GEN 1:1 Diyà te puunà midlimbag te Megbevayà is langit wey is kelibutan.
GEN 1:2 Ne zutun, kenè pa hustu is kegkeveeli te kelibutan ne wazè din taǥù. Ne ziyà te zivavew te utew mezalem he wahig ne utew merusirem, diyà medriǥuriǥu is Mulin-ulin te Megbevayà.
GEN 1:3 Ne migkaǥi zutun is Megbevayà te, “Mehimu is kerayag!” Ne nehimu en dutun is kerayag.
GEN 1:4 Ne naahà te Megbevayà he meupiya haazà is kerayag, ne impedsivey zin is kerayag wey is kerusireman.
GEN 1:5 Ne haazà is kerayag, migngezanan te Megbevayà te “maandew”, ne haazà is kerusireman, ne migngezanan din te “mezukilem.” Ne mibmezukilem dutun, ne hein nepawè en, ne nehimu is nehuna he andew.
GEN 1:6 Ne migkaǥi zutun is Megbevayà te, “Mehimu is elang dutun te wahig su wey mezezuwa he vahin.”
GEN 1:7 Ne zutun nehimu is elang ne pinaaǥi kayi impedsivey zin is wahig he ziyà te zizalem wey is wahig he ziyà te zivavew.
GEN 1:8 Ne haazà is elang, migngezanan te Megbevayà he “hewhewanan.” Ne mibmezukilem dutun, ne hein nepawè en, ne nehimu is ikezuwa he andew.
GEN 1:9 Ne migkaǥi zutun is Megbevayà te, “Mesevaha ziyà te sevaha he lugar is wahig kayi te kelibutan para medlepew is memaza he lugar.” Ne nehimu haazà.
GEN 1:10 Ne haazà is memaza, migngezanan te Megbevayà he “tanà” ne haazà is insivey zin he wahig, migngezanan din he “zaǥat.” Ne naahà te Megbevayà he meupiya haazà.
GEN 1:11 Ne zutun migkaǥi is Megbevayà te, “Medtuvù diyà te tanà is migkelingulingu he menge pinemula: is menge pinemula he zuen menge lisu wey is minsan hengkey he kayu he ebpemeǥas sumalà te kelasi zan.” Ne nehimu haazà.
GEN 1:12 Midtuvù dutun te tanà is langun he kelasi te menge sagbet he zuen dan lisu wey is minsan hengkey he kayu he ebpemeǥas he zuen lisu ziyà te menge veǥas dan. Ne naahà te Megbevayà he meupiya zaan haazà.
GEN 1:13 Ne mibmezukilem dutun, ne hein nepawè en, ne nehimu is iketelu he andew.
GEN 1:14 Ne migkaǥi zutun is Megbevayà te, “Mehimu ziyà te langit is menge mesiǥa su wey zuen tuus te maandew wey mezukilem. Egkehimu zaan haazà he tuus te menge timpu te menge tuig wey menge andew.
GEN 1:15 Egkehimu haazà he menge idtayew ziyà te langit su wey meteyawi is kelibutan.” Ne nehimu haazà.
GEN 1:16 Su midlimbag dutun te Megbevayà sikan is dezuwa he utew mesiǥa: ne haazà is dekelà, ibpetayew zin te tanà emun maandew, ne haazà daan is sevaha, ne ibpetayew zin te tanà emun mezukilem. Ne midlimbag din daan is menge vituen.
GEN 1:17 Ne heini is langun, insavuk din diyà te langit wey meteyawi is kelibutan,
GEN 1:18 ne wey pinaaǥi zutun metapid is maandew wey mezukilem, wey is merayag wey merusirem. Ne naahà te Megbevayà he meupiya zaan haazà.
GEN 1:19 Ne mibmezukilem dutun, ne hein nepawè en, ne nehimu is ikeepat he andew.
GEN 1:20 Ne migkaǥi zutun is Megbevayà te, “Mehimu ziyà te menge wahig is utew medmezakel he linimbag he egeǥehinawa wey ebpezumdumahà ne mehimu zaan is utew mezakel he menge tagbis he ebpemenlayang diyà te hewhewanan he zivavew te tanà.”
GEN 1:21 Umbe midlimbag te Megbevayà is utew zekelà he menge isdà wey is langun he menge linimbag he egeǥehinawa wey ebpenlayewlayew wey ebpezumdumahà he utew medmezakel ziyà te wahig. Ne midlimbag din daan is minsan hengkey he kelasi te menge tagbis. Ne naahà te Megbevayà he meupiya zaan haazà.
GEN 1:22 Ne midtuvazan heini te Megbevayà ne ke sikandin te, “Mengevuwad kew ne mebmahabet kew utew su wey mepenù is daǥat te menge linimbag ku. Ne mebmahabet kew zaan is menge tagbis diyan te tanà.”
GEN 1:23 Ne mibmezukilem dutun, ne hein nepawè en, ne nehimu is ikelima he andew.
GEN 1:24 Ne migkaǥi en maan is Megbevayà te, “Melimbag he ebpuun diyà te tanà is mezakel he kelasi te menge linimbag he egeǥehinawa. Melimbag is menge langgam he menge ayam wey menge leew wey is menge keranapranap.” Ne nehimu haazà.
GEN 1:25 Su midlimbag dutun te Megbevayà is menge langgam he leew wey ayam wey is menge keranapranap he ebpenanap wey edula zini te tanà, ne naahà dutun te Megbevayà he meupiya zaan haazà.
GEN 1:26 Ne zutun migkaǥi is Megbevayà te, “Edhimuwen tew is menusiyà he iring kenitew su wey zan meveyveyai is menge isdà diyà te zaǥat wey is menge tagbis diyà te hewhewanan wey is menge langgam he ayam wey leew wey is menge keranapranap he ebpenanap wey edula ziyà te tanà. Ebeyveyaan dan is tivuuk he tanà.”
GEN 1:27 Ne midlimbag dutun te Megbevayà is menusiyà he iring kandin. Midhimu zin sikandan he mekeiring kandin te Megbevayà. Maama wey vahi is midlimbag din.
GEN 1:28 Ne midtuvazan sikandan te Megbevayà ne migkeǥiyan din sikandan te, “Mevuwad kew ne mebmehabet kew su wey niw meeneb is kelibutan. Iyan kew mebayàbayà dini te tanà. Iyan kew mebayàbayà te menge isdà diyà te zaǥat wey te menge tagbis he ebpemenlayang diyà te hewhewanan wey te menge linimbag he egeǥehinawa he edhipanew zini te tanà.”
GEN 1:29 Ne migkaǥi zutun is Megbevayà te, “Idtuǥut ku keniyu he egkeenen niw is minsan hengkey he sagbet he zuen din beǥas wey is minsan hengkey he veǥas te kayu he ebpemeǥas he zuen lisu ziyà te menge veǥas din.
GEN 1:30 Ne haazà is menge langgam he ziyà te tanà, wey is menge tagbis he ebpemenlayang diyà te hewhewanan, wey is menge keranapranap he ebpenanap, wey is minsan hengkey he egeǥehinawa, idtuǥut ku kandan he egkeenen dan is minsan hengkey he menge meilem he sagbet.” Ne nehimu haazà.
GEN 1:31 Ne zutun mid-ahà te Megbevayà is langun he nelimbag din, ne utew iyan haazà meupiya. Ne mibmezukilem dutun, ne hein nepawè en, ne nehimu is ikeenem he andew.
GEN 2:1 Ne zutun nepasad te Megbevayà is kedlimbaǥa te langit, te kelibutan, wey te langun he taǥù dutun.
GEN 2:2 Ne zutun te ikepitu he andew, geina te nepasad en te Megbevayà haazà is langun he menge vaal zin, midhimeley sikandin he ebaal.
GEN 2:3 Ne midtuvazan te Megbevayà is ikepitu he andew ne migkaǥi zin daan he segradu haazà su midhimeley sikandin dutun te kedlimbaǥa zin te langun.
GEN 2:4 Iyan heini sikan is keguǥuza te kedlimbaǥa zengan te langit wey kelibutan. Dengan hein midlimbag te Nengazen he Megbevayà is langit wey kelibutan,
GEN 2:5 wazè pa pinemula kayi te kelibutan wey wazè pa zaan benì he nenuvù, su wazè din pa ipeuzan su wazà etew he ebpekaatur te tanà.
GEN 2:6 Dutun he timpu zuen gapun he ebpuun te tanà ne pinaaǥi zutun egkahames is tivuuk he tanà.
GEN 2:7 Ne zutun midlimbag te Nengazen he Megbevayà is etew, ne iyan inlimbag din dutun is eliyavuk he ebpuun dini te tanà. Ne inhiyup din dutun te izung duen te etew is kandin en he ǥehinawa he ebpekeuyag, ne zutun nehimu is etew he linimbag he ebpekeǥeǥehinawa.
GEN 2:8 Ne zutun mibeelan te Nengazen he Megbevayà is pemuleey ziyà te Eden he ziyà te zapit te edsilaan, ne insavuk din dutun haazà is etew he midlimbag din.
GEN 2:9 Ne zuen menge kayu he impetuvù dutun te Nengazen he Megbevayà. Utew meupiya he ed-ahaan haazà is menge kayu ne meupiya zaan he egkeenen is menge veǥas dan. Ne zutun te teliwazà duen te pemuleey impetuvù din daan is kayu he ebpekeveǥey te untung wey is kayu he ebpekeveǥey te kegketau te meupiya wey mezaat.
GEN 2:10 Ne zuen wahig diyà te Eden he ziyà ebayà te pemuleey su wey mevinyaǥi is menge pinemula zutun. Ne zutun nehimu haazà is wahig he ebpuunan duen te heepat he menge wahig.
GEN 2:11 Is ngazan te nehuna he wahig ne Pishon. Iyan haazà sikan is wahig he ziyà edtudà te tivuuk he tanà he Havila he zutun duen egkaahà he vulawan.
GEN 2:12 Lunsey he vulawan is ebpuun dutun, ne zuen daan dutun sikan is mahalen he pehemut he bidilyum wey zuen daan dutun menge mahalen he vatu he uniks.
GEN 2:13 Is ngazan dutun te ikezuwa he wahig ne Gihon. Diyà heini edtudà te tivuuk he tanà he Cush.
GEN 2:14 Is ngazan dutun te iketelu he wahig ne Tigris. Diyà heini edtudà te edsilaan te Asiria. Ne is ikeepat he wahig iyan is Eufrates.
GEN 2:15 Ne haazà is etew he midlimbag te Nengazen he Megbevayà, diyè din isavuk te pemuleey he Eden su wey zin maatur wey meventayi haazà is pemuleey.
GEN 2:16 Ne haazà is etew, mibpeketelteleenan te Megbevayà he egkaǥi te, “Idtuǥut ku kenikew he megkaan ka te veǥas te menge kayu zini te pemuleey,
GEN 2:17 iyan, sikan is beǥas te kayu he ebpekeveǥey te kegketau te meupiya wey mezaat, utew kinahanglan he kenè nu heeyan keena. Su zutun dà te kegkaan nu keniyan te veǥas din kenà duwazuwa he ebpatey ka.”
GEN 2:18 Ne migkaǥi zutun is Nengazen he Megbevayà te, “Kenà meupiya zuen te etew emun sebsevaha zà sikandin. Umbe ebeelan ku sikandin te zuma zin he zait he ebpeketavang kandin.”
GEN 2:19 Ne zutun, puun dutun te tanà, midlimbag te Nengazen he Megbevayà is langun he menge leew he menge langgam wey is langun he menge tagbis he ziyà ebpemenlayang te hewhewanan. Ne impeetuvang din haazà is langun dutun te etew su ed-ahaan din ke hengkey is menge igngazan kandan duen te etew. Ne sumalà is igngazan te etew te uman sevaha zutun te linimbag he egeǥehinawa ne iyan en ngazan din.
GEN 2:20 Ne migngezanan dutun te etew is langun he menge ayam he langgam dutun, wey is menge tagbis he ziyà ebpemenlayang te hewhewanan wey is langun he menge leew he langgam. Ne minsan pa zutun wazè pa hustu he zuma zutun te etew he ebpeketavang kandin.
GEN 2:21 Ne tenged dutun impelipezeng te Nengazen he Megbevayà haazà is etew ne hein utew en nehurep, migkuwa zin is sevaha zuen te menge ǥusuk kayi ne midlimeng din haazà is ebpuunan duen te ǥusuk.
GEN 2:22 Ne puun dutun te ǥusuk he migkuwa zin puun dutun te maama, midhimu te Nengazen he Megbevayà is bahi. Ne impeehè din haazà is bahi zutun te maama.
GEN 2:23 Ne zutun migkaǥi kes maama te, “Duen ku en human duma! Is menge tulan din, ne zini ebpuun te tulan ku wey is sapù din daan, ne zini ebpuun te sapù ku. Egngezanan ku sikandin he ‘vahi’ su zini sikandin ebpuun te kedì te maama,” ke sikandin.
GEN 2:24 Iyan heini hinungdan ke maan is ed-ewaan te maama is amey zin wey iney zin ne ebpengesawa te vahi, ne zutun egkehimu haazà is maama wey vahi he sevaha zà.
GEN 2:25 Ne lelevas haazà is dezuwa, sikan is maama wey esawa zin, iyan, kenè dan haazà igkeeled.
GEN 3:1 Sikan is uled, ne utew metau he ed-akal te langun he menge langgam he linimbag te Nengazen he Megbevayà. Migkeǥiyan din kes bahi te, “Kenà buwa iyan migkaǥi te Megbevayà is kenè din idtuǥut keniyu is kegkaan te veǥas te minsan hengkey he kayu zini te pemuleey?”
GEN 3:2 Ne midtavak haazà is bahi te, “Intuǥut din kenami is kegkaan te langun he menge veǥas te zuma he kayu kayi te pemuleey,
GEN 3:3 iyan, haazà is beǥas te kayu he ziyà te teliwazà te pemuleey. Indawey kenami te Megbevayà su ke sikandin te, ‘Kenè niw heeyan keena etawa minsan is kedsenggira zà duen. Su emun egkeenen niw heini ne ebpatey kew.’ ”
GEN 3:4 Ne migkaǥi kes uled diyà te vahi te, “Kenè kew ebpatey,
GEN 3:5 su netuenan en te Megbevayà he zutun dà te kegkeena niw zuen, egkehimu kew he utew metau ne ebpekeiring kew te Megbevayà su egketuenan niw is meupiya wey mezaat.”
GEN 3:6 Ne hein nesavut te vahi he metaam bes he egkeenen haazà is beǥas te kayu, wey meupiya zaan he ed-ahaan wey nesavut din daan he utew haazà egkinehenglana su wey zan mehimu he utew metau, ne midrupù sikandin dutun ne migkaan din. Ne mibeǥayan din daan is esawa zin he zuma zin daan dutun ne migkaan daan sikandin.
GEN 3:7 Ne zutun te nekepasad dan he egkaan, netuenan dan ke hengkey is meupiya wey mezaat, ne neseǥipè dan human he lelevas dan bes. Umbe mibpenahì dan is menge zahun te kayu he higus su wey zan duen igketambun te lawa zan.
GEN 3:8 Ne hein mahapun en dutun he ebpengpengeramag, nezineg dan is Nengazen he Megbevayà he edhiphipanew zutun te pemuleey. Ne haazà is maama wey esawa zin, mid-elesan dan is Megbevayà dutun te menge kayu he ziyà te pemuleey.
GEN 3:9 Ne mid-umew te Nengazen he Megbevayà sikan is maama he ke sikandin te, “Hendei ka?”
GEN 3:10 Ne midtavak is maama te, “Nezineg ku sikew is edhiphipanew zini te pemuleey, ne nahandek a, su lelevas a, umbe mid-eles a.”
GEN 3:11 Ne migkaǥi is Nengazen he Megbevayà te, “Hentei is migkaǥi kenikew he lelevas ka? Migkaan ke ve zuen te veǥas te kayu he indawey ku keniyu?”
GEN 3:12 Ne midtavak is maama te, “Haazà is bahi he impezuma nu kediey, mibeǥayan e zin ne migkaan a.”
GEN 3:13 Ne mid-insaan te Nengazen he Megbevayà kes vahi, ke sikandin te, “Hengkey heini is mid-ulaula nu?” Ne midtavak dutun is bahi te, “Mid-ekalan a te uled, umbe migkaan a.”
GEN 3:14 Ne zutun migkeǥiyan te Nengazen he Megbevayà kes uled, ke sikandin te, “Te langun he menge langgam he ayam wey ke leew ve, iyan ka edrewakan ku tenged te mid-ulaula nu heini. Ebpekelangkeb ke zà ne ebpekezula ka taman te kenè ke pa ebpatey.
GEN 3:15 Edhimuwen ku he kuntada nu haazà is bahi, ne ebpekigkuntada zaan is kevuwazan din te kevuwazan nu. Edrupeten din is ulu nu ne edkeǥaten nu is palu zin.”
GEN 3:16 Ne zutun migkeǥiyan din daan is bahi, ke sikandin te, “Tenged te mid-ulaula nu, edhimuwen ku he utew mesakit is kebelilita kenikew ke ed-anak ka. Merasey is ked-enaka nu te menge vatà, ne minsan pa zutun egkeeriǥan ke zed te esawa nu ne iyan sikandin ebayàbayà kenikew.”
GEN 3:17 Ne zutun migkeǥiyan te Megbevayà is maama te, “Tenged te mibpemineg ka te esawa nu ne migkaan ka zuen te veǥas te kayu he indawey ku he ke siak te, ‘Kenè niw heeyan keena,’ ne edrewakan ku is tanà tenged keniyu. Ne taman te kenè ke pa ebpatey wey ke zà ebpekekaan te veǥas te edtuvù dutun te tanà ke egkerasey ka he edhaǥù.
GEN 3:18 Su menge meǥarang wey menge zuǥiyen is edtuvù dutun te kebasuk nu. Ne ebpekekaan ka te veǥas te menge pinemula nu.
GEN 3:19 Ne taman te kenè ke pa idleveng dini te tanà, wey ke zà ebpekekaan ke edrimusengan ka. Is eliyavuk te tanà iyan puunà te lawa nu ne ziyà daan heini keuzemà te eliyavuk ebpekeulì.”
GEN 3:20 Sikan is maama, migngezanan din is esawa zin he “Eva” su egkehimu sikandin he iney te tivuuk he menusiyà.
GEN 3:21 Ne zutun mibaal is Nengazen he Megbevayà te visti he lundis te menge langgam ne insun-ud din haazà dutun te ki Adan wey te esawa zin.
GEN 3:22 Ne migkaǥi zutun is Nengazen he Megbevayà te, “Nehimu en is menusiyà he iring kenitew su egketuusan din en is meupiya wey mezaat. Umbe utew kinahanglan kenè sikandin edtuǥutan he mekekaan dutun te veǥas te kayu he ebpekeveǥey te untung, su emun ebpekekaan sikandin ne kenè en ebpatey te wazà pidtemanan.”
GEN 3:23 Ne tenged dutun midsegseg te Nengazen he Megbevayà sikan is menusiyà puun dutun te pemuleey he Eden, ne impevasuk din sikandin duen te tanà he zutun sikandin ebpuun.
GEN 3:24 Ne hein midsegseg din en haazà is etew, impevantey zin dutun te zapit te pemuleey he Eden sikan is menge velinsuǥuen din he kirubin wey zuen daan egkeregreg he ispada he ebiyuviyu su wey wazà minsan hentei he ebpekehendiyà te kayu he ebpekeveǥey te untung.
GEN 4:1 Ne zutun mid-uvayan ni Adan haazà is esawa zin he si Eva, ne mibmeǥingey sikandin ne mid-anak sikandin te maama, ne ke si Eva te, “Midtevangan a te Nengazen he mekeanak a, umbe egngezanan ku sikandin te Cain.”
GEN 4:2 Ne mibmeǥingey en maan si Eva ne mid-anak sikandin te maama, ne mid-ngezanan din te Abel. Ne hein midekelà en si Abel, perevantey sikandin te menge kerehidu, ne si Cain, ne mibasuk mulà.
GEN 4:3 Ne neuma is andew he nemuhat si Cain diyà te Nengazen. Ne iyan impemuhat din is menge veǥas te menge pinemula zin.
GEN 4:4 Ne si Abel mulà migkuwa sikandin te kinekekayan duen te menge uyaǥen din ne midlapè din, ne impemuhat din is kineupiyahan he vahin diyà te Megbevayà. Nelipey is Nengazen ki Abel wey zuen te pemuhat din,
GEN 4:5 piru wazè din mulà dewata si Cain wey is kandin he impemuhat. Ne zutun utew nepauk si Cain ne mibmerembunut is dagwey zin.
GEN 4:6 Ne migkaǥi zutun is Nengazen diyà te ki Cain te, “Maan is utew ka egkepauk wey maan is mibmerembunut is dagwey nu?
GEN 4:7 Su emun hustu is ed-ul-ulahan nu edewaten ku sikew; ne emun kenà, melemu ka ebpekesalà, su is salà ne iring te kumekaid he langgam he ed-ayan kenikew keniyan te ǥemawan. Utew zin egkesuati he mezaag ke zin, iyan, kinahanglan he iyan ka edaag kandin.”
GEN 4:8 Sevaha zutun he andew, migkaǥi si Cain diyà te hazi zin he si Abel te, “Edhendiyè ki te vevesukà.” Ne hein diyè dan en, midhimetayan ni Cain si Abel.
GEN 4:9 Ne mid-insaan te Nengazen si Cain te, “Hendei is hazi nu he si Abel?” Ne midtavak si Cain te, “Hanew ta. Bantey e ve te hazi ku?”
GEN 4:10 Ne migkeǥiyan te Megbevayà si Cain te, “Utew mezaat is mid-ulaula nu! Is lengesa te hazi nu ne henduen be te ebpehizuhizu he edsilutan ku is etew he midhimatey kandin.
GEN 4:11 Ne ǥuntaan tenged te mid-ulaula nu, edrewakan ku sikew ne edhimuwen ku he kenè ke en ebpekevasuk kayi te tanà su netiǥisan is tanà te lengesa te hazi nu he mibunù nu.
GEN 4:12 Minsan duen ibpemula nu kayi te tanà ne ebpengelinteuwan ku he kenè en ebeǥasan heini. Wazè en egketendù he egkeubpaan nu umbe ebpekeriǥuriǥu ke zà te minsan hendei zini te lumpad.”
GEN 4:13 Ne zutun migkaǥi si Cain diyà te Nengazen te, “Utew meveǥat is silut nu kediey. Kenè ku egkaantus.
GEN 4:14 Midsegseg a kenikew kayi he tanà wey nekepekeziyù ad kenikew. Ne wazè en egketendù he egkeubpaan ku, umbe ebpekeriǥuriǥu a zini te lumpad. Ne egkehimu he edhimetayan a te minsan hentei he egkeuma ku.”
GEN 4:15 Ne midtavak kandin dutun is Nengazen te, “Kenà egkehimu su ebpengelinteuwan ku he ke zuen edhimatey kenikew, Cain, ne kepipitu ku edtekepa is keveǥat te silut ku kandin.” Ne zutun midtuusan si Cain te Nengazen ne zutun ke egkeuma sikandin te minsan hentei ne egkeehè dan haazà is tuus ne kenè dan edhimetayan.
GEN 4:16 Ne mibpekeziyù si Cain te Nengazen, ne ziyà med-ubpà te tanà he Nod he ziyà te zapit te edsilaan te Eden.
GEN 4:17 Ne mid-uvayan ni Cain is esawa zin ne mibmeǥingey ne in-anak din is batà he maama ne migngezanan dan te Enoc. Ne midtukud dutun si Cain te inged ne migngezanan din te Enoc su in-iring din te ngazan te anak din.
GEN 4:18 Ne hein neuǥet nevuwad daan si Enoc ne nehimu sikandin he amey ni Irad. Ne si Irad, amey ni Mehuel; ne si Mehuel amey ni Metushael; ne si Metushael, ne amey ni Lamec.
GEN 4:19 Dezuwa is esawa ni Lamec, is sevaha, ne iyan si Ada, ne is sevaha, ne iyan si Zila.
GEN 4:20 In-anak ni Ada si Jabal he iyan nehuna te langun he ed-elima te menge ayam wey ed-ubpà te menge tulda.
GEN 4:21 Duen hazi ni Jabal he maama ne iyan ngazan din si Jubal, he nehuna te langun he metau he ebpen alpa wey ebpemulalà.
GEN 4:22 Si Zila mid-anak daan te maama ne iyan ngazan din si Tubal Cain he iyan dengan utew metau he pandey te ǥalang wey putew. Ne is etevey ni Tubal Cain ne iyan si Naama.
GEN 4:23 Ne zutun he andew migkaǥi si Lamec diyà te menge esawa zin te, “He Ada wey Zila, pemineg kew te egkeǥiyen ku. Midhimetayan ku is kengkenakan he midrasey wey mibpalì kedì.
GEN 4:24 Ne emun kepipitu egketakep is silut te edhimatey ki Cain, ne 77 is kegketakep is silut te edhimatey kediey.”
GEN 4:25 Ne mid-umanan ni Adan uvayi is esawa zin he si Eva, ne mid-anak te maama, ne migngezanan din ki Set, he ke và dà egkeǥiya, imbeǥey, su ke sikandin te, “Mibeǥayan a te Megbevayà te anak he ilis ki Abel.” Umbe iyan heini mid-ulaula te Megbevayà su mibunù ni Cain si Abel.
GEN 4:26 Ne hein neuǥet, nevuwad daan si Set te maama ne migngezanan din ki Enosh. Iyan haazà timpu zengan he ebpuunan te menge etew is paaǥi te ked-azap he egemiten is ngazan te Nengazen dutun te kebpengumew-umew zan.
GEN 5:1 Iyan heini keguǥuza te menge kevuwazan ni Adan. Dutun te kedlimbaǥa te Megbevayà te menusiyà, midhimu zin is etew iring te kandin he zagwey.
GEN 5:2 Maama wey vahi is midlimbag din. Ne hein nepasad din, midtuvazan din sikandan, ne migngezanan din sikandan he “menusiyà”.
GEN 5:3 Hein 130 en is penuiǥen ni Adan nevuwad sikandin te maama he utew midsempù kandin ne migngezanan din ki Set.
GEN 5:4 Ne puun dutun te ked-enaka ki Set, 800 pa he tuig is keluǥayad te untung ni Adan, ne zuen duma pa he menge anak din he maama wey vahi.
GEN 5:5 Ne hein 930 en he tuig is penuiǥen din, minatey sikandin.
GEN 5:6 Hein 105 en is penuiǥen ni Set nevuwad sikandin ki Enosh.
GEN 5:7 Ne puun dutun te ked-enaka ki Enosh, 807 pa he tuig is keluǥayad te untung ni Set, ne zuen duma pa he menge anak din he maama wey vahi.
GEN 5:8 Ne hein 912 en he tuig is penuiǥen din, minatey sikandin.
GEN 5:9 Hein 90 en is penuiǥen ni Enosh nevuwad sikandin ki Kenan.
GEN 5:10 Ne puun dutun te ked-enaka ki Kenan, 815 pa he tuig is keluǥayad te untung ni Enosh, ne zuen duma pa he menge anak din he maama wey vahi.
GEN 5:11 Ne hein 905 en he tuig is penuiǥen din, minatey sikandin.
GEN 5:12 Hein 70 en is penuiǥen ni Kenan nevuwad sikandin ki Mahalalel.
GEN 5:13 Ne puun dutun te ked-enaka ki Mahalalel, 840 pa he tuig is keluǥayad te untung ni Kenan, ne zuen duma pa he menge anak din he maama wey vahi.
GEN 5:14 Ne hein 910 en he tuig is penuiǥen din, minatey sikandin.
GEN 5:15 Hein 65 en is penuiǥen ni Mahalalel nevuwad sikandin ki Jared.
GEN 5:16 Ne puun dutun te ked-enaka ki Jared, 830 pa he tuig is keluǥayad te untung ni Mahalalel, ne zuen duma pa he menge anak din he maama wey vahi.
GEN 5:17 Ne hein 895 en he tuig is penuiǥen din, minatey sikandin.
GEN 5:18 Hein 162 en is penuiǥen ni Jared nevuwad sikandin ki Enoc.
GEN 5:19 Ne puun dutun te ked-enaka ki Enoc, 800 pa he tuig is keluǥayad te untung ni Jared, ne zuen duma pa zaan he menge anak din he maama wey vahi.
GEN 5:20 Ne hein 962 en he tuig is penuiǥen din, minatey sikandin.
GEN 5:21 Hein 65 en is penuiǥen ni Enoc nevuwad sikandin ki Metusela.
GEN 5:22 Ne puun dutun te ked-enaka ki Metusela, 300 pa he tuig is keluǥayad te untung ni Enoc, ne zuen duma pa zaan he menge anak din he vahi wey maama. Dutun he timpu utew meupiya is kedepità ni Enoc wey Megbevayà, umbe nekeuma te 365 is keluǥayad te untung din ne nahanew sikandin, su midtulus sikandin te Megbevayà.
GEN 5:25 Hein 187 en is penuiǥen ni Metusela nevuwad sikandin ki Lamec.
GEN 5:26 Ne puun dutun te ked-enaka ki Lamec, 782 pa he tuig is keluǥayad te untung ni Metusela, ne zuen duma pa zaan he menge anak din he maama wey vahi.
GEN 5:27 Ne hein 969 en he tuig is penuiǥen din, minatey sikandin.
GEN 5:28 Hein 182 en is penuiǥen ni Lamec nevuwad sikandin te maama.
GEN 5:29 Ne migngezanan din ki Noe su ke sikandin te, “Pinaaǥi kayi te vatà malù ebmahagkap is meveǥat he terebahu tew te kebasuk he imbeǥey kenitew tenged te midrewakan dengan te Nengazen is tanà.”
GEN 5:30 Ne puun dutun te ked-enaka ki Noe, 595 pa he tuig is keluǥayad te untung ni Lamec, ne zuen duma pa zaan he menge anak din he vahi wey maama.
GEN 5:31 Ne hein 777 en he tuig is penuiǥen din, minatey sikandin.
GEN 5:32 Hein 500 en is penuiǥen ni Noe nevuwad sikandin ki Shem, ki Ham, wey ki Jafet.
GEN 6:1 Ne hein mibmezakel en utew is menge etew zini te kelibutan wey zuen en menge anak dan he vahi.
GEN 6:2 Naahà duen te menge anak te Megbevayà he memekempet is menge vahi he anak te menge etew, ne mid-esawa zan dutun is menge vahi sumalà is egkesuatan dan.
GEN 6:3 Ne migkaǥi zutun is Nengazen te, “Haaza is gehinawa ku he imbeǥey ku ziyà te menusiyà, kenè ku idtuǥut he wazà pidtemanan te kedtuvey zin diyà te kandan, su menge etew zà duen sikandan. Ne tenged dutun, edhimuwen ku he puun guntaan, iyan kelugayad te untung din is 120 dà he tuig.”
GEN 6:4 Ne zutun he timpu hein neked-esawa is menge anak te Megbevayà wey is menge vahi he anak te etew, pinaaǥi zutun duen in-anak dini te tanà he menge etew he egngezanan te Nefilim. Ne haazà is menge Nefilim, ne utew menge ǥemhanan he etew ne utew zan nengevantug dengan.
GEN 6:5 Ne naahà te Nengazen he utew mezakel is menge kelelalung he ebeelan te menge etew wey iyan dà layun ed-isipen wey ed-ul-ulahan dan is mezaat.
GEN 6:6 Ne neisip din he zeyzey pezem ke wazè din limbaǥa is menusiyà ne utew sikandin dutun neseeng.
GEN 6:7 Umbe ke sikandin te, “Edlumpiyuwan ku is kelibutan su edlimasen ku zutun is menge etew he linimbag ku. Edhimetayan ku is menge etew, menge langgam, menge keranapranap wey is menge tagbis he ziyà te hewhewanan, su deyzey pa pezem ke wazè ku sikandan limbaǥa.”
GEN 6:8 Iyan, si Noe mulà, nekepenunuat sikandin te Nengazen.
GEN 6:9 Iyan heini guǥud mehitenged te pemilya ni Noe. Metazeng he etew si Noe. Dutun he timpu iyan dà sikandin etew he wazà igkesawey zuen; utew sikandin mibpekid-emiǥu te Megbevayà.
GEN 6:10 Tetelu is anak din he maama: si Shem, si Ham, wey si Jafet.
GEN 6:11 Naahà te Megbevayà he utew meremerik is menge ulaula te tivuuk he menusiyà wey utew kenà memetazeng is menge vaal zan.
GEN 6:12 Neehè din he utew lalung iyan is menge etew su nehimu en is menge ulaula te minsan hentei zini te kelibutan he utew en meremerik,
GEN 6:13 ne migkaǥi sikandin diyà te ki Noe te, “Neisip ku en he edlimasen ku is tivuuk he menusiyà. Su tenged kandan, nekeeneb te kelibutan is kelelalung, ne tenged dutun id-awè ku sikandan dini te tanà.
GEN 6:14 Baal ka te arka he kayu he sipru. Beeli nu zutun te arka is menge ruǥu ne pezeketi nu te merumiket he sulù is seled din wey is gawas din.
GEN 6:15 Is paaǥi te kebeeli nu zuen, ne iyan heini: 450 he giek is belavag din, 75 he giek is keluaǥan din, ne 45 he giek is ketikang din.
GEN 6:16 Beeli nu is sulawà te arka he senge siku is elang din puun dutun te atep ne ziyà te kilid te arka beeli niw is gemawan. Tetelu he endana is dutun te arka; duen diyà te zivavew, duen diyà te zizalem, wey zuen daan diyà te teliwazà.
GEN 6:17 Su ibpelapey ku is langun he menge wahig dini te tanà su wey melimas is minsan hengkey he egeǥehinawa zini te kelibutan. Ne egkeǥerà is minsan hengkey zini te tanà.
GEN 6:18 Iyan, sikew mulà, edhimuwen ku is utew melig-en he kebpekid-uyun ku kenikew. Ne ibpeseled ku sikew zuen te arka zuma is menge anak nu wey is esawa nu wey is menge ambey nu.
GEN 6:19 Ne ibpeseled nu zaan duma keniyu zutun te arka is langun he kelasi te menge linimbag he egeǥehinawa su wey kenè dan daan melimas. Tig-dezuwa te kada kelasi is ibpedparis niw he meemahan wey vehiyan.
GEN 6:20 Is menge tagbis daan sumalà is kelasi zan wey is menge langgam sumalà daan is kelasi zan wey is menge keranapranap daan sumalà is kelasi zan, tig-dezuwa te langun dutun is edhendiyan te kenikew su wey kenè dan melimas.
GEN 6:21 Ne sikew, kinahanglan he idseled nu zaan is minsan hengkey he kelasi te egkeenen su wey zuen egkeenen niw, wey egkeenen daan te menge langgam wey menge keranapranap.”
GEN 6:22 Ne midtuman ni Noe is langun he insuǥù kandin te Megbevayà.
GEN 7:1 Ne zutun migkaǥi is Nengazen diyà te ki Noe te, “Sikew, wey is tivuuk he pemilya nu, seled kew en diyà te arka, su iyan ke zà neehè ku he metazeng he etew te langun he menge etew ǥuntaan.
GEN 7:2 Ipeseled nu zaan dutun is pitu he perisan te langun he menge langgam he lumpiyu. Ne haazà is menge langgam he kenà lumpiyu senge paris dà mulà is ibpeseled nu.
GEN 7:3 Ne kuwa ka zaan te ebpemenlayang diyà te hewhewanan, he pitu he perisan ne ipeseled nu ziyan su wey zuen egkesamà he egkevuwad diyan te kelibutan.
GEN 7:4 Su egkepasad is pitu he andew puun guntaan, ibpeuzanan ku is tivuuk he kelibutan, taman te 40 he andew wey 40 he kezukileman, su wey melimas is minsan hengkey he egeǥehinawa he linimbag ku.”
GEN 7:5 Ne sumalà is insuǥù ki Noe te Nengazen iyan daan mibeelan din.
GEN 7:6 Mibpenuiǥen dutun si Noe te 600 he tuig hein kedlapey te wahig dini te kelibutan.
GEN 7:7 Ne si Noe, is menge anak din, wey is esawa zin, wey menge ambey zin, ne midseled dan dutun te arka su wey zan melibri zutun te kedlapey te menge wahig.
GEN 7:8 Sumalà te insuǥù te Megbevayà ki Noe, impeseled din diyà te arka is tigsenge perisan te langun he menge langgam he lumpiyu wey kenà lumpiyu he midhendiyà te kandin.
GEN 7:10 Ne hein netuman en haazà is pitu he andew, midlapey is menge wahig diyà te kelibutan.
GEN 7:11 Mibpenuiǥen dutun si Noe te 600 he tuig. Ne hein ike-17 he andew te ikezuwa he vulan, mid-uzan te utew mereǥes wey midlepew zutun is utew zekelà he wahig he edtudà he ebpuun diyà te utew mezalem he zaǥat, ne ingkevusbus daan is utew zekelà he wahig he ziyà ebpuun te hewhewanan.
GEN 7:12 Ne mid-uzanan is kelibutan taman te 40 he andew wey 40 he kezukileman.
GEN 7:13 Ne zutun te andew he mibpuun en is uzan, si Noe wey is esawa zin, duma te menge anak din he si Shem, si Ham, wey si Jafet wey is menge esawa zan, midseled dan dutun te arka.
GEN 7:14 Elin daan impeseled dutun is langun he kelasi te menge langgam: he edhipanew, ebpemenanap, wey is ebpemenlayang.
GEN 7:15 Sumalà te insuǥù te Megbevayà ki Noe, impeseled din diyà te arka is tigsenge paris he kelasi te langgam he mid-uvey ziyà te kandin. Ne midlekevan te Nengazen haazà is arka.
GEN 7:17 Midsigudu med-uzan kayi te kelibutan seled te 40 he andew. Mibmezalem is wahig taman te midletew sikan is arka.
GEN 7:19 Ne mid-iseg pa utew mebmezalem haazà is wahig ne nesapal is langun he memetikang he menge vuntud.
GEN 7:20 Ne mid-iseg pa zaan memezalem taman te menge 20 he ǥiek is kezalem din diyà te puntur te utew metikang he vuntud.
GEN 7:21 Ne nelimas dutun is minsan hengkey he menge linimbag he egeǥehinawa zini te lumpad. Is menge tagbis, menge ayam, menge leew he langgam, menge keranapranap, wey is tivuuk he menusiyà, nelimas dutun is langun.
GEN 7:22 Mibpatey zutun is minsan hengkey he egeǥehinawa he ed-ubpà dini te tanà.
GEN 7:23 Midlimas te Megbevayà is minsan hengkey he egeǥehinawa he ed-ubpà dini te kelibutan: etew, langgam, keranapranap, wey is menge tagbis. Iyan dà nelibri si Noe wey is menge zuma zin diyà te seled te arka.
GEN 7:24 Ne taman te 150 he andew zutun, wazà tanà he nekelepew su nelapew haazà te wahig.
GEN 8:1 Wazà melipati te Megbevayà si Noe wey is duma zin he menge langgam he zutun te seled te arka. Umbe impepengeramag din kayi te kelibutan ne midnaneynaney mebmevavew is wahig.
GEN 8:2 Mid-engked haazà is kedtudà te wahig he ebpuun te utew mezalem he zaǥat ne mid-engked daan is kegkevusbus te utew zekelà he wahig he ziyà ebpuun te hewhewanan, ne midtikdew haazà is utew mereǥes he uzan.
GEN 8:3 Ne zutun mid-iseg is kebmevavew te wahig taman te neuma is 150 he andew puun te kedlapey.
GEN 8:4 Ne hein ike-17 he andew te ikepitu he vulan, diyà mekesavuk is arka te Buntud he Ararat.
GEN 8:5 Mid-iseg mebmevavew is wahig taman te ike-10 he vulan. Ne zutun te egkehuna he andew te ikesepulù he vulan, egkeehè en is menge puntur te menge vuntud.
GEN 8:6 Kedlavey te 40 he andew, mibpuwasan ni Noe is sulawà duen te arka
GEN 8:7 ne zuen uwak he impelayang din. Ne haazà is uwak wazà medlikù su midtulung dà medlayanglayang taman te wazè pa memezahi is tanà.
GEN 8:8 Ne impelayang en daan ni Noe is limuken su ed-ahaan din ke wazè en wahig diyà te tanà,
GEN 8:9 piru wazà naahà duen te limuken he egkeletunan din su kemulu pa is wahig nekeeneb te tivuuk he kelibutan. Umbe midlikù haazà is limuken diyà te ki Noe ziyà te arka. Ne impelatun ni Noe haazà is limuken diyà te velad din.
GEN 8:10 Ne midtaǥad pa si Noe te pitu he andew ne impelayang din en maan haazà is limuken he ebpuun te arka.
GEN 8:11 Ne hein mahapun en dutun, midlikù haazà is limuken he ebangà te mehilew he zahun te kayu he ulibu. Ne netuenan dutun ni Noe he midtighak en is wahig.
GEN 8:12 Ne midtaǥad pa maan si Noe te pitu pa he andew zutun, ne impelayang din en maan haazà is limuken, piru wazè en medlikù diyà te kandin.
GEN 8:13 Ne 601 en is penuiǥen ni Noe. Ne zutun te egkehuna he andew te nehuna he vulan, wazè en wahig diyà te tanà. Ne in-awà dutun ni Noe is atep duen te arka ne neehè din he nemezahan en iyan is tanà.
GEN 8:14 Hein iyan en ike-27 he andew zutun te ikezuwa he vulan, nemezahan en is tivuuk he kelibutan.
GEN 8:15 Ne zutun migkaǥi is Megbevayà diyà te ki Noe, ke sikandin te,
GEN 8:16 “Liǥawang kew en keniyan te arka. Dumaha nu is esawa nu, is menge anak nu, wey is menge ambey nu.
GEN 8:17 Ipeliǥawang nu zaan haazà is langun he menge linimbag he menge langgam wey menge keranapranap, su wey mengevuwad sikandan wey zan meeneb is tivuuk he kelibutan.”
GEN 8:18 Ne zutun migawas si Noe duma is menge anak din, wey esawa zin, wey menge ambey zin.
GEN 8:19 Ne migawas daan dutun is kada paris te langun he menge kelasi te egeǥehinawa sumalà is kelasi zan: menge langgam, menge keranapranap, wey menge tagbis.
GEN 8:20 Ne mibaal si Noe te pemuhatà para te Nengazen. Ne migkuwa zin dutun te menge langgam is lumpiyu ragkes daan is kada kelasi te menge lumpiyu he tagbis, ne midtutung din heini zutun te pemuhatà he iyan pemuhat para te Nengazen.
GEN 8:21 Ne nahazek te Nengazen is kehemut te evel zutun, ne ke sikandin diyà te ǥehinawa zin te, “Kenè ku en maan edezeetan is menusiyà, minsan netuenan ku en he mekesesalà sikandan puun pa te ked-enaka kandan. Kenè ku en maan ed-umanan edlimasa iring te mibeelan ku.
GEN 8:22 Taman en te kenè pa egkehanew is kelibutan, kenà egkehimu he edhelinen ku is menge timpu, kekenà, ibpaaǥi ku zed is timpu te kebpemula wey tiraǥun, is timpu te meǥenew wey meinit, is timpu te ǥulavung wey tipenguzan, is maandew wey mezukilem.”
GEN 9:1 Ne zutun midtuvazan te Megbevayà si Noe wey is menge anak din, ne ke sikandin te, “Mevuwad kew ne mebmahabet kew utew su wey meeneb is kelibutan te menge etew.
GEN 9:2 Utew egkehandek keniyu is langun he menge langgam: is ebpemenhipanew, is ebpemenlayang, is ebpemenanap, wey is diyà ebpen-ubpà te wahig. Iyan kew ebayàbayà kandan te langun.
GEN 9:3 Is minsan hengkey he linimbag he ebpekewaleng he egeǥehinawa, ne idtuǥut ku he egkeenen niw su ibeǥey ku en keniyu, iring te kebeǥaya ku zengan keniyu te menge sagbet.
GEN 9:4 Piru kenè niw keena is langgam he wazè pa maawà dutun is lengesa zin, he iyan igkeuyag din.
GEN 9:5 Ke zuen etew wey minsan langgam he ibpetiǥis din is lengesa niw te menusiyà wey kew mebpatey, ebelesan ku. Ebelesan ku is minsan hentei he ebunù te zuma zin he etew.
GEN 9:6 Ke zuen etew he edhimatey te zuma zin he etew edhimetayan daan sikandin te zuma zin he etew. Su midlimbag te Megbevayà is etew he iring te zagwey zin.
GEN 9:7 Ne mesigudu kew mevuwad wey kew mebmezakel ne wey kew mekeeneb te tivuuk he kelibutan.”
GEN 9:8 Ne migkaǥi pa is Megbevayà diyà te ki Noe wey ziyà te menge anak din te,
GEN 9:9 “Edtukuzen ku en guntaan is kebpekid-uyun ku keniyu wey te menge kevuwazan niw,
GEN 9:10 wey is minsan hengkey he linimbag ku he egeǥehinawa he zuma niw keniyan te arka, is menge tagbis, is menge ayam, is menge leew he menge langgam, wey is minsan hengkey zaan he linimbag ku zini te kelibutan.
GEN 9:11 Ne iyan heini kebpekid-uyun ku keniyu: Kenè ku en maan edlimasen is langun he egeǥehinawa pinaaǥi te wahig. Kenè ku en maan edèdeetan is kelibutan pinaaǥi te wahig.”
GEN 9:12 Ne migkaǥi zaan is Megbevayà te, “Duen ibpeehè ku keniyu he egkehimu he tuus te wazà pidtemanan he kebpekid-uyun ku keniyu wey te langun he menge linimbag ku he egeǥehinawa he zuma niw he midlawang keniyan te arka. Ne iyan is:
GEN 9:13 Idsavuk ku en is belugtu ziyà te menge ǥapun he iyan tuus te kebpekid-uyun ku keniyu.
GEN 9:14 Emun edhimuwen ku he ebpenggapun ne egkeehè niw zutun is belugtu,
GEN 9:15 ne kenè ku edlipatan is kebpekid-uyun ku keniyu wey te langun he menge linimbag ku he egeǥehinawa, Kenè ku en maan ibpelapey is menge wahig para te kedlimasa te langun he menge linimbag he egeǥehinawa.
GEN 9:16 Emun egkeehè niw is belugtu ziyà te menge ǥapun, ed-ahaan ku zaan, ne edtenuzan ku is wazà pidtemanan he kebpekid-uyun ku keniyu te langun he linimbag ku ziyan te kelibutan he egeǥehinawa.”
GEN 9:17 Ne migkaǥi zaan is Megbevayà diyà te ki Noe te, “Is belugtu, ne iyan tuus te kebpekid-uyun ku keniyu te langun he egeǥehinawa zini te kelibutan.”
GEN 9:18 Is menge anak ni Noe he migawas dutun te arka ne iyan si Shem, si Ham, wey si Jafet. (Nehimu si Ham he amey ni Canaan.)
GEN 9:19 Iyan heini sikan is tetelu he anak ni Noe ne iyan sikandan menge kepuun te langun he menge etew he nekeeneb te tivuuk he kelibutan.
GEN 9:20 Si Noe sevaha te menge te perevasuk, ne iyan sikandin nehuna he nekepemula te paras.
GEN 9:21 Sevaha zutun he andew, mid-inum sikandin te vinu he zutun ebpuun te menge pinemula zin he paras, ne nelangut sikandin ne midhizeǥà he nelevasan diyà te tulda zin.
GEN 9:22 Si Ham (is amey ni Canaan), mid-ehè din is amey zin he nelevasan ne midtudtulan din is menge kakey zin he ziyè pa te ǥawas te valey.
GEN 9:23 Iyan, si Shem wey si Jafet mulà, migkuwa zan te malung ne insinabley zan ne midseled dan dutun is ed-endud ne midtembunan dan is amey zan he nelevasan. Wazè dan tengtengi sikandin su wey kenè dan maahà haazà is amey zan he nelevasan.
GEN 9:24 Ne hein nepukew si Noe zutun te kegkelangut din, ne netuenan din ke hengkey is mibeelan kandin te anak din he hazi,
GEN 9:25 ke sikandin te, “Berakat he rewaki ka te Megbevayà, Canaan. Mehimu ka he uripen te menge suled nu, ne mehimu he utew minus is pid-etawan nu.”
GEN 9:26 Ne migkaǥi zaan sikandin te, “Berakat daan he zeliǥa is Nengazen he iyan Megbevayà ni Shem! Ne verakat he mehimu he uripen ni Shem si Canaan.
GEN 9:27 Berakat daan he utew meluag is tanà he ebpeubpaan te Megbevayà te menge kevuwazan ni Jafet, ne berakat he ikeǥalew sikandan te menge kevuwazan ni Shem, iyan, uripen dan mulà si Canaan,” ke si Noe.
GEN 9:28 Ne puun dutun te kedlapey te zaǥat, 350 pa he tuig is keluǥayad te untung ni Noe.
GEN 9:29 Ne hein 777 en is penuiǥen din, minatey sikandin.
GEN 10:1 Si Shem, si Ham, wey si Jafet, iyan heini guǥud te menge kevuwazan dan he impenganak dutun te timpu hein neipus en is kedlapey te zaǥat.
GEN 10:2 Iyan heini menge anak ni Jafet he menge maama: si Gomer, Magog, Madai, Javan, Tubal, Meshec, wey si Tiras.
GEN 10:3 Is menge kevuwazan ni Gomer ne iyan si Ashkenaz, Rifat, wey Togarma.
GEN 10:4 Is menge anak ni Javan ne iyan si Elisha, Tarshish, Kitim, wey si Dodanim.
GEN 10:5 Iyan heini kevuwazan ni Jafet. Iyan sikandan mibpuunan te menge tribu he ziyà med-ubpà te veyvey te zaǥat. Is kada pemilya zan ne ziyà med-ubpà te keugelingen dan he inged he sakup te nasyun dan, wey zuen dan keugelingen he kineǥiyan.
GEN 10:6 Is menge anak ni Ham he menge maama: si Cush, Mizraim, Put, wey si Canaan.
GEN 10:7 Si Cush ne zuen din menge anak he iyan heini si Sheba, Havila, Sabta, Raama, wey si Sabteca. Ne iyan heini menge anak ni Raama, si Sheba wey si Dedan.
GEN 10:8 Duen pa sevaha he anak ni Cush he iyan ngazan din si Nimrod. Si Nimrod nehimu he gemhanan he etew kayi te kelibutan.
GEN 10:9 Nevantug si Nimrod he mengenganup tenged te intuǥut haazà kandin te Nengazen. Ne tenged dutun, duen layun dan egkekaǥi zengan he ke sikandan te, “Iring ki Nimrod is utew nevantug he mengenganup su iyan intuǥut kandin te Nengazen.”
GEN 10:10 Iyan menge zekelà he inged diyà te ǥinhedian din is Babilonia, is Erec, wey is Acad, he menge inged diyà te tanà he sakup te Shinar.
GEN 10:11 Mid-awà si Nimrod dutun ne midhendiyà te Asiria ne zutun midtukud din is menge inged he Nineve, Rehobot Ir, Cala
GEN 10:12 wey Resen he ziyà te pid-elangan te Nineve wey Cala, he iyan nevantug he inged.
GEN 10:13 Si Mizraim, ne iyan kepuun te menge Ludhanen, menge Anamnen, menge Lihabnen, menge Naftanen,
GEN 10:14 menge Patrusnen, menge Caslunen, wey is menge Caftornen he iyan menge kepuun te menge Filistihanen.
GEN 10:15 Si Canaan iyan amey ni Sidon wey ni Het. Ne iyan kakey si Sidon.
GEN 10:16 Kepuun daan si Canaan te menge Jebusihanen, menge Amorihanen, menge Girgasihanen,
GEN 10:17 menge Hivihanen, menge Erekihanen, menge Sinihanen,
GEN 10:18 menge Arbedihanen, menge Simarihanen, wey menge Hamatihanen. Hein neuǥet, nekedsisivey is menge kepuun he menge kevuwazan ni Canaan.
GEN 10:19 Is dulunà te menge tanè dan diyà te zivavà, puun te Sidon pehendiyà te Gerar ne nekeuma heini ziyà te Gasa. Is dulunà diyà te edsilaan nekeuma ziyà te Sodom, Gomora, Adma, wey Zeboyim taman te Lasha.
GEN 10:20 Iyan heini menge kevuwazan ni Ham. Is kada pemilya zan ne ziyà med-ubpà te keugelingen dan he inged he sakup te nasyun dan, wey zuen dan keugelingen he kineǥiyan.
GEN 10:21 Si Shem ne kakey ni Jafet he iyan kepuun te langun he menge kevuwazan ni Eber.
GEN 10:22 Is menge anak ni Shem he menge maama iyan si Elam, si Ashur, si Arfaxad, si Lud, wey si Aram.
GEN 10:23 Is menge anak ni Aram iyan si Uz, si Hul, si Geter, wey si Meshec.
GEN 10:24 Ne si Arfaxad ne iyan amey ni Shela, ne si Shela ne iyan amey ni Eber.
GEN 10:25 Dezuwa is menge anak ni Eber. Is sevaha, ne migngezanan ki Peleg, he ke và dà egkeǥiya, “kebpekedsusuwey”, su zutun he timpu nekedsusuwey is menge etew zini te lumpad. Is hazi zin ne migngezanan ki Joktan.
GEN 10:26 Si Joktan ne iyan amey ni Almodad, Shelef, Hazarmavet, Jera,
GEN 10:27 Hadoram, Uzal, Dikla,
GEN 10:28 Obal, Abimael, Sheba,
GEN 10:29 Ofir, Havila, wey Jobab. Heini is langun, ne menge anak ni Joktan.
GEN 10:30 Is netemanan te tanà he mid-ubpaan dan ne puun diyà te inged he Mesha pehendiyà te inged he Sefar he ziyà te menge vuvungan te zapit te edsilaan.
GEN 10:31 Iyan heini menge kevuwazan ni Shem. Is kada pemilya zan ne ziyà med-ubpà te keugelingen dan he inged he sakup te nasyun dan, wey zuen dan keugelingen he kineǥiyan.
GEN 10:32 Iyan heini menge kevuwazan te menge anak ni Noe. Heini sikandan ne nekedsisivey zan te neubpaan he menge nasyun. Tenged kandan, netukud is menge nasyun kayi te tivuuk he kelibutan hein neiwas is kedlapey te zaǥat.
GEN 11:1 Ne zutun he timpu, sebsevaha pa is kineǥiyan te langun he menge etew te tivuuk he kelibutan.
GEN 11:2 Ne zutun te kedhalinhalin te menge etew pehendiyà te zapit te edsilaan, neehè dan is meluag he menge suǥud diyà te Shinar, ne zutun dan med-ubpà.
GEN 11:3 Ne zutun, pesikaǥi zan te, “Ebaal kiw te sevaha he inged he zuen turi he ebpekeuma ziyà te langit, para mehimu kiw he bentuǥan wey para zaan kenè kiw mekedsusuwey kayi te tivuuk he kelibutan.” Umbe mibaal sikandan te brik, ne mid-init dan heini para mebmezesen utew. Brik is migamit dan batu man pezem. Ispaltu is migamit dan wey mekedezeket haazà.
GEN 11:5 Ne zutun, mibulus is Nengazen su ed-ahaan din is mibeelan te etew he inged wey turi.
GEN 11:6 Migkaǥi sikandin te, “Heini he menge etew, nesevaha zan wey sevaha zà is kineǥiyan dan. Ne heini is mibeelan dan ne puunè pa heini. Kenà egkeuǥet ne ebeelan dan is minsan hengkey he egkesuatan dan.
GEN 11:7 Kuwa kew en, edhendiyè kiw, ne ibpedseselekawè tew is kineǥiyan dan su wey zuen mezakel he menge kineǥiyan su wey kenè dan mekedsesevutà.”
GEN 11:8 Umbe mibpedsusuwey te sikandan te Nengazen kayi te tivuuk he kelibutan, ne neengkezan dan is kedtukud dan te inged.
GEN 11:9 Umbe, migngezanan haazà is inged he Babel, he ke và dà egkeǥiya, “Kegkengeliveǥi,” su zutun impedseselekawà te Nengazen is kineǥiyan te tivuuk he menusiyà. Ne puun dutun midhimu te Megbevayà he mekedsusuwey sikandan pehendiyà te minsan hendei zini te kelibutan.
GEN 11:10 Iyan heini guǥud mehitenged te pemilya ni Shem. Hein menge dezuwe en he tuig puun dutun te timpu te kegkeiwas en te kedlapey te zaǥat, 100 en is penuiǥen ni Shem, ne zutun nevuwad sikandin ki Arfaxad.
GEN 11:11 Ne puun dutun te ked-enaka ki Arfaxad, 500 pa he tuig is keluǥayad te untung ni Shem, ne zuen duma pa he menge anak din he maama wey vahi.
GEN 11:12 Hein 105 en is penuiǥen ni Arfaxad nevuwad sikandin ki Shela.
GEN 11:13 Ne puun dutun te ked-enaka ki Shela, 403 pa he tuig is keluǥayad te untung ni Arfaxad, ne zuen duma pa he menge anak din he maama wey vahi.
GEN 11:14 Hein 30 en is penuiǥen Shela ne nevuwad sikandin ki Eber.
GEN 11:15 Ne puun dutun te ked-enaka ki Eber, 403 pa he tuig is keluǥayad te untung ni Shela, ne zuen duma pa he menge anak din he maama wey vahi.
GEN 11:16 Hein 34 en is penuiǥen ni Eber ne nevuwad sikandin ki Peleg.
GEN 11:17 Ne puun dutun te ked-enaka ki Peleg, 403 pa is keluǥayad te untung ni Eber, ne zuen duma pa he menge anak din he maama wey vahi.
GEN 11:18 Hein 30 en is penuiǥen ni Peleg ne nevuwad sikandin ki Reu.
GEN 11:19 Ne puun dutun te ked-enaka ki Reu, 209 pa he tuig is keluǥayad te untung ni Peleg, ne zuen duma pa he menge anak din he maama wey vahi.
GEN 11:20 Hein 32 en is penuiǥen ni Reu ne nevuwad sikandin ki Serug.
GEN 11:21 Ne puun dutun te ked-enaka ki Serug, 207 pa he tuig is keluǥayad te untung ni Reu, ne zuen duma pa zaan he menge anak din he maama wey vahi.
GEN 11:22 Hein 30 en is penuiǥen ni Serug ne nevuwad sikandin ki Nahor.
GEN 11:23 Ne puun dutun te ked-enaka ki Nahor, 200 pa he tuig is keluǥayad te untung ni Serug, ne zuen duma pa zaan he menge anak din he maama wey vahi.
GEN 11:24 Hein 29 en is penuiǥen Nahor ne nevuwad sikandin ki Tera.
GEN 11:25 Ne puun dutun te ked-enaka ki Tera, 119 pa he tuig is keluǥayad te untung ni Nahor, ne zuen duma pa zaan he menge anak din he maama wey vahi.
GEN 11:26 Hein 70 is penuiǥen ni Tera ne nevuwad sikandin ki Abram, Nahor, wey si Haran.
GEN 11:27 Iyan heini guǥud mehitenged te pemilya ni Tera. Si Tera, iyan amey eni Abram, si Nahor, wey si Haran. Ne si Haran, ne nevuwad sikandin ki Lot.
GEN 11:28 Ne hein kemulu pa uuyag si Tera minatey is anak din he si Haran diyà te Ur he iyan inged dan te menge Kildiyanhen he zutun si Haran ianak.
GEN 11:29 Ne mibpengesawa si Abram wey si Nahor. Iyan esawa ni Abram si Sarai, ne iyan esawa ni Nahor si Milca. Anak si Milca ni Haran te amey zaan ni Isca.
GEN 11:30 Ne si Sarai, kenà ed-anak umbe wazè din menge anak.
GEN 11:31 Ne midumahan ni Tera is anak din he si Abram, is ambey zin he si Sarai, wey is apù din he si Lot he anak ni Haran, ne mid-awè dan diyà te Ur he sakup te inged te menge Kildiyanhen su edhendiyè dan pezem te Canaan. Piru hein nekeuma zan diyà te inged he Haran, diyè dan dà med-ubpà.
GEN 11:32 Ne ziyà en mebpatey si Tera te Haran hein mibpenuiǥen sikandin te 205 he tuig.
GEN 12:1 Ne migkaǥi is Nengazen diyà te ki Abram te, “Ewai nu is inged nu, wey is menge kezuzumahi nu, wey is menge pemilya te amey nu, ne hendiyà ka te inged he ibpeehè ku kenikew.
GEN 12:2 “Edhimuwen ku is menge kevuwazan nu he utew zekelà he nasyun. Ne edtuvazan ku sikew ne edhimuwen ku he utew mevantug is ngazan nu. Ne pinaaǥi zaan kenikew, edtuvazan ku is mezakel he menge etew.
GEN 12:3 Is menge etew he edtavang kenikew, edtuvazan ku. Is menge etew he ebpesipala kenikew, edrewakan ku. Ne pinaaǥi kenikew edtuvazan ku te meupiya is langun he menge etew ziyan te kelibutan.”
GEN 12:4 Ne zutun, migenat si Abram sumalà is insuǥù kandin te Nengazen ne miduma zaan si Lot. Menge 75 is penuiǥen ni Abram dutun te timpu te ked-awè din dutun te Haran. Miduma zin is esawa zin he si Sarai wey is enaken din he si Lot. Elin daan miduma zin is langun he menge etew he nengesakup dan hein diyè dan pa te Haran. Ne mid-uwit dan daan is langun he menge azen dan. Midhipanew sikandan pehendiyà te tanà he Canaan.
GEN 12:6 Ne hein nekeuma zan diyà te Canaan midlaus pa ensi Abram taman te zekelà he kayu he More he ziyà te inged he Shekem. (Ne zutun he timpu iyan meǥinged dutun is menge kevuwazan ni Canaan.)
GEN 12:7 Ne mibpaahà is Nengazen ki Abram ne ke sikandin te, “Heini is tanà, ne ibeǥey ku ziyà te menge kevuwazan nu.” Ne zutun mibaal si Abram te pemuhatà su ebpemuhaten din is Nengazen he iyan mibpaahà kandin.
GEN 12:8 Ne midlaus pa ensi Abram pehendiyà te vuvungan he ziyà te zapit te edsilaan te inged he Betel ne zutun din ipehitindeg is tulda zin. Diyà te zapit din te edsenlepan is inged he Betel wey ziyà te zapit te edsilaan is inged he Ai. Ne zutun mid-uman si Abram mebaal te pemuhatà ne mibpengumew-umew zin is Nengazen.
GEN 12:9 Ne zutun migenat en maan ensi Abram ne midlaus dan pa pehendiyà te tanà he egngezanan te Negev.
GEN 12:10 Ne mid-aǥi is bitil zutun te tanà ne tenged dutun midhipanew si Abram pehendiyà te tanà he Ehipto su wey zan mekeubpà diyà.
GEN 12:11 Ne hein meǥaan dan en ebpekeuma ziyà te Ehipto, migkeǥiyan din is esawa zin te, “Sikew, utew ka mekempet he vahi.
GEN 12:12 Ne emun egkeehè ka te menge Ehiptohanen siguradu egkaǥi zan te, ‘Esawa zin bes heini!’ Ne zutun, edhimetayan e zan, iyan, kenè ke zan mulà edhimetayan.
GEN 12:13 Keǥiya nu he etevey ku sikew su wey e zan mepurungi tenged kenikew ne kenè e zan edhimetayan tenged te etevey ku sikew.”
GEN 12:14 Ne hein nekeuma ensi Abram diyà te Ehipto, naahà iyan te menge Ehiptohanen he utew mekempet he vahi si Sarai.
GEN 12:15 Ne is menge upisyal te hadì te Ehipto, hein neehè dan si Sarai, midtudtulan dan is hadì te utew mekempet sikandin he vahi ne mid-uwit si Sarai ziyà te turuǥan.
GEN 12:16 Tenged ki Sarai mibpurungan dutun te hadì si Abram, ne mibeǥayan din si Abram te menge vaka, kerehidu, menge asnu he vehiyan wey meemahan, wey menge kemilyu, wey menge uripen he vahi wey maama.
GEN 12:17 Piru tenged ki Sarai, he esawa ni Abram, duen utew gerabi wey egkein-inuwan he zaru he imbeǥey te Nengazen diyà te hadì te Ehipto wey te langun he menge etew ziyà te turuǥan din.
GEN 12:18 Ne netuenan duen te hadì te Ehipto, is hinungdan dutun te neulaula kandan, mid-umew zin si Abram ne ke sikandin te, “Utew mezaat is mid-ulaula nu kedì! Maan is wazè nu keǥiya he esawa nu si Sarai?
GEN 12:19 Migkaǥi nu he etevey nu, ne migkuwa ku sikandin, su mid-esawa ku. Heini zed is esawa nu. Kuwaa nu ne awè kew kayi!”
GEN 12:20 Ne midsuǥù din is menge sundaru zin ne inhated dan si Abram wey esawa zin wey langun te menge azen dan pehendiyà te ǥawas dutun te ǥinhedian.
GEN 13:1 Ne mid-awà ensi Abram dutun te Ehipto ne midlikù diyà te tanà he egngezanan te Negev, duma is esawa zin. Ne mid-uwit dan is langun he ketiǥeyunan dan. Ne miduma zaan kandan si Lot.
GEN 13:2 Utew en sepian si Abram su utew mezakel is menge ayam din wey mezakel is menge azen din he pelata wey vulawan.
GEN 13:3 Ne puun dutun te Negev midhalinhalin sikandin taman te nekeuma en maan diyà te uvey te Betel he iyan sikan is daan he nesevukan te tulda zin he ziyà te pid-elangan te Betel wey Ai.
GEN 13:4 Ne iyan daan haazà inged he zuen pemuhatà he mibeelan din dutun. Ne mid-umanan din dutun pengum-umawa is Nengazen.
GEN 13:5 Ne si Lot daan he edumazuma ki Abram, duen daan menge uyaǥen din wey menge tulda.
GEN 13:6 Ne tenged kayi kenà ereg is tanà he egkepenebtavan te langun he menge ayam dan ki Abram. Ne tenged te utew mezakel is menge sakup dan wey menge ayam dan, kenè en egkehimu he ebpeemurè dan dutun te tanà he ed-ubpaan dan.
GEN 13:7 Ne tenged dutun, mibpetebtebekè en is menge bekidu ni Abram wey is menge bekidu ni Lot. (Ne kenà duen dà taman su zuen daan menge tribu he Canaanhen wey menge Pirisihanen he zaan he menge meǥinged dutun.)
GEN 13:8 Ne migkaǥi zutun si Abram diyà te ki Lot te, “Kenè ki edtebek ne kenà kinahanglan he ebpekedtebek is menge bekidu ta su enaken ku sikew.
GEN 13:9 Meupiya pa ke ebpesuwayè ki, su mezakel pa is lugar he egkehelinan, ne pilì ka, ke hendei is egkesuatan nu, emun iyan ebpilien nu is dapit te egkeǥivang ne ziyà a edhalin te zapit te egkekewanan. Piru ke iyan ebpilien nu is dapit he egkekewanan, ne ziyà a te zapit te egkeǥivang.”
GEN 13:10 Ne zutun mibpememantew si Lot ne neehè din he utew meupiya haazà is tanà he uvey te Suǥud he Jordan su mezakel is menge wahig dutun te zapit te inged he Zoar. Iring haazà te pemuleey te Eden sikan is pemuleey zengan te Nengazen wey iring daan te tanà he Ehipto. (Ne zutun he timpu wazè pa dèdeeti te Nengazen is menge inged he Sodom wey Gomora.)
GEN 13:11 Ne zutun mibpilì ni Lot haazà is tivuuk he Suǥud te Jordan ne midhipanew en sikandin dutun pehendiyà te zapit te edsilaan. Ne iyan haazà kebpesuwayè dan ki Abram.
GEN 13:12 Ne si Abram, diyà sikandin med-ubpà te tanà he Canaan; ne si Lot mulà, diyà sikandin med-ubpà te menge inged diyà te menge suǥud he uvey te Sodom ne zutun ne ziyè din benguna is menge tulda zin.
GEN 13:13 Ne is menge meǥinged dutun te Sodom, utew menge mekesesalà. Utew mezaat is menge salè dan he supak te Nengazen.
GEN 13:14 Ne si Abram, hein mid-ewaan en sikandin ni Lot, migkeǥiyan sikandin te Nengazen te, “Pememantew ka puun diyan te edhitindeǥan nu ne ahaa nu is tanà he ziyà te zapit te edsilaan, wey ziyà te zapit te edsenlepan.
GEN 13:15 Is taman te egkeehè nu he tanà, ibeǥey ku kenikew wey ziyà te menge kevuwazan nu, ne egkaangken dan te taman te taman.
GEN 13:16 Ne is menge kevuwazan nu, edhimuwen ku sikandan he iring te eliyavuk. Emun kenà egkevilang is eliyavuk, kenà egkevilang daan is menge kevuwazan nu.
GEN 13:17 Ne hipanew ka ne susiya nu is tivuuk he tanà su ibeǥey ku en heini kenikew.”
GEN 13:18 Ne zutun inhalin ni Abram is tulda zin, ne ziyà sikandin med-ubpà te uvey te menge kayu he ulayan ni Mamre he ziyà te Hebron, ne mibaal sikandin te pemuhatà para te Nengazen.
GEN 14:1 Ne iyan haazà timpu he iyan si Hadì Amrafel he hadì te Shinar, si Hadì Arioc he hadì te Elasar, si Hadì Kedorlaomer he hadì te Elam, wey si Hadì Tidal he hadì te Goyim.
GEN 14:2 Heini is menge hadì, ne midtebek dan ki Hadì Bera he hadì te Sodom, ki Hadì Birsha he hadì te Gomora, ki Hadì Shinab he hadì te Adma, ki Hadì Shemeber he hadì te Zeboyim, wey te hadì te Bela he iyan daan inged he Zoar.
GEN 14:3 Heini is lelima he hadì, ne midsevaha zan is menge sundaru zan diyà te Suǥud he Sidim he iyan guntaan sikan is Daǥat he Minatey.
GEN 14:4 Su heini is lelima he hadì, dutun he timpu, 12 he tuig, ne menge sakup sikandan ni Kedorlaomer, iyan, dutun te ike-13 he tuig ne midsukul sikandan.
GEN 14:5 Ne zutun te ike-14 he tuig, mibpengayew si Kedorlaomer wey is menge zuma zin he hadì, ne midtebek dan wey nengezaag dan is menge Ripanhen diyà te Ashterot Karnaim, is menge Zuzhanen diyà te Ham, is menge Emhanen diyà te menge suǥud te Kiryataim,
GEN 14:6 wey is menge Hurhanen diyà te menge vuvungan he Seir taman te inged he El Paran he ziyà te uvey te tanà he sibsivayan.
GEN 14:7 Ne zutun midlikù dan ne midhendiyè dan te inged he En Mishpat (he iyan Kadesh), ne nengezaag dan is menge meǥinged diyà te tivuuk he tanà te menge Amalikanhen ne nengezaag dan daan is menge Amorihanen diyà te inged he Hazazon Tamar.
GEN 14:8 Ne zutun is menge hadì te Sodom, Gomora, Adma, Zeboyim, wey is hadì te Bela, midtiǥum dan is menge sundaru zan diyà te Suǥud he Sidim
GEN 14:9 ne nekidtebek dan ki Hadì Kedorlaomer he hadì te Elam, ki Hadì Tidal he hadì te Goyim, ki Hadì Amrafel he hadì te Shinar, wey ki Hadì Arioc he hadì te Elasar. Heepat he hadì is edtebeken te lelima.
GEN 14:10 Ne haazà is Suǥud he Sidim, mezakel is menge vudsi zutun he nepenù te merumiket he espaltu. Ne nengezaag is menge sundaru te hadì te Sodom wey Gomora, ne hein mibpelaǥuy zan, nengeulug is duma kandan diyà te menge vudsi, is duma, ne mibpelaǥuy zan diyà te menge vuvungan.
GEN 14:11 Ne zutun mibpenavan te heepat he hadì is langun he menge azen wey egkeenen te menge meǥinged te Sodom wey Gomora, ne midhipanew zan.
GEN 14:12 Nevihag dan daan sikan is enaken ni Abram he si Lot ne mid-aǥew zan daan is langun he menge azen din, su ziyà sikandin med-ubpà te Sodom.
GEN 14:13 Duen sevaha he tig-Sodom he nekepelaǥuy, ne midhendiyà sikandin te Hebriyuhanen he si Abram ne impenudtul zin haazà is langun he neulaula. Dutun he timpu, ziyà si Abram med-ubpà te uvey te menge kayu he ulayan ni Mamre te Amorihanen. Heini si Mamre wey is menge suled din he si Iskul wey si Aner ne neupakat sikandan engki Abram.
GEN 14:14 Ne hein nezineg ni Abram he nevihag is enaken din, midtiǥum din is 318 he sakup din he egkeseriǥan din. Heini sikandan, menge sakup din puun pa te ked-enaka kandan, ne miduma zin sikandan, ne midal-as dan sikan is heepat he hadì taman te inged he Dan.
GEN 14:15 Ne hein mezukilem, mibahin ni Abram te dezuwa he grupu is menge sundaru zin. Ne zutun midsurung dan is menge kuntada zan, ne nezaag dan heini. Ne haazà is menge kuntada zan ne mibpemelaǥuy midal-as eni Abram taman te inged he Hoba, he ziyà te zapit te egkezizaya te inged he Damascus.
GEN 14:16 Midhawì ni Abram is langun he menge azen he nengaaǥew te menge kuntada. Ne midhawì din daan si Lot wey is langun he menge azen ni Lot. Elin daan midlibri zin is nengevihag he vahi wey is duma pa he menge etew.
GEN 14:17 Ne zutun te ed-ulì en si Abram he ebpuun te kedeeǥa zin ki Kedorlaomer wey is menge zuma he hadì, midsinuǥung sikandin te hadì te inged he Sodom. Diyè din sinuǥunga te Suǥud he Shave he egngezanan daan te Suǥud te Hadì.
GEN 14:18 Ne zuen hadì te inged he Salem he si Melkizedek he midsinuǥung daan kandan. Mid-uwit sikandin te supas wey vinu su ibpekaan din wey ibpeinum din ki Abram. Memumuhat si Melkizedek te Utew Lavew he Megbevayà.
GEN 14:19 Mibpenubtuvazan din si Abram te egkaǥi te, “Berakat, Abram, he tuvazi ka te Utew Lavew he Megbevayà he nenlimbag te langit wey tanà.
GEN 14:20 Deliǥa is Utew Lavew he Megbevayà, su midhimu zin he mekezaag ka te menge kuntada nu.” Ne zutun, imbeǥey kandin ni Abram is ikepulù he vahin te langun he netavan din.
GEN 14:21 Ne zutun migkeǥiyan si Abram duen te hadì te Sodom te, “Is langun he menge azen dey he nahawì nu ne kenikew en, piru egkuwaan ku zed is langun he menge sakup ku.”
GEN 14:22 Ne midtavak si Abram te, “Ebpenangdù a kayi te etuvangan te Nengazen, te Utew Lavew he Megbevayà he iyan nenlimbag te langit wey tanà.
GEN 14:23 Minsan tanur zà etawa hiket te sandalyas, ne kenè ku edewaten. Ne kenè ku egkuwaan is minsan hengkey he azen nu su kela ke mekekaǥi ka he iyan ka insepian ku.
GEN 14:24 Kenè ku edewaten is minsan hengkey he para zà kedì. Iyan dà edewaten ku is nekaan en te menge sakup ku, kenè ku en id-ulì kenikew, ne iveǥey nu zaan is bahin te menge midtavang kediey he si Eshcol, si Aner, wey si Mamre.”
GEN 15:1 Ne hein neiwas haazà, mibpekidlalag ki Abram is Nengazen , ke sikandin te, “Abram, kenè ka mahandek, su edlevanan ku sikew wey ebeǥayan ku sikew te utew zekelà he suhul.”
GEN 15:2 Ne midtavak dutun si Abram te, “Sikew is Nengazen he Megbevayà, wazà igkeveǥey nu kediey he ibmeupiya te ǥehinawa ku su kenè bes egkehimu he egkevuwad a, ne iyan ebpekepengevilin te menge azen ku si Eliezer he tig-Damascus.”
GEN 15:3 Ne impelaus pa ni Abram is egkeǥiyen din, ne ke sikandin te, “Geina te wazè nu himuwa he mevuwad a, iyan ebpekepengevilin te menge azen ku is suluǥuen ku zà.”
GEN 15:4 Ne zutun midtavak kandin is Nengazen , ke sikandin te, “Kenà iyan heini si Eliezer ebpekepengevilin su iyan dà ebpekepengevilin te menge azen nu is hustu en he anak nu.”
GEN 15:5 Ne zutun impeǥawas din si Abram ne ke sikandin te, “Lingehè ka ziyà te langit ne vilanga nu is menge vituen emun egkevilang nu.” Ne ke sikandin daan te, “Iring keniyan is menge kevuwazan nu keuzemà su kenà sikandan egkengevilang.”
GEN 15:6 Ne zutun, tenged te midtuu si Abram te Nengazen , mid-isip sikandin te Nengazen he metazeng.
GEN 15:7 Ne zutun migkaǥi is Nengazen te, “Iyan a sikan is Nengazen . Umbe impehendini ku sikew he ebpuun te inged he Ur te menge Kildiyanhen su wey ku ikeveǥey kenikew heini is tanà wey nu maangken.”
GEN 15:8 Ne zutun migkaǥi si Abram te, “He Nengazen he Megbevayà, hengkey is tuus wey ku metueni he egkaangken ku heini?”
GEN 15:9 Ne midtavak dutun is Nengazen te, “Uwita nu zini is dumeraǥa he vaka, sevaha he vehiyan he kambing, wey sevaha he meemahan he kerehidu, tigtetelu he tuig is penuiǥen te uman sevaha kandan. Uwit ka zaan dini te sevaha he limuken wey sevaha he merepatik.”
GEN 15:10 Ne mid-uwit ni Abram haazà diyà te Nengazen , ne mibpemaas heini ni Abram ne imped-atbang din is kedsevuka zin dutun te kada vaas. Iyan dà wazè din baasa sikan is merepatik wey limuken.
GEN 15:11 Ne zutun duen menge dezekelà he zumezaas he menge tagbis he midlatun dutun te mibaas, piru mibuǥew sikandan ni Abram.
GEN 15:12 Ne hein edsanlep en is andew, Nekelipezeng si Abram he utew nehurep. Ne neǥezam din dutun is utew subra he kegkahandek.
GEN 15:13 Ne migkeǥiyan sikandin dutun te Nengazen te, “Tentenuzi nu he is menge kevuwazan nu, ne egkehimu zan keuzemà he menge lumelengyawà ziyà te zuma he nasyun. Egkengeuripen sikandan wey ebpesipelahan sikandan seled te 400 he tuig.
GEN 15:14 Piru haazà is nasyun he ed-uripen kandan, edsilutan ku ne zutun ebpekaawè dan, ne utew mezakel is menge azen dan.
GEN 15:15 Sikew mulà, ebpekeluǥeyazen ku is untung nu; ebpatey ka tenged te keǥuǥurangi nu he melinawen.
GEN 15:16 Ke heepat egkelapis is menge kevuwazan nu ziyà te senge nenasyun, ne human dan ed-ulì dini su wazè pa metuman is timpu te kedsiluti ku te menge Amorihanen tenged te menge salè dan.”
GEN 15:17 Ne midsanlep en is andew ne mibmerusirem en, ne zuen migkivelat he naahà ni Abram he iring te kuzen he ed-evel wey egkeregreg he ziyà mebayà te pid-elangan dutun te mibaas he imped-aatbang.
GEN 15:18 Ne zutun he andew, midtukud is Nengazen te kebpekid-uyun din ki Abram. Ke sikandin te, “Ibeǥey ku te menge kevuwazan nu heini he tanà. Puun diyà te wahig te Ehipto pehendiyà te zekelà he Wahig he Eufrates.
GEN 15:19 Heini he tanà iyan guntaan ed-ubpaan te menge Kinhanen, menge Kinisihanen, menge Kidmunihanen,
GEN 15:20 menge Hitihanen, menge Pirisihanen, menge Ripanhen,
GEN 15:21 menge Amorihanen, menge tig-Canaan, menge Girgasihanen, wey menge Jebusihanen.”
GEN 16:1 Ne si Sarai, sikan is esawa ni Abram, kenà ed-anak. Duen uripen din he Ehiptohanen he egngezanan ki Hagar.
GEN 16:2 Ne migkaǥi si Sarai ziyà te ki Abram te, “Tenged te wazà ituǥut te Nengazen he mekaanak a, deyzey pa vuwa ke edhulizan nu is uripen ku, su kela ke egkehimu he pinaaǥi kandin duen ku zed menge anak.” Ne mid-uyun dutun si Abram te sambag ni Sarai.
GEN 16:3 (Sepulù en he tuig dutun is ked-ubpà eni Abram diyà te tanà he Canaan.) Ne mibeyaan dutun ni Sarai haazà is uripen din he tig-Ehipto he si Hagar ne imbeǥey zin diyà te esawa zin wey zin meesawa.
GEN 16:4 Ne midhulizan ni Abram si Hagar ne mibmeǥingey si Hagar. Ne si Hagar, hein nesavut din he meǥingey sikandin, mibpelevawan din is egalen din he si Sarai.
GEN 16:5 Ne migkaǥi zutun si Sarai ziyà te ki Abram te, “Kenikew he salà heini is kebpelevawi kediey ni Hagar. Minsan pa te iyan a mibeǥey kandin diyan te kenikew, ebpelevawan e zin gihapun hein netuenan din he meǥingey en su kenè nu edewayen. Nesayud is Nengazen ke hentei kenita is ebpekevenar!”
GEN 16:6 Ne midtavak dutun si Abram diyà te ki Sarai te, “Emun iyan heeyan, idlikù ku sikandin diyan te kenikew ne bayèbayè ka ke hengkey is ed-ul-ulahan nu kandin.” Ne puun dutun, kenà meupiya is ebelan ni Sarai ki Hagar, umbe hein neuǥet ne mibpelaǥuy sikandin.
GEN 16:7 Ne zutun naahà si Hagar te velinsuǥuen te Nengazen diyà te uvey te serebseb he ziyà te sibsivayan. Iyan haazà sikan is serebseb he ziyà te zalan pehendiyà te inged he Shur.
GEN 16:8 Ne mid-insaan dutun te velinsuǥuen sikandin te, “Hagar he suluǥuen ni Sarai, hendei ka ebpuun wey hendei ka ebpevayà?” Ne midtavak si Hagar te, “Ebpeleǥuyan ku is egalen ku he si Sarai.”
GEN 16:9 Ne zutun migkaǥi ziyà te kandin is belinsuǥuen te Nengazen, ke sikandin te, “Ulì ka ziyà te egalen nu ne pevayàbayè ka kandin.”
GEN 16:10 Ne migkaǥi zaan is belinsuǥuen te, “Edhimuwen ku he utew medmezakel keuzemà is menge kevuwazan nu, ne kenè dan egkengevilang.”
GEN 16:11 Ne impelaus din is egkeǥiyen din kandin te, “Meǥingey ka, ne maama is id-anak nu. Ishmael is igngazan nu kandin, su nezineg te Nengazen is menge pengemuyù nu kandin tenged te merasey is egkeulaula nu.
GEN 16:12 Ne heini is anak nu, iring sikandin keuzemà te asnu he leew su kenà ebpevayàbayà te minsan hentei. Ebpekigkuntada sikandin te minsan hentei ne egkuntedahan daan sikandin te langun. Minsan is langun he menge kezuzumahi zin, egkuntedahan din pa.”
GEN 16:13 Umbe migngezanan ni Hagar is Nengazen te, “El-roi,” su ke sikandin te, “Neehè ku ve is Megbevayà, ne kemulu e pa he uuyag guntaan?”
GEN 16:14 Tenged dutun migngezanan haazà is kalut te Beer Lahai Roi, he ke và dà egkeǥiya, “Kalut te uuyag he Megbevayà he nekaahà kediey.” Kemulu pa haazà is kalut diyà te pid-elangan te inged he Kadesh wey inged he Bered.
GEN 16:15 Ne mid-anak si Hagar te maama pinaaǥi ki Abram. Ne haazà is anak din, migngezanan ni Abram ki Ishmael.
GEN 16:16 Is penuiǥen ni Abram ne 86 he tuig hein ked-enaka ni Hagar ki Ishmael.
GEN 17:1 Ne hein 99 en is penuiǥen ni Abram, mibpaahà kandin is Nengazen ne migkaǥi kandin te, “Siak, iyan a Megbevayà he Mekeǥeǥehem. Sunuza nu is menge penurù ku ne kinahanglan he wazà igkesewayi kenikew.
GEN 17:2 Edtukuzen ku is kebpekid-uyun ku kenikew: ne edhimuwen ku he utew medmezakel is menge kevuwazan nu.”
GEN 17:3 Ne zutun midlangkeb si Abram diyà te tanà ne migkaǥi en maan kandin is Megbevayà te,
GEN 17:4 “Iyan kebpekid-uyun ku kenikew is: Egkehimu ka he amey te langun he menge nasyun.
GEN 17:5 Kenè ke en egngezanan ki Abram, kekenà, egngezanan ku en sikew ki Abraham, su edhimuwen ku sikew he kepuun te medmezakel he menge nasyun.
GEN 17:6 Edhimuwen ku he mepurung mevuwad is menge kevuwazan nu, ne egkehimu sikandan he zekelà he nasyun, ne is duma kandan ne egkehimu he menge hadì.
GEN 17:7 Edtumanen ku is kebpekid-uyun ku kenikew wey te menge kevuwazan nu te peleebuten he lapis te kevuwazan, ne pedayun a he Megbevayè niw. Heini he kebpekid-uyun ku ne taman te taman.
GEN 17:8 Ne is tivuuk kayi he tanà te Canaan he mid-ubpaan nu ǥuntaan te lumelengyawà, ibeǥey ku heini kenikew wey ziyà te menge kevuwazan nu. Egkeangken niw heini te taman te taman, ne pedayun he iyan a Megbevayè niw.”
GEN 17:9 Ne migkaǥi en maan is Megbevayà diyà te ki Abraham te, “Kenè nu lipati is kebpekid-uyun ku kenikew. Iyan daan heini meupiya he ed-ul-ulahan te menge kevuwazan nu te peleebuten he lapis te kevuwazan nu.
GEN 17:10 Ne mehitenged keniyan he kebpekid-uyun, kinahanglan he ebpesirkunsidar is langun he menge maama ziyan te keniyu.
GEN 17:11 Kinahanglan he edsirkunsidaren is langun he menge maama, ne iyan haazà tuus te kebpekid-uyun ku keniyu.
GEN 17:12 Puun guntaan taman te peleebuten he lapis te kevuwazan, kinahanglan he sirkunsidara niw is menge vatà he menge maama zutun te ikewalu he andew puun te ked-enaka kandin. Sirkunsidara niw zaan is menge uripen niw he maama he neetew ziyà te valey niw ragkes is nengepemasa niw he ziyà ebpuun te zuma he menge inged. Heeyan he tuus te lawa niw, iyan tistiǥus he tutuu is kebpekid-uyun ku keniyu, ne kenà heini egkahanew taman te taman.
GEN 17:14 Ne ke zuen minsan hentei he maama he zuma niw he kenà ebpesirkunsidar, kenè niw en isipa he zuma niw sikandin, su wazè din ilelenged is kebpekid-uyun ku.”
GEN 17:15 Ne elin daan migkaǥi te Megbevayà diyà te ki Abraham is: “Ne haazà is esawa nu he si Sarai, kenè nu en ngezani ki Sarai, kekenà, iyan nu en ingazan kandin si Sara, he ke và dà egkeǥiya, ‘Bai’.
GEN 17:16 Edtuvazan ku sikandin ne ebmeǥingey ne pinaaǥi kandin ibeǥey ku kenikew is anak he maama. Egkehimu sikandin he kepuun te mezakel he menge nasyun, ne is duma he menge kevuwazan din ne egkehimu he hadì.”
GEN 17:17 Ne zutun midlangkeb en maan si Abraham diyà te tanà, ne mid-engit su ke sikandin diyà te ǥehinawa zin te, “Egkehimu ves he egkevuwad a, is maama he 100 en is penuiǥen din? Ne egkehimu ves daan he ed-anak si Sara is 90 en is penuiǥen din?”
GEN 17:18 Ne ke sikandin diyà te Megbevayà te, “Emun iyan heeyan egkehitavù, edhengyuen ku he ikeǥaǥew nu zaan is anak ku he si Ishmael.”
GEN 17:19 Ne midtavak is Megbevayà te, “Iyan heini tutuu: Si Sara is esawa nu, ed-anak te maama, ne iyan ingazan nu kandin si Isaac, he ke và dà egkeǥiya, ‘Ked-engit’. Ibpelaus ku ziyà te kandin wey ziyà te menge kevuwazan din te wazà pidtemanan sikan is kebpekid-uyun ku kenikew taman te taman.
GEN 17:20 Ne si Ishmael zaan, ebpemineǥen ku is hangyù nu mehitenged kandin. Edtuvazan ku zaan sikandin ne edhimuwen ku he mezakel is menge kevuwazan din. Egkehimu sikandin he amey te 12 he menge pengulu, ne is menge kevuwazan din egkehimu he utew egkevantug he menge etew.
GEN 17:21 Piru haazà is kebpekid-uyun ku kenikew, ibpelaus ku zaan diyà te anak nu he si Isaac he id-anak ni Sara seled te senge tuig pa ǥuntaan.”
GEN 17:22 Ne hein nekeipus he edlalag is Megbevayà diyà te ki Abraham, nahanew sikandin dutun te ked-ahà ni Abraham.
GEN 17:23 Ne zutun dà he andew, midtuman ni Abraham is insuǥù kandin te Megbevayà. Midsirkunsidar zin is anak din he si Ishmael wey is langun he maama he ziyà te valey zin: is menge uripen he ziyà ianak te valey zin wey is menge uripen he mibpemasa zin.
GEN 17:24 Ne 99 he tuig is penuiǥen ni Abraham dutun te andew he mibpesirkunsidar sikandin.
GEN 17:25 Ne 13 he tuig is penuiǥen ni Ishmael zutun te kedsirkunsidara kandin.
GEN 17:26 Dutun he andew nesirkunsidar si Abraham, is anak din he si Ishmael,
GEN 17:27 wey is langun he menge uripen din he maama he ziyà ianak te valey zin, wey menge uripen he maama he mibpemasa zin diyà te menge lumelengyawà.
GEN 18:1 Ne mid-uman mebpaahà is Nengazen ki Abraham diyà te uvey te menge kayu he ulayan ni Mamre. Hein ebmeudtu zutun is andew, ebpimpinuu si Abraham diyà te ǥemawan te tulda zin.
GEN 18:2 Mibpememantew si Abraham ne neehè din is tetelu he maama ziyà te uvey. Ne zutun te kegkaahaa zin, migaanggaan medsinuǥung ne midlangkeb diyà te tanà su edtahud.
GEN 18:3 Ke sikandin te, “Datù, emun meupiya zà te ǥehinawa niw, ne tuluy kew zèpa kayi te kenami.
GEN 18:4 Ituǥut niw he ed-uwit key te wahig wey kew mekepenlùlù te menge paa niw. Himeley kew zèpa kayi te sihung te kayu.
GEN 18:5 Ne ituǥut niw zaan he ibpekaan dey pa sikiyu te zeisek su wey kew meulii te zesen te kenè kew pa edlaus te hipenawan niw su iyan buwa heini ketezengan ke maan is imbanglis kediey is kedhendini niw te kediey te suluǥuen niw.” Ne zutun midtavak dan te, “Uya, meupiya iyan ke egkeulaula haazà is migkaǥi nu.”
GEN 18:6 Ne zutun migaanggaan si Abraham ne midhendiyà te ki Sara he ziyà te tulda ne ke sikandin te, “Ganggaang ka, kuwa ka te menge pitu he ǥantang he herina wey vaal ka te supas.”
GEN 18:7 Ne mibpelelaǥuy sikandin pehendiyà te uyaǥen din ne mibpilì te nati he vaka he utew meupiya ne impelapè din duen te betan-en he suluǥuen din ne impehilutù din.
GEN 18:8 Ne hein naandam en is langun, midtangel en ni Abraham haazà is usa wey zuen daan gatas wey kisu. Ne migkaan dan diyà te sihung te kayu ne zutun daan si Abraham is ebpenilbi kandan.
GEN 18:9 Ne zutun mid-insaan dan si Abraham te, “Hendei is esawa nu he si Sara?” Ne midtavak sikandin te, “Diyè ded te seled te tulda.”
GEN 18:10 Ne zutun migkaǥi is Nengazen te, “Senge tuig pa ǥuntaan, edlikuan ku sikiyu ne zutun he timpu, si Sara, is esawa nu, id-anak din is maama.” Ne ziyà si Sara te ǥemawan te valey he egkeiniyuǥan dan is ebpemineg te vitiyara zan.
GEN 18:11 (Si Abraham wey si Sara, utew zan en meǥurang ne wazà bahi he ebpekaanak emun is penuiǥen din, iring te penuiǥen ni Sara.)
GEN 18:12 Ne tenged dutun nekeengit si Sara ziyà te ǥehinawa zin, ne neisip din is, “Egkehimu ve he egkeulaula heini is meupiya kediey te nemezahan e en wey utew en meǥurang is esawa ku?”
GEN 18:13 Ne zutun migkaǥi is Nengazen diyà te ki Abraham te, “Maan is mid-engit si Sara he egkaǥi te, ‘Egkehimu ve he ed-anak a is utew en meǥurang?’ ”
GEN 18:14 Ne mid-uman megkaǥi is Nengazen te, “Duen be minsan hengkey he kenà egkehimu te Nengazen? Sumalà is migkaǥi ku, edlikuan ku sikiyu seled te senge tuig ne ed-anak iyan dutun si Sara te maama.”
GEN 18:15 Ne mibarew zutun si Sara tenged kegkahandek din he egkaǥi te, “Wazà a med-engit!” Ne midtavak is Nengazen te, “Mid-engit ka iyan.”
GEN 18:16 Ne migenat en dutun haazà is tetelu he maama. Inhated sikandan ni Abraham taman te nepantew zan is inged he Sodom.
GEN 18:17 Ne migkaǥi is Nengazen diyà te ǥehinawa zin te, “Kenè ku id-eles ki Abraham is ebeelan ku.
GEN 18:18 Su kepuun si Abraham te utew zekelà wey mekeǥeǥehem he nasyun wey is kevuwazan din te peleebuten. Pinaaǥi kandin edtuvazan ku is langun he menge nasyun dini te kelibutan.
GEN 18:19 Mibpilì ku si Abraham su wey zin ikepenurù diyà te menge anak din wey menge kevuwazan din he med-ikul zan te ibayè ku te Nengazen pinaaǥi te ked-ul-ulaha zan te metazeng wey hustu. Pinaaǥi kayi, egketuman is menge pesarig ku kandin.”
GEN 18:20 Ne migkaǥi zutun is Nengazen diyà te ki Abraham te, “Utew kun mezaat is menge ulaula te menge tig-Sodom wey menge tig-Gomora wey utew kun meveǥat is menge salè dan.
GEN 18:21 Umbe edhendiyà a su ed-ahaan ku is menge ulaula zan ke utew subra he mezaat he iring te nezineg ku, su kinahanglan he egketuenan ku.”
GEN 18:22 Ne zutun migenat is dezuwa he menge maama su edhendiyè dan te Sodom, piru si Abraham, diyè ded edhithitindeg te etuvangan te Nengazen.
GEN 18:23 Ne mid-uvayan ni Abraham is Nengazen ne nenginginsà te, “Tutuu ve he idragkes nu is menge metazeng dutun te kedlimasa nu te utew menge mekesesalà he etew?
GEN 18:24 Penenglitan ke zuen 50 he menge metazeng he etew ziyà te inged, tutuu ve he edlimasen nu? Ne kenè nu egkehizuwan haazà is menge meǥinged minsan pa te zuen 50 he menge metazeng dutun?
GEN 18:25 Kenà haazà dait he edsilutan nu is menge metazeng duma te menge mekesesalà. Kenà egkehimu he id-iring nu is menge lalung kandan. Iyan ka ebayàbayà te tivuuk kelibutan, kenè be kinahanglan he ebeelan nu ke hengkey is hustu?”
GEN 18:26 Ne midtavak dutun is Nengazen te, “Emun duen egkeehè ku he 50 he menge metazeng he etew zutun te inged, kenè ku edèdeetan is tivuuk he inged tenged dutun te 50.”
GEN 18:27 Ne mid-uman dutun si Abraham megkaǥi te, “Peseyluwa a, su ǥeina te mibpekevurut a he egkaǥi ziyan te kenikew te Nengazen, ibpelaus ku pa is egkeǥiyen ku, minsan pa te kayi te etuvangan nu iring a te eliyavuk dà wey igmuk su utew minus is pid-etawan ku.
GEN 18:28 Penenglitan, ke wazà 50 he menge metazeng dutun te inged su 45, edlimasen nu zed be haazà is inged su egkurang te lelima he menge metazeng?” Ne midtavak is Nengazen te, “Emun duen egkeehè ku he 45, ne kenè ku en edlimasen.”
GEN 18:29 Ne mid-insè pa maan si Abraham te, “Ne emun iyan nu zà egkaahà dutun is 40 he menge metazeng?” Ne midtavak is Nengazen te, “Emun duen egkeehè ku he 40 ne kenè ku edlimasen.”
GEN 18:30 Ne migkaǥi en maan si Abraham te, “Pekelalaglalag ka, Nengazen, ne kenà a kenikew mepeuki su ebpenginginsè e pa. Penenglitan ke zuen egkeehè nu he 30 he menge metazeng?” Ne midtavak is Nengazen te, “Emun duen egkeehè ku he 30 ne kenè ku zaan edlimasen.”
GEN 18:31 Ne migkaǥi en maan si Abraham te, “Nengazen, ǥeina te mibpekevurut e pa maan he egkaǥi ziyan te kenikew te, ibpelaus ku pa is egkeǥiyen ku. Ne penenglitan, emun duen 20 he metazeng he egkeehè nu, edlimasen nu zed be?” Ne midtavak is Nengazen te, “Ke zuen minsan 20, kenè ku en edlimasen is inged.”
GEN 18:32 Ne migkaǥi pa maan si Abraham te, “Nengazen, Kenà a kenikew mepeuki, ketepusan en heini he id-insè ku. Penenglitan ke zuen 10 he menge metazeng he egkeehè nu zutun?” Ne midtavak is Nengazen te, “Ke zuen egkeehè ku ziyà he minsan 10 dà he menge metazeng, ne kenè kud edlimasen.”
GEN 18:33 Ne zutun nepasad is kebitiyara zan, nahanew is Nengazen, ne mid-ulì si Abraham diyà te kandan.
GEN 19:1 Ne haazà is dezuwa he menge velinsuǥuen te Nengazen, hein nekeuma zan diyà te inged he Sodom ne mahapun en, diyà si Lot ebpimpinuu te uvey te pultahan dutun te inged. Ne hein neehè din sikandan, midhitindeg sikandin ne midsinuǥung din ne midlangkeb sikandin diyà te tanà te kedtahud, he egkaǥi te,
GEN 19:2 “Edhengyuan ku sikiyu, menge zatù, tuluy kew pa ziyà te valey ku te suluǥuen niw. Penlùlui niw is menge paa niw wey hulavung kew pa. Keeselem kew en laus te hipenawan niw.” Ne midtavak sikandan te, “Maambe en su zini key zà edhulavung te pelasa.”
GEN 19:3 Piru midteǥel sikandan ni Lot, umbe miduma zan diyà te valey zin. Ne mid-andam si Lot te menge inumen wey egkeenen dan, ne mibpevaal zaan sikandin te supas he wazè din tapey, ne midlavung sikandan.
GEN 19:4 Ne zutun te wazè dan pa mekehizeǥà, nemekeuma is langun he menge maama zutun te tivuuk he inged he Sodom, menge kengkenakan wey menge meǥurang he maama, ne midlingutan dan is baley ni Lot.
GEN 19:5 Mid-umew zan si Lot, ne mid-insaan dan te, “Hendei sikan is menge maama he meǥeliyug nu he nekeuma ǥeina te mahapun? Ipeǥawas nu su egkesuat key he ebpekidhilavet kandan.”
GEN 19:6 Ne migawas dutun si Lot te valey su edlelaǥan din sikandan. Ne hein nekeǥawas en sikandin, ne midlekevan din is gemawan.
GEN 19:7 Migkeǥiyan din sikandan te, “Menge geli ku, kenà haazà egkehimu. Edhangyù a he kenè niw ul-ulaha heeyan is utew mezaat.
GEN 19:8 Heini zed is menge anak ku he raǥa. Wazè pa sikandan meuvayi te maama. Ibpeǥawas ku en sikandan ne egkehimu he ziyè niw ul-ulaha te kandan is egkesuatan niw, iyan, kenè niw pesipelahi heini is dezuwa he maama su menge meǥeliyug ku man ne kinahanglan he ed-elimahan ku sikandan.”
GEN 19:9 Piru nasì dan medtavak te, “Lumelengyawè ke zà dini, hentei ka is uvag en ebpelavetlavet kenami. Awè ka keniyan! Kela ke tuwas pa he mezaat is ed-ul-ulahan dey kenikew kenà kandan.” Ne zutun insinumag dan si Lot, ne ed-uvey zan en pezem duen te ǥemawan su egkebrahan dan is lekeb kayi.
GEN 19:10 Piru haazà is dezuwa he maama he ziyà te seled, mibpuwasan dan is gemawan ne midsengguyud dan si Lot ne inseled dan dutun te valey ne midlelekeb dan.
GEN 19:11 Ne haazà is menge etew he ziyà te ǥawas, mibpengelinteuwan kayi te zezuwa he melakap sikandan para kenà sikandan meketuredu te ǥemawan.
GEN 19:12 Ne migkaǥi haazà is dezuwa ziyà te ki Lot te, “Emun duen nu pa menge zuma kayi, iring te menge anak nu he maama wey vahi, wey menge mekaamung nu, wey is minsan hentei pa he menge sakup nu kayi te inged, kinahanglan he zumaha nu en ne pelaǥuy kew pehendiyà te ǥawas te inged,
GEN 19:13 su edèdeetan dey en heini is inged. Nezineg en te Nengazen is menge riklamu kandan tenged te menge ulaula zan he mezaat. Umbe midsuǥù key zin dini su ibpelimas din kenami heini he inged.”
GEN 19:14 Ne zutun mibeyaan ni Lot is menge maama he nekekaǥun te menge anak din, ke sikandin te, “Kuwa kew en su ebpelaǥuy kiw kayi su edlimasen en te Nengazen heini is inged tew.” Piru wazè dan mebpemineg su kunaan dan ke suyat dà haazà ni Lot.
GEN 19:15 Ne hein egkeriwaswas en, impeǥaangaan en si Lot dutun te zezuwa he velinsuǥuen he med-awè dan en dutun te inged, ke sikandan te, “Gaanggaan ka! Genat ke en, dumaha nu is esawa nu wey is menge anak nu he raǥa, su kela ke mekeragkes kew kayi te kedlimasa kayi te inged, tenged te utew meremerik he ulaula te menge etew kayi.”
GEN 19:16 Ne minsan pa zutun midlanganlangan pa si Lot. Ne tenged te nehizuwan sikandan te Nengazen, migewezan sikandan duen te menge velinsuǥuen diyà te zezuwa he velad dan, su wey zan mekeǥawas dutun te inged.
GEN 19:17 Ne hein diyè dan en te ǥawas, migkaǥi is sevaha he velinsuǥuen diyà te ki Lot te, “Pelaǥuy kew en! Kenè kew lilingey wey kenè kew teren kayi te menge suǥud. Diyè kew petandang te menge vuvungan para kenè kew meragkes mepatey.”
GEN 19:18 Piru midtavak si Lot te, “Egalen ku, kenè ad kenikew epepelaǥuy diyà te vuntud.
GEN 19:19 Utew zekelà is tavang niw kediey te suluǥuen niw ne utew zekelà is gaǥew niw kediey su midlibri a keniyu wey a kenà mebpatey. Utew zà meziyù haazà is buntud; kenà a ebpekepelaǥuy pehendiyà te vuvungan su egkesaut e zed kayi te kedlimas ne ebpatey a ǥihapun.
GEN 19:20 Neehè nu ve heeyan is deisey he inged keniyan te egkehunaan? Egkesiguru ku he egkeuma ku heeyan su uvey zà. Egkehimu ve he keniyan e zà ebpevayà te zeisey he inged su wey a meluwas?”
GEN 19:21 Ne midtavak dutun is belinsuǥuen te, “Uya, egkehimu; idtuǥut ku heini is hangyù nu. Kenè ku en edèdeetan haazà is inged he egkeǥiyen nu.
GEN 19:22 Sigi, pelaǥuy kew. Hendiyan kew en, su wazà egkehimu ku taman te kenè kew pa ebpekeuma zutun.” Ne tenged dutun, egngezanan haazà is inged te Zoar, he ke và dà egkeǥiya, “Deisek.”
GEN 19:23 Ne hein midsilè en is andew nekeume en ensi Lot diyà te Zoar.
GEN 19:24 Segugunà mibpeuzan is Nengazen te egkeregreg he esupri ziyà te inged he Sodom wey Gomora.
GEN 19:25 Pinaaǥi zutun midlimas te Nengazen haazà is dezuwa he inged wey sikan is tivuuk he suǥud. Neǥerà is langun he menge meǥinged dutun wey nezeetan is langun he edtuvù dutun.
GEN 19:26 Piru midlilingey sikan is esawa ni Lot su ed-ahaan din is neewaan dan, ne mibaluy sikandin he timus he iring te tukud.
GEN 19:27 Ne zutun te sunud he andew, midselem med-enew si Abraham, ne midlikù diyà te zaan he midhitindeǥan din hein mibpekidlaglag kandin is Nengazen.
GEN 19:28 Ne mibpememantew sikandin diyà te Sodom wey Gomora wey ziyà te tivuuk he suǥud. Ne neehè din is dekelà he evel he ebpuun dutun te tanà he iring te evel te selsalan.
GEN 19:29 Wazà melipati te Nengazen is kebpekid-uyun din diyà te ki Abraham, su zutun te kedèdeeti zin te menge inged diyà te suǥud he zutun med-ubpà si Lot, impepelaǥuy zin si Lot su wey kenà meragkes.
GEN 19:30 Ne mid-awà dutun si Lot wey is menge anak din he raǥa te inged he Zoar su egkahandek sikandin dutun he ed-ubpà, ne ziyè dan medhalin te vuntud, ne ziyè dan med-ubpà te surung.
GEN 19:31 Dutun he timpu, migkaǥi is kakey he anak din diyà te hazi zin te, “Utew en meǥurang is amey ta ne wazà kayi zuma pa he maama he ebpekeesawa kenita wey edhulid kenita sumalà is betasan te tivuuk he menusiyà.
GEN 19:32 Edlenguten ta nasì is amey ta te vinu, ne edhulizen ta sikandin su wey zuen te zed kevuwazan pinaaǥi te amey ta.”
GEN 19:33 Ne zutun he kezukileman, midlangut dan is amey zan, ne mibpekidhulid haazà is kakey te amey zan. Tenged te utew nelangut si Lot, wazè din metueni haazà is neulaula.
GEN 19:34 Ne hein nepawà, migkaǥi haazà is kakey ziyà te hazi zin te, “Geina te mezukilem, iyan a midhulid ki amà. Kengkuwan te mezukilem edlenguten te en maan sikandin, ne iyan kad maan hulid kandin su wey zuen te zed kevuwazan pinaaǥi te amey ta.”
GEN 19:35 Umbe, zutun he kezukileman, midlangut dan en maan is amey zan, ne iyan maan haazà is hazi mibpekidhulid te amey zan. Tenged te utew nelangut si Lot, wazè din metueni is neulaula.
GEN 19:36 Ne pinaaǥi zutun neǥingey ni Lot haazà is menge anak din he vahi.
GEN 19:37 Mid-anak haazà is kakey, ne maama is anak din, ne migngezanan din ki Moab. Iyan sikandin kepuun te menge Moabitanhen guntaan.
GEN 19:38 Mid-anak daan haazà is hazi, ne maama zaan is anak din, ne migngezanan din ki Ben Ami. Iyan sikandin kepuun te menge Amunihanen guntaan.
GEN 20:1 Ne zutun midlaus medhipanew ensi Abraham ne midhendiyè dan te tanà he Negev. Ne ziyè dan med-ubpà te pid-elangan te inged he Kadesh wey Shur. Ne hein neuǥet midhalin si Abraham diyà te inged he Gerar.
GEN 20:2 Hein dutun dan en, ne migkeǥiyan din is menge etew he etevey zin si Sara. Umbe impaangey ni Hadì Abimelec he hadì te Gerar si Sara su ed-esewaan din.
GEN 20:3 Sevaha zutun he mezukilem, mibpeteǥeinep is Nengazen ki Abimelec he egkaǥi te, “Ebpengelinteuwan ku he mebpatey ka, su haazà is bahi he migkuwa nu, duen din en esawa.”
GEN 20:4 Piru wazè pa uvayi ni Abimelec si Sara, ne tenged dutun migkaǥi sikandin te, “Nengazen, maan is edhimetayan nu is menge etew ku? Wazà a mekesalà?
GEN 20:5 Migkeǥiyan a ni Abraham he etevey zin si Sara, ne si Sara zaan migkeǥiyan e zin he meemahan din si Abraham. Angin ke netuenan ku he esawa zin su wazè ku pezem kuwaa si Sara, iyan, wazè ku metueni.”
GEN 20:6 Midtavak is Nengazen te, “Uya, netuenan ku he wazà mezaat he tuyù nu kandin, umbe mibpengelinteuwan ku he kenè ka mekeuvey kandin, su wey ka kenà mekesalà kedì.
GEN 20:7 Kinahanglan he ilikù nu sikandin diyà te ki Abraham, su ebpeneuven sikandin, ne id-ampù ke zin su wey ka kenà mebpatey. Piru emun kenè nu id-ulì, ebpetizeenan ku sikew he kenè en ebperis ne ebpatey ke en iyan ragkes is langun he menge sakup nu.”
GEN 20:8 Ne hein nepawà dutun te sunud he andew, mid-umew ni Abimelec is langun he menge upisyal zin, ne midtudtulan din sikandan mehitenged te teǥeinep din. Ne utew sikandan nahandek.
GEN 20:9 Ne zutun mid-umew ni Abimelec si Abraham ne mid-insaan din te, “Hengkey ves heini is mid-ulaula nu kenami? Hengkey is salè ku kenikew he iyan inhimuwa nu he mekesalà a wey is tivuuk he ginhedian ku? Kenà hustu heini is mid-ulaula nu.”
