
GEN 44:27 Penga niyan, minikagi se amay day diyà kenami, ‘Netegahan niyo,’ son din, ‘te olò dowa se batà ko timebaw diyà te esawa ko si Raquel.
GEN 44:28 Nemetayan a den te sebad. Inimetayan besi sikandin te mebolot menenanap te kebenesan, aw wedà ko palos todà kitai.
GEN 44:29 Aw ibingen niyo den se adi niyo aw matay sikandin, matay a heman tandà te lano ko kandin, so ontò a den temoay.’
GEN 44:30 “Nayan Sir, aw eked taking se adi day te peg-olì day, aw komità se amay day te wedà olì, matay sikandin, so ontò dakel se pedowan din diyà te batà din sìyan. Yan pineokit kenami, matay se amay day tandà te lano din.
GEN 44:32 Siaken heman, migsapà a diyà te amay ko te siak se megbantay te adi day amon wedad megpeeleg kandin. Minikagi a, aw eked ko keolì se adi day doton kandin, yan se salà ko kandin te wedad temanan.
GEN 44:33 Nayan Sir, peogpai a bag dini kamno amon inangen a no allang iselilin kandin. Peolii bag sikandin sipat te menge doma kedowa din.
GEN 44:34 Eked a olì doton te amay ko aw eked taking se adi day. Eked a keibeg komità te kegemakan domateng diyà te amay ko.”
GEN 45:1 Nayan, wedà ketemengi i Jose se pedowan din, aw yan impekesayo din se kedita te sineligan din amon eked dan kità kandin. Wedad doma otaw kidoen dalem te pegpekilala i Jose diyà te menge kedowa din.
GEN 45:2 Ontò migkelag si Jose igsà dinineg iyan te menge tege Ehipto doton te lowà, aw inindanan heman se menge otaw doton te balay te selotan.
GEN 45:3 Minikagi si Jose diyà te menge kedowa din, “Siaken si Jose. Mèpiya lay pa se pegkesawol te amay ko?” Meneng pegdineg te menge kedowa din kenyan, wedà dan peketaba kandin tandà te peso dan.
GEN 45:4 Penga niyan, minikagi si Jose, “Pegpedapag kaw diyà kanak.” Pegpedapag dan diyà kandin, minikagi heman si Jose, “Siaken se kedowa niyo si Jose imbeligyà niyo, aw inibing a dini te Ehipto.
GEN 45:5 Na, ikà niyo egketetana. Ikà niyo egkepuluk tepad te pegbeligyà niyo kanak, so impeonà a te Timanem dini amon eked kaw kematay.
GEN 45:6 Dowa den se omay te bitil, meneng lima mendad se omay wedad geniyen diyà te pawà.
GEN 45:7 Insogò a te Timanem dini amon megtabang a kenyo, so ibeg din eked kaw kematay te bitil amon meantay kaw aw menge bowad-bowad niyo.
GEN 45:8 Kenà niyo se migsawol kanak dini, meneng Timanem se migsawol kanak dini. Ininang a din melangkaw diyà te menge opisyal te selotan. Siak se egsogò te kedita te sineligan te selotan, aw siak heman se eglowan dini te kebelad te Ehipto.
GEN 45:9 “Kegaen kaw den olì doton te amay tadon, aw peg-indan kaw kandin, ‘Seini se inikagi te batà no si Jose. Impelowan a den te Timanem dini te kebelad te Ehipto. Keilangan meg-ayas kaw dini kanak.
GEN 45:10 Ipeogpà ta sikiyo dini te Gosen, amon medapag se kedita niyo diyà kanak, pengkey sikona, aw menge batà nikaw, menge apò nikaw, aw menge karniro aw menge kambing, aw menge baka, aw kedita te kedònan nikaw.
GEN 45:11 Aw meg-ogpà kaw dini te Gosen, ipaten ta sikiyo. Lima mendad se omay te bitil, aw eked a keibeg aw kelimahan ka, aw menge batà nikaw, aw menge ayam-ayam nikaw.’”
GEN 45:12 Minikagi heman si Jose, “Nayan, kedita niyo menge kakay ko, aw sikona heman Benjamin, kimilala kaw den te ontò a si Jose.
GEN 45:13 Indani niyo se amay tadon tepad te kelangkaw ko dini te Ehipto aw tepad te kedita te kinità niyo dini. Na, kegaen kaw den, aw ibingi niyo sikandin dini.”
GEN 45:14 Penga niyan, kimeles si Jose te adi din si Benjamin, aw migkelag. Migkelag heman si Benjamin te pegkeles din ki Jose.
GEN 45:15 Penga niyan, kimeles heman si Jose te tegsebad-sebad kandan, aw nengadek sikandin kandan, aw migkelag. Penga niyan, nekeikagi se menge kedowa i Jose diyà kandin.
GEN 45:16 Pegdineg te selotan te dimateng den se menge kedowa i Jose, neluba sikandin aw kedita te menge opisyal din.
GEN 45:17 Minikagi se selotan diyà ki Jose, “Sogoi se menge kedowa no meglolan te karga diyà te menge asno dan aw molì dan doton te Canaan,
GEN 45:18 amon engayen dan se amay niyo aw menge pamilya dan aw lomikò dan dini. Ipeogpà ko dan diyà te mèpiya tanà dini te Ehipto, aw ontò mèpiya se kànen dan dini.
GEN 45:19 Begayi dan heman te menge keriton lekat dini amon doen sekayan te menge esawa aw mengisù dan. Keilangan ibingen dan heman dini se amay niyo.
GEN 45:20 Ikegihi dan te keilangan eked dan ketetana tepad te kedònan dan tenanan doton, so begayan dan te ontò mèpiya dini te Ehipto.”
GEN 45:21 Yan se ininang te menge batà i Jacob. Doen menge keriton imbegay i Jose kandan iling te inikagi te selotan diyà kandin, aw doen heman kànen dan diyà te dalan imbegay din kandan.
GEN 45:22 Doen heman mèpiya ekasan imbegay i Jose diyà te tegsebad-sebad kandan, meneng si Benjamin se binegayan din te kwarta telo gatos plata selapì aw lima se ekasan.
GEN 45:23 Doen heman impeibing i Jose doton te amay din, sempolò asno linolanan te mèpiya kemolò te kedònan lekat te Ehipto, aw sempolò heman se doma asno linolanan te trigo, aw pan, aw menge doma kemolò te kànen amon doen kànen din diyà te dalan.
GEN 45:24 Penga niyan, minikagi si Jose diyà te menge kedowa din, “Ikà niyo egbolaw diyà te dalan.” Yan impekesayo din dan.
GEN 45:25 Nesayo dan lekat te Ehipto, aw minolì dan doton te amay dan si Jacob kidoen te Canaan.
GEN 45:26 Minikagi dan diyà kandin, “Neantay pa si Jose, aw eglowan sikandin doton te kebelad te Ehipto.” Ontò nepela si Jacob, so iling te eked din iyan pemenali.
GEN 45:27 Meneng peg-indan dan kandin tepad te kedita te inikagi i Jose, aw pegkità din te menge keriton impeibing i Jose amon sekayan din pesalo doton te Ehipto, yan neantay se pedowan din.
GEN 45:28 Minikagi sikandin, “Nemenal a den te neantay pa se batà ko si Jose. Wedad den doma ibeg ko. Keilangan domoton a den amon komità a kandin te eked a pa kematay.”
GEN 46:1 Nayan, miglolan si Jacob te kedakel te kedònan din, aw nesayo dan lekat te Canaan. Pegdateng dan doton te Berseba, doen ayam-ayam inimetayan i Jacob aw sinonog din amon segmanen din se Timanem iling te pegsagman te amay din si Isaac te Timanem.
GEN 46:2 Migpekità se Timanem diyà kandin te delem, aw timawal sikandin, “E Jacob.” Timaba si Jacob, “Ee, seini a.”
GEN 46:3 Minikagi sikandin, “Siaken se Timanem. Siaken se Timanem egseligan te amay no gebii. Ikà egkelemitan te pegdoton no te Ehipto, so doton te Ehipto inangen ko se menge bowad-bowad nikaw ontò melangkaw pongan.
GEN 46:4 Domoma a kenyo te pegdoton niyo te Ehipto, aw ibingen ko heman se menge bowad-bowad nikaw molì dini te Canaan. Aw matay ka, si Jose se meglebeng kamno.”
GEN 46:5 Penga niyan, dimeleg dan si Jacob lekat te Berseba. Impesakay sikandin te menge batà din diyà te keriton impeibing te selotan te Ehipto. Impesakay dan heman se menge mengisù aw menge esawa dan.
GEN 46:6 Inibing dan heman se menge ayam-ayam dan aw menge kedònan inabat dan doton te Canaan, aw dimoton dan te Ehipto. Impetaking i Jacob se kedita te menge bowad-bowad din,
GEN 46:7 menge batà din meama aw bayi, aw menge apò din heman meama aw bayi.
GEN 46:8 Na, seini se menge ngadan te bowad-bowad i Jacob timaking kandin doton te Ehipto. Si Ruben se kakay batà i Jacob.
GEN 46:9 Timaking si Ruben aw menge batà din meama si Hanoc, si Pallu, si Hesrom, aw si Carmi.
GEN 46:10 Si Simeon aw menge batà din meama si Jemuel, si Jamin, si Ohad, si Jakin, si Sokar, aw si Saul batà te bayi tege Canaan.
GEN 46:11 Si Levi aw menge batà din meama si Gerson, si Cohat, aw si Merari.
GEN 46:12 Si Juda aw menge batà din meama si Selas, si Peres, aw si Seras. (Nematay doton te Canaan se doma batà i Juda si Er aw si Onan.) Doen batà meama i Peres si Hesron aw si Hamul.
GEN 46:13 Si Isacar aw menge batà din meama si Tolas, si Puas, si Jasub, aw si Simron.
GEN 46:14 Si Sabulon aw menge batà din meama si Sered, si Elon, aw si Jaleel.
GEN 46:15 Yan se menge batà meama i Jacob timebaw diyà ki Lea doton te Mesopotamya. Doen heman batà dan bayi si Dina. Ketlowan teg telo se menge bowad-bowad i Jacob aw si Lea.
GEN 46:16 Timaking heman si Gad aw menge batà din meama si Sifeon, si Hagi, si Suni, si Esbon, si Eri, si Arod, aw si Areli.
GEN 46:17 Si Aser aw menge batà din meama si Imnas, si Iskas, si Isvi, si Berias, aw etebay dan si Sera. Doen batà meama i Berias si Eber aw si Melkiel.
GEN 46:18 Sempolò teg enem se kedita dan menge bowad-bowad i Jacob aw si Zilfa, sìyan allang imbegay i Laban diyà te batà din si Lea.
GEN 46:19 Dowa se batà i Jacob timebaw diyà te esawa din si Raquel, ngadan dan si Jose aw si Benjamin.
GEN 46:20 Dowa se batà meama i Jose timebaw doton te Ehipto, si Manases aw si Efraim. Yan se batà i Jose aw si Asenat, batà i Potiferas, sìyan egpengibing te menge otaw migsimba te aldaw doton te lonsod te On.
GEN 46:21 Doen menge batà meama i Benjamin si Belas, si Betser, si Asbel, si Geras, si Naaman, si Ehi, si Ros, si Mufim, si Hufim, aw si Ared.
GEN 46:22 Sempolò teg epat se kedita dan menge bowad-bowad i Jacob aw si Raquel.
GEN 46:23 Timaking heman si Dan aw batà din meama si Husim.
GEN 46:24 Si Neftali aw menge batà din meama si Jaseel, si Guni, si Jeser, aw si Selem.
GEN 46:25 Pito se kedita dan menge bowad-bowad i Jacob aw si Bilha, sìyan allang imbegay i Laban diyà te batà din si Raquel.
GEN 46:26 Keneman teg enem se kedita te menge bowad-bowad i Jacob dimoton te Ehipto. Wedà pesipati diyà te bilang se menge esawa te batà din.
GEN 46:27 Dowa se batà i Jose timebaw doton te Ehipto, aw yan kepitowan se kedita dan diyà te pamilya i Jacob te pegdoton din te Ehipto.
GEN 46:28 Nayan, insogò i Jacob si Juda monà kandin domoton ki Jose, so ibeg din songonen dan i Jose doton te Gosen. Pegdateng dan doton,
GEN 46:29 simakay si Jose te kelisa din, aw dimoton sikandin te Gosen amon somongon te amay din. Pegdateng din, kinelesan din se amay din, aw migkelag te ontò nenamay.
GEN 46:30 Minikagi si Jacob diyà ki Jose, “Mepakay den kanak aw matay a, so kimità a den kamno aw netegahan ko den te neantay ka pa.”
GEN 46:31 Penga niyan, minikagi si Jose diyà te menge kedowa din aw menge doma otaw diyà te pamilya te amay din, “Domoton a den te selotan amon meg-indan a kandin te dimateng den lekat te Canaan se kedita niyo menge kedowa ko aw menge doma otaw diyà te pamilya te amay ko.
GEN 46:32 Meg-indan a kandin te telediyaga kaw, aw egtonggò kaw te menge ayam-ayam, aw inibing niyo den se kedita te karniro niyo aw menge doma ayam-ayam niyo, aw kedakel te kedònan niyo.
GEN 46:33 Aw tewalen kaw te selotan, aw insaen kaw din aw eden se eg-inangen niyo,
GEN 46:34 keilangan meg-indan kaw kandin te telediyaga kaw lekat te pegkemengisù niyo, iling te eg-inangen te menge kemonaan niyo gebii. Doun niyan, ipeogpà kaw din doton te Gosen.” Yan se inikagi i Jose diyà kandan, so eglindoan te menge tege Ehipto se telediyaga.
GEN 47:1 Penga niyan, impetaking i Jose se lima kedowa din, aw dimoton dan te selotan. Minikagi si Jose, “Dimateng den se amay ko aw menge kedowa ko lekat te Canaan, sipat te kedita te karniro aw doma ayam-ayam dan aw kedakel te kedònan dan. Kidoen den dan te Gosen.” Penga niyan, impekilala din se lima kedowa din diyà te selotan.
GEN 47:3 Mig-insà se selotan diyà kandan, “Eden lay se eg-inangen niyo?” Timaba dan, “Sir, telediyaga kay, iling te eg-inangen te menge kemonaan day gebii.
GEN 47:4 Dimini kay so ontò medaet se bitil doton te Canaan igsà wedad palos mekaen te menge ayam-ayam day. Aw mepakay diyà kamno, peogpai kay doton te Gosen.”
GEN 47:5 Minikagi se selotan diyà ki Jose, “Mèpiya so dimateng den se amay nikaw aw menge kedowa nikaw.
GEN 47:6 Sikona se eglowan diyà te kebelad te Ehipto. Peogpai dan doton te Gosen, so yan se ontò mèpiya tanà. Aw doen otaw diyà kandan ontò biyasa egdiyaga, petonggoi kandan se kenaken menge ayam-ayam.”
GEN 47:7 Penga niyan, inibing i Jose se amay din si Jacob doton te selotan. Migtawal-tawal si Jacob amon mèpiya se ibegay te Timanem kandin,
GEN 47:8 aw mig-insà se selotan diyà kandin, “Pila lay se omay nikaw?”
GEN 47:9 Timaba si Jacob, “Sebad gatos ketlowan se omay ko. Pilabok olò se omay sìyan, aw melima se neokitan ko. Wedà pa apet se omay ko te omay te menge kemonaan ko.”
GEN 47:10 Todà migtawal-tawal si Jacob amon mèpiya se ibegay te Timanem diyà te selotan, aw penga niyan, nesayo sikandin.
GEN 47:11 Impeogpà i Jose se amay din aw menge kedowa din doton te Ehipto. Ontò mèpiya se tanà imbegay din kandan medapag te lonsod te Ramases, iling te impunù te selotan kandin.
GEN 47:12 Doen heman kànen imbegay i Jose diyà te amay din, aw menge kedowa din, aw menge doma otaw diyà te pamilya te amay din sipat te menge mengisù dan.
GEN 47:13 Ontò medaet se bitil igsà wedad palos kànen pengkey kenan. Nebitilan se kedita te otaw doton te Ehipto aw Canaan so binallos dan.
GEN 47:14 Minayad dan te trigo diyà ki Jose, aw inibing din se kedakel te kwarta imbayad dan kenyan doton te balay te selotan.
GEN 47:15 Pegkeamin te kedakel te kwarta doton te kebelad te Ehipto aw Canaan, dimoton se menge tege Ehipto ki Jose, aw minikagi dan, “Begayi kay bag te kànen, so agpet kay den matay. Tebangi kay, so wedad den kànen day aw neamin den se kwarta day.”
GEN 47:16 Minikagi si Jose, “Aw neamin den se kwarta niyo, ibingi niyo diyà se menge ayam-ayam niyo, so yan se mepakay niyo iliwan te kànen diyà kanak.”
GEN 47:17 Yan inibing dan se menge ayam-ayam dan doton ki Jose, menge kodà dan, menge karniro, kambing, baka, aw asno dan. Yan se imbayad dan te kànen diyà ki Jose. Imbegay din kandan se kànen te omay sìyan liniwanan dan te kedita te ayam-ayam dan.
GEN 47:18 Pegkepenga te omay sìyan, limikò dan doton ki Jose aw minikagi dan, “Sir, benal se kagi day kamno te neamin se kwarta day, aw tinig-apò no den se kedita te ayam-ayam day. Wedad den ibegay day kamno, olò pawà day aw lawa day se nesamà.
GEN 47:19 Aw eked ka pegtabang kenami, matay kay aw kebàtan se pawà day. Lawa day aw pawà se iliwan day te kànen. Mepakay aw inangen kay allang te selotan, aw ibegay day se tanà diyà kandin. Meneng begayi kay bag olò te trigo amon eked kay kematay aw amon doen itanem day diyà te pawà.”
GEN 47:20 Penga niyan, bineyadan i Jose se kedita te tanà kidoen te Ehipto amon tig-epoen iyan te selotan. Nemeligyà se kedita te tege Ehipto te tanà dan so ontò medaet se bitil, aw yan neinang se selotan tig-apò te kedakel te tanà.
GEN 47:21 Neinang allang te selotan se kedita te otaw kidoen te kebelad te Ehipto tandà te ininang i Jose.
GEN 47:22 Meneng wedà din beyadi se tanà tinig-apò te menge egpengibing te menge otaw egsimba te aldaw doton te Ehipto. Wedà dan beligyai se tanà dan so egtogpoan dan te selotan.
GEN 47:23 Minikagi si Jose diyà te menge otaw, “So bineyadan kaw den te selotan sipat te tanà niyo, ibegay ko den kenyo se benì ipanggas niyo.
GEN 47:24 Aw doen geniyen niyo, keilangan ibegay niyo se tengà te lima diyà te selotan. Kenyo se samà amon doen benì ipanggas niyo aw amon doen kànen niyo aw menge pamilya niyo.”
GEN 47:25 Timaba dan, “Tandà te tabang nikaw kenami, eked kay den kematay. Sir, ontò mèpiya se ininang no kenami, aw yan meinang kay menge allang te selotan.”
GEN 47:26 Yan migpunù si Jose doton te Ehipto te keilangan ibegay dan diyà te selotan se tengà te lima diyà te kedakel te geniyen dan, aw yan se punù egtoloen dan lamig songkani. Olò tanà te menge egpengibing te simbahan dan se wedà ketig-apò te selotan.
GEN 47:27 Mig-ogpà se menge bowad-bowad i Jacob (doma ngadan din si Israel) kidoen te Gosen doton te Ehipto, aw yan neinang dakel se kedònan dan kidoen, aw ontò migkedita se mengisù dan.
GEN 47:28 Mig-ogpà si Jacob doton te Ehipto te sempolò teg pito se omay, lamig minapet te sebad gatos kepatan teg pito se omay din.
GEN 47:29 Pegdateng te aldaw te agpet den sikandin matay, tinawal i Jacob se batà din si Jose, aw minikagi sikandin, “Soli se belad nikaw diyà te salad te bobon ko amon ketegahan ko te tomanen no se ipunù ko kamno seini. Pegpakang ka kanak te eked no lebengi se lawa ko dini te Ehipto.
GEN 47:30 Ibeg ko ilebeng beling se lawa ko doton te lebenganan doma te menge kemonaan ko. Yan ibingi se lawa ko lekat dini te Ehipto, aw lebengi a doton te linebengan kandan.” Minikagi si Jose, “Ee. Toloen ko se impunù no kanak.”
GEN 47:31 Minikagi si Jacob, “Pegsapà ka kanak te yan se inangen nikaw.” Yan migsapà si Jose. Penga niyan, timikelong si Jacob kidoen te katri din, aw migpesiontong sikandin diyà te Timanem.
GEN 48:1 Doen sebad aldaw, inindanan si Jose te nesekitan se amay din. Yan impetaking din se dowa batà din si Efraim aw si Manases, aw dimoton dan ki Jacob.
GEN 48:2 Inindanan si Jacob te dimateng se batà din si Jose, aw yan migkagsen sikandin aw minenaw diyà te katri din.
GEN 48:3 Minikagi si Jacob diyà ki Jose, “Kedengan, migpekità se Timanem metolos diyà kanak kidoen te Luz doton te Canaan, aw mèpiya se impakang din kanak.
GEN 48:4 Minikagi sikandin, ‘Medita se batà ibegay ko kamno amon meinang medita pongan se menge bowad-bowad nikaw. Ibegay ko se tanà dini te Canaan diyà te menge bowad-bowad nikaw amon tig-epoen dan ini te wedad temanan.’”
GEN 48:5 Minikagi heman si Jacob, “Se didowa batà nikaw timebaw dini te Ehipto te wedà a pa alin dini, yan se sekopen ko diyà te menge batà ko. Inangen ko kanak batà si Efraim aw si Manases, onawa te ontò batà ko si Ruben aw si Simeon.
GEN 48:6 Aw betaen no pa se doma, eked ko dan sekopi, meneng tepad te tanà kinewaen te menge bowad-bowad ko te pegkematay ko, mesakop dan diyà te pongan te kakay dan si Efraim aw si Manases.
GEN 48:7 Keidowan ko se didowa batà no sìyan tandà te dakel se pedowan ko diyà te inay no si Raquel. Ontò nepuluk se pedowan ko te pegkematay din doton te Canaan medapag te Efrata te peg-olì ko lekat te Mesopotamya. Inlebeng ko se lawa din medapag te dalan pesalo te Efrata.” (Se lonsod te Efrata, yan se iningedanan Bitlihim songkani.)
GEN 48:8 Pegkità i Jacob te didowa batà i Jose, mig-insà sikandin, “Sinu lay se menge telaki sìyan?”
GEN 48:9 Timaba si Jose, “Seini se didowa batà ko imbegay te Timanem kanak dalem te peg-ogpà ko dini te Ehipto.” Minikagi si Jacob, “Ibingi dan diyà, so megtawal-tawal a den amon begayan dan te Timanem te mèpiya.”
GEN 48:10 Tabag den medaet se mata i Jacob so migketemoay den sikandin, aw yan wedà nael sikandin kità. Inibing i Jose se batà din, aw yan kinelesan dan i Jacob aw inedekan din dan.
GEN 48:11 Minikagi si Jacob diyà ki Jose, “Kedengan mig-aneng-aneng a te eked a den palos kità kamno, meneng pineokit te tabang te Timanem kanak, kimità a den kamno aw menge batà nikaw heman.”
GEN 48:12 Penga niyan, inabat i Jose se batà din lekat te giba te amay din, aw limongken sikandin diyà te amay din lamig minapet se olo din diyà te tanà.
GEN 48:13 Impetindeg i Jose si Efraim lenged te bibang i Jacob, aw si Manases lenged te kowanan din.
GEN 48:14 Meneng pig-ibelios i Jacob se belad din, so belad din lenged te kowanan se impemaed din te olo i Efraim, pengkey adi sikandin, aw bibang din se impemaed din te olo te kakay si Manases.
GEN 48:15 Penga niyan, migtawal-tawal sikandin amon begayan te Timanem si Jose te mèpiya, kagi din, “E Timanem, sikona se egseligan te menge kemonaan ko si Abraham aw si Isaac. Sikona se gayed mig-ipat kanak lamig songkani.
GEN 48:16 Sikona se migpelowà kanak amon wedad memeeleg kanak. Ibeg ko mèpiya se ibegay no diyà te didowa telaki seini. Ibeg ko eked palos kelibeli se ngadan ko aw ngadan te menge kemonaan ko si Abraham aw si Isaac pineokit te didowa apò ko seini. Ibeg ko heman, megkedita se batà dan aw menge bowad-bowad dan.”
GEN 48:17 Nayan, pegkità i Jose te si Efraim se pinemàdan te amay din te kowanan, wedà sikandin keibeg kenyan. Yan inabat din se belad te amay din amon elinen din lekat te olo i Efraim doton te olo i Manases.
GEN 48:18 Minikagi si Jose, “Amà, wedà iyan peketotok, so seini se kakay. Seini se keilangan pemàdan nikaw te kowanan.”
GEN 48:19 Meneng mig-eked si Jacob, aw minikagi sikandin, “Netegahan ko iyan Atò. Netegahan ko iyan. Meinang heman melangkaw se menge bowad-bowad i Manases, meneng labi pa melangkaw si Efraim, so meinang medita pongan se menge bowad-bowad din.”
GEN 48:20 Yan mèpiya se intawal-tawal din diyà te Timanem tepad kandan te aldaw sìyan te peg-ikagi din kani, “Kenyo ngadan se gemiten te menge bowad-bowad ko te peg-ikagi dan te mèpiya diyà te menge doma otaw, so mikagi dan, ‘Ibeg day, mèpiya se ibegay te Timanem kenyo, iling te ipegbegay din diyà ki Efraim aw si Manases.’” Pineokit kenyan, ininang i Jacob si Efraim labi pa melangkaw diyà ki Manases.
GEN 48:21 Penga niyan, minikagi si Jacob diyà ki Jose, “Nayan, agpet den se aldaw te pegkematay ko, meneng ipaten ka pa te Timanem, aw ipeolì din se menge bowad-bowad ta te modi aldaw doton te tanà inogpaan te menge kemonaan ta gebii.
GEN 48:22 Kenà menge kedowa nikaw se begayan ko den te tanà ko doton te Sikem, meneng sikona se begayan ko kenyan. Yan se tanà melambò inabat ko lekat te menge tege Amori te pegpengayaw ko kandan te sondang aw bosog.”
GEN 49:1 Penga niyan, tinawal i Jacob se kedita te batà din meama, aw minikagi sikandin, “Pegpedapag kaw den diyà kanak, so meg-indan a den kenyo aw eden se domateng kenyo te modi aldaw.
GEN 49:2 Menge batà ko, pegpedapag kaw den diyà kanak. Penenalan kaw den kanak.
GEN 49:3 “Sikona Ruben se kakay diyà te kedita te batà ko. Magsen se lawa nikaw iling kanak kedengan. Diyà te kedita te menge batà ko, sikona se ontò melangkaw aw ontò egsegmanen.
GEN 49:4 Meneng iling ka te wayeg eglaneg, so kenà ka egpeketameng te ibeg te pedowan nikaw. Yan meabat se kelangkaw nikaw, so limayok ka te doma esawa ko, aw yan migyàyà ka kanak.
GEN 49:5 “Si Simeon aw si Levi, onawa se didowa dan, so egpenagnos dan te kekamang amon meg-inang dan te medaet.
GEN 49:6 Eked a penenalan te pelnao dan. Eked a ayon kandan, so pegkeopal dan, nemonò dan, aw pegkeluba dan, pigpantig dan se menge baka.
GEN 49:7 Ipelumun dan te Timanem tandà te keopal dan, so pelaban dan mebolot aw ontò melbala. Peg-ebong-ebongen se menge bowad-bowad dan aw mebilit dan doton te ogpeanan te menge doma bowad-bowad ko.
GEN 49:8 “Sikona Juda se iduyun te menge kedowa nikaw. Egpekedaeg ka te menge poon nikaw. Keilangan lomongken se menge kedowa no diyà kamno.
GEN 49:9 Juda, iling ka te menenanap iningedanan liyon egsagok te kànen din, aw eg-olì doton te salag din aw eg-ibat. Wedad otaw mekeotik kamno.
GEN 49:10 Si Juda se mengawid te bangkà te selotan, so gayed lomowan se menge bowad-bowad din lamig domateng se ontò selotan, sìyan toloen te kedita te otaw.
GEN 49:11 Iiket din se nati te asno diyà te belagen te paras doen ontò mèpiya pongo niyan. Mepakay din bugsakan se penenaktun din diyà te temek te paras ininang bino, so ontò dakel se paras din.
GEN 49:12 Labi pa melalag se mata din diyà te bino, aw labi pa mepotì se ngipen din diyà te gatas.
GEN 49:13 “Si Sabulon se meg-ogpà doton medapag te dagat. Ipegpondo se menge bapor doton te dedongan din. Tig-epoen din se tanà taman te Sidon.
GEN 49:14 “Si Isacar se iling te magsen asno gayed eg-ibat medapag te karga eg-ibingen din.
GEN 49:15 Meneng aw komità sikandin te mèpiya iyan ogpeanan aw mèpiya heman se tanà kidoen, meg-akot sikandin te mebegat, aw measeb sikandin megterbaho iling te allang.
GEN 49:16 “Mèpiya se pegpengibing i Dan te menge sakop din, iling te menge doma pongan te bowad-bowad i Israel.
GEN 49:17 Si Dan se iling te memokan doton te kilid te dalan menongkà te benis te kodà amon medagdag se otaw simakay aw mekelias.
GEN 49:18 “E Pengolo, egpelimanan ko se pegpelowà no kanak.
GEN 49:19 “Doen menge mengengayaw meglompak ki Gad, meneng etowan din dan, aw elawen din dan.
GEN 49:20 “Mèpiya se geniyen doton te menge pawà i Aser. Mèpiya se kànen ebaten kidoen kandin iling te mèpiya kànen te selotan.
GEN 49:21 “Si Neftali se iling te seladeng eked kedakep. Mèpiya heman se bawa te menge batà din.
GEN 49:22 “Si Jose se iling te kayo intanem medapag te selep. Dakel se pongo niyan, aw minapet se panga niyan te dibaloy te alad.
GEN 49:23 Doen otaw meglompak kandin aw memanà kandin,
GEN 49:24 meneng megkedaet se bosog dan, aw megkelomay se bebenayen dan tandà te inang te Timanem Metolos egseligan ko. Timanem se megbantay aw meg-ipat te menge bowad-bowad ko.
GEN 49:25 Se Timanem egseligan ko, yan se megtabang kenyo. Se Timanem eglowan diyà te kedita, yan se memegay kenyo te mèpiya. Sikandin se memegay kenyo te odan lekat te langit, aw selep egtebol lekat didalem te tanà. Sikandin se memegay kenyo te medita ayam-ayam aw batà.
GEN 49:26 Sikandin se memegay kenyo te dakel trigo aw kebokadan. Sikandin se memegay kenyo te mèpiya doton te pemebongan aw doton te bontod wedad temanan. Ibeg ko Jose, begayan ka te Timanem te kedita niyan, so pinemallì ka din diyà te kedita te menge kedowa nikaw.
GEN 49:27 “Si Benjamin se iling te mebolot menenanap te kebenesan iningedanan lobo gayed egpengimatay aw egpengaen lekat te iselem lamig te meapon.”
GEN 49:28 Yan se sempolò teg dowa pongan te menge bowad-bowad i Israel, aw yan se inikagi te amay dan diyà kandan. Neketepad se inikagi din diyà te tegsebad-sebad kandan te agpet sikandin matay.
GEN 49:29 Penga niyan, doen impunù i Jacob diyà te menge batà din, kagi din, “Agpet a den tomelokon te menge kemonaan ko nematay. Lebengi se lawa ko doton te linebengan te menge kemonaan ko doton te ilib kidoen te tanà tapay tinig-apò i Efron tege Heti
GEN 49:30 doton te Makpela lenged te eglibtakan te lonsod te Mamre doton te Canaan. Yan se ilib aw tanà bineyadan i Abraham ki Efron amon inangen din lebenganan.
GEN 49:31 Yan se linebengan ki Abraham aw esawa din si Sara. Yan heman se linebengan ki Isaac aw esawa din si Rebecca. Yan heman se linebengan ko ki Lea.
GEN 49:32 Yan se tanà aw ilib bineyadan lekat te menge tege Heti gebii.”
GEN 49:33 Penga te pegpunù i Jacob diyà te menge batà din, todà sikandin minibat, aw penga niyan nematay.
GEN 50:1 Penga niyan, kimeles si Jose te amay din aw migkelag aw nengadek te bawa din.
GEN 50:2 Penga niyan, migpunù si Jose te ipebalsamar te otaw biyasa se lawa te amay din.
GEN 50:3 Kepatan se aldaw se pegbalsamar dan kandin, so yan se kenamay te pegbalsamar dan te lawa te nematay. Nelenowan sikandin te menge tege Ehipto te kepitowan se aldaw.
GEN 50:4 Pegketagkas te pegkelano dan kandin, minikagi si Jose diyà te menge sineligan te selotan, “Aw doen keido niyo kanak, keliwati niyo bag se kagi ko seini diyà te selotan.
GEN 50:5 ‘Te wedà pa kematay se amay ko, migpakang a kandin te ilebeng ko se lawa din kidoen te lebenganan tapay din impetagad doton te Canaan. Yan aw mepakay diyà kamno, domoton a amon ilebeng ko, aw penga niyan molì a dini.’”
GEN 50:6 Timaba se selotan, “Ee. Doton ka aw lebengi se amay nikaw iling te impakang no kandin.”
GEN 50:7 Yan nesayo si Jose amon meglebeng te amay din. Tinekingan heman sikandin te kedita te opisyal te selotan, aw menge obanen egseligan te selotan, aw menge doma otaw nedengeg doton te Ehipto.
GEN 50:8 Timaking heman se kedita te pamilya i Jose, aw menge kedowa din, aw kedita te otaw diyà te pamilya te amay din. Olò menge deitek mengisù, aw karniro, kambing, aw baka se wedà dan petekingi, meneng mig-ogpà dan doton te Gosen.
GEN 50:9 Timaking heman ki Jose se menge otaw simakay te kelisa aw kodà. Ontò medita se otaw dimoton.
GEN 50:10 Pegdateng dan doton te giyekanan kidoen te Atad doton dipag te Jordan, nenamay dan migkoliyà. Minoloy si Jose te amay din kidoen taman te pito se aldaw.
GEN 50:11 Pegkità te menge tege Canaan te peg-oloy dan doton te Atad, minikagi dan, “Ontò minoloy se menge tege Ehipto.” Yan se doun te iningedanan se ogpeanan sìyan Abel Misraim (kelebadan niyan, oloyanan te tege Ehipto). Yan se neinang doton dipag te Jordan.
GEN 50:12 Yan tinoman te menge batà i Jacob se impunù din kandan.
GEN 50:13 Inibing dan se lawa din doton te Canaan, aw inlebeng dan iyan diyà te ilib kidoen te Makpela lenged te eglibtakan te lonsod te Mamre. Yan se ilib aw tanà bineyadan i Abraham ki Efron tege Heti amon inangen din lebenganan.
GEN 50:14 Penga te peglebeng i Jose te amay din, minolì sikandin doton te Ehipto sipat te menge kedowa din aw kedita te doma otaw timaking kandin te peglebeng.
GEN 50:15 Nayan, so nematay den si Jacob, migpebelaw-belaway se menge kedowa i Jose, kagi dan, “Megmeno kidon aw keopalan kidon den i Jose, aw megmalit den sikandin kenitadon tandà te medaet ininang tadon kandin?”
GEN 50:16 Penga niyan, impekeliwat dan se kagi dan diyà ki Jose, “Te wedà pa kematay se amay tadon,
GEN 50:17 migpunù sikandin te ikeliwat day diyà kamno se kagi din seini, ‘Pegwedadi bag se salà te menge kedowa no kedengan te peg-inang dan kamno te medaet.’ Yan, pegwedadi bag se salà ininang day menge sineligan te Timanem egpemenalen te amay tadon.” Pegdineg i Jose te kagi dan sìyan, migkelag sikandin.
GEN 50:18 Penga niyan, dimoton se menge kedowa din kandin, aw limongken dan diyà kandin. Minikagi dan, “Dimini kay den amon inangen kay menge allang nikaw.”
GEN 50:19 Meneng minikagi si Jose, “Ikà niyo egkelemitan kanak. Kenà ko se meg-okom kenyo, so olò Timanem se mepakay meg-okom.
GEN 50:20 Pengkey medaet se tod niyo kanak, meneng ininang te Timanem iyan mèpiya, amon medita se otaw eked kematay te bitil, aw yan se doun te neantay kidon pa songkani.
GEN 50:21 Ikà niyo palos egkelemitan, so siak se meg-ipat kenyo aw menge pamilya niyo.” Ontò mèpiya se kagi din kandan amon mesinalay se pedowan dan.
GEN 50:22 Mig-ogpà dan pa doton te Ehipto, si Jose aw kedita te menge bowad-bowad te amay din. Pegkematay i Jose, sebad gatos sempolò se omay din.
GEN 50:23 Te wedà pa sikandin kematay, nesàban sikandin te menge apò din te boel, menge apò i Efraim. Nesàban heman sikandin te menge apò din te boel, menge batà i Makir batà i Manases, aw inelopop din dan.
GEN 50:24 Nayan, doen aldaw minikagi si Jose diyà te menge kedowa din, “Agpet den domateng se aldaw te pegkematay ko, meneng metoman kaw gayed ipaten te Timanem, aw ibingen kaw din lekat te ogpeanan seini doton te ogpeanan impakang din diyà te menge kemonaan tadon si Abraham, si Isaac, aw si Jacob.”
GEN 50:25 Penga niyan, nemoyò si Jose te megsapà se menge doma bowad-bowad i Israel, kagi din, “Pegpakang kaw kanak te ibingen niyo se lawa ko te modi aldaw aw ipeolì kaw te Timanem doton te Canaan.”
GEN 50:26 Yan nematay si Jose doton te Ehipto te sebad gatos sempolò se omay din. Penga niyan, impebalsamar dan se lawa din, aw insawol dan iyan diyà te longon.
MAT 1:1 Seini se ngadan te menge kemonaan i Jesu Cristo. Si Jesus se sebad diyà te menge bowad-bowad i David, aw menge bowad-bowad i Abraham.
MAT 1:2 Si Abraham se amay i Isaac. Si Isaac se amay i Jacob. Si Jacob se amay i Juda aw menge kedowa din.
MAT 1:3 Si Juda se amay i Fares aw si Sara. Si Tamar se inay dan. Si Fares se amay i Esrom. Si Esrom se amay i Aram.
MAT 1:4 Si Aram se amay i Aminadab. Si Aminadab se amay i Naason. Si Naason se amay i Salmon.
MAT 1:5 Si Salmon se amay i Boos, aw si Rahab se inay din. Si Boos se amay i Obed, aw si Ruth se inay din. Si Obed se amay i Isai.
MAT 1:6 Si Isai se amay te selotan si David. Si David se amay i Solomon, aw inay din se esawa i Uria inagaw i David.
MAT 1:7 Si Solomon se amay i Roboam. Si Roboam se amay i Abias. Si Abias se amay i Asa.
MAT 1:8 Si Asa se amay i Josafat. Si Josafat se amay i Joram. Si Joram se amay i Usias.
MAT 1:9 Si Usias se amay i Jotam. Si Jotam se amay i Acas. Si Acas se amay i Esekias.
MAT 1:10 Si Esekias se amay i Manases. Si Manases se amay i Amon. Si Amon se amay i Josias.
MAT 1:11 Si Josias se amay i Jeconias aw menge kedowa din. Dinakep dan sipat menge doma dan Judiyo aw inibing dan doton te mediyò ogpeanan te Babilonya.
MAT 1:12 Penga te peg-ibing kandan doton te Babilonya, migbatà si Jeconias ki Salatiel. Si Salatiel se amay i Sorobabel.
MAT 1:13 Si Sorobabel se amay i Abiud. Si Abiud se amay i Eliakim. Si Eliakim se amay i Asor.
MAT 1:14 Si Asor se amay i Sadoc. Si Sadoc se amay i Akim. Si Akim se amay i Eliud.
MAT 1:15 Si Eliud se amay i Eleasar. Si Eleasar se amay i Matan. Si Matan se amay i Jacob.
MAT 1:16 Si Jacob se amay i Jose. Si Jose se esawa i Maria inay i Jesus. Si Jesus se ginulal Misiyas insogò te Timanem.
MAT 1:17 Nayan, lekat ki Abraham lamig ki David, sempolò teg epat kebelikwat se pamilya migpetondogay. Lekat ki David lamig te peg-ibing te menge Judiyo doton te Babilonya, sempolò teg epat heman kebelikwat se pamilya migpetondogay. Lekat te peg-ibing kandan doton te Babilonya lamig te pegtebaw te Misiyas, sempolò teg epat heman kebelikwat se pamilya migpetondogay.
MAT 1:18 Nayan, seini se indan-indan tepad te pegtebaw i Jesu Cristo. Si Maria se inay din, aw doen salà din si Jose. Te wedà dan pa peipiday, netegahan i Maria te miglaman sikandin pineokit te Espiritu Santo.
MAT 1:19 Mèpiya otaw se salà din si Jose. Pegketaga-taga din te miglaman den si Maria, mig-aneng-aneng sikandin te eked den ipid ki Maria. Ibeg i Jose osayen dan te wedad metaga-taga amon eked keyàyà si Maria.
MAT 1:20 Meneng dalem pa te peg-aneng-aneng din kenyan, doen anghil te Timanem migpekità diyà kandin pineokit te tegeinep, aw minikagi, “Jose, bowad-bowad i David, ikà eg-eked te peg-ipid no ki Maria, so miglaman sikandin pineokit te Espiritu Santo.
MAT 1:21 Doen batà meama tomebaw diyà kandin ingedanan no ki Jesus, so sikandin se megpelowà te otaw lekat te salà.”
MAT 1:22 Neinang iyan amon metoman se tapay inikagi te telekeliwat te kagi te Timanem gebii, kagi din,
MAT 1:23 “Na, meglaman se laga aw tomebaw se batà meama ingedanan ki Emmanuel.” (Se kelebadan niyan, “Dini den se Timanem doma kenitadon.”)
MAT 1:24 Pegkeloka i Jose, timolò sikandin te impunù te anghil te Timanem kandin, aw minipid sikandin ki Maria.
MAT 1:25 Meneng wedà dan pegpeleyokay lamig timebaw se batà. Iningedanan i Jose se batà ki Jesus.
MAT 2:1 Timebaw si Jesus doton te lonsod te Bitlihim sakop te probinsya te Judiya dalem te peglowan te selotan si Herod. Nayan, doen menge otaw dimateng doton te Jerusalem lekat te mediyò ogpeanan doton te eglibtakan te aldaw. Sikandan se ontò biyasa tepad te pengilala te menge bitoen.
MAT 2:2 Mig-insà dan, “Kenan lay se deitek batà meinang Selotan te menge Judiyo? Kinità day se bitoen limibtak aw yan se pengilala te timebaw den sikandin. Dimini kay amon megsimba kay kandin.”
MAT 2:3 Pegdineg i Herod te doen meinang selotan somelilin kandin, ontò sikandin netetana sipat kedita te tege Jerusalem.
MAT 2:4 Penga niyan, impetipon din se kedita te pengolo te simbahan te Judiyo aw menenoladà te punù ingkeliwat i Moises. Mig-insà sikandin aw kenan tebaw se Misiyas.
MAT 2:5 Timaba dan, “Tomebaw sikandin doton te Bitlihim dini te probinsya te Judiya, so yan se tapay insolat te telekeliwat te kagi te Timanem, kagi din,
MAT 2:6 ‘Sikiyo menge tege Bitlihim, pengkey nedengeg se menge doma lonsod doton te probinsya niyo te Judiya, meneng labi pa medengeg se lonsod niyo, so lekat kenyo se Pengolo lomowan diyà te menge bowad-bowad i Israel pinemallì ko.’”
MAT 2:7 Penga niyan, impeangay i Herod se menge otaw biyasa te pengilala te bitoen. Netipon dan te wedad doma otaw netaga-taga, aw ontò mig-insà si Herod aw kano dan kitai se bitoen sìyan.
MAT 2:8 Penga niyan, insogò din dan, kagi din, “Doton kaw te Bitlihim, aw ontò niyo pemehai se batà sìyan. Aw kitaen niyo sikandin, likò kaw dini aw indani a niyo amon domoton a heman aw megsimba a kandin.”
MAT 2:9 Penga niyan, nesayo dan aw todà dan kinità se bitoen tapay dan kinità limibtak. Pegkità dan te bitoen, ontò neluba se pedowan dan, aw yan se tinekingan dan lamig simagked iyan diatas te balay inogpaan i Jesus.
MAT 2:11 Peg-awop dan kidoen te balay, kinità dan se batà aw inay din si Maria. Limongken dan aw migsimba dan te batà. Penga niyan, inokal dan se kekanà inibing dan, menge bolawan, aw metinadeg sonogen, aw bebolong te saka iningedanan mira. Tinigkan dan iyan imbowang diyà ki Jesus.
MAT 2:12 Nayan, migpunù se Timanem diyà kandan pineokit te tegeinep te eked kepakay aw lomikò dan doton ki Herod. Yan se doun te minokit dan te sebad dalan te peg-olì dan doton te kandan ogpeanan.
MAT 2:13 Nayan, penga te pegkesayo dan, doen anghil insogò te Timanem migpekità diyà ki Jose pineokit te tegeinep, aw minikagi, “Enaw ka. Ibingi se batà aw inay din, aw kadas kaw doton te Ehipto. Peg-ogpà kaw doton lamig te ipeolì ko sikiyo, so doen sondalo isogò i Herod amon mengemahà te batà seini aw imetayan.”
MAT 2:14 Penga niyan, pengkey tengà te delem, minenaw si Jose aw inibing din se esawa din aw si Jesus, aw simamsam dan pesalo doton te Ehipto.
MAT 2:15 Mig-ogpà dan doton lamig nematay si Herod. Yan se neinang amon metoman se inikagi te telekeliwat te kagi te Timanem, “Ipeolì ko se batà ko lekat te Ehipto.”
MAT 2:16 Nayan, pegketaga-taga i Herod te inekalan sikandin te menge otaw biyasa tepad te pengilala te bitoen, ontò sikandin neopal so wedà dan likò doton kandin. Yan insogò din se menge sondalo doton te lonsod te Bitlihim aw menge ogpeanan medapag kidoen amon imetayan dan se kedita te batà meama lekat te kaling timebaw lamig te didowa se omay, so yan se kenamay netegahan din lekat te in-indan te menge otaw biyasa tepad te pengilala te bitoen.
MAT 2:17 Pineokit kenyan, netoman se inikagi te telekeliwat te kagi te Timanem gebii si Jeremias,
MAT 2:18 “Doen dinegen niyo kidoen te lonsod te Rama. Megkelag aw megmatay se menge bowad-bowad i Rakel, so melano dan te mengisù dan. Megkelag dan, aw eked dan kesinelayi, so inimetayan se mengisù dan.”
MAT 2:19 Nayan, penga te pegkematay i Herod, doen anghil insogò te Timanem migpekità diyà ki Jose doton te Ehipto pineokit te tegeinep. Minikagi se anghil,
MAT 2:20 “Enaw ka. Ibingi se batà aw inay din, aw olì kaw doton te Israel, so nematay den se otaw mengimatay peden te batà.”
MAT 2:21 Penga niyan, minenaw si Jose aw inibing din se esawa din aw si Jesus, aw minolì dan doton te Israel.
MAT 2:22 Meneng wedà dan deleg doton te probinsya te Judiya, so nelemitan si Jose te pegdineg din te limowan den si Arkelao simelilin te amay din si Herod nematay. Yan insogò te Timanem si Jose pineokit te tegeinep, aw simoway dan doton te probinsya te Galiliya.
MAT 2:23 Mig-ogpà dan doton te lonsod te Nasarit. Yan netoman se inikagi te menge telekeliwat te kagi te Timanem te tewalen si Jesus tege Nasarit.
MAT 3:1 Nayan, dimateng se aldaw te pegdoton i Juan Memonyagay te kebigtilan kidoen te probinsya te Judiya. Migtoladà sikandin, kagi din,
MAT 3:2 “Pegselsel kaw den te menge salà ininang niyo, so agpet den lomowan se Timanem diyà kenitadon.”
MAT 3:3 Si Juan se tinedoan te inikagi te telekeliwat te kagi te Timanem gebii si Isaias, “Dinegen niyo se otaw doton te kebigtilan aw dakel se kagi din, ‘Peketagad kaw te pegdateng te Pengolo. Peg-inang kaw te metòlid, so domateng sikandin.’”
MAT 3:4 Nayan, egpenaol si Juan te saol inabel lekat te bolbol te ayam-ayam kamilo aw egpengelen te kindal te ayam-ayam. Egpengànen din se menge dolon aw teneb eg-ebaten din doton te kebenesan.
MAT 3:5 Medita se otaw lekat te Jerusalem aw menge doma lonsod sakop te probinsya te Judiya aw medapag te wayeg te Jordan dimoton amon menenalan kandin.
MAT 3:6 Migselsel dan te menge salà ininang dan, aw binonyagan din dan doton te wayeg te Jordan.
MAT 3:7 Nayan, medita heman se egpengibing te simbahan te Judiyo dimoton ki Juan amon megpebonyag dan kandin. Sakop dan te menge Parisiyo aw Sadusiyo. Pegkità i Juan kandan, minikagi sikandin, “Tay law. Iling kaw te memokan egkadas te apoy. Eked kaw pekelowà lekat te pelumun te Timanem te modi aldaw singed aw megselsel kaw.
MAT 3:8 Aw migselsel kaw den, petega-tegahi niyo iyan pineokit te eg-inangen niyo.
MAT 3:9 Ikà niyo eg-aneng-aneng te eked kaw pelumuni so bowad-bowad kaw i Abraham. Eneng-enengi niyo se kagi ko seini. Pengkey se menge bato seini te lanto te tanà, mepakay iyan inangen te Timanem menge bowad-bowad i Abraham somelilin kenyo.
MAT 3:10 Iling kaw te kayo agpet pilayen. Aw kenà mèpiya se pongo te kayo, pilayen iyan aw sonogen.
MAT 3:11 Egpemonyag a pineokit te wayeg, so yan se pengilala te migselsel kaw den te salà ininang niyo. Meneng doen pa domateng labi pa melangkaw diyà kanak. Kenà botong se kelangkaw ko amon megtelaban a kandin pengkey mengibing a te sepatos din, so ontò sikandin melangkaw diyà kanak. Sikandin se memonyag kenyo pineokit te Espiritu Santo aw pineokit te apoy.
MAT 3:12 Iling sikandin te otaw egpepalid te trigo eggiyeken din, amon isawol din te buun aw ibingen din doton te balay. Meneng se ohot aw tipig, yan se sonogen din te apoy kenà egkepadeng.”
MAT 3:13 Nayan, dimateng si Jesus lekat te probinsya te Galiliya aw dimoton te wayeg te Jordan amon megpebonyag ki Juan.
MAT 3:14 Meneng wedà keibeg si Juan aw sikandin se megbonyag ki Jesus, so minikagi sikandin, “Eked kepakay aw siak se megbonyag kamno. Keilangan sikona se megbonyag kanak.”
MAT 3:15 Meneng minikagi si Jesus, “Tomani den se pegbonyag kanak, so keilangan tomoman ki den te kedita te ibeg te Timanem.” Penga niyan, migbonyag si Juan ki Jesus.
MAT 3:16 Penga te pegbonyag din kandin, minanggin si Jesus lekat te wayeg. Pegketà, neowang se langit, aw kinità din se Espiritu Santo migpedanà diyà kandin iling te selepati, aw mig-ogpà diyà kandin.
MAT 3:17 Penga niyan, dinineg dan se kagi te Timanem lekat te langit, “Seini se Batà ko. Dakel se pedowan ko kandin, aw ontò a neluba kandin.”
MAT 4:1 Penga te pegbonyag ki Jesus, inibing sikandin te Espiritu Santo doton te kebigtilan amon boyowen i Satanas.
MAT 4:2 Wedad palos kinaen i Jesus dalem te kepatan se aldaw, aw penga niyan binallos sikandin.
MAT 4:3 Dimateng si Satanas aw minikagi sikandin, “Aw ontò ka Batà te Timanem, inangi pan se menge bato seini pineokit te tolos no amon doen kànen nikaw.”
MAT 4:4 Meneng minikagi si Jesus, “Eked a, so doen kagi te Timanem insolat, ‘Kenà olò kànen se keilangan te otaw amon eked kematay, meneng keilangan kominawà se otaw te kedita te impunù te Timanem.’”
MAT 4:5 Penga niyan, inibing i Satanas si Jesus doton diatas te dakel simbahan doton te Jerusalem.
MAT 4:6 Minikagi si Satanas, “Nayan, aw ontò ka Batà te Timanem, kahang ka. Eked ka elegi, so doen kagi te Timanem insolat, ‘Isogò te Timanem se menge anghil amon meg-ipat dan kamno.’ Doen heman kagi te Timanem insolat, ‘Ewidan ka te menge anghil, aw engaten ka dan amon eked ka kesongkol te bato.’”
MAT 4:7 Meneng minikagi si Jesus, “Eked a, so doen heman kagi te Timanem insolat, ‘Ikà niyo egtandà te Pengolo niyo Timanem.’”
MAT 4:8 Penga niyan, inibing i Satanas si Jesus doton te ontò melangkaw bontod, aw impekità din kandin se kedita te ogpeanan te keneyonan aw kèpiya niyan.
MAT 4:9 Minikagi si Satanas, “Aw lomongken ka diyà kanak aw simbahen a nikaw, ibegay ko diyà kamno se kedita te ogpeanan sìyan, amon lomowan ka diyà te kedita te otaw kidoen.”
MAT 4:10 Meneng minikagi si Jesus, “Satanas, kesayo ka. Eked a pegsimba kamno, so doen kagi te Timanem insolat, ‘Timanem se Pengolo niyo aw sikandin se keilangan simbahen niyo, so sikandin olò se mepakay tekingan niyo.’”
MAT 4:11 Penga niyan, nesayo si Satanas, aw doen menge anghil insogò te Timanem amon meg-ipat dan ki Jesus.
MAT 4:12 Nayan, impedakep i Herod si Juan Memonyagay aw impekeleboso din. Pegketaga-taga i Jesus kenyan, minolì sikandin doton te probinsya te Galiliya.
MAT 4:13 Minokit sikandin doton te lonsod te Nasarit aw dimeleg doton te lonsod te Kapirnaom aw mig-ogpà kidoen dapag te kilid te lanaw digsel te tanà te Sabulon aw Neftali.
MAT 4:14 Pineokit kenyan, netoman se inikagi te telekeliwat te kagi te Timanem gebii si Isaias tepad te pegdateng i Jesus pigpolingunan te lowa,
MAT 4:15 “Se kedita te otaw eg-ogpà doton te tanà te Sabulon aw Neftali, aw doton dapag te kilid te lanaw, aw doton dipag te wayeg te Jordan, aw doton te Galiliya eg-ogpaan te menge otaw kenà Judiyo,
MAT 4:16 pengkey iling te eg-ogpà dan doton te kengitngitan, meneng kitaen dan se ontò melowa. Pengkey eg-ogpà dan doton te kengitngitan aw egkelemitan dan te kemetayun, meneng egkeenyagan dan.”
MAT 4:17 Lekat niyan, migtebò si Jesus migtoladà, aw minikagi sikandin, “Pegselsel kaw den te menge salà ininang niyo, so agpet den lomowan se Timanem diyà kenyo.”
MAT 4:18 Doen sebad aldaw, minipanaw si Jesus doton te kilid te lanaw te Galiliya. Kinità din se didowa memokotay si Simon iningedanan din ki Pedro, aw adi din si Andres nemokot.
MAT 4:19 Timawal si Jesus, “Taking kaw kanak, so megtoladà a kenyo amon kenà ikan se meabat niyo, meneng otaw se ibingen niyo diyà kanak.”
MAT 4:20 Pegketà, tinenanan dan se pokot aw timaking dan ki Jesus.
MAT 4:21 Dimeleg si Jesus, aw kinità din se doma telekedowa si Santiago aw adi din si Juan didowa batà i Sebedeo. Kidoen dan te belangay sipat amay dan, aw migtigmes dan te pokot. Tinawal dan heman i Jesus,
MAT 4:22 aw ayas dan tinenanan se belangay aw amay dan, aw timaking dan heman ki Jesus.
MAT 4:23 Nayan, timeped si Jesus te kedita te lonsod doton te probinsya te Galiliya, aw migtoladà doton te menge simbahan te Judiyo. Migtoladà sikandin te Mèpiya Indan tepad te peglowan te Timanem, aw pinegolian din se kedita te otaw doen mesakit.
MAT 4:24 Yan se doun te ontò sikandin nedengeg doton te kebelad te Sirya. Pinegolian din se kedita te otaw doen mesakit inibing diyà kandin, pengkey eden kemoloi te mesakit, aw otaw dinetengan te bosaw, aw otaw pigbaboy, aw otaw kenà egpekeiwal. Negolian se kedita dan.
MAT 4:25 Ontò medita se otaw timaking ki Jesus. Tikedo dan te probinsya te Galiliya, aw lekat te Dikapolis, aw Jerusalem, aw probinsya te Judiya, aw lekat dipag te wayeg te Jordan.
MAT 5:1 Pegkità i Jesus te medita se otaw netipon, timikedeg sikandin te bontod aw nenenoo kidoen. Migpedapag se kedita te otaw tinoledaan din,
MAT 5:2 aw migtoladà si Jesus kandan, kagi din,
MAT 5:3 “Doen keluba te kedita te otaw netaga-taga te eked dan pekeinang te mèpiya singed aw tebangan dan te Timanem, so sekopen din dan diyà te peglowan din.
MAT 5:4 “Doen keluba te kedita te otaw nelidò se pedowan dan, so sinelayen dan te Timanem.
MAT 5:5 “Doen keluba te kedita te otaw migpedanà te kandan pegkeotawun, so kominawà dan te tanà impakang te Timanem.
MAT 5:6 “Doen keluba te kedita te otaw ontò meibeg meg-inang te metòlid, so tebangan dan te Timanem amon mekeinang dan te metòlid.
MAT 5:7 “Doen keluba te kedita te otaw egkeido te doma, so keidowan dan heman te Timanem.
MAT 5:8 “Doen keluba te kedita te otaw melobos se pedowan dan tomaking te Timanem, so komità dan kwani kandin.
MAT 5:9 “Doen keluba te kedita te otaw egpekeaseb eg-inang te kelinaw, so inangen dan te Timanem menge batà din.
MAT 5:10 “Doen keluba te kedita te otaw egpemilangen tandà te pegtolò dan te Timanem, so sekopen din dan diyà te peglowan din.
MAT 5:11 “Doen keluba te kedita niyo egtompuyusen tandà te pegtaking niyo kanak, pengkey egpemilangen kaw, pengkey bàtan-bàtan kaw.
MAT 5:12 Iling heman kenyan se pegpemilang dimateng diyà te menge telekeliwat te kagi te Timanem gebii. Meneng keilangan ontò kaw meluba, so ontò mèpiya se ontong ibegay diyà kenyo doton te langit.”
MAT 5:13 “Dalem te peg-ogpà niyo dini te keneyonan, iling kaw te asin isanged diyà te kànen. Meneng simpana megkewedad se kepait te asin, eked iyan ketodà. Keilangan iagbel, so wedad den kekemowan niyan, aw gìtan iyan te otaw mokit kidoen.
MAT 5:14 “Dalem te peg-ogpà niyo dini te keneyonan, iling kaw te solò diyà te kedita te otaw. Eked keeles se lonsod aw doton te lanto te bontod.
MAT 5:15 Aw menemtem se otaw te solò, eked din iyan sengkobi te gentangan. Meneng mèpiya aw isawol din iyan diyà te kelengkawan amon keenyagan se didalem te balay.
MAT 5:16 Iling heman kenyan, keilangan olò mèpiya se inangen niyo, so aw komità se menge doma otaw te mèpiya se eg-inangen niyo, iduyun dan se Amay niyo Timanem doton te langit.”
MAT 5:17 “Ikà niyo eg-aneng-aneng te dimini a amon pegwedaden ko se menge punù ingkeliwat i Moises aw insolat te menge telekeliwat te kagi te Timanem gebii. Meneng dimini a amon ipetaga-taga ko se ontò kedegdagan niyan.
MAT 5:18 Eneng-enengi niyo se kagi ko kenyo seini. Dalem te doen pa langit aw tanà, wedad palos punù te Timanem pegwedaden, meneng metoman se kedita te kagi din.
MAT 5:19 Aw doen otaw megwedad peden te pengkey sebad punù te Timanem, aw megtoladà kenyan diyà te doma otaw, yan se otaw ontò medanà doton te peglowan te Timanem. Meneng aw tomolò se otaw te kedita te punù te Timanem aw megtoladà te doma otaw kenyan, yan se otaw ontò melangkaw doton te peglowan te Timanem.
MAT 5:20 Mikagi a den diyà kenyo, aw kenà labi pa metòlid se eg-inangen niyo diyà te eg-inangen te menge Parisiyo aw menenoladà te punù ingkeliwat i Moises, eked kaw palos sekopi te Timanem diyà te peglowan din.”
MAT 5:21 “Netegahan niyo den te migpunù si Moises diyà te menge kemonaan niyo te keilangan eked dan pemonò, so keilangan ipelumun se otaw memonò.
MAT 5:22 Meneng mikagi a den diyà kenyo te pengkey olò meopal se otaw diyà te doma, ibingen sikandin doton te otaw eg-osay. Aw mikagi se otaw te medaet diyà te doma, ibingen sikandin doton te kelengkawan te oseyanan. Aw mikagi se otaw diyà te doma, ‘Book ka,’ ibingen sikandin doton te apoy te kilot.
MAT 5:23 Yan aw domoton kaw te dakel simbahan amon memegay te bowang diyà te Timanem, aw keeneng-enengan niyo te doen pa salà ininang niyo diyà te doma otaw,
MAT 5:24 tenani niyo onà se ibowang niyo, aw doton kaw te otaw sìyan amon megkità kaw. Penga niyan, mepakay aw lomikò kaw memegay te bowang diyà te Timanem.
MAT 5:25 “Aw doen otaw megdimanda tepad kenyo, ayas kaw pegpeido-ido diyà kandin dalem pa te eked kaw dateng doton te howis, amon eked kaw din ibingi doton te howis, aw ibegay kaw diyà te belad te polis amon kelebosowen kaw.
MAT 5:26 Eneng-enengi niyo se kagi ko seini. Aw kelebosowen kaw, eked kaw palos pekelowà singed aw beyadan niyo se kedakel te salà.”
MAT 5:27 “Netegahan niyo den te migpunù si Moises gebii te eked kepakay aw lomakad se otaw.
MAT 5:28 Meneng mikagi a den diyà kenyo te pengkey olò tomengteng se meama diyà te bayi aw medaet se ibeg din kandin, nekelakad den sikandin diyà te pedowan din.
MAT 5:29 Yan aw meboyo kaw meg-inang te salà pineokit te mata niyo, mèpiya aw logiten niyo se mata, aw iagbel niyo amon eked kaw keboyo. Labi pa medaet aw meboyo kaw pineokit te mata aw iagbel se kedakel te lawa niyo doton te kilot.
MAT 5:30 Aw meboyo kaw heman meg-inang te salà pineokit te belad niyo, mèpiya aw tokongen niyo se belad niyo aw iagbel niyo amon eked kaw keboyo. Labi pa medaet aw meboyo kaw pineokit te belad niyo aw iagbel se kedakel te lawa niyo doton te kilot.”
MAT 5:31 “Migpunù heman si Moises gebii te keilangan doen papil ibegay te meama diyà te bayi tepad te pegsibwan din kandin, aw penga niyan mepakay din ipekesayo.
MAT 5:32 Meneng mikagi a den diyà kenyo, aw somibwan se meama te esawa din wedà peglakad, medaet se inangen te meama sìyan, so pineokit kandin mekelakad se esawa din aw todà mengognan, aw mekelakad heman se meama mengognan te bayi sinibwanan.”
MAT 5:33 “Netegahan niyo heman te migpunù si Moises diyà te menge kemonaan niyo gebii te eked kepakay aw tomalis se otaw te pakang aw impeokit din iyan diyà te ngadan te Timanem, so keilangan tomanen din iyan.
MAT 5:34 Meneng mikagi a den diyà kenyo, aw megpakang kaw diyà te doma otaw, ikà niyo egsapà. Ikà niyo egsapà te langit aw tanà. Medaet iyan, so iling te onsedanan te Timanem se langit, aw iling te gìtanan din se tanà. Ikà niyo heman egsapà te lonsod te Jerusalem, so yan se lonsod ogpaan kwani te Selotan metolos.
MAT 5:36 Ikà niyo heman egsapà te logay niyo, so eked niyo kebatog todaen se batek niyan pengkey meitem aw mepotì.
MAT 5:37 Aw keseligan se kagi niyo, botong aw olò kaw tomaba, ‘Ee,’ aw ‘Eked.’ Aw keilangan isogpat niyo se sapà diyà te kebenalan, medaet iyan, so lekat iyan ki Satanas.”
MAT 5:38 “Netegahan niyo heman te migpunù si Moises gebii, aw memisek se otaw te mata te doma otaw, keilangan piseken heman se kandin mata. Migpunù heman si Moises, aw longeben te otaw se ngipen te doma otaw, keilangan longeben heman se kandin ngipen.
MAT 5:39 Meneng mikagi a den diyà kenyo, aw doen otaw meg-inang te medaet diyà kenyo, ikà niyo eg-inang te medaet diyà kandin. Aw sempaken kaw te doma otaw diyà te pisngi lenged te kowanan, pesempaki niyo heman se pisngi lenged te bibang.
MAT 5:40 Aw doen otaw mengibing kenyo doton te howis amon mengabat te ekasan niyo, begayi niyo heman kandin se saol niyo.
MAT 5:41 Pengkey legesen kaw te sondalo mengibing te kedònan din taman te sebad kilomitro, pengibing kaw kenyan taman te dowa kilomitro.
MAT 5:42 Pemegay kaw diyà te otaw memoyò kenyo, aw pemebeles kaw heman diyà te otaw meibeg meles.”
MAT 5:43 “Netegahan niyo heman te doen migtoladà gebii te keilangan kedekelan niyo te pedowan se kedomaan niyo, aw mepakay keopalan se menge poon niyo.
MAT 5:44 Meneng mikagi a den diyà kenyo te keilangan kedekelan niyo te pedowan se poon niyo. Keilangan gayed kaw megtawal-tawal diyà te Timanem tepad te otaw egpemilang kenyo.
MAT 5:45 Aw iling kenyan se eg-inangen niyo, yan ipetaga-taga niyo te batà kaw te Timanem doton te langit, so gayed sikandin egpesenang te aldaw diyà te kedita te otaw pengkey medaet aw mèpiya se pedowan dan. Gayed heman sikandin egpetedak te odan diyà te pawà te kedita te otaw pengkey metòlid aw kenà metòlid se eg-inangen dan.
MAT 5:46 Keilangan kedita te otaw se kedekelan niyo te pedowan. Aw olò otaw doen dakel pedowan kenyo se kedekelan niyo te pedowan, wedad ontong ibegay te Timanem diyà kenyo, so pengkey kedita te menge iskribinti eglindoan niyo, gayed dan eg-inang te mèpiya diyà te otaw eg-inang te mèpiya diyà kandan.
MAT 5:47 Keilangan segmanen niyo se kedita te otaw. Aw olò menge kedomaan niyo Judiyo se segmanen niyo, wedad eg-inangen niyo labi pa mèpiya diyà te eg-inangen te doma, so se kedita te otaw kenà Judiyo eglindoan niyo, gayed dan egsagman te menge kedomaan dan.
MAT 5:48 Yan, keilangan melobos se pedowan niyo iling te kelobos te pedowan te Amay niyo Timanem doton te langit.”
MAT 6:1 “Ikà niyo egpemekità te pegtolò niyo te Timanem diyà te doma otaw amon iduyun kaw dan, so aw ibeg niyo iduyun kaw te doma otaw, wedad ontong kinewaen niyo lekat te Amay niyo Timanem eg-ogpà doton te langit.
MAT 6:2 “Yan aw megtabang kaw te otaw sagkep, ikà niyo eg-indan diyà te kedita te otaw amon iduyun kaw dan, so iling kenyan se eg-inangen te otaw eden dan aw egpenimanem dan. Yan se eg-inangen dan doton te simbahan te Judiyo aw kidoen te dalan, amon iduyun dan te menge doma otaw. Meneng eneng-enengi niyo se kagi ko seini. Wedad palos ontong ibegay te Timanem kandan.
MAT 6:3 Meneng aw megtabang kaw te otaw sagkep, keilangan eked iyan ketegahi te doma otaw pengkey sigalak niyo.
MAT 6:4 Aw eked niyo petega-tegahi diyà te doma otaw se pegpemegay niyo diyà te otaw sagkep, kitaen iyan te Amay niyo Timanem doton te langit, aw begayan kaw din te ontong.”
MAT 6:5 “Aw megtawal-tawal kaw diyà te Timanem, ikà niyo eg-iling te otaw eden dan aw egpenimanem dan, so egkeibeg dan egtawal-tawal doton te simbahan aw doton heman te dalan amon kitaen dan te menge doma otaw. Meneng eneng-enengi niyo se kagi ko seini. Wedad palos ontong ibegay te Timanem kandan.
MAT 6:6 Meneng aw megtawal-tawal kaw, pegsiolì kaw. Tekepi niyo se lelebangan, aw pegtawal-tawal kaw diyà te Amay niyo Timanem eked kitai. Pengkey eked kaw kitai te doma otaw, komità se Timanem kenyo, aw begayan kaw din te ontong.
MAT 6:7 “Ikà niyo egtawal-tawal aw kenà lekat te pedowan niyo se kagi, so iling kenyan se pegtawal-tawal te menge otaw kenà egpenimanem. Eden dan aw menenalan se Timanem kandan tandà te medita se kagi dan.
MAT 6:8 Ikà niyo eg-iling kandan, so tapay netaga-taga se Amay niyo Timanem aw eden se kelidoan niyo pengkey wedà kaw pa pemoyò diyà kandin.
MAT 6:9 Pegtawal-tawal kaw diyà te Timanem iling kani. ‘Amà kidoen te langit, ibeg day iduyun ka te kedita te otaw.
MAT 6:10 Ibeg day lomowan ka diyà te kedita te otaw. Ibeg day metoman se ibeg no dini te keneyonan iling te pegketoman te ibeg no doton te langit.
MAT 6:11 Begayi kay te kànen botong te kelikit te aldaw.
MAT 6:12 Pegwedadi se salà ininang day diyà kamno onawa te pegwedad day te salà ininang te doma otaw diyà kenami.
MAT 6:13 Ikà egpeokit kenami diyà te peg-akal, meneng pekediyoi kay diyà ki Satanas.’
MAT 6:14 “Aw pegwedaden niyo se salà ininang te doma otaw diyà kenyo, pegwedaden heman te Amay niyo Timanem se salà ininang niyo diyà kandin.
MAT 6:15 Meneng aw eked niyo pegwedadi se salà ininang te doma otaw diyà kenyo, eked heman pegwedadi te Amay niyo Timanem se salà ininang niyo diyà kandin.”
MAT 6:16 “Aw megpowasa kaw, ikà niyo egpetaga-taga kenyan diyà te doma otaw pineokit te bawa niyo. Ikà niyo eg-iling te menge otaw eden dan aw egpenimanem dan, so eg-inangen dan medaet se bawa dan amon metaga-taga se doma otaw te kenà dan egpengaen. Eneng-enengi niyo se kagi ko seini. Wedad den palos ontong ibegay te Timanem kandan.
MAT 6:17 Meneng aw megpowasa kaw, penowat kaw te logay, aw pegdàpog kaw te bawa,
MAT 6:18 amon eked ketaga-taga se doma otaw te wedà kaw kaen. Pengkey eked iyan ketegahi te doma otaw, meneng ketegahan iyan te Amay niyo Timanem eked kitai, aw doen ontong ibegay din diyà kenyo.”
MAT 6:19 “Ikà niyo egtipon te kedònan dini lanto te tanà, so peg-enayen iyan, aw megkedaet iyan, aw ebaten iyan te menenakaw.
MAT 6:20 Meneng keilangan megtipon kaw te kedònan doton te langit. Eked iyan peg-enayi, aw eked iyan pegkedaet, aw eked iyan heman ebati te menenakaw.
MAT 6:21 Aw kenan ketipon se kedònan niyo, yan heman se keeneng-enengan niyo.”
MAT 6:22 “Komità se otaw pineokit te mata. Aw mèpiya se mata te otaw, melowa se pegtengteng din.
MAT 6:23 Meneng aw medaet se mata, iling te mengitngit se pegtengteng din pengkey aldaw. Iling heman kenyan, aw medaet se pedowan te otaw, ontò medaet se kedita te eg-inangen din.”
MAT 6:24 “Wedad otaw meketolò te dowa amo din. Aw megpelenged sikandin diyà te sebad, eked sikandin tolò te sebad. Sebad olò se tekingan din, aw eked din segmani se sebad. Iling heman kenyan, eked pegsebad se pegpenimanem niyo aw pegpengewarta niyo.
MAT 6:25 “Yan se doun te mikagi a den diyà kenyo, ikà niyo egketetana tepad te keogpà niyo aw eden se kànen aw inemen niyo. Ikà niyo heman egketetana tepad te lawa niyo aw eden se ekasan niyo. So binegayan kaw den te Timanem te ontò meelagà, sìyan pedowan niyo aw lawa niyo, yan ikà niyo egketetana tepad te kànen aw ekasan niyo.
MAT 6:26 Eneng-enengi niyo tepad te menge manok te kebenesan. Kenà dan egpenanem. Kenà dan heman eglegani. Kenà dan heman eglodok te kànen dan kidoen te pol. Meneng gayed dan egbegayan te Amay niyo Timanem te kànen. So eg-ipaten te Timanem se kedita te manok te kebenesan pengkey iling te wedad keelagà dan, ontò kaw din heman ipaten, so meelagà kaw pa diyà te kedita te manok te kebenesan.
MAT 6:27 Pengkey metetana kaw, meneng eked pegkelayat se omol niyo pineokit te ketetana niyo.
MAT 6:28 Ikà niyo heman egketetana tepad te ekasan niyo. Eneng-enengi niyo se bolak te kebenesan. Gayed dan egtilles pengkey kenà dan egterbaho, aw kenà dan heman egpengabel te penenaktun.
MAT 6:29 Meneng eneng-enengi niyo se kagi ko seini. Pengkey mèpiya se bawa te penenaktun te selotan si Solomon gebii, meneng labi pa mèpiya se bawa te bolak te kebenesan.
MAT 6:30 So ininang te Timanem mèpiya se bawa te bolak te kebenesan pengkey sonogen iyan te eked kenamay, labi pa metoman se peg-ipat din kenyo. Meneng wedà pa kedì kelobos se pegsalig niyo kandin.
MAT 6:31 Ikà niyo egketetana tepad te kànen niyo, aw inemen niyo, aw ekasan niyo.
MAT 6:32 Se kedita te otaw kenà egsalig te Timanem, gayed dan egketetana tepad te keogpà dan. Meneng netegahan den te Amay niyo Timanem se kedita te kepulukan niyo.
MAT 6:33 Yan pelowani niyo se Timanem diyà te kenyo pegkeotawun, aw tolò kaw te ibeg din, aw yan begayan kaw din heman te keilangan niyo.
MAT 6:34 “Yan ikà niyo egketetana aw eden se domateng diyà kenyo kealdaw. Pebeyai niyo se kepulukan domateng te modi aldaw, so botong se kepulukan niyo te aldaw seini.”
MAT 7:1 “Ikà niyo eg-okom te doma otaw amon eked kaw heman okomi.
MAT 7:2 Okomen kaw onawa te peg-okom niyo te menge doma otaw. Keidowan kaw heman onawa te pegkeido niyo te menge doma otaw.
MAT 7:3 Mola niyo egkitaen se sagbet kidoen te mata te doma niyo, meneng wedà niyo ketegahi te doen batang kidoen te kenyo mata.
MAT 7:4 Aw doen batang kidoen te kenyo mata, eked kaw peketabang te doma niyo amon meabat se sagbet lekat te kandin mata.
MAT 7:5 Kolang se aneng-aneng niyo. Ebati niyo onà se batang lekat te kenyo mata, aw penga niyan metaen se pegkità niyo amon mengabat kaw heman te sagbet lekat te mata te doma niyo.
MAT 7:6 “Pekeimanday kaw te pegtoladà niyo te kebenalan. Eked kaw pemowang te mèpiya diyà te menge toyang, so memangà dan beling kenyo. Eked kaw heman pemegay te pirlas meelagà ipeninga diyà te menge osa, so peglegìtan dan beling iyan.”
MAT 7:7 “Aw memoyò kaw diyà te Timanem, begayan kaw din. Aw mengemahà kaw, doen kitaen niyo. Aw tomawal kaw doton te lelebangan, ipeawop kaw.
MAT 7:8 Kominawà se kedita te otaw memoyò. Komità se kedita te otaw mengemahà. Ipeawop heman se kedita te otaw tomawal.
MAT 7:9 Aw doen batà niyo memoyò te pan, eked kaw pemegay kandin te bato.
MAT 7:10 Aw memoyò se batà niyo te ikan, eked kaw heman pemegay kandin te memokan.
MAT 7:11 Nayan, pengkey doen medaet eg-inangen niyo, meneng gayed mèpiya se ipegpemegay niyo diyà te menge batà niyo. Labi pa se Amay niyo Timanem kidoen te langit, so egpemegay sikandin te mèpiya diyà te kedita te otaw memoyò diyà kandin.
MAT 7:12 “Aw meibeg kaw te mèpiya se inangen te doma otaw diyà kenyo, keilangan mèpiya heman se inangen niyo diyà te doma otaw. Pineokit kenyan, tomanen niyo se kedita te punù ingkeliwat i Moises aw intoladà te menge telekeliwat te kagi te Timanem gebii.”
MAT 7:13 “Mebelad se lelebangan aw mola okitan se dalan pesalo doton te kilot, aw medita se otaw eg-okit kenyan. Meneng okit kaw te lelebangan mesigpit,
MAT 7:14 so mesigpit se lelebangan aw melima se dalan pesalo doton te Timanem egpemegay te kaling pedowan, aw pilabok se otaw komità kenyan.”
MAT 7:15 “Peg-ahà kaw amon eked kaw keekali te menge otaw egpelingo-lingo telekeliwat te kagi te Timanem. Medaet se tod dan kenyo iling te mebolot menenanap te kebenesan iningedanan lobo egpelingo-lingo iling te ayam-ayam karniro amon megbaet te karniro.
MAT 7:16 Aw kitaen niyo se eg-inangen dan, ketegahan niyo aw olò dan egpelingo-lingo. Wedad palos pongo te paras geniyen lekat te ligem. Wedad heman pongo igira ipoen lekat te telayid.
MAT 7:17 Aw mèpiya se kemolò te kayo, mongo iyan te mèpiya. Meneng aw medaet se kemolò te kayo, mongo iyan heman te medaet.
MAT 7:18 Aw mèpiya se kayo, eked iyan pongo te medaet. Aw medaet se kayo, eked iyan heman pongo te mèpiya.
MAT 7:19 Aw kenà mèpiya se pongo te kayo, pilayen iyan aw sonogen.
MAT 7:20 Yan aw kitaen niyo se eg-inangen dan, ketegahan niyo aw ontò dan telekeliwat te kagi te Timanem.”
MAT 7:21 “Kenà kedita te otaw eg-ikagi te siak se pengolo dan se sekopen diyà te peglowan te Timanem, so se otaw egtolò te ibeg te Amay ko Timanem eg-ogpà doton te langit, yan olò se otaw sekopen te Timanem diyà te peglowan din.
MAT 7:22 Aw domateng se aldaw te peg-okom, medita se otaw mikagi diyà kanak, ‘Pengolo, peopi kay bag, so migkeliwat kay te kagi te Timanem tandà te pegtaking day kamno, aw migpelowà kay te bosaw lekat te otaw pineokit te ngadan nikaw, aw doen heman menge kepelahan ininang day pineokit te ngadan nikaw.’
MAT 7:23 Meneng mikagi a diyà kandan, ‘Wedà a palos ketaga-taga kenyo. Kesayo kaw, kedita niyo eg-inang te medaet.’”
MAT 7:24 “Meg-indan a den diyà kenyo tepad te otaw domineg te kagi ko, aw tomolò kenyan. Iling sikandin te otaw mig-inang te balay. Impetindeg din se tollok diyà te lanto te bato doton didalem te tanà.
MAT 7:25 Penga te peg-inang din te balay, minodan aw miglaneg se wayeg aw neapet se balay din. Mebandes se kelamag nekesogat diyà te balay din. Meneng wedà iyan kebàti, so ontò iyan dimasel.
MAT 7:26 “Meneng aw domineg se otaw te kagi ko, aw eked tolò kenyan, iling sikandin te otaw kolang se aneng-aneng din mig-inang te balay diyà te lanto te enay.
MAT 7:27 Penga niyan, minodan aw miglaneg se wayeg. Mebandes se kelamag nekesogat diyà te balay din, aw penga niyan, netongan iyan aw ontò nebàtan.”
MAT 7:28 Penga te pegtoladà i Jesus, ontò nepela se kedita te otaw nenenalan te pegtoladà din.
MAT 7:29 Kenà iling te pegtoladà te menenoladà te punù ingkeliwat i Moises se pegtoladà i Jesus, so tinekingan si Jesus te tolos.
MAT 8:1 Nayan, timopang si Jesus lekat te bontod, aw medita se otaw timaking kandin.
MAT 8:2 Doen otaw pigtompig dimoton ki Jesus. Limongken sikandin aw minikagi, “Sir, aw doen ibeg nikaw, netegahan ko te mekebatog ka megpegolì kanak.”
MAT 8:3 Nemaed si Jesus kandin, aw minikagi, “Meibeg a. Kegolian ka.” Pegketà, negolian sikandin.
MAT 8:4 Minikagi si Jesus, “Keilangan wedad palos otaw indanan no tepad te ininang ko kamno. Meneng doton ka te pengolo te simbahan aw pekitai se lawa no diyà kandin. Penga niyan, begayi se ibowang no iling te impunù i Moises amon metaga-taga se kedita te otaw te negolian ka den.”
MAT 8:5 Nayan, pegdateng i Jesus doton te Kapirnaom, doen kapitan te sondalo te gobirno te Roma simongon kandin aw nemoyò te tabang,
MAT 8:6 kagi din, “Sir, nesekitan se sineligan ko doton te balay ko. Kenà den egpekeiwal, aw ontò netigdaan.”
MAT 8:7 Minikagi si Jesus, “Tomaking a kamno aw megpegolì a kandin.”
MAT 8:8 Meneng minikagi se kapitan, “Sir, meyàyà a aw ipeawop ta diyà te balay ko, so ontò a medanà diyà kamno. Meneng botong aw olò ka mikagi te kegolian se sineligan ko, so metoman iyan.
MAT 8:9 Gayed a egtolò te otaw egsogò kanak, aw doen heman menge sondalo nesakop diyà kanak. Aw doen sondalo isogò ko, tomolò sikandin. Aw doen doma ipeangay ko, tomolò heman. Aw doen ipeinang ko te sineligan, yan se inangen din.”
MAT 8:10 Pegdineg i Jesus te kagi din, ontò nepela. Penga niyan, minikagi sikandin diyà te menge otaw timaking kandin, “Eneng-enengi niyo se kagi ko kenyo seini. Pengkey kidoen te menge bowad-bowad i Israel, wedad palos otaw netelaan ko simalig diyà kanak iling te pegsalig din.
MAT 8:11 Metoman se kagi ko seini. Aw domateng se aldaw te peglowan te Timanem, medita se otaw domateng lekat te kedita te ogpeanan te keneyonan, pengkey kenà dan Judiyo. Ipeakop dan diyà te peglowan te Timanem sipat kemonaan niyo si Abraham, aw si Isaac, aw si Jacob.
MAT 8:12 Meneng doen menge Judiyo egpeliman te ipeakop dan heman, meneng ipeibing dan doton te kengitngitan amon ipelumun dan. Ontò dan megkelag doton, aw megyangget-yangget se ngipen dan tandà te kegemakan dan.”
MAT 8:13 Minikagi si Jesus diyà te kapitan, “Olì ka den, so netoman den se pinemoyò no tandà te pegsalig no kanak.” Peg-ikagi i Jesus kenyan, ayas negolian se sineligan te kapitan.
MAT 8:14 Nayan, dimoton si Jesus te balay i Pedro, aw kinità din se ogangan i Pedro bayi minibat so piglegenaw.
MAT 8:15 Penga niyan, pinemàdan i Jesus se belad din, aw pegketà migkèpiya sikandin. Minenaw sikandin aw mig-inang te kànen i Jesus.
MAT 8:16 Pegsallep te aldaw, inibing dan doton ki Jesus se medita otaw dinetengan te bosaw, aw impelowà din se bosaw lekat kandan pineokit te kagi din. Pinegolian din heman se kedita te otaw doen mesakit.
MAT 8:17 Pegpegolì din kandan, tinoman din se inikagi te telekeliwat te kagi te Timanem gebii si Isaias, “Pegolien din se kedita te mesakit tadon.”
MAT 8:18 Nayan, pegkità i Jesus te medita se otaw timaking kandin, minikagi sikandin diyà te menge tinoledaan din te ipesakay dan sikandin te belangay matas doton dipag te lanaw.
MAT 8:19 Meneng doen menenoladà te punù ingkeliwat i Moises migpedapag diyà ki Jesus. Minikagi sikandin, “Sir, pengkey kenan ka pesalo, gayed a tomaking kamno.”
MAT 8:20 Meneng minikagi si Jesus, “Mèpiya pa se menge menenanap te kebenesan, so doen ogpeanan dan. Mèpiya pa heman se menge manok, so doen heman embonganan dan. Meneng melima aw tomaking ka kanak Timanem Migpekeotaw, so wedad palos ibatan ko te delem.”
MAT 8:21 Doen heman doma otaw timaking ki Jesus minikagi, “Pengolo, eked a taking kamno singed aw onà matay se amay ko aw ilebeng ko.”
MAT 8:22 Meneng minikagi si Jesus, “Keilangan tomaking ka den kanak, so mèpiya aw otaw wedad kaling pedowan se meglebeng te menge doma dan nematay.”
MAT 8:23 Nayan, pegsakay i Jesus te belangay, simakay heman se menge tinoledaan din.
MAT 8:24 Wedà kenamay, dinetengan dan te kelamag ontò mebandes, aw agpet neteled se belangay, so dakel se wayeg nekeawop. Meneng timedogi si Jesus.
MAT 8:25 Penga niyan, linoka dan sikandin, kagi dan, “Pengolo, tebangi kay, so melemes kidon den.”
MAT 8:26 Minikagi si Jesus, “Wedà pa kedì kelobos se pegsalig niyo kanak. Ikà niyo egkelemitan.” Penga niyan, timindeg si Jesus aw sinagda din se kelamag aw balud, aw migkelinaw se lanaw.
MAT 8:27 Nepela dan aw minikagi dan, “Ontò sikandin metolos, so pengkey kelamag aw balud timolò kandin.”
MAT 8:28 Nayan, dimeleg dan doton dipag te lanaw medapag te Gadara. Doen dowa otaw dinetengan te bosaw simongon kandin lekat te menge lebenganan. Ontò dan mebolot, aw yan wedad otaw eg-okit kidoen.
MAT 8:29 Mig-olangag dan, kagi dan, “Batà te Timanem, ikà pa egpeeleg kenami, so wedà pa dateng se aldaw te pegpelumun no kenami.”
MAT 8:30 Ontò medita se osa nenowal kidoen te kedepagan niyan.
MAT 8:31 Nemoyò se menge bosaw, kagi dan, “Aw ipelowà kay nikaw, peopi kay bag diyà te menge osa sida.”
MAT 8:32 Minikagi si Jesus, “Doton kaw den.” Penga niyan, limowà se bosaw lekat te otaw aw minawop dan diyà te osa. Penga niyan, kimagnan se kedita te osa pesalo te keba, aw kimahang dan doton te lanaw, aw nelemes dan.
MAT 8:33 Penga niyan, kimadas se menge telediyaga te osa, aw dimoton dan te lonsod. Mig-indan dan te kedita te kinità dan aw eden se neinang diyà te didowa otaw pinelowaan i Jesus te bosaw.
MAT 8:34 Penga niyan, dimoton se kedita te otaw ki Jesus. Pegkità dan kandin, nemoyò dan te mesayo si Jesus lekat te ogpeanan dan.
MAT 9:1 Nayan, simakay si Jesus te belangay, aw minolì doton te lonsod tinikedowan din.
MAT 9:2 Wedà kenamay, dimateng se otaw neningga te otaw kenà egpekeiwal. Pegkità i Jesus te ontò dan simalig diyà kandin, minikagi sikandin diyà te otaw kenà egpekeiwal, “Elew, peseligi se pedowan no, so pigwedad den se salà nikaw.”
MAT 9:3 Nayan, doen menge menenoladà te punù mig-aneng-aneng te migtompuyus si Jesus te Timanem pineokit te kagi din sìyan.
MAT 9:4 Meneng netegahan i Jesus aw eden se aneng-aneng dan, aw minikagi sikandin, “Nengà lay eg-aneng-aneng kaw te medaet?
MAT 9:5 Mola megpelingo-lingo se otaw megwedad te salà. Meneng eked pekebatog se otaw megpegolì te otaw kenà egpekeiwal singed aw doen tolos te Timanem diyà kandin.
MAT 9:6 Meneng so Timanem a Migpekeotaw, ipekità ko den kenyo te mekebatog a megwedad te salà te otaw dini lanto te tanà.” Penga niyan, minikagi si Jesus diyà te otaw kenà egpekeiwal, “Enaw ka. Loloni se inibatan no, aw olì ka den.”
MAT 9:7 Yan minenaw sikandin aw minolì.
MAT 9:8 Pegkità te doma otaw kenyan, ontò dan nelemitan, aw dimuyun dan te Timanem so insogò din si Jesus amon megwedad te salà te otaw.
MAT 9:9 Nayan, pegkesayo i Jesus lekat kidoen, kinità din se iskribinti nenenoo kidoen te opisina din, ngadan din si Mateo. Minikagi si Jesus, “Taking ka kanak.” Yan timindeg si Mateo aw timaking sikandin ki Jesus.
MAT 9:10 Penga niyan, kimaen si Jesus doton te balay i Mateo, aw medita heman se menge iskribinti aw doma otaw nelegeb te salà kimaen doma i Jesus aw menge tinoledaan din.
MAT 9:11 Meneng pegkità te menge Parisiyo kenyan, minikagi dan diyà te menge tinoledaan i Jesus, “Medaet iyan, so egpengaen se pengolo niyo doma te medaet otaw, menge iskribinti aw doma otaw nelegeb te salà.”
MAT 9:12 Meneng pegdineg i Jesus te inikagi dan, minikagi sikandin, “Kenà otaw wedad mesakit se bolongen te doktor, meneng otaw doen mesakit se bolongen din.
MAT 9:13 Keilangan eneng-enengen niyo aw eden se kedegdagan te kagi te Timanem seini, ‘Pengkey measeb kaw egpemegay te bowang diyà kanak, meneng labi a pa meluba aw megpeidoway kaw.’ Insogò a dini kenà amon tewalen ko se otaw eg-aneng-aneng te metòlid se eg-inangen dan, meneng insogò a dini amon tewalen ko se otaw mekesesalà.”
MAT 9:14 Nayan, dimoton se menge tinoledaan i Juan Memonyagay ki Jesus, aw mig-insà dan, “Melikit kay egpowasa onawa te eg-inangen te menge Parisiyo. Nengà lay kenà egpowasa se kamno menge tinoledaan?”
MAT 9:15 Minikagi si Jesus, “Aw doen peipid, eked kepuluk se menge sigalak te meama peipiden dalem te kidoen pa sikandin. Meneng doen aldaw domateng aw meabat lekat kandan se meama peipiden, aw yan se aldaw megpowasa dan so mepuluk dan.”
MAT 9:16 Mig-indan heman si Jesus te tegdeyanan tepad te kaling toladà din, kagi din, “Eked kepakay aw tompalan se tapay penenaktun te kaling tila wedà pa bugsaki, so komotot se itompal, aw labi pa dakel se lisì te saol.
MAT 9:17 Aw meg-inang heman se otaw te bino, eked din soli se temek te paras diyà te solanan ininang lekat te kindal te kambing tapay linanit, so aw megbohak se temek, megbeto se solanan tapay linanit, aw lomowà se bino aw kebàtan heman se solanan niyan. Meneng keilangan isawol se temek inangen bino diyà te solanan kaling linanit amon wedad kebàtan.”
MAT 9:18 Nayan, dalem te pegtoladà i Jesus, dimateng se sebad obanen te simbahan te Judiyo. Limongken sikandin diyà ki Jesus, aw minikagi, “Kaling pa nematay se batà ko bayi. Peg-ayas ka bag, aw pemàdi sikandin amon meantay.”
MAT 9:19 Penga niyan, timindeg si Jesus aw timaking kandin sipat menge tinoledaan din.
MAT 9:20 Nayan, doen heman sebad bayi pigdipenogan te sempolò teg dowa se omay. Migpedapag sikandin diyà te getan i Jesus aw nemaed olò te toktok te saol din,
MAT 9:21 so tapay sikandin mig-aneng-aneng te megolì se mesakit din aw pemàdan din olò se saol i Jesus.
MAT 9:22 Penga niyan, miniling si Jesus, aw kinità din se bayi sìyan. Minikagi sikandin, “Atà, peseligi se pedowan nikaw. Negolian ka so simalig ka diyà kanak.” Pegketà, negolì se mesakit din.
MAT 9:23 Pegdateng i Jesus doton te balay te obanen, kinità din se menge otaw mig-edop te seluli tandà te lano dan, aw medita heman se doma otaw netipon migkelag.
MAT 9:24 Migpunù si Jesus, kagi din, “Lowà kaw den, so wedà kematay se batà. Olò sikandin timedogi.” Meneng nebebeyatan dan si Jesus.
MAT 9:25 Pegkeobos te otaw netipon, minawop si Jesus diyà te tambì, aw pinemàdan din se belad te batà, aw minenaw se batà.
MAT 9:26 Nedengeg se peg-antay i Jesus kandin kidoen te kedepagan te ogpeanan sìyan.
MAT 9:27 Nayan, pegkesayo i Jesus lekat kidoen, doen dowa otaw bota timaking kandin. Timawal dan, “Bowad-bowad te selotan tadon gebii si David, keidowi kay bag.”
MAT 9:28 Pegdateng din doton te balay, migpedapag se otaw bota diyà kandin. Minikagi si Jesus, “Nemenal kaw lay te mekebatog a megpegolì kenyo?” Timaba dan, “Ee, Sir. Nemenal kay.”
MAT 9:29 Penga niyan, pinemàdan i Jesus se mata dan, aw minikagi sikandin, “Metoman iyan meinang diyà kenyo tandà te pegsalig niyo diyà kanak.”
MAT 9:30 Pegketà, kimità dan. Penga niyan, ontò migpunù si Jesus, “Keilangan wedad palos otaw indanan niyo.”
MAT 9:31 Meneng pegkesayo dan, wedà dan tolò kandin, aw yan se doun te labi pa nedengeg si Jesus doton te kebelad te probinsya sìyan.
MAT 9:32 Nayan, pegkesayo te didowa otaw pinegolian te mata, doen otaw neomo inibing doton ki Jesus, so dinetengan sikandin te bosaw.
MAT 9:33 Penga te pegpelowà i Jesus te bosaw lekat te otaw sìyan, nekeikagi den sikandin. Ontò nepela se kedita te otaw kimità kandin, aw minikagi dan, “Wedad palos kinità tadon iling kenyan dini kenitadon menge bowad-bowad i Israel.”
MAT 9:34 Meneng minikagi se menge Parisiyo, “Doen tolos imbegay diyà kandin lekat te pengolo te bosaw si Satanas, aw yan se doun te egpelowà sikandin te bosaw lekat te otaw.”
MAT 9:35 Nayan, miglegeb si Jesus doton te kedita te lonsod aw doma ogpeanan, aw migtoladà kidoen te menge simbahan te Judiyo. Migtoladà sikandin te Mèpiya Indan tepad te peglowan te Timanem, aw migpegolì te kedita te otaw doen mesakit.
MAT 9:36 Pegkità din te medita otaw netipon diyà kandin, ontò din dan neidowan, so ontò dan nelimahan aw wedad egtabang kandan. Iling dan te menge ayam-ayam karniro megketading te eked kenamay aw wedad megdiyaga kandan.
MAT 9:37 Penga niyan, minikagi si Jesus te tegdeyanan diyà te menge tinoledaan din, “Ontò dakel se geniyenen, aw pilabok se otaw meglegani.
MAT 9:38 Timanem se tig-apò te pawà, aw keilangan megtawal-tawal kaw diyà kandin amon isogò din se menge doma otaw meglegani.”
MAT 10:1 Nayan, tinawal i Jesus se sempolò teg dowa tinoledaan din, aw imbegay din diyà kandan se tolos amon megpelowà dan te bosaw lekat te otaw, aw amon megpegolì dan te kedita te otaw doen mesakit.
MAT 10:2 Seini se ngadan te sempolò teg dowa sogounun i Cristo, si Simon iningedanan din ki Pedro, aw kedowa din si Andres, aw didowa batà i Sebedeo si Santiago aw si Juan,
MAT 10:3 aw si Felipe, si Bartolome, si Tomas, si Mateo sìyan iskribinti, aw si Santiago batà i Alfeo, si Tadeo,
MAT 10:4 aw si Simon meyseg, aw si Judas Iscariote, sìyan migtolok ki Jesus.
MAT 10:5 Yan se sempolò teg dowa tinoledaan insogò i Jesus, so doen impunù din diyà kandan, kagi din, “Ikà niyo egdoton te menge ogpeanan te menge otaw kenà Judiyo. Ikà niyo heman egdoton te menge lonsod te Samarya.
MAT 10:6 Meneng doton kaw te menge bowad-bowad i Israel. Keilangan tebangan niyo dan so iling dan te menge ayam-ayam karniro migketading.
MAT 10:7 Pengkey kenan kaw pesalo, pegtoladà kaw te agpet den lomowan se Timanem.
MAT 10:8 Pegolii niyo se otaw doen mesakit. Entayi niyo se otaw nematay. Pegolii niyo se otaw pigtompig. Pelowai niyo se bosaw lekat te otaw. Ikà niyo egpebayad te otaw tebangan niyo, so wedad imbayad niyo te tolos insalig ko diyà kenyo.
MAT 10:9 Ikà niyo egpengibing te kwarta pengkey bolawan, selapì aw kedakò.
MAT 10:10 Ikà niyo heman egpengibing te kelepì, aw saol, aw sepatos ekasan niyo, aw bangkà, so keilangan togpoan kaw te otaw tebangan niyo, iling te otaw egterbaho gayed egtogpoan te otaw egtebangan dan.
MAT 10:11 Aw domateng kaw doton te lonsod aw doma ogpeanan, peg-insà kaw aw sinu se mèpiya otaw ogpaan niyo. Penga niyan, peg-ogpà kaw kidoen te balay din lamig domeleg kaw doton te doma lonsod.
MAT 10:12 Aw domateng kaw doton te balay, onà kaw ikagi diyà te otaw eg-ogpà kidoen te begayan se kedita dan te kelinaw.
MAT 10:13 Aw mèpiya se pedowan te otaw eg-ogpà kidoen, metoman dan begayan te kelinaw pineokit te kagi niyo. Meneng aw wedad otaw kidoen mèpiya se pedowan din, lomikò diyà kenyo se inikagi niyo.
MAT 10:14 Aw doen otaw eked pegsagman kenyo aw eked penenalan te itoladà niyo, tektaki niyo se napò te tanà lekat te sepatos niyo te pegkesayo niyo lekat te balay dan aw lonsod dan. Yan metaga-taga se otaw kidoen te doen salà dan, so wedà dan penenalan te intoladà niyo.
MAT 10:15 Eneng-enengi niyo se kagi ko kenyo seini. Pengkey ipelumun te Timanem se tege Sodoma aw tege Gomora te modi aldaw tepad te salà dan ontò medaet, meneng labi pa ipelumun te Timanem se otaw eked pegsagman kenyo.”
MAT 10:16 “Nayan, peg-ahà kaw amon eked kaw pemilangi te menge mededaet otaw, so iling kaw te ayam-ayam karniro binenganan te menenanap te kebenesan iningedanan lobo. Yan keilangan ontò kaw megpekebiyasa, aw keilangan wedad palos inangen niyo medaet.
MAT 10:17 Peg-ahà kaw te menge mededaet otaw, so ibingen kaw dan doton te howis, aw bedasen kaw dan kidoen te simbahan te Judiyo.
MAT 10:18 Dekepen kaw aw okomen kaw te menge gobirnador aw menge selotan tandà te pegpesakop niyo diyà kanak, amon meg-indan kaw te kebenalan tepad kanak diyà kandan aw diyà te menge doma otaw kenà Judiyo.
MAT 10:19 Aw ibingen kaw doton te otaw meg-okom kenyo, ikà niyo egketetana tepad te itaba niyo, aw eden se ikegiyen niyo kandan, so dalem te aldaw sìyan, begayan kaw te kebiyasa amon meketaba kaw kandan.
MAT 10:20 Kenà lekat te kenyo kebiyasa se ikegiyen niyo, meneng mikagi se Espiritu Santo isogò te Timanem Amay niyo pineokit kenyo.
MAT 10:21 “Doen otaw megtolok te kandan menge kedowa amon imetayan dan. Doen heman amay megtolok te kandan menge batà amon imetayan dan. Doen heman menge otaw eked pegsagman te kandan amay aw inay, aw ipeimatay dan.
MAT 10:22 Kebensihan kaw te keditaan te otaw tandà te pegpesakop niyo diyà kanak. Meneng aw tomayod kaw te kedita te kelimahan, ipelowà kaw.
MAT 10:23 Aw pemilangen kaw kidoen te sebad lonsod, kadas kaw lekat kidoen aw doton kaw te doma lonsod. Penenalan kaw te kagi ko kenyo seini. Siak se Timanem Migpekeotaw, aw lomikò a te eked pa kepenga se pegtoladà niyo kidoen te kedita te lonsod eg-ogpaan te menge bowad-bowad i Israel.
MAT 10:24 “Wedad meiskwilahay labi pa melangkaw diyà te meistro migtoladà kandin. Wedad heman sineligan labi pa melangkaw diyà te amo din.
MAT 10:25 Keilangan meluba se meiskwilahay aw mapet se kelangkaw din diyà te kelangkaw te meistro migtoladà kandin. Keilangan meluba heman se sineligan aw mapet se kelangkaw din diyà te kelangkaw te amo din. Netegahan niyo den te tinawal a te doma otaw Belsebul, se doma ngadan i Satanas. Na, aw medaet se intawal dan te Pengolo niyo, labi pa medaet se itawal dan kenyo menge sakop ko.”
MAT 10:26 “Na, ikà niyo egkelemitan te doma otaw, so ipekità te modi aldaw se kedita te in-eles den seini. Ipetaga-taga heman se kedita wedà pa ketegahi te doma otaw.
MAT 10:27 Pengkey eden se inikagi ko diyà kenyo te olò sikitadon, yan se keilangan ikegiyen niyo diyà te menge doma otaw. Pengkey eden se intoladà ko te wedad doma dimineg, yan se keilangan itoladà niyo diyà te kedita te otaw te keneyonan.
MAT 10:28 Ikà niyo egkelemitan te otaw, so olò lawa niyo se mebatog dan imetayan, kenà pedowan niyo wedad temanan. Meneng sebad se keilangan kelemitanan niyo, aw yan se Timanem, so mebatog din pegbàtan se pedowan aw lawa te otaw doton te kilot.
MAT 10:29 “Meneng ontò heman egkeido se Timanem te otaw. Pengkey iling te wedad keelagà te dowa manok te kebenesan aw beyadan niyo, meneng wedad palos manok te kebenesan medagdag kidoen te tanà aw kenà ibeg te Amay niyo Timanem.
MAT 10:30 Yan ikà niyo egkelemitan. So eg-ipaten te Timanem se kedita te manok te kebenesan pengkey iling te wedad keelagà dan, labi kaw pa eg-ipaten te Timanem, so meelagà kaw pa diyà te medita manok te kebenesan. Pengkey logay niyo, netegahan te Timanem aw pila se kedita niyan.”
MAT 10:32 “Aw mikagi se otaw diyà te doma te ontò sikandin migpesakop diyà kanak, mikagi a heman diyà te Amay ko doton te langit te sakop ko se otaw sìyan.
MAT 10:33 Meneng aw mikagi se otaw te kenà sikandin sakop ko, eked a heman ikagi diyà te Amay ko te sakop ko sikandin.”
MAT 10:34 “Ikà niyo eg-aneng-aneng te dimini a amon doen kelinaw te otaw dini lanto te tanà, meneng labi pa megpedàtay se otaw te pedowan tandà te pegdateng ko.
MAT 10:35 Eked pegsebad se telebatà tandà te pegdateng ko. Pengkey teleogangan, megpedàtay dan te pedowan tepad kanak.
MAT 10:36 Se ontò poon te otaw kwani, yan se menge sakop te kandin balay.
MAT 10:37 “Aw mikagi se otaw te dakel se pedowan din diyà kanak, meneng labi pa dakel se pedowan din diyà te amay aw inay din, eked kepakay megpesakop diyà kanak. Aw mikagi se otaw te dakel se pedowan din kanak, meneng labi pa dakel se pedowan din diyà te batà din, eked kepakay megpesakop diyà kanak.
MAT 10:38 Aw eked taking se otaw kanak so nelemitan te detengan sikandin te kelimahan aw kemetayun, eked kepakay megpesakop diyà kanak.
MAT 10:39 Pengkey ibeg te otaw megkelayat se omol din dini te keneyonan, meneng kunù din gayed matay. Meneng aw mepakay diyà te otaw pengkey imetayan sikandin tandà te pegtaking din kanak, begayan sikandin te kaling pedowan wedad temanan.”
MAT 10:40 “Aw megsagman se otaw kenyo, segmanen a din heman. Aw megsagman se otaw kanak, segmanen din heman se Amay ko simogò kanak.
MAT 10:41 Aw megsagman kaw te telekeliwat te kagi te Timanem tandà te pegkeliwat din te kagi te Timanem, doen ontong ibegay te Timanem diyà kenyo onawa te ontong ibegay din diyà te telekeliwat te kagi din. Aw megsagman kaw te otaw eg-inang te metòlid tandà te peg-inang din te metòlid, doen ontong ibegay te Timanem diyà kenyo onawa te ontong ibegay din diyà te otaw eg-inang te metòlid.
MAT 10:42 Eneng-enengi niyo se kagi ko kenyo seini. Aw melao se sebad otaw medanà egtaking kanak, aw memegay kaw te wayeg diyà kandin tandà te pegtaking din kanak, begayan kaw te Timanem te ontong.”
MAT 11:1 Penga te pegtoladà i Jesus te sempolò teg dowa tinoledaan din, timeped sikandin te menge lonsod medapag amon megtoladà te otaw kidoen.
MAT 11:2 Nayan, dalem te pegkekeleboso ki Juan Memonyagay, inindanan sikandin tepad te eg-inangen te Misiyas. Pegdineg i Juan kenyan, insogò din se menge tinoledaan din meg-insà ki Jesus,
MAT 11:3 kagi dan, “Sikona lay se ontò insogò te Timanem pinelimanan day, aw doen pa doma domateng?”
MAT 11:4 Timaba si Jesus, “Likò kaw den doton ki Juan, aw indani niyo sikandin te kedita te dinineg niyo aw kinità niyo dini.
MAT 11:5 Doen menge bota kimità den. Doen heman kapig minipanaw den. Doen tompigun negolian den. Doen bingelen dimineg den. Doen heman nematay neantay den. Doen menge otaw sagkep tinoledaan te Mèpiya Indan.
MAT 11:6 Indani niyo heman sikandin te doen keluba te otaw eked pegdowa-dowa te pegsalig din kanak.”
MAT 11:7 Pegkesayo te otaw insogò i Juan, minikagi si Jesus tepad ki Juan diyà te otaw netipon, kagi din, “Pegdoton niyo te kebigtilan, kenà tigbaw egkedogen te kelamag se pinengemahà niyo.
MAT 11:8 Wedà kaw heman doton amon tomengteng te otaw nenaol te ontò meelagà, so se menge otaw egpenaol te ontò meelagà, yan se eg-ogpà doton te balay te selotan.
MAT 11:9 Meneng seini indà se tod niyo. Dimoton kaw te kebigtilan amon kitaen niyo se telekeliwat te kagi te Timanem. Pengkey melangkaw se kedita te telekeliwat te kagi te Timanem, meneng labi pa melangkaw si Juan.
MAT 11:10 Sikandin se migtoladà tepad kanak, aw tinoman din se pakang seini tapay insolat kidoen te kagi te Timanem, ‘Na, doen otaw isogò ko megpetaga-taga te agpet ka den domateng, amon megpeketagad se kedita te otaw te pegdateng nikaw.’”
MAT 11:11 Minikagi heman si Jesus, “Eneng-enengi niyo se kagi ko kenyo seini. Wedad palos otaw dini lanto te tanà labi pa melangkaw diyà ki Juan Memonyagay. Meneng labi pa melangkaw diyà ki Juan se kedita te otaw megpesakop diyà te peglowan te Timanem.
MAT 11:12 Te wedà pa pegtoladà si Juan, gayed migtoladà se menge telekeliwat aw simolat heman si Moises te doen aldaw megtebò se Timanem lomowan. Pengkey lekat te pegtebò te pegtoladà i Juan lamig seini, ontò neibeg se menge otaw megpesakop diyà te peglowan te Timanem, aw medita den se otaw mebolot meibeg peden meg-agaw te peglowan din.
MAT 11:14 Simpana nemenal kaw te inikagi te menge otaw gebii, netegahan niyo den te si Juan se timoman te intoladà dan te doen domateng iling te telekeliwat te kagi te Timanem gebii si Elias.
MAT 11:15 Keilangan menenalan se kedita niyo doen telinga.
MAT 11:16 “Nayan, seini se tegdeyanan iindan ko kenyo amon ketegahan niyo aw eden se pig-ilingan te menge otaw te aldaw seini. Iling dan te mengisù egdanga doton te pedyanan aw egpetewalay dan,
MAT 11:17 ‘Pengkey mig-edop kay te seluli amon somayaw kaw, meneng wedà kaw sayaw. Pengkey migdelangan kay tepad te pegkematay, meneng wedà kaw heman kelano.’
MAT 11:18 Iling heman kandan se menge otaw te aldaw seini, so pegdini i Juan Memonyagay, kinità dan se ketanem din te melikit egpowasa aw kenà palos heman eg-inem. Meneng wedà dan penenalan kandin, aw minikagi dan te dinetengan sikandin te bosaw.
MAT 11:19 Pegdini ko Timanem Migpekeotaw, kinità dan se ketanem ko te egpengaen a aw eg-inem. Meneng kunù wedà dan penenalan kanak, aw minikagi dan te legoken a aw metiinem a, aw egsigelaken ko se menge iskribinti aw doma otaw nelegeb te salà. Meneng wedad beloyan, so ontò biyasa se Timanem, aw ketegahan iyan te kedita te otaw migpesakop diyà kandin aw komità dan te eg-inangen din.”
MAT 11:20 Penga niyan, neopal si Jesus te kedita te otaw eg-ogpà doton te menge lonsod ininangan din te keditaan te kepelahan, so wedà dan pegselsel te salà ininang dan.
MAT 11:21 Minikagi sikandin, “Mekelelayò kaw tege Korasin. Mekelelayò kaw heman tege Bitsayda, so wedà kaw pegselsel. Aw impekità diyà te tege Tiro aw tege Sidon gebii se inang metolos impekità ko kenyo, nenaol den dan peden te sako aw migbodbod den dan peden te abo diyà te olo dan amon ipetaga-taga dan te migselsel dan te salà dan ontò medaet.
MAT 11:22 Eneng-enengi niyo se kagi ko seini. Pengkey ipelumun te Timanem se tege Tiro aw tege Sidon, meneng labi kaw din pa ipelumun, so wedà kaw pemenal kanak.
MAT 11:23 Sikiyo tege Kapirnaom, pengkey meibeg kaw megpelangkaw-langkaw taman te langit, meneng idagdag kaw doton te kilot. Aw impekità diyà te tege Sodoma se inang metolos impekità ko kenyo, migselsel den dan peden aw wedà heman kebàti se lonsod dan.
MAT 11:24 Eneng-enengi niyo se kagi ko kenyo. Pengkey ipelumun te Timanem se tege Sodoma te modi aldaw tepad te salà dan ontò medaet, meneng labi kaw din pa ipelumun, so wedà kaw pemenal kanak.”
MAT 11:25 Penga niyan, migtawal-tawal si Jesus, kagi din, “Amà, Pengolo te kedita doton te langit aw dini heman te lanto te tanà, egpesiontong a diyà kamno, so wedà no petega-tegahi se kebenalan diyà te otaw biyasa aw dakel ontò netegahan, meneng impetaga-taga no den iyan diyà te otaw medanà.
MAT 11:26 Iduyun ta Amà, so lekat iyan te ibeg nikaw ontò mèpiya.”
MAT 11:27 Penga niyan, minikagi si Jesus, “Insalig te Amay ko se kedita diyà kanak. Se Amay ko, yan olò se netaga-taga te kedita tepad kanak, so Batà a din. Siak olò heman se netaga-taga te kedita tepad te Amay ko, aw eked ketaga-taga se otaw tepad kandin singed aw ipetaga-taga ko iyan diyà kandan.
MAT 11:28 “Aw migkelomay kaw den tandà te pegpengibing niyo te ontò mebegat kidoen te pedowan niyo, diyà kaw den kanak, so ebaten ko iyan diyà kenyo amon mekeetod kaw den.
MAT 11:29 Tiangi niyo se ipeibing ko kenyo iling te yogo, aw peg-iling kaw heman kanak, so ontò mèpiya se pedowan ko, aw mekeetod kaw.
MAT 11:30 Mèpiya se ipeibing ko kenyo. Kenà mebegat se ipetiang ko kenyo.”
MAT 12:1 Nayan, penga niyan te wedà kenamay, te aldaw te Sebado, minokit si Jesus aw menge tinoledaan din kidoen te kilid te pawà te trigo agpet den geniyen. Pengkey Sebado se aldaw te peg-etod te menge Judiyo, meneng kimetel se menge tinoledaan din te oway te trigo, aw kinaen dan, so binallos dan.
MAT 12:2 Meneng pegkità te menge Parisiyo te ininang dan, minikagi dan diyà ki Jesus, “Tay law. Mig-inang se menge tinoledaan no te salà, so doen punù ingkeliwat i Moises te keilangan eked kidon pegterbaho te aldaw te peg-etod.”
MAT 12:3 Minikagi si Jesus, “Kenà medaet se ininang dan. Nelibelan niyo den besi aw eden se insolat kidoen te kagi te Timanem tepad te ininang i David gebii. So binallos sikandin aw menge sondalo timaking kandin,
MAT 12:4 yan minawop dan diyà te balay te Timanem, aw kinaen dan se pan imbegay diyà te Timanem. Pengkey doen punù ingkeliwat i Moises te mepakay olò iyan kànen te menge pengolo te simbahan, meneng kenà medaet se ininang i David.
MAT 12:5 Nelibelan niyo besi heman aw eden se impunù ingkeliwat i Moises, te keilangan megterbaho se menge pengolo te simbahan pengkey aldaw te peg-etod, meneng kenà iyan salà dan.
MAT 12:6 Eneng-enengi niyo se kagi ko seini. Pengkey melangkaw se dakel simbahan, meneng doen dimateng den dini kenyo labi pa melangkaw diyà te simbahan.
MAT 12:7 Doen kagi te Timanem insolat, ‘Pengkey measeb kaw egpemegay te bowang diyà kanak, meneng labi a pa meluba aw megpeidoway kaw.’ Simpana mig-aneng-aneng kaw den aw eden se kedegdagan te kagi te Timanem sìyan, eked kaw sila te otaw wedà peg-inang te salà.
MAT 12:8 So siak se Timanem Migpekeotaw, mepakay aw siak se mikagi aw eden se mepakay inangen te otaw te aldaw te peg-etod.”
MAT 12:9 Nayan, nesayo si Jesus aw dimoton te simbahan te Judiyo.
MAT 12:10 Doen otaw kidoen nekepis se belad din. Doen heman menge doma otaw kidoen nengemahà te idimanda dan tepad ki Jesus, aw yan se doun te mig-insà dan, “Aw megpegolì se otaw te sebad otaw te aldaw te peg-etod, mekelàpang lay sikandin te punù ingkeliwat i Moises?”
MAT 12:11 Minikagi si Jesus, “Aw doen ayam-ayam niyo karniro medagdag doton te medalem awang te tanà te aldaw te peg-etod, ayas kaw megtabang kenyan amon mekelowà.
MAT 12:12 Pengkey meelagà se karniro, meneng labi pa meelagà se otaw diyà te karniro. Yan se doun te eked kidon làpang te punù ingkeliwat i Moises pineokit te peg-inang tadon te mèpiya pengkey aldaw te peg-etod.”
MAT 12:13 Penga niyan, minikagi si Jesus diyà te otaw nekepis se belad, “Oladi se belad nikaw.” Peg-olad din te belad din, migkèpiya iyan, so nekeonawa den te dibaloy.
MAT 12:14 Meneng nesayo se menge Parisiyo, aw migpebelaw-belaway dan tepad te inangen dan amon matay dan si Jesus.
MAT 12:15 Nayan, pegketaga-taga i Jesus te medaet se ibeg dan, nesayo sikandin lekat kidoen, aw medita se otaw timaking kandin. Migpegolì sikandin te kedita dan doen mesakit,
MAT 12:16 aw migpunù sikandin te keilangan wedad doma otaw indanan dan tepad kandin,
MAT 12:17 amon metoman se inikagi te telekeliwat te kagi te Timanem gebii si Isaias,
MAT 12:18 “Seini se pinemallì ko isogò doton kenyo, sìyan nedekelan ko te pedowan aw nelubahan ko. Ibegay ko se Espiritu Santo meg-ogpà diyà kandin. Megpetaga-taga sikandin te kedita te otaw pengkey kenà Judiyo te agpet a den meg-okom.
MAT 12:19 Eked sikandin pegbelobansag diyà te menge otaw eked penenalan kandin. Eked heman sikandin pegdindil. Aw megtoladà sikandin doton te menge dalan, eked din pelengkawi se kandin pegkeotawun.
MAT 12:20 Inangen din magsen se melomì tigbaw, aw ontò din ipelegdeg se solò kenà melowa lamig domateng se aldaw dàgen din se kedita te kededàtan.
MAT 12:21 Sikandin se pelimanan te kedita te otaw.”
MAT 12:22 Nayan, doen otaw bota aw omo inibing doton ki Jesus, so dinetengan te bosaw. Impelowà i Jesus se bosaw lekat kandin, aw penga niyan, nekeikagi sikandin aw kimità den.
MAT 12:23 Nepela se kedita te otaw kimità kenyan, aw migpebelaw-belaway dan, “Sikandin besi se Misiyas, sìyan bowad-bowad i David egpelimanan tadon.”
MAT 12:24 Meneng pegdineg te menge Parisiyo te migpelowà si Jesus te bosaw, minikagi dan, “Binegayan sikandin te tolos lekat te pengolo te bosaw si Belsebul, se doma ngadan i Satanas, aw yan se doun te egpelowà sikandin te bosaw lekat te otaw.”
MAT 12:25 Netaga-taga si Jesus te medaet se aneng-aneng dan, aw yan se doun te minikagi sikandin, “Simpana megbebolaw se sakop te sebad selotan, kebàtan se peglowan din te eked kenamay. Simpana megbebolaw se sakop te sebad lonsod, aw megbebolaw se otaw migsebad te balay, kebàtan se ogpeanan dan te eked kenamay.
MAT 12:26 Simpana megpelowà si Satanas te menge sakop din, kebàtan se peglowan din, so inangen din poon se menge sakop din.
MAT 12:27 Aw sinila niyo se pegpelowà ko te bosaw so eden niyo aw pineokit te tolos i Belsebul, sinila niyo heman se kenyo tinoledaan, so egpelowà dan heman te bosaw lekat te otaw. Yan se doun te sikandan se megpetaga-taga kenyo te kolang se pegsila niyo kanak.
MAT 12:28 Meneng aw pineokit te Espiritu Santo se pegpelowà ko te bosaw lekat te otaw, yan ketegahan niyo te dimateng den dini kenyo se peglowan te Timanem.
MAT 12:29 “Aw magsen se otaw, eked keagaw se awop te balay din singed aw domateng se otaw labi pa magsen diyà kandin. Yan se mekedaeg te tig-apò te balay aw meglegapos kandin, aw penga niyan mengabat sikandin te awop te balay.
MAT 12:30 “Se kedita te otaw eked pegpesakop diyà kanak, yan se egpoon kanak, aw se kedita te otaw kenà egtelaban kanak, iling te egpekadas dan te doma otaw lekat kanak.
MAT 12:31 Yan se doun te mikagi a den kani. Aw meg-inang se otaw te salà, pengkey medaet se inang din aw kagi din, meneng aw megselsel sikandin, pegwedaden te Timanem se salà din. Meneng aw megtompuyus se otaw te Espiritu Santo, eked palos pegwedadi te Timanem se salà din sìyan.
MAT 12:32 Aw mikagi se otaw te medaet tepad kanak Timanem Migpekeotaw, aw megselsel sikandin, pegwedaden iyan te Timanem. Meneng aw mikagi se otaw te medaet tepad te Espiritu Santo, eked palos pegwedadi se salà din sìyan, pengkey seini aw modi aldaw.”
MAT 12:33 “Aw mèpiya se kayo, mèpiya heman se pongo niyan. Aw medaet se kayo, medaet heman se pongo niyan. Aw kitaen niyo se pongo te kayo, ketegahan niyo aw eden kemoloi se kayo sìyan.
MAT 12:34 Iling kaw te memokan so medaet se eglowà lekat te bahà niyo. Wedad palos mèpiya ikegiyen niyo, so medaet se pedowan niyo. Aw mikagi se otaw, yan ipetaga-taga din aw eden se awop te pedowan din.
MAT 12:35 Aw mèpiya se pedowan te otaw, mèpiya heman se eg-inangen din. Meneng aw medaet se pedowan te otaw, medaet heman se eg-inangen din.
MAT 12:36 “Penenalan kaw te kagi ko kenyo seini. Aw domateng se aldaw te peg-okom te Timanem te otaw, ipelumun din se kedita te otaw minikagi te kagi wedad kekemowan.
MAT 12:37 Aw mèpiya se eg-ikegiyen niyo, eked kaw pelumuni. Meneng aw medaet se eg-ikegiyen niyo, ipelumun kaw.”
MAT 12:38 Penga niyan, nemoyò se menge Parisiyo aw menenoladà te punù, kagi dan, “Sir, ibeg day ipekità no diyà kenami se pengilala amon ketegahan day te ontò ka insogò te Timanem.”
MAT 12:39 Meneng minikagi si Jesus, “Medaet se ibeg te kedita te otaw songkani timinàyog te Timanem, so gayed kaw egkeibeg te ipekità ko diyà kenyo se pengilala. Meneng sebad olò se pengilala ipekità te Timanem diyà kenyo, aw yan se iling te neinang diyà te telekeliwat te kagi te Timanem gebii si Jonas.
MAT 12:40 So netelowan si Jonas doton te getek te dakel ikan gebii, iling heman kenyan, siak Timanem Migpekeotaw se ketelowan doton didalem te tanà.
MAT 12:41 Aw domateng se aldaw te peg-okom te Timanem te kedita te otaw, tomindeg heman se tege Niniba aw mikagi dan te keilangan ipelumun kaw so wedà kaw pegselsel te salà, so pegdineg te tege Niniba te intoladà i Jonas, migselsel dan te salà. Na, pengkey melangkaw si Jonas, meneng doen den dimini kenyo labi pa melangkaw diyà kandin.
MAT 12:42 Aw domateng se aldaw te peg-okom te Timanem te kedita te otaw, tomindeg heman se selotan bayi limowan doton te Siba gebii, aw mikagi sikandin te keilangan ipelumun kaw so wedà kaw penenalan kanak. Pengkey mediyò se ogpeanan din, meneng dimoton sikandin ki Solomon amon menenalan te kebiyasa ipegtoladà din. Na, pengkey melangkaw si Solomon, meneng doen den dimini labi pa melangkaw diyà kandin.”
MAT 12:43 “Aw ipelowà se bosaw lekat te otaw, meglegeb se bosaw doton te kebigtilan amon mengemahà te mèpiya ogpeanan din. Aw wedad ketelaan din,
MAT 12:44 mikagi sikandin, ‘Mèpiya pa aw lomikò a doton te otaw tapay ko eg-ogpaan.’ Lomikò se bosaw doton kandin, aw kitaen din se otaw tapay din inogpaan te mèpiya den, iling te balay melinis aw mèpiya pegkesawol.
MAT 12:45 Penga niyan, mangay se bosaw te doma pito bosaw labi pa medaet. Domoton se kedita dan te otaw sìyan aw meg-ogpà dan diyà kandin. Yan labi pa medaet se pegkesawol te otaw sìyan diyà te tapay pegkesawol din. Iling heman kenyan se medaet domateng diyà te kedita te otaw songkani so medaet se ibeg dan.”
MAT 12:46 Nayan, dalem te migtoladà pa si Jesus, dimateng se inay din aw menge kedowa din. Migtagad dan doton te lowà te balay, so ibeg dan megkità kandin.
MAT 12:47 Doen otaw minikagi diyà ki Jesus, “Doton te lowà se inay no aw menge kedowa nikaw. Meibeg dan ekon megkità kamno.”
MAT 12:48 Meneng minikagi si Jesus, “Mikagi a den diyà kenyo aw sinu se inay ko aw menge kedowa ko.”
MAT 12:49 Penga niyan, intedò i Jesus se menge tinoledaan din, aw minikagi sikandin, “Seini se inay ko aw menge kedowa ko.
MAT 12:50 Se menge otaw egtolò te ibeg te Amay ko doton te langit, yan se meinang inay ko aw menge kedowa ko meama aw bayi.”
MAT 13:1 Nayan, te aldaw sìyan, limowà si Jesus lekat te balay, aw dimoton te kilid te lanaw, aw nenenoo kidoen.
MAT 13:2 Ontò medita se otaw netipon diyà kandin, aw yan se doun te minalin sikandin doton te belangay pinondohan. Nenenoo sikandin, meneng mig-ogpà se kedita te otaw tinoledaan din doton te kilid te lanaw.
MAT 13:3 Penga niyan, medita se kebenalan intoladà din kandan pineokit te tegdeyanan. Minikagi si Jesus, “Doen otaw dimoton te pawà amon menabog te benì, so yan se ketanem te pegpenanem din.
MAT 13:4 Pegsabog din, doen benì nesabog diyà te dalan, aw kinaen iyan te menge manok te kebenesan.
MAT 13:5 Doen heman benì nesabog diyà te tanà kebeto-betowan, aw wedad nael tanà kidoen. Timobò iyan te wedà kenamay, so kenà medalem se tanà.
MAT 13:6 Meneng pegkelangkaw te aldaw, nelanes aw nematay so wedad nael dalid.
MAT 13:7 Doen heman benì nesabog diyà te pinonoan te sagbet doen tigis. Timilles heman se sagbet doen tigis, aw kinelep se menge tobò aw nematay.
MAT 13:8 Meneng doen benì nesabog diyà te melambò tanà. Yan se timilles aw minongo. Doen minongo te ginatos, aw doen minongo te keneman aw ketlowan.”
MAT 13:9 Minikagi heman si Jesus, “Keilangan menenalan se kedita niyo doen telinga.”
MAT 13:10 Penga niyan, dimoton se menge tinoledaan i Jesus kandin, aw mig-insà dan, “Nengà lay pineokit te tegdeyanan se pegtoladà no te menge doma otaw?”
MAT 13:11 Timaba si Jesus, “Sikiyo se pinetega-tegahan te Timanem te kebenalan tepad te peglowan din. Meneng wedà din petega-tegahi se doma otaw te kebenalan tepad te peglowan din.
MAT 13:12 Se otaw kominawà te kebenalan, yan se dogangan te kebenalan amon labi pa dakel diyà te keilangan din. Meneng se otaw eked kinawà te kebenalan, yan se pegwedadan te kebenalan.
MAT 13:13 Yan olò pineokit te tegdeyanan se pegtoladà ko te doma otaw amon pengkey tomengteng dan, meneng eked dan kità te kedegdagan niyan. Pengkey domineg dan, meneng eked dan ketaga-taga te kebenalan.
MAT 13:14 Pineokit kandan, netoman se inikagi te telekeliwat te kagi te Timanem gebii si Isaias, ‘Pengkey domineg kaw, meneng eked kaw pekelabet te dinegen niyo. Pengkey tomengteng kaw, meneng eked kaw ketaga-taga aw eden se kitaen niyo.
MAT 13:15 Metoman iyan so migkekagsen den se olo dan amon eked dan pemenal. Neinang den bingelen se telinga dan amon eked dan dineg te kebenalan. Inlipedeng dan se mata dan amon eked dan kità te kedegdagan te kagi ko kandan, so eked dan keibeg pengenganay diyà kanak amon tebangan ko dan.’
MAT 13:16 “Meneng doen den keluba niyo, so kimità kaw den aw dimineg kaw den te kebenalan.
MAT 13:17 Eneng-enengi niyo se kagi ko seini. Pengkey medita se telekeliwat te kagi te Timanem aw doma otaw eg-inang te metòlid gebii ibeg komità te inang ko kinità niyo, meneng wedà dan kità kenyan. Pengkey ibeg dan domineg te kagi ko dinineg niyo, meneng wedà dan dineg kenyan.”
MAT 13:18 “Penenalan kaw den te kedegdagan te tegdeyanan tepad te otaw nenabog te benì.
MAT 13:19 Se benì nesabog diyà te dalan, yan se iling te otaw domineg tepad te peglowan te Timanem meneng eked sikandin pekelabet. Penga niyan, doen inangen i Satanas amon kelibelan din se kagi te Timanem dinineg din.
MAT 13:20 Nayan, se benì nesabog diyà te tanà kebeto-betowan, yan se iling te otaw domineg te kagi te Timanem, aw meluba sikandin, aw tomolò sikandin kenyan te eked kenamay.
MAT 13:21 Meneng aw domateng se kelimahan aw pemilangen sikandin tandà te pegpemenal din te kagi te Timanem, tenanan din se pinemenalan din, so iling sikandin te tinanem wedad nael dalid.
MAT 13:22 Nayan, se benì nesabog diyà te pinonoan te sagbet doen tigis, yan se iling te otaw ontò domineg te kagi te Timanem intoladà. Meneng penga niyan, wedad ontong din so dàgen sikandin te ibeg din tomaking te ketanem te keneyonan, aw ibeg din megkeyaman amon meluba sikandin. Yan se doun te wedad ontong din diyà te kagi te Timanem dinineg din.
MAT 13:23 Meneng se benì nesabog diyà te melambò tanà, yan se iling te otaw domineg te kagi te Timanem, aw mekelabet kenyan. Doen ontong din iling te intanem mongo te ginatos, aw keneman aw ketlowan.”
MAT 13:24 Migtoladà si Jesus te doma tegdeyanan, kagi din, “Iling kani se peglowan te Timanem. Doen otaw nenanem te mèpiya kemolò te omay trigo doton te pawà din.
MAT 13:25 Meneng pegkedelem niyan, doen medaet otaw dimoton te pawà sìyan, aw nenanem heman te benì te sagbet onawa se bawa diyà te trigo intanem te tig-apò. Penga niyan, nesayo se otaw nenanem te medaet benì.
MAT 13:26 Eleg timilles se trigo aw sagbet. Meneng pegpemagting te trigo, kinità se sagbet so wedad pongo niyan.
MAT 13:27 Dimoton se menge sineligan te amo dan, aw mig-insà dan, ‘Ontò mèpiya se benì intanem tadon doton te pawà nikaw. Meneng kenan lekat se sagbet?’
MAT 13:28 Timaba se tig-apò, ‘Yan se intanem te otaw neopal kanak.’ Penga niyan, mig-insà dan, ‘Meibeg ka lay aw pispisen day se sagbet?’
MAT 13:29 Meneng minikagi sikandin, ‘Ikà niyo pa egpemispis te sagbet so mepispis heman se trigo intanem tadon.
MAT 13:30 Pebeyai niyo iyan tomilles. Aw domateng se aldaw te peglegani, isogò ko se menge otaw meglegani te onà dan pispisen se sagbet aw begkesen dan iyan amon sonogen. Meneng geniyen dan se trigo, aw isawol dan iyan doton te pol.’”
MAT 13:31 Migtoladà si Jesus te doma tegdeyanan, kagi din, “Iling kani se peglowan te Timanem. Doen benì ontò deitek intanem te otaw doton te pawà din.
MAT 13:32 Pengkey wedad ekon palos benì labi pa deitek kenyan, meneng aw tomilles iyan, labi pa iyan dakel diyà te kedita te doma intanem din. Megkedakel iyan iling te kayo, aw megsalag se menge manok kidoen.”
MAT 13:33 Migtoladà si Jesus te doma tegdeyanan, kagi din, “Iling heman kani se peglowan te Timanem. Aw isanged se yist diyà te dakel arina, lomebag se kedakel niyan.”
MAT 13:34 Gayed migtoladà si Jesus te otaw netipon pineokit te tegdeyanan tepad te peglowan te Timanem, so impeokit din te tegdeyanan se kedita te intoladà din kandan.
MAT 13:35 Pineokit kenyan, tinoman din se kagi te telekeliwat te kagi te Timanem gebii, “Megtoladà a te otaw pineokit te tegdeyanan. Iindan ko diyà kandan se wedà ko petega-tegahi lekat te keteboan te keneyonan.”
MAT 13:36 Penga niyan, nesayo si Jesus lekat kidoen te otaw netipon, aw minawop diyà te balay. Timaking se menge tinoledaan din aw nemoyò dan, “Indani kay aw eden se kedegdagan te tegdeyanan tepad te sagbet timilles kidoen te pawà.”
MAT 13:37 Minikagi si Jesus, “Se tig-apò te pawà nenanem te mèpiya benì, siaken iyan Timanem Migpekeotaw.
MAT 13:38 Se pawà, yan se keneyonan. Se mèpiya benì, yan se menge otaw migpesakop diyà te peglowan te Timanem. Meneng se sagbet, yan se menge sakop i Satanas.
MAT 13:39 Se medaet otaw nenanem te sagbet, yan si Satanas. Se kedegdagan te peglegani, yan se temanan te keneyonan, aw se otaw meglegani, yan se menge anghil.
MAT 13:40 Tinipon dan se sagbet aw sinonog dan. Iling heman kenyan se meinang aw domateng se temanan te keneyonan.
MAT 13:41 Siak Timanem Migpekeotaw se somogò te menge anghil amon melobos se peglowan ko. Tiponen dan se kedita te otaw eg-inang te salà aw egboyo te doma otaw.
MAT 13:42 Penga niyan, iagbel se kedita dan kidoen te apoy doton te kilot. Ontò dan megkelag doton, aw megyangget-yangget se ngipen dan tandà te kegemakan dan.
MAT 13:43 Meneng iling te pegsenang te aldaw, somenang heman se otaw eg-inang te metòlid aw domateng dan doton te peglowan te Amay dan Timanem. Keilangan menenalan se kedita niyo doen telinga.”
MAT 13:44 “Iling kani se peglowan te Timanem. Doen bolawan nenamay inlebeng doton te tanà. Nayan, doen otaw neketalà kenyan. Neluba se pedowan din, meneng todà din inlebeng, aw minolì. Penga niyan, imbeligyà din se kedita te kededònan din aw bineyadan din se tanà sìyan.”
MAT 13:45 “Iling heman kani se peglowan te Timanem. Doen tindiro egbayad te mèpiya kemolò te pirlas iling te peninga te bayi.
MAT 13:46 Nayan, doen pirlas kinità din ontò meelagà so ontò mèpiya se bawa niyan. Penga niyan, minolì sikandin, aw imbeligyà din se kedita te kededònan din aw bineyadan din se pirlas sìyan.”
MAT 13:47 “Iling heman kani se peglowan te Timanem. Doen pokot indagdag doton te lanaw, aw medita se kemolò te ikan nekeawop.
MAT 13:48 Pegkedita te ikan, inanggin iyan te otaw egpemokot diyà te kilid te lanaw amon ebaten dan se ikan. Insawol dan se mèpiya kemolò diyà te alat, meneng in-agbel dan se mededaet.
MAT 13:49 Iling heman kenyan se meinang aw domateng se temanan te keneyonan. Teniyen te menge anghil se otaw eg-inang te medaet aw otaw eg-inang te metòlid.
MAT 13:50 Penga niyan, iagbel dan se otaw mededaet kidoen te apoy doton te kilot. Ontò dan megkelag doton, aw megyangget-yangget se ngipen dan tandà te kegemakan dan.”
MAT 13:51 Nayan, mig-insà si Jesus diyà te menge tinoledaan din, “Nelebetan niyo lay se kedita te intoladà ko?” Timaba dan, “Ee. Nelebetan day.”
MAT 13:52 Minikagi si Jesus, “Aw doen otaw biyasa te kagi te Timanem tapay insolat, aw meg-iling heman sikandin te kaling itoladà ko tepad te peglowan te Timanem, iling sikandin te otaw doen dakel kedònan gayed din eggemiten, pengkey tapay aw kaling.”
MAT 13:53 Nayan, penga te pegtoladà i Jesus te kedita te tegdeyanan sìyan, nesayo sikandin
MAT 13:54 aw minolì doton te kandin lonsod. Migtoladà sikandin doton te simbahan te Judiyo. Ontò nepela se menge otaw kidoen, aw minikagi dan, “Sebad den ini, so ontò sikandin biyasa, aw mèpiya heman se kepelahan eg-inangen din.
MAT 13:55 Meneng netegahan tadon te sikandin se batà te karpintiro, aw si Maria se inay din. Netegahan tadon heman se menge kedowa din si Santiago, si Jose, si Simon, aw si Judas.
MAT 13:56 Eg-ogpà heman se menge etebay din dini kenitadon. Ontò kidon nepela so dakel den se nebatog din.”
MAT 13:57 Yan nebensi dan kandin. Meneng minikagi si Jesus, “Gayed egsegmanen te doma otaw se telekeliwat te kagi te Timanem, meneng kenà sikandin egsegmanen te otaw te kandin lonsod aw menge kedowa din.”
MAT 13:58 Yan se doun te pilabok se kepelahan ininang i Jesus kidoen, so wedà dan pemenal kandin.
MAT 14:1 Nayan, si Herod se otaw limowan doton te Galiliya, aw doen dinineg din tepad te eg-inangen i Jesus.
MAT 14:2 Minikagi sikandin diyà te menge opisyal, “Sikandin besi si Juan Memonyagay neantay den lekat te nematay, aw yan se doun te eg-inangen din se kepelahan metolos.”
MAT 14:3 Yan se inikagi din, so kedengan impedakep din si Juan, aw impegapos din, aw impekeleboso din. Yan se ininang din diyà ki Juan amon meluba se nayi din si Herodias inagaw din diyà te kedowa din si Felipe.
MAT 14:4 Peg-agaw i Herod te nayi din, simila si Juan kandin, kagi din, “Mig-inang ka den te salà, so nengagaw ka te nayi nikaw.”
MAT 14:5 Ibeg i Herod ipeimatay din si Juan, meneng wedà deleg, so nelemitan sikandin te meopal se kedita te otaw kandin, so eg-aneng-aneng dan te si Juan se ontò telekeliwat te kagi te Timanem.
MAT 14:6 Peg-inang i Herod te pista tepad te aldaw te pegtebaw din, simayaw se laga batà i Herodias amon meluba se menge otaw timanod. Ontò heman neluba si Herod,
MAT 14:7 aw yan se doun te ontò sikandin migsapà te ibegay din diyà te laga sìyan se pengkey eden se pemoyoen din.
MAT 14:8 Penga niyan, timolò se laga te punù te inay din aw minikagi, “Pesipali se lieg i Juan Memonyagay, aw pesoli se olo din diyà te dakel sablag, aw peibingi dini kanak.”
MAT 14:9 Nelidò se pedowan i Herod. Meneng so migsapà sikandin, aw eked keibeg silahen te menge otaw timanod, tinoman din se pinemoyò te laga.
MAT 14:10 Insogò din se sondalo doton te keleboso. Sinipal din se lieg i Juan.
MAT 14:11 Insawol din se olo diyà te sablag, aw imbegay din diyà te laga, aw inibing din doton te inay din.
MAT 14:12 Penga niyan, dimoton se menge tinoledaan i Juan te keleboso, aw inabat dan se lawa din aw inlebeng dan iyan. Penga niyan, dimoton dan ki Jesus aw mig-indan dan diyà kandin tepad te pegkematay i Juan.
MAT 14:13 Nayan, pegdineg i Jesus tepad te pegpengimatay ki Juan, nesayo sikandin lekat kidoen. Simakay sikandin te belangay aw dimoton te kesikmihan. Meneng pegketaga-taga te kedita te otaw te pineselowan i Jesus, dimoton dan heman. Minipanaw dan lekat te menge ogpeanan dan.
MAT 14:14 Pegtenà i Jesus, kinità din se ontò medita otaw migtagad kandin. Ontò din dan neidowan, aw pinegolian din se kedita te otaw doen mesakit.
MAT 14:15 Pegkeapon niyan, dimoton se tinoledaan din kandin, aw minikagi dan, “Ontò ini kebigtilan, aw agpet den delem. Pekeseyowi se kedita te otaw doton te lonsod amon mayad dan te kànen dan.”
MAT 14:16 Minikagi si Jesus, “Ikà niyo egpekesayo kandan. Pemekàni niyo dan.”
MAT 14:17 Minikagi dan, “Meneng doen olò lima se pan, aw didowa se ikan.”
MAT 14:18 Minikagi si Jesus, “Ibingi niyo iyan dini kanak.”
MAT 14:19 Penga niyan, impeonsad din se kedita te otaw kidoen te sagbet. Inabat din se lima pan aw didowa ikan. Limengag sikandin doton te langit aw migpesiontong diyà te Timanem kenyan. Penga niyan, binelà-belà din se pan aw imbegay din diyà te menge tinoledaan din, aw imbegay dan iyan diyà te menge otaw netipon.
MAT 14:20 Kimaen se kedita dan aw nebesog dan. Penga niyan, inimon dan se samà te pan kinaen dan, aw sempolò teg dowa se buun nepenò.
MAT 14:21 Menge lima melalan se meama kimaen kenyan, aw wedà bilangi se menge bayi aw mengisù.
MAT 14:22 Penga niyan, impeonà i Jesus se menge tinoledaan din simakay te belangay pesalo doton dipag te lanaw. Dalem niyan, impeolì din se kedita te otaw netipon.
MAT 14:23 Pegkesayo dan, timikedeg si Jesus doton te bontod sebad din amon megtawal-tawal. Pegsallep te aldaw, kidoen si Jesus te bontod olò din sebad.
MAT 14:24 Meneng mediyò den se belangay doton te lawod te lanaw. Ontò dan nelimahan, so dinetengan dan te dedakel balud aw simongsong dan te kelamag.
MAT 14:25 Ontò mata-mata te iselem, dimoton si Jesus kandan aw minipanaw sikandin diyà te lanto te lanaw.
MAT 14:26 Meneng pegkità dan kandin, ontò dan nelemitan. Migpuypuy dan tandà te lamit dan, aw minikagi dan, “Along iyan.”
MAT 14:27 Meneng pegketà timawal si Jesus, “Peseligi niyo se pedowan niyo, so siaken ini. Ikà niyo egkelemitan.”
MAT 14:28 Minikagi si Pedro, “Pengolo, aw ontò sikona, peipenawi a diyà te lanto te lanaw pesalo doton kamno.”
MAT 14:29 Minikagi si Jesus, “Na, diyà ka.” Penga niyan, timenà si Pedro lekat te belangay aw minipanaw diyà te lanto te lanaw pesalo doton ki Jesus.
MAT 14:30 Meneng peg-imanman din te kelamag ontò mebandes, nelemitan aw agpet melemes. Meneng nengenganay sikandin, kagi din, “Pengolo, tebangi a.”
MAT 14:31 Mig-ayas si Jesus minawid kandin, aw minikagi, “Wedà pa kedì kelobos se pegsalig no kanak. Nepela a so migdowa-dowa ka.”
MAT 14:32 Penga niyan, eleg dan simakay te belangay, aw timunung se kelamag.
MAT 14:33 Limongken se doma tinoledaan diyà ki Jesus, aw migsimba dan kandin, aw minikagi dan, “Ontò ka Batà te Timanem.”
MAT 14:34 Nayan, penga te pegbatas dan te lanaw, dimateng dan doton te Genesarit.
MAT 14:35 Kimilala se tege Genesarit ki Jesus, aw impeangay dan se kedita te otaw doen mesakit lekat te kedepagan niyan.
MAT 14:36 Nemoyò dan diyà ki Jesus aw mepakay dan olò memaed te toktok te saol din, aw negolian se kedita dan nemaed kenyan.
MAT 15:1 Nayan, doen menge Parisiyo aw menenoladà te punù ingkeliwat i Moises dimoton ki Jesus lekat te Jerusalem. Minikagi dan diyà kandin,
MAT 15:2 “Eglàpang se menge tinoledaan no te ketanem te kemonaan tadon, so kenà dan eg-onaw te belad dan te eked dan pa kaen.”
MAT 15:3 Minikagi si Jesus, “Eglàpang kaw heman te punù te Timanem pineokit te pegtaking niyo te ketanem te kemonaan niyo.
MAT 15:4 Migpunù se Timanem, ‘Keilangan segmanen no se amay aw inay nikaw.’ Migpunù heman sikandin, ‘Keilangan imetayan se otaw megtindaet te amay aw inay din.’
MAT 15:5 Meneng egtoladà kaw te mepakay aw eked pegsagman se otaw te amay aw inay din aw olò mikagi diyà kandan, ‘Se itabang ko peden kenyo, yan se tapay ko imbegay diyà te Timanem.’
MAT 15:6 Meneng pineokit te pegtaking niyo te ketanem sìyan, timinàyog kaw den te kagi te Timanem te keilangan segmanen niyo se amay aw inay niyo.
MAT 15:7 Tay law. Eden niyo aw egpenimanem kaw. Sikiyo se tinedoan te kagi te Timanem ingkeliwat i Isaias gebii,
MAT 15:8 ‘Pengkey eg-ikagi se otaw sìyan te egtaking dan kanak, meneng wedà kelobos se pedowan dan diyà kanak.
MAT 15:9 Wedad ontong te pegsimba dan kanak, so se ketanem te otaw ipegtoladà dan, yan se ininang dan punù te Timanem.’”
MAT 15:10 Nayan, medita se otaw netipon kidoen, aw timawal si Jesus diyà kandan amon megpedapag dan diyà kandin. Minikagi sikandin, “Penenalan kaw kanak amon mekelabet kaw kani.
MAT 15:11 Kenà egpekesalà se otaw pineokit te iawop din diyà te bahà din. Meneng egpekesalà se otaw pineokit te lomowà lekat te bahà din.”
MAT 15:12 Penga niyan, dimoton se menge tinoledaan i Jesus kandin, aw minikagi dan, “Neopal den se menge Parisiyo tepad te inikagi no sìyan.”
MAT 15:13 Minikagi si Jesus, “Pegbàtan dan te Amay ko eg-ogpà doton te langit, iling te sagbet pispisen doton te pawà.
MAT 15:14 Pebeyai niyo se menge Parisiyo. Iling dan te otaw bota megtelaman mengibing te doma. Meneng wedad otaw bota mekeagak te doma din bota, so medagdag se didowa dan doton te awang te tanà.”
MAT 15:15 Minikagi si Pedro, “Lebadi diyà kenami se tegdeyanan intoladà no gina.”
MAT 15:16 Minikagi si Jesus, “Nepela a so iling kaw heman te doma otaw wedà pekelabet.
MAT 15:17 Pengkey eden se kànen iawop diyà te bahà te otaw, yan se domeleg doton te getek, aw penga niyan lomowà lekat te lawa.
MAT 15:18 Meneng se kagi lomowà lekat te bahà te otaw, lekat iyan te pedowan din, aw yan se doun te egpekesalà se otaw.
MAT 15:19 Pedowan se kelekatan te medaet ibeg te otaw egbonò, aw eglakad, aw egpenakaw, aw egkebolalaw, aw egbaet-baet.
MAT 15:20 Egpekesalà se otaw pineokit te kedita niyan. Meneng kenà egpekesalà se otaw kenà eg-onaw te belad te eked pa kaen.”
MAT 15:21 Nesayo si Jesus lekat kidoen aw dimoton te probinsya medapag te lonsod te Tiro aw Sidon.
MAT 15:22 Doen bayi mig-ogpà kidoen kenà Judiyo so lekat te Canaan se menge kemonaan din. Dimoton sikandin ki Jesus aw minikagi te dakel se kagi din, “Sir, bowad-bowad i David, keidowi a bag, so ontò dinetengan te bosaw se batà ko bayi.”
MAT 15:23 Meneng wedà sikandin segmani i Jesus. Yan dimoton se menge tinoledaan i Jesus kandin aw nemoyò dan, kagi dan, “Pekeseyowi se bayi sìyan, so egtaking kenitadon aw gayed egbelisì.”
MAT 15:24 Minikagi si Jesus, “Olò menge bowad-bowad i Israel se sinogoan kanak tebangan ko, so iling dan te menge karniro migketading.”
MAT 15:25 Nayan, migpedapag se bayi diyà ki Jesus, aw limongken diyà kandin, aw minikagi, “Sir, tebangi a bag.”
MAT 15:26 Mig-indan si Jesus te tegdeyanan amon metaga-taga se bayi te olò menge Judiyo se tebangan din, kagi din, “Eked kepakay aw ebaten te otaw se kànen te menge batà din amon ibegay din diyà te menge toyang.”
MAT 15:27 Minikagi se bayi, “Sir, benal iyan. Meneng mepakay aw komaen se toyang te momò medagdag lekat te lemisa te tig-apò.”
MAT 15:28 Penga niyan, minikagi si Jesus, “Tiyà, ontò ka simalig kanak. Tomanen ko den se ibeg nikaw.” Pegketà, negolian se batà din.
MAT 15:29 Nayan, nesayo si Jesus lekat kidoen, aw minokit te kilid te lanaw te Galiliya. Timikedeg sikandin te bontod medapag, aw nenenoo kidoen.
MAT 15:30 Ontò medita se otaw dimoton kandin, aw inibing dan heman se menge doma otaw doen medita kemolò te mesakit. Doen menge kapig, aw nepantig, aw bota, aw omo, aw medita heman se doma otaw doen mesakit. Insawol dan doton dapag i Jesus, aw pinegolian din dan.
MAT 15:31 Nepela se kedita te otaw, so kinità den dan te minikagi den se omo, aw negolian se nepantig, aw minipanaw se kapig, aw kimità den se bota. Yan se doun te dimuyun dan te Timanem egseligan te menge bowad-bowad i Israel.
MAT 15:32 Na, penga niyan, tinawal i Jesus se menge tinoledaan din, aw minikagi sikandin, “Neidowan ko den se menge otaw dini, so netelowan den dan timaking kanak, aw wedad den kànen dan. Eked kepakay aw ipeolì ko dan te binallos dan pa, so metapì dan kidoen te dalan.”
MAT 15:33 Minikagi se tinoledaan din, “Meneng kebigtilan ini, aw wedad palos ebatan tadon te pan botong te ipekaen tadon kandan, so ontò dan medita.”
MAT 15:34 Mig-insà si Jesus, “Pila lay se pan inibing niyo?” Timaba dan, “Pito olò, aw pilabok se ikan dedeitek.”
MAT 15:35 Penga niyan, impeonsad din se kedita te otaw diyà te tanà.
MAT 15:36 Inabat din se pito pan aw ikan, aw migpesiontong diyà te Timanem kenyan. Binelà-belà din iyan, aw imbegay din diyà te menge tinoledaan din, aw inteped dan diyà te menge otaw netipon.
MAT 15:37 Kimaen se kedita dan aw nebesog dan. Penga niyan, inimon dan se samà te pan kinaen dan, aw pito se boliyas nepenò.
MAT 15:38 Menge epat melalan se meama kimaen kenyan, aw wedà bilangi se menge bayi aw mengisù.
MAT 15:39 Penga niyan, impeolì i Jesus se kedita dan, aw simakay sikandin te belangay aw dimoton te probinsya medapag te Magadan.
MAT 16:1 Nayan, doen menge Parisiyo aw Sadusiyo dimoton ki Jesus amon megtandà dan kandin. Nemoyò dan te ipekità din diyà kandan se pengilala amon ketegahan dan te ontò sikandin insogò te Timanem.
MAT 16:2 Minikagi si Jesus, “Aw melalag se langit te pegsallep te aldaw, ketegahan niyo te eked odan te keeldawan niyan.
MAT 16:3 Aw melalag se langit te iselem aw domelem, ketegahan niyo te modan te aldaw sìyan. Nepela a kenyo, so pengkey egpengilala kaw te ledyawan doton te langit, meneng wedà niyo kilelai aw eden se kedegdagan te egkeinang seini.
MAT 16:4 Medaet se ibeg te kedita te otaw songkani timinàyog te Timanem, so gayed kaw egkeibeg te ipekità ko diyà kenyo se pengilala. Meneng sebad olò se pengilala ipekità te Timanem diyà kenyo, aw yan se iling te neinang diyà te telekeliwat te kagi te Timanem gebii si Jonas.” Penga niyan, nesayo si Jesus lekat kidoen.
MAT 16:5 Nayan, minatas se menge tinoledaan i Jesus te lanaw, meneng wedad pan inibing dan so nelibelan dan se bawo dan.
MAT 16:6 Minikagi si Jesus, “Peg-ahà kaw amon eked kaw ketini te yist te menge Parisiyo aw Sadusiyo.”
MAT 16:7 Migpebelaw-belaway se menge tinoledaan din, kagi dan, “Yan se inikagi din so wedad pan inibing tadon.”
MAT 16:8 Meneng netegahan i Jesus aw eden se aneng-aneng dan, aw minikagi sikandin, “Tay law. Wedà pa kedì kelobos se pegsalig niyo kanak. Ikà niyo egkepela so wedad pan inibing niyo.
MAT 16:9 Nepela a kenyo, so wedà kaw pa ketaga-taga aw eden se mebatog ko inangen. Iling te nelibelan niyo den se pegpekaen ko te lima melalan otaw te lima pan, aw medita se buun inipenò niyo te samà.
MAT 16:10 Iling te nelibelan niyo heman se pegpekaen ko te epat melalan otaw te pito pan, aw medita se boliyas inipenò niyo te samà.
MAT 16:11 Meneng nepela a so wedà kaw pa pekelabet te kenà pan se kedegdagan te inikagi ko gina, te keilangan meg-ahà kaw amon eked kaw ketini te yist te menge Parisiyo aw Sadusiyo.”
MAT 16:12 Penga niyan, nekelabet dan te kenà yist te pan se keilangan imendayan dan, meneng keilangan megpekeimanday dan te ipegtoladà te menge Parisiyo aw Sadusiyo.
MAT 16:13 Nayan, dimoton si Jesus te lonsod medapag te Sesarya Filipos. Pegdateng din doton, mig-insà sikandin diyà te menge tinoledaan din, kagi din, “Eden lay se kagi te kedita te otaw tepad te Timanem Migpekeotaw? Sinu a lay ekon?”
MAT 16:14 Timaba dan, “Doen menge otaw eg-ikagi te sikona si Juan Memonyagay. Doen heman eg-ikagi te sikona si Elias. Doen heman eg-ikagi te sikona si Jeremias aw doma telekeliwat te kagi te Timanem gebii.”
MAT 16:15 Mig-insà si Jesus, “Meneng eden lay se kenyo aneng-aneng tepad kanak? Sinu a lay?”
MAT 16:16 Timaba si Simon iningedanan din ki Pedro, kagi din, “Sikona se Misiyas. Sikona se Batà te Timanem.”
MAT 16:17 Minikagi si Jesus, “Simon, batà i Juan, doen ontò keluba nikaw. Kenà otaw se migpetaga-taga diyà kamno te siak se Batà te Timanem, meneng Amay ko doton te langit se migpetaga-taga kenyan diyà kamno.
MAT 16:18 Eneng-enengi se kagi ko kamno seini. Iling ka te bato dimasel tandà te pegsalig no kanak, aw medita se otaw tomaking kamno aw megpesakop diyà kanak. Eked dan dàgi te tolos te kemetayun.
MAT 16:19 Isogò ko sikona meg-owang te lelebangan amon medita se otaw megpesakop diyà te peglowan te Timanem. Aw megpunù ka te doen eked kepakay inangen dini lanto te tanà, eked heman iyan kepakay inangen doton te langit. Aw megpunù ka te doen mepakay inangen dini lanto te tanà, mepakay heman iyan inangen doton te langit.”
MAT 16:20 Penga niyan, ontò migpunù si Jesus te keilangan eked dan indani diyà te doma otaw te sikandin se Misiyas.
MAT 16:21 Lekat niyan, mig-indan si Jesus diyà te menge tinoledaan din aw eden se metoman domateng diyà kandin. Keilangan domoton sikandin te Jerusalem, aw ipeeleg sikandin te menge obanen aw pengolo te simbahan aw menenoladà te punù ingkeliwat i Moises. Metoman sikandin imetayan, aw penga niyan meantay lekat te nematay te iketelo aldaw.
MAT 16:22 Penga niyan, migpedapag si Pedro diyà ki Jesus, aw sinagda din, kagi din, “Pengolo, eked peden iyan keinang te Timanem diyà kamno. Eked palos iyan ketoman.”
MAT 16:23 Meneng miniling si Jesus, aw minikagi diyà ki Pedro, “Kesayo ka lekat kanak. Iling ka ki Satanas, so mekeanggà ka kanak. Kenà lekat te Timanem se ibeg no sìyan, meneng lekat iyan te aneng-aneng nikaw.”
MAT 16:24 Penga niyan, minikagi si Jesus diyà te menge tinoledaan din, “Aw meibeg se otaw tomaking kanak, keilangan megsagda sikandin te ibeg te pedowan din, aw tomayod te kelimahan te kelikit te aldaw pengkey imetayan sikandin, aw keilangan ontò tomaking kanak.
MAT 16:25 Pengkey ibeg te otaw megkelayat se omol din dini te keneyonan, meneng kunù din gayed matay. Meneng aw mepakay diyà te otaw pengkey imetayan sikandin tandà te pegtaking din kanak, begayan sikandin te kaling pedowan wedad temanan.
MAT 16:26 Simpana tig-epoen te otaw se kedakel te keneyonan, aw penga niyan matay sikandin aw ipelumun doton te kilot, wedad ontong din, so eked kebeyadi se kaling pedowan wedad temanan.
MAT 16:27 Siak se Timanem Migpekeotaw, aw lomikò a dini tekingan te menge anghil aw kelangkaw te Amay ko. Aw lomikò a, begayan ko se kedita te otaw te ontong tepad te tapay dan ininang.
MAT 16:28 Eneng-enengi niyo se kagi ko kenyo seini. Doen otaw dini kenyo eked kematay singed aw onà dan komità te pegtebò te peglowan ko Timanem Migpekeotaw.”
MAT 17:1 Nayan, pegkeokit te enem se aldaw, impetaking i Jesus si Pedro, si Santiago, aw si Juan adi i Santiago, aw timikedeg dan doton te melangkaw bontod te wedad doma dan.
MAT 17:2 Pegketà, dalem te pegtengteng dan ki Jesus, netodà se bawa din, aw simenang iyan iling te aldaw. Ontò migkepotì se kedakel te penenaktun din so ontò minanyag.
MAT 17:3 Pegketà, kinità dan heman si Moises aw si Elias migpebelaw-belaway doma ki Jesus.
MAT 17:4 Minikagi si Pedro diyà ki Jesus, “Pengolo, mèpiya so dini kay. Aw mepakay diyà kamno, meg-inang a den te telo balay dini amon doen ogpaan te teg sebad-sebad kenyo si Moises aw si Elias.”
MAT 17:5 Telobo pa minikagi si Pedro, doen labon melowa dimateng diyà kandan aw wedà dan ebey kità kandan. Penga niyan, dinineg dan se kagi te Timanem lekat te labon, “Seini se Batà ko. Dakel se pedowan ko kandin, aw ontò a neluba kandin. Keilangan sikandin se penenelanen niyo.”
MAT 17:6 Pegdineg dan kenyan, nekelemlem dan so ontò dan nelemitan.
MAT 17:7 Meneng nemaed si Jesus kandan, aw minikagi, “Enaw kaw den. Ikà niyo egkelemitan.”
MAT 17:8 Peggimata dan, kinità dan olò si Jesus wedad den doma din.
MAT 17:9 Pegtopang dan lekat te bontod, ontò migpunù si Jesus kandan, kagi din, “Ikà niyo eg-indan te kinità niyo singed aw meantay a Timanem Migpekeotaw lekat te nematay.”
MAT 17:10 Penga niyan, mig-insà se menge tinoledaan din, “Aw agpet ka den lomowan, nengà lay egtoladà se menge menenoladà te punù ingkeliwat i Moises te keilangan domateng si Elias te eked pa lowan se Misiyas?”
MAT 17:11 Timaba si Jesus, “Benal domateng onà si Elias, so sikandin se megpeketagad te kedita.
MAT 17:12 Meneng mikagi a den diyà kenyo te dimateng den sikandin, aw wedà sikandin kilelai te doma otaw. Meneng medaet se ininang dan diyà kandin. Iling heman kenyan se medaet inangen dan diyà kanak Timanem Migpekeotaw.”
MAT 17:13 Penga niyan, neeneng-enengan dan te si Juan se timoman te pakang tepad te pegdateng i Elias.
MAT 17:14 Pegdateng dan doton te ongan, medita se otaw migtagad kandan. Nayan, doen otaw dimoton ki Jesus aw limongken diyà kandin, aw minikagi,
MAT 17:15 “Sir, keidowi bag se batà ko, so pigbaboy sikandin aw ontò eg-elegen. Melikit sikandin eg-elosen te bosaw diyà te apoy aw eglemesen heman diyà te wayeg.
MAT 17:16 Pengkey inibing ko sikandin dini te menge tinoledaan nikaw amon megpegolì dan kandin, meneng wedà dan iyan kebatog.”
MAT 17:17 Minikagi si Jesus, “Tay law, sikiyo menge otaw. Ontò kolang se aneng-aneng niyo, so wedà kaw pa salig diyà kanak. Eked den kenamay se pegdoma ko kenyo, meneng keilangan tomayod a pa pengkey eked kaw pemenal. Na, pedinihi se batà nikaw.”
MAT 17:18 Penga niyan, sinagda i Jesus se bosaw aw impelowà din iyan lekat te batà. Pegketà, negolian sikandin.
MAT 17:19 Pegkenamay-namay, dimoton se menge tinoledaan i Jesus kandin te wedad doma dan, aw mig-insà dan, “Nengà lay wedà day kebatog se pegpelowà te bosaw lekat kandin?”
MAT 17:20 Minikagi si Jesus, “Wedà niyo iyan kebatog so wedà pa kelobos se pegsalig niyo diyà kanak. Mikagi a den diyà kenyo te pengkey deitek pa se pegsalig niyo diyà kanak iling te kedeitek te benì te mostasa, mekebatog kaw mikagi diyà te bontod seini te malin iyan, aw tomolò iyan kenyo, so wedad palos eked niyo kebatog. [
MAT 17:21 Meneng eked pelowai se seini kemolò te bosaw singed aw megtawal-tawal kaw aw megpowasa kaw.]”
MAT 17:22 Nayan, pegketipon te menge tinoledaan i Jesus doton te probinsya te Galiliya, minikagi si Jesus, “Seini se metoman domateng diyà kanak Timanem Migpekeotaw. Metoman a itolok aw ibegay a diyà te belad te doma otaw.
MAT 17:23 Penga niyan, imetayan a dan, aw entayen a lekat te nematay te iketelo te aldaw.” Peg-ikagi din kenyan, ontò nelidò se pedowan dan.
MAT 17:24 Pegdateng dan doton te lonsod te Kapirnaom, doen menge otaw kidoen egpengabat te kwarta ipegbegay diyà te dakel simbahan te Jerusalem te kelikit te omay. Mig-insà dan diyà ki Pedro, “Egpemegay lay se pengolo niyo te kwarta diyà te dakel simbahan?”
MAT 17:25 Timaba si Pedro, “Ee man.” Peg-olì din doton te balay, te wedà pa ikagi si Pedro, minikagi si Jesus, “Simon, doen insà ko kamno. Sinu lay se otaw keilangan memegay te kwarta diyà te selotan? Kandin pamilya, aw doma otaw?”
MAT 17:26 Timaba si Pedro, “Olò doma otaw se keilangan memegay.” Minikagi si Jesus, “Yan eked pemegay se kandin menge batà.
MAT 17:27 Meneng eked ki keibeg aw doen meopal kenita. Yan doton ka te lanaw aw pegtonton ka te selab. Kitaen no se kwarta selapì doton te bahà te tagnà ikan meabat nikaw. Botong iyan te keilangan ibegay ta diyà te simbahan. Ebati iyan aw begayi diyà te menge otaw egpengabat.”
MAT 18:1 Nayan, wedà kenamay, dimoton se menge tinoledaan i Jesus kandin, aw mig-insà dan, “Sinu lay se ontò melangkaw doton te peglowan te Timanem?”
MAT 18:2 Tinawal i Jesus se sebad batà, aw impetindeg din iyan kidoen te tengà-tengà dan.
MAT 18:3 Penga niyan, minikagi si Jesus, “Eneng-enengi niyo se kagi ko seini. Eked kaw palos sekopi te Timanem diyà te peglowan din singed todaen niyo se aneng-aneng niyo, aw megpedanà kaw iling te kedanà te mengisù.
MAT 18:4 Meneng se otaw ontò melangkaw doton te peglowan te Timanem, yan se otaw megpedanà te kandin pegkeotawun iling te kedanà te batà seini.
MAT 18:5 Aw megsagman se otaw te sakop ko iling te batà seini tandà te pegpesakop din kanak, pineokit kenyan segmanen a din heman.”
MAT 18:6 “Meneng aw doen otaw mekebaet te pegpemenal te mengisù egkeidowan ko, ontò medaet se pelumun domateng diyà kandin. Labi pa mèpiya aw iketan se lieg din te dakel bato aw idagdag doton te lawod.
MAT 18:7 Mekelelayò se kedita te otaw, so doen egpekebaet te kandan pegpemenal. Doen gayed mekebaet te pegpemenal te kedita te otaw, meneng mekelelayò se otaw eg-inang kenyan, so ontò sikandin ipelumun.
MAT 18:8 “Aw meboyo kaw meg-inang te salà pineokit te belad aw benis niyo, mèpiya aw tokongen niyo iyan aw iagbel niyo amon eked kaw peg-inang te salà, aw amon kominawà kaw te kaling pedowan wedad temanan. Labi pa medaet aw meboyo kaw pineokit te belad aw benis niyo, aw iagbel se kedakel te lawa niyo kidoen te apoy doton te kilot eked palos kepadeng.
MAT 18:9 Aw meboyo kaw heman meg-inang te salà pineokit te mata niyo, mèpiya aw logiten niyo se mata niyo aw iagbel niyo amon eked kaw peg-inang te salà, aw amon kominawà kaw te kaling pedowan wedad temanan. Labi pa medaet aw meboyo kaw pineokit te mata niyo, aw iagbel se kedakel te lawa niyo kidoen te apoy doton te kilot.”
MAT 18:10 “Keilangan eked kaw peglindò te sakop ko medanà iling te kedanà te mengisù seini, so mikagi a den diyà kenyo te egtonggoan dan te menge anghil gayed egdoma te Amay ko doton te langit. [
MAT 18:11 Dimini a Timanem Migpekeotaw amon ipelowà ko se menge otaw nelegeb te salà.]
MAT 18:12 “Eneng-enengi niyo ini. Aw doen otaw doen sebad gatos ayam-ayam din karniro, aw metalon se sebad, tenanan din se kesyaman teg siyam doton te bontod, aw pemehaen din se sebad.
MAT 18:13 Mikagi a den diyà kenyo, aw kitaen din se sebad netalon, doen keluba din labi pa dakel diyà te keluba din tepad te kesyaman teg siyam wedà ketalon.
MAT 18:14 Iling heman kenyan se keluba te Amay ko doton te langit, so eked sikandin keibeg aw doen sakop din medanà mekesoway lekat kandin, pengkey sebad.”
MAT 18:15 “Na, aw doen otaw egpemenal meg-inang te salà diyà kenyo, doton kaw kandin te wedad doma otaw kidoen, aw ikagi kaw diyà kandin tepad te salà ininang din. Aw megselsel sikandin, yan tinebangan niyo den sikandin.
MAT 18:16 Meneng aw eked sikandin penenalan te kagi niyo, petekingi niyo se doma otaw pengkey sebad aw dowa, aw lomikò kaw doton kandin, amon doen dowa otaw aw kenà telo meg-indan te benal se kagi niyo kandin.
MAT 18:17 Aw eked sikandin penenalan kandan, indani niyo iyan diyà te kedita te otaw egsimba kidoen. Aw eked sikandin tolò te menge obanen te simbahan, ikà niyo egdoma kandin, so iling den sikandin te menge otaw kenà egpenimanem aw nelegeb te salà.”
MAT 18:18 “Eneng-enengi niyo se kagi ko kenyo seini. Aw megpunù kaw te doen eked kepakay inangen dini lanto te tanà, eked heman iyan kepakay inangen doton te langit. Aw megpunù kaw te doen mepakay inangen dini lanto te tanà, mepakay heman iyan inangen doton te langit.
MAT 18:19 “Mikagi a den heman diyà kenyo, aw doen dowa kenyo dini lanto te tanà, aw megsebad kaw te kenyo pemoyoen diyà te Amay ko doton te langit, metoman iyan meinang so ibegay din iyan diyà kenyo.
MAT 18:20 Pengkey olò dowa aw telo se otaw metipon amon megsimba kanak, kidoen a heman doma dan.”
MAT 18:21 Penga niyan, dimoton si Pedro ki Jesus aw minikagi, “Pengolo, aw melikit gayed eg-inang se doma otaw te salà diyà kanak, mekepila lay se pegwedad ko te salà din? Botong lay aw mekepito?”
MAT 18:22 Minikagi si Jesus, “Kenà olò mekepito, meneng keilangan gayed no pegwedaden se peg-inang din te salà, pengkey doblihen se kepitowan te mekepito.
MAT 18:23 Iling kani se peglowan te Timanem. Doen selotan mig-aneng-aneng te mèpiya aw somokot sikandin te salà te menge sakop din.
MAT 18:24 Pegtebò din, doen otaw impeangay din ontò dakel se salà din, so minelalan se kwarta binelesan din.
MAT 18:25 So eked sikandin pekeimpas, minikagi se selotan te keilangan inangen din allang se otaw sìyan sipat esawa din aw menge batà din. Keilangan ibeligyà dan heman te selotan sipat kedakel te kededònan dan amon meimpas se salà dan.
MAT 18:26 Meneng limongken se otaw sìyan aw migpeido-ido, kagi din, ‘Sir, pegtagad ka bag te eked kenamay, so impasen ko se kedakel te salà ko kamno.’
MAT 18:27 Penga niyan, pigwedad te selotan se salà te otaw sìyan tandà te keido din kandin, aw impelowà din sikandin.
MAT 18:28 Meneng pegkesayo te otaw sìyan, kinità din se doma otaw doton te dalan doen ontò deitek salà diyà kandin. Pegketà, pineleng din se lieg te otaw sìyan aw minikagi, ‘Impasi den se salà no kanak.’
MAT 18:29 Penga niyan, limongken se otaw aw migpeido-ido, kagi din, ‘Pegtagad ka bag te eked kenamay, so impasen ko se kedakel te salà ko kamno.’
MAT 18:30 Meneng wedad keido din, aw impekeleboso din se doma otaw lamig meimpas se salà.
MAT 18:31 Nayan, pegketaga-taga te menge kedomaan din kenyan, ontò nelidò se pedowan dan. Penga niyan, dimoton dan te selotan aw mig-indan dan te kedita te neinang din.
MAT 18:32 Penga niyan, impeangay te selotan se otaw sìyan aw minikagi, ‘Medaet ka otaw. Pegpeido-ido no diyà kanak, pigwedad ko se kedakel te salà nikaw.
MAT 18:33 So neidowan ta, keilangan keidowan no heman se doma otaw.’
MAT 18:34 Ontò sikandin neopalan te selotan, aw impekeleboso din sikandin amon ipelumun lamig meimpas se kedakel te salà.”
MAT 18:35 Minikagi si Jesus, “Aw eked kaw ontò pegwedad te salà te doma otaw, iling heman kenyan se inangen te Amay ko diyà kenyo. Eked kaw din keidowi.”
MAT 19:1 Nayan, penga te pegtoladà i Jesus te kedita niyan, nesayo sikandin lekat te probinsya te Galiliya aw minokit doton dipag te wayeg te Jordan taman te probinsya te Judiya.
MAT 19:2 Medita se otaw timaking kandin, aw pinegolian din se kedita dan doen mesakit.
MAT 19:3 Doen menge Parisiyo nengemahà te kemalì diyà te pegtoladà i Jesus amon doen idimanda dan tepad kandin. Dimoton dan kandin aw mig-insà dan, “Mepakay lay aw somibwan se otaw te esawa din pengkey wedad medaet ininang din?”
MAT 19:4 Timaba si Jesus, “Wedà niyo besi besahi se kagi te Timanem insolat. Peg-inang din te otaw gebii, sebad olò se meama ininang din aw sebad olò heman se bayi.
MAT 19:5 Minikagi heman se Timanem, ‘Yan se doun te tomanan se meama te amay aw inay din, aw megsebad diyà te esawa din. Se didowa dan meinang sebad.’
MAT 19:6 Yan kenà dowa se teleesawa, so neinang dan sebad. Nayan, so ininang dan te Timanem sebad, eked kepakay aw ipesoway dan te otaw.”
MAT 19:7 Minikagi dan, “Aw eked iyan kepakay, nengà lay migpunù si Moises gebii te keilangan doen papil ibegay te meama diyà te bayi tepad te pegsibwan din, aw penga niyan mepakay din ipekesayo?”
MAT 19:8 Minikagi si Jesus, “Migpunù si Moises te mepakay aw somibwan kaw te esawa niyo, so netegahan din te ontò magsen se olo niyo. Meneng gebii te peg-inang te Timanem te otaw, eked kepakay se pegsibwan.
MAT 19:9 Mikagi a den diyà kenyo, aw somibwan se meama te esawa din wedà peglakad, aw todà mengognan, mekelakad sikandin.”
MAT 19:10 Minikagi se menge tinoledaan din, “Aw iling kenyan se kelimahan domateng diyà te teleesawa, labi pa mèpiya aw eked pengognan se otaw.”
MAT 19:11 Meneng minikagi si Jesus, “Kenà kedita te otaw se eked palos pengognan, meneng olò se menge otaw pinemallì te Timanem te eked pengognan.
MAT 19:12 Medita se kemolò te otaw eked palos pengognan. Doen otaw eked pegbatà so kolang lekat te pegtebaw dan. Doen heman eked pengognan so tinelinan dan. Doen heman eked pengognan amon wedad mekeanggà te pegtoladà dan tepad te peglowan te Timanem. Aw pinemallì kaw te Timanem amon eked kaw palos pengognan, keilangan tomolò kaw kandin.”
MAT 19:13 Nayan, doen menge otaw nengibing te dedeitek mengisù doton ki Jesus amon pemàdan din dan aw megtawal-tawal te begayan dan te Timanem te mèpiya. Sinagda dan te menge tinoledaan din.
MAT 19:14 Meneng minikagi si Jesus, “Ikà niyo egsagda kandan, so lomowan se Timanem diyà te otaw ontò somalig diyà kandin iling te pegsalig te mengisù diyà te amay aw inay dan.”
MAT 19:15 Nemaed si Jesus kandan aw migtawal-tawal. Penga niyan, nesayo sikandin lekat kidoen.
MAT 19:16 Nayan, doen sebad otaw dimoton ki Jesus aw mig-insà, kagi din, “Sir, eden lay se mèpiya keilangan inangen ko amon doen kaling pedowan ko wedad temanan?”
MAT 19:17 Minikagi si Jesus, “Nepela a so mig-insà ka diyà kanak aw eden se mèpiya inangen nikaw. Sebad olò se ontò mèpiya, olò Timanem. Aw meibeg ka kominawà te kaling pedowan wedad temanan, keilangan tomolò ka te menge punù din ingkeliwat i Moises.”
MAT 19:18 Mig-insà se otaw sìyan, “Eden lay punui se keilangan toloen ko?” Minikagi si Jesus, “Ikà egbonò. Ikà eglakad. Ikà egpenakaw. Ikà egkebolalaw tepad te doma otaw.
MAT 19:19 Keilangan memasa ka te amay aw inay nikaw. Kedekeli heman te pedowan no se doma otaw iling te peg-aneng-aneng no te kamno pegkeotawun.”
MAT 19:20 Minikagi se otaw, “Gayed ko egtoloen se kedita niyan. Eden lay se wedà ko pa inangi?”
MAT 19:21 Minikagi si Jesus, “Aw meibeg ka te ontò melobos se pedowan no diyà te Timanem, olì ka den aw beligyai se kedakel te kedònan no, aw begayi se kwarta no diyà te menge otaw nelimahan. Aw yan se inangen no, doen ontong kinewaen no doton te langit. Penga te pegpemegay no te kedakel niyan, likò ka dini aw taking ka kanak.”
MAT 19:22 Pegdineg din kenyan, nelidò se pedowan din aw nesayo sikandin, so ontò dakel se kedònan din.
MAT 19:23 Minikagi si Jesus diyà te menge tinoledaan din, “Eneng-enengi niyo se kagi ko kenyo. Ontò melima se pegpesakop te otaw meyaman diyà te peglowan te Timanem.
MAT 19:24 Mikagi a den heman diyà kenyo te pengkey ontò melima se peg-okit te ayam-ayam kamilo diyà te awang te dagem, meneng labi pa melima se pegpesakop te otaw meyaman diyà te peglowan te Timanem.”
MAT 19:25 Pegdineg dan kenyan, ontò dan nepela, aw minikagi dan, “Aw iling kenyan, wedad palos otaw mekelowà lekat te pelumun te Timanem.”
MAT 19:26 Meneng timengteng si Jesus diyà kandan aw minikagi, “Pengkey eked pekelowà se otaw lekat te pelumun te Timanem, meneng wedad palos eked kebatog te Timanem.”
MAT 19:27 Penga niyan, minikagi si Pedro, “Meneng sikami, tinenanan day den se kedakel amon tomaking kay kamno. Eden lay se ontong kinewaen day?”
MAT 19:28 Minikagi si Jesus, “Eneng-enengi niyo se kagi ko kenyo seini. Aw inangen te Timanem kaling se keneyonan, menenoo a Timanem Migpekeotaw doton te melangkaw onsedanan te peglowan. Sikiyo menge tinoledaan ko, menenoo kaw heman doton te sempolò teg dowa onsedanan te peglowan, so lomowan kaw diyà te sempolò teg dowa pongan te menge bowad-bowad i Israel.
MAT 19:29 Aw timanan se otaw te kedònan din, aw kedowa din, aw amay din, aw inay din, aw batà din, aw pawà din, amon megpesakop diyà kanak, kominawà sikandin te ontong ginatos pa meelagà diyà te tinenanan din, aw begayan heman sikandin te kaling pedowan wedad temanan.
MAT 19:30 Meneng medita se otaw melangkaw songkani meinang ontò medanà doton te peglowan te Timanem. Medita heman se otaw medanà songkani, meneng meinang dan kwani melangkaw.”
MAT 20:1 “Iling heman kani se peglowan te Timanem. Doen tig-apò te pawà tineneman te paras. Limapos sikandin nengemahà te menge otaw meglegani te paras din.
MAT 20:2 Migpakang sikandin te doen kwarta ibegay din diyà kandan sebad dinaryo, so botong iyan itandan te sebad se aldaw. Penga niyan, dimoton dan te pawà din aw migterbaho dan.
MAT 20:3 Pegkealas nowibi, todà sikandin nengemahà te otaw meglegani. Doen otaw kinità din doton te pedyanan wedad terbaho dan.
MAT 20:4 Minikagi sikandin, ‘Aw megterbaho kaw doton te pawà ko, tendanan ko sikiyo te mèpiya.’ Yan nesayo dan aw miglegani.
MAT 20:5 Todà sikandin nengemahà te otaw te alas dosi aw alas tris te meapon, aw iling heman kenyan se kagi din kandan.
MAT 20:6 Sagwa agpet alas singko te meapon, kinità din heman se doma otaw wedad terbaho dan. Mig-insà sikandin, ‘Nengà lay wedad palos terbaho niyo te aldaw seini?’
MAT 20:7 Timaba dan, ‘So wedad megtandan kenami.’ Minikagi sikandin, ‘Pegterbaho kaw heman doton te pawà ko.’
MAT 20:8 “Nayan, pegkedelem niyan, minikagi se otaw diyà te otaw sineligan din, ‘Tewali se kedita te otaw migterbaho, aw begayi kandan se tandan dan. Onai se otaw kaling migterbaho, aw modihi se otaw tapay migterbaho.’
MAT 20:9 Pegtandan din te otaw migtebò migterbaho alas singko te meapon, sebad dinaryo se kwarta imbegay din diyà te teg sebad-sebad kandan.
MAT 20:10 Nayan, te wedà pa tendani se menge otaw migterbaho lekat te iselem, migpeliman dan te labi pa dakel se ibegay din diyà kandan. Meneng pegtandan din kandan, sebad heman dinaryo se kwarta imbegay din diyà te teg sebad-sebad kandan.
MAT 20:11 Pegkinawà dan te kwarta, migbelisì dan diyà te tig-apò te paras.
MAT 20:12 Minikagi dan, ‘Olò sebad oras se pegterbaho te otaw sida, meneng lekat te iselem se kenami pegterbaho, aw neilad kay te aldaw, meneng onawa se intandan no te kedita day.’
MAT 20:13 Meneng minikagi se tig-apò diyà te sebad kandan, ‘Elew, wedà a peglegawa kamno, so sebad dinaryo se kwarta impakang ko kamno.
MAT 20:14 Yan ibingi se kwarta intandan ko kamno aw olì ka den. Lekat te ibeg ko, onawa se imbegay ko diyà te kedita niyo.
MAT 20:15 Wedad besi mekesagda kanak aw meibeg a memegay te kanak kwarta diyà te otaw pemellien ko. Miningà ka besi so neido a kandan.’”
MAT 20:16 Minikagi heman si Jesus, “Iling heman kenyan, doen otaw medanà songkani ipelangkaw doton te peglowan te Timanem. Doen heman doma otaw melangkaw songkani, meneng meinang dan medanà.”
MAT 20:17 Nayan, peg-ipanaw i Jesus pesalo doton te Jerusalem, impetaking din se sempolò teg dowa tinoledaan din, aw minikagi diyà kandan te wedad doma dimineg,
MAT 20:18 “Na, domoton kidon te Jerusalem. Penga niyan, siak Timanem Migpekeotaw se itolok, aw ibegay a diyà te belad te menge pengolo te simbahan aw menenoladà te punù ingkeliwat i Moises. Megsebad dan mikagi te keilangan imetayan a.
MAT 20:19 Ibegay a dan heman diyà te belad te otaw kenà Judiyo. Kebebeyatan a dan, aw bedasen a dan, aw penga niyan ilansang a diyà te kros amon matay a. Penga niyan, meantay a lekat te nematay te iketelo te aldaw.”
MAT 20:20 Penga niyan, dimoton se esawa i Sebedeo ki Jesus sipat didowa batà din si Santiago aw si Juan. Limongken sikandin diyà ki Jesus so doen pemoyoen din.
MAT 20:21 Mig-insà si Jesus, “Eden lay se ibeg no diyà kanak?” Minikagi sikandin, “Aw megtebò ka lomowan, peonsadi bag se didowa batà ko seini diyà te tangkil no, sebad lenged te kowanan, aw sebad lenged te bibang, amon segmanen dan heman doma nikaw.”
MAT 20:22 Minikagi si Jesus, “Wedà niyo ketegahi aw eden se kebegat te pinemoyò niyo. Meketayod kaw lay heman te kelimahan agpet den domateng kanak?” Timaba dan, “Ee, meketayod kay heman kenyan.”
MAT 20:23 Minikagi si Jesus, “Metoman kaw heman detengan te kelimahan domateng kanak, meneng eked a pegpakang diyà kenyo te sikiyo se meketangkil diyà kanak, so tomangkil diyà kanak se otaw pinemallì te Amay ko.”
MAT 20:24 Pegdineg te sempolò tinoledaan aw eden se inikagi dan diyà ki Jesus, neopal dan ki Santiago aw si Juan.
MAT 20:25 Meneng tinawal dan i Jesus aw minikagi sikandin, “Netegahan niyo den aw eden se eg-inangen te menge otaw eglowan. Gayed dan egleges te menge sakop dan. Gayed heman egsogò-sogò se melangkaw otaw te menge sakop dan.
MAT 20:26 Meneng eked kepakay aw meg-iling kaw kandan. Aw doen otaw diyà kenyo meibeg megkelangkaw, keilangan gayed menabang kenyo.
MAT 20:27 Aw doen otaw diyà kenyo meibeg megkelangkaw, keilangan megpedanà sikandin te pegkeotawun din iling te kedanà te allang.
MAT 20:28 Keilangan meg-iling sikandin kanak Timanem Migpekeotaw, so dimini a te tanà kenà amon tebangan a te otaw, meneng dimini a amon menabang a te otaw. Neketagad a den imetayan amon medita se otaw mekelowà lekat te pegkeallang dan diyà te salà.”
MAT 20:29 Nayan, pegkesayo dan lekat te Jeriko, ontò medita se otaw timaking ki Jesus.
MAT 20:30 Doen dowa otaw bota nenenoo doton te kilid te dalan. Pegdineg dan te si Jesus se minokit kidoen, timawal dan, “Bowad-bowad i David, keidowi kay bag.”
MAT 20:31 Migsagda se menge doma otaw kandan, aw migpunù dan te keilangan mepenek dan. Meneng labi dan beling timawal, “Pengolo, bowad-bowad i David, keidowi kay bag.”
MAT 20:32 Pegdineg i Jesus te pegtawal dan, simagked sikandin aw timawal diyà kandan, kagi din, “Eden lay se ibeg niyo inangen ko kenyo?”
MAT 20:33 Timaba dan, “Pengolo, ibeg day, todà kay komità.”
MAT 20:34 Neidowan dan i Jesus, aw pinemàdan din se mata dan. Pegketà, kimità dan, aw timaking dan ki Jesus.
MAT 21:1 Nayan, pegpesalo dan doton te Jerusalem, migpedapag dan kidoen te lonsod te Bitpahi doton te ongan te bontod te Olibo. Insogò i Jesus se didowa tinoledaan din,
MAT 21:2 kagi din, “Onà kaw doton te lonsod sida peselowan tadon. Aw domateng kaw doton, ketelaan niyo se ayam-ayam iling te kodà iningedanan asno sipat nati niyan. Iniketan iyan, meneng lebadi niyo, aw ibingi niyo dini.
MAT 21:3 Aw doen otaw meg-insà te nengà lay linebad niyo iyan, ikegihi niyo te keilangan sekayan iyan te Pengolo niyo, aw yan ipeibing din iyan kenyo.”
MAT 21:4 Pineokit kenyan, tinoman din se kagi te telekeliwat te kagi te Timanem gebii,
MAT 21:5 “Seini se iindan no diyà te kedita te tege Sion. Na, domateng se selotan niyo, aw medanà se pegkeotawun din, so somakay te nati te asno.”
MAT 21:6 Nesayo se didowa tinoledaan din aw timolò dan te impunù din kandan.
MAT 21:7 Inibing dan se asno aw nati niyan doton ki Jesus. Menge saol dan se in-ampal dan diyà te getan te nati, aw simakay si Jesus kenyan.
MAT 21:8 Inladlad te keditaan te otaw se saol dan doton te dalan peselowan din, aw sinagpì te doma otaw se menge pelapà te palmera aw insawol dan doton te dalan, so yan se ketanem dan aw segmanen dan se otaw meinang selotan.
MAT 21:9 Migpegais se kedita te otaw timaking ki Jesus, pengkey nekeonà aw timetondog. Migpegais dan, “Iduyun se bowad-bowad i David. Iduyun se insogò te Pengolo tadon Timanem. Iduyun se Timanem.”
MAT 21:10 Pegdateng i Jesus doton te Jerusalem, nepela se kedita te otaw, so migpeinsaay dan, “Sinu lay sikandin?”
MAT 21:11 Timaba se otaw timaking ki Jesus, “Sikandin se telekeliwat te kagi te Timanem si Jesus. Lekat sikandin te lonsod te Nasarit sakop te probinsya te Galiliya.”
MAT 21:12 Nayan, dimoton si Jesus te dakel simbahan te Timanem doton te Jerusalem, aw impekadas din se kedita te otaw egpemeligyà aw egbayad kidoen te dowangen niyan. Impelias din se lemisa te menge otaw egliwan te kwarta, aw impelias din heman se bangkò te otaw egpemeligyà te selepati ibegay diyà te Timanem.
MAT 21:13 Minikagi sikandin, “Doen kagi te Timanem impesolat din gebii, ‘Se balay te Timanem, yan se ingedanan balay te pegtawal-tawal.’ Meneng ininang niyo den ini iling te ogpeanan te megdedempasay.”
MAT 21:14 Dimoton se menge otaw bota aw kapig te dakel simbahan, aw pinegolian dan i Jesus.
MAT 21:15 Meneng neopal se menge pengolo te simbahan aw menenoladà te punù ingkeliwat i Moises, so kimità dan te menge kepelahan ininang i Jesus, aw dinineg dan heman se mengisù migpetewalay kidoen te dakel simbahan, kagi dan, “Iduyun se bowad-bowad i David.”
MAT 21:16 Yan se doun te minikagi dan diyà ki Jesus, “Tay law. Aw dinineg no se kagi dan, nengà lay wedà no dan segdahi?” Timaba si Jesus, “Dinineg ko dan, meneng mepakay iyan diyà kanak. Wedà niyo besi besahi se kagi te Timanem seini, ‘Isogò te Timanem se mengisù domuyun kandin.’”
MAT 21:17 Penga niyan, nesayo si Jesus lekat kidoen aw dimoton te lonsod te Bitanya aw minidegà kidoen.
MAT 21:18 Pegkeiselem niyan, limikò si Jesus doton te Jerusalem. Te wedà pa dateng doton, binallos sikandin.
MAT 21:19 Kinità din se kayo igira medapag te dalan, aw dimoton sikandin amon mahà te pongo niyan. Meneng wedad palos pongo kinità din, olò menge dawen. Minikagi sikandin diyà te kayo, “Eked den palos pongo se kayo seini.” Wedà kenamay, nelanes se kayo sìyan.
MAT 21:20 Pegkità te menge tinoledaan din kenyan, nepela dan aw minikagi dan, “Nelanes den se kayo igira te wedà kenamay.”
MAT 21:21 Minikagi si Jesus, “Eneng-enengi niyo se kagi ko kenyo seini. Aw somalig kaw diyà te Timanem aw eked kaw pegdowa-dowa, meg-inang kaw te kepelahan labi pa metolos diyà te ininang ko diyà te kayo seini. Aw mikagi kaw diyà te bontod seini te meabat iyan aw mealin doton te dagat, metoman iyan meinang.
MAT 21:22 Aw megtawal-tawal kaw diyà te Timanem, aw somalig kaw diyà kandin, metoman kaw din begayan te kedita te pemoyoen niyo.”
MAT 21:23 Nayan, limikò si Jesus doton te dakel simbahan te Jerusalem aw migtoladà. Wedà kenamay, doen menge pengolo te simbahan aw menge obanen te Judiyo dimoton kandin, aw mig-insà dan, “Nengà lay eg-inang ka te kedita nini? Sinu lay se simogò kamno?”
MAT 21:24 Minikagi si Jesus, “Doen heman insà ko kenyo. Aw meketaba kaw kani, meg-indan a diyà kenyo aw sinu se simogò kanak.
MAT 21:25 Sinu lay se simogò ki Juan amon memonyag? Timanem, aw otaw se simogò kandin?” Penga niyan, migpebelaw-belaway dan aw eden se itaba dan kandin. Minikagi dan, “Simpana tomaba kidon te Timanem se simogò ki Juan, silahen kidon din, so wedà kidon pemenal ki Juan.
MAT 21:26 Meneng simpana tomaba kidon te olò otaw se simogò ki Juan, keopalan kidon te kedita te otaw netipon, so eg-aneng-aneng dan te ontò telekeliwat te kagi te Timanem si Juan.”
MAT 21:27 Yan se doun te minikagi dan, “Inday. Wedà day ketegahi aw sinu.” Minikagi si Jesus, “So wedà kaw taba te insà ko, eked a peg-indan diyà kenyo aw sinu se simogò kanak.”
MAT 21:28 “Eneng-enengi niyo ini. Doen otaw dowa se batà din. Minikagi sikandin diyà te batà din kakay, ‘Atò, pegterbaho ka den doton te pawà te aldaw seini.’
MAT 21:29 Minikagi se batà din, ‘Eked a.’ Meneng wedà kenamay, netodà se aneng-aneng din aw timolò.
MAT 21:30 Penga niyan, dimoton se otaw te batà din adi, aw onawa se inikagi din diyà kandin. Minikagi se batà din sìyan, ‘Ee, amà. Domoton a.’ Meneng penga niyan, wedà deleg.
MAT 21:31 Nayan, indani a niyo. Eden lay betai se timolò te amay din?” Timaba dan, “Kakay se timolò.” Minikagi si Jesus, “Eneng-enengi niyo se kagi ko kenyo seini. Medita den se otaw nekeonà kenyo migpesakop diyà te peglowan te Timanem, pengkey nelegeb dan te salà iling te menge iskribinti aw menge kepoyun.
MAT 21:32 Pegtoladà i Juan te keilangan megselsel kaw amon eneng-enengen te Timanem te metòlid kaw, wedà kaw pemenal kandin. Meneng medita se iskribinti aw kepoyun nemenal kandin. Pengkey kimità kaw kenyan, meneng wedà kaw pegselsel aw wedà kaw heman pemenal kandin.”
MAT 21:33 “Penenalan kaw den te tegdeyanan seini. Doen otaw migpawà aw nenanem te paras. Mig-inang sikandin te alad, aw tigmesanan te paras, aw layag. Penga niyan, impetonggò din iyan te menge doma otaw aw dimoton sikandin te mediyò ogpeanan.
MAT 21:34 Pegdateng te aldaw te peglegani, doen menge sineligan insogò te tig-apò amon doen talad din.
MAT 21:35 Meneng pegdateng te sineligan din doton, medaet se ininang te menge otaw migtonggò te pawà din. Nemadas dan te sebad sineligan din, aw nengimatay dan te doma, aw nemontog dan te bato diyà te doma.
MAT 21:36 Penga niyan, labi pa medita se doma sineligan insogò din doton kandan. Meneng onawa heman se medaet ininang te otaw migtonggò diyà te sineligan insogò din.
MAT 21:37 Penga niyan, insogò din se batà din, so aneng-aneng din keilangan segmanen dan se kandin batà.
MAT 21:38 Meneng pegdateng te batà din doton, migpebelaw-belaway dan, ‘Seini se meketig-apò te tanà seini aw matay se amay din. Mèpiya aw imetayan tadon sikandin amon sikitadon se meketig-apò te tanà seini.’
MAT 21:39 Penga niyan, inewidan dan sikandin, aw ginoyod dan doton te lowà te pawà, aw inimetayan dan sikandin.
MAT 21:40 “Nayan, indani a niyo. Aw domoton se tig-apò te pawà, eden lay se inangen din diyà te menge otaw impetonggò din?”
MAT 21:41 Timaba dan, “Ipeeleg din se mededaet otaw sìyan aw imetayan din se kedita dan. Penga niyan, ipetonggò din se pawà din te doma otaw keseligan, amon begayan dan sikandin te talad te kelikit te omay.”
MAT 21:42 Minikagi si Jesus, “Iling te wedà kaw palos pegbasa te kagi te Timanem seini, ‘Doen bato in-agbel te menge otaw mig-inang te balay, so eden dan aw wedad kekemowan niyan. Meneng yan se bato ontò salig te balay. Mèpiya se ininang te Pengolo sìyan, aw yan se doun te iduyun tadon sikandin.’
MAT 21:43 “Eneng-enengi niyo se kagi ko kenyo. Yan se doun te eked kaw sekopi te Timanem diyà te peglowan din, meneng sekopen din se menge doma otaw ontò tomolò te ibeg din. [
MAT 21:44 Aw mekedogsò se otaw kidoen te bato seini, melosek se menge tòlan din. Meneng aw kedegdagan se otaw te bato sìyan, mepolpog sikandin.]”
MAT 21:45 Pegdineg te menge Parisiyo aw pengolo te simbahan kenyan, netegahan dan te sikandan se nesogatan te tegdeyanan din sìyan,
MAT 21:46 aw yan se doun te ibeg dan megdakep peden kandin. Meneng wedà dan peketoman, so nelemitan dan te menge otaw gayed egpenenalan kandin, so mig-aneng-aneng se kedita te otaw te si Jesus se telekeliwat te kagi te Timanem.
MAT 22:1 Migtoladà si Jesus te doma tegdeyanan, kagi din,
MAT 22:2 “Iling heman kani se peglowan te Timanem. Doen selotan mig-inang te dakel kànen so peipiden se batà din.
MAT 22:3 Insogò din se sineligan mangay te kedita te otaw inindanan din. Meneng wedad ibeg dan gomemaw.
MAT 22:4 Doen heman menge doma sineligan insogò te selotan amon megkeliwat dan te kagi din, ‘Na, integilan ko den se kànen. Iniyaw day den se menge baka aw doma ayam-ayam melambò, aw nelegà den se kedita niyan. Ayas kaw den diyà te peipid.’
MAT 22:5 Meneng wedà dan pegsagman kenyan. Doen otaw dimoton te pawà, aw doen doma otaw dimoton te tinda din.
MAT 22:6 Doen heman menge doma otaw minawid te sineligan, aw pinemilang dan, aw inimetayan dan.
MAT 22:7 Neopal se selotan, aw insogò din se menge sondalo mengimatay kandan aw menonog heman te lonsod dan.
MAT 22:8 Penga niyan, minikagi se selotan diyà te menge sineligan din, ‘Integilan den se kànen, meneng eked ko petenodi se otaw tapay impeangay ko, so kimulu dan.
MAT 22:9 Nayan, doton kaw den te menge dalan eg-okitan te medita otaw, aw petenodi niyo se kedita te otaw ketelaan niyo.’
MAT 22:10 Penga niyan, dimoton dan te menge dalan, aw impetaking dan se kedita te otaw netelaan dan, pengkey mèpiya se keogpà dan aw pengkey kenà. Yan medita se otaw impetanod dan, aw nepenò den se balay.
MAT 22:11 “Nayan, wedà kenamay, limowà se selotan amon tomengteng diyà te otaw timanod te peipid. Kinità din se otaw wedad saol iling te keilangan gemiten te otaw tomanod te peipid.
MAT 22:12 Minikagi se selotan, ‘Elew, nengà lay dimini ka te wedad saol no iling te keilangan gemiten te otaw tomanod te peipid?’ Meneng wedad palos intaba din.
MAT 22:13 Penga niyan, minikagi se selotan diyà te menge sineligan din, ‘Geposi niyo se belad din aw benis, aw ibingi niyo sikandin doton te lowà kidoen te kengitngitan amon ipelumun. Ontò megkelag se otaw doton, aw megyangget-yangget se ngipen dan tandà te kegemakan dan.’
MAT 22:14 Pengkey ontò medita se otaw tinawal te Timanem, meneng pilabok se meinang menge sakop din.”
MAT 22:15 Penga niyan, nesayo se menge Parisiyo, aw migpebelaw-belaway dan aw eden se inangen dan diyà ki Jesus amon doen idimanda dan tepad te pegtoladà din.
MAT 22:16 Penga niyan, doen menge tinoledaan dan aw menge sakop i Herod insogò dan doton ki Jesus. Minikagi dan diyà kandin, “Sir, netegahan day te kenà ka egkebolalaw. Netegahan day heman te pengkey sinu se otaw toledaan no, ontò benal se ipegtoladà no diyà kandan tepad te ibeg te Timanem.
MAT 22:17 Nayan, doen insà day kamno. Indani kay aw eden se aneng-aneng nikaw. Lomàpang kidon lay te menge punù ingkeliwat i Moises aw mayad kidon te mihoras diyà te gobirno te Roma? Mepakay lay aw eked?”
MAT 22:18 Meneng netegahan i Jesus te medaet se tod dan te peg-insà dan kenyan. Yan minikagi sikandin, “Eden niyo aw egpenimanem kaw. Medaet se pegtandà niyo kanak.
MAT 22:19 Pekitai niyo diyà kanak se kwarta ipegbayad niyo te mihoras.” Penga niyan, imbegay dan diyà kandin se kwarta plata.
MAT 22:20 Mig-insà si Jesus, “Sinu lay bawa se insawol kidoen? Sinu lay ngadan se insolat kidoen?”
MAT 22:21 Timaba dan, “Selotan te Roma.” Minikagi si Jesus, “Yan begayi niyo diyà te selotan se keilangan ibegay niyo diyà kandin, aw begayi niyo heman diyà te Timanem se keilangan ibegay niyo diyà kandin.”
MAT 22:22 Pegdineg dan kenyan, nepela dan, aw nesayo dan lekat kandin.
MAT 22:23 Wedà kenamay, doen menge Sadusiyo dimoton ki Jesus. Yan se menge otaw egtoladà te eked palos keantay se otaw lekat te nematay. Mig-insà dan diyà ki Jesus, kagi dan,
MAT 22:24 “Sir, doen impunù i Moises kenitadon tepad te inangen te telekedowa meama. Aw matay se meama te wedad pa batà te esawa din, keilangan mengognan se kedowa te nematay diyà te nayi din nebalo, amon doen peden batà te kedowa din nematay.
MAT 22:25 Nayan, doen ekon pito telekedowa meama. Nengognan se kakay dan, aw nematay sikandin te wedad pa batà dan. Penga niyan, nengognan se kedowa din diyà te nayi din nebalo.
MAT 22:26 Meneng iling heman kenyan se neinang diyà te ikedowa aw iketelo lamig te ikepito, so migpetibos-tibosay se pito telekedowa nengognan te bayi sìyan, aw nematay se kedita dan te wedad pa palos batà dan.
MAT 22:27 Penga niyan, nematay heman se bayi.
MAT 22:28 Nayan, indani kay. Aw meantay se otaw lekat te nematay, sinu lay lebò diyà kandan se ontò esawa te bayi sìyan? So migpetibos-tibosay dan se pito nengognan kandin.”
MAT 22:29 Minikagi si Jesus, “Ontò kaw migkemalì, so wedà niyo pa kelebeti se kagi te Timanem insolat, aw wedà niyo heman ketegahi aw eden se mebatog inangen te Timanem pineokit te tolos din.
MAT 22:30 Aw entayen te Timanem se otaw lekat te nematay, eked dan palos pengognan, so iling dan te menge anghil eg-ogpà doton te langit.
MAT 22:31 Wedà kaw ketaga-taga te metoman meantay se otaw lekat te nematay so wedà kaw besi pegbasa te kagi te Timanem seini,
MAT 22:32 ‘Siak se Timanem gayed egseligan i Abraham, aw si Isaac, aw si Jacob.’ Kenà otaw wedad pedowan se egsalig te Timanem, meneng otaw doen pedowan se egsalig kandin.”
MAT 22:33 Ontò nepela se kedita te otaw dimineg te pegtoladà din.
MAT 22:34 Pegdineg te menge Parisiyo te dinaeg i Jesus se menge Sadusiyo, netipon dan aw dimoton dan heman ki Jesus.
MAT 22:35 Doen Parisiyo biyasa egtoladà te menge punù ingkeliwat i Moises. Ibeg din megtandà ki Jesus, aw yan se doun te mig-insà sikandin,
MAT 22:36 kagi din, “Sir, diyà te kedita te punù ingkeliwat i Moises, eden lay punui se ontò melangkaw?”
MAT 22:37 Minikagi si Jesus, “Kedekeli niyo te pedowan se Pengolo niyo Timanem te ontò melobos se pedowan niyo kandin, aw aneng-aneng niyo.
MAT 22:38 Yan se punù ontò melangkaw diyà te kedita.
MAT 22:39 Seini se punù neketondog kenyan. Kedekeli niyo te pedowan se doma otaw iling te peg-aneng-aneng niyo te kenyo pegkeotawun.
MAT 22:40 Aw egtoloen niyo se dowa punù sìyan, netolò niyo heman se kedita te punù ingkeliwat i Moises aw menge telekeliwat te kagi te Timanem gebii.”
MAT 22:41 Te wedà pa kesayo se menge Parisiyo, mig-insà si Jesus diyà kandan,
MAT 22:42 kagi din, “Eden lay se aneng-aneng niyo tepad te Misiyas? Sinu lay se kemonaan din?” Timaba dan, “Bowad-bowad i David se Misiyas isogò te Timanem.”
MAT 22:43 Minikagi si Jesus, “Aw benal iyan, nengà lay minikagi si David te Pengolo din se Misiyas? Pineokit te pegbayà-bayà te Espiritu Santo ki David, insolat din se kagi seini,
MAT 22:44 ‘Minikagi se Timanem diyà te Pengolo ko, Penenoo ka dini te tangkil ko lamig dàgen ko se menge poon no aw ipetolò ko dan kamno.’
MAT 22:45 Na, aw minikagi si David te Pengolo din se Misiyas, nengà lay bowad-bowad i David se Pengolo din?”
MAT 22:46 Meneng wedad palos otaw neketaba kandin. Lekat te aldaw sìyan, wedad palos otaw migtelaman mig-insà kandin.
MAT 23:1 Penga niyan, migtoladà si Jesus te kedita te otaw netipon aw menge tinoledaan din. Minikagi sikandin,
MAT 23:2 “Se menge menenoladà te punù aw menge Parisiyo, yan se otaw sineligan te menge punù ingkeliwat i Moises.
MAT 23:3 Yan se doun te keilangan gayed kaw tomolò te kedita te ipegtoladà dan. Meneng ikà niyo eg-iling te eg-inangen dan, so kenà dan egtolò te punù ipegtoladà dan.
MAT 23:4 Gayed dan egdogangan se punù ontò melima toloen te otaw. Meneng kenà dan egtelaban te otaw meibeg tomolò kenyan. Iling dan te otaw megleges te doma otaw memaba te pelaban mebegat, aw wedad palos tabang dan kandan amon meinang iyan meagka.
MAT 23:5 Gayed dan ipekità diyà te doma otaw se pegtolò dan te menge punù amon iduyun dan. Eg-inangen dan pelaban dakel se solanan te kagi te Timanem egpengibingen dan, aw egpelasan dan se saol dan melayat amon meg-aneng-aneng se doma otaw te ontò melobos se pedowan dan diyà te Timanem.
MAT 23:6 Aw doen dakel kànen, ibeg dan sikandan se monà ipekaen. Ibeg dan heman menenoo doton te mèpiya onsedanan kidoen te simbahan te Judiyo.
MAT 23:7 Ibeg dan segmanen dan te doma otaw doton te pedyanan, aw ibeg dan tewalen Meistro.
MAT 23:8 Meneng eked kepakay aw tewalen kaw Meistro te doma otaw, so telekedowa se kedita niyo aw sebad ko se meistro egtoladà kenyo.
MAT 23:9 Eked heman kepakay aw gulalen niyo Amay se doma otaw dini te keneyonan, so sebad olò se Amay niyo Timanem doton te langit.
MAT 23:10 Eked heman kepakay aw gulalen kaw Amo, so sebad ko se amo niyo, sìyan Misiyas insogò te Timanem.
MAT 23:11 Se otaw ontò melangkaw diyà kenyo, yan se keilangan menabang kenyo.
MAT 23:12 Aw megpelangkaw-langkaw se otaw, meinang sikandin medanà. Meneng aw megpedanà se otaw te kandin pegkeotawun, meinang sikandin melangkaw.”
MAT 23:13 “Mekelelayò kaw menge Parisiyo aw menenoladà te punù ingkeliwat i Moises. Eden niyo aw egpenimanem kaw, so egbelebagan niyo se menge otaw egkeibeg megpesakop diyà te peglowan te Timanem. Medaet so wedà kaw pegpesakop diyà kandin, meneng labi pa medaet so wedà niyo pesekopi se otaw egkeibeg megpesakop diyà kandin. [
MAT 23:14 Mekelelayò kaw menge Parisiyo aw menenoladà te punù ingkeliwat i Moises. Eden niyo aw egpenimanem kaw, so eg-agaw kaw te kedònan te bayi balo, aw penga niyan menamay se pegtawal-tawal niyo amon megpelingo-lingo kaw te melobos se pedowan niyo diyà te Timanem. Yan se doun te metoman kaw ontò ipelumun labi pa diyà te doma otaw.]
MAT 23:15 “Mekelelayò kaw menge Parisiyo aw menenoladà te punù ingkeliwat i Moises. Eden niyo aw egpenimanem kaw, so ontò kaw measeb meglegeb te mediyò amon megsakop te pengkey olò sebad se otaw, aw pineokit te pegtoladà niyo kandin, meinang sikandin labi pa medaet diyà kenyo, aw ipedeleg niyo sikandin doton te kilot.
MAT 23:16 “Mekelelayò kaw, so iling kaw te otaw bota megtelaman mengibing te doma otaw. Egtoladà kaw te mepakay aw tomalis se otaw te pakang din aw olò megsapà te dakel simbahan dini te Jerusalem. Meneng egtoladà kaw te keilangan tomanen te otaw se pakang din aw megsapà te bolawan impalas te dakel simbahan.
MAT 23:17 Iling kaw te otaw bota so eked niyo kitai se kebenalan. Wedad inenengen niyo, so pengkey melangkaw se bolawan impalas te dakel simbahan, meneng labi pa melangkaw se simbahan diyà te bolawan.
MAT 23:18 Egtoladà kaw heman te mepakay aw tomalis se otaw te pakang din aw olò megsapà te sonoganan te ayam-ayam ibegay diyà te Timanem. Meneng egtoladà kaw te keilangan tomanen te otaw se pakang din aw megsapà te ayam-ayam sonogen kidoen.
MAT 23:19 Iling kaw te otaw bota, so eked niyo kitai se kebenalan. Pengkey melangkaw se ayam-ayam sonogen, meneng labi pa melangkaw se sonoganan diyà te ayam-ayam sonogen kidoen.
MAT 23:20 Yan aw megsapà se otaw te sonoganan, megsapà heman sikandin te ayam-ayam sonogen kidoen.
MAT 23:21 Aw megsapà se otaw te dakel simbahan, megsapà heman sikandin te Timanem eg-ogpà doton te simbahan.
MAT 23:22 Aw megsapà se otaw te langit, megsapà heman sikandin te Timanem aw onsedanan din.
MAT 23:23 “Mekelelayò kaw menge Parisiyo aw menenoladà te punù ingkeliwat i Moises. Eden niyo aw egpenimanem kaw, so pengkey egpemegay kaw diyà te Timanem te ikesempolò ketengà te kedita te geniyen niyo pengkey menge enagay, meneng wedà niyo beling toloi se menge punù te Timanem labi pa melangkaw kenyan tepad te metòlid inang diyà te doma otaw, aw keido, aw pegsalig te doma otaw. Yan se keilangan inangen niyo, meneng pedeleg kaw heman te pegpemegay niyo diyà te Timanem.
MAT 23:24 Iling kaw te otaw bota meg-agak peden te doma otaw. Egpengabat kaw te langaw lekat te wayeg inemen niyo, meneng eg-emehen niyo biling se dakel ayam-ayam kamilo.
MAT 23:25 “Mekelelayò kaw menge Parisiyo aw menenoladà te punù ingkeliwat i Moises. Eden niyo aw egpenimanem kaw, so gayed kaw eg-ingà aw eglalang te medaet. Iling kaw te otaw olò eg-onaw te lowà te baso aw sablag pengkey melipà pa se didalem niyan.
MAT 23:26 Sikiyo menge Parisiyo, iling kaw te otaw bota, so eked niyo kitai se kebenalan. Keilangan onà kaw megligaw te didalem te baso aw sablag amon melinis se kedakel niyan.
MAT 23:27 “Mekelelayò kaw menge Parisiyo aw menenoladà te punù ingkeliwat i Moises. Eden niyo aw egpenimanem kaw. Iling kaw te lebeng pinintorahan te mepotì. Pengkey mèpiya se bawa niyan, meneng doton didalem se tòlan te otaw nematay aw nemahò.
MAT 23:28 Iling kaw kenyan, so pengkey aneng-aneng te doma otaw metòlid se eg-inangen niyo, meneng nelegeb se pedowan niyo te kebolalaw aw kededàtan.”
MAT 23:29 “Mekelelayò kaw menge Parisiyo aw menenoladà te punù ingkeliwat i Moises. Eden niyo aw egpenimanem kaw. Eg-inangen niyo se balay doton te kedita te lebeng te telekeliwat te kagi te Timanem aw doma otaw eg-inang te metòlid gebii, aw egpelasan niyo se lebeng dan.
MAT 23:30 Eg-ikagi kaw te simpana migdoma kaw kandan gebii, eked kaw akop diyà te pegpengimatay te menge kemonaan niyo te telekeliwat te kagi te Timanem.
MAT 23:31 Pineokit te kagi niyo, ipetaga-taga niyo te medaet heman se pedowan niyo, so sikiyo se bowad-bowad te otaw nengimatay kandan.
MAT 23:32 Yan keilangan meg-iling kaw den te menge kemonaan niyo amon sikopen niyo se medaet wedà dan kesikop.
MAT 23:33 Iling kaw te memokan so biyasa kaw eg-inang te medaet. Eked kaw palos pekelowà lekat te pelumun te Timanem, so metoman kaw din ipeibing doton te kilot.
MAT 23:34 Isogò ko doton kenyo se menge telekeliwat te kagi te Timanem, aw otaw biyasa te kagi ko, aw otaw megtoladà kenyo. Meneng doen diyà kandan imetayan niyo, aw doen heman ilansang niyo diyà te kros. Doen heman bedasen niyo doton te menge simbahan niyo, aw memilang kaw kandan pengkey kenan dan pesalo.
MAT 23:35 Yan se metoman niyo inangen amon ipelumun te Timanem se kedita niyo tandà te pegpengimatay te kemonaan niyo te menge otaw eg-inang te metòlid, lekat te peg-imatay dan ki Abel, pengkey wedà peg-inang te salà, taman te peg-imatay dan ki Zacarias batà i Barakia kidoen te dowangen te dakel simbahan medapag te sonoganan te ayam-ayam ibegay diyà te Timanem.
MAT 23:36 Eneng-enengi niyo se kagi ko kenyo seini. Metoman ipelumun te Timanem se kedita niyo songkani tandà te pegpengimatay kandan.”
MAT 23:37 “Mekelelayò kaw tege Jerusalem. Gayed niyo eg-imetayan se kedita te telekeliwat te kagi te Timanem, aw egbontogan niyo te bato se kedita te otaw insogò te Timanem dini kenyo amon matay dan. Melikit a peden megtipon kenyo amon meg-ipat a kenyo, iling te omagak lomemlem diyà te menge onsoy din. Meneng wedà kaw keibeg.
MAT 23:38 Na, pinebeyaan den se ogpeanan niyo.
MAT 23:39 Penenalan kaw kanak. Aw mesayo a, eked kaw kità kanak singed aw mikagi kaw, ‘Iduyun se insogò te Pengolo tadon Timanem.’”
MAT 24:1 Nayan, limowà si Jesus lekat te dakel simbahan te Jerusalem. Pegkesayo din, migpedapag se menge tinoledaan din aw impekità dan diyà kandin se menge balay te simbahan, so mèpiya se bawa niyan.
MAT 24:2 Meneng minikagi si Jesus, “Pengkey induyun niyo se simbahan seini, meneng mikagi a kenyo te tigkan iyan kebàtan te modi aldaw, aw wedad palos bato ketenanan diyà te lanto te doma bato.”
MAT 24:3 Wedà kenamay, dimoton si Jesus te bontod te Olibo aw nenenoo kidoen. Dimoton se menge tinoledaan din kandin te wedad doma dan, aw mig-insà dan, kagi dan, “Indani kay. Kano lay ketoman se in-indan nikaw? Eden lay se pengilala kitaen day amon ketegahan day te agpet ka lomikò aw agpet heman se temanan te keneyonan?”
MAT 24:4 Minikagi si Jesus, “Peg-ahà kaw amon eked kaw keekali.
MAT 24:5 Doen kwani medita otaw megpelingo-lingo te insogò dan te Timanem. Mikagi dan te sikandan se Misiyas, aw medita se otaw keekalan dan aw tomaking kandan.
MAT 24:6 Aw domineg kaw te doen gira medapag kenyo aw mediyò heman, ikà niyo egkelemitan. Keilangan iyan meinang, meneng kenà pa niyan se temanan te keneyonan.
MAT 24:7 Medita se otaw meggira, so doen pongan megbolaw diyà te doma pongan, aw doen heman menge sakop te sebad selotan megbolaw diyà te menge sakop te doma selotan. Megelà se otaw te medita ogpeanan tandà te bayil aw linog domateng diyà kandan.
MAT 24:8 Pengkey medaet iyan, meneng yan olò se keteboan te kelimahan domateng dini te keneyonan, iling te keteboan te mesakit domateng te bayi agpet tebawan.
MAT 24:9 “Yan kebensihan kaw te keditaan te otaw tandà te pegpesakop niyo diyà kanak, aw dekepen kaw dan amon ipeeleg kaw aw imetayan kaw dan.
MAT 24:10 Aw metoman iyan, medita se otaw lomengà te pegsalig dan kanak. Megpetolokay dan, aw megpeopalay dan.
MAT 24:11 Medita heman se otaw megpelingo-lingo telekeliwat te kagi te Timanem, aw medita se keekalan dan aw tomaking kandan.
MAT 24:12 Ontò medaet se inangen te otaw, aw yan se doun te megpedeitekay se keditaan te otaw te pedowan.
MAT 24:13 Meneng aw tomayod se otaw te kedita te kelimahan, ipelowà sikandin.
MAT 24:14 Onà itoladà se Mèpiya Indan tepad te peglowan te Timanem doton te kebelad te keneyonan, amon domineg se kedita te otaw. Penga niyan, domateng se temanan te keneyonan.”
MAT 24:15 “Na, minikagi se telekeliwat te kagi te Timanem gebii si Daniel te doen domateng meg-inang te medaet doton te dakel simbahan te Jerusalem aw ontò mekelamit te otaw. (Keilangan kelebetan iyan te kedita te otaw megbasa te kagi din sìyan insolat.) Aw kitaen niyo iyan doton te dakel simbahan,
MAT 24:16 keilangan komadas se kedita te otaw lekat te Judiya pesalo doton te bontod.
MAT 24:17 Keilangan eked awop diyà te balay din se otaw doton te lowà amon ebaten din se kedònan, meneng keilangan tenanan din se kedita.
MAT 24:18 Se otaw egterbaho doton te pawà, eked heman olì amon ebaten din se ekasan, meneng keilangan komadas.
MAT 24:19 Mekelelayò heman se menge bayi mebedes aw egsosowan te aldaw sìyan.
MAT 24:20 Pegtawal-tawal kaw diyà te Timanem te kenà pengodan aw kenà aldaw te peg-etod se pegkadas niyo.
MAT 24:21 Ontò medaet se kelimahan domateng diyà te keneyonan. Wedad palos kelimahan labi pa medaet diyà kenyan lekat te keteboan te keneyonan lamig seini, aw wedad palos heman kelimahan domateng labi pa medaet diyà kenyan.
MAT 24:22 Meneng pekebebaen te Timanem se kenamay te aldaw te kelimahan sìyan amon eked kegelà se kedita te otaw. Pekebebaen din iyan tandà te menge otaw pinemallì din.
MAT 24:23 “Aw domateng se aldaw sìyan, aw doen otaw mikagi, ‘Na, dini den se Misiyas,’ aw doen otaw mikagi, ‘Doton se Misiyas,’ ikà niyo egpemenal kandan.
MAT 24:24 Doen menge otaw domateng megpelingo-lingo te sikandan se Misiyas aw menge telekeliwat te kagi te Timanem. Meg-inang dan heman te menge kepelahan amon keekalan dan peden heman se menge otaw pinemallì te Timanem.
MAT 24:25 Yan peg-ahà kaw, so mig-indan a den kenyan diyà kenyo te eked pa dateng.
MAT 24:26 “Aw doen otaw mikagi diyà kenyo, ‘Na, doton den se Misiyas te kebigtilan,’ ikà niyo egdoton. Aw doen doma otaw mikagi, ‘Na, mineles den sikandin doton didalem te balay,’ ikà niyo egpemenal kenyan,
MAT 24:27 so ontò metaen se peglikò ko iling te kilem ontò somiblat doton te kebelad te langit, aw kitaen te kedita te otaw. Iling kenyan se pegdateng ko Timanem Migpekeotaw.
MAT 24:28 “Pengkey kenan se lawa te nematay, yan se ketiponan te menge manok egpengaen te lawa te nematay.”
MAT 24:29 “Aw mepenga se kelimahan sìyan, megkengitngit se keneyonan so eked ebey senang se aldaw aw bolan. Medagdag heman se menge bitoen lekat te langit, so mebilit se kedita dan.
MAT 24:30 Penga niyan, ipekità ko se pengilala doton te langit te agpet a den lomikò Timanem Migpekeotaw. Megkelag se kedita te otaw te keneyonan tandà te lamit dan, so komità dan te pegdateng ko aw lomikò a Timanem Migpekeotaw tekingan te labon lekat te langit. Komità dan te metolos a aw ontò a melangkaw.
MAT 24:31 Ipeedop ko se bodyong, aw isogò ko se menge anghil, aw tiponen dan se kedita te otaw pinemallì ko lekat te kebelad te keneyonan, pengkey kenan dan peg-ogpà.”
MAT 24:32 “Penenalan kaw den te tegdeyanan seini tepad te kayo igira. Aw tomobed iyan aw domawen, ketegahan niyo te agpet den domateng se pengaldaw.
MAT 24:33 Iling heman kenyan, aw kitaen niyo se pegketoman te kedita niyan inikagi ko diyà kenyo, ketegahan niyo te agpet a den lomikò.
MAT 24:34 Eneng-enengi niyo se kagi ko kenyo seini. Doen menge otaw komità te pengilala sìyan, eked dan kematay singed aw metoman se kedita niyan.
MAT 24:35 Doen temanan te langit aw tanà, meneng gayed metoman se kagi ko te wedad temanan.”
MAT 24:36 “Meneng eked ko indani aw eden eldawi aw orasi se peglikò ko. Wedad palos netaga-taga aw kano a likò, pengkey menge anghil doton te langit, so olò Amay ko se netaga-taga kenyan.
MAT 24:37 Aw lomikò a Timanem Migpekeotaw, medita se otaw eked peketagad te pegdateng ko, iling te otaw gebii wedà penenalan ki Noe.
MAT 24:38 Te wedà pa kelinep se tanà te wayeg, gayed dan egpengaen, aw eg-inem dan, aw egpepengognanay dan, lamig te aldaw te pegsakay i Noe aw pamilya din diyà te arka.
MAT 24:39 Meneng wedà ketaga-taga se menge doma otaw te agpet dan megelà lamig nesàban dan te pegkelinep te tanà te wayeg, aw nelemes se kedita dan. Iling heman kenyan se peglikò ko Timanem Migpekeotaw, so medita heman se otaw eked peketagad te pegdateng ko.
MAT 24:40 Aw domateng se aldaw sìyan, pengkey megterbaho se dowa otaw doton te pawà, meneng ipetaking se sebad, aw tenanan se sebad.
MAT 24:41 Pengkey meglegiling se dowa bayi, meneng ipetaking se sebad, aw tenanan se sebad.
MAT 24:42 Yan se doun te keilangan gayed kaw megpeketagad, so wedà niyo ketegahi aw eden eldawi se peglikò ko Pengolo niyo.
MAT 24:43 Meneng eneng-enengi niyo ini. Aw ketegahan te tig-apò te balay aw kano dateng se menenakaw, yan meketagad sikandin, aw eked ketekawi se balay din.
MAT 24:44 Keilangan gayed kaw heman megpeketagad, so domateng a Timanem Migpekeotaw te eked niyo ketegahi aw kano.”
MAT 24:45 “Se otaw egkeseligan aw biyasa eg-inang te kedita, yan se inangen te amo din egpengibing te kedita te doma otaw doton te balay din, amon memegay diyà kandan te kànen te kelikit te aldaw.
MAT 24:46 Aw domateng se pengolo din, ontò meluba se sineligan gayed egtolò te impunù te amo din.
MAT 24:47 Eneng-enengi niyo se kagi ko kenyo seini. Aw yan se inangen din, meinang sikandin egpengibing te kedita doton te balay te amo din.
MAT 24:48 Meneng aw meg-aneng-aneng se medaet sineligan te menamay pa se pegdateng te amo din,
MAT 24:49 aw egbedasen din se doma sineligan, aw gayed sikandin egpengaen aw eg-inem aw egkelasing sipat menge doma otaw metilasing, medaet iyan,
MAT 24:50 so domateng se amo din te aldaw wedà din pelimani.
MAT 24:51 Metoman sikandin ipelumun te amo din, so ipelumun sikandin iling te menge otaw eden dan aw egpenimanem dan. Ontò megkelag se otaw doton, aw megyangget-yangget se ngipen dan tandà te kegemakan dan.”
MAT 25:1 “Iling heman kani se keteboan te peglowan te Timanem. Doen sempolò laga simongon te meama peipiden. Doen solò inibing te teg sebad-sebad kandan.
MAT 25:2 Lima se laga doen mèpiya aneng-aneng, aw lima se laga kolang se aneng-aneng dan.
MAT 25:3 Doen solò inibing te lima laga kolang se aneng-aneng dan, meneng wedad pitrolyo inibing dan amon iawop dan diyà te solò dan aw meamin se awop niyan.
MAT 25:4 Meneng nengibing se lima laga doen mèpiya aneng-aneng te solò dan aw pitrolyo todà dan iawop.
MAT 25:5 Pegtagad dan te pegdateng te meama peipiden, nepilot se kedita dan aw timedogi dan, so nenamay wedà dateng se tinegadan dan.
MAT 25:6 “Pegketengà te delem, dinineg dan se otaw minikagi, ‘Na, dimateng den se peipiden. Ayas kaw den songon kandin.’
MAT 25:7 Yan neloka se kedita te laga aw migtodà dan te mitsa te solò dan.
MAT 25:8 Minikagi se lima laga kolang se aneng-aneng dan diyà te lima laga doen mèpiya aneng-aneng, ‘Begayi kay bag te pitrolyo, so agpet den mepadeng se solò day.’
MAT 25:9 Meneng minikagi se lima laga doen mèpiya aneng-aneng, ‘Eked kay pemegay, so eked kidon keteped te pitrolyo inibing day. Mèpiya aw domoton kaw te tinda amon mayad kaw.’
MAT 25:10 Yan dimoton dan te tinda amon mayad dan. Penga te pegkesayo dan, dimateng se otaw peipiden. Timaking heman se kedita te neketagad, aw dimoton dan te peipid. Penga te peg-awop dan kidoen te balay, tinakep se lelebangan niyan.
MAT 25:11 “Pegkenamay-namay, dimateng se lima laga lekat te tinda. Timawal dan doton te lowà te balay, kagi dan, ‘Sir, owangi bag se tetakep.’
MAT 25:12 Meneng minikagi sikandin, ‘Wedà ko sikiyo kilelai.’
MAT 25:13 “Yan se doun te keilangan gayed kaw megpeketagad, so wedà niyo ketegahi aw eden eldawi aw orasi se peglikò ko.”
MAT 25:14 “Iling heman kani se peglowan te Timanem. Doen otaw dimoton te mediyò ogpeanan. Meneng te wedà pa kesayo, tinawal din se kedita te sineligan din aw imbegay din diyà kandan se kwarta insalig kandan.
MAT 25:15 Doen kwarta imbegay din diyà te teg sebad-sebad kandan tepad te kebiyasa dan. Lima melalan se imbegay din diyà te sebad otaw, aw dowa melalan se imbegay din diyà te doma otaw, aw sebad melalan se imbegay din diyà te doma otaw. Penga niyan, nesayo sikandin.
MAT 25:16 Nayan, se otaw binegayan din te lima melalan, mignigosyo sikandin aw doen gamad din lima melalan.
MAT 25:17 Iling heman kenyan se ininang te otaw binegayan din te dowa melalan, so doen gamad din dowa melalan.
MAT 25:18 Meneng se otaw binegayan din te sebad melalan, nemangbang sikandin kidoen te tanà aw inlebeng din se kwarta imbegay diyà kandin.
MAT 25:19 “Nayan, pegkenamay, minolì se amo dan, aw tinawal din se sineligan binegayan din te kwarta amon ketegahan din aw doen gamad dan.