GEN 20:10 Ne ke sikandin en maan diyà te ki Abraham te, “Hengkey is tuyù nu kayi te mid-ulaula nu?”
GEN 20:11 Midtavak si Abraham te, “Mid-ulaula ku heini, su neisip ku is kela ke wazà minsan sevaha kayi he edtahud te Megbevayà, umbe neisip ku is iring kayi su kela ke himetayi a keniyu ne egkuwaan niw is esawa ku.
GEN 20:12 Tutuu iyan he etevey ku si Sara, su anak te amey ku, piru selakew is iney zin, ne mid-esawa ku.
GEN 20:13 Hein migkeǥiyan a te Nengazen he med-awà a ziyà te inged te amey ku, migkeǥiyan ku si Sara he ipekilala zin he telesuled key minsan hendei key mekepevayà. Pinaaǥi kayi igkepeehè din is dekelà he gaǥew zin kedì.”
GEN 20:14 Ne zutun in-ulì ni Abimelec si Sara ziyà te ki Abraham, ne mibeǥayan din si Abraham te menge kerehidu, baka, wey menge uripen he maama wey vahi.
GEN 20:15 Ne migkeǥiyan ni Abimelec si Abraham te, “Andam a te kebpeubpà keniyu kayi te tanè ku, ne iyan ka pilì ke hendei ka egkesuat he ed-ubpà.”
GEN 20:16 Ne migkeǥiyan din si Sara te, “1,000 he vuuk he pelata is ibeǥey ku ziyà te meemahan nu. Iyan heini ibpayùpayù ku keniyu su wey metueni te langun he menge zuma niw he wazà a mekesalà wey wazè ka mekepehilavet kedì.”
GEN 20:17 Tenged te kegkuwaa ni Abimelec ki Sara, mibpengelinteuwan te Megbevayà he kenà mekaanak is langun he menge vahi zutun te valey zin. Umbe mid-ampù si Abraham diyà te Megbevayà, ne mibpengelinteuwan te Megbevayà he meulii si Abimelec te zaru zin wey is esawa zin wey is menge uripen din he vahi su wey zan mekeuman mekaanak.
GEN 21:1 Midtentenuzan te Nengazen is migkaǥi zin he edhimuwen din diyà te ki Sara sumalà is insaad din.
GEN 21:2 Mibmeǥingey si Sara ne in-anak din is maama minsan pa te meǥurang en si Abraham. Is timpu te ked-enaka zuen te vatà, ne iyan en kes timpu he midtelaan he zaan te Megbevayà.
GEN 21:3 Ne haazà is batà, migngezanan ni Abraham ki Isaac.
GEN 21:4 Ne hein ikewalu he andew puun dutun te ked-enaka ki Isaac, midsirkunsidar sikandin ni Abraham sumalà is insuǥù kandin te Nengazen.
GEN 21:5 Ne 100 en is penuiǥen ni Abraham dutun te ked-enaka te anak din he si Isaac.
GEN 21:6 Ne migkaǥi si Sara te, “Midhimu human te Megbevayà he mekeengit a te kegkelipey ne ebpekeengit daan te kegkelipey is minsan hentei he egketudtulan mehitenged kayi.
GEN 21:7 Hentei vuwa is ebpekekaǥi ki Abraham he ebpekepesusu e pa te vatà? Piru nekaanak e pa minsan meǥurang en sikandin.”
GEN 21:8 Ne hein malù en dekelà si Isaac, wey hein nelutas en sikandin, midtukud si Abraham te zekelà he keemuran.
GEN 21:9 Ne sevaha he andew, naahà ni Sara si Ishmael (haazà is anak ni Abraham diyà te ki Hagar te Ehiptohanen) is edsudì te anak din he si Isaac.
GEN 21:10 Umbe migkaǥi si Sara ziyà te ki Abraham te, “Segseǥa nu heeyan is uripen he vahi wey is anak din, su kenà egkehimu he ebpekaambit is anak te uripen te egkepenunud te anak ku he si Isaac.”
GEN 21:11 Utew heini ingkeseeng ni Abraham tenged te anak din man daan si Ishmael.
GEN 21:12 Piru migkaǥi is Megbevayà diyà te ki Abraham te, “Kenè nu ikeseeng si Ishmael wey si Hagar. Tumana nu is egkeǥiyen ni Sara, su pinaaǥi ki Isaac is ebpuunan te menge kevuwazan nu he insaad ku.
GEN 21:13 Piru edhimuwen ku zaan he utew zekelà he nasyun is menge kevuwazan ni Ishmael, su anak nu man daan sikandin.”
GEN 21:14 Meselem pa utew zutun te sunud he andew, migkuwa si Abraham te egkeenen wey lundis he teleǥuey te wahig, ne imbeǥey zin ki Hagar. Ne impevava zin haazà ne impeǥenat din haazà is bahi wey is batà. Ne migenat en dutun si Hagar ne midriǥuriǥu ziyà te sibsivayan te Beersheba.
GEN 21:15 Hein naamin en is wahig dutun te teleǥuey, intaǥak ni Hagar is anak din diyà te sihung te dezeisey he kayu.
GEN 21:16 Ne mid-awà sikandin, he menge 100 he mitrus is keziyù puun dutun te vatà. Dutun sikandin mebpinuu he edsineǥew, ne egkeisip din is, “Kenè ku egkaantus te ed-ahà is anak ku he ebpatey.”
GEN 21:17 Piru nezineg te Megbevayà is ked-erang te vatà. Umbe migkaǥi is belinsuǥuen te Megbevayà diyà te langit te, “Hagar, hengkey is idsineǥew nu? Kenè ka mahandek! Nezineg te Megbevayà is ked-erang keniyan te anak nu.
GEN 21:18 Hitindeg ka ne enawa nu heeyan is batà, su edhimuwen ku he utew zekelà he nasyun is menge kevuwazan din.”
GEN 21:19 Ne zutun impeturedu te Megbevayà si Hagar te kalut, ne midhendiyà sikandin ne midsekezu ne impeinum din is anak din.
GEN 21:20 Ne midtuvazan te Megbevayà haazà is batà ne midekelà, ne ziyà med-ubpà te sibsivayan te Paran. Nehimu sikandin he mememanà. Ne zutun impeesawa sikandin te iney zin te vahi he Ehiptohanen.
GEN 21:22 Ne zutun he timpu, midhendiyà si Abimelec te ki Abraham wey is pengulu te menge sundaru zin he si Ficol. Migkeǥiyan ni Abimelec si Abraham te, “Netuenan dey iyan he edtevangan ka te Megbevayà te langun he ed-ul-ulahan nu.
GEN 21:23 Umbe penangdù ka kayi te etuvangan te Megbevayà he kenà a kenikew ed-ekalan ragkes is menge kevuwazan ku. Ipeehè nu kediey is gaǥew nu wey te menge meǥinged kayi te tanà he ed ubpaan nu te lumelengyawà, iring te impeehè ku kenikew is gaǥew ku kenikew.”
GEN 21:24 Ne midtavak si Abraham te, “Ebpenangdù a kenikew.”
GEN 21:25 Piru zuen riklamu ni Abraham diyà te ki Abimelec mehitenged te kalut he mid-aǥew te menge sakup din.
GEN 21:26 Ne migkaǥi si Abimelec te, “Wazè ku metueni ke hentei ki vaal heini. Wazè nu keǥiya kediey ne sikan ku pa mezineg.”
GEN 21:27 Ne zutun mid-uwit ni Abraham is menge kerehidu wey vaka ne imbeǥey zin ki Abimelec ne midhimu sikandan is dezuwa te kesebutan.
GEN 21:28 Ne zutun migkuwa ni Abraham is pitu he vehiyan he nati he kerehidu zutun te menge kerehidu ne insivey zin heini.
GEN 21:29 Mid-insaan sikandin ni Abimelec te, “Ebmenuwen heini is pitu he vehiyan he nati he kerehidu he insivey nu?”
GEN 21:30 Ne midtavak si Abraham te, “Kuwaa nu heini is pitu he vehiyan he nati he kerehidu he tuus te neketistiǥus ka he iyan a mibangbang kayi te kalut.”
GEN 21:31 Tenged dutun te midhimu zan he kesebutan, migngezanan haazà is kalut te Beersheba su zutun dan himuwa is kesebutan dan.
GEN 21:32 Hein nepasad dan haazà is kesebutan dan diyà te Beersheba, migenat en si Abimelec duma ki Ficol, is pengulu te menge sundaru zin, ne mid-ulì dan diyà te tanè dan te menge Filistihanen.
GEN 21:33 Mibpemula si Abraham te sengepuun he kayu he tamarisko ziyà te Beersheba ne mid-azap din dutun is Nengazen, he iyan kes wazà pidtemanan he Megbevayà.
GEN 21:34 Neuǥet pa zutun is ked-ubpà ni Abraham diyà te tanà te menge Filistihanen.
GEN 22:1 Midlavey is nepipira he tuig ne neuma is timpu he migezaman si Abraham te Megbevayà. Migkeǥiyan sikandin te Megbevayà te, “Abraham!” Ne midtavak si Abraham te, “Hengkey!”
GEN 22:2 Ne migkaǥi zutun is Megbevayà te, “Kuwaa nu is budtung he anak nu he si Isaac he utew nu mibmahal ne hendiyè ka te tanà he Moria. Tekezeg kew zutun te vuvungan he ibpeehè ku kenikew ne ipemuhat nu sikandin kayi te kedì he pemuhat he edtutungen.”
GEN 22:3 Umbe, zutun te utew pa meselem te sunud he andew, midselem med-enew si Abraham ne midsilyahan din is asnu zin. Mibpengayu pa sikandin te idtavun dutun te pemuhat he edtutungen ne miduma zin is dezuwa he suluǥuen din wey is anak din he si Isaac ne migenat dan pehendiyà te vuvungan he migkaǥi te Megbevayà.
GEN 22:4 Dutun te iketelu he andew te kedhipanew zan, nepantew ni Abraham haazà is buvungan he malù pa meziyùdiyù.
GEN 22:5 Migkeǥiyan din is menge suluǥuen din te, “Dini kew zà dèpa taǥad duma is asnu, su edlaus key pa ziyà su ed-azap key te Megbevayà. Edlikù key zè kan dini.”
GEN 22:6 Migkuwa zutun ni Abraham sikan is menge kayu ne impeuwit din ki Isaac ne iyan sikandin migkulang te tigtiǥen wey ubpit. Ne midlaus dan dutun.
GEN 22:7 Dutun te kemulu zan en edhipanew, migkaǥi si Isaac diyà te amey zin he si Abraham te, “Amà!” Ne midtavak si Abraham te, “Hengkey, Mama?” Mid-insà si Isaac te, “Duen ta tigtiǥen wey kayu, piru hendei ta egkekuwa is nati he kerehidu he ibpemuhat he edtutungen?”
GEN 22:8 Ne midtavak dutun si Abraham te, “Is Megbevayà, Mama, iyan ebeǥey kenita te nati he kerehidu he egkehimu he ibpemuhat he edtutungen.” Ne midlaus dan en dutun is dezuwa he edhipanew.
GEN 22:9 Ne hein nekeuma zan en dutun te vuvungan he impaahà te Megbevayà ki Abraham, mibaal si Abraham te pemuhatà, ne insavuk din dutun is menge kayu. Mibakus din dutun si Isaac ne insavuk din daan sikandin dutun te zivavew te kayu he ziyà te pemuhatà.
GEN 22:10 Ne migewezan ni Abraham is ubpit su edhimetayan din en is anak din.
GEN 22:11 Mid-umew si Abraham te velinsuǥuen te Nengazen he ebpuun te langit te, “Abraham! Abraham!” Ne midtavak sikandin te, “Hengkey.”
GEN 22:12 Ne migkaǥi is belinsuǥuen te, “Isavuk nu zà heeyan is ubpit! Kenè nu pelii is batà te minsan deisek dà! Netuenan ku en he iyan a is Megbevayà, utew lavew he ebmahalen nu su minsan is anak nu he utew nu minahal, wazè nu isipa he kenè nu ibeǥey kediey.”
GEN 22:13 Dutun te nekelilingey si Abraham, ne neehè din is kerehidu he meemahan he nekesanggat is sungey zin diyà te dezeisey he kayu. Ne migkuwa ni Abraham haazà ne impemuhat din he pemuhat he edtutungen ilis te anak din.
GEN 22:14 Migngezanan ni Abraham haazà te, “Iyan Ebeǥey is Nengazen.” Ne zuen pa erubasa ǥuntaan he edhenduen te, “Diyà te Buvungan te Nengazen egkeveǥayan kiw te tavang.”
GEN 22:15 Ne zutun mid-uman med-umew is belinsuǥuen te Nengazen he ziyà te langit ki Abraham,
GEN 22:16 ke sikandin te, “Iyan heini migkaǥi te Nengazen: Ibpenangdù ku kayi te gehinawa ku he edtuvazan ku iyan sikew tenged te wazè nu ikeleǥezi kedì is namànamà he anak nu. Edhimuwen ku he utew medmezakel is menge kevuwazan nu su iring te menge vituen diyà te langit wey iring te menge pantad diyà te veyvey te zaǥat. Egkeveyveyaan dan is menge inged te menge kuntada zan.
GEN 22:18 Ne pinaaǥi te menge kevuwazan nu, edtuvazan ku is langun he menge nasyun diyan te kelibutan, tenged te midtuman nu is suǥù ku kenikew.”
GEN 22:19 Hein nepasad haazà, midlikuan eni Abraham sikan is dezuwa he suluǥuen din, ne midhendiyè dan te Beersheba, ne ziyà si Abraham med-ubpà te Beersheba.
GEN 22:20 Midlavey zutun is timpu, ne nezineg ni Abraham is tudtul te zuen en menge anak te hazi zin he si Nahor ziyà te ki Milca.
GEN 22:21 Is kinekekayan he anak dan he maama ne si Uz, is sunud ne si Buz, is sunud pa ne si Kemuel (he nehimu he amey ni Aram),
GEN 22:22 si Kesed, si Hazo, si Pildash, si Jidlaf, wey si Betuel.
GEN 22:23 Si Betuel, ne zuen anak din he raǥa he si Rebeka. Sikandan is walu ne menge anak ni Nahor ziyà te ki Milca.
GEN 22:24 Duen pa menge anak ni Nahor ziyà te sevaha he esawa zin he si Reuma. Iyan ensi Tiba, Gaham, Tahash wey si Maaca.
GEN 23:1 Is keluǥayad te untung ni Sara 127 he tuig.
GEN 23:2 Diyà sikandin mebpatey te inged he Kiriat Arba (he iyan en guntaan inged he Hebron) diyà te tanà he Canaan. Utew inlalew ni Abraham is kebpatey ni Sara.
GEN 23:3 Ne mid-ewaan din dèpa is esawa zin he minatey ne midhendiyà te menge Hitihanen ne migkeǥiyan din sikandan te,
GEN 23:4 “Nekeubpà a kayi te lugar niw he sevaha he lumelengyawè dà, umbe emun egkehimu ipepemsa a keniyu te tanà he edlevengan ku te esawa ku.”
GEN 23:5 Ne midtavak dutun is menge Hitihanen te,
GEN 23:6 “Datù, pemineǥa nu is egkeǥiyen dey. Migkilala zey sikew he telehuzen he etew, umbe egkehimu he minsan hendei nu idleveng is esawa nu kayi te pinekemeupiya he penlevengè dey. Wazà minsan hentei kenami he kenà ebeǥey kenikew te edlevengan te esawa nu.”
GEN 23:7 Ne zutun, segugunà midluhud si Abraham diyà te etuvangan te menge Hitihanen he iyan tuus te kebpeselamat din.
GEN 23:8 Ke sikandin te, “Emun idtuǥut niw he idleveng ku kayi is esawa ku, edhengyuen ku keniyu he melelaǥi ku si Efron is anak ni Zohar,
GEN 23:9 su wey zin ivelegyà kayi te kedì haazà is surung he kilid te vevesukè din diyà te Macpela. Keǥiyi niw sikandin he ebeyazan ku te hustu he prisyu, kayi te etuvangan niw para egkehimu he penlevengè ku.”
GEN 23:10 Ebpimpinuu zutun si Efron duma te menge zuma zin he menge Hitihanen, umbe midtavak din si Abraham diyà te etuvangan te langun he menge zuma zin he menge Hitihanen he midtiǥum dutun te pultahan te inged.
GEN 23:11 Ke sikandin te, “Kayi te etuvangan te menge zuma ku, ibeǥey ku kenikew is tivuuk he vevesukè ku ragkes sikan is surung. Umbe egkehimu en idleveng nu is esawa nu.”
GEN 23:12 Ne mid-uman si Abraham medluhud he tuus te kebpeselamat din diyà te etuvangan te menge meǥinged dutun,
GEN 23:13 ne migkaǥi sikandin diyà te ki Efron he nezineg te langun te, “Pemineǥa a. Egkesuatan ku he ebeyazan ku haazà is bevesukà. Dewata nu en is ibayad ku, su wey zutun ku en ikeleveng is esawa ku.”
GEN 23:14 Ne midtavak dutun si Efron ki Abraham te,
GEN 23:15 “Datù, pemineǥa a zep-a. Is bali zuen te tanà, ne 400 he vuuk he pelata, piru kenà haazà ebpekesamuk kenita te teleemiǥu. Kuwaa nu en is tanà ne igkeleveng nu zutun is esawa nu.”
GEN 23:16 Ne mid-uyun dutun si Abraham sumalà is migkaǥi ni Efron, ne midtimbang din is 400 he vuuk he pelata sumalà is keveǥat he neuyunan he zaan te menge nigusyanti zutun. Ne imbayad din heini ki Efron dutun te etuvangan te menge Hitihanen.
GEN 23:17 Umbe naangken ni Abraham haazà is bevesukà ni Efron diyà te Macpela, he uvey te inged he Mamre, ragkes is surung wey is menge kayu he nekeelibet dutun te vevesukà. Nepirmahan te langun he menge Hitihanen he nevurun diyà te pultahan te inged.
GEN 23:19 Ne inleveng ni Abraham is esawa zin he si Sara ziyà te surung he ziyà te tanà he Macpela, he sakup te tanà he Canaan. Is Macpela uvey te Mamre he iyan guntaan kes inged he Hebron.
GEN 23:20 Umbe, is bevesukà ragkes is surung he iyan dengan teǥiǥaked kayi is menge Hitihanen, nehimu en heini he ki Abraham, ne midhimu zin heini he penlevengè din.
GEN 24:1 Utew en meǥurang dutun si Abraham, ne midtuvazan sikandin te Nengazen diyà te langun he menge vaal zin.
GEN 24:2 Sevaha zutun he andew, migkeǥiyan ni Abraham is egalen te menge suluǥuen din he iyan sineriǥan te langun he menge azen din te, “Isavuk nu is belad nu kayi te laang ku. Tuus heini te penaad nu he edtistiǥusan te Nengazen, he iyan dà Megbevayà te langit wey tanà, ne kenè ka mebpilì te ed-esawaan te anak ku he si Isaac te vahi he tig-Canaan he emurè tew kayi te mid-ubpaan tew ǥuntaan.
GEN 24:4 Hendiyè ka te inged he mibpuunan ku, ne ziyè ka pilì te ed-esawaan te anak ku he si Isaac te menge kezuzumahi ku.”
GEN 24:5 Piru mid-insaan dutun si Abraham te suluǥuen din te, “Na, hengkey ve is ed-ul-ulahan ku emun kenà egkesuat is bahi he eduma kediey ke ed-ulì a zini? Egkesuatan nu ve he edumahan ku ziyà is anak nu?”
GEN 24:6 Ne midtavak si Abraham te, “Kenè nu zumaha si Isaac diyà!
GEN 24:7 Is Nengazen, he iyan dà Megbevayà diyà te langit, migkaǥi kedì, he ewai ku is menge kezuzumahi te amey ku wey is inged ku he zutun a meetew. Ne nenangdù sikandin he ibeǥey zin heini is tanà he Canaan diyà te menge kevuwazan ku. Umbe hipanew ke en su ebpezumahan ke zin te menge velinsuǥuen din he ibpehuna kenikew ne iyan edtavang kenikew wey ka mekaahà diyà te egkeesawa te anak ku.
GEN 24:8 Piru emun kenà eduma haazà is bahi kenikew, wazè nu en televaken te heini he penangdù nu kediey. Piru kenè nu ziyà dumaha is anak ku.”
GEN 24:9 Umbe insavuk duen te suluǥuen is belad din diyà te laang ni Abraham te egalen din, ne nenangdù sikandin he edtumanen din is langun he insuǥù kandin.
GEN 24:10 Ne hein nepasad dutun, migkuwa is suluǥuen te sepulù he menge ayam he kemilyu ne migkergahan din te langun he kelasi te menge mahalen he igasa he ebpuun te egalen din he si Abraham. Migenat sikandin pehendiyà te inged he Aram Naharaim, he iyan inged he mid-ubpaan ni Nahor he hazi ni Abraham.
GEN 24:11 Impeleku zin is menge kemilyu ziyà te uvey te kalut he ǥawas te inged. Mahapun en dutun he iyan uras he edsekezu is menge vahi.
GEN 24:12 Ne zutun mid-ampù haazà is suluǥuen, “Sikew is Nengazen, Megbevayà te egalen ku he si Abraham, tevangi a ǥuntaan ne ipeehè nu is gaǥew nu te egalen ku he si Abraham.
GEN 24:13 Kayi a medhithitindeg te uvey te kalut ne ebpekeume en is menge raǥa he menge meǥinged kayi te inged su edsekezu zan.
GEN 24:14 Emun ebuyù a te wahig duen te umuy te raǥa, ne emun ebpemineg sikandin he ibpeinum a ragkes is menge kemilyu ku, berakat he iyan sikandin kes mibpilì nu he egkehimu he esawa te suluǥuen nu he si Isaac. Pinaaǥi kayi egketuenan ku he impeehè nu is gaǥew nu te egalen ku he si Abraham.”
GEN 24:15 Wazè pa zutun sikandin mekepasad he ed-ampù, ne nekeuma si Rebeka he edtiang te umuy. Anak si Rebeka ni Betuel, ne si Betuel anak ni Nahor wey ni Milca. Si Nahor suled ni Abraham.
GEN 24:16 Utew mekempet he raǥa si Rebeka ne wazè pa sikandin meuvayi te maama. Mibpenaug sikandin dutun te kalut ne midteǥuan din is umuy zin te wahig. Ne hein nekepasad ne migaun sikandin dutun ne mid-ulì.
GEN 24:17 Ne migaanggaan sikan is suluǥuen te kedsinuǥung kandin ne migkaǥi te, “Ipeinum a, bayi, keniyan te sinekezu nu.”
GEN 24:18 Midtavak si Rebeka te, “Uya zatù, inum ka.” Impekevavè din is umuy zin ne impeinum din sikan is suluǥuen.
GEN 24:19 Hein nekeinum en haazà is suluǥuen, migkaǥi sikandin te, “Edsekezu e pa su ibpeinum ku zaan is menge kemilyu nu.”
GEN 24:20 Ne ingaanggaan din ivusbus haazà is sinekezu zin diyà te pelungan, ne midlikù en maan sikandin medsekezu taman te nekeinum is langun he menge kemilyu.
GEN 24:21 Mibpeniid dà haazà is suluǥuen, ne ed-is-isipen din ke ebmenmenuwen te Nengazen te edhimu wey metuman is tuyù din te kedhendutun te haazà he lugar.
GEN 24:22 Ne hein nekeinum en is menge kemilyu, midkedkad duen te suluǥuen is uwiten din he ǥalunggalung he vulawan he heenem he gramu is keveǥat din. Midkedkad din daan is dezuwa he rintì he vulawan he 120 he gramu is keveǥat. Ne imbeǥey zin haazà ki Rebeka.
GEN 24:23 Ne mid-insaan din si Rebeka te, “Hentei ka ki anak? Egkehimu ve he ziyan key edhizeǥà guntaan te valey niw?”
GEN 24:24 Midtavak si Rebeka te, “Iyan amey ku si Betuel he anak ni Milca wey ni Nahor.
GEN 24:25 Duen egkehizeǥaan niw ziyà te kenami, wey zekelà daan is menge reǥami he idsamak para te menge kemilyu niw.”
GEN 24:26 Ne zutun midluhud is suluǥuen diyà te etuvangan te Nengazen.
GEN 24:27 Ke sikandin te, “Edeliǥen is Nengazen, he iyan Megbevayà te egalen ku he si Abraham. Impeehè din is kenà egkahanew he ǥaǥew zin te egalen ku. Iyan sikandin migiya kedì wey a mekehendiyà te kezuzumahi te egalen ku.”
GEN 24:28 Ne mibpelelaǥuy si Rebeka is ed-ulì diyà te valey zan, ne midtudtulan din is iney zin te langun he nengeulaula.
GEN 24:29 Is suled din he si Laban dutun daan is ebpemineg te edtudtulen din, he ebpengeǥiyen duen te etew mehitenged kandin. Naahà ni Laban is galunggalung wey sikan is menge rintì diyà te velad te etevey zin he si Rebeka. Umbe mibpelelaǥuy sikandin pehendiyà te kalut ne midhendiyà te etew he migkaǥi ni Rebeka. Diyè ded haazà is etew medhithitindeg te uvey te kalut, duma te menge kemilyu.
GEN 24:31 Migkeǥiyan sikandin ni Laban te, “Iyan ke ves is midtuvazan te Nengazen. Maan is kayi ke zà edhithitindeg? Laus ka ziyà te valey zey, su mid-endaman dey en sikew te edhizeǥaan nu wey lugar para te menge kemilyu nu.”
GEN 24:32 Miduma sikandin ki Laban. Hein nekeuma zan en diyà te valey, impenaug ni Laban is menge karga zuen te menge kemilyu, ne impekaan din haazà is menge kemilyu te reǥami wey kumpey. Mid-uwitan din daan te wahig haazà is suluǥuen wey is menge zuma zin, para mekepenlùlù dan te menge paa zan.
GEN 24:33 Hein netangel en is ibpekaan kandan, migkaǥi haazà is suluǥuen te, “Kenà a egkaan ke kenè ku egketudtul is tuyù ku te kedhengkayi.” Midtavak si Laban te, “Sigi en, tudtuli key en.”
GEN 24:34 Migkaǥi sikandin te, “Suluǥuen a ni Abraham.
GEN 24:35 Midtuvazan sikandin te Nengazen, ne utew zekelà is ketiǥeyunan din guntaan. Mibeǥayan sikandin te Nengazen te menge kerehidu, menge kambing, menge vaka, menge kemilyu, menge asnu, menge pelata, menge vulawan, wey menge suluǥuen he maama wey vahi.
GEN 24:36 Minsan meritan en si Sara is esawa zin, ne nekaanak pa sikandin. Ne heini is anak dan he maama iyan ebpekepenunud te langun he menge azen din.
GEN 24:37 Impenangdù ku te egalen ku he edtumanen ku is suǥù din he egkaǥi te, ‘Kenè ka mebpilì te ed-esewaan te anak ku kayi te menge tig-Canaan he is tanè dan iyan ed-ubpaan tew ǥuntaan.
GEN 24:38 Pehendiyè ka te pemilya te amey ku, ne ziyè ka pen-ahà te vahi he kezuzumahi ku he ibpeesawa nu te anak ku.’
GEN 24:39 Piru nenginginsà a, ‘Na, hengkey is ed-ul-ulahan ku emun kenà eduma haazà is bahi kedì?’
GEN 24:40 Midtavak sikandin te, ‘Is Nengazen he iyan ebpezumdumahan ku layun, edsuǥuen din is belinsuǥuen din he ibpezuma kenikew ne ebpengelinteuwan din para mehimu is tuyù nu ziyan, ne ebpekeehè ka te ed-esawaan te anak ku ziyà te menge kezuzumahi ku he menge kevuwazan te amey ku.
GEN 24:41 Emun diyè ka ebpevayà te menge kezuzumahi ku, wazè nu televaken dutun te penangdù nu kedì emun kenè dan ebpemineg he ibpezuma kenikew is bahi.’
GEN 24:42 “Umbe, geina te kebpekeuma ku ziyà te kalut, mid-ampù a. Ke siak te, ‘Nengazen, Megbevayà te egalen ku he si Abraham, berakat he ituǥut nu he mehimu is tuyù ku te kedhengkayi ku.
GEN 24:43 Guntaan, dini a edhithitindeg te uvey kayi te kalut. Emun duen ebpekeuma he raǥa he edhendini te kedsekezu, ne ebuyù a te zeisey zà he wahig duen te umuy zin.
GEN 24:44 Emun ebpemineg sikandin he ipeinum e zin ragkes is menge kemilyu ku, deyzey ke iyan en sikandin mibpilì nu he vahi he egkehimu he egkeesawa te anak te egalen ku.’
GEN 24:45 “Ne te wazè e pa mekeipus he ed-ampù, nekeuma si Rebeka he edtiang te idsekezu zin he umuy. Midtupang sikandin pehendiyà te kalut su edsekezu. Migkeǥiyan ku sikandin te, ‘Ipeinum e kun.’
GEN 24:46 Impekevavè din haazà is umuy ziyà te pemenayen din, he egkaǥi te, ‘Sigi, inum kad, ne ibpeinum ku zaan is menge kemilyu nu.’ Umbe mid-inum a, ne impeinum din daan is menge kemilyu.
GEN 24:47 Ne kegkepasad dutun, mid-insaan ku sikandin ke hentei sikandin ki anak. Midtavak sikandin te, ‘Anak a ni Betuel te anak ni Milca he esawa ni Nahor.’ Ne zutun mid-eritisan ku is izung din, ne imperirintì ku sikandin.
GEN 24:48 Midlangkeb a su ed-ezapen ku is Nengazen. Midalig ku is Nengazen, he Megbevayà te egalen ku si Abraham. Iyan sikandin mibpeturedu kedì te hustu he lugar, he zutun ku egkaahà is anak te kezuzumahi te egalen ku he egkehimu he esawa te anak din.
GEN 24:49 “Ne ǥuntaan, egkesuatan ku he metueni ku ke ibpeesawa niw si Rebeka ki Isaac he iyan kebpaahà niw te keupiya niw te egalen ku. Keǥi kew he zaan para metueni ku zaan ke hengkey is ed-ul-ulahan ku.”
GEN 24:50 Ne midtavak dutun si Laban wey si Betuel te, “Tenged te iyan egkesuatan heini te Nengazen, hengkey pa is egkekaǥi zey.
GEN 24:51 Heini zed si Rebeka, dumaha niw en sikandin ke ed-ulì kew para egkehimu sikandin he iyan esawa te anak te egalen nu, sumalà is migkaǥi kenikew te Nengazen.”
GEN 24:52 Ne hein nezineg duen te suluǥuen ni Abraham haazà is lalag dan midlangkeb en maan sikandin is ed-azap diyà te Nengazen.
GEN 24:53 Ne zutun migkuwa zin haazà is uwiten din he menge elahas he pelata ragkes is menge visti, ne imbeǥey zin ki Rebeka. Mibeǥayan din daan te mahalen he menge gasa he inggasa zin dutun te menge suled wey iney ni Rebeka.
GEN 24:54 Ne zutun, migkaan haazà is suluǥuen wey sikan is menge zuma zin. Ne zutun dan en mekehizeǥà te haazà he kezukileman. Ne hein nepawà mid-enew zan ne migkaǥi haazà is suluǥuen te, “Ed-ulì ad guntaan diyà te egalen ku.”
GEN 24:55 Ne midtavak dutun is iney wey is meemahan ni Rebeka te, “Deyzey ke kenè nu zèpa zumaha si Rebeka minsan taman dà te sepulù he andew, ne egkeiwas haazà ne human kew ebpekeǥenat.”
GEN 24:56 Piru migkaǥi haazà is suluǥuen te, “Kenà a keniyu senggena. Midhimu en te Nengazen he metuman is tuyù ku kayi, umbe ipeulì e en keniyu ziyà te egalen ku.”
GEN 24:57 Ne midtavak sikandan te, “Ed-umawen tew zèpa si Rebeka, ne ed-insaan tew sikandin ke hengkey is egkesuatan din.”
GEN 24:58 Umbe mid-umew zan si Rebeka ne mid-insaan te, “Egkesuat ke ve he eduma kandin guntaan?” Midtavak si Rebeka te, “Uya, egkesuat a he eduma.”
GEN 24:59 Umbe, impezuma zan si Rebeka wey is meritan he ed-elima kandin diyà te suluǥuen ni Abraham wey zuen te menge zuma zin.
GEN 24:60 Mibpenubtuvazan dan si Rebeka zutun te kegenat din. Ke sikandan te, “Sikew is etevey zey, berakat he liblibuwen is menge kevuwazan nu. Berakat daan he mezaag te menge kevuwazan nu is menge kuntada zan.”
GEN 24:61 Ne nepasad dutun, mid-untud si Rebeka wey sikan is menge suluǥuen din he vahi duen te menge kemilyu zan, ne miduma sikandan duen te suluǥuen ni Abraham.
GEN 24:62 Ne si Isaac, diyà sikandin ed-ubpà te Negev, beǥu pa sikandin mekeulì he ebpuun te Beer Lahai Roi.
GEN 24:63 Duen timpu zutun ne malù en merusirem, migawas sikandin te valey ne midriǥuriǥu. Duen nepantew zin he kemilyu he ebpelingguma.
GEN 24:64 Hein nepantew ni Rebeka si Isaac, midrenà sikandin dutun te kemilyu zin
GEN 24:65 ne mid-insaan din sikan is suluǥuen ni Abraham te, “Hentei haazà is edsinuǥung kenitew?” Ne midtavak haazà is suluǥuen te, “Egalen ku sikandin he si Isaac.” Ne zutun migkuwa ni Rebeka is lembung din ne midtembunan din is dagwey zin.
GEN 24:66 Impenudtul zuen te suluǥuen diyà te ki Isaac is langun he mid-ulaula zin.
GEN 24:67 Ne miduma ni Isaac si Rebeka ziyà te tulda he mid-ubpaan dengan te iney zin he si Sara. Ne neked-esawa zan ne utew mibmahal ni Isaac si Rebeka. Human maawà is seeng ni Isaac tenged te kebpatey te iney zin.
GEN 25:1 Ne mid-uman mebpengesawa si Abraham te vahi he migngezanan ki Ketura.
GEN 25:2 Is menge anak dan iyan ensi Zimran, Jokshan, Medan, Midian, Ishbak, wey si Shua.
GEN 25:3 Si Jokshan ne iyan anak din si Sheba wey si Dedan. Is menge kevuwazan ni Dedan ne iyan is menge Ashurnen, menge Litushnen, wey Liumnen.
GEN 25:4 Is menge anak ni Midian ne iyan si Efa, si Efer, si Hanoc, si Abida, wey si Eldaa. Iyan heini sikandan menge kevuwazan ni Ketura.
GEN 25:5 Iyan si Isaac ibpepengevilin te langun he menge azen ni Abraham.
GEN 25:6 Piru te wazè pa mebpatey si Abraham, duen daan impemeǥey zin diyà te menge anak din he maama he anak te zuma he menge esawa zin, ne ziyè din sikandan ipeubpà te tanà he zapit te edsilaan, he meziyù te anak din si Isaac.
GEN 25:7 Is keluǥayad te untung ni Abraham 175 he tuig.
GEN 25:8 Utew en meǥurang sikandin dutun te kebpatey zin, ne in-amur sikandin te menge kepuun din he nemematey en.
GEN 25:9 Inleveng sikandin te menge anak din he si Isaac wey si Ishmael ziyà te surung he Macpela, he uvey te Mamre, he vevesukà dengan ni Efron he anak ni Zohar he Hitihanen.
GEN 25:10 Haazà is tanà, ne mibpemasa ni Abraham dutun te menge Hitihanen. Diyà si Abraham ileveng wey is esawa zin he si Sara.
GEN 25:11 Ne hein minatey en si Abraham, midtuvazan te Megbevayà is anak din he si Isaac, ne ziyà si Isaac med-ubpà te Beer Lahai Roi.
GEN 25:12 Iyan heini guǥud mehitenged te pemilya ni Ishmael he anak ni Abraham diyà te ki Hagar he Ehiptohanen, he uripen ni Sara.
GEN 25:13 Iyan heini menge ngazan te menge anak ni Ishmael he maama, puun te kinikekayan: si Nebayot, Kedar, Adbeel, Mibsam,
GEN 25:14 Mishma, Duma, Masa,
GEN 25:15 Hadad, Tema, Jetur, Nafish, wey Kedema.
GEN 25:16 Iyan heini sikandan menge anak ni Ishmael, ne nehimu sikandan he pengulu te 12 he tribu he kevuwazan ni Ishmael. Ne is menge ngazan dan, ne iyan daan inngazan te menge inged he mid-ubpaan dan.
GEN 25:17 Is keluǥayad te untung ni Ishmael 137 he tuig. Minatey sikandin ne in-amur sikandin te menge kepuun din he nemematey en.
GEN 25:18 Diyà med-ubpà is menge kevuwazan din te menge inged he ebpuun te Havila pehendiyà te Shur, he zapit te edsilaan te Ehipto pehendiyà te Asiria. Ne migkuntada zan is langun he menge kezuzumahi zan he kevuwazan ni Ishmael.
GEN 25:19 Iyan heini guǥud mehitenged te pemilya ni Isaac he anak ni Abraham.
GEN 25:20 Menge 40 en is penuiǥen ni Isaac dutun te kebpekeesawa zin ki Rebeka he anak ni Betuel he Aramihanen he tig-Padan Aram. Etevey si Rebeka ni Laban he Aramihanen daan.
GEN 25:21 Tenged te kenà ed-anak si Rebeka, mid-ampù si Isaac diyà te Nengazen he med-anak ded is esawa zin. Midtavak te Nengazen is ked-ampù din, umbe mibmeǥingey zutun si Rebeka.
GEN 25:22 Egkeǥezam din is henduen be te ebpezumuǥà haazà is sereping he menge vatà diyà te ǥetek din. Migkaǥi si Rebeka te, “Emun iyan bes heini egkeulaula kandan te huziyan he timpu, deyzey nasì ke mebpatey ad.” Umbe mid-insà sikandin diyà te Nengazen mehitenged kayi. Migkaǥi is Nengazen diyà te kandin te,
GEN 25:23 “Iyan heeyan ebpuunan is dezuwa he vatà he keniyan te getek nu te zezuwa he nasyun. Ne heini is dezuwa he grupu te menge etew ne ebpekuntedehey. Mezesen haazà is sevaha kenà haazà is duma zin. Is kakey egkehimu he suluǥuen te hazi zin.”
GEN 25:24 Ne hein mid-anak en si Rebeka, sereping iyan haazà is in-anak din.
GEN 25:25 Haazà is kakey, ne meriǥàriǥà wey vulvulen is tivuuk he lawa zin, umbe migngezanan dan ki Esau, he ke và dà egkeǥiya, “Bulvulen.”
GEN 25:26 Ne hein edlepew en haazà is ikezuwa, ne migewezan din is palu te sereping din, umbe migngezanan dan haazà ki Jacob, he ke và dà egkeǥiya, “Egawed diyà te palu.” Mibpenuiǥen en dutun si Isaac te 60 he tuig te ked-enaka ni Rebeka kayi te sereping.
GEN 25:27 Ne hein midekelè en haazà is menge vatà, utew metau si Esau he ebpenuǥes, ne layun sikandin egketalus. Ne si Jacob mulà ne mevented, diyè dà sikandin te menge tulda ed-ubpàubpà su perevantey te uyaǥen.
GEN 25:28 Pelanggà ni Isaac si Esau su egkesuat layun sikandin he egkaan te egkengepenganup ni Esau, piru si Jacob ne iyan mulà pinelanggà ni Rebeka.
GEN 25:29 Ne sevaha he andew, te kemulu en edhilutù si Jacob te menge tilas he meriǥà, ne nekeulì si Esau is nenuǥes ne utew sikandin nevitil.
GEN 25:30 Ne migkeǥiyan din si Jacob te, “Beǥayi e en kun, ipekaan ad keniyan te sinuba nu he meriǥàriǥà su utew ad egkevitil.” (Ne tenged dutun, egngezanan daan si Esau ki Edom, he ke và dà egkeǥiya, “Meriǥà”.)
GEN 25:31 Ne midtavak si Jacob te, “Wey ku sikew ebeǥayi kayi emun ibeǥey nu kedì is ketenged nu te kegkekakey.”
GEN 25:32 Ne midtavak si Esau te, “Uya, su hengkey is pulus te ketenged ku emun ebpatey a te kegkeumes.”
GEN 25:33 Piru midtavak si Jacob te, “Penangdù ka zèpa kedì.” Ne zutun nenangdù si Esau he ibeǥey zin en ki Jacob is ketenged din te kegkekakey.
GEN 25:34 Ne zutun mibeǥayan sikandin ni Jacob te sinevawan he tilas. Nekepasad sikandin he egkaan wey ed-inum, ne zutun migenat sikandin. Ne pinaaǥi zutun mid-engkezan ni Esau is ketenged din, he kegkekakey.
GEN 26:1 Ne mid-aǥi en is bitil zutun te lugar he mid-ubpaan ni Isaac, kenà haazà kes bitil te kaazen pa ni Abraham. Midhendiyà si Isaac te ki Abimelec, sikan is hadì te menge Filistihanen he ziyà te inged he Gerar.
GEN 26:2 Ne mibpaahà is Nengazen kandin, he egkaǥi te, “Kenè ka hendiyà te Ehipto; diyan ke zà ubpà te lugar he ibpeehè ku kenikew.
GEN 26:3 Kayi ke zà ubpà dèpa su edumahan ku sikew wey edtuvazan ku sikew. Ibeǥey ku heini kenikew wey ziyà te menge kevuwazan nu heini is langun he tanà. Edtumanen ku is pesarig ku te amey nu he si Abraham.
GEN 26:4 Edhimuwen ku he medmezakel is menge kevuwazan nu iring kezakel te menge vituen diyà te langit, ne ibeǥey ku heini kandan is langun he tanà. Ne pinaaǥi kandan, edtuvazan ku is langun he etew kayi te kelibutan.
GEN 26:5 Ebeelan ku heini su mibpezumazuma si Abraham kedì. Midtuman din is langun he menge suǥù wey penurù ku.”
GEN 26:6 Umbe ziyà med-ubpà si Isaac te Gerar.
GEN 26:7 Mekempet si Rebeka, umbe emun ebpenginsà haazà is menge tig-Gerar ziyà te ki Isaac mehitenged te esawa zin, ne edtevaken din te etevey zin si Rebeka. Egkahandek sikandin he egkaǥi he esawa zin, su kela ke himetayi zan sikandin para maaǥew zan si Rebeka.
GEN 26:8 Malù en neuǥet is ked-ubpà eni Isaac diyà te Gerar. Sevaha he andew zutun, neserengà he midsinulew ziyà te bintanà si Abimelec he hadì te menge Filistihanen, ne neehè din he ebpekepkepà si Isaac wey si Rebeka.
GEN 26:9 Ne zutun impetawag din si Isaac, ke sikandin te, “Esawa nu ves sikandin? Maan is migkaǥi nu he etevey nu sikandin?” Ne midtavak si Isaac te, “Nahandek a, kela ke himetayi a tenged kandin.”
GEN 26:10 Ne migkaǥi si Abimelec te, “Kenà meupiya is mibeelan nu kenami. Penenglitan ke zuen kayi te menge sakup ku midhulid kandin, iyan ka pezem egkevasul te egkehimu he salè dey.”
GEN 26:11 Ne zutun impesavut ni Abimelec is langun he menge sakup din. Ke sikandin te, “Is minsan hentei he ebaal te kenà meupiya kayi te maama wey te esawa zin ne edhimetayan.”
GEN 26:12 Ne zutun he lugar mid-ezek si Isaac ne nekeraǥun sikandin te ke 100 metakep te haazè dà he tuig, tenged midtuvazan sikandin te Nengazen.
GEN 26:13 Mid-iseg sikandin med-uswag taman te utew en sikandin midsepian.
GEN 26:14 Neima kandin is menge Filistihanen su utew mezakel is menge kerehidu zin, kambing, baka, wey menge suluǥuen din.
GEN 26:15 Ne tenged te kegkeima te menge Filitihanen ki Isaac, mibumbunan dan te tanà is menge kalut he mibpekelutan te menge suluǥuen dengan te amey zin he si Abraham.
GEN 26:16 Ne zutun migkaǥi si Abimelec diyà te ki Isaac te, “Deyzey ke ed-awè kew kayi, su lavew en is keniyu he ǥehem te kenami.”
GEN 26:17 Umbe mid-awè en dutun si Isaac, ne ziyà medhalin te zal-ug te Gerar ne midtutulda sikandin ne ziyà med-ubpà.
GEN 26:18 Ne mid-umanan din pekeluti haazà is menge kalut te amey zin dengan he si Abraham he mibumbunan te menge Filistihanen hein minatey en si Abraham. Ne is menge inngazan ni Abraham duen te menge kalut, ne iyan daan inngazan ni Isaac.
GEN 26:19 Diyà te zal-ug, mibangbang is menge suluǥuen ni Isaac te beǥu he kalut ne nekeehè dan te serebseb.
GEN 26:20 Piru mibpekidtebek is menge bekidu he tig-Gerar te menge bekidu ni Isaac su kandan kun haazà he kalut. Umbe migngezanan haazà ni Isaac he kalut te Esek, he ke và dà egkeǥiya, “Tebek,” tenged te mibpekidtebek is menge tig-Gerar kandin.
GEN 26:21 Ne mid-uman mebangbang is menge suluǥuen din te selakew en he kalut, piru midtebekaayan dan ded haazà te menge tig-Gerar. Umbe migngezanan ni Isaac haazà he kelut te Sitna, he ke và dà egkeǥiya, “Tebekaayaan.”
GEN 26:22 Mid-awà dutun ensi Isaac ne mid-uman mebangbang sikandan te selakew-en maan he kalut. Wazè dan human heini lewenaayi, umbe migngezanan ni Isaac haazà is kalut te Rehobot, he ke và dà egkeǥiya, “Melu-ag.” Su ke sikandin te, “Mibeǥayan kiw en human te Nengazen te melu-ag he ubpaan para med-iseg kiw pa mebmezakel kayi.”
GEN 26:23 Ne puun dutun, midhalin si Isaac diyà te Beersheba.
GEN 26:24 Dutun te haazà he kezukilemi te kebpekeuma zin diyà, mibpaahà kandin is Nengazen he egkaǥi te, “Iyan a kes Megbevayà te amey nu he si Abraham. Kenè ka mahandek su iyan a zuma nu. Edtuvazan ku sikew ne edhimuwen ku he utew medmezakel is menge kevuwazan nu tenged te suluǥuen ku he si Abraham.”
GEN 26:25 Umbe mibaal si Isaac dutun te pemuhatà ne mid-azap te Nengazen. Impehitindeg din dutun he lugar is tulda zin ne impevangbang din is menge suluǥuen din te kalut.
GEN 26:26 Midhendiyà si Hadì Abimelec he ebpuun te Gerar ne miduma zin is sumesambag din he si Ahuzat wey sikan is egalen te menge sundaru zin he si Picol.
GEN 26:27 Mid-insaan ni Isaac sikandan te, “Maan is midhengkayi kew te kedì? Egkepeukan e man keniyu, umbe impaawà a keniyu ziyan te lugar niw?”
GEN 26:28 Ne midtavak dan te, “Nesavut dey he is Nengazen eduma kenikew, umbe neisip dey he kinanahanglan he edhimu kiw te kebpekid-uyun duma zutun is penangdù. Penaad ka kenami
GEN 26:29 he kenè key keniyu pesipelahi, su wazè dey man daan sikew pesipelahi hein diyè ka te kenami. Mibpurungan dey sikew, impeǥenat dey sikew he melinawen. Deyzey pezem he tuvazi ke pa te Nengazen.”
GEN 26:30 Umbe midtukud si Isaac te keemuran para kandan, ne migkaan dan wey nemen-inum dan.
GEN 26:31 Utew pa meselem dutun te sunud he andew, ne mibpesèsaazè dan. Ne hein nepasad, ne impeǥenat ni Isaac sikandan he melipayen.
GEN 26:32 Haazà he andew, nekeuma is menge suluǥuen ni Isaac, ne midtudtulan dan sikandin he zuen wahig duen te kalut he mibengbangan dan.
GEN 26:33 Migngezanan ni Isaac haazà te Siba. Umbe taman en guntaan iyan ngazan dutun is Beersheba.
GEN 26:34 Ne hein 40 en is penuiǥen ni Esau, mid-esawa zin si Judith he anak ni Beeri he Hitihanen, wey si Besemat he anak ni Elon he Hitihanen daan.
GEN 26:35 Utew ingkeseeng ni Isaac wey ni Rebeka haazà is menge ambey zan.
GEN 27:1 Utew en meǥurang si Isaac ne kenè en utew ebpekaahà. Ne mid-umew zin is anak din he kakey he si Esau. Ke sikandin te, “Mama.” Ne midtavak si Esau te, “Hengkey, amà?”
GEN 27:2 Migkaǥi si Isaac te, “Meǥurang e en utew, ne kenè en egkeuǥet ne ebpatey a.
GEN 27:3 Kuwaa nu is panè nu, ne hendiyè ka te unayan ne penuǥesi a ziyà.
GEN 27:4 Ne hilutua nu kedì is utew ku egkesuati he keenen ne uwita nu kayi te kedì su egkeenen ku. Egkepasad dutun ne ebpenubtuvazan ku sikew te kenè e pa ebpatey.”
GEN 27:5 Mibpemineg bes dutun si Rebeka te kemulu edlelaǥi ni Isaac si Esau. Umbe hein migenat en si Esau is ebpenuǥes diyà te unayan dan,
GEN 27:6 migkeǥiyan ni Rebeka is anak din he si Jacob te, “Nezineg ku ǥeina he migkeǥiyan te amey nu is kakey nu he si Esau te,
GEN 27:7 ‘Penuǥesi a ne hilutui a te utew ku egkesuati he linutuan. Su ebpenubtuvazan ku sikew kayi te etuvangan te Nengazen te kenè e pa ebpatey.’
GEN 27:8 Umbe mama, pemineg ka te idsuǥù ku kenikew:
GEN 27:9 Hendiyè ka te uyaǥen tew ne kuwa ka te zezuwa he nati he kambing he utew melambeg su edhilutuen ku heini te egkesuatan te amey nu te egkaan he linutuan.
GEN 27:10 Ne uwita nu heini ziyà te kandin su wey iyan ke zin mepenubtuvazi te kenè pa sikandin ebpatey.”
GEN 27:11 Ne midtavak si Jacob diyà te iney zin te, “Kenà buwa egkehimu, su vulvulen utew si Esau ne siak kenà mulà.
GEN 27:12 Kela ke ǥewezi a ni amà ne egketuenan din he mid-ilad ku sikandin, ne kenè e zin en ebpenubtuvazan kekenà, nasì e zin dà edrewaki.”
GEN 27:13 Midtavak si Rebeka te, “Mama, kediey en he televaken emun edrewakan ke zin. Beeli nu is ebpeelan ku kenikew. Genat ke en ne kuwai a te menge kambing.”
GEN 27:14 Ne migenat si Jacob is egkuwa te kambing, ne mid-uwit din diyà te iney zin, ne midhilutù haazà ni Rebeka te utew egkesuati ni Isaac te egkaan he linutuan.
GEN 27:15 Ne zutun migkuwa zin is utew meupiya he visti ni Esau ziyà te valey zan, ne inseluub din heini ki Jacob.
GEN 27:16 Midsevukan din te lundis dutun te kambing is beklawan ni Jacob wey lieg din.
GEN 27:17 Ne imbeǥey zin ki Jacob haazà is keenen wey supas he midhilutù din.
GEN 27:18 Mid-uwit haazà ni Jacob diyà te amey zin, ke sikandin te, “Amà!” Midtavak si Isaac te, “Hentei ka he anak ku?”
GEN 27:19 Ne midtavak si Jacob te, “Iyan a si Esau, kes kakey he anak nu. Midtuman ku en is insuǥù nu kedì. Enew ka wey ka mekekaan duen te neutel ku su wey a kenikew mepenubtuvazi.”
GEN 27:20 Ne mid-insà si Isaac te, “Mama, maan is utew ka meǥaan nekeutel?” Midtavak si Jacob te, “Mid-uǥupan a te Nengazen he Megbevayè nu.”
GEN 27:21 Migkaǥi si Isaac te, “Uvey ka, mama, su wey ku sikew meǥewezi wey ku mesusi ke tutuu ve iyan he iyan ka si Esau he anak ku.”
GEN 27:22 Ne mid-uvey zutun si Jacob, ne mibpanamsam sikandin te amey zin he egkaǥi te, “Is laǥeng nu ne laǥeng ni Jacob, piru is menge velad nu ne ki Esau iyan.”
GEN 27:23 Wazà ni Isaac mekilala si Jacob, su is menge velad din bulvulen iring te velad ni Esau. Umbe te wazè din pa penubtuvazi,
GEN 27:24 mid-insè pa maan si Isaac te, “Tutuu ve iyan he iyan ka si Esau?” Ne ke si Jacob te, “Tutuu iyan su si Esau a.”
GEN 27:25 Migkaǥi zutun si Isaac te, “Na, uwita nu en kayi heeyan is midhilutù nu he netuǥesan nu, ne emun ebpekekaan ad ne epenubtuvazan ku sikew.” Ne zutun imbeǥey ni Jacob haazà is egkeenen wey vinu, ne migkaan sikandin wey mid-inum.
GEN 27:26 Ne migkeǥiyan ni Isaac sikandin te, “Uvey ke kun kayi, mama, ne hezeki a.”
GEN 27:27 Ne mid-uvey si Jacob diyà te kandin ne midhezekan din. Ne hein nahazek ni Isaac is ngazeg te visti zin, ne mibpenubtuvazan din si Jacob he egkaǥi te, “Heini is ngazeg kayi te anak ku iring te ngazeg te vevesukà he midtuvazan te Nengazen.
GEN 27:28 Berakat he veǥayi ka te Megbevayà te uuzaran he tanà he layun egkahames te zehemug he ibeǥey zin, su wey utew zekelà is keuyaǥan nu wey vinu.
GEN 27:29 Berakat he mezakel he menge tribu is egkehimu menge suluǥuen nu, wey edtahud dan kenikew. Berakat he iyan ka mehimu he egalen te menge suled nu, wey medtahud kenikew is menge hazi nu. Berakat he is edrawak kenikew ne iyan merewaki, ne tuvazi mulà is ebpenuvadtuvad kenikew.”
GEN 27:30 Ne hein neipus ni Isaac is kebpenubtuvazi zin ki Jacob, ne migenat si Jacob. Beǥu pa utew zutun mid-awà si Jacob, ne iyan daan kebpekeulì ni Esau te nenuǥes.
GEN 27:31 Midhilutù daan sikandin te metaam he idsezà ne mid-uwit din diyà te amey zin. Ke sikandin diyà te amey zin te, “Amà, enew ka wey ka mekekaan kayi te netuǥesan ku su wey a kenikew mepenubtuvazi.”
GEN 27:32 Mid-insà si Isaac kandin te, “Hentei ka?” Midtavak sikandin te, “Si Esau a, is kakey he anak nu.”
GEN 27:33 Hein nezineg haazà ni Isaac, migkerker sikandin ne nemensag, “Hentei ves haazà is neketuǥes duen te mid-uwit kayi te kedì he keenen? Beǥu e pa nekepasad he egkaan kayi te kebpekeuma nu. Mibpenubtuvazan ku en sikandin ne kenè ku en egkehimu te edhawì.”
GEN 27:34 Hein nezineg haazà ni Esau, nekelelendag is edsineǥew ne migkeǥiyan din is amey zin te, “Amà, penubtuvazi a zaan!”
GEN 27:35 Midtavak si Isaac te, “Mid-ekalan a te hazi nu ne mid-eǥawan ke zin te ibpenuvadtuvad ku pezem kenikew.”
GEN 27:36 Ne migkaǥi si Esau te, “Ikezuwe en heini te kebinuangi zin kedì. Umba ves Jacob is inngazan kandin. Mid-eǥawan e zin te ketenged te kegkekakey ku, ne ǥuntaan migkuwa zin pa is kebpenubtuvad he para kedì.” Ne zutun mid-isaan din is amey zin te, “Ama, wazè nu en be igkepenuvadtuvad kediey?”
GEN 27:37 Ne midtavak si Isaac te, “Midhimu ku en he iyan sikandin egalen nu ne is langun he menge kezuzumahi zin ne midhimu ku en he menge suluǥuen din. Impenuvadtuvad ku en diyà te kandin is idsegkayà he egkekaan wey egkeinum. Umbe wazè en egkehimu ku para kenikew?”
GEN 27:38 Ne mibpehizuhizu pa utew si Esau te amey zin te, “Amà, wazè en be iyan minsan sevaha zà he igkepenuvadtuvad nu? Penubtuvazi a zaan.” Ne zutun midsineǥew en maan sikandin.
GEN 27:39 Midtavak si Isaac te, “Diyè ka ebpekeubpà te tanà he kenà uuzaran, wey kenà heini lelayun egkahames te zehemug he tuvad te Megbevayà.
GEN 27:40 Pinaaǥi zà te kebpekidtebek egkekuwa nu is igkeuyag nu, ne egkehimu ka he suluǥuen te hazi nu. Piru emun ed-atu ka kandin, ebpekeǥawas ka te kegkeveyveyai zin kenikew.”
GEN 27:41 Ne midumutan ni Esau si Jacob tenged te kebpenubtuvazi ki Jacob te amey zin. Nekekaǥi si Esau ziyà te ǥehinawa zin te, “Kenè en utew egkeuǥet ne ebpatey si amà; emun ebpatey en sikandin, edhimetayan ku si Jacob.”
GEN 27:42 Piru netudtulan si Rebeka te egkeisip ni Esau, umbe mid-umew zin si Jacob ne migkeǥiyan din te, “Is kakey nu he si Esau, iyan ebpekepayùpayù te ǥehinawa zin is egkeisip din he edhimetayan ke zin.
GEN 27:43 Umbe, mama, pemineǥa nu is egkeǥiyen ku: Pelaǥuy ka ziyà te Haran, diyà te meemahan ku he si Laban.
GEN 27:44 Ne ziyè ka ubpà dèpa taman te egkaawà is pauk kenikew te kakey nu,
GEN 27:45 ne egkelipatan din en is mibeelan nu kandin. Ebpeveyaan ku zà sikew ziyan emun egkaaween is rerangit din kenikew. Kenè ku egkesuatan he egkaawè kew is dezuwa kayi te kedì te senga andew zà.”
GEN 27:46 Ne migkeǥiyan dutun ni Rebeka si Isaac te, “Utew ku en igkerasey te ed-isip-isip is tenged kayi te menge esawa ni Esau he menge Hitihanen. Emun iyan ed-esewaan ni Jacob is tig-kayi zed he vahi he Hitihanen, deyzey pa ke ebpatey e en nasì.”
GEN 28:1 Ne mid-umew zutun ni Isaac si Jacob, ne mibpenubtuvazan din, wey migkeǥiyan din te, “Kenè ka limbe pengesawa te vahi he tig-Canaan.
GEN 28:2 Penines ka, ne pehendiyè ka te Padan Aram, diyà te apù nu he si Betuel he amey te iney nu. Diyè ka pengesawa te sevaha te menge raǥa he anak ni Laban te meemahan te iney nu.
GEN 28:3 Berakat he tuvazi ka te Megbevayà he Mekeǥeǥehem, ne veǥayi ke zin te mezakel he kevuwazan, su wey ka mehimu he amey te mezakel he grupu te menge etew.
GEN 28:4 Berakat he iveǥey zin kenikew wey te kevuwazan nu is tuvad he imbeǥey zin diyà te apù nu he si Abraham, su wey mehimu heini he kenikew he tanà is neubpaan nu ǥuntaan te sevaha he lumelengyawà. Heini he tanà ne imbeǥey te Megbevayà diyà te ki Abraham.”
GEN 28:5 Ne impehipanew ni Isaac si Jacob pehendiyà Padan Aram, diyà te lugar ni Laban he anak ni Betuel he Aramihanen. Si Laban meemahan ni Rebeka he iney ni Jacob wey ni Esau.
GEN 28:6 Netuenan ni Esau he mibpenubtuvazan ni Isaac si Jacob wey impehendiyè din te Padan Aram su wey ziyà sikandin mekepengesawa. Ne nezineg din daan he zutun te kebpenuvadtuvad ni Isaac intelaan din ki Jacob he kenà sikandin mebpengesawa te vahi he tig-Canaan.
GEN 28:7 Ne netuenan din daan he mibpemineg si Jacob te suǥù te amey zin wey iney zin su migenat en pehendiyà te Padan Aram.
GEN 28:8 Ne human dutun mesavut ni Esau he kenè bes iyan egkesuatan te amey zin he si Isaac sikan is menge vahi he tig-Canaan.
GEN 28:9 Ne zutun midhendiyà sikandin te anggam din he si Ishmael he anak ni Abraham diyà te ki Hagar. Gawas dutun te zezuwa he esawa zin, mid-esawa zin daan si Mahalat he anak ni Ishmael wey etevey ni Nebayot.
GEN 28:10 Mid-awà si Jacob dutun te Beersheba ne midhendiyà sikandin te Haran.
GEN 28:11 Ne hein nekeuma sikandin diyà te sevaha he lugar, ne zutun dà sikandin medhizeǥà te haazà he kezukilemi su midsanlep en is andew. Migkuwa sikandin te vatu, ne mid-ulunè din haazà dutun te kedlipezeng din.
GEN 28:12 Ne zutun te kedlipezeng din, neketeǥeinep sikandin te heǥezan he nekehitindeg kayi te tanà ne nekeuma ziyà te langit. Neehè din is menge velinsuǥuen te Megbevayà he ebpememenahik wey ebpemenaug dutun te heǥezan.
GEN 28:13 Ne ziyà te zivavew zutun te heǥezan, neehè din is Nengazen he edhithitindeg ne migkaǥi sikandin te, “Iyan a sikan is Nengazen, is Megbevayà ni Abraham wey ni Isaac. Ibeǥey ku kenikew wey te menge kevuwazan nu heini he tanà is midhizeǥaan nu.
GEN 28:14 Is menge kevuwazan nu egkehimu he iring kezakel te eliyavuk te tanà. Pinaaǥi kenikew wey te menge kevuwazan nu, edtuvazan ku is langun he menge etew kayi te kelibutan.
GEN 28:15 Tentenuzi nu he layun a eduma kenikew wey ebentayan ku sikew minsan hendei ka ebpevayà. Ibpelikù ku sikew kayi he tanà, ne kenè ku sikew ed-ewaan taman te egketuman ku is menge saad ku kenikew.”
GEN 28:16 Ne nepukew si Jacob, ne ke sikandin te, “Wazè ku metueni he mibulusan bes te Nengazen heini he lugar.”
GEN 28:17 Ne nahandek sikandin, ke sikandin te, “Utew a ebpendeǥubduva kayi he lugar! Ubpeey heini te Megbevayà ne kayi ves is gemawan pehendiyà te langit!”
GEN 28:18 Utew pa zutun meselem te ked-enew ni Jacob. Migkuwa zin haazà is batu he mid-ulunè din, ne impehitindeg din haazà he tedeman din. Mid-itisan din haazà te lana su wey mehimu he segradu.
GEN 28:19 Migngezanan haazà ni Jacob he lugar te Betel, he ke và dà egkeǥiya, “Baley te Megbevayà.” Piru is inged dutun dengan migngezanan te Luz.
GEN 28:20 Ne mibpenangdù dutun si Jacob he egkaǥi te, “He Megbevayà, emun edumahan a wey ebentayan a kenikew kayi te hipenawan ku wey emun ebeǥayan a kenikew te egkeenen wey igkevisti,
GEN 28:21 wey emun ebpekelikù a ziyà te ubpaan te amey ku he wazà mezaat he egkehitavù kedì, ne sikew is Nengazen, iyan ka Megbevayà he ed-ezapen ku.
GEN 28:22 Ne heini is batu he impelastar ku kayi he tedeman ku, ebpekepenistiǥus he kayi ka ed-ubpà he lugar. Ne ibeǥey ku kenikew is ikesepulù te langun he ibeǥey nu kediey.”
GEN 29:1 Ne midlaus si Jacob te kedhipanew zin, ne nekeuma sikandin diyà te tanà te menge etew he zapit te edsilaan.
GEN 29:2 Ne zuen neehè din diyà te unayan he sevaha he kalut, ne ziyà te uvey kayi zuen tetelu he leyuzan he kerehidu, su ziyà egkuwa is menge etew zutun te wahig he ibpeinum dan te menge kerehidu zan. Heini he kalut ne midtengevan te zekelà he vatu.
GEN 29:3 Edteǥan te menge bekidu te kerehidu he egkevurunburun is langun he menge kerehidu zan ne human dan id-awà haazà is batu he intangeb. Emun egkepasad dan te kebpeinum is menge kerehidu zan, ne idlikù dan haazà is batu.
GEN 29:4 Ne mid-insaan ni Jacob haazà is menge bekidu te kerehidu te, “Geli, hendei kew ebpuun?” Midtavak sikandan te, “Tig-Haran key.”
GEN 29:5 Ne mid-insè en maan si Jacob te, “Egkekilala niw ve si Laban he apù ni Nahor?” Midtavak dan te, “Uya, egkekilala zey.”
GEN 29:6 Ne mid-insaan en maan ni Jacob te, “Egkemenumenu en sikandin?” Midtavak dan te, “Meupiya zed man. Ahaa nu, heeyan ded is anak din he si Raquel is ebpelingguma duma te menge kerehidu zin.”
GEN 29:7 Ne migkeǥiyan en maan ni Jacob te, “Metikang pa is andew, ne kenè pa uras he edtudilen is menge kerehidu, deyzey vuwa ke ibpeinum niw sikandan, ne ipeuman niw pa ipepenabtab.”
GEN 29:8 Midtavak sikandan te, “Kenà egkehimu emun kenè dey pa egkevurunburun is menge kerehidu zey. Emun kayi en is langun he kerehidu ne edlilizen dey haazà is intangeb he vatu su wey mekeinum sikandan.”
GEN 29:9 Kemulu pa ebpekibitiyara si Jacob kandan dutun kebpekeuma ni Raquel he edtundan te menge kerehidu te amey zin, su sikandin is ed-elima kayi.
GEN 29:10 Ne hein naahà ni Jacob si Raquel, is anak te anggam din he si Laban he edtundan te menge kerehidu, midhendutun sikandin te kalut, ne in-awè din is batu he intangeb dutun, ne impemeinum din is menge kerehidu te anggam din he si Laban.
GEN 29:11 Nepasad haazà, ne midhezekan din si Raquel, ne nekesineǥew sikandin su nehilelaut.
GEN 29:12 Migkeǥiyan din si Raquel te, “Anak a ni Rebeka, umbe enaken a te amey nu.” Mibpelelaǥuy si Raquel is ed-ulì ne midtudtulan din is amey zin.
GEN 29:13 Hein nezineg ni Laban he zutun si Jacob is enaken din he anak te etevey zin he si Raquel, migègaanan din sinuǥunga. Migkepkepan din ne midhezekan din ne miduma zin diyà te valey zan. Ne ipenudtul ni Jacob ki Laban is langun he nengeulaula.
GEN 29:14 Ne migkeǥiyan sikandin ni Laban te, “Tutuu iyan he mesipeg ku sikew.”
GEN 29:15 Ne hein senge vulan en is ked-ubpà ni Jacob diyà te ki Laban, migkeǥiyan ni Laban sikandin te, “Kenà meupiya he edterebahu ka kayi te kedì he wazè nu suhul minsan pa te enaken ku sikew. Keǥiyi a kenikew ke hengkey is egkesuatan nu he idsuhul ku kenikew?”
GEN 29:16 Duen dezuwa he anak ni Laban he raǥa. Iyan ngazan te kakey si Lea ne si Raquel is hazi.
GEN 29:17 Meupiya he ed-ahaan is mata ni Lea, piru edhuna he mekempet wey mezagwey he ed-ahaan is dagwey ni Raquel.
GEN 29:18 Tenged te egkesuatan ni Jacob si Raquel, migkeǥiyan din si Laban te, “Edterebahu a kayi te kenikew seled te pitu he tuig emun ibpeesawa nu kedì si Raquel.”
GEN 29:19 Migkaǥi si Laban te, “Deyzey pa ke iyan ke zà ebpekeesawa kandin kenà te zuma he maama. Kayi ke zà ubpà.”
GEN 29:20 Ne zutun, impepeniwakà ni Laban si Jacob taman te pitu he tuig wey zin meesawa si Raquel. Tenged te utew zin nesuati si Raquel henduen te pira zà he andew ziyà te kandin haazà is pitu he tuig.
GEN 29:21 Hein netuman en haazà is pitu he tuig, migkeǥiyan ni Jacob si Laban te, “Nepasad-en is kebpeniwakè ku kenikew, iveǥey nu en kediey si Raquel su ebpehulizè key en.”
GEN 29:22 Mid-uyun dutun si Laban, umbe midtukud sikandin te keemuran ne mid-imbita zin is langun he menge meǥinged dutun.
GEN 29:23 Piru hein mezukilem en, iyan miduma ni Laban si Lea ziyà ki Jacob, he si Raquel man pezem. Ne mibpehulizà si Jacob wey si Lea.
GEN 29:24 (Ne zaan he imbeǥey ni Laban si Zilpa is suluǥuen din he vahi ziyà te ki Lea wey mehimu he suluǥuen din.)
GEN 29:25 Hein nepawà, netuenan ni Jacob he si Lea ves is hulid din. Ne zutun mibeyaan din si Laban he egkaǥi te, “Maan is mid-ulaula nu heini kediey? Mibpeniwakà a kenikew para meesawa ku si Raquel. Maan is mid-ekalan a kenikew?”
GEN 29:26 Ne midtavak si Laban te, “Kenà heeyan betasan kayi te kenami he lugar is iyan ibpehuna ibpeesawa is hazi kenà is kakey.
GEN 29:27 Teǥazi nu zèpa he mepasad heini is pitu he andew he keemuran te eseweey niw ki Lea, su ibpeesawa ku human kenikew si Raquel, emun ebpekeuman ka ebpekepenilbi kedì te pitu pa maan he tuig.”
GEN 29:28 Ne mid-uyun dutun si Jacob te migkaǥi ni Laban. Hein nepasad haazà is sengesimana he keemuran te eseweey ni Lea, impeesawa zaan ni Laban kandin si Raquel.
GEN 29:29 (Imbeǥey zaan ni Laban si Bilha is suluǥuen din he vahi ziyà te ki Raquel su wey mehimu he suluǥuen din.)
GEN 29:30 Ne mibpekidhulid si Jacob ki Raquel. Utew minahal ni Jacob si Raquel kenà si Lea. Ne mid-uman en maan si Jacob mebpeniwakà diyà te ki Laban te pitu pa maan he tuig.
GEN 29:31 Naahà te Nengazen he kenà mahal ni Jacob si Lea, umbe mibpengelinteuwan din he mekaanak si Lea, piru si Raquel ne kenà.
GEN 29:32 Mibmeǥingey si Lea ne mid-anak te maama ne migngezanan din ki Reuben, su ke sikandin te, “Naahà te Nengazen is merasey he egkeulaula ku, guntaan siguradu he ebmahalen ad human te esawa ku.”
GEN 29:33 Ne mid-uman sikandin mebmeǥingey, ne mid-anak en maan sikandin te maama. Migkaǥi sikandin te, “Mid-umanan a veǥayi te Nengazen te sevaha he anak he maama su nezineg din he wazà a mahala te esawa ku.” Umbe migngezanan din haazà is batà te Simeon.
GEN 29:34 Ne mibmeǥingey en maan si Lea, ne mid-anak sikandin te sevaha pa maan he maama. Migkaǥi sikandin te, “Human ad buwa ebmahala te esawa ku su tetelu en is anak dey he maama.” Umbe migngezanan din haazà is batà ki Levi.
GEN 29:35 Mibmeǥingey med-uman si Lea ne mid-anak sikandin te sevaha pa he maama. Migkaǥi sikandin te, “Edeliǥen ku is Nengazen.” Umbe migngezanan din haazà is batà te Juda. Puun dutun, wazè en sikandin med-anak.
GEN 30:1 Hein naahà ni Raquel he kenà sikandin ed-anak, neima sikandin ki Lea. Migkeǥiyan din si Jacob te, “Beǥayi a te anak su emun kenà a kenikew ebeǥayan te vatà ne ebpatey e en!”
GEN 30:2 Ne nepeukan sikandin ni Jacob he egkaǥi te, “Maan, Megbevayè e ve? Kandin he ketau is kenè nu kebpekaanak!”
GEN 30:3 Migkaǥi si Raquel ziyà te ki Jacob te, “Emun iyan heeyan, pekidhulid ka ki Bilha he uripen ku su minsan pinaaǥi zà kandin is kebpekekuwa ku te vatà.”
GEN 30:4 Ne imbeǥey ni Raquel ki Jacob si Bilha is uripen din para mehimu he esawa zin daan, ne mibpekidhulid si Jacob kandin.
GEN 30:5 Mibmeǥingey si Bilha, ne mid-anak te maama.
GEN 30:6 Ne migkaǥi si Raquel te, “In-awà human te Megbevayà is keelezan ku. Midtavak din is pengemuyù ku, su imbeǥey zin kedì is sevaha he anak he maama.” Umbe migngezanan din haazà is batà ki Dan.
GEN 30:7 Ne mibmeǥingey en maan si Bilha is suluǥuen ni Raquel, ne mid-anak sikandin te maama, ikezuwe en haazà he anak dan ki Jacob.
GEN 30:8 Migkaǥi si Raquel te, “Mibpurung a mebpekidlawan te suled ku, ne nezaag ku sikandin.” Umbe migngezanan din haazà ki Naftali.
GEN 30:9 Ne hein kenè en si Lea ebpekaanak, ne impeesawa zin ki Jacob is uripen din he si Zilpa.
GEN 30:10 Mibmeǥingey si Zilpa, ne mid-anak te maama.
GEN 30:11 Migkaǥi si Lea te, “Utew meupiya is palad ku!” Umbe migngezanan din haazà is batà ki Gad.
GEN 30:12 Mid-uman med-anak si Zilpa te maama he ikezuwa he anak dan ki Jacob.
GEN 30:13 Migkaǥi si Lea te, “Utew a nelipey! Ebpekekaǥi is menge zuma ku he vahi he utew ad melipayen.” Umbe migngezanan din haazà is batà ki Asher.
GEN 30:14 Sevaha zutun he timpu he iyan ting-eǥani te trigu, midhendiyà si Reuben te vevesukà, ne zuen neehè din he pinemula he mandaǥura. Mibpenguwa sikandin te veǥas kayi, ne mid-uwit din diyà te iney zin he si Lea. Hein naahà haazà ni Raquel, migkaǥi sikandin te, “Beǥayi ad kun keniyan te mandragura he mid-uwit te anak nu.”
GEN 30:15 Ne midtavak si Lea te, “Wazè nu pe bes ikesuat is ked-eǥawa nu te esawa ku? Egkuwaan nu pa zaan is mandragura te anak ku?” Migkaǥi si Raquel te, “Emun ebeǥayan a kenikew te mandragura ne ibpehulid ku si Jacob kenikew kengkuwan ke mezukilem.”
GEN 30:16 Hein mahapun en, ne ebpelingguma si Jacob is ebpuun diyà te vevesukà is ed-ulì en, ne midsinuǥung sikandin ni Lea, he egkaǥi te, “Kinahanglan he kayi ka edhulid te kedì guntaan te mezukilem, su mibeyazan ku en sikew ziyà te ki Raquel te mandragura he mid-uwit te anak ku.” Umbe ziyà te ki Lea medhulid si Jacob dutun te kezukilemi.
GEN 30:17 Midtavak te Megbevayà is pengemuyù ni Lea, ne mibmeǥingey sikandin. Ne mid-anak sikandin te maama he ikelima te anak dan ki Jacob.
GEN 30:18 Migkaǥi si Lea te, “Midsuhulan a te Megbevayà su impeesawa ku is uripen ku te esawa ku.” Umbe migngezanan din haazà is batà ki Isacar.
GEN 30:19 Mibmeǥingey en maan si Lea ne mid-anak te maama he ikeenem te anak dan ki Jacob.
GEN 30:20 Migkaǥi si Lea te, “Utew mahal is imbeǥey kediey te Megbevayà. Edtehuzen ad human te esawa ku su neveǥayan ku en sikandin te heenem he anak he maama.” Umbe migngezanan din haazà is batà te Zebulun.
GEN 30:21 Ne is huziyan he in-anak ni Lea vahi, ne migngezanan din ki Dina.
GEN 30:22 Si Raquel ne wazà daan melipati te Megbevayà. Midtavak din daan is pengemuyù din he mekaanak daan sikandin.
GEN 30:23 Mibmeǥingey sikandin ne mid-anak te maama. Migkaǥi sikandin te, “In-awà human te Megbevayà is utew ku igkeeled.” Umbe migngezanan din haazà is batà te Jose, su ke sikandin te,
GEN 30:24 “Berakat he umani e pa te Nengazen te sevaha pa he anak.”
GEN 30:25 Hein in-anak en ni Raquel si Jose, migkeǥiyan ni Jacob si Laban te, “Tuǥuti e en human he mekeulì a ziyà te inged dey.
GEN 30:26 Iveǥey nu en kediey is menge esawa ku he mibpenilbiyan ku ziyan te kenikew wey menge anak ku, su ed-ulì e en. Netuenan nu ke hengkey kezekelà is nehimu ku te kebpenilbi ku kenikew.”
GEN 30:27 Midtavak si Laban te, “Emun meupiya zà is gehinawa nu, ne zini ke pa ubpà. Su sumalà te kebarè ku, netuenan ku he midtuvazan a te Nengazen pinaaǥi kenikew.
GEN 30:28 Keǥiya nu ke pira is idsuhul ku kenikew, su ebeyazan ku sikew.”
GEN 30:29 Ne midtavak si Jacob te, “Nesavut nu en he utew a midhaǥù dini te kenikew, ne nesavut nu zaan ke hengkey is uswag te menge uyaǥen nu tenged te ked-elima ku.
GEN 30:30 Hein nekeuma a keyi pirapira zà is menge uyaǥen nu, piru ǥuntaan utew en mibmezakel, su midtuvazan ka te Nengazen pinaaǥi kedì. Umbe ǥuntaan kinahanglan he edsiguruwen ku is para te keugelingen ku he pemilya.”
GEN 30:31 Nenginginsà si Laban te, “Hengkey is egkesuatan nu he ibayad ku kenikew?” Midtavak si Jacob te, “Kenè e en kenikew suhuli. Emun ebpemineg ka te egkesuatan ku ne kenà a ed-awà kayi, su ed-elimahan ku is menge uyaǥen nu.
GEN 30:32 Iyan heini: edsusiyen ku ǥuntaan is menge uyaǥen nu ne egkuwaan ku is meitem he menge kerehidu wey kevangan he menge kambing. Iyan dà haazà suhul ku.
GEN 30:33 Ne emun egkeuǥet en, egketuenan nu ke egkeseriǥan a wey ke kenà, su edsusiyen nu haazà is menge uyaǥen he insuhul nu kedì. Emun duen egkeehè nu he kambing he kevangan etawa kerehidu he kenà meitem, keǥiya nu he tinakew ku.”
GEN 30:34 Midtavak si Laban te, “Emun iyan heeyan egkesuatan nu, ebpemineg a.”
GEN 30:35 Piru te haazà he andew, insivey ni Laban is kevangan he kambing, meemahan wey vehiyan, ragkes is meitem he menge kerehidu. Mibpeelimahan din heini te anak din he maama.
GEN 30:36 Insivey ni Laban is kandin he menge uyaǥen dutun te menge uyaǥen ni Jacob te keziyù he tetelu he andew emun edhipenawen. Iyan dà nesamà he uyaǥen dutun is mid-elimahan ni Jacob.
GEN 30:37 Ne zutun, migkuwa si Jacob te menge subpang te kayu he alamu, ebilyanu wey platanu ne mibpenluk-itan din. Piru wazè din emini penluk-iti, umbe mibpemelvel-etan din te wazà luk-iti su wey mebeverekà he ed-ehaan haazà is subpang.
GEN 30:38 Diyè din haazà ipasek te uvey te peinumà te menge uyaǥen para maahà haazà dutun te menge uyaǥen emun ebpekeinum dan.
GEN 30:39 Dutun te egkesineruwan te subpang ebpepenpeniwelayà haazà is menge kambing emun edhendutun dan is ed-inum. Emun ed-anak dan, ne kevengan is anak dan.
GEN 30:40 Piru is ki Jacob he mibeelan te menge kerehidu: Zutun te kemulu en ebpepenpeniwelayà haazà is menge uyaǥen, ibpesinaru zin sikandan duen te kevangan he kambing wey zuen te menge meitem he kambing ni Laban. Ne pinaaǥi zutun te paaǥi ni Jacob, mibmezakel is kandin he menge uyaǥen, ne insivey zin te menge uyaǥen ni Laban.
GEN 30:41 Emun ebpepenpeniwelayè en haazà is menge uyaǥen he memeupiya is lawa ziyà te peinumà, ne ibpasek en maan ni Jacob haazà is beverekà he subpang dutun te egkesineruwan dan.
GEN 30:42 Emun memeluya haazà is menge uyaǥen he ebpepenpeniwelayà, ne kenè din ibpasek haazà is subpang. Umbe egketuusan is ki Laban su memeluya piru is ki Jacob ne memeupiya is menge lawa mulà.
GEN 30:43 Pinaaǥi kayi, midsepian utew si Jacob. Ne utew midmezakel is menge uyaǥen din ragkes is menge kemilyu wey menge asnu. Mezakel zaan is menge suluǥuen din he menge maama wey vahi.
GEN 31:1 Nezineg ni Jacob is lalag te menge anak ni Laban, ke sikandan te, “Migkuwe en ni Jacob is hapit langun he menge azen te amey tew. Is langun he ketiǥeyunan din ne ebpuun te menge azen te amey tew.”
GEN 31:2 Neǥezam ni Jacob he nahalin en is gehinawa ni Laban kandin kenà te nehuna.
GEN 31:3 Migkeǥiyan te Nengazen si Jacob te, “Ulì ke en diyà te lugar he mid-ubpaan te menge kepuun nu, ziyà te menge kezuzumahi nu, ne iyan a eduma kenikew.”
GEN 31:4 Ne zutun mibpesuǥuan ni Jacob is menge esawa zin he si Raquel wey si Lea he medhendiyè dan te kandin, diyà te pepenebtavà te menge uyaǥen.
GEN 31:5 Migkeǥiyan din sikandan te, “Neǥezam ku he nahalin en is gehinawa zin kedì guntaan kenà te nehuna. Piru is Megbevayà te amey ku iyan edtavang kedì.
GEN 31:6 Netuenan niw en he mid-amin ku is taman te egkehimu ku te kebpenilbi ku ziyà te amey niw,
GEN 31:7 piru midterteruan e zin pa. Kesepulù din en helina is paaǥi zin te kedsuhuli kedì. Piru wazà ituǥut te Nengazen he mezaagdaag e zin.
GEN 31:8 Piru emun egkaǥi sikandin te, ‘Iyan suhul ku kenikew is menge uyaǥen he beverekà,’ ne beverekà is langun he anak te menge uyaǥen.
GEN 31:9 Ne pinaaǥi zutun migkuwa te Megbevayà is menge uyaǥen te amey niw ne imbeǥey zin kediey.”
GEN 31:10 Ne mid-uman megkaǥi si Jacob te, “Duen timpu he ebpemelelevag is menge uyaǥen, ne neketeǥeinep a. Neteǥeinep ku he is menge meemahan he kambing ne ebpemeniwaley te menge vehiyan he menge beverekà he kambing.
GEN 31:11 Dutun te teǥeinep ku, migkeǥiyan a te velinsuǥuen te Megbevayà. Ke sikandin te, ‘Jacob!’ Midtavak a te, ‘Heini e zed!’
GEN 31:12 Ne ke sikandin te, ‘Ahaa nu is langun he menge meemahan he kambing ne nekepeniwaley te menge vehiyan he menge beverekà he kambing. Mid-ulaula ku heini tenged te neehè ku is langun he mibeelan ni Laban.
GEN 31:13 Iyan a sikan is Megbevayà he mibpaahà kenikew ziyà te Betel kes lugar he zutun nu ipelastar kes tedeman nu he vatu he mid-itisan nu te lana. Dutun ka zaan mebpesarig kediey. Ne ǥuntaan, awè ka kayi te inged ne ulì ke en diyà te kenikew en he inged he zutun ka ianak.’ ”
GEN 31:14 Ne zutun midtavak si Raquel wey si Lea ziyà te ki Jacob te, “Wazè dey en egkepengevilin te amey zey.
GEN 31:15 Mid-isip key zin en he iring te kenè din menge anak. Imbelegyè key zin ne mid-amin din en te egastu is ingkepemasa kenami.
GEN 31:16 Is langun he ketiǥeyunan he midhawì te Megbevayà diyà te amey zey, ne egkeisip dey he iyan egkepengevilin dey wey te menge anak dey. Umbe pemineǥa nu is egkeǥiyen te Megbevayè nu.”
GEN 31:17 Ne zutun, mibpenines si Jacob su ed-ulì diyà te Canaan, kes lugar te amey zin he si Isaac. Impeuntud din is menge esawa zin wey menge anak din te kemilyu. Mid-uwit din is menge uyaǥen wey is langun he menge azen he netiǥum din diyà te Padan Aram. Neserengà haazà duen te kegenat ni Laban hein mibpen-elutan din is menge kerehidu zin, ne zutun te wazè pa sikandin mekeulì, migkuwa ni Raquel kes ed-ezapen te amey zin.
GEN 31:20 Neekalan ni Jacob si Laban is Aramihanen su wazè din keǥiyi he ed-awè dan en dutun.
GEN 31:21 Ne zutun te kegenat eni Jacob, mid-uwit din is langun he keleglaǥan din. Midrapas dan te Wahig he Eufrates ne ziyè dan medtandang te menge vuvungan te Gilead.
GEN 31:22 Tetelu en dutun he andew is midlavey te kebpelaǥuy eni Jacob, ne human metueni ni Laban.
GEN 31:23 Ne zutun midtiǥum din is menge kezuzumahi zin ne midal-as dan. Ne hein ikepitu en he andew te kedal-as dan, ne neseutan dan si Jacob diyà te menge vuvungan te Gilead.
GEN 31:24 Ne zutun he kezukilemi, mibpaahà is Megbevayà ki Laban te Aramihanen pinaaǥi te teǥeinep. Migkeǥiyan sikandin te Megbevayà te, “Kenè nu pesipelahi si Jacob.”
GEN 31:25 Mibpehitindeg si Jacob te tulda zin diyà te menge vuvungan te Gilead dutun te kegkeumahi kandin ni Laban. Ne zutun daan mebpehitindeg si Laban wey is menge zuma zin te menge tulda zan.
GEN 31:26 Ne migkeǥiyan ni Laban si Jacob te, “Maan is mid-ulaula nu heini kedì! Maan is mid-ekalan a kenikew? Mid-uwit nu pa is menge anak ku, he henduen be te nengevihag te tebek.
GEN 31:27 Maan is mid-ekalan a kenikew ne migenat kew he wazà mebpenanghid kedì? Angin pezem ke migkaǥi kew kedì, minsan pezem mekeǥenat kew ne edlipeylipey kiw he edsunetahan te tamburin wey alpa.
GEN 31:28 Wazè e en ganì kenikew ipehazek te menge apù ku wey menge anak ku te kegenat dan. Kenà meupiya is mid-ulaula nu.
GEN 31:29 Duen ku ketezengan pezem te kebpesipala kenikew, piru mibpaahà kedì is Megbevayà geina te mezukilem he ed-ezapen te amey nu, ke sikandin te, ‘Kenè nu pesipelahi si Jacob.’
GEN 31:30 Netuenan ku he utew ka ebulunga ziyà te keniyu, umbe egkesuatan nu en he mekeulì ka. Piru maan is midtakew nu is menge ed-ezapen ku?”
GEN 31:31 Midtavak si Jacob te, “Wazà ad mebpenanghid kenikew su egkahandek a he kela ke teǥela nu hewia kayi te kedì is menge anak nu.
GEN 31:32 Piru emun mehitenged te ed-ezapen nu he netazin, emun egkehè nu heini kayi te minsan hentei kayi te kenami, ne siluti nu sikandin te kemetayen. Kayi te etuvangan te menge kezuzumahi ku he iyan ebpemekepenistiǥus, ahaa nu emun duen egkeehè nu he menge azen nu kayi te kenami, emun duen ne kuwaa nu.” Wazà metueni ni Jacob he si Raquel ves is migkuwa zuen te menge ed-ezapen ni Laban.
GEN 31:33 Ne zutun, mibpen-ahà ni Laban haazà is menge ed-ezapen din dutun te tulda ni Jacob, diyà te ki Lea ragkes is menge tulda zuen te zezuwa he menge uripen he vahi te menge esawa ni Jacob. Piru wazè din maahà haazà is ed-ezapen din. Dutun te kedliǥawang din duen te tulda ni Lea, midseled sikandin daan diyà te tulda ni Raquel.
GEN 31:34 Piru ingke-eles-en ni Raquel ziyà te bulsavulsa zuen te silya te kemilyu zin, ne mibpinuuwan din heini. Ne midsusi ni Laban is langun he menge taǥù dutun te tulda ne wazè din maahà.
GEN 31:35 Ne migkaǥi si Raquel ziyà te amey zin te, “Amà, kenà a kenikew mepeuki te kenà a ebpekehitindeg su neumahan a te binulan he zaru te vahi.” Wazà mesanggen si Laban he ebpen-ahà piru wazè din iyan maahà sikan is menge ed-ezapen din.
GEN 31:36 Wazà meeǥen ni Jacob is kegkepauk din, umbe migkeǥiyan din si Laban te, “Hengkey ves is mezaat he neveelan ku? Hengkey utew is salè ku maan is midtelukunan e pa kenikew?
GEN 31:37 Guntaan te nesusi nu en is langun he azen ku, emun duen azen nu he neehè nu, isavuk nu kayi te etuvangan te menge kezuzumahi ku wey te menge kezuzumahi nu, para meehè dan, ne iyan en sikandan metau ke hengkey is kandan he kukuman para kenita.
GEN 31:38 Seled te 20 he tuig is ked-ubpè ku ziyan te keniyu, ne wazà merenrani is menge vehiyan he kerehidu wey kambing nu minsan kesevaha. Wazà a zaan mekekaan te menge kerehidu nu he meemahan.
GEN 31:39 Wazè ku en uwita ziyan te kenikew is menge uyaǥen nu he midhimetayan te menge zumezaas he menge langgam; segugunè ku heini ed-ilisi. Mibpeveyazan nu zaan kedì is menge uyaǥen nu he midtakew te timpu te maandew wey te mezukilem.
GEN 31:40 Iyan heini egkeulaula ku: utew a egkeiniti emun maandew, utew a egkeǥenew emun mezukilem, ne layun a egkepurang.
GEN 31:41 Menge 20 en he tuig is ked-ubpè ku ziyan te keniyu, 14 he tuig is kebpenilbi ku kenikew para kayi te zezuwa he anak nu he menge vahi. Ne mid-uman e pa medterebahu te heenem he tuig te kebekidu te menge uyaǥen nu. Piru hengkey heini is mibeelan nu? Ne kesepulù nu en helhelina is suhul ku.
GEN 31:42 Emun buwa wazà a tevangi te Megbevayà te amey ku he si Isaac, kes Megbevayà ni Abraham, kela ke midsegseg e en kenikew he wazà uwiten he minsan hengkey. Piru naahà te Megbevayà is kedhaǥù ku wey kedterebahu ku, umbe midawey ke zin geina he mezukilem.”
GEN 31:43 Midtavak si Laban te, “Heini is menge vahi he esawa nu ne menge anak ku, is menge anak dan ne menge apù ku. Heeyan is menge uyaǥen nu ne kediey zaan. Langun he egkeehè nu kayi ne kediey. Piru ǥuntaan, kenè ku en egkahawì is menge anak ku wey menge apù ku?
GEN 31:44 Meupiya vuwa ke edhimu ki te uyun. Edtukud ki te tedeman he vatu he iyan ebpenistiǥus te kebpeked-uyun ta.”
GEN 31:45 Umbe migkuwa zutun si Jacob te zekelà he vatu ne impelastar zin he tedeman.
GEN 31:46 Ne zutun midsuǥù din is menge kezuzumahi zin he medtambù dan te menge vatu. Kebpekepasad dan he edtambù te menge vatu ne zutun dan mebpemengaan.
GEN 31:47 Migngezanan haazà ni Laban is intambù he menge vatu te Jegar Sahaduta. Piru migngezanan heini ni Jacob te Galeed. Diyà te Hebreo, he ke và dà egkeǥiya, “Intambù he Ebpeketistiǥus.”
GEN 31:48 Migkaǥi si Laban te, “Heini is intambù he menge vatu, ne iyan ebpenistiǥus te kebpeked-uyun ta te dezuwa.” Iyan heeyan mibpuunan ke maan is migngezanan haazà is intambù he menge vatu te Galeed.
GEN 31:49 Migngezanan daan te, “Mizpa,” he ke và dà egkeǥiya, “Ebantey,” su migkaǥi si Laban te, “Berakat he iyan ebantey kenitew is Nengazen emun ebpesuwayè kiw.
GEN 31:50 Emun ebpesipelahan nu is menge esawa nu he menge anak ku, wey emun ebpengesawa ke pa te zuma pa he vahi, tentenuzi nu he minsan ke kenè ku egkaahà, egkeehè ka mulà te Megbevayà he iyan ebpenistiǥus te neuyunan ta.”
GEN 31:51 Ne mid-uman pa megkaǥi si Laban diyà te ki Jacob te, “Heini zed is menge vatu he intambù he iyan tedeman wey ebpenistiǥus te kebpeked-uyun ta.
GEN 31:52 Iyan menge tuus he ebpeketistiǥus is Megbevayà. Tuus heini is intambù wey tuus daan heini is impelastar he vatu te uyun ta he kenà a edlavey kayi te intambù te kebpesipala kenikew, ne sikew zaan, kenè ka edlavey kayi te kebpesipala kedì.
GEN 31:53 Ne ke edsupaken heini te minsan hentei kenita, berakat he siluti sikandin te Megbevayà ni Abraham wey Megbevayà ni Nahor he iyan daan Megbevayà te amey zan.” Ne mibpesarig daan si Jacob ne mibpetistiǥus te Megbevayà he edtehuzen te amey zin he si Isaac.
GEN 31:54 Ne mibpemuhat sikandin dutun te vuvungan ne impekaan din te menge kezuzumahi zin. Ne hein nekekaan dan, dutun dan medhulavung.
GEN 31:55 Ne hein nepawà, midhezekan ni Laban is menge apù din wey menge anak din he esawa ni Jacob ne mibpenubtuvazan din. Ne zutun migenat su ed-ulì.
GEN 32:1 Ne migenat en daan dutun ensi Jacob ne neumahan sikandin te menge velinsuǥuen te Megbevayà.
GEN 32:2 Ne hein naahà sikandan ni Jacob, ke sikandin te, “Menge sundaru heini te Megbevayà!” Ne migngezanan din haazà is tanà te Mahanaim.
GEN 32:3 Ne zuen menge midsuǥù ni Jacob he impehuna zin diyà te ki Esau ziyà te tanà he Seir, kes lugar he egngezanan daan he Edom.
GEN 32:4 Mibpenurù din sikandan ke hengkey is egkeǥiyen dan diyà te ki Esau. Migkaǥi si Jacob te, “Keǥiyi niw si Esau te ziyà a med-ubpà te ki Laban ne wazè e pa ganì mekeulì taman guntaan.
GEN 32:5 Ne keǥiyi niw sikandan he zuen ku en menge vaka, menge asnu, menge kerehidu, wey menge kambing, ne zuen ku zaan menge suluǥuen he vahi wey maama. Keǥiyi niw sikandin he midsuǥù ku sikiyu he edhangyù kandin he ikeǥaǥew e zin ded.”
GEN 32:6 Ne hein nekelikù is menge midsuǥù ni Jacob, ke sikandan te, “Midhendiyè key te ki Esau, ne migenat en su edsinuǥungen ke zin. Duen din duma he 400 he menge maama.”
GEN 32:7 Ne zutun utew nahandek si Jacob ne kenà ebpeketareg, ne mibahin din te zezuwa he grupu is menge sakup din ragkes is menge kerehidu, baka, kambing, wey kemilyu.
GEN 32:8 Tenged te neisip din is penenglitan ke ebpekeuma si Esau ne edsurungen din haazà is senge grupu ne ebpekepelaǥuy pa haazà is senge grupu.
GEN 32:9 Ne zutun mid-ampù si Jacob te, “He Megbevayà te apù ku he si Abraham wey Megbevayà te amey ku he si Isaac, iyan ka kes Nengazen he migkaǥi kediey he med-ulì a ziyà te menge kezuzumahi ku, diyà te tanà he zutun a ianak, ne edtuvazan a kenikew.
GEN 32:10 Ne siak is suluǥuen nu, kenà a zait te zekelà he ǥaǥew nu kediey he kenà egkaamin. Dengan hein midrapas a kayi te wahig he Jordan su edhendiyà a te ki Laban ne iyan dà naazen ku zutun is tuked ku. Ne ǥuntaan utew mezakel is menge azen ku su egkehimu he ebehinen te zezuwa he vahin.
GEN 32:11 Ne tevangi a ǥuntaan kenikew su wey a kenà mekeizi te kakey ku he si Esau su utew ad egkahandek su kela ke edtebeken e zin, ne ebpesipelahan din is menge esawa ku wey menge anak ku.
GEN 32:12 Piru mibpesarig ka kedì he edtuvazan a kenikew ne edhimuwen nu is menge kevuwazan ku he iring kezakel te pantad diyà te veyvey te zaǥat su kenè en egkengevilang.”
GEN 32:13 Ne ziyà medhulavung ensi Jacob. Ne hein meselem, mibpilì si Jacob te menge uyaǥen he igasa zin ki Esau:
GEN 32:14 200 he menge vehiyan he kambing wey 20 daan he menge meemahan he kambing, 200 he menge vehiyan he kerehidu wey 20 daan he menge meemahan he kerehidu,
GEN 32:15 30 he menge vehiyan he kemilyu wey menge nati zan, 40 he vehiyan he vaka wey 10 he menge tudu he vaka, 20 he vehiyan he asnu wey 10 he menge meemahan he asnu.
GEN 32:16 Mibahin ni Jacob is menge uyaǥen din, ne kada grupu ne zuen dutun impevantey zin. Migkeǥiyan din dutun is menge suluǥuen din te, “Huna kew kedì, ne hipanew kew he kenà utew ebpesundulà is kada grupu.”
GEN 32:17 Migkeǥiyan din kes menge suluǥuen he edtundan duen te nehuna he grupu te, “Emun ebpeked-uma kew ki Esau ne ebpenginginsà sikandin ke hentei kew ki suluǥuen wey hendei kew ebpevayà, wey ke hentei ki uyaǥen heeyan is edtundanen niw,
GEN 32:18 tevaka niw sikandin te kedì heini he menge uyaǥen ne igasa ku heini kandin. Keǥiyi niw zaan sikandin te keniyan en edtundug.”
GEN 32:19 Iyan ded haazà migkaǥi zin dutun te ikezuwa, wey te iketelu wey te langun he menge suluǥuen he edtundan duen te menge uyaǥen.
GEN 32:20 Ne mibpetizeenan din sikandan he kenè dan lipati he keǥiyi zan si Esau he edtundug en sikandin. Su neisip ni Jacob he, “Ebpeypeyuan ku si Esau kayi te menge igasa ku he ibpehuna ku. Su kela ke meked-ehè key ne ebpeseyluwen e zin ded.”
GEN 32:21 Umbe impehuna zin haazà is menge igasa zin, piru sikandin mulà dutun dà mebpelintetaǥak te haazà he kezukilimi te mid-ubpaan dan.
GEN 32:22 Ne hein mezukilem, mid-enew si Jacob ne miduma zin is dezuwa he esawa zin, is dezuwa he menge suluǥuen dan he vahi, wey is 11 he anak din he maama, ne imperapas din sikandan ipehuna te repasan te Jabok.
GEN 32:23 Ne impenlayun daan ni Jacob is langun he menge azen din.
GEN 32:24 Ne hein iyan dà si Jacob netaǥak dutun, duen nekeuma he sevaha he maama ne mibuteng din si Jacob. Mibuteng sikandan taman te egkepawà.
GEN 32:25 Hein neisip dutun te etew he kenè din egkezaag si Jacob, migewezan din is seǥang ni Jacob ne nekiluwan haazà is midsuuran te tulan kayi.
GEN 32:26 Ne zutun migkaǥi haazà is etew te, “Lekai a kenikew su egkepawè en.” Ne midtavak si Jacob te, “Kenè ku sikew edlekaan emun kena a kenikew ebpenubtuvazan.”
GEN 32:27 Ne mid-insaan sikandin dutun te etew te, “Hentei is ngazan nu?” Ne midtavak sikandin te, “Si Jacob.”
GEN 32:28 Ne migkaǥi haaza is etew te, “Puun guntaan kenè en maan Jacob is igngazan kenikew, kekenà, Israel en tenged te nekibuteng ka te Megbevayà wey te etew, ne nekezaag ka.”
GEN 32:29 Ne migkeǥiyan sikandin ni Jacob te, “Tezemi a kenikew ke hentei is ngazan nu?” Ne midtavak haazà is etew te, “Kenè nu en i-insai ke hentei is ngazan ku.” Ne zutun mibpenubtuvazan din si Jacob.
GEN 32:30 Migngezanan haazà ni Jacob he tanà te Peniel, he ke và dà egkeǥiya, “Neehè ku is dagwey te Megbevayà piru uuyag e zed.”
GEN 32:31 Ne hein midsilà is andew mid-awà si Jacob diyà te Peniel. Ebpiangpiang sikandin tenged te kegkekiluwi te midsuuran te tulan te seǥang din.
GEN 32:32 Iyan heini hinungdan ke maan is taman guntaan he is menge Israilihanen ne kenà egkaan te uǥat he zutun te tulan he zapit te seǥang. Su keniyan dapit gewezi te Megbevayà si Jacob.
GEN 33:1 Ne hein kebpantew ni Jacob, neehè din si Esau is ebpelingguma he edumahan te 400 he menge maama. Ne zutun, impedtetepizè din is menge anak din diyà te menge esawa zin he si Lea wey si Raquel, wey ziyà te menge suluǥuen dan he vahi.
GEN 33:2 Ne hein migenat sikandan, impehuna zin is dezuwa he menge suluǥuen din wey is menge anak dan, ne edtinundug si Lea wey is menge anak din, ne midtinundug si Raquel wey is anak din he si Jose.
GEN 33:3 Ne iyan sikandin midhuna te langun kandan ne kepipitu sikandin medlangkeb diyà te tanà dutun te ked-uvey zin diyà te kakey zin.
GEN 33:4 Ne si Esau mibpelelaǥuy is edsinuǥung ki Jacob ne migkepkepan din ne midhezekan din, ne nekesineǥew zan is dezuwa.
GEN 33:5 Ne hein neehè din is menge vahi wey menge vatà, ne mid-insaan din si Jacob te, “Hentei heini is menge zuma nu?” Ne midtavak si Jacob te, “Iyan heini menge anak ku he imbeǥey kediey te Megbevayà su ingkehizu e zin.”
GEN 33:6 Ne mid-uvey ziyà te ki Esau haazà is dezuwa he suluǥuen he vahi wey is menge anak dan, ne midluhud sikandan he iyan kedtahud dan kandin.
GEN 33:7 Ne midsunud si Lea wey is menge anak din, ne midluhud daan sikandan. Ne iyan nehuziyan he mid-uvey he ed-luhud si Jose wey is iney zin he si Raquel.
GEN 33:8 Ne mid-insaan ni Esau si Jacob te, “Hengkey is ibpesavut dutun te nesinuǥung ku he grupu te menge uyaǥen nu?” Midtavak si Jacob te, “Ibpayùpayù ku kenikew para mezawat a kenikew.”
GEN 33:9 Ne migkaǥi si Esau te, “Mezakel en is menge azen ku, geli, umbe kenikew zed haazà.”
GEN 33:10 Piru midteǥel ni Jacob, ke sikandin te, “Sigi en, dewata nud haazà. Su emun tutuu he igkeǥaǥew a kenikew dewata nu en is gasa ku kenikew. Su hein kedtengtengi ku te zagwey nu ne henduen be te zagwey te Megbevayà. Ne ǥuntaan te midawat a kenikew,
GEN 33:11 dewata nu en is ibeǥey ku kenikew su nehizuwan a te Megbevayà ne wazà a mekurangi te menge penginehenglanen ku.” Midteǥel ni Jacob si Esau taman te nezawat en nasì ni Esau haazà is igasa zin.
GEN 33:12 Ne migkaǥi si Esau te, “Kuwa kiw en su egenat kiw en. Ebpezumehè kiw en.”
GEN 33:13 Piru midtavak si Jacob te, “Netuenan nu he utew key menaney he edhipanew su memenaney he edhipanew is menge vatà, ne egkesuatan ku zaan he egkepurungan egkeelimahi is menge uyaǥen he edsusuwan. Emun ebpeǥesen ta te kedhipanew is menge uyaǥen te tivuuk he andew ne kela ke mebpematey sikandan.
GEN 33:14 Deyzey ke edhuna ke en kenami. Ednaneynaney key en edsunud kenikew sumalà te kegaan kayi te menge vatà wey te menge uyaǥen he egketundug dey. Diyè kiw en ebpeked-uuma te Seir.”
GEN 33:15 Ne migkaǥi si Esau te, “Emun iyan heeyan, idtaǥak ku nasì is duma he menge sakup ku kenikew.” Midtavak si Jacob te, “Kenè en kinahanglan. Is impurtanti ne midawat a kenikew.”
GEN 33:16 Ne zutun he andew migenat si Esau is ed-ulì diyà te Seir.
GEN 33:17 Piru ziyà mebpevayà ensi Jacob te Sucot, he ke và dà egkeǥiya, “Helungà,” ne hein nekeuma zan diyà, midlelawig si Jacob te helungà te menge uyaǥen din. Umbe Sucot is inngazan dan dutun te inged.
GEN 33:18 Hein neuǥet ne nekeuma sikandan diyà te Canaan puun te Padan Aram he wazà mezaat he neulaula kandan. Nekeuma zan diyà te inged he Shekem. Ne impehitindeg dan dutun is menge tulda zan diyà te uvey zutun te inged.
GEN 33:19 Ne haazà is tanà he mibpehitindeǥan dan te tulda ne mibpemasa ni Jacob diyà te menge anak ni Hamor te 100 he vuuk he pelata. Si Hamor ne iyan amey ni Shekem.
GEN 33:20 Ne zutun mibaal si Jacob te pemuhatà he migngezanan din te El Elohe Israel, he ke và dà egkaǥiya, “Utew mekeǥeǥehem is Megbevayà he ed-ezapen ni Israel.”
GEN 34:1 Si Dina, sikan is anak ni Jacob he raǥa he anak ni Lea, mibpenumbaley ziyà te menge vahi he menge meǥinged dutun te inged.
GEN 34:2 Naahà sikandin ni Shekem he anak ni Hamor he Hivihanen, he pengulu zengan dutun he lugar. Mid-eǥen din si Dina ne midlayug din.
GEN 34:3 Utew zin nesuati si Dina, ne utew zin mibmahal ne midneyneyuan din.
GEN 34:4 Ne migkeǥiyan din is amey zin he si Hamor te, “Ipeesawa nu kedì heeyan is bahi.”
GEN 34:5 Hein netuenan ni Jacob he midlayug ni Shekem si Dina, wazè din pa ul-ulaha is egkeisip din su wazè pa mekeulì is menge anak din he menge maama he ziyà te unayan su abantey te menge uyaǥen dan.
GEN 34:6 Midhendiyà si Hamor wey is anak din he si Shekem te ki Jacob su ebpekidlalag kandin.
GEN 34:7 Ne hein netudtulan is menge anak ni Jacob he menge maama zutun te neulaula, segugunè dan mid-ulì. Utew mibmezaat is gehinawa zan ne utew zan egkepeuki si Shekem tenged te mid-ulaula zin he kenà meupiya he vaal, he nekeveǥey te keelezan te pemilya ni Jacob.
GEN 34:8 Piru migkeǥiyan sikandan ni Hamor te, “Utew nesuati te anak ku he si Shekem is raǥa niw, umbe edhangyù a he ipeesawa niw en sikandin ki Shekem.
GEN 34:9 Egkesuatan dey zaan he ebpengesawa kew kayi te kenami. Is menge anak niw he vahi, ne ipeesawa niw kenami ne ibpeesawa zey zaan is menge anak dey keniyu.
GEN 34:10 Egkehimu he ebpekeubpè kew kayi te kenami he tanà su kenè dey keniyu ibarew. Dini kew ubpà; dini kew petiǥayun minsan hendei ne ebpekaangken kew te tanà.”
GEN 34:11 Midhangyù daan si Shekem diyà te amey wey menge suled ni Dina te, “Emun egkehizuwan a keniyu ne ipeesawa niw en kedì si Dina, ne minsan hengkey he ebuyuen niw ibeǥey ku.
GEN 34:12 Minsan pira is ibpesunggud niw kediey wey is minsan hengkey he ebuyuen he igasa ku kandin ne ibeǥey ku asal ipeesawa niw kediey si Dina.”
GEN 34:13 Tenged te midèdeetan ni Shekem is dengeg ni Dina, mid-ekalan te menge anak ni Jacob si Shekem wey is amey zin he si Hamor.
GEN 34:14 Ke sikandan te, “Kenà egkehimu he ibpeesawa zey is etevey zey te maama he wazà mesirkunsidar, su utew heeyan mekeeled-eled dini te kenami.
GEN 34:15 Ebpemineg key he ibpeesawa kenikew is etevey zey ke ebpekeiring kew kenami.
GEN 34:16 Emun ebpesirkunsidar kew ne human egkehimu he ibpeesawa zey keniyu is menge anak dey he raǥa. Human egkehimu he zini key ed-ubpà te keniyu ne egkehimu kiw he sevaha zà he tribu.
GEN 34:17 Piru emun kenè kew ebpesirkunsidar, ne egkuwaan dey is etevey zey ne egenat key.”
GEN 34:18 Nesuat dutun si Hamor wey si Shekem.
GEN 34:19 Umbe tenged te utew nesuati ni Shekem si Dina, wazè en sikandin medlanganlangan ne midtuman din is migkaǥi kandin te menge anak ni Jacob. Si Shekem utew midtahud kandin is pemilya te amey zin.
GEN 34:20 Umbe midhendiyè dan te amey zin te pultahan te inged su edlelaǥan dan is menge maama zutun te inged dan.
GEN 34:21 Ke sikandan te, “Haazà is menge etew, ne ebpekid-emiǥu zan kenitew, umbe meupiya ke kayi tew en sikandan ibpeubpà te kenitew. Meluag daan heini is tanè tew. Ebpekepengesawa kiw te menge anak dan he raǥa ne ebpekepengesawa zan daan te kenitew he menge raǥa.
GEN 34:22 Iyan, wey zan dà ebpekeuyun he zini zan ed-ubpà te kenitew ke ebpesirkunsidar kiw is langun he menge maama iring kandan.
GEN 34:23 Ne emun ebpekeubpè dan en kayi, egkehimu en he is langun he uyaǥen dan wey menge azen dan ne kenitew en daan. Umbe ebpemineg kiw en te egkesuatan dan su wey zan mekeubpà kayi zuma kenitew.”
GEN 34:24 Ne mid-uyunan te langun he menge maama he meǥinged dutun haazà is sambag ni Hamor wey te anak din he si Shekem. Umbe mibpesirkunsidar is langun he menge maama zutun te inged.
GEN 34:25 Kedlevey zutun te tetelu he andew, zutun te kemulu pa egkesekiti is menge maama te kedsirkunsidara kandan, midseled dutun te inged kes dezuwa he menge anak ni Jacob, si Simeon wey si Levi, is menge kakey ni Dina. Wazà metueni te menge etew zutun he mezaat bes is tuyù dan. Mid-uwit dan te ispada ne mibpenhimetayan dan is langun he menge maama zutun.
GEN 34:26 Midhimetayan dan si Hamor wey is anak din he si Shekem, ne migkuwa zan dutun si Dina te valey ni Shekem ne migenat dan.
GEN 34:27 Ne zutun, nekeuma zaan is duma pa he menge anak ni Jacob dutun te inged ne mibpenavan dan is menge azen dutun te inged. Mid-ulaula zan haazà tenged te midèdeetan is dengeg te etevey zan he si Dina.
GEN 34:28 Mibpenguwa zan is menge kerehidu, menge vaka, menge asnu, wey is minsan hengkey he menge azen diyà te inged wey minsan is diyà te menge unayan.
GEN 34:29 Mibpenguwa zan is langun he ketiǥeyunan dutun te inged, ragkes is menge azen he zutun te seled te menge valey. Ne mibpemihag dan is langun he menge vahi wey menge vatà.
GEN 34:30 Ne migkeǥiyan ni Jacob si Simeon wey si Levi te, “Mibeǥayan a keniyu te utew zekelà he samuk. Edumutan kiw en te menge Canaanhen wey menge Pirisihanen he menge meǥinged kayi te tanà. Mezakel zan, kenè kiw, ne emun ebpetebtevangè dan ne edsurungen kiw zan, egkaamin kiw zan te edhimatey.”
GEN 34:31 Piru midtavak haazà is dezuwa he anak din te, “Idtuǥut dey ve he ebpesipelahan is etevey zey su id-iring te vahi he ebelegyà te zengeg din?”
GEN 35:1 Ne zutun migkaǥi is Megbevayà diyà te ki Jacob te, “Penines ka ne halin ka ziyà te Betel ne ziyè ka ubpà. Ne vaal ka ziyà te pemuhatà para kediey, kes Megbevayà he mibpaahà kenikew zengan dutun te timpu he ebpeleǥuyan nu is kakey nu he si Esau.”
GEN 35:2 Umbe migkeǥiyan ni Jacob is tivuuk he pemilya zin wey is langun he menge sakup din te, “Ipenimbag niw is menge ed-ezapen niw. Mebpenlumpiyu kew te keugelingen niw ne ilisi niw is bisti niw.
GEN 35:3 Ne edhendiyè kiw te Betel; ne ebaal a zutun te pemuhatà ne ed-ezapen ku is Megbevayà he midtavang kedì te menge kelised ku, wey miduma kedì minsan hendei a ebpevayà.”
GEN 35:4 Ne haazà is menge ed-ezapen dan wey menge eritis, imbeǥey zan ki Jacob ne inleveng din diyà te sihung te kayu he ulayan diyà te uvey te Shekem.
GEN 35:5 Ne hein migenat en dutun ensi Jacob, mibpengelinteuwan te Megbevayà he mahandek is menge meǥinged te menge siringan dan he inged, umbe wazè dan mezal-as ensi Jacob.
GEN 35:6 Nekeuma ensi Jacob wey is menge zuma zin diyà te inged he Luz he egngezanan daan he Betel ziyà te tanà he Canaan.
GEN 35:7 Ne mibeelan din dutun is pemuhatà. Iyan inngazan din dutun he lugar is El Betel, he ke và dà egkeǥiya, “Megbevayà te Betel,” su hein mibpeleǥuyan din is kakey zin he si Esau, dutun mebpaahà kandin is Megbevayà.
GEN 35:8 Ne zutun, minatey si Debora he mid-uyamu zengan ki Rebeka. Ne ziyà ileveng sikandin te sihung te kayu he ulayan he ziyà te alug te Betel. Egngezanan haazà he kayu he Alon Bacut, he ke và egkeǥiya, “kayu he midsineǥawan.”
GEN 35:9 Ne zutun te timpu he nekeulì ensi Jacob he ebpuun te Padan Aram, mid-uman en maan mebpaahà is Megbevayà diyà te kandin, ne mibpenubtuvazan din si Jacob.
GEN 35:10 Migkeǥiyan sikandin te Megbevayà te, “Jacob is ngazan nu, puun guntaan ne kenè en maan Jacob is igngazan kenikew, kekenà, Israel en.” Umbe Israel en is ngazan ni Jacob.
GEN 35:11 Ne mid-uman megkaǥi is Megbevayà diyà kandin te, “Iyan a sikan is Mekeǥeǥehem he Megbevayà. Edhimuwen ku he mevuwad ka. Egkehimu ka he kepuun te sevaha he nasyun wey te mezakel he menge nasyun, ne egkehimu he hadì is duma he menge kevuwazan nu.
GEN 35:12 Heini is tanà he imbeǥey ku ziyà te ki Abraham wey ziyà te ki Isaac, ibeǥey ku zaan kenikew wey ziyà te menge kevuwazan nu.”
GEN 35:13 Ne mid-awà is Megbevayà dutun te tanà he zutun mebpekidlalag ki Jacob. Ne impelastar ni Jacob dutun is batu. Mid-itisan din te vinu wey lana su wey mehimu he segradu.
GEN 35:15 Ne haazà is tanà, migngezanan ni Jacob te Betel, he ke và egkeǥiya, “baley te Megbevayà.”
GEN 35:16 Ne mid-awà ensi Jacob dutun te Betel duma is pemilya zin. Meǥaan dutun ed-anak si Raquel. Ne te wazè dan pa mekeuma ziyà te inged he Efrat ne ebeliliten en si Raquel su ed-anak. Ne utew sikandin midlised.
GEN 35:17 Ne zutun te egkeseǥunsun en is belilit, migkaǥi is mengunguyamu te, “Kenè ka meseeng su maama en maan is id-anak nu.”
GEN 35:18 Ne hein edluwèluwe en te ǥehinawa si Raquel, migngezanan din is anak din ki Ben Oni. Piru migngezanan mulà ni Jacob haazà is batà ki Benjamin.
GEN 35:19 Ne mibpatey zutun si Raquel ne ziyè dan ileveng te uvey te zalan pehendiyà te inged he Efrat. (Ne haazà is inged he Efrat ne iyan guntaan inged he Betlehem.)
GEN 35:20 Ne zuen batu he impelastar ni Jacob diyà te leveng ni Raquel, ne taman en guntaan kemulu pa egketuusi is leveng ni Raquel tenged dutun.
GEN 35:21 Ne midlaus pa medhipanew ensi Jacob ne ziyà dan med-ubpà te tanà he ziyà dapit te inged he Migdal Eder.
GEN 35:22 Ne zutun te timpu he kemulu pa ed-ubpà ensi Jacob dutun, midhulizan ni Reuben is esawa te amey zin he si Bilha. Hein netuenan haazà ni Jacob, utew sikandin nepauk. Duen 12 he menge anak ni Jacob.
GEN 35:23 Is menge anak din diyà te ki Lea ne iyan si Reuben, is kakey, ne sunud si Simeon, si Levi, si Juda, si Isacar, wey si Zebulun.
GEN 35:24 Is menge anak din diyà te ki Raquel, ne iyan si Jose wey si Benjamin.
GEN 35:25 Is menge anak din diyà te ki Bilha, sikan is suluǥuen ni Raquel he vahi, ne iyan si Dan wey si Naftali.
GEN 35:26 Is menge anak din diyà te ki Zilpa, sikan is suluǥuen ni Lea he vahi, ne iyan si Gad wey si Asher. Iyan heini sikandan langun menge anak ni Jacob he maama he in-anak diyà te inged he Padan Aram.
GEN 35:27 Mid-ulì si Jacob diyà te amey zin he si Isaac he ziyà te Mamre he uvey te inged he Kiriat Arba (he iyan daan Hebron). Iyan haazà mid-ubpaan dengan ni Abraham wey ni Isaac.
GEN 35:28 Is keluǥayad te untung ni Isaac 180 he tuig.
GEN 35:29 Meǥurang en utew sikandin te kebpatey zin, ne in-amur sikandin te menge kepuun din he nemematey en. Inleveng sikandin te menge anak din he si Esau wey si Jacob.
GEN 36:1 Iyan heini guǥud mehitenged te pemilya ni Esau (he egngenazan daan te Edom).
GEN 36:2 Nengesawa si Esau te menge vahi he tig-Canaan. Iyan sikandan si Ada he anak ni Elon te Hitihanen, si Oholibama he anak ni Ana wey apù ni Zibeon te Hivihanen,
GEN 36:3 wey si Basemat he suled ni Nebayot te anak ni Ishmael.
GEN 36:4 Is anak ni Esau ziyà te ki Ada ne iyan si Elifaz. Is anak din diyà te ki Basemat ne iyan si Reuel.
GEN 36:5 Ne is menge anak din diyà te ki Oholibama ne iyan si Jeush, Jalam, wey Kora. Iyan sikandan menge anak ni Esau he neetew ziyà te Canaan.
GEN 36:6 Miduma ni Esau is menge esawa zin, menge anak din, wey is langun he sakup te pemilya zin, wey mid-uwit din is menge azen din wey menge uyaǥen din he nekuwa zin diyà te Canaan, ne midhalin sikandin te sevaha he lugar, he meziyù te mid-ubpaan te suled din he si Jacob.
GEN 36:7 Su kenà sikandan egkehimu he ebpeemurà diyà te sevaha zà he lugar su mahabet is menge azen dan; ne kenà ereg kandan haazà is lugar he mid-ubpaan dan tenged te kahabet te menge uyaǥen dan.
GEN 36:8 Umbe, si Esau (he egngenazan daan ki Edom) diyà med-ubpà te menge vuvungan he Seir.
GEN 36:9 Iyan heini guǥud mehitenged te pemilya ni Esau he iyan kepuun te menge Edomanhen he meǥinged diyà te menge vuvungan he Seir.
GEN 36:10 Is maama he anak ni Esau ziyà te ki Basemat ne iyan si Reuel, ne is anak din he maama ziyà te ki Ada ne iyan si Elifaz.
GEN 36:11 Is menge anak ni Elifaz he menge maama ne iyan ensi Teman, Omar, Zefo, Gatam, wey Kenaz.
GEN 36:12 Ne zuen daan anak din diyà te esawa zin he si Timna he si Amalek. Iyan sikandan menge apù ni Esau ziyà te esawa zin he si Ada.
GEN 36:13 Is menge anak ni Reuel he menge maama ne iyan ensi Nahat, Zera, Shama, wey Miza. Iyan sikandan menge apù ni Esau ziyà te esawa zin he si Basemat.
GEN 36:14 Is maama he menge anak ni Esau ziyà te ki Oholibama ne iyan ensi Jeush, Jalam, wey si Kora (si Oholibama anak ni Ana wey apù ni Zibeon).
GEN 36:15 Iyan heini nehimu he menge pengulu te menge kevuwazan ni Esau: si Teman, si Omar, si Zefo, si Kenaz,
GEN 36:16 si Kora, si Gatam, wey si Amalek. Heini sikandan menge pengulu ziyà te lugar he Edom, menge anak sikandan ni Elifaz wey menge apù ni Ada.
GEN 36:17 Nehimu zaan he menge pengulu te Edom is menge anak ni Reuel he iyan ensi Nahat, Zera, Shama, wey Miza. Menge apù sikandan ni Esau ziyà te esawa zin he si Basemat.
GEN 36:18 Nehimu zaan he menge pengulu is menge anak ni Esau ziyà te ki Oholibama te anak ni Ana. Iyan sikandan si Jeush, si Jalam, wey si Kora.
GEN 36:19 Pudu sikandan menge kevuwazan ni Esau he menge pengulu ziyà te Edom.
GEN 36:20 Iyan heini menge maama he kevuwazan ni Seir he Hurhanen he meǥinged diyà te Edom: Si Lotan, Shobal, Zibeon, Ana,
GEN 36:21 Dishon, Ezer, wey Dishan. Nehimu sikandan he menge pengulu te menge Hurhanen he meǥinged diyà te Edom.
GEN 36:22 Is menge anak ni Lotan iyan si Hori wey si Hemam. Telesuled si Lotan wey si Timna he sevaha zuen te menge asawa ni Elifaz.
GEN 36:23 Is menge anak ni Shobal iyan si Alvan, Manahat, Ebal, Shefo, wey si Onam.
GEN 36:24 Is menge anak ni Zibeon iyan si Aya wey si Ana. Iyan si Ana sikan is neketuredu te serebseb diyà te sibsivayan hein ebantey sikandin te menge asnu te amey zin.
GEN 36:25 Is menge anak ni Ana iyan si Dishon wey si Oholibama.
GEN 36:26 Is menge anak ni Dishon he menge maama, iyan si Hemdan, Eshban, Itran, wey si Keran.
GEN 36:27 Is menge anak ni Ezer iyan si Bilhan, Zaavan, wey si Akan.
GEN 36:28 Is menge anak ni Dishan iyan si Uz wey si Aran.
GEN 36:29 Iyan heini sikandan menge pengulu te menge Hurhanen he midumala te menge lugar ziyà te Seir: Si Lotan, si Shobal, si Zibeon, si Ana, si Dishon, si Ezer, wey si Dishan.
GEN 36:31 Iyan heini sikandan menge hadì diyà te Edom dutun te timpu he wazè pa menge hadì te menge Israilihanen:
GEN 36:32 Si Bela he tig-Dinhaba he anak ni Beor nehimu he hadì te Edom.
GEN 36:33 Hein minatey sikandin, iyan mid-ilis kandin si Jobab he anak ni Zera te tig-Bozra.
GEN 36:34 Hein minatey si Jobab, iyan mid-ilis kandin si Husham he tig-Teman.
GEN 36:35 Ne hein minatey si Husham, iyan mid-ilis kandin si Hadad he tig-Avet he anak ni Bedad. Si Hadad iyan kes nekezaag te menge Midianhen diyà te Moab.
GEN 36:36 Hein minatey si Hadad, iyan mid-ilis kandin si Samla he tig-Masreka.
GEN 36:37 Hein minatey si Samla, iyan mid-ilis kandin si Shaul he tig-Rehobot he uvey te Wahig he Eufrates.
GEN 36:38 Hein minatey si Shaul, iyan mid-ilis kandin si Baal Hanan he anak ni Acbor.
GEN 36:39 Hein minatey si Baal Hanan, iyan mid-ilis kandin si Hadar he tig-Pau. Iyan esawa zin si Mehetabel he anak ni Matred wey apù ni Mezahab.
GEN 36:40 Si Esau (he migngezanan daan te Edom) iyan kepuun te menge Edomanhen. Ne iyan heini nehimu he menge pengulu te menge kevuwazan ni Esau he is menge tribu zan wey menge inged dan iyan inngazan kandan: Timna, Alva, Jetet, Oholibama, Elah, Pinon, Kenaz, Teman, Mibzar, Magdiel, wey Iram.
GEN 37:1 Ne ziyà med-ubpà si Jacob te tanà he Canaan he iyan daan sikan is tanà he mid-ubpaan dengan te amey zin he si Abraham.
GEN 37:2 Iyan heini guǥud mehitenged te pemilya ni Jacob: Hein 17 is penuiǥen ni Jose, mid-uǥup en sikandin te menge kakey zin te kebantey te menge uyaǥen. Haazà he menge kakey zin, ne menge anak ni Bilha wey ni Zilpa he menge esawa te amey zin. Ebpenudtulen ni Jose ziyà te amey zin mezaat he menge ulaula te menge kakey zin.
GEN 37:3 Ne si Jacob, edhuna is kebmahala zin ki Jose kenà haazà is duma he menge anak din, su ǥeina te meǥurang en sikandin te kegkeetew ni Jose. Umbe mibpetehìan din si Jose te meupiya he visti wey melayat.
GEN 37:4 Ne hein nesavut te menge kakey ni Jose he mibmahal si Jose te amey zan, kenà sikandan, nepeukan dan si Jose ne layun en memesakit he lalag dan emun ebpekidlalag dan kandin.
GEN 37:5 Sevaha he kezukileman neketeǥeinep si Jose. Hein midtudtul zin haazà is teǥeinep din diyà te menge kakey zin, ne mid-iseg is kegkepeuki zan kandin.
GEN 37:6 Su iyan heini midtudtul zin diyà te menge kakey zin, ke sikandin te, “Neteǥeinep ku
GEN 37:7 he zutun te ziyè kiw te vevesukà is ebpemagkes te ǥinarab, ne netekewtekew kiw te zuen binagkes ku he mid-enew he midhitindeg he midlingutan duen te keniyu he menge vinagkes su edtahud dan.”
GEN 37:8 Migkaǥi haazà is menge suled din te, “Hengkey? Egkehimu ka edhadì wey ebayàbayà kenami?” Umbe mid-iseg pa is kegkepeuki zan ki Jose.
GEN 37:9 Ne nekeuman si Jose meketeǥeinep ne midtudtul zin en maan diyà te menge kakey zin. Ke sikandin te, “Nekeuman a meketeǥeinep, neehè ku is andew, vulan, wey 11 he menge vituen he edtahud kedì.”
GEN 37:10 Midtudtul zaan ni Jose haazà is teǥeinep din diyà te amey zin piru midsawey sikandin te amey zin. Migkaǥi is amey zin te, “Hengkey, mama, is ibpesavut nu? Egkehimu ve he siak wey is iney nu wey is menge suled nu ne ebpekepevayàbayè key kenikew?”
GEN 37:11 Ne utew neepesi si Jose te menge suled din, piru si Jacob mulà mid-isip-isip din heini he menge hitavù.
GEN 37:12 Sevaha zutun he andew, midhendiyà is menge kakey ni Jose te Shekem su ebpemepenabtab te menge uyaǥen te amey zan.
GEN 37:13 Ne zutun, migkeǥiyan ni Jacob si Jose te, “Is menge kakey nu ne ziyà te Shekem su ebpemepenabtab dan te menge uyaǥen tew.
GEN 37:14 Hendiyè ka wey nu melauy ke meupiya ve is egkeulaula te menge kakey nu wey te menge uyaǥen, ne meǥaan ke zà likù kayi wey a metudtuli kenikew.” Midtavak si Jose te, “Uya, amà.” Umbe, puun dutun te Hebron, midhendiyà si Jose te Shekem.
GEN 37:15 Ne hein diyè en sikandin is edriǥuriǥu ziyà te unayan, duen etew he nenginginsà kandin ke hentei is ebpen-ahaan din.
GEN 37:16 Midtavak si Jose te, “Ebpen-ahaan ku is menge kakey ku. Netuenan ve ke hendei zan ebpemepenabtab?”
GEN 37:17 Migkaǥi haazà is etew te, “Mid-awè dan en kayi. Nezineg ku he ebpehendiyè kun sikandan te Dotan.” Ne midtelukun si Jose ziyà, ne neturedu zin sikandan diyà te Dotan.
GEN 37:18 Hein malù pa meziyù si Jose is ebpelingguma, ne naahà sikandin te menge suled din, ne mibpelenuwan dan en sikandin te edhimatey.
GEN 37:19 Ke sikandan te, “Heeyan en kes meneneǥeinep is ebpelingguma.
GEN 37:20 Kuwa kew en su edhimetayan tew sikandin, ne id-ulug tew sikandin kayi te vudsi he punduwà te wahig. Egkeǥiyen tew zà he midhimetayan sikandin te dumezaas he langgam. Ed-ahaan te kun be ke metuman is menge teǥeinep din.”
GEN 37:21 Ne hein nezineg heini ni Reuben is pelanu, egkesuatan din he edluwasen din si Jose. Ke sikandin te, “Kenè tew edhimetayan.
GEN 37:22 Iulug niw zà sikandin te vudsi kayi te sibsivayan, kenè niw sikandin himetayi.” Umbe migkaǥi heini ni Reuben su wey zin melibri si Jose wey zin ikeulì diyà te amey zan.
GEN 37:23 Ne hein nekeuma si Jose ziyà te kandan, migewezan dan ne midluwas dan sikan is bisti ni Jose he nepurung mezeyzeyani
GEN 37:24 ne intimbag dan sikandin diyà te vudsi he punduwà te wahig. Ne haazà is budsi ne wazè din taǥù he wahig.
GEN 37:25 Ne te egkaan sikandan, ne zuen dan nepantew he ebpemelingguma he nigusyanti he menge Ismailihanen he ebpuun diyà te Gilead. Duen menge kemilyu zan he migkergahan dan te menge penaket, bawì, wey menge perehemut he ed-uwiten dan diyà te Ehipto.
GEN 37:26 Migkeǥiyan ni Juda haazà is menge suled din te, “Hengkey is egkepupulus tew ke edhimetayan tew is hazi tew he id-eles tew is kedhimetayi tew kandin?
GEN 37:27 Deyzey pa vuwa ke ibelegyè tew sikandin keniyan te menge Ismailihanen. Kenè tew edhimetayan su hazi tew man sikandin.” Ne mid-uyunan haazà te menge suled din.
GEN 37:28 Hein midsaǥad haazà is menge nigusyanti he tig-Midian, mibatun dan si Jose puun dutun te vudsi, ne imbelegyè dan sikandin te 20 he vuuk he pelata. Ne mid-uwit dan si Jose ziyà te Ehipto.
GEN 37:29 Ne hein midlikuan ni Reuben haazà is budsi ne wazè en dutun si Jose, ne mibindas din is bisti zin su utew neseeng.
GEN 37:30 Ne zutun, midlikù sikandin diyà te menge suled din he egkaǥi te, “Wazè en dutun kes hazi tew. Ebmenmenu ad be te ked-ulì ku ziyà te ki amà?”
GEN 37:31 Midhimatey sikandan te kambing ne midlupit dan te lengesa is bisti ni Jose.
GEN 37:32 Ne mid-uwit dan is bisti ni Jose ziyà te amey zan, migkaǥi sikandan te, “Neehè dey heini. Ahaa kun heini, ki Jose ve heini etawa kenà.”
GEN 37:33 Nekilala ni Jacob haazà is bisti. Ke sikandin te, “Kumbalà heeyan ni Jose. Midhimetayan sikandin te kumekaid he langgam! Siguradu he mibpurungan sikandin deesi te langgam.”
GEN 37:34 Ne mibindas ni Jacob is bisti zin ne mibivisti te saku he tuus te kegkeseeng din. Neuǥet is kedlalew zin te anak din.
GEN 37:35 Midhendutun te kandin is langun he menge anak din su edlenganen dan, piru wazà maawà is kegkeseeng din. Ke sikandin te, “Beleǥaza ad keniyu! Iyan ibpatey ku is kegkeseeng ku tenged te kebpatedany te anak ku.” Ne midsigudu en sikandin medsineǥew tenged ki Jose.
GEN 37:36 Ne mid-uwit si Jose te menge Midianhen diyà te Ehipto ne imbelegyè dan sikandin diyà te ki Potifar he sevaha he upisyal te hadì te Ehipto, he kepitan te menge vantey te turuǥan.
GEN 38:1 Dutun he timpu, midsuwey si Juda te menge suled din ne ziyà sikandin med-ubpà te ed-ubpaan ni Hira he tig-Adulam.
GEN 38:2 Ne zutun nekilala ni Juda is anak ni Shua he tig-Canaan ne mid-esawa zin haazà.
GEN 38:3 Ne mibmeǥingey haazà ne mid-anak te maama ne migngezanan haazà ni Juda te Er.
GEN 38:4 Mid-uman sikandin mebmeǥingey ne mid-anak en maan te maama ne migngezanan din te Onan.
GEN 38:5 Ne mid-uman en maan sikandin mebmeǥingey ne mid-anak en maan te maama ne migngezanan din haazà te Shela. In-anak si Shela ziyà te Kezib.
GEN 38:6 Impeesawa ni Juda is kinekekayan he anak din he si Er te vahi he iyan ngazan din si Tamar.
GEN 38:7 Piru mezaat is ulaula ni Er ziyà te etuvangan te Nengazen, umbe midhimetayan sikandin te Nengazen.
GEN 38:8 Umbe, migkeǥiyan ni Juda si Onan te, “Esawaa nu is ipag nu su veveluwan nu sikandin su suled nu is minatey he esawa zin, su wey pinaaǥi kenikew egkevuwad is minatey he suled nu.”
GEN 38:9 Netuenan ni Onan he is egkehimu he anak dan ki Tamar ne kenà heini ed-isipen he keugelingen din he kevuwazan. Umbe kada zin edhileveti si Tamar ne kenè din ibpeseled is similya zin su para kenà sikandin mekaanak para zuen te minatey he suled din.
GEN 38:10 Ne mezaat diyà te etuvangan te Nengazen haazà is mibeelan ni Onan, umbe midhimetayan din si Onan.
GEN 38:11 Ne migkeǥiyan ni Juda haazà is ambey zin he si Tamar te, “Ulì ka zèpa ziyà te amey nu, ne kenè ka mebpeesawa taman te egkenakan en si Shela.” Migkaǥi haazà ni Juda su nahandek sikandin he kela ke mebpatey zaan si Shela iring duen te menge suled din. Umbe mid-ulì dèpa si Tamar ziyà te amey zin.
GEN 38:12 Ne hein neuǥet en minatey is esawa ni Juda. Ne hein netapus is timpu te kedlalew zin, ne midhendiyà sikandin te menge peraalut te menge kerehidu zin diyà te Timnah. Duma zin te midhendutun is emiǥu zin he si Hira he tig-Adulam.
GEN 38:13 Ne netudtulan si Tamar he edhendiyà is enuǥang din te Timnah su ed-elutan din is menge kerehidu zin.
GEN 38:14 Kegkezineǥa zutun ni Tamar, mid-ilisan din is bisti zin he visti te valu, ne midtembunan din te lembung is buked din. Ne mibpimpinuu sikandin diyà te pultahan te inged he Enaim, he ziyà te kilid te zalan he ibpehendiyà te Timnah. Iyan diyà te isip din he edlimbungan din si Juda su neseǥipè din he wazà gihapun sikandin ipeesawa ki Shela minsan pa te kenakan en heini.
GEN 38:15 Ne hein naahà ni Juda si Tamar, wazè din mekilala he iyan kes ambey zin su netembunan man is buked din. Kunaan din ke vahi haazà he ebelegyà te zengeg din. Umbe mid-uvayan din haazà dutun te kilid te zalan he ke sikandin te, “Hendini ka su ebpehilevetè ki.” Ne midtavak si Tamar te, “Hengkey is ibayad nu kedì ke ebpehilavet a kenikew?”
GEN 38:17 Migkaǥi si Juda te, “Ebeǥayan ku sikew te kambing he ebpuun diyà te menge uyaǥen ku.” Midtavak si Tamar te, “Edsukul a emun duen idsandè nu he wey nu en egkahawì emun igkepeuwit nu en sikan is kambing.”
GEN 38:18 Mid-insà si Juda te, “Hengkey is ibpesandè nu kedì?” Midtavak si Tamar te, “Iveǥey nu kediey is penmarka nu wey is hiket din he imbevelieg nu, ragkes en is tuked nu.” Umbe imbeǥey haazà ni Juda ne mibpekidhilavet sikandin ki Tamar. Ne hein nepasad haazà mid-ulì si Tamar, ne in-awè din is tambun te vuked din ne mid-uman mebivisti te visti he para te valu. Ne hein malù en neuǥet mibmeǥingey sikandin.
GEN 38:20 Wazè en meuǥet ne impahated en ni Juda zuen te emiǥu zin he si Hira he tig-Adulam sikan is kambing he idlekat duen te menge azen he insandè din diyà te vahi, piru wazè din meturedu haazà is bahi.
GEN 38:21 Nenginginsà si Hira te menge tig-Enaim ke hendei en sikan is bahi he ebelegyà te zengeg din, he ebpimpinuu ziyà te kilid te zalan. Piru midtavak is menge etew te, “Wazè man bahi kayi he ebelegyà te zengeg din.”
GEN 38:22 Umbe, midlikù si Hira ziyà te ki Juda he ke sikandin te, “Wazè ku sikandin meturedu. Ne iyan lalag te menge etew zutun he wazà bahi zutun he ebelegyà te zengeg din.”
GEN 38:23 Migkaǥi si Juda te, “Ebey-anan en sikan is menge azen ku he ziyà te kandin, su kela ke và ki zà eengiti te menge etew is edtulung ebpen-ahà te wazà duen. Mibpeuwitan ku en man pezem sikandin te kambing piru wazè nu sikandin meturedu ziyà.”
GEN 38:24 Hein midlavey en is tetelu he vulan, netudtulan si Juda he is ambey zin he si Tamar ebpemelegyà te zengeg din ne mibmeǥingey en. Umbe migkaǥi si Juda te, “Uwita niw sikandin diyà te ǥawas te inged ne binsuli niw.”
GEN 38:25 Piru hein ed-uwiten dan en si Tamar, duen impekaǥi zin diyà te ki Juda he ziyà te kandin is penmarka wey is hiket kayi, ragkes en is tuked. Ne is teǥiǥaked dutun iyan nekeǥingey kandin. Ne kinahanglan he egkilelaan ke hentei is teǥiǥaked dutun.
GEN 38:26 Nekilala ni Juda he kandin haazà he menge azen, umbe migkaǥi sikandin te, “Wazà mekesalà si Tamar. Iyan a nekesalà su wazè ku sikandin ipeesawa te anak ku he si Shela.” Ne wazè en si Juda med-uman medhilavet ki Tamar.
GEN 38:27 Hein hapit en ed-anak si Tamar, netuenan he sereping is keǥingayan din.
GEN 38:28 Hein ebeliliten en sikandin, migawas is belad te sevaha he vatà. Ne is mengunguyamu midhiketan din heini te meriǥà he hiket su wey metuusi he iyan kakey.
GEN 38:29 Piru inseled dutun te vatà is belad din ne iyan midhuna megawas sikan is sereping din. Ne migkaǥi is mengunguyamu te, “Mibpekid-aǥew ka te kegawas.” Umbe migngezanan haazà is batà te Perez.
GEN 38:30 Ne migawas daan sikan is sereping din he midhiketan te meriǥà he hiket is belad din. Ne migngezanan sikandin te Zera.
GEN 39:1 Hein mid-uwit en duen te menge Ismailihanen si Jose ziyà te Ehipto, imbelegyà sikandin diyà te ki Potifar he sevaha te menge upisyal te hadì te Ehipto he kepitan te menge vantey te turuǥan.
GEN 39:2 Midumahan te Nengazen si Jose umbe mid-iseg mebmeupiya is kebpekesavuk din. Diyà sikandin med-ubpà te valey te egalen din he tig-Ehipto he si Potifar.
GEN 39:3 Naahà te egalen din he midumahan si Jose te Nengazen wey midtuvazan is langun he menge vaal zin,
GEN 39:4 umbe utew zin ingkeǥaǥew si Jose. Midhimu zin si Jose he sineriǥan din te kedumalaha te langun he menge suluǥuen din diyà te valey zin wey is kebayàbayà te langun he menge azen din.
GEN 39:5 Ne puun dutun te kedseriǥi ki Jose, midtuvazan te Nengazen is pemilya ni Potifar he Ehiptohanen wey is langun he menge azen din diyà te baley zin wey ziyà te vevesukè din. Midhimu heini te Nengazen tenged ki Jose.
GEN 39:6 Ne tenged dutun, insarig ni Potifar ki Jose is langun he azen din su emun iyan si Jose edumala ne kenè en sikandin egkesamuk gawas te kegkaan. Metaid si Jose wey meupiya is kedlelawa zin.
GEN 39:7 Ne wazà meuǥet, neimahan sikandin te esawa te egalen din. Ne midhinggat din si Jose he ebpehulizè dan.
GEN 39:8 Ne si Jose, wazè din pemineǥa, kekenà, migkeǥiyan din te, “Sikan is egalen ku, wazà igkesamuk din he minsan hengkey tenged te insarig din kediey is langun he menge azen din.
GEN 39:9 Henduen be te nekedrepeng key kayi te valey, su insarig din is langun kediey kayi ǥawas kenikew su esawa ke zin man. Kenà egkehimu he edlimbungan ku is egalen ku wey ebaal a te salà diyà te Megbevayà.”
GEN 39:10 Ne minsan pa te andew-andew is kedhinggata zuen te vahi ki Jose he ebpehulid, wazà si Jose mebpemineg.
GEN 39:11 Sevaha zutun he andew, midseled si Jose ziyà te valey su zuen din ebeelan, ne wazà dutun is menge zuma zin he menge suluǥuen.
GEN 39:12 Migewezan duen te esawa zuen te egalen ni Jose bisti zin ne migkeǥiyan din te, “Hulid ka kedì.” Piru mibpelaǥuy si Jose pehendiyà te ǥawas, piru netaǥak din is samput din dutun te vahi.
GEN 39:13 Hein naahà duen te vahi he migawas si Jose ne neǥewezan din is bisti ni Jose,
GEN 39:14 ne mid-umew zin is menge suluǥuen din, he egkaǥi te, “Ahaa niw man heini! Mid-uwitan kiw kayi te esawa ku te Hebriyuhanen para mepeel-elezi kiw. Kunaan niw vuwa, midseled sikandin kayi te ruǥu ku su edleyuǥen e zin, piru nengulahì a.
GEN 39:15 Ne tenged dutun, mibpelaǥuy sikandin diyà te gawas, piru netaǥak din is samput din.”
GEN 39:16 Ne intaǥù dutun te vahi haazà is samput ni Jose taman te nekeulì is esawa zin.
GEN 39:17 Ne midtudtul zin haazà diyà te esawa zin. Ke sikandin te, “Kes Hebriyuhanen he uripen nu he mid-uwit nu zini, egkesuatan din he mepeel-elezi a su midseled geina kayi te ruǥu ku su edleyuǥen e zin.
GEN 39:18 Piru hein migkulahì a ne mibpelaǥuy sikandin pehendiyà te gawas, ne netaǥak ganì is samput din.”
GEN 39:19 Hein nezineg ni Potifar haazà is tudtul te esawa zin mehitenged ki Jose, utew sikandin nepauk.
GEN 39:20 Ne tenged dutun, impezakep din si Jose ne inseled duen te pirisuan te menge pirisu te hadì. Piru minsan pa te ziyà si Jose te pirisuwan,
GEN 39:21 midumahan ded si Jose te Nengazen. Tenged te tuvad te Nengazen, nehizuwan duen te ebantey zuen te pirisuwan si Jose.
GEN 39:22 Ne tenged dutun, insarig duen te ebantey te pinirisu ki Jose is kebayàbayà te langun he menge pirisu ziyà te pirisuwan ne iyan impezumala sikandin te langun he menge vaal zutun.
GEN 39:23 Haazà is egalen te pirisuwan, wazè en igkesemuki zin duen te langun he insarig din ki Jose su midtuvazan man si Jose te Nengazen ne mibpengelinteuwan din he layun meupiya is minsan hengkey he ebeelan ni Jose.
GEN 40:1 Mibpenlavey is timpu, is pengulu te pereuwit te vinu te hadì wey kes pengulu te mememaal te supas ne nekesalà diyà te kandin. Utew nepeuki te hadì haazà is dezuwa he menge upisyal zin.
GEN 40:3 Umbe, impepirisu sikandan diyà te valey te kepitan te menge vantey ziyà te pirisuwan he iyan ded sikan is mibpirisuan daan ki Jose.
GEN 40:4 Si Jose is midseriǥan te kepitan te menge vantey he iyan ebeǥey kandan te egkinehenglanen dan. Neuǥet is kegkepirisuwa kandan.
GEN 40:5 Sevaha zutun he mezukilem, neketeǥeinep kes pereuwit te inumen wey mememaal te supas dutun te kemulu pa sikandan nepirisu. Uman sevaha kandan ne selakew is teǥeinep din wey selakew is kehuluǥan te teǥeinep din.
GEN 40:6 Ne hein nepawà te kedleuya kandan ni Jose, neehè din he utew zan neseeng.
GEN 40:7 Mid-insaan din haazà is dezuwa he upisyal te hadì te Ehipto ke maan is utew zan neseeng.
GEN 40:8 Ne midtavak dan te, “Geina te neketeǥeinep key, iyan, wazà ebpekeseysey ke hengkey is kehuluǥan duen te teǥeinep dey.” Ne migkaǥi zutun si Jose te, “Megbevayè dà is ebpekepezayag kenitew te kehuluǥan te menge teǥeinep. Keǥiya niw kun kediey is teǥeinep niw.”
GEN 40:9 Ne zutun impenudtul ki Jose te egalen te menge pereuwit te inumen is teǥeinep din. Ke sikandin te, “Neteǥeinep ku he zuen gawed diyà te egkesineruan ku.
GEN 40:10 Ne tetelu is subpang duen te ǥawed. Ne mibpeneringsing ne mibpengevukad ne mibpemeǥas ne nengelutuan is beǥas din.
GEN 40:11 Migewezan ku kun is tasa te hadì te Ehipto ne midrupù ku haazà is menge paras ne migkeres ku ne midtiǥis is wahig din diyà te tasa. Ne nepasad ne imbeǥey ku haazà is tasa ziyà te hadì.”
GEN 40:12 Ne migkaǥi si Jose te, “Iyan heini kehuluǥan te teǥeinep nu: Sikan is tetelu he subpang ne iyan kehuluǥan din is tetelu he andew.
GEN 40:13 Dutun te kenè pa egkeuma is tetelu he andew, ne ibpeǥawas ke en te hadì kayi te pirisuwan, ne ibpelikù ke zin diyà te zaan he terebahu nu he iyan is ked-uwiti nu kandin te vinu.
GEN 40:14 Berakat he kenà a kenikew lipati emun meupiya en is kebpekesavuk nu, he iyan kebpaahà a nu te keupiya nu kedì, keǥiya nu ziyà te hadì is ngazan ku su wey a kenikew metevangi wey a mekeǥawas kayi te pirisuwan.
GEN 40:15 Migebpaan a puun te inged dey te menge Hebriyuhanen, ne wazà salè ku he zait he igkepirisuwa kedì.”
GEN 40:16 Hein nezineg duen te egalen te mememaal te supas he meupiya is kehuluǥan duen te teǥeinep, midtudtul zin daan is teǥeinep din diyà te ki Jose. Ke sikandin te, “Neketeǥeinep a zaan he zuen ku ed-utuken he tetelu he revan he nepenù te supas.
GEN 40:17 Ne is kinezivevawan en utew zutun te revan, ne zuen taǥù he nekedseselekawà he kelasi he supas he para te hadì, piru mibpengaan heini te menge tagbis.”
GEN 40:18 Ne midtavak si Jose te, “Iyan heini kehuluǥan te teǥeinep nu: Sikan is tetelu he revan, ne tetelu zaan he andew.
GEN 40:19 Seled te tetelu he andew ebpepungelan ka te hadì te ulu ne ibitey ka ziyà te kayu ne ebpengeenen te menge tagbis is sapù nu.”
GEN 40:20 Ne netuman iyan haazà su neketelu pa zutun iyan kedsilibra te ked-enaka te hadì te Ehipto ne midtukud sikandin te keemuran ne impetampu zin is langun he menge upisyal zin. Mid-umew zin is egalen te menge pereuwit te inumen wey is egalen te menge mememaal te supas ne impeetuvang sikandan te menge zuma zan he upisyal.
GEN 40:21 Ne sikan is egalen te menge pereuwit te inumen, impelikù din te zaan he vaal zin ne iyan en maan sikandin eduwal te inumen diyà te hadì.
GEN 40:22 Ne sikan is egalen te menge mememaal te supas, impevitey te hadì sumalà is kehuluǥan he midseysey ni Jose.
GEN 40:23 Piru sikan is pereuwit te inumen, wazè din tevangi si Jose su nelipatan din.
GEN 41:1 Ne hein midlavey en is dezuwa he tuig ne neketeǥeinep is hadì te Ehipto he edhithitindeg sikandin diyà te veyvey te Wahig he Nilo.
GEN 41:2 Ne neehè din he zuen egaun diyà te wahig he pitu he vaka he utew memeupiya wey memelambù he mibpemenabtab dan te menge sagbet diyà te veyvey.
GEN 41:3 Ne zuen daan neehè din he pitu he vaka he nekesunud he migaun, he memeǥasà wey memezaat.
GEN 41:4 Ne heini is nengehuziyan he vaka he memeǥasà wey memezaat, migkaan dan haazà is nengehuna he utew memelambù wey memeupiya. Ne zutun nepukew haazà is hadì.
GEN 41:5 Ne midlipezeng en maan sikan is hadì ne nekeuman meketeǥeinep. Ne zutun te teǥeinep din duen neehè din he menge pungu he utew memeupiya wey memetiugkey.
GEN 41:6 Ne huziyan dutun duen mibpenuvù he pitu zaan he pungu he mid-ukap dà he nezeetan te keramag he ziyà ebpuun te edsilaan.
GEN 41:7 Ne mibpengeveleng duen te nengepis haazà is pitu he utew memerimiǥas. Ne zutun nepukew haazà is hadì ne teǥeinep dè bes.
GEN 41:8 Ne hein nepawà, utew neliveg haazà is hadì tenged dutun te menge teǥeinep din, ne impetawag din is langun he menge selemengkiru wey uluwanen he menge etew ziyà te ǥinhedian din he Ehipto. Ne midtudtulan din sikandan te menge teǥeinep din, piru wazà minsan hentei kandan he ebpekeseysey zutun te hadì ke hengkey is kehuluǥan dutun.
GEN 41:9 Ne zutun mid-uvayan duen te egalen te pereuwit te vinu sikan is hadì te Ehipto he egkaǥi te, “Netenuzan ku ǥuntaan is menge salè ku.
GEN 41:10 Netenuzan ku is kegkepeuki nu zengan kedì wey zuen te egalen te mememaal te supas, ne impepirisu key kenikew ziyà te valey te kepitan te menge vantey te turuǥan?
GEN 41:11 Sevaha zutun he kezukileman, neketeǥeinep key is dezuwa, ne nekedselekawà is kehuluǥan te teǥeinep dey.
GEN 41:12 Duen duma zey ziyà he kenakan he Hebriyuhanen, he suluǥuen te kepitan te menge vantey te turuǥan. Midtudtul zey kandin is menge teǥeinep dey ne midseysey zin kenami is kehuluǥan dutun.
GEN 41:13 Ne sumalà is kehuluǥan te kada sevaha ne iyan daan neulaula kenami, su siak, impelikù a kenikew kayi te zaan he terebahu ku ne sikan is sevaha, ne impevitey nu.”
GEN 41:14 Ne zutun mibpeveyaan te hadì si Jose, ne segugunà impeǥawas sikandin duen te pirisuwan. Hein nepesazan sikandin te ed-alut wey ebpemarbas, ne mid-ilis sikandin ne mid-etuvang diyà te hadì.
GEN 41:15 Ne migkaǥi is hadì diyà te ki Jose te, “Neketeǥeinep a piru wazà minsan hentei he ebpekeseysey te kehuluǥan din. Duen mibpenudtul kedì he metau ka he edseysey te kehuluǥan te menge teǥeinep.”
GEN 41:16 Ne midtavak si Jose te, “Kenà a iyan, Mahal he Hadì, kekenà, iyan dà is Megbevayà ebpekeveǥey te kehuluǥan te menge teǥeinep he meupiya para kenikew.”
GEN 41:17 Ne migkaǥi zutun te hadì is menge teǥeinep din diyà te ki Jose. Ke sikandin te, “Neteǥeinep ku he ziyà a edhithitindeg te veyvey te Wahig he Nilo.
GEN 41:18 Ne zuen neehè ku he pitu he menge vaka he memeupiya wey memelambù he migaun, ne mibpemenabtab te menge sagbet.
GEN 41:19 Ne netegteǥaad duen migaun daan he pitu he vaka he memezaat wey memeǥasà. Wazà a mekaahà te vaka kayi te tivuuk he ǥinhedian ku he Ehipto te iring dutun te utew mezaat.
GEN 41:20 Ne migkaan dutun te memezaat wey memeǥasà haazà is pitu he memelambù he nengehuna he migaun.
GEN 41:21 Piru hein nekaan dan en, kenà egketuusan he nekaan dan su memeǥasè ded gihapun sikandan. Ne zutun nepukew a.
GEN 41:22 Ne nekeuman a mekelipezeng ne neketeǥeinep ad maan he zutun duen neehè ku he senge puun te parey he trigu he pitu is pungu zin he utew memeupiya wey memetiugkey.
GEN 41:23 Ne zutun midlepew zaan is pitu he pungu he mid-ukap dà he nezeetan te keramag he ziyà ebpuun te edsilaan.
GEN 41:24 Ne haazà is menge pungu he mid-ukap, ne mid-eveleng dan is pitu he pungu he memeupiya. Ne impenudtul ku heini ziyà te menge selemengkiru, iyan, wazà minsan hentei kandan he nekeseysey kediey te kehuluǥan din.”
GEN 41:25 Ne migkaǥi zutun si Jose ziyà te hadì te, “Mahal he Hadì, sebsevaha zà is kehuluǥan duen te zezuwa he teǥeinep nu. Impezayag en kenikew te Megbevayà ke hengkey is ed-ul-ulahan din.
GEN 41:26 Su haazà is pitu he vaka he memelambù wey kes pitu he memetiugkey he menge parey ne sevaha zà is kehuluǥan din he iyan is pitu he tuig.
GEN 41:27 Ne haazà is pitu he vaka he memeǥasà wey memezaat wey haazà is pitu he pungu te parey he mid-ukap ne iyan ibpaalung dutun is pitu he tuig he vitil.
GEN 41:28 Ne haazà he egkehitavù ne iyan en kes migkaǥi ku kenikew, Mahal he Hadì, he impezayag en kenikew te Megbevayà ke hengkey is ed-ul-ulahan din.
GEN 41:29 Puun guntaan ebpekesunud is pitu he tuig he utew zekelà is uzar he parey zini te tivuuk he ǥinhedian te Ehipto.
GEN 41:30 Piru zuen daan pitu he tuig he vitil he ebpekesunud dutun te egkehuna he pitu he tuig ne tenged dutun egkelipatan en haazà is nehuna he menge tuig he zekelà is egkeenen su haazà is bitil ebpekezezaat kayi te tanà te Ehipto.
GEN 41:31 Ne tenged dutun te utew mepait he vitil, ne henduen be te wazà mekesaǥad is tig-Ehipto te zekelà he uzar.
GEN 41:32 Kezezuwa ipeteǥeinep te Megbevayà kenikew, Mahal he Hadì, su ibpesavut din he siguradu he ed-ul-ulahan din haazà wey meǥaan en utew is kegkeul-ulaha zuen.
GEN 41:33 “Umbe, Mahal he Hadì, kinahanglan he ebpen-ahaan nu is sevaha he etew he uluwanen para egkehimu he iyan edumala te tanà te Ehipto.
GEN 41:34 Ne kinahanglan daan he zuen ebpilien nu he menge egalen dini te tivuuk he Ehipto para ibpepenukut te ikelima he vahin te langun he egkeraǥun seled te pitu he tuig he zekelà is uzar.
GEN 41:35 Kinahanglan he ibeǥey nu kandan is keǥehem wey zan mekepenguwa te egkeenen dutun te menge tuig he meupiya is menge abut su wey zan ikepezerengdeng wey ikepeventayi kandan seled te menge inged.
GEN 41:36 Ne haazà is iderengdeng, ne egkehimu he iyan egkeenen te menge meǥinged dini te Ehipto emun ed-aǥi en is pitu he tuig he vitil, su wey kenà sikandan mengevitil.”
GEN 41:37 Ne haazà is hadì wey is menge upisyal zin, ingkesuat dan utew heini is sambag ni Jose.
GEN 41:38 Ne migkaǥi haazà is hadì diyà te menge upisyal zin te, “Wazè en duma pa he egkeehè tew he iring ki Jose su mid-ulinan iyan sikandin te Megbevayà.”
GEN 41:39 Ne migkeǥiyan din si Jose te, “Geina te iyan ka kes mibpezayaǥan te Megbevayà te langun kayi, nesavut dey he wazà duma pa he etew he metau wey zuen din kedsavut he iring kenikew.
GEN 41:40 Edhimuwen ku sikew he iyan ebayàbayà te turuǥan ku ne kinahanglan he ebpevayàbayà kenikew is minsan hentei he sakup ku. Iyan e zà lavew kenikew su iyan a hadì.”
GEN 41:41 Ne mid-uman megkaǥi is hadì diyà te ki Jose te, “Idsarig ku en kenikew ǥuntaan is kebayàbayà te tivuuk he ǥinhedian ku he Ehipto.”
GEN 41:42 Ne mibpul-ut dutun te hadì is sising din he iyan tuus te keǥehem din he insarig din ki Jose. Mibpesun-uzan din si Jose te utew mahal he manggad he meputì ne mibpevelieǥan din sikandin te rantey he vulawan.
GEN 41:43 Ne insuǥù din he ibpeuntud si Jose te ikezuwa he lavew he kerwahi zin, ne insuǥù din daan he zuen menge etew he edhuna ki Jose wey zan mekevensag te, “Luhud kew!” Ne iyan haazà neulaula hein insarig duen te hadì te Ehipto ki Jose is kebayàbayà te tivuuk he ǥinhedian din he Ehipto.
GEN 41:44 Ne migkeǥiyan te hadì si Jose te, “Minsan pa te iyan a sikan is hadì, wazà minsan hentei he menge sakup ku kayi te tivuuk he ǥinhedian ku he Ehipto he ebpekeulaula te minsan hengkey emun kenè nu idtuǥut.”
GEN 41:45 Ne migngezanan dutun te hadì si Jose te si Zafenat Panea, ne impepengesawa zin ki Asenat he anak ni Potifera he iyan lavew he memumuhat diyà te inged he On. Ne nehimu si Jose he gubirnedur te tivuuk he ǥinhedian te Ehipto.
GEN 41:46 Mibpenuiǥen dutun si Jose te 30 zutun te timpu te kedhimuwa kandin he lavew he upisyal te hadì. Ne mid-awà sikandin dutun te etuvangan te hadì ne midhipanew he midtukid din susiya is langun he menge inged diyà te Ehipto.
GEN 41:47 Ne zutun te netagnà he pitu he tuig he zekelà is uzar, dekelà iyan is menge abut dan diyà te menge tanè dan.
GEN 41:48 Ne heini he menge tuig, impetiǥum ni Jose is langun he nekulikta he ebpuun te menge neraǥun. Ne impezerengdeng din diyà te kada inged is menge neraǥun he ebpuun te menge vevesukà diyà te pelingut kayi.
GEN 41:49 Utew zekelà he parey he trigu is impezerengdeng ni Jose; iring kezekelà haazà is parey te pantad diyà te veyvey te zaǥat. Ne ǥeina te utew haazà dekelà mid-engkezan en ni Jose is kedtimbanga wey kebilanga zuen su kenè en egkengevilang.
GEN 41:50 Ne te wazè pa meuma sikan is pitu he tuig he vitil duen dezuwa he anak he maama ni Jose he in-anak te esawa zin he si Asenat, sikan is anak ni Potifera he memumuhat diyà te On.
GEN 41:51 Is kakey he anak ni Jose, ne migngezanan din ki Manase su ke sikandin te, “Geina te midhimu te Megbevayà he melipati ku is langun he menge keseengan ku wey is kebulunga ku te amey ku wey menge kezuzumahi ku.”
GEN 41:52 Ne haazà is hazi he anak din, migngezanan din ki Efraim su ke sikandin te, “Midhimu te Megbevayà he mebmeuswaǥen a zini te tanà he mezakel is menge kemereǥenan ku.”
GEN 41:53 Ne nepangkus haazà is pitu he tuig he utew zekelà is neraǥun diyà te Ehipto,
GEN 41:54 ne neume en haazà is pitu he tuig he vitil sumalà is netagnà ni Jose. Mibitil is menge meǥinged te minsan hendei he ǥinhedian, iyan, duen mulà egkeenen diyà te ǥinhedian he Ehipto.
GEN 41:55 Ne hein neǥezam en te langun he menge tig-Ehipto is bitil midhengyuan dan is hadì dan he veǥayi sikandan te egkeenen. Ne migkeǥiyan din sikandan te, “Hendiyè kew te ki Jose ne veeli niw is egkeǥiyen din.”
GEN 41:56 Ne hein nekeeneb en is bitil ziyà te tivuuk he ǥinhedian, mibpepuwasan ni Jose is menge budiga ne mibelegyà te egkeenen diyà te menge tig-Ehipto su utew en mepait is bitil ziyà te tivuuk he Ehipto.
GEN 41:57 Ne zuen menge etew he ebpuun te langun he menge zuma he ǥinhedian ne midhendiyè dan te Ehipto, su ebpemasa zan te egkeenen diyà te ki Jose, su mepait daan is bitil ziyà te minsan hendei he lugar.
GEN 42:1 Hein nezineg ni Jacob he zuen belegyà he egkeenen diyà te Ehipto, migkeǥiyan din is menge anak din he maama te, “Hengkey pa is edteǥazan niw?
GEN 42:2 Nezineg ku he zuen kun egkeenen diyà te Ehipto. Hendiyè kew ne pemasa kew te egkeenen su wey kiw kenà mebpatey kayi te vitil.”
GEN 42:3 Ne zutun midhendiyà te Ehipto is sepulù he kakey ni Jose su ebpemasa zan te egkeenen.
GEN 42:4 Wazà ni Jacob ibpezuma si Benjamin is hazi ni Jose te menge kakey zin, su egkahandek si Jacob kela ke zuen mezaat he egkeulaula ki Benjamin.
GEN 42:5 Ne midhendiyà is menge anak ni Jacob te Ehipto, ne zuen menge zuma zan he ziyà te zuma he inged su ebpemasa zaan te egkeenen, su bitil en diyà te tivuuk he Canaan.
GEN 42:6 Ne iyan si Jose gubirnedur te tivuuk he ǥinhedian te Ehipto, iyan sikandin ebelegyà te egkeenen diyà te tivuuk he menge meǥinged dutun. Ne zutun te kebpekeuma te menge kakey zin, midluhud dan diyà te etuvangan ni Jose he iyan kedtahud dan.
GEN 42:7 Ne zutun te naahà sikandan ni Jose, nekilala zin sikandan, piru henduen be te kenè din uvag egkengekilala ne midhenggeran din sikandan ne ke sikandin te, “Hendei kew ebpuun?” Ne midtavak dan te, “Diyè key ebpuun te Canaan, ne midhengkayi key su ebpemasa key te egkeenen.” Ne netenuzan din is menge teǥeinep din mehitenged kandan ne ke sikandin diyà te kandan te, “Teruen kew! Umbe midhendini kew su ed-ahaan niw is kebpekesavuk dey wey niw metueni ke egkezaag key keniyu!”
GEN 42:10 Ne midtavak dan te, “Es! Es! Kenà iyan, datù, su sikami is menge suluǥuen nu, iyan dey zà inhendini is kebpemasa te egkeenen.
GEN 42:11 Su menge anak key pudu te sevaha zà he etew. Kenè key teruen su sikami is menge suluǥuen nu, kenà iyan dey inhendini is kebpeniid!”
GEN 42:12 “A, teruen kew iyan,” ke si Jose, “su midhendini kew wey niw iyan maahà is kebpekesavuk dey wey niw metueni ke egkezaag key keniyu.”
GEN 42:13 Ne midtavak dan te, “Sikami, datù, is menge suluǥuen nu, ne sepulù key wey zezuwa he menge anak te sevaha zà he etew. Diyè pa is amey zey te Canaan. Diyà daan te kandin is hazi zey. Duen pa sevaha he hazi zey he minatey en.”
GEN 42:14 Ne midtavak si Jose te, “Tutuu ves iyan he kebpeniid dà is inhendini niw.
GEN 42:15 Egezaman ku sikiyu wey ku metueni ke tutuu ve is migkaǥi niw. Idsesapè ku he mintras uuyag pa is hadì te Ehipto ne kenè kew ebpekaawà kayi emun kenà edhendini is hazi niw.
GEN 42:16 Kinahanglan he ebpeveyaan te sevaha keniyu is hazi niw. Is duma keniyu ne ebpirisuwen ku su egezaman ku sikiyu wey ku metueni ke teruen kew. Su emun kenà tutuu is migkaǥi niw ne egketuenan ku he tutuu ves iyan he iyan inhendini niw is kebpeniid.”
GEN 42:17 Ne mibpirisu zin sikandan taman te tetelu he andew.
GEN 42:18 Ne zutun te iketelu he andew migkeǥiyan sikandan ni Jose te, “Duen ebpeveelan ku keniyu wey kew melibri su siak, edtahud a te Megbevayà.
GEN 42:19 Emun tutuu is migkaǥi niw, kinahanglan he itaǥak niw is sevaha keniyu te teltelesuled kayi ne ulì kew wey niw ikehated is egkeenen diyà te menge pemilya niw he egkengevitil.
GEN 42:20 Ne zumaha niw zini sikan is hazi niw su wey ku metueni he wazè kew medtarùtarù para kenè ku sikiyu ebpehimetayan.” Ne mibeelan dan haazà.
GEN 42:21 Ne pesikaǥi zan dutun te, “Umbe egkeulaula en heini kenitew su silut tenged te mid-ulaula tew ziyà te hazi tew he si Jose. Su minsan pa te utew sikandin nerasey wey midhengyuan kiw zin, midtengtengan tew zà ne wazè kiw mebpehangyù. Umbe edlised kiw en guntaan.”
GEN 42:22 Ne migkaǥi zutun si Reuben te, “Migkeǥiyan ku zengan sikiyu te, ‘Kenè niw pesipelahi is hazi tew? Piru wazè kew mebpemineg kedì. Umbe edsilutan kiw en guntaan tenged te kemetayen din.’ ”
GEN 42:23 Wazè dan metueni he egkesavut ni Jose is egkeǥiyen dan, su emun ebpekidlalag sikandin kandan ne zuen tigseysey zin.
GEN 42:24 Mid-awà dèpa si Jose ziyà te kandan su edsineǥew. Ne netetegteǥaad ne midlikù sikandin ne mid-uman mebpekidlalag kandan. Ne zutun mibpilì din si Simeon dutun te kandan ne impevakus din diyà te etuvangan dan.
GEN 42:25 Ne midsuǥù ni Jose is menge suluǥuen din he penua zan te keuyaǥan is menge saku te menge kakey zin ne insuǥù din daan he ieles diyà te saku te kada sevaha is selapì he imbayad din dutun, ne insuǥù din daan he veǥayi sikandan te lutù para te ked-ulì dan. Ne netuman is langun he insuǥù ni Jose.
GEN 42:26 Ne hein nepasad heini migkergahan dan is menge asnu zan te keuyaǥan, ne migenat dan.
GEN 42:27 Ne hein mezukilem en midhulavung dan diyà te sevaha he lugar. Ne mibengkasan te sevaha kandan is saku zin su ibpekaan din is asnu zin ne neehè din is selapì he imbayad din.
GEN 42:28 Ne migkeǥiyan din is menge suled din te, “Inlikù is imbayad ku! Su neketaǥù kayi te saku ku.” Ne zutun mibpengguyaan sikandan langun is mibpengulbaan. Mibpein-inseey sikandan te, “Hengkey vuwa heini is mid-ulaula te Megbevayà kenitew?”
GEN 42:29 Ne hein nekeulì dan diyà te amey zan he si Jacob he ziyà te Canaan midtudtulan dan sikandin te langun he neulaula kandan. Ke sikandan te,
GEN 42:30 “Sikan is gubirnedur he impevayàbayà te tivuuk he ginhedian, mid-eǥetan key zin he migkaǥi te iyan inhendiyè dey is kebpeniid kandan.
GEN 42:31 Piru midtavak dey sikandin te kenè key menge meniniid, ne tutuu is egkeǥiyen dey.
GEN 42:32 Migkaǥi key zaan he 12 key he teltelesuled he menge anak te sevaha zà he etew. Minatey is sevaha he hazi zey, ne ziyè ded mulà is sevaha te amey zey ziyà te Canaan.
GEN 42:33 Piru migkeǥiyan key zin te, ‘Egezaman ku sikiyu ke tutuu ve iyan is migkaǥi niw. Kinahanglan he itaǥak niw zini is sevaha keniyu ne ulì kew wey niw ikehated is keuyaǥan diyà te menge pemilya niw he egkengevitil.
GEN 42:34 Ne kinahanglan he edumahan niw is hazi niw kayi su wey ku metueni ke kenè kew teruen wey kenà kebpeniid dà is inhendini niw. Ne idlikù ku is sevaha he suled niw ziyan te keniyu, ne edtuǥutan ku sikiyu te kednigusyu zini te Ehipto.’ ”
GEN 42:35 Ne hein imbusbus dan is taǥù te menge saku zan neehè dan diyà te kada saku is selapì he imbayad te kada sevaha. Ne zutun te kegkaahaa ni Jacob wey is menge anak din te selapì dan ne utew zan migkulbai.
GEN 42:36 Ne migkaǥi si Jacob diyà te kandan te, “Pinaaǥi keniyu egkeewaan a te menge anak ku. Su minatey en si Jose, neewaan a ni Simeon, ne egkuwaan niw pe bes si Benjamin? Utew e en nerasey.”
GEN 42:37 Ne migkaǥi si Reuben diyà te amey zin te, “Amà, iyan e en metau ki Benjamin. Himetayi nu is menge anak ku he zezuwa emun kenè ku sikandin egkezuma te ed-ulì dini te kenikew.”
GEN 42:38 Piru midtavak si Jacob te, “Kenà egkehimu he ibpezuma ku keniyu si Benjamin. Minatey en is kakey zin ne iyan dà sikandin nesamà is sebsevaha. Kele ke zuen mezaat he egkeulaula kandin diyà te hipenawan, ne siak meǥurang e en, kela ke iyan ibpatey ku is kegkeseeng ku.”
GEN 43:1 Ne utew en mid-iseg haazà is bitil ziyà te Canaan.
GEN 43:2 Ne hein naamin dan en is egkeenen he migkuwa zan diyà te Ehipto migkaǥi si Jacob diyà te kandan te, “Hendiyè kew en maan wey kew mekepemasa te egkeenen tew minsan deisey zà.”
GEN 43:3 Ne midtavak si Juda te, “Haazà is gubirnedur, mibpeketelteleenan key zin he kenà egkehimu he ebpekeetuvang key ziyà te kandin emun kenè dey egkezuma is hazi zey.
GEN 43:4 Ne emun ibpezuma nu si Benjamin edhendiyè key ne ebpemasa key te egkeenen tew.
GEN 43:5 Iyan, emun kenè nu ibpezuma, ne kenè key zaan edhendiyà su migkaǥi sikan is gubirnedur he emun kenè dey egkezuma is hazi zey ne kenà egkehimu he ebpekeetuvang key ziyà te kandin.”
GEN 43:6 Ne migkaǥi si Jacob te, “Maan is midhimu niw he utew a meseeng? Maan is migkaǥi niw kandin he zuen niw pa hazi?”
GEN 43:7 Ne midtavak dan te, “Geina te mibpeniguduwan key zin insai mehitenged te pemilya tew. Ke sikandin te, ‘Uuyag pe be is amey niw? Duen niw pe be hazi?’ Umbe intug-an dey su wazè dey isipa he egkeǥiyen din he kinahanglan he edumahan dey pa is hazi zey ziyà te Ehipto.”
GEN 43:8 Ne zutun migkaǥi si Juda ziyà te amey zin he si Israel te, “Isarig nu kediey si Benjamin ne egenat key en guntaan su wey kiw kenà meumes te vitil.
GEN 43:9 Iyan a ebantey kandin ne iyan a ebpesarig kenikew he emun kenè ku sikandin igkeulì dini te etuvangan nu ne kediey he salà diyà te kenikew te wazà pidtemanan.
GEN 43:10 Angin ke wazè key mesanggen su kezezuwa key en pezem mekehendiyà wey mekeulì dini.”
GEN 43:11 Ne migkaǥi zutun is amey zan te, “Emun iyan en heeyan egkeulaula su wazà duma he paaǥi, ne zeyzey ke zuen edtinesen niw he menge meupiya he igasa he zini ebpuun te kenitew wey niw meuwit diyà te egalen dan. Uwit kew te menge bawì, teneb, penaket, menge perehemut, wey menge veǥas te kayu he pistasyu wey almindru.
GEN 43:12 Tekepa niw is selapì niw wey niw ikeulì haazà is selapì he neketaǥù diyà te menge saku niw su kela ke nesayep dan dà.
GEN 43:13 Ne zumaha niw zaan is hazi niw ne ǥaanggaan kew likù dutun te gubirnedur.
GEN 43:14 Berakat he pengelinteuwi te Mekeǥeǥehem he Megbevayà he mehizuwi kew zin su wey ituǥut din he mekeulì si Simeon wey si Benjamin. Ne siak, emun iyan imbanglis kediey he egkeewaan e pa te menge anak ku ne kinahanglan he ed-entusen ku.”
GEN 43:15 Ne zutun mibpenines dan is menge igasa zan ne midtakep dan is selapì dan. Migenat dan ne miduma zan si Benjamin pehendiyà te Ehipto, ne mibpekid-ehè dan te ki Jose.
GEN 43:16 Hein naahà sikandan ni Jose he nezuma zan si Benjamin, migkeǥiyan din is suluǥuen din te, “Dumaha nu heini is menge etew ziyà te valey ku. Lapè ka te uyaǥen wey susuba ka, su kayi sikandan ebpeniudtu zuma kedì.”
GEN 43:17 Ne midtuman dutun te suluǥuen is insuǥù kandin. Ne miduma zin sikandan diyà te valey ni Jose.
GEN 43:18 Ne utew sikandan nahandek dutun te kedumaha kandan diyà te valey ni Jose su neisip dan is, “Kela ke iyan indumaha kenitew kayi is tenged te selapì he neketaǥù diyà te menge saku tew zutun te nehuna he kedhendini tew. Kela ke edekepen kiw ne ed-uripenen kiw ne egkuwaan dan is menge asnu tew.”
GEN 43:19 Ne tenged dutun mid-uvayan dan haazà is suluǥuen ni Jose ne mibpekidlalag dan diyà te ǥemawan dutun te valey.
GEN 43:20 Ke sikandan te, “Datù, midhendini key zengan su mibpemasa key te egkeenen.
GEN 43:21 Piru hein nezukileman key ne nekehulavung key ziyà te sevaha he lugar, ne mibengkasan dey is menge saku zey, ne neehè dey zutun te menge saku zey sikan is selapì he impemasa zey te egkekaan. Heini zed, id-ulì dey.
GEN 43:22 Ne zuen selakew en maan he selapì dey ǥuntaan he ibpemasa te egkeenen. Wazè dey metueni ke hentei is midtaǥù te selapì diyà te menge saku zey.”
GEN 43:23 Ne midtavak is suluǥuen te, “Wazà kinahanglan he igkeseeng niw heeyan. Kenè kew mahandek. Is Megbevayè niw he Megbevayà te amey niw, iyan buwa mibeǥey keniyu te selapì diyà te menge saku niw, su nezawat ku man is selapì niw.” Ne mid-uwit din diyà te kandan si Simeon.
GEN 43:24 Impeseled din dutun sikandan te valey ni Jose ne mibeǥayan din sikandan te wahig he ibpenlùlù te menge paa zan. Ne migkumpayan din daan is menge asnu zan.
GEN 43:25 Ne mid-andam dan dutun is menge igasa zan ki Jose ke ed-ulì te meudtu su nezineg dan he ziyè din sikandan ibpekaan te valey zin.
GEN 43:26 Ne hein nekeuma si Jose, midluhud dan he iyan kedtahud dan kandin ne imbeǥey zan is menge igasa zan.
GEN 43:27 Ne nenginginsà si Jose kandan ke egkemenumenu zan en. Ne nenginginsè en maan sikandin te, “Egkemenumenu en is amey niw he meǥurang en he midtudtul niw zengan kedì? Uuyag pe be sikandin?”
GEN 43:28 Ne midtavak dan te, “Uuyag pa is amey zey wey meupiya zed daan sikandin.” Ne mid-uman dan medluhud su ibpeehè dan is kedtahud dan kandin.
GEN 43:29 Hein naahà ni Jose si Benjamin is lumunè din en te ǥetek, ke sikandan te, “Iyan be heini sikan is hazi niw he migkaǥi niw zengan kedì?” Ne migkeǥiyan din si Benjamin te, “Mama, berakat he tuvazi ka te Megbevayà.”
GEN 43:30 Ne zutun utew si Jose nerurunù te kebulunga zin te hazi zin. Migaanggaan sikandin med-awà dutun ne midseled diyà te ruǥu zin ne ziyà medsineǥew.
GEN 43:31 Ne hein netegteǥaad, mibpendapug ne midlikuan din is menge suled din ne midtigker zin is gehinawa zin ne ke sikandin diyà te menge suluǥuen te, “Isavuk niw en is egkeenen.”
GEN 43:32 Impedsisivey zan is egkeenan: is egkeenan ni Jose, is egkeenan te menge suled din, wey is egkeenan te menge etew zutun he tig-Ehipto. Su is menge tig-Ehipto kenè dan ebpekidtuǥen te menge Hebriyuhanen su utew haazà supak te menge vetasan dan.
GEN 43:33 Impemepinuu is menge suled ni Jose sumalà is idad dan puun duen te kakey kandan pehendiyà te hazi ne tenged dutun mibpetengtengtengè dan su utew zan nengeinuinu.
GEN 43:34 Duen menge idsezà he ebpuun te lemisahan ni Jose he impehated din diyà te kandan ne is imbeǥey ki Benjamin, ne kelelima metakep te kezekelà te imbeǥey ziyà te menge kakey zin. Ne migkaan dan ne mid-inum dan duma ki Jose ne mibmeupiya is gehinawa zan.
GEN 44:1 Ne zuen insuǥù ni Jose ziyà te suluǥuen din he ebayàbayà diyà te valey zin. Ke sikandin te, “Penua nu is saku te kada sevaha kandan sumalà is egkehenat te menge asnu zan, ne itaǥù nu is selapì he ibpemasa te kada sevaha ziyà te saku zin.
GEN 44:2 Ne haazà is saku te hazi zan, dutun nu itaǥù is tasa ku he pelata zuma te selapì din he ibpemasa zin te egkeenen.” Ne midtuman din haazà is insuǥù ni Jose.
GEN 44:3 Ne hein nepawà impeǥenat din en is menge suled ni Jose wey menge asnu zan.
GEN 44:4 Ne hein kenè pa utew meziyù is imbayè dan migkaǥi si Jose ziyà te suluǥuen din te, “Gègaani nu telukuni haazà is menge etew ne emun egkesaut nu, keǥiyi nu sikandan te, ‘Maan is utew mezaat is imbales niw te ǥaǥew te egalen ku?
GEN 44:5 Maan is migkuwa niw kes tasa he inumà te egalen ku he egemiten din te kebpenagnà? Kenà meupiya hini is mid-ulaula niw.’ ”
GEN 44:6 Ne nesaut din sikandan ne migkaǥi zin kandan haazà is impekaǥi kandin ni Jose.
GEN 44:7 Piru midtavak dan te, “Datù, maan is egkaǥi ka te iring keniyan? Kenà egkehimu he zuen ebeelan dey he iring te migkaǥi nu.
GEN 44:8 Netuenan nu en man he puun pa te Canaan, inlikù dey is neehè dey he selapì duen te saku zey ziyan te kenikew. Maan is egkinahanglan key pa te kebpenakew te selapì wey vulawan diyà te valey te egalen nu?
GEN 44:9 Emun duen kayi te kenami egkaahaan nu keniyan te tasa he nekaǥi nu, himetayi sikandin ne uripena key is duma.”
GEN 44:10 Ne midtavak haazà is suluǥuen ni Jose te, “Uya, emun duen minsan hentei keniyu he egkaahaan ku kayi ne ed-uripenen ku sikandin, ne is duma keniyu ne wazè din mulà televaken.”
GEN 44:11 Ne zutun migègaanan hew-asa te kada sevaha is saku zin ne mibengkasan din.
GEN 44:12 Ne zutun midsusi te suluǥuen is saku te kada sevaha puun dutun te kakey kandan pehendiyà te kineheziyan, ne ziyè din meturedu is tasa te saku ni Benjamin.
GEN 44:13 Ne hein naahà heini zutun te teltelesuled, mibindas dan is menge ugelingen dan tuus te utew zan kegkeseeng. Migkergahan dan en maan is menge asnu zan ne midlikù dan diyà te inged.
GEN 44:14 Ne hein nekeuma si Juda wey is menge suled din, ne zutun ded si Jose te valey zin. Midseled sikandan dutun te valey ne midluhud dan diyà te etuvangan ni Jose.
GEN 44:15 Migkeǥiyan ni Jose sikandan te, “Hengkey heini is mid-ulaula niw? Wazè niw ves metueni he metau a he edtagnà?”
GEN 44:16 Ne midtavak si Juda te, “Datù, wazè dey en igkepengetezengan kenikew, ne kenè dey zaan egkekaǥi he wazè dey salà. Iyan is Megbevayà mibpezayag te salè dey. Sikami is langun ne menge uripen key en kenikew wey kes naahaan nu zuen te tasa.”
GEN 44:17 Iyan, midtavak dutun si Jose te, “Kenà egkehimu he pudu kew ed-uripenen ku su kenà haazà metazeng he kukuman. Iyan dà ed-uripenen ku is sevaha he ziyà te kandin maahà kes tasa ku. Is duma keniyu ne egkehimu he ed-ulì kew ziyà te amey niw te wazà samuk.”
GEN 44:18 Ne zutun mid-uvayan si Jose ni Juda ne ke si Juda te, “Pekelalaglalag ka, datù, ne tuǥuti a kenikew is suluǥuen nu he mekekaǥi a ziyà te kenikew. Ne minsan pa te nekedrepeng kew te hadì te Ehipto ne kenà a kenikew mepeuki.
GEN 44:19 Dutun te nehuna he kedhendini zey, in-insè nu kenami te menge suluǥuen nu ke zuen dey pa amey wey hazi.
GEN 44:20 Ne midtavak key te duen dey iyan amey he meǥurang en utew wey zuen dey pa hazi he in-anak te meǥurang en utew is amey zey. Iyan dà sikandin nesamà te menge anak te iney zin su minatey en is kakey zin. Ne utew sikandin pinelanggà te amey zey.
GEN 44:21 Ne migkaǥi nu he kinahanglan he edumahan dey sikandin dini wey nu zaan maahà.
GEN 44:22 Ne migkaǥi key he kenà egkehimu he ed-ewaan din is amey zey su ebpatey is amey zey ke egkeewaan sikandin te hazi zey.
GEN 44:23 Ne iyan migkaǥi nu is: ‘emun kenè dey edumahan dini is hazi zey ne kenè en egkehimu he ebpekeetuvang key maan kenikew.’
GEN 44:24 Ne hein mid-ulì key ziyà te suluǥuen nu he amey zey midtudtul zey kandin haazà is migkaǥi nu.
GEN 44:25 Ne zuen timpu he migkaǥi is amey zey he kinahanglan he medlikù key kayi te Ehipto wey key mekepemasa en maan te egkeenen.
GEN 44:26 Ne migkaǥi key zutun he kenè key ebpekelikù. Wey key zà ebpekelikù ke egkezuma zey is hazi zey su migkaǥi key he kenà egkehimu he ebpekeetuvang key kenikew emun kenà ebpekezuma is hazi zey.
GEN 44:27 Ne zutun migkaǥi kenami is suluǥuen nu he amey zey, ke sikandin te, ‘Netuenan niw he zuen dezuwa he maama he in-anak te esawa ku.
GEN 44:28 Neewaan a te sevaha, ne migkaǥi ku zutun he siguradu midawi sikandin te kumekaid, ne taman en guntaan wazè ku en maan sikandin maahà.
GEN 44:29 Ne emun edumahan niw si Benjamin ne ke zuen mezaat he egkeulaula kandin, siak is uvanen en, tenged keniyu kenè en egkaawà is utew ku kegkeseeng taman te kenè e pa ebpatey.’
GEN 44:30 “Ne emun kenà ebpekezuma kenami is hazi zey ke ed-ulì key ziyà te amey zey, ne is amey zey emun kenè din egkaahà is anak din, ebpatey sikandin su iring te untung din heini is anak din. Ne sikami is menge suluǥuen nu, tenged kenami utew en egkeseeng is amey zey he uvanen en ne kenà egkaawà is seeng din taman te kenè pa sikandin ebpatey.
GEN 44:32 Siak is sevaha he suluǥuen nu, mibpesarig a ziyà te amey zey he wazà mezaat he egkeulaula te anak din he ke siak te, ‘Emun kenè ku sikandin igkeulì kayi ne kediey he salà diyà te kenikew te wazà pidtemanan.’
GEN 44:33 Ne pekelalaglalag ka ǥuntaan ne ituǥut nu he iyan a is suluǥuen nu ebpetaǥak kayi su iyan a ed-uripenen he id-ilis te hazi ku ne ipeulì nu zed sikandin duma is menge suled din.
GEN 44:34 Su kenà a ebpekeulì diyà te amey ku emun kenà ebpekezuma is hazi ku. Kenè ku egkaantus is utew gerabi he kegkeseeng te amey ku.”
GEN 45:1 Kenè en dutun egketigker ni Jose is gehinawa zin, umbe impeliǥawang din is menge suluǥuen din. Hein wazè en dutun menge etew he zuma ni Jose, mibepekilala sikandin te menge suled din.
GEN 45:2 Midsineǥew zutun si Jose, ne nezineg haazà te menge Ehiptohanen, ne netudtulan dutun is pemilya te hadì.
GEN 45:3 Migkaǥi si Jose ziyà te menge suled din te, “Iyan a si Jose! Uuyag pe be is amey ku?” Piru wazà meketavak dutun is menge kakey zin su utew zan netentani.
GEN 45:4 Ne zutun migkeǥiyan ni Jose is menge suled din te, “Uvey kew kayi te kedì.” Ne hein mid-uvayan dan en, ke sikandin te, “Iyan a sikan is suled niw he si Jose, kes imbelegyè niw ne mid-uwit dini te Ehipto.
GEN 45:5 Kenè kew meseeng, ne kenè kew mebasul te ingkevelegyà a keniyu kayi, su paaǥi heini te Megbevayà is impehuna a kayi para meluwas kew te mereǥen he ked-ubpà.
GEN 45:6 Dezuwe en he tuig is ked-aǥi te vitil zini te kenitew ne egkeumanan pa heini te lelima he tuig he wazà egkeraǥun te ebasuk.
GEN 45:7 Piru impehuna a zini te Megbevayà su ebpengelinteuwan din he kenè kew mebpatey te vitil ne zuen samà kenitew zini te kelibutan.
GEN 45:8 Umbe, kenè kew iyan mibpuwit kayi kedì, kekenà, iyan is Megbevayà. Midhimu e zin he peresambag te hadì kayi te Ehipto wey ibpezumala te pemilya zin, wey edumala te tivuuk he ginhedian te Ehipto.
GEN 45:9 Ne ǥuntaan, gaanggaan kew ulì diyà te amey tew ne keǥiya niw kandin he is anak din he si Jose ne midhimu te Megbevayà he iyan ebayàbayà te tivuuk he ginhedian te Ehipto. Ne keǥiyi niw sikandin te ibpeǥaanggaan ku ibpehendini.
GEN 45:10 Keǥiyi niw sikandin he egkehimu he ebpekeubpà sikandin diyà te inged he Goshen duma te menge anak din wey menge apù din, menge uyaǥen, wey is langun he menge azen din, para uvey zà sikandin kayi te kedì.
GEN 45:11 Ne emun diyè en sikandin te Goshen, ne ed-elimahan ku sikandin su zuen pa lelima he tuig he vitil he ebpeebuten. Kenè ku egkesuatan he egkeumes sikandin wey is menge pemilya zin ragkes is menge uyaǥen din.”
GEN 45:12 Ne impelaus ni Jose is menge lalag din te, “Guntaan, wazè en mekeeles keniyu, wey te suled ku he si Benjamin he tutuu iyan he iyan a si Jose is ebpekidlalag keniyu.
GEN 45:13 Keǥiya niw ziyà te amey ku is mehitenged te ketengdanan ku kayi te Ehipto wey is langun he neehè niw parti kedì, ne ǥègaani niw sikandin ipehendini te kedì.”
GEN 45:14 Ne zutun migkepkepan din is hazi zin he si Benjamin ne midsineǥawan din, ne midsineǥew zaan si Benjamin is egkepkep daan kandin.
GEN 45:15 Ne midhezekan ni Jose is langun he menge kakey zin he edsineǥaw sikandin. Ne zutun human mekepekidlalag kandin is menge suled din.
GEN 45:16 Ne hein netudtul haazà diyà te turuǥan te hadì te Ehipto he nemekeuma is menge suled ni Jose, utew nesuat kes hadì ne nesuat daan is menge upisyal zin.
GEN 45:17 Migkaǥi haazà is hadì diyà te ki Jose te, “Keǥiyi nu is menge suled nu he iyan ibpeulaula ku kandan is: ‘Kergahi zan is menge asnu zan ne med-ulì dan diyà te Canaan.
GEN 45:18 Ne dumaha zan is amey niw wey is menge pemilya zan dini te kediey. Ebeǥayan ku sikandan te utew meupiya he tanà dini te ǥinhedian ku he Ehipto. Ibpekaan ku sikandan te utew meupiya zini te ǥinhedian ku.’
GEN 45:19 Keǥiyi nu sikandan he med-uwit dan te menge kerumata he ebpuun kayi te Ehipto he egkeuntuzan te menge esawa zan wey te menge anak dan wey zan mekahalin dini. Ne uwita zan dini is amey zan.
GEN 45:20 Kenè dan menuǥuni is menge azen dan he egkengetaǥak dan su is menge meupiya he menge azen kayi te tivuuk he Ehipto ne egkaangken dan.”
GEN 45:21 Midtuman heini te menge anak ni Jacob. Ne sumalà te suǥù te hadì te Ehipto, impeuwit ni Jose is menge suled din te menge kerumata ne impelulutù din te egkekaan dan te edhipanew.
GEN 45:22 Mibeǥayan ni Jose te ed-ilisan is kada sevaha kandan; piru is imbeǥey zin ki Benjamin ne lelima he ed-ilisan wey 300 he elad he pelata.
GEN 45:23 Mibpeuwitan din daan is amey zin te 10 he asnu he migkergahan te menge meupiya he menge pruduktu te Ehipto, wey 10 he asnu he menge vehiyan he migkergahan te veǥas te trigu, supas, wey edlutuen te amey zan te kedhipanew.
GEN 45:24 Ne hein impeǥenat din is menge suled din, ke sikandin te, “Kenè kew mebpeeg-eǥetà diyà te zalan.”
GEN 45:25 Ne mid-awè dan diyà te Ehipto ne nekeuma zan diyà te amey zan he si Jacob diyà te Canaan.
GEN 45:26 Hein nekeuma zan diyà, midtudtulan dan is amey zan te uuyag pa si Jose, ne iyan sikandin ebayàbayà te tivuuk he ǥinhedian te Ehipto. Ne netentanan dutun si Jacob ne wazà mekekaǥi; henduen te kenà dutun ebpeketuu sikandin.
GEN 45:27 Piru hein midtudtulan dan sikandin te langun he migkaǥi ni Jose ziyà te kandan, wey hein neehè din is menge kerwahi he impeuwit ni Jose he ebpeuntuzan kandin wey mekehalin sikandin diyà te Ehipto, ne nekelikù is hustu he ked-isip-isip din.
GEN 45:28 Ne migkaǥi si Jacob te, “Nevenaran a human! Uuyag pe bes iyan is anak ku he si Jose! Edhendiyà a te kandin wey ku sikandin maahà te kenè e pa ebpatey!”
GEN 46:1 Ne zutun migenat si Jacob duma te pemilya zin, ne mid-uwit dan is langun he menge azen dan. Ne hein nekeuma zan diyà te Beersheba, mibpemuhat din is Megbevayà te amey zin he si Isaac.
GEN 46:2 Ne hein mezukilem, mibpaahà is Megbevayà ki Jacob. Ne mid-umew te Megbevayà si Jacob, ke sikandin te, “Jacob.” Ne midtavak si Jacob te, “Heini e zed.”
GEN 46:3 Ne ke sikandin te, “Megbevayà a; iyan a kes Megbevayà te amey nu. Kinahanglan he kenè ka mahandek he ebpehendiyà te Ehipto, su edhimuwen ku sikiyu he utew zekelà he nasyun.
GEN 46:4 Eduma a keniyu ke edhendiyè kew te Ehipto ne edhimuwen ku he mekeulì daan keuzemà is menge kevuwazan nu. Ne sikew, emun ebpatey ka ne iyan si Jose edleveng kenikew.”
GEN 46:5 Ne zutun, migenat en maan ensi Jacob he ebpuun te Beersheba, ne impeuntud dan sikandin te menge kerwahi he imbeǥey te hadì te Ehipto para kandin. Ne impeuntud dan daan is menge esawa zan wey menge anak dan.
GEN 46:6 Midtundan dan daan is langun he menge uyaǥen dan wey mid-uwit dan is menge ketiǥeyunan dan he nekuwa zan diyà te tanà he Canaan. Miduma ni Jacob pehendiyà te Ehipto is langun he menge kevuwazan din: is menge anak din wey menge apù din.
GEN 46:8 Iyan heini menge ngazan te menge Israilihanen he menge kevuwazan ni Jacob he midhendiyà te Ehipto: si Reuben is kinekekayan he anak ni Jacob,
GEN 46:9 ne is menge anak he maama ni Reuben ne iyan si Hanoc, si Palu, si Hezron, wey si Carmi.
GEN 46:10 Is menge anak he maama ni Simeon iyan ensi Jemuel, si Jamin, si Ohad, si Jakin, si Zohar, wey si Shaul ne iyan heini anak ni Simeon pinaaǥi te vahi he tig-Canaan.
GEN 46:11 Is menge anak he maama ni Levi ne iyan si Gershon, si Kohat, wey si Merari.
GEN 46:12 Is menge anak he maama ni Juda ne iyan si Er, si Onan, si Shela, si Perez, wey si Zera (piru si Er wey si Onan, diyè dan dà mebpatey te Canaan), ne zuen menge anak ni Perez he si Hezron wey si Hamul.
GEN 46:13 Is menge anak he maama ni Isacar ne iyan si Tola, si Pua, si Jashub, wey si Shimron.
GEN 46:14 Is menge anak he maama ni Zebulun ne iyan si Sered, si Elon, wey si Jaleel.
GEN 46:15 Iyan heini menge anak wey menge apù ni Jacob he in-anak ni Lea ziyà te inged he Padan Aram. Ne 33 is langun he menge kevuwazan ni Jacob wazà lavet te anak din he vahi he si Dina.
GEN 46:16 Is menge anak he maama ni Gad ne iyan si Zefon, si Hagi, si Shuni, si Ezbon, si Eri, si Arodi, wey si Areli.
GEN 46:17 Is menge anak he maama ni Asher ne iyan si Imnah, si Ishva, si Ishvi, si Beria, wey is etevey zan he si Sera. Duen menge anak ni Beria he iyan si Heber wey si Malkiel.
GEN 46:18 Menge kevuwazan heini ni Zilpa, is suluǥuen he imbeǥey ni Laban diyà te anak din he si Lea. Ne heini is 16 ne menge kevuwazan ded daan ni Jacob.
GEN 46:19 Is menge anak he maama ni Jacob pinaaǥi te esawa zin he si Raquel ne iyan si Jose wey si Benjamin. Is menge anak ni Jose, ne si Efraim wey si Manase. Diyà sikandan ianak te Ehipto. (In-anak sikandan ni Asenat, sikan is anak ni Potifera he iyan memumuhat diyà te inged he On.)
GEN 46:21 Is menge anak he maama ni Benjamin ne iyan si Bela, si Beker, si Ashbel, si Gera, si Naaman, si Ehi, si Rosh, si Mupim, si Hupim, wey si Ard.
GEN 46:22 Iyan sikandan kes 14 he menge anak wey menge apù ni Jacob diyà te ki Raquel.
GEN 46:23 Is anak he maama ni Dan ne iyan si Hushim.
GEN 46:24 Is menge anak he maama ni Naftali ne iyan si Jaziel, si Guni, si Jezer, wey si Shilem.
GEN 46:25 Menge kevuwazan heini ni Bilha, sikan is suluǥuen he imbeǥey ni Laban diyà te anak din he si Raquel. Pitu sikandan he menge kevuwazan daan ni Jacob.
GEN 46:26 Is kezakel te menge anak wey apù ni Jacob he midhendiyà te Ehipto ne 66 langun, kenà ragkes is menge esawa te menge anak din.
GEN 46:27 Is menge anak he maama ni Jose he in-anak diyà te Ehipto, ne zezuwa. Ne 70 is langun he menge kevuwazan ni Jacob dutun te timpu te kedseled dan diyà te Ehipto.
GEN 46:28 Si Jacob, ne impehuna zin si Juda ziyà te ki Jose su wey ikepenurù kandin is ibayà pehendiyà te tanà he Goshen. Ne hein nekeume en ensi Jacob diyà te tanà he Goshen,
GEN 46:29 impaandam ni Jose is kerwahi zin, ne mid-untud sikandin su egenat te kedtelavuk te amey zin diyà te Goshen. Ne hein nekeuma si Jose migkepkepan din is amey zin ne utew neuǥet is kedsineǥew zin.
GEN 46:30 Ne migkaǥi si Jacob diyà te anak din he si Jose te, “Egkehimu en ke ebpatey a su neehè ku en he uuyag ke pa iyan.”
GEN 46:31 Ne migkaǥi zutun si Jose ziyà te menge suled din wey ziyà te langun he menge sakup te amey zin te, “Edhendiyà a te hadì su kinahanglan he edlelaǥan ku sikandin te, ‘Sikan is menge suled ku wey is langun he menge sakup te amey ku nekeuma zan en dini te kediey he ebpuun te ed-ubpaan dan diyà te Canaan.’
GEN 46:32 Egkeǥiyan ku sikandin te, ‘Is menge maama, ne menge bekidu sikandan te menge uyaǥen, ne mid-uwit dan daan is langun he menge azen dan wey is langun he menge uyaǥen dan.’
GEN 46:33 Ne emun ibpeumew kew te hadì ne ed-insaan kew zin ke hengkey is terebahu niw,
GEN 46:34 kinahanglan he medtavak kew, ke sikiyu te, ‘Sikami is menge suluǥuen nu, menge bekidu key; puun dà te kedekdekelè dey su iyan daan heini ulaula te menge ginikanan dey.’ ” Ne ke si Jose te, “Dutun edtuǥutan kew zin he ed-ubpà diyà te tanà he Goshen, su is menge Ehiptohanen utew zan egkeepesi is minsan hentei he menge bekidu te menge uyaǥen.”
GEN 47:1 Ne midhendiyà si Jose te hadì te Ehipto ne ke sikandin te, “Nemekeume en is amey ku wey menge suled ku he ebpuun te tanà he Canaan, ne uwiten dan is langun he menge azen dan wey menge uyaǥen dan, ne ziyè dan en te Goshen.”
GEN 47:2 Impekilala zutun ni Jose te hadì is lelima zuen te menge suled din.
GEN 47:3 Ne mid-insaan sikandan dutun te hadì te, “Hengkey is terebahu niw?” Ne midtavak sikandan te, “Menge bekidu key te menge uyaǥen, iring te menge ginikanan dey.”
GEN 47:4 Ne migkaǥi zan daan te, “Midhendini key su zini key zèpa ed-ubpà su utew gerabi he vitil ziyà te Canaan, ne wazè en egkepenebtavan te menge uyaǥen dey. Pekelalaglalag ka he tuǥuti key he mekeubpè key ziyà te Goshen.”
GEN 47:5 Ne migkaǥi haazà is hadì diyà te ki Jose te, “Guntaan te nekeuma en is amey nu wey menge suled nu,
GEN 47:6 egkehimu he ebpekeubpà is pemilya nu kayi te Ehipto. Diyè nu ipeubpà sikandan te Goshen, he sevaha te meupiya he tanà te Ehipto. Emun duen nu netuenan kandan he egkeseriǥan, himuwa nu sikandan he menge bekidu te menge uyaǥen ku.”
GEN 47:7 Ne impeetuvang daan ni Jose is amey zin he si Jacob ne impekilala zin dutun te hadì, ne mibpenubtuvazan ni Jacob haazà is hadì.
GEN 47:8 Mid-insaan dutun te hadì si Jacob, ke sikandin te, “Pira, anggam, is penuiǥen nu?”
GEN 47:9 Ne midtavak si Jacob te, “130 en is penuiǥen ku. Mevavè dà is kedì he untung ne mereǥen is neulaula ku. Is keluǥayad te kedì he untung ne kenà ebpekerepeng te keluǥayad te untung te menge kepuun ku.”
GEN 47:10 Ne zutun, mibpenubtuvazan en maan ni Jacob haazà is hadì ne mid-ewaan din.
GEN 47:11 Ne mibeǥayan ni Jose is amey zin wey is menge suled din te utew memeupiya he tanà diyà te Ehipto ziyà te tanà he Rameses sumalà is insuǥù kandin dutun te hadì.
GEN 47:12 Ne is amey zin, is menge suled din, wey is langun he menge sakup te amey zin ragkes te menge vatà, ne midsupurtar ni Jose te egkeenen.
GEN 47:13 Ne zutun, mid-iseg pa utew is bitil, umbe wazè en keuyaǥan diyà te minsan hendei he lugar. Is menge meǥinged diyà te Ehipto wey ziyà te Canaan, ne utew zan midlised tenged dutun te vitil.
GEN 47:14 Midtiǥum ni Jose is langun he selapì te menge tig-Ehipto wey tig-Canaan he ingkepemasa zan te keuyaǥan. Ne haazà is selapì, mid-uwit ni Jose ziyà te turuǥan te hadì.
GEN 47:15 Ne hein naamin en is selapì te menge tig-Ehipto wey menge tig-Canaan, midhendiyà te ki Jose is langun he menge tig-Ehipto. Ke sikandan te, “Wazè dey en selapì. Beǥayi key te keuyaǥan su henduen be te ebpatey key en te kegkevitil.”
GEN 47:16 Migkaǥi si Jose te, “Emun wazè niw en selapì, uwita niw zini is menge uyaǥen niw ne egkehimu he idliwè niw te keuyaǥan.”
GEN 47:17 Ne zutun mid-uwit dan diyà te ki Jose is menge uyaǥen dan he menge kudà, asnu, vaka, wey kerehidu, ne inliwè dan haazà diyà te ki Jose te keuyaǥan. Ne pinaaǥi kayi te kedliwaa zan te menge uyaǥen dan midhimu ni Jose he kenè dan bitila taman te senge tuig.
GEN 47:18 Kedlavey te senge-tuig, midhendiyè en maan is menge etew te ki Jose, ke sikandan te, “Wazà mekeeles kenikew he wazè dey en selapì, ne is menge uyaǥen dey diyan en te kenikew. Wazè en nesamà kenami, gawas te lawa zey wey tanà.
GEN 47:19 Umbe tevangi key he kenè key mebpatey wey kenè dey mevey-ani is menge tanè dey. Ebpezumazuma key he egkehimu he menge uripen te hadì wey mekuwa zin is menge tanè dey asal zà duen dey keuyaǥan. Beǥayi key en te menge venì he ibpemula zey su wey key kenà mebpematey wey kenè dey mevey-ani is menge tanè dey.”
GEN 47:20 Umbe imbelegyà te langun he tig-Ehipto is menge tanè dan diyà te ki Jose tenged te utew mepait he vitil. Ne mibpemasa ni Jose haazà is langun he menge vevesukà diyà te Ehipto su wey meǥaked te hadì.
GEN 47:21 Pinaaǥi zutun midhimu ni Jose he menge suluǥuen te hadì is menge etew ziyà te tivuuk he tanà te Ehipto.
GEN 47:22 Iyan dà tanà he wazè din mekuwa sikan is gaked te menge memumuhat su zuen layun idsuhul kandan te hadì ne tenged dutun wazè dan mulà bitila ne wazè dan ikevelegyà is tanè dan.
GEN 47:23 Ne zuen migkaǥi ni Jose ziyà te menge etew, ke sikandin te, “Guntaan te nepemasa ku en sikiyu wey is menge tanè niw he para te hadì, ebeǥayan ku sikiyu te venì wey kew mekepemula.
GEN 47:24 Ne emun edraǥun kew en, iveǥey niw ziyà te hadì is ikelima he vahin te egkeraǥun niw. Ne keniyu en haazà is nesamà, para zuen niw igkepemula wey zuen daan keuyaǥan te tivuuk he pemilya niw.”
GEN 47:25 Ne midtavak dan te, “Datù, utew meupiya is mibeelan nu kenami, su midlibri key kenikew. Ne ebpezumazuma key he egkehimu he menge uripen te hadì.”
GEN 47:26 Umbe midhimu ni Jose is belaud diyà te tanà te Ehipto he is ikelima he vahin te egkeraǥun ne para te hadì. Heini he velaud kemulu pa taman en guntaan. Iyan dà wazà maangken te hadì is tanà te menge memumuhat.
GEN 47:27 Is menge kevuwazan ni Israel, ne ziyè dan med-ubpà te tanà he Goshen he sakup te Ehipto. Nekaangken sikandan te menge tanà dutun ne mibmezakel zan utew.
GEN 47:28 Si Jacob, ne 17 he tuig is ked-ubpè din diyà te Ehipto ne is keluǥayad te untung din, ne 147 he tuig.
GEN 47:29 Hein egkeǥezam din he meǥaan en sikandin egkeumuri, mid-umew zin si Jose, ne ke sikandin diyà te kandin te, “Emun egkehimu isavuk nu is belad nu kayi te laang ku, ne penangdù ka he ipeehè nu he kenà egkaawà is gaǥew nu kedì. Kenà a ileveng kayi te Ehipto.
GEN 47:30 Emun ebpatey ad, ne ileveng a kenikew ziyà te penlevengà te menge kepuun ku.” Ne midtavak dutun si Jose te, “Uya, edtumanen ku is intelaan nu kediey.”
GEN 47:31 Ne migkaǥi si Jacob te, “Penangdù ka kediey he edtumanen nu iyan heini.” Ne mibpenangdù si Jose. Ne zutun midlangkeb si Jacob dutun te hizeǥaan din su ebpeselamat te Megbevayà.
GEN 48:1 Neuma is timpu he netudtulan si Jose he edezaru is amey zin he si Jacob. Umbe miduma zin is dezuwa he anak din he si Manase wey si Efraim ne midhendiyà dan te amey zin.
GEN 48:2 Hein netudtulan si Jacob he nekeuma is anak din he si Jose, midteǥel sikandin med-enew ne mibpinuu ziyà te hizeǥaan din.
GEN 48:3 Ne migkaǥi si Jacob diyà te ki Jose te, “Mibpaahà dengan kediey is Mekeǥeǥehem he Megbevayà diyà te inged he Lus he ziyà te Canaan ne zutun midtuvazan e zin.
GEN 48:4 Ke sikandin te, ‘Ebeǥayan ku sikew te mezakel he menge kevuwazan su wey ka mehimu he amey te mezakel he menge etew. Ne ibeǥey ku heini is tanà te Canaan diyà te menge kevuwazan nu, ne egkehimu heini he kandan te taman te taman.’ ”
GEN 48:5 Ne ke si Jacob en maan te, “Ne ǥuntaan, sikan is dezuwa he anak nu he maama he kayi ianak te Ehipto te wazè e pa mekeuma zini, ne egkeragkes sikandan te kediey he menge anak. Kediey en si Efraim wey si Manase, iring te menge anak ku zaan si Reuben wey si Simeon.
GEN 48:6 Ke zuen menge anak nu he wazè pa ianak ne kenikew mulà. Ke zuen menge kevuwazan dan ne elin ebpekepengevilin te menge azen he ebpuun ki Efraim wey ki Manase.”
GEN 48:7 Ne zutun migkaǥi pa maan sikandin te, “Egketenuzan ku is kebpatey te iney nu. Ebpuun key zengan diyà te Padan ne midhipanew key pehendiyà te tanà te Canaan. Hein uvey key en diyà te Efrat ne minatey sikandin, umbe ziyè ku zà sikandin ileveng te kilid te zalan pehendiyà te Efrat.” (Ne haazà is inged he Efrat ne iyan guntaan inged he Betlehem.)
GEN 48:8 Ne hein naahà ni Israel is dezuwa he anak ni Jose, mid-insà sikandin te, “Hentei heini?”
GEN 48:9 Ne midtavak si Jose te, “Iyan en heini, amà, sikan is menge anak ku he imbeǥey kediey te Megbevayà.” Ne migkaǥi si Israel te, “Ipeuvey nu sikandan kayi su wey ku sikandan mepenubtuvazi.”
GEN 48:10 Egkezeetan en dutun is menge mata ni Israel su utew en sikandin meǥurang, ne tenged dutun henduen te kenè en sikandin ebpekaahà, umbe impeuvey ni Jose is menge anak din diyà te ki Israel. Ne midhezekan wey migkepkepan sikandan ni Israel.
GEN 48:11 Ne migkaǥi si Israel ziyà te ki Jose te, “Kunaan ku zengan ke kenè ku en sikew egkaahà, piru ǥuntaan intuǥut te Megbevayà he kenà iyan ke zà neehè ku, kekenà, elin daan is menge anak nu.”
GEN 48:12 Ne migkuwa ni Jose is menge anak din he midsekepu ni Israel, ne midlangkeb sikandin he iyan kedtahud din te amey zin.
GEN 48:13 Ne zutun impeuvey en maan ni Jose is menge anak din diyà te apù dan su wey mepenubtuvazi sikandan. Ne ziyà si Efraim te egkekewanan ni Jose, ne si Manase ziyà te egkeǥivang ni Jose.
GEN 48:14 Ne si Israel, impedlambid din is menge velad din ne ingkawè din is kewanan he velad din ne indampè din te purù ni Efraim minsan pa te iyan si Efraim hazi. Ne is givang he velad din indampè din diyà te purù ni Manase he iyan sikan is kakey.
GEN 48:15 Ne zutun mibpenubtuvazan din sikandan ke sikandin te, “Berakat he ebpenubtuvazan heini he menge vatà te Megbevayà he ed-ezapen te menge kepuun ku he si Abraham wey si Isaac, kes Megbevayà he mid-elima kedì te tivuuk he untung ku taman en guntaan.
GEN 48:16 Ne verakat he tuvazi zaan sikandan duen te velinsuǥuen he midlibri kedì te langun he menge kezeetan. Berakat he kenà a melipati wey is menge kepuun ku he si Abraham wey si Isaac. Berakat he mebmahabet utew is menge kevuwazan dan dini te kelibutan.”
GEN 48:17 Ne hein naahà ni Jose he indampè te amey zin is kewanan he velad din diyà te purù ni Efraim, wazè din haazà mesuati umbe migewezan din is kewanan he velad te amey zin su wey iyan din mezampà is purù ni Manase.
GEN 48:18 Migkaǥi si Jose te, “Amà, kenà haazà hustu. Su iyan heini kakey; kinahanglan he iyan nu sikandin edempaan te kewanan.”
GEN 48:19 Piru midtavak is amey zin te, “Uya, mama, netuenan ku. Is menge kevuwazan ni Manase egkehimu he egkevantug ded daan he menge etew. Piru egkelewanan sikandin ni Efraim su egkehimu he utew bentuǥan is menge kevuwazan din, ne egkehimu sikandan he mezakel he menge grupu te menge etew.”
GEN 48:20 Umbe midhimu zin he lavew si Efraim ki Manase. Ne zutun he andew, mibpenubtuvazan din sikandan he egkaǥi te, “Egemiten te menge Israilihanen is menge ngazan niw te kebpenuvadtuvad. He egkaǥi te, ‘Berakat he tuvazi kew te Megbevayà he iring ki Efraim wey ki Manase.’ ”
GEN 48:21 Ne zutun migkaǥi si Israel ziyà te ki Jose te, “Meǥaan en is kebpatey ku, iyan, edumahan kew zed te Megbevayà, ne ibpeulì din ded keuzemà is menge kevuwazan tew ziyà te tanà he mid-ubpaan te menge kepuun tew.
GEN 48:22 Ne sikew Jose is ebpekepenunud te Shekem kenà is menge suled nu. Heeyan he lugar ne naaǥew ku te kebpekidtebek ku te menge Amorihanen.”
GEN 49:1 Ne zutun mid-umew ni Jacob is menge anak din, ne ke sikandin te, “Pen-uvey kew kayi su wey ku sikiyu mekeǥiyi ke hengkey is egkeulaula keniyu keuzemà.
GEN 49:2 Sikiyu is menge anak ku, uvey kew wey pemineg kew te menge lalag ku te amey niw.
GEN 49:3 “Sikew Reuben, is kinekekayan he anak ku, iyan ka nehuna he veǥas te kegkemaama ku. Edhuna is kegkeventuǥa wey kedtehuza kenikew te menge suled nu.
GEN 49:4 Piru iring ka te edìdì he wahig, su kenè nu egkeeǥen is kegkeiveg nu. Umbe mibpekidhilavet ka te esawa ku he suluǥuen, kenè ke en maan lavew te zuma.
GEN 49:5 “Sikiyu Simeon wey Levi, ebpeked-iring kew su egemiten niw is gumaan niw te kebpendaagdaag.
GEN 49:6 Kenà a edtampu etawa edtelavuk te menge kevurunan niw su tenged te kegkepauk niw ne ebpenhimetayan niw is menge etew, ne emun meupiya is gehinawa niw ne ebpiangan niw is menge vaka.
GEN 49:7 Edrewakan ku sikiyu tenged te kegkepauk niw he utew subra. Ebpedsusuwayen ku is menge kevuwazan niw kayi te Israel.
GEN 49:8 “Sikew Juda, edeliǥen wey edtehuzen ka te menge suled nu. Ne egkezaag nu is menge kuntada nu.
GEN 49:9 Iring ka te nati he erimaung he ebpekaahà te edewiyen din, ne edlikù sikandin diyà te elesè din, ne ziyà sikandin edleku. Ne wazà minsan hentei he ebpekesamuk kandin.
GEN 49:10 Pedayun ka he edumala, Juda. Ebpuun te kevuwazan nu is egkehimu he menge sineriǥan. Umbe ebeǥey is menge nasyun te vuhis diyà te kenikew wey ebpevayèbayè dan kenikew.
GEN 49:11 Ne utew uuzaran is tanè nu; umbe minsan pa ke idtagkes nu is asnu ziyà te ǥawed he paras he utew merapung, ne kenè din pa egkeamin te edtabtab tenged te kehabet din. Ne minsan pa ke ibpemìpì nu pa is binu ne kenè pa heini egkaamin.
GEN 49:12 Umbe te subra he ked-inum nu te vinu, ne ebmeziǥà is mata nu. Ne tenged daan te subra he ked-inum nu te ǥatas, ne ebmeputì is ngipen nu.
GEN 49:13 “Sikew Zebulun, ed-ubpè ka ziyà te veyvey te zaǥat. Ne is kenikew he lugar ne egkehimu he zungguan te menge untuzà. Ne is kenikew he tanà ne taman diyà te Sidon.
GEN 49:14 “Sikew Isacar, iring ka te utew mezesen he asnu piru edleku ke zà diyà te ubpeey te menge kerehidu.
GEN 49:15 Ed-entusen nu is ked-uripena kenikew minsan pa ke ibpetiang ka te meveǥat wey ebpeǥesen ka he edterebahu, asal meupiya wey uuzaran is lugar he egkeubpaan nu.
GEN 49:16 “Sikew Dan, ne metazeng he kukuman is ibeǥey nu ziyà te menge sakup nu he sevaha he tribu te menge Israilihanen.
GEN 49:17 Egkeiring ka te uled diyà te zalan he ebpemengaǥat te paa te kudà, ne egkeulug is ed-untud dutun.”
GEN 49:18 Ne migkaǥi si Jacob te, “He Nengazen, edteǥad a te kedlibri nu.”
GEN 49:19 Ne impelaus ni Jacob is egkeǥiyen din, ke sikandin te, “Sikew Gad, edsurungen ka te grupu te menge tulisan, piru edel-asen nu sikandan dutun te kebpelaǥuy zan, ne ebelesan nu sikandan.
GEN 49:20 “Sikew Asher, egkehimu ka he uuzaran. Ebpekeraǥun ka te menge keenen he para te menge dungganen he menge etew.
GEN 49:21 “Sikew Naftali, iring ka te impelayud he selazeng he utew memekempet is menge nati zin.
GEN 49:22 “Sikew Jose, iring ka te meseǥila he asnu he ziyà te kilid te serebseb etawa ziyà te kelendiǥan.
GEN 49:23 Edumutan ka te menge mememanà. Ne ebpenaan ke zan tenged te kegkeuringer zan,
GEN 49:24 piru edsiguduwan nu zaan sikandan ebpenaa. Ne kenà egkeewaan te zesen is beklawan nu, tenged te tavang te Gemhanan he Megbevayè ku he ebantey wey eputà he vatu te Israel.
GEN 49:25 Iyan sikandin kes Mekeǥeǥehem he Megbevayà he ed-ezapen te menge kepuun nu he edtavang wey ebpenuvadtuvad kenikew. Ebeǥayan ke zin te uzan wey wahig diyà te serebseb. Ebeǥayan ke zin daan te mezakel he menge anak wey menge uyaǥen.
GEN 49:26 Guntaan, utew pa mezakel is menge ibpenuvadtuvad ku; lavew pa te meupiya he menge vuvungan he utew uuzaran. Berakat he mezawat nu heini he menge penuvadtuvad, Jose–iyan ka lavew te menge suled nu.
GEN 49:27 “Sikew Benjamin, iring ka te zumezaas he asu, he maandew wey mezukilem is kebpenhimatey zin wey kegkaan.”