MAT 25:20 Pegdateng te sineligan binegayan din te lima melalan, inibing din iyan sipat gamad din lima melalan, aw minikagi sikandin, ‘Sir, lima melalan se imbegay no diyà kanak, aw doen den heman gamad ko lima melalan.’
MAT 25:21 Minikagi se amo din, ‘Mèpiya se ininang nikaw. So keseligan ka, labi pa dakel se ibegay ko diyà kamno. Ibeg ko meluba ka heman onawa te kanak pegkeluba.’
MAT 25:22 Penga niyan, dimateng se sineligan binegayan din te dowa melalan, aw minikagi sikandin, ‘Sir, dowa melalan se imbegay no diyà kanak, aw doen den heman gamad ko dowa melalan.’
MAT 25:23 Minikagi se amo din, ‘Mèpiya se ininang nikaw. So keseligan ka, labi pa dakel se ibegay ko diyà kamno. Ibeg ko meluba ka heman onawa te kanak pegkeluba.’
MAT 25:24 Penga niyan, dimateng heman se sineligan binegayan din te sebad melalan, aw minikagi sikandin, ‘Sir, netegahan ko te mebolot ka otaw, so eglegeniyen no se intanem te doma otaw, aw gayed no ipegsawol diyà te pol nikaw se omay trigo impepalid te doma otaw.
MAT 25:25 Yan wedà a pegnigosyo te kwarta nikaw, meneng inlebeng ko iyan kidoen te tanà, so nelemitan a kamno. Iolì ko den diyà kamno se sebad melalan imbegay no diyà kanak.’
MAT 25:26 Minikagi se amo din, ‘Tekahen ka aw ontò medaet se ininang nikaw. Minikagi ka den te eglegeniyen ko se intanem te doma otaw, aw ipegsawol ko diyà te pol ko se omay trigo impepalid te doma otaw. Aw netegahan no iyan,
MAT 25:27 keilangan ipebeles no peden se kwarta ko diyà te doma otaw amon iolì iyan diyà kanak te peg-olì ko sipat batà niyan.’
MAT 25:28 Penga niyan, minikagi sikandin diyà te menge doma sineligan, ‘Na, ebati niyo se sebad melalan imbegay ko diyà kandin, aw begayi niyo diyà te otaw doen sempolò melalan.
MAT 25:29 Se otaw egkeseligan, yan se begayan ko te labi pa dakel diyà te keilangan din. Meneng se otaw kenà egkeseligan, yan se ebatan ko te imbegay ko diyà kandin.
MAT 25:30 Na, se medaet otaw seini, ibingi niyo sikandin kidoen te lowà doton te kengitngitan amon ipelumun. Ontò megkelag se otaw kidoen, aw megyangget-yangget se ngipen dan tandà te kegemakan dan.’”
MAT 25:31 “Aw lomikò a Timanem Migpekeotaw amon lomowan a, tekingan a te kedita te anghil. Penga niyan, menenoo a kidoen te melangkaw onsedanan te peglowan amon meg-okom a te kedita te otaw
MAT 25:32 tiponen ko lekat te kebelad te keneyonan. Tepiden ko dan diyà te dowa pongan iling te eg-inangen te telediyaga te karniro aw tepiden din se menge karniro aw kambing,
MAT 25:33 so egtiponen din se karniro lenged te kowanan din aw egtiponen din heman se kambing lenged te bibang din. Iling heman kenyan se inangen ko te peg-okom ko,
MAT 25:34 so mikagi a diyà te menge otaw lenged te kowanan ko, ‘Taking kaw den kanak, so pinemallì kaw te Amay ko Timanem amon meluba kaw. Metoman den iyan so megtebò a den lomowan diyà kenyo iling te peglalang te Amay ko te wedà pa inangi se keneyonan.
MAT 25:35 Pegkeballos ko, impekaen a niyo. Pegkelao ko, impeinem a niyo. Pengkey wedà a niyo kilelai te pegdateng ko doton kenyo, meneng impeogpà a niyo doton te balay niyo.
MAT 25:36 Pegkewedad te penenaktun ko, doen imbegay niyo kanak. Pegkesakit ko, mig-ipat kaw kanak. Pegkekeleboso ko, linaoy a niyo.’
MAT 25:37 Penga niyan, meg-insà se otaw lenged te kowanan ko eg-inang te metòlid, kagi dan, ‘Sir, kano ka lay bellosi, penga niyan impekaen ka day? Kano ka lay kelao, penga niyan impeinem ka day?
MAT 25:38 Kano ka lay dini wedà ka day kilelai, penga niyan impeogpà ka day doton te balay? Kano lay pegkewedad se penenaktun no, penga niyan binegayan ka day?
MAT 25:39 Kano ka lay kesekiti aw kekeleboso, penga niyan mig-ipat kay kamno?’
MAT 25:40 Tomaba a, ‘Eneng-enengi niyo se kagi ko seini. Pineokit te peg-inang niyo kenyan diyà te ontò medanà otaw egtaking kanak, ininang niyo iyan diyà kanak.’
MAT 25:41 “Penga niyan, mikagi a heman diyà te menge otaw lenged te bibang ko, ‘Ontò kaw ipelumun. Kesayo kaw den lekat kanak. Doton kaw den te kilot doen apoy eked palos kepadeng, so yan se integilan te Timanem amon doen egbelan din ki Satanas aw kedita te anghil din.
MAT 25:42 Pegkeballos ko, wedà a niyo pekàni. Pegkelao ko, wedà a niyo peinemi.
MAT 25:43 Pegdateng ko doton kenyo, wedà a niyo peogpai doton te balay niyo. Pegkewedad te penenaktun ko, wedà a niyo begayi. Pegkesakit ko aw pegkekeleboso ko, wedà a niyo leoyi.’
MAT 25:44 Meg-insà dan heman, ‘Sir, kano kay lay kità te binallos ka, aw nelao ka, aw wedad ogpeanan no, aw wedad penenaktun no, aw nesekitan ka, aw kineleboso ka, penga niyan wedà kay pegtabang kamno?’
MAT 25:45 Tomaba a, ‘Eneng-enengi niyo se kagi ko seini. Pineokit te wedà kaw pegtabang te ontò medanà otaw egtaking kanak, wedà a niyo tebangi.’
MAT 25:46 Penga niyan, ipedeleg dan doton te pelumun wedad temanan. Meneng se otaw eg-inang te metòlid, begayan dan te kaling pedowan wedad temanan.”
MAT 26:1 Penga te pegtoladà i Jesus te kedita niyan, minikagi sikandin diyà te menge tinoledaan din,
MAT 26:2 “Netegahan niyo den besi te dowa mendad se aldaw te pegdateng te Pista te Pegpelowà, aw metoman a ibegay diyà te belad te otaw meglansang kanak Timanem Migpekeotaw diyà te kros.”
MAT 26:3 Dalem niyan, netipon se menge pengolo te simbahan aw menge obanen te Judiyo doton te balay te ontò pengolo dan si Caifas.
MAT 26:4 Miglalang dan te dekepen dan si Jesus te wedad doma otaw metaga-taga amon imetayan dan.
MAT 26:5 Minikagi dan, “Keilangan eked kidon pegdakep kandin dalem te pista, amon eked pegsamok se kedita te otaw.”
MAT 26:6 Nayan, pegdoton i Jesus te lonsod te Bitanya, limaoy sikandin ki Simon, sìyan otaw pinegolian din te tompig.
MAT 26:7 Dalem te pegpengaen dan, doen bayi nengibing te lana metinadeg ontò meelagà insawol diyà te deitek botilya mèpiya se bawa. Migpedapag se bayi diyà ki Jesus aw nenoyong te lana diyà te olo din.
MAT 26:8 Na, pegkità te menge tinoledaan i Jesus te ininang te bayi, neopal dan, aw minikagi dan, “Tay law. Pigbàtan din se lana sìyan.
MAT 26:9 Aw ibeligyà iyan, doen ontò dakel kwarta iteped diyà te menge otaw sagkep.”
MAT 26:10 Meneng netaga-taga si Jesus te ingkeopal dan, aw minikagi sikandin, “Ikà niyo egsila te bayi sìyan, so mèpiya se ininang din diyà kanak.
MAT 26:11 Gayed doen otaw sagkep mebatog niyo tebangan. Meneng eked a gayed peg-ogpà dini kenyo.
MAT 26:12 Pineokit te pegtoyong din te lana diyà kanak, impetagad a din te peglebeng kanak.
MAT 26:13 Eneng-enengi niyo se kagi ko seini. Eked palos sikandin kelibeli, so pengkey kenan toledai se Mèpiya Indan doton te kebelad te keneyonan, iindan heman se ininang te bayi sìyan.”
MAT 26:14 Nayan, doen tinoledaan i Jesus ngadan din si Judas Iscariote. Dimoton sikandin te menge pengolo te simbahan
MAT 26:15 aw minikagi sikandin, “Aw itolok ko sikandin amon dekepen niyo, pila lay se kwarta ibegay niyo kanak?” Penga niyan, doen kwarta imbegay dan diyà kandin ketlowan plata.
MAT 26:16 Lekat niyan, migtagad si Judas te mèpiya aldaw amon itolok din si Jesus.
MAT 26:17 Nayan, pegdateng te tagnà aldaw te pista te pegpengaen te menge Judiyo te pan kenà eglebag, dimoton se menge tinoledaan i Jesus kandin, aw mig-insà dan, kagi dan, “Kenan kay lay peg-inang te kànen tadon te Pista te Pegpelowà?”
MAT 26:18 Minikagi si Jesus, “Doton kaw te otaw te Jerusalem, aw ikagi kaw diyà kandin, ‘Insogò kay te Pengolo day amon mikagi kay diyà kamno te agpet den se pegkematay din. Komaen sikandin te Pista te Pegpelowà dini te balay nikaw sipat sikami menge tinoledaan din.’”
MAT 26:19 Penga niyan, timolò dan kandin, aw mig-inang dan te kànen.
MAT 26:20 Pegkedelem niyan, dimoton si Jesus aw kedita te sempolò teg dowa tinoledaan din, aw kimaen dan.
MAT 26:21 Dalem te pegpengaen dan, minikagi si Jesus, “Eneng-enengi niyo se kagi ko seini. Doen sebad kenyo megtolok kanak.”
MAT 26:22 Ontò nelidò se pedowan dan, aw migpetibos-tibosay dan mig-insà, kagi dan, “Pengolo, kenà ko lay lebò?”
MAT 26:23 Minikagi si Jesus, “Doen sebad dini megtolok kanak pengkey timogen sikandin kanak.
MAT 26:24 Metoman a imetayan, so yan se insolat gebii tepad kanak Timanem Migpekeotaw. Meneng mekelelayò se otaw megtolok kanak. Mèpiya peden aw wedà sikandin tebaw.”
MAT 26:25 Mig-insà se migtolok kandin si Judas, “Sir, kenà ko lay lebò?” Minikagi si Jesus, “Benal se inikagi nikaw.”
MAT 26:26 Nayan, telobo dan pa kimaen, nengabat si Jesus te pan, aw migpesiontong sikandin diyà te Timanem, aw binelà-belà din se pan, aw inteped din diyà kandan, aw minikagi, “Kàni niyo se pan seini, so yan se lawa ko.”
MAT 26:27 Penga niyan, inabat din heman se tabò, aw migpesiontong sikandin diyà te Timanem, aw impeinem din iyan diyà kandan, aw minikagi, “Kedita niyo minem kani,
MAT 26:28 so seini se dipanog ko, aw pineokit kani, doen den kaling peokit pesalo doton te Timanem. Pineokit te pegkematay ko, pegwedaden din se salà te ontò medita otaw.
MAT 26:29 Mikagi a den diyà kenyo te eked a todà inem te ininem tadon seini singed aw metoman kidon minem te kaling bino doton te peglowan te Amay ko.”
MAT 26:30 Penga niyan, migdelangan dan tepad te pegduyun dan te Timanem, aw nesayo dan lekat kidoen, aw dimoton dan te bontod te Olibo.
MAT 26:31 Penga niyan, minikagi si Jesus diyà te menge tinoledaan din, “Kwani seini, tomanan se kedita niyo kanak tandà te kelimahan domateng diyà kanak, so doen kagi te Timanem insolat gebii, ‘Ipeimatay ko se otaw egtonggò te ayam-ayam karniro, aw mebilit se kedita te karniro tinonggoan din.’
MAT 26:32 Meneng penga te pegkeantay ko lekat te nematay, mekeonà a diyà kenyo doton te Galiliya.”
MAT 26:33 Minikagi si Pedro diyà ki Jesus, “Pengkey tomanan se kedita te doma kamno, meneng eked a palos tanan kamno.”
MAT 26:34 Minikagi si Jesus, “Eneng-enengi se kagi ko kamno seini. Kwani te delem te eked pegkolaak se manok, ibolon a nikaw te meketelo.”
MAT 26:35 Minikagi si Pedro, “Eked a palos pegbolon kamno, pengkey imetayan a sipat kamno.” Iling heman kenyan se inikagi te kedita te tinoledaan i Jesus.
MAT 26:36 Nayan, dimoton si Jesus aw menge tinoledaan din te kekeyowan iningedanan Gitsimani. Pegdateng dan doton, minikagi si Jesus, “Pegtagad kaw dini. Domoton a sida amon megtawal-tawal a.”
MAT 26:37 Impetaking din si Pedro aw sìyan didowa batà i Sebedeo. Penga niyan, ontò den nepuluk se pedowan din,
MAT 26:38 aw minikagi sikandin, “Ontò den nepuluk se pedowan ko, iling te matay a. Peg-ogpà kaw den dini, aw ikà niyo egtedogi.”
MAT 26:39 Penga niyan, dimeleg si Jesus te kenà mediyò, aw limemlem sikandin aw migtawal-tawal, kagi din, “Amà, aw mepakay diyà kamno, eked a no peden peokiti diyà te kelimahan seini. Meneng ibeg ko, kamno ibeg se metoman, kenà kanak.”
MAT 26:40 Peglikò din doton te tinoledaan din, timedogi den dan. Linoka din dan aw minikagi sikandin diyà ki Pedro, “Nepela a den kenyo, so wedà kaw peketayod te sebad olò oras, meneng timedogi kaw.
MAT 26:41 Ikà niyo egtedogi. Meneng pegtawal-tawal kaw amon eked kaw keboyo. Pengkey mèpiya se ibeg te pedowan niyo, meneng wedad kagsen te lawa niyo.”
MAT 26:42 Migpekediyò-diyò si Jesus te ikedowa, aw migtawal-tawal, kagi din, “Amà, aw eked kepakay aw eked a okit diyà te kelimahan seini, ibeg ko metoman se kamno ibeg.”
MAT 26:43 Todà limikò si Jesus doton te menge tinoledaan din, aw kinità din dan timedogi, so nepilot dan.
MAT 26:44 Todà sikandin nesayo aw migtawal-tawal te iketelo. Onawa heman se intawal-tawal din.
MAT 26:45 Penga niyan, limikò sikandin doton te tinoledaan din aw minikagi sikandin, “Nepela a so gayed kaw timedogi. Na, dimateng den se oras te pegtolok kanak Timanem Migpekeotaw, amon dekepen a te menge otaw mededaet.
MAT 26:46 Enaw kaw den. Dimateng den se otaw megtolok kanak. Somongon kidon kandin.”
MAT 26:47 Telobo pa minikagi si Jesus, dimateng si Judas, sìyan tinoledaan i Jesus. Ontò medita se otaw timaking kandin, aw migkekamang dan te menge podok aw batota. Insogò dan te menge pengolo te simbahan aw menge obanen te Judiyo.
MAT 26:48 Tapay dan netegahan aw eden se inangen i Judas, so minikagi sikandin, “Se otaw edekan ko, yan se otaw inahà niyo. Dekepi niyo sikandin.”
MAT 26:49 Nayan, pegdateng dan doton, wedà peg-alà-alà si Judas, meneng dimoton ki Jesus, aw minikagi, “Sir, mèpiya delem.” Penga niyan, inedekan din si Jesus.
MAT 26:50 Minikagi si Jesus, “Elew, pedelegi den se tod nikaw.” Penga niyan, migpedapag se doma otaw diyà ki Jesus, aw migdakep dan kandin.
MAT 26:51 Na, doen doma i Jesus nenagnos te podok din aw tinigbas din se sineligan te ontò pengolo te simbahan, aw nepalot se dibaloy telinga din.
MAT 26:52 Meneng minikagi si Jesus, “Olii se podok diyà te lomà. Aw meglegamit se otaw te podok, imetayan heman sikandin pineokit te podok.
MAT 26:53 Wedà no besi ketegahi ini. Aw mengenganay a diyà te Amay ko, isogò din se minelalan anghil din amon megtabang dan kanak.
MAT 26:54 Meneng simpana tebangan a dan, eked den ketoman se kagi te Timanem insolat gebii te metoman a detengan te kelimahan.”
MAT 26:55 Penga niyan, minikagi si Jesus diyà te kedita te otaw netipon, “Kolang se pegkekamang niyo te podok aw batota amon megdakep kaw kanak, so kenà a megdedempasay. Gayed a migtoladà doton te dakel simbahan, meneng wedà a niyo dekepi doton.
MAT 26:56 Meneng neinang se kedita nini amon metoman se insolat te menge telekeliwat te kagi te Timanem gebii tepad kanak.” Penga niyan, kimadas se kedita te tinoledaan i Jesus, aw tinenanan dan sikandin.
MAT 26:57 Penga niyan, inibing si Jesus te otaw migdakep kandin doton te balay te ontò pengolo te simbahan si Caifas. Tapay netipon kidoen se menenoladà te punù ingkeliwat i Moises aw menge obanen te Judiyo.
MAT 26:58 Timelokon heman si Pedro, meneng migpekediyò lamig dimateng sikandin doton te dowangen te balay te ontò pengolo te simbahan. Pegdateng din doton te balay, nenenoo si Pedro doma te menge otaw migtonggò te dakel simbahan, amon ketegahan din aw eden se meinang ki Jesus.
MAT 26:59 Nayan, ibeg te menge pengolo te simbahan aw menge doma dan obanen, doen inangan dan si Jesus te salà amon doen tindegan te pegpeimatay dan kandin.
MAT 26:60 Pengkey medita se otaw migkebolalaw tepad kandin, meneng kenà botong se in-indan dan tepad kandin. Pegkenamay-namay, doen dowa otaw dimoton kandan,
MAT 26:61 aw minikagi dan, “Dinineg day se inikagi din te mekebatog sikandin megbaet te dakel simbahan sida eg-ogpaan te Timanem, aw todà din iyan ipetindeg dalem te telo se aldaw.”
MAT 26:62 Timindeg se ontò pengolo te simbahan aw minikagi, “Eden lay se itaba no kenyan? Indani kay aw benal se inikagi te didowa otaw sìyan.”
MAT 26:63 Meneng wedà taba si Jesus. Penga niyan, minikagi se ontò pengolo te simbahan, “Megpunù a den diyà kamno pineokit te ngadan te Timanem eked palos kematay te keilangan meg-indan ka den te kebenalan. Sikona ekon se Misiyas, sìyan Batà te Timanem. Indani kay den aw benal iyan.”
MAT 26:64 Minikagi si Jesus, “Benal se inikagi nikaw. Mikagi a den kani diyà kenyo. Te eked kenamay, komità kaw kanak Timanem Migpekeotaw egpenenoo kidoen te tangkil te Amay ko metolos amon lomowan a doma din. Lomikò a heman dini lekat te langit tekingan te labon.”
MAT 26:65 Penga niyan, miglisì se ontò pengolo te simbahan te saol din tandà te keopal din, aw minikagi sikandin, “Migtompuyus sikandin te Timanem, so migpelingo-lingo sikandin Batà te Timanem. Wedad den kekemowan te peg-indan te doma otaw diyà kenitadon tepad kandin, so dinineg tadon den se pegtompuyus din te Timanem.
MAT 26:66 Na, eden lay se aneng-aneng niyo tepad kandin?” Timaba dan, “Keilangan imetayan sikandin so doen salà din.”
MAT 26:67 Penga niyan, tineptepan dan se bawa din, aw sinombag dan sikandin. Doen heman menge otaw nenampeng te mata din aw nenampak te bawa din,
MAT 26:68 aw minikagi dan, “Na, aw ontò ka Misiyas, etoki aw sinu se nenombag kamno.”
MAT 26:69 Dalem niyan, mig-ogpà si Pedro doton te lowà te balay kidoen te dowangen. Doen bayi egtelaban dimoton kandin aw minikagi, “Sikona se egdoma ki Jesus tege probinsya te Galiliya.”
MAT 26:70 Meneng migbolon si Pedro, aw dinineg te kedita dan se kagi din, “Wedà ko ketegahi aw eden se eg-ikegiyen nikaw.”
MAT 26:71 Penga niyan, minalin si Pedro doton medapag te lelebangan. Doen doma bayi egtelaban kimità ki Pedro, aw minikagi diyà te menge otaw kidoen, “Otaw seini se egdoma ki Jesus tege Nasarit.”
MAT 26:72 Todà migbolon si Pedro. Migsapà sikandin aw minikagi, “Wedà ko sikandin kilelai.”
MAT 26:73 Wedà kenamay, doen menge doma otaw dimoton ki Pedro, aw minikagi dan, “Benal sikona se sebad egdoma te otaw sida dinakep. Netegahan day te sikona se tege probinsya te Galiliya, so dinineg day se litok te kagi nikaw.”
MAT 26:74 Penga niyan, ontò migsapà si Pedro aw minikagi, “Wedà a palos kilala te otaw sida.” Pegketà, migkolaak se manok.
MAT 26:75 Yan neeneng-enengan i Pedro se tapay inikagi i Jesus te ibolon din sikandin te meketelo te eked pa pegkolaak se manok. Penga niyan, nesayo si Pedro aw ontò migkelag.
MAT 27:1 Nayan, peglibtak te aldaw sìyan, netipon se kedita te pengolo te simbahan aw menge obanen te Judiyo, aw miglalang dan aw eden se idimanda dan diyà te gobirno tepad ki Jesus amon imetayan sikandin.
MAT 27:2 Penga niyan, ginapos dan si Jesus, aw inibing dan sikandin doton te gobirnador si Pilato.
MAT 27:3 Nayan, si Judas, sìyan migtolok ki Jesus, pegketaga-taga din te minikagi se menge pengolo te simbahan aw menge obanen te Judiyo te keilangan imetayan si Jesus, miglama-lama sikandin te medaet ininang din. In-olì din se kedakel te kwarta imbegay dan diyà kandin,
MAT 27:4 aw minikagi sikandin diyà kandan, “Doen salà ininang ko, so migtolok a te otaw wedad palos salà din aw imetayan den sikandin.” Meneng minikagi dan, “Wedad labut day te salà nikaw. Inday den kamno.”
MAT 27:5 Penga niyan, insabog din se kwarta doton didalem te dakel simbahan, aw nesayo sikandin aw mig-iket te lieg din.
MAT 27:6 Inimon te menge pengolo te simbahan se kwarta insabog din, aw minikagi dan, “Simpana isawol tadon se kwarta seini diyà te solanan te kwarta ibowang diyà te Timanem, mekelàpang kidon te punù ingkeliwat i Moises, so seini se imbayad te pegpengimatay te otaw.”
MAT 27:7 Penga niyan, migsebad dan tepad te kwarta sìyan, aw yan se imbayad dan te tanà te meneniyonay amon doen lebengan te menge otaw matay kidoen kenà tege Jerusalem.
MAT 27:8 Yan se doun te eg-ingedanan se pawà sìyan “Pawà te Dipanog” lamig songkani.
MAT 27:9 Pineokit kenyan, netoman den se inikagi te telekeliwat te kagi te Timanem gebii si Jeremias, kagi din, “Ketlowan se kwarta plata keelagà din pegsebadan te menge bowad-bowad i Israel,
MAT 27:10 aw yan se ibayad dan te tanà te meneniyonay, so yan se insogò te Timanem kanak.”
MAT 27:11 Nayan, pegpengibing dan ki Jesus doton te gobirnador, mig-insà se gobirnador, “Sikona lay se Selotan te menge Judiyo?” Minikagi si Jesus, “Ee. Benal se kagi nikaw.”
MAT 27:12 Meneng pegdimanda te menge pengolo te simbahan aw menge obanen te Judiyo tepad ki Jesus, pengkey wedad salà din, meneng wedà palos sikandin ikagi.
MAT 27:13 Penga niyan, minikagi si Pilato, “Medita se indimanda dan tepad kamno. Nengà lay wedà ka taba kandan?”
MAT 27:14 Meneng wedà palos taba si Jesus, aw yan se doun te ontò nepela se gobirnador.
MAT 27:15 Nayan, kelikit te Pista te Pegpelowà, doen ketanem te gobirnador te ipelowà din se sebad otaw kineleboso, pengkey sinu se pemellien te kedita te otaw.
MAT 27:16 Na, dalem niyan, doen medaet otaw kineleboso ontò nedengeg, ngadan din si Barabas.
MAT 27:17 Pegketipon te medita otaw, mig-insà si Pilato, “Sinu lay se ibeg niyo ipelowà ko? Si Barabas aw si Jesus egtewalen niyo Misiyas? Sinu lay se pemellien niyo?”
MAT 27:18 Yan se inikagi i Pilato, so netegahan din te impedakep te menge pengolo te simbahan si Jesus so miningà dan kandin.
MAT 27:19 Dalem te pegpenenoo i Pilato doton te oseyanan, doen otaw insogò te esawa din amon ikeliwat se kagi din, “Ikà eg-inabut te otaw sìyan, so wedad salà din. Ontò nelemitan se pedowan ko tepad kandin pineokit te tegeinep tidelem.”
MAT 27:20 Dalem niyan, gayed migdeliseg se menge pengolo te simbahan aw menge obanen te Judiyo diyà te otaw netipon kidoen amon memoyò dan ki Pilato te ipelowà din si Barabas aw imetayan si Jesus.
MAT 27:21 Wedà kenamay, todà mig-insà se gobirnador, kagi din, “Sinu lay se pinemallì niyo ipelowà ko?” Timaba dan, “Si Barabas.”
MAT 27:22 Mig-insà si Pilato, “Menonen ko si Jesus egtewalen niyo Misiyas?” Timaba se kedita dan, “Imetayi sikandin. Lensangi diyà te kros.”
MAT 27:23 Mig-insà si Pilato, “Nengà lay? Eden lay se salà ininang din?” Meneng labi pa dakel se kagi dan aw migbelobansag dan, “Imetayi sikandin. Lensangi diyà te kros.”
MAT 27:24 Nayan, netegahan den i Pilato te eked sikandin penalo diyà kandan, aw agpet den dan megsamok. Yan se doun te inabat din se wayeg aw mig-onaw te belad din dalem te pegtengteng dan diyà kandin. Minikagi sikandin, “Pineokit te peg-onaw ko te belad, impetaga-taga ko den kenyo te wedad labut ko aw imetayan niyo se otaw seini. Meneng aw yan se inangen niyo diyà kandin, inday den kenyo.”
MAT 27:25 Minikagi se kedita te otaw, “Mepakay diyà kenami aw ipelumun kay aw menge bowad-bowad day tepad te peg-imatay kandin, so salà day iyan.”
MAT 27:26 Penga niyan, impelowà i Pilato si Barabas lekat te keleboso. Impebadas din si Jesus, aw impeibing din amon ilansang diyà te kros.
MAT 27:27 Penga niyan, inibing te menge sondalo si Jesus doton didalem te balay te gobirnador, aw migtipon dan te kedita te doma dan sondalo.
MAT 27:28 Penga niyan, linowas dan se saol din lekat kandin, aw pineseolan dan sikandin te melalag saol iling te saol te selotan.
MAT 27:29 Linekò dan se belagen doen tigis, aw yan se insangkob dan diyà te olo din iling te korona te selotan. Doen heman tigbaw impeawid dan kandin iling te bangkà te selotan. Penga niyan, limongken dan diyà kandin aw migpelingo-lingo dan te sikandin se selotan egsegmanen dan. Minikagi dan, “Iduyun sikona Selotan te menge Judiyo.”
MAT 27:30 Penga niyan, tineptepan dan sikandin. Inabat dan se tigbaw lekat kandin, aw yan se imbadas dan te olo din.
MAT 27:31 Penga te pegtompuyus dan kandin, linowas dan se melalag saol lekat kandin aw impesaol dan diyà kandin se kandin saol. Penga niyan, inibing dan sikandin lekat te balay te gobirnador amon ilansang diyà te kros.
MAT 27:32 Pegkesayo dan lekat te Jerusalem, netelaan te menge sondalo se tege Sirene ngadan din si Simon. Lineges dan sikandin neniang te kros lensangan ki Jesus.
MAT 27:33 Dimoton dan te bontod iningedanan Golgota. Se kelebadan niyan, “Tòlan te Olo.” Pegdateng dan doton,
MAT 27:34 imbegay te sondalo diyà ki Jesus se bino sinengedan te bebolong te saka metabang amon eked din imenmani se kesakit. Meneng pegtimtim din kenyan, wedà din pedelegi inemi.
MAT 27:35 Penga te peglansang te sondalo kandin diyà te kros, pigtalad-talad dan se penenaktun linowas din, aw migbonot dan aw eden se penenaktun meabat te teg sebad-sebad kandan.
MAT 27:36 Penga niyan, nenenoo dan aw migtonggò dan kandin.
MAT 27:37 Doen solat insawol dan diatas te olo din tepad te indimanda kandin, kagi niyan, “Seini si Jesus, Selotan te menge Judiyo.”
MAT 27:38 Doen heman dowa megdedempasay inlansang diyà te kros kidoen te tangkil din, aw si Jesus diyà te tengà-tengà.
MAT 27:39 Migtompuyus kandin se menge otaw minokit te dalan medapag kidoen. Migkiling-kiling dan te olo dan te peg-otik dan kandin,
MAT 27:40 aw minikagi dan, “Minikagi ka te mekebatog ka megbaet te dakel simbahan sida, aw todà no iyan ipetindeg dalem te telo se aldaw. Aw mekebatog ka kenyan, pekitai diyà kenami te doen tolos no pineokit te pegtabang no te kamno pegkeotawun amon eked ka kematay. Aw ontò ka Batà te Timanem, tenà ka den lekat te kros.”
MAT 27:41 Iling heman kenyan se pegtompuyus te menge pengolo te simbahan, aw menenoladà te punù ingkeliwat i Moises, aw menge obanen te Judiyo. Minikagi dan,
MAT 27:42 “Migtabang sikandin te menge doma otaw netigdaan amon eked dan pa kematay. Meneng eked den sikandin peketabang te kandin pegkeotawun amon eked kematay. Minikagi sikandin te sikandin se Selotan te menge bowad-bowad i Israel. Eked kidon pemenal te kagi din singed aw tomenà sikandin lekat te kros.
MAT 27:43 Timanem ekon se egseligan din. Kitaen tadon den aw dakel se pedowan te Timanem kandin pineokit te pegtabang te Timanem kandin te aldaw seini, so minikagi sikandin, ‘Siaken se Batà te Timanem.’”
MAT 27:44 Iling heman kenyan se pegtompuyus te megdedempasay inlansang diyà te kros kidoen te tangkil din.
MAT 27:45 Nayan, pegkealas dosi te aldaw, migkengitngit se langit aw tanà lamig alas tris te meapon.
MAT 27:46 Menge alas tris te meapon, timawal si Jesus te dakel se kagi din, kagi te Hebreo, “Eli, Eli, lama sabaktani?” Se kelebadan niyan, “E Timanem ko, nengà lay tinenanan a nikaw?”
MAT 27:47 Pegdineg te menge otaw netipon kidoen, minikagi dan, “Nengenganay den sikandin diyà ki Elias, sìyan telekeliwat te kagi te Timanem gebii.”
MAT 27:48 Doen otaw ayas minangay te ispongha aw inagem din iyan diyà te bino sinengedan te wayeg. Intangen din iyan diyà te toktok te tigbaw, aw impesopsop din iyan ki Jesus.
MAT 27:49 Meneng timawal se menge doma otaw, “Pebeyai sikandin, so kitaen tadon aw domini si Elias amon megtabang kandin.”
MAT 27:50 Penga niyan, todà timawal si Jesus te dakel se kagi din, aw penga niyan nematay.
MAT 27:51 Nayan, tigkan nelisì se kayad kidoen te tengà-tengà te dakel simbahan te Jerusalem. Nelisì iyan lekat diatas lamig diyà te ongan. Ontò miglinog, aw doen dedakel bato nelebak.
MAT 27:52 Neowang se menge ilib linebengan te otaw nematay, aw medita se otaw sinakop te Timanem neantay lekat te nematay.
MAT 27:53 Limowà dan lekat te lebeng dan, aw penga te pegkeantay i Jesus lekat te nematay, dimoton dan te Jerusalem, aw medita se otaw kimità kandan.
MAT 27:54 Na, se menge sondalo aw kapitan migtonggò ki Jesus, nelemitan dan te pegkayong te linog, aw pegkekità dan te kepelahan neinang te pegkematay i Jesus. Minikagi dan heman, “Ontò Batà te Timanem se otaw sìyan.”
MAT 27:55 Medita heman se bayi kidoen kenà mediyò te kros, aw kinità dan se kedita te neinang. Sikandan se tapay timaking ki Jesus lekat te Galiliya taman te Jerusalem amon megtabang dan kandin.
MAT 27:56 Sikandan si Maria tege Magdala, aw kesangay din si Maria inay i Santiago aw si Jose, aw sìyan esawa i Sebedeo, aw doen heman menge doma dan.
MAT 27:57 Pegkeapon niyan, dimateng se meyaman otaw tege Arimatiya, ngadan din si Jose. Sikandin heman se tinoledaan i Jesus.
MAT 27:58 Dimoton sikandin ki Pilato, aw pinemoyò din se lawa i Jesus amon ilebeng din. Yan migpunù si Pilato te mepakay aw ebaten din se lawa.
MAT 27:59 Penga niyan, inabat din iyan lekat te kros, aw ginakes din te kaling sapot.
MAT 27:60 Doen lebeng kaling impeawang i Jose diyà te pangpang, aw yan se linebengan din te lawa i Jesus. Penga niyan, kinelid din se dakel bato amon isampeng te lebeng. Penga niyan, nesayo sikandin.
MAT 27:61 Kinità iyan i Maria tege Magdala aw kesangay din, so nenenoo dan dapag te lebeng.
MAT 27:62 Keeldawan niyan, dalem te aldaw te peg-etod, dimoton ki Pilato se menge Parisiyo aw menge pengolo te simbahan,
MAT 27:63 aw minikagi dan, “Sir, doen neeneng-enengan day. Te wedà pa kematay se otaw sìyan migpelingo-lingo Misiyas, minikagi sikandin te meantay lekat te nematay te iketelo te aldaw.
MAT 27:64 Yan mèpiya aw isogò no se menge sondalo megtonggò te lebeng din te telo se aldaw, amon eked ketakaw te menge tinoledaan din se lawa din lekat te lebeng. Yan eked dan pekeindan te neantay den sikandin lekat te nematay. Medita den se otaw neekalan te sikandin se Misiyas, meneng labi pa medaet aw keekalan dan te neantay den sikandin lekat te nematay.”
MAT 27:65 Minikagi si Pilato, “Na, petekingi niyo se menge sondalo doton te lebeng, aw ontò niyo iyan petonggoi.”
MAT 27:66 Penga niyan, dimoton dan te lebeng aw impeket dan se pengilala diyà te dakel bato insampeng kenyan amon wedad otaw meg-owang kenyan. Penga niyan, tinonggoan iyan te menge sondalo.
MAT 28:1 Nayan, penga te aldaw te peg-etod, te wedà pa libtak se aldaw te iselem te Linggo, dimoton si Maria tege Magdala aw kesangay din te lebeng i Jesus.
MAT 28:2 Te wedà dan pa dateng doton, ontò miglinog, so doen anghil te Timanem dimateng lekat te langit, aw nengelid te bato insampeng te lebeng, aw nenenoo sikandin kidoen.
MAT 28:3 Ontò minanyag se bawa din iling te kilem, aw ontò mepotì se penenaktun din.
MAT 28:4 Tinegangtang se menge sondalo tandà te lamit dan, aw nekelias dan iling te otaw nematay.
MAT 28:5 Na, pegdateng te didowa bayi doton te lebeng, minikagi se anghil, “Ikà niyo egkelemitan. Netegahan ko te inahà niyo si Jesus, sìyan inlansang diyà te kros.
MAT 28:6 Meneng wedad sikandin dini, so neantay den lekat te nematay. Yan se tapay din impakang. Awop kaw diyà amon kitaen niyo se linebengan kandin.
MAT 28:7 Na, kegaen kaw den doton te menge tinoledaan din, aw indani niyo dan te neantay den sikandin lekat te nematay, aw nekeonà den sikandin diyà kenyo pesalo doton te probinsya te Galiliya. Kitaen niyo sikandin doton. Yan se kagi ko kenyo.”
MAT 28:8 Penga niyan, migpekegaen dan se nesayo lekat te lebeng. Pengkey nelemitan dan, meneng ontò heman neluba se pedowan dan. Kimagnan dan amon meg-indan dan kenyan diyà te menge tinoledaan i Jesus.
MAT 28:9 Te wedà dan pa dateng doton, kinità dan si Jesus kidoen te dalan, aw minikagi sikandin, “Mèpiya iselem.” Migpedapag dan diyà kandin, aw limongken dan, aw minawid dan te benis din, aw migsimba dan kandin.
MAT 28:10 Minikagi si Jesus, “Ikà niyo egkelemitan. Doton kaw den te menge tinoledaan ko. Ikagi kaw diyà kandan te ibeg ko domoton dan te Galiliya, so kitaen a dan doton.”
MAT 28:11 Nayan, pegkesayo te bayi, dimoton te Jerusalem se menge sondalo migtonggò te lebeng. Mig-indan dan diyà te menge pengolo te simbahan te kedita te neinang diyà kandan doton te lebeng.
MAT 28:12 Penga niyan, tinipon te menge obanen te Judiyo se menge doma dan, aw migpebelaw-belaway dan. Penga niyan, dakel se kwarta imbegay dan diyà te menge sondalo,
MAT 28:13 aw minikagi dan, “Peg-indan kaw diyà te doma otaw te dimoton se menge tinoledaan din te delem, aw tinakaw dan se lawa din dalem te pegtedogi niyo.
MAT 28:14 Aw dinegen iyan te gobirnador, sikami se megbalaw-balaw kandin amon eked kaw din keopali.”
MAT 28:15 Penga niyan, kininawà te menge sondalo se kwarta, aw timolò dan te impunù kandan. Iling kenyan se ipeg-indan-indan te keditaan te Judiyo lamig songkani.
MAT 28:16 Nayan, dimoton se sempolò tegusà tinoledaan i Jesus te Galiliya doton te bontod pinedotonan i Jesus kandan.
MAT 28:17 Pegkità dan kandin, migsimba dan kandin. Meneng doen menge tinoledaan din egdowa-dowa aw benal sikandin.
MAT 28:18 Migpedapag si Jesus diyà kandan aw minikagi, “Impelowan a den diyà te kedita doton te langit aw dini heman te lanto te tanà.
MAT 28:19 Yan isogò ko den sikiyo doton te kebelad te keneyonan. Pegtoladà kaw te kedita te otaw amon tomaking dan kanak. Pemonyagi niyo dan diyà te ngadan te Timanem Amay, aw Batà din, aw Espiritu Santo.
MAT 28:20 Pegtoladà kaw kandan te keilangan tomolò dan te kedita te impunù ko diyà kenyo. Na, gayed a meg-ipat kenyo pengkey lamig te temanan te keneyonan.”
MAR 1:1 Seini se keteboan te Mèpiya Indan tepad te Batà te Timanem, si Jesu Cristo.
MAR 1:2 Gebii doen insolat te telekeliwat te kagi te Timanem si Isaias, “Na, doen otaw isogò ko megpetaga-taga te agpet ka den domateng, amon megpeketagad se kedita te otaw te pegdateng nikaw.
MAR 1:3 Dinegen niyo se otaw doton te kebigtilan aw dakel se kagi din, ‘Pegpeketagad kaw te pegdateng te Pengolo. Peg-inang kaw te metòlid, so domateng sikandin.’”
MAR 1:4 Nayan, dimoton si Juan Memonyagay te kebigtilan. Migtoladà sikandin te kedita te otaw te keilangan megselsel dan te salà ininang dan aw bonyagan dan amon ipetaga-taga dan te pigwedad den te Timanem se salà dan.
MAR 1:5 Medita se otaw lekat te menge lonsod sakop te probinsya te Judiya aw lekat te Jerusalem dimoton amon menenalan kandin. Migselsel dan te menge salà ininang dan, aw binonyagan din dan doton te wayeg te Jordan.
MAR 1:6 Nayan, egpenaol si Juan te saol inabel lekat te bolbol te ayam-ayam kamilo, aw egpengelen te kindal te ayam-ayam. Egpengànen din se menge dolon aw teneb eg-ebaten din doton te kebenesan.
MAR 1:7 Migtoladà sikandin, kagi din, “Doen domateng labi pa melangkaw diyà kanak. Kenà botong se kelangkaw ko amon megtelaban a kandin pengkey meglebad a te sepatos din, so ontò sikandin melangkaw diyà kanak.
MAR 1:8 Nemonyag a kenyo pineokit te wayeg, meneng sikandin se memonyag kenyo pineokit te Espiritu Santo.”
MAR 1:9 Nayan, wedà kenamay, dimateng si Jesus lekat te lonsod te Nasarit sakop te probinsya te Galiliya, aw migpebonyag sikandin ki Juan kidoen te wayeg te Jordan.
MAR 1:10 Peg-anggin i Jesus lekat te wayeg, pegketà kinità din se langit neowang aw migpedanà se Espiritu Santo diyà kandin iling te selepati.
MAR 1:11 Penga niyan, dinineg dan se kagi te Timanem lekat te langit, “Sikona se Batà ko. Dakel se pedowan ko kamno, aw ontò a neluba kamno.”
MAR 1:12 Penga niyan, inibing sikandin te Espiritu Santo doton te kebigtilan.
MAR 1:13 Mig-ogpà sikandin kidoen taman te kepatan se aldaw, aw binoyo peden i Satanas. Doen menge menenanap te kebenesan dimoma kandin, meneng doen menge anghil mig-ipat kandin.
MAR 1:14 Nayan, penga te pegpedakep i Herod ki Juan Memonyagay, dimoton si Jesus te probinsya te Galiliya aw migtoladà te Mèpiya Indan lekat te Timanem.
MAR 1:15 Minikagi sikandin, “Netoman den se aldaw tapay impakang, aw agpet den lomowan se Timanem diyà kenyo. Pegselsel kaw den te menge salà ininang niyo, aw pemenal kaw den te Mèpiya Indan.”
MAR 1:16 Nayan, minipanaw si Jesus doton te kilid te lanaw te Galiliya. Kinità din se didowa memokotay si Simon aw adi din si Andres nemokot.
MAR 1:17 Timawal si Jesus, “Taking kaw kanak, so megtoladà a kenyo amon kenà ikan se meabat niyo, meneng otaw se ibingen niyo diyà kanak.”
MAR 1:18 Pegketà, tinenanan dan se pokot aw timaking dan ki Jesus.
MAR 1:19 Penga niyan, dimeleg si Jesus te kenà mediyò, aw kinità din si Santiago aw adi din si Juan didowa dan batà i Sebedeo. Kidoen dan te belangay aw migtigmes dan te pokot.
MAR 1:20 Pegketà, tinawal dan heman i Jesus. Tinenanan dan se amay dan kidoen te belangay sipat menge doma otaw egtendanan din, aw timaking dan heman ki Jesus.
MAR 1:21 Penga niyan, dimoton dan te lonsod te Kapirnaom. Pegkesebado, dimoton si Jesus te simbahan te Judiyo aw migtoladà kidoen.
MAR 1:22 Ontò nepela se kedita te otaw dimineg te intoladà din, so kenà iling te pegtoladà te menenoladà te punù ingkeliwat i Moises se pegtoladà i Jesus, so tinekingan si Jesus te tolos.
MAR 1:23 Pegketà, dimateng kidoen te simbahan se otaw dinetengan te bosaw.
MAR 1:24 Timawal sikandin, “Tay, Jesus tege Nasarit. Ikà eg-inabut kenami. Ikà egbaet kenami. Netegahan ko aw sinu ka. Sikona se metòlid otaw insogò te Timanem.”
MAR 1:25 Meneng migsagda si Jesus te bosaw, kagi din, “Kepenek ka den. Lowà ka den diyà kandin.”
MAR 1:26 Impekeseg te bosaw se otaw aw timawal te dakel se kagi din, aw penga niyan limowà diyà kandin.
MAR 1:27 Nepela se kedita te otaw, aw migpebelaw-belaway dan, kagi dan, “Tay law. Sebad se ipegtoladà din. Metolos sikandin, so aw megpelowà sikandin te menge bosaw, egtolò dan kandin.”
MAR 1:28 Wedà kenamay, ontò nedengeg si Jesus kidoen te kedita te ogpeanan medapag doton te probinsya te Galiliya.
MAR 1:29 Wedà kenamay, nesayo si Jesus lekat te simbahan te Judiyo aw dimoton te balay i Simon aw si Andres. Timaking heman si Santiago aw si Juan.
MAR 1:30 Nayan, netigdaan se ogangan i Pedro bayi piglegenaw, aw inindanan dan si Jesus tepad kandin.
MAR 1:31 Penga niyan, dimoton si Jesus kandin, aw minawid te belad din, aw impeenaw din. Migkèpiya sikandin, aw penga niyan mig-inang te kànen i Jesus aw menge doma din.
MAR 1:32 Pegsallep te aldaw sìyan, inibing dan doton ki Jesus se kedita te otaw doen mesakit aw otaw dinetengan te bosaw.
MAR 1:33 Ontò medita se tege Kapirnaom netipon doton te lowà te balay.
MAR 1:34 Pinegolian din se medita otaw doen medita kemolò te mesakit, aw medita heman se bosaw impelowà din lekat te otaw. Meneng sinagda i Jesus se menge bosaw amon eked dan ikagi, so netegahan dan aw sinu sikandin.
MAR 1:35 Pegkeiselem niyan te wedà pa libtak se aldaw, minenaw si Jesus aw dimoton te wedad otaw eg-ogpà, aw migtawal-tawal doton.
MAR 1:36 Meneng nengemahà si Simon aw menge doma otaw kandin.
MAR 1:37 Pegkità dan kandin, minikagi dan, “Pinengemahà ka te kedita te otaw.”
MAR 1:38 Meneng minikagi si Jesus, “Domeleg kidon den doton te menge doma lonsod amon megtoladà a heman doton, so yan se doun te dimini a.”
MAR 1:39 Yan timeped sikandin te kedita te lonsod doton te probinsya te Galiliya, aw migtoladà kidoen te menge simbahan te Judiyo, aw impelowà din se menge bosaw lekat te otaw.
MAR 1:40 Nayan, doen otaw pigtompig dimoton ki Jesus, aw migpeido-ido diyà kandin. Limongken heman sikandin aw minikagi, “Aw doen ibeg nikaw, netegahan ko te mekebatog ka megpegolì kanak.”
MAR 1:41 Neido si Jesus aw nemaed kandin, aw minikagi, “Meibeg a. Kegolian ka.”
MAR 1:42 Pegketà, negolian sikandin.
MAR 1:43 Ontò migpunù si Jesus kandin, kagi din, “Keilangan wedad palos otaw indanan no tepad te ininang ko kamno. Meneng doton ka te pengolo te simbahan, aw pekitai se lawa no diyà kandin. Penga niyan, begayi se ibowang no iling te impunù i Moises amon metaga-taga se kedita te otaw te negolian ka den.” Penga niyan, impekesayo sikandin i Jesus.
MAR 1:45 Meneng pegkesayo din, medita se otaw inindanan din tepad te ininang i Jesus kandin. Yan se doun te wedà pekeokit si Jesus te menge lonsod so pelaban medita se otaw metipon. Yan miglegeb sikandin doton te ogpeanan mediyò te lonsod, aw medita se otaw dimoton kandin lekat te kedita te ogpeanan.
MAR 2:1 Nayan, peglaklak te pila aldaw, minolì si Jesus doton te Kapirnaom. Doen menge otaw dimineg te mig-ogpà sikandin diyà te balay kidoen.
MAR 2:2 Yan medita se otaw netipon doton didalem te balay igsà wedà pekeombà se menge otaw pengkey doton te lowà te balay medapag te lelebangan. Dalem te pegtoladà i Jesus kandan te kagi te Timanem,
MAR 2:3 dimateng se epat otaw neningga te otaw kenà egpekeiwal.
MAR 2:4 Wedà dan pekedapag diyà ki Jesus so ontò medita se otaw netipon. Yan nenayit dan doton te atep te balay sìyan, so pantal se atep niyan. Inowang dan se atep kidoen diatas i Jesus, aw intonton dan se otaw kenà egpekeiwal sipat inibatan din.
MAR 2:5 Pegkità i Jesus te ontò dan simalig diyà kandin, minikagi sikandin diyà te otaw kenà egpekeiwal, “Elew, pigwedad den se salà nikaw.”
MAR 2:6 Nayan, doen menge menenoladà te punù ingkeliwat i Moises nenenoo kidoen, aw mig-aneng-aneng dan,
MAR 2:7 “Eked kepakay se inikagi din sìyan. Migtompuyus sikandin te Timanem, so wedad mekebatog megwedad te salà meneng olò Timanem.”
MAR 2:8 Nayan, netegahan i Jesus aw eden se aneng-aneng dan, aw yan minikagi sikandin, “Nengà lay egdowa-dowa se aneng-aneng niyo?
MAR 2:9 Mola megpelingo-lingo se otaw megwedad te salà. Meneng eked pekebatog se otaw megpegolì te otaw kenà egpekeiwal singed aw doen tolos te Timanem diyà kandin.
MAR 2:10 Meneng so Timanem a Migpekeotaw, ipekità ko den kenyo te mekebatog a megwedad te salà te otaw dini te tanà.” Penga niyan, minikagi si Jesus diyà te otaw kenà egpekeiwal,
MAR 2:11 “Enaw ka. Loloni se inibatan no, aw olì ka den.”
MAR 2:12 Yan minenaw sikandin, aw inibing din se inibatan din, aw tinengtengan sikandin te menge otaw se minolì. Yan se doun te nepela se kedita dan, aw induyun dan se Timanem. Migpebelaw-belaway dan, “Wedad palos kinità tadon iling kenyan.”
MAR 2:13 Pegkesayo i Jesus lekat te balay, todà sikandin dimoton te kilid te lanaw. Netipon se kedita te otaw diyà kandin, aw migtoladà sikandin kandan.
MAR 2:14 Pegkesayo i Jesus lekat kidoen, doen iskribinti si Levi batà i Alfeo nenenoo kidoen te opisina din. Pegkità i Jesus kandin, minikagi sikandin, “Taking ka kanak.” Yan timindeg si Levi, aw timaking sikandin ki Jesus.
MAR 2:15 Penga niyan, kimaen si Jesus kidoen te balay i Levi, aw medita heman se menge iskribinti aw doma otaw nelegeb te salà kimaen doma i Jesus aw menge tinoledaan din, so medita se otaw iling kenyan timaking ki Jesus.
MAR 2:16 Doen heman kidoen menge menenoladà te punù ingkeliwat i Moises sakop te menge Parisiyo. Pegkità dan te kimaen si Jesus doma te menge iskribinti aw doma otaw nelegeb te salà, minikagi dan diyà te menge tinoledaan i Jesus, “Medaet iyan, so egpengaen sikandin doma te medaet otaw, menge iskribinti aw doma otaw nelegeb te salà.”
MAR 2:17 Meneng pegdineg i Jesus te inikagi dan, minikagi sikandin, “Kenà otaw wedad mesakit se bolongen te doktor, meneng otaw doen mesakit se bolongen din. Insogò a dini kenà amon tewalen ko se otaw eg-aneng-aneng te metòlid se eg-inangen dan, meneng insogò a dini amon tewalen ko se otaw mekesesalà.”
MAR 2:18 Nayan, egpowasa se menge tinoledaan i Juan, aw egpowasa heman se menge Parisiyo. Doen menge otaw dimoton ki Jesus aw minikagi dan, “Melikit egpowasa se menge tinoledaan i Juan, aw egpowasa heman se menge tinoledaan te Parisiyo. Nengà lay kenà egpowasa se kamno menge tinoledaan?”
MAR 2:19 Minikagi si Jesus, “Aw doen peipid, eked kepuluk se menge sigalak te meama peipiden dalem te kidoen pa sikandin.
MAR 2:20 Meneng doen aldaw domateng aw meabat lekat kandan se meama peipiden, aw yan se aldaw megpowasa dan so mepuluk dan.”
MAR 2:21 Mig-indan heman si Jesus te tegdeyanan tepad te kaling itoladà din, kagi din, “Eked kepakay aw tompalan se tapay penenaktun te kaling tila wedà pa bugsaki, so komotot se kaling tila aw itompal diyà te tapay, aw meinang labi pa dakel se lisì te saol.
MAR 2:22 Aw meg-inang heman se otaw te bino, eked din soli se temek te paras diyà te solanan ininang lekat te kindal te kambing tapay linanit, so aw megbohak se temek, megbeto se solanan tapay linanit, aw eleg kebàtan se bino aw solanan niyan. Yan keilangan isawol se temek inangen bino diyà te solanan kaling linanit.”
MAR 2:23 Nayan, Sebado se aldaw te peg-etod te menge Judiyo. Pegkesebado, minokit si Jesus aw menge tinoledaan din kidoen te kilid te pawà te trigo agpet den geniyen. Peg-okit dan kidoen, kimetel se menge tinoledaan din te oway te trigo, aw kinaen dan, so binallos dan.
MAR 2:24 Meneng minikagi se menge Parisiyo diyà ki Jesus, “Tay law. Mig-inang se menge tinoledaan no te salà, so doen punù ingkeliwat i Moises te keilangan eked kidon pegterbaho te aldaw te peg-etod.”
MAR 2:25 Minikagi si Jesus, “Kenà medaet se ininang dan. Nelibelan niyo den besi aw eden se insolat kidoen te kagi te Timanem tepad te ininang i David gebii dalem te si Abiatar se ontò pengolo te simbahan. So binallos si David aw menge sondalo timaking kandin, aw wedad palos kànen dan,
MAR 2:26 yan minawop sikandin diyà te balay te Timanem, aw kinaen din se pan imbegay diyà te Timanem. Yan heman se impekaen din te menge doma din. Pengkey doen punù ingkeliwat i Moises te mepakay olò iyan kànen te menge pengolo te simbahan, meneng kenà medaet se ininang i David.”
MAR 2:27 Minikagi heman si Jesus, “Migpunù se Timanem te doen aldaw te peg-etod kenà amon doen kelimahan te otaw, meneng amon doen kèpiyaan te otaw.
MAR 2:28 So siak se Timanem Migpekeotaw, mepakay aw siak se mikagi aw eden se mepakay inangen pengkey aldaw te peg-etod.”
MAR 3:1 Nayan, dimoton si Jesus te simbahan te Judiyo. Doen otaw kidoen nekepis se belad din.
MAR 3:2 Kidoen heman se menge otaw nengemahà te idimanda dan tepad ki Jesus, aw yan se doun te gayed dan migsimà kandin aw megpegolì sikandin te otaw doen mesakit te aldaw te peg-etod.
MAR 3:3 Minikagi si Jesus diyà te otaw nekepis se belad, “Diyà ka kanak.”
MAR 3:4 Penga niyan, minikagi si Jesus diyà te menge otaw timengteng kandin, “Tepad te punù ingkeliwat i Moises, eden lay se mepakay inangen tadon te aldaw te peg-etod? Meg-inang kidon lay te mèpiya, aw meg-inang kidon te medaet? Megtabang kidon lay te doma otaw, aw mengimatay kidon te doma?” Meneng wedad palos intaba dan.
MAR 3:5 Timengteng si Jesus diyà te kedita dan, aw neopal sikandin so nelidò se pedowan din tandà te kagsen te olo dan. Penga niyan, minikagi sikandin diyà te otaw nekepis se belad, “Oladi se belad nikaw.” Peg-olad din te belad din, pegketà migkèpiya iyan.
MAR 3:6 Penga niyan, nesayo se menge Parisiyo, aw migpebelaw-belaway dan sipat menge sakop i Herod tepad te inangen dan amon matay dan si Jesus.
MAR 3:7 Nayan, nesayo si Jesus aw menge tinoledaan din lekat kidoen aw dimoton dan te kilid te lanaw. Medita se otaw timaking kandan lekat te probinsya te Galiliya. Doen heman menge otaw lekat te probinsya te Judiya,
MAR 3:8 aw tege Jerusalem, aw lekat te probinsya te Idumya, aw lekat dipag te wayeg te Jordan, aw medita heman lekat te kedepagan te lonsod te Tiro aw Sidon. Pegdineg dan tepad te kedita te kepelahan ininang i Jesus, dimoton dan kandin.
MAR 3:9 Sagwa ontò medita se otaw netipon, migpunù sikandin te menge tinoledaan din te megpetagad dan te belangay sekayan din amon eked sikandin sigpiti te menge otaw.
MAR 3:10 Medita se otaw pinegolian din, aw yan medita se otaw doen mesakit migpeegaway se migpedapag diyà kandin amon memaed dan kandin aw kegolian dan.
MAR 3:11 Dimoton heman kandin se menge otaw dinetengan te bosaw. Pegkità dan kandin, limongken dan diyà kandin aw timawal dan te dakel kagi, “Sikona se ontò Batà te Timanem.”
MAR 3:12 Meneng ontò migpunù si Jesus te keilangan wedad doma otaw indanan dan tepad kandin.
MAR 3:13 Nayan, timikedeg si Jesus te bontod, aw tinawal din se menge otaw pinemallì din, aw dimoton dan kandin.
MAR 3:14 Penga niyan, doen sempolò teg dowa otaw pinemallì din aw iningedanan din dan menge apostol, amon gayed dan tomaking kandin, aw yan se insogò din megtoladà te Mèpiya Indan.
MAR 3:15 Imbegay din diyà kandan se tolos amon megpelowà dan te bosaw lekat te otaw.
MAR 3:16 Seini se menge ngadan te otaw pinemallì din, si Simon iningedanan i Jesus ki Pedro,
MAR 3:17 aw didowa batà i Sebedeo si Santiago aw adi din si Juan. Yan se telekedowa iningedanan i Jesus ki Boanerges. (Se kelebadan niyan, “kenà telawun.”)
MAR 3:18 Pinemallì din heman si Andres, si Felipe, si Bartolome, si Mateo, si Tomas, si Santiago batà i Alfeo, si Tadeo, si Simon meyseg,
MAR 3:19 aw si Judas Iscariote, sìyan migtolok ki Jesus.
MAR 3:20 Penga niyan, minolì si Jesus. Meneng wedà sikandin pekekaen aw menge tinoledaan din so medita se otaw todà netipon kidoen kandin.
MAR 3:21 Pegdineg te menge kedomaan i Jesus te wedà sikandin pekekaen, dimoton dan kandin amon ibingen dan sikandin doton te balay, so doen menge otaw eg-ikagi te migkebook sikandin.
MAR 3:22 Doen menge menenoladà te punù ingkeliwat i Moises tikedo te Jerusalem simila ki Jesus, kagi dan, “Dinetengan sikandin i Belsebul, se doma ngadan i Satanas. Pengolo te bosaw se nemegay kandin te tolos amon megpelowà sikandin te bosaw lekat te otaw.”
MAR 3:23 Meneng tinawal dan i Jesus, aw minikagi sikandin diyà kandan pineokit te tegdeyanan, “Eked kepakay aw megpelowà si Satanas te menge bosaw sinekopan din.
MAR 3:24 Simpana megbebolaw se sakop te sebad selotan, kebàtan se peglowan te selotan sìyan te eked kenamay.
MAR 3:25 Simpana megbebolaw se otaw migsebad te balay, kebàtan se ogpeanan dan te eked kenamay.
MAR 3:26 Simpana megbolaw si Satanas diyà te menge sakop din aw meinang dan poon din, kebàtan se peglowan din te eked kenamay.
MAR 3:27 “Aw magsen se otaw, eked keagaw se awop te balay din singed aw domateng se otaw labi pa magsen diyà kandin. Yan se mekedaeg te tig-apò te balay aw meglegapos kandin, aw penga niyan mengabat sikandin te awop te balay.
MAR 3:28 “Eneng-enengi niyo se kagi ko kenyo. Pengkey eden kemoloi te salà inangen te otaw, mepakay iyan pegwedaden te Timanem, pengkey megtompuyus dan kandin.
MAR 3:29 Meneng aw megtompuyus se otaw te Espiritu Santo, eked palos pegwedadi se salà din sìyan. Meneng ipelumun sikandin te wedad temanan tandà te salà din sìyan.”
MAR 3:30 Yan se inikagi din diyà kandan, so minikagi dan te dinetengan te bosaw si Jesus.
MAR 3:31 Nayan, pegtoladà i Jesus, dimateng se inay din aw menge kedowa din. Migtagad dan doton te lowà te balay. Impetawal dan sikandin so ibeg dan megkità kandin.
MAR 3:32 Medita se otaw nenenoo kidoen te dapag din, aw minikagi dan diyà kandin, “Doton te lowà se inay no aw menge kedowa nikaw. Meibeg dan ekon megkità kamno.”
MAR 3:33 Meneng minikagi si Jesus diyà kandan, “Mikagi a den diyà kenyo aw sinu se inay ko aw menge kedowa ko.”
MAR 3:34 Penga niyan, timengteng si Jesus diyà te menge otaw nenenoo kidoen, aw minikagi sikandin, “Seini se inay ko aw menge kedowa ko.
MAR 3:35 Se menge otaw egtolò te ibeg te Timanem, yan se meinang inay ko aw menge kedowa ko meama aw bayi.”
MAR 4:1 Nayan, doen aldaw migtoladà si Jesus doton te kilid te lanaw. Ontò medita se otaw netipon diyà kandin, aw yan se doun te minalin sikandin doton te belangay pinondohan medapag te kilid te lanaw. Nenenoo sikandin kidoen, meneng mig-ogpà se kedita te otaw tinoledaan din doton te kilid te lanaw kidoen te tanà.
MAR 4:2 Penga niyan, medita se kebenalan intoladà din diyà kandan pineokit te tegdeyanan. Pegtoladà din, minikagi sikandin,
MAR 4:3 “Doen otaw dimoton te pawà amon menabog te benì, so yan se ketanem te pegpenanem din.
MAR 4:4 Pegsabog din, doen benì nesabog diyà te dalan, aw kinaen iyan te menge manok te kebenesan.
MAR 4:5 Doen heman benì nesabog diyà te tanà kebeto-betowan, aw wedad nael tanà kidoen. Timobò iyan te wedà kenamay, so kenà medalem se tanà.
MAR 4:6 Meneng pegkelangkaw te aldaw, nelanes aw nematay so wedad nael dalid.
MAR 4:7 Doen heman benì nesabog diyà te pinonoan te sagbet doen tigis. Timilles heman se sagbet doen tigis aw kinelep se menge tobò aw nematay. Yan wedad palos pongo niyan.
MAR 4:8 Meneng doen benì nesabog diyà te melambò tanà. Yan se timobò aw timilles, aw minongo. Doen minongo te ketlowan, aw doen minongo te keneman aw ginatos.”
MAR 4:9 Minikagi heman si Jesus, “Keilangan menenalan se kedita niyo doen telinga.”
MAR 4:10 Penga te pegkesayo te keditaan te otaw, doen diyà te sempolò teg dowa tinoledaan i Jesus aw menge otaw nesamà mig-insà diyà kandin tepad te tegdeyanan intoladà din.
MAR 4:11 Minikagi si Jesus, “Sikiyo se pinetega-tegahan te Timanem te kebenalan tepad te peglowan din. Meneng olò pineokit te tegdeyanan se pegtoladà ko te doma otaw
MAR 4:12 amon pengkey tomengteng dan, meneng eked dan kità te kedegdagan niyan. Pengkey domineg dan, meneng eked dan ketaga-taga te kebenalan niyan, so aw mekelabet dan, mengenganay dan diyà kanak aw pegwedaden ko se salà ininang dan.”
MAR 4:13 Minikagi si Jesus, “Nepela a so wedà kaw pekelabet te tegdeyanan sìyan. Aw wedà kaw pekelabet kenyan, eked kaw pekelabet te kedita te doma tegdeyanan ipegtoladà ko kenyo.
MAR 4:14 Nayan, se kedegdagan te otaw nenabog te benì, yan se otaw egtoladà te kagi te Timanem.
MAR 4:15 Se benì nesabog diyà te dalan, yan se iling te otaw toledaan te kagi te Timanem. Aw domineg dan kenyan, doen inangen i Satanas amon kelibelan dan se kagi te Timanem dinineg dan.
MAR 4:16 Nayan, se benì nesabog diyà te tanà kebeto-betowan, yan se iling te otaw domineg te kagi te Timanem, aw meluba dan, aw tomolò dan kenyan te eked kenamay.
MAR 4:17 Meneng aw domateng se kelimahan aw pemilangen dan tandà te pegpemenal dan te kagi te Timanem, tenanan dan se pinemenalan dan, so iling dan te tinanem wedad nael dalid.
MAR 4:18 Nayan, se benì nesabog diyà te pinonoan te sagbet doen tigis, yan se iling te otaw ontò domineg te kagi te Timanem intoladà.
MAR 4:19 Meneng penga niyan, wedad ontong dan so dàgen dan te ibeg dan tomaking te ketanem te keneyonan, aw ibeg dan megkeyaman amon meluba dan, aw menge doma ibeg dan. Yan se doun te wedad ontong dan diyà te kagi te Timanem dinineg dan.
MAR 4:20 Meneng se benì nesabog diyà te melambò tanà, yan se iling te otaw domineg te kagi te Timanem, aw menenalan dan kenyan. Doen ontong dan iling te intanem mongo te ketlowan, aw keneman aw ginatos.”
MAR 4:21 Minikagi si Jesus, “Aw menemtem se otaw te solò, eked din iyan sengkobi. Eked din heman elesi doton te siyong te katri. Meneng mèpiya aw isawol din iyan diyà te kelengkawan.
MAR 4:22 Iling heman kenyan, wedad in-eles songkani eked kitai te modi aldaw. Wedad heman imbolon songkani eked keindan te modi aldaw.
MAR 4:23 Keilangan menenalan se kedita niyo doen telinga.”
MAR 4:24 Minikagi heman si Jesus, “Keilangan toloen niyo se dinineg niyo.
MAR 4:25 Se otaw kominawà te kebenalan, yan se dogangan te kebenalan. Meneng se otaw eked kinawà te kebenalan, yan se pegwedadan te kebenalan.”
MAR 4:26 Minikagi heman si Jesus, “Iling kani se peglowan te Timanem. Aw menanem se otaw te benì doton te pawà din,
MAR 4:27 penga niyan, wedad ketetana din tepad te pegtilles niyan pengkey aldaw aw delem, so gayed tomobò aw tomilles se itanem din pengkey wedà din ketegahi se pegtobò niyan.
MAR 4:28 Gayed tomilles se itanem kidoen te tanà, so onà tomobò, aw penga niyan domawen, aw penga niyan mongo iyan.
MAR 4:29 Aw metesan se pongo, geniyen iyan te otaw, so dimateng den se aldaw te peglegani.”
MAR 4:30 Minikagi heman si Jesus, “Meg-indan a den kenyo tepad te peglowan te Timanem pineokit te tegdeyanan seini.
MAR 4:31 Doen benì ontò deitek intanem te otaw doton te pawà din. Pengkey wedad ekon palos benì labi pa deitek kenyan,
MAR 4:32 meneng penga te pegtanem din, timilles iyan, aw labi pa iyan dakel diyà te kedita te doma intanem din. Dakel se menge panga niyan, aw migsalag se menge manok kidoen.”
MAR 4:33 Migtoladà si Jesus kandan pineokit te medita tegdeyanan iling kenyan taman te egkelebetan dan.
MAR 4:34 Impeokit din te tegdeyanan se kedita te intoladà din kandan. Meneng gayed din ipeg-indan te menge tinoledaan din dalem te wedad doma dan aw eden se kedegdagan te kedita te tegdeyanan.
MAR 4:35 Pegkeapon te aldaw sìyan, minikagi si Jesus diyà te menge tinoledaan din, “Mèpiya aw matas kidon doton dipag te lanaw.”
MAR 4:36 Penga niyan, tinenanan dan se kedita te otaw netipon kidoen te kilid te lanaw, aw simakay dan heman te belangay tapay sinekayan i Jesus. Doen heman menge doma belangay timaking kandan.
MAR 4:37 Wedà kenamay, dinetengan dan te kelamag ontò mebandes, aw nekeawop se wayeg diyà te belangay, aw agpet dan neteled.
MAR 4:38 Meneng neketedogi si Jesus diyà te olonan kidoen te olin. Linoka dan sikandin aw minikagi dan, “Sir, tebangi kay, so melemes kidon den.”
MAR 4:39 Neloka si Jesus aw sinagda din se kelamag. Minikagi sikandin diyà te balud, “Pegkelinaw ka.” Penga niyan, timunung se kelamag aw migkelinaw se lanaw.
MAR 4:40 Minikagi si Jesus, “Wedà pa kedì kelobos se pegsalig niyo kanak. Ikà niyo egkelemitan.”
MAR 4:41 Ontò dan nepela aw migpebelaw-belaway dan, kagi dan, “Ontò sikandin metolos, so pengkey kelamag aw balud timolò kandin.”
MAR 5:1 Nayan, dimeleg dan doton dipag te lanaw medapag te Gerasa.
MAR 5:2 Pegtenà i Jesus, doen otaw dinetengan te bosaw simongon kandin lekat te menge lebenganan,
MAR 5:3 so yan se eg-ogpaan din. Ontò sikandin magsen, aw yan se doun te eked sikandin kegapos te doma otaw, pengkey doen sengkalì.
MAR 5:4 Pengkey melikit dan sikandin eggeposen te sengkalì, aw egpentongan dan sikandin, meneng gayed din egbogtoen se sengkalì, aw egbàtan din se ipegpantong kandin. Wedad palos otaw mekedaeg kandin so ontò magsen.
MAR 5:5 Pengkey aldaw aw delem, gayed sikandin eglegeb kidoen te lebenganan aw doton heman te bontod, aw gayed egpuypuy aw egpemoneg te lawa din te bato.
MAR 5:6 Pegkità din ki Jesus doton te mediyò, kimagnan sikandin simongon ki Jesus aw limongken diyà kandin.
MAR 5:7 Migpunù si Jesus diyà te bosaw, kagi din, “Lowà ka den diyà kandin.” Minikagi se otaw te dakel kagi din, “Jesus, Batà te Timanem ontò melangkaw, ikà egsamok kanak. So Timanem se egtengteng kenita, memoyò a diyà kamno, ikà bag egpeeleg kanak.”
MAR 5:9 Mig-insà si Jesus, “Sinu lay se ngadan nikaw?” Timaba sikandin, “Si Minelalan se ngadan ko, so medita kay.”
MAR 5:10 Ontò nemoyò se bosaw diyà ki Jesus te eked din dan peseyowi doton te mediyò ogpeanan.
MAR 5:11 Ontò medita se osa nenowal doton te bontod medapag.
MAR 5:12 Nemoyò se menge bosaw diyà ki Jesus, kagi dan, “Aw mepakay diyà kamno, malin kay doton te menge osa sìyan.”
MAR 5:13 Yan impealin din dan. Limowà se menge bosaw lekat te otaw aw minalin dan doton te osa. Penga niyan, kimagnan se kedita te osa pesalo te keba, aw kimahang dan doton te lanaw. Nelemes se kedita dan menge dowa melalan.
MAR 5:14 Penga niyan, kimadas se menge telediyaga te osa aw mig-indan dan tepad kenyan doton te lonsod aw kedepagan niyan. Penga niyan, dimoton se menge otaw inindanan dan amon komità dan kenyan.
MAR 5:15 Pegdateng dan doton ki Jesus, kinità dan se otaw pinelowaan te minelalan se bosaw. Nenenoo sikandin, aw nenelowal den, aw migkèpiya den. Pegkità dan kenyan, nelemitan dan.
MAR 5:16 Inindanan dan heman te menge otaw kimità kenyan tepad te neinang diyà te otaw sìyan aw menge osa.
MAR 5:17 Lekat niyan, nemoyò dan te mesayo si Jesus lekat te ogpeanan dan.
MAR 5:18 Penga niyan, te pegsakay i Jesus te belangay, nemoyò se otaw pinelowaan te bosaw aw mepakay sikandin tomaking.
MAR 5:19 Meneng wedà din petekingi, so inikegiyan i Jesus, “Olì ka den doton te menge kedomaan nikaw, aw peg-indan ka kandan tepad te mèpiya ininang te Pengolo kamno, aw keido din kamno.”
MAR 5:20 Penga niyan, nesayo sikandin aw mig-indan doton te Dikapolis tepad te mèpiya ininang i Jesus diyà kandin. Yan se doun te nepela se kedita te otaw inindanan din.
MAR 5:21 Pegbatas i Jesus doton dipag te lanaw, ontò medita se otaw netipon diyà kandin doton te kilid te lanaw.
MAR 5:22 Penga niyan, dimoton ki Jesus se sebad obanen te simbahan te Judiyo, ngadan din si Jairo. Pegkità din ki Jesus, limongken sikandin
MAR 5:23 aw nemoyò, kagi din, “Ontò netigdaan se deitek batà ko bayi. Peg-ayas ka bag, aw pemàdi sikandin amon kegolian aw eked kematay.”
MAR 5:24 Penga niyan, timaking si Jesus kandin. Ontò medita se doma otaw timaking ki Jesus aw migpesegsegay dan kidoen te dalan.
MAR 5:25 Nayan, doen heman sebad bayi timaking kandin pigdipenogan te sempolò den teg dowa se omay.
MAR 5:26 Medita se doktor migbolong kandin, aw neamin se kedakel te kwarta din. Ontò sikandin ineleg, so pengkey eden se imbolong dan kandin, meneng labi den beling medaet se mesakit din.
MAR 5:27 Pegdineg din tepad te eg-inangen i Jesus, dimoton sikandin aw migpedapag diyà te getan din aw nemaed te saol din,
MAR 5:28 so tapay sikandin mig-aneng-aneng te megolì se mesakit din aw pemàdan din olò se saol i Jesus.
MAR 5:29 Pegketà, negolì se mesakit din, aw mig-imanman sikandin te mèpiya den se lawa din.
MAR 5:30 Pegketaga-taga i Jesus te doen neinang pineokit te tolos din, miniling sikandin aw timengteng diyà te menge otaw timaking kandin, aw minikagi, “Sinu lay se nemaed te saol ko?”
MAR 5:31 Minikagi se menge tinoledaan din, “Ikà eg-insà aw sinu se nemaed kamno, so pigdenganan ka te medita otaw.”
MAR 5:32 Meneng gayed timengteng si Jesus diyà te kedita dan amon kitaen din aw sinu se nemaed kandin.
MAR 5:33 Nelemitan se bayi sìyan, so netegahan din te negolì den se mesakit din. Yan migpedapag sikandin diyà ki Jesus aw tinegangtang tandà te lamit din. Limongken sikandin diyà ki Jesus aw mig-indan kandin te kedita tepad te mesakit din aw pegkegolì niyan.
MAR 5:34 Penga niyan, minikagi si Jesus, “Atà, simalig ka diyà kanak, aw yan se doun te negolian ka. Olì ka den. Mèpiya den se pedowan aw lawa nikaw.”
MAR 5:35 Telobo pa minikagi si Jesus diyà te bayi, dimateng se otaw lekat te balay te obanen te simbahan, aw minikagi diyà ki Jairo, “Nematay den se batà nikaw. Wedad den kekemowan te pegpedeleg no te Menenoladà doton te balay nikaw.”
MAR 5:36 Meneng wedà segmani i Jesus se inikagi dan. Minikagi sikandin diyà ki Jairo, “Ikà egkepuluk, meneng salig ka diyà kanak.”
MAR 5:37 Wedad doma otaw impetaking i Jesus doton te balay, meneng olò si Pedro, aw si Santiago, aw adi i Santiago si Juan.
MAR 5:38 Pegdateng dan doton te balay i Jairo, kinità i Jesus se menge otaw migbelisì, aw migkelag, aw migmatay tandà te lano dan.
MAR 5:39 Peg-awop din diyà te balay, minikagi sikandin, “Ikà niyo egbelisì. Ikà niyo egkelag. Wedà kematay se batà. Olò sikandin timedogi.”
MAR 5:40 Meneng nebebeyatan dan si Jesus. Penga niyan, impelowà din se kedita dan, aw dimoton sikandin te tambì inibatan te batà. Impetaking din olò se tinoledaan din aw amay aw inay te batà.
MAR 5:41 Pinemàdan din se belad te batà, aw minikagi te kagi te Hebreo, “Talita kumi.” (Se kelebadan niyan, “Atà, enaw ka.”)
MAR 5:42 Pegketà, minenaw sikandin aw migpanaw-panaw, so sempolò den teg dowa se omay din. Ontò nepela se amay aw inay din.
MAR 5:43 Meneng ontò migpunù si Jesus te wedad palos otaw mepakay indanan dan tepad te peg-antay din te batà sìyan. Minikagi heman si Jesus te mèpiya aw pemekànen dan se batà.
MAR 6:1 Nayan, nesayo si Jesus aw minolì doton te kandin lonsod. Timaking heman se menge tinoledaan din.
MAR 6:2 Pegkesebado, migtoladà sikandin doton te simbahan te Judiyo. Nepela se medita otaw dimineg kandin, aw minikagi dan, “Ontò kidon nepela so dakel den se nebatog din. Ontò sikandin biyasa, aw mèpiya heman se kepelahan eg-inangen din.
MAR 6:3 Meneng netegahan tadon te olò sikandin karpintiro, aw si Maria se inay din. Netegahan tadon heman se menge kedowa din si Santiago, si Jose, si Judas, aw si Simon. Eg-ogpà heman se menge etebay din dini kenitadon.” Yan nebensi dan ki Jesus.
MAR 6:4 Penga niyan, minikagi sikandin, “Gayed egsegmanen te doma otaw se telekeliwat te kagi te Timanem, meneng kenà sikandin egsegmanen te menge otaw te kandin lonsod aw menge kedowa din.”
MAR 6:5 Nepela si Jesus so wedà dan pemenal kandin, aw yan se doun te pilabok se kepelahan ininang din kidoen. Pilabok olò se otaw pinemàdan din aw negolian. Nayan, miglegeb si Jesus doton te kedita te lonsod, aw migtoladà kidoen.
MAR 6:7 Doen sebad aldaw migtipon sikandin te sempolò teg dowa tinoledaan din. Imbegay din diyà kandan se tolos amon megpelowà dan te bosaw lekat te otaw, aw insogò din dan teg dowa-dowa doton te menge doma ogpeanan.
MAR 6:8 Te wedà dan pa kesayo, doen impunù din kandan te olò bangkà se mepakay dan ibingen. Eked dan pengibing te kànen, aw kelepì, aw kwarta, so togpoan dan te otaw toledaan dan.
MAR 6:9 Mepakay aw menepatos dan, meneng eked dan pengibing te ekasan.
MAR 6:10 Migpunù sikandin, kagi din, “Aw domateng kaw doton te lonsod, ketingen kaw diyà te sebad balay. Ikà niyo eg-alin-alin lamig domeleg kaw doton te doma lonsod.
MAR 6:11 Aw doen otaw eked pegsagman kenyo, aw eked dan penenalan te itoladà niyo, tektaki niyo se napò te tanà lekat te sepatos niyo te pegkesayo niyo lekat te lonsod dan. Yan metaga-taga se otaw kidoen te doen salà ininang dan, so wedà dan penenalan kenyo.”
MAR 6:12 Penga niyan, nesayo dan. Pengkey kenan dan pesalo, migtoladà dan te keilangan megselsel se kedita te otaw te salà ininang dan.
MAR 6:13 Medita se bosaw impelowà dan lekat te otaw, aw medita heman se otaw doen mesakit pinetedakan dan te lana aw negolian dan.
MAR 6:14 Nayan, dimineg se selotan si Herod tepad te ininang i Jesus aw menge tinoledaan din, so ontò nedengeg si Jesus. Doen menge otaw eg-ikagi, “Sikandin besi si Juan Memonyagay neantay den lekat te nematay, aw yan se doun te eg-inangen din se kepelahan metolos.”
MAR 6:15 Meneng doen heman menge doma otaw eg-ikagi, “Sikandin se telekeliwat te kagi te Timanem gebii si Elias.” Doen heman menge doma otaw eg-ikagi, “Ontò sikandin telekeliwat te kagi te Timanem, iling te menge telekeliwat te kagi te Timanem gebii.”
MAR 6:16 Meneng pegdineg i Herod tepad te ininang i Jesus, minikagi sikandin, “Sikandin besi si Juan Memonyagay, sìyan impesipal ko se lieg din, meneng neantay besi lekat te nematay.”
MAR 6:17 Yan se inikagi i Herod, so kedengan impedakep din si Juan, aw impegapos din, aw impekeleboso din. Yan se ininang din ki Juan amon meluba se nayi din si Herodias inagaw din diyà te kedowa din si Felipe.
MAR 6:18 Peg-agaw i Herod te nayi din, simila si Juan kandin, kagi din, “Mig-inang ka te salà, so nengagaw ka te nayi nikaw.”
MAR 6:19 Yan se doun te neopal si Herodias diyà ki Juan, aw ibeg din ipeimatay din si Juan. Meneng wedà pekedeleg,
MAR 6:20 so egsagman si Herod ki Juan, so netegahan din te gayed eg-inang si Juan te metòlid, aw wedad salà ininang din. Yan se doun te eked kepakay diyà kandin aw imetayan si Juan. Egkeibeg si Herod domineg te ipegtoladà i Juan, meneng pegdineg din kenyan, ontò migkebulung se aneng-aneng din.
MAR 6:21 Nayan, mig-inang si Herod te pista tepad te aldaw te pegtebaw din, aw impetanod din se kedita te opisyal, aw kapitan te sondalo, aw otaw meyaman. Yan se aldaw intelegsà i Herodias amon ipeimatay din si Juan.
MAR 6:22 Pegsayaw te laga batà i Herodias, ontò neluba si Herod aw menge otaw timanod. Penga niyan, minikagi si Herod, “Pemoyoi den se ibeg no diyà kanak pengkey eden, so ibegay ko iyan diyà kamno.”
MAR 6:23 Migsapà si Herod diyà kandin, kagi din, “Pengkey eden se pemoyoen nikaw, yan se ibegay ko kamno, pengkey taman te ketengà te tanà eglowanan ko.”
MAR 6:24 Penga niyan, nesayo se laga aw mig-insà diyà te inay din, kagi din, “Eden lay se mèpiya pemoyoen ko?” Minikagi se inay din si Herodias, “Pemoyoi te ipesipal din se lieg i Juan Memonyagay.”
MAR 6:25 Penga niyan, ayas limikò se laga doton ki Herod, aw nemoyò, kagi din, “Ibeg ko, ipesipal no se lieg i Juan Memonyagay, aw ipesawol no se olo din diyà te dakel sablag, aw ipeibing no dini kanak te eked kenamay.”
MAR 6:26 Ontò nelidò se pedowan i Herod. Meneng so migsapà sikandin, aw eked keibeg silahen te menge otaw timanod, eked sikandin tomalis te pakang din diyà te laga.
MAR 6:27 Yan se doun te wedà sikandin peg-alà-alà, aw insogò din se sondalo mangay te olo i Juan. Penga niyan, dimoton se sondalo te keleboso aw sinipal din se lieg i Juan.
MAR 6:28 Insawol din se olo din diyà te sablag, aw imbegay din diyà te laga, aw inibing te laga doton te inay din.
MAR 6:29 Pegdineg te menge tinoledaan i Juan te inimetayan sikandin, dimoton dan te keleboso, aw inabat dan se lawa din aw inlebeng dan iyan.
MAR 6:30 Nayan, peg-olì te menge sogounun i Cristo doton kandin, mig-indan dan diyà kandin tepad te kedita te ininang dan aw intoladà dan.
MAR 6:31 Penga niyan, minikagi si Jesus, “Tenani niyo se doma otaw, aw taking kaw kanak doton te kesikmihan amon meg-etod kaw te eked kenamay.” Yan se inikagi din, so medita se otaw gayed egdoton kandin, aw kenà egpekekaen si Jesus aw menge tinoledaan din.
MAR 6:32 Penga niyan, nesayo dan lekat kidoen. Simakay dan te belangay aw dimoton dan te kesikmihan te wedad doma dan.
MAR 6:33 Nayan, medita se otaw kimità te pegkesayo dan, aw netegahan dan te sikandan si Jesus aw menge tinoledaan din. Yan nesayo dan lekat te medita ogpeanan dan, aw kimagnan dan diyà te kilid te lanaw, aw nekeonà dan dimateng doton te peselowan te belangay sinekayan i Jesus.
MAR 6:34 Pegtenà i Jesus, kinità din se ontò medita otaw migtagad kandin. Ontò din dan neidowan, so iling dan te menge ayam-ayam karniro megketading te eked kenamay aw wedad megdiyaga kandan. Penga niyan, migtoladà si Jesus kandan te medita kebenalan.
MAR 6:35 Pegkeapon niyan, dimoton se tinoledaan din kandin, aw minikagi dan, “Ontò ini kebigtilan, aw agpet den delem.
MAR 6:36 Pekeseyowi se kedita te otaw doton te menge lonsod aw kedepagan amon mayad dan te kànen.”
MAR 6:37 Meneng minikagi si Jesus, “Pemekàni niyo dan.” Minikagi dan diyà kandin, “Eked day kebatog. Simpana mayad kay te pan botong te ipekaen day kandan, keilangan dakel se kwarta ibayad day kenyan, menge dowa gatos kwarta dinaryo.”
MAR 6:38 Minikagi si Jesus, “Tengtengi niyo aw pila se pan inibing niyo.” Pegkità dan, limikò dan doton ki Jesus aw minikagi dan, “Lima olò se pan, aw didowa se ikan.”
MAR 6:39 Penga niyan, impeebong-ebong i Jesus se kedita te otaw aw impeonsad din dan kidoen te sagbet.
MAR 6:40 Peg-onsad dan, doen menge inebongan teg sebad gatos otaw, aw doen heman menge inebongan teg keliman otaw.
MAR 6:41 Penga niyan, inabat i Jesus se lima pan aw didowa ikan. Limengag sikandin doton te langit aw migpesiontong diyà te Timanem kenyan. Penga niyan, binelà-belà din se pan aw imbegay din diyà te menge tinoledaan din amon iteped dan diyà te menge otaw netipon. Impeteped din heman se didowa ikan diyà te kedita te otaw.
MAR 6:42 Kimaen se kedita dan aw nebesog dan.
MAR 6:43 Penga niyan, inimon dan se samà te pan aw ikan kinaen dan, aw sempolò teg dowa se buun nepenò.
MAR 6:44 Menge lima melalan se meama kimaen te pan, aw doen heman menge bayi aw mengisù.
MAR 6:45 Penga niyan, impeonà i Jesus se menge tinoledaan din simakay te belangay pesalo doton dipag te lanaw, doton te Bitsayda. Dalem niyan, impeolì din se kedita te otaw netipon.
MAR 6:46 Pegkesayo dan, timikedeg si Jesus doton te bontod amon megtawal-tawal.
MAR 6:47 Pegsallep te aldaw, mediyò den se belangay doton te lawod te lanaw. Meneng si Jesus kidoen pa te bontod olò din sebad.
MAR 6:48 Kinità din te ontò melima se pegbugsay dan, so simongsong dan te kelamag. Ontò mata-mata te iselem, dimoton si Jesus kandan aw minipanaw sikandin diyà te lanto te lanaw. Ibeg din mekesaeb kandan.
MAR 6:49 Meneng pegkità dan kandin, eden dan aw along sikandin, so minipanaw sikandin diyà te lanto te lanaw. Migpuypuy dan,
MAR 6:50 so kimità se kedita dan kandin, aw ontò dan nelemitan. Meneng pegketà timawal si Jesus, kagi din, “Peseligi niyo se pedowan niyo, so siaken ini. Ikà niyo egkelemitan.”
MAR 6:51 Penga niyan, eleg simakay si Jesus te belangay, aw timunung se kelamag. Ontò dan nepela,
MAR 6:52 so pengkey kinità dan se kepelahan ininang i Jesus diyà te pan aw ikan, meneng wedà dan pa ketegahi te doen tolos din, so magsen se olo dan.
MAR 6:53 Nayan, penga te pegbatas dan te lanaw, dimateng dan doton te Genesarit, aw migpondo dan kidoen.
MAR 6:54 Pegtenà dan, kimilala se menge otaw ki Jesus,
MAR 6:55 aw ayas dan inangay se kedita te otaw doen mesakit lekat te kedepagan niyan. Tiningga dan se otaw aw dimoton dan te pengkey kenan ekon si Jesus.
MAR 6:56 Pengkey doton te lonsod aw mediyò te lonsod, pengkey kenan pesalo si Jesus, inibing dan se otaw doen mesakit doton te pedyanan, aw nemoyò dan diyà ki Jesus aw mepakay dan olò memaed te toktok te saol din, aw negolian se kedita dan nemaed kenyan.
MAR 7:1 Nayan, doen menge Parisiyo aw menenoladà te punù ingkeliwat i Moises dimoton ki Jesus lekat te Jerusalem.
MAR 7:2 Kinità dan te limàpang se menge tinoledaan i Jesus te ketanem te menge Parisiyo, so kimaen dan te wedà dan peg-onaw te belad dan.
MAR 7:3 Doen ketanem te Parisiyo aw kedita te doma dan Judiyo te eked dan kaen singed aw onà dan onawan se belad dan iling te ketanem intoladà te kemonaan dan kandan.
MAR 7:4 Aw molì dan lekat te pedyanan, linisan dan se lawa dan te eked dan pa kaen. Medita heman se doma ketanem egtekingan dan tepad te pegligaw te baso, aw keldiro, aw telepagan ininang te kinis, aw katri.
MAR 7:5 Minikagi se menge Parisiyo aw menenoladà te punù ingkeliwat i Moises, “Kenà egtaking se menge tinoledaan no te ketanem te kemonaan tadon, so kimaen dan te wedà dan peg-onaw te belad dan.”
MAR 7:6 Minikagi si Jesus, “Eden niyo aw egpenimanem kaw. Sikiyo se tinedoan te kagi te Timanem ingkeliwat i Isaias gebii, ‘Pengkey eg-ikagi se otaw sìyan te egtaking dan kanak, meneng wedà kelobos se pedowan dan kanak.
MAR 7:7 Wedad ontong te pegsimba dan kanak, so se ketanem te otaw ipegtoladà dan, yan se ininang dan punù te Timanem.’
MAR 7:8 Limengà kaw den te pegtolò niyo te punù te Timanem, aw gayed kaw egtaking te ketanem te otaw.”
MAR 7:9 Minikagi heman si Jesus diyà kandan, “Ontò kaw biyasa egtinàyog te punù te Timanem amon gayed kaw tomaking te ketanem niyo.
MAR 7:10 Migpunù si Moises, ‘Keilangan segmanen no se amay aw inay nikaw.’ Migpunù heman sikandin, ‘Keilangan imetayan se otaw megtindaet te amay aw inay din.’
MAR 7:11 Meneng egtoladà kaw te mepakay aw eked pegsagman se otaw te amay aw inay din aw olò mikagi diyà kandan, ‘Se itabang ko peden kenyo, yan se ininang ko corban, so imbegay ko den iyan diyà te Timanem.’
MAR 7:12 Yan segdahen niyo se pegtabang din te amay aw inay din.
MAR 7:13 Pineokit te pegtaking niyo te menge ketanem egkeliwaten niyo, timinàyog kaw te kagi te Timanem te keilangan segmanen niyo se amay aw inay niyo. Medaet heman se menge doma eg-inangen niyo.”
MAR 7:14 Nayan, medita se otaw netipon kidoen, aw timawal si Jesus diyà kandan amon megpedapag dan diyà kandin. Minikagi sikandin, “Penenalan kaw kanak se kedita niyo amon mekelabet kaw kani.
MAR 7:15 Kenà egpekesalà se otaw pineokit te iawop din diyà te bahà din. Meneng egpekesalà se otaw pineokit te lomowà lekat te bahà din. [
MAR 7:16 Keilangan menenalan se kedita niyo doen telinga.]”
MAR 7:17 Penga niyan, nesayo si Jesus lekat kidoen te otaw netipon, aw minawop diyà te balay. Timaking se menge tinoledaan din aw mig-insà dan kandin tepad te tegdeyanan sìyan.
MAR 7:18 Minikagi si Jesus, “Nepela a so iling kaw heman te doma otaw wedà pekelabet. Pengkey eden se kànen iawop diyà te bahà te otaw, kenà egpekesalà se otaw pineokit kenyan.
MAR 7:19 Eked deleg se kànen doton te pedowan din, meneng domeleg iyan doton te getek, aw penga niyan lomowà lekat te lawa.” Pineokit te sìyan kagi i Jesus, netegahan tadon den te mepakay aw komaen kidon te pengkey eden kemoloi te kànen.
MAR 7:20 Minikagi heman si Jesus, “Meneng se kagi lomowà lekat te bahà te otaw, yan se doun te egpekesalà se otaw.
MAR 7:21 Didalem te pedowan se kelekatan te medaet ibeg te otaw eglayok te kenà kandan esawa, aw egpenakaw, aw egbonò, aw eglakad,
MAR 7:22 aw egkeibeg te kedònan te doma, aw eg-inang te medaet, aw eg-akal, aw wedad yàyà metibayi, aw eg-ingà, aw egbaet-baet, aw egpelangkaw-langkaw, aw wedad inenengen.
MAR 7:23 Lekat didalem te pedowan se kedita te medaet sìyan, aw egpekesalà se otaw eg-inang kenyan.”
MAR 7:24 Timindeg si Jesus aw nesayo lekat kidoen, aw dimoton te probinsya medapag te lonsod te Tiro aw Sidon. Pegdateng din doton, mig-ogpà sikandin diyà te balay kidoen. Pengkey ibeg din wedad metaga-taga aw kenan sikandin, meneng wedà sikandin pekeeles.
MAR 7:25 Doen batà bayi dinetengan te bosaw, aw dinineg te inay din te dimateng si Jesus. Yan dimoton se inay te batà sìyan aw limongken diyà kandin.
MAR 7:26 Kenà sikandin Judiyo, so eg-ikagi te Griego aw timebaw doton te Fenisya sakop te probinsya te Sirya. Nemoyò sikandin te ipelowà i Jesus se bosaw lekat te batà din.
MAR 7:27 Meneng mig-indan si Jesus te tegdeyanan amon metaga-taga se bayi te olò menge Judiyo se tebangan din, kagi din, “Keilangan onà ipekaen te otaw se menge batà din, so eked kepakay aw ebaten din se kànen te menge batà din amon ibegay din diyà te menge toyang.”
MAR 7:28 Minikagi se bayi, “Sir, benal iyan. Meneng mepakay aw komaen se toyang te momò medagdag lekat te kinaen te menge batà.”
MAR 7:29 Minikagi si Jesus, “Tandà te inikagi no sìyan, mepakay aw molì ka den, so limowà den se bosaw lekat te batà nikaw.”
MAR 7:30 Peg-olì te bayi sìyan, kinità din se batà din minibat, aw wedad den bosaw diyà kandin.
MAR 7:31 Nayan, nesayo si Jesus lekat te lonsod te Tiro, aw minokit doton te lonsod te Sidon aw kedepagan te Dikapolis lamig dimateng doton te lanaw te Galiliya.
MAR 7:32 Pegdateng din doton, doen otaw inibing doton kandin bingelen aw kenà egkelitok se kagi din. Nemoyò se menge doma din te pemàdan i Jesus amon kegolian.
MAR 7:33 Penga niyan, inibing sikandin i Jesus doton te keligbinan, aw inloglog din se intetodò din diyà te telinga te otaw bingelen, aw inelem din se intetodò din te ngingi aw pinemàdan din se dilà te otaw sìyan.
MAR 7:34 Penga niyan, limengag sikandin doton te langit aw migpedo-pedo tandà te keido din, aw minikagi, “Efata.” (Se kelebadan niyan, “Keowang ka den.”)
MAR 7:35 Pegketà, nekedineg se otaw sìyan, aw migkèpiya se dilà din aw nelitok se kagi din.
MAR 7:36 Penga niyan, migpunù si Jesus te keilangan eked dan indani diyà te doma otaw tepad te kepelahan sìyan. Pengkey ontò sikandin migpunù, meneng labi dan pa mig-indan kenyan diyà te doma otaw.
MAR 7:37 Ontò dan nepela, aw minikagi dan, “Ontò mèpiya se kedita te ininang din, so pengkey bingelen impedineg din, aw omo impeikagi din.”
MAR 8:1 Nayan, wedà kenamay, ontò medita se otaw netipon diyà ki Jesus. Pegkewedad te kànen dan, tinawal i Jesus se menge tinoledaan din, aw minikagi sikandin,
MAR 8:2 “Neidowan ko den se menge otaw seini, so netelowan den dan timaking kanak, aw wedad den kànen dan.
MAR 8:3 Simpana ipeolì ko dan te binallos dan pa, metapì dan kidoen te dalan, so mediyò se ogpeanan te keditaan dan.”
MAR 8:4 Minikagi se tinoledaan din, “Meneng kebigtilan ini, aw wedad palos ebatan tadon te pan amon ipekaen tadon kandan.”
MAR 8:5 Mig-insà si Jesus, “Pila lay se pan inibing niyo?” Timaba dan, “Pito olò.”
MAR 8:6 Penga niyan, impeonsad din se kedita te otaw diyà te tanà. Inabat din se pito pan, aw migpesiontong diyà te Timanem kenyan. Binelà-belà din iyan, aw imbegay din diyà te menge tinoledaan din, aw inteped dan diyà te menge otaw netipon.
MAR 8:7 Doen heman pilabok ikan dedeitek. Migpesiontong heman si Jesus diyà te Timanem kenyan, aw impeteped din heman iyan diyà kandan.
MAR 8:8 Kimaen se kedita dan aw nebesog dan. Penga niyan, inimon dan se samà te pan kinaen dan, aw pito se boliyas nepenò.
MAR 8:9 Menge epat melalan se otaw kimaen kenyan.
MAR 8:10 Penga niyan, impeolì i Jesus se kedita dan, aw simakay sikandin te belangay doma te menge tinoledaan din, aw dimoton dan te probinsya medapag te Dalmanota.
MAR 8:11 Nayan, doen menge Parisiyo dimoton ki Jesus. Megdindil dan peden kandin. Ibeg dan megtandà dan kandin, aw yan se doun te nemoyò dan te ipekità din diyà kandan se pengilala amon ketegahan dan te ontò sikandin insogò te Timanem.
MAR 8:12 Ontò migpedo-pedo si Jesus tandà te puluk din, aw minikagi sikandin, “Wedad kekemowan te pegpekità ko kenyo te pengilala. Eneng-enengi niyo se kagi ko seini. Wedad palos pengilala ipekità te Timanem diyà kenyo.”
MAR 8:13 Penga niyan, nesayo si Jesus lekat kidoen, aw simakay te belangay pesalo doton dipag te lanaw.
MAR 8:14 Nayan, pegbatas dan te lanaw, wedad pan inibing te menge tinoledaan i Jesus, so nelibelan dan se bawo dan. Meneng doen sebad olò pan kidoen te belangay.
MAR 8:15 Migpunù si Jesus kandan, kagi din, “Peg-ahà kaw amon eked kaw ketini te yist te menge Parisiyo aw si Herod.”
MAR 8:16 Migpebelaw-belaway se menge tinoledaan din, kagi dan, “Yan se inikagi din so wedad pan inibing tadon.”
MAR 8:17 Meneng netegahan i Jesus aw eden se aneng-aneng dan, aw minikagi sikandin, “Tay law. Ikà niyo egkepela so wedad pan inibing niyo. Nepela a kenyo, so wedà niyo pa kelebeti se inikagi ko gina diyà kenyo. Magsen pa se olo niyo.
MAR 8:18 Pengkey doen mata niyo, wedà kaw pa kità te kebenalan. Pengkey doen telinga niyo, wedà kaw pa penenalan. Iling te nelibelan niyo se kepelahan ininang ko.
MAR 8:19 Pegpekaen ko te lima melalan otaw te lima pan, pila lay buun se inipenò niyo te samà?” Timaba dan, “Sempolò teg dowa.”
MAR 8:20 Mig-insà heman si Jesus, “Pegpekaen ko te epat melalan otaw te pito pan, pila lay boliyas se inipenò niyo te samà?” Timaba dan, “Pito.”
MAR 8:21 Minikagi si Jesus, “Aw wedà niyo iyan kelibeli, nepela a so wedà niyo pa kelebeti se inikagi ko gina diyà kenyo.”
MAR 8:22 Nayan, dimoton si Jesus aw menge tinoledaan din te Bitsayda. Doen menge otaw nengibing te otaw bota doton ki Jesus, aw nemoyò dan te pemàdan din sikandin amon kegolian.
MAR 8:23 Minawid si Jesus te belad te otaw bota, aw inagak din doton te lowà te lonsod. Penga niyan, migsawol sikandin te ngingi diyà te mata te bota, aw nemaed kandin, aw mig-insà, “Doen lay den kinità nikaw?”
MAR 8:24 Timengteng se otaw aw minikagi, “Ee. Meneng kenà metaen so iling te lawa te kayo se bawa te otaw kinità ko migpanaw-panaw.”
MAR 8:25 Todà nemaed si Jesus te mata din. Penga niyan, ontò timengteng se otaw sìyan aw kinità din se otaw ontò metaen, so migkèpiya den se mata din.
MAR 8:26 Penga niyan, impeolì sikandin i Jesus, kagi din, “Ikà eg-apit pengkey doton te lonsod.”
MAR 8:27 Nayan, dimeleg si Jesus aw menge tinoledaan din pesalo doton te lonsod te Sesarya Filipos. Peg-ipanaw dan, mig-insà si Jesus diyà kandan, kagi din, “Eden lay se kagi te kedita te otaw tepad kanak? Sinu a lay ekon?”
MAR 8:28 Timaba dan, “Doen menge otaw eg-ikagi te sikona si Juan Memonyagay. Doen heman eg-ikagi te sikona si Elias. Doen heman eg-ikagi te sikona se doma telekeliwat te kagi te Timanem gebii.”
MAR 8:29 Mig-insà si Jesus, “Meneng eden lay se kenyo aneng-aneng tepad kanak? Sinu a lay?” Timaba si Pedro, kagi din, “Sikona se Misiyas insogò te Timanem dini kenami.”
MAR 8:30 Penga niyan, migpunù si Jesus te keilangan eked dan indani diyà te doma otaw tepad kandin.
MAR 8:31 Nayan, migtoladà si Jesus diyà te menge tinoledaan din aw eden se metoman domateng diyà kandin Timanem Migpekeotaw. Ontò sikandin elegen, aw kuluwan sikandin te menge obanen te Judiyo aw menge pengolo te simbahan aw menenoladà te punù ingkeliwat i Moises. Metoman sikandin imetayan, meneng penga niyan te telo se aldaw, meantay sikandin lekat te nematay.
MAR 8:32 Ontò nebangal se intoladà din kandan. Penga niyan, migpedapag si Pedro diyà ki Jesus, aw minikagi diyà kandin te eked kepakay aw metoman iyan domateng diyà kandin.
MAR 8:33 Meneng timengteng si Jesus diyà te menge tinoledaan din aw ontò minikagi diyà ki Pedro, kagi din, “Kesayo ka lekat kanak. Iling ka ki Satanas, so kenà lekat te Timanem se ibeg no sìyan, meneng lekat iyan te aneng-aneng nikaw.”
MAR 8:34 Penga niyan, tinawal i Jesus se menge tinoledaan din sipat kedita te doma otaw netipon kidoen. Minikagi sikandin, “Aw meibeg se otaw tomaking kanak, keilangan megsagda sikandin te ibeg te pedowan din, aw tomayod te kelimahan te kelikit te aldaw pengkey imetayan sikandin, aw keilangan ontò tomaking kanak.
MAR 8:35 Pengkey ibeg te otaw megkelayat se omol din dini te keneyonan, meneng kunù din gayed matay. Meneng aw mepakay diyà te otaw pengkey imetayan sikandin tandà te pegtaking din kanak aw pegtoladà din te Mèpiya Indan tepad kanak, begayan sikandin te kaling pedowan wedad temanan.
MAR 8:36 So simpana tig-epoen te otaw se kedakel te keneyonan, aw penga niyan matay sikandin aw ipelumun doton te kilot, wedad ontong din,
MAR 8:37 so eked kebeyadi se kaling pedowan wedad temanan.
MAR 8:38 Aw eked ikagi se otaw te sikandin se sakop ko, aw eked heman tolò te kagi ko meneng tomaking te otaw nelegeb te salà egtinàyog te Timanem, yan se otaw eked ko heman ikegihi te sikandin se sakop ko te peglikò ko. Siak se Timanem Migpekeotaw, aw lomikò a pa dini tekingan te kelangkaw te Amay ko aw sipat menge anghil te Timanem.”
MAR 9:1 Minikagi heman si Jesus, “Eneng-enengi niyo se kagi ko kenyo seini. Doen otaw dini kenyo eked kematay singed aw onà dan komità te pegtebò te peglowan te Timanem metolos.”
MAR 9:2 Nayan, pegkeokit te enem se aldaw, impetaking i Jesus si Pedro, si Santiago, aw si Juan, aw timikedeg dan doton te melangkaw bontod te wedad doma dan. Pegketà, dalem te pegtengteng dan diyà ki Jesus, netodà se bawa din.
MAR 9:3 Ontò migkepotì se kedakel te penenaktun din so ontò minanyag. Eked keinang iling kenyan se penenaktun bugsakan dini te tanà, so ontò mepotì.
MAR 9:4 Penga niyan, kinità dan heman si Elias aw si Moises migbalaw-balaw doma ki Jesus.
MAR 9:5 Minikagi si Pedro diyà ki Jesus, “Pengolo, mèpiya so dini kay. Ibeg day meg-inang kay den te telo balay amon doen ogpaan te teg sebad-sebad kenyo si Moises aw si Elias.”
MAR 9:6 Pengkey yan se inikagi i Pedro, meneng wedà din kelebeti aw eden se inikagi din, so ontò dan nelemitan.
MAR 9:7 Penga niyan, doen labon dimateng diyà kandan, aw wedà dan ebey kità kandan. Penga niyan, dinineg dan se kagi te Timanem lekat te labon, “Seini se Batà ko aw ontò dakel se pedowan ko kandin. Keilangan sikandin se penenelanen niyo.”
MAR 9:8 Wedà kenamay, timengteng dan aw kinità dan olò si Jesus wedad den doma din.
MAR 9:9 Pegtopang dan lekat te bontod, ontò migpunù si Jesus diyà kandan te eked kepakay aw indanan dan se doma otaw tepad te kinità dan singed aw meantay sikandin Timanem Migpekeotaw lekat te nematay.
MAR 9:10 Timolò dan te punù din sìyan. Meneng gayed dan migpeinsaay aw eden se kedegdagan te inikagi din tepad te pegkeantay din lekat te nematay.
MAR 9:11 Penga niyan, mig-insà dan diyà kandin, “Aw agpet ka den lomowan, nengà lay egtoladà se menge menenoladà te punù ingkeliwat i Moises te keilangan domateng si Elias te eked pa lowan se Misiyas?”
MAR 9:12 Timaba si Jesus, “Benal domateng onà si Elias amon megpeketagad te kedita. Meneng eneng-enengi niyo heman te doen kagi te Timanem insolat tepad kanak Timanem Migpekeotaw te ontò a elegen aw kebebeyatan a.
MAR 9:13 Meneng mikagi a den diyà kenyo te dimateng den si Elias, aw medaet se ininang te doma otaw diyà kandin, aw yan se pegketoman te pakang insolat tepad kandin.”
MAR 9:14 Pegdateng dan doton te menge doma tinoledaan i Jesus, kinità dan te ontò medita se otaw netipon diyà kandan, aw doen menge menenoladà te punù ingkeliwat i Moises migbalaw-balaw kandan.
MAR 9:15 Pegkità te kedita te otaw ki Jesus, ontò dan nepela, aw kimagnan dan aw simongon dan kandin.
MAR 9:16 Mig-insà si Jesus, kagi din, “Eden lay se imbalaw-balaw niyo kandan?”
MAR 9:17 Timaba se sebad otaw, “Sir, inibing ko se batà ko amon megtabang ka kandin, so egdetengan sikandin te bosaw migpeomo kandin.
MAR 9:18 Aw egdateng iyan kandin, egpekelias, aw egbohak se bahà din, aw egyangget-yangget se ngipen, aw egkeseg se lawa din. Nemoyò a diyà te menge tinoledaan no te ipelowà dan se bosaw lekat kandin, meneng wedà dan iyan kebatog.”
MAR 9:19 Minikagi si Jesus, “Tay law, sikiyo menge otaw. Wedà kaw pa salig kanak. Eked den kenamay se pegdoma ko kenyo, meneng keilangan tomayod a pa pengkey eked kaw pemenal. Na, pedinihi se batà nikaw.”
MAR 9:20 Penga niyan, inibing dan se batà. Meneng pegkità te bosaw ki Jesus, impekeseg te bosaw se batà, aw impelias aw impebolaling sikandin, aw migbohak se bahà din.
MAR 9:21 Mig-insà si Jesus diyà te amay din, “Kano lay ini pegtebò?” Timaba se amay din, “Lekat pa te deitek sikandin.
MAR 9:22 Melikit sikandin eg-elosen te bosaw diyà te apoy, aw eglemesen heman diyà te wayeg amon imetayan sikandin. Meneng aw mebatog nikaw, keidowi kay bag aw tebangi kay.”
MAR 9:23 Minikagi si Jesus, “Nepela a so egdowa-dowa ka te mebatog ko. Wedad palos eked kebatog te Timanem megtabang te otaw somalig diyà kandin.”
MAR 9:24 Minikagi se otaw te dakel se kagi din, “Simalig a den diyà te Timanem. Lobosi se pegsalig ko diyà kandin amon eked a pegdowa-dowa.”
MAR 9:25 Pegkità i Jesus te labi pa medita se otaw netipon, sinagda din se bosaw, kagi din, “Sikona bosaw migpeomo aw migpebingel kandin, lowà ka den lekat kandin, aw ikà palos eglikò diyà kandin.”
MAR 9:26 Penga niyan, migpuypuy se bosaw, aw ontò din impekeseg se batà, aw penga niyan limowà. Iling te wedad pedowan te batà, aw minikagi se keditaan te otaw, “Nematay den sikandin.”
MAR 9:27 Meneng inewidan i Jesus se belad din aw impeenaw din, aw yan neketindeg.
MAR 9:28 Peg-olì i Jesus aw menge tinoledaan din, dimoton dan kandin te wedad doma dan, aw mig-insà dan, “Nengà lay wedà day kebatog se pegpelowà te bosaw lekat kandin?”
MAR 9:29 Minikagi si Jesus, “Wedà niyo iyan kebatog so eked pelowai se kemolò te bosaw seini singed aw megtawal-tawal kaw.”
MAR 9:30 Nayan, nesayo si Jesus aw menge tinoledaan din lekat kidoen, aw minokit dan te probinsya te Galiliya. Meneng ibeg i Jesus, wedad metaga-taga aw kenan sikandin,
MAR 9:31 amon eked keanggà se pegtoladà din te menge tinoledaan din. Minikagi sikandin, “Seini se metoman domateng diyà kanak Timanem Migpekeotaw. Metoman a itolok aw ibegay a diyà te belad te doma otaw. Penga niyan, imetayan a dan, meneng penga te telo se aldaw, meantay a lekat te nematay.”
MAR 9:32 Meneng wedà dan ketegahi aw eden se kedegdagan te inikagi din sìyan, meneng wedad mig-insà kandin tepad kenyan, so neyàyà dan.
MAR 9:33 Nayan, pegdateng i Jesus aw menge tinoledaan din doton te Kapirnaom, mig-ogpà dan diyà te balay. Mig-insà si Jesus, “Eden lay se pigdindilan niyo gina kidoen te dalan te wedà kidon pa dateng dini?”
MAR 9:34 Meneng wedad timaba, so migpedindilay dan aw sinu se ontò melangkaw diyà kandan.
MAR 9:35 Penga niyan, nenenoo si Jesus aw tinawal din se kedita te sempolò teg dowa dan, aw minikagi sikandin, “Aw meibeg se otaw megkelangkaw, keilangan megpedanà sikandin te pegkeotawun din iling te kedanà te allang.”
MAR 9:36 Penga niyan, tinawal i Jesus se sebad batà, aw impetindeg din iyan kidoen te tengà-tengà dan. Penga niyan, inolid din, aw minikagi sikandin,
MAR 9:37 “Aw megsagman se otaw te sakop ko iling te kedanà te sebad batà seini tandà te pegpesakop din kanak, pineokit kenyan segmanen a din heman. Aw megsagman se otaw kanak, kenà olò siaken se segmanen din, so segmanen din heman se Amay ko simogò kanak.”
MAR 9:38 Nayan, minikagi si Juan diyà ki Jesus, “Sir, doen otaw kinità day migpelowà te bosaw lekat te menge otaw pineokit te ngadan nikaw. Meneng sinagda day sikandin so wedà pekeakop diyà kenitadon.”
MAR 9:39 Meneng minikagi si Jesus, “Ikà niyo egsagda kandin, so aw meg-inang se otaw te kepelahan pineokit te ngadan ko, eked tagmon ikagi te medaet tepad kanak.
MAR 9:40 Se otaw kenà poon tadon, meinang sikandin doma tadon.
MAR 9:41 Eneng-enengi niyo se kagi ko kenyo seini. Aw melao kaw, aw doen otaw memegay kenyo te wayeg tandà te pegpesakop niyo diyà kanak, begayan sikandin te Timanem te ontong.”
MAR 9:42 Minikagi heman si Jesus, “Aw doen otaw mekebaet te pegpemenal te mengisù egkeidowan ko, ontò medaet se pelumun domateng diyà kandin. Labi pa mèpiya aw iketan se lieg din te dakel bato aw idagdag doton te lawod.
MAR 9:43 Aw meboyo kaw meg-inang te salà pineokit te belad niyo, mèpiya aw tokongen niyo se belad niyo amon eked kaw peg-inang te salà, aw amon kominawà kaw te kaling pedowan wedad temanan. Labi pa medaet aw meboyo kaw pineokit te belad niyo, aw iagbel se kedakel te lawa niyo doton te kilot.
MAR 9:45 Aw meboyo kaw heman meg-inang te salà pineokit te benis niyo, mèpiya aw tokongen niyo se benis sìyan amon eked kaw peg-inang te salà, aw amon kominawà kaw te kaling pedowan wedad temanan. Labi pa medaet aw meboyo kaw pineokit te benis niyo, aw iagbel se kedakel te lawa niyo doton te kilot.
MAR 9:47 Aw meboyo kaw heman meg-inang te salà pineokit te mata niyo, mèpiya aw logiten niyo se mata niyo amon eked kaw peg-inang te salà aw amon sekopen kaw te Timanem diyà te peglowan din. Labi pa medaet aw meboyo kaw pineokit te mata niyo, aw iagbel se kedakel te lawa niyo doton te kilot,
MAR 9:48 so eked palos kematay se sapat kidoen, aw eked palos heman kepadeng se apoy,
MAR 9:49 so doen apoy medagdag diyà te kedita dan kidoen.
MAR 9:50 “Nayan, isanged se asin diyà te kànen amon megkèpiya se nanam. Meneng aw megkewedad se kepait te asin, eked iyan ketodà. Keilangan ontò mèpiya se eg-inangen niyo amon meinang kaw iling te mèpiya kemolò te asin eked pegkewedad se kepait niyan. Keilangan eked kaw heman pegpedindilay.”
MAR 10:1 Nayan, nesayo si Jesus lekat kidoen aw dimoton dipag te wayeg te Jordan taman te probinsya te Judiya. Medita heman se otaw netipon diyà kandin, aw migtoladà heman sikandin kandan, so yan se gayed din eg-inangen.
MAR 10:2 Doen menge Parisiyo nengemahà te kemalì diyà te pegtoladà i Jesus amon doen idimanda dan tepad kandin. Dimoton dan kandin aw minikagi dan, “Mepakay lay aw somibwan se otaw te esawa din?”
MAR 10:3 Timaba si Jesus, “Eden lay se impunù i Moises tepad te pegsibwan?”
MAR 10:4 Minikagi dan, “Migpunù si Moises te mepakay aw ibegay te meama se papil diyà te bayi tepad te pegsibwan din, aw penga niyan ipekesayo din.”
MAR 10:5 Meneng minikagi si Jesus, “Migpunù si Moises te mepakay aw somibwan kaw te esawa niyo, so netegahan din te ontò magsen se olo niyo.
MAR 10:6 Meneng gebii te peg-inang te Timanem te otaw, sebad olò se meama ininang din aw sebad olò heman se bayi.
MAR 10:7 Yan se doun te tomanan se meama te amay aw inay din, aw megsebad diyà te esawa din.
MAR 10:8 Se didowa dan meinang sebad. Yan kenà didowa se teleesawa, so neinang dan sebad.
MAR 10:9 Nayan, so ininang dan te Timanem sebad, eked kepakay aw ipesoway dan te otaw.”
MAR 10:10 Peg-olì i Jesus doton te balay, todà mig-insà se menge tinoledaan din tepad te pegpesibwanay.
MAR 10:11 Minikagi si Jesus, “Aw somibwan se meama te esawa din aw todà mengognan, mekelakad sikandin.
MAR 10:12 Aw somibwan se bayi te esawa din aw todà mengognan, mekelakad sikandin.”
MAR 10:13 Nayan, doen menge otaw nengibing te dedeitek mengisù doton ki Jesus amon pemàdan din dan aw megtawal-tawal te begayan dan te Timanem te mèpiya. Sinagda dan te menge tinoledaan din.
MAR 10:14 Meneng pegkità i Jesus kenyan, neopal sikandin aw minikagi, “Ikà niyo egsagda kandan, so lomowan se Timanem diyà te otaw ontò somalig diyà kandin iling te pegsalig te mengisù diyà te amay aw inay dan.
MAR 10:15 Eneng-enengi niyo se kagi ko kenyo seini. Aw eked salig se otaw diyà te Timanem iling te pegsalig te mengisù diyà te amay dan, eked sikandin sekopi te Timanem diyà te peglowan din.”
MAR 10:16 Penga niyan, inolid i Jesus se menge mengisù, aw nemaed sikandin kandan aw migtawal-tawal tepad kandan.
MAR 10:17 Nayan, pegkesayo i Jesus lekat kidoen, doen sebad otaw kimagnan doton kandin, aw limongken diyà kandin, aw mig-insà, kagi din, “Sir, ontò ka mèpiya otaw. Eden lay se keilangan inangen ko amon mekinawà ko se kaling pedowan wedad temanan?”
MAR 10:18 Minikagi si Jesus, “Nepela a so minikagi ka te mèpiya a otaw. Meneng wedad otaw ontò mèpiya, so olò Timanem se ontò mèpiya.
MAR 10:19 Netegahan no besi se menge punù ingkeliwat i Moises. Ikà egbonò. Ikà eglakad. Ikà egpenakaw. Ikà egkebolalaw tepad te doma otaw. Ikà eglegawa. Keilangan memasa ka te amay aw inay nikaw.”
MAR 10:20 Timaba se otaw sìyan, “Sir, gayed ko egtoloen se kedita niyan lekat te pegkebatà ko lamig seini.”
MAR 10:21 Timengteng si Jesus diyà kandin, aw dakel se pedowan din kandin. Minikagi sikandin, “Sebad mendad se keilangan inangen nikaw. Olì ka den aw beligyai se kedakel te kedònan no, aw begayi se kwarta no diyà te menge otaw nelimahan. Aw yan se inangen no, doen ontong kinewaen no doton te langit. Penga te pegpemegay no te kedakel niyan, likò ka dini aw taking ka kanak.”
MAR 10:22 Pegdineg din kenyan, timàmod sikandin aw nesayo te nepuluk se pedowan din, so ontò dakel se kedònan din.
MAR 10:23 Penga niyan, timengteng si Jesus diyà te menge tinoledaan din aw minikagi, “Ontò melima se pegpesakop te otaw meyaman diyà te peglowan te Timanem.”
MAR 10:24 Nepela se menge tinoledaan din tandà te inikagi din sìyan. Meneng minikagi heman si Jesus, “Ontò melima se pegpesakop te otaw diyà te peglowan te Timanem.
MAR 10:25 Pengkey ontò melima se peg-okit te ayam-ayam kamilo diyà te awang te dagem, meneng labi pa melima se pegpesakop te otaw meyaman diyà te peglowan te Timanem.”
MAR 10:26 Pegdineg dan kenyan, ontò dan nepela, aw minikagi dan, “Aw iling kenyan, wedad palos otaw mekelowà lekat te pelumun te Timanem.”
MAR 10:27 Meneng timengteng si Jesus diyà kandan aw minikagi, “Pengkey eked pekelowà se otaw lekat te pelumun te Timanem, meneng mebatog ipelowà te Timanem se otaw lekat te pelumun, so wedad palos eked kebatog te Timanem.”
MAR 10:28 Penga niyan, minikagi si Pedro, “Meneng sikami, tinenanan day den se kedakel amon tomaking kay kamno.”
MAR 10:29 Minikagi si Jesus, “Eneng-enengi niyo se kagi ko kenyo seini. Se otaw timanan den te kedònan din, aw kedowa din, aw amay din aw inay din, aw batà din, aw pawà din, amon tomaking kanak aw amon megtoladà te menge doma otaw tepad te Mèpiya Indan,
MAR 10:30 yan se metoman kominawà te ontong ginatos pa meelagà diyà te tinenanan din dalem te eked pa kematay. Pengkey egpemilangen sikandin, meneng metoman sikandin begayan te menge kedònan, aw kedowa, aw inay, aw batà, aw pawà, aw begayan heman sikandin te kaling pedowan wedad temanan te modi aldaw.
MAR 10:31 Meneng medita se otaw melangkaw songkani meinang ontò medanà doton te peglowan te Timanem. Medita heman se otaw medanà songkani, meneng meinang dan kwani melangkaw.”
MAR 10:32 Nayan, minipanaw si Jesus aw menge tinoledaan din pesalo doton te Jerusalem. Pegpesalo dan doton, minipanaw si Jesus diyà te monà dan. Nepela se menge tinoledaan din te ibeg din domoton te Jerusalem. Doen heman menge otaw timaking kandin nelemitan. Meneng migtipon si Jesus te sìyan sempolò teg dowa tinoledaan din, aw mig-indan diyà kandan aw eden se metoman domateng diyà kandin,
MAR 10:33 kagi din, “Na, domoton kidon den te Jerusalem. Penga niyan, siak Timanem Migpekeotaw se itolok, aw ibegay a diyà te belad te menge pengolo te simbahan aw menenoladà te punù ingkeliwat i Moises. Megsebad dan mikagi te keilangan imetayan a. Ibegay a dan heman diyà te belad te menge otaw kenà Judiyo.
MAR 10:34 Kebebeyatan a dan, aw teptepan a dan, aw bedasen a dan, aw penga niyan imetayan a dan. Penga te telo se aldaw, meantay a lekat te nematay.”
MAR 10:35 Penga niyan, dimoton ki Jesus se didowa batà i Sebedeo si Santiago aw si Juan. Minikagi dan, “Sir, ibeg day inangen no diyà kenami se pemoyoen day diyà kamno.”
MAR 10:36 Minikagi si Jesus, “Eden lay se ibeg niyo inangen ko diyà kenyo?”
MAR 10:37 Minikagi dan, “Aw megtebò ka lomowan, peonsadi kay bag diyà te tangkil nikaw, sebad lenged te kowanan, aw sebad lenged te bibang, amon segmanen kay heman doma nikaw.”
MAR 10:38 Meneng minikagi si Jesus, “Wedà niyo ketegahi aw eden se kebegat te pinemoyò niyo. Meketayod kaw lay heman te kelimahan agpet den domateng kanak? Meketayod kaw lay heman te kegemakan agpet den domateng kanak?”
MAR 10:39 Timaba dan, “Ee, meketayod kay heman kenyan.” Minikagi si Jesus, “Metoman kaw heman detengan te kelimahan aw kegemakan domateng kanak,
MAR 10:40 meneng eked a pegpakang kenyo te sikiyo se meketangkil diyà kanak, so tomangkil diyà kanak se otaw tapay pinemallì.”
MAR 10:41 Pegdineg te sempolò tinoledaan aw eden se inikagi dan diyà ki Jesus, neopal dan diyà ki Santiago aw si Juan.
MAR 10:42 Meneng tinawal dan i Jesus aw minikagi sikandin, “Netegahan niyo den aw eden se eg-inangen te menge otaw eglowan. Gayed dan egleges te menge sakop dan. Gayed heman egsogò-sogò se menge melangkaw otaw te menge sakop dan.
MAR 10:43 Meneng eked kepakay aw meg-iling kaw kandan. Aw doen otaw diyà kenyo meibeg megkelangkaw, keilangan gayed sikandin menabang kenyo.
MAR 10:44 Aw doen otaw diyà kenyo meibeg megkelangkaw, keilangan megpedanà sikandin te kandin pegkeotawun iling te kedanà te allang.
MAR 10:45 Keilangan meg-iling sikandin kanak Timanem Migpekeotaw, so dimini a te tanà kenà amon tebangan a te otaw, meneng dimini a amon menabang a te otaw. Neketagad a den imetayan amon medita se otaw mekelowà lekat te pegkeallang dan diyà te salà.”
MAR 10:46 Nayan, minokit si Jesus aw menge tinoledaan din diyà te lonsod te Jeriko. Ontò medita se doma otaw timaking kandan. Pegkesayo dan lekat te Jeriko, doen otaw bota nenenoo doton te kilid te dalan, ngadan din si Bartimeo batà i Timeo.
MAR 10:47 Pegdineg din te si Jesus tege Nasarit se minokit kidoen, timawal sikandin, kagi din, “Jesus, bowad-bowad i David, keidowi a bag.”
MAR 10:48 Medita se otaw migpunù te keilangan mepenek sikandin. Meneng labi beling sikandin timawal, “Bowad-bowad i David, keidowi a bag.”
MAR 10:49 Pegdineg i Jesus te pegtawal din, simagked sikandin aw minikagi, “Pedinihi niyo sikandin.” Penga niyan, minangay dan kandin, kagi dan, “Peseligi se pedowan nikaw. Tindeg ka den, so impeangay ka din.”
MAR 10:50 Penga niyan, ayas timindeg aw tinenanan din se kayab din, aw dimoton ki Jesus.
MAR 10:51 Pegdateng din doton, minikagi si Jesus, “Eden lay se ibeg no inangen ko kamno?” Minikagi se otaw bota, “Sir, ibeg ko, todà a komità.”
MAR 10:52 Minikagi si Jesus, “Mepakay aw molì ka den. Negolian ka den so simalig ka diyà kanak.” Pegketà, kimità sikandin, aw timaking ki Jesus.
MAR 11:1 Nayan, pegpesalo dan doton te Jerusalem, migpedapag dan kidoen te lonsod te Bitpahi aw Bitanya doton te ongan te bontod te Olibo. Insogò i Jesus se didowa tinoledaan din,
MAR 11:2 kagi din, “Onà kaw den doton te lonsod sida peselowan tadon. Aw domateng kaw doton, ketelaan niyo se nati te kodà. Iniketan iyan, meneng wedà iyan lumun kesekayi te otaw. Lebadi niyo, aw ibingi niyo dini.
MAR 11:3 Aw doen otaw meg-insà kenyo te nengà lay linebad niyo iyan, ikegihi niyo te keilangan sekayan iyan te Pengolo niyo, aw ipeolì din iyan te eked kenamay.”
MAR 11:4 Penga niyan, nesayo dan, aw netelaan dan se nati te kodà iniketan diyà te lelebangan te balay medapag te dalan. Penga niyan, linebad dan iyan.
MAR 11:5 Meneng mig-insà se menge otaw kidoen, “Nengà lay linebad niyo iyan?”
MAR 11:6 Yan mig-indan se didowa tinoledaan i Jesus tepad te insogò din kandan, aw penga niyan mepakay iyan diyà te tig-apò.
MAR 11:7 Penga niyan, inibing dan se nati doton ki Jesus. Menge saol dan se in-ampal dan diyà te getan te nati, aw simakay si Jesus kenyan.
MAR 11:8 Medita se otaw migladlad te saol dan doton te dalan peselowan din, aw sinagpì te menge doma otaw se menge pelapà te palmera aw insawol dan doton te dalan, so yan se ketanem dan aw segmanen dan se otaw meinang selotan.
MAR 11:9 Migpegais se kedita te otaw timaking ki Jesus, pengkey nekeonà aw timetondog. Migpegais dan, “Iduyun se Timanem. Iduyun se Pengolo tadon insogò din.
MAR 11:10 Iduyun se peglowan din iling te peglowan te kemonaan tadon gebii si David. Iduyun se Timanem.”
MAR 11:11 Pegdateng i Jesus doton te Jerusalem, dimoton sikandin te dakel simbahan kidoen. Pegtengteng din diyà te kedita, limikò sikandin doton te Bitanya sipat sìyan sempolò teg dowa tinoledaan din, so ontò den meapon.
MAR 11:12 Pegkeiselem niyan, minipanaw dan lekat te Bitanya pesalo doton te Jerusalem. Te wedà dan pa dateng doton, binallos si Jesus.
MAR 11:13 Kinità din se kayo igira te mediyò. Dimawen iyan, aw dimoton sikandin amon mahà te pongo niyan. Meneng pegdateng din doton, wedad palos pongo kinità din, olò menge dawen. Wedà pa dateng se aldaw te pegpongo din.
MAR 11:14 Minikagi sikandin diyà te kayo, “Eked den palos pongo se kayo seini.” Dinineg te menge tinoledaan din se inikagi din sìyan.
MAR 11:15 Pegdateng i Jesus doton te Jerusalem, dimoton sikandin te dakel simbahan, aw impekadas din se kedita te otaw egpemeligyà aw egbayad kidoen te dowangen niyan. Impelias din se lemisa te menge otaw egliwan te kwarta, aw impelias din heman se bangkò te menge otaw egpemeligyà te selepati ibegay diyà te Timanem.
MAR 11:16 Sinagda din heman se kedita te otaw nengibing te kedònan dan minokit te dowangen te dakel simbahan.
MAR 11:17 Penga niyan, migtoladà sikandin, kagi din, “Doen kagi te Timanem impesolat din gebii, ‘Se balay te Timanem, yan se ingedanan balay te pegtawal-tawal te kedita te otaw te keneyonan.’ Meneng ininang niyo den ini iling te ogpeanan te megdedempasay.”
MAR 11:18 Meneng doen menge pengolo te simbahan aw menenoladà te punù ingkeliwat i Moises dimineg te inikagi i Jesus. Penga niyan, miglalang dan te imetayan dan sikandin. Nelemitan dan ki Jesus, so ontò nepela se kedita te otaw tepad te intoladà din.
MAR 11:19 Pegsallep te aldaw sìyan, nesayo si Jesus aw menge tinoledaan din lekat te Jerusalem aw minolì dan.
MAR 11:20 Pegkeiselem niyan, te peglikò dan doton te Jerusalem, kinità dan se kayo igira nelanes den pengkey dalid.
MAR 11:21 Neeneng-enengan i Pedro aw eden se neinang, aw minikagi sikandin diyà ki Jesus, “Sir, tengtengi se kayo inikegiyan no gebenini nelanes den.”
MAR 11:22 Minikagi si Jesus, “Aw megtawal-tawal kaw diyà te Timanem, keilangan somalig kaw diyà kandin.
MAR 11:23 Eneng-enengi niyo se kagi ko kenyo seini. Aw mikagi se otaw diyà te bontod seini te meabat iyan aw mealin doton te dagat, aw kenà egdowa-dowa se pedowan din, meneng egpemenal te metoman se kagi din, metoman iyan meinang.
MAR 11:24 Yan mikagi a den diyà kenyo, aw megtawal-tawal kaw diyà te Timanem, keilangan memenal kaw te binegayan kaw din den te pinemoyò niyo, aw metoman kinewaen niyo iyan.
MAR 11:25 Aw megtawal-tawal kaw, aw doen salà ininang te doma otaw diyà kenyo wedà niyo pa pegwedadi, pegwedadi niyo iyan amon pegwedaden heman te Timanem se salà ininang niyo diyà kandin. [
MAR 11:26 Meneng aw eked niyo pegwedadi se salà ininang te doma otaw diyà kenyo, eked heman pegwedadi te Timanem Amay se salà ininang niyo diyà kandin.]”
MAR 11:27 Pegdateng dan doton te Jerusalem, minipanaw si Jesus kidoen te dakel simbahan. Wedà kenamay, doen menge pengolo te simbahan aw menenoladà te punù aw menge obanen te Judiyo dimoton ki Jesus.
MAR 11:28 Mig-insà dan, “Nengà lay eg-inang ka te kedita nini? Sinu lay se simogò kamno?”
MAR 11:29 Minikagi si Jesus, “Doen heman insà ko kenyo. Aw meketaba kaw kani, meg-indan a kenyo aw sinu se simogò kanak.
MAR 11:30 Sinu lay se simogò ki Juan amon memonyag? Timanem lay, aw otaw se simogò kandin?”
MAR 11:31 Penga niyan, migpebelaw-belaway dan aw eden se itaba dan kandin. Minikagi dan, “Simpana tomaba kidon te Timanem se simogò ki Juan, silahen kidon din, so wedà kidon pemenal ki Juan.
MAR 11:32 Meneng eked kidon heman taba te olò otaw se simogò ki Juan.” Eked dan ikagi te olò otaw se simogò ki Juan, so nelemitan dan aw keopalan dan te kedita te otaw netipon, so eg-aneng-aneng se kedita te otaw te ontò telekeliwat te kagi te Timanem si Juan.
MAR 11:33 Yan se doun te minikagi dan, “Inday. Wedà day ketegahi aw sinu.” Minikagi si Jesus, “So wedà kaw taba te insà ko, eked a peg-indan kenyo aw sinu se simogò kanak.”
MAR 12:1 Nayan, mig-indan si Jesus te menge tegdeyanan diyà te medita otaw netipon kidoen. Minikagi sikandin, “Doen otaw migpawà aw nenanem te paras. Mig-inang sikandin te alad, aw tigmesanan te paras, aw layag. Penga niyan, impetonggò din iyan te menge doma otaw, aw dimoton te mediyò ogpeanan.
MAR 12:2 Pegdateng te aldaw te peglegani, doen sineligan insogò te tig-apò amon doen talad ebaten din lekat te menge otaw impetonggò din.
MAR 12:3 Meneng pegdateng te sogounun doton kandan, binadas dan sikandin aw impekesayo dan te wedad palos imbegay kandin.
MAR 12:4 Penga niyan, doen doma sineligan insogò te tig-apò. Meneng binonalan dan sikandin diyà te olo, aw ontò dan pa pigyàyà.
MAR 12:5 Penga niyan, doen doma sineligan insogò te tig-apò. Meneng inimetayan dan. Medita pa se sineligan insogò din doton kandan, meneng doen binadas dan, aw doen heman inimetayan dan.
MAR 12:6 Se temanan insogò din, yan se batà din egkedekelan din te pedowan, so aneng-aneng din keilangan segmanen dan se kandin batà.
MAR 12:7 Meneng pegdateng te batà din doton, migpebelaw-belaway dan, ‘Seini se meketig-apò te tanà seini aw matay se amay din. Mèpiya aw imetayan tadon sikandin amon sikitadon den se meketig-apò te tanà seini.’
MAR 12:8 Penga niyan, inimetayan dan sikandin aw in-agbel dan se lawa din doton te lowà te pawà.
MAR 12:9 “Nayan, meg-indan a den diyà kenyo aw eden se inangen te tig-apò diyà kandan. Domoton sikandin aw imetayan din se kedita dan, aw ipetonggò din se pawà din te doma otaw.
MAR 12:10 Migbasa kaw den besi te kagi te Timanem seini insolat, ‘Doen bato in-agbel te menge otaw mig-inang te balay, so eden dan aw wedad kekemowan niyan. Meneng yan se bato ontò salig te balay.
MAR 12:11 Mèpiya se ininang te Pengolo sìyan, aw yan se doun te iduyun tadon sikandin.’”
MAR 12:12 Pegdineg te menge obanen te Judiyo kenyan, netegahan dan te sikandan se nesogatan te tegdeyanan din sìyan, aw yan se doun te ibeg dan megdakep peden kandin. Meneng wedà dan peketoman, so nelemitan dan te menge otaw gayed egpenenalan kandin. Penga niyan, nesayo dan lekat kidoen.
MAR 12:13 Wedà kenamay, doen menge Parisiyo aw menge sakop i Herod insogò dan doton ki Jesus, so ibeg dan doen idimanda dan tepad te pegtoladà din.
MAR 12:14 Pegdateng dan doton ki Jesus, minikagi dan, “Sir, netegahan day te kenà ka egkebolalaw. Netegahan day heman te pengkey sinu se otaw toledaan nikaw, gayed ka egtoladà te kebenalan tepad te ibeg te Timanem. Nayan, doen insà day kamno. Lomàpang kidon lay te menge punù ingkeliwat i Moises aw mayad kidon te mihoras diyà te gobirno te Roma? Mepakay lay aw eked?”
MAR 12:15 Meneng netegahan i Jesus te medaet se tod dan te peg-insà dan kenyan. Yan minikagi sikandin, “Medaet se pegtandà niyo kanak. Pekitai niyo kanak se kwarta ipegbayad niyo te mihoras.”
MAR 12:16 Penga niyan, imbegay dan diyà kandin se kwarta plata. Mig-insà si Jesus, “Sinu lay bawa se insawol kidoen? Sinu lay ngadan se insolat kidoen?” Timaba dan, “Selotan te Roma.”
MAR 12:17 Minikagi si Jesus, “Begayi niyo diyà te selotan se keilangan ibegay niyo diyà kandin, aw begayi niyo heman diyà te Timanem se keilangan ibegay niyo diyà kandin.” Pegdineg dan kenyan, nepela dan.
MAR 12:18 Doen heman menge Sadusiyo dimoton ki Jesus. Yan se menge otaw egtoladà te eked palos keantay se otaw lekat te nematay. Mig-insà dan diyà ki Jesus, kagi dan,
MAR 12:19 “Sir, doen impunù i Moises kenitadon tepad te inangen te telekedowa meama. Aw matay se meama te wedad pa batà te esawa din, keilangan mengognan se kedowa te nematay diyà te nayi din nebalo, amon doen peden batà te kedowa din nematay.
MAR 12:20 Na, doen ekon pito telekedowa meama. Nengognan se kakay dan, aw nematay sikandin te wedad pa batà dan.
MAR 12:21 Penga niyan, nengognan se ikedowa meama te nayi din nebalo, meneng nematay heman sikandin te wedad pa batà dan. Onawa heman se neinang te iketelo meama.
MAR 12:22 Migpetibos-tibosay se pito telekedowa nengognan te bayi sìyan, meneng nematay se kedita dan te wedad pa palos batà dan. Penga niyan, nematay heman se bayi.
MAR 12:23 Nayan, indani kay. Aw meantay se otaw lekat te nematay, sinu lay lebò diyà kandan se ontò esawa te bayi sìyan? So migpetibos-tibosay dan se pito nengognan kandin.”
MAR 12:24 Minikagi si Jesus, “Ontò kaw migkemalì, so wedà niyo pa kelebeti se kagi te Timanem insolat, aw wedà niyo heman ketegahi aw eden se mebatog inangen te Timanem pineokit te tolos din.
MAR 12:25 Aw entayen te Timanem se menge otaw lekat te nematay, eked dan palos pengognan, so iling dan te menge anghil eg-ogpà doton te langit.
MAR 12:26 Wedà kaw ketaga-taga te metoman meantay se otaw lekat te nematay, so wedà kaw besi pegbasa te libro insolat i Moises gebii. Pegsolat din tepad te pegpekità te Timanem diyà kandin kidoen te sagbet limegdeg, minikagi se Timanem diyà kandin, ‘Siak se Timanem gayed egseligan i Abraham, aw si Isaac, aw si Jacob.’
MAR 12:27 Yan kenà otaw wedad pedowan se egsalig te Timanem, meneng otaw doen pedowan se egsalig kandin. Yan se doun te ontò kaw migkemalì.”
MAR 12:28 Nayan, dimateng se sebad menenoladà te punù ingkeliwat i Moises, aw dinineg din se pegpebelaw-belaway dan. Pegketaga-taga din te mèpiya se intaba i Jesus kandan, mig-insà sikandin, “Diyà te kedita te punù ingkeliwat i Moises, eden lay punui se ontò melangkaw?”
MAR 12:29 Minikagi si Jesus, “Seini se punù ontò melangkaw. ‘Kedita niyo menge bowad-bowad i Israel, penenalan kaw kanak. Sebad olò se Timanem, aw sikandin se Pengolo tadon.
MAR 12:30 Kedekeli niyo te pedowan se Pengolo niyo Timanem te ontò melobos se pedowan niyo kandin, aw aneng-aneng niyo.’
MAR 12:31 Seini se punù neketondog kenyan. ‘Kedekeli niyo te pedowan se doma otaw iling te peg-aneng-aneng niyo te kenyo pegkeotawun.’ Wedad palos punù labi pa melangkaw diyà te didowa punù sìyan.”
MAR 12:32 Minikagi se menenoladà sìyan, “Sir, neketotok se intaba nikaw. Benal se inikagi no te sebad olò se Timanem, aw wedad doma timanem lowà pa diyà kandin.
MAR 12:33 Benal heman se inikagi no te keilangan kedekelan tadon sikandin te pedowan te ontò melobos se pedowan tadon kandin, aw keilangan kedekelan tadon te pedowan se doma otaw iling te peg-aneng-aneng tadon te kenitadon pegkeotawun. Pengkey mèpiya se pegpengimatay aw pegsonog tadon te ayam-ayam ibegay diyà te Timanem, meneng labi pa mèpiya aw tomolò kidon te didowa punù sìyan.”
MAR 12:34 Pegdineg i Jesus te mèpiya se intaba din, minikagi sikandin, “Agpet den se pegpesakop no diyà te peglowan te Timanem.” Lekat te aldaw sìyan, wedad palos otaw migtelaman mig-insà ki Jesus.
MAR 12:35 Nayan, pegtoladà i Jesus doton te dakel simbahan, minikagi sikandin, “Benal se ipegtoladà te menge menenoladà te punù ingkeliwat i Moises te bowad-bowad i David se Misiyas isogò te Timanem dini kenyo.
MAR 12:36 Meneng minikagi si David te Pengolo din se Misiyas. Pineokit te pegbayà-bayà te Espiritu Santo ki David, insolat din se kagi seini, ‘Minikagi se Timanem diyà te Pengolo ko, Penenoo ka dini te tangkil ko lamig dàgen ko se menge poon no aw ipetolò ko dan kamno.’
MAR 12:37 Na, so minikagi si David te Pengolo din se Misiyas, kenà olò bowad-bowad din se Misiyas, meneng Pengolo din heman.” Neluba se kedita te otaw nenenalan ki Jesus.
MAR 12:38 Pegtoladà din, minikagi sikandin, “Peg-ahà kaw te menge menenoladà te punù ingkeliwat i Moises. Gayed dan egpenaol te melayat, aw ibeg dan segmanen dan te doma otaw doton te pedyanan.
MAR 12:39 Ibeg dan heman menenoo doton te mèpiya onsedanan kidoen te simbahan te Judiyo. Aw doen dakel kànen, ibeg dan sikandan se monà ipekaen.
MAR 12:40 Meneng sikandan se eg-agaw te kedònan te menge bayi balo, aw penga niyan menamay se pegtawal-tawal dan amon megpelingo-lingo dan te melobos se pedowan dan diyà te Timanem. Meneng metoman dan ontò ipelumun labi pa diyà te doma otaw.”
MAR 12:41 Nayan, nenenoo si Jesus doton didalem te dakel simbahan te Jerusalem medapag te solanan te kwarta ibowang diyà te Timanem. Timengteng sikandin diyà te menge otaw egsawol te kwarta dan kidoen. Medita se otaw meyaman egsawol te dakel kwarta ibowang dan.
MAR 12:42 Penga niyan, dimateng se sagkep bayi balo, aw migsawol sikandin te didowa kedakò kidoen wedad nael keelagà niyan.
MAR 12:43 Penga niyan, tinawal i Jesus se menge tinoledaan din, aw minikagi sikandin, “Eneng-enengi niyo se kagi ko seini. Pengkey dakel se imbowang te kedita te doma otaw migsawol te kwarta kidoen, meneng labi pa meelagà se imbowang te bayi balo sida.
MAR 12:44 Dakel se kwarta te doma otaw aw eked dan kelimahi tandà te pegpemegay dan. Meneng se bayi sida sagkep, tinigkan din imbowang se kedakel te kedònan din, pengkey nelimahan sikandin.”
MAR 13:1 Nayan, peglowà i Jesus lekat te dakel simbahan te Jerusalem, doen sebad tinoledaan din minikagi, “Sir, tengtengi se menge balay te simbahan, so mèpiya se bawa niyan, aw ininang iyan te bato mèpiya se bawa niyan.”
MAR 13:2 Minikagi si Jesus, “Pengkey induyun niyo se dakel simbahan seini, meneng tigkan iyan kebàtan te modi aldaw, aw wedad palos bato ketenanan diyà te lanto te doma bato.”
MAR 13:3 Wedà kenamay, dimoton dan te bontod te Olibo dipag te dakel simbahan. Nenenoo si Jesus, aw dimoton kandin si Pedro, si Santiago, si Juan, aw si Andres te wedad doma dan. Mig-insà dan,
MAR 13:4 “Indani kay. Kano lay ketoman se in-indan nikaw? Eden lay se pengilala kitaen day aw agpet metoman se kedita niyan?”
MAR 13:5 Minikagi si Jesus, “Peg-ahà kaw amon eked kaw keekali.
MAR 13:6 Doen kwani medita otaw megpelingo-lingo te insogò ko dan. Mikagi dan te sikandan se Misiyas, aw medita se otaw keekalan dan aw tomaking kandan.
MAR 13:7 Aw domineg kaw te doen gira aw menge samok, ikà niyo egkelemitan. Keilangan onà iyan meinang, meneng kenà pa niyan se temanan te keneyonan.
MAR 13:8 Medita se otaw meggira, so doen pongan megbolaw diyà te doma pongan, aw doen heman menge sakop te sebad selotan megbolaw diyà te menge sakop te doma selotan. Megelà se otaw te medita ogpeanan tandà te linog aw bayil domateng diyà kandan. Pengkey medaet iyan, meneng yan olò se keteboan te kelimahan domateng dini te keneyonan, iling te keteboan te mesakit domateng te bayi agpet tebawan.
MAR 13:9 “Meneng peg-ahà kaw, so ibingen kaw te doma otaw doton te howis, aw bedasen kaw dan kidoen te menge simbahan te Judiyo. Ipeibing kaw doton te menge gobirnador aw selotan tandà te pegpesakop niyo diyà kanak, amon mekeindan kaw te kebenalan tepad kanak diyà kandan.
MAR 13:10 Keilangan onà itoladà se Mèpiya Indan diyà te kedita te otaw te eked pa dateng se temanan te keneyonan.
MAR 13:11 Aw ibingen kaw doton te otaw meg-okom kenyo, ikà niyo egketetana aw eden se ikegiyen niyo kandan. Dalem te aldaw sìyan, begayan kaw te kebiyasa amon meketaba kaw kandan, so kenà lekat te kenyo kebiyasa se ikegiyen niyo, meneng lekat iyan te Espiritu Santo.
MAR 13:12 Doen menge otaw megtolok te kandan menge kedowa amon imetayan dan. Doen heman amay megtolok te kandan menge batà amon imetayan dan. Doen heman menge otaw eked pegsagman te kandan amay aw inay, aw ipeimatay dan.
MAR 13:13 Kebensihan kaw te keditaan te otaw tandà te pegpesakop niyo diyà kanak. Meneng aw tomayod kaw te kedita te kelimahan, ipelowà kaw.”
MAR 13:14 “Doen pa domateng meg-inang te medaet doton te dakel simbahan te Jerusalem, pengkey eked iyan kepakay, aw ontò mekelamit te otaw. (Keilangan kelebetan iyan te kedita te otaw megbasa te kagi din sìyan insolat.) Aw kitaen niyo iyan doton te dakel simbahan, keilangan komadas se kedita te otaw lekat te Judiya pesalo doton te bontod.
MAR 13:15 Keilangan eked awop diyà te balay din se otaw doton te lowà amon ebaten din se kedònan, meneng keilangan tenanan din se kedita.
MAR 13:16 Se otaw egterbaho doton te pawà, eked heman olì amon ebaten din se ekasan, meneng keilangan komadas.
MAR 13:17 Mekelelayò heman se menge bayi mebedes aw egsosowan te aldaw sìyan.
MAR 13:18 Pegtawal-tawal kaw diyà te Timanem te kenà pengodan se pegkadas niyo,
MAR 13:19 so ontò medaet se kelimahan domateng diyà te keneyonan. Wedad palos kelimahan labi pa medaet diyà kenyan lekat te peg-inang te Timanem te keneyonan lamig seini, aw wedad palos heman kelimahan domateng labi pa medaet diyà kenyan.
MAR 13:20 Meneng pekebebaen te Timanem se kenamay te aldaw te kelimahan sìyan amon eked kegelà se kedita te otaw. Pekebebaen din iyan tandà te menge otaw pinemallì din.
MAR 13:21 “Aw domateng se aldaw sìyan, aw doen otaw mikagi, ‘Na, dini den se Misiyas,’ aw doen otaw mikagi, ‘Na, doton se Misiyas,’ ikà niyo egpemenal kandan,
MAR 13:22 so doen menge otaw domateng megpelingo-lingo te sikandan se Misiyas aw menge telekeliwat te kagi te Timanem. Meg-inang dan heman te menge kepelahan amon keekalan dan peden heman se menge otaw pinemallì te Timanem.
MAR 13:23 Meneng peg-ahà kaw, so mig-indan a den te kedita diyà kenyo te eked pa dateng.”
MAR 13:24 “Aw mepenga se kelimahan sìyan, megkengitngit se keneyonan, so eked ebey senang se aldaw aw bolan.
MAR 13:25 Medagdag heman se menge bitoen lekat te langit, so mebilit se kedita dan.
MAR 13:26 Penga niyan, kitaen te kedita te otaw se pegdateng ko, so lomikò a Timanem Migpekeotaw tekingan te labon. Komità dan te ontò a metolos aw melangkaw a.
MAR 13:27 Isogò ko se menge anghil, aw ipetipon ko se kedita te otaw pinemallì ko lekat te kebelad te keneyonan, pengkey kenan dan peg-ogpà.”
MAR 13:28 “Penenalan kaw den te tegdeyanan seini tepad te kayo igira. Aw tomobed iyan aw domawen, ketegahan niyo te agpet den domateng se pengaldaw.
MAR 13:29 Iling heman kenyan, aw kitaen niyo se pegketoman te kedita niyan inikagi ko diyà kenyo, ketegahan niyo te agpet a den lomikò.
MAR 13:30 Eneng-enengi niyo se kagi ko kenyo seini. Doen menge otaw komità te pengilala sìyan, eked dan kematay singed aw metoman se kedita niyan.
MAR 13:31 Doen temanan te langit aw tanà, meneng gayed metoman se kagi ko te wedad temanan.”
MAR 13:32 “Meneng eked ko indani aw eden eldawi aw orasi se peglikò ko. Wedad palos netaga-taga aw kano a likò, pengkey menge anghil doton te langit, so olò Amay ko se netaga-taga kenyan.
MAR 13:33 Keilangan gayed kaw megpeketagad, so wedà niyo ketegahi aw eden eldawi se pegketoman niyan.
MAR 13:34 Iling a te otaw domoton te mediyò ogpeanan. Te eked pa kesayo, doen ipunù din diyà te kedita te sineligan din, so doen inangen te teg sebad-sebad kandan te iyogan din. Megpunù heman sikandin te keilangan gayed megpeketagad se otaw egbantay te balay din.
MAR 13:35 Yan se doun te keilangan gayed kaw megpeketagad, so wedà niyo ketegahi aw eden orasi se peglikò te Pengolo niyo, atok te pegsallep te aldaw, atok megtengà te delem, atok eked pa libtak se aldaw, atok iselem. Yan se doun te keilangan gayed kaw megpeketagad,
MAR 13:36 so aw lomikò a te wedà kaw pa peketagad, kitaen ko sikiyo timedogi pa.
MAR 13:37 Se impunù ko kenyo seini, yan se ipunù ko heman diyà te kedita te otaw, te keilangan megpeketagad se teg sebad-sebad otaw.”
MAR 14:1 Nayan, dowa mendad se aldaw te pegdateng te Pista te Pegpelowà. Yan se pegpengaen dan te pan kenà eglebag. Gayed mig-aneng-aneng se menge pengolo te simbahan aw menenoladà te punù aw eden se inangen dan amon dekepen dan si Jesus te wedad pa doma otaw metaga-taga amon imetayan dan.
MAR 14:2 Minikagi dan, “Keilangan eked kidon pegdakep kandin dalem te pista, amon eked pegsamok se kedita te otaw.”
MAR 14:3 Nayan, pegdoton i Jesus te lonsod te Bitanya, limaoy sikandin ki Simon, sìyan otaw pinegolian din te tompig. Dalem te pegpengaen dan, doen bayi nengibing te lana metinadeg insawol diyà te deitek botilya. Ontò iyan meelagà so ininang te ontò nardo. Penga niyan, linebak din se botilya aw intoyong din se lana diyà te olo i Jesus.
MAR 14:4 Na, doen menge otaw kidoen mig-aneng-aneng, “Tay law. Pigbàtan din se lana sìyan.
MAR 14:5 Simpana ibeligyà iyan, ginatos pa se kwarta dinaryo iteped peden diyà te menge otaw sagkep.” Sinila dan heman se bayi sìyan.
MAR 14:6 Meneng minikagi si Jesus, “Pebeyai niyo sikandin. Ikà niyo egsila te bayi sìyan. Mèpiya se ininang din diyà kanak.
MAR 14:7 Gayed doen otaw sagkep mebatog niyo tebangan pengkey kano doen ibeg niyo. Meneng eked a gayed peg-ogpà dini kenyo.
MAR 14:8 Ininang te bayi sìyan se mebatog din inangen. Pineokit te pegtoyong din te lana sìyan diyà kanak, impetagad a din te peglebeng kanak.
MAR 14:9 Eneng-enengi niyo se kagi ko seini. Eked palos sikandin kelibeli, so pengkey kenan toledai se Mèpiya Indan doton te kebelad te keneyonan, iindan heman se ininang te bayi sìyan.”
MAR 14:10 Nayan, doen sebad tinoledaan i Jesus ngadan din si Judas Iscariote. Dimoton sikandin te menge pengolo te simbahan aw migpebelaw-belaway dan tepad te pegtolok din ki Jesus amon dekepen dan.
MAR 14:11 Pegdineg dan te kagi din, neluba dan aw migpakang dan te doen kwarta ibegay dan diyà kandin. Penga niyan, migtagad si Judas te mèpiya aldaw amon itolok din si Jesus.
MAR 14:12 Nayan, dimateng se tagnà aldaw te pista te pegpengaen te menge Judiyo te pan kenà eglebag. Yan heman se aldaw te pegpengiyaw dan te nati te karniro kànen dan te Pista te Pegpelowà. Dimoton se menge tinoledaan i Jesus kandin aw mig-insà dan, kagi dan, “Kenan kay lay peg-inang te kànen tadon te Pista te Pegpelowà?”
MAR 14:13 Penga niyan, insogò din se didowa tinoledaan din, kagi din, “Doton kaw te Jerusalem. Aw domateng kaw doton, kitaen niyo se otaw neniang te sibolan nepenò te wayeg. Taking kaw kandin.
MAR 14:14 Aw domateng sikandin doton te balay, ikagi kaw diyà te tig-apò, ‘Insogò kay te Pengolo amon meg-insà kay kamno aw kenan se kànan te kedita day te Pista te Pegpelowà.’
MAR 14:15 Penga niyan, ipekità din diyà kenyo se dakel gibelayan kidoen diatas te balay tapay doen telepagan impetagad kenitadon. Peg-inang kaw te kànen tadon kidoen.”
MAR 14:16 Penga niyan, nesayo se didowa tinoledaan din aw dimoton dan te Jerusalem. Kinità dan se kedita iling te tapay inikagi i Jesus diyà kandan. Penga niyan, mig-inang dan te kànen.
MAR 14:17 Pegkedelem niyan, dimoton si Jesus aw kedita te sempolò teg dowa tinoledaan din.
MAR 14:18 Dalem te kimaen dan, minikagi si Jesus, “Eneng-enengi niyo se kagi ko kenyo seini. Doen sebad kenyo megtolok kanak, aw kimaen sikandin doma ko.”
MAR 14:19 Nepuluk se pedowan dan, aw migpetibos-tibosay dan mig-insà diyà kandin, kagi dan, “Kenà ko lay lebò?”
MAR 14:20 Minikagi si Jesus, “Yan se sebad diyà te sempolò teg dowa kenyo. Timogen sikandin kanak.
MAR 14:21 Metoman a imetayan, so yan se kagi te Timanem insolat gebii tepad kanak Timanem Migpekeotaw. Meneng mekelelayò se otaw megtolok kanak. Mèpiya peden aw wedà sikandin tebaw.”
MAR 14:22 Nayan, dalem te pegpengaen dan, nengabat si Jesus te pan, aw migpesiontong sikandin diyà te Timanem. Penga niyan, binelà-belà din se pan, aw inteped din iyan diyà kandan, aw minikagi sikandin, “Kàni niyo se pan seini, so yan se lawa ko.”
MAR 14:23 Penga niyan, inabat din heman se tabò, aw migpesiontong sikandin diyà te Timanem, aw inteped din heman diyà kandan, aw mininem se kedita dan kenyan.
MAR 14:24 Minikagi si Jesus, “Yan se dipanog ko, aw pineokit kani, doen den kaling peokit pesalo doton te Timanem. Pineokit te pegkematay ko, medita se otaw tebangan.
MAR 14:25 Eneng-enengi niyo se kagi ko kenyo seini. Eked a todà inem te ininem tadon seini singed aw metoman kidon minem te kaling bino doton te peglowan te Timanem.”
MAR 14:26 Penga niyan, migdelangan dan tepad te pegduyun dan te Timanem, aw nesayo dan lekat kidoen, aw dimoton dan te bontod te Olibo.
MAR 14:27 Penga niyan, minikagi si Jesus diyà te menge tinoledaan din, “Tomanan se kedita niyo kanak, so doen kagi te Timanem insolat gebii, ‘Ipeimatay ko se otaw egtonggò te ayam-ayam karniro, aw mebilit se kedita te karniro tinonggoan din.’
MAR 14:28 Meneng penga te pegkeantay ko lekat te nematay, mekeonà a diyà kenyo doton te Galiliya.”
MAR 14:29 Minikagi si Pedro diyà ki Jesus, “Pengkey tomanan se kedita te doma kamno, meneng eked a palos tanan kamno.”
MAR 14:30 Minikagi si Jesus, “Eneng-enengi se kagi ko kamno seini. Kwani te eked pegkolaak se manok te mekedowa te delem seini, ibolon a nikaw te meketelo.”
MAR 14:31 Meneng ontò minikagi si Pedro, “Eked a palos pegbolon kamno, pengkey imetayan a sipat kamno.” Iling heman kenyan se inikagi te kedita te tinoledaan i Jesus.
MAR 14:32 Nayan, dimoton dan te kekeyowan iningedanan Gitsimani. Pegdateng dan doton, minikagi si Jesus diyà te menge tinoledaan din, “Pegtagad kaw dini, so domoton a sida amon megtawal-tawal a.”
MAR 14:33 Penga niyan, impetaking din si Pedro, aw si Santiago, aw si Juan. Ontò den nepuluk se pedowan din,
MAR 14:34 aw minikagi sikandin, “Ontò den nepuluk se pedowan ko, iling te matay a. Peg-ogpà kaw den dini, aw ikà niyo egtedogi.”
MAR 14:35 Penga niyan, dimeleg si Jesus te kenà mediyò, aw limemlem sikandin aw migtawal-tawal. Nemoyò sikandin diyà te Timanem aw mepakay diyà kandin, eked din peden sikandin peokiti diyà te kelimahan agpet domateng diyà kandin.
MAR 14:36 Migtawal-tawal sikandin, kagi din, “Amà, wedad palos eked no kebatog. Yan eked a no peden peokiti diyà te kelimahan seini. Meneng ibeg ko, kamno ibeg se metoman, kenà kanak.”
MAR 14:37 Peglikò din doton te tinoledaan din, timedogi den dan. Linoka din sikandan aw minikagi sikandin diyà ki Pedro, “Simon, nepela a den kenyo, so timedogi kaw. Wedà kaw kedì peketayod te sebad olò oras.
MAR 14:38 Ikà niyo egtedogi, meneng pegtawal-tawal kaw amon eked kaw keboyo. Pengkey mèpiya se ibeg te pedowan niyo, meneng wedad kagsen te lawa niyo.”
MAR 14:39 Todà migpekediyò-diyò si Jesus aw migtawal-tawal. Onawa heman se intawal-tawal din.
MAR 14:40 Todà limikò si Jesus doton te menge tinoledaan din, aw kinità din dan timedogi, so ontò dan nepilot. Wedà dan ketegahi aw eden se itaba dan kandin.
MAR 14:41 Peglikò i Jesus doton kandan te iketelo, minikagi sikandin, “Nepela a so gayed kaw timedogi. Na, botong den iyan, so dimateng den se oras te pegtolok kanak Timanem Migpekeotaw amon dekepen a te menge otaw nelegeb te salà.
MAR 14:42 Enaw kaw den. Dimateng den se otaw megtolok kanak. Somongon kidon kandin.”
MAR 14:43 Telobo pa minikagi si Jesus, pegketà dimateng si Judas, sìyan tinoledaan i Jesus. Medita se otaw timaking kandin, aw migkekamang dan te menge podok aw batota. Insogò dan te menge pengolo te simbahan aw menge menenoladà te punù ingkeliwat i Moises aw menge obanen te Judiyo.
MAR 14:44 Tapay dan netegahan aw eden se inangen i Judas, so minikagi sikandin, “Se otaw edekan ko, yan se otaw inahà niyo. Dekepi niyo sikandin aw bentayi niyo sikandin te pegpengibing niyo kandin doton te otaw meg-osay kandin.”
MAR 14:45 Nayan, pegdateng dan doton, wedà peg-alà-alà si Judas meneng dimoton ki Jesus, aw minikagi, “Sir.” Penga niyan, inedekan din si Jesus.
MAR 14:46 Penga niyan, dinakep dan sikandin.
MAR 14:47 Meneng doen sebad tinoledaan i Jesus nenagnos te podok din aw tinigbas din se sineligan te ontò pengolo te simbahan, aw nepalot se dibaloy telinga din.
MAR 14:48 Penga niyan, minikagi si Jesus diyà kandan, “Kolang se pegkekamang niyo te podok aw batota amon megdakep kaw kanak, so kenà a megdedempasay.
MAR 14:49 Gayed a migtoladà doton te dakel simbahan, meneng wedà a niyo dekepi doton. Meneng keilangan metoman se kagi te Timanem insolat tepad kanak.”
MAR 14:50 Penga niyan, kimadas se kedita te tinoledaan i Jesus, aw tinenanan dan sikandin.
MAR 14:51 Doen sebad telaki timelokon ki Jesus olò migdiping. Dinakep dan heman sikandin,
MAR 14:52 meneng nekelowà, so tinenanan din se diping din aw kimadas migpetabeg-tabeg.
MAR 14:53 Penga niyan, inibing dan si Jesus doton te ontò pengolo te simbahan. Tapay netipon kidoen se menge pengolo te simbahan, aw menge obanen te Judiyo, aw menge menenoladà te punù ingkeliwat i Moises.
MAR 14:54 Timelokon heman si Pedro, meneng migpekediyò sikandin lamig dimateng doton te dowangen te balay te ontò pengolo te simbahan. Nenenoo sikandin doma te menge otaw migtonggò te dakel simbahan, aw mig-ingadang sikandin diyà te apoy dan.
MAR 14:55 Nayan, ibeg te menge pengolo te simbahan aw menge doma dan obanen, doen inangan dan si Jesus te salà amon doen tindegan te pegpeimatay dan kandin. Meneng wedad palos salà din kinità dan.
MAR 14:56 Pengkey medita se otaw migkebolalaw tepad kandin, meneng kenà onawa se in-indan dan.
MAR 14:57 Doen menge otaw migkebolalaw tepad kandin, kagi dan,
MAR 14:58 “Dinineg day se inikagi din te mekebatog sikandin megbaet te dakel simbahan sida ininang te otaw, aw ipetindeg din se kaling simbahan eked inangi te otaw dalem te telo se aldaw.”
MAR 14:59 Pengkey yan se in-indan dan tepad kandin, meneng kenà onawa se in-indan dan.
MAR 14:60 Penga niyan, timindeg se ontò pengolo te simbahan aw mig-insà diyà ki Jesus, “Eden lay se itaba no kenyan? Indani kay aw benal se inikagi dan.”
MAR 14:61 Meneng wedà taba si Jesus. Minikagi heman se ontò pengolo te simbahan, “Sikona ekon se Misiyas, sìyan Batà te Timanem. Indani kay den aw benal iyan.”
MAR 14:62 Minikagi si Jesus, “Benal iyan. Komità kaw kanak Timanem Migpekeotaw egpenenoo kidoen te tangkil te Amay ko metolos amon lomowan a doma din. Lomikò a heman dini lekat te langit tekingan te labon.”
MAR 14:63 Penga niyan, miglisì se ontò pengolo te simbahan te saol din tandà te keopal din, aw minikagi sikandin, “Wedad den kekemowan te peg-indan te doma otaw diyà kenitadon tepad kandin,
MAR 14:64 so dinineg tadon den se pegtompuyus din te Timanem pineokit te pegpelingo-lingo din Batà te Timanem. Na, eden lay se aneng-aneng niyo tepad kandin?” Penga niyan, minikagi se kedita dan te keilangan imetayan sikandin so doen salà din.
MAR 14:65 Lekat niyan, tineptepan dan sikandin, aw doen nenampeng te mata din aw nenombag kandin, aw minikagi dan, “Na, etoki aw sinu se nenombag kamno.” Nenombag heman kandin se menge otaw migtonggò te dakel simbahan.
MAR 14:66 Dalem niyan, mig-ogpà si Pedro kidoen te dowangen. Doen bayi egtelaban te ontò pengolo te simbahan minokit kidoen te dowangen.
MAR 14:67 Pegkità din ki Pedro mig-ingadang kidoen te apoy, mininoet sikandin aw minikagi, “Sikona se egdoma ki Jesus tege Nasarit.”
MAR 14:68 Meneng migbolon si Pedro, kagi din, “Wedà ko ketegahi aw eden se eg-ikegiyen nikaw.” Penga niyan, minalin si Pedro doton te dapag te dalan, aw migkolaak se manok.
MAR 14:69 Wedà kenamay, todà kimità se bayi sìyan ki Pedro aw minikagi diyà te menge otaw kidoen, “Sebad heman sakop din se otaw seini.”
MAR 14:70 Meneng todà migbolon si Pedro. Penga niyan, te wedà kenamay, doen menge doma otaw kidoen minikagi diyà ki Pedro, “Benal sikona se sebad egdoma te otaw sida dinakep, so tege probinsya ka te Galiliya.”
MAR 14:71 Meneng ontò migsapà si Pedro aw minikagi, “Wedà a palos kilala te otaw eg-ikegiyen niyo sìyan.”
MAR 14:72 Pegketà, migkolaak se manok te ikedowa. Yan neeneng-enengan i Pedro se tapay inikagi i Jesus te ibolon din sikandin te meketelo te eked pa pegkolaak se manok te mekedowa. Penga niyan, ontò sikandin migkelag.
MAR 15:1 Nayan, peglibtak te aldaw sìyan, netipon se kedita te pengolo te simbahan, aw menge obanen te Judiyo, aw menge menenoladà te punù ingkeliwat i Moises. Netipon se kedita dan amon meglalang dan aw eden se inangen dan. Penga niyan, ginapos dan si Jesus, aw inibing dan sikandin doton te gobirnador si Pilato.
MAR 15:2 Pegdateng dan doton, mig-insà si Pilato ki Jesus, kagi din, “Sikona lay se Selotan te menge Judiyo?” Timaba si Jesus, “Ee. Benal se kagi nikaw.”
MAR 15:3 Penga niyan, medita se indimanda te menge pengolo te simbahan tepad kandin.
MAR 15:4 Minikagi heman si Pilato, “Medita se indimanda dan tepad kamno. Eden lay se itaba no kandan?”
MAR 15:5 Meneng wedà den taba si Jesus, aw yan se doun te nepela si Pilato.
MAR 15:6 Nayan, kelikit te Pista te Pegpelowà, doen ketanem te gobirnador te ipelowà din se sebad otaw kineleboso, pengkey sinu se pemellien te kedita te otaw.
MAR 15:7 Na, dalem niyan, doen menge ribildi kineleboso, so nemonò dan te otaw te peg-ato dan te gobirno. Doen sebad kandan iningedanan ki Barabas.
MAR 15:8 Pegketipon te medita otaw, nemoyò dan ki Pilato amon ipelowà din se otaw kineleboso, so yan se ketanem din.
MAR 15:9 Penga niyan, mig-insà si Pilato, “Meibeg kaw lay aw ipelowà ko se Selotan te menge Judiyo?”
MAR 15:10 Yan se inikagi i Pilato, so netegahan din te impedakep te menge pengolo te simbahan si Jesus so miningà dan kandin.
MAR 15:11 Meneng gayed migdeliseg se menge pengolo te simbahan diyà te otaw netipon kidoen amon ipelowà din si Barabas aw eked din pelowai si Jesus.
MAR 15:12 Mig-insà heman si Pilato, “Menonen ko sikandin egtewalen niyo Selotan te menge Judiyo?”
MAR 15:13 Migbelobansag dan heman, kagi dan, “Imetayi sikandin. Lensangi diyà te kros.”
MAR 15:14 Mig-insà si Pilato, “Nengà lay? Eden lay se salà ininang din?” Meneng labi pa dakel se kagi dan, aw migbelobansag dan, “Imetayi sikandin. Lensangi diyà te kros.”
MAR 15:15 Penga niyan, impelowà i Pilato si Barabas lekat te keleboso, so ibeg din meluba se medita otaw netipon. Impebadas din si Jesus, aw impeibing din amon ilansang diyà te kros.
MAR 15:16 Penga niyan, inibing te menge sondalo si Jesus doton didalem te balay te gobirnador, aw migtipon dan te kedita te doma dan sondalo.
MAR 15:17 Penga niyan, pineseolan dan sikandin te melalag saol iling te saol te selotan. Linekò dan se belagen doen tigis aw yan se insangkob dan diyà te olo din iling te korona te selotan.
MAR 15:18 Penga niyan, migpelingo-lingo dan te egsegmanen dan sikandin, kagi dan, “Iduyun sikona Selotan te menge Judiyo.”
MAR 15:19 Penga niyan, binadas dan se olo din te tigbaw, aw tineptepan dan sikandin. Limongken dan heman diyà kandin aw migpelingo-lingo dan te sikandin se selotan egsegmanen dan.
MAR 15:20 Penga te pegtompuyus dan kandin, linowas dan se melalag saol lekat kandin, aw impesaol dan diyà kandin se kandin saol. Penga niyan, inibing dan sikandin lekat te balay te gobirnador amon ilansang diyà te kros.
MAR 15:21 Nayan, kidoen te dalan, netelaan te menge sondalo se sebad tege Sirene kaling dimateng lekat te saka. Ngadan din si Simon, aw batà din si Alejandro aw si Rufo. Lineges dan sikandin neniang te kros.
MAR 15:22 Inibing te menge sondalo si Jesus doton te bontod iningedanan Golgota. (Se kelebadan niyan, “Tòlan te Olo.”)
MAR 15:23 Pegdateng dan doton, imbegay te sondalo diyà ki Jesus se bino sinengedan te bebolong te saka iningedanan mira amon eked din imenmani se kesakit. Meneng wedà din inemi.
MAR 15:24 Penga niyan, inlansang dan sikandin diyà te kros. Penga niyan, pigtalad-talad te menge sondalo se penenaktun linowas din, aw migbonot dan aw eden se penenaktun meabat te teg sebad-sebad kandan.
MAR 15:25 Menge alas nowibi se oras te peglansang dan kandin diyà te kros.
MAR 15:26 Doen solat tepad te indimanda kandin insawol dan kidoen, kagi niyan, “Seini se Selotan te menge Judiyo.”
MAR 15:27 Doen heman dowa megdedempasay inlansang diyà te kros kidoen te tangkil din, aw si Jesus diyà te tengà-tengà. [
MAR 15:28 Yan netoman se kagi te Timanem insolat gebii, “Ipelumun sikandin iling te otaw dakel se salà.”]
MAR 15:29 Migtompuyus kandin se menge otaw minokit diyà te dalan medapag kidoen. Migkiling-kiling dan te olo dan te pegsila dan kandin, aw minikagi dan, “Ehe. Minikagi ka te mekebatog ka megbaet te dakel simbahan sida, aw todà no iyan ipetindeg dalem te telo se aldaw.
MAR 15:30 Na, aw mekebatog ka kenyan, pekitai diyà kenami te doen tolos no pineokit te pegtabang no te kamno pegkeotawun amon eked ka kematay. Tenà ka den lekat te kros.”
MAR 15:31 Iling heman kenyan se pegtompuyus te menge pengolo te simbahan, aw menenoladà te punù ingkeliwat i Moises. Minikagi dan, “Migtabang sikandin te menge doma otaw netigdaan amon eked dan pa kematay. Meneng eked den sikandin peketabang te kandin pegkeotawun amon eked kematay.
MAR 15:32 Aw benal sikandin se Misiyas aw Selotan te menge bowad-bowad i Israel, mekebatog sikandin tomenà lekat te kros dalem te pegtengteng tadon kandin, amon memenal kidon kandin.” Iling heman kenyan se pegtompuyus te doma otaw inlansang diyà te kros kidoen te tangkil din.
MAR 15:33 Nayan, pegkealas dosi te aldaw, migkengitngit se langit aw tanà lamig alas tris te meapon.
MAR 15:34 Menge alas tris te meapon, timawal si Jesus te dakel se kagi din, kagi te Hebreo, “Eloi, Eloi, lama sabaktani?” Se kelebadan niyan, “E Timanem ko, nengà lay tinenanan a nikaw?”
MAR 15:35 Pegdineg te menge otaw netipon kidoen, minikagi dan, “Na, nengenganay den sikandin diyà ki Elias, sìyan telekeliwat te kagi te Timanem gebii.”
MAR 15:36 Doen otaw ayas minangay te ispongha aw inagem din iyan diyà te bino sinengedan te wayeg. Intangen din iyan diyà te toktok te tigbaw, aw impesopsop din iyan ki Jesus. Minikagi heman se otaw, “Pebeyai niyo sikandin, so kitaen tadon aw domini si Elias amon mengabat kandin.”
MAR 15:37 Penga niyan, timawal si Jesus te dakel se kagi din, aw penga niyan nematay.
MAR 15:38 Nayan, tigkan nelisì se kayad kidoen te tengà-tengà te dakel simbahan te Jerusalem. Nelisì iyan lekat diatas lamig diyà te ongan.
MAR 15:39 Gayed timengteng se kapitan te sondalo ki Jesus, aw pegkità din te pegtawal din aw pegkematay din, minikagi sikandin, “Ontò Batà te Timanem se otaw sìyan.”
MAR 15:40 Doen heman menge bayi kidoen kenà mediyò te kros, aw kinità dan se kedita te neinang. Sikandan si Maria tege Magdala, aw kesangay din si Maria inay te kaling otaw si Santiago aw si Jose. Kidoen heman si Salome.
MAR 15:41 Sikandan se tapay timaking ki Jesus te peglegeb din kidoen te probinsya te Galiliya amon megtabang dan kandin. Medita heman se doma dan bayi timaking ki Jesus te pegdoton din te Jerusalem.
MAR 15:42 Agpet den somallep se aldaw, aw keeldawan niyan se Sebado aw aldaw te peg-etod. Doen otaw si Jose tege Arimatiya. Sikandin se sebad obanen egsegmanen te menge doma din obanen eglowan diyà te menge Judiyo, aw egpeliman sikandin te peglowan te Timanem. Pegkeapon niyan, impesalig din se pedowan din, aw dimoton ki Pilato, aw pinemoyò din se lawa i Jesus amon ilebeng din.
MAR 15:44 Nepela si Pilato te nematay den si Jesus. Yan se doun te impeangay din se kapitan te sondalo, aw mig-insà kandin aw nematay den si Jesus.
MAR 15:45 Peg-ikagi te kapitan te benal nematay den si Jesus, migpunù si Pilato te mepakay aw ebaten i Jose se lawa din.
MAR 15:46 Penga niyan, bineyadan din se sapot, aw inabat din se lawa lekat te kros, aw ginakes din iyan te sapot, aw inlebeng din kidoen te lebeng impeawang diyà te pangpang. Penga niyan, kinelid din se dakel bato amon isampeng te lebeng.
MAR 15:47 Timaking heman si Maria tege Magdala aw kesangay din si Maria inay i Jose, aw kinità dan se linebengan te lawa.
MAR 16:1 Nayan, penga te aldaw te peg-etod, migpedomà-domaay si Maria tege Magdala, aw kesangay din si Maria inay i Santiago, aw si Salome. Minayad dan te metinadeg amon doen itoyong dan diyà te lawa i Jesus.
MAR 16:2 Peglibtak te aldaw te iselem te Linggo, dimoton dan te lebeng.
MAR 16:3 Te wedà dan pa dateng doton, migpeinsaay dan, kagi dan, “Sinu lay se mengelid te bato insampeng te lebeng amon mekeawop kidon?”
MAR 16:4 Meneng pegtengteng dan, kinità dan te tapay den nekelid se bato insampeng. Ontò dakel se bato sìyan.
MAR 16:5 Penga niyan, minawop dan diyà te lebeng, aw kinità dan se anghil nenaol te mepotì aw nenenoo lenged te kowanan dan. Nepela se menge bayi.
MAR 16:6 Penga niyan, minikagi se anghil, “Ikà niyo egkepela. Netegahan ko te inahà niyo si Jesus tege Nasarit, sìyan inlansang diyà te kros. Wedad den sikandin dini, so neantay den lekat te nematay. Tengtengi niyo den se linebengan kandin.
MAR 16:7 Na, doton kaw den ki Pedro aw menge doma tinoledaan i Jesus, aw indani niyo dan te nekeonà den si Jesus diyà kenyo pesalo doton te probinsya te Galiliya. Kitaen niyo sikandin doton, so yan se inikagi din kenyo.”
MAR 16:8 Penga niyan, limowà dan lekat te lebeng aw kimadas dan, so tinegangtang dan, aw ontò dan nepela. Wedad palos otaw inindanan dan tepad te kinità dan, so nelemitan dan. [
MAR 16:9 Nayan, penga te pegkeantay i Jesus lekat te nematay te iselem te Linggo, si Maria tege Magdala se tagnà pinekitaan i Jesus. Sikandin se tapay pinelowaan i Jesus te pito se bosaw.
MAR 16:10 Dimoton sikandin te menge tinoledaan i Jesus. Gayed dan nepuluk aw migkelag dan. Meneng mig-indan si Maria diyà kandan aw eden se kinità din.
MAR 16:11 Pegdineg dan te neantay den si Jesus lekat te nematay aw kinità din den sikandin, wedà dan pemenal kenyan.
MAR 16:12 Penga niyan, migpekità si Jesus diyà te didowa tinoledaan din te peg-ipanaw dan pesalo doton te saka, meneng wedà dan sikandin kilelai, so netodà den se bawa din.
MAR 16:13 Pegkilala dan kandin, limikò dan doton te Jerusalem, aw mig-indan dan diyà te menge doma tinoledaan din. Meneng wedà dan pa pemenal kandan.
MAR 16:14 Penga niyan, migpekità si Jesus diyà te sempolò tegusà tinoledaan din dalem te pegpengaen dan. Simila sikandin kandan so wedà dan pemenal aw magsen se olo dan, so wedà dan pemenal te kagi te menge otaw kimità kandin penga te pegkeantay din lekat te nematay.
MAR 16:15 Penga niyan, minikagi si Jesus, “Doton kaw den te kebelad te keneyonan. Pegtoladà kaw te Mèpiya Indan tepad kanak diyà te kedita te otaw.
MAR 16:16 Aw memenal se otaw kenyan, aw megpebonyag, ipelowà sikandin lekat te salà. Meneng aw eked pemenal se otaw, ipelumun sikandin.
MAR 16:17 Seini se menge pengilala inangen te menge otaw egpemenal kanak. Megpelowà dan te bosaw lekat te otaw pineokit te ngadan ko. Mikagi dan heman te kagi eked kelebeti.
MAR 16:18 Pengkey mekeawid dan te memokan, pengkey mekeinem dan te mekeilo, eked dan elegi. Aw memaed dan te menge otaw doen mesakit, kegolian dan.”
MAR 16:19 Nayan, penga te peg-ikagi i Jesus diyà kandan, neengat sikandin doton te langit, aw nenenoo kidoen te tangkil te Timanem amon lomowan doma din.
MAR 16:20 Penga niyan, nesayo se menge tinoledaan i Jesus lekat te Jerusalem aw migtoladà dan kidoen te kebelad te keneyonan, pengkey kenan dan pesalo. Tinebangan dan heman te Pengolo, so impetaga-taga din te benal se intoladà dan pineokit te menge pengilala ininang dan.]
LUK 1:1 Elew Teofilo. Medita den se otaw simolat tepad te neinang dini kenami.
LUK 1:2 Se insolat dan, yan se kagi ingkeliwat te menge otaw ontò kimità te kedita te ininang i Jesus lekat te ketebò niyan, so ontò dan kinità se ininang din, aw ingkeliwat dan heman se kagi din diyà kenami.
LUK 1:3 Elew, nenamay a den mig-iling te kedita niyan, aw yan se doun te mig-aneng-aneng a den te mèpiya aw somolat a heman diyà kamno te kedita te neinang,
LUK 1:4 amon ketegahan no te ontò benal se tapay intoladà diyà kamno.
LUK 1:5 Kedengan, dalem te peglowan i Herod kidoen te probinsya te Judiya, doen sebad pengolo te simbahan te Judiyo ngadan din si Zacarias. Sikandin se sebad pengolo te simbahan sakop te gropo i Abias. Doen esawa din si Elisabet, aw pengolo te simbahan se kemonaan din heman.
LUK 1:6 Sìyan teleesawa, ontò dan nelubahan te Timanem so metòlid se eg-inangen dan. Wedad palos otaw mekesila kandan so ontò dan egtolò te menge punù te Pengolo.
LUK 1:7 Wedad palos batà dan, so wedà pegbatà si Elisabet, aw lokes den, aw temoay den se esawa din.
LUK 1:8 Dimateng se aldaw te pegpengibing i Zacarias te pegsimba, so migpetibos-tibosay se menge gropo te pengolo.
LUK 1:9 Se ketanem te menge pengolo te simbahan, migbonot dan aw sinu se mawop doton te dakel simbahan amon menonog te metinadeg. Aldaw sìyan, si Zacarias se nepallì.
LUK 1:10 Pegdateng te oras te pegsonog, medita se otaw migtawal-tawal doton te lowà.
LUK 1:11 Peg-awop din amon menonog, doen anghil insogò te Timanem migpekità diyà kandin doton te sonoganan te metinadeg lenged te kowanan.
LUK 1:12 Pegkità i Zacarias kandin, migkebulung se aneng-aneng din aw nelemitan.
LUK 1:13 Meneng minikagi se anghil, “Zacarias, ikà egkelemitan. Nenenalan se Timanem te intawal-tawal nikaw. Doen batà no meama tomebaw diyà te esawa no, aw keilangan ingedanan no sikandin ki Juan.
LUK 1:14 Yan se doun te ontò ka meluba, aw meluba heman se medita doma otaw aw tomebaw sikandin,
LUK 1:15 so ipelangkaw sikandin te Pengolo. Eked palos inem te bino aw pengkey eden se mekelasing. Meneng gayed sikandin egbeyà-beyaan te Espiritu Santo lekat te pegtebaw din.
LUK 1:16 Megtabang sikandin te medita bowad-bowad i Israel amon todà dan tomaking te Pengolo dan Timanem.
LUK 1:17 Mekeonà sikandin diyà te Pengolo amon megpetaga-taga sikandin te kedita te otaw te agpet den domateng se Pengolo. Megtabang se Espiritu Santo kandin iling te pegtabang din te telekeliwat te kagi din si Elias gebii. Pineokit te pegtoladà i Juan, megpèpiyaay se pedowan te menge telebatà. Megtoladà heman sikandin te menge otaw kenà egtolò te Timanem amon meg-inang dan te metòlid. Aw metoman iyan, meketagad den dan te pegdateng te Pengolo.”
LUK 1:18 Mig-insà si Zacarias, “Menonen ko se pegketaga-taga te metoman iyan? Eked besi iyan ketoman, so temoay a den, aw lokes den se esawa ko.”
LUK 1:19 Timaba se anghil, “Siak si Gabriel, aw gayed a ipegsogò te Timanem. Insogò a din dini kamno amon ipetaga-taga ko kamno se mèpiya indan sìyan.
LUK 1:20 Nayan, so wedà ka pemenal te inikagi ko gina diyà kamno, lekat seini meinang ka den bingelen aw omo lamig metoman se kagi ko, so ontò iyan metoman aw domateng se aldaw tapay pinemallì te Timanem.”
LUK 1:21 Nayan, se menge otaw kidoen te lowà te dakel simbahan, migtagad dan pa te peglowà din, aw nepela dan so nenamay sikandin doton didalem.
LUK 1:22 Peglowà din, wedà sikandin pekeikagi, aw netegahan dan te doen migpekità diyà kandin lekat te langit. Meneng gayed sikandin siminyas diyà kandan te belad din, so neomo.
LUK 1:23 Pegkepenga te pegpengibing i Zacarias kidoen te dakel simbahan, minolì sikandin.
LUK 1:24 Penga niyan te wedà kenamay, miglaman se esawa din si Elisabet. Dalem te lima se bolan, gayed sikandin mig-ogpà kidoen te balay.
LUK 1:25 Minikagi sikandin, “Ontò mèpiya se tabang te Pengolo kanak, so neidowan a din. Eked a den lindoi te doma otaw.”
LUK 1:26 Pegdateng te ikeenem se bolan te peglaman i Elisabet, insogò te Timanem se anghil si Gabriel doton te lonsod te Nasarit sakop te probinsya te Galiliya.
LUK 1:27 Doen laga kidoen si Maria. Telesalà dan si Jose sebad bowad-bowad te selotan gebii si David.
LUK 1:28 Dimoton si Gabriel ki Maria aw minikagi, “Doen keluba nikaw. Ontò ka neidowan te Timanem aw gayed ka din eg-ipaten.”
LUK 1:29 Meneng pegdineg i Maria te inikagi te anghil, ontò sikandin migkebulung. Mig-aneng-aneng sikandin aw eden se kedegdagan niyan.
LUK 1:30 Minikagi heman se anghil, “Maria, ikà egkelemitan, so pinemallì ka te Timanem amon tebangan ka din.
LUK 1:31 Meglaman ka, aw tebawan ka te batà meama. Ingedanan no se batà ki Jesus.
LUK 1:32 Melangkaw sikandin, aw doen gulal din Batà te Timanem Melangkaw. Ipelowan sikandin te Timanem iling te peglowan te kemonaan din si David gebii.
LUK 1:33 Lomowan sikandin diyà te kedita te bowad-bowad i Jacob te wedad temanan. Wedad palos temanan te peglowan din.”
LUK 1:34 Minikagi si Maria, “Menonen lay iyan? So wedà a pa lumun layok te meama.”
LUK 1:35 Timaba se anghil, “Domateng se Espiritu Santo kamno, aw ketebangan ka te tolos te Timanem. Yan se doun te menimanem se batà tomebaw kamno, aw sikandin se Batà te Timanem.
LUK 1:36 Nayan, se inayen no si Elisabet, pengkey wedà sikandin pegbatà aw lokes den, meneng miglaman den te enem pa se bolan.
LUK 1:37 Wedad palos eked kebatog te Timanem.”
LUK 1:38 Minikagi si Maria, “Na, gayed a egtolò te Timanem. Mepakay aw meinang diyà kanak se inikagi nikaw.” Penga niyan, nesayo se anghil.
LUK 1:39 Penga niyan te wedà kenamay, nesayo si Maria aw mig-ayas doton te bontod taman te sebad lonsod sakop te probinsya te Judiya.
LUK 1:40 Pegdateng din doton, nenayit te balay te emayen din si Zacarias aw timawal ki Elisabet.
LUK 1:41 Pegdineg i Elisabet te tawal din, miniwal se batà kidoen te getek din, aw dimateng se Espiritu Santo diyà ki Elisabet.
LUK 1:42 Timawal sikandin te dakel se kagi din, “Diyà te kedita te bayi, sikona se binegayan te Timanem te ontò dakel keluba. Begayan din heman te keluba se batà tomebaw diyà kamno.
LUK 1:43 Nepela a so pengkey sikona se inay te Pengolo ko, meneng limaoy ka kanak.
LUK 1:44 Pegdineg ko te kagi no, miniwal se batà kidoen te getek ko tandà te luba din.
LUK 1:45 Doen den keluba nikaw, so nemenal ka te metoman se kagi ingkeliwat diyà kamno lekat te Pengolo.”
LUK 1:46 Penga niyan, minikagi si Maria, “Ipegduyun ko se Pengolo,
LUK 1:47 aw ontò neluba se pedowan ko tandà te Timanem egpelowà kanak,
LUK 1:48 so pengkey ontò a medanà diyà kandin, meneng neeneng-enengan a din. Yan se doun te mikagi se kedita te otaw te binegayan a te Timanem te ontò dakel keluba,
LUK 1:49 so ontò mèpiya se ininang te Timanem metolos diyà kanak. Ontò sikandin metòlid.
LUK 1:50 Lekat te ketebò te keneyonan lamig te temanan, gayed din egkeidowan se kedita te otaw egsagman aw egtolò kandin.
LUK 1:51 Ipetaga-taga din te metolos sikandin pineokit te eg-inangen din. Ipekadas din se menge otaw eg-aneng-aneng te melangkaw dan.
LUK 1:52 Ebaten din se melangkaw selotan lekat te onsedanan dan te peglowan, aw inangen din melangkaw se menge otaw medanà.
LUK 1:53 Begayan din se otaw sagkep te mèpiya tabang, meneng ipekesayo din se otaw meyaman te wedad ibegay kandan.
LUK 1:54 Tebangan din kidon menge bowad-bowad i Israel pinemallì din, so eked din palos kelibeli se pakang din diyà te menge kemonaan tadon te gayed din keidowan si Abraham aw menge bowad-bowad din te wedad temanan.”
LUK 1:56 Nayan, mig-ogpà si Maria diyà ki Elisabet taman te menge telo se bolan, aw penga niyan minolì.
LUK 1:57 Nayan, pegdateng te aldaw te pegpetebaw i Elisabet, timebaw se batà din meama.
LUK 1:58 Pegdineg te menge kedomaan din aw menge simbalay din kenyan, neluba dan heman so ontò sikandin neidowan te Timanem.
LUK 1:59 Pegdateng te ikewalo te aldaw lekat te pegtebaw din, netipon dan amon tolien aw ingedanan se batà. Ibeg dan ingedanan heman sikandin ki Zacarias, onawa te ngadan te amay din.
LUK 1:60 Meneng minikagi si Elisabet, “Eked iyan kepakay, so ingedanan sikandin ki Juan.”
LUK 1:61 Minikagi dan, “Meneng wedad palos kedomaan no iningedanan kenyan.”
LUK 1:62 Penga niyan, siminyas dan diyà ki Zacarias bingelen pa aw eden se ibeg din iingadan.
LUK 1:63 Siminyas heman sikandin aw nemoyò te solatan, aw insolat din se kagi, “Ingedanan sikandin ki Juan.” Ontò nepela se kedita dan.
LUK 1:64 Pegketà negolian se pegkeomo din aw nekeikagi aw dimuyun sikandin te Timanem.
LUK 1:65 Nelemitan se kedita te simbalay dan. Ontò iyan nedengeg kidoen te menge bontod doton te Judiya, so yan se pigsempetanen dan.
LUK 1:66 Neeneng-enengan dan se dinineg dan, aw netegahan dan te meinang medengeg se batà sìyan, so egdomaan sikandin te Pengolo metolos.
LUK 1:67 Nayan, dimateng se Espiritu Santo diyà ki Zacarias, aw ingkeliwat din se kagi te Timanem, kagi din,
LUK 1:68 “Iduyun se Pengolo tadon Timanem egseligan te kedita tadon menge bowad-bowad i Israel, so doen isogò din megpelowà kenitadon menge sakop din, aw imetayan sikandin iselilin kenitadon.
LUK 1:69 Doen isogò te Timanem metolos megpelowà kenitadon, sìyan bowad-bowad i David egtolò te Timanem gebii.
LUK 1:70 Yan se impakang te Timanem gebii pineokit te menge telekeliwat te kagi din, so minikagi sikandin
LUK 1:71 te tebangan kidon din amon mekelowà kidon lekat te belad te poon tadon.
LUK 1:72 Metoman kidon din keidowan, so yan se impakang din diyà te menge kemonaan tadon. Eked din kelibeli se impakang din gebii,
LUK 1:73 so ontò migpakang diyà te kemonaan tadon si Abraham
LUK 1:74 te ipelowà kidon din lekat te belad te menge poon tadon, amon mekesimba kidon diyà kandin te wedad kelemitanan.
LUK 1:75 Ibeg din menimanem kidon aw metòlid se inangen tadon diyà kandin dalem te peg-ogpà tadon dini te keneyonan.
LUK 1:76 Nayan, sikona batà ko, meinang ka telekeliwat te kagi te Timanem melangkaw. Mekeonà ka doton te menge otaw amon meketagad dan te pegdateng te Pengolo,
LUK 1:77 so sikona se megpetaga-taga diyà te menge Judiyo te ipelowà din se menge sakop din lekat te pelumun aw pegwedaden din se salà tadon.
LUK 1:78 Yan se inangen te Timanem so gayed egkeido aw dakel se pedowan din. Iling te peglibtak te aldaw se pegdateng din amon megpelowà kenitadon,
LUK 1:79 so manyag sikandin diyà kenitadon pengkey iling kidon te otaw eg-ogpà diyà te kengitngitan aw nelemitan te kemetayun, amon ipeokit kidon din kidoen te dalan pesalo doton te kelinaw.”
LUK 1:80 Timilles si Juan aw ontò sikandin egkeseligan. Pegkedakel din, mig-ogpà sikandin kidoen te kebigtilan lamig te aldaw te pegpekità din diyà te menge bowad-bowad i Israel.
LUK 2:1 Nayan, dalem te peglowan i Cesar Augusto doton te Roma, doen impunù din te keilangan megpelista se kedita te otaw nesakop te gobirno te Roma.
LUK 2:2 Yan se tagnà pegpelista te ngadan, aw ininang iyan dalem te peggobirnador i Cirenio kidoen te Sirya.
LUK 2:3 Migsiolì se kedita te otaw doton te lonsod te kandan kemonaan amon megpelista dan te ngadan.
LUK 2:4 Nayan, se selotan gebii si David, yan se kemonaan i Jose, aw yan se doun te nesayo si Jose lekat te Nasarit sakop te probinsya te Galiliya aw dimoton te probinsya te Judiya taman te lonsod te Bitlihim, so yan se lonsod tinikedowan i David.
LUK 2:5 Yan se dinotonan te didowa dan si Maria amon megpelista si Jose. Mebedes den se salà din si Maria.
LUK 2:6 Dalem pa te kidoen dan te Bitlihim, dimateng se aldaw te pegtebaw te batà din.
LUK 2:7 Yan timebaw se penganay batà din meama. Linempingan din se batà, aw impeibat din diyà te kènanan te ayam-ayam kidoen te kelokob, so wedad keombaan dan doton te balay eg-ogpaan te mepanaw.
LUK 2:8 Nayan, medapag te lonsod te Bitlihim, doen menge telediyaga migpolaw se egtonggò te menge ayam-ayam karniro doton te tanà doen sagbet.
LUK 2:9 Pegketà migpekità se anghil insogò te Pengolo diyà kandan, aw doen minanyag diyà kandan lekat te Pengolo. Ontò dan nelemitan.
LUK 2:10 Meneng minikagi se anghil, “Ikà niyo egkelemitan. Na, doen den ikegiyen ko diyà kenyo aw ontò ini mèpiya, so mekebegay te keluba diyà te kedita niyo.
LUK 2:11 Doen timebaw gina seini kidoen te Bitlihim. Sikandin se Pengolo si Cristo megpelowà kenyo.
LUK 2:12 Seini se pengilala amon ketegahan niyo te benal se inikagi ko kenyo. Kitaen niyo se batà linempingan aw impeibat kidoen te kènanan te ayam-ayam.”
LUK 2:13 Pegketà kinità dan se ontò medita anghil lekat te langit timaking kandin. Dimuyun dan te Timanem, kagi dan,
LUK 2:14 “Iduyun tadon den se Timanem doton diatas te langit. Begayan din te kelinaw te pedowan se otaw egkelubahan din dini te tanà.”
LUK 2:15 Peg-olì te menge anghil doton te langit, gayed migpebelaw-belaway se telediyaga, kagi dan, “Domoton kidon den te Bitlihim amon kitaen tadon se neinang seini, sìyan impetaga-taga te Pengolo diyà kenitadon.”
LUK 2:16 Penga niyan, mig-ayas dan doton aw kimità dan ki Maria aw si Jose, aw kinità dan heman se batà impeibat kidoen te kènanan te ayam-ayam.
LUK 2:17 Pegkità dan kandan, in-indan dan se inikagi te anghil tepad te batà sìyan.
LUK 2:18 Nepela se kedita te otaw dimineg te in-indan te menge telediyaga.
LUK 2:19 Meneng si Maria, insawol din se kedita te kagi dan diyà te pedowan din, aw gayed mig-aneng-aneng kenyan.
LUK 2:20 Penga niyan, minolì se telediyaga, aw gayed dan induyun se Timanem tandà te kedita te dinineg aw kinità dan, so netoman den se inikagi te anghil kandan.
LUK 2:21 Pegdateng te ikewalo te aldaw lekat te pegtebaw din, tinolì sikandin aw iningedanan ki Jesus, so yan se ngadan inikagi te anghil te wedà pa peglaman se inay din.
LUK 2:22 Dimateng se aldaw, dimoton si Jose aw si Maria te Jerusalem amon tomolò dan te punù ingkeliwat i Moises tepad te bayi kaling egtebawan. Inibing dan heman se batà si Jesus amon ibegay sikandin diyà te Pengolo,
LUK 2:23 so doen punù impekeliwat te Pengolo te keilangan ibegay diyà te Timanem se batà meama tagnà tomebaw.
LUK 2:24 Dimoton dan te dakel simbahan amon memegay dan te ibowang diyà te Timanem, so timolò dan te punù impekeliwat te Pengolo te keilangan ibegay se didowa tokmo aw kenà didowa selepati dedeitek pa.
LUK 2:25 Nayan, doen sebad tege Jerusalem si Simeon. Eg-inang sikandin te metòlid, aw egtolò heman te Timanem. Gayed sikandin egpeliman te megpelowà se Timanem te menge bowad-bowad i Israel. Eg-ogpaan sikandin te Espiritu Santo,
LUK 2:26 aw impetaga-taga te Espiritu Santo kandin te eked sikandin kematay singed aw onà din kitaen se Misiyas isogò te Pengolo.
LUK 2:27 Inibing te Espiritu Santo si Simeon doton te dakel simbahan kidoen te Jerusalem. Aldaw sìyan, inibing heman si Jesus te amay aw inay din doton te dakel simbahan amon tomolò dan te punù ingkeliwat i Moises tepad te deitek batà.
LUK 2:28 Pegkità i Simeon kandan, inabat din se batà aw inolid din. Penga niyan, dimuyun sikandin te Timanem, kagi din,
LUK 2:29 “Pengolo ko, mepakay den diyà kanak aw meg-etod a aw matay a den, so netoman den se pakang no kanak,
LUK 2:30 so ontò a den kimità te insogò no megpelowà kenami.
LUK 2:31 Sikandin se ipekità no diyà te kedita te otaw.
LUK 2:32 Sikandin se mekelowa te kengitngit kidoen te pedowan te kedita te otaw kenà Judiyo, aw sikandin se megpetaga-taga diyà kenami menge bowad-bowad i Israel pinemallì no te ontò ka melangkaw.”
LUK 2:33 Nayan, se amay aw inay te batà, ontò dan nepela te inikagi i Simeon tepad te batà dan si Jesus.
LUK 2:34 Migtawal-tawal si Simeon te ketebangan dan te Timanem, aw minikagi sikandin diyà te inay te batà si Maria, “Na, meinang se batà seini pengilala kitaen te medita bowad-bowad i Israel. Aw komità dan kandin, medita se otaw komulu kandin aw ipelumun dan, meneng medita se doma otaw somalig diyà kandin aw mekelowà dan lekat te pelumun,
LUK 2:35 so ipetaga-taga din aw eden se aneng-aneng te kedita te otaw. Pengkey sikona, Maria, ontò ka kelimahan, so iling te dogsengen se posong nikaw.”
LUK 2:36 Doen heman bayi egkeliwat te kagi te Timanem kidoen te dakel simbahan ngadan din si Ana. Si Panuel se ngadan te amay din, sakop te pongan iningedanan Aser, so si Aser se kemonaan dan. Nengognan si Ana te pito se omay, aw penga niyan nebalo. Ontò den lokes, so kewelowan teg epat se omay din. Egdoton sikandin te dakel simbahan, so egsimba sikandin te aldaw aw delem, aw migpowasa, aw migtawal-tawal.
LUK 2:38 Dalem pa te minikagi si Simeon diyà ki Maria, dimateng si Ana kidoen kandan, aw migpesiontong diyà te Timanem. Mig-indan heman sikandin tepad te batà diyà te kedita te otaw egpeliman te megpelowà se Timanem te menge Judiyo.
LUK 2:39 Nayan, pegtoman i Jose aw si Maria te kedita te punù te Pengolo ingkeliwat i Moises tepad te batà kaling timebaw, minolì dan doton te lonsod te Nasarit kidoen te probinsya te Galiliya.
LUK 2:40 Timilles se batà, aw migketesan, aw migkebiyasa, so egtebangan sikandin te Timanem.
LUK 2:41 Nayan, kelikit te omay, gayed egdoton se amay aw inay i Jesus te Jerusalem amon tomanod dan te Pista te Pegpelowà.
LUK 2:42 Sagwa sempolò teg dowa se omay i Jesus, nemista dan doton te Jerusalem, so yan se gayed dan eg-inangen.
LUK 2:43 Pegkepenga te pista, minolì dan, meneng mig-ogpà pa si Jesus kidoen te Jerusalem. Meneng wedà iyan ketegahi te amay aw inay din,
LUK 2:44 so eden dan aw timaking sikandin te menge doma dan kidoen te dalan. Minipanaw dan lamig meapon. Pegkeapon, nengemahà dan kandin kidoen te menge kedomaan dan aw menge doma otaw minipanaw.
LUK 2:45 Meneng wedà dan kitai. Penga niyan, limikò dan doton te Jerusalem amon mengemahà dan kandin.
LUK 2:46 Te iketelo te aldaw, kinità dan sikandin kidoen te dakel simbahan doton te Jerusalem. Dimoma sikandin te menge menenoladà, aw nenenalan sikandin diyà kandan aw mig-insà heman diyà kandan.
LUK 2:47 Nepela se kedita te otaw dimineg te inikagi din, so ontò biyasa, aw mèpiya heman se intaba din.
LUK 2:48 Pegkità te amay aw inay din kandin, ontò dan nepela. Minikagi se inay din, “Atò, eked kepakay se ininang no diyà kenami, so ontò kay netetana, aw nengemahà kay kamno.”
LUK 2:49 Minikagi si Jesus, “Nepela a so pinengemahà a niyo. Nepela a so wedà niyo ketegahi te keilangan dini a te balay te Amay ko.”
LUK 2:50 Meneng wedà dan kelebeti se kedegdagan te inikagi din diyà kandan.
LUK 2:51 Penga niyan, timaking si Jesus kandan aw minolì doton te Nasarit, aw timolò te amay aw inay din. Si Maria, insawol din se kedita niyan diyà te pedowan din aw mig-aneng-aneng kenyan.
LUK 2:52 Timilles si Jesus aw migkebiyasa. Labi pa nelubahan te Timanem aw otaw.
LUK 3:1 Nayan, pegkenamay, dimateng se ikesempolò teg lima se omay te peglowan i Tiberio kidoen te Roma. Si Poncio Pilato se gobirnador kidoen te Judiya. Limowan si Herod kidoen te Galiliya, aw kedowa din si Felipe se limowan kidoen te Itorya aw Trakoniti. Limowan si Lisanias kidoen te Abilina.
LUK 3:2 Si Anas aw si Caifas se ontò pengolo te dakel simbahan te Jerusalem. Dalem te peg-ogpà i Juan batà i Zacarias kidoen te kebigtilan, insogò sikandin te Timanem megtoladà te kagi din.
LUK 3:3 Yan se doun te miglegeb sikandin kidoen te kedepagan te wayeg te Jordan. Migtoladà sikandin te kedita te otaw te keilangan megselsel dan te salà aw bonyagan dan amon ipetaga-taga dan te pigwedad den te Timanem se salà dan.
LUK 3:4 Pegtoladà din kenyan, tinoman din se pakang tapay insolat kidoen te kagi te Timanem ingkeliwat i Isaias, “Dinegen niyo se otaw doton te kebigtilan, aw dakel se kagi din, ‘Pegpeketagad kaw te pegdateng te Pengolo. Peg-inang kaw te metòlid, so domateng sikandin.’
LUK 3:5 Peg-epengen se kedita te baog, aw inangen mepantal se kedita te bontod. Tòliden se dalan belegkong, aw inangen melenas se dalan megeled-geled. Keilangan iling kenyan se pegpeketagad niyo te kenyo pedowan,
LUK 3:6 aw komità se kedita te otaw te megpelowà se Timanem te otaw lekat te salà.”
LUK 3:7 Nayan, pegdineg te otaw te intoladà i Juan, medita dan se dimoton kandin amon bonyagan din dan. Minikagi si Juan, “Tay law. Iling kaw te memokan egkadas te apoy. Eked kaw pekelowà lekat te pelumun te Timanem te modi aldaw singed aw megselsel kaw.
LUK 3:8 Aw migselsel kaw den, petega-tegahi niyo iyan pineokit te eg-inangen niyo. Ikà niyo eg-aneng-aneng te eked kaw pelumuni so bowad-bowad kaw i Abraham. Eneng-enengi niyo se kagi ko seini. Pengkey se menge bato seini te lanto te tanà, mepakay iyan inangen te Timanem menge bowad-bowad i Abraham amon somelilin dan kenyo.
LUK 3:9 Iling kaw te kayo agpet pilayen. Aw kenà mèpiya se pongo te kayo, pilayen iyan aw sonogen.”
LUK 3:10 Mig-insà se menge otaw, “Aw iling kay kenyan, eden lay se keilangan inangen day?”
LUK 3:11 Timaba si Juan, “Seini se inangen niyo. Aw doen dowa saol niyo, begayi niyo se sebad diyà te otaw wedad saol din. Aw doen kànen niyo, ilasi niyo se doma otaw wedad kànen din.”
LUK 3:12 Doen heman menge iskribinti dimoton ki Juan amon bonyagan din dan. Minikagi dan, “Sir, eden lay se keilangan inangen day?”
LUK 3:13 Timaba si Juan, “Ikà niyo egpengabat te kwarta labi pa dakel diyà te impunù te gobirno.”
LUK 3:14 Doen heman menge sondalo mig-insà diyà kandin, “Pengkey sikami, eden lay se keilangan inangen day?” Timaba si Juan, “Ikà niyo egleges te otaw amon mengabat kaw te kwarta dan. Ikà niyo heman egdimanda pineokit te kebolalaw amon begayan kaw te kwarta. Meneng pengkey eden se itandan te gobirno diyà kenyo, yan se keilangan kelubahan niyo.”
LUK 3:15 Nayan, pegdineg te menge otaw te intoladà i Juan, egdowa-dowa se aneng-aneng dan aw sikandin se Misiyas pinelimanan dan.
LUK 3:16 Meneng minikagi si Juan, “Egpemonyag a pineokit te wayeg. Meneng doen pa domateng labi pa melangkaw diyà kanak. Kenà botong se kelangkaw ko amon megtelaban a kandin pengkey meglebad a te sepatos din, so ontò sikandin melangkaw diyà kanak. Sikandin se memonyag kenyo pineokit te Espiritu Santo aw pineokit te apoy.
LUK 3:17 Iling sikandin te otaw egpepalid te trigo eggiyeken din, amon isawol din te buun aw ibingen din doton te balay. Meneng se ohot aw tipig, yan se sonogen din te apoy kenà egkepadeng.”
LUK 3:18 Iling kenyan se pegtoladà i Juan te Mèpiya Indan diyà te kedita te otaw, aw minikagi diyà kandan te keilangan tomolò dan te intoladà din.
LUK 3:19 Se otaw limowan kidoen te Galiliya, yan si Herod. Sinila sikandin i Juan so medita se ininang din medaet. Nengagaw heman sikandin te nayi din si Herodias. Peg-inang din kenyan, simila si Juan kandin,
LUK 3:20 aw labi pa medaet se ininang i Herod, so impekeleboso din si Juan.
LUK 3:21 Meneng dalem pa te pegbonyag i Juan te kedita te otaw, migpebonyag heman si Jesus. Penga niyan, dalem te pegtawal-tawal i Jesus, neowang se langit,
LUK 3:22 aw kinità dan se Espiritu Santo migpedanà diyà kandin iling te bawa te selepati. Dinineg dan heman se kagi te Timanem lekat te langit, “Sikona se Batà ko. Dakel se pedowan ko kamno, aw ontò a neluba kamno.”
LUK 3:23 Pegtebò i Jesus te pegtoladà din, menge ketlowan se omay din. Neeneng-enengan te kedita te otaw te si Jesus se ontò batà i Jose. Si Jose se batà i Heli.
LUK 3:24 Si Heli se batà i Matat. Si Matat se batà i Levi. Si Levi se batà i Melki. Si Melki se batà i Jana. Si Jana se batà i Jose.
LUK 3:25 Si Jose se batà i Matatias. Si Matatias se batà i Amos. Si Amos se batà i Nahum. Si Nahum se batà i Esli. Si Esli se batà i Nagai.
LUK 3:26 Si Nagai se batà i Maat. Si Maat se batà i Matatias. Si Matatias se batà i Semei. Si Semei se batà i Jose. Si Jose se batà i Joda.
LUK 3:27 Si Joda se batà i Joana. Si Joana se batà i Resa. Si Resa se batà i Sorobabel. Si Sorobabel se batà i Salatiel. Si Salatiel se batà i Neri.
LUK 3:28 Si Neri se batà i Melki. Si Melki se batà i Addi. Si Addi se batà i Cosam. Si Cosam se batà i Elmodam. Si Elmodam se batà i Er.
LUK 3:29 Si Er se batà i Josue. Si Josue se batà i Eliezer. Si Eliezer se batà i Jorim. Si Jorim se batà i Matat. Si Matat se batà i Levi.
LUK 3:30 Si Levi se batà i Simeon. Si Simeon se batà i Juda. Si Juda se batà i Jose. Si Jose se batà i Jonan. Si Jonan se batà i Eliakim.
LUK 3:31 Si Eliakim se batà i Melea. Si Melea se batà i Mainan. Si Mainan se batà i Matata. Si Matata se batà i Natan. Si Natan se batà i David.
LUK 3:32 Si David se batà i Isai. Si Isai se batà i Obed. Si Obed se batà i Boos. Si Boos se batà i Salmon. Si Salmon se batà i Naason.
LUK 3:33 Si Naason se batà i Aminadab. Si Aminadab se batà i Aram. Si Aram se batà i Arni. Si Arni se batà i Esrom. Si Esrom se batà i Fares. Si Fares se batà i Juda.
LUK 3:34 Si Juda se batà i Jacob. Si Jacob se batà i Isaac. Si Isaac se batà i Abraham. Si Abraham se batà i Tare. Si Tare se batà i Nakor.
LUK 3:35 Si Nakor se batà i Serug. Si Serug se batà i Ragaw. Si Ragaw se batà i Peleg. Si Peleg se batà i Eber. Si Eber se batà i Sala.
LUK 3:36 Si Sala se batà i Cainan. Si Cainan se batà i Arfaksad. Si Arfaksad se batà i Sem. Si Sem se batà i Noe. Si Noe se batà i Lamek.
LUK 3:37 Si Lamek se batà i Matusalen. Si Matusalen se batà i Enok. Si Enok se batà i Jared. Si Jared se batà i Mahalaleel. Si Mahalaleel se batà i Cainan.
LUK 3:38 Si Cainan se batà i Enos. Si Enos se batà i Set. Si Set se batà i Adam. Si Adam se batà te Timanem.
LUK 4:1 Egbeyà-beyaan si Jesus te Espiritu Santo. Pegkesayo din lekat te wayeg te Jordan, inibing sikandin te Espiritu Santo doton te kebigtilan.
LUK 4:2 Mig-ogpà sikandin kidoen taman te kepatan se aldaw, aw binoyo i Satanas. Peg-ogpà din kidoen, wedad palos kinaen din, aw penga niyan binallos sikandin.
LUK 4:3 Minikagi si Satanas, “Aw ontò ka Batà te Timanem, inangi pan se bato seini pineokit te tolos no amon doen kànen nikaw.”
LUK 4:4 Meneng minikagi si Jesus, “Eked a, so doen kagi te Timanem insolat, ‘Kenà olò kànen se keilangan te otaw amon eked kematay.’ ”
LUK 4:5 Penga niyan, inibing i Satanas si Jesus doton te melangkaw bontod, aw te wedà kenamay, impekità din kandin se kedita te ogpeanan te keneyonan.
LUK 4:6 Minikagi si Satanas, “Inangen ta otaw lomowan diyà te kedita te otaw kidoen, aw begayan ta heman te kèpiya niyan, so siak se eg-awid te kedita niyan diyà te belad ko, aw mekebegay a kenyan diyà te pengkey sinu se pemellien ko.
LUK 4:7 Aw simbahen a no, ibegay ko kamno se kedakel niyan.”
LUK 4:8 Meneng minikagi si Jesus, “Eked a, so doen kagi te Timanem insolat, ‘Timanem se Pengolo niyo aw sikandin se keilangan simbahen niyo, so sikandin olò se mepakay tekingan niyo.’”
LUK 4:9 Penga niyan, inibing i Satanas si Jesus doton diatas te dakel simbahan te Jerusalem. Minikagi si Satanas, “Nayan, aw ontò ka Batà te Timanem, kahang ka doton te tanà.
LUK 4:10 Eked ka elegi, so doen kagi te Timanem insolat, ‘Isogò te Timanem se menge anghil amon meg-ipat dan kamno.’
LUK 4:11 Doen heman kagi te Timanem insolat, ‘Ewidan ka te menge anghil, aw engaten ka dan amon eked ka kesongkol te bato.’”
LUK 4:12 Meneng timaba si Jesus, “Eked a, so doen kagi te Timanem insolat, ‘Ikà niyo egtandà te Timanem.’”
LUK 4:13 Nayan, pegketaga-taga i Satanas te eked keboyo si Jesus aw wedad den doma iboyo din kandin, nesayo sikandin aw migtagad te doma aldaw.
LUK 4:14 Ontò egbeyà-beyaan te Espiritu Santo si Jesus. Dimoton sikandin te probinsya te Galiliya, aw dimineg se kedita te otaw kidoen te dengeg din.
LUK 4:15 Timeped sikandin te menge simbahan te Judiyo amon megtoladà, aw induyun sikandin te kedita te otaw.
LUK 4:16 Penga niyan, minolì si Jesus doton te Nasarit. Yan se lonsod tinillesan din. Pegkesebado, dimoton sikandin te simbahan te Judiyo, so yan se ketanem din. Timindeg sikandin amon megbasa te kagi te Timanem.
LUK 4:17 Imbegay dan diyà kandin se libro insolat te telekeliwat te kagi te Timanem gebii si Isaias. Migbeka sikandin kenyan aw migbasa te kagi seini,
LUK 4:18 “Dini kanak se Espiritu Santo, so pinemallì a din amon megtoladà a te Mèpiya Indan diyà te menge otaw sagkep. Insogò a din amon mikagi a diyà te menge otaw kineleboso te ipelowà den dan te Timanem. Insogò a heman amon mikagi a diyà te menge otaw bota te komità den dan. Insogò a din amon megpelowà a te kedita te otaw nelimahan,
LUK 4:19 aw amon megpetaga-taga a te dimateng den se aldaw te ipekità te Pengolo se keido din.”
LUK 4:20 Penga te pegbasa din kenyan, linolon din se libro aw in-olì din diyà te egpengibing te simbahan. Penga niyan, nenenoo si Jesus amon megtoladà. Penga niyan, netingen se kedita te otaw aw timengteng dan diyà kandin.
LUK 4:21 Nayan, migtebò si Jesus migtoladà, kagi din, “Seini aldaw, netoman den se kagi te Timanem dinineg niyo.”
LUK 4:22 Mig-aneng-aneng se kedita te otaw te mèpiya se kagi din, aw nepela dan kenyan so eden dan aw olò sikandin batà i Jose.
LUK 4:23 Minikagi heman si Jesus, “Meibeg kaw besi megpeaneng-aneng kanak te eg-ikegiyen tadon, ‘Aw doktor ka, keilangan ipetaga-taga no iyan pineokit te pegbolong no te kamno pegkeotawun.’ Dinineg niyo den te doen menge kepelahan ininang ko doton te Kapirnaom, aw mikagi kaw besi heman diyà kanak te keilangan inangen ko heman se menge kepelahan dini te kanak probinsya.
LUK 4:24 Meneng eneng-enengi niyo se kagi ko seini. Kenà egsegmanen se telekeliwat te kagi te Timanem kidoen te kandin probinsya.
LUK 4:25 Seini se kebenalan ipeaneng-aneng ko kenyo. Gebii dalem te pegkeliwat i Elias te kagi te Timanem, wedad palos odan taman te telo se omay aw enem se bolan, aw doen heman ontò medaet bayil dini te kedita te ogpeanan te kemonaan tadon. Pengkey medita se bayi balo nelimahan dini te Judiya,
LUK 4:26 meneng kenà dan se sinogoan te Timanem ki Elias, so insogò din si Elias megtabang te bayi balo kenà Judiyo eg-ogpà kidoen te Saripta sakop te Sidon.
LUK 4:27 Iling heman kenyan se neinang dalem te pegkeliwat i Eliseo te kagi te Timanem. Pengkey medita se Judiyo pigtompig, meneng kenà dan se pinegolian din, so olò din pinegolian se kenà Judiyo si Naaman sakop te Sirya.”
LUK 4:28 Se otaw netipon kidoen, yan se menge Judiyo. Pegdineg dan te egkeidowan te Timanem se menge otaw kenà Judiyo, yan se doun te neopal se kedita dan.
LUK 4:29 Penga niyan, timindeg dan aw impelowà dan sikandin lekat te lonsod dan. Kidoen diatas te bontod se lonsod dan. Yan inibing dan si Jesus doton te pangpang niyan amon idagdag dan sikandin.
LUK 4:30 Meneng minokit si Jesus diyà te tengà-tengà te otaw netipon, aw nesayo sikandin.
LUK 4:31 Nayan, dimoton si Jesus te lonsod te Kapirnaom sakop te probinsya te Galiliya. Pegkesebado, migtoladà sikandin.
LUK 4:32 Ontò nepela se kedita te otaw dimineg te intoladà din, so tinekingan si Jesus te tolos.
LUK 4:33 Kidoen te simbahan te Judiyo, doen otaw dinetengan te bosaw. Timawal sikandin aw dakel se kagi din,
LUK 4:34 “Tay, Jesus tege Nasarit. Ikà egsamok kenami. Eked kay keibeg aw pegbàtan kay nikaw. Netegahan ko aw sinu ka. Sikona se metòlid otaw insogò te Timanem.”
LUK 4:35 Meneng migsagda si Jesus te bosaw, kagi din, “Kepenek ka. Lowà ka den lekat kandin.” Penga niyan, imbontog te bosaw se otaw sìyan aw limowà lekat kandin, meneng wedà elegi se otaw.
LUK 4:36 Nepela se kedita te otaw, aw migpebelaw-belaway dan, “Tay law. Sebad se ipegtoladà din. Ontò sikandin metolos, so aw megpelowà sikandin te menge bosaw, egtolò dan kandin.”
LUK 4:37 Penga niyan, ontò nedengeg si Jesus kidoen te kedita te ogpeanan medapag doton.
LUK 4:38 Pegkesayo i Jesus lekat te simbahan te Judiyo, dimoton sikandin te balay i Simon iningedanan din ki Pedro. Pegdateng din doton, ontò netigdaan se ogangan i Pedro bayi piglegenaw, aw nemoyò dan te tabang din.
LUK 4:39 Penga niyan, dimoton si Jesus kandin, aw migpetunung te keinit te lawa din. Pegketà migkèpiya sikandin, aw minenaw amon meg-inang te kànen i Jesus aw menge doma din.
LUK 4:40 Pegsallep te aldaw, inibing dan doton ki Jesus se kedita te doma dan doen medita kemolò te mesakit. Pinemàdan din se kedita dan aw negolian dan.
LUK 4:41 Doen heman medita otaw dinetengan te bosaw inibing doton ki Jesus. Peglowà te bosaw, timawal dan, “Sikona se Batà te Timanem.” Meneng sinagda i Jesus te menge bosaw amon eked dan ikagi, so netegahan dan te sikandin se Misiyas insogò te Timanem.
LUK 4:42 Pegkeiselem niyan, nesayo si Jesus aw dimoton te wedad otaw eg-ogpà amon megtawal-tawal. Meneng nengemahà se medita otaw kandin. Pegkità dan kandin, ontò dan peden sikandin temengan.
LUK 4:43 Meneng minikagi si Jesus, “Keilangan domoton a heman te doma lonsod amon megtoladà a kandan te Mèpiya Indan tepad te peglowan te Timanem, so yan se doun te insogò a din.”
LUK 4:44 Penga niyan, migtoladà si Jesus kidoen te menge simbahan te Judiyo doton te kedita te ogpeanan dan.
LUK 5:1 Nayan, doen aldaw timindeg si Jesus kidoen te kilid te lanaw iningedanan Genesarit. Migpesegsegay se kedita te otaw amon megpedapag dan diyà kandin, so ibeg dan domineg te kagi te Timanem itoladà din.
LUK 5:2 Doen dowa belangay kinità din kidoen te kilid te lanaw, meneng tinenanan iyan te otaw egpemokot, so migbollaw dan te pokot.
LUK 5:3 Penga niyan, minalin si Jesus doton te belangay i Simon, aw nemoyò te ipelepaw din iyan kidoen te lanaw medapag te kilid. Penga niyan, nenenoo si Jesus kidoen te belangay aw migtoladà te menge otaw kidoen te tanà.
LUK 5:4 Penga te pegtoladà din, minikagi si Jesus diyà ki Simon, “Pegpelawod ka aw penagdag kaw te pokot amon doen meabat.”
LUK 5:5 Meneng timaba si Simon, “Pengolo, nemokot kay timayod te delem, meneng wedad palos neabat day. Meneng so simogò ka, megdagdag kay te pokot.”
LUK 5:6 Pegdagdag dan te pokot, nesàban dan se dakel gapang te ikan. Agpet den nelisì se pokot so ontò medita se ikan neabat.
LUK 5:7 Penga niyan, kinapay dan se menge otaw kidoen te doma belangay amon megtelaban kandan. Pegdateng dan doton, miglolan dan te ikan lamig agpet den meteled se didowa belangay so nepenò te ikan.
LUK 5:8 Si Simon, se doma ngadan din si Pedro, pegkità din kenyan, limongken diyà ki Jesus aw minikagi, “Pengolo, kesayo ka lekat kanak, so nelegeb a te salà.”
LUK 5:9 Yan se inikagi din so ontò nepela si Pedro aw menge doma din, so ontò medita se ikan neabat dan.
LUK 5:10 Nepela heman se kedomaan din kidoen te doma belangay si Santiago aw si Juan, didowa batà i Sebedeo. Minikagi si Jesus diyà ki Simon, “Ikà egkelemitan. Lekat seini, kenà ikan se meabat no, meneng otaw den se ibingen no diyà kanak.”
LUK 5:11 Pegdong dan te belangay, timanan dan te kedita, aw timaking dan ki Jesus.
LUK 5:12 Sagwa kidoen si Jesus te sebad lonsod, kinità din se otaw nelegeb se lawa te tompig. Pegkità din ki Jesus, limongken diyà kandin aw nemoyò, “Sir, aw doen ibeg no, netegahan ko te mekebatog ka megpegolì kanak.”
LUK 5:13 Nemaed si Jesus kandin, aw minikagi, “Meibeg a. Kegolian ka.” Pegketà, negolian sikandin.
LUK 5:14 Migpunù si Jesus kandin te wedad palos otaw mepakay indanan din. Minikagi heman sikandin, “Doton ka te pengolo te simbahan aw pekitai se lawa no diyà kandin. Penga niyan, begayi se ibowang no iling te impunù i Moises amon ketegahan te kedita te otaw te negolian ka den.”
LUK 5:15 Meneng labi pa medita se otaw dimineg te dengeg i Jesus, aw yan se doun te ontò medita se otaw dimoton kandin amon menenalan dan kandin aw amon kegolian dan.
LUK 5:16 Meneng melikit egdoton si Jesus te kebigtilan amon megtawal-tawal.
LUK 5:17 Nayan, pegtoladà i Jesus, nenenalan kandin se menge Parisiyo, aw doen heman menge menenoladà te punù ingkeliwat i Moises. Lekat dan te medita ogpeanan kidoen te probinsya te Galiliya aw Judiya, aw lekat te lonsod te Jerusalem. Doen tolos i Jesus lekat te Timanem amon megpegolì te menge otaw doen mesakit.
LUK 5:18 Wedà kenamay, dimateng se otaw neningga te otaw kenà egpekeiwal. Ibeg dan ipeawop sikandin diyà te balay amon ibingen doton ki Jesus.
LUK 5:19 Meneng wedad okitan dan so ontò medita se otaw netipon. Yan nenayit dan doton te atep te balay sìyan, so pantal se atep niyan. Inowang dan se ketengà te atep, aw intonton dan sikandin sipat inibatan din kidoen te tengà-tengà te otaw medapag ki Jesus.
LUK 5:20 Pegkità i Jesus te ontò dan simalig diyà kandin, minikagi sikandin, “Elew, pigwedad den se salà nikaw.”
LUK 5:21 Meneng migpebelaw-belaway se menge Parisiyo aw menenoladà te punù ingkeliwat i Moises, kagi dan, “Eked kepakay se inikagi din sìyan. Migtompuyus sikandin te Timanem, so wedad mekebatog megwedad te salà meneng olò Timanem.”
LUK 5:22 Meneng netegahan i Jesus aw eden se pigbelaw-belaway dan, aw minikagi sikandin, “Nengà lay egdowa-dowa se aneng-aneng niyo?
LUK 5:23 Mola megpelingo-lingo se otaw megwedad te salà. Meneng eked pekebatog se otaw megpegolì te otaw kenà egpekeiwal singed aw doen tolos te Timanem diyà kandin.
LUK 5:24 Meneng so Timanem a Migpekeotaw, ipekità ko den kenyo te mekebatog a megwedad te salà te otaw dini te tanà.” Penga niyan, minikagi si Jesus diyà te otaw kenà egpekeiwal, “Enaw ka. Loloni se inibatan no, aw olì ka den.”
LUK 5:25 Pegketà, dalem te pegtengteng te kedita te otaw diyà kandin, minenaw, aw inibing din se inibatan din, aw minolì sikandin egduyun te Timanem.
LUK 5:26 Ontò nepela se kedita dan, aw induyun dan se Timanem. Nelemitan dan aw migpebelaw-belaway dan, “Sebad indà se kinità tadon seini.”
LUK 5:27 Nayan, pegkesayo i Jesus lekat kidoen, doen iskribinti si Levi nenenoo kidoen te opisina din. Pegkità i Jesus kandin, minikagi, “Taking ka kanak.”
LUK 5:28 Yan timindeg si Levi, aw tinenanan din se kedita, aw timaking sikandin ki Jesus.
LUK 5:29 Wedà kenamay, mig-inang si Levi te dakel kànen kidoen te balay din te pegsagman din ki Jesus. Medita heman se iskribinti aw doma otaw kimaen doma dan.
LUK 5:30 Meneng doen menge Parisiyo aw menenoladà te punù ingkeliwat i Moises simila te menge tinoledaan i Jesus, kagi dan, “Medaet iyan so kimaen kaw doma te mededaet otaw, menge iskribinti aw doma otaw nelegeb te salà.”
LUK 5:31 Pegketaga-taga i Jesus te insila dan, minikagi sikandin, “Kenà otaw wedad mesakit se bolongen te doktor, meneng otaw doen mesakit se bolongen din.
LUK 5:32 Insogò a dini kenà amon tewalen ko se otaw eg-aneng-aneng te metòlid se eg-inangen dan, meneng insogò a amon indanan ko se otaw mekesesalà te keilangan megselsel dan.”