GEN 49:28 Iyan heini sikan is 12 he anak ni Jacob he menge tribu te Israel. Ne iyan haazà menge petizaan ni Jacob te kada sevaha kandan.
GEN 49:29 Ne zutun duen intelaan ni Jacob diyà te menge anak din, ke sikandin te, “Meǥaan e en ebpekaamur te menge kepuun ku he nemematey en. Ne emun egkehitavù en heini, ne ziyà a keniyu ileveng te surung duma te menge kepuun ku he ziyà te vevesukà ni Efron he Hitihanen.
GEN 49:30 Haazà he vevesukà ne ziyà te Macpela, he ebpekesinaru te inged he Mamre, he sakup te Canaan. Mibpemasa ni Abraham haazà is bevesukà diyà te ki Efron he Hitihanen su wey zuen penlevengè din.
GEN 49:31 Diyà ileveng si Abraham wey is esawa zin he si Sara, ne ziyà daan ileveng is amey ku he si Isaac wey is iney ku he si Rebeka, ne ziyè ku zaan ileveng si Lea.
GEN 49:32 Iyan haazà sikan is surung wey vevesukà he mibpemasa zengan diyà te menge Hitihanen.”
GEN 49:33 Ne hein nepasad ni Jacob is menge idtelaan din te menge anak din, mid-ayun sikandin medhizeǥà diyà te hizeǥaan ne minatey sikandin. Ne nekaamur sikandin te menge kepuun din he nemematey en.
GEN 50:1 Ne zutun midlingketawan ni Jose is amey zin ne midsineǥawan din wey midhezekan din.
GEN 50:2 Ne midsuǥù din dutun is menge perebelsamar he belsemara zan is lawa te amey zin. Umbe mibelsamar zan dutun is lawa ni Jacob.
GEN 50:3 Ne 40 he andew is keluǥayad te kebelsemara zan su iyan haazà hustu he keluǥayad te kebelsemar te minatey. Ne 70 he andew is kedlalew te menge Ehiptohanen tenged ki Jacob.
GEN 50:4 Ne hein netapus haazà is timpu te kedlalew zan, midlelaǥan ni Jose is menge upisyal te hadì te Ehipto, ke sikandin te, “Emun egkehimu ne lelaǥi niw is hadì
GEN 50:5 he tuǥuti e zin te kedleveng te amey ku ziyà te Canaan. Su zuen intelaan kediey te amey ku, ne impepenangdù e zin he ke sikandin te, ‘Emun ebpatey a kinahanglan he ziyà a kenikew ileveng te penlevengà he zaan he mid-andam ku ziyà te tanà he Canaan.’ Ne emun egkepasad is kedlevenga kandin, ne edlikù e zed dini.”
GEN 50:6 Ne hein netuenan duen te hadì, ne midtavak sikandin te, “Tumana nu is impenangdù nu ziyà te amey nu. Ne ǥenat kad ne ileveng nu en sikandin.”
GEN 50:7 Ne zutun migenat si Jose, ne miduma kandin is mezakel he menge upisyal te hadì te Ehipto, wey is menge lavew he menge sineriǥan din wey is langun he menge ebmeǥurangen te tivuuk he tanà te Ehipto.
GEN 50:8 Ne miduma zaan is langun he menge sakup ni Jose, is menge suled din wey is menge sakup te amey zin. Ne iyan dà nesamà diyà te Goshen is menge anak dan wey is menge uyaǥen dan.
GEN 50:9 Duen daan mibpemen-untud te kudà wey kerwahi he mibpemenduma, ne utew zan mezakel is midhendiyà.
GEN 50:10 Ne hein nekeuma sikandan diyà te ǥunasà diyà te Atad he uvey te Wahig he Jordan, ne midlalew sikandan para ki Jacob, ne utew subra is kedlelendag dan. Ne midlalew si Jose seled te pitu he andew.
GEN 50:11 Ne is menge tig-Canaan he meǥinged dutun, hein neehè dan is ebpemenlelendag dutun te gunasà diyà te Atad, ne migkaǥi zan te, “Utew neseeng is menge Ehiptohanen.” Ne tenged dutun haazà is inged he uvey te Wahig he Jordan ne migngezanan te Abel Mizraim, he ke và dà egkeǥiya, midlelendaǥan te menge Ehiptohanen.
GEN 50:12 Midtuman te menge anak ni Jacob is intelaan din kandan.
GEN 50:13 Ne mid-uwit dan is lawa zin diyà te Canaan ne inleveng dan diyà te surung he ziyà te vevesukà te Macpela, diyà te edsilaan te Mamre. Heini he vevesukà mibpemasa ni Abraham diyà te ki Efron he Hitihanen, su ebeelan din he penlevengà.
GEN 50:14 Ne si Jose, hein nepasad en haazà is kedlevenga te amey zin, mid-ulì sikandin diyà te Ehipto zuma te menge suled din wey is langun he menge etew he miduma kandin te kedleveng te amey zin.
GEN 50:15 Ne haazà is menge suled ni Jose, dutun te minatey en is amey zan, pesikaǥi zan te, “Kela ke ebelesan kiw en ni Jose tenged te mezaat he mid-ulaula tew zengan kandin.”
GEN 50:16 Ne tenged dutun duen surat he impeuwit dan diyà te ki Jose he edhenduen te, “Is amey tew, te wazè pa sikandin mebpatey intelaan din kenami
GEN 50:17 he megkaǥi key ziyan te kenikew te egkeǥiyen din kenikew he iyan is: ‘Edhengyuan ku sikew, mama, he peseyluwa nu is salà wey mezaat he mid-ulaula kenikew te menge kakey nu su mibpesipelahan ke zan,’ ke sikandin. Ne sikami zaan is menge suluǥuen te Megbevayà te amey tew, edhengyuan dey sikew he peseyluwa nu is salè dey kenikew.” Ne hein nekeuma heini is surat diyà te ki Jose, mibpenluluhaan sikandin su nerurunù.
GEN 50:18 Ne zutun nemekeuma is menge suled din ne midlangkeb dan diyà te etuvangan din. Ke sikandan te, “Menge uripen key en kenikew.”
GEN 50:19 Piru midtavak si Jose ziyà te kandan te, “Kenè kew mahandek. Kenè ku sikiyu ebelesan su kenà egkehimu he iyan a ed-ilis te Megbevayà!
GEN 50:20 Su minsan pa te mezaat is tuyù niw kediey, mibpengelinteuwan te Megbevayà he meupiya is pangkus din. Su impelavew e zin su wey kiw is mezakel melibri ne kenà meumes.
GEN 50:21 Umbe kenè kew mahandek su ed-elimahan ku sikiyu wey is menge anak niw.” Iyan heini menge lalag din kandan he menayù su wey mekesarig dan kandin.
GEN 50:22 Ne si Jose wey is langun he menge sakup wey kevuwazan te amey zin, diyè dan med-ubpà te Ehipto. Is keluǥayad te untung ni Jose 110 he tuig.
GEN 50:23 Neseutan pa sikandin te menge apù din te veul he menge kevuwazan ni Efraim. Ne neseutan pa zaan sikandin te menge apù din he menge anak ni Makir he anak ni Manase.
GEN 50:24 Duen timpu he migkaǥi si Jose ziyà te menge suled din te, “Meǥaan en is kebpatey ku, piru kenà egkehimu he kenè kew en edtevangan te Megbevayà. Ne ibpaawè kew zin ded kayi he tanà, ne ibpeulì kew zin diyà te tanà he impesarig din te menge kepuun tew he si Abraham, si Isaac, wey si Jacob.”
GEN 50:25 Ne zutun, impepenangdù ni Jose is menge Israilihanen. Ke sikandin te, “Ipenangdù niw he emun ibpeawè kew en te Megbevayà kayi he lugar ne uwita niw is menge tulan ku.”
GEN 50:26 Ne hein 110 en is penuiǥen ni Jose ne minatey sikandin. Mibelsamar zan is lawa zin ne insavuk dan diyà te lungun diyà te Ehipto.
EXO 1:1 Iyan heini menge ngazan te menge maama he anak ni Jacob he miduma kandin diyà te Ehipto, duma te menge pemilya zan:
EXO 1:2 Si Reuben, si Simeon, si Levi, si Juda,
EXO 1:3 si Isacar, si Zebulun, si Benjamin,
EXO 1:4 si Dan, si Naftali, si Gad, wey si Asher.
EXO 1:5 Ne 70 langun is kevuwazan ni Jacob he nemenduma kandin diyà te Ehipto, ragkes en si Jose he zaan en he ziyà te Ehipto.
EXO 1:6 Neuma is timpu he minatey si Jose wey is langun he menge suled din. Midlavey haazà he lapis te kevuwazan,
EXO 1:7 piru meǥaan dà nevuwad is menge kevuwazan dan, ne utew en subra is kahabet dan, umbe nekeeneb en sikandan dutun te tanà te Ehipto he neubpaan dan.
EXO 1:8 Ne zuen beǥu he nehimu he hadì diyà te Ehipto he wazà mesayud mehitenged ki Jose.
EXO 1:9 Ne migkeǥiyan din is menge sakup din te, “Ahaa niw man! Ebpemiligru kiw su utew en subra is kahabet te menge kevuwazan ni Israel.
EXO 1:10 Kinahanglan he zuen tew paaǥi he para kenà sikandan medsigudu mebmahabet, su wey zan kenà mekesukul kenitew pinaaǥi te kedtampu te menge etew he ebpekigira kenitew, su wey zan kenà mekaawà kayì te kenitew.”
EXO 1:11 Umbe, duen menge upisyal he midseriǥan te kedlisliseza te menge kevuwazan ni Israel pinaaǥi te kebpeterebehuwa kandan te utew subra, ne zutun netukud dan is menge inged he iyan is Pitom wey Rameses he zutun is menge budiga te hadì te Ehipto.
EXO 1:12 Iyan, dutun te utew sikandan edèdaaǥa, nasì en sikandan mebmahabet ne mid-iseg en mebmeluag is egkeubpaan dan, ne tenged kayi egkahandek kandan is menge tig-Ehipto.
EXO 1:13 Tenged kayi, impeiseg dan pa is kebpesipelahi zan te menge Israilihanen.
EXO 1:14 Wazè dan kegkehizu te menge Israilihanen. Utew zan midlisedlised sikandan pinaaǥi te kebpeterebehuwa kandan te kebaal te menge brik wey kedsimintu. Ne midrasey zan sikandan te kebpeterebehuwa zan diyà te pemuleey zan.
EXO 1:15 Ne migkeǥiyan duen te hadì diyà te Ehipto si Shifra wey si Pua he menge Hebriyuhanen he mengunguyamu te,
EXO 1:16 “Emun ebpenguyemuwan niw is ed-anak he Hebriyuhanen, ne himetayi niw emun maama, iyan, emun bahi ne kenè niw en himetayi.”
EXO 1:17 Ne ǥeina te egkahandek te Megbevayà haazà is menge mengunguyamu, wazè dan tumana haazà is migkaǥi kandan duen te hadì; wazè dan himetayi is menge vatà he maama he neuyemuwan dan.
EXO 1:18 Ne impetawag duen te hadì diyà te Ehipto sikan is menge mengunguyamu ne migkeǥiyan din te, “Maan is midsupak niw is insuǥù ku keniyu? Maan is wazè niw penhimetayi is menge vatà he maama he neuyemuwan niw?”
EXO 1:19 Ne midtavak dan is hadì te Ehipto he ke sikandan te, “Is menge vahi he Hebriyuhanen ne kenà iring te menge vahi he Ehiptohanen; lelemuwan sikandan umbe edlusazan dan en te kenè pa ebpekeuma is mengunguyamu.”
EXO 1:20 Mibpurungan te Megbevayà haazà is menge mengunguyamu. Ne mid-iseg pa mebmahabet haazà is menge kevuwazan ni Israel.
EXO 1:21 Ne ǥeina te midtahud dutun te menge mengunguyamu is Megbevayà, mibeǥayan din sikandan te keugelingen dan he menge pemilya.
EXO 1:22 Ne midsuǥù te hadì te Ehipto is langun he sakup din he itimbag dan diyà te Wahig he Nilo is langun he menge maama he veǥu he id-anak te menge Israilihanen, iyan, kenè dan mulà idtimbag emun bahi.
EXO 2:1 Ne zuen maama he kevuwazan ni Levi he nekeesawa te vahi he kevuwazan ded daan ni Levi.
EXO 2:2 Ne mibmeǥingey haazà is esawa zin ne mid-anak te maama. Ne hein naahà dutun te vahi he meupiya he vatà haazà is in-anak din, in-eles din seled te tetelu he vulan.
EXO 2:3 Iyan, hein kenè din en egkehimu te ed-eles haazà is batà, migkuwa sikandin te pepirus he teleǥuey ne mibpinsi zin te alkitran su wey kena rehevi te wahig. Ne zutun din itaǥù haazà is batà ne insavuk din diyà te vereesen he veyvey te Wahig he Nilo.
EXO 2:4 Ne is bahi he kakey zutun te vatà, edhithitindeg diyà te malù meziyù su ed-ahaan din ke egkemenumenu haazà is hazi zin.
EXO 2:5 Ne midhendutun te Wahig he Nilo haazà is bahi he anak te hadì te Ehipto su ebpemeziǥù. Ne hein ebpemenhiphipanew zuen te veyvey is menge suluǥuen din, neehè din sikan is teleǥuey he insavuk duen te vereesen dutun te ebpemeziǥù en sikandin, ne impekuwa zin haazà te vahi he uripen din.
EXO 2:6 Mibpuwasan din haazà ne neehè din sikan is batà. Mid-eerang haazà ne nehizuwan din. Ke sikandin te, “Sevaha heini te menge anak te Hebriyuhanen.”
EXO 2:7 Ne mid-insaan duen te kakey te vatà haazà is anak te hadì te Ehipto, ke sikandin te, “Egkehimu ve ke egkuwaan ku sikew te vahi he Hebriyuhanen su wey zin meelimahi kenikew heeyan is batà?”
EXO 2:8 “Uya,” ke sikandin. Ne zutun mibeyaan dutun te vahi is iney zan.
EXO 2:9 Ne migkaǥi ziyà te kandin haazà is anak te hadì te Ehipto te, “Uwita nu heini is batà ne ipesusu nu para kediey, ne ebeyazan ku sikew.” Umbe migkuwa zutun te vahi haazà is batà ne mid-uyamu zin.
EXO 2:10 Ne hein nelutas en haazà is batà, ne inhated din en diyà te anak te hadì te Ehipto ne haazà mid-isip he anak duen te anak te hadì. Migngezanan din te Moises su geina te ziyè din mekuwa te wahig.
EXO 2:11 Ne sevaha he andew, hein dekelè en si Moises, midhendiyà sikandin te lugar he zutun is menge zuma zin he menge Hebriyuhanen, ne neehè din is kemereǥenan dan. Neehè din is sevaha he Ehiptohanen he mibuǥel zin is sevaha he Hebriyuhanen he kezuzumahi ni Moises.
EXO 2:12 Nenlangulangu sikandin ke zuen be ebpekaahà; ne hein wazà duma he etew he neehè din, midhimetayan din sikan is tig-Ehipto ne mibumbunan din te pantad.
EXO 2:13 Ne hein sunud he andew, mid-uman medhipanew sikandin ne neehè din is dezuwa he Hebriyuhanen he ebpetebekà. Ne migkeǥiyan din sikan is mibaal te mezaat te, “Maan is ebpesekitan nu heeyan is duma nu he Hebriyuhanen?”
EXO 2:14 Ne migkaǥi haazà is etew te, “Hentei is mibeǥey kenikew te ketenged te kedatùdatù kayi te kenami? Edhimetayan e ve kenikew iring te kedhimetayi nu zuen te tig-Ehipto?” Ne nahandek si Moises te kegkezineǥa zin dutun su netuenan din he zuen bes netau zuen te mibeelan din.
EXO 2:15 Hein nezineg te hadì te Ehipto haazà is mibeelan ni Moises, ebpen-ahaan din te paaǥi he mepatey zin si Moises, piru mibpelaǥuy si Moises diyà te Midian ne zutun med-ubpà. Ne zutun te kebpekeuma zin, mibpinuu sikandin diyà te uvey te kalut.
EXO 2:16 Ne zutun, is pitu he anak he vahi te memumuhat diyà te Midian, midhendiyè dan te kalut su edsekezu te ibpeinum te menge uyaǥen te amey zan.
EXO 2:17 Ne nemekeuma is duma he ebpemen-elima te kerehidu ne edsegseǥen dan haazà is menge vahi wey is menge uyaǥen dan, iyan, midtevangan sikandan ni Moises, ne impeinum din sikan is menge kerehidu he ed-elimahan dan.
EXO 2:18 Ne hein nekeulì dan en diyà te amey zan he si Reuel, mid-insà si Reuel, ke sikandin te, “Maan is meǥaan kew zà nekeulì?”
EXO 2:19 Ne midtavak sikandan te, “Duen tig-Ehipto he mid-uǥup kenami para kenè key melupiglupig duen te zuma he menge ed-lima te uyaǥen. Mibpenekezuwan key zin pa wey impemeinum din is menge uyaǥen tew.”
EXO 2:20 Ne migkeǥiyan din haazà is menge anak din te, “Hendei sikandin? Maan is wazè niw zumaha? Ipehendini niw su wey mekekaan.”
EXO 2:21 Ne mibpezumazuma si Moises ne zutun en med-ubpà te kandan, ne impeesawa kandin ni Reuel is anak din he si Zipora.
EXO 2:22 Ne mid-anak si Zipora te maama, ne haazà migngezanan ni Moises te Gershom, su ke sikandin te, “Lumelengyawà a kayi he inged.”
EXO 2:23 Ne hein neuǥet en, mibpatey en sikan is hadì te Ehipto. Ne is menge kevuwazan ni Israel kemulu ǥihapun is kegkengereǥeni zan tenged te ked-uripena kandan. Ne nengemuyù sikandan wey zan metevangi, ne nekeuma haazà diyà te Megbevayà.
EXO 2:24 Nezineg te Megbevayà is dag-es dan, ne netenuzan din is paaǥi te kebpekid-uyun din diyà te ki Abraham, ki Isaac, wey ki Jacob.
EXO 2:25 Naahà sikandan te Megbevayà ne nehizuwan din sikandan.
EXO 3:1 Ne sevaha he andew, ebantey si Moises te menge uyaǥen te enuǥang din he si Jetro he memumuhat diyà te Midian. Ne midtundan ni Moises haazà is menge uyaǥen pehendiyà te hunaan te sibsivayan ne nekeuma zan diyà te Horeb, kes buntud te Megbevayà.
EXO 3:2 Ne zutun mibpaahà kandin is belinsuǥuen te Nengazen pinaaǥi te egkeregreg he hapuy ziyà te teliwazà te dezeisey he kayu. Naahà ni Moises haazà ne minsan pa te egkeregreg haazà, iyan, kenà egketutung.
EXO 3:3 Ne neisip din is malù din haazà ed-uvayi su wey zin mesusi haazà is sikan din pa maahà su neinuinu sikandin ke maan is kenà egketutung haazà.
EXO 3:4 Ne hein naahà sikandin te Nengazen is malù ed-uvey te kedsusi, nezineg din is ked-umew te Megbevayà he ebpuun dutun te teliwazà te egkeregreg he egkaǥi te, “Moises! Moises!” Ne midtavak si Moises te, “Heini e zed.”
EXO 3:5 Migkaǥi is Megbevayà te, “Kenè ke en utew uvey, pul-uta nu is sandalyas nu su segradu heini is tanà he nehitindeǥan nu.”
EXO 3:6 Ne mid-uman sikandin megkaǥi te, “Iyan a sikan is Megbevayà he ed-ezapen te menge kepuun nu, ed-ezapen a ni Abraham, ed-ezapen a ni Isaac wey ed-ezapen a ni Jacob.” Ne zutun midtembunan ni Moises is dagwey zin su egkahandek he ed-ahà te Megbevayà.
EXO 3:7 Migkaǥi is Nengazen te, “Neehè ku is kemereǥenan te menge etew ku ziyà te Ehipto. Nezineg ku is kebuyù dan te tavang tenged te kebpesipelahi kandan te menge edumala kandan te edterebahu, ne edtevangan ku su egkehizuwan ku sikandan.
EXO 3:8 Ne umbe mibulus a su edlibriyen ku sikandan te menge pesipala kandan te menge tig-Ehipto, wey ibpaawè ku sikandan diyà te Ehipto ne ziyè ku sikandan ibpeubpà te tanà he meupiya wey meluag, tanà he egkeerubasa he ebpuunan te edtudà he ǥatas wey teneb he iyan ed-ubpaan te menge Canaanhen, Hitihanen, Amorihanen, Pirisihanen, Hivihanen wey Jebusihanen.
EXO 3:9 Nezineg ku is pengemuyù te menge kevuwazan ni Israel, wey neehè ku is paaǥi te kedèdaaǥa kandan te menge Ehiptohanen.
EXO 3:10 Umbe, edsuǥuen ku sikew ǥuntaan pehendiyà te hadì te Ehipto su wey nu mepenguluwi is menge etew ku he Israilihanen te kegawas dan puun te Ehipto.”
EXO 3:11 Iyan, migkaǥi si Moises diyà te Megbevayà te, “Siak, utew minus is pid-etawan ku; kenà a zait he edhendiyà te hadì wey ebpengulu te menge Israilihanen te kegawas puun te Ehipto.”
EXO 3:12 Ne migkaǥi is Megbevayà te, “Eduma a kenikew. Ne is egkehimu he singyal he iyan a midsuǥù kenikew iyan is: Emun igkepeǥawas nu en sikandan puun te Ehipto, ne kayi a keniyu ed-ezapa te vuvungan.”
EXO 3:13 Ne migkaǥi en maan si Moises diyà te Megbevayà te, “Emun edhendiyà a te menge Israilihanen ne egkeǥiyan ku sikandan te, ‘Midsuǥù a zini te keniyu te Megbevayà he ed-ezapen te menge kepuun niw,’ kela ke egkaǥi sikandan te, ‘Hentei is ngazan din?’ Emun iyan haazà, hengkey ve is egkeǥiyen ku ziyà te kandan?”
EXO 3:14 Ne migkaǥi is Megbevayà diyà te ki Moises te, “Iyan a is Megbevayà he kenà egkahalin. Keǥiyi nu is menge Israilihanen he iyan a is Megbevayà he kenà egkahalin midsuǥù kenikew.”
EXO 3:15 Migkaǥi zaan is Megbevayà diyà te ki Moises te, “Keǥiyi nu is menge Israilihanen: ‘Is Nengazen, is Megbevayà he ed-ezapen te menge kebpuun niw he si Abraham, si Isaac, wey si Jacob ne iyan midsuǥù kenikew.’ Kilelaà niw is ngazan ku he Nengazen te wazà pidtemanan.
EXO 3:16 “Genat ke en ne tiǥuma nu is menge edumala te menge kevuwazan ni Israel ne keǥiyi nu sikandan te, ‘Is Nengazen, is Megbevayà he ed-ezapen te menge kebpuun niw he si Abraham, si Isaac, wey si Jacob mibpaahà kediey, ne migkeǥiyan e zin te: Ebpurungan kew zin ebentayi, ne egkeehè din is ed-ulaula keniyu te menge Ehiptohanen.
EXO 3:17 Nenangdù sikandin he ibpeǥawas kew zin puun te menge kemereǥenan he nengeseǥazan niw zini te Ehipto, ne ziyè kew zin ed-uwita te tanà te menge Canaanhen, menge Hitihanen, menge Amorihanen, menge Pirisihanen, menge Hivihanen wey menge Jebusihanen–tanà he egkeerubasa he ebpunan te edtudà he ǥatas wey teneb.’
EXO 3:18 “Ne ebpemineg kenikew is menge edumala te menge Israilihanen. Ne zumaha nu sikandan diyà te hadì te Ehipto ne keǥiyi niw sikandin te, ‘Is Nengazen, is Megbevayà he ed-ezapen te menge Hebriyuhanen, nekidhinguma kenami. Umbe tuǥuti key te kedhipanew seled te tetelu he andew su edhendiyè key te sibsivayan su ebpemuhaten dey is Nengazen he Megbevayè dey.’
EXO 3:19 Iyan, netuenan ku he kenè kew edtuǥutan duen te hadì te Ehipto emun wazà ebpeǥes kandin.
EXO 3:20 Ne tenged te kenè din kedtuǥut ibayew ku is belad ku te kebpigada te menge Ehiptohanen pinaaǥi te menge egkengein-inuwan he ibpezayag ku ziyà te kandan, ne emun egkeuleule en heini ne edtuǥutan kew zin en human te kegenat.
EXO 3:21 Ne ebpengelinteuwan ku he megkelelaǥan is menge Ehiptohanen diyà te keniyu su para zuen niw egkeuwit dutun te kegenat niw.
EXO 3:22 Dutun he timpu, is kada vahi keniyu, mebuyù diyà te Ehiptohanen he siringan din he vahi wey meǥeliyug dutun te siringan din te menge elahas he pelata wey vulawan wey manggad he igkepevisti niw te menge anak niw. Pinaaǥi kayi egkepenevanan niw is menge Ehiptohanen.”
EXO 4:1 Ne midtavak si Moises te, “Hengkey is ebeelan ku emun kenà sikandan edtuu kediey etawa kenà sikandan ebpemineg kediey? Su và dan dà egkaǥi te, kenà tutuu he mibpaahà kenikew is Megbevayà.”
EXO 4:2 Ne migkaǥi is Nengazen diyà te kandin te, “Hengkey heeyan is egewezan nu?” Ne midtavak sikandin te, “Tuked.”
EXO 4:3 Ne migkaǥi is Nengazen te, “Itimbag nu ziyà te tanà.” Ne intimbag ni Moises haazà diyà te tanà ne mibaluy he uled, ne zutun nepeleǥuyan din tenged te kegkahandek din.
EXO 4:4 Ne migkaǥi is Nengazen diyà te kandin te, “Kuwaa nu, ne ziyè nu ǥewazi te ikug.” Umbe migkuwa ni Moises haazà is uled ne te kegkegewezi zin dutun mibaluy zed he tuked.
EXO 4:5 Ne migkaǥi is Nengazen te, “Pinaaǥi keniyan he singyal ebpeketuu zan he, is Nengazen, he Megbevayà he ed-ezapen te menge kepuun dan he si Abraham, si Isaac, wey si Jacob, iyan mibpaahà kenikew.”
EXO 4:6 Ne mid-uman megkaǥi is Nengazen te, “Isuksuk nu is belad nu ziyà te kumbalè nu.” Midtuman haazà ni Moises, ne hein in-awè din en is belad din, ne utew heini mibmeputì tenged te midletunan heini te melimezang he zaru te lundis.
EXO 4:7 Ne migkaǥi is Nengazen te, “Iuman nu isuksuk diyà te kumbalè nu.” Ne inlikù ni Moises isuksuk is belad din diyà te kumbalè din, ne hein in-awè din ne iring ded te zuma he vahin te lawa zin su neulian en.
EXO 4:8 Ne migkaǥi is Nengazen te, “Emun kenè ke zan edtuuwan etawa kenè ke zan edseǥipaan pinaaǥi zuen te nehuna he singyal, ne egkehimu he edtuuwan ke zan pinaaǥi keniyan te ikezuwa.
EXO 4:9 Iyan, emun kenè ke zan pa ebpemineǥen pinaaǥi kayi te zezuwa he singyal, kuwa ka te wahig diyà te Wahig he Nilo ne ivusbus nu ziyà te memaza he tanà, ne egkehimu heini he lengesa.”
EXO 4:10 Ne migkaǥi si Moises diyà te Nengazen te, “He Nengazen, wazè ku pa meseǥazi is mibmetau a he ebpengaǥikaǥi puun pa zengan taman en guntaan te kebpekidlalag nu kedì te suluǥuen nu. Kenà a metau he epengaǥikaǥi wey ngulit a zaan.”
EXO 4:11 Ne migkaǥi is Nengazen diyà te kandin te, “Hentei ves is mibaal te vèbà te etew? Hentei is midhimu kandin he vengel etawa emew? Hentei is midhimu kandin he ebpekaahà etawa midhimu kandin he lakap? Kenè be iyan a, is Nengazen?
EXO 4:12 Umbe, genat ke en ne ed-uǥupan ku sikew te kegkaǥi wey ibpenurù ku kenikew ke hengkey is egkeǥiyen nu.”
EXO 4:13 Piru migkaǥi en maan si Moises te, “He Nengazen, iyan nu keniyan ipevaal is sengeeetew en.”
EXO 4:14 Dutun nepeukan si Moises te Nengazen ne migkaǥi te, “Iyan nasì is kakey nu he si Aaron he kevuwazan daan ni Levi. Netuenan ku he metau mulà sikandin he ebpengaǥikaǥi. Guntaan kemulu en sikandin edhipanew te kedsinuǥung kenikew, ne ibmeupiya te ǥehinawa zin is kegkaahaa zin kenikew.
EXO 4:15 Lelaǥi nu sikandin, ne ipenurù nu kandin is egkeǥiyen din. Ne ed-uǥupan ku sikiyu is dezuwa te kegkaǥi, wey ibpenurù ku keniyu is ereg he ebeelan niw.
EXO 4:16 Is idlalag nu pezem diyà te menge etew ne si Aaron is egkaǥi. Penurua nu sikandin ke hengkey is idlalag din; kuwinta henduen te iyan ka Megbevayà.
EXO 4:17 Iyan, uwita nu heeyan is tuked he egewezan nu su pinaaǥi keniyan ebpekehimu ka te menge singyal.”
EXO 4:18 Ne mid-ulì si Moises diyà te enuǥang din he si Jetro ne migkeǥiyan din te, “Tuǥuti a kenikew te kedlikù diyà te menge kezumahan ku ziyà te Ehipto te ked-ahà ke menge uuyag ded be sikandan.” Ne midtavak si Jetro te, “Uya, egkehimu he egenat ka, ne verakat he meupiya is hipanew nu.”
EXO 4:19 Ne zutun he timpu te kemulu pa si Moises diyà te Midian ne migkeǥiyan sikandin te Nengazen te, “Likù ke en diyà te Ehipto su pudu en minatey sikan is menge etew he egkesuat he edhimatey kenikew.”
EXO 4:20 Ne migkuwa ni Moises is esawa zin wey sikan is menge anak din he pudu maama, ne impeuntud din sikandan te asnu su egenat dan en pehendiyà te Ehipto. Ne mid-uwit daan ni Moises sikan is tuked te Megbevayà.
EXO 4:21 Migkaǥi is Nengazen diyà te ki Moises te, “Emun diyè ke en te Ehipto kinahanglan he ipeehè nu te hadì te Ehipto is langun he menge singyal he impeehè ku kenikew. Imbeǥey ku en kenikew is gehem te ked-ul-ulaha zuen. Ne zutun ebpengelinteuwan ku he kenà haazà med-uteng diyà te ǥehinawa zin su wey kew zin kenà metuǥuti te ked-awà puun te Ehipto.
EXO 4:22 Ne zutun keǥiyi nu haazà is hadì te, ‘Iyan heini lalag te Nengazen diyà te kenikew: Ed-isipen ku is menge Israilihanen he iring te kakey he anak ku,
EXO 4:23 umbe, migkeǥiyan ku sikew he tuǥuti nu he mekeǥenat heeyan is anak ku su wey mekaazap kedì. Iyan, wazè nu tuǥuti he mekeǥenat, umbe edhimetayan ku is kakey he anak nu he maama!’ ”
EXO 4:24 Dutun te kedhipanew eni Moises wey is pemilya zin, midhulavung dan diyà te himelayà. Midhinguma si Moises te Nengazen su edhimetayan din pezem.
EXO 4:25 Piru migkuwa si Zipora te meǥarang he vatu ne midsirkunsidar zin is anak din, ne is lundis he nekuwa zin, indazas din diyà te sineruwan ni Moises. Ne migkaǥi si Zipora te, “Tutuu iyan he esawa ku sikew tenged te lengesa.” (Nekaǥi ni Zipora heini he iyan ibpesavut is kegkesirkunsidara.) Umbe wazà himetayi te Nengazen si Moises.
EXO 4:27 Migkaǥi is Nengazen diyà te ki Aaron te, “Hipanew ka ne sinuǥunga nu si Moises diyà te sibsivayan.” Umbe midsinuǥung din si Moises diyà te Buntud te Megbevayà ne midhezekan din si Moises tuus te kegkeǥalew zin.
EXO 4:28 Ne midtudtul ni Moises diyà te ki Aaron is minsan hengkey he ibpekaǥi kandin te Nengazen, wey is langun he menge singyal he ebpeveelan kandin te Nengazen.
EXO 4:29 Umbe midhendiyè dan is dezuwa, ne midtiǥum dan is langun he ebpemendumala te menge Israilihanen.
EXO 4:30 Ne migkaǥi ni Aaron diyà te kandan is langun he migkaǥi te Nengazen diyà te ki Moises. Wey impaahà ni Moises te menge etew sikan is menge singyal,
EXO 4:31 ne midtuu sikandan. Ne hein netuenan dan he igkeseeng sikandan te Nengazen wey naahà te Nengazen is kemeresayan dan, midluhud sikandan te ked-azap kandin.
EXO 5:1 Ne midhendiyà si Moises wey si Aaron te hadì te Ehipto, ne migkeǥiyan dan te, “Iyan heini migkaǥi te Nengazen he Megbevayà te Israel: ‘Tuǥuti nu he mekeǥenat is menge etew ku, su wey zan mekesilibra te pista para kedì diyà te sibsivayan.’ ”
EXO 5:2 Ne migkaǥi is hadì te, “Hentei is Nengazen he ebpepezumdumahan niw kedì is lalag din he tuǥuti ku is menge kevuwazan ni Israel te kegenat? Wazè ku mekilala is Nengazen ne kenè ku edtuǥutan is menge kevuwazan ni Israel te kegenat.”
EXO 5:3 Ne midtavak si Moises wey si Aaron te, “Nekidhinguma kenami is Megbevayà he ed-ezapen dey te menge Hebriyuhanen. Ne tuǥuti key kenikew te kedhipanew seled te tetelu he andew su edhendiyè key te sibsivayan su ebpemuhaten dey is Nengazen he iyan Megbevayè dey, su emun kenè dey heini ebeelan, ne ebpenhimetayan key zin pinaaǥi te zaru etawa tebek.”
EXO 5:4 Iyan, migkaǥi haazà is hadì te Ehipto te, “Moises wey Aaron, maan is ibpeengked niw is menge etew te terebahu zan? Likui niw is keniyu he menge terebahu.”
EXO 5:5 Migkaǥi med-uman sikandin te, “Kenà ereg he ibpeengked niw te kedterebahu is menge etew su utew sikandan mahabet.”
EXO 5:6 Ne zutun daan he andew, migkeǥiyan te hadì te Ehipto is menge Ehiptohanen he edumala te ebpemenerebahu he menge Israilihanen wey is impepengulu zin kandan he menge Israilihanen te:
EXO 5:7 “Kenè niw en human beǥayi is menge etew te reǥami he egkaǥamit dan te kebpemaal te menge brik, iyan en human sikandan ibpepen-ahà te reǥami he egkeǥamit dan.
EXO 5:8 Piru is kahabet te menge brik he ebpeveelan niw kandan hein iyan kew pa ebeǥey kandan te reǥami, ne iyan ded kahabet te menge brik he ebpeveelan niw kandan minsan pa te kenè niw en sikandan ebeǥayan te reǥami. Ebpemepepeǥul sikandan, pegelitan dan dà is kedhangyù dan he ipeǥenat sikandan su wey zan mepemuhat is Megbevayè dan.
EXO 5:9 Ipeiseg niw is kereǥen te terebahu zan su para mekepenigudu sikandan he edterebahu su para wazè dan en timpu te kebpemineg te tarù he ebpengeǥiyen diyà te kandan.”
EXO 5:10 Ne zutun sikan is menge upisyal te kebantey te ebpemenerebahu wey sikan is menge pengulu zan, midhendiyà te kandan, ne migkaǥi ziyà te kandan te, “Iyan suǥù te hadì is kenè kew en kun human ebeǥayan te reǥami.
EXO 5:11 Iyan kew en kun pen-ahà ke hendei kew ebpeketuredu, iyan, kenà edterinan is kezakel te ebpeveelan keniyu he menge brik.”
EXO 5:12 Umbe, nekeeneb sikandan diyà te tivuuk he Ehipto is ebpenguwa te tued te reǥami he iyan egemiten dan he ilis te reǥami.
EXO 5:13 Is menge upisyal he ebantey kandan edsigudu en kandan ebmandar he egkaǥi te, “Kinahanglan he edhimesazen niw te kada andew is iring kahabet te brik he ebpeveelan keniyu hein ebeǥayan kew pa te reǥami.”
EXO 5:14 Mibpenlagkut is menge Israilihanen he mibpilì te menge upisyal te hadì he ibpepengulu te menge zuma zan, su maan kun is wazè dan mehimu zutun he andew wey te midlavey he andew is iring kahabet duen te nehuna.
EXO 5:15 Ne midhendiyà sikandan te hadì ne ke sikandan te, “Maan is ed-iringen key kenikew kayi is menge suluǥuen nu?
EXO 5:16 Ebpenlegkuten key, piru kenà kenami he sayep is kenè dey kebpekehimu te ebpeveelan kenami, su edteǥelen key keniyu te kebaal te menge brik he iring kahabet duen te nehuna, iyan, wazè key veǥayi te reǥami.”
EXO 5:17 Ne migkaǥi is hadì te Ehipto te, “Ebpemepepeǥul kew, umbe layun kew edhangyù he tuǥuti kew te kegenat su ebpemuhaten niw is Nengazen.
EXO 5:18 Terebahu kew en! Kenè kew ebeǥayan te reǥami piru kinahanglan he ebeelan niw ke sengemenu kahabet is brik he ebpeveelan keniyu.”
EXO 5:19 Ne zutun te kegkeǥiyi kandan he kenà edterinan is kahabet te menge brik he ebpeveelan kandan te kada andew neisip dan he mereǥen en is kebpekesavuk dan.
EXO 5:20 Ne hein mid-awè dan en diyà te hadì, neehè dan si Moises wey si Aaron is edtaǥad kandan,
EXO 5:21 ne migkeǥiyan dan haazà is dezuwa te, “Berakat he siluti kew te Nengazen, su keniyu he vaal is utew ingkeepesi kenami te hadì wey te menge upisyal zin. Is mibeelan niw ne iyan egkehimu he hinungdan te kedhimetayi zan kenami.”
EXO 5:22 Ne mid-uman mebpekidlalag si Moises te Nengazen ke sikandin te, “He Nengazen, maan is ed-uwitan nu te samuk heini is menge etew? Iyan be insuǥua nu kediey is kebeǥey kandan te samuk?
EXO 5:23 Su puun dà te kedhendiyè ku te hadì te kegkaǥi ziyà te kandin te menge lalag he ibpekaǥi nu, midlisedlised din en heini is menge etew, ne wazè nu sikandan libriya.”
EXO 6:1 Ne migkaǥi is Nengazen diyà te ki Moises te, “Egkeehè nu en human is ed-ul-ulahan ku ziyà te hadì te Ehipto. Pinaaǥi te ǥehem he ibpeehè ku, edtuǥut sikandin he mekeǥenat kew puun te nasyun din. Ne egketeǥel sikandin te kebpeǥenat keniyu.”
EXO 6:2 Migkaǥi zaan is Megbevayà diyà te ki Moises te, “Iyan a Nengazen.
EXO 6:3 Hein mibpaahà a ki Abraham, ki Isaac, wey ki Jacob, nesavut dan he iyan a is Mekeǥeǥehem he Megbevayà. Iyan, wazà a mekepekilala kandan pinaaǥi te ngazan ku he Nengazen.
EXO 6:4 Midhimu ku is kebpekid-uyun ku kandan, he ibeǥey ku kandan is tanà te Canaan he iyan neubpaan dan dutun te kegkelumelengyawè dan.
EXO 6:5 Ne ǥuntaan nezineg ku en is dag-es te menge Israilihanen he ed-uripenen te menge Ehiptohanen, ne netenuzan ku en haazà is kebpekid-uyun ku kandan.
EXO 6:6 Umbe, keǥiyi nu is menge Israilihanen: ‘Iyan a Nengazen. Ne ibpeǥawas ku sikiyu te kegkeuripena keniyu te menge Ehiptohanen. Pinaaǥi te ǥehem ku, ebpurungan ku edsiluti is menge Ehiptohanen, ne edlibriyen ku sikiyu.
EXO 6:7 Ed-isipen ku sikiyu he menge etew ku ne iyan a egkehimu he Megbevayè niw. Ne egketuenan niw he siak is Nengazen he Megbevayè niw, iyan a mibpeǥawas keniyu puun te kegkeuripena keniyu te menge tig-Ehipto.
EXO 6:8 Ne ziyè ku sikiyu ed-uwita te tanà he insaad ku he ibeǥey ku ziyà te ki Abraham, ki Isaac, wey ki Jacob. Ibeǥey ku haazà keniyu, ne egkaangken niw en. Iyan a sikan is Nengazen.’ ”
EXO 6:9 Ne midtultul haazà ni Moises diyà te menge Israilihanen, iyan, wazè dan sikandin pemineǥa tenged te kegkesuǥey zan wey te gerabi he pesipala kandan dutun te ked-uripena kandan.
EXO 6:10 Ne migkeǥiyan si Moises te Nengazen te,
EXO 6:11 “Genat ka, ne keǥiyi nu is Faraon he hadì te Ehipto he tuǥuti zin en is menge Israilihanen he egawas te nasyun din.”
EXO 6:12 Iyan, migkaǥi si Moises diyà te Nengazen te, “Emun wazà mebpemineg kedì is menge Israilihanen, iyan pe be is hadì? Su kenà a metau he ebpengaǥikaǥi!”
EXO 6:13 Ne migkaǥi is Nengazen diyà te ki Moises wey ki Aaron te, “Keǥiyi niw is menge Israilihanen wey is Faraon he hadì te Ehipto he midsuǥù ku sikiyu is dezuwa te kebpeǥawas te menge Israilihanen diyà te Ehipto.”
EXO 6:14 Iyan heini menge kepuun te nepipira he menge pemilya te tribu te Israel: Is menge anak ni Reuben he maama te kinekekayan he anak ni Israel iyan ensi Hanoc, Palu, Hezron wey si Carmi. Ne iyan sikandan wey is menge kevuwazan dan menge pemilya he ebpuun diyà te ki Reuben.
EXO 6:15 Is menge anak he maama ni Simeon iyan ensi Jemuel, Jamin, Ohad, Jakin, Zohar, wey si Shaul. (Heini si Shaul anak ni Simeon he Canaanhen is iney zin.) Ne iyan sikandan wey is menge kevuwazan dan menge pemilya he ebpuun ki Simeon.
EXO 6:16 Sumalà is insurat he keguǥuza iyan heini menge ngazan te menge maama he menge anak ni Levi: si Gershon, si Kohat, wey si Merari. Is keluǥayad te untung ni Levi 137 he tuig.
EXO 6:17 Is menge anak he maama ni Gershon iyan si Libni wey si Shimei.
EXO 6:18 Is menge anak he maama ni Kohat iyan si Amram, si Izhar, si Hebron, wey si Uziel. Is keluǥayad te untung ni Kohat 133 he tuig.
EXO 6:19 Is menge anak he maama ni Merari iyan si Mali wey si Mushi. Ne iyan heini ebpuunan te menge kevuwazan ni Levi sumalà is keguǥuza te menge kevuwazan dan.
EXO 6:20 Mid-esawa ni Amram is etevey te amey zin he si Jokebed. Ne iyan menge anak dan he maama si Moises wey si Aaron. Is keluǥayad te untung ni Amram 137 he tuig.
EXO 6:21 Is maama he menge anak ni Izhar iyan si Kora, si Nefeg, wey si Zicri.
EXO 6:22 Is maama he menge anak ni Uziel iyan si Mishael, si Elzafan, wey si Sitri.
EXO 6:23 Si Aaron, neesawa zin si Elisheba is anak he vahi ni Aminadab wey etevey zaan ni Nashon. Ne in-anak dan si Nadab, si Abihu, si Eleazar, wey si Itamar.
EXO 6:24 Is maama he menge anak ni Kora iyan si Asir, si Elkana, wey si Abiasaf. Ne iyan sikandan wey is menge kevuwazan dan menge pemilya he ebpuun te ki Kora.
EXO 6:25 Si Eleazar is anak he maama ni Aaron, neesawa zin is sevaha zuen te menge anak he vahi ni Putiel ne in-anak dan si Finehas. Iyan heini menge kepuun te menge pemilya he Levihanen.
EXO 6:26 Sikan is Aaron wey Moises he ingkelista kayi te guǥud te menge pemilya iyan en sikan is Aaron wey Moises he migkeǥiyan te Nengazen te, “Dumaha niw is menge Israilihanen pehendiyà te ǥawas te Ehipto.”
EXO 6:27 Iyan sikandan sikan is nekidlalag te Faraon he hadì te Ehipto mehitenged te kedumaha zan te menge Israilihanen pehendiyà te ǥawas te Ehipto.
EXO 6:28 Ne hein nekidlalag is Nengazen ki Moises diyà te Ehipto,
EXO 6:29 migkeǥiyan din si Moises te, “Siak, is Nengazen, edsuǥuen ku sikew. Keǥiya nu ziyà te Faraon he hadì te Ehipto is langun he migkaǥi ku ziyà te kenikew.”
EXO 6:30 Iyan, migkaǥi si Moises diyà te Nengazen te, “Kenà ebpemineg kedì is hadì su kenà a metau he ebpengaǥikaǥi.”
EXO 7:1 Ne migkaǥi is Nengazen diyà te ki Moises te, “Pemineg ka! Edhimuwen ku sikew he iring te sevaha he megbevayà he para te hadì te Ehipto. Pekidlalag ka kandin pinaaǥi te suled nu he si Aaron.
EXO 7:2 Egkeǥiyen nu ziyà te suled nu he si Aaron is minsan hengkey he egkeǥiyen ku kenikew, ne iyan sikandin egkaǥi ziyà te hadì he tuǥuti zin he mekeǥawas is menge Israilihanen puun te nasyun din.
EXO 7:3 Ne ebpengelinteuwan ku he kenà ed-uteng is menge lalag niw ziyà te ǥehinawa te hadì, ne minsan ke mezakel he menge singyal wey egkengein-inuwan he menge vaal is ebeelan ku ziyà te Ehipto,
EXO 7:4 kenè kew zin gihapun ebpemineǥen. Ne ibpeseǥazan ku te menge Ehiptohanen is utew merasey, ne ibpeǥawas ku puun diyà te kandan is langun he tribu te Israel he menge etew ku.
EXO 7:5 Is menge Ehiptohanen, ne egketuenan dan he iyan a Nengazen emun igkepeseǥazan ku en kandan is utew merasey wey igkepeǥawas ku en puun diyà te kandan is menge Israilihanen.”
EXO 7:6 Midtuman ni Moises wey ni Aaron is insuǥù kandan te Nengazen.
EXO 7:7 Ne 80 en is penuiǥen ni Moises ne si Aaron, ne 83 is penuiǥen din hein mibpekidlalag sikandan te hadì te Ehipto.
EXO 7:8 Migkeǥiyan te Nengazen si Moises wey si Aaron te,
EXO 7:9 “Emun egkeǥiyan kew te hadì te Ehipto te peehè kew te singyal, ne keǥiyi nu Moises si Aaron te, ‘Itimbag nu is tuked nu ziyà te etuvangan te hadì ne ebaluy haazà he uled.’ ”
EXO 7:10 Ne midhendiyà si Moises wey si Aaron te hadì ne mibeelan dan is insuǥù kandan te Nengazen. Intimbag ni Aaron sikan is tuked din diyà te etuvangan te hadì wey te menge upisyal zin, ne mibaluy he uled haazà is tuked.
EXO 7:11 Ne zutun mibpesuǥuan te hadì is menge uluwanen he etew wey is menge selemengkiru ziyà te Ehipto ne nehimu zan daan is iring dutun pinaaǥi te kegkeselemengkiru zan.
EXO 7:12 Is kada sevaha kandan, midtimbag te tuked din ne haazà nememaluy he uled. Iyan, mibakal zuen te tuked ni Aaron sikan is kandan he menge tuked.
EXO 7:13 Iyan, wazà haazà med-uteng diyà te ǥehinawa te hadì ne wazè din pemineǥa si Moises wey si Aaron sumalà is daan he impetizaan kandan te Nengazen.
EXO 7:14 Ne migkaǥi is Nengazen diyà te ki Moises te, “Mezesen is gehinawa te hadì he kenà edtuǥut he mekeǥenat is menge Israilihanen.
EXO 7:15 Umbe, hendiyè ka te hadì keeselem te meselem emun edhendiyà sikandin te Wahig he Nilo. Ne zutun ka pekidhinguma kandin te veyvey te wahig, ne uwita nu sikan is tuked nu he mibaluy he uled.
EXO 7:16 Ne keǥiyi nu sikandin te, ‘Midsuǥù a te Nengazen he iyan Megbevayà te menge Hebriyuhanen, su ebpekeǥiyan ke zin he: Tuǥuti nu en is menge etew ku te kegenat su wey zan mekaazap kedì diyà te sibsivayan. Iyan, taman en guntaan ne wazè ka mebpezumazuma.
EXO 7:17 Siak, is Nengazen, egkaǥi a he pinaaǥi te edhimuwen ku, egketuenan nu he iyan a Nengazen. Pinaaǥi kayi he tuked, idlagkut ku heini ziyà te wahig he Nilo ne ebaluy he lengesa is wahig.
EXO 7:18 Ne zutun ebpemematey is menge isdà kayi te Nilo wey ebmemahu heini is wahig ne kenè en egkehimu he ed-inumen te menge Ehiptohanen.’ ”
EXO 7:19 Ne migkeǥiyan si Moises te Nengazen te, “Keǥiyi nu si Aaron te, ‘Kuwaa nu is tuked nu ne ivayew nu ziyà te menge wahig kayi te Ehipto: dezekelà he wahig he edtudà, beuǥan, kanal, wey menge wahig he mibpeneng, wey ziyà te langun he punduwà te wahig.’ Ne is langun dutun ebaluy he lengesa. Iyan heini egkeulaula ziyà te Ehipto. Minsan is wahig he ziyà te menge teleǥuey he kayu etawa vatu ne egkehimu he lengesa.”
EXO 7:20 Ne midtuman ni Moises wey ni Aaron is insuǥù kandan te Nengazen. Imbayew ni Aaron sikan is tuked din diyà te etuvangan te hadì te Ehipto wey te menge upisyal zin, ne inlagkut din diyà te Wahig he Nilo, ne zutun mid-amin mebaluy he lengesa haazà is wahig.
EXO 7:21 Nemematey is menge isdà dutun ne mibmemahù haazà is wahig, ne kenè en egkehimu he ed-inumen te menge Ehiptohanen. Minsan hendei ziyà te Ehipto ne zuen wahig he mibaluy he lengesa.
EXO 7:22 Piru is Ehiptohanen he menge selemengkiru nekehimu zaan sikandan te iring dutun pinaaǥi te kegkeselemengkiru zan, ne haazà is neulaula wazà med-uteng diyà te ǥehinawa te hadì, ne wazà sikandin mebpemineg ki Moises wey ki Aaron, su iyan haazà migkaǥi te Nengazen.
EXO 7:23 Midlikù haazà is hadì diyà te turuǥan din ne wazè din en itaǥù diyà te ǥehinawa zin haazà is neulaula.
EXO 7:24 Ne is menge Ehiptohanen nemengalut sikandan diyà te uvey te Wahig he Nilo su para zuen dan egkekuwaan te ed-inumen dan su kenè en man egkehimu he ed-inumen is wahig.
EXO 7:25 Ne hein pitu en he andew puun duen te kebpeveluya te Nengazen te Wahig he Nilo he lengesa pinaaǥi ki Aaron,
EXO 8:1 ne migkeǥiyan te Nengazen si Moises te, “Hendiyè ka te hadì te Ehipto ne keǥiyi nu sikandin te, ‘Iyan heini lalag te Nengazen diyà te kenikew: Tuǥuti nu is menge etew ku te kegenat su wey zan mekaazap kedì.
EXO 8:2 Ne emun kenè nu sikandan edtuǥutan, ebpigedahan ku sikiyu is menge Ehiptohanen kayi te tivuuk he Ehipto pinaaǥi te menge vakbak.
EXO 8:3 Utew edsubra is kebmahabet te menge vakbak diyà te Wahig he Nilo ne edseled dan diyà te turuǥan nu, diyà te ruǥu nu wey minsan diyà te hizeǥaan nu. Edseled dan daan diyà te menge valey te menge upisyal nu wey te ginsekupan nu, ragkes en is menge avu wey menge lugar he ebmesahan te herina.
EXO 8:4 Edlingketawan ka te menge bakbak wey is menge etew nu wey elin is menge upisyal nu.’ ”
EXO 8:5 Ne zutun migkaǥi is Nengazen diyà te ki Moises te, “Keǥiyi nu si Aaron he beyawa zin is belad din he zuen tuked he ibpetezù diyà te menge dezekelà he wahig he edtudà, beuǥan, kanal, wey menge wahig he mibpeneng, ne egaun is menge vakbak kayi te tivuuk he tanà he Ehipto.”
EXO 8:6 Ne imbayew ni Aaron is belad din he ibpetezù diyà te zivavew te menge wahig diyà te Ehipto, ne zutun migaun is utew midtaman he mahabet he menge vakbak ne giranap dan diyà te tivuuk he Ehipto.
EXO 8:7 Ne sikan is menge selemengkiru nehimu zan daan is iring dutun su ingkepeǥaun dan daan is menge vakbak puun te menge wahig diyà te Ehipto.
EXO 8:8 Ne mibpesuǥuan te hadì te Ehipto si Moises wey si Aaron ne migkeǥiyan din te, “Ampù kew ziyà te Nengazen he iawè din heini is menge vakbak kayi te kediey wey te menge etew ku, ne edtuǥutan ku te kegenat is menge zuma niw su wey zan mepemuhat is Nengazen.”
EXO 8:9 Ne migkaǥi si Moises te, “Iyan ke en telaan ke keenu ku sikew id-ampù duma te menge upisyal nu wey te tivuuk he gin-etawan nu, su wey maawà is nenggaun he menge vakbak diyà te keniyu wey ziyà te menge valey niw. Iyan dà egkesamà he menge vakbak is diyà te Wahig he Nilo.”
EXO 8:10 Ne midtavak haazà is hadì te, “Keeselem iampù a kenikew.” Ne midtavak si Moises te, “Uya, edtumanen ku heeyan is nekaǥi nu, su wey nu metueni he wazà ebpekerepeng te Nengazen he iyan Megbevayè dey.
EXO 8:11 Ed-awà is langun he menge vakbak diyà te keniyu ne iyan dà egkesamà is diyà te Wahig he Nilo.”
EXO 8:12 Ne hein mid-ewaan en ni Moises wey ni Aaron kes hadì, ne mibpengemuyù si Moises diyà te Nengazen he iawè din sikan is menge vakbak he midsuǥù din diyà te Ehipto.
EXO 8:13 Ne mibeelan te Nengazen is inhangyù ni Moises. Nemematey is menge vakbak diyà te menge valey, diyà te menge lama, wey menge vevesukà.
EXO 8:14 Ne miburunburun heini te menge Ehiptohanen ne metikang is tambù dan ne mibmemahù is tivuuk he Ehipto tenged dutun.
EXO 8:15 Iyan, hein naahà duen te hadì he naawè en sikan is menge vakbak, ne impemezesen din en maan is gehinawa zin, ne wazà sikandin mebpemineg ki Moises wey ki Aaron, sumalà te nekaǥi te Nengazen.
EXO 8:16 Ne migkaǥi is Nengazen diyà te ki Moises te, “Keǥiyi nu si Aaron te ilagkut nu is tuked nu ziyà te tanà, ne egkehimu he rengit is eliyavuk te tanà te tivuuk he Ehipto.”
EXO 8:17 Ne mibeelan dan heini, ne hein inlagkut ni Aaron diyà te tanà sikan is tuked din, ne mibaluy he menge rengit is eliyavuk diyà te tivuuk he tanà he Ehipto. Ne midhurunan te menge rengit is menge etew wey menge uyaǥen.
EXO 8:18 Ne hein iyan migezam mebaal te menge rengit sikan is menge selemengkiru pinaaǥi te kegkeselemengkiru zan, ne wazà sikandan mekehimu. Ne zutun midhurun is menge rengit diyà te menge etew wey menge uyaǥen.
EXO 8:19 Ne migkaǥi sikan is menge selemengkiru ziyà te hadì te, “Baal heini te Megbevayà!” Piru mezesen gihapun is gehinawa zuen te hadì, ne wazà sikandin mebpezumazuma ki Moises wey ki Aaron, su iyan heini migkaǥi te Nengazen.
EXO 8:20 Ne migkaǥi is Nengazen diyà te ki Moises te, “Sayu ka enew keeselem ne veyai nu kes hadì te kedhendiyà din te wahig. Ne keǥiyi nu sikandin he iyan heini migkaǥi ku: ‘Tuǥuti nu is menge etew ku te kegenat su wey zan mekaazap kedì.
EXO 8:21 Ne emun kenè nu sikandan edtuǥutan, ebpengelinteuwan ku he ebpekeuma keniyan te kenikew is ebmelinguwan he menge dezeizey he keranapranap he edhurun diyà te kenikew wey ziyà te menge upisyal nu wey te menge keet-etawan nu. Egkengepenù te menge dezeisey he keranapranap is menge valey niw, ne is tanà ne egketembunan kayi.
EXO 8:22 Iyan, emun egkehitavù en haazà ne kenà mulà egkehitavù diyà te tanà he Goshen, he iyan ed-ubpaan te menge etew ku; kenà mulà edhendiyà te kandan is menge dezeizey he keranapranap he ebpezumdumahà, su para metueni niw he siak, is Nengazen, dutun a he lugar.
EXO 8:23 Edhimuwen ku is kebpekeviza te kediey he menge etew wey is kenikew he menge etew. Ne heini is singyal egkehitavù keeselem.’ ”
EXO 8:24 Mid-ulaula iyan heini te Nengazen. Midselezan te mezakel he menge dezeisey he menge keranapranap is turuǥan te hadì wey is baley te menge perezumala zin, ne is tivuuk he tanà te Ehipto ne nezeetan tenged kayi.
EXO 8:25 Ne mibpesuǥuan te hadì si Moises wey si Aaron ne ke sikandin diyà te kandan te, “Genat kew en, pemuhata niw is Megbevayà, piru kayi kew zà te seled te Ehipto.”
EXO 8:26 Iyan, midtavak si Moises te, “Kenà heeyan hustu, su is menge pemuhat he ibpemuhat dey te Nengazen he Megbevayè dey, ne utew igkelimezangi te menge Ehiptohanen. Ne emun igkeremerik dan is ibpemuhat dey, ne ebpenulengen key zan te vatu.
EXO 8:27 Umbe, kinahanglan he edtumanen dey is insuǥù kenami te Nengazen he iyan Megbevayè dey he ibpehipanew key zin pehendiyà te sibsivayan seled te tetelu he andew ne human dey sikandin ebpemuhata.”
EXO 8:28 Ne migkaǥi is hadì te, “Edtuǥutan ku sikiyu te kedhendiyà te sibsivayan su wey niw mepemuhat is Nengazen he Megbevayè niw, piru kinahanglan he kenè kew edhendiyà te utew meziyù. Ne iampù e en keniyu.”
EXO 8:29 Midtavak si Moises te, “Ǥuntaan ke ed-ewaan ku en sikew, id-ampù ku en sikew ziyà te Nengazen, ne keeselem ed-awà is menge zezeizey he keranapranap diyà te keniyu te langun. Iyan dà is, kinahanglan he kenè key en kenikew ed-umanan edlimbungi pinaaǥi te kenè nu kebpeǥenata kenami emun egenat key en su wey zey mepemuhat is Nengazen.”
EXO 8:30 Ne zutun mid-ewaan ni Moises haazà is hadì ne mid-ampù diyà te Nengazen.
EXO 8:31 Ne intuǥut te Nengazen is mibuyù ni Moises. Mid-awà is menge zezeizey he keranapranap diyà te langun he menge Ehiptohanen, ne wazà minsan sevaha he nesamà.
EXO 8:32 Ne zutun he timpu impemezesen en maan duen te hadì is gehinawa zin he kenè din edtuǥutan he mekeǥenat haazà is menge Israilihanen.
EXO 9:1 Ne migkeǥiyan te Nengazen si Moises te, “Hendiyè ka te hadì te Ehipto ne keǥiyi sikandin te, ‘Iyan heini migkaǥi te Nengazen, is Megbevayà te menge Hebriyuhanen: Tuǥuti nu is menge etew ku te kegenat su wey zan mekaazap kedì.
EXO 9:2 Ne emun kenè nu pa sikandan edtuǥutan he mekeǥenat,
EXO 9:3 ne zuen meveǥat he ibpigada ku he iyan is kebpematey te menge uyaǥen nu ziyà te vevesukà–ebpematey is menge kudè niw, menge asnu niw, menge kemilyu niw, menge vaka niw, menge kerehidu niw, wey menge kambing niw.
EXO 9:4 Iyan, ibpebiza ku is menge uyaǥen te menge Israilihanen wey is menge uyaǥen te menge Ehiptohanen, su wazà mulà ebpatey he uyaǥen te Israilihanen.’ ”
EXO 9:5 Midtelaan te Nengazen is timpu, ke sikandin te, “Keeselem ku heini ed-ul-ulaha kayi he tanà.”
EXO 9:6 Ne hein sunud en he andew mibeelan en te Nengazen haazà: mid-amin mebpematey is langun he uyaǥen te menge Ehiptohanen. Piru wazà mulà mepetayi te minsan sevaha is uyaǥen te menge Israilihanen.
EXO 9:7 Ne zuen impesusi te hadì te Ehipto he menge etew ke zuen be nemematey te uyaǥen te menge Israilihanen. Piru minsan ke netuenan din en he tutuu heini, iyan, wazà mahalin is gehinawa zin, ne wazè din gihapun tuǥuti te kegenat is menge Israilihanen.
EXO 9:8 Ne migkaǥi is Nengazen diyà te ki Moises wey ki Aaron te, “Kuwa kew te tigsengekemkem he avu ziyà te repuǥà ne haazà ibpesimburà ki Moises diyà te hewhewanan dutun te egkeventayan sikandin te hadì.
EXO 9:9 Ne egkehimu haazà he eliyavuk ne haazà ebpekeeneb te tivuuk he Ehipto, ne pinaaǥi zutun ebpenlevaǥan te menge levag he ednanà is menge etew wey menge ayam kayi he tanà.”
EXO 9:10 Umbe, migkuwa sikandan te avu ziyà te repuǥà ne midhitindeg sikandan diyà te etuvangan te hadì. Insimburà haazà ni Moises diyà te hewhewanan, ne zutun mibpenlevaǥan te menge levag he ednanà is menge etew wey menge ayam.
EXO 9:11 Ne wazè en mekepeǥiewǥiew ziyà te ki Moises sikan is menge selemengkiru su mibpenlevaǥan en daan sikandan iring te langun he menge Ehiptohanen.
EXO 9:12 Ne haazà he singyal, midhimu te Nengazen he kenà gihapun med-uteng diyà te ǥehinawa zutun te hadì. Umbe wazè din gihapun pemineǥa si Moises wey si Aaron, su iyan haazà migkaǥi he zaan te Nengazen diyà te ki Moises.
EXO 9:13 Migkaǥi is Nengazen diyà te ki Moises te, “Selemselem ka enew keeselem ne etuvanga nu is hadì, ne ke sikew ziyà te kandin te, ‘Iyan heini migkaǥi te Nengazen he iyan Megbevayà te menge Hebriyuhanen diyà te kenikew: Tuǥuti nu te kegenat is menge etew ku su wey zan mekaazap kedì.
EXO 9:14 Ne emun kenè nu sikandan edtuǥutan, ne ibpeiseg ku en is keveǥat te menge pigada ku kenikew, ragkes is menge upisyal nu wey is tivuuk he gin-etawan nu su wey nu metueni he wazà ebpekerepeng kedì kayi te tivuuk he kelibutan.
EXO 9:15 Ne minsan dengan ke mid-amin ku sikiyu limasa is menge Ehiptohanen pinaaǥi te zaru, ne egkehimu ku ne wazè ke en pezem guntaan.
EXO 9:16 Iyan, intuǥut ku he meuyag-uyag ka para kayi he ketuyu-an: su wey nu maahà is gehem ku ne wey a mevantug kayi te tivuuk he kelibutan.
EXO 9:17 Piru kemulu nu egkuntedaha is menge etew ku, wey kenè nu sikandan edtuǥutan te kegenat.
EXO 9:18 Umbe keeselem, te iyan ded heini he uras, ibpeuzan ku te ǥiyew he utew gerabi, he wazè pa keenu meseǥazi puun te kegketukud te Ehipto.
EXO 9:19 Umbe, kinahanglan he segugunè ka suǥù he ipemeseled is langun he menge uyaǥen nu wey is langun he menge uripen nu he ziyà te vevesukà, su is langun he ziyà te ǥawas, etew man etawa uyaǥen, ne ebpematey emun egkeuluǥan te ǥiyew.’ ”
EXO 9:20 Ne tenged te nekaǥi te Nengazen, nengahandek is duma he menge upisyal te hadì te Ehipto, umbe inggaanggaan dan ipemeseled is menge uripen dan wey is menge uyaǥen dan.
EXO 9:21 Piru sikan is duma he wazà medseǥipà dutun te migkaǥi te Nengazen; ne ziyè dà mulà te gawas is kandan he menge uripen wey menge uyaǥen.
EXO 9:22 (Ne hein iyan en timpu te kedtumana te Nengazen duen te lalag din) migkeǥiyan din si Moises te, “Ivayew nu en is tuked nu pehendiyà te zivavew su wey mengeulug is giyew kayi te tivuuk he Ehipto su wey meuluǥi is menge etew, menge uyaǥen, wey is langun he menge pinemula.”
EXO 9:23 Umbe, hein imbayew ni Moises sikan is tuked din diyà te zivavew, impepemeransì te Nengazen, impeuzan te giyew, wey impepengilat. Is menge uzan he ǥiyew he impeuzan te Nengazen diyà te tanà he Ehipto,
EXO 9:24 iyan utew gerabi puun te kegkehimuwa te Ehipto he nasyun. Ne zutun te ebpenggiyew, edtulung en daan ebpengilat.
EXO 9:25 Nekeeneb diyà te Ehipto is giyew ne nekezezaat te menge etew wey menge uyaǥen he ziyà te ǥawas, ragkes is langun he menge pinemula wey menge kayu.
EXO 9:26 Iyan dà wazà duen giyew is tanà he Goshen he zutun ed-ubpà is menge Israilihanen.
EXO 9:27 Ne mibpesuǥuan te hadì si Moises wey si Aaron. Ne ke sikandin diyà te kandan te, “Guntaan netuenan ku en he nekesalà a; netuenan ku he ebpekevenar is Nengazen ne iyan a nesayep wey is menge etew ku.
EXO 9:28 Iampù niw ziyà te Nengazen he ipeengked din en heini is gerabi he veransì wey giyew. Ne human ku en sikiyu edtuǥuti te kedhipanew; kenè kew en ereg he ed-ubpè pa kayi.”
EXO 9:29 Ne midtavak si Moises te, “Kengkuwan te kebpekeǥawas ku kayi te inged, ibayew ku is belad ku su ed-ampù e en diyà te Nengazen. Ne ed-engked is menge veransì ne egkaawà is giyew, su wey nu metueni he gaked te Nengazen heini is kelibutan.
EXO 9:30 Iyan, netuenan ku en he sikew wey is menge upisyal nu, ne kenè kew pa ǥihapun egkahandek te Nengazen he Megbevayà.”
EXO 9:31 (Nezeetan is menge pinemula zan he flax wey barli su zutun he timpu, nelutuan en is menge barli ne nengevukad en is menge flax.
EXO 9:32 Ne is menge trigu wey is sintinu wazà mulà mezeeti su nehuziyan.)
EXO 9:33 Ne mid-ewaan ni Moises haazà is hadì, ne migawas sikandin dutun te inged. Imbayew zin is menge velad din te ked-ampù diyà te Nengazen; ne mid-engked is beransì, is kebpenggiyew, wey is uzan.
EXO 9:34 Ne hein naahà dutun te hadì he mid-engked en is uzan, is giyew, wey veransì, ne mid-uman en maan sikandin mebpekesalà. Impemezesen din wey te menge upisyal zin is gehinawa zan.
EXO 9:35 Ne tenged te kezesen te gehinawa zin ne wazè din ipeǥenat is menge Israilihanen, sumalà te nekaǥi te Nengazen pinaaǥi ki Moises.
EXO 10:1 Ne migkeǥiyan te Nengazen si Moises te, “Hendiyè ka te hadì te Ehipto, su ebpekezesenen ku is gehinawa zin wey is gehinawa te menge upisyal zin, su wey ku ikepedayun ikepaahà diyà te kandan is menge singyal he ebeelan ku,
EXO 10:2 su wey niw metudtul ziyà te menge anak niw wey menge apù niw is paaǥi te kedsiluti ku te menge Ehiptohanen wey is paaǥi te kebpaahà ku kandan te menge singyal he mibeelan ku, su wey niw metueni he iyan a Nengazen.”
EXO 10:3 Ne midhendiyà si Moises wey si Aaron te hadì ne migkeǥiyan dan sikandin te, “Iyan heini migkaǥi te Nengazen he iyan Megbevayà te menge Hebriyuhanen, ‘Sengemenu kun is keluǥayad te kebpelavew nu ziyà te etuvangan ku? Tuǥuti nu te kegenat is menge etew ku su wey zan mekaazap kedì.
EXO 10:4 Ne emun kenè nu edtuǥutan te kegenat is menge etew ku, ibpeseǥazan ku keeselem te menge etew nu kayi te Ehipto is pigada pinaaǥi te terapan.
EXO 10:5 Ne tenged te utew subra is kahabet dan, ne kenà ebpekelepew is tanà. Ne iyan heini ebpekaamin duen te zeisey he nesamà keniyu hein nenggiyew, ne idragkes dan is langun he kayu ziyà te menge pemuleey niw.
EXO 10:6 Ne egkepenù te terapan is turuǥan nu, wey is menge valey te menge upisyal nu wey is menge valey te langun he Ehiptohanen. Ne wazè pa heeyan keenu meseǥazi te menge kepuun niw puun te ked-ubpè dan kayi he tanà taman en guntaan.’ ” Ne zutun miberiyung si Moises ne mid-ewaan din is hadì te Ehipto.
EXO 10:7 Ne migkaǥi sikan is menge upisyal te hadì diyà te kandin te, “Ebpekesigudu en ebpekeveǥey kenitew te kezeetan heeyan he etew, umbe deyzey ke edtuǥutan nu en sikandan te kegenat su wey zan maazap is Nengazen he Megbevayè dan. Su isipa nu man, nezeetan en heini is Ehipto.”
EXO 10:8 Umbe, impelikù dutun te hadì si Moises wey si Aaron, ne migkaǥi haazà is hadì diyà te kandan te, “Egkehimu en he egenat kew te ked-azap te Nengazen he Megbevayè niw, piru id-insè ku keniyu ke hentei keniyu is eduma te egenat?”
EXO 10:9 Midtavak si Moises te, “Egenat key langun: batà wey meǥurang. Edumahan dey is menge anak dey wey menge uyaǥen dey, su edsilibra key te pista para te Nengazen.”
EXO 10:10 Ne migkaǥi haazà is hadì te, “Dumahi kew te Nengazen; iyan, kenà a edtuǥut, su emun idtuǥut ku he edumahan niw is menge pemilya niw ne siguradu zuen mezaat he ed-ul-ulahan niw.
EXO 10:11 Kenà a edtuǥut! Iyan dà is menge maama ibpehipanew para mekaazap te Nengazen, emun iyan heeyan egkesuatan niw.” Ne zutun, impaawà si Moises wey si Aaron dutun te etuvangan te hadì.
EXO 10:12 Ne migkaǥi is Nengazen diyà te ki Moises te, “Bentanga nu is tuked nu keniyan te tanà he Ehipto su wey mekeuma is menge terapan, ne egkeenen dan is menge pinemula he wazà mezeeti zuen te ǥiyew.”
EXO 10:13 Umbe, mibantang ni Moises diyà te tanà he Ehipto sikan is tuked din, ne zutun te tivuuk he andew wey tivuuk he kezukileman, impepengeramag te Nengazen dutun he tanà te keramag he ebpuun diyà te edsilaan. Ne kegkemeselem, nekeuwit en te terapan haazà is keramag
EXO 10:14 he utew gerabi, ne midhurapun heini ziyà te tivuuk he Ehipto. Wazè pa iring dutun he kebpendezaat te terapan puun te nehuna he timpu wey minsan te huziyan he timpu.
EXO 10:15 Midhurunan dan is tivuuk he Ehipto ne henduen be te mibmeitem is tanà. Mid-amin dan keena sikan is wazà mezeeti zuen te ǥiyew. Migkaan dan is minsan hengkey he midtuvù diyà te menge pemuleey wey is menge veǥas te kayu. Umbe wazè en nesamà he pinemula ziyà te tivuuk he Ehipto.
EXO 10:16 Ne tenged dutun migègaanan pesuǥui te hadì si Moises wey si Aaron, ne ke sikandin diyà te kandan te, “Nekesalà a ziyà te Nengazen he iyan Megbevayè niw wey ziyà daan te keniyu.
EXO 10:17 Umbe, peseyluwa ad maan keniyu tenged te salè ku te minsan kesevaha zà, ne ampù kew ziyà te Nengazen he Megbevayè niw he iawè din heini is ebpekepatey he pigada.”
EXO 10:18 Ne mid-awà dutun si Moises te hadì, ne mid-ampù diyà te Nengazen.
EXO 10:19 Ne zutun impepengeramag te Nengazen te mevandes he keramag he ebpuun diyà te edsenlepan, ne impenlayap dutun sikan is terapan ne ziyà meuwit te Zaǥat he Meriǥà. Ne wazè en terapan he nesamà diyà te tivuuk he Ehipto.
EXO 10:20 Iyan, midhimu gihapun te Nengazen he mebmezesen is gehinawa te hadì te Ehipto, ne wazè din tuǥuti te kegenat is menge Israilihanen.
EXO 10:21 Ne migkeǥiyan te Nengazen si Moises te, “Ivayew nu is belad nu pehendiyà te zivavew su wey utew mibmerusirem diyà te tivuuk he Ehipto.”
EXO 10:22 Ne imbayew ni Moises is belad din pehendiyà te zivavew, ne utew mibmerusirem diyà te tivuuk he Ehipto seled te tetelu he andew.
EXO 10:23 Ne zutun, wazà minsan sevaha he nekehimu he egawas diyà te ed-ubpaan din seled te tetelu he andew su kenà ebpekaahà. Piru merayag mulà is diyà te lugar he ed-ubpaan te menge Israilihanen.
EXO 10:24 Ne mibpesuǥuan te hadì si Moises ne migkeǥiyan din te, “Genat kew en! Ezapa niw en is Nengazen, su elin ku en ibpezuma keniyu is menge pemilya niw, iyan dà itaǥak niw is menge uyaǥen niw.”
EXO 10:25 Piru midtavak si Moises te, “Kinahanglan he ed-uwiten dey is menge uyaǥen dey su wey zey mepemuhat te menge pemuhat is Nengazen he Megbevayè dey, ragkes en is menge pemuhat he edtutungen.
EXO 10:26 Ed-uwiten dey is langun he uyaǥen dey; kinahanglan he wazà minsan sevaha he egkesamà. Su wazè dey pa metueni ke hengkey he kelasi te uyaǥen is ibpepemuhat te Nengazen kenami. Emun diyè key en ne human dey egketueni.”
EXO 10:27 Iyan, midhimu gihapun te Nengazen he mebmezesen is gehinawa te hadì te Ehipto, ne wazè din sikandan tuǥuti te kegenat.
EXO 10:28 Migkeǥiyan duen te hadì si Moises te, “Awè ka kayi te etuvangan ku! Ne kenè ke en peuman paahà kedì! Su ebpehimetayan ku en sikew emun ed-uman ke pa ebpekid-etuvang kedì.”
EXO 10:29 Ne midtavak si Moises te, “Uya, kenà ad ed-uman ed-etuvang kenikew su iyan heeyan egkesuatan nu.”
EXO 11:1 Ne migkaǥi zutun is Nengazen diyà te ki Moises te, “Duen pa sevaha he pigada he ebpeseǥazan ku te hadì wey te zuma he menge Ehiptohanen. Ne emun egkeseǥazan dan en haazà, ne human kew en edtuǥuti te hadì te kegenat puun kayi te Ehipto ne zutun kenè en kinahanglan he edhangyù kew ziyà te kandin su iyan en sikandin edsegseg keniyu.
EXO 11:2 Keǥiyi nu is menge Israilihanen, maama wey vahi, he mebuyù sikandan te menge elahas he pelata wey menge elahas he vulawan diyà te menge siringan dan he Ehiptohanen.”
EXO 11:3 (Su midhimu te Nengazen is menge Ehiptohanen he mebmahagkap is gehinawa zan diyà te menge Israilihanen, ne si Moises daan, dekelà is kedtehuza kandin te menge upisyal te hadì te Ehipto wey te zuma he menge Ehiptohanen.)
EXO 11:4 Ne zutun migkaǥi en maan si Moises diyà te hadì, “Iyan heini migkaǥi te Nengazen: ‘Kengkuwan te liwazà is kezukileman edhipenawen ku is tivuuk he Ehipto.
EXO 11:5 Ne zutun he timpu ebpematey is kada pengenayan he maama kayi te Ehipto, puun te penganey he anak te hadì he iyan pezem ebpekeilis kandin pehendiyà te penganey he anak duen te uripen he vahi he pereǥaling wey is langun he penganey he anak te menge uyaǥen.
EXO 11:6 Egkezineg kayi te tivuuk he Ehipto is mezaǥing he sineǥawan. Iyan heeyan kinemezeetan he egkehitavù kayi te Ehipto he wazè pa keenu meseǥazi ne kenè en egkeuman egkeseǥazi.
EXO 11:7 Piru ziyà te menge Israilihanen mulà duen kelinew ne wazà minsan gevu te asu he egkezineg.’ Ne pinaaǥi keniyan egketuenan niw he impebiza te Nengazen is menge Ehiptohanen wey menge Israilihanen.
EXO 11:8 Ne is langun kayi te menge upisyal nu edhendiyà te kedì, ne edluhud dan diyà te etuvangan ku is egkaǥi te, ‘Genat ke en wey is langun he edsunud kenikew!’ Ne emun egkeuleule en heini ne egenat e en.” Ne zutun nepauk si Moises ne mid-ewaan din haazà is hadì.
EXO 11:9 Daan he migkaǥi is Nengazen diyà te ki Moises te, “Kenè ka ebpemineǥen te hadì su para ikepeehè ku kayi te Ehipto is mezakel he menge vaal ku he egkengein-inuwan.”
EXO 11:10 Nemetmetahan te hadì te Ehipto is kebpaahà ni Moises wey ni Aaron duen te langun he egkengein-inuwan, iyan, midhimu te Nengazen is gehinawa zin he mezesen he kenà edtuǥut he mekeǥenat is menge Israilihanen puun te Ehipto.
EXO 12:1 Ne migkaǥi is Nengazen diyà te ki Moises wey ki Aaron diyà te Ehipto te,
EXO 12:2 “Heini is bulan guntaan iyan egkehuna he vulan te tuig para keniyu.
EXO 12:3 Keǥiyi niw is tivuuk he keet-etawan te Israel he ziyà te ikesepulù he andew kayi he vulan kinahanglan he megkuwa is kada pemilya te nati he kerehidu etawa kambing para te pemilya zin.
EXO 12:4 Ne emun egkeerangan te senge pemilya he kenè dan egkaamin te egkaan is sengetiman he kerehidu, mebpetelewizè dan dutun te avey zin. Edtelazen dan heini sumalà te kezakel zan wey sumalà te egkekaan te kada etew.
EXO 12:5 Iyan niw pilia is menge meemahan he uyaǥen niw he senge-tuig pa is keǥurang din wey wazè din sazir, egkehimu ke kerehidu, ne egkehimu zaan emun kambing.
EXO 12:6 Elimahi niw haazà taman te ike-14 he andew kayi he vulan, su sikiyu is tivuuk he keet-etawan te Israel, edlepaan niw haazà dutun he timpu emun ebpengirum-irum en.
EXO 12:7 Ne kuwa kew te lengesa kayi ne izazas niw haazà diyà te ǥawas he ziyà te pesikilizà te marku te gemawan wey egkezivavew te marku zutun te ǥemawan te menge valey niw he zutun niw egkeena is edlepaan niw.
EXO 12:8 Dutun he kezukileman, egkeenen niw is usa he tinuug duma te memepait he utanen wey supas he wazè din tapey.
EXO 12:9 Kenè kew kaan te usa he mehilew etawa sinevawan, kekenà, tuuǥa niw heini is tivuuk duma is ulu, paa wey is seled te ǥetek dutun te usa.
EXO 12:10 Kinahanglan he ed-eminen niw haazà egkeena te kenè pa ebmeselem, ne emun duen niw egkesamà te egkeume en is meselem kinahanglan he edtutungen niw haazà.
EXO 12:11 Dutun te kegkeena niw kayi, kinahanglan he naandam kew en te kedhipanew. Sesendalyas kew ne ǥewezi niw is tuked niw, ne ǥaanggaan kew is egkaan. Iyan haazà timpu te Pista te Kedlavey te Belinsuǥuen he edsilibrahan niw te kebeǥey te zengeg kedì.
EXO 12:12 “Su zutun daan he kezukileman edhipenawen ku is tivuuk he Ehipto ne ebpenhimetayan ku is langun he menge pengenayan he menge maama te menge Ehiptohanen, meetew se meuyaǥen. Ne edsilutan ku is langun he menge ed-ezapen kayi te Ehipto. Su iyan a Nengazen.
EXO 12:13 Ne haazà is lengesa, ne iyan tuus te menge valey he zutun kew is menge Israilihanen ed-ubpà. Ne emun egkeehè ku haazà is lengesa ne edlevayan ku zà sikiyu. Ne wazà mulà kezeetan he egkehitavù keniyu kayi te kebpigedahi ku te menge Ehiptohanen.
EXO 12:14 “Ne heini he andew, ne tentenuzi niw heini minsan keenu. Silibraha niw heini kada tuig he iyan pista te kebeǥayi niw kedì te zengeg. Heini he sulunuzen, ne kinahanglan he edtumanen niw taman te peleebuten he menge lapis te kevuwazan.
EXO 12:15 Ne iyan heini ibpeulaula ku keniyu: Kinahanglan he kenè niw edtepayan is supas he egkeenen niw seled te pitu he andew. Umbe kinahanglan he id-awè niw is tapey ziyà te menge valey niw zutun te egkehuna he andew. Su is minsan hentei keniyu he egkaan te midtepayan puun dutun te egkehuna he andew pehendiyà te ikepitu he andew ne ed-isipen sikandin he kenà ragkes te kevuwazan ni Israel.
EXO 12:16 Dutun te egkehuna he andew tiǥum kew te ked-azap kedì ne umana niw heini ul-ulaha zutun te ikepitu he andew. Kinahanglan he wazà duma he terebahu niw seled dutun te pitu he andew, kekenà, iyan dà is kebaal te egkekaan te uman sevaha keniyu.
EXO 12:17 “Silibraha niw is Pista te Supas he Wazè din Tapey, su wey niw kenà melipati haazà is andew te kebpeǥewasa ku keniyu te menge tribu ni Israel puun diyà te Ehipto. Ne iyan suǥù ku is: Kinahanglan he ibpezume en diyà te egketulung egkelapislapis he kevuwazan niw is kedsilibraha kayi.
EXO 12:18 Puun kew te kedsilibra kayi zutun te mezukilem te ike-14 he andew te egkehuna he vulan taman te mezukilem dutun te ike-21 he andew, ne kenè niw tepayi is supas he egkeenen niw.
EXO 12:19 Seled te pitu he andew kinahanglan he wazà tapey ziyà te menge valey niw. Is minsan hentei he egkaan te midtepayan kenè en sikandin ed-isipen he ragkes te kevuwazan ni Israel, tutuu man sikandin he kevuwazan ni Israel wey ke kenà.
EXO 12:20 Dutun he timpu kenè kew kaan te edtepayan. Minsan hendei kew ed-ubpà.”
EXO 12:21 Ne impetawag ni Moises is langun he ebpemendumala te Israel ne migkeǥiyan din te, “Pen-ulì kew en ne keǥiyi niw is langun he menge pemilya niw, he megkuwa zan te nati he kerehidu etawa kambing ne lepaa zan haazà para te kedsilibra te Pista te Kedlavey te Belinsuǥuen.
EXO 12:22 Ipetiǥis niw haazà is lengesa ziyà te yahung. Ne kuwa kew te subpang te hisup ne ipevudseng niw haazà diyà te lengesa ne izazas niw ziyà te zivavew wey pesikilizà he marku te menge ǥemawan niw. Ne wazà edliǥawang keniyu ziyà te valey niw taman te egkepawà.
EXO 12:23 Su edhipenawen te Nengazen is Ehipto te kebpenhimatey te kinekekayan he menge anak he maama te menge Ehiptohanen. Piru emun egkaahà te Nengazen is lengesa ziyà te zivavew wey pesikilizà he marku te ǥemawan, ne edlevayan din dà is baley niw ne kenè din edtuǥutan is ebpendezaat te kedseled diyà te menge valey niw te kebpenhimatey te kinekekayan he anak niw he maama.
EXO 12:24 Tumana niw heini he sulunuzen wey te menge kevuwazan niw taman te taman.
EXO 12:25 Emun ebpekeseled kew en duen te tanà he impenaad te Nengazen he ibeǥey zin keniyu pedeyuna niw is ked-ul-ulaha niw kayi he tulumanen.
EXO 12:26 Ne emun ed-insà is menge anak niw ke hengkey is kehuluǥan duen te tulumanen,
EXO 12:27 keǥiyi niw sikandan te, ‘Pista heini te Kedlavey te Belinsuǥuen te Nengazen he edsilibrahan para te kebeǥey te zengeg te Nengazen, su midlevayan din dà is menge valey tew te menge Israilihanen diyà te Ehipto hein kebpenhimetayi zin te menge Ehiptohanen.’ ” Ne hein nekepasad dutun he edlalag si Moises, ne midluhud is menge Israilihanen ne mid-azap dan is Nengazen.
EXO 12:28 Ne midtuman dan is insuǥù te Nengazen ki Moises wey ki Aaron.
EXO 12:29 Ne hein liwazè en is kezukileman, midhimetayan en te Nengazen is langun he penganey he menge anak he maama diyà te Ehipto, puun te penganey he anak te hadì, he iyan pezem ebpekeilis kandin te kedhadì, pehendiyà te penganey te menge pinirisu ziyà te pirisuwan wey is langun he penganey te menge uyaǥen.
EXO 12:30 Ne zutun he kezukileman mid-enew is hadì wey is langun he menge upisyal zin wey is langun he menge Ehiptohanen. Ne zutun nezineg dan is utew mezaǥing he sineǥawan diyà te Ehipto, su kada valey zan ne zuen duen mibpatey.
EXO 12:31 Dutun he kezukileman, mibpesuǥuan te hadì si Moises wey si Aaron ne ke sikandin diyà te kandan te, “Sigi, genat kew en! Ewai niw en heini is nasyun ku. Genat kew en wey niw maazap is Nengazen, su iyan heeyan edtulungan niw edhengyua.
EXO 12:32 Elin niw en tundana is menge uyaǥen niw su iyan heeyan migkaǥi niw. Ne hengyui niw is Megbevayà he kehizuwi e zin!”
EXO 12:33 Dutun he timpu edeǥusuwen en te menge Ehiptohanen is menge Israilihanen te ked-awà diyà te kandan. Su ke sikandan te, “Egkaamin key en ebpematey emun kenè kew pa egenat!”
EXO 12:34 Ne tenged dutun impenaǥù dan diyà te menge teleǥuey zan is herina he mibmasa zan he wazè pa tepayi. Mibpenenges dan te manggad ne mibpeniang dan te egenat.
EXO 12:35 Midtuman te menge Israilihanen is mibpeveelan kandan ni Moises su mibuyù dan diyà te menge Ehiptohanen te menge elahas he pelata, menge elahas he vulawan, wey menge ebistiyen.
EXO 12:36 Midhimu te Nengazen he mebmeupiya is gehinawa te menge Ehiptohanen diyà te menge Israilihanen umbe imbeǥey zan is mibuyù te menge Israilihanen; pinaaǥi zutun nepenevanan dan is menge Ehiptohanen.
EXO 12:37 Midhipanew is menge Israilihanen puun te Rameses pehendiyà te Sucot. Ne 600,000 is kahabet te menge maama zutun te nemenhipanew ne zuen pa menge vahi wey menge vatà.
EXO 12:38 Ne liyu kandan duen pa mahabet he menge etew he nemenduma kandan he kenà Israilihanen ne elin pa midtundan dan is menge uyaǥen dan he utew mahabet.
EXO 12:39 Pinaaǥi zuen te uwiten dan he minasa he herina he wazè en metepayi, nekevaal sikandan te supas he wazè din tapey. Wazà haazà metepayi is minasa zan su geina te egkezeǥusu sikandan su edsegseǥen en sikandan te menge Ehiptohanen.
EXO 12:40 Is keluǥayad te ked-ubpà te menge Israilihanen diyà te Ehipto, ne 430 he tuig.
EXO 12:41 Ne netapus haazà is 430 he tuig, ne iyan en andew te ked-awà dutun te menge etew te Nengazen diyà te Ehipto.
EXO 12:42 Dutun te tivuuk he kezukileman te kegenat te menge Israilihanen puun te Ehipto, henduen be te wazà medlipezeng is Nengazen te kebantey kandan. Umbe zutun daan he kezukileman ne kenà edlipezeng is menge Israilihanen su ebeǥayan dan te zengeg is Nengazen. Kinahanglan he ed-ul-ulahan dan heini taman te peleebuten he lapis te menge kevuwazan.
EXO 12:43 Migkaǥi is Nengazen diyà te ki Moises wey ki Aaron te, “Iyan heini menge sulunuzen mehitenged te Pista te Kedlavey te Belinsuǥuen: “Dutun te kedsilibra, kenè niw ipekaan is lumelengyawà.
EXO 12:44 Is uripen he egkepemasa niw, egkehimu he egkaan dutun emun midsirkunsidar niw en,
EXO 12:45 piru is midteǥaad dà med-ubpà diyà te keniyu wey is menge sinuhulan niw zà ne kenè niw ipekaan dutun.
EXO 12:46 Diyè dà haazà egkeenà te seled te valey he zutun heini endama. Ne haazà is usa kinahanglan he wazà minsan deisey zutun he ed-uwiten diyà te ǥawas. Ne kenè niw zaan bedtìa wey kenè niw rupeta is minsan hengkey he tulan din.
EXO 12:47 Kinahanglan he edsilibrahan heini te tivuuk he keet-etawan te Israel.
EXO 12:48 “Is kenà Hebriyuhanen he ebpekesahug diyà te keniyu he egkesuat he edsilibra te Pista te Kedlavey te Belinsuǥuen su wey meveǥayi te zengeg is Nengazen, kinahanglan he ipesirkunsidar zin is langun he menge maama he sakup te pemilya zin. Ne human sikandin egkehimu he edtampu su kuwinta, egkehimu en sikandin he Hebriyuhanen. Kenà egkehimu he ebpeketampu zutun is minsan hentei he maama he wazà mesirkunsidar.
EXO 12:49 Is belaud he para keniyu te menge Israilihanen ne iyan ded belaud he para te kenà menge Israilihanen he mid-ubpà duma keniyu.”
EXO 12:50 Midtuman te langun he menge Israilihanen is insuǥù te Nengazen diyà te ki Moises wey ki Aaron.
EXO 12:51 Dutun he andew impeǥawas te Nengazen puun diyà te Ehipto is menge tribu te Israel.
EXO 13:1 Migkeǥiyan te Nengazen si Moises te,
EXO 13:2 “Ipehinungud niw kedì is kada penganey he maama te menge anak niw wey is kada meemahan he egkehuna he anak te menge uyaǥen niw su migaked ku en heini.”
EXO 13:3 Ne migkeǥiyan ni Moises is menge etew te, “Tentenuzi niw heini he andew is andew te kebpeǥewasa keniyu ziyà te Ehipto, he zutun kew mengeuripen, ne tenged te kebpeǥewasa zin keniyu zutun pinaaǥi te mekeǥeǥehem he velad din. Kenè kew kaan te edtepayan.
EXO 13:4 Tentenuzi niw heini he andew zutun te vulan he Abib, he iyan kes andew te kebpeǥewasa keniyu ziyà te Ehipto.
EXO 13:5 Is tanà te menge Canaanhen, menge Hitihanen, menge Amorihanen, menge Hivihanen wey menge Jebusihanen, iyan kes tanà he impenangdù te Nengazen diyà te menge kepuun niw he ibeǥey zin keniyu, su heini he tanà, ne meupiya wey uuzaran. Ne emun ibpeseled kew en te Nengazen dutun he tanà, tumana niw heini he sulunuzen kayi he vulan te egkehuna he vulan te tuig:
EXO 13:6 Iyan keena niw seled te pitu he andew is supas he wazè din tapey ne zutun te ikepitu he andew tukud kew te pista he para te Nengazen.
EXO 13:7 Iyan dà keena niw is supas he kenà edtepayan seled dutun te pitu he andew. Dutun he timpu, kinahanglan he wazà tapey ziyà te menge valey niw wey ziyà te minsan hendei ziyà te ǥawas.
EXO 13:8 Dutun he andew keǥiyi niw is menge anak niw he iyan id-ul-ulaha niw zutun is tenged te kedtentenuzi niw te mid-ulaula te Nengazen para keniyu hein migawas kew puun te Ehipto.
EXO 13:9 Heini he pista, igkepetug-iring te patik diyà te menge velad niw etawa vuked niw he ebpetanudtanud keniyu he kinahanglan he edtudtulen niw is insuǥù te Nengazen su impeǥawas kew zin diyà te Ehipto pinaaǥi te ǥehem din.
EXO 13:10 Umbe, tumana niw heini kada egkeuma is kedtumana zuen te kada tuig.
EXO 13:11 “Emun diyè kew en te tanà te menge Canaanhen su ibeǥey en te Nengazen haazà diyà te keniyu sumalà is impenangdù din diyà te menge kepuun niw,
EXO 13:12 iveǥey niw ziyà te Nengazen is kada penganey he maama etawa meemahan he uyaǥen. Su ǥaked sikandan te Nengazen.
EXO 13:13 Ne tenged kayi egkehimu he edlekaten niw ziyà te Nengazen is asnu niw he pengenayan pinaaǥi te kebpemuhat diyà te kandin te nati he kerehidu. Ne emun kenè niw en edlekaten, kinahanglan he edhimetayan niw pinaaǥi te kebunggua zuen. Egkehimu zaan he edlekaten niw ziyà te Nengazen is kada penganey he maama zuen te menge anak niw.
EXO 13:14 Dutun te huziyan he timpu, emun ed-insà is menge anak niw ke hengkey is ibpesavut dutun, ne ke sikiyu te, ‘Impeǥawas kiw te Nengazen puun diyà te Ehipto su midlibri kiw zin te kegkeuripena kenitew pinaaǥi te kegemita zin te ǥehem din.
EXO 13:15 Su hein kenè kiw edtuǥutan te hadì te kegenat, midhimetayan te Nengazen is langun he penganey he menge anak he maama diyà te Ehipto, wey minsan is meemahan he menge penganey te menge uyaǥen dan. Umbe, ibpemuhat tew ziyà te Nengazen is menge meemahan he penganey he menge uyaǥen tew ne ebelukasan tew is penganey he menge anak tew he maama.’
EXO 13:16 Heini he tulumanen, iring te patik diyà te velad wey vuked he kenà egkelipatan su layun egkaahà su pinaaǥi kayi kenà egkelipatan is kebpeǥewasa kenitew te Nengazen puun diyà te Ehipto pinaaǥi te kegamit din te ǥehem din.”
EXO 13:17 Hein impeǥenat en te hadì is menge Israilihanen, wazà sikandan ipevayà te Megbevayà te zalan he ziyà ebpekevayà te ed-ubpaan te menge Filistihanen minsan pa te iyan haazà mepantek su migkaǥi is Megbevayà te, “Is menge Israilihanen, emun ebpekepekidtebek dan te menge Filistihanen, ne kela ke mahalin is isip dan ne edlikù dan diyà te Ehipto.”
EXO 13:18 Ne tenged kayi, ziyà sikandan ipevayà te Megbevayà te ibayà he ibpehendiyà te Zaǥat he Meriǥà he ziyà ebpekevayà te sibsivayan minsan pa te mekived haazà he zalan. Dutun te kedhipanew te menge Israilihanen puun diyà te Ehipto neǥumeenan sikandan para te kebpekidtebek.
EXO 13:19 Mid-uwit ni Moises is menge tulan ni Jose su geina te impepenangdù ni Jose is menge suled din su ke sikandin te, “Kenà duwazuwa he edtevangan kew te Megbevayà, ne emun ed-awè kew en kayi te Ehipto kinahanglan he ed-uwiten niw is menge tulan ku.”
EXO 13:20 Hein mid-awè en is menge Israilihanen diyà te Sucot, ne ziyà sikandan megkampu te Etam, he kilid te sibsivayan.
EXO 13:21 Emun maandew zutun te kedhipanew zan egiyahan sikandan te Nengazen. Ebpetelihuna kandan sikandin pinaaǥi te mekepal he ǥapun he egkeiring te tukud diyà te egkehunaan dan; ne emun mezukilem, ne pinaaǥi maan te regreg he egkeiring te tukud diyà te egkehunaan dan. Ne iyan haazà ebpeketeyew kandan umbe ebpekehimu sikandan he edhipanew te maandew wey mezukilem.
EXO 13:22 Emun maandew kenà ed-awà diyà te egkehunaan dan sikan is mekepal he ǥapun he iring te tukud, ne emun mezukilem kenà ed-awà diyà te egkehunaan dan sikan is regreg he iring te tukud.
EXO 14:1 Ne migkaǥi is Nengazen diyà te ki Moises te,
EXO 14:2 “Keǥiyi nu is menge Israilihanen he medlikù dan, ne ziyè dan megkampu te uvey te Pi Hahirot, diyà te mid-elangan te Migdol wey Zaǥat he Meriǥà. Uvey heini te zaǥat ne egkaatbang din is Baal Zefon.
EXO 14:3 Umbe edhimuwen niw heini su para meisip te hadì he egkengetazintazin kew ne kenè kew en ebpekeǥawas kayi te sibsivayan.
EXO 14:4 Ne edhimuwen ku he mebmezesen is gehinawa te hadì su wey kew zin mezal-as. Piru edèdeetan ku sikandin wey is menge sundaru zin. Ne pinaaǥi kayi egkeveǥayan a te zengeg, ne egketuenan te menge Ehiptohanen he iyan a kes Nengazen.” Umbe, mid-ulaula heini te menge Israilihanen.
EXO 14:5 Ne hein netudtulan sikan is hadì he mibpelaǥuy is menge Israilihanen, nahalin is isip din wey is isip te menge upisyal zin mehitenged te kegenat te menge Israilihanen. Ke sikandan te, “Nesayep kiw su midtuǥutan tew is menge Israilihanen te kegenat ne ǥuntaan kenè en sikandan ebpekepenilbi kenitew.”
EXO 14:6 Umbe, impaandam dutun te hadì is menge kerwahi zin, ne miduma zin is menge sundaru zin.
EXO 14:7 Ne 600 he utew memeupiya he kerwahi is migamit dan, ne ǥawas dutun duen pa zuma he menge kerwahi ziyà te Ehipto he migamit dan ne zuen netendek he menge egalen dutun te menge sundaru ziyà te kada kerwahi.
EXO 14:8 Mibpengelinteuwan te Nengazen he ibpemezesen din is gehinawa te hadì te Ehipto, umbe, midal-as din is menge Israilihanen he migenat he mezeeǥen.
EXO 14:9 Is menge Ehiptohanen he miduma te kedal-as iyan is menge sundaru te hadì duma is menge pereuntud din te kudà wey menge kerwahi. Ne ziyè dan meseuti is menge Israilihanen te kampu zan he kilid te Zaǥat he Meriǥà wey uvey te Pi Hahirot, he atbang te Baal Zefon.
EXO 14:10 Ne hein ebpekeuvey en haazà is hadì wey is menge sundaru zin, midsirap is menge Israilihanen ne neehè dan is menge Ehiptohanen he edal-as kandan. Ne nahandek sikandan ne nekevuyù sikandan te tavang diyà te Nengazen.
EXO 14:11 Ne migkeǥiyan dan si Moises te, “Maan is kayi key pa kenikew zumaha te sibsivayan para mebpatey? Wazè en be penlevengà diyà te Ehipto? Maan is impaawè key pa kenikew ziyà te Ehipto?
EXO 14:12 Minsan pa te migkeǥiyan dey en sikew hein diyè kiw pa te Ehipto te, bey-ani key en kenikew is ebpenilbi te menge Ehiptohanen su meupiya pa is kebpenilbi kandan kenà is kebpatey ziyà te sibsivayan!”
EXO 14:13 Ne midtavak si Moises te, “Kenè kew mahandek. Pekelig-en kew ne egkeehè niw is paaǥi te Nengazen te kedlibriya zin keniyu ǥuntaan he andew. Su heini is menge Ehiptohanen he egkeehè niw ǥuntaan, ne kenè niw en sikandan egkeuman egkaahà.
EXO 14:14 Su iyan is Nengazen ebpekidtebek para keniyu. Ne kenè en kinahanglan he iyan kew ebpekidtebek.”
EXO 14:15 Ne nengemuyù si Moises diyà te Nengazen ne migkeǥiyan sikandin te Nengazen te, “Hustu ke en he edhangyù. Keǥiyi nu is menge Israilihanen he medhipanew zan en.
EXO 14:16 Ivayew nu is tuked nu ziyà te zivavew keniyan te zaǥat su wey meluwisi is egkezalandalan he tanà diyà te zizalem keniyan te zaǥat su para zutun ebayà is menge Israilihanen.
EXO 14:17 Ibpemezesen ku is gehinawa te menge Ehiptohanen su para del-asa kew zan. Piru edèdeetan ku is hadì wey is menge sundaru zin, wey is menge pereuntud din te kudà wey menge kerwahi. Ne pinaaǥi kayi egkevantug a.
EXO 14:18 Ne emun egkezèdeetan ku en sikandan, ne egketuenan te menge Ehiptohanen he iyan a Nengazen.”
EXO 14:19 Ne zutun is belinsuǥuen te Megbevayà he ziyà edhipanew te egkesineruwan te menge Israilihanen, mid-awà, ne ziyà medliling te egkeiniyuǥan dan. Ne sikan is mekepal he ǥapun he iring te tukud, mid-awà daan su midliling daan diyà te egkeiniyuǥan dan,
EXO 14:20 ne mibpetug-elang te menge Ehiptohanen wey te menge Israilihanen. Ne seled te tivuuk he kezukileman nekeveǥey te kerusirem diyà te menge Ehiptohanen haazà is gapun he iring te tukud, iyan, nekeveǥey mulà te kerayag diyà te menge Israilihanen. Ne tenged dutun, tekew en midlavey is kezukileman ne wazà mekeuvey is menge Ehiptohanen diyà te menge Israilihanen.
EXO 14:21 Ne migketeng ni Moises is belad din diyà te zivavew zutun te zaǥat, ne zutun te tivuuk he kezukileman impehiyup te Nengazen haazà is daǥat te mevandes he keramag he ebpuun diyà te edsilaan ne zutun nevahin is daǥat ne neluwisan is nezalandalan he tanà diyà te zizalem dutun te zaǥat.
EXO 14:22 Ne zutun mebayà is menge Israilihanen, te memaza he ibayà, ne ziyà te egkekewanan dan wey egkeǥivang dan is wahig he neiring te elavet.
EXO 14:23 Ne midal-as sikandan te menge Ehiptohanen. Midal-as kandan is langun he menge kudà te hadì he eguyud te kerwahi, wey is duma he menge sundaru zin he ebpemen-untud te kudà.
EXO 14:24 Ne hein meǥaan en egkepawà dutun he kezukileman nememantew is Nengazen puun duen te mekepal he ǥapun wey regreg he iring te tukud, mibpantew zin is menge sundaru he Ehiptohanen ne mibpengelintuwan din he mengeliveg sikandan.
EXO 14:25 Mibpengelinteuwan din he kenà metileng is menge ligid te menge kerwahi zan su para medlised sikandan he ebpepelelaǥuy zutun. Ke sikandan te, “Ebpeleǥuyan tew is menge Israilihanen su iyan is Nengazen ebpekidtebek kenitew para kandan.”
EXO 14:26 Hein nekelayun en is menge Israilihanen, migkaǥi is Nengazen diyà te ki Moises te, “Ketenga nu is belad nu ziyà te zivavew keniyan te zaǥat su wey mekedlikuey heeyan is daǥat su wey mengelened is menge Ehiptohanen, wey mengelened heeyan is menge kerwahi zan wey heeyan is menge pereuntud te kudà.”
EXO 14:27 Umbe, migketeng ni Moises is belad din diyà te zivavew zutun te zaǥat, ne zutun te meselem nekedlikuey haazà is daǥat. Ne ebpemelaǥuy pezem is menge Ehiptohanen piru midlened sikandan te Nengazen dutun te zaǥat.
EXO 14:28 Nengelened is langun he menge sundaru te hadì te Ehipto he edal-as te menge Israilihanen ragkes en is menge pereuntud te kudà wey menge kerwahi. Wazà minsan sevaha he nesamà kandan.
EXO 14:29 Piru is menge Israilihanen nekevayà mulà sikandan dutun te zaǥat su zuen dan med-ikul te neluwisan he nezalandalan he tanà, ne ziyà te egkekewanan dan wey egkeǥivang dan is wahig he iring te elavat.
EXO 14:30 Dutun he andew midlibri te Nengazen is menge Israilihanen te mezaat he ebeelan pezem kandan te menge Ehiptohanen, ne naahà te menge Israilihanen diyà te veyvey is nemekehidhizeǥà he nemematey.
EXO 14:31 Ne hein naahà te menge Israilihanen is dekelà he ǥehem te Nengazen he impeehè din pinaaǥi te mid-ulaula zin, ne neteǥuan sikandan te kedtahud te Nengazen wey te kedsarig diyà te kandin wey ziyà te ki Moises he suluǥuen din.
EXO 15:1 Migkanta ni Moises wey is duma he menge Israilihanen diyà te Nengazen heini he kentahan: “Egkentahan ku is Nengazen, su mezeeǥen sikandin. Insinumag din diyà te zaǥat is menge kudà wey is ebpemen-untud duen.
EXO 15:2 Is Nengazen iyan ebeǥey kedì te zesen, wey iyan sikandin egkekanta ku. Iyan sikandin menluluwas ku. Iyan sikandin Megbevayè ku, ne edeliǥen ku sikandin. Megbevayà sikandin te menge kepuun ku, ne ebentuǥen ku sikandin.
EXO 15:3 Beǥani is Nengazen; Nengazen is ngazan din.
EXO 15:4 Midlened din diyà te zaǥat is menge kerwahi wey is menge sundaru te hadì te Ehipto. Nengelened diyà te Zaǥat he Meriǥà sikan is egkengeseriǥan he menge upisyal te hadì.
EXO 15:5 Nengelened sikandan te mezalem he wahig; iring sikandan te vatu he inteledted diyà te mezalem.
EXO 15:6 Utew lavew is gehem nu Nengazen; pinaaǥi kayi midruntek nu is menge kuntada.
EXO 15:7 Tenged te kegkemekeǥeǥehem nu, midèdeetan nu is edsukul kenikew. Neregreg is ebpeketutung he pauk nu; iring sikandan te reǥami he nehimu he igmuk.
EXO 15:8 Pinaaǥi zà te kedhiyup nu neked-untud is wahig diyà te zaǥat ne neluwisan is tanà, ne haazà is wahig melig-en is kebpekehitindeg din he neiring te zezuwa he elavat; ne mibadtik haazà.
EXO 15:9 Mibpegalbu is kuntada tew, ke sikandin te, ‘Edel-asen ku sikandan ne edekepen ku; ebehinen ku is ketiǥeyunan dan ne ebpurungan ku heini ebpemulpulusi. Edhulevuten ku is ispada ku ne edèdeetan ku sikandan.’
EXO 15:10 Piru senge pedhiyup nu zà ne nengelened sikandan te zaǥat. Neiring sikandan te timeǥà he inteledted diyà te mezalem.
EXO 15:11 Wazà ed-ezapen te menge etew he ebpekerepeng kenikew, Nengazen. Wazà ebpekerepeng kenikew te kegkewaǥas nu wey kegkemekeǥeǥehem. Iyan ke zà Megbevayà he mibaal te egkein-inuwan he menge vaal!
EXO 15:12 Pinaaǥi te ǥehem nu mid-eveleng te tanà is menge kuntada zey.
EXO 15:13 Tenged te hizu nu he ebpedayun, mibpenguluwan nu is menge etew he midlibri nu. Pinaaǥi te zesen nu, egiyahan nu sikandan pehendiyà te segradu he ubpeey nu.
EXO 15:14 Egkezineg heini te zuma he menge nasyun ne egkerkeren sikandan te kegkahandek. Utew egkeherati is menge Filistihanen.
EXO 15:15 Is menge pengulu te Edom wey Moab, egkeheratan utew te kegkahandek, ne is pengulu ziyà te Canaan, ne edliyasen te kegkahandek.
EXO 15:16 “Uya, utew sikandan egkulbai. Pinaaǥi te ǥehem nu ebpeketireneb sikandan iring te vatu, taman te nekesaǥad en is menge etew he midlibri nu.
EXO 15:17 Ed-uwiten nu is menge etew nu ziyà te tanè nu, wey ibpeubpè nu sikandan diyà te vuntud he migaked nu– kes lugar he mibeelan nu he ed-ubpaan nu, Nengazen, kes baley nu he iyan ka mismu mibaal.
EXO 15:18 Edhadì ka, Nengazen te wazà pidtemanan.”
EXO 15:19 Midlened te Nengazen is menge kudà te hadì te Ehipto wey is menge kerwahi wey is menge pereuntud te kudà dutun te kebpekerapes te menge Israilihanen duen te memaza he tanà duen te teliwazà te zaǥat.
EXO 15:20 Si Miriam is etevey ni Aaron he ebpeneuven te Megbevayà, migkuwa sikandin te tamburin, ne iyan sikandin midhuna te menge vahi te kedtukar te tamburin ne nemenayew sikandan.