LUK 5:33 Doen heman otaw minikagi diyà ki Jesus, “Melikit egpowasa se menge tinoledaan i Juan, aw egpowasa heman se menge tinoledaan te Parisiyo. Nengà lay kenà egpowasa se kamno menge tinoledaan?”
LUK 5:34 Minikagi si Jesus, “Aw doen peipid, eked kepuluk se menge sigalak te meama peipiden dalem te kidoen pa sikandin.
LUK 5:35 Meneng doen aldaw domateng aw meabat lekat kandan se meama peipiden, aw yan se aldaw megpowasa dan so mepuluk dan.”
LUK 5:36 Mig-indan heman si Jesus te menge tegdeyanan tepad te kaling itoladà din, kagi din, “Aw doen kaling penenaktun, wedad otaw meglisì kenyan amon doen itompal te pepidit din, so aw yan se inangen din, kebàtan se kaling penenaktun, aw kenà onawa se batek te pepidit aw itompal kenyan.
LUK 5:37 Aw meg-inang heman se otaw te bino, eked din soli se temek te paras diyà te solanan ininang lekat te kindal te kambing tapay linanit, so aw megbohak se temek, megbeto se solanan tapay linanit, aw eleg kebàtan se bino aw solanan niyan.
LUK 5:38 Yan keilangan isawol se temek inangen bino diyà te solanan kaling linanit.
LUK 5:39 Aw gayed eg-inem se otaw te tapay bino, eked sikandin keibeg te bino kaling ininang, so labi pa mèpiya se tapay.”
LUK 6:1 Nayan, Sebado se aldaw te peg-etod te menge Judiyo. Pegkesebado, minokit si Jesus aw menge tinoledaan din kidoen te kilid te pawà te trigo agpet den geniyen. Kimetel se menge tinoledaan din te oway te trigo, aw kinoso-koso dan iyan diyà te belad, aw kinaen dan, so binallos dan.
LUK 6:2 Meneng minikagi se menge Parisiyo, “Doen punù ingkeliwat i Moises te keilangan eked pegterbaho se otaw te aldaw te peg-etod. Nengà lay wedà kaw tolò kenyan?”
LUK 6:3 Timaba si Jesus, “Kenà medaet se ininang dan. Nelibelan niyo besi aw eden se insolat kidoen te kagi te Timanem tepad te ininang i David gebii. So binallos sikandin aw menge sondalo timaking kandin,
LUK 6:4 yan minawop sikandin diyà te balay te Timanem, aw kinaen din se pan imbegay diyà te Timanem. Yan heman se impekaen din diyà te menge doma din. Pengkey doen punù ingkeliwat i Moises te mepakay olò iyan kànen te menge pengolo te simbahan, meneng kenà medaet se ininang i David.”
LUK 6:5 Minikagi heman si Jesus, “So siak se Timanem Migpekeotaw, mepakay aw siak se mikagi aw eden se mepakay inangen aldaw te peg-etod.”
LUK 6:6 Nayan, pegdateng te doma aldaw te peg-etod, dimoton si Jesus te simbahan te Judiyo, aw migtoladà. Doen otaw kidoen nekepis se belad din kowanan.
LUK 6:7 Doen heman kidoen menge Parisiyo aw menenoladà te punù ingkeliwat i Moises. Nengemahà dan te idimanda dan tepad ki Jesus, aw yan se doun te gayed dan timengteng diyà kandin aw megpegolì sikandin te otaw doen mesakit te aldaw te peg-etod.
LUK 6:8 Meneng netegahan i Jesus se aneng-aneng dan, aw minikagi diyà te otaw nekepis se belad, “Tindeg ka, aw diyà ka kanak.” Penga niyan, timolò se otaw ki Jesus aw dimoton kandin.
LUK 6:9 Minikagi si Jesus diyà te otaw timengteng kandin, “Doen insà ko kenyo tepad te punù ingkeliwat i Moises. Eden lay se mepakay inangen tadon te aldaw te peg-etod? Meg-inang kidon lay te mèpiya, aw meg-inang kidon te medaet? Megtabang kidon lay te doma otaw, aw mengimatay kidon te doma?”
LUK 6:10 Penga niyan, timengteng si Jesus diyà te kedita dan, aw minikagi diyà te otaw nekepis se belad, “Oladi se belad nikaw.” Pegtolò din, migkèpiya iyan.
LUK 6:11 Meneng ontò neopal se menge Parisiyo aw menenoladà te punù. Yan migpebelaw-belaway dan aw menonen dan si Jesus.
LUK 6:12 Nayan, wedà kenamay, timikedeg si Jesus doton te bontod amon megtawal-tawal. Timayod sikandin te delem aw migtawal-tawal diyà te Timanem.
LUK 6:13 Pegkeiselem, tinawal din se kedita te otaw tinoledaan din. Penga niyan, pinemallì din se sempolò teg dowa otaw megtelaban kandin, aw iningedanan din dan menge apostol.
LUK 6:14 Sikandan si Simon iningedanan i Jesus ki Pedro, aw kedowa din si Andres, aw si Santiago, si Juan, si Felipe, si Bartolome,
LUK 6:15 si Mateo, si Tomas, aw si Santiago batà i Alfeo, aw si Simon meyseg,
LUK 6:16 aw si Judas batà te kesangay i Santiago, aw kesangay din si Judas Iscariote, sìyan migtolok ki Jesus.
LUK 6:17 Nayan, timopang si Jesus tinekingan te menge tinoledaan pinemallì din, aw timindeg dan kidoen te tanà mepantal. Ontò medita se otaw gayed egtaking kandan, aw minakop diyà kandan se ontò medita otaw lekat te kedita te lonsod sakop te probinsya te Judiya, aw lekat te Jerusalem, aw pengkey lekat te Tiro aw Sidon medapag te dagat. Netipon se kedita dan amon menenalan ki Jesus, aw amon kegolian se mesakit dan.
LUK 6:18 Dimoton heman kandin se otaw dinetengan te bosaw aw migkèpiya dan.
LUK 6:19 Migtelaman se kedita te otaw memaed kandin, so doen tolos din aw yan se doun te nekebatog sikandin migpegolì te kedita dan.
LUK 6:20 Penga niyan, timengteng si Jesus diyà te menge tinoledaan din aw minikagi, “Doen keluba te kedita niyo sagkep, so lomowan se Timanem diyà kenyo.
LUK 6:21 “Doen keluba te kedita niyo binallos seini, so mebesog kaw. “Doen keluba te kedita niyo nelidò seini, so sinelayen kaw te Timanem.
LUK 6:22 “Doen keluba te kedita niyo kebensihan te doma otaw, aw pemilangen, aw tompuyusen, aw tindàten tandà te pegtaking niyo kanak Timanem Migpekeotaw,
LUK 6:23 so egtindàten heman te kemonaan dan se menge telekeliwat te kagi te Timanem gebii. Aw yan se domateng diyà kenyo, keilangan ontò kaw meluba, so ontò mèpiya se ontong ibegay kenyo kidoen te langit.
LUK 6:24 “Meneng mekelelayò kaw meyeyaman, so doen den kelubahan niyo aw wedad pa ibegay diyà kenyo.
LUK 6:25 “Mekelelayò kaw menge otaw doen den kelidoan niyo seini, so bellosen kaw. “Mekelelayò kaw egkebebayat seini, so doen aldaw domateng aw mepuluk kaw aw megkelag kaw.
LUK 6:26 “Mekelelayò kaw aw iduyun kaw te kedita te otaw, so induyun heman te kemonaan niyo se otaw migpelingo-lingo telekeliwat te kagi te Timanem.”
LUK 6:27 “Meneng seini se kagi ko diyà te kedita niyo nenenalan kanak. Kedekeli niyo te pedowan se poon niyo. Inangi niyo se mèpiya diyà te otaw egkebensi kenyo.
LUK 6:28 Pemoyò kaw diyà te Timanem te keidowan din se otaw egpenollon kenyo. Pegtawal-tawal kaw heman diyà kandin tepad te otaw egtompuyus kenyo.
LUK 6:29 Aw sempaken kaw diyà te pisngi, pesempaki niyo heman se dibaloy. Aw legesen kaw memegay te ekasan niyo, begayi niyo heman se saol niyo.
LUK 6:30 Pemegay kaw diyà te otaw memoyò kenyo. Aw doen mengabat te kedònan niyo, ikà niyo egpeolì.
LUK 6:31 Aw meibeg kaw te mèpiya se inangen te doma otaw diyà kenyo, keilangan mèpiya heman se inangen niyo diyà te doma otaw.
LUK 6:32 “Aw olò otaw doen dakel pedowan diyà kenyo se kedekelan niyo te pedowan, eked kaw duyuni te Timanem, so pengkey otaw kenà egpenimanem, dakel se pedowan dan diyà te otaw doen dakel pedowan diyà kandan.
LUK 6:33 Aw olò otaw eg-inang te mèpiya diyà kenyo se inangan niyo te mèpiya, eked kaw heman duyuni te Timanem, so iling heman kenyan se eg-inangen te otaw kenà egpenimanem.
LUK 6:34 Aw olò otaw mekeimpas te salà se pebelesan niyo, eked kaw duyuni te Timanem, so pengkey otaw kenà egpenimanem, egpebelesay dan aw egpeimpasay dan.
LUK 6:35 Meneng sikiyo, seini se keilangan inangen niyo. Kedekeli niyo te pedowan se poon niyo. Inangi niyo dan te mèpiya. Pebelesi niyo dan pengkey eked dan iyan keolì. Aw yan se inangen niyo, dakel se ontong ibegay diyà kenyo, aw ipetaga-taga niyo te batà kaw te Timanem, so gayed sikandin egkeido te kedita te otaw pengkey medaet dan aw kenà egpesiontong.
LUK 6:36 Keilangan egkeido kaw te doma iling te keido te Amay niyo Timanem.”
LUK 6:37 “Ikà niyo eg-okom te doma otaw amon eked kaw okomi. Ikà niyo egpemegay te pelumun diyà te doma otaw amon eked kaw begayi te pelumun. Pegwedadi niyo se salà te doma otaw amon pegwedaden se kenyo salà.
LUK 6:38 Bowangi niyo se doma, aw bowangan kaw heman te Timanem. Ontò dakel se ibowang din kenyo, so deseken din, aw keyongen din, aw olowan din se ibegay din kenyo amon ontò dakel se kinewaen niyo. Aw bowasag kaw diyà te doma otaw, bowasag heman se Timanem diyà kenyo.”
LUK 6:39 Migtegdeyanan si Jesus, kagi din, “Wedad otaw bota mekeagak te doma din bota, so medagdag se didowa dan doton te awang te tanà.
LUK 6:40 Wedad heman meiskwilahay labi pa biyasa diyà te meistro din. Meneng penga te peg-iling din te kedita, onawa se kebiyasa din aw kebiyasa te meistro din.
LUK 6:41 “Mola niyo egkitaen se sagbet kidoen te mata te doma niyo, meneng wedà niyo ketegahi te doen batang kidoen te kenyo mata.
LUK 6:42 Aw eked niyo kitai se batang kidoen te kenyo mata, eked kaw peketabang te doma niyo amon meabat se sagbet lekat te kandin mata. Kolang se aneng-aneng niyo te wedad salà niyo. Ebati niyo onà se batang lekat te kenyo mata, aw penga niyan metaen se pegkità niyo amon mengabat kaw heman te sagbet lekat te mata te doma niyo.”
LUK 6:43 “Aw mèpiya se kayo, eked iyan pongo te medaet. Aw medaet se kayo, eked heman pongo te mèpiya.
LUK 6:44 Aw kitaen tadon se pongo te kayo, ketegahan tadon aw eden kemoloi te kayo iyan. Wedad pongo igira geniyen lekat te ligem. Wedad heman paras ipoen lekat te telayid.
LUK 6:45 Iling heman kenyan se otaw. Aw mèpiya se pedowan te otaw, mèpiya heman se eg-inangen din. Meneng aw medaet se pedowan te otaw, medaet heman se eg-inangen din. Aw mikagi se otaw, yan ipetaga-taga din aw eden se awop te pedowan din.”
LUK 6:46 “Eked kepakay aw mikagi kaw te siak se Pengolo niyo singed aw tomolò kaw te ipegtoladà ko kenyo.
LUK 6:47 Meg-indan a den kenyo tepad te otaw domini kanak, aw domineg te kagi ko, aw tomolò kenyan.
LUK 6:48 Iling sikandin te otaw mig-inang te balay. Nemangbang sikandin te ontò medalem lamig minapet te bato, aw yan se pinetindegan din te tollok. Pegkepenga te peg-inang din te balay, miglaneg se wayeg aw minapet te balay din. Meneng wedà iyan keagos, so ontò dimasel.
LUK 6:49 Meneng aw domineg se otaw te kagi ko, aw eked tolò kenyan, iling sikandin te otaw mig-inang te balay diyà te lanto te tanà wedà din bengbangi. Peglaneg te wayeg, netongan iyan te wedà kenamay aw ontò iyan nebàtan.”
LUK 7:1 Penga te peg-ikagi i Jesus diyà te otaw netipon kidoen, dimoton sikandin te Kapirnaom.
LUK 7:2 Doen kidoen kapitan te sondalo te gobirno te Roma. Nesekitan aw ontò netigdaan se sebad sineligan din ontò din egkeidowan.
LUK 7:3 Pegdineg te kapitan tepad ki Jesus, doen menge obanen te Judiyo insogò din mangay ki Jesus amon megpegolì te sineligan din.
LUK 7:4 Pegdateng dan doton ki Jesus, ontò dan nemoyò kandin, kagi dan, “Ontò mèpiya otaw se kapitan migsogò kenami. Pegtabang ka bag kandin,
LUK 7:5 so egkedekelan kidon din te pedowan sikitadon menge Judiyo. Sikandin se migpeinang te simbahan day dini.”
LUK 7:6 Yan timaking si Jesus kandan. Pegkedapag din kidoen te balay, doen menge sigalak te kapitan insogò din doton ki Jesus amon ikeliwat dan se kagi din seini, “Sir, pebeyai se pegdini no te balay ko, so medanà a diyà kamno, aw meyàyà a aw ipeawop ta diyà te balay ko.
LUK 7:7 Yan se doun te wedà a songon kamno, so medanà a diyà kamno. Pengkey mediyò ka pa lekat te balay ko, meneng botong aw olò ka mikagi te kegolian se sineligan ko, so metoman iyan.
LUK 7:8 Gayed a egtolò te otaw simogò kanak, aw doen heman menge sondalo nesakop diyà kanak. Aw doen sondalo isogò ko, tomolò sikandin. Aw doen doma ipeangay ko, tomolò heman. Aw doen ipeinang ko te sineligan, yan se inangen din.” Yan se kagi te kapitan ingkeliwat dan diyà ki Jesus.
LUK 7:9 Pegdineg i Jesus kenyan, ontò nepela. Penga niyan, miniling sikandin aw minikagi diyà te medita otaw timaking kandin, “Eneng-enengi niyo se kagi ko kenyo. Pengkey kidoen te menge bowad-bowad i Israel, wedad palos otaw netelaan ko simalig kanak iling te pegsalig din.”
LUK 7:10 Nayan, peg-olì te otaw insogò te kapitan, kinità dan se sineligan negolian den.
LUK 7:11 Penga niyan te wedà kenamay, dimoton si Jesus te lonsod te Nain. Timaking se tinoledaan din kandin, aw ontò heman medita se doma otaw timaking kandin.
LUK 7:12 Pegkedapag dan te lonsod, kinità dan se medita otaw lekat te lonsod nengibing te lawa te otaw nematay amon ilebeng. Temisa batà se nematay, aw balo se inay din. Ontò medita se otaw timaking pesalo doton te lebengan kandin.
LUK 7:13 Pegkità te Pengolo te inay te nematay, ontò sikandin neido aw minikagi, “Ikà egkelag.”
LUK 7:14 Penga niyan, migpedapag si Jesus aw nemaed te inibatan te nematay, aw yan simagked se otaw nengibing kenyan. Minikagi si Jesus diyà te nematay, “Atò, enaw ka.”
LUK 7:15 Yan neantay se otaw lekat te nematay, aw minenaw, aw minikagi diyà kandan. Penga niyan, inibing sikandin i Jesus doton te inay din.
LUK 7:16 Nelemitan se kedita te otaw kimità kenyan, aw induyun dan se Timanem, kagi dan, “Migtabang den se Timanem kenitadon menge sakop din, so insogò din dini kenitadon se metolos telekeliwat te kagi din seini.”
LUK 7:17 Nedengeg se sìyan ininang i Jesus kidoen te kedita te menge lonsod kidoen te probinsya te Judiya aw kedepagan niyan.
LUK 7:18 Nayan, se menge tinoledaan i Juan Memonyagay, mig-indan dan diyà ki Juan tepad te kedita te ininang i Jesus.
LUK 7:19 Impeangay i Juan se dowa tinoledaan din, aw insogò din dan doton te Pengolo amon meg-insà dan aw sikandin se ontò insogò te Timanem pinelimanan dan, aw doen pa doma domateng.
LUK 7:20 Pegdoton dan ki Jesus, minikagi dan, “Insogò kay i Juan amon meg-insà kay kamno aw sikona se ontò insogò te Timanem pinelimanan day, aw doen pa doma domateng.”
LUK 7:21 Dalem te aldaw sìyan, migpegolì si Jesus te medita otaw doen mesakit aw otaw netigdaan aw otaw pigbosawan. Migpegolì heman sikandin te otaw bota amon todà dan komità.
LUK 7:22 Yan se doun te timaba si Jesus, “Likò kaw den doton ki Juan aw indani niyo sikandin te kedita te kinità niyo aw dinineg niyo dini. Doen menge bota kimità den. Doen heman kapig minipanaw den. Doen tompigun negolian den. Doen bingelen dimineg den. Doen heman nematay neantay den. Doen menge otaw sagkep tinoledaan te Mèpiya Indan.
LUK 7:23 Indani niyo heman sikandin te doen keluba te otaw eked pegdowa-dowa te pegsalig din kanak.”
LUK 7:24 Pegkesayo te otaw insogò i Juan, minikagi si Jesus tepad ki Juan diyà te otaw netipon, kagi din, “Pegdoton niyo te kebigtilan, kenà tigbaw egkedogen te kelamag se pinengemahà niyo.
LUK 7:25 Wedà kaw heman doton amon tomengteng te otaw nenaol te ontò meelagà, so se menge otaw egpenaol te mèpiya aw egpengabat te pengkey eden se ibeg dan, yan se eg-ogpà doton te balay te selotan.
LUK 7:26 Meneng seini indà se tod niyo. Dimoton kaw te kebigtilan amon kitaen niyo se telekeliwat te kagi te Timanem. Pengkey melangkaw se kedita te telekeliwat te kagi te Timanem, meneng labi pa melangkaw si Juan.
LUK 7:27 Sikandin se migtoladà tepad kanak, aw tinoman din se pakang seini tapay insolat kidoen te kagi te Timanem, ‘Na, doen otaw isogò ko megpetaga-taga te agpet ka den domateng, amon megpeketagad se kedita te otaw te pegdateng nikaw.’”
LUK 7:28 Minikagi heman si Jesus, “Eneng-enengi niyo se kagi ko seini. Wedad palos otaw dini lanto te tanà labi pa melangkaw diyà ki Juan. Meneng labi pa melangkaw diyà ki Juan se kedita te otaw megpesakop diyà te peglowan te Timanem.”
LUK 7:29 Pegdineg dan te intoladà i Juan, minikagi se kedita te otaw pengkey menge iskribinti te metòlid se impunù te Timanem aw migpebonyag dan ki Juan.
LUK 7:30 Meneng se menge Parisiyo aw menenoladà te punù ingkeliwat i Moises, mig-eked dan te ibeg te Timanem kandan, so wedà dan pegpebonyag ki Juan.
LUK 7:31 Minikagi si Jesus, “Nayan, seini se tegdeyanan iindan ko kenyo amon ketegahan niyo aw eden se pig-ilingan te menge otaw te aldaw seini.
LUK 7:32 Iling dan te mengisù egdanga doton te pedyanan aw egpetewalay dan, ‘Pengkey mig-edop kay te seluli amon somayaw kaw, meneng wedà kaw sayaw. Pengkey migdelangan kay tepad te pegkematay, meneng wedà kaw heman kelano.’
LUK 7:33 Iling kaw heman kandan, so pegdini i Juan Memonyagay, kinità niyo se ketanem din te melikit egpowasa aw kenà palos heman eg-inem. Meneng wedà kaw penenalan kandin, aw minikagi kaw te dinetengan sikandin te bosaw.
LUK 7:34 Pegdini ko Timanem Migpekeotaw, kinità niyo se ketanem ko te gayed a egpengaen aw eg-inem. Meneng kunù wedà kaw penenalan kanak, aw minikagi kaw te legoken a aw metiinem a, aw egsigelaken ko se menge iskribinti aw doma otaw nelegeb te salà.
LUK 7:35 Meneng wedad beloyan, so netegahan te kedita te otaw migpesakop diyà te Timanem te ontò sikandin biyasa.”
LUK 7:36 Doen sebad Parisiyo nemekaen ki Jesus, aw dimoton si Jesus te balay din aw kimaen.
LUK 7:37 Nayan, doen bayi eg-ogpà kidoen te lonsod sìyan, aw nedengeg sikandin mig-inang te salà. Pegketaga-taga din te kimaen si Jesus kidoen te balay te Parisiyo, dimoton sikandin. Inibing din se lana metinadeg insawol kidoen te deitek botilya.
LUK 7:38 Peg-awop din kidoen te balay, timikelong diyà te benis i Jesus aw migkelag. Impetedak din se lohà diyà te benis din, aw logay din se inggalis kenyan. Gayed egpengadek te benis i Jesus, aw nenoyong heman te lana diyà te benis din.
LUK 7:39 Nayan, sìyan Parisiyo migpekaen ki Jesus, pegkità din te ininang te bayi, mig-aneng-aneng sikandin te kenà ontò telekeliwat insogò te Timanem si Jesus. Aneng-aneng din, simpana si Jesus se benal telekeliwat insogò te Timanem, ketegahan din aw eden se eg-inangen te bayi sìyan, so ontò sikandin mig-inang te salà.
LUK 7:40 Minikagi si Jesus diyà te Parisiyo, “Simon, doen ikegiyen ko diyà kamno.” Timaba si Simon, “Ee, Sir. Ikegihi a.”
LUK 7:41 Minikagi si Jesus, “Doen dowa otaw mineles te kwarta diyà te otaw egpebeles. Se sebad, doen salà din lima gatos. Se doma otaw, doen salà din keliman olò.
LUK 7:42 Pengkey wedà dan eleg pekebayad te salà dan, meneng pigwedad din se salà te didowa. Na, sinu lay diyà te didowa otaw sìyan se doen ontò dakel pedowan diyà te otaw migpebeles?”
LUK 7:43 Timaba si Simon, “Sikandin besi mineles te lima gatos, so labi pa dakel se salà din pigwedad.” Minikagi si Jesus, “Benal se pegtaba nikaw.”
LUK 7:44 Penga niyan, timengteng si Jesus diyà te bayi aw minikagi pa diyà ki Simon, “Eneng-enengi se bayi seini. Pegdateng ko dini te balay no, wedad wayeg imbegay no kanak ionaw te benis ko tepad te ketanem tadon. Meneng se bayi seini, lohà din se in-onaw din te benis ko, aw logay din se inggalis din kenyan.
LUK 7:45 Peg-awop ko diyà te balay no, wedà ka adek kanak. Meneng se bayi seini, gayed egpengadek te benis ko lekat te pegdateng ko lamig seini.
LUK 7:46 Wedà ka pegsawol te lana diyà te olo ko amon segmanen a nikaw. Meneng se bayi seini, meelagà se metinadeg intoyong din diyà te benis ko.
LUK 7:47 Penenalan ka kanak. Pengkey ontò medita se salà te bayi seini, meneng pigwedad den te Timanem se kedita te salà din, aw yan se doun te impetaga-taga den te bayi te ontò dakel se pedowan din kanak. Meneng simpana kenà medita se salà te otaw pigwedad te Timanem, eked din ontò petega-tegahi te dakel se pedowan din diyà te Timanem.”
LUK 7:48 Penga niyan, minikagi si Jesus diyà te bayi, “Pigwedad den se salà nikaw.”
LUK 7:49 Nepela se menge otaw kimaen doma din, so aneng-aneng dan eked kepakay aw sikandin se megwedad te salà te otaw.
LUK 7:50 Meneng minikagi heman si Jesus diyà te bayi, “Simalig ka diyà kanak, aw yan se doun te impelowà ka den te Timanem lekat te salà nikaw. Olì ka den. Ibeg ko doen kelinaw te pedowan nikaw.”
LUK 8:1 Wedà kenamay, miglegeb si Jesus aw timeped te menge lonsod aw doma ogpeanan. Migtoladà sikandin te menge otaw te Mèpiya Indan tepad te peglowan te Timanem. Timaking heman kandin se sempolò teg dowa tinoledaan pinemallì din.
LUK 8:2 Timaking heman kandin se menge bayi tapay pinegolian din aw pinelowaan din te bosaw. Sikandan si Maria tege Magdala pinelowaan te pito se bosaw,
LUK 8:3 aw si Juana sìyan esawa i Cusa sebad opisyal i Herod, aw si Susana, aw medita heman se doma. Se menge bayi sìyan, yan se migtabang ki Jesus aw menge doma din.
LUK 8:4 Gayed dimoton ki Jesus se menge otaw lekat te kedita te lonsod. Pegketipon te ontò medita otaw, mig-indan si Jesus te tegdeyanan, kagi din,
LUK 8:5 “Doen otaw dimoton te pawà amon menabog te benì, so yan se ketanem te pegpenanem din. Pegsabog din, doen benì nesabog diyà te dalan, aw negìtan iyan te otaw aw kinaen te menge manok te kebenesan.
LUK 8:6 Doen heman benì nesabog diyà te tanà kebeto-betowan. Pegtobò niyan, nelanes aw nematay te wedà kenamay so nepangkag se tanà.
LUK 8:7 Doen heman benì nesabog diyà te pinonoan te sagbet doen tigis. Timilles heman se sagbet doen tigis aw kinelep se menge tobò aw nematay.
LUK 8:8 Meneng doen benì nesabog diyà te melambò tanà. Yan se timilles aw minongo te ginatos.” Penga niyan, minikagi si Jesus te dakel se kagi din, “Keilangan menenalan se kedita niyo doen telinga.”
LUK 8:9 Nayan, mig-insà se menge tinoledaan i Jesus aw eden se kedegdagan te tegdeyanan sìyan.
LUK 8:10 Minikagi si Jesus, “Sikiyo se pinetega-tegahan te Timanem te kebenalan tepad te peglowan din. Meneng olò pineokit te tegdeyanan se pegtoladà ko te menge doma otaw amon pengkey tomengteng dan, meneng eked dan kità te kedegdagan niyan. Pengkey domineg dan, meneng eked dan ketaga-taga te kebenalan.”
LUK 8:11 “Seini se kedegdagan te tegdeyanan sìyan. Se benì insabog, yan se kagi te Timanem.
LUK 8:12 Na, se benì nesabog diyà te dalan, yan se iling te menge otaw domineg te kagi te Timanem intoladà. Penga niyan, doen inangen i Satanas amon kelibelan dan se kagi te Timanem dinineg dan, so ibeg i Satanas, eked dan pemenal aw eked dan heman pekelowà lekat te salà.
LUK 8:13 Nayan, se benì nesabog diyà te tanà kebeto-betowan, yan se iling te otaw domineg te kagi te Timanem, aw meluba dan, aw tomolò dan kenyan te eked kenamay. Meneng aw meboyo dan, tenanan dan se pinemenalan dan, so iling dan te tinanem wedad nael dalid.
LUK 8:14 Nayan, se benì nesabog diyà te pinonoan te sagbet doen tigis, yan se iling te otaw ontò domineg te kagi te Timanem intoladà. Meneng penga niyan, wedad ontong dan, so dàgen dan te ibeg dan megkeyaman, aw ibeg dan te keluba te keneyonan, aw doma ibeg te pedowan dan.
LUK 8:15 Meneng se benì nesabog diyà te melambò tanà, yan se iling te otaw ontò melobos se pedowan dan. Aw domineg dan te kagi te Timanem, ontò dan iyan egtoloen. Egtayod dan te kelimahan lamig doen ontong dan.”
LUK 8:16 “Aw menemtem se otaw te solò, eked din iyan sengkobi. Eked din heman elesi doton te siyong te katri. Meneng mèpiya aw isawol din iyan diyà te kelengkawan amon keenyagan se didalem te balay.
LUK 8:17 Iling heman kenyan, wedad in-eles songkani eked kitai te modi aldaw. Wedad heman imbolon songkani eked keindan te modi aldaw.
LUK 8:18 “Nayan, keilangan toloen niyo se dinineg niyo. Se otaw kominawà te kebenalan, yan se dogangan te kebenalan. Meneng se otaw eked kinawà te kebenalan, yan se pegwedadan te kebenalan.”
LUK 8:19 Nayan, pegtoladà i Jesus, dimateng se inay din aw menge kedowa din. Meneng wedà dan pekedapag diyà kandin, so ontò medita se otaw netipon kidoen kandin.
LUK 8:20 Doen otaw minikagi diyà kandin, “Doton te lowà se inay no aw menge kedowa nikaw. Meibeg dan ekon megkità kamno.”
LUK 8:21 Timaba si Jesus, “Se menge otaw domineg te kagi te Timanem aw tomolò kenyan, yan se meinang inay ko aw menge kedowa ko.”
LUK 8:22 Nayan, doen sebad aldaw minikagi si Jesus diyà te menge tinoledaan din, “Mèpiya aw matas kidon doton dipag te lanaw.” Penga niyan, simakay dan te belangay.
LUK 8:23 Pegpesalo dan doton, neketedogi si Jesus. Wedà kenamay, dinetengan dan te kelamag ontò mebandes. Dakel se wayeg nekeawop te belangay, aw agpet dan neteled.
LUK 8:24 Penga niyan, linoka dan si Jesus, kagi dan, “Pengolo, melemes kidon den.” Neloka si Jesus aw sinagda din se kelamag aw dakel balud. Timunung se kelamag aw migkelinaw se lanaw.
LUK 8:25 Penga niyan, minikagi si Jesus, “Wedà pa kedì kelobos se pegsalig niyo kanak.” Meneng nelemitan dan. Nepela dan aw migpebelaw-belaway dan, kagi dan, “Ontò sikandin metolos, so pengkey kelamag aw balud timolò kandin.”
LUK 8:26 Penga niyan, dimeleg dan doton medapag te Gerasa dipag te probinsya te Galiliya.
LUK 8:27 Pegtenà i Jesus, kinità din se tege Gerasa simongon kandin. Dinetengan sikandin te bosaw, aw nenamay den migpetabeg-tabeg. Kenà eg-ogpà diyà te balay, meneng eg-ogpà doton te menge lebenganan.
LUK 8:28 Pegkità din ki Jesus, mig-olangag sikandin, aw limongken diyà ki Jesus, aw minikagi te dakel se kagi din, “Jesus, Batà te Timanem ontò melangkaw, ikà egsamok kanak. Memoyò a den diyà kamno, ikà bag egpeeleg kanak.”
LUK 8:29 Yan se inikagi te bosaw, so pinunuan i Jesus se bosaw amon lomowà diyà te otaw. Melikit egdetengan te bosaw se otaw sìyan, aw yan eggeposen sikandin te doma otaw te sengkalì, aw egpentongan dan sikandin, aw gayed dan egbentayan. Meneng egkebogtò se ipeggapos kandin aw eg-ibingen sikandin te bosaw doton te kebigtilan.
LUK 8:30 Na, mig-insà si Jesus, “Sinu lay se ngadan nikaw?” Timaba sikandin, “Minelalan.” Yan se intaba din so ontò medita se bosaw egdateng kandin.
LUK 8:31 Gayed dan egpemoyò diyà ki Jesus te eked din dan peibingi doton te kilot aw ipelumun.
LUK 8:32 Ontò medita se osa nenowal doton te bontod medapag. Nemoyò se menge bosaw diyà ki Jesus aw mepakay diyà kandin malin dan doton te menge osa sìyan. Yan impealin din dan.
LUK 8:33 Yan limowà se menge bosaw lekat te otaw aw minalin dan doton te osa. Penga niyan, kimagnan se kedita te osa pesalo te keba, aw kimahang dan doton te lanaw, aw nelemes dan.
LUK 8:34 Pegkità te menge telediyaga te osa kenyan, kimadas dan aw mig-indan dan tepad kenyan doton te lonsod aw kedepagan niyan.
LUK 8:35 Penga niyan, dimoton se menge otaw inindanan dan amon komità dan kenyan. Pegdateng dan doton ki Jesus, kinità dan se otaw pinelowaan te bosaw. Nenenoo sikandin kidoen te dapag i Jesus, aw nenelowal den, aw migkèpiya den sikandin. Pegkità dan kenyan, nelemitan dan.
LUK 8:36 Inindanan dan heman te menge otaw kimità te pegpelowà i Jesus te bosaw lekat kandin.
LUK 8:37 Penga niyan, nemoyò se kedita te tege Gerasa te mesayo si Jesus lekat kidoen, so ontò dan nelemitan. Penga niyan, simakay si Jesus te belangay amon molì doton dipag.
LUK 8:38 Meneng nemoyò se otaw pinelowaan te bosaw aw mepakay sikandin tomaking. Meneng wedà din petekingi, so inikegiyan i Jesus,
LUK 8:39 “Olì ka den aw peg-indan ka diyà te menge kedomaan no tepad te mèpiya ininang te Timanem diyà kamno.” Penga niyan, nesayo sikandin aw mig-indan diyà te kedita te otaw te lonsod tepad te mèpiya ininang i Jesus diyà kandin.
LUK 8:40 Peg-olì i Jesus doton dipag te lanaw, medita se otaw simongon kandin, so tapay dan migtagad kandin.
LUK 8:41 Penga niyan, dimoton ki Jesus se sebad obanen te simbahan te Judiyo, ngadan din si Jairo. Limongken sikandin diyà ki Jesus aw nemoyò te domoton si Jesus te balay din,
LUK 8:42 so ontò netigdaan se batà din bayi. Yan se temisa batà din, aw menge sempolò teg dowa se omay din. Penga niyan, timaking si Jesus kandin. Medita se otaw timaking ki Jesus aw migpesegsegay dan kidoen te dalan.
LUK 8:43 Nayan, doen sebad bayi timaking kandin pigdipenogan te sempolò teg dowa se omay, aw migkewedad se kedakel te kedònan din imbayad te menge doktor, meneng wedad otaw nekebolong kandin.
LUK 8:44 Pegtaking din ki Jesus, migpedapag diyà te getan din aw nemaed olò te toktok te saol din. Pegketà, negolì se mesakit din.
LUK 8:45 Penga niyan, mig-insà si Jesus, “Sinu lay se nemaed kanak?” Meneng wedad otaw mig-indan. Minikagi si Pedro, “Pengolo, ikà eg-insà aw sinu se nemaed kamno, so pigdenganan ka te medita otaw.”
LUK 8:46 Meneng minikagi si Jesus, “Doen gina otaw nemaed kanak, so mig-imanman a te doen tolos limowà lekat kanak amon megpegolì te otaw.”
LUK 8:47 Nayan, pegketaga-taga te bayi te eked keeles se ininang din, migpedapag sikandin diyà ki Jesus aw tinegangtang tandà te lamit din. Limongken sikandin diyà ki Jesus aw mig-indan aw eden se tod din. Dimineg heman se kedita te otaw te kagi din te negolì den se mesakit din te lekat te pegpemaed din ki Jesus.
LUK 8:48 Minikagi si Jesus, “Atà, simalig ka diyà kanak, aw yan se doun te negolian ka. Olì ka den. Ibeg ko doen kelinaw te pedowan nikaw.”
LUK 8:49 Telobo pa minikagi si Jesus diyà te bayi, dimateng se otaw lekat te balay te obanen te simbahan, aw minikagi diyà ki Jairo, “Nematay den se batà nikaw. Wedad den kekemowan te pegpedeleg no te Menenoladà doton te balay nikaw.”
LUK 8:50 Meneng pegdineg i Jesus kenyan, minikagi sikandin, “Ikà egkepuluk, meneng salig ka diyà kanak, so meantay pa sikandin.”
LUK 8:51 Pegdateng dan doton te balay i Jairo, wedad doma otaw impetaking i Jesus doton didalem, meneng olò si Pedro, si Juan, si Santiago, aw amay aw inay te batà.
LUK 8:52 Pengkey migkelag aw migmatay se kedita te doma otaw, meneng minikagi si Jesus, “Ikà egkelag, so wedà kematay se batà. Olò sikandin timedogi.”
LUK 8:53 Meneng nebebeyatan dan si Jesus, so tapay dan netegahan te ontò den nematay se batà.
LUK 8:54 Meneng pinemàdan din se belad te batà, aw minikagi te dakel se kagi din, “Atà, enaw ka.”
LUK 8:55 Penga niyan, neantay sikandin aw minenaw. Penga niyan, migpunù si Jesus te ipekaen dan sikandin.
LUK 8:56 Nepela se amay aw inay din te neantay sikandin. Meneng migpunù si Jesus te wedad palos otaw mepakay indanan dan tepad te peg-antay din te batà sìyan.
LUK 9:1 Nayan, doen sebad aldaw migtipon si Jesus te sempolò teg dowa tinoledaan din, aw imbegay din diyà kandan se tolos amon megpelowà dan te bosaw lekat te otaw aw amon megpegolì dan te otaw doen mesakit.
LUK 9:2 Penga niyan, insogò din dan tomeped te menge doma ogpeanan amon megtoladà dan tepad te peglowan te Timanem aw amon megpegolì dan te otaw doen mesakit.
LUK 9:3 Doen impunù din kandan, kagi din, “Ikà niyo egpengibing te kedònan, pengkey bangkà, kelepì, kànen aw kwarta, so togpoan kaw te otaw toledaan niyo. Ikà niyo heman egpengibing te ekasan.
LUK 9:4 Aw domateng kaw doton te lonsod, ketingen kaw diyà te sebad balay. Ikà niyo eg-alin-alin lamig domeleg kaw doton te doma lonsod.
LUK 9:5 Aw doen otaw eked pegsagman kenyo, tektaki niyo se napò te tanà lekat te sepatos niyo te pegkesayo niyo lekat te lonsod dan. Yan metaga-taga se otaw kidoen te doen salà dan, so wedà dan penenalan te intoladà niyo.”
LUK 9:6 Penga niyan, nesayo dan aw timeped dan te menge lonsod. Pengkey kenan dan pesalo, gayed dan migtoladà te Mèpiya Indan, aw migpegolì dan heman te menge otaw doen mesakit.
LUK 9:7 Nayan, si Herod se otaw limowan kidoen te Galiliya. Pegdineg din tepad te ininang i Jesus aw intoladà din, migkebulung sikandin, so doen menge otaw eg-ikagi te yan si Juan Memonyagay neantay den lekat te nematay.
LUK 9:8 Meneng doen heman menge doma otaw eg-ikagi te sikandin se telekeliwat te kagi te Timanem gebii si Elias. Eg-ikagi heman se menge doma otaw te sikandin se sebad telekeliwat te kagi te Timanem gebii neantay den lekat te nematay.
LUK 9:9 Meneng minikagi si Herod, “Kenà niyan si Juan, so impesipal ko se lieg din. Sinu lay sikandin? So dinineg ko den te doen kepelahan eg-inangen din.” Penga niyan, ibeg i Herod megkità ki Jesus.
LUK 9:10 Nayan, peg-olì te menge sogounun i Cristo doton kandin, mig-indan dan diyà kandin tepad te kedita te ininang dan. Penga niyan, tinenanan dan se doma otaw aw inibing dan i Jesus doton te sebad lonsod iningedanan Bitsayda.
LUK 9:11 Meneng pegketaga-taga te kedita te otaw te dinotonan i Jesus, timelokon dan heman. Neluba si Jesus so nengemahà dan kandin. Penga niyan, mig-indan si Jesus diyà kandan tepad te peglowan te Timanem. Migpegolì heman sikandin te kedita te otaw doen mesakit.
LUK 9:12 Pegkeapon, dimoton se sempolò teg dowa tinoledaan i Jesus kandin, aw minikagi dan, “Pekeseyowi se kedita te otaw doton te lonsod aw kedepagan niyan amon midegà dan aw mengabat dan te kànen dan kidoen, so ontò ini kebigtilan.”
LUK 9:13 Meneng minikagi si Jesus, “Pemekàni niyo dan.” Minikagi dan, “Meneng doen olò lima se pan, aw didowa se ikan. Kenà iyan botong kànen singed aw isogò kay nikaw mayad te doma kànen, so ontò medita se otaw.”
LUK 9:14 Menge lima melalan se meama netipon kidoen, aw doen heman menge bayi aw mengisù. Minikagi si Jesus diyà te menge tinoledaan din, “Peonsadi niyo se menge otaw teg keliman se sebad ebong.”
LUK 9:15 Timolò dan, aw impeonsad dan se kedita te otaw.
LUK 9:16 Penga niyan, inabat i Jesus se lima pan aw didowa ikan. Limengag sikandin doton te langit aw migpesiontong diyà te Timanem kenyan. Penga niyan, binelà-belà din iyan aw imbegay din diyà te menge tinoledaan din amon iteped dan diyà te menge otaw netipon.
LUK 9:17 Kimaen se kedita dan aw nebesog dan. Penga niyan, inimon dan se samà te pan kinaen dan, aw sempolò teg dowa se buun nepenò.
LUK 9:18 Nayan, doen sebad aldaw migtawal-tawal si Jesus sebad din, aw medapag heman kidoen se menge tinoledaan din. Penga niyan, mig-insà si Jesus diyà kandan, kagi din, “Eden lay se kagi te kedita te otaw tepad kanak? Sinu a lay ekon?”
LUK 9:19 Timaba dan, “Medita se otaw eg-ikagi te sikona si Juan Memonyagay. Meneng doen heman eg-ikagi te sikona si Elias. Doen heman eg-ikagi te sikona se sebad telekeliwat te kagi te Timanem gebii neantay den lekat te nematay.”
LUK 9:20 Mig-insà si Jesus, “Meneng eden lay se kenyo aneng-aneng tepad kanak? Sinu a lay?” Timaba si Pedro, “Sikona se Misiyas insogò te Timanem dini kenami.”
LUK 9:21 Penga niyan, ontò migpunù si Jesus te keilangan eked dan indani diyà te doma otaw te sikandin se Misiyas.
LUK 9:22 Minikagi heman si Jesus, “Pengkey Timanem a Migpekeotaw, meneng metoman a ontò elegen, aw kuluwan a te menge obanen te Judiyo aw menge pengolo te simbahan aw menge menenoladà te punù. Imetayan a, meneng penga niyan te iketelo te aldaw, meantay a lekat te nematay.”
LUK 9:23 Nayan, minikagi si Jesus diyà te kedita dan nenenalan kandin, kagi din, “Aw meibeg se otaw tomaking kanak, keilangan megsagda sikandin te ibeg te pedowan din, aw tomayod te kelimahan te kelikit te aldaw pengkey imetayan sikandin, aw keilangan ontò tomaking kanak.
LUK 9:24 Pengkey ibeg te otaw megkelayat se omol din dini te keneyonan, meneng kunù din gayed matay. Meneng aw mepakay diyà te otaw pengkey imetayan sikandin tandà te pegtaking din kanak, begayan sikandin te kaling pedowan wedad temanan.
LUK 9:25 Simpana tig-epoen te otaw se kedakel te keneyonan, aw penga niyan matay sikandin aw ipelumun doton te kilot, wedad ontong din.
LUK 9:26 Aw eked ikagi se otaw te sikandin se sakop ko, aw eked heman tolò te kagi ko, yan se otaw eked ko heman ikegihi te sikandin se sakop ko te peglikò ko dini. Siak se Timanem Migpekeotaw, aw lomikò a pa dini tekingan te keanyag ko, aw keanyag te Amay ko, aw keanyag te menge anghil te Timanem.
LUK 9:27 Eneng-enengi niyo se kagi ko seini. Doen otaw dini kenyo eked kematay singed aw onà dan komità te peglowan te Timanem.”
LUK 9:28 Nayan, penga te sebad simana lekat te peg-ikagi i Jesus kenyan, impetaking din si Pedro, si Juan, aw si Santiago, aw timikedeg dan doton te bontod amon megtawal-tawal dan.
LUK 9:29 Dalem te pegtawal-tawal i Jesus, netodà se bawa din, aw ontò migkepotì se kedakel te penenaktun din.
LUK 9:30 Pegketà doen dowa otaw migbalaw-balaw kandin, si Moises aw si Elias.
LUK 9:31 Pegpekità dan, minanyag dan heman. Migpebelaw-belaway se telo dan tepad te pegkematay i Jesus, so yan se tomanen din te eked kenamay doton te Jerusalem.
LUK 9:32 Ontò neketedogi si Pedro aw doma din. Meneng pegkeloka dan, kinità dan se anyag i Jesus aw sìyan dowa otaw doma din.
LUK 9:33 Dalem te pegkesayo i Moises aw si Elias lekat ki Jesus, minikagi si Pedro diyà ki Jesus, “Pengolo, mèpiya so dini kay. Ibeg day meg-inang kay den te telo balay amon doen ogpaan te teg sebad-sebad kenyo si Moises aw si Elias.” Pengkey yan se inikagi i Pedro, meneng wedà din kelebeti aw eden se inikagi din.
LUK 9:34 Telobo pa minikagi si Pedro, doen labon dimateng diyà kandan aw wedà dan ebey kità kandan. Pegkeselibeng te labon kandan, ontò nelemitan si Pedro aw doma din.
LUK 9:35 Penga niyan, dinineg dan se kagi te Timanem lekat te labon, “Seini se Batà ko, aw pinemallì ko sikandin amon tomanen din se ibeg ko. Keilangan sikandin se penenelanen niyo.”
LUK 9:36 Penga te pegdineg dan kenyan, kinità dan si Jesus olò sebad din. Wedà dan peg-indan diyà te doma otaw tepad te kinità dan kidoen lamig ontò nenamay.
LUK 9:37 Keeldawan niyan, timopang dan lekat te bontod aw nesongonan dan te ontò medita otaw.
LUK 9:38 Nayan, doen sebad otaw timawal ki Jesus, kagi din, “Sir, keidowi bag se batà ko, so sikandin se temisa batà ko.
LUK 9:39 Melikit sikandin egdetengan te bosaw, aw egpuypuy. Egpemekeseg iyan kandin, aw egbohak se bahà din. Ontò melima se pegpelowà te bosaw lekat kandin, so eked kesayo singed aw onà din peelegen se batà.
LUK 9:40 Nemoyò a diyà te menge tinoledaan no te ipelowà dan se bosaw lekat kandin, meneng wedà dan iyan kebatog.”
LUK 9:41 Minikagi si Jesus, “Tay law, sikiyo menge otaw. Ontò kolang se aneng-aneng niyo, so wedà kaw pa salig diyà kanak. Eked den kenamay se pegdoma ko kenyo, meneng keilangan tomayod a pa pengkey eked kaw pemenal. Na, pedinihi se batà nikaw.”
LUK 9:42 Pegpesalo te batà doton ki Jesus, binadas sikandin te bosaw aw impekeseg din. Meneng sinagda i Jesus se bosaw aw impelowà din iyan lekat te batà. In-olì din se batà sìyan negolian diyà te amay din.
LUK 9:43 Ontò nepela se kedita te otaw kidoen, so netegahan dan te ontò melangkaw se Timanem. Dalem te nepela pa se kedita te otaw tandà te ininang i Jesus, minikagi sikandin diyà te menge tinoledaan din,
LUK 9:44 “Keilangan ontò kaw menenalan te kagi ko kenyo seini. Seini se metoman domateng diyà kanak Timanem Migpekeotaw. Metoman a itolok aw ibegay a diyà te belad te doma otaw.”
LUK 9:45 Meneng wedà dan ketegahi aw eden se kedegdagan te inikagi din sìyan, so wedà iyan keinang mebangal amon eked dan iyan kelebeti. Meneng wedad otaw mig-insà kandin tepad kenyan, so neyàyà dan.
LUK 9:46 Nayan, migpedindilay se menge tinoledaan i Jesus aw sinu se ontò melangkaw diyà kandan.
LUK 9:47 Meneng pegketaga-taga i Jesus aw eden se pigdindilan dan, tinawal din se sebad batà, aw impetindeg din iyan kidoen te tangkil din.
LUK 9:48 Penga niyan, minikagi si Jesus, “Aw megsagman se otaw te batà seini tandà te pegpesakop din kanak, pineokit kenyan segmanen a din heman. Aw megsagman se otaw kanak, segmanen din heman se Amay ko simogò kanak. Se otaw ontò megpedanà kidoen kenyo, yan se ontò melangkaw.”
LUK 9:49 Nayan, minikagi si Juan, “Pengolo, doen otaw kinità day migpelowà te bosaw lekat te menge otaw pineokit te ngadan nikaw. Meneng sinagda day sikandin so wedà pekeakop diyà kenitadon.”
LUK 9:50 Meneng minikagi si Jesus, “Ikà niyo egsagda kandin, so se otaw kenà poon niyo, meinang sikandin doma niyo.”
LUK 9:51 Sagwa agpet den domateng se aldaw te pegkeengat i Jesus doton te langit, miglalang sikandin domoton te Jerusalem.
LUK 9:52 Doen menge otaw insogò din minonà diyà kandin. Nesayo dan aw dimoton dan te sebad lonsod sakop te Samarya amon megpetagad dan te ogpaan din aw mapit kidoen.
LUK 9:53 Kenà Judiyo se menge otaw eg-ogpà kidoen, aw yan se doun te wedà dan peepiti si Jesus, so netegahan dan te domeleg sikandin doton te Jerusalem.
LUK 9:54 Pegketaga-taga i Santiago aw si Juan te eked dan segmani te tege Samarya, minikagi dan, “Pengolo, meibeg ka lay aw ipedagdag day se apoy lekat te langit amon megelà dan?”
LUK 9:55 Meneng miniling si Jesus diyà kandan aw sinagda din dan.
LUK 9:56 Penga niyan, dimeleg dan doton te doma lonsod.
LUK 9:57 Dalem te peg-ipanaw dan, doen otaw minikagi diyà ki Jesus, “Pengkey kenan ka pesalo, gayed a tomaking kamno.”
LUK 9:58 Meneng minikagi si Jesus, “Mèpiya pa se menge menenanap te kebenesan, so doen ogpeanan dan. Mèpiya pa heman se menge manok, so doen heman embonganan dan. Meneng melima aw tomaking ka kanak Timanem Migpekeotaw, so wedad palos ibatan ko te delem.”
LUK 9:59 Minikagi si Jesus diyà te doma otaw kidoen, “Taking ka kanak.” Meneng timaba sikandin, “Pengolo, eked a taking kamno singed aw onà matay se amay ko aw ilebeng ko.”
LUK 9:60 Meneng minikagi si Jesus, “Mèpiya aw otaw wedad kaling pedowan se meglebeng te menge doma dan nematay. Meneng aw doen kaling pedowan no, keilangan megtoladà ka den te doma otaw tepad te peglowan te Timanem.”
LUK 9:61 Doen heman doma otaw minikagi diyà ki Jesus, “Pengolo, tomaking a diyà kamno. Meneng molì a onà amon megpetaga-taga a te menge kedomaan ko.”
LUK 9:62 Minikagi si Jesus, “Ikà eg-iling te otaw megdaro gayed eglingì, so kolang se inangen din. Iling heman kenyan se otaw kenà melobos se pedowan din tomaking kanak, so eked kepakay aw megpesakop sikandin diyà te peglowan te Timanem.”
LUK 10:1 Penga niyan, pinemallì te Pengolo se kepitowan teg dowa otaw, aw insogò din dan teg dowa-dowa doton te kedita te lonsod aw ogpeanan agpet dotonan din, amon megpeketagad se kedita te otaw te pegdateng din.
LUK 10:2 Minikagi si Jesus diyà kandan, “Ontò dakel se geniyenen, aw pilabok se otaw meglegani. Timanem se tig-apò te pawà, aw keilangan megtawal-tawal kaw diyà kandin amon isogò din se menge doma otaw meglegani.
LUK 10:3 Na, kesayo kaw den. Meneng peg-ahà kaw amon eked kaw pemilangi te mededaet otaw, so iling kaw te ayam-ayam karniro egbenganan te menenanap te kebenesan iningedanan lobo.
LUK 10:4 Ikà niyo egpengibing te kwarta, aw kelepì, aw sepatos ekasan niyo. Aw doen otaw kitaen niyo doton te dalan, ikà niyo egsempetanun kandan amon eked kaw keanggà.
LUK 10:5 Aw domateng kaw doton te balay, onà kaw ikagi diyà te otaw eg-ogpà kidoen, ‘Begayan se kedita niyo te kelinaw.’
LUK 10:6 Na, aw mèpiya se pedowan te otaw eg-ogpà kidoen, begayan sikandin te kelinaw pineokit te kagi niyo. Meneng aw wedad otaw kidoen mèpiya se pedowan din, lomikò diyà kenyo se inikagi niyo.
LUK 10:7 Ikà niyo eg-alin-alin, meneng peg-ogpà kaw kidoen te sebad olò balay. Kaen kaw aw inem kaw te pengkey eden se lemaken dan kenyo, so keilangan togpoan se otaw egterbaho.
LUK 10:8 Pengkey kenan kaw doton, aw segmanen kaw te otaw kidoen, kaen kaw te pengkey eden se ipekaen dan kenyo.
LUK 10:9 Pegpegolì kaw te otaw doen mesakit. Ikagi kaw diyà kandan, ‘Medapag den se peglowan te Timanem diyà kenyo.’
LUK 10:10 Meneng aw eked kaw segmani te otaw doton te lonsod dotonan niyo, doton kaw te dalan aw ikagi kaw,
LUK 10:11 ‘Pengkey napò te tanà niyo dimeket diyà te benis day, tektaken day den, amon ketegahan niyo te doen salà niyo. Keilangan metaga-taga kaw te medapag den se peglowan te Timanem diyà kenyo, meneng kimulu kaw kenyan.’
LUK 10:12 Eneng-enengi niyo se kagi ko kenyo. Pengkey ipelumun te Timanem se tege Sodoma te modi aldaw tepad te salà dan ontò medaet, meneng labi din pa ipelumun se otaw eked pegsagman kenyo.”
LUK 10:13 “Mekelelayò kaw tege Korasin. Mekelelayò kaw heman tege Bitsayda, so wedà kaw pegselsel. Aw impekità diyà te tege Tiro aw tege Sidon gebii se inang metolos impekità ko kenyo, nenaol den dan peden te sako aw migbodbod den dan peden te abo diyà te olo dan amon ipetaga-taga dan te migselsel dan te salà dan ontò medaet.
LUK 10:14 Pengkey ipelumun te Timanem se tege Tiro aw tege Sidon, meneng labi kaw din pa ipelumun so wedà kaw pemenal kanak.
LUK 10:15 Sikiyo tege Kapirnaom, pengkey meibeg kaw megpelangkaw-langkaw taman te langit, meneng idagdag kaw doton te kilot.”
LUK 10:16 Minikagi heman si Jesus diyà te menge tinoledaan insogò din, “Aw menenalan se otaw diyà kenyo, siak heman se penenelanen din. Aw eked penenalan se otaw diyà kenyo, siak heman se eked din penenelani. Aw eked penenalan se otaw diyà kanak, eked din heman penenelani se Amay ko simogò kanak.”
LUK 10:17 Nayan, penga te peg-olì te kepitowan teg dowa tinoledaan insogò i Jesus doton te kedita te lonsod, neluba dan, aw minikagi dan, “Pengolo, pengkey bosaw nebatog day impelowà pineokit te pegtawal day te ngadan nikaw.”
LUK 10:18 Minikagi si Jesus, “Dimaeg kaw kandan so kinità ko se pegkedagdag i Satanas lekat te langit iling te kilem.
LUK 10:19 Ikà niyo egkelibel kani. Doen tolos imbegay ko kenyo amon domaeg kaw te kedita te sakop i Satanas. Pengkey gìtan niyo se memokan aw doma mekeilo, meneng eked kaw elegi, so wedad palos meleg kenyo.
LUK 10:20 Meneng pengkey egdaeg kaw te menge bosaw, kenà niyan se ingkeluba niyo, meneng keilangan meluba kaw so insolat den te Timanem se ngadan niyo kidoen te langit.”
LUK 10:21 Nayan, dakel se luba imbegay te Espiritu Santo ki Jesus, aw yan se doun te migtawal-tawal sikandin, kagi din, “Amà, Pengolo te kedita doton te langit aw dini heman te tanà, egpesiontong a diyà kamno, so wedà no petega-tegahi se kebenalan diyà te otaw biyasa aw dakel netegahan, meneng impetaga-taga no den iyan diyà te otaw medanà. Iduyun ta Amà, so lekat iyan te ibeg nikaw ontò mèpiya.”
LUK 10:22 Penga niyan, minikagi si Jesus, “Insalig te Amay ko se kedita diyà kanak. Se Amay ko, yan olò se netaga-taga te kedita tepad kanak, so Batà a din. Siak olò heman se netaga-taga te kedita tepad te Amay ko, aw eked ketaga-taga se otaw tepad kandin singed aw ipetaga-taga ko iyan diyà kandan.”
LUK 10:23 Penga niyan, minikagi si Jesus diyà te menge tinoledaan din te wedad doma otaw dimineg kandin, “Doen den keluba niyo tandà te ininang ko kinità niyo.
LUK 10:24 Pengkey medita se telekeliwat te kagi te Timanem aw menge selotan gebii ibeg komità te inang ko kinità niyo, meneng wedà dan kità kenyan. Pengkey ibeg dan domineg te kagi ko dinineg niyo, meneng wedà dan dineg kenyan.”
LUK 10:25 Nayan, timindeg se sebad menenoladà te menge punù ingkeliwat i Moises. Ibeg din megtandà ki Jesus, aw yan se doun te mig-insà sikandin, kagi din, “Sir, eden lay se keilangan inangen ko amon metoman a kominawà te kaling pedowan wedad temanan?”
LUK 10:26 Minikagi si Jesus, “Eden lay se binasa no kidoen te kagi te Timanem tepad kenyan?”
LUK 10:27 Timaba sikandin, “Binasa ko se kagi seini, ‘Kedekeli niyo te pedowan se Pengolo niyo Timanem te ontò melobos se pedowan niyo kandin, aw aneng-aneng niyo, aw keseg niyo. Kedekeli niyo heman te pedowan se doma otaw iling te peg-aneng-aneng niyo te kenyo pegkeotawun.’”
LUK 10:28 Minikagi si Jesus, “Benal se taba nikaw. Aw yan se inangen no, metoman ka kominawà te kaling pedowan wedad temanan.”
LUK 10:29 Meneng ibeg te otaw sìyan, ipetaga-taga din te metòlid se eg-inangen din, aw yan se doun te mig-insà sikandin, “Sinu lay se doma otaw keilangan kedekelan ko te pedowan?”
LUK 10:30 Timaba si Jesus, “Doen sebad Judiyo nesayo lekat te Jerusalem pesalo doton te Jeriko. Peg-ipanaw din, nesàban sikandin te megdedempasay. Inabat dan se kedakel te kedònan din, aw binadas dan sikandin. Penga niyan, tinenanan dan sikandin iling te nematay.
LUK 10:31 Nayan, wedà kenamay, dimateng se pengolo te simbahan te Judiyo. Meneng pegkità din te otaw sìyan nepelian, migpekediyò sikandin aw limaklak.
LUK 10:32 Penga niyan, dimateng heman se sebad Judiyo sakop te pongan i Levi. Pegkità din te otaw sìyan nepelian, migpekediyò heman sikandin aw limaklak.
LUK 10:33 Penga niyan, doen mepanaw tege Samarya kenà Judiyo dimateng doton te Judiyo sìyan nepelian. Pegkità din kandin, ontò din neidowan.
LUK 10:34 Dimoton aw binolong din se palì te lana aw bino, aw binagkes din. Penga niyan, impesakay din diyà te kodà din, aw inibing din doton te balay eg-ogpaan te mepanaw, aw inipat din kidoen.
LUK 10:35 Keeldawan niyan, imbegay din se kwarta diyà te tig-apò te balay sìyan aw minikagi sikandin, ‘Ipati sikandin. Aw labi pa dakel se gasto din, beyadan ko iyan aw lomikò a dini.’
LUK 10:36 Nayan, eden lay se kamno aneng-aneng? Pengkey telo se otaw kimità te otaw nepelian te megdedempasay, meneng sinu lay se migpetaga-taga te dakel se pedowan din diyà te doma otaw?”
LUK 10:37 Timaba se menenoladà, “Sìyan tege Samarya doen keido din.” Minikagi si Jesus, “Pengkey kenan ka pesalo, keilangan iling heman kenyan se inangen nikaw.”
LUK 10:38 Nayan, dimeleg dan aw minokit dan doton te sebad lonsod. Doen bayi si Marta kidoen migpeapit ki Jesus doton te balay din.
LUK 10:39 Dalem te peg-inang i Marta te kànen, gayed nenenoo se adi din si Maria diyà te dapag i Jesus amon menenalan te itoladà din.
LUK 10:40 Meneng ontò nebuyung si Marta, so sebad din se mig-inang te kànen. Penga niyan, dimoton si Marta ki Jesus, aw minikagi, “Pengolo, sebad ko se mig-inang te kànen, so wedà pegtelaban se adi ko. Aw doen keido no kanak, sogoi sikandin megtelaban kanak.”
LUK 10:41 Meneng timaba se Pengolo, “Tay law, Marta. Pelaban ka netetana tepad te medita eg-inangen nikaw.
LUK 10:42 Meneng sebad olò se kolang nikaw. Labi pa mèpiya se ininang i Maria, aw eked ko segdahi se pegpenenalan din kanak.”
LUK 11:1 Nayan, doen sebad aldaw migtawal-tawal si Jesus. Penga te pegtawal-tawal din, minikagi se sebad tinoledaan din, “Pengolo, toledai kay megtawal-tawal iling te pegtoladà i Juan Memonyagay diyà te menge tinoledaan din.”
LUK 11:2 Minikagi si Jesus, “Iling kani se itawal-tawal niyo. ‘Amà, ibeg day iduyun ka te kedita te otaw. Ibeg day lomowan ka diyà te kedita te otaw.
LUK 11:3 Begayi kay te kànen botong te kelikit te aldaw.
LUK 11:4 Pegwedadi se salà ininang day diyà kamno, so egwedad kay te salà eg-inangen te doma otaw diyà kenami. Ikà egpeokit kenami diyà te peg-akal.’”
LUK 11:5 Migtoladà heman si Jesus kandan tepad te pegtawal-tawal, kagi din, “Simpana domateng se mepanaw diyà te balay te sigalak din, meneng wedad ipekaen te tig-apò te balay kandin. Seini se inangen din. Pengkey tengà te delem, domoton se otaw sìyan te simbalay, aw memoyò diyà te sigalak din, kagi din, ‘Elew, tebangi a bag, so doen sigalak ko dimateng lekat te mediyò, meneng wedad ipekaen ko kandin.’
LUK 11:7 Simpana tomaba se otaw lekat didalem, ‘Ikà egsamok kanak. Netakep den se lelebangan ko, aw timedogi a den sipat menge mengisù ko. Eked a den enaw amon memegay a kamno.’
LUK 11:8 Nayan, eneng-enengi niyo ini. Pengkey eked peden sikandin enaw amon megtabang kandin so sigalak din, meneng aw eked lengà se otaw memoyò, yan se doun te keilangan menaw sikandin amon memegay kandin te pengkey eden se kepulukan din.
LUK 11:9 Eneng-enengi niyo ini. Aw memoyò kaw diyà te Timanem, begayan kaw din. Aw mengemahà kaw, doen kitaen niyo. Aw tomawal kaw doton te lelebangan, ipeawop kaw.
LUK 11:10 Kominawà se kedita te otaw memoyò. Komità heman se kedita te otaw mengemahà. Ipeawop heman se kedita te otaw tomawal.
LUK 11:11 Aw doen batà niyo memoyò te ikan, eked kaw pemegay kandin te memokan.
LUK 11:12 Aw memoyò se batà niyo te batà te manok, eked kaw heman pemegay kandin te inenipit.
LUK 11:13 Nayan, pengkey doen medaet eg-inangen niyo, meneng gayed mèpiya se ipegpemegay niyo diyà te menge batà niyo. Labi pa se Amay niyo Timanem kidoen te langit, so egpemegay sikandin te Espiritu Santo diyà te kedita te otaw memoyò diyà kandin.”
LUK 11:14 Doen sebad aldaw migpelowà si Jesus te bosaw migpeomo te otaw dinetengan din. Penga te pegpelowà din te bosaw, nekeikagi den se otaw, aw yan se doun te ontò nepela se doma otaw kimità kenyan.
LUK 11:15 Meneng eg-ikagi se doma otaw, “Binegayan sikandin te tolos lekat te pengolo te bosaw si Belsebul, se doma ngadan i Satanas, aw yan se doun te egpelowà sikandin te bosaw lekat te otaw.”
LUK 11:16 Doen heman menge doma otaw migtandà peden ki Jesus aw doen pengilala ipekità din diyà kandan amon ketegahan dan te ontò sikandin insogò te Timanem.
LUK 11:17 Meneng netaga-taga si Jesus aw eden se aneng-aneng dan, aw yan se doun te minikagi sikandin, “Simpana megbebolaw se sakop te sebad lonsod, aw megbebolaw se otaw migsebad te balay, kebàtan se lonsod dan te eked kenamay.
LUK 11:18 Nayan, eg-ikagi kaw te egpelowà a te bosaw lekat te otaw pineokit te tolos imbegay i Satanas diyà kanak. Meneng simpana megbolaw si Satanas diyà te menge sakop din, kebàtan se peglowan din.
LUK 11:19 Aw sinila niyo se pegpelowà ko te bosaw so aneng-aneng niyo pineokit iyan te tolos i Belsebul, sinila niyo heman se kenyo tinoledaan, so egpelowà dan heman te bosaw lekat te otaw. Yan se doun te sikandan se megpetaga-taga kenyo te kolang se pegsila niyo kanak.
LUK 11:20 Meneng aw pineokit te tolos imbegay te Timanem se pegpelowà ko te bosaw lekat te otaw, yan ketegahan niyo te dimateng den dini kenyo se peglowan te Timanem.
LUK 11:21 “Aw megbantay se otaw te balay din, aw magsen sikandin, aw doen kekamang din, eked keagaw se kedònan din.
LUK 11:22 Meneng aw domateng se otaw labi pa magsen diyà kandin, yan se domaeg te tig-apò te balay aw meg-agaw te kedita te kekamang sineligan din, aw iteped heman se kedònan din diyà te menge doma otaw.
LUK 11:23 “Se kedita te otaw eked pegpesakop diyà kanak, yan se egpoon kanak. Aw se kedita te otaw kenà egtelaban kanak, yan se egpekadas te doma otaw lekat kanak.”
LUK 11:24 “Aw ipelowà se bosaw lekat te otaw, meglegeb se bosaw doton te kebigtilan amon mengemahà te mèpiya ogpeanan din. Aw wedad ketelaan din, mikagi sikandin, ‘Mèpiya pa aw lomikò a doton te otaw tapay ko eg-ogpaan.’
LUK 11:25 Lomikò se bosaw doton kandin, aw kitaen din se otaw tapay din inogpaan te mèpiya den, iling te balay melinis aw mèpiya pegkesawol.
LUK 11:26 Penga niyan, mangay se bosaw te doma pito bosaw labi pa medaet. Domoton se kedita dan te otaw sìyan aw meg-ogpà dan diyà kandin. Yan labi pa medaet se pegkesawol te otaw sìyan diyà te tapay pegkesawol din.”
LUK 11:27 Pegtoladà i Jesus te otaw netipon, doen bayi timawal diyà kandin, kagi din, “Doen ontò keluba te bayi migbatà aw migpesoso kamno.”
LUK 11:28 Meneng minikagi si Jesus, “Labi pa meluba se kedita te otaw domineg te kagi te Timanem aw tomolò dan heman kenyan.”
LUK 11:29 Sagwa labi pa medita se otaw netipon diyà ki Jesus, minikagi sikandin, “Medaet se ibeg te kedita te otaw songkani, so gayed kaw egkeibeg te ipekità ko diyà kenyo se pengilala. Meneng sebad olò se pengilala ipekità te Timanem diyà kenyo, aw yan se iling te neinang ki Jonas gebii.
LUK 11:30 Pineokit te neinang ki Jonas, netaga-taga se tege Niniba te ontò sikandin insogò te Timanem. Iling heman kenyan, doen heman meinang diyà kanak Timanem Migpekeotaw amon metaga-taga se kedita niyo te ontò a insogò te Timanem.
LUK 11:31 Aw domateng se aldaw te peg-okom te Timanem te kedita te otaw, tomindeg heman se selotan bayi limowan doton te Siba gebii, aw mikagi sikandin te keilangan ipelumun kaw so wedà kaw penenalan kanak. Pengkey mediyò se ogpeanan din, meneng dimoton sikandin ki Solomon amon menenalan te kebiyasa ipegtoladà din. Na, pengkey melangkaw si Solomon, meneng doen den dimini labi pa melangkaw diyà kandin.
LUK 11:32 Aw domateng se aldaw te peg-okom te Timanem te kedita te otaw, mikagi heman se tege Niniba te keilangan ipelumun kaw so wedà kaw pegselsel te salà, so pegdineg te tege Niniba te intoladà i Jonas, migselsel dan te salà. Na, pengkey melangkaw si Jonas, meneng doen den dimini kenyo labi pa melangkaw diyà kandin.”
LUK 11:33 “Aw menemtem se otaw te solò, eked din iyan elesi kidoen te awang te tanà. Eked din heman sengkobi te gentangan. Meneng mèpiya aw isawol din iyan diyà te kelengkawan amon keenyagan se didalem te balay.
LUK 11:34 Komità se otaw pineokit te mata. Aw mèpiya se mata te otaw, melowa se pegtengteng din. Meneng aw medaet se mata, iling te mengitngit se pegtengteng din pengkey aldaw.
LUK 11:35 Iling heman kenyan, keilangan megpekeimanday kaw amon kenà medaet se pedowan niyo pengkey aneng-aneng niyo mèpiya se pedowan.
LUK 11:36 Meneng aw meleseb se pedowan niyo, wedad medaet inangen niyo, so tomalag mèpiya se meinang niyo. Melowa iyan kitaen te doma otaw iling te solò eg-anyag.”
LUK 11:37 Penga te pegtoladà i Jesus, doen sakop te menge Parisiyo migpekaen kandin. Pegdateng i Jesus doton te balay din, minawop aw kimaen doma din.
LUK 11:38 Meneng ontò nepela se Parisiyo ki Jesus, so wedà sikandin taking te ketanem te menge Judiyo tepad te peg-onaw te belad te wedà pa kaen.
LUK 11:39 Meneng minikagi se Pengolo, “Sikiyo menge Parisiyo, gayed kaw eg-ingà aw eglalang te medaet. Iling kaw te otaw olò eg-onaw te lowà te baso aw lipong pengkey melipà pa se didalem niyan.
LUK 11:40 Wedad inenengen niyo. Ininang kaw te Timanem, aw ibeg din, tomalag mèpiya se pedowan niyo aw eg-inangen niyo.
LUK 11:41 Keilangan lekat te keido te pedowan niyo se pegpemegay niyo diyà te otaw nelimahan, aw yan meinang kaw ontò mèpiya.
LUK 11:42 “Mekelelayò kaw menge Parisiyo, so pengkey egpemegay kaw diyà te Timanem te ikesempolò ketengà te kedita te geniyen niyo pengkey menge enagay, meneng wedà niyo beling inangi se keilangan inangen tepad te metòlid inang diyà te doma otaw, aw kedakel te pedowan niyo diyà te Timanem. Yan se keilangan inangen niyo, meneng pedeleg kaw heman te pegpemegay niyo diyà te Timanem.
LUK 11:43 “Mekelelayò kaw menge Parisiyo, so ibeg niyo menenoo kidoen te onsedanan impetagad kenyo doton te simbahan te Judiyo amon ipelangkaw kaw te doma otaw. Ibeg niyo heman segmanen kaw te doma otaw doton te pedyanan.
LUK 11:44 Mekelelayò kaw, so medaet se awop te pedowan niyo. Iling kaw te lebeng eked kilelai te otaw mokit kidoen.”
LUK 11:45 Doen sebad menenoladà te punù ingkeliwat i Moises minikagi diyà ki Jesus, “Sir, peg-ikagi no kenyan diyà te menge Parisiyo, sinila kay heman doma dan.”
LUK 11:46 Minikagi si Jesus, “Mekelelayò kaw heman menenoladà te punù ingkeliwat i Moises, so gayed niyo egdogangan se punù ontò melima toloen te otaw, meneng kenà kaw egtelaban te otaw meibeg tomolò kenyan.
LUK 11:47 Mekelelayò kaw, so pengkey egpelasan niyo se menge lebeng te telekeliwat te kagi te Timanem gebii, meneng sikandan se inimetayan te kenyo kemonaan.
LUK 11:48 Pineokit te pegpalas niyo te lebeng dan, ipetaga-taga niyo te egtandù kaw te pegpengimatay te kemonaan niyo kandan. Kemonaan niyo se nengimatay te menge telekeliwat te kagi te Timanem, aw sikiyo se egpalas te menge lebeng dan.
LUK 11:49 Yan se doun te minikagi se Timanem, ‘Isogò ko doton kandan se menge telekeliwat te kagi ko aw menge sogounun ko. Meneng doen imetayan dan, aw pemilangen dan heman se doma.’
LUK 11:50 Nayan, ipelumun te Timanem se kedita niyo songkani tandà te pegpengimatay te kemonaan niyo te menge telekeliwat te kagi din lekat te keteboan te keneyonan lamig seini,
LUK 11:51 lekat te peg-imatay dan ki Abel taman te peg-imatay dan ki Zacarias kidoen te dowangen te dakel simbahan medapag te sonoganan te ayam-ayam ibegay diyà te Timanem. Mikagi a den diyà kenyo te metoman ipelumun te Timanem se kedita niyo songkani tandà te pegpengimatay kandan.
LUK 11:52 “Mekelelayò kaw menge menenoladà te punù ingkeliwat i Moises. Iling kaw te otaw mig-eles te konsì te balay amon wedad mekeawop, so wedà kaw keibeg aw doen otaw mekelabet te kagi te Timanem insolat. Wedà kaw pemenal te kagi din, aw egbelebagan niyo heman se menge otaw egkeibeg memenal kenyan.”
LUK 11:53 Nayan, nesayo si Jesus lekat te balay sìyan. Meneng se menge Parisiyo aw menenoladà te punù, gayed dan mig-insà diyà kandin so medaet se pedowan dan kandin.
LUK 11:54 Ibeg dan peden ketelaan dan se kemalì diyà te kagi din amon doen idimanda dan tepad kandin.
LUK 12:1 Nayan, dalem te pegtoladà i Jesus, minelalan se otaw netipon diyà kandin igsà migpegìtay dan te benis. Onà minikagi si Jesus diyà te menge tinoledaan din, “Peg-ahà kaw amon eked kaw ketini te salà te menge Parisiyo, so eden dan aw egpenimanem dan.
LUK 12:2 Meneng kitaen se kedita te salà dan te modi aldaw, so ipekità te Timanem se kedita pengkey in-eles den seini.
LUK 12:3 Pengkey eden se inikagi te wedad doma otaw dimineg, yan se dinegen te kedita te otaw. Pengkey eden se inggomod-gomod doton didalem te tambì niyo, yan se iindan diyà te kedita te otaw.”
LUK 12:4 “Menge sigalak ko, penenalan kaw te kagi ko seini. Ikà niyo egkelemitan te otaw, so olò lawa niyo se mebatog dan imetayan, aw penga niyan wedad doma medaet mebatog dan inangen diyà kenyo.
LUK 12:5 Meneng sebad se keilangan kelemitanan niyo, aw yan se Timanem, so aw mepenga se otaw matay, mebatog te Timanem ipedeleg sikandin doton te kilot. Yan se doun te keilangan Timanem se kelemitanan niyo.
LUK 12:6 “Meneng ontò heman egkeido se Timanem te otaw. Pengkey iling te wedad keelagà te lima manok te kebenesan aw beyadan niyo, meneng wedad palos manok te kebenesan egkelibelan te Timanem.
LUK 12:7 So eg-ipaten te Timanem se kedita te manok te kebenesan pengkey iling te wedad keelagà dan, ontò kaw din ipaten, so meelagà kaw pa diyà te kedita te manok te kebenesan. Pengkey logay niyo, netegahan te Timanem aw pila se kedita niyan. Yan ikà niyo egkelemitan.”
LUK 12:8 “Penenalan kaw te kagi ko seini. Aw mikagi se otaw diyà te doma te ontò sikandin migpesakop diyà kanak Timanem Migpekeotaw, mikagi a heman diyà te menge anghil te Timanem te sakop ko sikandin.
LUK 12:9 Meneng aw mikagi se otaw te kenà sikandin sakop ko, eked a heman ikagi diyà te menge anghil te Timanem te sakop ko sikandin.
LUK 12:10 “Aw mikagi se otaw te medaet tepad kanak Timanem Migpekeotaw, pegwedaden iyan te Timanem aw iselsel din. Meneng aw megtompuyus se otaw te Espiritu Santo, eked pegwedadi se salà din sìyan.
LUK 12:11 “Aw ibingen kaw doton te menge obanen te simbahan te Judiyo aw menge opisyal te gobirno amon okomen kaw dan tandà te pegtaking niyo kanak, ikà niyo egketetana tepad te itaba niyo, aw ikegiyen niyo diyà kandan,
LUK 12:12 so toledaan kaw te Espiritu Santo aw eden se ikegiyen niyo kandan te aldaw sìyan.”
LUK 12:13 Doen otaw kidoen minikagi diyà ki Jesus, “Sir, pegpunù ka diyà te kakay ko te keilangan ibegay din kanak se tengà te kedònan aw tanà tinenanan te amay day te pegkematay din.”
LUK 12:14 Meneng minikagi si Jesus, “Tay law. Kenà a howis meg-osay kenyo.”
LUK 12:15 Minikagi heman si Jesus diyà te otaw netipon, “Ikà niyo eg-ingà te kedònan te doma otaw. Pengkey ontò dakel se kedònan te otaw, meneng eked pegkelayat se omol din pineokit kenyan.”
LUK 12:16 Penga niyan, mig-indan si Jesus te tegdeyanan, kagi din, “Doen otaw meyaman nekegani te ontò dakel.
LUK 12:17 Penga niyan, mig-aneng-aneng sikandin, ‘Megmeno a? So wedad den keombaan te pol solanan te ginani ko.
LUK 12:18 Na, seini se inangen ko. Gobalen ko se tapay pol, aw penga niyan inangen ko se pol labi pa dakel, aw yan se solanan ko te kedakel te ginani ko aw kededònan ko.
LUK 12:19 Penga niyan, aneng-aneng ko, botong den se kepulukan ko te pengkey pila se omay. Mepakay den aw eked a pegterbaho. Olò a den komaen, aw minem a, aw gayed a meluba.’
LUK 12:20 Meneng minikagi se Timanem, ‘Wedad palos inenengen nikaw. Matay ka den te delem seini. Pengkey dakel den se kededònan no, meneng ibegay se kedakel niyan diyà te doma otaw.’
LUK 12:21 Iling heman kenyan se meinang diyà te otaw egkeyaman, meneng wedad aneng-aneng din diyà te Timanem.”
LUK 12:22 Minikagi si Jesus diyà te menge tinoledaan din, “Yan se doun te mikagi a den diyà kenyo, ikà niyo egketetana tepad te keogpà niyo aw eden se kànen niyo. Ikà niyo heman egketetana tepad te lawa niyo aw eden se ekasan niyo.
LUK 12:23 So binegayan kaw den te Timanem te ontò meelagà, sìyan pedowan niyo aw lawa niyo, yan ikà niyo egketetana tepad te kànen aw ekasan niyo.
LUK 12:24 Eneng-enengi niyo tepad te menge owak. Kenà dan egpenanem. Kenà dan heman eglegani. Wedad heman pol egsolan dan te kànen. Meneng gayed dan egbegayan te Timanem te kànen. So eg-ipaten te Timanem se kedita te manok te kebenesan pengkey iling te wedad keelagà dan, ontò kaw din ipaten, so meelagà kaw pa diyà te kedita te manok te kebenesan.
LUK 12:25 Pengkey metetana kaw, meneng eked pegkelayat se omol niyo pineokit te ketetana niyo.
LUK 12:26 Aw eked kaw pekeinang te dedeitek, ikà niyo egketetana tepad te labi pa dakel.
LUK 12:27 Eneng-enengi niyo se bolak te kebenesan. Gayed dan egtilles pengkey kenà dan egterbaho, aw kenà dan heman egpengabel te penenaktun. Meneng eneng-enengi niyo se kagi ko seini. Pengkey mèpiya se bawa te penenaktun te selotan si Solomon gebii, meneng labi pa mèpiya se bawa te bolak te kebenesan.
LUK 12:28 So ininang te Timanem mèpiya se bawa te bolak te kebenesan pengkey sonogen iyan te eked kenamay, labi pa metoman se peg-ipat din kenyo. Meneng wedà pa kedì kelobos se pegsalig niyo kandin.
LUK 12:29 Ikà niyo egketetana tepad te kànen niyo aw inemen niyo. Ikà niyo heman egdowa-dowa.
LUK 12:30 Se kedita te otaw kenà egsalig te Timanem, gayed dan egketetana tepad te keogpà dan. Meneng netegahan den te Timanem se kepulukan niyo.
LUK 12:31 Yan pelowani niyo se Timanem diyà te kenyo pegkeotawun, aw yan begayan kaw din heman te keilangan niyo.”
LUK 12:32 “Ikà niyo egkelemitan. Pengkey pilabok kaw, meneng pinemallì kaw te Timanem amon megpesakop kaw diyà te peglowan din.
LUK 12:33 Keilangan ibeligyà niyo se kededònan niyo, aw ipemegay niyo se kwarta diyà te otaw nelimahan. Aw yan se inangen niyo, metipon kidoen te langit se ontong niyo eked palos pegkedaet, so eked iyan ketakaw kidoen, aw eked iyan heman kebàti.
LUK 12:34 Aw kenan ketipon se ontong niyo, yan heman se keeneng-enengan niyo.”
LUK 12:35 “Keilangan megpeketagad kaw te pengkey eden se domateng. Mèpiya aw iling kaw te menge sineligan egtagad te pegdateng te amo dan lekat te pista. Pengkey delem, gayed dan egpelegdeg te solò aw egpenaol dan amon somongon dan kandin te pegdateng din.
LUK 12:37 Aw domateng se amo dan, ontò dan meluba aw wedà dan tedogi aw neketagad dan. Eneng-enengi niyo se kagi ko seini. Mèpiya se inangen din diyà kandan. Meg-ekas se amo dan, aw sikandin se megpepenenoo kandan kidoen te lemisa aw megpekaen kandan.
LUK 12:38 Pengkey domateng se amo dan te tengà te delem, aw pengkey mata-mata te iselem, ontò dan meluba aw meketagad dan te pegdateng din.
LUK 12:39 Meneng ikà niyo eg-iling te tig-apò te balay timedogi aw wedà peketagad te pegdateng te menenakaw, so aw ketegahan din aw kano dateng se menenakaw, yan meketagad sikandin, aw eked ketekawi se balay din.
LUK 12:40 Yan se doun te keilangan gayed kaw megpeketagad, so domateng a Timanem Migpekeotaw te eked niyo ketegahi aw kano.”
LUK 12:41 Mig-insà si Pedro, kagi din, “Pengolo, sinu lay se inikegiyan no te tegdeyanan sìyan? Diyà olò kenami, aw diyà te kedita te otaw?”
LUK 12:42 Minikagi si Jesus, “Se otaw egkeseligan aw biyasa eg-inang te kedita, yan se inangen te amo din egpengibing te kedita te doma otaw doton te balay din, amon memegay kandan te kànen te kelikit te aldaw.
LUK 12:43 Aw domateng se amo din, ontò meluba se sineligan aw gayed egtolò te impunù te amo din.
LUK 12:44 Eneng-enengi niyo se kagi ko kenyo seini. Aw yan se inangen din, meinang sikandin egpengibing te kedita doton te balay te amo din.
LUK 12:45 Meneng aw meg-aneng-aneng se sineligan te menamay pa se pegdateng te amo din, aw egbedasen din se doma sineligan pengkey meama aw bayi, aw gayed sikandin egpengaen aw eg-inem aw egkelasing, medaet iyan,
LUK 12:46 so domateng se amo din te aldaw wedà din pelimani. Ipelumun sikandin te amo din, aw eked heman todà keseligi, so wedà tolò.
LUK 12:47 “Nayan, aw metaga-taga se sineligan aw eden se ibeg te amo din, meneng eked tolò kenyan, ontò sikandin ipelumun.
LUK 12:48 Meneng aw doen salà inangen te sineligan wedà ketaga-taga aw eden se ibeg te amo din, ipelumun heman sikandin, meneng kenà ontò. Se otaw binegayan te dakel, keilangan ontò mèpiya se pegpengibing din kenyan. Se otaw dakel se insalig te doma otaw kandin, keilangan ontò sikandin egkeseligan.”
LUK 12:49 “Dimini a amon ibingen ko se iling te apoy dini te tanà, aw ibeg ko peden mekelegeb iyan diyà kenyo seini.
LUK 12:50 Meneng keilangan onà a kelimahan. Ontò melima se pegtagad ko kenyan. Ibeg ko peden mepenga den.
LUK 12:51 Ikà niyo eg-aneng-aneng te dimini a amon doen kelinaw te otaw dini lanto te tanà. Meneng penenalan kaw te kagi ko diyà kenyo. Labi pa megpedàtay se otaw te pedowan tandà te pegdateng ko,
LUK 12:52 so lekat seini, eked pegsebad se otaw eg-ogpà diyà te sebad balay. Aw lima dan, telo besi se megpelenged kanak, aw dowa se megpoon kanak.
LUK 12:53 Pengkey telebatà, eked dan pegsebad. Pengkey teleogangan, megpedàtay dan te pedowan tepad kanak.”
LUK 12:54 Minikagi heman si Jesus diyà te otaw netipon, “Aw kitaen niyo te domelem se egselepan te aldaw, ketegahan niyo te modan te eked kenamay, aw penga niyan metoman modan.
LUK 12:55 Aw mebandes se kelamag lekat te polò, ketegahan niyo te meinit kwani se aldaw, aw penga niyan metoman iyan.
LUK 12:56 Tay law. Eden niyo aw egpenimanem kaw, so pengkey egpengilala kaw te ledyawan kidoen te tanà aw langit, meneng wedà niyo kilelai aw eden se meinang seini.”
LUK 12:57 “Nepela a kenyo so wedà kaw ketaga-taga aw eden se inang metòlid.
LUK 12:58 Pegselsel kaw den dalem te doen pa aldaw. Aw doen otaw megdimanda tepad kenyo, mèpiya aw megselsel kaw kandin kidoen pa te dalan, amon eked kaw din peibingi doton te howis, aw ibegay kaw diyà te belad te polis amon kelebosowen kaw.
LUK 12:59 Aw kelebosowen kaw, eked kaw palos pekelowà singed aw beyadan niyo se kedakel te salà.”
LUK 13:1 Na, penga niyan, doen otaw kidoen mig-indan diyà ki Jesus te doen menge sakop te probinsya te Galiliya impeimatay i Pilato dalem pa te pegsonog dan te ayam-ayam imbegay dan diyà te Timanem kidoen te dakel simbahan doton te Jerusalem.
LUK 13:2 Minikagi si Jesus diyà kandan, “Ikà niyo eg-aneng-aneng te inimetayan dan so labi pa medaet se salà dan diyà te menge doma dan menge sakop te probinsya te Galiliya.
LUK 13:3 Penenalan kaw te kagi ko kenyo. Aw eked kaw pegselsel te salà niyo, matay se kedita niyo iling kandan.
LUK 13:4 Eneng-enengi niyo se sempolò teg walo otaw netonganan te melangkaw kotà kidoen te Siloam. Pengkey negelà dan, meneng ikà niyo eg-aneng-aneng te labi pa medaet se salà dan diyà te kedita te tege Jerusalem.
LUK 13:5 Penenalan kaw te kagi ko kenyo. Aw eked kaw pegselsel te salà niyo, matay se kedita niyo iling kandan.”
LUK 13:6 Nayan, mig-indan si Jesus te tegdeyanan seini. “Doen kayo igira kidoen te tanà te sebad otaw. Dimoton sikandin amon mengabat te pongo niyan, meneng wedad palos kinità din.
LUK 13:7 Penga niyan, minikagi sikandin diyà te otaw impetonggò te tanà din, ‘Na, telo pa se omay gayed a migpeliman te doen pongo te kayo seini, meneng wedad palos. Pilayi iyan, amon doen ontong ko te tanà seini.’
LUK 13:8 Meneng timaba se teletonggò, ‘Sir, pebeyai pa iyan te sebad mendad se omay, so ebwaban ko pa aw solan ko te tai te baka.
LUK 13:9 Mèpiya peden aw mongo iyan te modi omay. Meneng aw eked pongo, mepakay diyà kanak aw pilayen nikaw.’”
LUK 13:10 Nayan, migtoladà si Jesus kidoen te simbahan te Judiyo te Sebado aldaw te peg-etod dan.
LUK 13:11 Doen heman bayi kidoen impeeleg te bosaw te sempolò teg walo se omay, so nebongkog sikandin.
LUK 13:12 Pegkità i Jesus kandin, timawal sikandin, kagi din, “Tiyà, kegolian ka den.”
LUK 13:13 Penga niyan, pinemàdan sikandin i Jesus, aw pegketà negolian sikandin aw dimuyun te Timanem.
LUK 13:14 Meneng ontò neopal se obanen te simbahan so aldaw te peg-etod se pegpegolì i Jesus te bayi sìyan. Yan se doun te minikagi sikandin diyà te kedita te otaw kidoen, “Kelikit te simana, enem se aldaw mepakay megterbaho se otaw, aw yan se aldaw mepakay aw kegolian kaw. Meneng eked kepakay aw seini, so aldaw te peg-etod.”
LUK 13:15 Minikagi si Jesus diyà kandin, “Tay law. Eden niyo aw egpenimanem kaw. Pengkey aldaw te peg-etod, gayed niyo eg-elinen se baka aw kodà niyo, aw eg-ibingen niyo dan doton te wayeg amon ipeinem niyo.
LUK 13:16 Aw mepakay tebangan se ayam-ayam te aldaw te peg-etod, mepakay heman aw kegolian se bayi seini sebad bowad-bowad i Abraham aw impeeleg i Satanas te sempolò teg walo se omay. Keilangan tebangan sikandin pengkey aldaw te peg-etod.”
LUK 13:17 Peg-ikagi din kenyan, ontò neyàyà se kedita dan migpoon kandin. Meneng ontò neluba se kedita te otaw so medita se kepelahan eg-inangen din.
LUK 13:18 Nayan, minikagi heman si Jesus, “Meg-indan a den kenyo te tegdeyanan tepad te peglowan te Timanem.
LUK 13:19 Iling iyan te ontò deitek benì intanem te otaw kidoen te pawà din. Timobò iyan aw timilles lamig neinang ontò dakel kayo, aw migsalag se manok kidoen.”
LUK 13:20 Minikagi heman sikandin, “Seini se doma tegdeyanan tepad te peglowan te Timanem.
LUK 13:21 Iling iyan te yist, so aw isanged iyan diyà te dakel arina, lomebag se kedakel niyan.”
LUK 13:22 Pegpesalo i Jesus doton te Jerusalem, minapit sikandin kidoen te teg sebad-sebad lonsod inokitan din amon megtoladà.
LUK 13:23 Doen otaw mig-insà kandin, kagi din, “Sir, pilabok lay se otaw mekelowà lekat te salà?” Timaba si Jesus,
LUK 13:24 “Pegpekagsen kaw mokit te lelebangan mesigpit. Penenalan kaw kanak. Medita se otaw meibeg mokit kidoen pesalo doton te peglowan te Timanem te modi aldaw, meneng eked dan peopi.
LUK 13:25 Aw megtakep se tig-apò te balay, pengkey tomawal kaw doton te lowà, eked kaw din peopi. Pengkey mikagi kaw, ‘Sir, owangi bag se tetakep nikaw.’ Meneng tomaba sikandin, ‘Wedà ko ketegahi aw kenan kaw lekat.’
LUK 13:26 Mikagi kaw heman, ‘Meneng kimaen kay doma no, aw migtoladà ka heman kidoen te lonsod day.’
LUK 13:27 Meneng mikagi sikandin, ‘Wedà ko ketegahi aw kenan kaw lekat. Kesayo kaw, kedita niyo eg-inang te medaet.’
LUK 13:28 Aw domateng se aldaw te peglowan te Timanem, ontò kaw megkelag aw megyangget-yangget se ngipen niyo tandà te kegemakan niyo, so kitaen niyo si Abraham, aw si Isaac, aw si Jacob, aw kedita te telekeliwat te kagi te Timanem gebii impeawop din. Meneng sikiyo se ipekesayo aw eked kaw peopi.
LUK 13:29 Medita se otaw domateng lekat te kedita te ogpeanan te keneyonan, pengkey kenà dan Judiyo, aw ipeakop dan diyà te peglowan te Timanem.
LUK 13:30 Na, doen menge otaw medanà songkani, meneng meinang dan melangkaw kidoen te peglowan te Timanem. Doen heman menge otaw melangkaw songkani, meneng meinang dan kwani medanà.”
LUK 13:31 Nayan, doen menge Parisiyo dimoton ki Jesus, aw minikagi dan diyà kandin, “Kesayo ka den lekat dini, so ibeg ekon i Herod imetayan ka.”
LUK 13:32 Minikagi si Jesus, “Pengkey biyasa sikandin eg-akal, doton kaw kandin, aw ikegihi niyo sikandin te eked a kelemitan kandin. Gayed a pa egpelowà te bosaw lekat te otaw, aw egpegolì a te otaw doen mesakit te seini aldaw aw kealdaw heman. Meneng ipengahen ko olò se inangen ko te iketelo aldaw.
LUK 13:33 Nayan, keilangan domeleg a pa te seini aldaw aw kealdaw aw sebad aldaw lamig domateng a doton te Jerusalem, so gayed eg-imetayan se menge telekeliwat te kagi te Timanem kidoen.
LUK 13:34 “Mekelelayò kaw tege Jerusalem. Gayed niyo eg-imetayan se kedita te telekeliwat te kagi te Timanem, aw egbontogan niyo te bato se kedita te otaw insogò te Timanem dini kenyo amon matay dan. Melikit a peden megtipon kenyo amon meg-ipat a kenyo, iling te omagak lomemlem diyà te menge onsoy din. Meneng wedà kaw keibeg.
LUK 13:35 Na, pinebeyaan den se ogpeanan niyo. Penenalan kaw kanak. Aw mesayo a, eked kaw kità kanak singed aw mikagi kaw, ‘Iduyun se insogò te Pengolo tadon Timanem.’”
LUK 14:1 Nayan, sebad aldaw te peg-etod, dimoton si Jesus te balay te sebad obanen te Judiyo migpelenged te Parisiyo, so impekaen din sikandin kidoen. Ontò timengteng se doma otaw kandin aw eden se inangen din.
LUK 14:2 Na, kidoen heman se otaw limebag se lawa din.
LUK 14:3 Mig-insà si Jesus diyà te menge Parisiyo aw menenoladà te punù ingkeliwat i Moises, kagi din, “Aw megpegolì se otaw te sebad otaw te aldaw te peg-etod, mekelàpang lay sikandin te punù ingkeliwat i Moises?”
LUK 14:4 Meneng wedad palos intaba dan. Penga niyan, nemaed si Jesus kandin, aw migpegolì kandin. Penga niyan, impeolì din sikandin.
LUK 14:5 Penga niyan, minikagi si Jesus, “Aw doen batà niyo aw baka medagdag kidoen te sokian medalem, seini indà se inangen niyo. Ayas kaw megtabang amon mekelowà pengkey aldaw te peg-etod. Sinu lay diyà kenyo se eked pegtabang?”
LUK 14:6 Meneng wedad palos intaba dan kenyan.
LUK 14:7 Pegpenenoo dan kidoen te lemisa, kinità i Jesus te gayed migpeonà-onà se menge otaw amon menenoo dan diyà te bangkò impetagad te otaw melangkaw. Yan se doun te mig-indan sikandin te tegdeyanan diyà te kedita dan, kagi din,
LUK 14:8 “Aw ipetanod kaw te peipid, ikà niyo onà egpenenoo diyà te bangkò impetagad te otaw melangkaw, so doen besi doma otaw ipetanod labi pa melangkaw diyà kenyo.
LUK 14:9 Aw tapay kaw den nenenoo, domateng se tigbatà aw mikagi diyà kenyo, ‘Tindeg kaw den, so ipepenenoo ko se otaw sida.’ Aw yan ontò kaw meyàyà, so modi kaw ipekaen.
LUK 14:10 Meneng labi pa mèpiya aw seini se inangen niyo. Aw ipetanod kaw te peipid, ikà niyo egpenenoo diyà te bangkò impetagad te otaw melangkaw. Aw komità se tigbatà kenyo, mikagi peden sikandin, ‘Elew, penenoo kaw dini te onsedanan te otaw melangkaw.’ Yan kebegayan kaw te dengeg kidoen te kedita te doma niyo.
LUK 14:11 Aw megpelangkaw-langkaw se otaw, meinang sikandin medanà. Meneng aw megpedanà se otaw te kandin pegkeotawun, meinang sikandin melangkaw.”
LUK 14:12 Minikagi heman si Jesus diyà te otaw migpetanod kandin, “Aw meg-inang ka te dakel kànen, pengkey alas dosi aw delem, ikà egpetanod te menge sigalak no, aw kedowa no, aw menge gaked no, aw simbalay no meyeyaman. Aw yan se menge otaw ipetanod no, onawa se inangen dan kwani, so ipekaen ka dan heman iling te ininang no kandan.
LUK 14:13 Meneng aw meg-inang ka te kànen, mèpiya aw ipetanod no se otaw sagkep, aw nepantig, aw kapig, aw bota.
LUK 14:14 Aw iling kenyan se otaw ipetanod no, ontò ka meluba, so eked dan keinang se ininang no diyà kandan. Meneng Timanem se memegay kamno te ontong te aldaw te peg-antay din lekat te nematay te kedita te otaw mig-inang te metòlid.”
LUK 14:15 Nayan, sagwa dimineg se sebad otaw kimaen doma din, minikagi sikandin, “Aw lomowan se Timanem, ontò kidon meluba aw ipetanod kidon din te peg-inang din te dakel kànen.”
LUK 14:16 Meneng minikagi si Jesus, “Doen otaw mig-inang te ontò dakel kànen, aw medita se otaw inindanan din.
LUK 14:17 Pegdateng te aldaw te pegkaen, doen sineligan insogò din mangay te kedita te otaw inindanan din, so integilan din den se kedakel te kànen.
LUK 14:18 Meneng mig-eked se kedita dan. Doen otaw minikagi, ‘Minayad a den te tanà, aw keilangan domoton a amon tomengteng a kenyan. Keidowi a bag, so eked a peketanod.’
LUK 14:19 Minikagi se doma otaw, ‘Minayad a den te sempolò se baka eglegoyod te daro, aw domoton a den amon telemanen se peglegoyod dan te daro. Keidowi a bag, so eked a peketanod.’
LUK 14:20 Minikagi heman se doma otaw, ‘Kaling a pa nengognan, aw yan se doun te eked a peketanod.’
LUK 14:21 Penga niyan, minolì se sineligan aw mig-indan kenyan diyà te amo din. Pegdineg te otaw kenyan, neopal sikandin, aw minikagi, ‘Kegaen ka doton te menge kersada aw menge dalan te lonsod, aw petekingi dini se otaw ketelaan no pengkey sagkep, aw nepantig, aw otaw bota, aw kapig.’
LUK 14:22 Wedà kenamay, minikagi se sineligan, ‘Sir, timolò a den te impunù no kanak, meneng doen pa keombaan.’
LUK 14:23 Minikagi heman se amo din, ‘Doton ka heman te ogpeanan mediyò te lonsod, aw ontò ka ikagi diyà te otaw amon tomanod dan, so ibeg ko mepenò se balay ko te otaw ipekaen ko.
LUK 14:24 Meneng se otaw tapay ko tinawal, eked ko dan palos pekàni te dakel kànen seini.’”
LUK 14:25 Nayan, ontò medita se otaw timaking ki Jesus kidoen te dalan. Miniling sikandin aw minikagi diyà kandan,
LUK 14:26 “Aw meibeg se otaw tomaking kanak, eked ko sikandin inangi tinoledaan ko singed aw sebad ko se tekingan din. Eked kepakay aw tekingan din heman se amay din, aw inay din, aw esawa din, aw batà din, aw menge kedowa din, aw pengkey ibeg te pedowan din.
LUK 14:27 Eked ko heman inangi tinoledaan ko se otaw eked tayod te kelimahan pengkey imetayan sikandin tandà te pegtaking din kanak.
LUK 14:28 “Keilangan onà meg-aneng-aneng se otaw aw meketayod sikandin tomaking kanak. Iling sikandin te otaw meg-inang te balay. Onà din eneng-enengen aw pila se keelagà niyan, aw botong se ibayad din amon mepenga iyan.
LUK 14:29 Simpana kenà botong se kwarta din, eked kepenga se balay din. Penga te pegtollok din, aw eked deleg, mebebayat se kedita te otaw komità kenyan, aw somila dan kandin,
LUK 14:30 kagi dan, ‘Pengkey migtebò sikandin mig-inang te balay, meneng wedà din kepenga.’
LUK 14:31 “Se otaw meibeg tomaking kanak, iling heman sikandin te selotan doen sempolò melalan sondalo din. Meneng aw kelowan melalan se sondalo te poon din, keilangan onà sikandin meg-aneng-aneng aw botong se keseg te sondalo din amon mekedaeg dan te medita sondalo te poon din.
LUK 14:32 Simpana aneng-aneng din eked pekedaeg, pengkey mediyò pa se poon din, doen otaw isogò din somongon kandan amon megsebad dan aw wedad gira.
LUK 14:33 Iling heman kenyan, keilangan onà meg-aneng-aneng se otaw meibeg tomaking kanak. Aw eked tanan se otaw te kedakel te kedònan din amon tomaking kanak, eked ko inangi tinoledaan ko.”
LUK 14:34 “Nayan, isanged se asin diyà te kànen amon mèpiya se nanam. Meneng simpana megkewedad se kepait te asin, eked iyan ketodà.
LUK 14:35 Pengkey isawol iyan doton te pawà, aw isanged iyan diyà te bebolong te tanà, wedad den kekemowan kenyan, so keilangan iagbel. Keilangan menenalan se kedita niyo doen telinga.”
LUK 15:1 Nayan, medita se iskribinti aw doma otaw nelegeb te salà migpedapag diyà ki Jesus amon domineg dan te itoladà din.
LUK 15:2 Yan se doun te migtindaet se menge Parisiyo aw menenoladà te punù, aw minikagi dan, “Medaet se eg-inangen din, so egsigelaken din se menge otaw egpekesalà aw eglàpang te punù ingkeliwat i Moises. Medaet so egpengaen sikandin doma dan.”
LUK 15:3 Pegketaga-taga i Jesus te eg-ikegiyen dan, mig-indan sikandin te tegdeyanan seini, kagi din,
LUK 15:4 “Aw doen otaw doen sebad gatos ayam-ayam din karniro, aw metalon se sebad, tenanan din se kesyaman teg siyam doton te tanà doen sagbet, aw pemehaen din se sebad netalon lamig kitaen din.
LUK 15:5 Pegkità din, ontò sikandin meluba aw ibingen din molì.
LUK 15:6 Aw molì sikandin, tewalen din se menge sigalak din aw simbalay din, kagi din, ‘Keilangan meluba kaw heman, so kinità ko den se karniro netalon.’
LUK 15:7 Nayan, penenalan kaw te kagi ko. Iling heman kenyan, pengkey sidebok se otaw nelegeb te salà, aw megselsel sikandin, doen keluba doton te langit labi pa dakel diyà te keluba tepad te kesyaman teg siyam otaw wedà pegselsel so eg-inang dan te metòlid.”
LUK 15:8 “Aw doen sempolò se kwarta te bayi plata meelagà, aw metalon se sebad, temteman din se solò, aw ponasan din heman se balay, aw ontò din pemehaen lamig kitaen din.
LUK 15:9 Aw kitaen din iyan, tewalen din se menge sigalak din aw menge simbalay, kagi din, ‘Keilangan meluba kaw heman, so kinità ko den se kwarta netalon.’
LUK 15:10 Penenalan kaw te kagi ko. Iling heman kenyan, meluba se menge anghil te Timanem pengkey olò sebad se otaw megselsel te salà din.”
LUK 15:11 Minikagi heman si Jesus, “Doen otaw dowa se batà din meama.
LUK 15:12 Minikagi se adi diyà te amay din, ‘Amà, ibeg ko ibegay no den kanak se ketengà te tanà aw kedònan tenanan no kenami aw matay ka.’ Penga niyan, tinengà te amay se tanà din, aw imbegay din iyan diyà te didowa batà din.
LUK 15:13 Penga niyan te wedà kenamay, imbeligyà te adi se tanà imbegay kandin, aw nesayo sikandin nengibing te kwarta din. Dimoton sikandin te ontò mediyò ogpeanan, aw pigbàtan din se kwarta din kidoen pineokit te medaet eg-inangen din wedad ontong.
LUK 15:14 Pegkeamin te kwarta din, dimateng se ontò medaet bayil, aw ontò den sikandin nelidò.
LUK 15:15 Penga niyan, migpeido-ido sikandin diyà te sebad otaw doen tanà kidoen, aw impetonggò sikandin te menge osa.
LUK 15:16 Ontò sikandin binallos, aw kànen din peden se egpengànen te osa, so wedad doma kànen din. Wedad otaw neido kandin, aw wedad heman kànen imbegay kandin.
LUK 15:17 Meneng mig-aneng-aneng sikandin, ‘Se kedita te otaw egterbaho kidoen te amay ko, ontò dakel se kànen dan. Meneng siak, agpet a matay dini tandà te ballos ko.
LUK 15:18 Mèpiya aw molì a den doton te amay ko, aw megselsel a diyà te Timanem aw diyà te amay ko.
LUK 15:19 Mikagi a heman diyà kandin te mepakay aw eked a din peden tewali batà din, meneng inangen a din iling te otaw egtendanan din.’
LUK 15:20 Penga niyan, timindeg sikandin aw minolì. “Pengkey mediyò pa se balay, meneng kinità sikandin te amay din aw neidowan din. Kimagnan se amay doton te batà din, aw kimeles kandin, aw nengadek kandin.
LUK 15:21 Minikagi se batà din, ‘Amà, doen salà ininang ko diyà te Timanem aw diyà heman kamno. Eked a no peden tewali batà nikaw.’
LUK 15:22 Meneng timawal se amay din diyà te menge sineligan, kagi din, ‘Kegaen kaw. Ibingi niyo se ontò mèpiya saol ekasan din. Pepeningsingi niyo heman sikandin, aw pesepetosi niyo.
LUK 15:23 Engayi niyo se nati te baka melambò amon iyawen, so meg-inang kidon te dakel kànen tandà te luba tadon.
LUK 15:24 Eden ko aw nematay den se batà ko seini, meneng neantay pa kedì. Netalon sikandin, meneng kinità.’ Penga niyan, migtebò dan se migpista.
LUK 15:25 “Nayan, te peg-olì te adi, doton pa te pawà se kakay din. Meneng pegkedapag te kakay din diyà te balay, dinineg din se menge otaw migdelangan aw simayaw.
LUK 15:26 Pegdineg din kenyan, tinawal din se sebad sineligan aw mig-insà aw eden se neinang.
LUK 15:27 Timaba sikandin, ‘Minolì den se adi no, aw impeiyaw te amay niyo se nati te baka melambò, so nekeolì den se adi no aw wedad mesakit.’
LUK 15:28 Pegdineg din kenyan, ontò neopal se kakay igsà wedà penayit diyà te balay. Penga niyan, timenà se amay din amon ipepenayit.
LUK 15:29 Meneng minikagi se kakay batà din, ‘Tay law. Pengkey pila se omay, gayed a pa timolò kamno, aw wedad palos punù no linèpangan ko. Meneng wedad palos imbegay no kanak, pengkey kambing deitek, amon lelahen ko se menge sigalak ko.
LUK 15:30 Meneng se doma batà no sida, pigbàtan din den se kwarta no imbayad din te bayi. Meneng peg-olì din, impeiyaw no ekon se melambò nati te baka amon meluba sikandin.’
LUK 15:31 Minikagi se amay din, ‘Atò, gayed ki egpetekingay, aw pengkey eden se kanak, kamno heman iyan.
LUK 15:32 Meneng keilangan megpelelahay kidon aw megpelubahay kidon, so eden ko aw nematay den se adi no, meneng neantay pa kedì. Netalon sikandin, meneng kinità.’”
LUK 16:1 Mig-indan heman si Jesus te tegdeyanan seini diyà te menge tinoledaan din, kagi din, “Doen otaw impetonggò te datò diyà te kedakel te keyemanan din. Nayan, dinineg te datò te pigbàtan te teletonggò se keyemanan din.
LUK 16:2 Penga niyan, tinawal te datò se otaw sìyan, aw minikagi, ‘Medaet se dinineg ko tepad kamno. Ibingi dini se kedita te libro tepad te kwarta insalig ko diyà kamno, so eked a den salig kamno.’
LUK 16:3 Nayan, mig-aneng-aneng se sineligan, ‘Agpet den wedad otaw megtandan kanak. Megmeno a? So kenà botong se keseg ko amon meg-inang a te pawà, aw meyàyà a aw meinang a metipemoyò.
LUK 16:4 Na, netegahan ko den aw eden se inangen ko. Aw metoman iyan, pengkey ipekesayo a te amo ko, meneng medita pa se sigalak ko megsagman kanak kidoen te balay dan.’
LUK 16:5 Penga niyan, tinawal din se kedita te otaw teg sebad-sebad doen salà dan diyà te amo din. Tinawal din se tagnà aw minikagi, ‘Pila lay se kedakel te salà no diyà te amo ko?’
LUK 16:6 Timaba sikandin, ‘Sebad gatos lata se lana.’ Minikagi se sineligan, ‘Seini se papil tapay no pigpirmahan. Penenoo ka den aw solat ka te keliman olò lata. Kegaen ka.’
LUK 16:7 Penga niyan, tinawal din se doma otaw, aw minikagi sikandin, ‘Pila lay se kedakel te salà nikaw?’ Timaba sikandin, ‘Sebad gatos sako se omay trigo.’ Minikagi se sineligan, ‘Seini se papil tapay no pigpirmahan. Solat ka den te kewelowan olò sako.’
LUK 16:8 Nayan, pengkey migtostos se sineligan te salà te otaw diyà te amo din, meneng dimuyun se amo kandin, so biyasa sikandin miglalang te kèpiyaan. Pengkey biyasa se menge sakop te Timanem egpengabat te ontong, meneng labi pa biyasa egpengabat te ontong se menge otaw kenà egtaking te Timanem.”
LUK 16:9 Minikagi heman si Jesus, “Seini se punù ko diyà kenyo. Tebangi niyo se menge doma otaw te kwarta niyo dini te keneyonan. Yan aw meamin iyan, ipeogpà kaw te Timanem doton te langit aw matay kaw.
LUK 16:10 Aw keseligan se otaw pengkey deitek se isalig diyà kandin, keseligan heman sikandin aw dakel se isalig diyà kandin. Meneng aw eked keseligi se otaw aw deitek se isalig diyà kandin, eked heman sikandin keseligi te dakel.
LUK 16:11 Nayan, aw eked kaw keseligi dalem te pegpengibing niyo te kwarta dini te keneyonan, eked kaw heman keseligi te Timanem te ontò keyemanan doton te langit.
LUK 16:12 Aw eked kaw keseligi dalem te pegtonggò niyo te kedònan insalig te doma otaw diyà kenyo, eked kaw heman begayi te Timanem te ontong niyo doton te langit.
LUK 16:13 “Wedad sineligan meketolò te dowa amo din. Aw megpelenged sikandin diyà te sebad, eked sikandin tolò te sebad. Sebad olò se tekingan din, aw eked din segmani se sebad. Iling heman kenyan, eked pegsebad se pegpenimanem niyo aw pegpengewarta niyo.”
LUK 16:14 Nayan, pegdineg te menge Parisiyo te intoladà i Jesus, pigbàtan-bàtan dan sikandin, so egkeibegan dan se kwarta.
LUK 16:15 Meneng minikagi si Jesus, “Sikiyo se egpelingo-lingo te metòlid se eg-inangen niyo, meneng netaga-taga se Timanem te medaet se pedowan niyo. Pengkey megpelangkaw-langkaw kaw, meneng ontò iyan medaet diyà te Timanem.
LUK 16:16 “Te wedà pa pegtoladà si Juan Memonyagay, keilangan toloen se punù ingkeliwat i Moises aw menge telekeliwat te kagi te Timanem. Meneng lekat te pegtebò te pegtoladà i Juan lamig seini, gayed ipegtoladà se Mèpiya Indan tepad te peglowan te Timanem, aw medita se otaw ontò meibeg megpesakop diyà kandin.
LUK 16:17 Pengkey megkewedad se langit aw tanà, meneng eked palos pegkewedad se punù te Timanem te eked pa iyan ketoman.
LUK 16:18 “Aw somibwan se meama te esawa din, aw mengognan diyà te doma bayi, mekelakad sikandin. Aw mengognan se otaw diyà te bayi sinibwanan te esawa din, mekelakad heman sikandin.”
LUK 16:19 “Doen otaw meyaman egpenaol te ontò meelagà, aw egpengaen te ontò mèpiya te kelikit te aldaw.
LUK 16:20 Doen heman otaw sagkep ngadan din si Lazaro. Nelegeb se lawa din te palì, aw gayed sikandin ipegpeibat kidoen te lowà te balay te otaw meyaman.
LUK 16:21 Ibeg din peden komaen olò te momò lekat te lemisa te otaw sìyan meyaman. Gayed heman egdilaan te menge toyang se menge palì din.
LUK 16:22 Nayan, nematay se otaw sagkep, aw inibing sikandin te menge anghil doton te tangkil te kemonaan din si Abraham kidoen te langit. Penga niyan, nematay heman se otaw meyaman aw inlebeng.
LUK 16:23 Inibing sikandin doton te ogpeanan te otaw nematay, aw ontò sikandin ineleg kidoen. Limengag sikandin aw timengteng diyà ki Abraham ontò mediyò aw kidoen si Lazaro te tangkil din.
LUK 16:24 Timawal sikandin, ‘Apò Abraham, keidowi a bag. Sogoi si Lazaro megbawog te intetodò din diyà te wayeg amon ipetedak diyà te dilà ko, so ontò a ineleg dini te apoy seini.’
LUK 16:25 Meneng minikagi si Abraham, ‘Atò, eneng-enengi ini. Te wedà ka pa kematay, wedad palos lidò no so dakel se kedònan no mèpiya, meneng gayed doen kelimahan i Lazaro. Nayan, ontò den sikandin neluba dini, aw sikona den se ineleg kidoen.
LUK 16:26 Doen pa sebad mendad egpekeanggà. Doen medalem awang kidoen te tengà-tengà ta eked keokiti te otaw megpesalo peden doton kamno, aw wedad heman mekedini lekat kamno.’
LUK 16:27 Minikagi se otaw meyaman, ‘Apò, aw eked no sogoi si Lazaro dini, sogoi sikandin doton te balay te menge kedowa ko.
LUK 16:28 Doen pa lima kedowa ko, aw ibeg ko indanan din dan te keilangan megselsel dan te salà, amon eked dan heman peibingi dini te kededàtan.’
LUK 16:29 Meneng minikagi si Abraham, ‘Gayed doen punù ingkeliwat i Moises aw menge telekeliwat te kagi te Timanem egbesahen dan. Mèpiya aw menenalan dan kenyan.’
LUK 16:30 Minikagi se otaw meyaman, ‘Apò, eked dan penenalan kenyan. Meneng aw doen otaw meantay lekat te nematay isogò no doton kandan, metoman dan megselsel te salà dan.’
LUK 16:31 Minikagi si Abraham, ‘Aw eked dan penenalan te punù ingkeliwat i Moises aw menge telekeliwat te kagi te Timanem, eked dan heman pemenal pengkey doen meantay lekat te nematay.’”
LUK 17:1 Minikagi si Jesus diyà te menge tinoledaan din, “Doen gayed mekebaet te pegpemenal te kedita te otaw, meneng mekelelayò se otaw eg-inang kenyan, so ontò sikandin ipelumun.
LUK 17:2 Labi pa mèpiya aw iketan se lieg din te dakel bato aw idagdag doton te lawod, amon eked din kebàti se pegpemenal te mengisù migpesakop diyà kanak, pengkey sebad.
LUK 17:3 Keilangan megpekeimanday kaw. “Na, aw doen otaw meg-inang te salà diyà kenyo, ikagi kaw diyà kandin tepad te salà ininang din. Aw megselsel sikandin, pegwedadi niyo se salà ininang din.
LUK 17:4 Pengkey mekepito sikandin peg-inang te medaet diyà kenyo dalem te sebad olò se aldaw, kelikit te pegselsel din kenyan, keilangan pegwedaden niyo se kedita te salà din.”
LUK 17:5 Minikagi se menge sogounun i Cristo, “Lobosi se pegsalig day diyà kamno.”
LUK 17:6 Minikagi se Pengolo, “Mikagi a den diyà kenyo te pengkey deitek pa se pegsalig niyo diyà kanak iling te kedeitek te benì te mostasa, mekebatog kaw mikagi diyà te dakel kayo te pispisen din se lawa din aw malin doton te dagat, aw tomolò iyan kenyo.”
LUK 17:7 “Simpana doen sineligan egdaro aw egtonggò te karniro te amo din. Aw mepenga se pegterbaho din doton te pawà, aw domoton te balay, eked kepakay aw sikandin se monà ipekaen te eked pa kaen se amo din.
LUK 17:8 Meneng onà megpunù se amo te keilangan meg-inang se sineligan te kànen aw meglamak kenyan. Penga te pegkaen te amo, yan mepakay aw komaen se sineligan.
LUK 17:9 Mepakay heman aw eked pesiontongi te amo se sineligan timolò te punù din, so yan se terbaho din.
LUK 17:10 Iling kaw heman te sineligan sìyan, so penga te pegtolò niyo te kedita te punù te Timanem diyà kenyo, eked kaw pesiontongi, meneng keilangan mikagi kaw diyà kandin, ‘Eked kay nikaw duyuni, so olò day ininang se keilangan toloen day.’”
LUK 17:11 Pegpesalo i Jesus doton te Jerusalem, minokit sikandin diyà te pigkitaan te probinsya te Samarya aw Galiliya.
LUK 17:12 Pegdateng din doton te sebad baryo, nesongonan sikandin te sempolò otaw tompigun. Pengkey mediyò dan pa,
LUK 17:13 meneng timawal dan, “Jesus, Pengolo, keidowi kay bag.”
LUK 17:14 Pegkità din kandan, minikagi sikandin, “Doton kaw te menge pengolo te simbahan aw pegpekità kaw diyà kandan te lawa niyo.” Pegdoton dan, negolian se kedita dan te wedà dan pa dateng.
LUK 17:15 Doen sebad otaw kidoen kandan, pegkità din te negolian den, dimuyun sikandin te Timanem te dakel se kagi din, aw limikò sebad din diyà ki Jesus.
LUK 17:16 Limongken diyà ki Jesus, aw migpesiontong heman sikandin. Tege Samarya se otaw sìyan.
LUK 17:17 Penga niyan, minikagi si Jesus, “Pengkey sempolò se kedita dan pinegolian ko, meneng sidebok se otaw limikò amon domuyun te Timanem, aw kenà sikandin Judiyo. Nepela a, so wedà heman likò se siyam Judiyo doma din.”
LUK 17:19 Minikagi heman si Jesus diyà te otaw sìyan negolian den, “Tindeg ka den, aw mepakay ka den mesayo. Negolian ka so simalig ka diyà kanak.”
LUK 17:20 Doen menge Parisiyo mig-insà ki Jesus aw kano pegtebò se Timanem lomowan. Timaba sikandin, “Aw megtebò se Timanem lomowan, wedad pengilala ipekità din diyà kenyo.
LUK 17:21 Wedad otaw mekeikagi, ‘Dini den se peglowan din.’ Wedad heman otaw mekeikagi, ‘Kidoen se peglowan din.’ Eneng-enengi niyo ini. Eglowan den se Timanem dini kenyo.”
LUK 17:22 Penga niyan, minikagi si Jesus diyà te menge tinoledaan din, “Doen aldaw domateng aw meibeg kaw peden te megtebò a lomowan Timanem Migpekeotaw, meneng keilangan megtagad kaw pa kenyan.
LUK 17:23 Doen kwani otaw mikagi, ‘Kidoen se Misiyas.’ Doen heman doma otaw mikagi, ‘Dini den sikandin.’ Meneng peg-ogpà kaw. Ikà niyo egtaking kandan,
LUK 17:24 so ontò metaen se peglikò ko iling te kilem ontò somiblat doton te kebelad te langit aw kitaen te kedita te otaw. Iling heman kenyan se pegdateng ko Timanem Migpekeotaw.
LUK 17:25 Meneng eked a likò singed aw ontò a elegen, aw onà a kuluwan te menge otaw te aldaw seini.
LUK 17:26 Aw lomikò a Timanem Migpekeotaw, medita se otaw eked peketagad te pegdateng ko, iling te otaw gebii wedà penenalan ki Noe.
LUK 17:27 Gayed dan egpengaen, aw eg-inem dan, aw egpepengognanay dan, lamig te aldaw te pegsakay i Noe aw pamilya din diyà te arka. Meneng negelà se menge doma otaw so nesàban dan te pegkelinep te tanà te wayeg, aw nelemes se kedita dan.
LUK 17:28 Wedà heman peketagad se otaw gebii dalem te peg-ogpà i Lot doton te Sodoma. Gayed dan heman egpengaen, aw eg-inem dan, aw egbayad dan, aw egpemeligyà dan, aw egpenanem dan, aw eg-inang dan te balay.
LUK 17:29 Meneng aldaw te pegkesayo i Lot lekat te Sodoma, negelà se kedita te doma tege Sodoma, so nematay dan te apoy aw esopri nedagdag lekat te langit.
LUK 17:30 Kesàban heman iling kenyan se otaw kenà egpeketagad te aldaw aw ipekità a Timanem Migpekeotaw.
LUK 17:31 “Aw domateng se aldaw sìyan, eked awop diyà te balay din se otaw doton te lowà amon ebaten din se kedònan, meneng keilangan tenanan din se kedita. Eked heman olì se otaw egterbaho doton te pawà, meneng keilangan komadas.
LUK 17:32 Eneng-enengi niyo te nebaloy asin se esawa i Lot te peglingì din diyà te lonsod tinenanan dan.
LUK 17:33 Pengkey ibeg te otaw megkelayat se omol din, meneng kunù din gayed matay. Meneng aw mepakay diyà te otaw pengkey imetayan sikandin, begayan sikandin te kaling pedowan wedad temanan.
LUK 17:34 Penenalan kaw te kagi ko. Aw domateng se aldaw sìyan, pengkey tomedogi se dowa otaw kidoen te sebad ikam, meneng ipetaking se sebad, aw tenanan se sebad.
LUK 17:35 Pengkey meglegiling se dowa bayi, meneng ipetaking se sebad, aw tenanan se sebad. [
LUK 17:36 Pengkey megterbaho se dowa meama doton te pawà, meneng ipetaking se sebad, aw tenanan se sebad.]”
LUK 17:37 Mig-insà se menge tinoledaan din, kagi dan, “Pengolo, kenan lay iyan keinang?” Minikagi si Jesus, “Pengkey kenan se lawa te nematay, yan se ketiponan te menge manok egpengaen te lawa te nematay.”
LUK 18:1 Mig-indan si Jesus te tegdeyanan amon ketoledaan dan te keilangan gayed dan megtawal-tawal amon eked dan lengà.
LUK 18:2 Minikagi sikandin, “Kidoen te sebad lonsod, doen howis kenà egpenimanem aw kenà heman egkeido te doma otaw.
LUK 18:3 Doen heman bayi balo eg-ogpà kidoen gayed egdoton te howis aw egpemoyò, kagi din, ‘Tebangi a amon dàgen ko se otaw egpemilang kanak.’
LUK 18:4 Meneng wedà pegtabang se howis kandin. Nayan, pegkenamay, mig-aneng-aneng se howis, ‘Pengkey kenà a egpenimanem aw kenà a heman egkeido te doma otaw,
LUK 18:5 meneng keilangan tebangan ko se bayi balo seini, so gayed a din egbuyungen. Megkelomay a kwani aw gayed sikandin meglikò-likò.’”
LUK 18:6 Minikagi heman se Pengolo, “Na, eneng-enengi niyo se inikagi te howis, so pengkey kenà egpenimanem, meneng tebangan din se otaw gayed egpemoyò.
LUK 18:7 Labi pa metoman se Timanem egpenabang te otaw pinemallì din aw egpengenganay dan diyà kandin te kelikit te aldaw aw delem. Eked sikandin peg-alà-alà,
LUK 18:8 meneng metoman menabang kandan te eked kenamay. Yan, ikà niyo eglengà te pegtawal-tawal niyo diyà kandin. Metoman a lomikò Timanem Migpekeotaw, aw ibeg ko kitaen se medita otaw egsalig diyà kanak.”
LUK 18:9 Nayan, mig-indan si Jesus te tegdeyanan seini diyà te menge otaw eden dan aw metòlid se eg-inangen dan, aw gayed dan eglindò te doma.
LUK 18:10 Minikagi si Jesus, “Doen dowa otaw dimoton te dakel simbahan te Jerusalem amon megtawal-tawal dan. Parisiyo se sebad, aw iskribinti se sebad.
LUK 18:11 Timindeg kidoen se Parisiyo aw migtawal-tawal, kagi din, ‘E Timanem, egpesiontong a diyà kamno, so labi a pa mèpiya diyà te menge doma otaw, so kenà a iling te otaw eg-akal, aw eglàpang te punù, aw eglakad. Egpesiontong a so kenà a medaet otaw iling te iskribinti sida.
LUK 18:12 Kelikit te simana, mekedowa a egpowasa. Gayed ko ipegbowang se ikesempolò ketengà te kwarta eg-ebaten ko.’
LUK 18:13 Meneng pegtawal-tawal te iskribinti, migpekediyò sikandin diyà te menge doma otaw so neyàyà. Wedà heman lengag doton te langit, meneng timikelong sikandin aw dinapì din se kagpa din tandà te pegselsel din, aw minikagi, ‘Timanem, keidowi a bag, so nelegeb a te salà.’
LUK 18:14 Na, penenalan kaw te kagi ko. Peg-olì te iskribinti sìyan, pigwedad den te Timanem se salà din. Meneng se Parisiyo, wedà pegwedadi te Timanem se salà din. Inangen te Timanem medanà se kedita te otaw egpelangkaw-langkaw, meneng inangen din melangkaw se kedita te otaw egpedanà te kandan pegkeotawun.”
LUK 18:15 Nayan, doen menge otaw nengibing te dedeitek mengisù doton ki Jesus amon pemàdan din dan, aw megtawal-tawal te begayan dan te Timanem te mèpiya. Meneng pegkità te menge tinoledaan din kenyan, migsagda dan kandan.
LUK 18:16 Meneng tinawal i Jesus se kedita dan diyà kandin, aw minikagi sikandin, “Ikà niyo egsagda kandan, so lomowan se Timanem diyà te otaw ontò somalig diyà kandin iling te pegsalig te mengisù diyà te amay aw inay dan.
LUK 18:17 Eneng-enengi niyo se kagi ko seini. Aw eked salig se otaw diyà te Timanem iling te pegsalig te mengisù diyà te amay dan, eked sikandin sekopi te Timanem diyà te peglowan din.”
LUK 18:18 Doen sebad obanen te Judiyo mig-insà diyà ki Jesus, kagi din, “Sir, ontò ka mèpiya otaw. Eden lay se keilangan inangen ko amon mekinawà ko se kaling pedowan wedad temanan?”
LUK 18:19 Minikagi si Jesus, “Nepela a so minikagi ka te mèpiya a otaw. Meneng wedad otaw ontò mèpiya, so olò Timanem se ontò mèpiya.
LUK 18:20 Netegahan no besi se menge punù ingkeliwat i Moises. Ikà eglakad. Ikà egbonò. Ikà egpenakaw. Ikà egkebolalaw tepad te doma otaw. Keilangan memasa ka te amay aw inay nikaw.”
LUK 18:21 Timaba se obanen, “Gayed ko egtoloen se kedita niyan lekat te pegkebatà ko lamig seini.”
LUK 18:22 Pegdineg i Jesus kenyan, minikagi sikandin, “Sebad mendad se keilangan inangen nikaw. Beligyai se kedakel te kedònan no, aw iteped se kwarta no diyà te menge otaw nelimahan. Aw yan se inangen no, doen ontong kinewaen no doton te langit. Penga te pegteped no te kedakel niyan, likò ka dini aw taking ka kanak.”
LUK 18:23 Meneng pegdineg te obanen kenyan, nepuluk se pedowan din, so ontò sikandin meyaman.
LUK 18:24 Pegkità i Jesus te nepuluk se obanen, minikagi sikandin, “Ontò melima se pegpesakop te otaw meyaman diyà te peglowan te Timanem.
LUK 18:25 Pengkey ontò melima se peg-okit te ayam-ayam kamilo diyà te awang te dagem, meneng labi pa melima se pegpesakop te otaw meyaman diyà te peglowan te Timanem.”
LUK 18:26 Minikagi se menge doma otaw dimineg kenyan, “Aw iling kenyan, wedad palos otaw mekelowà lekat te pelumun te Timanem.”
LUK 18:27 Timaba si Jesus, “Betogen te Timanem se eked kebatog te otaw.”
LUK 18:28 Minikagi si Pedro, “Meneng sikami, tinenanan day den se kedakel te kedònan day amon tomaking kay kamno.”
LUK 18:29 Minikagi si Jesus, “Eneng-enengi niyo se kagi ko seini. Se otaw timanan den te kedònan din, aw esawa din, aw kedowa din, aw amay din, aw inay din, aw batà din, amon megtoladà te doma otaw tepad te peglowan te Timanem,
LUK 18:30 yan se metoman kominawà te ontong labi pa dakel diyà te tinenanan din dalem te eked pa kematay, aw penga niyan, begayan heman sikandin te kaling pedowan wedad temanan te modi aldaw.”
LUK 18:31 Nayan, migtipon si Jesus te sìyan sempolò teg dowa tinoledaan din, aw minikagi sikandin, “Na, domoton kidon den te Jerusalem amon metoman se kedita te pakang insolat te menge telekeliwat te kagi te Timanem tepad kanak Timanem Migpekeotaw.
LUK 18:32 Metoman a ibegay diyà te belad te menge otaw kenà Judiyo. Kebebeyatan a, aw pemilangen a, aw teptepan a.
LUK 18:33 Bedasen a dan, aw penga niyan imetayan a dan. Meneng meantay a lekat te nematay te iketelo te aldaw.”
LUK 18:34 Meneng wedà pekelabet se tinoledaan din te sìyan inikagi i Jesus. Wedà petega-tegahi se kedegdagan niyan diyà kandan, aw yan se doun te wedà dan pekelabet.
LUK 18:35 Pegkedapag i Jesus doton te lonsod te Jeriko, doen otaw bota nenenoo kidoen te kilid te dalan aw egpemoyò.
LUK 18:36 Pegdineg din te medita otaw limaklak, mig-insà sikandin aw eden se neinang.
LUK 18:37 Minikagi se menge doma, “Minokit dini si Jesus tege Nasarit.”
LUK 18:38 Penga niyan, timawal sikandin, “Jesus, bowad-bowad i David, keidowi a bag.”
LUK 18:39 Migsagda kandin se menge otaw nekeonà ki Jesus, aw migpunù dan te keilangan mepenek sikandin. Meneng labi beling sikandin timawal, “Bowad-bowad i David, keidowi a bag.”
LUK 18:40 Pegdineg i Jesus te pegtawal din, simagked sikandin aw impeangay din se otaw bota. Pegdateng din doton, mig-insà si Jesus,
LUK 18:41 “Eden lay se ibeg no inangen ko kamno?” Timaba se bota, “Pengolo, ibeg ko, todà a komità.”
LUK 18:42 Minikagi si Jesus, “Kimità ka den. Negolian ka den so simalig ka diyà kanak.”
LUK 18:43 Pegketà, kimità sikandin, aw timaking ki Jesus. Gayed din pinesiontongan se Timanem. Dimuyun heman te Timanem se kedita te otaw kimità te pegpegolì kandin.
LUK 19:1 Nayan, minokit si Jesus kidoen te lonsod te Jeriko.
LUK 19:2 Doen tege Jeriko ngadan din si Sakeo. Sikandin se pengolo te kedita te iskribinti aw ontò meyaman.
LUK 19:3 Ibeg din tomengteng ki Jesus, meneng wedà din kebatog, so medita se otaw netipon, aw ontò sikandin mebabà otaw.
LUK 19:4 Na, kimagnan sikandin doton te monà kidoen te dalan okitan i Jesus, aw nenayit diyà te dakel kayo amon komità ki Jesus.
LUK 19:5 Pegdateng i Jesus doton te kayo pinenitan i Sakeo, limengag sikandin aw minikagi, “Sakeo, ayas ka tenà, so keilangan meg-ogpà a kidoen te balay no te aldaw seini.”
LUK 19:6 Ayas timenà si Sakeo, aw inibing din si Jesus doton te balay din, aw migsagman kandin, aw neluba se pedowan din.
LUK 19:7 Meneng simila se kedita te otaw kimità kenyan, kagi dan, “Medaet iyan, so midegà sikandin kidoen te balay te otaw nelegeb te salà.”
LUK 19:8 Migpedapag si Sakeo diyà ki Jesus aw minikagi, “Pengolo, seini se inangen ko. Ibegay ko se ketengà te kedònan ko diyà te menge otaw nelimahan. Aw migleges a te otaw memegay kanak te kwarta, yan se lintapan ko te mekeepat.”
LUK 19:9 Minikagi si Jesus, “Aldaw seini, mekelowà ka den lekat te salà, so nemenal ka den kanak iling te pegpemenal i Abraham gebii.
LUK 19:10 Dimini a te tanà Timanem Migpekeotaw amon tewalen ko se otaw nelegeb te salà, aw ipelowà ko dan.”
LUK 19:11 Gayed egpenenalan se kedita te otaw diyà ki Jesus, aw mig-indan sikandin te tegdeyanan, so medapag den sikandin te Jerusalem, aw eden dan aw agpet den megtebò se Timanem lomowan diyà kandan.
LUK 19:12 Yan se doun te minikagi sikandin, “Doen melangkaw otaw dimoton te mediyò ogpeanan amon inangen sikandin selotan te lonsod din, aw penga niyan molì amon lomowan.
LUK 19:13 Te wedà pa kesayo, tinawal din se sempolò sineligan din, aw imbegay din diyà kandan se kwarta, sebad gatos diyà te teg sebad-sebad kandan. Minikagi sikandin, ‘Seini se kwarta gemiten niyo te pegnigosyo dalem te iyogan ko.’
LUK 19:14 Nayan, se doma otaw eg-ogpà kidoen te lonsod sìyan, wedà dan keibeg aw meinang sikandin selotan lomowan diyà kandan. Penga te pegkesayo din, doen otaw insogò dan mikagi diyà te gobirno te eked dan keibeg aw otaw sìyan se lomowan diyà kandan.
LUK 19:15 Meneng gayed sikandin neinang selotan. Peg-olì din, impeangay din se sempolò sineligan din, sìyan binegayan din te kwarta, so ibeg din ketegahan aw pila se kedakel te gamad dan.
LUK 19:16 Dimateng se tagnà aw minikagi, ‘Sir, se sebad gatos imbegay no diyà kanak, neinang iyan sebad melalan.’
LUK 19:17 Minikagi se selotan, ‘Mèpiya se ininang nikaw. Pengkey deitek se imbegay ko diyà kamno, meneng keseligan ka, aw yan se doun te inangen ta den gobirnador lomowan diyà te sempolò lonsod.’
LUK 19:18 Dimateng se ikedowa sineligan aw minikagi, ‘Sir, se sebad gatos imbegay no diyà kanak, neinang iyan lima gatos.’
LUK 19:19 Minikagi se selotan, ‘Inangen ta den gobirnador lomowan diyà te lima lonsod.’
LUK 19:20 Penga niyan, doen sineligan dimateng aw minikagi, ‘Sir, iolì ko den diyà kamno se sebad gatos imbegay no diyà kanak, so intagò ko iyan diyà te kelobaw aw in-eles ko.
LUK 19:21 Wedà ko iyan gemiti, so nelemitan a kamno, so mebolot ka otaw. Eg-ebaten no se wedà no kepegodi, aw eglegeniyen no se intanem te doma otaw.’
LUK 19:22 Minikagi se selotan, ‘Ontò medaet se ininang nikaw. Pineokit te inikagi no sìyan, impetaga-taga no den te keilangan ipelumun ta. Minikagi ka te ontò a mebolot, so eg-ebaten ko se wedà ko kepegodi, aw eglegeniyen ko se intanem te doma otaw. Aw netegahan no iyan,
LUK 19:23 keilangan ipebeles no peden se kwarta ko diyà te doma otaw amon iolì iyan diyà kanak te peg-olì ko sipat batà niyan.’
LUK 19:24 Penga niyan, minikagi se selotan diyà te menge doma otaw kidoen, ‘Ebati niyo se sebad gatos imbegay ko diyà kandin, aw begayi niyo iyan diyà te otaw doen sebad melalan.’
LUK 19:25 Meneng minikagi dan, ‘Pengolo, eked iyan kepakay, so tapay den doen sebad melalan diyà kandin.’
LUK 19:26 Timaba se selotan, ‘Penenalan kaw te kagi ko. Se otaw egkeseligan, yan se begayan ko te labi pa dakel. Meneng se otaw kenà egkeseligan, yan se ebatan ko te imbegay ko diyà kandin.
LUK 19:27 Meneng labi pa medaet se pelumun ko diyà te menge poon ko, sìyan wedà keibeg te peglowan ko diyà kandan. Ibingi niyo dan dini kanak, aw imetayi niyo se kedita dan.’”
LUK 19:28 Penga te peg-ikagi i Jesus kenyan, nekeonà sikandin te doma otaw pesalo doton te Jerusalem.
LUK 19:29 Pegkedapag din kidoen te lonsod te Bitpahi aw Bitanya doton te ongan te bontod te Olibo, insogò din se dowa tinoledaan din,
LUK 19:30 kagi din, “Onà kaw doton te lonsod sida peselowan tadon. Aw domateng kaw, ketelaan niyo se nati te kodà. Iniketan iyan, meneng wedà iyan lumun kesekayi te otaw. Lebadi niyo, aw ibingi niyo dini.
LUK 19:31 Aw doen otaw meg-insà kenyo te nengà lay linebad niyo iyan, ikegihi niyo te keilangan sekayan iyan te Pengolo niyo.”
LUK 19:32 Nesayo se didowa dan insogò din, aw netelaan dan iyan iling te inikagi din diyà kandan.
LUK 19:33 Peglebad dan te lobid in-iket te nati, mig-insà se tig-apò, “Nengà lay linebad niyo iyan?”
LUK 19:34 Timaba dan, “Keilangan sekayan iyan te Pengolo day.”
LUK 19:35 Penga niyan, inibing dan se nati doton ki Jesus. Menge saol dan se in-ampal dan diyà te getan te nati, aw impesakay dan si Jesus.
LUK 19:36 Pegsakay din, inladlad te menge doma otaw se saol dan doton te dalan peselowan din, so yan se ketanem dan aw segmanen dan se otaw meinang selotan.
LUK 19:37 Pegkedapag i Jesus te lonsod te Jerusalem, te wedà pa topang te bontod te Olibo, migtebò se kedita te otaw timaking kandin dimuyun te Timanem te dakel se kagi dan. Ontò dan neluba aw migpesiontong dan diyà te Timanem so medita se kepelahan ininang i Jesus tapay dan kinità.
LUK 19:38 Migpegais dan, “Iduyun se Selotan seini insogò te Pengolo tadon Timanem. Begayan kidon din te kelinaw te pedowan lekat te langit. Iduyun den se Timanem.”
LUK 19:39 Doen heman menge Parisiyo timaking ki Jesus, aw minikagi dan diyà kandin, “Sir, segdahi se peg-ikagi dan kenyan.”
LUK 19:40 Meneng minikagi si Jesus, “Penenalan kaw kanak. Simpana mepenek se menge otaw seini, metoman somelilin kandan se menge bato megpegais aw domuyun kanak.”
LUK 19:41 Pegkedapag i Jesus te lonsod te Jerusalem, kinità din iyan aw migkelag tandà te keido din te otaw eg-ogpà kidoen.
LUK 19:42 Minikagi sikandin, “Mekelelayò kaw tege Jerusalem. Ibeg ko peden mekeabat kaw den te kelinaw te pedowan. Meneng wedà niyo kitai se keokit niyan.
LUK 19:43 Metoman kaw pa kelimahan, so lomibed se menge sondalo te poon niyo kidoen te lonsod niyo, aw ontò dan megbangan kenyo amon eked kaw palos pekelowà.
LUK 19:44 Imetayan kaw dan, aw ontò dan heman pegbàtan se kedakel te lonsod niyo aw gobalen dan heman se kedita te balay niyo. Yan se metoman domateng diyà kenyo so wedà niyo ketegahi te seini se aldaw te pegpelowà te Timanem kenyo.”
LUK 19:45 Pegdateng i Jesus doton te Jerusalem, dimoton sikandin te dakel simbahan, aw impekadas din se kedita te otaw egpemeligyà te ayam-ayam kidoen te dowangen niyan.
LUK 19:46 Minikagi sikandin, “Doen kagi te Timanem impesolat din gebii, ‘Se balay te Timanem, yan se ingedanan balay te pegtawal-tawal.’ Meneng ininang niyo den ini iling te ogpeanan te megdedempasay.”
LUK 19:47 Migtoladà si Jesus kidoen te dakel simbahan te Jerusalem te kelikit te aldaw. Meneng se kedita te pengolo te simbahan, aw menenoladà te punù ingkeliwat i Moises, aw menge dakel otaw, miglalang dan te imetayan dan si Jesus.
LUK 19:48 Meneng wedà dan peketoman, so ontò egpenenalan se kedita te otaw diyà kandin.
LUK 20:1 Pegtoladà i Jesus te menge otaw netipon kidoen te dakel simbahan, migtoladà sikandin tepad te Mèpiya Indan. Dalem te pegtoladà din, dimateng se menge pengolo te simbahan aw menenoladà te punù aw menge obanen te Judiyo.
LUK 20:2 Minikagi dan, “Indani kay te nengà lay eg-inang ka te kedita nini. Sinu lay se simogò kamno?”
LUK 20:3 Timaba si Jesus, “Doen heman insà ko kenyo. Na, indani a niyo.
LUK 20:4 Sinu lay se simogò ki Juan amon memonyag? Timanem, aw otaw se simogò kandin?”
LUK 20:5 Penga niyan, migpebelaw-belaway dan aw eden se itaba dan kandin. Minikagi dan, “Simpana tomaba kidon te Timanem se simogò ki Juan, silahen kidon din, so wedà kidon pemenal ki Juan.
LUK 20:6 Meneng simpana tomaba kidon te olò otaw se simogò ki Juan, bontogan kidon te kedita te otaw te bato lamig matay kidon, so nenamay dan mig-aneng-aneng te ontò telekeliwat te kagi te Timanem si Juan.”
LUK 20:7 Yan se doun te timaba dan ki Jesus te wedà dan ketegahi aw sinu se simogò ki Juan.
LUK 20:8 Minikagi si Jesus, “So wedà kaw taba te insà ko, eked a peg-indan diyà kenyo aw sinu se simogò kanak.”
LUK 20:9 Nayan, mig-indan si Jesus te tegdeyanan seini diyà te medita otaw netipon kidoen, kagi din, “Doen otaw migpawà aw nenanem te paras. Penga niyan, impetonggò din iyan te menge doma otaw, aw dimoton sikandin te mediyò ogpeanan amon meg-ogpà te ontò menamay.
LUK 20:10 Pegdateng te aldaw te peglegani, doen sineligan insogò te tig-apò amon doen talad te paras ebaten din lekat te otaw impetonggò din. Meneng pegdateng te sineligan doton kandan, binadas dan sikandin aw impekesayo dan te wedad palos imbegay kandin.
LUK 20:11 Penga niyan, doen doma sineligan insogò te tig-apò. Meneng binadas dan heman sikandin, aw ontò dan pigyàyà, aw impekesayo dan te wedad palos imbegay kandin.
LUK 20:12 Penga niyan, doen iketelo sineligan insogò te tig-apò. Meneng ontò dan sikandin impeeleg, aw ginoyod dan doton te lowà te pawà.
LUK 20:13 Penga niyan, mig-aneng-aneng se tig-apò, ‘Megmeno a? Mèpiya aw isogò ko se batà ko egkedekelan ko te pedowan, so keilangan segmanen dan sikandin.’
LUK 20:14 Meneng pegdateng te batà din doton kandan, migpebelaw-belaway dan, ‘Seini se meketig-apò te tanà seini aw matay se amay din. Mèpiya aw imetayan tadon sikandin amon sikitadon se meketig-apò te tanà seini.’
LUK 20:15 Penga niyan, ginoyod dan sikandin doton te lowà te pawà aw inimetayan dan sikandin. “Nayan, meg-indan a den diyà kenyo aw eden se inangen te tig-apò diyà kandan.
LUK 20:16 Domoton sikandin aw imetayan din se kedita dan. Penga niyan, ipetonggò din se pawà din te doma otaw.” Nayan, pegdineg te menge otaw te tegdeyanan sìyan, minikagi dan, “Eked iyan peden ketoman.”
LUK 20:17 Meneng timengteng si Jesus diyà kandan aw minikagi, “Meneng keilangan iyan metoman, so doen kagi te Timanem insolat, ‘Doen bato in-agbel te menge otaw mig-inang te balay, so eden dan aw wedad kekemowan niyan. Meneng yan se bato ontò salig te balay.’
LUK 20:18 Aw mekedogsò se otaw kidoen te bato sìyan, melosek se menge tòlan din. Meneng aw kedegdagan se otaw te bato sìyan, mepolpog sikandin.”
LUK 20:19 Na, se menge menenoladà te punù aw pengolo te simbahan, netegahan dan te sikandan se nesogatan te tegdeyanan sìyan in-indan i Jesus, aw yan se doun te ibeg dan megdakep peden kandin te aldaw sìyan. Meneng wedà dan peketoman, so nelemitan dan te menge otaw gayed egpenenalan kandin aw domapit dan kandin.
LUK 20:20 Yan olò dan migtagad te mèpiya aldaw. Doen heman menge otaw insogò dan migpelingo-lingo te tomaking kandin, meneng olò dan nengemahà aw doen kemalì te ikegiyen din amon doen idimanda dan tepad kandin aw ipedakep te gobirnador.
LUK 20:21 Minikagi dan diyà kandin, “Sir, netegahan day te ontò benal se eg-ikegiyen no aw ipegtoladà nikaw. Pengkey sinu se otaw toledaan no, gayed ka egtoladà te kebenalan tepad te ibeg te Timanem.
LUK 20:22 Nayan, indani kay den. Lomàpang kidon lay te menge punù ingkeliwat i Moises aw mayad kidon te mihoras diyà te gobirno te Roma? Mepakay lay aw eked?”
LUK 20:23 Meneng netegahan i Jesus te medaet se tod dan te peg-insà dan kenyan. Yan minikagi sikandin,
LUK 20:24 “Pekitai niyo kanak se kwarta ipegbayad niyo te mihoras. Sinu lay bawa se insawol kidoen? Sinu lay ngadan se insolat kidoen?” Timaba dan, “Selotan te Roma.”
LUK 20:25 Minikagi si Jesus, “Yan begayi niyo diyà te selotan se keilangan ibegay niyo diyà kandin, aw begayi niyo heman diyà te Timanem se keilangan ibegay niyo diyà kandin.”
LUK 20:26 Pengkey ibeg dan doen kemalì te kagi din diyà te otaw netipon kidoen, meneng wedad palos kemalì kinità dan. Nepela dan tandà te pegtaba din kenyan, aw nepenek dan.
LUK 20:27 Doen heman menge Sadusiyo dimoton ki Jesus. Yan se menge otaw egtoladà te eked palos keantay se otaw lekat te nematay.
LUK 20:28 Mig-insà dan diyà ki Jesus, kagi dan, “Sir, doen impunù i Moises kenitadon tepad te inangen te telekedowa meama. Aw matay se meama te wedad pa batà te esawa din, keilangan mengognan se kedowa te nematay diyà te nayi din nebalo, amon doen peden batà te kedowa din nematay.
LUK 20:29 Nayan, doen ekon pito telekedowa meama. Nengognan se kakay dan, aw nematay sikandin te wedad pa batà dan.
LUK 20:30 Penga niyan, nengognan se ikedowa meama te nayi din nebalo, meneng nematay heman sikandin.
LUK 20:31 Penga niyan, nengognan heman kandin se iketelo meama. Migpetibos-tibosay se pito telekedowa nengognan te bayi sìyan, meneng nematay se kedita dan te wedad pa palos batà dan.
LUK 20:32 Penga niyan, nematay heman se bayi.
LUK 20:33 Nayan, indani kay. Aw meantay se otaw lekat te nematay, sinu lay lebò diyà kandan se ontò esawa te bayi sìyan? So migpetibos-tibosay dan se pito nengognan kandin.”
LUK 20:34 Minikagi si Jesus, “Gayed pa egpengognan se otaw dini te keneyonan.
LUK 20:35 Meneng kidoen te langit, eked den pengognan se otaw pinemallì te Timanem aw entayen din dan lekat te nematay.
LUK 20:36 Eked dan todà kematay, so iling dan te menge anghil. Meinang dan menge batà te Timanem, so entayen din dan lekat te nematay.
LUK 20:37 Metoman dan meantay lekat te nematay, so impetaga-taga iyan heman i Moises. Pegsolat din tepad te pegpekità te Timanem diyà kandin kidoen te sagbet limegdeg, tinawal din se Pengolo ‘Timanem gayed egseligan i Abraham, aw si Isaac, aw si Jacob.’
LUK 20:38 Kenà otaw wedad pedowan se egsalig te Timanem, meneng otaw doen pedowan se egsalig kandin. Yan se doun te keilangan ketegahan tadon te doen keentayan te lawa te otaw nematay, so binegayan dan te Timanem te kaling pedowan wedad temanan.”
LUK 20:39 Doen kidoen menge menenoladà te punù, aw minikagi dan, “Sir, ontò mèpiya se intaba no kandan.”
LUK 20:40 Penga niyan, wedad palos otaw migtelaman mig-insà kandin.
LUK 20:41 Minikagi si Jesus, “Pengkey benal se ipegtoladà dan te bowad-bowad i David se Misiyas isogò te Timanem dini kenyo,
LUK 20:42 meneng minikagi si David te Pengolo din se Misiyas, so simolat si David kidoen te libro te Delangan, ‘Minikagi se Timanem diyà te Pengolo ko, Penenoo ka dini te tangkil ko
LUK 20:43 lamig dàgen ko se menge poon no aw ipetolò ko dan kamno.’
LUK 20:44 Na, aw minikagi si David te Pengolo din se Misiyas, kenà olò bowad-bowad din se Misiyas, meneng Pengolo din heman.”
LUK 20:45 Dalem te pegpenenalan te medita otaw ki Jesus, minikagi sikandin diyà te menge tinoledaan din,
LUK 20:46 “Peg-ahà kaw te menge menenoladà te punù ingkeliwat i Moises. Gayed dan egpenaol te melayat, aw ibeg dan segmanen dan te doma otaw doton te pedyanan. Ibeg dan heman menenoo doton te mèpiya onsedanan kidoen te simbahan te Judiyo. Ibeg dan heman, aw doen dakel kànen, sikandan se monà ipekaen.
LUK 20:47 Meneng sikandan se eg-agaw te kedònan te bayi balo, aw penga niyan menamay se pegtawal-tawal dan amon megpelingo-lingo dan te melobos se pedowan dan diyà te Timanem. Meneng metoman dan ontò ipelumun labi pa diyà te doma otaw.”
LUK 21:1 Pegtoladà i Jesus kidoen te dakel simbahan te Jerusalem, kinità din se menge otaw meyaman egsawol te kwarta diyà te solanan te ibowang diyà te Timanem.
LUK 21:2 Penga niyan, kinità din heman se sagkep bayi balo migsawol te dowa kedakò kidoen.
LUK 21:3 Minikagi si Jesus, “Eneng-enengi niyo se kagi ko seini. Pengkey dakel se imbowang te kedita te doma otaw, meneng labi pa meelagà se imbowang te bayi balo sida.
LUK 21:4 Dakel se kwarta te doma aw eked dan kelimahi tandà te pegpemegay dan. Meneng se bayi sida sagkep, tinigkan din imbowang se kedakel te kedònan din, pengkey nelimahan sikandin.”
LUK 21:5 Doen otaw kidoen migpebelaw-belaway tepad te dakel simbahan sìyan, so ininang iyan te bato mèpiya se bawa, aw dakel heman se kwarta imbowang amon pelasan iyan. Minikagi si Jesus,
LUK 21:6 “Doen aldaw domateng te pegbàtan se dakel simbahan induyun niyo seini. Tigkan iyan kebàtan, aw wedad palos bato ketenanan diyà te lanto te doma bato.”
LUK 21:7 Doen otaw mig-insà, “Sir, kano lay ketoman se in-indan nikaw? Eden lay se pengilala kitaen day aw agpet iyan metoman?”
LUK 21:8 Minikagi si Jesus, “Peg-ahà kaw amon eked kaw keekali, so doen kwani medita otaw megpelingo-lingo te insogò ko dan. Mikagi dan te sikandan se Misiyas. Mikagi heman se doma te agpet den domateng se aldaw pinelimanan niyo. Meneng ikà niyo egtaking kandan.
LUK 21:9 Aw domineg kaw te doen gira aw menge samok, ikà niyo egkelemitan. Keilangan onà iyan meinang, meneng kenà pa niyan se temanan te keneyonan.”
LUK 21:10 Minikagi heman sikandin, “Medita se otaw meggira, so doen pongan megbolaw diyà te doma pongan, aw doen heman menge sakop te sebad selotan megbolaw diyà te menge sakop te doma selotan.
LUK 21:11 Doen heman linog ontò medaet, aw megelà se otaw te medita ogpeanan tandà te bayil aw mesakit domateng diyà kandan. Ipekità heman te Timanem se kepelahan mekelelamit kidoen te langit.
LUK 21:12 Meneng te eked pa iyan ketoman, dekepen kaw, aw pemilangen kaw. Okomen kaw doton te menge simbahan te Judiyo, aw kelebosowen kaw heman. Ipeibing kaw doton te menge selotan aw gobirnador tandà te pegpesakop niyo diyà kanak,
LUK 21:13 amon meg-indan kaw te kebenalan tepad kanak.
LUK 21:14 Ikà niyo egketetana aw megpeketagad kaw tomaba kandan,
LUK 21:15 so dalem te aldaw sìyan, ibegay ko kenyo se kebiyasa amon meketaba kaw kandan. Yan se doun te wedad poon niyo mekedaeg te kenyo kagi.
LUK 21:16 Pengkey amay niyo, aw inay niyo, aw kedowa niyo, pengkey doma gaked niyo aw sigalak niyo, doen heman diyà kandan megtolok kenyo. Doen heman kenyo ipeimatay dan.
LUK 21:17 Kebensihan kaw te keditaan te otaw tandà te pegpesakop niyo diyà kanak.
LUK 21:18 Meneng wedad megkedaet kenyo pengkey sebad.
LUK 21:19 Pineokit te pegtayod niyo te kedita te kelimahan, metoman kaw kominawà te kaling pedowan wedad temanan.”
LUK 21:20 “Aw komità kaw te nelibedan te medita sondalo se lonsod te Jerusalem, yan ketegahan niyo te pegbàtan iyan te eked kenamay.
LUK 21:21 Keilangan komadas se kedita te otaw lekat te Judiya pesalo doton te bontod. Keilangan komadas se kedita te otaw lekat te Jerusalem. Keilangan eked doton te Jerusalem se otaw doton te lowà.
LUK 21:22 Metoman ipelumun te Timanem se otaw medaet, aw tomanen din se kedita te pakang din insolat.
LUK 21:23 Mekelelayò se menge bayi mebedes aw egsosowan te aldaw sìyan. Ontò medaet se kelimahan domateng dini te keneyonan, aw ontò ipelumun te Timanem se menge sakop te Judiya.
LUK 21:24 Medita se otaw megelà tigbasen. Medita heman se doma dekepen aw ibingen doton te kedita te doma lonsod mediyò. Ontò pegbàtan te menge otaw kenà Judiyo se lonsod te Jerusalem lamig mepenga se peglowan dan.”
LUK 21:25 “Doen pengilala ipekità te Timanem kidoen te aldaw aw bolan aw menge bitoen. Dini heman te tanà, metetana aw melemitan se kedita te otaw, so ontò megbalud aw domaging se dagat.
LUK 21:26 Megketetapì se medita otaw tandà te lamit dan, so eked dan ketaga-taga aw eden se domateng dini te keneyonan. Pengkey menge bitoen kidoen te langit, mebilit se kedita dan.
LUK 21:27 Penga niyan, kitaen te kedita te otaw se pegdateng ko, so lomikò a Timanem Migpekeotaw tekingan te labon. Komità dan te metolos a aw ontò a melangkaw.
LUK 21:28 Na, aw kitaen niyo se pegketoman niyan, keilangan meluba kaw, so ipelowà kaw te Timanem te eked kenamay.”
LUK 21:29 Nayan, mig-indan si Jesus te tegdeyanan seini, kagi din, “Tengtengi niyo se kayo igira aw menge doma kayo heman.
LUK 21:30 Aw kitaen niyo se kayo tomobed aw domawen, ketegahan niyo te agpet den domateng se aldaw te pegpemongo niyan.
LUK 21:31 Iling heman kenyan, aw kitaen niyo te metoman se inikagi ko diyà kenyo, yan ketegahan niyo te agpet den lomowan se Timanem.
LUK 21:32 “Eneng-enengi niyo se kagi ko seini. Doen menge otaw komità te pengilala sìyan eked kematay singed aw metoman se kedita niyan.
LUK 21:33 Doen temanan te langit aw tanà, meneng gayed metoman se kagi ko te wedad temanan.”
LUK 21:34 “Peg-ahà kaw amon meketagad kaw te aldaw sìyan. Eked kaw peketagad aw egpengemahà kaw te keluba, aw eg-inem kaw, aw gayed kaw eg-aneng-aneng tepad te peg-ogpà niyo, so metoman domateng se aldaw sìyan pengkey eked kaw peketagad.
LUK 21:35 Metoman iyan domateng diyà te kedita te otaw dini lanto te tanà.
LUK 21:36 Yan se doun te keilangan gayed kaw meg-ahà, aw megtawal-tawal kaw te begayan kaw te Timanem te kagsen te pedowan amon meketayod kaw te kedita te kelimahan sìyan. Aw meketayod kaw, eked kaw keyàyà aw domateng a Timanem Migpekeotaw.”
LUK 21:37 Gayed egtoladà si Jesus kidoen te dakel simbahan te Jerusalem te kelikit te aldaw. Meneng te delem, gayed egdoton te bontod te Olibo aw minidegà kidoen.
LUK 21:38 Gayed eglapos se medita otaw netipon kidoen te dakel simbahan amon menenalan dan kandin.
LUK 22:1 Nayan, agpet den se pista te menge Judiyo iningedanan dan Pista te Pegpelowà. Yan se pegpengaen dan te pan kenà eglebag.
LUK 22:2 Gayed mig-aneng-aneng se menge pengolo te simbahan aw menenoladà te punù aw eden se inangen dan amon imetayan dan si Jesus te eked dan keopali te kedita te otaw gayed egpenenalan kandin.
LUK 22:3 Penga niyan, dimateng si Satanas diyà ki Judas Iscariote. Sikandin se sebad diyà te sempolò teg dowa tinoledaan i Jesus.
LUK 22:4 Dimoton si Judas te menge pengolo te simbahan aw menge kapitan te otaw egtonggò te dakel simbahan te Jerusalem. Migpebelaw-belaway dan tepad te pegtolok din ki Jesus amon dekepen dan.
LUK 22:5 Neluba dan, aw minikagi dan te doen kwarta ibegay dan kandin.
LUK 22:6 Migsebad dan, aw yan migtagad si Judas te mèpiya aldaw amon itolok din si Jesus te wedad otaw metipon, amon wedad samok.
LUK 22:7 Nayan, dimateng se aldaw te pegpengaen te menge Judiyo te pan kenà eglebag. Yan heman se aldaw te pegpengiyaw dan te nati te karniro kànen dan te Pista te Pegpelowà.
LUK 22:8 Simogò si Jesus ki Pedro aw si Juan, kagi din, “Peg-inang kaw den te kànen tadon te Pista te Pegpelowà.”
LUK 22:9 Mig-insà dan, “Kenan kay lay peg-inang?”
LUK 22:10 Minikagi sikandin, “Eneng-enengi niyo ini. Aw domateng kaw doton te Jerusalem, kitaen niyo se otaw neniang te sibolan nepenò te wayeg. Taking kaw kandin. Aw domateng sikandin doton te balay,
LUK 22:11 ikagi kaw diyà te tig-apò, ‘Insogò kay te Pengolo amon meg-insà kay kamno aw kenan se kànan te kedita day te Pista te Pegpelowà.’
LUK 22:12 Penga niyan, ipekità din diyà kenyo se dakel gibelayan kidoen diatas te balay tapay doen telepagan niyan. Peg-inang kaw te kànen tadon kidoen.”
LUK 22:13 Penga niyan, dimoton dan aw kinità dan se kedita iling te tapay inikagi i Jesus diyà kandan. Penga niyan, mig-inang dan te kànen.
LUK 22:14 Pegdateng te oras te pegkaen, dimoton si Jesus aw menge sogounun din, aw kimaen dan.
LUK 22:15 Minikagi si Jesus, “Ontò a neibeg komaen te pista seini doma niyo, so agpet a den imetayan.
LUK 22:16 Penenalan kaw te kagi ko. Eked a todà kaen te Pista te Pegpelowà singed aw metoman se kedegdagan niyan kidoen te peglowan te Timanem.”
LUK 22:17 Penga niyan, inabat din heman se tabò, aw migpesiontong sikandin diyà te Timanem, aw minikagi, “Tepedi niyo ini amon mekeinem se kedita niyo.
LUK 22:18 Penenalan kaw kanak. Eked a todà inem te ininem tadon seini singed aw metoman lomowan se Timanem.”
LUK 22:19 Nengabat heman sikandin te pan. Penga te pegpesiontong din, binelà-belà din iyan, aw inteped din diyà kandan, aw minikagi, “Se pan seini, yan se lawa ko [imetayan amon mekelowà kaw. Inangi niyo iling kani amon gayed a niyo keeneng-enengan.”
LUK 22:20 Penga te pegkaen dan, inabat din heman se tabò aw minikagi sikandin, “Se meinem seini, yan se pengilala te doen kaling peokit ininang te Timanem pineokit te dipanog ko amon tebangan kaw.]
LUK 22:21 “Meneng eneng-enengi niyo ini. Migdoma kanak dini se otaw megtolok kanak.
LUK 22:22 Imetayan a Timanem Migpekeotaw, so yan se ibeg te Amay ko. Meneng mekelelayò se otaw megtolok kanak.”
LUK 22:23 Penga niyan, migpeinsaay se menge tinoledaan din aw sinu se megtolok kandin.
LUK 22:24 Nayan, migpedindilay heman se menge tinoledaan din aw sinu se ontò melangkaw diyà te kedita dan.
LUK 22:25 Yan minikagi si Jesus, “Gayed egleges se menge selotan te menge sakop dan, aw ibeg dan iduyun dan tandà te keido dan.
LUK 22:26 Meneng eked kepakay aw meg-iling kaw kandan, so se melangkaw otaw diyà kenyo, yan se keilangan meinang iling te adi niyo. Se pengolo niyo, yan se keilangan meinang iling te sogounun niyo.
LUK 22:27 Aw doen otaw komaen kidoen te lemisa, aw doen heman otaw egtelaban kandin meglamak te kànen, netegahan niyo te labi pa melangkaw se otaw egpenenoo. Meneng pengkey siak se Pengolo niyo, meneng iling a te otaw egsogoen niyo.
LUK 22:28 “Pengkey medita se kelimahan ko, meneng sikiyo se gayed timaking kanak.
LUK 22:29 Migpunù se Amay ko te siak se lomowan, aw megpunù a den heman te sikiyo
LUK 22:30 se megdoma kanak te pegkaen ko kidoen te peglowan ko. Sikiyo heman se isawol ko lomowan diyà te sempolò teg dowa pongan te menge bowad-bowad i Israel.”
LUK 22:31 Penga niyan, minikagi si Jesus diyà ki Pedro, “Simon, penenalan ka kanak. Pinemoyò i Satanas diyà te Timanem amon megtandà kenyo, iling te inangen te otaw meg-etap te omay trigo.
LUK 22:32 Meneng migtawal-tawal a diyà te Amay ko tepad kamno amon gayed ka somalig diyà kanak. Pengkey tominàyog ka kanak te eked kenamay, meneng aw todà ka tomaking kanak, meketabang ka te menge doma no tinoledaan ko.”
LUK 22:33 Minikagi si Pedro, “Pengolo, neketagad a den tomaking kamno pengkey kelebosowen a aw imetayan a.”
LUK 22:34 Minikagi si Jesus, “Pedro, penenalan ka kanak. Te eked pegkolaak se manok kealdaw iselem, ibolon no se pegtaking no kanak te meketelo.”
LUK 22:35 Nayan, minikagi si Jesus diyà te menge tinoledaan din, kagi din, “Kedengan, insogò ko sikiyo megtoladà, meneng doen impunù ko te wedad kedònan ibingen niyo, pengkey kwarta aw kelepì, aw sepatos ekasan niyo. Indani a niyo. Nelimahan kaw lay so wedad kedònan niyo?” Timaba dan, “Wedà kay palos kelimahi.”
LUK 22:36 Minikagi si Jesus, “Meneng lekat seini, aw doen kwarta niyo aw kelepì, ibingi niyo. Aw wedad ibayad niyo te podok, keilangan ibeligyà niyo se saol amon mekebayad kaw.
LUK 22:37 Metoman den se kagi te Timanem insolat tepad kanak, ‘Ipelumun sikandin iling te otaw dakel se salà.’ Agpet a den imetayan, so yan se insolat tepad kanak.”
LUK 22:38 Minikagi dan, “Meneng Pengolo, doen dowa podok tadon seini.” Meneng so wedà dan pekelabet, minikagi si Jesus, “Pebeyai niyo.”
LUK 22:39 Nayan, nesayo si Jesus aw dimoton te bontod te Olibo, so melikit sikandin egdoton. Timaking heman se menge tinoledaan din.
LUK 22:40 Pegdateng din doton, minikagi sikandin, “Pegtawal-tawal kaw amon eked kaw keboyo.”
LUK 22:41 Penga niyan, dimeleg si Jesus te kenà mediyò. Limongken sikandin aw migtawal-tawal, kagi din,
LUK 22:42 “Amà, aw mepakay diyà kamno, eked a no peokiti te kelimahan seini. Meneng ibeg ko, kamno ibeg se metoman, kenà kanak.” [
LUK 22:43 Penga niyan, doen anghil insogò lekat te langit amon megpekagsen te pedowan din.
LUK 22:44 Ontò mebegat se pedowan din, aw yan se doun te ontò sikandin migtawal-tawal. Ontò sikandin pig-etingan iling te pegtedak te dipanog.]
LUK 22:45 Penga te pegtawal-tawal din, dimoton sikandin te menge tinoledaan din, aw timedogi den dan, so migkelomay dan tandà te lidò dan.
LUK 22:46 Linoka din dan aw minikagi sikandin, “Tay law. Nepela a so timedogi kaw. Enaw kaw den. Pegtawal-tawal kaw amon eked kaw keboyo.”
LUK 22:47 Telobo pa minikagi si Jesus, dimateng se medita otaw kidoen. Inibing dan i Judas, sìyan tinoledaan i Jesus. Migpedapag sikandin diyà ki Jesus amon mengadek kandin.
LUK 22:48 Meneng minikagi si Jesus diyà kandin, “Tay law, elew. Mengadek ka kedì kanak amon itolok a no Timanem Migpekeotaw.”
LUK 22:49 Pegketaga-taga te menge tinoledaan i Jesus te dekepen sikandin, minikagi dan, “Pengolo, tigbasen day sikandan aw isogò kay nikaw.”
LUK 22:50 Pegketà nenigbas se sebad tinoledaan diyà te sineligan te ontò pengolo te simbahan, aw nepalot se telinga din lenged te kowanan.
LUK 22:51 Meneng minikagi si Jesus, “Ikà niyo.” Penga niyan, nemaed sikandin te telinga te sineligan, aw negolì iyan.
LUK 22:52 Se menge otaw dimoton amon megdakep dan ki Jesus, yan se menge pengolo te simbahan, aw menge kapitan te otaw egtonggò te dakel simbahan, aw menge obanen te Judiyo. Minikagi si Jesus diyà kandan, “Kolang se pegkekamang niyo te podok aw batota amon megdakep kaw kanak, so eden niyo aw megdedempasay a.
LUK 22:53 Gayed a migtoladà kidoen te dakel simbahan, meneng wedà a niyo dekepi doton. Meneng mekedakep kaw den kanak, so seini se aldaw pinemallì te Timanem aw meg-inang si Satanas te medaet.”
LUK 22:54 Penga niyan, dinakep dan si Jesus aw inibing dan sikandin doton te balay te ontò pengolo te simbahan. Timelokon heman si Pedro meneng migpekediyò.
LUK 22:55 Doen apoy kidoen te dowangen inantay te menge otaw migtonggò, aw migdoma heman si Pedro te menge otaw mig-ingadang kidoen.
LUK 22:56 Peg-anyag te apoy diyà te bawa din, doen bayi kimità kandin aw minikagi, “Egdoma se otaw seini te otaw sida dinakep.”
LUK 22:57 Meneng migbolon si Pedro, aw minikagi sikandin, “Tay law, atà. Wedà ko sikandin kilelai.”
LUK 22:58 Penga niyan te wedà kenamay, doen heman doma otaw kimità kandin, aw minikagi, “Sikona heman se tinoledaan din.” Meneng minikagi si Pedro, “Kenà ko, elew.”
LUK 22:59 Penga te sebad oras minokit, doen heman doma otaw migtedò kandin, aw minikagi, “Benal sikandin se egdoma te otaw sida, so sikandin heman se tege probinsya te Galiliya.”
LUK 22:60 Meneng minikagi si Pedro, “Tay law, elew. Wedà ko ketegahi se inikagi nikaw.” Nayan, dalem pa te peg-ikagi i Pedro, migkolaak se manok.
LUK 22:61 Miniling si Jesus aw timengteng diyà ki Pedro. Yan neeneng-enengan din se tapay inikagi te Pengolo te ibolon din sikandin te meketelo te eked pa pegkolaak se manok te iselem.
LUK 22:62 Penga niyan, nesayo si Pedro aw ontò migkelag.
LUK 22:63 Nayan, se otaw migtonggò ki Jesus, gayed dan nebebayat kandin aw nemadas dan kandin.
LUK 22:64 Sinempengan dan heman se mata din, aw minikagi dan, “Etoki aw sinu se nenombag kamno.”
LUK 22:65 Gayed dan migtompuyus kandin aw minikagi dan te medaet.
LUK 22:66 Nayan, peglibtak te aldaw sìyan, netipon se kedita te obanen te Judiyo, aw menge pengolo te simbahan, aw menenoladà te punù ingkeliwat i Moises. Impeangay dan si Jesus, aw minikagi dan,
LUK 22:67 “Sikona ekon se Misiyas egpelimanan day. Indani kay den aw benal iyan.” Meneng minikagi si Jesus, “Pengkey indanan ko sikiyo te kebenalan, meneng eked kaw pemenal kanak.
LUK 22:68 Pengkey doen peden insà ko kenyo, meneng eked kaw heman taba kenyan.
LUK 22:69 Meneng te eked kenamay, menenoo a Timanem Migpekeotaw kidoen te tangkil te Timanem metolos amon lomowan a doma din.”
LUK 22:70 Mig-insà se kedita dan, “Aw iling kenyan, Batà ka kedì te Timanem?” Timaba sikandin, “Benal se inikagi niyo te Batà a te Timanem.”
LUK 22:71 Yan migpebelaw-belaway dan, “Wedad den kekemowan te peg-indan te doma otaw diyà kenitadon tepad kandin, so kandin den kagi se dinineg tadon.”
LUK 23:1 Penga niyan, timindeg se kedita dan netipon, aw nengibing dan ki Jesus doton te gobirnador si Pilato.
LUK 23:2 Migdimanda dan tepad ki Jesus, kagi dan, “Kinità day se otaw seini megsamok peden te pongan day, so migtoladà sikandin te eked kepakay aw mayad kay te mihoras diyà te gobirno te Roma. Migpelingo-lingo heman sikandin Misiyas, sìyan selotan lomowan kenami.”
LUK 23:3 Mig-insà si Pilato diyà kandin, “Sikona lay se Selotan te menge Judiyo?” Timaba si Jesus, “Ee. Benal se kagi nikaw.”
LUK 23:4 Minikagi si Pilato diyà te menge pengolo te simbahan aw doma otaw netipon kidoen, “Wedad palos salà te otaw seini kinità ko.”
LUK 23:5 Meneng labi dan pa migleges kandin, kagi dan, “Gayed sikandin egsamok te kedita te otaw, so yan se ipegtoladà din kidoen te kebelad te Judiya, lekat te Galiliya taman dini.”
LUK 23:6 Pegdineg i Pilato kenyan, mig-insà kandan aw si Jesus se sakop te probinsya te Galiliya.
LUK 23:7 Pegketaga-taga din te lekat si Jesus te probinsya nesekopan i Herod, impeibing din doton kandin, so kidoen heman si Herod te Jerusalem te aldaw sìyan.
LUK 23:8 Pegkità i Herod ki Jesus, ontò neluba, so tapay den sikandin dimineg tepad ki Jesus, aw nenamay den te ibeg din komità kandin aw menge kepelahan inangen i Jesus.
LUK 23:9 Yan se doun te medita se in-insà i Herod diyà ki Jesus, meneng wedà palos taba.
LUK 23:10 Migpedapag se menge pengolo te simbahan aw menenoladà te punù, aw neopal dan migdimanda tepad kandin.
LUK 23:11 Gayed nebebayat si Herod aw kedita te sondalo din, aw migpelingo-lingo dan te pegsagman dan kandin iling te pegsagman dan te selotan. Penga niyan, pineseolan i Herod si Jesus te ontò mèpiya saol iling te ekasan te selotan, aw impelikò din doton ki Pilato.
LUK 23:12 Pineokit kenyan, migpesigelakay si Herod aw si Pilato, so tapay dan egpedindilay.
LUK 23:13 Nayan, migtipon si Pilato te kedita te pengolo te simbahan, aw menge obanen te Judiyo aw otaw netipon kidoen.
LUK 23:14 Minikagi sikandin, “Pegpengibing niyo te otaw seini dini kanak, minikagi kaw te migsamok sikandin te kedita te otaw. Na, kinità niyo den te mig-insà a kandin, meneng wedad palos salà din kinità ko iling te indimanda niyo tepad kandin.
LUK 23:15 Wedad heman salà din kinità i Herod, so impelikò din sikandin dini kenitadon. Na, eneng-enengi niyo ini. Wedad palos ininang din te mepakay sikandin ipelumun aw imetayan.
LUK 23:16 Yan se doun te olò ko sikandin ipebadas, aw penga niyan ipelowà.” [
LUK 23:17 Nayan, kelikit te Pista te Pegpelowà, gayed ipelowà din diyà kandan se sebad otaw kineleboso.]
LUK 23:18 Meneng migbelobansag se kedita dan, “Imetayi se otaw seini. Pelowai si Barabas.”
LUK 23:19 Na, si Barabas se nekeleboso pa, so sikandin se pengolo te otaw minato te gobirno kidoen te Jerusalem, aw doen heman otaw inimetayan din.
LUK 23:20 Ibeg i Pilato megpelowà ki Jesus, aw yan todà din dan inikegiyan.
LUK 23:21 Meneng migbelobansag dan, “Imetayi sikandin. Lensangi diyà te kros.”
LUK 23:22 Te iketelo peg-ikagi i Pilato, minikagi sikandin, “Meneng wedad palos medaet ininang din. Wedad palos salà din kinità ko te mepakay sikandin ipelumun aw imetayan. Yan se doun te olò ko sikandin ipebadas, aw penga niyan ipelowà.”
LUK 23:23 Meneng gayed dan migbelobansag te dakel se kagi dan, so ontò dan ibeg te keilangan ilansang sikandin diyà te kros amon matay. Yan dinaeg dan si Pilato, so ontò dakel se kagi dan.
LUK 23:24 Penga niyan, minikagi si Pilato te tomanen din se ibeg dan.
LUK 23:25 Yan impelowà din lekat te keleboso se otaw pinemallì dan, sìyan otaw minato te gobirno aw nemonò. Meneng si Jesus se impeibing din amon imetayan, so yan se ibeg dan.
LUK 23:26 Penga niyan, inibing te sondalo si Jesus lekat te balay i Pilato. Kidoen te dalan, kinità dan se tege Sirene ngadan din si Simon kaling dimateng lekat te saka. Lineges dan sikandin neniang te kros aw timetondog ki Jesus.
LUK 23:27 Ontò medita se otaw timaking ki Jesus, aw medita heman se bayi ontò migkelag tandà te lano dan kandin.
LUK 23:28 Meneng miniling si Jesus aw minikagi, “Sikiyo bayi tege Jerusalem, ikà niyo egkelag tandà te kelimahan domateng diyà kanak. Meneng keilangan megkelag kaw tandà te kelimahan metoman domateng diyà kenyo aw menge batà niyo.
LUK 23:29 Penenalan kaw kanak. Doen aldaw domateng aw mikagi se otaw te labi pa meluba se menge bayi wedad palos batà dan.
LUK 23:30 Te aldaw sìyan, tomawal se otaw diyà te menge bontod, kagi dan, ‘Bonboni kay niyo. Imetayi kay niyo.’
LUK 23:31 Aw medaet se kelimahan dimateng den diyà kanak pengkey wedad salà ko, labi pa medaet se kelimahan domateng diyà te otaw doen salà te modi aldaw.”
LUK 23:32 Dowa heman se doma otaw inibing dan amon imetayan doma din, so ontò medaet se ininang dan.
LUK 23:33 Pegdateng dan doton te bontod iningedanan Tòlan te Olo, inlansang dan sikandin diyà te kros. Inlansang heman se dowa otaw medaet kidoen te tangkil din, aw si Jesus diyà te tengà-tengà.
LUK 23:34 Migtawal-tawal si Jesus tepad te menge otaw miglansang kandin diyà te kros, kagi din, “Amà, pegwedadi se salà dan, so wedà dan ketegahi aw eden se ininang dan seini.” Penga te peglansang dan ki Jesus diyà te kros, pigtalad-talad dan se penenaktun linowas din, aw migbonot dan aw eden se penenaktun meabat te teg sebad-sebad kandan.
LUK 23:35 Timengteng kandin se kedita te otaw netipon kidoen. Meneng se menge obanen te Judiyo, migbaet-baet dan kandin, kagi dan, “Migtabang sikandin te doma otaw netigdaan amon eked dan pa kematay. Kitaen tadon den aw meketabang sikandin te kandin pegkeotawun amon eked kematay. Kitaen tadon heman aw benal sikandin se Misiyas insogò te Timanem, sìyan tapay pinemallì din.”
LUK 23:36 Migtompuyus heman se menge sondalo kandin. Dimoton dan kandin amon ipeinem dan kandin se bino sinengedan te wayeg.
LUK 23:37 Minikagi dan, “Aw ontò ka Selotan te menge Judiyo, tebangi se kamno pegkeotawun.”
LUK 23:38 Doen heman solat insawol doton diatas te olo din, kagi niyan, “Seini se Selotan te menge Judiyo.”
LUK 23:39 Se sebad otaw medaet impetangkil ki Jesus, migtompuyus sikandin, kagi din, “Petega-tegahi kay te ontò ka Misiyas. Tebangi se kamno pegkeotawun, aw tebangi kay heman.”
LUK 23:40 Meneng migsagda se sebad, kagi din, “Ikà egtompuyus te Timanem. Keilangan megselsel ka diyà te Timanem, so onawa se pelumun dimateng den diyà kenitadon.
LUK 23:41 Keilangan ipelumun ki den, so yan se detengan te medaet ininang ta. Meneng wedad palos medaet ininang te doma ta seini.”
LUK 23:42 Penga niyan, minikagi sikandin diyà ki Jesus, “Keidowi a bag aw lomowan ka.”
LUK 23:43 Minikagi si Jesus, “Eneng-enengi se kagi ko kamno. Kwani seini, megdoma ka kanak doton te langit.”
LUK 23:44 Pegkealas dosi te aldaw, migkengitngit se langit aw tanà lamig alas tris te meapon,
LUK 23:45 so wedà senang se aldaw. Tigkan heman nelisì se kayad kidoen te tengà-tengà te dakel simbahan te Jerusalem.
LUK 23:46 Penga niyan, timawal si Jesus te dakel se kagi din, “Amà, isalig ko den se pedowan ko diyà kamno.” Penga te peg-ikagi din kenyan, nematay sikandin.
LUK 23:47 Kinità te kapitan te sondalo se kepelahan neinang te pegkematay i Jesus, aw dimuyun sikandin te Timanem, kagi din, “Ontò mèpiya se otaw sìyan.”
LUK 23:48 Nayan, se kedita te otaw netipon kidoen, pegkità dan te kedita niyan neinang, migsiolì dan aw dinapì dan se kagpa dan tandà te lano dan.
LUK 23:49 Meneng se kedita te sigalak i Jesus aw menge bayi timaking kandin lekat te Galiliya, timindeg dan te kenà mediyò te kros, aw kinità dan se ininang kandin.
LUK 23:50 Nayan, doen otaw si Jose tege Arimatiya sakop te probinsya te Judiya. Mèpiya otaw sikandin, aw gayed eg-inang te metòlid, aw egpeliman te peglowan te Timanem. Pengkey sikandin se sebad obanen diyà te menge obanen eglowan diyà te menge Judiyo, meneng wedà tandù diyà te medaet piglalang te menge doma din obanen, sìyan ininang den dan diyà ki Jesus.
LUK 23:52 Dimoton sikandin ki Pilato aw pinemoyò din se lawa i Jesus amon ilebeng din.
LUK 23:53 Penga niyan, inabat din se lawa lekat te kros, aw ginakes din iyan te sapot, aw inlebeng din kidoen te lebeng kaling ininang diyà te pangpang, aw wedad pa palos inlebeng.
LUK 23:54 Agpet den somallep se aldaw, aw keeldawan niyan se Sebado aw aldaw te peg-etod.
LUK 23:55 Peglebeng i Jose ki Jesus, timelokon heman se menge bayi timaking ki Jesus lekat te Galiliya. Kinità dan heman se lebeng aw pegsawol te lawa din kidoen.
LUK 23:56 Penga niyan, minolì dan aw migtegilan dan te menge kemolò te lana metinadeg isawol dan diyà te lawa te nematay. Aldaw te Sebado, mig-etod dan, so yan se punù ingkeliwat i Moises.
LUK 24:1 Meneng pegkeiselem te Linggo, limapos se menge bayi nengibing te metinadeg integilan dan, aw dimoton dan te linebengan ki Jesus.
LUK 24:2 Pegdateng dan doton, kinità dan se lebeng neowang, so tapay den nekelid se dakel bato insampeng.
LUK 24:3 Peg-awop dan diyà te lebeng, kinità dan te wedad den lawa i Jesus kidoen.
LUK 24:4 Migkebulung dan aw eden se neinang. Penga niyan, kinità dan se didowa anghil kidoen, aw ontò mepotì se penenaktun dan.
LUK 24:5 Timikelong se menge bayi, so ontò dan nelemitan. Minikagi se menge anghil, “Ikà niyo egpengemahà te otaw neantay lekat te nematay dini te lebenganan.
LUK 24:6 Wedad sikandin dini, so neantay den lekat te nematay. Eneng-enengi niyo se inikagi din diyà kenyo kedengan dalem te pegtoladà din kidoen te Galiliya.
LUK 24:7 Inikegiyan kaw din te keilangan ibegay sikandin Timanem Migpekeotaw diyà te belad te menge otaw nelegeb te salà amon imetayan dan sikandin ilansang diyà te kros, aw penga niyan, meantay sikandin lekat te nematay te iketelo te aldaw.”
LUK 24:8 Yan neeneng-enengan dan te yan se inikagi i Jesus diyà kandan.
LUK 24:9 Penga niyan, minolì dan, aw mig-indan dan te kedakel niyan diyà te sempolò tegusà tinoledaan i Jesus aw diyà te menge doma dan kidoen.
LUK 24:10 Se menge bayi sìyan, yan si Maria tege Magdala, si Juana, si Maria inay i Santiago, aw menge bayi doma dan. Peg-indan dan kenyan diyà te menge sogounun i Cristo,
LUK 24:11 wedà dan pemenal te neantay den si Jesus, so eden dan aw kenà benal se inikagi dan.
LUK 24:12 Meneng kimagnan si Pedro pesalo doton te lebeng. Pegdateng din doton, simelib sikandin aw timengteng doton didalem. Kinità din olò se sapot tapay inggakes diyà te lawa, meneng wedad lawa kinità din. Penga niyan, minolì sikandin gayed mig-aneng-aneng tepad te neinang, so nepela sikandin.
LUK 24:13 Te aldaw sìyan, doen didowa tinoledaan i Jesus minipanaw pesalo doton te Imaos, sebad lonsod menge sempolò tegusà kilomitro lekat te Jerusalem.
LUK 24:14 Gayed dan migpebelaw-belaway tepad te kedita te neinang ki Jesus.
LUK 24:15 Dalem pa te pegpebelaw-belaway dan, migpedapag si Jesus aw migdoma kandan.
LUK 24:16 Pengkey kinità dan sikandin, meneng wedà dan kilala kandin.
LUK 24:17 Peg-ipanaw dan, minikagi si Jesus, “Eden lay se egbelaw-belewayen niyo gina?” Simagked se didowa dan aw ontò nelidò se pedowan dan.
LUK 24:18 Penga niyan, timaba se sebad si Cleopas, kagi din, “Tay law, elew. Nepela a, so pengkey gimemaw ka doton te Jerusalem, meneng wedà ka kedì ketaga-taga aw eden se neinang kidoen te menge aldaw seini.”
LUK 24:19 Minikagi sikandin, “Eden lay se neinang kidoen?” Minikagi dan, “Doen telekeliwat te kagi te Timanem ngadan din si Jesus tege Nasarit. Insogò sikandin te Timanem, aw ontò mèpiya se ininang din aw inikagi din kinità te kedita te otaw.
LUK 24:20 Meneng se menge pengolo te simbahan aw menge obanen te Judiyo, impedakep dan sikandin te gobirno, aw penga niyan inimetayan dan sikandin inlansang diyà te kros.
LUK 24:21 Tapay kay migpeliman te sikandin se megpelowà te menge bowad-bowad i Israel. Meneng inimetayan dan sikandin te netelowan pa.
LUK 24:22 Meneng pengkey nematay sikandin, nepela kay, so doen menge kedomaan day bayi limapos doton te lebeng din gina iselem,
LUK 24:23 meneng wedad lawa din kinità dan kidoen. Peg-olì dan, mig-indan dan diyà kenami te doen menge anghil migpekità diyà kandan, aw minikagi dan ekon heman te neantay den si Jesus lekat te nematay.
LUK 24:24 Doen menge doma day dimoton heman te lebeng din, aw kinità dan te benal se in-indan te menge bayi. Meneng wedà dan kitai si Jesus.”
LUK 24:25 Penga niyan, minikagi si Jesus, “Tay law. Nepela a kenyo, so wedà kaw pa pemenal te kedita te inikagi te menge telekeliwat te kagi te Timanem gebii.
LUK 24:26 Nepela a so wedà niyo ketegahi te eked lowan se Misiyas singed aw onà sikandin imetayan iling te neinang den seini.”
LUK 24:27 Penga niyan, miglebad-lebad si Jesus diyà kandan te kedita te insolat kidoen te kagi te Timanem tepad te pegkeotawun din, lekat te insolat i Moises aw kidoen te insolat te kedita te telekeliwat te kagi te Timanem gebii.
LUK 24:28 Pegkedapag dan doton te lonsod dinotonan te didowa tinoledaan sìyan, domeleg peden si Jesus.
LUK 24:29 Meneng ontò dan sikandin tinemengan, kagi dan, “Idegà ka den dini kenami, so ontò den meapon aw agpet den delem.” Penga niyan, timaking si Jesus kandan.
LUK 24:30 Peg-iyambong dan, inabat din se pan, aw migpesiontong sikandin diyà te Timanem, aw binelà-belà din, aw imbegay din diyà kandan.
LUK 24:31 Penga niyan, kinilala den dan te sikandin si Jesus. Meneng pegketà, migkewedad sikandin kidoen.
LUK 24:32 Migpebelaw-belaway dan, “Yan kedì se doun te neantag se pedowan ta te peg-ikagi din diyà kenita kidoen te dalan, aw peglebad-lebad din te kagi te Timanem diyà kenita.”
LUK 24:33 Penga niyan, nesayo dan aw limikò dan doton te Jerusalem. Pegdateng dan doton, tapay netipon se sempolò tegusà tinoledaan i Jesus aw menge doma dan.
LUK 24:34 Minikagi se otaw tapay netipon, “Ontò benal neantay se Pengolo lekat te nematay, so migpekità sikandin diyà ki Simon.”
LUK 24:35 Penga niyan, mig-indan se didowa dan kaling dimateng tepad te neinang kandan kidoen te dalan, aw pegkilala dan kandin te pegbelà-belà din te pan.
LUK 24:36 Dalem pa te peg-indan dan te kinità dan, dimateng si Jesus timindeg kidoen te tengà-tengà dan. Minikagi sikandin, “Ibeg ko melinaw se pedowan niyo.”
LUK 24:37 Meneng nelemitan dan, so eden dan aw along din.
LUK 24:38 Minikagi si Jesus, “Ikà niyo egkebulung. Ikà niyo heman egdowa-dowa.
LUK 24:39 Tengtengi niyo se menge palì diyà te belad ko aw benis ko. Ontò siak. Pemaed kaw kanak amon ontò kaw metaga-taga te kenà a olò along. Wedad lawa te along, meneng seini kitaen niyo den te doen lawa ko.”
LUK 24:40 Penga niyan, impekità din kandan se belad din aw benis din.
LUK 24:41 Neluba dan, meneng iling te wedà dan pemenal te ontò sikandin. So nepela dan pa, mig-insà si Jesus, “Doen lay kànen dini?”
LUK 24:42 Yan nemegay dan kandin te ikan sinognowan.
LUK 24:43 Kininawà din iyan aw kinaen din dalem te timengteng dan kandin.
LUK 24:44 Penga niyan, minikagi si Jesus, “Pegdoma ko kenyo kedengan te wedà a pa kematay, seini se inikagi ko diyà kenyo, te keilangan metoman se kedita te kagi insolat tepad kanak kidoen te punù ingkeliwat i Moises, aw insolat te menge telekeliwat te kagi te Timanem, aw kidoen heman te libro te Delangan.”
LUK 24:45 Penga niyan, migtabang si Jesus kandan amon mekelabet dan te kedegdagan te kagi te Timanem insolat gebii.
LUK 24:46 Minikagi heman sikandin, “Seini se kagi te Timanem tapay insolat, te keilangan imetayan se Misiyas, aw meantay sikandin lekat te nematay te iketelo te aldaw, aw netoman den iyan.
LUK 24:47 Doen heman kagi te Timanem insolat te keilangan megtoladà kaw diyà te kedita te otaw te keneyonan te pegwedaden te Timanem se salà dan aw megselsel dan aw memenal dan kanak. Keilangan megtebò kaw megtoladà kenyan dini te Jerusalem.
LUK 24:48 Sikiyo se otaw kimità te kedita niyan, aw meg-indan kaw den diyà te doma otaw.
LUK 24:49 Isogò ko diyà kenyo se Espiritu Santo tapay impakang te Amay ko. Meneng peg-ogpà kaw dini te Jerusalem lamig kinewaen niyo se Espiritu Santo domateng diyà kenyo lekat te langit.”
LUK 24:50 Penga niyan, timaking dan ki Jesus, aw nesayo dan lekat te Jerusalem, aw dimoton dan dapag te Bitanya. Pegdateng dan doton, timakyaw si Jesus te belad din, aw migtawal-tawal sikandin te tebangan dan te Timanem.
LUK 24:51 Dalem pa te pegtawal-tawal din, timanan sikandin kandan aw neengat doton te langit.
LUK 24:52 Penga niyan, migsimba dan kandin, aw minolì dan doton te Jerusalem, aw ontò neluba se pedowan dan.
LUK 24:53 Melikit dan egdoton te dakel simbahan te Jerusalem aw egduyun dan te Timanem kidoen.
JOH 1:1 Gebii te wedà pa inangi se keneyonan, tapay sikandin doen iningedanan Kagi te Timanem. Sikandin se doma te Timanem, aw sikandin heman se ontò Timanem.
JOH 1:2 Lekat te ketebò te kedita, sikandin se doma te Timanem.
JOH 1:3 Wedad palos ininang aw kenà pineokit kandin, so ininang te Timanem se kedita pineokit kandin.
JOH 1:4 Sikandin se eglekatan te pedowan te kedita, aw yan se lowa eg-anyag diyà te kengitngit kidoen te pedowan te kedita te otaw.
JOH 1:5 Yan heman se mekelowa te kengitngit. Wedà palos pekedaeg se kengitngit diyà te lowa sìyan.
JOH 1:6 Doen otaw ngadan din si Juan Memonyagay. Insogò sikandin te Timanem
JOH 1:7 meg-indan diyà te kedita te otaw te si Jesus se lowa te Timanem, amon memenal se kedita te otaw diyà ki Jesus pineokit te itoladà din.
JOH 1:8 Kenà si Juan se lowa, meneng sikandin se insogò amon meg-indan tepad te lowa.
JOH 1:9 Se benal lowa, yan se dimini te keneyonan amon mekelowa te kengitngit kidoen te pedowan te kedita te otaw.
JOH 1:10 Dimini si Jesus te keneyonan, meneng pengkey ininang te Timanem se kedita dini te keneyonan pineokit kandin, wedà sikandin kilelai te menge otaw.
JOH 1:11 Pengkey dimoton te ogpeanan te kandin kedomaan, meneng wedà dan pegsagman kandin.
JOH 1:12 Meneng pengkey sinu se migsagman kandin aw nemenal kandin, yan se otaw mepakay meinang menge batà te Timanem.
JOH 1:13 Pegkeinang dan batà te Timanem, kenà iyan iling te pegtebaw te otaw dini te keneyonan. Kenà iyan heman lekat te ibeg aw aneng-aneng te otaw. Meneng lekat te ibeg te Timanem, ininang din dan menge batà din.
JOH 1:14 Migpekeotaw sikandin iningedanan Kagi te Timanem, aw mig-ogpà sikandin doma kenami. Kinità day se kelangkaw din. Ontò sikandin melangkaw so sikandin se temisa Batà te Amay din. Ontò sikandin egpenabang, aw ontò benal se kagi din.
JOH 1:15 Sikandin se in-indan i Juan Memonyagay te peg-ikagi din, “Seini se otaw tapay ko in-indan kenyo, so minikagi a te doen pa otaw meketetondog kanak aw somelilin kanak. Labi pa sikandin melangkaw diyà kanak, so tapay den sikandin doen te wedà a pa tebaw.”
JOH 1:16 Ontò kidon din neidowan, aw gayed kidon din egtebangan te wedad temanan.
JOH 1:17 Nemegay se Timanem kenitadon te punù din pineokit ki Moises. Meneng pineokit ki Jesu Cristo, nemegay se Timanem kenitadon te tabang din aw kebenalan.
JOH 1:18 Wedad palos otaw kimità te Timanem. Meneng se Batà din temisa, yan se migpetaga-taga diyà kenitadon tepad te Amay din, so gayed dan egpedomaay.
JOH 1:19 Doen menge pengolo te simbahan te Judiyo aw menge bowad-bowad i Levi dimoton ki Juan Memonyagay. Insogò dan te menge obanen te Judiyo lekat te Jerusalem amon meg-insà dan ki Juan aw sinu sikandin. Seini se inikagi i Juan, so wedà din boloni se kebenalan, meneng timaba sikandin, kagi din, “Kenà ko se Misiyas megpelowà kenyo.”
JOH 1:21 Mig-insà dan, “Sinu ka lay? Si Elias ka lay?” Timaba si Juan, “Kenà ko.” Minikagi dan, “Sikona besi se sìyan doma telekeliwat te kagi te Timanem pinelimanan day.” Timaba sikandin, “Kenà ko.”
JOH 1:22 Todà dan minikagi, “Indani kay aw sinu ka, amon doen itaba day diyà te menge otaw simogò kenami. Eden lay se inangen no dini?”
JOH 1:23 Timaba si Juan, “Siak se otaw impakang te telekeliwat te kagi te Timanem gebii si Isaias, ‘Doen otaw kidoen te kebigtilan megpunù te keilangan meketagad se kedita te otaw, so agpet den domateng se Pengolo.’”
JOH 1:24 Se menge otaw mig-insà kandin, yan se insogò te menge Parisiyo.
JOH 1:25 Mig-insà dan heman, “Aw kenà nikaw se Misiyas megpelowà kenami, aw kenà nikaw heman si Elias limikò dini, aw kenà nikaw heman se sìyan doma telekeliwat te kagi te Timanem egpelimanan day, nengà lay egpemonyag ka?”
JOH 1:26 Timaba si Juan, “Egpemonyag a pineokit te wayeg. Meneng doen sebad otaw doma niyo wedà niyo kilelai.
JOH 1:27 Sikandin se meketetondog aw somelilin kanak. Kenà botong se kelangkaw ko amon megtelaban a kandin pengkey meglebad a te sepatos din, so ontò sikandin melangkaw diyà kanak.”
JOH 1:28 Neinang se kedita niyan kidoen te lonsod te Bitanya doton dipag te wayeg te Jordan egbonyagan i Juan.
JOH 1:29 Keeldawan niyan, kinità i Juan si Jesus migpesalo diyà kandin. Pegkità din kandin, minikagi diyà te menge otaw kidoen, “Na, yan se Nati te Karniro imbegay te Timanem, so sikandin se mengabat te salà te kedita te otaw.
JOH 1:30 Seini se otaw tapay ko in-indan kenyo, so minikagi a te doen pa otaw meketetondog aw somelilin kanak. Labi pa sikandin melangkaw diyà kanak, so tapay den sikandin doen te wedà a pa tebaw.
JOH 1:31 Kedengan, wedà ko pa ketegahi aw sinu sikandin, meneng yan se tod te pegbonyag ko pineokit te wayeg amon metaga-taga se kedita niyo bowad-bowad i Israel tepad te pegdateng din.”
JOH 1:32 Minikagi heman si Juan, “Kinità ko se Espiritu Santo migpedanà diyà kandin lekat te langit iling te selepati, aw mig-ogpà kidoen kandin.
JOH 1:33 Kedengan, wedà ko pa ketegahi aw sinu sikandin, meneng insogò a te Timanem amon memonyag a pineokit te wayeg, aw inindanan a din te komità a te Espiritu Santo megpedanà kidoen te otaw aw meg-ogpà kandin. Sebad heman kemolò se pegbonyag din, so sikandin se memonyag pineokit te Espiritu Santo.
JOH 1:34 Yan se kinità ko den, aw iindan ko den kenyo te sikandin se Batà te Timanem.”
JOH 1:35 Keeldawan niyan, kimidoen heman todà si Juan Memonyagay sipat dowa tinoledaan din.
JOH 1:36 Pegkità din te peg-okit i Jesus kidoen, minikagi sikandin, “Na, yan se Nati te Karniro imbegay te Timanem.”
JOH 1:37 Pegdineg te dowa tinoledaan din kenyan, timaking dan ki Jesus.
JOH 1:38 Pegbiling i Jesus, kinità din te timaking dan kandin, aw mig-insà, “Eden lay se pinengemahà niyo?” Timaba dan, “Rabi.” (Se kelebadan niyan, “Menenoladà.”) “Kenan ka lay peg-ogpà?”
JOH 1:39 Minikagi si Jesus, “Taking kaw kanak amon kitaen niyo.” Yan timaking dan kandin, aw kinità dan se eg-ogpaan din. Miglegeana dan kandin lekat te menge alas kwatro te meapon lamig delem.
JOH 1:40 Si Andres se sebad diyà te didowa dan dimineg ki Juan aw timaking ki Jesus. Telekedowa dan si Andres aw si Simon, se doma ngadan din si Pedro.
JOH 1:41 Pegketà nengemahà si Andres te kakay din si Simon, aw minikagi sikandin, “Kinità day se Misiyas.” (Se kedegdagan niyan, “Cristo.”)
JOH 1:42 Impetaking din se kakay din doton ki Jesus. Pegkità i Jesus kandin, minikagi, “Sikona si Simon, batà i Juan. Meneng ingedanan ka ki Cefas.” (Onawa se kelebadan te ngadan Cefas aw Pedro, yan se kagi “Bato.”)
JOH 1:43 Keeldawan niyan, migpetagad si Jesus domoton te probinsya te Galiliya. Onà din pinengemahà si Felipe tege Bitsayda. Yan heman se lonsod eg-ogpaan i Andres aw si Pedro. Pegkità i Jesus ki Felipe, minikagi sikandin, “Taking ka kanak.”
JOH 1:45 Penga niyan, nengemahà si Felipe ki Natanael aw minikagi, “Kinità day se otaw impakang i Moises aw menge doma telekeliwat te kagi te Timanem te pegsolat dan gebii. Yan se tege Nasarit si Jesus, batà i Jose.”
JOH 1:46 Minikagi si Natanael, “Wedad palos mèpiya lekat te Nasarit.” Minikagi si Felipe, “Ayas ka amon komità ka kandin.”
JOH 1:47 Pegdateng dan doton, minikagi si Jesus tepad ki Natanael, “Na, yan se benal bowad-bowad i Israel, so wedad palos ipegbolon din.”
JOH 1:48 Minikagi si Natanael, “Nemeno lay se pegketaga-taga no kanak?” Minikagi si Jesus, “Te wedà ka pa engayi i Felipe, tapay ta kinità kidoen te kayo igira.”
JOH 1:49 Minikagi si Natanael, “Sir, sikona se ontò Batà te Timanem. Ontò sikona se selotan impakang amon lomowan diyà kenami menge bowad-bowad i Israel.”
JOH 1:50 Minikagi si Jesus, “Nemenal ka den so minikagi a olò te kinità ta kidoen te kayo igira. Meneng komità ka kwani te inang ko labi pa metolos kani.”
JOH 1:51 Minikagi heman si Jesus, “Eneng-enengi se kagi ko kamno, so komità kaw te langit meowang, aw kitaen niyo heman se menge anghil te Timanem menayit aw tomenà diyà kanak Timanem Migpekeotaw.”
JOH 2:1 Te iketelo te aldaw, doen peipid kidoen te Kana sakop te probinsya te Galiliya. Timanod se inay i Jesus te peipid.
JOH 2:2 Dimoton heman si Jesus aw menge tinoledaan din, so impeangay dan.
JOH 2:3 Pegkeamin te bino, minikagi se inay i Jesus diyà kandin, “Neamin den se bino.”
JOH 2:4 Minikagi si Jesus, “Inà, ikà egpunù kanak, so wedà pa dateng se oras aw ipekità ko se tolos ko.”
JOH 2:5 Minikagi se inay din diyà te menge sineligan, “Pengkey eden se ipunù din kenyo, tolò kaw.”
JOH 2:6 Kidoen se enem dedakel sibolan egsolan te wayeg ipeglinis dan, so yan se ketanem te menge Judiyo. Menge lima lata se awop te teg sebad-sebad kenyan.
JOH 2:7 Minikagi si Jesus diyà te menge sineligan, “Ipenoi niyo te wayeg se sibolan.” Yan inipenò dan se enem sibolan taman te sìsì.
JOH 2:8 Penga niyan, minikagi heman si Jesus, “Segadi niyo aw ibingi niyo doton te pengolo niyo.” Yan inibing dan iyan diyà kandin.
JOH 2:9 Timimtim se pengolo te wayeg ininang bino. Wedà din ketegahi aw kenan lekat se bino, meneng netaga-taga se menge sineligan so simalok dan te wayeg. Pegtimtim din kenyan, tinawal din se meama, sìyan impeipid,
JOH 2:10 aw minikagi, “Tepad te ketanem tadon, se onà ipeinem, yan se bino ontò mèpiya nanam. Meneng penga te peg-inem te otaw te dakel bino, yan ipeinem dan te bino kenà ontò mèpiya. Yan nepela a, so sebad se pegpeinem no seini, so tinemengan nikaw kedì se ontò mèpiya bino lamig seini.”
JOH 2:11 Peg-inang i Jesus kenyan kidoen te Kana sakop te probinsya te Galiliya, yan se tagnà kepelahan ininang din amon ipekità din te doen kelangkaw din. Nemenal se menge tinoledaan din kandin.
JOH 2:12 Penga te peipid, dimoton si Jesus te Kapirnaom tinekingan te inay din, aw menge kedowa din, aw menge tinoledaan din. Mig-ogpà dan kidoen te wedà kenamay.
JOH 2:13 Agpet den domateng se aldaw te Pista te Pegpelowà, aw yan dimoton si Jesus te Jerusalem.
JOH 2:14 Pegdateng din doton, doen menge otaw kinità din kidoen te dowangen te dakel simbahan te Judiyo, menge otaw egpemeligyà te menge baka sonogen aw ibegay diyà te Timanem, aw karniro, aw selepati. Doen heman menge otaw kinità din nenenoo kidoen egliwan te kwarta.
JOH 2:15 Pegkità din kenyan, ininang din se olisi lobid, aw impekadas din se kedita dan sipat menge karniro aw baka lekat te dowangen te dakel simbahan. Impelias din se menge lemisa dan, aw in-olà din heman se kwarta te menge otaw egliwan.
JOH 2:16 Minikagi heman diyà te menge otaw egpemeligyà te selepati, “Ibingi niyo iyan lekat dini. Ikà niyo eg-inang pedyanan te balay te Amay ko Timanem.”
JOH 2:17 Pegkità te menge tinoledaan din te ininang din, neeneng-enengan dan se kagi insolat kidoen te kagi te Timanem gebii, “E Timanem, ontò meinit se pedowan ko, so ontò meelagà se balay no diyà kanak.”
JOH 2:18 Penga niyan, mig-insà se menge obanen te Judiyo, “Doen lay pengilala ipekità no kenami amon ketegahan day te insogò ka meg-inang kenyan?”
JOH 2:19 Timaba si Jesus, “Aw pegbàtan niyo se balay seini eg-ogpaan te Timanem, penga niyan todà ko iyan ipetindeg dalem te telo se aldaw.”
JOH 2:20 Minikagi dan, “Kepatan teg enem se omay te peg-inang te balay te Timanem seini. Eked no iyan petindegi dalem te telo se aldaw.”
JOH 2:21 Meneng wedà dan ketegahi te lawa din se balay sìyan inikagi din.
JOH 2:22 Meneng penga te pegkeantay i Jesus lekat te nematay, neeneng-enengan te tinoledaan din se inikagi din sìyan, aw nemenal dan te netoman se kagi te Timanem tapay insolat te meantay sikandin lekat te nematay, aw benal heman se inikagi i Jesus.
JOH 2:23 Peg-ogpà i Jesus doton te Jerusalem dalem te Pista te Pegpelowà, medita se otaw nemenal kandin, so kinità dan se menge kepelahan ininang din.
JOH 2:24 Meneng wedà salig si Jesus kandan,
JOH 2:25 so netegahan din aw eden se awop te pedowan te kedita te otaw. Pengkey wedad mig-indan kandin tepad te awop te pedowan te otaw, meneng netegahan din den iyan, so tapay din netegahan aw eden se pedowan te otaw.
JOH 3:1 Doen otaw ngadan din si Nicodemo. Sikandin se sebad diyà te menge kelengkawan te menge Judiyo, aw migpelenged sikandin te menge Parisiyo.
JOH 3:2 Dimoton sikandin ki Jesus te delem, aw minikagi, “Sir, netegahan day den te insogò ka te Timanem amon megtoladà kenami, so wedad otaw mekebatog meg-inang te kepelahan iling te ininang no den singed aw doen tolos ibegay te Timanem kandin.”
JOH 3:3 Minikagi si Jesus, “Eneng-enengi se kagi ko kamno. Aw eked todà tebaw se otaw, eked sikandin kesakop diyà te peglowan te Timanem.”
JOH 3:4 Minikagi si Nicodemo, “Meneng eked kepakay aw tomebaw se obanen, so eked pekelikò doton te getek te inay din amon todà tomebaw.”
JOH 3:5 Minikagi si Jesus, “Eneng-enengi se kagi ko kamno. Aw eked tebaw se otaw pineokit te wayeg aw pineokit heman te Espiritu Santo, eked sikandin kesakop diyà te peglowan te Timanem.
JOH 3:6 Se tomebaw olò diyà te otaw, otaw heman iyan. Meneng se tomebaw pineokit te Espiritu Santo, yan se otaw ogpaan te Espiritu Santo.
JOH 3:7 Ikà egkepela diyà te inikagi ko kamno te keilangan todà kaw tomebaw.
JOH 3:8 Egkedog se kelamag egpesalo pengkey kenan. Meneng pengkey egdinegen no se logo-logo niyan, eked no ketegahi aw kenan iyan lekat aw kenan pesalo. Iling heman kenyan se pegtebaw te otaw pineokit te Espiritu Santo.”
JOH 3:9 Mig-insà si Nicodemo, “Menonen se peg-inang kenyan?”
JOH 3:10 Timaba si Jesus, “Nepela a, so pengkey sikona se meistro te menge bowad-bowad i Israel, meneng wedà no pa iyan kelebeti.
JOH 3:11 Eneng-enengi se kagi ko kamno. Eg-ikegiyen day se netegahan day, aw ipeg-indan day se benal kinità day, meneng wedà kaw pemenal te inikagi day.
JOH 3:12 Aw eked kaw pemenal te in-indan ko tepad te meinang dini te tanà, eked kaw heman pemenal aw meg-indan a kenyo tepad te meinang doton te langit.
JOH 3:13 Wedad palos otaw nenayit doton te langit, meneng olò siak Timanem Migpekeotaw se timenà lekat te langit.
JOH 3:14 “Gebii te pegkegelà te menge Judiyo lekat te pegtongkà te menge memokan kidoen te kebigtilan, ininang i Moises se memokan lekat te galang, aw insawol din iyan kidoen te kayo intollok amon eked kematay se otaw tomengteng kenyan. Iling heman kenyan, siak Timanem Migpekeotaw se isawol kidoen te kayo itollok.
JOH 3:15 Meinang iyan amon kebegayan te kaling pedowan wedad temanan se kedita te otaw memenal kanak.”
JOH 3:16 Ontò nedekelan te Timanem te pedowan se kedita te otaw, aw yan se doun te insogò din se Batà din temisa amon eked pelumuni se kedita te otaw memenal kandin, meneng begayan dan te kaling pedowan wedad temanan.
JOH 3:17 Insogò te Timanem se Batà din dini te keneyonan kenà amon ipelumun din se otaw, meneng insogò din amon megpelowà te otaw.
JOH 3:18 Aw memenal se otaw diyà te Batà te Timanem, eked dan pelumuni te Timanem. Meneng aw eked dan pemenal, netegahan den te metoman dan ipelumun, so wedà dan pemenal diyà te Batà te Timanem temisa.
JOH 3:19 Seini se doun te ipelumun dan. Pegdateng te iningedanan Lowa dini te keneyonan, neibeg dan te kengitngitan aw kimulu dan te kelowahan, so medaet se eg-inangen dan.
JOH 3:20 Se otaw eg-inang te medaet, yan se eked keibeg te kelowahan, aw megpekediyò dan kidoen te kelowahan amon eked ketegahi se inang din medaet.
JOH 3:21 Meneng se otaw egtaking te kebenalan, yan se megpedapag diyà te kelowahan, amon ketegahan te eg-inangen din se ibeg te Timanem.
JOH 3:22 Penga niyan, dimoton si Jesus aw menge tinoledaan din te probinsya te Judiya. Mig-ogpà dan kidoen aw migbonyag.
JOH 3:23 Migbonyag heman si Juan Memonyagay so wedà pa kelebosowi. Migbonyag sikandin kidoen te Inon medapag te Salim, so dakel se wayeg kidoen. Dimoton se menge otaw kandin aw binonyagan din dan.
JOH 3:25 Doen menge tinoledaan i Juan aw sebad Judiyo migpedindilay tepad te pegpelinis.
JOH 3:26 Dimoton dan ki Juan aw minikagi, “Sir, se doma no kedengan doton dipag te Jordan, sìyan in-indan no, yan se egpemonyag den ekon heman, aw medita den se otaw limengà te pegtaking dan kamno aw timaking den dan diyà kandin.”
JOH 3:27 Minikagi si Juan, “Wedad mebatog te otaw singed aw isogò sikandin te Timanem.
JOH 3:28 Netegahan niyo den te minikagi a te kenà ko se Misiyas megpelowà kenyo. Meneng insogò a amon megpetagad a te pegdateng din.
JOH 3:29 Se meama peipiden, yan se tekingan te bayi. Meneng se sigalak te meama peipiden, yan se megtagad kandin aw menenalan heman kandin, aw meluba se pedowan din te pegdineg din te kagi te sigalak din peipiden. Iling a heman kenyan, so nesikop den se keluba te pedowan ko te pegdineg ko te medita se otaw egtaking ki Jesus.
JOH 3:30 Keilangan megkedakel se dengeg i Jesus, aw metostos se kanak dengeg.”
JOH 3:31 Se insogò dini lekat te langit, yan se ontò melangkaw diyà te kedita. Meneng se otaw dini te tanà, yan se otaw lekat dini te tanà, aw lekat heman te tanà se ipegtoladà din. Meneng se insogò dini lekat te langit, yan se ontò melangkaw diyà te kedita.
JOH 3:32 Eg-indan sikandin te benal kinità din aw dinineg din kidoen te langit, meneng pilabok se egpenenalan te kagi din.
JOH 3:33 Meneng se otaw memenal te kagi din, yan se otaw megpetaga-taga te benal se kagi te Timanem.
JOH 3:34 Eg-ikagi se insogò te Timanem te kagi lekat te Timanem, so tigkan imbegay te Timanem se Espiritu Santo diyà kandin.
JOH 3:35 Ontò dakel se pedowan te Timanem Amay diyà te Batà din, aw insalig din diyà kandin se peglowan diyà te kedita.
JOH 3:36 Se otaw memenal diyà te Batà te Timanem, yan se otaw doen kaling pedowan wedad temanan. Meneng se otaw eked tolò te kagi te Batà te Timanem, yan se otaw eked begayi te kaling pedowan, meneng detengan dan te pelumun te Timanem te wedad temanan.
JOH 4:1 Nayan, dinineg te menge Parisiyo te medita se otaw timaking ki Jesus aw binonyagan din labi pa medita diyà te timaking aw binonyagan i Juan Memonyagay.
JOH 4:2 Meneng se kebenalan, kenà si Jesus se nemonyag, meneng menge tinoledaan din se nemonyag.
JOH 4:3 Pegdineg i Jesus kenyan, nesayo sikandin lekat te probinsya te Judiya aw dimoton te probinsya te Galiliya.
JOH 4:4 Pegpesalo din doton te Galiliya, minokit dan te probinsya te Samarya.
JOH 4:5 Peg-ipanaw dan, dimateng dan te lonsod te Sikar sakop te probinsya te Samarya, medapag te tanà imbegay i Jacob diyà te batà din si Jose gebii.
JOH 4:6 Kidoen heman se sokian binengbangan i Jacob. Nenenoo si Jesus medapag te sokian, so migkelomay sikandin tandà te peg-ipanaw din. Menge alas dosi den.
JOH 4:7 Sebad din se kidoen so dimeleg den se menge tinoledaan din doton te lonsod amon mayad dan te kànen. Dalem niyan, dimateng se bayi tege Samarya amon somalok. Minikagi si Jesus, “Peinemi a.”
JOH 4:9 Ontò nepela se bayi, so doen ketanem te menge Judiyo te eked dan kaen aw inem diyà te telepagan te menge tege Samarya, aw eked dan heman pegdoma kandan. Yan minikagi se bayi, “Sikona se sakop te Judiya, aw siak se sakop te Samarya. Nengà lay nemoyò ka kanak te wayeg inemen?”
JOH 4:10 Timaba si Jesus, “Aw netegahan no pa aw eden se ibowang te Timanem kamno, aw netegahan no heman aw sinu se nemoyò te wayeg diyà kamno, sikona se memoyò diyà kanak, aw begayan ta te wayeg egpemegay te pedowan.”
JOH 4:11 Minikagi se bayi, “Sir, wedad kamno segaday, aw mediyò heman se wayeg doton didalem te sokian. Kenan no lay ebati se wayeg egpemegay te pedowan?
JOH 4:12 Kemonaan tadon gebii si Jacob se nemangbang te sokian seini egselokan tadon. Seini se eg-ineman din, aw kedita te batà din, aw ayam-ayam din. Labi ka lay pa melangkaw diyà kandin?”
JOH 4:13 Timaba si Jesus, “Aw minem se otaw te wayeg seini, todà sikandin melao.
JOH 4:14 Meneng se otaw minem te wayeg ibegay ko kandin, yan se eked todà palos kelao. Se wayeg ibegay ko kandin, yan se meinang selep kidoen kandin egtebolan te wayeg mekebegay te kaling pedowan wedad temanan.”
JOH 4:15 Minikagi se bayi, “Sir, peinemi a te wayeg sìyan amon eked a palos kelao, aw amon wedad den palos keilangan te todà a somalok dini.”
JOH 4:16 Minikagi si Jesus, “Engayi se esawa no, aw likò kaw dini.”
JOH 4:17 Minikagi se bayi, “Wedad esawa ko.” Minikagi si Jesus, “Benal se inikagi no te wedad esawa no,
JOH 4:18 so mekelima ka pa pengognan, aw kenà ontò kamno esawa se meama migdoma kamno. Benal se inikagi nikaw.”
JOH 4:19 Minikagi se bayi, “Sir, netegahan ko den te telekeliwat ka insogò te Timanem.
JOH 4:20 Se menge kemonaan day tege Samarya, yan se migsimba te Timanem dini te bontod seini. Meneng sikiyo menge Judiyo, egtoladà kaw te keilangan megsimba kidon doton te Jerusalem.”
JOH 4:21 Minikagi si Jesus, “Penenalan ka kanak. Doen aldaw domateng aw kenà olò dini te bontod seini se simbahan te otaw, aw kenà olò heman doton te Jerusalem, meneng mepakay aw simbahen se Timanem Amay pengkey kenan.
JOH 4:22 Sikiyo tege Samarya, wedà kaw ketaga-taga aw sinu se egsimbahen niyo. Meneng sikami Judiyo, netaga-taga kay aw sinu se egsimbahen day, so pineokit kenami Judiyo, megpelowà se Timanem te kedita te otaw.
JOH 4:23 Dimateng den se aldaw te keilangan melobos se pedowan te otaw megsimba kandin, aw keilangan ketegahan dan heman se kebenalan tepad kandin egsimbahen dan, so yan se ibeg te Timanem te megsimba se otaw kandin iling kenyan.
JOH 4:24 Wedad lawa te Timanem, aw eked heman sikandin kitai. Yan se doun te keilangan melobos se pedowan te otaw megsimba kandin, aw keilangan ketegahan dan heman se kebenalan tepad kandin egsimbahen dan.”
JOH 4:25 Minikagi se bayi, “Netegahan ko te domateng se Misiyas amon megpelowà kenitadon, sìyan isogò te Timanem iningedanan Cristo. Aw domateng sikandin, lebaden din se kedita te kebenalan diyà kenitadon.”
JOH 4:26 Minikagi si Jesus, “Se minikagi diyà kamno, yan se insogò te Timanem.”
JOH 4:27 Dalem pa te peg-ikagi i Jesus kandin, dimateng se menge tinoledaan din. Ontò dan nepela te minikagi si Jesus diyà te bayi. Meneng wedad palos mig-insà aw eden se ibeg te bayi kandin. Wedà dan heman peg-insà te nengà lay minikagi si Jesus diyà kandin.
JOH 4:28 Penga niyan, tinenanan te bayi se sibolan din, aw ayas minolì doton te lonsod. Pegdateng din doton, minikagi sikandin diyà te menge otaw,
JOH 4:29 “Taking kaw kanak amon kitaen niyo heman se otaw mig-indan kanak te kedita te ininang ko. Sikandin besi se Misiyas megpelowà kenitadon.”
JOH 4:30 Yan nesayo dan aw dimoton dan ki Jesus.
JOH 4:31 Pegtanan te bayi ki Jesus, minikagi se menge tinoledaan din, “Sir, kaen ka den.”
JOH 4:32 Minikagi si Jesus, “Doen kànen ko wedà niyo ketegahi.”
JOH 4:33 Yan migpeinsaay dan, “Doen lay lebò nemegay kandin te kànen?”
JOH 4:34 Minikagi si Jesus, “Iling te kànen ko se pegtoman ko te ibeg te simogò kanak aw peg-epos ko te sogò din kanak.
JOH 4:35 Eg-ikegiyen niyo te doen epat se bolan te eked pa peglegani. Meneng mikagi a den kenyo te dimateng den se aldaw te peglegani. Tengtengi niyo se medita otaw seini meibeg memenal, so iling dan te tinanem neketagad den geniyen.
JOH 4:36 Doen ontong kinewaen te otaw meglegani te otaw memenal, aw kaling pedowan wedad temanan se ibegay te Timanem diyà te otaw memenal. Pengkey sebad otaw se menanem, aw doma otaw se meglegani te pongo niyan, meneng se kedita dan eleg meluba.
JOH 4:37 Yan benal se eg-ikegiyen, ‘Menanem se sebad, meneng meglegani se doma.’
JOH 4:38 Isogò ko den sikiyo meglegani kidoen te pawà wedà niyo tenemi. Meneng tandà te pagod te doma otaw, medita se otaw geniyen niyo megpesakop diyà te peglowan te Timanem.”
JOH 4:39 Doen medita tege Samarya nemenal diyà ki Jesus tandà te peg-ikagi te bayi, “Inindanan a din te kedita te ininang ko.”
JOH 4:40 Yan pegdateng te menge tege Samarya doton ki Jesus, ontò dan nemoyò kandin te meg-ogpà kidoen kandan. Yan mig-ogpà si Jesus kidoen te dowa se delem.
JOH 4:41 Pegtoladà din kidoen, labi pa medita se otaw nemenal kandin.
JOH 4:42 Minikagi dan diyà te bayi, “Nemenal kay den kenà olò pineokit te inikagi no kenami, meneng nemenal kay den so nenenalan kay den kandin, aw netegahan day den te ontò sikandin se megpelowà te kedita te otaw.”
JOH 4:43 Nayan, pegkepenga te dowa se delem, nesayo si Jesus aw dimoton te probinsya te Galiliya.
JOH 4:44 Tapay minikagi si Jesus te kenà egsegmanen se menge telekeliwat te kagi te Timanem kidoen te probinsya tinebawan dan.
JOH 4:45 Meneng pegdateng din doton te probinsya te Galiliya, nepela sikandin so limiyag se menge tege Galiliya kandin, so medita dan se timanod te Pista te Pegpelowà kidoen te Jerusalem, aw kinità dan se menge kepelahan ininang din kidoen.
JOH 4:46 Limikò si Jesus doton te lonsod te Kana sakop te Galiliya. Yan se lonsod ininangan din te kepelahan, so binaloy din bino se wayeg kidoen. Doton te doma lonsod te Kapirnaom, doen sebad opisyal te gobirno te Roma, aw nesekitan se batà din.
JOH 4:47 Pegdineg din te nesayo den si Jesus lekat te probinsya te Judiya aw dimateng den kidoen te probinsya te Galiliya, dimoton sikandin ki Jesus, aw nemoyò te domoton sikandin te Kapirnaom amon megpegolì te batà din, so ontò den netigdaan.
JOH 4:48 Minikagi si Jesus, “Aw wedad pengilala aw kepelahan kitaen niyo, eked kaw pemenal kanak.”
JOH 4:49 Minikagi se opisyal, “Sir, ayas ka taking kanak te eked pa kematay se batà ko.”
JOH 4:50 Minikagi si Jesus, “Olì ka den, so negolian den se batà nikaw.” Nemenal se opisyal te inikagi i Jesus kandin, aw nesayo.
JOH 4:51 Te wedà pa dateng doton te balay din, pig-isongon din se menge sineligan din kidoen te dalan, aw mig-indan dan kandin te negolian den se batà din.
JOH 4:52 Penga niyan, mig-insà sikandin aw eden orasi se pegkèpiya din. Timaba dan, “Gebenini te ala ona te meapon, minowas se keinit te lawa din.”
JOH 4:53 Penga niyan, neeneng-enengan din te yan se oras te peg-ikagi i Jesus te negolian den se batà din. Yan se doun te nemenal sikandin ki Jesus aw kedita te doma otaw mig-ogpà kidoen te balay din.
JOH 4:54 Yan se ikedowa kepelahan ininang i Jesus. Ininang din iyan kidoen te probinsya te Galiliya te pegdateng din lekat te probinsya te Judiya.
JOH 5:1 Penga niyan, doen pista ininang te menge Judiyo, aw yan dimoton si Jesus te Jerusalem amon tomanod.
JOH 5:2 Doen lanaw kidoen te Jerusalem doton dapag te lelebangan te kotà nekelibed te lonsod, sìyan iningedanan Lelebangan te Karniro. Iningedanan se lanaw Bitsata te menge otaw eg-ikagi te Hebreo, aw doen lima elonganan kidoen te kilid niyan.
JOH 5:3 Medita se otaw doen mesakit eg-ogpà diyà te lima elonganan niyan, aw migtagad dan te pegpegolì kandan. Doen menge bota. Doen menge kapig. Doen heman menge otaw kenà egpekeiwal. [Gayed dan migtagad te pegketigaw te wayeg kidoen,
JOH 5:4 so seletà doen anghil te Timanem mebo kidoen te lanaw, aw megtigaw te wayeg kidoen. Penga niyan, aw ayas mebo se otaw diyà te wayeg, kegolian dan.]
JOH 5:5 Doen sebad otaw kidoen nesekitan te ketlowan pa teg walo se omay.
JOH 5:6 Kimità si Jesus kandin minibat, aw netegahan din te ontò sikandin nenamay nesekitan. Mig-insà si Jesus, “Meibeg ka lay kegolian?”
JOH 5:7 Timaba se otaw, “Meneng Sir, aw metigaw se wayeg, wedad otaw megsawol kanak kidoen te wayeg. Pengkey megtelaman a, meneng gayed mekeonà se doma te eked a pa dateng kidoen.”
JOH 5:8 Minikagi si Jesus, “Enaw ka. Loloni se inibatan no, aw ipanaw ka.”
JOH 5:9 Ketà negolian sikandin. Linolon din se inibatan din aw minipanaw. Neinang iyan te Sebado, aldaw te peg-etod.
JOH 5:10 Yan neopalan te menge obanen te Judiyo se otaw negolian. Minikagi dan, “Seini se aldaw te peg-etod. Nekelàpang ka te punù so nengibing ka te ikam.”
JOH 5:11 Meneng timaba sikandin, “Se otaw migpegolì kanak, yan se migpunù kanak te peglolon ko te ikam aw peg-ipanaw ko.”
JOH 5:12 Mig-insà dan, “Sinu lay se otaw migpunù te peglolon no te ikam aw peg-ipanaw nikaw?”
JOH 5:13 Meneng wedà ketegahi te otaw negolian aw sinu se ngadan te migpegolì kandin, so dimeleg den si Jesus, aw medita se otaw netipon kidoen.
JOH 5:14 Penga niyan te wedà kenamay, nengemahà si Jesus kandin kidoen te dakel simbahan te Judiyo. Pegkità din kandin, minikagi si Jesus, “Na, negolian ka den. Lengà ka den te peg-inang no te salà amon eked ka detengi te labi pa medaet.”
JOH 5:15 Penga niyan, nesayo se otaw negolian, aw mig-indan diyà te menge obanen te Judiyo te si Jesus se migpegolì kandin.
JOH 5:16 Yan se doun te pinemilang dan si Jesus, so neopal dan te pegpegolì din te otaw aldaw te Sebado.
JOH 5:17 Meneng doen intaba i Jesus kandan, so minikagi sikandin, “Gayed egterbaho se Amay ko pengkey aldaw seini, aw yan se doun te gayed a heman egterbaho.”
JOH 5:18 Pegdineg dan kenyan, labi dan pa meibeg mengimatay kandin. Neopal dan kandin so wedà sikandin taking te ketanem dan tepad te aldaw te peg-etod. Neopal dan heman so minikagi sikandin te Timanem se Amay din, aw pineokit kenyan onawa se kelangkaw din diyà te Timanem.
JOH 5:19 Minikagi si Jesus diyà te menge obanen te Judiyo, “Eneng-enengi niyo se kagi ko kenyo. So Batà a te Timanem, wedad palos inangen ko lowà te ibeg te Amay ko. Olò ko inangen se tapay kinità ko eg-inangen te Amay ko. Se inangen din, yan heman se inangen ko,
JOH 5:20 so dakel se pedowan te Amay ko kanak, aw pinekitaan a din te kedita te eg-inangen din. Doen pa inangen din ipekità din pineokit kanak labi pa metolos te ininang ko den amon ontò kaw mepela.
JOH 5:21 Eg-antay se Amay ko te otaw nematay, aw egpemegay kandan te kaling pedowan. Iling heman kenyan se inangen ko, so memegay a heman te kaling pedowan diyà te kedita te otaw pemellien ko.
JOH 5:22 Kenà Amay ko se meg-okom te otaw, meneng binegayan a din te peg-okom,
JOH 5:23 so ibeg din segmanen a heman te kedita te otaw, onawa te pegsagman dan kandin. Aw eked pegsagman se otaw kanak, yan se pengilala te kenà heman sikandin egsagman te Amay ko simogò kanak.
JOH 5:24 “Eneng-enengi niyo se kagi ko kenyo seini. Se otaw menenalan te kagi ko, aw memenal heman diyà te Amay ko simogò kanak, yan se otaw begayan te kaling pedowan wedad temanan. Eked sikandin pelumuni, so nekelowà den sikandin lekat te kemetayun, aw doen den kaling pedowan din wedad temanan.
JOH 5:25 Eneng-enengi niyo se kagi ko kenyo. Doen aldaw domateng, igsà dimateng den iyan, aw domineg te kagi ko se menge otaw wedad pedowan. Aw memenal dan kanak, begayan dan te kaling pedowan wedad temanan.
JOH 5:26 So Amay ko Timanem se eglekatan te kaling pedowan wedad temanan, ininang a din heman eglekatan te kaling pedowan wedad temanan.
JOH 5:27 So siak se Timanem Migpekeotaw, binegayan a din heman te peg-okom te otaw.
JOH 5:28 Ikà niyo egkepela te kagi ko seini, so doen aldaw domateng aw domineg se kedita te otaw nematay te tawal ko kandan.
JOH 5:29 Penga niyan, meantay dan lekat te nematay. Se otaw tapay mig-inang te mèpiya, yan se entayen amon eked dan palos todà kematay. Meneng se otaw tapay mig-inang te medaet, yan se otaw entayen amon ipelumun dan.”
JOH 5:30 “Wedà ko teboki se inang ko. Iling te intoladà din kanak se peg-okom ko, aw metòlid se peg-okom ko, so kenà kenaken ibeg se egtekingan ko, meneng egtekingan ko se ibeg te Amay ko migsogò kanak.
JOH 5:31 “Simpana olò sebad ko se meg-indan kenyo tepad kanak, eked niyo besi pemenali se kagi ko.
JOH 5:32 Meneng doen doma mekeindan te benal tepad kanak, aw netegahan ko te keseligan se kagi din tepad kanak.
JOH 5:33 Doen otaw insogò niyo amon meg-insà diyà ki Juan Memonyagay tepad kanak, aw mig-indan heman sikandin te benal tepad kanak.
JOH 5:34 Wedad keilangan ko te doen otaw meg-indan te benal tepad kanak. Meneng pineeneng-enengan ko sikiyo tepad te inikagi i Juan Memonyagay amon memenal kaw kanak, aw mekelowà kaw lekat te salà.
JOH 5:35 Si Juan Memonyagay, iling sikandin te solò ontò meanyag, aw neluba kaw tandà te intoladà din kenyo te wedà kenamay.
JOH 5:36 Meneng doen pa meg-indan te benal labi pa keseligan diyà ki Juan, so lekat te Amay ko se kedita te kepelahan eg-inangen ko, aw yan se egpetaga-taga te ontò a insogò te Amay ko.
JOH 5:37 Sikandin se mig-indan te benal tepad kanak, meneng wedà kaw keibeg menenalan te kagi din kenyo. Wedà kaw heman keibeg komità kandin.
JOH 5:38 Eked niyo heman soli se kagi din kidoen te pedowan niyo, so pengkey insogò a din, eked a niyo pemenali.
JOH 5:39 Gayed kaw egbasa te kagi te Timanem tapay insolat, so aneng-aneng niyo, kebegayan kaw te kaling pedowan wedad temanan pineokit te pegbasa niyo kenyan. Eg-indan se kagi te Timanem te benal tepad kanak,
JOH 5:40 meneng eked kaw pa pemenal kanak, aw yan eked kaw begayi te kaling pedowan wedad temanan.
JOH 5:41 Kenà aw egkeibegan ko se duyun te otaw,
JOH 5:42 meneng netegahan ko te wedad kedakel te pedowan niyo diyà te Timanem.
JOH 5:43 Pengkey insogò a te Amay ko amon megtoladà a kenyo tepad kandin, meneng wedà a niyo pemenali. Meneng aw doen doma otaw megtoladà wedà sogoi te Timanem, yan se pemenalen niyo.
JOH 5:44 Ibeg niyo iduyun kaw te menge doma otaw, meneng eked kaw keibeg iduyun te sebad olò Timanem. Yan se doun te eked kaw pemenal.
JOH 5:45 Kenà ko se megdimanda diyà te Timanem tepad kenyo te modi aldaw, so se kemonaan niyo si Moises egseligan niyo, yan se megdimanda te aldaw sìyan amon ipelumun kaw.
JOH 5:46 Simpana ontò kaw nemenal te kagi i Moises, nemenal kaw heman kanak, so simolat si Moises tepad kanak.
JOH 5:47 Meneng aw eked kaw pemenal te insolat din, eked kaw heman pemenal te ikegiyen ko.”
JOH 6:1 Penga niyan, dimoton si Jesus dipag te Lanaw te Galiliya, yan heman se iningedanan Lanaw te Tibiryas.
JOH 6:2 Ontò medita se otaw timaking kandin, so kinità dan se kepelahan ininang din te pegpegolì din te menge otaw doen mesakit.
JOH 6:3 Timikedeg si Jesus aw menge tinoledaan din te bontod, aw nenenoo dan kidoen.
JOH 6:4 Neinang ini te agpet domateng se pista te menge Judiyo iningedanan Pista te Pegpelowà.
JOH 6:5 Pegtengteng i Jesus, kinità din se medita otaw migpesalo diyà kandin. Minikagi si Jesus diyà ki Felipe, “Kenan lay beyadi se ipekaen tadon kandan?”
JOH 6:6 Yan se ininsà din amon tendaen din se pegsalig i Felipe diyà kandin, so tapay netegahan din aw eden se inangen din.
JOH 6:7 Timaba si Felipe, “Simpana doen ontò dakel kwarta tadon, pengkey doen dowa gatos se kwarta dinaryo ibayad tadon te pan, kolang pa se pan iteped diyà kandan, so ontò dan medita.”
JOH 6:8 Kidoen heman se sebad tinoledaan i Jesus si Andres, sìyan adi i Pedro. Minikagi sikandin,
JOH 6:9 “Doen telaki dini nengibing te bawo din lima se pan ininang lekat te sebada, aw dowa se ikan din. Meneng iling iyan te wedad, so ontò medita se otaw netipon.”
JOH 6:10 Minikagi si Jesus diyà te menge tinoledaan din, “Peonsadi niyo se menge otaw.” Nayan, mebelad se sagbet kidoen aw yan minonsad dan kidoen. Menge lima melalan se kedita te meama kidoen, aw doen heman menge bayi.
JOH 6:11 Inabat i Jesus se lima pan, aw migpesiontong kenyan diyà te Timanem, aw impeteped din iyan diyà te menge otaw minonsad. Onawa heman se ininang din diyà te ikan lamig nebesog se kedita dan.
JOH 6:12 Pegkebesog dan, minikagi si Jesus diyà te menge tinoledaan din, “Imoni niyo se samà te kànen amon wedad kebàtan.”
JOH 6:13 Peg-imon dan te samà te pan wedà kàni, doen sempolò teg dowa buun nepenò te pan.
JOH 6:14 Pegkità te menge otaw te kepelahan ininang i Jesus, minikagi dan, “Sikandin se ontò benal telekeliwat te kagi te Timanem insogò din dini te keneyonan.”
JOH 6:15 Meneng nesayo den si Jesus lekat kidoen sebad din, aw dimeleg doton didaya, so netegahan din te doen ibeg dan megleges kandin amon inangen dan sikandin selotan dan, meneng kenà niyan se ibeg din.
JOH 6:16 Pegsallep te aldaw, timegbeng se menge tinoledaan i Jesus doton te kilid te lanaw.
JOH 6:17 Pegkedelem, simakay dan te belangay, so wedà pa dateng si Jesus. Minatas dan pesalo doton te Kapirnaom.
JOH 6:18 Meneng wedà kenamay, migkedakel se balud so migkebandes.
JOH 6:19 Pegbugsay dan te menge lima kilomitro, kinità dan si Jesus migpesalo kandan, aw minipanaw sikandin diyà te lanto te lanaw. Ontò dan nelemitan.
JOH 6:20 Meneng timawal si Jesus, “Siaken inì. Ikà niyo egkelemitan.”
JOH 6:21 Penga niyan, ontò dan neluba aw impesakay dan sikandin. Wedà kenamay, dimateng dan kidoen te tanà dinotonan dan.
JOH 6:22 Keeldawan niyan, nengemahà ki Jesus se menge otaw tinenanan te menge tinoledaan doton dipag te lanaw, so netegahan dan te gebenini doen olò sebad belangay kidoen, aw netegahan dan heman te wedà taking si Jesus diyà te menge tinoledaan din te pegsakay dan kenyan.
JOH 6:23 Wedà dan pegkità ki Jesus, meneng doen menge belangay lekat te Tibiryas migdong dapag te tanà kinànan dan te pan impesiontong i Jesus.
JOH 6:24 Penga niyan, pegketaga-taga dan te wedad kidoen si Jesus aw menge tinoledaan din, simakay dan heman minatas pesalo doton te Kapirnaom, amon mengemahà dan ki Jesus.
JOH 6:25 Pegdateng dan doton te Kapirnaom, kinità dan si Jesus, aw mig-insà dan, “Sir, kano ka lay dini?”
JOH 6:26 Timaba si Jesus, “Eneng-enengi niyo se kagi ko kenyo. Nengemahà kaw kanak kenà so nemenal kaw pineokit te kepelahan impekità ko kenyo, meneng nengemahà kaw kanak so nebesog kaw te pan impekaen ko kenyo gebenini.
JOH 6:27 Ikà niyo egpengemahà te kànen megkewedad te eked kenamay. Meneng pengemahà kaw te kànen eked pegkewedad aw mekebegay te pedowan wedad temanan. Yan se ibegay ko kenyo, so siaken se Timanem Migpekeotaw, aw impetaga-taga te Amay ko Timanem te siak se insogò din.”
JOH 6:28 Minikagi dan diyà ki Jesus, “Toledai kay aw eden se inangen day amon metoman day se ibeg te Timanem.”
JOH 6:29 Timaba si Jesus, “Seini se ibeg te Timanem inangen niyo. Pemenal kaw kanak, so insogò a te Timanem.”
JOH 6:30 Mig-insà dan heman, “Eden lay se pengilala ipekità no kenami amon memenal kay kamno? Eden lay se inangen no kenami?
JOH 6:31 So gebii te peg-ogpà te menge kemonaan tadon doton te kebigtilan, kinaen dan se kànen iningedanan mana, so doen kagi te Timanem insolat, ‘Binegayan din dan te kànen lekat te langit.’”
JOH 6:32 Minikagi si Jesus, “Eneng-enengi niyo se kagi ko kenyo. Kenà si Moises se nemegay te kànen lekat te langit, meneng Timanem se egpemegay kenyo te benal kànen lekat te langit.
JOH 6:33 Insogò dini lekat te langit se benal kànen ipegpemegay te Timanem, aw yan se mekebegay te kaling pedowan wedad temanan diyà te kedita te otaw.”
JOH 6:34 Minikagi dan, “Pengolo, begayi kay te kànen sìyan te kelikit te aldaw.”
JOH 6:35 Minikagi si Jesus, “Siaken se kànen mekebegay te kaling pedowan wedad temanan. Se otaw tomaking aw memenal kanak, yan se otaw eked palos bellosi aw eked heman palos kelao.
JOH 6:36 Meneng tapay ko inikagi kenyo, te pengkey kinità a niyo, meneng wedà kaw pa pemenal kanak.
JOH 6:37 Se kedita te otaw insalig te Amay ko diyà kanak, yan se otaw tomaking kanak. Pengkey sinu se otaw tomaking kanak, eked ko palos sikandin pekedasi.
JOH 6:38 Insogò a dini lekat te langit kenà amon inangen ko se kanak ibeg, meneng dimini a amon toloen ko se ibeg te Amay ko simogò kanak.
JOH 6:39 Aw seini se ibeg din, te tonggoan ko se kedita te otaw insalig din diyà kanak amon wedad metalon kandan, aw entayen ko se kedita dan te temanan aldaw.
JOH 6:40 Meibeg se Amay ko te begayan te kaling pedowan wedad temanan se kedita te otaw nengemahà aw nemenal kanak, aw entayen ko dan te temanan aldaw.”
JOH 6:41 Pegdineg te menge obanen te Judiyo kenyan, nebensi dan, so minikagi si Jesus te sikandin se kànen imbegay te Timanem kandan lekat te langit.
JOH 6:42 Migpebelaw-belaway dan, kagi dan, “Meneng sikandin si Jesus, aw si Jose olò se amay din. Netegahan tadon aw sinu se amay aw inay din. Yan nengà lay minikagi sikandin te insogò sikandin lekat te langit?”
JOH 6:43 Minikagi si Jesus, “Ikà niyo egkebensi.
JOH 6:44 Wedad otaw meketaking kanak singed aw onà entagen se pedowan din te Amay ko simogò kanak. Se otaw tomaking kanak, yan se entayen ko te temanan aldaw.
JOH 6:45 Doen insolat te telekeliwat te kagi te Timanem, kagi din, ‘Toledaan te Timanem se kedita te otaw.’ Se kedita te otaw menenalan aw tomolò te itoladà te Amay ko, yan se tomaking kanak.
JOH 6:46 Wedad otaw kimità te Amay ko Timanem, meneng sebad ko se kimità kandin, aw insogò a din dini.
JOH 6:47 Eneng-enengi niyo se kagi ko kenyo. Doen kaling pedowan wedad temanan te kedita te otaw nemenal kanak.
JOH 6:48 Siaken se kànen egpemegay te kaling pedowan wedad temanan.
JOH 6:49 Peg-ogpà te menge kemonaan niyo kidoen te kebigtilan, nematay dan pengkey kimaen dan te mana imbegay te Timanem kandan lekat te langit.
JOH 6:50 Meneng sebad kemolò se kànen seini insogò den dini lekat te langit, so se kedita te otaw komaen kani, yan se otaw eked palos kematay se pedowan din.
JOH 6:51 Siaken se kànen insogò dini lekat te langit mekebegay te kaling pedowan. Aw komaen se otaw te kànen seini, wedad temanan te pedowan din. Se kànen seini ibegay ko, yan se onod ko, amon mekekinawà se kedita te otaw te kaling pedowan.”
JOH 6:52 Pegdineg te menge obanen te Judiyo kenyan, migpedindilay dan, kagi dan, “Eked sikandin pemegay te onod din kenitadon amon mekaen tadon iyan.”
JOH 6:53 Minikagi si Jesus, “Eneng-enengi niyo se kagi ko kenyo. Aw eked kaw kaen te onod ko, aw eked kaw heman inem te dipanog ko, wedad kaling pedowan ibegay kenyo. Siak se Timanem Migpekeotaw,
JOH 6:54 aw se otaw komaen te onod ko aw minem te dipanog ko, yan se otaw begayan ko te kaling pedowan wedad temanan, aw entayen ko pa sikandin te temanan aldaw.
JOH 6:55 Ontò mekaen se onod ko, aw ontò heman meinem se dipanog ko.
JOH 6:56 Se otaw komaen te onod ko aw minem te dipanog ko, yan se eg-ogpà diyà kanak, aw siak diyà kandin.
JOH 6:57 Insogò a te Amay ko wedad temanan din, aw doen heman pedowan ko wedad temanan lekat kandin. Iling heman kenyan se otaw komaen kanak, so yan se otaw begayan te pedowan wedad temanan pineokit kanak.
JOH 6:58 Seini se kànen lekat te langit. Kenà ini iling te mana, so nematay se kemonaan niyo pengkey kimaen dan kenyan. Meneng se otaw komaen te kànen seini, wedad palos temanan te pedowan din.”
JOH 6:59 Yan se intoladà i Jesus kidoen te simbahan te Judiyo doton te lonsod te Kapirnaom.
JOH 6:60 Pegdineg te menge tinoledaan i Jesus te intoladà din seini, medita kandan se migpebelaw-belaway, kagi dan, “Eked nael pemenali se intoladà din seini. Wedad besi palos otaw mekepemenal kenyan.”
JOH 6:61 Netegahan i Jesus te doen menge tinoledaan din nebensi te intoladà din, aw minikagi sikandin, “Nepela a so nebensi kaw te inikagi ko seini.
JOH 6:62 Labi pa besi se kebensi niyo aw kitaen a niyo Timanem Migpekeotaw aw megpeengat a doton te langit eg-ogpaan ko kedengan.
JOH 6:63 Timanem olò se mekebegay te kaling pedowan. Eked iyan keabat pineokit te pagod te otaw. Meneng se kebenalan intoladà ko kenyo, yan se lekat te Timanem aw mekebegay te kaling pedowan.
JOH 6:64 Doen dini kenyo eked pemenal kanak.” Yan se inikagi i Jesus so tapay din netegahan aw sinu se otaw eked pemenal, aw netegahan din heman aw sinu se otaw megtolok kandin.
JOH 6:65 Minikagi heman si Jesus, “Yan se doun te minikagi a diyà kenyo te wedad otaw meketaking kanak singed aw onà entagen se pedowan din te Amay ko.”
JOH 6:66 Lekat niyan, medita se tinoledaan timanan ki Jesus aw limengà dan te pegtaking kandin.
JOH 6:67 Minikagi si Jesus diyà te sìyan sempolò teg dowa tinoledaan din, kagi din, “Meibeg kaw lay heman tomanan kanak?”
JOH 6:68 Timaba si Simon, se doma ngadan din si Pedro, kagi din, “Pengolo, wedad palos doma tekingan day, so sebad no se egtoladà tepad te kaling pedowan wedad temanan.
JOH 6:69 Nemenal kay den kamno, aw netegahan day te wedad salà no aw sikona se insogò te Timanem.”
JOH 6:70 Minikagi si Jesus, “Pengkey pinemallì ko sikiyo sempolò teg dowa, meneng doen sebad diyà kenyo sakop i Satanas.”
JOH 6:71 Yan se inikagi din tepad ki Judas batà i Simon Iscariote, so pengkey si Judas se sebad diyà te sempolò teg dowa tinoledaan din, meneng sikandin se migtolok kandin.
JOH 7:1 Penga niyan, miglegeb si Jesus kidoen te probinsya te Galiliya. Wedà sikandin doton te probinsya te Judiya, so doen menge obanen te Judiyo meibeg mengimatay kandin.
JOH 7:2 Nayan, agpet den domateng se pista te menge Judiyo iningedanan Pista te Bolongabong.
JOH 7:3 Minikagi se menge kedowa i Jesus diyà kandin, “Mèpiya aw mesayo ka dini aw memista ka heman kidoen te probinsya te Judiya amon komità se menge otaw tinoledaan no te kepelahan eg-inangen nikaw.
JOH 7:4 Aw meibeg se otaw te medengeg se ngadan din, eked din elesi se inangen din. Yan aw doen kepelahan inangen no, mèpiya aw ipekità no iyan diyà te kedita te otaw dini te keneyonan.”
JOH 7:5 Yan se inikagi dan, so pengkey telekedowa dan si Jesus, meneng wedà dan pemenal kandin.
JOH 7:6 Minikagi si Jesus, “Wedà pa dateng se kanak aldaw. Meneng pengkey eden eldawi se mepakay diyà kenyo.
JOH 7:7 Eked kaw kebensihi te menge otaw egtaking te ibeg te keneyonan, meneng kebensihan a dan, so gayed a eg-ikagi diyà kandan te medaet se eg-inangen dan.
JOH 7:8 Onà kaw doton te pista. Eked a pa doton so wedà pa dateng se aldaw te pegdoton ko.”
JOH 7:9 Penga te peg-ikagi din kenyan, mig-ogpà pa sikandin kidoen te probinsya te Galiliya.
JOH 7:10 Penga te pegdoton te menge kedowa i Jesus te pista kidoen te Jerusalem, dimoton heman sikandin te eles-eles, so ibeg din wedad otaw metaga-taga te pegdoton din.
JOH 7:11 Kidoen te Jerusalem, doen menge obanen te Judiyo nengemahà kandin, aw migpeinsaay dan, “Kenan lebò sikandin?”
JOH 7:12 Medita se otaw netipon kidoen te pista, aw migpedindilay dan tepad ki Jesus. Doen menge otaw minikagi, “Mèpiya otaw sikandin.” Doen heman menge doma otaw minikagi, “Kenà, so eg-akal sikandin te otaw pineokit te ipegtoladà din.”
JOH 7:13 Meneng in-eles dan se peg-ikagi dan kenyan, so nelemitan dan te menge obanen te Judiyo neopal kandin.
JOH 7:14 Pegketengà te pista, dimoton si Jesus te dakel simbahan te Judiyo kidoen te Jerusalem, aw migtoladà te otaw netipon kidoen.
JOH 7:15 Pegtoladà din, ontò nepela se menge obanen te Judiyo, aw minikagi dan, “Kenan lebò lekat se kebiyasa te otaw seini? So wedà sikandin toledai te menge pengolo te simbahan.”
JOH 7:16 Timaba si Jesus kandan, kagi din, “Wedà ko teboki se kebenalan intoladà ko seini, meneng lekat iyan te Timanem simogò kanak.
JOH 7:17 Aw meibeg se otaw tomolò te ibeg te Timanem kandin, yan se otaw metaga-taga aw kenan lekat se kebenalan ipegtoladà ko, aw lekat iyan te Timanem aw tinebok ko.
JOH 7:18 Aw teboken te otaw se itoladà din, ibeg din domuyun te kandin pegkeotawun. Meneng aw pineokit te pegtoladà din, iduyun din se simogò kandin, yan se pengilala te benal se ipegtoladà din, aw kenà sikandin bolelawun.
JOH 7:19 Kineliwatan kaw i Moises te menge punù, meneng wedad palos otaw kidoen kenyo timolò kenyan. Nengà lay ibeg niyo pa mengimatay kanak?”
JOH 7:20 Timaba se menge otaw netipon, kagi dan, “Migkebook ka den so dinetengan ka te bosaw. Wedad man otaw meibeg mengimatay kamno.”
JOH 7:21 Minikagi si Jesus, “Doen olò sebad kepelahan ininang ko, aw nepela se kedita niyo so aldaw te peg-etod.
JOH 7:22 Gebii, migpunù si Moises te keilangan tolien se dedeitek batà niyo meama. Pengkey yan se impunù din, meneng olò din ingkeliwat se ketanem tapay pa tinekingan te kemonaan tadon gebii. Yan keilangan tolien se batà niyo pengkey aldaw te peg-etod.
JOH 7:23 Yan eked kepakay aw keopalan a niyo, so aw mepakay se pegtolì niyo te otaw dalem te aldaw te peg-etod amon toloen se punù ingkeliwat i Moises, mepakay heman se pegpegolì ko te kedakel te lawa te otaw dalem te aldaw te peg-etod.
JOH 7:24 Yan ikà niyo egsila te otaw singed aw ketegahan niyo se ontò kebenalan.”
JOH 7:25 Doen menge tege Jerusalem migpebelaw-belaway, kagi dan, “Indà, sikandin se otaw egpemehaen amon imetayan.
JOH 7:26 Meneng nepela kay so egtoladà sikandin kinità te kedita tadon, aw wedad palos otaw migsagda kandin. Netaga-taga den besi se menge pengolo te simbahan tadon te ontò sikandin se Misiyas megpelowà kenitadon.
JOH 7:27 Meneng kenà din besi se pinelimanan tadon, so aw domateng se Misiyas isogò te Timanem, wedad otaw metaga-taga aw kenan sikandin lekat. Meneng netegahan tadon se tinikedowan te otaw seini.”
JOH 7:28 Pegtoladà i Jesus kidoen te dakel simbahan te Jerusalem, minikagi sikandin, “Eden niyo aw netegahan niyo te sinu a aw kenan a lekat. Dimini a kenà pineokit te kenaken ibeg, meneng insogò a dini. Egkeseligan se simogò kanak, meneng wedà kaw ketaga-taga kandin.
JOH 7:29 Netaga-taga a kandin so dimini a lekat kandin, aw sikandin se simogò kanak.”
JOH 7:30 Peg-ikagi din kenyan, doen menge otaw meibeg megdakep kandin, meneng wedà dan deleg, so wedà pa dateng se aldaw pinemallì te Timanem te pegdakep kandin.
JOH 7:31 Meneng medita se doma otaw nemenal te sikandin se insogò te Timanem. Minikagi dan, “Aw domateng se Misiyas megpelowà kenitadon, wedad kepelahan inangen din labi pa mèpiya diyà te eg-inangen te otaw seini.”
JOH 7:32 Pegdineg te menge Parisiyo te eg-ikegiyen te otaw netipon, migsebad dan diyà te menge pengolo te simbahan te Judiyo, aw insogò dan se menge teletonggò te simbahan amon dekepen dan si Jesus.
JOH 7:33 Minikagi si Jesus diyà te otaw netipon, “Te eked kenamay, mesayo a lekat dini, so molì a doton te simogò kanak.
JOH 7:34 Pengkey mengemahà kaw kanak, meneng eked kaw kità kanak, so eked kaw pekedoton te ogpeanan ko.”
JOH 7:35 Pegdineg te menge obanen te Judiyo kenyan, migpeinsaay dan, “Kenan lay pesalo sikandin te eked tadon kitai? Domoton lay sikandin te mediyò lonsod eg-ogpaan te menge Judiyo nesakop te kenà Judiyo amon megtoladà te menge otaw kenà Judiyo?
JOH 7:36 Eden lay se kedegdagan te inikagi din te eked kidon pekekità kandin pengkey mengemahà kidon kandin? Nengà lay minikagi sikandin te eked kidon pekedoton te ogpeanan din?”
JOH 7:37 Se temanan aldaw te Pista te Bolongabong, yan se ontò melangkaw aldaw diyà te kedita te Judiyo. Pegdateng te temanan aldaw te pista, timindeg si Jesus kidoen te dakel simbahan aw minikagi te dakel se kagi din, “Aw sinu se nelao, domiyà kanak, so ipeinem ko.
JOH 7:38 Aw memenal se otaw kanak, metoman diyà kandin se kagi te Timanem insolat, ‘Kidoen te pedowan din, tomebol se wayeg mekebegay te kaling pedowan wedad temanan.’”
JOH 7:39 Se inikagi din tepad te wayeg, yan se tegdeyanan din tepad te Espiritu Santo ibegay diyà te kedita te otaw memenal kandin. Meneng wedà pa dateng se Espiritu Santo kandan, so wedà pa pegpeengat si Jesus doton te langit.
JOH 7:40 Pegdineg dan te inikagi din, doen menge otaw minikagi, “Sikandin se ontò benal telekeliwat te kagi te Timanem tapay din impakang.”
JOH 7:41 Minikagi se menge doma otaw, “Sikandin se Misiyas megpelowà kenitadon.” Meneng doen heman menge doma otaw minikagi, “Kenà sikandin se egpelimanan tadon, so kenà tege Galiliya se Misiyas megpelowà kenitadon.
JOH 7:42 Doen kagi te Timanem insolat te keilangan pelimanan tadon se Misiyas bowad-bowad te kemonaan tadon si David. Tomebaw se Misiyas egpelimanan tadon kidoen te Bitlihim, so yan se lonsod inogpaan i David.”
JOH 7:43 Wedà dan pegsebad, aw yan se doun te migpedindilay dan tepad kandin.
JOH 7:44 Doen menge otaw kidoen kandan meibeg megdakep kandin, meneng wedad otaw minawid kandin.
JOH 7:45 Peg-olì te menge teletonggò te simbahan kidoen te menge otaw simogò kandan, mig-insà se menge Parisiyo aw pengolo te simbahan, kagi dan, “Nengà lay wedà niyo ibingi?”
JOH 7:46 Timaba se menge teletonggò, kagi dan, “So wedad palos otaw migtoladà te kebenalan iling te pegtoladà din.”
JOH 7:47 Minikagi se menge Parisiyo, “Neekalan kaw din kedì heman.
JOH 7:48 Wedà kay din keekali, so wedad palos pengolo te simbahan nemenal diyà kandin. Wedad palos heman diyà kenami menge Parisiyo nemenal kandin.
JOH 7:49 Meneng se medita otaw sagkep timaking kandin, yan se nemenal kandin so wedà dan toledai te kebenalan tepad te kagi te Timanem insolat, aw yan ipelumun dan te Timanem.”
JOH 7:50 Kidoen heman si Nicodemo, so sikandin se sebad doma dan. Sikandin se dimoton ki Jesus kedengan te delem. Minikagi diyà te menge doma din netipon, kagi din,
JOH 7:51 “Eked kepakay diyà te punù ingkeliwat i Moises aw ipelumun se otaw singed aw onà sikandin insaan aw eden se eg-inangen din, amon meketaba.”
JOH 7:52 Meneng minikagi dan, “Sikona besi heman se sakop te probinsya te Galiliya. Pengemahà ka kidoen te kagi te Timanem insolat, aw yan ketegahan no te wedad palos sakop te probinsya te Galiliya neinang telekeliwat te kagi te Timanem.” [
JOH 7:53 Penga niyan, nesayo se kedita dan aw migsiolì dan.
JOH 8:1 Meneng dimoton si Jesus te bontod iningedanan Olibo.
JOH 8:2 Keeldawan niyan te peglibtak te aldaw, limikò si Jesus doton te dakel simbahan. Pegketipon te kedita te otaw, nenenoo sikandin aw migtoladà kandan.
JOH 8:3 Dalem te pegtoladà din, dimateng se menge menenoladà te punù ingkeliwat i Moises aw menge Parisiyo. Inibing dan se sebad bayi kinità dan limakad. Inibing dan sikandin doton te monà i Jesus
JOH 8:4 aw minikagi dan, “Sir, kinità day gina se bayi seini limakad.
JOH 8:5 Doen punù ingkeliwat i Moises te keilangan bontogan te bato se otaw limakad amon matay. Na, menonen lay sikandin. Eden lay se aneng-aneng nikaw?”
JOH 8:6 Yan se ininsà dan amon tendaen dan si Jesus, so ibeg dan idimanda dan sikandin diyà te howis. Meneng timibakang sikandin aw simolat te intetodò din diyà te tanà.
JOH 8:7 Sagwa wedà dan lengà te peg-insà dan kandin, timindeg si Jesus aw minikagi, “Se otaw diyà kenyo wedad palos salà ininang din, yan se mekeonà memontog kandin te bato.”
JOH 8:8 Penga niyan, todà timibakang si Jesus, aw simolat te intetodò din kidoen te tanà.
JOH 8:9 Pegdineg te menge Parisiyo te inikagi din, neyàyà dan aw nesayo se kedita dan teg sebad-sebad. Menge obanen se onà nesayo. Nesamà olò se bayi aw si Jesus.
JOH 8:10 Penga niyan, timindeg si Jesus aw mig-insà, “Atà, kenan lay den se menge otaw neopal kamno? Wedad lay den migpelumun kamno?”
JOH 8:11 Timaba se bayi, “Wedad, Sir.” Minikagi si Jesus, “Eked a heman pegpelumun kamno. Olì ka den, aw ikà todà egpekesalà.”]
JOH 8:12 Pegtoladà i Jesus te menge otaw netipon, minikagi, “Siaken se kelowahan eg-anyag diyà te kedita te otaw te keneyonan. Aw tomaking se otaw kanak, wedad kengitngit diyà te pedowan din, so doen keanyag diyà kandin mekebegay te kaling pedowan wedad temanan.”
JOH 8:13 Pegdineg te menge Parisiyo te inikagi din, minikagi dan, “Olò sebad no se mig-indan kenami tepad te kamno pegkeotawun. Eked kepemenali se inikagi nikaw.”
JOH 8:14 Timaba si Jesus, “Pengkey olò sebad ko se mig-indan tepad kanak, meneng benal se inikagi ko, so netegahan ko aw kenan a lekat, aw netegahan ko heman aw kenan a pesalo. Meneng sikiyo, wedà kaw ketaga-taga aw kenan a lekat aw kenan a pesalo.
JOH 8:15 Aw meg-okom kaw te otaw, lekat olò te kenyo aneng-aneng se peg-okom niyo. Meneng siak, kenà tod ko dini se peg-okom ko te otaw.
JOH 8:16 Meneng aw meg-okom a, keseligan se peg-okom ko, so kenà ko sidebok se meg-okom, meneng meg-okom kay te Amay ko simogò kanak.
JOH 8:17 Doen punù ingkeliwat i Moises egtoloen niyo te keseligan se ikegiyen te dowa otaw aw eg-onawa se kagi dan.
JOH 8:18 Yan egkeseligan a, so siak se eg-indan kenyo tepad kanak, aw Amay ko simogò kanak, sikandin heman se eg-indan te benal tepad kanak.”
JOH 8:19 Migtompuyus se menge Parisiyo kandin aw minikagi dan, “Kenan lay se amay nikaw?” Timaba si Jesus, “Wedà niyo ketegahi aw sinu a. Wedà niyo heman ketegahi aw sinu se Amay ko. Aw netegahan niyo aw sinu a, netegahan niyo heman aw sinu se Amay ko.”
JOH 8:20 Yan se inikagi i Jesus te pegtoladà din kidoen te dakel simbahan te Judiyo, doton te tambì niyan iningedanan Solanan te Kwarta Ibowang. Wedad otaw nekedakep kandin, so wedà pa dateng se aldaw pinemallì te Timanem te pegdakep dan kandin.
JOH 8:21 Todà minikagi si Jesus diyà te menge otaw netipon, “Agpet den se pegkesayo ko. Pengkey mengemahà kaw kanak, meneng matay kaw te eked pegwedadi se salà niyo. Eked kaw pekedoton te dotonan ko.”
JOH 8:22 Yan migpeinsaay se menge obanen te Judiyo, “Megpekematay lay sikandin? So minikagi sikandin te eked kidon pekedoton te dotonan din.”
JOH 8:23 Minikagi si Jesus, “Sikiyo se tege tanà, meneng siak se tege langit. Keneyonan se tinikedowan niyo, meneng kenà keneyonan se tinikedowan ko.
JOH 8:24 Yan se doun te minikagi a te matay kaw te eked pegwedadi se salà niyo, so aw eked kaw pemenal te benal se inikagi ko tepad te pegkeotawun ko, eked pegwedadi se salà niyo.”
JOH 8:25 Mig-insà dan, “Sinu ka lay?” Timaba si Jesus, “Yan se melikit ko in-indan kenyo lekat te ketebò te pegtoladà ko.
JOH 8:26 Dakel pa se itoladà ko aw isila ko kenyo. Meneng egkeseligan se simogò kanak, aw keilangan meg-indan a diyà te kedita te otaw te kebenalan impetaga-taga din kanak.”
JOH 8:27 Meneng wedà dan pa ketegahi te Amay din Timanem se simogò kandin.
JOH 8:28 Minikagi si Jesus, “Penga te pegsawol niyo te Timanem Migpekeotaw kidoen te kayo intollok, yan ketegahan niyo te benal se inikagi ko tepad te pegkeotawun ko. Ketegahan niyo heman te wedà ko teboki se pegtoladà ko, meneng ipegtoladà ko se intoladà te Amay ko kanak.
JOH 8:29 Gayed a egtebangan te simogò kanak. Wedà a din tenani, so gayed ko eg-inangen se ibeg din.”
JOH 8:30 Peg-ikagi i Jesus kenyan, medita se otaw nemenal kandin.
JOH 8:31 Minikagi si Jesus diyà te menge Judiyo nemenal kandin, “Aw ebey kaw tomolò te itoladà ko, meinang kaw ontò tinoledaan ko.
JOH 8:32 Yan ketegahan niyo se kebenalan, aw pineokit te kebenalan, mekelowà kaw heman lekat te nekeallang kenyo.”
JOH 8:33 Timaba dan, “Nengà lay minikagi ka te mekelowà kay? Wedad palos mig-allang kenami, so ontò kay menge bowad-bowad i Abraham.”
JOH 8:34 Minikagi si Jesus, “Eneng-enengi niyo se kagi ko kenyo. Se kedita te otaw eg-inang te salà, yan se allang te salà.
JOH 8:35 Eked gayed peg-ogpà se allang diyà te balay te amo din te wedad temanan. Meneng se batà, mepakay aw gayed sikandin meg-ogpà diyà te balay te amay din te wedad temanan.
JOH 8:36 Yan aw Batà te Timanem se megpelowà kenyo lekat te salà, ontò kaw mekelowà.
JOH 8:37 Netegahan ko te bowad-bowad kaw i Abraham. Meneng ibeg niyo mengimatay kanak, so wedà niyo soli se kebenalan ipegtoladà ko diyà te pedowan niyo.
JOH 8:38 Se ipegtoladà ko, yan se kebenalan impetaga-taga te Amay ko kanak. Meneng se eg-inangen niyo, yan se medaet pig-ilingan niyo diyà te kenyo kemonaan.”
JOH 8:39 Minikagi dan, “Si Abraham se kemonaan day.” Minikagi si Jesus, “Simpana ontò kaw bowad-bowad i Abraham, meg-iling kaw heman te mèpiya ininang din gebii.
JOH 8:40 Meneng pengkey migtoladà a kenyo te kebenalan impetaga-taga te Timanem kanak, meneng ibeg niyo mengimatay kanak. Kenà niyan se ininang i Abraham.
JOH 8:41 Yan iling kaw te amay niyo.” Minikagi dan, “Kenà kay batà te lowà. Sebad olò se Amay day, aw yan se Timanem.”
JOH 8:42 Minikagi si Jesus, “Simpana Timanem se amay niyo, yan kedekelan a niyo peden te pedowan, so pegdini ko, Timanem se linekatan ko. Dimini a kenà lekat te kanak ibeg, meneng insogò a din dini.
JOH 8:43 Wedà niyo kelebeti se inikagi ko, so eked kaw keibeg menenalan te kebenalan itoladà ko.
JOH 8:44 Si Satanas se ontò amay niyo, aw se ibeg din medaet, yan heman se ibeg niyo inangen. Lekat te ketebò te keneyonan, egpengimatay sikandin. Wedad palos labut din te kebenalan, so wedad kebenalan diyà kandin. Aw megkebolalaw sikandin, yan se ketanem te pedowan din, so bolelawun sikandin, aw sikandin se eglekatan te kedita te kebolalaw.
JOH 8:45 Meneng ontò benal se kagi ko kenyo, aw yan se doun te eked a niyo pemenali.
JOH 8:46 Wedad sebad kenyo mekeindan te benal doen salà ininang ko. Olò kebenalan se intoladà ko, meneng wedà kaw pemenal kanak.
JOH 8:47 Egpenenalan se menge batà te Timanem diyà te kagi te Timanem. Meneng kenà kaw batà te Timanem, aw yan se doun te eked kaw penenalan.”
JOH 8:48 Pegdineg te menge obanen te Judiyo te inikagi i Jesus, minikagi dan, “Benal besi te kenà ka doma day Judiyo, meneng sakop ka besi te probinsya te Samarya eglindoan day. Migkebook ka so dinetengan ka te bosaw.”
JOH 8:49 Minikagi si Jesus, “Wedad bosaw diyà kanak. Ipegpelangkaw ko olò se Amay ko, meneng eglindò kaw kanak.
JOH 8:50 Kenà ibeg ko aw megpelangkaw-langkaw a, meneng doen meibeg te ipelangkaw a te otaw, aw sikandin se megpetaga-taga te benal se kagi ko.
JOH 8:51 Eneng-enengi niyo se kagi ko kenyo. Eked detengi te kemetayun se kedita te otaw tomolò te ipegtoladà ko.”
JOH 8:52 Minikagi se menge obanen te Judiyo, “Ontò day den netegahan te doen bosaw diyà kamno. Pengkey si Abraham aw kedita te telekeliwat te kagi te Timanem gebii, dinetengan se kedita dan te kemetayun. Meneng minikagi ka te eked detengi te kemetayun se otaw tomolò te ipegtoladà nikaw.
JOH 8:53 Kenà ka melangkaw diyà te kemonaan day si Abraham, so nematay sikandin aw kedita te telekeliwat te kagi te Timanem gebii. Sinu lay peden se pelingo-lingowan nikaw?”
JOH 8:54 Timaba si Jesus, “Simpana megpelangkaw-langkaw a, wedad ontong ko. Meneng ipegpelangkaw a te Amay ko, aw eg-ikagi kaw te sikandin se Timanem egsimbahen niyo.
JOH 8:55 Meneng wedà kaw ketaga-taga kandin. Netaga-taga a kandin, aw simpana mikagi a te wedà a ketaga-taga kandin, bolelawun a heman iling kenyo. Meneng seini se kebenalan, te netaga-taga a kandin, aw egtoloen ko se menge punù din.
JOH 8:56 Se kemonaan niyo si Abraham, ontò sikandin neluba so metoman din kitaen se pegdateng ko. Kinità a din den aw ontò den sikandin neluba.”
JOH 8:57 Minikagi se menge obanen te Judiyo, “Wedà ka pa apet te keliman se omay. Ontò ka lay kimità ki Abraham?”
JOH 8:58 Minikagi si Jesus, “Eneng-enengi niyo se kagi ko. Te wedà pa tebaw si Abraham, tapay a den doen.”
JOH 8:59 Pegdineg dan te inikagi din sìyan, nengimon dan te menge bato ibontog kandin, so ibeg dan imetayan dan sikandin. Meneng mineles si Jesus aw nesayo lekat te dakel simbahan.
JOH 9:1 Peg-ipanaw i Jesus, kinità din se otaw bota lekat te pegtebaw din.
JOH 9:2 Mig-insà se menge tinoledaan i Jesus, “Sir, sinu lay se mig-inang te salà doun te bota se otaw seini lekat te pegtebaw din? Sikandin lay se mig-inang te salà, aw amay aw inay din?”
JOH 9:3 Timaba si Jesus, “Kenà lekat te kandin salà se pegkebota din. Kenà heman lekat te salà te amay aw inay din. Meneng bota sikandin amon pineokit kandin ipekità te metolos se Timanem.
JOH 9:4 Dalem te doen pa aldaw, keilangan inangen tadon se ibeg te Timanem simogò kanak, so wedad meketerbaho te delem.
JOH 9:5 Aw dini a pa te keneyonan, siaken se kelowahan eg-anyag diyà te pedowan te kedita te otaw te keneyonan.”
JOH 9:6 Penga te peg-ikagi din kenyan, neneptep sikandin diyà te tanà, aw inlotek se ngingi diyà te tanà, aw insawol din diyà te mata te otaw bota.
JOH 9:7 Minikagi sikandin, “Doton ka te lanaw iningedanan Siloam, aw onawi se bawa no kidoen.” (Se kelebadan te Siloam, yan se kagi “impeibing.”) Penga niyan, dimoton se otaw bota aw migdàpog. Peg-olì din, kimità den.
JOH 9:8 Nepela se menge otaw simbalay din aw otaw tapay kimità kandin egpemoyò, aw minikagi dan, “Sikandin se gayed egpenenoo aw metipemoyò.”
JOH 9:9 Doen otaw minikagi, “Sikandin goman iyan.” Meneng doen doma otaw minikagi, “Kenà sikandin. Tabag olò onawa se bawa dan.” Meneng minikagi sikandin, “Siaken se bota.”
JOH 9:10 Mig-insà dan, “Aw sikona se bota, eden lay se neinang te kimità ka den?”
JOH 9:11 Timaba sikandin, “Doen otaw ngadan din si Jesus neneptep diyà te tanà aw inlotek din se ngingi din diyà te tanà, aw insawol din diyà te mata ko, aw insogò a din doton te Siloam amon megdàpog a te bawa ko. Timolò a kandin, aw yan kimità a den.”
JOH 9:12 Mig-insà dan, “Kenan lay den sikandin?” Timaba se otaw, “Inday. Wedà ko ketegahi.”
JOH 9:13 Penga niyan, inibing dan se otaw negolì se mata din doton te menge Parisiyo.
JOH 9:14 Aldaw te peg-etod te menge Judiyo se aldaw te peglotek i Jesus te ngingi diyà te tanà aw migpegolì te mata te otaw bota.
JOH 9:15 Mig-insà heman se menge Parisiyo diyà kandin aw nemeno se pegkegolì te mata din. Mig-indan sikandin, kagi din, “Insawol din se pasak diyà te mata ko, aw migdàpog a te bawa ko, aw yan kimità a.”
JOH 9:16 Penga niyan, doen menge Parisiyo minikagi tepad ki Jesus, “Kenà sikandin insogò te Timanem, so eglàpang sikandin te punù tepad te aldaw te peg-etod.” Meneng doen menge doma otaw minikagi, “Simpana sikandin se metilàpang te punù, eked sikandin pekebatog meg-inang te menge kepelahan iling kani.” Yan migpedindilay dan.
JOH 9:17 Penga niyan, mig-insà dan diyà te otaw negolì se mata, “Eden lay se kamno aneng-aneng tepad kandin? So kamno mata se pinegolì din.” Timaba sikandin, “Telekeliwat sikandin te kagi te Timanem.”
JOH 9:18 Wedà pemenal se menge obanen te Judiyo te tapay sikandin bota aw negolì den se mata din, aw yan impeangay dan se amay aw inay din.
JOH 9:19 Pegdateng dan doton, mig-insà dan kandan, “Batà niyo lay se otaw seini? Bota lay sikandin lekat te pegtebaw din? Nengà lay sikandin kimità den?”
JOH 9:20 Timaba se amay aw inay din, “Netegahan day te sikandin se batà day, aw netegahan day heman te bota sikandin lekat te pegtebaw din.
JOH 9:21 Meneng wedà day ketegahi aw nengà lay sikandin kimità den. Wedà day heman ketegahi aw sinu se migbolong kandin. Meneng mèpiya aw sikandin se insaen niyo, so dakel den sikandin. Sikandin se meketaba te menge insà niyo.”
JOH 9:22 Yan se inikagi te amay aw inay din, so nelemitan dan te menge obanen te Judiyo. Tapay migsebad se menge obanen te eked den dan peopi te simbahan se otaw mikagi te si Jesus se Misiyas.
JOH 9:23 Yan se doun te minikagi se amay aw inay din, “Dakel den sikandin. Mèpiya aw sikandin se insaan niyo.”
JOH 9:24 Yan todà dan impeangay se otaw negolian te mata din, aw minikagi dan, “Na, peg-indan ka den te benal, so kinità ka den te Timanem. Netegahan day den te limàpang sikandin te punù ingkeliwat i Moises.”
JOH 9:25 Timaba se otaw, “Wedà ko ketegahi aw benal aw kenà benal te sikandin se limàpang te punù ingkeliwat i Moises. Meneng sebad olò se netegahan ko, te bota a kedengan, meneng egpengità a den songkani.”
JOH 9:26 Minikagi dan, “Eden lay se ininang din kamno? Pigmeno lay se pegbolong din te mata nikaw?”
JOH 9:27 Timaba sikandin, “Tapay ko iyan in-indan kenyo, meneng wedà kaw penenalan. Meibeg kaw lay domineg todà kenyan amon meinang kaw tinoledaan din?”
JOH 9:28 Pegdineg dan kenyan, neopal dan, aw minikagi dan, “Sikona se tinoledaan din, meneng sikami se tinoledaan te telekeliwat te kagi te Timanem gebii si Moises.
JOH 9:29 Netegahan day te si Moises se insogò te Timanem. Meneng otaw sìyan, wedà day ketegahi aw sinu se simogò kandin.”
JOH 9:30 Minikagi se otaw negolian, “Ontò a den nepela kenyo. Pengkey migpegolì sikandin te mata ko pineokit te tolos din, meneng wedà niyo pa ketegahi aw sinu se simogò kandin.
JOH 9:31 Netegahan tadon te kenà egtebangan te Timanem se otaw eglàpang te punù. Meneng se otaw egsimba te Timanem aw egtolò te ibeg din, yan se egtebangan te Timanem.
JOH 9:32 Lekat te ketebò te keneyonan lamig seini, wedad palos otaw netegahan tadon nekebatog migpegolì te mata te otaw bota lekat te pegtebaw din.
JOH 9:33 Simpana kenà sikandin insogò te Timanem, wedad palos kepelahan mebatog din inangen.”
JOH 9:34 Minikagi dan, “Pegtebaw no, bota ka so doen salà nikaw. Yan eked kepakay aw sikona se megtoladà kenami.” Penga niyan, impelowà dan sikandin lekat te simbahan.
JOH 9:35 Pegdineg i Jesus te impelowà dan lekat te simbahan se otaw negolian, pinengemahà din sikandin. Pegkità din kandin, mig-insà si Jesus, “Nemenal ka lay te doen Timanem Migpekeotaw?”
JOH 9:36 Timaba sikandin, “Sir, indani a aw sinu iyan amon memenal a kandin.”
JOH 9:37 Minikagi si Jesus, “Kinità no den sikandin, so se minikagi diyà kamno, siaken iyan.”
JOH 9:38 Minikagi se otaw, “Pengolo, nemenal a den kamno.” Penga niyan, migsimba sikandin ki Jesus.
JOH 9:39 Minikagi si Jesus, “Insogò a dini te keneyonan amon ipekità ko se awop te pedowan te kedita te otaw. Se otaw iling te bota so wedà dan kità te kebenalan, yan se tebangan ko amon komità dan. Meneng se otaw eden dan aw kimità dan te kebenalan, yan se pekitaan ko te iling dan te otaw bota.”
JOH 9:40 Doen menge Parisiyo medapag kandin aw dimineg dan te kagi din, aw minikagi dan, “Bota kay lay heman?”
JOH 9:41 Timaba si Jesus, “Aw iling kaw te otaw bota so wedà kaw kità te kebenalan, mepakay aw megselsel kaw amon pegwedaden te Timanem se salà niyo. Meneng so migpelingo-lingo kaw te ontò kaw kimità te kebenalan, yan doen pa salà niyo.”
JOH 10:1 Mig-indan si Jesus kandan te tegdeyanan tepad te menge sakop din, aw sinu se mepakay mengibing kandan. Minikagi sikandin, “Eneng-enengi niyo se kagi ko kenyo. Aw doen kelokob te ayam-ayam karniro, se otaw eked okit te lelebangan niyan meneng lomàpang te alad, yan se menenakaw.
JOH 10:2 Meneng se otaw mokit te lelebangan niyan, yan se ontò telediyaga te karniro.
JOH 10:3 Aw mawop se pengolo diyà te kelokob, meg-owang kandin se otaw egtonggò te tetakep te kelokob. Se menge karniro din doton didalem, yan se nenadam te kagi din. Tewalen din se menge ngadan dan, aw tomaking dan heman kandin pesalo doton te lowà.
JOH 10:4 Aw ibingen din se kedita te kandin karniro doton te lowà, mipanaw sikandin diyà te monà dan, aw tomaking dan kandin, so nenadam dan te kagi din.
JOH 10:5 Meneng eked dan taking te doma otaw. Komadas dan kandin, so wedà dan kenadam te kagi din.”
JOH 10:6 Yan se tegdeyanan in-indan i Jesus kandan, meneng wedà dan kelebeti aw eden se kedegdagan niyan.
JOH 10:7 Yan minikagi heman si Jesus, “Eneng-enengi niyo se kagi ko kenyo. Iling a te lelebangan te kelokob te karniro.
JOH 10:8 Se menge doma otaw nekeonà kanak, yan se iling te menenakaw aw megdedempasay, meneng wedà dan penenelani te karniro.
JOH 10:9 Iling a te lelebangan. Aw mokit se otaw diyà kanak, mekelowà sikandin. Iling sikandin te karniro mepakay meglegeb doton te kelokob, aw doton heman te lowà, aw yan mekekaen.
JOH 10:10 Domoton se menenakaw te kelokob amon menakaw, aw mengimatay, aw megbaet. Meneng dimini a amon memegay a te kaling pedowan wedad temanan diyà te kedita te otaw, sìyan kaling pedowan wedad kekolangan.
JOH 10:11 “Iling a te mèpiya telediyaga te karniro. Se mèpiya telediyaga te karniro, yan se egpeketagad pengkey matay amon megpelowà te karniro lekat te kededàtan.
JOH 10:12 Meneng aw megtonggò se otaw tendanan, aw kitaen din se toyang te kebenesan iningedanan lobo, yan komadas sikandin aw tomanan te menge karniro. So kenà din se tig-apò kenyan, kenà din se ontò megtonggò kenyan. Yan bengaen te lobo se karniro aw mebilit se doma.
JOH 10:13 Komadas se otaw tendanan so kenà din se tig-apò, aw wedad kedakel te pedowan din diyà te menge karniro egtonggoan din.
JOH 10:14 Iling a te mèpiya telediyaga te karniro. Netegahan a te Amay ko aw netegahan ko heman sikandin. Iling heman kenyan se kedita te sakop ko, so netegahan ko dan, aw netegahan a dan heman. Mepakay diyà kanak aw imetayan a amon megpelowà a te otaw megpesakop diyà kanak.
JOH 10:16 Doen pa menge doma wedà pa pegpesakop diyà kanak. Keilangan sekopen ko dan heman, aw menenalan dan heman kanak. Yan inangen ko dan sebad olò pongan, aw siak se mengibing kandan.
JOH 10:17 “Dakel se pedowan te Amay ko kanak, so mepakay diyà kanak aw imetayan a amon meantay a.
JOH 10:18 Wedad megleges kanak, meneng lekat te kanak ibeg, mepakay aw imetayan a. Mepakay aw matay a, aw mepakay heman aw meantay a, so yan se doun te insogò a te Amay ko.”
JOH 10:19 Pegdineg te menge obanen te Judiyo te inikagi i Jesus, todà dan migpedindilay, so wedà dan pegsebad.
JOH 10:20 Doen kandan minikagi, “Doen bosaw diyà kandin. Migkebook sikandin. Ikà niyo egpenenalan kandin.”
JOH 10:21 Meneng doen heman doma otaw minikagi, “Simpana doen bosaw diyà kandin, eked sikandin pekebatog mikagi iling kani, so ontò mèpiya se inikagi din. Se otaw doen bosaw, eked heman pekebatog megpegolì te mata te otaw bota.”
JOH 10:22 Penga niyan, dimateng se aldaw te pista te peg-aneng-aneng dan te pegtodà te dakel simbahan kidoen te Jerusalem.
JOH 10:23 Yan se pengodan, aw minipanaw si Jesus kidoen te balkon te dakel simbahan iningedanan Balkon i Solomon.
JOH 10:24 Migpedapag se menge obanen te Judiyo kidoen kandin, aw minikagi dan, “Nenamay den wedà day ontò ketegahi aw eden se tod nikaw. Ikà den egbolon diyà kenami aw sinu ka. Indani kay aw sikona se Misiyas megpelowà kenami. Ibeg day ontò mebangal se kagi no kenami.”
JOH 10:25 Timaba si Jesus, “Pengkey tapay ko iyan in-indan kenyo, meneng wedà a niyo pemenali. Eg-inangen ko se menge kepelahan so insogò a te Amay ko, aw yan se pengilala ipekità ko kenyo amon ketegahan niyo aw sinu a.
JOH 10:26 Meneng wedà kaw pa pemenal, so wedà kaw pa akop diyà te menge karniro ko.
JOH 10:27 Egpenenalan se karniro ko te kagi ko, aw netegahan ko dan, aw egtaking dan heman kanak.
JOH 10:28 Egpemegay a kandan te kaling pedowan wedad temanan, aw eked dan detengi te kemetayun. Wedad palos mekeagaw kandan diyà kanak.
JOH 10:29 Amay ko se nemegay kandan diyà kanak amon ipaten ko dan, aw sikandin se labi pa metolos diyà te kedita te doma. Yan se doun te wedad palos mekeagaw kandan diyà kandin.
JOH 10:30 Siak aw Amay ko migsebad.”
JOH 10:31 Pegdineg te menge obanen te Judiyo te inikagi din sìyan, todà dan nengimon te menge bato ibontog kandin amon imetayan dan sikandin.
JOH 10:32 Meneng minikagi si Jesus, “Medita se mèpiya ininang ko aw kinità niyo, so insogò a te Amay ko Timanem. Eden lay se ininang ko te imetayan a niyo?”
JOH 10:33 Timaba se menge obanen te Judiyo, “Bontogan day sikona te bato kenà so mig-inang ka te kepelahan, meneng bontogan ka so migtompuyus ka te Timanem. Pengkey olò ka otaw, meneng minikagi ka den seini te Timanem ka.”
JOH 10:34 Minikagi si Jesus, “Netegahan niyo indà te doen kagi te Timanem insolat te tinawal din timanem se menge otaw.
JOH 10:35 Nayan, eked kepakay aw todaen se kagi te Timanem. Yan so tinawal din menge timanem se otaw insogò din gebii,
JOH 10:36 eden niyo aw migtompuyus a te Timanem pineokit te inikagi ko seini te siak se Batà te Timanem, so pinemallì a din aw insogò a din heman dini te keneyonan.
JOH 10:37 Simpana kenà insogò te Timanem se kepelahan eg-inangen ko, ikà niyo egpemenal kanak.
JOH 10:38 Meneng aw yan se eg-inangen ko, pengkey eked kaw pemenal kanak, pemenal kaw te Timanem se eglekatan te kepelahan eg-inangen ko, amon ketegahan niyo pa te diyà kanak se Amay ko, aw diyà a te Amay ko.”
JOH 10:39 Pegdineg dan kenyan, ibeg dan megdakep kandin, meneng nekelowà sikandin lekat kandan.
JOH 10:40 Nesayo si Jesus lekat te Jerusalem, aw minatas te wayeg iningedanan Jordan, aw dimoton te ogpeanan egbonyagan i Juan Memonyagay kedengan. Mig-ogpà si Jesus kidoen.
JOH 10:41 Medita se otaw dimoton kandin, so minikagi dan, “Pengkey wedad kepelahan ininang i Juan Memonyagay, meneng benal se kedita te inikagi din tepad ki Jesus.”
JOH 10:42 Medita se otaw kidoen nemenal kandin.
JOH 11:1 Penga niyan, doen otaw nesekitan si Lazaro tege Bitanya. Doen dowa etebay din si Maria aw si Marta. Tege Bitanya dan heman.
JOH 11:2 Si Maria se migtoyong te lana diyà te benis te Pengolo, aw logay din se inggalis din kenyan. Nesekitan se meama dan si Lazaro.
JOH 11:3 Doen otaw insogò dan doton ki Jesus minikagi, “Sir, nesekitan se sigalak no nedekelan no te pedowan.”
JOH 11:4 Pegdineg i Jesus kenyan, minikagi, “Pengkey nesekitan sikandin, meneng se tod kenà amon matay, meneng amon ipekità te melangkaw se Timanem. Ipekità heman te melangkaw a Batà te Timanem pineokit kenyan.”
JOH 11:5 Pengkey nedekelan i Jesus te pedowan si Marta aw si Maria aw si Lazaro,
JOH 11:6 meneng pegdineg din te nesekitan si Lazaro, mig-ogpà pa kidoen taman te dowa se delem.
JOH 11:7 Pegkeobos te dowa se delem, minikagi si Jesus diyà te menge tinoledaan din, “Lomikò kidon den doton te probinsya te Judiya.”
JOH 11:8 Minikagi se menge tinoledaan din, “Sir, mèpiya aw eked ka pa likò doton, so doen pa ibeg te menge obanen te Judiyo memontog kamno te bato amon imetayan ka.”
JOH 11:9 Minikagi si Jesus, “Egsenang se aldaw te sempolò teg dowa oras te kelikit te aldaw. Aw mipanaw se otaw te aldaw, eked sikandin pekedogsò so melowa se aldaw.
JOH 11:10 Meneng aw mipanaw se otaw te delem, mekedogsò sikandin so wedad den aldaw.”
JOH 11:11 Yan se tegdeyanan inikagi i Jesus amon ketegahan dan te wedad pa medaet domateng diyà kandin kidoen te Judiya. Penga niyan, minikagi heman sikandin, “Timedogi den se sigalak tadon si Lazaro. Yan domoton a amon lokahen ko.”
JOH 11:12 Minikagi se menge tinoledaan din, “Pengolo, mèpiya aw timedogi den, so yan se pengilala te megkèpiya sikandin.”
JOH 11:13 Yan se inikagi dan so eden dan aw olò timedogi si Lazaro. Meneng se kedegdagan te inikagi i Jesus, nematay den sikandin.
JOH 11:14 Yan minikagi si Jesus kenà pineokit te tegdeyanan, kagi din, “Nematay den si Lazaro.
JOH 11:15 Mèpiya so wedad a kidoen te pegkematay din, so ketebangan kaw den amon lobosen se pegpemenal niyo kanak. Nayan, domoton kidon kandin.”
JOH 11:16 Si Tomas, se doma ngadan din si Pingin, minikagi diyà te menge doma tinoledaan, “Tomaking kidon te Pengolo pengkey imetayan kidon heman doma din.”
JOH 11:17 Pegdateng i Jesus doton te Bitanya, epat den se delem te peglebeng ki Lazaro.
JOH 11:18 Medapag se lonsod te Bitanya kidoen te Jerusalem, menge telo kilomitro se kediyò niyan.
JOH 11:19 Yan se doun te medita se menge Judiyo tege Jerusalem limaoy ki Marta aw si Maria amon sinelayen dan tandà te kedowa dan nematay.
JOH 11:20 Pegdineg i Marta te medapag den dan si Jesus, simongon sikandin. Meneng mig-ogpà pa se adi din si Maria kidoen te balay.
JOH 11:21 Pegkità i Marta ki Jesus, minikagi, “Pengolo, simpana dini ka, eked peden kematay se kedowa ko.
JOH 11:22 Pengkey nematay den, meneng netegahan ko te pengkey eden se pemoyoen no diyà te Timanem, yan se ibegay din kamno.”
JOH 11:23 Minikagi si Jesus, “Meantay pa se kedowa nikaw.”
JOH 11:24 Minikagi si Marta, “Netegahan ko te meantay sikandin te temanan aldaw aw entayen te Timanem se kedita te otaw lekat te nematay.”
JOH 11:25 Minikagi si Jesus, “Siaken se meg-antay te otaw lekat te nematay. Siak se egpemegay te kaling pedowan. Pengkey matay se otaw nemenal kanak, meneng meantay sikandin.
JOH 11:26 Aw memenal kanak se otaw wedà pa kematay, eked palos sikandin detengi te kemetayun. Nemenal ka lay kenyan?”
JOH 11:27 Timaba si Marta, “Ee, Pengolo. Nemenal a te sikona se Batà te Timanem. Sikona se Misiyas insogò din dini te keneyonan.”
JOH 11:28 Penga te peg-ikagi i Marta kenyan, minolì sikandin amon mangay te adi din si Maria. Minikagi sikandin te wedad doma otaw dimineg, “Dimateng den se Menenoladà, aw impeangay ka din.”
JOH 11:29 Pegdineg i Maria kenyan, ayas timindeg aw dimoton kandin.
JOH 11:30 Wedà pa dateng si Jesus te lonsod, so kidoen pa sikandin te sinongonan i Marta kandin.
JOH 11:31 Na, se menge Judiyo migsinalay kandin kidoen te balay, pegkità dan te pegkesayo i Maria lekat te balay, timaking dan kandin, so eden dan aw domoton te lebeng amon megkelag.
JOH 11:32 Meneng pegdateng i Maria doton ki Jesus, limongken sikandin, aw minikagi, “Pengolo, simpana dini ka, eked peden kematay se kedowa ko.”
JOH 11:33 Sagwa kimità si Jesus te migkelag si Maria aw kedita te Judiyo timaking kandin, neantag se pedowan din aw ontò nelidò.
JOH 11:34 Minikagi sikandin, “Kenan lay lebengi?” Minikagi dan, “Pengolo, taking ka kenami.”
JOH 11:35 Penga niyan, migkelag heman si Jesus.
JOH 11:36 Pegkità te menge Judiyo te migkelag sikandin, minikagi dan, “Ontò kedì dakel se pedowan din diyà te nematay.”
JOH 11:37 Meneng minikagi se menge doma, “Sikandin se migpegolì te mata te otaw bota. Simpana dini sikandin, wedà peden kematay si Lazaro.”
JOH 11:38 Pegdateng i Jesus doton te lebeng, todà neantag se pedowan din. Ilib se linebengan ki Lazaro, aw doen dakel bato insampeng diyà te awang niyan.
JOH 11:39 Minikagi si Jesus, “Owangi niyo se lebeng din.” Meneng minikagi se etebay te nematay si Marta, “Pengolo, nemahò den, so epat pa se aldaw lekat te peglebeng kandin.”
JOH 11:40 Minikagi si Jesus, “Eneng-enengi se inikagi ko diyà kamno. Aw memenal ka kanak, komità ka te melangkaw se Timanem.”
JOH 11:41 Penga niyan, inabat dan se bato insampeng te lebeng. Limengag si Jesus aw migtawal-tawal, “Amà, egpesiontong a te dinineg no den se pinemoyò ko kamno.
JOH 11:42 Netegahan ko te gayed a no egpenenelanen. Meneng migtawal-tawal a den kamno seini amon ketebangan se menge doma otaw dini, so ibeg ko memenal dan te sikona se simogò kanak dini te tanà.”
JOH 11:43 Penga te pegtawal-tawal i Jesus, timawal sikandin te dakel se kagi din, “Lazaro, lowà ka den kidoen.”
JOH 11:44 Limowà si Lazaro neantay den lekat te nematay. Ginakes pa se kedakel te lawa din te sapot pengkey diyà te benis din aw bebenayun. Doen kelobaw imbagkes diyà te bawa din. Minikagi si Jesus, “Lebadi niyo sikandin amon mekeipanaw.”
JOH 11:45 Se medita Judiyo timaking ki Maria doton te lebeng, pegkità dan te kepelahan ininang i Jesus, nemenal dan kandin.
JOH 11:46 Meneng doen menge doma dan Judiyo dimoton te menge Parisiyo, aw mig-indan dan kandan te ininang i Jesus.
JOH 11:47 Pegdineg te menge pengolo te simbahan aw Parisiyo, migtipon dan te kedita te doma dan obanen te simbahan, aw minikagi dan, “Megmeno kidon? So medita se kepelahan eg-inangen te otaw sìyan.
JOH 11:48 Aw eked kidon pegsagda kandin, kedita te Judiyo memenal eleg kandin. Aw domineg se gobirno kidoen te Roma te doen sebad otaw megpeinang selotan amon lomowan dini, medaet iyan, so isogò dan dini se menge sondalo amon pegbàtan dan se ogpeanan tadon, aw imetayan dan heman se kedita tadon Judiyo.”
JOH 11:49 Meneng doen sebad otaw diyà kandan si Caifas. Sikandin se ininang ontò pengolo te simbahan dalem te omay sìyan. Minikagi sikandin, “Kolang se aneng-aneng niyo.
JOH 11:50 Wedà niyo besi eneng-enengi te mèpiya aw sebad olò se otaw matay iselilin te kedita te otaw. Labi pa mèpiya aw sikandin se imetayan amon eked imetayi se kedita tadon Judiyo.”
JOH 11:51 Se inikagi din sìyan, kenà iyan lekat te kandin aneng-aneng. Meneng so sikandin se ontò pengolo te simbahan te omay sìyan, impeikagi sikandin te Timanem te metoman imetayan si Jesus amon somelilin sikandin te kedita te Judiyo.
JOH 11:52 Kenà olò menge Judiyo se ketebangan din, meneng sekopen te Timanem se kedita te otaw inangen din menge batà din, pengkey kenan dan peg-ogpà.
JOH 11:53 Lekat te aldaw sìyan, gayed dan miglalang te pegpengimatay kandin.
JOH 11:54 Yan se doun te limengà si Jesus te peglegeb din kidoen te menge lonsod te Judiyo. Meneng nesayo sikandin aw dimoton te lonsod iningedanan Ipraim, medapag te kebigtilan. Mig-ogpà sikandin kidoen aw menge tinoledaan din.
JOH 11:55 Penga niyan, agpet den domateng se aldaw te pista te menge Judiyo, sìyan Pista te Pegpelowà. Te wedà pa dateng se aldaw te pista, medita se otaw dimoton te Jerusalem lekat te menge doma lonsod amon toloen dan se ketanem te menge Judiyo tepad te pegpelinis.
JOH 11:56 Nengemahà dan ki Jesus kidoen. Pegketipon dan kidoen te dakel simbahan te Judiyo, migpeinsaay dan, “Eden lay se kenyo aneng-aneng? Tomanod lay sikandin te pista, aw eked?”
JOH 11:57 Tapay migpunù se menge pengolo te simbahan aw menge Parisiyo te keilangan indanan dan aw kenan si Jesus amon dekepen dan sikandin.
JOH 12:1 Enem pa se aldaw te wedà pa dateng se aldaw te Pista te Pegpelowà, dimoton si Jesus te Bitanya. Yan se lonsod eg-ogpaan i Lazaro, sìyan otaw inantay i Jesus lekat te nematay.
JOH 12:2 Pegdateng din doton, mig-inang dan te kànen te pegsagman dan ki Jesus. Pegpengaen dan, migtelaban si Marta miglamak, aw si Lazaro se sebad diyà te menge otaw kimaen doma ki Jesus.
JOH 12:3 Si Maria, sìyan adi i Lazaro, inibing din se sebad sopa te lana metinadeg iningedanan nardo ontò meelagà. Yan se intoyong din diyà te benis i Jesus, aw logay din se inggalis din te benis i Jesus. Nelegeb se kedakel te balay te nadeg niyan.
JOH 12:4 Minikagi se sebad tinoledaan i Jesus, sìyan migtolok kandin si Judas Iscariote, kagi din,
JOH 12:5 “Tay law. Ontò iyan meelagà. Mèpiya peden aw ibeligyà iyan amon doen kwarta ibegay diyà te menge otaw sagkep.”
JOH 12:6 Yan se inikagi din kenà so egkeidowan din se otaw sagkep, meneng menenakaw sikandin, so gayed din eg-ebaten se kwarta insalig diyà kandin, so sikandin se egtonggò te kwarta te kedita dan.
JOH 12:7 Minikagi si Jesus, “Pebeyai sikandin. Yan se ininang din amon ipetagad a din te peglebeng kanak.
JOH 12:8 Gayed doen otaw sagkep mebatog niyo tebangan. Meneng eked a gayed peg-ogpà dini kenyo.”
JOH 12:9 Medita se Judiyo dimineg te kidoen si Jesus te Bitanya, aw dimoton dan. Pengkey nengemahà dan ki Jesus, meibeg dan heman komità ki Lazaro inantay din lekat te nematay.
JOH 12:10 Yan se doun te miglalang se menge pengolo te simbahan te imetayan dan heman si Lazaro,
JOH 12:11 so peg-antay kandin lekat te nematay, medita se Judiyo limengà te pegtaking kandan, so nemenal den dan ki Jesus.
JOH 12:12 Keeldawan niyan, dimineg se medita otaw timanod te pista te agpet den domateng si Jesus kidoen te Jerusalem.
JOH 12:13 Simongon dan kandin, aw inibing dan se menge pelapà te palmera sinagpì dan, so yan se ketanem dan te pegsongon dan te selotan. Migpegais dan, “Iduyun se Timanem. Iduyun heman se insogò din dimateng den. Iduyun sikandin Selotan te kedita tadon bowad-bowad i Israel.”
JOH 12:14 Impeangay i Jesus se nati te kodà egtewalen asno, aw yan se sinekayan din. Pineokit kenyan, tinoman din se pakang tapay insolat kidoen te kagi te Timanem,
JOH 12:15 “Na, kedita niyo tege Sion, ikà niyo egkelemitan. Domateng se selotan niyo somakay te nati te asno.”
JOH 12:16 Pegdateng i Jesus doton te Jerusalem, wedà pa ketaga-taga se menge tinoledaan din te yan se pegketoman te pakang tapay insolat. Meneng penga te pegkeantay din lekat te nematay, aw pegpeengat din doton te langit, mig-aneng-aneng den dan te yan se impakang tepad kandin gebii, aw netoman den iyan.
JOH 12:17 Medita se otaw kimità te pegtawal i Jesus ki Lazaro kidoen te lebeng aw peg-antay din kandin lekat te nematay. Mig-indan dan te menge doma otaw,
JOH 12:18 aw yan se doun te medita se otaw simongon ki Jesus te pegdateng din doton te Jerusalem, so dinineg dan tepad te kepelahan ininang din.
JOH 12:19 Pegkità te menge Parisiyo te medita se otaw timaking ki Jesus, migpebelaw-belaway dan, “Dinaeg kidon den, so timaking kandin se kedita te otaw te keneyonan.”
JOH 12:20 Doen heman menge otaw Griego timaking te menge Judiyo dimoton te Jerusalem amon megsimba dan kidoen dalem te pista.
JOH 12:21 Nengemahà dan ki Felipe tege Bitsayda, sakop te Galiliya. Minikagi dan, “Sir, meibeg kay komità ki Jesus.”
JOH 12:22 Mig-indan si Felipe diyà ki Andres te ibeg dan, aw didowa dan se dimoton ki Jesus amon meg-indan kandin.
JOH 12:23 Minikagi si Jesus, “Agpet den se aldaw ipekità te Amay ko te melangkaw a.
JOH 12:24 Eneng-enengi niyo se kagi ko kenyo. Wedad ontong te benì singed aw onà itanem diyà te tanà aw ilebeng. Aw ilebeng aw tomobò, dakel se pongo niyan.
JOH 12:25 Pengkey ibeg te otaw megkelayat se omol din dini te keneyonan, meneng kunù din gayed matay. Meneng aw mepakay diyà te otaw pengkey eked keleyati se omol din dini te keneyonan, begayan sikandin te kaling pedowan wedad temanan.
JOH 12:26 Aw meibeg se otaw meinang sogounun ko, keilangan tomaking kanak, so pengkey kenan a pesalo, doton heman se sogounun ko. Iduyun te Amay ko se sogounun ko.”
JOH 12:27 Minikagi si Jesus, “Ontò den nepuluk se pedowan ko. Megmeno a? Eked a pemoyò diyà te Amay ko te ipelowà a din lekat te kelimahan domateng diyà kanak, so yan se doun te dimini a te keneyonan amon tomayod a kenyan.”
JOH 12:28 Penga niyan, migtawal-tawal si Jesus, “Amà, pekitai diyà te menge otaw dini te ontò ka melangkaw.” Peg-ikagi din kenyan, dinineg dan se kagi te Timanem lekat te langit, kagi din, “Tapay ko den iyan impekità, aw todà ko heman ipekità.”
JOH 12:29 Medita se otaw kidoen dimineg kenyan, meneng eden dan aw kilat. Minikagi se menge doma otaw, “Doen anghil minikagi diyà kandin.”
JOH 12:30 Minikagi si Jesus, “Kenà siak se tod te peg-ikagi te Timanem kenyan, meneng sikiyo, amon memenal kaw.
JOH 12:31 Lekat seini, ipelumun te Timanem se kedita te poon din dini te keneyonan. Dàgen din heman se pengolo te medaet dini te keneyonan si Satanas.
JOH 12:32 Meneng penga te pegsawol kanak kidoen te kayo intollok, ipetaking ko se kedita te otaw kanak lekat te kebelad te keneyonan.”
JOH 12:33 Yan se inikagi i Jesus amon ketegahan dan aw eden se keokit te pegkematay din.
JOH 12:34 Meneng minikagi se menge otaw, “Doen intoladà kenami kidoen te kagi te Timanem insolat, te wedad palos temanan te peglowan te Misiyas megpelowà kenitadon. Meneng minikagi ka te keilangan isawol se Timanem Migpekeotaw kidoen te kayo intollok. Nengà lay iyan? Sinu lay se sìyan Timanem Migpekeotaw?”
JOH 12:35 Minikagi si Jesus, “Domaan kaw pa te kelowahan te eked kenamay. Yan keilangan tomaking kaw te kelowahan amon eked kaw kesàbi te kengitngit. Se otaw mipanaw te kengitngit, yan se eked ketaga-taga aw kenan pesalo.
JOH 12:36 Meneng dalem te doen pa kelowahan dini kenyo, keilangan tomaking kaw te kelowahan, amon meinang kaw sakop te kelowahan.” Penga te peg-ikagi i Jesus kenyan, nesayo kidoen aw mineles.
JOH 12:37 Pengkey kimità dan te ontò medita kepelahan ininang din, meneng wedà dan pa pemenal kandin.
JOH 12:38 Pineokit kenyan, netoman den se impakang te telekeliwat te kagi te Timanem gebii si Isaias, kagi din, “Pengolo, wedad nael otaw memenal te itoladà day. Wedad nael heman memenal pengkey doen kepelahan ipekità no kandan.”
JOH 12:39 Doen anggà kidoen te pedowan dan, aw yan se doun te wedà dan pemenal, so minikagi heman si Isaias,
JOH 12:40 “Yan ipelumun dan te Timanem amon eked dan kità te kebenalan. Ipekagsen heman te Timanem se olo dan amon eked dan pemenal, aw amon eked dan pengenganay diyà kandin te tabang.”
JOH 12:41 Yan se inikagi i Isaias gebii, so tapay din netegahan te melangkaw se isogò te Timanem, aw yan se intoladà din.
JOH 12:42 Medita se otaw nemenal te si Jesus se insogò te Timanem, aw doen heman menge obanen te Judiyo nemenal. Meneng migbolon dan kenyan so nelemitan dan te eked dan peopi te menge Parisiyo kidoen te simbahan.
JOH 12:43 Migbolon dan te pegpemenal dan, so pengkey doen ibeg dan iduyun te Timanem, meneng labi dan pa meibeg iduyun te doma otaw.
JOH 12:44 Timawal si Jesus aw dakel se kagi din, “Aw memenal se otaw kanak, kenà olò siak se pemenalen din, meneng pemenalen din heman se Amay ko simogò kanak.
JOH 12:45 Se otaw kimità kanak, yan se kimità heman te Amay ko simogò kanak.
JOH 12:46 Siak se lowa dimini te keneyonan amon mekelowà lekat te kengitngitan se otaw memenal kanak.
JOH 12:47 Aw doen otaw dimineg te kebenalan intoladà ko meneng eked tolò kenyan, kenà ko se eglekatan te pelumun kandin. Insogò a dini kenà amon megpelumun a te otaw, meneng amon megpelowà a te otaw lekat te pelumun.
JOH 12:48 Meneng se otaw eked pemenal kanak aw eked heman tolò te kebenalan intoladà ko, yan se metoman ipelumun te temanan aldaw pineokit te kagi intoladà ko wedà din toloi.
JOH 12:49 Wedà ko teboki se pegtoladà ko, meneng insogò a te Amay ko, aw sikandin se migpunù kanak aw eden se ikegiyen ko aw itoladà ko.
JOH 12:50 Netegahan ko te punù te Timanem se kelekatan te kaling pedowan wedad temanan. Yan se doun te gayed ko ipegkeliwat se kagi impunù din kanak.”
JOH 13:1 Te wedà pa dateng se aldaw te Pista te Pegpelowà, tapay netegahan i Jesus te agpet den se pegkesayo din lekat te keneyonan amon molì doton te Amay din. Gayed dakel se pedowan din diyà te menge tinoledaan din dini te keneyonan, aw nedekelan din dan te pedowan lamig te pegkematay din.
JOH 13:2 Kimaen dan te iyambong. Kidoen heman si Judas Iscariote, batà i Simon, tapay binoyo i Satanas amon megtolok ki Jesus.
JOH 13:3 Meneng si Jesus, tapay netegahan din te insalig diyà kandin se pegpengibing te kedita. Netegahan din heman te Timanem se migsogò kandin aw sikandin se olian din heman.
JOH 13:4 Yan dalem pa te peg-iyambong dan, timindeg si Jesus, aw miglowas te saol din, aw nemagkes te towalya diyà te pawak din.
JOH 13:5 Penga niyan, nenoyong sikandin te wayeg diyà te pelenggana, aw mig-onaw te benis te menge tinoledaan din teg sebad-sebad. Miglegalis heman sikandin te benis dan te towalya diyà te pawak din.
JOH 13:6 Pegdateng din doton ki Simon, iningedanan din ki Pedro, nepela si Pedro aw minikagi, “Pengolo ko, eked kepakay aw sikona se meg-onaw te benis ko.”
JOH 13:7 Timaba si Jesus, “Wedà no pa kelebeti aw eden se inangen ko seini. Meneng kelebetan no te modi aldaw.”
JOH 13:8 Minikagi si Pedro, “Eked ka palos peg-onaw te benis ko.” Minikagi si Jesus, “Aw eked ta onawi, wedad labut no kanak.”
JOH 13:9 Meneng wedà pekelabet si Pedro, aw yan se doun te minikagi sikandin, “Pengolo, kenà olò benis ko se onawan no, meneng belad ko heman aw olo ko.”
JOH 13:10 Minikagi si Jesus, “Se otaw nemedigos den, olò benis din se keilangan onawan amon melinis se kedakel te lawa din. Melinis kaw den, meneng kenà melinis se kedita niyo.”
JOH 13:11 Netegahan i Jesus aw sinu se megtolok kandin, aw yan se doun te peg-ikagi din te kenà melinis se kedita dan.
JOH 13:12 Penga te peg-onaw din te benis dan, nenaol sikandin aw limikò kidoen te lemisa. Penga niyan, minikagi sikandin, “Wedà niyo besi kelebeti aw eden se ininang ko gina diyà kenyo.
JOH 13:13 Eg-ikagi kaw te siak se Menenoladà, aw egtewalen a niyo Pengolo. Neketotok iyan, so ontò a Pengolo niyo, aw egtoladà a kenyo.
JOH 13:14 Nayan, pengkey siak se Menenoladà aw Pengolo niyo, meneng migpedanà a te kanak pegkeotawun aw mig-onaw a te kenyo benis. Yan keilangan megpedanà kaw heman te kenyo pegkeotawun aw megpeonaway kaw te benis niyo.
JOH 13:15 Yan se ininang ko amon meg-iling kaw kanak.
JOH 13:16 Eneng-enengi niyo se kagi ko kenyo. Se sineligan, kenà melangkaw diyà te amo din. Se sogounun, kenà heman melangkaw diyà te otaw simogò kandin.
JOH 13:17 Aw kelebetan niyo se kebenalan intoladà ko den kenyo seini, yan ontò kaw meluba aw tomolò kaw kenyan.
JOH 13:18 Meneng kenà kedita niyo se pinunuan ko kani. Netegahan ko aw eden se awop te pedowan te kedita niyo pinemallì ko, aw keilangan metoman se kagi te Timanem insolat, ‘Pengkey tomogen se sebad otaw kanak, meneng peelegen a din pa.’
JOH 13:19 Mig-indan a den kenyo tepad kani te eked pa iyan ketoman, amon aw kitaen niyo se pegketoman niyan, memenal kaw te benal se inikagi ko tepad te pegkeotawun ko.
JOH 13:20 Eneng-enengi niyo se kagi ko kenyo. Aw megsagman se otaw te menge sogounun ko, segmanen a din heman. Aw megsagman se otaw kanak, segmanen din heman se Amay ko simogò kanak.”
JOH 13:21 Penga te peg-ikagi i Jesus kenyan, ontò nelidò se pedowan din, aw minikagi, “Eneng-enengi niyo se kagi ko kenyo. Doen sebad kenyo megtolok kanak.”
JOH 13:22 Pegdineg te menge tinoledaan din kenyan, nepela dan aw migpetengtengay dan, so wedà dan ketegahi aw sinu se nepeselowan te inikagi din sìyan.
JOH 13:23 Se timangkil ki Jesus, yan se tinoledaan ontò nedekelan i Jesus te pedowan.
JOH 13:24 Kimapay si Pedro kandin, aw minikagi, “Insai si Jesus aw sinu otawi se nepeselowan te inikagi din.”
JOH 13:25 Yan minonsalig sikandin ki Jesus aw mig-insà, “Pengolo, sinu lay otawi diyà kenami se megtolok kamno?”
JOH 13:26 Timaba si Jesus, “Yan se otaw begayan ko te pan tapay imbawog diyà te lipong.” Penga niyan, migbawog si Jesus te pan, aw imbegay din ki Judas, batà i Simon Iscariote.
JOH 13:27 Penga te pegkinawà i Judas te pan, dimateng si Satanas diyà kandin. Minikagi si Jesus, “Eyasi se inangen nikaw.”
JOH 13:28 Meneng se menge doma tinoledaan kidoen te lemisa, wedà dan ketegahi aw eden se tod te inikagi i Jesus diyà ki Judas.
JOH 13:29 Si Judas se egtonggò te kwarta te kedita dan, aw yan se doun te mig-aneng-aneng dan te insogò sikandin amon mayad te menge kelidoan dan tepad te pista. Mig-aneng-aneng se doma te insogò sikandin amon memegay te kwarta diyà te menge otaw sagkep.
JOH 13:30 Na, penga te pegkaen i Judas te pan imbegay i Jesus kandin, limowà te balay, aw delem den.
JOH 13:31 Penga te pegkesayo i Judas, minikagi si Jesus, “Ipekità den te siak se Timanem Migpekeotaw, aw pineokit kanak ipekità heman te melangkaw se Timanem.
JOH 13:32 Aw ipekità te melangkaw se Timanem pineokit kanak, sikandin heman se megpekità te melangkaw a, aw yan se ipekità din te eked den kenamay.
JOH 13:33 “Menge batà ko, eked den kenamay se pegdoma ko kenyo. Penga niyan, pengkey pemehaen a niyo, meneng onawa se kagi ko kenyo te inikagi ko kedengan diyà te menge obanen te Judiyo, te eked kaw pa pekedoton te dotonan ko.
JOH 13:34 Doen den kaling punù ko kenyo seini. Pegpedekelay kaw te pedowan. Keilangan megpedekelay kaw te pedowan iling te kedakel te pedowan ko kenyo.
JOH 13:35 Aw megpedekelay kaw te pedowan, yan se pengilala amon metaga-taga se kedita te otaw te menge tinoledaan ko sikiyo.”
JOH 13:36 Mig-insà si Pedro, “Pengolo, kenan ka lay doton?” Timaba si Jesus, “Eked ka pa pekedoma kanak doton te dotonan ko. Meneng tomelokon ka kanak te modi aldaw.”
JOH 13:37 Minikagi si Pedro, “Pengolo, nengà lay eked a den pekedoma kamno? Neketagad a den pengkey imetayan a tandà te pegtaking ko kamno.”
JOH 13:38 Timaba si Jesus, “Eden no aw neketagad ka den imetayan tandà te pegtaking no kanak. Eneng-enengi se kagi ko kamno. Te eked pa pegkolaak se manok te iselem, ibolon a nikaw te meketelo.”
JOH 14:1 Minikagi si Jesus diyà te menge tinoledaan din, “Ikà niyo egketetana. Pemenal kaw te Timanem. Pemenal kaw heman kanak.
JOH 14:2 Medita se tambì kidoen te balay eg-ogpaan te Amay ko. Simpana kenà iyan benal, eked a peden peg-indan kenyo. Meneng domoton a den amon ipetagad ko kenyo se ogpaan niyo.
JOH 14:3 Aw mepenga se pegpetagad ko te ogpaan niyo, lomikò a dini aw ipetaking ko sikiyo amon meg-ogpà kaw doma ko.
JOH 14:4 Netegahan niyo den heman se dalan pesalo doton te dotonan ko.”
JOH 14:5 Minikagi si Tomas, “Pengolo, wedà day ketegahi se dotonan nikaw. Yan eked day heman ketegahi se dalan.”
JOH 14:6 Minikagi si Jesus, “Siak se dalan. Siak se kebenalan. Siak se eglekatan te kaling pedowan. Eked pekedoton se otaw te Amay ko singed aw onà dan mokit kanak.
JOH 14:7 Aw netegahan a niyo, yan ketegahan niyo den heman se Amay ko. Lekat seini, netegahan niyo den sikandin, aw kinità niyo den heman sikandin.”
JOH 14:8 Minikagi si Felipe, “Pengolo, pekitai den se Timanem kenami, aw yan wedad den doma pemoyoen day.”
JOH 14:9 Minikagi si Jesus, “Felipe, ontò den nenamay se pegdoma ko kamno. Yan nepela a so wedà ka pa ketaga-taga aw sinu a. Se kedita te otaw kimità kanak, kimità den dan heman te Amay ko. Nepela a te meibeg ka ipekità ko kenyo se Amay ko.
JOH 14:10 Iling te wedà ka pemenal te diyà a te Amay ko, aw diyà heman sikandin kanak. Pengkey se eg-ikegiyen ko kenyo, kenà ko iyan egteboken, meneng yan se eg-inangen te Amay ko eg-ogpà diyà kanak.
JOH 14:11 Pemenal ka te inikagi ko, te diyà a te Amay ko, aw diyà heman sikandin kanak. Aw eked ka pemenal kenyan pengkey siak se minikagi kenyan, pemenal ka kenyan tandà te menge kepelahan ininang ko.
JOH 14:12 “Eneng-enengi niyo se kagi ko kenyo. Se otaw memenal kanak, iling heman te eg-inangen ko se inangen din, aw labi pa dakel se inangen din, so mesayo a den aw molì a doton te Amay ko.
JOH 14:13 Pengkey eden se pemoyoen niyo diyà te Amay ko pineokit te ngadan ko, yan se inangen ko kenyo, amon kitaen niyo te melangkaw se Timanem pineokit te eg-inangen ko.
JOH 14:14 Aw memoyò kaw pineokit te ngadan ko, siak se meg-inang kenyan.”
JOH 14:15 “Aw dakel se pedowan niyo kanak, yan tomolò kaw heman te impunù ko kenyo.
JOH 14:16 Memoyò a diyà te Amay ko amon memegay kenyo te Teletabang somelilin kanak, aw meg-ogpà sikandin kidoen kenyo te wedad temanan.
JOH 14:17 Yan se Espiritu Santo egtoladà te kebenalan. Eked sikandin kinewai te menge otaw egtaking te medaet ketanem te keneyonan, so kenà dan egkità kandin, aw kenà dan egketaga-taga aw sinu sikandin. Meneng sikiyo, netaga-taga kaw den kandin, so egdomaan kaw din aw ogpaan kaw te wedad temanan.
JOH 14:18 “Aw mesayo a, eked kaw keinang iling te menilo, so lomikò a dini kenyo.
JOH 14:19 Te eked kenamay, eked a den todà kitai te menge doma otaw. Meneng sikiyo, todà kaw komità kanak. So doen pedowan ko wedad temanan, begayan kaw heman te pedowan wedad temanan.
JOH 14:20 Aw domateng se aldaw sìyan, ontò niyo ketegahan te diyà a te Amay ko, aw diyà kaw kanak, aw diyà a kenyo.
JOH 14:21 “Se otaw menenalan te impunù ko aw tomolò kenyan, yan se otaw ontò dakel se pedowan din kanak. Se otaw dakel se pedowan din kanak, yan se egkedekelan te Amay ko te pedowan, aw dakel heman se pedowan ko kandin, aw megpekità a heman kandin.”
JOH 14:22 Minikagi si Judas, sìyan kesangay i Judas Iscariote, kagi din, “Pengolo, menonen no se pegpekità no kenami, meneng eked ka pegpekità te menge doma otaw?”
JOH 14:23 Timaba si Jesus, “Aw dakel se pedowan te otaw kanak, tomolò sikandin te punù ko. Kedekelan heman sikandin te Amay ko te pedowan, aw domoton kay kandin aw meg-ogpà kay kidoen te pedowan din.
JOH 14:24 Se otaw wedad kedakel te pedowan din kanak, yan se otaw kenà egtolò te punù ko. Se intoladà ko kenyo, kenà iyan lekat te kanak aneng-aneng, meneng lekat iyan te Amay ko simogò kanak.
JOH 14:25 “Migtoladà a kani kenyo dalem te dini a pa kenyo.
JOH 14:26 Meneng doen Teletabang isogò te Amay ko somelilin kanak, aw yan se Espiritu Santo. Sikandin se megtoladà kenyo te kedita, aw megpeaneng-aneng kenyo te kedita te intoladà ko kenyo.
JOH 14:27 “Ibegay ko den kenyo se kelinaw te pedowan. Kenaken kelinaw se ibowang kenyo. Eked pekebegay se otaw dini te keneyonan te kelinaw te pedowan ibowang ko den kenyo. Yan ikà niyo egketetana. Ikà niyo heman egkelemitan.
JOH 14:28 Dinineg niyo se inikagi ko gina kenyo, te agpet a den mesayo, aw lomikò a pa heman dini kenyo. Aw ontò dakel se pedowan niyo kanak, meluba kaw heman kenyan, so molì a doton te Amay ko. Sikandin se labi pa melangkaw diyà kanak.
JOH 14:29 Te eked pa iyan ketoman, tapay a den minikagi kenyan diyà kenyo, amon aw metoman iyan, memenal kaw te insogò a te Timanem.
JOH 14:30 Wedad den nael aldaw te pegtoladà ko kenyo, so agpet den domateng se pengolo te medaet dini te keneyonan, amon domaeg peden kanak. Eked a din dàgi,
JOH 14:31 meneng gayed ko egtoloen se impunù te Amay ko kanak, amon ketegahan te kedita te otaw te dakel se pedowan ko diyà te Amay ko. Tindeg kaw den, so agpet kidon den mesayo lekat dini.”
JOH 15:1 “Iling a te ontò pinonoan te belagen te paras, aw Amay ko se iling te otaw eg-ipat te paras.
JOH 15:2 Aw doen metesan belagen kidoen kanak kenà egpongo, yan se tepoen din. Meneng se kedita te belagen egpongo kidoen kanak, yan se linisan din amon labi pa dakel se paras mongo kidoen kenyan.
JOH 15:3 Lininisan kaw den pineokit te kebenalan intoladà ko kenyo.
JOH 15:4 Keilangan meg-ogpà kaw diyà kanak aw meg-ogpà a heman diyà kenyo, so eked pongo se belagen singed aw meg-ogpà diyà te pinonoan. Iling kaw heman kenyan, so wedad ontong niyo singed aw meg-ogpà kaw diyà kanak.
JOH 15:5 “Siaken se iling te pinonoan, aw sikiyo se iling te menge belagen ko. Aw meg-ogpà se otaw diyà kanak aw meg-ogpà a heman diyà kandin, yan se otaw mongo te dakel. Meneng aw tomani kaw kanak, wedad palos mebatog niyo.
JOH 15:6 Aw eked peg-ogpà se otaw diyà kanak, iagbel ko sikandin iling te menge belagen tepoen aw iagbel. Aw melangkay iyan, tiponen aw sonogen.
JOH 15:7 Meneng aw meg-ogpà kaw diyà kanak, aw isawol niyo se menge kagi ko kidoen te pedowan niyo, mepakay aw memoyò kaw te keibegan niyo, aw yan se inangen ko kenyo.
JOH 15:8 Iduyun se Amay ko pineokit te pegpemongo niyo te dakel, aw yan se kitaen te tinoledaan ko sikiyo.
JOH 15:9 Dakel se pedowan te Amay ko kanak. Iling heman kenyan se kedakel te pedowan ko kenyo. Peg-ogpà kaw diyà kanak amon gayed dakel se pedowan ko kenyo.
JOH 15:10 Aw tomolò kaw te impunù ko kenyo, yan ketegahan niyo te dakel se pedowan ko kenyo, iling te timolò a te impunù te Amay ko kanak, aw netegahan ko te dakel se pedowan din kanak.
JOH 15:11 “Seini se intoladà ko kenyo amon makop kaw heman diyà te keluba ko, so ibeg ko ontò kaw meluba.
JOH 15:12 Seini se ipunù ko kenyo. Keilangan megpedekelay kaw te pedowan iling te kedakel te pedowan ko kenyo.
JOH 15:13 Aw meketagad se otaw somelilin te menge sigalak din imetayan, yan se pengilala te ontò dakel se pedowan din kandan.
JOH 15:14 Aw tomolò kaw te menge punù ko kenyo, sikiyo se menge sigalak ko.
JOH 15:15 Lekat seini, eked ko sikiyo tewali menge sineligan ko, meneng tewalen ko sikiyo menge sigalak ko. Se menge sineligan, eked dan ketegahi aw eden se tod te amo dan. Meneng sikiyo se menge sigalak ko, so impetaga-taga ko kenyo se kedita te intoladà te Amay ko kanak.
JOH 15:16 Kenà sikiyo se nemallì kanak, meneng siak se nemallì kenyo, aw isogò ko den sikiyo amon megterbaho kaw kanak aw mongo kaw heman te dakel pongo wedad keeminan. Yan aw doen pemoyoen niyo diyà te Amay ko pineokit te ngadan ko, yan se ibegay din kenyo.
JOH 15:17 Seini se impunù ko kenyo. Keilangan megpedekelay kaw te pedowan.”
JOH 15:18 “Aw kebensihan kaw te menge otaw egtaking te ketanem te keneyonan, keilangan eneng-enengen niyo te tapay a dan heman nebensihan te wedà kaw dan pa kebensihi.
JOH 15:19 Simpana sakop kaw te menge otaw sìyan, sigalak kaw dan so onawa kaw kandan. Meneng kenà kaw den sakop dan, so nemallì a den kenyo aw impelowà ko den sikiyo lekat kandan. Yan se doun te kebensihan kaw dan.
JOH 15:20 Eneng-enengi niyo se inikagi ko diyà kenyo kedengan. Wedad sineligan labi pa melangkaw diyà te amo din. Aw nemilang se menge doma otaw kanak, memilang dan heman kenyo. Aw timolò dan te kanak toladà, tomolò dan heman te kenyo toladà.
JOH 15:21 Meneng wedà dan ketaga-taga te simogò kanak, aw yan se doun te memilang dan heman kenyo, so migpesakop kaw diyà kanak.
JOH 15:22 Simpana wedà a dini amon megtoladà a kandan, yan eked heman petega-tegahi se salà dan seini. Meneng so dimini a, eked den dan pekeikagi te wedad salà dan.
JOH 15:23 Aw mebensi se otaw kanak, mebensi dan heman te Amay ko.
JOH 15:24 Simpana wedà dan kità te menge kepelahan ininang ko eked keinang te doma otaw, eked dan heman petega-tegahi te doen salà dan. Meneng nebensi dan kanak aw Amay ko, pengkey kinità dan se kepelahan ininang ko.
JOH 15:25 Pineokit te pegkebensi dan, netoman den se kagi tapay insolat diyà te kagi te Timanem, ‘Wedad tindegan te kebensi dan kanak.’
JOH 15:26 “Isogò ko dini kenyo se Teletabang lekat te Amay ko. Yan se Espiritu Santo megtoladà kenyo te kebenalan. Aw domateng sikandin lekat te Amay ko, meg-indan sikandin te kebenalan tepad kanak.
JOH 15:27 Meg-indan kaw heman diyà te doma otaw tepad kanak, so migdoma kaw kanak lekat te ketebò te pegtoladà ko lamig seini.
JOH 16:1 “Migtoladà a kenyo te kedita nini amon eked kealin se pegsalig niyo kanak.
JOH 16:2 Domateng se aldaw eked kaw peopi kidoen te menge simbahan te Judiyo. Imetayan kaw heman te otaw meg-aneng-aneng te yan se ibeg te Timanem.
JOH 16:3 Meneng memilang dan kenyo so wedà dan ketaga-taga te Amay ko, aw wedà dan heman ketaga-taga kanak.
JOH 16:4 Intoladà ko den kenyo se kedita nini, so aw detengan kaw te pegpemilang, yan meg-aneng-aneng kaw te siak se tapay migtoladà kenyo te metoman iyan domateng diyà kenyo.” “Pegtebò te pegtaking niyo kanak, wedà a pegtoladà kenyo te kedita nini, so migdoma a pa kenyo.
JOH 16:5 Meneng agpet a den molì doton te Amay ko simogò kanak. Nepela a kenyo so pengkey mesayo a den, wedà kaw peg-insà tepad te pegkesayo ko.
JOH 16:6 Meneng nelidò beling se pedowan niyo so migtoladà a kenyo aw eden se domateng kwani diyà kenyo.
JOH 16:7 Meneng seini se kebenalan. Begayan kaw pa te kèpiya pineokit te pegkesayo ko, so simpana eked a kesayo, eked dateng se Teletabang diyà kenyo. Meneng aw mesayo a, somogò a kandin diyà kenyo.
JOH 16:8 Aw domateng sikandin, ipetaga-taga din diyà te kedita te otaw tepad te salà, aw tepad te metòlid inang, aw tepad te pelumun.
JOH 16:9 Ipetaga-taga din kandan te doen salà dan, so wedà dan pemenal kanak.
JOH 16:10 Ipetaga-taga din tepad te metòlid inang, so molì a doton te Amay ko, aw eked a niyo den kitai.
JOH 16:11 Ipetaga-taga din heman te metoman dan ipelumun te Timanem, so dinaeg se pengolo te medaet dini te keneyonan.
JOH 16:12 “Doen pa medita kebenalan ibeg ko itoladà kenyo, meneng eked kaw pa pekelabet kenyan.
JOH 16:13 Meneng aw domateng se Espiritu Santo amon megtoladà te kebenalan, sikandin se megpetaga-taga kenyo te kedita te kebenalan. Eked din teboki se pegtoladà din kenyo, meneng kedita te intoladà te Amay ko kandin, yan se ikeliwat din heman kenyo. Iindan din heman kenyo aw eden se metoman domateng.
JOH 16:14 Iduyun a din, so lekat kanak se kagi itoladà din kenyo.
JOH 16:15 So insalig te Amay ko se kedita diyà kanak, yan minikagi a te lekat kanak se kagi itoladà din kenyo.”
JOH 16:16 “Te eked kenamay, eked a niyo den kitai. Penga niyan te eked kenamay, todà a niyo kitaen.”
JOH 16:17 Pegdineg te menge tinoledaan din kenyan, migpeinsaay dan, “Nengà lay sikandin minikagi te eked kenamay, eked kidon den kità kandin, aw penga niyan te eked kenamay, todà kidon komità kandin? Nengà lay heman sikandin minikagi te yan se meinang so molì doton te Amay din?”
JOH 16:18 Migpeinsaay dan heman, “Eden lay se kedegdagan te kagi din te eked kenamay? Wedà tadon ketegahi se kedegdagan niyan.”
JOH 16:19 Netaga-taga si Jesus te doen insaen dan peden kandin, aw yan minikagi sikandin, “Migpeinsaay kaw den tepad te kedegdagan te inikagi ko gina, te eked kenamay, eked a niyo den kitai, aw penga niyan te eked kenamay, todà a niyo kitaen.
JOH 16:20 Eneng-enengi niyo se ikegiyen ko den diyà kenyo. Megkelag aw megmatay kaw tepad kanak, meneng meluba se medaet otaw dini te keneyonan. Pengkey melidò kaw, meneng todà kaw meluba.
JOH 16:21 Eneng-enengi niyo ini. Aw doen bayi tebawan, yan se kesekitan aw domateng se aldaw te pegtebaw. Meneng penga te pegtebaw te batà din, kelibelan din se kesakit tandà te keluba din, so doen batà din timebaw.
JOH 16:22 Iling kaw heman kenyan, so pengkey melidò kaw den, meneng todà kaw komità kanak. Todà heman meluba se pedowan niyo, aw wedad otaw mekeabat te keluba kidoen kenyo.
JOH 16:23 Aw metoman iyan, wedad keilangan te peg-insà niyo kanak aw eden se kedegdagan te inikagi ko. Eneng-enengi niyo se kagi ko seini. Aw doen pemoyoen niyo diyà te Amay ko pineokit te ngadan ko, yan se ibegay din kenyo.
JOH 16:24 Lamig seini, wedà kaw pa pemoyò kandin pineokit te ngadan ko. Meneng lekat seini, pemoyò kaw kandin pineokit te ngadan ko, aw metoman kaw kominawà amon ontò kaw meluba.”
JOH 16:25 “Migtoladà a kenyo kani pineokit te menge tegdeyanan melima kelebetan. Meneng te eked kenamay, domateng se aldaw eked ko peokiti te tegdeyanan se itoladà ko kenyo, so bengalen ko se pegtoladà ko kenyo tepad te Amay ko.
JOH 16:26 Aw domateng se aldaw sìyan, mepakay aw sikandin se pemoyoan niyo pineokit te ngadan ko. Yan se doun te wedà a ikagi te siak se memoyò kandin tepad kenyo,
JOH 16:27 so dakel se pedowan din kenyo. Dakel se pedowan te Amay ko kenyo, so dakel se pedowan niyo kanak, aw nemenal kaw te insogò a te Amay ko.
JOH 16:28 Insogò a din dini te keneyonan, aw mesayo a den lekat te keneyonan amon molì a doton te Amay ko.”
JOH 16:29 Pegdineg te menge tinoledaan din kenyan, minikagi dan, “Nebangal den se inikagi no seini so wedà no iyan peokiti te tegdeyanan.
JOH 16:30 Netegahan day den te netaga-taga ka te kedita, aw wedad keilangan te meg-insà kay kamno. Yan se doun te nemenal kay den te insogò ka te Timanem.”
JOH 16:31 Minikagi si Jesus, “Nemenal kaw den,
JOH 16:32 meneng doen pa aldaw agpet domateng te mebilit kaw. Dimateng den se aldaw te megsiolì se kedita niyo, so tenanan a niyo sebad ko. Meneng doen pa doma ko, so domaan a te Amay ko.
JOH 16:33 Minikagi a kani diyà kenyo amon doen kelinaw te pedowan niyo tandà te pegpesakop niyo diyà kanak. Pengkey pemilangen kaw te otaw dini te keneyonan, meneng pegpekagsen kaw, so dinaeg ko se kedita te medaet dini te keneyonan.”
JOH 17:1 Pegkepenga te peg-ikagi i Jesus diyà te menge tinoledaan din, limengag sikandin doton te langit aw migtawal-tawal, kagi din, “Amà, dimateng den se oras pinemallì nikaw. Pekitai te melangkaw se Batà nikaw, amon ipekità ko heman te melangkaw ka.
JOH 17:2 Insalig no kanak se peglowan diyà te kedita te otaw amon mekebegay a te kaling pedowan wedad temanan diyà te kedita te otaw imbegay no kanak.
JOH 17:3 Seini se otaw doen kaling pedowan wedad temanan, se otaw netaga-taga kamno, sebad no se ontò benal Timanem, aw netaga-taga heman kanak, si Jesu Cristo insogò no dini te keneyonan.
JOH 17:4 Impekità ko den dini te keneyonan te melangkaw ka, so tinoman ko den se kedita te impunù no kanak.
JOH 17:5 Nayan Amà, pekitai heman kidoen te langit te melangkaw a, iling te kelangkaw ko gebii te pegdoma ko kamno te wedà pa inangi se keneyonan.
JOH 17:6 “Migpetaga-taga a kamno diyà te kedita te otaw seini insalig no kanak dini te keneyonan. Pinemallì no dan, aw imbegay no dan kanak, aw timolò dan te impunù no kandan.
JOH 17:7 Netegahan den dan te lekat kamno se kedita te insalig no kanak.
JOH 17:8 Ingkeliwat ko diyà kandan se kebenalan insalig no kanak, aw nemenal den dan kenyan. Netegahan den dan heman te benal sikona se tinikedowan ko. Nemenal den dan te insogò a nikaw.
JOH 17:9 “Doen den pemoyoen ko kamno tepad te menge otaw seini. Kenà tepad te menge otaw egtaking te medaet dini te keneyonan se pemoyoen ko kamno, meneng tepad te menge otaw insalig no diyà kanak, so sakop no dan.
JOH 17:10 Se kedita te sakop ko, yan se sakop no heman. Se kedita dan diyà kamno, diyà dan heman kanak, aw impekità te melangkaw a pineokit kandan.
JOH 17:11 Nayan, agpet a den molì doton kamno, aw eked a peg-ogpà dini te keneyonan. Meneng meg-ogpà pa dini te keneyonan se kedita te sakop ta. Amà, metòlid se kedita te eg-inangen nikaw. Peg-ipat ka kandan amon eked dan soway lekat te kebenalan tepad te kamno pegkeotawun insalig no kanak. Peg-ipat ka kandan amon megsebad dan te pedowan, iling te pegsebad te pedowan ta.
JOH 17:12 Dalem te pegdoma ko kandan, mig-ipat a kandan amon eked dan soway lekat te kebenalan tepad te kamno pegkeotawun insalig no diyà kanak. Migtonggò a kandan, aw yan se doun te wedad palos nebàtan kandan. Meneng sebad se kebàtan, sìyan sakop te medaet, amon metoman se kagi tapay no impesolat tepad kandin.
JOH 17:13 Nayan, agpet a den molì doton kamno. Dalem te dini a pa te keneyonan, minikagi a kani amon ontò dan meluba iling te keluba ko.
JOH 17:14 Ingkeliwat ko den kandan se kagi no, so netegahan ko te kebensihan dan kwani te menge otaw medaet dini te keneyonan. Kebensihan dan so kenà dan egtaking te otaw medaet dini te keneyonan. Iling heman kanak, kenà a egtaking te otaw medaet dini te keneyonan.
JOH 17:15 Memoyò a den kamno kenà amon ebaten no dan lekat te otaw egtaking te medaet dini te keneyonan, meneng ibeg ko meg-ipat ka kandan amon eked dan keekali i Satanas.
JOH 17:16 Kenà a egtaking te otaw medaet dini te keneyonan, aw iling heman kanak se menge sakop ta, so kenà dan egtaking te otaw medaet dini te keneyonan.
JOH 17:17 Se kedita te sakop ta, ibeg ko inangen no dan otaw ontò egpenimanem pineokit te kebenalan lekat kamno, so benal se kedakel te kagi nikaw.
JOH 17:18 Insogò a no dini te keneyonan, aw yan isogò ko den dan megtoladà te kedita te otaw dini te keneyonan.
JOH 17:19 Amon ketebangan ko dan, ibegay ko den kamno se pegkeotawun ko tomolò te ibeg no, amon memegay dan heman kamno te pegkeotawun dan aw melobos heman se pegtolò dan te ibeg no kandan.
JOH 17:20 “Kenà olò sakop ta seini se intawal-tawal ko den diyà kamno, meneng kedita heman te doma otaw memenal kwani kanak pineokit te itoladà dan kandan.
JOH 17:21 Ibeg ko megsebad dan te pedowan, iling te pegsebad te pedowan ta seini, so sikona Amà, diyà ka kanak, aw diyà a heman kamno. Iling heman kenyan, ibeg ko diyà dan kenita, amon memenal se kedita te otaw dini te keneyonan te insogò a nikaw.
JOH 17:22 Imbegay ko den kandan se kelangkaw imbegay no kanak, amon megsebad dan te pedowan iling te pegsebad te pedowan ta,
JOH 17:23 so diyà a kandan aw diyà ka kanak. Ibeg ko, ontò dan megsebad te pedowan amon ketegahan te kedita te otaw dini te keneyonan te sikona se simogò kanak, aw dakel se pedowan no kandan iling te kedakel te pedowan no kanak.
JOH 17:24 “Amà, se menge otaw insalig no diyà kanak, ibeg ko gayed dan meg-ogpà doma kanak kidoen te langit, amon komità dan te kelangkaw ko imbegay no kanak, so dakel se pedowan no kanak gebii te wedà pa inangi se keneyonan.
JOH 17:25 E Amà, metòlid se kedita te eg-inangen nikaw. Se otaw egtaking te medaet dini te keneyonan, wedà dan ketegahi aw sinu ka, meneng netaga-taga a kamno, aw netegahan heman te menge sakop ta seini te insogò a nikaw.
JOH 17:26 Impetaga-taga ko den kandan tepad te pegkeotawun no, aw doen pa ipetaga-taga ko kandan tepad kenyan, so ibeg ko, megpedekelay dan te pedowan iling te kedakel te pedowan no kanak, aw meg-ogpà a heman diyà te pedowan dan.”
JOH 18:1 Penga te pegtawal-tawal i Jesus, nesayo sikandin aw menge tinoledaan din, aw dimoton dan dipag te baog iningedanan Kidron. Dimeleg dan doton te kekeyowan.
JOH 18:2 Si Judas, sìyan migtolok kandin, tapay netegahan din se dotonan dan, so melikit dimoton si Jesus tinekingan te menge tinoledaan din.
JOH 18:3 Nayan, minangay si Judas te menge sondalo aw menge otaw egtonggò te simbahan insogò te menge pengolo te simbahan aw Parisiyo, aw timaking dan kandin doton te kekeyowan. Nengibing dan te menge solò, aw gansà, aw kekamang dan.
JOH 18:4 Nayan, tapay netaga-taga si Jesus aw eden se domateng kandin. Yan pegdateng te menge otaw timaking ki Judas, simongon si Jesus kandan aw mig-insà, “Sinu lay se inahà niyo?”
JOH 18:5 Timaba dan, “Si Jesus tege Nasarit.” Minikagi si Jesus, “Siak se inahà niyo.” Kidoen heman doma te menge sondalo se migtolok ki Jesus si Judas.
JOH 18:6 Pegdineg dan te inikagi i Jesus te sikandin se inahà dan, migpeosos dan aw nekelias dan.
JOH 18:7 Todà mig-insà si Jesus, “Sinu lay se inahà niyo?” Timaba dan, “Si Jesus tege Nasarit.”
JOH 18:8 Minikagi si Jesus, “Tapay a minikagi diyà kenyo te siak se inahà niyo. Na, aw benal siak se inahà niyo, pebeyai niyo se menge doma ko seini.”
JOH 18:9 Pineokit te inikagi din sìyan, netoman se kagi tapay intawal-tawal din, te eked kebàti se otaw insalig te Timanem diyà kandin.
JOH 18:10 Na, tinagnos i Pedro se podok din aw tinigbas din se sineligan te ontò pengolo te simbahan, aw nepalot se telinga din lenged te kowanan. Si Malco se ngadan din.
JOH 18:11 Minikagi si Jesus diyà ki Pedro, “Olii se podok diyà te lomà, so keilangan detengan a te kelimahan imbegay te Amay ko diyà kanak.”
JOH 18:12 Penga niyan, se menge sondalo aw kapitan dan, aw menge otaw egtonggò te simbahan te Judiyo, dinakep dan si Jesus aw ginapos dan sikandin.
JOH 18:13 Inibing dan onà doton ki Anas, so si Anas se ogangan i Caifas ininang ontò pengolo te simbahan dalem te omay sìyan.
JOH 18:14 Si Caifas se tapay minikagi diyà te menge obanen te Judiyo te mèpiya aw olò sebad se otaw imetayan amon mekelowà se kedita te otaw.
JOH 18:15 Nayan, si Simon, se doma ngadan din si Pedro, aw doma din sebad tinoledaan i Jesus, timelokon dan ki Jesus. Pegdateng dan doton te balay te ontò pengolo te simbahan, timaking se sìyan sebad tinoledaan ki Jesus doton te dowangen te balay, so kinilala sikandin te ontò pengolo te simbahan.
JOH 18:16 Meneng mig-ogpà si Pedro kidoen te lowà te alad medapag te lelebangan. Na, sìyan doma tinoledaan, kinilala sikandin te ontò pengolo te simbahan. Limowà sikandin, aw nemoyò diyà te bayi migtonggò te lelebangan te alad te ipeawop din heman si Pedro.
JOH 18:17 Mig-insà se bayi migtonggò te lelebangan ki Pedro, kagi din, “Indà? Sikona se sebad tinoledaan te otaw sida dinakep.” Meneng timaba si Pedro, “Kenà ko.”
JOH 18:18 Nayan, mig-antay te apoy se menge sineligan aw otaw egtonggò te simbahan amon meg-ingadang dan, so megenaw se delem sìyan. Migdoma-doma si Pedro kandan aw mig-ingadang heman.
JOH 18:19 Nayan, mig-insà se ontò pengolo te simbahan diyà ki Jesus tepad te menge tinoledaan din aw intoladà din.
JOH 18:20 Timaba si Jesus, “Netegahan te kedita te otaw se inikagi ko, so gayed a egtoladà kidoen te menge simbahan te Judiyo aw kidoen heman te dakel simbahan dini te Jerusalem egtiponan te kedita te Judiyo. Wedà ko elesi se intoladà ko.
JOH 18:21 Meneng ikà eg-insà kanak. Labi pa mèpiya aw meg-insà ka diyà te menge otaw dimineg kanak, so netegahan dan aw eden se intoladà ko.”
JOH 18:22 Peg-ikagi din kenyan, doen sebad otaw egtonggò nenampak ki Jesus. Minikagi heman sikandin, “Eked kepakay aw iling kenyan se pegtaba no diyà te ontò pengolo te simbahan.”
JOH 18:23 Minikagi si Jesus, “Simpana medaet se inikagi ko, indani kay aw eden se kedaet niyan. Meneng aw wedad kedaet diyà te inikagi ko, medaet se pegpenampak no kanak.”
JOH 18:24 Penga niyan, todà ginapos se belad i Jesus, aw impeibing sikandin i Anas doton te ontò pengolo te simbahan si Caifas.
JOH 18:25 Dalem niyan, mig-ingadang pa si Pedro. Mig-insà se doma otaw, “Indà? Sikona besi heman se sebad diyà te menge tinoledaan din.” Meneng migbolon si Pedro aw minikagi, “Kenà ko.”
JOH 18:26 Kidoen heman se sebad sineligan te ontò pengolo te simbahan. Sikandin se kedowa te sineligan pinelotan i Pedro te telinga din. Minikagi sikandin diyà ki Pedro, “Sikona besi se kinità ko migdoma kandin kidoen te kekeyowan.”
JOH 18:27 Todà heman migbolon si Pedro, aw penga niyan migkolaak se manok.
JOH 18:28 Penga niyan, inibing dan si Jesus lekat te balay i Caifas pesalo doton te balay inogpaan te gobirnador insawol te gobirno te Roma. Ontò dan limapos se pegpesalo dan doton. Wedà awop se menge obanen te Judiyo diyà te balay te gobirnador amon eked dan pekelàpang te punù ingkeliwat i Moises kandan tepad te pegpelinis, so simpana mawop dan diyà te balay te otaw kenà Judiyo, eked kepakay aw makop dan komaen te Pista te Pegpelowà.
JOH 18:29 Yan se doun te limowà diyà kandan se gobirnador si Pilato, aw minikagi, “Eden lay se dimanda niyo tepad te otaw seini?”
JOH 18:30 Timaba dan, “Simpana wedad salà ininang din, eked day ibingi dini kamno amon ipelumun nikaw.”
JOH 18:31 Minikagi si Pilato, “Mèpiya aw sikiyo se megpelumun kandin tepad te menge punù egtoloen niyo.” Minikagi se menge obanen te Judiyo, “Meneng eked kepakay diyà te gobirno te Roma aw sikami se mengimatay te otaw ipelumun day.”
JOH 18:32 Neinang iyan amon metoman se inikagi i Jesus tepad te keokit te pegkematay din.
JOH 18:33 Minawop si Pilato te balay din. Impeangay din heman si Jesus aw mig-insà, “Sikona lay se Selotan te menge Judiyo?”
JOH 18:34 Minikagi si Jesus, “Lekat lay te kamno aneng-aneng se ininsà no, aw lekat lay iyan te doma otaw mig-indan kamno tepad kanak?”
JOH 18:35 Timaba si Pilato, “Kenà a Judiyo. Meneng menge doma no Judiyo aw menge pengolo te simbahan niyo se nengibing kamno dini kanak. Indani a aw eden se salà ininang nikaw.”
JOH 18:36 Timaba si Jesus, “Kenà dini te keneyonan se peglowan ko. Simpana dini te keneyonan se peglowan ko, yan domapit se menge sakop ko kanak amon eked a dekepi te menge obanen te Judiyo. Meneng kenà dini te keneyonan se peglowan ko.”
JOH 18:37 Minikagi si Pilato, “Ontò ka kedì selotan.” Minikagi si Jesus, “Ee. Benal se inikagi no te selotan a, so yan se doun te migpekeotaw a. Insogò a dini te keneyonan amon meg-indan a te kebenalan. Egpenenelanen a te kedita te otaw migpesakop diyà te kebenalan.”
JOH 18:38 Minikagi si Pilato, “Wedad palos otaw metaga-taga aw eden se ontò kebenalan.” Nayan, penga te peg-ikagi i Pilato kenyan, todà limowà diyà te balay din, aw minikagi diyà te menge obanen te Judiyo netipon kidoen, “Wedad palos salà din kinità ko.
JOH 18:39 Na, kelikit te Pista te Pegpelowà, doen ketanem niyo dini te doen ipelowà ko diyà kenyo sebad otaw kineleboso. Meibeg kaw lay aw ipelowà ko se Selotan te menge Judiyo?”
JOH 18:40 Migbelobansag dan, “Kenà otaw seini se ipelowà no, meneng ibeg day si Barabas.” (Na, si Barabas se megdedempasay.)
JOH 19:1 Penga niyan, impeibing i Pilato si Jesus doton didalem te balay aw impebadas.
JOH 19:2 Penga te pegbadas te menge sondalo kandin, linekò dan se belagen doen tigis, aw yan se insangkob diyà te olo din iling te korona te selotan. Impesaol dan heman sikandin te melalag saol te selotan.
JOH 19:3 Penga niyan, migpelingo-lingo dan dimuyun kandin iling te pegduyun dan te selotan, aw minikagi dan, “Iduyun sikona Selotan te menge Judiyo.” Nenampak dan heman kandin.
JOH 19:4 Todà limowà si Pilato te balay, aw minikagi diyà te menge otaw netipon, “Na, ipelowà ko den sikandin dini kenyo amon ketegahan niyo te wedad palos salà din kinità ko.”
JOH 19:5 Penga niyan, limowà si Jesus te balay. Sinengkoban pa sikandin te belagen doen tigis, aw impesaol pa te melalag saol te selotan. Minikagi si Pilato, “Na, tengtengi niyo sikandin.”
JOH 19:6 Meneng se menge pengolo te simbahan aw otaw egtonggò te simbahan, pegkità dan ki Jesus, migbelobansag dan, “Imetayi sikandin. Lensangi diyà te kros.” Minikagi si Pilato, “Sikiyo se mengibing kandin aw meglansang kandin diyà te kros amon matay, so se kenaken, kinità ko te wedad salà din.”
JOH 19:7 Minikagi se menge obanen te Judiyo, “Doen punù ingkeliwat i Moises diyà kenami linèpangan din, aw yan se doun te keilangan ipelumun sikandin aw imetayan, so minikagi te sikandin se Batà te Timanem.”
JOH 19:8 Pegdineg i Pilato te Batà te Timanem si Jesus, labi pa nelemitan.
JOH 19:9 Todà din inibing si Jesus doton didalem te balay aw todà din ininsà, “Kenan ka lay lekat?” Meneng wedà taba si Jesus.
JOH 19:10 Nepela si Pilato, aw minikagi, “Mèpiya aw tomaba ka, so netegahan no te siak se mepakay somogò aw ipelowà ka aw ipelansang ka diyà te kros amon imetayan.”
JOH 19:11 Minikagi si Jesus, “Simpana wedà ka pelowani te Timanem, eked ka pekelowan diyà kanak seini. Yan se doun te labi pa mebegat se salà te otaw migpeibing kanak dini kamno.”
JOH 19:12 Pegdineg i Pilato kenyan, ibeg din megpelowà ki Jesus. Meneng migbelobansag se menge obanen te Judiyo, “Aw ipelowà no sikandin, meinang ka poon te selotan tadon si Cesar, so aw megpelingo-lingo se otaw selotan, poon sikandin i Cesar.”
JOH 19:13 Pegdineg i Pilato te kagi dan, inibing din si Jesus doton te lowà te balay, aw nenenoo kidoen te oseyanan iningedanan Gabata te otaw eg-ikagi te Hebreo, meneng se kelebadan niyan, “Tindeganan Bato.”
JOH 19:14 Aldaw sìyan, yan se aldaw te pegtegilan dan te Pista te Pegpelowà. Sagwa agpet den alas dosi, minikagi si Pilato, “Na, seini se selotan niyo.”
JOH 19:15 Meneng migbelobansag dan, “Imetayi sikandin. Imetayi. Lensangi diyà te kros.” Minikagi si Pilato, “Meibeg kaw lay te ipelansang ko se selotan niyo diyà te kros?” Timaba se menge pengolo te simbahan, “Sebad olò se selotan day, aw yan si Cesar.”
JOH 19:16 Penga niyan, impeibing i Pilato si Jesus amon ilansang diyà te kros.
JOH 19:17 Nayan, inibing si Jesus te menge sondalo, aw impetiang dan kandin se kros lensangan kandin. Nesayo dan lekat te Jerusalem aw dimoton dan te bontod iningedanan Golgota te otaw eg-ikagi te Hebreo, meneng se kelebadan niyan, “Tòlan te Olo.”
JOH 19:18 Pegdateng dan doton, inlansang dan sikandin diyà te kros. Doen heman dowa otaw doma din inlansang diyà te kros intollok diyà te tangkil din, aw si Jesus diyà te tengà-tengà.
JOH 19:19 Doen insolat i Pilato aw impesawol din iyan doton diatas te olo i Jesus, kagi niyan, “Seini si Jesus tege Nasarit, Selotan te menge Judiyo.”
JOH 19:20 Medita se Judiyo migbasa kenyan, so medapag kidoen se lonsod te Jerusalem. Insolat iyan te telo kemolò te kagi, Hebreo, aw Latin, aw Griego.
JOH 19:21 Minikagi se menge pengolo te simbahan te Judiyo diyà ki Pilato, kagi dan, “Mèpiya aw eked no solati se kagi, ‘Seini se Selotan te menge Judiyo.’ Keilangan iselilin no se kagi, ‘Migpelingo-lingo se otaw seini Selotan te menge Judiyo.’”
JOH 19:22 Timaba si Pilato, “Eked ko den todai se insolat ko.”
JOH 19:23 Penga te peglansang te menge sondalo ki Jesus diyà te kros, inabat dan se penenaktun linowas din. Pigtalad-talad dan iyan te epat talad amon doen meabat te teg sebad-sebad kandan. Inabat dan heman se melayat saol i Jesus tinibok se inabel wedà palos tebili.
JOH 19:24 Yan se doun te minikagi dan, “Mèpiya aw eked tadon lisii se saol din. Meneng labi pa mèpiya aw megbonot kidon aw sinu se mekeabat kenyan.” Pegbonot dan kenyan, yan netoman se pakang insolat diyà te kagi te Timanem, “Megtalad-talad dan te penenaktun ko, aw megbonot dan heman tepad te saol ko.”
JOH 19:25 Yan se ininang te menge sondalo. Dalem niyan, doen menge bayi timindeg kidoen medapag te kros linensangan ki Jesus. Yan se inay din, aw kedowa te inay din, aw esawa i Clopas si Maria, aw si Maria tege Magdala.
JOH 19:26 Pegkità i Jesus te inay din aw sìyan sebad tinoledaan nedekelan din te pedowan, minikagi diyà te inay din, “Inà, sìyà den se batà nikaw.”
JOH 19:27 Penga niyan, minikagi heman si Jesus diyà te sìyan tinoledaan din, “Sìyà den se inay nikaw.” Lekat te aldaw sìyan, impeogpà te tinoledaan sìyan se inay i Jesus kidoen te balay din.
JOH 19:28 Penga niyan, netegahan i Jesus te nepenga din den se kedita te insogò te Amay din kandin, aw minikagi, “Nelao a.” Pineokit kenyan, netoman se pakang tepad kandin tapay insolat diyà te kagi te Timanem.
JOH 19:29 Doen sibolan sinolan te bino sinengedan te wayeg. Inagem dan se ispongha intangen diyà te panga te kayo hisopo, aw impesopsop dan iyan ki Jesus.
JOH 19:30 Penga te pegsopsop din, minikagi, “Nepenga den.” Penga niyan, timikelong sikandin aw nematay.
JOH 19:31 Nayan, neinang iyan te meapon te aldaw te pegtegilan dan te Pista te Peglaklak. Ibeg te menge obanen te Judiyo, meabat lekat te kros se lawa te otaw nematay te eked pa sallep se aldaw, so se keeldawan niyan, yan se Sebado ontò melangkaw aldaw diyà te menge Judiyo. Yan se doun te nemoyò dan ki Pilato te pentigen te sondalo se benis te menge otaw inlansang diyà te kros amon ayas dan matay.
JOH 19:32 Yan insogò din se menge sondalo, aw pigpantig dan se benis te sebad otaw inlansang diyà te tangkil i Jesus, aw penga niyan diyà heman te sebad tangkil din.
JOH 19:33 Meneng pegdateng dan doton ki Jesus, kinità dan te nematay den sikandin, aw yan se doun te wedà dan pentigi se kandin benis.
JOH 19:34 Meneng doen sebad sondalo nenogseng te kilid din te dilek, aw yan dimelog se dipanog aw wayeg lekat te kilid din.
JOH 19:35 Kinità ko se kedita nini in-indan ko den kenyo, aw benal se kagi ko. Netegahan ko te benal iyan neinang, aw ibeg ko memenal kaw heman.
JOH 19:36 Peg-inang te menge sondalo kenyan, netoman se pakang tapay insolat diyà te kagi te Timanem, “Wedad palos tòlan din pentigen.”
JOH 19:37 Doen heman doma pakang tapay insolat diyà te kagi te Timanem tepad te menge Judiyo, “Kitaen dan sikandin tapay dan dogsengen.”
JOH 19:38 Nayan, doen sebad otaw si Jose tege Arimatiya timaking ki Jesus, meneng mig-eles-eles te pegtaking din kandin so nelemitan sikandin te menge obanen te Judiyo. Dimoton si Jose ki Pilato aw mig-insà aw mepakay aw ebaten din se lawa i Jesus lekat te kros amon ilebeng din. Mepakay iyan diyà ki Pilato, aw yan dimoton aw inabat din se lawa.
JOH 19:39 Doen heman timaking kandin si Nicodemo. Sikandin se dimoton ki Jesus kedengan te delem. Inibing din heman se menge keliman kilo bebolong metinadeg iningedanan mira aw alos pigsanged.
JOH 19:40 Inibing dan se lawa i Jesus, aw ginakes dan iyan te sapot sipat te metinadeg, so yan se ketanem te menge Judiyo aw ilebeng se lawa te nematay.
JOH 19:41 Doen kekeyowan medapag te bontod linensangan ki Jesus. Doen lebeng kidoen kaling inewangan diyà te pangpang, aw wedad pa palos inlebeng.
JOH 19:42 Yan se linebengan dan te lawa din, so medapag, aw agpet den somallep se aldaw, aw keeldawan niyan se aldaw te peg-etod.
JOH 20:1 Nayan, te wedà pa libtak se aldaw te iselem te Linggo, ontò limapos si Maria tege Magdala dimoton te lebeng i Jesus. Kinità din se lebeng din neowang so tapay den nekelid se dakel bato insampeng.
JOH 20:2 Penga niyan, kimagnan sikandin aw dimoton ki Pedro aw sìyan sebad tinoledaan ontò nedekelan i Jesus te pedowan. Minikagi sikandin, “Neabat se lawa te Pengolo tadon lekat te lebeng. Wedà day ketegahi aw kenan iyan soli.”
JOH 20:3 Penga niyan, timindeg si Pedro aw sìyan sebad tinoledaan aw dimoton dan te lebeng.
JOH 20:4 Kimagnan se didowa dan, meneng sìyan sebad tinoledaan, labi pa megaen diyà ki Pedro, aw yan se onà dimateng doton te lebeng.
JOH 20:5 Simelib sikandin amon tomengteng doton didalem. Kinità din se sapot kidoen, meneng wedà sikandin awop.
JOH 20:6 Penga niyan, nekemodi si Pedro dimateng aw dimeleg doton didalem te lebeng. Kinità din se sapot kidoen.
JOH 20:7 Kinità din heman se kelobaw intenges diyà te olo. Wedà iyan pesipati diyà te sapot, meneng linepì aw tinani.
JOH 20:8 Penga niyan, minawop heman se tinoledaan nekeonà dimateng. Pegkità din te kedita niyan, nemenal sikandin te ontò benal neantay si Jesus lekat te nematay,
JOH 20:9 so lamig te aldaw sìyan, wedà pa kelebeti te menge tinoledaan se pakang tapay insolat diyà te kagi te Timanem, te keilangan meantay si Jesus lekat te nematay.
JOH 20:10 Penga niyan, minolì se didowa tinoledaan i Jesus doton te balay dan.
JOH 20:11 Nayan, mig-ogpà pa si Maria tege Magdala doton te lowà te lebeng aw migkelag. Dalem te pegkelag din, simelib amon tomengteng doton didalem.
JOH 20:12 Kinità din kidoen se didowa anghil nenaol te mepotì. Nenenoo dan kidoen te linebengan ki Jesus, sebad se lenged te olo, aw sebad se lenged te benis.
JOH 20:13 Mig-insà dan, “Atà, nengà lay migkelag ka?” Timaba sikandin, “So neabat se lawa te Pengolo ko, aw wedà ko ketegahi aw kenan iyan soli.”
JOH 20:14 Penga te peg-ikagi din kenyan, miniling sikandin aw kimità ki Jesus timindeg kidoen te lowà te lebeng, meneng wedà kilala kandin.
JOH 20:15 Mig-insà si Jesus, “Atà, nengà lay migkelag ka? Sinu lay se inahà nikaw?” Meneng mig-aneng-aneng si Maria te sikandin se otaw egtonggò te kekeyowan sìyan, aw yan se doun te minikagi sikandin, “Sir, aw sikona se nengabat te lawa din, indani a aw kenan iyan soli, so ibingen ko.”
JOH 20:16 Minikagi si Jesus, “Maria.” Yan siminalo si Maria diyà kandin aw minikagi te kagi te Hebreo, “Raboni.” (Se kelebadan niyan, “Menenoladà.”)
JOH 20:17 Minikagi si Jesus, “Ikà eg-awid kanak, so wedà a pa pegpeengat doton te Amay ko. Meneng doton ka te menge kedowa ko, aw peg-indan ka kandan te molì a pa doton te Amay ko, doton te Timanem ko. Sikandin se Amay niyo heman aw Timanem niyo.”
JOH 20:18 Penga niyan, dimoton si Maria tege Magdala te menge tinoledaan i Jesus aw minikagi, “Kinità ko den gina se Pengolo.” Penga niyan, in-indan din diyà kandan se kedita te inikagi i Jesus diyà kandin.
JOH 20:19 Pegkedelem te Linggo sìyan, netipon se menge tinoledaan i Jesus kidoen te sebad balay, aw tinakep dan se lelebangan niyan amon eked dan kitai, so nelemitan dan te menge obanen te Judiyo. Pengkey netakep se lelebangan, meneng pegketà dimateng si Jesus timindeg kidoen te tengà-tengà dan, aw minikagi, “Ibeg ko melinaw se pedowan niyo.”
JOH 20:20 Penga niyan, impekità din diyà kandan se menge palì diyà te belad din aw kilid din. Ontò neluba se menge tinoledaan din te pegkità dan te Pengolo.
JOH 20:21 Penga niyan, todà minikagi si Jesus, “Ibeg ko melinaw se pedowan niyo. Iling te pegsogò te Amay ko kanak, yan isogò ko den heman sikiyo.”
JOH 20:22 Penga te peg-ikagi din kenyan, mig-edop sikandin diyà kandan aw minikagi, “Domateng se Espiritu Santo kenyo.
JOH 20:23 Aw pegwedaden niyo se salà te doma otaw, pegwedaden iyan te Timanem. Meneng aw eked niyo pegwedadi se salà te doma otaw, eked iyan pegwedadi te Timanem.”
JOH 20:24 Nayan, si Tomas, se doma ngadan din si Pingin, sikandin se sebad diyà te sempolò teg dowa tinoledaan i Jesus. Pegpekità i Jesus diyà kandan, wedad kidoen si Tomas.
JOH 20:25 Yan minikagi se doma tinoledaan diyà ki Tomas, “Migpekità se Pengolo kenami.” Meneng minikagi si Tomas, “Eked a pemenal te neantay sikandin lekat te nematay singed aw onà ko kitaen se palì te lansang diyà te belad din, aw isawol ko se intetodò ko diyà te awang niyan, aw ilamen ko heman se kilid din.”
JOH 20:26 Penga te sebad simana, todà netipon se menge tinoledaan i Jesus doton te balay, aw kidoen heman si Tomas doma dan. Netakep se lelebangan, meneng pegketà dimateng si Jesus timindeg diyà te tengà-tengà dan, aw minikagi, “Ibeg ko melinaw se pedowan niyo.”
JOH 20:27 Penga niyan, minikagi sikandin diyà ki Tomas, “Soli se intetodò no dini. Tengtengi se belad ko. Ilami heman se kilid ko. Ikà egdowa-dowa, meneng pemenal ka kanak.”
JOH 20:28 Meneng olò minikagi si Tomas, “Sikona se Pengolo ko. Sikona se Timanem ko.”
JOH 20:29 Minikagi si Jesus, “Nemenal ka den so kimità ka den kanak. Meneng labi pa meluba se menge otaw memenal pengkey wedà dan kità kanak.”
JOH 20:30 Medita pa se kepelahan ininang i Jesus kinità te menge tinoledaan din, meneng wedà ko solati se kedita niyan diyà te libro seini.
JOH 20:31 Meneng insolat ko ini amon memenal kaw den te si Jesus se Misiyas megpelowà kenitadon aw sikandin se Batà te Timanem. Aw memenal kaw kandin, begayan kaw te kaling pedowan wedad temanan.
JOH 21:1 Penga niyan, todà migpekità si Jesus diyà te menge tinoledaan din kidoen te kilid te Lanaw te Tibiryas. Meg-indan a den kenyo tepad te pegpekità din kandan.
JOH 21:2 Netipon kidoen se menge tinoledaan i Jesus. Se kedita dan si Simon, se doma ngadan din si Pedro, aw si Tomas, se doma ngadan din si Pingin, aw si Natanael tege Kana sakop te Galiliya, aw sìyan didowa batà i Sebedeo, aw dowa heman se doma tinoledaan i Jesus.
JOH 21:3 Minikagi si Pedro, “Memokot a.” Minikagi heman se doma, “Tomaking kay heman kamno.” Penga niyan, timegbeng dan doton te lanaw, aw simakay dan te belangay. Pengkey timayod dan te delem, meneng wedad neabat dan.
JOH 21:4 Te wedà pa ontò libtak se aldaw, kimidoen si Jesus timindeg diyà te kilid te lanaw, meneng wedà pa ketegahi te menge tinoledaan din aw sinu iyan, so mediyò dan pa.
JOH 21:5 Timawal si Jesus kandan, “Elew, doen neabat niyo?” Timaba dan, “Wedad palos.”
JOH 21:6 Minikagi si Jesus, “Todà niyo degdagi se pokot doton te kowanan, aw yan doen meabat niyo.” Penga niyan, todà dan indagdag se pokot. Meneng wedà dan kelolan se ikan so ontò medita se neabat.
JOH 21:7 Sìyan tinoledaan ontò nedekelan i Jesus te pedowan, yan se minikagi diyà ki Pedro, “Sikandin se Pengolo.” Pegketaga-taga i Pedro kenyan, nenaol sikandin so wedad saol din te nemokot. Kimahang sikandin doton te lanaw amon ayas domateng doton te kilid.
JOH 21:8 Nekemodi se menge doma tinoledaan simakay te belangay. Ginoyod dan se pokot nepenò te ikan, so medapag dan diyà te kilid te lanaw, olò menge kesyaman mitros se kediyò dan.
JOH 21:9 Pegdateng dan doton te kilid, kinità dan se pan, aw doen heman menge ikan tinoeg den diyà te baga.
JOH 21:10 Minikagi si Jesus, “Ibingi niyo diyà se menge ikan neabat niyo gina.”
JOH 21:11 Yan nenayit si Pedro diyà te belangay aw inanggin din se pokot. Nepenò iyan te dedakel ikan, sebad gatos keliman teg telo se kedita niyan. Pengkey ontò medita se ikan, meneng wedà kelisì se pokot.
JOH 21:12 Penga niyan, minikagi si Jesus, “Ayas kaw den, aw kaen kaw.” Wedad tinoledaan mig-insà ki Jesus aw sinu sikandin, so netegahan den dan te sikandin se Pengolo.
JOH 21:13 Penga niyan dimoton si Jesus aw inabat din se pan aw ikan, aw inteped din diyà kandan.
JOH 21:14 Yan se iketelo te pegpekità i Jesus diyà te menge tinoledaan din penga te pegkeantay din lekat te nematay.
JOH 21:15 Penga te pegkaen dan, mig-insà si Jesus diyà ki Pedro, “Simon, batà i Juan, pengkey dakel se pedowan te menge doma no kanak, labi lay pa dakel se kamno pedowan kanak?” Timaba si Pedro, “Ee, Pengolo. Netegahan no te ontò dakel se pedowan ko kamno.” Minikagi si Jesus, “Peg-ipat ka te menge sakop ko.”
JOH 21:16 Mig-insà si Jesus te ikedowa, “Simon, batà i Juan, dakel lay se pedowan no kanak?” Timaba si Pedro, “Ee, Pengolo. Netegahan no te ontò dakel se pedowan ko kamno.” Minikagi si Jesus, “Pegtonggò ka heman te menge sakop ko.”
JOH 21:17 Mig-insà si Jesus te iketelo, “Simon, batà i Juan, ontò lay dakel se pedowan no kanak?” Nelidò se pedowan i Pedro so mig-insà si Jesus kandin te iketelo aw ontò dakel se pedowan din kandin. Timaba sikandin, “Pengolo, netegahan no se kedita. Netegahan no te ontò dakel se pedowan ko kamno.” Minikagi si Jesus, “Peg-ipat ka te menge sakop ko egkedekelan ko te pedowan.
JOH 21:18 Eneng-enengi se ikegiyen ko kamno. Te kaling ka pa otaw, sikona se nenaol te kamno pegkeotawun, aw sikona heman se nemallì aw kenan ka pesalo. Meneng aw megketemoay ka, ibegay no se belad no amon geposen ka te menge doma otaw, aw ibingen ka dan doton te kenà no ibeg.”
JOH 21:19 Yan se inikagi i Jesus amon ipetaga-taga din kandin aw eden se keokit te pegkematay i Pedro amon iduyun se Timanem. Penga niyan, minikagi si Jesus, “Gayed ka taking kanak.”
JOH 21:20 Penga niyan, miniling si Pedro, aw kinità din kidoen se sìyan tinoledaan ontò nedekelan i Jesus te pedowan. Yan se timangkil diyà te Pengolo kedengan te pegpengaen dan aw mig-insà aw sinu se megtolok kandin.
JOH 21:21 Na, pegkità i Pedro kandin, mig-insà sikandin, “Pengolo, eden lay heman se domateng kwani kandin?”
JOH 21:22 Timaba si Jesus, “Simpana ibeg ko eked sikandin kematay lamig te aldaw te peglikò ko, wedad labut no kenyan. Meneng keilangan gayed ka tomaking kanak.”
JOH 21:23 Yan migpeindanay se menge otaw egpemenal ki Cristo te eked kematay se tinoledaan sìyan. Meneng kenà niyan se inikagi i Jesus, so se inikagi din, “Simpana ibeg ko eked sikandin kematay lamig te aldaw te peglikò ko, wedad labut no kenyan.”
JOH 21:24 Se sìyan tinoledaan ontò nedekelan i Jesus te pedowan, yan se mig-indan te kedita nini aw simolat kani. Nedengeg heman sikandin so ontò keseligan se kagi din.
JOH 21:25 Meneng medita pa se ininang i Jesus wedà ko solati dini. Simpana isolat se kedita niyan, aneng-aneng ko eked besi pekeombà se kedita te libro dini te keneyonan.
ACT 1:1 Elew Teofilo. Tagnà pegsolat ko kamno kedengan, mig-indan a te kedita te ininang i Jesus aw intoladà din heman lekat te ketebò te pegtoladà din
ACT 1:2 taman te pegkeengat din doton te langit. Pegkeantay din lekat te nematay, melikit si Jesus migpekità diyà te menge sogounun tapay pinemallì din. Migtoladà heman kandan tepad te peglowan te Timanem. Dalem te kepatan se aldaw, melikit sikandin migpekità diyà kandan. Yan ontò dan netegahan te neantay sikandin lekat te nematay, so kinità dan sikandin. Te wedà pa keengat doton te langit, migpunù si Jesus kandan pineokit te Espiritu Santo.
ACT 1:4 Pegdoma i Jesus kandan, migpunù sikandin te eked dan pa kesayo lekat te Jerusalem, so minikagi sikandin, “Keilangan megtagad kaw te pegketoman te impakang te Timanem, so yan se tapay ko intoladà kenyo.
ACT 1:5 Kedengan, pineokit te wayeg se pegbonyag i Juan. Meneng sebad kemolò se pegbonyag te Timanem kenyo, so te eked kenamay, domateng se Espiritu Santo kenyo.”
ACT 1:6 Pegketipon te menge sogounun i Cristo, mig-insà dan kandin, kagi dan, “Pengolo, megpelowà ka lay den aw lomowan ka lay den kenami menge Judiyo?”
ACT 1:7 Timaba si Jesus, kagi din, “Eked niyo ketegahi aw kano iyan ketoman, so Timanem Amay ko olò se netaga-taga aw kano iyan, so lekat iyan te kandin ibeg.
ACT 1:8 Meneng ikà niyo egkelibel kani. Aw domateng se Espiritu Santo kenyo, ketebangan kaw din amon meg-indan kaw tepad kanak doton te Jerusalem, aw kidoen heman te kedita te ogpeanan te Judiya aw Samarya, aw pengkey taman te kebelad te keneyonan.”
ACT 1:9 Penga niyan te telobo dan pa timengteng ki Jesus, neengat sikandin doton te langit. Neselibengan sikandin te labon.
ACT 1:10 Peglengag dan doton te langit, pegketà dimateng se didowa anghil nenaol te mepotì.
ACT 1:11 Minikagi se anghil, “Sikiyo tege Galiliya, ikà niyo eglengag. Neengat den si Jesus doton te langit, meneng todà sikandin lomikò dini te tanà onawa te pegkeengat din kinità niyo seini.”
ACT 1:12 Penga niyan, nesayo se menge sogounun i Cristo lekat te bontod sìyan iningedanan Olibo. Minolì dan doton te Jerusalem. Sebad kilomitro se kediyò niyan lekat te bontod sìyan.
ACT 1:13 Pegdateng dan doton te Jerusalem, netipon dan doton te gibelayan te balay inogpaan dan. Seini se otaw netipon. Si Pedro aw si Juan aw si Santiago aw si Andres, si Felipe aw si Tomas, si Bartolome aw si Mateo, si Santiago batà i Alfeo, si Simon meyseg, aw si Judas batà te kesangay i Santiago.
ACT 1:14 Melikit dan netipon aw migsebad se pedowan te kedita dan migtawal-tawal diyà te Timanem. Netipon heman kidoen se menge bayi, aw menge kedowa i Jesus, aw inay din si Maria.
ACT 1:15 Doen aldaw netipon se medita otaw egpemenal, dagpò dan menge sebad gatos kelowan. Timindeg si Pedro kidoen aw minikagi,
ACT 1:16 “Menge kedowa ko, netoman den se kagi te Timanem impesolat te Espiritu Santo ki David tepad ki Judas. Sikandin se nengibing te menge otaw migdakep ki Jesus.
ACT 1:17 Benal si Judas se doma day, so sikandin heman se pinemallì i Jesus amon megtelaban kandin.”
ACT 1:18 (Doen kwarta imbegay ki Judas tandà te peg-inang din te medaet, aw yan se imbayad din te pawà. Penga niyan, nedagdag si Judas aw migbeto se getek din. Nelowà se tegaken din aw nematay.
ACT 1:19 Netegahan iyan te kedita te otaw dini te Jerusalem. Iningedanan se pawà sìyan Akeldama. Se kelebadan niyan, “Pawà te Dipanog.”)
ACT 1:20 “Doen kagi tapay insolat diyà te libro te Delangan, ‘Kebàtan se inogpaan din. Wedad otaw meg-ogpà kidoen.’ Doen heman insolat, ‘Mèpiya aw isawol se doma otaw somelilin kandin.’ Yan se kagi impesolat te Timanem.
ACT 1:21 Nayan, mèpiya aw pemellien day se doma otaw kimità ki Jesus neantay. Mepakay olò aw pemellien se otaw gayed egtaking kenami kedengan dalem te pegdoma i Jesus kenami, lekat te pegbonyag i Juan ki Jesus lamig te pegkeengat din doton te langit.”
ACT 1:23 Penga niyan, impesolat dan se ngadan te dowa otaw, si Matias aw si Jose iningedanan ki Justo, se doma ngadan din si Barsabas.
ACT 1:24 Penga niyan, migtawal-tawal dan diyà te Timanem, “Pengolo, netegahan no se pedowan te kedita te otaw. Yan petega-tegahi kenami aw sinu se otaw pinemallì no
ACT 1:25 somelilin ki Judas aw meinang sogounun megtelaban kenami, se terbaho tinenanan i Judas pesalo doton te temanan din.”
ACT 1:26 Penga te pegtawal-tawal dan, migbonot dan. Penga niyan, si Matias se nepallì. Impeakop sikandin doma te sempolò tegusà sogounun i Cristo.
ACT 2:1 Pegdateng te aldaw te pista iningedanan Pentekostes, netipon se kedita te otaw nemenal ki Jesus doton te sebad balay.
ACT 2:2 Pegketà dinineg te kedita dan se logo-logo lekat te langit, iling te kelamag ontò mebandes. Migbelinut se logo-logo doton didalem te balay netiponan dan.
ACT 2:3 Penga niyan, kinità dan se legdeg iling te apoy timeped diyà te teg sebad-sebad kandan, aw simelà iyan diyà te olo dan.
ACT 2:4 Yan dimateng se Espiritu Santo kandan. Nekeikagi den dan te medita kemolò kagi te doma otaw wedà dan peg-ilingi, so impeikagi dan te Espiritu Santo.
ACT 2:5 Doen medita Judiyo egpenimanem kidoen te Jerusalem lekat te kedita te ogpeanan te keneyonan.
ACT 2:6 Pegdineg dan te kagi te otaw nebegayan te Espiritu Santo, ontò medita se otaw netipon. Ontò dan nepela, so dinineg te teg sebad-sebad kandan se kemolò te kagi din inikagi te menge otaw egpemenal.
ACT 2:7 Ontò nepela se otaw netipon. Minikagi dan, “Pengkey tege Galiliya se kedita dan,
ACT 2:8 meneng nekeikagi dan te medita kemolò kagi tadon wedà dan palos peg-ilingi.
ACT 2:9 Medita se ogpeanan tinikedowan tadon, so doen menge tege Partya, aw tege Medya, aw tege Elam. Doen menge otaw lekat te Mesopotamya, aw Judiya, aw Kapadosya, aw Ponto, aw Asya.
ACT 2:10 Doen heman otaw tikedo te Frigya, aw Pampilya, aw Ehipto, aw menge ogpeanan te Libya medapag te Sirene. Doen menge kedowa tadon Judiyo lekat te Roma. Doen heman menge otaw kenà Judiyo egtolò te ketanem tadon Judiyo.
ACT 2:11 Doen tege Kreta aw tege Arabya. Mig-indan se menge tege Galiliya sìyan te mèpiya ininang te Timanem. Ontò kidon mekelabet te inikagi dan, so nekeikagi dan te medita kemolò kagi tadon.”
ACT 2:12 Ontò dan nepela aw migkebulung se aneng-aneng dan. Migpeinsaay dan, “Eden lay ini?”
ACT 2:13 Meneng doen heman menge doma otaw migtompuyus, kagi dan, “Nelangot dan te bino.”
ACT 2:14 Timindeg si Pedro sipat doma sempolò tegusà sogounun i Cristo kidoen. Penga niyan, minikagi sikandin amon domineg se kedita te otaw netipon. Kagi din, “Menge kedowa ko Judiyo, aw kedita niyo dini te Jerusalem, penenalan kaw, so doen ikegiyen ko kenyo.
ACT 2:15 Eden niyo aw nelangot kay te bino, so simpana minem se otaw te bino, eked pa kelangot, so medanà pa se aldaw.
ACT 2:16 Meneng sebad se neinang gina, so netoman den se kagi insolat te sebad telekeliwat te kagi te Timanem si Joel gebii,
ACT 2:17 kagi din, ‘Seini se kagi te Timanem. Aw agpet den se temanan te keneyonan, ibegay ko se Espiritu Santo diyà te kedita te otaw. Yan komeliwat se menge batà niyo te kagi ko. Komità se menge kaling pa otaw te ipekità ko kandan. Megtegeinep heman se menge obanen kenyan.
ACT 2:18 Aldaw sìyan, ibegay ko se Espiritu Santo diyà te kedita te otaw egtolò kanak, pengkey meama aw bayi. Komeliwat dan te kagi ko.
ACT 2:19 Ipekità ko se kepelahan doton te langit. Ipekità ko heman dini te tanà se ledyawan te dipanog aw apoy aw ebel.
ACT 2:20 Megkengitngit se aldaw. Megkelalag se bolan iling te dipanog. Metoman iyan te eked pa okomi te Pengolo tadon se kedita te otaw. Yan se aldaw ontò medengeg.
ACT 2:21 Meneng mekelowà lekat te salà se kedita te otaw memoyò diyà te Pengolo tadon.’ Yan se kagi te Timanem ingkeliwat i Joel.
ACT 2:22 “Na, menge kedomaan ko Judiyo, penenalan kaw te ikegiyen ko. Si Jesus tege Nasarit, yan se impetaga-taga te Timanem te sikandin se insogò din. Impetaga-taga din iyan pineokit te peg-inang din te inang metolos, aw kepelahan, aw ledyawan. Ontò niyo netegahan iyan so neinang iyan dini kenyo.
ACT 2:23 Pengkey tapay netegahan te Timanem aw eden se inangen niyo ki Jesus, meneng lekat te ibeg te Timanem se pegdakep niyo ki Jesus. Impelansang niyo sikandin te medaet otaw diyà te kros aw impeimatay niyo,
ACT 2:24 meneng inantay sikandin te Timanem lekat te nematay. Impelowà din si Jesus diyà te kemetayun, so eked daeg se kemetayun kandin.
ACT 2:25 Simolat se kemonaan tadon si David tepad ki Jesus, kagi din, ‘Netegahan ko te tebangan a te Pengolo aw wedad mekelamit kanak, so gayed a din egtekingan.
ACT 2:26 Yan ontò neluba se pedowan ko. Iduyun ko sikandin. Pengkey matay se lawa ko, doen pelimanan ko,
ACT 2:27 so eked a din pebeyai doton te lebeng. Eked kepakay diyà kandin aw meledak se lawa ko, so pinemallì a din.
ACT 2:28 Entayen a din lekat te nematay. Ontò neluba se pedowan ko so egdomaan a din.’ Yan se kagi ingkeliwat i David.
ACT 2:29 “Menge kedowa ko, ontò ko bengalen se kagi ko kenyo. Sìyan inikagi te kemonaan tadon gebii si David, kenà iyan tepad te kandin pegkeotawun, so nematay sikandin aw inlebeng se lawa din doton te ilib inewangan, aw penga niyan neledak. Kidoen pa se linebengan kandin lamig songkani.
ACT 2:30 Meneng te wedà pa kematay si David, sikandin se telekeliwat te kagi te Timanem. Doen impakang te Timanem te meinang selotan se sebad bowad-bowad i David, amon doen selotan lomowan iling te peglowan i David.
ACT 2:31 Migpeliman si David te pegketoman niyan, aw yan minikagi sikandin te meantay se Misiyas pelimanan din, so kagi din, ‘Eked sikandin pebeyai doton te lebeng. Eked kepakay diyà te Timanem aw meledak se lawa te Misiyas isogò din.’
ACT 2:32 Netoman den iyan, so inantay te Timanem si Jesus lekat te nematay, aw kinità te kedita day te neantay sikandin lekat te nematay.
ACT 2:33 Ininang den si Jesus melangkaw doton te langit aw timangkil te Amay din. Tinoman den te Timanem se pakang din ki Jesus te isogò se Espiritu Santo, aw yan se kinità niyo gina aw dinineg niyo.
ACT 2:34 Sìyan inikagi i David, kenà iyan tepad te kandin pegkeotawun, so wedà keengat se lawa i David doton te langit, meneng diyà pa te lebeng. Gebii minikagi si David, ‘Minikagi se Timanem diyà te Pengolo ko, Penenoo ka dini te tangkil ko
ACT 2:35 lamig dàgen ko se menge poon no aw ipetolò ko dan kamno.’
ACT 2:36 Eneng-enengi niyo. Pengkey inlansang niyo si Jesus diyà te kros amon matay, meneng sikandin se ininang te Timanem Pengolo aw Misiyas.”
ACT 2:37 Pegdineg te menge otaw te inikagi i Pedro, ontò neantag se pedowan dan. Mig-insà dan ki Pedro aw doma sogounun i Cristo, kagi dan, “Elew, megmeno kay?”
ACT 2:38 Timaba si Pedro, “Pegselsel kaw te salà niyo. Pegpebonyag kaw tandà te pegpemenal niyo ki Jesu Cristo. Aw memenal kaw, pegwedaden te Timanem se salà niyo, aw Espiritu Santo se ibegay kenyo.
ACT 2:39 Migpakang se Timanem te ibegay din se Espiritu Santo diyà kenyo, aw diyà te batà niyo, aw diyà te otaw mediyò, so ibegay din diyà te kedita te otaw tewalen din.”
ACT 2:40 Nenamay pa minikagi si Pedro diyà kandan. Migpunù sikandin, kagi din, “Ikà niyo egdoma te kedomaan niyo eg-inang te medaet, amon eked kaw pelumuni.”
ACT 2:41 Penga niyan, binonyagan dan se menge otaw nemenal te inikagi i Pedro. Doen menge telo melalan otaw nemenal te Timanem te aldaw sìyan, aw nekeakop dan diyà te otaw tapay nemenal.
ACT 2:42 Ebey dan nenenalan te intoladà te menge sogounun i Cristo. Egpetekingay se otaw egpemenal, aw egtipon dan amon megtawal-tawal diyà te Timanem, aw amon megbelà-belà te pan, iling te pegtoladà i Jesus kandan kedengan.
ACT 2:43 Mig-inang se sogounun i Cristo te inang metolos aw kepelahan. Yan ontò nepela se kedita te otaw.
ACT 2:44 Melikit netipon se menge otaw egpemenal. Sebad se ketig-epoan dan te kedònan dan,
ACT 2:45 aw imbeligyà dan se kedònan amon doen kwarta ibegay dan diyà te doma otaw tepad te kelimahan dan.
ACT 2:46 Kelikit te aldaw, netipon se kedita dan doton te dakel simbahan te Jerusalem, aw migbelà-belà dan te pan doton te kandan balay. Neluba se pedowan dan te pegsebad dan pegpengaen.
ACT 2:47 Gayed dan ipegduyun se Timanem. Sinagman dan te menge doma otaw. Kelikit te aldaw, dinogangan te Pengolo se otaw nemenal.
ACT 3:1 Doen aldaw dimoton si Pedro aw si Juan te dakel simbahan te Jerusalem alas tris te meapon, so yan se oras te pegtawal-tawal kidoen.
ACT 3:2 Doen sebad otaw kapig lekat te pegtebaw din nenenoo kidoen te lelebangan te simbahan iningedanan Pelasan. Kelikit te aldaw, egkelelangen te doma din doton te lelebangan te simbahan amon memoyò te kwarta diyà te otaw mawop.
ACT 3:3 Agpet den mawop si Pedro aw si Juan, kimità se kapig kandan aw nemoyò sikandin te kwarta diyà kandan.
ACT 3:4 Pegkità dan kandin, minikagi si Pedro, “Tengtengi kay.”
ACT 3:5 Yan timengteng se kapig kandan, so eden din aw doen kwarta ibegay kandin.
ACT 3:6 Meneng minikagi si Pedro, “Wedad palos kwarta ko, meneng tebangan ta te mebatog ko. Pineokit te ngadan i Jesu Cristo tege Nasarit, ipanaw ka.”
ACT 3:7 Penga niyan, inewidan i Pedro se belad din digsel te kowanan aw impetindeg din. Pegketà migkagsen se benis din.
ACT 3:8 Yan timindeg sikandin aw migpanaw-panaw. Penga niyan, minawop sikandin doton didalem te simbahan doma ki Pedro aw si Juan. Migpanaw-panaw sikandin, aw migtolayun, aw induyun din se Timanem.
ACT 3:9 Kinità te kedita te otaw kidoen se peg-ipanaw din aw pegduyun din te Timanem.
ACT 3:10 Kinilala dan sikandin se otaw tapay metipemoyò gayed egpenenoo doton te lelebangan iningedanan Pelasan. Yan ontò dan nepela kandin so kinità dan negolian den.
ACT 3:11 Kidoen si Pedro aw si Juan te sebad balkon te dakel simbahan iningedanan Balkon i Solomon. Inewidan dan te otaw negolian tandà te luba din. Netipon se kedita te otaw kidoen kandan so nepela dan.
ACT 3:12 Pegkità i Pedro te otaw netipon, minikagi, “Menge kedomaan ko Judiyo, ikà niyo egkepela kenyan. Ikà niyo egtengteng kenami. Kenà kenami tolos se nekegolì te otaw kapig. Kenà heman lekat te ketòlid day.
ACT 3:13 Timanem se egseligan te kemonaan tadon si Abraham, si Isaac, aw si Jacob. Timanem se migpegolì kandin amon iduyun se Batà te Timanem si Jesus. Kedengan insogò din si Jesus dini te tanà, meneng sikiyo se otaw nemegay kandin diyà te belad te gobirno. Pengkey ibeg i Pilato ipelowà din si Jesus, meneng simagda kaw kandin amon imetayan se insogò te Timanem.
ACT 3:14 Pengkey wedad palos salà din, meneng wedà kaw keibeg kandin. Nemoyò kaw te ipelowà i Pilato se otaw metibonò.
ACT 3:15 Inimetayan niyo se egpemegay te kaling pedowan lekat te Timanem, meneng inantay sikandin te Timanem lekat te nematay. Benal iyan, so kinità day sikandin neantay.
ACT 3:16 Pineokit te ngadan i Jesus egseligan day, negolian den se otaw seini kinità aw kinilala niyo. Pineokit te pegsalig ki Jesus, nekeipanaw den sikandin aw yan se kinità niyo.
ACT 3:17 “Menge kedowa ko, netegahan ko te impeimatay niyo si Jesus so wedà niyo ketegahi te sikandin se Misiyas. Wedà heman ketaga-taga se menge otaw limowan kenyo.
ACT 3:18 Yan netoman se kagi te Timanem ingkeliwat te kedita te telekeliwat din gebii, te pemilangen aw imetayan se Misiyas isogò din.
ACT 3:19 Yan pegselsel kaw aw taking kaw te Timanem amon pegwedaden din se salà niyo,
ACT 3:20 aw begayan kaw din te kaling pedowan. Ipelikò din heman se Misiyas tapay pinemallì din si Jesus,
ACT 3:21 meneng songkani eg-ogpà pa sikandin doton te langit lamig te todaen te Timanem se kedita, so yan se impakang te Timanem kenitadon Judiyo aw impekeliwat din iyan pineokit te telekeliwat te kagi din.
ACT 3:22 Gebii minikagi si Moises diyà te menge bowad-bowad i Israel, ‘Isogò te Timanem se doma telekeliwat te kagi din. Yan se sebad bowad-bowad niyo. Keilangan tomolò kaw te kedita te kagi din kenyo. Eked sekopi te Timanem se otaw eked penenalan te kagi te telekeliwat din so ipekesayo din dan.’
ACT 3:24 “Kedita te telekeliwat te kagi te Timanem gebii, si Samuel aw menge doma telekeliwat neketetondog kandin, minikagi se kedita dan tepad te netoman den seini.
ACT 3:25 Sikitadon heman se pinekangan te Timanem, so ingkeliwat se pakang sìyan diyà kenitadon. Netoman den songkani se pakang te Timanem diyà te kemonaan tadon, so minikagi se Timanem diyà ki Abraham, ‘Tebangan ko se kedita te otaw te keneyonan pineokit te bowad-bowad nikaw.’ Yan se impakang te Timanem ki Abraham.
ACT 3:26 Sikitadon onà se sinogoan te Timanem ki Jesus amon tebangan kidon aw megselsel kidon te salà.”
ACT 4:1 Telobo pa minikagi si Pedro aw si Juan diyà te menge otaw netipon, dimateng diyà kandan se menge pengolo te simbahan, aw kapitan te polis egtonggò te dakel simbahan. Dimateng heman se menge otaw Sadusiyo egtoladà te wedad palos keentayan.
ACT 4:2 Neopal dan, so migtoladà si Pedro aw si Juan te neantay si Jesus lekat te nematay aw doen aldaw te meantay heman se menge otaw lekat te nematay.
ACT 4:3 Dinakep dan si Pedro aw si Juan. Kineleboso dan te sebad se delem amon meinsà dan te keeldawan niyan, so simallep den se aldaw.
ACT 4:4 Meneng nemenal se medita otaw nenenalan ki Pedro aw si Juan. Menge lima melalan se kedita te otaw nemenal, sipat sìyan otaw tapay nemenal.
ACT 4:5 Keeldawan niyan, netipon se kedita te egpengibing aw obanen te simbahan te Jerusalem aw menenoladà te punù ingkeliwat i Moises, so se kedita dan, yan se menge otaw eglowan te menge Judiyo.
ACT 4:6 Netipon se ontò pengolo te simbahan si Anas, aw si Caifas, aw si Juan, aw si Alejandro, aw menge doma gaked i Anas eleg netipon kidoen.
ACT 4:7 Impeangay dan si Pedro aw si Juan aw mig-insà dan kandan, kagi dan, “Sinu lay se nemegay kenyo te tolos? Sinu lay ngadan se inikagi niyo te nekeinang kaw kani?”
ACT 4:8 Penga niyan, tinebangan te Espiritu Santo si Pedro aw yan minikagi, “Menge egpengibing aw obanen te simbahan,
ACT 4:9 mig-insà kaw kenami tepad te mèpiya ininang day diyà te otaw kapig. Mig-insà kaw aw nemeno se pegkegolì din.
ACT 4:10 Indanan ko den sikiyo aw kedita te doma niyo bowad-bowad i Israel. Negolian se otaw kindoen pineokit te ngadan i Jesu Cristo tege Nasarit. Si Jesus se inimetayan niyo, meneng inantay te Timanem lekat te nematay.
ACT 4:11 Si Jesus se ketomanan te kagi te Timanem insolat, ‘Doen bato in-agbel te menge otaw mig-inang te balay, so eden dan aw wedad kekemowan niyan. Meneng yan se bato ontò salig te balay.’
ACT 4:12 Wedad doma mekepelowà kenitadon lekat te salà. Pengkey dini te kebelad te keneyonan, wedad doma insogò te Timanem dini te keneyonan amon megpelowà te otaw lekat te salà.”
ACT 4:13 Penga niyan, ontò nepela se kedita te obanen te simbahan netipon, so wedà pegketalaw si Pedro aw si Juan te pegtaba dan, pengkey wedà dan ontò pekeiskwila. Meneng mig-aneng-aneng den dan te timaking si Pedro aw si Juan ki Jesus kedengan.
ACT 4:14 Meneng wedad neinang te menge obanen te simbahan kandan ki Pedro so kidoen se otaw negolian.
ACT 4:15 Penga niyan, impelowà dan si Pedro aw si Juan te wedà kenamay. Te iyogan dan, migpeinsaay se menge obanen,
ACT 4:16 “Megmeno kidon? Eked kidon pekeikagi te wedà iyan keinang. Netegahan te kedita te otaw dini te Jerusalem te neinang dan se kepelahan.
ACT 4:17 Meneng mèpiya aw lemiten tadon dan amon eked dan ebey ikagi te ngadan te egtekingan dan sìyan, amon eked iyan ketegahi te menge otaw kidoen te doma lonsod.”
ACT 4:18 Pegtawal dan ki Pedro aw si Juan, migpunù dan te eked dan ebey ikagi te ngadan i Jesus, aw eked dan heman pegtoladà tepad kandin.
ACT 4:19 Meneng timaba si Pedro aw si Juan, kagi dan, “Peg-aneng-aneng kaw aw eden se ibeg te Timanem inangen day, aw sikiyo se toloen day, aw kenà sikandin.
ACT 4:20 Eked kay lengà te peg-indan te benal kinità aw dinineg day.”
ACT 4:21 Meneng labi pa miglamit se menge obanen te simbahan kandan aw migpelowà dan kandan, so wedà dan ketegahi aw eden se ipelumun dan kandan, so dimuyun se kedita te otaw te Timanem te pegkegolì te otaw kapig.
ACT 4:22 Lampas te kepatan se omay te otaw negolian.
ACT 4:23 Pegkelowà i Pedro aw si Juan, dimoton dan te menge doma otaw egpemenal. In-indan dan se kedita te inikagi te menge pengolo aw obanen te simbahan.
ACT 4:24 Pegdineg dan kenyan, migtawal-tawal se kedita dan diyà te Timanem, kagi dan, “E Pengolo, sikona se Timanem mig-inang te langit, aw tanà, aw dagat, aw kedita heman niyan.
ACT 4:25 Sikona heman se minikagi pineokit te kemonaan day si David egtolò kamno gebii, so pineokit te Espiritu Santo, minikagi sikandin, ‘Meopal se menge otaw kenà Judiyo, aw meglalang se menge Judiyo te medaet, meneng wedad detengan niyan.
ACT 4:26 Megsebad se pedowan te menge otaw eglowan dini te keneyonan amon mato dan te Pengolo aw isogò din.’
ACT 4:27 Netoman den iyan, so dini te Jerusalem, migsebad se pedowan i Herod, aw si Poncio Pilato, aw menge bowad-bowad i Israel, aw menge doma otaw kenà Judiyo, amon imetayan dan se insogò no si Jesus, pengkey wedad kandin salà. Sikandin se ininang no Misiyas.
ACT 4:28 Pengkey inimetayan dan sikandin, meneng se pegketoman niyan, yan se tapay lekat te kamno ibeg.
ACT 4:29 E Pengolo, netegahan no den se peglamit dan kenami. Yan tebangi kay menge sogounun no amon eked kay pegketalaw te peg-indan te kagi nikaw.
ACT 4:30 Pekitai se ketolos nikaw, aw pegolii se menge otaw doen mesakit. Pekitai se kepelahan aw doma inang no metolos pineokit te ngadan te insogò no si Jesus.”
ACT 4:31 Pegtawal-tawal dan diyà te Timanem, nekayong se balay netiponan dan, so dimateng se Espiritu Santo kandan. Lekat niyan, wedà dan kelemitan te peg-indan dan te kagi te Timanem diyà te menge doma otaw.
ACT 4:32 Migsebad se pedowan te kedita te otaw egpemenal. Wedad migtameng te kedònan din, meneng gayed dan egpetebangay.
ACT 4:33 Mig-inang se menge sogounun i Cristo te kepelahan, aw mig-indan dan te benal neantay se Pengolo si Jesus lekat te nematay. Ontò tinebangan te Timanem se kedita te otaw egpemenal.
ACT 4:34 Yan wedad puluk te kànen aw kedònan dan, so imbeligyà te menge otaw se tanà dan aw balay, aw imbegay dan se kwarta diyà te menge sogounun i Cristo. Inteped dan iyan diyà te menge doma otaw nelimahan.
ACT 4:36 Doen sebad otaw tege Sipro, bowad-bowad i Levi, ngadan din si Jose. Iningedanan sikandin te menge sogounun i Cristo ki Bernabe. (Se kelebadan niyan, “Egpenabang.”)
ACT 4:37 Imbeligyà din se tanà din aw imbegay din se kwarta diyà te menge sogounun i Cristo.
ACT 5:1 Doen sebad meama si Ananias aw esawa din si Sapira. Imbeligyà dan se tanà dan.
ACT 5:2 Meneng migsebad se pedowan dan migtameng te ketengà te kwarta. Inibing i Ananias se samà diyà te menge sogounun i Cristo aw migpelingo-lingo te tinigkan din imbegay se kwarta.
ACT 5:3 Nayan, minikagi si Pedro, “Pigbayà-bayà ka i Satanas. Ibeg no peden megkebolalaw ka diyà te Espiritu Santo. Kenà nini se kedakel te keelagà te tanà imbeligyà nikaw.
ACT 5:4 Te wedà no pa pemeligyai se tanà, kamno pa iyan. Penga te pegpemeligyà no kenyan, kamno pa heman se kwarta. Wedad migleges kamno te pegpemegay no te kwarta. Meneng medaet den se aneng-aneng nikaw. Eden no aw olò otaw se pigkebolelawan nikaw, meneng Timanem se pigkebolelawan nikaw.”
ACT 5:5 Pegdineg i Ananias te kagi i Pedro, netongan sikandin aw nematay. Penga niyan, ginakes te menge telaki se lawa din, aw kinelalang dan iyan doton te lowà, aw inlebeng dan. Ontò nelemitan se kedita te otaw kimità kenyan.
ACT 5:7 Pegkepenga te menge telo oras, dimateng si Sapira, meneng wedà pa ketaga-taga te pegkematay te esawa din.
ACT 5:8 Minikagi si Pedro, “Tebahi a. Seini lay se kedakel te kwarta imbayad te tanà imbeligyà niyo?” Timaba si Sapira, “Ee. Taman iyan.”
ACT 5:9 Minikagi si Pedro, “Medaet se pegsebad te pedowan niyo amon megtandà kaw te Espiritu Santo. Kidoen den te lowà se menge otaw miglebeng gina te esawa nikaw. Kelelangen ka dan heman amon ilebeng.”
ACT 5:10 Pegketà nematay heman sikandin. Pegdateng te menge telaki doton, nematay den si Sapira. Yan kinelalang dan heman se lawa din doton te lowà, aw inlebeng dan diyà te tangkil te lebeng te esawa din.
ACT 5:11 Ontò nelemitan se kedita te otaw egpemenal aw kedita heman te doma otaw netaga-taga kenyan.
ACT 5:12 Medita se kepelahan ininang te menge sogounun i Cristo kinità te doma otaw. Gayed egketipon se otaw egpemenal doton te balkon te simbahan iningedanan Balkon i Solomon.
ACT 5:13 Doen menge doma otaw wedà akop diyà te otaw egpemenal tandà te ketalaw dan, meneng dimuyun dan te menge otaw egpemenal.
ACT 5:14 Migkedita se otaw nemenal diyà te Pengolo. Doen meama aw bayi heman nekeakop diyà te otaw egpemenal ki Jesus.
ACT 5:15 So doen kepelahan ininang te menge sogounun i Cristo, inibing te doma se otaw doen mesakit doton te lowà te menge balay. Insawol dan se kama aw ikam te otaw doen mesakit doton dapag te dalan amon keelongan dan i Pedro so ibeg dan kegolian.
ACT 5:16 Dimoton te Jerusalem se medita otaw tikedo te menge doma lonsod medapag kidoen. Nengibing dan te menge otaw doen mesakit aw doma otaw pigdetengan te bosaw. Negolian se kedita te otaw nesekitan, aw impelowà se bosaw lekat te doma.
ACT 5:17 Nayan, ontò neopal se ontò pengolo te simbahan aw menge otaw ketondog kandin, yan se menge Sadusiyo. Miningà dan te menge sogounun i Cristo aw
ACT 5:18 impedakep dan. Penga niyan, kineleboso dan.
ACT 5:19 Meneng pegkedelem niyan, inowang te anghil te Timanem se tetakep te keleboso aw impelowà din dan. Doen impunù din kandan, kagi din,
ACT 5:20 “Doton kaw te dakel simbahan. Peg-indan kaw te menge otaw tepad te kaling pedowan ibegay te Timanem kandan.”
ACT 5:21 Peglibtak te aldaw, minawop se menge sogounun i Cristo doton te dakel simbahan aw todà dan migtoladà. Dalem niyan, migtipon se ontò pengolo te simbahan, aw menge otaw neketetondog kandin, aw kedita te doma obanen te simbahan. Impeangay dan se sogounun i Cristo lekat te keleboso.
ACT 5:22 Meneng pegdateng te otaw insogò doton te keleboso, wedad den dan kidoen. Penga niyan, limikò dan doton te menge obanen netipon aw minikagi dan,
ACT 5:23 “Pegdateng day doton, netakep pa se keleboso, aw egtonggò pa se sondalo. Meneng peg-owang day te tetakep, wedad den dan kidoen.”
ACT 5:24 Mondà netaga-taga se menge pengolo te simbahan aw kapitan te polis egtonggò te dakel simbahan, ontò migkebulung se aneng-aneng dan aw kenan den se menge sogounun i Cristo.
ACT 5:25 Penga niyan, dimateng se sebad otaw kidoen kandan. Minikagi sikandin, “Se menge otaw kineleboso niyo gebenini, kidoen den dan te dakel simbahan aw migtoladà dan.”
ACT 5:26 Penga niyan, dimoton se polis aw kapitan dan amon mangay dan te sogounun i Cristo. Wedà pegleges se polis kandan so nelemitan dan aw bontogan dan te menge otaw te bato.
ACT 5:27 Peg-ibing dan kandan doton te menge obanen netipon, minikagi se ontò pengolo te simbahan,
ACT 5:28 “Kedengan, migpunù kay kenyo te eked kaw palos pegtoladà tepad te otaw egtekingan niyo. Meneng wedà kaw tolò, so songkani, netaga-taga se kedita te otaw dini te Jerusalem te intoladà niyo. Eg-ikagi kaw heman te sikami se otaw migpeimatay te egtekingan niyo.”
ACT 5:29 Nayan, timaba si Pedro aw menge doma sogounun i Cristo, “Pengkey megsagda kaw kenami, meneng eked kay lengà, so Timanem se toloen day.
ACT 5:30 Se Timanem sineligan te kemonaan tadon, yan se simogò ki Jesus dini te tanà. Meneng impeimatay niyo sikandin inlansang diyà te kros.
ACT 5:31 Penga niyan, inantay sikandin te Timanem metolos aw ininang din melangkaw doton te langit, so sikandin se lomowan kenitadon aw megpelowà kenitadon lekat te salà. Ibeg din megselsel kaw te salà amon pegwedaden din se salà niyo.
ACT 5:32 Mig-indan kay te benal iyan neinang so impeikagi kay te Espiritu Santo, sìyan ibegay te Timanem diyà te kedita te otaw tomolò kandin.”
ACT 5:33 Pegdineg dan kenyan, ontò den neopal se pedowan dan, aw ibeg dan imetayan se menge sogounun i Cristo.
ACT 5:34 Meneng doen sebad Parisiyo egtoladà te punù ingkeliwat i Moises si Gamaliel. Egsegmanen sikandin te menge doma otaw. Timindeg sikandin amon mikagi, meneng onà din impelowà se menge sogounun i Cristo dalem te peg-ikagi din.
ACT 5:35 Penga niyan, minikagi si Gamaliel diyà te menge doma din netipon, “Menge kedomaan ko bowad-bowad i Israel, peg-imanday kaw aw eden se inangen niyo diyà te menge otaw sìyan.
ACT 5:36 Kedengan, doen sebad otaw iningedanan ki Teudas meibeg megkedakel otaw, aw menge epat gatos se otaw timaking kandin. Meneng inimetayan sikandin, aw penga niyan nebilit se otaw timaking kandin, so wedad den mengibing kandan.
ACT 5:37 Pegbilang te gobirno te kedita te otaw, doen heman tege Galiliya si Judas. Pengkey medita heman se otaw timaking kandin, meneng inimetayan sikandin, aw yan nebilit se otaw timaking kandin.
ACT 5:38 Nayan, ikegiyen ko kenyo te mèpiya aw pebeyaan tadon se menge otaw seini, aw ipekesayo tadon dan olò. Pebeyai niyo sikandan, so aw kenà Timanem se simogò kandan, yan wedad detengan te eg-inangen dan.
ACT 5:39 Meneng aw Timanem se simogò kandan, eked kidon pekedaeg kandan. Meg-ahà kidon amon eked kidon keinang poon te Timanem.”
ACT 5:40 Penga niyan, aneng-aneng dan, mèpiya se inikagi i Gamaliel. Peg-angay dan te menge sogounun i Cristo, impebadas dan pa. Migpunù dan kandan te eked dan palos peg-indan tepad ki Jesus. Penga niyan, impelowà dan.
ACT 5:41 Pegkesayo te sogounun i Cristo, ontò neluba se pedowan dan, so aneng-aneng dan, pinemallì dan te Timanem amon pemilangen dan tandà te pegpemenal dan ki Jesus.
ACT 5:42 Migtoladà dan pa aw migkeliwat te kagi te Timanem, pengkey doton te dakel simbahan, aw doton te menge balay. Kelikit te aldaw, migtoladà dan te si Jesus se Misiyas insogò te Timanem.
ACT 6:1 Nayan, migkedita se otaw egpemenal. Meneng migpedindilay se menge otaw egpemenal eg-ikagi te Griego aw doma eg-ikagi te Hebreo, so minikagi se menge otaw eg-ikagi te Griego te deitek olò se togpò inteped diyà te kandan menge bayi balo te kelikit te aldaw.
ACT 6:2 Penga niyan, pigtipon te sempolò teg dowa sogounun i Cristo se kedita te otaw egpemenal. Minikagi dan, “Medaet diyà kenami aw lomengà kay te pegtoladà te kagi te Timanem amon meteped se togpò diyà te otaw nelimahan.
ACT 6:3 Menge kedowa day, mèpiya aw pemellien niyo se pito meama, sìyan mèpiya otaw egbeyà-beyaan te Espiritu Santo aw ontò biyasa. Penga niyan, sikandan se meneped te togpò,
ACT 6:4 amon megtawal-tawal kay se kenami diyà te Timanem aw megtoladà kay heman.”
ACT 6:5 Pegdineg te kedita te otaw egpemenal kenyan, aneng-aneng dan, mèpiya iyan inangen. Yan pinemallì dan si Esteban, so egpemenal sikandin diyà te Timanem te kedakel te pedowan din, aw egbeyà-beyaan heman te Espiritu Santo. Se doma otaw pinemallì dan, yan si Felipe, aw si Procoro, aw si Nicanor, aw si Timon, aw si Parmenas, aw si Nicolas tege Antyokya timolò te ketanem te menge Judiyo pengkey kenà sikandin Judiyo.
ACT 6:6 Impeasdang dan diyà te menge sogounun i Cristo. Migtawal-tawal se menge sogounun i Cristo aw pinemàdan dan se pito otaw sìyan.
ACT 6:7 Penga niyan, gayed in-indan se kagi te Timanem doton te menge doma ogpeanan. Migkedita se otaw nemenal doton te Jerusalem, aw medita heman se pengolo te simbahan te Judiyo nemenal.
ACT 6:8 Ontò tinebangan te Timanem si Esteban, aw ininang din se inang metolos, aw impekità din se kepelahan diyà te doma otaw.
ACT 6:9 Doen menge otaw migdindil kandin. Sikandan se menge tege Sirene aw tege Alejandriya egsimba doton te simbahan iningedanan “Tengke Otaw Nekelowà,” aw menge doma dan tege Silisya, aw tege Asya.
ACT 6:10 Meneng wedà dan pekedaeg kandin, so biyasa pa sikandin mikagi kandan aw tinebangan te Espiritu Santo.
ACT 6:11 Penga niyan, binoyo dan se menge doma otaw amon mikagi dan te dinineg dan si Esteban migtompuyus te Timanem aw si Moises.
ACT 6:12 Pineokit kenyan, migsamok dan te menge doma otaw, aw menge obanen te simbahan, aw menenoladà te punù ingkeliwat i Moises. Penga niyan, ayas dan inewidan si Esteban. Inibing dan sikandin doton te menge obanen te simbahan amon okomen dan.
ACT 6:13 Timindeg se menge doma otaw migkebolalaw, kagi dan, “Sikandin se eglindò te simbahan seini egpenimeneman. Egtompuyusen din heman se punù egtoloen tadon ingkeliwat te kemonaan tadon si Moises.
ACT 6:14 Dinineg day sikandin minikagi te meglegobal se tege Nasarit si Jesus te dakel simbahan seini, aw elinen din heman se menge ketanem ingkeliwat i Moises.”
ACT 6:15 Penga niyan, ontò nenginoet se kedita te obanen te simbahan diyà ki Esteban. Nekesapit se bawa din te bawa te anghil.
ACT 7:1 Mig-insà se ontò pengolo te simbahan ki Esteban, kagi din, “Benal lay se kagi dan?”
ACT 7:2 Timaba si Esteban, kagi din, “Menge kedowa aw emayen ko, penenalan kaw kanak. Gebii pa te peg-ogpà i Abraham doton te Mesopotamya, te wedà pa alin doton te Haran, migpekità se Timanem diyà kandin lekat te langit.
ACT 7:3 Minikagi se Timanem, ‘Tanan ka te kedomaan no aw ogpeanan no seini. Doton ka te ogpeanan tedoan ko kamno.’
ACT 7:4 Timolò si Abraham, aw nesayo lekat te Kaldiya, aw mig-ogpà doton te Haran. Pegkematay te amay din, impealin te Timanem si Abraham dini te ogpeanan tadon.
ACT 7:5 Wedad tanà imbegay te Timanem kandin pengkey deitek. Pengkey wedad palos batà i Abraham, meneng migpakang se Timanem te doen tanà ibegay kandin aw menge bowad-bowad din.
ACT 7:6 Minikagi se Timanem te meg-ogpà se menge bowad-bowad din doton te ogpeanan tinig-apò te menge doma otaw. Kelimahan dan aw ellangen dan te doma otaw taman te epat gatos se omay.
ACT 7:7 Minikagi se Timanem, ‘Ipelumun ko se otaw meg-allang te bowad-bowad no, aw ipelowà ko dan lekat kidoen. Penga niyan, meg-ogpà dan dini aw megsimba dan kanak.’ Yan se pakang te Timanem ki Abraham.
ACT 7:8 Penga niyan, migpunù se Timanem te keilangan tolien si Abraham aw kedita te bowad-bowad din meama amon eked dan kelibeli se impakang te Timanem kandan. Yan pegkepenga te sebad simana lekat te pegtebaw te batà din si Isaac, tinolì din. Iling kenyan, tinolì i Isaac se batà din si Jacob. Nenolì heman si Jacob te sempolò teg dowa batà din meama. Sikandan se kemonaan tadon.
ACT 7:9 “Doen sebad batà i Jacob si Jose. Miningà se menge kedowa din, aw imbeligyà dan sikandin, aw yan pig-allang doton te Ehipto. Meneng tinebangan te Timanem sikandin
ACT 7:10 aw yan neketayod te kelimahan. Ontò sikandin biyasa, aw yan neluba se selotan te Ehipto si Paraon. Ininang din si Jose gobirnador doton te Ehipto aw amo te kedita doton te balay din.
ACT 7:11 Doen bayil doton te Ehipto aw Canaan. Ontò nelimahan se kedita te otaw. Wedad heman kànen te kemonaan tadon.
ACT 7:12 Pegketaga-taga i Jacob te doen kànen doton te Ehipto, insogò din se menge batà din doton te Ehipto. Yan se tagnà pegdoton dan amon mayad dan te kànen.
ACT 7:13 Ikedowa te pegdoton dan te Ehipto, migpekilala si Jose te menge kedowa din, aw mig-indan ki Paraon te sikandan se menge kedowa din.
ACT 7:14 Nayan, impeangay i Jose se amay din aw menge nayi aw anak din. Kepitowan teg lima se kedita dan.
ACT 7:15 Minalin si Jacob aw mig-ogpà doton te Ehipto. Pegkepenga niyan, migkemematay se teg sebad-sebad kandan doton te Ehipto, si Jacob aw batà din menge kemonaan tadon.
ACT 7:16 Inibing se lawa te nematay doton te Sikem, aw inlebeng dan kidoen te ilib doton te tanà tapay bineyadan i Abraham diyà te menge batà i Hamor.
ACT 7:17 “Sagwa agpet den metoman se pakang te Timanem ki Abraham, migkedita se kemonaan tadon doton te Ehipto.
ACT 7:18 Limowan se sebad selotan wedà ketaga-taga ki Jose.
ACT 7:19 Nemilang se selotan sìyan te menge kemonaan tadon, aw migleges kandan igsà kedita te kaling batà timebaw impeibing din dan te amay doton te mediyò aw tinenanan dan amon matay.
ACT 7:20 Dalem niyan, timebaw si Moises pinemallì te Timanem. In-eles sikandin te amay aw inay din kidoen te balay dan taman te telo se bolan.
ACT 7:21 Pegtanan dan kandin doton te kilid te wayeg, netelaan te batà i Paraon bayi. Yan pigbatà-batà din si Moises.
ACT 7:22 Pigtoledaan sikandin te kedakel te kebiyasa te tege Ehipto. Pegketesan din, ontò biyasa se peg-ikagi aw peg-inang din.
ACT 7:23 Mondà kepatan se omay din, limaoy si Moises te kedomaan din menge bowad-bowad i Israel.
ACT 7:24 Netelaan din se sebad tege Ehipto nemilang te sebad kedomaan din Judiyo. Penga niyan, dimapit si Moises te kedomaan din, aw dinaeg din se tege Ehipto, aw inimetayan din,
ACT 7:25 so eden din aw meg-aneng-aneng se menge Judiyo te sikandin se insogò te Timanem amon mengibing kandan lomowà lekat te Ehipto. Meneng wedà dan peg-aneng-aneng kenyan.
ACT 7:26 Keeldawan niyan, netelaan din se didowa Judiyo migbolaw. Migtelaman si Moises mig-osay kandan. Minikagi sikandin, ‘Elew, telekedowa kaw. Ikà niyo egbolaw.’
ACT 7:27 Meneng neopal heman ki Moises se otaw neopal te doma din. Inseging din si Moises aw minikagi, ‘Wedad migsogò kamno amon lomowan ka aw megtoladà kenami.
ACT 7:28 Imetayan a no lay heman iling te ininang no te tege Ehipto gebenini?’
ACT 7:29 Pegdineg i Moises kenyan, nelemitan aw kimadas doton te Midian, sebad lonsod mediyò. Mig-ogpà sikandin kidoen, aw nengognan, aw migbatà te dowa meama.
ACT 7:30 “Penga te kepatan se omay, kidoen si Moises te kebigtilan doton te ongan te bontod iningedanan Sinay. Migpekità se anghil diyà kandin doton te sagbet limegdeg.
ACT 7:31 Pegkità i Moises kenyan, ontò nepela. Migpedapag sikandin amon tomengteng. Meneng dinineg din se kagi te Pengolo lekat te apoy,
ACT 7:32 ‘Siaken se Timanem egseligan te kemonaan no gebii si Abraham, si Isaac, aw si Jacob.’ Pegdineg din kenyan, wedà ebey tengteng, so ontò sikandin nelemitan aw tinegangtang.
ACT 7:33 Minikagi se Pengolo, ‘Lowasi se sepatos no amon memasa ka kanak, so egpenimeneman se tanà seini.
ACT 7:34 Netegahan ko te ontò nelimahan se menge kedomaan no pinemallì ko doton te Ehipto. Dinineg ko se pegtawal-tawal dan diyà kanak. Megpelowà a den kandan. Na, sikona den se isogò ko doton te Ehipto.’
ACT 7:35 “Si Moises se tapay kinuluwan te kedomaan din bowad-bowad i Israel, so tapay dan minikagi, ‘Wedad migsogò kamno amon lomowan ka aw megtoladà kenami.’ Meneng sikandin se insogò te Timanem amon lomowan aw mengibing kandan. Migtabang kandin se anghil migpekità diyà kandin doton te sagbet limegdeg.
ACT 7:36 Si Moises se mig-inang te kepelahan doton te Ehipto. Sikandin se nengibing kandan te pegkesayo dan lekat te Ehipto. Sikandin se nengibing kandan te peg-okit dan te dagat iningedanan Dagat Melalag, aw doton heman te kebigtilan te kepatan se omay.
ACT 7:37 Si Moises se mig-indan diyà te menge bowad-bowad i Israel te doen kwani sebad kedomaan dan inangen te Timanem telekeliwat te kagi din iling te pegsogò din ki Moises.
ACT 7:38 Si Moises se inindanan te anghil te kagi te Timanem kidoen te bontod iningedanan Sinay. Sikandin heman se migkeliwat te kagi te Timanem diyà te menge kemonaan tadon netipon kidoen te kebigtilan, aw ingkeliwat den heman iyan diyà kenitadon.
ACT 7:39 Meneng wedà tolò se kemonaan tadon kandin. Wedà dan penenalan kandin, so ibeg dan lomikò doton te Ehipto.
ACT 7:40 Pegtikedeg i Moises te bontod, nemoyò dan diyà ki Aaron, ‘Inangi kay te inotaw amon doen mengibing kenami, so wedà day ketegahi aw nemeno si Moises, sìyan nengibing kenitadon lekat te Ehipto.’
ACT 7:41 Penga niyan, ininang dan se inotaw iling te bawa te nati te baka. Migdogsò dan aw migtawal-tawal dan kenyan. Induyun dan se ininang dan sìyan.
ACT 7:42 Yan timinàyog se Timanem kandan. Pinebeyaan din se pegsimba dan te bolan, aw bitoen, aw aldaw. Gebii, simolat se sebad telekeliwat te kagi te Timanem, kagi din, ‘Menge bowad-bowad i Israel, peglikò-likò niyo doton te kebigtilan taman te kepatan se omay, kenà ko se binegayan niyo te ayam-ayam indogsò niyo.
ACT 7:43 Meneng doen menge inotaw ininang niyo amon simbahen niyo dan. Inibing niyo se dogsoanan te sebad diwatà si Molok. Inibing niyo heman se egdogsoan niyo iling te bitoen iningedanan Refan. Yan ipelumun ko den sikiyo, so meibing kaw digsel doton te mediyò ogpeanan Babilonya.’ Yan se kagi te Timanem.
ACT 7:44 “Gebii te peglikò-likò te menge kemonaan tadon doton te kebigtilan, eg-ibingen dan se balay sinolan te bato sinolatan te menge punù te Timanem, so insogò dan te Timanem meg-inang dan te balay sìyan inetepan te penenaktun, iling te impekità te Timanem ki Moises.
ACT 7:45 Pegkematay i Moises, si Josue se nengibing te menge Judiyo te pegpesalo dan doton te ogpeanan impakang te Timanem kandan. Pengkey kenan dan pesalo, gayed dan eg-ibingen se balay sìyan inetepan te penenaktun. Migtabang se Timanem kandan, aw impekadas din se menge doma otaw kidoen amon doen ogpaan dan. Nenamay dan migtawal-tawal kidoen te balay sìyan eg-ibingen dan lamig te peglowan i David.
ACT 7:46 “Neluba se Timanem te peglowan i David. Ibeg i David meg-inang peden te dakel simbahan te pegtawal-tawal dan diyà te Timanem.
ACT 7:47 Meneng batà i David si Solomon se nekeinang kenyan.
ACT 7:48 Meneng eked peg-ogpà se Timanem Melangkaw diyà te lowang te simbahan inangen te otaw, so simolat se telekeliwat te kagi te Timanem gebii, kagi din,
ACT 7:49 ‘Langit se onsedanan ko, aw keneyonan se gìtanan ko. Siaken se mig-inang te kedita. Eked kaw pekebatog te peg-inang te balay ogpaan ko. Wedad etodanan inangen niyo kanak, so ininang ko se kedita.’ Yan se kagi te Pengolo.
ACT 7:51 “Ontò kaw metugul, so kenà kaw egtolò te Timanem. Eked kaw penenalan te kebenalan. Iling kaw te kemonaan tadon, so gayed kaw eg-eked te Espiritu Santo.
ACT 7:52 Pinemilang te kemonaan tadon se kedita te telekeliwat te kagi te Timanem, so inimetayan dan se otaw mig-indan kandan te domateng se isogò te Timanem wedad salà din. Pegdateng din, migtolok aw nemonò kaw kandin.
ACT 7:53 Pengkey sikiyo se otaw kineliwatan te menge anghil te kagi te Timanem, meneng wedà kaw tolò kenyan.”
ACT 7:54 Pegdineg te menge obanen te simbahan te kagi i Esteban, ontò dan neopal, aw nengiteb-kiteb dan tandà te keopal dan.
ACT 7:55 Meneng gayed egbeyà-beyaan te Espiritu Santo si Esteban. Peglengag din doton te langit, kinità din se kelangkaw te Timanem aw si Jesus timangkil kandin.
ACT 7:56 Minikagi si Esteban, “Tay. Kinità ko se langit neowang, aw kidoen se Timanem Migpekeotaw eglowan den tangkil te Timanem.”
ACT 7:57 Meneng sinempengan te kedita te otaw se telinga dan amon eked dan dineg te kagi din. Migpuypuy dan tandà te keopal dan. Penga niyan, linimpongan dan si Esteban,
ACT 7:58 aw inseging doton te lowà te Jerusalem. Binontogan dan sikandin te bato amon matay. Doen sebad telaki si Saulo migtonggò te saol linowas te menge otaw nemontog ki Esteban.
ACT 7:59 Pegbontog dan kandin, migtawal-tawal sikandin, kagi din, “E Jesus Pengolo ko, kinewai se pedowan ko, so matay a den.”
ACT 7:60 Penga niyan, limongken si Esteban aw timawal te dakel se kagi din, “E Pengolo, ikà egpelumun kandan te salà ininang dan kanak.” Penga niyan, nematay.
ACT 8:1 Tinandù i Saulo se pegpengimatay dan ki Esteban. Inlebeng te menge otaw egpenimanem se lawa din. Ontò dan migkelag tandà te lano dan kandin. Lekat te aldaw te pegkematay i Esteban, ontò pinemilang se kedita te otaw egpemenal doton te Jerusalem. Yan nesayo dan aw migbilit-bilit dan doton te menge lonsod te Judiya aw Samarya. Meneng mig-ogpà pa se menge sogounun i Cristo doton te Jerusalem.
ACT 8:3 Nemilang si Saulo te menge otaw egpemenal, aw timeped te menge balay dan amon dekepen din dan aw kelebosowen, pengkey meama aw bayi.
ACT 8:4 Pegkebilit te otaw egpemenal, migtoladà dan te menge doma otaw tepad ki Jesus pengkey kenan dan pesalo.
ACT 8:5 Dimoton si Felipe te sebad lonsod doton te Samarya. Migtoladà sikandin te otaw kidoen te si Jesus se Misiyas insogò te Timanem.
ACT 8:6 Migsebad se menge otaw nenenalan kandin, so dinineg dan se intoladà din, aw kinità dan se kepelahan ininang din.
ACT 8:7 Doen menge bosaw migpuypuy aw impelowà din lekat te otaw. Pinegolian din heman se menge otaw kenà egpekeiwal aw doma otaw kapig.
ACT 8:8 Yan ontò neluba se kedita te otaw kidoen.
ACT 8:9 Doen sebad otaw biyasa ekon egdelikmata si Simon. Nenamay den sikandin nepelahan te tege Samarya, so eg-ikagi te sikandin se melangkaw otaw.
ACT 8:10 Egpenenalan se kedita te otaw diyà kandin, pengkey sagkep aw melangkaw otaw, so eden dan aw doen tolos te Timanem diyà kandin.
ACT 8:11 Yan egpenenalan dan kandin, so nenamay dan nepela te pegdelikmata din.
ACT 8:12 Meneng pegtoladà i Felipe kandan tepad te peglowan te Timanem aw si Jesu Cristo, nemenal dan aw binonyagan dan heman, pengkey meama aw bayi.
ACT 8:13 Nemenal heman si Simon. Penga te pegbonyag kandin, timaking ki Felipe, aw nepela sikandin diyà te kepelahan ininang i Felipe.
ACT 8:14 Pegketaga-taga te menge sogounun i Cristo doton te Jerusalem te nemenal se tege Samarya te kagi te Timanem, insogò dan si Pedro aw si Juan domoton te Samarya amon megtelaban kandan.
ACT 8:15 Pegdateng dan doton, migtawal-tawal dan diyà te Timanem amon domateng se Espiritu Santo kandan,
ACT 8:16 so pengkey nemenal dan ki Jesus aw binonyagan dan, meneng wedà dateng se Espiritu Santo kandan.
ACT 8:17 Pegpemaed i Pedro aw si Juan kandan, dimateng se Espiritu Santo kandan.
ACT 8:18 Pegkità i Simon te imbegay se Espiritu Santo pineokit te pegpemaed te sogounun i Cristo kandan, imbegay din se kwarta diyà kandan
ACT 8:19 aw minikagi, “Begayi a heman te tolos sìyan amon kebegayan te Espiritu Santo se kedita te otaw pemàdan ko.”
ACT 8:20 Minikagi si Pedro, “Kebàtan ka aw kwarta no, so eden no aw kebeyadan se ibowang te Timanem.
ACT 8:21 Wedad labut no te eg-inangen day, so wedà kelobos se pedowan no diyà te Timanem.
ACT 8:22 Pegselsel ka te salà seini. Pegtawal-tawal ka diyà te Pengolo aw mepakay din pegwedaden se medaet ibeg te pedowan nikaw.
ACT 8:23 Netegahan ko te ontò ka pa miningà, aw neallang ka pa te salà.”
ACT 8:24 Nemoyò si Simon kandan, kagi din, “Pegtawal-tawal kaw diyà te Pengolo amon wedad ketomanan te kagi niyo.”
ACT 8:25 Mig-indan si Pedro aw si Juan te kagi intoladà te Pengolo kandan aw ininang din kinità dan. Penga niyan, minolì dan doton te Jerusalem, meneng migtoladà dan heman te Mèpiya Indan doton te menge lonsod te Samarya inokitan dan.
ACT 8:26 Migpekità se anghil te Timanem diyà ki Felipe. Minikagi sikandin, “Doton ka te dalan lekat te Jerusalem pesalo doton te Gasa. Yan se dalan kidoen te kebigtilan.”
ACT 8:27 Nayan, timolò si Felipe aw dimoton te dalan intedò kandin. Na, doen sebad otaw tege Etyopya tapay dimoton te Jerusalem amon megsimba kidoen. Melangkaw se gulal din, so sikandin se tesorero te bayi eglowan doton te Etyopya, sìyan egtewalen Kandaki.
ACT 8:28 Minolì den se sìyan tege Etyopya lekat te Jerusalem. Pegsakay din te kelisa din, migbasa sikandin te libro insolat te telekeliwat te kagi te Timanem gebii si Isaias.
ACT 8:29 Simogò se Espiritu Santo ki Felipe, kagi din, “Egpangi aw tekingi se kelisa sìyan.”
ACT 8:30 Kimagnan si Felipe, aw dinineg din se tege Etyopya migbasa te libro insolat te telekeliwat te kagi te Timanem gebii si Isaias. Mig-insà si Felipe, “Nekelabet ka lay te binasa no?”
ACT 8:31 Timaba se tege Etyopya, “Eked a pekelabet singed aw doen otaw megtoladà kanak.” Penga niyan, impesakay din si Felipe.
ACT 8:32 Nayan, seini se kagi te Timanem binasa te tege Etyopya. “Iling sikandin te karniro inibing amon iyawen. Iling heman sikandin te nati te karniro kenà eg-ikagi aw gontingan se bolbol, so pengkey kelimahan sikandin, meneng wedad palos kagi din.
ACT 8:33 Pengkey wedad salà din, meneng pegyèyaen sikandin aw ipelumun. Wedad bowad-bowad din, so imetayan sikandin.”
ACT 8:34 Mig-insà se tege Etyopya ki Felipe, kagi din, “Sinu lay se tinedoan te telekeliwat te kagi te Timanem simolat kani? Sikandin aw doma otaw? Indani a den.”
ACT 8:35 Nayan, migtebò si Felipe miglebad-lebad diyà kandin te kagi te Timanem sìyan. Migtoladà sikandin te si Jesus se egpelowà te otaw lekat te salà.
ACT 8:36 Wedà kenamay, dimateng dan doton te wayeg. Minikagi se tege Etyopya, “Doen wayeg dini. Mepakay lay aw bonyagan a no?” [
ACT 8:37 Minikagi si Felipe, “Mepakay aw ontò ka den nemenal.” Minikagi se tege Etyopya, “Nemenal a den te si Jesu Cristo se ontò Batà te Timanem.”]
ACT 8:38 Penga niyan, sinagkà din se kodà. Limanglang dan diyà te wayeg aw binonyagan sikandin i Felipe.
ACT 8:39 Peg-anggin dan lekat te wayeg, inabat te Espiritu Santo si Felipe. Wedà den kitai te tege Etyopya si Felipe, meneng dimeleg aw neluba se pedowan din.
ACT 8:40 Meneng kenan si Felipe, doton den te lonsod te Asoto. Pengkey kenan pesalo, gayed sikandin migtoladà te Mèpiya Indan tepad ki Cristo kidoen te kedita te lonsod inokitan din lamig dimateng doton te Sesarya.
ACT 9:1 Nayan, dalem niyan, gayed egkeopal si Saulo aw egbentakan din se kedita te otaw egpemenal te Pengolo. Dimoton sikandin te ontò pengolo te simbahan te Jerusalem,
ACT 9:2 aw nemoyò te solat ibingen din doton te menge simbahan te Judiyo kidoen te Damasko amon mepakay din dekepen se menge otaw ketelaan din egtaking te Pengolo, pengkey meama aw bayi, aw ibingen din dan doton te Jerusalem amon kelebosowen.
ACT 9:3 Pegkedapag din doton te Damasko, pegketà nesogatan sikandin te anyag lekat te langit.
ACT 9:4 Nekelangkeb sikandin diyà te tanà aw doen dinineg din minikagi, “E Saulo, nengà lay egpemilang ka kanak?”
ACT 9:5 Mig-insà si Saulo, “Sir, sinu ka lay?” Yan timaba se Pengolo, “Siaken si Jesus se egpemilangen nikaw.
ACT 9:6 Tindeg ka aw deleg ka doton te Damasko. Indanan ka aw eden se inangen nikaw.”
ACT 9:7 Netingen se menge otaw dimoma kandin tandà te peso dan, so pengkey dinineg dan se kagi, meneng wedà dan kitai se minikagi.
ACT 9:8 Penga niyan, timindeg si Saulo. Meneng pegkebeka te mata din, wedà pekekità. Yan inewidan dan se belad din aw inagak doton te Damasko.
ACT 9:9 Netelowan sikandin kidoen wedà pekekità aw wedad kinaen din aw ininem.
ACT 9:10 Doen sebad otaw mig-ogpà kidoen te Damasko si Ananias egpemenal ki Jesus. Migpekità se Pengolo diyà kandin aw minikagi, “E Ananias.” Timaba si Ananias, kagi din, “Pengolo, eden lay se ibeg no ipeinang kanak?”
ACT 9:11 Minikagi se Pengolo, “Doton ka te dalan iningedanan Metòlid. Pemehai se balay i Judas, so yan se inogpaan te sebad otaw tege Tarso si Saulo. Migtawal-tawal sikandin diyà kanak.
ACT 9:12 Doen impekità ko kandin te domateng ka aw memaed ka kandin, amon todà sikandin komità.”
ACT 9:13 Minikagi si Ananias, “Sir, medita se otaw mig-indan kanak te ontò medaet se eg-inangen din diyà te menge otaw sinakop te Timanem doton te Jerusalem.
ACT 9:14 Dimini heman sikandin te Damasko nengibing te papil sinolatan te menge pengolo te simbahan te Jerusalem te mepakay sikandin mekedakep te kedita te otaw egtawal-tawal diyà kamno.”
ACT 9:15 Minikagi se Pengolo, “Doton ka, so sikandin se pinemallì ko amon meg-indan tepad kanak doton te menge otaw kenà Judiyo, aw menge selotan, aw sikiyo menge bowad-bowad i Israel.
ACT 9:16 Ipetaga-taga ko kandin te doen kelimahan domateng diyà kandin tandà te pegtaking din kanak.”
ACT 9:17 Penga niyan, dimoton si Ananias te balay inogpaan i Saulo. Peg-awop din, pinemàdan din si Saulo aw minikagi, “Kedowa ko, insogò a te Pengolo si Jesus, sìyan migpekità diyà kamno doton te dalan. Insogò a din dini kamno amon todà ka komità, aw amon domateng se Espiritu Santo kamno.”
ACT 9:18 Pegketà nedagdag se iling te onap lekat te mata i Saulo, aw yan kimità den sikandin. Penga niyan, binonyagan sikandin.
ACT 9:19 Pegpengaen din, migkèpiya se lawa din. Nenamay-namay mig-ogpà si Saulo diyà te menge otaw egpemenal doton te Damasko.
ACT 9:20 Wedà kenamay, dimoton si Saulo te simbahan te Judiyo aw migtoladà diyà te otaw kidoen te si Jesus se Batà te Timanem.
ACT 9:21 Nepela se kedita te otaw nenenalan kandin, aw migpebelaw-belaway dan, “Sikandin indà se egpemilang te menge otaw egpemenal doton te Jerusalem. Dimini ekon heman amon dekepen din se menge otaw egpemenal ki Jesus, aw ibingen din dan doton te Jerusalem amon kelebosowen te menge pengolo te simbahan te Judiyo.”
ACT 9:22 Labi pa migkeinit se pedowan i Saulo te peg-indan din te benal si Jesus se Misiyas insogò te Timanem. Wedà pekedaeg kandin se menge Judiyo eg-ogpà doton te Damasko, so ontò mèpiya se inikagi din.
ACT 9:23 Pegkenamay-namay, doen menge Judiyo kenà egpemenal miglalang mengimatay kandin.
ACT 9:24 Pengkey aldaw aw delem, egbangan dan kandin kidoen te dalan lekat te Damasko amon imetayan dan sikandin. Meneng doen otaw mig-indan ki Saulo te ibeg dan.
ACT 9:25 Yan tinebangan sikandin te menge doma otaw egpemenal te Timanem. Pegketengà te delem, in-awop dan sikandin doton didalem te boliyas aw intonton dan iyan lekat te bintanà doton te lowà te melangkaw alad nekelibed te Damasko amon mekelowà.
ACT 9:26 Pegdateng i Saulo doton te Jerusalem, ibeg din makop diyà te menge otaw egpemenal kidoen. Meneng nelemitan dan, so eden dan aw wedà sikandin pemenal ki Jesus.
ACT 9:27 Meneng inibing i Bernabe si Saulo doton te menge sogounun i Cristo. Mig-indan sikandin diyà kandan tepad te pegpekità aw peg-ikagi te Pengolo diyà kandin doton te dalan. In-indan din heman kandan te wedà pegketalaw si Saulo te peg-indan din tepad ki Jesus doton te Damasko.
ACT 9:28 Penga niyan, timaking si Saulo diyà te menge otaw egpemenal kidoen te Jerusalem. Wedà pegketalaw te pegtoladà din so insogò te Pengolo.
ACT 9:29 Migtoladà si Saulo te menge Judiyo eg-ikagi te kagi te Griego aw migpebelaw-belaway dan. Meneng ibeg dan imetayan sikandin.
ACT 9:30 Pegketaga-taga te menge doma din kenyan, inibing dan sikandin doton te Sesarya aw impesakay dan diyà te dakel belangay pesalo doton te Tarso.
ACT 9:31 Penga niyan, wedad den migsamok te otaw egpemenal doton te kedita te lonsod te Judiya aw Galiliya aw Samarya. Nelobos se pedowan dan, aw timolò dan te Pengolo, aw migtabang se Espiritu Santo kandan.
ACT 9:32 Miglegeb si Pedro doton te medita lonsod aw doton heman te menge sakop te Timanem kidoen te Lida.
ACT 9:33 Doen otaw kinità din si Eneas kenà egpekeiwal te walo se omay.
ACT 9:34 Minikagi si Pedro kandin, “E Eneas, enaw ka, so pinegolì ka i Jesu Cristo. Loloni se inibatan nikaw.” Pegketà minenaw si Eneas.
ACT 9:35 Kinità iyan te kedita te otaw doton te Lida aw doma lonsod te Saron. Nemenal dan heman diyà te Pengolo.
ACT 9:36 Doen sebad bayi egpemenal doton te Jopa ngadan din si Tabita, doma ngadan din si Dorcas. Mèpiya otaw sikandin, so gayed egtabang te doma otaw.
ACT 9:37 Doen sebad aldaw netigdaan si Dorcas, aw penga niyan nematay. Dinigos dan se lawa din, aw insawol dan doton te gibelayan.
ACT 9:38 Pegketaga-taga te menge otaw egpemenal te kidoen si Pedro te Lida, insogò dan se dowa otaw amon mangay kandin, so kenà mediyò se Jopa kidoen te Lida. Minikagi dan ki Pedro, “Ayas ka doton te Jopa.”
ACT 9:39 Yan timaking si Pedro kandan. Pegdateng din doton, inibing dan sikandin doton te gibelayan. Miglimpong se menge bayi balo diyà kandin, aw migkelag dan. Impekità dan kandin se menge saol aw dagom tinebil i Dorcas te wedà pa kematay.
ACT 9:40 Meneng impelowà i Pedro se kedita dan kidoen. Limongken si Pedro aw migtawal-tawal diyà te Timanem. Penga niyan, minasdang diyà te lawa te nematay aw minikagi, “E Tabita, enaw ka.” Penga niyan, gimimata si Dorcas. Pegkità din ki Pedro, minenaw.
ACT 9:41 Pinemàdan i Pedro se belad din aw yan impetindeg din. Penga niyan, tinawal i Pedro se menge bayi balo sipat menge doma sakop te Timanem, aw kinità dan si Dorcas neantay lekat te nematay.
ACT 9:42 Nedengeg iyan doton te kebelad te Jopa, aw medita se otaw nemenal te Pengolo.
ACT 9:43 Nenamay si Pedro mig-ogpà doton te Jopa diyà te balay te otaw biyasa eglanit te kindal te ayam-ayam si Simon.
ACT 10:1 Kidoen te Sesarya, doen serhinto ngadan din si Cornelio. Sikandin se sebad diyà te menge sondalo iningedanan Gropo Italya. Sikandin se olo te sebad gatos sondalo.
ACT 10:2 Egpenimanem sikandin pengkey kenà Judiyo. Gayed sikandin egtolò te Timanem sipat menge doma otaw eg-ogpà diyà te balay din. Egtebangan din se menge Judiyo nelimahan, aw gayed egtawal-tawal diyà te Timanem.
ACT 10:3 Menge alas tris te meapon, doen kinità din ontò melowa. Migpekità diyà kandin se anghil te Timanem aw minikagi, “E Cornelio.”
ACT 10:4 Timengteng si Cornelio pengkey ontò nepela. Timaba, kagi din, “Sir, eden lay se ibeg no ipeinang kanak?” Minikagi se anghil, “Dinineg te Timanem se pegtawal-tawal no kandin. Netegahan din heman se keido no diyà te menge Judiyo nelimahan. Neluba se Timanem.
ACT 10:5 Nayan, sogò ka te otaw domoton te Jopa amon mangay ki Simon, se doma ngadan din si Pedro.
ACT 10:6 Mig-ogpà sikandin medapag te dagat doton te balay te kesangay din si Simon biyasa eglanit te kindal te ayam-ayam.”
ACT 10:7 Peg-olì te anghil doton te langit, tinawal i Cornelio se dowa sineligan din aw sebad sondalo egpenimanem aw egkeseligan din.
ACT 10:8 Mig-indan kandan te kedita te neinang diyà kandin, aw insogò din dan domoton te Jopa.
ACT 10:9 Keeldawan niyan te agpet den alas dosi, aw medapag den dan doton te Jopa, nenayit si Pedro kidoen te atep te balay inogpaan din amon megtawal-tawal diyà te Timanem, so pantal se atep te balay sìyan.
ACT 10:10 Binallos si Pedro aw ibeg din komaen. Meneng dalem te wedà pa kelegà se kànen, doen impekità te Timanem diyà kandin.
ACT 10:11 Kinità din se langit neowang. Doen migpedanà diyà kandin iling te dakel bekas intonton lekat te langit aw inewidan diyà te epat dogong.
ACT 10:12 Awop niyan se ontò medita kemolò te menenanap aw ayam-ayam aw manok.
ACT 10:13 Doen minikagi diyà ki Pedro lekat te langit, “E Pedro, pengiyaw ka amon doen iotan nikaw.”
ACT 10:14 Meneng timaba si Pedro, “Sir, eked a kaen kenyan so eked a làpang te punù ingkeliwat i Moises, sìyan gayed ko egtoloen.”
ACT 10:15 Doen heman kagi todà dinineg din, “Ikà eg-ikagi te eked kepakay aw kànen, so minikagi se Timanem te mepakay iyan kànen.”
ACT 10:16 Meketelo heman iyan keinang diyà kandin iling kenyan, aw penga niyan neengat se bekas doton te langit. Meneng wedad kinaen din.
ACT 10:17 Mig-aneng-aneng si Pedro aw eden se kedegdagan te kinità din. Na, dalem niyan, mig-insà se menge otaw insogò i Cornelio aw kenan se balay i Simon. Telobo pa mig-aneng-aneng si Pedro, dimateng dan doton te lelebangan te balay inogpaan din. Kenà dan Judiyo.
ACT 10:18 Timawal dan aw mig-insà aw sìyan se balay inogpaan i Simon, se doma ngadan din si Pedro.
ACT 10:19 Dalem niyan te peg-aneng-aneng i Pedro te kinità din, minikagi se Espiritu Santo diyà kandin, “Na, tenà ka den, so doen telo otaw dimateng nengemahà kamno. Ikà egkulu te tomaking kandan, so insogò ko dan.”
ACT 10:21 Penga niyan, timenà si Pedro aw mig-insà kandan, kagi din, “Siaken se otaw pinengemahà niyo. Eden lay se tod niyo kanak?”
ACT 10:22 Timaba dan, “Insogò kay te sebad serhinto si Cornelio olo te sebad gatos sondalo. Sikandin se otaw egpenimanem aw egtolò te Timanem, aw induyun sikandin te medita Judiyo. Doen anghil te Timanem migpunù kandin te ipeangay ka din amon megtoladà ka kandin.”
ACT 10:23 Penga niyan, impeawop din dan aw impeidegà dan kidoen. Keeldawan niyan, timaking si Pedro kandan. Timaking heman kandin se menge doma otaw egpemenal lekat te Jopa.
ACT 10:24 Keeldawan heman niyan, dimateng dan doton te Sesarya. Migpeliman si Cornelio kandan, aw tapay din pigtipon se kedomaan din aw menge sigalak din.
ACT 10:25 Pegdateng i Pedro doton, simongon si Cornelio aw limongken diyà ki Pedro amon megsimba kandin.
ACT 10:26 Meneng minikagi si Pedro, “Tindeg ka. Siaken olò otaw. Kenà a Timanem. Ikà egsimba kanak.” Yan impetindeg i Pedro si Cornelio.
ACT 10:27 Nayan, migpebelaw-belaway dan aw minawop dan te balay. Medita se otaw netipon kidoen.
ACT 10:28 Minikagi si Pedro diyà kandan, “Netegahan niyo te eked kepakay aw megdoma se otaw Judiyo diyà te otaw kenà Judiyo. Eked heman kepakay aw gomemaw se otaw Judiyo diyà te balay te otaw kenà Judiyo. Siaken se Judiyo. Sikiyo se kenà. Meneng impetaga-taga a den te Timanem te eked a den peg-eked se megdoma te otaw kenà Judiyo.
ACT 10:29 Peg-angay dan kanak, timolò a aw dimini a. Na, nengà lay impeangay a no?”
ACT 10:30 Minikagi si Cornelio, “Netelowan pa, migtawal-tawal a diyà te Timanem te alas tris te meapon. Pegketà migpekità diyà kanak se anghil nenaol te mepotì,
ACT 10:31 aw minikagi diyà kanak, ‘E Cornelio, dinineg te Timanem se pegtawal-tawal no kandin, aw netegahan din heman se keido no diyà te menge Judiyo nelimahan.
ACT 10:32 Na, sogò ka te otaw domoton te Jopa amon mangay ki Simon, se doma ngadan din si Pedro. Mig-ogpà sikandin dapag te dagat diyà te balay te kesangay din si Simon biyasa eglanit te kindal te ayam-ayam.’
ACT 10:33 Yan se doun te ayas ta impeangay. Mèpiya so dini ka den. Na, elew, netipon se kedita day amon menenalan kay te kagi te Pengolo ikeliwat no kenami.”
ACT 10:34 Nayan, migtebò si Pedro migtoladà kandan, kagi din, “Ontò ko netegahan te kenà olò Judiyo se otaw egkeidowan te Timanem.
ACT 10:35 Meneng keidowan din se kedita te otaw egtolò kandin aw eg-inang te mèpiya, pengkey otaw Judiyo aw pengkey otaw kenà Judiyo.
ACT 10:36 Netegahan niyo te insogò te Timanem si Jesus diyà kenami menge bowad-bowad i Israel amon megtoladà kenitadon te mèpiya indan tepad te kelinaw te pedowan ibegay din diyà te otaw memenal ki Jesu Cristo, so sikandin se Pengolo te kedita tadon.
ACT 10:37 Netegahan niyo se neinang doton te Judiya, so pegkepenga te pegtoladà i Juan tepad te pegbonyag, migtebò si Jesus tege Nasarit migtoladà doton te Galiliya.
ACT 10:38 Simogò se Timanem kandin aw egbeyà-beyaan te Espiritu Santo. Pengkey peglegeb din, tinebangan din se menge otaw, aw pinegolian din se menge doma dinetengan te bosaw, so migtabang se Timanem kandin.
ACT 10:39 Kinità day se kedita te ininang din doton te menge lonsod te Judiya aw doton te Jerusalem. Penga niyan, inlansang dan si Jesus diyà te kros aw yan inimetayan.
ACT 10:40 Meneng inantay sikandin te Timanem lekat te nematay te iketelo te aldaw. Impekità te Timanem si Jesus diyà kenami.
ACT 10:41 Wedà sikandin kitai te kedita te otaw, meneng sikami pinemallì te Timanem se kimità kandin, aw kimaen kay doma kandin penga te pegkeantay din lekat te nematay.
ACT 10:42 Insogò kay din amon megtoladà kay te Mèpiya Indan tepad kandin diyà te menge otaw, aw amon meg-indan kay te benal si Jesus se pinemallì te Timanem meg-okom te kedita te otaw, pengkey nematay aw wedà pa kematay.
ACT 10:43 Kedita te telekeliwat te kagi te Timanem simolat te pegwedaden se salà te kedita te otaw memenal ki Jesus.”
ACT 10:44 Telobo pa minikagi si Pedro, dimateng se Espiritu Santo diyà te otaw nenenalan kandin.
ACT 10:45 Ontò nepela se kedita te Judiyo timaking ki Pedro, so dimateng heman se Espiritu Santo diyà kandan pengkey kenà dan Judiyo,
ACT 10:46 so dinineg dan se menge otaw kenà Judiyo nekeikagi te medita kemolò kagi te doma otaw, aw dimuyun dan heman te Timanem. Penga niyan, minikagi si Pedro diyà te menge Judiyo timaking kandin,
ACT 10:47 “Dimateng den heman se Espiritu Santo diyà kandan onawa te pegdateng din diyà kenitadon. Wedad den belabag te pegbonyag kandan.”
ACT 10:48 Penga niyan, minikagi si Pedro te bonyagan dan, so nemenal dan ki Jesu Cristo. Penga niyan, tinemengan dan si Pedro, aw mig-ogpà sikandin kidoen kandan te wedà kenamay.
ACT 11:1 Nayan, nedengeg se pegpemenal te menge otaw kenà Judiyo te kagi te Timanem. Netegahan iyan te menge sogounun i Cristo aw doma otaw egpemenal doton te Judiya.
ACT 11:2 Peglikò i Pedro doton te Jerusalem, simila se menge Judiyo egtoladà te keilangan tomolò se kedita te otaw nemenal ki Cristo te menge punù ingkeliwat i Moises, kagi dan,
ACT 11:3 “Medaet se ininang no, so mig-ogpà ka ekon doton te otaw kenà Judiyo, aw migdoma ka kandan kimaen.”
ACT 11:4 Penga niyan, migtebò si Pedro mig-indan diyà kandan te kedita te neinang.
ACT 11:5 Minikagi sikandin, “Pegtawal-tawal ko doton te Jopa, doen impekità te Timanem diyà kanak. Doen migpedanà diyà kanak iling te dakel bekas intonton lekat te langit aw inewidan diyà te epat dogong.
ACT 11:6 Penga niyan, timengteng a aw kinità ko se awop niyan ontò medita kemolò te ayam-ayam aw menenanap aw manok.
ACT 11:7 Penga niyan, doen minikagi diyà kanak lekat te langit, ‘E Pedro, pengiyaw ka amon doen iotan nikaw.’
ACT 11:8 Meneng timaba a, ‘Pengolo, eked a kaen kenyan, so eked a làpang te punù ingkeliwat i Moises, sìyan gayed ko egtoloen.’
ACT 11:9 Meneng todà heman minikagi diyà kanak, ‘Ikà eg-ikagi te eked kepakay aw kànen, so minikagi se Timanem te mepakay iyan kànen.’
ACT 11:10 Meketelo heman iyan keinang diyà kanak iling kenyan, aw penga niyan neengat se bekas doton te langit. Meneng wedad kinaen ko.
ACT 11:11 Penga niyan te wedà kenamay, dimateng se telo otaw doton te balay inogpaan ko aw kenà dan Judiyo.
ACT 11:12 Insogò dan lekat te Sesarya amon engayen a dan. Minikagi se Espiritu Santo diyà kanak te eked a kulu se tomaking kandan. Enem se otaw egpemenal timaking kanak lekat te Jopa. Pegdateng day doton te balay i Cornelio, minawop se kedita day.
ACT 11:13 Mig-indan sikandin kenami tepad te pegkità din te anghil doton te balay din. Minikagi se anghil, ‘Sogò ka te otaw domoton te Jopa amon mangay ki Simon, se doma ngadan din si Pedro.
ACT 11:14 Megtoladà sikandin kamno aw kedita te otaw eg-ogpà diyà te balay nikaw. Yan mekelowà kaw lekat te salà niyo.’
ACT 11:15 Pegtoladà ko kandan, dimateng se Espiritu Santo diyà kandan onawa te pegdateng din diyà kenitadon kedengan.
ACT 11:16 Yan neeneng-enengan ko se kagi te Pengolo, ‘Kedengan pineokit te wayeg se pegbonyag i Juan. Meneng sebad kemolò se pegbonyag te Timanem kenyo, so te eked kenamay, domateng se Espiritu Santo kenyo.’
ACT 11:17 So onawa se imbegay din diyà te menge otaw kenà Judiyo aw diyà kenitadon menge Judiyo te pegpemenal tadon te Pengolo tadon si Jesu Cristo, eked ko kebelebagi se Timanem.”
ACT 11:18 Pegdineg dan te inikagi din, wedà den dan sila kandin, meneng induyun dan se Timanem, so minikagi dan, “Pengkey menge otaw kenà Judiyo, mepakay aw megselsel dan te salà aw somalig dan ki Jesus amon begayan dan te Timanem te kaling pedowan.”
ACT 11:19 Pegkematay i Esteban, pinemilang se menge otaw egpemenal. Pegkadas dan, migbilit-bilit dan doton te Fenisya, aw Sipro, aw Antyokya kidoen te Sirya. Mig-indan dan te kagi te Timanem diyà te doma dan menge Judiyo mig-ogpà kidoen.
ACT 11:20 Meneng doen menge otaw egpemenal tege Sipro aw tege Sirene dimoton te Antyokya, aw migtoladà dan heman tepad ki Jesus diyà te menge otaw kenà Judiyo.
ACT 11:21 Migtabang se Pengolo kandan, aw medita se otaw nemenal aw timolò te Pengolo.
ACT 11:22 Pegketaga-taga te menge otaw egpemenal doton te Jerusalem, insogò dan si Bernabe doton te Antyokya.
ACT 11:23 Mèpiya otaw si Bernabe aw simalig diyà te Pengolo aw egbeyà-beyaan heman te Espiritu Santo. Pegdateng din doton te Antyokya, neluba sikandin so kinità din te ontò dan tinebangan te Timanem. Migtoladà sikandin kandan te eked pegdowa-dowa se aneng-aneng dan, aw lobosen dan se pedowan diyà te Pengolo. Pegdineg dan te kagi din, medita se otaw nemenal diyà te Pengolo.
ACT 11:25 Penga niyan, dimoton si Bernabe te Tarso amon mengemahà ki Saulo.
ACT 11:26 Pegkità din kandin, inibing din doton te Antyokya. Mig-ogpà dan kidoen te sebad se omay. Migtoladà dan te menge otaw egpemenal. Se menge otaw egpemenal doton te Antyokya, yan se monà iningedanan Sakop i Cristo.
ACT 11:27 Dalem te kidoen dan pa te Antyokya, doen menge telekeliwat te kagi te Timanem dimateng lekat te Jerusalem.
ACT 11:28 Si Agabo se sebad kandan. Impeikagi sikandin te Espiritu Santo te agpet den domateng se bitil diyà te kedita te ogpeanan. Netoman iyan dalem te peglowan i Claudio doton te Roma.
ACT 11:29 Yan migsebad se pedowan te kedita te tege Antyokya egpemenal te megtabang dan te menge otaw egpemenal doton te Judiya. Imbowang te teg sebad-sebad otaw se nebatog dan imbegay.