EXO 15:21 Ne migkentahan ni Miriam sikandan te heini he kanta: “Kentahi niw is Nengazen, su utew sikandin mezeeǥen. Insinumag din diyà te zaǥat is menge kudà wey is nemen-untud kayi.”
EXO 15:22 Ne puun dutun te Zaǥat he Meriǥà, miduma ni Moises is menge Israilihanen pehendiyà te sibsivayan he Shur. Ne seled te tetelu he andew is kedhipanew zan dutun te sibsivayan ne wazà wahig he neturedu zan.
EXO 15:23 Hein nekeuma sikandan diyà te Mara, duen dutun wahig, piru wazà sikandan mekeinum su mepait haazà is wahig. (Ne iyan haazà hinungdan te kegngezani zutun te Mara su iyan ibpesavut te Mara is mepait.)
EXO 15:24 Ne mibegulbul is menge Israilihanen diyà te ki Moises he ke sikandan te, “Hengkey is egkeinum tew?”
EXO 15:25 Ne nengemuyù si Moises diyà te Nengazen, ne zuen riag he impaahà kandin te Nengazen. Intimbag ni Moises haazà dutun te wahig ne mibmeemis haazà is wahig. Ne zutun te Mara migezaman sikandan te Nengazen ne zutun din daan iveǥey is sulunuzen wey suǥù din kandan.
EXO 15:26 Ke sikandin te, “Emun ebpurungan niw ebpemineǥa is lalag ku te Nengazen he Megbevayè niw, wey emun iyan niw ebeelan is mid-isip ku he hustu, wey emun daan kenè niw ebey-anan is menge sulunuzen wey menge suǥù ku, kekenà, ebpezumdumahan niw, ne kenè ku sikiyu ebpeeǥiyan te minsan hengkey he zaru he impaaǥi ku ziyà te Ehipto, su iyan a is Nengazen ebawì keniyu.”
EXO 15:27 Ne hein mid-uman dan medhipanew nekeuma zan diyà te Elim, ne zuen mulà dutun 12 he menge serebseb wey 70 he kayu he palma, ne migkampu sikandan dutun te uvey te wahig.
EXO 16:1 Puun te Elim, ne midhipanew is tivuuk he keet-etawan te Israel taman te nekeuma zan diyà te sibsivayan te Sin, he nekepetug-elang te Elim wey Sinai. Nekeuma zan diyà hein ike-15 he andew zuen te ikezuwa he vulan te tuig puun te ked-awè dan diyà te Ehipto.
EXO 16:2 Diyà te sibsivayan midriklamu ziyà te ki Moises wey ki Aaron haazà is langun he menge Israilihanen.
EXO 16:3 Ke sikandan te, “Deyzey pa ke ziyè key zà himetayi te Nengazen hein diyè key pa te Ehipto. Diyà, ne ebayèbayè key te minsan hengkey he egkekaan dey. Piru ǥuntaan, mid-uwit key kayi keniyu te sibsivayan wey key mengeumes.”
EXO 16:4 Ne migkaǥi is Nengazen diyà te ki Moises te, “Pemineg ka! Ibpeuzan ku te egkekaan he ebpuun diyà te langit para keniyu. Kada andew ne mebpengamì is menge Israilihanen te egkekaan dan he para zà te haazè dà he andew. Pinaaǥi kayi egezaman ku sikandan ke ebeelan dan be is ibpemeveelan ku kandan wey ke kenà.
EXO 16:5 Keǥiyi nu sikandan he dubliya zan is edtiǥumen dan he egkekaan te ikeenem he andew te kada simana.”
EXO 16:6 Umbe, migkeǥiyan ni Moises wey ni Aaron is langun he menge Israilihanen te, “Kengkuwan te mezukilem, egktuenan niw he iyan is Nengazen mibpeǥawas keniyu puun diyà te Ehipto,
EXO 16:7 ne zutun te meselem egkeehè niw is mekeǥeǥehem he kebpekiduma te Nengazen. Su nezineg din en is menge riklamu niw. Hentei key is edriklemuwan niw? Is tutuu, is Nengazen, iyan edriklemuwan niw.”
EXO 16:8 Ne migkaǥi pa si Moises te, “Ebeǥayan kew te Nengazen te usa he egkekaan niw emun mezukilem wey emun meselem egkeveyangan kew te supas su nezineg din is kebegulbul niw ziyà te kandin. Ne egkesavut niw human he kenè key iyan mibegulbulan niw, kekenà, iyan is Nengazen. Hentei key ves is ebegulbulan niw?”
EXO 16:9 Ne migkeǥiyan ni Moises si Aaron te, “Keǥiyi nu is tivuuk he keet-etawan te Israel he medhitindeg dan diyà te etuvangan te Nengazen su nezineg din is menge riklamu zan.”
EXO 16:10 Ne zutun te kedlelaǥi ni Aaron te tivuuk he keet-etawan, midtengteng sikandan diyà te sibsivayan ne netik-ew zan maahà dutun is mekeǥeǥehem he kebpekiduma te Nengazen diyà te ǥapun.
EXO 16:11 Migkaǥi is Nengazen diyà te ki Moises te,
EXO 16:12 “Nezineg ku is menge riklamu te menge Israilihanen. Keǥiyi nu sikandan te kada mezukilem ne ebpekekaan dan te usa ne kada meselem ne egkeveyangan sikandan te supas. Ne zutun egketuenan niw he iyan a is Nengazen Megbevayè niw.”
EXO 16:13 Ne hein merusrusirem en, nenlepew is utew mahabet he menge piyuǥù diyà te migkempuwan dan ne samè dà kenà meketambun dutun te kampu zan. Ne hein meselem en, nengahames te zehemug is tanà dutun te migkempuwan dan.
EXO 16:14 Ne hein nemezahan en haazà is dehemug, duen neehè dan diyà te sibsivayan he memenipis he utew meputì.
EXO 16:15 Ne wazè dan metueni ke hengkey haazà, umbe mibpein-inseey sikandan, ke “Hengkey heini?” Ne migkeǥiyan sikandan ni Moises te, “Iyan heini supas he imbeǥey te Nengazen diyà te kenyu he para egkekaan niw.
EXO 16:16 Migkaǥi is Nengazen he is kada sevaha keniyu ne medtiǥum sumalà te egkinehenglanen din: senge-ǥantang kada andew is para te sevaha he etew.”
EXO 16:17 Umbe nenguwa is menge Israilihanen dutun he keenen; is duma, mezakel is netiǥum dan ne is duma, ne zeisey zà.
EXO 16:18 Ne hein migantang dan heini, is kada sevaha ne neketiǥum te tig senge-ǥantang. Is neketiǥum te zekelà ne wazà medsubra, ne is neketiǥum te zeisey ne wazà megkurang. Netengkaan dà is nekuwa te uman sevaha.
EXO 16:19 Ne migkeǥiyan sikandan ni Moises te, “Kinahanglan he wazà medteǥana kayi para te sunud he andew.”
EXO 16:20 Iyan, is duma kandan ne wazà mebpezumazuma ki Moises, su midteǥenahan dan is sunud he andew. Piru midtagkey heini ne nerangug. Umbe nepeukan dan ni Moises.
EXO 16:21 Kada meselem ne ebpenguwa is uman sevaha kandan sumalà te egkinehenglanen din. Ne emun ebmeinit en is andew, egkengereney sikan is egkesamè dan.
EXO 16:22 Hein ikeenem he andew, midtakep dan is migkuwa zan–menge zezuwa he ǥantang is para te sevaha he etew. Umbe midhendiyà is menge pengulu te ki Moises ne nenginginsè dan ke maan is midtakep.
EXO 16:23 Ne migkaǥi si Moises diyà te kandan te, “Midsuǥù is Nengazen he kinahanglan he medhimeley kew keeselem su iyan Andew te Kedhimeley, sevaha he segradu he andew para te Nengazen. Umbe hilutua niw is egkesuatan niw te edhilutù; sevawi niw is egkesuatan niw te edsavew. Ne is egkesamà, ne iteǥana niw para keeselem.”
EXO 16:24 Umbe inteǥana zan is nesamè dan para te sunud he andew su iyan man ibpeulaula kandan ni Moises, ne haazà wazà mulà merangug wey wazà daan tegkayi.
EXO 16:25 Dutun migkaǥi si Moises diyà te kandan te, “Keena niw heeyan guntaan he andew. Wazà guntaan egkengeulug he keenen su iyan heini Andew te Kedhimeley he insuǥù te Nengazen.
EXO 16:26 Penguwa kew kayi he keenen seled te heenem he andew, piru te ikepitu he andew ne himeley kew. Heeyan he andew ne wazà ebpekepenguwa te egkekaan.”
EXO 16:27 Piru zuen ded gihapun migawas dutun te ikepitu he andew su ebpenguwa zutun he keenen, piru wazà neehè dan.
EXO 16:28 Ne migkaǥi is Nengazen diyà te ki Moises te, “Sengemenu keluǥayad is kedsupaka kayi te menge etew te menge suǥù ku wey menge penurù ku?
EXO 16:29 Tentenuzi niw he mibeǥayan ku sikiyu te Andew te Kedhimeley, umbe kada ikeenem he andew ne edubliyen ku is menge egkekaan niw para te zezuwa he andew. Kinahanglan he is kada sevaha, ne med-ubpà diyà te seled te valey zin emun ikepitu he andew. Wazà medliǥawang te kebpenguwa te egkeenen.”
EXO 16:30 Umbe, midhimeley haazà is menge etew zutun te ikepitu he andew.
EXO 16:31 Migngezanan haazà te menge Israilihanen he ‘manna’. Iring heini te zeisey he lisu ne meputì, ne meemis iring te menipis he menge supas he midsevukan te teneb.
EXO 16:32 Migkaǥi si Moises te, “Iyan heini suǥù te Nengazen: Taǥù kew te senge-ǥantang he ‘manna’, para te peleebuten he egkelapislapis he menge kevuwazan, para meehè dan is keenen he imbeǥey ku keniyu ziyà te sibsivayan hein impeǥawas ku sikiyu puun diyà te Ehipto.”
EXO 16:33 Ne migkeǥiyan ni Moises si Aaron te, “Kuwa ka te umuy ne teǥui nu te senge-ǥantang he ‘manna.’ Ne isavuk nu heini ziyà te etuvangan te Nengazen para te peleebuten he menge lapis te kevuwazan.”
EXO 16:34 Ne midtuman ni Aaron haazà is insuǥù te Nengazen ki Moises. Midtaǥù si Aaron te ‘manna’ ziyà te Kavan te Kebpekid-uyun su para egketipiǥan heini.
EXO 16:35 Migkaan is menge Israilihanen te ‘manna’ seled te 40 he tuig, taman te nekeuma zan diyà te tanà he ed-ubpaan dan he iyan is Canaan.
EXO 16:36 (Kada andew ebpumpun is kada sevaha kandan te senge-ǥantang he ‘manna’.)
EXO 17:1 Sumalà te suǥù te Nengazen, mid-awà is tivuuk he keet-etawan te Israel ziyà te sibsivayan he Sin ne midlaus dan te kedhipanew zan. Neketulung en sikandan mekahalinhalin taman te nekeuma zan diyà te sevaha he lugar. Ne ziyè dan megkampu te Refidim, piru wazà wahig he egkeinum diyà.
EXO 17:2 Umbe midtebek dan si Moises ke sikandan te, “Beǥayi key te wahig he egkeinum dey.” Ne midtavak si Moises te, “Maan is edtebeken a keniyu? Maan is egezaman niw is Nengazen?”
EXO 17:3 Piru egkengemezahan utew haazà is menge etew zutun, umbe mibpedayun is kedriklamu zan diyà te ki Moises. Ke sikandan te, “Maan is impeǥawas key pa kenikew ziyà te Ehipto? Ebpematey key zè bes te kegkemezahi kayi duma te menge anak dey wey menge uyaǥen dey.”
EXO 17:4 Ne zutun mibuyù te tavang si Moises diyà te Nengazen, “He Nengazen, hengkey is ebeelan ku kayi te menge etew? Samè dà kenè e zan penulenga te vatu!”
EXO 17:5 Midtavak is Nengazen diyà te ki Moises te, “Kuwaa nu is tuked nu he inlagkut nu te Wahig he Nilo, ne huna ka te menge etew. Dumaha nu is duma he menge ebmeǥurangen te menge Israilihanen.
EXO 17:6 Edtaǥazan ku sikew ziyà te vatu ziyà te Horeb. Emun dutun ke en, legkuta nu haazà is batu, ne edtudà puun dutun is wahig su wey zuen egkeinum keniyan te menge etew.” Ne mid-ulaula ni Moises haazà dutun te etuvangan te menge edumala te Israel.
EXO 17:7 Ne haazà he lugar migngezanan, ni Moises te Masa wey Meriba, su geina te zutun sikandin tebeka te menge Israilihanen wey migezaman dan is Nengazen pinaaǥi te kegkaǥi te, “Midumahan kiw ve te Nengazen etawa wazà?”
EXO 17:8 Midsurung te menge Amalikanhen is menge Israilihanen hein diyè dan pa te Refidim.
EXO 17:9 Ne migkaǥi si Moises diyà te ki Josue te, “Pilì ka te menge sakup tew kayi he ebpekidtebek keniyan te menge Amalikanhen. Ne keeselem edhitindeg a ziyà te vuvungan is egkulang duen te tuked te Nengazen.”
EXO 17:10 Umbe, mibpekidtebek ensi Josue te menge Amalikanhen sumalà te insuǥù kandan ni Moises hein kemulu pa si Moises, si Aaron, wey si Hur edtekezeg diyà te vuvungan.
EXO 17:11 Ne zutun te imbayew ni Moises is menge velad din, nekezaag is menge Israilihanen, iyan, emun ibpezizalem din is menge velad din, ne iyan ebpekezaag is menge Amalikanhen.
EXO 17:12 Ne hein neuǥet en ne neveley en is menge velad ni Moises. Umbe migkuwa si Aaron wey si Hur te vatu ne zutun dan ipepinuu si Moises. Ne mibpeziveluyà si Aaron wey si Hur is egawed te menge velad ni Moises taman te kedsanlep te andew.
EXO 17:13 Umbe nezaag eni Josue is menge Amalikanhen.
EXO 17:14 Ne migkaǥi is Nengazen diyà te ki Moises te, “Isurat nu heini zuen te libru para kenà heini melipati ne ipehibelu nu heini ki Josue: Edezeetan ku is menge Amalikanhen.”
EXO 17:15 Ne mibaal si Moises te pemuhatà he migngezanan din te, “Iyan Bendirè ku te Kezeeǥan is Nengazen.”
EXO 17:16 Ke sikandin te, “Tenged te impaahà te menge Amalikanhen is kedsukul zan te Nengazen, ne kenà ed-engkezan te Nengazen te edtebek is menge Amalikanhen taman te taman.”
EXO 18:1 Si Jetro, sikan is memumuhat diyà te Midian he enuǥang ni Moises, netudtulan sikandin te langun he mid-ulaula te Megbevayà diyà te ki Moises wey ziyà te menge etew zin he menge kevuwazan ni Israel. Nezineg din ke mibmenumenu te Nengazen is kebpeǥewasa zin te menge Israilihanen puun te Ehipto.
EXO 18:2 Hein aney, impeulì ni Moises is esawa zin he si Sipora wey sikan is dezuwa he anak dan he menge maama ziyà te ki Jetro he enuǥang din. Is ngazan te sevaha he anak dan iyan si Gershom, su ǥeina te in-anak sikandin te timpu te kegkelumelengyawà ni Moises.
EXO 18:4 Ne is sevaha pa, migngezanan din te Eliezer su geina te iyan edtavang kandin is Megbevayà he ed-ezapen te kepuun din; ne iyan midlibri kandin wey kenà sikandin mepatey te hadì te Ehipto.
EXO 18:5 Ne midhendiyà si Jetro, wey is esawa ni Moises he si Sipora wey sikan is dezuwa he anak dan te kampu eni Moises diyà te sibsivayan he uvey te vuntud te Megbevayà.
EXO 18:6 Daan he mibpeuwitan ni Jetro si Moises te lalag he edhenduen te, “Siak is enuǥang nu he si Jetro, ebpekeuma a ziyan, ne zuma ku is esawa nu wey is dezuwa he anak nu.”
EXO 18:7 Ne tenged kayi midsinuǥung ni Moises is enuǥang din diyà te ǥawas ne midluhud sikandin diyà te etuvangan te enuǥang din wey midhezekan din daan. Ne mibpeinseey sikandan mehitenged te kebpekesavuk te uman sevaha kandan, ne zutun midseled dan diyà te tulda.
EXO 18:8 Ne zutun midtultul ni Moises diyà te enuǥang din is minsan hengkey he mid-ulaula te Nengazen diyà te hadì te Ehipto, wey ziyà te zuma pa he menge Ehiptohanen he para te keupiyaanan te menge Israilihanen. Midtudtul zin is langun he menge mereǥen he nengeseǥazan dan diyà te imbayè dan wey is menge vaal te Nengazen te kedlibri kandan.
EXO 18:9 Ne ingkelipey ni Jetro is langun he meupiya he menge paaǥi te Nengazen te kedlibriya zin te menge Israilihanen para kenà mekezezaat kandan is menge Ehiptohanen.
EXO 18:10 Ke sikandin te, “Idalig tew te Nengazen is kedlibriya zin keniyu ziyà te ǥehem te menge Ehiptohanen wey te hadì dan.
EXO 18:11 Guntaan, netuenan ku en he utew lavew he gemhanan is Nengazen kenà te langun he ed-ezapen, su midlibri zin is menge Israilihanen te kedèdaaǥa kandan te menge Ehiptohanen.”
EXO 18:12 Ne si Jetro he enuǥang ni Moises, nemuhat diyà te Megbevayà te pemuhat he edtutungen wey zuma he menge ibpemuhat diyà te Megbevayà. Ne zutun te kemulu zin en ebeeli haazà, ne nekeuma si Aaron wey is langun he menge edumala te Israel. Ne migkaan dan duma ki Jetro zutun te etuvangan te Megbevayà.
EXO 18:13 Ne zutun te sunud he andew, mibpinuu si Moises is ebpenhusey wey edsambag te menge etew, ne nehepunan is kedliǥuyi kandin te menge etew.
EXO 18:14 Ne hein naahà ni Jetro is langun he mibeelan ni Moises dutun te menge etew, migkeǥiyan din si Moises te, “Maan is ebeelan nu heini kayi te menge etew? Maan is sebsevaha nu is ebaal kayi? Edlinya is menge etew kayi te etuvangan nu puun pa te meselem taman en te ebmerusrusirem en.”
EXO 18:15 Ne midtavak si Moises te, “Geina te ed-uvey sikandan kayi te kediey su id-insè dan ke hengkey is egkesutan te Megbevayà.
EXO 18:16 Ne emun duen menge kesevaan dan, idangep dan kayi te kediey, ne edhusayen ku sikandan ke hentei kandan is ebpekevenar. Ne ibpenurù ku kandan is menge suǥù wey menge sulunuzen he ibpesunud te Megbevayà.”
EXO 18:17 Ne migkaǥi si Jetro te, “Kenà meupiya heeyan is paaǥi nu te kedhimuwa nu kayi.
EXO 18:18 Mibeelan nu is kegkereǥeni nu wey kayi te menge etew. Utew mereǥen heini ke iyan ke zà.
EXO 18:19 Pemineǥa a kenikew ǥuntaan su edsembaǥan ku sikew, ne verakat he zumahi ka te Megbevayà. Leusa nu is ked-ul-ulaha nu te ked-uvey ziyà te Megbevayà para te menge etew. Izangep nu ziyà te kandin is kesevaan dan.
EXO 18:20 Ipelaus nu is kebpenurù nu kandan te menge suǥù wey menge sulunuzen he ibpesunud te Megbevayà. Penurua nu sikandan te paaǥi te kebpengungubpaan wey minsan hengkey he ebeelan dan.
EXO 18:21 Iyan, pilì ka te metau he menge etew he ebpekeuǥup kenikew te kebpenhusey nu. Kinahanglan he metau sikandan he edhusey, edtahud te Megbevayà, egkeseriǥan, ne kenà edawat te sipsip. Himuwa sikandan he menge zatù te menge grupu te menge etew he tig-1,000, tig-100, tig-50 wey tig-10.
EXO 18:22 Ebpenilbi sikandan he menhuhusey te langun he timpu. Iyan sikandan ebpenhusey te minsan hengkey he melemu zà he menge samuk, iyan, is mereǥen he menge samuk, ne ziyè dan idangep te kenikew. Ne heini he paaǥi, ebmahagkap is menge vaal nu te kedtavang kandan.
EXO 18:23 Netuenan ku he iyan heini egkesuatan te Megbevayà he ebeelan nu; emun ed-ul-ulahan nu heini ne kenè ka egkereǥenan. Ne heini he menge etew. Ne zutun, melinawen is kebpekeulì kayi te menge etew.”
EXO 18:24 Ne mibpezumdumahan ni Moises haazà is sambag te enuǥang din.
EXO 18:25 Mibpilì sikandin te menge Israilihanen te menge etew he uluwanen he edhusey, ne midhimu zin sikandan he menge upisyal te grupu te menge etew he tig-1,000, tig-100, tig-50, wey tig-10.
EXO 18:26 Nenilbi sikandan te menge etew he iyan menge zatù te langun he timpu. Iyan sikandan edhusey te menge melemu zà he menge samuk, iyan, is menge mereǥen he menge samuk ne idangep dan diyà te ki Moises.
EXO 18:27 Ne impeulì ni Moises is enuǥang din diyà te nasyun din.
EXO 19:1 Mid-awà is menge Israilihanen diyà te Refidim ne midhendiyè dan te sibsivayan he Sinai. Diyà sikandan megkampu te egkesineruwan te vuntud. Iketelu haazà he vulan te ked-awè dan diyà te Ehipto.
EXO 19:3 Ne midtekezeg si Moises diyà te vuntud su ebpekidhinguma te Megbevayà. Mid-umew sikandin te Nengazen he edhenduen te, “Iyan heini keǥiya nu ziyà te menge Israilihanen he kevuwazan ni Jacob:
EXO 19:4 ‘Neehè niw is mibeelan ku ziyà te menge Ehiptohanen, wey ke mibmenumenu ku sikiyu te ked-uwita ku keniyu zini te kediey, iring te ked-uwit te kulaǥu te menge pispis din he ebpengelangan din te menge pakpak din.
EXO 19:5 Emun ebpurung kew ebpezumazuma kedì wey edsunud kew te kebpekid-uyun ku keniyu, ebpilien ku sikiyu kayi te langun he menge nasyun he egkehimu he menge pinilì he menge etew ku. Kedì is tivuuk he kelibutan,
EXO 19:6 piru egkehimu kew he ǥaked ku he pinilì he menge etew, ne egkehimu kew he ginhedian he ebpenilbi kediey pinaaǥi te kegkememumuhat niw.’ Iyan heini keǥiya nu ziyà te menge Israilihanen.”
EXO 19:7 Ne tenged dutun midtupang si Moises he ebpuun diyà te vuntud ne midtawag din is menge edumala zutun te menge Israilihanen ne midtudtulan din sikandan dutun te migkaǥi kandin te Nengazen.
EXO 19:8 Mid-uyun haazà is langun he menge Israilihanen te migkaǥi kandan ni Moises ne ke sikandan te, “Edtumanen dey is langun he insuǥù kenami te Nengazen.” Ne midtudtul ni Moises diyà te Nengazen is tavak te menge etew.
EXO 19:9 Migkaǥi is Nengazen diyà te ki Moises, “Edhendiyà a te kenikew pinaaǥi te mekepal he ǥapun su wey mezineg keniyan te menge etew is kebpekidlalag ku kenikew. Ne zutun ebpekesarig sikandan layun kenikew.” Hein neipus ni Moises te egkaǥi ziyà te Nengazen is menge tavak te menge etew,
EXO 19:10 migkaǥi pa is Nengazen diyà te kandin te, “Hendiyè ka te kandan ne keǥiyi nu sikandan he mebpekelumpiyu sikandan guntaan wey keeselem. Kinahanglan he pemìpii zan is menge visti zan.
EXO 19:11 Sigureduwa nu he andam sikandan dutun te iketelu he andew, su zutun he andew, siak is Nengazen, ebulus a kayi te Buntud he Sinai ne egkaahà a te langun he etew.
EXO 19:12 Teltali niw is peliǥuy kayi te vuntud te edtemanan te menge etew. Keǥiyi nu sikandan he kenè dan medtekezeg etawa med-uvey zutun te lugtenaan dutun te vuntud. Is minsan hentei he ed-uvey kayi te vuntud ne edhimetayan,
EXO 19:13 etew man etawa uyaǥen. Edhimetayan pinaaǥi te kedtuleng te vatu etawa kebpanà; ne wazà kayi egawed. Egkehimu he edtekezeg is menge etew kayi te vuntud emun egkezineg is meluǥayad he kebpezeǥinga te vudyung.”
EXO 19:14 Ne zutun midtupang si Moises puun dutun te vuntud ne midsuǥù din is menge etew he mebpekelumpiyu. Ne mibpemìpian dutun te menge etew is menge visti zan.
EXO 19:15 Migkeǥiyan ni Moises sikandan te, “Pengandam kew para te meketelu ǥuntaan; kenè niw en dèpa hileveti is esawa niw.”
EXO 19:16 Ne hein meselem dutun te iyan en iketelu he andew, nemeransì wey egkeserasab is kilat, ne zuen mekepal he ǥapun he nekeselikuvung dutun te vuntud, ne egkezineg dutun is utew mezaǥing he vudyung. Ne tenged kayi, migkerker te kegkahandek is langun he menge etew ziyà te kampu zan.
EXO 19:17 Ne miduma ni Moises haazà is menge etew ziyà te gawas te kampu su ebpekidhinguma zan te Megbevayà, ne ziyà sikandan medhitindeg te lugtenaan duen te vuntud.
EXO 19:18 Ne neselikuvungan te evel haazà is Buntud he Sinai su mibulus is Nengazen dutun pinaaǥi te hapuy. Midlipuwak is evel zutun he iring te evel te utew zekelà he rapug, ne nehuyung haazà is tivuuk he vuntud,
EXO 19:19 ne mid-iseg is daǥing dutun te vudyung. Mibpekidlalag si Moises te Megbevayà ne nezineg dan daan is laǥeng te Megbevayà pinaaǥi te mezesen he ruǥung.
EXO 19:20 Mibulus is Nengazen dutun te puntur te Buntud he Sinai, ne zutun migkeǥiyan din si Moises he medtekezeg dutun te puntur te Buntud. Umbe midtekezeg si Moises
EXO 19:21 ne migkeǥiyan sikandin te Nengazen te, “Tupangi nu is menge etew ne petizeeni nu sikandan he kenè dan medrapas duen te taltal zuen te nekepeliǥuy zuen te vuntud su ed-ahaan ku. Su emun ebeelan dan heini, mahabet kandan is ebpatey.
EXO 19:22 Minsan is menge memumuhat he layun ed-uvey kayi te kediey kinahanglan he mebpekelumpiyu sikandan te keugelingen dan su emun kenà, ne edsilutan ku sikandan.”
EXO 19:23 Ne migkaǥi si Moises diyà te Nengazen te, “Kenà ebpekehimu is menge etew te kedtekezeg kayi te vuntud su mibpetizeenan key man kenikew he isipa zey he utew segradu he lugar heini is buntud, ne mibpeteltalan nu kenami is ebpekeliǥuy kayi he kenè dey edrepasen.”
EXO 19:24 Ne midtavak is Nengazen te, “Tupang ka ne veyai nu si Aaron ne zumaha nu kayi. Piru sikan is menge memumuhat wey is kezekelan, ne kenè nu mulà ipehengkayi te kediey. Su emun edteǥel zan edhengkayi, ne edsilutan ku sikandan.”
EXO 19:25 Umbe, midtupangan ni Moises ne migkeǥiyan din is menge etew.
EXO 20:1 Ne migkaǥi is Megbevayà,
EXO 20:2 “Iyan a Nengazen he Megbevayè niw, iyan a mibpeǥawas keniyu ziyà te Ehipto he zutun kew uripena.
EXO 20:3 “Kenè kew med-azap te zuma he ed-ezapen gawas kedì.
EXO 20:4 “Kenè kew mebaal te ed-ezapen he ledawan te minsan hengkey he ziyà te langit, wey minsan hengkey he kayi te tanà, wey ziyà te wahig.
EXO 20:5 Kenè kew mebpenilbi wey med-azap kayi; su siak, is Nengazen, iyan a Megbevayè niw, ne kenà a egkesuat he zuen pa zuma he ed-ezapen niw. Edsilutan ku is menge nekesalà kedì, apil en is menge kevuwazan dan taman te iketelu wey ikeepat he lapis te kevuwazan dan he midselikwey kedì.
EXO 20:6 Piru ibpeehè ku is keupiya ku ziyà te mahabet he lapis te kevuwazan he ebmahal kedì wey edtuman te menge suǥù ku.
EXO 20:7 “Kenè niw ǥemita is ngazan ku te wazè din pulus, su siak is Nengazen he Megbevayè niw, edsilut te minsan hentei he egamit te ngazan ku te wazè din pulus.
EXO 20:8 “Tumana niw is ebpeveelan ku zutun te Andew te Kedhimeley, ne isipa niw haazà he segradu he andew para kediey.
EXO 20:9 Terebahu kew seled te heenem he andew,
EXO 20:10 iyan, is ikepitu he andew he iyan Andew te Kedhimeley ne isipa niw he para heeyan kediey, kes Nengazen he Megbevayè niw. Dutun he andew ne kenè kew medterebahu te minsan hengkey. Kinahanglan daan he kenà medterebahu is menge anak niw, menge suluǥuen niw, wey minsan is kenà menge Israilihanen he mid-ubpà diyà te inged niw. Kenè niw zaan iterebahu is menge ayam niw.
EXO 20:11 Su seled te heenem he andew is kebeeli ku te langit, tanà, daǥat, wey te langun he menge seled dutun, ne midhimeley a hein ikepitu en he andew. Ne mibpenubtuvazan ku haazà is Andew te Kedhimeley ne midhimu ku he segradu he andew para kediey.
EXO 20:12 “Tehuza niw is amey niw wey iney niw, su para luǥeyazi kew te untung ne egkeuǥet is ked-ubpè niw zutun te tanà he ibeǥey ku keniyu.
EXO 20:13 “Kenè kew mebunù.
EXO 20:14 “Kenè kew mebpengumpadi.
EXO 20:15 “Kenè kew mebpenakew.
EXO 20:16 “Kenè kew medtarùtarù diyà te hukmanan te kedezaat te zuma niw he etew.
EXO 20:17 “Kenè niw meimahi is baley te zuma niw, etawa esawa te zuma, menge suluǥuen, menge uyaǥen dan, wey minsan hengkey he ǥaked dan.”
EXO 20:18 Ne hein nezineg duen te menge etew is beransì, wey zaǥing te vudyung, wey hein neehè dan is egkeserasab he kilat, wey evel zutun te vuntud, migkerker sikandan te kegkahandek dan, ne mibpekeziyù sikandan.
EXO 20:19 Ne migkeǥiyan dan si Moises te, “Ebpemineg key minsan iyan ke zà ebpekidlalag kenami ne kenè nu en iyan ipepekidlalag kenami is Megbevayà su kela ke mebpemematey key.”
EXO 20:20 Ne migkeǥiyan sikandan ni Moises te, “Kenè kew mahandek su ibpeehè dà keniyu te Megbevayà is mekahandekhandek he ǥehem din su wey kew meteǥui te zekelà he kedtahud kandin, su para kenè kew mekesalà.”
EXO 20:21 Wazà med-awà is menge etew zuen te nepunduwan dan, ne si Moises mulà mid-uvey zuen te mekepal he ǥapun he zutun is Megbevayà.
EXO 20:22 Ne migkeǥiyan te Nengazen si Moises te, “Keǥiya nu ziyà te menge Israilihanen heini is lalag ku ziyà te kandan he edhenduen: Neehè niw is kebpekidlalag ku keniyu puun diyà te langit.
EXO 20:23 Kenè kew mebaal te ledawan he ed-ezapen niw zaan iring te ked-ezapa niw kedì, kenè kew mebaal te ledawan he pelata wey ledawan he vulawan he ed-ezapen niw.
EXO 20:24 “Baal kew te tanà he pemuhatà he iyan ebpemuhatan niw kediey, ne zutun niw ipemuhat is menge kerehidu niw, menge kambing, wey menge vaka he pemuhat he edtutungen wey pemuhat he para te meupiya he kedepità. Ne veeli niw heini ziyà te lugar he mibpilì ku he zutun a ed-ezapa, ne edhendutun a is ebpenuvadtuvad keniyu.
EXO 20:25 Emun ebaal kew te pemuhatà he vatu para kediey ne kenè niw heini vesbasi, su emun egemitan niw heini te gelemiten he para ibasbas, ne kenè en heini ereg he egemiten para te kebpemuhata kedì.
EXO 20:26 Ne kenè kew pemenahik dutun te pemuhatà pinaaǥi te heǥezan su wey kenà mesiniling is id-eelesè niw.”
EXO 21:1 Migkaǥi is Nengazen diyà te ki Moises, “Iyan heini menge sulunuzen he ibpetuman nu te menge Israilihanen:
EXO 21:2 “Emun duen ebpemasa te uripen he Hebriyuhanen, kinahanglan he seled dà te heenem he tuig is kebpesilbiya zin dutun diyà te kandin. Ne zutun te ikepitu he tuig, kinahanglan he ed-engkezan din en te ed-uripen, ne kenè en ibpevayad te minsan hengkey.
EXO 21:3 Emun wazè din esawa zutun te timpu te kegkeuripena kandin ne zutun en sikandin mekepengesawa te uripen en sikandin, ne iyan dà sikandin ebpekeǥawas te kegkeuripen dutun te ikepitu he tuig. Iyan, emun duen din en esawa zutun te kegkeuripena kandin, ne ebpekeǥawas haazà is esawa zin duma kandin.
EXO 21:4 Ne emun impepengesawa sikandin te egalen din dutun te timpu he kemulu en sikandin uripen, ne is bahi wey is menge vatà, ne egketaǥak dan dutun te egalen dan, umbe iyan dà ebpekeǥawas te kegkeuripen haazà is maama.
EXO 21:5 “Iyan, emun egkaǥi haazà is maama te, ‘Kenà a egawas te kegkeuripena kedì su mahal ziyà te ǥehinawa ku is egalen ku, esawa ku wey is menge anak ku.’
EXO 21:6 Emun iyan haazà, kinahanglan he ed-uwiten sikandin dutun te egalen din diyà te menge zatù. Ne ed-uwiten sikandin diyà te marku te ǥemawan ne ebusluwen is telinga zin. Ne egkehimu sikandin he uripen dutun te egalen din taman te kemetayen din.”
EXO 21:7 “Ne emun ibpeuripen te maama is anak din he vahi pinaaǥi te kebelegyaa zin dutun, ne kenà iring te paaǥi te kebpekeǥawas te maama he uripen is paaǥi te kandin he kebpekeǥawas te kegkeuripen su kenà mulà sikandin ebpekeǥawas dutun te ikepitu he tuig.
EXO 21:8 Ne emun kenà sikandin ebpekepenunuat dutun te egalen din he teǥiuripen kandin, kinahanglan he velukasi sikandin te pemilya zin. Iyan, wazè en ketenged dutun te egalen te kebelegyà dutun te vahi ziyà te menge lumelengyawà su iyan haazà is egalen midsupak te kuntrata.
EXO 21:9 Ne emun ibpeesawa te egalen is uripen din he vahi te anak din he maama, kinahanglan he kenè din en ed-isipen he uripen haazà is bahi, kekenà, isipa zin en he anak din.
EXO 21:10 Ne emun eduwayan sikandin dutun te esawa zin, kinahanglan he kenà egkahalin is ked-elimahi zin dutun te kakey he esawa zin pinaaǥi te keenen, pemisti, wey kedhuliza kandin.
EXO 21:11 Ne emun kenè din heini igkeveǥey zutun te kakey he esawa zin is tetelu he kelasi, ne ebpekeǥawas en haazà is bahi te kegkeuripena kandin ne kenè ne kinahanglan he ebayad sikandin te selapì.
EXO 21:12 “Sikan is ebpekepatey te zuma zin he etew, kinahanglan daan he edhimetayan.
EXO 21:13 Iyan, emun wazè din tivevaa is kegkepetaya zin dutun, kekenà, nevèbeelan is kegkehitevua zutun su tenged te imbanglis ku, ne egkehimu sikandin he ebpelaǥuy ziyà te lugar he idteǥana ku.
EXO 21:14 Iyan, emun duen edhimatey te zuma zin he etew pinaaǥi te akal, ne minsan diyè pa sikandin mebpelaǥuy te pemuhatà para kediey, iawè niw zutun ne himetayi niw ziyà te gawas.
EXO 21:15 “Is minsan hentei he ebuǥel etawa ebpalì te amey zin etawa iney zin, kinahanglan he edhimetayan.
EXO 21:16 “Is minsan hentei keniyu he egebpà te sengeeetew su ibelegyè din, ne minsan wazè din pa haazà ikevelegyà dutun te kegkezekepi kandin, kinahanglan he edhimetayen sikandin.
EXO 21:17 “Is minsan hentei keniyu he edrawak te amey zin etawa iney zin, kinahanglan he edhimetayan.
EXO 21:18 “Emun duen ebpetebekà, ne is sevaha egkepelian etawa egkeruuǥan pinaaǥi te vatu etawa pinaaǥi te sumbag, iyan, kenà sikandin ebpatey, kekenà, kenè dà sikandin ebpekehimu he edterebahu seled te egkepipira he andew.
EXO 21:19 Ne emun ebpekeenew en wey ebpekehipanew en minsan pa ke edtutuked dà, ne iyan dà silut duen te etew he nekevaal zuen is: ebpeveyazan kandin is menge timpu te kegkeetresadu zutun te sevaha, ne etimana zin taman te egkepurung haazà egkeulii.
EXO 21:20 “Emun duen ebpukpuk te uripen din he maama etawa vahi ne edsilutan sikandin emun ibpatey zutun te uripen haazà.
EXO 21:21 Iyan, emun kenà ibpatey zutun te uripen haazà is kebpukpuka kandin ne ebpekeenew heini, kenà edsilutan haazà is egalen su ǥaked din man haazà is uripen.
EXO 21:22 “Emun duen maama he ebpetebekà he tenged dutun duen meǥingey he egkesazir he tenged dutun egketeǥel is kebpekaanak din iyan, kenè ded utew ebpekezezaat kandin haazà, ne haazà is nekesazir kandin kinahanglan he ibpevayad sumalà is ibpevayad te teǥiesawa zuen te vahi he ebpezumdumahan te menge zatù.
EXO 21:23 Iyan, emun grabi is kegkesazir zin ne iyan heini kukuman he ikula niw: Is ebpekepatey edhimetayan daan.
EXO 21:24 Is ebpekezezaat te mata te zuma zin edezeetan daan is kandin he mata, is ebpekesepù te ngipen te zuma zin edsepuan daan, is ebpekezezaat te velad te zuma zin edezeetan daan is kandin he velad, is ebpekezezaat te paa te zuma zin edezeetan daan is kandin he paa.
EXO 21:25 Sikan is edtutung te zuma zin, ne edtutungen daan. Sikan is ebpalì te zuma zin, ne ebpelian daan. Ne sikan is ebuǥel te zuma zin, ebuǥelen daan.
EXO 21:26 “Emun duen ebpekezezaat te mata te uripen din he maama etawa vahi, ne iyan bayad dutun is: ebpekeǥawas haazà is uripen te kegkeuripena kandin.
EXO 21:27 Ne emun duen ebpekesepù te ngipen te uripen din, ne iyan ded bayad dutun is ebpekeǥawas haazà is uripen te kegkeuripena kandin.
EXO 21:28 “Emun duen baka he ebpekesungey te maama etawa vahi ne ebpatey haazà is egkesungey, kinahanglan he edhimetayan haazà is baka pinaaǥi te kebpenulenga zuen te vatu, ne kenà haazà egkeenen. Ne kenà edsilutan is teǥiǥaked dutun te vaka.
EXO 21:29 Iyan, emun daan he vetasan dutun te vaka is kebpemenungey ne nepetizeenan en is teǥiǥaked duen, iyan, mibpesagdan din dà, ne emun ebpekepatey haazà is baka te maama etawa vahi, kinahanglan he edhimetayan haazà is baka wey is teǥiǥaked duen.
EXO 21:30 Iyan, emun ebpevayad dà is menge kezumahan dutun te nepatey, ne kenè ne edhimetayan haazà is teǥiǥaked piru kinahanglan he ebeyazan din is ibpevayad kandin.
EXO 21:31 Iyan ded heini velaud emun batà he maama etawa vahi is ebpatey te kegkesungayi kandin te vaka.
EXO 21:32 Ne emun iyan ebpatey te kegkesungayi kandin te vaka is uripen he maama etawa vahi kinahanglan he ebayad is teǥiǥaked dutun te vaka ziyà te teǥiuripen dutun te 30 he vuuk he pelata, ne edhimetayan haazà is baka pinaaǥi te kebpenulenga zuen te vatu.
EXO 21:33 “Emun duen edluwisen din is tambun te vudsi etawa ebangbang sikandin, ne kenè din edtembunan ne egkeulug dutun is baka etawa asnu,
EXO 21:34 kinahanglan he ebeyazan duen te teǥiǥaked te vudsi haazà is ayam he neulug, ne kandin en haazà is minatey he uyaǥen.
EXO 21:35 “Ne emun duen etew he ebpekepatey is baka zin te vaka te zuma zin, ne ivelegyè dan haazà is uuyag ne liwezaa zan te ebahin is halin dutun. Liwezaa zan daan te ebahin haazà is minatey he uyaǥen.
EXO 21:36 Iyan, emun daan he vetasan dutun te vaka is kebpemenungey ne mibpesagdan duen te teǥiǥaked, kinahanglan he edliwanan din haazà ne kandin en sikan is minatey.
EXO 22:1 “Emun duen edtakew te vaka etawa kerehidu he edlepaan din etawa ibelegyè din, ne is sevaha he vaka ebpeliwanan kandin te lelima he vaka, ne is sevaha he kerehidu ebpeliwanan kandin te heepat he kerehidu.
EXO 22:2 Emun mezukilem, ke zuen tekawen he egkabra te elavat su wey mekeseled ne zutun nepatey sikandin, ne kenà salà dutun te nekepatey is kegkepetaya zin duen te tekawen.
EXO 22:3 Iyan, emun maandew is kegkehitevua zutun ne zuen televaken dutun te nekepatey. “Kinahanglan he ibpevayad is tekawen, ne emun wazè din igkevayad ne ivelegyà sikandin su wey iyan ikevayad te tinakew zin is bali zin.
EXO 22:4 Emun egkesepenan diyà te kandin is tinakew zin he vaka, etawa asnu, etawa kerehidu, he uuyag pa haazà, kinahanglan he edtekepen is ibpevayad kandin.
EXO 22:5 “Emun duen uyaǥen te sevaha he etew he impaawè din ne neketabtab te pinemula te zuma, kinahanglan he ebeyazan din te pinekemeupiya he neraǥun din diyà te vevesukè din etawa pemuleey zin te paras.
EXO 22:6 “Emun egketuvù is hapuy he edelandap diyà te meribpesen ne ebpekevinsul te menge inemung etawa wazè pa meǥarab, emun kenà ne sengeereduwan en, ne kinahanglan he ibpevayad sikan is midtuvù te hapuy.
EXO 22:7 “Emun duen ibpetipiǥan din is selapì din etawa mahal he menge azen din te sengeeetew, ne emun egketakew haazà puun dutun te impetipig ne ibpevayad te edtekepen is midtakew zutun emun egkezekepan.
EXO 22:8 Iyan, emun kenà egkezekepan sikan is tekawen ne sikan is impetipig, kinahanglan he ed-etuvang diyà te menge zatù su wey metueni ke migkuwa zin etawa wazà, is mibpetipiǥan kandin.
EXO 22:9 “Is minsan hengkey he kesevaan mehitenged te kebpeeǥawà te azen iring te vaka, asnu, kerehidu, manggad, etawa minsan hengkey he netazin he zuma he azen he egkeeǥewaayan, ne iyan is menge zatù edhusey zutun. Ne sikan is egkeǥiyen dutun te menge zatù he iyan egkevenaran, ne ibpevayad te edtekepen is bali zuen te tekew zin en egekeza.
EXO 22:10 “Emun ebpeelimahan din te zuma zin is asnu zin, baka zin, kerehidu zin, etawa zuma he kelasi te uyaǥen, ne emun ebpatey haazà, etawa egkeseziran, etawa egketazin, iyan, wazà netau ke maan,
EXO 22:11 ne egkehusey sikandan pinaaǥi te kedsesapà duen te impeelima ziyà te etuvangan te Nengazen he wazè din hanew ke maan is netazin haazà is mibpeelimahan kandin. Ne kinahanglan he edtuu zutun sikan is teǥiǥaked ne haazà is impeelima ne kenè en ibpevayad.
EXO 22:12 Iyan, emun midtakew haazà is uyaǥen, kinahanglan he ibpevayad sikan is mid-elima zuen.
EXO 22:13 Ne emun mideesan te leew he langgam, kinahanglan he ed-uwiten duen te mid-elima is samà dutun, su wey maahà, su iyan haazà tuus he tutuu he nekeizan te leew he langgam.
EXO 22:14 “Ne emun duen edsambey te uyaǥen te zuma zin, ne haazà is uyaǥen egkesazir etawa ebpatey te wazà dutun sikan is teǥiǥaked, kinahanglan he ebayad haazà is midsambey.
EXO 22:15 Iyan, emun dutun sikan is teǥiǥaked ne kenà ibpevayad haazà is midsambey. Emun mibpilitiyan haazà is uyaǥen ne sikan is impiliti zuen iyan en kuwinta vayad.
EXO 22:16 “Emun edlimbungan te maama is raǥa he wazè pa mekeǥuni ne edhilivetan din haazà, kinahanglan he ibeǥey zin diyà te lukes dutun te vahì is bayad te salè din, ne human ibpeesawa kandin haazà is bahi.
EXO 22:17 Ne emun kenà ibpeesawa te amey zutun te vahi haazà is anak din kinahanglan gihapun he ibpevayad haazà is maama te sungguzanan he para te raǥa.
EXO 22:18 “Himetayi niw is minsan hentei he veyilan.
EXO 22:19 “Is minsan hentei he edtambid te ayam kinahanglan he edhimetayan.
EXO 22:20 “Is minsan hentei he kenè din iyan ebpemuhaten is Nengazen su iyan din ebpemuhaten is duma he ed-ezapen, kinahanglan he ebpurungan edèdeeti.
EXO 22:21 “Kenè niw luplupiǥa is lumelengyawà; kenè niw pesipelahi su nehimu kew zaan he lumelengyawà diyà te Ehipto.
EXO 22:22 “Kenè niw dèdaaǥa is balu he vahi etawa ilu he vatà.
EXO 22:23 Emun ebeelan niw heini, ne ebpengemuyù sikandan kayi te kedì ne siguradu ebpemineǥen ku is pengemuyù dan.
EXO 22:24 Egkepeukan ku sikiyu emun edèdaaǥen niw is balu etawa ilu ne ebpengelinteuwan ku he mepatey kew te ǥumaan su wey mevalu is menge esawa niw, ne wey meilu is menge anak niw.
EXO 22:25 “Emun ibpesambey niw te selapì is minsan hentei he etew ku he pubri, kenè niw pursintuwi iringi te ebeelan te zuma he ebpemesambey te selapì.
EXO 22:26 Emun idsandà te zuma niw is samput din, ne iulì niw ziyà te kandin te kenè pa edsanlep is andew,
EXO 22:27 su iyan dà haazà idtambun din te lawa zin emun edlipezeng sikandin. Iulì niw su emun ebpengemuyù sikandin kayi te kediey ebpemineǥen ku sikandin su hihizuwen a.
EXO 22:28 “Kenè niw sumpelita is Megbevayà wey kenè niw rewaki is ebpengulu keniyu.
EXO 22:29 “Kenè niw lipati is kebeǥey te halad kayi te kedì he ebpuun te neraǥun niw, menge vinu, wey menge lana. “Ipehinungud niw kedì is penganey he anak niw he menge maama.
EXO 22:30 Ne iring ded kayi is ul-ulaha niw ziyà te menge vaka niw wey menge kerehidu niw. Is penganey he menge anak dan he meemahan, seled dà te pitu he andew is kebpezumaha niw zuen diyà te iney zin ne iveǥey niw en kediey zutun te ikewalu he andew pinaaǥi te kebpemuhata niw zuen.
EXO 22:31 “Iyan kew menge etew he pinilì ku, umbe, kenè kew megkaan te usa te minsan hengkey he uyaǥen he midhimetayan te zumezaas he menge langgam. Isamak niw heini te menge asu.
EXO 23:1 “Kenè kew mebpenudtul te menge tarù. Kenè niw uǥupi is mezaat he etew pinaaǥi te kedtarùtarù.
EXO 23:2 Kenè kew med-iring te kezekelan dutun te kebaal zan te mezaat. Emun duen idseysey niw ziyà te hukmanan, kenè niw tembuni is hustu minsan supak is kezekelan dutun te kegkaǥi niw te hustu.
EXO 23:3 Kenè niw depiǥi is pubri ziyà te hukmanan tenged te hizu niw kandin dutun te kasu zin.
EXO 23:4 “Emun egkeehè niw is baka etawa asnu te kuntada niw he nekaawà, kuwaa niw ne ihated niw ziyà te kandin.
EXO 23:5 Emun egkeehè niw is asnu he edtundanen te ebpekigkuntada keniyu he egkelilid tenged te karga zin, kenè niw và dà seǥazi, kekenà, uǥupi niw sikandin wey mekehitindeg haazà.
EXO 23:6 “Kenè niw limbungi ziyà te hukmanan is egkaayuayu.
EXO 23:7 Kenè kew medsumbung te tarù he sumbung. Kenè niw hukumi te kemetayen is etew he kenà ereg he edhimetayan, etawa etew he wazà mekesalà, su edsilutan ku is minsan hentei he ebaal kayi.
EXO 23:8 “Kenè kew medawat te sipsip, su is sipsip iyan ebpekepelakap te etew su minsan netuenan din en is tutuu, edtuisen din gihapun is menge lalag te metazeng he etew.
EXO 23:9 “Kenè niw lupiǥi is lumelengyawà, su netuenan niw is kebpekesavuk te lumelengyawà su nehimu kew zaan he lumelengyawà diyà te Ehipto.
EXO 23:10 “Seled te heenem he tuig pemulai niw is menge tanè niw su wey kew sebpeta.
EXO 23:11 Piru zutun te ikepitu he tuig ipehimeley niw is tanè niw pinaaǥi te kenè niw zuen kedterebehuwa. Ne emun duen dutun ebpenuvù he egkekaan, ne haazà egkehimu he keenen te menge zuma niw he pubri, ne is egkesamè dan egkehimu he keenen te menge leew he langgam. Ne iringa niw zed daan kayi is pemuleey niw te paras wey pemuleey te ulibu niw.
EXO 23:12 “Terebahu kew seled te heenem he andew, piru himeley kew emun ikepitu en he andew, su para mekehimeley zaan is menge vaka niw wey menge asnu niw, ragkes is menge uripen niw he neetew ziyà te keniyu, wey is kenà menge Israilihanen he zuma niw he meǥinged.
EXO 23:13 Purungi niw tumana heini is langun he migkaǥi ku keniyu. Kenè kew ampù diyà te zuma he menge ed-ezapen, ne kenè niw hisguti is ngazan dan.”
EXO 23:14 “Seled te senge-tuig ketetelu kew medsilibra te pista he para te kebeǥey kedì te zengeg.
EXO 23:15 Silibraha niw is Pista te Supas he Wazè din Tapey. Seled te pitu he andew iyan niw keena is supas he kenà edtepayan, sumalà is insuǥù ku en keniyu. Ne netendek he timpu is ked-ul-ulaha niw kayi su ziyè dà te vulan he Abib, su iyan haazà bulan te timpu te ked-awè niw ziyà te Ehipto. Dutun he timpu kinahanglan he med-uwit te halad is kada sevaha keniyu kayi te kediey.
EXO 23:16 Silibraha niw zaan is Pista te Kedraǥun pinaaǥi te kedhelaza niw kayi te kediey te egkehuna he menge sebpet niw ziyà te menge bevesukè niw. Ne elin daan silibriha niw is Pista te Tevas emun egkezerengdeng niw en is menge sebpet niw zutun te kegketapus te tuig.
EXO 23:17 Ne medtampu is menge maama keniyu te kada kegkaamur niw seled kayi te tetelu he pista su kinahanglan he ed-ezapen e zan is Nengazen he Egalen niw.
EXO 23:18 Kenè niw ipemuhat kayi te kedì is lengesa he egkelepikan te minsan hengkey he edtepayan. Is tavà te uyaǥen he ibpemuhat niw kedì te pista, ne kenè niw itaǥak taman te meselem, kekenà, emina niw tutunga.
EXO 23:19 “Uwita niw ziyà te valey te Nengazen he Megbevayè niw is kinemeupiyahan duen te egkehuna he egkeraǥun niw ziyà te tanè niw. “Kenè niw hilutua is nati he kambing te ǥatas te iney zin.
EXO 23:20 “Edsuǥuen ku is belinsuǥuen ku he medhuna keniyu wey kew zin meventayi ziyà te ibayè niw, ne wey kew zin mezuma ziyà te lugar he mid-andam ku para keniyu.
EXO 23:21 Pemineǥa niw sikandin ne tumana niw is egkeǥiyen din. Kenè kew sukul kandin. Su is langun he ebeelan din, ebeelan din pinaaǥi te ngazan ku ne kenè din ebpekewezaan is menge salè niw, etawa kenè kew zin ebpeseyluwen te menge salè niw.
EXO 23:22 Emun ebpurungan niw ebpemineǥa is menge lalag din diyà te keniyu, ne edtumanen niw is langun he egkeǥiyen ku ziyà te keniyu, iyan a egkehimu he kuntada te menge kuntada niw.
EXO 23:23 Edhuna ziyà te ibayè niw is belinsuǥuen ku ne edumahan kew zin diyà te tanà te menge Amorihanen, menge Hitihanen, menge Pirisihanen, menge Canaanhen, menge Hivihanen wey menge Jebusihanen, ne iyan a ebpuew kandan.
EXO 23:24 Kenè niw ezapa wey silbiyi is kandan he ebpen-ezapen, ne kenè niw iringi is menge vaal zan. Purungi niw zèdeeti is menge ed-ezapen dan wey is menge vatu he tedeman dan.
EXO 23:25 Iyan a keniyu ezapa is Nengazen he Megbevayè niw, ne edtuvazan ku sikiyu te keenen wey wahig. Ne id-awè ku is daru ziyà te keniyu,
EXO 23:26 ne zutun te tanè niw wazà keniyu egkerenranan etawa kenà ebpekaanak. Ne ebpengelinteuwan ku he luǥeyazi kew te untung.
EXO 23:27 “Epelihendeken ku wey edliveǥen ku is menge kuntada niw he zutun te egkesineruwan niw ne ebpemekepelaǥuy zan.
EXO 23:28 Ebpehurunan ku te petiyukan is menge Hivihanen, menge Canaanhen, wey menge Hitihanen su wey mesegseg sikandan.
EXO 23:29 Iyan, kenè ku sikandan edsegseǥen seled dà te senge-tuig su emun egkediritsuwan egkeewai te etew heeyan is tanà, ne ed-ubpaan te mahabet he menge leew he langgam ne iyan egkehimu he prublima niw.
EXO 23:30 Ednenenayan ku sikandan te edsegseg su para meiseg kew pa mevuwad su wey niw meeneb haazà is tanà.
EXO 23:31 “Is egketemanan te tanà he ibpaangken ku keniyu ne ebpuun diyà te Zaǥat he Meriǥà pehendiyà te Zaǥat he Mediteraneo, wey ebpuun te disirtu pehendiyà te Wahig he Eufrates. Ebpengelinteuwan ku he mezaag niw is menge etew he ed-ubpà keniyan he tanà su wey niw sikandan mesegseg.
EXO 23:32 Kenè kew pekid-uyun kandan wey te menge ed-ezapen dan.
EXO 23:33 Kenè niw sikandan ipeubpà diyà te tanè niw, su iyan sikandan ibpekesalè niw kayi te kediey. Su emun ed-azap kew te menge ed-ezapen dan, ne iring heini te penuǥes he ebpekeutel keniyu.”
EXO 24:1 Ne migkeǥiyan te Nengazen si Moises te, “Tekezeg ka kayi te kediey ne zumaha nu si Aaron, si Nadab, si Abihu, is 70 he ebpemendumala te Israel. Ne ezapa e zan kayi, iyan, diyè dan dà te meziyù.
EXO 24:2 Iyan ke zà egkehimu he ed-uvey kediey, ne is menge zuma nu kinahanglan he kenè dan mulà med-uvey. Ne is kezekelan keniyu kinahanglan he wazà edtekezeg kayi te vuntud duma kenikew.”
EXO 24:3 Ne hein nekelikù sikandin diyà te menge etew migkaǥi zin kandan is langun he menge lalag wey menge velaud te Nengazen, ne mibperedredseey sikandan is edtavak te, “Ebeelan dey is minsan hengkey he nekaǥi te Nengazen.”
EXO 24:4 Ne insurat ni Moises is langun he nekaǥi te Nengazen. Ne hein nepawà midselemselem sikandin med-enew ne mibaal sikandin te pemuhatà diyà te nevunsuzan duen te vuntud ne impelastar zin is 12 he tedeman he vatu he iyan ibpesavut dutun is 12 he tribu te Israel.
EXO 24:5 Ne midsuǥù din te kebpemuhat is duma zan he vetan-en he menge maama, ne nemuhat sikandan te pemuhat he edtutungen, wey nemuhat daan sikandan te menge tudu he vaka he pemuhat he para te meupiya he kedepità.
EXO 24:6 Ne midliwazà ni Moises is lengesa, is liwazà in-ahuk din diyà te menge yahung ne is sevaha he liwazà impirik din duen te pemuhatà.
EXO 24:7 Ne migkuwa zin sikan is Libru te Kebpekid-uyun te Megbevayà ne mibasa zin diyà te etuvangan te menge etew. Ne midtavak sikandan te, “Ebeelan dey is minsan hengkey he nekaǥi te Nengazen; ebpezumdumahan dey sikandin.”
EXO 24:8 Ne migkuwa si Moises te lengesa ne haazà impirik din diyà te menge etew he ke sikandin te, “Heini is lengesa iyan lig-en wey tuus te paaǥi te kebpekid-uyun te Nengazen diyà te keniyu kayi te kebeǥayi zin keniyu te langun he menge suǥù.”
EXO 24:9 Ne midtekezeg diyà te vuntud si Moises, si Aaron, si Nadab, wey si Abihu, wey sikan is 70 he ebpemendumala te Israel.
EXO 24:10 Ne neehè dan is Megbevayà te Israel, he ziyà mekehitindeg te iring te saag he sapiru he henduen te mehiǥawan he langit.
EXO 24:11 Iyan, minsan pa te neehè dan is Megbevayà ne wazè din sikandan himetayi. Migkaan pa ganì sikandan wey mid-inum diyà te etuvangan te Megbevayà.
EXO 24:12 Ne migkeǥiyan en maan si Moises te Nengazen te, “Laus ke pa tekezeg kayi te kediey ne taǥad ka kayi, su ibeǥey ku ziyà te kenikew is melumpipì he menge vatu he midsuratan te menge suǥù ku wey menge penurù he egkesunud keniyan te menge etew.”
EXO 24:13 Ne zutun midlaus medtekezeg si Moises diyà te vuntud te Megbevayà duma si Josue he suluǥuen din.
EXO 24:14 Hein wazè pa sikandan megenat ne migkaǥi si Moises diyà te menge edumala te, “Taǥad kew taman te ebpekelikù key kayi te keniyu. Ne emun duen menge kesevaan niw ne iyan niw ipehusey si Aaron wey si Hur su kayi mulà sikandan te keniyu.”
EXO 24:15 Ne zutun te kebpekeuma eni Moises diyà te puntur zutun te vuntud, ne haazà is buntud netembunan te ǥapun,
EXO 24:16 ne mibulus is Nengazen dutun te Buntud he Sinai. Ne seled te heenem he andew netembunan te ǥapun haazà is buntud, ne hein ikepitu en he andew mid-umew si Moises te Nengazen puun duen te ǥapun.
EXO 24:17 Ne zutun te kedlaus kedtekezeg ni Moises duen te vuntud, nekeseled sikandin duen te ǥapun. Ne zutun sikandin te vuntud seled te 40 he andew wey 40 he kezukileman. Ne is kezekelan mulà te menge Israilihanen, ne iyan kandan he ked-ahaa te mekeǥeǥehem he kebpekiduma te Nengazen duen te puntur te vuntud is iring te edriyubriyub he hapuy.
EXO 25:1 Migkaǥi is Nengazen diyà te ki Moises te,
EXO 25:2 “Keǥiyi nu is menge Israilihanen te uwiti e zan te menge halad. Ne iyan ka zawat dutun te idhalad dan kayi te kediey he ebpuun diyà te keputian te atey zan is kebeǥaya zan duen.
EXO 25:3 Iyan heini menge halad he egkuwaan nu ziyà te kandan: vulawan, pelata, brunsi,
EXO 25:4 welin he meitem is kaavuavu zin, merudtem wey kanggan, linu, wey bulvul te kambing he hinavel,
EXO 25:5 lundis te meemahan he kerehidu he midtinà te meriǥà, meupiya he kelasi he lundis, kayu he ekasya,
EXO 25:6 lana te ulibu para te sulù, menge pehemut he para te lana he idlana wey para te mehemut he veyewà,
EXO 25:7 wey vatu he uniks wey zuma pa he mahalen he menge vatu he para ibpemikit duen te ipud wey zuen te teleǥuey ziyà te kumeng kayi.
EXO 25:8 Ipevaal nu sikandan te tulda he zutun a ed-ezapa, ne edlumun a ziyà te kandan.
EXO 25:9 Is kebeeli zutun te Tulda he Ed-ezapan wey is langun he menge gelemiten dutun, kinahanglan he iyan egkesunud sikan is mudilu he ibpeehè ku kenikew.
EXO 25:10 “Pevaal ka te Kavan, iyan niw veeli is kayu he ekasya, ne haazà, 45 he vaney is kelayat din, 27 he vaney is keluag din, ne 27 he vaney is ketikang din.
EXO 25:11 Ne ed-epizan te lunsey he vulawan is diyà te seled wey is diyà te gawas te kavan wey ebpeliǥuyan te ribiti he vulawan.
EXO 25:12 Pevaal ka te heepat he mibpen-iring te rintì he vulawan, ne haazà diyà ibpikit te heepat he paa zutun te kavan.
EXO 25:13 Pevaal ka zaan te menge tival he kayu he ekasya ne haazà ed-epizan te vulawan,
EXO 25:14 ne id-ahuk haazà is tival zuen te menge mibpen-iring te rintì duen te kada kilid te Kavan para metival zan haazà is Kavan.
EXO 25:15 Ne haazà is menge tival kinahanglan he kenè en ed-ew-ewaan dutun.
EXO 25:16 Ne itaǥù niw zutun te Kavan is dezuwa he melumpipì he vatu he ibeǥey ku ziyà te kenikew he zutun idsurat is menge Kesuǥuan.
EXO 25:17 “Peveeli nu heini he Kavan te lunsey he vulawan he tangeb, he 45 he vaney is kelayat din wey 27 he vaney is keluag din.
EXO 25:18 Ne pesalsal ka te vulawan ne haazà, ebeelan he zezuwa he ledawan te velinsuǥuen he kirubin. Ne ziyà haazà ibpelastar te pesiziveluyà he egkepengkusan duen te tangeb su para teleubpu zà sikan is menge kirubin wey haazà is tangeb.
EXO 25:20 Kinahanglan he is menge pakpak duen te menge kirubin ne egkevekar ziyà te zivavew zuen te tangeb su para ebpekelambung duen. Ibpedsineru haazà is dezuwa he kirubin ne zutun sikandan ibpetengteng te tangeb.
EXO 25:21 Ne itaǥù nu zutun te Kavan is midlumpipì he menge vatu he edsuratan te menge Kesuǥuan ku he ibeǥey ku kenikew, ne tengevi nu haazà is kavan.
EXO 25:22 Ne ebpekidhinguma a kenikew zutun te mid-elangan duen te dezuwa he kirubin he ziyà te zivavew zuen te Kavan, ne ibeǥey ku kenikew is langun he menge velaud ku para te menge Israilihanen.
EXO 25:23 “Pevaal ka te lemisahan he ekasya, he 36 he vaney is keluǥayad din, ne 18 he vaney is keluag din wey 27 he vaney is ketikang din.
EXO 25:24 Ne peepizi nu haazà te lunsey he vulawan wey peribitiyi nu te vulawan is peliǥuy zutun.
EXO 25:25 Sevuki niw te senipa is ebpekeliǥuy ziyà te zivavew zutun te lemisahan he heepat he vaney is keluag din ne haazà is ibpekaplè niw lituwi niw pekeplai ziyà te zivavew zin te vulawan he ribiti zin.
EXO 25:26 Ne vaal kew te heepat he mibpen-iring te rintì he vulawan ne ipikit niw haazà diyà te heepat he tukud te lemisahan,
EXO 25:27 ne ebpemekeuvey is kebpikita zuen diyà te ibpekaplà he senipa ziyà te zivavew su iyan haazà ed-ehukan te menge tival he idtival zutun te lemisahan.
EXO 25:28 Baal kew te menge tival he kayu he ekasya, ne epizi niw te vulawan ne iyan haazà itival niw zutun te lemisahan.
EXO 25:29 “Baal kew zaan te lunsey he vulawan he menge pinggan, menge tasa, menge umuy, wey menge yehung. Ne haazà, iyan ebpen-ehukan te menge pemuhat he inumen.
EXO 25:30 Kinahanglan he pirmeninti is supas dutun te lemisahan he ibpemuhat kayi te kedì.
EXO 25:31 “Pevaal ka zaan te selevukà te sulù he lunsey he vulawan is menge paa zin, lawa zin, wey is dayandayan dutun he menge vulak, he is duma zuen wazè pa mebekar ne is duma mibekar en. Haazà is dayandayan idredsè dà is kebpurmaha kayi zuen te kebpurmaha te selevukà te menge sulù su teleubpu zà heini.
EXO 25:32 Haazà is selevukà te sulù, duen din heenem he subpang, tigtetelu is diyà te kada kilid kayi.
EXO 25:33 Is kada subpang dutun, duen din tetelu he zayandayan he menge vulak he mid-iring te vulak he almindru, he is duma, memetivurun pa, ne is duma nememekar en.
EXO 25:34 Ne is lawa zutun te selevukà te sulù, ne zuen dutun heepat he zayandayan he ed-iringen te vulak he almindru he wazè pa mebekar wey mibekar en.
EXO 25:35 Duen sevaha he vulak diyà te zizalem te kada paris te subpang.
EXO 25:36 Haazà is menge zayandayan wey menge subpang, idredsè dà is kebpurmaha zuen te kebeeli zuen te lewahan te selevukà te sulù.
EXO 25:37 Ne pevaal ka te pitu he sulù he idsavuk niw zuen te selevukà te sulù, ne ziyè niw haazà ipelastar is selevukà te lugar he egketeyawan is diyà te egkesineruwan din.
EXO 25:38 Kinahanglan he lunsey he vulawan is menge lipit wey is menge selevukà te igmuk.
EXO 25:39 Menge 35 he kilu he lunsey he vulawan is egkeǥamit niw te kebaal te selevukà te sulù wey te langun he menge gelemiten kayi.
EXO 25:40 Kinahanglan he edsungkad is kebeeli niw kayi zuen te mudilu he impeehè ku kenikew kayi te vuntud.
EXO 26:1 “Ipeveeli nu is Tulda he Ed-ezapan. Is egemiten te kebeeli kayi, ne sepulù he lukut he linu he eburdahan te welin he meitem is kaavuavu, merudtem wey kanggan. Ne pepurungi nu heini peburdahi te zagwey te menge kirubin.
EXO 26:2 Iped-iiring niw is kezekelà te kada sevaha, 42 he ǥiek is kelayat din ne heenem he ǥiek is keluag din.
EXO 26:3 Is kada lelima zutun te sepulù he kurtina ne ibpedliliib niw te edtahì (ne haazà is sepulù egkehimu zà he zezuwa).
EXO 26:4 Ne peveeli nu te mibpen-iring te sising is manggad he meitem is kaavuavu zin is diyà te kada kilid te ikezuwa he apid duen te sevaha zutun te impikit he menge tila;
EXO 26:5 kinahanglan he 50 he iring te sising is diyà te kada kilid ne ibped-aatbang haazà.
EXO 26:6 Ne mebaal zan te 50 he kaw-it he vulawan su wey mekedliliib sikan is menge mibpen-iring te menge sising duen te zezuwa he impebpikit he menge tila. Pinaaǥi kayi ne egkeveelan is Tulda he Ed-ezapan.
EXO 26:7 “Ne pevaal ka zaan te tambun duen te Tulda. Ne egemiten is 11 he lukut he manggad he vulvul te kambing
EXO 26:8 Ne iped-iiring niw is keluag wey kelayat dutun te 11 he manggad, kinahanglan he 45 he ǥiek is kelayat din ne heenem he ǥiek is keluag din.
EXO 26:9 Ipedliliib niw is lelima zutun, ne sikan is heenem, ipedliliib niw ǥihapun. Ne is ikeenem he manggad, ne edlumpien diyà te egkesineruwan duen te Tulda.
EXO 26:10 Kinahanglan he zuen 50 he mibpen-iring te sising is kilid duen te id-apid te mibpebpikit he menge tila,
EXO 26:11 ne kinahanglan he ebperisan haazà is menge ebpen-iringen te sising te 50 he kaw-it he brunsi.
EXO 26:12 Edteyuntunen diyà te egkeiniyuǥan duen te tulda is ketengà te manggad he ebpekesubra.
EXO 26:13 Ne edteyuntunen daan diyà te kada kilid is senge-ǥiek wey tengà he manggad he subra te idtambun duen te Tulda.
EXO 26:14 Is divavew zuen te tambun te tulda, pezivevawi niw te lundis te meemahan he kerehidu he edtinaan te meriǥà, ne umani niw pa pezivevawi te meupiya he kelasi te lundis.
EXO 26:15 Is kayu he egkeǥamit niw he menge tabla zuen te Tulda he ed-ezapan, iyan is; metulid he marku he ekasya.
EXO 26:16 Is kada sevaha zutun, ne 15 he ǥiek is keluǥayad din ne zezuwa he ǥiek is keluag din,
EXO 26:17 Ne egkurtiyan niw is kada sevaha zutun su wey mekedhuhulmahà emun ibpenaud niw en. Kinahanglan he wazà minsan sevaha he kenè niw egkurtiyan.
EXO 26:18 Is 20 he tabla kayi, ziyà egemita te egkezivavà he vahin duen te Tulda.
EXO 26:19 Baal kew te 40 he untuzà he pelata he ibpesungkad duen te menge tabla, zezuwa he untuzà is ibpesungkad diyà te kada sevaha he tabla he ziyà ibperenged te kinurtiyan he vahin dutun te tabla.
EXO 26:20 Ne 20 he tabla is egemiten para te egkezizaya he vahin te Tulda,
EXO 26:21 wey sungkad te 40 he menge peuntuzà he pelata–dezuwa he peuntuzà is diyà te kada tabla.
EXO 26:22 Ne heenem he tabla is egkeǥamit diyà te kilid he zapit te edsenlepan,
EXO 26:23 ne zezuwa he tabla is egkeǥamit diyà te kada suyuk diyà te kilid
EXO 26:24 ne haazà ibpegkepleey puun te zizalem pehendiyà te zivavew he iyan ebpekeveǥey te purma zutun te suyuk. Ne pudu ed-iringa kayi is dezuwa he tabla ziyà te menge suyuk.
EXO 26:25 Umbe, zuen walu he menge tabla he para ziyà te menge suyuk wey 16 he menge peuntuzà he pelata su is kada tabla, egkinahanglan te zezuwa he peuntuzà.
EXO 26:26 “Pevaal ka zaan te menge marku he kayu he ekasya he para te elavat, lelima is para te egkezizaya he vahin duen te Tulda,
EXO 26:27 lelima zaan is para te egkezivavà he vahin, wey lelima pa he para te zapit te edsenlepan he egkeiniyuǥan he vahin duen te Tulda.
EXO 26:28 Ne sikan is marku he ibpeteliwazà, kinahanglan he ebpekepangkus duen te Tulda he ed-ezapan, ne ziyà haazà idtaud te teliwazà he pid-elangan duen te menge tabla.
EXO 26:29 Epizi niw te vulawan sikan is menge tabla ne vaal kew te mibpen-iring te rintì he vulawan he ibpenaud dutun te menge tabla he iyan edlugluǥan te menge marku. Ne elin daan epizi niw te vulawan sikan is menge marku.
EXO 26:30 “Kinahanglan he edsungkad duen te mudilu he impeehè ku kenikew kayi te vuntud is kedtukuza niw zuen te Tulda he Ed-ezapan.
EXO 26:31 “Baal kew te kurtina he linu he miburdahan te welin he meitem is kaavuavu, merudtem wey kanggan. Ne eburdahan heini te mekempet he zagwey te menge kirubin.
EXO 26:32 Ne isanggat niw ziyà te menge kaw-it he vulawan he idtaud diyà te heepat he tukud he ekasya he ed-epizan te vulawan he ziyà ibpehitindeg te heepat he untuzà he pelata.
EXO 26:33 Isanggat niw haazà is kurtina ziyà te kaw-it ne isavuk niw ziyà te zivaluy zutun te kurtina sikan is Kavan te Kebpekid-uyun ku keniyu. Pinaaǥi zutun te kurtina egkevahin is seled te Segradu he Lugar wey is Utew Segradu he Lugar.
EXO 26:34 Sikan is Kavan te Kebpekid-uyun ku keniyu, kinahanglan he ziyà idsavuk te Utew Segradu he Lugar ne kinahanglan he edtembunan duen te tambun din.
EXO 26:35 Ne isavuk niw sikan is lemisahan diyà te gawas te kurtina, diyè niw isavuk te zapit te zizaya he zutun te seled te Tulda. Ne id-atbang niw zutun te lemisahan sikan is selevukà te sulù su ziyè niw mulà idsavuk te egkezivavà he vahin dutun te seled te Tulda he Ed-ezapan.
EXO 26:36 “Pevaal ka zaan te sevaha pa he kurtina, he para te ǥemawan dutun te Tulda he Ed-ezapan. Is kurtina kinahanglan he linu he eburdahan te welin he meitem is kaavuavu zin, merudtem wey kanggan. Kinahanglan he meupiya is kegkeburdahi kayi.
EXO 26:37 Ne para kayi he kurtina, baal kew te lelima he tukud he ekasya he ed-epizan te vulawan, ne itaud niw ziyà te kada sevaha zutun is kaw-it he vulawan. Ne vaal kew zaan te lelima he brunsi he ebpehitindeǥan dutun te menge tukud.”
EXO 27:1 Migkaǥi is Nengazen diyà te ki Moises te, “Baal kew te kuwedradu he pemuhatà he kayu he ekasya. Pitu wey tengà he ǥiek is kelayat din ne pitu zaan wey tengà he ǥiek is keluag din, ne heepat wey tengà he ǥiek is ketikang din.
EXO 27:2 Ne veeli niw te sungeysungey is heepat he suyuk dutun, he idredsè dà is kebeeli zuen te kebeeli zutun te pemuhatà. Kinahanglan he ed-epizan te brunsi haazà is pemuhatà.
EXO 27:3 Is langun he menge gelemiten dutun te pemuhatà ne brunsi, he iyan is: menge selevukà te avu, menge pala, menge yahung, menge dezekelà he tinidur he para te usa, wey is menge selevukà te vaǥa.
EXO 27:4 Baal kew zaan te tuuǥà he brunsi he para zutun te pemuhatà, ne pikiti niw te menge brunsi he mibpen-iring te rintì is kada suyuk dutun.
EXO 27:5 Ne isavuk niw heini ziyà te untuzè din he ziyà te tengàtengà he vahin te seled duen te pemuhatà puun te zivavew.
EXO 27:6 Baal kew te tival he ekasya he para zutun te pemuhatà, ne epizi niw haazà te brunsi.
EXO 27:7 Ne haazà is menge tival zuen niw idluglug te mibpen-iring te rintì he ziyà te pesikilizà dutun te pemuhatà su iyan haazà idtival zutun te pemuhatà emun ed-uwiten.
EXO 27:8 Kinahanglan he kahun is beeli niw he pemuhatà. Ne iyan niw iringi sikan is impeehè ku kenikew kayi te vuntud.”
EXO 27:9 “Kinahanglan he zuen lama zutun te Tulda he Ed-ezapan, elaza niw haazà pinaaǥi te kegkurtinahi zuen te linu. Is keluǥayad te kurtina he impelingut diyà te zivavà he kilid ne 150 he ǥiek.
EXO 27:10 Ibpikit heini he kurtina ziyà te 20 he tukud he brunsi he ziyà ipehitindeg te 20 daan he ebpeuntuzan duen he brunsi. Is ebpemikitan duen te menge kurtina, ne iyan is menge kaw-it he pelata he impikit diyà te menge kebilya he pelata ziyà te menge tukud.
EXO 27:11 Is kurtina he ziyà dapit te zizaya ne 150 daan he ǥiek is keleyatan din. Ibpikit daan heini ziyà te 20 he tukud he brunsi he ziyà ipehitindeg te 20 he ebpeuntuzan duen he brunsi. Is ebpikitan duen te menge kurtina ne iyan is menge kaw-it he pelata he ibpemikit diyà te menge kebilya he pelata ziyà te tukud.
EXO 27:12 “Is kurtina he ziyà dapit te edsenlepan he kilid, 75 he ǥiek is keluǥayad din, ne ibpikit heini ziyà te sepulù he tukud he impehulma ziyà te sepulù daan he menge peuntuzà.
EXO 27:13 Is dapit te edsilaan he kilid duen te lama 75 zaan he ǥiek is keluǥayad din.
EXO 27:14 Ne zuen kayi ǥemawan he ed-elangan daan te kurtina is kilid din. Is kurtina ziyà te egkekewanan, 22 he ǥiek is keluǥayad din, ne ibpikit heini ziyà te tetelu he tukud he ibpemehulma ziyà te tetelu zaan he menge peuntuzà.
EXO 27:15 Is kurtina ziyà te egkeǥivang, 22 wey tengà he ǥiek is keluǥayad din, ne idtaud heini ziyà te tetelu he tukud he ibpehulma ziyà te tetelu he peuntuzà.
EXO 27:16 Ne haazà is gemawan, kinahanglan he egkurtinahan te 30 he ǥiek is keluǥayad din he linu he eburdahan te welin he meitem is kaavuavu zin, merudtem wey kanggan ne ebpurungan heini eburdahi. Ne idtaud haazà is kurtina ziyà te heepat he menge tukud he ibpehulma ziyà te heepat he peuntuzà.
EXO 27:17 Is langun he menge tukud he ebpekeliǥuy zutun te lama kinahanglan he zuen dutun menge kaw-it wey menge kebilya he pelata, wey zuen menge pundasyun he brunsi.
EXO 27:18 “Umbe, haazà is lama, zuen din keleyatan he 150 he ǥiek wey 75 he ǥiek he keluaǥan. Ebpeliǥuyan heini te kurtina he linu he is kelayat din, pitu wey tengà he ǥiek. Is menge tukud kayi, ibpehulma ziyà te menge peuntuzà he brunsi.
EXO 27:19 Kinahanglan he pudu brunsi is langun he menge idhiman duen te Tulda he Ed-ezapan ragkes is langun he menge palpal he ibanting dutun te tulda wey is menge kurtina ziyà te lama kayi.
EXO 27:20 “Suǥua nu is menge Israilihanen he uwiti ke zan te lunsey he lana te mibevayu he ulibu he idtubil te menge sulù dutun te Tulda su para layun mekesiǥa.
EXO 27:21 Is selevukà te sulù, kinahanglan he idsavuk diyà te ǥawas te kurtina he ebpeketambun duen te Kavan te Kebpekid-uyun. Si Aaron wey is menge kevuwazan din iyan ed-etiman duen te menge sulù duen te Tulda he Edtelevukaayan. Ibpesiǥa zan heini ziyà te etuvangan ku meselem wey mezukilem. Heini he menge sulunuzen ereg he edtumanen te menge Israilihanen taman te huziyan he menge lapis te menge kevuwazan dan.
EXO 28:1 “Ipeviza nu puun te zuma he menge etew is suled nu he si Aaron wey sikan is menge anak din he ensi Nadab, Abihu, Eleazar, wey Itamar, su edhimuwen ku sikandan he menge memumuhat he ebpenilbi kedì.
EXO 28:2 Peveeli nu is suled nu he si Aaron te menge visti he segradu he ebpekeveǥey kandin te zengeg.
EXO 28:3 Keǥiyi nu sikan is menge maama he mibeǥayan ku te ketau te kebpemaal te visti he veeli zan si Aaron te menge visti, su wey niw sikandin ikepeveyveyai kedì su edhimuwen ku sikandin he memumuhat he edsilbi kedì.
EXO 28:4 Ne iyan heini menge visti he ebeelan para kandin: is teleǥuey ziyà te kumeng, ipud, pendivavew he visti, pendizalem he visti he binurdahan, tengkulu, wey vagkes. Kinahanglan he ebaal zan te menge visti he para ki Aaron wey para te menge anak din he maama, su para mekepenilbi sikandan kedì pinaaǥi te kebpemuhat.
EXO 28:5 Is egkeǥamit iyan is: linu he eburdahan te vulawan he tanur, wey welin he meitem is kaavuavu zin, merudtem wey kanggan.
EXO 28:6 “Is ipud, kinahanglan he iyan ebeelan is linu he utew meupiya, wey tanur he vulawan wey welin he tanur he meitem is kavuavu zin, merudtem wey kanggan. Kinahanglan he meupiya is kegkeburdahi kayi.
EXO 28:7 Heini he visti, dezuwa he vahin; is diyà te peka wey is diyà te sineruwan, ne ebpekedsumpul heini ziyà te idtedted diyà te pemenayen.
EXO 28:8 Is bakes kayi, linu zaan he miburdahan te vulawan he tanur wey welin he meitem is kaavuavu zin, merudtem, wey kanggan.
EXO 28:9 “Ne kuwa kew te zezuwa he vatu he uniks ne id-ukir niw zutun is sepulù wey dezuwa he menge ngazan te menge anak ni Jacob,
EXO 28:10 ne ibpedsusunud pinaaǥi te penuiǥen dan, heenem he ngazan is diyà te kada vatu.
EXO 28:11 Is ked-ukira te menge ngazan duen te sepulù wey dezuwa he menge ngazan te menge anak ni Israel duen te dezuwa he vatu kinahanglan he utew ebpurpurungi ne ibpezivavew ziyà te selevukà he vulawan haazà is menge vatu.
EXO 28:12 Ne ibpikit heini zuen te menge tedted diyà te pemenayen duen te ipud. Iyan teǥialung kayi is sepulù wey zezuwa he tribu te Israel. Pinaaǥi kayi edtiangen ni Aaron is menge ngazan dan diyà te etuvangan ku, ne siak is Nengazen, layun ku sikandan egketenuzi is menge etew ku.
EXO 28:13 Is menge selevukà he vulawan
EXO 28:14 pesevuki nu te zezuwa he rantey he lunsey he vulawan su wey ikepikit heini zuen te pemenayen duen te visti.
EXO 28:15 “Pevaal kew te teleǥuey ziyà te kumeng he egemiten te kebpesavut te egkesuatan te Nengazen. Kinahanglan daan he utew metau is ebaal zuen, he utew meupiya is kegkeveeli kayi, ne is tila kayi ne kinahanglan he iring te tila he egemiten te kebaal te ipud: linu he miburdahan te vulawan he tanur wey welin he meitem is kaavuavu zin, merudtem wey kanggan.
EXO 28:16 Heini is teleǥuey ziyà te kumeng edubliyen is kedlumpìa zuen ne kuwedradu heini; siyam he vaney is keleyatan din wey keluaǥan din.
EXO 28:17 Ne ibpikit dutun is heepat he linya te menge mahal he vatu. Is nehuna he linya, rubi, tupas, wey biril;
EXO 28:18 is ikezuwa he linya, imirald, sapiru, wey diyemanti;
EXO 28:19 is iketelu he linya, hasintu, agata wey amatista;
EXO 28:20 ne ikeepat he linya, krisulitu, uniks, wey haspir. Ibpemezivavew heini ziyà te selevukà he vulawan he para te ebpezivevawan duen.
EXO 28:21 Is kada sevaha zuen te sepulù wey dezuwa he menge vatu, ne id-ukir zutun is sevaha zaan he ngazan te sevaha he anak ni Jacob, su iyan haazà edriprisintar te sepulù wey dezuwa he ebpuunan te menge kevuwazan ni Israel. Is ked-ukira zutun ne iring te ked-ukir te para ibmarka.
EXO 28:22 “Baal kew zaan te rantey he lunsey he vulawan he para zuen te teleǥuey ziyà te kumeng.
EXO 28:23 Ne vaal kew zaan te zezuwa he mibpen-iring te sising he vulawan, ne ipikit niw haazà diyà te egkezapit te zivavew he menge suyuk duen te teleǥuey ziyà te kumeng.
EXO 28:24 Ne ihiket niw zutun te zezuwa he rantey he vulawan duen te iring te sising.
EXO 28:25 Ne is divaluy he purù dan, ne zuen niw ihiket te zezuwa he selevukà he zuen idsanggat te menge tedted diyà te pemenayen duen te ipud.
EXO 28:26 Ne uman kew vaal te zezuwa he mibpen-iring te sising he vulawan ne ziyè niw ipikit te egkezapit diyà te zizalem he dezuwa he suyuk duen te teleǥuey ziyà te kumeng he sikan is egkezapit duen he mid-epizan kayi he ipud.
EXO 28:27 Ne uman kew pa vaal te zezuwa he ebpen-iringen te sising he vulawan ne ipikit niw haazà diyà te kilid duen te ipud wey zivavew te imbakes duen.
EXO 28:28 Ne sikan is dezuwa he iring te menge sising he zuen ipikit te egkezizalem he menge suyuk duen te teleǥuey ziyà te kumeng, teuzi niw te hiket he meitem is kaavuavu zin ne ihiket niw zuen te zezuwa he iring te menge sising he zuen ipikit te pesikilizà he zapit te egkesineruwan duen te ipud su para meviǥer is kebpekesavuk din diyà te egkezivavew te vakes.
EXO 28:29 “Dutun te kedseled ni Aaron duen te Segradu he Lugar, ne idtaud din haazà is teleǥuey ziyà te kumeng he mideyzeyanan te mahal he menge vatu he in-ukir zuen is menge ngazan te menge tribu te Israel su para siak is Nengazen, ne layun ku sikandan egketenuzi is menge etew ku.
EXO 28:30 Ne idtaǥù daan dutun te teleǥuey ziyà te kumeng is dezuwa he vatu he veveraan he egngezanan te Urim wey Thumim, su para egkeuwit ni Aaron emun ebpekid-etuvang sikandin kedì te Waǥas he Nengazen. Dutun he menge timpu te ked-etuvang din kedì, kinahanglan he layun din idtaud sikan is teleǥuey ziyà te kumeng, su wey zin metueni is egkesuatan ku para te menge kevuwazan ni Israel.
EXO 28:31 “Is pendivavew he visti he iyan egkeepizan duen te ipud he manggad he meitem is kaavuavu zin.
EXO 28:32 Is budsi zutun he iyan sikan is egkeehukan te lieg, kinahanglan he edteuzan te epuru is peliǥuy su wey kenà mevindas.
EXO 28:33 Is peliǥuy he sidsid dutun te visti kinahanglan he ibpeliǥuy te eburda zutun is ed-iringen te menge veǥas te kayu he pumigranata, he welin he meitem is kaavuavu zin, merudtem wey kanggan he ebpemelvel-etan te menge seriyew he vulawan.
EXO 28:35 Ibivisti ni Aaron haazà is pendivavew he visti zutun te kedseled din duen te Segradu he Lugar su ebpenilbi ziyà te etuvangan ku, su wey mezineg is daǥing te menge seriyew emun edseled etawa egawas si Aaron dutun te Segradu he Lugar. Emun ebeelan din heini ne kenà sikandin ebpatey.
EXO 28:36 “Baal kew te midalya he lunsey he vulawan he ed-iringen te pelatu ne iukir niw zutun is menge lalag he: ‘Pehinungud te Nengazen.’
EXO 28:37 Ihiket niw heini ziyà te etuvangan duen te tengkulu ni Aaron pinaaǥi te hiket he meitem is kaavuavu zin, su wey maahà heini ziyà te vuked din. Ne ebpaahà heini he ed-uwiten ni Aaron is minsan hengkey he salà he nehimu te menge Israilihanen dutun te kebpemuhata zan te Nengazen. Kinahanglan he layun heini idtaud ni Aaron diyà te vuked din su wey zin mepenunuat is Nengazen.
EXO 28:39 “Linu is hevela niw he pendizalem he visti ni Aaron ne linu zaan is beeli niw he tengkulu zin, wey vakes din he kinahanglan he egkepurungan heini te eburda.
EXO 28:40 Beeli niw zaan te menge visti, menge vakes, wey menge tengkulu sikan is menge anak ni Aaron he menge maama, su ebpekeveǥey kandan te zengeg.
EXO 28:41 “Bistiyi nu kayi is suled nu he si Aaron wey sikan is menge anak din he maama. Ne ebpetiǥisan sikandan te lana tuus te kegkehimuwa kandan he memumuhat. Ne ipehinungud nu sikandan kediey su wey sikandan mekepenilbi kedì pinaaǥi te kebpemuhat.
EXO 28:42 “Peveeli niw zaan sikandan te pendizalem he visti he ebpeketambun te pid-etawan dan. Is keluǥayad kayi, ne puun te hawak taman te vuel, su wey zan kenà mevikangi.
EXO 28:43 Emun edseled si Aaron wey sikan is menge anak din duen te Tulda he Edtelevukaayan, etawa ed-uvey zan duen te pemuhatà diyà te Segradu he Lugar su ebpemuhat sikandan, kinahanglan he egemiten dan heini su edhimetayan ku sikandan emun ibpeǥawaǥawa zan is pid-etawan dan. Heini he sulunuzen pehendiyè en te egkelapislapis he kevuwazan ni Aaron is kedtumana zan kayi.
EXO 29:1 “Iyan heini ul-ulaha nu te kebpehinunguza nu ki Aaron wey te menge anak din he menge maama su wey zan mekepenilbi kedì pinaaǥi te kegkememumuhat dan. Kuwa ka te sevaha he turiti he vaka wey zezuwa he meemahan he kerehidu he wazè dan sazir.
EXO 29:2 Kuwa ka te kinemeupiyahan he herina te trigu, ne veeli nu he supas, iyan, kenè nu tepayi; baal ka zaan te mamun he ed-emutan te lana he ulibu, ne vaal ke zaan te kenà mulà ed-emutan te lana, is duma zutun ebpekenipisen nu ne edezasan nu te lana.
EXO 29:3 Itaǥù nu haazà diyà te vaskit ne ipemuhat nu kayi te kedì duma te kebpemuhata nu zuen te sevaha he turiti he vaka wey zezuwa he meemahan he kerehidu.
EXO 29:4 “Dumaha nu si Aaron wey sikan is menge anak din he maama ziyà te idselang pehendiyà te Tulda he Edtelevukaayan, ne ipepemeziǥù nu sikandan.
EXO 29:5 Ne vistiyi nu si Aaron te menge visti te memumuhat he iyan sikan is; bisti he kemisidintru wey sikan is ipud he iyan kes ispisyal he visti te memumuhat, sikan is teleǥuey ziyà te kumeng, wey sikan is meupiya is kegkeveeli zin he vakes duen te ipud.
EXO 29:6 Tengkuluwi nu sikandin ne ipikit nu zutun sikan is midalya he vulawan he tuus he impehinungud sikandin he para te Nengazen.
EXO 29:7 Kuwa ka te lana he para zà te idlana te ebpilien ku, ne ilana nu ziyà te ulu ni Aaron.
EXO 29:8 Ne ipehinungud nu zaan sikan is menge anak din he maama, ne vistiyi nu sikandan te pendizalem he visti,
EXO 29:9 tengkulu, wey vakes. Egkehimu sikandan he memumuhat taman te taman. Iyan heini paaǥi te kedhimuwa nu ki Aaron he memumuhat wey sikan is menge anak din.
EXO 29:10 “Uwita nu sikan is turiti he vaka ziyà te etuvangan te Tulda he Edtelevukaayan, ne keǥiyi nu si Aaron wey sikan is menge anak din he izampè dan is palad dan diyà te ulu zutun te vaka.
EXO 29:11 Ne lepaa nu haazà is baka ziyà te etuvangan te Nengazen diyà te gemawan dutun te Tulda he Edtelevukaayan.
EXO 29:12 Ne kuwa ka te lengesa zutun te vaka ne ipalis nu zuen te menge sungeysungey te menge suyuk duen te pemuhatà. Ne sikan is egkesamà he lengesa ivusbus nu zuen te untuzà dutun te pemuhatà.
EXO 29:13 Ne kuwaa nu is langun he tavà diyà te seled te ǥetek, ne kuwaa nu is deisey he vahin te atey, wey sikan is menge vuwà ragkes is menge tavà kayi, ne tutunga nu zuen te pemuhatà.
EXO 29:14 Ne sikan is sapù duen te vaka, lundis din, wey bituka zin, ne ziyè nu tutunga te gawas te kampu. Heini he pemuhat, pemuhat para idlumpiyu.
EXO 29:15 “Egkepasad haazà, iyan nu en maan kuwaa sikan is sevaha zuen te zezuwa he meemahan he menge kerehidu, ne keǥiyi nu si Aaron wey sikan is menge anak din he izampè dan is palad dan diyà te ulu zuen te kerehidu.
EXO 29:16 Lepaa nu haazà, ne uwita nu is lengesa zin, ne ipirik nu zuen te pesikilizà duen te pemuhatà.
EXO 29:17 Sepùa nu haazà is kerehidu; ne lùlui nu is bituka wey is duma he ebpemeketaǥù diyà te zizalem din ne sikan is menge paa, em-emura nu ragkes duen te ulu wey zuma he vahin.
EXO 29:18 Ne tutunga nu haazà duen te pemuhatà su pemuhat haazà he edtutungen para kedì. Is kehemut kayi he pemuhat te pinaaǥi te hapuy ne ebpekepenunuat kedì.
EXO 29:19 “Ne kuwaa nu en daan sikan is nesamà duen te zezuwa he meemahan he kerehidu, ne idampà ni Aaron wey te menge anak din diyà te ulu zutun is palad dan.
EXO 29:20 Ne himetayi nu haazà, ne kuwa ka te lengesa zutun ne izazas nu ziyà te kewanan he telinga ni Aaron wey kewanan he telinga zuen te menge anak din he maama, wey kewanan he tindezekelà te menge velad wey paa zan. Ne piriki nu te lengesa sikan is peliǥuy zuen te pemuhatà.
EXO 29:21 Ne kuwa ka te lengesa he zutun te pemuhatà, ne isahug nu heini te lana he para idlana ne ipirik nu haazà diyà te ki Aaron wey ziyà te menge visti zin, ipirik nu zaan duen te menge anak din, wey ziyà te menge visti zan. Dutun, si Aaron wey sikan is menge anak din he maama wey is menge visti zan, igkepehinungud en kayi te kediey.
EXO 29:22 “Kuwaa nu is menge tavà duen te kerehidu, sikan is melambù he ikug din, sikan is menge tavà diyà te seled te ǥetek, sikan is deisey he vahin te atey, wey sikan is menge vuwà ragkes is menge tavà kayi, wey sikan is kewanan he vuvun. Iyan heini is kerehidu pemuhat para te kedhimuwa te memumuhat he memumuhat.
EXO 29:23 Kuwa ka te supas duen te baskit he wazà tepayi he iyan sikan is supas he impemuhat kayi te kediey. Ipedsesangì nu is klasi te supas he egkuwaan nu, kuwa ka te sevaha he mamun he mid-emutan te lana he ulibu, wey sevaha he pan he wazà emuti te lana, wey senge-elad duen te menipis he supas.
EXO 29:24 Ne peǥewezi nu haazà is langun ki Aaron, wey te menge anak din he maama, ne ivayew zan haazà kayi te etuvangan ku su pemuhat haazà he ibayew.
EXO 29:25 Ne kuwaa nu haazà is menge supas diyà te menge velad dan, ne tutunga nu zutun te pemuhatà duma te pemuhat he edtutungen. Is kehemut kayi he pemuhat te pinaaǥi te hapuy ne ebpekepenunuat kedì.
EXO 29:26 Ne kuwaa nu is kumeng duen te kerehidu ne ivayew nu haazà kayi te etuvangan ku su pemuhat haazà kayi te kediey he ibayew. Iyan heini kenikew he vahin duen te kerehidu he pemuhat he para te kedhimuwa ki Aaron he memumuhat wey te menge anak din.
EXO 29:27 “Ipehinungud nu kayi te kedì is menge vahin duen te kerehidu he pemuhat para te kedhimuwa ki Aaron he memumuhat wey te menge anak din, ragkes en kayi is kumeng wey buvun he imbayew kayi te kedì.
EXO 29:28 Kenà egkahalin is paaǥi ku he iyan heini: Emun ebpemuhat is menge etew ku te menge pemuhat he para te meupiya he kedepità, ne sikan is kumeng wey buvun duen te ayam he ibpemuhat kinahanglan he ibeǥey ziyà te menge memumuhat.
EXO 29:29 “Emun ebpatey en si Aaron, sikan is menge visti zin te kegkememumuhat din kinahanglan he ibeǥey ziyà te kevuwazan din he ebpekeilis kandin te lavew he mememuhat su para igkevivisti zan haazà emun ed-urdinahan sikandan pinaaǥi te kedlenahi kandan.
EXO 29:30 Is kevuwazan ni Aaron he ebpekeilis kandin te lavew he memumuhat he edseled te Tulda he Edtelevukaayan su ebpenilbi kedì dutun te Segradu he Lugar, kinahanglan he ibivisti zin haazà is menge visti seled te pitu he andew.
EXO 29:31 “Kuwaa nu sikan is usa he kerehidu he neǥamit te kedhimuwa ki Aaron wey zuen te menge anak din he memumuhat, ne hilutua nu ziyà te segradu he lugar.
EXO 29:32 Ne zutun dan haazà egkeena zuma zuen te supas duen te baskit te gemawan te Tulda he Edtelevukaayan.
EXO 29:33 Iyan dà sikandan egkehimu he egkaan dutun te usa wey supas he impemuhat para mevelukasi is menge salè dan dutun te kedhimuwa kandan he memumuhat. Wazà duma he egkehimu he egkaan kayi zuma kandan su segradu heini he keenen.
EXO 29:34 Ne emun egkeume en is meselem, ke zuen pa kenà egkekaan duen te usa etawa supas kinahanglan he edtutungen haazà; kenà haazà egkeenen su segradu haazà.
EXO 29:35 “Tumana nu heini is insuǥù ku kenikew mehitenged te kedhimuwa ki Aaron he memumuhat wey te menge anak din. Himuwa nu is ked-urdina kandan seled te pitu he andew.
EXO 29:36 Kada andew zutun, kinahanglan he pemuhat ka te turiti he vaka he pemuhat he para idlumpiyu, su wey melumpiyuwi sikan is pemuhatà. Ne lenahi nu haazà is pemuhatà su wey ikepehinungud heini.
EXO 29:37 Ul-ulaha nu heini kada andew zutun te pitu he andew. Ne egkepurung egkehimu he segradu haazà is pemuhatà, ne ereg he idsivey para te Nengazen is ebpekezegkit dutun.
EXO 29:38 “Kada andew kinahanglan he ibpemuhat nu zutun te pemuhatà is dezuwa he nati he kerehidu he tigsenge-tuig is keǥurang dan.
EXO 29:39 Sevaha te meselem ne sevaha te mahapun.
EXO 29:40 Dutun te kebpemuhata nu zuen te kerehidu te meselem, ne pemuhat ka te zezuwa he kilu he meupiya he kelasi he herina. Sehuǥi nu heini te senge litru he lana te veǥas te mibevayu he ulibu. Pemuhat ka zaan te senge litru he vinu he pemuhat he inumen.
EXO 29:41 Ne sikan is nati he kerehidu he ibpemuhat emun mahapun, iyan ded duma zin sikan is duma zuen te ibpemuhat emun meselem, wey iring daan duen kengezekelà. Is kehemut kayi he pemuhat te pemuhat he pinaaǥi te hapuy ebpekepenunuat kedì.
EXO 29:42 Iyan heini pemuhat he edtutungen, kinahanglan he andew-andew is ked-ul-ulaha niw kayi he pemuhat taman te sunud he menge lapis te kevuwazan. Ipemuhat niw heini kediey zutun te gemawan te Tulda he Edtelevukaayan, su zutun a ebpekidhinguma keniyu wey ebpekidlalag.
EXO 29:43 Dutun ku edhingumaa is menge kevuwazan ni Israel, ne pinaaǥi te mekeǥeǥehem he kebpekiduma ku egkehimu he segradu haazà he lugar.
EXO 29:44 Edhimuwen ku he segradu sikan is Tulda he Edtelevukaayan wey sikan is pemuhatà dutun, ne edhimuwen ku si Aaron wey is menge anak din he maama, he selakew keniyu su iyan mulà kandan he vaal is kebpemuhata kediey.
EXO 29:45 Edlumun a keniyu te menge kevuwazan ni Israel ne egkehimu a he Megbevayè niw.
EXO 29:46 Ne egketuenan niw he iyan a is Nengazen he Megbevayè niw, mibpeǥawas keniyu ziyà te Ehipto su para mekelumun a ziyà te keniyu. Iyan a is Nengazen Megbevayè niw.
EXO 30:1 “Baal kew te pemuhatà he kayu he ekasya he para tutungà te veyewà.
EXO 30:2 Ne haazà, kinahanglan he kuwedradu he 18 he vaney is kelayat din ne 18 zaan he vaney is keluag din, ne 36 he vaney is ketikang din. Ne kinahanglan he zuen kayi menge sungeysungey ziyà te menge suyuk din he idredsè dà is kebpurmaha zuen te kebeeli zuen te pemuhatà.
EXO 30:3 Epizi niw te lunsey he vulawan is dapit te zivavew kayi, is heepat he kilid kayi, wey sikan is menge sungeysungey ziyà te menge suyuk. Ne rebitiyi niw te vulawan is peliǥuy kayi.
EXO 30:4 Ne vaal kew te zezuwa he ebpen-iringen te rintì he vulawan he para idtaud diyà te zizalem duen te ribiti ziyà te pesiziveluyà duen te pemuhatà, he para edteuzan te menge tival he idtival kayi.
EXO 30:5 Kayu he ekasya is beeli niw he menge tival ne epizi niw haazà te vulawan.
EXO 30:6 Isavuk niw heini he pemuhatà diyà te gawas duen te egkurtinahan te kurtina he ibitey ziyà te egkesineruwan duen te Kavan te Kebpekid-uyun ku keniyu. Ne zutun a he lugar ebpekidhinguma keniyu.
EXO 30:7 “Kada meselem emun ed-etimanen ni Aaron sikan is menge sulù, kinahanglan he edtutung sikandin dutun he pemuhatà te mehemut he veyewà.
EXO 30:8 Ne emun edtemteman din sikan is sulù ke egkesakep en, kinahanglan gihapun he edtutung sikandin te veyewà. Ne heini is kebpemuhata kedì pinaaǥi te kedtutung te veyewà, kinahanglan he kada andew is kebeeli zuen pehendiyè en te huziyan he menge lapis te kevuwazan.
EXO 30:9 Kayi he pemuhatà, kenè kew mebpemuhat te selakew he veyewà, kenè niw heini pemuhati te minsan hengkey he pemuhat he edtutungen, etawa pemuhat he gasa, etawa pemuhat he inumen.
EXO 30:10 Kesevaha te kada tuig, kinahanglan he edlumpiyuwan ni Aaron sikan is pemuhatà pinaaǥi te kebpelisi te lengesa zuen te menge sungeysungey te menge suyuk kayi. Haazà is lengesa he ibpalis, ne lengesa zuen te pemuhat he para idlumpiyu. Kinahanglan he kenè en ed-engkezan is kebeeli kayi kada tuig pehendiyè en te huziyan he lapis te menge kevuwazan; mid-isip ku heini he segradu utew he pemuhatà.”
EXO 30:11 Ne migkeǥiyan te Nengazen si Moises te,
EXO 30:12 “Emun edsinsusen nu is menge kevuwazan ni Israel, kinahanglan he ebeyazan te kada sevaha he maama kayi te kediey is untung din su para wazà mezaat he egkehitavù diyà te kandin dutun te kedsinsus.
EXO 30:13 Is kada sevaha he maama he egkeragkes dutun te sinsus, kinahanglan he ebayad te heenem he gramu he pelata he edsungkad diyà te timbangan te pelata te menge memumuhat. Kinahanglan he ebayad is kada sevaha keniyu, su halad niw heini kayi te kedì.
EXO 30:14 Is langun he menge maama he 20 he tuig is penuiǥen din, pehendiyè en te metikang ne iyan sikandan ebeǥey kayi te kediey.
EXO 30:15 Is sepian, kinahanglan he kenà subra is ibayad din, ne is pubri kinahanglan he kenà kurang is ibayad din.
EXO 30:16 Gemita niw heini he selapì para te ked-etiman duen te Tulda he Edtelevukaayan. Iyan heini lugbak para te untung niw, su wey ku kenà melemlemuwi is ked-ipat keniyu.”
EXO 30:17 Migkaǥi is Nengazen diyà te ki Moises te,
EXO 30:18 “Baal kew te brunsi he bisin he brunsi zaan is selevukè din. Ne ziyè niw isavuk te tengàtengà te pid-elangan te Tulda he Edtelevukaayan wey zuen te pemuhatà, ne tegui niw haazà te wahig.
EXO 30:19 Ne haazà is wahig dutun, iyan egemiten ni Aaron wey te menge anak din he maama te kedlùlù te menge velad dan wey menge paa zan,
EXO 30:20 te kenè pa sikandan edseled te Tulda he Edtelevukaayan, wey kenè pa sikandan ed-uvey zuen te pemuhatà te kebpemuhat pinaaǥi te hapuy.
EXO 30:21 Kinahanglan he edlùluan dan is menge velad dan wey menge paa zan su wey zan kenà mebpatey. Heini he sulunuzen, kinahanglan he edtumanen ni Aaron wey te menge kevuwazan din taman te huziyan he lapis te menge kevuwazan.”
EXO 30:22 Migkaǥi is Nengazen diyà te ki Moises te,
EXO 30:23 “Kuwa ka te kinemeupiyahan he pehemut: Heenem he kilu he wahig he mira, tetelu he kilu te mehemut he sinamun, wey tetelu zaan he kilu te mehemut he calamus,
EXO 30:24 wey heenem he kilu he kasia (kinahanglan he iyan idtimbang sikan is timbangan te menge memumuhat) ne ed-umanan haazà te senge litru wey tengà he lana te ulibu;
EXO 30:25 pinaaǥi kayi beeli niw is segradu he lana he utew mehemut he para te idlana.
EXO 30:26 Ne gemita niw heini te kedlana te Tulda he Edtelevukaayan, wey zuen te Kavan te Kebpekid-uyun ku keniyu, wey zuen te lemisahan wey is langun he kehimanan din wey zuen te ibpehitindeg he sulù wey is langun he menge himan din, wey zuen te pemuhatà te edtutungen he veyewà, wey zuen te pemuhatà te menge pemuhat he edtutungen wey te menge gelemiten din, is bisin wey is selevukè din.
EXO 30:29 Ipehinungud nu kediey heini is langun, ne zutun, egkepurung egkehimu he segradu heini is langun ne tenged dutun, ereg he idsivey para te Nengazen is ebpekezegkit duen.
EXO 30:30 “Ne lenahi niw zutun te lana si Aaron wey sikan is menge anak din he maama he tuus te ibpeveyveyaan niw sikandan kediey su wey zan mekepenilbi kedì pinaaǥi te kebpemuhat.
EXO 30:31 Kegiyi nu is menge Israilihanen te, ‘Heini is lana, iyan segradu he lana te Nengazen he pehendiyè en te egkalapislapis he kevuwazan is kegemita zuen,’
EXO 30:32 Kinahanglan he kenà heini idlana ziyà te etew zà duen, ne kinahanglan daan he kenè niw ed-iringan is kebeeli kayi he lana emun ebaal kew te lana he selakew en is egemitan niw zuen, su para kenà mevaleyvaley, su segradu heini he lana, ne kinahanglan he ebeǥayan niw te keveǥat is kegkesegradu zin.
EXO 30:33 Is minsan hentei keniyu he ebaal te iring kayi he lana he ibpenlana zin etawa idlana zin te zuma he etew zà duen su kenà memumuhat, ne kenè niw en sikandin isipa he zuma niw.”
EXO 30:34 Ne migkaǥi en maan is Nengazen diyà te ki Moises te, “Kuwa kew te ibped-iiring is kezekelè din he menge pehemut he iyan heini: istakti, uniks, galbanum, wey lunsey he veyewà.
EXO 30:35 Pinaaǥi te kebpedsesehuǥa kayi, baal kew te veyewà he utew mehemut. Timusi niw haazà, ne egkelunsey wey egkehimu he segradu haaza is beyewà.
EXO 30:36 Bekbeka niw is duma kayi taman te egkepurung egkepurbus, ne isawed niw ziyà te etuvangan duen te Kavan te Kebpekid-uyun he zuen te Tulda he Edtelevukaayan, he zutun a ebpekidhinguma kenikew. Kinahanglan he ed-isipen nu heini he utew segradu.
EXO 30:37 Ne kenè kew mebaal te veyewà he para keniyu he iring din su iring te mibpenggamit kayi is ebpenggemiten niw te kebaal. Haazà he veyewà isipa niw he segradu he azen he impehinungud kayi te kediey.
EXO 30:38 Ke zuen minsan hentei keniyu he ebaal te iring dutun he veyewà su ebeelan din he pehemut din, ne kenè niw en sikandin isipa he zuma niw.”
EXO 31:1 Ne migkeǥiyan te Nengazen si Moises te,
EXO 31:2 “Pemineg ka! Mibpilì ku si Bezalel, is anak he maama ni Uri he apù ni Hur he sakup te tribu ni Juda.