ACT 11:30 Pegkeimon dan te bowang, insogò dan si Bernabe aw si Saulo mengibing kenyan doton te menge egpengibing te simbahan kidoen te Judiya.
ACT 12:1 Nayan, dalem niyan, nemilang se selotan si Herod te menge otaw egpemenal.
ACT 12:2 Impesipal din se lieg i Santiago kakay i Juan.
ACT 12:3 Yan neluba se menge Judiyo kenà egpemenal. Pegketaga-taga i Herod te neluba dan kenyan, impedakep din heman si Pedro. Neinang iyan dalem te pista te pegpengaen te menge Judiyo te pan kenà eglebag.
ACT 12:4 Pegdakep dan kandin, kineleboso aw tinonggoan te sempolò teg enem sondalo. Sebad pongan, teg epat se egtonggò, so ibeg i Herod okomen din si Pedro te pegkepenga te Pista te Pegpelowà amon kitaen te kedita te otaw.
ACT 12:5 Dalem te pegkeleboso ki Pedro, ontò migtawal-tawal se menge otaw egpemenal diyà te Timanem tepad kandin.
ACT 12:6 Tengà te delem te wedà pa dateng se aldaw te peg-okom kandin, timedogi si Pedro doton didalem te keleboso. Dowa se sengkalì in-iket kandin. Impetengà-tengà sikandin diyà te dowa sondalo, aw doen heman menge sondalo egtonggò doton te lowà te tetakep.
ACT 12:7 Pegketà minanyag se didalem te keleboso, so kimidoen se sebad anghil te Timanem. Pinemàdan din si Pedro aw linoka. Minikagi sikandin, “Ayas ka enaw.” Penga niyan, nelebad se sengkalì lekat te bebenayun din,
ACT 12:8 aw minikagi se anghil, “Pengelen ka aw penepatos ka.” Pegtolò i Pedro kandin, minikagi se anghil, “Penaol ka aw taking ka kanak.”
ACT 12:9 Penga niyan, timaking si Pedro te anghil. Meneng wedà din ketegahi aw benal se neinang diyà kandin, so eden din aw olò tegeinep.
ACT 12:10 Minokit dan diyà te didowa sondalo egtonggò. Pegdateng dan doton te dakel tetakep te keleboso pesalo doton te lowà, neowang iyan te wedad otaw mig-owang. Yan nekelowà dan. Pegdateng dan doton te sowayan te dalan, ketà migkewedad se anghil.
ACT 12:11 Peg-imanman i Pedro, netegahan din te insogò te Pengolo se anghil din amon megpelowà kandin lekat te belad i Herod, amon eked ketoman se pinelimanan te menge Judiyo kenà egpemenal.
ACT 12:12 Pegkeaneng-aneng i Pedro kenyan, dimoton sikandin te balay i Maria, sìyan inay i Juan, se doma ngadan din si Marcos. Tapay netipon se medita otaw kidoen amon megtawal-tawal dan diyà te Timanem tepad kandin.
ACT 12:13 Pegdateng din doton, tinoktok din se dakel tetakep doton te lowà te balay. Doen sebad allang bayi ngadan din si Roda nenilib kandin.
ACT 12:14 Pegdineg din te kagi i Pedro, kimilala si Roda te sikandin aw ontò neluba, meneng wedà din owangi se tetakep so mig-ayas limikò amon meg-indan diyà te menge doma otaw te dimateng den si Pedro doton te lowà te balay.
ACT 12:15 Meneng minikagi dan, “Migkebook ka.” Meneng gayed minikagi si Roda te ontò iyan benal. Meneng minikagi dan, “Yan besi se anghil egtonggò kandin.”
ACT 12:16 Dalem niyan, gayed nenoktok si Pedro lamig inowang dan. Pegkità dan kandin, ontò dan nepela.
ACT 12:17 Intakyaw i Pedro se belad din amon mepenek dan, aw in-indan din diyà kandan se pegpelowà te Pengolo kandin lekat te keleboso. Minikagi heman sikandin, “Indani niyo si Santiago aw menge doma otaw egpemenal.” Penga niyan, nesayo si Pedro aw dimoton te doma ogpeanan.
ACT 12:18 Pegkeiselem, ontò migkebulung se kedita te sondalo, so wedà dan ketegahi aw kenan si Pedro.
ACT 12:19 Migsogò si Herod amon pemehaen si Pedro, meneng wedà dan kitai. Yan ontò ininsà i Herod se menge sondalo migtonggò, meneng wedà dan ketegahi aw kenan. Yan impeimatay din se kedita dan. Penga niyan, nesayo si Herod lekat te Judiya, aw dimoton te Sesarya, aw mig-ogpà doton te nenamay-namay.
ACT 12:20 Doen aldaw ontò neopal se selotan si Herod te menge tege Tiro aw tege Sidon. Nayan, dimoton dan kandin amon megkità, so eg-ebaten dan se kànen dan lekat te lonsod nesakop kandin. Impetaking dan se sebad otaw egtelaban ki Herod si Blasto.
ACT 12:21 Aldaw te peg-osay, nenaol si Herod te mèpiya saol te selotan, aw nenenoo doton te onsedanan te selotan, aw minikagi diyà te otaw netipon.
ACT 12:22 Ontò dan neluba aw dimuyun dan kandin, kagi dan, “Kenà otaw. Sikandin se Timanem.”
ACT 12:23 Pegketà impelumun sikandin te anghil te Timanem, so wedà din segdahi se pegduyun dan kandin. Penga niyan, kinaen sikandin te sapat aw yan nematay.
ACT 12:24 Medita se otaw inindanan te kagi te Timanem, aw migkedita se otaw egpemenal.
ACT 12:25 Pegkepenga dan i Bernabe aw si Saulo minated te bowang doton te Jerusalem, minolì dan doton te Antyokya. Impetaking dan si Juan, se doma ngadan din si Marcos.
ACT 13:1 Doen menge telekeliwat te kagi te Timanem aw menenoladà te otaw egpemenal kidoen te Antyokya. Sikandan si Bernabe, aw si Simeon, se doma ngadan din si Meitem, aw si Lucio tege Sirene, aw si Saulo, aw si Manaen doma i Herod migpetillesay.
ACT 13:2 Doen aldaw migpowasa se otaw egpemenal kidoen te Antyokya, aw megsimba dan te Pengolo. Dalem niyan, minikagi se Espiritu Santo diyà kandan, “Teniyi niyo kanak si Bernabe aw si Saulo, so doen ipeinang ko kandan.”
ACT 13:3 Penga niyan, migpowasa dan aw todà dan migtawal-tawal, aw pinemàdan dan si Bernabe aw si Saulo, aw penga niyan impekesayo dan.
ACT 13:4 Insogò se didowa dan te Espiritu Santo aw yan timegbeng dan pesalo doton te Silusya, aw simakay dan te dakel belangay pesalo doton te polò iningedanan Sipro.
ACT 13:5 Pegdateng dan doton, timenà dan doton te lonsod te Salamina, aw migtoladà dan te kagi te Timanem doton te menge simbahan te Judiyo. Timaking heman si Juan, se doma ngadan din si Marcos, so migtelaban kandan.
ACT 13:6 Peglegeb dan doton te menge lonsod te polò sìyan, timaman dan te Papos. Kinità dan se sebad otaw Judiyo si Barjesus. Biyasa ekon sikandin egdelikmata. Migpelingo-lingo sikandin telekeliwat te kagi te Timanem.
ACT 13:7 Egdoma sikandin te gobirnador te polò sìyan si Sergio Paulo. Ontò biyasa se gobirnador aw impeangay din si Bernabe aw si Saulo, so ibeg din menenalan te kagi te Timanem.
ACT 13:8 Meneng migsamok kandin se otaw biyasa egdelikmata si Elimas, so yan se gulal din kagi te Griego. Ibeg din megsagda te gobirnador amon eked sikandin pemenal.
ACT 13:9 Penga niyan, tinebangan te Espiritu Santo si Saulo, doma ngadan din si Pablo. Timengteng sikandin ki Elimas
ACT 13:10 aw minikagi, “Sikona se sakop i Satanas, so sikona se poon te kedita te metòlid. Biyasa ka eg-akal. Eg-ikagi ka te kebolalaw se benal kagi te Pengolo.
ACT 13:11 Na, mebota ka te menamay-namay, so ipelumun ka den te Pengolo. Eked ka kità.” Pegketà nebota sikandin. Wedad kinità din. Yan migkawà-kawà sikandin nengemahà te doma otaw meg-agak kandin.
ACT 13:12 Pegkità te gobirnador kenyan, ontò neleseb se pedowan din nenenalan te kagi te Pengolo, aw yan nemenal sikandin.
ACT 13:13 Penga niyan, simakay si Pablo aw menge doma din te dakel belangay lekat te Papos pesalo doton te Pampilya. Dimeleg dan doton te Perga. Meneng simoway si Juan kandan so minolì doton te Jerusalem.
ACT 13:14 Nesayo si Pablo aw si Bernabe lekat te Perga aw dimeleg dan doton te Antyokya kidoen te Pisidya. Aldaw te Sebado, dimoton dan te simbahan te Judiyo. Minawop dan aw nenenoo.
ACT 13:15 Migbasa se egpengibing te simbahan te kagi te Timanem insolat i Moises aw menge doma telekeliwat te kagi te Timanem. Penga niyan, nemoyò se egpengibing te simbahan diyà ki Pablo aw si Bernabe, kagi dan, “Menge kedowa day, aw doen itoladà niyo diyà te kedita day netipon, mepakay aw megtoladà kaw den.”
ACT 13:16 Yan timindeg si Pablo aw intakyaw din se belad amon mepenek dan. Minikagi sikandin, “Menge kedomaan ko bowad-bowad i Israel aw kedita niyo kenà Judiyo egtolò heman te Timanem, penenalan kaw te kagi ko.
ACT 13:17 Timanem se egseligan tadon aw sikandin se nemallì te kemonaan tadon. Peg-ogpà dan doton te mediyò ogpeanan te Ehipto, migtabang se Timanem kandan aw migkedita dan. Pineokit te inang metolos, migtabang se Timanem kandan amon mekelowà dan lekat te Ehipto.
ACT 13:18 Dalem te kepatan se omay, inipat dan te Timanem doton te kebigtilan.
ACT 13:19 Dinaeg te Timanem se pito pongan te otaw doton te Canaan, aw imbegay din se tanà diyà te menge Judiyo amon meg-ogpà dan kidoen
ACT 13:20 dalem te epat gatos keliman se omay. Penga niyan, doen menge otaw insogò te Timanem teg sebad-sebad amon mengibing kandan lamig te peg-ogpà te sebad telekeliwat te kagi te Timanem, si Samuel.
ACT 13:21 Penga niyan, ibeg dan doen selotan mengibing kandan. Yan insogò te Timanem se batà i Cis si Saulo, sebad sakop te pongan i Benjamin. Limowan si Saulo diyà kandan dalem te kepatan se omay.
ACT 13:22 Penga niyan, impelowà te Timanem si Saulo aw inselilin din si David limowan kandan, so minikagi se Timanem, ‘Pinemallì ko den se batà i Isai si David. Neluba a kandin so tomanen din se kedita te punù ko kandin.’
ACT 13:23 “Sebad bowad-bowad i David si Jesus. Sikandin se insogò te Timanem amon megpelowà te otaw lekat te salà. Sikandin se tapay din impakang diyà kenitadon, so sikitadon se bowad-bowad i Israel.
ACT 13:24 Te wedà pa pegtoladà si Jesus, migtoladà si Juan diyà te menge bowad-bowad i Israel te keilangan megselsel dan te salà amon bonyagan din dan.
ACT 13:25 Te wedà pa kematay si Juan, minikagi sikandin, ‘Kenà ko se pinelimanan niyo, meneng doen pa domateng mekeselilin kanak. Kenà botong se kelangkaw ko amon megtelaban a kandin pengkey meglebad a te sepatos din, so ontò sikandin melangkaw diyà kanak.’
ACT 13:26 “Penenalan kaw menge kedowa ko, menge bowad-bowad te kemonaan tadon si Abraham, aw kedita niyo egtolò te Timanem. Sikitadon se pinetega-tegahan te Timanem te doen den kelowaan lekat te salà.
ACT 13:27 Meneng se menge otaw doton te Jerusalem aw otaw limowan kandan, wedà dan ketaga-taga te sikandin se Egpelowà. Pengkey binasa dan se kagi insolat te menge telekeliwat te kagi te Timanem doton te simbahan dan te kelikit te simana, meneng wedà dan iyan kelebeti. Mig-okom dan kandin, aw yan netoman se inikagi te telekeliwat te kagi te Timanem.
ACT 13:28 Pengkey wedad palos salà din amon mepakay imetayan, meneng nemoyò dan ki Pilato amon imetayan sikandin.
ACT 13:29 Yan netoman se kedita te kagi te Timanem tapay insolat. Penga niyan, inabat dan se lawa din lekat te kros aw inlebeng dan iyan doton te ilib.
ACT 13:30 Meneng inantay sikandin te Timanem lekat te nematay.
ACT 13:31 Nenamay sikandin migpekità diyà te menge otaw timaking kandin kedengan lekat te Galiliya pesalo doton te Jerusalem. Eg-indan den dan diyà kenitadon menge Judiyo te benal kinità dan.
ACT 13:32 Dimini kay den amon meg-indan kenyo te Mèpiya Indan tepad ki Cristo. Pengkey kemonaan tadon se pinekangan te Timanem,
ACT 13:33 meneng netoman den iyan dini kenitadon, so insogò din den si Jesus. Yan se kedegdagan te kagi te Timanem insolat diyà te Delangan Ikedowa, ‘Sikona se Batà ko, aw ipetaga-taga ko den te siaken se Amay nikaw.’
ACT 13:34 Si Jesus se inantay te Timanem lekat te nematay, aw eked sikandin todà kematay, so yan se kagi te Timanem, ‘Ibegay ko kamno se mèpiya impakang ko ki David, aw metoman den iyan.’
ACT 13:35 Doen heman kagi insolat diyà te doma delangan, ‘Eked kepakay diyà kamno aw meledak se lawa te pinemallì nikaw.’
ACT 13:36 Gebii, timolò si David te Timanem lamig te pegkematay din, aw penga niyan inlebeng sikandin sipat te kemonaan din aw neledak se lawa din.
ACT 13:37 Meneng si Jesus, wedà keledak se lawa din, so inantay sikandin te Timanem.
ACT 13:38 “Menge kedowa ko, ibeg ko ketegahan niyo den te pineokit te pegkematay i Jesu Cristo, in-indan kenyo se pegwedad te salà. Eked kaw pekelowà lekat te salà pineokit te pegtolò niyo te punù ingkeliwat i Moises, meneng pineokit ki Jesu Cristo mekelowà se kedita te otaw memenal kandin.
ACT 13:40 “Peg-ahà kaw amon eked kaw pelumuni iling te menge otaw in-indan te telekeliwat te kagi te Timanem,
ACT 13:41 ‘Sikiyo menge otaw egtompuyus, peg-ahà kaw. Mepela kaw aw ipelumun ko sikiyo, so pengkey doen kepelahan inangen ko diyà kenyo, meneng eked kaw pa pemenal pengkey indanan kaw te doma otaw.’”
ACT 13:42 Penga te pegtoladà i Pablo, nemoyò se menge otaw te todà dan megtoladà kandan te modi Sebado.
ACT 13:43 Pegkesayo dan, tinekingan dan te medita otaw, menge Judiyo aw menge otaw kenà Judiyo egtolò te ketanem te menge Judiyo. Migpunù si Pablo aw si Bernabe kandan te keilangan somalig dan diyà te Timanem egpenabang kandan.
ACT 13:44 Pegdateng te modi Sebado, netipon se kedita te tege Antyokya amon menenalan dan te kagi te Timanem itoladà dan kandan.
ACT 13:45 Meneng ontò miningà se menge Judiyo kenà egpemenal so kinità dan se medita otaw netipon. Yan migsawal dan ki Pablo aw migtompuyus dan heman kandin.
ACT 13:46 Meneng wedà pegketalaw si Pablo aw si Bernabe, so timaba dan, “Keilangan sikiyo Judiyo se onà day indanan te kagi te Timanem. Meneng wedà kaw penenalan kenyan so eked kaw keibeg te kaling pedowan wedad temanan ibegay te Timanem. Doun niyan, meg-indan kay den te kagi te Timanem diyà te menge doma otaw kenà Judiyo.
ACT 13:47 Yan se inangen day so doen kagi te Pengolo insolat, ‘Inangen ko sikona solò amon manyag ka pengkey doton te menge otaw kenà Judiyo, amon mekelowà se kedita te otaw lekat te salà taman te kebelad te keneyonan.’”
ACT 13:48 Pegdineg te menge otaw kenà Judiyo kenyan, ontò dan neluba aw dimuyun dan te Timanem tepad te inikagi i Pablo. Nemenal se kedita te otaw neibeg te kaling pedowan wedad temanan.
ACT 13:49 Nedengeg se kagi te Pengolo doton te menge doma lonsod medapag te Antyokya.
ACT 13:50 Meneng dineliseg te menge Judiyo kenà egpemenal se menge obanen kidoen aw menge bayi melangkaw. Pinemilang dan si Pablo aw si Bernabe, aw impekadas dan lekat te lonsod sìyan aw kedepagan niyan.
ACT 13:51 Pegkesayo dan lekat kidoen, tinaktak dan se napò te tanà lekat te sepatos dan amon metaga-taga se otaw kidoen te doen salà dan so wedà dan penenalan te intoladà. Penga niyan, dimoton si Pablo aw si Bernabe te Ikonyo.
ACT 13:52 Ontò neluba se kedita te otaw egpemenal doton te Antyokya, so egbeyà-beyaan dan te Espiritu Santo.
ACT 14:1 Pegdateng i Pablo aw si Bernabe doton te Ikonyo, dimoton dan te simbahan te Judiyo. Pegtoladà dan kidoen, nemenal se medita otaw Judiyo aw menge doma otaw kenà Judiyo.
ACT 14:2 Meneng doen menge Judiyo wedà pemenal migdeliseg te menge doma otaw kenà Judiyo amon meopal dan heman diyà te menge otaw nemenal.
ACT 14:3 Nenamay mig-ogpà si Pablo aw si Bernabe kidoen. Wedà dan pegketalaw te pegtoladà tepad te keido te Pengolo, aw migtabang heman se Pengolo kandan, aw mig-inang dan heman te kepelahan amon metaga-taga se menge otaw te benal se intoladà dan.
ACT 14:4 Meneng wedà pegsebad se pedowan te otaw eg-ogpà kidoen, so doen migpedigsel te menge Judiyo kenà egpemenal, aw doen heman migpedigsel te menge sogounun i Cristo.
ACT 14:5 Miglalang heman se menge Judiyo kenà egpemenal aw menge doma otaw kenà Judiyo aw otaw limowan kandan. Ibeg dan peelegen aw bontogan dan te bato si Pablo aw si Bernabe amon matay.
ACT 14:6 Pegketaga-taga te sogounun i Cristo kenyan, kimadas dan doton te Listra aw Derbe, didowa lonsod doton te Likaonya. Migtoladà dan te Mèpiya Indan kidoen aw doton heman te kedepagan niyan.
ACT 14:8 Doton te Listra, doen sebad otaw kapig wedà palos pekeipanaw lekat te pegtebaw din.
ACT 14:9 Nenenalan sikandin te intoladà i Pablo. Penga niyan, netegahan i Pablo te nemenal se otaw kapig te mekebatog se Timanem megpegolì kandin. Yan nenginoet si Pablo kandin
ACT 14:10 aw timawal te dakel se kagi din, “Tindeg ka.” Pegketà neketindeg aw nekeipanaw.
ACT 14:11 Pegkità te menge doma otaw te ininang i Pablo, minikagi se tege Likaonya te kandan kagi wedà kelebeti i Pablo, aw migpetewalay dan, “Sikandan se timanem tadon migpekeotaw timenà dini kenitadon.”
ACT 14:12 Eden dan aw si Bernabe se timanem dan si Jupiter aw si Pablo ekon se sogounun din si Mercurio, so sikandin se migtoladà.
ACT 14:13 Doen dakel simbahan dan doton te lowà te Listra egtewal-tewalan dan ki Jupiter. Doen menge baka pineningaan dan te bolak inibing te pengolo te simbahan doton kandan amon idogsò dan ki Bernabe aw si Pablo.
ACT 14:14 Meneng pegketaga-taga dan te ibeg te menge otaw kidoen, linisì dan se saol tandà te lidò te pedowan dan. Ayas dan dimoton te otaw netipon aw timawal dan, kagi dan,
ACT 14:15 “Ikà niyo egdogsò kenami. Kenà kay timanem, meneng otaw kay heman iling kenyo. Dimini kay amon megtoladà kay kenyo te kagi te Timanem, amon lomengà kaw te pegsalig diyà te kenà benal timanem aw somalig kaw diyà te Timanem wedad temanan din, so sikandin se mig-inang te langit, aw tanà, aw dagat, aw kedita heman niyan.
ACT 14:16 Kedengan, pinebeyaan te Timanem se eg-inangen niyo kenà Judiyo.
ACT 14:17 Meneng gayed din impetaga-taga te doen Timanem, so egpemegay sikandin te odan, aw eg-entayen din se menge tinanem te kelikit te omay, amon megkedoen kànen niyo aw keluba te pedowan niyo.”
ACT 14:18 Pengkey pa te kagi dan sìyan, meneng ontò dan pa nelimahan te pegsagda dan te otaw megdogsò kandan.
ACT 14:19 Penga niyan, dimateng se menge Judiyo kenà egpemenal lekat te Ikonyo aw Antyokya sakop te Pisidya. Migdeliseg dan te tege Listra, aw yan binontogan dan si Pablo te bato, aw ginoyod dan doton te lowà te lonsod so eden dan aw nematay den.
ACT 14:20 Meneng pegketipon te otaw egpemenal doton kandin, minenaw si Pablo aw minolì doton te Listra. Keeldawan niyan, nesayo si Pablo aw si Bernabe pesalo doton te Derbe.
ACT 14:21 Migtoladà si Pablo aw si Bernabe te Mèpiya Indan kidoen te Derbe, aw medita se otaw nemenal ki Jesus. Penga niyan, limikò dan doton te Listra, aw Ikonyo, aw Antyokya kidoen te Pisidya.
ACT 14:22 Migtoladà dan te menge otaw egpemenal, aw mig-antag dan te pedowan te menge otaw kidoen amon melobos se pegsalig dan te Timanem. Minikagi dan, “Onà kidon tomayod te kelimahan, aw penga niyan lomowan se Timanem diyà kenitadon.”
ACT 14:23 Doen heman otaw pinemallì i Pablo aw si Bernabe doton te teg sebad-sebad lonsod, amon isawol dan egpengibing te simbahan. Doen aldaw migpowasa dan, aw nemoyò dan te tebangan dan te Pengolo egseligan dan.
ACT 14:24 Penga niyan, minokit dan doton te menge lonsod te Pisidya taman te menge lonsod te Pampilya.
ACT 14:25 Migtoladà dan doton te Perga, aw penga niyan dimeleg dan doton te Atalya.
ACT 14:26 Simakay dan te dakel belangay lekat te Atalya aw minolì dan doton te Antyokya, so yan se linekatan dan. Kedengan te peglekat dan doton te Antyokya, migtawal-tawal se otaw diyà te Timanem amon tebangan din se inang dan, sìyan neinang den dan.
ACT 14:27 Pegdateng dan doton te Antyokya, pigtipon dan se kedita te otaw egpemenal amon meg-indan dan te kedita te ininang te Timanem pineokit kandan, so tinebangan dan te Timanem te peg-indan dan te menge otaw kenà Judiyo, aw yan nemenal dan heman te kagi te Timanem.
ACT 14:28 Penga niyan, nenamay dan mig-ogpà kidoen te otaw egpemenal doton te Antyokya.
ACT 15:1 Nayan, doen menge otaw egpemenal dimateng lekat te Judiya kidoen te Antyokya aw migtoladà dan, kagi dan, “Eked kaw pekelowà lekat te salà niyo singed aw tolien kaw aw tomolò kaw te kedita te punù ingkeliwat i Moises.”
ACT 15:2 Meneng nengela si Pablo aw si Bernabe diyà te intoladà dan sìyan. Migpedindilay dan aw wedà dan pegsebad. Penga niyan, miglalang se menge otaw egpemenal te isogò dan si Pablo aw si Bernabe aw menge doma otaw domoton te Jerusalem amon megkità dan te menge sogounun i Cristo aw menge egpengibing te simbahan tepad te toladà dan sìyan.
ACT 15:3 Penga niyan, impekesayo dan te menge otaw egpemenal. Peg-okit dan te Fenisya aw Samarya, mig-indan dan te nemenal den se menge otaw kenà Judiyo. Pegdineg te kedita te otaw egpemenal kenyan, ontò dan neluba.
ACT 15:4 Pegdateng dan doton te Jerusalem, sinagman dan te menge otaw egpemenal, aw menge egpengibing te simbahan, aw menge sogounun i Cristo. Penga niyan, mig-indan si Pablo aw si Bernabe te kedita te ininang te Timanem pineokit kandan.
ACT 15:5 Meneng timindeg se menge sakop te Parisiyo egpemenal ki Jesus. Yan se menge otaw ontò egtolò te punù ingkeliwat i Moises. Minikagi dan, “Eked tadon peekopi se menge otaw kenà Judiyo singed aw tolien dan aw tomolò dan te kedita te punù ingkeliwat i Moises.”
ACT 15:6 Penga niyan, migtipon se kedita te sogounun i Jesus aw menge egpengibing te otaw egpemenal amon megpebelaw-belaway dan te menonen se menge otaw kenà Judiyo, aw tolien dan aw eked.
ACT 15:7 Nenamay dan migpebelaw-belaway. Penga niyan, timindeg si Pedro aw minikagi, “Menge kedowa ko, netegahan niyo den besi te siak se pinemallì te Timanem diyà te kedita tadon amon megtoladà a te Mèpiya Indan diyà te menge otaw kenà Judiyo amon memenal dan.
ACT 15:8 Netegahan te Timanem aw melobos se pedowan te kedita te otaw. Impetaga-taga din te sinakop din den se menge otaw kenà Judiyo pineokit te pegpemegay din te Espiritu Santo diyà kandan onawa te pegpemegay din diyà kenitadon kedengan.
ACT 15:9 Eden niyo aw olò menge Judiyo se linisan din te pedowan lekat te salà, meneng eleg din heman linisan se pedowan te menge otaw kenà Judiyo pineokit te pegpemenal dan kandin.
ACT 15:10 Meopal besi se Timanem aw ipetolò niyo dan te ontò melima, so wedà iyan kebatog te kemonaan tadon, aw eked kidon heman pekebatog kenyan.
ACT 15:11 Meneng netegahan tadon den te nekelowà kidon lekat te salà pineokit te tabang i Jesu Cristo kenitadon. Onawa heman se pegpelowà din te menge doma otaw, pengkey kenà dan Judiyo.”
ACT 15:12 Penga niyan, netingen se kedita te otaw aw nenenalan dan. Mig-indan si Bernabe aw si Pablo te menge kepelahan ininang te Timanem pineokit kandan doton te menge otaw kenà Judiyo.
ACT 15:13 Pegkepenga niyan, minikagi si Santiago, “Menge kedowa ko, penenalan kaw kanak.
ACT 15:14 Mig-indan den si Simon te doen den heman menge otaw kenà Judiyo pinemallì te Timanem amon makop dan heman diyà kandin.
ACT 15:15 Onawa heman se kagi te Timanem insolat te telekeliwat te kagi din,
ACT 15:16 ‘Penga niyan, lomikò a. Pengkey simagked se peglowan te bowad-bowad i David, meneng todà ko ipedeleg se peglowan dan
ACT 15:17 amon tomaking te Pengolo se kedita te otaw tinawal ko pengkey kenà dan Judiyo.
ACT 15:18 Yan se kagi te Pengolo impetaga-taga din gebii.’
ACT 15:19 “Nayan, aneng-aneng ko, eked kidon pegleges te menge otaw kenà Judiyo egpemenal te keilangan tolien dan.
ACT 15:20 Meneng mèpiya aw olò kidon somolat kandan aw megpunù kidon te eked dan kaen te pengelapen tapay imbegay diyà te inotaw, aw ayam-ayam egpelengen aw dipanog, aw eked dan heman peg-inabut te kenà kandan esawa.
ACT 15:21 Mèpiya aw tomolò dan kenyan, so lekat te gebii doen gayed egtoladà te punù ingkeliwat i Moises te kelikit te Sebado doton te simbahan te Judiyo kidoen te teg sebad-sebad lonsod.”
ACT 15:22 Penga niyan, migsebad se aneng-aneng te kedita te otaw egpemenal sipat menge sogounun i Cristo aw menge egpengibing te simbahan. Pinemallì dan se dowa otaw tomaking ki Pablo aw si Bernabe domoton te Antyokya. Se pinemallì dan, yan si Silas aw si Judas, se doma ngadan din si Barsabas, so induyun dan te kedita te otaw egpemenal.
ACT 15:23 Seini se kagi te solat impeibing kandan. “Menge kedowa day kenà Judiyo doton te Antyokya, aw Sirya, aw Silisya. Se simolat kani, yan se menge sogounun i Cristo aw egpengibing te simbahan. Sikami se kedowa niyo.
ACT 15:24 Doen ekon menge otaw lekat dini migsamok kenyo pineokit te pegtoladà dan. Migbulung dan ekon te pedowan niyo. Meneng wedà kay sogò kandan doton kenyo.
ACT 15:25 Migsebad den se aneng-aneng day te isogò day se otaw domoton kenyo, aw tomaking dan te kedowa tadon si Bernabe aw si Pablo egkedekelan tadon te pedowan.
ACT 15:26 Se didowa dan gayed egsalig te Pengolo tadon si Jesu Cristo.
ACT 15:27 Se pinemallì day isogò doton kenyo, yan si Judas aw si Silas. Sobloden dan se kagi insolat day doton kenyo.
ACT 15:28 Inelladan kay te Espiritu Santo, aw yan migsebad kay te eked kay pegleges te pegtolò niyo te kedita te ketanem day, meneng seini olò se ipunù day kenyo.
ACT 15:29 Ikà niyo egpengaen te pengelapen tapay imbegay diyà te inotaw, aw dipanog, aw ayam-ayam pelengen. Ikà niyo heman eg-inabut te kenà kenyo esawa. Mèpiya aw tomolò kaw kenyan. Taman den iyan te ikegiyen day kenyo.”
ACT 15:30 Penga niyan, nesayo se insogò dan pesalo doton te Antyokya. Pegdateng dan doton te Antyokya, pigtipon dan se kedita te otaw egpemenal. Imbegay dan se solat diyà kandan.
ACT 15:31 Pegbasa dan kenyan, ontò neluba se pedowan dan tandà te solat sìyan.
ACT 15:32 Nenamay migtoladà si Judas aw si Silas te menge otaw egpemenal, so telekeliwat dan te kagi te Timanem. Inantag dan se pedowan te menge otaw egpemenal amon melobos se pedowan dan diyà te Timanem.
ACT 15:33 Pegkenamay-namay dan kidoen, nesayo si Judas aw si Silas, aw minikagi se menge otaw egpemenal te mèpiya peg-ipanaw dan. Penga niyan, minolì dan doton te Jerusalem. [
ACT 15:34 Meneng aneng-aneng i Silas, mèpiya aw meg-ogpà sikandin kidoen.]
ACT 15:35 Meneng mig-ogpà pa si Pablo aw si Bernabe doton te Antyokya. Migtoladà aw mig-indan dan te kagi te Pengolo. Medita heman se otaw migtelaban kandan.
ACT 15:36 Pegkenamay-namay, minikagi si Pablo diyà ki Bernabe, “Elew, lomikò ki den doton te kedita te lonsod, sìyan pigtoledaan ta te kagi te Pengolo kedengan, amon ketegahan ta aw eden den se kandan pegpemenal.”
ACT 15:37 Ibeg i Bernabe ipetaking dan si Juan, se doma ngadan din si Marcos.
ACT 15:38 Meneng eked keibeg si Pablo, so simoway si Marcos kandan kedengan doton te Pampilya, aw wedà ebey pegtelaban kandan.
ACT 15:39 Yan migpedindilay si Bernabe aw si Pablo, aw yan se doun te migsoway dan. Penga niyan, impetaking i Bernabe si Marcos, aw simakay dan te dakel belangay pesalo doton te Sipro.
ACT 15:40 Yan pinemallì i Pablo si Silas tomaking kandin. Migtawal-tawal se menge otaw egpemenal te megtabang se Pengolo kandan te peselowan dan. Penga niyan, nesayo dan.
ACT 15:41 Tineped dan se menge lonsod doton te probinsya te Sirya aw Silisya. Inantag dan se pedowan te menge otaw egpemenal amon melobos se pedowan dan diyà te Timanem.
ACT 16:1 Dimoton si Pablo aw si Silas te Derbe aw Listra. Doen sebad otaw mig-ogpà kidoen ngadan din si Timoteo. Egpemenal sikandin te Timanem sipat inay din. Judiyo se inay din, meneng kenà Judiyo se amay din.
ACT 16:2 Mèpiya otaw si Timoteo. Induyun sikandin te kedita te otaw egpemenal doton te Listra aw Ikonyo.
ACT 16:3 Ibeg i Pablo ipetaking din si Timoteo. Yan impetolì din sikandin amon eked kebensihi te menge Judiyo doton te menge lonsod peselowan dan, so netegahan dan te wedà pa ketolì so kenà Judiyo se amay din.
ACT 16:4 Peg-okit dan te menge lonsod, migtoladà dan te impunù te menge sogounun i Cristo aw egpengibing te simbahan doton te Jerusalem amon tomolò dan kenyan.
ACT 16:5 Yan nelobos se pegsalig te menge otaw egpemenal te Timanem, aw doen heman menge doma otaw nemenal te Timanem te kelikit te aldaw.
ACT 16:6 Migtoladà dan te kagi te Timanem doton te menge lonsod kidoen te Frigya aw Galasya, so sinagda dan te Espiritu Santo te eked dan pegtoladà doton te Asya.
ACT 16:7 Pegkedapag dan doton te Misya, ibeg dan domoton te Bitinya, meneng todà dan sinagda te Espiritu Santo.
ACT 16:8 Penga niyan, lineklakan dan se Misya aw dimeleg dan doton te Troas.
ACT 16:9 Pegdateng dan doton, doen impekità te Timanem diyà ki Pablo te delem. Kinità din iling te bawa te otaw tege Masidonya nemoyò, kagi din, “Ayas ka diyà te Masidonya aw tebangi kay.”
ACT 16:10 Penga niyan, nengemahà kay te sekayan day pesalo doton te Masidonya, so netegahan day te insogò kay te Timanem doton kandan amon megtoladà kay kandan te Mèpiya Indan tepad ki Jesus.
ACT 16:11 Simakay kay te dakel belangay lekat te Troas, aw minatas kay doton te polò iningedanan Samotrasya. Keeldawan niyan, simakay kay heman doton te Niyapolis.
ACT 16:12 Lekat kidoen, minipanaw kay doton te Filipos. Yan se ontò dakel lonsod doton te Masidonya, aw sakop te Roma se menge otaw eg-ogpà kidoen. Nenamay-namay kay mig-ogpà kidoen.
ACT 16:13 Pegkesebado, dimoton kay te wayeg lowà te Filipos, so doen ekon kidoen tiponanan te menge otaw megtawal-tawal. Nenenoo kay kidoen te kilid te wayeg, aw migpebelaw-belaway kay te menge bayi netipon kidoen.
ACT 16:14 Doen sebad bayi si Lydia nenenalan kenami. Tiyatira se tinebolan din. Egpemeligyà sikandin te penenaktun melalag kidoen te Filipos. Gayed sikandin egtolò te ibeg te Timanem. Pegpenenalan i Lydia te intoladà day, migtabang se Pengolo kandin amon memenal ki Jesus.
ACT 16:15 Binonyagan sikandin sipat kedita te otaw mig-ogpà diyà kandin. Penga niyan, minikagi sikandin, “Aw nemenal kaw te nelobos se pedowan ko diyà te Pengolo, peg-ogpà kaw den doton te balay ko.” Ontò migpeido-ido si Lydia aw yan timandù kay.
ACT 16:16 Nayan, doen sebad aldaw migpesalo kay doton te wayeg amon megtawal-tawal. Kinità day se sebad allang bayi enitowan. Sikandin se teleetok aw eden se domateng diyà te otaw. Yan dakel se ontong te menge tig-apò din pineokit te peg-etok din.
ACT 16:17 Timelokon se bayi kenami aw timawal, kagi din, “Sikandan se sogounun te Timanem Melangkaw. Dimini dan amon megtoladà dan kenyo te doen kelowaan lekat te salà.”
ACT 16:18 Yan se eg-inangen din te kelikit te aldaw. Sagwa wedà peketayod si Pablo, yan siminalo kandin aw minikagi diyà te bosaw, “Insogò a i Jesu Cristo, aw yan mikagi a kamno, lowà ka diyà kandin.” Pegketà limowà se bosaw diyà kandin.
ACT 16:19 Pegketaga-taga te menge tig-apò te pigbàtan den se ebetanan dan te kwarta, inewidan dan si Pablo aw si Silas. Inibing dan doton te oseyanan kidoen te poblasyon.
ACT 16:20 Inibing dan doton te dowa howis aw minikagi dan, “Migsamok dan dini kenitadon. Sikandan se Judiyo,
ACT 16:21 aw doen intoladà dan eked tadon kepakay toloen, so sakop te Roma se kedita tadon eg-ogpà dini.”
ACT 16:22 Yan ontò neopal se kedita dan ki Pablo aw si Silas. Linisì te howis se saol i Pablo aw si Silas amon bedasen dan.
ACT 16:23 Penga dan binadas, kineleboso dan. Migpunù se howis diyà te otaw egtonggò te ontò din imendayan amon eked dan pekelowà.
ACT 16:24 Timolò sikandin aw insawol din dan doton te tambì didalem te keleboso. Impeawop se benis dan diyà te awang te kayo amon eked dan pekekadas.
ACT 16:25 Tengà te delem, migtawal-tawal si Pablo aw si Silas diyà te Timanem. Migdelangan dan heman se dimuyun te Timanem. Nenenalan kandan se menge doma otaw kineleboso.
ACT 16:26 Pegketà miglinog ontò magsen, aw ontò nekayong se keleboso. Neowang se kedita te tetakep niyan, aw nelebad se sengkalì in-iket te menge otaw kineleboso.
ACT 16:27 Pegkeloka te otaw egtonggò, kinità din se tetakep neowang, aw tinagnos din se kempilan amon megpeumul-umul, so eden din aw nekelowà den se menge otaw kineleboso.
ACT 16:28 Meneng timawal si Pablo te dakel se kagi din, “Ikà egpeumul-umul, so seini pa se kedita day.”
ACT 16:29 Penga niyan, impeangay te otaw egtonggò se solò, aw ayas minawop. Limongken sikandin diyà ki Pablo aw si Silas, aw tinegangtang tandà te lamit din.
ACT 16:30 Inibing din dan doton te lowà aw mig-insà, kagi din, “Eden lay se inangen ko amon mekelowà a lekat te salà ko?”
ACT 16:31 Timaba dan, “Pemenal ka te Pengolo si Jesus amon mekelowà ka lekat te salà, sikona aw menge doma otaw eg-ogpà diyà te balay nikaw.”
ACT 16:32 Penga niyan, migtoladà si Pablo te kagi te Pengolo diyà kandan aw kedita te otaw eg-ogpà diyà te balay din.
ACT 16:33 Tengà pa te delem, inonawan din se palì dan. Binonyagan dan sikandin aw kedita te otaw mig-ogpà diyà kandin.
ACT 16:34 Inibing din dan doton te balay din, aw pinekaen din dan. Neluba se kedita dan, so nemenal den dan te Timanem.
ACT 16:35 Pegkealdaw, insogò te howis se menge sondalo doton te otaw egtonggò aw minikagi dan, “Pelowai dan.”
ACT 16:36 Penga niyan, minikagi se otaw egtonggò ki Pablo, “Doen insogò te howis amon ipelowà kaw. Mepakay kaw den lomowà. Ibeg ko doen kelinaw te pedowan niyo.”
ACT 16:37 Meneng wedà tandù si Pablo. Minikagi sikandin diyà te sondalo, “Pengkey sakop kay te Roma, meneng binadas kay dan diyà te keditaan te otaw. Penga niyan, kineleboso kay, pengkey wedad salà day. Aw ibeg dan pa, ieles se pegpekesayo kenami. Meneng eked kay kesayo singed aw sikandan se domini amon megpelowà kenami.”
ACT 16:38 Penga niyan, kineliwat te sondalo se inikagi dan doton te dowa howis. Pegketaga-taga te howis te sakop dan te Roma, ontò dan nelemitan.
ACT 16:39 Yan dimoton dan te keleboso amon ipelowà dan. Migpeido-ido dan ki Pablo aw si Silas, aw pigbalaw-balaw dan te mesayo dan lekat te Filipos.
ACT 16:40 Pegkelowà dan, dimoton dan te balay i Lydia. Yan migkità dan te menge otaw egpemenal, aw inantag dan se pedowan dan amon melobos se pedowan dan diyà te Timanem. Penga niyan, nesayo dan lekat te Filipos.
ACT 17:1 Minokit si Pablo aw si Silas doton te Ampipolis aw Apolonya. Dimoton dan te Tesalonika. Doen sebad simbahan te Judiyo kidoen.
ACT 17:2 Migsimba si Pablo so yan se ketanem din. Migtoladà sikandin te kagi te Timanem kidoen te simbahan te kelikit te Sebado taman te telo simana.
ACT 17:3 Miglebad-lebad heman sikandin te kagi te Timanem insolat amon ontò dan kelebetan te keilangan pemilangen aw imetayan se Misiyas isogò te Timanem, aw penga niyan meantay heman lekat te nematay. Minikagi sikandin, “Si Jesus se Misiyas insogò te Timanem, sìyan intoladà ko kenyo.”
ACT 17:4 Doen menge Judiyo nemenal aw migpesakop diyà ki Pablo aw si Silas. Nemenal heman se medita otaw kenà Judiyo egsalig diyà te Timanem aw medita heman bayi melangkaw.
ACT 17:5 Meneng miningà se menge Judiyo kenà egpemenal, aw pigtipon dan se menge doma medaet otaw wedad eg-inangen dan. Pegkedita dan, migsamok dan kidoen, aw dimoton dan te balay i Jason amon dekepen dan kidoen si Pablo aw si Silas aw ibingen dan doton te menge otaw netipon.
ACT 17:6 Meneng kinità dan olò si Jason aw menge doma otaw egpemenal, aw yan se inibing dan doton te menge konsiyal. Minikagi dan, “Dimini den se otaw migsamok te kedita te otaw te keneyonan.
ACT 17:7 Mig-ogpà den dan doton ki Jason. Limàpang dan te punù te selotan si Cesar, so doen son dan olò sebad se lomowan, aw yan si Jesus.”
ACT 17:8 Nayan, ontò neopal se menge konsiyal aw kedita te doma otaw te pegdineg dan kenyan.
ACT 17:9 Penga niyan, doen kwarta insawol i Jason aw menge doma otaw egpemenal, aw migpakang dan te eked pegsamok si Pablo aw si Silas. Penga niyan, nekelowà dan.
ACT 17:10 Pegkedelem niyan, impekesayo te menge otaw egpemenal si Pablo aw si Silas, aw dimoton dan te Berya. Pegdateng dan doton, dimoton dan te simbahan te Judiyo.
ACT 17:11 Kenà iling te tege Tesalonika se menge otaw doton te Berya, so ontò measeb se tege Berya egpenenalan te kagi te Timanem. Kelikit te aldaw, migbasa dan te kagi te Timanem insolat amon ketegahan dan aw benal se intoladà i Pablo.
ACT 17:12 Medita se Judiyo nemenal, aw doen heman menge Griego meama aw bayi melangkaw eleg nemenal.
ACT 17:13 Sagwa netaga-taga se menge Judiyo kenà egpemenal doton te Tesalonika te migtoladà si Pablo te kagi te Timanem doton te Berya, dimoton dan heman amon megsamok dan.
ACT 17:14 Yan impekesayo te menge otaw egpemenal si Pablo pesalo doton te dagat. Meneng si Silas aw si Timoteo mig-ogpà pa doton te Berya.
ACT 17:15 Doen doma otaw timaking ki Pablo taman te Atenas. Peg-olì dan doton te Berya, inindanan dan si Silas aw si Timoteo te intogon dan i Pablo te ayas dan domoton te Atenas.
ACT 17:16 Dalem te pegtagad i Pablo doton te Atenas, ontò nepuluk se pedowan din, so ontò medita se inotaw egdogsoan te otaw eg-ogpà kidoen.
ACT 17:17 Migpebelaw-belaway si Pablo te menge Judiyo aw menge doma otaw egsalig diyà te Timanem doton te simbahan dan. Kelikit te aldaw, migpebelaw-belaway heman si Pablo te menge otaw netelaan din doton te pedyanan.
ACT 17:18 Doen menge menenoladà sakop te menge Epicuriano aw Estoiko migdindil ki Pablo. Migtompuyus se sebad, kagi din, “Wedad besi ontong te intoladà te metibelisì sìyan.” Doen doma minikagi, “Egtoladà besi tepad te menge doma timanem egsimbahen doton te mediyò ogpeanan.” Minikagi dan kenyan so migtoladà si Pablo tepad ki Jesus aw keentayan.
ACT 17:19 Inibing dan si Pablo doton te tiponanan te obanen aw pinemoyò dan sikandin, kagi dan, “Indani kay aw eden se kaling toladà nikaw.
ACT 17:20 Doen intoladà no wedà day palos dinegi. Lebadi iyan diyà kenami.”
ACT 17:21 Yan se inikagi dan, so se ibeg te tege Atenas aw ibeg heman te menge doma otaw eggemaw kidoen, gayed dan eg-indan aw egpenenalan te kaling toladà, so yan se ketanem dan.
ACT 17:22 Penga niyan, timindeg si Pablo doton te monà te kedita te obanen netipon. Minikagi sikandin, “Penenalan kaw tege Atenas. Netegahan ko te ontò kaw measeb te pegsimba niyo,
ACT 17:23 so peglegeb ko dini te Atenas, kinità ko se medita dogsoanan niyo. Doen heman sebad sinolatan te kagi, ‘Dogsoanan te timanem wedà tadon ketegahi.’ Nayan, se Timanem egdogsoan niyo pengkey wedà niyo ketegahi, sikandin se itoladà ko den kenyo.
ACT 17:24 Eked sikandin peg-ogpà diyà te lowang te simbahan inangen te otaw, so sikandin se mig-inang te keneyonan aw kedita niyan, aw sikandin se Pengolo te kedita doton te langit aw dini heman te tanà.
ACT 17:25 Wedad palos puluk din itabang te otaw kandin, so sikandin se egpemegay te kedita diyà kenitadon, pengkey pedowan tadon aw omol.
ACT 17:26 Ininang te Timanem se sebad otaw si Adam, aw sikandin se kemonaan te kedita te otaw eg-ogpà dini te kebelad te keneyonan. Tapay piglalang te Timanem se kenamay aw temanan te ogpeanan dan.
ACT 17:27 Ininang te Pengolo se kedita niyan amon mengemahà se kedita tadon kandin aw kitaen tadon sikandin, so kenà mediyò se Timanem diyà te teg sebad-sebad kenitadon.
ACT 17:28 ‘Lekat te ibeg te Timanem timebaw kidon, aw timilles kidon, aw timayod kidon lamig songkani.’ Iling te insolat te sebad doma niyo biyasa, kagi din, ‘Tengke Timanem se kedita tadon.’
ACT 17:29 Aw benal sikitadon se tengke Timanem, eked kepakay aw meg-aneng-aneng kidon te Timanem se iling te inotaw ininang te bolawan aw selapì aw bato pinelasan te otaw biyasa.
ACT 17:30 Pengkey kedengan pinebeyaan te Timanem se eg-inangen te otaw so wedà dan pa ketaga-taga kandin, meneng songkani impunù din te megselsel se kedita te otaw,
ACT 17:31 so tapay den pinemallì te Timanem se aldaw te peg-okom te kedita te otaw. Doen den pinemallì din meg-okom, aw metòlid se peg-okom din. Metoman iyan, so inantay sikandin te Timanem lekat te nematay.”
ACT 17:32 Pegdineg dan te doen neantay lekat te nematay, doen menge otaw nebebayat aw migtompuyus. Meneng minikagi se menge doma, “Toledai kay todà te modi aldaw.”
ACT 17:33 Penga niyan, nesayo si Pablo.
ACT 17:34 Meneng doen menge doma otaw nemenal te Timanem aw timaking ki Pablo. Yan se sebad obanen kidoen si Dionisio, aw sebad bayi si Damaris, aw menge doma otaw eleg nemenal.
ACT 18:1 Penga niyan, nesayo si Pablo lekat te Atenas aw dimoton te Korinto.
ACT 18:2 Kinità din kidoen se sebad Judiyo si Akilas timebaw doton te Ponto, kaling dimateng lekat te Italya sipat esawa din si Priscila, so migpunù se selotan si Claudio te mesayo se kedita te Judiyo lekat te Roma kapital te Italya. Gimemaw si Pablo diyà kandan.
ACT 18:3 Mig-ogpà diyà kandan aw migpetelebanay dan, so sikandan se otaw biyasa eg-inang te balay eg-etepan te penenaktun, onawa te eg-inangen i Pablo.
ACT 18:4 Kelikit te Sebado, gayed egpeinsaay si Pablo te menge otaw doton te simbahan te Judiyo amon doen menge Judiyo memenal aw pengkey kenà Judiyo.
ACT 18:5 Meneng pegdateng i Silas aw si Timoteo lekat te Masidonya, yan gayed den migtoladà si Pablo te menge Judiyo te kagi te Timanem te kelikit te aldaw, aw se intoladà din kandan, si Jesus se Misiyas insogò te Timanem.
ACT 18:6 Meneng neopal se menge Judiyo ki Pablo, aw migtompuyus dan kandin. Penga niyan, imbuya-buya i Pablo se saol din amon ketegahan dan te doen salà dan, so wedà dan pemenal. Minikagi sikandin, “Aw ipelumun kaw, inday kenyo aw yan se ibeg niyo. Wedad labut ko. Lekat seini, megtoladà a te menge otaw kenà Judiyo.”
ACT 18:7 Penga niyan, nesayo si Pablo lekat te simbahan te Judiyo, aw minalin doton te balay te sebad otaw kenà Judiyo si Tito Justo egtolò te ibeg te Timanem. Tangkil te simbahan te Judiyo se balay din.
ACT 18:8 Se egpengibing te simbahan te Judiyo si Crispo, nemenal te Pengolo sipat kedita te otaw eg-ogpà diyà te balay din. Nemenal heman se medita doma otaw doton te Korinto aw binonyagan dan.
ACT 18:9 Tengà te delem, migpekità se Pengolo diyà ki Pablo, aw minikagi diyà kandin, “Ikà egkelemitan. Ikà eglengà te pegtoladà, meneng ebey ka pa pegtoladà,
ACT 18:10 so egtebangan ta. Wedad otaw megpeeleg kamno, so medita pa se otaw memenal kanak dini te Korinto.”
ACT 18:11 Penga niyan, mig-ogpà si Pablo doton te Korinto lamig te sebad se omay aw enem se bolan, aw migtoladà sikandin te kagi te Timanem diyà te otaw eg-ogpà kidoen.
ACT 18:12 Pegkeinang i Galio gobirnador doton te Gresya, migsebad se menge Judiyo kenà egpemenal, aw dinakep dan si Pablo, aw inibing dan doton ki Galio amon insaen.
ACT 18:13 Minikagi dan, “Kolang se intoladà din tepad te pegsimba diyà te Timanem, so eked tadon iyan kepakay toloen.”
ACT 18:14 Mikagi peden si Pablo, meneng minikagi si Galio diyà te menge Judiyo, “Simpana sikandin se metibaet aw metibonò, yan menenalan a kenyo.
ACT 18:15 Meneng aw olò kaw megpebelaw-belaway tepad te pegtoladà niyo, aw kemonaan niyo, aw punù egtoloen niyo, sikiyo se meg-osay kenyan, so eked a keibeg meg-osay aw iling kenyan.”
ACT 18:16 Penga niyan, impekesayo din dan.
ACT 18:17 Penga niyan, dinakep te menge otaw kenà Judiyo se sebad egpengibing te simbahan te Judiyo si Sostenes. Binadas dan sikandin doton te lowà te oseyanan. Meneng wedà pegsagman si Galio kenyan.
ACT 18:18 Nenamay si Pablo mig-ogpà doma te menge otaw egpemenal kidoen te Korinto. Pegkesayo din, timaking heman si Akilas aw esawa din si Priscila. Binolo si Pablo doton te Sengkriya, so yan se pengilala te tinoman din den se pakang din diyà te Timanem. Penga niyan, simakay se telo dan te dakel belangay pesalo doton te Sirya.
ACT 18:19 Pegdateng dan doton te Efeso, tinenanan i Pablo si Akilas aw si Priscila, so dimoton si Pablo te simbahan te Judiyo aw migtoladà kidoen.
ACT 18:20 Ibeg dan meg-ogpà si Pablo kidoen kandan te menamay, meneng wedà keibeg si Pablo kenyan.
ACT 18:21 Pegkesayo i Pablo kidoen, minikagi sikandin, “Aw meibeg se Timanem, lomikò a dini kenyo.” Penga niyan, simakay si Pablo te dakel belangay lekat te Efeso.
ACT 18:22 Pegdateng din doton te Sesarya, dimeleg doton te Jerusalem amon gomemaw te menge otaw egpemenal kidoen. Penga niyan, dimoton te Antyokya.
ACT 18:23 Pegkenamay-namay din kidoen, nesayo todà. Timeped sikandin te menge ogpeanan doton te kebelad te Galasya aw Frigya amon entagen din se pedowan te menge otaw egpemenal.
ACT 18:24 Doen sebad Judiyo si Apolos lekat te Alejandriya dimateng doton te Efeso. Mèpiya se pegtoladà din aw biyasa sikandin te kagi te Timanem.
ACT 18:25 Netegahan din se ibeg te Pengolo. Pengkey ontò sikandin measeb eg-indan, aw metòlid se pegtoladà din tepad te Pengolo, meneng olò tepad te pegbonyag i Juan Memonyagay se netegahan din.
ACT 18:26 Wedà pegketalaw si Apolos te pegtoladà doton te simbahan te Judiyo. Pegdineg i Priscila aw si Akilas kandin, impetaking dan sikandin doton te balay dan amon megtoladà dan kandin te benal kagi te Timanem wedà din ketegahi.
ACT 18:27 Sagwa neibeg si Apolos domoton te Gresya, migtabang kandin se menge otaw nemenal doton te Efeso. Simolat dan doton te menge otaw dotonan din amon segmanen dan sikandin. Pegdateng din doton te Gresya, mèpiya se pegtabang din te menge otaw nemenal pineokit te tabang te Timanem kandin.
ACT 18:28 Pegtoladà din, linebad-lebad din se kagi te Timanem amon ketegahan te menge Judiyo te si Jesus se Misiyas insogò te Timanem. Yan dinaeg din se menge Judiyo migdindil kandin kidoen te keditaan te otaw.
ACT 19:1 Dalem te peg-ogpà i Apolos doton te Korinto, limiyo si Pablo te bontod pesalo doton te Efeso. Netelaan din kidoen se menge tinoledaan.
ACT 19:2 Mig-insà si Pablo, kagi din, “Pegpemenal niyo te Timanem, dimateng lay se Espiritu Santo diyà kenyo?” Timaba dan, “Wedà, so wedà kay toledai tepad te Espiritu Santo.”
ACT 19:3 Mig-insà si Pablo, kagi din, “Eden lay kemoloi te pegbonyag se pinemenalan niyo?” Timaba dan, “Pegbonyag i Juan Memonyagay.”
ACT 19:4 Minikagi si Pablo, “Binonyagan i Juan se otaw migselsel te salà dan. Meneng migtoladà heman sikandin te keilangan memenal se menge Judiyo diyà te sebad otaw somelilin kandin, aw yan si Jesus.”
ACT 19:5 Pegdineg dan kenyan, nemenal dan diyà te Pengolo si Jesus aw binonyagan dan.
ACT 19:6 Pegpemaed i Pablo kandan, dimateng se Espiritu Santo diyà kandan, aw nekeikagi dan te medita kemolò kagi te doma otaw, aw kimeliwat dan heman te kagi te Timanem.
ACT 19:7 Sempolò teg dowa se otaw nemenal.
ACT 19:8 Dalem te telo se bolan, gayed egdoton si Pablo te simbahan te Judiyo. Wedà sikandin pegketalaw te pegtoladà din kandan tepad te peglowan te Timanem.
ACT 19:9 Meneng doen menge otaw kimulu te pegpemenal. Medaet se inikagi dan tepad te kagi te Timanem intoladà din diyà te otaw netipon. Penga niyan, nesayo si Pablo lekat te simbahan, aw inibing din se menge otaw egpemenal doton te iskwilahan pigmeistrohan i Tirano. Migtoladà si Pablo kandan kidoen te kelikit te aldaw
ACT 19:10 lamig te dowa se omay. Yan netegahan te kedita te otaw kidoen te Asya se kagi te Pengolo. Netegahan iyan te menge otaw Judiyo aw menge otaw kenà Judiyo.
ACT 19:11 Egtabang se Timanem ki Pablo, aw ininang din se kepelahan,
ACT 19:12 so pengkey kelobaw aw penenaktun din ipeg-ated dan doton te otaw doen mesakit, amon kegolian se otaw sìyan doen mesakit, aw amon mekelowà se bosaw lekat te doma otaw.
ACT 19:13 Doen menge Judiyo lomelegeb eg-ikagi te doen tolos dan megpelowà te bosaw lekat te otaw. Minikagi dan diyà te bosaw, “Lowà ka pineokit ki Jesus, sìyan intoladà i Pablo.”
ACT 19:14 Se migtelaman kenyan, yan se pito batà te ontò pengolo te simbahan te Judiyo si Esceva.
ACT 19:15 Meneng minikagi se bosaw diyà kandan, “Netegahan ko si Jesus aw si Pablo. Meneng sikiyo, eked ko toloi.”
ACT 19:16 Penga niyan, pinengayaw dan te otaw dinetengan te bosaw, aw dinaeg se kedita dan. Yan kimadas dan kidoen nelingkasan te penenaktun aw nepelian dan.
ACT 19:17 Nedengeg iyan doton te Efeso, aw netegahan iyan te kedita te Judiyo aw otaw kenà Judiyo. Nepela se kedita dan, aw induyun dan se ngadan te Pengolo si Jesus.
ACT 19:18 Migselsel heman se menge otaw kaling nemenal. Wedà dan boloni se medaet ininang dan.
ACT 19:19 Doen heman menge otaw biyasa egdelikmata nemegay te libro dan te delikmata, aw migsonog dan kenyan kinità te kedita te otaw. Binilang dan se keelagà te kedita te libro sinonog, dagpò niyan keliman melalan se kwarta dan.
ACT 19:20 Nedengeg se kagi te Pengolo intoladà, aw medita se otaw nemenal.
ACT 19:21 Penga niyan, ibeg i Pablo domoton te Jerusalem mokit te Masidonya aw Gresya. Minikagi sikandin, “Penga te peggemaw ko doton te Jerusalem, keilangan domeleg a doton te Roma.”
ACT 19:22 Insogò din se dowa otaw migtabang kandin si Timoteo aw si Erasto domoton te Masidonya, meneng nenamay-namay mig-ogpà pa si Pablo kidoen te probinsya te Asya.
ACT 19:23 Dalem te peg-ogpà din doton te Efeso, doen dakel samok tepad te pegtoladà din te kagi te Timanem.
ACT 19:24 Doen sebad otaw si Demetrio biyasa egtoang te selapì. Medita se otaw migterbaho kandin, so mig-inang dan te kekitaan iling te kedakel te kepolan impesopo te simbahan egtewal-tewalan dan diyà te sebad inotaw ngadan din si Diana. Yan se ipegpemeligyà dan, aw dakel se kwarta neabat dan.
ACT 19:25 Migtipon si Demetrio te otaw migterbaho kandin aw doma otaw egtoang kenyan. Minikagi si Demetrio diyà kandan, “Netegahan niyo te dakel se kwarta egkeabat tadon pineokit te eg-inangen tadon seini.
ACT 19:26 Meneng kinità niyo den besi si Pablo, aw dinineg niyo heman se inikagi din. Wedad son din kekemowan te inotaw eg-inangen te otaw, so kenà ekon timanem. Medita se otaw nenenalan kandin, pengkey dini te Efeso aw doton heman te kedita te doma lonsod te Asya.
ACT 19:27 Medaet iyan, so wedad nael otaw mayad te eg-inangen tadon. Medaet heman so wedad den megsagman te simbahan te melangkaw inotaw tadon si Diana. Sikandin se egsimbahen te kedita te otaw dini te Asya aw doton te kebelad te keneyonan. Ontò medaet aw eked dan pegtawal-tawal kandin.”
ACT 19:28 Pegdineg dan te kagi din, ontò dan neopal aw migbelobansag dan, kagi dan, “Iduyun si Diana te Efeso.”
ACT 19:29 Nesamok se kedita te otaw eg-ogpà kidoen. Inewidan dan se otaw timaking ki Pablo lekat te Masidonya si Gayo aw si Aristarco. Intolod dan doton te tiponanan te otaw.
ACT 19:30 Ibeg peden i Pablo domeleg doton amon mikagi diyà te otaw netipon, meneng sinagda te menge otaw egpemenal.
ACT 19:31 Doen menge doma otaw melangkaw sigalak din migpunù kandin te eked sikandin doton amon eked heman elegi.
ACT 19:32 Dalem niyan, dakel se samok te kedita te otaw netipon. Wedà peg-onawa se kagi imbelobansag dan. Pilabok se otaw netaga-taga te nengà netipon dan.
ACT 19:33 Impetindeg te menge Judiyo se doma dan si Alejandro doton te monà. Penga niyan, intakyaw din se belad din amon mepenek dan, so ibeg din mikagi diyà te otaw netipon.
ACT 19:34 Meneng pegketaga-taga dan te Judiyo sikandin, labi dan migbelobansag te dowa oras, kagi dan, “Mebohay si Diana te Efeso.”
ACT 19:35 Penga niyan, sinagda te konsiyal se otaw netipon. Pegkepenek dan, minikagi sikandin, “Menge sakop te Efeso, netaga-taga se kedita te otaw te sikitadon tege Efeso se egtonggò te simbahan te melangkaw timanem tadon si Diana nedagdag lekat te langit.
ACT 19:36 Wedad otaw mekeikagi te kebolalaw iyan. Yan kepenek kaw. Ikà niyo egkebook.
ACT 19:37 Wedad palos salà te didowa otaw sìyan inibing niyo dini, so wedad palos tinakaw dan lekat te simbahan. Wedà dan heman pegtompuyus te inotaw tadon.
ACT 19:38 Simpana doen salà dan ki Demetrio aw menge doma din, keilangan meg-indan dan diyà te howis te aldaw te peg-osay amon megpebelaw-belaway dan kidoen.
ACT 19:39 Meneng aw doen pa doma ibeg niyo, pegtagad kaw te aldaw te pegtipon, so yan se punù te gobirno.
ACT 19:40 Detengan kidon besi te keopal te gobirno tandà te pegsamok tadon te aldaw seini, so wedad itaba tadon kenyan.”
ACT 19:41 Penga niyan, impeolì din se kedita te otaw netipon.
ACT 20:1 Pegkepenga te samok doton te Efeso, migtipon si Pablo te menge otaw egpemenal. Inantag din se pedowan dan, aw simabi kandan te mesayo den sikandin. Penga niyan, dimoton si Pablo te Masidonya.
ACT 20:2 Peg-okit din diyà te menge lonsod kidoen, ontò din inantag se pedowan te menge otaw egpemenal. Pegdateng din doton te Gresya,
ACT 20:3 mig-ogpà kidoen te telo se bolan. Sagwa agpet den somakay si Pablo te dakel belangay pesalo doton te Sirya, doen ekon menge Judiyo kenà egpemenal mengimatay kandin. Yan minipanaw si Pablo limikò doton te Masidonya.
ACT 20:4 Doen menge otaw timaking kandin pesalo doton te Jerusalem, yan se batà i Piro si Sopater tege Berya, aw si Aristarco aw si Segundo didowa dan tege Tesalonika, aw si Gayo tege Derbe, aw si Tikico aw si Trofimo didowa dan tege Asya, aw si Timoteo.
ACT 20:5 Minonà se kedita dan simakay te belangay pesalo doton te Troas, aw migtagad dan kenami kidoen.
ACT 20:6 Inapit a i Pablo doton te Filipos. Mig-ogpà kay kidoen taman te pegkepenga te pista te pegpengaen te pan kenà eglebag. Penga niyan, simakay kay te dakel belangay. Penga te lima se delem, nengonsaeb kay kandan doton te Troas. Mig-ogpà kay kidoen te sebad simana.
ACT 20:7 Pegkedelem te Sebado, netipon se kedita day amon megbelà-belà te pan iling te pegtoladà i Jesus kedengan. Timetoo si Pablo migtoladà lamig te tengà te delem, so ibeg din mesayo te keeldawan niyan.
ACT 20:8 Medita se solò kidoen te gibelayan pigtiponan day.
ACT 20:9 Doen sebad telaki si Eutico nenenoo doton te bintanà. Pegtoladà i Pablo te nenamay, ontò nepilot si Eutico. Pegketedogi din, nedagdag doton te tanà lekat te iketelo kunsad te balay. Pegdateng dan doton kandin, nematay den.
ACT 20:10 Timenà si Pablo, aw limongken kidoen te dapag din. Kinelesan din, aw minikagi diyà te menge doma otaw, “Ikà niyo egketetana, so neantay den sikandin.”
ACT 20:11 Neantay se telaki aw inibing dan doton te balay din. Ontò neluba se kedita te otaw. Pegpenayit i Pablo doton te balay, pigbelà-belà din se pan aw kimaen kay. Nenamay kay migsempetanun lamig te peglibtak te aldaw. Penga niyan, nesayo kay si Pablo.
ACT 20:13 Ibeg i Pablo, mipanaw doton te Asos. Yan simoway kay kandin. Simakay kay te belangay pesalo doton te Asos amon somongon kay kandin doton.
ACT 20:14 Pegkità day doton te Asos, simakay si Pablo te belangay sinekayan day. Migpesalo se kedita day doton te Mitilene.
ACT 20:15 Peglowà day lekat te Mitilene, dimateng kay te Kiyos te keeldawan niyan. Penga niyan, minapit kay doton te polò iningedanan Samos te ikedowa te aldaw. Penga te peg-ogpà day doton te Trogilyom, dimateng kay doton te Mileto te iketelo te aldaw.
ACT 20:16 Wedà kay apit doton te Efeso, so eked keibeg si Pablo aw menamay kay doton te Asya. Nesasaw sikandin amon domateng kay doton te Jerusalem te eked pa dateng se aldaw te pista iningedanan Pentekostes.
ACT 20:17 Pegdateng day doton te Mileto, insogò i Pablo se otaw domoton te Efeso amon engayen se kedita te egpengibing te simbahan kidoen.
ACT 20:18 Pegdateng dan doton te Mileto, minikagi si Pablo, “Netaga-taga kaw den te eg-inangen ko doton kenyo lekat te pegdateng ko doton te Asya.
ACT 20:19 Measeb a timolò te Pengolo tadon. Migpedanà a te kanak pegkeotawun. Migkelag a so dakel se pedowan ko kenyo. Nelimahan a so ibeg te menge Judiyo kenà egpemenal mengimatay kanak.
ACT 20:20 Wedà a pegketalaw te pegtoladà ko kenyo te mèpiya, pengkey doton te simbahan aw doton heman te teg sebad-sebad balay.
ACT 20:21 Mig-indan a te benal diyà te kedita niyo, pengkey Judiyo aw kenà Judiyo. Migpunù a kenyo te megselsel kaw diyà te Timanem aw memenal kaw diyà te Pengolo tadon si Jesu Cristo.
ACT 20:22 “Na, domoton a den te Jerusalem, so yan se ibeg te Espiritu Santo kanak. Wedà ko ketegahi aw eden se domateng kanak kidoen.
ACT 20:23 Meneng melikit a eg-indanan te Espiritu Santo te pemilangen a aw kelebosowen a kidoen.
ACT 20:24 Meneng aneng-aneng ko, wedad beloyan aw imetayan a, so ibeg ko ipengahen ko olò se eg-inangen ko. Meluba a aw mebatog ko tomanen se insogò i Jesus kanak, so insogò a din megtoladà te Mèpiya Indan tepad te tabang te Timanem kenitadon.
ACT 20:25 Lamig seini, miglegeb a amon megtoladà a kenyo tepad te peglowan te Timanem. Meneng mesayo a den, aw eked a den palos likò dini.
ACT 20:26 Yan eneng-enengi niyo ini. Aw doen pa otaw wedà pa pemenal, wedad salà ko kandin,
ACT 20:27 so ontò a migtoladà kenyo te kedita te ibeg te Timanem.
ACT 20:28 Pekeimanday kaw. Pegtonggò kaw te kedita te otaw egpemenal, so Espiritu Santo se miggulal kenyo egpengibing amon mengibing kaw kandan. Ininang kidon din sakop din pineokit te pegkematay i Jesus.
ACT 20:29 Netegahan ko te doen kwani otaw domateng dini kenyo amon meg-akal dan kenyo, aw kebàtan dan se pegsalig niyo diyà te Timanem.
ACT 20:30 Doen heman menge doma niyo megtoladà te kagi kenà benal amon tomaking se menge otaw diyà kandan.
ACT 20:31 Yan peg-ahà kaw. Ikà niyo egkelibel kani. Gayed a migtoladà kenyo te aldaw aw delem dalem te telo se omay. Migkelag a heman so dakel se pedowan ko kenyo.
ACT 20:32 Ibeg ko, Timanem se megtonggò kenyo. Ibeg ko, tomolò kaw te kagi te Timanem, so mèpiya iyan aw meketabang kenyo. Aw tomolò kaw te kagi din, begayan kaw din heman te ibegay din diyà te kedita te sakop din.
ACT 20:33 “Wedà a palos ingà te kwarta aw penenaktun niyo.
ACT 20:34 Netegahan niyo te gayed a migterbaho amon doen ibayad ko te kepulukan ko aw kepulukan te menge doma otaw timaking kanak.
ACT 20:35 Yan se ininang ko amon ketegahan niyo te mèpiya aw measeb kidon megterbaho, amon meketabang kidon te menge doma otaw nelimahan. Ikà niyo egkelibel te inikagi te Pengolo si Jesus, ‘Pengkey meluba se otaw tebangan te doma, meneng labi pa meluba se otaw egpenabang te doma.’”
ACT 20:36 Penga niyan, limongken dan aw migtawal-tawal si Pablo diyà te Timanem.
ACT 20:37 Ontò dan migkelag, aw kimeles dan ki Pablo, aw nengadek dan kandin.
ACT 20:38 Ontò dan nepuluk, so minikagi si Pablo te eked den palos likò doton kandan. Penga niyan, timaking dan kandin doton te dakel belangay sekayan day.
ACT 21:1 Pegkesayo day lekat te Mileto, minantek kay doton te polò te Kos. Keeldawan niyan, dimateng kay doton te Rodas aw Mira. Pegkesayo day doton, dimeleg kay doton te Patara.
ACT 21:2 Pegdateng day doton, netelaan day se doma belangay pesalo doton te Fenisya. Yan simakay kay aw nesayo.
ACT 21:3 Kinità day se polò te Sipro, meneng limaklak kay kidoen digsel te lawod. Dimeleg kay doton te Sirya. Migdong kay doton te Tiro so doen in-awas kidoen.
ACT 21:4 Netelaan day se menge doma otaw egpemenal kidoen, aw mig-ogpà kay kidoen kandan te sebad simana. Ingkeliwat dan ki Pablo se kagi te Espiritu Santo te eked sikandin kepakay domoton te Jerusalem.
ACT 21:5 Pegdateng te aldaw te pegkesayo day, tinekingan kay te kedita dan meama aw bayi aw mengisù. Pegdateng day doton te enay, limongken se kedita day aw migtawal-tawal kay diyà te Timanem. Penga niyan, migsoway kay den.
ACT 21:6 Migsiolì dan doton te balay dan, aw simakay kay te belangay.
ACT 21:7 Pegsakay day lekat te Tiro, dimoton kay te Tolemay. Timenà kay kidoen, aw limaoy kay te menge otaw egpemenal. Minidegà kay kidoen te sebad se delem.
ACT 21:8 Keeldawan niyan, nesayo kay pesalo doton te Sesarya. Pegtenà day, dimeleg kay doton te balay i Felipe aw mig-ogpà kay kidoen. Si Felipe se sebad diyà te pito otaw migtelaban te menge sogounun i Cristo doton te Jerusalem. Sikandin heman se menenoladà te kagi te Timanem.
ACT 21:9 Doen epat batà din laga. Sikandan se telekeliwat te kagi te Timanem.
ACT 21:10 Pegkenamay-namay day kidoen, dimateng lekat te Judiya se sebad telekeliwat te kagi te Timanem si Agabo.
ACT 21:11 Peglegeana din kenami, inabat din se elen i Pablo aw in-iket din diyà te kandin benis aw belad, aw minikagi sikandin, “Seini se inikagi te Espiritu Santo. Iling kani iketan te menge Judiyo kenà egpemenal se tig-apò te elen seini doton te Jerusalem. Ibegay dan sikandin diyà te belad te menge otaw kenà Judiyo.”
ACT 21:12 Pegdineg day kenyan, nemoyò kay diyà ki Pablo te eked sikandin deleg doton te Jerusalem. Iling heman kenyan se inikagi te kedita te otaw egpemenal kidoen te Sesarya.
ACT 21:13 Meneng minikagi si Pablo, “Ikà niyo egkelag. Ikà niyo egpemegay te lidò diyà te pedowan ko, so wedad beloyan aw iketan a doton te Jerusalem. Wedad heman beloyan aw imetayan a tandà te pegsalig ko diyà te Pengolo tadon si Jesus.”
ACT 21:14 Wedà day kebatog se migtameng kandin. Penga niyan, minikagi kay, “Meinang se ibeg te Pengolo tadon.” Penga niyan, nepenek kay.
ACT 21:15 Wedà kenamay, migtapid kay te pengibingen day, aw dimeleg kay doton te Jerusalem.
ACT 21:16 Doen menge otaw egpemenal lekat te Sesarya timaking kenami. In-ated kay dan doton te balay te sebad otaw lekat te Sipro si Mason, nenamay den nemenal ki Cristo. Mig-ogpà kay kidoen kandin.
ACT 21:17 Pegdateng day doton te Jerusalem, ontò kay sinagman te menge otaw egpemenal kidoen.
ACT 21:18 Keeldawan niyan, miglegeana si Pablo ki Santiago. Timaking kay kandin. Netipon heman se kedita te egpengibing te simbahan.
ACT 21:19 Pegkità i Pablo kandan, in-indan din se kedita te ininang te Timanem kidoen te menge otaw kenà Judiyo pineokit te pegtoladà din.
ACT 21:20 Pegdineg dan kenyan, induyun dan se Timanem. Penga niyan, minikagi dan diyà ki Pablo, “Mèpiya so nemenal den se menge otaw kenà Judiyo, meneng ikà egkelibel te minelalan heman se Judiyo nemenal ki Jesus. Measeb dan pa egtolò te punù ingkeliwat i Moises.
ACT 21:21 Meneng dinineg dan te kolang se intoladà no diyà te kedita te Judiyo eg-ogpà doton te mediyò, so egtoladà ka ekon te mepakay aw eked dan tolò te punù ingkeliwat i Moises. Minikagi ka ekon te mepakay aw eked tolii se menge batà dan meama, aw eked dan heman tolò te ketanem tadon Judiyo.
ACT 21:22 Megmeno ka lebò aw metaga-taga dan kwani te dimateng ka den dini?
ACT 21:23 Mèpiya aw tomolò ka te punù day seini. Doen epat otaw dini migpakang den diyà te Timanem tepad te ketanem tadon.
ACT 21:24 Akop ka kandan aw pegpakang ka heman. Aw metagkas se impakang dan diyà te Timanem, pegbayad ka te kepulukan dan amon bolowen dan. Aw inangen no iyan, metaga-taga se kedita te otaw te kenà benal se dinineg dan, so egtolò ka pa se kamno te punù ingkeliwat i Moises.
ACT 21:25 Meneng tepad te menge otaw kenà Judiyo nemenal, simolat kay kandan kedengan te eked dan kaen te pengelapen tapay imbegay diyà te inotaw, aw dipanog, aw ayam-ayam pelengen, aw eked dan heman peg-inabut te kenà kandan esawa.”
ACT 21:26 Keeldawan niyan, minakop si Pablo diyà te epat otaw sìyan aw migpakang heman. Dimoton dan te dakel simbahan te Jerusalem, aw in-indan dan diyà te egpengibing te simbahan se aldaw aw metagkas se pakang dan, so yan se aldaw te peg-imatay dan te ayam-ayam amon ibegay diyà te Timanem.
ACT 21:27 Sagwa agpet den metagkas se pito se aldaw, doen menge Judiyo kenà egpemenal lekat te Asya kimità ki Pablo kidoen te dakel simbahan. Yan timawal dan diyà te menge doma otaw amon megtelaban dan megdakep ki Pablo.
ACT 21:28 Migbelobansag dan, kagi dan, “Menge kedomaan day bowad-bowad i Israel, telebani kay. Seini se otaw egtoladà diyà te kedita te otaw te lindoan kidon Judiyo, aw simbahan seini egpenimeneman, aw punù ingkeliwat i Moises. Labi pa medaet se ininang din seini, so inibing din se otaw kenà Judiyo dini didalem te dakel simbahan seini egpenimeneman, pengkey eked iyan kepakay.”
ACT 21:29 Yan se kagi dan so kinità dan se sebad tege Efeso kenà Judiyo si Trofimo timaking ki Pablo doton te Jerusalem. Meneng eden dan aw impetaking sikandin i Pablo doton te dakel simbahan.
ACT 21:30 Migsamok se kedita te otaw doton te Jerusalem. Medita dan netipon, aw inewidan dan si Pablo, aw ginoyod dan doton te lowà te dakel simbahan. Penga niyan, tinakep dan se simbahan.
ACT 21:31 Ibeg dan, mengimatay ki Pablo. Meneng doen otaw mig-indan te kapitan te sondalo te migsamok den se kedita te otaw te Jerusalem.
ACT 21:32 Pegketà inibing te kapitan se menge serhinto aw sondalo, aw mig-ayas dan doton te otaw netipon. Pegkità te menge otaw te kapitan aw sondalo, limengà dan te pegsombag dan ki Pablo.
ACT 21:33 Pegdateng te kapitan doton, dinakep din si Pablo. Iniketan se belad din te dowa sengkalì. Penga niyan, mig-insà se kapitan aw sinu se ngadan din, aw eden se medaet ininang din.
ACT 21:34 Doen menge otaw timaba, meneng wedà peg-onawa se inikagi dan. Wedà kelebeti te kapitan aw eden se neinang, so medita se migbelobansag. Penga niyan, inibing din si Pablo pesalo doton te kotà te sondalo.
ACT 21:35 Pegdateng dan doton te lelebangan te kotà, kinelalang te menge sondalo si Pablo amon mekeokit dan, so ontò neopal se otaw netipon.
ACT 21:36 Migbelobansag se otaw timaking, kagi dan, “Imetayan tadon den sikandin.”
ACT 21:37 Sagwa agpet den dan mawop doton didalem te kotà, minikagi si Pablo diyà te kapitan te doen ikegiyen din kandin aw mepakay. Nepela se kapitan, aw yan minikagi sikandin, “Biyasa ka kedì te kagi te Griego.
ACT 21:38 Eden ko aw sikona se sebad tege Ehipto, sìyan minato te gobirno kedengan, aw nengibing te epat melalan se otaw doen kekamang doton te kebigtilan.”
ACT 21:39 Minikagi si Pablo, “Siaken se Judiyo. Sakop a te Tarso, sìyan dakel lonsod doton te Silisya. Ibeg ko mikagi a diyà te otaw netipon.”
ACT 21:40 Neibeg se kapitan, aw yan timindeg si Pablo doton te lelebangan. Intakyaw din se belad amon ketegahan dan te doen ikegiyen din kandan. Pegkepenek dan, minikagi si Pablo te kagi te Hebreo, so yan se kagi te menge Judiyo.
ACT 22:1 Kagi din, “Menge kedomaan ko aw obanen, penenalan kaw te ikegiyen ko kenyo.”
ACT 22:2 Pegdineg dan te peg-ikagi din te kagi te Hebreo, ontò dan nenenalan. Yan minikagi si Pablo,
ACT 22:3 “Siaken se doma niyo Judiyo. Timebaw a doton te Tarso, sebad lonsod doton te Silisya. Timilles a dini te Jerusalem. Si Gamaliel se meistro migtoladà kanak. Mig-iling a te kedita te punù egtoloen te kemonaan tadon. Measeb a egtolò te Timanem onawa te keaseb niyo songkani.
ACT 22:4 Yan se doun te nemilang a te otaw egpemenal ki Jesus aw inimetayan ko dan, so eden ko aw yan se ibeg te Timanem. Doen heman dinakep ko aw kineleboso ko, pengkey meama aw bayi.
ACT 22:5 Netegahan iyan te ontò pengolo te simbahan aw kedita te menge obanen, so sikandan se simolat diyà te doma dan doton te Damasko te mepakay aw domoton a amon dekepen ko se menge otaw nemenal ki Jesus, so ibeg ko ibingen ko dan dini te Jerusalem amon ipelumun.
ACT 22:6 Meneng sagwa agpet den alas dosi, aw medapag a den doton te Damasko, pegketà nesogatan a te anyag lekat te langit.
ACT 22:7 Nekelangkeb a diyà te tanà, aw doen dinineg ko minikagi, ‘E Saulo, nengà lay egpemilang ka kanak?’
ACT 22:8 Penga niyan, minikagi a, ‘Sir, sinu ka lay?’ Yan timaba se Pengolo, ‘Siaken si Jesus tege Nasarit se egpemilangen nikaw.’
ACT 22:9 Pengkey kinità te menge otaw dimoma kanak se peg-anyag, meneng wedà dan kelebeti se kagi te sìyan minikagi kanak.
ACT 22:10 Mig-insà a, ‘Pengolo, eden lay se inangen ko?’ Yan minikagi se Pengolo, ‘Tindeg ka aw deleg ka doton te Damasko. Yan indanan ka aw eden se keilangan inangen nikaw.’
ACT 22:11 Wedà a pekekità tandà te anyag lekat te langit, meneng inagak a te doma ko pesalo doton te Damasko.
ACT 22:12 Doen sebad otaw eg-ogpà kidoen si Ananias ontò measeb egtolò te punù ingkeliwat i Moises aw induyun te kedita te Judiyo.
ACT 22:13 Dimateng sikandin diyà kanak aw minikagi, ‘Kedowa ko, bekahi se mata no, so todà ka komità.’ Na, pegketà nekekità a kandin.
ACT 22:14 Minikagi si Ananias, ‘Tapay ka pinemallì te Timanem egseligan te kemonaan ta, amon metaga-taga ka te ibeg din. Pinemallì ka din amon komità ka te batà din, aw amon domineg ka te kagi din, aw netoman den iyan.
ACT 22:15 Ibeg din, meg-indan ka diyà te kedita te otaw te kinità no aw dinineg nikaw.
ACT 22:16 Nayan, ayas ka. Enaw ka aw bonyagan ka. Pegtawal-tawal ka diyà te Pengolo amon mekelowà ka lekat te salà nikaw.’
ACT 22:17 “Penga niyan, minolì a dini te Jerusalem. Pegtawal-tawal ko doton te dakel simbahan, doen migpekità diyà kanak.
ACT 22:18 Minikagi se kinità ko, ‘Ayas ka kesayo lekat te Jerusalem, so eked penenalan se menge otaw dini te itoladà no tepad kanak.’
ACT 22:19 Minikagi a diyà te Pengolo, ‘Meneng aneng-aneng ko menenalan dan, so netegahan dan te siaken se timeped te kedita te simbahan te Judiyo amon dekepen ko aw bedasen ko se kedita te otaw nemenal diyà kamno.
ACT 22:20 Netegahan dan heman te siaken se timanod te pegpengimatay dan te sogounun nikaw si Esteban, aw migsebad se pedowan ko diyà te menge otaw nengimatay kandin, so migtonggò a te saol linowas dan.’
ACT 22:21 Meneng minikagi se Pengolo, ‘Kesayo ka, so isogò ta doton te mediyò ogpeanan amon megtoladà ka te kagi ko diyà te menge otaw kenà Judiyo.’”
ACT 22:22 Pegdineg dan te isogò sikandin doton te menge otaw kenà Judiyo, wedà dan ebey penenalan kandin. Migbelobansag dan, kagi dan, “Imetayan tadon den sikandin. Mèpiya pa aw matay sikandin.”
ACT 22:23 Migbelobansag dan, aw intayaw dan se saol, aw insabog dan heman se tanà doton diatas so ontò dan neopal.
ACT 22:24 Pegkità te kapitan te ontò dan neopal, impeibing din si Pablo doton didalem te kotà. Insogò din se menge sondalo memadas ki Pablo amon meg-indan te benal, so ibeg te kapitan metaga-taga aw eden se ingkeopal te otaw ki Pablo, so wedà pekelabet se kapitan te kagi te Hebreo.
ACT 22:25 Peggapos dan kandin, minikagi si Pablo diyà te serhinto timindeg kidoen, “Eked kepakay aw bedasen se otaw sakop te Roma singed aw onà insaen te howis.”
ACT 22:26 Pegdineg te serhinto te inikagi din, dimoton te kapitan aw minikagi, “Ikà egpebadas kandin, so sakop sikandin te Roma.”
ACT 22:27 Yan dimoton se kapitan ki Pablo aw mig-insà, kagi din, “Indani a te benal. Sakop ka lay te Roma?” Timaba si Pablo, kagi din, “Ee.”
ACT 22:28 Minikagi se kapitan, “Dakel se kwarta imbayad ko amon meinang a sakop te Roma.” Minikagi si Pablo, “Meneng se kanak, wedad imbayad ko, so timebaw a sakop te Roma.”
ACT 22:29 Penga niyan, wedà pemadas se sondalo ki Pablo. Nelemitan se kapitan so ginapos din se otaw sakop te Roma.
ACT 22:30 Ibeg te kapitan ontò metaga-taga aw eden se ingkeopal te menge Judiyo ki Pablo, so wedà pekelabet se kapitan te kagi te Hebreo. Keeldawan niyan, pigtipon din se menge obanen te simbahan aw kedita te kelengkawan te Judiyo. Inabat din si Pablo lekat te keleboso aw inibing din doton te otaw netipon. Impetindeg din doton te monà dan.
ACT 23:1 Yan timengteng si Pablo diyà te kedita te obanen te simbahan aw minikagi sikandin, “Menge kedowa ko, pengkey eden se neinang ko, meneng netegahan ko te ontò metòlid se aneng-aneng ko diyà te Timanem lamig songkani.”
ACT 23:2 Si Ananias se ontò pengolo te simbahan. Insogò din se doma otaw menampak ki Pablo amon ipelumun.
ACT 23:3 Penga niyan, minikagi si Pablo diyà ki Ananias, “Ipelumun ka te Timanem, so eden nikaw aw ontò ka egtaking diyà te Timanem. Eden nikaw aw siak se limàpang te punù ingkeliwat i Moises, meneng sikona se limàpang te punù ingkeliwat i Moises, so impesampak a nikaw.”
ACT 23:4 Penga niyan, doen menge doma otaw medapag kandin aw minikagi dan, “Ikà egtompuyus te ontò pengolo te simbahan, sìyan pinemallì te Timanem.”
ACT 23:5 Yan minikagi si Pablo, “Menge kedowa ko, wedà ko ketegahi te sikandin se ontò pengolo te simbahan. Netegahan ko te doen kagi te Timanem insolat te keilangan eked silahi se otaw lomowan kenitadon.”
ACT 23:6 Netaga-taga si Pablo te kenà egsebad se kedita te obanen te simbahan, so doen egpelenged te Sadusiyo, aw doen doma otaw egpelenged te Parisiyo. Yan minikagi si Pablo diyà kandan, “Menge kedowa ko, siaken se egpelenged te Parisiyo, aw kemonaan ko heman se egpelenged te Parisiyo. Impedini a amon insaen a niyo te aldaw seini, so egpeliman a te peg-antay te Timanem te otaw lekat te nematay.”
ACT 23:7 Peg-ikagi din kenyan, migpedindilay se Parisiyo aw Sadusiyo. Yan migpeteniyay dan.
ACT 23:8 Egtoladà se Parisiyo te entayen te Timanem se otaw lekat te nematay, aw doen menge anghil, aw doen heman pedowan wedad temanan. Meneng egtoladà se Sadusiyo te wedad otaw meantay lekat te nematay, aw wedad anghil, aw wedad heman pedowan wedad temanan.
ACT 23:9 Yan dakel se samok dan. Penga niyan, doen menge menenoladà te punù ingkeliwat i Moises timindeg lenged te Parisiyo. Minikagi dan, “Aneng-aneng day, wedad salà din. Doen besi anghil minikagi diyà kandin.”
ACT 23:10 Ontò dan migsamok, aw nelemitan se kapitan aw mengimatay dan ki Pablo. Yan insogò din se menge sondalo amon engayen dan si Pablo aw ibingen dan sikandin doton te kotà.
ACT 23:11 Tengà te delem, migpekità se Pengolo diyà ki Pablo aw minikagi, “Ikà egkelemitan. Mig-indan ka den tepad kanak dini te Jerusalem. Meg-indan ka pa heman doton te Roma.”
ACT 23:12 Keeldawan niyan, doen menge Judiyo kenà egpemenal migsebad te pedowan mengimatay ki Pablo. Migpepekangay dan te eked dan kaen singed aw imetayan dan si Pablo.
ACT 23:13 Lampas te kepatan se otaw minakop kandan.
ACT 23:14 Penga niyan, dimoton dan te menge pengolo aw obanen te simbahan. Minikagi dan, “Migpepekangay kay te eked kay palos kaen singed aw imetayan day si Pablo.
ACT 23:15 Nayan, pemoyoi niyo diyà te kapitan te todà din ibingen si Pablo dini kenyo. Pegpelingo-lingo kaw te doen pa insaen niyo diyà kandin. Meneng benganan day sikandin amon imetayan day te eked pa dateng dini kenyo.”
ACT 23:16 Meneng dimineg se anak i Pablo te ibeg dan megbangan kandin. Yan dimoton te kotà amon meg-indan ki Pablo.
ACT 23:17 Penga niyan, tinawal i Pablo se sebad serhinto aw minikagi, “Ibingi se telaki seini doton te kapitan so doen iindan din.”
ACT 23:18 Yan inibing sikandin te serhinto doton te kapitan aw minikagi, “Nemoyò sìyan otaw kineleboso si Pablo te ibingen ko kamno se telaki seini, so doen iindan din kamno.”
ACT 23:19 Yan inibing te kapitan se telaki doton te keligbinan aw mig-insà, kagi din, “Atò, eden se iindan no kanak?”
ACT 23:20 Yan minikagi se telaki, “Miglalang den se menge Judiyo te memoyò dan kamno amon ibingen no si Tiyò doton te tiponanan te obanen te simbahan kealdaw. Megpelingo-lingo dan te doen pa insaen dan diyà kandin.
ACT 23:21 Meneng ikà egpemenal kandan, so lampas te kelowan se otaw megbangan kandin doton te dalan. Migpepekangay dan te eked dan kaen singed aw imetayan dan si Tiyò. Neketagad den dan aw tegadan dan olò se pegsogò nikaw.”
ACT 23:22 Minikagi se kapitan, “Ikà eg-indan diyà te doma te mig-indan ka den kanak.” Penga niyan, impekesayo din se telaki sìyan.
ACT 23:23 Penga niyan, impeangay te kapitan se dowa serhinto, aw minikagi diyà kandan, “Tiponi niyo se dowa gatos sondalo mipanaw, aw kepitowan sondalo somakay te kodà, aw dowa gatos mengibing te dilek amon meketagad dan, so mesayo kaw kwani alas nowibi te delem pesalo doton te Sesarya.
ACT 23:24 Pesekayi si Pablo diyà te kodà. Imendayi niyo se pegtonggò kandin amon wedad medaet domateng kandin lamig domateng doton te gobirnador si Felis.”
ACT 23:25 Doen heman solat impeibing te kapitan, kagi niyan,
ACT 23:26 “Siak si Claudio Lisias se simolat kamno Felis ontò melangkaw gobirnador day. Mebohay ka.
ACT 23:27 Se otaw impeibing ko kamno seini, dinakep sikandin te menge Judiyo, aw imetayan dan peden sikandin. Meneng dimoton a sipat menge sondalo amon ipelowà sikandin, so netegahan ko te sikandin se otaw sakop te Roma.
ACT 23:28 Pigtipon ko se kedita te obanen te simbahan, so ibeg ko ketegahan aw eden se ingkeopal te menge Judiyo kandin.
ACT 23:29 Penga niyan, netegahan ko te wedad salà din mepakay ikeleboso aw iimatay kandin, so olò dan neopal kandin so limàpang ekon te punù egtoloen dan.
ACT 23:30 Impeibing ko sikandin doton kamno, so doen ekon menge otaw megbangan kandin amon imetayan. Isogò ko kwani heman se menge otaw neopal kandin amon meg-indan dan diyà kamno aw eden se dimanda dan tepad kandin. Taman den.”
ACT 23:31 Penga te pegsolat din kenyan, timolò se menge sondalo, aw inibing dan si Pablo te delem doton te Antipatriya.
ACT 23:32 Keeldawan niyan, minolì doton te Jerusalem se menge sondalo sìyan minipanaw. Meneng dimeleg si Pablo inibing te menge doma sondalo simakay te kodà.
ACT 23:33 Pegdateng dan doton te Sesarya, imbegay dan se solat diyà te gobirnador, aw inibing dan heman si Pablo doton kandin.
ACT 23:34 Pegbasa te gobirnador te solat, mig-insà aw kenan se probinsya linekatan i Pablo. Pegketaga-taga din te Silisya se linekatan din,
ACT 23:35 minikagi sikandin, “Insaen ta aw domateng se menge otaw neopal kamno.” Penga niyan, insogò din se menge sondalo megtonggò kandin doton te keleboso impeinang te tapay selotan si Herod.
ACT 24:1 Pegkepenga te lima se aldaw, dimoton se ontò pengolo te dakel simbahan si Ananias te Sesarya sipat menge obanen te dakel simbahan aw sebad abogado si Tertulo. Dimoton dan amon meg-indan dan diyà te gobirnador te ingkeopal dan ki Pablo.
ACT 24:2 Impeangay si Pablo aw penga niyan, timindeg si Tertulo aw minikagi diyà te gobirnador, “Ontò ka day induyun. Mèpiya se keogpà day, so sikona se eglowan kenami. Egtodaen no se medaet dini kenami, so mèpiya se inenengen nikaw.
ACT 24:3 Nedengeg iyan doton te kedita te lonsod te kelikit te aldaw. Egpesiontongan day se kèpiya nikaw.
ACT 24:4 Eked a den ikagi diyà kamno te menamay. Yan keidowi a aw penenalan ka te kagi ko kamno.
ACT 24:5 Netegahan day te ontò medaet se otaw seini, so egsemoken din se kedita te Judiyo dini te kebelad te keneyonan, aw sikandin se egpengibing te menge otaw egpemenal te sebad otaw tege Nasarit.
ACT 24:6 Linindoan din heman se dakel simbahan egpenimeneman doton te Jerusalem. Yan dinakep day sikandin. [Ibeg day peden meg-okom kay kandin.
ACT 24:7 Meneng dimateng se ontò kapitan te sondalo si Lisias aw migleges kenami amon ibegay day si Pablo diyà te belad din.
ACT 24:8 Migpunù heman sikandin te keilangan domini se menge otaw neopal diyà ki Pablo.] Aw meg-insà ka kandin, yan ketegahan no te ontò benal se inikagi day kamno.”
ACT 24:9 Dimogyon heman se menge doma din Judiyo, aw minikagi dan te benal se inikagi din.
ACT 24:10 Penga niyan, migtangù-tangù se gobirnador diyà ki Pablo amon mikagi. Yan minikagi sikandin, “Netegahan ko te ontò den nenamay limowan ka dini te probinsya seini. Yan neluba a so sikona se menenalan te taba ko te kagi dan.
ACT 24:11 Olò sempolò pa teg dowa se aldaw, dimoton a te Jerusalem amon megsimba a kidoen. Aw meg-insà ka te menge doma otaw, mekeindan dan te benal iyan.
ACT 24:12 Wedà a pegdindil te menge doma otaw. Wedà a pegsamok te doma otaw pengkey doton te dakel simbahan, aw doton te menge doma simbahan te Judiyo, aw doton te menge balay.
ACT 24:13 Wedad palos ipekità dan kamno te benal doen salà ko.
ACT 24:14 Eg-ikagi a te benal diyà kamno. Egsimbahen ko se Timanem egseligan te kemonaan day. Se kebenalan egtekingan ko, yan son dan se kebolalaw. Egtolò a te kedita te punù ingkeliwat i Moises aw menge doma telekeliwat te kagi te Timanem.
ACT 24:15 Onawa heman se egpelimanan ko aw menge otaw neopal kanak, so egpelimanan ko heman se peg-antay te Timanem te kedita te otaw lekat te nematay, pengkey otaw egpenimanem aw otaw kenà egpenimanem.
ACT 24:16 Ontò a measeb eg-inang te mèpiya, so ibeg ko wedad palos ikeyàyà ko diyà te Timanem aw otaw.
ACT 24:17 Pengkey nenamay wedà a likò doton te Jerusalem, meneng dimoton a seini, so mig-ated a te kwarta itabang diyà te menge doma ko Judiyo nelimahan aw ibowang diyà te Timanem.
ACT 24:18 Dalem niyan, kidoen a te dakel simbahan so tinoman ko se pakang ko diyà te Timanem. Wedad palos otaw pigtipon ko. Wedà a pegsamok te doma otaw. Meneng doen menge Judiyo lekat te Asya kimità kanak.
ACT 24:19 Neopal dan kanak. Mèpiya peden aw dini sikandan amon megdimanda dan tepad kanak aw simpana doen salà ko.
ACT 24:20 Insai se menge otaw dini aw eden se salà ko kinità te menge obanen te simbahan te peg-insà dan kanak kedengan.
ACT 24:21 Benal minikagi a, ‘Impedini a amon insaen a niyo te aldaw seini, so siak se egpemenal te entayen te Timanem se otaw lekat te nematay.’”
ACT 24:22 Yan simagked si Felis te peg-osay, so netegahan din den se ipegtoladà te otaw timaking ki Jesus. Minikagi sikandin, “Eposen ko se osay aw domateng se kapitan si Lisias.”
ACT 24:23 Penga niyan, minikagi si Felis diyà te serhinto te ebey pa tonggoan si Pablo, meneng eked begayi te kelimahan. Mepakay aw leoyen sikandin te menge doma din amon megtabang dan te kandin kepulukan.
ACT 24:24 Pegkenamay-namay, dimoton si Felis aw esawa din si Drusila sebad Judiyo. Impeangay din si Pablo amon menenalan dan te itoladà din tepad te pegpemenal diyà ki Jesu Cristo.
ACT 24:25 Migtoladà heman si Pablo te keilangan metòlid se eg-inangen te otaw, aw megtameng te ibeg te pedowan, aw doen kwani aldaw meg-okom se Timanem te kedita te otaw. Pegtoladà i Pablo kenyan, ontò nelemitan si Felis aw minikagi, “Botongi den se pegtoladà nikaw. Aw doen aldaw, todà ta engayen.”
ACT 24:26 Melikit impeangay i Felis si Pablo amon megpebelaw-belaway dan, so eden din aw doen kwarta ibegay i Pablo kandin amon mekelowà.
ACT 24:27 Penga te dowa se omay, ininang gobirnador si Porcio Festo simelilin ki Felis. Wedà pelowai i Felis si Pablo, so ibeg din meluba kandin se menge Judiyo kenà egpemenal.
ACT 25:1 Pegdateng i Festo doton te probinsya te Judiya, mig-ogpà sikandin doton te Sesarya te telo se aldaw. Penga niyan, dimoton te Jerusalem.
ACT 25:2 Pegdateng din doton, mig-indan se menge pengolo te simbahan aw dakel otaw te ingkeopal dan ki Pablo.
ACT 25:3 Nemoyò dan te ipeangay i Festo si Pablo lekat te Sesarya aw ipeibing din doton te Jerusalem, so ibeg dan benganan dan si Pablo doton te dalan amon imetayan.
ACT 25:4 Meneng minikagi si Festo te tinonggoan pa si Pablo doton te Sesarya, aw molì heman sikandin kidoen te eked kenamay.
ACT 25:5 Kagi din, “Sogoi niyo se menge melangkaw otaw dini kenyo tomaking kanak pesalo doton te Sesarya. Aw doen salà din, megdimanda dan kidoen.”
ACT 25:6 Mig-ogpà si Festo doton te Jerusalem lampas te sebad simana. Penga niyan, minolì doton te Sesarya. Keeldawan niyan, dimoton sikandin te oseyanan, aw impeangay din si Pablo.
ACT 25:7 Pegdateng i Pablo doton kandin, timindeg se menge Judiyo kenà egpemenal dimateng lekat te Jerusalem. Mig-indan dan te medita se medaet ininang i Pablo, meneng wedad kebenalan impekità dan.
ACT 25:8 Pegtaba i Pablo, minikagi sikandin, “Wedad salà ko pengkey diyà te punù egtoloen day Judiyo, aw pengkey diyà te dakel simbahan day, aw pengkey diyà te gobirno.”
ACT 25:9 Meneng ibeg i Festo, meluba se menge Judiyo kandin, aw yan mig-insà sikandin ki Pablo, kagi din, “Meibeg ka lay domoton te Jerusalem amon osayan ta doton?”
ACT 25:10 Timaba si Pablo, kagi din, “Seini den se oseyanan te gobirno. Keilangan osayan a dini, so netegahan no den te wedad palos salà ko diyà te menge Judiyo neopal kanak.
ACT 25:11 Simpana benal doen salà ko, eked a kulu te ipelumun a aw imetayan a niyo. Meneng aw kenà benal se inikagi dan, eked a begayi diyà te belad dan. Yan memoyò a den te si Cesar se meg-osay kanak.”
ACT 25:12 Penga te pegpebelaw-belaway i Festo aw menge doma teleglawong, minikagi sikandin, “So pinemoyò no den te si Cesar se meg-osay kamno, yan ipeibing ta doton kandin.”
ACT 25:13 Pegkenamay-namay, dimateng se selotan te menge Judiyo si Agripas aw etebay din si Bernice. Miglegeana dan ki Festo kidoen te Sesarya.
ACT 25:14 Dalem te peg-ogpà dan doton, mig-indan si Festo diyà ki Agripas tepad ki Pablo. Minikagi si Festo, “Doen dini sebad otaw si Pablo kineleboso i Felis, meneng wedà din pelowai.
ACT 25:15 Pegdoton ko te Jerusalem, doen medita pengolo aw obanen te simbahan te Judiyo neopal ki Pablo. Nemoyò dan te ipelumun ko sikandin aw imetayan.
ACT 25:16 Meneng minikagi a kandan te eked kepakay diyà te gobirno kidoen te Roma aw ipelumun se sakop te Roma singed aw onà sikandin megkità te menge otaw migdimanda tepad kandin, amon meketaba te kagi dan.
ACT 25:17 Pegdateng day dini, wedà a peg-alà-alà, so keeldawan niyan, impeangay ko sikandin amon osayan ko.
ACT 25:18 Pegdimanda dan tepad kandin, eden ko aw ontò medaet se salà din ipetaga-taga dan kanak.
ACT 25:19 Meneng kenà, so ibeg dan olò megdindil tepad te ketanem dan aw tepad te sebad otaw nematay si Jesus, meneng minikagi si Pablo te neantay lekat te nematay.
ACT 25:20 So wedà ko ketegahi aw eden se osayen ko tepad kenyan, mig-insà a ki Pablo aw meibeg sikandin domoton te Jerusalem amon osayan ko kidoen.
ACT 25:21 Meneng nemoyò sikandin te si Cesar se meg-osay kandin. Yan impekeleboso ko pa sikandin dalem te eked pa sikandin keibing doton ki Cesar.”
ACT 25:22 Minikagi si Agripas, “Ibeg ko menenalan a kandin.” Minikagi si Festo, “Kealdaw menenalan ka kandin.”
ACT 25:23 Keeldawan niyan, ontò sinagman si Agripas aw si Bernice te pegdoton dan te oseyanan sipat menge kapitan te sondalo aw menge dakel otaw te Sesarya. Impeangay i Festo si Pablo.
ACT 25:24 Penga niyan, minikagi si Festo, “Sir Agripas aw kedita niyo netipon dini, seini se otaw neopalan te menge Judiyo, pengkey dini te Sesarya aw doton heman te Jerusalem. Gayed dan egpemoyò te imetayan ko sikandin.
ACT 25:25 Meneng aneng-aneng ko, wedad salà din te mepakay sikandin imetayan. Meneng pegpemoyò din te si Cesar se meg-osay kandin, miglalang a te ipeibing ko sikandin doton ki Cesar.
ACT 25:26 Meneng wedà ko ketegahi aw eden se isolat ko diyà te melangkaw pengolo tadon si Cesar tepad te otaw seini. Yan impeangay ko sikandin amon menenalan ka Agripas aw kedita niyo. Penga niyan, indani a aw eden se isolat ko,
ACT 25:27 so aneng-aneng ko, eked kepakay se pegpeibing ko kandin doton ki Cesar singed aw doen salà din iindan ko.”
ACT 26:1 Minikagi si Agripas diyà ki Pablo, “Mepakay aw mikagi ka.” Penga niyan, intakyaw i Pablo se belad din aw minikagi,
ACT 26:2 “Sir, Agripas. Ontò a neluba so sikona se otaw menenalan kanak seini, amon ketegahan no te kenà benal se dimanda te menge doma Judiyo tepad kanak,
ACT 26:3 so ontò ka netaga-taga tepad te ketanem tadon Judiyo aw gayed tadon egdindilan. Yan keleyati se pedowan no aw menenalan ka kanak.
ACT 26:4 “Netegahan te kedita te Judiyo se keogpà ko kedengan lekat te pegketelaki ko doton te Tarso aw penga niyan doton te Jerusalem.
ACT 26:5 Aw meg-insà ka kandan, mekeindan dan te benal, so netegahan dan te ontò a egtolò te ketanem te menge Judiyo, so siaken se migpelenged te menge Parisiyo.
ACT 26:6 Nayan, neopalan a den dan so egpeliman a te metoman se impakang te Timanem diyà te kemonaan tadon.
ACT 26:7 Yan heman se egpelimanan te kedita te sempolò teg dowa pongan tadon te Judiyo, aw yan se doun te gayed dan egsimba te Timanem te aldaw aw delem. Sir, neopalan a den te menge doma ko Judiyo so yan se pinelimanan ko.
ACT 26:8 Ikà niyo eg-aneng-aneng te eked pekebatog se Timanem meg-antay te otaw lekat te nematay.
ACT 26:9 “Pengkey siak, kedengan eden ko aw mèpiya se pegpemilang ko te menge otaw egpemenal ki Jesus tege Nasarit.
ACT 26:10 Yan se ininang ko kidoen te Jerusalem, so siak se migkeleboso te medita otaw sinakop te Timanem, so insogò a te menge pengolo te simbahan te Jerusalem. Peg-osay day kandan, sipat siak minikagi te imetayan dan.
ACT 26:11 Melikit ko dan ipegpelumun doton te kedita te simbahan te Judiyo, so ibeg ko peden, lomengà dan te pegpemenal dan ki Jesus. Ontò a neopal kandan, aw pinemilang ko dan pengkey doton te mediyò lonsod.
ACT 26:12 “Yan se doun te dimoton a te Damasko, so inibing ko se papil sinolatan te menge pengolo te simbahan te Jerusalem te mepakay aw megdakep a te menge otaw egtaking ki Jesus.
ACT 26:13 Meneng pegkealas dosi te wedà a pa dateng doton, doen anyag lekat te langit kinità ko labi pa melowa diyà te aldaw. Neenyagan heman se doma otaw timaking kanak.
ACT 26:14 Pegkelangkeb day diyà te tanà, doen dinineg ko minikagi te kagi te Hebreo, ‘E Saulo, nengà lay egpemilang ka kanak? So sikona olò se elegen te ininang nikaw.’
ACT 26:15 Yan mig-insà a, ‘Sir, sinu ka lay?’ Yan timaba se Pengolo, ‘Siaken si Jesus se egpemilangen nikaw.
ACT 26:16 Tindeg ka den, so migpekità a den kamno amon inangen ta sogounun ko meg-indan te doma otaw te kinità no te aldaw seini aw sìyan ipekità ko diyà kamno te modi aldaw.
ACT 26:17 Tonggoan ta amon eked ka imetayi te menge Judiyo aw otaw kenà Judiyo, so isogò ta doton kandan
ACT 26:18 amon ketegahan dan se kebenalan, amon tomanan dan te kengitngit aw megpesalo dan diyà te kelowahan, amon mekelowà dan lekat te belad i Satanas aw megpesakop dan diyà te Timanem, aw pegwedaden din se salà dan pineokit te pegpemenal dan diyà kanak, amon kinewaen dan heman se ontong ibegay te Timanem diyà te kedita te batà din.’
ACT 26:19 “Sir, penga niyan, tinolò ko se impekità din kanak lekat te langit.
ACT 26:20 Migtoladà a doton te Damasko aw Jerusalem aw menge lonsod te Judiya aw doton heman te menge otaw kenà Judiyo. Migtoladà a diyà kandan te keilangan megselsel dan aw tomaking dan te Timanem, aw keilangan ipekità dan te kaling se pedowan dan pineokit te eg-inangen dan.
ACT 26:21 So yan se intoladà ko, dinakep a te menge doma Judiyo doton te dakel simbahan kidoen te Jerusalem amon imetayan a dan.
ACT 26:22 Meneng gayed a egtebangan te Timanem lamig te aldaw seini, aw yan timayod a migtoladà te kedita te otaw pengkey sagkep aw melangkaw. Migtoladà a olò te netoman den se pakang ingkeliwat te menge telekeliwat te kagi te Timanem aw kemonaan tadon si Moises,
ACT 26:23 so kagi dan, keilangan pemilangen se Misiyas aw imetayan. Sikandin son dan se tagnà meantay eked palos todà kematay, aw pineokit kenyan, ipetaga-taga din te doen kelowaan te kedita te otaw lekat te salà, pengkey Judiyo aw kenà Judiyo.”
ACT 26:24 Telobo pa minikagi si Pablo, migbelobansag si Festo, kagi din, “Migkebook ka den. Migkebook ka so pelaban dakel se pig-ilingan nikaw.”
ACT 26:25 Minikagi si Pablo, “Sir, wedà a pegkebook, so ontò benal se inikagi ko kenyo,
ACT 26:26 so netegahan te selotan se kedita niyan. Wedà a pegketalaw te peg-ikagi ko kandin, so netegahan din te benal se kedita te inikagi ko, so wedà iyan keinang doton te kesikmihan.
ACT 26:27 Indà, Agripas? Nemenal ka lay te inikagi te menge telekeliwat te kagi te Timanem? Netegahan ko te nemenal ka kenyan.”
ACT 26:28 Minikagi si Agripas ki Pablo, “Te eked kenamay, meinang a no peden sakop i Cristo.”
ACT 26:29 Minikagi si Pablo, “Pengkey menamay aw eked kenamay, ibeg ko meinang ka iling kanak, pengkey kedita niyo nenenalan kanak te aldaw seini. Meneng eked a keibeg aw geposen kaw heman iling kanak.”
ACT 26:30 Penga niyan, timindeg se selotan aw gobirnador aw si Bernice aw kedita dan kidoen.
ACT 26:31 Pegkesayo dan, migpebelaw-belaway dan, kagi dan, “Wedad salà din mepakay ikeleboso aw iimatay kandin.”
ACT 26:32 Minikagi heman si Agripas diyà ki Festo, “Simpana wedà din pemoyoi te si Cesar se meg-osay kandin, yan mepakay aw ipelowà nikaw.”
ACT 27:1 Pegpengibing dan ki Pablo pesalo doton te Italya, simakay kay te dakel belangay. Doen sebad serhinto diyà te menge sondalo iningedanan Gropo Augusto ngadan din si Julio impetonggò i Festo ki Pablo aw menge doma otaw kineleboso.
ACT 27:2 Timaking heman kenami si Aristarco tege Tesalonika sakop te Masidonya. Doen dakel belangay dimateng lekat te Adramito megpesalo doton te menge lonsod te Asya, aw yan se sinekayan day lekat te Sesarya.
ACT 27:3 Keeldawan niyan, minapit kay doton te Sidon. Neidowan i Julio si Pablo, aw yan timenà sikandin aw miglegeana diyà te menge otaw egpemenal kidoen, aw sinagman dan sikandin.
ACT 27:4 Pegsakay day lekat te Sidon, minokit kay doton te keselibengan te kelamag kidoen te dibaloy te polò iningedanan Sipro, so wedà kay pekesongsong.
ACT 27:5 Minokit kay doton te lawod te Silisya aw Pampilya. Timenà kay doton te Mira, sebad lonsod kidoen te Lisya.
ACT 27:6 Netelaan i Julio se sebad pangkò doen dedakel layag meneng wedad katig. Dimateng se pangkò lekat te Alejandriya megpesalo doton te Italya, aw yan se sinekayan day lekat te Mira.
ACT 27:7 Ontò meloway se kagnan day, aw nenamay se pegdateng day doton te Ngido, so wedà kay pekesongsong te kelamag, aw yan minatas kay doton te polò iningedanan Kreta. Minokit kay medapag te Ponta Salmon, so ontò mebandes se kelamag kidoen.
ACT 27:8 Minokit kay medapag te enay, meneng nelimahan kay pa, aw nenamay kay dimateng doton te Mèpiya Dedongan medapag te lonsod te Lasya.
ACT 27:9 Tandà te kenamay te sinekayan day, neobos den se aldaw te pegpowasa, aw ontò melima se peglowà te belangay. Yan minikagi si Pablo,
ACT 27:10 “Aneng-aneng ko, ontò kidon kelimahan aw domeleg kidon, so kebàtan besi se pangkò aw lolan niyan, aw megelà kidon besi heman.”
ACT 27:11 Meneng wedà penenalan se serhinto ki Pablo, so simalig sikandin diyà te egpengibing aw tig-apò te pangkò sìyan.
ACT 27:12 Aneng-aneng dan, kenà ontò mèpiya se dedongan sìyan dalem te pengodan. Yan se doun te keditaan te otaw simakay meibeg mesayo doton te Fenis, sebad lonsod te polò sìyan digsel te egselepan te aldaw, so ibeg dan meg-ogpà kidoen dalem te pengodan.
ACT 27:13 Pegdateng te pasbang, eden dan aw mekebatog dan domeleg doton te Fenis. Yan linakon dan se pondo, aw minokit kay medapag te kilid te enay te polò sìyan.
ACT 27:14 Meneng wedà kenamay, ontò migkebandes se kelamag lekat te polò, so dinetengan kay te dakel odan aw dakel balud.
ACT 27:15 Neibing se pangkò te kelamag, so wedà kay pekesongsong. Yan tininggetanan day se kelamag aw neibing kay.
ACT 27:16 Pegdateng day doton te deitek polò iningedanan Kawda, tabag melinaw kidoen. Ontò melima se peglolan day te deitek boti.
ACT 27:17 Pegkepenga niyan, inigot dan heman se getan te pangkò te lobid amon eked kebàti. Nelemitan dan aw idagsà se pangkò doton te abas iningedanan Sirte doton te Libya. Yan linolon dan se layag aw neketaking kay te kelamag.
ACT 27:18 Keeldawan niyan, ontò pa medaet se dagat. Yan in-agbel day se lolan amon eked kay keteled.
ACT 27:19 Pegdateng te iketelo te aldaw, in-agbel day se telepagan te pangkò sìyan.
ACT 27:20 Ontò nenamay wedà kay pekekità te aldaw aw bitoen. Aneng-aneng te kedita day, eked kay peketayod, so timetoo pa se odan aw kelamag ontò medaet.
ACT 27:21 Ontò nenamay wedad kinaen day. Meneng timindeg si Pablo aw minikagi, “Menge doma ko, mèpiya peden aw timolò kaw te inikagi ko kenyo te eked kidon kesayo lekat te Kreta, amon eked kebàti se lolan aw wedad kelimahan tadon.
ACT 27:22 Na, mikagi a diyà kenyo, peseligi se pedowan niyo, so wedad otaw melemes, meneng olò pangkò se kebàtan.
ACT 27:23 So tengà te delem, doen anghil migpekità diyà kanak insogò te Timanem egsimbahen ko aw migsakop kanak.
ACT 27:24 Minikagi sikandin, ‘E Pablo, ikà egkelemitan, so metoman ka komità ki Cesar aw osayan ka din doton te Roma, aw yan minikagi se Timanem te eked kematay se otaw simakay doma nikaw.’
ACT 27:25 Nayan menge doma ko, peseligi se pedowan niyo. Egsalig a te Timanem te metoman se kedita te kagi din kanak.
ACT 27:26 Meneng idagsà kidon doton te sebad polò.”
ACT 27:27 Pegkepenga te dowa simana, gayed kay pa impalid doton te dagat iningedanan Adriya. Tengà te delem, dinineg te gormiti se balud, aw netegahan day te medapag den se kilid te enay.
ACT 27:28 Penga niyan, intonton dan se lobid amon tendaen se kedalem te dagat. Kelowan depa se kedalem niyan. Wedà kenamay, todà dan tinandà aw sempolò teg lima depa se kedalem niyan.
ACT 27:29 Nelemitan kay aw idagsà se pangkò doton te abas. Yan indagdag dan se epat pondo lekat te olin, aw migtawal-tawal kay te meketayod kay lamig te peglibtak te aldaw.
ACT 27:30 Intonton te menge gormiti se deitek boti doton te dagat, so migpelingo-lingo dan te megdagdag dan te pondo doton te dolong, amon komadas dan lekat te pangkò sinekayan day.
ACT 27:31 Meneng minikagi si Pablo diyà te menge sondalo aw serhinto, “Eked kidon apet doton te enay singed aw meg-ogpà dan dini kenitadon.”
ACT 27:32 Penga niyan, binogtò te menge sondalo se lobid in-iket te deitek boti amon idagsà.
ACT 27:33 Mata-mata te iselem, minikagi si Pablo te mèpiya aw komaen dan. Kagi din, “Sempolò teg epat pa se aldaw migtagad kaw, aw netegahan ko te binallos kaw, so wedad nael kinaen niyo.
ACT 27:34 Yan kaen kaw amon megkagsen kaw. Ikà niyo egkelemitan, so wedad otaw melemes aw kepelian.”
ACT 27:35 Penga niyan, inabat i Pablo se pan, aw migpesiontong diyà te Timanem, aw pigbelà-belà din se pan, aw kimaen.
ACT 27:36 Pegkità day kandin, migkèpiya se pedowan day, aw kimaen kay heman.
ACT 27:37 Dowa gatos kepitowan teg enem se kedita day simakay te pangkò sìyan.
ACT 27:38 Pegkebesog day, in-agbel day se samà te trigo inlolan amon lomepaw se pangkò.
ACT 27:39 Peglibtak te aldaw, wedà day ketegahi aw kenan se detengan day, meneng kinità day se solok doen enay. Yan migpebelaw-belaway kay aw mebatog day ipesallad se pangkò kidoen.
ACT 27:40 Penga niyan, binogtò day se lobid in-iket te pondo, aw yan tinenanan se kedita te pondo doton didalem te dagat. Linebad day heman se lobid in-iket te bensalan. Bineka day se layag doton te dolong, aw yan migpesalo kay doton te enay.
ACT 27:41 Meneng nekesogat se pangkò diyà te abas aw yan nekesallad. Nekeselà se dolong, aw yan wedà keabat, aw nebàtan den se olin te balud.
ACT 27:42 Mig-aneng-aneng den se menge sondalo mengimatay te menge otaw egtonggoan dan amon eked dan pekekapay aw pekelowà.
ACT 27:43 Meneng migsagda si Julio kandan, so ibeg din eked imetayi si Pablo. Penga niyan, insogò din se menge otaw biyasa egkapay komahang doton te dagat amon monà dan domateng doton te enay.
ACT 27:44 Modi pa se menge doma otaw wedad kebiyasa egkapay. Minawid dan te tabla aw menge lopod lekat te pangkò, aw yan wedad mineleg, aw nekelowà se kedita day doton te enay.
ACT 28:1 Pegdateng day doton te enay, netegahan day te sìyan se polò iningedanan Malta.
ACT 28:2 Ontò kay neidowan te menge otaw eg-ogpà kidoen pengkey kenà dan Judiyo. Sinagman kay dan aw nenemtem dan te dakel apoy, so minodan aw ontò kay negenawan.
ACT 28:3 Nengimon si Pablo te kayo itabon. Pegsawol din diyà te apoy, dimelog se memokan tandà te keinit, aw tinongkà se belad din.
ACT 28:4 Pegkità te menge tege Malta te memokan diyà te belad din, migpebelaw-belaway dan, kagi dan, “Sikandin besi se metibonò. Pengkey wedà sikandin kematay doton te dagat, meneng dini te tanà matay sikandin, so yan se pelumun te salà din.”
ACT 28:5 Meneng impilik i Pablo se memokan doton te apoy aw wedà palos elegi.
ACT 28:6 Migtagad se menge doma otaw te lomebag se belad din aw penga niyan matay. Pegkenamay-namay te wedà sikandin kemeno, yan nealin se aneng-aneng dan, aw minikagi dan te sikandin se sebad timanem.
ACT 28:7 Doen dakel tanà medapag kidoen tinig-apò te datò te polò sìyan si Publio. Neidowan aw sinagman kay din te telo se delem.
ACT 28:8 Nesekitan se amay din piglegenaw aw mig-indes. Dimoton si Pablo kandin aw migtawal-tawal diyà te Timanem. Nemaed si Pablo kandin, aw yan negolian se temoay.
ACT 28:9 Pegketaga-taga te menge doma otaw, kimidoen se kedita dan doen mesakit, aw negolian dan heman.
ACT 28:10 Dakel se imbowang dan kenami. Pegsakay day te doma pangkò lekat kidoen, inlolan dan se kedita te keilangan day.
ACT 28:11 Penga te telo se bolan, nesayo kay simakay te sebad pangkò lekat te Alejandriya ngadan din Pingin Timanem tapay impondo kidoen te Malta dalem te eked pekelowà.
ACT 28:12 Pegdateng day doton te Sirakusa, mig-ogpà kay doton te telo se delem.
ACT 28:13 Lekat te Sirakusa, dimeleg kay doton te Regyo. Keeldawan niyan, doen ebagat aw nesayo kay pesalo doton te Putiyoli. Dimateng kay kidoen te iketelo te aldaw.
ACT 28:14 Netelaan day se menge otaw egpemenal kidoen te Putiyoli. Nemoyò dan te meg-ogpà kay kidoen kandan te sebad simana. Penga niyan, minipanaw kay pesalo doton te Roma.
ACT 28:15 Doen menge otaw egpemenal kidoen te Roma. Pegketaga-taga dan te dimateng kay, doen simongon kenami doton te Foro i Apyo, aw doen menge doma simongon kenami doton te lonsod iningedanan Telo Bentokanan. Pegkità i Pablo kandan, migpesiontong sikandin diyà te Timanem, aw neluba se pedowan din.
ACT 28:16 Pegdateng day doton te Roma, wedà kelebosowi si Pablo, meneng impeogpà doton te sebad balay tinonggoan te sondalo.
ACT 28:17 Penga te telo se delem, pigtipon i Pablo se menge melangkaw Judiyo. Pegketipon dan, minikagi si Pablo, “Menge kedowa ko, pengkey wedad salà ko diyà te menge doma tadon Judiyo, aw diyà te ketanem te kemonaan tadon, meneng dinakep a dan doton te Jerusalem, aw in-ated a diyà te belad te gobirno te Roma.
ACT 28:18 Peg-osay dan kanak, ibeg dan ipelowà a dan peden, so wedad salà ko mepakay ipelumun aw iimatay kanak.
ACT 28:19 Meneng doen menge doma Judiyo migsagda kandan. Doun niyan, pinemoyò ko te si Cesar se meg-osay kanak. Meneng wedà a keopal diyà te menge Judiyo, so siaken heman se sebad Judiyo.
ACT 28:20 Yan se doun te pigtipon ko sikiyo, amon megkità kidon aw megpebelaw-belaway. Iniketan a pa te sengkalì seini so pinemenalan ko sikandin egpelimanan tadon menge bowad-bowad i Israel.”
ACT 28:21 Minikagi dan, “Wedad solat dimateng kenami lekat te menge Judiyo tepad kamno. Wedad heman otaw dimini amon meg-indan kenami te medaet ka otaw.
ACT 28:22 Meneng netegahan day olò te doen ekon otaw doton te kedita te doma lonsod neopal diyà te menge otaw egpemenal. Yan ibeg day menenalan te kamno kagi.”
ACT 28:23 Penga niyan, pinemallì dan se aldaw aw kano dan ketipon. Pegdateng te aldaw sìyan, ontò medita se otaw netipon doton te balay inogpaan din. Lekat te iselem lamig te meapon, migtoladà si Pablo kandan. Mig-indan sikandin kandan tepad te peglowan te Timanem, aw miglebad-lebad sikandin te punù ingkeliwat i Moises aw insolat te menge doma telekeliwat te kagi te Timanem amon memenal se otaw ki Jesus.
ACT 28:24 Doen menge otaw nemenal te inikagi din, aw doen heman doma wedà pemenal.
ACT 28:25 Wedà dan peg-onawa. Nesayo dan penga te peg-ikagi i Pablo kani, “Benal se kagi impekeliwat te Espiritu Santo ki Isaias, so minikagi sikandin tepad te menge kemonaan tadon,
ACT 28:26 ‘Doton ka te menge otaw Judiyo, aw seini se ikegiyen no kandan. Pengkey domineg kaw te kagi ko kenyo, meneng wedad kelebetan niyo. Pengkey tomengteng kaw diyà te ipekità ko kenyo, meneng wedad kilelaen niyo.
ACT 28:27 Yan se itoladà no kandan so migpekagsen dan te olo dan amon eked dan pekelabet. Sinengseng dan se telinga dan amon eked dan penenalan. Inlipedeng dan se mata dan amon eked dan kità. Aw eked dan pemenal kanak, eked ko dan begayi te mèpiya.’ Yan se kagi te Timanem.
ACT 28:28 Penenalan kaw kanak. Inindanan den se menge otaw kenà Judiyo te megpelowà se Timanem kandan lekat te salà, so menenalan dan kenyan.” [
ACT 28:29 Penga te peg-ikagi i Pablo kenyan, nesayo se menge Judiyo aw ontò dan migpebelaw-belaway tepad te inikagi din diyà kandan.]
ACT 28:30 Mig-ogpà pa si Pablo te dowa se omay doton te balay binelesan din. Egsegmanen din se kedita te otaw eglegeana kidoen kandin.
ACT 28:31 Migtoladà sikandin te kebenalan tepad te Pengolo si Jesu Cristo aw tepad te peglowan te Timanem. Wedà pegketalaw te pegtoladà din, aw wedad heman otaw mig-anggà kandin.
ROM 1:1 Siak si Pablo se simolat kani. Sineligan a i Jesu Cristo. Pinemallì a din amon inangen a sebad sogounun din megtoladà te Mèpiya Indan te Timanem tepad ki Cristo.
ROM 1:2 Se Mèpiya Indan sìyan, yan se impakang te Timanem gebii aw impesolat din te menge telekeliwat te kagi din.
ROM 1:3 Yan se Mèpiya Indan tepad te Batà din si Jesu Cristo migpekeotaw aw timebaw sebad bowad-bowad te selotan gebii si David.
ROM 1:4 Netegahan tadon te ontò Timanem si Jesu Cristo, so pineokit te peg-antay te Timanem kandin lekat te nematay, impetaga-taga din te Batà din se Pengolo tadon si Jesu Cristo.
ROM 1:5 Pineokit kandin, tinebangan a te Timanem aw ininang a din sogounun i Cristo megtoladà te kedita te otaw pengkey kenà Judiyo. Ibeg din memenal se kedita te otaw ki Cristo aw tomolò dan kandin, aw iduyun dan sikandin.
ROM 1:6 Pengkey sikiyo tege Roma, tinawal kaw heman te Timanem amon megpesakop kaw diyà ki Jesu Cristo.
ROM 1:7 Seini se solat ko diyà te kedita niyo doton te lonsod te Roma. Nedekelan kaw te Timanem te pedowan, aw tinawal kaw din amon meinang kaw menge sakop din. Ibeg ko tebangan kaw te Timanem Amay tadon aw Pengolo tadon si Jesu Cristo, aw begayan kaw dan te kelinaw te pedowan.
ROM 1:8 Monà te kedita te kagi ko kenyo, egpesiontong a diyà te Timanem pineokit ki Jesu Cristo tepad te kedita niyo egpemenal, so pengkey doton te ogpeanan mediyò, medita den se otaw netaga-taga te nemenal kaw den ki Cristo.
ROM 1:9 Netegahan te Timanem te melobos se pedowan ko kandin te pegtoladà ko te Mèpiya Indan tepad te Batà din si Jesu Cristo. Netegahan din te gayed a egtawal-tawal diyà kandin tepad kenyo.
ROM 1:10 Egpemoyò a kandin te ipedoton a din kenyo aw mepakay iyan diyà kandin, so nenamay den wedà a pekedoton.
ROM 1:11 Ibeg ko, komità a kenyo, so doen ibegay ko kenyo lekat te Espiritu Santo amon melobos se pegtaking niyo te Pengolo tadon,
ROM 1:12 so ibeg ko megpekegsenay kidon te pedowan pineokit te kenitadon pegpemenal.
ROM 1:13 Menge kedowa ko, ibeg ko ontò kaw metaga-taga te melikit a eglalang domoton kenyo, meneng gayed doen anggà ko. Ibeg ko, meketoladà a heman doton kenyo amon doen otaw memenal, iling te ininang ko doton te menge doma otaw kenà Judiyo,
ROM 1:14 so keilangan tomolò a te Timanem simogò kanak megtoladà te kedita te kemolò te otaw, pengkey mig-iskwila dan aw wedà, pengkey biyasa dan aw wedad toig.
ROM 1:15 Yan se doun te meagka se pedowan ko megtoladà heman kenyo te Mèpiya Indan tepad ki Cristo doton te Roma.
ROM 1:16 Nayan, ontò dakel se pegsalig ko diyà te Mèpiya Indan sìyan, so yan se tolos te Timanem mekepelowà te kedita te otaw lekat te salà aw memenal dan kenyan. Nekeonà se menge Judiyo dimineg kenyan, aw penga niyan se menge otaw kenà Judiyo.
ROM 1:17 Pineokit te Mèpiya Indan tepad ki Cristo, impetaga-taga te Timanem te eneng-enengen din te metòlid se otaw aw memenal dan, so doen kagi te Timanem insolat gebii, kagi din, “Se menge otaw eneng-enengen te Timanem te metòlid dan pineokit te pegpemenal dan, yan se begayan te Timanem te kaling pedowan wedad temanan.”
ROM 1:18 Impetaga-taga te Timanem te ipelumun din se kedita te otaw kenà egtaking kandin aw eg-inang te medaet, so pineokit te peg-inang dan te medaet, egkebelebagan dan se pegketaga-taga te doma otaw te kebenalan tepad te Timanem.
ROM 1:19 Ipelumun din dan so aw meibeg dan metaga-taga te kebenalan tepad te Timanem, mola iyan ketegahan, so impetaga-taga iyan te Timanem kandan.
ROM 1:20 Gebii, lekat te peg-inang te Timanem te keneyonan lamig songkani, pengkey eked sikandin kitai, mola se pegketaga-taga te otaw te doen Timanem Metolos te wedad temanan, so egkitaen tadon se kedita te ininang din. Yan se doun te eked pekeikagi se otaw te wedà dan ketaga-taga te kebenalan.
ROM 1:21 Pengkey netaga-taga dan te doen Timanem, meneng wedà dan pegsagman kandin. Wedà dan heman pegpesiontong diyà kandin te keido din kandan. So kimulu dan, neinang kolang se aneng-aneng dan. Iling te mengitngit se aneng-aneng dan.
ROM 1:22 Pengkey eg-ikagi dan te biyasa dan, meneng wedad inenengen dan.
ROM 1:23 Wedà dan pegsimba te Timanem eked kematay, meneng migsimba dan te inotaw doen bawa te otaw egkematay, aw manok, aw ayam-ayam, aw menenanap.
ROM 1:24 Yan se doun te pinebeyaan den dan te Timanem, so gayed medaet se ibeg te pedowan dan. Yan se doun te medaet se ininang dan diyà te doma otaw, aw medaet heman se ininang te doma otaw diyà kandan.
ROM 1:25 Kimulu dan te kebenalan tepad te Timanem, aw nemenal dan te kebolalaw. Sinimba dan se ininang te Timanem, meneng wedà dan sikandin simbahi. Sinagman dan se ininang te Timanem, meneng wedà dan segmani se Timanem mig-inang te kedita. Iduyun sikandin te wedad temanan. Metoman iyan.
ROM 1:26 So timinàyog dan te Timanem, pinebeyaan din dan. Yan se doun te timaking dan te mekeyèyaay ibeg dan. Pengkey menge bayi, kimulu dan se limayok te esawa dan amon meg-inang dan te eked kepakay inangen.
ROM 1:27 Iling heman kenyan se ininang te menge meama, so kimulu dan limayok te bayi, aw nengemahà dan te doma meama amon lomayok kandan. Wedad yàyà dan meg-inang te medaet sìyan, aw yan medaet se kegemakan dimateng te pegkeotawun dan.
ROM 1:28 So wedà dan pegsagman te Timanem, pinebeyaan din dan. Yan se doun te tomalag den medaet se aneng-aneng dan aw medaet heman se eg-inangen dan.
ROM 1:29 Nelegeb dan te medita kemolò te medaet. Egkeibeg dan te kedònan te doma, aw egtindaet dan. Gayed dan eg-ingà, aw egbonò, aw egdindil, aw eg-akal, aw medaet se eg-ikegiyen dan tepad te doma otaw. Egbelikbik dan,
ROM 1:30 aw egbaet-baet dan, aw medaet se pedowan dan diyà te Timanem. Mebolot dan, aw egpelangkaw-langkaw dan, aw egduyun dan te kandan pegkeotawun. Gayed dan eglalang te medaet inangen. Kenà dan egtolò te amay aw inay.
ROM 1:31 Kolang se aneng-aneng dan. Kenà dan egtoman te pakang. Wedad palos egkedekelan dan te pedowan, aw wedad heman egkeidowan dan.
ROM 1:32 Pengkey netegahan dan te migpunù se Timanem te keilangan imetayan se kedita te otaw eg-inang te medaet iling kenyan, meneng kunù eg-inang dan pa gayed te medaet. Labi pa medaet se ininang dan, so induyun dan heman se doma otaw eg-inang te medaet iling kenyan.
ROM 2:1 Yan keilangan meg-ahà se kedita niyo egsila te doma otaw eg-inang te medaet. Eked kaw pekeikagi te wedad salà ininang niyo. Aw mikagi kaw te mèpiya aw ipelumun te Timanem se otaw eg-inang te medaet, aw medaet heman se eg-inangen niyo, ipelumun kaw heman doma dan.
ROM 2:2 Netegahan tadon te metòlid se peg-okom te Timanem te pegpelumun din te kedita te otaw eg-inang te medaet iling kenyan.
ROM 2:3 Sikiyo heman, aw egsila kaw te doma otaw eg-inang te medaet, meneng medaet heman se eg-inangen niyo, eden niyo aw mekelowà kaw lekat te pelumun te Timanem.
ROM 2:4 Ikà niyo eg-aneng-aneng te eked kaw pelumuni te Timanem tandà te kedakel aw kedalem te pedowan din. Iling te nelibelan niyo te gayed medalem se pedowan te Timanem kenyo so ibeg din megselsel kaw.
ROM 2:5 Meneng metugul kaw. Wedà kaw pegselsel, aw yan se doun te labi pa medaet se pelumun domateng kenyo te modi aldaw, so pineokit te pelumun din kenyo, ipetaga-taga din te ontò metòlid se peg-okom din,
ROM 2:6 so doen ibegay din diyà te teg sebad-sebad otaw tepad te ininang dan.
ROM 2:7 Doen menge otaw gayed eg-inang te mèpiya amon iduyun dan te Timanem, aw amon meg-ogpà dan doma din doton te langit te wedad temanan. Yan se otaw begayan din te kaling pedowan wedad temanan.
ROM 2:8 Meneng doen heman menge otaw egtaking te ibeg te kandan pedowan. Kenà dan egpemenal te kebenalan tepad te Timanem, meneng eg-inang dan te medaet. Yan se otaw ontò ipelumun te Timanem.
ROM 2:9 Doen ontò kelimahan domateng diyà te kedita te otaw eg-inang te medaet, labi se menge Judiyo aw se menge otaw kenà Judiyo heman.
ROM 2:10 Meneng se kedita te otaw eg-inang te mèpiya, yan se iduyun te Timanem doton te langit. Begayan din se kedita dan te kelinaw te pedowan, pengkey doton te otaw kenà Judiyo aw labi den doton te Judiyo,
ROM 2:11 so wedad palos otaw pedigselan din te peg-okom.
ROM 2:12 Netaga-taga se kedita te Judiyo aw eden se menge punù te Timanem ingkeliwat i Moises. Yan aw meg-inang dan te salà, ipelumun dan te Timanem tandà te peglàpang dan te punù ingkeliwat i Moises. Meneng doen heman menge otaw kenà Judiyo kenà egketaga-taga aw eden se menge punù te Timanem ingkeliwat i Moises. Aw meg-inang dan te salà, ipelumun dan heman te Timanem pengkey kenà menge punù ingkeliwat i Moises se iokom din kandan.
ROM 2:13 Pengkey metaga-taga se otaw te menge punù ingkeliwat i Moises, meneng aw eked dan tolò kenyan, kenà dan se eneng-enengen te Timanem te metòlid dan, meneng se otaw ontò tomolò te punù din.
ROM 2:14 Wedà ketaga-taga se menge otaw kenà Judiyo tepad te menge punù te Timanem ingkeliwat i Moises. Pengkey wedà dan toledai kenyan, meneng doen aldaw eked dan peg-inang te salà, iling te impunù ingkeliwat i Moises, so netaga-taga dan te doen salà eked dan kepakay inangen.
ROM 2:15 Pineokit kenyan, ipetaga-taga dan te insawol den te Timanem se punù din kidoen te pedowan dan. Kidoen te aneng-aneng dan, netaga-taga dan te doen mèpiya aw medaet, so seletà eg-aneng-aneng dan te mèpiya se eg-inangen dan, aw seletà eg-aneng-aneng dan heman te medaet se eg-inangen dan.
ROM 2:16 Pegtoladà ko te Mèpiya Indan, egtoladà a te doen pa aldaw domateng aw isogò te Timanem si Jesu Cristo meg-okom te kedita te otaw, so ipetaga-taga din se kedita te ininang tadon pengkey in-eles.
ROM 2:17 Nayan, neluba kaw besi so Judiyo kaw, aw pinemallì kaw te Timanem. Egsalig kaw heman diyà te pegketaga-taga niyo te menge punù ingkeliwat i Moises amon eneng-enengen te Timanem te metòlid kaw. Egpelangkaw-langkaw kaw heman so sikiyo se egsimba te ontò benal Timanem.
ROM 2:18 Eg-ikagi kaw te netaga-taga kaw den te ibeg din, aw biyasa kaw den egpemallì te mèpiya, so tinoledaan kaw te kagi te Timanem insolat.
ROM 2:19 Eg-aneng-aneng kaw besi te iling kaw te mèpiya otaw meg-agak te otaw bota, aw iling kaw te solò eg-olog te dalan pesalo doton te Timanem.
ROM 2:20 Eg-aneng-aneng kaw te biyasa kaw den megtoladà te doma otaw wedà toledai aw wedà pa peg-iling tepad te Timanem, so nesikop se kebiyasa aw kebenalan lekat te punù ingkeliwat i Moises.
ROM 2:21 Pengkey migtoladà kaw te menge doma otaw te keilangan metòlid se inangen dan, meneng kenà niyo eg-inangen se ipegtoladà niyo. Pengkey egtoladà kaw te medaet se egpenakaw, meneng gayed kaw egpenakaw.
ROM 2:22 Pengkey eg-ikagi kaw te eked kepakay aw meglakad, meneng eglakad kaw. Pengkey eglindò kaw te inotaw, meneng egpenakaw kaw kidoen te simbahan sinolan te inotaw.
ROM 2:23 Pengkey mikagi kaw te mèpiya se punù ingkeliwat i Moises, meneng eglindò kaw te Timanem pineokit te peglàpang niyo te punù din sìyan.
ROM 2:24 Doen kagi te Timanem insolat te egtompuyus se otaw kenà Judiyo te Timanem tandà te medaet inang niyo menge Judiyo.
ROM 2:25 Sikiyo menge Judiyo, aw tomolò kaw te punù ingkeliwat i Moises, benal doen ontong te pegpetolì niyo. Meneng aw lomàpang kaw te punù ingkeliwat i Moises, wedad ontong niyo pengkey tinolì kaw, so neinang kaw iling te otaw wedà tolii kenà egtolò te punù ingkeliwat i Moises.
ROM 2:26 Meneng aw doen otaw kenà Judiyo wedà pa tolii gayed egtolò te ibeg te Timanem iling te punù din ingkeliwat i Moises, yan se otaw sekopen te Timanem iling te tinolì sikandin.
ROM 2:27 Pengkey Judiyo kaw, meneng aw eglàpang kaw te punù ingkeliwat i Moises, doen aldaw domateng aw mikagi se menge otaw kenà Judiyo te keilangan ipelumun kaw, so pengkey binegayan kaw te kagi te Timanem insolat, pengkey tinolì kaw heman, meneng kenà kaw egtolò. Meneng pengkey wedà keliwati se punù te Timanem diyà te menge otaw kenà Judiyo, aw wedad ketanem dan te egtolien, meneng doen otaw diyà kandan egtolò te ibeg te Timanem.
ROM 2:28 Kenà botong aw olò egtaking se menge Judiyo te ketanem te Judiyo, so keilangan melobos se pedowan dan tomaking te Timanem. Kenà heman botong aw olò tolien se menge Judiyo, so keilangan todaen dan heman se ibeg te pedowan dan pineokit te Espiritu Santo, amon tomolò dan te punù ingkeliwat i Moises. Pengkey eked duyuni te doma otaw se Judiyo netodà se pedowan, meneng Timanem se domuyun kandin.
ROM 3:1 Nayan, meg-aneng-aneng kaw besi te wedad ontong te menge Judiyo, aw wedad heman kekemowan te pegtolì kandan.
ROM 3:2 Meneng medita se ontong dan. Monà te kedita, insalig te Timanem kandan se kagi din.
ROM 3:3 Benal doen menge Judiyo kenà egsalig kenyan, meneng ikà niyo eg-aneng-aneng te eked keseligi se Timanem.
ROM 3:4 Pengkey egkebolalaw se kedita te otaw, meneng kenà egkebolalaw se Timanem, so gayed sikandin egtoman te pakang din. Doen kagi te Timanem insolat, “Timanem, aw mikagi ka, ketegahan day te kebenalan se ikegiyen nikaw. Aw doen otaw megdimanda tepad kamno, sikona se menalo.”
ROM 3:5 Meneng doen besi menge otaw eg-aneng-aneng te mepakay aw meg-inang kidon te medaet, so pineokit kenyan, ontò metaga-taga se doma otaw te metòlid se Timanem, aw yan eked kepakay aw ipelumun te Timanem se otaw eg-inang te medaet. Doen besi menge otaw eg-aneng-aneng iling kenyan.
ROM 3:6 Meneng eked kidon ikagi te medaet se Timanem aw ipelumun kidon din, so simpana kenà metòlid se inangen te Timanem, eked kepakay aw sikandin se meg-okom te kedita te otaw dini lanto te tanà.
ROM 3:7 Doen besi heman menge otaw eg-aneng-aneng te mepakay aw megkebolalaw kidon, so pineokit kenyan, ontò metaga-taga se doma otaw te egkeseligan se Timanem aw iduyun dan sikandin, aw yan eked kepakay aw ipelumun te Timanem se otaw egkebolalaw.
ROM 3:8 Simpana benal iyan, mepakay peden aw meg-inang kidon te medaet amon iduyun se Timanem. Meneng kenà iyan benal. Doen otaw egbaet-baet kanak so eden dan aw yan se ipegtoladà ko. Meneng mèpiya aw ipelumun te Timanem se otaw egtoladà iling kenyan.
ROM 3:9 Nayan, kenà benal te labi pa mèpiya se kedita te Judiyo diyà te menge doma otaw kenà Judiyo, so tapay a minikagi diyà kenyo te nekeinang se kedita te otaw te salà, pengkey Judiyo aw otaw kenà Judiyo.
ROM 3:10 Doen kagi te Timanem insolat, “Wedad palos otaw ontò metòlid, pengkey sebad.
ROM 3:11 Wedad palos otaw netaga-taga tepad te Timanem. Wedad heman otaw meibeg metaga-taga te Timanem.
ROM 3:12 Timinàyog se kedita te otaw te Timanem. Tomalag dan nelegeb te salà. Wedad palos otaw mig-inang te metòlid, pengkey sebad.
ROM 3:13 Iling te lebeng neowang se bahà dan so medaet se kagi dan. Pineokit te kagi dan, eg-akal dan te doma otaw. Iling te lalas te memokan se medaet kagi eglowà lekat te bahà dan.
ROM 3:14 Gayed dan egpenollon aw egkeopal.
ROM 3:15 Meagka se pedowan dan memonò.
ROM 3:16 Pengkey kenan dan okit, egbaet aw egpemegay dan te kelimahan.
ROM 3:17 Wedà dan ketaga-taga aw eden se peokit amon doen kelinaw te pedowan dan.
ROM 3:18 Wedà dan heman ketaga-taga te keilangan melemitan dan meg-inang te kenà ibeg te Timanem.”
ROM 3:19 Na, netegahan tadon te yan se kagi te Timanem tepad te kedita tadon menge Judiyo, so kemonaan tadon se kineliwatan i Moises te menge punù. Yan eked kidon pekeikagi te wedad salà tadon, so okomen te Timanem se kedita te otaw te keneyonan.
ROM 3:20 Yan se doun te wedad palos otaw eneng-enengen te Timanem te metòlid dan pineokit te pegtolò dan te punù ingkeliwat i Moises, so pineokit te pegketaga-taga tadon te menge punù ingkeliwat i Moises, netegahan tadon te salà se eg-inangen tadon.
ROM 3:21 Meneng impetaga-taga den te Timanem kenitadon te doen den peokit ininang din amon eneng-enengen din te metòlid kidon. Kenà iyan pineokit te pegtolò tadon te punù ingkeliwat i Moises. Mebasa se peokit sìyan kidoen te kagi te Timanem insolat i Moises aw menge doma telekeliwat te kagi din.
ROM 3:22 Eneng-enengen te Timanem te metòlid kidon pineokit te pegpemenal tadon ki Jesu Cristo. Yan se inangen din diyà te kedita te otaw memenal, pengkey Judiyo aw otaw kenà Judiyo, so onawa se kedita te otaw.
ROM 3:23 Nekesalà se kedita te otaw. Wedad palos otaw mekeapet te ketòlid te Timanem.
ROM 3:24 Meneng pineokit te tabang te Timanem, inaneng-aneng din den te metòlid kidon. Yan se imbowang din kenitadon pineokit te pegpelowà i Jesu Cristo kenitadon lekat te salà.
ROM 3:25 Si Jesus se insogò te Timanem amon matay sikandin somelilin kenitadon. Pineokit te dipanog din, pegwedaden te Timanem se salà te otaw memenal kandin. Yan se ininang te Timanem amon ipetaga-taga din kenitadon te metòlid se eg-inangen din. Tandà te kelayat te pedowan din, wedà din tagmon pelumuni se otaw nekesalà kedengan.
ROM 3:26 Meneng songkani wedad salà eked din pelumuni amon ipetaga-taga din kenitadon te metòlid sikandin, aw eneng-enengen din te metòlid se teg sebad-sebad otaw egpemenal ki Jesus.
ROM 3:27 Yan se doun te eked kidon pegpelangkaw-langkaw. Eked kidon ikagi te inaneng-aneng te Timanem te metòlid kidon pineokit te pegtolò tadon te menge punù ingkeliwat i Moises, so pineokit te pegpemenal tadon ki Jesus se peg-aneng-aneng te Timanem te metòlid kidon.
ROM 3:28 Yan netegahan tadon den te pineokit te pegpemenal te teg sebad-sebad kenitadon se peg-aneng-aneng te Timanem te metòlid kidon. Kenà iyan pineokit te pegtolò tadon te menge punù ingkeliwat i Moises.
ROM 3:29 Ikà niyo eg-aneng-aneng te olò Judiyo se mepakay megpesakop diyà te Timanem, so mepakay megpesakop se kedita te otaw diyà kandin, pengkey Judiyo aw otaw kenà Judiyo.
ROM 3:30 Olò sebad se Timanem, aw sikandin se meg-aneng-aneng te metòlid se kedita te otaw memenal ki Jesus, pengkey Judiyo aw otaw kenà Judiyo.
ROM 3:31 Meneng ikà niyo eg-aneng-aneng te tinenanan tadon den se menge punù ingkeliwat i Moises pineokit te pegpemenal tadon ki Jesus. Meneng so nemenal kidon den ki Jesus, mekebatog kidon den tomolò te menge punù ingkeliwat i Moises.
ROM 4:1 Nayan, mèpiya aw meg-aneng-aneng kidon tepad ki Abraham, sìyan kemonaan te kedita tadon menge Judiyo.
ROM 4:2 Simpana pineokit te mèpiya ininang din se peg-aneng-aneng te Timanem te metòlid sikandin, mepakay peden megpelangkaw-langkaw si Abraham. Meneng kenà pineokit kenyan se peg-aneng-aneng te Timanem te metòlid sikandin.
ROM 4:3 Netegahan tadon iyan so doen kagi te Timanem insolat tepad kenyan, kagi din, “Nemenal si Abraham te Timanem, aw yan se doun te mig-aneng-aneng se Timanem te metòlid sikandin.”
ROM 4:4 Aw megterbaho se otaw, eked eneng-enengi te bowang se itandan kandin, so nepagod sikandin.
ROM 4:5 Iling heman kenyan, kenà otaw egkepagod se eneng-enengen te Timanem te metòlid sikandin. Meneng aw somalig se otaw diyà te Timanem, te sikandin se meg-aneng-aneng te metòlid se otaw nekesalà, yan se otaw eneng-enengen te Timanem te metòlid tandà te pegsalig din.
ROM 4:6 Minikagi heman si David gebii te meluba se teg sebad-sebad otaw eneng-enengen te Timanem te metòlid dan kenà pineokit te pagod dan meneng pineokit te pegpemenal dan, so minikagi sikandin,
ROM 4:7 “Doen keluba te kedita te otaw aw pigwedad te Timanem se inang dan medaet, Aw inabat te Timanem se salà dan.
ROM 4:8 Doen keluba te otaw aw gibowen te Timanem se lista te salà ininang din.”
ROM 4:9 Na, kenà olò menge Judiyo egpemetolì se begayan te Timanem te keluba sìyan, so egbegayan din heman se menge otaw kenà Judiyo pengkey kenà dan egpemetolì. Netegahan tadon den te inaneng-aneng te Timanem te metòlid si Abraham so nemenal sikandin.
ROM 4:10 Yan se neinang kandin kenà penga te pegtolì kandin, meneng neinang iyan te wedà pa tolii.
ROM 4:11 Penga te pegpemenal i Abraham, migpetolì sikandin. Yan se pengilala te inaneng-aneng te Timanem te metòlid sikandin tandà te pegpemenal din te wedà pa tolii. Yan neinang sikandin olo te kedita te otaw egpemenal pengkey wedà dan tolii, so inaneng-aneng heman te Timanem te metòlid dan tandà te pegpemenal dan.
ROM 4:12 Neinang heman sikandin olo te kedita te Judiyo tinolì kenà tandà te pegtolì kandan, meneng tandà te pegpemenal dan te Timanem iling te pegpemenal i Abraham te wedà pa sikandin tolii.
ROM 4:13 Gebii, migpakang se Timanem diyà ki Abraham aw menge bowad-bowad din te doen aldaw domateng aw begayan dan te kedakel te keneyonan aw lomowan dan diyà te kedita te otaw. Yan se impakang te Timanem kenà so timolò si Abraham te menge punù ingkeliwat i Moises, meneng impakang iyan te Timanem so nemenal si Abraham te Timanem aw inaneng-aneng te Timanem te metòlid sikandin.
ROM 4:14 Simpana olò otaw egtolò te punù ingkeliwat i Moises se begayan te impakang te Timanem, wedad den kekemowan te pegpemenal tadon te Timanem, aw eked heman ketoman se impakang te Timanem.
ROM 4:15 Keilangan ipelumun te Timanem se kedita te otaw tandà te peglàpang dan te menge punù ingkeliwat i Moises. Eked kepakay se otaw eked làpang te punù singed aw wedad punù.
ROM 4:16 Yan olò otaw egpemenal se begayan te Timanem te impakang din. Ibegay din iyan kenitadon pineokit te tabang din amon metoman iyan ibegay diyà kenitadon timetondog ki Abraham. Kenà olò Judiyo egtolò te menge punù ingkeliwat i Moises se begayan te Timanem, meneng begayan din heman se kedita te otaw egpemenal kandin iling te pegpemenal i Abraham, so neinang si Abraham olo te kedita tadon egpemenal.
ROM 4:17 Doen kagi te Timanem ki Abraham insolat, “Inangen ko sikona kemonaan te medita pongan.” Yan ininang te Timanem si Abraham olo te kedita tadon egpemenal te Timanem iling te pegpemenal i Abraham kandin. Timanem se mekeantay te otaw lekat te nematay, aw mekebatog sikandin meg-inang te wedà pa palos inangi pineokit te kagi din.
ROM 4:18 Pengkey iling te eked palos ketoman se impakang te Timanem ki Abraham, meneng nemenal sikandin. Migpeliman sikandin te aldaw te meinang sikandin kemonaan te medita pongan, so pinekangan sikandin te Timanem te doen batà din tomebaw aw megkedita se menge bowad-bowad din.
ROM 4:19 Netaga-taga si Abraham te temoay sikandin, aw eked den sikandin pekebatà, so agpet den sebad gatos se omay din. Netegahan din heman te wedà lumun pegbatà se esawa din si Sara. Pengkey netegahan din iyan, wedà pegkelomay se pegsalig din diyà te Timanem.
ROM 4:20 Wedà sikandin pegdowa-dowa tepad te impakang te Timanem kandin te doen batà din tomebaw, meneng linobos din se pegpemenal din diyà te Timanem, aw induyun din se Timanem,
ROM 4:21 so netegahan din te tomanen te Timanem se impakang din.
ROM 4:22 Yan se doun te inaneng-aneng te Timanem te metòlid si Abraham so nemenal sikandin.
ROM 4:23 Pengkey yan se kagi te Timanem insolat, te inaneng-aneng din te metòlid sikandin, meneng kenà olò si Abraham se detengan te kagi sìyan,
ROM 4:24 so detengan kidon heman. Eneng-enengen heman te Timanem te metòlid se kedita tadon egpemenal te Timanem mig-antay te Pengolo tadon si Jesus lekat te nematay.
ROM 4:25 Nematay si Jesus amon ipelowà kidon lekat te salà tadon. Inantay heman sikandin te Timanem lekat te nematay amon eneng-enengen din te metòlid kidon.
ROM 5:1 Nayan, so netegahan tadon den te inaneng-aneng den te Timanem te metòlid kidon tandà te pegpemenal tadon ki Jesu Cristo, wedad den ikeopal te Timanem kenitadon. Migsebad kidon diyà te Timanem pineokit te pegkematay te Pengolo tadon si Jesu Cristo.
ROM 5:2 Pineokit te pegpemenal tadon kandin, nekeakop kidon diyà te otaw egtebangan te Timanem. Neluba kidon den heman, so egpelimanan tadon se aldaw te meg-ogpà kidon doma te Timanem doton te langit.
ROM 5:3 Doen heman doma ingkeluba tadon. Neluba kidon te doen den kelimahan tadon tandà te pegtaking tadon ki Cristo, so pineokit te pegtayod tadon te kelimahan, doen keilingan tadon amon eked kidon dàgi pengkey eden se domateng kenitadon.
ROM 5:4 Aw meketayod kidon te kelimahan, metaga-taga kidon te egkeluba se Timanem te kenitadon pegpemenal, aw lekat kenyan, netegahan tadon te metoman se egpelimanan tadon.
ROM 5:5 Eked kidon lengà te pegpemenal. Tomanen te Timanem se egpelimanan tadon, so nedekelan kidon din te pedowan pineokit te Espiritu Santo imbegay din kenitadon.
ROM 5:6 Kedengan te wedà kidon pa pemenal, neallang kidon te salà. Meneng pegdateng te aldaw pinemallì te Timanem, nematay si Cristo amon megpelowà kenitadon egpekesalà.
ROM 5:7 Wedad besi otaw meibeg imetayan amon somelilin te doma otaw eg-inang te metòlid. Pilabok besi heman se otaw ontò meibeg imetayan amon somelilin te otaw gayed eg-inang te mèpiya diyà te doma otaw.
ROM 5:8 Meneng impetaga-taga te Timanem kenitadon te ontò dakel se pedowan din kenitadon, so dalem pa te eg-inang kidon te salà, insogò din si Jesu Cristo aw inimetayan sikandin amon megpelowà kenitadon lekat te pelumun.
ROM 5:9 Nayan, so inaneng-aneng den te Timanem te metòlid kidon pineokit te pegkematay i Cristo, netegahan tadon den te ontò kidon din ipelowà lekat te pelumun te modi aldaw.
ROM 5:10 Pengkey poon kidon te Timanem, meneng pineokit te pegkematay te Batà din, migsebad kidon den kandin. So migsebad kidon den kandin, yan netegahan tadon den heman te ontò kidon ipelowà lekat te pelumun pineokit te pegkeantay i Cristo lekat te nematay.
ROM 5:11 Pengkey meluba kidon so impelowà kidon lekat te pelumun, meneng doen heman keluba te pedowan tadon diyà te Timanem pineokit te Pengolo tadon si Jesu Cristo, so pineokit te ininang din, migsebad kidon den diyà te Timanem.
ROM 5:12 Gebii, mig-inang se tagnà otaw si Adam te salà, aw yan se keteboan te salà dini te keneyonan. Lekat te salà, doen heman kemetayun. Yan se doun te egkematay se kedita te otaw, so mig-inang se kedita tadon te salà.
ROM 5:13 Pengkey te wedà pa pegpunù se Timanem te menge punù ingkeliwat i Moises, tapay nekesalà se otaw. Meneng wedà dan eneng-enengi, so wedad pa punù ingkeliwat i Moises.
ROM 5:14 Meneng lekat ki Adam taman te pegkeliwat i Moises te punù te Timanem, migkemematay se kedita te otaw so doen salà ininang dan, pengkey wedà dan lèpangi se punù linèpangan i Adam. Pengkey medaet se ininang i Adam gebii, meneng doen timbang din. Yan se Misiyas pinelimanan din.
ROM 5:15 Medaet se ininang i Adam, meneng ontò mèpiya se imbowang te Timanem. Netegahan tadon te egkematay se kedita te otaw tandà te salà ininang te sebad otaw si Adam. Meneng netegahan tadon te ontò medita se otaw tinebangan te Timanem tandà te ininang te sebad otaw si Jesu Cristo. Yan se mèpiya imbowang te Timanem diyà kenitadon.
ROM 5:16 Medaet se dimateng diyà te otaw tandà te peg-inang i Adam te salà. Meneng ontò mèpiya se dimateng diyà te otaw tandà te pegbowang te Timanem. Pengkey mekesebad si Adam peg-inang te salà, minikagi se Timanem te keilangan ipelumun se kedita te otaw. Meneng pengkey medita se salà ininang te kedita tadon, tinebangan kidon te Timanem, aw minikagi sikandin te eked kidon din pelumuni.
ROM 5:17 Pengkey benal egkematay se kedita te otaw tandà te salà ininang te sebad otaw si Adam, meneng ontò mèpiya se dimateng diyà kenitadon tandà te ininang te sebad otaw si Jesu Cristo. Ontò mèpiya se tabang te Timanem imbowang din kenitadon, sìyan peg-aneng-aneng din te metòlid kidon, so aw kominawà kidon te tabang din sìyan, begayan kidon din te kaling pedowan, aw ipelowan kidon doma din doton te langit.
ROM 5:18 Netegahan tadon den te impelumun se kedita te otaw tandà te peg-inang i Adam te salà, meneng doen kaling pedowan imbegay te Timanem kenitadon aw inaneng-aneng din te metòlid kidon tandà te peg-inang i Cristo te mèpiya.
ROM 5:19 Wedà tolò si Adam te Timanem, aw yan se doun te kinetinan se kedita te otaw te salà. Meneng timolò si Jesu Cristo te Timanem, aw yan se doun te medita se otaw eneng-enengen te Timanem te metòlid dan.
ROM 5:20 Impekeliwat te Timanem se menge punù din ki Moises, amon metaga-taga kidon te ontò dakel se salà ininang tadon. Meneng pengkey dakel se salà ininang tadon, labi pa dakel se tabang te Timanem kenitadon.
ROM 5:21 Pengkey egkematay se kedita te otaw neallang te salà, meneng egtebangan te Timanem se kedita te otaw megpesakop diyà kandin, so eneng-enengen din te metòlid dan. Begayan din dan heman te kaling pedowan wedad temanan pineokit te ininang te Pengolo tadon si Jesu Cristo.
ROM 6:1 Nayan, doen besi menge otaw meg-aneng-aneng te mèpiya aw gayed kidon meg-inang te salà amon labi pa dakel se keido te Timanem kenitadon.
ROM 6:2 Meneng eked iyan kepakay. Pegpesakop tadon diyà ki Cristo, iling kidon te otaw nematay so eked kidon den keibeg te salà. Yan eked den heman kepakay aw meg-inang kidon te salà.
ROM 6:3 Netegahan niyo den te pegpebonyag te kedita tadon migpesakop diyà ki Jesu Cristo, migsebad kidon diyà te kemetayun din kidoen te kros.
ROM 6:4 Pineokit te pegpebonyag tadon, iling te nematay kidon doma kandin, aw iling te inlebeng kidon heman doma kandin. Neinang iyan amon begayan kidon te Timanem te kaling pedowan, iling te peg-antay din ki Cristo lekat te nematay pineokit te tolos din.
ROM 6:5 So migsebad kidon den diyà ki Cristo te pegkematay tadon iling kandin, yan megsebad kidon heman diyà kandin te pegkeantay tadon iling te pegkeantay din.
ROM 6:6 Netegahan tadon te peglansang ki Jesus doton te kros amon matay, iling te inlansang heman se tapay pedowan tadon doma kandin doton te kros, amon eked kidon den keibeg meg-inang te salà, aw amon eked kidon den keallang te salà,
ROM 6:7 so aw matay se otaw, eked sikandin peg-inang te salà.
ROM 6:8 So iling te nematay kidon den doma ki Cristo te pegpemenal tadon kandin, yan netegahan tadon te binegayan kidon heman te kaling pedowan wedad temanan iling kandin.
ROM 6:9 Netegahan tadon den te inantay si Cristo lekat te nematay, aw eked palos sikandin todà kematay. Dinaeg din den se eneg te kemetayun.
ROM 6:10 Mekesebad olò sikandin kematay, aw eked palos sikandin todà kematay. Pineokit te pegkematay din, dinaeg din se eneg te salà. Neantay den sikandin lekat te nematay, aw gayed den ipegduyun se Timanem pineokit te eg-inangen din.
ROM 6:11 Iling heman kenyan, keilangan eneng-enengen niyo te iling kaw den te otaw nematay so eked kaw den keibeg te salà. Pineokit te pegpesakop niyo diyà ki Jesu Cristo, binegayan kaw den te kaling pedowan, aw yan keilangan iduyun heman se Timanem pineokit te eg-inangen niyo.
ROM 6:12 Yan eked den kepakay aw beyà-beyaan kaw te salà. Eked den kepakay aw tomolò kaw te medaet ibeg te pedowan niyo.
ROM 6:13 Ikà niyo eglegamit te lawa niyo meg-inang te salà. Meneng keilangan ipelowan niyo se Timanem diyà kenyo, so impelowà kaw din lekat te kemetayun aw binegayan kaw din den te kaling pedowan. Begayi niyo se lawa niyo diyà te Timanem amon gemiten din iyan meg-inang te metòlid.
ROM 6:14 Eked kaw den keleges meg-inang te salà, so nekelowà kaw den kenà pineokit te menge punù ingkeliwat i Moises, meneng pineokit te keido aw tabang te Timanem.
ROM 6:15 Nayan, pengkey eneng-enengen te Timanem te metòlid kidon kenà pineokit te pegtolò tadon te menge punù ingkeliwat i Moises meneng pineokit te keido din, ikà niyo eg-aneng-aneng te mepakay aw meg-inang kidon te salà. Ikà niyo eg-aneng-aneng iling kenyan.
ROM 6:16 Netegahan niyo den, aw megpeallang kaw diyà te doma otaw, keilangan tomolò kaw kandin. Iling heman kenyan, aw meallang se otaw diyà te salà, detengan sikandin te kemetayun wedad temanan. Meneng aw tomolò se otaw te Timanem, eneng-enengen te Timanem te metòlid sikandin.
ROM 6:17 Kedengan, neallang kaw te salà. Meneng ontò a den egpesiontong diyà te Timanem, so nelobos den se pedowan niyo egtolò te kebenalan intoladà kenyo tepad te Timanem pinesekopan niyo.
ROM 6:18 So impelowà kaw den lekat te salà, keilangan metòlid se eg-inangen niyo.
ROM 6:19 Kenà medalem se kagi ko kenyo seini, so ibeg ko mekelabet kaw te toladà ko kenyo. Kedengan, neallang kaw te salà, aw ginamit niyo se lawa niyo mig-inang te salà, aw gayed niyo pigdogangan se salà. Meneng songkani, keilangan gemiten niyo se lawa niyo meg-inang te metòlid amon benal kaw egpenimanem.
ROM 6:20 Kedengan te pegkeallang niyo te salà, wedà kaw peg-aneng-aneng tepad te metòlid ibeg te Timanem.
ROM 6:21 Meneng wedad ontong niyo lekat te ininang niyo kedengan, sìyan medaet egkeyèyaan niyo den songkani, so detengan te kemetayun wedad temanan se otaw eg-inang te salà iling kenyan.
ROM 6:22 Meneng so impelowà kaw den te Timanem lekat te salà aw migpesakop kaw den diyà kandin, doen den ontong niyo, so ininang kaw din egpenimanem, aw yan begayan kaw din te kaling pedowan wedad temanan.
ROM 6:23 Detengan te kemetayun wedad temanan se otaw eg-inang te salà. Meneng se ibowang te Timanem, yan se kaling pedowan wedad temanan pineokit te pegpemenal tadon te Pengolo tadon si Jesu Cristo.
ROM 7:1 Menge kedowa ko, biyasa kaw tepad te menge punù te gobirno, aw yan netegahan niyo te keilangan tomolò se otaw te punù te gobirno taman olò te pegkematay din. Meneng aw matay se otaw, eked den keleges tomolò.
ROM 7:2 Yan eked todà pengognan se bayi doen esawa singed aw matay se esawa din, so yan se punù te gobirno. Meneng aw matay se esawa te bayi, mepakay aw mengognan todà, so wedad den labut din te punù sìyan.
ROM 7:3 Meneng aw tomaking se bayi te doma meama te eked pa kematay se esawa din, yan mekelakad. Meneng aw matay se meama aw todà mengognan se esawa din, eked pekelakad so wedad kelebutan te punù te gobirno tepad te monà esawa din.
ROM 7:4 Menge kedowa ko, iling kidon heman kenyan, so pegkematay i Cristo, iling te nematay kidon heman doma kandin. So nematay kidon, eked kidon den keleges tomolò te menge punù ingkeliwat i Moises, meneng mepakay aw tomaking kidon den ki Cristo inantay te Timanem lekat te nematay, amon tomolò kidon te ibeg te Timanem.
ROM 7:5 Kedengan dalem te pegtaking tadon te ibeg te pedowan tadon, doen medaet ibeg tadon nekeboyo kenitadon pineokit te menge punù ingkeliwat i Moises. Yan se doun te detengan kidon peden te kemetayun, so gayed kidon mig-inang te salà.
ROM 7:6 Meneng so iling te nematay kidon den, eked kidon keleges tomolò te menge punù ingkeliwat i Moises, so impelowà kidon den te Timanem lekat te pegkeallang tadon kenyan. Kedengan te pegtaking tadon te menge punù insolat i Moises, wedà kidon peketolò te ibeg te Timanem. Meneng songkani, mekebatog kidon den tomolò te ibeg te Timanem so egtabang se Espiritu Santo kenitadon.
ROM 7:7 Nayan, doen besi menge otaw meg-aneng-aneng den te medaet se punù ingkeliwat i Moises. Meneng kenà iyan medaet, so pineokit te punù ingkeliwat i Moises, netegahan ko den aw eden se salà. Simpana wedad punù megsagda te peg-ingà, eked ko ketegahi te medaet se peg-ingà.
ROM 7:8 Meneng pegketaga-taga ko te punù te Timanem tepad te peg-ingà, labi a pa gayed eg-ingà so medaet se ibeg te pedowan ko. Simpana wedad punù, wedà ko ketegahi aw eden se salà.
ROM 7:9 Kedengan te wedà ko ontò ketegahi aw eden se impunù te Timanem, eden ko aw mèpiya se pedowan ko. Meneng pegketaga-taga ko te kebenalan tepad te menge punù, netegahan ko den te nelegeb se pedowan ko te salà, aw detengan a te kemetayun wedad temanan.
ROM 7:10 Pengkey doen kaling pedowan wedad temanan impakang diyà te otaw ontò tomolò te menge punù te Timanem, meneng netegahan ko te detengan a te kemetayun tandà te peglàpang ko te punù din.
ROM 7:11 Neekalan a te salà, so pengkey mèpiya peden se pinelimanan ko tandà te pegtolò ko te menge punù, meneng detengan a te kemetayun wedad temanan tandà te peglàpang ko te punù te Timanem.
ROM 7:12 Wedad palos kemalì diyà te menge punù ingkeliwat i Moises. Lekat te Timanem se teg sebad-sebad punù sìyan, aw ontò iyan metòlid aw ontò mèpiya.
ROM 7:13 Meneng ikà niyo eg-aneng-aneng te mèpiya punù te Timanem se linekatan te kemetayun ko. Kenà iyan, so detengan a te kemetayun tandà te peglàpang ko te mèpiya punù sìyan, amon metaga-taga a te medaet se salà ininang ko. Pineokit te mèpiya punù te Timanem, impetaga-taga a te ontò medaet se salà ininang ko.
ROM 7:14 Netegahan tadon te mèpiya se punù te Timanem so lekat iyan kandin. Meneng doen pa medaet ibeg te pedowan ko. Iling a te allang so eg-inang a te salà.
ROM 7:15 Nepela a te eg-inangen ko, so pengkey meibeg a meg-inang te mèpiya, meneng eked ko iyan keinang. Pengkey eked a keibeg meg-inang te medaet, meneng yan se egkeinang ko.
ROM 7:16 Nayan, aw eked a keibeg meg-inang te medaet eg-inangen ko, yan se pengilala te netegahan ko te metòlid se punù te Timanem.
ROM 7:17 Yan kenà siaken se eg-inang te medaet, meneng lekat iyan te medaet ibeg te tapay pedowan ko.
ROM 7:18 Netegahan ko te wedad palos mèpiya kidoen te tapay pedowan ko, so pengkey meibeg a meg-inang te mèpiya, meneng eked ko iyan keinang.
ROM 7:19 Yan se doun te eked ko keinang se mèpiya inangen ko peden. Meneng gayed ko egkeinang se medaet eked ko peden inangi.
ROM 7:20 Aw egkeinang ko se eked ko peden inangi, yan kenà siaken se eg-inang te medaet, meneng lekat iyan te medaet ibeg te tapay pedowan ko.
ROM 7:21 Seini se gayed ko meinang. Aw meibeg a meg-inang te mèpiya, medaet se inangen ko.
ROM 7:22 Pengkey didalem te pedowan ko, ibeg ko tomolò a te ibeg te Timanem,
ROM 7:23 meneng netegahan ko te sebad se ibeg te lawa ko. Iling te egbolaw se ibeg te lawa ko aw aneng-aneng ko. Yan neallang a diyà te medaet ibeg te lawa ko.
ROM 7:24 Ontò melima se pegkesawol ko sìyan. Sinu se megpelowà kanak lekat te pegkeallang ko diyà te medaet ibeg te pedowan ko detengan te kemetayun?
ROM 7:25 Yan egpesiontong a diyà te Timanem, so impelowà a din den pineokit te Pengolo tadon si Jesu Cristo. Yan mig-indan a den kenyo te kelimahan ko. Pengkey ibeg ko tomolò a te ibeg te Timanem, meneng egpekeinang a pa te medaet so doen pa medaet ibeg te pedowan ko.
ROM 8:1 Yan eked pelumuni te Timanem se kedita te otaw migpesakop diyà ki Jesu Cristo.
ROM 8:2 So pegsebad ko diyà ki Jesu Cristo, doen kaling pedowan imbegay te Espiritu Santo kanak, aw yan se doun te wedad den keilangan meg-inang a te salà, aw eked a den heman detengi te pelumun.
ROM 8:3 So medaet se pedowan tadon, eked kidon peketolò te menge punù ingkeliwat i Moises. Meneng tinebangan kidon te Timanem, so insogò din se Batà din dini te tanà. Migpekeotaw sikandin amon ipelumun tandà te salà tadon. Pineokit te pegkematay din, wedad den eneg te salà, aw eked kidon den keleges tomaking te medaet ibeg te pedowan tadon.
ROM 8:4 Yan se ininang te Timanem amon mekeinang kidon te metòlid iling te impunù din ingkeliwat i Moises. Eked kidon keleges tomaking te medaet ibeg te pedowan tadon, so egpenabang se Espiritu Santo kenitadon amon mekeinang kidon te metòlid.
ROM 8:5 Aw egbeyà-beyaan se otaw te medaet ibeg te pedowan din, gayed sikandin eg-aneng-aneng tepad te pegtoman din te medaet ibeg din. Meneng aw egbeyà-beyaan te Espiritu Santo se otaw, gayed sikandin eg-aneng-aneng tepad te pegtoman din te ibeg te Espiritu Santo.
ROM 8:6 Aw meg-aneng-aneng se otaw tepad te pegtoman din te medaet ibeg te pedowan din, detengan sikandin te kemetayun wedad temanan. Meneng aw meg-aneng-aneng se otaw tepad te pegtoman din te ibeg te Espiritu Santo, yan se otaw doen kaling pedowan wedad temanan, aw melinaw se pedowan din.
ROM 8:7 Se otaw eg-aneng-aneng tepad te pegtoman din te medaet ibeg te pedowan din, yan se egpoon te Timanem, so kenà sikandin egtolò te impunù te Timanem. Eked sikandin peketolò te impunù te Timanem.
ROM 8:8 Aw egbeyà-beyaan se otaw te medaet ibeg te pedowan din, wedad palos inangen din kelubahan te Timanem.
ROM 8:9 Meneng kenà kaw den egbeyà-beyaan te medaet ibeg te pedowan niyo, so egbeyà-beyaan kaw den te Espiritu Santo eg-ogpà kidoen te pedowan niyo. Aw doen otaw wedad Espiritu Santo diyà kandin insogò i Cristo, yan se otaw wedà pegpesakop diyà ki Cristo.
ROM 8:10 Meneng aw eg-ogpà si Cristo diyà kenyo, pengkey matay se lawa niyo tandà te salà, meneng binegayan kaw te Timanem te kaling pedowan, so inaneng-aneng din den te metòlid kaw.
ROM 8:11 Timanem se mig-antay ki Cristo lekat te nematay. Yan aw eg-ogpaan kaw te Espiritu Santo, entayen heman te Timanem se lawa niyo lekat te nematay pineokit te Espiritu Santo eg-ogpà kidoen kenyo.
ROM 8:12 Na, menge kedowa ko, so eg-ogpaan kidon te Espiritu Santo, keilangan meg-inang kidon te ibeg te Timanem. Keilangan eked kidon taking te medaet ibeg te pedowan tadon,
ROM 8:13 so aw egbeyà-beyaan kaw te medaet ibeg te pedowan niyo, detengan kaw te kemetayun wedad temanan. Meneng aw pineokit te tabang te Espiritu Santo lomengà kaw te peg-inang niyo te salà, doen kaling pedowan niyo wedad temanan,
ROM 8:14 so se kedita te otaw egbeyà-beyaan te Espiritu Santo, yan se menge batà te Timanem.
ROM 8:15 Pegpemegay te Timanem te Espiritu Santo diyà kenyo, wedà kaw din inangi menge allang din, meneng ininang kaw din menge batà din. Yan se doun te wedad den kelemitanan niyo, so mepakay den aw Amà se itawal tadon te Timanem, so amay tadon den sikandin,
ROM 8:16 so Espiritu Santo se egpetaga-taga kenitadon te menge batà kidon den te Timanem.
ROM 8:17 So batà kidon din, doen aldaw domateng aw kominawà kidon te kedita te kèpiyaan impetagad din kenitadon. Pengkey eden se ibegay din ki Cristo, yan heman se ibegay din kenitadon. Aw pemilangen kidon tandà te pegtaking tadon ki Cristo, ipelangkaw kidon heman doton te langit doma i Cristo.
ROM 8:18 Pengkey egpemilangen kidon dini lanto te tanà, meneng aneng-aneng ko aw kinewaen tadon se kèpiyaan impetagad te Timanem kenitadon, kelibelan tadon se kelimahan sìyan,
ROM 8:19 so egpeliman se kedita te ininang te Timanem te aldaw domateng aw ipekità din se kedita te menge batà din.
ROM 8:20 Gebii, migkedaet se kedita ininang te Timanem dini lanto te tanà aw wedad den ontong so impelumun, kenà lekat te ibeg niyan meneng lekat te ibeg te Timanem. Meneng doen pa aldaw pelimanan tadon
ROM 8:21 aw inangen te Timanem kaling se kedita te ininang din amon wedad palos matay aw megkedaet. Yan meinang mèpiya se kedita, iling te kèpiyaan domateng kenitadon menge batà te Timanem.
ROM 8:22 Te eked pa iyan ketoman, netegahan tadon te ontò egkelimahan se kedita te ininang te Timanem dini lanto te tanà lamig seini, iling te bayi agpet tebawan.
ROM 8:23 Kenà olò doma ininang te Timanem se egkelimahan, meneng sikitadon heman se egkelimahan dalem te pegpeliman tadon te aldaw te ipekità te Timanem se kedita te menge batà din, aw metoman meinang kaling se lawa tadon. Imbegay den se Espiritu Santo kenitadon, aw sikandin se tagnà te kedita te ibowang te Timanem kenitadon,
ROM 8:24 so lekat te pegpelowà din kenitadon lekat te salà, gayed kidon egpeliman kenyan. Aw dimateng den se pinelimanan tadon, eked kidon ikagi te doen pa pelimanan tadon, so wedad otaw megpeliman te dimateng den.
ROM 8:25 Meneng so wedà pa dateng se egpelimanan tadon, keilangan medalem se pedowan tadon dalem te pegpeliman tadon kenyan.
ROM 8:26 Egtebangan kidon heman te Espiritu Santo amon eked kidon lengà se egpeliman. So aw eked kidon ketaga-taga aw eden se mèpiya pemoyoen tadon te pegtawal-tawal tadon diyà te Timanem, ikeliwat te Espiritu Santo se ontò medalem ibeg te pedowan tadon eked tadon keikagi.
ROM 8:27 Netaga-taga se Timanem Amay aw eden se awop te pedowan tadon, aw netegahan din heman aw eden se aneng-aneng te Espiritu Santo, so egpemoyoen te Espiritu Santo diyà te Timanem se tabang din kenitadon menge sakop din lekat te kandin ibeg.
ROM 8:28 Netegahan tadon den te pineokit te kedita te domateng kenitadon, doen kèpiyaan inangen te Timanem diyà te kedita tadon doen dakel pedowan kandin, so tinawal kidon din tandà te kandin ibeg.
ROM 8:29 Gebii lekat te keteboan te keneyonan, tapay netaga-taga se Timanem aw sinu se megpesakop diyà kandin. Miglalang sikandin meg-inang kenitadon iling te Batà din si Jesus, so ibeg din meinang se kedita tadon iling te telekedowa, aw meinang si Jesus iling te kakay tadon.
ROM 8:30 Se kedita tadon pinemallì te Timanem amon inangen kidon din iling te Batà din, yan heman se tinawal din. Se kedita tadon tinawal din, yan heman se inaneng-aneng din te metòlid. Se kedita tadon inaneng-aneng din te metòlid, yan se ipelowan din doma kandin.
ROM 8:31 Aw meg-aneng-aneng kidon tepad te kedita te kèpiyaan ininang te Timanem kenitadon, ketegahan tadon te wedad palos mekedaeg kenitadon so egdomaan kidon te Timanem.
ROM 8:32 Wedà din temengi se Batà din si Jesus, meneng insogò din sikandin simelilin kenitadon aw nematay amon megtabang kenitadon. Aw iling kenyan se keido din kenitadon, ibegay din heman se kedita te kelidoan tadon.
ROM 8:33 Wedad palos mekeikagi te doen pa salà tadon. Pinemallì kidon te Timanem aw sikandin se mig-aneng-aneng te metòlid kidon.
ROM 8:34 Wedad palos heman mekeikagi te keilangan ipelumun kidon. Nematay si Jesu Cristo simelilin kenitadon. Meneng neantay heman sikandin lekat te nematay, aw eglowan den sikandin doma te Timanem Amay din doton te langit, aw egpemoyò den sikandin diyà te Timanem Amay din te itabang din kenitadon.
ROM 8:35 Pengkey eden se domateng kenitadon, netegahan tadon te gayed dakel se pedowan i Cristo kenitadon. Pengkey kelimahan kidon, aw mesamok kidon, aw pemilangen kidon, pengkey wedad kànen tadon, aw wedad penenaktun tadon, pengkey elegen kidon aw imetayan kidon, netegahan tadon te dakel se pedowan i Cristo kenitadon.
ROM 8:36 Doen insolat kidoen te kagi te Timanem tepad te menge kelimahan sìyan, “Gayed kay agpet imetayan tandà te pegtaking day kamno. Yan eg-ilingen kay te menge ayam-ayam karniro agpet iyawen.”
ROM 8:37 Meneng pengkey egdetengan kidon te kedita te kelimahan sìyan, ontò kidon domaeg, so meketayod kidon pineokit te tabang i Cristo gayed doen dakel pedowan kenitadon.
ROM 8:38 Netegahan ko te wedad palos mekeelet te pegkedakel te pedowan te Timanem kenitadon. Pengkey imetayan kidon, aw pengkey menamay pa se pegkematay tadon, gayed kidon egkedekelan te Timanem te pedowan. Pengkey menge anghil, aw pengkey menge doma eglowan, wedad mekeelet te pegkedakel te Timanem te pedowan din kenitadon. Pengkey eden se domateng seini aw modi aldaw, pengkey eden se mekelelamit, wedad mekeelet te pegkedakel te Timanem te pedowan din kenitadon. Pengkey doton diatas te langit, pengkey doton didalem te dagat, pengkey eden se dini lanto te tanà, wedad palos mekeelet te pegkedakel te Timanem te pedowan din kenitadon imbegay din kenitadon pineokit te Pengolo tadon si Jesu Cristo.
ROM 9:1 Nayan, doen den ipetaga-taga ko kenyo seini. Ontò iyan benal, so migpesakop a diyà ki Cristo. Netegahan ko te kenà kebolalaw se kagi ko kenyo seini, so egbeyà-beyaan a te Espiritu Santo.
ROM 9:2 Ibeg ko ketegahan niyo te ontò nelidò se pedowan ko, aw iling te eked a kesinalay,
ROM 9:3 so pengkey kedomaan ko se menge doma Judiyo, meneng wedà dan pa salig diyà ki Cristo. Ibeg ko somelilin a peden kandan aw ipelumun a te Timanem amon ketebangan ko dan. Pegwedaden ko peden heman se pegpesakop ko diyà ki Cristo amon meinang dan menge sakop din.
ROM 9:4 Ontò den dan netebangan, so gebii pinemallì te Timanem se menge bowad-bowad i Israel, aw pigbatà din dan. Sikandan se pinekitaan din te kelangkaw din. Sikandan heman se pinekangan din te tebangan din dan. Sikandan se sineligan din te menge punù ingkeliwat i Moises. Sikandan se tinoledaan din tepad te pegsimba dan kandin. Medita heman se pakang din kandan.
ROM 9:5 Nedengeg se menge kemonaan dan pinemallì din gebii. Pegpekeotaw te Misiyas, timebaw sikandin diyà te kandan pongan. Sikandin se Timanem eglowan diyà te kedita. Iduyun sikandin te wedad temanan. Metoman iyan.
ROM 9:6 Nayan, pengkey doen menge Judiyo wedà salig diyà ki Cristo, meneng eked a ikagi te wedà ketoman te Timanem se pakang din. Kenà kedita te bowad-bowad i Israel se pinemallì te Timanem.
ROM 9:7 Iling heman kenyan, wedà pemellii te Timanem se kedita te menge bowad-bowad i Abraham, so minikagi se Timanem diyà ki Abraham, “Se menge bowad-bowad te batà no si Isaac, yan olò se eneng-enengen ko te ontò bowad-bowad nikaw.”
ROM 9:8 Pineokit te kagi te Timanem sìyan, impetaga-taga din kenitadon te eked din eneng-enengi te menge batà din se kedita te otaw, so eked eneng-enengi te Timanem te menge batà din se otaw singed aw doen pakang din tepad kandan.
ROM 9:9 Olò sebad se batà i Abraham pinemallì te Timanem, so tapay migpakang se Timanem ki Abraham tepad ki Isaac, kagi din, “Doen inangen ko metolos te modi omay, so doen batà meama tomebaw diyà te esawa no si Sara.”
ROM 9:10 Doen heman pinemallì te Timanem diyà te didowa batà te kemonaan tadon si Isaac, so tinebawan se esawa din si Rebecca te pingin.
ROM 9:11 Pengkey wedà dan pa tebaw, pengkey wedad pa ininang dan mèpiya aw medaet, minikagi se Timanem diyà te inay dan, kagi din, “Lomowan se modi tomebaw diyà te monà tomebaw.” Yan pinemallì te Timanem se modi timebaw amon ipetaga-taga din te kenà din egpemellien se otaw tandà te ininang dan mèpiya, meneng egpemellien din se otaw lekat te tod din aw ibeg din,
ROM 9:13 so doen kagi te Timanem insolat, “Si Jacob se nedekelan ko te pedowan, kenà si Esau.”
ROM 9:14 Nayan, doen besi menge otaw meg-aneng-aneng te medaet se ininang te Timanem so sebad olò se pinemallì din aw wedà din pemellii se doma. Meneng kenà medaet se pegpemallì din kenyan,
ROM 9:15 so minikagi se Timanem diyà ki Moises, kagi din, “Siak se memallì aw sinu se keidowan ko. Siak se memallì aw sinu se kedekelan ko te pedowan.”
ROM 9:16 Yan netegahan tadon den te kenà egpemellien te Timanem se otaw lekat te ibeg dan aw kepagod dan, meneng lekat te keido te Timanem se pegpemallì din.
ROM 9:17 Insolat se inikagi te Timanem diyà te selotan te Ehipto gebii wedà din keidowi, kagi din, “Impelowan ko sikona selotan amon ipetaga-taga ko te ontò a metolos pineokit te pegdaeg ko kamno amon medengeg a kidoen te kebelad te keneyonan.”
ROM 9:18 Yan netegahan tadon den te Timanem se egpemallì aw sinu se otaw keidowan din aw sinu se otaw pebeyaan din metugul.
ROM 9:19 Nayan, so Timanem se egpemallì aw sinu se sekopen din, doen besi otaw doton kenyo meg-aneng-aneng te nengà lay ipelumun te Timanem se otaw wedà din pemellii, so eked dan kebatog se megtodà te ibeg te Timanem.
ROM 9:20 Meneng eked kepakay aw somila kidon te Timanem, so olò kidon otaw ininang din. Eked kepakay aw meg-insà se koden diyà te otaw migtiyon kenyan te nengà lay ininang din iyan iling kenyan.
ROM 9:21 Aw meg-inang se otaw te koden, sikandin se memallì aw eden se bawa te koden inangen din. Pengkey sebad olò kumù se tanà, mepakay aw tengaen din iyan, amon inangen din se sebad koden mepalas aw sebad koden wedad palas.
ROM 9:22 Iling heman kenyan se ininang te Timanem, so pengkey keilangan ipelumun din se otaw neopalan din amon ipetaga-taga din te sikandin se ontò melangkaw, meneng tandà te kedalem te pedowan din, wedà din dan tagmon pelumuni.
ROM 9:23 Yan se ininang din amon ipetaga-taga din diyà te kedita tadon neidowan din te ontò sikandin mèpiya, so impetagad kidon din amon begayan kidon din te kèpiyaan doton te langit.
ROM 9:24 Sikitadon se otaw sìyan tinawal te Timanem. Kenà olò menge Judiyo se tinawal din, meneng otaw heman kenà Judiyo.
ROM 9:25 Kidoen te libro insolat i Oseas, doen kagi te Timanem insolat, kagi din, “Sekopen ko den se menge otaw wedà ko pa sekopi. Kedekelan ko den te pedowan se menge otaw wedà ko pa kedekeli te pedowan.
ROM 9:26 Pengkey doton te ogpeanan te menge otaw nebensihan so kenà dan sakop ko, tewalen dan menge batà te Timanem wedad temanan din.”
ROM 9:27 Seini heman se inikagi i Isaias tepad te menge Judiyo, “Pengkey megkedita se menge Judiyo igsà eked dan kebilang iling te enay doton te dagat, meneng olò pilabok se mekelowà lekat te pelumun.
ROM 9:28 So domateng se aldaw ayas tomanen te Timanem se kagi din te ontò din ipelumun se otaw dini lanto te tanà.”
ROM 9:29 Iling kenyan se tapay inikagi i Isaias, kagi din, “Simpana sikitadon menge Judiyo eked keidowi te Timanem Metolos, wedad palos mesamà kenitadon, so tigkan megelà se kedita tadon iling te pegkegelà te tege Sodoma aw tege Gomora.”
ROM 9:30 Nayan, netegahan tadon den ini. Pengkey wedà pegpeliman se menge otaw kenà Judiyo te eneng-enengen te Timanem te metòlid dan, meneng doen den kandan inaneng-aneng din te metòlid dan pineokit te pegsalig dan diyà ki Cristo.
ROM 9:31 Meneng pengkey ontò measeb se menge Judiyo timolò te menge punù ingkeliwat i Moises amon eneng-enengen te Timanem te metòlid dan, meneng wedà dan iyan kebatog.
ROM 9:32 Wedà dan iyan kebatog so wedà dan salig diyà ki Cristo, meneng simalig dan diyà te mèpiya inang dan. So kimulu dan ki Cristo, iling dan te otaw nekedogsò diyà te bato kidoen te dalan.
ROM 9:33 Iling kenyan se kagi te Timanem insolat, “Isawol ko se otaw doton te lonsod te menge Judiyo iningedanan Sion. Iling sikandin te bato mekebangkil kandan, aw iling te bato kedogsoan dan. Meneng eked palos pekebollog se otaw somalig diyà kandin.”
ROM 10:1 Menge kedowa ko, ontò a egkeibeg te mekelowà se menge doma ko Judiyo lekat te salà, aw yan se ipegtawal-tawal ko diyà te Timanem tepad kandan.
ROM 10:2 Netegahan ko te ontò dan measeb tomaking te ketanem pinemenalan dan tepad te Timanem. Meneng wedà dan ketaga-taga te kebenalan.
ROM 10:3 Wedà dan ketegahi te doen peokit ininang te Timanem amon eneng-enengen din te metòlid dan. Yan ininang dan beling se kandan peokit. Meneng wedà eneng-enengi te Timanem te metòlid dan, so wedà dan taking te peokit ininang din.
ROM 10:4 Si Cristo se temanan te menge punù ingkeliwat i Moises. Lekat niyan, eneng-enengen den te Timanem te metòlid se kedita te otaw somalig diyà ki Cristo.
ROM 10:5 Gebii, simolat si Moises tepad te inangen te menge otaw meibeg eneng-enengen te Timanem te metòlid dan pineokit te pegtolò dan te menge punù ingkeliwat din, kagi din, “Eneng-enengen te Timanem te metòlid se otaw ontò meketolò te menge punù ingkeliwat ko.”
ROM 10:6 Meneng doen heman kagi te Timanem insolat diyà te kedita tadon inaneng-aneng te Timanem te metòlid kidon pineokit te pegsalig tadon diyà ki Cristo. Pineokit kenyan, netegahan tadon te eked kepakay aw meg-aneng-aneng kidon te keilangan doen pa domoton te langit amon mangay ki Cristo.
ROM 10:7 Eked heman kepakay aw meg-aneng-aneng kidon te keilangan doen pa domoton didalem te tanà amon meg-antay ki Cristo lekat te nematay.
ROM 10:8 Doen heman kagi te Timanem insolat, “Kidoen kenyo se kagi te Timanem, so yan se egbelaw-belewayen niyo aw eg-eneng-enengen niyo.” Yan se kagi te Timanem ipegtoladà day te keilangan somalig kidon diyà ki Cristo.
ROM 10:9 Aw mikagi kaw te benal migpesakop kaw den diyà te Pengolo tadon si Jesus, aw memenal kaw te inantay sikandin te Timanem lekat te nematay, yan mekelowà kaw lekat te pelumun te Timanem.
ROM 10:10 Aw melobos se pedowan tadon te pegsalig tadon diyà ki Cristo, yan eneng-enengen te Timanem te metòlid kidon. Aw meg-indan kidon te menge doma otaw te benal simalig kidon den diyà ki Jesu Cristo, yan ipelowà kidon din lekat te pelumun din.
ROM 10:11 Doen kagi te Timanem insolat, “Eked palos pekebollog se otaw somalig diyà kandin.”
ROM 10:12 Ibeg te Timanem, somalig se kedita te otaw diyà ki Jesu Cristo. Wedad elet diyà te Judiyo aw otaw kenà Judiyo, so olò sebad se Pengolo te kedita tadon. Ontò din egkeidowan se kedita te otaw memoyò te tabang din,
ROM 10:13 so doen kagi te Timanem insolat, “Mekelowà lekat te salà se kedita te otaw memoyò diyà te Pengolo tadon.”
ROM 10:14 Meneng eked dan pekepemoyò te tabang din singed aw somalig dan diyà kandin. Eked dan pekesalig diyà kandin singed aw menenalan dan te kagi din. Eked dan heman penenalan te kagi din singed aw doen otaw megtoladà kandan.
ROM 10:15 Wedad heman otaw megtoladà kandan singed aw doen isogò doton kandan. Meneng doen den otaw insogò amon megtoladà kandan, so doen insolat kidoen te kagi te Timanem, “Ontò mèpiya se pegdateng te menge otaw egtoladà te Mèpiya Indan.”
ROM 10:16 Meneng te pegtoladà dan te Mèpiya Indan, pilabok se Judiyo nemenal kenyan, so gebii minikagi se telekeliwat te kagi te Timanem si Isaias, “E Pengolo ko, wedad nael otaw nemenal te intoladà day.”
ROM 10:17 Yan netegahan tadon te eked pemenal se otaw singed aw menenalan dan te kebenalan. Se kebenalan, yan se ipegtoladà day tepad ki Cristo.
ROM 10:18 Pengkey wedà pemenal se keditaan te Judiyo, meneng ikà niyo eg-aneng-aneng te wedà dan indani te kebenalan. Inindanan den dan, so doen kagi te Timanem insolat, “Dinineg den iyan te kedita te otaw dini lanto te tanà. In-indan den iyan doton te kebelad te keneyonan.”
ROM 10:19 Pengkey medita se bowad-bowad i Israel wedà pemenal, meneng ikà niyo eg-aneng-aneng te wedà dan kelebeti se intoladà kandan, so doen kagi te Timanem insolat i Moises gebii, kagi din, “Tebangan ko se menge otaw kenà Judiyo amon mingà kaw kandan. Keidowan ko se menge otaw egkebensihan niyo amon meopal kaw.”
ROM 10:20 Labi pa mebangal se kagi te Timanem insolat i Isaias tepad te menge otaw kenà Judiyo, kagi din, “Kinità a te menge otaw wedà pengemahà kanak. Pengkey wedà dan peg-insà tepad kanak, meneng migpekità a den diyà kandan.”
ROM 10:21 Doen heman kagi te Timanem insolat i Isaias tepad te menge Judiyo, kagi din, “Pengkey gayed a egtawal kandan amon megpedapag dan diyà kanak, meneng kenà dan egtolò so metugul dan.”
ROM 11:1 Nayan, pengkey wedad nael Judiyo nemenal, meneng ikà niyo eg-aneng-aneng te timinàyog se Timanem te kedita te Judiyo, so siaken heman sebad Judiyo. Si Abraham se kemonaan ko, aw nesakop a heman diyà te pongan i Benjamin.
ROM 11:2 Wedà tinàyog se Timanem te menge Judiyo, sìyan pinemallì din gebii. Netegahan tadon iyan so doen insolat diyà te kagi te Timanem tepad te inikagi te telekeliwat te kagi te Timanem si Elias gebii. Pegtawal-tawal din diyà te Timanem, mig-indan sikandin tepad te medaet ininang te menge doma din Judiyo,
ROM 11:3 kagi din, “E Pengolo ko, nengimatay dan te menge doma telekeliwat te kagi nikaw. Migbaet dan heman te menge solanan te ipegpemegay day diyà kamno. Sebad ko olò se nesamà egtaking kamno, aw ibeg dan mengimatay heman kanak.”
ROM 11:4 Meneng kenà olò si Elias se egtaking te Timanem, so seini se inikagi te Timanem diyà kandin, kagi din, “Doen pa pito melalan otaw tinani ko wedà pegsimba te inotaw iningedanan Baal.”
ROM 11:5 Iling heman kenyan, doen heman songkani menge otaw egtaking te Timanem pengkey pilabok kidon, so pinemallì kidon din pineokit te keido din.
ROM 11:6 Simpana pemellien olò te Timanem se menge otaw mèpiya se inang dan, kenà iyan lekat te keido din. Meneng pinemallì kidon din kenà pineokit te ininang tadon pengkey mèpiya aw medaet, meneng pinemallì kidon din pineokit te keido din kenitadon.
ROM 11:7 Yan se doun te netegahan tadon den ini. Pengkey ibeg te keditaan te Judiyo eneng-enengen te Timanem te metòlid dan pineokit te pegtolò dan te menge punù ingkeliwat i Moises, meneng wedà dan iyan kebatog. Pilabok olò se Judiyo pinemallì te Timanem, aw yan se otaw inaneng-aneng din te metòlid dan. Meneng wedà pegpetaga-taga se Timanem te kebenalan diyà te doma Judiyo,
ROM 11:8 so doen kagi te Timanem insolat tepad te menge Judiyo wedà pemenal kandin, “Impekagsen te Timanem se olo dan amon eked dan pekelabet te kebenalan. Ininang din dan iling te otaw eked kità pengkey doen mata dan, aw eked dineg pengkey doen telinga dan, aw iling dan kenyan lamig songkani.”
ROM 11:9 Iling heman kenyan se insolat i David gebii, “Pengkey dakel se kànen dan, meneng meinang iyan litag aw belatik aw tokliben, so detengan dan te pelumun.
ROM 11:10 Meinang dan iling te otaw bota amon eked dan kità te kebenalan. Meinang dan iling te otaw bongkog tandà te kelimahan wedad temanan domateng kandan.”
ROM 11:11 Nayan, pengkey nekesalà se keditaan te Judiyo so wedà dan pemenal ki Cristo, meneng ikà niyo eg-aneng-aneng te eked den kepakay aw megselsel dan, so kenà iyan benal. Meneng so nekesalà se menge Judiyo, doen den menge otaw kenà Judiyo impelowà te Timanem lekat te salà. Impelowà din dan amon mingà se menge Judiyo kandan aw memenal dan heman.
ROM 11:12 So nekesalà se menge Judiyo, tinebangan den te Timanem se kedita te otaw te keneyonan. So wedà kinawà se menge Judiyo te ontong ibegay peden te Timanem kandan, doen den ontong imbegay din diyà te menge otaw kenà Judiyo. Pengkey mèpiya se ininang te Timanem sìyan, meneng labi pa mèpiya aw megpesakop heman se kedita te Judiyo diyà ki Cristo.
ROM 11:13 Nayan, doen isolat ko diyà te kedita niyo kenà Judiyo. Ininang a sogounun i Cristo amon megtoladà a kenyo te kagi din. Ontò a measeb te pegtoladà ko
ROM 11:14 so ibeg ko mingà se menge Judiyo kenyo nemenal, amon doen heman kandan memenal aw mekelowà lekat te salà.
ROM 11:15 Pineokit te pegtinàyog te Timanem te menge Judiyo, mepakay aw megsebad den se menge otaw kenà Judiyo aw Timanem. Pengkey mèpiya iyan, meneng labi pa mèpiya aw mesakop heman se menge Judiyo, so meinang dan iling te otaw neantay lekat te nematay.
ROM 11:16 Se menge Judiyo, iling dan te pan imbegay diyà te Timanem, so aw kandin se sebad lapid te pan, kandin heman se kedakel te pan. Iling dan heman te kayo imbegay diyà te Timanem, so aw kandin se dalid niyan, kandin heman se panga niyan.
ROM 11:17 Ipolingun ko se menge Judiyo wedà pemenal iling te menge panga te kayo iningedanan olibo intanem te Timanem, so tinepò se menge panga niyan. Meneng sikiyo menge otaw kenà Judiyo nemenal, iling kaw te menge panga te kayo timobò doton te kebenesan. Meneng inabat kaw te Timanem lekat te kayo timobò doton te kebenesan aw insogpat kaw din doton te lawa te sìyan kayo intanem din amon tomilles kaw kidoen. Yan sinakop kaw den te Timanem diyà te menge otaw eg-ipaten din iling te menge Judiyo inipat din gebii.
ROM 11:18 Pengkey iling te panga tinepò se menge Judiyo wedà pemenal, meneng ikà niyo eg-aneng-aneng te labi kaw pa mèpiya diyà kandan. Eked kepakay aw megpelangkaw-langkaw kaw, so iling kaw olò te panga. Matay se panga aw wedad dalid te kayo, so lekat te dalid se keseg te panga.
ROM 11:19 Doen besi otaw kenà Judiyo mikagi kanak iling kani, “Meneng labi kay mèpiya diyà te menge Judiyo, so iling dan te panga tinepò amon iselilin kay kandan.”
ROM 11:20 Benal se kagi din sìyan te sinelilinan se menge Judiyo, meneng tinepò dan te Timanem so wedà dan pemenal. Inselilin kaw din so nemenal kaw. Yan peg-ahà kaw. Ikà niyo egpelangkaw-langkaw.
ROM 11:21 Wedà keidowi te Timanem se menge Judiyo wedà taking kandin, pengkey iling dan te ontò panga te kayo din, meneng tinepò din dan. Yan ikà niyo eg-aneng-aneng te pengkey lomengà kaw te pegtaking niyo kandin, gayed kaw din pa keidowan.
ROM 11:22 Pineokit kenyan, netegahan tadon den te doen otaw keidowan te Timanem, aw doen heman otaw ipelumun din. Ipelumun din se otaw nekesalà, meneng keidowan kaw din aw tomayod kaw tomaking kandin. Meneng aw lomengà kaw tomaking kandin, inangen kaw din heman iling te panga tinepò.
ROM 11:23 Meneng aw megselsel se menge Judiyo aw tomaking dan kandin, todà din dan sekopen iling te panga todà isogpat doton te kayo amon tomilles, so mebatog din iyan inangen.
ROM 11:24 Sikiyo menge otaw kenà Judiyo, iling kaw te panga tinepò lekat te kayo timobò doton te kebenesan, aw insogpat kaw diyà te kayo intanem, pengkey wedad otaw mig-aneng-aneng te mebatog iyan. Meneng se menge Judiyo iling te panga te kayo intanem. Labi pa mola aw todà dan isogpat diyà te kayo tinepoan kandan.
ROM 11:25 Menge kedowa ko kenà Judiyo, doen kebenalan wedà pa petega-tegahi lamig songkani, meneng ipetaga-taga ko den iyan diyà kenyo amon eked kaw peg-aneng-aneng te sikiyo olò se otaw netaga-taga te kebenalan. Metugul se keditaan te Judiyo songkani. Eked dan taking te Timanem singed aw onà megpesakop se kedita te otaw kenà Judiyo pinemallì te Timanem.
ROM 11:26 Penga niyan, ipelowà te Timanem se kedita te Judiyo, so doen kagi te Timanem insolat, “Domateng se Egpelowà lekat te ogpeanan te menge Judiyo iningedanan Sion. Ipelowà din se kedita te menge bowad-bowad i Jacob lekat te salà dan.”
ROM 11:27 “Yan tomanen ko se pakang ko kandan, so pegwedaden ko se salà ininang dan.”
ROM 11:28 Neinang poon te Timanem se keditaan te Judiyo, so wedà dan penenalan te Mèpiya Indan tepad ki Cristo, aw pineokit kenyan, nekelowà kaw den lekat te salà pengkey kenà kaw Judiyo. Meneng dakel pa se pedowan te Timanem kenami menge Judiyo, so pinemallì kay din aw tomanen din pa se pakang din diyà te menge kemonaan day gebii.
ROM 11:29 Eked ketodà se aneng-aneng te Timanem tepad te otaw pinemallì din aw binegayan din te kèpiyaan.
ROM 11:30 Sikiyo menge otaw kenà Judiyo, wedà kaw tolò te ibeg te Timanem kedengan, meneng so wedà tolò se menge Judiyo, neidowan kaw den te Timanem.
ROM 11:31 Iling heman kenyan, pengkey kenà egtolò se keditaan te Judiyo songkani, meneng tandà te keido te Timanem kenyo, keidowan dan heman te Timanem te modi aldaw.
ROM 11:32 Impetaga-taga te Timanem te nekesalà se kedita te otaw, pengkey Judiyo aw otaw kenà Judiyo, amon ipetaga-taga din te doen keido din diyà te kedita te otaw.
ROM 11:33 Ontò mèpiya se Timanem. Wedad temanan te keido din, aw kebiyasa din, aw pegketaga-taga din. Eked kidon ontò ketaga-taga te aneng-aneng din aw tod din,
ROM 11:34 so doen kagi te Timanem insolat, “Wedad palos otaw netaga-taga aw eden se aneng-aneng te Pengolo tadon. Wedad heman palos otaw migtoladà kandin.
ROM 11:35 Wedad heman ibegay tadon kandin keilangan liwanan din.”
ROM 11:36 Sikandin se mig-inang te kedita, aw pineokit te tolos din, egbayà-bayà sikandin te kedita te ininang din. Iduyun heman sikandin pineokit te kedita niyan. Iduyun sikandin te wedad temanan. Metoman iyan.
ROM 12:1 Nayan, menge kedowa ko, ontò mèpiya se keido te Timanem kenitadon, aw yan se doun te megpunù a den kenyo te keilangan betel niyo ibegay se pegkeotawun niyo diyà te Timanem dalem te doen pa pedowan niyo. Aw ibegay niyo se pegkeotawun niyo diyà kandin, kinewaen din iyan, aw ipetaga-taga niyo te melobos se pedowan niyo te pegsimba niyo kandin.
ROM 12:2 Ikà niyo egtaking te ketanem te otaw kenà egpenimanem. Meneng pemoyoi niyo te inangen te Timanem kaling se aneng-aneng niyo amon metòlid se eg-inangen niyo. Yan ketegahan niyo aw eden se ibeg te Timanem inangen niyo, so mèpiya iyan, aw kelubahan din, aw wedad kolang niyan.
ROM 12:3 Tandà te pegsogò te Timanem kanak, doen den ipunù ko diyà te kedita niyo egpemenal. Ikà niyo egpelangkaw-langkaw. Meneng keilangan metòlid se aneng-aneng niyo tepad te mebatog niyo inangen tandà te kebiyasa imbegay te Timanem kenyo te pegsalig niyo diyà kandin.
ROM 12:4 Pengkey medita se kinemoloan diyà te lawa te otaw, meneng netibok se kedita niyan diyà te sebad lawa, aw doen kekemowan te kedita te kinemoloan diyà te lawa.
ROM 12:5 Iling heman kenyan, pengkey medita kidon egpemenal, meneng pegsebad tadon diyà ki Cristo, neinang kidon iling te lawa din amon megpetebangay kidon iling te pegpetebangay te menge kinemoloan diyà te lawa.
ROM 12:6 Yan, so medita se kemolò te kebiyasa imbegay te Timanem diyà te teg sebad-sebad kenitadon tandà te tabang din, keilangan gemiten tadon iyan amon megpetebangay kidon. Aw binegayan kaw te Timanem te kebiyasa te pegkeliwat te kagi te Timanem, keilangan komeliwat kaw te kebenalan insalig din kenyo.
ROM 12:7 Aw binegayan kaw te kebiyasa te pegtelaban, keilangan megtelaban kaw. Aw biyasa kaw egtoladà, keilangan megtoladà kaw.
ROM 12:8 Aw biyasa kaw egpekagsen te pedowan te doma otaw egpemenal, yan se keilangan inangen niyo. Aw ibeg te Timanem memegay kaw diyà te doma otaw nelimahan, keilangan bowasag kaw kandan. Aw inangen kaw te Timanem pengolo diyà te doma otaw, keilangan measeb kaw te pegpengolo niyo. Aw isogò kaw te Timanem menabang te doma otaw nelidò, keilangan meluba se pedowan niyo te pegtabang niyo kandan.
ROM 12:9 Aw keidowan niyo se doma otaw, keilangan melobos se pedowan niyo. Peg-eked kaw te medaet, meneng taking kaw ontò te mèpiya.
ROM 12:10 Tandà te pegpesakop niyo diyà ki Cristo, neinang kaw den iling te telekedowa, aw yan keilangan megpedekelay kaw te pedowan. Keilangan meagka se pedowan te kedita niyo te pegpesegmanay.
ROM 12:11 Ikà niyo egketaka te pegtolò niyo te Pengolo tadon, meneng keilangan measeb kaw, aw keilangan magsen heman se pedowan niyo.
ROM 12:12 Keilangan meluba kaw so doen egpelimanan niyo. Aw pemilangen kaw, pedeleg kaw te pegtaking niyo ki Cristo. Pedeleg kaw se pegtawal-tawal.
ROM 12:13 Pegtabang kaw te menge doma sakop te Timanem nelimahan. Pegsagman kaw heman te menge otaw mepanaw.
ROM 12:14 Pemoyò kaw diyà te Timanem te keidowan din se otaw egpemilang kenyo. Ikà niyo egpemoyò te detengan dan te medaet, meneng pegtawal-tawal kaw te keidowan din dan.
ROM 12:15 Aw doen keluba te doma otaw, keilangan meluba kaw heman doma kandan. Aw doen kepuluk te doma otaw, keilangan mepuluk kaw heman doma kandan.
ROM 12:16 Se kedita niyo migpesakop diyà ki Cristo, keilangan megsebad kaw te pedowan. Ikà niyo egpelangkaw-langkaw, meneng mèpiya aw megpeketagad kaw meg-inang te sagkep inang. Ikà niyo eg-aneng-aneng te sikiyo olò se netaga-taga te kebenalan.
ROM 12:17 Pengkey doen otaw meg-inang te medaet diyà kenyo, ikà niyo eg-inang te medaet diyà kandan. Pegpekeaseb kaw meg-inang te ontò mèpiya eked silahi te doma otaw.
ROM 12:18 Pegpekeaseb kaw te pegsebad te pedowan niyo diyà te kedita te doma otaw.
ROM 12:19 Menge kedowa ko egkedekelan ko te pedowan, ikà niyo egmalit te menge otaw eg-inang te medaet diyà kenyo, meneng pebeyai niyo sikandan, so Timanem se megpelumun kandan. Doen kagi te Timanem insolat, “Minikagi se Timanem, siaken se megpelumun kandan. Siaken se megmalit kandan.”
ROM 12:20 Meneng doen sebad punù te Timanem insolat tepad te mèpiya inangen tadon, kagi din, “Aw bellosen se otaw egpoon kenyo, pekàni niyo sikandin. Aw melao, peinemi niyo. So pineokit te pegtabang niyo kandin, ontò sikandin meyàyà.”
ROM 12:21 Aw meg-inang kaw te medaet diyà te menge otaw eg-inang te medaet diyà kenyo, dàgen kaw dan pineokit te pegtaking niyo te medaet. Meneng aw mèpiya se inangen niyo diyà te otaw eg-inang te medaet diyà kenyo, mekedaeg kaw kandan pineokit te pegtaking niyo te mèpiya.
ROM 13:1 Keilangan tomolò se kedita te otaw te menge opisyal te gobirno, so wedad otaw meinang pengolo singed aw inangen sikandin te Timanem pengolo. Ininang te Timanem pengolo se kedita dan.
ROM 13:2 Aw mato se otaw te menge opisyal te gobirno, iling te mato sikandin te punù te Timanem, so ininang dan te Timanem pengolo, aw yan se doun te ipelumun se otaw mato kandan.
ROM 13:3 Aw mèpiya se inangen tadon, eked kidon kelemitan te menge otaw egpengolo. Meneng keilangan melemitan se menge otaw eg-inang te medaet. Aw ibeg niyo eked kaw kelemitan te menge opisyal te gobirno, peg-inang kaw te mèpiya aw yan iduyun kaw dan,
ROM 13:4 so ininang dan te Timanem pengolo amon mèpiya se keogpà niyo. Meneng aw eg-inang kaw te medaet, keilangan melemitan kaw, so ontò dan megpelumun kenyo. Ininang dan te Timanem pengolo amon megpelumun dan te menge otaw eg-inang te medaet.
ROM 13:5 Yan se doun te keilangan tomolò kaw te menge opisyal te gobirno, kenà olò amon eked kaw pelumuni te Timanem, meneng keilangan tomolò kaw, so netegahan niyo te mèpiya iyan.
ROM 13:6 Yan heman se doun te keilangan mayad kidon te mihoras, so sogounun te Timanem se kedita te opisyal egtoman te menge punù te gobirno.
ROM 13:7 Yan bayad kaw te kedita te kemolò te mihoras ipebayad te gobirno. Tolò kaw te menge opisyal te gobirno, aw pemasa kaw heman kandan.
ROM 13:8 Ikà niyo egpengotang amon wedad salà niyo. Meneng ikà niyo palos egwedad te pegpedekelay niyo te pedowan, so aw dakel se pedowan te otaw diyà te doma, timoman den sikandin te kedita te punù ingkeliwat i Moises.
ROM 13:9 Doen punù insolat, “Ikà niyo eglakad. Ikà niyo egbonò. Ikà niyo egpenakaw. Ikà niyo eg-ingà.” Doen heman menge doma punù insolat, meneng netibok se kedita niyan diyà te sebad punù seini, “Kedekeli niyo te pedowan se doma otaw iling te peg-aneng-aneng niyo te kenyo pegkeotawun.”
ROM 13:10 Aw dakel se pedowan tadon diyà te doma otaw, wedad palos medaet inangen tadon diyà kandan. Yan aw dakel se pedowan tadon diyà te doma otaw, meketolò kidon te kedita te punù ingkeliwat i Moises.
ROM 13:11 Seini se keilangan inangen tadon, so netegahan tadon te agpet den domateng se aldaw te kelowaan egpelimanan tadon. Eked kepakay aw iling kidon te otaw neketedogi, meneng keilangan megpeketagad kidon, so lomikò si Cristo te eked kenamay. Kenà iling te kedengan te kaling pegpesakop tadon diyà ki Cristo, so mig-aneng-aneng kidon te menamay pa se peglikò din.
ROM 13:12 Iling te agpet den lomaklak se kengitngit aw domateng se aldaw, so agpet den se peglikò i Cristo. Doun niyan, keilangan lomengà kidon meg-inang te medaet, aw keilangan meg-inang kidon te metòlid. Yan megpeketagad kidon iling te sondalo gayed egpeketagad.
ROM 13:13 Keilangan tomalag mèpiya se eg-inangen tadon amon metaga-taga se kedita te otaw te wedad medaet mekeyàyà kenitadon. Ikà niyo eg-iling te otaw egsamok, aw eglasing, aw eglayok te kenà kandan esawa, aw metibayi wedad yàyà. Ikà niyo egdindil. Ikà niyo eg-ingà.
ROM 13:14 Meneng peg-iling kaw te eg-inangen te Pengolo tadon si Jesu Cristo. Ikà niyo eg-aneng-aneng tepad te pegtoman niyo te medaet ibeg te lawa niyo.
ROM 14:1 Nayan, peekopi niyo se otaw migpesakop diyà ki Cristo pengkey wedà pa ontò ketaga-taga te kebenalan. Pengkey sebad se aneng-aneng din tepad te pegpenimanem, ikà niyo egdindil kandin.
ROM 14:2 Eg-aneng-aneng se otaw netaga-taga te kebenalan te mepakay din kànen se kedita te kinemoloan te kànen. Meneng eg-aneng-aneng se otaw wedà pa ketaga-taga te kebenalan te eked din kepakay kànen se pengelapen.
ROM 14:3 Aw egpengaen kaw te pengelapen, ikà niyo eglindò te otaw kenà egpengaen kenyan. Aw kenà kaw egpengaen te pengelapen, ikà niyo egsila te otaw egpengaen kenyan, so tomalag sakop te Timanem se kedita niyo.
ROM 14:4 Eked kepakay aw silahen tadon se ketanem egtekingan te menge doma otaw singed aw kenitadon sineligan, so olò amo dan se mepakay mikagi te mèpiya aw medaet se ketanem egtekingan te sineligan din. Meneng mèpiya se eg-inangen tadon menge sakop din, so egpeketabang se Pengolo tadon kenitadon.
ROM 14:5 Iling heman kenyan, doen otaw meibeg megsimba te sebad aldaw te kelikit te simana. Meneng doen heman doma otaw mepakay diyà kandin se pegsimba te pengkey eden eldawi. Keilangan meg-aneng-aneng se teg sebad-sebad kenitadon aw eden se ibeg te Timanem inangen tadon.
ROM 14:6 Aw meibeg se otaw megsimba te sebad aldaw, Timanem se ipegduyun din pineokit te pegtaking din te ketanem sìyan. Iling heman kenyan, aw egpengaen se otaw te pengelapen, Timanem se egbesahan din pineokit te pegpengaen din te pengelapen, so Timanem se egpesiontongan din kenyan. Meneng aw kenà egpengaen se otaw te pengelapen, Timanem se egbesahan din pineokit te kenà din pegpengaen te pengelapen, aw egpesiontong sikandin diyà te Timanem te egpengànen din.
ROM 14:7 Pengkey matay kidon, pengkey dalem pa te wedà kidon kematay, eked kidon pegtebok te inangen tadon.
ROM 14:8 Dalem te wedà kidon pa kematay, Pengolo tadon si Cristo se egseligan tadon. Pengkey matay kidon, sikandin heman se seligan tadon. Yan, pengkey dalem te wedà kidon pa kematay, pengkey matay kidon, sakop kidon pa te Pengolo tadon.
ROM 14:9 Yan se doun te nematay si Cristo aw neantay heman sikandin lekat te nematay, amon lomowan sikandin diyà te kedita tadon te wedà kidon kematay, aw te pegkematay tadon heman.
ROM 14:10 Yan se doun te eked kepakay aw silahen tadon se ketanem egtekingan te doma otaw migpesakop diyà kandin. Eked heman kepakay aw meglindò kidon kandan, so sominalo kwani se kedita tadon te Timanem amon okomen kidon din.
ROM 14:11 Netegahan tadon te benal iyan, so mebasa tadon se kagi te Pengolo tadon kidoen te kagi te Timanem insolat, “Metoman se kagi ko kenyo seini. Doen aldaw domateng te lomongken se kedita te otaw diyà kanak. Domuyun se kedita te otaw te Timanem.”
ROM 14:12 Yan keilangan sominalo se teg sebad-sebad kenitadon te Timanem amon meg-indan kidon te benal tepad te kedita te ininang tadon dini lanto te tanà.
ROM 14:13 Yan ikà niyo egsila te ketanem egtekingan te menge doma sakop i Cristo. Meneng keilangan eneng-enengen niyo tepad te ketanem egtekingan niyo amon eked kedàti se menge doma sakop i Cristo tandà te eg-inangen niyo, aw amon wedad heman otaw meboyo meg-inang te salà.
ROM 14:14 Tandà te pegsebad ko ki Jesus, ontò a den netaga-taga te wedad palos kànen ininang te Timanem eked kepakay kànen. Meneng aw meg-aneng-aneng se otaw te doen kànen ininang te Timanem eked kepakay kànen, eked kepakay aw kànen din iyan.
ROM 14:15 Aw kedàtan se doma otaw tomaking ki Cristo tandà te egpengànen niyo, medaet se pegpengaen niyo kenyan, so iling te wedà niyo sikandin kedekeli te pedowan. Ikà niyo egbaet te pegsalig te doma otaw diyà ki Cristo pineokit te pegpengaen niyo, so simelilin si Cristo heman kandin te pegkematay din doton te kros.
ROM 14:16 Pengkey netegahan niyo te doen mèpiya mepakay inangen, meneng aw doen otaw somila kenyo tandà te peg-inang niyo kenyan, ikà niyo eg-inang kenyan.
ROM 14:17 Diyà kenitadon migpesakop diyà te peglowan te Timanem, mepakay pengkey eden se kànen aw inemen tadon. Meneng keilangan metòlid se inangen tadon, aw melinaw se pedowan tadon diyà te doma otaw, aw yan begayan kidon te Espiritu Santo te keluba te pedowan tadon.
ROM 14:18 Aw yan se inangen te kedita tadon egtolò ki Cristo, meluba se Timanem kenitadon, aw mikagi heman se doma otaw te mèpiya se eg-inangen tadon.
ROM 14:19 Nayan, pengkey eden se inangen tadon, keilangan eneng-enengen tadon amon eked kebàti se kelinaw te pedowan tadon, amon megpetebangay kidon te pegtaking tadon ki Cristo.
ROM 14:20 Ikà niyo egbaet te eg-inangen te Timanem pineokit te pegpengaen niyo. Mepakay aw kànen tadon se kedita te kinemoloan te kànen, meneng eked kepakay aw kebàtan tadon se pegsalig te doma otaw diyà ki Cristo pineokit te pegpengaen tadon.
ROM 14:21 Labi pa mèpiya aw eked kidon kaen te pengelapen, aw eked kidon inem te bino, aw eked kidon peg-inang te pengkey eden amon eked pekesalà se doma otaw pineokit te pegtaking tadon te ketanem sìyan.
ROM 14:22 Pengkey eden se aneng-aneng niyo tepad te ketanem egtekingan niyo, ikà niyo egpetaga-taga kenyan diyà te doma otaw, so botong aw Timanem olò se metaga-taga kenyan. Meluba se otaw netaga-taga den te metòlid se ketanem pinemallì din egtekingan.
ROM 14:23 Meneng aw egdowa-dowa se aneng-aneng te otaw tepad te pegpengaen din te pengelapen, mekesalà sikandin aw komaen kenyan, so kenà melobos se pedowan din. Pengkey eden se inangen tadon, aw eked kelobos se pedowan tadon, mekesalà kidon.
ROM 15:1 Nayan, sikitadon menge otaw netaga-taga te kebenalan, keilangan medalem se pedowan tadon diyà te menge doma tadon wedà pa ontò ketaga-taga te kebenalan. Eked kepakay aw olò kenitadon ibeg se inangen tadon.
ROM 15:2 Keilangan meg-aneng-aneng se teg sebad-sebad kenitadon aw eden se meketabang te doma otaw, amon melobos se pegsalig dan diyà ki Cristo.
ROM 15:3 Pengkey si Cristo, wedà sikandin peg-aneng-aneng tepad te kandin ibeg, so doen kagi te Timanem insolat tepad kandin, “E Timanem, siak se nekegamak te kedita te tompuyus te doma otaw kamno.”
ROM 15:4 Netegahan tadon te insolat se kedita te kagi te Timanem gebii amon peg-ilingan tadon, so pineokit te kagi te Timanem, meketayod kidon te kelimahan, aw megkagsen se pedowan tadon dalem te pegpeliman tadon te aldaw domateng.
ROM 15:5 Timanem se eglekatan te pegtayod tadon te kelimahan aw pegkagsen te pedowan tadon. Ibeg ko tebangan kaw din amon meinang sebad se pedowan te kedita niyo, iling te ibeg i Jesu Cristo.
ROM 15:6 Yan megsebad kaw heman domuyun te Timanem Amay te Pengolo tadon si Jesu Cristo.
ROM 15:7 Yan, pegpeidoway kaw iling te pegkeido i Cristo te kedita niyo amon iduyun se Timanem.
ROM 15:8 Ipeaneng-aneng ko den kenyo te insogò te Timanem si Cristo diyà kenami menge Judiyo amon ipetaga-taga din te ontò keseligan se kagi te Timanem, so tinoman i Cristo se impakang te Timanem diyà te menge kemonaan day gebii.
ROM 15:9 Impetaga-taga heman i Cristo te menge otaw kenà Judiyo te neidowan dan te Timanem amon domuyun dan heman kandin, so doen kagi te Timanem insolat, kagi din, “E Timanem, pengkey doton te menge otaw kenà Judiyo, megpesiontong a diyà kamno doma dan. Iduyun day sikona pineokit te pegdelangan day.”
ROM 15:10 Doen heman doma kagi te Timanem insolat, “Sikiyo menge otaw kenà Judiyo, doen den keluba niyo doma te menge Judiyo tapay pinemallì te Timanem.”
ROM 15:11 Doen heman doma kagi te Timanem insolat, “Kedita niyo menge otaw kenà Judiyo, duyun kaw te Pengolo tadon. Keilangan domuyun se kedita te otaw kandin.”
ROM 15:12 Doen heman insolat i Isaias gebii, “Lekat te menge bowad-bowad i Isai, doen sebad otaw domateng amon lomowan diyà te menge otaw kenà Judiyo, aw sikandin se seligan dan.”
ROM 15:13 Timanem se eglekatan te kedita te egpelimanan tadon. Ibeg ko, begayan kaw din te ontò keluba aw kelinaw te pedowan niyo tandà te pegsalig niyo ki Cristo, amon melobos se pegpeliman niyo pineokit te tabang te Espiritu Santo kenyo.
ROM 15:14 Menge kedowa ko, netegahan ko den te gayed mèpiya se eg-inangen niyo, aw tinoledaan kaw te kebenalan tepad te Timanem, aw mekebatog kaw heman megpetoledaay.
ROM 15:15 Meneng wedà a pegketalaw te pegsolat ko kenyo amon eked niyo kelibeli se kagi ko. Tandà te tabang te Timanem kanak,
ROM 15:16 ininang a din sogounun i Jesu Cristo, aw insogò a din doton te menge otaw kenà Judiyo, so pineokit kanak dimateng den kandan se Mèpiya Indan lekat te Timanem. Yan kininawà den dan te Timanem, so ininang dan egpenimanem pineokit te Espiritu Santo.
ROM 15:17 Tandà te tabang i Jesu Cristo kanak, wedad ingkeyàyà ko tepad te pegtolò ko te Timanem.
ROM 15:18 Olò a meg-indan kenyo tepad te ininang i Cristo pineokit kanak. Doen den menge otaw kenà Judiyo egtolò te Timanem pineokit te pegtoladà ko aw peg-inang ko,
ROM 15:19 aw pineokit te menge kepelahan egkeinang, aw pineokit te tolos te Espiritu Santo. Yan migtoladà a te Mèpiya Indan tepad ki Cristo doton te kedita te ogpeanan lekat te Jerusalem taman te Ilirico.
ROM 15:20 Doen gayed ibeg ko megtoladà te Mèpiya Indan doton te menge ogpeanan te otaw wedà pa ketaga-taga tepad ki Cristo, so eked a keibeg todà megtoladà te otaw tapay tinoledaan te doma otaw tepad ki Cristo.
ROM 15:21 Ibeg ko, metoman se kagi te Timanem insolat, “Komità se menge otaw wedà pa indani tepad kandin, aw metaga-taga se menge otaw wedà pa dineg tepad kandin.”
ROM 15:22 So gayed a migtoladà doton te menge ogpeanan sìyan, yan se doun te wedà ko pa tomani se ibeg ko te lomaoy a kenyo doton te Roma.
ROM 15:23 Meneng songkani, nepenga den se ininang ko dini te menge ogpeanan seini. So nenamay den te doen ibeg ko lomaoy kenyo,
ROM 15:24 ibeg ko, mapit a doton kenyo te pegpesalo ko doton te Espanya. Ontò a meluba aw mekeogpà a doton kenyo te eked kenamay, aw penga niyan, meketabang kaw kanak te pegdeleg ko doton te Espanya.
ROM 15:25 Meneng te eked a pa doton kenyo, onà a domoton te Jerusalem amon ibingen ko se kwarta itabang te menge sakop te Timanem doton,
ROM 15:26 so ibeg te menge otaw dini te probinsya te Masidonya aw Gresya, megtabang dan te menge sakop te Timanem nelimahan doton te Jerusalem.
ROM 15:27 Yan se ibeg dan megtabang te menge Judiyo. Doen heman ontong dan kandan, so pineokit te menge Judiyo, dimateng den se kagi te Timanem doton te menge otaw kenà Judiyo. Yan mèpiya aw megtabang se menge otaw kenà Judiyo te menge Judiyo nelimahan.
ROM 15:28 Penga te pegtoman ko te peg-ated ko te kwarta itabang kandan, mokit a doton kenyo te pegpesalo ko doton te Espanya.
ROM 15:29 Aw domateng a doton kenyo, netegahan ko te ontò mèpiya se ibegay i Cristo kenitadon.
ROM 15:30 Menge kedowa ko, doen pemoyoen ko diyà kenyo tandà te pegsebad tadon diyà te Pengolo tadon si Jesu Cristo, aw tandà te pegpedekelay tadon te pedowan imbegay te Espiritu Santo kenitadon. Ibeg ko, megtawal-tawal kaw heman diyà te Timanem tepad kanak.
ROM 15:31 Pemoyò kaw diyà kandin te eked a peelegi te menge otaw kenà egpesakop diyà ki Cristo doton te Judiya. Pegtawal-tawal kaw heman te megpesiontong se menge sakop te Timanem doton te Jerusalem tandà te peg-ated ko te kwarta itabang kandan.
ROM 15:32 Penga niyan, aw meibeg se Timanem, ontò a meluba aw domoton a kenyo, aw megkagsen se pedowan ko aw komità a kenyo.
ROM 15:33 Ibeg ko, tebangan se kedita niyo te Timanem egpemegay te kelinaw te pedowan.
ROM 16:1 Nayan, iindan ko den kenyo tepad ki Febe. Sikandin se doma tadon egsalig diyà ki Cristo, aw sebad opisyal te simbahan doton te Sengkriya.
ROM 16:2 Aw domateng sikandin doton kenyo, pegsagman kaw kandin tandà te pegsalig din diyà te Pengolo tadon, so yan se keilangan inangen tadon menge sakop te Timanem. Aw doen kelidoan din, pegtabang kaw kandin, so medita se doma otaw tinebangan din, pengkey siaken, tinebangan a din heman.
ROM 16:3 Indani niyo si Priscila aw esawa din si Akilas te eg-aneng-aneng a kandan, so sikandan se egtelaban kanak te pegtoladà ko tepad ki Jesu Cristo.
ROM 16:4 Neketagad dan imetayan amon ketebangan a dan. Egpesiontong a kandan, aw egpesiontong heman kandan se kedita te otaw kenà Judiyo egsimba dini.
ROM 16:5 Indani niyo heman se kedita te otaw egsimba doton te kandan balay te eg-aneng-aneng a kandan. Indani niyo heman se sigalak ko si Epeneto te eg-aneng-aneng a kandin. Sikandin se tagnà otaw simalig diyà ki Cristo doton te probinsya te Asya.
ROM 16:6 Indani niyo si Maria te eg-aneng-aneng a kandin, so measeb sikandin egtabang kenyo.
ROM 16:7 Indani niyo heman si Andronico aw si Junias te eg-aneng-aneng a kandan. Sikandan se doma ko Judiyo kineleboso doma kanak. Ontò dan nedengeg sogounun i Cristo, aw migpesakop dan diyà ki Cristo te wedà a pa pegpesakop.
ROM 16:8 Indani niyo se sigalak ko diyà te Pengolo tadon si Ampliato te eg-aneng-aneng a kandin.
ROM 16:9 Iling heman kenyan se iindan niyo diyà ki Urbano, so egtelaban sikandin kenami te pegtoladà day tepad ki Cristo, aw si Estakis nedekelan ko heman te pedowan.
ROM 16:10 Indani niyo si Apeles te eg-aneng-aneng a kandin. Egkeseligan sikandin te pegtaking din ki Cristo. Indani niyo heman se pamilya i Aristobulo te eg-aneng-aneng a kandan.
ROM 16:11 Indani niyo se doma ko Judiyo si Herodion te eg-aneng-aneng a kandin. Eg-aneng-aneng a heman te menge otaw diyà te pamilya i Narciso timaking te Pengolo tadon.
ROM 16:12 Eg-aneng-aneng a ki Trifena aw si Trifosa. Measeb dan egtolò te Pengolo tadon. Eg-aneng-aneng a heman ki Persida. Dakel se nebatog din te pegtolò din te Pengolo tadon.
ROM 16:13 Eg-aneng-aneng a heman ki Rufo. Nedengeg sikandin egtaking te Pengolo tadon, aw inay din egkeido kanak iling te ontò inay ko.
ROM 16:14 Eg-aneng-aneng a heman ki Asincrito, si Flegonte, si Hermes, si Patrobas, si Hermas, aw menge doma dan egpemenal.
ROM 16:15 Eg-aneng-aneng a heman ki Filologo, si Julia, si Nereo aw etebay din, aw si Olimpas aw kedita te doma dan menge sakop te Timanem.
ROM 16:16 Pegpeliyagay kaw se kedita niyo egpemenal ki Cristo, so yan se pengilala te egpedekelay kidon te pedowan. Ibeg te kedita te otaw egsimba dini, megpetaga-taga dan kenyo te eg-aneng-aneng dan kenyo.
ROM 16:17 Menge kedowa ko, peg-ahà kaw te menge otaw egbaet te pegsebad te pedowan niyo aw egbaet te pegsalig niyo diyà ki Cristo, so kenà iling kenyan se kebenalan intoladà day kenyo. Ikà niyo egtaking kandan.
ROM 16:18 Kenà dan egtolò te Pengolo tadon si Cristo, meneng egtaking dan te ibeg te kandan pedowan. Pineokit te mèpiya kagi dan, eg-akal dan te menge otaw wedà ketaga-taga te kebenalan.
ROM 16:19 Nedengeg kaw den so egtolò kaw te kebenalan pig-ilingan niyo, aw ontò a neluba kenyan. Ibeg ko ontò kaw megkebiyasa meg-inang te mèpiya, aw wedad toig niyo meg-inang te medaet.
ROM 16:20 Timanem se egpemegay te kelinaw te pedowan, aw sikandin se mekedaeg ki Satanas te eked kenamay amon wedad mebatog din inangen diyà kenyo. Ibeg ko, tebangan kaw te Pengolo tadon si Jesu Cristo.
ROM 16:21 Si Timoteo doma ko egtoladà, ibeg din metaga-taga kaw te eg-aneng-aneng sikandin kenyo. Iling heman kenyan se ibeg te menge doma ko Judiyo, si Lucio, aw si Jason, aw si Sosipatro.
ROM 16:22 Siaken heman, si Tercio, impesolat i Pablo te solat seini, eg-aneng-aneng a heman kenyo tandà te pegpesakop tadon diyà te Pengolo tadon.
ROM 16:23 Eg-aneng-aneng heman si Gayo kenyo. Impeogpà a din doton te balay din, aw egsimba heman dini te balay din se kedita te otaw te lonsod seini. Se tesorero te lonsod seini si Erasto, aw kedowa tadon heman si Cuarto, eg-aneng-aneng dan heman kenyo. [
ROM 16:24 Ibeg ko tebangan se kedita niyo te Pengolo tadon si Jesu Cristo. Metoman iyan.]
ROM 16:25 Na, iduyun tadon se Timanem. Sikandin olò se mekelobos te pegsalig niyo diyà kandin pineokit te Mèpiya Indan ipegtoladà ko tepad ki Jesu Cristo, aw pineokit te kebenalan nenamay wedà petega-tegahi te Timanem gebii.
ROM 16:26 Meneng yan se kebenalan impetaga-taga den pineokit te insolat te menge telekeliwat te kagi te Timanem gebii. Simogò se Timanem wedad temanan te ipetaga-taga iyan diyà te kedita te otaw amon somalig dan diyà ki Cristo aw tomolò dan heman kandin.
ROM 16:27 Timanem olò se netaga-taga te kedita. Iduyun sikandin te wedad temanan pineokit ki Jesu Cristo. Metoman iyan.
1CO 1:1 Seini se solat ko, si Pablo, doma ki Sostenes, sìyan kedowa tadon te pegpemenal. Lekat te ibeg te Timanem, tinawal a din amon inangen a sebad sogounun i Jesu Cristo.
1CO 1:2 Seini se solat ko diyà te kedita niyo menge sakop te Timanem kidoen te Korinto. Egpenimanem kaw so migsebad se pedowan niyo diyà ki Jesu Cristo, aw tinawal kaw te Timanem amon inangen kaw din sakop din sipat kedita te doma otaw egpemenal te Pengolo tadon si Jesu Cristo, pengkey doton te menge doma ogpeanan, so sikandin se Pengolo dan heman.
1CO 1:3 Ibeg ko, tebangan kaw te Amay tadon Timanem aw Pengolo tadon si Jesu Cristo. Ibeg ko heman, begayan kaw te Timanem te kelinaw te pedowan niyo.
1CO 1:4 Aw megtawal-tawal a diyà te Timanem, gayed a egpesiontong tepad kenyo, so ontò kaw din tinebangan pineokit ki Jesu Cristo.
1CO 1:5 Lekat te pegsebad te pedowan niyo kandin lamig songkani, ontò medita se tabang din kenyo, aw yan netegahan niyo se kebenalan, aw biyasa kaw egtoladà kenyan.
1CO 1:6 In-awop niyo diyà te pedowan se intoladà day tepad ki Cristo,
1CO 1:7 aw yan wedad kolang diyà kenyo te kedita te kemolò te kebiyasa imbegay te Timanem diyà te otaw egpemenal, dalem te pegpeliman niyo te peglikò te Pengolo tadon si Jesu Cristo.
1CO 1:8 Sikandin se megpekagsen te pegpemenal niyo amon wedad salà kitaen din diyà kenyo aw lomikò se Pengolo tadon si Jesu Cristo.
1CO 1:9 Egkeseligan se Timanem aw tinawal kaw din amon megsebad se pedowan niyo diyà te Batà din si Jesu Cristo Pengolo tadon.
1CO 1:10 Menge kedowa ko te pegpemenal, seini se ipunù ko kenyo so insogò a te Pengolo tadon si Jesu Cristo. Pegsebad kaw den amon wedad megpedindilay kidoen kenyo. Pegsebad kaw te aneng-aneng aw pedowan.
1CO 1:11 Menge kedowa ko, yan se punù ko kenyo, so doen menge otaw i Klowi mig-indan kanak te egpedindilay kaw.
1CO 1:12 Ibeg ko ipekelabet kenyo. Doen ekon eg-ikagi te siak se egtekingan dan. Doen ekon heman menge doma eg-ikagi te si Apolos se egtekingan dan. Doen ekon doma egtaking ki Pedro, aw doen pa ekon eg-ikagi te si Cristo olò se egtekingan dan.
1CO 1:13 Aw mikagi kaw kenyan, iling te tinengà-tengà niyo si Cristo. Eked kepakay aw mikagi kaw te siak se egtekingan niyo, so kenà ko se inimetayan doton te kros amon megpelowà kenyo. Binonyagan kaw, meneng kenà te siak se pinemenalan niyo.
1CO 1:14 Binonyagan ko olò si Crispo aw si Gayo. Egpesiontong a den so wedad doma kenyo binonyagan ko,
1CO 1:15 amon wedad otaw mekeikagi te siak se egtekingan dan tandà te pegbonyag ko kandan.
1CO 1:16 (Nekeaneng-aneng a den te binonyagan ko heman si Estepanos aw pamilya din. Wedad den doma neeneng-enengan ko.)
1CO 1:17 Insogò a i Cristo kenà amon memonyag a, meneng insogò a din amon megtoladà a te Mèpiya Indan tepad kandin. Migtoladà a kenà pineokit te kebiyasa ko, so aw iling kenyan, kebelebagan se pegpemenal te kebenalan tepad te pegkematay i Cristo doton te kros.
1CO 1:18 Pengkey eg-aneng-aneng se otaw kenà egpemenal te wedad ontong te kebenalan ipegtoladà ko tepad te pegkematay i Cristo doton te kros, meneng sikitadon egpemenal se netaga-taga te egpelowà den se Timanem te otaw lekat te salà pineokit te pegkematay i Cristo.
1CO 1:19 So doen kagi te Timanem tapay insolat, “Pegbàtan ko se kebiyasa te otaw eg-ikagi te biyasa dan, aw ipetaga-taga ko te wedad ontong te pig-ilingan te otaw doen dakel netegahan.”
1CO 1:20 Wedad den detengan te kebiyasa te otaw eg-ikagi te biyasa dan, aw otaw egtoladà te punù ingkeliwat i Moises, aw otaw teleglawong, so impetaga-taga den te Timanem te kolang pa se kebiyasa te otaw dini te keneyonan.
1CO 1:21 Wedad otaw metaga-taga te Timanem pineokit te kebiyasa dan. Meneng lekat te kebiyasa te Timanem, miglalang sikandin te ipelowà din se otaw memenal te kebenalan ipegtoladà kandan, pengkey doen otaw eg-aneng-aneng te wedad ontong kenyan.
1CO 1:22 Eked pemenal se menge Judiyo singed aw komità dan te kepelahan, aw ibeg te menge Griego, pemenalen dan olò se ontò medalem toladà.
1CO 1:23 Meneng se ipegtoladà day, yan se kebenalan tepad ki Cristo inlansang diyà te kros, pengkey egkebensi se menge Judiyo kenyan, aw eg-aneng-aneng se menge Griego te wedad ontong niyan.
1CO 1:24 Meneng se otaw tinawal te Timanem, pengkey Judiyo aw kenà Judiyo, yan se egpemenal ki Cristo migpekità kenitadon te tolos aw kebiyasa te Timanem.
1CO 1:25 Pengkey lindoan te otaw se kebiyasa te Timanem, meneng yan se ontò pa melangkaw diyà te kebiyasa te otaw. Pengkey mikagi dan te melomay se Timanem, meneng ontò pa sikandin magsen diyà te kagsen te otaw.
1CO 1:26 Menge kedowa ko te pegpemenal, eneng-enengi niyo tepad te pegpemallì te Timanem kenyo. Pilabok se otaw biyasa dini te keneyonan pinemallì din. Pilabok heman se otaw nedengeg pinemallì din, aw pilabok heman se otaw melangkaw.
1CO 1:27 Meneng pinemallì te Timanem se menge otaw wedad kebiyasa dini te keneyonan amon meyàyà se otaw eg-aneng-aneng te dakel se kebiyasa dan. Pinemallì din heman se menge otaw wedad dengeg amon meyàyà se otaw nedengeg.
1CO 1:28 Pinemallì din heman se menge otaw wedad kelangkaw aw eglindoan te doma aw wedad ontong, amon ipekità din te wedad ontong te aneng-aneng tadon doen ontong.
1CO 1:29 Yan se doun te wedad palos otaw mekebatog domuyun te kandin pegkeotawun diyà te Timanem.
1CO 1:30 Lekat te ibeg te Timanem, migsebad se pedowan niyo ki Cristo, aw impetaga-taga din se kebiyasa te Timanem diyà kenitadon. Yan netegahan tadon te in-aneng-aneng te Timanem te metòlid kidon, iling kidon te wedad salà aw eked kidon den pelumuni.
1CO 1:31 Yan mèpiya aw tomolò kidon te kagi te Timanem insolat, “Eked kepakay aw domuyun se otaw te kandin pegkeotawun, meneng mèpiya aw iduyun din se Pengolo egpemegay te mèpiya.”
1CO 2:1 Menge kedowa ko, pegdoton ko kenyo kedengan, migtoladà a kenyo te kagi te Timanem, meneng wedà ko iyan peokiti te medalem kagi aw kebiyasa te otaw,
1CO 2:2 so ibeg ko, sebad olò se itoladà ko kenyo, yan si Jesu Cristo aw pegkematay din kidoen te kros.
1CO 2:3 Peg-ogpà ko doton kenyo, iling te melomay se lawa ko aw tinegangtang a, so nelemitan a aw eked ko ketoman se ibeg te Timanem inangen ko doton.
1CO 2:4 Pegtoladà ko kenyo te kagi te Timanem, nemenal kaw kanak kenà tandà te kebiyasa te kagi ko, meneng nemenal kaw so kinità niyo se tabang te Espiritu Santo kanak.
1CO 2:5 Yan nemenal kaw ki Jesu Cristo, kenà lekat te kebiyasa te otaw, meneng lekat te eneg te Timanem.
1CO 2:6 Aw ontò egtaking te Timanem se otaw egpenenalan kanak, yan se egtoledaan ko te kebiyasa medalem. Kenà iyan iling te kebiyasa te otaw dini te keneyonan. Kenà heman iling te kebiyasa te otaw eglowan, so pesalo dan megkewedad.
1CO 2:7 Meneng se medalem kebiyasa ipegtoladà ko, yan se kebiyasa lekat te Timanem wedà din petega-tegahi diyà te otaw kedengan. Meneng te wedà pa peg-inang se Timanem te keneyonan, tapay din den piglalang te doen kelowaan lekat te salà amon domoma kidon kwani kandin.
1CO 2:8 Se menge otaw eglowan dini te keneyonan, wedà dan ketegahi se peglalang te Timanem, so simpana netegahan dan iyan, eked dan peden lensangi se Pengolo melangkaw doton te kros.
1CO 2:9 So doen kagi te Timanem insolat, “Doen integilan te Timanem ibegay din diyà te kedita te otaw dakel se pedowan dan kandin, aw labi pa iyan mèpiya diyà te pengkey eden se dinineg tadon, aw kinità tadon, aw neeneng-enengan tadon.”
1CO 2:10 Kedengan, wedà petega-tegahi te Timanem se integilan din kenitadon, meneng impetaga-taga din den iyan kenitadon pineokit te Espiritu Santo, so netegahan te Espiritu Santo se kedita te aneng-aneng te Timanem pengkey medalem.
1CO 2:11 Eneng-enengi niyo ini. Wedad palos otaw meketaga-taga te aneng-aneng te doma otaw, so yan olò se ketegahan din se kandin aneng-aneng. Iling heman kenyan, wedad palos otaw meketaga-taga te aneng-aneng te Timanem, so olò Espiritu Santo se egketaga-taga kenyan.
1CO 2:12 Sikitadon egpemenal se binegayan te kebiyasa kenà iling te kebiyasa te otaw dini te keneyonan, meneng Espiritu Santo se imbegay din kenitadon, amon ketegahan tadon se kedita te imbegay din kenitadon.
1CO 2:13 Yan kenà lekat te kebiyasa te otaw se ipegtoladà day, meneng lekat te Espiritu Santo se kagi day, aw yan egtoladà kay te kebenalan tepad te Espiritu Santo diyà te menge otaw egbeyà-beyaan te Espiritu Santo.
1CO 2:14 Meneng se otaw kenà egbeyà-beyaan te Espiritu Santo, yan se otaw eked pekekinawà te ibegay te Espiritu Santo, so aneng-aneng din wedad ontong niyan. Eked din iyan kelebeti, so kelebetan iyan olò aw tebangan kidon te Espiritu Santo.
1CO 2:15 Meneng se otaw egbeyà-beyaan te Espiritu Santo, yan se mekelabet te kedita, meneng eked sikandin kelebeti te doma otaw kenà egbeyà-beyaan te Espiritu Santo.
1CO 2:16 Benal iyan so “Wedad palos otaw meketaga-taga te aneng-aneng te Timanem. Wedad heman otaw meketoladà kandin.” Meneng sikitadon egpemenal se pinetega-tegahan i Cristo te aneng-aneng din.
1CO 3:1 Menge kedowa ko, doen wedà ko pa toledai kenyo, so kenà kaw iling te otaw ontò egbeyà-beyaan te Espiritu Santo. Iling kaw beling te otaw egtaking te ibeg te kandan pedowan aw otaw kaling timaking ki Cristo.
1CO 3:2 Se intoladà ko kenyo, yan se iling te gatas ipeinem te deitek batà. Kenà iyan iling te pengelapen, so eked niyo pa iyan kekinawà. Pengkey lamig songkani, eked kaw pa pekebatog kominawà kenyan,
1CO 3:3 so egtaking kaw pa te medaet ibeg te kenyo pedowan. So doen pa kidoen kenyo egpeingaay aw doen heman egpedindilay, yan se pengilala te egtaking kaw pa te medaet ibeg te kenyo pedowan, iling te doma otaw kenà egtaking te Timanem.
1CO 3:4 Doen ekon menge otaw kidoen kenyo eg-ikagi te egtaking dan ki Apolos, aw doen heman ekon egtaking kanak. Aw egpedindilay kaw, iling kaw den te menge doma otaw kenà egtaking te Timanem.
1CO 3:5 Eked kepakay aw sikami si Apolos se tekingan niyo, so sogounun kay olò i Jesu Cristo aw migtoladà kay kenyo amon memenal kaw kandin. Tinoman day olò se sogò te Pengolo day.
1CO 3:6 Ipegpolingun ko iling te pawà. Siak se minanggas, aw si Apolos se migtonggò, meneng Timanem se migpetilles te intanem.
1CO 3:7 Kenà melangkaw se otaw manggas. Kenà heman melangkaw se otaw megtonggò. Meneng Timanem se melangkaw, so sikandin se megpetilles te intanem.
1CO 3:8 Wedad melangkaw diyà te otaw manggas aw otaw megtonggò, so doen ontong ibegay te Timanem diyà te teg sebad-sebad kandan tepad te eg-inangen dan.
1CO 3:9 Didowa kay si Apolos se insogò te Timanem meg-inang, aw iling kaw te pawà pinetrebehowan te Timanem kenami. Doma ipolingun ko, iling kaw te balay impeinang te Timanem.
1CO 3:10 Tandà te tabang te Timanem kanak, iling a te otaw biyasa meg-inang te balay. Insawol ko den se petindegan te balay, aw doma otaw se megpedeleg te peg-ipenga te balay sìyan. Meneng pengkey sinu se meg-inang te balay, keilangan meketotok se peg-inang din kenyan.
1CO 3:11 Se pinetindegan te balay insawol ko, yan olò si Jesu Cristo. Wedad doma petindegan mepakay isawol kidoen te balay ipeinang te Timanem.
1CO 3:12 Kidoen te pinetindegan sìyan, mebatog inangen se balay bolawan, aw selapì, aw bato meelagà, aw tabla, aw sagbet, aw legami.
1CO 3:13 Meneng aw lomikò si Jesu Cristo, ipekità din te menge otaw aw doen ontong te ininang dan, so ipeokit i Cristo se inang dan diyà te apoy amon ketegahan aw mèpiya iyan.
1CO 3:14 Aw mèpiya se ininang dan kidoen te pinetindegan iling te balay eked kesonog, begayan din dan te ontong.
1CO 3:15 Meneng aw kolang se ininang dan iling te balay melomì mesonog, eked begayi te ontong se otaw mig-inang kenyan. Pengkey wedad ontong dan, meneng mekelowà dan iling te otaw mekelowà lekat te apoy.
1CO 3:16 Netegahan niyo den ini. Se kedita niyo egpemenal, iling kaw te balay te Timanem, aw eg-ogpà se Espiritu Santo kidoen kenyo.
1CO 3:17 Aw doen otaw megbaet te balay sìyan, pegbàtan heman sikandin te Timanem, so balay te Timanem se eg-ogpaan din, aw sikiyo se balay din sìyan.
1CO 3:18 Peg-ahà kaw amon wedad keekalan kenyo. Aw doen otaw kidoen kenyo eg-ikagi te doen den kebiyasa din dini te keneyonan, keilangan tenanan din se kebiyasa din sìyan amon kinewaen din se ontò kebiyasa ibegay te Timanem,
1CO 3:19 so se kebiyasa te otaw dini te keneyonan, wedad ontong niyan diyà te Timanem. Benal se kagi te Timanem insolat, “Se kebiyasa te otaw, yan se isilit te Timanem te otaw eg-aneng-aneng te doen kebiyasa dan.”
1CO 3:20 Doen heman doma kagi te Timanem insolat, “Netegahan te Pengolo te wedad ontong te aneng-aneng te otaw eg-aneng-aneng te doen kebiyasa dan.”
1CO 3:21 Yan keilangan eked niyo duyuni se pegkeotawun niyo tandà te kebiyasa te otaw egtekingan niyo. Eked iyan kepakay, so imbegay te Timanem se kedita dan diyà kenyo.
1CO 3:22 Pengkey siak, aw si Apolos, aw si Pedro, insogò te Timanem se kedita day amon megtabang kenyo. Pengkey eden se ontong dini te keneyonan, pengkey dalem te wedà kaw pa kematay, aw pengkey matay kaw, aw pengkey aldaw seini, aw pengkey modi aldaw, tomalag iyan imbegay te Timanem amon doen ontong niyo,
1CO 3:23 so sakop kaw i Cristo, aw si Cristo se sakop te Timanem Amay.
1CO 4:1 Yan keilangan meg-aneng-aneng kaw te sikami si Apolos se insogò i Cristo, aw insalig te Timanem kenami se kebenalan ipegtoladà day kenyo.
1CO 4:2 So sikami se otaw sineligan din kenyan, keilangan tomolò kay te simogò kenami.
1CO 4:3 Yan, pengkey eden se aneng-aneng niyo aw doma otaw tepad kanak, aw den iyan, so pengkey siak, eked a heman ikagi aw ontò mèpiya se pegtolò ko te Timanem.
1CO 4:4 Pengkey wedad netegahan ko medaet diyà te neinang ko, meneng wedà a keinang metòlid pineokit kenyan, so Pengolo olò se netaga-taga aw metòlid a.
1CO 4:5 Yan ikà niyo eg-okom te eg-inangen te doma otaw, so wedà pa dateng se aldaw te peg-okom. Aw lomikò se Pengolo, ipetaga-taga din se kedita, sìyan wedà tadon pa ketegahi. Ipetaga-taga din heman se kedita te aneng-aneng te otaw, aw penga niyan, iduyun te Timanem se teg sebad-sebad otaw doen ontong.
1CO 4:6 Menge kedowa ko, dini te intoladà ko seini, impolingun ko diyà kanak aw ki Apolos, so ibeg ko meg-iling kaw kenami te pegtolò day te kagi te Timanem insolat, amon wedad pedigselan niyo.
1CO 4:7 Kenà kaw melangkaw diyà te menge doma otaw, so se kedita te nekinawà niyo, yan se imbowang te Timanem kenyo. Aw lekat te Timanem se kedita, eked kepakay aw megpelangkaw-langkaw kaw, so kenà iyan lekat te kenyo pegkeotawun.
1CO 4:8 Ikà niyo eg-aneng-aneng te netegahan niyo den se kedita aw meyaman kaw den. Eden niyo aw limowan kaw den, pengkey wedà kay pa lowan. Mèpiya peden aw limowan kaw den, amon mekelowan kay heman doma kenyo.
1CO 4:9 Aneng-aneng ko, doen ibeg te Timanem te medanà se pegkeotawun day aw menge doma sogounun i Cristo, aw lindoan kay iling te otaw kineleboso aw agpet imetayan, so egkitaen kay te kedita dini te keneyonan, pengkey otaw aw menge anghil eleg heman egpengità kenami.
1CO 4:10 Pengkey wedad ekon inenengen day so egtaking kay ki Cristo, meneng aneng-aneng niyo doen inenengen niyo so egtaking kaw ki Cristo. Pengkey wedad ekon mebatog day inangen, meneng aneng-aneng niyo mebatog niyo inangen se kedita pengkey eden. Sikiyo se nedengeg, meneng sikami se eglindoan.
1CO 4:11 Lamig seini, egbellosen kay, aw egkelao kay, aw wedad nael penenaktun day, aw pineeleg kay, aw lomelegeb kay so wedad balay day.
1CO 4:12 Egterbaho kay amon doen mekaen day. Aw tollonan kay te doma otaw, egpemoyò kay diyà te Timanem te keidowan din dan. Pengkey egpemilangen kay, meneng kunù egpeketayod kay.
1CO 4:13 Aw bàtan-bàtan kay, egtaba kay te mèpiya. Lamig seini, se aneng-aneng te otaw dini te keneyonan, iling kay te sagbet iagbel so wedad ontong.
1CO 4:14 Simolat a kani diyà kenyo kenà amon meyàyà kaw, meneng amon megtoladà a kenyo, so egkedekelan ko sikiyo te pedowan iling te ontò batà ko.
1CO 4:15 Pengkey pila gatos se doma otaw megtoladà kenyo tepad ki Cristo, meneng ikà niyo egkelibel te siaken olò se amay niyo, so nemenal kaw ki Cristo pineokit te pegtoladà ko kenyo te Mèpiya Indan.
1CO 4:16 Se punù ko kenyo, peg-ilingi niyo se eg-inangen ko.
1CO 4:17 Yan insogò ko si Timoteo doton kenyo. Iling sikandin te batà ko egkedekelan ko te pedowan, aw egkeseligan sikandin te pegtaking din te Pengolo tadon. Ipeaneng-aneng kaw din te eg-inangen ko te pegtaking ko ki Jesu Cristo, aw yan se ipegtoladà ko doton te kedita te simbahan pengkey kenan a pesalo.
1CO 4:18 Doen ekon doton kenyo migpelangkaw-langkaw, so eden dan aw eked a laoy kenyo.
1CO 4:19 Meneng aw meibeg se Pengolo, domoton a kenyo te eked kenamay, amon kitaen ko aw ontò benal egtaking te Timanem se otaw egpelangkaw-langkaw, aw olò taman te kagi dan.
1CO 4:20 Aw eglowan se Timanem kenitadon, ketegahan iyan kenà pineokit te kagi tadon meneng pineokit te inang tadon.
1CO 4:21 Yan sikiyo se memallì. Aw eked kaw taking te intoladà ko, ipelumun ko sikiyo aw domateng a doton kenyo. Meneng aw ibeg niyo tomolò kaw te intoladà ko kenyo, yan komità kaw te ontò dakel se pedowan ko kenyo.
1CO 5:1 Na, dinineg ko te doen ekon otaw kidoen kenyo migsembowaga, so doen ekon eglayok te esawa te amay din. Pengkey kidoen te menge otaw kenà egpemenal, wedad otaw eg-inang kenyan, so ontò iyan medaet.
1CO 5:2 Pengkey medaet iyan, meneng gayed kaw pa egpelangkaw-langkaw. Keilangan melidò kaw beling aw ipelowà niyo se otaw mig-inang te medaet sìyan, amon eked sikandin pekedoma te menge otaw egpemenal.
1CO 5:3 Pengkey wedad a kidoen kenyo, meneng kidoen se aneng-aneng ko. Seini se ininang ko den iling te kidoen a kenyo. Pineokit te ngadan te Pengolo tadon si Jesus, pig-okom ko den se otaw mig-inang te medaet. Aw megtipon se kedita niyo egpemenal, iling te kidoen a migdoma kenyo aw seini se keilangan inangen niyo, so tebangan kaw te tolos te Pengolo tadon si Cristo.
1CO 5:5 Keilangan pebeyaan niyo se otaw sìyan amon pelumunen i Satanas se lawa din, aw amon mekelowà se pedowan din te aldaw te peglikò te Pengolo tadon si Jesus.
1CO 5:6 Medaet se pegpelangkaw-langkaw niyo. Mèpiya beling aw megpedanà kaw amon eked ketin se salà sìyan diyà te kedita niyo, so iling kenyan se ikegiyen tadon, “Pengkey deitek olò se yist, meneng lomebag se kedakel te arina.”
1CO 5:7 Tenani niyo se peg-inang te salà amon mekeiling kaw te pan wedad yist eg-inangen te menge Judiyo te pista te pegpengaen dan te pan kenà eglebag aw pegpengiyaw dan te karniro. Iling kaw den te pan wedad yist, aw si Cristo se iling te karniro, so inimetayan sikandin amon ipelowà kidon din lekat te salà.
1CO 5:8 Yan se doun te mèpiya aw megpesiontong kidon diyà te Timanem tandà te peglengà tadon te peg-inang te medaet, so yan se iling te yist mekeketin kenyo. Meneng keilangan lobosen tadon se pedowan te pegtaking tadon te kebenalan, so yan se iling te pan wedad yist.
1CO 5:9 Pegsolat ko kenyo kedengan, inikagi ko kenyo te eked kepakay aw megdoma kaw te otaw eg-inang te medaet.
1CO 5:10 Meneng se punù ko sìyan, kenà iyan tepad te menge otaw wedà pemenal, aw eg-inang te medaet, aw egkeibeg te kwarta, aw egdampas, aw egsimba te kenà benal timanem, so simpana eked kepakay se pegkità niyo te menge otaw eg-inang te medaet, yan eked kaw peg-ogpà dini te keneyonan.
1CO 5:11 Meneng se kedegdagan te punù insolat ko kenyo, eked kaw kepakay megdoma te otaw egpemenal aw eglayok te kenà kandin esawa, aw egkeibeg te kwarta, aw egsimba te kenà benal timanem, aw egbaet-baet, aw eglasing, aw egpenakaw. Eked heman kepakay pengkey komaen kaw doma te otaw egpemenal aw medaet se eg-inangen din iling kenyan.
1CO 5:12 Se menge otaw wedà pemenal te Timanem, eked kidon peg-okom kandan, so Timanem se meg-okom kandan. Meneng se menge otaw egpemenal, yan se okomen niyo aw medaet se eg-inangen dan. “Pelowai niyo se otaw sìyan mig-inang te medaet.” Yan se kagi te Timanem insolat.
1CO 6:1 Na, aw doen menge sakop te Timanem doton kenyo egpedindilay, ibeg dan ekon osayan te otaw kenà sakop te Timanem. Meneng eked iyan kepakay. Mèpiya aw osayan dan te menge sakop te Timanem.
1CO 6:2 Iling te nelibelan niyo den te sikitadon egpemenal se megdoma ki Cristo meg-okom te kedita te otaw te keneyonan te modi aldaw. Aw okomen tadon kwani se kedita te otaw, mepakay kaw heman meg-osay te deitek egkeinang te doma sakop te Timanem songkani.
1CO 6:3 Netegahan niyo den besi te okomen tadon kwani se menge anghil. Yan se doun te mepakay kaw heman meg-osay tepad te keogpà niyo dini te keneyonan.
1CO 6:4 Meneng aw doen dindil doton kenyo, egpeibingay kaw ekon doton te otaw kenà egpemenal amon osayan kaw dan.
1CO 6:5 Keilangan meyàyà kaw kenyan, so iling te wedad den otaw doen inenengen doton kenyo meg-osay te menge otaw egpemenal.
1CO 6:6 Meneng pengkey egpemenal kaw, egpeibingay kaw ekon doton te howis, aw labi pa iyan medaet so otaw kenà egpemenal se eg-osay kenyo.
1CO 6:7 Kolang se eg-inangen niyo, so egpeibingay kaw doton te howis. Labi pa mèpiya aw kelibelan niyo se pegtindaet aw peglimbong kenyo.
1CO 6:8 Meneng sikiyo menge otaw egpemenal ki Cristo se egtindaet aw eglimbong te doma otaw, pengkey menge doma niyo egpemenal.
1CO 6:9 Nelibelan niyo besi te eked pekeakop diyà te peglowan te Timanem se otaw gayed eg-inang te medaet. Ontò niyo eneng-enengi se kebenalan seini. Eked pekeakop diyà te peglowan te Timanem se kedita te otaw eglayok te kenà kandan esawa, aw egsimba te kenà benal timanem, aw eglakad, aw bayot, aw egpenolis, aw otaw egpengewarta, aw eglasing, aw egbaet-baet, aw egpenakaw.
1CO 6:11 Doen otaw kidoen kenyo iling kenyan se eg-inangen dan kedengan, meneng songkani binonyagan kaw den, aw ininang kaw te Timanem otaw egpenimanem, aw eg-eneng-enengen te Timanem te metòlid kaw pineokit te ngadan te Pengolo tadon si Jesu Cristo, aw pineokit te Espiritu Santo.
1CO 6:12 Pengkey mepakay aw inangen ko se kedita te ibeg ko, meneng wedad ontong te kedita niyan. Pengkey mepakay aw inangen ko se kedita, meneng eked a keibeg aw meallang a te inang ko.
1CO 6:13 Eneng-enengi niyo ini. Benal se eg-ikegiyen te doen kànen amon isawol diyà te getek, aw doen heman getek amon solan te kànen. Meneng eked kepakay aw megkelagok kidon, so doen kwani aldaw pegbàtan te Timanem se getek aw kànen. Iling heman kenyan se lawa tadon. Ininang iyan te Timanem kenà amon meibeg kidon te kenà kenitadon esawa, meneng ininang kidon din amon tomolò kidon te ibeg te Pengolo tadon, aw netegahan te Pengolo tadon se keilangan te lawa tadon.
1CO 6:14 Entayen pa te Timanem se lawa tadon lekat te nematay pineokit te tolos din, onawa te peg-antay din te Pengolo tadon lekat te nematay.
1CO 6:15 Netegahan niyo den te iling te ogpo lawa i Cristo se lawa niyo. Yan aw migsebad kaw den ki Cristo, eked kepakay aw ipedoma niyo se lawa niyo diyà te lawa te kepoyun. Ontò iyan eked kepakay.
1CO 6:16 Netegahan niyo den heman, aw lomayok se otaw te kepoyun, yan meinang sebad se lawa dan, so doen kagi te Timanem tapay insolat, “Megsebad se lawa te dowa otaw sìyan.”
1CO 6:17 Meneng pengkey sinu se memenal te Pengolo tadon, megsebad se pedowan din diyà kandin.
1CO 6:18 Ikà niyo eg-inabut te kenà kenyo esawa. Se lawa, wedad labut te kedita te doma salà, meneng se otaw eglayok te kenà kandin esawa, mekesalà sikandin pineokit te lawa din.
1CO 6:19 Nelibelan niyo den besi ini. Se lawa niyo, yan se eg-ogpaan te Espiritu Santo imbegay te Timanem kenyo, aw kidoen lamig songkani. Yan se doun te kenà kenyo se lawa niyo, meneng Timanem se tig-apò kenyan,
1CO 6:20 so ontò meelagà se imbayad din kenyo. Yan keilangan mèpiya se inangen niyo amon iduyun se Timanem.
1CO 7:1 Nayan, seini se meikagi ko tepad te insà insolat niyo kanak. Aw eked pengognan se otaw, mèpiya iyan.
1CO 7:2 Meneng aw mengognan se otaw, keilangan melobos se pedowan din diyà te esawa din amon eked keboyo te medaet.
1CO 7:3 Se meama, keilangan mengimanday te esawa din. Se bayi heman, keilangan mengimanday te esawa din.
1CO 7:4 So diyà te otaw mengognan, eked ketig-apò te bayi se kandin lawa, meneng metig-apò te kandin esawa. Onawa heman niyan se meama, eked sikandin peketig-apò te kandin lawa, meneng metig-apò te kandin esawa.
1CO 7:5 Ikà niyo eg-eked te pegpeleyokay singed aw megsebad se pedowan niyo te eked kaw pegpeleyokay te pila se aldaw amon tomayod kaw megtawal-tawal. Pegkepenga niyan, todà kaw pegpeleyokay amon eked kaw keboyo i Satanas pineokit te ibeg te lawa niyo.
1CO 7:6 Yan se inikagi ko kenyo kenà amon legesen ko sikiyo mengognan, meneng amon ketegahan niyo te mepakay diyà kanak aw mengognan kaw.
1CO 7:7 Pengkey ibeg ko meiling kaw peden kanak so wedad esawa ko, meneng netegahan ko te lekat te Timanem se mebatog inangen te teg sebad-sebad otaw.
1CO 7:8 Seini se kagi ko diyà te menge otaw wedà pengognan aw diyà te menge otaw balo. Mèpiya aw eked kaw pengognan iling kanak.
1CO 7:9 Meneng aw eked kaw peketameng te ibeg niyo, mèpiya aw mengognan kaw, so aw ontò se ibeg niyo mengognan, labi pa mèpiya aw mengognan kaw.
1CO 7:10 Seini se isogò ko diyà te kedita niyo doen esawa. Kenà lekat kanak se sogò seini, meneng lekat te Pengolo. Eked kepakay aw tomanan se bayi te esawa din.
1CO 7:11 Meneng aw somoway sikandin te esawa din, keilangan eked pengognan diyà te doma meama, meneng mèpiya aw molì heman todà doton te kandin esawa. Eked heman kepakay aw somibwan se meama te esawa din.
1CO 7:12 Doen pa ikegiyen ko diyà te doma otaw pengkey wedà ini keliwati lekat te Pengolo. Seini se punù ko kenyo. Eked sibwani te otaw egpemenal se esawa din kenà egpemenal meibeg megdoma kandin,
1CO 7:14 so aw egpemenal se sebad otaw, kenà mediyò lekat te Timanem se esawa din wedà pemenal. Iling heman kenyan se menge batà dan, so medapag dan diyà te Timanem. Kenà dan iling te batà te otaw kenà egpemenal.
1CO 7:15 Meneng se otaw kenà egpemenal, aw ibeg din tomanan te esawa din egpemenal, mepakay iyan. Eked pegtameng se otaw egpemenal, so ibeg te Timanem eked kidon pegleges te doma.
1CO 7:16 Pengkey temengan niyo se esawa niyo kenà egpemenal, meneng eked niyo ketegahi aw memenal dan.
1CO 7:17 Keilangan tomaking se teg sebad-sebad kenitadon te ibeg te Pengolo tadon, aw tomayod kidon heman te keogpà te pegpenenalan tadon te tawal te Timanem. Yan se ipegpunù ko diyà te kedita te otaw egpemenal.
1CO 7:18 Aw netolì den se meama te wedà pa ketawal te Timanem, keilangan eked sikandin keyàyà te netolì sikandin. Aw wedà pa sikandin ketolì, kenà den keilangan tolien sikandin.
1CO 7:19 Pengkey tolien se otaw aw eked tolii, kenà niyan se meelagà diyà te Timanem, meneng yan se meelagà aw toloen tadon se punù te Timanem kenitadon.
1CO 7:20 Mèpiya aw tomayod se teg sebad-sebad kenitadon kidoen te keogpà te pegpenenalan tadon te tawal te Timanem.
1CO 7:21 Aw allang kaw te pegtawal te Timanem kenyo, wedad beloyan. Meneng aw ibeg te tig-apò megpelowà kenyo, lowà kaw.
1CO 7:22 Pengkey allang kaw pa, meneng iling kaw den te kenà allang, so impelowà kaw te Pengolo lekat te salà. Aw sikiyo kenà allang te pegtawal te Timanem kenyo, neinang kaw den iling te allang, so tinig-apò kaw den i Cristo.
1CO 7:23 So ontò meelagà se imbayad din kenyo, yan ikà niyo egpeallang diyà te doma otaw.
1CO 7:24 Yan menge kedowa ko, keilangan megpedeleg se teg sebad-sebad kenyo te pegsebad niyo diyà te Timanem iling te keogpà niyo te pegpenenalan niyo te tawal te Timanem.
1CO 7:25 Nayan, tomaba a te insà niyo tepad te menge otaw wedà pengognan. Wedad punù ikeliwat ko kandan lekat te Pengolo tadon, meneng pineokit te keido din kanak, egkeseligan a, aw seini den se aneng-aneng ko.
1CO 7:26 Mèpiya aw tomayod kaw te keogpà niyo songkani, so doen kelimahan agpet den domateng kenitadon.
1CO 7:27 Aw doen den esawa niyo, ikà niyo egpesibwanay. Aw wedad esawa niyo, ikà niyo egpengognan.
1CO 7:28 Meneng aw mengognan kaw, kenà iyan salà. Se ibeg ko olò, eked kaw peden detengi te kelimahan egdateng diyà te menge otaw doen esawa.
1CO 7:29 Menge kedowa ko, ibeg ko ketegahan niyo ini. Agpet den se aldaw te peglikò te Pengolo tadon. Yan lekat seini, pengkey doen esawa niyo, ikà niyo eglengà te pegtaking niyo te Timanem.
1CO 7:30 Pengkey melidò kaw, pengkey meluba kaw, pengkey doen kedònan niyo aw wedad, aw den iyan, so sebad olò se egtekingan niyo.
1CO 7:31 Pengkey eg-ogpà kaw dini te keneyonan, meneng ikà niyo eglengà te pegtaking niyo ki Cristo amon gayed kaw meketoman te ibeg te Timanem, so megkewedad se keneyonan seini te eked den kenamay.
1CO 7:32 Ibeg ko peden, wedad ketetana niyo, so se telaki, yan se mebatog din eneng-enengen olò se ibeg te Pengolo tadon amon meluba se Pengolo kandin.
1CO 7:33 Meneng se meama doen esawa, yan se eked kebatog metibok se aneng-aneng din tomaking ki Cristo, so eneng-enengen din heman se ibeg te esawa din amon meluba se esawa din kandin,
1CO 7:34 so egketengà se ibeg din. Iling heman kenyan se bayi, so se laga, mebatog din tiboken se pedowan din diyà te ibeg te Pengolo tadon, amon melinis se lawa din aw aneng-aneng din. Meneng se bayi doen esawa, yan se gayed din eneng-enengen se ibeg te esawa din amon meluba se esawa din kandin.
1CO 7:35 Eked a keibeg aw kelimahan kaw pineokit te inikagi ko, meneng ibeg ko megtabang a kenyo amon meg-inang kaw te mèpiya, aw tomaking kaw te Pengolo tadon te kedakel te pedowan niyo.
1CO 7:36 Na, aw doen otaw kidoen kenyo doen batà din laga metesan den wedà din pepengognani, aw todà meg-aneng-aneng se amay te mèpiya aw doen esawa te batà din, mepakay aw tomanen din se ibeg din sìyan. Aw mengognan se batà din, kenà iyan salà.
1CO 7:37 Meneng aw meg-aneng-aneng se amay te eked palos pepengognani se batà din laga, aw wedad megleges kandin, aw lekat te kandin ibeg, kenà medaet aw eked pepengognani te amay se batà din.
1CO 7:38 Mèpiya heman aw ipepengognan te amay se batà din, meneng labi pa mèpiya aw eked pepengognani se batà din.
1CO 7:39 Eked kepakay aw somoway se bayi te esawa din singed aw matay se meama. Meneng aw matay se meama, mepakay aw todà mengognan se bayi balo, meneng keilangan egpemenal te Pengolo tadon se pengognanen din.
1CO 7:40 Meneng se aneng-aneng ko, labi pa besi meluba se balo aw eked todà pengognan. Aneng-aneng ko, Espiritu Santo se migtoladà kanak kenyan.
1CO 8:1 Nayan, tomaba a te insà niyo tepad te pegkaen niyo te pengelapen imbegay diyà te inotaw egseligan te otaw kenà egsalig te Timanem. Ontò benal se inikagi niyo te netegahan te kedita tadon se kebenalan tepad te pegkaen te pengelapen imbegay diyà te inotaw. Meneng ikà niyo egkelibel kani. Aw meg-aneng-aneng kaw te netegahan niyo se kedita, yan se kelekatan te pegduyun niyo te kenyo pegkeotawun, meneng medaet iyan. Meneng aw megpedekelay kaw te pedowan, yan se kelekatan te pegpetebangay niyo tepad te pegtaking niyo te Pengolo tadon.
1CO 8:2 Aw meg-aneng-aneng se otaw te netegahan din se kedita, kolang pa se pegketaga-taga din.
1CO 8:3 Meneng se otaw dakel se pedowan din diyà te Timanem, yan se otaw ipetaga-taga te Timanem te batà din den.
1CO 8:4 Nayan, tepad te pegkaen te pengelapen imbegay diyà te inotaw, benal se inikagi niyo te kenà ontò timanem se egbegayan dan. Benal heman se inikagi niyo te olò sebad se Timanem.
1CO 8:5 Pengkey doen menge doma otaw eg-aneng-aneng te medita se timanem aw pengolo doton te langit aw dini heman te tanà,
1CO 8:6 meneng diyà kenitadon egpemenal, olò sebad se Timanem Amay. Sikandin se eglekatan te kedita aw egtekingan tadon. Sebad heman se Pengolo tadon aw yan si Jesu Cristo. Pineokit kandin, ininang te Timanem se kedita, aw pineokit kandin, mekepedapag kidon diyà te Timanem.
1CO 8:7 Pengkey benal te wedad doma timanem, meneng doen pa menge otaw doton kenyo wedà dan keleseb te kebenalan sìyan. Timaking dan te ketanem te otaw egdogsò aw egpengaen te pengelapen ipegbegay diyà te inotaw. Yan se ketanem dan kedengan te wedà dan pa pemenal ki Cristo. Pengkey lamig songkani, aw kànen dan se pengelapen imbegay diyà te inotaw, eden dan aw doen labut dan te pegpemasa te inotaw sìyan. So wedà dan pa keleseb te kebenalan, eden dan aw mekesalà dan pineokit te pegkaen dan te pengelapen imbegay diyà te inotaw.
1CO 8:8 Meneng kenà kànen se mekepedapag kenitadon diyà te Timanem, so pengkey komaen kidon kenyan, aw pengkey eked kidon kaen kenyan, kenà niyan se ontò ibeg te Timanem.
1CO 8:9 Yan pengkey mepakay kaw komaen te pengelapen imbegay te doma otaw diyà te inotaw aw meibeg kaw, meneng peg-ahà kaw amon wedad otaw meboyo meg-inang te salà pineokit te peg-iling dan kenyo, so wedà dan ontò ketaga-taga te kebenalan.
1CO 8:10 Pengkey netegahan niyo se kebenalan, aw simpana komaen kaw te pengelapen imbegay doton te simbahan te inotaw, aw kitaen kaw te doma otaw wedà ontò ketaga-taga te kebenalan, yan se labi pa mekebegay kandin te eneg te peg-iling kenyo komaen, pengkey aneng-aneng din medaet iyan.
1CO 8:11 Aw yan se inangen niyo lekat te pegketaga-taga niyo te kebenalan, megkedaet se doma niyo, sìyan wedà ontò ketaga-taga te kebenalan, pengkey sikandin se kedowa niyo te pegpemenal, sìyan impelowà pineokit te pegkematay i Cristo.
1CO 8:12 Aw pineokit te inang niyo megkedaet se aneng-aneng te doma niyo, sìyan wedà pa ontò ketaga-taga te kebenalan, kenà olò sikandin se keselaan niyo, meneng mekesalà kaw heman ki Cristo.
1CO 8:13 Yan aw mekesalà se kedowa ko pineokit te pegkaen ko, yan se doun te eked a den palos kaen te pengelapen imbegay diyà te inotaw, amon eked sikandin pegkedaet pineokit kanak.
1CO 9:1 Siaken, mepakay a peden memallì te inangen ko, so siaken se sogounun i Cristo, aw kinità ko se Pengolo tadon si Jesus, aw sikiyo se nemenal kandin pineokit te pegtoladà ko.
1CO 9:2 Pengkey doen doma otaw eg-aneng-aneng te kenà a sogounun i Cristo, meneng sikiyo se netaga-taga kenyan, so pineokit te pegtoladà ko, nemenal kaw aw yan se pengilala te sogounun a i Cristo.
1CO 9:3 Yan se ipegtaba ko diyà te menge otaw eked pemenal te insogò a din.
1CO 9:4 Pengkey wedà a niyo togpoi, meneng ikà niyo eg-aneng-aneng te eked iyan kepakay.
1CO 9:5 Simpana doen esawa ko, mepakay aw ipetaking ko pengkey kenan a pesalo, so doen man esawa ipegpetaking te menge doma sogounun i Cristo, pengkey si Pedro aw menge kedowa i Jesus.
1CO 9:6 Pengkey wedà kay togpoi te menge simbahan, meneng ikà niyo eg-aneng-aneng te olò sikami si Bernabe se keilangan megterbaho amon doen ibayad day te kànen,
1CO 9:7 so se otaw megpagod, keilangan doen ontong din. Wedad palos sondalo menogpò te kandin pegkeotawun. Wedad heman otaw eked kaen te pongo te intanem din. Wedad heman otaw telediyaga eked inem te gatas lekat te baka tinonggoan din.
1CO 9:8 Lekat te keogpà tadon se tegdeyanan ko seini, meneng onawa heman se toladà diyà te kagi te Timanem insolat,
1CO 9:9 so doen punù te Timanem ingkeliwat i Moises insolat, “Aw megterbaho se baka, eked pongosi, amon mekekaen.” Na, pegpunù te Timanem kenyan, kenà olò baka se eg-eneng-enengen din,
1CO 9:10 so ibeg din sikitadon se doen kèpiyaan. Insolat iyan amon ketegahan tadon te keilangan doen ontong te otaw megtoladà te kagi te Timanem. Pengkey otaw menanem aw otaw meglegani, doen ontong dan egpelimanan.
1CO 9:11 Sikami egtoladà, iling kay te otaw nenanem te pawà, so se kebenalan tepad te Timanem, yan se intanem day kidoen kenyo. Yan kenà medaet aw doen ibegay niyo kenami, sìyan keilangan day te kelikit te aldaw.
1CO 9:12 Aw mepakay se pegpenogpò niyo te menge doma menenoladà, sikami se labi pa niyo togpoan, so sikami se onà migtoladà kenyo. Pengkey mepakay aw memoyò kay te togpò lekat kenyo, meneng wedà kay palos pemoyò. Pengkey nelimahan kay, meneng wedà kay palos pemoyò lekat kenyo, amon eked kebelebagi se menge otaw menenalan te Mèpiya Indan intoladà day tepad ki Cristo.
1CO 9:13 Netegahan niyo den ini. Se menge otaw egterbaho doton te dakel simbahan te Judiyo doton te Jerusalem, yan se doen ilas dan diyà te kànen egpengibingen doton te simbahan te Judiyo. Se menge otaw egsonog te ayam-ayam doton te dakel simbahan te Judiyo, yan se begayan te tengà te kànen kidoen ipegpemegay diyà te Timanem.
1CO 9:14 Iling kenyan, migpunù se Pengolo tadon te keilangan togpoan te otaw menenalan se otaw megtoladà kandan te Mèpiya Indan tepad ki Cristo.
1CO 9:15 Meneng siaken, wedà a palos pemoyò lekat kenyo. Se tod ko te pegsolat ko kani, kenà amon megpetogpò a kenyo, so kenà niyan se ibeg ko. Wedad otaw meketodà te peg-eked ko te pegpenogpò niyo kanak.
1CO 9:16 Eked ko duyuni se pegkeotawun ko te migtoladà a te Mèpiya Indan, so insogò a te Timanem megtoladà kenyan, aw ipelumun a din aw eked a tolò.
1CO 9:17 Meneng aw lekat te kanak ibeg se pegtoladà ko, yan se ontong ko aw togpoan a. Meneng kenà iyan lekat te kanak ibeg, so insalig te Timanem kanak se pegtoladà te Mèpiya Indan tepad ki Cristo, aw se keluba ko te pegtoladà ko, yan se ontong ko pengkey eked ko sikiyo petogpoi. Pengkey mepakay aw togpoan a te otaw toledaan ko te Mèpiya Indan, meneng eked a palos pemoyò te togpò lekat kandan.
1CO 9:19 Pengkey mepakay aw memallì a peden te inangen ko, aw wedad otaw mekeleges kanak, meneng migpeinang a iling te allang megtabang te kedita te otaw, amon pineokit kanak, medita se otaw memenal ki Cristo.
1CO 9:20 Seini se eg-inangen ko. Aw menge Judiyo se toledaan ko, egtoloen ko se ketanem dan amon memenal dan te kebenalan itoladà ko. Pengkey netegahan ko te mepakay aw eked ketolò se punù ingkeliwat i Moises, meneng egtoloen dan se menge punù sìyan, aw yan tomolò a heman kenyan amon memenal se menge Judiyo te kebenalan itoladà ko tepad ki Cristo.
1CO 9:21 Aw menge otaw kenà Judiyo se toledaan ko, tomaking a heman kandan te eked tolò te punù ingkeliwat i Moises, amon memenal heman se menge otaw kenà Judiyo ki Cristo. Meneng kenà te linèpangan ko se punù te Timanem, meneng se kebenalan, timolò a man ki Cristo.
1CO 9:22 Peg-ilingan ko se inang te menge otaw wedà ontò ketoledai tepad te pegtaking ki Cristo, amon ketebangan ko dan. Gayed a timaking te inang te kedita te otaw, amon pineokit te pegtoladà ko, doen menge otaw mekelowà lekat te pegpelumun te Timanem.
1CO 9:23 Yan se eg-inangen ko amon ketegahan te kedita te otaw se Mèpiya Indan tepad ki Cristo, aw amon mekeontong a heman doton te langit.
1CO 9:24 Netegahan niyo den, aw doen koyà, pengkey medita se otaw komagnan, meneng sebad olò se kebegayan te ontong. Tayod kaw heman te pegtaking niyo ki Cristo amon mekekinawà kaw heman te kenyo ontong.
1CO 9:25 Se kedita te otaw komagnan, doen eked dan kepakay inangen amon eked ketostos se kagsen dan. Aw tomayod dan kenyan, doen mekeabat te ontong, pengkey ininang iyan te dawen melanes te eked kenamay. Meneng sikitadon egpemenal ki Cristo, ibeg tadon kinewaen se ontong wedad palos temanan.
1CO 9:26 Yan se doun te egpekagsen a te pegtaking ko ki Cristo, iling te otaw egpekagsen se egkagnan lamig domateng te temanan. Iling a heman te otaw egpesontokay gayed egpekesogat te timbang din.
1CO 9:27 Gayed ko egnedamen se lawa ko te sontok amon melomì ko meibing se lawa ko, so eked a keibeg te penga te pegpeakop ko te doma otaw, eked a pekeakop se kanak.
1CO 10:1 Ibeg ko, eneng-enengen niyo tepad te menge kemonaan tadon gebii, sìyan timaking ki Moises doton te kebigtilan. Nesempengan se kedita dan te labon impedoma te Timanem diyà kandan, aw yan se tinekingan dan. Minokit se kedita dan diyà te dalan ininang te Timanem kandan kidoen te tengà-tengà te dagat iningedanan Dagat Melalag.
1CO 10:2 Pineokit te pegtaking dan te labon aw peg-okit dan timalà te dagat, iling te binonyagan se kedita dan kidoen, so nelobos se pedowan dan timaking ki Moises.
1CO 10:3 Kimaen se kedita dan te pan imbegay te Timanem kandan.
1CO 10:4 Mininem se kedita dan te wayeg imbegay te Timanem kandan, so impetebol iyan i Cristo lekat te bato, aw sikandin se nenabang kandan pengkey kenan dan pesalo.
1CO 10:5 Meneng pengkey mèpiya se tabang te Timanem kandan, pilabok olò se timaking te ibeg te Timanem. Yan neopal se Timanem kandan, aw impelumun dan. Medita se nematay doton te kebigtilan inokitan dan.
1CO 10:6 Na, se kedita te neinang te kemonaan tadon, yan se gegonan tadon amon eked kidon taking te medaet ibeg te pedowan tadon iling kandan.
1CO 10:7 Yan ikà niyo egsimba te kenà benal timanem, iling te ininang te medita doma dan. Doen kagi te Timanem insolat te kelikit te pegsimba dan te kenà benal timanem, gayed dan kimaen aw mininem, aw penga niyan simayaw dan.
1CO 10:8 Eked kepakay aw lomayok kidon te kenà kenitadon esawa, iling te ininang te medita doma dan, so yan se doun te impelumun dan te Timanem, aw kelowan teg telo melalan se otaw negelà te sebad olò se aldaw.
1CO 10:9 Eked heman kepakay aw tendaen tadon se Pengolo pineokit te peg-inang tadon te kenà ibeg din, so doen menge kemonaan tadon migtandà te Pengolo, aw yan impetongkà din dan te memokan aw nematay dan.
1CO 10:10 Eked heman kepakay aw megbelisì kidon te medaet tepad te Timanem, so doen kemonaan tadon migbelisì, aw yan se inimetayan te anghil insogò lekat te langit.
1CO 10:11 Neinang se kedita niyan te kemonaan tadon amon ketegahan tadon te metoman kidon ipelumun aw meg-inang kidon te medaet. Nesolat iyan amon eked kidon peg-iling kandan, so agpet den se temanan te keneyonan.
1CO 10:12 Yan aw doen otaw eg-aneng-aneng te mèpiya se eg-inangen din, yan se otaw keilangan megpekeahà amon eked sikandin keboyo i Satanas megpekesalà.
1CO 10:13 Se tandà neokitan niyo, onawa iyan te tandà egkeokitan te menge doma otaw. Meneng egkeseligan se Timanem, so eked kaw din peokiti te tandà i Satanas eked niyo kebatog. Aw tendaen kaw, doen dalan inangen te Timanem amon mekelowà kaw, aw begayan kaw din heman te eneg amon meketayod kaw kenyan.
1CO 10:14 Na, menge kedowa ko egkedekelan ko te pedowan, ikà niyo eg-inabut diyà te pegsimba te kenà benal timanem.
1CO 10:15 Doen inenengen niyo, aw yan mikagi a kenyo te eneng-enengi niyo aw benal se intoladà ko.
1CO 10:16 Seini se mèpiya inangen tadon aw metipon kidon, amon eneng-enengen tadon se pegkematay i Cristo kenitadon. Aw minem kidon te tabò, onà kidon megtawal-tawal diyà te Timanem aw megpesiontong kidon diyà kandin kenyan. Aw minem kidon diyà te tabò sìyan, yan ipetaga-taga tadon te migsebad kidon den ki Cristo pineokit te dipanog din te pegkematay din doton te kros. Aw komaen kidon te pan binelà-belà, yan ipetaga-taga tadon heman te migsebad kidon den ki Cristo pineokit te lawa din nematay doton te kros.
1CO 10:17 So doen olò sebad pan, yan ketegahan tadon te pengkey medita kidon egpemenal, meneng sebad se neekopan tadon, so sebad olò se pan iteped diyà te kedita tadon.
1CO 10:18 Eneng-enengi niyo heman se ketanem te menge Judiyo. Aw egsimba dan, egduyun dan te Timanem pineokit te pegpengimatay dan te ayam-ayam ipegpemegay, aw se otaw egpengaen te pengelapen egteniyen, yan se otaw egpeakop diyà te pegduyun dan te Timanem.
1CO 10:19 Iling heman kenyan se otaw memegay te kànen diyà te inotaw, so megpeakop dan heman diyà te pegduyun te kenà benal timanem. Meneng ibeg ko, ketegahan niyo te wedad palos ontong dan kenyan. Eked heman ketebangi se otaw egsimba te inotaw.
1CO 10:20 Aw doen kànen ibegay te otaw kenà egsimba te Timanem, se ontò dan begayan te kànen, yan se menge bosaw. Kenà Timanem se iduyun dan. Eked a keibeg aw mesakop kaw te bosaw.
1CO 10:21 Eked kepakay aw minem kaw kidoen te tabò impunù te Pengolo amon iduyun sikandin, aw penga niyan minem kaw heman kidoen te tabò egtewal-tewalan dan te bosaw. Eked heman kepakay aw komaen kaw te pan impunù te Pengolo, aw penga niyan komaen kaw heman diyà te kènanan te otaw egduyun te bosaw.
1CO 10:22 Aw iling kenyan se eg-inangan niyo, meopal se Pengolo kenyo. Eked kaw pekelowà te pegpelumun din kenyo.
1CO 10:23 Pengkey mepakay aw inangen ko se kedita mepakay diyà te Timanem, meneng eked a, so wedad ontong te kedita niyan. Pengkey doen mepakay tadon inangen, meneng eked tadon iyan inangi, so eked tadon ketebangi se menge doma otaw egpemenal.
1CO 10:24 Pengkey eden se inangen te otaw, kolang se tod din aw olò sikandin se mekeontong, meneng keilangan mekeontong heman se doma otaw.
1CO 10:25 Na, aw doen pengelapen ibeligyà doton te pedyanan, mepakay aw kànen niyo iyan, pengkey eden. Aw mengabat kaw, ikà niyo den eg-insà aw eden pengelepeni se inabat niyo, amon wedad keeneng-enengan niyo.
1CO 10:26 Mepakay aw kànen niyo iyan, so doen kagi te Timanem insolat, “Lekat te Pengolo se kedita dini te keneyonan, so sikandin se mig-inang te kedita.”
1CO 10:27 Na, aw tewalen kaw komaen doton te balay te otaw kenà egsalig ki Cristo, aw doen ibeg niyo domoton, mepakay iyan. Pengkey eden se ipekaen din kenyo, mepakay iyan kànen. Ikà niyo den eg-insà aw eden se ipekaen kenyo, amon wedad keeneng-enengan niyo.
1CO 10:28 Meneng aw doen otaw mikagi diyà kenyo te tapay iyan imbegay diyà te inotaw, ikà niyo egpengaen kenyan amon wedad keeneng-enengan te otaw simabi kenyo, so pengkey eked pegkedaet se kenyo aneng-aneng, meneng megkedaet beling se kandin aneng-aneng. Pengkey komaen a aw eked, wedad otaw mekesila kanak pengkey wedà peg-onawa se aneng-aneng day,
1CO 10:30 so aw megpesiontong a te kànen ko, eked kepakay aw silahen a tandà te pegkaen ko te pinesiontongan ko diyà te Timanem.
1CO 10:31 Nayan, pengkey eden se inangen tadon, pengkey komaen kidon, aw pengkey minem kidon, keilangan iduyun tadon se Timanem pineokit te kedita te inangen tadon.
1CO 10:32 Keilangan mèpiya se kedita te eg-inangen niyo amon eked pegkedaet se pedowan te doma otaw, pengkey Judiyo aw kenà Judiyo, pengkey otaw egpemenal te Timanem.
1CO 10:33 Peg-iling kaw kanak, so ibeg ko ketebangan se kedita te otaw. Kenà olò kenaken kèpiyaan se eg-eneng-enengen ko, meneng eg-eneng-enengen ko heman se kèpiyaan te kedita te doma otaw, so ibeg ko mekelowà dan lekat te salà.
1CO 11:1 Taking kaw kanak, so si Cristo se egtekingan ko.
1CO 11:2 Na, mèpiya se ininang niyo, so gayed a niyo egkeeneng-enengan, aw egtekingan niyo heman se ketanem intoladà ko kenyo.
1CO 11:3 Meneng ibeg ko ketegahan niyo ini. Si Cristo, yan se olo te kedita te meama, aw se meama yan se olo te esawa din, aw se Timanem Amay yan se olo i Cristo.
1CO 11:4 Aw megsimba kaw, aw tedongan te meama se olo din te pegtawal-tawal din aw pegkeliwat din te kagi te Timanem, yan mekeyèyaay sikandin, so kenà din egbesahan si Cristo.
1CO 11:5 Meneng aw wedad tedong te bayi te pegtawal-tawal din aw pegkeliwat din te kagi te Timanem, mekeyèyaay sikandin, so kenà din egbesahan se meama. Se bayi wedad tedong, yan se iling te bayi binolo se olo din,
1CO 11:6 so aw eked keibeg se bayi megtedong te olo doton te simbahan, yan se pengilala te eked din toloi se meama. Mèpiya beling aw domeleg sikandin megpegopit iling te bawa te meama. Meneng aw mekeyèyaay se bayi bolowen aw mebabà se logay din, yan mèpiya aw tedongan se olo din.
1CO 11:7 Se meama, eked kepakay aw tedongan se olo din aw megtawal-tawal, so yan se pengilala te ininang te Timanem se meama melangkaw diyà te kedita dini te keneyonan. Meneng se bayi, yan se keilangan megtedong te olo din aw megtawal-tawal, so yan se pengilala te egtolò se bayi te meama.
1CO 11:8 Gebii te peg-inang te Timanem ki Adam aw si Eva, kenà lekat te bayi se meama, meneng lekat te meama se bayi.
1CO 11:9 Kenà aw meama se ininang amon meluba se bayi, meneng bayi se ininang amon meluba se meama.
1CO 11:10 Yan mèpiya aw megtedong se bayi te olo din doton te simbahan, amon pengkey menge anghil metaga-taga te egpemasa se bayi te meama.
1CO 11:11 Meneng eked kepakay diyà te Pengolo aw eked pegpetebangay se meama aw bayi.
1CO 11:12 Gebii te peg-inang te Timanem te otaw, inabat din se bayi lekat te meama, penga niyan ipetebaw din heman se meama lekat te bayi, meneng se kedita niyan, tomalag lekat te Timanem.
1CO 11:13 Eneng-enengi niyo ini. Medaet se bayi megtawal-tawal diyà te Timanem doton te simbahan aw wedad tedong din.
1CO 11:14 Netegahan tadon diyà te pedowan tadon te eked kepakay aw melayat se logay te meama iling te bayi.
1CO 11:15 Netegahan tadon heman te mèpiya aw melayat se logay te bayi, so yan se keluba din. Imbegay te Timanem se melayat logay diyà te bayi amon ketegahan te keilangan tedongan se olo te bayi aw megtawal-tawal doton te simbahan.
1CO 11:16 Aw doen otaw eked pemenal te inikagi ko tepad te pegtedong te bayi te olo, seini se itaba ko kandin te yan se ipegtoladà day, aw egtekingan iyan te kedita te otaw egpemenal te Timanem pengkey kenan.
1CO 11:17 Na, tepad te modi pegtoladà ko kenyo, eked ko sikiyo duyuni, so medaet se eg-inangen niyo. Pegtipon niyo te pegsimba, doen egpekebelabag te pegkinawà niyo te mèpiya.
1CO 11:18 Tagnà ikegiyen ko kenyo, dinineg ko te egpedàtay kaw ekon te pedowan pengkey kidoen te simbahan niyo, aw nepuluk se pedowan ko aw benal iyan.
1CO 11:19 Doen kèpiyaan aw wedà pegsebad se pedowan niyo, so pineokit kenyan, ketegahan aw sinu se egtaking te kebenalan.
1CO 11:20 Medaet se eg-inangen niyo, so pengkey egtipon kaw ekon komaen amon keeneng-enengan se pegkematay te Pengolo tadon, meneng kenà kaw egpemasa kandin.
1CO 11:21 Aw egdateng se oras te pegkaen, gayed kaw ekon egkegallat se egpengaen. Kenà kaw ekon egtagad te doma otaw, aw kenà kaw ekon egtalad kandan. Yan se doun te medita se melasing, aw bellosen se doma, so wedad den kànen.
1CO 11:22 Medaet se eg-inangen niyo. Aw olò kànen se ibeg niyo, labi pa mèpiya aw komaen kaw doton te kenyo balay, amon eked keyàyà se doma otaw egpemenal wedad kànen. Eked a duyun te eg-inangen niyo sìyan, so ontò iyan medaet diyà te Timanem.
1CO 11:23 Seini se intoladà te Pengolo kanak, sìyan ingkeliwat ko kenyo kedengan tepad te peg-aneng-aneng te pegkematay te Pengolo. Te delem te wedà pa dekepi si Jesus, nengabat sikandin te pan,
1CO 11:24 aw penga te pegpesiontong din, binelà-belà din iyan aw minikagi, “Se pan seini, yan se lawa ko imetayan amon mekelowà kaw. Inangi niyo iling kani amon gayed a niyo keeneng-enengan.”
1CO 11:25 Penga te pegkaen dan, inabat din heman se tabò aw minikagi, “Se meinem seini, yan se pengilala te doen kaling peokit ininang te Timanem pineokit te dipanog ko. Kelikit niyo minem iling kani, inangi niyo ini te doen peg-aneng-aneng niyo kanak.”
1CO 11:26 Yan dalem te eked pa likò se Pengolo, kelikit te pegkaen niyo te pan aw peg-inem niyo diyà te tabò, ipetaga-taga niyo te nematay se Pengolo amon megpelowà kenyo.
1CO 11:27 Yan aw doen otaw komaen te pan aw minem, aw wedà kelobos se pedowan din, yan se otaw ipelumun te Timanem, so kenà sikandin egpemasa te lawa aw dipanog te Pengolo.
1CO 11:28 Yan keilangan ontò tadon ehaen se kenitadon pedowan te eked kidon pa kaen te pan aw inem.
1CO 11:29 Aw doen otaw makop komaen aw minem, aw eked din eneng-enengi te yan se pengilala te pegkematay te Pengolo, yan se otaw mekekinawà te pelumun lekat te pegkaen din aw peg-inem.
1CO 11:30 Yan se doun te nesekitan se medita doton kenyo, aw migkelomay, aw doen heman nematay.
1CO 11:31 Meneng aw onà tadon ehaen se kenitadon pedowan aw melobos te eked kidon pa kaen, yan eked kidon pelumuni.
1CO 11:32 Meneng aw impelumun kidon den te Pengolo, mèpiya iyan, so yan se toladà din kenitadon te keilangan tomolò kidon kandin, amon eked kidon pekeakop te pelumun din te modi aldaw diyà te otaw kenà egpemenal.
1CO 11:33 Yan menge kedowa ko, aw megtipon kaw komaen te pan pengilala te lawa te Pengolo, keilangan megpetegaday kaw.
1CO 11:34 Aw doen otaw eked peketagad te doma otaw, mèpiya aw komaen sikandin doton te kandin balay, amon eked kaw pelumuni te Timanem kidoen te kenyo pegtipon. Na, se doma insà niyo kanak, yan se tebahen ko aw domateng a kidoen kenyo.
1CO 12:1 Nayan menge kedowa ko, ibeg ko ontò niyo kelebetan tepad te ipegpemegay te Espiritu Santo.
1CO 12:2 Netegahan niyo te gebii te wedà kaw pa taking ki Cristo, neallang kaw so timolò kaw te kenà benal timanem, sìyan kenà eg-ikagi, so neibing kaw timolò kandan.
1CO 12:3 Megtoladà a den kenyo amon ketegahan niyo aw Espiritu Santo se egbayà-bayà te otaw. Aw doen otaw menollon ki Jesus, ketegahan niyo te kenà Espiritu Santo se egbayà-bayà kandin. Meneng aw mikagi se otaw te si Jesus se Pengolo din, yan ketegahan niyo te Espiritu Santo se egbayà-bayà kandin.
1CO 12:4 Pengkey medita se kemolò te ipegpemegay din diyà kenitadon, meneng olò sebad se egpemegay, aw yan se Espiritu Santo.
1CO 12:5 Doen heman medita kemolò te inang tadon amon megpetebangay kidon, meneng sebad olò se Pengolo toloen tadon.
1CO 12:6 Medita se kemolò te terbaho tadon, meneng sebad se Timanem egpemegay te keseg diyà te kedita tadon egterbaho.
1CO 12:7 Se teg sebad-sebad kenitadon, doen den kebiyasa imbegay te Espiritu Santo diyà kenitadon amon megtabang kidon te doma otaw egpemenal.
1CO 12:8 Se sebad otaw, doen imbegay te Espiritu Santo kandin kebiyasa amon megtoladà te kebenalan diyà te doma otaw. Se sebad otaw, doen imbegay te Espiritu Santo kandin kebiyasa amon meg-indan-indan te toladà amon mekelabet se doma otaw.
1CO 12:9 Se doma otaw, doen imbegay te Espiritu Santo kandin dakel pegsalig diyà te Timanem amon meketabang te doma otaw. Se doma, doen imbegay te Espiritu Santo kandin kebiyasa megpegolì te menge kemolò te mesakit.
1CO 12:10 Doen heman doma binegayan te Espiritu Santo te kebiyasa amon mekeinang te metolos inang diyà te doma otaw. Doen doma otaw mekekeliwat te kagi te Timanem. Se sebad otaw, doen imbegay kandin kebiyasa amon ketegahan din aw kenan lekat se tolos, aw lekat iyan te Timanem aw lekat te bosaw. Se sebad otaw, doen imbegay kandin amon mekeikagi te menge doma kagi eked din kelebeti. Se sebad otaw, doen imbegay kandin kebiyasa amon mekeobad te kagi eked kelebeti.
1CO 12:11 Se kelekatan te kedita te kebiyasa sìyan, yan se Espiritu Santo, aw lekat te ibeg din egpemegay diyà te teg sebad-sebad kenitadon egpemenal.
1CO 12:12 Na, se lawa te otaw, pengkey medita se kemolò diyà te lawa, meneng sebad olò se lawa, so se kedita te kinemoloan niyan netibok diyà te sebad lawa. Iling heman te menge kemolò diyà te lawa se kedita tadon egpemenal, so pengkey medita kidon, meneng migsebad kidon diyà ki Cristo.
1CO 12:13 So se kedita tadon, pengkey Judiyo aw kenà Judiyo, aw pengkey allang aw kenà allang, meneng binonyagan se kedita tadon pineokit te Espiritu Santo amon meinang kidon sebad lawa, aw binegayan se kedita tadon te Espiritu Santo meg-ogpà diyà te pedowan tadon.
1CO 12:14 Ininang se lawa te otaw amon medita se mebatog din inangen, kenà olò sebad se inangen.
1CO 12:15 Pengkey eked pekeawid se benis iling te belad, meneng eked kepakay aw metani se benis diyà te lawa, so kolang se lawa aw wedad benis.
1CO 12:16 Pengkey eked pekekità se telinga iling te mata, meneng eked kepakay aw metani se telinga diyà te lawa, so kolang se lawa aw wedad telinga.
1CO 12:17 Simpana tomalag mata se lawa, eked iyan pekedineg. Simpana tomalag telinga se lawa, eked iyan pekeadek.
1CO 12:18 Meneng se lawa tadon, yan se ininang te Timanem lekat te kandin ibeg, aw doen kekemowan te kedita te kinemoloan diyà te lawa tadon, so insawol te Timanem se kedita niyan kidoen te lawa.
1CO 12:19 Simpana sebad olò se kekemowan te kedita te kinemoloan, eked keinang lawa.
1CO 12:20 Meneng se lawa tadon, pengkey medita se kinemoloan niyan, meneng netibok diyà te sebad lawa.
1CO 12:21 Nayan, eked kepakay aw doen olò mata meneng wedad belad. Eked heman kepakay aw doen olò olo meneng wedad benis,
1CO 12:22 so doen kekemowan tadon te kedita te kinemoloan diyà te lawa, pengkey eneng-enengen tadon te wedad kekemowan.
1CO 12:23 Pengkey aneng-aneng tadon kenà mèpiya se sebad kinemoloan diyà te lawa, meneng yan se ontò eg-ipaten. Aw sìyan kinemoloan diyà te lawa eked kepakay kitaen, yan se ontò tigmesen.
1CO 12:24 Meneng se mepakay kitaen, yan se wedad kekemowan te pegtigmes. Peg-inang te Timanem te lawa tadon, insawol din iyan amon ontò tadon tigmesen se kinemoloan diyà te lawa tadon, amon wedad kolang.
1CO 12:25 Yan kenà egpedindilay se menge kinemoloan diyà te lawa tadon, meneng egpetebangay se kedita niyan.
1CO 12:26 Aw elegen se sebad, imenmanen te kedakel te lawa se kesakit. Aw iduyun se sebad, yan meluba se kedakel te lawa.
1CO 12:27 Se kelebadan te tegdeyanan ko seini, se kedita niyo, iling kaw te lawa i Cristo, aw se teg sebad-sebad kenyo, yan se iling te menge kinemoloan diyà te lawa din.
1CO 12:28 Se kedita tadon egpemenal ki Cristo, tinapid kidon te Timanem te mèpiya, so doen eg-inangen te teg sebad-sebad kenitadon. Monà te kedita, yan se sogounun i Cristo. Se ikedowa, yan se otaw egkeliwat te kagi te Timanem. Se iketelo, yan se otaw megtoladà te kebenalan. Tondog niyan se mekeinang te metolos inang, aw otaw binegayan te kebiyasa amon megpegolì te menge mesakit, aw otaw egpenabang te doma, aw otaw biyasa egpengolo, aw otaw mekeikagi te menge doma kagi eked din kelebeti.
1CO 12:29 Netegahan niyo te kenà kedita tadon tomalag sogounun i Cristo. Kenà kedita tadon egkeliwat te kagi te Timanem. Kenà kedita tadon egtoladà te kebenalan. Kenà kedita tadon binegayan te peg-inang te metolos inang,
1CO 12:30 aw kenà kedita tadon binegayan te kebiyasa amon megpegolì te menge mesakit. Kenà kedita tadon mekeikagi te doma kagi eked kelebeti, aw kenà heman kedita tadon se binegayan te kebiyasa amon mekeobad te kagi eked kelebeti.
1CO 12:31 Meneng keilangan ontò niyo keibegan se ontò mèpiya kebiyasa ibegay te Espiritu Santo kenyo, amon megpetebangay kaw. Meneng ipekità ko kenyo se inang labi pa mèpiya diyà te menge doma kebiyasa sìyan.
1CO 13:1 Aw mekeikagi a te doma kagi te otaw wedà ko peg-ilingi, aw pengkey mekeikagi a te kagi te menge anghil, meneng aw wedad kedakel te pedowan ko diyà te doma otaw, wedad ontong te peg-ikagi ko, so iling a te daging te agong selegsagen aw mekebebingel.
1CO 13:2 Pengkey biyasa a egkeliwat te kagi te Timanem, pengkey doen impetaga-taga te Timanem kanak wedà din petega-tegahi diyà te doma otaw, pengkey netegahan ko se kedita te kebenalan, pengkey ontò a egsalig diyà te Timanem aw yan egpekeinang a te kepelahan, meneng aw wedad kedakel te pedowan ko diyà te doma otaw, wedad ontong kanak.
1CO 13:3 Pengkey tigkan ko ibegay se kedakel te kedònan ko diyà te doma otaw, pengkey mepakay diyà kanak se pegsonog te lawa ko tandà te pegpemenal ko, meneng aw wedad kedakel te pedowan ko diyà te doma otaw, wedad ontong te peg-inang ko kenyan.
1CO 13:4 Seini se eg-inangen te otaw dakel se pedowan din. Melayat se pedowan din, aw mèpiya se eg-inangen din diyà te doma. Kenà eg-ingà. Kenà heman egduyun te pegkeotawun din.
1CO 13:5 Kenà egpelangkaw-langkaw. Doen but din. Wedad kedemet. Kenà mebabaw se pedowan din. Kenà egmalit.
1CO 13:6 Se otaw doen dakel pedowan, eked keluba aw mekesalà se doma, meneng meluba aw mèpiya se eg-inangen te doma.
1CO 13:7 Se otaw dakel se pedowan din, pengkey eden se inangen te doma kandin, eked pegbelisì. Meibeg heman sikandin memenal te mèpiya. Gayed din heman egpelimanan se mèpiya. Pengkey eden se kelimahan domateng kandin, eked sikandin lengà.
1CO 13:8 Wedad temanan te kedakel te pedowan din. Doen kwani aldaw domateng te wedad komeliwat te kagi te Timanem. Megkewedad heman se peg-ikagi te doma kagi eked kelebeti. Wedad heman meg-indan-indan te toladà diyà te doma otaw amon mekelabet.
1CO 13:9 Wedà pa kesikop se netegahan tadon, aw kenà pa botong se pegkeliwat tadon te kagi te Timanem.
1CO 13:10 Meneng aw domateng se modi aldaw, aw metoman se kedita te pakang te Timanem, wedad den kekemowan te netegahan tadon, aw ketenanan tadon iyan so wedà pa kesikop.
1CO 13:11 Yan se iling kanak, so pegkebatà ko kedengan, iling te batà se kagi ko, aw ibeg ko, aw aneng-aneng ko. Meneng pegkedakel ko, limengà a den te pegtengisù so wedà iyan kesikop.
1CO 13:12 Songkani, se pegketaga-taga tadon, yan se iling te bawa kitaen tadon diyà te ispiho eked ontò kebangal. Meneng doen kwani aldaw domateng, bawa i Cristo se ontò tadon kitaen. Pengkey wedà pa kesikop se netegahan ko, meneng domateng kwani se aldaw mesikop se netegahan ko iling te pegketaga-taga te Timanem kanak.
1CO 13:13 Yan doen telo eked palos pegkewedad. Yan se pegsalig tadon, aw pegpeliman tadon, aw pegkedakel te pedowan tadon. Meneng se ontò melangkaw diyà te telo sìyan, yan se pegkedakel te pedowan.
1CO 14:1 Nayan, keilangan peg-ilingan niyo se pegkedakel te pedowan. Meneng mèpiya aw meibeg kaw te kebiyasa ibegay te Espiritu Santo kenyo, amon meketabang kaw te doma niyo. Se ontò mèpiya kebiyasa, yan se pegkeliwat te kagi te Timanem.
1CO 14:2 Aw mikagi se otaw te doma kagi eked kelebeti, kenà doma otaw se ikegiyan din kenyan, meneng Timanem se ikegiyan din, so pengkey wedad otaw mekelabet te kagi din, meneng pineokit te Espiritu Santo, ikegiyen din se kebenalan wedà ketegahi te doma otaw.
1CO 14:3 Meneng aw komeliwat se otaw te kagi te Timanem, doma otaw se ikegiyan din kenyan, amon ketebangan din se pegsalig dan te Timanem, aw amon entagen din heman se pedowan dan, aw amon meketayod dan heman te kelimahan.
1CO 14:4 Aw mikagi se otaw te doma kagi eked kelebeti, olò kandin pegkeotawun se ketebangan din. Meneng aw komeliwat se otaw te kagi te Timanem, yan se meketabang te kedita te doma otaw egsimba.
1CO 14:5 Pengkey ibeg ko mekeikagi se kedita niyo te doma kagi eked kelebeti, meneng labi pa mèpiya aw mekekeliwat kaw te kagi te Timanem amon ketebangan se doma otaw egsimba. Labi pa mèpiya se pegkeliwat te otaw te kagi te Timanem diyà te peg-ikagi te otaw te kagi eked kelebeti aw wedad otaw mekeobad te ikegiyen din.
1CO 14:6 Menge kedowa ko, simpana domoton a kenyo, aw olò a mikagi te kagi eked niyo kelebeti, wedad ontong niyo singed aw mikagi a te impetaga-taga te Timanem kanak, aw megpekelabet a kenyo te kebenalan, aw komeliwat a te kagi te Timanem, aw megtoladà a kenyo.
1CO 14:7 Iling te daging te seluli aw kitara, aw eked iyan kelitok, eked ketegahi aw eden se litok.
1CO 14:8 Iling heman te peg-edop te bodyong amon metipon se menge otaw mato te menge mengayaw, so aw eked kelitok se peg-edop kenyan, wedad meketagad.
1CO 14:9 Sikiyo heman, aw eked kebangal se ikegiyen niyo, wedad mekelabet kenyo aw wedad ontong kenyan, so ipalid olò te kelamag se kagi niyo.
1CO 14:10 Doen medita kemolò te kagi te otaw dini te keneyonan, aw doen kedegdagan te teg sebad-sebad kenyan.
1CO 14:11 Meneng aw eked ko kelebeti se kagi te otaw mikagi kanak, yan se iling te otaw kenà tege dini, aw iling a heman kandin.
1CO 14:12 Sikiyo heman, aw meibeg kaw te kebiyasa ibegay te Espiritu Santo, yan mèpiya aw keibegan niyo se kebiyasa meketabang te menge doma niyo egsimba.
1CO 14:13 Aw doen otaw kidoen kenyo mekeikagi te kagi eked kelebeti, keilangan pemoyoen din diyà te Espiritu Santo se kebiyasa amon meobad din se kagi din eked kelebeti.
1CO 14:14 Aw megtawal-tawal a te kagi eked kelebeti, pengkey megtawal-tawal se pedowan ko, meneng eked taking se aneng-aneng ko.
1CO 14:15 Aw iling kenyan, seini se inangen ko. Megtawal-tawal a te kagi eked ko kelebeti imbegay te Espiritu Santo kanak, meneng megtawal-tawal a heman te kagi kelebetan. Aw megdelangan a te kagi eked ko kelebeti imbegay te Espiritu Santo kanak, megdelangan a heman te kagi kelebetan ko.
1CO 14:16 Aw megpesiontong kaw diyà te Timanem te kagi eked kelebeti, eked pegpesiontong se doma otaw egsimba doma kenyo singed aw doen meg-obad kenyan, so eked dan kelebeti se eg-ikegiyen niyo.
1CO 14:17 Pengkey ontò mèpiya se pegpesiontong niyo diyà te Timanem, meneng eked ketebangi se menge doma otaw.
1CO 14:18 Egpesiontong a diyà te Timanem so egpekeikagi a te kagi eked kelebeti, aw labi a pa ontò biyasa diyà te kedita niyo.
1CO 14:19 Meneng aw doen doma ko megsimba, mèpiya aw ikegiyen ko se kagi kelebetan dan amon ketoledaan ko dan. Pengkey olò lima kagi kelebetan dan se ikegiyen ko, yan se labi pa mèpiya diyà te sempolò melalan kagi ikegiyen ko eked dan kelebeti.
1CO 14:20 Menge kedowa ko, ikà niyo eg-iling te mengisù wedad inenengen. Pengkey mèpiya aw iling kaw te mengisù wedad toig meg-inang te salà, meneng diyà te aneng-aneng niyo, pekitai niyo te metesan kaw den.
1CO 14:21 Doen kagi te Timanem insolat, te pengkey doen menge otaw lekat te mediyò ogpeanan eg-ikagi te sebad kemolò kagi, aw pengkey pineokit kandan mikagi se Pengolo diyà te menge otaw pinemallì din, meneng kunù eked dan penenalan.
1CO 14:22 Yan ketegahan tadon ini. Se peg-ikagi te kagi eked kelebeti, yan se petaga-taga te Timanem diyà te otaw egpengela te metoman dan detengan te pelumun, aw kenà ini petaga-taga diyà te otaw egpemenal. Meneng se pegkeliwat te kagi te Timanem, yan se tabang te Timanem diyà te otaw egpemenal, so kenà ini tabang diyà te otaw egpengela.
1CO 14:23 Aw metipon kaw megsimba, aw mikagi se kedita niyo te kagi eked kelebeti, aw penga niyan mawop se otaw kenà egpemenal aw wedà ketoledai te kebenalan, yan mekeaneng-aneng sikandin te migkebook kaw den, so wedà sikandin pekelabet.
1CO 14:24 Meneng aw se kedita mikagi, komeliwat dan te kagi te Timanem, aw penga niyan mawop se otaw kenà egpemenal aw wedà ketoledai te kebenalan, yan aw menenalan sikandin, ketegahan din te benal sikandin mig-inang te medaet, aw mikagi sikandin te benal doen salà din diyà te Timanem.
1CO 14:25 Ipeaneng-aneng kandin se medaet diyà te pedowan din, aw penga niyan tomikelong, aw megsimba te Timanem, aw mikagi sikandin te benal doen Timanem doma niyo.
1CO 14:26 Nayan menge kedowa ko, aw metipon kaw megsimba, seini se mèpiya inangen niyo. Doen megdelangan tepad te pegduyun te Timanem. Doen heman doma megtoladà. Doen heman doma meg-indan te kebenalan impekità te Timanem kandin. Se doma mikagi te kagi eked kelebeti, aw meg-obad heman se doma kenyan. Inangi niyo ini amon ketebangan se kedita niyo egtaking ki Cristo.
1CO 14:27 Aw doen otaw meibeg mikagi te kagi eked kelebeti, mepakay aw taman olò te dowa aw kenà telo se megpetibos-tibosay mikagi, aw penga niyan keilangan doen otaw meg-obad.
1CO 14:28 Meneng aw wedad otaw kidoen biyasa meg-obad kenyan, keilangan wedad mikagi te kagi eked kelebeti kidoen te simbahan. So aw wedad meg-obad, mepakay aw iduyun din se Timanem te kagi eked kelebeti te wedad doma din.
1CO 14:29 Aw doen otaw kidoen kenyo biyasa komeliwat te kagi te Timanem, mepakay aw dowa aw kenà telo olò se mikagi, aw keilangan menenalan se kedita megsimba, amon ketegahan dan aw metòlid se ikegiyen dan.
1CO 14:30 Meneng aw doen ipekità te Timanem diyà te sebad otaw, ipetunung onà se monà migtoladà.
1CO 14:31 Aw yan se inangen niyo, meketoladà se kedita te telekeliwat te kagi te Timanem te petibos-tibosay, amon mekeiling se kedita niyo megsimba, aw meantag heman se pedowan te kedita niyo timaking ki Cristo.
1CO 14:32 Se otaw biyasa megkeliwat te kagi te Timanem, mepakay din ipetunung se kagi din,
1CO 14:33 so kenà lekat te Timanem se belisì, meneng sikandin se kelekatan te kelinaw te pedowan. Iling te ketanem te kedita te sakop te Timanem egsimba doton te teg sebad-sebad lonsod,
1CO 14:34 egkepenek se menge bayi doton te simbahan, so eked kepakay aw mikagi dan. Doen heman kagi te Timanem insolat, te keilangan tomolò se bayi te meama.
1CO 14:35 Aw meibeg se bayi meg-insà, keilangan meg-insà sikandin te esawa din doton te balay, so kenà mèpiya aw mikagi se bayi kidoen te simbahan.
1CO 14:36 Doen besi menge otaw kidoen kenyo egpengela te intoladà ko seini. Mig-aneng-aneng dan besi te sikiyo tege Korinto se tagnà pinetega-tegahan te Timanem te kebenalan. Aneng-aneng dan besi, sikiyo olò se binegayan te kebenalan.
1CO 14:37 Aw doen otaw kidoen kenyo meg-aneng-aneng te sikandin se komeliwat te kagi te Timanem, aw doen doma kebiyasa din imbegay te Espiritu Santo kandin, yan keilangan ketegahan din te ontò punù te Pengolo tadon se insolat ko seini.
1CO 14:38 Aw wedà sikandin pemenal te lekat te Pengolo tadon se punù seini, ikà niyo egpenenalan kandin.
1CO 14:39 Nayan menge kedowa ko, ontò kaw pekeaseb te pegkeliwat te kagi te Timanem, meneng ikà niyo egsagda te peg-ikagi te kagi eked kelebeti.
1CO 14:40 Keilangan inangen niyo se kedita diyà te kebenalan aw kedalem te pedowan.
1CO 15:1 Nayan menge kedowa ko, todà a meg-indan kenyo tepad ki Cristo, so yan se Mèpiya Indan intoladà ko kenyo, aw pinemenalan niyo, aw in-awop niyo te pedowan.
1CO 15:2 Aw dimasel se pegpemenal niyo, aw nelobos se pedowan niyo, nekelowà kaw den lekat te salà pineokit te pegpemenal niyo te kebenalan intoladà ko kenyo.
1CO 15:3 Se intoladà te Timanem kanak, yan se ingkeliwat ko heman diyà kenyo. Seini se kebenalan ontò melangkaw te kedita. Nematay si Cristo amon megpelowà kenitadon lekat te salà, aw yan netoman se kagi te Timanem tapay insolat gebii.
1CO 15:4 Inlebeng sikandin, aw penga niyan te iketelo te aldaw, inantay sikandin te Timanem lekat te nematay, aw yan netoman se kagi te Timanem tapay insolat.
1CO 15:5 Penga te pegkeantay din lekat te nematay, onà migpekità diyà ki Pedro, aw penga niyan migpekità heman diyà te menge doma tinoledaan din.
1CO 15:6 Penga niyan, migpekità heman diyà te otaw tapay egtaking kandin, aw lampas te lima gatos se otaw netipon kimità kandin. Doen den nematay kandan, meneng doen pa medita kandan wedà kematay lamig songkani.
1CO 15:7 Migpekità heman si Cristo diyà ki Santiago, aw penga niyan migpekità heman diyà te kedita te sogounun i Cristo.
1CO 15:8 Siaken se temanan modi kimità kandin, pengkey wedad palos migpeliman te pegpemenal ko.
1CO 15:9 Siaken se ontò medanà diyà te kedita te sogounun i Cristo. Eked a peden tewali sogounun i Cristo, so kedengan te wedà a pa pemenal ki Cristo, gayed a egpemilang te menge otaw egpemenal te Timanem.
1CO 15:10 Meneng pineokit te tabang te Timanem kanak, ininang a din sogounun i Cristo. Doen detengan te tabang din kanak, so labi a pa measeb diyà te kedita te doma sogounun i Cristo te peg-inang ko. Meneng kenà lekat te kanak eneg se nebatog ko, so Timanem se migtabang kanak.
1CO 15:11 Pengkey sinu se measeb, pengkey siak aw pengkey doma, meneng kebenalan se intoladà day, aw yan se pinemenalan niyo.
1CO 15:12 Nayan, so migtoladà kay te inantay te Timanem si Cristo lekat te nematay, eked kepakay aw doen kidoen kenyo mikagi te eked palos keantay se otaw nematay.
1CO 15:13 Simpana wedad palos keentayan lekat te nematay, wedà peden keantay si Cristo.
1CO 15:14 Simpana wedà keantay si Cristo lekat te nematay, yan wedad ontong te pegtoladà day, aw wedad heman ontong te pegpemenal niyo kandin.
1CO 15:15 Aw iling kenyan, migkebolalaw kay tepad te ininang te Timanem, so migtoladà kay te Timanem se mig-antay ki Cristo lekat te nematay. Meneng simpana wedad palos entayen te Timanem, kebolalaw se intoladà day.
1CO 15:16 Simpana wedad keentayan lekat te nematay, yan wedà entayi te Timanem si Cristo lekat te nematay.
1CO 15:17 Simpana wedà entayi si Cristo, wedad ontong te pegpemenal niyo ki Cristo, aw doen pa salà niyo.
1CO 15:18 Aw iling kenyan, dinetengan den te pelumun te Timanem se otaw nematay, pengkey simalig dan diyà ki Cristo kedengan.
1CO 15:19 Simpana wedad palos mèpiya pelimanan tadon ki Cristo penga te pegkematay tadon, labi kidon pa mekelelayò diyà te menge doma otaw, aw eked kidon keantay lekat te nematay.
1CO 15:20 Meneng seini se kebenalan. Inantay man si Cristo lekat te nematay, aw yan se ipetaga-taga te metoman heman entayen te Timanem lekat te nematay se kedita te otaw simalig kandin.
1CO 15:21 Pineokit te medaet inang te sebad otaw, doen den kemetayun domateng diyà te kedita te otaw, meneng pineokit te mèpiya inang te sebad otaw, doen den keentayan lekat te nematay.
1CO 15:22 Pengkey egkematay se kedita tadon menge bowad-bowad i Adam, meneng entayen se kedita tadon menge otaw migsebad ki Cristo.
1CO 15:23 Entayen kidon te Timanem te aldaw pinemallì din, so onà inantay si Cristo, aw penga niyan te peglikò din dini te keneyonan, entayen se kedita tadon menge sakop din.
1CO 15:24 Penga niyan, metoman se kedita, so domaeg si Cristo te kedita te poon din pengkey kenan. Penga niyan, ipetunung din se peglowan din, aw iolì se kelangkaw te peglowan diyà te Timanem Amay,
1CO 15:25 so lomowan pa si Cristo lamig te aldaw dàgen din se kedita te poon din aw tomolò dan kandin.
1CO 15:26 Aw dàgen i Cristo se kedita te poon din, se temanan te poon dàgen din, yan se kemetayun. Pengkey dàgen se kedita, meneng eked dàgi se Timanem nemegay te kedita diyà ki Cristo.
1CO 15:28 Aw metoman ipetolò i Cristo se kedita, penga niyan, tomolò heman si Cristo sipat kedita te timolò kandin diyà te Timanem Amay nemegay te kedita diyà kandin, amon Timanem se lomowan diyà te kedita.
1CO 15:29 Simpana wedad keentayan lekat te nematay, wedad besi ontong aw bonyagan se otaw egpeliman te todà din kitaen se otaw nematay, so simpana wedad palos entayen lekat te nematay, wedad pelimanan te otaw megpebonyag.
1CO 15:30 Simpana wedad keentayan, wedad heman ontong te pegtayod ko te kelimahan egdateng kanak te kelikit te aldaw.
1CO 15:31 Menge kedowa ko, Pengolo tadon si Jesu Cristo se netaga-taga te benal a neluba kenyo. Netegahan din heman te agpet a eg-imetayan te kelikit te aldaw tandà te pegtaking ko kandin.
1CO 15:32 Dini te Efeso, ontò mebolot se otaw, so iling a te migbolaw te menenanap te kebenesan, so kenà dan egtolò te toladà ko. Meneng wedad ontong te pegtayod ko kenyan aw simpana eked palos entayi se otaw nematay. Simpana wedad keentayan, labi pa mèpiya aw tomaking kidon te otaw eg-ikagi te mepakay aw olò kidon komaen aw minem so agpet kidon den matay.
1CO 15:33 Peg-ahà kaw amon eked kaw keekali, so kebàtan te otaw medaet se menge otaw tomaking kandan.
1CO 15:34 Peketòlid kaw. Lengai niyo den se peg-inang niyo te salà. Simolat a kani kenyo amon meyàyà kaw, so medita pa se otaw kidoen kenyo eg-inang te salà, aw wedà ketaga-taga te kebenalan tepad te inang te Timanem.
1CO 15:35 Doen pa besi doton kenyo eg-insà aw menonen te Timanem se peg-antay din te otaw matay, aw doen besi heman otaw eg-insà aw eden se bawa te otaw aw entayen.
1CO 15:36 Wedad inenengen te otaw eg-insà kenyan, so wedà dan eneng-enengi se benì ipanggas. Eked tobò se benì singed aw onà ilebeng.
1CO 15:37 Wedà tapay tilles se ipanggas, meneng olò benì wedà pa tilles se ipanggas, pengkey trigo aw doma kemolò te benì.
1CO 15:38 Timanem se egpemallì aw eden se tomobò lekat te benì ipegpanggas niyo, so pengkey eden kemoloi te benì se ipanggas niyo, gayed iyan tomobò.
1CO 15:39 Pengkey doen lawa te teg sebad-sebad ininang te Timanem, meneng kenà dan onawa, so sebad kemolò se lawa te otaw, aw sebad se lawa te ayam-ayam, aw sebad heman se lawa te manok, aw sebad pa heman se lawa te ikan.
1CO 15:40 Doen lawa te tege langit, aw doen heman lawa te tege tanà. Meneng kenà onawa se palas te lawa te tege langit aw palas te lawa te tege tanà.
1CO 15:41 Sebad kemolò se palas te aldaw, aw sebad heman se palas te bolan, aw sebad pa heman se palas te menge bitoen. Pengkey pa diyà te menge bitoen, kenà onawa se palas te kedita niyan.
1CO 15:42 Iling heman kenyan aw entayen te Timanem se otaw nematay, so se lawa tadon dini te keneyonan, yan se kemolò te lawa matay aw ilebeng. Meneng se lawa meantay, yan se kemolò te lawa eked palos kematay.
1CO 15:43 Pengkey medaet se bawa tadon, meneng aw entayen kidon, ontò den mèpiya se bawa tadon. Pengkey egkelomay kidon songkani, meneng eked pegkelomay se kaling lawa tadon.
1CO 15:44 Se lawa tadon ilebeng, yan se lawa tadon dini te keneyonan. Meneng aw entayen kidon te Timanem, doen heman kaling lawa ibegay din kenitadon doton te langit. So netegahan niyo den te doen lawa tadon dini te keneyonan, yan ketegahan niyo heman te doen kwani heman kaling lawa tadon doton te langit.
1CO 15:45 Doen kagi te Timanem insolat, te peg-inang te Timanem te tagnà otaw si Adam, yan se binegayan din te pedowan. Meneng si Cristo ingedanan Temanan Adam, sikandin se egpemegay te kaling pedowan.
1CO 15:46 Kenà monà se kaling lawa doton te langit, meneng monà se lawa tadon dini te tanà, aw penga niyan doen lawa tadon doton te langit.
1CO 15:47 Se Tagnà Adam, yan se lekat te tanà, so ininang te Timanem se lawa din lekat te tanà. Meneng se Ikedowa Adam si Cristo, yan se lekat te langit.
1CO 15:48 Se kedita tadon dini te tanà, iling kidon te tagnà otaw ininang lekat te tanà. Se kedita tadon migsebad se pedowan tadon ki Cristo, aw domateng kidon doton te langit, meinang kidon iling ki Cristo.
1CO 15:49 Aw ininang te tanà se lawa tadon seini iling te lawa i Adam, doen aldaw domateng mebaloy se lawa tadon doton te langit iling te lawa i Cristo.
1CO 15:50 Menge kedowa ko, seini se kedegdagan te inikagi ko. Se lawa tadon seini dini te tanà, eked palos pekeakop diyà te peglowan te Timanem, so se lawa tadon egkematay, eked peketayod te wedad temanan.
1CO 15:51 Nayan, ikegiyen ko den kenyo se kebenalan wedà pa petega-tegahi te Timanem. Eked kematay se kedita tadon, meneng tigbayà se lawa tadon keselilinan te kaling lawa.
1CO 15:52 Tigbayà iyan meinang te sebad pegpulà-pulà. Meinang iyan aw dinegen se peg-edop te bodyong ipetaga-taga te dimateng den se temanan. Aw edopen se bodyong, penga niyan entayen te Timanem se nematay diyà te kaling lawa eked palos kematay. Aw sikitadon wedà pa kematay, inangen heman kaling se lawa tadon,
1CO 15:53 so se lawa tadon doen temanan, keilangan selilinan te lawa wedad temanan. Se lawa tadon egkematay, keilangan selilinan te lawa eked palos kematay.
1CO 15:54 Nayan, se lawa tadon doen temanan aw egkematay, aw keselilinan den te lawa wedad temanan aw eked heman kematay, yan metoman den se pakang insolat diyà te kagi te Timanem, te megkewedad se kemetayun so dàgen den.
1CO 15:55 “Duyuni niyo se Timanem, so dinaeg den se kemetayun. Eked kidon den detengi te kemetayun.”
1CO 15:56 Egdetengan kidon te kemetayun so nekesalà kidon. Nekesalà kidon so wedà kidon peketolò te punù te Timanem.
1CO 15:57 Meneng megpesiontong kidon diyà te Timanem, so dinaeg din den se kemetayun pineokit te Pengolo tadon si Jesu Cristo, amon tebangan kidon.
1CO 15:58 Menge kedowa ko egkedekelan ko te pedowan, lobosi niyo se pegtaking niyo te Pengolo tadon. Ikà niyo egpedaeg te toladà kebolalaw. Pegpekeaseb kaw tolò te ibeg te Timanem kenyo, so netegahan niyo den te doen ontong te kedita te inangen tadon aw tomolò kidon te Pengolo tadon.
1CO 16:1 Nayan, tepad te kwarta ibegay niyo itabang te menge kedowa tadon sakop te Timanem doton te Jerusalem, taking kaw heman te impunù ko diyà te menge otaw egsimba doton te probinsya te Galasya.
1CO 16:2 Seini se inangen niyo. Kelikit te Linggo, itagò te teg sebad-sebad kenyo se kwarta ibegay lekat te neabat niyo te monà simana, amon tapay meketagad se ibowang niyo aw lomaoy a todà kidoen kenyo.
1CO 16:3 Aw domateng a kidoen kenyo, isogò ko se menge otaw egkeseligan niyo amon mengibing dan te tabang niyo doton te Jerusalem.
1CO 16:4 Aw keilangan domoton a heman te Jerusalem, tomaking dan kanak.
1CO 16:5 Aw domoton a kenyo, mokit a te probinsya te Masidonya, so ibeg ko onà a mokit doton te eked kenamay.
1CO 16:6 Meneng aw domateng a kidoen kenyo, menamay a meg-ogpà kidoen, lamig te meobos se pengodan. Aw metoman iyan, sikiyo se megtabang kanak amon meketagad a domeleg pengkey doton te doma ogpeanan.
1CO 16:7 Eked a keibeg aw olò a mapit kenyo te eked kenamay, so ibeg ko meg-ogpà a kidoen kenyo te menamay, aw mepakay diyà te Pengolo tadon.
1CO 16:8 Meg-ogpà a dini te Efeso taman te pista iningedanan Pentekostes,
1CO 16:9 so ontò measeb se otaw dini menenalan te itoladà ko, aw doen pa medita inangen ko, pengkey medita se otaw meibeg megsagda kanak.
1CO 16:10 Aw domateng si Timoteo kidoen kenyo, liyag kaw kandin amon eked sikandin kelemitan, so sikandin heman se insogò te Pengolo iling kanak.
1CO 16:11 Yan eked kepakay aw eked kaw pegsagman kandin. Meneng tebangi niyo sikandin, amon melinaw se pedowan din aw molì diyà kanak, so migpeliman a te peg-olì din dini, sipat menge doma kedowa tadon dini.
1CO 16:12 Se kedowa tadon si Apolos, ontò ko pinemoyò te tomaking sikandin te menge doma kedowa domoton kenyo, meneng ibeg din ekon eked pa tagmon doton kenyo. Aw doen ketagad din, yan domoton kenyo.
1CO 16:13 Nayan, peg-ahà kaw. Lobosi niyo se pedowan te pegsalig niyo ki Cristo. Ikà niyo egketalaw, meneng pekeaseb kaw.
1CO 16:14 Pengkey eden se inangen niyo, keilangan dakel se pedowan niyo.
1CO 16:15 Nayan menge kedowa ko, netegahan niyo te si Estepanos aw pamilya din se tagnà simalig ki Cristo doton te probinsya niyo te Gresya, aw lekat te ibeg te pedowan dan gayed dan egpenabang te menge doma sakop te Timanem. Na, pemoyoen ko den sikiyo
1CO 16:16 te tekingan niyo se otaw iling kenyan aw menge doma egtelaban kandan.
1CO 16:17 Ontò a neluba te pegdateng i Estepanos aw si Partonato aw si Akayko, so pengkey netetana a kenyo, meneng neabat te pegdateng dan.
1CO 16:18 Migkagsen se pedowan ko pineokit kandan, aw netegahan ko te migkagsen heman se kenyo pedowan pineokit kandan. Mèpiya aw iduyun niyo se otaw iling kandan.
1CO 16:19 Se kedita te otaw egpemenal dini te probinsya te Asya, ibeg dan metaga-taga kaw te eg-aneng-aneng dan kenyo. Doen heman inikagi i Akilas aw esawa din si Priscila, sipat kedita te otaw egtipon aw egsimba doton te balay dan, te eg-aneng-aneng dan kenyo, so migsebad se pedowan niyo te Pengolo tadon.
1CO 16:20 Onawa se kagi te kedita te kedowa tadon dini. Pegpeliyagay kaw se kedita niyo egpemenal, so yan se pengilala te egpedekelay kidon te pedowan.
1CO 16:21 Siak si Pablo, somolat a kani te dakel heman se pedowan ko kenyo.
1CO 16:22 Pengkey sinu se wedad pedowan diyà te Pengolo tadon, ipelumun dan. Lomikò se Pengolo tadon te eked kenamay.
1CO 16:23 Ibeg ko, tebangan kaw te Pengolo tadon si Jesus.
1CO 16:24 Gayed dakel se pedowan ko diyà te kedita niyo migpesakop diyà ki Jesu Cristo.
2CO 1:1 Seini se solat ko, si Pablo, doma ki Timoteo, kedowa tadon te pegpemenal. Lekat te ibeg te Timanem, siak se sebad sogounun i Jesu Cristo. Seini se solat ko diyà te kedita niyo menge sakop te Timanem kidoen te Korinto, aw diyà te kedita niyo menge sakop din doton te doma ogpeanan te Gresya.
2CO 1:2 Ibeg ko, tebangan kaw te Timanem Amay aw Pengolo tadon si Jesu Cristo. Ibeg ko heman, begayan kaw te Timanem te kelinaw te pedowan.
2CO 1:3 Iduyun se Timanem, Amay te Pengolo tadon si Jesu Cristo. Lekat kandin se keido, aw sikandin heman se egtabang.
2CO 1:4 Pengkey eden se kelimahan ko, ontò a din egtebangan. Yan pengkey eden se kelimahan te doma otaw, meketabang a heman kandan pineokit te tabang imbegay te Timanem kanak.
2CO 1:5 Aw ontò a pemilangen iling ki Cristo, ontò a heman tebangan pineokit ki Cristo.
2CO 1:6 Neketayod a pa te kelimahan amon meketabang a kenyo, aw amon mekelowà kaw lekat te kelimahan. Tinebangan a te Timanem amon meketabang a heman kenyo. Metoman iyan aw meketayod kaw te kelimahan iling te neokitan ko.
2CO 1:7 Metoman se egpelimanan ko tepad kenyo, so netegahan ko ini, aw pemilangen kaw, tebangan kaw heman te Timanem.
2CO 1:8 Menge kedowa ko, ibeg ko, metaga-taga kaw tepad te kelimahan neokitan ko doton te Asya, so ontò iyan dakel aw pelaban mebegat. Eden ko aw yan den se aldaw te pegkematay ko,
2CO 1:9 so aneng-aneng ko metoman a imetayan. Meneng lekat te ibeg te Timanem se peg-aneng-aneng ko kenyan, amon wedad doma seligan ko, olò Timanem, so sikandin se meg-antay te menge otaw lekat te nematay.
2CO 1:10 Penga niyan, impelowà a din lekat te medaet kelimahan sìyan. Sikandin se egseligan ko megpelowà heman kanak, pengkey eden se kelimahan domateng kanak.
2CO 1:11 Mèpiya aw megtabang kaw kanak pineokit te pegtawal-tawal niyo diyà te Timanem, amon megpesiontong se medita otaw diyà te Timanem tandà te pegpelowà din kanak pineokit te pegtawal-tawal te medita otaw.
2CO 1:12 Ontò a neluba, so netegahan ko te ontò metòlid se keogpà ko. Pengkey kenan a pesalo, aw labi pa doton kenyo, metòlid se keogpà ko aw mèpiya heman se tod ko kenà pineokit te kenaken kebiyasa, meneng pineokit te tabang te Timanem kanak.
2CO 1:13 Insolat ko olò se mebatog niyo besahen aw kelebetan. Pengkey doen pa kidoen kenyo wedà pekelabet, meneng ibeg ko, mekelabet se kedita niyo amon megpelubahay kidon te aldaw te peglikò te Pengolo tadon si Jesus.
2CO 1:15 Na, so netegahan ko te mekelabet se kedita niyo, yan mig-aneng-aneng a te meglegeb a kidoen kenyo te mekedowa, amon ontò kaw meluba, so ibeg ko, mapit a kidoen kenyo te pegpesalo ko doton te Masidonya. Kepenga niyan, todà a mapit kidoen kenyo te pegpesalo ko doton te Judiya, amon meketabang kaw kanak.
2CO 1:17 Pengkey wedà a pa pekedeleg, meneng kenà egdowa-dowa se ibeg ko lomaoy kenyo. Siak kenà iling te doma otaw kenà egkeseligan aw melomì egketodà se aneng-aneng.
2CO 1:18 Egkeseligan se Timanem, aw netegahan din te ontò benal se intoladà ko kenyo.
2CO 1:19 Kenà egdowa-dowa se Batà te Timanem si Jesu Cristo, sìyan intoladà day si Silas aw si Timoteo. Ontò egkeseligan si Jesu Cristo,
2CO 1:20 so metoman se kedita te pakang te Timanem pineokit kandin, aw yan se doun te eg-ikagi kay te kebenalan pineokit kandin amon iduyun tadon se Timanem.
2CO 1:21 Sikandin se egtabang kenami sipat sikiyo amon ontò kidon tomaking ki Cristo. Timanem heman se nemallì kenitadon.
2CO 1:22 Impetaga-taga din te batà kidon din pineokit te Espiritu Santo imbegay din meg-ogpà dini te pedowan tadon, amon ketegahan tadon te metoman se kedita te pakang din.
2CO 1:23 Na, wedà a deleg doton kenyo amon eked a pemegay kenyo te lidò pineokit te pegsagda ko kenyo. Labi pa mèpiya aw megselsel kaw te eked a pa doton. Pinemoyò ko se Timanem megsistigos te ontò benal se inikagi ko seini.
2CO 1:24 Kenà ko se egsogò kenyo tepad te pegpemenal, so nelobos den se pegpemenal niyo. Meneng egtelaban a kenyo tepad te pegpemenal amon meluba kaw.
2CO 2:1 Netibok se aneng-aneng ko. Eked a pa tagmon doton kenyo amon eked a pemegay kenyo te lidò iling te neinang ko kedengan.
2CO 2:2 Simpana melidò kaw kidoen pineokit te pegsagda ko te eg-inangen niyo medaet, yan eked kaw pekesinalay kanak.
2CO 2:3 Simolat a kenyo kedengan amon tòliden niyo se inang niyo, amon eked a niyo kebegayi te lidò aw domoton a. Sikiyo peden se memegay kanak te luba, so netegahan ko den aw tomolò kaw te insolat ko, yan meluba se kedita tadon.
2CO 2:4 Pegsolat ko kenyo kedengan, ontò nelidò se pedowan ko aw nekekelag a. Simolat a kenyo kenà amon kebegayan ko sikiyo te lidò, meneng amon ipetaga-taga ko kenyo te ontò ko sikiyo nedekelan te pedowan.
2CO 2:5 Na, tepad te sìyan otaw kidoen kenyo mig-inang te medaet kedengan, kenà olò siak se binegayan din te lidò, meneng se doma heman doton kenyo.
2CO 2:6 Botongi niyo den se pegpelumun kandin, so migselsel den sikandin.
2CO 2:7 Mèpiya aw pegwedaden niyo den se salà ininang din. Sinelayi niyo se pedowan din amon eked sikandin lengà te pegpemenal so pelaban nelidò se pedowan din.
2CO 2:8 Ibeg ko, todà niyo sikandin kedekelan te pedowan.
2CO 2:9 Yan se doun te simolat a kenyo kedengan tepad te otaw sìyan, amon ketegahan ko aw ontò niyo toloen se kedita te impunù ko kenyo tepad kandin.
2CO 2:10 Aw pegwedaden niyo se salà ininang din, siak heman megwedad kenyan. Aw pigwedad niyo den, pigwedad ko den heman amon kèpiyaan kaw, so mèpiya iyan diyà ki Cristo.
2CO 2:11 Mèpiya aw pegwedaden tadon se salà ininang te otaw sìyan amon eked kidon keekali i Satanas, so ontò tadon den netegahan se menge medaet ibeg i Satanas.
2CO 2:12 Nayan, pegdoton ko te Troas amon megtoladà a te Mèpiya Indan tepad ki Cristo, kinità ko te doen dalan impetagad te Pengolo kanak amon megtoladà a.
2CO 2:13 Meneng gayed netetana se pedowan ko, so wedà pa dateng doton se kedowa tadon si Tito lekat kidoen kenyo, aw penga niyan, nesayo a dimeleg doton te Masidonya.
2CO 2:14 Meneng ontò a egpesiontong diyà te Timanem, so sikandin se nenalo kenitadon, aw impetaking kidon din te ibeg din, aw impeakop kidon din diyà ki Cristo. Insalig te Timanem diyà kenitadon se kebenalan tepad ki Cristo amon ipetaga-taga tadon iyan diyà te kedita te otaw, so mèpiya se kebenalan tepad ki Cristo, iling te sebad metinadeg keedekan pengkey kenan.
2CO 2:15 Meluba se Timanem aw megtoladà a tepad ki Cristo diyà te menge otaw nemenal aw diyà heman te menge otaw ipelumun.
2CO 2:16 Na, se otaw memenal te itoladà ko, yan se begayan te Timanem te kaling pedowan aw keentayan wedad temanan. Meneng se otaw eked pemenal, yan se detengan te kemetayun wedad temanan. Pengkey doen otaw eg-aneng-aneng te wedad mekebatog megtoladà kenyan, meneng egpekebatog a so egtebangan a te Timanem.
2CO 2:17 Kenà a iling te menge doma otaw egtoladà te kagi te Timanem amon mengewarta. Meneng insogò a te Timanem, aw netegahan din te nelobos se pedowan ko te pegtoladà te Mèpiya Indan tepad ki Cristo.
2CO 3:1 Kenà ko ipegduyun se kanak pegkeotawun. Kenà a iling te menge doma otaw egtoladà, so eked niyo dan segmani singed aw doen solat ipekità dan. Kenà a heman iling te doma otaw egtoladà, so eked dan heman segmani te menge doma otaw singed aw doen solat lekat kenyo.
2CO 3:2 Sikiyo se iling te solat megpekilala kanak doton te kedita te doma otaw, so nemenal kaw den ki Cristo lekat te pegtoladà ko.
2CO 3:3 Si Cristo se migtodà te kenyo pedowan lekat te pegtoladà ko, aw pineokit te tabang te Espiritu Santo wedad temanan din. Ketegahan iyan kenà pineokit te insolat, meneng pineokit te ininang te Espiritu Santo. Insolat iyan kenà kidoen te bato, meneng kidoen te pedowan niyo.
2CO 3:4 Insolat ko seini so egsalig a te Timanem pineokit ki Cristo.
2CO 3:5 Kenà lekat te kanak aneng-aneng aw kebiyasa se nekebatog te ininang ko doton kenyo, meneng lekat te Timanem se kebiyasa,
2CO 3:6 so sikandin se nemegay te kebiyasa kanak aw migsogò kanak megtoladà te doen kaling peokit ininang din. Kenà punù insolat se ipegkeliwat ko, meneng ipegkeliwat ko se intoladà te Espiritu Santo kanak. Se tapay punù insolat, yan olò se egpetaga-taga te menge otaw te medaet se pedowan dan. Meneng se Espiritu Santo, yan se egpemegay te kaling pedowan.
2CO 3:7 Insolat te Timanem diyà te bato se punù din ingkeliwat i Moises. Pegsolat din te punù sìyan, impeketin din ki Moises se keanyag din, aw penga niyan kinità te menge bowad-bowad i Israel se keanyag te Timanem diyà te bawa i Moises. Ontò minanyag se bawa din igsà wedà ontò peketengteng se menge otaw diyà kandin, so nelemitan dan pengkey gayed migpeloway se keanyag migkewedad. Se punù ingkeliwat i Moises, yan se egpetaga-taga te menge otaw te pelumun aw kemetayun wedad temanan. Pengkey mèpiya se impekità te Timanem te pegbegay din te punù ki Moises,
2CO 3:8 meneng labi pa mèpiya se ipekità te Timanem diyà te menge otaw begayan din te Espiritu Santo.
2CO 3:9 Pengkey mèpiya se pegpetaga-taga te Timanem te ipelumun din se otaw lomàpang te punù ingkeliwat i Moises, meneng labi pa mèpiya se pegpetaga-taga din te eneng-enengen din te metòlid se otaw memenal.
2CO 3:10 Pengkey mèpiya se tagnà peokit, meneng iling den te nelibelan se kèpiya niyan, so labi pa ontò mèpiya se kaling peokit.
2CO 3:11 Pengkey mèpiya se tagnà peokit doen temanan, meneng labi pa mèpiya se kaling peokit wedad temanan.
2CO 3:12 So netegahan ko te doen ketomanan te egpelimanan ko, yan se doun te egbengalen ko se pegtoladà ko. Kenà a iling ki Moises so wedad ipeg-eles ko. Penga te pegtoladà din, sinempengan din se bawa din amon eked kitai te menge doma din bowad-bowad i Israel se pegkewedad te keanyag diyà te bawa din.
2CO 3:14 Meneng wedà keleseb se aneng-aneng te menge Judiyo, so magsen se olo dan. Lamig songkani aw besahen dan se libro sinolatan tepad te tapay peokit ininang te Timanem, nebelebagan se aneng-aneng dan so eked dan pa pekelabet. Eked keabat se nekebelabag te aneng-aneng dan singed aw memenal dan ki Jesu Cristo.
2CO 3:15 Lamig songkani aw megbasa se menge Judiyo te punù ingkeliwat i Moises, iling te nebelebagan se aneng-aneng dan.
2CO 3:16 Meneng aw memenal dan te Pengolo, yan meabat se belabag amon mekelabet dan te kagi te Timanem sìyan.
2CO 3:17 Na, se Pengolo sìyan, yan se Espiritu Santo. Aw kidoen kandan se Espiritu Santo, eked den dan keallang te salà aw pegtolò te punù ingkeliwat i Moises.
2CO 3:18 Wedad den belabag diyà te kedita tadon nemenal ki Cristo. Aw gayed tadon keleseban se kelangkaw te Pengolo, gayed heman elinen te Timanem se pegkesawol tadon, amon kitaen te doma otaw se kelangkaw te Pengolo diyà kenitadon. Yan se eg-inangen te Pengolo, sìyan Espiritu Santo, amon labi kidon pa megkelangkaw iling kandin.
2CO 4:1 Na, pineokit te keido te Timanem kanak, insogò a din megtoladà aw yan eked a lengà.
2CO 4:2 Ontò ko pig-ekedan se medaet inang, sìyan megbolon aw mekeyàyà. Wedà a peglegawa te doma otaw. Meneng ontò ko binangal se pegtoladà te kagi te Timanem. Netegahan te Timanem te kebenalan se intoladà ko, aw netegahan iyan te kedita te otaw.
2CO 4:3 Meneng se Mèpiya Indan tepad ki Cristo intoladà ko, wedà iyan kelebeti te menge otaw egpesalo doton te pelumun,
2CO 4:4 so se menge otaw wedà pemenal, impekagsen i Satanas se olo dan amon eked dan kelebeti se Mèpiya Indan tepad te kelangkaw i Jesu Cristo, so egkitaen se keanyag te Timanem diyà te bawa i Cristo.
2CO 4:5 Sikandin se Pengolo eglowan aw yan se gayed ko ipegtoladà. Kenà ibeg ko iduyun se kanak pegkeotawun, meneng neketabang a kenyo pineokit te pegtoladà aw tandà te kedakel te pedowan ko ki Cristo.
2CO 4:6 Peg-inang te Timanem te keneyonan, mengitngit aw penga niyan ininang din se kelowahan. Iling kenyan se ininang din kanak, so kedengan, iling te doen kengitngit diyà te pedowan ko, so wedà a kilala ki Jesu Cristo. Meneng linowa din den se pedowan ko amon ipekità din kanak se kelangkaw te Timanem diyà te bawa i Cristo.
2CO 4:7 Iling a te koden wedad keelagà sinolan te bolawan meelagà, so pengkey wedad keelagà ko, meneng insalig te Timanem kanak se pegtoladà te kebenalan tepad ki Cristo amon ketegahan te menge otaw te sikandin se eglekatan te tolos. Kenà iyan lekat kanak.
2CO 4:8 Pengkey medita se egsamok kanak, meneng wedad mekebelabag kanak. Pengkey egkebulung a, meneng kenà a eglengà.
2CO 4:9 Gayed a egpemilangen te doma otaw, meneng eked a tenani te Timanem. Pineeleg a te doma otaw, meneng wedà a kematay.
2CO 4:10 Melikit a agpet matay iling te neokitan i Jesus kedengan, meneng gayed a din ipegpelowà amon ketegahan te doma otaw te benal neantay si Jesus.
2CO 4:11 Melikit a agpet eg-imetayan tandà te pegtaking ko ki Jesus, amon te eked a pa kematay, onà kitaen te menge otaw se keentayan i Jesus diyà te lawa ko.
2CO 4:12 Pengkey doen kelimahan neokitan ko tandà te pegtoladà ko, meneng kunù doen ontong te pedowan niyo.
2CO 4:13 Doen insolat diyà te kagi te Timanem, “Iindan ko se pinemenalan ko.” Iling heman kenyan se kanak pegpemenal, so pengkey nelimahan a, meneng iindan ko pa se pinemenalan ko.
2CO 4:14 Netegahan ko den te Timanem se mig-antay ki Jesus lekat te nematay, aw yan entayen a din heman, so doen pegsebad te pedowan ko diyà ki Jesus. Ibingen te Timanem se kedita tadon egpemenal doton te dapag din.
2CO 4:15 Pengkey egpemilangen a tandà te pegtoladà ko, meneng ibeg ko doen kèpiyaan niyo, amon pineokit te pegladlad te tabang te Timanem diyà te medita otaw, doen heman labi pa medita otaw megpesiontong kandin amon sikandin se iduyun.
2CO 4:16 Yan se doun te wedà a lengà. Pengkey melomay se lawa ko, meneng se pedowan ko gayed egkagsen.
2CO 4:17 Pegpemilang kanak, aneng-aneng ko meketayod a, so doen temanan niyan. Aw meketayod a te pegpemilang kanak, ontò mèpiya se ibegay te Timanem kanak doton te langit. Ontò mèpiya se ontong wedad temanan.
2CO 4:18 Kenà ontong dini te keneyonan se ehaen ko, so megkewedad iyan te eked kenamay. Meneng gayed ko egpelimanan se benal ontong eked kitai te mata dini te keneyonan, so wedad temanan niyan.
2CO 5:1 Meketayod a pa te kelimahan, so netegahan ko aw matay se lawa ko dini te keneyonan, doen pa kaling lawa eked palos kematay ibegay te Timanem kanak doton te langit.
2CO 5:2 Dalem te wedà a pa kematay, ontò melima se keogpà ko. Ontò ko ibeg begayan a te Timanem te kaling lawa doton te langit.
2CO 5:3 Pineokit te pegpemegay din kanak te kaling lawa, gayed doen ogpaan te pedowan ko.
2CO 5:4 Dalem te peg-ogpà ko dini te keneyonan, doen pa kelimahan ko, meneng kenà ibeg ko ayas a matay, meneng ibeg ko begayan a te kaling lawa doton te langit, amon keselilinan se lawa ko seini egkeledak te lawa eked palos kematay.
2CO 5:5 Se Timanem, yan se migpetagad den kenitadon amon mekekinawà kidon te kaling lawa, aw sikandin se simogò te Espiritu Santo meg-ogpà dini kenitadon, amon ketegahan tadon te metoman pa se impakang din.
2CO 5:6 Yan se doun te gayed egkeantag se pedowan ko. Netegahan ko te dalem ko pa te mig-ogpà a dini te keneyonan, eked a pa pegdoma te Pengolo,
2CO 5:7 meneng songkani kenà ko egkitaen se egtekingan ko, meneng egtekingan ko se pinemenalan ko.
2CO 5:8 Gayed egkeantag se pedowan ko. Mèpiya kanak aw matay a amon megdoma a te Pengolo.
2CO 5:9 Pengkey matay a, aw pengkey wedà a pa kematay dalem te wedà pa likò se Pengolo, ontò ko ibeg meluba sikandin kanak.
2CO 5:10 Sominalo kwani se kedita tadon ki Cristo amon okomen kidon din, aw amon meabat te teg sebad-sebad kenitadon egpemenal se kandin ontong tepad te ininang din dini te keneyonan. Se otaw mig-inang te mèpiya, yan se doen ontong. Se otaw egpemenal eg-inang te medaet, yan se wedad ontong.
2CO 5:11 Nayan, so netegahan ko den te ontò melangkaw se Pengolo egsinelowen ko, yan se doun te gayed a egtoladà te menge otaw amon memenal dan. Netegahan den te Timanem te nelobos se pedowan ko kandin, aw ibeg ko metaga-taga kaw heman te doen kelobos te pedowan ko diyà te Timanem.
2CO 5:12 Insolat ko iyan kenà amon iduyun ko se kanak pegkeotawun, meneng amon wedad ikeyàyà niyo kanak, aw amon doen itaba niyo diyà te menge doma otaw egduyun te kandan pegkeotawun kenà tepad te kelobos te pedowan, meneng tepad olò te ketanem dan.
2CO 5:13 Simpana aneng-aneng niyo migkebook a den tandà te keaseb te pegtaking ko te Timanem, aw den iyan, so ibeg ko iduyun se Timanem. Pengkey aneng-aneng niyo doen inenengen ko, meneng ibeg ko pa megtabang kenyo.
2CO 5:14 Tandà te kedakel te pedowan i Cristo kanak, neantag heman se pedowan ko. Netegahan ko den ini, te pegkematay i Cristo, iling te nematay se kedita te otaw, so nematay sikandin inselilin te kedita te otaw, amon eked kidon taking te kenitadon ibeg. Nematay amon tekingan tadon se kandin ibeg, so nematay aw neantay heman sikandin amon megtabang kenitadon.
2CO 5:16 Kedengan, iling te aneng-aneng te menge doma otaw se aneng-aneng ko, so medita se otaw nebensihan ko, aw yan se doun te nebensihan ko si Cristo. Meneng songkani netodà den se aneng-aneng ko tepad kandin aw tepad te kedita te otaw.
2CO 5:17 Se otaw simalig ki Cristo, ontò den netodà se pedowan dan. Taman den niyan se pegkeallang dan diyà te medaet, so doen den kaling pedowan dan.
2CO 5:18 Lekat te ibeg te Timanem, ininang din se dalan pesalo doton kandin amon megsebad se pedowan tadon te Timanem pineokit ki Cristo. Insogò a din den megtoladà diyà te kedita te otaw te doen den dalan ininang te Timanem pesalo doton kandin, amon megsebad se pedowan tadon diyà kandin pineokit ki Cristo, aw amon pegwedaden din heman se salà tadon. Insalig din kanak se mèpiya indan sìyan amon itoladà ko diyà te menge doma otaw.
2CO 5:20 Siak heman se sebad sogounun i Cristo egpengibing te kagi din, so pineokit kanak, ipetaga-taga te Timanem se punù din. So insogò a i Cristo, yan mikagi a diyà kenyo, pegsebadi niyo se pedowan niyo diyà te Timanem.
2CO 5:21 Pengkey wedad salà i Cristo, meneng impelumun sikandin te Timanem tandà te salà tadon, amon eneng-enengen te Timanem te metòlid kidon pineokit te pegpesakop tadon diyà ki Cristo.
2CO 6:1 Egtoloen ko se Timanem simogò kanak aw seini se ipegtoladà ko. Aw nekekinawà kaw te tabang te Timanem, pekitai niyo te doen ontong niyo pineokit te peg-inang niyo te metòlid.
2CO 6:2 Doen inikagi te Timanem, “Pegdateng te aldaw tapay pinemallì ko, impekità ko se keido ko kamno, aw tinebangan ta te pegkelowà nikaw.” Eneng-enengi niyo den ini. Seini den se aldaw tapay pinemallì te Timanem. Seini den se aldaw te pegpelowà te Timanem te menge otaw lekat te salà.
2CO 6:3 Ontò ko eg-imendayan se eg-inangen ko amon wedad otaw meg-eked te pegpemenal, aw amon wedad isila te ipegtoladà ko tepad te Pengolo.
2CO 6:4 Pengkey eden se inangen ko, ipekità ko te metòlid se keogpà ko, so keilangan metòlid se eg-inangen te menge otaw insogò te Timanem. Impekità ko den iyan pineokit te pegtayod ko te menge kelimahan.
2CO 6:5 Neketayod a pengkey binadas a, aw kineleboso a, aw pengkey sinamok a. Neketayod a den pengkey melima se ininang ko, pengkey wedad tedogi aw wedad kinaen ko, amon eposen ko se inang ko. Meneng neketayod a te kedita te kelimahan sìyan.
2CO 6:6 Impekità ko te metòlid se eg-inangen ko pineokit kani. Nelobos se pedowan ko, aw netegahan ko se kebenalan, aw medalem se pedowan ko, aw egkeidowan ko se doma otaw, aw egbeyà-beyaan a te Espiritu Santo, aw ontò dakel se pedowan ko diyà te menge otaw egpemenal.
2CO 6:7 Ipekità ko te metòlid se eg-inangen ko so egtoladà a heman te kebenalan, aw ontò a egtebangan te tolos te Timanem. Iling a te sondalo doen kekamang eked dàgi te poon din, so iling te sondang aw kelasag se ketòlid te pedowan imbegay te Timanem kanak.
2CO 6:8 Pengkey iduyun a aw tompuyusen a te doma, meneng gayed ko ipedeleg se inang ko diyà te Timanem. Pengkey medaet aw mèpiya se kagi dan tepad kanak, aw pengkey doen mikagi te bolelawun a, meneng eked ko iyan penenelani so benal se ipegtoladà ko.
2CO 6:9 Pengkey doen menge otaw eked pegsagman kanak, meneng nedengeg a pa diyà te doma otaw. Pengkey doen meibeg mengimatay kanak, meneng egtebangan a te Timanem. Pengkey impeokit a te Timanem diyà te kelimahan amon toledaan a din, meneng wedà a kematay.
2CO 6:10 Pengkey medita se kelidoan ko dini te keneyonan seini, meneng gayed doen luba ko lekat ki Cristo. Sagkep a, meneng dakel se ipegkeliwat ko diyà te doma otaw pineokit te pegtoladà ko kandan. Wedad kedònan ko dini te keneyonan, meneng doen dakel ontong intagò kanak doton te langit.
2CO 6:11 Menge kedowa ko kidoen te Korinto, in-indan ko man den kenyo se kedita diyà te pedowan ko. Ontò ko sikiyo nedekelan te pedowan.
2CO 6:12 Kenà deitek se pedowan ko kenyo, meneng sikiyo se doen deitek pedowan kanak.
2CO 6:13 Mikagi a kenyo te iling kaw te ontò batà ko. Mèpiya aw kedekelan a niyo te pedowan, iling te kedakel te pedowan ko kenyo.
2CO 6:14 Ikà niyo egdoma te menge otaw kenà egpemenal, so eked pegpedomaay se otaw diyà te kelowahan aw otaw diyà te kengitngitan. Eked heman pegpedomaay se otaw eg-inang te metòlid aw otaw kenà eg-inang te metòlid.
2CO 6:15 Wedad pegsebad te pedowan i Cristo aw si Satanas. Eked heman kepakay aw megsebad se pedowan te otaw nemenal aw otaw kenà egpemenal.
2CO 6:16 Eked kepakay aw simbahen se inotaw doton te balay te Timanem. Se kedita tadon egpemenal, sikitadon se balay eg-ogpaan te Timanem wedad temanan din. Iling te inikagi te Timanem tepad te menge Judiyo gebii, kagi din, “Meg-ogpà a kidoen kandan. Doen inangen ko kidoen kandan. Siak se simbahen dan, aw siak se megtabang kandan.”
2CO 6:17 Yan se doun te inikagi te Timanem, “Ikà niyo egdoma te menge otaw kenà egtaking kanak. Ikà niyo eg-inabut te medaet ketanem dan. Aw tenanan niyo iyan, somongon a kenyo.
2CO 6:18 Meinang a amay niyo, aw meinang kaw batà ko. Yan kinewaen ko sikiyo.” Yan se inikagi te Timanem eglowan diyà te kedita.
2CO 7:1 Menge kedowa ko egkedekelan ko te pedowan, so yan se menge pakang te Timanem kenitadon, mèpiya aw ontò tadon lobosen se aneng-aneng aw eg-inangen tadon, amon ontò kidon megketòlid pineokit te pegtolò tadon te Timanem.
2CO 7:2 Nayan, kedekeli a niyo te pedowan. Netegahan niyo man den te wedad palos otaw pig-inangan ko te medaet, aw wedad otaw pigtoledaan ko meg-inang te medaet, aw wedad otaw pigbollogan ko.
2CO 7:3 Se inikagi ko seini kenà sila ko kenyo. Egsobloden ko pa se inikagi ko, ontò ko sikiyo nedekelan te pedowan. Gayed dakel se pedowan ko pengkey eden se domateng kenitadon.
2CO 7:4 Ontò ko sikiyo egseligan. Ontò ko sikiyo ipegduyun diyà te doma otaw. Ontò a neluba te pegdineg ko tepad kenyo. Pengkey ontò a nelimahan, meneng doen pa gayed keluba ko.
2CO 7:5 Kedengan, pegdateng ko doton te Masidonya, netetana se pedowan ko so wedà pa dateng si Tito lekat kidoen kenyo. Gayed a nelimahan so migdindil se doma otaw, aw netetana a heman tepad kenyo.
2CO 7:6 Meneng gayed egsinelayen te Timanem se pedowan te otaw nelidò. Yan se ininang din kanak, so pegdateng i Tito dini kanak, yan migkèpiya se pedowan ko.
2CO 7:7 Neluba a te pegdateng din dini, meneng labi a pa ontò neluba te peg-indan din kanak te keluba din tepad kenyo. Inindanan a din tepad te pegkelidò te pedowan niyo tandà te medaet ininang niyo kedengan. Doen son din ibeg niyo komità aw megtabang kanak. Pegketaga-taga ko kani, ontò a neluba.
2CO 7:8 Pegsolat ko kenyo kedengan, mebegat se pedowan ko memegay kenyo te lidò pineokit te pegsagda ko kenyo. Meneng neluba a den, pengkey nelidò kaw te wedà kenamay te pegkekinawà niyo te solat ko.
2CO 7:9 Songkani, neluba a, meneng kenà keluba te nelidò kaw, meneng neluba a so lekat niyan migselsel kaw, aw netodà se pedowan niyo, so yan se mèpiya diyà te Timanem amon doen ontong niyo pineokit kanak.
2CO 7:10 Ibeg te Timanem, melidò se otaw nekesalà amon megselsel. Kenà iyan medaet, so yan se peokit te pegpelowà lekat te salà. Meneng se otaw melidò aw eked pegselsel, yan se eked begayi te kaling pedowan wedad temanan.
2CO 7:11 Meneng eneng-enengi niyo ini. Mèpiya diyà te Timanem se pegkelidò niyo, so lekat niyan ontò niyo impekità te netodà den se eg-inangen niyo, so ontò kaw neopal diyà te otaw doton kenyo mig-inang te medaet, aw nelemitan kaw aw ipelumun kaw. Ontò kaw egkeibeg te todà megsebad se pedowan tadon, aw megtabang kaw heman kanak. Impelumun niyo den se sìyan otaw nekesalà kidoen. Tandà te kedita te ininang niyo, wedad den isila ko kenyo.
2CO 7:12 Pegsolat ko kenyo kedengan, ibeg ko kenà olò ipelumun se otaw mig-inang te medaet kidoen, kenà olò sinelayen se otaw neinangan te medaet, meneng labi ko pa ontò ibeg ipekità diyà kenyo aw Timanem heman te ontò pa dakel se pedowan niyo kanak.
2CO 7:13 Yan se doun te neluba a, so netoman se ibeg ko sìyan. Pengkey neluba a kenyan, meneng labi a pa neluba te pegkità ko te keluba te pedowan i Tito pineokit te mèpiya se inang te kedita niyo.
2CO 7:14 Kedengan, induyun ko sikiyo diyà ki Tito. Wedà a den keyàyà, so netoman den se kagi ko kandin. Benal se kedakel te inikagi ko kenyo kedengan. Iling kenyan, benal heman se peg-indan ko ki Tito tepad kenyo, so netoman den iyan.
2CO 7:15 Labi pa dakel se pedowan i Tito kenyo seini, so gayed din egkeeneng-enengan se pegtolò te kedita niyo te punù impeibing ko kandin, aw ontò meagka se pedowan niyo migsagman kandin.
2CO 7:16 Na, siaken, ontò dakel se luba ko, so pineokit te mèpiya inang niyo, netegahan ko den te keseligan kaw.
2CO 8:1 Na, menge kedowa ko, ibeg ko ipetaga-taga kenyo se ininang te menge otaw egpemenal ki Cristo kidoen te Masidonya, so pineokit te tabang te Timanem, mèpiya se ininang dan.
2CO 8:2 Pengkey ontò dan nelimahan so pinemilang dan, meneng labi dan pa neluba, aw bowasag dan te pegpemegay dan te bowang, pengkey ontò dan sagkep,
2CO 8:3 so lekat te keagka te pedowan dan, imbowang dan se nebatog dan imbegay. Netegahan ko te doen ibeg dan memegay te labi pa dakel,
2CO 8:4 so ontò dan nemoyò diyà kanak aw mepakay dan memegay te bowang diyà te menge doma sakop te Timanem nelimahan.
2CO 8:5 Aneng-aneng ko, kenà dakel se ibegay dan, meneng ontò kedì dakel se imbegay dan. Meneng labi pa mèpiya, so onà dan imbegay diyà te Pengolo se pegkeotawun dan. Penga niyan, migtelaban dan kanak, so yan se ibeg te Timanem kandan.
2CO 8:6 Na, ontò den neluba se pedowan ko, so dakel se imbowang te menge otaw kidoen te Masidonya. Yan se doun te somogò a ki Tito te lomikò doton kenyo, amon entagen din se pedowan niyo, amon tomanen niyo se pegtipon te bowang, so sikandin se migtebò mig-antag te pedowan niyo kedengan.
2CO 8:7 Ontò kaw den nedengeg, so ontò kaw egpemenal te Mèpiya Indan, aw magsen kaw migtoladà, aw netaga-taga kaw te kebenalan, aw measeb kaw egtolò te Timanem, aw dakel se pedowan niyo kanak. Ibeg ko, medengeg kaw heman pineokit te pegtabang niyo diyà te doma otaw nelimahan.
2CO 8:8 Eked ko sikiyo sogoi memegay. Meneng ibeg ko ipetaga-taga olò kenyo se keaseb te doma otaw nemegay, amon ketegahan ko aw benal doen dakel pedowan niyo.
2CO 8:9 Ikà niyo egkelibel te tabang te Pengolo tadon si Jesu Cristo, so peg-ogpà din doton te langit, sikandin se tig-apò te kedita, meneng tinenanan din se kedita niyan, aw migpekeotaw amon tebangan kaw din, amon lekat kenyan meketig-apò kaw te mèpiya doton te langit.
2CO 8:10 Na, pengkey eked ko sikiyo sogoi, meneng seini se aneng-aneng ko. Te monà omay, lekat te ibeg niyo se migtebò kaw migtipon te kwarta ibowang. Mèpiya aw tomanen niyo den se pegtipon kenyan.
2CO 8:11 Kedengan te pegtebò niyo te pegtipon, ontò meagka se pedowan niyo. Mèpiya aw eked kaw lokas te pegtoman kenyan taman te mebatog niyo ibegay.
2CO 8:12 Aw meagka se pedowan niyo, mèpiya aw ibegay niyo se taman te mebatog niyo, so eked kaw legesi memegay te labi pa dakel kenyan.
2CO 8:13 Eked a keibeg aw megkeyaman se doma otaw pineokit te pegpemegay niyo kandan, aw penga niyan kelimahan kaw heman.
2CO 8:14 Meneng ibeg ko megpetebangay kaw. Aw doen tabang ibegay niyo doton te otaw nelimahan, doen heman kwani aldaw tomabang dan kenyo aw simpana sikiyo se kelimahan. Yan se pegpetebangay niyo.
2CO 8:15 Doen insolat diyà te kagi te Timanem tepad te pegpetebangay te menge Judiyo nengimon te kànen imbegay te Timanem kandan lekat te langit. Seini se kagi insolat, “Se menge otaw nengimon te dakel kànen, wedad lampas. Aw se menge doma otaw nengimon te deitek kànen, wedad kolang. Nebesog se kedita dan.”
2CO 8:16 Migpesiontong a diyà te Timanem, so lekat kandin se kedakel te pedowan i Tito kenyo, iling te kedakel te pedowan ko kenyo.
2CO 8:17 Ontò neluba si Tito te pegdineg din te ibeg ko lomikò sikandin doton kenyo. Meagka se pedowan din domoton kenyo.
2CO 8:18 Ipetaking ko ki Tito se sebad kedowa tadon egpemenal. Nedengeg sikandin diyà te kedita te otaw nemenal ki Cristo, so biyasa sikandin egtoladà te Mèpiya Indan tepad ki Cristo.
2CO 8:19 Kenà olò nedengeg, meneng pinemallì heman sikandin te kedita te otaw nemenal ki Cristo amon tomaking kanak mengibing te bowang niyo diyà te menge otaw egpemenal nelimahan. Ibingen ko iyan doton kandan amon iduyun se Pengolo, aw amon ketebangan ko se menge otaw nelimahan doton.
2CO 8:20 Ibeg ko, ontò imendayan se pegpengibing day te dakel bowang sìyan, amon wedad otaw mekesila kenami.
2CO 8:21 Yan ipetaking ko sìyan sebad otaw egkeseligan amon ketegahan te kedita te otaw aw Pengolo te metòlid se eg-inangen day, so yan se ibeg ko.
2CO 8:22 Na, doen heman sebad kedowa tadon isogò ko doma i Tito komidoen kenyo. Se otaw seini, melikit ko egkitaen se menge inang din aw ontò measeb. Labi pa meagka se pedowan din komidoen kenyo so egseligan kaw din.
2CO 8:23 Na, si Tito, sikandin se doma ko megtoladà kenyo. Sìyan didowa otaw domoma kandin, yan se insogò te menge doma tadon nemenal ki Cristo. Iduyun tadon si Cristo pineokit te inang dan.
2CO 8:24 Yan mèpiya aw ipekità niyo te dakel se pedowan niyo kandan, amon metaga-taga se menge doma otaw egpemenal ki Cristo doton te teg sebad-sebad lonsod te benal se inikagi ko te mèpiya se inang niyo.
2CO 9:1 Wedad den kekemowan te todà a somolat kenyo tepad te pegtipon niyo te kwarta ibowang diyà te menge sakop te Timanem doton te Judiya,
2CO 9:2 so netegahan ko den te meibeg kaw megtabang kandan. Yan se induyun ko kenyo doton te menge otaw egpemenal ki Cristo doton te Masidonya, so doen ibeg niyo megtabang. Inikagi ko kandan kedengan te monà omay, neketagad kaw den kidoen te Gresya memegay te kwarta. Pegketaga-taga dan te meagka se pedowan niyo megtabang, keditaan dan heman meibeg megtabang.
2CO 9:3 Isogò ko si Tito aw menge doma ko amon tomanen niyo se pegtipon te itabang te eked a pa dateng doton, aw amon metoman se duyun ko tepad kenyo te doen ibeg niyo memegay.
2CO 9:4 Aw doen menge tege Masidonya tomaking kanak te pegpesalo ko doton kenyo te Korinto, simpana kitaen dan te wedà kaw peketagad, siak se meyàyà, meneng sikiyo se labi pa meyàyà so induyun ko sikiyo te neketagad kaw den.
2CO 9:5 Yan se doun te migsogò a kandan ki Tito kidoen te eked a pa doton, amon ipetagad dan se bowang tapay niyo impakang. Mèpiya aw tapay den iyan tiponen te eked a pa dateng doton. Ibeg ko, memegay kaw kenà lekat te leges, meneng lekat te keagka te pedowan niyo.
2CO 9:6 Netegahan niyo man den ini. Aw deitek se benì ipanggas, deitek heman se geniyen. Meneng aw dakel se ipanggas, dakel heman se geniyen.
2CO 9:7 Iling heman kenyan se otaw memegay. Keilangan lekat te ibeg te pedowan din. Medaet aw mebegat se pedowan te otaw memegay. Medaet heman aw meleges te doma otaw, so meluba se Timanem aw memegay se otaw lekat te keagka te pedowan din.
2CO 9:8 Timanem se mekebegay te tabang labi pa dakel diyà te lidò niyo amon doen gayed botong kenyo aw amon doen pa heman lampas ibegay niyo diyà te doma otaw nelimahan.
2CO 9:9 Doen kagi impesolat te Timanem tepad te eg-inangen te otaw metòlid, kagi din, “Dakel se ipegtabang din diyà te menge otaw sagkep, aw wedad temanan te peg-inang din te metòlid.”
2CO 9:10 Se Timanem, yan se egpemegay te benì ipanggas aw pongo heman kànen. Aw doen kepulukan niyo, togpoan kaw din te labi pa dakel amon labi kaw pa meketabang te doma otaw.
2CO 9:11 So dakel se imbegay te Timanem kenyo, mèpiya aw dakel heman se ibegay niyo diyà te doma otaw. Aw ibingen day se itabang niyo doton te menge doma otaw, ontò dan megpesiontong diyà te Timanem te pegkekinawà dan kenyan,
2CO 9:12 so aw doen ibegay niyo, ketebangan se menge sakop te Timanem nelimahan, aw medita heman se otaw megpesiontong diyà te Timanem.
2CO 9:13 Aw kitaen dan se pegtabang niyo kandan, iduyun dan se Timanem, so lekat te kebowasag niyo se pegtabang niyo kandan aw diyà te kedita te otaw. Iduyun dan heman se Timanem so egtoloen niyo se Mèpiya Indan tepad ki Cristo egseligan niyo.
2CO 9:14 Aw yan se inangen niyo, ontò kaw dan kedekelan te pedowan, aw gayed dan megtawal-tawal tepad kenyo so ontò mèpiya se tabang te Timanem pineokit kenyo.
2CO 9:15 Mèpiya aw ontò kidon megpesiontong diyà te Timanem Amay, so mèpiya se tabang din kenitadon, so insogò din se Batà din si Jesus. Eked a pekebatog meg-indan te kedalem te tabang din, so ontò iyan mèpiya.
2CO 10:1 Na, siak si Pablo doen ipunù ko kenyo lekat te pegketinuud aw keido i Cristo. Siak ekon se telawun aw kidoen a doma niyo, meneng mebolot a ekon aw somolat a kenyo lekat te mediyò.
2CO 10:2 Se ipunù ko kenyo, inangi niyo se metòlid amon eked a pegsagda kenyo aw meglegeb a doton kenyo, so ontò ko segdahen se menge otaw eg-aneng-aneng te egtekingan ko se kanak ibeg iling te otaw kenà egpemenal.
2CO 10:3 Pengkey siak se otaw iling kenyo, aw eg-ogpà a dini te keneyonan, meneng kenà iling te gira dini te keneyonan se pegsagda ko te menge otaw eg-eked te kebenalan, so kenà kanak pegkeotawun se egseligan ko.
2CO 10:4 Se kekamang ko, kenà iling te menge kekamang te gira, meneng doen eneg imbegay kanak lekat te Timanem. Yan mekedaeg a te kededàtan, pengkey iling te kagsen te kotà te sondalo.
2CO 10:5 Nekedaeg a te medaet aneng-aneng te menge otaw egpelangkaw-langkaw, aw kedita te ikegiyen te menge otaw eg-eked te kebenalan tepad te Timanem. Dinaeg se medaet aneng-aneng dan aw timolò dan ki Cristo.
2CO 10:6 Aw metoman kaw tomolò te Timanem, yan ipelumun ko se kedita te otaw nemenal kenà egtolò ki Cristo aw domateng a doton kenyo.
2CO 10:7 Eneng-enengi niyo ini. Doen ekon menge otaw doton kenyo eg-ikagi te egtaking dan ki Cristo. Mèpiya aw eneng-enengen dan ini. Aw benal dan egtaking ki Cristo, ontò a heman egtaking se kanak.
2CO 10:8 Pengkey todà a heman mikagi te insogò a te Pengolo, eked a heman keyàyà so insogò a din kenà amon megbaet a te pegpemenal niyo, meneng amon megtabang a kenyo.
2CO 10:9 Eked a keibeg meglamit kenyo pineokit te kagi insolat ko.
2CO 10:10 Doen ekon otaw kidoen kenyo eg-ikagi te tabag a ekon mebolot aw neopal a te pegsolat ko kenyo, meneng aw kidoen a doma niyo, iling a ekon te telawun, aw wedad ekon toig ko te pegtoladà.
2CO 10:11 Meneng se otaw eg-ikagi kenyan, mèpiya aw ketegahan dan te tomanen ko se kedita te kagi insolat ko aw domateng a kidoen kenyo.
2CO 10:12 Eked a keibeg megpeakop diyà te menge doma menenoladà egduyun te kandan pegkeotawun. Wedad inenengen dan so egpeduyunay dan, aw pengkey eden se inangen dan, yan son dan se metòlid inang.
2CO 10:13 Se kanak, eked ko ikegihi te nebatog ko se wedà ko kebatog. Gayed ko olò eg-inangen se insogò te Timanem kanak, aw yan se doun te tomabang a kenyo kidoen te Korinto.
2CO 10:14 Wedà a làpang te sogò te Timanem te pegtoladà ko kenyo te kagi din, meneng siak se monà kimidoen kenyo, so insogò a din meg-indan te Mèpiya Indan tepad ki Cristo.
2CO 10:15 Eked ko peg-ilingi se doma menenoladà, so eked ko ikegihi te nebatog ko se nebatog te doma otaw. Meneng aw magsen kaw somalig te Timanem, ibeg ko megtelaban kaw kanak te pegpesalo ko doton te doma ogpeanan,
2CO 10:16 so domeleg a pa amon megtoladà te Mèpiya Indan tepad ki Cristo. Eked a duyun te kanak pegkeotawun te nebatog ko se nebatog te doma otaw doton te doma ogpeanan.
2CO 10:17 Doen kagi te Timanem insolat, “Eked kepakay aw domuyun se otaw te kandin pegkeotawun, meneng mèpiya aw iduyun din se Pengolo egpemegay te mèpiya.”
2CO 10:18 Na, eked duyuni te Timanem se otaw domuyun te kandin pegkeotawun. Meneng aw Timanem se domuyun te otaw, yan ketegahan din te ontò iyan benal.
2CO 11:1 Nayan, ibeg ko keleyatan a niyo te pedowan pengkey tabag a iling te otaw wedad inenengen, so domuyun a den te kanak pegkeotawun te eked kenamay. Keleyati a niyo bag te pedowan.
2CO 11:2 Netetana a kenyo iling te ketetana te Timanem kenyo, so ibeg ko, melobos se pedowan niyo ki Cristo, iling te pegkelobos te pedowan te laga diyà te sebad meama mengognan kandin.
2CO 11:3 Meneng nelemitan a aw metodà se ibeg niyo tomaking ki Cristo. Iling kenyan se peg-akal i Satanas ki Eva gebii pineokit te peg-akal te memokan kandin.
2CO 11:4 Netetana a aw menenalan kaw te menge otaw domoton kenyo megtoladà te doen doma egpelowà kenà si Jesus, sìyan intoladà ko den kenyo. Egtoladà dan te doen sebad kemolò Espiritu Santo aw Mèpiya Indan kenà iling te pinemenalan niyo kedengan. Nepela a, so neibeg kaw te migtoladà dan kenyan.
2CO 11:5 Na, tepad te sìyan menge otaw doton kenyo eg-ikagi te sikandan se ontò benal sogounun i Cristo, eden niyo aw sikandan se labi pa melangkaw diyà kanak.
2CO 11:6 Pengkey wedad nael kebiyasa ko megtoladà iling te doma otaw, meneng ontò a biyasa te kebenalan. Netegahan niyo den te ontò benal se intoladà ko kenyo.
2CO 11:7 Pegtoladà ko kenyo te Mèpiya Indan lekat te Timanem, wedà ko sikiyo pebeyadi, so migtabang a kenyo te wedad togpò amon doen ontong niyo te toladà ko. Meneng yan besi se salà ko kenyo.
2CO 11:8 Pegtoladà ko kenyo kedengan, tinogpoan a te menge otaw egpemenal ki Cristo doton te menge doma ogpeanan. Kolang besi se pegpengabat ko te kwarta kandan, so sikiyo se tinebangan ko.
2CO 11:9 Peg-ogpà ko kidoen kenyo, pengkey doen puluk ko, meneng wedà a pemoyò diyà kenyo, so se menge kedowa tadon nemenal doton te Masidonya, yan se nengibing te intogpò kanak. Wedà a palos pemoyò diyà kenyo, aw ibeg ko eked a palos pemoyò te tabang diyà kenyo.
2CO 11:10 Keseligan se kagi i Cristo, aw keseligan heman se kagi ko seini. Pengkey kenan a pesalo, doton kenyo aw doton te kedita te doma lonsod te Gresya, tomanen ko se pakang seini te wedad otaw pemoyoan ko te tabang.
2CO 11:11 Meneng pengkey eked a pemoyò te togpò lekat kenyo, ikà niyo eg-aneng-aneng te wedà ko sikiyo kedekeli te pedowan. Netegahan iyan te Timanem te ontò dakel se pedowan ko kenyo.
2CO 11:12 Yan eked a pemoyò te tabang lekat kenyo, so eked a peg-iling te menge menenoladà doton kenyo eg-ikagi te egpetandan a iling kandan.
2CO 11:13 Se menge otaw sìyan, kenà dan benal sogounun i Cristo. Mig-akal dan kenyo pineokit te pegtoladà dan aw pegpelingo-lingo te sikandan se insogò i Cristo.
2CO 11:14 Meneng eked tadon kepelahi se eg-inangen dan, so iling dan ki Satanas egpelingo-lingo te sikandin se sebad anghil insogò te Timanem.
2CO 11:15 Yan eked tadon kepelahi aw megpelingo-lingo heman se menge sakop i Satanas te sikandan se insogò te Timanem megtoladà te metòlid. Meneng te modi aldaw, ipelumun dan, so medaet se eg-inangen dan.
2CO 11:16 Todà ko ini ikegiyen diyà kenyo. Ikà niyo eg-aneng-aneng te iling a te otaw wedad inenengen gayed egduyun te kandin pegkeotawun. Meneng pengkey yan se aneng-aneng niyo, keleyati a niyo te pedowan te peg-ikagi ko kani, pengkey iling te wedad inenengen ko.
2CO 11:17 Se ikegiyen ko seini tepad kanak, kenà iyan insogò te Pengolo, meneng iling a den te menge otaw wedad inenengen gayed egduyun te pegkeotawun dan.
2CO 11:18 So medita se otaw kidoen kenyo egduyun te kandan pegkeotawun, meg-indan a heman kenyo tepad kanak.
2CO 11:19 Pelaban melomì se olo niyo, so gayed kaw egpenenalan te toladà te menge otaw wedad inenengen,
2CO 11:20 so mepakay diyà kenyo aw ellangen kaw dan, aw ebaten dan se kwarta niyo, aw egawen dan se kedònan niyo. Aw lomowan dan kenyo, pengkey menampak dan kenyo, mepakay diyà kenyo.
2CO 11:21 Meneng mikagi kaw besi te neyàyà a so eked a keibeg meg-iling kandan. Na, so mebolot dan domuyun te kandan pegkeotawun, mebolot a den heman domuyun te kanak pegkeotawun, meneng iling a te otaw wedad inenengen te peg-indan ko kani.
2CO 11:22 Aw domuyun dan te kandan pegkeotawun so Judiyo dan, siak heman se sebad Judiyo. Aw ikegiyen dan te pinemallì te Timanem se kandan pongan te Israel, siak heman se sebad sakop te Israel. Aw domuyun dan te kandan pegkeotawun so sikandan se menge bowad-bowad i Abraham, siak heman se sebad bowad-bowad i Abraham.
2CO 11:23 Eg-ikagi dan te sikandan se menge sogounun i Cristo. Iling a te otaw migkebook so iduyun ko se kanak pegkeotawun, meneng siak se ontò sogounun i Cristo. Labi pa dakel se kanak neinang diyà kandan. Tandà te pegtoladà ko te kebenalan, melikit a egkelebosowen. Melikit a egbedasen, eked ko den kebilang. Melikit a agpet egkematay.
2CO 11:24 Mekelima a bedasi te menge doma ko Judiyo te ketlowan teg siyam a kesogat te kelikit te badas.
2CO 11:25 Meketelo a pekeokit te binonalan te kayo. Mekesebad a bontogi te bato amon matay. Meketelo kebàti se dakel belangay sinekayan ko. Sebad se aldaw aw sebad se delem te limepaw a doton te lawod.
2CO 11:26 Medita se kelimahan neokitan ko te peglegeb. Egbatas a te miglaneg. Egkità a te menge megdedempasay. Doen menge Judiyo aw menge otaw kenà Judiyo ibeg mengimatay kanak. Medita se kelimahan neokitan ko doton te lonsod, aw doton te wedad otaw eg-ogpà, aw diyà te dagat. Pinemilang a heman te otaw egpelingo-lingo te egtaking dan ki Cristo.
2CO 11:27 Seini heman se menge neokitan ko. Ontò a migkelomay tandà te terbaho ko. Melikit a kenà egpeketedogi te delem. Egbellosen a, egkelao a, aw melikit kenà botong se kànen ko aw penenaktun. Neketayod a te wedad heman eg-ogpaan ko.
2CO 11:28 Doen heman medita doma kelimahan neokitan ko, meneng eked ko den indani. Te kelikit te aldaw, gayed pa doen ketetana ko tepad te doma tadon nemenal ki Cristo doton te teg sebad-sebad lonsod.
2CO 11:29 Aw doen olò sebad otaw melomay se pegpemenal din, ontò ko ibeg tebangan sikandin. Na, aw doen sebad otaw nemenal meg-inang te salà, ontò a egkeopal diyà te otaw migboyo kandin.
2CO 11:30 Na, eked a keibeg domuyun te kanak pegkeotawun, meneng aw meleges a domuyun te kanak pegkeotawun, ipekità ko olò se menge kelomayan ko.
2CO 11:31 Kenà kebolalaw se indan ko, aw netegahan iyan te Timanem, Amay te Pengolo tadon si Jesu Cristo. Iduyun sikandin te wedad temanan.
2CO 11:32 Iindan ko se tepad te neokitan ko doton te lonsod te Damasko kedengan. Doen sebad gobirnador kidoen insawol te sebad selotan si Aretas. Insogò din se menge sondalo megbangan kanak doton te dalan amon dekepen a.
2CO 11:33 Meneng se menge doma ko, in-awop a dan diyà te dakel boliyas. Penga niyan, impelowà a dan lekat diatas te melangkaw alad nekelibed te lonsod sìyan. Intonton a dan doton te lowà. Yan nekekadas a.
2CO 12:1 Wedad ontong te pegduyun ko te kanak pegkeotawun, meneng iling te neleges a tomaba te menge otaw kidoen. Meneng iindan ko den kenyo se menge impekità te Pengolo kanak, aw doma impetaga-taga din.
2CO 12:2 Kedengan te sempolò teg epat den se omay se minokit, neibing a doton te langit eg-ogpaan te Timanem. Wedà ko ketegahi aw neketaking se lawa ko te pedowan ko doton. Timanem olò se netaga-taga kenyan.
2CO 12:3 Dimateng a doton te ogpeanan dotonan te kedita te otaw egpemenal. Wedà ko ketegahi aw neketaking se lawa ko te pedowan ko doton. Timanem olò se netaga-taga kenyan.
2CO 12:4 Se dinineg ko doton, yan se eked ko kepakay iindan.
2CO 12:5 Pengkey mepakay aw domuyun a te kanak pegkeotawun tandà te impekità te Timanem kanak, meneng iindan ko olò se menge kelomayan ko.
2CO 12:6 Pengkey iindan ko se kedita neokitan ko, meneng kenà a iling te wedad inenengen, so iindan ko olò se benal. Meneng eked a duyun te kanak pegkeotawun, so ibeg ko eked peg-aneng-aneng se doma otaw tepad te kèpiya ko melangkaw pa diyà te eg-inangen ko egkitaen dan, aw ipegtoladà ko egdinegen dan.
2CO 12:7 Ibeg te Timanem, eked a pegpelangkaw-langkaw tandà te kedita te impekità din kanak. Pinebeyaan te Timanem se sebad sogounun i Satanas memegay kanak te kelimahan eked keabat, amon eked a pegpelangkaw-langkaw.
2CO 12:8 Meketelo a pegtawal-tawal diyà te Pengolo. Nemoyò a te ebaten din se kelimahan ko.
2CO 12:9 Meneng wedà din ebati. Timaba sikandin kanak, kagi din, “Pengkey eden se keokitan no, ontò botong se tabang ko kamno, so aw megkelomay ka, yan ontò ko ipekità te metolos a.” Yan se kagi din kanak. Yan gayed a den egkeluba te doen kelomay ko amon ketegahan te menge doma otaw te doen eneg imbegay i Cristo diyà kanak.
2CO 12:10 So egtaking a ki Cristo, ontò a den egkeluba pengkey egkelomay a, aw tompuyusen a, aw egkelimahan a, aw egpemilangen a, aw eg-elegen a, so aw egkelomay a, yan egbegayan a te Timanem te kagsen amon meketayod a.
2CO 12:11 Siak se iling te otaw wedad inenengen so dimuyun a te kanak pegkeotawun, meneng sikiyo se migleges kanak. Mèpiya pa peden aw sikiyo se domuyun kanak. Pengkey doen menge kelomayan ko, meneng kenà melangkaw diyà kanak se menge otaw doton kenyo eg-ikagi te sikandan se benal sogounun i Cristo.
2CO 12:12 Peg-ogpà ko kidoen kenyo kedengan, kinità niyo te benal a sogounun i Cristo pineokit te menge inang ko. Melayat se pedowan ko kenyo, aw kinità niyo se menge pengilala ininang ko, aw menge kepelahan, aw menge inang metolos.
2CO 12:13 Se menge ininang ko diyà te menge otaw nemenal ki Cristo doton te doma lonsod, yan se onawa te ininang ko kenyo. Sebad olò se wedà ko peg-onewai, so wedà ko kinewai se togpò lekat kenyo, meneng kininawà ko se togpò lekat kandan. Pegwedadi niyo bag se salà ko sìyan.
2CO 12:14 Meketagad a den meglegeb kidoen kenyo te iketelo. Aw domoton a kenyo, wedad heman pemoyoen ko lekat kenyo, so kenà kwarta niyo se ibeg ko, meneng ibeg ko se kedakel te pedowan niyo kanak. Iling kaw te batà ko. Kenà mengisù se menogpò te amay aw inay dan, meneng amay aw inay se menogpò te batà.
2CO 12:15 Meluba a memegay te kedakel te kwarta ko aw kepagod ko amon kèpiyaan kaw. Pengkey deitek se pedowan niyo kanak, meneng ontò dakel se pedowan ko kenyo.
2CO 12:16 Pengkey benal wedad pinemoyò ko kenyo, meneng doen ekon eg-ikagi te mig-akal a kenyo aw miglegawa.
2CO 12:17 Meneng te pegdoton te menge doma otaw insogò ko kedengan, wedad palos inabat ko kenyo pineokit kandan.
2CO 12:18 Lekat te ibeg ko, impedoton ko kenyo si Tito aw sìyan sebad kedowa tadon insogò ko doma kandin, meneng wedad pinemoyò din diyà kenyo. Onawa se eg-inangen day si Tito, so egsebad se pedowan day.
2CO 12:19 Eden niyo aw sikiyo se petega-tegahan te wedad salà ko pineokit te pegsolat ko seini, so ibeg ko kenà sikiyo se meluba kanak, meneng Timanem se meluba kanak, so egtaking a ki Cristo. Menge kedowa ko, simolat a te kedita nini amon tebangan kaw te pegtaking niyo te Timanem, so nedekelan ko sikiyo te pedowan.
2CO 12:20 Netetana a aw domateng a kidoen kenyo, kitaen ko sikiyo meg-inang te kenà ko ibeg. Aw yan se inangen niyo, inangen ko heman kenyo se kenà niyo ibeg, so segdahen ko sikiyo. Netetana a aw kitaen ko sikiyo megpedindilay, aw megpeingaay, aw megpeopalay, aw megpedemetay kaw. Doen besi heman kitaen ko menge otaw egbaet-baet, aw egbelikbik, aw egpelangkaw-langkaw, aw egsamok.
2CO 12:21 Pengkey metòlid se intoladà ko kenyo, meneng netetana a so meyàyà a diyà te Timanem aw domateng a kidoen kenyo tandà te salà niyo. Melidò a aw doen pa menge otaw nemenal kidoen kenyo wedà pegselsel te peg-inang dan te medaet kedengan, aw peglayok dan te kenà kandan esawa, aw pegkemetibayi dan.
2CO 13:1 Na, aw metoman a lomikò kidoen kenyo, yan se iketelo te peglegeb ko kidoen kenyo. Ipelumun ko se otaw eg-inang te salà, meneng toloen ko pa se punù te Timanem te eked pelumuni se otaw singed aw doen dowa otaw aw kenà telo meg-indan te benal doen salà din.
2CO 13:2 Kedengan te ikedowa ko peglegeb doton kenyo, minikagi a te ipelumun ko se menge otaw mig-inang te medaet. Yan se inikagi ko diyà te menge otaw mig-inang te medaet aw menge otaw wedà peg-inang te medaet. Todà ko den heman sikiyo ikegihan te iyogan ko pineokit te pegsolat ko seini, aw domateng a kidoen, ontò ko sikiyo ipelumun,
2CO 13:3 so ipetaga-taga ko kenyo te benal si Cristo se migsogò kanak te pegpelumun ko kenyo. Kenà sikandin melomay iling te otaw, meneng doen tolos din te megpelumun kenyo.
2CO 13:4 Wedà kulu si Cristo inlansang diyà te kros, meneng neantay sikandin lekat te nematay so doen tolos te Timanem kidoen kandin. Iling a kenyan, so pengkey melomay se lawa ko, meneng kitaen niyo kwani te binegayan a te Timanem te eneg amon megpelumun kenyo.
2CO 13:5 Ontò niyo eneng-enengi. Sikiyo se keilangan meg-ahà te kenyo pegkeotawun aw lulub kaw ki Cristo. Mèpiya aw lobosen niyo se pegpemenal ki Cristo. Eneng-enengi niyo ini te kenà metòlid se otaw diyà te Timanem singed aw eg-ogpà si Jesu Cristo diyà kandin.
2CO 13:6 Pengkey eden se aneng-aneng niyo, meneng ibeg ko ketegahan niyo te metòlid a diyà te Timanem, aw insogò a i Cristo.
2CO 13:7 Megtawal-tawal a diyà te Timanem tepad kenyo amon metòlid se inangen niyo. Kenà ibeg ko ipekità kenyo te metòlid se eg-inangen ko, meneng ibeg ko inangen niyo se metòlid, pengkey wedad otaw metaga-taga te insogò a i Cristo megpelumun kenyo.
2CO 13:8 Eked kepakay aw inangen ko se kenà tepad te impunù te Timanem. Se tod ko, ketegahan te kedita te otaw se kebenalan tepad ki Cristo.
2CO 13:9 Yan pengkey wedad otaw ipelumun ko doton so migselsel den dan, meneng meluba a aw magsen kaw meg-inang te metòlid. Gayed ko ipegtawal-tawal diyà te Timanem te ontò melobos se pegpemenal niyo.
2CO 13:10 Insolat ko tapay ini kenyo te wedà a pa pesalo kidoen, amon wedad segdahen ko aw domateng a doton, so tapay kaw timolò. Benal insogò a te Pengolo kenà amon kebàtan kaw, meneng amon ketebangan kaw.
2CO 13:11 Na, menge kedowa ko, keluba kaw den. Imendayi niyo se peg-ogpà niyo. Toloi niyo se impunù ko kenyo. Pegsebad kaw te pegpemenal aw pedowan niyo. Domaan kaw te Timanem eglekatan te kedakel aw kelinaw te pedowan.
2CO 13:12 Pegpeliyagay kaw se kedita niyo egpemenal, so yan se pengilala te egpedekelay kidon te pedowan.
2CO 13:13 Eg-ikagi se kedita day menge sakop te Timanem eg-ogpà dini te eg-aneng-aneng kay kenyo.
2CO 13:14 Ibeg ko tebangan se kedita niyo te Pengolo tadon si Jesu Cristo, aw kedekelan kaw te Timanem te pedowan, aw megsebad kaw tandà te Espiritu Santo eg-ogpà diyà kenyo.
GAL 1:1 Se solat seini, lekat kanak si Pablo. Siak se sebad sogounun i Cristo. Kenà otaw se simogò kanak. Kenà heman pineokit te otaw se migsogò kanak. Meneng se simogò kanak, yan si Jesu Cristo aw Timanem Amay mig-antay ki Cristo lekat te nematay.
GAL 1:2 Kedita day nemenal se mig-indan kenyo te eg-eneng-enengen day se kedita niyo egpemenal te Timanem doton te teg sebad-sebad lonsod te Galasya.
GAL 1:3 Ibeg ko, begayan kaw te tabang aw kelinaw te pedowan lekat te Amay tadon Timanem, aw lekat te Pengolo tadon si Jesu Cristo.
GAL 1:4 Lekat te kandin ibeg, nematay si Cristo amon meabat se kedita te salà tadon, amon eked kidon taking te menge otaw eg-inang te medaet dini te keneyonan. Timolò si Cristo mig-inang kenyan, so yan se ibeg te Timanem Amay tadon.
GAL 1:5 Timanem se iduyun te wedad temanan. Metoman iyan.
GAL 1:6 Menge kedowa ko, ontò a nepela kenyo, so te wedà pa kenamay, timinàyog kaw den ekon te Timanem timawal kenyo pineokit te tabang i Cristo. Nemenal kaw den ekon te sebad kemolò toladà tepad te kelowaan te otaw.
GAL 1:7 Meneng wedad doma kelowaan te otaw, olò sìyan intoladà day kenyo. Se menge otaw egbulung te aneng-aneng niyo, ibeg dan selilinan se Mèpiya Indan tepad ki Cristo te kebolalaw.
GAL 1:8 Meneng eked iyan kepakay. Pengkey sinu se megtoladà te sebad kemolò toladà kenà onawa te intoladà day kenyo kedengan tepad te kelowaan te otaw, yan se ipelumun te Timanem, pengkey sikami, aw pengkey anghil lekat te langit.
GAL 1:9 Inikagi ko den ini kenyo kedengan, meneng todà ko ikegiyen. Pengkey sinu otawi, aw kenà onawa te pinemenalan niyo se itoladà din tepad te kelowaan te otaw lekat te salà, yan se ipelumun te Timanem.
GAL 1:10 Ikà niyo eg-aneng-aneng te ibeg ko iduyun a te doma otaw, meneng ibeg ko Timanem se domuyun kanak. Ikà niyo eg-aneng-aneng te ibeg ko meluba se doma otaw kanak, so aw yan se ibeg ko, eked a pegsagda te pegtoladà dan te kebolalaw. Meneng migsagda a den kandan so sogounun a i Cristo.
GAL 1:11 Menge kedowa ko, seini se ipetaga-taga ko kenyo, kenà lekat te aneng-aneng te otaw se Mèpiya Indan tepad ki Cristo, sìyan intoladà ko kenyo,
GAL 1:12 so wedad otaw migtoladà te Mèpiya Indan diyà kanak, meneng impetaga-taga i Jesu Cristo kanak se Mèpiya Indan seini.
GAL 1:13 Dinineg niyo den se kanak keogpà dalem te pegtaking ko te ketanem te menge Judiyo. Ontò ko pinemilang se menge otaw nemenal te Timanem, aw ibeg ko ipeimatay se kedita dan.
GAL 1:14 Labi a pa measeb diyà te doma ko menge Judiyo onawa te idad ko te peg-iling te punù ingkeliwat i Moises, so labi a pa measeb diyà kandan te pegtolò ko te kedita te ketanem te kemonaan day.
GAL 1:15 Pengkey yan se ininang ko, meneng pineokit te tabang te Timanem, pinemallì a din te wedà a pa tebaw amon inangen a din sogounun i Cristo. Netoman den iyan.
GAL 1:16 Impekità te Timanem kanak se Batà din amon itoladà ko doton te menge otaw kenà Judiyo. Penga niyan, wedad otaw dinotonan ko amon megtoladà kanak.
GAL 1:17 Wedà a heman likò doton te Jerusalem amon toledaan a te menge otaw doton, sìyan ininang sogounun i Cristo monà diyà kanak. Meneng dimeleg a onà doton te kebigtilan iningedanan Arabya, aw penga niyan, limikò a heman doton te lonsod te Damasko.
GAL 1:18 Wedà a doton te Jerusalem lamig nepenga se telo se omay. Miglegeb a doton ki Pedro. Olò dowa simana se kenamay ko mig-ogpà doton kandin.
GAL 1:19 Wedad doma sogounun i Cristo pigkità ko, olò sìyan kedowa i Jesus si Santiago.
GAL 1:20 Ontò benal se insolat ko kenyo seini. Netegahan te Timanem te kenà ini kebolalaw.
GAL 1:21 Peglekat ko doton te Jerusalem, dimeleg a doton te Sirya aw doton te Silisya.
GAL 1:22 Yan se doun te wedà kilala kanak se kedita te otaw nemenal ki Cristo doton te Judiya, so wedà a dan lumun kitai.
GAL 1:23 Meneng dinineg dan olò diyà te menge doma otaw eg-ikagi, “Kedengan, se otaw sida, ontò din egpemilangen se kedita tadon egpemenal ki Jesus. Ibeg din kedengan, ipeimatay se kedita tadon, meneng songkani sikandin den ekon se migtoladà te pegpemenal ki Jesus.”
GAL 1:24 Yan se doun te dimuyun dan te Timanem, so nemenal a den ki Jesu Cristo.
GAL 2:1 Penga te sempolò teg epat se omay, limikò a doton te Jerusalem. Timaking kanak si Bernabe, aw impetaking day heman si Tito.
GAL 2:2 Dimoton a te Jerusalem, so yan se ibeg te Timanem impetaga-taga din kanak. Pegdateng day doton, migtipon se kedita day menge sogounun i Cristo doton te kesikmihan. In-indan ko kandan se Mèpiya Indan tepad ki Cristo gayed ko ipegtoladà diyà te menge otaw kenà Judiyo. Eg-ikagi a, se otaw memenal ki Jesus, yan se otaw doen kelowaan lekat te salà, kenà pineokit te pegtolò te punù ingkeliwat i Moises. In-indan ko iyan amon ketegahan te menge doma sogounun i Cristo te metòlid se intoladà ko, aw amon eked dan peg-aneng-aneng te kolang se pegtoladà ko te menge otaw kenà Judiyo.
GAL 2:3 Minikagi se kedita te sogounun i Cristo te metòlid se intoladà ko diyà te menge otaw kenà Judiyo. Pengkey kenà Judiyo se doma ko si Tito, meneng wedà legesi te menge sogounun i Cristo se pegtolì kandin tepad te punù ingkeliwat i Moises.
GAL 2:4 Meneng doen menge doma Judiyo eden dan aw netegahan dan se kebenalan. Migsimà dan kenami te pegtipon day amon ketegahan dan aw egtoloen te otaw nemenal ki Jesu Cristo se punù ingkeliwat i Moises, so ibeg dan, toloen tadon se punù sìyan. Meneng si Cristo man se tapay migpelowà kenitadon lekat te punù sìyan.
GAL 2:5 Wedà kay palos tolò te ibeg dan, so ibeg day wedad kebolalaw toladà isanged diyà te kebenalan, sìyan Mèpiya Indan tepad ki Cristo intoladà day kenyo.
GAL 2:6 Pegdineg dan te intoladà ko, wedad palos tinodà te menge sogounun i Cristo. Aneng-aneng ko, pengkey melangkaw se gulal dan, meneng mig-onawa kay, so diyà te Timanem, kenà sikandan se melangkaw diyà te doma dan otaw nemenal.
GAL 2:7 Wedad kagi ko tinodà dan, meneng aneng-aneng te menge doma sogounun i Cristo te insogò a te Timanem megtoladà te Mèpiya Indan tepad ki Cristo doton te menge otaw kenà Judiyo, iling te pegsogò din ki Pedro kedengan megtoladà tepad ki Cristo doton te menge Judiyo.
GAL 2:8 Migtabang se Timanem ki Pedro te pegtoladà din doton te menge otaw Judiyo, aw tinebangan a heman te Timanem te pegtoladà ko te menge otaw kenà Judiyo.
GAL 2:9 Si Santiago, si Pedro, aw si Juan ekon se melangkaw diyà te kedita dan menge sogounun i Cristo. Mig-aneng-aneng dan te insogò a te Timanem. Migsebad se pedowan te kedita day menge sogounun i Cristo te mèpiya aw yan se inangen day si Bernabe se megtoladà te menge otaw kenà Judiyo, aw yan se kandan inangen se megtoladà te menge Judiyo. Yan migpeelimenoway kay doton, so migsebad se pedowan te kedita day kenyan.
GAL 2:10 Sebad olò se impunù dan kenami te gayed kay megtabang te menge otaw sagkep doton te Judiya, sìyan otaw nemenal te Timanem, aw yan se ibeg ko gayed inangen.
GAL 2:11 Doen aldaw ontò ko sinagda si Pedro, so doen ininang din kenà mèpiya. Pegdateng din doton te Antyokya,
GAL 2:12 gayed sikandin egpengaen doma te menge otaw kenà Judiyo. Mèpiya iyan, meneng pegdateng te menge otaw insogò i Santiago, pengkey netegahan i Pedro te mepakay aw komaen doma te menge otaw kenà Judiyo, limengà sikandin kimaen doma dan, amon eked sikandin silahi te menge otaw egtoladà te keilangan toloen se menge punù ingkeliwat i Moises.
GAL 2:13 Nekesalà heman se menge doma Judiyo, so mig-iling dan heman ki Pedro. Pengkey si Bernabe eleg mig-iling kandan. Migpelingo-lingo dan te wedà dan ketegahi te diyà te aneng-aneng te Timanem onawa se pegkesawol te kedita te sakop din, pengkey Judiyo aw kenà Judiyo.
GAL 2:14 Pegketaga-taga ko ki Pedro te kenà dan ebey egtekingan se kebenalan te Mèpiya Indan tepad ki Cristo, yan se doun te migsagda a ki Pedro kidoen kinità te menge otaw nemenal ki Cristo. Minikagi a, “Sikona, pengkey ontò ka Judiyo, meneng tinenanan nikaw den kedengan se ketanem te menge Judiyo te eked dan kaen doma te kenà Judiyo. So tinenanan no den iyan, eked den kepakay aw ipetolò nikaw se menge otaw kenà Judiyo diyà te ketanem te menge Judiyo, so timanan ka den se kamno kenyan.” Yan se inikagi ko ki Pedro.
GAL 2:15 Sikami Judiyo, kenà kay iling te menge doma otaw kenà Judiyo, sìyan gayed eglàpang te punù te Timanem,
GAL 2:16 meneng netegahan day den te wedad palos otaw eneng-enengen te Timanem te metòlid dan pineokit te pegtolò dan te punù ingkeliwat i Moises, so olò otaw memenal ki Jesu Cristo se eneng-enengen te Timanem te metòlid dan. Yan se doun te nemenal kay ki Jesu Cristo amon meg-aneng-aneng se Timanem te metòlid kay pineokit te pegpemenal day kandin, so wedad palos otaw eneng-enengen te Timanem te metòlid dan pineokit te pegtolò dan te punù ingkeliwat i Moises.
GAL 2:17 Na, aw ibeg day meg-aneng-aneng se Timanem te metòlid kay pineokit te pegpemenal day ki Cristo, keilangan mikagi kay te benal doen salà ininang day, iling te menge otaw kenà Judiyo. Pengkey eked peg-aneng-aneng se Timanem te metòlid kidon pineokit te pegtolò tadon te punù ingkeliwat i Moises, meneng eked keibeg si Cristo aw gayed kidon meg-inang te salà.
GAL 2:18 Simpana todà a tomaking te punù ingkeliwat i Moises pengkey tapay a limengà te pegtaking ko kenyan, ipetaga-taga ko te doen salà ko.
GAL 2:19 So netegahan ko te eked peg-aneng-aneng se Timanem te metòlid a pineokit te pegtolò ko te punù ingkeliwat i Moises, yan limengà a te pegtolò te punù sìyan amon megpesakop a diyà te Timanem.
GAL 2:20 Pegpemenal ko ki Cristo, iling te nematay a doma kandin kidoen te kros. Lekat niyan, kenà kenaken ibeg se egbayà-bayà kanak, meneng si Cristo se egbayà-bayà kanak so eg-ogpaan a din. Dalem pa te peg-ogpà ko dini te keneyonan, megpesakop a diyà te Batà te Timanem egseligan ko. Dakel se pedowan din kanak aw yan nematay sikandin simelilin kanak.
GAL 2:21 Aw todà a tomolò te punù ingkeliwat i Moises, yan ketèyogan ko se tabang te Timanem, sìyan tapay ko kininawà, meneng eked a keibeg aw iling kenyan, so simpana meg-aneng-aneng se Timanem te metòlid se otaw pineokit te pegtolò dan te punù ingkeliwat i Moises, wedad den kekemowan te pegkematay i Cristo.
GAL 3:1 Tay law kenyo menge otaw kidoen te Galasya, iling te wedad inenengen niyo. Impesoway kaw den te menge doma otaw kenà egtolò te kebenalan intoladà ko kenyo kedengan. Impesoway kaw dan pengkey tapay niyo dinineg se intoladà ko kenyo, pengkey tapay ko den sikiyo inindanan tepad te pegkematay i Cristo kidoen te kros.
GAL 3:2 Netegahan niyo den te nekekinawà kaw te Espiritu Santo kenà pineokit te pegtolò niyo te punù ingkeliwat i Moises. Meneng nekekinawà kaw te Espiritu Santo pineokit te pegpemenal niyo te intoladà ko tepad ki Jesus.
GAL 3:3 Ikà niyo eg-iling te menge otaw wedad inenengen. Pegtebò niyo nemenal, tinebangan kaw te Espiritu Santo. Meneng eden niyo aw meg-aneng-aneng se Timanem te metòlid kaw pineokit te pegsalig niyo te punù ingkeliwat i Moises.
GAL 3:4 Eked kepakay aw wedad ontong te kedita neokitan niyo te pegpemenal niyo.
GAL 3:5 Timanem se egpemegay kenyo te Espiritu Santo, aw sikandin se eg-inang te kepelahan doton kenyo. Se peg-inang din kani diyà kenyo, kenà pineokit te pegtolò niyo te punù ingkeliwat i Moises, meneng pineokit te pegpemenal niyo te intoladà tepad ki Jesus.
GAL 3:6 Ipolingun ko iling te kemonaan day si Abraham. Inaneng-aneng te Timanem te metòlid sikandin, so nemenal te metoman se impakang te Timanem kandin.
GAL 3:7 Se kedita te otaw memenal, yan se menge otaw inangen te Timanem iling te bowad-bowad i Abraham amon begayan din dan te impakang din ki Abraham.
GAL 3:8 Doen kagi te Timanem insolat te eneng-enengen din te metòlid se kedita te otaw, pengkey Judiyo aw kenà Judiyo, pineokit te pegpemenal dan. Yan se mèpiya indan tapay intoladà din ki Abraham, kagi din, “Pineokit kamno, ibegay ko se mèpiya diyà te kedita te otaw dini te keneyonan.”
GAL 3:9 Na, nemenal si Abraham te inikagi te Timanem, aw yan inaneng-aneng te Timanem te metòlid sikandin. Iling heman kenyan se kedita te otaw memenal, so eneng-enengen heman te Timanem te metòlid dan.
GAL 3:10 Meneng se kedita te otaw meibeg eneng-enengen te Timanem te metòlid dan pineokit te pegtolò dan te punù ingkeliwat i Moises, yan se ipelumun te Timanem. So doen kagi te Timanem insolat, “Ipelumun te Timanem se kedita te otaw kenà ontò egtolò te kedita te punù insolat i Moises.”
GAL 3:11 Netegahan tadon te wedad palos otaw eneng-enengen te Timanem te metòlid dan pineokit te pegtolò dan te punù ingkeliwat i Moises, so impesolat heman te Timanem, “Se otaw memenal, yan se otaw eneng-enengen te Timanem te metòlid dan aw begayan din te pedowan wedad temanan.” Yan se kagi din.
GAL 3:12 Meneng se otaw meibeg eneng-enengen te Timanem te metòlid sikandin pineokit te pegtolò din te punù ingkeliwat i Moises, yan se otaw wedad kekemowan te kandin pegpemenal. So doen kagi te Timanem insolat, “Se otaw somalig te punù ingkeliwat i Moises, yan se otaw keilangan tomolò te kedita te punù sìyan amon kebegayan te pedowan wedad temanan.”
GAL 3:13 Meneng wedad otaw meketolò te kedita te punù sìyan. Se otaw egsalig diyà te punù ingkeliwat i Moises, yan se otaw ipelumun te Timanem pineokit te menge punù sìyan. Meneng si Cristo se migpelowà kenitadon lekat te pelumun, so sikandin se impelumun inselilin kenitadon. Se pegpelumun kandin, yan se pegkematay din doton te kros. So doen kagi te Timanem insolat, “Pengkey sinu otawi se imetayan aw bitinen doton te kayo intollok, yan se pengilala te ontò dakel se pelumun kandin.”
GAL 3:14 Pineokit te pegkematay i Jesu Cristo, se kèpiyaan impakang te Timanem ki Abraham gebii, yan se minapet den diyà te kedita te otaw pengkey kenà Judiyo, amon mekekinawà kidon te Espiritu Santo, sìyan impakang te Timanem ibegay diyà te kedita te otaw memenal.
GAL 3:15 Menge kedowa ko, aw doen otaw megpakang diyà te sebad otaw te doen ibegay din kandin, wedad doma otaw mepakay megtodà te pakang sìyan, aw wedad heman otaw mekebatog megwedad kenyan.
GAL 3:16 Na, pinekangan te Timanem si Abraham aw bowad-bowad din. Kenà aw kedita te bowad-bowad i Abraham se pinekangan te Timanem, meneng sebad olò bowad-bowad din si Cristo.
GAL 3:17 Seini se kedegdagan te insolat ko. Doen pakang te Timanem ki Abraham. Pegkepenga te epat gatos ketlowan se omay, impesolat te Timanem se punù ingkeliwat i Moises diyà te kedita te Judiyo. Pengkey doen punù imbegay te Timanem ki Moises, meneng eked palos pegkewedad se impakang te Timanem ki Abraham. Eked kepakay aw wedad ketomanan te impakang din sìyan.
GAL 3:18 Simpana meg-aneng-aneng se Timanem te metòlid kidon pineokit te pegtolò tadon te punù ingkeliwat i Moises, wedad den kekemowan te pakang, so meg-aneng-aneng se Timanem te metòlid kidon pineokit te pagod. Meneng bowang se impakang te Timanem ki Abraham.
GAL 3:19 Na, pengkey benal wedad otaw eneng-enengen te Timanem te metòlid dan pineokit te pegtolò te punù ingkeliwat i Moises, kenà aw wedad kekemowan te punù sìyan. Impekeliwat te Timanem se punù din diyà te menge Judiyo amon ketegahan te kedita te otaw te okomen din dan so nekeinang dan te medaet. Se kenamay te pegtolò te punù ingkeliwat i Moises, taman olò te pegdateng te sìyan sebad bowad-bowad i Abraham impakang. Pegpemegay te Timanem te punù sìyan, in-indan din iyan diyà te menge anghil. Penga niyan, ingkeliwat dan iyan diyà ki Moises, aw penga niyan sikandin se migkeliwat heman kenyan diyà te kedita te Judiyo.
GAL 3:20 Meneng labi pa mèpiya se pegpakang te Timanem diyà ki Abraham, so wedad palos doma migkeliwat kenyan. Timanem olò se mig-indan kandin.
GAL 3:21 Ikà niyo eg-aneng-aneng te pineokit te punù sìyan migkewedad se impakang te Timanem. Kenà niyan, so simpana mekekinawà kidon te pedowan wedad temanan pineokit te pegtolò te punù ingkeliwat i Moises, yan se peokit te meg-aneng-aneng se Timanem te metòlid kidon.
GAL 3:22 Meneng eked iyan kebatog, so doen kagi te Timanem insolat te nekesalà se kedita te otaw. Meneng olò pineokit te pegpemenal ki Jesu Cristo se pegkekinawà te mèpiya impakang te Timanem.
GAL 3:23 Te wedà kay pa pemenal ki Cristo, eked kepakay aw eked kay tolò te punù ingkeliwat i Moises, aw timolò kay kenyan lamig te pegpekità te Timanem te keilangan memenal kay ki Jesu Cristo.
GAL 3:24 Yan heman se doun te impesolat te Timanem se punù amon doen mengibing kenami lamig te pegdateng i Cristo, amon meg-aneng-aneng se Timanem te metòlid kay pineokit te pegpemenal kandin.
GAL 3:25 Na, so nemenal kay den ki Jesu Cristo, wedad den kekemowan te ibingen kay pa te punù ingkeliwat i Moises.
GAL 3:26 Na, songkani batà kaw den heman te Timanem pineokit te pegpemenal niyo ki Jesu Cristo.
GAL 3:27 So nemenal den se kedita niyo ki Cristo, aw binonyagan kaw den tandà te pegtaking niyo kandin, yan ontò kaw den iling te pegkesawol din.
GAL 3:28 Diyà te kedita niyo egpemenal, wedad den elet diyà te menge Judiyo aw kenà Judiyo. Wedad heman elet diyà te allang aw otaw kenà allang. Wedad heman elet diyà te meama aw bayi. Mig-onawa kaw den diyà te Timanem, so migsebad den se pedowan te kedita niyo diyà ki Jesu Cristo.
GAL 3:29 So migsebad den se pedowan niyo diyà ki Cristo, nekeakop kaw den diyà te menge bowad-bowad i Abraham, aw begayan kaw heman te mèpiya impakang te Timanem.
GAL 4:1 Aw matay se otaw, batà din se tig-apò te kedakel te kedònan aw tanà te amay din. Meneng dalem te deitek pa se batà, iling te allang se pegkesawol din, pengkey sikandin se nenig-apò te kedita.
GAL 4:2 Iling te allang se batà sìyan, so dalem te deitek pa sikandin, keilangan tomolò sikandin te otaw tapay pinemallì te amay din làno meg-ipat kandin aw megtonggò te kedònan aw tanà, lamig te aldaw tapay pinemallì te amay te pegbegay kenyan diyà kandin.
GAL 4:3 Iling kidon kenyan. Te wedà pa dateng si Cristo, iling kidon te batà deitek. Eked kepakay aw eked tadon toloi se ketanem te kemonaan tadon aw ibeg te otaw dini te keneyonan.
GAL 4:4 Meneng pegdateng te aldaw tapay pinemallì te Timanem, insogò din dini te keneyonan se Batà din aw impekeotaw din amon pineokit kandin inangen kidon menge batà te Timanem. Insogò si Jesus doton te menge Judiyo aw ontò timolò te punù ingkeliwat i Moises amon ipelowà din se menge otaw egtolò te punù sìyan.
GAL 4:6 Na, so batà kidon den te Timanem, impeogpà te Timanem se Espiritu Santo diyà kenitadon, aw yan mepakay aw Amà se itawal tadon diyà te Timanem,
GAL 4:7 so pineokit te keido din, kenà kaw den iling te allang, meneng batà kaw din den. Na, so batà kaw din den, kinewaen niyo heman se kedita te ibegay din diyà te menge batà din.
GAL 4:8 Na, kedengan te wedà niyo pa ketegahi se Timanem, neallang kaw te kenà benal timanem egtekingan niyo.
GAL 4:9 Meneng songkani, so netegahan niyo den se benal Timanem, aw netegahan kaw din den heman, ikà niyo todà egtaking te ibeg te otaw aw ketanem nekeallang kenyo kedengan.
GAL 4:10 Meneng iling te timinàyog kaw den te Timanem tapay pinemenalan niyo pineokit te pegtolò niyo te ketanem tepad te aldaw te peg-etod, aw pista te kelikit te bolan aw kelikit te omay, aw pengkey kano se ibeg niyo peg-inang kenyan. Meneng eked kaw pekelowà lekat te salà pineokit te pegtolò niyo kenyan.
GAL 4:11 Ontò a netetana aw wedad ontong te pegtoladà ko kenyo tepad ki Jesu Cristo.
GAL 4:12 Menge kedowa ko, seini se ontò ibeg ko kenyo. Peg-ilingi a niyo, so pegpemenal ko ki Cristo, limengà a te pegsalig ko diyà te punù ingkeliwat i Moises aw mig-iling a heman kenyo kenà Judiyo kenà egsalig te punù, sìyan egtoloen te menge Judiyo. Eked ko palos kelibeli se mèpiya ininang niyo kanak kedengan.
GAL 4:13 Se tagnà ko pegdoton kenyo kedengan, migtoladà a kenyo te Mèpiya Indan so nesekitan a kidoen.
GAL 4:14 Pengkey nelimahan kaw so doen mesakit ko, meneng wedà a niyo lindoi. Mèpiya se pegsagman niyo kanak. Simpana doen anghil te Timanem aw kenà si Jesu Cristo lomaoy kenyo, iling te pegsagman niyo kandan se pegsagman niyo kanak kedengan.
GAL 4:15 Netegahan ko te ontò kaw neluba te kidoen a doma kenyo, so ontò se ibeg niyo megtabang kanak pengkey eden. Meneng iling te netodà den se pedowan niyo kanak.
GAL 4:16 Aneng-aneng niyo besi, neopal a kenyo te peg-indan ko kenyo te kebenalan.
GAL 4:17 Meneng se menge doma otaw migtoladà kenyo, ontò kaw dan inimendayan, meneng eden niyo aw mèpiya se tod dan kenyo, so ibeg dan, megbaet te pegsebad te pedowan tadon, amon olò sikandan se toloen niyo.
GAL 4:18 Mèpiya aw doen menge otaw mengimanday kenyo, meneng keilangan mèpiya se tod dan, pengkey wedad a kidoen kenyo.
GAL 4:19 Menge batà ko te pegpemenal, ontò a netetana kenyo, so ontò ko ibeg tiboken niyo se pegtaking ki Cristo.
GAL 4:20 Ibeg ko kidoen a kenyo amon megpebelaw-belaway kidon, so wedà ko ketegahi aw eden se aneng-aneng niyo.
GAL 4:21 Na, sikiyo menge otaw ibeg somalig diyà te punù ingkeliwat i Moises, ontò niyo eneng-enengi aw eden se insolat tepad te punù sìyan.
GAL 4:22 Nebasa tadon diyà te kagi te Timanem te doen didowa batà i Abraham. Se sebad, timebaw diyà te allang din si Agar, aw se sebad batà din, timebaw diyà te esawa din si Sara.
GAL 4:23 Se batà din timebaw diyà te allang, yan se pigbatà lekat te ibeg te otaw. Meneng se batà din timebaw diyà te kenà allang, yan se impakang te Timanem diyà ki Abraham.
GAL 4:24 Na, se in-indan ko seini gina, iling te sebad polingun. Se dowa bayi seini, yan se impolingun te dowa peokit. Se sebad peokit, yan se impolingun ki Agar, so allang sikandin. Yan se pakang lekat te bontod iningedanan Sinay, so yan se pinunuan te Timanem te punù ingkeliwat i Moises. Iling te neallang se kedita te otaw tomaking kenyan.
GAL 4:25 Se bontod te Sinay doton te Arabya, yan se iningedanan Agar te menge otaw kidoen. Se pigpolingunan dan te allang seini, yan se menge Judiyo, so allang si Agar sipat menge batà din, aw neallang heman se kedita te Judiyo egtaking te punù ingkeliwat i Moises.
GAL 4:26 Meneng kenà allang se esawa i Abraham si Sara, aw yan se egpolingunan te kedita tadon nemenal ki Jesus, so kenà tadon se neallang diyà te punù ingkeliwat i Moises.
GAL 4:27 Doen insolat diyà te kagi te Timanem, “Keluba ka sikona lokes, pengkey wedà ka lumun pegbatà. Pegpegais ka tandà te luba nikaw, pengkey wedà ka lumun okit te egtebawan. Pengkey tinenanan ka te esawa no, meneng te modi aldaw, labi pa medita se batà no diyà te menge batà te bayi doen esawa.”
GAL 4:28 Na, menge kedowa ko, batà kidon den te Timanem pineokit te pakang din. Iling kidon ki Isaac timebaw diyà ki Sara, so sikandin se batà impakang te Timanem diyà ki Abraham.
GAL 4:29 Meneng te aldaw sìyan gebii, se sebad batà piglaman pineokit te Espiritu Santo si Isaac, yan se pinemilang te kedowa din batà piglaman pineokit te ibeg te otaw. Iling kidon te sebad batà impakang, so egpemilangen kidon te menge otaw neallang te punù ingkeliwat i Moises.
GAL 4:30 Meneng doen insolat diyà te kagi te Timanem, “Pekeseyowi se allang aw batà din, so wedad palos kedònan ibegay diyà te batà te allang. Tomalag iyan ibegay diyà te batà te kenà allang.”
GAL 4:31 Menge kedowa ko, kenà kidon den iling te batà te allang, so keilangan tomolò se allang. Meneng iling kidon den te batà te kenà allang, so mepakay aw eked kidon den tolò te punù ingkeliwat i Moises.
GAL 5:1 Wedà kidon den keallang te punù ingkeliwat i Moises, so impelowà kidon den i Cristo lekat kidoen. Ikà niyo egkelibel kenyan. Ikà niyo heman todà egpeallang.
GAL 5:2 Penenelani niyo se kagi ko seini. Simpana punù ingkeliwat i Moises se seligan niyo amon meg-aneng-aneng se Timanem te metòlid kaw, wedad ontong te pegpemenal niyo ki Cristo.
GAL 5:3 Ibeg ko, ontò niyo ini eneng-enengen. Pengkey sinu se somalig te punù ingkeliwat i Moises amon meg-aneng-aneng se Timanem te metòlid sikandin, kenà olò punù tepad te pegtolì se toloen din, meneng keilangan toloen din se kedita te punù ingkeliwat i Moises.
GAL 5:4 Na, sikiyo meibeg eneng-enengen te Timanem te metòlid kaw pineokit te pegtolò niyo te punù sìyan, timinàyog kaw den ki Cristo aw nebensihan niyo den se tabang te Timanem.
GAL 5:5 Meneng aw si Jesus se seligan tadon, tebangan kidon te Espiritu Santo aw pelimanan tadon se aldaw te metoman kidon eneng-enengen te Timanem te metòlid kidon,
GAL 5:6 Diyà te menge otaw nemenal den ki Cristo, wedad elet diyà te otaw tinolì aw otaw wedà tolii. Onawa iyan diyà te Timanem. Meneng ibeg te Timanem, ipekità tadon te benal se pegpemenal tadon pineokit te dakel pedowan tadon.
GAL 5:7 Kedengan, ontò kaw egtaking te kebenalan, meneng seini, nepela a so limengà kaw den.
GAL 5:8 Kenà Timanem se migsagda te pegtaking niyo te kebenalan.
GAL 5:9 Peg-ahà kaw amon eked kaw ketini te toladà dan kenà metòlid, so iling kenyan se ikegiyen tadon, “Pengkey deitek olò se yist, meneng lomebag se kedakel te arina.”
GAL 5:10 Aneng-aneng ko, memenal kaw te kagi ko kenyo seini, so telekedowa kidon den pineokit te Pengolo tadon. Meneng pengkey sinu se megbulung te aneng-aneng niyo, yan se otaw ipelumun te Timanem.
GAL 5:11 Migkebolalaw dan so minikagi dan te egtoladà a te keilangan tolien kidon aw tomolò te punù ingkeliwat i Moises amon meg-aneng-aneng se Timanem te metòlid kidon. Meneng kenà iyan benal. Simpana yan se ipegtoladà ko, eked a den pemilangi te menge Judiyo, aw eked a dan heman kebensihi te pegtoladà ko tepad te pegkematay i Cristo doton te kros.
GAL 5:12 Ibeg ko peden, megpetepò heman se menge otaw egsamok kenyo, sìyan egtoladà te keilangan tomolò kaw te punù ingkeliwat i Moises.
GAL 5:13 Menge kedowa ko, tinawal kaw te Timanem amon ipelowà kaw din lekat te pegtolò niyo te punù sìyan. Pengkey wedà kaw den keallang kenyan, meneng ikà niyo den eg-aneng-aneng te mepakay aw tomaking kaw te medaet ibeg te pedowan niyo. Meneng pedekelay kaw te pedowan, aw petebangay kaw.
GAL 5:14 Netibok se kedita te punù ingkeliwat i Moises diyà te sebad punù seini, “Kedekeli niyo se doma otaw te pedowan iling te peg-aneng-aneng niyo te kenyo pegkeotawun.”
GAL 5:15 Meneng aw megpedindilay aw megbolaw kaw, pekeahà kaw amon eked kebàti se pegsebad te pedowan niyo tomaking ki Jesu Cristo.
GAL 5:16 Seini se punù ko kenyo. Toloi niyo se Espiritu Santo, amon eked niyo ketolò se medaet ibeg te pedowan niyo.
GAL 5:17 Eked pegsebad se medaet ibeg niyo aw ibeg te Espiritu Santo. Yan se doun te egdowa-dowa se aneng-aneng niyo, aw yan doen belabag te ibeg niyo inangen.
GAL 5:18 Meneng aw Espiritu Santo se tekingan niyo, eked kaw den keallang te punù ingkeliwat i Moises.
GAL 5:19 Netegahan tadon man den se eg-inangen te otaw egtolò te medaet ibeg te pedowan dan. Iling kani se eg-inangen dan. Eglayok te kenà kandan esawa, egkapoy, wedad yàyà metibayi,
GAL 5:20 egsimba te kenà benal timanem, egpengenito, egpeopalay, egdindil, eg-ingà, mesayo egkeopal, demeten, egpeitongay dan, egpekontrahay dan,
GAL 5:21 egkeibeg te kedònan te doma otaw, metiinem, eg-inang te pengkey eden se ibeg dan inangen, aw doma pa medaet inang iling kani. Sinagda ko sikiyo kedengan, meneng todà a megsagda kenyo seini. Se menge otaw eg-inang te medaet iling kenyan, yan se eked pekeakop diyà te peglowan te Timanem.
GAL 5:22 Meneng se otaw egbeyà-beyaan te Espiritu Santo, seini se eg-inangen din. Egkedekelan din se doma otaw te pedowan, ontò egkeluba, doen kelinaw te pedowan din, egpeketayod te kelimahan, mèpiya se eg-inangen din, egkebowasag sikandin diyà te doma otaw, aw egkeseligan sikandin,
GAL 5:23 aw mèpiya se pedowan din, aw egpeketameng te ibeg te pedowan din. Wedad palos punù ingkeliwat i Moises te eked kepakay se peg-inang te mèpiya iling kenyan.
GAL 5:24 Se menge otaw migpesakop diyà ki Cristo, yan se mig-eked te pegtolò te medaet ibeg te pedowan.
GAL 5:25 Se Espiritu Santo, yan se nemegay kenitadon te pedowan wedad temanan, aw keilangan ontò kidon tomolò kandin.
GAL 5:26 Keilangan eked kidon pegpelangkaw-langkaw, eked kidon pegpetompuyusay, aw eked kidon pegpeingaay.
GAL 6:1 Menge kedowa ko te pegpemenal, aw doen kitaen niyo sebad otaw egpemenal meg-inang te medaet, mèpiya aw sikiyo menge otaw ontò egbeyà-beyaan te Espiritu Santo se megtabang kandin, amon ibingen niyo sikandin lomikò diyà te pegpenimanem, meneng keilangan mèpiya se pedowan niyo kandin. Ontò kaw pekeahà amon eked kaw heman keboyo i Satanas.
GAL 6:2 Aw megpetebangay kaw, yan egtoloen niyo se punù i Cristo.
GAL 6:3 Aw aneng-aneng te otaw eked sikandin keboyo te medaet, yan se lekatan te kedegdagan din pesalo te kededàtan, so neekalan sikandin.
GAL 6:4 Meneng mèpiya aw eneng-enengen te teg sebad-sebad otaw se kandin eg-inangen, so aw megpekeaseb sikandin meg-inang te mèpiya, kenà lekat te eg-inangen te doma otaw se luba din, meneng lekat te kandin eg-inangen.
GAL 6:5 Yan keilangan eneng-enengen te teg sebad-sebad otaw se kandin eg-inangen.
GAL 6:6 Se menge otaw pigtoledaan te kagi te Timanem, yan se keilangan memegay te menge mèpiya diyà te otaw migtoladà kandan.
GAL 6:7 Ontò niyo eneng-enengi se kebenalan seini. Eked keekali se Timanem. Pengkey eden se ipanggas te otaw, yan heman se geniyen din.
GAL 6:8 Se kelebadan niyan, aw tomolò se otaw te medaet ibeg te pedowan din, domateng diyà kandin se kemetayun wedad temanan. Meneng se otaw egbeyà-beyaan te Espiritu Santo, yan se otaw begayan din te keentayan wedad temanan.
GAL 6:9 Mèpiya aw eked kidon lengà meg-inang te mèpiya, so aw domateng se aldaw tapay pinemallì te Timanem, mekinawà tadon se ontong aw eked kidon lengà.
GAL 6:10 Yan seini se mèpiya inangen tadon. Gayed tadon inangen se mèpiya diyà te kedita te otaw, aw labi pa diyà te menge kedowa tadon egpemenal.
GAL 6:11 Siak si Pablo se simolat te temanan te kagi ko seini diyà kenyo. Ehai niyo se kededakel te pegsolat ko kani.
GAL 6:12 Se menge otaw egtoladà te keilangan tomolò kaw te punù ingkeliwat i Moises aw tolien kaw, yan se otaw meibeg te meluba se menge doma dan Judiyo pineokit te pegtolò niyo te ketanem dan sìyan. Eden dan aw pineokit kenyan, eked dan pemilangi te menge doma dan Judiyo, pengkey egpemenal dan ki Jesus nematay doton te kros.
GAL 6:13 Sìyan menge otaw egtoladà te keilangan tomolò kaw te punù ingkeliwat i Moises aw tolien kaw, wedà dan man ketolò se kedita te punù sìyan. Meneng ibeg dan tolien kaw amon iduyun se kandan pegkeotawun pineokit te pegtolò niyo kandan.
GAL 6:14 Meneng se kanak, eked a keibeg domuyun te kanak pegkeotawun. Sebad olò se iduyun ko, yan se Pengolo tadon si Jesu Cristo. Nematay sikandin doton te kros amon megpelowà kenitadon lekat te salà. Pineokit te pegkematay din, kenà a den egkeallang te medaet ibeg te keneyonan, aw eked a den heman keibeg taking te mekeboyo.
GAL 6:15 Pengkey tolien se otaw aw eked, kenà niyan se eglekatan te mèpiya, meneng se mèpiya, yan se kaling pedowan wedad temanan mekinawà tadon.
GAL 6:16 Timanem se egpemegay te kelinaw te pedowan aw keido. Ibeg ko, ibegay din iyan diyà te kedita te otaw egpemenal aw tomaking te kebenalan insolat ko seini, pengkey diyà te menge Judiyo aw menge otaw kenà Judiyo.
GAL 6:17 Lekat seini, mèpiya aw wedad otaw mengela te siak se sebad sogounun i Jesus, so doen den menge laas diyà te lawa ko lekat te pegpemilang te doma otaw kanak tandà te pegtaking ko ki Jesus.
GAL 6:18 Menge kedowa ko, ibeg ko tebangan kaw te Pengolo tadon si Jesu Cristo. Metoman iyan.
EPH 1:1 Se solat seini lekat kanak si Pablo. Lekat te ibeg te Timanem, siak se sebad sogounun i Jesu Cristo. Seini se solat ko diyà te kedita niyo sinakop te Timanem aw gayed egsalig diyà ki Jesu Cristo.
EPH 1:2 Ibeg ko, begayan kaw te tabang aw kelinaw te pedowan lekat te Timanem Amay tadon, aw lekat te Pengolo tadon si Jesu Cristo.
EPH 1:3 Iduyun se Timanem, Amay te Pengolo tadon si Jesu Cristo. Mèpiya se tabang te Timanem kenitadon pineokit te ininang i Cristo, so binegayan kidon din te kedita te kèpiyaan lekat te langit.
EPH 1:4 Gebii te wedà pa inangi te Timanem se keneyonan, tapay kidon din pinemallì amon inangen kidon sakop din pineokit ki Cristo, aw amon meg-aneng-aneng se Timanem te metòlid kidon, aw wedad silahen din diyà kenitadon. So dakel se pedowan te Timanem kenitadon,
EPH 1:5 mig-aneng-aneng sikandin te inangen kidon din menge batà din pineokit ki Cristo, so yan se ibeg din aw tod din.
EPH 1:6 Iduyun tadon se Timanem so ontò mèpiya se keido din, so ontò kidon din tinebangan pineokit te Batà din egkedekelan din te pedowan.
EPH 1:7 Pineokit te pegkematay i Cristo doton te kros, impelowà kidon te Timanem lekat te salà. Pigwedad din se kedita te salà tadon. Ontò dakel se tabang din kenitadon,
EPH 1:8 so ontò sikandin bowasag te pegtabang din kenitadon. Lekat te kebiyasa te Timanem, wedà din petega-tegahi diyà te otaw gebii se impetaga-taga din den kenitadon te doen pa inangen din pineokit ki Cristo.
EPH 1:10 Aw domateng se aldaw, tomanen te Timanem se tod din. Pegsebaden din se kedita te ininang din, pengkey doton diatas te langit aw dini lanto te tanà, aw ipelowan din si Cristo diyà te kedita niyan.
EPH 1:11 Lekat te ibeg te Timanem se kedita te eg-inangen din. Yan pinemallì kidon din gebii te wedà din pa inangi se keneyonan amon meinang kidon menge sakop din pineokit ki Cristo.
EPH 1:12 Sikami menge Judiyo se monà simalig diyà ki Cristo, aw yan se doun te iduyun day sikandin.
EPH 1:13 Sikiyo heman menge otaw kenà Judiyo, pegdineg niyo te benal kagi te Timanem, sìyan Mèpiya Indan te doen kelowaan lekat te salà, simalig kaw heman diyà ki Jesu Cristo. Mig-iling kaw den kenami menge Judiyo, so binegayan kaw heman te Timanem te Espiritu Santo tapay din impakang, so yan se pengilala te sakop kaw din.
EPH 1:14 So impeogpà din se Espiritu Santo diyà kenitadon, netegahan tadon te kominawà kidon te kedita te kèpiyaan impakang din kenitadon, aw ontò kidon din heman ipelowà. Yan se doun te iduyun tadon sikandin.
EPH 1:15 Na, dinineg ko te gayed kaw egsalig diyà te Pengolo tadon si Jesus. Dakel ekon heman se pedowan niyo te kedita te sakop te Timanem.
EPH 1:16 Lekat te pegdineg ko kenyan, gayed a egtawal-tawal aw egpesiontong diyà te Timanem tepad kenyo.
EPH 1:17 Egtawal-tawal a diyà te Timanem simogò te Pengolo tadon si Jesu Cristo, aw sikandin se Timanem Amay ipegduyun tadon. Egpemoyò a diyà kandin te tebangan kaw din pineokit te Espiritu Santo, amon megkebiyasa kaw, aw amon metaga-taga kaw heman te Timanem.
EPH 1:18 Ibeg ko ontò kaw din toledaan amon ketegahan niyo aw eden se pelimanan niyo tandà te pegtawal din kenyo. Ibeg ko heman ipetaga-taga kaw din te ontò dakel se ontong ibegay din diyà te kedita te otaw sinakop te Timanem.
EPH 1:19 Ibeg ko heman ketegahan niyo te gayed meketabang se Timanem te kedita tadon egpemenal, so ontò sikandin metolos. Impekità din te metolos sikandin
EPH 1:20 pineokit te ininang din diyà ki Cristo, so inantay din sikandin lekat te nematay, aw impenenoo din sikandin kidoen te tangkil din doton te langit amon lomowan heman doma din.
EPH 1:21 Yan eglowan si Cristo diyà te kedita te melangkaw aw metolos doton te langit, so labi pa melangkaw se gulal din diyà te kedita te doma gulal, pengkey songkani aw modi aldaw.
EPH 1:22 Impelowan te Timanem si Cristo diyà te kedita, aw ininang din si Cristo Pengolo te kedita aw olo te kedita tadon egpemenal,
EPH 1:23 so iling kidon te lawa i Cristo. Tandà te pegpesakop tadon diyà kandin, wedad kolang diyà kandin, aw wedad heman kolang doton te langit aw dini heman te lanto te tanà tandà te peglowan din diyà te kedita niyan.
EPH 2:1 Kedengan, te wedà kaw pa pemenal, iling kaw te nematay tandà te peg-inang niyo te salà.
EPH 2:2 Kedengan, gayed kaw egpekesalà. Mig-iling kaw te otaw eg-inang te salà dini te keneyonan. Timolò kaw ki Satanas, pengolo te kedita te bosaw. Sikandin se egbayà-bayà te kedita te otaw kenà egtolò te Timanem.
EPH 2:3 Kedengan, iling heman kenyan se kedita tadon, so gayed kidon egtaking te medaet ibeg te pedowan tadon. Pengkey eden se ibeg te lawa aw aneng-aneng tadon, yan se eg-inangen tadon. So yan se ketanem tadon, detengan kidon peden te pelumun te Timanem iling te kedita te otaw kenà egtolò kandin.
EPH 2:4 Meneng ontò kidon neidowan te Timanem, aw ontò kidon din nedekelan te pedowan,
EPH 2:5 so pengkey iling kidon te nematay tandà te peg-inang tadon te medaet, meneng binegayan kidon te Timanem te kaling pedowan tandà te pegpesakop tadon diyà ki Cristo. Pineokit te tabang te Timanem kenitadon, impelowà kidon din lekat te salà.
EPH 2:6 Inantay kidon din doma i Jesu Cristo lekat te nematay, aw impelowan kidon din doma din doton te langit pineokit ki Jesu Cristo.
EPH 2:7 Yan se ininang din amon gayed metaga-taga se kedita te otaw te ontò dakel se tabang din kenitadon pineokit ki Jesu Cristo.
EPH 2:8 Pineokit te tabang te Timanem, impelowà kaw din lekat te salà te pegpemenal niyo ki Cristo kenà pineokit te inang niyo, meneng pineokit te bowang te Timanem kenyo.
EPH 2:9 Wedad palos otaw megpelangkaw-langkaw, so eked pekelowà se otaw lekat te salà pineokit te eg-inangen din.
EPH 2:10 Meneng pineokit ki Cristo, ininang kidon den te Timanem kaling amon mekeinang kidon te mèpiya, so yan se tapay din inlalang kenitadon.
EPH 2:11 Sikiyo menge otaw kenà Judiyo, eneng-enengi niyo tepad te pegkeotawun niyo kedengan. Egkebensihan kaw te menge Judiyo egpemetolì, so wedà kaw taking te ketanem day sìyan.
EPH 2:12 Wedà kaw pekeakop diyà te menge bowad-bowad i Israel. Eked kaw heman pekekinawà te ontong ibegay te Timanem kenami, so kenà kenyo kemonaan se pinekangan din. Kedengan, te pegtaking niyo te medaet ketanem te otaw dini te keneyonan, wedad palos tabang te Timanem pinelimanan niyo, so wedà kaw pa ketaga-taga tepad kandin.
EPH 2:13 Pengkey mediyò kaw lekat te Timanem kedengan, meneng pegpemenal niyo ki Cristo, impedapag kaw te Timanem pineokit te pegkematay i Cristo doton te kros.
EPH 2:14 Pineokit kandin, migsebad den se menge Judiyo aw otaw kenà Judiyo. Yan se doun te wedad den peopalay te menge Judiyo aw otaw kenà Judiyo, so inabat din se elet diyà te tengà-tengà tadon.
EPH 2:15 Tandà te pegkematay i Cristo, impelowà kay din menge Judiyo lekat te menge punù ingkeliwat i Moises tinolò day, amon pegsebaden din se didowa pongan te otaw, se menge Judiyo aw otaw kenà Judiyo, pineokit te pegpesakop te kedita tadon diyà kandin. Pigsebad din se didowa kemolò te otaw, aw yan inabat din se peopalay tadon.
EPH 2:16 Pineokit te pegkematay i Cristo doton te kros, ininang din iling te sebad lawa se didowa kemolò te otaw, aw pigsebad din se kedita tadon aw Timanem. Pineokit te ininang i Cristo, wedad den peopalay.
EPH 2:17 Dimini si Cristo amon megtoladà te wedad den peopalay. Yan se intoladà din diyà te kedita te otaw, pengkey sikiyo menge otaw kenà Judiyo aw sikami menge Judiyo.
EPH 2:18 Pineokit ki Cristo, mekepedapag kidon den diyà te Timanem Amay tadon, so eg-ogpaan den te Espiritu Santo se kedita tadon, pengkey Judiyo aw otaw kenà Judiyo.
EPH 2:19 Nayan, sikiyo menge otaw kenà Judiyo, pengkey kenà kaw sakop te Timanem kedengan, meneng sinakop kaw din den sipat kedita te doma sakop din, aw ininang kaw din menge batà din.
EPH 2:20 Se kedita tadon egpemenal, iling kidon te balay, aw iling te tollok te balay se menge sogounun i Cristo aw menge telekeliwat te kagi te Timanem. Si Jesu Cristo se iling te bato pinetindegan te balay sìyan.
EPH 2:21 Dimasel se balay sìyan so pigsebad se kedita tadon diyà kandin, aw eg-inangen kidon din balay eg-ogpaan te Timanem tandà te pegsebad tadon diyà te Pengolo.
EPH 2:22 Sikiyo menge otaw kenà Judiyo, nekeakop kaw heman diyà te balay sìyan eg-ogpaan te Timanem pineokit te Espiritu Santo.
EPH 3:1 Na, siak si Pablo, kineleboso a so egtaking a ki Jesu Cristo aw migtoladà a tepad kandin diyà kenyo menge otaw kenà Judiyo.
EPH 3:2 Netegahan niyo den besi te insogò a te Timanem amon megtoladà a kenyo te doen tabang din kenyo pengkey kenà kaw Judiyo.
EPH 3:3 Netegahan niyo den heman te doen kebenalan impetaga-taga te Timanem diyà kanak pengkey wedà iyan petega-tegahi gebii. Simolat a den te mebabà olò tepad kenyan diyà te solat ko seini.
EPH 3:4 Aw megbasa kaw kenyan, ketegahan niyo heman se netegahan ko tepad ki Cristo wedà petega-tegahi gebii.
EPH 3:5 Wedà iyan petega-tegahi te Timanem diyà te menge kemonaan tadon. Meneng pineokit te Espiritu Santo, impetaga-taga din den se kebenalan diyà kenami pinemallì din menge sogounun i Cristo aw menge telekeliwat te kagi din.
EPH 3:6 Seini se kebenalan impetaga-taga din den. Sikiyo menge otaw kenà Judiyo, so nemenal kaw te Mèpiya Indan tepad ki Jesu Cristo, aw migpesakop kaw diyà kandin, begayan kaw heman te Timanem te kedita onawa te ibegay din diyà te menge Judiyo egpemenal. Ipeakop kaw din heman diyà te otaw lowanan i Cristo doma te menge Judiyo. Begayan kaw heman te Timanem te impakang din, onawa te ibegay din diyà te menge Judiyo egpemenal.
EPH 3:7 Tandà te tabang te Timanem kanak, ininang a din sogounun megtoladà te Mèpiya Indan pineokit te tolos din.
EPH 3:8 Pengkey siak se ontò medanà diyà te kedita te sakop te Timanem, meneng pinemallì a din amon megtoladà kenyo menge otaw kenà Judiyo tepad te ontò mèpiya tabang i Cristo kenitadon eked tadon ontò kelebeti.
EPH 3:9 Insogò a din amon ipetaga-taga ko diyà te kedita te otaw aw eden se tod te Timanem mig-inang te kedita. Wedà din petega-tegahi diyà te otaw gebii aw eden se tod din,
EPH 3:10 amon pineokit te kedita te otaw egpemenal, ipetaga-taga din den diyà te kedita te melangkaw aw metolos doton te langit te ontò mèpiya se kebiyasa din.
EPH 3:11 Yan se tod te Timanem gebii te wedad pa keneyonan, meneng tinoman din den iyan pineokit te Pengolo tadon si Jesu Cristo.
EPH 3:12 So nemenal kidon den ki Cristo, yan se doun te wedad den lamit tadon megpedapag diyà te Timanem. Eked kidon den sagkà te pegtawal-tawal tadon diyà kandin.
EPH 3:13 Yan doen ipunù ko kenyo. Ikà niyo eglengà tandà te kelimahan dimateng kanak lekat te pegtoladà ko kenyo menge otaw kenà Judiyo, so pineokit te kelimahan ko sìyan, doen kèpiyaan niyo.
EPH 3:14 Peg-aneng-aneng ko tepad te ontò mèpiya tabang te Timanem kenitadon, eglongken a aw egtawal-tawal a diyà te Timanem Amay.
EPH 3:15 Sikandin se eg-ingadan te kedita, pengkey doton te langit aw dini lanto te tanà.
EPH 3:16 Egtawal-tawal a diyà te Timanem Melangkaw egpemegay te ontò mèpiya, so ibeg ko pekegsenen din se pegsalig niyo diyà kandin pineokit te Espiritu Santo.
EPH 3:17 Egpemoyò a diyà te Timanem te gayed meg-ogpà si Cristo diyà te pedowan niyo tandà te pegpemenal niyo kandin. Egpemoyò a heman diyà kandin amon labi pa megkedakel se pedowan niyo diyà te Timanem aw diyà te doma otaw.
EPH 3:18 Pineokit kenyan, ontò kaw metaga-taga sipat kedita tadon menge sakop te Timanem te kebelad aw kelayat aw kelangkaw aw kedalem te kedakel te pedowan i Cristo.
EPH 3:19 Ibeg ko metaga-taga kaw te egkedekelan kaw i Cristo te pedowan, pengkey eked tadon ontò kelebeti se kedakel te pedowan din. Aw metaga-taga kaw te egkedekelan kaw i Cristo te pedowan, kinewaen niyo se kedakel te ibegay te Timanem diyà kenyo lamig mesikop kaw onawa te pegkesikop din.
EPH 3:20 Iduyun tadon den se Timanem egtabang kenitadon pineokit te tolos din, so ontò dakel se mebatog din inangen labi pa dakel diyà te kedita te egpemoyoen tadon aw eg-eneng-enengen tadon.
EPH 3:21 Iduyun sikandin pineokit te kedita tadon egpemenal aw pineokit heman ki Jesu Cristo. Iduyun sikandin te wedad palos temanan. Metoman iyan.
EPH 4:1 Nayan, siak se nekeleboso tandà te pegtaking ko te Pengolo, aw yan memoyò a diyà kenyo te keilangan gayed mèpiya se kedita te eg-inangen niyo, sìyan ibeg te Timanem, so yan se tod din te pegtawal din kenyo.
EPH 4:2 Ikà niyo egpelangkaw-langkaw. Keilangan melayat se pedowan niyo diyà te doma otaw tandà te pegpedekelay niyo te pedowan.
EPH 4:3 Pegpekagsen kaw amon megpedeleg se pegsebad te pedowan niyo, so sebad se pedowan imbegay te Espiritu Santo kenyo.
EPH 4:4 Ininang kaw den te Timanem iling te sebad lawa, aw olò sebad se Espiritu Santo mig-ogpà diyà kenyo, so olò sebad se egpelimanan niyo lekat te pegtawal te Timanem kenyo.