EXO 31:3 Ne ed-ulinan ku sikandin pinaaǥi te ǥehem ku, ne ebeǥayan ku te ketau wey ebilidad te kebaal te minsan hengkey he vuluhaten.
EXO 31:4 Ebeǥayan ku sikandin te ketau te kebaal te mekempet he menge vutang he vulawan, pelata, wey brunsi,
EXO 31:5 te kebpurma te mahalen he menge vatu he ibpemikit, kegkurti te kayu, wey kebaal te zuma he edeyzeyanan he terebahu.
EXO 31:6 Ne nepilì ku zaan he edterebahu duma kandin si Oholiab he anak he maama ni Ahisamac te ebpuun diyà te tribu ni Dan. Ne ebeǥayan ku zaan te ebilidad is langun he menge pandey su para mehimu zan is minsan hengkey he idsuǥù ku he ebeelan he iyan is:
EXO 31:7 Tulda he Edtelevukaayan, Kavan te Kebpekid-uyun ku keniyu wey is tangeb din, is langun he menge gelemiten duen te Tulda–
EXO 31:8 sikan is lemisahan wey menge gelemiten kayi, sikan is selevukà te sulù he lunsey he vulawan wey is langun he himan kayi, sikan is pemuhatà he tutungà te veyewà,
EXO 31:9 sikan is pemuhatà te edtutungen he menge pemuhat, wey is langun he menge gelemiten kayi, sikan is bisin wey te selevukè din,
EXO 31:10 sikan is mekempet he menge visti te memumuhat he para egemiten ni Aaron wey zuen te menge anak din he maama emun ebpemuhat dan,
EXO 31:11 sikan is lana he idlana wey sikan is mehemut he veyewà he para zuen te Segradu he Lugar. Kinahanglan he ebpekepurung ebpekesungkad te insuǥù ku is kebeeli kayi te langun.”
EXO 31:12 Midsuǥù si Moises te Nengazen
EXO 31:13 he keǥiyi zin is menge Israilihanen: “Kinahanglan he edtumanen niw is menge ebpeveelan ku zutun te Andew te Kedhimeley, su iyan heini taman te taman he tuus diyà te pid-elangan tew he ebpetanudtanud keniyu he siak is Nengazen midhimu ku sikiyu he menge etew ku.
EXO 31:14 Kinahanglan he edtumanen niw is menge ebpeveelan ku zutun te Andew te Kedhimeley, su segradu heini he andew. Is minsan hentei he kenà edsunud te ibpetuman ku mehitenged keniyan he andew, kinahanglan he edhimetayan. Is minsan hentei he edterebahu keniyan he andew, ne kenè niw en isipa he zuma niw.
EXO 31:15 Seled te heenem he andew is kedterebahu niw, piru te ikepitu he andew, ne himeley kew. Su heini he andew ne segradu para kedì, is minsan hentei keniyu he edterebahu kayi he andew ne kinahanglan he edhimetayan.
EXO 31:16 Umbe sikiyu is menge Israilihanen, kinahanglan he tumana niw is ibpetuman ku keniyu te Andew te Kedhimeley taman te huziyan he lapis te menge kevuwazan. Su iyan heini pirmeninti he tuus te ebpedayun he kebpekid-uyun ku keniyu. Su seled te heenem he andew mibeelan ku is langit wey is kelibutan, ne te ikepitu he andew ne midhimeley a.”
EXO 31:18 Ne hein nekepasad is Nengazen he ebpekidlalag ki Moises diyà te puntur te Buntud he Sinai, imbeǥey zin diyà te ki Moises is dezuwa he midlumpipì he vatu he zutun isurat te Megbevayà is menge velaud din.
EXO 32:1 Ne hein neseǥipà te menge etew he neuǥet en he wazà meketupang si Moises diyà te kandan, ne mid-amur-amur zan diyà te ki Aaron, ke sikandan te, “Kela ke zuen en mezaat he neulaula zuen te etew he si Moises he nengulu kenitew te kegawas diyà te Ehipto; umbe veeli key te ed-ezapen he ebpekepengulu kenami.”
EXO 32:2 Ne migkaǥi si Aaron diyà te kandan te, “Pemul-uta niw is bulawan he menge eritis he in-eeritis te menge esawa niw wey menge anak niw, ne uwita niw kayi te kediey.”
EXO 32:3 Ne mibpemul-ut dutun te menge etew is menge eritis dan, ne mid-uwit dan diyà te ki Aaron.
EXO 32:4 Ne migkuwa haazà ni Aaron ne midtunew zin diyà te hulmahan he mid-iring te vaka umbe neveelan haazà he ledawan he vaka. Ne migkaǥi haazà is menge Israilihanen te, “Iyan heini ed-ezapen tew he nengulu kenitew te kegawas diyà te Ehipto.”
EXO 32:5 Ne hein naahà ni Aaron he utew haazà ingkesuat te menge etew ne mibpevaal sikandin te pemuhatà diyà te etuvangan dutun te vulawan he vaka, ne migkaǥi sikandin te, “Keeselem duen pista he para te kebeǥey te zengeg diyà te Nengazen.”
EXO 32:6 Umbe, hein meselem en, ne mid-enew is menge etew ne nemuhat dan te pemuhat he edtutungen wey pemuhat he para te meupiya he kedepità. Ne mibpemengaan wey mibpemenginum sikandan, ne mibeelan dan is egkesuatan dan te ebaal te kedlipeylipey te kedsimbaha zan dutun te ed-ezapen dan.
EXO 32:7 Ne migkeǥiyan si Moises te Nengazen te, “Gègaani nu tupangi sikan is menge etew he mibpenguluwan nu te kegawas diyà te Ehipto su nekevaal zan te mezaat.
EXO 32:8 Wazè en meuǥet ne wazè en sikandan med-ikul ziyà te zalan he ibpeikul ku kandan; midtunew zan te vulawan ne mibeelan dan he ed-ezapen he vaka, ne mid-azap dan haazà wey mibpemuhat dan. Ne egkeǥiyen dan te iyan haazà ed-ezapen dan he nengulu kandan te kegawas diyà te Ehipto.”
EXO 32:9 Ne migkaǥi pa is Nengazen diyà te ki Moises te, “Utew mesinupaken heeyan he menge etew.
EXO 32:10 Ne ǥuntaan bey-ani e en kenikew su nepeukan ku en sikandan ne edèdeetan ku en sikandan. Ne iyan ke zà wey is menge kevuwazan nu edhimuwen ku he ventuǥan he nasyun.”
EXO 32:11 Iyan, midhangyù si Moises diyà te Nengazen he iyan Megbevayè din he ke sikandin te, “He Nengazen, maan is utew nu egkepeuki is menge etew nu he impeǥawas nu ziyà te Ehipto pinaaǥi te zekelà he ǥehem nu?
EXO 32:12 Emun egeraan nu is menge etew nu kenè be ebpekekaǥi is menge Ehiptohanen te iyan nu zà impeǥewasa kandan diyà te Ehipto su egeraan nu sikandan kayi te vuntud su wey maawà sikandan kayi te kelibutan? Umbe deyzey ke id-awè nu is pauk nu kandan; deyzey ke edhelinen nu is isip nu ne kenè nu zed sikandan edèdeetan.
EXO 32:13 Tentunuzi nu is menge suluǥuen nu he si Abraham, si Isaac wey si Jacob; tentenuzi nu is meheǥet he penangdù nu ziyà te kandan he ibeǥey nu kandan is utew mahabet he kevuwazan su ebpekeiring te kahabet te menge vituen diyà te zivavew, ne id-amin nu ibeǥey zutun te menge kevuwazan dan is tanà he ingkepenaad nu he ibeǥey ziyà te kandan, ne egkepengevilin dan haazà te taman te taman.”
EXO 32:14 Ne tenged kayi wazè ded leusi te Nengazen te edezaat is menge etew zin.
EXO 32:15 Ne midtupang si Moises puun dutun te vuntud is ed-uwit duen te zezuwa he melumpipì he vatu he midsuratan te Kesuǥuan is pesiziveluyà.
EXO 32:16 Baal te Megbevayà haazà is midlumpipì he menge vatu, ne iyan en daan sikandin midsurat te menge velaud din dutun.
EXO 32:17 Ne hein ebpekeuvey zan en, nekezineg si Josue te utew meǥurub he menge etew, ne ke sikandin diyà te ki Moises te, “Egkezineg ku is henduen te keǥurub te tebek diyà te kampu.”
EXO 32:18 Ne migkaǥi si Moises te, “Heeyan he keǥurub, kenà uruhuyan te ebpekezaag ne kenà daan erang te egkezaag, kekenà, keǥurub te ebpemenganta.”
EXO 32:19 Ne hein utew en si Moises ebpekeuvey zuen te kampu, neehè din en sikan is ed-ezapen he ledawan he tudu he vaka wey is menge etew he ebpemenayew, ne zutun utew sikandin nererengiti. Ne intimbag din duen te lugtenaan te vuntud sikan is uwiten din he memelumpipì he vatu ne nengetevì haazà.
EXO 32:20 Ne migkuwa zin sikan is ed-ezapen he ledawan he vaka ne mibinsulan din. Ne hein nepasad dutun ne mibpurung din bekbeka ne insimburè din haazà diyà te wahig, ne impeinum din te menge Israilihanen.
EXO 32:21 Ne migkaǥi sikandin diyà te ki Aaron te, “Hengkey is mibeelan kayi te menge etew ziyà te kenikew? Su maan is midtuǥutan nu sikandan te kebaal te zekelà he salà?”
EXO 32:22 Ne midtavak si Aaron te, “Kenà a kenikew mepeuki su netuenan nu en man he heini is menge etew, susuaten he ebaal te mezaat.
EXO 32:23 Migkaǥi zan kayi te kedì te, ‘Kela ke zuen en mezaat he nehitavù duen te etew he si Moises he iyan mibpeǥawas kenami ziyà te Ehipto; umbe veeli key te ed-ezapen dey he ebpekepengulu kenami.’
EXO 32:24 Ne impeuwit ku kandan kayi te kedì is menge zayandayan dan he vulawan, ne sikan is duen dan, mibpemul-ut dan, ne imbeǥey zan kedì ne midtunew ku haazà diyà te hapuy ne pinaaǥi zutun nehimu is ledawan te tudu he vaka.”
EXO 32:25 Naahà ni Moises he wazè en dewaya ni Aaron is menge etew he subre en is kedlipeylipey zan. Ne tenged dutun ed-eengitan sikandan te menge kuntada zan diyà te peliǥuy.
EXO 32:26 Umbe, midhitindeg sikandin diyà te pultahan duen te kampu zan, ne midhabet megkaǥi te, “Is minsan hentei keniyu he ebpesakup mulà te Nengazen, medhengkayi te kediey!” Ne midhendiyà te kandin is langun he menge Levihanen.
EXO 32:27 Ne migkeǥiyan din sikandan te, “Is Nengazen he Megbevayà te Israel, edsuǥuen kew zin is langun te kedseluniket te menge ispada niw, ne ke và dà kegkamet ne remrembanga niw heini is kampu, ne himetayi niw is lalung he menge etew, minsan menge suled niw, menge emiǥu niw, wey menge siringan niw.”
EXO 32:28 Ne mibpezumazuma zutun is menge Levihanen ne nekepatey zan te 3,000 he menge maama zutun he andew.
EXO 32:29 Migkaǥi si Moises diyà te menge Levihanen te, “Guntaan he andew insivey kew te Nengazen he menge memumuhat din, su mibpenhimetayan niw minsan is menge anak niw wey menge suled niw. Umbe edtuvazan kew zin guntaan he andew.”
EXO 32:30 Ne hein sunud he andew, migkeǥiyan ni Moises sikan is menge etew te, “Nekevaal kew te zekelà he salà. Piru edtekezeg a ǥuntaan kayi te vuvungan, diyà te Nengazen, su kela ke pezumdumahi zin ded is hangyù ku he peseyluwa kew zin te salè niw.”
EXO 32:31 Ne midlikù si Moises diyà te Nengazen, ne migkeǥiyan din is Nengazen te, “Nekevaal te zekelà he salà sikan is menge etew. Mibaal zan te ed-ezapen dan he vulawan.
EXO 32:32 Ne edhengyuan ku sikew he peseyluwa nu sikandan dutun te salè dan; ne emun kenè nu en sikandan ebpeseyluwen, ne penasa nu en daan is kedì he ngazan duen te libru he zutun nu ilista is menge ngazan te menge etew nu.”
EXO 32:33 Ne midtavak is Nengazen te, “Iyan ku id-awà duen te libru ku is menge ngazan duen te nekesalà kayi te kediey.
EXO 32:34 Ne ǥenat ke en, ne zumaha nu sikan is menge etew ziyà te lugar he migkaǥi ku kenikew. Tentenuzi nu he iyan egiya keniyu is belinsuǥuen ku, iyan, egkeuma ǥihapun is timpu te kedsiluti ku keniyan te menge etew tenged te salè dan.”
EXO 32:35 Umbe, impaaǥi te Nengazen is bangkit diyà te kandan, su geina te mid-azap dan sikan is bulawan he ed-ezapen he mibeelan ni Aaron.
EXO 33:1 Ne migkeǥiyan en maan te Nengazen si Moises te, “Awè ke en kayi he lugar, ne zumaha nu sikan is menge etew he impeǥawas nu puun te Ehipto, ne hendiyè kew en te tanà he insaad ku he ibeǥey ku ziyà te ki Abraham, ki Isaac wey ki Jacob wey ziyà te menge kevuwazan dan.
EXO 33:2 Ne edsuǥuen ku is belinsuǥuen ku te keǥiya keniyu, ne edsegseǥen ku puun dutun te tanà is menge Canaanhen, menge Amorihanen, menge Hitihanen, menge Pirisihanen, menge Hivihanen, wey menge Jebusihanen.
EXO 33:3 Haazà he tanà, ne meupiya wey selebpeten egkeerubasa he ebpuunan te edtudà he ǥatas wey teneb. Piru kenà a mulà eduma keniyu su geina te utew kew mesinupaken ne kela ke kenà a meketigker ne egkezeetan kew kediey te kenè kew pa ebpekeuma.”
EXO 33:4 Ne hein nezineg haazà duen te menge etew is mesakit he lalag, midlalew sikandan ne wazè dan en medsun-ud te menge elahas.
EXO 33:5 Su geina te mibpekeǥiyan sikandan te Nengazen ki Moises te, “Utew kew mesinupaken he menge etew ne emun eduma a keniyu te minsan meǥaan dà ne egkezezeetan ku en sikiyu tenged te kenè ku kebpekaantus. Ne pemul-uta niw is menge elahas niw ne iyan e en metau ke hengkey is ebeelan ku ziyà te keniyu.”
EXO 33:6 Umbe, mibpemul-ut te menge Israilihanen is menge elahas dan dutun te ziyè dan te Buntud he Horeb.
EXO 33:7 Minsan ebpekahalin is kampu te menge Israilihanen ne idhalin en daan ni Moises sikan is Tulda ziyà te kenà utew uvey te kampu. Ne iyan ngazan dutun is “Tulda he Edtelevukaayan.” Is minsan hentei kandan he egkesuat he metueni zin is egkesuatan te Nengazen ne edhendutun te Tulda.
EXO 33:8 Ne emun edhendutun si Moises te Tulda ne ebpemenlawang sikan is menge etew ziyà te menge tulda zan su ebentayan dan si Moises taman te kebpekeseled din dutun te Tulda he ed-ezapan.
EXO 33:9 Ne emun diyè en si Moises te seled ne ebpekevavà sikan is mekepal he ǥapun he iring te tukud, ne ziyà ebpundu te ǥemawan duen te Tulda ne ebpekidlalag is Nengazen ki Moises.
EXO 33:10 Emun egkeehè en duen te menge etew ziyà te ǥemawan duen te Tulda he ed-ezapan sikan is mekepal he ǥapun he iring te tukud, ne ebpemenhitindeg sikandan is ed-azap te Nengazen diyà te gemawan te kandan he menge tulda.
EXO 33:11 Ed-etuvangen en te Nengazen si Moises emun edlelaǥan din; iring sikandin te etew he ebpekidlalag te emiǥu zin. Ne ed-ulì si Moises diyà te kampu. Ne sikan mulà is menguhed he maama he timbang din he iyan si Josue he anak ni Nun, ne kenà mulà ed-awà duen te Tulda.
EXO 33:12 Migkaǥi si Moises diyà te Nengazen te, “Layun a kenikew egkeǥiyi he ebpenguluwan ku heini is menge etew te kedhendiyà te tanà he ibeǥey nu kandan, iyan, wazà a kenikew keǥiyi ke hentei is ibpezuma nu kedì. Migkaǥi nu zaan he nepurung a kenikew mekilala wey igkesuat a kenikew.
EXO 33:13 Emun tutuu he nekepenunuat a kenikew, penurua a te menge paaǥi nu su para mekilala ku sikew su wey med-iseg pa is kebpekepenunuat ku kenikew. Tentenuzi nu he menge etew nu heini is menge kevuwazan ni Israel.”
EXO 33:14 Ne migkaǥi is Nengazen te, “Edumahan ku sikew, wey ibpehimeley ku sikew.”
EXO 33:15 Migkaǥi si Moises te, “Emun kenè ka eduma kenami, deyzey ke kayi key zà kenikew ibpeubpà.
EXO 33:16 Is kedumahi nu kenami iyan igketueni te zuma he menge etew he nekepenunuat kenikew is menge etew wey siaken. Is kebpekiduma nu kenami iyan ibpekeviza zey te zuma he menge etew kayi te tanà.”
EXO 33:17 Ne migkaǥi is Nengazen diyà te ki Moises te, “Ebeelan ku is hangyù nu kediey, su nepurung ku sikew mekilala, wey nekepenunuat ka kediey.”
EXO 33:18 Ne ke si Moises te, “Edhangyù a ziyà te kenikew he, ipeehè nu kedì is mekeǥeǥehem he kebpekiduma nu kenami.”
EXO 33:19 Ne midtavak is Nengazen te, “Ibpeehè ku kenikew is langun he keupiya ku ne egkeǥiyen ku ziyà te kenikew is mahal he ngazan ku he Nengazen. Siak is Nengazen egkehizuwan ku wey igkeǥaǥew ku is menge pinilì ku.
EXO 33:20 Kenè ku ibpaahà kenikew is kebuvuked ku su ebpatey is ebpekaahà kedì,
EXO 33:21 iyan, duen lugar he uvey ku he zuen duen batu ne egkehimu ke zutun ka te vatu edhitindeg.
EXO 33:22 Ne emun edsaǥad dutun is anlag he iyan tuus he zutun a, ne id-ahuk ku sikew ziyà te veka zutun te vatu ne id-eles ku sikew su edempaan ku haazà is beka taman te ebpekelavey ad.
EXO 33:23 Ne id-awè ku zutun is belad ku, ne egkeehè nu is peka ku piru kenè nu mulà egkaahà is kebuvuked ku.”
EXO 34:1 Ne migkeǥiyan te Nengazen si Moises te, “Basbas ka te zezuwa he vatu he edlumpipien iring duen te nehuna he imbeǥey ku kenikew, ne idsurat ku zutun is menge lalag he iyan ded sikan is menge lalag he insurat ku zuen te nehuna he melumpipì he menge vatu he migevè nu.
EXO 34:2 Pengandam ka keeselem ke meselem, ne tekezeg ka ziyà te Buntud he Sinai su wey ki meked-uma ziyà te puntur.
EXO 34:3 Kinahanglan he wazà eduma kenikew, kinahanglan daan he wazà minsan sevaha he edhendiyà te minsan hendei keniyan te vuntud, wey minsan is menge kerehidu niw wey menge vaka niw kinahanglan he wazà kandan ebpekepenabtab diyà te lugtenaan keniyan te vuntud.”
EXO 34:4 Ne mibasbas si Moises te zezuwa he midlumpipì he vatu he iring duen te nehuna, ne zutun te sunud he andew midselemselem sikandin medtekezeg diyà te Buntud he Sinai is ed-uwit dutun, su iyan haazà insuǥù kandin te Nengazen.
EXO 34:5 Ne mibulus is Nengazen, ne egkaahà is gapun he zutun sikandin ne midhitindeg sikandin dutun te vuntud duma ki Moises, ne migkaǥi zin is mahal he ngazan din he Nengazen.
EXO 34:6 Ne midsaǥad is Nengazen diyà te etuvangan din ne mibpekezaǥing sikandin is egkaǥi te, “Siak is Nengazen, Megbevayà a he veliǥeǥawen wey hihizuwen, ne kenà a melemu he egkepauk, ne ibpeehè ku is dekelà he kebmahal ku wey kebmetinumanen ku.
EXO 34:7 Ibpeehè ku is kebmahala ku te mahabet he menge etew, ne ebpeseyluwen ku is kezaat dan, kerepasan dan, wey menge salè dan. Piru edsilutan ku is mekesesalà, ragkes is menge kevuwazan dan taman te iketelu wey ikeepat he lapis te kevuwazan.”
EXO 34:8 Ne segugunà si Moises midluhud diyà te tanà is ed-azap te Nengazen.
EXO 34:9 Ne ke sikandin te, “Nengazen, ke tutuu he nekepenunuat a kenikew, ne edhengyuan ku sikew he zumahi key kenikew. Utew mesinupaken haazà is menge etew piru peseyluwa nu is mezaat he menge ulaula zey wey menge salè dey, ne zewata key kenikew he menge etew nu.”
EXO 34:10 Migkaǥi is Nengazen diyà te ki Moises te, “Ebaal a guntaan te paaǥi te kebpekid-uyun ku keniyu te menge Israilihanen. Ebeelan ku ziyà te etuvangan te langun he menge zuma nu is egkein-inuwan he menge vaal he wazè ku pa meveeli ziyà te minsan hendei he nasyun kayi te kelibutan. Egketuenan te menge etew kayi te peliǥuy is mekeǥeǥehem he menge vaal ku te Nengazen para kenikew.
EXO 34:11 Tumana nu is menge suǥù he ibeǥey ku kenikew ǥuntaan he andew. Emun edlaus kew en, edsegseǥen ku is menge Amorihanen, menge Canaanhen, menge Hitihanen, menge Pirisihanen, menge Hivihanen wey menge Jebusihanen puun duen te tanà he insaad ku keniyu.
EXO 34:12 Kenè ka mebpekid-uyun diyà te menge etew he ebpemen-ubpà diyà te tanà he ebeyaan niw, su ebpekekaid keniyu is kebpekid-uyun niw kandan.
EXO 34:13 Umbe, pemengkaǥa niw is menge pemuhatè dan, penrupeta niw is tedeman dan he menge vatu, wey penempeza niw is menge tukud dan he simbulu te vahi he ed-ezapen dan he si Ashera.
EXO 34:14 Kenè kew med-azap te zuma he ed-ezapen, su siak is Nengazen, utew a egkeepes emun duen duma he ed-ezapen niw.
EXO 34:15 Kenè kew mebpekid-uyun diyà te menge etew he ebpemen-ubpà diyà te tanà he ebeyaan niw, su emun ed-ezapen dan wey ebpemuhaten dan is menge ed-ezapen dan, ne egkehimu he edhinggaten kew zan te keduma kandan, ne egketintal kew te kegkaan te keenen he impemuhat dan diyà te menge ed-ezapen dan.
EXO 34:16 Ne egkehimu zaan he ebpemengesawa ziyà te kandan is menge anak niw he maama, ne tenged dutun egkehimu he ed-azap dan te menge ed-ezapen dutun te menge etew.
EXO 34:17 “Kenè kew mebaal te menge ed-ezapen niw.
EXO 34:18 “Tumana niw is Pista te Supas he Wazè din Tapey sumalà is kedsuǥua ku kayi ziyà te keniyu. Emun bulan te Abib ne kaan kew te Supas he Wazè din Tapey seled te pitu he andew, su iyan haazà bulan te ked-awè niw ziyà te Ehipto.
EXO 34:19 “Kediey he ǥaked is kinekekayan he anak niw he maama, wey is meemahan he penganey te menge uyaǥen niw.
EXO 34:20 Egkehimu he edlekaten niw is penganey te menge asnu niw pinaaǥi te kebpemuhata niw kayi te kedì te nati he kerehidu. Iyan, emun kenè niw edlekaten, kinahanglan he edhimetayan niw haazà is asnu pinaaǥi te kebunggua niw zuen. Kinahanglan daan he edlekaten niw is penganey he menge anak niw he maama. “Kinahanglan he wazà mebpekid-etuvang kedì he wazè din igkahalad.
EXO 34:21 “Terebahu kew seled te heenem he andew, iyan, dutun te ikepitu he andew ne himeley kew, minsan timpu te kebpengeradu wey tiraǥun.
EXO 34:22 “Silibraha niw is Pista te Kedraǥun pinaaǥi te ked-uwit kayi te kediey te egkehuna he sebpet te trigu niw, wey silibraha niw zaan is Pista te Tevas emun egketapus en is tuig.
EXO 34:23 “Is langun he menge maama keniyu, kinahanglan he edtampu kayi te tetelu he pista kada tuig pinaaǥi te ked-azap kedì te Nengazen, he iyan Megbevayè niw te menge kevuwazan ni Israel.
EXO 34:24 Edsegseǥen ku is menge etew puun te tanà he ibeǥey ku keniyu, ne ebpekeluaǥen ku is tanè niw. Wazà edsurung etawa ed-aǥew te nasyun niw zutun te timpu te kedhengkayi niw te kediey te Nengazen he Megbevayè niw, pinaaǥi te kedtampu niw zutun te tetelu he pista kada tuig.
EXO 34:25 “Kenè niw ipemuhat kayi te kedì is lengesa he egkelepikan te minsan hengkey he edtepayan. Kinahanglan he wazà egkesamà taman te meselem duen te edlepaan niw emun Pista te Kedlavey te Belinsuǥuen.
EXO 34:26 “Uwita niw ziyà te valey te Nengazen he Megbevayè niw is kinemeupiyahan duen te egkehuna he egkeraǥun niw ziyà te tanè niw. “Kenè niw hilutua is nati he kambing te ǥatas te iney zin.”
EXO 34:27 Migkeǥiyan si Moises te Nengazen te, “Isurat nu heini he menge lalag su iyan heini paaǥi te kebpekid-uyun ku kenikew wey te tivuuk he menge Israilihanen.”
EXO 34:28 Ne zutun si Moises seled te kepatan he andew wey kezukileman, ne wazè en sikandin mekekaan wey mekeinum. Ne insurat din diyà te midlumpipì he menge vatu sikan is menge lalag te Nengazen mehitenged te kebpekid-uyun din kandan he iyan sikan is Sepulù he menge Belaud.
EXO 34:29 Midtupang si Moises puun duen te Buntud he Sinai he ed-uwit duen te zezuwa he melumpipì he vatu he midsuratan te Kesuǥuan. Nenganlag is dagwey zin su geina te nekidlalag sikandin te Nengazen, iyan, wazè din haazà metueni.
EXO 34:30 Ne naahà ni Aaron wey zuen te langun he menge etew is kebpenganlag te zagwey ni Moises hein midtengtengan dan sikandin, ne nahandek sikandan he ed-uvey ziyà te kandin.
EXO 34:31 Piru mid-umew sikandan ni Moises, umbe mid-uvey si Aaron wey sikan is menge pengulu te menge keet-etawan te Israel, ne mibpekidlalag si Moises kandan.
EXO 34:32 Ne hein nepasad haazà, mid-uvey ziyà te kandin is langun he menge Israilihanen. Ne impenurù din diyà te kandan sikan is langun he menge velaud he imbeǥey te Nengazen diyà te kandin diyà te Buntud he Sinai.
EXO 34:33 Ne emun ebpekepasad en si Moises he ebpekidlalag kandan edtembunan din is dagwey zin.
EXO 34:34 Piru emun edseled si Moises diyà te Tulda he Edtelevukaayan su ebpekidlalag te Nengazen, id-awè din is tambun te zagwey zin taman te ebpekeǥas sikandin dutun te Tulda. Ne emun ebpekeǥawas en sikandin, ne egkeǥiyen din diyà te menge Israilihanen is minsan hengkey he ibpekaǥi te Nengazen kandin,
EXO 34:35 ne egkaahà te menge Israilihanen is kebpenganlag te zagwey zin. Ne edtembunan din heini taman te edlikù sikandin diyà te Tulda su ebpekidlalag en maan sikandin te Nengazen.
EXO 35:1 Midtiǥum ni Moises is tivuuk he keet-etawan te Israel ne migkeǥiyan din sikandan te, “Iyan heini ibpeulaula te Nengazen keniyu:
EXO 35:2 Seled te heenem he andew, beeli niw is menge terebahu niw, piru zutun te ikepitu he andew ne himeley kew, su iyan heini andew he segradu ne para heini te Nengazen. Is minsan hentei he edterebahu te haazà he andew kinahanglan he edhimetayan.
EXO 35:3 Umbe kenè kew medterebahu, minsan is kedtetavun diyà te menge ed-ubpaan niw te kedsusuba te haazà he andew.”
EXO 35:4 Migkeǥiyan ni Moises is tivuuk he keet-etawan te Israel te, “Iyan heini insuǥù te Nengazen he veeli niw:
EXO 35:5 Halad kew ziyà te Nengazen puun te menge azen niw. Egkehimu he edhalad kew te vulawan, pelata, brunsi,
EXO 35:6 welin he meitem is kaavuavu zin, merudtem wey kanggan, linu, manggad he vulvul te kambing,
EXO 35:7 lundis te meemahan he kerehidu he midtinà te meriǥà, meupiya he kelasi he lundis, kayu he ekasya,
EXO 35:8 lana para idtubil te sulù, menge pehemut para te lana he idlana wey is para zuen te mehemut he veyewà,
EXO 35:9 wey vatu he uniks wey zuma pa he mahalen he menge vatu he para ibpikit duen te ipud wey zuen te teleǥuey ziyà te kumeng kayi.
EXO 35:10 “Is langun keniyu he zuen ketau te kebaal, ne medhengkayi ne veeli zan is minsan hengkey he insuǥù te Nengazen.
EXO 35:11 Beeli zan is Tulda he Ed-ezapan, is menge tambun dutun, is menge edsenggatan, is menge elavat he tabla, menge marku, menge tukud dutun, wey is menge pundasyun.
EXO 35:12 Elin daan is Kavan te Kebpekid-uyun te Nengazen, is menge tival zuen, is tangeb din wey is kurtina he id-alang duen,
EXO 35:13 is lemisahan wey is menge tival kayi wey is langun he gelemiten duen; is supas he ibpemuhat diyà te etuvangan te Megbevayà;
EXO 35:14 is selevukà te sulù wey is menge gelemiten duen; is menge sulù duma is lana he idtubil zuen;
EXO 35:15 is pemuhatà he edtutungan te veyewà wey is menge tival kayi; is lana he idlana; is mehemut he veyewà; is kurtina zuen te Tulda he Ed-ezapan;
EXO 35:16 is pemuhatà te pemuhat he edtutungen, tuuǥà he brunsi, is menge tival wey is langun he gelemiten kayi; is bisin he brunsi wey is selevukè din;
EXO 35:17 is menge kurtina he ibpeliǥuy te lama wey is menge tukud din wey is menge pundasyun; is kurtina ziyà te pultahan te lama;
EXO 35:18 is menge palpal wey is menge vanting he para zuen te Tulda he Ed-ezapan wey te lama kayi,
EXO 35:19 wey is mekempet wey segradu he menge visti he para te memumuhat he si Aaron wey te menge anak din he maama he ibivisti zan emun ebpemuhat dan duen te Segradu he Lugar.”
EXO 35:20 Ne mid-awà is tivuuk he keet-etawan te Israel diyà te etuvangan ni Moises.
EXO 35:21 Ne is kada sevaha kandan he egkesuat he edhalad, mid-uwit din is idhalad din diyà te Nengazen, he para te ibaal zuen te Tulda he Edtelevukaayan wey te langun he gelemiten kayi, wey is langun he egkinehenglanen para meveeli is menge visti te menge memumuhat.
EXO 35:22 Is langun he egkesuat he edhalad, maama wey vahi, mid-uwit te menge mahalen he menge lipit, menge eritis, menge rintì, wey nekedseselekawà he klasi te menge elahas he vulawan. Mid-uwit dan is menge vulawan dan su impemuhat dan he pemuhat he ibayew ziyà te Nengazen.
EXO 35:23 Duen midhalad te welin he meitem is kaavuavu zin, merudtem wey kanggan, linu, manggad he vulvul te kambing, lundis te meemahan he kerehidu he midtinà te meriǥà, wey meupiya he kelasi he lundis.
EXO 35:24 Is duma, mid-uwit te pelata etawa brunsi, wey menge tabla he ekasya he inhalad dan diyà te Nengazen.
EXO 35:25 Is menge vahi he uluwanen he ebpenhavel, mid-uwit dan te welin he meitem is kaavuavu zin, merudtem wey kanggan, wey linu.
EXO 35:26 Ne is menge vahi he metau he edhavel te vulvul te kambing, ne meupiya is gehinawa zan te kedhavel kayi.
EXO 35:27 Mibeǥey zaan sikan is menge pengulu zan te menge vatu he uniks wey zuma he mahalen he menge vatu he ibpikit duen te visti he ipud, wey zuen te teleǥuey ziyà te kumeng.
EXO 35:28 Duen daan imbeǥey zan he menge penaket wey lana te ulibu he para te idtubil zuen te menge sulù, wey lana he para te idlana, wey is para zuen te mehemut he veyewà.
EXO 35:29 Is langun he menge Israilihanen, maama wey vahi he egkesuat he ebeǥey, mid-uwit dan te idhalad dan diyà te Nengazen he ebpuun te keputian te atey zan is kebeǥaya zan duen; ne para haazà te langun he ebpeveelan te Nengazen kandan he impekaǥi zin ki Moises.
EXO 35:30 Migkeǥiyan ni Moises is menge Israilihanen te, “Mibpilì te Nengazen si Bezalel, is anak he maama ni Uri he apù ni Hur he sakup te tribu ni Juda.
EXO 35:31 Ebpeulinan din sikandin te Mulin-ulin din ne ebeǥayan din te ketau wey ebilidad te kebaal te minsan hengkey he vuluhaten–
EXO 35:32 ebeǥayan ku sikandin te ketau te kebaal te mekempet he menge vutang he vulawan, pelata, wey brunsi;
EXO 35:33 te kebpurma te mahalen he menge vatu he ibpemikit, kegkurti te kayu, wey kebaal te zuma he edeyzeyanan he terebahu.
EXO 35:34 Imbeǥey te Nengazen diyà te kandin wey ziyà te ki Oholiab he anak he maama ni Ahisamac he nesakup te tribu ni Dan, is ketau te kebpetueni te zuma te netuenan dan pinaaǥi te kebpenurù dan.
EXO 35:35 Imbeǥey zin diyà te kandan is ketau te kebaal te langun he kelasi te terebahu: iring te kebpandey te vatu, kebaal te menge zayandayan, wey kedhavel te manggad, keburda te linu, welin he meitem is kaavuavu zin, merudtem wey kanggan. Egkehimu zan is langun he kelasi te terebahu, wey utew sikandan metau he ebaal.
EXO 36:1 “Si Bezalel, si Oholiab, wey is duma pa he mibeǥayan te Nengazen te ketau wey ebilidad te kebaal te nekedseselekawà he vuluhaten iyan midterebahu te kebeeli zuen te Tulda sumalà te insuǥù te Nengazen.”
EXO 36:2 Umbe, impetawag ni Moises si Bezalel, si Oholiab wey is duma pa he mibeǥayan te Nengazen te ketau wey ebilidad te kebaal te nekedseselekawà he vuluhaten, wey utew egkesuat he edtavang te kedterebahu.
EXO 36:3 Ne imbeǥey ni Moises diyà te kandan is langun duen te inhalad te menge Israilihanen he para te kedtukuza zuen te Tulda. Ne kada meselem dutun ed-uwit is menge Israilihanen diyà te ki Moises te idhalad dan.
EXO 36:4 Umbe, mid-ewaan dèpa te menge terebahanti zuen te Tulda is terebahu zan ne midhendiyè dan te ki Moises is egkaǥi te,
EXO 36:5 “Midsubre en is imbeǥey te menge etew te egkinehenglanen te kebeeli te ebpeveelan te Nengazen.”
EXO 36:6 Ne tenged dutun mibpekeǥiyan ni Moises is menge etew zuen te tivuuk he kampu he med-engked dan en he ed-amut te para te kebeeli zuen te Tulda he Ed-ezapan, umbe wazè en human med-uwit diyà te kandin te menge halad sikan is menge etew.
EXO 36:7 Su sikan is ingkeveǥey zan en midsubre en te egkinehenglanen para te kedhimesaza te terebahu.
EXO 36:8 Is langun he memetau he ebpemenerebahu, ne iyan impevaal zan duen te Tulda he Ed-ezapan. Iyan migamit dan te kebaal zan dutun is sepulù he lukut he linu he miburdahan te welin he meiten is kaavuavu zin, merudtem wey kanggan. Ne nepurungan meburdahi heini te zagwey te menge kirubin.
EXO 36:9 Imped-iiring dan is kezekelà te kada sevaha, 42 he ǥiek is kelayat din ne heenem he ǥiek is keluag din.
EXO 36:10 Ne impebpipikit dan is kada lelima he kurtina (umbe nehimu zà haazà he zezuwa he tiglima).
EXO 36:11 Ne mibeelan dan te ebpen-iringen te sising is manggad he meitem is kaavuavu zin is diyà te kada kilid duen te ikezuwa he apid te sevaha zutun te impikit he menge tila.
EXO 36:12 Tig-50 he mibpen-iring te sising is intaud dan diyà te kada kilid ne impedsineruwà haazà.
EXO 36:13 Ne mibaal zan te 50 he kaw-it he vulawan su wey mekedliliib sikan is menge mibpen-iring te menge sising duen te zezuwa he impebpikit he menge tila. Pinaaǥi kayi ne neveelan is Tulda he Ed-ezapan.
EXO 36:14 Ne mibaal zaan sikandan te tambun duen te Tulda. Ne iyan migamit dan is 11 he lukut he manggad he vulvul te kambing.
EXO 36:15 Is kada manggad ne 45 he ǥiek is keluǥayad ne heenem he ǥiek is keluag din.
EXO 36:16 Ne impebpipikit dan te edtahi haazà is lelima he tila, ne iring ded duen te nesamà he heenem.
EXO 36:17 Ne midteuzan dan te 50 he mibpen-iring te sising is kilid duen te in-apid te mibpebpikit he menge tila,
EXO 36:18 ne impedliib dan pinaaǥi te 50 he kaw-it he brunsi.
EXO 36:19 Ne mid-uman pa sikandan mebaal te zezuwa he tambun, is sevaha, lundis te meemahan he kerehidu he midtinà te meriǥà, ne is ikezuwa meupiya he kelasi te lundis.
EXO 36:20 Ne mibaal sikandan te id-elavat dutun te Tulda. Is migamit dan ne tabla he ekasya.
EXO 36:21 Is kada sevaha zutun, ne 15 he ǥiek is keluǥayad din ne dezuwa he ǥiek is keluag din,
EXO 36:22 ne migkurtiyan haazà is kada purù dutun te tabla su wey mekesumpul heini duen te sevaha pa he tabla. Iring kayi is mibeelan dan te kada tabla.
EXO 36:23 Is 20 kayi he menge tabla, ne in-elavat dan diyà te egkezivavà he parti zuen te Tulda.
EXO 36:24 Heini he menge tabla ne impehulma zan duen te 40 he peuntuzà he pelata–su zezuwa he peuntuzà te kada tabla.
EXO 36:25 Is dapit te zizaya he parti zuen te Tulda ne mid-elevatan dan te 20 he tabla,
EXO 36:26 wey impehulma zaan duen te 40 he menge peuntuzà he pelata–dezuwa he peuntuzà is kada tabla.
EXO 36:27 Is dapit te edsenlepan he vahin dutun te Tolda, he iya is divaluy kayi, mid-elevaatan dan te heenem he tabla,
EXO 36:28 wey tig-dezuwa he tabla he para ziyà te kada suyuk.
EXO 36:29 Heini he menge tabla zutun te suyuk ne melig-en is kebpedsumpula zutun te zizalem ne egkeheǥet heini ziyà te divavew pinaaǥi zutun te mid-iring te sising. Iring kayi is mibeelandan dutun te zezuwa he tabla dutun te suyuk.
EXO 36:30 Umbe, zuen walu he menge tabla he para ziyà te menge suyuk wey 16 he menge peuntuzà he pelata kada tabla, egkinahanglan te zezuwa he peuntuzà.
EXO 36:31 Ne mibaal sikandan te menge marku he kayu he ekasya he para te elavat, lelima is para te egkezizaya he vahin duen te Tulda,
EXO 36:32 lelima zaan is para te egkezivavà he vahin, wey lelima pa he para te zapit te edsenlepan he egkeiniyuǥan he vahin duen te Tulda.
EXO 36:33 Ne is ibelavag he ibpeteliwazà, duen te elavat ne intaud dan puun te kilid dutun te Tulda he Ed-ezapan pehendiyà te zivaluy he elavat.
EXO 36:34 Mid-epizan dan te vulawan sikan is menge tabla, ne mibaal sikandan te mibpen-iring te rintì he vulawan he impenaud duen te menge tabla he iyan midlugluǥan duen te menge velavag he mid-epizan daan te vulawan.
EXO 36:35 Ne mibaal sikandan te kurtina he linu, ne miburdahan te welin he meitem is kaavuavu zin, merudtem wey kanggan, ne mibpurungan burdahi te zagwey te kirubin.
EXO 36:36 Ne ziyè dan haazà ipikit te mibeelan dan he heepat he menge tukud he ekasya he mibpen-epizan te vulawan wey midteuzan daan te vulawan he menge kaw-it. Ne ziyà haazà ipehulma is menge tukud te menge peuntuzà he pelata.
EXO 36:37 Ne sikan is gemawan duen te Tulda he Ed-ezapan, mibeelan dan te kurtina he linu he miburdahan te welin he meitem is kaavuavu zin, merudtem wey kanggan. Ne utew heini mibpurungi burdahi.
EXO 36:38 Mibaal zaan sikandan te lelima he tukud he zuen duen menge kaw-it, ne impikit dan dutun sikan is kurtina. Heini he menge tukud, mid-epizan te vulawan ragkes is menge in-ulu zuen wey menge kebilya, ne impehulma heini ziyà te lelima he peuntuzà he brunsi.
EXO 37:1 Ne mibeelan eni Bezalel is Kavan te Kebpekid-uyun he kayu he ekasya, ne haazà, 45 he vaney is keluǥayad din, 27 he vaney is keluag din, ne 27 he vaney is ketikang din.
EXO 37:2 Ne mid-epizan dan te lunsey he vulawan is diyà te seled wey is diyà te gawas kayi, ne midribitiyan dan te vulawan is diyà te menge kilid kayi.
EXO 37:3 Ne mibaal sikandin te heepat he mibpen-iring te rintì he vulawan, ne impikit heini zuen te heepat he paa kayi. Tig-dezuwa is diyà te pesikilizà kayi.
EXO 37:4 Ne mibaal zaan sikandan te menge tival he kayu he ekasya he mid-epizan dan te vulawan. Tig-dezuwa is diyà te kada kilid.
EXO 37:5 Ne in-ahuk dan haazà is tival zuen te menge mibpen-iring te rintì duen te kada kilid te Kavan para metival zan haazà is Kavan.
EXO 37:6 Ne mibaal zaan sikandan te Kavan he lunsey he vulawan he 45 he vaney is kelayat din wey 27 he vaney is keluag din.
EXO 37:7 Ne mibaal sikandan te zezuwa he ledawan he kirubin he vulawan duen te kada puru te tangeb duen te Kavan. In-ubpu zà heini te kebeeli zuen te tangeb te Kavan.
EXO 37:9 Nevekar is menge pakpak duen te menge kirubin diyà te zivavew zuen te tangeb su wey zan melembungi heini. Impedsineruwà haazà is dezuwa he zutun ipetengteng te tangeb.
EXO 37:10 Ne mibaal zaan sikandan te lemisahan he ekasya, he 36 he vaney is keluǥayad din, ne 18 he vaney is keluag din wey 27 he vaney is ketikang din.
EXO 37:11 Ne mid-epizan dan haazà te lunsey he vulawan wey midribitiyan dan daan te vulawan is peliǥuy zutun.
EXO 37:12 Ne midsenipahan dan is ebpekeliǥuy ziyà te zivavew zutun te lemisahan te heepat he vaney is keluag din, ne is divavew zutun te insenipa zan, midribitiyan dan te vulawan.
EXO 37:13 Ne mibaal sikandan te heepat he mibpen-iring te rintì he vulawan, ne impikit dan heini zuen te heepat he tukud te lemisahan
EXO 37:14 uvey te senipa. Kayi zan idtaud sikan is tival he idtival zuen te lemisahan.
EXO 37:15 Heini he menge tival, ekasya he mid-epizan te vulawan.
EXO 37:16 Ne mibaal sikandan te lunsey he vulawan he menge gelemiten dutun te lemisahan he iyan is: menge pinggan, menge tasa, menge yehung, wey menge tivud he egemiten para te menge pemuhat he inumen.
EXO 37:17 Mibaal zan daan te selevukà te sulù he lunsey he vulawan is paa zin, lawa zin, wey is dayandayan dutun he menge vulak, he is duma zuen wazè pa mebekar ne is duma mibekar en. Haazà is dayandayan idredsè dà is kebpurmaha kayi zuen te kebpurmaha te selevukà te menge sulù su teleubpu zà heini.
EXO 37:18 Haazà is selevukà te sulù, duen din heenem he subpang; tigtetelu is diyà te kada kilid kayi.
EXO 37:19 Is kada subpang dutun, duen din tetelu he zayandayan he menge vulak he mid-iring te vulak he almindru, he is duma, memetivurun pa, ne is duma nememekar en.
EXO 37:20 Ne is lawa zutun te selevukà te sulù, ne zuen dutun heepat he zayandayan he mid-iring te vulak he almindru he wazè pa mebekar wey mibekar en.
EXO 37:21 Duen sevaha he vulak diyà te zizalem te kada paris te subpang.
EXO 37:22 Haazà is menge zayandayan wey menge subpang, inredsè dà is kebpurmaha zuen te kebeeli zuen te lewahan te selevukà te sulù.
EXO 37:23 Mibaal zaan sikandan te pitu he sulù, menge lipit kayi, wey menge idtaya te egkeepus he pebilu zuen te sulù. Heini is langun lunsey he vulawan.
EXO 37:24 Menge 35 he kilu he lunsey he vulawan is neǥamit te kebeeli zuen te selevukà te sulù wey te langun he menge gelemiten kayi.
EXO 37:25 Mibaal zaan sikandan te pemuhatà he kayu he ekasya he para tutungà te veyewà. Kuwedradu heini; 18 he vaney is keluǥayad din wey keluaǥan din, 36 he vaney is ketikang din. Duen kayi menge sungeysungey ziyà te suyuk din he inredsè dà is kebpurmaha zuen te kebeeli kayi te pemuhatà.
EXO 37:26 Mid-epizan dan te lunsey he vulawan is dapit te zivavew kayi, is heepat he kilid kayi, wey sikan is menge sungeysungey ziyà te menge suyuk, ne midribitiyan dan te vulawan is peliǥuy kayi.
EXO 37:27 Midteuzan dan te zezuwa he mibpen-iring te rintì he vulawan is dizalem duen te ribiti ziyà te pesiziveluyà duen te pemuhatà, he para edteuzan te menge tival he idtival kayi.
EXO 37:28 Haazà is mibeelan he tival, kayu he ekasya he mid-epizan te vulawan.
EXO 37:29 Mibaal zaan sikandin te segradu he lana he para te idlana wey lunsey he veyewà he utew mehemut.
EXO 38:1 Mibaal zaan sikandan te kuwedradu he pemuhatà te pemuhat he edtutungen. Iyan migamit dan is kayu he ekasya. Pitu wey tengà he ǥiek is kelayat din ne pitu zaan wey tengà he ǥiek is keluag din, ne heepat wey tengà he ǥiek is ketikang din.
EXO 38:2 Mibeelan dan heini te menge sungeysungey ziyà te heepat he suyuk kayi, he inredsè dà is kebpurmaha kayi te kebeeli zuen te pemuhatà. Mid-epizan dan heini is pemuhatà te brunsi.
EXO 38:3 Is langun he menge gelemiten dutun te pemuhatà ne brunsi, he iyan is: menge selevukà te avu, menge pala, menge yahung, menge zezekelà he tinidur he para te usa, wey is menge selevukà te vaǥa.
EXO 38:4 Mibaal zaan sikandan te tuuǥà he brunsi he para zutun te pemuhatà, ne midsevukan dan te untuzà diyà te seled dutun te pemuhatà, ne ziyà haazà te liwezaan puun te zivavew.
EXO 38:5 Mibaal zaan sikandan te heepat he mibpen-iring te rintì he brunsi ne impikit dan heini ziyà te heepat he suyuk dutun te tuuǥà he brunsi. Heini is mibpen-iring te rintì ne iyan edteuzan te menge tival he idtival zutun te pemuhatà.
EXO 38:6 Is menge tival he mibeelan, kayu he ekasya he mid-epizan te brunsi.
EXO 38:7 Intaud dan sikan is menge tival zuen te mibpen-iring te rintì he ziyà te kada kilid dutun te pemuhatà su para mevinting heini. Tabla is mibeelan dan he pemuhatà he mibpuwang is seled din.
EXO 38:8 Ne mibaal sikandan te brunsi he bisin wey te untuzà kayi he brunsi zed. Is menge brunsi he migamit te kebeeli kayi, ne ebpuun diyà te brunsi he peǥelungan te menge vahi he nemenilbi ziyà te gemawan te Tulda he Edtelevukaayan.
EXO 38:9 Mibeelan dan te lama sikan is Tulda, ne mibpeliǥuyan dan heini te kurtina he linu. Is keluǥayad te kurtina he impelingut diyà te zivavà he kilid ne 150 he ǥiek.
EXO 38:10 Impikit dan heini he kurtina ziyà te 20 he tukud he brunsi he ziyà ipehulma te 20 daan he peuntuzà he brunsi. Is mibpikitan dan dutun te kurtina, iyan is menge kaw-it he pelata he nekepikit diyà te menge kebilya he pelata zuen te menge tukud.
EXO 38:11 Is kurtina he ziyà te zizaya he kilid 150 daan he ǥiek is keluǥayad din, ne impikit heini ziyà te 20 he tukud he brunsi he impehulma ziyà te 20 he peuntuzà he brunsi. Is mibpikitan dutun te kurtina iyan is menge kaw-it he pelata he nekepikit diyà te menge kebilya he pelata zuen te menge tukud.
EXO 38:12 Is kurtina he ziyà dapit te edsenlepan he kilid, 75 he ǥiek is keluǥayad din, ne impikit heini ziyà te sepulù he tukud he impehulma ziyà te sepulù daan he menge peuntuzà. Is mibpikitan dutun te kurtina, iyan is menge kaw-it he pelata he nekepikit diyà te menge kebilya he pelata zuen te menge tukud.
EXO 38:13 Is dapit te edsilaan he kilid duen te lama 75 zaan he ǥiek is keluǥayad din.
EXO 38:14 Ne zuen kayi ǥemawan he ed-elangan daan te kurtina is kilid din. Is kurtina ziyà te egkekewanan, 22 he ǥiek is keluǥayad din, ne ibpikit heini ziyà te tetelu he tukud he ibpemehulma ziyà te tetelu zaan he menge peuntuzà.
EXO 38:15 Is kurtina ziyà te egkeǥivang, 22 wey tengà he ǥiek is keluǥayad din, ne intaud heini ziyà te tetelu he tukud he impehulma ziyà te tetelu he peuntuzà.
EXO 38:16 Pudu linu he manggad is kurtina he impeliǥuy zuen te lama.
EXO 38:17 Is menge pundasyun te menge tukud, brunsi, ne is menge kaw-it wey menge kebilya kayi, ne pelata. Is menge in-ulu te menge tukud, mid-epizan te pelata. Is langun he menge tukud dutun te peliǥuy te lama, ne zuen daan menge kebilya he pelata.
EXO 38:18 Is kurtina ziyà te pultahan dutun te lama, ne manggad he linu he miburdahan te meitem is kaavuavu zin, merudtem wey kanggan. Ne utew heini mibpurungan te eburda. Is keluǥayad kayi, 30 he ǥiek, ne is ketikang din, pitu wey tengà he ǥiek, iring te ketikang te menge kurtina ziyà te peliǥuy zuen te lama.
EXO 38:19 Heini he kurtina, impikit diyà te heepat he tukud he impehulma ziyà te heepat daan he brunsi he peuntuzà. Is menge kaw-it wey menge kebilya zutun te menge tukud, ne pelata, wey mid-epizan te pelata is menge in-ulu zutun te tukud.
EXO 38:20 Lunsey he brunsi is menge palpal te menge vanting dutun te Tulda he Ed-ezapan.
EXO 38:21 Iyan heini menge himan he neǥamit te kebpehitindeǥa zuen te Tulda he Ed-ezapan he zutun itaǥù sikan is Kesuǥuan. Heini is menge himan, inlista te menge kevuwazan ni Levi sumalà te suǥù ni Moises. Heini he vuluhaten, iyan midumala zuen si Itamar he anak ni Aaron he memumuhat.
EXO 38:22 Is midumala te kebenguna zuen te Tulda he Ed-ezapan, iyan si Bezalel he anak ni Uri he apù ni Hur, he ebpuun diyà te tribu ni Juda. Mibeelan din is langun he insuǥù te Nengazen ki Moises.
EXO 38:23 Is umuuǥup din, iyan si Oholiab he anak ni Ahisamac, he ebpuun diyà te tribu ni Dan. Metau sikandin he edterebahu wey metau he ebpurma te meupiya he ed-ahaan, wey eburda te linu te meitem is kaavuavu zin, merudtem wey kanggan.
EXO 38:24 Is keveǥat te langun he vulawan he inhalad para egemiten te kebeeli zuen te Tulda he Ed-ezapan, menge 1,000 he kilu ziyà te timbangan te menge memumuhat.
EXO 38:25 Is keveǥat te langun he pelata he netiǥum, ne menge 3,520 he kilu ziyà te timbangan te menge memumuhat. Iyan mibeǥey kayi is menge etew he nelista te sinsus. Is kada sevaha kandan mibeǥey te heenem he gramu ziyà te timbangan te menge memumuhat. Duen 603,550 he etew he is keǥurang dan 20 he tuig pehendiyà te metikang is nelista te sinsus.
EXO 38:27 Is 3,500 he kilu he pelata, migamit haazà te kebaal te 100 he menge peuntuzà duen te Tulda wey menge kurtina. Nekesavuk te tig-35 he kilu is kada peuntuzà.
EXO 38:28 Is nesamà he 20 he kilu he pelata, mibeelan he menge kaw-it wey menge kebilya zuen te menge tukud, wey in-apid te menge in-ulu te menge tukud.
EXO 38:29 Is keveǥat te brunsi he inhalad diyà te Nengazen, menge 2,500 he kilu.
EXO 38:30 Migamit heini te kebaal te menge pundasyun te menge tukud duen te menge gemawan te Tulda he Edtelevukaayan. Is duma zutun, migamit te kebaal te pemuhatà he brunsi wey te menge tuuǥà kayi, wey te langun he gelemiten dutun te pemuhatà.
EXO 38:31 Iyan ded haazà migamit dan te kebaal te menge pundasyun te menge tukud duen te alad, wey zuen te gemawan dutun te lama wey te langun he menge palpal zuen te Tulda he Ed-ezapan wey menge palpal ziyà te alad.
EXO 39:1 Midtahì ensi Bezalel te segradu he menge visti he para te menge memumuhat sumalà te insuǥù te Nengazen ki Moises. Is manggad he migamit dan welin he meitem is kaavuavu zin, merudtem wey kanggan. Iyan daan heini klasi te manggad he migamit dan hein mibeelan dan te visti si Aaron.
EXO 39:2 Midtahì dan daan te ipud. Is manggad he migamit dan linu he miburdahan te welin he meitem is kaavuavu zin, merudtem wey kanggan.
EXO 39:3 Mibaal sikandan te tanur he vulawan pinaaǥi te kedlumpipia zan duen te vulawan wey kebpenebtevasa zuen he mibpekenipis. Ne imburda zan heini te linu duma te welin he meitem is kaavuavu zin, merudtem wey kanggan. Utew meupiya is kegkeburdaha kayi.
EXO 39:4 Dezuwa he vahin heini he visti, is peka wey sineruwan, ne impedsumpul heini ziyà te tedted din diyà te pemenayen.
EXO 39:5 Is bakes kayi, linu zaan he miburdahan te vulawan he tanur wey welin he meitem is kaavuavu zin, merudtem, wey kanggan. Mibeelan dan heini sumalà te insuǥù te Nengazen ki Moises.
EXO 39:6 Intaud dan is menge vatu he uniks diyà te selevukà he vulawan. Ne in-ukir zan dutun is menge ngazan te menge anak he maama ni Jacob. Iring heini te ked-ukir te para ibmarka.
EXO 39:7 Ne impikit dan haazà duen te menge tedted diyà te pemenayen duen te ipud su tedeman haazà he menge vatu para te menge tribu te Israel. Mibeelan dan heini is langun sumalà te insuǥù te Nengazen ki Moises.
EXO 39:8 Mibaal zaan sikandan te teleǥuey ziyà te kumeng, ne utew meupiya is kegkeveeli kayi. Is manggad he migamit para kayi, ne iring ded duen te migamit dan te kebaal te visti he ipud: linu he miburdahan te vulawan he tanur wey welin he meitem is kaavuavu zin, merudtem wey kanggan.
EXO 39:9 Heini is teleǥuey ziyà te kumeng midubli is kedlumpìa zuen ne kuwedradu heini; siyam he vaney is keleyatan din wey keluaǥan din.
EXO 39:10 Ne midteuzan dan heini te heepat he linya te mahalen he menge vatu. Is nehuna he linya, rubi, tupas, wey biril;
EXO 39:11 is ikezuwa he linya, imirald, sapiru, wey diyemanti;
EXO 39:12 is iketelu he linya, hasintu, agata, wey amatista;
EXO 39:13 ne ikeepat he linya, krisulitu, uniks, wey haspir. Ne impikit dan heini ziyà te selevukà he vulawan.
EXO 39:14 Is kada sevaha zuen te sepulù wey dezuwa he menge vatu, ne in-ukir zutun is sevaha zaan he ngazan te sevaha he anak ni Jacob, su iyan haazà edriprisintar te sepulù wey zezuwa he ebpuunan te menge kevuwazan ni Israel. Is ked-ukira zutun ne iring te ked-ukir te para ibmarka.
EXO 39:15 Midteuzan dan daan te rantey he lunsey he vulawan sikan is teleǥuey ziyà te kumeng.
EXO 39:16 Mibaal zaan sikandan te dezuwa he selevukà he vulawan wey zezuwa he mibpen-iring te sising he vulawan, ne impikit dan heini is dezuwa he mibpen-iring te sising diyà te zivavew he menge suyuk duen te teleǥuey ziyà te kumeng.
EXO 39:17 Ne inhiket dan sikan is dezuwa he rantey he vulawan duen te zezuwa he iring te sising he zutun te apid te kumeng he teleǥuey,
EXO 39:18 ne sikan is dezuwa he purù duen te rantey, ne impikit dan diyà te selevukà he zuen idsanggat te menge tedted diyà te pemenayen duen te ipud.
EXO 39:19 Mibaal zaan sikandan te zezuwa pa he mibpen-iring te sising he vulawan. Ne impikit dan heini zuen te egkeiniyuǥan duen te zizalem he menge suyuk duen te teleǥuey ziyà te kumeng, he id-apid duen te ipud.
EXO 39:20 Ne mibaal pa sikandan te zezuwa pa he mibpen-iring te sising he vulawan, ne impikit dan heini zuen te ipud diyà te zivavew te vakes kayi.
EXO 39:21 Ne impedhiketè dan pinaaǥi te meitem is kaavuavu zin he hiket sikan is dapit te zizalem he iring te sising duen te apid te kumeng he teleǥuey wey sikan is mibpen-iring te sising duen te ipud. Pinaaǥi kayi ebpekepurung ebpekepikit sikan is apid te kumeng he teleǥuey zuen te ipud. Mibeelan dan heini is langun sumalà te insuǥù te Nengazen ki Moises.
EXO 39:22 Mibaal zaan sikandan te visti he pendivavew he visti te memumuhat. Heini he visti ed-epizan duen te ipud. Is manggad he migamit dan te kedtahì kayi welin he lunsey he meitem is kaavuavu zin.
EXO 39:23 Heini he visti duen din liab he mid-epuruwan su wey kenà mevindas.
EXO 39:24 Mibpemikitan dan is peliǥuy te sidsid kayi he visti te mibpen-iring te prutas he pumigranata, he iyan mibeelan is linu he miburdahan te welin he meitem is kaavuavu zin, merudtem wey kanggan.
EXO 39:25 Mibel-etan dan sikan is menge zayandayan te menge seriyew he lunsey he vulawan. Heini he visti ibivisti ni Aaron emun ebpenilbi sikandin te Nengazen. Mibeelan dan heini is langun sumalà te insuǥù te Nengazen ki Moises.
EXO 39:27 Mibaal zan daan te menge pendizalem he visti he para ki Aaron wey para zuen te menge anak din he maama; iyan migamit dan is manggad he linu.
EXO 39:28 Iyan ded daan haazà klasi te manggad he migamit dan te kebaal te menge tengkulu, menge kalù wey menge pendizalem he visti.
EXO 39:29 Is menge vakes, linu zaan he miburdahan te welin he meitem is kaavuavu zin, merudtem wey kanggan. Ne utew heini mibpurungi te eburda. Midhimu zan heini is langun sumalà te insuǥù te Nengazen ki Moises.
EXO 39:30 Mibaal sikandan te midalya he lunsey he vulawan ne mibpe-ukiran dan heini te iring te ked-ukir te para te ibmarka. Ne iyan heini lalag he in-ukir zuen: “Insivey para te Nengazen.”
EXO 39:31 Ne impikit dan heini ziyà te egkesineruwan te tengkulu ni Aaron pinaaǥi te meitem is kaavuavu zin he hiket. Mibeelan dan heini is langun sumalà te insuǥù te Nengazen ki Moises.
EXO 39:32 Nepasad is langun he terebahu zuen te Tulda he Ed-zapan, he egngezanan daan he Tulda he Edtelevukaayan. Mibeelan te menge Israilihanen is langun he insuǥù te Nengazen diyà te ki Moises.
EXO 39:33 Ne impeehè dan diyà te ki Moises haazà is Tulda he Ed-ezapan wey is langun he menge gelemiten dutun: is menge kaw-it, menge elavat, menge marku, menge tukud, menge pundasyun,
EXO 39:34 is tambun he lundis te meemahan he kerehidu he midtinà te meriǥà, is tambun he meupiya he kelasi he lundis, is menge kurtina;
EXO 39:35 is Kavan te Kebpekid-uyun wey is tambun din wey is menge tival kayi;
EXO 39:36 is lemisahan wey is langun he gelemiten kayi, wey is supas he ibpemuhat diyà te etuvangan te Megbevayà;
EXO 39:37 is lunsey he vulawan he selevukà te menge sulù, is ebpekelinya kayi he menge sulù, wey menge gelemiten dutun; wey is lana he idtubil te sulù;
EXO 39:38 is bulawan he pemuhatà; is lana he para te idlana; is mehemut he veyewà; is kurtina he para te gemawan duen te Tulda;
EXO 39:39 is brunsi he pemuhatà wey is tuuǥà he brunsi kayi, is menge tival zuen, wey is langun he menge gelemiten kayi; is bisin wey te selevukè din;
EXO 39:40 is menge kurtina he ibpeliǥuy zuen te lama wey is menge tukud kayi wey menge pundasyun; is kurtina te pultahan dutun te lama; is menge hiket wey menge palpal para te kurtina te lama; is langun he gelemiten dutun te Tulda he Ed-ezapan, he migngezanan daan te Tulda he Edtelevukaayan;
EXO 39:41 wey is mekempet wey segradu he menge visti he para te memumuhat he si Aaron wey te menge anak din he menge maama, he ibivisti zan emun ebpemuhat dan duen te Segradu he Lugar.
EXO 39:42 Mibeelan te menge Israilihanen is langun he terebahu he insuǥù te Nengazen diyà te ki Moises.
EXO 39:43 Ne mibpurungan susiya ni Moises is minsan hengkey zutun, ne neehè din he sungkad is kegkeveeli te langun dutun te insuǥù te Nengazen. Umbe mibpenubtuvazan sikandan ni Moises.
EXO 40:1 Ne migkeǥiyan te Nengazen si Moises te,
EXO 40:2 “Dutun te egkehuna he andew te egkehuna he vulan te tuig, ne ipelastar niw en heeyan is Tulda he Ed-ezapan, he egngezanan daan he Tulda he Edtelevukaayan.
EXO 40:3 Iseled niw zutun sikan is Kavan te Kebpekid-uyun, ne elangi niw te kurtina.
EXO 40:4 Iseled niw sikan is lemisahan ne isavuk niw zutun sikan is menge gelemiten kayi. Ne elin niw iseled sikan is selevukà te sulù ne isavuk niw zutun sikan is menge sulù.
EXO 40:5 Isavuk niw sikan is pemuhatà he vulawan he edtutungan te veyewà diyà te etuvangan duen te Kavan te Kebpekid-uyun, ne itaud niw is kurtina ziyà te gemawan duen te Tulda he Ed-ezapan.
EXO 40:6 “Isavuk niw ziyà te etuvangan duen te Tulda he Ed-ezapan sikan is pemuhatà te edtutungen he pemuhat.
EXO 40:7 Ne isavuk niw sikan is bisin, diyà te pid-elangan duen te Tulda wey zuen te pemuhatà, ne teǥui niw haazà te wahig.
EXO 40:8 Ipenaud niw sikan is ibpeliǥuy zuen te Tulda he menge kurtina, ragkes sikan is kurtina zuen te gemawan te lama.
EXO 40:9 “Ne ipehinungud niw kayi te kediey sikan is Tulda wey is langun he gelemiten duen pinaaǥi te kedlenahi niw zuen te segradu he lana, ne egkehimu haazà he segradu.
EXO 40:10 Edheplasan daan haazà is pemuhatà te pemuhat he edtutungen wey is langun he menge gelemiten kayi pinaaǥi te kebpehinunguza kayi te kedì, ne egkehimu heini he segradu.
EXO 40:11 Ne ipehinungud niw zaan sikan is bisin wey is selevukè din, te iyan gihapun he paaǥi.
EXO 40:12 “Ne zumaha nu si Aaron wey sikan is menge anak din he maama ziyà te ǥemawan duen te Tulda he Edtelevukaayan ne ipepemeziǥù nu sikandan dutun.
EXO 40:13 Ne sun-uzi nu si Aaron duen te menge visti te memumuhat, ne lenahi nu sikandin su iyan heini paaǥi te kebpehinunguza kandin kayi te kedì, su wey mekepenilbi sikandin kediey pinaaǥi te kebpemuhat.
EXO 40:14 Dumaha nu zaan sikan is menge anak din he maama, ne ipesun-ud kandan is pendizalem he visti zan.
EXO 40:15 Ne lenahi nu sikandan iring te kedlanahi nu te amey zan, su para mekepenilbi sikandan kediey pinaaǥi te kebpemuhat pehendiyè en te huziyan he menge lapis te kevuwazan.”
EXO 40:16 Ne mibeelan ni Moises haazà is langun he insuǥù te Nengazen kandin.
EXO 40:17 Umbe, midtukud is Tulda he Ed-ezapan dutun te nehuna he andew te nehuna he vulan dutun te ikezuwa he tuig te kegkeliwas te ked-awè dan diyà te Ehipto.
EXO 40:18 Iyan heini kedtukuza ni Moises duen te Tulda: Intaud din is menge pundasyun kayi, is menge elavat, wey menge marku te elavat, wey menge tukud.
EXO 40:19 Ne mibekar zin sikan is Tulda, ne impetaud din is menge elavat he manggad wey is tambun he iyan atep duen. Mibeelan din heini is langun sumalà te insuǥù kandin te Nengazen.
EXO 40:20 Ne intaǥù din duen te Kavan sikan is melumpipì he vatu he midsuratan te Kesuǥuan, ne in-ahuk din duen te menge mibpen-iring te rintì duen te Kavan sikan is menge tival, ne midtembunan din heini.
EXO 40:21 Ne inseled din sikan is Kavan duen te Tulda he Ed-ezapan, ne intaud din sikan is kurtina su wey mezilungi haazà is Kavan te Kebpekid-uyun.
EXO 40:22 Ne impelastar zin is lemisahan diyà te seled dutun te Tulda, ziyà te egkezizaya he kilid, he ziyà te ǥawas duen te kurtina.
EXO 40:23 Ne insavuk din dutun te lemisahan sikan is supas he ibpemuhat diyà te etuvangan te Nengazen. Mibeelan din heini is langun sumalà te insuǥù kandin te Nengazen.
EXO 40:24 Impelastar zin daan sikan is selevukà te sulù diyà te seled duen te Tulda, diyà te egkesineruwan duen te lemisahan he zapit te egkezivavà.
EXO 40:25 Ne insavuk din sikan is menge sulù diyà te etuvangan te Nengazen. Mibeelan din heini is langun sumalà te insuǥù kandin te Nengazen.
EXO 40:26 Inseled din duen te Tulda sikan is bulawan he pemuhatà, ne ziyè din ipelastar te etuvangan duen te kurtina,
EXO 40:27 ne midtutung din dutun is mehemut he veyewà, su iyan haazà insuǥù te Nengazen. Mibeelan din heini is langun sumalà te insuǥù te Nengazen kandin.
EXO 40:28 Intaud din daan sikan is kurtina ziyà te gemawan duen te Tulda,
EXO 40:29 ne impelastar zin diyà te uvey te ǥemawan sikan is pemuhatà te pemuhat he edtutungen. Ne nemuhat sikandin dutun te menge pemuhat he edtutungen, wey menge pemuhat he gasa.
EXO 40:30 Ne insavuk din sikan is bisin diyà te pid-elangan duen te Tulda wey zuen te pemuhatà ne midteǥuan din haazà te wahig he ibpenlùlù.
EXO 40:31 Ne si Moises, si Aaron wey sikan is menge anak din he maama ebpenlùluan dan is menge velad dan, wey menge paa zan dutun.
EXO 40:32 Ebpenlùlù dan emun edseled dan dutun te Tulda etawa edhenduen dan te pemuhatà. Mibeelan dan heini is langun sumalà te insuǥù te Nengazen ki Moises.
EXO 40:33 Ne impelastar ni Moises sikan is menge kurtina zuen te lama, he ebpekeliǥuy zuen te Tulda, wey zuen te pemuhatà, ragkes sikan is kurtina te gemawan dutun te lama. Ne nepasad ni Moises is langun he vuluhaten.
EXO 40:34 Ne hein nepasad heini is langun netembunan te ǥapun sikan is Tulda he Edtelevukaayan he tuus te zutun is Nengazen.
EXO 40:35 Ne tenged dutun kenà si Moises ebpekeseled dutun te Tulda.
EXO 40:36 Ne emun ebpeketikang sikan is gapun diyà te zivavew zuen te Tulda ne egenat heini, ne egenat daan is menge Israilihanen puun te kampu zan.
EXO 40:37 Emun kenà ed-awà duen te Tulda sikan is gapun, ne kenè dan daan edhalin.
EXO 40:38 Sikan is gapun he simbulu he zutun is Nengazen he kenà ed-awà diyà te zivavew zuen te Tulda emun maandew, ne emun mezukilem duen dutun hapuy he ǥapun su para maahà heini te langun he Israilihanen dutun te kedhipanew zan.
LEV 1:1 Midtawag te Nengazen si Moises ne midlelaǥan din diyà te Tulda he Edtelevukaayan. Midsuǥù din si Moises te kegkaǥi kayi ziyà te menge Israilihanen: Emun duen keniyu ebpemuhat te uyaǥen diyà te Nengazen, ne mebpemuhat sikandin te vaka, kerehidu, etawa kambing.
LEV 1:3 Emun baka is ibpemuhat din he iyan pemuhat he edtutungen, kinahanglan he meemahan heini he wazè din sazir, ne ipemuhat din heini ziyà te ǥemawan te Tulda he Edtelevukaayan, su para zewata sikandin te Nengazen.
LEV 1:4 Izampè din is belad din diyà te ulu zuen te vaka he ibpemuhat din, ne edewaten heini te Nengazen su wey melibri sikandin puun te menge salè din.
LEV 1:5 Ne lepaa zin haazà he uyaǥen diyà te etuvangan te Nengazen. Ne is lengesa kayi ibpirik te menge memumuhat he menge kevuwazan ni Aaron peliǥuy zuen te pemuhatà he ziyà te ǥemawan te Tulda he Edtelevukaayan.
LEV 1:6 Ne enisi zin haazà is uyaǥen wey sepùa.
LEV 1:7 Kegkepasad dutun, medtetavun is menge memumuhat he menge kevuwazan ni Aaron diyà te pemuhatà ne tevuni zan haazà te menge kayu he ibpurung ibpenavuk.
LEV 1:8 Ne isavuk dan duen te hapuy sikan is mibpenggetad dan he vahin duen te uyaǥen, ragkes is ulu wey is menge tavà.
LEV 1:9 Kinahanglan he lùlui duen te nemuhat is menge vahin he ziyà te seled te ǥetek wey is menge paa zuen te vaka. Ne kegkepasad, iyan en is memumuhat edtutung kayi te langun diyà te pemuhatà, iyan heini pemuhat he edtutungen. Is kehemut kayi he pemuhat te pinaaǥi te hapuy ne ebpekepenunuat te Nengazen.
LEV 1:10 Emun kerehidu etawa kambing is ibpemuhat te etew he iyan pemuhat he edtutungen, kinahanglan he meemahan heini he wazè din sazir.
LEV 1:11 Lepaa zin heini ziyà te etuvangan te Nengazen diyà te egkezizaya te pemuhatà. Ne is lengesa kayi ibpirik te menge memumuhat he menge kevuwazan ni Aaron diyà te peliǥuy zuen te pemuhatà.
LEV 1:12 Emun egkepenggetad en heini zuen te nemuhat, ibpelastar heini te memumuhat diyà te hapuy, ragkes is ulu wey is menge tavà.
LEV 1:13 Kinahanglan he lùlui zuen te nemuhat is menge vahin he ziyà te seled te ǥetek wey is menge paa kayi. Ne iyan en haazà is memumuhat edtutung dutun te langun diyà te pemuhatà te pemuhat he edtutungen. Is kehemut kayi he pemuhat te pinaaǥi te hapuy ne ebpekepenunuat te Nengazen.
LEV 1:14 Emun tagbis is ibpemuhat te etew he iyan pemuhat he edtutungen, kinahanglan he merepatik heini etawa limuken.
LEV 1:15 Ed-uwiten heini te memumuhat diyà te pemuhatà. Egurivizen din is lieg kayi taman te egketamped, ne ibpetiǥis din is lengesa duen te kilid te pemuhatà. Ne edtutungen din is ulu kayi ziyà te pemuhatà.
LEV 1:16 Ne kegkepasad dutun, id-awè din is evenan ragkes is taǥù din he kinaan kayi ne idtimbag din diyà te zapit te edsilaan duen te pemuhatà he zutun idsavuk is avu.
LEV 1:17 Baasa zin haazà is tagbis pinaaǥi te keguyud te menge pakpak kayi he kenè din daan ebpitasen. Ne tutunga zin haazà is tagbis diyà te pemuhatà he iyan en pemuhat he edtutungen. Is kehemut kayi he pemuhat te pinaaǥi te hapuy ne ebpekepenunuat te Nengazen!
LEV 2:1 Emun duen ebpemuhat te pemuhat he para gasa te Nengazen, ne ǥemita zin is kineupiyahan he kelasi te herina, ne sehuǥi zin heini te lana wey veyewà.
LEV 2:2 Uwita zin heini ziyà te menge memumuhat he menge kevuwazan ni Aaron. Ne edterinan te memumuhat haazà te sengekemkem he herina he midsehuǥan te lana, wey ragkes is langun he veyewà he insahug kayi he midtarin din, ne edtutungen din diyà te pemuhatà. Edtutungen din heini he paaǥi te kedtentenuzi te Nengazen. Is kehemut kayi he pemuhat te pinaaǥi te hapuy ne ebpekepenunuat te Nengazen.
LEV 2:3 Is egkesamà dutun te herina, ne ǥaked ni Aaron wey te menge kevuwazan din, ne utew heini segradu su zuma heini zuen te pemuhat pinaaǥi te hapuy he impemuhat diyà te Nengazen.
LEV 2:4 Emun duen ebpemuhat te supas he midhilutù diyà te evuwan he pemuhat he para gasa, kinahanglan he iyan egemiten din is kineupiyahan he kelasi te herina he wazà tepayi. Egkehimu he ibpemuhat is mekepal he supas he midsehuǥan te lana etawa menipis he supas he midezasan te lana.
LEV 2:5 Emun is ibpemuhat he supas ne ziyà hilutua te mevavew he hilutuey, kinahanglan he iyan egemiten is kineupiyahan he kelasi te herina he edsehuǥan te lana, piru kenà edtepayan.
LEV 2:6 Ebpenevien heini ne ed-itisan te lana. Pemuhat heini he para gasa.
LEV 2:7 Emun diyà edhilutua te karà is supas he ibpemuhat, kinahanglan daan he iyan egemiten is kineupiyahan he kelasi te herina ne edsehuǥan daan heini te lana.
LEV 2:8 Uwita heini he menge pemuhat diyà te memumuhat su wey zin ikepemuhat diyà te Nengazen duen te pemuhatà.
LEV 2:9 Edterinan heini te memumuhat, ne haazà is tinarin din edtutungen din diyà te pemuhatà he paaǥi te kedtentenuzi te Nengazen. Is kehemut kayi he pemuhat te pinaaǥi te hapuy ne ebpekepenunuat te Nengazen.
LEV 2:10 Ne is samà dutun te pemuhat, ne ǥaked en ni Aaron wey te menge kevuwazan din, ne utew heini segradu su zuma heini zuen te pemuhat pinaaǥi te hapuy he impemuhat diyà te Nengazen.
LEV 2:11 Is langun he pemuhat he para gasa he ibpemuhat diyà te Nengazen kinahanglan he wazè din tapey, su kenè kew engayan he edtutung te tapey etawa teneb dutun te kebpemuhata niw te Nengazen te pemuhat pinaaǥi te hapuy.
LEV 2:12 Egkehimu ke ibpemuhat niw is tapey etawa teneb he iring te kebpemuhata niw te egkehuna he sebpet niw, piru kenà heini ereg he edtutungen diyà te pemuhatà.
LEV 2:13 Timusi niw is langun he menge pemuhat niw he para gasa, su is timus, simbulu te wazà pidtemanan he kebpekid-uyun niw te Megbevayà. Timusi niw is langun he menge pemuhat niw.
LEV 2:14 Emun ibpemuhat niw is egkehuna he sebpet niw he iyan gasa he ibeǥey niw ziyà te Nengazen, pemuhat kew te ginaling he menge trigu he midsandag.
LEV 2:15 Sehuǥi niw heini te lana wey veyewà. Pemuhat heini he para gasa.
LEV 2:16 Edtutungen te memumuhat is duma zuen te ginaling he midsehuǥan te lana, wey is langun he veyewà he insahug duen te ginaling he para te kedtentenuzi te Nengazen. Pemuhat heini pinaaǥi te hapuy para te Nengazen.
LEV 3:1 Emun duen ebpemuhat te vaka he meemahan etawa vehiyan he pemuhat he para te meupiya he kedepità, kinahanglan he iyan din ibpemuhat diyà te etuvangan te Nengazen is wazè din sazir.
LEV 3:2 Izampè din is belad din diyà te ulu zutun te vaka, ne ziyè din heini lepaa te ǥemawan te Tulda he Edtelevukaayan. Is lengesa kayi, ne ibpirik te menge memumuhat he menge kevuwazan ni Aaron diyà te peliǥuy zuen te pemuhatà.
LEV 3:3 Puun dutun te ibpemuhat, ne edtarin is memumuhat te ibpemuhat din diyà te Nengazen he pemuhat pinaaǥi te hapuy. Egkuwaan din is langun he tavà diyà te seled te ǥetek kayi,
LEV 3:4 is menge vuwà ragkes is menge tavà kayi, wey is deisey he vahin te atey kayi.
LEV 3:5 Ne edtutungen heini is langun kayi te menge memumuhat diyà te pemuhatà apil zuen te pemuhat he edtutungen. Is kehemut kayi he pemuhat te pinaaǥi te hapuy ne ebpekepenunuat te Nengazen.
LEV 3:6 Emun kerehidu etawa kambing is ibpemuhat din he para te meupiya he kedepità, meemahan man heini etawa vehiyan, ne kinahanglan he wazè din sazir.
LEV 3:7 Emun kerehidu is ibpemuhat din diyà te Nengazen,
LEV 3:8 izampè din is belad din diyà te ulu zutun te kerehidu ne lepaa zin haazà diyà te etuvangan te Tulda he Edtelevukaayan. Ne is lengesa kayi, ibpirik te menge memumuhat he menge kevuwazan ni Aaron diyà te peliǥuy te pemuhatà.
LEV 3:9 Puun dutun te ibpemuhat, ne edtarin is memumuhat te ibpemuhat din diyà te Nengazen he pemuhat pinaaǥi te hapuy. Egkuwaan din is menge tavà kayi, is tivuuk he melambù he ikug he midlempek tempeza, is langun he tavà diyà te seled te ǥetek,
LEV 3:10 is menge vuwà ragkes is menge tavà kayi, wey is deisey he vahin te atey.
LEV 3:11 Edtutungen heini is langun te memumuhat diyà te pemuhatà he pemuhat he keenen. Pemuhat heini pinaaǥi te hapuy para te Nengazen.
LEV 3:12 Emun kambing is ibpemuhat din diyà te Nengazen,
LEV 3:13 izampè din is belad din diyà te ulu zutun te kambing ne lepaa zin haazà diyà te etuvangan te Tulda he Edtelevukaayan. Ne is lengesa kayi, ibpirik te menge memumuhat he menge kevuwazan ni Aaron diyà te peliǥuy te pemuhatà.
LEV 3:14 Puun dutun te ibpemuhat, ne edtarin is memumuhat te ibpemuhat din diyà te Nengazen he pemuhat pinaaǥi te hapuy. Egkuwaan din is langun he tavà diyà te seled te ǥetek,
LEV 3:15 is menge vuwà ragkes is menge tavà kayi, wey is deisey he vahin te atey.
LEV 3:16 Heini is langun, edtutungen te memumuhat diyà te pemuhatà he pemuhat he keenen. Is kehemut kayi he pemuhat te pinaaǥi te hapuy ne ebpekepenunuat te Nengazen. Is langun he tavà diyà te seled kayi, ne ǥaked te Nengazen.
LEV 3:17 Kenè kew kaan te tavà etawa lengesa. Kinahanglan he heini he velaud edtumanen niw taman te huziyan he lapis te menge kevuwazan, minsan hendei kew ed-ubpà.
LEV 4:1 Midsuǥù daan te Nengazen si Moises he keǥiyi zin is menge Israilihanen he is minsan hentei he nekesupak te suǥù he wazè din tivevaa, ne iyan heini ereg he ebeelan din:
LEV 4:3 Emun ebpekesalà is lavew he memumuhat he wazè din tivevaa, ne tenged dutun egkezelahig is menge etew, mebpemuhat sikandin diyà te Nengazen te turiti he vaka he wazè din sazir he pemuhat he para idlumpiyu.
LEV 4:4 Uwita zin haazà is baka ziyà te ǥemawan te Tulda he Edtelevukaayan. Izampè din is belad din diyà te ulu zutun te vaka ne lepaa zin haazà diyà te etuvangan te Nengazen.
LEV 4:5 Ne egkuwa is lavew he memumuhat te lengesa zutun te vaka ne ed-uwiten din haazà diyà te seled te Tulda.
LEV 4:6 Idtiyuk din is tezù din dutun te lengesa, ne is duma zutun ibpirik din te kepipitu ziyà te egkesineruwan duen te kurtina he ingkurtina te Utew Segradu he Lugar he ziyà te etuvangan te Nengazen.
LEV 4:7 Ne ebpelisan din te lengesa sikan is menge sungeysungey te menge suyuk duen te pemuhatà he tutungà te veyewà diyà te seled te Tulda he zutun is Nengazen. Ne sikan is egkesamà he lengesa zuen te vaka ne id-itis din diyà te dizalem duen te pemuhatà he pemuhat he edtutungen. Heini he pemuhatà ne ziyà te uvey te ǥemawan te Tulda.
LEV 4:8 Ne egkuwaan din is langun he tavà diyà te seled te ǥetek duen te vaka,
LEV 4:9 is menge vuwà ragkes is menge tavà kayi, wey is deisey he vahin te atey.
LEV 4:10 (Iyan daan heini ebeelan diyà te ibpemuhat he uyaǥen he pemuhat he para te meupiya he kedepità.) Edtutungen heini is langun te memumuhat diyà te pemuhatà he pemuhat he edtutungen.
LEV 4:11 Piru is egkesamà he zuma te impemuhat he uyaǥen iring te lundis, sapù, ulu, menge paa, wey is diyà te seled te ǥetek ragkes en is bituka kayi, ne uwita zin heini ziyà te ǥawas te kampu ne tutunga zin diyà te egkeregreg he kayu, diyà te lugar he midtuuwan he lumpiyu, kes lugar he timbaǥà te avu.
LEV 4:13 Emun ebpekerapas te suǥù te Nengazen is tivuuk he keet-etawan te Israel he wazè dan tivevaa, nekesalè dan gihapun minsan pa is kezekelan kandan wazà mesayud mehitenged kayi.
LEV 4:14 Ne emun egketuenan dan en he nekesalè bes sikandan, is tivuuk he keet-etawan mebpemuhat te turiti he vaka su pemuhat he para idlumpiyu. Uwita zan heini is baka ziyà te Tulda he Edtelevukaayan.
LEV 4:15 Ne idampà te menge pengulu te menge Israilihanen diyà te ulu zutun te vaka is menge velad dan ne lepaa zan heini ziyà te etuvangan te Nengazen.
LEV 4:16 Ne megkuwa is lavew he memumuhat te lengesa zutun te vaka ne uwita zin diyà te seled te Tulda.
LEV 4:17 Itiyuk din is tezù din duen te lengesa, ne ipirik din heini te kepipitu ziyà te kurtina he ingkurtina zuen te Utew Segradu he Lugar, he zutun is Nengazen.
LEV 4:18 Ne pelisi zin te lengesa sikan is menge sungeysungey te menge suyuk duen te pemuhatà diyà te seled te Tulda he zutun is Nengazen. Ne is egkesamà he lengesa ne iitis din diyà te zizalem duen te pemuhatà he pemuhat he edtutungen. Heini he pemuhatà, ne ziyà te uvey te ǥemawan duen te Tulda.
LEV 4:19 Ne veeli zin daan kayi he vaka is iring te mibeelan din duen te vaka he pemuhat he para idlumpiyu: Kuwaa zin is langun he tavà duen te vaka, ne tutunga zin diyà te pemuhatà, ne tutunga zin mulà sikan is baka ziyà te ǥawas te kampu. Ne pinaaǥi te kebeeli kayi te lavew he memumuhat, ne egkevelukasan is menge Israilihanen puun te menge salè dan, ne ebpeseyluwen sikandan te Nengazen. Iyan heini pemuhat he para idlumpiyu te tivuuk he menge etew te Israel.
LEV 4:22 Emun ebpekerapas te suǥù te Nengazen he Megbevayè din is sevaha he egalen, piru wazè din heini tivevaa, nekesalà gihapun sikandin.
LEV 4:23 Ne emun egketuenan din en he nekesalè bes sikandin, ne mebpemuhat sikandin te meemahan he kambing he wazè din sazir.
LEV 4:24 Pemuhat heini he idlumpiyu kandin. Izampè din is belad din diyà te ulu zutun te kambing, ne lepaa zin haazà diyà te etuvangan te Nengazen, diyà te lugar he lepeey zaan te menge pemuhat he uyaǥen he iyan pemuhat he edtutungen.
LEV 4:25 Ne itiyuk te memumuhat is tezù din duen te lengesa te kambing, ne ipalis din haazà duen te menge sungeysungey te menge suyuk duen te pemuhatà te pemuhat he edtutungen. Is egkesamà he lengesa, iitis din diyà te dizalem duen te pemuhatà.
LEV 4:26 Ne tutunga zin is langun he tavà diyà te pemuhatà iring ded te ebeelan duen te tavà te ibpemuhat he uyaǥen he pemuhat he para te meupiya he kedepità. Pinaaǥi te kebeeli kayi te memumuhat, egkevelukasan is etew puun te salè din, ne ebpeseyluwen sikandin te Nengazen.
LEV 4:27 Emun is sevaha keniyu nekerapas te suǥù te Nengazen he wazè din tivevaa, nekesalà gihapun sikandin.
LEV 4:28 Emun egketuenan din en he nekesalè bes sikandin, ne mebpemuhat sikandin te vehiyan he kambing he wazè din sazir he para te salà he neveelan din.
LEV 4:29 Izampè din is belad din dutun te ulu zuen te pemuhat he para idlumpiyu, ne lepaa zin heini ziyà te Tulda, zuen te lugar he lepeey te menge uyaǥen he iyan pemuhat he edtutungen.
LEV 4:30 Ne itiyuk te memumuhat is tezù din diyà te lengesa zuen te kambing, ne ipalis din haazà diyà te menge sungeysungey te menge suyuk duen te pemuhatà he pemuhat he edtutungen. Ne is egkesamà he lengesa ne iitis din diyà te zizalem duen te pemuhatà.
LEV 4:31 Ne kuwaa zin is langun he tavà duen te kambing iring te ebeelan duen te pemuhat he uyaǥen he pemuhat he para te meupiya he kedepità. Ne kegkepasad dutun, tutunga zin is tavà diyà te pemuhatà he mehemut he pemuhat he ebpekepenunuat te Nengazen. Ne pinaaǥi kayi te ebeelan te memumuhat, egkevelukasan is etew puun te menge salè din, ne ebpeseyluwen sikandin te Nengazen.
LEV 4:32 Emun kerehidu is ibpemuhat te etew para melumpiyuwi sikandin, kinahanglan he vehiyan heini he wazè din sazir.
LEV 4:33 Izampè din is belad din diyà te ulu zutun te kerehidu ne lepaa zin heini ziyà te Tulda, zuen te lugar he lepeey te menge uyaǥen he iyan pemuhat he edtutungen.
LEV 4:34 Ne idtiyuk te memumuhat is belad din diyà te lengesa zuen te kerehidu, ne ipalis din heini ziyà te menge sungeysungey te menge suyuk te pemuhatà te pemuhat he edtutungen. Is egkesamà he lengesa id-itis diyà te dizalem duen te pemuhatà.
LEV 4:35 Ne kuwaa zin is langun he tavà duen te kerehidu iring te ebeelan duen te pemuhat he kerehidu he pemuhat he para te meupiya he kedepità. Ne kegkepasad dutun, tutunga zin is tavà diyà te pemuhatà duma te zuma he menge pemuhat pinaaǥi te hapuy para te Nengazen. Pinaaǥi kayi te ebeelan te memumuhat, egkevelukasan is etew puun te salè din, ne ebpeseyluwen sikandin te Nengazen.
LEV 5:1 Emun is sevaha he etew kenà egkaǥi ziyà te hukmanan mehitenged te neehè din etawa netuenan din, ne zuen din televaken.
LEV 5:2 Emun duen nekeǥawed te minsan hengkey he mid-isip he meremerik, he iring te minatey he meremerik he menge langgam, nekesalà sikandin wey neremerikan sikandin minsan wazè din metueni he nekeǥawed sikandin.
LEV 5:3 Emun nekeǥawed sikandin te meremerik he vutang te etew he wazè din metueni he igkehimu ves kandin he meremerik is kegkeveeli zin dutun, ebpekesalà sikandin dutun te timpu te kegketueni zin kayi.
LEV 5:4 Emun ebpenangdù is sevaha he etew he kenè din ed-is-isipen ke meupiya ve haazà wey ke mezaat is impenangdù din he ebeelan din, ne haazà nekepehimu kandin he meremerik, ne ebpekesalà sikandin emun egkepurung din en egkeisip-isip is mibeelan din.
LEV 5:5 Emun ebpekesalà is etew te minsan hendei keniyan he menge vaal, kinahanglan he egkeǥiyen din heini.
LEV 5:6 Ne veyazi zin haazà is salà he neveelan din pinaaǥi te kebpemuhat din diyà te Nengazen te sevaha he vehiyan he kerehidu etawa kambing he pemuhat he para idlumpiyu. Iyan is memumuhat ebpemuhat kayi para mevelukasi sikandin te salè din.
LEV 5:7 Ne emun kenà sikandin ebpekeveleveg he ebpemuhat te kerehidu, mebpemuhat dà sikandin te zezuwa he merepatik etawa zezuwa he limuken he vayad te salè din: is sevaha pemuhat he para idlumpiyu ne is sevaha ne pemuhat he edtutungen.
LEV 5:8 Uwita zin heini ziyà te memumuhat ne idhuna ibpemuhat duen te memumuhat sikan is pemuhat he para idlumpiyu. Egurivizen te memumuhat is lieg kayi, piru kenè din ebpitasen.
LEV 5:9 Ne ibpirik din is duma he lengesa kayi ziyà te kilid te pemuhatà, ne is egkesamà he lengesa, ne ibpirik din diyà te zizalem te pemuhatà. Iyan heini pemuhat he ebpekelumpiyu te etew.
LEV 5:10 Ne ibpemuhat daan duen te memumuhat sikan is sevaha pa he pemuhat he edtutungen, sumalà te paaǥi te kebpemuhata kayi. Pinaaǥi te kebeeli kayi te memumuhat, egkevelukasan is etew puun te salè din, ne ebpeseyluwen sikandin te Nengazen.
LEV 5:11 Piru emun kenè pa sikandin ebpekevaug te zezuwa he merepatik etawa zezuwa he limuken, ne mebpemuhat dà sikandin te zezuwa he kilu he meupiya he kelasi he herina. Kinahanglan he kenè din heini edsehuǥan te lana wey veyewà su pemuhat heini he idlumpiyu, ne kenà heini pemuhat he para gasa.
LEV 5:12 Ne uwita zin heini ziyà te memumuhat ne edtarin dutun is memumuhat te sengekemkem he paaǥi te ketentenuzi te Nengazen. Ne haazà is tinarin din, ne edtutungen din diyà te pemuhatà duma te zuma he menge pemuhat diyà te Nengazen he pinaaǥi te hapuy. Pemuhat heini he para te idlumpiyu.
LEV 5:13 Pinaaǥi te kebeeli kayi te memumuhat egkevelukasan is etew te minsan hendei zutun he menge salà he neveelan din, ne ebpeseyluwen sikandin te Nengazen. Is egkesamà dutun te pemuhat he herina gaked en te memumuhat, iring te ebeelan duen te pemuhat he para gasa.
LEV 5:14 Insuǥù pa heini te Nengazen ki Moises:
LEV 5:15 Emun ebpekesupak is sevaha he etew tenged te wazè din ikeveǥey is butang he para pezem te Nengazen, minsan wazè din heini tivevaa, kinahanglan he ebpemuhat sikandin te meemahan he kerehidu he wazè din sazir he vayad te salè din. Is bali te kerehidu ibpesikad diyà te keveǥat te pelata ziyà te timbangan he egemiten te menge memumuhat. Heini he pemuhat, ne bayad te salà.
LEV 5:16 Ne ǥawas dutun te kerehidu, kinahanglan he ebeyazan din sikan is wazè din ikeveǥey te Nengazen, ne umani zin pa te 20 pursintu is bali zutun te wazè din ikeveǥey. Ne iveǥey zin haazà is langun diyà te memumuhat he iyan ebpemuhat duen te kerehidu para mevelukasi sikandin te salè din, ne ebpeseyluwen sikandin te Nengazen.
LEV 5:17 Emun nekerapas te suǥù te Nengazen is sevaha he etew he wazè din metueni, nekesalà sikandin, ne zuen din televaken diyà te Nengazen.
LEV 5:18 Kinahanglan he ed-uwit sikandin diyà te memumuhat te meemahan he kerehidu he wazè din sazir, he ibpemuhat din he vayad te salè din. Ne kinahanglan he is bali kayi ibpesikad diyà te keveǥat te pelata ziyà te timbangan he egemiten te menge memumuhat. Ne pinaaǥi te kebpemuhata kayi te memumuhat, egkevelukasan is etew puun te salè he neveelan din he wazà tivevaa, ne ebpeseyluwen sikandin te Nengazen.
LEV 6:1 Iyan heini migkaǥi te Nengazen diyà te ki Moises
LEV 6:2 mehitenged te etew he nekerapas te egkesuatan te Nengazen pinaaǥi te kedlimbung te iring din he etew mehitenged te vutang he mibpetipiǥan kandin etawa intaǥak diyà te kandin, etawa kedtakew kayi he vutang, etawa kebpenapì,
LEV 6:3 etawa midtarùtarù mehitenged te vutang he netazin he migkaǥi zin he wazè din maahà, etawa nengulivet te tarù he wazè din meveeli is minsan hendei kayi he menge salà.
LEV 6:4 Emun egketuenan he tutuu he nekesalà sikandin, kinahanglan he id-ulì din is tinakew zin, etawa nekuwa zin pinaaǥi te limbung, etawa menge azen he intaǥak etawa mibpetipiǥan kandin, etawa menge azen he netazin he neehè din,
LEV 6:5 etawa minsan hengkey he menge azen he impengulivet din he wazà diyà te kandin, piru is tutuu, ziyè bes te kandin. Kinahanglan he iulì din heini ziyà te teǥiǥaked he wazà meterini, ne umani zin pa te 20 pursintu is bali kayi. Iveǥey zin heini ziyà te teǥiǥaked dutun te andew te kebpemuhat din te pemuhat he vayad te salè din.
LEV 6:6 Med-uwit sikandin diyà te memumuhat te meemahan he kerehidu he wazè din sazir, ne ipemuhat din heini ziyà te Nengazen he vayad te salè din. Ne kinahanglan he is bali te kerehidu ne pelata he ibpesikad is keveǥat din diyà te timbangan he egemiten te menge memumuhat.
LEV 6:7 Pinaaǥi kayi te ebeelan te memumuhat diyà te etuvangan te Nengazen, ne egkevelukasan is etew te salè din, ne ebpeseyluwen sikandin te Nengazen te salà he neveelan din.
LEV 6:8 Midsuǥù te Nengazen si Moises he keǥiyi zin si Aaron wey sikan is menge anak din he menge maama, kayi he menge sulunuzen mehitenged te pemuhat he edtutungen: Heini he pemuhat kinahanglan he idtaǥak diyà te pemuhatà taman te egkepawà he kenà ed-ewaan te hapuy haazà is pemuhatà.
LEV 6:10 Idsun-ud te memumuhat is pendivavew he visti zin he linu, wey is pendizalem he visti he linu he ebpeketambun te pid-etawan din, ne egkuwaan din is igmuk kayi he pemuhat, ne idsavuk din diyà te kilid te pemuhatà.
LEV 6:11 Ne kegkepasad kayi, med-ilis sikandin te visti zin, ne uwita zin haazà is igmuk diyà te ǥawas te kampu, ziyà te lugar he ed-isipen he lumpiyu.
LEV 6:12 Kinahanglan he kenà ed-ewaan te hapuy haazà is pemuhata; kenà heini ed-evukan. Kada meselem ne edtevunan heini te memumuhat, ne ibpurung din idsavuk dutun te hapuy is pemuhat he edtutungen. Iragkes din daan te edtutung is menge tavà te uyaǥen he pemuhat he para te meupiya he kedepità.
LEV 6:13 Kinahanglan he kenà ed-ewaan te hapuy haazà is pemuhatà; kenà heini ed-evukan.
LEV 6:14 Iyan heini menge sulunuzen mehitenged te pemuhat he para gasa: Is menge memumuhat he menge kevuwazan ni Aaron iyan ed-uwit kayi he pemuhat diyà te etuvangan te Nengazen diyà te egkesineruwan duen te pemuhatà.
LEV 6:15 Edterinan te memumuhat te sengekemkem heini is pemuhat he herina he zuen duen lana, ne edtutungen din haazà is tinarin din diyà te pemuhatà ragkes is langun he veyewà he insahug dutun te herina. Edtutungen din heini he paaǥi te kedtentenuzi te Nengazen, is kehemut kayi he pemuhat ebpekepenunuat te Nengazen.
LEV 6:16 Is egkesamà he herina, ne edhilutuen ne egkeenen ni Aaron wey te menge memumuhat he menge kevuwazan din. Piru hilutua zan heini he wazè din tapey, ne keena zan diyà te lama te Tulda he Edtelevukaayan, he segradu he lugar. Imbeǥey heini kandan te Nengazen he kandan he vahin duen te menge pemuhat he pinaaǥi te hapuy. Is pemuhat he para gasa utew heini segradu iring te pemuhat he para idlumpiyu wey te pemuhat he vayad te salà.
LEV 6:18 Is langun he maama he menge kevuwazan ni Aaron egkehimu he egkeenen dan is bahin dan dutun te menge pemuhat pinaaǥi te hapuy. Para zà heini kandan taman te peleebuten he menge kevuwazan wey kenà heini egkeengked taman te taman. Is ebpekezegkit kayi he menge pemuhat, egkeipiktuwan te kegkesegradu kayi.
LEV 6:19 Iyan heini migkaǥi te Nengazen diyà te ki Moises
LEV 6:20 mehitenged te pemuhat he para te Nengazen he ibpemuhat ni Aaron dutun te andew te kedhimuwa kandin he lavew he memumuhat, he kinahanglan he ed-ul-ulahan daan te menge kevuwazan din he ebpekeilis kandin: Mebpemuhat sikandin te zezuwa he kilu he meupiya he kelasi he herina. Pemuhat heini he para te kebeǥey te zengeg diyà te Nengazen, he layun heini ebeeli taman te taman. Is liwazà kayi ne ipemuhat din ke meselem ne is liwazà wey ke mahapun.
LEV 6:21 Heini he herina edsehuǥan te lana ne edhilutuen diyà te mevavew he hilutuey. Emun egkelutù en, ebpenevien ne ibpemuhat diyà te Nengazen he iyan pemuhat he para gasa. Is kehemut kayi he pemuhat ebpekepenunuat kandin.
LEV 6:22 Ne kinahanglan he edtutungen heini langun, su heini he pemuhat, ne para te Nengazen, ne ed-ul-ulahan heini taman te taman. Kinahanglan he ed-ul-ulahan heini te kevuwazan ni Aaron he iyan ebpekeilis kandin he egkehimu he memumuhat.
LEV 6:23 Is langun he menge pemuhat he para gasa zutun te memumuhat kinahanglan he pudu edtutunga; kenà heini egkeenen.
LEV 6:24 Midsuǥù en maan te Nengazen si Moises
LEV 6:25 he egkeǥiyan si Aaron wey sikan is menge anak din he maama kayi he menge sulunuzen: Is pemuhat he para idlumpiyu, kinahanglan he edlepaan diyà te etuvangan te Nengazen diyà te lugar he lepeey te pemuhat he edtutungen. Is pemuhat he para idlumpiyu, utew heini segradu he pemuhat.
LEV 6:26 Is memumuhat he ebpemuhat kayi, kinahanglan he megkaan kayi ziyà te lama te Tulda he Edtelevukaayan, kes segradu he lugar.
LEV 6:27 Is minsan hentei he ebpekesamsam kayi egkeipiktuwan te kegkesegradu kayi. Ne is bisti he egkepesikan te lengesa kayi he pemuhat kinahanglan he ebpìpian diyà te segradu he lugar zuen te Tulda.
LEV 6:28 Kinahanglan he edtevien is diniyun he edhilutuan keniyan he pemuhat. Piru emun diyà heini hilutua te kuzen, kinahanglan he egkeǥisan heini he kuzen ne edlùluan te wahig.
LEV 6:29 Egkehimu he egkaan kayi he pemuhat is langun he maama ziyà te pemilya te menge memumuhat. Utew heini segradu he pemuhat.
LEV 6:30 Piru emun ed-uwiten is lengesa kayi he pemuhat diyà te Segradu he Lugar zuen te seled te Tulda, su wey mepesaylu is salà te sevaha he etew, ne kenà egkeenen heini he pemuhat, kekenà, edtutungen.
LEV 7:1 Iyan heini menge sulunuzen mehitenged te pemuhat he vayad te salà. Segradu utew heini he pemuhat.
LEV 7:2 Is pemuhat he vayad te salà edlepaan diyà te lepeey te pemuhat he edtutungen. Ne is lengesa kayi ibpirik diyà te peliǥuy te pemuhatà.
LEV 7:3 Pudu ibpemuhat is tavà kayi: is melambù he ikug, is menge tavà diyà te seled te getek,
LEV 7:4 is menge vuwà ragkes is menge tavà kayi, wey is deisey he vahin te atey.
LEV 7:5 Heini is langun edtutungen te memumuhat diyà te pemuhatà he pemuhat pinaaǥi te hapuy para te Nengazen. Pemuhat heini he vayad te salà.
LEV 7:6 Ebpekekaan te egkesamà kayi he pemuhat is langun he maama ziyà te pemilya te menge memumuhat, piru kinahanglan he ziyè dan heini egkeena te segradu he lugar, su utew heini segradu.
LEV 7:7 Ebpeked-iring dà is sulunuzen mehitenged te pemuhat he para idlumpiyu wey te pemuhat he vayad te salà: is usa kayi he menge pemuhat gaked en te memumuhat he nemuhat kayi.
LEV 7:8 Is lundis te uyaǥen he pemuhat he edtutungen ne ǥaked daan te memumuhat he nemuhat duen.
LEV 7:9 Iring daan te langun he menge pemuhat he para gasa, he midhilutù diyà te evuwan etawa karà etawa mevavew he hilutuey, ne ǥaked en daan heini te memumuhat he nemuhat duen.
LEV 7:10 Is langun he menge pemuhat he para gasa, he midsehuǥan te lana etawa wazà, ne ǥaked en daan te menge kevuwazan ni Aaron ne purungi zan heini bevehina.
LEV 7:11 Iyan heini menge sulunuzen mehitenged te pemuhat he para te meupiya he kedepità te Nengazen:
LEV 7:12 Emun ebpemuhat is etew te pemuhat para te meupiya he kedepità su ebpeselematan din is Nengazen, ne perisi zin heini te supas. Med-uwit sikandin te supas he wazè din tapey iring te supas he mekepal he midsehuǥan te lana, supas he menipis he midezasan te lana, wey supas he iyan mibeelan is meupiya he kelasi te herina he midsehuǥan te lana.
LEV 7:13 Ne gawas keniyan, med-uwit daan sikandin te supas he zuen din tapey.
LEV 7:14 Mebpemuhat sikandin te tigselimbaha ziyà te kada kelasi kayi he supas he gasa ziyà te Nengazen. Ne ǥaked en heini te memumuhat he mibpemirik te lengesa he pemuhat he para te meupiya he kedepità.
LEV 7:15 Is usa te uyaǥen he pemuhat he para te kebpeselamat diyà te Nengazen, kinahanglan he egkeenen te nemuhat wey te pemilya zin wey te menge memumuhat dutun dà te andew te kebpemuhata kayi; kinahanglan he wazà egkesamà kayi zutun te sunud he andew.
LEV 7:16 Emun is pemuhat din para te meupiya he kedepità he ibpemuhat din he para te kedtuman te penaad etawa pemuhat he keugelingen din he suat, is usa kayi egkeenen dutun dà he andew te kebpemuhata zuen. Iyan, emun duen pa egkesamà he usa, egkehimu heini he egkeenen dutun te sunud he andew.
LEV 7:17 Ne emun duen pa maan egkesamà he usa taman te iketelu he andew, kinahanglan en he edtutungen heini.
LEV 7:18 Emun duen egkaan duen te usa zutun te iketelu he andew, ne haazà he pemuhat kenà edewaten te Nengazen ne wazà pulus te kebpemuhata zuen. Ed-isipen heini he utew mezaat ne zuen televaken te minsan hentei he egkaan kayi.
LEV 7:19 Emun ebpekezegkit is usa ziyà te minsan hengkey he mid-isip he meremerik, ne kenè ne heini ereg he egkeenen, ne edtutungen en heini. Is minsan hentei he ed-isipen he lumpiyu, egkehimu he egkaan kayi.
LEV 7:20 Piru is minsan hentei he ed-isipen he meremerik he egkaan kayi te usa he para te Nengazen, ne heeyan he etew kenè niw en isipa he zuma niw.
LEV 7:21 Emun duen ebpezegkit dutun te minsan hengkey he ed-isipen he meremerik, iring te meremerik he menge vutang te etew, etawa meremerik he langgam, etawa minsan hengkey he meremerik, ne egkaan sikandin te usa kayi he pemuhat he para te Nengazen, ne heeyan he etew kenè niw en isipa he zuma niw.
LEV 7:22 Midsuǥù te Nengazen si Moises
LEV 7:23 he keǥiya zin heini ziyà te menge Israilihanen: Kenè kew kaan te tavà te vaka, kerehidu, etawa kambing.
LEV 7:24 Is tavà te langgam he ebpatey zà etawa nepatey te zuma he langgam egkehimu he egemiten niw ziyà te minsan hengkey he egemitan niw zuen, piru kenè niw keena.
LEV 7:25 Is minsan hentei he egkaan te tavà he egkehimu he ibpemuhat diyà te Nengazen he pemuhat pinaaǥi te hapuy, ne kenè niw en isipa he zuma niw.
LEV 7:26 Minsan hendei kew ed-ubpà, ne kenè kew megkaan te lengesa te langgam ragkes en is lengesa te tagbis.
LEV 7:27 Is minsan hentei he egkaan te lengesa, ne kenè niw en isipa he zuma niw.
LEV 7:28 Mid-uman medsuǥù is Nengazen ki Moises
LEV 7:29 he keǥiya zin heini ziyà te menge Israilihanen: Is minsan hentei he ebpemuhat te pemuhat he para te meupiya he kedepità, kinahanglan he mebeǥey sikandin te vahin kayi he pemuhat diyà te Nengazen he iyan ebpekezawat duen is menge memumuhat.
LEV 7:30 Heini he pemuhat, ne uwita zuen te ebpemuhat diyà te pemuhatà. Uwita zin is tavà wey is kumeng duen te uyaǥen, ne ivayew zin sikan is kumeng diyà te etuvangan te Nengazen su pemuhat he ibayew.
LEV 7:31 Edtutungen duen te memumuhat sikan is tavà diyà te pemuhatà, piru sikan is kumeng, ne ǥaked en ni Aaron wey te menge kevuwazan din he menge memumuhat.