EPH 4:5 Olò sebad se Pengolo tadon. Olò sebad se pinemenalan tadon. Olò sebad se pegbonyag kenitadon.
EPH 4:6 Olò sebad se Timanem Amay te kedita tadon. Eglowan sikandin diyà te kedita tadon. Pengkey kenan kidon peg-ogpà, kidoen sikandin. Eg-ogpà sikandin diyà te kedita tadon.
EPH 4:7 Doen kebiyasa imbegay i Cristo kenitadon, meneng kenà onawa se imbegay din diyà te kedita tadon, so pinemallì din aw eden se ibegay din diyà te teg sebad-sebad kenitadon.
EPH 4:8 Iling kenyan se kagi te Timanem insolat gebii, kagi din, “Pegpeengat din doton te langit, impetaga-taga din te dinaeg din den se kedita te poon din. Doen heman imbegay din diyà te menge sakop din.”
EPH 4:9 Na, pineokit te kagi “pegpeengat din,” netegahan tadon te tapay sikandin timenà dini te tanà.
EPH 4:10 Si Cristo se timenà dini te tanà, aw sikandin heman se migpeengat doton diatas te langit amon lomowan sikandin diyà te kedita pengkey kenan.
EPH 4:11 Sikandin se nemegay kenitadon te menge kinemoloan te kebiyasa amon megpetebangay kidon. Doen menge sogounun i Cristo. Doen heman menge telekeliwat te kagi te Timanem. Doen heman menge otaw egtoladà te Mèpiya Indan tepad ki Cristo. Doen heman menge otaw biyasa egpengibing aw egtoladà te menge otaw egpemenal.
EPH 4:12 Yan se menge kebiyasa imbegay din diyà kenitadon menge sakop te Timanem amon mekebatog kidon megtabang te menge doma otaw egpemenal, aw amon megkagsen se pegpemenal te kedita tadon neinang iling te lawa i Cristo.
EPH 4:13 Pineokit kenyan, mekebatog kidon megsebad te pegpemenal tadon aw pegketaga-taga tadon te Batà te Timanem. Yan meinang kidon iling te otaw migketesan, so meinang se keogpà tadon iling te keogpà i Cristo.
EPH 4:14 Aw metoman iyan, eked kidon pekeonawa te mengisù. Eked kidon pekeonawa te dagsà eg-ibingen te balud aw gayed ipegpalid te kelamag, so eked kidon pemenal te pengkey eden se itoladà te menge otaw biyasa eg-akal pineokit te kebolalaw dan.
EPH 4:15 Meneng keilangan tomolò kidon te kebenalan aw megpedekelay kidon heman te pedowan, amon meg-iling kidon ki Cristo pengkey eden se inangen tadon. Sikandin se olo tadon,
EPH 4:16 aw iling te lawa din se kedita tadon menge sakop din. Aw megsebad se terbaho te luluwadun aw teg sebad-sebad kinemoloan diyà te lawa, meketilles se lawa. Iling heman kenyan, aw tomanen te teg sebad-sebad kenitadon se eg-inangen tadon, tomilles kidon aw megkagsen kidon pineokit te pegpedekelay tadon te pedowan.
EPH 4:17 Nayan, seini se ipunù ko kenyo lekat te Pengolo tadon. Ikà niyo den egtaking te ketanem te otaw kenà egtaking te Timanem, so wedad ontong te aneng-aneng dan.
EPH 4:18 Wedà dan ketaga-taga te kebenalan. Wedad kaling pedowan imbegay te Timanem kandan, so wedà dan pemenal te kebenalan, aw magsen se olo dan.
EPH 4:19 Wedad yàyà dan te peg-inang dan te medaet, aw ontò dan metibayi, aw egkeibeg dan eg-inang te pengkey eden kemoloi te medaet.
EPH 4:20 Meneng kenà iling kenyan se pig-ilingan niyo tepad ki Cristo,
EPH 4:21 so netegahan ko te tinoledaan kaw tepad ki Jesus aw impetaga-taga kaw tepad te kebenalan intoladà din.
EPH 4:22 Yan keilangan tenanan niyo den se tapay pegkeotawun niyo so yan se linekatan te medaet ketanem tinekingan niyo kedengan, so pineokit kenyan, egkeekalan kaw amon tomaking kaw te medaet ibeg te pedowan niyo, aw yan se mekedaet kenyo.
EPH 4:23 Keilangan meinang kaling se kenyo pedowan aw aneng-aneng.
EPH 4:24 Keilangan kinewaen niyo den se kaling pegkeotawun ininang te Timanem iling kandin, aw ipekità niyo iyan pineokit te peg-inang niyo te ontò metòlid aw mèpiya.
EPH 4:25 Yan ikà niyo egkebolalaw. Keilangan benal se ikegiyen niyo diyà te doma otaw, so neinang se kedita tadon kinemoloan diyà te sebad olò lawa.
EPH 4:26 Aw doen ikeopal niyo, ikà niyo eg-inang te medaet. Pegwedadi niyo se keopal te eked pa sallep se aldaw,
EPH 4:27 amon eked kaw keboyo i Satanas meg-inang te medaet.
EPH 4:28 Aw doen menenakaw doton kenyo, keilangan lomengà aw megterbaho amon meketabang te menge doma otaw nelimahan.
EPH 4:29 Ikà niyo palos eg-ikagi te medaet diyà te doma otaw. Meneng keilangan mèpiya se ikegiyen niyo diyà te doma otaw amon megkagsen dan aw ketebangan dan pineokit te kagi niyo. Aw meketepad se kagi niyo, yan ketebangan se otaw domineg kenyo.
EPH 4:30 Ikà niyo eg-inang te pengkey eden eked keibegi te Espiritu Santo. Binegayan kaw te Timanem te Espiritu Santo, so yan se pengilala te sinakop kaw din aw ipelowà kaw te aldaw te peglikò te Pengolo tadon.
EPH 4:31 Ikà niyo egpeogpà te medaet diyà te pedowan. Ikà niyo egkeopal. Ikà niyo egdindil. Ikà niyo egbaet-baet. Ikà niyo heman eg-inang te medaet diyà te doma otaw.
EPH 4:32 Meneng keilangan meg-inang kaw te mèpiya, aw megpeidoway kaw. Keilangan pegwedaden niyo se salà ininang te doma otaw diyà kenyo, iling te pegwedad te Timanem te salà ininang niyo tandà te pegkematay i Cristo.
EPH 5:1 Yan, so ininang kaw te Timanem menge batà din egkedekelan din te pedowan, keilangan meg-iling kaw kandin.
EPH 5:2 Keilangan gayed kaw megpedekelay te pedowan iling te kedakel te pedowan i Cristo kenitadon. Pegkematay i Cristo doton te kros, simelilin sikandin kenitadon, aw yan neinang sikandin iling te ayam-ayam inimetayan amon mesinalay se Timanem.
EPH 5:3 So sakop kaw te Timanem, ikà niyo eglayok te kenà kenyo esawa. Ikà niyo egkapoy. Ikà niyo eg-ingà. Keilangan ketegahan te wedad palos eg-inangen niyo iling kenyan.
EPH 5:4 Eked heman kepakay aw mikagi kaw te medaet. Eked heman kepakay aw mikagi kaw te wedad ontong. Eked heman kepakay aw megkebawol kaw te medaet. Meneng keilangan gayed kaw megpesiontong diyà te Timanem.
EPH 5:5 Ketegahan niyo te benal se kagi ko seini. Eked peekopi i Cristo aw Timanem se otaw diyà te peglowan din aw eglayok dan te kenà kandan esawa, aw egkapoy dan, aw eg-ingà dan. Aw eg-ingà se otaw, doen egsimbahen din kenà Timanem.
EPH 5:6 Ipelumun te Timanem se kedita te otaw eg-inang te medaet iling kenyan, so kenà dan egtolò kandin. Yan peg-ahà kaw amon eked kaw keekali te otaw egpelingo-lingo egtoladà te kebenalan.
EPH 5:7 Ikà niyo egtaking kandan.
EPH 5:8 Kedengan, diyà kaw te kengitngitan, so wedà kaw pa ketaga-taga tepad te Timanem. Meneng songkani diyà kaw den te kelowahan, so migpesakop kaw diyà te Pengolo tadon. Yan keilangan imendayan niyo se keogpà niyo diyà te kelowahan.
EPH 5:9 Aw imendayan niyo se keogpà niyo diyà te kelowahan, ketegahan iyan pineokit te mèpiya se pedowan niyo, aw metòlid se eg-inangen niyo, aw egkeseligan kaw.
EPH 5:10 Pekagsen kaw peg-iling te inang mekebegay te luba diyà te Pengolo tadon.
EPH 5:11 Ikà niyo eg-inabut te inang wedad ontong eg-inangen te menge sakop te kengitngitan. Meneng keilangan ipekità niyo te medaet se eg-inangen dan.
EPH 5:12 Ontò medaet se eg-inangen dan kenà egkitaen te doma otaw, igsà mekeyèyaay se otaw mikagi tepad kenyan.
EPH 5:13 Meneng aw ipekità se eg-inangen te otaw doton te kelowahan, yan ontò ketegahan aw eden se mèpiya aw medaet.
EPH 5:14 Aw doen manyag, keenyagan se kedita. Yan se doun te doen eg-ikegiyen seini. “Aw timedogi ka pa, keloka ka den. Aw nematay ka pa, keantay ka den lekat te nematay, So keenyagan kaw den i Cristo.”
EPH 5:15 Peg-ahà kaw tepad te eg-inangen niyo. Ikà niyo eg-iling te otaw wedad inenengen. Meneng peg-iling kaw te otaw doen inenengen.
EPH 5:16 Keilangan meg-inang kaw te mèpiya dalem te doen pa aldaw, so medita se otaw gayed eg-inang te medaet songkani.
EPH 5:17 Yan ikà niyo eg-inang te wedad ontong, meneng keilangan tomolò kaw te ibeg te Pengolo tadon.
EPH 5:18 Ikà niyo eglasing, so mekedaet iyan kenyo. Meneng keilangan beyà-beyaan kaw te Espiritu Santo.
EPH 5:19 Yan aw metipon kaw, pegdelangan kaw tandà te keluba te pedowan niyo, amon iduyun se Pengolo tadon.
EPH 5:20 Keilangan gayed kaw megpesiontong te kedita diyà te Timanem Amay tadon pineokit te ngadan te Pengolo tadon si Jesu Cristo.
EPH 5:21 Keilangan megpesegmanay kaw tandà te pegtaking niyo ki Cristo.
EPH 5:22 Sikiyo menge bayi doen esawa, keilangan tomolò kaw te esawa niyo, iling te pegtolò niyo te punù te Pengolo tadon,
EPH 5:23 so meama se pengolo te esawa din, iling ki Cristo se Pengolo te kedita tadon egpemenal. Iling kidon te lawa din, aw sikandin se egpelowà kenitadon.
EPH 5:24 Yan keilangan tomolò se menge bayi te esawa dan, iling te pegtolò te kedita tadon egpemenal ki Cristo.
EPH 5:25 Sikiyo menge meama doen esawa, keilangan dakel se pedowan niyo te esawa niyo, aw yan meg-iling kaw ki Cristo. Dakel se pedowan i Cristo diyà te kedita tadon egpemenal, aw yan se doun te simelilin sikandin kenitadon aw nematay amon megpelowà kenitadon.
EPH 5:26 Yan se ininang din amon inangen kidon din ontò egpenimanem. Yan se ininang din, so lininisan kidon den i Cristo pineokit te pegpebonyag tadon diyà te wayeg pineokit te kagi te Timanem.
EPH 5:27 Lininisan kidon din amon meluba sikandin te pegtengteng din kenitadon, so ibeg din wedad salà tadon, aw wedad kemalì, aw wedad palos medaet iling kenyan. Meneng ibeg din ontò kidon menimanem.
EPH 5:28 Iling heman kenyan, keilangan dakel se pedowan te meama diyà te esawa din, iling te aneng-aneng din tepad te kandin lawa. Yan aw dakel se pedowan te meama diyà te esawa din, iling te dakel se pedowan din diyà te kandin pegkeotawun,
EPH 5:29 so wedad palos otaw egkebensi te kandin lawa, meneng gayed din iyan eg-ipaten. Iling heman kenyan, gayed eg-ipat si Cristo kenitadon egpemenal,
EPH 5:30 so iling kidon te menge kinemoloan te lawa din.
EPH 5:31 Doen kagi te Timanem insolat, “Yan se doun te tomanan se meama te amay aw inay din, aw megsebad diyà te esawa din. Se didowa dan meinang sebad.”
EPH 5:32 Ontò mèpiya se kebenalan impetaga-taga te Timanem pineokit te kagi din sìyan, aw mikagi a den diyà kenyo te kedegdagan niyan. Yan se kebenalan tepad ki Cristo aw sikitadon egpemenal.
EPH 5:33 Meneng ibeg ko ketegahan niyo te keilangan dakel se pedowan te teg sebad-sebad meama te esawa din, iling te aneng-aneng din tepad te kandin pegkeotawun. Keilangan megsagman heman se bayi te kandin esawa.
EPH 6:1 Sikiyo menge mengisù, keilangan tomolò kaw te amay aw inay niyo tandà te pegpesakop niyo diyà te Pengolo tadon, so yan se mèpiya.
EPH 6:2 Doen punù te Timanem tepad kenyan, aw yan se tagnà punù din doen ontong ibegay din diyà te otaw tomolò kenyan, kagi din, “Keilangan segmanen niyo se amay aw inay niyo,
EPH 6:3 amon mèpiya se keogpà niyo, aw amon melayat se omol niyo kidoen te lanto te tanà.”
EPH 6:4 Sikiyo menge amay aw inay, ikà niyo egpeopal te menge batà niyo. Meneng keilangan megpunù kaw kandan aw megtoladà kaw kandan iling te eg-inangen te Pengolo tadon.
EPH 6:5 Sikiyo menge allang, keilangan ontò kaw tomolò te amo niyo dini lanto te tanà. Keilangan megsagman kaw kandan, aw melobos se pedowan niyo kandan, onawa te pegtolò niyo ki Cristo.
EPH 6:6 Keilangan gayed kaw tomolò, kenà olò dalem te pegtengteng te amo niyo, so kenà olò otaw se keilangan kelubahan niyo. Meneng so si Cristo se Pengolo niyo, keilangan lekat te pedowan niyo se pegtolò niyo te ibeg te Timanem.
EPH 6:7 Keilangan measeb kaw megterbaho, so kenà olò otaw se toloen niyo, meneng toloen niyo heman se Pengolo tadon.
EPH 6:8 Ikà niyo egkelibel te doen ontong ibegay te Pengolo tadon diyà te kedita te otaw eg-inang te mèpiya, pengkey allang aw otaw kenà allang.
EPH 6:9 Sikiyo menge otaw doen allang, keilangan mèpiya heman se pedowan niyo kandan. Ikà niyo eglamit kandan, so netegahan niyo te onawa se Pengolo niyo aw Pengolo dan eg-ogpà doton te langit. Diyà te aneng-aneng din, onawa se keelagà te kedita te otaw, pengkey allang aw kenà allang.
EPH 6:10 Nayan, seini se temanan te punù ko kenyo. So migpesakop kaw diyà te Pengolo tadon, peseligi se pegtaking niyo kandin pineokit te keseg ibegay din kenyo.
EPH 6:11 Gemiti niyo se kedita te kekamang ipegbegay te Timanem diyà kenyo, amon eked kaw dàgi i Satanas te peg-akal din kenyo.
EPH 6:12 Kenà otaw se bolawen tadon, meneng bolawen tadon se mededaet sogounun i Satanas pengkey melangkaw dan, aw egbayà-bayà te otaw dini lanto te tanà eg-ogpà diyà te kengitngitan, aw kedita te bosaw metolos eg-inang te medaet.
EPH 6:13 Yan se doun te keilangan gemiten niyo se kedita te kekamang ibegay te Timanem kenyo amon meketagad kaw. Yan aw domateng se aldaw te kelimahan, eked kaw dàgi, meneng aw mepenga iyan, kitaen te nenalo kaw.
EPH 6:14 Yan pegpeketagad kaw iling te sondalo egpeketagad megbolaw te poon din. Iling te elen se peg-aneng-aneng niyo te kebenalan, aw iling te saol kinis se peg-inang niyo te metòlid.
EPH 6:15 Iling te sepatos se ibeg niyo meg-indan diyà te doma otaw te Mèpiya Indan tepad te kelinaw te pedowan ibegay te Timanem kandan.
EPH 6:16 Doen pa doma keilangan gemiten niyo, so iling te kelasag se pegsalig niyo diyà ki Cristo, amon eked kaw kesogat te kededàtan iling te tonod eglegdeg ipegpanà i Satanas diyà kenyo.
EPH 6:17 Iling te telandà kinis se pegketaga-taga niyo te nekelowà kaw den lekat te salà. Iling te sondang se kagi te Timanem insolat imbegay te Espiritu Santo diyà kenyo. Keilangan gemiten niyo se kedita te kekamang sìyan.
EPH 6:18 Pengkey eden se domateng kenyo, keilangan gayed kaw megtawal-tawal pineokit te tabang te Espiritu Santo. Pemoyò kaw te kelidoan niyo diyà te Timanem. Peg-ahà kaw amon eked kaw lengà. Pegtawal-tawal kaw tepad te kedita te sakop te Timanem.
EPH 6:19 Pegtawal-tawal kaw heman tepad kanak, amon begayan a te Timanem te kebiyasa te pegtoladà ko te kagi din. Pegtawal-tawal kaw tepad kanak amon wedad lamit ko te pegtoladà ko te Mèpiya Indan tepad ki Cristo, sìyan wedà din petega-tegahi diyà te otaw gebii.
EPH 6:20 Insogò a te Timanem amon megtoladà a te Mèpiya Indan sìyan, aw yan se doun te kineleboso a den. Pegtawal-tawal kaw tepad kanak amon wedad lamit ko te pegtoladà ko, so yan se sogò din kanak.
EPH 6:21 Nayan, ibeg ko ketegahan niyo tepad te peg-ogpà ko aw eg-inangen ko dini, aw yan isogò ko si Tikico meg-indan kenyo te kedita. Sikandin se kedowa tadon te pegpemenal egkedekelan ko te pedowan, aw egkeseligan sikandin egtelaban kanak te pegtoladà tepad te Pengolo tadon.
EPH 6:22 Isogò ko den sikandin doton kenyo amon metaga-taga kaw tepad te peg-ogpà day dini, aw amon meluba se pedowan niyo.
EPH 6:23 Menge kedowa ko, ibeg ko doen kelinaw te pedowan niyo aw megpedekelay kaw te pedowan dalem te pegsalig niyo te Timanem. Yan se ibegay kenyo te Timanem Amay aw Pengolo tadon si Jesu Cristo.
EPH 6:24 Ibeg ko tebangan te Timanem se kedita te otaw dakel se pedowan dan diyà te Pengolo tadon si Jesu Cristo te wedad temanan.
PHI 1:1 Seini se solat ko, si Pablo, doma ki Timoteo, didowa kay insogò i Jesu Cristo. Seini se solat day te kedita niyo menge sakop te Timanem kidoen te lonsod te Filipos. Simolat kay heman te menge egpengibing kenyo aw menge doma opisyal te simbahan.
PHI 1:2 Ibeg ko, begayan kaw te tabang aw kelinaw te pedowan lekat te Timanem Amay tadon, aw lekat te Pengolo tadon si Jesu Cristo.
PHI 1:3 Gayed a egpesiontong diyà te Timanem te kelikit ko eg-aneng-aneng kenyo.
PHI 1:4 Gayed neluba se pedowan ko te kelikit ko egtawal-tawal diyà te Timanem tepad te kedita niyo.
PHI 1:5 Neluba a so lekat te aldaw te pegpemenal niyo ki Cristo lamig songkani, gayed dakel se tabang niyo kanak te pegtoladà ko te Mèpiya Indan tepad ki Cristo.
PHI 1:6 Netegahan ko te migtebò se Timanem mig-inang te mèpiya kidoen te pedowan niyo, aw gayed din iyan inangen lamig melingeb iyan te aldaw te peglikò i Jesu Cristo.
PHI 1:7 Mèpiya se eg-eneng-enengen ko tepad te kedita niyo, so gayed dakel se pedowan ko kenyo. Tinebangan kaw te Timanem aw tinebangan a din heman, pengkey te pegkeleboso kanak, aw pegpetaga-taga ko te benal se Mèpiya Indan tepad ki Cristo.
PHI 1:8 Netaga-taga se Timanem te benal dakel se pedowan ko te kedita niyo, onawa te kedakel te pedowan i Jesu Cristo kenyo.
PHI 1:9 Egtawal-tawal a diyà te Timanem tepad kenyo, amon gayed din pedekelen se pedowan niyo, aw amon labi kaw pa megkebiyasa te kebenalan aw metòlid se aneng-aneng niyo,
PHI 1:10 amon metaga-taga kaw aw eden se ontò mèpiya inangen niyo. Aw metoman iyan, eked kaw peg-inang te salà, aw wedad otaw mekesila kenyo, meneng meketagad kaw te aldaw te peglikò i Cristo.
PHI 1:11 Ibeg ko, olò metòlid se inangen niyo pineokit te tabang i Jesu Cristo kenyo. Yan ipelangkaw aw iduyun se Timanem.
PHI 1:12 Menge kedowa ko, ibeg ko metaga-taga kaw te pengkey nelimahan a dini te keleboso, meneng pineokit kenyan, labi pa nedengeg se Mèpiya Indan tepad ki Cristo,
PHI 1:13 so netegahan den te keditaan te sondalo te gobirnador aw kedita te doma otaw te kineleboso a tandà te pegtaking ko ki Cristo.
PHI 1:14 Lekat te pegkeleboso kanak, labi den egsalig se keditaan te otaw egpemenal diyà te Pengolo tadon. Labi den migkagsen se ibeg dan megtoladà te kagi te Timanem, so wedad den lamit dan.
PHI 1:15 Pengkey doen otaw egtoladà tepad ki Cristo eg-ingà kanak aw meibeg domaeg kanak, meneng mèpiya se tod te menge doma otaw egtoladà.
PHI 1:16 Dakel se pedowan dan kanak, so netegahan dan te pinemallì a te Timanem meg-indan te Mèpiya Indan tepad ki Cristo.
PHI 1:17 Meneng sìyan menge doma otaw, egtoladà dan tepad ki Cristo amon megkelangkaw dan. Kenà mèpiya se tod dan, so ibeg dan labi pa medaet se kelimahan ko dini te keleboso.
PHI 1:18 Meneng aw den iyan, so pengkey medaet aw mèpiya se tod dan, meneng egkeluba a kenyan aw yan se peokit te pegtoladà tepad ki Cristo. Gayed a meluba lekat seini,
PHI 1:19 so netegahan ko te pengkey nelimahan a, meneng ipelowà a kwani pineokit te pegtawal-tawal niyo, aw pineokit te tabang te Espiritu i Jesu Cristo.
PHI 1:20 Ibeg ko, gayed ko inangen se kedita insalig te Timanem diyà kanak. Wedà a palos kelemitan te pegtoladà ko, labi den te aldaw songkani, amon gayed iduyun si Cristo pineokit kanak pengkey imetayan a aw eked a imetayi.
PHI 1:21 Dalem te peg-ogpà ko dini lanto te tanà, si Cristo se ontò meelagà kanak. Meneng aw matay a, labi pa mèpiya se ontong ko so megdoma a kandin.
PHI 1:22 Aw menamay pa se pegkematay ko, doen pa dakel mebatog ko inangen ki Cristo. Meneng wedà ko ketegahi aw eden se mèpiya pemellien ko.
PHI 1:23 Ontò egdowa-dowa se aneng-aneng ko tepad kenyan. Doen ibeg te pedowan ko domoton a te langit, so labi pa mèpiya aw meg-ogpà a doton doma ki Cristo.
PHI 1:24 Meneng amon meketabang a kenyo, keilangan meg-ogpà a pa dini te tanà.
PHI 1:25 So netegahan ko iyan, aneng-aneng ko eked a pa kematay, meneng meg-ogpà a pa doma niyo dini te tanà amon ketebangan ko se pegtaking niyo ki Cristo, aw amon ontò kaw meluba tandà te pegpemenal niyo kandin.
PHI 1:26 Yan, aw eked a pa kematay, ontò kaw heman domuyun ki Jesu Cristo so mekelikò a doton kenyo.
PHI 1:27 Nayan, pengkey eden se domateng kanak, keilangan onawa se inangen niyo diyà te Mèpiya Indan tepad ki Cristo intoladà kenyo. Yan pengkey domoton a kenyo, aw olò a indanan tepad kenyo, ketegahan ko te wedà kealin se pegsalig niyo diyà ki Cristo, aw sebad se pedowan niyo se egpetebangay te pegtoladà niyo te Mèpiya Indan tepad ki Cristo pinemenalan niyo.
PHI 1:28 Ibeg ko heman metaga-taga a te eked kaw palos kelemitan te menge otaw egpoon kenyo, pengkey eden se medaet inangen dan kenyo. Aw eked kaw kelemitan kandan, yan se pengilala te ipelumun dan kwani te Timanem, meneng ipelowà kaw din lekat te pelumun. Yan se pengilala ipekità te Timanem diyà kandan.
PHI 1:29 Pinemallì kaw din kenà olò amon memenal kaw ki Cristo, meneng pinemallì kaw din heman amon pemilangen kaw tandà te pegtaking niyo kandin.
PHI 1:30 Kinità niyo te pinemilang a kedengan, aw dinineg niyo heman te egpemilangen a pa lamig songkani. Se kelimahan eg-okitan niyo, yan se onawa te kelimahan eg-okitan ko tepad ki Cristo.
PHI 2:1 Nayan, neantag se pedowan niyo tandà te pegsebad niyo ki Cristo, aw neluba kaw den so dakel se pedowan din kenyo. Inogpaan kaw den te Espiritu Santo, aw yan egpeidoway kaw den. So netegahan niyo den iyan,
PHI 2:2 ontò a meluba aw megsebad kaw te aneng-aneng niyo, aw megpedekelay kaw te pedowan, aw sebad se tod niyo.
PHI 2:3 Pengkey eden se inangen niyo, ikà niyo egkedemet. Ikà niyo egpelangkaw-langkaw. Meneng keilangan megpedanà kaw te kenyo pegkeotawun aw megsagman kaw te menge doma niyo.
PHI 2:4 Ikà niyo eg-aneng-aneng olò te kenyo kèpiyaan, meneng keilangan meg-aneng-aneng kaw tepad te kèpiyaan te menge doma niyo.
PHI 2:5 Keilangan meg-iling se teg sebad-sebad kenyo ki Jesu Cristo, so seini se aneng-aneng din.
PHI 2:6 Pengkey gayed onawa se pegkesawol i Jesus aw pegkesawol te Timanem, Meneng wedà din eneng-enengi te onawa sikandin te Timanem,
PHI 2:7 So lekat te kandin ibeg, tinenanan din se kelangkaw din, Aw migpedanà sikandin iling te kedanà te allang. Migpekeotaw sikandin aw timebaw.
PHI 2:8 Pegpekeotaw din, ininang din medanà se pegkeotawun din pineokit te pegtolò din te Amay din Igsà inimetayan sikandin inlansang doton te kros.
PHI 2:9 Yan se doun te ontò sikandin impelangkaw te Timanem, Aw ininang din sikandin Pengolo te kedita pengkey kenan,
PHI 2:10 Amon lomongken se kedita diyà kandin, pengkey eg-ogpà dan doton te langit, aw dini lanto te tanà, aw pengkey doton didalem te tanà. Domuyun se kedita dan te ngadan i Jesus,
PHI 2:11 So mikagi se kedita niyan te si Jesu Cristo se Pengolo te kedita dan, Aw yan iduyun dan se Timanem Amay.
PHI 2:12 Yan menge kedowa ko egkedekelan ko te pedowan, pegdoma ko kenyo kedengan, gayed kaw egtolò te ibeg te Timanem. Pengkey wedad a den doton kenyo seini, meneng keilangan labi kaw pa megpekeaseb te pegtolò niyo kandin aw pegsagman niyo kandin, lamig mesikop se pegpelowà din kenyo,
PHI 2:13 so doen eg-inangen te Timanem kenyo amon meibeg kaw tomolò kandin, aw amon mekebatog kaw tomolò te ibeg din.
PHI 2:14 Pengkey eden se inangen niyo, ikà niyo egbelisì. Ikà niyo heman egdindil,
PHI 2:15 amon wedad mekesila kenyo menge batà te Timanem. Pengkey eg-ogpà kaw doma te otaw eg-inang te medaet aw nelegeb te salà, meneng keilangan melobos se pedowan niyo aw metòlid se eg-inangen niyo. Iling kaw te menge bitoen eg-anyag kidoen te langit, so egkitaen kaw te doma otaw kenà egtaking te Timanem,
PHI 2:16 aw yan ipegpetaga-taga niyo kandan se Mèpiya Indan te doen kaling pedowan ibegay te Timanem kandan. Aw yan se eg-inangen niyo, eked a keyàyà te aldaw te peglikò i Cristo, so sikiyo se ipekità ko kandin amon ketegahan din te doen ontong te ininang ko.
PHI 2:17 Aw imetayan a, meinang se dipanog ko iling te bino itoyong diyà te ayam-ayam sonogen, aw se tabang niyo kanak tandà te pegpemenal niyo iling te ayam-ayam toyongan kenyan aw ibegay diyà te Timanem. Aw metoman iyan, eked a den kepuluk meneng labi a pa meluba doma kenyo.
PHI 2:18 Yan heman se doun te keilangan meluba kaw doma ko.
PHI 2:19 Nayan, seini se ibeg ko aw mepakay diyà te Pengolo tadon si Jesus. Ibeg ko isogò si Timoteo lomaoy kenyo te eked kenamay, so aw molì sikandin dini kanak, indanan a din tepad kenyo aw yan meluba se pedowan ko.
PHI 2:20 Sikandin olò se doen aneng-aneng kenyo onawa te aneng-aneng ko kenyo, so gayed sikandin eg-aneng-aneng tepad te kèpiyaan te keogpà niyo.
PHI 2:21 Kedita te doma otaw dini, gayed dan eg-aneng-aneng tepad te kèpiyaan te kandan keogpà. Kenà dan eg-aneng-aneng tepad te inangen dan diyà ki Jesu Cristo.
PHI 2:22 Meneng netegahan niyo den te egkeseligan si Timoteo, so iling te pegtelaban te batà te amay din se pegtelaban i Timoteo kanak te pegtoladà ko te Mèpiya Indan tepad ki Cristo.
PHI 2:23 Ibeg ko, aw ketegahan ko aw eden se domateng kanak, isogò ko sikandin doton kenyo te eked kenamay.
PHI 2:24 Simalig a te Pengolo te mekedoton a heman kenyo te eked kenamay.
PHI 2:25 Nayan, mig-aneng-aneng a den te mèpiya aw ipeolì ko si Epafrodito doton kenyo. Iling sikandin te kedowa ko, aw migtelaban kanak migtoladà tepad ki Cristo, aw egtolò heman te Pengolo tadon iling te pegtolò te sondalo. Insogò niyo sikandin dini amon megtabang kanak.
PHI 2:26 Meneng ipeolì ko den sikandin so dimela den kenyo, aw netetana den sikandin so dinineg niyo te nesekitan sikandin dini.
PHI 2:27 Ontò netigdaan igsà agpet nematay, meneng neidowan sikandin te Timanem aw yan wedà kematay. Neidowan a heman te Timanem, so aw nematay si Epafrodito, labi pa medaet se kelimahan ko.
PHI 2:28 Yan ontò a meibeg megsogò kandin doton kenyo amon meluba kaw te pegkità niyo kandin. Aw meluba kaw, meowà se ketetana ko tepad kenyo.
PHI 2:29 Aw domateng sikandin, segmani niyo sikandin taking te keluba te pegkità niyo kandin, so sikandin se kedowa tadon diyà te Pengolo. Keilangan segmanen niyo se kedita te otaw iling kandin,
PHI 2:30 so agpet sikandin nematay tandà te inang din tepad ki Cristo. Mepakay diyà kandin aw matay amon metoman din se ibeg niyo megtabang kanak.
PHI 3:1 Nayan, menge kedowa ko, ibeg ko meluba kaw tandà te pegpesakop tadon diyà te Pengolo tadon. Eked a pegkelomay pengkey sobloden ko se impunù ko kenyo kedengan, so aw tomolò kaw kenyan, eked kaw keekali.
PHI 3:2 Peg-ahà kaw te menge otaw egtewalen ko menge toyang. Medaet se eg-inangen dan, so egtoladà dan te eked kidon sekopi te Timanem singed aw tomolò kidon te punù ingkeliwat i Moises aw megpetolì kidon.
PHI 3:3 Meneng sikitadon se doen pengilala te ontò kidon sakop te Timanem, so egsimba kidon te Timanem pineokit te tabang te Espiritu Santo, aw doen den keluba tadon lekat ki Jesu Cristo. Impelowà kidon den lekat te salà, meneng kenà iyan pineokit te pegtolò tadon te punù ingkeliwat i Moises.
PHI 3:4 Simpana ipelowà se otaw tandà te inang din aw pegkeotawun din, siaken se ontò ipelowà, so pengkey sinu otawi se eg-aneng-aneng te ipelowà sikandin pineokit te inang din aw pegkeotawun din, labi a pa melangkaw diyà kandin.
PHI 3:5 Tinolì a te ikewalo aldaw lekat te pegtebaw ko iling te punù te kemonaan ko. Siak se sebad bowad-bowad i Israel, aw nesakop a diyà te pongan i Benjamin. Ontò a Judiyo, aw timaking a te ketanem te menge kemonaan ko. Ontò a timolò te menge punù ingkeliwat i Moises, so migpesakop a diyà te gropo iningedanan Parisiyo.
PHI 3:6 Ontò a measeb igsà nemilang a te menge otaw egpemenal ki Cristo. Ontò metòlid se pegtolò ko te menge punù ingkeliwat i Moises igsà wedad palos punù linèpangan ko.
PHI 3:7 Kedengan iman ko doen ontong ko kenyan, meneng songkani limengà a den te pegsalig ko te punù sìyan, so migpesakop a den diyà ki Cristo.
PHI 3:8 Yan pengkey eden se mèpiya inang ko kedengan, netegahan ko den te wedad palos ontong ko kenyan, so labi pa mèpiya se pegtaking ko te Pengolo tadon si Jesu Cristo. Pegpemenal ko kandin, tinenanan ko se kedita te doma egseligan ko. Tinenanan ko se wedad ontong amon tomaking a ki Cristo,
PHI 3:9 aw amon meinang a sakop din. Wedà peg-aneng-aneng se Timanem te metòlid a pineokit te pegtolò ko te menge punù ingkeliwat i Moises, meneng eg-aneng-aneng se Timanem te metòlid a pineokit olò te pegsalig ko ki Cristo, so eneng-enengen te Timanem te metòlid se kedita te otaw somalig ki Cristo.
PHI 3:10 Ibeg ko den ontò a metaga-taga kandin. Ibeg ko heman tebangan a din pineokit te tolos eggemiten din lekat te pegkeantay din lekat te nematay. Ibeg ko heman mekeiling a kandin pengkey detengan a te kelimahan iling te kelimahan dimateng kandin, aw pengkey imetayan a iling te pegkematay din,
PHI 3:11 so egpeliman a te mekeakop a heman diyà te menge otaw entayen din lekat te nematay.
PHI 3:12 Eked a ikagi te netoman ko den se kedita niyan. Eked a heman ikagi te neinang a den te Timanem ontò metòlid. Meneng measeb a pa egtaking te ibeg din, so yan se doun te pegsakop i Jesu Cristo kanak.
PHI 3:13 Menge kedowa ko, wedà a peg-aneng-aneng te netoman ko den se kedita niyan, meneng seini se eg-inangen ko. Egkelibelan ko se kedita te ininang ko, aw gayed a egpekagsen amon mapet a te temanan.
PHI 3:14 Gayed a egpekagsen iling te otaw egkoyà gayed egkagnan pesalo doton te temanan amon mekekinawà a te ontong ibegay te Timanem kanak, so tinawal a din meg-ogpà doton te langit tandà te ininang i Jesu Cristo kanak.
PHI 3:15 Nayan, sikiyo menge otaw nelobos se pegpemenal niyo, keilangan iling te kanak aneng-aneng se aneng-aneng niyo tepad te inikagi ko sìyan. Aw kenà iling te kanak aneng-aneng se aneng-aneng niyo, ipetaga-taga te Timanem kenyo aw eden se ontò kebenalan.
PHI 3:16 Meneng keilangan gayed kidon tomolò te kedita te kebenalan impetaga-taga din den kenitadon.
PHI 3:17 Menge kedowa ko, ibeg ko meg-iling se kedita niyo kanak. Sikami se gegonan niyo, aw keilangan peg-ilingan niyo se menge otaw mig-iling kenami.
PHI 3:18 Doen melikit ko in-indan kenyo, meneng pengkey mekepuluk te pedowan ko, sobloden ko pa iyan seini. Doen menge otaw egpetaga-taga te egkebensihan dan se pegkematay i Cristo doton te kros pineokit te medaet eg-inangen dan.
PHI 3:19 Meneng metoman dan detengan te pelumun te Timanem, so olò dan eg-aneng-aneng tepad te ibeg te lawa dan. Keilangan meyàyà dan tandà te medaet inang dan, meneng egpelangkaw-langkaw dan. Kenà dan eg-aneng-aneng tepad te Timanem, so olò dan eg-aneng-aneng tepad te keogpà dan dini lanto te tanà.
PHI 3:20 Meneng kenà iling kenyan se kedita tadon egpemenal ki Cristo, so migpesakop kidon diyà te peglowan te Timanem doton te langit. Yan se lekatan te Pengolo egpelimanan tadon, si Jesu Cristo egpelowà kenitadon.
PHI 3:21 Aw lomikò sikandin, inangen din iling te lawa din eked kematay se lawa tadon egkematay. Yan se inangen din pineokit te tolos din, so metolos sikandin aw mekedaeg sikandin te kedita pengkey kenan amon lomowan sikandin diyà kandan.
PHI 4:1 Nayan, menge kedowa ko egkedekelan ko te pedowan, sikiyo se egpemegay te luba kanak, aw sikiyo se pengilala te doen ontong te peg-inang ko. Dimela a kenyo, aw dakel se pedowan ko kenyo. Ibeg ko eked kealin se pegsalig niyo diyà te Pengolo tadon.
PHI 4:2 Memoyò a kenyo Eyodia aw Sintike te megpelebetay kaw, so telekedowa kaw diyà te Pengolo tadon.
PHI 4:3 Memoyò a heman kamno ontò sigalak ko te keilangan megtabang ka te didowa bayi sìyan amon megsebad dan, so ontò dan migtelaban kanak te pegtoladà ko te Mèpiya Indan tepad ki Cristo. Migpedomaay dan si Clemente aw menge doma otaw migtelaban kanak. Insolat se ngadan te menge otaw sìyan kidoen te libro sinolatan te ngadan te kedita te otaw binegayan te kaling pedowan wedad temanan.
PHI 4:4 Keilangan gayed kaw meluba tandà te pegpesakop niyo diyà te Pengolo tadon. Todà a megpunù kenyo te keilangan meluba kaw.
PHI 4:5 Pekitai niyo diyà te kedita te otaw te medalem se pedowan niyo. Lomikò se Pengolo tadon te eked kenamay.
PHI 4:6 Pengkey eden se domateng kenyo, ikà niyo palos egketetana. Meneng pegtawal-tawal kaw tepad te kedita diyà te Timanem. Pemoyoi niyo diyà kandin se kedita te kelidoan niyo. Pegpesiontong kaw heman kenyan diyà kandin.
PHI 4:7 Aw yan se eg-inangen niyo, inangen te Timanem ontò melinaw se pedowan niyo igsà eked iyan kelebeti te otaw. Yan se ikelasag din te pedowan niyo aw aneng-aneng niyo tandà te pegsebad niyo ki Jesu Cristo.
PHI 4:8 Nayan, menge kedowa ko, sebad mendad se ikegiyen ko kenyo. Keilangan wedad palos eneng-enengen niyo singed aw benal iyan, aw doen ontong, aw metòlid, aw wedad salà, aw ikeluba, aw mèpiya dengeg. Pengkey eden se mèpiya, aw mepakay iduyun, yan se keilangan gayed niyo eneng-enengen.
PHI 4:9 Tolò kaw te kedita te intoladà ko kenyo. Peg-iling kaw te kedita te inikagi ko aw ininang ko, aw yan egdomaan kaw te Timanem egpemegay te kelinaw te pedowan.
PHI 4:10 Ontò a neluba aw egpesiontong a diyà te Pengolo tadon, so todà kaw den migtabang kanak. Netegahan ko te doen gayed ibeg niyo megtabang kanak, meneng wedad aldaw te pegtabang niyo.
PHI 4:11 Ikà niyo eg-aneng-aneng te migbelisì a tandà te kelimahan ko, so netegahan ko den te pengkey eden se domateng kanak, gayed mèpiya se pedowan ko.
PHI 4:12 Miglumun a den te keogpà te sagkep aw meyaman. Pineokit te pegtoladà te Timanem kanak, netegahan ko den te meketayod a pengkey eden se domateng kanak, pengkey dakel se kànen ko, pengkey bellosen a, pengkey meyaman a, pengkey wedad kedònan ko.
PHI 4:13 Pengkey eden se domateng kanak, meketayod a te kedita niyan so egtebangan a i Cristo.
PHI 4:14 Meneng egpesiontong a te intabang niyo kanak tandà te kelimahan ko.
PHI 4:15 Sikiyo menge tege Filipos, netegahan niyo den te pegkesayo ko lekat te probinsya te Masidonya, te kaling ko intoladà kenyo se Mèpiya Indan tepad ki Cristo, wedad doma otaw egpemenal nenogpò kanak, meneng olò sikiyo se nenogpò kanak.
PHI 4:16 Pengkey dalem te peg-ogpà ko doton te Tesalonika, gayed kaw egpenogpò kanak.
PHI 4:17 Kenà te intabang niyo kanak se egkeibegan ko, meneng ibeg ko begayan kaw te Timanem te ontong tandà te pegtabang niyo kanak.
PHI 4:18 Wedad den kepulukan ko so nekekinawà a den te kwarta impeibing niyo kanak, igsà doen pa samà. Wedad den kepulukan ko so binegayan a den i Epafrodito te impeibing niyo kanak. Iling iyan te metinadeg ipegbegay diyà te Timanem, so kinità din iyan aw neluba sikandin kenyan.
PHI 4:19 Wedad temanan te keyemanan te Timanem egseligan ko, aw begayan kaw din te kedita te kelidoan niyo tandà te pegpesakop niyo diyà ki Jesu Cristo.
PHI 4:20 Yan keilangan iduyun se Timanem Amay tadon te wedad temanan. Metoman iyan.
PHI 4:21 Indani niyo se teg sebad-sebad sakop te Timanem egpemenal ki Jesu Cristo te eg-aneng-aneng a kandan. Eg-eneng-enengen kaw heman te menge otaw doma ko dini.
PHI 4:22 Pengkey kedita te menge sakop te Timanem dini, aw labi pa se menge otaw egterbaho doton te balay te selotan, ibeg te kedita dan metaga-taga kaw te eg-aneng-aneng dan kenyo.
PHI 4:23 Ibeg ko megtabang se Pengolo tadon si Jesu Cristo te teg sebad-sebad kenyo.
COL 1:1 Seini se solat ko, si Pablo, doma ki Timoteo kedowa tadon te pegpemenal. Lekat te ibeg te Timanem, siak se sebad sogounun i Jesu Cristo.
COL 1:2 Seini se solat day te kedita niyo menge sakop te Timanem doton te lonsod te Kolosas. Sikiyo se menge kedowa day te pegpemenal aw egkeseligan. Ibeg day, tebangan kaw te Timanem, aw begayan kaw din heman te kelinaw te pedowan niyo.
COL 1:3 Kelikit te pegtawal-tawal day tepad kenyo, gayed kay egpesiontong diyà te Timanem Amay te Pengolo tadon si Jesu Cristo.
COL 1:4 Egpesiontong kay diyà kandin so inindanan kay te ontò kaw egsalig diyà ki Jesu Cristo, aw dakel ekon heman se pedowan niyo diyà te kedita te sakop te Timanem.
COL 1:5 Yan se eg-inangen niyo, so kedengan te pegdineg niyo te kebenalan tepad ki Cristo, nemenal kaw te doen ontong ibegay kenyo doton te langit. Yan se Mèpiya Indan
COL 1:6 intoladà den doton kenyo aw doton te kebelad te keneyonan. Medita den se doma otaw nemenal kenyan, aw eg-inang den dan te mèpiya. Mig-iling kaw heman kandan, so lekat te aldaw te pegdineg niyo te doen tabang te Timanem kenyo, olò mèpiya se eg-inangen niyo, so netegahan niyo den te benal iyan.
COL 1:7 Yan se intoladà i Epapras kenyo. Sikandin heman se sineligan i Cristo, aw dakel se pedowan tadon kandin. Sikandin se egseligan day insogò day doton kenyo amon megtoladà tepad ki Cristo.
COL 1:8 Inindanan kay din te egpedekelay kaw te pedowan pineokit te Espiritu Santo.
COL 1:9 Yan se doun te gayed kay egtawal-tawal tepad kenyo lekat te pegdineg day tepad kenyo kedengan lamig songkani. Gayed kay egpemoyò diyà te Timanem te ontò kaw metaga-taga aw eden se ibeg din inangen niyo pineokit te kebiyasa ibegay te Espiritu Santo kenyo.
COL 1:10 Yan se egpemoyoen day amon ibeg te Pengolo tadon se eg-inangen niyo, aw amon gayed sikandin meluba tepad kenyo. Aw yan se inangen niyo, mèpiya se kedita te inang niyo, aw labi kaw pa metaga-taga tepad te Timanem.
COL 1:11 Ibeg day lobosen te Timanem se pegsalig niyo diyà kandin pineokit te tolos din, amon meketayod kaw te kelimahan aw meluba heman se pedowan niyo.
COL 1:12 Pegpesiontong kaw diyà te Timanem Amay, so impeakop kaw din diyà te menge sakop din begayan din te mèpiya doton te langit.
COL 1:13 Impelowà kidon den te Timanem lekat te peglowan i Satanas, aw inalin kidon din doton te peglowan te Batà din si Jesu Cristo ontò din nedekelan te pedowan,
COL 1:14 so pineokit te pegkematay i Jesus, impelowà kidon din lekat te salà, aw pigwedad den te Timanem se kedita te salà tadon.
COL 1:15 Nayan, si Jesu Cristo se migpekeotaw amon ipekità din kenitadon se kedita tepad te Timanem eked kitai. Ontò melangkaw si Cristo diyà te kedita ininang te Timanem,
COL 1:16 so pineokit ki Cristo, ininang te Timanem se kedita. Pengkey doton te langit aw dini te tanà, pengkey egkitaen aw kenà egkitaen, aw pengkey eden kemoloi te doen metolos aw eglowan, ininang te Timanem se kedita niyan pineokit ki Cristo amon sikandin se iduyun tadon.
COL 1:17 Te wedad pa ininang, doen den tapay si Cristo. Timayod se ininang din lamig songkani, so sikandin se minawid te kedita diyà te belad din.
COL 1:18 Sikandin se olo tadon, aw iling kidon te lawa din, so sikandin se egpengibing te kedita tadon egpemenal. Sikandin se egpemegay kenitadon te kaling pedowan, aw sikandin se tagnà neantay lekat te nematay eked palos todà kematay amon mengolo sikandin diyà te kedita te otaw meantay lekat te nematay. Yan se doun te wedad pa labi melangkaw diyà kandin,
COL 1:19 so lekat te ibeg te Timanem, ontò kitaen se ketanem te Timanem diyà ki Cristo.
COL 1:20 Ibeg te Timanem, pegsebaden din se kedita diyà kandin, pengkey dini te tanà aw doton te langit, aw yan se ininang din pineokit te Batà din si Jesu Cristo, so lekat te pegkematay din doton te kros, mepakay aw megsebad se otaw aw Timanem.
COL 1:21 Kedengan, mediyò kaw kidoen te Timanem, aw minato kaw kandin, so medaet se pedowan niyo kandin aw medaet heman se eg-inangen niyo.
COL 1:22 Meneng migpekeotaw si Jesus, aw nematay heman sikandin amon ibingen kaw din doton te Timanem. Mepakay aw megpedapag kaw den kandin so wedad den salà niyo aw wedad isila kenyo.
COL 1:23 Meneng keilangan gayed kaw somalig diyà ki Jesu Cristo, aw keilangan lobosen niyo se pegpemenal niyo kandin. Ikà niyo egsoway lekat te kagi te Timanem pinemenalan niyo tepad ki Cristo, so doen den egpelimanan niyo. Yan se Mèpiya Indan intoladà den diyà te menge otaw doton te kebelad te keneyonan, aw yan heman se ipegtoladà ko.
COL 1:24 Pengkey kineleboso a, meneng neluba a den, so pineokit te kelimahan ko, melobos se pedowan niyo diyà ki Cristo. Pineokit te pegtayod ko te kelimahan, kelumunan ko se kelimahan ibeg i Cristo okitan ko amon ketebangan se kedita te otaw egpemenal, kedita tadon impolingun te lawa i Cristo.
COL 1:25 Insogò a te Timanem amon megtoladà a te kedita niyo egpemenal, so ibeg din ipetaga-taga ko se kagi din diyà te kedita niyo.
COL 1:26 Yan se kebenalan wedà din petega-tegahi diyà te menge otaw gebii lamig songkani. Meneng impetaga-taga din den iyan diyà te menge sakop din,
COL 1:27 so ibeg din ipetaga-taga din diyà kenitadon te ontò mèpiya se kebenalan seini. Ipetaga-taga din iyan heman doton te menge otaw kenà Judiyo. Seini se kebenalan sìyan wedà din petega-tegahi kedengan, te isogò din si Jesu Cristo meg-ogpà kidoen te kenyo pedowan, aw yan se doun te netegahan niyo te doen kèpiyaan pelimanan niyo doton te langit.
COL 1:28 Egtoladà kay te kedita te otaw tepad ki Cristo. Gayed kay egsagda te kedita te otaw aw egtoladà kay kandan te kebenalan tepad ki Cristo, so ibeg day ontò melobos se pegtaking te kedita te otaw diyà ki Cristo.
COL 1:29 Yan se doun te ontò a egpekagsen te pegtoladà ko kenyan pineokit te kagsen imbegay te Timanem kanak.
COL 2:1 Ibeg ko ketegahan niyo te ontò a migpekagsen te pegtoladà ko tepad ki Cristo amon tebangan ko sikiyo tege Kolosas, aw menge otaw doton te Layodisiya, aw kedita heman te otaw egpemenal wedà pa kità kanak.
COL 2:2 Ibeg ko megkagsen se pedowan niyo somalig diyà ki Cristo aw megpedekelay kaw te pedowan. Ibeg ko heman ontò niyo ketegahan se kebenalan tepad ki Cristo, so yan se kaling impetaga-taga din.
COL 2:3 Si Cristo se kelekatan te kedakel te kebiyasa tepad te Timanem.
COL 2:4 Yan se insolat ko kenyo amon eked kaw keekali te doma otaw egtoladà te kebolalaw pengkey mèpiya se kagi dan.
COL 2:5 Pengkey wedad a doton kenyo, meneng gayed a eg-aneng-aneng kenyo. Neluba a te pegdineg ko te migsebad kaw aw ontò kaw simalig diyà ki Cristo.
COL 2:6 Pegpemenal niyo ki Jesu Cristo, neinang sikandin Pengolo niyo, aw yan keilangan tomaking kaw kandin te kelikit te aldaw.
COL 2:7 Aw lobosen niyo se pegsalig niyo diyà ki Cristo, iling kaw te kayo medalem se dalid, aw iling kaw te balay ontò dimasel. Aw yan se inangen niyo, ketegahan niyo te benal se intoladà diyà kenyo kedengan, aw gayed kaw megpesiontong diyà te Timanem.
COL 2:8 Peg-ahà kaw te menge otaw meg-akal peden kenyo pineokit te kagi dan medalem aw mèpiya dinegen amon tomaking kaw kandan. Meneng wedad ontong te kagi dan, so egtoladà dan olò te ketanem te kemonaan dan gebii aw aneng-aneng te otaw tepad te keneyonan. Kenà lekat ki Cristo se ipegtoladà dan.
COL 2:9 Pegpekeotaw i Cristo, ontò kinità se ketanem te Timanem diyà kandin.
COL 2:10 Pineokit te pegpemenal niyo ki Cristo, nekekinawà kaw den te kaling pedowan aw wedad kolang niyan. Sikandin se melangkaw diyà te kedita te metolos aw eglowan.
COL 2:11 Doen pengilala eg-inangen te menge Judiyo amon ipetaga-taga dan te egtaking dan te Timanem, aw yan se pegpemetolì dan. Meneng sebad se pengilala ininang i Cristo te pegpemenal tadon kandin, so impelowà kidon din lekat te pegkeallang tadon diyà te medaet ibeg te pedowan tadon.
COL 2:12 Pegpebonyag tadon, iling te inlebeng kidon sipat ki Cristo, aw iling te inantay kidon heman sipat kandin tandà te pegpemenal tadon te ininang te Timanem Amay mig-antay ki Cristo lekat te nematay.
COL 2:13 Kedengan, iling te nematay kaw, so nelegeb kaw te salà aw egtaking kaw te medaet ibeg te pedowan niyo. Meneng songkani binegayan kaw din heman te kaling pedowan iling ki Cristo, so pigwedad den te Timanem se kedita te salà ininang tadon.
COL 2:14 Kedengan, ipelumun kidon peden te Timanem tandà te peglàpang tadon te menge punù din. Meneng songkani eked kidon din pelumuni, so ginibo din den se lista te menge salà tadon pineokit te pegkematay i Cristo doton te kros.
COL 2:15 Dinaeg te Timanem se kedita te metolos aw eglowan, aw impetaga-taga din te kedita tadon te nenalo den sikandin diyà te kedita dan pineokit te pegkematay i Jesus doton te kros.
COL 2:16 So impelowà kaw den te Timanem, ikà niyo egpenenalan te menge otaw egpunù peden kenyo te doen eked niyo kepakay kànen aw doen eked niyo kepakay inemen, aw egpunù heman te keilangan tomolò kaw te menge ketanem dan tepad te menge pista kelikit te omay, aw kelikit te bolan, aw kelikit te aldaw te peg-etod.
COL 2:17 Se kedita niyan, yan olò se egtengtengan tepad te egpelimanan, meneng si Jesu Cristo se ketomanan niyan.
COL 2:18 Doen heman menge otaw egpelangkaw-langkaw, so eg-ikagi dan te doen kebenalan impetaga-taga te Timanem kandan, aw egtoladà dan tepad te pegpedanà aw pegsimba dan te menge anghil. Meneng peg-ahà kaw amon eked kaw dan keekali pineokit te kagi dan, so kenà lekat te Timanem se ipegtoladà dan, meneng lekat te medaet aneng-aneng dan.
COL 2:19 Kenà dan egtaking te Pengolo tadon si Cristo. Sikandin se olo tadon, aw iling kidon te lawa din. Eglowan se olo diyà te lawa, aw doen eg-inangen niyan pineokit te luluwadun aw ogat. Iling heman kenyan, pineokit ki Cristo megkagsen se pegpemenal tadon aw meg-inang kidon te ibeg te Timanem.
COL 2:20 So migpesakop kaw diyà ki Cristo, iling te nematay kaw heman sipat kandin. Impelowà kaw din heman lekat te pegkeallang niyo diyà te ketanem te otaw dini te keneyonan. So kenà kaw den allang niyan, ikà niyo eg-aneng-aneng te keilangan tomolò kaw te menge punù iling kani.
COL 2:21 “Ikà niyo egpemaed kani. Ikà niyo egpengaen kenyan. Ikà niyo eg-awid kenyan.”
COL 2:22 Wedad den ontong te kedita te punù sìyan, pengkey toloen aw eked. Ikà niyo egpenenalan te toladà sìyan so olò iyan lekat te aneng-aneng te otaw.
COL 2:23 Ipetaga-taga dan peden te doen kebiyasa dan pineokit te leges pegsimba dan te menge anghil, aw pegpelingo-lingo dan te pegsagman dan kandan, aw pegpeeleg dan te kandan lawa. Meneng eden dan aw doen ontong dan, so eked dan dàgi se medaet ibeg te lawa dan pineokit te eg-inangen dan sìyan.
COL 3:1 Neantay den si Cristo lekat te nematay, aw iling te neantay kaw heman sipat kandin. Yan se doun te keilangan gayed kaw meg-aneng-aneng tepad te impetagad kenyo doton te langit, so egpenenoo si Cristo kidoen te tangkil te Timanem Amay din aw eglowan doma din.
COL 3:2 Ikà niyo eg-aneng-aneng tepad te menge keibegan te otaw dini te keneyonan, meneng keilangan meg-aneng-aneng kaw tepad te ibeg i Cristo doton te langit.
COL 3:3 Iling te nematay kaw, aw iling te inantay kaw den te Timanem doma ki Cristo pengkey wedà pa iyan pekitai.
COL 3:4 Si Cristo se nemegay kenyo te kaling pedowan wedad temanan. Aw lomikò sikandin, entayen kaw din aw megdoma kaw kandin te peglowan din.
COL 3:5 Yan, so iling te nematay kaw den doma ki Cristo, keilangan imetayan niyo se ibeg te pedowan niyo meg-inang te medaet iling te ininang niyo kedengan. Ikà niyo eglayok te kenà kenyo esawa. Ikà niyo egkapoy. Ikà niyo egkeboyo te medaet pengkey lekat iyan te kenyo pedowan. Ikà niyo eg-ingà te kedònan te doma otaw, so iling iyan te pegsimba niyo diyà te kenà benal timanem.
COL 3:6 Ipelumun te Timanem se kedita te otaw eg-inang te medaet iling kenyan.
COL 3:7 Yan heman se ininang niyo kedengan te wedà kaw pa pemenal.
COL 3:8 Meneng seini, keilangan tenanan niyo den se kedita te medaet ketanem iling kani. Ikà niyo egkeopal. Ikà niyo egbantak. Ikà niyo egbaet-baet te doma otaw. Ikà niyo eg-ikagi te medaet.
COL 3:9 Ikà niyo egkebolalaw, so tinenanan niyo den se tapay pegkeotawun mig-inang te medaet kedengan,
COL 3:10 aw kiminawà kaw den te kaling pegkeotawun doen kaling pedowan imbegay te Timanem, aw gayed din iyan ipegpetilles lamig iling kaw te Timanem, amon ontò kaw metaga-taga te kebenalan tepad kandin.
COL 3:11 Diyà te kedita tadon egpemenal, wedad palos lindoan te Timanem, pengkey Judiyo aw kenà Judiyo, pengkey tinolì aw wedà tolii, pengkey mig-iskwila aw wedà peg-iskwila, pengkey allang aw kenà allang, so migsebad den se kedita tadon diyà ki Cristo, aw mig-ogpà sikandin diyà te kedita tadon.
COL 3:12 Pinemallì kaw te Timanem, aw sinakop kaw din, aw egkedekelan kaw din te pedowan. Yan keilangan todaen niyo se keogpà niyo, so keilangan megpeidoway kaw, aw meg-inang kaw te mèpiya diyà te doma otaw. Keilangan megpedanà kaw te pegkeotawun niyo. Keilangan medalem se pedowan niyo. Keilangan melayat se pedowan niyo.
COL 3:13 Keilangan megpetebangay kaw. Aw doen otaw meg-inang te salà diyà kenyo, keilangan pegwedaden niyo iyan amon megsebad kaw, so keilangan meg-iling kaw te Pengolo tadon te pegwedad din te menge salà ininang niyo.
COL 3:14 Seini se melangkaw punù diyà te kedita nini. Keilangan megpedekelay kaw te pedowan, so pineokit kenyan megkèpiya se keogpà niyo aw wedad kolang niyan.
COL 3:15 Keilangan isawol niyo diyà te pedowan niyo se kelinaw ibegay i Cristo amon ketegahan niyo aw eden se mèpiya inangen niyo, so yan se tod din te peg-inang din kenyo iling te sebad lawa. Keilangan megpesiontong kaw heman diyà kandin.
COL 3:16 Keilangan isawol niyo diyà te pedowan niyo se kagi intoladà i Cristo. Pegpetoledaay kaw te kedita te kebenalan, aw pegpesegdahay kaw heman. Pekitai niyo te egpesiontong kaw diyà te Timanem pineokit te pegdelangan niyo diyà kandin.
COL 3:17 Pengkey eden se inangen niyo aw ikegiyen niyo, eneng-enengi niyo te sakop kaw te Pengolo tadon si Jesus, aw pegpesiontong kaw heman diyà te Timanem Amay pineokit kandin.
COL 3:18 Na, sikiyo menge bayi doen esawa, keilangan tomolò kaw te esawa niyo, so yan se mèpiya inangen te menge sakop te Pengolo tadon.
COL 3:19 Na, sikiyo menge meama doen esawa, keilangan dakel se pedowan niyo diyà te esawa niyo. Ikà niyo egkeopal kandan.
COL 3:20 Na, sikiyo menge mengisù, keilangan tomolò kaw te kedita te punù te amay aw inay niyo, so meluba se Pengolo tadon aw yan se inangen niyo.
COL 3:21 Na, sikiyo menge amay aw inay, ikà niyo egpeopal te menge batà niyo amon eked dan lokas te metòlid.
COL 3:22 Na, sikiyo menge allang, keilangan ontò kaw tomolò te amo niyo dini lanto te tanà, pengkey eden se punù dan kenyo. Keilangan gayed kaw tomolò, kenà olò dalem te pegtengteng te amo niyo, so kenà olò otaw se keilangan kelubahan niyo. Meneng keilangan melobos se pedowan niyo diyà kandan tandà te pegsagman niyo te Pengolo tadon.
COL 3:23 Pengkey eden se terbaho niyo, keilangan ontò kaw measeb, so kenà olò otaw se toloen niyo te pegterbaho niyo, meneng toloen niyo heman se Pengolo tadon.
COL 3:24 Ikà niyo egkelibel te doen ontong ibegay te Pengolo tadon diyà kenyo doton te langit, so Pengolo tadon si Cristo se ontò amo tadon.
COL 3:25 Meneng aw medaet se eg-inangen te otaw, medaet heman se pelumun domateng kandin, so wedad palos otaw pedigselan te Timanem te peg-okom din.
COL 4:1 Na, sikiyo menge otaw doen allang, keilangan metòlid se pegpengibing niyo kandan, so netegahan niyo te doen heman Pengolo niyo doton te langit.
COL 4:2 Se kedita niyo, keilangan gayed kaw megtawal-tawal. Ikà niyo eglengà te pegtawal-tawal, aw keilangan megpesiontong kaw diyà te Timanem.
COL 4:3 Pegtawal-tawal kaw heman tepad kenami, amon doen aldaw ibegay te Timanem kenami te pegtoladà day te kagi din, sìyan kebenalan tepad ki Cristo wedà din petega-tegahi gebii. Kineleboso a pa seini tandà te pegtoladà ko te kebenalan sìyan.
COL 4:4 Pegtawal-tawal kaw heman te tebangan a te Timanem te pegtoladà ko kenyan, so keilangan mebangal se ipegtoladà ko.
COL 4:5 Keilangan mèpiya se eg-inangen niyo diyà te menge doma otaw kenà egpemenal. Peg-indan kaw kandan tepad ki Cristo te pengkey eden eldawi.
COL 4:6 Keilangan mèpiya se eg-ikegiyen niyo diyà te kedita te otaw amon meibeg dan menenalan te kagi niyo. Pegpeketagad kaw amon meketaba kaw te kedita te otaw doen insà kenyo.
COL 4:7 Aw domateng doton kenyo se kedowa tadon te pegpemenal si Tikico, sikandin se meg-indan kenyo tepad te keogpà ko dini. Egkeseligan sikandin egtoladà, aw egkedekelan tadon sikandin te pedowan. Sikandin se doma ko eg-inang te ibeg te Pengolo tadon.
COL 4:8 Isogò ko sikandin doton kenyo, amon entagen din se pedowan niyo pineokit te peg-indan din kenyo tepad te keogpà day.
COL 4:9 Isogò ko heman se kedowa tadon te pegpemenal si Onesimo tomaking kandin. Egkeseligan heman sikandin aw egkedekelan tadon te pedowan. Sikandin se tege doton kenyo. Didowa dan se meg-indan kenyo aw eden se eg-inangen day dini.
COL 4:10 Kineleboso heman doma ko si Aristarco, aw ibeg din ketegahan niyo te eg-aneng-aneng sikandin kenyo. Onawa heman kenyan se kagi i Marcos, sìyan kedowa i Bernabe. Aw domateng sikandin doton kenyo, pegsagman kaw kandin iling te tapay impunù ko kenyo.
COL 4:11 Si Josue, se doma ngadan din si Justo, ibeg din heman ketegahan niyo te dakel se pedowan din kenyo. Diyà te kedita te menge Judiyo egpemenal, seini olò telo se egtelaban te pegtoladà ko tepad te peglowan te Timanem. Ontò migkagsen se pedowan ko tandà te tabang dan.
COL 4:12 Minikagi heman si Epapras sebad heman sakop te probinsya niyo te dakel se pedowan din kenyo. Gayed sikandin egtolò te ibeg i Jesu Cristo. Egtawal-tawal sikandin aw ontò egpemoyò diyà te Timanem te melobos se pegpemenal niyo. Ibeg din ontò kaw metaga-taga te kedita te ibeg te Timanem diyà kenyo.
COL 4:13 Kinità ko te ontò sikandin measeb amon tebangan kaw aw menge otaw tege Layodisiya aw tege Hiropolis.
COL 4:14 Se doktor si Lucas egkedekelan tadon te pedowan, aw si Demas, ibeg dan metaga-taga kaw te eg-aneng-aneng dan heman kenyo.
COL 4:15 Keliwati niyo se kagi ko doton te tege Layodisiya egpemenal, aw doton heman ki Ninfa aw kedita te otaw egtipon kidoen te balay din amon megsimba, so eg-aneng-aneng a kandan.
COL 4:16 Aw mepenga se pegbasa niyo te solat ko seini, peibingi niyo iyan doton te Layodisiya amon besahen dan heman doton. Pegbasa kaw heman te solat ko kandan.
COL 4:17 Keliwati niyo heman se kagi ko diyà ki Arkipo te keilangan ipengahen din se terbaho insogò te Pengolo tadon kandin.
COL 4:18 Siak si Pablo se simolat te temanan te solat ko kenyo seini. Ikà niyo egkelibel te kineleboso a pa. Ibeg ko tebangan kaw te Timanem.
1TH 1:1 Seini se solat ko, si Pablo, doma ki Silas, aw si Timoteo. Simolat kay te kedita niyo egpemenal kidoen te Tesalonika menge sakop te Amay tadon Timanem aw Pengolo tadon si Jesu Cristo. Ibeg day, tebangan kaw te Timanem aw begayan kaw din heman te kelinaw te pedowan.
1TH 1:2 Gayed kay egpesiontong diyà te Timanem tepad te kedita niyo, aw gayed kay heman egtawal-tawal tepad kenyo.
1TH 1:3 Te pegtawal-tawal day diyà te Amay tadon Timanem, kenà kay egkelibel te impetaga-taga niyo te benal nemenal kaw ki Cristo pineokit te eg-inangen niyo, aw impetaga-taga niyo te dakel se pedowan niyo kandin pineokit te pegpekeaseb niyo, aw impetaga-taga niyo te egpeliman kaw te Pengolo tadon si Jesu Cristo pineokit te pegtayod niyo te kelimahan.
1TH 1:4 Menge kedowa day, netegahan day te dakel se pedowan te Timanem kenyo, aw pinemallì kaw din,
1TH 1:5 so pegtoladà day kenyo te Mèpiya Indan tepad ki Cristo, nemenal kaw kenà pineokit olò te inikagi day, meneng pineokit te ininang te Espiritu Santo kenyo, aw yan netegahan niyo te ontò benal se intoladà day. Peg-ogpà day kidoen kenyo, kinità niyo heman se ininang day amon ketebangan kaw.
1TH 1:6 Netegahan day te pinemallì kaw te Timanem so neinang kaw iling kenami aw iling heman te Pengolo tadon. Pengkey pinemilang kaw tandà te pegpemenal niyo te kagi te Timanem, meneng binegayan kaw te Espiritu Santo te keluba te pedowan niyo.
1TH 1:7 Yan se doun te sikiyo den se gegonan pig-ilingan te kedita te doma otaw egpemenal doton te kebelad te Masidonya aw Gresya,
1TH 1:8 so pineokit kenyo, ingkeliwat den se kagi te Timanem tepad te Pengolo tadon kenà olò doton te Masidonya aw Gresya, meneng netaga-taga den se kedita te otaw te nemenal kaw den te Timanem. Yan se doun te wedad den keilangan te peg-indan day te menge otaw tepad te pegpemenal niyo, so netegahan den dan iyan.
1TH 1:9 Eg-indan se kedita dan aw eden se ininang niyo te pegdoton day kenyo. Eg-indan dan te limengà kaw den te pegsimba niyo te inotaw, aw egtolò kaw den ekon te benal Timanem wedad temanan din.
1TH 1:10 Egpeliman kaw den ekon te peglikò te Batà din lekat te langit. Yan si Jesu Cristo inantay te Timanem lekat te nematay. Si Jesu Cristo heman se megpelowà kenitadon lekat te pelumun te Timanem te modi aldaw.
1TH 2:1 Menge kedowa day, netaga-taga kaw den te dakel se nebatog day te pegdoton day kenyo kedengan.
1TH 2:2 Te wedà kay pa doton kenyo, ontò medaet se ininang kenami, aw tinompuyus kay doton te Filipos. Meneng pegdateng day doton kenyo, tinebangan kay te Timanem aw yan wedad ketalaw day te pegtoladà day kenyo te Mèpiya Indan lekat te Timanem. Yan se ininang day pengkey medita se otaw migpoon kenami.
1TH 2:3 Kenà kebolalaw se ipegtoladà day. Kenà heman medaet se tod day. Kenà heman amon meg-akal kay kenyo.
1TH 2:4 Meneng egtoladà kay so netaga-taga se Timanem te mèpiya se tod day, aw sineligan kay din te Mèpiya Indan tepad ki Cristo. Egtoladà kay kenà amon meluba se menge otaw kenami, meneng ibeg day meluba se Timanem kenami, so sikandin se egketaga-taga te ontò ibeg te pedowan tadon.
1TH 2:5 Ontò niyo netegahan te wedà kay peg-akal kenyo pineokit te pegluba day kenyo. Wedà kay heman pegpelingo-lingo amon meglegawa kay kenyo. Netaga-taga heman se Timanem kenyan.
1TH 2:6 Wedad ibeg day te iduyun kay te menge doma otaw, aw wedad heman ibeg day te iduyun kay niyo.
1TH 2:7 So sogounun kay i Cristo, mepakay aw somogò kay kenyo. Meneng peg-ogpà day doma kenyo, wedà kay sogò kenyo, so neido kay kenyo iling te pegkeido te inay diyà te menge batà din eg-ipaten din.
1TH 2:8 So dakel se pedowan day kenyo, ibeg day kenà olò megtoladà kay kenyo te Mèpiya Indan lekat te Timanem, meneng neketagad kay heman imetayan aw yan se meketabang kenyo. Ontò dakel se pedowan day kenyo.
1TH 2:9 Menge kedowa day, wedà niyo besi kelibeli te ontò kay migpekeaseb te peg-ogpà day doton kenyo. Pegtoladà day kenyo te Mèpiya Indan lekat te Timanem, gayed kay migterbaho te aldaw aw delem amon eked kaw kelimahi te pegpenogpò niyo kenami.
1TH 2:10 Netegahan niyo aw netegahan heman te Timanem te wedad palos mekesila te ininang day diyà kenyo egpemenal, so timolò kay te ibeg te Timanem aw metòlid se ininang day.
1TH 2:11 Netegahan niyo heman te mèpiya se ininang day diyà te teg sebad-sebad kenyo, iling te eg-inangen te mèpiya amay diyà te menge batà din.
1TH 2:12 Migtoladà kay kenyo te metòlid. Mig-antag kay te pedowan niyo. Migpunù kay kenyo te keilangan metòlid se eg-inangen niyo mekeluba te Timanem. Sikandin se timawal kenyo amon sekopen kaw din diyà te peglowan din, aw amon mekekinawà kaw te kèpiya din.
1TH 2:13 Gayed kay heman egpesiontong diyà te Timanem tepad kani. Pegtoladà day kenyo te kagi te Timanem, nemenal kaw kenyan, so netegahan niyo te kenà iyan olò kagi te otaw, meneng ontò benal kagi te Timanem. Pineokit te kagi te Timanem, doen eg-inangen din diyà te kedita niyo egpemenal.
1TH 2:14 Menge kedowa day, neinang kaw den iling te menge sakop te Timanem egpemenal ki Jesu Cristo doton te Judiya. Pinemilang dan te menge doma dan Judiyo, aw iling kaw kandan so pinemilang kaw heman te menge doma niyo kenà Judiyo.
1TH 2:15 Nengimatay se menge Judiyo te menge telekeliwat te kagi te Timanem gebii. Nengimatay heman se menge Judiyo te Pengolo tadon si Jesu Cristo, aw nemilang dan heman kenami. Kenà egkeibeg se Timanem te eg-inangen dan. Iling te egpoon dan te kedita te otaw,
1TH 2:16 so migsagda dan te pegtoladà day te menge otaw kenà Judiyo te mekelowà dan lekat te salà. So egsagda dan te pegtoladà day, egdogangan dan se menge salà dan. Meneng agpet den dan detengan te pelumun te Timanem.
1TH 2:17 Menge kedowa day, pegkesayo day lekat kenyo, wedà kay kelibel kenyo. Pengkey wedà kenamay, meneng ontò kay dimela kenyo. Doen ontò ibeg day megkità kay kenyo.
1TH 2:18 Ibeg day lomikò kay doton kenyo. Pengkey gayed a migpetagad te peglikò ko, meneng nebelebagan a i Satanas.
1TH 2:19 Ibeg ko lomaoy a doton kenyo so pineokit kenyo doen egpelimanan day, aw doen keluba day. Aw komità kay te Pengolo tadon si Jesus te peglikò din, eked kay keyàyà tepad kenyo,
1TH 2:20 so pineokit kenyo ontò kay meluba.
1TH 3:1 So ontò kay dimela kenyo, mig-aneng-aneng kay te mepakay aw megpetanan se didowa kenami doton te Atenas,
1TH 3:2 aw yan insogò day si Timoteo doton kenyo. Sikandin se kedowa tadon sineligan heman te Timanem te pegtoladà te Mèpiya Indan tepad ki Cristo. Insogò day sikandin meg-antag te pedowan niyo amon melobos se pegtaking niyo te Timanem,
1TH 3:3 so ibeg day wedad lomengà kenyo te pegpemenal tandà te pegpemilang egdateng kenitadon. Netegahan niyo te yan se pinemallì te Timanem amon okitan tadon.
1TH 3:4 Peg-ogpà day doton kenyo kedengan, migtoladà kay kenyo te domateng se aldaw te pegpemilang kenitadon, aw netegahan niyo den te netoman den iyan.
1TH 3:5 Yan se doun te insogò ko si Timoteo doton kenyo. So ontò a dimela kenyo, insogò ko sikandin amon metaga-taga a tepad te pegtaking niyo te Timanem, so netetana a aw neekalan kaw i Satanas, aw yan nebàtan besi se nebatog day doton kenyo.
1TH 3:6 Meneng neluba kay den so minolì den si Timoteo dini kenami lekat kenyo, aw mèpiya se in-indan din kenami tepad te pegtaking niyo te Timanem aw pegpedekelay niyo te pedowan. Minikagi heman sikandin te mèpiya se aneng-aneng niyo tepad kenami, aw dimela kaw heman kenami onawa te pegdela day kenyo.
1TH 3:7 Menge kedowa day, so mèpiya se dinineg day tepad kenyo, pengkey ontò kay pa egkelimahan aw egpemilangen, meneng neluba kay den tandà te pegtaking niyo te Timanem.
1TH 3:8 Mèpiya den se pedowan day so netegahan day den te nelobos se pegtaking niyo te Pengolo tadon.
1TH 3:9 Ontò kay den egpesiontong diyà te Timanem tepad kenyo, so binegayan kay din te keluba pineokit kenyo.
1TH 3:10 Pengkey aldaw aw delem, gayed kay egtawal-tawal diyà kandin aw egpemoyò kay te mekebatog kay komità kenyo amon meketabang kay kenyo aw kolang pa se pegtaking niyo kandin.
1TH 3:11 Egpemoyò kay diyà te Amay tadon Timanem aw Pengolo tadon si Jesus te tebangan kay din amon mekedoton kay kenyo te eked kenamay.
1TH 3:12 Egpemoyò kay heman te labi pa megkedakel se pedowan niyo te menge doma otaw egpemenal aw kedita te otaw, iling te kedakel te pedowan day kenyo.
1TH 3:13 Yan lobosen din se pedowan niyo kandin, aw wedad palos isila te Amay tadon Timanem kenyo te aldaw te peglikò te Pengolo tadon si Jesu Cristo tekingan te kedita te sakop te Timanem.
1TH 4:1 Nayan menge kedowa day, migtoladà kay kenyo te keilangan metòlid se eg-inangen niyo amon meluba se Timanem kenyo. Yan se ininang niyo. Meneng tandà te pegsebad tadon diyà te Pengolo tadon si Jesus, ontò kay den memoyò kenyo te gayed kaw megpekeaseb meg-inang te metòlid.
1TH 4:2 Netegahan niyo den se punù day kenyo ingkeliwat day lekat te Pengolo tadon si Jesus.
1TH 4:3 Seini se ibeg te Timanem inangen niyo. Ibeg din wedad salà inangen niyo. Keilangan eked kaw layok te kenà kenyo esawa.
1TH 4:4 Keilangan mèpiya se pegpengognan te teg sebad-sebad kenyo menge meama, aw kenà mekeyèyaay.
1TH 4:5 Aw mengognan kaw, ikà niyo egtaking te medaet ibeg te lawa niyo iling te eg-inangen te menge otaw kenà egtaking te Timanem.
1TH 4:6 Yan keilangan wedad palos otaw meg-inang te salà tepad kenyan aw meglegawa te doma otaw. Yan se impunù day kenyo kedengan, so ipelumun te Timanem se otaw eg-inang te medaet iling kenyan.
1TH 4:7 Tinawal kidon te Timanem kenà amon meg-inang kidon te medaet, meneng tinawal kidon din amon meg-inang kidon te metòlid.
1TH 4:8 Yan aw doen otaw eked tolò te punù sìyan, kenà otaw se egkuluwan din meneng egkuluwan din se Timanem nemegay kenyo te Espiritu Santo.
1TH 4:9 Wedad den keilangan te doen megtoladà kenyo tepad te pegpedekelay niyo te pedowan, so tinoledaan kaw den te Timanem te keilangan megpedekelay kaw te pedowan,
1TH 4:10 aw netegahan day te dakel se pedowan niyo diyà te kedita te doma otaw egpemenal doton te kebelad te probinsya te Masidonya. Meneng menge kedowa day, ibeg day gayed niyo pedekelen se pedowan niyo kandan.
1TH 4:11 Keilangan gayed kaw metingen. Ikà niyo eg-inabut te eg-inangen te menge doma otaw. Keilangan megpekeaseb kaw megterbaho amon mekeabat kaw te kenyo kepulukan, so yan se impunù day kenyo kedengan.
1TH 4:12 Aw yan se inangen niyo, segmanen kaw te menge doma otaw, pengkey wedà dan pa pemenal, aw yan wedad heman keilangan te pegpemoyò niyo te kepulukan niyo diyà te doma otaw.
1TH 4:13 Menge kedowa day, ibeg day metaga-taga kaw tepad te menge otaw nematay den, amon eked kaw kepuluk iling te otaw wedad egpelimanan dan.
1TH 4:14 Egpemenal kidon te nematay si Jesus, aw neantay heman sikandin lekat te nematay, aw yan egpemenal kidon te entayen heman te Timanem se kedita te otaw tapay nemenal ki Jesus te wedà dan pa kematay amon megdoma dan kandin.
1TH 4:15 Se itoladà day kenyo seini, yan se impetaga-taga te Pengolo tadon kenami. Aw domateng se aldaw te peglikò te Pengolo tadon, kenà sikitadon wedà pa kematay se mekeonà megkità kandin, so mekeonà se menge otaw egpemenal nematay den.
1TH 4:16 Aw lomikò se Pengolo tadon, domineg kidon te tawal din, aw kagi te melangkaw anghil, aw daging te bodyong te Timanem. Pengolo tadon se tomenà lekat te langit, aw onà din entayen se menge otaw nematay.
1TH 4:17 Penga niyan, sikitadon wedà pa kematay se engaten din sipat kandan doton te menge labon, aw megkità kidon te Pengolo tadon doton. Yan gayed kidon meg-ogpà doma te Pengolo tadon te wedad temanan.
1TH 4:18 Yan pegpetaga-taga kaw te menge otaw nemetayan te inikagi ko seini amon mesinalay dan.
1TH 5:1 Menge kedowa day, wedad den keilangan te pegsolat day kenyo tepad te aldaw aw kano iyan ketoman,
1TH 5:2 so ontò niyo den netegahan te domateng se aldaw te peglikò te Pengolo tadon iling te pegdateng te menenakaw te tengà te delem aw wedad egpeketagad.
1TH 5:3 Aw mikagi se menge otaw te wedad samok aw wedad kelemitanan, yan pegketà detengan dan te mekebebaet, iling te pegtebò te mesakit domateng te bayi agpet tebawan. Eked dan pekelowà lekat kenyan.
1TH 5:4 Meneng sikiyo menge kedowa day, kenà kaw diyà te kengitngitan, aw eked kaw kepela tandà te pegdateng te aldaw te peglikò te Pengolo tadon. Eked kaw kepela kenyan iling te otaw mepela te pegdateng te menenakaw.
1TH 5:5 So sakop kaw i Cristo, sikiyo se otaw te kelowahan aw aldaw. Kenà kidon otaw te delem aw kengitngitan.
1TH 5:6 Yan se doun te keilangan eked kidon peg-iling te menge otaw kenà egpemenal, so iling dan te otaw egtedogi. Meneng keilangan iling kidon te otaw egkeloka aw egpeketagad.
1TH 5:7 Delem se pegtedogi te otaw, aw delem heman se pegkelasing dan.
1TH 5:8 Meneng sikitadon se otaw te aldaw, aw yan keilangan egpeketagad kidon. Aw gayed kidon egsalig diyà te Timanem aw egpedekelay kidon te pedowan, yan se iling te ikelasag te lawa tadon, aw iling te telandà kinis se pegpeliman tadon te pegpelowà te Timanem kenitadon lekat te pelumun.
1TH 5:9 Pinemallì kidon te Timanem kenà amon ipelumun kidon din, meneng amon ipelowà kidon din lekat te pelumun pineokit te Pengolo tadon si Jesu Cristo.
1TH 5:10 Simelilin sikandin kenitadon aw nematay amon meg-ogpà se kedita tadon doma din pengkey nematay kidon aw wedà kidon pa kematay te peglikò din.
1TH 5:11 Yan pegpeentagay kaw te pedowan, aw pegpetebangay kaw, iling te eg-inangen niyo den.
1TH 5:12 Menge kedowa day, doen pa ipunù day kenyo te keilangan segmanen niyo se menge otaw egpengibing kenyo, sìyan measeb otaw pinemallì te Pengolo tadon amon mengibing dan aw megtoladà dan kenyo.
1TH 5:13 Keilangan ontò kaw megsagman kandan aw ontò dakel se pedowan niyo kandan tandà te eg-inangen dan doton kenyo. Keilangan eked kaw pegpedindilay.
1TH 5:14 Menge kedowa day, ibeg day megpunù kaw te menge otaw metaka te keilangan megpekeaseb dan. Peg-antag kaw te pedowan te menge otaw migkegenaw se pedowan. Pegtabang kaw te menge otaw kenà melobos se pegtaking dan te Timanem. Pekeleyati niyo se pedowan niyo diyà te kedita te otaw.
1TH 5:15 Ikà niyo eg-inang te medaet diyà te menge otaw eg-inang te medaet diyà kenyo, meneng keilangan gayed kaw meg-inang te mèpiya diyà te menge doma otaw egpemenal aw diyà heman te kedita te otaw.
1TH 5:16 Keilangan gayed meluba se pedowan niyo.
1TH 5:17 Keilangan gayed kaw megtawal-tawal diyà te Timanem.
1TH 5:18 Keilangan gayed kaw megpesiontong diyà kandin pengkey eden se domateng kenyo. Yan se ibeg te Timanem inangen niyo pineokit ki Jesu Cristo.
1TH 5:19 Ikà niyo egsagda te eg-inangen te Espiritu Santo.
1TH 5:20 Ikà niyo egkulu te kagi ikeliwat te Timanem kenyo,
1TH 5:21 meneng peg-ahà kaw aw keseligan se kedita. Aw keseligan se kagi ikeliwat kenyo, tolò kaw kenyan.
1TH 5:22 Meneng pegpekediyò kaw lekat te kedita te medaet.
1TH 5:23 Ibeg day, ontò kaw linisan te Timanem egpemegay te kelinaw te pedowan. Ibeg day tonggoan din heman se pedowan niyo, aw aneng-aneng niyo, aw lawa niyo, amon wedad palos isila kenyo te peglikò te Pengolo tadon si Jesu Cristo.
1TH 5:24 Tomanen iyan te Timanem nemallì kenyo, so egkeseligan sikandin.
1TH 5:25 Menge kedowa day, pegtawal-tawal kaw heman diyà te Timanem tepad kenami.
1TH 5:26 Pegpeliyagay kaw se kedita niyo egpemenal, so yan se pengilala te egpedekelay kidon te pedowan.
1TH 5:27 Lekat te Pengolo tadon se punù ko kenyo seini. Pegbasa kaw te solat seini diyà te kedita te otaw egpemenal kidoen kenyo.
1TH 5:28 Ibeg ko, tebangan kaw te Pengolo tadon si Jesu Cristo.
2TH 1:1 Seini se solat ko, si Pablo, doma ki Silas, aw si Timoteo. Simolat kay te kedita niyo egpemenal doton te Tesalonika menge sakop te Amay tadon Timanem aw Pengolo tadon si Jesu Cristo.
2TH 1:2 Ibeg day, tebangan kaw te Amay tadon Timanem aw Pengolo tadon si Jesu Cristo, aw begayan kaw dan heman te kelinaw te pedowan.
2TH 1:3 Menge kedowa day, mèpiya aw megpesiontong kay diyà te Timanem tepad kenyo. Mèpiya se pegpesiontong day, so ontò den magsen se pegpemenal niyo kandin, aw ontò kaw den heman egpedekelay te pedowan.
2TH 1:4 Yan se doun te sikiyo se ipegduyun day te peglaoy day te menge doma otaw egpemenal doton te menge doma lonsod, so eg-indan kay kandan te gayed kaw egpemenal te Timanem pengkey ontò kaw egpemilangen aw egkelimahan.
2TH 1:5 Pineokit kenyan, impetaga-taga te Timanem te metòlid se peg-okom din, so pineokit te pegtayod niyo te kelimahan egkeokitan niyo, ipetaga-taga din te neketagad kaw mekesakop diyà te peglowan din.
2TH 1:6 Ontò metòlid se eg-inangen te Timanem, aw yan ipelumun din se menge otaw nemilang kenyo.
2TH 1:7 Meneng sikiyo egpemilangen songkani, inangen kaw din beyang-beyang sipat heman sikami. Yan se inangen din aw lomikò se Pengolo tadon lekat te langit. Iling te apoy se saol din, aw tekingan sikandin te menge anghil metolos lekat te langit. Ipelumun din se kedita te otaw kimulu te Timanem. Ipelumun din se kedita te otaw wedà pemenal te Mèpiya Indan tepad te Pengolo tadon si Jesus.
2TH 1:9 Ipelumun dan te kemetayun wedad temanan, so ipekesayo dan lekat te Pengolo tadon, aw lekat te kelangkaw te tolos din.
2TH 1:10 Yan se meinang te aldaw te peglikò din. Lomikò sikandin amon ipelangkaw sikandin pineokit te kedita te sakop te Timanem, aw amon iduyun sikandin te kedita te otaw egpemenal kandin. Ipesipat kaw heman kandan so nemenal kaw te kebenalan intoladà day kenyo.
2TH 1:11 Yan se doun te gayed kay egtawal-tawal tepad kenyo. Egpemoyò kay diyà te Timanem te ipetagad kaw din kominawà te ibegay din kenyo. Ibeg day, tebangan kaw te Timanem amon metoman se kedita te ibeg niyo meg-inang te mèpiya tandà te pegsalig niyo kandin.
2TH 1:12 Yan iduyun niyo se Pengolo tadon, aw iduyun kaw din heman. Metoman iyan pineokit te tabang te Timanem aw Pengolo tadon si Jesu Cristo.
2TH 2:1 Nayan menge kedowa day, ipetaga-taga day den kenyo tepad te peglikò te Pengolo tadon si Jesu Cristo aw tepad te peg-angay din kenitadon. Doen ipunù day kenyo
2TH 2:2 te keilangan eked pegkebulung se aneng-aneng niyo te pegdineg niyo te dimateng den ekon se aldaw te peglikò te Pengolo tadon. Ikà niyo egketetana pengkey doen otaw mikagi te yan se impekeliwat te Timanem kandin, pengkey doen otaw egtoladà kenyan, aw pengkey yan ekon se insolat day.
2TH 2:3 Pengkey eden se ikegiyen dan iling kenyan, peg-ahà kaw amon eked kaw keekali, so eked dateng se aldaw sìyan singed aw metoman se peg-eked te keditaan te otaw te Timanem, aw ipekità se Olo te Medaet, sìyan ipelumun doton te kilot te wedad temanan.
2TH 2:4 Meneng onà sikandin megpoon te kedita egtewalen timanem aw egsimbahen. Megpelangkaw sikandin diyà te kedita niyan, so mawop heman sikandin te simbahan te Timanem, aw menenoo sikandin kidoen, so mikagi te sikandin se Timanem.
2TH 2:5 Wedà niyo besi kelibeli te yan se intoladà ko kenyo te peg-ogpà ko doton kenyo kedengan.
2TH 2:6 Doen pa egpekebelabag te pegketoman niyan songkani, aw netegahan niyo aw eden iyan. Meneng aw domateng se aldaw pinemallì te Timanem, kitaen se Olo te Medaet sìyan.
2TH 2:7 Doen den eg-inangen te Olo te Medaet, meneng iling te eles-eles se peg-inang din, so eked sikandin kitai singed aw meabat se egpekebelabag kandin.
2TH 2:8 Meneng aw kitaen se Olo te Medaet, imetayan sikandin te Pengolo tadon si Jesus te pegdateng din. Olò din edopen se Olo te Medaet, aw yan matay sikandin aw kebàtan se eg-inangen din.
2TH 2:9 Aw kitaen se Olo te Medaet, egbeyà-beyaan sikandin i Satanas, aw medita se ledyawan aw kepelahan inangen din pineokit te tolos din amon meg-akal te otaw.
2TH 2:10 Medita kemolò se medaet inangen din amon ekalan din se menge otaw detengan te mekebebaet. Pegbàtan dan so wedad ibeg dan memenal te kebenalan mekepelowà peden kandan.
2TH 2:11 Yan se doun te doen isogò te Timanem meg-akal kandan amon memenal dan te kebolalaw.
2TH 2:12 Yan ipelumun se kedita te otaw eked pemenal te kebenalan aw egkeibeg meg-inang te salà.
2TH 2:13 Menge kedowa day egkedekelan te Pengolo tadon te pedowan, mèpiya aw gayed kay megpesiontong diyà te Timanem tepad kenyo, so lekat te keteboan te keneyonan pinemallì kaw te Timanem amon ipelowà kaw lekat te salà, aw yan se ininang din kenyo pineokit te peglinis te Espiritu Santo kenyo, aw pineokit te pegpemenal niyo te kebenalan.
2TH 2:14 Yan se tod te Timanem te pegtawal din kenyo pineokit te pegtoladà day kenyo te Mèpiya Indan, so ibeg din kominawà kaw te kedita te mèpiya ipegpemegay te Pengolo tadon si Jesu Cristo.
2TH 2:15 Yan menge kedowa day, ikà niyo egdowa-dowa te pegsalig niyo ki Cristo, aw ikà niyo egsoway lekat te menge kebenalan intoladà day kenyo te peg-ogpà day doton kenyo kedengan aw pineokit heman te pegsolat day kenyo.
2TH 2:16 Ibeg day, entagen se pedowan niyo aw tebangan kaw te Pengolo tadon si Jesu Cristo aw Amay tadon Timanem amon mèpiya se kedita te inangen niyo aw ikegiyen niyo. Dakel se pedowan te Timanem kenitadon, aw pineokit te tabang din kenitadon neantag den se pedowan tadon wedad temanan, aw mèpiya den heman se pegpeliman tadon.
2TH 3:1 Nayan menge kedowa day, pegtawal-tawal kaw tepad kenami, amon labi pa medita se otaw metaga-taga aw memenal te kebenalan ipegtoladà day tepad te Pengolo tadon, iling te neinang doton kenyo.
2TH 3:2 Pegtawal-tawal kaw heman te ipelowà kay din lekat te belad te menge medaet otaw kenà egpenimanem, so medita se otaw wedà pa pemenal te Timanem.
2TH 3:3 Meneng egkeseligan se Pengolo tadon. Sikandin se megpekagsen te pegsalig niyo diyà kandin aw megtonggò kenyo amon eked kaw dàgi i Satanas.
2TH 3:4 So simalig kay diyà te Pengolo tadon, netegahan day te gayed kaw egtolò te impunù day kenyo.
2TH 3:5 Ibeg day beyà-beyaan kaw te Pengolo tadon amon labi pa megkedakel se pedowan niyo diyà te Timanem, aw amon meketayod kaw te kelimahan iling ki Cristo.
2TH 3:6 Menge kedowa day, seini se ipunù day kenyo pineokit te ngadan te Pengolo tadon si Jesu Cristo. Aw tekahen se otaw egpemenal aw kenà egtolò te impunù day kenyo, ikà niyo egdoma kandin.
2TH 3:7 Tapay niyo netegahan aw eden se keilangan inangen niyo amon mekeiling kaw kenami. Peg-ogpà day doton kenyo, wedà kay pegketaka.
2TH 3:8 Wedà kay pemoyò te kànen day diyà te menge doma otaw, meneng minayad kay te kedita te kelidoan day. Ontò kay migpekeaseb migterbaho pengkey aldaw aw delem amon eked kaw kelimahi te pegpenogpò niyo kenami.
2TH 3:9 Migterbaho kay kenà te eked kepakay aw togpoan kay niyo, meneng amon meinang kay gegonan peg-ilingan niyo.
2TH 3:10 Peg-ogpà day doton kenyo, seini se impunù day kenyo. Ikà niyo egpemekaen te otaw eked keibeg megterbaho.
2TH 3:11 Yan se impunù day kenyo so doen ekon menge otaw doton kenyo tekahen. Kenà dan ekon egterbaho, meneng olò dan eg-inabut te eg-inangen te doma otaw.
2TH 3:12 Seini se ipunù day aw pemoyoen day kandan tandà te pegsebad tadon diyà te Pengolo tadon si Jesu Cristo. Keilangan metingen dan aw megterbaho dan amon doen ibayad dan te kandan kelidoan.
2TH 3:13 Menge kedowa day, keilangan eked kaw pegkelomay te peg-inang niyo te mèpiya.
2TH 3:14 Aw doen otaw doton kenyo eked tolò te menge punù day diyà te solat day seini, peg-ahà kaw kandin, aw ikà niyo egdoma kandin amon meyàyà sikandin.
2TH 3:15 Meneng ikà niyo eg-aneng-aneng te poon niyo sikandin. Pegtoladà kaw beling kandin, so kedowa tadon sikandin te pegpemenal.
2TH 3:16 Ibeg day, gayed kaw begayan te Pengolo tadon te kelinaw te pedowan pengkey eden se domateng kenyo, so sikandin se eglekatan te kelinaw te pedowan. Ibeg day heman, gayed megdoma se Pengolo tadon kenyo.
2TH 3:17 Siaken si Pablo se simolat te menge kagi diyà te temanan te solat seini. Metaga-taga kaw te benal siak se simolat kani, so iling kani se pegpirma ko te kedita te solat ko.
2TH 3:18 Ibeg ko, tebangan te Pengolo tadon si Jesu Cristo se kedita niyo.
1TI 1:1 Siak, si Pablo, se simolat kani. Ininang a sogounun i Jesu Cristo pineokit te punù te Timanem egpelowà kenitadon, aw pineokit te punù i Jesu Cristo egpelimanan tadon.
1TI 1:2 Simolat a kamno, Timoteo. Iling ka te ontò batà ko tandà te pegpemenal no ki Cristo. Ibeg ko, tebangan ka, aw keidowan ka, aw begayan ka te kelinaw te pedowan lekat te Amay tadon Timanem aw Pengolo tadon si Jesu Cristo.
1TI 1:3 Ibeg ko meg-ogpà ka pa doton te Efeso. Yan heman se impunù ko kamno kedengan te pegpesalo ko doton te Masidonya. Peg-ogpà ka pa doton, so doen menge otaw egtoladà te kebolalaw, aw keilangan megsagda ka kandan.
1TI 1:4 Pegpunù ka kandan te keilangan eked dan pemenal te kebolalaw ingkeliwat te menge kemonaan dan, aw keilangan eked dan salig diyà te menge indan-indan tepad te menge monà otaw, so yan se lekatan te dindil. Pineokit kenyan, eked kidon ketaga-taga aw eden se eg-inangen te Timanem, so ketegahan iyan olò pineokit te pegpemenal tadon te Timanem.
1TI 1:5 Yan se ipunù ko amon megpedekelay dan te pedowan. Meneng eked dan pegpedekelay te pedowan singed aw linisan te Timanem se pedowan dan lekat te salà, aw metibok se ibeg dan meg-inang te metòlid, aw melobos se pegpemenal dan te Timanem.
1TI 1:6 Doen menge otaw simoway lekat te pegtaking dan kenyan, aw gayed den dan egpebelaw-belaway te wedad ontong.
1TI 1:7 Pengkey doen ibeg dan meinang menenoladà te menge punù ingkeliwat i Moises, meneng wedà dan pa pekelabet te kedegdagan te eg-ikegiyen dan. Wedà dan ketaga-taga te kebenalan ipegtoladà dan diyà te menge doma otaw.
1TI 1:8 Netegahan tadon ini. Aw metòlid se peggamit tadon te menge punù ingkeliwat i Moises, mèpiya se menge punù sìyan.
1TI 1:9 Netegahan tadon heman te doen punù kenà amon segdahen se otaw meg-inang te metòlid, meneng amon segdahen se menge otaw kenà egtolò, aw otaw metugul, aw otaw kenà egpemasa te Timanem, aw nelegeb te salà, aw eg-inang te medaet, aw egtompuyus te mèpiya, aw otaw egpengimatay te amay aw inay dan, aw otaw egbonò.
1TI 1:10 Doen punù amon segdahen se otaw eglayok te kenà kandan esawa, aw bayot, aw otaw eg-agaw te doma otaw, aw bolelawun, aw otaw egkebolalaw te pegsistigos dan, aw pengkey eden se medaet inangen te otaw kenà egtaking te kebenalan ipegtoladà tadon.
1TI 1:11 Yan se kebenalan tepad te Mèpiya Indan insalig diyà kanak te Timanem metolos aw ipegduyun.
1TI 1:12 Egpesiontong a diyà te Pengolo tadon si Jesu Cristo, so binegayan a din te keseg amon mekebatog a megtoladà. Egpesiontong a diyà kandin so mig-aneng-aneng sikandin te egkeseligan a, aw ininang a din sogounun din.
1TI 1:13 Kedengan te wedà a pa pemenal, migtompuyus a kandin, aw nemilang a te menge sakop din, aw nebensi a kandan. Meneng neidowan a din pa, so peg-inang ko kenyan, wedà a pa pemenal kandin, aw yan wedà ko ketegahi te medaet se ininang ko sìyan.
1TI 1:14 Meneng songkani, ontò a tinebangan te Pengolo, so nemenal a kandin, aw dakel se pedowan ko kandin tandà te pegsebad ko diyà kandin.
1TI 1:15 Benal se eg-ikegiyen seini, aw keilangan ontò tadon pemenalen. Dimini si Jesu Cristo te keneyonan amon megpelowà te otaw lekat te salà sipat siak ontò medaet diyà te kedita te otaw nekesalà.
1TI 1:16 Meneng neidowan a te Timanem, so tod din ipetaga-taga din te ontò medalem se pedowan i Jesu Cristo te pegkeido din kanak, pengkey siak se ontò medaet diyà te kedita te otaw nekesalà. Yan se ininang din amon metaga-taga se kedita te doma otaw memenal kandin te begayan din dan heman te kaling pedowan wedad temanan.
1TI 1:17 Iduyun tadon se Timanem eglowan te wedad temanan. Eked palos sikandin kematay, aw eked heman sikandin kitai. Sebad din se Timanem, aw segmanen aw iduyun sikandin te wedad temanan. Metoman iyan.
1TI 1:18 Nayan, batà ko Timoteo, seini se ipunù ko kamno. Ikà egkelibel te inikagi te menge telekeliwat te kagi te Timanem tepad kamno kedengan. Yan ketebangan ka amon keseligan ka tomoman te impunù kamno, iling te sondalo egkeseligan tepad te eg-inangen din.
1TI 1:19 Yan melobos se pegsalig no diyà te Timanem, aw metibok heman se ibeg no meg-inang te metòlid. Doen menge doma otaw pengkey netegahan dan aw eden se metòlid, meneng wedà dan iyan inangi, aw migkedaet se pegpemenal dan.
1TI 1:20 Iling kenyan se neinang i Himeneo aw si Alejandro. Impebayà-bayà ko dan ki Satanas amon ketoledaan dan te eked kepakay se pegtompuyus dan te Timanem.
1TI 2:1 Nayan, seini se ontò ipunù ko. Pemoyò kaw te menge kelidoan niyo diyà te Timanem. Pegtawal-tawal kaw tepad te kedita te otaw, aw pegpesiontong kaw heman diyà kandin tepad te keido din.
1TI 2:2 Pegtawal-tawal kaw tepad te menge selotan aw tepad te kedita te otaw eglowan, amon mèpiya se keogpà tadon dalem te pegtolò tadon te Timanem aw peg-inang tadon te ontò metòlid.
1TI 2:3 Mèpiya aw iling kenyan se pegtawal-tawal tadon, so aw yan se eg-inangen tadon, meluba se Timanem egpelowà kenitadon.
1TI 2:4 Ibeg din kedita te otaw se mekelowà lekat te salà aw metaga-taga heman te kebenalan.
1TI 2:5 Olò sebad se Timanem, aw olò heman sebad se Telekagon diyà te tengà-tengà te Timanem aw otaw, aw yan si Jesu Cristo.
1TI 2:6 Lekat te kandin ibeg, simelilin sikandin kenitadon aw nematay amon ipelowà din se kedita te otaw. Pegdateng te aldaw pinemallì te Timanem, impetaga-taga din pineokit ki Jesu Cristo te doen ibeg din ipelowà se kedita te otaw lekat te salà.
1TI 2:7 Yan se doun te ininang a sogounun i Cristo megtoladà te menge otaw kenà Judiyo, amon metaga-taga dan te keilangan memenal dan te kebenalan. Kenà kebolalaw se eg-ikegiyen ko, meneng kebenalan iyan.
1TI 2:8 Ibeg ko megtawal-tawal se menge meama doton te kedita ogpeanan. Keilangan metòlid se eg-inangen dan. Keilangan eked dan keopal, aw eked dan heman pegdindil.
1TI 2:9 Ibeg ko heman, keilangan doen inenengen te menge bayi tepad te pegdagom dan. Eked dan pegpeduyun, meneng keilangan mèpiya se pegdagom dan. Eked kepakay aw megpekità-kità dan pineokit te pegtigmes te logay dan, aw pineokit te pegpalas dan te bolawan aw pirlas aw dagom meelagà.
1TI 2:10 Meneng keilangan iduyun dan tandà te peg-inang dan te mèpiya, so yan se keilangan inangen te menge bayi eg-ikagi te egtaking dan te Timanem.
1TI 2:11 Keilangan mepenek se menge bayi menenalan te otaw megtoladà. Keilangan tomolò dan te kedita itoladà kandan.
1TI 2:12 Eked kepakay diyà kanak aw bayi se megtoladà aw lomowan diyà te meama. Keilangan olò dan menenalan,
1TI 2:13 so si Adam se monà ininang te Timanem, aw penga niyan si Eva.
1TI 2:14 Kenà si Adam se neekalan i Satanas gebii, meneng bayi se neekalan aw yan limàpang sikandin te punù te Timanem kandan.
1TI 2:15 Meneng aw gayed somalig se menge bayi diyà te Timanem, aw dakel se pedowan dan, aw metòlid se eg-inangen dan, aw eked dan pegpeduyun, doen kelowaan dan pineokit te pegpemetebaw dan.
1TI 3:1 Benal se eg-ikegiyen seini. Aw meibeg se otaw meinang egpengibing te simbahan, ontò mèpiya se egkeibegan din.
1TI 3:2 Se otaw inangen egpengibing te simbahan, keilangan wedad palos isila kandin. Keilangan sebad olò se esawa din aw kenà eglakad. Keilangan biyasa sikandin memallì te metòlid inangen din. Keilangan tikbel sikandin. Keilangan besahan sikandin te menge doma otaw. Keilangan megsagman sikandin te menge otaw gomemaw kandin. Keilangan biyasa sikandin megtoladà.
1TI 3:3 Eked kepakay aw eglasing, aw egbolaw, meneng keilangan mèpiya se pedowan din diyà te doma otaw. Eked kepakay aw egdindil aw egpengewarta.
1TI 3:4 Keilangan mèpiya se pegpengibing din te esawa din aw menge batà din. Keilangan tomolò se menge batà din kandin, aw keilangan gayed dan egsagman kandin.
1TI 3:5 Aw wedad toig te otaw mengibing te esawa din aw menge batà din, eked heman sikandin pekebatog mengibing te menge otaw egsimba te Timanem.
1TI 3:6 Eked heman kepakay aw inangen egpengibing te simbahan se otaw kaling nemenal ki Cristo, so megpelangkaw-langkaw besi sikandin aw yan ipelumun te Timanem iling ki Satanas.
1TI 3:7 Keilangan mèpiya se eg-inangen din amon segmanen sikandin te menge otaw kenà egpemenal, so aw pemellien se otaw kenà egsegmanen, mekeyèyaay besi sikandin aw keekalan i Satanas.
1TI 3:8 Iling heman kenyan, keilangan metinuud se menge doma opisyal te simbahan. Keilangan keseligan se kagi dan. Eked kepakay aw metilasing dan aw mengewarta dan.
1TI 3:9 Keilangan metibok se pegpemenal dan so eked kepakay aw egdowa-dowa se aneng-aneng dan tepad te kebenalan impetaga-taga te Timanem kenitadon.
1TI 3:10 Eked inangi se otaw opisyal te simbahan singed aw kitaen niyo se eg-inangen dan. Penga niyan, aw wedad medaet ketegahan niyo, mepakay dan inangen menge opisyal te simbahan.
1TI 3:11 Keilangan metinuud heman se esawa dan. Eked kepakay aw egbaet-baet dan. Keilangan biyasa dan memallì te metòlid inangen dan. Keilangan keseligan dan te pengkey eden se eg-inangen dan.
1TI 3:12 Se otaw inangen opisyal te simbahan, keilangan sebad olò heman se esawa din aw kenà eglakad. Keilangan mèpiya se pegpengibing din te esawa din aw menge batà din.
1TI 3:13 Aw mèpiya se eg-inangen te menge opisyal te simbahan, besahan dan te menge doma otaw, aw yan eked dan keyàyà te pegtoladà dan tepad te pegpemenal ki Jesu Cristo.
1TI 3:14 Pegsolat ko kani kamno, doen ibeg ko lomaoy a doton kamno te eked kenamay.
1TI 3:15 Meneng aw meanggà a, pineokit te solat ko seini, ketegahan no aw eden se mèpiya inangen tadon menge batà te Timanem. Sikitadon se otaw egsimba te Timanem wedad temanan din. Iling kidon te tollok te balay din, so sikitadon se sineligan din te kebenalan.
1TI 3:16 Netegahan te kedita tadon te ontò mèpiya se kebenalan impetaga-taga te Timanem aw pinemenalan tadon. Migpekeotaw si Jesu Cristo aw dimini te tanà. Impetaga-taga te Espiritu Santo te metòlid sikandin. Kinità sikandin te menge anghil. Inindanan se menge otaw kenà Judiyo tepad kandin. Doen otaw nemenal kandin doton te kebelad te tanà. Inengat sikandin doton te langit.
1TI 4:1 Mebangal se intoladà te Espiritu Santo te doen menge otaw somoway lekat te pegsalig dan ki Cristo aw agpet se temanan te keneyonan. Meneng tomolò dan te bosaw biyasa eg-akal, aw memenal dan te kebolalaw itoladà te bosaw.
1TI 4:2 Ikeliwat se itoladà dan te otaw egkebolalaw aw eg-akal. Eked dan ketaga-taga te eden se metòlid aw eden se medaet, so pegbàtan se aneng-aneng dan.
1TI 4:3 Megtoladà dan te eked kepakay aw mengognan se otaw. Megtoladà dan heman te doen kànen eked kepakay kànen. Meneng ininang te Timanem se kànen sìyan, aw penga te pegpesiontong tadon kandin, mepakay iyan kànen te kedita te otaw simalig diyà kandin aw netaga-taga den te kebenalan.
1TI 4:4 Mèpiya se kedita ininang te Timanem, aw yan eked kepakay aw mikagi kidon te medaet se kànen ininang din. Meneng keilangan kinewaen tadon iyan aw megpesiontong kidon diyà kandin tepad te kedita.
1TI 4:5 Netegahan tadon te mepakay se pegpengaen tadon te kedita tandà te inikagi te Timanem aw tandà te pegpesiontong tadon diyà kandin.
1TI 4:6 Aw megtoladà ka kenyan diyà te menge doma otaw egpemenal, mèpiya ka sineligan i Jesu Cristo, so egkagsen se pegsalig no kandin pineokit te peg-iling no te kebenalan pinemenalan no, aw pineokit te pegtaking no te kebenalan intoladà kamno.
1TI 4:7 Ikà egpenenalan te menge indan-indan eked keibegi te Timanem aw wedad ontong. Meneng keilangan megpekagsen ka tomolò te Timanem.
1TI 4:8 Aw megpekagsen kidon te lawa tadon, doen ontong tadon. Meneng labi pa mèpiya se ontong tadon aw megpekagsen kidon tomolò te Timanem, so pineokit kenyan, mèpiya se keogpà tadon dini songkani aw doton heman te langit te modi aldaw.
1TI 4:9 Keseligan se inikagi ko sìyan, aw keilangan ontò iyan pemenalen.
1TI 4:10 Yan se doun te egpekagsen kidon te eg-inangen tadon so egseligan tadon se Timanem wedad temanan din. Sikandin se megpelowà te kedita te otaw, aw labi din pa ipelowà se kedita tadon egpemenal ki Jesu Cristo.
1TI 4:11 Se insolat ko den kamno, yan se keilangan ipunù no aw itoladà no diyà te menge doma otaw.
1TI 4:12 Ikà egketalaw te pegtoladà no pengkey kaling ka pa otaw. Meneng keilangan meinang ka gegonan peg-ilingan te menge doma otaw egpemenal, pengkey eden se eg-ikegiyen no aw eg-inangen nikaw. Pekitai te dakel se pedowan no, aw melobos se pegsalig no te Timanem, aw wedad inang no medaet.
1TI 4:13 Dalem te eked a pa pekedoton kamno, pegbasa ka gayed te kagi te Timanem diyà te menge otaw kidoen, aw pegtoladà ka kandan, aw pegsoblod ka te menge kebenalan.
1TI 4:14 Ikà eglengà te peggamit no te kebiyasa nekinawà no kedengan pineokit te peg-ikagi te telekeliwat te kagi te Timanem tepad kamno aw pineokit te pegpemaed te menge egpengibing te simbahan diyà te olo nikaw.
1TI 4:15 Pegpekagsen ka peg-inang te kedita niyan. Toman ka kenyan, amon metaga-taga se kedita te otaw te ontò ka mig-iling.
1TI 4:16 Peg-ahà ka tepad te eg-inangen no aw ipegtoladà nikaw. Aw yan se inangen nikaw, kenà olò sikona se mekelowà lekat te pelumun, meneng mekelowà heman se menge otaw toledaan nikaw.
1TI 5:1 Ikà egkeopal te menge temoay meg-inang te salà, meneng keilangan mèpiya se pegsagda no kandan iling te peg-ikagi no diyà te amay nikaw. Peg-aneng-aneng ka te menge kaling meama iling te kedowa nikaw.
1TI 5:2 Peg-aneng-aneng ka te menge lokes iling te inay nikaw, aw menge kaling bayi iling te etebay nikaw, aw wedad medaet inangen no kandan.
1TI 5:3 Se menge bayi balo wedad palos menogpò kandan, yan se keilangan tebangan niyo.
1TI 5:4 Meneng aw doen batà aw apò te bayi balo, pegtoladà ka kandan te keilangan sikandan se menogpò te kandan pamilya aw memegay te ontong diyà te kandan inay aw amay, so yan se ibeg te Timanem inangen tadon.
1TI 5:5 Meneng se bayi balo wedad palos menogpò kandin aw sebad din olò, Timanem olò se egseligan din, aw gayed sikandin egtawal-tawal aw egpemoyò te tabang din te kelikit te aldaw aw delem.
1TI 5:6 Meneng se bayi balo gayed egkeibeg te keluba te otaw dini te keneyonan, yan se iling te nematay den pengkey wedà pa kematay.
1TI 5:7 Se impunù ko kamno, yan se keilangan itoladà no diyà te kedita te otaw egpemenal amon wedad mekesila kandan.
1TI 5:8 Aw doen otaw egpemenal kenà egpenogpò te kandin pamilya, labi pa aw kenà egpenogpò te otaw eg-ogpà diyà te kandin balay, yan se otaw timinàyog te kebenalan tapay pinemenalan din, aw labi pa medaet se ketanem din diyà te ketanem te otaw kenà egpemenal.
1TI 5:9 Ikà egsolat te ngadan te bayi balo diyà te lista te menge balo egtebangan niyo singed aw minapet den te keneman se omay din, aw sebad olò heman se esawa din.
1TI 5:10 Eked sikandin peekopi singed aw medengeg sikandin eg-inang te mèpiya. Pelistahi olò se ngadan te bayi balo mig-ipat te menge batà din aw migsagman te menge otaw gimemaw kandin, aw mig-onaw te benis te menge doma sakop te Timanem, aw migtabang te menge otaw nelimahan, aw migpekeaseb sikandin te medita kemolò te mèpiya inang.
1TI 5:11 Ikà egsolat te ngadan te kaling bayi balo diyà te lista te menge balo egtebangan niyo, so aw meibeg dan todà mengognan, lomengà dan te eg-inangen dan ki Cristo.
1TI 5:12 Pineokit kenyan, silahen dan te menge doma otaw so eked dan tomani se tapay pakang dan ki Cristo.
1TI 5:13 Megketaka dan heman, aw meglegeb-legeb dan doton te menge doma balay. Kenà olò dan megketaka, meneng megkebelikbikun dan heman, aw meg-inabut dan te doma, aw mikagi dan tepad te eked kepakay iindan.
1TI 5:14 Yan se doun te ibeg ko mengognan beling todà se kaling bayi balo, aw megbatà dan, aw meg-ipat dan te kandan pamilya, amon wedad isila te menge poon tadon tepad kenitadon egpemenal.
1TI 5:15 Yan se ibeg ko, so doen den menge bayi balo simoway lekat te kebenalan aw timaking den dan ki Satanas.
1TI 5:16 Se otaw egpemenal doen bayi balo doton kandin, yan se keilangan menogpò kandin. Eked kepakay aw sikiyo egpemenal se keilangan menogpò kandan amon mekebatog kaw menogpò te menge doma bayi balo wedad palos pamilya menogpò kandan.
1TI 5:17 Aw mèpiya se pegpengibing te menge egpengibing te simbahan, aw ontò dan measeb egtoladà aw egsoblod te kagi te Timanem, mèpiya aw tendanan dan te dobli.
1TI 5:18 So doen kagi te Timanem insolat, “Ikà niyo egpongos te baka aw meglegiyek te trigo, amon mekekaen iyan.” Doen heman doma kagi insolat, “Keilangan tendanan se otaw egterbaho.”
1TI 5:19 Aw mikagi se otaw te doen salà ininang te egpengibing te simbahan, ikà niyo tagmon egpemenal kenyan singed aw doen dowa otaw aw kenà telo mikagi te benal iyan.
1TI 5:20 Meneng aw mekesalà se egpengibing te simbahan, pegsagda ka kandin te pegketipon te kedita te otaw egpemenal, amon melemitan se menge doma otaw meg-iling kandin.
1TI 5:21 Egtengtengen ki te Timanem, aw si Jesu Cristo, aw menge anghil te Timanem, aw yan egpunù a kamno te keilangan tomolò ka te insolat ko kamno. Keilangan wedad palos otaw pedigselan no te pegsagda no te medaet, so keilangan segdahen no se kedita te otaw, pengkey melangkaw otaw aw kenà.
1TI 5:22 Keilangan eked ka kesasaw te pegpemallì no te otaw inangen egpengibing te simbahan, so aw mekesalà sikandin, silahen ka heman doma din. Yan keilangan wedad salà inangen nikaw.
1TI 5:23 Olò wayeg se eg-inemen no, meneng labi pa mèpiya aw inemen no heman se deitek bino amon kebolongan se mesakit te getek no aw menge doma mesakit melikit egdateng kamno.
1TI 5:24 Doen menge otaw egpekesalà sikil egketegahan te menge doma otaw, aw detengan dan te pelumun. Meneng doen menge doma otaw egpekesalà eked ketegahi te doma otaw singed aw menamay.
1TI 5:25 Iling heman kenyan, doen menge otaw eg-inang te mèpiya sikil egketegahan te menge doma otaw. Meneng pengkey eked iyan tagmon ketegahi te doma otaw, eked iyan keeles te wedad temanan.
1TI 6:1 Pegtoladà ka te kedita te allang te keilangan ontò dan tomolò te amo dan, amon wedad otaw megtompuyus te Timanem, aw wedad heman otaw mekesila te ipegtoladà tadon.
1TI 6:2 Aw egpemenal se amo dan ki Cristo, eked kepakay aw eked tolò se allang kandin pengkey telekedowa dan diyà ki Cristo. Meneng keilangan labi pa ontò mèpiya se eg-inangen te allang, so pineokit kenyan, egtebangan dan se otaw egpemenal ki Cristo aw egkedekelan te Timanem te pedowan. Keilangan megtoladà ka kenyan aw megsoblod ka kenyan diyà te menge otaw egpemenal.
1TI 6:3 Aw doen otaw sebad se ipegtoladà din kenà iling te kagi lekat te Pengolo tadon si Jesu Cristo, aw kenà heman iling te kebenalan pinemenalan tadon,
1TI 6:4 yan se otaw olò egpelangkaw-langkaw, aw wedad palos netegahan din. Kolang se ibeg din te pegdindil tepad te kedegdagan te kagi. Yan se kelekatan te peg-ingà, aw pegkeopal, aw pegbaet-baet, aw wedad pegsalig.
1TI 6:5 Gayed dan egpedindilay so migkedaet se aneng-aneng dan, aw simoway dan lekat te kebenalan. Eg-aneng-aneng dan te megkeyaman dan pineokit te pegpesakop dan diyà te Timanem.
1TI 6:6 Benal doen ontong te otaw megpesakop diyà te Timanem, meneng wedad ontong din kenyan singed aw meg-aneng-aneng sikandin te botong se kedònan din.
1TI 6:7 Pegtebaw tadon, wedad palos kedònan inibing tadon dini te keneyonan. Aw matay kidon, wedad heman palos kedònan ibingen tadon lekat dini.
1TI 6:8 Yan aw doen den kànen tadon aw penenaktun, botong den iyan te keluba te pedowan tadon.
1TI 6:9 Meneng se menge otaw egkeibeg megkeyaman, yan se mesayo meboyo aw keekalan te ibeg dan wedad ontong aw mekedaet kandan, aw yan detengan dan te mekebebaet.
1TI 6:10 Aw egkeibeg se otaw mengewarta, yan se eglekatan te peg-inang din te medita kemolò te medaet. Doen den menge otaw simoway lekat te kebenalan tapay dan pinemenalan tandà te ibeg dan egpengewarta, aw ontò den nepuluk se pedowan dan tandà te kelimahan dan.
1TI 6:11 Meneng so sikona se otaw egtaking te Timanem, pegpediyò ka lekat te kedita te medaet sìyan in-indan ko kamno. Pegpekeaseb ka meg-inang te metòlid, aw toman ka te ibeg te Timanem, aw salig ka kandin. Keilangan dakel se pedowan no diyà te menge doma otaw, aw keilangan medalem aw mèpiya se pedowan nikaw.
1TI 6:12 Pegpekagsen ka toman te insogò kamno tepad te kebenalan pinemenalan nikaw. Pegkinawà ka te kaling pedowan wedad temanan, so yan se doun te tinawal ka te Timanem amon begayan ka kenyan, aw mig-indan ka diyà te medita otaw te nemenal ka te kebenalan.
1TI 6:13 Doen pa ipunù ko kamno te egtengtengen ki te Timanem meg-antay te kedita lekat te nematay, aw egtengtengen ki i Jesu Cristo mig-indan ki Poncio Pilato te kebenalan.
1TI 6:14 Tolò ka te impunù kamno amon wedad palos kemalì no aw wedad isila kamno lamig te aldaw te peglikò te Pengolo tadon si Jesu Cristo.
1TI 6:15 Ipelikò sikandin te Timanem aw domateng se aldaw pinemallì din, so Timanem se ontò melangkaw diyà te kedita. Sikandin se Selotan eglowan diyà te kedita te selotan, aw sikandin se Pengolo diyà te kedita te pengolo.
1TI 6:16 Sikandin olò se eked palos kematay. Eg-ogpà sikandin diyà te ontò kelowahan eked kedepagi te otaw. Wedad palos otaw kimità kandin, aw eked palos sikandin kitai te otaw. Iduyun aw lomowan sikandin te wedad temanan. Metoman iyan.
1TI 6:17 Pegpunù ka te menge otaw doen dakel kedònan songkani te keilangan eked dan pegpelangkaw-langkaw. Eked kepakay aw kedònan dan se seligan dan, so eked ketegahi aw kano iyan pegkewedad. Meneng Timanem se keilangan seligan dan, so bowasag sikandin diyà kenitadon. Egpemegay sikandin te kedita te kelidoan tadon amon mèpiya se keogpà tadon.
1TI 6:18 Pegpunù ka te menge otaw meyaman te keilangan meg-inang dan te mèpiya diyà te menge doma otaw, so yan se ontò keyemanan. Keilangan meagka se pedowan dan megtabang te menge doma otaw.
1TI 6:19 Aw yan se inangen dan, metipon se ontong ibegay kandan doton te langit te modi aldaw, amon kinewaen dan se ontò benal pedowan wedad temanan.
1TI 6:20 E Timoteo, peg-ahà ka te metòlid se pegtoladà no te kebenalan insalig kamno. Ikà eg-inabut te balaw eked keibegi te Timanem aw kebolalaw ipegtoladà te menge otaw eden dan aw doen kebiyasa imbegay te Timanem kandan,
1TI 6:21 so doen menge otaw eg-ikagi te doen kebiyasa dan, meneng pineokit kenyan simoway dan lekat te kebenalan pinemenalan tadon. Ibeg ko tebangan te Timanem se kedita niyo.
2TI 1:1 Siak, si Pablo, se simolat kani. Ininang a sogounun i Jesu Cristo pineokit te ibeg te Timanem, so insogò a din megtoladà tepad te kaling pedowan wedad temanan ibegay din diyà te kedita te otaw memenal ki Jesu Cristo.
2TI 1:2 Simolat a kamno, Timoteo. Iling ka te ontò batà ko so dakel se pedowan ko kamno. Ibeg ko tebangan ka, aw keidowan ka, aw begayan ka te kelinaw te pedowan lekat te Amay tadon Timanem aw Pengolo tadon si Jesu Cristo.
2TI 1:3 Wedad ikeyàyà ko diyà te Timanem egtoloen ko iling te pegtolò te menge kemonaan ko kandin. Aldaw aw delem, gayed a egpesiontong diyà kandin tepad kamno te pegtawal-tawal ko diyà kandin.
2TI 1:4 Eg-aneng-aneng a te migkelag ka te pegtanan ko kamno. Ontò ko ibeg te todà ki megkità amon meluba se pedowan ko.
2TI 1:5 Wedà ko kelibeli se kelobos te pegpemenal no, iling heman te pegpemenal te apò no si Loida aw inay no si Eunice kedengan. Netegahan ko te melobos den se pegpemenal no iling kandan.
2TI 1:6 Yan se doun te ibeg ko eked no kelibeli te keilangan gemiten no se kebiyasa imbegay te Timanem kamno kedengan te pegpemaed ko te olo no aw pegtawal-tawal ko tepad kamno.
2TI 1:7 Imbegay te Timanem se Espiritu Santo kenitadon kenà amon megketalaw kidon, meneng imbegay din amon megkagsen kidon, aw megkedakel se pedowan tadon, aw meketameng kidon te ibeg tadon.
2TI 1:8 Yan ikà egkeyàyà te peg-indan no tepad te Pengolo tadon. Ikà heman egkeyàyà tepad te pegkeleboso kanak tandà te pegtolò ko kandin. Meneng pegtoladà ka te Mèpiya Indan tepad kandin pengkey pemilangen ka, so begayan ka te Timanem te eneg din amon meketayod ka kenyan.
2TI 1:9 Impelowà kidon din lekat te salà aw tinawal kidon din amon inangen kidon din menge sakop din. Yan se ininang din kenà tandà te peg-inang tadon te mèpiya, meneng tandà te kandin ibeg aw tabang din kenitadon. Gebii te wedad pa palos ininang din, miglalang sikandin megtabang kenitadon pineokit ki Jesu Cristo.
2TI 1:10 Netoman den se ibeg din sìyan, so insogò din den si Jesu Cristo amon megpelowà kenitadon. So neantay sikandin lekat te nematay, wedad den lamit tadon te kemetayun. Pineokit te Mèpiya Indan tepad ki Cristo, netegahan tadon te doen kaling pedowan wedad temanan ipegpemegay din kenitadon.
2TI 1:11 Ininang a te Timanem sogounun i Cristo meg-indan aw megtoladà te Mèpiya Indan sìyan,
2TI 1:12 aw yan se doun te egpemilangen a songkani. Meneng kenà a egkeyàyà, so netegahan ko aw sinu se sineligan ko. Netegahan ko te mekebatog sikandin meg-ipat kanak dalem te pegtoman ko te insalig din kanak lamig te aldaw te peg-okom din.
2TI 1:13 Taking ka te kebenalan intoladà ko kamno, so yan se keilangan peg-ilingan nikaw. Lobosi se pegsalig no diyà ki Jesu Cristo, aw lobosi se pegkedakel te pedowan no te doma otaw, so yan se pengilala te migsebad kidon diyà ki Jesu Cristo.
2TI 1:14 Pineokit te tabang te Espiritu Santo eg-ogpà diyà kenitadon, peg-ahà ka te metòlid se pegtoladà no te kebenalan insalig diyà kamno.
2TI 1:15 Netegahan no besi te tininggetanan a te kedita te otaw egpemenal dini te probinsya te Asya, pengkey si Figelo aw si Hermogenes.
2TI 1:16 Meneng ibeg ko keidowan te Pengolo tadon si Onesiforo aw pamilya din, so pegdateng din dini te Roma, nengemahà sikandin kanak lamig kinità a din. Melikit sikandin eglaoy kanak aw neantag se pedowan ko pineokit kandin. Wedà sikandin keyàyà pengkey kineleboso a.
2TI 1:18 Tapay no netegahan te dakel se tabang din kanak doton te Efeso. Ibeg ko keidowan sikandin te Pengolo tadon te modi aldaw aw lomikò sikandin.
2TI 2:1 Sikona Timoteo, iling ka te ontò batà ko. Pegpekagsen ka pineokit te tabang i Jesu Cristo.
2TI 2:2 Se kebenalan intoladà ko kamno aw medita doma otaw, yan se keilangan itoladà no diyà te menge doma otaw keseligan amon meketoladà dan heman te menge doma otaw.
2TI 2:3 Pegpeketagad ka aw pemilangen ka tandà te pegtaking no ki Jesu Cristo, aw yan meinang ka iling te sondalo egkeseligan.
2TI 2:4 Aw meinang se otaw sondalo, eked kepakay aw mebuyung sikandin te terbaho te otaw kenà sondalo, so keilangan toloen din se pengolo din amon meluba sikandin.
2TI 2:5 Iling heman te egkoyà se otaw egtaking ki Jesu Cristo, so aw megkoyà se otaw, eked sikandin penalo aw eked heman begayi te ontong singed aw tomolò sikandin te menge punù tepad te pegkoyà.
2TI 2:6 Iling heman te egpawà se otaw egtaking ki Jesu Cristo, so aw measeb se otaw megpawà, sikandin se onà kominawà te ontong te geniyen.
2TI 2:7 Eneng-enengi se kagi ko kamno, so tebangan ka te Pengolo tadon amon mekelabet ka te kedita niyan.
2TI 2:8 Peg-aneng-aneng ka tepad ki Jesu Cristo. Neantay sikandin lekat te nematay, aw bowad-bowad sikandin i David. Yan se Mèpiya Indan ipegtoladà ko.
2TI 2:9 So migtoladà a te Mèpiya Indan sìyan, nelimahan a den aw kineleboso a den iling te telebonò. Pengkey ginapos a, meneng eked kesagda se pegtoladà te kagi te Timanem.
2TI 2:10 Yan se doun te egpeketayod a te kelimahan dimateng kanak amon ketebangan ko se menge otaw pinemallì te Timanem, so ibeg ko mekelowà dan heman lekat te salà pineokit te pegpemenal dan ki Jesu Cristo, aw kominawà dan heman te kaling pedowan wedad temanan.
2TI 2:11 Benal se kagi seini, “So nematay kidon den doma i Cristo, entayen kidon heman meg-ogpà doma din.
2TI 2:12 Aw meketayod kidon te pegpemilang kenitadon, lomowan kidon heman doma din. Meneng aw mikagi kidon te kenà kidon sakop din, mikagi heman sikandin te kenà kidon sakop din.
2TI 2:13 Pengkey kenà kidon egkeseligan, meneng gayed sikandin egkeseligan, so eked sikandin pegtodà te inikagi din.”
2TI 2:14 Pegtoladà ka te menge otaw doton te keilangan eked dan kelibeli se kedita niyan. Pegpunù ka kandan, so egtengtengen dan te Timanem, keilangan eked dan pegpedindilay tepad te kedegdagan te kagi. Wedad ontong kenyan, so olò iyan mekebaet te pegpemenal te menge otaw menenalan kenyan.
2TI 2:15 Pegpekeaseb ka te eg-inangen no amon meluba se Timanem kamno. Keilangan metòlid se pegtoladà no te kagi te Timanem amon wedad mekeyàyà kamno.
2TI 2:16 Ikà eg-inabut te medaet balaw eked keibegi te Timanem, so pineokit kenyan labi pa megpekediyò se menge otaw diyà te ibeg te Timanem.
2TI 2:17 Iling te bekokang gayed egkedakel diyà te lawa se ipegtoladà dan. Iling heman kenyan se ipegtoladà te didowa otaw, si Himeneo aw si Fileto.
2TI 2:18 Simoway dan lekat te kebenalan, so egtoladà dan te nepenga den se aldaw te peg-antay te Timanem te otaw lekat te nematay. Pineokit kenyan, doen menge otaw nebàtan den se pegsalig dan diyà te Timanem.
2TI 2:19 Meneng eked ketodà se kebenalan impetoladà te Timanem, aw egketegahan iyan pineokit te kagi seini, “Netegahan te Pengolo se kedita te otaw egtaking kandin.” Doen heman doma kagi, “Keilangan eked pegpekesalà se kedita te otaw eg-ikagi te egtaking dan te Pengolo.”
2TI 2:20 Medita se kinemoloan te telepagan doton te dakel balay te otaw meyaman, so doen telepagan ininang te bolawan, doen ininang te selapì, doen telepagan kayo, aw doen heman iling te koden ininang te tanà. Doen menge telepagan meelagà eked din gemiti singed aw doen otaw gomemaw kandin. Doen heman menge doma telepagan barato eggemiten din te pengkey eden eldawi.
2TI 2:21 Aw eked peg-inabut se otaw te salà, iling sikandin te telepagan meelagà diyà te tig-apò, aw pemellien sikandin te Pengolo amon gemiten din, so egpeketagad sikandin meg-inang te pengkey eden se mèpiya.
2TI 2:22 Yan se doun te keilangan eked ka peg-inabut te medaet mekeboyo te kaling otaw. Meneng keilangan megpekeaseb ka meg-inang te metòlid, aw somalig ka diyà te Timanem, aw megpedakel ka te pedowan no, aw megpekelinaw ka te pedowan nikaw, so yan se eg-inangen te kedita te otaw egtawal-tawal diyà te Pengolo tadon aw melobos se pedowan dan kandin.
2TI 2:23 Pegpekediyò ka diyà te balaw wedad inenengen aw wedad ontong, so netegahan no te yan se eglekatan te dindil.
2TI 2:24 Eked kepakay aw megdindil se sineligan te Pengolo tadon. Keilangan mèpiya beling se inangen din diyà te kedita te otaw. Keilangan biyasa sikandin egtoladà. Keilangan melayat se pedowan din.
2TI 2:25 Aw megtoladà sikandin te menge otaw kenà egpemenal te kagi din, keilangan mèpiya se pedowan din kandan, so doen besi aldaw ibegay te Timanem kandan amon megselsel dan aw metaga-taga dan te kebenalan.
2TI 2:26 Yan mekelowà dan lekat te belad i Satanas, so sikandin se tapay migdakep kandan, aw kandin ibeg se egtoloen dan.
2TI 3:1 Peg-aneng-aneng ka kani. Aw agpet domateng se temanan te keneyonan, medaet se kelimahan domateng te menge otaw.
2TI 3:2 Doen kwani menge otaw megkedemet, aw mengewarta, aw megpeduyun, aw megpelangkaw-langkaw. Megtompuyus dan te doma otaw, eked dan tolò te amay aw inay dan, mengako dan, aw eked dan pegsagman te Timanem.
2TI 3:3 Wedad kedakel te pedowan dan, eked dan keosayi, megbaet-baet dan, meg-inang dan te pengkey eden se ibeg dan medaet, melbala dan, aw mebensi dan te pengkey eden se mèpiya.
2TI 3:4 Megtolok dan te menge doma dan, mebolot dan, aw megpelangkaw-langkaw dan. Eked dan taking te Timanem, meneng kandan beling keluba se pemehaen dan.
2TI 3:5 Megpelingo-lingo dan menimanem, meneng eked dan pemenal te metolos se Timanem. Pegpekediyò ka diyà kandan.
2TI 3:6 Doen heman kandan egdoton te menge balay eg-ogpaan te menge bayi kenà melobos se pedowan dan diyà te Timanem. Nelegeb se menge bayi sìyan te salà aw egbeyà-beyaan dan te menge ibeg te pedowan dan medaet. Yan se doun te egkeekalan dan,
2TI 3:7 so pengkey eden se itoladà kandan, yan se pemenalen dan, meneng eked dan palos ketaga-taga te kebenalan.
2TI 3:8 Se menge meama egtoladà kandan, egpoon dan te kebenalan iling ki Janes aw si Jambres migpoon ki Moises gebii. Nebàtan se aneng-aneng dan, aw olò dan egpelingo-lingo te egpemenal dan.
2TI 3:9 Meneng dàgen dan te eked kenamay, so metaga-taga se kedita te otaw te wedad inenengen dan iling te neinang ki Janes aw si Jambres gebii.
2TI 3:10 Meneng sikona, Timoteo, netegahan no den se kedita intoladà ko, aw eg-inangen ko, aw ibeg te pedowan ko. Kinità no heman se pegsalig ko diyà te Timanem, aw pegkelayat aw pegkedakel te pedowan ko. Kinità no heman se pegtayod ko te kelimahan,
2TI 3:11 aw pegpemilang kanak, aw kelimahan ko. Netegahan no se kedita neinang kanak kedengan doton te Antyokya aw Ikonyo aw Listra, aw eden se pemilang dimateng kanak. Meneng impelowà a te Pengolo tadon lekat te kedita niyan.
2TI 3:12 Pemilangen pa se kedita te otaw migpesakop diyà ki Jesu Cristo aw melobos se pedowan dan tomolò te ibeg te Timanem.
2TI 3:13 Meneng se menge otaw eg-inang te medaet aw egpelingo-lingo te egpemenal dan, yan se otaw gayed meg-inang te labi pa medaet. Meg-akal dan te doma otaw, aw ekalan dan heman te doma otaw.
2TI 3:14 Meneng sikona, keilangan eked ka soway lekat te kebenalan intoladà kamno aw pinemenalan nikaw, so egkeseligan se otaw pig-ilingan no kenyan,
2TI 3:15 aw netegahan no te lekat te pegkebatà nikaw tinoledaan ka te kagi te Timanem insolat. Aw yan se peg-ilingan tadon, metaga-taga kidon tepad te pegpelowà te otaw lekat te salà pineokit te pegsalig diyà ki Jesu Cristo.
2TI 3:16 Lekat te Timanem se kedita te kagi impesolat din, aw doen ontong tadon kenyan te pegtoladà tadon te kebenalan, aw pegsagda tadon te medaet, aw pegtodà tadon te kolang, aw pegtoladà tadon tepad te metòlid eg-inangen.
2TI 3:17 Pineokit te kagi te Timanem, megkebiyasa se kedita tadon egtaking te Timanem aw meketagad kidon meg-inang te pengkey eden kemoloi te mèpiya inang.
2TI 4:1 Doen ipunù ko kamno aw egtengtengen ki te Timanem aw si Jesu Cristo, se meg-okom te kedita te otaw pengkey nematay aw wedà pa kematay. So netegahan tadon te lomikò si Jesus aw lomowan, seini se ipunù ko kamno.
2TI 4:2 Pegtoladà ka te kagi te Timanem. Keilangan megpeketagad ka megtoladà kenyan pengkey meibeg aw eked keibeg se menge otaw menenalan. Pegpetaga-taga ka diyà te menge otaw te kemalì dan. Pegsagda ka te otaw eg-inang te medaet. Peg-antag ka te pedowan te menge otaw kenà melobos se pedowan dan. Keilangan gayed medalem se pedowan no dalem te pegtoladà no kandan.
2TI 4:3 Yan se impunù ko kamno, so domateng se aldaw eked keibeg se menge otaw menenalan te kebenalan ipegtoladà. Meibeg dan beling tomaking te medaet ibeg dan, yan mahà dan te menge otaw megtoladà kandan te pengkey eden se ibeg dan penenelanen.
2TI 4:4 Komulu dan te kebenalan ipegtoladà kandan, meneng memenal dan beling te menge kebolalaw ingkeliwat te menge kemonaan dan.
2TI 4:5 Meneng sikona, Timoteo, keilangan gayed ka tomaking te metòlid. Keilangan megpeketagad ka tomayod te kelimahan. Pegtoladà ka te Mèpiya Indan tepad ki Jesu Cristo. Toman ka te kedita insogò te Timanem kamno.
2TI 4:6 Nayan, aneng-aneng ko, agpet den se aldaw te pegkematay ko aw meinang a iling te bino itoyong diyà te ayam-ayam sonogen aw ibegay diyà te Timanem.
2TI 4:7 Migpekeaseb a iling te otaw egkoyà. Iling a te otaw kimagnan dimateng doton te temanan, so tinoman ko den se kedita impunù te Timanem kanak. Neseligan a te pegtoladà ko te kebenalan pinemenalan tadon,
2TI 4:8 aw yan doen den ontong intagò kanak. Yan se ibegay te Pengolo tadon diyà te kedita te otaw eg-eneng-enengen din te metòlid dan aw domateng se aldaw te peg-okom din. Ontò metòlid se peg-okom din, aw kenà olò siaken se begayan din te ontong, meneng begayan din se kedita te otaw migpeliman te peglikò din.
2TI 4:9 Peg-ayas ka dini te eked kenamay.
2TI 4:10 Tinenanan a den i Demas, so ibeg din se keluba te keneyonan seini. Dimoton sikandin te Tesalonika. Kenan si Cresente, dimoton sikandin te Galasya. Kenan si Tito, dimoton sikandin te Dalmasya.
2TI 4:11 Si Lucas olò se doma ko dini. Engayi si Marcos aw petekingi sikandin aw domini ka, so meketelaban sikandin te eg-inangen ko dini.
2TI 4:12 Insogò ko si Tikico doton te Efeso.
2TI 4:13 Aw domini ka, ibingi diyà se saol ko medikemel, sìyan tinenanan ko ki Carpo doton te Troas. Ibingi heman se menge libro. Keilangan ibingen no heman dini se menge doma solat.
2TI 4:14 Ontò medaet se ininang kanak te menenayab te tebaga si Alejandro. Ipelumun sikandin te Pengolo tadon tandà te medaet ininang din.
2TI 4:15 Peg-ahà ka kandin, so ontò sikandin migpoon te pegtoladà day.
2TI 4:16 Tagnà peg-ibing kanak doton te howis, wedad palos otaw migtabang kanak, so tinenanan a te kedita te doma ko. Meneng ibeg ko eked dan pelumuni te Timanem tepad kenyan.
2TI 4:17 Pengkey timanan dan kanak, meneng migtabang se Pengolo tadon kanak, aw nemegay sikandin kanak te keseg, aw yan nekebatog a migtoladà te Mèpiya Indan tepad kandin diyà te kedita te otaw kenà Judiyo. Pengkey ibeg te menge poon ko imetayan a, meneng impelowà a te Pengolo tadon.
2TI 4:18 Pengkey eden se medaet inangen dan peden kanak, meneng ipelowà a din lekat kenyan aw ibingen a din doton te langit te kandin peglowan. Sikandin se iduyun te wedad temanan. Metoman iyan.
2TI 4:19 Indani si Priscila, aw si Akilas, aw pamilya i Onesiforo te eg-aneng-aneng a kandan.
2TI 4:20 Mig-ogpà pa si Erasto doton te Korinto. Impeogpà ko si Trofimo doton te Mileto, so nesekitan sikandin.
2TI 4:21 Ayas ka dini te eked pa dateng se pengodan. Minikagi si Eubulo, si Pudente, si Lino, aw si Claudia te eg-aneng-aneng dan kenyo, aw yan heman se kagi te menge doma otaw egpemenal.
2TI 4:22 Pengolo tadon se gayed meg-ipat kamno. Ibeg ko tebangan te Timanem se kedita niyo.
TIT 1:1 Siak si Pablo se simolat kani. Sineligan a te Timanem aw sogounun a i Jesu Cristo. Insogò a din megtabang te menge otaw pinemallì te Timanem amon metibok se pegsalig dan kandin aw pegketaga-taga dan te kebenalan pinemenalan tadon.
TIT 1:2 Insogò a amon ipetaga-taga ko kandan te doen egpelimanan tadon, sìyan kaling pedowan wedad temanan impakang te Timanem gebii. Kenà egkebolalaw se Timanem,
TIT 1:3 aw yan pegdateng te aldaw pinemallì din, impetaga-taga din iyan pineokit te kagi din. Yan se kebenalan insalig din kanak aw ipegtoladà ko, so insogò a te Timanem egpelowà kenitadon lekat te salà.
TIT 1:4 Seini se solat ko kamno, Tito. Iling ka te ontò batà ko, so nemenal ka te Pengolo tadon iling te pegpemenal ko kandin. Ibeg ko, tebangan ka aw begayan ka te kelinaw te pedowan lekat te Timanem Amay aw lekat ki Jesu Cristo egpelowà kenitadon.
TIT 1:5 Kedengan, tinenanan ta doton te polò te Kreta amon ipengahen no se sìyan wedà ta kepenga doton, aw amon pemellien no se menge otaw inangen egpengibing te simbahan doton te teg sebad-sebad lonsod kidoen. Ikà egkelibel te impunù ko kamno,
TIT 1:6 te keilangan pemellien no olò se otaw wedad palos isila kandin. Keilangan sebad olò se esawa din aw kenà eglakad. Keilangan egpemenal heman se menge batà din aw wedad dengeg dan te egtaking dan te keluba te keneyonan. Keilangan egtolò dan te ipegpunù kandan.
TIT 1:7 So egseligan sikandin te Timanem mengibing te menge otaw egpemenal, keilangan wedad palos isila kandin. Eked kepakay se otaw egpelangkaw-langkaw, aw mebabaw se pedowan din, aw metiinem, aw egbolaw, aw egpengewarta.
TIT 1:8 Keilangan egsagman sikandin te menge doma otaw, aw egkeibeg megtabang kandan. Keilangan mèpiya se but din, aw metòlid se eg-inangen din egkelubahan te Timanem. Keilangan egpeketameng sikandin te ibeg te pedowan din.
TIT 1:9 Aw megtoladà sikandin, eked kepakay aw somoway lekat te kebenalan ipegtoladà tadon. Aw keseligan se pegtoladà din te ontò kebenalan, ketebangan se menge otaw menenalan te itoladà din, aw ipetaga-taga din heman se kemalì te menge otaw egpoon te kebenalan.
TIT 1:10 Yan se kagi ko kamno so medita se otaw kenà egpenenalan te kebenalan. Eg-akal dan te menge doma otaw pineokit te ipegtoladà dan wedad ontong. Judiyo se keditaan dan egtoladà te keilangan tomolò se kedita te otaw nemenal ki Cristo te menge punù ingkeliwat i Moises.
TIT 1:11 Meneng keilangan segdahen no se pegtoladà dan, so medita se pamilya egsemoken dan pineokit te pegtoladà dan te eked kepakay itoladà. Meneng yan se ipegtoladà dan amon mengewarta dan.
TIT 1:12 Doen sebad doma dan nedengeg lekat te Kreta minikagi kani, “Gayed egkebolalaw aw medaet se menge otaw dini te Kreta. Tekahen dan aw legoken.”
TIT 1:13 Ontò benal se inikagi din sìyan, aw yan se doun te keilangan ontò ka megsagda kandan amon megketòlid se pegpemenal dan te kebenalan.
TIT 1:14 Keilangan tomanan dan te pegpenenalan dan diyà te kenà benal indan-indan te Judiyo gebii. Keilangan tomanan dan heman te pegtaking dan te menge punù te otaw timanan te kebenalan.
TIT 1:15 Aw lininisan te Timanem se otaw lekat te salà, wedad melipà diyà kandin. Meneng wedad palos melinis diyà te otaw doen pa salà aw wedà pemenal, so medaet se aneng-aneng dan, aw kenà dan egketaga-taga aw eden se mèpiya aw eden se medaet.
TIT 1:16 Pengkey eg-ikagi dan te egtaking dan te Timanem, meneng pineokit te eg-inangen dan, ipegpetaga-taga dan te kenà benal se kagi dan. Eked keibeg se Timanem kandan. Kenà dan egtolò te ipegpunù kandan. Eked dan palos pekebatog se meg-inang te mèpiya.
TIT 2:1 Meneng sikona Tito, keilangan megtoladà ka te ontò kebenalan. Eked kepakay aw somoway ka lekat te benal kagi te Timanem ipegtoladà tadon.
TIT 2:2 Pegtoladà ka te menge temoay te keilangan biyasa dan memallì te metòlid inangen dan. Keilangan metinuud dan. Keilangan tikbel dan. Keilangan melobos se pegsalig dan diyà te Timanem. Keilangan dakel se pedowan dan diyà te doma otaw. Keilangan tomayod dan te kelimahan.
TIT 2:3 Iling heman kenyan se itoladà no diyà te menge lokes, te keilangan metòlid se inangen dan amon meluba se Timanem kandan. Eked kepakay aw megbaet-baet dan aw meglasing dan. Keilangan mèpiya se itoladà dan
TIT 2:4 amon meg-iling se menge kaling bayi tepad te pegkedakel te pedowan dan diyà te esawa dan aw menge batà dan.
TIT 2:5 Megtoladà dan heman te menge kaling bayi te keilangan megpetikbel dan, aw megpelobos te pedowan dan diyà te esawa dan. Keilangan megpekeaseb dan megterbaho. Keilangan tomolò dan te esawa dan. Aw iling kenyan se eg-inangen dan, wedad otaw mekesila te kagi te Timanem ipegtoladà tadon.
TIT 2:6 Iling heman kenyan se itoladà no diyà te menge kaling meama. Pegtoladà ka kandan te keilangan megpetikbel dan.
TIT 2:7 Sikona heman, pengkey eden se inangen nikaw, keilangan mèpiya iyan amon meinang ka gegonan peg-ilingan te menge doma otaw. Aw megtoladà ka, keilangan metinuud ka, aw keilangan metinònò ka.
TIT 2:8 Keilangan ontò benal se ikegiyen nikaw, sìyan eked silahi. Aw yan se inangen nikaw, meyàyà se menge poon no so wedad palos medaet ikegiyen dan tepad kenitadon.
TIT 2:9 Pegtoladà ka te menge allang te keilangan tomolò dan te punù te amo dan amon meluba dan kandan. Keilangan eked dan pegketugul.
TIT 2:10 Keilangan eked dan penakaw, meneng mèpiya se inangen dan amon ipetaga-taga dan te gayed dan egkeseligan. Aw iling kenyan se kedita te eg-inangen dan, metaga-taga se menge doma otaw te mèpiya se ipegtoladà tadon tepad te Timanem egpelowà kenitadon.
TIT 2:11 Impetaga-taga den te Timanem se tabang din mekepelowà te kedita te otaw lekat te salà.
TIT 2:12 Pineokit te tabang din, netegahan tadon te keilangan lomengà kidon meg-inang te eked keibegi te Timanem. Keilangan lomengà kidon tomaking te medaet ibeg te pedowan tadon dini lanto te tanà, so keilangan megpekebatol kidon, aw metòlid se inangen tadon, aw tomaking kidon te ibeg te Timanem dalem te peg-ogpà tadon dini lanto te tanà.
TIT 2:13 Keilangan inangen tadon iyan dalem te pegtagad tadon te mèpiya aldaw aw kitaen tadon se kelangkaw te Timanem egpelowà kenitadon, si Jesu Cristo egpelimanan tadon.
TIT 2:14 Sikandin se simelilin kenitadon te pegkematay din amon megpelowà kenitadon lekat te pegkeallang tadon te salà, aw amon sekopen kidon din. Yan se doun te lininisan kidon din lekat te salà, aw ininang kidon din otaw meibeg meg-inang te mèpiya.
TIT 2:15 Se kedita te insolat ko seini, yan se keilangan itoladà no diyà te menge otaw doton. Pegpunù ka kandan aw pegsagda ka kandan pineokit te kelangkaw imbegay te Timanem kamno. Eked kepakay aw lindoan ka te doma otaw.
TIT 3:1 Pegtoladà ka te menge otaw doton kamno te keilangan tomolò dan te menge opisyal te gobirno. Keilangan tomolò dan te menge punù te gobirno. Keilangan meagka se pedowan dan megtelaban te kedita te mèpiya inang.
TIT 3:2 Pegtoladà ka kandan te eked dan peglibag, aw eked dan pegdindil. Meneng keilangan mèpiya se pedowan dan diyà te kedita te otaw, aw megsagman dan kandan,
TIT 3:3 so sikitadon egpemenal, wedad heman inenengen tadon kedengan, aw metugul kidon, aw wedà kidon taking te ibeg te Timanem. Neallang kidon te mededaet ibeg te pedowan tadon aw menge kelubahan medaet. Gayed kidon eg-aneng-aneng tepad te medaet inangen tadon diyà te doma otaw, aw gayed kidon eg-ingà. Nebensihan kidon te doma otaw aw nebensi kidon heman kandan.
TIT 3:4 Meneng pegpetaga-taga te Timanem egpelowà kenitadon te keido din aw kedakel te pedowan din kenitadon,
TIT 3:5 impelowà kidon din lekat te salà. Impelowà kidon din kenà tandà te peg-inang tadon te metòlid, meneng tandà te keido din kenitadon. Impelowà kidon din lekat te salà pineokit te peg-onaw din kenitadon, aw yan se todà tadon pegtebaw te pegpemegay te Espiritu Santo kenitadon te kaling pedowan.
TIT 3:6 Ontò dakel se tabang te Timanem kenitadon, so insogò din se Espiritu Santo megbayà-bayà kenitadon tandà te ininang i Jesu Cristo egpelowà kenitadon.
TIT 3:7 Yan se ininang din amon pineokit te keido din, meg-aneng-aneng se Timanem te metòlid kidon, aw amon metoman kidon begayan te kaling pedowan egpelimanan tadon.
TIT 3:8 Ontò benal se insolat ko kamno seini. Ibeg ko, ontò ka megtoladà te kedita te sìyan insolat ko kamno, amon ontò measeb se kedita te otaw nemenal te Timanem meg-inang te mèpiya, so mèpiya iyan peg-ilingan aw doen ontong te otaw tomolò kenyan.
TIT 3:9 Meneng ikà eg-inabut te balaw wedad ontong, aw menge indan-indan tepad te menge monà otaw. Ikà eg-inabut te menge dindil te otaw egbolaw tepad te menge punù ingkeliwat i Moises, so wedad ontong tadon kenyan.
TIT 3:10 Aw doen otaw doton kenyo egsamok te doma din otaw egpemenal, pegsagda ka kandin. Aw eked sikandin tolò, todà ka pegsagda kandin. Meneng aw eked pa sikandin tolò, ikà egdoma kandin meneng pebeyai sikandin.
TIT 3:11 Ketegahan no te simoway se otaw iling kenyan lekat te kebenalan, so ipetaga-taga din iyan pineokit te peg-inang din te salà.
TIT 3:12 Isogò ko si Artemas aw kenà si Tikico domoton kamno. Penga niyan, penamal ka se lomagbak kanak doton te Nicopolis, so ibeg ko meg-ogpà a doton dalem te pengodan.
TIT 3:13 Peg-inang ka te mebatog no itabang diyà te abogado si Sinos aw si Apolos amon mekesayo dan lekat kidoen. Begayi se kelidoan dan amon eked dan pegkolang.
TIT 3:14 Mèpiya aw meg-iling se menge kedowa tadon doton te keilangan megpekeaseb dan meg-inang te mèpiya, aw megtabang dan te doma otaw ontò nelimahan, amon doen ontong te pegtaking dan te Timanem.
TIT 3:15 Ibeg te kedita te doma ko dini, metaga-taga kaw te eg-aneng-aneng dan kamno. Indani se kedita te sigalak tadon egpemenal doton kamno te eg-aneng-aneng kay kandan. Ibeg ko tebangan te Timanem se kedita niyo.
PHM 1:1 Seini se solat day kamno, Filemon, sigalak day egtabang kenami. Se solat seini lekat kanak, si Pablo, kineleboso pa tandà te pegtaking ko ki Jesu Cristo, aw lekat heman te kedowa tadon te pegpemenal si Timoteo.
PHM 1:2 Simolat kay kamno, aw esawa no si Apia etebay tadon te pegpemenal, aw batà no si Arkipo doma tadon egtolò te Pengolo iling te sondalo. Simolat kay heman te kedita te otaw egpemenal aw egsimba doton te balay nikaw.
PHM 1:3 Ibeg ko, tebangan kaw aw begayan kaw te kelinaw te pedowan lekat te Amay tadon Timanem aw lekat te Pengolo tadon si Jesu Cristo.
PHM 1:4 Kedowa ko, Filemon, gayed a egpesiontong diyà te Timanem tepad kamno te kelikit te pegtawal-tawal ko,
PHM 1:5 so dinineg ko tepad te kedakel te pedowan no te kedita te sakop te Timanem, aw tepad te pegsalig no diyà te Pengolo tadon si Jesus.
PHM 1:6 Egtawal-tawal a te pineokit te pegsebad tadon te pegpemenal, kedogangan se ketaga-taga no tepad te kedita te kèpiya imbegay i Cristo kenitadon tandà te pegpesakop tadon diyà kandin.
PHM 1:7 Ontò neluba se pedowan ko tandà te kedakel te pedowan no te menge doma otaw. Neantag se pedowan ko, so pineokit kamno neluba se kedita te otaw migpesakop diyà te Timanem.
PHM 1:8 Doun niyan, doen ibeg ko kamno. So insogò a i Cristo, mepakay aw somogò a kamno meg-inang te metòlid.
PHM 1:9 Meneng so dakel se pedowan ko kamno, eked a sogò kamno. Pengkey siaken, si Pablo, se sebad sogounun i Jesu Cristo, aw pengkey nekeleboso a songkani tandà te pegtaking ko kandin, meneng memoyò a olò diyà kamno.
PHM 1:10 Doen pemoyoen ko diyà kamno tepad ki Onesimo. So nemenal den sikandin ki Cristo, iling den sikandin te ontò batà ko, so pineokit kanak nemenal sikandin dini te keleboso.
PHM 1:11 Kedengan wedad nael ontong no kandin, meneng songkani doen dakel ontong ta kandin.
PHM 1:12 Ipeolì ko den sikandin doton kamno pengkey ontò dakel se pedowan ko kandin.
PHM 1:13 Ibeg ko, temengan ko peden sikandin amon meketabang ka kanak pineokit kandin dalem te dini a pa te keleboso tandà te pegtoladà ko te Mèpiya Indan tepad ki Cristo.
PHM 1:14 Meneng eked ko sikandin temengi, so eked a keibeg aw meleges se tabang no kanak. Labi pa mèpiya aw lekat iyan te keagka te pedowan nikaw. Yan eked ko tomani se ontò ibeg ko singed aw mepakay iyan diyà kamno.
PHM 1:15 Lekat besi te ibeg te Timanem se pegkesayo i Onesimo lekat kamno te wedà kenamay amon todà no meabat te wedad temanan.
PHM 1:16 Lekat seini kenà den sikandin olò allang no, meneng labi den sikandin meelagà diyà te allang, so kedowa no den sikandin tandà te pegpemenal din ki Cristo. Ontò sikandin meelagà kanak, meneng labi pa meelagà kamno, kenà olò so allang no sikandin, meneng meelagà so kedowa no den sikandin tandà te pegpemenal din te Pengolo tadon.
PHM 1:17 Nayan, so siak se sigalak nikaw, liyagi sikandin iling te siak se liyagan nikaw.
PHM 1:18 Aw doen kemalì ininang din kamno, aw doen salà din kamno te kwarta, listahi iyan diyà te kanak ngadan.
PHM 1:19 Siak se simolat te kagi seini. Siaken, Pablo, se mayad kenyan. Meneng netegahan no den te dakel se ontong no kanak, so pineokit kanak neabat no se kaling pedowan wedad temanan.
PHM 1:20 Doun niyan, Elew, keidowi a bag so sakop ki te Pengolo tadon. Tomani se ibeg ko amon meluba se pedowan ko so telekedowa ki tandà te pegpemenal ta ki Cristo.
PHM 1:21 Dalem te pegsolat ko kani, netegahan ko te egkeseligan ka tomoman te pinemoyò ko kamno, aw labi pa heman dakel se inangen nikaw.
PHM 1:22 Doen pa pemoyoen ko kamno seini. Petegadi a te ibetanan doton kamno, so nemenal a te ipelowà a lekat dini tandà te pegtawal-tawal niyo diyà te Timanem tepad kanak amon mekedoton a kenyo.
PHM 1:23 Se doma ko si Epapras kineleboso heman tandà te pegtaking din ki Jesu Cristo, ibeg din metaga-taga ka te eg-aneng-aneng sikandin kamno.
PHM 1:24 Iling heman kenyan se inikagi te menge doma otaw egtelaban kanak dini, si Marcos, si Aristarco, si Demas, aw si Lucas.
PHM 1:25 Ibeg ko megtabang se Pengolo tadon si Jesu Cristo te kedita niyo.
HEB 1:1 Gebii, pineokit te menge telekeliwat te kagi te Timanem se peg-ikagi din diyà te menge kemonaan tadon Judiyo. Mekedita se peg-ikagi diyà kandan, aw medita se kinemoloan te peokit te peg-ikagi din kandan.
HEB 1:2 Meneng songkani, sebad den se ininang te Timanem, so pineokit te Batà din si Jesu Cristo se peg-ikagi din kenitadon. Pineokit heman ki Jesu Cristo se peg-inang te Timanem te keneyonan. Sikandin heman se pinemallì te Timanem amon menig-apò te kedita.
HEB 1:3 Pineokit heman kandin, ipegpekità se kelangkaw te Timanem, aw sikandin se egkitaan tadon te ketanem te Timanem. Sikandin se egbayà-bayà te kedita te neinang dini te keneyonan pineokit te kagi din metolos. Pegkepenga din te miglinis kenitadon lekat te salà, minolì sikandin doton te langit, aw minonsad sikandin kidoen te tangkil te Timanem Melangkaw amon lomowan doma din.
HEB 1:4 Pineokit kenyan, impetaga-taga te Timanem te labi pa melangkaw si Jesu Cristo diyà te kedita te anghil. Labi pa heman melangkaw se inggulal din kandin diyà te kedita te anghil.
HEB 1:5 Wedad palos anghil inikegiyan te Timanem iling te inikagi din diyà ki Cristo, “Sikona se Batà ko, aw ipetaga-taga ko den te siaken se Amay nikaw.” Si Cristo olò heman se inikegiyan te Timanem kani, “Siak se Amay din, aw sikandin se Batà ko.”
HEB 1:6 Te agpet isogò te Timanem se ontò melangkaw Batà din dini te keneyonan, minikagi heman se Timanem, “Simbahen sikandin te kedita te anghil te Timanem.”
HEB 1:7 Seini se inikagi te Timanem tepad te pegkesawol te menge anghil, “Mepakay aw inangen te Timanem se menge anghil iling te kelamag aw apoy, aw yan se ibeg din.”
HEB 1:8 Meneng kenà onawa se inikagi te Timanem tepad te Batà din, so minikagi sikandin, “Sikona Timanem se lomowan te wedad temanan. Metòlid se peglowan nikaw.
HEB 1:9 Egkeibeg ka te metòlid. Eked ka keibeg te medaet. Yan se doun te siaken Timanem nikaw se mig-inang kamno labi pa melangkaw diyà te kedita, aw nemegay a kamno te ontò keluba.”
HEB 1:10 Doen heman sebad kagi te Timanem diyà te Batà din, “Te keteboan, sikona Pengolo se mig-inang te tanà. Sikona heman se mig-inang te kedita doton te langit.
HEB 1:11 Pengkey megkewedad se kedakel niyan, meneng wedad temanan nikaw. Megketapay se tanà aw langit, iling te pepidit megkedaet.
HEB 1:12 Penga niyan, iling te peglepì te tapay saol, selilinan no se langit aw tanà. Meneng sikona se eked palos keselilini, so wedad palos temanan nikaw.”
HEB 1:13 Wedad palos anghil inikegiyan te Timanem iling te inikagi din diyà ki Cristo, “Onsad ka dini te tangkil ko lamig dàgen ko se menge poon no aw ipetolò ko dan kamno.”
HEB 1:14 Nayan, netegahan tadon den ini. Se menge anghil, yan olò se egsogò-sogoen te Timanem. Pengkey eked dan kitai te otaw, meneng ipegsogò dan te Timanem amon megtabang dan te kedita tadon ipelowà din.
HEB 2:1 So ontò melangkaw si Cristo, yan se doun te netegahan tadon den te keilangan ontò kidon menenalan te menge kebenalan intoladà kenitadon, amon eked kidon soway lekat kenyan.
HEB 2:2 Ontò keseligan se punù te Timanem ingkeliwat te menge anghil diyà ki Moises gebii. So keseligan iyan, yan se doun te impelumun se kedita te otaw limàpang kenyan, aw impelumun se otaw wedà tolò.
HEB 2:3 Yan heman se doun te labi kidon din ipelumun aw eked kidon penenalan te kagi din tepad te ontò mèpiya kelowaan lekat te salà. Pengolo tadon se tagnà migpetaga-taga te doen kelowaan lekat te salà, aw doen heman menge otaw dimineg kandin migpetaga-taga kenitadon te keseligan se kagi din sìyan.
HEB 2:4 Pineokit te menge kepelahan aw menge inang din metolos, impetaga-taga heman te Timanem te keseligan se kagi din ingkeliwat dan. Lekat te kandin ibeg, inteped din heman kandan se menge kemolò te kebiyasa ipegpemegay te Espiritu Santo.
HEB 2:5 Kenà menge anghil se pinemallì te Timanem ipelowan din diyà te kaling keneyonan te modi aldaw, aw yan se keneyonan in-indan ko den kenyo seini.
HEB 2:6 Meneng otaw beling se ipelowan din kenyan, so doen insolat diyà te kagi te Timanem gebii tepad kenyan, “E Timanem, ontò ka melangkaw diyà te otaw, meneng kepelahan so wedà kay nikaw kelibeli. Ontò ka melangkaw, meneng gayed kay nikaw eg-ipaten.
HEB 2:7 Te wedà kenamay ininang no se otaw medanà diyà te menge anghil. Gebii ininang no se otaw ontò melangkaw,
HEB 2:8 So impelowan no se otaw diyà te kedita.” So yan se insolat te impelowan te Timanem se otaw diyà te kedita, netegahan tadon te wedad palos pinolò din wedà lowani te otaw, pengkey netegahan tadon te kenà kidon eglowan diyà te kedita songkani.
HEB 2:9 Meneng netegahan tadon te timoman si Jesus limowan. Pegpekeotaw din, neinang sikandin medanà diyà te menge anghil te wedà kenamay, amon somelilin sikandin kenitadon aw matay doton te kros tandà te keido te Timanem kenitadon. Pineokit te pegkematay din, ininang sikandin te Timanem ontò melangkaw.
HEB 2:10 Timanem se miglalang te yan se inangen din, so ibeg te Timanem mig-inang te kedita domuyun kandin, ontò medita se otaw meinang menge batà din aw inangen din melangkaw doma kandin. Yan metòlid se pegpeokit din ki Jesus diyà te kelimahan amon metoman se ibeg din, so pineokit te pegkematay din, impetaga-taga te Timanem te ontò mèpiya si Jesus migtoman te pegpelowà kenitadon lekat te salà.
HEB 2:11 Timanem se Amay i Jesus eglinis lekat te salà, aw Timanem heman se Amay te kedita tadon lininisan din lekat te salà. Yan se doun te kenà sikandin egkeyàyà mikagi te sikitadon se menge kedowa din,
HEB 2:12 so minikagi sikandin, “Amà, mig-indan a tepad kamno diyà te menge kedowa ko. Iduyun ta pineokit te pegdelangan ko sipat kedita te otaw egsimba kamno.”
HEB 2:13 Minikagi heman sikandin, “Somalig a heman diyà te Timanem.” Minikagi heman, “Seini a sipat menge batà te Timanem insalig din kanak.”
HEB 2:14 Sikitadon doen lawa egkematay se menge batà te Timanem sìyan. Yan migpekeotaw heman si Jesus amon matay sikandin, so pineokit te pegkematay din, dinaeg din den se eglekatan te kemetayun si Satanas.
HEB 2:15 Nematay si Jesus amon ipelowà din se otaw gayed neallang te lamit te kemetayun.
HEB 2:16 Netegahan tadon te kenà menge anghil se tinebangan din, meneng kedita te menge bowad-bowad i Abraham se tinebangan din.
HEB 2:17 Meneng eked sikandin peketabang kenitadon singed aw meinang sikandin iling kenitadon menge kedowa din. Yan se doun te migpekeotaw sikandin aw timayod te kelimahan amon meinang sikandin telekagon tadon doton te Timanem, aw amon pegwedaden din se menge salà tadon. So dinetengan sikandin te kelimahan, yan doen den keido din kenitadon egdetengan te kelimahan. So neketayod sikandin te pegboyo i Satanas, yan meketabang den sikandin te kedita te otaw boyowen i Satanas.
HEB 3:1 Menge kedowa ko tinawal aw sinakop te Timanem, peg-aneng-aneng kaw den tepad ki Jesus pinemenalan tadon. Sikandin se insogò te Timanem dini te tanà, aw sikandin se egkagon kenitadon doton te Timanem.
HEB 3:2 Egkeseligan sikandin so gayed timolò te Timanem simogò kandin. Yan iling sikandin ki Moises gebii gayed timolò te Timanem te pegpengibing din te menge kemonaan tadon Judiyo ipolingun ko iling te balay te Timanem.
HEB 3:3 Pengkey melangkaw si Moises, meneng labi pa melangkaw si Jesus. Pengkey iduyun se balay, meneng labi pa iduyun se otaw mig-inang te balay.
HEB 3:4 Aw doen balay, doen heman otaw mig-inang te balay. Timanem se mig-inang te kedita.
HEB 3:5 Olò sineligan te Timanem si Moises. Insalig te Timanem kandin se pegpengibing te kedita te menge doma din Judiyo. Pineokit te pegtoman i Moises te sogò te Timanem kandin, netegahan tadon te metoman se ipetaga-taga te Timanem te modi aldaw.
HEB 3:6 Meneng kenà sineligan te Timanem si Jesus, so Batà din sikandin. Insalig te Timanem kandin se pegpengibing te kedita te menge sakop te Timanem. Aw gayed kidon somalig diyà te egpelimanan tadon, ipetaga-taga tadon te sakop kidon din.
HEB 3:7 Yan se doun te keilangan toloen tadon se inikagi te Espiritu Santo, “Pengkey seini aldaw, aw domineg kaw te kagi te Timanem,
HEB 3:8 ikà niyo egketugul. Ikà niyo eg-iling te menge kemonaan niyo doton te kebigtilan gebii, so impekagsen dan se olo dan, aw wedà dan tolò, aw migtandà dan te kedalem te pedowan te Timanem.”
HEB 3:9 Minikagi se Timanem, “Pengkey kinità dan se menge kepelahan ininang ko kandan dalem te kepatan se omay, meneng tinandà dan pa se kedalem te pedowan ko.
HEB 3:10 Yan se doun te neopal a kandan, aw minikagi a diyà kandan, ‘Gayed dan egsoway lekat kanak. Kenà dan egtaking te ibeg ko.’
HEB 3:11 Yan neopal a aw migpakang a, ‘Eked ko dan peogpai doma ko doton te mèpiya ogpeanan impetagad ko.’”
HEB 3:12 Yan menge kedowa ko, peg-ahà kaw amon wedad palos otaw doton kenyo medaet se pedowan aw eked tolò, aw amon wedad somoway lekat te Timanem wedad temanan.
HEB 3:13 Yan keilangan megpekegsenay kaw te kelikit te aldaw dalem pa te doen aldaw, amon wedad metugul kenyo pineokit te peg-akal kenyo meg-inang te salà,
HEB 3:14 so aw gayed kidon somalig diyà ki Cristo lekat te keteboan lamig te temanan, meinang kidon menge doma din.
HEB 3:15 Ikà niyo egkelibel te kagi te Timanem seini, “Pengkey seini aldaw, aw domineg kaw te kagi te Timanem, ikà niyo egketugul. Ikà niyo eg-iling te menge kemonaan niyo gebii, so impekagsen dan se olo dan, aw wedà dan tolò.”
HEB 3:16 Se menge otaw gebii dimineg te kagi te Timanem aw wedà tolò kandin, yan se kedita te otaw timaking ki Moises te peglowà dan lekat te Ehipto.
HEB 3:17 So gayed dan mig-inang te salà, yan neopalan dan te Timanem taman te kepatan se omay, aw nematay se kedita dan doton te kebigtilan.
HEB 3:18 Migpakang se Timanem tepad kandan, “Eked ko dan palos peogpai doma ko doton te mèpiya ogpeanan impetagad ko.” Yan se punù te Timanem tepad kandan, so wedà dan tolò kandin.
HEB 3:19 Pineokit kenyan, netegahan tadon te wedà dan pekeogpà doton, so wedà dan pemenal te kagi te Timanem.
HEB 4:1 Nayan, doen pa ketomanan te pakang te Timanem te meg-ogpà kidon doma din doton te mèpiya ogpeanan impetagad din. Yan keilangan meg-ahà kidon amon aw domateng se aldaw te peg-okom, wedad peden diyà kenitadon eked peogpai doton.
HEB 4:2 Inindanan kidon den te mèpiya indan, onawa te in-indan diyà te menge kemonaan tadon Judiyo gebii. Meneng pengkey dimineg dan kenyan, wedad ontong dan, so wedà dan pemenal kenyan.
HEB 4:3 Meneng sikitadon egpemenal se ipeogpà te Timanem doton te mèpiya ogpeanan impetagad din, so minikagi se Timanem tepad te menge kemonaan tadon gebii, “Yan neopal a aw migpunù a, ‘Eked ko dan peogpai doma ko doton te mèpiya ogpeanan impetagad ko.’” Doen ogpeanan tapay impetagad din, so impetagad din iyan lekat te ketebò te keneyonan.
HEB 4:4 Doen insolat diyà te kagi te Timanem gebii tepad te ikepito aldaw, “Mig-ogpà se Timanem te ikepito te aldaw, so nepenga den se kedita te ininang din.”
HEB 4:5 Meneng minikagi se Timanem tepad te menge kemonaan tadon wedà tolò kandin, “Eked ko dan peogpai doma ko doton te mèpiya ogpeanan impetagad ko.”
HEB 4:6 Pengkey dimineg dan te mèpiya indan, meneng wedà dan peogpai te Timanem doma din, so wedà dan pemenal kandin. Yan doen pa menge doma otaw ipeogpà din doma din.
HEB 4:7 Netegahan tadon te benal iyan, so pengkey medita se omay minokit, pineokit te insolat i David, impetaga-taga te Timanem te doen doma aldaw, pengkey seini, te ipeogpà din se menge otaw doma din. Yan se kedegdagan te kagi din tapay ko sinoblod, “Pengkey seini aldaw, aw domineg kaw te kagi te Timanem, ikà niyo egketugul.”
HEB 4:8 Gebii te pegpengibing i Josue te menge kemonaan tadon, kenà ogpeanan impetagad te Timanem se dinotonan dan, so penga niyan minikagi se Timanem te doen pa doma aldaw te ipeogpà din se menge otaw doma din.
HEB 4:9 Yan se doun te netegahan tadon te doen pa mèpiya ogpeanan impetagad te Timanem te kedita tadon menge sakop din ogpaan tadon, iling te peg-ogpà din gebii te ikepito te aldaw.
HEB 4:10 Aw meg-ogpà kidon doma din, nepenga den se eg-inangen tadon, iling te peg-ogpà te Timanem penga te peg-inang din te keneyonan.
HEB 4:11 Yan, so doen mèpiya ogpeanan impetagad te Timanem kenitadon, keilangan megpekagsen kidon amon ipeogpà kidon din doma din doton te mèpiya ogpeanan sìyan impetagad din. Keilangan eked kidon peg-iling te menge kemonaan tadon sìyan, so wedà dan tolò aw yan wedà din dan peogpai doton.
HEB 4:12 Ontò metolos se kagi te Timanem aw egpekebegay te kaling pedowan. Labi pa megalang se kagi te Timanem diyà te sondang mekesipal te luluwadun aw ogat, so mekeapet se kagi te Timanem doton te temanan te pedowan aw aneng-aneng te otaw. Pineokit kenyan, ipetaga-taga aw eden se egkeeneng-enengan tadon aw egkeibegan te pedowan tadon.
HEB 4:13 Wedad palos mekeeles diyà te Timanem, so egkitaen din se kedita, aw sikandin se meg-okom te kenitadon eg-inangen.
HEB 4:14 Nayan, keilangan lobosen tadon se pegsalig tadon diyà ki Jesus pinemenalan tadon. Doen melangkaw Telekagon tadon dimoton den diatas te langit eg-ogpaan te Timanem, aw yan se Batà te Timanem si Jesus.
HEB 4:15 Netaga-taga se Telekagon tadon te kelomayan tadon aw ontò egkeido kenitadon, so pengkey eden kemoloi se ipegboyo i Satanas kenitadon, yan heman se tineyodan din, meneng wedà sikandin peg-inang te salà.
HEB 4:16 So doen Telekagon tadon, yan se doun te eked kidon sagkà te peg-apot tadon diyà te Timanem gayed egpenabang, amon keidowan kidon din, aw amon tebangan kidon din aw doen kelimahan tadon.
HEB 5:1 Aw pemellien te menge Judiyo se otaw meinang telekagon dan diyà te Timanem, sikandin se seligan te menge doma otaw amon megkagon kandan diyà te Timanem. Sikandin se egkinawà te menge ibowang dan diyà te Timanem. Sikandin heman se egbegayan dan te ayam-ayam imetayan tandà te salà ininang dan.
HEB 5:2 So otaw heman sikandin egpekesalà, yan doen heman keido din diyà te menge doma otaw egpekesalà aw egsoway lekat te ibeg te Timanem.
HEB 5:3 So egpekesalà heman sikandin, yan keilangan doen ayam-ayam imetayan din tandà te kandin salà, iling te pegpengimatay din te ayam-ayam tandà te salà te menge doma otaw.
HEB 5:4 Eked kepakay aw megpepallì se otaw te kandin pegkeotawun amon meinang sikandin telekagon te Judiyo, so keilangan Timanem se tomawal te otaw meinang telekagon te Judiyo. Iling kenyan se pegpemallì te Timanem ki Aaron gebii.
HEB 5:5 Iling heman kenyan si Cristo, so wedà sikandin pegpepallì te kandin pegkeotawun amon meinang sikandin Telekagon tadon. Ininang si Cristo melangkaw te peg-ikagi te Timanem diyà kandin, “Sikona se Batà ko, aw siaken se Amay nikaw.”
HEB 5:6 Minikagi heman se Timanem diyà kandin, “Inangen ko sikona Telekagon te wedad temanan, iling te pegkagon i Melkisedec gebii.”
HEB 5:7 Pegtawal-tawal i Jesus diyà te Amay din dalem te peg-ogpà din dini lanto te tanà, seletà migpegais sikandin aw migkelag, so mekebatog se Timanem megpelowà kandin lekat te kemetayun. So ibeg i Jesus tomolò, yan se doun te nenenalan se Timanem kandin.
HEB 5:8 Pengkey Batà te Timanem si Jesus, meneng mig-iling sikandin timolò te ibeg te Amay din pineokit te pegtayod din te kelimahan dimateng kandin.
HEB 5:9 Pineokit te pegtayod din te kedita niyan, impetaga-taga din te ontò sikandin timolò, aw yan neinang sikandin Egpelowà te kedita te otaw tomolò kandin, amon begayan din dan te kaling pedowan wedad temanan.
HEB 5:10 Neinang sikandin Egpelowà, so ginulal sikandin te Timanem Telekagon tadon, iling te pegkagon i Melkisedec gebii.
HEB 5:11 Nayan, doen pa dakel isolat ko peden kenyo tepad te pegkagon i Melkisedec aw si Jesus, meneng melima se pegpetaga-taga ko kenyo tepad kenyan so wedad den nael ibeg niyo menenalan.
HEB 5:12 So nenamay kaw den migpesakop diyà ki Cristo, yan biyasa kaw den peden megtoladà te doma otaw. Meneng sikiyo se keilangan todà toledaan te tagnà intoladà kenyo lekat te kagi te Timanem. Iling kaw te batà olò egsoso aw eked pa pekekaen te pengelapen.
HEB 5:13 Iling te batà egsoso se otaw wedà pa peg-iling te keilangan meg-inang dan te metòlid.
HEB 5:14 Meneng mekekaen se otaw metesan te pengelapen. Metesan den se otaw ontò den biyasa egtaking te mèpiya aw egkulu te medaet.
HEB 6:1 Yan botong den se kenamay te peg-iling tadon te menge kebenalan onà intoladà diyà kenitadon tepad te pegpemenal tadon ki Cristo, so keilangan meg-iling kidon den te menge kebenalan labi pa medalem. Eked den kepakay aw gayed tadon sobloden se menge kebenalan tapay pig-ilingan tadon tepad te peglengà tadon te inang wedad ontong, aw tepad te pegsalig tadon diyà te Timanem.
HEB 6:2 Ikà niyo eg-anggà-anggà te pegsoblod niyo te kebenalan tepad te pegpebonyag tadon, aw tepad te pegkinawà tadon te Espiritu Santo, aw tepad te peg-antay te Timanem kenitadon lekat te nematay te modi aldaw, aw tepad te peg-okom din aw eden se detengan te otaw te wedad temanan.
HEB 6:3 Yan mèpiya aw megpedeleg kidon den meg-iling te doma kebenalan labi pa medalem, aw yan se inangen tadon den seini aw mepakay diyà te Timanem.
HEB 6:4 Mèpiya aw megpedeleg kidon amon eked kidon peketinàyog te Timanem, so aw tominàyog se menge otaw te Timanem tapay nenedaman dan, eked dan todà pekeselsel. Pengkey tapay dan netaga-taga te kebenalan, pengkey doen imbowang te Timanem kandan aw doen heman ininang te Espiritu Santo kandan, pengkey netaga-taga dan te mèpiya se kagi lekat te Timanem, aw kinità dan se menge kepelahan iling te meinang te modi aldaw, meneng aw tominàyog dan te Timanem tapay nenedaman dan, eked dan todà pekeselsel. Eked dan iyan kebatog so nekeiling dan te menge otaw miglansang te Batà te Timanem doton te kros, aw egyèyaen dan sikandin diyà te menge doma otaw.
HEB 6:7 Ipolingun ko se kedita te otaw iling te pawà gayed eg-odanan. Mèpiya se pawà egtoboan te menge tinanem, so doen kekemowan te otaw menanem kidoen. Aw iling kenyan se otaw, begayan dan te Timanem te ontong.
HEB 6:8 Meneng medaet se pawà egtoboan olò te benganga aw menge doma kemolò te sagbet, so wedad kekemowan niyan. Aw iling kenyan se otaw, agpet dan detengan te pelumun te Timanem.
HEB 6:9 Menge kedowa ko egkedekelan ko te pedowan, pengkey yan se kagi ko kenyo, meneng netegahan ko den te labi pa mèpiya se domateng kenyo tandà te pegpelowà te Timanem kenyo lekat te salà.
HEB 6:10 Ontò metòlid se peg-okom te Timanem, aw yan eked din kelibeli se mèpiya ininang niyo tandà te kedakel te pedowan niyo kandin, so migtabang kaw te menge doma sakop te Timanem, aw yan heman se eg-inangen niyo lamig songkani.
HEB 6:11 Ibeg day, measeb kaw meg-iling te mèpiya lamig te aldaw te peglikò te Pengolo tadon aw metoman se kedita te mèpiya pinelimanan tadon.
HEB 6:12 Ibeg day, eked kaw pegkelomay te pegpemenal. Meneng keilangan meg-iling kaw te menge otaw gayed egsalig diyà te Timanem aw medalem se pedowan dan lamig te pegkinawà dan te impakang din kandan.
HEB 6:13 Nayan, peg-aneng-aneng kaw den tepad ki Abraham. Gebii te pegpakang te Timanem kandin, ibeg din metaga-taga si Abraham te metoman se pakang din sìyan, aw yan se doun te impesipat din se kandin ngadan diyà te pakang din, so wedad palos ngadan labi pa melangkaw diyà te kandin ngadan.
HEB 6:14 Minikagi sikandin diyà ki Abraham, “Megpakang a kamno te mèpiya se ibegay ko kamno, so doen batà nikaw tomebaw, aw inangen ko sikona kemonaan te ontò medita otaw.”
HEB 6:15 Penga niyan, medalem se pedowan i Abraham lamig te pegkinawà din te impakang te Timanem kandin.
HEB 6:16 Aw meibeg se otaw megpetaga-taga te metoman se pakang dan, ipesipat dan diyà te pakang se ngadan te otaw labi pa melangkaw diyà kandan. Aw iling kenyan se inangen te otaw osayan, memenal se menge doma otaw te benal se pakang din.
HEB 6:17 Iling heman kenyan se ininang te Timanem. So ibeg din metaga-taga se kedita te otaw kominawà te pakang din te eked din palos todai se tod din, yan se doun te impesipat din se kandin ngadan diyà te pakang din.
HEB 6:18 Yan dowa se ininang din. Migpakang sikandin, aw impesipat din se kandin ngadan diyà te pakang din. Pineokit te didowa sìyan, netegahan tadon te eked palos ketodà se pakang din, aw eked palos heman sikandin pegkebolalaw. Yan se doun te megkagsen se pedowan te kedita tadon migpesakop diyà kandin, aw melobos se pegpeliman tadon te impakang din.
HEB 6:19 So metoman se egpelimanan tadon, wedad den lamit te pedowan tadon. Iling si Jesus te telekagon te Judiyo minokit te kayad diyà te tengà-tengà te simbahan, so nekeonà den si Jesus doton te langit aw egkagon den sikandin kenitadon doton te Timanem. Metoman kidon kominawà te impakang din, so ininang si Jesus Telekagon tadon te wedad temanan, iling te pegkagon i Melkisedec gebii.
HEB 7:1 Si Melkisedec se selotan doton te lonsod te Salem, aw sikandin se telekagon te menge otaw egsimba te Timanem ontò melangkaw. Peg-olì i Abraham lekat te pegdaeg din te menge selotan migpoon kandin, simongon si Melkisedec kandin aw migtawal-tawal sikandin tepad ki Abraham amon begayan sikandin te Timanem te mèpiya.
HEB 7:2 Si Melkisedec heman se binegayan i Abraham te ikesempolò ketengà te kedita neabat din. Se kedegdagan te ngadan i Melkisedec, yan se kagi metòlid. Yan tewalen sikandin “Selotan Eglowan te Metòlid.” Doen heman kedegdagan te kagi Salem, yan se kagi kelinaw. Yan tewalen heman sikandin “Selotan te Kelinaw.”
HEB 7:3 Kidoen te kagi te Timanem insolat, wedà solati aw sinu se amay aw inay din. Wedà tadon heman ketegahi aw sinu se menge kemonaan din. Wedad heman insolat tepad te pegtebaw din aw tepad te pegkematay din. So iling te wedad netegahan tadon tepad te linekatan din aw detengan din, yan iling sikandin te Batà te Timanem wedad temanan te pegkagon din.
HEB 7:4 Yan netegahan tadon te ontò melangkaw si Melkisedec, so sikandin se binegayan te kemonaan tadon si Abraham te ikesempolò ketengà te kedita neabat din lekat te menge otaw dinaeg din.
HEB 7:5 Nayan, doen punù te Timanem insolat te keilangan memegay se kedita te Judiyo te ikesempolò ketengà te gamad diyà te menge kedowa dan bowad-bowad i Levi ininang telekagon, pengkey bowad-bowad heman i Abraham se menge bowad-bowad i Levi sipat te kedita te doma dan Judiyo.
HEB 7:6 Meneng labi pa melangkaw si Melkisedec diyà te menge telekagon te Judiyo, so pengkey kenà bowad-bowad i Levi si Melkisedec, meneng sikandin se binegayan i Abraham te ikesempolò ketengà te neabat din. Labi pa heman melangkaw si Melkisedec diyà ki Abraham, so sikandin se migtawal-tawal tepad ki Abraham tapay pinekangan te Timanem,
HEB 7:7 so se otaw megtawal-tawal tepad te doma, yan se labi pa melangkaw diyà te otaw tewal-tewalan din.
HEB 7:8 Nayan, se menge telekagon te Judiyo egbegayan te ikesempolò ketengà, olò dan otaw egkematay. Meneng labi pa melangkaw si Melkisedec se binegayan i Abraham te ikesempolò ketengà. So wedad indan tepad te pegkematay din, iling te wedad temanan te pegkagon din.
HEB 7:9 Pengkey egbegayan se menge bowad-bowad i Levi te ikesempolò ketengà so telekagon dan te Judiyo, meneng labi pa melangkaw si Melkisedec diyà kandan. Pegsongon din ki Abraham te pegpemegay i Abraham kandin te ikesempolò ketengà, iling te nemegay heman si Levi diyà kandin, so si Levi se bowad-bowad i Abraham.
HEB 7:11 Nayan, gebii, ininang telekagon se menge bowad-bowad i Levi, aw si Aaron se tagnà telekagon dan. Pengkey timolò dan te menge punù ingkeliwat i Moises, meneng wedà peg-aneng-aneng se Timanem te metòlid dan pineokit te eg-inangen dan, aw yan se doun te keilangan isogò te Timanem se sebad kemolò Telekagon tadon iling te pegkagon i Melkisedec.
HEB 7:12 Pegselilin te Timanem te pegkagon te Judiyo, keilangan selilinan din heman se menge tapay punù.
HEB 7:13 Netegahan tadon te sinelilinan iyan, so se Pengolo tadon si Cristo, kenà sikandin sakop te pongan i Levi, meneng sakop sikandin te pongan i Juda. Wedad palos bowad-bowad i Juda neinang telekagon te Judiyo, so wedà pegtoladà si Moises te mepakay aw meinang telekagon se sakop te pongan i Juda.
HEB 7:15 Ontò den mebangal te sinelilinan se pegkagon te menge bowad-bowad i Levi, so doen den kaling Telekagon tadon iling ki Melkisedec.
HEB 7:16 Ininang Telekagon tadon si Cristo kenà pineokit te punù tepad te pongan te kemonaan din, meneng ininang sikandin Telekagon tadon so doen pedowan din metolos wedad temanan.
HEB 7:17 So doen kagi te Timanem insolat tepad kandin, “Inangen ko sikona Telekagon te wedad temanan, iling te pegkagon i Melkisedec gebii.”
HEB 7:18 Pineokit kenyan, netegahan tadon te sinelilinan den te Timanem se menge tapay punù ingkeliwat i Moises. Wedad den ontong kenyan,
HEB 7:19 so pengkey timaking kidon kenyan, wedà peg-aneng-aneng se Timanem te metòlid kidon. Meneng doen den egpelimanan tadon labi pa mèpiya kenyan, so pineokit te Telekagon tadon, mepakay aw megpedapag kidon den diyà te Timanem.
HEB 7:20 Labi pa mèpiya se pegkagon i Jesus, so doen impakang te Timanem tepad kenyan. Kedengan, pegkeinang te menge bowad-bowad i Levi telekagon te Judiyo, wedad impakang te Timanem tepad kandan.
HEB 7:21 Meneng peg-inang te Timanem ki Jesus Telekagon tadon, impesipat din se kandin ngadan diyà te pakang din kandin, so doen kagi te Timanem insolat, “Eked palos ketodà se impakang te Timanem kandin, ‘Inangen ko sikona Telekagon te wedad temanan.’”
HEB 7:22 Pineokit te pakang te Timanem sìyan, netegahan tadon te labi pa mèpiya se kaling peokit ininang te Timanem amon mekepedapag kidon diyà kandin, so si Jesus se pengilala te doen ketomanan te pakang sìyan.
HEB 7:23 Pegkagon te menge telekagon te Judiyo, keilangan medita dan, so pegketemoay te sebad aw pegkematay, doen doma simelilin kandin, aw yan gayed dan migpetondogay.
HEB 7:24 Meneng labi pa mèpiya se pegkagon i Jesus, so wedad temanan niyan, so eked den sikandin kematay.
HEB 7:25 Yan se doun te gayed sikandin mekebatog megpelowà te kedita te otaw megpedapag diyà te Timanem pineokit kandin. So wedad temanan din, gayed sikandin egpemoyò diyà te Amay din te itabang din kandan.
HEB 7:26 Yan si Jesus se Telekagon neketepad kenitadon. Ontò sikandin metòlid. Wedad palos salà din so wedad medaet ininang din. Kenà sikandin iling te otaw egpekesalà. Ininang sikandin te Timanem ontò melangkaw diyà te kedita, pengkey doton te langit.
HEB 7:27 Labi pa sikandin mèpiya diyà te menge telekagon te Judiyo, so keilangan doen ayam-ayam imetayan aw sonogen dan te kelikit te aldaw tandà te peg-inang dan te salà. Meneng wedad palos salà te Telekagon tadon. Keilangan doen heman ayam-ayam imetayan te menge telekagon te Judiyo diyà te Timanem te kelikit te aldaw tandà te pegpekesalà te kedita dan Judiyo. Meneng labi pa mèpiya se ininang te Telekagon tadon, so mekesebad olò sikandin pemegay te pegkeotawun din amon imetayan, so botong se sebad pegkematay din.
HEB 7:28 Kedengan, pineokit te menge punù ingkeliwat i Moises, eg-inangen telekagon te Judiyo se menge otaw egpekesalà. Meneng songkani, doen den pakang te Timanem nekeselilin te menge punù ingkeliwat i Moises, so ininang te Timanem se Batà din Telekagon tadon wedad salà din te wedad temanan.
HEB 8:1 Nayan, tiboken ko den se kedita te intoladà ko kenyo. Doen den Telekagon tadon ontò neketepad kenitadon iling kenyan. Sikandin se impeonsad te Timanem Melangkaw kidoen te tangkil din doton te langit, aw impelowan din heman sikandin doma din.
HEB 8:2 Sikandin se Telekagon tadon kidoen te Ontò Tambì te Timanem doton te langit, sìyan balay kenà ininang te otaw, meneng ininang te Timanem.
HEB 8:3 Se kedita te menge telekagon te Judiyo, keilangan doen bowang dan aw ayam-ayam eg-imetayan dan ibegay diyà te Timanem. Iling heman kandan se Telekagon tadon si Jesus, so keilangan doen heman ibegay din diyà te Timanem.
HEB 8:4 Doton den se Telekagon tadon te langit, so simpana dini pa sikandin te tanà, eked kepakay aw meinang sikandin telekagon te Judiyo, so nenamay den doen menge telekagon te Judiyo egpemegay diyà te Timanem iling te punù ingkeliwat i Moises gebii.
HEB 8:5 Iling olò te ininang doton te langit se eg-inangen te menge telekagon te Judiyo. Doen heman simbahan doton te langit pig-ilingan te simbahan te menge Judiyo, so te wedà pa peg-inang si Moises te balay egsimbahan dan, migpunù se Timanem diyà kandin, kagi din, “Keilangan ipeinang no iyan iling te sìyan impekità ko kamno kedengan doton diatas te bontod.”
HEB 8:6 Se eg-inangen i Cristo diyà kenitadon, yan se labi pa mèpiya diyà te ininang te menge telekagon te Judiyo. Se kaling peokit ininang i Cristo, yan se labi pa mèpiya diyà te tapay peokit, so labi pa mèpiya se impakang te Timanem tepad kenyan.
HEB 8:7 Simpana aw botong se tapay peokit, wedad keilangan te selilinan iyan te kaling peokit. Meneng kenà iyan botong, aw sinelilinan din iyan,
HEB 8:8 so wedà sikandin keluba tandà te medaet ininang te menge otaw limàpang te punù ingkeliwat i Moises. Yan minikagi se Timanem, “Doen aldaw domateng aw meg-inang a te kaling peokit amon megsebad se kedita te Judiyo diyà kanak, pengkey bowad-bowad dan i Israel aw bowad-bowad dan i Juda.
HEB 8:9 Se kaling peokit inangen ko, kenà iyan iling te tapay peokit ininang ko tepad te menge kemonaan dan gebii te pegpengibing ko kandan lekat te Ehipto. Wedà dan taking te tapay peokit, aw yan timinggetan a kandan.”
HEB 8:10 Minikagi heman se Timanem, “Iling kani se kaling peokit inangen ko te menge bowad-bowad i Israel te modi aldaw. Ipeaneng-aneng ko kandan se menge punù ko amon eked dan iyan kelibeli. Iling te isolat ko se menge punù ko kidoen te pedowan dan amon meibeg dan tomolò kenyan. Penga niyan, siaken se Timanem simbahen dan, aw sikandan se otaw ipaten ko.
HEB 8:11 Aw metoman iyan, wedad den keilangan te megtoladà se otaw te menge doma din te keilangan meg-iling dan tepad kanak, so metaga-taga se kedita te otaw tepad kanak, pengkey sagkep aw melangkaw dan.
HEB 8:12 Keidowan ko dan, aw pegwedaden ko se salà dan. Eked a palos peg-aneng-aneng tepad te salà ininang dan.”
HEB 8:13 Pineokit te peg-ikagi te Timanem te meg-inang sikandin te kaling peokit, impetaga-taga din kenitadon te sinelilinan din den se tapay peokit. So sinelilinan den se tapay, megkewedad iyan te eked kenamay, so wedad den kekemowan niyan.
HEB 9:1 Gebii te peg-inang te Timanem te tapay peokit pesalo doton kandin, doen menge punù din tepad te pegsimba te menge Judiyo, aw doen heman simbehanan dan dini lanto te tanà.
HEB 9:2 Peg-inang dan te simbahan, ininang dan se balay inetepan aw inebengan te penenaktun, aw dowa se tambì niyan. Iningedanan se sebad tambì “Tambì te Timanem,” aw yan se sinolan dan te solò aw lemisa egsolan te pan ipegpemegay diyà te Timanem.
HEB 9:3 Doen kayad diyà te lelebangan te balay sìyan, aw doen heman kayad diyà te tambì doton didalem niyan. Iningedanan se sebad tambì sìyan “Ontò Tambì te Timanem.”
HEB 9:4 Didalem niyan, doen lemisa ininang te bolawan egsonogan dan te metinadeg. Insawol dan heman kidoen se kaban linoplopan te bolawan. Se kaban sìyan, yan se pengilala te doen peokit ininang te Timanem pesalo doton kandin, aw yan se egsolan te tibod ininang te bolawan nepenò te pan iningedanan mana. Insawol heman doton didalem te kaban se bangkà i Aaron nemokad, aw sìyan didowa bato mebelad sinolatan te Timanem te menge punù impekeliwat din ki Moises.
HEB 9:5 Se saeb te kaban sìyan, yan se egwilikan te dipanog te menge ayam-ayam eg-imetayan amon pegwedaden te Timanem se menge salà te otaw. Egkelendongan iyan te pakpak te didowa ininang iling te anghil impetindeg kidoen, so yan se pengilala te kidoen se Timanem. Meneng eked a den pegpetaga-taga kenyo tepad te kedita niyan.
HEB 9:6 Pegpetagad dan te kedita niyan, gayed eg-awop se menge telekagon doton te tambì lenged te lowà te kelikit te aldaw, so eg-inangen dan se terbaho insalig diyà kandan.
HEB 9:7 Meneng sìyan sebad tambì doton didalem, olò ontò telekagon se mepakay mawop kidoen, aw mekesebad olò sikandin awop te kelikit te omay. Eked sikandin pekeawop kidoen singed aw ibingen din se dipanog te ayam-ayam ibegay din diyà te Timanem tandà te kandin salà aw tandà te menge salà neinang te kedita te doma din Judiyo.
HEB 9:8 Pineokit kenyan, impetaga-taga te Espiritu Santo kenitadon te kedengan dalem te doen pa punù tepad te balay sìyan, eked kepakay aw mawop se pengkey sinu otawi te Ontò Tambì amon megpedapag diyà te Timanem.
HEB 9:9 Iling iyan te tegdeyanan, aw doen kelebadan niyan keilangan peg-ilingan tadon seini. Pengkey pila se bowang dan aw ayam-ayam imetayan dan aw ibegay diyà te Timanem, meneng eked iyan pekeabat te salà te otaw egsimba kidoen.
HEB 9:10 Olò tepad te eg-inangen te otaw se menge punù sìyan, so doen punù tepad te pegkaen, aw peg-inem, aw peglinis te pengkey eden. Keilangan toloen iyan lamig olò te aldaw te peg-inang te Timanem te kaling peokit.
HEB 9:11 Meneng doen den kaling peokit sìyan, so dimateng den si Cristo. Ininang den sikandin Telekagon tadon. Pineokit kandin, mèpiya se tabang dimateng diyà kenitadon. Labi pa ontò mèpiya se simbahan inopan din doton te langit. Wedà iyan inangi te otaw so kenà iyan dini lanto te tanà.
HEB 9:12 Mekesebad olò sikandin awop te Ontò Tambì te Timanem doton te langit, so botong den se sebad peg-awop din. Kenà dipanog te kambing aw baka se inibing din doton, meneng kandin dipanog se imbegay din kidoen. Pineokit kenyan, impelowà kidon din lekat te salà te wedad temanan.
HEB 9:13 Aw memaed se otaw te lawa te otaw nematay, doen punù ingkeliwat i Moises te keilangan linisan sikandin. Keilangan wilikan sikandin te dipanog te kambing aw baka, aw bodbodan heman sikandin te abo te nati te baka sonogen amon melinis se lawa din.
HEB 9:14 Meneng labi pa dakel se egkebatog pineokit te dipanog i Cristo, so lininisan kidon den lekat te salà. Pineokit te tabang te Espiritu Santo wedad temanan din, nemegay sikandin te kandin lawa diyà te Timanem, aw inimetayan sikandin pengkey wedad palos salà din. So lininisan kidon den lekat te salà pineokit te dipanog i Cristo, yan wedad den keilangan te pegsalig tadon diyà te inang wedad ontong, meneng simalig kidon den diyà te Timanem wedad temanan din.
HEB 9:15 Yan si Cristo se mig-inang te kaling peokit amon mepakay kominawà se kedita tadon tinawal te Timanem te mèpiya impakang din kenitadon te wedad temanan. Mekinawà tadon se mèpiya sìyan, so pineokit te pegkematay i Cristo, impelowà kidon den lekat te salà ininang tadon dalem te pegtaking tadon te tapay peokit.
HEB 9:16 Nayan, aw doen otaw megpirma te papil tepad te pegteped te tanà din aw kedònan din penga te pegkematay din, eked iyan keteped diyà te menge otaw inlista diyà te papil pinirmahan din singed aw ipetaga-taga te benal nematay den sikandin.
HEB 9:17 Wedad kinewaen dan lamig te pegkematay din, so eked iyan ketoman singed aw matay se tig-apò kenyan.
HEB 9:18 Iling heman kenyan se tapay peokit ininang te Timanem, so wedad ontong te otaw kenyan singed aw doen dipanog te ayam-ayam imetayan dan.
HEB 9:19 Gebii, penga te pegtoladà i Moises te kedita te menge punù te Timanem diyà te menge Judiyo, inabat din se dipanog te nati te baka inimetayan din, aw sinengedan din iyan te wayeg. Penga niyan, inagem din se melalag bolbol te ayam-ayam karniro intangen din diyà te panga te kayo hisopo, aw inwilik din iyan diyà te libro sinolatan te menge punù, aw diyà heman te kedita te otaw.
HEB 9:20 Penga niyan, minikagi sikandin, “Se dipanog seini, yan se pengilala te doen den peokit pesalo doton te Timanem, aw migpunù sikandin te keilangan tomolò kidon kenyan.”
HEB 9:21 Iling heman kenyan se pegwilik din te dipanog diyà te simbahan dan sìyan aw diyà te kedita te telepagan niyan eggemiten dan te pegsimba dan doton,
HEB 9:22 so doen punù ingkeliwat i Moises te keilangan doen dipanog ilinis te keditaan te telepagan dan. Iling heman kenyan, eked pegwedadi te Timanem se salà te otaw singed aw doen imetayan amon doen dipanog ilinis.
HEB 9:23 Se simbahan te menge Judiyo aw menge telepagan niyan, yan olò se impeiling te benal simbahan doton te langit. Lininisan se simbahan dini te tanà pineokit te dipanog te ayam-ayam inwilik kenyan. Meneng kidoen te simbahan doton te langit, keilangan labi pa meelagà se dipanog ilinis kenyan.
HEB 9:24 Yan penga te pegkematay i Jesus, kenà simbahan ininang te menge Judiyo se inopan din, so olò iyan impeiling te benal simbahan doton te langit. Meneng dimoton sikandin te langit, aw egkagon den sikandin kenitadon doton te Timanem.
HEB 9:25 Se telekagon te Judiyo, yan se eg-awop te Ontò Tambì te simbahan te kelikit te omay amon mengibing te dipanog te ayam-ayam. Meneng si Cristo, mekesebad olò se pegpemegay te kandin pegkeotawun, so botong se pegkematay din.
HEB 9:26 Simpana kenà iyan botong, keilangan melikit se pegkematay din lekat te keteboan te keneyonan lamig songkani. Meneng kenà iling kenyan si Cristo, so mekesebad olò se peg-inang din songkani te wedà pa dateng se temanan te keneyonan, aw botong den iyan. Migpekeotaw sikandin amon mengabat te salà tadon pineokit te pegpemegay te kandin lawa te pegkematay din.
HEB 9:27 Keilangan mekesebad se pegkematay te kedita te otaw, aw penga niyan okomen kidon te Timanem.
HEB 9:28 Mekesebad heman se pegkematay i Cristo amon mengabat te salà te kedita tadon. Lomikò pa sikandin dini te tanà kenà amon todà mengabat te salà tadon, meneng lomikò amon mangay te kedita te otaw egpeliman kandin.
HEB 10:1 Nayan, se menge punù ingkeliwat i Moises, yan olò se pengilala te doen pa domateng labi pa mèpiya kenyan. Se kedita te mèpiya dimateng den kenitadon pineokit te ininang i Cristo, yan se neketepad aw nekeselilin te menge punù ingkeliwat i Moises. Se menge otaw timaking te menge punù ingkeliwat i Moises, keilangan gayed dan imetayan se ayam-ayam ibegay diyà te Timanem te kelikit te omay. Pengkey yan se egtekingan dan, eked peg-aneng-aneng se Timanem te metòlid dan.
HEB 10:2 Simpana lininisan dan te Timanem lekat te salà pineokit te pegpengimatay dan te ayam-ayam ipegpemegay dan diyà kandin, metaga-taga dan te pegwedaden din se salà dan, aw mepakay dan lomengà te pegpengimatay dan te ayam-ayam.
HEB 10:3 Meneng so keilangan mengimatay dan te ayam-ayam te kelikit te omay, neeneng-enengan dan te gayed doen salà dan,
HEB 10:4 so eked palos keabat se salà te otaw pineokit te pegpemegay dan te dipanog te menge baka aw kambing.
HEB 10:5 Gebii, te agpet den isogò si Cristo dini te keneyonan, minikagi sikandin diyà te Timanem, “Netegahan ko te kenà bowang aw ayam-ayam imetayan se meketepad kamno, aw yan impetagad no se lawa ko amon imetayan a.
HEB 10:6 Eked ka keluba pineokit te pegsonog te ayam-ayam aw pegpemegay te dipanog niyan amon pegwedaden se salà.
HEB 10:7 Minikagi a heman, ‘E Timanem, seini a den so meg-inang a den te ibeg nikaw, iling te insolat tepad kanak diyà te libro sinolatan te kagi nikaw.’”
HEB 10:8 Tagnà inikagi din, eked peketepad diyà te Timanem se pegpemegay te otaw te menge ayam-ayam diyà kandin tepad te menge punù ingkeliwat i Moises. Pengkey imetayan dan se ayam-ayam, pengkey sonogen dan iyan, pengkey ibegay dan se dipanog niyan diyà kandin tandà te salà ininang dan, meneng eked sikandin keluba pineokit te kedita niyan.
HEB 10:9 Minikagi heman si Cristo, “Seini a den so meg-inang a den te ibeg nikaw.” Pineokit te kagi din sìyan, netegahan tadon te sinelilinan den te Timanem se menge tapay punù tepad te pegpengimatay te ayam-ayam, aw inselilin din den se pegkematay i Cristo.
HEB 10:10 So timoman si Jesu Cristo te ibeg te Timanem, yan lininisan kidon den lekat te salà pineokit te pegpemegay din te kandin lawa te mekesebad olò imetayi, so botong se sebad pegkematay din.
HEB 10:11 Se kedita te menge telekagon te Judiyo, gayed dan egterbaho te kelikit te aldaw, so gayed dan egpengimatay te menge ayam-ayam. Meneng eked palos keabat se salà pineokit te peg-inang dan kenyan.
HEB 10:12 Meneng mekesebad olò se pegkematay i Jesu Cristo amon meabat se salà tadon, aw botong iyan te wedad temanan. Penga niyan, minonsad sikandin kidoen te tangkil te Timanem doton te langit.
HEB 10:13 Egtagad den sikandin te aldaw te pegdaeg te Timanem te poon din amon lomowan sikandin diyà te kedita.
HEB 10:14 Mekesebad olò se pegkematay i Cristo, aw pineokit kenyan, eg-aneng-aneng den se Timanem te metòlid kidon den te wedad temanan tandà te peglinis din kenitadon lekat te salà.
HEB 10:15 Doen heman ipetaga-taga te Espiritu Santo diyà kenitadon tepad kenyan, so doen kagi din insolat,
HEB 10:16 “Minikagi se Pengolo, ‘Iling kani se kaling peokit inangen ko kandan te modi aldaw. Ipeaneng-aneng ko kandan se menge punù ko amon eked dan iyan kelibeli. Iling te isolat ko se menge punù ko kidoen te pedowan dan amon meibeg dan tomolò kenyan.’”
HEB 10:17 Minikagi heman sikandin, “Eked a den palos todà peg-aneng-aneng tepad te salà dan.”
HEB 10:18 Yan wedad den keilangan te pegpengimatay tadon te ayam-ayam amon meabat se salà tadon, so pigwedad den te Timanem se kedita te salà ininang tadon.
HEB 10:19 Nayan, menge kedowa ko, so nemegay den si Jesus te dipanog din te pegkematay din kenitadon, eked kidon den sagkà te peg-awop tadon doton te Ontò Tambì te Timanem doton te langit.
HEB 10:20 Pineokit ki Cristo, doen den kaling peokit amon mekinawà tadon se kaling pedowan. Wedad den mekebelabag diyà kenitadon aw Timanem, so inabat den i Cristo se kayad diyà te tengà-tengà pineokit te pegkematay din.
HEB 10:21 Sikandin se egkagon kenitadon doton te Timanem so eglowan sikandin diyà te kedita tadon menge sakop te Timanem.
HEB 10:22 Keilangan megpedapag kidon den diyà te Timanem te doen pegkelobos te pedowan tadon somalig diyà kandin. Melinis den se pedowan tadon aw aneng-aneng tadon so iling te winilikan kidon te dipanog aw lininisan kidon te wayeg.
HEB 10:23 Keilangan megpekagsen kidon se egpeliman diyà te pakang te Timanem pinemenalan tadon, so egkeseligan sikandin aw tomanen din se kedita te impakang din.
HEB 10:24 Keilangan megpetebangay kidon amon ontò benal se pegpedekelay tadon te pedowan aw peg-inang tadon te mèpiya.
HEB 10:25 Pengkey doen menge otaw limengà te pegsimba, meneng keilangan eked kidon peg-iling kandan. Keilangan megpekegsenay kidon te pedowan amon meketayod kidon te pegpeliman. Ontò iyan keilangan songkani so netegahan tadon te lomikò se Pengolo tadon te eked kenamay.
HEB 10:26 Aw netegahan tadon den se kebenalan, meneng gayed kidon pa eg-inang te medaet, wedad den doma matay amon meabat se salà tadon.
HEB 10:27 Aw iling kenyan se inangen te otaw, detengan sikandin te ontò medaet pelumun te Timanem, so sonogen te Timanem se kedita te otaw mato kandin.
HEB 10:28 Gebii, aw doen otaw egkebensi te menge punù ingkeliwat i Moises, aw doen telo otaw aw kenà dowa otaw megsistigos te benal iyan, eked sikandin keidowi meneng tiblug imetayan.
HEB 10:29 Meneng labi pa medaet se pelumun domateng diyà te otaw megtompuyus te Batà te Timanem, so pineokit te pegtompuyus din kandin, impetaga-taga din te wedad ontong din diyà te dipanog i Cristo ilinis peden kandin, pengkey yan se pengilala te doen den kaling peokit pesalo doton te Timanem. Ipelumun sikandin so nengako sikandin te Espiritu Santo gayed egkeido.
HEB 10:30 Netegahan tadon te Timanem se minikagi kani, “Siaken se megpelumun kandan. Siaken se megmalit kandan.” Doen heman doma kagi te Timanem insolat, “Meg-okom se Timanem te menge sakop din.”
HEB 10:31 Ontò mekelelamit se pelumun domateng diyà te otaw ipelumun te Timanem wedad temanan din.
HEB 10:32 Ikà niyo egkelibel tepad te pegtebò niyo te pegpemenal kedengan. Penga te pegketaga-taga niyo te kebenalan, medita se kelimahan dimateng kenyo, meneng neketayod kaw te kedita niyan.
HEB 10:33 Seletà tinompuyus kaw aw pinemilang kaw diyà te keditaan te otaw, aw seletà egpekesipat kaw te menge doma pinemilang iling kenyan.
HEB 10:34 Neidowan niyo se doma otaw kineleboso aw migtabang kaw kandan. Pengkey linompak se kedita te kedònan niyo, meneng gayed pa neluba se pedowan niyo, so netegahan niyo te doen ontong niyo labi pa mèpiya doton te langit eked palos kelompak lekat kenyo.
HEB 10:35 Yan ikà niyo eglengà te pegsalig niyo diyà te Timanem, so aw melobos se pegsalig niyo diyà kandin, mèpiya se ontong kinewaen niyo.
HEB 10:36 Keilangan medalem se pedowan niyo amon mekebatog kaw tomoman te ibeg te Timanem, aw yan kominawà kaw te impakang din kenyo.
HEB 10:37 Doen kagi te Timanem insolat, “Domateng se Pengolo egpelimanan niyo te eked kenamay. Eked sikandin peg-alà-alà.
HEB 10:38 Se menge otaw eg-eneng-enengen ko te metòlid dan, yan se meketayod te pengkey eden se kelimahan tandà te pegsalig dan kanak. Meneng aw lomengà se otaw tomaking kanak tandà te ketalaw din, eked a keluba kandin.”
HEB 10:39 Meneng menge kedowa ko, kenà kidon iling te sìyan telawun pegbàtan te Timanem, so melobos se pegsalig tadon diyà kandin, aw yan eked kidon din pegbàti.
HEB 11:1 Nayan, aw somalig kidon diyà te Timanem, ketegahan tadon te metoman kidon mekekinawà te mèpiya egpelimanan tadon, aw ketegahan tadon heman te benal doen mèpiya wedà tadon pa kitai.
HEB 11:2 Se menge otaw gebii, yan se induyun te Timanem, so simalig dan diyà kandin.
HEB 11:3 So egsalig kidon diyà te Timanem, netegahan tadon te olò sikandin minikagi aw yan ininang din se keneyonan, aw eked kitai se ginamit din te peg-inang din te kedita egkitaen tadon.
HEB 11:4 Gebii, simalig si Abel diyà te Timanem, aw yan mèpiya se imbegay din diyà te Timanem, kenà iling te imbegay te kedowa din si Cain. Pineokit te pegsalig i Abel, mig-aneng-aneng se Timanem te metòlid sikandin. Impetaga-taga te Timanem te mig-aneng-aneng sikandin te metòlid si Abel pineokit te pegkinawà din te imbegay din. Pengkey nenamay den si Abel nematay, meneng doen pa peg-ilingan tadon diyà kandin tandà te pegsalig din diyà te Timanem.
HEB 11:5 Simalig heman si Enok diyà te Timanem gebii. Pineokit te pegsalig din, wedà sikandin kematay, so inibing sikandin te Timanem doton te langit. Penga niyan, wedà sikandin kitai dini te tanà, so inibing sikandin te Timanem. Doen kagi te Timanem insolat tepad kandin, te wedà pa sikandin ibingi doton te langit, neluba se Timanem kandin.
HEB 11:6 Eked palos keluba se Timanem pineokit te eg-inangen tadon singed aw somalig kidon diyà kandin. Aw megpedapag se otaw diyà te Timanem, keilangan memenal sikandin te doen Timanem, aw keilangan memenal heman sikandin te doen ontong ibegay te Timanem diyà te kedita te otaw mengemahà kandin.
HEB 11:7 Simalig heman si Noe diyà te Timanem gebii. Peg-ikagi te Timanem diyà kandin te doen domateng mekegelà te otaw, nemenal sikandin te Timanem pengkey wedad palos kinità din iling kenyan. Penga niyan, mig-inang sikandin te dakel sampan egtewalen arka, aw yan se sinekayan din aw sipat pamilya din. Pegkelinep te tanà te wayeg, wedà dan kelemes. Pineokit te pegsalig i Noe diyà te Timanem, impetaga-taga din te metòlid se pegpelumun te Timanem te otaw wedà pemenal kandin, aw neakop heman sikandin diyà te kedita te otaw eneng-enengen te Timanem te metòlid dan tandà te pegsalig dan diyà kandin.
HEB 11:8 Simalig heman si Abraham diyà te Timanem. Pegtawal te Timanem kandin, timolò sikandin aw nesayo lekat te lonsod inogpaan din. Pegkesayo din doton, wedà din ketegahi aw kenan se dotonan din, meneng dimoton sikandin te ogpeanan impakang te Timanem kandin.
HEB 11:9 Pegdateng din doton te tanà impakang te Timanem kandin, simalig sikandin diyà te Timanem, so migpeliman sikandin te aldaw te pegbegay te Timanem kandin te tanà sìyan. Mig-ogpà dan diyà te balay inetepan te penenaktun. Iling heman kenyan se ininang te batà din si Isaac, aw apò din si Jacob, so migpeliman dan heman te aldaw te pegketoman te pakang te Timanem.
HEB 11:10 Iling te eked kenamay se peg-ogpà i Abraham doton, so se ogpeanan ontò din pinelimanan, yan se lonsod doton te langit eked palos kealin so ininang iyan te Timanem.
HEB 11:11 Se esawa i Abraham si Sara simalig heman diyà te Timanem. Pengkey lokes den sikandin, meneng miglaman, so nemenal sikandin te egkeseligan se Timanem tomoman te impakang din.
HEB 11:12 Pengkey migketemoay si Abraham, aw iling te eked sikandin pekebatà, meneng doen batà din timebaw, aw neinang sikandin kemonaan te ontò medita otaw igsà eked dan kebilang, iling te menge bitoen doton te langit aw iling te enay doton te dagat.
HEB 11:13 Simalig se kedita te otaw sìyan diyà te Timanem, meneng nematay dan te wedà pa ketoman se impakang te Timanem. Meneng kunù wedà dan lengà te pegsalig dan diyà te Timanem, so netegahan dan te pengkey menamay pa, domateng se aldaw te metoman dan kominawà te impakang te Timanem, sìyan pinelimanan dan. Impetaga-taga dan te kenà keneyonan se ontò ogpeanan dan te wedad temanan.
HEB 11:14 Aw mikagi se otaw te kenà keneyonan se ontò ogpeanan dan, yan ontò kidon metaga-taga te doen pa doma ogpeanan dan labi pa mèpiya diyà te keneyonan seini. Iling kenyan se menge kemonaan tadon gebii.
HEB 11:15 Wedà peg-aneng-aneng si Abraham te ontò ogpeanan din se tinikedowan din, so simpana yan se aneng-aneng din, mekebatog sikandin molì doton.
HEB 11:16 Meneng wedà dan olì doton, so doen ibeg dan meg-ogpà doton te ogpeanan labi pa mèpiya, sìyan ogpeanan doton te langit. Doun niyan, wedà keyàyà se Timanem te egtewalen dan sikandin Timanem dan, aw yan impetagad din den se ogpeanan dan.
HEB 11:17 Simalig si Abraham diyà te Timanem, aw migpakang se Timanem kandin te ontò megkedita se bowad-bowad din pineokit te batà din si Isaac. Penga niyan, migtandà se Timanem te pegsalig i Abraham diyà kandin, aw insogò din sikandin mengimatay te batà din si Isaac aw sonogen, so ibegay kandin. Meneng kunù simalig pa si Abraham diyà te Timanem, so neketagad sikandin mengimatay te batà din.
HEB 11:19 Timolò sikandin, so aneng-aneng din, aw matay si Isaac, mekebatog se Timanem meg-antay kandin lekat te nematay. Iling te inantay sikandin te Timanem, so simpana wedà segdahi te Timanem si Abraham, megpedeleg sikandin te pegpengimatay din te batà din.
HEB 11:20 Simalig heman si Isaac diyà te Timanem, so minikagi sikandin diyà te batà din si Jacob aw si Esau te begayan dan te Timanem te mèpiya.
HEB 11:21 Simalig heman si Jacob diyà te Timanem, so te agpet den sikandin matay, minikagi sikandin diyà te didowa apò din batà i Jose te begayan dan te Timanem te mèpiya, aw penga niyan, timikelong sikandin diyà te bangkà din aw migsimba te Timanem.
HEB 11:22 Simalig heman si Jose diyà te Timanem, so te agpet den sikandin matay, minikagi sikandin te domateng se aldaw te mesayo se kedita te menge bowad-bowad i Israel lekat te Ehipto. Yan se doun te nemoyò heman sikandin te keilangan ibingen dan se menge tòlan te lawa din te pegkesayo dan lekat te Ehipto amon ilebeng se tòlan din doton te tanà impakang te Timanem kandan.
HEB 11:23 Simalig heman se amay aw inay i Moises diyà te Timanem, so pengkey migpunù se selotan te Ehipto te keilangan imetayan se kedita te batà meama tomebaw diyà te Judiyo, meneng wedà dan kelemitan. Pegtebaw i Moises, in-eles dan sikandin taman te telo se bolan amon eked imetayi, so kimità dan te mèpiya se bawa din.
HEB 11:24 Simalig heman si Moises diyà te Timanem, so pegketesan din, pengkey beyang-beyang sikandin doton te balay te selotan te Ehipto, tinenanan din se kedita niyan, so eked sikandin keibeg tewalen apò te selotan.
HEB 11:25 Eked sikandin keibeg tomaking te menge otaw egpengemahà te keluba pineokit te peg-inang dan te salà, so egkewedad se keluba te salà te eked kenamay. Meneng ibeg din beling makop diyà te menge sakop te Timanem amon pemilangen sikandin doma dan.
HEB 11:26 Aneng-aneng din, pengkey mèpiya aw megkeyaman sikandin doton te Ehipto, meneng labi pa mèpiya aw pemilangen sikandin tandà te pegpemenal din te tomanen te Timanem se pakang din, sìyan tinoman din pineokit te pegsogò din te Misiyas. Labi pa iyan mèpiya diyà ki Moises, so egpemenal sikandin te doen ontong ibegay te Timanem diyà kandin te modi aldaw.
HEB 11:27 Simalig sikandin diyà te Timanem, aw yan pegkesayo din lekat te Ehipto, wedà sikandin kelemitan te meopal se selotan kandin. Gayed sikandin egsalig diyà te Timanem so iling te egkitaen din se Timanem kenà egkitaen.
HEB 11:28 Simalig sikandin diyà te Timanem, aw yan migtoladà sikandin te menge Judiyo te keilangan mengimatay dan te karniro aw idamos dan se dipanog niyan diyà te lelebangan te balay dan. Yan se ininang dan so aw domateng se anghil isogò te Timanem amon mengimatay te menge penganay batà doton te Ehipto, kitaen din se dipanog indamos dan aw yan lomaklak sikandin te balay sìyan aw wedad matay kidoen.
HEB 11:29 Simalig heman se menge Judiyo diyà te Timanem, so pegtengà te Timanem te Dagat Melalag, minipanaw dan diyà te tanà nepangkag, aw yan minatas dan. Doen menge tege Ehipto mig-alaw kandan. Migtelaman dan heman minokit, meneng nelemes se kedita dan, so impeolì te Timanem se dagat kidoen kandan.
HEB 11:30 Simalig heman se menge Judiyo diyà te Timanem, so limibed dan te kotà te lonsod te Jeriko te kelikit te aldaw lamig te ikepito te aldaw, aw yan tigkan tinongan te Timanem se kotà sìyan amon dàgen dan se tege Jeriko.
HEB 11:31 Meneng doen sebad bayi kepoyun ngadan din si Rahab mig-ogpà doton te Jeriko. Pegsogò i Josue te dowa otaw migsimà doton te Jeriko, migsagman si Rahab kandan aw migtabang heman kandan. So simalig sikandin diyà te Timanem, yan wedà sikandin pekesipat te pegkegelà te doma tege Jeriko wedà tolò te Timanem.
HEB 11:32 Medita pa se ikegiyen ko peden kenyo tepad te menge otaw simalig diyà te Timanem, meneng kenà botong se aldaw amon megtoladà a kenyo tepad te menge doma otaw gebii iling ki Gideon, si Barak, si Samson, si Jepte, si David, si Samuel, aw menge doma telekeliwat te kagi te Timanem gebii.
HEB 11:33 So simalig dan diyà te Timanem, yan tinebangan din dan, aw yan doen otaw diyà kandan nekedaeg te menge selotan migpoon kandan. Doen heman diyà kandan metòlid se peglowan dan diyà te menge sakop dan. Doen heman menge doma otaw kiminawà te mèpiya impakang te Timanem kandan tandà te pegsalig dan diyà kandin. Doen heman menge doma nekedaeg te menge liyon, aw yan wedà dan kebangà.
HEB 11:34 Doen heman menge doma otaw simalig diyà te Timanem aw yan nekelowà dan lekat te dakel apoy. Doen heman nekelowà lekat te belad te otaw mengimatay peden kandan. Doen heman otaw melomay neinang magsen pineokit te pegsalig dan diyà te Timanem. Doen heman wedà pegketalaw te peg-ato dan te menge poon dan, aw yan dinaeg dan se kedita te otaw limompak diyà kandan lekat te mediyò ogpeanan.
HEB 11:35 Doen heman menge bayi simalig diyà te Timanem aw yan neantay se batà dan pengkey nematay den. Doen heman menge doma otaw simalig diyà te Timanem dinakep te otaw mebolot. Pengkey impeeleg dan lamig nematay dan, meneng wedà dan lengà te pegsalig dan diyà te Timanem, so ibeg dan entayen dan te Timanem lekat te nematay amon meg-ogpà dan doma din te wedad temanan.
HEB 11:36 Doen heman menge doma otaw simalig diyà te Timanem nebebeyatan aw binadas te doma otaw. Ginapos se menge doma te sengkalì, aw kineleboso dan.
HEB 11:37 Doen menge doma binontogan te bato lamig nematay. Ginabas se lawa te doma, aw tinigbas te sondang se doma. Nelimahan se menge doma otaw simalig diyà te Timanem so wedad penenaktun dan olò kindal te karniro aw kambing. Newedadan dan te kànen, aw nelimahan dan, aw pinemilang dan.
HEB 11:38 Impekadas dan lekat te menge lonsod inogpaan dan. Yan miglegeb dan doton te kebigtilan aw doton te menge bontod, aw mig-ogpà dan doton te menge ilib aw doton te awang te tanà. Pengkey mèpiya dan otaw, meneng wedà pekebegay se menge doma otaw kandan te keluba dini te keneyonan.
HEB 11:39 Pengkey induyun te Timanem se kedita te otaw sìyan so simalig dan diyà kandin, meneng wedà dan pa pekekinawà te impakang te Timanem,
HEB 11:40 so labi pa mèpiya se aneng-aneng te Timanem te makop kidon diyà kandan. Ibeg te Timanem eked din pa tomani se pakang din kandan singed aw mekeakop kidon heman diyà te kedita dan kominawà te mèpiya impakang din.
HEB 12:1 Nayan, ontò medita se otaw simalig diyà te Timanem gebii, aw yan impetaga-taga dan diyà kenitadon te ontò egkeseligan se Timanem. Iling te pegkoyà se pegtaking tadon te Timanem dini lanto te tanà, aw yan keilangan tomanan kidon heman te kedita mekeanggà kenitadon iling te inangen te otaw megkekoyà. Keilangan lomengà kidon heman te peg-inang tadon te salà gayed egpekeiket kenitadon. Keilangan megpekagsen kidon komagnan lamig domateng kidon doton te temanan.
HEB 12:2 Keilangan tomaking kidon ki Jesus, so sikandin se ontò tadon peg-ilingan te pegsalig tadon diyà te Timanem, aw meinang heman melobos se pegsalig tadon diyà te Timanem pineokit te tabang i Jesus. Timayod sikandin te kelimahan te peglansang kandin doton te kros. Wedà sikandin keyàyà te neinang diyà kandin, meneng timayod sikandin te peg-imatay kandin, so netegahan din te meluba sikandin aw mepenga se kedita niyan. Egpenenoo den sikandin kidoen te tangkil te Timanem Amay din aw eglowan doma din.
HEB 12:3 Ontò medaet se kelimahan tineyodan i Jesus, so pigtindaet te menge otaw nelegeb te salà. Yan peg-aneng-aneng kaw tepad kandin amon eked kaw lengà te pegtaking niyo kandin.
HEB 12:4 Pengkey mig-eked kaw meg-inang te salà, meneng wedad pa otaw inimetayan doton kenyo tandà te pegtaking niyo ki Jesus.
HEB 12:5 Iling te nelibelan niyo den se impunù te Timanem diyà te kedita niyo menge batà din, so doen kagi din insolat, “Batà ko, aw toledaan ka te Pengolo, keilangan megpesiontong ka diyà kandin. Aw ipelumun ka din, ikà egkepuluk,
HEB 12:6 so egtoledaan te Pengolo se kedita te otaw nedekelan din te pedowan, aw ipegpelumun din se kedita te otaw ininang din batà din aw meg-inang dan te medaet.”
HEB 12:7 Yan aw detengan kaw te kelimahan, keilangan tomayod kaw kenyan, so toledaan kaw te Timanem pineokit kenyan. Aw toledaan kaw din, yan se pengilala te batà kaw din, so wedad palos besi batà eked toledai te amay din.
HEB 12:8 Egtoledaan te Timanem se kedita niyo migpesakop diyà kandin. Simpana eked kaw din toledai, kenà kaw menge batà din aw kenà sikandin Amay niyo.
HEB 12:9 Egsagman kidon te menge amay tadon dini lanto te tanà pengkey migpelumun dan kenitadon. Yan keilangan labi kidon pa tomolò te Amay tadon doton diatas te langit, so aw tomolò kidon kandin, begayan kidon din te kaling pedowan wedad temanan.
HEB 12:10 Se menge amay tadon dini lanto te tanà, yan se migtoladà kenitadon te wedà kenamay tepad te eneng-enengen dan aw eden se mèpiya. Meneng se Amay tadon doton diatas te langit, yan se egtoladà kenitadon amon tebangan kidon din, aw amon meinang kidon egpenimanem.
HEB 12:11 Aw toledaan kidon te Timanem, mepuluk se pedowan tadon so melima se keokitan tadon. Meneng penga te pegtoladà din kenitadon, aw meleseb se peg-iling tadon, yan doen ontong tadon, so megkelinaw se pedowan tadon, aw megkebiyasa kidon meg-inang te metòlid.
HEB 12:12 Nayan, ikà niyo egkelomay te pegtaking niyo te Timanem. Pengkey nelimahan kaw, ikà niyo eglengà. Meneng keilangan megpekagsen kaw, aw keilangan lobosen niyo se pegsalig niyo diyà te Timanem.
HEB 12:13 Ikà niyo egsoway lekat te metòlid dalan amon eked soway se menge doma niyo wedà kelobos se pegsalig dan diyà te Timanem, meneng megkagsen dan.
HEB 12:14 Pegpekeaseb kaw te pegsebad te pedowan niyo diyà te kedita te doma otaw. Pegpekeaseb kaw heman meg-inang te metòlid, so wedad palos otaw meg-ogpà doma te Pengolo tadon singed aw metòlid dan.
HEB 12:15 Peg-ahà kaw amon wedad otaw doton kenyo komulu te tabang te Timanem. Aw komulu se otaw te tabang te Timanem, iling sikandin te sagbet mekeilo, so mekesamok sikandin te doma otaw egpemenal, aw meboyo dan meg-inang heman te salà.
HEB 12:16 Peg-ahà kaw amon wedad otaw doton kenyo meg-inabut te kenà kandin esawa, aw tominggetan heman sikandin te Timanem. Iling kenyan si Esau gebii, so pengkey sikandin se keliwatan peden te pakang te Timanem diyà te kemonaan din so sikandin se penganay batà te amay din, meneng inliwan din se pegkepenganay din diyà te kànen neamin te sebad olò pegpengaen.
HEB 12:17 Netegahan niyo besi heman te penga niyan, ibeg din megtawal-tawal se amay din diyà te Timanem amon begayan sikandin te mèpiya. Meneng wedà din iyan kebatog, so eked ketodà se ininang din pengkey ontò sikandin migkelag se migpeido-ido.
HEB 12:18 Aw megpedapag kidon diyà te Timanem, eked kidon den kelemitan iling te menge kemonaan tadon Judiyo gebii. Pegdoton dan te bontod iningedanan Sinay, kinità dan se apoy, aw kengitngit, aw labon, aw kelamag.
HEB 12:19 Dinineg dan se peg-edop te bodyong aw peg-ikagi te Timanem. Pegdineg dan te kagi din, ontò dan nelemitan aw nemoyò dan te eked sikandin ikagi diyà kandan.
HEB 12:20 Ontò dan migpeso tandà te punù din kandan, “Pengkey otaw, pengkey ayam-ayam, aw doen gomiet olò diyà te bontod sìyan, keilangan imetayan dan bontogan te bato.”
HEB 12:21 Ontò dan nelemitan tandà te kinità dan igsà minikagi si Moises te tinegangtang sikandin aw migpeso.
HEB 12:22 Meneng kenà iling kenyan se pegpedapag tadon diyà te Timanem, so iling te migpedapag kidon den doton te bontod iningedanan Sion, se lonsod eg-ogpaan te Timanem wedad temanan. Yan se lonsod doton te langit iningedanan Kaling Jerusalem pigtiponan te ontò medita anghil eked kebilang gayed egduyun kandin.
HEB 12:23 Nekeakop kidon den doma te menge batà te Timanem insolat se ngadan dan doton te langit. Wedad den kelemitanan tadon diyà te Timanem meg-osay te kedita, so impeakop kidon din diyà te kedita te menge doma sakop din nematay den aw ininang din den ontò metòlid doton te langit.
HEB 12:24 Migpedapag kidon den diyà ki Jesus mig-inang te kaling peokit amon mekepedapag kidon diyà te Timanem. Lininisan kidon te dipanog din lekat te salà, aw yan se pengilala te doen keido te Timanem kenitadon. Labi pa iyan mèpiya diyà te dipanog i Abel, so yan se pengilala te keilangan ipelumun se kedowa din nengimatay kandin.
HEB 12:25 Nayan, penenalan kaw te kagi te Timanem. Gebii wedà penenalan se menge kemonaan tadon te kagi te Timanem ingkeliwat i Moises dini lanto te tanà, aw yan impelumun dan te Timanem. Labi kidon pa ipelumun te Timanem aw eked kidon penenalan te inikagi din lekat te langit.
HEB 12:26 Gebii te peg-ikagi te Timanem doton te bontod te Sinay, nekayong se tanà tandà te kedakel te kagi din. Meneng doen pa pakang din, “Sebad mendad se pegkayong ko, meneng kenà olò tanà se keyongen ko, so keyongen ko heman se langit.”
HEB 12:27 Pineokit te inikagi te Timanem sìyan, netegahan tadon te pegbàtan din se kedakel te ininang din aw pegwedaden din iyan amon mesamà olò se eked palos kebàti.
HEB 12:28 Yan keilangan megpesiontong kidon diyà te Timanem so sinakop kidon din diyà te peglowan din eked palos kebàti. Keilangan megsimba kidon heman kandin onawa te ibeg din inangen tadon, aw megsagman kidon heman kandin,
HEB 12:29 so se Timanem egsimbahen tadon, iling te apoy egpelumun.
HEB 13:1 Keilangan gayed dakel se pedowan niyo diyà te menge doma otaw egpemenal.
HEB 13:2 Ikà niyo egkelibel te keilangan megsagman kaw te otaw mepanaw, pengkey wedà niyo kilelai. Liyag kaw kandan, so doen migsagman te otaw minapit doton kandan, meneng wedà dan ketaga-taga te menge anghil se minapit doton kandan.
HEB 13:3 Ikà niyo egkelibel te keilangan megtabang kaw te menge otaw egpemenal kineleboso. Peg-ipat kaw kandan iling te sikiyo heman se kineleboso sipat kandan. Keilangan megtabang kaw heman te menge otaw egpemenal pinemilang iling te sikiyo heman se pinemilang sipat kandan.
HEB 13:4 Keilangan meg-aneng-aneng se kedita te otaw te meelagà se pegkelobos te pedowan te teleesawa. Keilangan wedad otaw lomakad te kandin esawa, so megpelumun se Timanem te kedita te otaw lomakad aw lomayok te kenà kandin esawa.
HEB 13:5 Ikà niyo egpengewarta. Keilangan meluba kaw te kedònan neabat niyo, so minikagi se Timanem, “Eked a palos tanan kenyo. Eked a palos lowat kenyo.”
HEB 13:6 So Timanem se egseligan tadon, yan mekeikagi kidon, “Pengolo ko se megtabang kanak, aw yan eked a kelemitan, pengkey eden se inangen te otaw kanak.”
HEB 13:7 Ikà niyo egkelibel te menge egpengibing te simbahan migtoladà kenyo te kagi te Timanem kedengan. Peg-aneng-aneng kaw tepad te mèpiya ininang dan te wedà dan pa kematay, aw peg-iling kaw te pegpemenal dan.
HEB 13:8 Eked palos ketodà si Jesu Cristo, so gayed sikandin onawa, pengkey gebii, pengkey songkani, pengkey te wedad temanan.
HEB 13:9 Aw doen otaw megtoladà kenyo te sebad kemolò toladà kenà iling te kebenalan tapay intoladà diyà kenyo, ikà niyo egpemenal kenyan. Pineokit te tabang te Timanem, melobos se pegsalig tadon diyà kandin. Eked kelobos se pegsalig tadon diyà kandin pineokit te pegtolò tadon te menge punù ipegtoladà dan tepad te kànen tadon, so kenà egketebangan se menge otaw egtolò te menge punù sìyan.
HEB 13:10 Nematay si Jesus amon beyadan din se salà te kedita tadon nemenal kandin. Meneng se kedita te otaw egtaking te punù ingkeliwat i Moises tepad te pegpengimatay te ayam-ayam doton te simbahan te Judiyo, eked dan pekeakop diyà te kedita tadon impelowà i Jesus lekat te salà.
HEB 13:11 Aw imetayan te pengolo te simbahan te Judiyo se ayam-ayam tandà te salà ininang te otaw, ibingen din se dipanog niyan doton didalem te Ontò Tambì doton te simbahan dan. Meneng ibingen dan se lawa te sìyan ayam-ayam inimetayan doton te lowà te lonsod dan aw sonogen dan iyan kidoen.
HEB 13:12 Iling heman kenyan se neinang diyà ki Jesus, so inimetayan heman sikandin doton te lowà te lonsod, aw dipanog din se inlinis te salà te otaw.
HEB 13:13 Yan, impelowà kidon den lekat te menge punù ingkeliwat i Moises. Keilangan tenanan tadon se kedita niyan aw tomaking kidon te Pengolo tadon nematay doton te lowà te lonsod. Keilangan eked kidon kelemitan aw pemilangen kidon tandà te pegtaking tadon kandin, so pinemilang heman sikandin.
HEB 13:14 Meketayod kidon kenyan so eked kidon peg-ogpà dini te keneyonan te wedad temanan. Meneng doen pa lonsod egpelimanan tadon ogpaan doton te langit te wedad temanan.
HEB 13:15 Doen den keilangan ibegay tadon diyà te Timanem pineokit ki Jesus, aw yan se pegduyun tadon te Timanem te wedad temanan. Keilangan gayed kidon megpetaga-taga te egpesiontong kidon diyà kandin.
HEB 13:16 Ikà niyo heman egkelibel te keilangan mèpiya se eg-inangen niyo, aw keilangan megtabang kaw te doma niyo nelimahan, so meluba se Timanem kenyo pineokit kenyan.
HEB 13:17 Tolò kaw te menge egpengibing te simbahan. Pegsagman kaw kandan, so insogò dan te Timanem amon meg-ipat dan kenyo. Keilangan keseligan dan, so doen aldaw te okomen dan te Timanem. Aw megsagman kaw kandan, meluba se pedowan dan. Meneng aw eked kaw pegsagman kandan, mepuluk se pedowan dan, aw wedad heman ontong kinewaen niyo.
HEB 13:18 Pegtawal-tawal kaw diyà te Timanem tepad kenami. Netegahan day te wedad ininang day mepakay silahen, aw tod day wedad palos inangen day eked duyuni te Timanem.
HEB 13:19 Ontò ko ibeg, megtawal-tawal kaw diyà te Timanem te mekelikò a doton kenyo te eked kenamay.
HEB 13:20 Inantay te Timanem se Pengolo tadon si Jesus lekat te nematay, so pineokit te pegkematay din, ininang din se kaling peokit amon mekepedapag kidon diyà kandin te wedad temanan. Iling sikandin te Telediyaga tadon, so iling kidon te menge karniro eg-ipaten din.
HEB 13:21 Yan se doun te egtawal-tawal a diyà te Timanem egpemegay te kelinaw te begayan kaw te kedita te mèpiya tabang din amon mekebatog kaw tomoman te ibeg din. Ibeg ko heman, tebangan kaw din amon meg-inang kaw te mekeluba kandin pineokit te tabang i Jesu Cristo diyà kenyo. Iduyun sikandin te wedad temanan. Metoman iyan.
HEB 13:22 Menge kedowa ko, ibeg ko menenalan kaw te kedita te insolat ko den diyà kenyo amon ketebangan kaw, so pilabok se kagi ko kenyo seini.
HEB 13:23 Ibeg ko metaga-taga kaw te impelowà den se kedowa tadon si Timoteo lekat te keleboso. Aw domateng sikandin te eked kenamay, ipetaking ko sikandin aw domoton a kenyo.
HEB 13:24 Indani niyo se kedita te egpengibing te simbahan aw kedita te doma niyo sakop te Timanem te eg-aneng-aneng a heman kandan. Ibeg te menge tege Italya, metaga-taga kaw heman te eg-aneng-aneng dan kenyo.
HEB 13:25 Ibeg ko megtabang se Timanem te kedita niyo. Metoman iyan.
JAM 1:1 Se solat seini lekat kanak si Santiago. Sineligan a te Timanem aw Pengolo tadon si Jesu Cristo. Seini se solat ko te kedita niyo Judiyo egpemenal ki Cristo, pengkey nekeogpà kaw doton te medita ogpeanan doton te kebelad te keneyonan. Ibeg ko, mèpiya se keogpà niyo.
JAM 1:2 Menge kedowa ko, aw detengan kaw te menge kelimahan, keilangan ontò kaw meluba,
JAM 1:3 so aw meketayod kaw te kelimahan aw gayed kaw somalig diyà te Timanem, yan se mekebegay kenyo te kedalem te pedowan.
JAM 1:4 Aw megkedalem se pedowan niyo, ontò megketesan se pegpemenal niyo pineokit kenyan.
JAM 1:5 Meneng aw doen otaw kidoen kenyo detengan te kelimahan, aw wedà ketaga-taga aw eden se inangen din, mèpiya aw memoyò sikandin diyà te Timanem amon ibegay din kandin se kebiyasa, so gayed egpemegay se Timanem diyà te kedita te otaw memoyò. Bowasag sikandin diyà kandan, aw eked din dan heman peyàyai.
JAM 1:6 Aw memoyò se otaw diyà te Timanem, keilangan memenal te tebangan sikandin te Timanem. Keilangan eked sikandin pegdowa-dowa, so se otaw egdowa-dowa, yan se iling te balud egtaking te kelamag pengkey kenan kedog.
JAM 1:7 Egdowa-dowa sikandin, aw kenà egkeseligan te pengkey eden se eg-inangen din. Aw iling kenyan se otaw, eden din aw doen ibegay te Timanem kandin.
JAM 1:9 Se menge kedowa tadon sagkep, mèpiya aw meluba dan te meelagà dan diyà te Timanem.
JAM 1:10 Meneng se menge kedowa tadon meyaman aw melangkaw, mèpiya aw meluba dan te kenà keyemanan se seligan dan. Megkewedad se keyemanan te eked kenamay iling te bolak te kebenesan,
JAM 1:11 so aw megkelangkaw se aldaw aw meinit, melanes se bolak, aw matay, aw medaet iyan tengtengen. Iling heman kenyan se menge otaw meyaman, so pengkey mebuyung dan mengewarta, meneng ketenanan dan se kedita aw matay.
JAM 1:12 Aw meketayod se otaw te kelimahan, yan se otaw ontò meluba, so penga niyan, doen ontong kinewaen din, se kaling pedowan impakang te Timanem diyà te kedita te otaw doen dakel pedowan kandin.
JAM 1:13 Aw meboyo se otaw te medaet, eked kepakay aw mikagi sikandin te Timanem se migboyo kandin, so eked palos pegboyo se Timanem, aw wedad heman otaw boyowen din.
JAM 1:14 Meneng meboyo se otaw te medaet ibeg te pedowan din.
JAM 1:15 Aw tomolò se otaw te medaet ibeg te pedowan din, yan mekeinang te salà. Aw gayed meg-inang se otaw te salà, yan se detengan te pelumun aw kemetayun wedad temanan.
JAM 1:16 Menge kedowa egkedekelan ko te pedowan, peg-ahà kaw amon wedad keekalan kenyo.
JAM 1:17 Mèpiya se kedita te ipegbowang te Timanem, aw wedad kolang niyan. Yan se ipegpemegay te Timanem mig-inang te aldaw aw bolan aw menge bitoen. Pengkey egkealin-alin se bawa te aldaw aw bolan aw bitoen, meneng eked kealin-alin se Timanem, so gayed sikandin egpemegay te mèpiya.
JAM 1:18 Lekat te ibeg din ininang kidon din menge batà din pineokit te pegpemenal tadon te kebenalan ipegtoladà. Yan se ininang din amon sikitadon se ontò meelagà diyà te kedita te ininang din.
JAM 1:19 Menge kedowa egkedekelan ko te pedowan, eneng-enengi niyo ini. Mèpiya aw megpekeaseb se kedita niyo menenalan. Mèpiya aw eked niyo sesawi se peg-ikagi. Mèpiya heman aw eked kaw tagmon keopal,
JAM 1:20 so aw meopal se otaw, kenà din eg-inangen se metòlid ibeg te Timanem.
JAM 1:21 Yan tanan kaw te medaet inang niyo aw kedita te medaet aneng-aneng niyo. Tolò kaw te Timanem, aw pemenali niyo se kagi din insawol diyà te pedowan niyo, so se kagi din, yan se mekepelowà kenyo lekat te salà.
JAM 1:22 Keilangan tomolò kaw te kagi te Timanem. Eked kepakay aw olò niyo penenelanen, aw penga niyan eked niyo iyan soli diyà te aneng-aneng. Aw doen otaw egpenenalan olò meneng kenà egtolò, eden din aw doen ontong din. Iling sikandin te otaw tomengteng te bawa din diyà te ispiho,
JAM 1:24 meneng aw mesayo sikandin lekat te ispiho, eked kenamay kelibelan din se kinità din. Iling kenyan se otaw menenalan te punù te Timanem meneng eked tolò.
JAM 1:25 Mèpiya se punù te Timanem, aw yan se mekepelowà te otaw lekat te salà. Se otaw menenalan kenyan aw eked kelibel kenyan meneng gayed egtolò, yan se otaw egbegayan te Timanem te keluba, pengkey eden se inangen din.
JAM 1:26 Aw eg-aneng-aneng se otaw te egtaking sikandin te Timanem, meneng kenà din eg-imendayan se eg-ikegiyen din, wedad ontong din, so eden din aw timaking sikandin te Timanem.
JAM 1:27 Meneng se otaw ontò egtaking te Timanem Amay, yan se otaw egpenabang te menge doma otaw nelimahan, pengkey menilo aw bayi balo. Kenà heman eg-iling te medaet ketanem te otaw dini te keneyonan.
JAM 2:1 Menge kedowa ko, aw egsalig kaw diyà ki Jesu Cristo Pengolo tadon melangkaw, yan keilangan onewaen niyo se pegsagman niyo te kedita te otaw egpemenal, pengkey sagkep aw meyaman.
JAM 2:2 Aw mawop diyà te simbahan niyo se otaw meyaman menaol te meelagà aw memeningsing te bolawan, imendayan niyo sikandin, aw ipeonsad niyo doton te mèpiya onsedanan. Penga niyan, domateng se doma otaw sagkep menaol te pepidit, ipetindeg niyo sikandin doton te mediyò aw ipetibakang.
JAM 2:4 Aw yan se inangen niyo, ontò iyan medaet, so eden niyo aw mèpiya se otaw meyaman aw medaet se otaw sagkep. Medaet se aneng-aneng niyo sìyan.
JAM 2:5 Menge kedowa egkedekelan ko te pedowan, penenalan kaw te kagi ko seini. Pengkey deitek se kedònan te otaw sagkep dini te keneyonan, yan se otaw pinemallì te Timanem amon dakel se pegsalig dan kandin, aw mekeakop dan heman diyà te peglowan din, so yan se impakang din diyà te kedita te otaw doen dakel pedowan kandin.
JAM 2:6 Meneng eglindoan niyo se otaw sagkep, aw egsegmanen niyo se otaw meyaman. Meneng se menge meyaman, yan se otaw egdagan kenyo, aw egpemeibing heman kenyo doton te howis,
JAM 2:7 aw egtompuyus ki Jesu Cristo simakop kenyo.
JAM 2:8 Mèpiya aw toloen niyo se punù te Timanem, sìyan kagi din insolat, “Kedekeli niyo te pedowan se doma otaw iling te peg-aneng-aneng niyo te kenyo pegkeotawun.”
JAM 2:9 Meneng aw segmanen niyo se meyaman, aw lindoan niyo se sagkep, medaet se inang niyo, so wedà kaw tolò te punù te Timanem sìyan. Yan doen salà niyo.
JAM 2:10 Pengkey tomolò se otaw te kedita te punù te Timanem, meneng olò sebad se lèpangan din, yan doen salà din iling te otaw limàpang te kedita te punù.
JAM 2:11 Doen punù te Timanem, “Ikà niyo eglakad.” Doen heman doma punù din, “Ikà niyo egbonò.” Pengkey eked peglakad se otaw meneng aw memonò, pengkey olò sebad se punù te Timanem linèpangan din, yan se otaw doen salà.
JAM 2:12 Okomen kidon din kwani amon ketegahan aw timolò kidon te punù din, sìyan mekepelowà te otaw lekat te salà. So netegahan niyo den iyan, keilangan imendayan niyo se kagi aw inang niyo amon eked kaw pekelàpang te punù din.
JAM 2:13 Aw meg-okom se Timanem te kedita te otaw, eked din keidowi se otaw wedà keido te doma otaw nelimahan. Meneng aw meido se otaw te doma otaw nelimahan, wedad kelemitanan din aw okomen te Timanem.
JAM 2:14 Menge kedowa ko, aw doen otaw mikagi te egpemenal sikandin ki Cristo, meneng wedad mèpiya eg-inangen din, wedad ontong din, so eden din aw nekelowà lekat te salà.
JAM 2:15 Aw doen kedowa tadon egpemenal wedad penenaktun din aw kànen,
JAM 2:16 aw simpana mikagi kaw kandin, “Ibeg ko doen kelinaw te pedowan nikaw. Mebesog ka aw megkedoen penenaktun nikaw.” Meneng aw wedad palos ibegay niyo kandin, wedad ontong te peg-ikagi niyo kenyan.
JAM 2:17 Aw wedad mèpiya eg-inangen te otaw, wedad ontong te pegpemenal din.
JAM 2:18 Meneng doen besi otaw eg-ikagi te meluba se Timanem aw olò memenal se otaw. Doen besi heman doma otaw eg-ikagi te meluba se Timanem aw olò meg-inang se otaw te mèpiya. Meneng seini se itaba ko kenyan. Aw wedad mèpiya eg-inangen niyo, wedad ipekità niyo te benal nemenal kaw ki Cristo. Meneng mèpiya aw ipekità tadon te nemenal kidon ki Cristo pineokit te peg-inang tadon te mèpiya.
JAM 2:19 Aw mikagi kaw te nemenal kaw den te olò sebad se Timanem, mèpiya iyan, meneng eden niyo aw botong se pegpemenal niyo kenyan. Pengkey bosaw eleg heman nemenal kenyan, aw egtegengtangen dan tandà te lamit dan kandin, meneng kenà dan man egtaking te Timanem.
JAM 2:20 Wedad inenengen te otaw wedà ketaga-taga te kolang se pegpemenal te otaw aw wedad mèpiya inang din.
JAM 2:21 Netegahan niyo ini. Mig-aneng-aneng se Timanem te metòlid se kemonaan tadon si Abraham pineokit te ininang din, so ontò timolò te impunù te Timanem kandin, aw neketagad sikandin mengimatay te batà din si Isaac doton te sonoganan te ayam-ayam ibegay diyà te Timanem.
JAM 2:22 Timolò si Abraham te Timanem so nemenal sikandin. Impekità din te nelobos se pegpemenal din pineokit te ininang din.
JAM 2:23 Yan se kedegdagan te kagi te Timanem insolat, “Nemenal si Abraham te tomanen te Timanem se pakang din kandin, aw yan mig-aneng-aneng se Timanem te metòlid sikandin.” Yan se doun te tinawal sikandin “Sigalak te Timanem.”
JAM 2:24 Netegahan niyo den te keilangan ipekità te otaw te nemenal sikandin te Timanem pineokit te mèpiya inang din amon meg-aneng-aneng se Timanem te metòlid sikandin.
JAM 2:25 Iling heman kenyan si Rahab gebii, so pengkey kepoyun sikandin, meneng mig-aneng-aneng se Timanem te metòlid sikandin tandà te mèpiya inang din pineokit te pegtabang din te dowa otaw insogò migsimà doton te Jeriko, amon mekelowà dan aw mekeolì.
JAM 2:26 Eneng-enengi niyo ini. Wedad ontong te lawa aw wedad pedowan. Iling heman kenyan, wedad ontong te otaw memenal aw wedad mèpiya inang din.
JAM 3:1 Menge kedowa ko, mèpiya aw pilabok se otaw meibeg meinang menenoladà, so netegahan niyo te kenà meagka se pegtoladà te kagi te Timanem. Simpana medaet se eg-inangen day egtoladà, labi pa mebegat se pelumun te Timanem kenami.
JAM 3:2 Melikit se kedita tadon eg-inang te medaet aw eg-ikagi te medaet. Meneng aw wedad palos medaet ikegiyen te otaw, biyasa sikandin egpengibing te kandin pegkeotawun, aw eked peg-inang te salà.
JAM 3:3 Pengkey eden se kedakel te kodà, meneng meibing iyan te otaw pineokit te deitek kakang isawol diyà te bahà.
JAM 3:4 Na, eneng-enengi niyo heman se bapor. Pengkey ontò iyan dakel, aw pengkey mebandes se kelamag, meneng pineokit te deitek bensalan, mepakay iyan meibing te otaw pengkey kenan se ibeg din peselowan.
JAM 3:5 Iling heman kenyan se dilà te otaw, so pengkey deitek iyan diyà te lawa tadon, meneng dakel se meinang pineokit te dilà tadon. Eneng-enengi niyo ini. Pengkey medita se kayo doton te kegolangan, meneng mesonog se kedakel niyan te deitek baga.
JAM 3:6 Iling heman te apoy se kagi tadon, so aw eked iyan imendayi, ontò iyan mekedaet kenitadon. Aw medaet se kagi tadon, yan se mekedaet te kenitadon pegkeotawun, aw yan se mekesamok te kenitadon aneng-aneng dalem te peg-ogpà tadon dini te keneyonan. Kilot se eglekatan te medaet kagi.
JAM 3:7 Doen medita kemolò te menenanap aw manok pigkagnek te otaw, pengkey menge menenanap eg-ogpà diyà te tanà aw dagat.
JAM 3:8 Meneng wedad palos otaw mekesagkà te dilà te otaw, so gayed egpeketagad se dilà mikagi te medaet, iling te memokan gayed egpeketagad tomongkà.
JAM 3:9 Pineokit te dilà tadon, mekeduyun kidon te Timanem Amay. Meneng pineokit heman te dilà tadon, meketindaet kidon te doma otaw, pengkey ininang te Timanem iling kandin.
JAM 3:10 Lekat te sebad bahà lomowà se kagi mèpiya aw medaet. Menge kedowa ko, eked inì kepakay inangen. Keilangan ontò mèpiya se kagi tadon eked sengedi te medaet,
JAM 3:11 so kenà egtebol se wayeg mèpiya aw mepait lekat te sebad selep.
JAM 3:12 Wedad heman kayo igira egpongo te olibo. Wedad heman belagen te paras egpongo te igira. Wedad heman wayeg seloken diyà te dagat.
JAM 3:13 Aw doen otaw kidoen kenyo biyasa egtoladà, mèpiya aw ipekità din iyan pineokit te mèpiya inang din. Aw metinuud sikandin, yan ketegahan te ontò sikandin biyasa.
JAM 3:14 Meneng aw eg-ingà aw egpelangkaw-langkaw diyà te doma otaw, eked kepakay aw mikagi te biyasa, so migkebolalaw sikandin.
JAM 3:15 Kolang se kebiyasa te otaw iling kenyan, so kenà iyan lekat te Timanem, meneng lekat iyan te medaet ibeg te otaw dini te keneyonan egtaking te menge bosaw.
JAM 3:16 Pengkey sinu se eg-ingà aw megpelangkaw-langkaw diyà te doma, yan se otaw egsamok aw eg-inang te medita kemolò te medaet.
JAM 3:17 Meneng se otaw doen kebiyasa lekat te Timanem, yan se otaw kenà eg-inang te medaet, kenà egsamok, gayed mèpiya se pedowan din, kenà metugul, gayed egkeido aw egpenabang te doma, kenà egdowa-dowa, meneng melobos se pedowan din.
JAM 3:18 Mèpiya se detengan te otaw gayed eg-inang te kelinaw.
JAM 4:1 Doen pa otaw egpedindilay kidoen kenyo. Meg-indan a den kenyo aw kenan iyan lekat. Lekat iyan te egkeibegan niyo se mekeboyo dini te keneyonan, aw yan nesamok se aneng-aneng niyo.
JAM 4:2 Aw eked kaw pekeabat te keibegan niyo, yan mengimatay kaw. Aw eked kaw pekekinawà te ingaen niyo, yan megpedindilay kaw. Meneng eked kaw pekeabat te ibeg niyo so wedà kaw pemoyò diyà te Timanem.
JAM 4:3 Pengkey memoyò kaw diyà te Timanem, meneng wedad ibegay din kenyo so kolang se pinemoyò niyo, so ibeg niyo tomaking kaw te medaet ibeg te pedowan niyo.
JAM 4:4 Timanan kaw den te Timanem, iling te otaw timanan te esawa din aw limakad. Nelibelan niyo den besi se kebenalan seini. Se otaw egtaking te medaet ibeg te otaw dini te keneyonan, yan se otaw timinàyog te Timanem. Pengkey sinu otawi se tomaking te medaet ibeg te otaw dini te keneyonan, yan se otaw meinang poon te Timanem.
JAM 4:5 Eden niyo aw wedad ketomanan te kagi te Timanem, te insogò din se Espiritu Santo meg-ogpà diyà te pedowan tadon, aw ibeg din ontò melobos se pedowan tadon diyà kandin.
JAM 4:6 Meneng doen heman tabang din kenitadon, so doen kagi din insolat, “Se otaw megpelangkaw-langkaw, yan se otaw keopalan te Timanem. Meneng se otaw egpedanà te kandin pegkeotawun, yan se otaw tebangan te Timanem.”
JAM 4:7 Yan mèpiya aw megpesakop kidon diyà te Timanem amon doen tabang din kenitadon. Aw etowan niyo si Satanas, komadas sikandin lekat kenyo.
JAM 4:8 Aw megpedapag kaw diyà te Timanem, megpedapag heman sikandin diyà kenyo. Sikiyo eg-inang te salà, lengà kaw den. Sikiyo otaw egdowa-dowa te kenyo pegpenimanem, ontò niyo den lobosi se pedowan niyo.
JAM 4:9 Keilangan melidò kaw aw megkelag kaw tandà te ininang niyo medaet. Eked kepakay aw meluba kaw te salà niyo aw mebebayat, so keilangan meyàyà kaw kenyan.
JAM 4:10 Aw megpedanà kaw te pegkeotawun niyo diyà te Pengolo, tebangan kaw din aw ipelangkaw din heman se kenyo pegkeotawun.
JAM 4:11 Menge kedowa ko, ikà niyo egpesilahay. Aw somila kaw te doma otaw, aw meglindò kaw kandan, mekelindò kaw heman te punù te Timanem. Aw meglindò kaw te punù te Timanem, kenà kaw egtaking te punù din, so lomowan kaw peden kenyan.
JAM 4:12 Timanem olò se mepakay lomowan aw meg-okom. Sikandin olò se mepakay megpelowà te sebad otaw aw megpelumun te doma. Yan eked kepakay aw sikiyo se meg-okom aw somila te doma otaw.
JAM 4:13 Penenalan kaw kanak, se kedita niyo eglalang. Simpana mikagi kaw, “Domoton kay kealdaw te doma lonsod, aw megtinda kay kidoen te sebad se omay, aw megkeyaman kay.”
JAM 4:14 Kolang iyan, so wedad palos otaw metaga-taga te eden se meinang pengkey kealdaw. Iling te labon eg-ibingen te kelamag se keogpà tadon dini te keneyonan, so megkewedad iyan te eked kenamay.
JAM 4:15 Labi pa mèpiya aw mikagi kaw kani, “Aw meibeg se Timanem, eked kay tagmon kematay, aw doen pa heman inangen day.”
JAM 4:16 Meneng medaet se eg-inangen niyo, so gayed kaw egpelangkaw-langkaw tandà te aneng-aneng niyo inangen te modi aldaw. Medaet iyan diyà te Timanem.
JAM 4:17 Netegahan niyo den besi se kebenalan seini. Se otaw netaga-taga aw eden se mèpiya inangen din, meneng wedà din iyan inangi, yan se otaw doen salà diyà te Timanem.
JAM 5:1 Penenalan kaw kanak se kedita niyo meyaman demeten. Mèpiya aw melidò kaw aw megkelag kaw, so doen kelimahan metoman domateng kenyo.
JAM 5:2 Kebàtan se kedakel te kedònan niyo, aw penenaktun niyo,
JAM 5:3 aw kwarta niyo. Se pegkedaet niyan, yan se pengilala te benal doen salà niyo, aw kebàtan kaw heman iling te otaw meelos te apoy, so yan se impetagad niyo te kenyo pegkeotawun te temanan aldaw.
JAM 5:4 Netegahan den te Timanem te miglimbong kaw te pegtandan niyo te menge otaw migterbaho doton te pawà niyo. Dinineg te Timanem se pegbelisì dan, aw yan domapit kandan se Timanem metolos.
JAM 5:5 Wedad palos kepulukan niyo meyeyaman, so gayed kaw egpekeabat te kedita te ibeg niyo. Meneng wedà niyo eneng-enengi te agpet den domateng se pelumun te Timanem kenyo. Iling kaw te menge melambò ayam-ayam eked ketaga-taga te iyawen dan te eked kenamay.
JAM 5:6 Pengkey wedad salà te menge doma otaw, meneng eg-ibingen niyo dan doton te howis amon ipelumun. Doen heman otaw impeimatay niyo, pengkey kenà dan eg-ato kenyo.
JAM 5:7 Nayan menge kedowa ko, mèpiya aw melayat se pedowan niyo lamig te peglikò te Pengolo tadon, so metoman din dan ipelumun. Netegahan niyo te melayat se pedowan te otaw megtagad te odan amon menanem te benì, so doen ontong niyan pelimanan din aw megketesan.
JAM 5:8 Keilangan melayat heman se kenyo pedowan. Pegpekagsen kaw, so lomikò se Pengolo te eked kenamay.
JAM 5:9 Menge kedowa ko, ikà niyo egpelibagay amon eked kaw pelumuni, so agpet den se peg-okom te Pengolo.
JAM 5:10 Eneng-enengi niyo se menge telekeliwat te kagi te Pengolo gebii. Pengkey insogò dan te Pengolo, meneng doen heman kelimahan neteyodan dan.
JAM 5:11 Netegahan tadon te ontò den dan neluba, so timayod dan te kelimahan. Netegahan niyo den besi te ontò nelimahan si Job, meneng wedà tinàyog te Timanem, aw yan doen mèpiya imbegay te Timanem kandin, so ontò egkeidowan te Timanem se menge otaw egsalig kandin.
JAM 5:12 Menge kedowa ko, seini se ontò melangkaw punù ko kenyo. Aw megpakang kaw diyà te doma otaw, ikà niyo egsapà te langit, aw tanà, aw pengkey eden, so keilangan benal se kedita te kagi niyo, pengkey wedad sapà, amon eked kaw detengi te pelumun te Timanem.
JAM 5:13 Aw doen otaw kidoen kenyo nelimahan, mèpiya aw megtawal-tawal. Aw doen otaw neluba, mèpiya aw iduyun din se Timanem pineokit te pegdelangan.
JAM 5:14 Aw doen otaw nesekitan, mèpiya aw megpeangay te menge egpengibing te simbahan amon megtawal-tawal dan tepad kandin. Ipetedak dan heman se lana diyà kandin pineokit te ngadan te Pengolo tadon.
JAM 5:15 Aw megtawal-tawal se otaw egsalig diyà te Timanem, kegolian te Timanem se otaw nesekitan. Aw doen salà ininang din, pegwedaden iyan te Timanem.
JAM 5:16 Aw doen salà ininang niyo diyà te doma otaw, keilangan meg-indan kaw kandin amon pegwedaden din. Pegtawal-tawal kaw heman tepad te menge doma niyo amon kegolian dan, so ontò dakel se mebatog te pegtawal-tawal te otaw eneng-enengen te Timanem te metòlid.
JAM 5:17 Eneng-enengi niyo si Elias gebii. Pengkey onawa se kandin pegkeotawun diyà kenitadon, meneng migtawal-tawal sikandin diyà te Timanem aw nemoyò te eked odan. Yan se doun te wedad palos odan lamig te telo se omay aw enem se bolan.
JAM 5:18 Penga niyan, todà sikandin migtawal-tawal, aw yan minodan aw neantay se tinanem.
JAM 5:19 Menge kedowa ko, aw doen otaw kidoen kenyo simoway lekat te kebenalan egpemenalan tadon, mèpiya aw doen megtabang kandin, amon ibingen sikandin lomikò diyà te kebenalan.
JAM 5:20 Eneng-enengi niyo ini. Aw megtabang kaw te doma otaw amon lomengà te pegtaking din te salà, yan mekepelowà kaw kandin lekat te kemetayun wedad temanan, aw pegwedaden heman te Timanem se ontò medita salà din.
1PE 1:1 Se solat seini lekat kanak si Pedro. Siak se sebad sogounun i Jesu Cristo. Seini se solat ko te kedita niyo menge sakop te Timanem impekadas lekat te kenyo ogpeanan, aw eg-ogpà den doton te menge probinsya te Ponto, Galasya, Kapadosya, Asya, aw Bitinya.
1PE 1:2 Pineokit te ibeg te Timanem Amay tadon gebii, pinemallì kaw din aw ininang kaw din egpenimanem pineokit te tabang te Espiritu Santo amon meketolò kaw ki Jesu Cristo, so pineokit te dipanog din, lininisan kaw den lekat te salà. Ibeg ko, labi kaw pa tebangan te Timanem, aw labi pa melinaw se pedowan niyo.
1PE 1:3 Iduyun se Timanem, Amay te Pengolo tadon si Jesu Cristo. Ontò kidon neidowan te Timanem, aw binegayan kidon din te kaling pedowan. Yan doen egpelimanan tadon tandà te pegkeantay i Jesu Cristo lekat te nematay.
1PE 1:4 Egpeliman kidon te mèpiya ibegay te Timanem kenitadon. Eked iyan pegkedaet, aw eked kebàti, aw wedad heman temanan niyan, so intagò din doton te langit.
1PE 1:5 Eg-ipaten te Timanem metolos se kedita niyo simalig diyà kandin lamig te aldaw sikopen din se pegpelowà din kenitadon. Tapay din iyan impetagad, aw ipekità din iyan te modi aldaw.
1PE 1:6 Yan se doun te keilangan meluba se pedowan niyo. Pengkey egkelimahan kaw aw egpemilangen kaw songkani te eked kenamay, meneng keilangan meluba pa se pedowan niyo,
1PE 1:7 so ibeg te Timanem tomayod kaw te menge kelimahan sìyan amon ipetaga-taga niyo te ontò nelobos se pegsalig niyo diyà kandin. Iling iyan te bolawan tonawen diyà te apoy amon ketegahan aw ontò iyan bolawan. Pengkey meelagà se bolawan, megkewedad iyan te eked kenamay. Meneng labi pa meelagà se pegsalig niyo diyà te Timanem, aw yan ipeokit kaw din diyà te kelimahan amon ketegahan din aw ontò kaw egsalig diyà kandin. Aw meketayod kaw kenyan, iduyun kaw din aw ipelangkaw kaw din te aldaw te peglikò i Jesu Cristo.
1PE 1:8 Pengkey wedà kaw palos kità ki Jesus, meneng dakel se pedowan niyo kandin. Pengkey wedà kaw kità kandin, meneng nemenal kaw kandin, aw yan se doun te ontò neluba se pedowan niyo, aw eked iyan kelitok te kagi.
1PE 1:9 Ontò kaw neluba so simalig kaw den diyà te Timanem aw yan impelowà kaw din lekat te salà.
1PE 1:10 Ontò migpekeaseb mig-iling se menge telekeliwat te kagi te Timanem gebii tepad te pegpelowà te Timanem te otaw lekat te salà, aw gayed dan migtoladà te doen aldaw domateng te megtabang se Timanem te menge otaw, aw netoman den iyan diyà kenyo.
1PE 1:11 Gebii, ingkeliwat dan se kagi te Timanem te doen kelimahan domateng diyà ki Cristo, aw penga niyan ipelangkaw sikandin, so impeikagi dan te Espiritu Santo. Migpekeaseb dan amon metaga-taga dan peden aw kano iyan ketoman aw menonen se pegketoman niyan.
1PE 1:12 Meneng impetaga-taga te Timanem kandan te eked ketoman se kagi din ingkeliwat dan tepad ki Cristo te eked dan pa kematay, meneng sikitadon se netomanan te kagi te Timanem ingkeliwat dan. Netoman den iyan aw yan se intoladà diyà kenyo. Se menge otaw migtoladà kenyo te Mèpiya Indan sìyan tepad ki Cristo, tinoledaan dan te Espiritu Santo insogò din lekat te langit. Ontò mèpiya se kebenalan sìyan igsà ibeg te menge anghil metaga-taga dan peden heman tepad kenyan.
1PE 1:13 So netegahan niyo den iyan, yan keilangan megpeketagad kaw meg-aneng-aneng te metòlid. Keilangan megpekebatol kaw. Keilangan megpeliman kaw te mèpiya ibegay te Timanem diyà kenyo te aldaw te peglikò i Jesu Cristo.
1PE 1:14 So menge batà kaw den te Timanem, yan keilangan tomolò kaw kandin. Kedengan te wedà kaw pa ketaga-taga te kebenalan, timaking kaw te medaet ibeg te pedowan niyo. Meneng ikà niyo den egtaking kenyan.
1PE 1:15 So wedad palos salà te Timanem timawal kenyo, yan keilangan wedad palos heman salà inangen niyo.
1PE 1:16 Keilangan meg-inang kidon te metòlid, so doen kagi te Timanem insolat, kagi din, “So wedad salà ko, yan keilangan wedad heman salà inangen niyo.”
1PE 1:17 Metòlid se peg-okom te Timanem te kedita te otaw tepad te ininang te teg sebad-sebad kenitadon. Aw egtewalen niyo den sikandin Amay niyo, keilangan ontò kaw megsagman kandin dalem te peg-ogpà niyo dini lanto te tanà.
1PE 1:18 Kedengan neallang kaw timaking te menge ketanem wedad ontong pig-ilingan niyo diyà te menge kemonaan niyo, meneng impelowà kaw den te Timanem lekat kenyan. Kenà iling te selapì aw bolawan egkebàtan se imbayad din te kelowaan niyo.
1PE 1:19 Meneng impelowà kaw din so nematay se meelagà Batà din si Cristo. Iling sikandin te karniro ontò mèpiya aw wedad kolang eg-imetayan aw ipegpemegay diyà te Timanem.
1PE 1:20 Gebii te wedà pa peg-inang se Timanem te keneyonan, tapay din pinemallì si Cristo, meneng kaling sikandin insogò dini te tanà amon megpelowà kenyo.
1PE 1:21 Pineokit ki Cristo, nemenal kaw den te Timanem mig-antay kandin lekat te nematay aw mig-inang kandin melangkaw doton te langit. Timanem den se egseligan niyo te doen egpelimanan niyo doton te langit.
1PE 1:22 So nenenalan kaw den te kebenalan tepad ki Cristo, lininisan kaw den lekat te salà, aw ontò kaw den egpedekelay te pedowan. Meneng ibeg ko, labi kaw pa megpedekelay te pedowan.
1PE 1:23 Todà kaw den timebaw kenà pineokit te otaw, meneng pineokit te kagi te Timanem wedad temanan egpemegay te kaling pedowan wedad temanan.
1PE 1:24 Doen kagi te Timanem insolat, “Mebabà se omol te kedita te otaw. Iling dan olò te sagbet, aw iling olò te bolak te sagbet se otaw melangkaw, So egkematay se sagbet te eked kenamay, aw egkewedad se bolak niyan.
1PE 1:25 Meneng eked pegkewedad se kagi te Pengolo tadon te wedad temanan.” Se kagi sìyan, yan se Mèpiya Indan tepad ki Jesu Cristo intoladà diyà kenyo.
1PE 2:1 So menge batà kaw den te Timanem, yan keilangan eked kaw den peg-inang te medaet diyà te doma otaw. Ikà niyo egkebolalaw. Ikà niyo egpelingo-lingo. Ikà niyo eg-ingà. Ikà niyo egbaet-baet.
1PE 2:2 Keilangan gayed kaw meg-iling te ontò kagi te Timanem, iling te deitek batà gayed egkeibeg somoso. Pineokit te peg-iling niyo te kagi te Timanem, megketesan se pegsalig niyo diyà kandin,
1PE 2:3 so nenadam kaw den te keido te Pengolo tadon.
1PE 2:4 Keilangan beyà-beyaan kaw i Cristo egpemegay te kaling pedowan wedad temanan. Iling sikandin te bato gemiten te peg-inang te balay. Pengkey mig-aneng-aneng se menge otaw te wedad keelagà din, meneng sikandin se pinemallì te Timanem aw meelagà diyà kandin.
1PE 2:5 Binegayan kaw din te kaling pedowan wedad temanan. Aw beyà-beyaan kaw din, meinang kaw iling te menge bato gemiten te peg-inang te balay egsimbahan te Timanem. Inangen kaw din heman iling te menge pengolo te simbahan te Judiyo, so pineokit te tabang i Jesu Cristo, doen den mepakay tadon ibegay diyà te Timanem. Aw megsimba kidon kandin aw domuyun kidon heman kandin, yan se kelubahan din.
1PE 2:6 Doen kagi te Timanem insolat tepad ki Cristo, “Pinemallì ko se ontò meelagà bato egpetindegan ko te balay doton te lonsod te Sion. Eked palos pekebollog se otaw somalig diyà kandin.”
1PE 2:7 Ontò sikandin meelagà diyà te kedita niyo simalig diyà kandin. Meneng doen kagi te Timanem insolat tepad te menge otaw wedà salig diyà kandin, “Doen bato in-agbel te menge otaw mig-inang te balay, so eden dan aw wedad kekemowan niyan, Meneng yan se bato ontò salig te balay.”
1PE 2:8 Doen heman kagi te Timanem insolat, “Yan se bato mekebangkil kandan. Yan se bato kedogsoan dan.” Yan se dimateng kandan so wedà dan penenalan te kagi te Timanem, aw yan se pelumun impetagad din kandan.
1PE 2:9 Meneng kenà kaw iling kandan, so sikiyo se pinemallì te Timanem aw ininang kaw menge batà din. Ininang kaw din menge pengolo te simbahan eglowanan i Cristo. Ininang kaw din menge sakop din egpenimanem, aw tinig-apò kaw din heman. Pinemallì kaw din amon meg-indan kaw te doma otaw tepad te menge mèpiya ininang din diyà kenyo, so pegtawal din kenyo amon megpesakop kaw diyà kandin, inalin kaw din lekat te kengitngit doton te mèpiya kelowahan din.
1PE 2:10 Kedengan, kenà kaw menge sakop te Timanem, meneng songkani sakop kaw din den. Kedengan, wedà kaw ketaga-taga te doen keido te Timanem, meneng songkani dinetengan kaw den te keido din.
1PE 2:11 Meneng menge kedowa ko egkedekelan ko te pedowan, kenà keneyonan seini se ontò ogpeanan niyo, aw olò kaw iling te mepanaw dini lanto te tanà. Yan megpunù a den kenyo te keilangan eked kaw taking te medaet ibeg te lawa niyo, so pineokit kenyan kebàtan se pegtaking niyo te Timanem.
1PE 2:12 So tengtengen kaw te menge otaw wedà pa pemenal te Timanem, yan keilangan ontò metòlid se eg-inangen niyo, amon aw mikagi dan te doen salà niyo, metaga-taga dan beling te mèpiya se eg-inangen niyo, aw yan se doun te iduyun dan se Timanem te aldaw te pegdateng din.
1PE 2:13 Keilangan tomolò kaw te kedita te punù te gobirno, so yan se ibeg te Pengolo tadon. Keilangan tomolò kaw te selotan, so sikandin se eglowan diyà te kedita te doma opisyal.
1PE 2:14 Keilangan tomolò kaw heman te menge gobirnador, so insogò dan megpelumun te otaw eg-inang te medaet aw amon domuyun dan te otaw eg-inang te mèpiya.
1PE 2:15 Ibeg te Timanem, meg-inang kaw te metòlid, amon wedad isila te kedita te otaw wedà pa ketaga-taga te kebenalan aw wedad inenengen.
1PE 2:16 Mepakay aw memallì kaw den aw eden se inangen niyo, meneng ikà niyo eg-aneng-aneng te mepakay aw memallì kaw meg-inang te medaet, so keilangan metòlid se eg-inangen niyo, amon ipetaga-taga niyo te egtolò kaw den te Timanem.
1PE 2:17 Keilangan megsagman kaw te kedita te otaw. Keilangan dakel se pedowan niyo te kedita te doma sakop te Timanem. Keilangan melemitan kaw meg-inang te eked keibegi te Timanem. Keilangan megsagman kidon te otaw ginulal selotan tadon.
1PE 2:18 Nayan, se kedita niyo sineligan, keilangan tomolò aw megsagman kaw te amo niyo, kenà olò aw mèpiya dan aw egkeido dan, meneng keilangan megsagman kaw kandan pengkey wedad keido dan kenyo.
1PE 2:19 So aw tomayod kaw te pemilang pengkey wedad medaet ininang niyo, yan meluba se Timanem kenyo, so netegahan niyo te yan se ibeg te Timanem inangen niyo.
1PE 2:20 Meneng aw ipelumun kaw tandà te medaet ininang niyo, pengkey tomayod kaw te pelumun, eked kaw duyuni te Timanem. Meneng aw meketayod kaw te pemilang pengkey metòlid se eg-inangen niyo, yan doen ontong ibegay te Timanem diyà kenyo.
1PE 2:21 Ibeg te Timanem tomayod kaw te kelimahan. Nelimahan heman si Cristo aw timayod sikandin kenyan amon ketebangan kaw din. Sikandin se gegonan niyo amon meketayod kaw heman te kelimahan.
1PE 2:22 Wedad palos salà ininang din. Wedà sikandin palos pegkebolalaw.
1PE 2:23 Pegtompuyus dan kandin, wedad medaet intaba din. Pegpengimatay dan kandin, wedà sikandin peglamit kandan. Olò sikandin simalig diyà te Timanem eg-okom te metòlid.
1PE 2:24 Pegkematay din doton te kros, inibing din se kedita te salà tadon amon mekelowà kidon lekat te salà aw amon mekeinang kidon te metòlid. Pineokit te pegpelumun kandin, migkèpiya kidon den.
1PE 2:25 Kedengan, iling kaw te menge ayam-ayam karniro egketading. Meneng songkani, timaking kaw den ki Cristo biyasa egpengibing aw eg-ipat kenyo.
1PE 3:1 Sikiyo heman menge bayi doen esawa, keilangan tomolò kaw te kenyo esawa, amon pengkey wedà dan pa tolò te kagi te Timanem, meneng meibeg dan memenal pineokit te pegkità dan te metòlid eg-inangen niyo. Wedad keilangan te mikagi kaw diyà kandan tepad te kagi te Timanem,
1PE 3:2 so komità dan te pegsagman niyo te Timanem aw wedad eg-inangen niyo mepakay dan silahen.
1PE 3:3 Ikà niyo eg-aneng-aneng te keilangan doen palas niyo amon mèpiya se bawa niyo, iling te pegtigmes te logay, aw pegsawol te bolawan, aw pegdagom te ontò meelagà.
1PE 3:4 Meneng keilangan ipekità niyo se mèpiya but lekat te pedowan niyo. Aw metinuud kaw, aw metelek kaw, yan se doen ontò keelagà eked palos pegkedaet, so ontò meelagà diyà te Timanem se otaw iling kenyan.
1PE 3:5 Yan heman se pegkesawol te menge bayi simalig diyà te Timanem gebii. Impekità dan te mèpiya dan otaw pineokit te pegtolò dan te kandan esawa.
1PE 3:6 Iling kenyan se esawa i Abraham gebii si Sara, so timolò sikandin te esawa din, aw impetaga-taga din te si Abraham se pengolo din. Aw meg-iling kaw kandin pineokit te peg-inang niyo te metòlid aw wedad lamit niyo, yan meinang kaw heman iling te batà i Sara.
1PE 3:7 Sikiyo heman menge meama doen esawa, keilangan meg-ipat kaw kandan aw megsagman kaw heman kandan. Labi dan pa melomay diyà te meama, meneng kenà olò meama se egbegayan te kaling pedowan wedad temanan, so bayi heman se egbegayan kenyan. Keilangan megsagman kaw te kenyo esawa amon wedad mekebelabag te pegtawal-tawal niyo diyà te Timanem.
1PE 3:8 Nayan, seini pa se ipunù ko kenyo. Keilangan megsebad kaw te aneng-aneng niyo aw pedowan niyo. Keilangan dakel se pedowan niyo te menge doma otaw egpemenal, aw keilangan megpeidoway kaw heman. Keilangan megpedanà kaw te kenyo pegkeotawun.
1PE 3:9 Aw doen otaw meg-inang te medaet diyà kenyo, ikà niyo eg-inang te medaet diyà kandan. Aw doen otaw megtompuyus kenyo, ikà niyo egtompuyus kandan. Meneng pemoyò kaw diyà te Timanem te keidowan din dan, so pegtawal din kenyo, migpakang sikandin te keidowan kaw din.
1PE 3:10 Doen kagi te Timanem insolat, “Aw meibeg se otaw meluba aw beyang-beyang dini lanto te tanà, keilangan eked sikandin ikagi te medaet, aw eked heman sikandin pegkebolalaw.
1PE 3:11 Keilangan lomengà sikandin meg-inang te medaet amon olò mèpiya se inangen din. Keilangan megpekeaseb sikandin megsebad te pedowan din diyà te doma otaw.
1PE 3:12 Egtonggoan te Timanem se otaw eg-inang te metòlid, aw egpenenelanen din se ipegtawal-tawal dan kandin. Meneng ipelumun din se otaw eg-inang te medaet.”
1PE 3:13 Yan, aw measeb kaw meg-inang te mèpiya, iling te wedad otaw megpeeleg kenyo.
1PE 3:14 Meneng aw pemilangen kaw tandà te peg-inang niyo te metòlid, meluba se pedowan niyo. Ikà niyo egkelemitan. Ikà niyo egketetana.
1PE 3:15 Keilangan meg-aneng-aneng kaw te si Cristo se Pengolo niyo. Keilangan gayed kaw megpeketagad tomaba diyà te otaw meg-insà kenyo tepad te pinemenalan niyo.
1PE 3:16 Meneng aw tomaba kaw kandan, keilangan mèpiya se pedowan niyo kandan, aw keilangan megsagman kaw heman kandan. Keilangan wedad salà inangen niyo, so sakop kaw i Cristo. Yan aw doen otaw megbael-bael tepad kenyo, aw somila dan te mèpiya eg-inangen niyo, meyàyà dan.
1PE 3:17 Aw ibeg te Timanem doen kelimahan tadon tandà te peg-inang tadon te metòlid, mèpiya iyan. Meneng kenà mèpiya aw doen kelimahan tadon tandà te peg-inang tadon te medaet,
1PE 3:18 so nematay heman si Cristo amon megpelowà kenitadon lekat te salà. Mekesebad sikandin kematay so botong se pegkematay din. Pengkey wedad salà din, meneng simelilin sikandin kenitadon pengkey doen salà tadon amon megkità kidon aw Timanem. Pengkey nematay se lawa din, meneng neantay sikandin.
1PE 3:19 Dimeleg sikandin doton te ogpeanan kinelebosowan te pedowan te menge otaw nematay gebii, aw migtoladà sikandin kandan doton.
1PE 3:20 Yan se pedowan te menge otaw gebii wedà tolò te Timanem dalem te peg-inang i Noe te arka. Medalem se pedowan te Timanem diyà kandan, aw nenamay sikandin migtagad lamig nepenga se peg-inang i Noe te arka. Meneng pilabok se otaw wedà kelemes te wayeg nekelinep te tanà, so walo olò se otaw simakay te arka limepaw diyà te lanto te wayeg.
1PE 3:21 Yan se pengilala tepad te pegpebonyag niyo, so impelowà kaw lekat te salà kenà tandà te peg-onaw te lawa niyo amon meabat se osing, meneng tandà te pegpemoyò niyo te Timanem te ebaten din se salà lekat te pedowan niyo. Impelowà kaw lekat te pelumun pineokit te pegkeantay i Jesu Cristo lekat te nematay.
1PE 3:22 Dimoton sikandin diatas te langit. Minonsad den sikandin kidoen te tangkil te Timanem aw eglowan heman doma din. Impelowan sikandin diyà te kedita doton te langit, pengkey kedita te anghil aw menge doma metolos.
1PE 4:1 Timayod si Cristo te kelimahan te pegdini din te lanto te tanà. Yan aw detengan kaw te kelimahan, keilangan meg-aneng-aneng kaw tepad te pegtayod din te kelimahan. Aw meketayod se otaw te kelimahan, yan se pengilala te kimulu den sikandin meg-inang te salà,
1PE 4:2 so dalem te peg-ogpà niyo dini lanto te tanà, eked kaw taking te medaet ibeg te pedowan niyo, meneng ibeg te Timanem se tekingan niyo.
1PE 4:3 Keilangan eked kaw todà peg-inang te medaet ininang niyo kedengan, iling te eg-inangen te doma otaw kenà egtaking te Timanem. Kedengan kenà kaw egkeyàyà eg-inang te medaet ibeg te pedowan niyo, aw eglasing kaw, aw egsamok kaw, aw mebolot kaw, aw egpengako kaw te Timanem pineokit te pegsimba niyo te inotaw.
1PE 4:4 Nepela den se menge medaet otaw tinekingan niyo kedengan, so kenà kaw den egtaking kandan te peg-inang dan te pengkey eden se medaet ibeg dan, aw yan egtompuyus dan kenyo.
1PE 4:5 Meneng aw den iyan, so domateng se aldaw te ipelumun dan te Timanem, so neketagad den sikandin meg-okom te kedita te otaw pengkey nematay aw wedà pa kematay.
1PE 4:6 Yan se doun te tinoledaan heman se menge otaw gebii nematay den te Mèpiya Indan tepad ki Cristo, amon begayan dan te Timanem te kaling pedowan wedad temanan, pengkey dinetengan se lawa dan te kemetayun, so yan se pelumun te Timanem te kedita te otaw.
1PE 4:7 Agpet den se temanan te keneyonan, aw yan se doun te keilangan metinuud kaw aw tikbel kaw, amon wedad mekebelabag te pegtawal-tawal niyo diyà te Timanem.
1PE 4:8 Ontò keilangan te gayed kaw megpedekelay te pedowan, so aw dakel se pedowan niyo te doma otaw, mebatog niyo pegwedaden se ontò medita salà dan diyà kenyo.
1PE 4:9 Aw doen otaw egpemenal te Timanem lomaoy doton kenyo, pegsagman kaw kandan. Ikà niyo egbelisì tepad kenyan.
1PE 4:10 Medita se kinemoloan te kebiyasa imbegay te Timanem diyà te teg sebad-sebad kenitadon. Keilangan gemiten niyo te mèpiya se imbegay te Timanem kenyo amon megpetebangay kaw.
1PE 4:11 Aw insogò kaw te Timanem megtoladà, keilangan kagi te Timanem se itoladà niyo. Aw insogò kaw te Timanem megtabang te doma otaw, keilangan measeb kaw megtabang, so begayan kaw te Timanem te eneg. Aw iling kenyan se kedita te eg-inangen niyo, iduyun se Timanem pineokit te pegtabang i Jesu Cristo kenyo. Timanem se iduyun aw lomowan te wedad temanan. Metoman iyan.
1PE 4:12 Nayan, kedita niyo egkedekelan ko te pedowan, ikà niyo egkepela tandà te kelimahan dimateng den kenyo amon tendaen se pegsalig niyo diyà te Timanem. Ikà niyo eg-aneng-aneng te olò sikiyo se nekeokit kenyan.
1PE 4:13 Keilangan meluba se pedowan niyo, so iling te migdoma kaw den ki Cristo te pegtayod din te kelimahan dimateng kandin. Aw tomayod kaw te kelimahan, labi kaw pa meluba te aldaw aw komità kaw kandin te peglikò din.
1PE 4:14 Aw tompuyusen kaw tandà te pegtaking niyo ki Cristo, keilangan meluba kaw, so egbeyà-beyaan kaw te Espiritu Santo melangkaw.
1PE 4:15 Wedad peden otaw doton kenyo ipelumun so egbonò, aw egpenakaw, aw eglàpang te punù te gobirno, aw eg-inabut te doma.
1PE 4:16 Meneng aw pemilangen kaw tandà te pegpesakop niyo diyà ki Cristo, ikà niyo egkeyàyà. Pegpesiontong kaw diyà te Timanem, so egtewalen kaw menge sakop i Cristo.
1PE 4:17 Megtebò den se Timanem meg-okom, aw sakop din se onà din okomen. Yan aw sikitadon egsalig diyà kandin se onà okomen, labi pa medaet se kegemakan te menge otaw kenà egpenenalan te Mèpiya Indan impetaga-taga te Timanem tepad ki Cristo.
1PE 4:18 Doen kagi te Timanem insolat, “Pengkey melima se pegkelowà te otaw egtolò te Timanem lekat te pelumun, meneng eked palos pekelowà se otaw egkulu te Timanem aw eg-inang te salà.”
1PE 4:19 Yan aw ibeg te Timanem detengan kaw te kelimahan, keilangan eked kaw lengà te peg-inang niyo te metòlid. Salig kaw diyà te Timanem mig-inang te kedita, so egkeseligan sikandin.
1PE 5:1 Nayan, doen ipunù ko diyà te kedita niyo egpengibing te simbahan, so siaken heman se sebad egpengibing te simbahan. Kinità ko se pegpemilang ki Cristo kedengan, aw kitaen ko pa heman se kelangkaw din, so lomikò sikandin te eked kenamay.
1PE 5:2 Peg-ipat kaw te menge otaw egtoledaan niyo, so insalig dan te Timanem diyà kenyo. Peg-ipat kaw kandan kenà lekat te pegkeleges, meneng lekat te kèpiya te pedowan niyo, so yan se ibeg te Timanem kenyo. Pengibing kaw kandan kenà amon tendanan kaw, meneng keilangan meagka se pedowan niyo te pegtabang niyo kandan.
1PE 5:3 Ikà niyo egleges te menge otaw egtoledaan niyo, so insalig dan te Timanem diyà kenyo. Keilangan metòlid se eg-inangen niyo, so sikiyo se peg-ilingan dan.
1PE 5:4 Aw lomikò si Cristo Pengolo te kedita niyo egpengibing te simbahan, doen mèpiya ontong ibegay din diyà kenyo eked palos pegkedaet te wedad temanan.
1PE 5:5 Sikiyo heman menge kaling otaw, keilangan toloen niyo se menge egpengibing te simbahan. Ikà niyo egpelangkaw-langkaw, meneng keilangan megpedanà se kedita niyo diyà te menge doma niyo, so doen kagi te Timanem insolat te meinang poon te Timanem se otaw egpelangkaw-langkaw, meneng egtebangan din se otaw egpedanà.
1PE 5:6 Yan keilangan megpedanà kaw diyà te Timanem Metolos, so aw domateng se aldaw pinemallì din, inangen kaw din melangkaw.
1PE 5:7 Pengkey eden se ketetana niyo, salig kaw gayed diyà kandin, so sikandin se eg-ipat kenyo.
1PE 5:8 Peg-ahà kaw. Keilangan megpeketagad kaw, so egpengemahà se poon tadon si Satanas te otaw pegbàtan din, iling te liyon binallos gayed egpengemahà te okadan niyan aw kànen.
1PE 5:9 Salig kaw diyà te Timanem, aw ato kaw ki Satanas, so netegahan niyo te kenà olò sikiyo se egdetengan te kelimahan, meneng nelimahan heman se kedita te doma niyo egpemenal dini lanto te tanà.
1PE 5:10 Pengkey nelimahan kaw den seini, meneng mepenga iyan te eked kenamay. Gayed egtabang se Timanem, aw tinawal kaw din amon megdoma kaw kandin te wedad temanan tandà te pegsebad niyo diyà ki Cristo. Penga te pegtayod niyo te kelimahan, Timanem se meg-inang kenyo mesikop aw domasel, aw sikandin se memegay kenyo te eneg din.
1PE 5:11 Sikandin se lomowan te wedad temanan. Metoman iyan.
1PE 5:12 Si Silas se migtelaban kanak te pegsolat ko kani. Sikandin se kedowa tadon te pegpemenal, aw netegahan ko te egkeseligan sikandin. Pengkey pilabok se kagi ko kenyo seini, meneng impesolat ko ini amon meantag se pedowan niyo. Ibeg ko ketegahan niyo te seini se kebenalan ingkeliwat ko diyà kenyo tepad te tabang te Timanem kenitadon. Peg-aneng-aneng kaw gayed tepad kenyan.
1PE 5:13 Eg-eneng-enengen kaw te kedita te otaw pinemallì te Timanem aw migpesakop diyà kandin dini te lonsod te Babilonya. Eg-aneng-aneng heman si Marcos kenyo. Iling sikandin te batà ko.
1PE 5:14 Pegpeliyagay kaw se kedita niyo egpemenal, so yan se pengilala te egpedekelay kidon te pedowan. Ibeg ko, doen kelinaw te pedowan te kedita niyo migpesakop diyà ki Cristo.
2PE 1:1 Se solat seini lekat kanak si Simon, doma ngadan ko si Pedro. Sineligan a i Jesu Cristo aw ininang a sogounun din. Seini se solat ko diyà te kedita niyo simalig diyà ki Jesu Cristo. Sikandin se Timanem egpelowà kenitadon. Tandà te ketòlid din, ininang kaw din heman otaw simalig diyà kandin iling te pegsalig day diyà kandin.
2PE 1:2 Ibeg ko ontò kaw tebangan te Timanem, aw inangen din heman ontò melinaw se pedowan niyo pineokit te peg-iling niyo tepad te Timanem aw tepad te Pengolo tadon si Jesu Cristo.
2PE 1:3 Tinebangan kidon te Timanem Metolos amon gayed kidon meketolò te ibeg din dalem te peg-ogpà tadon dini lanto te tanà. Yan se ininang din so netegahan tadon den sikandin. Tinawal kidon din amon mekeakop kidon diyà te kelangkaw din aw kèpiya din.
2PE 1:4 Lekat te kèpiya te pedowan din, meelagà aw ontò mèpiya se pakang din kenyo amon pineokit kenyan meketig-apò kaw te kandin ketanem, aw amon eked kaw pekeinang te mekedaet ibeg te pedowan te otaw dini te keneyonan.
2PE 1:5 Yan se doun te keilangan megpekeaseb kaw meg-inang te mèpiya. Aw meg-inang kaw te mèpiya, keilangan megkebiyasa kaw heman.
2PE 1:6 Aw biyasa kaw, keilangan temengan niyo se ibeg niyo meg-inang te medaet. Aw meketameng kaw te ibeg niyo, keilangan meg-iling kaw heman te pegtayod te kelimahan. Aw meketayod kaw te kelimahan, keilangan tomolò kaw heman te ibeg te Timanem.
2PE 1:7 Aw meketolò kaw te ibeg te Timanem, keilangan megpeidoway kaw heman. Aw egpeidoway kaw, keilangan dakel heman se pedowan niyo diyà te kedita te otaw.
2PE 1:8 Aw kidoen kenyo se kedita niyan, doen dakel ontong niyo te pegketaga-taga niyo te Pengolo tadon si Jesu Cristo.
2PE 1:9 Aw doen otaw nemenal ki Cristo meneng kenà iling kenyan se eg-inangen din, iling sikandin te bota so kenà egpengità te kebenalan. Nelibelan din te lininisan sikandin te Timanem lekat te salà.
2PE 1:10 Menge kedowa ko, pinemallì kaw te Timanem aw tinawal kaw din. Yan pegpekeaseb kaw den megpetaga-taga te ontò kaw menge batà din pineokit te eg-inangen niyo, so aw mèpiya se eg-inangen niyo, eked palos pegkedaet se pegsalig niyo diyà kandin.
2PE 1:11 Aw yan se eg-inangen niyo, ontò kaw ipeawop kidoen te peglowan i Jesu Cristo egpelowà kenitadon. Lomowan se Pengolo tadon te wedad temanan.
2PE 1:12 Yan, pengkey netegahan niyo den se kedita niyan, pengkey nelobos den se pegtaking niyo te kebenalan pinemenalan niyo, meneng ibeg ko gayed a megpeaneng-aneng kenyo tepad kenyan.
2PE 1:13 Dalem te eked a pa kematay, aneng-aneng ko mèpiya aw gayed ko iyan ipeaneng-aneng kenyo amon eked niyo iyan kelibeli.
2PE 1:14 Netegahan ko te matay a te eked kenamay, so yan se impetaga-taga te Pengolo tadon si Jesu Cristo diyà kanak.
2PE 1:15 Yan se doun te doen isolat ko amon penga te pegkematay ko, eked niyo kelibeli se intoladà ko diyà kenyo.
2PE 1:16 Pegtoladà day kenyo tepad te tolos te Pengolo tadon si Jesu Cristo aw tepad te peglikò din dini te tanà, kenà iyan indan-indan lekat te aneng-aneng te otaw. Meneng sikami se kimità te kelangkaw i Cristo.
2PE 1:17 Migdoma kay kandin kedengan te pegduyun te Timanem Amay kandin aw pegpelangkaw din kandin. Dinineg day se kagi te Timanem Melangkaw, kagi din, “Seini se Batà ko. Dakel se pedowan ko kandin, aw ontò a neluba kandin.”
2PE 1:18 Sikami se dimineg te kagi te Timanem sìyan lekat te langit, so timaking kay ki Jesus kedengan doton te bontod te pegpekità te Timanem diyà kandin.
2PE 1:19 Yan se doun te neleseb se pedowan day te keseligan se kagi te Timanem tepad ki Cristo ingkeliwat te menge telekeliwat din gebii. Keilangan menenalan kaw heman kenyan, so se insolat dan, yan se iling te solò eg-anyag diyà te kengitngitan lamig te aldaw te pegdateng i Cristo. Iling sikandin te bitoen eg-anyag te medapag aldaw, aw inangen din melowa se aneng-aneng niyo.
2PE 1:20 Seini se melangkaw te kedita ipeaneng-aneng ko kenyo. Wedad otaw mekelabet te kagi te Timanem insolat te menge telekeliwat din gebii singed aw tebangan sikandin te Timanem,
2PE 1:21 so kenà lekat te aneng-aneng te otaw se kagi intoladà te menge telekeliwat din, meneng lekat iyan te Timanem. So pigbeyà-beyaan dan te Espiritu Santo, yan kagi te Timanem se inikagi dan.
2PE 2:1 Gebii doen menge otaw migpelingo-lingo te telekeliwat dan te kagi te Timanem, aw doen heman menge otaw megtoladà songkani megpelingo-lingo te lekat te Timanem se ipegtoladà dan. Meneng kebolalaw se itoladà dan, aw yan se mekedaet te pegsalig niyo diyà te Timanem. Eked dan keibeg aw lomowan kandan se Pengolo tadon migtansò kandan, aw yan egpedetengen dan se kededàtan te eked kenamay.
2PE 2:2 Medita se otaw egpemenal meboyo meg-inang te medaet iling kandan, aw yan se doun te silahen heman se kebenalan egtekingan tadon.
2PE 2:3 Tandà te ibeg dan mengewarta, megtoladà dan kenyo te kebolalaw amon mengabat dan te kwarta niyo. Nenamay den doen pelumun impetagad kandan, aw agpet den dan ipelumun te Timanem.
2PE 2:4 Gebii doen menge anghil mig-inang te salà, meneng wedà din dan keidowi, so impeibing din dan doton te kilot. Impegapos din dan doton te kengitngitan lamig domateng se aldaw te peg-okom.
2PE 2:5 Gebii te aldaw i Noe te peg-inang te kedita te otaw te salà, wedà din dan heman keidowi, so lininep din se tanà te wayeg aw nelemes se kedita dan wedà taking kandin. Olò din pinolò si Noe migtoladà te keilangan meg-inang dan te metòlid, aw sipat te doma pito sakop te pamilya din.
2PE 2:6 Gebii, impelumun heman te Timanem se tege Sodoma aw tege Gomora tandà te medaet ininang dan. Tigkan din dan sinonog sipat lonsod inogpaan dan amon metaga-taga se kedita te otaw aw eden se detengan te otaw egpekesalà.
2PE 2:7 Meneng si Lot olò se impelowà din, so metòlid se eg-inangen din. Ontò nepuluk se pedowan din so wedad yàyà te menge otaw kidoen mig-inang te medaet.
2PE 2:8 Dalem te peg-ogpà i Lot doma kandan, kinità din aw dinineg din se medaet eg-inangen dan te kelikit te aldaw. Ontò nepuluk se pedowan din tepad kenyan, so metòlid se eg-inangen din.
2PE 2:9 Pineokit kenyan, netegahan tadon te biyasa se Timanem megtabang te otaw egpenimanem amon eked dan peg-inang te salà. Biyasa heman sikandin domaeg te otaw eg-inang te medaet, aw ipetagad din dan lamig te aldaw te pegpelumun din kandan.
2PE 2:10 Ontò medaet se pelumun din te kedita te otaw egtaking te medaet ibeg te lawa dan aw eked tolò te Timanem. Iling heman kenyan se menge otaw egpelingo-lingo te lekat te Timanem se ipegtoladà dan. Mebolot dan, aw kandan ibeg se egtekingan dan. Kenà dan egsagman te doen kelangkaw doton te langit, meneng egtompuyus dan kandan.
2PE 2:11 Pengkey labi pa melangkaw se menge anghil diyà te menenoladà sìyan, meneng kenà dan egtompuyus kandan diyà te Timanem.
2PE 2:12 Meneng se menenoladà sìyan egtoladà te kebolalaw, pengkey eden se ibeg te pedowan dan, yan se inangen dan. Iling dan te menge menenanap te kebenesan wedad aneng-aneng aw wedad detengan dan meneng olò dekepen aw iyawen. Egtompuyus dan te kedita wedà dan ketegahi, meneng ipelumun dan te wedad temanan tandà te eg-inangen dan medaet.
2PE 2:13 Medaet se detengan dan so medaet se ininang dan. Pengkey aldaw, wedad yàyà dan egtaking te medaet ibeg te pedowan dan. Yan egsilahen kaw te menge doma otaw, so aw komaen kaw, makop se menge menenoladà sìyan diyà kenyo. Meneng kenà mèpiya se tod dan, so ibeg dan meg-akal kenyo.
2PE 2:14 Aw komità dan te bayi, ibeg dan leyokan dan. Eked lengà se ibeg dan meg-inang te salà. Biyasa dan egboyo te menge otaw egdowa-dowa tepad te pegtaking dan te Timanem. Nelegeb se pedowan dan te peg-ingà. Eked dan pekelowà lekat te pelumun te Timanem.
2PE 2:15 Neinang dan iling te otaw migketading, so simoway dan lekat te dalan pesalo doton te Timanem. Se eg-inangen dan, yan se iling te medaet ininang te telekeliwat te kagi te Timanem gebii si Balaam batà i Bosor. Tandà te ibeg din te kwarta ibegay diyà kandin, timandù sikandin meg-inang te medaet.
2PE 2:16 Meneng migsagda se Timanem kandin. Impeikagi te Timanem se kodà iningedanan asno sinekayan din iling te kagi te otaw, aw yan nebelebagan se tod din medaet.
2PE 2:17 Se menge menenoladà sìyan egtoladà te kebolalaw, wedad ontong niyo kandan, so iling dan te selep neeti. Iling dan te labon wedad odan eg-ibingen te kelamag. Impetagad te Timanem se ogpeanan dan kidoen te kengitngitan doton te kilot.
2PE 2:18 Iling te medalem se ipegtoladà dan, meneng wedad kebenalan niyan. Pineokit te medaet ibeg te lawa, egboyowen dan se menge otaw kaling timanan te menge doma dan eg-inang te medaet.
2PE 2:19 Egtoladà dan te doen kelowaan te kedita te otaw tomaking kandan so mepakay dan meg-inang te pengkey eden se ibeg dan. Meneng sikandan se neallang te kededàtan, so pengkey eden se egbayà-bayà te otaw, yan se mekeallang kandin.
2PE 2:20 Aw egketaga-taga se menge otaw tepad te Pengolo tadon si Jesu Cristo migpelowà kenitadon, timanan dan te medaet keogpà te otaw dini te keneyonan. Meneng aw meboyo dan, aw todà dan dàgen te kededàtan, ontò medaet se keogpà dan labi pa medaet diyà te keogpà dan te wedà dan pa ketaga-taga tepad ki Cristo.
2PE 2:21 Pengkey medaet aw eked palos ketaga-taga se otaw te doen peokit ininang te Timanem amon meg-aneng-aneng sikandin te metòlid kidon, meneng labi pa medaet aw metaga-taga se otaw kenyan aw penga niyan tominàyog dan kenyan aw eked dan tolò te kagi te Timanem intoladà diyà kandan.
2PE 2:22 Pineokit kandan, netegahan tadon te benal se eg-ikegiyen seini, “Gayed eglikò se toyang egpengaen te indelowak din.” Benal heman se doma eg-ikegiyen, “Pengkey digosen se osa, meneng todà tomonà doton te pasak.”
2PE 3:1 Nayan kedita niyo nedekelan ko te pedowan, seini se ikedowa solat ko kenyo. Todà a simolat kenyo so megpeaneng-aneng a kenyo tepad te kebenalan tapay ko intoladà kenyo amon metòlid se aneng-aneng niyo.
2PE 3:2 Ibeg ko meg-aneng-aneng kaw tepad te kagi insolat te menge telekeliwat te kagi te Timanem gebii, aw tepad te insogò te Pengolo tadon migpelowà kenitadon, sìyan impetaga-taga din diyà kenyo pineokit te menge sogounun din.
2PE 3:3 Seini se melangkaw te kedita ipeaneng-aneng ko kenyo. Aw agpet den se temanan te keneyonan, doen menge otaw meg-inang te pengkey eden se ibeg te pedowan dan. Mebebayat dan kenyo
2PE 3:4 aw mikagi dan, “Eked kay pemenal te impakang i Jesu Cristo te lomikò sikandin dini te tanà. Nematay se kemonaan tadon gebii, meneng gayed onawa se keneyonan lekat te peg-inang kenyan lamig songkani.”
2PE 3:5 Meneng se otaw mikagi kenyan, komulu dan te kebenalan seini. Gebii te peg-inang te Timanem te kedita, olò sikandin minikagi aw yan ininang din se langit aw tanà. Ininang din se tanà diyà te tengà-tengà te dagat, aw ipegpetilles din se kedita pineokit te wayeg.
2PE 3:6 Wayeg heman se inlinep din te tanà gebii, aw nelemes se kedita te otaw.
2PE 3:7 Doen aldaw domateng te sonogen din se langit aw tanà egkitaen tadon seini. Olò sikandin mikagi aw yan mesonog. Meneng eked din iyan sonogi singed aw domateng se aldaw te peg-okom din te kedita te otaw wedà pegpesakop diyà kandin, so pegbàtan din dan te apoy.
2PE 3:8 Kedita niyo egkedekelan ko te pedowan, ikà niyo egkelibel kani. Diyà te aneng-aneng te Pengolo tadon, eked kenamay se sebad melalan se omay. Diyà te kandin aneng-aneng, se kenemayan te sebad melalan se omay, iling olò te sebad se aldaw.
2PE 3:9 Pengkey doen otaw eg-aneng-aneng te eg-enggaen te Timanem se pegtoman din te pakang, meneng kenà din eg-enggaen. Ontò medalem se pedowan din, so eked sikandin keibeg te doen otaw kebàtan. Ibeg din megselsel se kedita te otaw te salà dan.
2PE 3:10 Tomanen te Pengolo tadon se pakang din. Iling te pegdateng te menenakaw se peglikò te Pengolo tadon, so wedad otaw metaga-taga aw kano likò. Aw domateng se aldaw sìyan, dinegen se logo-logo, so megkewedad se langit. Mesonog heman se aldaw, aw bolan, aw menge bitoen, aw megkewedad se kedita niyan. Tomalag mesonog se tanà aw kedita te ininang dini lanto te tanà.
2PE 3:11 So doen aldaw domateng aw kebàtan se kedita niyan, yan keilangan ontò kaw tomaking te Timanem aw meg-inang kaw heman te metòlid amon eked kaw pekesipat.
2PE 3:12 Egtagad aw egpeliman kaw te aldaw te pegtoman te Timanem te pakang din. Aw domateng se aldaw sìyan, mesonog se langit aw megkewedad iyan. Metonaw heman se aldaw, aw bolan, aw kedita te bitoen tandà te keinit te apoy.
2PE 3:13 Meneng migpakang heman se Timanem te inangen din se kaling langit aw kaling tanà ogpaan te kedita te otaw eg-inang te metòlid, aw yan se egpelimanan tadon.
2PE 3:14 Nayan, kedita niyo egkedekelan ko te pedowan, dalem te pegtagad niyo te aldaw sìyan, keilangan megpekeaseb kaw menimanem amon wedad salà niyo isila te Timanem, aw amon melinaw se pedowan niyo.
2PE 3:15 Aw aneng-aneng niyo te iling te eg-enggaen te Pengolo tadon se peglikò din, ikà niyo egkelibel te egtagad pa sikandin amon doen pa aldaw mekelowà se otaw lekat te pelumun din. Yan heman se impetaga-taga te kedowa tadon si Pablo egkedekelan tadon te pedowan. Impetaga-taga din iyan diyà kenyo te pegsolat din kenyo, so binegayan sikandin te Timanem te kebiyasa.
2PE 3:16 Iling heman kenyan se ipegtoladà i Pablo diyà te kedita te solat din. Doen heman insolat din melima kelebetan, aw yan se todaen te menge otaw wedà ontò ketaga-taga te kebenalan aw wedà kelobos se pegsalig dan diyà te Timanem. Iling heman kenyan se pegtodà dan te menge doma kagi te Timanem insolat, aw yan se doun te pegbàtan din dan.
2PE 3:17 Meneng menge kedowa ko egkedekelan ko te pedowan, tapay kaw den netaga-taga tepad te menge otaw sìyan. Yan se doun te keilangan meg-ahà kaw amon eked kaw keekali te kebolalaw ipegtoladà te menge otaw mededaet. Peg-ahà kaw amon eked kaw kelibel te kebenalan pinemenalan niyo.
2PE 3:18 Keilangan gayed kaw meg-iling tepad te kèpiya ipegpemegay te Pengolo tadon si Jesu Cristo egpelowà kenitadon. Keilangan meg-iling kaw heman te kebenalan ipetaga-taga din diyà kenyo. Sikandin se iduyun seini aw lamig te wedad temanan. Metoman iyan.
1JO 1:1 Gebii te wedà pa inangi se keneyonan, tapay den doen si Cristo iningedanan Kagi te Timanem. Sikandin se egpemegay te kaling pedowan wedad temanan. Pegpekeotaw din dini te tanà, dinineg day se kagi din, aw ontò day heman sikandin kinità, aw pinemàdan day heman sikandin.
1JO 1:2 Impekità sikandin egpemegay te kaling pedowan, aw kimità kay kandin, aw benal se kagi day te kinità day sikandin. Megtoladà kay heman kenyo te sikandin se egpemegay te kaling pedowan wedad temanan, aw sikandin se gayed egdoma te Timanem Amay, aw sikandin se dimini amon megpekità diyà kenami.
1JO 1:3 Se ontò day kinità aw dinineg, yan se ipegtoladà day heman kenyo, amon makop kaw heman diyà kenami, so migpesigelakay kay te Timanem Amay aw Batà din si Jesu Cristo.
1JO 1:4 Simolat kay heman kenyo amon mesikop se keluba tadon.
1JO 1:5 Seini se intoladà i Jesu Cristo dinineg day, aw ipegtoladà day heman kenyo. Timanem se kelowahan, aw yan wedad palos kengitngitan diyà kandin.
1JO 1:6 Aw mikagi kidon te migpesigelakay kidon te Timanem, meneng egtaking kidon pa te kengitngitan aw eg-inang kidon te medaet, yan bolelawun kidon so kenà kidon egtaking te kebenalan.
1JO 1:7 Meneng aw egtaking kidon te kelowahan iling te Timanem eg-ogpà diyà te kelowahan, yan migpesigelakay se kedita tadon egtaking kandin, aw dipanog te Batà din si Jesus se ipeg-onaw kenitadon lekat te kedakel te salà tadon.
1JO 1:8 Aw mikagi kidon te wedad den palos salà tadon, neekalan kidon aw wedad heman kebenalan diyà kenitadon.
1JO 1:9 Meneng aw mikagi kidon te benal doen salà tadon, yan pegwedaden te Timanem se salà tadon, aw onawan kidon din lekat te medaet ininang tadon, so egkeseligan sikandin aw metòlid heman se eg-inangen din.
1JO 1:10 Simpana mikagi kidon te wedad palos salà ininang tadon, iling iyan te mekeikagi kidon te bolelawun se Timanem, aw wedà tadon pa ontò soli se kagi din diyà te pedowan tadon.
1JO 2:1 Menge batà ko te pegpemenal, seini se insolat ko kenyo amon eked kaw peg-inang te salà. Meneng aw doen otaw mekesalà, doen telekagon tadon kidoen te Timanem Amay, aw yan si Jesu Cristo wedad palos salà.
1JO 2:2 Sikandin se simelilin kenitadon inimetayan amon pegwedaden te Timanem se menge salà tadon. Kenà olò kenitadon salà se pegwedaden din, meneng salà te kedita te otaw te keneyonan se pegwedaden din.
1JO 2:3 Seini se pengilala amon ketegahan tadon te ontò Timanem se egtekingan tadon. Aw egtolò kidon te menge punù din, yan ketegahan tadon te egtaking kidon kandin.
1JO 2:4 Aw doen otaw eg-ikagi te egtaking sikandin te Timanem, meneng kenà egtolò te punù te Timanem, yan se otaw bolelawun aw wedad heman kebenalan diyà kandin.
1JO 2:5 Meneng se otaw egtolò te kagi te Timanem, yan se otaw ontò nelobos se kedakel te pedowan din diyà te Timanem. Yan se pengilala te ontò kidon den diyà te Timanem.
1JO 2:6 Aw eg-ikagi se otaw te diyà sikandin te Timanem, keilangan inangen din se kandin pegkeotawun iling te pegkeotawun i Jesu Cristo.
1JO 2:7 Menge kedowa ko egkedekelan ko te pedowan, kenà kaling se punù insolat ko kenyo seini, meneng tapay iyan impunù day diyà kenyo, so netegahan niyo iyan lekat te keteboan te pegpemenal niyo ki Cristo kedengan, so dinineg niyo kedengan se punù intoladà day kenyo.
1JO 2:8 Pengkey tapay iyan punù, meneng iling heman te kaling punù. Impetaga-taga se kebenalan te punù sìyan pineokit te ininang i Cristo aw pineokit heman te eg-inangen niyo, so migkewedad se kengitngitan dini kenitadon, aw doen den ontò benal kelowahan dini te pedowan tadon.
1JO 2:9 Se otaw eg-ikagi te eg-ogpà sikandin diyà te kelowahan, meneng egkebensi te menge doma otaw, yan se otaw gayed pa eg-ogpà diyà te kengitngitan.
1JO 2:10 Meneng se otaw doen dakel pedowan din diyà te menge doma otaw, yan se otaw eg-ogpà diyà te kelowahan, aw wedad mekepedogsò kandin.
1JO 2:11 Meneng se otaw egkebensi te menge doma otaw, yan se otaw eg-ogpà pa aw eglegeb diyà te kengitngitan. Eked sikandin ketaga-taga aw kenan sikandin pesalo, so eked sikandin kità tandà te kengitngit.
1JO 2:12 Menge batà ko te pegpemenal, simolat a den kenyo so ibeg ko megpeaneng-aneng a kenyo te pigwedad den te Timanem se salà niyo pineokit ki Jesu Cristo.
1JO 2:13 Menge obanen, simolat a den kenyo so ibeg ko megpeaneng-aneng a kenyo te egtaking kaw den ki Cristo tapay doen gebii te wedad pa keneyonan. Menge kaling otaw, simolat a den kenyo so ibeg ko megpeaneng-aneng a kenyo te dimaeg kaw den ki Satanas. Menge batà ko te pegpemenal, simolat a kenyo so ibeg ko megpeaneng-aneng a kenyo te egtaking kaw den diyà te Timanem Amay.
1JO 2:14 Menge obanen, simolat a kenyo so ibeg ko megpeaneng-aneng a kenyo te egtaking kaw den te Timanem tapay doen gebii te wedad pa keneyonan. Menge kaling otaw, simolat a kenyo so ibeg ko megpeaneng-aneng a kenyo te measeb kaw den egtaking te Timanem, aw insawol niyo se kagi te Timanem diyà te pedowan niyo, aw dimaeg kaw den ki Satanas.
1JO 2:15 Ikà niyo egtaking te medaet ketanem dini te keneyonan. Ikà niyo heman egkeibeg te medaet inang dini te keneyonan, so aw egkeibeg se otaw tomaking te medaet ketanem dini te keneyonan, yan eked sikandin keibeg tomaking te Timanem Amay.
1JO 2:16 Doen medaet ibeg te pedowan, aw doen heman kitaen te otaw aw keibegan dan, aw doen heman pegpelangkaw-langkaw dan tandà te kedònan dan, meneng se kedita niyan kenà lekat te Timanem Amay, so lekat iyan te keneyonan.
1JO 2:17 Meneng megkewedad se medaet ketanem dini te keneyonan te eked kenamay sipat medaet ibeg te otaw te keneyonan. Meneng se otaw egtoman te ibeg te Timanem, yan se otaw tomayod te wedad temanan.
1JO 2:18 Menge batà ko te pegpemenal, agpet den se temanan te keneyonan. Tapay niyo dinineg te doen pa sebad otaw domateng mato ki Cristo aw megpelangkaw-langkaw peden diyà kandin. Doen medita eg-ato ki Cristo dimateng den, aw yan netegahan tadon te agpet den se temanan te keneyonan.
1JO 2:19 Se menge eg-ato sìyan, kenà dan benal kedowa tadon te pegpemenal, aw yan nesayo den dan lekat kenitadon. Simpana benal dan kedowa tadon te pegpemenal, eked dan peden kesayo lekat kenitadon. Meneng nesayo den dan lekat kenitadon aw yan se pengilala te kenà dan benal kedowa tadon te pegpemenal.
1JO 2:20 Meneng se kedita niyo, binegayan kaw den i Cristo te Espiritu Santo, aw netaga-taga kaw den te kebenalan.
1JO 2:21 Simolat a kenyo kenà so wedà kaw ketaga-taga te kebenalan, meneng simolat a kenyo amon megpeaneng-aneng a kenyo te kebenalan tapay niyo netegahan. Netegahan niyo den heman te wedad kebolalaw eglekat te kebenalan.
1JO 2:22 Se otaw ontò bolelawun, yan se otaw eg-ikagi te kenà si Jesus se Misiyas. Yan se otaw eg-ato ki Cristo. Eked heman sikandin pemenal te Timanem Amay aw Batà din.
1JO 2:23 Aw eked pemenal se otaw te Batà te Timanem, eked heman sikandin pegpesakop diyà te Timanem Amay. Meneng aw mikagi se otaw te ontò sikandin nemenal te Batà te Timanem, migpesakop den heman sikandin diyà te Timanem Amay.
1JO 2:24 Nayan, keilangan sikopen niyo se pegpemenal niyo diyà te kagi te Timanem intoladà kenyo lekat te pegpemenal niyo ki Jesu Cristo lamig seini, so aw ontò niyo lobosen se pegpemenal niyo diyà te kagi te Timanem, diyà kaw te Timanem Amay aw Batà din.
1JO 2:25 Doen impakang i Jesus kenitadon, aw yan se kaling pedowan wedad temanan imbegay din.
1JO 2:26 Seini se insolat ko kenyo amon eked kaw keekali te menge menenoladà meibeg peden meg-akal kenyo.
1JO 2:27 Meneng ikà niyo egketetana, so eg-ogpaan kaw pa te Espiritu Santo imbegay i Jesu Cristo diyà kenyo. Yan wedad den keilangan te doma megtoladà kenyo aw eden se kebenalan aw eden se kebolalaw, so Espiritu Santo se megtoladà kenyo te kedita. Ontò benal se ipegtoladà din, aw kenà iyan kebolalaw. Yan keilangan meg-ogpà kaw diyà ki Cristo iling te intoladà te Espiritu Santo kenyo.
1JO 2:28 Nayan menge batà ko te pegpemenal, peg-ogpà kaw diyà ki Cristo amon eked kaw kelemitan aw eked kaw keyàyà te peglikò din.
1JO 2:29 So netegahan niyo den te metòlid se Batà te Timanem si Cristo, yan se doun te keilangan ketegahan niyo heman ini. Aw metòlid se eg-inangen te otaw, yan se pengilala te ininang dan te Timanem menge batà din.
1JO 3:1 Netegahan tadon den te ontò dakel se pedowan te Timanem Amay kenitadon, so iningedanan kidon din menge batà din, aw yan se ininang din kenitadon. Meneng se menge otaw kenà egtaking te Timanem, wedà dan pemenal te batà kidon te Timanem, so wedà dan pa pemenal te Timanem.
1JO 3:2 Menge kedowa egkedekelan ko te pedowan, batà kidon den te Timanem. Pengkey wedà tadon pa ketegahi aw eden se keilingan tadon te modi aldaw, meneng netegahan tadon te mekeiling kidon ki Cristo aw lomikò sikandin, so ontò tadon sikandin kitaen.
1JO 3:3 Aw ontò egpeliman se otaw te metoman iyan, yan se otaw megpelobos te kandin pedowan wedad salà iling ki Cristo.
1JO 3:4 Aw meg-inang se otaw te salà, punù te Timanem se linèpangan din, so se pegpekesalà, yan se peglàpang te punù te Timanem.
1JO 3:5 Netegahan niyo den te migpekeotaw si Jesu Cristo amon pegwedaden te Timanem se menge salà te otaw. Wedad palos salà i Jesu Cristo,
1JO 3:6 aw yan kenà eg-inang te salà se otaw eg-ogpà diyà kandin. Meneng aw gayed eg-inang se otaw te salà, yan se pengilala te wedà pa sikandin pemenal ki Cristo, aw wedà pa heman taking kandin.
1JO 3:7 Menge batà ko te pegpemenal, keilangan eked kaw keekali te doma otaw, so metòlid olò se otaw aw metòlid se eg-inangen din iling ki Jesu Cristo.
1JO 3:8 Meneng sakop i Satanas se otaw gayed megpedeleg te peg-inang te salà, so gayed migpedeleg si Satanas te peg-inang te salà lekat te gebii te wedà pa inangi se keneyonan lamig songkani. Yan migpekeotaw se Batà te Timanem si Jesus amon pegbàtan din se kedita te medaet inang i Satanas.
1JO 3:9 Se otaw ininang te Timanem batà din, yan se otaw kenà eg-inang te salà so binegayan sikandin te kaling pedowan lekat te Timanem. Eked sikandin peg-inang te salà so ininang den sikandin batà te Timanem.
1JO 3:10 Seini se pengilala amon ketegahan tadon aw sinu se menge batà te Timanem aw menge batà i Satanas. Aw doen otaw kenà metòlid se eg-inangen din aw wedad kedakel te pedowan din te menge doma otaw, yan se otaw kenà batà te Timanem.
1JO 3:11 Seini se kebenalan dinineg niyo lekat te pegpemenal niyo ki Cristo kedengan lamig songkani. Keilangan megpedekelay kidon te pedowan.
1JO 3:12 Keilangan eked kidon peg-iling ki Cain migpesakop diyà ki Satanas, so nengimatay te adi din. Nengimatay sikandin so medaet se eg-inangen din, aw miningà te adi din eg-inang te metòlid.
1JO 3:13 Yan menge kedowa ko, ikà niyo egkepela aw kebensihan kaw te otaw dini te keneyonan.
1JO 3:14 Impelowà kidon den lekat te kemetayun wedad temanan, aw binegayan kidon den heman te kaling pedowan wedad temanan. Netegahan tadon te benal iyan so dakel se pedowan tadon te menge doma otaw. Meneng eg-ogpà pa diyà te kemetayun se otaw wedad kedakel te pedowan din te doma,
1JO 3:15 so aw medaet se pedowan te otaw te doma, iling sikandin te nengimatay. Netegahan tadon den te wedad kaling pedowan wedad temanan diyà te otaw mengimatay te doma otaw.
1JO 3:16 Netegahan tadon den aw eden se ontò dakel pedowan, so neketagad si Jesu Cristo inimetayan amon megpelowà kenitadon lekat te salà. Yan sikitadon heman egpemenal, keilangan meketagad kidon imetayan amon ketebangan tadon se kedowa tadon.
1JO 3:17 Aw doen kedònan te otaw meketabang te doma otaw nelimahan, meneng eked sikandin pegtabang so wedad kedakel te pedowan din, yan se pengilala te wedad heman kedakel te pedowan din te Timanem.
1JO 3:18 Menge batà ko te pegpemenal, wedad ontong aw olò kidon mikagi te dakel se pedowan tadon te doma otaw meneng wedad ketomanan niyan. Keilangan ipekità tadon te benal dakel se pedowan tadon te doma otaw pineokit te tabang tadon kandan.
1JO 3:19 Aw megtabang kidon te doma otaw, yan ketegahan tadon te ontò kidon diyà te kebenalan, aw mekesinalay kidon heman te pedowan tadon egkitaen din.
1JO 3:20 Pengkey melidò se pedowan tadon tandà te peg-inang tadon te salà kedengan, meneng labi pa melangkaw se keido te Timanem, so netaga-taga sikandin te kedita pengkey wedà tadon ketegahi.
1JO 3:21 Menge kedowa egkedekelan ko te pedowan, so netegahan tadon den te wedad den salà tadon, eked den kepuluk se pedowan tadon, aw wedad heman medaet kitaen te Timanem kidoen te pedowan tadon.
1JO 3:22 Pengkey eden se pemoyoen tadon diyà kandin, netegahan tadon te mekinawà tadon iyan, so egtolò kidon te menge punù din aw ibeg din.
1JO 3:23 Seini se impunù din kenitadon, te keilangan somalig kidon diyà te Batà din si Jesu Cristo, aw megpedekelay kidon heman te pedowan iling te intoladà din kenitadon.
1JO 3:24 Se kedita te otaw egtolò te punù te Timanem, diyà dan te Timanem aw se Timanem heman diyà kandan. Netegahan tadon te diyà kenitadon se Timanem so pineokit te Espiritu Santo imbegay din kenitadon.
1JO 4:1 Menge kedowa egkedekelan ko te pedowan, ikà niyo egpemenal te kedita te otaw megtoladà kenyo singed aw onà kaw mengemahà aw lekat te Timanem se intoladà dan, so medita se otaw eglegeb-legeb dini te keneyonan aw egpelingo-lingo te telekeliwat dan te kagi te Timanem.
1JO 4:2 Seini se pengilala amon ketegahan niyo aw lekat te Espiritu Santo se itoladà dan. Se otaw mikagi te benal migpekeotaw si Jesu Cristo dini te keneyonan, yan se otaw egtoladà te kagi lekat te Timanem.
1JO 4:3 Meneng aw eked ikagi se otaw te migpekeotaw si Jesus, kenà lekat te Timanem se itoladà din, so yan se otaw lekat te eg-ato ki Cristo. Tapay tadon netegahan te domateng se eg-ato ki Cristo, aw dini den sikandin te keneyonan.
1JO 4:4 Menge batà ko te pegpemenal, diyà kaw den te Timanem aw yan domaeg kaw te kedita dan egkeliwat te kagi kenà lekat te Timanem, so doen eg-ogpà diyà te pedowan niyo labi pa melangkaw diyà ki Satanas pengolo te medaet otaw dini te keneyonan.
1JO 4:5 Egtaking te medaet ketanem te keneyonan se kedita dan egkeliwat te kagi kenà lekat te Timanem, aw tepad te ketanem te keneyonan se ipegtoladà dan. Egpenenalan heman kandan se kedita te otaw egtaking te ketanem te keneyonan.
1JO 4:6 Meneng diyà kidon den te Timanem, aw yan se doun te egpenenelanen te kedita te otaw egtaking te Timanem se ipegtoladà tadon. Meneng kenà kidon egpenenelanen te otaw kenà egtaking te Timanem. Yan se pengilala amon ketegahan tadon aw sinu se egtaking te kebenalan aw sinu se egtaking te kebolalaw.
1JO 4:7 Menge kedowa egkedekelan ko te pedowan, keilangan gayed kidon megpedekelay te pedowan, so Timanem se eglekatan te dakel pedowan. Se otaw doen dakel pedowan din, yan se ininang te Timanem batà din aw egtaking heman te Timanem.
1JO 4:8 Meneng se otaw wedad kedakel te pedowan din, yan se otaw kenà egtaking te Timanem, so ontò dakel se pedowan te Timanem.
1JO 4:9 Impetaga-taga te Timanem te ontò dakel se pedowan din kenitadon, so insogò din se Batà din temisa dini te keneyonan amon begayan kidon din te kaling pedowan pineokit kandin.
1JO 4:10 Yan ketegahan tadon aw eden se ontò benal kedakel te pedowan, so kenà kedakel te pedowan tadon diyà te Timanem, meneng kedakel te pedowan te Timanem kenitadon, so insogò din se Batà din amon somelilin kenitadon imetayan, aw amon mekelowà kidon lekat te salà.
1JO 4:11 Menge kedowa egkedekelan ko te pedowan, so ontò dakel se pedowan te Timanem kenitadon, yan keilangan megpedekelay kidon heman te pedowan.
1JO 4:12 Wedad palos otaw kimità te Timanem. Meneng aw megpedekelay kidon te pedowan, yan se pengilala te eg-ogpà se Timanem diyà te pedowan tadon, aw mesikop heman se kedakel te pedowan din diyà kenitadon.
1JO 4:13 Netegahan tadon te diyà kidon kandin aw diyà heman sikandin kenitadon so pineokit te Espiritu Santo imbegay din kenitadon.
1JO 4:14 Kinità day se Batà te Timanem migpekeotaw, aw mekeikagi kay te benal sikandin insogò te Timanem Amay amon megpelowà te kedita te otaw lekat te salà.
1JO 4:15 Se otaw mikagi te benal Batà te Timanem si Jesus, yan se otaw doen Timanem diyà kandin, aw diyà heman sikandin te Timanem.
1JO 4:16 Yan netegahan tadon te dakel se pedowan te Timanem kenitadon, aw yan se egseligan tadon. Ontò dakel se pedowan te Timanem. Se otaw doen dakel pedowan din, yan se otaw diyà te Timanem aw se Timanem heman diyà kandin.
1JO 4:17 So sikitadon diyà kandin, aw mesikop se kedakel te pedowan din kenitadon, yan ketegahan tadon te wedad medaet kitaen te Timanem kidoen te pedowan tadon aw domateng se aldaw te peg-okom te Timanem te kedita te otaw. Pengkey dini kidon pa te keneyonan, meneng iling ki Cristo se kenitadon pegkeotawun.
1JO 4:18 Eked kidon den kelemitan aw nedekelan kidon te pedowan, so aw memenal kidon te ontò kidon nedekelan te pedowan, eked kidon kelemitan. Meneng melemitan se otaw ipelumun, so wedà dan pemenal te nedekelan dan te pedowan.
1JO 4:19 Doen dakel pedowan tadon so monà kidon nedekelan te Timanem te pedowan.
1JO 4:20 Aw mikagi se otaw te dakel se pedowan din te Timanem, meneng wedad kedakel te pedowan din te menge doma otaw, yan se bolelawun, so aw wedad kedakel te pedowan te otaw te menge doma din egkitaen, yan labi pa wedad kedakel te pedowan din te Timanem kenà din egkitaen.
1JO 4:21 Seini se impunù te Timanem kenitadon. Se otaw dakel se pedowan din te Timanem, yan se otaw keilangan dakel heman se pedowan din te menge doma din.
1JO 5:1 Se kedita te otaw nemenal te si Jesus se Misiyas, yan se menge batà te Timanem. Aw dakel se pedowan tadon te Timanem Amay, dakel heman se pedowan tadon te kedita te menge batà din.
1JO 5:2 Aw dakel se pedowan tadon te Timanem aw egtolò kidon te menge punù din, yan se pengilala te dakel se pedowan tadon te menge doma batà te Timanem,
1JO 5:3 so metaga-taga kidon te dakel se pedowan tadon te Timanem pineokit te pegtolò tadon te menge punù din. Kenà melima se pegtolò tadon te punù din,
1JO 5:4 so se kedita tadon menge batà te Timanem, mekedaeg kidon te kedita te medaet dini te keneyonan, so nekedaeg kidon den te medaet pineokit te kebenalan pinemenalan tadon.
1JO 5:5 Se otaw nemenal te si Jesus se Batà te Timanem, yan se mekedaeg te kedita te medaet dini te keneyonan.
1JO 5:6 Netegahan tadon te si Jesu Cristo se Batà te Timanem pineokit te wayeg te pegbonyag kandin, aw pineokit te dipanog te pegkematay din. Netegahan tadon iyan kenà olò pineokit te pegbonyag ki Jesus, meneng pineokit heman te pegkematay i Jesus kidoen te kros.
1JO 5:7 Eg-indan heman se Espiritu Santo te kebenalan sìyan so eked sikandin pegkebolalaw.
1JO 5:8 Yan netegahan tadon te si Jesus se Batà te Timanem pineokit te telo seini, Espiritu Santo, aw wayeg, aw dipanog. Onawa se impetaga-taga te telo sìyan.
1JO 5:9 Aw egseligan tadon se kagi te menge otaw, labi pa keseligan se kagi te Timanem, so Timanem se minikagi te benal tepad te Batà din.
1JO 5:10 Aw nemenal se otaw te Batà te Timanem, ontò din insawol se kebenalan sìyan kidoen te pedowan din. Meneng aw eked pemenal se otaw te Timanem, aneng-aneng din bolelawun se Timanem, so eked sikandin pemenal te inikagi te Timanem tepad te Batà din.
1JO 5:11 Seini se intoladà te Timanem, te doen kaling pedowan wedad temanan imbegay din kenitadon, aw imbegay din iyan pineokit te Batà din si Jesus.
1JO 5:12 Se otaw kiminawà te Batà te Timanem, yan se otaw doen kaling pedowan wedad temanan. Meneng se otaw wedà kinawà te Batà te Timanem, yan se otaw wedad kaling pedowan diyà kandin.
1JO 5:13 Sinolatan ko sikiyo nemenal den diyà te Batà te Timanem amon ontò niyo ketegahan te doen den kaling pedowan niyo wedad temanan.
1JO 5:14 Egseligan tadon sikandin, so pengkey eden se pemoyoen tadon meketepad te kandin ibeg, yan menenalan sikandin.
1JO 5:15 So netegahan tadon te menenalan sikandin te kedita te pemoyoen tadon kandin, yan netegahan tadon heman te nekinawà tadon den se pinemoyò tadon kandin.
1JO 5:16 Aw megkità kaw te doma niyo egpemenal meg-inang te salà kenà egdateng te kemetayun wedad temanan, megtawal-tawal kaw kandin amon memegay se Timanem kandin te kaling pedowan aw eked dateng te kemetayun se salà din. Doen salà ipelumun te kemetayun wedad temanan, meneng eked a ikagi te keilangan megtawal-tawal kaw tepad kenyan.
1JO 5:17 Se kedita te eg-inangen tadon medaet, yan se salà, meneng doen salà kenà egdateng te kemetayun wedad temanan.
1JO 5:18 Netegahan tadon ini. Aw ininang kidon den menge batà te Timanem, yan kenà kidon egpedeleg eg-inang te salà, so egtonggoan kidon te Batà te Timanem amon eked kidon pegtindàti i Satanas.
1JO 5:19 Netegahan tadon te sakop kidon te Timanem. Meneng se kedita te otaw egtaking te medaet dini te keneyonan, yan se menge sakop i Satanas.
1JO 5:20 Netegahan tadon heman te dimini se Batà te Timanem te keneyonan amon ketegahan tadon se benal Timanem. Sikitadon diyà te benal Timanem so diyà kidon te Batà din si Jesu Cristo. Sikandin se benal Timanem, aw sikandin se eglekatan te kaling pedowan wedad temanan.
1JO 5:21 Menge batà ko te pegpemenal, ikà niyo egtaking te kenà benal timanem.
2JO 1:1 Se solat seini lekat kanak ininang egpengibing te simbahan. Sinolatan ko sikona bayi pinemallì te Timanem, aw menge batà nikaw ontò ko nedekelan te pedowan. Kenà olò siaken se doen dakel pedowan kenyo, meneng dakel heman se pedowan te kedita te otaw netaga-taga te kebenalan.
2JO 1:2 Dakel se pedowan day kenyo so doen kebenalan diyà te pedowan tadon te wedad temanan.
2JO 1:3 Metoman kidon tebangan, aw keidowan, aw begayan te kelinaw te pedowan lekat te Timanem Amay aw Batà din si Jesu Cristo, so yan se ibegay dan diyà te kedita te otaw netaga-taga te kebenalan aw egpedekelay heman te pedowan.
2JO 1:4 Ontò neluba se pedowan ko, so kinità ko te doen menge batà no egtaking te kebenalan iling te punù te Timanem Amay diyà kenitadon.
2JO 1:5 Simolat a den kamno bayi amon ipeaneng-aneng ko kamno te keilangan megpedekelay kidon te pedowan. Kenà kaling se punù insolat ko kenyo seini, so tapay niyo iyan netegahan lekat te ketebò te pegpemenal niyo ki Cristo kedengan.
2JO 1:6 Ipetaga-taga tadon te dakel se pedowan tadon te Timanem pineokit te pegtolò tadon te menge punù din. Seini se impunù kenyo lekat te ketebò te pegpemenal niyo, te keilangan dakel se pedowan niyo.
2JO 1:7 Medita se otaw eglegeb dini te keneyonan aw eg-akal dan te doma otaw, so kenà dan egtoladà te kebenalan tepad te pegpekeotaw i Jesu Cristo. Iling kenyan se eg-ikegiyen te otaw eg-akal aw eg-ato ki Cristo.
2JO 1:8 Yan peg-ahà kaw amon eked pegkewedad se ontong tepad te ininang niyo, meneng kinewaen niyo se ontong te modi aldaw.
2JO 1:9 Aw somoway se otaw lekat te kebenalan intoladà i Jesu Cristo, aw isogpat din se kebolalaw diyà te kebenalan, wedad Timanem kidoen kandin. Meneng aw ontò egsalig se otaw diyà te kebenalan intoladà i Jesu Cristo, kidoen kandin se Timanem Amay aw Batà.
2JO 1:10 Aw doen otaw domateng kenyo aw doen itoladà din kenyo kenà onawa te kebenalan intoladà i Jesu Cristo, ikà niyo egpepenayit kandin diyà te balay niyo. Ikà niyo heman egliyag kandin,
2JO 1:11 so aw lomiyag kaw kandin, mekeakop kaw heman diyà te medaet inang din.
2JO 1:12 Doen pa medita kagi isolat ko peden kenyo, meneng eked a den solat, so ibeg ko meglegeana a kidoen kenyo amon megpebelaw-belaway kidon, so ibeg ko mesikop se keluba tadon.
2JO 1:13 Na, se menge batà te kedowa no bayi pinemallì te Timanem, minikagi dan te eg-aneng-aneng dan kenyo.
3JO 1:1 Se solat seini lekat kanak ininang egpengibing te simbahan. Simolat a kamno Gayo, sigalak ko ontò ko egkedekelan te pedowan.
3JO 1:2 Sigalak ko, egtawal-tawal a diyà te Timanem te mèpiya se keogpà nikaw aw mèpiya se lawa nikaw, so netegahan ko te mèpiya pa se pegpemenal nikaw.
3JO 1:3 Ontò a neluba, so pegdini te menge kedowa ta, gayed a dan eg-indanan te nelobos se pedowan no diyà te Timanem, so ontò ka ekon egtaking te kebenalan.
3JO 1:4 Ontò a egkeluba aw egdinegen ko te egtaking te kebenalan se menge batà ko te pegpemenal.
3JO 1:5 Kedowa egkedekelan ko te pedowan, ontò ka egkeseligan, so egsegmanen no se menge kedowa ta te pegpemenal eg-apit doton kamno, pengkey otaw lekat te doma ogpeanan.
3JO 1:6 Mig-indan dan diyà te menge otaw egpemenal dini, te dakel se pedowan no kandan. Mèpiya aw gayed ka megtabang kandan amon domeleg dan megtoladà doton te doma ogpeanan, so yan se ibeg te Timanem inangen tadon.
3JO 1:7 Se menge otaw eglegeb amon megtoladà te doma otaw tepad ki Jesu Cristo, kenà dan egbegayan te tabang lekat te otaw kenà egpemenal.
3JO 1:8 Yan keilangan sikitadon egpemenal se menogpò te otaw egtoladà amon meketabang kidon te pegtoladà dan te kebenalan.
3JO 1:9 Doen insolat ko diyà te menge otaw egpemenal kidoen kamno. Meneng wedà penenalan si Diotrefes te kagi ko, so ibeg din megpelangkaw-langkaw peden diyà te menge doma.
3JO 1:10 Aw domateng a doton kenyo, ipetaga-taga ko se medaet inang din, so medaet se eg-ikegiyen din tepad kanak. Pengkey medaet iyan, doen labi pa medaet eg-inangen din, so aw domateng se menge menenoladà kidoen, kenà sikandin egsagman kandan. Aw meibeg se doma otaw megsagman kandan, egsegdahen din dan, aw ipelowà din dan peden heman lekat te kedita dan egpemenal.
3JO 1:11 Kedowa egkedekelan ko te pedowan, ikà eg-iling te otaw eg-inang te medaet, meneng peg-iling ka te otaw eg-inang te mèpiya. Se otaw eg-inang te mèpiya, yan se otaw migpesakop diyà te Timanem. Meneng se otaw eg-inang te medaet, yan se wedà ketaga-taga te Timanem.
3JO 1:12 Ipegduyun si Demetrio te kedita te otaw, so egtaking sikandin te Timanem aw impekità din iyan pineokit te mèpiya inang din. Ipegduyun ko heman sikandin, aw netegahan no heman te benal se kagi ko.
3JO 1:13 Doen pa medita kagi isolat ko peden kamno, meneng eked a den keibeg aw isolat diyà kamno,
3JO 1:14 so doen ibeg ko meglegeana a kidoen kamno te eked kenamay amon megpebelaw-belaway ki.
3JO 1:15 Ibeg ko, doen kelinaw te pedowan nikaw. Eg-ikagi se menge sigalak ta dini te eg-aneng-aneng dan kamno. Indani heman se teg sebad-sebad sigalak ta kidoen kamno te eg-aneng-aneng kay kandan.
JUD 1:1 Se solat seini lekat kanak si Judas, kedowa i Santiago, aw sineligan i Jesu Cristo. Seini se solat ko te kedita niyo tinawal te Timanem. Egkedekelan kaw te Timanem Amay tadon te pedowan, aw eg-ipaten kaw i Jesu Cristo.
JUD 1:2 Ibeg ko ontò kaw keidowan te Timanem, aw begayan kaw heman te kelinaw aw kedakel te pedowan lekat kandin.
JUD 1:3 Menge kedowa ko egkedekelan ko te pedowan, pengkey ontò dakel se ibeg ko somolat kenyo tepad te pegpelowà te Timanem te kedita tadon lekat te salà, meneng keilangan somolat a den kenyo te megpekagsen kaw te pegpemenal amon eked kaw dàgi te otaw meibeg peden megtodà te ontò kebenalan. Imbegay iyan te Timanem diyà te menge sakop din, aw eked iyan kepakay todaen.
JUD 1:4 Yan simolat a den kenyo so doen den menge otaw kenà egpemenal te Timanem minakop diyà kenyo te wedà niyo ketegahi. Tinodà dan se kebenalan tepad te keido te Timanem, so egtoladà dan te mepakay aw meg-inang kaw te medaet so gayed kaw egkeidowan te Timanem. Kenà dan egpemenal te Pengolo tadon si Jesu Cristo eglowan diyà kenitadon. Simolat se menge telekeliwat te kagi te Timanem gebii aw eden se pelumun domateng kandan.
JUD 1:5 Pengkey tapay kaw netaga-taga te keilangan ipelumun se otaw eg-inang te medaet iling kenyan, meneng ibeg ko megpeaneng-aneng a kenyo tepad te ininang te Pengolo tadon gebii. Impelowà din se menge bowad-bowad i Israel lekat te Ehipto, aw penga niyan pigbàtan din se kedita dan wedà pemenal kandin.
JUD 1:6 Gebii doen heman menge anghil wedà tolò te Timanem, aw timanan dan te kandan ogpeanan. Tandà te peg-inang dan te medaet sìyan, impegapos din dan te sengkalì eked palos kelebad, aw impetagad din dan doton te kengitngitan lamig domateng se aldaw te peg-okom din kandan.
JUD 1:7 Eneng-enengi niyo heman tepad te menge tege Sodoma aw tege Gomora aw menge doma otaw mig-ogpà doton te menge lonsod medapag kidoen. Medaet heman se ininang dan, so migkapoy dan. Kenà olò bayi se lineyokan dan meneng limayok dan heman te doma dan meama. Ipelumun dan te Timanem te apoy eked palos kepadeng amon melemitan kidon meg-iling kandan.
JUD 1:8 Medaet heman se eg-inangen te menge otaw sìyan egtoladà te kebolalaw. So kolang se aneng-aneng dan, yan medaet se eg-inangen dan pineokit te lawa dan. Kenà dan egtolò te Timanem, aw egtompuyus dan heman te menge anghil.
JUD 1:9 Pengkey si Miguel se ontò melangkaw diyà te kedita te anghil, meneng kenà iling kenyan se ininang din. Pegkematay i Moises gebii, migpedindilay si Miguel aw si Satanas, so segdahen peden i Satanas se peglebeng i Miguel te lawa i Moises. Meneng wedà palos pegtompuyus si Miguel ki Satanas. Olò sikandin minikagi, “Timanem se megsagda kamno.”
JUD 1:10 Meneng se menge otaw sìyan, egtompuyus dan te kedita wedà dan ketegahi. Iling dan te menge menenanap te kebenesan wedad aneng-aneng, so pengkey eden se ibeg te pedowan dan, yan se inangen dan. Yan se doun te pegbàtan dan te wedad temanan.
JUD 1:11 Mekelelayò dan, so medaet se domateng kandan. Nekesalà dan iling ki Cain kimulu te Timanem gebii. Mig-iling dan heman ki Balaam gebii, so timandù dan heman meg-inang te medaet amon mengewarta dan. Egbolaw dan te menge otaw insogò te Timanem iling ki Kora gebii, aw pegbàtan dan heman te Timanem iling te pegbaet din ki Kora.
JUD 1:12 Egsilahen kaw te doma otaw, so aw metipon kaw komaen amon keeneng-enengan niyo se pegkematay te Pengolo tadon, makop se menge menenoladà sìyan diyà kenyo. Wedad yàyà dan tomoman te medaet ibeg dan, so yan olò se eg-eneng-enengen dan. Wedad ontong niyo diyà kandan so iling dan te labon wedad odan eg-ibingen te kelamag. Iling dan te kayo wedad palos pongo pengkey dimateng se aldaw te pegpongo niyan. Iling dan te kayo nelakat aw ontò den nematay.
JUD 1:13 Iling dan te dedakel balud doton te dagat. Eked kebolon se medaet eg-inangen dan so iling dan te sagbet ipegdagsà doton te enay. Kenà dan egkeseligan, so iling dan te menge bitoen nealin lekat te nesolan dan doton te langit. Yan impetagad te Timanem se ogpeanan dan kidoen te kengitngitan doton te kilot te wedad temanan.
JUD 1:14 Gebii doen kagi te Timanem ingkeliwat i Enok tepad te menge otaw sìyan. Diyà te kedita te bowad-bowad i Adam, si Enok se apò din te ikepito keliwat. Minikagi sikandin, “Peg-ahà kaw, so domateng se Pengolo tadon tinekingan te minelalan anghil din.
JUD 1:15 Okomen din se kedita te otaw, aw ipelumun din se otaw wedà pegpesakop diyà kandin. Ipelumun din se otaw nekesalà tandà te ontò medaet ininang dan, aw tandà te medaet inikagi dan tepad kandin.”
JUD 1:16 Se menge otaw sìyan, gayed dan egbelisì aw egsila. Egtaking dan te mededaet ibeg te pedowan dan. Egpelangkaw-langkaw dan, aw egpelingo-lingo dan egduyun te doma otaw amon meg-akal dan kandan.
JUD 1:17 Menge kedowa ko egkedekelan ko te pedowan, ikà niyo egkelibel te inikagi kedengan te menge sogounun te Pengolo tadon si Jesu Cristo. Minikagi dan diyà kenyo aw eden se domateng te modi aldaw. Aw agpet den se temanan te keneyonan, doen menge otaw mebebayat, so eked dan pemenal te kebenalan, aw tomaking dan te mededaet ibeg te pedowan dan.
JUD 1:19 Sikandan se eglekatan te dindil. Egtaking dan te medaet ibeg te otaw dini te keneyonan. Kenà dan egbeyà-beyaan te Espiritu Santo.
JUD 1:20 Meneng menge kedowa ko egkedekelan ko te pedowan, keilangan megpekegsenay kaw amon melobos se pegsalig niyo diyà te Timanem. Pegtawal-tawal kaw pineokit te tabang te Espiritu Santo kenyo.
JUD 1:21 Ikà niyo egtanan te kedakel te pedowan te Timanem dalem te pegtagad niyo te Pengolo tadon si Jesu Cristo egkeido kenyo, so ipeogpà kaw din doma din te wedad temanan.
JUD 1:22 Keidowi niyo se menge doma otaw egdowa-dowa te pegpemenal dan.
JUD 1:23 Pegtabang kaw kandan, so iling te megpelowà kaw kandan lekat te apoy. Keidowi niyo heman se menge doma otaw mig-inang te medaet, meneng peg-ahà kaw amon eked kaw keboyo meg-iling kandan.
JUD 1:24 Nayan, iduyun se Timanem. Mekebatog sikandin meg-ipat kenyo amon eked kaw peg-inang te salà. Ibingen kaw din doton te ogpeanan din te wedad palos kolang niyo, aw yan ontò kaw meluba.
JUD 1:25 Iduyun se Timanem. Sebad din se Timanem, aw migpelowà den sikandin kenitadon lekat te salà pineokit te Pengolo tadon si Jesu Cristo. Timanem se ontò mèpiya. Sikandin se ontò melangkaw. Sikandin se eglowan diyà te kedita. Sikandin se ontò metolos. Doen den sikandin gebii, aw songkani, aw te wedad temanan. Metoman iyan.
REV 1:1 Seini se impekità i Jesu Cristo. Ingkeliwat din ini lekat te Timanem diyà te kedita tadon egtolò kandin, amon metaga-taga kidon aw eden se metoman domateng te eked kenamay. Siak si Juan sebad sakop i Jesu Cristo. Doen anghil insogò din amon ipetaga-taga din ini kanak.
REV 1:2 Simolat a den te kedita te kinità ko, aw eg-indan a kenyo te benal iyan kagi te Timanem aw impetaga-taga i Jesu Cristo.
REV 1:3 Aw megbasa kaw kani, ontò kaw meluba. Aw menenalan kaw kani, aw tomolò kaw te kebenalan insolat dini, ontò kaw heman meluba, so metoman se kedita te pakang te Timanem te eked kenamay.
REV 1:4 Siak si Juan se simolat kani diyà te kedita niyo menge sakop te pito simbahan kidoen te probinsya te Asya. Ibeg ko tebangan kaw aw begayan kaw heman te kelinaw te pedowan lekat te Timanem, aw Espiritu Santo, aw si Jesu Cristo. Gayed doen Timanem pengkey seini, aw gebii, aw modi heman aldaw. Se Espiritu Santo insogò lekat te langit, gayed din ipegpetaga-taga te metolos sikandin pineokit te pito keokit. Keseligan se kagi i Jesu Cristo. Sikandin se tagnà neantay lekat te nematay amon mengolo diyà te kedita te otaw meantay lekat te nematay. Sikandin se eglowan diyà te kedita te selotan dini te keneyonan. Dakel se pedowan din kenitadon, aw yan impelowà kidon din lekat te salà tadon pineokit te dipanog din te pegkematay din doton te kros.
REV 1:6 Impeakop kidon din diyà te peglowan din. Ininang kidon din menge sogounun din amon meg-inang kidon te ibeg te Amay din Timanem. Yan mèpiya aw sikandin se iduyun aw lomowan te wedad temanan. Metoman iyan.
REV 1:7 Na, lomikò si Jesu Cristo domaan te labon. Kitaen te kedita te otaw se pegdateng din, aw komità heman kandin se kedita te otaw nengimatay kandin. Megmatay se otaw te kedita te pongan dini te keneyonan tandà te puluk te pedowan dan, so sikandin se megpelumun kandan. Ontò iyan benal. Metoman iyan.
REV 1:8 Eglowan se Pengolo tadon Timanem diyà te kedita, aw doen sikandin seini, aw gebii, aw modi heman aldaw. Yan se doun te minikagi sikandin, “Siaken se Alpa aw Omiga.” (Se kelebadan niyan, “Siaken se keteboan aw temanan te kedita.”)
REV 1:9 Siak si Juan se simolat kani, kedowa niyo te pegpemenal. Iling a kenyo, so medalem heman se pedowan ko te pegtayod ko te pegpemilang dimateng kanak, so siak heman se migpesakop diyà te peglowan te Timanem. Impelumun a te gobirno aw impeibing a doton te polò iningedanan Patmos tandà te pegkeliwat ko te kagi te Timanem aw kebenalan intoladà i Jesu Cristo.
REV 1:10 Aldaw te Linggo te pegsimba diyà te Pengolo tadon, doen impekità te Espiritu Santo dimateng kanak. Doen dinineg ko minikagi kidoen te getan ko. Iling te peg-edop te bodyong se peg-ikagi din, so ontò dakel.
REV 1:11 Minikagi sikandin, “Solati se kitaen no, aw peibingi iyan doton te menge sakop te pito simbahan kidoen te Efeso, aw Ismirna, aw Pergamo, aw Tiyatira, aw Sardis, aw Filadelfya, aw Layodisiya.”
REV 1:12 Pegdineg ko kenyan, miniling a amon kitaen ko se otaw minikagi. Pegbiling ko, kinità ko se pito solò ininang te bolawan.
REV 1:13 Kidoen te tengà-tengà te pito solò, doen kinità ko iling te bawa te Timanem Migpekeotaw. Melayat se saol din, aw bolawan se in-elen din.
REV 1:14 Ontò mepotì se logay din so iling te kepotì te sapot. Iling te apoy se mata din.
REV 1:15 Melalag se benis din iling te galang ininit diyà te apoy aw impesiag. Ontò dakel se peg-ikagi din iling te daging te dakel wayeg egdelog.
REV 1:16 Lenged te kowanan, inewidan din se pito bitoen. Lekat te bahà din, eglowà se sondang ontò megalang. Iling te aldaw alas dosi se bawa din so ontò iyan simenang.
REV 1:17 Pegkità ko kandin, ontò a nelemitan aw limemlem a diyà te monà din. Wedà a pekeiwal so iling a te otaw nematay. Meneng pinemàdan a din te kowanan belad din aw impetindeg a din. Minikagi sikandin, “Ikà egkelemitan. Siaken se keteboan aw temanan te kedita.
REV 1:18 Siak se doen pedowan wedad temanan. Inimetayan a, aw eked a den todà palos kematay. Siaken olò se mekebatog meg-antay te otaw lekat te nematay. Aw matay se otaw, siak olò se mekesogò aw kenan dan peogpai.
REV 1:19 Nayan, solati se impekità ko den kamno, sìyan neinang den seini, aw sìyan heman ipekità ko kamno metoman te modi aldaw.
REV 1:20 Ipetaga-taga ko den kamno se kedegdagan te pito bitoen kinità no inewidan ko diyà te kowanan, aw kedegdagan te pito solò ininang te bolawan. Sìyan pito bitoen, yan se menge anghil egtonggò te menge sakop te pito simbahan, aw se pito solò, yan se pito simbahan.”
REV 2:1 Minikagi heman sikandin, “Solat ka te anghil egtonggò te menge sakop te simbahan kidoen te Efeso. Seini se kagi isolat nikaw. ‘Seini se kagi ko kenyo. Siak se eg-awid te pito bitoen diyà te kowanan ko, aw siak heman se egtonggò te pito solò bolawan.
REV 2:2 Netegahan ko se kedita te eg-inangen niyo. Netegahan ko heman te measeb kaw, aw medalem heman se pedowan niyo te pegtayod niyo te kelimahan. Netegahan ko heman te egsegdahen niyo se otaw eg-inang te medaet kidoen kenyo. Tinandà niyo se otaw egpelingo-lingo te sogounun dan i Cristo, aw kinità niyo te bolelawun dan.
REV 2:3 Netegahan ko heman te medalem pa se pedowan niyo dalem te pegtayod niyo te kelimahan, pengkey pinemilang kaw tandà te pegsalig niyo kanak. Wedà kaw heman lokas.
REV 2:4 Meneng netegahan ko heman te medaet se eg-inangen niyo seini, so pengkey dakel se pedowan niyo kanak kedengan, meneng deitek den seini.
REV 2:5 Eneng-enengi niyo te ontò dakel se pedowan niyo kanak kedengan, aw yan pegselsel kaw so deitek den seini. Todà kaw peg-inang te mèpiya, iling te ininang niyo kedengan. Aw eked kaw pegselsel, yan domoton a kenyo amon ebaten ko se solò lekat kenyo.
REV 2:6 Meneng doen iduyun ko kenyo, so egkebensihan niyo se medaet eg-inangen te menge Nikolayta egkebensihan ko heman.
REV 2:7 Se kedita niyo domineg te kagi ko, keilangan tomolò kaw te kagi te Espiritu Santo diyà te kedita niyo egpemenal. Se kedita te otaw eked dàgi te kededàtan, yan se pekànen ko te pongo te kayo te kaling pedowan wedad temanan intanem kidoen te langit eg-ogpaan te Timanem.’”
REV 2:8 Minikagi heman sikandin, “Solat ka heman te anghil egtonggò te menge sakop te simbahan kidoen te Ismirna. Seini se kagi isolat nikaw. ‘Seini se kagi ko kenyo. Siak se keteboan te kedita, aw siak heman se temanan te kedita. Nematay a, aw neantay a heman lekat te nematay.
REV 2:9 Netegahan ko te egtayod kaw te pegpemilang te doma otaw kenyo. Netegahan ko heman te ontò kaw sagkep, meneng meyaman kaw doton te langit. Netegahan ko heman te egbàtan-bàtan kaw te menge Judiyo. Pengkey eg-aneng-aneng dan te ontò dan Judiyo, meneng migpesakop dan diyà ki Satanas.
REV 2:10 Ikà niyo egkelemitan te kelimahan agpet domateng kenyo. Doen menge otaw kidoen kenyo ipekeleboso i Satanas amon ketegahan aw ontò kaw egsalig kanak. Keilangan pemilangen kaw te eked kenamay, menge sempolò se aldaw. Pengkey imetayan kaw, salig kaw diyà kanak, so begayan ko sikiyo te ontong, sìyan korona te kaling pedowan wedad temanan.
REV 2:11 Se kedita niyo domineg te kagi ko, keilangan tomolò kaw te kagi te Espiritu Santo diyà te kedita niyo egpemenal. Se kedita te otaw eked dàgi te kededàtan, yan se eked detengi te pelumun, sìyan ikedowa pegkematay.’”
REV 2:12 Minikagi heman sikandin, “Solat ka heman te anghil egtonggò te menge sakop te simbahan kidoen te Pergamo. Seini se kagi isolat nikaw. ‘Seini se kagi ko kenyo. Siak se egpengibing te sondang ontò megalang.
REV 2:13 Netegahan ko te pengkey eg-ogpà kaw doton te lonsod eglowanan i Satanas, meneng ontò kaw simalig kanak. Wedà kaw lengà te pegpemenal niyo kanak pengkey kedengan te pegpengimatay ki Antipas. Egkeseligan sikandin migtoladà tepad kanak, aw yan se doun te inimetayan sikandin kidoen te lonsod niyo eglowanan i Satanas.
REV 2:14 Pengkey induyun ko sikiyo, meneng netegahan ko heman te doen medaet eg-inangen niyo, so doen otaw doton kenyo egtaking te kebolalaw intoladà i Balaam gebii. Migtoladà si Balaam ki Balak te peokit te pegboyo din te menge bowad-bowad i Israel amon lomengà dan te pegtaking dan diyà te Timanem. Binoyo din dan amon komaen dan te pengelapen imbegay diyà te kenà benal timanem, aw amon lomayok dan te kenà kandan esawa.
REV 2:15 Doen heman menge doma otaw doton kenyo egtaking te kebolalaw intoladà te menge Nikolayta.
REV 2:16 Pegselsel kaw den. Aw eked kaw, ayas a domoton kenyo amon imetayan ko dan pineokit te sondang eglowà lekat te bahà ko.
REV 2:17 Se kedita niyo domineg te kagi ko, keilangan tomolò kaw te kagi te Espiritu Santo diyà te kedita niyo egpemenal. Se kedita niyo eked dàgi te kededàtan, yan se begayan ko te pan intagò kenyo kidoen te langit. Begayan ko heman sikiyo te bato mepotì sinolatan te kaling ngadan. Se otaw begayan ko kenyan, yan olò se otaw metaga-taga aw sinu se ngadan insolat kidoen.’”
REV 2:18 Minikagi heman sikandin, “Solat ka te anghil egtonggò te menge sakop te simbahan kidoen te Tiyatira. Seini se kagi isolat nikaw. ‘Seini se kagi ko kenyo. Siak se Batà te Timanem. Iling te apoy se mata ko, aw iling te galang impesiag se benis ko.
REV 2:19 Netegahan ko se kedita te eg-inangen niyo. Dakel heman se pedowan niyo kanak. Nelobos se pegsalig niyo kanak. Gayed kaw egtolò kanak. Medalem se pedowan niyo te pegtayod niyo te kelimahan. Se eg-inangen niyo seini, yan se labi pa mèpiya diyà te ininang niyo kedengan.
REV 2:20 Meneng netegahan ko te doen heman medaet eg-inangen niyo, so mepakay diyà kenyo aw toledaan kaw te bayi si Jesebel egpelingo-lingo telekeliwat te kagi te Timanem. Egboyo sikandin te menge sakop ko pineokit te pegtoladà din te mepakay aw lomayok dan te kenà kandan esawa, aw komaen dan heman te pengelapen ipegpemegay diyà te kenà benal timanem.
REV 2:21 Migtagad a kandin amon megselsel te peglayok din te kenà kandin esawa, meneng eked keibeg megselsel.
REV 2:22 Yan se doun te ipelumun ko sikandin, aw mibat sikandin kesekitan. Aw eked pegselsel se kedita te otaw timaking kandin te peg-inang dan te medaet, ipelumun ko dan heman, amon ontò dan kelimahan.
REV 2:23 Imetayan ko se kedita te tinoledaan din, amon ketegahan te kedita te otaw egpemenal te siak se netaga-taga te kedita kidoen te pedowan niyo, aw begayan ko se teg sebad-sebad kenyo te ontong tepad te ininang niyo.
REV 2:24 Doen pa ikegiyen ko diyà te kedita niyo tege Tiyatira wedà taking te medaet intoladà te bayi sìyan, diyà te kedita niyo wedà peg-iling te egtewalen din kebiyasa, meneng lekat iyan ki Satanas. Wedad den doma ipunù ko kenyo,
REV 2:25 meneng keilangan tiboken niyo se pegsalig niyo diyà kanak lamig te peglikò ko.
REV 2:26 Se kedita te otaw eked dàgi te kededàtan aw tomolò te ibeg ko lamig te peglikò ko, isogò ko dan amon lomowan dan diyà te kedita te lonsod te keneyonan,
REV 2:27 so tapay a insogò te Amay ko amon lomowan a diyà te kedita. Lomowan kaw diyà te otaw te kedita te lonsod, aw keilangan tomolò dan kenyo. Meinang dan iling te tibod nelosek, so ontò niyo dan dàgen.
REV 2:28 Begayan ko heman sikiyo te bitoen eg-anyag te medapag aldaw.
REV 2:29 Se kedita niyo domineg te kagi ko, keilangan tomolò kaw te kagi te Espiritu Santo diyà te kedita niyo egpemenal.’”
REV 3:1 Minikagi heman sikandin, “Solat ka te anghil egtonggò te menge sakop te simbahan kidoen te Sardis. Seini se kagi isolat nikaw. ‘Seini se kagi ko kenyo. Dini kanak se Espiritu Santo egpetaga-taga te metolos sikandin pineokit te pito keokit. Dini heman kanak se pito bitoen eg-ewidan ko. Netegahan ko se eg-inangen niyo. Pengkey nedengeg kaw te doen kaling pedowan niyo, meneng wedà niyo iyan pekitai pineokit te eg-inangen niyo.
REV 3:2 Keloka kaw amon meketagad kaw. Lobosi niyo se pegsalig niyo diyà kanak, so agpet den iyan megkewedad. Netegahan ko te doen pa kolang eg-inangen niyo kenà ibeg te Amay ko Timanem.
REV 3:3 Ikà niyo den egkelibel te kebenalan intoladà kenyo kedengan, sìyan pinemenalan niyo. Tolò kaw kenyan, aw pegselsel kaw. Aw eked kaw, domateng a te eked kaw peketagad, iling te pegdateng te menenakaw te wedad meketagad, so eked niyo ketegahi aw eden orasi se pegdateng ko.
REV 3:4 Pilabok olò se otaw doton kenyo tege Sardis wedà kelipai te medaet eg-inangen te doma. Yan se menge otaw menaol kwani te mepotì aw megdoma kanak, so ininang ko dan metòlid.
REV 3:5 Se kedita te otaw eked dàgi te kededàtan, yan se ipesaol ko te mepotì. Eked ko palos gibowi se ngadan dan diyà te libro sinolatan ko te ngadan te kedita te otaw binegayan ko te kaling pedowan wedad temanan. Mikagi a heman diyà te Amay ko aw menge anghil din te yan se menge otaw migpesakop diyà kanak.
REV 3:6 Se kedita niyo domineg te kagi ko, keilangan tomolò kaw te kagi te Espiritu Santo diyà te kedita niyo egpemenal.’”
REV 3:7 Minikagi heman sikandin, “Solat ka heman te anghil egtonggò te menge sakop te simbahan kidoen te Filadelfya. Seini se kagi isolat nikaw. ‘Seini se kagi ko kenyo. Siak se eg-inang te metòlid, aw egkeseligan a. Siak se lomowan iling te peglowan i David gebii. Aw owangen ko se okitanan amon mekeakop se otaw diyà te peglowan ko, wedad meketakep. Aw tekepen ko se okitan niyan, wedad mekeowang.
REV 3:8 Netegahan ko te mèpiya se eg-inangen niyo. Yan inowang ko den se lelebangan amon mokit kaw, aw wedad meketakep kenyan. Netegahan ko te pengkey pilabok kaw aw sagkep kaw, meneng gayed kaw pa egtolò te kagi ko. Wedà kaw pegbolon te sikiyo se menge sakop ko.
REV 3:9 Nayan, se menge otaw migpesakop diyà ki Satanas, eden dan aw ontò dan Judiyo, so migpelingo-lingo dan olò te egtaking dan kanak. Ipesagman ko dan diyà kenyo amon ketegahan dan te sikiyo se ontò ko egkedekelan te pedowan.
REV 3:10 So ontò kaw timolò te impunù ko kenyo te keilangan tomayod kaw te kelimahan iling te kanak pegtayod te kelimahan, yan ontò a heman meg-ipat kenyo amon eked kaw detengi te ontò medaet kelimahan agpet domateng diyà te kedita te otaw te keneyonan.
REV 3:11 Na, lomikò a te eked kenamay. Tiboki niyo se pegsalig niyo diyà kanak amon wedad mekeagaw te ontong intagò kenyo.
REV 3:12 Se kedita te otaw eked dàgi te kededàtan, yan se inangen ko medengeg, so inangen ko dan iling te dimasel tollok kidoen te dakel simbahan te Timanem kidoen te langit. Gayed dan meg-ogpà kidoen, aw solatan ko dan te ngadan te Timanem Amay ko, aw ngadan heman te lonsod eg-ogpaan te Amay ko, sìyan iningedanan Kaling Jerusalem megpedanà lekat te langit aw lekat te Timanem. Solatan ko dan heman te kaling ngadan ko.
REV 3:13 Se kedita niyo domineg te kagi ko, keilangan tomolò kaw te kagi te Espiritu Santo diyà te kedita niyo egpemenal.’”
REV 3:14 Minikagi heman sikandin, “Solat ka heman te anghil egtonggò te menge sakop te simbahan kidoen te Layodisiya. Seini se kagi isolat nikaw. ‘Seini se kagi ko kenyo. Siak se ontò egkeseligan. Ontò benal se ipegtoladà ko. Siak se pengolo te kedita te ininang te Timanem.
REV 3:15 Eked ko sikiyo duyuni, so netegahan ko se eg-inangen niyo. Kenà melobos se pedowan niyo kanak, aw yan se doun te iling kaw te eg-inemen olò megebinallaw, kenà ontò megenaw aw kenà heman ontò meinit. Mèpiya peden aw iling kaw te eg-inemen ontò megenaw, aw mèpiya peden heman aw iling kaw te eg-inemen ontò meinit.
REV 3:16 Meneng so iling kaw te eg-inemen megebinallaw, kenà megenaw aw kenà heman meinit, yan se doun te agpet ko sikiyo kebensihan iling te eg-inemen iemog,
REV 3:17 so egduyun kaw te kenyo pegkeotawun te meyeyaman kaw, aw wedad den kolang te kedònan niyo. Meneng wedà niyo ketegahi te sikiyo se ontò nelimahan. Wedà niyo ketegahi te iling kaw te otaw sagkep, aw bota, aw wedad penenaktun.
REV 3:18 Nayan, seini se punù ko kenyo. Keilangan ebaten niyo se doen ontò keelagà lekat kanak iling te bolawan kaling ininang, amon ontò kaw megkeyaman. Keilangan ebaten niyo lekat kanak se ontò isampeng te keyèyaan niyo iling te penenaktun wedad kelipà, amon meabat se keyèyaan niyo. Keilangan ebaten niyo heman lekat kanak se ontò meketabang kenyo iling te bebolong mekegolì te mata, amon komità kaw te kebenalan.
REV 3:19 Se kedita te otaw nedekelan ko te pedowan, yan se gayed ko egsegdahen, aw egtoledaan ko dan heman. Yan keilangan measeb kaw aw megselsel kaw, amon eked ko sikiyo pelumuni.
REV 3:20 Na, dini a den te kenyo lelebangan aw egtawal a diyà kenyo. Aw domineg kaw kanak aw meg-owang kaw kanak te tetakep, yan mawop a, aw komaen a doma kenyo, aw megpesigelakay kidon.
REV 3:21 Se kedita te otaw eked dàgi te kededàtan, yan se ipeonsad ko kidoen te tangkil ko dalem te peglowan ko, iling te peg-onsad ko kidoen te tangkil te Amay ko penga te pegdaeg ko te kedita.
REV 3:22 Se kedita niyo domineg te kagi ko, keilangan tomolò kaw te kagi te Espiritu Santo diyà te kedita niyo egpemenal.’”
REV 4:1 Penga niyan, doen pa heman doma impekità te Pengolo kanak, so kinità ko se lelebangan neowang kidoen te langit. Se otaw tapay minikagi diyà kanak te ontò dakel se kagi din iling te peg-edop te bodyong, yan se todà minikagi, “Penayit ka diyà, so ipekità ko kamno aw eden se metoman domateng te modi aldaw.”
REV 4:2 Pegketà doen impekità te Espiritu Santo dimateng kanak, so kinità ko se onsedanan te peglowan kidoen te langit, aw doen minonsad kidoen.
REV 4:3 Mèpiya se bawa din iling te bawa te bato meelagà iningedanan haspi aw kornalina. Nepeyongan se onsedanan din te binengonan melonaw iling te bawa te bato meelagà iningedanan esmeralda.
REV 4:4 Nelibedan se onsedanan te doma kelowan teg epat onsedanan, aw doen kelowan teg epat obanen nenenoo kidoen. Mepotì se penenaktun te kedita dan, aw sinengkoban se olo dan te korona ininang te bolawan.
REV 4:5 Migkilem se onsedanan te peglowan, aw dinineg ko heman se daging aw delegdeg te kilat. Kidoen te monà te onsedanan te peglowan, doen pito solò eglegdeg, aw yan se pengilala te Espiritu Santo egpetaga-taga te metolos sikandin pineokit te pito keokit.
REV 4:6 Kidoen heman te monà te onsedanan sìyan, doen iling te lanaw ontò metìngaw iling te ispiho. Kidoen medapag te tangkil te onsedanan te peglowan, doen epat ayam-ayam metolos. Doen medita mata dan diyà te bawa dan aw diyà heman te getan dan.
REV 4:7 Iling te liyon se tagnà ayam-ayam metolos. Iling te nati te baka se ikedowa. Iling te bawa te otaw se iketelo. Iling te banog eglayang se ikeepat.
REV 4:8 Doen enem pakpak te teg sebad-sebad te epat ayam-ayam metolos seini. Nelegeb se lawa dan te medita mata dan, pengkey doton didalem. Aldaw aw delem, gayed dan egdelangan te wedad temanan, aw seini se kagi te delangan dan. “Ontò metòlid se eg-inangen te Timanem. Sikandin se Pengolo eglowan diyà te kedita. Doen den sikandin gebii, aw seini, Aw modi heman aldaw.”
REV 4:9 Timanem se egpenenoo diyà te onsedanan te peglowan, aw sikandin se eked palos kematay te wedad temanan. Sikandin se gayed ipegduyun te sìyan epat ayam-ayam metolos, aw egsegmanen dan sikandin, aw egpesiontongan dan heman.
REV 4:10 Dalem niyan, eglongken heman se kelowan teg epat obanen diyà te Timanem egpenenoo kidoen te onsedanan te peglowan. Egsimbahen dan heman sikandin eked palos kematay te wedad temanan. Insawol dan se menge korona dan kidoen te monà din, so yan se pengilala te pegpedanà dan diyà kandin. Gayed dan migdelangan, kagi dan,
REV 4:11 “E Pengolo day Timanem, melangkaw ka, Aw yan keilangan iduyun ka, aw segmanen ka, aw toloen ka te kedita, So sikona se mig-inang te kedita, aw Lekat te kamno ibeg, ininang no se kedita te doen seini.”
REV 5:1 Penga niyan, doen kinità ko kidoen te belad te sìyan egpenenoo kidoen. Inewidan din te kowanan se papil sinolatan heman diyà dibaloy. Linolon iyan, aw pito se pengilala impeket kenyan amon eked iyan kelebad.
REV 5:2 Penga niyan, kinità ko heman se magsen anghil, aw timawal sikandin te dakel se kagi din, “Sinu lay se melangkaw otaw mekebatog meglebad te solat seini? Sinu lay se melangkaw otaw mekebatog mengabat te pengilala seini amon mebasa ini?”
REV 5:3 Pengkey nengemahà se anghil kidoen te langit, aw tanà, aw didalem te tanà, meneng wedad palos otaw kinità din botong se kelangkaw din mekebatog meglebad kenyan amon megbasa kenyan.
REV 5:4 Yan se doun te migkelag a, so wedad palos kinità din botong se kelangkaw din mekebatog meglebad kenyan amon megbasa kenyan.
REV 5:5 Penga niyan, doen sebad diyà te kelowan teg epat obanen minikagi, “Ikà egkelag, so magsen si Jesus iling te liyon, aw sikandin se bowad-bowad i Juda, aw timobò diyà te kemonaan din si David. Sikandin se dimaeg te kedita te poon din, aw yan se doun te sikandin se mekebatog meglebad te solat aw mengabat te pito pengilala niyan.”
REV 5:6 Penga niyan, doen kinità ko diyà te tengà-tengà te onsedanan te peglowan aw epat ayam-ayam metolos aw menge obanen. Doen Nati te Karniro mig-ogpà kidoen, aw kinità ko se menge laas te palì te pegpengimatay kandin gebii, meneng neantay den sikandin. Doen pito seka din, aw pito se mata din, aw yan se pengilala te Espiritu Santo egpetaga-taga te metolos sikandin pineokit te pito keokit, aw insogò doton te kebelad te keneyonan.
REV 5:7 Penga niyan, migpedapag se Karniro diyà te onsedanan te peglowan, aw inabat din se papil linolon lekat te belad kowanan te sìyan nenenoo kidoen.
REV 5:8 Peg-abat din te papil, limongken se kedita te ayam-ayam metolos aw obanen diyà kandin amon megsimba dan kandin. Inibing te teg sebad-sebad obanen se alpa egkebliten, aw inewidan dan heman se menge lipong ininang te bolawan. Nepenò se lipong dan te metinadeg egsonogen amon megkèpiya se nadeg. Yan se polingun te pegtawal-tawal te menge sakop te Timanem kandin.
REV 5:9 Migdelangan dan heman te kaling delangan, kagi dan, “Botong se kelangkaw nikaw amon mekebatog ka mengabat te papil linolon Aw mengabat ka te pengilala niyan, So sikona se inimetayan, Aw pineokit te dipanog no te pegkematay no, Migtansò ka te otaw lekat te kedita te ogpeanan Amon meinang dan sakop te Timanem.
REV 5:10 Impeakop no dan diyà te peglowan nikaw. Ininang no dan menge sogounun no, Aw eglowan den dan kidoen te keneyonan.”
REV 5:11 Penga niyan, kinità ko aw dinineg ko se medita anghil migdelangan. Ontò dan medita, so minelalan dan aw eked dan kebilang. Netipon dan kidoen te onsedanan te peglowan aw epat ayam-ayam metolos aw menge obanen.
REV 5:12 Ontò magsen se pegdelangan te kedita dan, kagi dan, “Melangkaw se Karniro inimetayan, Aw yan keilangan toloen tadon sikandin, Aw begayan tadon te kedònan tadon, So biyasa sikandin, aw eglowan diyà te kedita. Sikandin se ipelangkaw tadon, aw segmanen tadon, aw iduyun tadon.”
REV 5:13 Penga niyan, dinineg ko se pegdelangan te kedita kidoen te langit, aw tanà, aw pengkey kidoen didalem te tanà aw dagat. Migdelangan se kedita dan, kagi dan, “Iduyun sikandin egpenenoo kidoen te onsedanan te peglowan, Aw iduyun heman se Karniro. Keilangan segmanen dan, Aw ipelangkaw dan, Aw toloen dan te wedad temanan.”
REV 5:14 Penga niyan, timaba se epat ayam-ayam metolos, kagi dan, “Metoman iyan.” Limongken heman se menge obanen aw migsimba dan.
REV 6:1 Penga niyan, dalem te pegtengteng ko, inabat te Karniro se tagnà te pito pengilala impeket diyà te solat linolon. Penga niyan, dinineg ko se kagi te sebad ayam-ayam metolos, aw iling te daging te kilat se kagi din. Minikagi sikandin, “Ayas ka den.”
REV 6:2 Penga niyan, kinità ko se kodà mepotì, aw doen heman simakay kenyan nengibing te bosog. Binegayan sikandin te korona amon isangkob diyà te olo din, aw penga niyan, insogò sikandin amon dàgen din se kedita te poon din kidoen te keneyonan.
REV 6:3 Penga niyan, inabat te Karniro se ikedowa pengilala diyà te solat, aw dinineg ko se ikedowa ayam-ayam metolos minikagi, “Ayas ka den.”
REV 6:4 Penga niyan, dimateng se doma kodà ontò melalag. Se otaw simakay kenyan, yan se insogò amon mesamok se kedita te otaw te keneyonan, aw yan se doun te megbebolaw dan aw megpeimetayay dan. Doen heman melayat sondang imbegay kandin.
REV 6:5 Penga niyan, inabat te Karniro se iketelo pengilala diyà te solat, aw dinineg ko se iketelo ayam-ayam metolos minikagi, “Ayas ka den.” Penga niyan, kinità ko se kodà meitem. Doen heman simakay kenyan nengibing te timbangan.
REV 6:6 Doen dinineg ko minikagi kidoen te tengà-tengà te epat ayam-ayam metolos. Migpunù sikandin diyà te otaw simakay, kagi din, “Pemehali se kànen dan, so olò sebad litro te trigo se mepakay beyadan te kwarta itandan te sebad se aldaw, aw olò telo litro te sebada se mepakay beyadan te itandan te sebad se aldaw. Meneng ikà eg-alin te keelagà te lana aw bino.”
REV 6:7 Penga niyan, inabat te Karniro se ikeepat pengilala diyà te solat linolon, aw dinineg ko se ikeepat ayam-ayam metolos minikagi, “Ayas ka den.”
REV 6:8 Penga niyan, kinità ko se kodà ponsì. Si Kemetayun se ngadan te otaw simakay kenyan, aw si Kemeteyanan se ngadan te doma otaw timaking kandin. Insogò dan amon imetayan dan se ikeepat ketengà te otaw te keneyonan. Imetayan dan pineokit te gira, aw bayil, aw mesakit, aw menenanap te kebenesan.
REV 6:9 Penga niyan, inabat te Karniro se ikelima pengilala diyà te solat, aw penga niyan doen kinità ko kidoen te kilid te sonoganan te ayam-ayam ibegay diyà te Timanem. Kinità ko se pedowan te kedita te otaw inimetayan tandà te pegtoladà dan te kagi te Timanem, aw tandà te peg-indan dan te kebenalan tepad ki Jesu Cristo.
REV 6:10 Timawal dan te dakel se kagi dan, “E Pengolo Metolos, ontò ka egkeseligan, aw ontò metòlid se eg-inangen nikaw. Menamay lay pa se pegtoman no te pegpelumun te otaw eg-ogpà kidoen te keneyonan tandà te pegpengimatay dan kenami?”
REV 6:11 Penga niyan, doen melayat saol mepotì imbegay diyà te teg sebad-sebad kandan. Minikagi heman se Pengolo diyà kandan te keilangan megtagad dan pa te eked kenamay lamig mesikop se kedita te sineligan te Timanem, so doen pa doma dan imetayan iling kandan.
REV 6:12 Penga niyan, inabat te Karniro se ikeenem pengilala diyà te solat linolon. Penga niyan, doen ontò magsen linog, aw migkeitem se aldaw iling te tila ontò meitem, aw migkelalag se kedakel te bolan iling te dipanog.
REV 6:13 Nedagdag heman se menge bitoen diyà te tanà iling te pongo te kayo igira posot nelampod te kelamag mebandes.
REV 6:14 Nealin se kedita te bitoen lekat te langit, iling te peglolon te papil. Neantag aw nealin se kedita te bontod aw polò.
REV 6:15 Penga niyan, se kedita te otaw, pengkey menge selotan, aw doma otaw limowan, aw menge pengolo te sondalo, aw meyeyaman, aw otaw mebolot, aw kedita te otaw pengkey allang aw kenà allang, mineles dan kidoen te menge ilib aw kidoen te bontod.
REV 6:16 Timawal dan heman diyà te menge bontod aw dakel bato, kagi dan, “Bonboni kay niyo, aw selibengi kay niyo amon eked kay kitai te Timanem egpenenoo kidoen te onsedanan te peglowan kidoen te langit. Elesi kay niyo amon eked kay detengi te pelumun lekat te Karniro,
REV 6:17 so dimateng den se aldaw te pegpelumun dan te otaw, aw wedad palos mekelowà kenyan.”
REV 7:1 Penga niyan, kinità ko se epat anghil timindeg kidoen te epat dogong te keneyonan, aw migsagkà dan te epat kelamag amon eked kedogi se tanà, aw dagat, aw kayo.
REV 7:2 Penga niyan, kinità ko se sebad anghil dimateng lekat te eglibtakan te aldaw. Inibing din se inangay te pengilala tinig-apò te Timanem wedad temanan din. Timawal sikandin te dakel se kagi din diyà te epat anghil insogò din, sìyan neketagad den megbaet te tanà aw dagat.
REV 7:3 Minikagi sikandin, “Ikà niyo egbaet te tanà aw dagat aw kayo singed aw onà day pengilelaan se kilay te kedita te otaw egtolò te Timanem tadon.”
REV 7:4 Penga niyan, inindanan a te kedita te otaw pengilelaan, sebad gatos kepatan teg epat melalan se kedita dan pengilelaan lekat te sempolò teg dowa pongan te bowad-bowad te batà i Israel.
REV 7:5 Sempolò teg dowa melalan se otaw pinengilelaan dan lekat te bowad-bowad te batà din si Juda. Sempolò teg dowa heman melalan se pinengilelaan dan lekat te bowad-bowad te batà din si Ruben. Sempolò teg dowa heman melalan se pinengilelaan dan lekat te menge bowad-bowad i Gad.
REV 7:6 Sempolò teg dowa heman melalan lekat ki Aser. Sempolò teg dowa heman melalan lekat ki Neftali. Sempolò teg dowa heman melalan lekat ki Manases.
REV 7:7 Sempolò teg dowa heman melalan lekat ki Simeon. Sempolò teg dowa heman melalan lekat ki Levi. Sempolò teg dowa heman melalan lekat ki Isacar.
REV 7:8 Sempolò teg dowa heman melalan lekat ki Sabulon. Sempolò teg dowa heman melalan lekat ki Jose. Sempolò teg dowa heman melalan lekat ki Benjamin.
REV 7:9 Penga niyan, kinità ko se ontò medita otaw lekat te kedita te ogpeanan. Eked dan kebilang, so ontò dan medita. Timindeg dan kidoen te monà te onsedanan te peglowan, kidoen te monà te Karniro. Nenaol dan te mepotì aw nengibing dan te pelapà te palmera.
REV 7:10 Timawal se kedita dan, kagi dan, “Iduyun se Timanem eglowan diyà kenitadon, aw iduyun heman se Karniro, so sikandan se migpelowà kenitadon lekat te salà.”
REV 7:11 Kidoen heman se kedita te anghil limibed te onsedanan te peglowan, aw menge obanen, aw epat ayam-ayam metolos. Limongken se kedita dan diyà te onsedanan te peglowan, aw migsimba dan te Timanem.
REV 7:12 Minikagi dan, “Metoman iyan. Melangkaw se Timanem eglowan diyà kenitadon, aw yan iduyun tadon den sikandin, aw segmanen tadon sikandin, so ontò sikandin biyasa. Egpesiontong kidon heman kandin, aw ipelangkaw tadon sikandin, so metolos sikandin, aw eglowan diyà te kedita te wedad temanan. Metoman iyan.”
REV 7:13 Penga niyan, doen obanen mig-insà kanak, “Netegahan no lay aw sinu se menge otaw seini nenaol te mepotì? Netegahan no lay aw kenan dan lekat?”
REV 7:14 Timaba a, “Apò, wedà ko ketegahi. Indani a.” Minikagi sikandin, “Lekat dan te ontò kelimahan. Migbugsak den dan te saol dan diyà te dipanog te Karniro amon ontò iyan megkepotì.
REV 7:15 Yan se doun te timindeg den dan kidoen te monà te onsedanan te Timanem. Eg-ogpà dan kidoen te dakel simbahan din pengkey aldaw aw delem, aw gayed dan egtolò te ibeg din. Eg-ipaten dan heman te Timanem eg-ogpà kidoen te onsedanan te peglowan.
REV 7:16 Eked den dan bellosi. Eked den dan heman kelao. Eked den dan ketapì tandà te keinit te aldaw, aw pengkey eden kemoloi te keinit,
REV 7:17 so egtonggoan dan te Karniro tangkil te onsedanan te peglowan. Ibingen din dan doton te olo te wayeg mekebegay te kaling pedowan wedad temanan. Ebaten heman te Timanem se kedita te puluk dan.”
REV 8:1 Penga niyan, inabat te Karniro se ikepito pengilala diyà te solat linolon. Penga te peg-abat din kenyan, ontò netinep se kedita kidoen te langit taman te tengà te oras.
REV 8:2 Penga niyan, kinità ko se pito anghil egtelaban te Timanem, aw doen pito bodyong imbegay kandan.
REV 8:3 Doen heman sebad anghil nengibing te depolan ininang te bolawan. Migpedapag sikandin diyà te sonoganan, aw doen metinadeg imbegay kandin. Sinonog din iyan kidoen te depolan amon tebangan se pegtawal-tawal te kedita te sakop te Timanem kidoen te sonoganan ininang te bolawan medapag te onsedanan te peglowan.
REV 8:4 Minebel se metinadeg sinonog kidoen te depolan inewidan te anghil minasdang diyà te onsedanan, aw nekesanged se ebel diyà te intawal-tawal te menge sakop te Timanem.
REV 8:5 Penga niyan, inipenò te anghil se depolan te baga inabat din lekat te sonoganan. Penga niyan, imbontog din iyan lekat te langit kidoen te tanà. Penga niyan, migkilat, aw dakel se logo-logo, aw simiblat se kilem, aw miglinog.
REV 8:6 Penga niyan, neketagad se pito anghil amon meg-edop dan te pito bodyong.
REV 8:7 Mig-edop se tagnà anghil te bodyong din. Penga niyan, doen nedagdag diyà te tanà, dedakel odan netikbolò aw megenaw, aw nedagdag heman se apoy doen sanged dipanog. Yan se doun te nesonog se iketelo ketengà te tanà. Nesonog heman se iketelo ketengà te kedita te kayo. Nesonog heman se kedakel te sagbet.
REV 8:8 Mig-edop se ikedowa anghil te bodyong din, aw penga niyan, doen nedagdag diyà te dagat iling te ontò dakel bontod limegdeg. Yan se doun te neinang dipanog se iketelo ketengà te dagat,
REV 8:9 aw nematay se iketelo ketengà te kedita te ikan, aw nebàtan heman se iketelo ketengà te menge sekeyanan kidoen te dagat.
REV 8:10 Mig-edop se iketelo anghil te bodyong din, aw nedagdag se dakel bitoen lekat te langit limegdeg iling te solò. Nedagdag iyan diyà te iketelo ketengà te wayeg te baog aw selep.
REV 8:11 Ngadan te bitoen sìyan Kepait. Migkepait heman se iketelo ketengà te wayeg, aw medita se otaw nematay so mininem dan te wayeg mepait.
REV 8:12 Mig-edop se ikeepat sogounun te Timanem te bodyong din. Penga niyan, nebàtan se iketelo ketengà te aldaw, aw nebàtan heman se iketelo ketengà te bolan, aw nebàtan se iketelo ketengà te menge bitoen, aw yan se doun te neabat se iketelo ketengà te senang dan. Ontò migkengitngit so wedad palos simenang te iketelo ketengà te oras te kelikit te aldaw aw delem.
REV 8:13 Penga niyan, kinità ko se banog limayang kidoen te tengà-tengà te langit aw tanà. Dinineg ko se kagi niyan, so timawal iyan te meketelo te dakel se kagi din, “Ontò mekelelayò se otaw eg-ogpà kidoen te tanà.” Minikagi iyan heman, “Ontò medaet se puluk domateng kandan, so agpet den meg-edop se telo mendad anghil te bodyong.”
REV 9:1 Penga niyan, mig-edop se ikelima anghil te bodyong din, aw doen kinità ko iling te bitoen kidoen te tanà, so nedagdag sikandin lekat te langit. Binegayan sikandin te konsì amon mekeowang te awang pesalo doton didalem te tanà wedad temanan te kedalem.
REV 9:2 Penga niyan, mig-owang sikandin te awang diyà te tanà, aw limowà se ebel niyan iling te ebel lekat te ontò dakel seyaban. Neselibengan se aldaw aw migkengitngit so limowà se ebel lekat te awang diyà te tanà.
REV 9:3 Penga niyan, limowà se medita dolon lekat te ebel, aw migpedanà dan diyà te tanà. Insogò dan amon megpeeleg te otaw pineokit te kesakit te seged dan iling te kesakit te inenipit.
REV 9:4 Doen impunù kandan te eked dan bàti se sagbet, aw golay, aw kayo. Meneng mepakay aw ipeeleg dan olò se otaw wedad pengilala te Timanem kidoen te kilay dan.
REV 9:5 Insogò se dolon amon megpelumun kandan taman te lima se bolan, meneng doen impunù kandan te eked dan imetayi se otaw. Iling te kesakit te pegbangà te inenipit se pelumun kandan.
REV 9:6 Dalem te lima se bolan sìyan, ontò meibeg se otaw megpekematay, meneng eked iyan kebatog. Pengkey ibeg dan matay, meneng eked dan iyan kebatog.
REV 9:7 Se lawa te dolon, iling te lawa te kodà sekayan te otaw meggira. Doen insangkob dan diyà te olo dan iling te korona ininang te bolawan. Iling te bawa te otaw se bawa dan,
REV 9:8 aw melayat se logay dan iling te bayi. Iling te ngipen te liyon se ngipen dan.
REV 9:9 Iling te kelasag ininang te kinis se kagpa dan. Peglayang dan, dimaging se pakpak dan iling te daging te ontò medita kelisa goyoden te kodà komagnan pesalo doton te gira.
REV 9:10 Iling te ikog te inenipit se ikog dan, so mekeseged. Doen lalas diyà te ikog dan amon mekepelumun dan te otaw taman te lima se bolan.
REV 9:11 Doen selotan te dolon nengibing kandan. Sikandin se anghil i Satanas aw pengolo te kedita dan kidoen te awang te tanà wedad temanan te kedalem. Ngadan din diyà te kagi te Hebreo si Abbadon. Ngadan din diyà te kagi te Griego si Apolyon. (Se kelebadan niyan, “Metibaet.”)
REV 9:12 Nepenga den se tagnà puluk, meneng doen pa dowa mendad puluk domateng.
REV 9:13 Penga niyan, mig-edop se ikeenem anghil te bodyong din, aw doen dinineg ko minikagi kidoen te epat seka te sonoganan ininang te bolawan kidoen medapag te onsedanan te peglowan.
REV 9:14 Minikagi sikandin diyà te ikeenem anghil, “Pelowai se epat anghil i Satanas ginapos pa kidoen te dakel wayeg te Yofritis.”
REV 9:15 Yan impelowà din se epat anghil sìyan. Tapay dan impetagad taman te omay seini, aw bolan seini, aw aldaw seini, aw oras seini, amon mengimatay dan te iketelo ketengà te otaw.
REV 9:16 Inindanan a te kedita te sondalo dan simakay te kodà. Dowa gatos milyon se kedita dan.
REV 9:17 Iling kani se bawa te kodà aw sondalo impekità kanak. Kinità ko se sondalo simakay, aw doen menge saol dan ininang te kinis melalag, iling te kelalag te apoy. Doen heman menge saol dan melonaw, iling te batek te bato meelagà iningedanan sapiro. Doen heman menge saol dan bolaw, iling te batek te esopri. Iling te olo te liyon se olo te kodà dan, aw lekat te bahà dan limowà se apoy aw ebel aw esopri.
REV 9:18 Negelà se iketelo ketengà te otaw pineokit te telo kededàtan, sìyan apoy, aw ebel, aw esopri limowà lekat te bahà te kodà dan sìyan.
REV 9:19 Doen lalas te kodà diyà te bahà aw diyà heman te ikog dan, so doen olo diyà te ikog dan iling te memokan, aw mekedaet iyan te otaw.
REV 9:20 Se kedita te otaw nesamà, sìyan wedà imetayi te kodà mekedaet, wedà dan lengà te peg-inang dan te medaet. Wedà dan heman lengà te pegsimba dan te menge bosaw, aw pegsimba dan te inotaw ininang dan lekat te bolawan, aw selapì, aw galang, aw bato, aw kayo. Simalig dan kenyan pengkey wedà iyan pekekità, aw wedà pekeikagi, aw wedà pekeipanaw.
REV 9:21 Wedà dan heman lengà te pegbonò dan, aw pegketoigan dan, aw peglayok dan te kenà kandan esawa, aw pegpenakaw dan.
REV 10:1 Penga niyan, kinità ko se sebad magsen anghil migpedanà lekat te langit. Nenaol sikandin te labon, aw doen binengonan neketedong kandin. Iling te senang te aldaw se bawa din, aw iling te tollok limegdeg se benis din.
REV 10:2 Kidoen te belad din, inibing din se deitek papil wedà loloni. Pegtenà din, insawol din se benis din kowanan kidoen te tengà-tengà te dagat, aw insawol din se benis din bibang kidoen te tanà.
REV 10:3 Timawal sikandin te ontò dakel, iling te kagi te liyon. Pegtawal din, migkilat te mekepito.
REV 10:4 Pegkilat te mekepito, somolat a peden te dinineg ko. Meneng doen minikagi lekat te langit, “Ikà egsolat te inikagi te pito kilat, so keilangan ieles no iyan.”
REV 10:5 Penga niyan, sìyan anghil kinità ko timindeg kidoen te dagat aw tanà, timakyaw sikandin te kowanan.
REV 10:6 Migsapà sikandin te ngadan te Timanem eked palos kematay, sìyan mig-inang te langit, aw tanà, aw dagat, aw kedita niyan. Migsapà sikandin te eked den libà-libai se pegtoman te kedita,
REV 10:7 so aw meg-edop se ikepito anghil te bodyong din, tomanen te Timanem se ibeg din, so yan se tapay impakang te Timanem diyà te menge telekeliwat timolò kandin gebii aw migkeliwat heman te kagi din.
REV 10:8 Penga niyan, todà minikagi se dinineg ko lekat te langit, kagi din, “Doton ka te anghil timindeg kidoen te dagat aw tanà. Ebati se papil inibing din wedà loloni.”
REV 10:9 Yan dimoton a te anghil aw pinemoyò ko se deitek papil. Minikagi sikandin, “Kinewai iyan aw kàni. Ontò iyan màmis iling te teneb diyà te bahà no, meneng megkepait iyan diyà te getek nikaw.”
REV 10:10 Penga niyan, kininawà ko se deitek papil inibing te anghil, aw kinaen ko iyan. Ontò iyan màmis iling te teneb diyà te bahà ko, meneng peg-ame ko kenyan, migkepait iyan diyà te getek ko.
REV 10:11 Penga niyan, insogò a din, kagi din, “Keilangan todà ka megkeliwat te kagi te Timanem tepad te medita kemolò te otaw, aw ogpeanan, aw kagi, aw selotan.”
REV 11:1 Penga niyan, doen sokoday iling te bangkà imbegay kanak. Doen simogò kanak, kagi din, “Tindeg ka, aw sokodi se dakel simbahan te Timanem, aw sonoganan niyan, aw bilangi se otaw egsimba kidoen.
REV 11:2 Meneng ikà egsokod te dowangen kidoen te lowà niyan. Pebeyai iyan, so metoman iyan ibegay diyà te menge otaw kenà Judiyo. Meglompak dan te lonsod te Jerusalem taman te kepatan teg dowa se bolan.
REV 11:3 Isogò ko doton se dowa otaw menaol te tila sako, so yan se pengilala te keilangan megselsel se menge otaw toledaan dan. Meg-indan dan te kebenalan, aw megkeliwat dan te kagi ko taman te sebad melalan dowa gatos keneman se aldaw.”
REV 11:4 Sìyan dowa otaw isogò din, yan se tinedoan te tegdeyanan gebii tepad te dowa kayo olibo. Tinedoan dan heman te tegdeyanan tepad te dowa solò te Pengolo tadon eglowan diyà te kedita te otaw.
REV 11:5 Aw doen otaw meibeg megpeeleg kandan, doen apoy lomowà lekat te bahà dan amon pegbàtan se poon dan. Pineokit kenyan, imetayan dan se kedita te otaw meibeg megpeeleg kandan.
REV 11:6 Doen tolos ibegay kandan amon kebelebagan dan se labon amon eked odan dalem te kedita te aldaw te pegkeliwat dan te kagi te Timanem. Doen heman tolos ibegay kandan amon meinang dipanog se wayeg te baog. Doen heman tolos ibegay kandan amon megpeeleg dan te kedita te otaw te keneyonan pineokit te kedita te kededàtan pengkey kano se ibeg dan.
REV 11:7 Aw mepenga dan meg-indan te kebenalan, bolawen dan te menenanap mebolot lomowà lekat te awang diyà te tanà wedad temanan te kedalem. Dàgen se didowa dan te menenanap mebolot, aw imetayan din dan.
REV 11:8 Penga niyan, isawol se lawa dan nematay kidoen te kersada te lonsod nedengeg nemetayan te Pengolo dan inlansang diyà te kros. Kidoen te tegdeyanan tepad te lonsod sìyan, iningedanan iyan Sodoma aw Ehipto.
REV 11:9 Domoton se medita otaw lekat te kedita te pongan, aw kagi, aw ogpeanan amon tomengteng dan te lawa dan nematay taman te telo se aldaw aw tengà. Eked dan lebengi.
REV 11:10 Ontò meluba se kedita te otaw te keneyonan tandà te pegkematay te didowa dan. Yan se doun te megpista dan, aw megpebegayay dan heman te bowang, so nematay den se didowa telekeliwat, sìyan tapay nemegay kandan te lidò te pedowan dan.
REV 11:11 Meneng penga te telo se aldaw aw tengà, inantay dan te Timanem lekat te nematay, aw minenaw dan. Yan ontò nelemitan se kedita te otaw kimità kandan.
REV 11:12 Penga niyan, doen dinineg dan minikagi lekat te langit, kagi din, “Diyà kaw den te langit.” Penga niyan, neengat dan tinekingan te labon, aw kinità iyan te kedita te poon dan.
REV 11:13 Penga niyan, doen ontò magsen linog, aw nebàtan se ikesempolò ketengà te balay te lonsod sìyan. Pito melalan heman se otaw negelà te linog. Ontò nelemitan se otaw nesamà, aw induyun dan se kelangkaw te Timanem eg-ogpà kidoen te langit.
REV 11:14 Nepenga den se ikedowa puluk, meneng doen pa iketelo puluk domateng te eked kenamay.
REV 11:15 Penga niyan, mig-edop se ikepito anghil te bodyong din, aw doen medita dinineg ko kidoen te langit aw ontò dakel se kagi dan, “Se kedita te otaw te keneyonan nesakop den te peglowan te Pengolo tadon aw peglowan te Misiyas pinemallì din. Lomowan sikandin te wedad temanan.”
REV 11:16 Penga niyan, limongken se kedita te kelowan teg epat obanen egpenenoo medapag te onsedanan te Timanem, aw migsimba dan kandin.
REV 11:17 Minikagi dan, “E Pengolo day Timanem eglowan diyà te kedita te otaw. Doen ka gebii, aw doen ka seini. Egpesiontong kay kamno, so impekità no den te ontò ka metolos, aw migtebò ka den te peglowan no kidoen te keneyonan.
REV 11:18 Pengkey neopal se menge poon no, meneng dimateng den se aldaw te pegpelumun no kandan, aw aldaw te peg-okom no te otaw nematay den. Dimateng den se aldaw te memegay ka te ontong diyà te kedita te otaw timolò kamno, diyà te telekeliwat te kagi nikaw, aw diyà te kedita te sakop nikaw, pengkey sagkep dan aw melangkaw, diyà te kedita te otaw egsagman kamno. Dimateng den heman se aldaw te pegbàtan no se kedita dan migbaet te keneyonan.”
REV 11:19 Penga niyan, neowang se dakel simbahan te Timanem kidoen te langit, aw kinità se kaban sinolan te pakang te Timanem insolat gebii. Migkilem, aw dimaging, aw migkilat, aw miglinog, aw nedagdag heman se dedakel odan netikbolò aw megenaw.
REV 12:1 Penga niyan, doen dakel ledyawan kinità ko kidoen te langit. Kinità ko se bayi migdagom te aldaw, aw doen bolan kidoen te salad te benis din, aw doen korona insangkob din diyà te olo din ininang te sempolò teg dowa bitoen.
REV 12:2 Mebedes sikandin, aw migpuypuy tandà te kesakit, so agpet den tebawan.
REV 12:3 Penga niyan, doen doma ledyawan kinità ko kidoen te langit. Doen dakel nagan melalag kinità ko. Doen pito olo din aw sempolò se seka, aw doen korona insangkob kidoen te teg sebad-sebad olo din.
REV 12:4 Pineokit te ikog din, ineblas din se iketelo ketengà te bitoen lekat te langit, aw in-agbel din iyan diyà te tanà. Penga niyan, mig-ogpà se nagan medapag te bayi agpet den tebawan amon kànen din se batà aw tomebaw.
REV 12:5 Penga niyan, doen batà meama timebaw, aw sikandin se lomowan diyà te kedita te otaw te keneyonan, aw keilangan tomolò se kedita dan kandin. Meneng wedà kàni te nagan se batà sìyan, so sinagmit te Timanem aw inibing din doton te onsedanan din te peglowan kidoen te langit.
REV 12:6 Penga niyan, kimadas se bayi doton te kebigtilan, so doen ogpeanan integilan te Timanem kidoen amon ipaten din se bayi taman te sebad melalan dowa gatos keneman se aldaw.
REV 12:7 Penga niyan, doen gira kidoen te langit. Si Miguel se nengibing te menge doma anghil, aw migbolaw dan te nagan. Minato se nagan aw menge anghil din,
REV 12:8 meneng dinaeg dan, aw impekadas dan lekat te langit.
REV 12:9 Yan indagdag se dakel nagan lekat te langit. Sikandin se migpelingo-lingo memokan gebii, aw iningedanan ki Satanas, aw biyasa sikandin eg-akal te kedita te otaw te keneyonan. Indagdag sikandin lekat te langit kidoen te tanà sipat kedita te anghil din.
REV 12:10 Penga niyan, doen dinineg ko timawal kidoen te langit te dakel se kagi din, “Netoman den se pegpelowà te Timanem te kedita te otaw. Impekità den te Timanem te metolos sikandin. Migtebò den se peglowan din, aw insawol din den se Misiyas amon lomowan, so indagdag din den si Satanas, sìyan gayed egpoon te menge kedowa tadon egpemenal aw egdimanda kandan diyà te Timanem te aldaw aw delem.
REV 12:11 Meneng dinaeg dan sikandin pineokit te dipanog te Karniro inimetayan doton te kros, aw pineokit te peg-indan te kebenalan tepad ki Cristo, so wedà dan kelemitan pengkey imetayan dan tandà te pegsalig dan diyà ki Cristo.
REV 12:12 Yan keilangan meluba kaw tege langit aw kedita niyo eg-ogpà kidoen te langit. Meneng mekelelayò kaw tege tanà aw tege dagat, so dimateng den si Satanas kenyo. Ontò sikandin neopal, so netegahan din te detengan sikandin te pelumun te eked kenamay.”
REV 12:13 Peg-aneng-aneng te nagan te indagdag sikandin lekat te langit kidoen te tanà, pig-alaw din se bayi tinebawan te meama.
REV 12:14 Meneng doen dowa pakpak te banog imbegay te Timanem kandin amon mekelayang sikandin doton te kebigtilan amon eked kesàbi te nagan. Ipaten sikandin te Timanem kidoen taman te telo se omay aw tengà.
REV 12:15 Pengkey impelowà te nagan se dakel wayeg lekat te bahà din amon enoden din,
REV 12:16 meneng netebangan se bayi te tanà, so neewangan se tanà aw nekeawop kidoen se dakel wayeg impelowà te nagan lekat te bahà din.
REV 12:17 Yan se doun te ontò neopal se nagan diyà te bayi, aw limikò amon megbolaw te menge doma batà din, diyà te kedita dan egtolò te punù te Timanem aw eg-indan te kebenalan tepad ki Jesus.
REV 12:18 Penga niyan, mig-ogpà se nagan diyà te enay kidoen te dagat.
REV 13:1 Penga niyan, kinità ko se menenanap mebolot minanggin lekat te dagat. Doen sempolò seka din aw pito se olo din. Doen menge korona insangkob kidoen te teg sebad-sebad te sempolò seka din. Doen ontò medaet ngadan egtompuyus te Timanem insolat kidoen te teg sebad-sebad olo din.
REV 13:2 Iling te menenanap te kebenesan iningedanan liyopardo se menenanap mebolot kinità ko. Iling te benis te menenanap te kebenesan iningedanan oso se benis din. Iling te bahà te liyon se bahà din. Se tolos te nagan aw peglowan din aw pegpengibing din, yan se insalig din diyà te sìyan menenanap mebolot.
REV 13:3 Nepelian se sebad olo din aw iling te nematay iyan. Meneng penga niyan, negolian, aw yan se doun te nepela se kedita te otaw te keneyonan, aw timaking dan heman kenyan.
REV 13:4 Egsimbahen te otaw se nagan, so ininang din egpengolo se menenanap mebolot. Egsimbahen dan heman se menenanap mebolot, aw minikagi dan, “Wedad palos labi pa mèpiya diyà te menenanap mebolot, aw wedad heman mekedaeg kandin.”
REV 13:5 Pinebeyaan te Timanem se pegpelangkaw-langkaw te menenanap mebolot aw pegpenollon din te Timanem, aw peglowan din diyà te kedita taman te kepatan teg dowa se bolan.
REV 13:6 Peg-ikagi din, nenollon sikandin te Timanem, aw nenollon heman sikandin te ogpeanan te Timanem kidoen te langit, aw nenollon heman sikandin te kedita te sakop te Timanem eg-ogpà doton te langit.
REV 13:7 Pinebeyaan heman te Timanem se peggira niyan diyà te menge sakop te Timanem kidoen te tanà, aw pegdaeg niyan kandan. Ininang heman iyan egpengolo te otaw lekat te kedita te ogpeanan.
REV 13:8 Simbahen iyan te kedita te otaw te keneyonan, sìyan menge otaw wedà kesolat se ngadan dan kidoen te libro sinolatan te ngadan te kedita te otaw begayan te kaling pedowan wedad temanan. Yan se libro insolat te Karniro inimetayan, aw insolat iyan te wedà pa inangi se keneyonan.
REV 13:9 Se kedita niyo domineg te kagi ko, keilangan meg-aneng-aneng kaw te kagi ko seini.
REV 13:10 Se kedita te otaw pinemallì amon dekepen, yan se metoman medakep. Se kedita heman te otaw mengibing te sondang aw mengimatay, yan se metoman imetayan te sondang. Yan se doun te keilangan tomayod te kelimahan se kedita tadon sakop te Timanem, aw keilangan somalig kidon heman diyà kandin.
REV 13:11 Penga niyan, kinità ko se doma menenanap mebolot limowà lekat didalem te tanà. Doen dowa seka din iling te karniro, aw iling te kagi te nagan se kagi din.
REV 13:12 Sikandin se egkeliwat te kedita te punù te tagnà menenanap mebolot, sìyan simogò kandin. Eglegesen din se kedita te otaw te keneyonan amon megsimba dan te tagnà menenanap mebolot, sìyan negolian te palì te pegkematay din.
REV 13:13 Doen heman dakel kepelahan eg-inangen te ikedowa menenanap, so doen apoy indagdag din lekat te langit kinità te kedita te otaw.
REV 13:14 Doen menge kepelahan impeinang te tagnà menenanap pineokit te ikedowa, aw yan se doun te nekeakal sikandin te kedita te otaw eg-ogpà kidoen te keneyonan. Migpunù heman kandan amon meg-inang dan te inotaw ipesopo te tagnà menenanap, sìyan nepelian te sondang meneng wedà kematay.
REV 13:15 Penga niyan, insogò se ikedowa menenanap amon memegay te pedowan diyà te inotaw ininang. Yan se doun te nekeikagi se inotaw, aw migpunù iyan te imetayan se kedita te otaw eked pegsimba kenyan.
REV 13:16 Doen heman impunù din te keilangan pengilelaan se kedita te otaw diyà te belad dan kowanan aw diyà te kilay dan, pengkey otaw nedengeg aw wedà kedengeg, pengkey meyaman aw sagkep, pengkey allang aw kenà allang.
REV 13:17 Wedad otaw mekebayad aw wedad heman mekebeligyà singed aw onà dan pengilelaan te ngadan te menenanap mebolot aw bilang te ngadan din.
REV 13:18 Nayan, keilangan doen kebiyasa te otaw meglebad te tegdeyanan te bilang te ngadan te menenanap sìyan, so in-eles se ngadan te otaw diyà te bilang niyan, enem gatos keneman teg enem.
REV 14:1 Penga niyan, kinità ko se Karniro timindeg kidoen te bontod iningedanan Sion. Kidoen heman doma din se sebad gatos kepatan teg epat melalan otaw, sìyan otaw doen ngadan te Karniro aw ngadan te Amay din Timanem insolat diyà te kilay dan.
REV 14:2 Penga niyan, doen dinineg ko minikagi kidoen te langit, iling te logo-logo te medita wayeg dimelog, aw iling heman iyan te eleg-eg te kilat. Doen heman dinineg ko iling te daging te medita otaw egpengablit te alpa.
REV 14:3 Timindeg se kedita dan kidoen medapag te onsedanan te peglowan, aw kidoen te epat ayam-ayam metolos, aw kidoen te menge obanen. Migdelangan dan te kaling delangan. Sikandan olò se nekeiling te kaling delangan sìyan, so sikandan se impelowà te Karniro lekat te salà kidoen te keneyonan.
REV 14:4 Wedà dan layok te kenà kandan esawa, so wedà dan pengognan. Egtaking dan te Karniro pengkey kenan pesalo. Impelowà din dan lekat te salà kidoen te keneyonan, aw neinang dan iling te pongo monà geniyen ibegay diyà te Timanem aw diyà te Karniro.
REV 14:5 Wedad palos kebolalaw inikagi dan, so wedà dan peg-inang te medaet te wedà dan pa kematay.
REV 14:6 Penga niyan, kinità ko se sebad anghil limayang kidoen te tengà-tengà te langit aw tanà. Egtoladà sikandin te mèpiya indan wedad temanan. Yan se intoladà din diyà te kedita te otaw mig-ogpà kidoen te keneyonan, pengkey kenan dan peg-ogpà.
REV 14:7 Timawal sikandin te dakel se kagi din, “Segmani niyo se Timanem. Duyuni niyo heman sikandin, so dimateng den se aldaw te ipelumun din se kedita te poon din. Keilangan simbahen niyo sikandin mig-inang te langit, aw tanà, aw dagat, aw kedita te wayeg.”
REV 14:8 Penga niyan, doen ikedowa anghil timelokon te doma aw minikagi, “Ontò den nebàtan se lonsod nedengeg iningedanan Babilonya, so binoyo te tege Babilonya se kedita te doma otaw te keneyonan amon makop dan diyà te medaet inang dan egkebensihan te Timanem.”
REV 14:9 Penga niyan, doen iketelo anghil timelokon te doma aw timawal te dakel se kagi din, “Aw megsimba kaw diyà te menenanap mebolot aw diyà te inotaw impeinang din, aw pengilelaan kaw din diyà te kilay aw diyà te belad,
REV 14:10 ipesipat kaw heman diyà te otaw ipelumun te Timanem, so neketagad den sikandin megpelumun te wedad keido din. Dalem te pegtonggò te Karniro aw menge anghil te Timanem, ipelumun te Timanem se otaw te apoy aw esopri.
REV 14:11 Mebel se apoy te pelumun din kandan te wedad temanan. Pengkey aldaw aw delem, eked palos lengà se pelumun din kandan, so migsimba dan te menenanap mebolot aw inotaw impeinang din, aw pinengilelaan dan te ngadan te sìyan menenanap mebolot.”
REV 14:12 Yan se doun te keilangan tomayod se kedita tadon sakop te Timanem diyà te kelimahan, pengkey kedita tadon egtolò te impunù te Timanem aw egsalig diyà ki Jesus.
REV 14:13 Penga niyan, doen dinineg ko minikagi diyà kanak lekat te langit, “Solati inì. Meluba se otaw matay aw tapay dan simalig diyà te Pengolo.” Minikagi se Espiritu Santo, “Ontò dan meluba, so wedad den terbaho dan lekat seini, aw mekeetod den dan, so doen ibowang kandan tandà te mèpiya inang dan.”
REV 14:14 Penga niyan, kinità ko se labon mepotì, aw doen nenenoo kidoen iling te bawa te Timanem Migpekeotaw. Doen korona ininang te bolawan insangkob din kidoen te olo din, aw doen geniyay megalang inewidan din.
REV 14:15 Penga niyan, doen sebad anghil limowà te dakel simbahan, aw timawal sikandin diyà te otaw nenenoo kidoen te labon, aw dakel se kagi din, “Gemiti se geniyay no, so dimateng den se aldaw te peglegani, so ontò den neinog se keneyonan.”
REV 14:16 Penga niyan, ginamit te otaw nenenoo kidoen te labon se geniyay din, aw ginani din se keneyonan.
REV 14:17 Penga niyan, doen sebad anghil limowà lekat te dakel simbahan te Timanem kidoen te langit, aw doen heman geniyay din megalang.
REV 14:18 Penga niyan, dimateng se sebad anghil lekat te sonoganan kidoen te dakel simbahan. Sikandin se anghil egtonggò te apoy kidoen te sonoganan. Timawal sikandin diyà te doma anghil nengibing te geniyay, aw dakel se kagi din, “Gemiti se geniyay no aw genihi se pongo te paras kidoen te keneyonan, so neinog den.”
REV 14:19 Penga niyan, ginamit te anghil se geniyay din aw ginani din se kedita te paras kidoen te keneyonan. Penga niyan, insawol din dan kidoen te dakel tigmesanan te paras amon ontò dan ipelumun te Timanem.
REV 14:20 Penga niyan, ginìtan se pongo te paras kidoen te tigmesanan doton te lowà te lonsod, aw dimelog se dipanog niyan lekat te tigmesanan taman te menge telo gatos kilomitro. Sebad mitro aw tengà se kedalem te dipanog sìyan.
REV 15:1 Penga niyan, doen doma ledyawan kinità ko kidoen te langit ontò ko nepelahan. Doen pito anghil nengibing te pito kededàtan. Seini se temanan te kededàtan, so aw penga niyan, melingeb se pegpelumun te Timanem kandan kidoen te keneyonan.
REV 15:2 Doen pa kinità ko iling te lanaw ontò metìngaw iling te ispiho, meneng pigsanged te apoy. Kinità ko heman kidoen se kedita te otaw nekedaeg te menenanap mebolot, so wedà dan pegsimba diyà te inotaw impeinang din, aw wedà dan pegpeinang te pengilala te bilang te ngadan din. Timindeg dan kidoen te kilid te lanaw, aw kinablit dan se menge alpa imbegay te Timanem kandan.
REV 15:3 Migdelangan dan te delangan i Moises timolò te Timanem gebii, aw delangan te Karniro, kagi dan, “E Timanem, Pengolo day, Eglowan ka diyà te kedita te otaw. Ontò mèpiya se kedita te inang nikaw. Sikona se selotan diyà te kedita te lonsod. Metòlid aw neketotok se kedita te eg-inangen nikaw.
REV 15:4 E Pengolo day, Segmanen ka aw iduyun ka te kedita te otaw, So sebad no se eg-inang te ontò metòlid. Simbahen ka te otaw lekat te kedita te lonsod, So impekità no den te metòlid se kedita te ininang nikaw.”
REV 15:5 Penga niyan, kinità ko te neowang den se dakel simbahan te Timanem kidoen te langit, aw kinità ko se didalem te tambì egsolan te punù te Timanem insolat.
REV 15:6 Limowà lekat te dakel simbahan se pito anghil amon mengibing dan te pito kededàtan. Nenaol dan te tila iningedanan linon ontò mepotì, aw doen elen dan ininang te bolawan.
REV 15:7 Doen pito lipong ininang te bolawan sinolan te pelumun te Timanem eked palos kematay. Yan se imbegay te sebad ayam-ayam metolos diyà te pito anghil.
REV 15:8 Penga niyan, ontò dakel se ebel kidoen didalem te dakel simbahan te Timanem tandà te kelangkaw din aw tolos din. Yan se doun te wedad otaw mekeawop te dakel simbahan lamig mepenga se pito kededàtan inibing te pito anghil.
REV 16:1 Penga niyan, doen dinineg ko timawal kidoen te dakel simbahan, aw simogò sikandin te pito anghil, kagi din, “Ibingi niyo se pito lipong doton te keneyonan, aw olai niyo se awop niyan, so yan se pelumun te Timanem.”
REV 16:2 Penga niyan, inibing te tagnà anghil se lipong, aw in-olà din iyan kidoen te tanà. Peg-olà din te lipong, pigbekokang se kedita te otaw pinengilelaan te menenanap mebolot, aw kedita dan migsimba diyà te inotaw impeinang din. Mahò aw ontò medaet se bekokang dan.
REV 16:3 Inibing te ikedowa anghil se lipong, aw in-olà din iyan kidoen te dagat. Yan neinang dipanog se dagat, iling te dipanog te otaw binonò, aw nematay se kedita doton didalem te dagat.
REV 16:4 Inibing te iketelo anghil se lipong, aw in-olà din iyan kidoen te kedita te wayeg aw selep, aw neinang dipanog se kedita niyan.
REV 16:5 Dinineg ko se inikagi te anghil insogò kidoen te wayeg, kagi din, “E Timanem eg-inang te metòlid, doen ka seini aw doen ka heman gebii. Ontò metòlid se pegpelumun no te otaw seini.
REV 16:6 Nemonò dan te menge sakop no aw telekeliwat te kagi no gebii, aw yan se doun te impeinem no den dan te dipanog. Mèpiya den, so nesàban den dan te ontong dan.”
REV 16:7 Doen heman dinineg ko timawal kidoen te sonoganan, kagi din, “Timanem, Pengolo eglowan diyà te kedita te otaw, benal iyan. Ontò neketotok aw metòlid se pegpelumun nikaw.”
REV 16:8 In-olà te ikeepat anghil se lipong kidoen te aldaw, aw yan se doun te nekesonog se aldaw te otaw.
REV 16:9 Tinollonan dan se Timanem simogò te menge kededàtan seini, so ontò meinit se aldaw. Meneng wedà dan pegselsel te medaet ininang dan, aw wedà dan heman duyun kandin.
REV 16:10 In-olà te ikelima anghil se lipong kidoen te onsedanan te peglowan te menenanap mebolot, aw migkengitngit se peglowan din. Nemangà se menge sakop din te dilà dan tandà te kesakit te kededàtan dimateng kandan.
REV 16:11 Nenollon dan te Timanem tandà te kesakit aw menge bekokang dan. Meneng wedà dan pegselsel te medaet ininang dan.
REV 16:12 In-olà te ikeenem anghil se lipong kidoen te dakel wayeg te Yofritis, aw yan neeti se wayeg sìyan aw migkepangkag amon tapay meketagad se baog te peg-okit te menge selotan domateng lekat te lonsod kidoen te eglibtakan te aldaw.
REV 16:13 Penga niyan, kinità ko heman se telo bosaw ontò medaet, aw iling te bakbak se bawa dan. Limowà se sebad lekat te bahà te nagan, aw limowà se ikedowa lekat te bahà te menenanap mebolot, aw limowà se iketelo lekat te bahà te telekeliwat te kebolalaw i Satanas.
REV 16:14 Nekeinang se telo bosaw sìyan te menge kepelahan, aw insogò dan i Satanas doton te kedita te selotan te keneyonan, amon megtipon dan te kedita te sondalo, so mato dan diyà te Timanem aw domateng se aldaw te peglowan din diyà te kedita te otaw.
REV 16:15 Yan tinipon te telo bosaw se kedita te selotan aw sondalo dan kidoen te bontod iningedanan Armagidon diyà te kagi te Hebreo. Meneng minikagi se Pengolo, “Na, iling te pegdateng te menenakaw se pegdateng ko, so wedad metaga-taga aw kano. Mèpiya se otaw eked tedogi so megpeliman kanak. Meluba se otaw gayed egpenenaktun so meketagad te pegdateng ko amon eked sikandin keyàyà aw megkità a kandin.”
REV 16:17 In-olà te ikepito anghil se lipong diyà te kelamag, aw doen timawal kidoen te dakel simbahan te Timanem, aw kidoen te onsedanan te peglowan, kagi din, “Nepenga den se kedita.”
REV 16:18 Penga niyan, migkilem, aw doen ontò dakel eleg-eg, aw migkilat, aw doen ontò dakel linog. Wedad palos otaw mig-imanman te linog iling kenyan lekat te gebii, so ontò neantag se tanà.
REV 16:19 Netengà te telo se lonsod sìyan nedengeg, aw nebàtan se kedita te lonsod te keneyonan. Tinoman te Timanem se pakang din tepad te tege Babilonya, aw yan dinetengan dan te keopal din, aw ontò din dan impelumun.
REV 16:20 Migkewedad se kedita te polò aw kedita heman te bontod.
REV 16:21 Nedegdagan se otaw te dedakel odan netikbolò aw megenaw, aw keliman kilo se kebegat te teg sebad-sebad kenyan. Nenollon dan te Timanem tandà te kededàtan te dedakel odan netikbolò aw megenaw, so ontò iyan medaet kededàtan.
REV 17:1 Penga niyan, migpedapag kanak se sebad anghil tapay nengibing te lipong, aw minikagi, “Taking ka kanak, aw ipekità ko kamno se pelumun te Timanem diyà te kepoyun ontò nedengeg eg-ogpà kidoen te medita wayeg.
REV 17:2 Limayok se kedita te selotan te keneyonan kandin, aw nelasing se kedita te otaw te keneyonan pineokit te bino imboyo din kandan.”
REV 17:3 Penga niyan, doen impekità te Espiritu Santo kanak, aw inibing a te anghil doton te kebigtilan. Kinità ko se bayi simakay te melalag menenanap mebolot. Doen medita ngadan egtompuyus te Timanem insolat kidoen te lawa te menenanap sìyan, aw doen pito olo din aw sempolò se seka din.
REV 17:4 Migdagom se bayi te melalag ontò meelagà aw iling te selotan. Doen palas din ininang te bolawan, aw bato meelagà, aw menge pirlas. Inewidan din se tabò ininang te bolawan, aw nepenò iyan te inang din medaet.
REV 17:5 Kidoen te kilay din, insolat se ngadan doen kedegdagan in-eles, kagi din, “Babilonya, lonsod nedengeg, eglekatan te kedita te kepoyun aw kedita te medaet kidoen te keneyonan.”
REV 17:6 Kinità ko heman te nelasing den se bayi sìyan, so ininem din se dakel dipanog te menge sakop te Timanem inimetayan din tandà te pegsalig dan diyà ki Jesus. Pegkità ko kandin, ontò a nepela.
REV 17:7 Meneng minikagi se anghil, “Ikà egkepela, so indanan ta den te kedegdagan tepad te bayi seini, aw tepad te menenanap mebolot sinekayan din doen pito olo aw sempolò se seka.
REV 17:8 Sìyan menenanap mebolot kinità no, doen pedowan din kedengan, meneng nematay den. Meneng te eked kenamay, meantay aw lomowà lekat te awang kidoen te tanà wedad temanan te kedalem. Aw lomowà iyan, iagbel iyan doton te kilot amon ipelumun. Mepela se kedita te otaw te keneyonan, sìyan menge otaw wedà kesolat se ngadan dan kidoen te libro sinolatan te ngadan te kedita te otaw begayan te kaling pedowan wedad temanan. Yan se insolat te wedà pa inangi se keneyonan. Mepela dan so kinità dan se sìyan menenanap mebolot, aw nematay iyan, meneng meantay pa.
REV 17:9 “Keilangan biyasa se otaw amon mekelabet kani. Se pito olo te menenanap mebolot, yan se pito bontod eg-ogpaan te bayi sìyan.
REV 17:10 Se pito olo te menenanap mebolot, yan heman se pito selotan. Nematay den se lima kandan, aw doen sebad limowan seini, aw doen pa sebad wedà pa lowan. Aw lomowan se ikepito selotan, mesagda se peglowan din te eked kenamay.
REV 17:11 Se menenanap mebolot, sìyan doen pedowan din kedengan meneng nematay den, yan se ikewalo selotan, meneng doma iyan te pito ketondogan din. Ipelumun sikandin kwani kidoen te kilot.
REV 17:12 “Se sempolò seka kinità no, yan se sempolò selotan wedà pa lowan. Meneng isawol dan selotan amon lomowan dan doma te menenanap mebolot te eked kenamay, sebad olò oras.
REV 17:13 Megsebad se aneng-aneng te sìyan sempolò selotan, aw megpesakop dan diyà te menenanap mebolot, aw tomolò dan te ipunù din kandan.
REV 17:14 Penga niyan, megbolaw dan te Karniro. Meneng dàgen din dan, so sikandin se Pengolo diyà te kedita te pengolo, aw sikandin se Selotan eglowan diyà te kedita te selotan. Se kedita te sakop te Karniro, yan se otaw tinawal te Timanem, aw pinemallì din, aw egkeseligan dan.”
REV 17:15 Minikagi heman se anghil, “Se wayeg kinità no inogpaan te kepoyun, yan se medita kemolò te otaw eked kebilang lekat te medita lonsod, aw medita kemolò se kagi dan.
REV 17:16 Se sempolò selotan pinolingunan te sempolò seka kinità no, meopal dan te kepoyun. Meopal heman kandin se menenanap mebolot. Yan se doun te meglompak dan kandin, aw mengabat dan te penenaktun din, aw komaen dan te onod din, aw sonogen dan sikandin.
REV 17:17 Yan se inangen dan kandin, so begayan dan te Timanem te ibeg amon tomanen dan se lalang din. Yan se doun te megsebad dan te pedowan aw megpesakop dan diyà te menenanap mebolot amon megtelaban dan kenyan lamig metoman se tapay impakang te Timanem.
REV 17:18 Se bayi kinità no, yan se lonsod nedengeg eglowan diyà te kedita te selotan te keneyonan.”
REV 18:1 Penga niyan, kinità ko se sebad anghil timenà lekat te langit. Melangkaw se gulal din, aw migkelowa se kedakel te keneyonan tandà te keanyag din.
REV 18:2 Timawal sikandin te ontò dakel se kagi din, “Ontò den nebàtan se Babilonya, lonsod nedengeg. Neinang den iyan ogpeanan te bosaw. Nelegeb iyan te kedita te enito. Nelegeb iyan te kedita te manok ontò medaet.
REV 18:3 Neinang iyan iling kenyan so neboyo se kedita te otaw te keneyonan amon makop dan diyà te medaet inang din egkeopalan te Timanem. Limayok se kedita te selotan te keneyonan kandin. Migkeyaman heman se kedita te tindiro te keneyonan bineyadan din te kepulukan din amon metoman se medaet ibeg din.”
REV 18:4 Penga niyan, doen doma dinineg ko minikagi kidoen te langit, “Kedita niyo migpesakop diyà kanak, kesayo kaw lekat te ogpeanan sìyan. Eked a keibeg aw makop kaw diyà te salà te bayi sìyan, amon eked kaw heman detengi te kededàtan domateng kandin.
REV 18:5 Simpana ilodok se kedakel te salà din, mapet den te langit, so ontò den dakel. Wedà pegwedadi te Timanem se salà din ontò medaet.
REV 18:6 Se ininang din diyà te doma otaw, yan heman se inangen kandin. Se pegpemilang din te doma, dobli se pegpemilang domateng kandin. Se keopal din kenyo, dobli heman se keopal te Timanem kandin.
REV 18:7 So migpelangkaw-langkaw sikandin aw tinoman din se medaet ibeg din, yan heman se kebegat te pelumun domateng kandin, so elegen sikandin aw melano. Mig-aneng-aneng sikandin te iling sikandin te selotan, kenà iling te balo. Eden din aw eked palos sikandin kelano.
REV 18:8 Meneng yan se doun te dalem te sebad se aldaw, detengan sikandin te kededàtan, so ipelumun sikandin pineokit te mesakit, aw kelano, aw bayil. Mesonog heman sikandin te apoy, so ipelumun sikandin te Timanem metolos Pengolo.”
REV 18:9 Aw kitaen se ebel te pegsonog kandin, megkelag aw megmatay se kedita te selotan limayok kandin aw timoman te kedita te ibeg din medaet.
REV 18:10 Megpekediyò dan kidoen amon eked dan kesàbi te pelumun domateng kandin, aw mikagi dan, “Ontò mekelelayò se Babilonya lonsod nedengeg, so dalem te sebad oras, nesàban iyan te pelumun.”
REV 18:11 Megkelag aw melano heman se kedita te tindiro tandà te pegbaet kenyan, so wedad den mayad te ibeligyà dan,
REV 18:12 menge bolawan, aw selapì, aw bato meelagà, aw pirlas, aw tila mepotì, aw meelagà tila te selotan, aw sida, aw tila melalag, aw tabla mèpiya nadeg, aw medita kemolò te ibeligyà dan ininang lekat te tangkò te elefanti, aw meelagà tabla, aw tombaga, aw kinis, aw bato marmol.
REV 18:13 Wedad heman mayad te ibeligyà dan, menge kaningag aw menge doma kemolò te enagay, aw metinadeg sonogen, aw sìyan bebolong iningedanan mira, aw litek metinadeg, aw bino, aw lana, aw arina, aw trigo, aw baka, aw karniro, aw kodà, aw keriton, aw allang, aw pengkey otaw wedad ontong.
REV 18:14 Minikagi dan heman diyà te bayi impolingun diyà te lonsod te Babilonya, “Nebàtan den se kedita te egkeibegan nikaw. Nebàtan den se kedita te mèpiya kànen no aw kedònan no, aw eked iyan palos todà kitai.”
REV 18:15 Se kedita te otaw migkeyaman pineokit te pegpemeligyà dan te menge meelagà kidoen, megpekediyò dan te lonsod sìyan amon eked dan kesàbi te kededàtan. Megkelag aw melano dan.
REV 18:16 Mikagi dan, “Ontò mekelelayò se lonsod nedengeg. Nenaol se otaw kidoen te mèpiya sapot, aw tila te selotan, aw melalag. Migpalas dan heman te bolawan, aw bato meelagà, aw menge pirlas.
REV 18:17 Meneng dalem te sebad oras, nebàtan se kedakel te keyemanan dan.” Migpekediyò heman se otaw egpengibing te bapor, aw menge otaw simakay te bapor, aw menge gormiti, aw kedita te otaw egpengibing te karga diyà te bapor.
REV 18:18 Pegkità dan te ebel lekat te pegkesonog te lonsod sìyan, timawal dan, “Wedad palos lonsod labi pa nedengeg diyà te lonsod sìyan.”
REV 18:19 Imbodbod dan se napò te tanà diyà te olo dan tandà te lano dan. Migkelag dan aw timawal dan, “Ontò mekelelayò se lonsod nedengeg, so migkeyaman se kedita te tig-apò te bapor nengibing te keyemanan doton kenyan. Nebàtan se kedita niyan dalem te sebad olò oras.”
REV 18:20 Keilangan meluba kaw tege langit, so nebàtan den iyan. Keilangan meluba kaw menge sakop te Timanem, aw sogounun i Cristo, aw telekeliwat te kagi te Timanem, so impelumun den te Timanem se lonsod sìyan tandà te pegpemilang niyan kenyo.
REV 18:21 Penga niyan, inabat te anghil se bato iling te kedakel te dakel gilingan, aw indagdag din kidoen te dagat. Minikagi sikandin, “Iling kenyan, nebàtan den heman se lonsod te Babilonya nedengeg, so eked palos todà kitai.
REV 18:22 Eked den palos dinegi se daging te pegkablit te alpa, aw kagi te otaw megdelangan, aw daging te seluli aw bodyong. Eked den palos kitai kidoen se otaw biyasa meg-inang te pengkey eden. Eked den palos dinegi kidoen se daging te gilingan.
REV 18:23 Wedad den palos menemtem te solò kidoen. Wedad den heman meg-inang te peipid kidoen. Impelumun se tege Babilonya so doen menge otaw egpemeligyà kidoen migpelangkaw-langkaw, aw doen mig-akal te kedita te otaw pineokit te pegboyo dan kandan.
REV 18:24 Impelumun se tege Babilonya so sikandan se nengimatay te menge telekeliwat te kagi te Timanem, aw menge sakop din, aw kedita te otaw binonò kidoen te keneyonan.”
REV 19:1 Penga niyan, doen dinineg ko iling te pegtawal te ontò medita otaw kidoen te langit. Timawal dan, “Aliloya. Iduyun se Timanem, so sikandin se egpelowà, aw melangkaw, aw metolos.
REV 19:2 Ontò neketotok aw metòlid se peg-okom din, so impelumun din den se kepoyun nedengeg, sìyan migpeakop te kedita te otaw te keneyonan diyà te medaet inang din. Impelumun sikandin te Timanem so nengimatay te menge otaw timolò te Timanem.”
REV 19:3 Todà dan timawal, “Aliloya. Iduyun se Timanem. Gayed mebel se apoy te pegsonog te lonsod sìyan te wedad temanan.”
REV 19:4 Penga niyan, limongken se kedita te kelowan teg epat obanen aw epat ayam-ayam metolos, aw migsimba dan te Timanem nenenoo kidoen te onsedanan te peglowan. Minikagi dan, “Metoman iyan. Aliloya. Iduyun se Timanem.”
REV 19:5 Penga niyan, doen minikagi kidoen medapag te onsedanan te peglowan, kagi din, “Kedita niyo egtolò te Timanem tadon aw kedita niyo egsagman kandin, pengkey sagkep aw melangkaw, duyuni niyo se Timanem.”
REV 19:6 Penga niyan, doen dinineg ko iling te pegtawal te ontò medita otaw, iling te elok te medita wayeg aw eleg-eg te kilat. Timawal dan, “Aliloya. Iduyun se Timanem, so limowan den se Pengolo tadon Timanem diyà te kedita te otaw.
REV 19:7 Keilangan ontò kidon meluba aw iduyun tadon sikandin, so dimateng den se peipid te Karniro, aw neketagad den se ipeipid kandin.
REV 19:8 Doen dagom imbegay kandin ininang te sapot ontò mepotì aw wedad kelipà niyan.” Se kedegdagan te sapot, yan se metòlid inang te menge sakop te Timanem.
REV 19:9 Penga niyan, minikagi se anghil, “Solat ka den kani. Ontò meluba se kedita dan tinawal diyà te peipid te Karniro.” Penga niyan, minikagi heman sikandin, “Yan se benal kagi te Timanem.”
REV 19:10 Penga niyan, limongken a diyà kandin amon simbahen ko, meneng minikagi sikandin, “Ikà egsimba kanak, so pengkey siak, aw sikona, aw kedita heman te doma no nemenal te kebenalan intoladà i Jesus, tomalag egtolò te Timanem. Yan keilangan Timanem olò se simbahen nikaw.” Yan se inikagi din, so se intoladà i Jesus, yan heman se kebenalan intoladà te menge telekeliwat te kagi te Timanem.
REV 19:11 Penga niyan, kinità ko se langit neowang, aw doen kodà mepotì. Se otaw simakay kenyan, yan se doen doma ngadan din si Keseligan, aw si Kebenalan. Metòlid se kedita te pegpelumun din aw peglompak din te poon din.
REV 19:12 Iling te apoy se mata din. Medita se korona insangkob kidoen te olo din. Doen ngadan insolat kandin, meneng olò sikandin se netaga-taga te kedegdagan niyan.
REV 19:13 Iling te in-agem se saol din diyà te dipanog, aw egtewalen sikandin “Kagi te Timanem.”
REV 19:14 Tinekingan sikandin te ontò medita sondalo lekat te langit. Nenaol dan heman te sapot ontò mepotì aw wedad kelipà, aw simakay dan heman te menge kodà mepotì.
REV 19:15 Lekat te bahà din, eglowà se sondang megalang, aw yan se kekamang din idaeg te kedita te eglowan kidoen te keneyonan. Aw lomowan sikandin, keilangan tomolò se kedita te otaw kandin. Inangen din se poon din iling te paras emegen te otaw meg-inang te bino, so ipekità din kandan se keopal te Timanem metolos.
REV 19:16 Doen gulal din insolat kidoen te saol din aw bobon din, “Selotan eglowan diyà te kedita te selotan,” aw “Pengolo te kedita te pengolo.”
REV 19:17 Penga niyan, kinità ko se anghil kidoen te aldaw. Timawal sikandin diyà te kedita te manok eglayang kidoen te tengà-tengà te langit aw tanà, aw dakel se kagi din, “Ayas kaw. Pegtipon kaw, so doen ipekaen te Timanem kenyo.
REV 19:18 Komaen kaw te onod te menge selotan, aw kapitan, aw sondalo. Kànen niyo se lawa te kodà aw lawa te otaw simakay te kodà. Kànen niyo se lawa te kedita te otaw pengkey allang aw kenà allang, pengkey sagkep aw melangkaw.”
REV 19:19 Penga niyan, kinità ko se menenanap mebolot aw menge selotan te keneyonan sipat kedita te sondalo dan. Netipon dan amon megbolaw te otaw simakay te kodà mepotì aw kedita te sondalo lekat te langit.
REV 19:20 Pegbolaw dan, dinakep se menenanap mebolot. Dinakep heman se telekeliwat te kebolalaw, sìyan tapay mig-inang te menge kepelahan pineokit te tolos te simogò kandin, amon meg-akal te kedita te otaw pinengilelaan te menenanap mebolot aw otaw migsimba te inotaw impeinang din. Penga niyan, in-agbel se menenanap aw telekeliwat din doton te lanaw apoy doen esopri eglegdeg.
REV 19:21 Penga niyan, inimetayan se kedita te sondalo dan pineokit te sondang eglowà lekat te bahà te otaw simakay te kodà mepotì. Ontò nebesog se kedita te manok kimaen te lawa dan.
REV 20:1 Penga niyan, kinità ko se anghil migpedanà lekat te langit. Inibing din se konsì te awang te tanà wedad temanan te kedalem. Binitbit din heman se dakel sengkalì.
REV 20:2 Dinakep din se nagan, yan se memokan gebii, si Satanas. Yan se ginapos din lamig mepenga se sebad melalan se omay.
REV 20:3 In-agbel din doton te awang te tanà wedad temanan te kedalem, aw tinakep din iyan, aw pinengilelaan din se tetakep amon wedad meg-owang. Yan se ininang din amon eked pa peg-akal se nagan diyà te otaw te kedita te lonsod. Aw mepenga se sebad melalan se omay, ipelowà sikandin te eked kenamay.
REV 20:4 Penga niyan, kinità ko se menge onsedanan te peglowan. Nenenoo kidoen se menge otaw insawol amon meg-okom. Kinità ko heman se pedowan te kedita te otaw inimetayan tandà te peg-indan dan tepad ki Jesus aw pegtoladà dan te kagi te Timanem, so wedà dan pegsimba diyà te menenanap mebolot aw diyà te inotaw impeinang din, aw wedà dan heman pegpeinang te pengilala kidoen te kilay dan aw belad. Inantay den dan, aw limowan dan doma i Cristo dalem te sebad melalan se omay.
REV 20:5 Yan se tagnà peg-antay te Timanem te otaw lekat te nematay, so wedà entayi se menge doma otaw lekat te nematay singed aw mepenga se sebad melalan se omay.
REV 20:6 Meluba aw egpenimanem heman se kedita te otaw entayen te Timanem te tagnà peg-antay din. Yan se otaw eked pesipati diyà te medaet otaw ipelumun te ikedowa pegkematay. Inangen dan menge sogounun i Cristo aw Timanem. Lomowan dan doma i Cristo dalem te sebad melalan se omay.
REV 20:7 Aw mepenga se sebad melalan se omay, ipelowà si Satanas lekat te keleboso.
REV 20:8 Aw lomowà sikandin, meg-akal te kedita te lonsod te keneyonan, pengkey Gog aw Magog, aw megtipon kandan amon megbolaw dan te Timanem. Ontò medita se sondalo metipon, aw eked dan kebilang iling te enay kidoen te dagat.
REV 20:9 Peg-ipanaw dan, limanang dan diyà te kebelad te tanà, aw nelibedan se lonsod te Jerusalem nedekelan te Timanem te pedowan aw eg-ogpaan te menge sakop din. Meneng nedegdagan dan te apoy lekat te langit, aw neamin dan nematay.
REV 20:10 Penga niyan, in-agbel se mig-akal kandan si Satanas doton te lanaw apoy aw esopri tapay inegbelan te menenanap mebolot aw telekeliwat din te kebolalaw. Elegen dan te aldaw aw delem te wedad palos temanan.
REV 20:11 Penga niyan, kinità ko se mepotì onsedanan te peglowan ontò dakel, aw doen nenenoo kidoen. Ontò migpekediyò se tanà aw langit lekat kandin tandà te kelangkaw din, aw eked den dan kitai.
REV 20:12 Kinità ko se kedita te otaw neantay den lekat te nematay, pengkey melangkaw aw sagkep. Timindeg dan diyà te monà te onsedanan te peglowan. Bineka se menge libro aw sìyan libro sinolatan te ngadan te kedita te otaw binegayan te kaling pedowan wedad temanan. Se insolat kidoen te menge doma libro, yan se indan aw eden se ininang dan te wedà dan pa kematay, aw yan se binasa te peg-okom kandan.
REV 20:13 Peg-antay kandan, inantay se kedita te otaw lekat te nematay, pengkey nelemes dan kidoen te dagat, aw nekelowà se pedowan dan lekat te ogpeanan te otaw nematay. Inokom se kedita dan tepad te ininang dan te wedà dan pa kematay.
REV 20:14 Penga niyan, in-agbel doton te lanaw apoy se kemetayun aw ogpeanan te otaw nematay, aw yan se temanan niyan. Se lanaw apoy, yan se iningedanan Ikedowa Kemetayun.
REV 20:15 Se otaw wedà kitai se ngadan dan kidoen te libro sinolatan te ngadan te kedita te otaw binegayan te kaling pedowan wedad temanan, yan se in-agbel doton te lanaw apoy.
REV 21:1 Penga niyan, kinità ko se kaling langit aw kaling tanà, so neselilinan se monà langit aw monà tanà. Wedad den heman dagat.
REV 21:2 Kinità ko se lonsod eg-ogpaan te Timanem, sìyan iningedanan Kaling Jerusalem. Migpedanà iyan lekat te langit aw lekat te Timanem. Ontò mèpiya se bawa niyan, iling te bayi ontò mig-igmes te aldaw te peipid din.
REV 21:3 Doen dinineg ko timawal kidoen te onsedanan te peglowan, kagi din, “Na, meg-ogpà den se Timanem doma te otaw. Meg-ogpà doma kandan, aw meinang sakop din se kedita dan, aw sikandin se meg-ipat kandan, aw sikandin se gayed dan egseligan.
REV 21:4 Gelisen din se lohà kidoen te mata dan amon ontò dan meluba. Wedad den palos matay. Wedad den melano. Wedad heman megkelag. Wedad heman mesakit, so migkewedad den se monà keneyonan.”
REV 21:5 Minikagi se nenenoo kidoen te onsedanan te peglowan, “Na, inangen ko den kaling se kedita.” Minikagi heman sikandin, “Solati se kedita nini, so keseligan se kagi ko, aw metoman iyan.”
REV 21:6 Minikagi heman sikandin, “Netoman den se kedita. Siaken se Alpa aw Omiga, so siaken se gayed doen lekat te keteboan lamig te temanan. Aw melao se otaw, ipeinem ko dan kidoen te selep doen wayeg egpemegay te pedowan wedad temanan, aw eked ko heman iyan pebeyadi.
REV 21:7 Doen ontong ibegay ko diyà te kedita te otaw eked dàgi te kededàtan, so siak se Timanem megtonggò kandan, aw meinang dan menge batà ko.
REV 21:8 Meneng se kedita te otaw dàgen te kededàtan, aw eked tayod te pegsalig kanak, aw otaw nelegeb te salà, aw metibonò, aw eglayok te kenà kandan esawa, aw egketoigan, aw egsimba te kenà benal timanem, aw egkebolalaw, doen ontong te kedita dan kidoen te lanaw apoy aw esopri, yan se ikedowa kemetayun.”
REV 21:9 Penga niyan, migpedapag kanak se sebad anghil tapay mig-olà te kededàtan lekat te lipong din. Minikagi sikandin, “Ayas ka, so ipekità ko kamno se bayi neinang den esawa te Karniro.”
REV 21:10 Penga niyan, doen impekità te Espiritu Santo kanak, aw inibing a te anghil sìyan doton te bontod ontò melangkaw. Impekità din kanak se lonsod eg-ogpaan te Timanem, sìyan iningedanan Kaling Jerusalem. Migpedanà iyan lekat te langit aw lekat te Timanem.
REV 21:11 Ontò iyan melowa so doen lowa te Timanem kidoen. Minanyag iyan iling te bato meelagà, iling te haspi, aw ontò metìngaw iling te ispiho.
REV 21:12 Ontò melangkaw se alad te lonsod sìyan, aw sempolò teg dowa se lelebangan niyan. Sempolò teg dowa heman se anghil migtonggò te menge lelebangan. Sinolatan se lelebangan te ngadan te sempolò teg dowa pongan te bowad-bowad i Israel.
REV 21:13 Doen epat kilid te alad te lonsod, aw telo se lelebangan kidoen te teg sebad-sebad kilid niyan. Telo se lelebangan lenged te eglibtakan te aldaw, aw doen telo lenged te norte, aw doen telo lenged te sur, aw doen telo lenged te egselepan te aldaw.
REV 21:14 Doen sempolò teg dowa dakel bato pinetindegan te alad, aw sinolatan se bato te menge ngadan te sempolò teg dowa sogounun te Karniro.
REV 21:15 Inibing te anghil minikagi kanak se sokoday iling te bangkà ininang te bolawan amon sokoden din se lonsod, aw lelebangan niyan, aw alad.
REV 21:16 Se lonsod sìyan, onawa se kelayat niyan aw kebelad niyan. Pegsokod din te lonsod, dowa melalan epat gatos kilomitro se kelayat niyan. Onawa heman se sokod din te kebelad aw kelangkaw niyan.
REV 21:17 Sinokod din heman se kelayat te alad, keneman mitros. Onawa se kelayat te mitro ginamit te anghil aw mitro eggemiten tadon.
REV 21:18 Ininang se alad te bato meelagà iningedanan haspi, aw ininang se lonsod te ontò bolawan metìngaw iling te ispiho.
REV 21:19 Se dakel bato pinetindegan te alad, yan se pinelasan heman te medita kemolò te bato meelagà. Se tagnà dakel bato, pinelasan iyan te haspi. Se ikedowa, pinelasan te sapiro. Agata se iketelo, esmeralda se ikeepat,
REV 21:20 onisi se ikelima, kornalina se ikeenem, krisolito se ikepito, birilo se ikewalo, topasyo se ikesiyam, krisopraso se ikesempolò, hasinto se ikesempolò tegusà, aw amatista se ikesempolò teg dowa.
REV 21:21 Se sempolò teg dowa lelebangan, yan se sempolò teg dowa pirlas, so ininang se teg sebad-sebad lelebangan te sebad olò dakel pirlas. Se kersada te lonsod sìyan, yan se ininang te ontò bolawan metìngaw iling te ispiho.
REV 21:22 Wedad simbahan kinità ko kidoen te lonsod sìyan, so eg-ogpà kidoen se egsimbahen dan, yan se Timanem Pengolo eglowan diyà te kedita dan aw Karniro.
REV 21:23 Wedad heman kekemowan te senang te aldaw aw bolan kidoen, so egsenangan dan te lowa te Timanem, aw Karniro se solò dan kidoen.
REV 21:24 Senangan se kedita te otaw te keneyonan te anyag lekat te lonsod sìyan. Ibingen te kedita te selotan te keneyonan se keyemanan dan ibegay kidoen.
REV 21:25 Meowang se lelebangan niyan tomayod te aldaw. Eked palos tekepi, so wedad den delem kidoen.
REV 21:26 Mengibing se kedita te otaw te keneyonan te menge keyemanan dan aw ibegay dan kidoen.
REV 21:27 Meneng wedad palos medaet mekeawop kidoen. Eked heman pekeawop se otaw eg-inang te medaet aw egkebolalaw. Meneng se otaw mekeawop te lonsod sìyan, yan olò se otaw insolat se ngadan dan kidoen te libro sinolatan te Karniro te ngadan te kedita te otaw binegayan te kaling pedowan.
REV 22:1 Penga niyan, impekità din kanak se wayeg iningedanan Wayeg Mekebegay te Kaling Pedowan. Ontò iyan metìngaw iling te ispiho, aw egtebol kidoen te onsedanan te Timanem aw Karniro.
REV 22:2 Eg-okit se wayeg diyà te tengà-tengà te kersada te lonsod sìyan. Kidoen te kilid te wayeg, doen menge kayo intanem iningedanan Kayo Mekebegay te Kaling Pedowan. Egpongo iyan te mekesempolò teg dowa te kelikit te omay, so egpongo te kelikit te bolan. Se dawen heman niyan, yan se mekebolong te kedita te otaw.
REV 22:3 Wedad tinèyogan te Timanem kidoen. Kidoen se onsedanan te Timanem aw Karniro, aw simbahen se Timanem te kedita te sakop din.
REV 22:4 Komità dan te bawa din, aw solatan se kilay dan te ngadan din.
REV 22:5 Wedad delem kidoen, aw wedad kekemowan dan te solò aw aldaw kidoen, so keenyagan dan te Timanem Pengolo dan. Lomowan dan doma te Timanem te wedad temanan.
REV 22:6 Minikagi se anghil kanak, “Ontò benal se kedita te kagi dinineg no, aw metoman iyan meinang, so se Timanem migpekeliwat te kagi din pineokit te telekeliwat din gebii, yan se Pengolo simogò te anghil din amon ketegahan te kedita te sakop din aw eden se meinang te eked kenamay.”
REV 22:7 Minikagi se Pengolo, “Na, lomikò a te eked kenamay.” Ontò meluba se kedita te otaw tomolò te kagi ingkeliwat pineokit te libro seini.
REV 22:8 Siak si Juan, aw dinineg ko aw kinità ko se kedita te insolat ko dini. Penga te pegdineg ko kani aw pegkità ko kani, limongken a diyà te anghil migpekità kani kanak amon simbahen ko.
REV 22:9 Meneng minikagi sikandin, “Ikà egsimba kanak, so pengkey siak, aw sikona, aw kedita heman te doma no telekeliwat te kagi te Timanem, aw kedita te otaw tomolò te kagi insolat kidoen te libro seini, egtolò se kedita tadon te Timanem. Yan keilangan Timanem olò se simbahen nikaw.”
REV 22:10 Minikagi heman sikandin, “Ikà eg-eles te kagi ingkeliwat den kamno aw insolat no diyà te libro seini, so metoman iyan meinang te eked kenamay.
REV 22:11 Aw metoman iyan, pebeyai se menge otaw gayed eg-inang te medaet aw wedad yàyà, so yan se pinemallì dan. Meneng keilangan gayed tomayod meg-inang te mèpiya aw metòlid se kedita te otaw egpenimanem.”
REV 22:12 Minikagi se Pengolo, “Na, lomikò a te eked kenamay, aw doen ontong ibegay ko diyà te kedita te otaw tepad te ininang dan.
REV 22:13 Siaken se Alpa aw Omiga, siaken se keteboan aw temanan te kedita, so monà a pa diyà te kedita, aw modi a pa heman diyà te kedita.”
REV 22:14 Ontò meluba se kedita te otaw neonawan lekat te salà dan, so yan se otaw mepakay komaen te pongo te kayo iningedanan Kayo Mekebegay te Kaling Pedowan, aw mepakay heman aw mawop dan te lelebangan pesalo doton te lonsod.
REV 22:15 Meneng se kedita te otaw eg-inang te mekeyàyà, aw egketoigan, aw eglayok te kenà kandan esawa, aw metibonò, aw egsimba te kenà benal timanem, aw kedita te otaw egkebolalaw aw egkeibeg te kebolelawan, yan se eked pekeawop te lonsod.
REV 22:16 “Siak si Jesus se simogò te anghil ko doton kamno amon ikeliwat se kagi ko seini diyà te kedita te otaw egpemenal aw egsimba kanak. Siak se bowad-bowad i David impakang gebii. Siak heman se meanyag bitoen te medapag aldaw.”
REV 22:17 Egtawal se Espiritu Santo aw esawa te Karniro, kagi dan, “Ayas kaw diyà.” Aw kedita te otaw menenalan, keilangan tomawal dan heman diyà te doma otaw, “Ayas kaw heman diyà.” Pengkey sinu se otaw nelao meibeg minem, doen wayeg ibowang kandin mekebegay te kaling pedowan.
REV 22:18 Seini se ipunù ko diyà te kedita te otaw domineg te kagi ingkeliwat pineokit te libro seini. Aw doen otaw megdogang te libro seini, idogang te Timanem diyà kandin se kedita te kededàtan in-indan ko dini te libro seini.
REV 22:19 Aw doen otaw mengabat te kagi lekat te libro seini, ebaten heman te Timanem lekat kandin se ontong din, sìyan pongo te Kayo Mekebegay te Kaling Pedowan. Ebaten heman te Timanem lekat kandin se ontong din te peg-ogpà din kidoen te lonsod eg-ogpaan te Timanem, sìyan in-indan ko kidoen te libro seini.
REV 22:20 Si Jesus se netaga-taga te benal se kedita te insolat ko, aw minikagi sikandin, “Ontò a lomikò te eked kenamay.” Metoman iyan. E Jesus, Pengolo ko, ibeg ko lomikò ka den.
REV 22:21 Ibeg ko, kedita niyo sakop te Timanem se tebangan te Pengolo tadon si Jesus. Metoman iyan.