LEV 7:32 Is kewanan he vuvun duen te uyaǥen ne ibeǥey ziyà te memumuhat he nemuhat te lengesa wey tavà kayi.
LEV 7:34 Ibeǥey te Nengazen is kumeng wey is buvun te pemuhat niw ziyà te menge memumuhat he si Aaron wey is menge kevuwazan din. Iyan heini vahin he edewaten dan diyà te keniyu taman te taman.
LEV 7:35 Iyan haazà bahin te menge pemuhat pinaaǥi te hapuy he para te Nengazen, he ibahin diyà te ki Aaron wey te menge kevuwazan din dutun te andew te kebpehinunguza kandan, su wey zan mekepenilbi te Nengazen pinaaǥi te kegkememumuhat dan.
LEV 7:36 Dutun he andew te kedhimuwa te menge memumuhat he menge memumuhat, midsuǥù te Nengazen is menge Israilihanen he iveǥey zan haazà he vahin he para te menge memumuhat, para kandan haazà taman te taman, ne tumana zan heini wey te peleebuten he kevuwazan dan.
LEV 7:37 Iyan haazà menge sulunuzen mehitenged te pemuhat he edtutungen, pemuhat he para gasa, pemuhat he para idlumpiyu, pemuhat he vayad te salà, pemuhat he para te kedhimuwa te memumuhat he memumuhat, wey pemuhat he para te meupiya he kedepità.
LEV 7:38 Menge sulunuzen heini he imbeǥey te Nengazen diyà te ki Moises diyà te sibsivayan he ziyà te Buntud he Sinai, hein midsuǥù din is menge Israilihanen te kebpemuhat diyà te kandin.
LEV 8:1 Migkaǥi is Nengazen diyà te ki Moises te,
LEV 8:2 “Ipehendiyè nu si Aaron wey sikan is menge anak din he maama te ǥemawan te Tulda he Edtelevukaayan, ne tiǥuma nu ziyà is langun he menge Israilihanen. Ipeuwit nu is menge visti he para te menge memumuhat, is lana he para te idlana, is tudu he vaka he pemuhat he para idlumpiyu, is dezuwa he meemahan he menge kerehidu, wey is revan he midteǥuan te menge supas he wazè din tapey.”
LEV 8:4 Midtuman ni Moises is insuǥù kandin te Nengazen, ne midtiǥum is menge Israilihanen diyà te ǥemawan duen te Tulda he Edtelevukaayan.
LEV 8:5 Ne migkeǥiyan sikandan ni Moises he heini is ebeelan din, insuǥù kandin te Nengazen.
LEV 8:6 Miduma zin diyà te teliwazà si Aaron wey is menge anak din, ne impepemeziǥù din sikandan.
LEV 8:7 Ne impesul-ub din ki Aaron is bisti te lavew he memumuhat: is pendizalem he visti, is bakes, is pendivavew he visti, wey is ipud he mibpikitan te vakes he mibpurpurungan is kedhevela zuen.
LEV 8:8 Ne impeseluub daan ni Moises diyà te ki Aaron is teleǥuey ziyà te kumeng, ne intaǥù din dutun is Urim wey Thumim.
LEV 8:9 Ne impesuup din diyà te ulu ni Aaron is tengkulu, ne impikit din diyà te sineruwan dutun te tengkulu is bulawan he simbulu he mibpilì si Aaron he para te Nengazen. Mibeelan ni Moises heini is langun sumalà te insuǥù kandin te Nengazen.
LEV 8:10 Ne migkuwa ni Moises is lana, ne mibpirikan din sikan is Tulda he Ed-ezapan wey is langun he netaǥù kayi. Su idhalad haazà he menge vutang diyà te Nengazen.
LEV 8:11 Kepipitu zin piriki te lana sikan is pemuhatà wey is langun he ǥelemiten dutun te pemuhatà, ne iring din ded daan is bisin wey is selevukà kayi. Mibeelan din heini su inhalad din heini he menge azen diyà te Nengazen.
LEV 8:12 Ne mibpetiǥisan din te lana is ulu ni Aaron he paaǥi te kebpehinunguza kandin diyà te Nengazen.
LEV 8:13 Ne miduma zin diyà te teliwazà is menge anak ni Aaron he menge maama, ne mibistiyan din sikandan te visti he para te memumuhat wey mibekesan heini. Midsul-uvan daan sikandan te menge kalù. Mibeelan heini ni Moises sumalà te insuǥù kandin te Nengazen.
LEV 8:14 Ne kegkepasad dutun, impekuwa ni Moises is tudu he vaka he pemuhat he para idlumpiyu. Ne indampà ni Aaron wey te menge anak din is menge velad dan diyà te ulu zuen te vaka.
LEV 8:15 Midlapà ni Moises haazà is baka ne migkuwa sikandin te lengesa kayi. Intiyuk din is tezù din duen te lengesa, ne mibpelisan din sikan is menge sungeysungey te menge suyuk te pemuhatà he iyan kedlumpiyuwi kayi. Ne in-itis dutun is nesamà he lengesa diyà te zizalem duen te pemuhatà. Iyan heini paaǥi te kebpehinunguza zin duen te pemuhatà diyà te Nengazen, su para mehimu heini he ereg he ebpekelibri te mekesesalà.
LEV 8:16 Migkuwa zaan ni Moises is langun he tavà diyà te seled te ǥetek duen te uyaǥen, is deisey he vahin te atey, is menge vuwà ragkes is menge tavà kayi, ne midtutung din heini is langun diyà te pemuhatà.
LEV 8:17 Is nengesamà he vahin duen te vaka iring te sapù, lundis, wey menge vituka, midtutung din diyà te ǥawas te kampu. Mibeelan heini ni Moises sumalà is insuǥù kandin te Nengazen.
LEV 8:18 Kegkepasad dutun, impekuwa ni Moises sikan is meemahan he kerehidu he pemuhat he edtutungen. Ne indampà ni Aaron wey te menge anak din is menge velad dan diyà te ulu zuen te kerehidu.
LEV 8:19 Midlapà ni Moises haazà is kerehidu, ne impirik din is lengesa kayi ziyà te peliǥuy te pemuhatà.
LEV 8:20 Midsapù din haazà is uyaǥen, ne midtutung din is ulu, is tavà, wey is duma he menge parti kayi. Midlùluan din is menge vahin he ziyà te seled te ǥetek wey is menge paa. Ne midtutung din diyà te pemuhatà is langun he parti zutun te uyaǥen he pemuhat he edtutungen. Is kehemut kayi he pemuhat te pinaaǥi te hapuy ne ebpekepenunuat te Nengazen. Mibeelan heini ni Moises sumalà te insuǥù kandin te Nengazen.
LEV 8:22 Ne impekuwa zaan ni Moises sikan is ikezuwa he meemahan he kerehidu. Heini he kerehidu pemuhat he para te kedhimuwa te memumuhat he memumuhat. Indampà ni Aaron wey te menge anak din is menge velad dan diyà te ulu zuen te kerehidu.
LEV 8:23 Ne midlapà ni Moises haazà is kerehidu, ne migkuwa sikandin te lengesa kayi, ne impalis din diyà te zizalem he vahin te kewanan he telinga ni Aaron, diyà te kewanan he tindezekelà te velad din, wey ziyà te kewanan he tindezekelà te paa zin.
LEV 8:24 Ne miduma zaan ni Moises diyà te teliwazà is menge anak ni Aaron he maama, ne mibpelisan din daan te lengesa is dizalem he vahin te kewanan he telinga zan, is tindezekelà te kewanan he velad dan, wey is tindezekelà te kewanan he menge paa zan, ne impirik din sikan is lengesa ziyà te peliǥuy zuen te pemuhatà.
LEV 8:25 Migkuwa zin is menge tavà, is melambù he ikug, is langun he tavà diyà te seled te ǥetek, is deisey he vahin te atey, is menge vuwà ragkes is menge tavà kayi, wey is kewanan he vuvun.
LEV 8:26 Ne migkuwa si Moises te tigselimbaha ziyà te kada kelasi te menge supas he wazè din tapey he intaǥù diyà te revan, ne impemuhat din diyà te Nengazen. Is migkuwa zin supas he mekepal he wazè din tapey, supas he midsehuǥan te lana, wey supas he menipis. Impetepayè din heini ki Aaron wey te menge anak din ragkes is langun he menge tavà wey sikan is kewanan he vuvun te kerehidu, ne imbayew zin heini ziyà te Nengazen su pemuhat heini he ibayew.
LEV 8:28 Ne kegkepasad te kebeyawa kayi, migkuwa heini ni Moises diyà te kandan ne midtutung din diyà te pemuhatà duma zuen te pemuhat he edtutungen. Pemuhat heini he para te kedhimuwa te memumuhat he memumuhat. Is kehemut kayi he pemuhat te pinaaǥi te hapuy ne ebpekepenunuat te Nengazen.
LEV 8:29 Migkuwa zaan ni Moises is kumeng duen te kerehidu, ne imbayew zin diyà te Nengazen su pemuhat heini he ibayew. Iyan heini ki Moises he vahin duen te kerehidu he pemuhat he para te kedhimuwa te memumuhat he memumuhat. Ne mibeelan ni Moises heini is langun sumalà te insuǥù kandin te Nengazen.
LEV 8:30 Ne migkuwa si Moises te lana he para te idlana wey lengesa he zuen te pemuhatà ne mibpirikan din si Aaron wey kes menge anak ni Aaron wey is menge visti zan. Pinaaǥi kayi impehinungud din sikandan wey is menge visti zan diyà te Nengazen.
LEV 8:31 Ne migkeǥiyan ni Moises si Aaron wey is menge anak ni Aaron te, “Lutua niw ziyà te ǥemawan te Tulda he Edtelevukaayan sikan is usa, ne sumalà te insuǥù keniyu ne keena niw heini zutun duma zuen te supas he intaǥù te revan he pemuhat para te kedhimuwa te memumuhat he memumuhat.
LEV 8:32 Ne tutunga niw is egkesamà he usa wey supas.
LEV 8:33 Kenè kew awà dutun seled te pitu he andew, taman te egkepasad is kedhimuwa keniyu he memumuhat.
LEV 8:34 Iyan is Nengazen midsuǥù kenitew te kebaal kayi te ebeelan tew ǥuntaan, su para mevelukasi kew puun te menge salè niw.
LEV 8:35 Kinahanglan he kenè kew med-awà kayi te maandew wey mezukilem seled te pitu he andew, ne veeli niw is ebpeveelan te Nengazen su wey kew kenà mebpatey, su iyan heini migkaǥi te Nengazen kayi te kedì he ibpeveelan keniyu.”
LEV 8:36 Umbe, midtuman ni Aaron wey te menge anak din is langun he insuǥù te Nengazen pinaaǥi ki Moises.
LEV 9:1 Hein ikewalu he andew he iyan kegkepasad te kedhimuwa ki Aaron he memumuhat, impetawag ni Moises si Aaron wey sikan is menge anak din he maama, wey is menge edumala te menge Israilihanen.
LEV 9:2 Migkeǥiyan ni Moises si Aaron te, “Kuwa ka te sevaha he turiti he vaka wey sevaha he meemahan he kerehidu he pudu wazè din sazir, ne ipemuhat nu ziyà te Nengazen. Is baka, pemuhat he para idlumpiyu, ne is kerehidu, pemuhat he edtutungen.
LEV 9:3 Ne keǥiyi nu is menge Israilihanen he megkuwa zan te meemahan he kambing he pemuhat he para idlumpiyu. Wey megkuwa zan daan te vaka wey kerehidu he pudu tig senge-tuig pa is keǥurang he wazè din sazir he pemuhat he edtutungen.
LEV 9:4 Megkuwa zaan sikandan te vaka wey meemahan he kerehidu he pemuhat dan para te meupiya he kebpekidepità. Ipemuhat dan heini zuma zuen te pemuhat he para gasa he midsehuǥan te lana, su ǥuntaan he andew ibpaahà te Nengazen is kebpekiduma zin keniyu.”
LEV 9:5 Umbe, mid-uwit dan diyà te egkesineruwan duen te Tulda he Edtelevukaayan is langun he insuǥù kandan ni Moises he uwita zan. Mid-amur-amur zan is langun diyà te etuvangan te Nengazen.
LEV 9:6 Migkaǥi si Moises diyà te kandan te, “Midsuǥù kew te Nengazen te kebaal kayi te kebpemuhat su wey zin ikepezayag diyà te keniyu is gehem din.”
LEV 9:7 Ne migkeǥiyan din si Aaron te, “Uvey ka ziyà te pemuhatà ne ipemuhat nu is pemuhat he para idlumpiyu wey is pemuhat he edtutungen su wey ka mevelukasi wey is pemilya nu puun te menge salè niw. Ne sumalà te insuǥù te Nengazen, ipemuhat nu zaan is pemuhat te menge etew su wey zan mevelukasi puun te menge salè dan.”
LEV 9:8 Umbe, mid-uvey si Aaron duen te pemuhatà ne midlapè din sikan is turiti he vaka he pemuhat he para idlumpiyu kandin.
LEV 9:9 Is lengesa kayi mid-uwit te menge anak din diyà te kandin, ne intiyuk din is tezù din dutun te lengesa, ne impirik din heini ziyà te menge sungeysungey te menge suyuk duen te pemuhatà. Is nesamà he lengesa in-itis din diyà te zizalem duen te pemuhatà.
LEV 9:10 Midtutung din diyà te pemuhatà is menge tavà, is menge vuwà, wey is deisey he vahin te atey, sumalà te insuǥù te Nengazen ki Moises.
LEV 9:11 Is usa wey is lundis kayi midtutung din diyà te ǥawas te kampu.
LEV 9:12 Ne midlapà daan ni Aaron sikan is uyaǥen he pemuhat he edtutungen. Is lengesa kayi, mid-uwit te menge anak din diyà te kandin, ne in-itis din heini ziyà te peliǥuy zuen te pemuhatà.
LEV 9:13 Mid-uwit dan daan diyà te kandin sikan is sinapù he uyaǥen ragkes is ulu kayi, ne midtutung din heini ziyà te pemuhatà.
LEV 9:14 Midlùluan din is menge parti he ziyà te seled te ǥetek wey is menge paa, ne midtutung din diyà te pemuhatà duma te zuma he parti zuen te uyaǥen.
LEV 9:15 Ne kegkepasad dutun mid-uwit din is menge pemuhat te menge etew. Midlapè din sikan is kambing, ne impemuhat din para melumpiyuwi is menge etew iring duen te mibeelan din diyà te pemuhat he para melumpiyuwi sikandin.
LEV 9:16 Ne mid-uwit din daan sikan is uyaǥen he pemuhat he edtutungen diyà te teliwazà, ne impemuhat din heini sumalà te paaǥi te kebpemuhata kayi.
LEV 9:17 Mid-uwit din daan is pemuhat he gasa ziyà te teliwazà. Midtarin sikandin dutun te sengekemkem, ne midtutung din diyà te pemuhatà he in-uman duen te pemuhat he edtutungen kada meselem.
LEV 9:18 Midlapà daan ni Aaron sikan is baka wey sikan is meemahan he kerehidu he para te menge etew he pemuhat he para te meupiya he kedepità. Is lengesa kayi mid-uwit te menge anak din diyà te kandin, ne impirikpirik din heini ziyà te peliǥuy zuen te pemuhatà.
LEV 9:19 Is menge tavà kayi he menge uyaǥen, is melambù he ikug, is menge tavà diyà te seled te ǥetek, is menge vuwà, wey is deisek he menge parti te menge atey,
LEV 9:20 in-untud te menge anak ni Aaron diyà te menge kumeng duen te menge uyaǥen. Ne midtutung ni Aaron sikan is menge tavà diyà te pemuhatà.
LEV 9:21 Sumalà te insuǥù ni Moises, imbayew ni Aaron is menge kumeng wey is kewanan he menge vuvun duen te menge uyaǥen su pemuhat haazà he ibayew.
LEV 9:22 Ne hein nepasad ni Aaron haazà is langun, imbayew zin is menge velad din dutun te ked-ampù din para te menge etew. Ne mibpenaug sikandin puun duen te pemuhatà.
LEV 9:23 Ne midseled si Moises wey si Aaron duen te Tulda he Edtelevukaayan. Ne hein migawas sikandan, mibpenubtuvazan dan is menge etew. Ne impezayag te Nengazen is gehem din diyà te menge etew pinaaǥi te kebpevulus te hapuy he mid-amin medtutung te menge pemuhat diyà te pemuhatà. Ne hein naahà heini te menge etew, nemengulahì dan tenged te kegkelipey, ne midluhud dan te ked-azap te Nengazen.
LEV 10:1 Ne si Nadab wey si Abihu, he menge anak ni Aaron, migkuwa is kada sevaha kandan te teleǥuey te veyewà. Ne midsevukan dan heini te vaǥa wey veyewà ne impemuhat dan diyà te Nengazen. Piru heini is mibeelan dan ne kenè iyan insuǥù te Nengazen, su is hapuy he migamit dan kenà dait he egemiten.
LEV 10:2 Umbe, impevulus te Nengazen is hapuy he midtutung kandan taman te minatey zan diyà te etuvangan te Nengazen dutun te Tulda he Edtelevukaayan.
LEV 10:3 Ne migkeǥiyan ni Moises si Aaron te, “Iyan heini ibpesavut te Nengazen hein migkaǥi sikandin te, ‘Kinahanglan he egkilelaan te menge memumuhat is kegkewaǥas ku, wey kinahanglan he ebeǥayan a te zengeg te langun he menge etew ku.’ ” Wazà meketavak si Aaron.
LEV 10:4 Ne impetawag ni Moises si Mishael wey si Elsafan, he menge anak he maama ni Uziel te anggam ni Aaron, ne migkeǥiyan din sikandan te, “Hendini kew, kuwaa niw is minatey he menge kezuzumahi niw keniyan te Tulda ne uwita niw ziyà te ǥawas te kampu.”
LEV 10:5 Umbe, migkuwa zan haazà is nemematey, piru ziyè dà sikandan megawed te visti, ne mid-uwit dan diyà te ǥawas te kampu sumalà te insuǥù ni Moises.
LEV 10:6 Ne migkaǥi si Moises diyà te ki Aaron wey ziyà te menge anak din he si Eleazar wey si Itamar te, “Kenè niw vey-ani he egkeǥuseng is bulvul niw etawa ebindasen niw is menge kumbalè niw te kebpekilala he idlalew niw is minatey. Emun ebeelan niw heeyan, ne ebpatey kew ne egkepeukan te Nengazen is langun he menge Israilihanen. Is langun he menge etew te Israel he menge kezuzumahi niw, ne iyan mulà sikandan medlalew para keniyan te zezuwa he midtutung te Nengazen.
LEV 10:7 Kenè kew zèpa awà kayi te ǥemawan te Tulda. Emun ebeelan niw heini ne ebpatey kew, su mibpilì kew te Nengazen he mehimu kew he menge memumuhat pinaaǥi te kedlenahi keniyu te lana.” Ne midtuman dan haazà is migkaǥi ni Moises.
LEV 10:8 Migkeǥiyan te Nengazen si Aaron te,
LEV 10:9 “Sikew wey is menge anak nu ne kenè kew ereg he edseled diyà te Tulda emun ebpekeinum kew te vinu etawa minsan hengkey he inumen he ebpekelangut. Emun ebeelan niw heini ne ebpatey kew. Kinahanglan he edtumanen niw heini taman te huziyan he lapis te menge kevuwazan.
LEV 10:10 Ereg he egketuenan niw ke hengkey is para te Nengazen wey para te langun, is lumpiyu wey meremerik.
LEV 10:11 Ne kinahanglan he ebpenuruen niw is iring niw he menge Israilihanen te langun he sulunuzen he imbeǥey ku keniyu pinaaǥi ki Moises.”
LEV 10:12 Migkaǥi si Moises diyà te ki Aaron wey ziyà te zezuwa he anak ni Aaron he nesamà he iyan si Eleazar wey si Itamar, “Kuwaa niw is pemuhat he para gasa he nesamà duen te menge pemuhat pinaaǥi te hapuy he ibpemuhat para te Nengazen. Lutua niw heini ne kenà edtepayan ne keena niw ziyà te avey te pemuhatà su utew heini segradu he pemuhat.
LEV 10:13 Diyè niw zà heini keena te segradu he lugar su iyan heini keniyu he vahin puun te menge pemuhat pinaaǥi te hapuy. Iyan heini insuǥù te Nengazen kediey.”
LEV 10:14 “Is imbayew he kumeng wey vuvun te uyaǥen he impemuhat diyà te Nengazen he egkehimu he ǥaked te menge memumuhat, ne keena nu zuma te tivuuk he pemilya nu. Keena niw heini ziyà te minsan hendei he lugar he ed-isipen tew he lumpiyu. Imbeǥey heini keniyu he vahin niw puun te menge pemuhat te menge Israilihanen he para te meupiya he kebpekidepità.
LEV 10:15 Emun ebpemuhat is menge Israilihanen, ne ipemuhat dan is kumeng wey is buvun te uyaǥen ragkes is menge tavà he ibpemuhat dan he pemuhat pinaaǥi te hapuy. Ne is kumeng wey is buvun ne ivayew zan diyà te etuvangan te Nengazen he pemuhat he ibayew. Iyan heini vahin nu wey te menge anak nu taman te taman, sumalà te insuǥù te Nengazen.”
LEV 10:16 Hein midsusi si Moises mehitenged te kambing he pemuhat he para idlumpiyu, neehè din he pudu en haazà netutung. Umbe utew zin nepeuki si Eleazar wey si Itamar, ne midsumayan din sikandan.
LEV 10:17 Ke sikandin te, “Maan is wazè niw keena ziyà te segradu he lugar sikan is pemuhat he para idlumpiyu? Heini he pemuhat utew segradu, ne imbeǥey heini te Nengazen keniyu su wey mevelukasi is menge etew puun te menge salè dan diyà te etuvangan te Nengazen.
LEV 10:18 Su is lengesa kayi wazà meuwit diyà te Segradu he Lugar, migkaan niw pezem heini ziyà te Tulda, sumalà te insuǥù ku keniyu.”
LEV 10:19 Midtavak ni Aaron si Moises te, “Wazè pa meuǥet nemuhat is menge anak ku te pemuhat he para idlumpiyu kandan wey pemuhat he edtutungen, piru minatey sikandan is dezuwa. Ne tenged keniyan he hitavù igkelipey ve vuwa te Nengazen emun migkaan ku is usa zuen te pemuhat he para idlumpiyu te heini he andew?”
LEV 10:20 Nevenaran si Moises te tavak ni Aaron.
LEV 11:1 Midsuǥù te Nengazen si Moises wey si Aaron he keǥiya zan heini ziyà te menge Israilihanen: Egkehimu he egkeenen niw is minsan hengkey he langgam he neuyag kayi te tanà he netevì is sulu zan wey ed-umanan dan edsepaa is kinaan dan.
LEV 11:4 Piru kenè niw keena is menge langgam he ed-uman edsepà te kinaan dan he wazà metevì is sulu zan, iring te kemilyu, badir, wey rabit. Kenè niw zaan keena is bavuy, su minsan netevì is sulu zin, piru kenà kayi ed-umanan edsepaa is kinaan din. Isipa niw he meremerik heini he menge langgam. Kenè kew kaan te usa kayi wey kenè kew gawed te minatey kandan.
LEV 11:9 Egkehimu he egkeenen niw is minsan hengkey he neuyag diyà te wahig he zuen din kapey wey hun-ap. Piru kenè niw keena is wazè din kapey wey hun-ap, wey kenè niw zaan gewezi is minatey kandan. Isipa niw he meremerik heini.
LEV 11:13 Kenè niw keena is menge tagbis iring te kulaǥu, uwak, menge tagbis he edaas te lawa te etew etawa langgam, dapay, ekang, kalamun, menge tagbis he ebpendawi te isdà, tulabung, dugwak, wey kaveg. Isipa niw he meremerik heini he menge tagbis.
LEV 11:20 Egkehimu he egkeenen niw is menge dezeizey he keranapranap he edlayang wey ebpenanap he zuen dan menge paa he ibpekeladsik dan iring te terapan, sengug, wey pelaǥà. Piru kenè niw keena is duma pa he menge keranapranap he edlayang wey ebpenanap. Isipa niw he meremerik heini he menge keranapranap.
LEV 11:24 Kenè kew ǥawed te minatey he menge langgam he wazà metevì is sulu zan wey kenà ed-uman edsepà te kinaan dan. Kenè kew zaan gawed te minatey he menge langgam he heepat is menge paa zan he igkahis dan is menge sulu zan. Isipa niw he meremerik heini he menge langgam. Is minsan hentei he ebpekesamsam te minatey kandan, kinahanglan he ebpìpian din is bisti zin, ne ed-isipen pa sikandin he meremerik taman te mezukilem.
LEV 11:29 Isipa niw he meremerik is menge langgam he ebpenanap iring te rumat, laku, pelesakà, telètà, pelaas, buaya, ivid, wey menge kemilyun. Is minsan hentei he ebpekesamsam te minatey kandan ed-isipen he meremerik taman te mezukilem.
LEV 11:32 Is minsan hengkey he egkeuluǥan te ebpatey kandan egkehimu he meremerik, kayu man heini he mibeelan he azen, manggad, panit, etawa saku. Ne minsan hengkey is egemitan kayi kinahanglan he edlùluan te wahig, piru ed-isipen pa heini he meremerik taman te mezukilem.
LEV 11:33 Emun egkeuluǥan is umuy te minatey kandan, is langun he taǥù kayi egkehimu he meremerik, ne kinahanglan he egevaan heini.
LEV 11:34 Is minsan hengkey he keenen he intereb diyà te wahig he taǥù dutun te umuy egkehimu he meremerik. Ne egkehimu zaan he meremerik is minsan hengkey he kelasi te inumen he zutun te seled te umuy.
LEV 11:35 Minsan hengkey he egkeuluǥan te minatey kandan egkehimu he meremerik. Emun iyan egkeuluǥan is evuwan etawa kuzen, isipa niw heini he meremerik ne kinahanglan heini he edrupeten.
LEV 11:36 Is serebseb etawa vudsi he punduwà te wahig he egkeuluǥan te minatey kandan kenè mulà egkehimu he meremerik, piru is edsamsam dutun te minatey he langgam egkehimu he meremerik.
LEV 11:37 Kenà daan egkehimu he meremerik is minsan hengkey he venì he ibpemula he egkeuluǥan dutun.
LEV 11:38 Piru emun iyan egkeuluǥan is benì he nehuluman te wahig, ne heini he venì egkehimu he meremerik.
LEV 11:39 Emun ebpatey is langgam he egkehimu he egkeenen, is minsan hentei he ebpekesamsam kayi ed-isipen he meremerik taman te mezukilem.
LEV 11:40 Is minsan hentei he egkuwa etawa egkaan te lawa kayi, kinahanglan he ebpìpian din is bisti zin, piru ed-isipen pa sikandin he meremerik taman te egkesakep.
LEV 11:41 Kenè niw keena is minsan hengkey he keranapranap he ebpenanap su meremerik heini: is minsan hengkey he edula etawa ebpenanap he heepat is paa etawa mahabet is menge paa.
LEV 11:43 Kenè niw remeriki is keugelingen niw pinaaǥi te kegkaan te minsan hendei kayi he menge langgam, su iyan a, is Nengazen, Megbevayè niw. Umbe iviza niw is keugelingen niw para kediey, ne mebpekesegradu kew su waǥas a.
LEV 11:45 Iyan a Nengazen he mibpeǥawas keniyu puun te Ehipto su wey a mehimu he Megbevayè niw. Umbe mebpekesegradu kew su waǥas a.
LEV 11:46 Pinaaǥi kayi he sulunuzen te mehitenged te langun he kelasi te menge langgam,
LEV 11:47 egketuenan niw ke hendei kandan is lumpiyu wey is meremerik, is egkehimu he egkeenen wey is kenà egkehimu he egkeenen.
LEV 12:1 Midsuǥù te Nengazen si Moises
LEV 12:2 he keǥiya zin heini ziyà te menge Israilihanen: Emun ed-anak is bahi te maama, ed-isipen sikandin he meremerik seled te pitu he andew, iring daan ke edlengesahan sikandin.
LEV 12:3 Dutun te ikewalu he andew edsirkunsidaren is anak din.
LEV 12:4 Ne tenged te kebpedayun kegawas te lengesa zin, ne medtaǥad pa sikandin te 33 he andew ne human sikandin ed-isipa he lumpiyu. Kenà sikandin egkehimu he edsamsam te minsan hengkey he azen he para te Nengazen ne kenà sikandin egkehimu he edhendiyà te Tulda he Edtelevukaayan taman te ebpekelavey is menge andew te kegkehimuwa kandin he meremerik.
LEV 12:5 Emun bahi is anak din, ed-isipen sikandin he meremerik seled te 14 he andew, ne emun edlengesahan daan sikandin tenged te ebpedayun he kegawas te lengesa zin, medtaǥad pa sikandin te 66 he andew ne human sikandin ed-isipa he lumpiyu.
LEV 12:6 Emun egkeume en is menge andew te kegkehimuwa kandin he lumpiyu puun te kegkehimuwa kandin he meremerik tenged te ked-anak din te maama etawa bahi, ne med-uwit sikandin diyà te memumuhat diyà te ǥemawan te Tulda he Edtelevukaayan te kerehidu he senge-tuig is keǥurang din he pemuhat he edtutungen, wey sevaha he limuken etawa merapatik he pemuhat he para idlumpiyu.
LEV 12:7 Ibpemuhat heini te memumuhat diyà te etuvangan te Nengazen para maawà is keremerik dutun te vahi puun te kedlengesahi kandin, ne egkehimu en sikandin he lumpiyu. Emun kenà sikandin ebpekeveleveg he ebeǥey te kerehidu med-uwit dà sikandin te zezuwa he merepatik etawa zezuwa he limuken. Is sevaha, pemuhat he edtutungen ne is sevaha pa, pemuhat he para idlumpiyu. Pinaaǥi kayi te ebeelan te memumuhat, egkaawà is kegkehimuwa kandin he meremerik ne egkehimu en sikandin he lumpiyu. Iyan heini menge sulunuzen mehitenged te vahi he ed-anak.
LEV 13:1 Mibeǥey is Nengazen kayi he menge sulunuzen diyà te ki Moises wey ki Aaron:
LEV 13:2 Emun is lundis te sevaha he etew edlevag etawa ebuketur etawa ebmeputìputì, he egkehimu ke edekelà he zaru te lundis, edumahan heini he etew ziyà te ki Aaron he memumuhat etawa sevaha zuen te menge memumuhat he kevuwazan ni Aaron.
LEV 13:3 Ne ed-ahaan te memumuhat is bahin te lundis he midtuvuan dutun, emun midlevag haazà is lundis, wey mibmemeputì is bulvul zuen, tutuu he zuen din daru te lundis. Ne segugunà egkeǥiya zuen te memumuhat diyà te menge etew he meremerik haazà is etew.
LEV 13:4 Iyan, emun haazà is mibmeputìputì diyà te lundis din ne kenà tuus te zaru te lundis wey wazà mebmeputì is bulvul zutun, ne idsivey sikandin dutun te memumuhat puun te menge etew seled te pitu he andew.
LEV 13:5 Ne zutun te ikepitu he andew ed-umanan edsusiya zuen te memumuhat is lundis duen te etew. Ne emun is egkeehè din iyan ded gihapun su wazà heini medelandap, id-uman sikandin idsivey zutun te memumuhat puun te menge etew seled te selakew en he pitu he andew.
LEV 13:6 Ne ziyà te ikepitu en maan he andew, ed-umanan sikandin edsusiya zuen te memumuhat. Ne emun midtulak en haazà is diyà te lundis din ne wazà medelandap, ne egkeǥiyen duen te memumuhat diyà te menge etew he lumpiyu haazà is etew su zeisey zà he levag is diyà te lundis din. Ne kegkepasad dutun pìpii zutun te etew is bisti zin, ne ed-isipen en sikandin he lumpiyu.
LEV 13:7 Iyan, emun edelandap is ebpemuketur ziyà te lundis din dutun te nesusi en sikandin te memumuhat ne ingkepeseyuzan en he lumpiyu sikandin, kinahanglan he ebpeuman sikandin ebpesusi te memumuhat.
LEV 13:8 Ne emun tutuu he midelandap haazà is dezeisey he menge levag, ne egkeǥiyan dutun te memumuhat diyà te menge etew he meremerik haazà is etew su zuen din daru te lundis.
LEV 13:9 Is minsan hentei he zuen tuus te zaru te lundis diyà te kandin kinahanglan he edumahan diyà te memumuhat.
LEV 13:10 Emun egkesusi te memumuhat he ebmemeputìputì is levag he iyan hinungdan te kebmemeputì te menge vulvul zuen, ne egkeehè en is sapù,
LEV 13:11 ne grabi heini he zaru. Ne ebpesayud is memumuhat he meremerik haazà is etew. Kenè en kinahanglan he idsivey pa sikandin para mepeniizi su keladu en he meremerik sikandin.
LEV 13:12 Emun iyan ked-ahà zuen te memumuhat he nekeeneb en diyà te lawa zuen te etew haazà is daru,
LEV 13:13 kinahanglan he ed-umanan sikandin ebpurungi edsusiya zuen te memumuhat. Ne emun tutuu he nekeeneb en diyà te tivuuk he lawa zuen te etew sikan is daru he tenged dutun mibmeputì pudu is tivuuk he lundis din ebpesayud haazà is memumuhat he lumpiyu haazà is etew.
LEV 13:14 Iyan, emun egkesusi zuen te memumuhat he nenggawas en is sapù, ebpesayud sikandin he meremerik haazà is etew su zuen din daru ziyà te lundis. Heini is migawas he sapù ed-isipen he meremerik.
LEV 13:16 Iyan, emun egkeulian su midtulak en, mebpeuman sikandin mebpesusi te memumuhat.
LEV 13:17 Ne emun tutuu he midtulak en ebpesayud haazà is memumuhat he lumpiyu haazà is etew.
LEV 13:18 Emun duen etew he zuen din levag he neulian,
LEV 13:19 iyan, duen en maan mid-uman mebuketur zutun te neulian he malù meputìputì etawa meriǥàriǥà, kinahanglan he ibpesusi zin heini te memumuhat.
LEV 13:20 Ne emun edlevag haazà is mibuketur zutun te lundis ne tuus heeyan te zaru te lundis ne ebmemeputì daan is menge vulvul kayi, ne ebpesayud is memumuhat he meremerik haazà he etew, su zuen din daru te lundis he mibpuunà pinaaǥi te levag.
LEV 13:21 Iyan, emun egkesusi te memumuhat he kenà haazà tuus te zaru te lundis wey wazà daan mebmeputì is bulvul kayi, ne henduen te edtulak en, idsivey sikandin dutun te memumuhat puun te menge etew seled te pitu he andew.
LEV 13:22 Emun edelandap heini ziyà te zuma he vahin te lundis, ebpesayud is memumuhat he meremerik haazà he etew.
LEV 13:23 Iyan, emun wazà heini medelandap, tulak dà heini te levag, ne ebpesayud is memumuhat he lumpiyu en haazà he etew.
LEV 13:24 Emun netutung is sevaha he etew ne mibmeputìputì haazà etawa mibmeriǥàriǥà,
LEV 13:25 kinahanglan he ibpesusi heini te memumuhat. Ne emun tuus heini te zaru te lundis wey mibmeputì is menge vulvul kayi, ne zuen din daru te lundis he mibpuun pinaaǥi te kegketutung. Ne ebpesayud is memumuhat he meremerik haazà he etew.
LEV 13:26 Iyan, emun nesusi te memumuhat he kenà haazà tuus te zaru te lundis wey wazà daan mebmeputì is menge vulvul zutun, ne henduen te midtulak en, idsivey sikandin te memumuhat puun te menge etew seled te pitu he andew.
LEV 13:27 Ne ikepitu he andew ed-umanan sikandin edsusiya te memumuhat. Ne emun midelandap heini ziyà te zuma he vahin te lundis, ebpesayud haazà is memumuhat he meremerik haazà is etew, su zuen din daru te lundis.
LEV 13:28 Iyan, emun wazà heini medelandap su midtulak en, ne levag dà heini tenged te kegketutung. Ne ebpesayud is memumuhat he lumpiyu haazà is etew.
LEV 13:29 Emun duen keriskis diyà te ulu etawa vakà te sevaha he etew,
LEV 13:30 kinahanglan he ibpesusi zin heini te memumuhat. Emun tuus heini te zaru te lundis wey mibmekelawag is menge vulvul etawa sumpà kayi wey mibmenipis, ebpesayud is memumuhat he meremerik haazà he etew, su zuen mezeǥes he zaru te lundis din he midtuvù diyà te ulu etawa vakà.
LEV 13:31 Iyan, emun egkesusi te memumuhat he haazà is keriskis kenà tuus te zaru te lundis piru wazà meitem he vulvul etawa sumpà kayi, idsivey sikandin duen te memumuhat puun te menge etew seled te pitu he andew.
LEV 13:32 Ne ikepitu he andew, ed-umanan edsusiya te memumuhat haazà is mezeǥes. Ne emun wazà heini medelandap wey kena tuus te zaru te lundis, wey wazà mebmekelawag is menge vulvul etawa sumpà kayi,
LEV 13:33 kinahanglan he ebpevangul sikandin wey ebpemarbas piru kenè din iragkes sikan is duen duen mezeǥes. Ne id-uman sikandin idsivey te memumuhat seled te selakew en he pitu he andew.
LEV 13:34 Dutun te ikepitu he andew, ed-umanan edsusiya zuen te memumuhat sikan is mezeǥes. Ne emun wazà heini medelandap wey kenà tuus te zaru te lundis, ebpesayud haazà is memumuhat he lumpiyu haazà is etew. Ne ebpìpian dutun te etew is bisti zin, ne ed-isipen sikandin he lumpiyu.
LEV 13:35 Iyan, emun midelandap haazà is mezeǥes diyà te lundis din dutun te ingkepetuenan en duen te memumuhat he lumpiyu haazà he etew,
LEV 13:36 ed-umanan sikandin edsusiya zutun te memumuhat. Ne emun tutuu he midelandap haazà is mezeǥes diyà te lundis din, ne kenè en kinahanglan he edsusiyen pa zuen te memumuhat ke zuen be vulvul etawa sumpà he mibmekelawag su keladu en he meremerik sikandin.
LEV 13:37 Iyan, emun egkesusi zuen te memumuhat he wazà heini medelandap ne zuen en meitem he vulvul etawa sumpà he midtuvù, neulian en heini. Ne ebpesayud haazà is memumuhat he lumpiyu haazà is etew.
LEV 13:38 Emun duen ebmeputìputì diyà te lundis te etew,
LEV 13:39 kinahanglan he ibpesusi heini te memumuhat. Iyan, emun haazà is mibmeputìputì ne kenà utew egketuusan is keputì din, mezeǥes dà heini he migawas diyà te lundis. Haazà he etew ed-isipen he lumpiyu.
LEV 13:40 Emun is etew neupew zapit te vuked etawa dapit te purù, lumpiyu sikandin.
LEV 13:42 Iyan, emun duen ebmeriǥàriǥà he levag dutun te upew zin, kinahanglan he ibpesusi zin heini te memumuhat. Ne emun haazà is meriǥàriǥà he levag henduen te zaru te lundis he egkaahà diyà te lawa, ebpesayud is memumuhat he meremerik haazà he etew.
LEV 13:45 Is etew he zuen din daru te lundis kinahanglan he mebivisti te vindas he visti, kenà mebpenuwat te vulvul zin, ne tembuni zin is dizalem he vahin te zagwey zin ne mebensag sikandin te, “Meremerik a! Meremerik a!”
LEV 13:46 Ed-isipen sikandin he meremerik dutun te ziyè pa te kandin sikan is daru. Ne kinahanglan he ziyà sikandin med-ubpà te ǥawas te kampu he sebsevaha zin.
LEV 13:47 Emun midhab-ung is manggad he welin etawa linu etawa minsan hengkey he azen he lundis is mibeelan, kinahanglan he ibpesusi heini te memumuhat. Ne emun egkesusi en te memumuhat, isivey zin heini seled te pitu he andew.
LEV 13:51 Dutun te ikepitu he andew ed-umanan heini edsusiya te memumuhat. Ne emun midelandap haazà is hab-ung ne ed-isipen heini he meremerik, ne kinahanglan he ebinsulan heini su ed-iseg pa haazà is hab-ung.
LEV 13:53 Iyan, emun egkesusi te memumuhat he wazà medelandap haazà is hab-ung
LEV 13:54 ne medsuǥù sikandin he ebpìpian etawa edlùluan haazà is manggad etawa lundis, wey idsivey pa seled te selakew en he pitu he andew.
LEV 13:55 Ne kegketapus dutun ne ed-umanan heini edsusiya te memumuhat. Ne emun wazà medheva haazà is hab-ung, ed-isipen heini he meremerik minsan wazà medelandap haazà is hab-ung. Umbe kinahanglan he ebinsulan heini minsan divaluy zà is midhab-ung.
LEV 13:56 Iyan, emun egkesusi zuen te memumuhat he midheva haazà is hab-ung, ne iawè din sikan is bahin he nepikitan te hab-ung duen te manggad etawa lundis.
LEV 13:57 Iyan, emun edlikù haazà is hab-ung ne edelandap, kinahanglan he ebinsulan en haazà is manggad etawa lundis.
LEV 13:58 Ne emun egkaawà haazà is hab-ung dutun te nepìpian en haazà is manggad etawa lundis ne ed-umanan heini ebpìpii ne egkehimu en heini he lumpiyu.
LEV 13:59 Iyan heini menge sulunuzen para metueni ke lumpiyu etawa meremerik is midhab-ung he manggad he welin etawa linu etawa minsan hengkey he azen he lundis is mibeelan he midhab-ung.
LEV 14:1 Iyan heini menge sulunuzen he migkaǥi te Nengazen diyà te ki Moises he mehitenged te kedlumpiyuwi te etew he neulian te zaru zin te lundis: Emun igkepetuenan en diyà te memumuhat is mehitenged te zaru te sevaha he etew,
LEV 14:3 egawas is memumuhat diyà te kampu ne edsusiyen din is lawa zuen te etew. Ke neulian en be heini te zaru zin te lundis,
LEV 14:4 ebpekuwa haazà is memumuhat te zezuwa he tagbis he lumpiyu he uuyag, sengetamped he kayu he sidru, merudtem he hulibis, wey senge verakes he hisupu.
LEV 14:5 Ne ibpehimetayan duen te memumuhat sikan is sevaha he tagbis diyà te zivavew te diniyun he midteǥuan te wahig he ebpuun diyà te serebseb.
LEV 14:6 Ne egkuwaan din sikan is sevaha pa he uuyag he tagbis, kes kayu he sidru, kes merudtem he hulibis wey kes hisupu, ne ibpevudseng din haazà is langun duen te wahig he zuen duen lengesa te tagbis he midhimetayan.
LEV 14:7 Ne haazà is wahig he zuen duen lengesa ne ibpirik din te kepipitu ziyà te etew he neulian te zaru zin te lundis, ne kegkepasad ibpeseyuzan din he lumpiyu en haazà is etew. Ne ibpaawà dutun te memumuhat sikan is uuyag he tagbis.
LEV 14:8 Piru te kenè pa ibpetuenan he lumpiyu en sikandin, kinahanglan he pìpii zin dèpa is bisti zin, kiskisi zin is langun he vulvul zin wey berehibu, ne mebpemeziǥù sikandin. Ne egkehimu en sikandin he edseled diyà te kampu piru kenà sikandin med-ubpà diyà te tulda zin seled te pitu he andew.
LEV 14:9 Ne zutun te ikepitu he andew umani zin kiskisi is langun he vulvul zin wey berehibu, pìpii zin is bisti zin, wey mebpemeziǥù sikandin.
LEV 14:10 Dutun te ikewalu he andew, kinahanglan he med-uwit sikandin te zezuwa he meemahan he kerehidu wey sevaha he vehiyan he kerehidu he senge-tuig is keǥurang he wazè din sazir. Med-uwit daan sikandin te heenem he kilu he meupiya he kelasi he herina he midsehuǥan te lana he pemuhat he para gasa. Wey med-uwit pa sikandin te senge vasu he lana.
LEV 14:11 Ne ed-uwiten dutun te memumuhat haazà is etew wey kes pemuhat din diyà te etuvangan te Nengazen diyà dapit te gemawan te Tulda he Edtelevukaayan.
LEV 14:12 Ne egkuwaan duen te memumuhat sikan is sevaha he meemahan he kerehidu wey sikan is senge vasu he lana, ne ibpemuhat din heini he pemuhat he vayad te salà. Ne ibpeketikang din heini ziyà te etuvangan te Nengazen su pemuhat heini he ibayew.
LEV 14:13 Edlepaan din haazà is kerehidu ziyà te segradu he lugar, ziyà te lepeey te pemuhat he para idlumpiyu wey te pemuhat he edtutungen. Heini is pemuhat he kerehidu, utew segradu, ne para zà heini te menge memumuhat, he iring te pemuhat he idlumpiyu.
LEV 14:14 Egkuwa haazà is memumuhat te zeisey he lengesa zuen te kerehidu he impemuhat ne ibpelis din heini ziyà te kewanan he telinga zuen te etew, wey is tindezekelà te kewanan he velad din wey paa.
LEV 14:15 Idtepayà daan te memumuhat is givang he palad din te zeisey he lana,
LEV 14:16 ne idtiyuk din is tezù te kewanan he velad din kayi te lana ne ibpirik din heini te kepipitu ziyà te etuvangan te Nengazen.
LEV 14:17 Ne sikan is egkesamà dutun te lana ziyà te palad din, ne idazas din daan dutun te etew zuen te mibpendezasan din te lengesa; izazas din heini ziyà te kewanan he telinga zuen te etew, wey te tindezekelà te kewanan he velad din wey paa.
LEV 14:18 Ne is egkesamè pa zuen te lana ziyà te palad duen te memumuhat, ne izazas duen te etew ziyà te ulu zin. Ne ibpemuhat dutun te memumuhat sikan is pemuhat he para idlumpiyu. Ne kegkepasad, edlepaan duen te memumuhat sikan is pemuhat he edtutungen ne ibpemuhat din heini ziyà te pemuhatà duma zuen te pemuhat he para gasa. Ne pinaaǥi kayi te ebeelan te memumuhat diyà te etuvangan te Nengazen, egkaawà is keremerik dutun te etew ne egkehimu en sikandin he lumpiyu.
LEV 14:21 Iyan, emun pubri haazà is etew ne kenè din egkeveleveg is kebpemuhat kayi he menge pemuhat, ne med-uwit dà sikandin te sevaha he meemahan he kerehidu he ibpemuhat din he pemuhat he vayad te salà. Ivayew zin heini he pemuhat para te Nengazen para mepesaylu sikandin te menge salè din. Med-uwit daan sikandin te zezuwa he kilu he meupiya he kelasi he herina he midsehuǥan te lana he pemuhat he para gasa. Wey med-uwit pa sikandin te senge vasu he lana.
LEV 14:22 Ne sumalà te egkehimu zin med-uwit sikandin te zezuwa he merepatik etawa zezuwa he limuken; is sevaha, pemuhat he para idlumpiyu kandin ne is sevaha pa, pemuhat he edtutungen.
LEV 14:23 Dutun te ikewalu he andew uwita zin heini is langun he pemuhat diyà te memumuhat diyà te ǥemawan te Tulda he Edtelevukaayan, diyà te etuvangan te Nengazen.
LEV 14:24 Egkuwaan duen te memumuhat sikan is kerehidu he pemuhat he vayad te salà wey sikan is senge vasu he lana ne ivayew zin heini ziyà te etuvangan te Nengazen su pemuhat heini he ibayew.
LEV 14:25 Ne edlepaan din haazà is kerehidu ne egkuwa sikandin te lengesa kayi ne ibpalis din diyà te kewanan he telinga zuen te etew he edlumpiyuwan wey ziyà te tindezekelà te kewanan he velad din wey paa zin.
LEV 14:26 Ne idtepayà dutun te memumuhat is givang he palad din te lana,
LEV 14:27 ne pinaaǥi te kewanan he tezù din, ne ibpirik din haazà is lana te kepipitu ziyà te etuvangan te Nengazen.
LEV 14:28 Is duma he lana ziyà te palad din, idazas din dutun te etew ziyà te midezasan din en te lengesa.
LEV 14:29 Is egkesamà duen te lana ziyà te palad te memumuhat, idazas din diyà te ulu zutun te etew. Ne ibpemuhat dutun te memumuhat sikan is dezuwa he merepatik etawa zezuwa he limuken; is sevaha pemuhat he para idlumpiyu ne is sevaha pa para pemuhat he edtutungen. Ipemuhat din daan is pemuhat he para gasa. Pinaaǥi kayi te ebeelan te memumuhat diyà te etuvangan te Nengazen, egkaawà is keremerik te etew.
LEV 14:32 Iyan heini menge sulunuzen mehitenged te kedlumpiyuwi te etew he zuen din daru te lundis emun kenà sikandin ebpekeveleveg te egkinehenglanen he pemuhat para te idlumpiyu.
LEV 14:33 Iyan heini migkaǥi te Nengazen diyà te ki Moises wey ki Aaron
LEV 14:34 mehitenged te ebeelan dan emun duen ibpetuvù te Nengazen he hab-ung diyà te menge valey zan emun diyè dan en te Canaan, kes lugar he imbeǥey te Nengazen kandan wey zan maangken:
LEV 14:35 Emun is teǥiǥaked te valey ebpekeseǥipà he zuen henduen be te hab-ung diyà te valey zin, kinahanglan he keǥiya zin haazà diyà te memumuhat.
LEV 14:36 Ne emun kenè pa edseled is memumuhat dutun te valey te kedsusi ke zuen be zutun hab-ung, medsuǥù sikandin he iǥawas is langun he vutang diyà te seled, su para kenà heini meragkes te ed-isipen he meremerik. Ne kegkepasad, human pa edseled dutun te valey is memumuhat
LEV 14:37 ne edsusiyen din ke hab-ung be is diyà te elavat. Ne emun egkeehè din he meilem-ilem etawa meriǥàriǥà is ebuketur zutun te elavat,
LEV 14:38 egawas sikandin dutun he valey ne ebpelekevan din heini seled te pitu he andew.
LEV 14:39 Ne ikepitu he andew ed-umanan din edsusiya heini. Ne emun edelandap haazà is hab-ung diyà te zuma he vahin te elavat,
LEV 14:40 ne ibpaawè din is menge vahin te elavat he zuen duen hab-ung ne ibpetimbag din heini ziyà te ǥawas te inged, diyà te lugar he edtimbaǥan te ed-isipen he meremerik.
LEV 14:41 Ne ebpekeǥisan din is langun he elavat diyà te seled dutun te valey ne is langun he kinaǥis ibpetimbag din diyà te gawas te inged, diyà te lugar he edtimbaǥan te ed-isipen he meremerik.
LEV 14:42 Ne ebpekuwa sikandin te para idliwan dutun te elavat he mibpen-awà.
LEV 14:43 Iyan, emun kegkepasad dutun ed-umanan pa edheb-unga haazà is baley,
LEV 14:44 ne ed-umanan heini ebeyai te memumuhat su wey zin mesusi. Ne emun midelandap is hab-ung, ne ed-isipen en he meremerik haazà is baley, su heini he kelasi te hab-ung ne ebpenhalin.
LEV 14:45 Umbe, iperundus din heini he valey ne is menge pengawid kayi, idtimbag diyà te ǥawas te inged, he timbaǥà te ed-isipen he meremerik.
LEV 14:46 Is minsan hentei he midseled dutun he valey hein midlekevan pa ne ed-isipen he meremerik taman te kebmerusirem.
LEV 14:47 Is minsan hentei he edlipezeng etawa egkaan diyà te seled kayi he valey kinahanglan he ebpìpian din is bisti zin.
LEV 14:48 Iyan, emun egkesusi zuen te memumuhat he wazè en umana heb-unga haazà is baley hein neliwanan en te elavat sikan is midhab-ung he elavat, ne ebpesayud haazà is memumuhat he lumpiyu haazà he valey su wazè en heb-unga.
LEV 14:49 Ne para isipe en haazà he lumpiyu en he valey, egkuwa is memumuhat te zezuwa he tagbis, kayu he sidru, merudtem he hulibis, wey hisupu.
LEV 14:50 Edhimetayan din is sevaha he tagbis diyà te zivavew te ziniyun he midteǥuan te wahig he ebpuun diyà te serebseb.
LEV 14:51 Ne egkuwaan din sikan is kayu he sidru, is merudtem he hulibis, is hisupu, wey sikan is uuyag he tagbis, ne ibpevudseng din heini is langun duen te wahig he zuen duen lengesa te tagbis he midhimetayan. Ne haazà is wahig he zuen duen lengesa, ne ibpirik din te kepipitu zuen te valey.
LEV 14:52 Umbe, pinaaǥi zuen te lengesa te tagbis, te wahig he ebpuun diyà te serebseb, te uuyag he tagbis, te kayu he sidru, te hisupu, wey merudtem he hulibis, egkelumpiyuwan duen te memumuhat haazà is baley.
LEV 14:53 Ne ibpaawè din sikan is uuyag he tagbis diyà te ǥawas te inged. Pinaaǥi kayi te ebeelan te memumuhat, egkaawà is kegkeremeriki te valey ne egkehimu en heini he lumpiyu.
LEV 14:54 Iyan heeyan menge sulunuzen mehitenged te menge zaru te lundis he edeǥes, etawa edlevag, etawa ebmemeriǥà, etawa ebmeputìputì, ne mehitenged te hab-ung te visti wey valey. Ne pinaaǥi kayi he sulunuzen egketuenan niw ke hengkey is lumpiyu wey ke hengkey is meremerik.
LEV 15:1 Midsuǥù te Nengazen si Moises wey si Aaron
LEV 15:2 he keǥiya zan heini ziyà te menge Israilihanen: Emun duen egawas diyà te sudiyà te maama tenged te zaru zin, heeyan is egawas ed-isipen he meremerik.
LEV 15:3 Mebpedayun se kenà is kedtiǥis kayi ed-isipen gihapun sikandin he meremerik.
LEV 15:4 Is minsan hengkey he egkehizeǥaan din etawa egkepinuuwan din egkehimu he meremerik.
LEV 15:5 Ne is minsan hentei he ebpekesamsam kandin etawa ebpekesamsam te midhizeǥaan din etawa mibpinuuwan din, kinahanglan he ebpìpian din is bisti zin wey mebpemeziǥù, piru ed-isipen pa ǥihapun sikandin he meremerik taman te egkesakep.
LEV 15:8 Is minsan hentei he egkeilevan kayi he etew, kinahanglan he ebpìpian din is bisti zin wey mebpemeziǥù, piru ed-isipen pa ǥihapun sikandin he meremerik taman te egkesakep.
LEV 15:9 Is minsan hengkey he egkepinuuwan wey egkeuntuzan din emun ed-untud sikandin te kudà, egkehimu haazà he meremerik. Is ebpekesamsam wey ebpekevitbit kayi, kinahanglan he ebpìpian din is bisti zin wey mebpemeziǥù, piru ed-isipen pa ǥihapun sikandin he meremerik taman te egkesakep.
LEV 15:11 Is minsan hentei he egkesamsam kayi he etew te wazà mekepenlùlù te menge velad din, kinahanglan he ebpìpian din is bisti zin wey mebpemeziǥù, piru ed-isipen pa ǥihapun sikandin he meremerik taman te egkesakep.
LEV 15:12 Is diniyun he egkesamsam kayi he etew kinahanglan he egevaan, ne is minsan hengkey he kayu he mibeelan he azen he egkesamsam kayi he etew kinahanglan he edlùluan.
LEV 15:13 Ne emun egkeulian en heini he etew zutun te zaru zin, ipelavey zin dèpa is pitu he andew. Ne pìpii zin is bisti zin wey mebpemeziǥù te wahig he ebpuun diyà te serebseb. Dutun te ikewalu he andew kinahanglan he med-uwit sikandin te zezuwa he merepatik etawa dezuwa he limuken diyà te etuvangan te Nengazen diyà te gemawan te Tulda he Edtelevukaayan. Ne iveǥey zin haazà diyà te memumuhat he iyan ebpemuhat dutun. Is sevaha, ne pemuhat he para idlumpiyu ne is sevaha pa, para pemuhat he edtutungen. Pinaaǥi kayi te ebeelan te memumuhat diyà te etuvangan te Nengazen, egkaawà is keremerik keniyan he etew tenged te migawas diyà te sudiyè din, ne egkehimu en sikandin he lumpiyu.
LEV 15:16 Emun is maama egewasan te similya zin, kinahanglan he mebpemeziǥù sikandin, piru ed-isipen pa ǥihapun sikandin he meremerik taman te egkesakep.
LEV 15:17 Is minsan hengkey he manggad etawa lundis he mibeelan he azen he egketiǥisan te similya zutun, kinahanglan he ebpìpian, piru ed-isipen pa ǥihapun heini he meremerik te taman te egkesakep.
LEV 15:18 Emun ebpehilevetà is maama wey vahi ne egewasan is maama te similya, kinahanglan he mebpemeziǥù sikandan is dezuwa, piru ed-isipen pa ǥihapun sikandan he meremerik taman te mahapun.
LEV 15:19 Emun edlelengesa is bahi, ed-isipen sikandin he meremerik seled te pitu he andew, ne is minsan hentei he edsamsam kandin ed-isipen daan he meremerik taman te mahapun.
LEV 15:20 Is minsan hengkey he egkehizeǥaan wey egkepinuuwan dutun te vahi he midlelengesa, egkehimu he meremerik.
LEV 15:21 Is minsan hentei he ebpekesamsam te midhizeǥaan din etawa mibpinuuwan din kinahanglan he pìpii zin is bisti zin wey mebpemeziǥù, piru ed-isipen pa ǥihapun sikandin he meremerik taman te egkesakep.
LEV 15:24 Emun ebpekidhilavet is maama te vahi he midlelengesa, ed-isipen daan haazà is maama he meremerik seled te pitu he andew, ne is minsan hengkey he egkehizeǥaan din egkehimu he meremerik.
LEV 15:25 Emun edlengesahan is bahi he edrapas te egkepipira he andew etawa edlengesahan pa sikandin te kenà timpu te kedlelengesa zin, ed-isipen gihapun sikandin he meremerik, iring din ded daan emun ke wazè pa haazà maawà. Ed-isipen sikandin he meremerik emun kemulu pa edlengesahi.
LEV 15:26 Is minsan hengkey he egkehizeǥaan din dutun te edlengesahan sikandin etawa egkepinuuwan din egkehimu he meremerik.
LEV 15:27 Ne is minsan hentei he ebpekesamsam kayi egkehimu he meremerik. Kinahanglan he pìpii zin is bisti zin wey mebpemeziǥù, piru ed-isipen pa ǥihapun sikandin he meremerik taman te egkesakep.
LEV 15:28 Emun ed-engked is lengesa zutun te vahi, ipelavey zin dèpa is pitu he andew. Dutun te ikewalu he andew kinahanglan he med-uwit sikandin te zezuwa he merepatik etawa zezuwa he limuken diyà te memumuhat diyà te gemawan te Tulda he Edtelevukaayan.
LEV 15:30 Ne ibpemuhat te memumuhat is sevaha kayi he para idlumpiyu ne is sevaha pa para pemuhat he edtutungen. Pinaaǥi kayi te ebeelan te memumuhat diyà te etuvangan te Nengazen, egkaawà is keremerik dutun te vahi ne egkehimu en sikandin he lumpiyu.
LEV 15:31 Migkeǥiyan te Nengazen si Moises wey si Aaron he kinahanglan he ebpekeventayan te menge Israilihanen is mehitenged te igkehimuwa kandan he meremerik, su wey zan kenà mebpatey emun edseled sikandan diyà te tulda te Nengazen he ziyà te teliwazà te kampu.
LEV 15:32 Iyan heeyan menge sulunuzen mehitenged te maama he egewasan te similya etawa zuen egawas diyà te sudiyè din tenged te zaru zin, wey mehitenged te vahi he edlengesahan etawa edsubra te egkepipira he andew is kedlengesahi zin etawa edlengesahan te kenè pa timpu zin, wey mehitenged te maama he ebpekidhilavet te vahi he ed-isipen he meremerik.
LEV 16:1 Hein minatey en sikan is dezuwa he anak ni Aaron he menge maama dutun te kebpemuhata zan te Nengazen, migkaǥi is Nengazen diyà te ki Moises te, “Keǥiyi nu is suled nu he si Aaron he kenà sikandin medseled dutun te Utew Segradu he Lugar, dutun te liyu te kurtina, te minsan hengkey he uras he egkesuat sikandin. Su emun ed-ul-ulahan din heini ne ebpatey sikandin. Su kayi he lugar ibpeehè ku is kebpekiduma ku pinaaǥi te ǥapun dutun te renged te tangeb te Kavan te Kebpekid-uyun.”
LEV 16:3 Iyan heini insuǥù te Nengazen he veeli ni Aaron dutun te andew he edseled sikandin diyà te Utew Segradu he Lugar: Med-uwit sikandan te turiti he vaka he pemuhat he para idlumpiyu wey meemahan he kerehidu he pemuhat he edtutungen.
LEV 16:4 Kinahanglan he mebpemeziǥù sikandin ne isul-ub din is bisti he para te lavew he memumuhat he pudu linu: is pendizalem he visti he ebpeketambun te pid-etawan din, is pendivavew he visti, is bakes, wey is tengkulu.
LEV 16:5 Mebeǥey kandin te zezuwa he meemahan he menge kambing is keet-etawan te Israel he pemuhat he para idlumpiyu wey sevaha he meemahan he kerehidu he pemuhat he edtutungen.
LEV 16:6 Ibpemuhat ni Aaron haazà is turiti he vaka he pemuhat he para idlumpiyu para mehimu sikandin he lumpiyu wey is menge pemilya zin.
LEV 16:7 Ne egkuwaan din haazà is dezuwa he kambing ne ed-uwiten din daan diyà te etuvangan te Nengazen, diyà te ǥemawan te Tulda he Edtelevukaayan.
LEV 16:8 Ne edripa sikandin ke hendei zapit dutun te zezuwa he kambing is para te Nengazen wey is para ki Azazel.
LEV 16:9 Is kambing he egkeripahan he para te Nengazen, ne pemuhat he para idlumpiyu.
LEV 16:10 Piru is kambing he egkeripahan he para ki Azazel, ibpemuhat din heini he uuyag diyà te Nengazen ne ibpaawè din heini ziyà te sibsivayan, su wey melibri is menge etew puun te menge salè dan.
LEV 16:11 Edlepaan ni Aaron sikan is turiti he vaka he pemuhat he para idlumpiyu kandin wey te menge pemilya zin.
LEV 16:12 Ne egkuwa sikandin te selevukà te veyewà ne ebpenuen din heini te vaǥa he ebpuun diyà te pemuhatà he ziyà te seled te tulda. Ne egkuwa zaan sikandin te zezuwa he kemkem he mehemut he pinu he veyewà, ne ed-uwiten din heini ziyà te Utew Segradu he Lugar.
LEV 16:13 Ne ziyà te etuvangan te Nengazen, idsavuk din haazà is beyewà duen te hapuy, ne is evel kayi ebpekeeneb duen te tambun te Kavan te Kebpekid-uyun, umbe kenà sikandin ebpatey.
LEV 16:14 Egkuwa sikandin te lengesa zuen te vaka ne edhitindeg sikandin diyà te egkesineruwan duen te Kavan te Kebpekid-uyun te Nengazen he edsinaru ziyà te edsilaan. Ne pinaaǥi te tezù din ebpirikan din te kepipitu sikan is tambun kayi.
LEV 16:15 Edlepaan din daan sikan is kambing he pemuhat he para idlumpiyu te menge etew. Ed-uwiten din is lengesa kayi ziyà te Utew Segradu he Lugar ne ibpirik din duen te tambun te Kavan te Kebpekid-uyun, iring duen te mibeelan din duen te lengesa te vaka.
LEV 16:16 Pinaaǥi kayi te ebeelan ni Aaron, egkelumpiyuwan is Utew Segradu he Lugar te kegkeremeriki zuen tenged te keremerik te menge Israilihanen wey tenged te menge salà dan wey menge kedsupak dan. Ebeelan din daan heini ziyà te zuma he vahin duen te tulda su ziyà man heini mekepelastar te teliwazà te kampu zan te menge meremerik.
LEV 16:17 Kinahanglan he wazà etew he ebpundu ziyà te Tulda zutun te uras te kedseled ni Aaron diyà te Utew Segradu he Lugar taman te egawas sikandin. Emun egkepasad din en te ebaal is tulumanen para melumpiyuwi sikandin, is pemilya zin, wey is tivuuk he keet-etawan te Israel,
LEV 16:18 egawas sikandin duen te Utew Segradu he Lugar ne edhendiyà te pemuhatà he ziyà te ǥemawan te tulda. Ne egkuwa sikandin duen te lengesa zuen te vaka wey kambing he impemuhat ne ibpalis din duen te menge sungeysungey te menge suyuk duen te pemuhatà su wey melumpiyuwi heini.
LEV 16:19 Ne pinaaǥi te tezù din ibpirik din te kepipitu zutun te pemuhatà is duma he lengesa te kebpemuhat kayi ziyà te Nengazen wey te ked-ewaa te keremerik te menge Israilihanen.
LEV 16:20 Ne emun egkepasad en ni Aaron te edlumpiyu sikan is Utew Segradu he Lugar wey is duma he parti zuen te tulda ragkes en is pemuhatà, ne ed-uwiten din diyà te teliwazà sikan is uuyag he kambing.
LEV 16:21 Ne idampè din is dezuwa he velad din diyà te ulu zuen te kambing ne idtug-an din is langun he menge salà wey kedsupak te menge Israilihanen. Pinaaǥi kayi ebpekahalin is menge salè dan diyà te ulu zutun te kambing. Ne ibpepaawà ni Aaron haazà is kambing diyà te sibsivayan te etew he midseriǥan te kebaal kayi.
LEV 16:22 Umbe, ed-uwiten dutun te kambing is langun he salà te menge Israilihanen diyà te sibsivayan.
LEV 16:23 Ne edseled si Aaron dutun te tulda ne edluwasen din is bisti zin he visti te lavew he memumuhat he imbivisti zin hein wazè pa sikandin medseled diyà te Utew Segradu he Lugar, ne idtaǥak din heini zutun te tulda.
LEV 16:24 Ne ebpemeziǥù sikandin diyà te sevaha he segradu he lugar zutun te Tulda ne kegkepasad ebivisti sikandin te urdinaryu. Ne egawas sikandin ne ibpemuhat din sikan is dezuwa he pemuhat he edtutungen para mevelukasi sikandin wey is menge Israilihanen te menge salè dan.
LEV 16:25 Edtutungen din daan diyà te pemuhatà is menge tavà dutun te pemuhat he para idlumpiyu.
LEV 16:26 Sikan is etew he insarig kandin is kebpaawà duen te kambing he para ki Azazel kinahanglan he ebpìpian din dèpa is bisti zin wey mebpemeziǥù te kenè pa sikandin edlikù diyà te kampu.
LEV 16:27 Kinahanglan he ed-uwiten diyà te ǥawas te kampu wey edtutungen is nesamà duen te vaka wey kambing he migkuwaan te lengesa he mid-uwit diyà te Utew Segradu he Lugar he inlumpiyu kayi.
LEV 16:28 Is etew he edtutung kayi kinahanglan he ebpìpian din dèpa is bisti zin wey mebpemeziǥù te kenè pa sikandin edlikù diyà te kampu.
LEV 16:29 Iyan heini menge sulunuzen he ebeelan te menge Israilihanen wey te kenà menge Israilihanen he mid-ubpà duma kandan, ne tumana zan heini taman te taman. Dutun te ikesepulù he andew te ikepitu he vulan kinahanglan he mebpuasa zan ne kenè dan medterebahu, iring te Andew te Kedhimeley. Su iyan heeyan andew he ebeelan is tulumanen te kebelukas kandan puun te menge salè dan su wey zan mehimu he lumpiyu ziyà te etuvangan te Nengazen.
LEV 16:32 Is memumuhat he mibpilì wey mid-urdinahan he iyan ebpekeilis te amey zin te kegkelavew he memumuhat iyan ebaal zutun he tulumanen. Ivivisti zin is bisti te lavew he memumuhat,
LEV 16:33 ne veeli zin is tulumanen te kedlumpiyu zuen te Utew Segradu he Lugar, ziyà te zuma pa he vahin dutun te Tulda ragkes en is pemuhatà, is menge memumuhat, wey is menge etew te Israel.
LEV 16:34 Kinahanglan he edtumanen dan heini he sulunuzen taman te taman. Ne veeli zan heini kesevaha kada tuig. Ne midtuman heini ni Moises sumalà te insuǥù te Nengazen.
LEV 17:1 Midsuǥù te Nengazen si Moises
LEV 17:2 he keǥiya zin heini ki Aaron wey te maama he menge anak din wey te langun he menge Israilihanen:
LEV 17:3 Is minsan hentei keniyu he ebpemuhat te vaka, kerehidu etawa kambing diyà te zuma he lugar,
LEV 17:4 ne kenà diyà te Tulda he Ed-ezapan (egngezanan daan he Tulda he Edtelevukaayan), ne iring ded te nekevunù sikandin te etew, umbe kenè niw sikandin isipa he zuma niw. Midhimu heini he kebpemuhat su para ziyè niw veeli is kebpemuhat te ǥemawan te Tulda ne kenà diyà te zuma he lugar. Umbe is ibpemuhat niw he pemuhat he para gasa iveǥey niw ziyà te memumuhat he iyan ebpemuhat kayi ziyà te Nengazen.
LEV 17:6 Ibpirik te memumuhat is lengesa te uyaǥen diyà te pemuhatà he pemuhatà he para te Nengazen, he ziyà te ǥemawan te Tulda. Ne edtutungen din is menge tavà dutun te uyaǥen ne is kehemut kayi ebpekepenunuat te Nengazen.
LEV 17:7 Umbe, kenè kew en ereg he ebpemuhat diyà te ed-ezapen he henduen be te kambing, su ebpekepeziyù heeyan keniyu ziyà te Nengazen. Kinahanglan he tumana niw heini taman te huziyan he lapis te menge kevuwazan.
LEV 17:8 Timan-i niw heini, sikiyu is menge Israilihanen wey is kenà menge Israilihanen he mid-ubpà duma keniyu: Is minsan hentei he ebpemuhat te minsan hengkey he pemuhat diyà te zuma he lugar
LEV 17:9 ne kenà diyà te ǥemawan te tulda, ne kenè niw en isipa he zuma niw.
LEV 17:10 Is minsan hentei he egkaan te lengesa egkeepesan te Nengazen ne kenè niw en sikandin isipa he zuma niw.
LEV 17:11 Su is untung te linimbag ne ziyà te lengesa zin, ne insuǥù te Nengazen he gemita niw heini para mevelukasi kew puun te menge salè niw, su is lengesa he iyan mibeǥey te untung, iyan ebpekevelukas te etew puun te menge salà.
LEV 17:12 Iyan heini hinungdan ke maan is kenè kew ereg he egkaan te lengesa.
LEV 17:13 Is minsan hentei keniyu te menge Israilihanen wey te kenà menge Israilihanen he mid-ubpà duma keniyu he ed-utel te langgam etawa tagbis he egkehimu he egkeenen, kinahanglan he ibpetiǥis din is lengesa kayi ne tembuni zin te tanà,
LEV 17:14 su is untung te linimbag ne ziyà te lengesa zin. Umbe migkeǥiyan kew te Nengazen he kenè niw keena is lengesa te minsan hengkey he linimbag; ne is minsan hentei he egkaan kayi ne kenè niw en isipa he zuma niw.
LEV 17:15 Is minsan hentei keniyu te menge Israilihanen wey kenà menge Israilihanen he mid-ubpà duma keniyu he egkaan te langgam he minatey zà etawa midhimetayan te zuma he langgam, kinahanglan he pìpii zin is bisti zin wey mebpemeziǥù, piru ed-isipen pa ǥihapun sikandin he meremerik taman te egkesakep.
LEV 17:16 Emun kenè din ebpìpian is bisti zin wey kenà ebpemeziǥù, ne zuen din televaken.
LEV 18:1 Midsuǥù te Nengazen si Moises
LEV 18:2 he keǥiya zin heini ziyà te menge Israilihanen: Iyan a Nengazen he Megbevayè niw.
LEV 18:3 Kinahanglan he kenè niw veeli is menge ebeelan te menge etew ziyà te Ehipto he zutun kew med-ubpà dengan, wey is menge ebeelan te menge etew ziyà te Canaan, he zutun ku sikiyu ed-uwita.
LEV 18:4 Kinahanglan he edtumanen niw is menge suǥù ku wey menge sulunuzen su is etew he edtuman kayi ebpekaangken te meupiya he ked-ubpà. Siak is Nengazen he Megbevayè niw, midsuǥù ku sikiyu.
LEV 18:6 Wazà minsan hentei keniyu he mebpekidhilavet te megeget he kezuzumahi zin.
LEV 18:7 Kenè nu peel-elezi is amey nu pinaaǥi te kebpekidhilavet te iney nu etawa zuma pa he esawa zin.
LEV 18:9 Kenè ka mebpekidhilavet te etevey nu, minsan etevey nu zà sikandin diyà te amey nu etawa iney nu, midekelè man sikandin duma keniyu wey ke wazà.
LEV 18:10 Kenè ka mebpekidhilavet te apù nu he vahi, su ebpekeveǥey heini kenikew te keelezan.
LEV 18:11 Kenè ka mebpekidhilavet te anak he vahi te amey nu ziyà te zuma he esawa zin, su suled nu zaan sikandin.
LEV 18:12 Kenè ka mebpekidhilavet te ayè nu, suled man te amey nu etawa iney nu.
LEV 18:14 Kenè nu peel-elezi is suled he maama te amey nu pinaaǥi te kebpekidhilavet te esawa zin, su ayè nu zaan sikandin.
LEV 18:15 Kenè ka mebpekidhilavet te ambey nu su esawa sikandin te anak nu.
LEV 18:16 Kenè ka mebpekidhilavet te ipag nu su ebpekeveǥey heini te keelezan te suled nu.
LEV 18:17 Kenè ka mebpekidhilavet te anak etawa apù he vahi te vahi he mibpekidhilavet ka kandin dutun te nehuna he timpu, su kela ke anak nu etawa apù nu haazà, ne mahawag heeyan he vaal.
LEV 18:18 Kenè nu esewaa is ipag nu zutun te uuyag pa is esawa nu.
LEV 18:19 Kenè ka mebpekidhilavet te vahi he edlengesahan su meremerik sikandin.
LEV 18:20 Kenè ka mebpekidhilavet te esawa te zuma, su emun ebeelan nu heini ed-isipen ka he meremerik.
LEV 18:21 Kenè nu iveǥey is minsan hentei te menge anak nu su wey ikepemuhat diyà te ed-ezapen he si Molec, su ebpekeveǥey heeyan kedì te Megbevayè nu te keelezan. Iyan a sikan is Nengazen.
LEV 18:22 Kenè ka mebpekidhilavet te iring nu he maama su mekeeled-eled heeyan.
LEV 18:23 Kenè ka mebpekidhilavet te uyaǥen su utew heeyan mahawag, wey minsan is bahi ne kenè din iveǥey is lawa zin para mehileveti te uyaǥen. Su sevaha heini he kedsuwey te hustu ne ed-isipen ka he meremerik emun ebeelan nu heini.
LEV 18:24 Kenè niw remeriki is keugelingen niw pinaaǥi te kebaal te minsan hendei kayi he vaal, su iyan heini ingkeremeriki te menge etew he edsegseǥen ku puun te tanà he para keniyu.
LEV 18:25 Ne minsan ganì heeyan he tanà neremerikan tenged te ebeelan dan, umbe impaaǥi ku keniyan he tanà is menge kezeetan su wey pinaaǥi zutun mekeawè dan keniyan. Piru sikiyu is menge meǥinged he Israilihanen wey is kenà menge Israilihanen he mid-ubpà duma keniyu, kenè niw veeli heeyan is mahawag he menge vaal, kekenà, tumana niw is menge sulunuzen he ibpesunud ku wey menge suǥù. Su emun edremerikan niw heeyan is tanà pinaaǥi te kebaal niw keniyan he menge vaal, ibpaawè kew zaan keniyan he tanà iring te menge etew he nehuna keniyu.
LEV 18:29 Is minsan hentei he ebaal keniyan te utew mezaat he menge vaal ne kenè niw en sikandin isipa he zuma niw.
LEV 18:30 Umbe, tumana niw is ebpeveelan ku keniyu ne kenè niw iringi is utew mezaat he menge ebeelan te menge etew he nehuna keniyu, su wey niw kenà meremeriki is keugelingen niw tenged kayi. Iyan a kes Nengazen he Megbevayè niw.
LEV 19:1 Midsuǥù te Nengazen si Moises
LEV 19:2 he keǥiya zin heini ziyà te tivuuk he keet-etawan te Israel: Pengungubpaan kew he segradu su waǥas a is Nengazen he Megbevayè niw.
LEV 19:3 Kinahanglan he edtehuzen niw is iney niw wey amey niw, wey kinahanglan he tumana niw is ebpeveelan ku keniyu zutun te Andew te Kedhimeley. Iyan a kes Nengazen he Megbevayè niw.
LEV 19:4 Kenè kew med-azap te zuma he menge ed-ezapen wey kenè kew mebaal te ledawan te zuma he ed-ezapen. Iyan a kes Nengazen he Megbevayè niw.
LEV 19:5 Emun ebpemuhat kew te pemuhat para mehimu he meupiya is kebpekidepitè niw kedì, ipemuhat niw heini te paaǥi he egkezawat ku heini para keniyu.
LEV 19:6 Keena niw is usa kayi zutun te andew te kebpemuhat niw etawa sunud he andew. Piru emun duen egkesamà he usa taman te iketelu he andew kinahanglan he edtutungen heini.
LEV 19:7 Emun egkeenen niw heini te iketelu he andew ne kenè ku heini edewaten su utew mezaat heini.
LEV 19:8 Is minsan hentei he egkaan kayi ne zuen din televaken su ebpendezeisayen din is para kediey, umbe haazà he etew kenè niw en isipa he zuma niw.
LEV 19:9 Emun edraǥun kew ne kenè niw emina te edraǥun is diyà te kilid te pemuleey niw, ne kenè niw en likui pekirerawa is nengesamà.
LEV 19:10 Iring ded dutun is beeli niw ziyà te pemuleey niw te paras, kenè niw en likui wey kuwaa is nengeulug. Teǥaka niw en heeyan para te menge pubri wey te menge lumelengyawà. Iyan a kes Nengazen he Megbevayè niw.
LEV 19:11 Kenè kew mebpenakew, medtarùtarù, etawa medlimbung te iring niw he etew.
LEV 19:12 Kenè kew penangdù te tarù he egemiten niw is ngazan ku, su emun ebeelan niw heeyan ne ebpeel-elezan a keniyu. Iyan a kes Nengazen.
LEV 19:13 Kenè niw limbungi wey tekawi is iring niw he etew. Kenè niw lenglengani te edsuhul is etew he impeterebahu niw.
LEV 19:14 Kenè niw keǥiyi te mezaat is bengel, wey kenè kew medsavuk te egkesipà diyà te ibayà te lakap. Tumana niw heini su ibpekilala niw is kedtehuza niw kedì. Iyan a kes Nengazen.
LEV 19:15 Kinahanglan he meketezenganen wey hustu is kedhukum niw ziyà te hukmanan; kinahanglan he wazè niw ibpelavi, sepian etawa pubri.
LEV 19:16 Kenè kew ituk te zuma niw he etew. Kenè kew vaal te minsan hengkey he ebpekezezaat te untung din. Iyan a kes Nengazen.
LEV 19:17 Kenè niw dumuti is duma niw he etew. Dewaya niw sikandin emun nekesalà sikandin su para wazè niw televaken.
LEV 19:18 Kenè kew penimales etawa dumut te zuma niw he etew, kekenà, mahala niw sikandin iring te kebmahala niw te keugelingen niw. Iyan a kes Nengazen.
LEV 19:19 Tumana niw is menge sulunuzen he ibpesunud ku. Kenè niw pepeniwelayi is sevaha he uyaǥen te selakew en he kelasi te uyaǥen. Kenè kew pemula te zezuwa he kelasi te venì diyà te sevaha zà he pemuleey. Kenè kew sul-ub te sevaha he visti he zezuwa he kelasi te manggad.
LEV 19:20 Emun is sevaha he maama ebpekidhilavet te sevaha he uripen he vahi he ed-esewaan en te sengememaama, piru heini is bahi wazè pa mevelukasi te kegkeuripena kandin etawa wazè pa meveǥayi te vayàbayà, kinahanglan he edsilutan sikandan. Piru kenà sikandan edhimetayan su kenè pe man ebpekevayàbayà haazà is bahi.
LEV 19:21 Kinahanglan he med-uwit sikan is maama te meemahan he kerehidu ziyà te ǥemawan te Tulda he Edtelevukaayan he vayad te salè din. Pinaaǥi te kebpemuhata te memumuhat dutun te kerehidu ziyà te etuvangan ku, egkevelukasan haazà is maama te salè din ne ebpeseyluwen ku sikandin.
LEV 19:23 Emun ebpekeuma kew en diyà te tanà he ibeǥey ku keniyu, kenè niw keena is beǥas te kayu he ibpemula niw zutun te egkehuna he tetelu he tuig. Isipa niw heini he meremerik.
LEV 19:24 Dutun te ikeepat he tuig, is langun he veǥas kayi ihalad niw kayi te kedì he idalig kedì, umbe kenè niw zaan heini keena.
LEV 19:25 Piru te ikelima he tuig ne ebpekekaan kew en te menge veǥas kayi. Ne emun edtumanen niw heini he sulunuzen, utew meveǥas is menge kayu niw. Iyan a kes Nengazen he Megbevayè niw.
LEV 19:26 Kenè kew kaan te usa he zuen din pa lengesa. Kenè niw veeli is ebeelan te menge kineegmanen etawa veyilan.
LEV 19:27 Emun idlalew niw is minatey kenè niw tempezi is bulvul niw ziyà te kada tengkilizan te ulu niw etawa sumpè niw,
LEV 19:28 wey kenè niw zaan pelii is lawa niw. Wey kenè kew zaan mebpepatik. Iyan a kes Nengazen.
LEV 19:29 Kenè niw peel-elezi is menge anak niw he vahi pinaaǥi te kebpeǥesa niw kandan te kebelegyà te zengeg dan, su ebpekeiniyat heini, ne utew ebmahabet diyà te lugar niw is ed-ulaula kayi.
LEV 19:30 Tumana niw is ebpeveelan ku keniyu zutun te Andew te Kedhimeley, ne tehuza niw is lugar he zutun a keniyu ed-ezapa. Iyan a kes Nengazen.
LEV 19:31 Kenè kew zangep diyà te menge veyilan he ebpekidlalag te gimukud te nemematey en, su emun ebeelan niw heini ed-isipen kew he meremerik. Iyan a kes Nengazen he Megbevayè niw.
LEV 19:32 Tehuza niw is menge meǥurang, wey tehuza a zaan keniyu is Megbevayè niw. Iyan a kes Nengazen.
LEV 19:33 Kenè niw temudmuzi is kenà menge Israilihanen he ed-ubpà duma keniyu.
LEV 19:34 Irerepengan niw sikandan, wey mahala niw sikandan iring te kebmahala niw te keugelingen niw, su umuuliey kew zaan dengan diyà te Ehipto. Iyan a kes Nengazen he Megbevayè niw.
LEV 19:35 Kenè kew limbung diyà te kedtimbang niw, kedtakes niw, etawa kedsukud niw.
LEV 19:36 Gemita niw is hustu he timbangan, tekesà, wey sukud. Iyan a kes Nengazen he Megbevayè niw he mibpeǥawas keniyu ziyà te Ehipto. Tumana niw is langun he menge sulunuzen he ibpesunud ku wey menge suǥù ku.
LEV 20:1 Midsuǥù te Nengazen si Moises
LEV 20:2 he keǥiya zin heini ziyà te menge Israilihanen: Is minsan hentei keniyu te menge Israilihanen etawa kenà menge Israilihanen he mid-ubpà duma keniyu he ebpemuhat te anak din diyà te ed-ezapen he si Molec, kinahanglan he penulenga niw te vatu taman te kebpatey zin.
LEV 20:3 Egkeepesan ku heeyan he etew ne kenè niw en isipa he zuma niw, su zutun te kebpemuhata zin te anak din diyà te ki Molec, midremerikan din is lugar he zutun a keniyu ed-ezapa ne mibpendezeisey zin is ngazan ku. Emun ebey-anan niw zà haazà he etew,
LEV 20:5 iyan a mismu egkuntra kandin wey te pemilya zin wey te langun he edsunud kandin te kebpemuhat diyà te ki Molec. Kenè ku sikandan ed-isipen he zuma niw.
LEV 20:6 Egkeepesan ku zaan is etew he edangep wey edsunud te menge veyilan he ebpekidlalag te ǥimukud te nemematey en. Kenè ku sikandan ed-isipen he zuma niw.
LEV 20:7 Ihalad niw is keugelingen niw para kediey wey pengungubpaan kew he segradu, su iyan a kes Nengazen he Megbevayè niw.
LEV 20:8 Tumana niw is menge sulunuzen he ibpesunud ku, su iyan a is Nengazen midsivey keniyu para kedì.
LEV 20:9 Is minsan hentei he edrewakan din is amey zin etawa iney zin kinahanglan he edhimetayan. Iyan dà sikandin egkevasul zutun te kedhimetayi kandin.
LEV 20:10 Emun ebpekidhilavet is maama te esawa te zuma, ne sikandin wey kes bahi kinahanglan he edhimetayan.
LEV 20:11 Emun ebpekidhilavet is maama te sevaha te menge esawa te amey zin, mibpeel-elezan din is amey zin. Ne sikandan is dezuwa zutun te vahi kinahanglan he edhimetayan. Iyan dà sikandan egkevasul zutun te kemetayen dan.
LEV 20:12 Emun is amey ebpekidhilavet te ambey zin, ne sikandan is dezuwa kinahanglan he edhimetayan. Su mezaat is mibeelan dan. Iyan dà sikandan egkevasul zutun te kemetayen dan.
LEV 20:13 Emun is maama ebpekidhilavet te iring din he maama, ne sikandan is dezuwa kinahanglan he edhimetayan su utew mezaat is mibeelan dan. Diyè dà te kandan igkevasul is kemetayen dan.
LEV 20:14 Emun ed-esewaan te maama is iney wey anak, kinahanglan he ebinsulan sikandan is tetelu, su mezaat is mibeelan dan. Kenà ereg he ebpedayun heini he kelelalung diyà te keniyu.
LEV 20:15 Emun duen maama etawa vahi he ebpekidhilavet te uyaǥen, kinahanglan he edhimetayan sikandin wey haazà is uyaǥen. Diyè dà te kandan igkevasul is kemetayen dan.
LEV 20:17 Emun is maama ebpengesawa wey ebpekidhilavet te etevey zin, minsan ke suled din dà heini ziyà te amey etawa iney, mibpeel-elezan din haazà is suled din ne zuen din televaken. Ne ǥeina te mekeeled-eled haazà is mibeelan dan te zezuwa, ne kenè niw en sikandan isipa he zuma niw.
LEV 20:18 Emun is maama ebpekidhilavet te vahi he midlengesahan, ne nemineg haazà is bahi, ne kenè niw en sikandan isipa is dezuwa he zuma niw.
LEV 20:19 Emun is maama ebpekidhilavet te ayè din, mibpeel-elezan din haazà is ayè din. Ne sikandan is dezuwa ne zuen dan televaken dutun te mibeelan dan.
LEV 20:20 Emun is maama ebpekidhilavet te esawa te anggam din, mibpeel-elezan din is anggam din. Sikandan is dezuwa ne zuen dan televaken, ne ebpatey zà sikandan he wazè dan anak.
LEV 20:21 Emun is maama ebpengesawa te esawa te suled din he uuyag pa, mibpeel-elezan din is suled din. Ne ǥeina te meremerik is mibeelan dan, ne tekew en sikandan ebpatey he wazè dan anak.
LEV 20:22 Tumana niw is langun he menge sulunuzen he ibpesunud ku wey is menge suǥù ku su wey ku sikiyu kenà ipaawà diyà te tanà he ed-uwitan ku keniyu he egkeubpaan niw.
LEV 20:23 Is menge etew he ibpaawè ku zutun he tanà iyan mibaal keniyan he kelelalung, ne tenged kayi igkelimezangi ku sikandan. Umbe kenè niw iringi is ebeelan dan.
LEV 20:24 Ne sumalà te nekaǥi ku keniyu egkaangken niw is tanè dan. Ibeǥey ku keniyu heini is meupiya wey selebpeten he tanà su wey niw maangken. Iyan a kes Nengazen he Megbevayè niw he midhimu keniyu he segradu puun te zuma he menge etew.
LEV 20:25 Kinahanglan he egketuenan niw ke hengkey is lumpiyu wey meremerik he menge langgam ragkes en is menge tagbis. Kenè niw remeriki is keugelingen niw pinaaǥi te kegkaan te meremerik he menge langgam. Ne sumalà te migkaǥi ku keniyu, isipa niw heini he meremerik,
LEV 20:26 pengungubpaan kew he segradu su siak is Nengazen, waǥas a. Ne midhimu ku sikiyu he segradu puun te zuma he menge nasyun su wey kew mehimu he kediey.
LEV 20:27 Emun duen keniyu veyilan he ebpekidlalag te ǥimukud te nemematey en, kinahanglan he ebpenulengen sikandin te vatu taman te ebpatey. Ne iyan dà sikandin egkevasul zutun te kemetayen din.
LEV 21:1 Midsuǥù te Nengazen si Moises he keǥiya zin heini ziyà te menge memumuhat he kevuwazan ni Aaron: Kenè niw remeriki is keugelingen niw pinaaǥi te kedtampu te kedlevenga te iring niw he Israilihanen,
LEV 21:2 gawas ke is ebpatey utew niw en megeget iring te iney niw, amey niw, anak niw, suled niw he maama,
LEV 21:3 etawa etevey niw he wazè din pa esawa, ne midsarig pa keniyu.
LEV 21:4 Kenè niw zaan remeriki is keugelingen niw pinaaǥi te kedtampu te kedlevenga te kezuzumahi te esawa niw.
LEV 21:5 Emun edlalew kew tenged te minatey, ne kenè niw kiskisi is minsan hendei he vahin te ulu niw, kenè niw tempezi is sumpè niw, wey kenè niw pelii is lawa niw.
LEV 21:6 Kinahanglan he idhalad niw is keugelingen niw para kediey te Megbevayè niw, wey kenè niw pendezeisaya is ngazan ku. Beeli niw heini su iyan kew man ebpemuhat te menge pemuhat pinaaǥi te hapuy, he iyan keenen ku.
LEV 21:7 Kinahanglan he kenè kew mebpengesawa te vahi he meremerik su ebelegyà te zengeg din, etawa vahi he midsuwayan te esawa zin, su insivey kew para kediey.
LEV 21:8 Kinahanglan he segradu is ked-isipa keniyu te zuma niw he menge Israilihanen su iyan kew ebpemuhat te menge pemuhat kayi te kediey, te Nengazen, he waǥas, ne edhimuwen ku is menge etew ku he wazà igkesewayi.
LEV 21:9 Emun duen niw anak he vahi he ebpeelimungew keniyu tenged te kebelegyè din te zengeg din, ne tenged dutun ed-isipen sikandin he meremerik, kinahanglan he ebinsulan sikandin.
LEV 21:10 Emun egkeseeng is lavew he memumuhat tenged te minatey, kinahanglan he kenè din gusenga is bulvul zin wey kenè din bindasa is bisti zin.
LEV 21:11 Kinahanglan he edsenggilahan din is kebpekesamsam te minatey, minsan pa ke amey zin etawa iney zin.
LEV 21:12 Ne ǥeina te inhalad sikandin kayi te kedì he lavew he memumuhat pinaaǥi te kedlenahi kandin, kenà sikandin ereg he ed-awà diyà te Tulda he Edtelevukaayan te kedtampu te kedleveng, su emun ebeelan din heini ne egkeremerikan sikan is tulda. Iyan a kes Nengazen.
LEV 21:13 Is ed-esewaan te lavew he memumuhat kinahanglan he wazè pa mekeremaǥi wey iring din he Israilihanen. Kenà sikandin mebpengesawa te valu etawa vahi he midsuwayan te esawa zin, etawa vahi he meremerik su ebelegyà te zengeg din.
LEV 21:15 Pinaaǥi te kedtumana kayi te memumuhat kenà ed-isipen he meremerik is menge anak din. Iyan a is Nengazen midsivey kandin para mehimu he lavew he memumuhat.
LEV 21:16 Midsuǥù te Nengazen si Moises
LEV 21:17 he keǥiya zin heini ziyà te ki Aaron: Wazà minsan hentei te menge kevuwazan nu he taman te huziyan he lapis te menge kevuwazan he ebpekepenilbi pinaaǥi te kegkememumuhat emun duen sazir te lawa zin.
LEV 21:18 Kenà egkehimu is lakap, pigket, duen sazir te kebuvuked din, duen sazir ziyà te lawa zin,
LEV 21:19 nelepuan is paa zin etawa velad,
LEV 21:20 bekut, inanu, duen din daru ziyà te mata etawa lundis, etawa kenà ebpekaanak.
LEV 21:21 Umbe, emun duen sazir te kevuwazan ni Aaron, ne kenà egkehimu he ebpemuhat kayi te kedì te menge pemuhat pinaaǥi te hapuy, he iyan keenen ku. Wey kenà daan egkehimu ke edseled sikandin diyà te Segradu he Lugar wey ed-uvey zuen te pemuhatà su egkeremerikan is Tulda ku. Piru egkehimu ke egkaan sikandin te menge keenen he vahin te menge memumuhat duen te segradu he pemuhat wey zuen te utew segradu he pemuhat. Iyan a is Nengazen midsivey keniyu para kedì.
LEV 21:24 Umbe, migkaǥi heini is langun ni Moises diyà te ki Aaron wey ziyà te menge kevuwazan din he menge maama, wey ziyà te langun he menge Israilihanen.
LEV 22:1 Midsuǥù te Nengazen si Moises
LEV 22:2 he keǥiya zin heini ziyà te ki Aaron wey ziyà te maama he menge kevuwazan din: Kenè niw pendezeisaya is waǥas he ngazan ku, umbe tehuza niw is menge pemuhat he ibpemuhat te menge Israilihanen kayi te kedì. Iyan a kes Nengazen.
LEV 22:3 Emun duen keniyu ǥuntaan etawa menge kevuwazan niw taman te huziyan he lapis te menge kevuwazan he edsamsam te pemuhat kayi te kedì, dutun te meremerik sikandin, kenè en egkehimu he ebpekepenilbi pinaaǥi te kegkememumuhat din. Iyan a kes Nengazen.
LEV 22:4 Wazà minsan hentei keniyu he egkehimu he egkaan te pemuhat, emun duen din daru te lundis, etawa zuen egawas diyà te sudiyè din tenged te zaru zin, etawa nekesamsam te azen he nehimu he meremerik su nekeseǥahid te minatey, etawa migewasan te similya, etawa nekesamsam te langgam, etawa etew he ed-isipen he meremerik. Wey zà sikandin egkehimu he egkaan te menge pemuhat emun ebpekepemeziǥù sikandin, piru medtaǥad pa sikandin taman te mahapun, dutun te edsanlep en is andew, ne egkehimu en human he egkaan sikandin te menge pemuhat he iyan keuyaǥan din su memumuhat man sikandin.
LEV 22:8 Kinahanglan he kenè kew megkaan te minsan hengkey he usa te langgam he minatey zà etawa midhimetayan te zuma he langgam. Su emun ebeelan niw heini ed-isipen kew he meremerik. Iyan a kes Nengazen.
LEV 22:9 Sikiyu is menge memumuhat, tumana niw is ibpetuman ku keniyu. Kinahanglan he edtumanen niw heini su wey kew kenà mekepenavak wey mebpatey. Iyan a is Nengazen midsivey keniyu para kedì.
LEV 22:10 Iyan kew zà wey is pemilya niw, egkehimu he egkaan duen te vahin te menge pemuhat he para te menge memumuhat. Kenà egkehimu he egkaan kayi is meǥeliyug niw etawa sinuhulan niw he terebahanti.
LEV 22:11 Piru egkehimu ke egkaan kayi is uripen he mibpemasa niw etawa in-anak diyà te keniyu.
LEV 22:12 Kenà daan ebpekekaan kayi is anak te memumuhat he neesawa te kenà memumuhat.
LEV 22:13 Iyan, emun nevalu sikandin etawa nekedsuwey zan te esawa zin he wazè dan anak, ne midlikù med-ubpà duma te amey zin, ne ebpekekaan sikandin te keenen he egkezawat te amey zin dutun te kegkememumuhat din. Purungi niw tentenuzi he iyan kew zà is menge memumuhat wey is pemilya niw ebpekekaan te vahin te menge pemuhat he para keniyu.
LEV 22:14 Iyan, emun duen etew he kenà sakup te pemilya niw he ebpekekaan kayi he wazè din tivevaa, kinahanglan he edliwanan din heini ziyà te keniyu ne umani zin pa te 20 pursintu is bali kayi.
LEV 22:15 Sikiyu is menge memumuhat, kenè niw pendezeisaya is menge pemuhat te menge Israilihanen kayi te kedì,
LEV 22:16 su wey kew kenà mekesalà dutun te kegkeena niw kayi ne wazè niw televaken. Iyan a is Nengazen midsivey keniyu su wey kew mehimu he kedì.
LEV 22:17 Midsuǥù te Nengazen si Moises
LEV 22:18 he keǥiya zin heini ziyà te ki Aaron wey ziyà te maama he menge anak din, diyà te iring dan he menge Israilihanen, wey ragkes is kenà menge Israilihanen he mid-ubpà duma kandan: Emun is pemuhat he edtutungen iyan ibpemuhat niw he pemuhat para te kedtuman te sevaha he penaad etawa pemuhat he keugelingen he suat,
LEV 22:19 kinahanglan he meemahan he vaka, kerehidu, etawa kambing ne kinahanglan he wazè dan sazir su wey ku zewata heini.
LEV 22:20 Kenè kew mebpemuhat te zuen din sazir su kenè ku heini edewaten.
LEV 22:21 Emun is pemuhat he para te meupiya he kedepità ibpemuhat niw kediey he kedtuman te penaad etawa pemuhat he keugelingen he suat, kinahanglan he vaka heini etawa kerehidu etawa kambing he wazè sazir su edewaten ku heini.
LEV 22:22 Kenè kew mebpemuhat kayi te kedì te uyaǥen he lakap, lepù, pelien, etawa zuen din daru te lundis. Kenè niw heini ipemuhat kedì dutun te pemuhatà te pemuhat he pinaaǥi te hapuy.
LEV 22:23 Egkehimu he ibpemuhat niw he pemuhat he keugelingen he suat is baka etawa kerehidu he kenà hustu is kegkeveeli te sevaha he vahin te lawa zin, piru kenà heini egkehimu he ibpemuhat he pemuhat he kedtuman te penaad.
LEV 22:24 Kenè kew mebpemuhat kayi te kedì te uyaǥen he nepelian is tayak din etawa migkapun. Kenè niw heini veeli ziyà te lugar niw.
LEV 22:25 Ne kenè kew zaan mebpemasa te iring keniyan he kelasi te uyaǥen diyà te menge lumelengyawà te ibpemuhat niw kayi te kedì, su kenè ku heeyan edewaten.
LEV 22:26 Is beǥu he in-anak he vaka, kerehidu etawa kambing, kinahanglan he kenè idsuwey te iney zin seled te pitu he andew. Piru emun midlavey en te pitu he andew egkehimu en heini he ibpemuhat niw kayi te kedì he pemuhat pinaaǥi te hapuy.
LEV 22:28 Emun ebpemuhat kew te vaka etawa kerehidu, ne kenè niw iredsà kandan is nati zan dutun te iyan ded he andew.
LEV 22:29 Emun ebpemuhaten a keniyu te pemuhat he para kebpeselamat kedì, sunuza niw is hustu he paaǥi te kebpemuhata kayi su para zewata ku heini.
LEV 22:30 Ne kinahanglan he keena niw en dutun mismu te andew te kebpemuhata zuen ne kenè niw semai taman te edsunud he meselem. Iyan a kes Nengazen.
LEV 22:31 Tumana niw is menge suǥù ku. Iyan a kes Nengazen.
LEV 22:32 Kenè niw pendezeisaya is waǥas he ngazan ku, ne kilelaa a keniyu he waǥas. Iyan a is Nengazen midsivey keniyu su wey kew mehimu he menge etew ku,
LEV 22:33 wey mibpeǥawas a keniyu puun te Ehipto su wey a mehimu he Megbevayè niw. Iyan a kes Nengazen.
LEV 23:1 Midsuǥù te Nengazen si Moises
LEV 23:2 he keǥiya zin heini ziyà te menge Israilihanen, is mehitenged te ispisyal he menge timpu he zutun medtiǥum dan te ked-azap te Nengazen:
LEV 23:3 Duen heenem he andew te kedterebahu niw, piru himeley kew ziyà te ikepitu he andew su iyan heeyan Andew te Kedhimeley. Kenè kew terebahu keniyan he andew, kekena, tiǥum kew para te ked-azap, su andew heeyan he ebeǥayan niw te zengeg is Nengazen.
LEV 23:4 Is Pista te Kedlavey te Belinsuǥuen wey is Pista te Supas he Wazè din Tapey, menge ispisyal heini he menge timpu he edtiǥum is menge Israilihanen te ked-azap te Nengazen.
LEV 23:5 Is Pista te Kedlavey te Belinsuǥuen, mezukilem is kedhimuwa zuen diyà te ike-14 he andew te egkehuna he vulan te tuig.
LEV 23:6 Ne ike-15 he andew zutun he vulan, ebpuun daan is Pista te Supas he Wazè din Tapey. Pitu he andew heini he pista, ne zutun he menge andew kinahanglan he iyan egkeenen niw is supas he wazè din tapey.
LEV 23:7 Dutun te egkehuna he andew kayi te pista, ne kenè kew medterebahu, kekenà, tiǥum kew te ked-azap te Nengazen.
LEV 23:8 Seled te pitu he andew pemuhatà niw is Nengazen te pemuhat pinaaǥi te hapuy. Ne zutun te ikepitu he andew ne kenè kew en maan terebahu, kekenà, tiǥum kew te ked-azap te Nengazen.
LEV 23:9 Emun diyè kew en te tanà he ibeǥey te Nengazen keniyu, ipemuhat niw ziyà te kandin is egkehuna he vinagkes niw he menge pungu te kada kedraǥun niw. Uwita niw heini ziyà te memumuhat dutun te sunud he andew te Andew te Kedhimeley, ne ibayew heini te memumuhat diyà te etuvangan te Nengazen su wey kew zewata te Nengazen pinaaǥi kayi.
LEV 23:12 Dutun daan he andew, pemuhat kew ziyà te Nengazen te kerehidu he senge-tuig is keǥurang din he wazè din sazir he pemuhat he edtutungen.
LEV 23:13 Lepiki niw heini te pemuhat he para gasa he heepat he kilu he meupiya he kelasi te herina he midsehuǥan te lana, wey senge litru he vinu he pemuhat he inumen. Pemuhat heini he pinaaǥi te hapuy, is kehemut kayi ebpekepenunuat te Nengazen.
LEV 23:14 Emun wazè niw pa heini ikepemuhat, ne kenè kew pa megkaan te minsan hengkey he kelasi te keenen he zuma te beǥu he midraǥun niw, mehilew man heini etawa sinandag etawa midlutù he supas. Heini he sulunuzen, kinahanglan he tumana niw taman te huziyan he lapis te menge kevuwazan niw, minsan hendei kew ed-ubpà.
LEV 23:15 Kedlavey zutun te pitu he simana he iyan kebpuun te andew zutun te kedhelaza niw zuen te menge vinagkes he pungu, tiǥum kew ne pemuhat kew uman te pemuhat he para gasa puun dutun te menge pungu he veǥu pa he ineǥani niw. Ul-ulaha niw heini zutun te ike-50 he andew, he iyan kes andew te kegkeiwas te ikepitu he Andew te Kedhimeley. Is idhalad niw, ne zezuwa he supas he mibeelan he ziyà ebpuun te heepat he kilu te meupiya he kelasi te herina, he zuen din tapey. Ipemuhat niw heini he pemuhat he ibayew he ebpuun te nehuna he neraǥun niw.
LEV 23:18 Perisi niw heini te pitu he meemahan he kerehidu, he tig senge-tuig is keǥurang, sevaha he turiti he vaka, wey zezuwa he meemahan he kerehidu, he wazè dan menge sazir. Ipemuhat niw heini he pemuhat he edtutungen duma te pemuhat he para gasa duma zuen te pemuhat he inumen. Is kehemut kayi he pemuhat te pinaaǥi te hapuy ne ebpekepenunuat te Nengazen.
LEV 23:19 Ne pemuhat kew zaan te sevaha he meemahan he kambing he pemuhat he para idlumpiyu, wey zezuwa he kerehidu he tig senge-tuig is keǥurang dan he para te meupiya he kebpekidepità diyà te Nengazen.
LEV 23:20 Ne ibayew te memumuhat diyà te etuvangan te Nengazen sikan is dezuwa he kerehidu wey is pemuhat he zuma te nehuna he neraǥun. Segradu heini he menge pemuhat diyà te Nengazen ne vahin heini te menge memumuhat.
LEV 23:21 Dutun he andew kenè kew medterebahu, kekenà, tiǥum kew te ked-azap te Nengazen. Heini he sulunuzen, ne kinahanglan he tumana niw taman te huziyan he lapis te menge kevuwazan niw, minsan hendei kew ed-ubpà.
LEV 23:22 Emun edraǥun kew ne kenè niw emina te edraǥun is diyà te kilid te pemuleey niw, ne kenè niw en likui wey pekirerawa. Teǥaka niw en heeyan he para te menge pubri wey menge langyew he kenà menge Israilihanen. Iyan heini suǥù te Nengazen he Megbevayè niw.
LEV 23:23 Dutun te egkehuna he andew te ikepitu he vulan te tuig, himeley kew para te kedtentenuzi niw te Nengazen. Emun egkezineg niw is kebpezaǥing te menge trumpita, ne tiǥum kew te ked-azap kandin.
LEV 23:25 Kenè kew terebahu zutun he andew, kekenà, pemuhata niw is Nengazen te pemuhat pinaaǥi te hapuy.
LEV 23:26 Dutun te ikesepulù he andew kayi te ikepitu he vulan, iyan kes Andew te Kebelukas. Kenè kew terebahu keniyan he andew, kekenà, tiǥum kew te ked-azap te Nengazen. Puasa kew wey pemuhata niw sikandin te pemuhat pinaaǥi te hapuy. Su keniyan he andew ebeelan is tulumanen te kebelukasi keniyu tenged te menge salè niw diyà te etuvangan te Nengazen he Megbevayè niw.
LEV 23:29 Is kenà ebpuasa zutun he andew ne kenè niw en isipa he zuma niw.
LEV 23:30 Edhimetayan te Nengazen is minsan hentei he edterebahu keniyan he andew.
LEV 23:31 Umbe, himeley kew wey puasa kew puun te kedsanlep te andew te ikesiyew he andew te haazà he vulan taman te sunud he kedsanlep te andew. Kinahanglan he tumana niw heini he sulunuzen taman te huziyan he lapis te peleebuten he menge kevuwazan niw, minsan hendei kew ed-ubpà.
LEV 23:33 Dutun te ike-15 he andew te ikepitu he vulan ebpuunan is Pista te Kebaal te menge Lawig, ne silibraha niw heini seled te pitu he andew.
LEV 23:35 Dutun te egkehuna he andew kenè kew terebahu, kekenà, tiǥum kew te ked-azap te Nengazen.
LEV 23:36 Seled te pitu he andew ebpemuhat kew ziyà te Nengazen te pemuhat pinaaǥi te hapuy. Ne ikewalu he andew kenè kew en maan terebahu, kekenà, tiǥum kew en maan te ked-azap te Nengazen, ne pemuhata niw sikandin. Ketepusan heini he andew te kedtiǥum niw.
LEV 23:37 Iyan heini ispisyal he menge timpu he zutun edtiǥum kew te ked-azap te Nengazen wey kebpemuhat te menge pemuhat pinaaǥi te hapuy. Kinahanglan he uwit kew te menge pemuhat he edtutungen, pemuhat he para gasa, pemuhat he para te meupiya he kedepità, wey menge pemuhat he inumen, he kinahanglan he ibpemuhat niw zutun te netendek he timpu te kebpemuhata kayi.
LEV 23:38 Silibraha niw heini is ispisyal he menge timpu he ebpekeuman te Andew te Kedhimeley he ebeelan niw kada simana. Wey ipemuhat niw heini he menge pemuhat he ebpekeuman te menge gasa niw, menge pemuhat he para te kedtuman te menge penaad niw, wey menge pemuhat he kineugelingen he suat he ibpemuhat niw ziyà te Nengazen.
LEV 23:39 Emun mehitenged te Pista te Kebaal te menge Lawig, ne silibraha niw heini he para te kebeǥey te zengeg diyà te Nengazen puun te ike-15 he andew te ikepitu he vulan, dutun te tevas. Silibraha niw heini seled te pitu he andew; kenè kew medterebahu zutun te egkehuna he andew wey ikewalu he andew.
LEV 23:40 Dutun te egkehuna he andew kuwa kew te kineupiyahan he menge veǥas te menge kayu, menge zahun te palma, menge subpang te merapung he menge kayu, wey dezeisey he kayu ziyà te pangpang, ne medlipey kew ziyà te etuvangan te Nengazen he Megbevayè niw seled te pitu he andew.
LEV 23:41 Silibraha niw heini he pista ziyà te ikepitu he vulan kada tuig para te kebeǥey te zengeg diyà te Nengazen. Seled te pitu he andew, ubpè kew ziyà te menge lawig su wey metueni te menge kevuwazan niw he impeubpà te Nengazen he Megbevayè niw is menge kepuun niw ziyà te menge lawig hein impeǥawas din sikandan puun te Ehipto. Heini he sulunuzen, ne kinahanglan he tumana niw taman te huziyan he lapis te menge kevuwazan niw.
LEV 23:44 Iyan haazà sikan is ispisyal he menge timpu te ked-ezap te Nengazen he impetuenan ni Moises te menge Israilihanen.
LEV 24:1 Midsuǥù te Nengazen si Moises he ipetuman din heini te menge Israilihanen: Uwiti niw te lunsey he lana te mibevayu he ulibu is menge sulù diyà te ǥawas te ruǥu he zutun is selevukà te Kavan te Kebpekid-uyun dutun te Tulda he Edtelevukaayan, su para kenà meengked is kedsiǥa kayi ziyà te etuvangan te Nengazen. Emun ebmerusirem en, edtemteman heini ni Aaron ne ibpesiǥa taman te egkepawà. Edsigureduwen din he pirmeninti is kedsiǥa te menge sulù diyà te impehitindeg he selevukà duen he lunsey he vulawan. Heini he sulunuzen, kinahanglan he tumana niw taman te huziyan he lapis te menge kevuwazan.
LEV 24:5 Baal kew te 12 he vuuk he supas, he is kada sevaha mibeelan puun te heepat he kilu he meupiya he kelasi te herina.
LEV 24:6 Isavuk niw heini ziyà te lemisahan he lunsey he vulawan he ziyà te etuvangan te Nengazen. Ilinya niw heini te zezuwa he linya he tig-enem he supas is diyà te kada linya.
LEV 24:7 Ne sevuki niw te lunsey he veyewà is avey te kada linya. Haazà is beyewà, iyan egkehimu he pemuhat he para te kedtentenuzi te Nengazen. Edtutungen heini he iyan pemuhat pinaaǥi te hapuy he ilis duen te menge supas.
LEV 24:8 Kinahanglan he layun idsavuk heini is menge supas diyà te etuvangan te Nengazen kada Andew te Kedhimeley. Ketengdanan niw heini te menge Israilihanen taman te taman.
LEV 24:9 Heini he menge supas, ne para ki Aaron wey te menge kevuwazan din. Egkeenen dan heini ziyà te segradu he lugar zutun te Tulda, tenged te utew heini segradu he vahin te menge pemuhat. Ne para heini kandan taman te taman.
LEV 24:10 Duen sevaha he etew he is amey zin Ehiptohanen ne is iney zin Israilihanen. (Is ngazan te iney zin iyan si Shelomit, he anak ni Dibri te ebpuun diyà te tribu ni Dan.) Nekidtebek heini he etew te sevaha he Israilihanen diyà te kampu, ne midsumpalit din is ngazan te Nengazen. Umbe mid-uwit dan haazà diyà te ki Moises,
LEV 24:12 ne mibpirisu zan haazà taman te egketuenan dan ke hengkey is egkesuatan te Nengazen mehitenged dutun he etew.
LEV 24:13 Ne migkaǥi is Nengazen diyà te ki Moises te,
LEV 24:14 “Uwita niw ziyà te ǥawas te kampu sikan is etew he midsumpalit kedì. Is langun he nekezineg te kedsumpalit din ne izampè dan is belad dan diyà te ulu zin he tuus te zuen din televaken, ne kegkepasad ne ebpenulengen sikandin te vatu te tivuuk he menge Israilihanen.
LEV 24:15 Ne keǥiyi nu is menge Israilihanen he minsan hentei kandan wey is kenà menge Israilihanen he mid-ubpà duma kandan he edsumpalit kediey wey ebpendezeisey te ngazan ku, ne zuen din televaken. Kinahanglan he ebpenulengen sikandin te vatu te tivuuk he kezekelan taman te ebpatey.”
LEV 24:17 “Is minsan hentei he ebpekepatey te etew, kinahanglan he edhimetayan daan.
LEV 24:18 Is etew he ebpekepatey te uyaǥen te zuma kinahanglan he ed-ilisan din haazà. Uuyag daan is iliwan din su uuyag man sikan is midhimetayan din.
LEV 24:19 Emun ebpekevaal te mezaat is sevaha he etew ziyà te iring din he etew ne ebeelan daan diyà te kandin is iring te mibeelan din: Emun midlepuan din is sengeeetew ne edlepuan daan sikandin, emun midluǥit din is mata te zuma ne edluǥiten daan is kandin he mata, emun midsepuan din te ngipen is duma ne edsepuan daan sikandin te ngipen.
LEV 24:21 Is minsan hentei he ebpekepatey te uyaǥen kinahanglan he ed-ilisan din heini, piru is ebpekepatey te etew ne kinahanglan he edhimetayan daan.
LEV 24:22 Heini he velaud ne para keniyu te langun, he tutuu he Israilihanen etawa kenà. Iyan a kes Nengazen he Megbevayè niw.”
LEV 24:23 Hein nepasad ni Moises heini te egkaǥi ziyà te menge Israilihanen ne mid-uwit dan sikan is etew he midsumpalit din is Megbevayà diyà te ǥawas te kampu ne mibpenuleng dan te vatu, sumalà te insuǥù te Nengazen ki Moises.
LEV 25:1 Hein diyè en si Moises te Buntud he Sinai, midsuǥù sikandin te Nengazen
LEV 25:2 he keǥiya zin heini ziyà te menge Israilihanen: Emun ebpekeuma kew en duen te tanà he ibeǥey ku keniyu, kenè niw pemulai is tanà te kada ikepitu he tuig su wey a keniyu meveǥayi te zengeg.
LEV 25:3 Seled te heenem he tuig ne ebpekepemula kew wey ebpekeraǥun. Piru te ikepitu he tuig ne kinahanglan he ibpehimeley niw is tanà. Kenè niw pemulai is menge vevesukè niw ne kenè niw zaan penempezi te menge subpang is menge paras niw.
LEV 25:5 Ne kenè niw zaan reǥuna wey kenè niw ivelegyà is menge pungu etawa menge veǥas te menge pinemula he nenuvù dà.
LEV 25:6 Piru egkehimu heini he egkeenen niw zuma te menge suluǥuen niw, menge terebahanti niw, wey te kenà menge Israilihanen he mid-ubpà duma keniyu,
LEV 25:7 te menge uyaǥen niw, wey te leew he menge langgam he zutun te tanè niw.
LEV 25:8 Dutun te kada ike-49 he tuig, te ikesepulù he andew te ikepitu he vulan he iyan kes Andew te Kebelukas te menge etew tenged te menge salè dan, ipezaǥing niw is menge vudyung diyà te tivuuk he lugar niw.
LEV 25:10 Pekeveǥata niw is ike-50 he tuig, su timpu heini te kebeǥey te vayàbayà diyà te menge uripen su wey zan mekelikù en diyà te pemilya zan wey te ked-ulì diyà te teǥiǥaked te menge azen he ingkevelegyè din.
LEV 25:11 Kayi he Tuig te Kebeǥey te Bayàbayà wey Ked-ulì, kenè kew pemula wey kenè kew zaan raǥun; kenè kew penrupù te menge veǥas te ulì, piru egkehimu he ebpenguwa kew para te egkeenen niw. Segradu heini he tuig para keniyu.
LEV 25:13 Kayi he tuig is azen he imbelegyà diyà te keniyu iulì niw ziyà te mibelegyà duen.
LEV 25:14 Umbe, emun ebelegyè kew etawa ebpemasa kew te tanà te zuma niw he meǥinged, kenè kew pelimlimbungà.
LEV 25:15 Kinahanglan he is bali te tanà ibasi ziyà te nesamà he menge tuig he zutun ebpekeraǥun pa is nemasa su kenè pa egkeuma is Tuig te Kebeǥey te Bayàbayà wey Ked-ulì te menge azen.
LEV 25:16 Emun mahabet pa is menge tuig ne human egkeuma is Tuig te Kebeǥey te Bayàbayà wey Ked-ulì ne mahala niw is bali te tanà, iyan, emun hapit en egkeuma haazà ne veretuwa niw zà. Su is tutuu, kenà tanà is ebpemesahan, kekenà, iyan is kahabet te egkeraǥun puun dutun te tanà.
LEV 25:17 Kenè kew mebpelimlimbungà, kekenà, tehuza a keniyu, is Nengazen he Megbevayè niw.
LEV 25:18 Tumana niw is menge sulunuzen he ibpesunud ku wey menge suǥù su wey kew mekepengungubpaan he melinawen dutun te tanà he ed-ubpaan niw ne kenè kew egkeewaan te keenen tenged te kezekelà te menge abut niw puun te tanà.
LEV 25:20 Kenè kew meseeng ke hengkey is egkekaan niw zutun te ikepitu he tuig he kenè kew ebpekepemula wey ebpekeraǥun.
LEV 25:21 Su edtuvazan ku is tanè niw zutun te ikeenem he tuig para zekelà is egkeraǥun puun duen ne ebpekesustinir te tetelu he tuig.
LEV 25:22 Ne zutun te kebpemula niw te ikewalu he tuig, ne kemulu niw pa egkeena is neraǥun niw zutun te ikeenem he tuig, ne zekelè pa is keenen niw taman te tiraǥun te ikesiyam he tuig.
LEV 25:23 Kenè kew pekid-uyun he kenè niw en ibpahawì te minsan keenu is tanà he imbelegyà diyà te keniyu su heini he tanà kediey; ebpeubpaan ku zà wey ebpeseupan ku zà heini keniyu.
LEV 25:24 Umbe, ituǥut niw he mahawì te teǥiǥaked is tanè din puun keniyu. Beeli niw heini ziyà te langun he tanà he nepemasa niw.
LEV 25:25 Emun nepubri is duma niw he Israilihanen, he tenged dutun ingkevelegyè din is tanè din, is megeget he kezuzumahi zin iyan medlekat dutun.
LEV 25:26 Piru emun wazè din kezuzumahi he edlekat dutun para kandin, egkehimu ǥihapun he egkahawì din heini emun nekaamuy en sikandin te pelata he idlekat kayi.
LEV 25:27 Emun egkehitavù heini, ne veyazi zin is nekepemasa te tanè din te vali he ibasi te kahabet te kedraǥun puun dutun te tanà taman te egkeuma is Tuig te Kebeǥey te Bayàbayà wey Ked-ulì te azen, he egkehimu en he egkahawì din is tanè din.
LEV 25:28 Iyan, emun kenè pa ereg is idlekat din, ne kenè din pa haazà egkekuwa puun te nemasa taman te kegkeuma te Tuig te Kebeǥey te Bayàbayà wey Ked-ulì. Dutun he tuig egkahawì din en is tanè din he wazà bayad.
LEV 25:29 Emun is sevaha he etew ebelegyà te valey zin he ziyà te inged he neliǥuy te verengbeng, egkehimu pa ke edlekaten din heini seled te senge-tuig, puun te timpu te kebelegyè din.
LEV 25:30 Piru emun kenè din heini egkelekat seled te senge-tuig, ne haazà he valey egkehimu en he ǥaked te nekepemasa zuen wey te menge kevuwazan din taman te taman. Kenè en heini egkahawì te teǥiǥaked dutun te Tuig te Kebeǥey te Bayàbayà wey Ked-ulì.
LEV 25:31 Piru is menge valey ziyà te zezeisey he menge inged he wazè din berengbeng iring heini te vevesukà, he egkehimu he edlekaten wey egkahawì dutun te tuig te Kebeǥey te Bayàbayà wey Ked-ulì.
LEV 25:32 Is menge kevuwazan ni Levi egkehimu he edlekat minsan keenu te menge valey zan he ziyà te menge inged he ǥaked dan.
LEV 25:33 Emun kenè dan heini egkelekat, id-ulì heini ziyà te kandan dutun te Tuig te Kebeǥey te Bayàbayà wey Ked-ulì. Su is baley ziyà te menge inged dan kandan he vahin puun te zuma zan he menge Israilihanen.
LEV 25:34 Piru is menge penebtavà he uvey te menge inged dan kinahanglan he kenà ibelegyà, su kandan haazà he azen taman te taman.
LEV 25:35 Emun nepubri is duma niw he Israilihanen ne kenè en sikandin ebpekegaga he edsupurtar te keugelingen din, tevangi niw sikandin iring te kedtavang niw te langyew etawa meǥeliyug, su wey meuyag-uyag sikandin duma keniyu.
LEV 25:36 Ipesambey niw sikandin te selapì he kenà ibpetuvù, wey velegyai niw te keenen he kenè kew en egenansya, su wey sikandin meuyag-uyag. Beeli niw heeyan he paaǥi te kebpekilala te kedtehuza niw kedì te Megbevayè niw.
LEV 25:38 Iyan a kes Nengazen he Megbevayè niw he mibpeǥawas keniyu puun te Ehipto su wey ku ikeveǥey keniyu is tanà te Canaan ne wey a mehimu he Megbevayè niw.
LEV 25:39 Emun nepubri is duma niw he Israilihanen, he tenged dutun ingkevelegyè din diyà te keniyu is keugelingen din pinaaǥi te kebpeuripen, kenè niw sikandin ibpeterebahu he iring te uripen.
LEV 25:40 Isipa niw sikandin he sevaha he sinuhulan he terebahanti etawa meǥeliyug he mid-ubpè dà duma keniyu. Edterebahu sikandin diyà te keniyu taman te egkeuma is Tuig te Kebeǥey te Bayàbayà wey Ked-ulì.
LEV 25:41 Dutun he tuig ebpekevayèbayè en sikandin wey is menge anak din, ne ebpekelikù en sikandan diyà te menge kezuzumahi zan ne egkeuman dan en maan egkaangken is menge azen te menge kepuun dan.
LEV 25:42 Menge uripen ku sikiyu is menge Israilihanen he impeǥawas ku puun te Ehipto. Umbe kenè niw ivelegyà is keugelingen niw pinaaǥi te kebpeuripen.
LEV 25:43 Kenè niw dèdaaǥa is iring niw he Israilihanen he mibpeuripen keniyu. Beeli niw heeyan te kebpekilala he edtehuzen a keniyu is Megbevayè niw.
LEV 25:44 Emun egkesuat kew he zuen niw menge uripen, ne pemasa kew ziyà te menge nasyun diyà te peliǥuy niw.
LEV 25:45 Egkehimu zaan ke ziyè kew ebpemasa te emurè niw te inged he kenà menge Israilihanen he mid-ubpà duma keniyu etawa ziyà te sakup te pemilya zan he neetew ziyà te keniyu he lugar. Is menge uripen he egkepemasa niw ziyà te kandan egkehimu en he azen niw,
LEV 25:46 ne egkehimu ke ibpepengevilin niw te menge anak niw, ebpekepenilbi sikandan kandan seled te tivuuk he untung dan. Piru kenè niw dèdaaǥa is iring niw he Israilihanen he nehimu he uripen niw.
LEV 25:47 Emun imbelegyà te sevaha he pubri he Israilihanen is keugelingen din pinaaǥi te kebpeuripen te emurù niw te inged he sepian he kenà Israilihanen etawa kezuzumahi zutun te kenè Israilihanen,
LEV 25:48 ne heeyan he Israilihanen egkehimu pa he edlekaten. Egkehimu sikandin he edlekaten te suled din,
LEV 25:49 anggam din, id-aǥew zin, etawa minsan hentei he megeget he kezuzumahi zin. Egkehimu zaan ke iyan mismu sikandin edlekat te keugelingen din emun ebpekevaug sikandin.
LEV 25:50 Is ereg he ebeelan din, ne belensiya zin duma te nekepemasa kandin ke pira en he tuig is kebpenilbi zin wey pira is ereg he ibayad kayi emun ebeyazan sikandin te iring te edhimuwen diyà te sevaha he sinuhulan he terebahanti. Ne itarin din dutun te kentidad is imbayad kandin dutun te kebpemesaha kandin he uripen. (Haazà he kentidad ibasi ziyà te kahabet te menge tuig puun te kebpemesaha kandin taman te Tuig te Kebeǥey te Bayàbayà wey Ked-ulì.) Ne ke pira is egkesamà, ne iyan haazà ebeyazan din para mevelukasi sikandin.
LEV 25:53 Kinahanglan he ed-isipen sikandin te nemasa kandin he sevaha he sinuhulan he terebahanti ne kenè din dèdaaǥa.
LEV 25:54 Emun kenà sikandin egkelekat te iring kayi he paaǥi, egkelibri ǥihapun sikandin wey is menge anak din dutun te Tuig te Kebeǥey te Bayàbayà wey Ked-ulì.
LEV 25:55 Umbe, wazà keniyu egkeuripen taman te taman, su menge uripen ku sikiyu, sikiyu is imbpeǥawas ku puun te Ehipto. Iyan a kes Nengazen he Megbevayè niw.
LEV 26:1 Kenè kew mebaal te menge ed-ezapen iring te ledawan, tedeman he vatu, etawa mibpurma he vatu, he ed-ezapen niw, su iyan a is Nengazen Megbevayè niw.
LEV 26:2 Tumana niw is ebpeveelan ku keniyu zutun te Andew te Kedhimeley wey tehuza niw is lugar he zutun a keniyu ed-ezapa. Iyan a kes Nengazen.
LEV 26:3 Emun edtumanen niw is menge sulunuzen he ibpesunud ku wey menge suǥù ku,
LEV 26:4 ebpeuzanan ku sikiyu zutun te hustu he timpu su wey mebeǥey te sebpet is tanà ne ebpekepemeǥas is menge kayu.
LEV 26:5 Egkehimu he utew zekelà is sebpet niw ne minsan is timpu te kegunas niw te menge pungu ebpekeuma pa taman te kebpenrupù te beǥas te menge paras, ne is timpu te kebpenrupù niw te beǥas te paras ebpekeuma pa te timpu te kebpemula niw. Umbe ebpekevayèbayè kew te kegkaan niw ne ebpekepengungubpaan kew pa he melinawen diyà te lugar niw.
LEV 26:6 Edhimuwen ku he melinew is lugar niw, umbe ebpekelipezeng kew he wazè niw igkahandek. Edsegseǥen ku is dumezaas he menge langgam, wey wazà menge kuntada he edsurung keniyu.
LEV 26:7 Iyan kew edsurung te menge kuntada niw ne ebpenhimetayan niw sikandan.
LEV 26:8 Is 5 keniyu ebpekezaag te 100 ne is 100 keniyu ebpekezaag te 10,000.
LEV 26:9 Ed-eturen ku sikiyu ne ebeǥayan ku te mahabet he menge kevuwazan su wey ku metuman is kebpekid-uyun ku keniyu.
LEV 26:10 Tenged te kezekelà te menge abut niw, kenè niw pa egkaamin te egkaan is egkehuna he menge abut niw, ne igkaawà niw zà heini ziyà te midteǥuan niw zuen su ed-ilisan niw te veǥu he sebpet.
LEV 26:11 Ed-ubpà a zuma keniyu ne kenè ku sikiyu idselikwey.
LEV 26:12 Eduma a keniyu ne iyan a egkehimu he Megbevayè niw ne ebpedayun is kegkehimu niw he menge etew ku.
LEV 26:13 Iyan a kes Nengazen he Megbevayè niw he mibpeǥawas keniyu puun te Ehipto su wey kew kenè en meuripen te menge Ehiptohanen. Mibeǥayan ku en sikiyu te vayàbayà umbe wazè en ereg he igkeeled niw.
LEV 26:14 Piru emun kenè kew ebpemineg kedì etawa kenè kew edtuman te langun he menge suǥù ku wey menge sulunuzen, ne tenged kayi egkesupak niw is kebpekid-uyun ku keniyu,
LEV 26:16 iyan heini ebeelan ku keniyu: Egketeranta kew te kegkahandek su ebpeeǥiyan ku sikiyu te menge zaru he kenà egkeulian wey dateng he ebpekezezaat te menge mata niw wey menge lawa niw. Ebpemula kew ne kenà heini ebpulus diyà te keniyu su edsurungen kew te menge kuntada niw ne egkeenen dan is menge abut niw.
LEV 26:17 Egkuntedahan ku sikiyu para mezaag kew te menge kuntada niw ne iyan sikandan edumala keniyu. Tenged te kegketeranta niw ne ebpelaǥuy kew minsan wazà edal-as keniyu.
LEV 26:18 Ne emun kenè kew pa ebpemineg kediey, ne edsilutan ku sikiyu te kepipitu edtekepa.
LEV 26:19 Edhimuwen ku he kenà medlampus is gehem he ibpahambug niw; ne kenè ku sikiyu ebpeuzanan, umbe ebpurung ebadtik is menge tanè niw.
LEV 26:20 Egkehimu he wazà pulus te menge kedhaǥù niw, su is menge tanè niw, kenà ebeǥey te sebpet ne is menge kayu niw ne kenà ebpemeǥas.
LEV 26:21 Emun ebpedayun kew pa ǥihapun he edsupak kediey su kenè kew ebpemineg kediey, ed-umanan ku pa te kepipitu en maan egketakep he silut keniyu.
LEV 26:22 Edsuǥuen ku ziyà te keniyu is dumezaas he menge langgam ne ebpenhimetayan dan is menge anak niw wey menge uyaǥen niw, ne tenged kayi zeisey zà is egkesamà keniyu he henduen be te wazè en edhiphipanew ziyà te menge zalan niw.
LEV 26:23 Ne emun kenè kew pa ǥihapun ebpemineg kediey, su ebpedayun kew hinuun te kedsupak kedì,
LEV 26:24 iyan a mismu egkuntra keniyu ne ebpurungan ku sikiyu edsiluti.
LEV 26:25 Ibpesurung ku sikiyu te menge kuntada niw he iyan silut niw tenged te kedsupak niw te kebpekid-uyun ku keniyu. Minsan med-eles kew pa ziyà te inged niw ebpeeǥiyan ku ǥihapun sikiyu te menge kemeresayan, ne tenged dutun egkepeǥes kew he ebpezizalem te gehem te menge kuntada niw.
LEV 26:26 Egkurang is keenen niw, umbe sevaha zà he evuwan is egemiten te sepulù he vahi te kedlutù te supas, ne ebevehinen dan pa heini para keniyu. Uya, ebpekekaan kew piru kenè kew egkahantey.
LEV 26:27 Ne emun kenè kew pa ǥihapun ebpemineg kediey su ebpedayun kew hinuun te kedsupak kedì,
LEV 26:28 ne tenged te pauk ku egkuntrahan ku sikiyu ne edsilutan ku sikiyu te pitu pa maan he takep.
LEV 26:29 Ebpeeǥiyan ku sikiyu te vitil ne egkepeǥes kew he egkaan te keugelingen niw he menge anak.
LEV 26:30 Edrundusen ku is menge simbahan niw ziyà te metikang he menge lugar ragkes is menge pemuhatà he tutungà te veyewà. Ne idtimbag ku sikiyu is ebpematey ziyà te zivavew te kenà egeǥehinawa he menge ed-ezapen, ne idselikwey ku sikiyu.
LEV 26:31 Ebengkaǥen ku is menge inged niw wey menge simbahan niw, ne kenà ebpekepenunuat kedì is hemut te menge pemuhat niw.
LEV 26:32 Ebengkaǥen ku is lugar niw ne egkeinuinu zà is menge kuntada niw he edsakup kayi.
LEV 26:33 Ebpeeǥiyan ku sikiyu te tebek he edezaat te tanè niw ragkes en is menge inged kayi, ne ibpeyapat ku sikiyu ziyà te zuma he menge nasyun, ne egkehimu he mekevulungbulung is tanè niw.
LEV 26:34 Dutun te menge vihag kew ziyà te lugar te menge kuntada niw ne egkevengkag is lugar niw, ne ebpekehimeley is tanè niw. Su zutun te ed-ubpè kew pa zutun te tanè niw ne wazè niw heini ipehimeley minsan dutun te tuig te kebpehimelaya te tanà. Piru zutun he timpu human en heini ebpekehimeley zutun te wazè en kayi ed-ubpa.
LEV 26:36 Sikiyu is egkengesamà te tebek he ed-uwiten te menge kuntada niw ziyà te kandan he menge lugar, edterenteduwen ku, ne minsan daǥing dà te menge zahun he egkeremaǥen ebpemelaǥuy kew en he henduen be te edel-asen te edhimatey keniyu, minsan wazà edal-as keniyu. Ne ebpekedsusukung kew is egkengepiley. Umbe kenè kew ebpekesukul te menge kuntada niw.
LEV 26:38 Ebpematey kew ziyà te lugar te menge kuntada niw.
LEV 26:39 Is egkesamà keniyu ednaneynaney ebpematey tenged te menge salè niw wey te menge salà te menge kepuun niw.
LEV 26:40 Tenged te kedluivi wey kedsupaka niw kediey egkuntedahan ku sikiyu ne ibpevihag ku pehendiyà te lugar te menge kuntada niw. Iyan, emun ed-engkezan niw is menge salè niw wey menge salà te menge kepuun niw wey ed-engkezan niw en is ke bmesinupaken niw, wey edewaten niw is silut tenged te menge salè niw,
LEV 26:42 edtumanen ku is kebpekid-uyun ku te menge kepuun niw he si Abraham, si Isaac, wey si Jacob ne idlikù ku sikiyu ziyà te tanè niw.
LEV 26:43 Piru kinahanglan he ibpaawè ku zèpa sikiyu puun te tanè niw he iyan bayad niw te menge salè niw, tenged te kedselikwaya niw te menge suǥù ku wey menge sulunuzen he ibpesunud ku. Ne ebpekehimeley is tanà dutun te egkeewaan niw.
LEV 26:44 Piru minsan edsilutan ku sikiyu, ne kenè ku sikiyu idselikwey ziyà te lugar te menge kuntada niw; kenè ku sikiyu edezeetan he wazè en egkesamà keniyu. Ne kenà egkehimu he id-awè ku is kebpekid-uyun ku keniyu, su iyan a is Nengazen Megbevayè niw.
LEV 26:45 Edtumanen ku ziyà te keniyu is kebpekid-uyun ku te menge kepuun niw he impeǥawas ku puun te Ehipto su impeehè ku ziyà te menge nasyun is gehem ku. Mibeelan ku heini ziyà te menge kepuun niw su para siak is Nengazen mehimu he Megbevayè dan. Iyan a kes Nengazen.
LEV 26:46 Iyan heeyan sikan is nekedseselekawà he menge suǥù wey menge sulunuzen he imbeǥey te Nengazen diyà te menge Israilihanen diyà te Buntud he Sinai pinaaǥi ki Moises.
LEV 27:1 Midsuǥù te Nengazen si Moises
LEV 27:2 he keǥiya zin heini ziyà te menge Israilihanen: Emun is sevaha he etew inhalad diyà te Nengazen su ingkepenaad he idhalad, heeyan he penaad
LEV 27:3 emun ebeyazan is bali zin te ziyà ibasi is keveǥat din te timbangan he egemiten te menge memumuhat: is ebpenuiǥen te senge vulan pehendiyà te heepat he tuig maama: 5 he vuuk he pelata bahi: 3 he vuuk he pelata is ebpenuiǥen te 5 he tuig pehendiyà te 19 maama: 20 he vuuk he pelata bahi, 10 he vuuk he pelata is ebpenuiǥen te 20 he tuig pehendiyà te 59 maama: 50 he vuuk he pelata bahi: 30 he vuuk he pelata is ebpenuiǥen te 60 he tuig pehendiyà te metikang maama: 15 he vuuk he pelata bahi: 10 he vuuk he pelata.
LEV 27:8 Emun pubri is nekepenaad ne kenà sikandin ebpekevaug he ebayad dutun he kentidad, ne uwita zin diyà te memumuhat sikan is etew he impenaad din he idhalad din diyà te Nengazen, ne iyan egkaǥi haazà is memumuhat te vali he egkevaug dutun te etew te ebayad.
LEV 27:9 Emun iyan impenaad din is uyaǥen he egkehimu he ibpemuhat diyà te Nengazen, heeyan he uyaǥen egkehimu en he gaked te Nengazen.
LEV 27:10 Kinahanglan he kenè din en heini liwai te selakew en he uyaǥen, minsan pa ke edhuna he meupiya is idliwà etawa edliwaan. Emun ebeelan din heini ne sikan is uyaǥen he impenaad din wey sikan is uyaǥen he idliwè din ne pudu egkehimu he ǥaked te Nengazen.
LEV 27:11 Emun iyan impenaad din is meremerik he uyaǥen he kenà egkehimu he ibpemuhat diyà te Nengazen, ne uwita zin diyà te memumuhat haazà is uyaǥen.
LEV 27:12 Ne edsusiyen heini zutun te memumuhat ke meupiya ve wey ke kenà, ne ebeliyan din heini te vali he kenè en egkahalinhalin.
LEV 27:13 Emun edhewien dutun te teǥiǥaked haazà is uyaǥen kinahanglan he ebeyazan din haazà is prisyu te uyaǥen ne umani zin pa te 20 pursintu is bali kayi.
LEV 27:14 Emun inhalad te etew is baley zin diyà te Nengazen, ne edsusiyen te memumuhat haazà is baley ke meupiya pe be wey ke kenè en, ne ebeliyan din heini te vali he kenè en egkahalinhalin.
LEV 27:15 Emun edhewien te teǥiǥaked haazà is baley, kinahanglan he ebeyazan din is prisyu zutun te valey ne umani zin pa te 20 pursintu is bali kayi. Ne idlikù diyà te kandin haazà is baley.
LEV 27:16 Emun inhalad te etew ziyà te Nengazen is bahin te tanè din he nepengevilin din puun te menge kepuun din, ebeliyan heini te memumuhat te vali he ibpesikad te kezekelà te venì he igkepemula zutun te tanà: is kada egkepemulaan te liwazà te saku he venì ne iyan bali zin is 20 he vuuk he pelata.
LEV 27:17 Emun inhalad din is bevesukè din dutun te sikan pa meipus is Tuig te Kebeǥey te Bayàbayà wey Ked-ulì, is bali kayi ne iyan ded.
LEV 27:18 Iyan emun neuǥet en is kegkeliwas dutun he tuig ne human din heini ihalad, ebeliyan heini te memumuhat te vali he mevavà dutun, sumalà te kahabet te menge tuig he nesamà he egkeume en maan is Tuig te Kebeǥey te Bayàbayà wey Ked-ulì.
LEV 27:19 Emun edhewien te teǥiǥaked haazà is bevesukè din, kinahanglan he ebeyazan din is bali kayi te vevesukà ne umani zin pa te 20 pursintu haazà is bali kayi. Ne id-uli diyà te kandin haazà is bevesukà.
LEV 27:20 Iyan, emun ibelegyè din haazà is bevesukà dutun te wazè din pa melekat, ne kenè din en haazà egkahawì.
LEV 27:21 Ne emun egkeume en maan is Tuig te Kebeǥey te Bayàbayà wey Ked-ulì, ne ǥaked en heini te Nengazen ne kenè en heini egkahawì, egkehimu en heini he azen te menge memumuhat.
LEV 27:22 Emun inhalad te etew is bevesukà he nepemasa zin,
LEV 27:23 ne ebeliyan heini te memumuhat te vali he ibasi ziyà te kahabet te menge tuig he human egkeuma is Tuig te Kebeǥey te Bayàbayà wey Ked-ulì. Kinahanglan he segugunà heini edlekata. Is bayad he idlekat din kayi gaked en te Nengazen.
LEV 27:24 Dutun he Tuig te Kebeǥey te Bayàbayà wey Ked-ulì, haazà he tanà id-ulì diyà te teǥiǥaked he mibelegyà duen.
LEV 27:25 Is langun he prisyu te menge inhalad diyà te Nengazen kinahanglan he ziyà ibpesikad te keveǥat te pelata ziyà te timbangan he egemiten te menge memumuhat.
LEV 27:26 Is egkehuna he anak te uyaǥen ne ǥaked te Nengazen, umbe kenè en heini kinahanglan he idhalad diyà te kandin su zaan he kandin.
LEV 27:27 Emun meremerik haazà he uyaǥen, ne egkehimu he edlekaten te teǥiǥaked. Beyazi zin is bali zutun te uyaǥen ne umani zin pa haazà is bali zin te 20 pursintu. Ne emun kenè din heini edlekaten ne ibelegyà heini te menge memumuhat sumalà te imbali kayi.
LEV 27:28 Kenà egkehimu he ibelegyà etawa edlekaten is minsan hengkey he azen he kenè en duwazuwa is kedhelaza zuen diyà te Nengazen, etew man etawa uyaǥen etawa tanà he nepengevilin. Gaked en heini he Nengazen.
LEV 27:29 Is etew he kenà duwazuwa is kedhelaza zuen diyà te Nengazen kenà egkehimu he edhewien. Kinahanglan heini he edhimetayan.
LEV 27:30 Is ikesepulù he vahin te langun he menge sebpet, ne ǥaked te Nengazen
LEV 27:31 emun edhewien te etew is ikesepulù he vahin te sebpet, kinahanglan he ebeyazan din is bali kayi ne umani zin pa haazà is bali te 20 pursintu.
LEV 27:32 Emun ebilang kew te vaka niw, kerehidu niw, etawa kambing niw, is ikesepulù kayi iveǥey niw ziyà te Nengazen.
LEV 27:33 Kinahanglan he kenè niw heini pilia etawa liwai. Emun edliwaan niw heini, ne haazà is uyaǥen he edliwaan niw wey haazà is idliwè niw, ne pudu egkehimu he ǥaked te Nengazen ne kenè en heini egkehimu he edhewien.
LEV 27:34 Iyan heeyan menge suǥù he imbeǥey te Nengazen ki Moises diyà te Buntud he Sinai he para te menge Israilihanen.
NUM 1:1 Hein nehuna he andew te ikezuwa he vulan, dutun te ikezuwa he tuig te ked-awà te menge Israilihanen diyà te Ehipto, migkaǥi is Nengazen diyà te ki Moises diyà te Tulda he Edtelevukaayan he ziyà te sibsivayan he Sinai te,
NUM 1:2 “Sinsusa niw is kada kezuzumahi wey pemilya te tivuuk he keet-etawan te Israel. Ilista niw is menge ngazan te langun he menge maama
NUM 1:3 he ebpenuiǥen te 20 he tuig pehendiyà te metikang he egkehimu en he edsunderuwen. Iyan kew ki Aaron dumala te kedsinsus ne peuǥup kew te pengulu te kada tribu.”
NUM 1:5 Iyan heini menge pengulu te kada tribu he ebpekeuǥup keniyu: Ngazan te Tribu; Ngazan te Pengulu Reuben; Elizur he anak ni Shedeur Simeon; Shelumiel he anak ni Zurishadai Juda; Nashon he anak ni Aminadab Isacar; Netanel he anak ni Zuar Zebulun; Eliab he anak ni Helon Efraim he anak ni Jose; Elishama he anak ni Amihud Manase he anak ni Jose; Gamaliel he anak ni Pedazur Benjamin; Abidan he anak ni Gideoni Dan; Ahiezer he anak ni Amishadai Asher; Pagiel he anak ni Ocran Gad; Eliasaf he anak ni Deuel Naftali; Ahira he anak ni Enan
NUM 1:16 Iyan haazà sikandan menge pengulu ziyà te menge tribu he nengepilì puun te menge Israilihanen.
NUM 1:17 Ne impetiǥum ni Moises wey ni Aaron duma kayi te menge pengulu is langun he menge Israilihanen dutun mismu he andew. Impenlista zan is langun he menge maama he ebpenuiǥen te 20 pehendiyà te metikang sumalà te kada kezuzumahi wey is menge pemilya zutun.
NUM 1:19 Mibeelan ni Moises heini is kebpenlista ziyà te sibsivayan he Sinai, su iyan haazà insuǥù te Nengazen.
NUM 1:20 Iyan heini kezakel te menge maama he 20 he tuig is keǥurang dan pehendiyà te metikang he egkehimu en he edsunderuwen, he ingkelista ziyà te kada tribu wey pemilya: Ngazan te Tribu; Kahabet Reuben (kes kinekekayan he anak ni Jacob); 46,500 Simeon; 59,300 Gad; 45,650 Juda; 74,600 Isacar; 54,400 Zebulun; 57,400 Efraim (he anak ni Jose); 40,500 Manase (he anak ni Jose); 32,200 Benjamin; 35,400 Dan; 62,700 Asher; 41,500 Naftali; 53,400
NUM 1:44 Iyan haazà kezakel te menge maama he nevilang ni Moises wey ni Aaron wey te 12 he menge pengulu te menge Israilihanen. Is kada sevaha kandan ingkelista ziyà te listahan te tribu zan wey pemilya zan. Ebpenuiǥen sikandan te 20 pehendiyà te metikang he egkehimu en he edsunderuwen.
NUM 1:46 Is kinetivuukan te kezakel zan, 603,550 sikandan.
NUM 1:47 Wazà iragkes kayi is menge kevuwazan ni Levi.
NUM 1:48 Su migkaǥi is Nengazen diyà te ki Moises te,
NUM 1:49 “Kenè niw iragkes te edsinsus is tribu ni Levi duma te zuma he menge Israilihanen he ebpenirbisyu emun timpu te tebek.
NUM 1:50 Kekenà, iveǥey kandan he ketengdanan is kedumala zuen te Tulda he Ed-ezapan he zutun itaǥù sikan is Kesuǥuan, wey is langun he ǥelemiten kayi. Iyan sikandan ed-uwit dutun te Tulda wey te langun he ǥelemiten kayi. Kinahanglan he ed-etimanen dan heini, ne kinahanglan he ziyè dan megkampu te ebpekeliǥuy kayi.
NUM 1:51 Emun idhalin haazà is Tulda, iyan sikandan ebaal kayi, ne emun ed-umanan ebenguna heini, ne iyan dan gihapun ebangun kayi. Ne is minsan hentei he kenà kevuwazan ni Levi he ebaal kayi he vuluhaten, ne edhimetayan.
NUM 1:52 Kinahanglan he ebpeem-emurà te egkempuwan is kada tribu te menge Israilihanen, ne mebpehitindeg te bendira is kada tribu.
NUM 1:53 Piru is menge kevuwazan ni Levi, kinahanglan he ziyà megkampu te ebpekeliǥuy zuen te Tulda he midteǥuan te Kesuǥuan, su wey ku kenà mepeuki is menge etew te Israel. Ketengdanan te menge kevuwazan ni Levi is ked-atur zuen te Tulda.”
NUM 1:54 Mibeelan heini is langun te menge Israilihanen sumalà te insuǥù te Nengazen ki Moises.
NUM 2:1 Migkeǥiyan te Nengazen si Moises wey si Aaron te,
NUM 2:2 “Ipekampu niw is kada tribu te Israel ziyà te zizalem te bendira te kada tribu zan. Ne ziyà ibpelastar sikan is Tulda he Edtelevukaayan te teliwazè dan.
NUM 2:3 Is tribu ni Juda, Isacar, wey ni Zebulun diyà megkampu te zapit te edsilaan, diyà te dizalem te bendira te kada tribu zan. Iyan heini ngazan te menge pengulu zan wey kahabet te menge sakup dan: Tribu; Pengulu; Kahabet Juda; Nashon he anak ni Aminadab; 74,600 Isacar; Netanel he anak ni Zuar; 54,400 Zebulun; Eliab he anak ni Helon; 57,400
NUM 2:9 Ne 186,400 langun is kehabet kayi he grupu he ebpenguluwan te tribu ni Juda. Iyan heini sikandan grupu he edhuna emun edhipanew is menge Israilihanen.
NUM 2:10 “Is tribu ni Reuben, ni Simeon, wey ni Gad, ne ziyà megkampu te zapit te zivavà, diyà te zizalem te bendira te kada tribu zan. Iyan heini menge ngazan te menge pengulu zan wey kahabet te menge sakup dan: Tribu; Pengulu; Kahabet Reuben; Elizur he anak ni Shedeur; 46,500 Simeon; Shelumiel he anak ni Zurishadai; 59,300 Gad; Eliasaf he anak ni Deuel; 45,650
NUM 2:16 Ne 151,450 langun is kahabet kayi he grupu he ebpenguluwan te tribu ni Reuben. Iyan sikandan edtinundug te grupu ni Juda emun edhipanew is menge Israilihanen.
NUM 2:17 “Is edtinundug kandan iyan is tribu ni Levi he ed-uwit duen te Tulda he Edtelevukaayan. Is langun he tribu kinahanglan he ebpetuntunduǥà emun edhipanew sikandan, iring te kebplastar zan emun ke egkampu zan, he ziyà te dizalem te bendira he neketukid te kada tribu zan.
NUM 2:18 “Is tribu ni Efraim, Manase, wey ni Benjamin, ne ziyà megkampu te zapit te edsenlepan, diyà te zizalem te bendira te kada tribu zan. Iyan heini menge ngazan te menge pengulu zan wey kahabet te menge sakup dan: Tribu; Pengulu; Kahabet Efraim; Elishama he anak ni Amiud; 40,500 Manase; Gamaliel he anak ni Pedazur; 32,200 Benjamin; Abidan he anak ni Gideoni; 35,400
NUM 2:24 Ne 108,100 langun is kahabet kayi he grupu he ebpenguluwan te tribu ni Efraim. Edtundug sikandan te tribu ni Levi emun edhipanew is menge Israilihanen.
NUM 2:25 “Is tribu ni Dan, ni Asher, wey ni Naftali ne ziyà megkampu te zapit te zizaya, ziyà te zizalem te bendira te kada tribu zan. Iyan heini menge ngazan te menge pengulu zan wey kahabet te menge sakup dan: Tribu; Pengulu; Kahabet Dan; Ahiezer he anak ni Amishadai; 62,700 Asher; Pagiel he anak ni Ocran; 41,500 Naftali; Ahira he anak ni Enan; 53,400
NUM 2:31 Ne 157,600 langun is kahabet kayi he grupu he ebpenguluwan te tribu ni Dan. Iyan sikandan diyà te kinehuziyanan emun edhipanew is menge Israilihanen. Edhipanew zan diyà te zizalem te bendira zan he neketukid te kada tribu zan.”
NUM 2:32 Is kinetivuukan he kahabet te menge Israilihanen he ingkelista ziyà te kada tribu, 603,550 langun.
NUM 2:33 Ne wazà kayi meragkes is menge kevuwazan ni Levi, su wazà sikandan iragkes te ebilang sumalà te insuǥù te Nengazen ki Moises.
NUM 2:34 Midsunud te menge Israilihanen is langun he insuǥù te Nengazen ki Moises: is kada tribu migkampu wey midhipanew he zizalem te kada bendira te tribu zan he neketukid te kada tribu wey pemilya zan.
NUM 3:1 Iyan heini keguǥuza mehitenged te menge kevuwazan ni Aaron wey ni Moises he ingkesurat hein timpu te kebpekidlalag te Nengazen ki Moises diyà te Buntud he Sinai.
NUM 3:2 Is menge anak ni Aaron iyan ensi Nadab, Abihu, Eleazar, wey si Itamar. Iyan kakey si Nadab.
NUM 3:3 Mibpilì wey mid-urdinahan sikandan wey zan mekepenilbi pinaaǥi te kegkememumuhat.
NUM 3:4 Piru si Nadab wey si Abihu, minatey ziyà te etuvangan te Nengazen hein migamit dan te hapuy he kenà iyan sikan is hapuy he para te kebpemuhata te Nengazen hein diyè dan te sibsivayan he Sinai. Minatey sikandan he wazè dan menge anak, umbe iyan dà si Eleazar wey si Itamar nenilbi pinaaǥi te kegkememumuhat dutun te kaazen pa te amey zan he si Aaron.
NUM 3:5 Migkaǥi is Nengazen diyà te ki Moises te,
NUM 3:6 “Ipetawag nu is tribu ni Levi ne zumaha nu ziyà te ki Aaron he memumuhat su wey zan mekeuǥup kandin.
NUM 3:7 Ebpenilbi zan ki Aaron wey te langun he menge etew te Israel pinaaǥi te kebaal te menge vuluhaten diyà te Tulda he Ed-ezapan he egngezanan daan te Tulda he Edtelevukaayan.
NUM 3:8 Iyan daan sikandan ed-atur te langun he menge gelemiten duen te Tulda he Edtelevukaayan, ne ebpenilbi zan dutun te Tulda para te menge Israilihanen.
NUM 3:9 Ebpeveyveyaan ki Aaron wey ziyà te menge anak din he maama is menge kevuwazan ni Levi su wey metevangi sikandan.
NUM 3:10 Iyan, himuwa nu he memumuhat si Aaron wey is menge anak din. Is minsan hentei he ebaal te vuluhaten te memumuhat diyà te Tulda he Ed-ezapan he kenà kevuwazan ni Levi ne ereg he edhimetayan.”
NUM 3:11 Migkaǥi pa is Nengazen diyà te ki Moises te,
NUM 3:12 “Mibpilì ku is menge kevuwazan ni Levi he liwan te menge kinekekayan he anak he menge maama te menge Israilihanen. Kediey is kada kevuwazan ni Levi.
NUM 3:13 Su kediey man is langun he kinekekayan he maama kayi te Israel. Hein mibpenhimetayan ku is langun he kinekekayan he maama ziyà te Ehipto, ne intapid ku en he para kedì is langun he kinekekayan he maama kayi te Israel, etew etawa uyaǥen. Umbe ǥaked ku sikandan. Iyan a kes Nengazen.”
NUM 3:14 Migkeǥiyan te Nengazen si Moises diyà te sibsivayan he Sinai te,
NUM 3:15 “Bilanga nu is menge kevuwazan ni Levi he menge maama sumalà te pemilya zan. Bilanga nu is senge vulan is keǥurang din pehendiyà te metikang.”
NUM 3:16 Umbe, mibilang sikandan ni Moises sumalà te insuǥù kandin te Nengazen.
NUM 3:17 Iyan heini menge anak ni Levi: si Gershon, si Kohat, wey si Merari.
NUM 3:18 Is menge anak ni Gershon iyan si Libni wey si Shimei.
NUM 3:19 Is menge anak ni Kohat iyan ensi Amram, Izhar, Hebron, wey Uziel.
NUM 3:20 Is menge anak ni Merari iyan ensi Mali wey Mushi. Iyan sikandan menge kevuwazan ni Levi he inlista sumalà te menge pemilya zan.
NUM 3:21 Is menge kevuwazan ni Gershon iyan kes menge pemilya he ebpuun diyà te ki Libni wey ki Shimei.
NUM 3:22 Is kahabet te menge maama kandan he is keǥurang dan senge vulan pehendiyà te metikang ne 7,500.
NUM 3:23 Is lugar he egkempuwan dan ne ziyà dapit te egkeiniyuǥan duen te Tulda he Ed-ezapan, he ziyà te zapit te edsenlepan duen te tulda.
NUM 3:24 Is pengulu zan iyan si Eliasaf he anak ni Lael.
NUM 3:25 Iyan sikandan midseriǥan te ked-atur te menge gelemiten duen te Tulda he Edtelevukaayan he iyan heini: menge tambun, is kurtina te gemawan te Tulda,
NUM 3:26 is menge kurtina ziyà te lama he impeliǥuy zuen te Tulda wey pemuhatà, ragkes en is kurtina te pultahan duen te lama, wey is menge hiket kayi. Kandan he ketengdanan is langun he vuluhaten he para kayi he menge gelemiten.
NUM 3:27 Is menge kevuwazan ni Kohat iyan sikan is menge pemilya eni Amram, Izhar, Hebron, wey Uziel.
NUM 3:28 Is kahabet te menge maama kandan he is keǥurang dan senge vulan pehendiyà te metikang ne 8,600. Insarig daan kandan is ked-atur zuen te Tulda he Edtelevukaayan.
NUM 3:29 Is lugar he egkempuwan dan ne ziyà dapit te zivavà duen te Tulda.
NUM 3:30 Ne iyan pengulu zan si Elizafan he anak ni Uziel.
NUM 3:31 Iyan sikandan daan midseriǥan te ked-atur te menge himan duen te Tulda he Edtelevukaayan he iyan is: Kavan te Kebpekid-uyun, lemisahan, selevukà te sulù, menge pemuhatà, menge gelemiten he egemiten te menge memumuhat emun ebaal zan te vuluhaten dan, wey zuen te kurtina ziyà te seled te Tulda. Kandan he ketengdanan is langun he vuluhaten he egkeǥemitan kayi he menge gelemiten.
NUM 3:32 Is pengulu te menge kevuwazan ni Levi iyan si Eleazar he anak ni Aaron he memumuhat. Iyan sikandin mibpilì he edumala zuen te menge etew he insarig kandan is ked-atur zuen te Tulda.
NUM 3:33 Is menge kevuwazan ni Merari iyan is menge pemilya he ebpuun diyà te ki Mali wey ki Mushi.
NUM 3:34 Is kahabet te menge maama kandan he is keǥurang dan senge vulan pehendiyà te metikang ne 6,200.
NUM 3:35 Is pengulu zan iyan si Zuriel he anak ni Abihail. Is lugar he egkempuwan dan ne ziyà te egkezizaya zuen te Tulda.
NUM 3:36 Iyan sikandan midseriǥan te ked-atur te tabla he elavat duen te Tulda, menge marku, menge tukud, wey menge pundasyun kayi. Kandan he ketengdanan is langun he menge vuluhaten he egkeǥemitan kayi he menge gelemiten.
NUM 3:37 Iyan daan sikandan midseriǥan te ked-atur te menge tukud diyà te ǥawas duen te lama wey te menge pundasyun kayi, menge palpal wey menge hiket kayi.
NUM 3:38 Si Moises wey si Aaron wey is menge anak din, ne ziyè dan megkampu zapit te egkesineruwan duen te Tulda he Edtelevukaayan he zapit te edsilaan. Iyan sikandan midseriǥan te kedumala te menge vuluhaten duen te Tulda he para te menge Israilihanen. Is minsan hentei he ebaal te vuluhaten te memumuhat dutun te Tulda he kenà kevuwazan ni Levi ereg he edhimetayan.
NUM 3:39 Is kahabet te langun he menge maama he kevuwazan ni Levi he is keǥurang dan senge vulan pehendiyà te metikang ne 22,000. Si Moises wey si Aaron is mibilang kandan sumalà te insuǥù te Nengazen kandan.
NUM 3:40 Migkaǥi is Nengazen diyà te ki Moises te, “Bilanga nu wey ilista is menge ngazan te langun he kinekekayan he menge anak he maama te menge Israilihanen he is keǥurang dan senge vulan pehendiyà te metikang.
NUM 3:41 Ipehinungud niw kayi te kedì is menge kevuwazan ni Levi he ilis te langun he kinekekayan he maama he menge anak te menge Israilihanen. Ipehinungud niw zaan kayi te kedì is menge uyaǥen te menge kevuwazan ni Levi he ilis te langun he kinekekayan he menge uyaǥen te menge Israilihanen. Iyan a Nengazen.”
NUM 3:42 Umbe, mibilang ni Moises is langun he kinekekayan he menge maama he menge anak te menge Israilihanen he is keǥurang dan senge vulan pehendiyà te metikang, sumalà te insuǥù te Nengazen kandin. Is kahabet dan nekeuma te 22,273.
NUM 3:44 Migkaǥi pa is Nengazen diyà te ki Moises te, “Ipehinungud niw kayi te kedì is menge kevuwazan ni Levi he ilis te langun he kinekekayan he menge anak he maama te menge Israilihanen. Ipehinungud niw zaan is menge uyaǥen te menge kevuwazan ni Levi he ilis te kinekekayan he menge uyaǥen te menge Israilihanen. Kediey is menge kevuwazan ni Levi. Iyan a Nengazen.
NUM 3:46 Geina te midsubra te 273 is kinekekayan he maama he menge anak te menge Israilihanen kenà te menge kevuwazan ni Levi, kinahanglan he edlekaten sikandan.
NUM 3:47 Ne para melekat sikandan, kinahanglan he ebeyazan is kada sevaha kandan te lelima he vuuk he pelata he ibpesikad diyà te keveǥat te pelata ziyà te timbangan he egemiten te menge memumuhat.
NUM 3:48 Ne ibeǥey nu haazà diyà te ki Aaron wey te menge anak din is selapì he idlekat te nenubra he menge kinekekayan.”
NUM 3:49 Umbe, migkulikta ni Moises is selapì he idlekat te menge kinekekayan he menge anak te menge Israilihanen he midsubra te kahabet te menge kevuwazan ni Levi.
NUM 3:50 Is nekulikta zin 1,365 he vuuk he pelata, he impesikad diyà te keveǥat te pelata ziyà te timbangan he egemiten te menge memumuhat.
NUM 3:51 Ne imbeǥey zin heini ziyà te ki Aaron wey ziyà te menge anak ni Aaron he menge maama sumalà te insuǥù kandin te Nengazen.
NUM 4:1 Migkeǥiyan te Nengazen si Moises wey si Aaron te,
NUM 4:2 “Sinsusa niw is menge kevuwazan ni Kohat he sakup te tribu ni Levi; sinsusa is kada kezuzumahi wey is menge pemilya zutun.
NUM 4:3 Bilanga niw is langun he maama he is penuiǥen dan 30 pehendiyà te 50 he tuig, he ebpekehimu he ebpenilbi ziyà te Tulda he Edtelevukaayan.
NUM 4:4 “Is buluhaten te menge kevuwazan ni Kohat diyà te Tulda he Edtelevukaayan iyan is ked-atur te utew segradu he menge vutang.
NUM 4:5 Emun ed-awè kew zutun te kampu niw, kinahanglan he edseled si Aaron wey is menge anak din duen te Tulda ne egkuwaan dan is kurtina ziyà te seled, ne idtambun dan heini zuen te Kavan te Kebpekid-uyun.
NUM 4:6 Ne kegkepasad dutun, ed-umanan dan pa heini edtembuni te meupiya he kelasi he lundis wey manggad he meitem is kaavuavu zin, ne idtaud dan is menge tival kayi.
NUM 4:7 “Tembuni zan daan te manggad he meitem is kaavuavu zin is lemisahan he selevukà te supas he ibpemuhat diyà te etuvangan te Megbevayà, ne isavuk dan dutun te lemisahan is menge pinggan, menge tasa, menge yahung, menge tivud he teleǥuey te pemuhat he inumen, wey menge supas he layun dutun te lemisahan.
NUM 4:8 Ne kegkepasad dutun edtembunan dan heini te manggad he kanggan, ne ed-umanan dan pa heini edtembuni te meupiya he kelasi he lundis, ne idtaud dan is menge tival kayi.
NUM 4:9 “Is selevukà te sulù edtengesen dan te manggad he meitem is kaavuavu zin ragkes en is menge sulù dutun, menge lipit, menge taya te igmuk te pebilu te sulù, wey menge tivud he teleǥuey te lana he idtubil te sulù.
NUM 4:10 Edtengesen dan heini is langun te meupiya he kelasi he lundis, ne ibpikit dan duen te tival.
NUM 4:11 “Tembuni zan daan te manggad he meitem is kaavuavu zin sikan is pemuhatà he vulawan ne edtembunan dan pa heini te meupiya he kelasi he lundis, ne itaud dan is menge tival para kayi.
NUM 4:12 Is duma pa he menge gelemiten he egemiten te kebpenilbi zutun te Tulda, edtengesen daan te manggad he meitem is kaavuavu zin wey te meupiya he kelasi he lundis, ne ibpikit heini zuen te tival.
NUM 4:13 “Kinahanglan he id-awè dan is avu zuen te pemuhatà, ne edtembunan heini is pemuhatà te manggad he merudtem.
NUM 4:14 Ne isavuk dan kayi te pemuhatà is langun he ǥelemiten para kayi: is menge selevukà te vaǥa, is dezekelà he menge tinidur he para te usa, is menge pala, wey is menge yehung. Ne tembuni zan heini te meupiya he kelasi he lundis, ne itaud dan is menge tival kayi.
NUM 4:15 “Emun egkepasad en ni Aaron wey te menge anak din te edtambun sikan is Tulda he Edtelevukaayan wey is langun he menge gelemiten kayi, ne edtivalen heini te menge kevuwazan ni Kohat dutun te timpu te ked-awè niw puun te kampu niw. Piru kinahanglan he kenè dan semsama heini is segradu he menge vutang su wey zan kenà mebpatey. “Iyan haazà sikan is menge gelemiten duen te Tulda he Edtelevukaayan he ed-uwiten te menge kevuwazan ni Kohat.
NUM 4:16 Si Eleazar he anak ni Aaron he memumuhat, kandin he ketengdanan is bahin duen te lana he para te menge sulù, menge veyewà, kada andew he pemuhat he para gasa, wey is lana he para te idlana. Iyan sikandin edumala te vuluhaten para zutun te tivuuk he Tulda wey te langun he menge gelemiten kayi.”
NUM 4:17 Migkaǥi is Nengazen diyà te ki Moises wey ki Aaron te,
NUM 4:18 “Kenè niw pesegdana he mepuew is kevuwazan ni Kohat puun te menge Levihanen.
NUM 4:19 Iyan heini veeli niw para kenà sikandan mebpematey emun ed-uvey sikandan duen te utew segradu he menge vutang: Kinahanglan he eduma kandan si Aaron wey is menge anak din emun edseled dan duen te Tulda ne egkeǥiyen diyà te kandan ke hengkey is ereg he ebeelan dan wey kinahanglan he ed-uwiten dan.
NUM 4:20 Su emun kenà sikandan edumahan, kenè dan medseled te ked-ahà te segradu he menge vutang minsan meǥaan dà, su wey zan kenà mebpatey.”
NUM 4:21 Migkeǥiyan te Nengazen si Moises te,
NUM 4:22 “Sinsusa nu zaan is menge kevuwazan ni Gershon sumalà te pemilya zan.
NUM 4:23 Bilanga nu zaan is langun he maama kandan he is penuiǥen dan 30 pehendiyà te 50 he tuig, he ebpekehimu te kebaal te menge vuluhaten diyà te Tulda he Edtelevukaayan.
NUM 4:24 “Is buluhaten te menge kevuwazan ni Gershon iyan is ked-uwit kayi he menge vutang:
NUM 4:25 menge kurtina zuen te Tulda he Ed-ezapan, (egngezanan daan te Tulda he Edtelevukaayan), is langun he menge tambun he para idtambun kayi, wey is menge kurtina te ǥemawan,
NUM 4:26 is menge kurtina zuen te lama he nekepeliǥuy zuen te Tulda wey pemuhatà, is kurtina ziyà te ǥemawan te lama, is menge hiket, wey is langun he ǥelemiten he egemiten te kebpenilbi zutun te Tulda. Kandan he vaal is langun he vuluhaten he egkeǥemitan kayi he menge gelemiten.
NUM 4:27 Si Aaron wey is menge anak din iyan edumala te menge kevuwazan ni Gershon mehitenged te vuluhaten dan, ed-uwit daan sikandan te menge gelemiten etawa ebaal te zuma he menge vuluhaten. Iyan kew ki Aaron kaǥi ke hengkey is ed-uwiten dan.
NUM 4:28 Iyan heeyan menge vuluhaten te menge kevuwazan ni Gershon diyà te Tulda he Edtelevukaayan. Dizalem sikandan te kedumala ni Itamar he anak ni Aaron he memumuhat.”
NUM 4:29 “Sinsusa nu zaan is menge kevuwazan ni Merari; sinsusa is kada kezuzumahi wey is menge pemilya zutun.
NUM 4:30 Bilanga nu is langun he menge maama he is penuiǥen dan 30 pehendiyà te 50 he tuig, he ebpekehimu te vuluhaten diyà te Tulda he Edtelevukaayan.
NUM 4:31 Iyan heini vuluhaten dan diyà te Tulda he Edtelevukaayan: iyan sikandan ed-uwit te menge tabla he elavat duen te tulda, menge marku kayi, menge tukud, wey menge pundasyun.
NUM 4:32 Iyan daan sikandan ed-uwit te menge tukud he edteuzan te menge kurtina he ibpeliǥuy zuen te Tulda, wey menge pundasyun kayi, menge palpal wey menge hiket. Kandan he vaal is langun he menge vuluhaten he egkeǥemitan kayi he menge gelemiten. Iyan kew ki Aaron kaǥi ziyà te kada sevaha kandan ke hengkey is kinahanglan he ed-uwiten dan.
NUM 4:33 Iyan heeyan menge vuluhaten te menge kevuwazan ni Merari ziyà te Tulda he Edtelevukaayan. Dizalem sikandan te kedumala ni Itamar he anak ni Aaron he memumuhat.”
NUM 4:34 Tenged te kedtuman te insuǥù te Nengazen, midsinsus eni Moises, Aaron, wey te menge pengulu te Israel is menge kevuwazan ni Kohat, ni Gershon, wey ni Merari; midsinsus is kada kezuzumahi wey is menge pemilya zutun. Inlista zan is langun he menge maama kandan he is penuiǥen dan 30 pehendiyà te 50 he tuig he ebpekehimu te menge vuluhaten diyà te Tulda he Edtelevukaayan, ne iyan heini kahabet dan: Pemilya; Kahabet Kohat; 2,750 Gershon; 2,630 Merari; 3,200 Is tivuuk he kahabet dan, 8,580 langun.
NUM 4:49 Umbe, sumalà te insuǥù te Nengazen ki Moises, mibilang sikandan ne mibeǥayan te vuluhaten is kada sevaha kandan wey migkeǥiyan ke hengkey is ed-uwiten din.
NUM 5:1 Migkaǥi is Nengazen diyà te ki Moises te,
NUM 5:2 “Mendui nu is menge Israilihanen he ibpeǥawas diyà te kampu is minsan hentei he zuen melimezang he zaru te lundis din, etawa zuen egawas diyà te sudiyè din tenged te zaru, etawa nehimu he meremerik su nekeǥawed te minatey.
NUM 5:3 Maama etawa vahi ne ipeǥawas niw sikandan su wey zan kenà meremeriki is kampu zan, he iyan ed-ubpaan ku duma keniyu.”
NUM 5:4 Umbe, impeǥawas te menge Israilihanen haazà he menge etew ziyà te kampu su iyan haazà insuǥù te Nengazen ki Moises.
NUM 5:5 Migkaǥi is Nengazen diyà te ki Moises te,
NUM 5:6 “Keǥiyi nu is menge Israilihanen he emun duen maama etawa vahi he nekesupak te egkesuatan te Nengazen pinaaǥi te kebaal te mezaat diyà te iring din he etew, heeyan he etew nekesalà.
NUM 5:7 Kinahanglan he idtug-an din is salà he neveelan din, ne veyazi zin te hustu he vayad is azen he migkuwa zin etawa midezeetan din, ne haazà is hustu he vayad din ne umani zin pa te 20 pursintu is bali zutun. Iveǥey zin heini is langun diyà te etew he neselaan din.
NUM 5:8 Piru ke minatey en haazà is etew he neveelan te mezaat, ne wazà daan megeget he kezuzumahi zin he iyan edawat kayi he vayad, ne haazà is bayad gaked en te Nengazen, ne kinahanglan he ibeǥey haazà diyà te memumuhat duma te kerehidu he ibpemuhat dutun te memumuhat su para mepesaylu is salà dutun he etew.
NUM 5:9 Is langun he segradu he menge gasa he ed-uwiten te menge Israilihanen diyà te memumuhat, gaked en te memumuhat.
NUM 5:10 Uya, gaked en te memumuhat haazà is segradu he menge pemuhat.”
NUM 5:11 Mid-uman pa megkaǥi is Nengazen te,
NUM 5:12 “Keǥiya nu heini ziyà te menge Israilihanen: Penenglitan ke zuen bahi he mibpekigkumpadi.
NUM 5:13 Mibpehilavet sikandin te kumpadi zin he wazà metueni te esawa zin. Wazà netau te meremerik he vaal zin, su wazà nekaahà kandin te aktu.
NUM 5:14 Emun edhaled is esawa zin he tutuu he zuen mibeelan din he mezaat, etawa ebpengelikud is maama piru wazà mezaat he mibeelan duen te vahi, kinahanglan he ed-uwiten sikandin duen te maama ziyà te memumuhat ne kinahanglan he ed-uwit haazà is maama te pemuhat he para te esawa zin he zezuwa he kilu he herina he barli, ne kinahanglan he kenè din heini edsehuǥan te lana etawa veyewà su pemuhat heini he gasa he ibpemuhat din tenged te kebpengelikuzi zin te esawa zin. Pemuhat heini para metueni ke nekesalè be is esawa zin etawa wazà.
NUM 5:16 “Edumahan dutun te memumuhat haazà is bahi ziyà te etuvangan ku.
NUM 5:17 Ne ed-itis te wahig he mid-isip he segradu ziyà te ziniyun haazà is memumuhat, ne edsevukan din haazà te eliyavuk he ebpuun diyà te saag duen te Tulda he Ed-ezapan.
NUM 5:18 Ibpehitindeg dutun te memumuhat haazà is bahi ziyà te etuvangan ku, ibpeperuvey te memumuhat haazà is bahi ne ibpetepayà kandin sikan is pemuhat he gasa he para metueni ke nekesalè be sikandin wey ke wazà. Pemuhat heini te esawa zin te kebpengelikuzi zin kandin. Ne kegkepasad dutun, egewazan dutun te memumuhat sikan is midteǥuan te wahig he mepait he ed-uwit te rawak.
NUM 5:19 Ne ibpepenangdù din haazà is bahi ke mibpekigkumpadi ve sikandin etawa wazà, ne egkaǥi sikandin te, ‘Emun wazè nu remeriki is keugelingen nu pinaaǥi te kebpehilavet te sengememaama, kenè ka ed-utengan te rawak he ed-uwiten kayi te mepait he wahig.
NUM 5:20 Iyan, emun midremerikan nu is keugelingen nu pinaaǥi te kebpehilavet te maama he kenè nu esawa,
NUM 5:21 ebpenangdù a he egkehimu ka he mezaat he petug-iringan tenged te rawak te Nengazen dutun te timpu he kenè ke en ebpekaanak.
NUM 5:22 Berakat he heini is wahig he ed-uwit te rawak, edreneb diyà te lawa nu su wey ka kenè en mekaanak.’ Ne edtavak haazà is bahi te, ‘Uya, uyun a keniyan.’
NUM 5:23 “Ne kegkekapasad dutun, idsurat duen te memumuhat heini he menge rawak diyà te para te edsuratan ne ebpenasen din pinaaǥi te kedtereva kayi zuen te wahig he mepait he intaǥù diyà te ziniyun.
NUM 5:24 Ne ibpeinum din dutun te vahi haazà is mepait he wahig he ed-uwit te rawak, su para mekaantus sikandin te utew merasey he egkeuwit dutun emun tutuu he nekesalà sikandin.
NUM 5:25 Ne egkuwaan duen te memumuhat puun te velad dutun te vahi sikan is pemuhat he para gasa he pemuhat para te kebpengelikud te esawa zin, ne ibayew heini zutun te memumuhat diyà te etuvangan ku, ne ed-uwiten din diyà te pemuhatà.
NUM 5:26 Egkuwa haazà is memumuhat te sengekemkem dutun te pemuhat he para metueni ke nekesalè be haazà is bahi etawa wazà, ne edtutungen din duen te pemuhatà. Ne kegkepasad dutun human din ibpeinum duen te vahi sikan is wahig.
NUM 5:27 Emun tutuu he midremerikan din is keugelingen din pinaaǥi te kedluivi zin te esawa zin, ne haazà is wahig he neinum din, ebpekeuwit diyà te kandin te rawak he utew zin igkerasey. Kenè en sikandin ebpekaanak, ne egkehimu sikandin he petug-iring te etew he edrewakan te Megbevayà.
NUM 5:28 Iyan, emun wazè din remeriki is keugelingen din, kenà sikandin ed-utengan kayi ne ebpekaanak sikandin.
NUM 5:29 “Iyan heini kesuǥuan bahin te maama he ebpengelikuzan din is esawa zin. Emun is bahi midremerikan din is keugelingen din pinaaǥi te kedluivi zin te esawa zin,
NUM 5:30 etawa edhaled is maama te esawa zin, ne tenged dutun kinahanglan he ibpehitindeg te memumuhat is bahi ziyà te etuvangan ku ne ebeelan diyà te kandin heini he menge kesuǥuan.
NUM 5:31 Is maama wazè din televaken, piru is bahi zuen din televaken emun nekesalà sikandin, ne egkerasey sikandin tenged te salè din.”
NUM 6:1 Migkaǥi is Nengazen diyà te ki Moises te,
NUM 6:2 “Keǥiya nu ziyà te menge Israilihanen he emun duen bahi etawa maama he edhimu te ispisyal he penaad he ibpehinungud din is keugelingen din kayi te kedì pinaaǥi te kedhimuwa zin kayi he Nazareo,
NUM 6:3 kinahanglan he kenà sikandin med-inum te vinu he paras wey te zuma pa he ebpekelangut he menge inumen. Kenà daan sikandin megamit te sukà he paras, wey te sukà he iyan mibeelan is duma pa he ebpekelangut he inumen. Ne kenà sikandin med-inum te wahig te paras wey kenà megkaan te wazà genguwa etawa migangu he paras.
NUM 6:4 Dutun te Nazareo sikandin, kinahanglan he kenà sikandin megkaan te minsan hengkey he ebpuun diyà te paras, minsan lisu zin etawa luwit din.
NUM 6:5 “Kenè din daan petempezi is bulvul zin dutun te wazè din pa mepasad is penaad din te kebpenilbi te Nengazen. Kinahanglan he idsivey sikandin he para te Nengazen taman te egkepasad is timpu te penaad din, ne vey-ani zin en ke ebmelayat is bulvul zin.
NUM 6:6 Dutun te wazè din pa mepasad is penaad din te kebpenilbi te Nengazen, kinahanglan he kenà sikandin med-uvey te minatey,
NUM 6:7 minsan amey zin, iney zin, etawa suled din. Kenè din remeriki is keugelingen din tenged kandan, su is bulvul zin simbulu te kebpehinunguza zin te untung din diyà te Megbevayà.
NUM 6:8 Umbe, zutun te tivuuk he timpu te kebpehinunguza zin te untung din, insivey sikandin he para te Nengazen.
NUM 6:9 “Emun duen edtik-ew ebpatey ziyà te avey zin, he tenged dutun neremerikan sikan is bulvul zin he simbulu te kebpehinungud din te keugelingen din diyà te Nengazen, kinahanglan he medtaǥad sikandin te pitu he andew, ne zutun mebpevangul sikandin. Is ikepitu he andew, iyan kes andew te kebpekelumpiyuwa zin te keugelingen din.
NUM 6:10 Ne emun ikewalu en he andew, kinahanglan he med-uwit sikandin te zezuwa he merepatik etawa limuken diyà te memumuhat diyà te ǥemawan te Tulda he Edtelevukaayan.
NUM 6:11 Is sevaha, ibpemuhat te memumuhat he pemuhat he para idlumpiyu ne is sevaha pa, pemuhat he edtutungen. Ne pinaaǥi kayi egkevelukasan sikandin tenged te salè din te kebpekeǥawed te minatey. Dutun mismu he andew, iuman din ipehinungud is keugelingen din ne ipeuman din ipemelayat is bulvul zin.
NUM 6:12 Sikan is nehuna he menge andew te kebpenilbi zin te Megbevayà, kenè en idtarin te keluǥayad te timpu he impenaad din, su neremerikan man sikandin tenged te kebpekeǥawed te minatey. Kinahanglan he iuman din ipehinungud is keugelingen din ne med-uman mebpuun taman te egkepasad din is penaad din. Kinahanglan daan he ed-uwit sikandin te meemahan he kerehidu he ibpemuhat para te vayad te salè din.
NUM 6:13 “Iyan heini ebeelan diyà te kandin emun egkepasad en is penaad din he kedhimuwa zin te keugelingen din he Nazareo: Kinahanglan he ibpehendiyà sikandin te ǥemawan te Tulda he Edtelevukaayan.
NUM 6:14 Dutun ebpemuhat sikandin diyà te Nengazen te menge uyaǥen he wazè dan sazir he iyan is: sevaha he meemahan he kerehidu he senge-tuig is keǥurang din he pemuhat he edtutungen, sevaha he vehiyan he kerehidu he senge-tuig gihapun is keǥurang din he pemuhat para idlumpiyu, wey sevaha he meǥurang en he meemahan he kerehidu he pemuhat he para te meupiya he kedepità.
NUM 6:15 Ne liyu zutun, mebpemuhat daan sikandin te menge pemuhat he para gasa, pemuhat he inumen, wey senge vaskit he supas he wazè din tapey he iyan ebeelan is meupiya he kelasi te herina. Is duma he supas, ne ebpekekepalen ne edsehuǥan te lana ne is duma pa ebpekenipisen he edezasan te lana.
NUM 6:16 “Iyan is memumuhat ebpemuhat kayi ziyà te etuvangan te Nengazen: Ibpemuhat din is pemuhat he para idlumpiyu wey is pemuhat he edtutungen.
NUM 6:17 Ne ibpemuhat din daan is meemahan he kerehidu he pemuhat he para te meupiya he kedepità duma zuen te senge vaskit he supas he wazè din tapey. Ne ibpemuhat din daan sikan is menge pemuhat he para gasa wey is pemuhat he inumen.
NUM 6:18 “Ne kegkepasad dutun, mebpevangul haazà is Nazareo he simbulu te kebpehinunguza zin te untung din diyà te Nengazen, diyà te ǥemawan te Tulda he Edtelevukaayan. Ne vinsuli zin is bulvul zin te hapuy he tutungà te pemuhat he para te meupiya he kedepità.
NUM 6:19 Ne idsavuk duen te memumuhat diyà te palad duen te Nazareo is pemenayen he vahin duen te sinevawan he kerehidu wey sikan is menipis wey mekepal he menge supas he wazè din tapey puun duen te vaskit.
NUM 6:20 Ne egkuwaan duen te memumuhat haazà ne ibayew zin diyà te etuvangan te Nengazen su pemuhat haazà he ibayew. Segradu heini he vahin te pemuhat, ne ǥaked en heini te memumuhat, ragkes is kumeng wey vuvun duen te kerehidu he imbayew zaan diyà te Nengazen. Ne kegkepasad kayi egkehimu en he ed-inum te vinu haazà is Nazareo.
NUM 6:21 “Iyan heini sulunuzen he para te sevaha he Nazareo. Piru emun edsaad is sevaha he Nazareo he ebpemuhat sikandin diyà te Nengazen he ebpesubrahan din is ibpetuman kandin he penaad he egkehimu he Nazareo, kinahanglan he edtumanen din heini.”
NUM 6:22 Migkaǥi is Nengazen diyà te ki Moises te,
NUM 6:23 “Keǥiyi nu si Aaron wey is menge anak din he maama te iyan heini keǥiya zan emun ebpenubtuvazan dan is menge Israilihanen:
NUM 6:24 ‘Berakat he tuvazi kew te Nengazen.
NUM 6:25 Berakat he ipaahà te Nengazen is keupiya zin wey hizu zin keniyu.
NUM 6:26 Berakat he purungi kew te Nengazen ne veǥayi kew zin te meupiya he kebpekesavuk.’
NUM 6:27 “Pinaaǥi kayi igkepehayag dan diyà te menge Israilihanen ke hentei a, ne edtuvazan ku sikandan.”
NUM 7:1 Hein ingkepelastar en ni Moises sikan is Tulda he Ed-ezapan, mibpirikan din heini te lana, ne impehinungud din ragkes en is langun he menge gelemiten kayi. Iyan daan heini mibeelan din duen te tulda he iring ded te mibeelan din duen te pemuhatà wey is langun he ǥelemiten kayi.
NUM 7:2 Ne mid-uwit te menge halad diyà te Nengazen is menge pengulu te Israel, he iyan kes menge pengulu te kada tribu he insarig kandan is kedsinsus.
NUM 7:3 Mid-uwit dan diyà te etuvangan te Nengazen te heenem he kerumata wey 12 he vaka, sevaha he kerumata is mid-uwit te kada zezuwa he pengulu, ne sevaha he vaka is mid-uwit te kada sevaha kandan. Mid-uwit dan haazà diyà te egkesineruwan duen te Tulda he Ed-ezapan.
NUM 7:4 Migkaǥi is Nengazen diyà te ki Moises te,
NUM 7:5 “Dewata nu is halad dan su egemiten heini para te menge vuluhaten diyà te Tulda he Edtelevukaayan. Iveǥey nu heini ziyà te menge kevuwazan ni Levi sumalà te egkinehenglanen duen te neketukid kandan he vuluhaten.”
NUM 7:6 Umbe, midawat ni Moises haazà is menge kerumata wey menge vaka ne imbeǥey zin diyà te menge kevuwazan ni Levi.
NUM 7:7 Imbeǥey zin is dezuwa he kerumata wey heepat he vaka ziyà te menge kevuwazan ni Gershon he para te vuluhaten dan.
NUM 7:8 Imbeǥey zin is heepat he kerumata wey walu he vaka ziyà te menge kevuwazan ni Merari he para te vuluhaten dan. Iyan heini sikandan is langun ebpenguluwan ni Itamar he anak ni Aaron he memumuhat.
NUM 7:9 Piru wazà mulà beǥayi ni Moises te kerumata etawa vaka is menge kevuwazan ni Kohat su iyan sikandan midseriǥan te kedtiang duen te segradu he menge vutang duen te Tulda.
NUM 7:10 Is menge pengulu, mid-uwit daan te kandan he menge halad he para te kebpehinunguza zuen te pemuhatà emun ibpehinungud en heini.
NUM 7:11 Migkeǥiyan te Nengazen si Moises te, “Kinahanglan he kada andew, zuen sevaha he pengulu he ed-uwit te halad din he para te kebpehinunguza zuen te pemuhatà.”
NUM 7:12 Iyan heini sikandan mid-uwit te menge halad: Dutun te nehuna he andew, iyan si Nashon he anak ni Aminadab, he pengulu te tribu ni Juda. Dutun te ikezuwa he andew, iyan si Netanel he anak ni Zuar, he pengulu te tribu ni Isacar. Dutun te iketelu he andew, iyan si Eliab he anak ni Helon, he pengulu te tribu ni Zebulun. Dutun te ikeepat he andew, iyan si Elizur he anak ni Shedeur, he pengulu te tribu ni Reuben. Dutun te ikelima he andew, iyan si Shelumiel he anak ni Zurishadai, he pengulu te tribu ni Simeon. Dutun te ikeenem he andew, iyan si Eliasaf he anak ni Deuel, he pengulu te tribu ni Gad. Dutun te ikepitu he andew, iyan si Elishama he anak ni Amihud, he pengulu te tribu ni Efraim. Dutun te ikewalu he andew, iyan si Gamaliel he anak ni Pedazur, he pengulu te tribu ni Manase. Dutun te ikesiyam he andew, iyan si Abidan he anak ni Gideoni, he pengulu te tribu ni Benjamin. Dutun te ikesepulù he andew, iyan si Ahiezer he anak ni Amishadai, he pengulu te tribu ni Dan. Dutun te ike-11 he andew, iyan si Pagiel he anak ni Ocran, he pengulu te tribu ni Asher. Dutun te ike-12 he andew, iyan si Ahira he anak ni Enan, he pengulu te tribu ni Naftali. Is kada sevaha kandan mid-uwit kayi he menge halad: sevaha he pelata he bendihadu he sengekilu wey tengà is keveǥat din wey sevaha he pelata he yahung he 800 he gramu is keveǥat din diyà te timbangan he egemiten te menge memumuhat. Is kada sevaha kayi nepenù te meupiya he kelasi te herina he midsehuǥan te lana ne halad heini he pemuhat he para gasa. Mid-uwit daan is kada sevaha kandan te vulawan he 120 he gramu is keveǥat din he nepenù te veyewà, sevaha he turiti he vaka, sevaha he meemahan he kerehidu he meǥurang en, wey sevaha he meemahan he kerehidu he senge-tuig pa is keǥurang din he pemuhat he edtutungen, sevaha he meemahan he kambing he pemuhat he para idlumpiyu, dezuwa he tudu he vaka, lelima he meemahan he kerehidu he meǥurang en, lelima he meemahan he kambing, wey lelima he meemahan he kerehidu he senge-tuig pa is keǥurang dan he pemuhat he para te meupiya he kedepità.
NUM 7:84 Iyan heini sikan is langun he menge halad duen te 12 he pengulu te menge Israilihanen he para te kebpehinunguza zuen te pemuhatà: 12 he pelata he menge bendihadu, 12 he pelata he menge yehung, wey 12 he vulawan he menge tasa.
NUM 7:85 Is kada sevaha zuen te pelata he bendihadu, sengekilu wey tengà is keveǥat din, ne is kada sevaha zuen te pelata he yehung, 800 he gramu is keveǥat din. Is keveǥat kayi te langun nekeuma te 28 he kilu ziyà te timbangan he egemiten te menge memumuhat.
NUM 7:86 Sikan is 12 he tasa he vulawan he nepenù te veyewà, duen keveǥat te kada sevaha zutun he 120 he gramu ziyà te timbangan he egemiten te menge memumuhat. Is keveǥat kayi te langun nekeuma te 1,440 he gramu.
NUM 7:87 Is menge uyaǥen he imbeǥey he para te pemuhat he edtutungen, 12 he turiti he vaka, 12 he meemahan he menge kerehidu he meǥurang en, wey 12 he menge kerehidu he tig senge-tuig is keǥurang dan, ragkes is menge pemuhat he para gasa. Is pemuhat he para idlumpiyu: 12 he meemahan he menge kambing.
NUM 7:88 Is menge uyaǥen he pemuhat he para te meupiya he kedepità: 24 he tudu he vaka, 60 he meemahan he menge kerehidu he meǥurang en, 60 he meemahan he menge kambing, wey 60 he meemahan he menge kerehidu he tig senge-tuig pa is keǥurang dan. Iyan heini kes langun he menge pemuhat he para te kebpehinunguza zuen te pemuhatà.
NUM 7:89 Emun edseled si Moises duen te Tulda he Edtelevukaayan su ebpekidlalag te Nengazen, egkezineg din is laǥeng he ebpekidlalag kandin puun duen te mid-elangan te zezuwa he ledawan te kirubin, he zuen te zivavew te tambun te Kavan te Kebpekid-uyun. Dutun ebpekidlalag is Nengazen ki Moises.
NUM 8:1 Migkeǥiyan te Nengazen si Moises te,
NUM 8:2 “Keǥiyi nu si Aaron he emun ibpelastar zin en is pitu he sulù, kinahanglan he ziyè din heini ipelastar te egkeenlaǥan te kerayag din is diyà te egkesineruwan te selevukà kayi.”
NUM 8:3 Umbe, mibeelan haazà ni Aaron: impelastar zin haazà is menge sulù diyà te lugar he egkeenlaǥan te kerayag din is egkesineruwan te selevukà kayi, sumalà te insuǥù te Nengazen ki Moises.
NUM 8:4 Bulawan haazà is tivuuk he selevukà te menge sulù puun te zizalem pehendiyà te zivavew su iyan haazà kebeeli zuen he impaahà te Nengazen diyà te ki Moises.
NUM 8:5 Migkaǥi is Nengazen diyà te ki Moises te,
NUM 8:6 “Isivey nu is menge kevuwazan ni Levi puun te zuma he menge Israilihanen ne lumpiyuwi nu sikandan.
NUM 8:7 Iyan heini veeli nu te kedlumpiyu kandan: Piriki nu sikandan te wahig he ǥelemiten te kedlumpiyu ne pekiskisi nu is tivuuk he lawa zan wey pepìpii nu is menge visti zan. Ne kegkepesad dutun ed-isipen en sikandan he lumpiyu.
NUM 8:8 Ne ipeuwit nu sikandan te turiti he vaka wey pemuhat he para gasa he meupiya he kelasi te herina he midsehuǥan te lana. Ipeuwit nu zaan sikandan te sevaha pa he turiti he vaka he pemuhat he para idlumpiyu.
NUM 8:9 “Ne kegkepasad dutun, tiǥuma nu is tivuuk he keet-etawan te Israel ne ipehinungud niw is menge kevuwazan ni Levi ziyà te egkesineruwan duen te Tulda he Edtelevukaayan.
NUM 8:10 Dumaha nu is menge kevuwazan ni Levi ziyà te etuvangan ku ne ipezampè nu te menge Israilihanen is menge ulu te menge kevuwazan ni Levi.
NUM 8:11 Si Aaron is ebpehinungud kandan diyà te etuvangan ku he ispisyal he halad puun te menge Israilihanen, su wey zan mekepenilbi kedì.
NUM 8:12 “Ne idampà te menge kevuwazan ni Levi is menge velad dan diyà te ulu zuen te zezuwa he turiti he vaka he para kedì. Is sevaha zutun, pemuhat he para idlumpiyu, ne is sevaha pa, pemuhat he edtutungen, su wey zan mevelukasi te menge salè dan.
NUM 8:13 Ne ipehitindeg sikandan diyà te etuvangan ni Aaron wey te menge anak din he menge maama ne ipehinungud sikandan he ispisyal he halad para kediey.
NUM 8:14 Pinaaǥi kayi igkesivey nu is menge kevuwazan ni Levi puun te zuma he menge Israilihanen ne egkehimu en sikandan he menge ǥaked ku.
NUM 8:15 “Emun egkepasad nu en te edlumpiyu wey ebpehinungud kayi te kedì he ispisyal he halad is menge kevuwazan ni Levi, ne ebpekepenilbi en sikandan diyà te Tulda he Edtelevukaayan.
NUM 8:16 Iyan sikandan menge Israilihanen he insivey para zà kediey he ilis te langun he kinekekayan he menge anak te menge Israilihanen.
NUM 8:17 Su kediey is langun he kinekekayan he menge maama te menge Israilihanen, etew man etawa uyaǥen. Hein mibpenhimetayan ku is langun he kinekekayan he menge anak he maama te menge Ehiptohanen, insivey ku en he para kediey is langun he menge anak he maama te menge Israilihanen.
NUM 8:18 Ne migkuwa ku is menge kevuwazan ni Levi he ilis te langun he kinekekayan he menge maama te menge Israilihanen.
NUM 8:19 Diyà te langun he menge Israilihanen, iyan is menge kevuwazan ni Levi mibpilì ku he ebpekeuǥup ki Aaron wey te menge anak din. Ebpenilbi sikandan diyà te Tulda he Edtelevukaayan para te menge Israilihanen, ne iyan sikandan ebaal te menge tulumanen he para mevelukasi is salà te menge Israilihanen, su para wazà kezeetan he egkehitavù kandan emun ed-uvey zan duen te Tulda he Edtelevukaayan.”
NUM 8:20 Umbe, mibeelan eni Moises, Aaron, wey te tivuuk he keet-etawan te Israel is insuǥù te Nengazen ki Moises he ebeelan diyà te menge kevuwazan ni Levi.
NUM 8:21 Midlumpiyuwan te menge kevuwazan ni Levi is keugelingen dan, wey mibpìpian dan is menge visti zan. Ne impehinungud sikandan ni Aaron diyà te etuvangan te Nengazen he ispisyal he halad, ne mibeelan ni Aaron is tulumanen he para mevelukasi is menge salè dan, wey para meisip en sikandan he lumpiyu.
NUM 8:22 Ne kegkepasad dutun, nenilbi en is menge kevuwazan ni Levi ziyà te Tulda he Edtelevukaayan he zizalem te kedumala ni Aaron wey te menge anak din. Mibeelan dan diyà te menge kevuwazan ni Levi is insuǥù te Nengazen ki Moises.
NUM 8:23 Migkaǥi is Nengazen diyà te ki Moises te,
NUM 8:24 “Iyan heini menge sulunuzen para te menge kevuwazan ni Levi: Ebpuun ebpenilbi is menge kevuwazan ni Levi ziyà te Tulda he Edtelevukaayan emun 25 en is penuiǥen dan,
NUM 8:25 ne ed-engked dan he ebpenilbi emun 50 en is penuiǥen dan.
NUM 8:26 Egkehimu pa sikandan he ed-uǥup te menge zuma zan he menge Levihanen pinaaǥi te kebantey zuen te Tulda, piru kenè dan en mebaal te menge vuluhaten dutun te Tulda. Iyan heeyan menge ketengdanan te menge kevuwazan ni Levi he ipetuman nu kandan.”
NUM 9:1 Hein nehuna he vulan te ikezuwa he tuig puun te kegawas te menge Israilihanen diyà te Ehipto, migkeǥiyan te Nengazen si Moises diyà te sibsivayan he Sinai te,
NUM 9:2 “Ibpesilibra te menge Israilihanen is Pista te Kedlavey te Belinsuǥuen dutun te timpu he midtelaan.
NUM 9:3 Ebpuunan niw heini emun egkesakep en dutun te ike-14 he andew kayì he vulan. Kinahanglan he ed-ikulen niw is langun he sulunuzen mehitenged kayi he pista.”
NUM 9:4 Umbe, migkeǥiyan ni Moises is menge Israilihanen bahin te kedsilibra te Pista te Kedlavey te Belinsuǥuen.
NUM 9:5 Mibeelan dan is kedsilibra zutun diyà te sibsivayan he Sinai hein mibpuun is ike-14 he andew te egkehuna he vulan. Mibeelan heini te langun he menge Israilihanen sumalà te insuǥù te Nengazen ki Moises.
NUM 9:6 Piru zuen duma kandan he wazà meketampu zutun te pista, su geina te zutun he andew nehimu sikandan he meremerik su nekeǥawed dan te minatey. Umbe zutun he andew midhendiyà sikandan te ki Moises wey ki Aaron.
NUM 9:7 Ne ke sikandan te, “Nehimu key he meremerik su nekeǥawed key te minatey, piru maan is indawey kenami is kedsilibra kayì he pista wey kebpemuhat te menge pemuhat diyà te Nengazen duma te zuma he menge Israilihanen kayi te midtelaan he timpu?”
NUM 9:8 Midtavak sikandan ni Moises te, “Taǥad kew zà dèpa taman te egketuenan ku ke hengkey is idsuǥù te Nengazen kediey mehitenged keniyu.”
NUM 9:9 Migkeǥiyan te Nengazen si Moises te,
NUM 9:10 “Keǥiyi nu is menge Israilihanen he minsan hentei kandan guntaan wey is huziyan he menge kevuwazan dan he egkehimu he meremerik su nekeǥawed te minatey etawa ziyà sikandin te hipenawan dutun te timpu te kedsilibra, ebpekehimu ǥihapun he edsilibra te Pista te Kedlavey te Belinsuǥuen.
NUM 9:11 Silibraha zan heini emun edlavey en is senge vulan, puun te ike-14 he andew te ikezuwa he vulan. Keena zan is kerehidu wey supas he wazè din tapey wey mepait he menge pinemula.
NUM 9:12 Kinahanglan he egkaamin heini te kenè pa egkepawà, wey kenè dan daan bedtìa is tulan duen te kerehidu. Emun edsilibra zan te Pista te Kedlavey te Belinsuǥuen kinahanglan he ed-ikulen dan is menge sulunuzen mehitenged kayi.
NUM 9:13 “Piru is etew he lumpiyu wey wazà medhipanew ziyà te meziyù he wazà medsilibra te Pista te Kedlavey te Belinsuǥuen, heeyan he etew kinahanglan he kenè en egkilelaan he zuma niw, su wazà sikandin mebpemuhat te pemuhat he para te Nengazen dutun te midtelaan he timpu. Heeyan he etew egkerasey tenged te salè din.
NUM 9:14 “Emun duen kenà Israilihanen he mid-amur ziyà te inged niw he egkesuat he edsilibra te Pista te Kedlavey te Belinsuǥuen, kinahanglan he edsilibrahan din heini he ed-ikul zuen te langun he menge sulunuzen mehitenged kayi. Neked-iring dà is menge sulunuzen he para te menge Israilihanen wey te kenà menge Israilihanen.”
NUM 9:15 Hein andew te kebenguna zuen te Tulda he Ed-ezapan he zutun itaǥù sikan is Kesuǥuan, neliǥuy heini te ǥapun. Puun te mezukilem taman te meselem, heini he ǥapun henduen be te hapuy he ed-anlag.
NUM 9:16 Iyan heini layun egkehitavù–emun maandew ebpekeliǥuy heini zuen te tulda ne emun mezukilem ed-anlag heini iring te hapuy.
NUM 9:17 Ne emun ebpeketikang sikan is gapun diyà te zivavew zuen te Tulda ne egenat heini, ne egenat daan is menge Israilihanen, ne ke hendei ebpundu haazà is gapun ne zutun dan daan egkampu.
NUM 9:18 Umbe, midhipanew wey migkampu is menge Israilihanen sumalà te insuǥù kandan te Nengazen. Kenè dan edhipanew emun dutun pa te zivavew te tulda sikan is gapun.
NUM 9:19 Minsan meluǥayad he timpu is kenà ked-awà duen te ǥapun diyà te zivavew zuen te Tulda, ne kenà sikandan egenat; edtaǥad sikandan te idsuǥù te Nengazen.
NUM 9:20 Duen timpu he egkepipira zà he andew is kenà ked-awà duen te ǥapun diyà te zivavew zuen te tulda ne egkepipira zà daan he andew is kenè dan kebpekeǥenat. Ne edhipanew en maan sikandan sumalà te idsuǥù te Nengazen.
NUM 9:21 Usahay sengekezukileman dà is kenà ked-awà duen te ǥapun, ne sunud he andew ne ebpeketikang en heini, ne egenat en daan is menge Israilihanen. Maandew etawa mezukilem egenat is menge Israilihanen basta ebpezivavew haazà is gapun.
NUM 9:22 Emun kenà ed-awà haazà is gapun diyà te zivavew zuen te tulda seled te zezuwa he andew etawa senge vulan etawa senge tuig, kenà daan ed-awà is menge Israilihanen diyà te kampu zan, iyan, emun ebpezivavew haazà is gapun ne segugunè dan egenat.
NUM 9:23 Umbe, egkampu wey egenat is menge Israilihanen sumalà te idsuǥù te Nengazen. Ne midtuman dan is menge suǥù te Nengazen he migkaǥi zin diyà te ki Moises.
NUM 10:1 Migkaǥi is Nengazen diyà te ki Moises te,
NUM 10:2 “Pevaal ka te zezuwa he trumpita he pelata ne ǥemita nu heini te kedtiǥuma te menge etew wey kebpaandam kandan te kedhipanew.
NUM 10:3 Emun ibpedredsà te ebpezaǥing haazà is dezuwa he trumpita ne edtiǥum is langun he menge etew ziyà te ǥemawan duen te Tulda he Edtelevukaayan.
NUM 10:4 Emun sevaha zà is ibpezaǥing, ne iyan dà is menge pengulu te kada tribu is edtiǥum diyà te etuvangan nu.
NUM 10:5 Emun ibpezaǥing haazà is trumpita te para te kebpaandam te menge etew te kedhipanew, is tribu he ziyà megkampu te zapit te edsilaan duen te Tulda ne iyan medhuna medhipanew.
NUM 10:6 Ne emun ikezuwa he kebpezeǥinga zuen te trumpita, ne iyan en maan megenat is tribu he egkezivavà duen te Tulda. Is kebpezeǥinga kayi iyan tuus te kebpeǥenata kandan.
NUM 10:7 Piru selakew is kebpezeǥinga zuen te trumpita emun ibpetiǥum sikandan.
NUM 10:8 “Iyan dà is menge kevuwazan ni Aaron he menge memumuhat mebpezaǥing duen te menge trumpita. Heini he sulunuzen, kinahanglan he edtumanen niw wey te menge kevuwazan niw taman te taman.
NUM 10:9 “Emun diyè kew en te tanè niw, ne ebpekidtebek kew te menge kuntada niw he edrasey keniyu, ipezaǥing niw is menge trumpita su para siak is Nengazen he Megbevayè niw, egketenuzan ku sikiyu ne edlibriyen ku sikiyu te kedezaat te menge kuntada niw.
NUM 10:10 Emun timpu te kedlipey niw zutun te kedsilibra niw te menge pista te netendek he timpu te kebeeli zuen, ragkes en is Pista te Kebpuun te Hayag–pezaǥing niw is menge trumpita emun ebpemuhat kew te menge pemuhat he edtutungen wey pemuhat he para te meupiya he kedepità. Heini he menge trumpita ebpetanudtanud kediey te Megbevayè niw te kebpekid-uyun ku keniyu. Iyan a Nengazen he Megbevayè niw.”
NUM 10:11 Hein ike-20 he andew te ikezuwa he vulan, te ikezuwa he tuig puun te kegawas te menge Israilihanen diyà te Ehipto, midhendiyà te zivavew sikan is gapun duen te Tulda he Ed-ezapan he zutun itaǥù sikan is Kesuǥuan.
NUM 10:12 Ne midhipanew is menge Israilihanen puun te sibsivayan he Sinai ne edhalinhalin te menge lugar, taman te mibpundu sikan is gapun diyà te sibsivayan he Paran.
NUM 10:13 Iyan heini nehuna he timpu te kedhipanew zan, he sumalà te suǥù te Nengazen pinaaǥi ki Moises.
NUM 10:14 Is grupu he midhuna he uwiten dan is bendira zan iyan is grupu he ebpenguluwan te tribu ni Juda. Is pengulu zan iyan si Nashon he anak ni Aminadab.
NUM 10:15 Is tribu ni Isacar mibpenguluwan ni Netanel he anak ni Zuar.
NUM 10:16 Ne is tribu ni Zebulun mibpenguluwan ni Eliab he anak ni Helon.
NUM 10:17 Hein netines en sikan is Tulda he Ed-ezapan, midtival en heini te menge kevuwazan ni Gershon wey menge kevuwazan ni Merari. Ne midtinundug sikandan medhipanew.
NUM 10:18 Ne is midtinundug kandan he ed-uwit te bendira zan iyan is grupu he ebpenguluwan te tribu ni Reuben. Is pengulu zan iyan si Elizur he anak ni Shedeur.
NUM 10:19 Is tribu ni Simeon mibpenguluwan ni Shelumiel he anak ni Zurishadai.
NUM 10:20 Ne is tribu ni Gad mibpenguluwan ni Eliasaf he anak ni Deuel.
NUM 10:21 Ne midtinundug kandan is menge kevuwazan ni Kohat he ed-uwit te segradu he menge gelemiten duen te Tulda he Ed-ezapan. Kinahanglan he igkepelastar en sikan is Tulda te kenè pa sikandan ebpekeuma ziyà te lugar he egkempuwan dan.
NUM 10:22 Ne is midtinundug kandan he ed-uwit te bendira zan iyan is grupu he ebpenguluwan te tribu ni Efraim. Is pengulu zan iyan si Elishama he anak ni Amihud.
NUM 10:23 Is tribu ni Manase mibpenguluwan ni Gamaliel he anak ni Pedazur.
NUM 10:24 Ne is tribu ni Benjamin mibpenguluwan ni Abidan he anak ni Gideoni.
NUM 10:25 Is kinehuziyanan he midhipanew he ed-uwit te bendira zan iyan is grupu he ebpenguluwan te tribu ni Dan. Iyan sikandan nehimu he vantey ziyà te egkeiniyuǥan he para te langun he grupu. Is pengulu zan iyan si Ahiezer he anak ni Amishadai.
NUM 10:26 Is tribu ni Asher mibpenguluwan ni Pagiel he anak ni Ocran.
NUM 10:27 Ne is tribu ni Naftali mibpenguluwan ni Ahira he anak ni Enan.
NUM 10:28 Iyan heeyan kebpekedezepità te menge grupu te menge tribu te Israel dutun te kedhipanew zan.
NUM 10:29 Ne migkaǥi si Moises diyà te ki Hobab he uyang din he anak ni Reuel he Midianhen te, “Edhendiyè key en te lugar he migkaǥi te Nengazen he ibeǥey zin kenami. Umbe zuma ka kenami ne kenè dey sikew ebey-anan, su midsaad is Nengazen he edtuvazan din is Israel.”
NUM 10:30 Piru midtavak si Hobab te, “Kenà a. Edlikù a kayi te kediey he lugar wey ziyà te menge emurè ku te inged.”
NUM 10:31 Migkaǥi si Moises te, “Emun egkehimu ne kenè key kenikew ewai. Iyan ka netau ke hendei is meupiya he egkempuwan dey ziyà te sibsivayan. Iyan ka giya kenami.
NUM 10:32 Emun eduma ka kenami ebehinan dey sikew te langun he keupiyaanan he ibeǥey te Nengazen kenami.”
NUM 10:33 Umbe, mid-awà sikandan puun te vuntud te Nengazen ne midhipanew sikandan seled te tetelu he andew. Layun diyà te egkehunaan dan sikan is Kavan te Kebpekid-uyun su wey zan meturedu is lugar he egkehimelayan dan.
NUM 10:34 Emun maandew, ziyà sikan is gapun te Nengazen te zivavew zan te edhipanew.
NUM 10:35 Kada ed-uwita sikan is Kavan te Kebpekid-uyun, egkaǥi si Moises te, “Sigi en, Nengazen, gurigawa nu en is menge kuntada nu. Berakat he mebpemelaǥuy sikandan.”
NUM 10:36 Ne kada idsavuk sikan is Kavan te Kebpekid-uyun, egkaǥi si Moises te, “Nengazen, likù ke en kayi, te utew mezakel he menge etew te Israel.”
NUM 11:1 Ne midriklamu is menge Israilihanen mehitenged te kelised dan. Kegkezineǥa kayi te Nengazen, nepauk sikandin ne midretem din is hapuy he nekevinsul te nepipira he vahin te peliǥuy te kampu zan.
NUM 11:2 Tenged kayi mibuyù te penavang is menge Israilihanen diyà te ki Moises, ne mid-ampù si Moises diyà te Nengazen, ne neevukan haazà is hapuy.
NUM 11:3 Umbe, migngezanan dan haazà is lugar te Tabera, su midretem is Nengazen te hapuy ziyà te kandan.
NUM 11:4 Dutun he timpu, is grupu te kenà menge Israilihanen he nemenduma te menge Israilihanen midriklamu su egkesuat dan he egkaan te zuma he kelasi te menge keenen, ne is menge Israilihanen midriklamu zaan he ke sikandan te, “Deyzey pezem ke ebpekekaan kiw te usa.
NUM 11:5 Hein diyè kiw pa te Ehipto ebpekekaan kiw te isdà he wazè din bayad wey menge timun, menge milun, menge sibuyas, wey menge ahus.
NUM 11:6 Piru kayi kenè kiw egenahan he egkaan su pudu zà ‘manna’ is keenen tew.”
NUM 11:7 Is ‘manna’ henduen be te dezeisey he menge lisu ne meputì heini.
NUM 11:8 Ebpengemien heini te menge Israilihanen diyà te tanà kada meselem, ne egelingen dan, ne emun kenà, ne ebeveyuwen dan. Edhilutuen dan heini ziyà te ziniyun ne ebeelan dan he menipis he supas. Is taam kayi iring te taam te pan he midlutù te lana he ulibu.
NUM 11:9 Ebpekelapik heini te kebpeketanà te menge zehemug dutun te kampu emun mezukilem.
NUM 11:10 Nezineg ni Moises he edriklamu is kada pemilya ziyà te ǥemawan te menge tulda zan. Umbe utew sikandan nepeuki te Nengazen, ne neselekawan daan si Moises tenged kayi te mibeelan dan.
NUM 11:11 Mid-insà sikandin diyà te Nengazen te, “Maan is mibeǥayan a kenikew is suluǥuen nu te zekelà he prublima? Hengkey is neveelan ku he wazè nu ikesuat he iyan imbeǥayi nu kediey te prublima kayi te menge etew?
NUM 11:12 Menge anak ku ve sikandan? Iyan e ve mid-anak kandan? Maan is egkeǥiyan a kenikew he ed-eturen ku sikandan iring te ked-atur te perevantey te vatà he edsepipiyen din wey ibpesusu zin. Ne ibpezuma nu sikandan kedì diyà te tanà he insaad nu ziyà te menge kepuun dan?
NUM 11:13 Hendei a egkuwa te usa he para kayi he menge etew? Edtulung dan edriklamu kayi te kedì he veǥayi ku sikandan te usa he egkekaan dan.
NUM 11:14 Kenè ku egkehimu is ked-atur kandan te langun emun iyan e zà. Utew heini meveǥat para kediey.
NUM 11:15 Emun iyan heini ebeelan nu kediey ne himetayi ad nasì kenikew ǥuntaan. Emun nekepenunuat a kenikew, ne kenà a kenikew vey-ani he egkerasey!”
NUM 11:16 Umbe, migkaǥi is Nengazen diyà te ki Moises te, “Tiǥuma nu is 70 he menge edumala te menge Israilihanen he nekilala nu he nengulu te menge etew, ne ipehendiyè nu sikandan te Tulda he Edtelevukaayan ne ipehitindeg nu sikandan dutun duma kenikew.
NUM 11:17 Ebulus a ne ebpekidlalag a kenikew zutun, ne ibeǥey ku kandan is duma he keǥehem he imbeǥey ku kenikew su wey zan mekeuǥup kenikew te kedumala te menge etew su para zuen nu zuma te kedumala kandan.
NUM 11:18 “Ne keǥiyi nu is menge etew he mebpekelumpiyu sikandan, su keeselem duen en egkekaan dan he usa. Keǥiya nu heini ziyà te kandan: ‘Siak is Nengazen, nezineg ku sikiyu he edriklamu su egkesuat kew he egkaan te usa. Ne migkaǥi kew pa he meupiya pa is kebpekesavuk niw ziyà te Ehipto kenà guntaan. Umbe ebeǥayan ku sikiyu te usa keeselem su wey kew mekekaan te usa.
NUM 11:19 Ne is kebpekekaan niw kayi, ne kenè dà seled te senga andew, etawa zezuwa he andew, etawa lelima, etawa sepulù, etawa 20 he andew,
NUM 11:20 kekena, senge vulan, taman te igkeutè niw heini su edsemuwen kew en. Su inselikwey a keniyu is nekiduma keniyu, ne midriklamu kew kayi te kedì he ke sikiyu te, deyzey pa ke wazè kew en med-awà diyà te Ehipto.’ ”
NUM 11:21 Piru migkaǥi si Moises te, “600,000 langun is menge etew he zuma ku, ne ǥuntaan migkaǥi ka he ebeǥayan nu sikandan te usa he egkekaan dan seled te senge vulan?
NUM 11:22 Minsan edlepaan dey pa is langun he menge kerehidu wey menge vaka etawa edhingutelen dey is langun he isdà diyà te zaǥat ne kenè pa ereg kandan.”
NUM 11:23 Migkaǥi is Nengazen diyà te ki Moises te, “Duen be edtemanan te ǥehem ku? Egkeehè nu ǥuntaan ke egkeulaula ve is migkaǥi ku etawa kenà.”
NUM 11:24 Umbe, migenat si Moises ne migkeǥiyan din is menge etew zuen te migkaǥi kandin te Nengazen. Midtiǥum din sikan is 70 he menge perezumala ne impehitindeg din diyà te peliǥuy zuen te tulda.
NUM 11:25 Ne mibulus is Nengazen pinaaǥi te ǥapun ne nekidlalag ki Moises. Ne imbeǥey zin duen te 70 he menge perezumala is duma he keǥehem. Ne hein diyè en haazà te kandan ne nenagnà sikandan, piru wazè en haazà meuman-uman.
NUM 11:26 Duen dezuwa zuen te 70 he menge perezumala he wazà med-awà diyà te kampu ne wazè dan medhendiyà te tulda he iyan si Eldad wey si Medad. Piru nekaangken gihapun sikandan te keǥehem ne ebpemenagnà daan sikandan dutun te kampu.
NUM 11:27 Ne zuen betan-en he maama he mibpelelaǥuy pehendiyà te ki Moises he ke sikandin te, si Eldad wey si Medad ne nenagnà diyà te kampu.
NUM 11:28 Ne si Josue he anak ni Nun, he nehimu he timbang ni Moises puun te vetan-en pa sikandin, migkaǥi ziyà te ki Moises te, “Datù, ipeengked nu sikandan.”
NUM 11:29 Piru midtavak si Moises te, “Ingkeipeng nu ve he ebpekezezaat heini te kegkepengulu ku? Emun iyan e zà ebpekevayàbayà, egkesuat a he pudu veǥayi te keǥehem te Nengazen is menge etew zin su para pudu zan mekepenagnà iring te menge ebpeneuven.”
NUM 11:30 Ne kegkepasad dutun midlikù si Moises wey haazà is menge perezumala te menge Israilihanen diyà te kampu.
NUM 11:31 Ne zutun impepengeramag te Nengazen te ebpekeuwit te menge piyuǥù puun te zaǥat. Ne nemenlayang dan diyà te peliǥuy te kampu he tetelu he ǥiek is ketikang dan puun te tanà, ne nepipira he kilumitru is keluǥayad wey keluag te tanà he nezebpakan dan.
NUM 11:32 Umbe, zutun te tivuuk he andew nengapul is menge etew taman te mezukilem wey taman en te sunud he andew. Ne wazà mebminus te nengkelibu he kilu is nekuwa te kada sevaha kandan, ne impengagkag dan haazà diyà te peliǥuy te kampu.
NUM 11:33 Iyan, wazè dan pa haazà maamin ne utew en sikandan nepeuki te Nengazen, ne mibpeeǥiyan din sikandan te kezeetan.
NUM 11:34 Umbe, migngezanan haazà he lugar te Kibrot Hataava su zutun ipenleveng is menge etew he seseveleken te usa.
NUM 11:35 Puun dutun midhipanew is menge Israilihanen pehendiyà te Hazerot ne zutun dan megkampu.
NUM 12:1 Hein diyè dan te Hazerot, midsawey ni Miriam wey ni Aaron si Moises su ǥeina te nengesawa sikandin te Kushanen.
NUM 12:2 Ke sikandan te, “Pinaaǥi zè be ki Moises is kebpekidlalag te Nengazen? Kenè be ebpekidlalag daan sikandin pinaaǥi kenami.” Piru nezineg haazà te Nengazen.
NUM 12:3 (Si Moises iyan etew he kenà mepelevawen te langun he menge etew te tivuuk he kelibutan.)
NUM 12:4 Umbe, migkeǥiyan te Nengazen si Moises, si Aaron, wey si Miriam te, “Gawas kew is tetelu keniyan te kampu ne hendiyè kew te Tulda he Edtelevukaayan.” Umbe migawas sikandan is tetelu ne midhendiyè dan te Tulda.
NUM 12:5 Ne mibulus is Nengazen pinaaǥi te ǥapun he henduen be te tukud ne midhitindeg diyà te ǥemawan duen te Tulda he Edtelevukaayan ne mid-umew zin si Aaron wey si Miriam. Ne hein mid-uvey haazà is dezuwa,
NUM 12:6 migkaǥi is Nengazen te, “Pemineǥa niw heini: Emun duen ku ebpeneuven diyà te keniyu, ne ebpekidlalag a kandin pinaaǥi te ibpelewasan ku wey ibpeteǥeinep ku.
NUM 12:7 Piru kenà iring keniyan emun iyan ku edlelaǥan is suluǥuen ku he si Moises, he egkeseriǥan he pengulu te menge etew ku.
NUM 12:8 Emun ebpekidlalag a kandin, ne iring te ebpeetuvangè key su keladu is kebpekidlalag ku. Ne iring ded te neehè e zin. Piru minsan pa te iyan haazà wazè kew mahandek he egkaǥi te mezaat he ebpekesuǥat diyà te suluǥuen ku he si Moises?”
NUM 12:9 Utew sikandan nepeuki te Nengazen ne mid-awà sikandin.
NUM 12:10 Hein mid-awè en haazà is gapun diyà te zivavew zuen te Tulda, ne segugunà midtuvùi te zaru te lundis si Miriam, ne utew mibmeputì is lundis din. Ne hein naahà haazà ni Aaron,
NUM 12:11 migkeǥiyan din si Moises te, “Datù, kenè key kenikew ipaantus tenged te salà he tinulebung is kegkeveeli zey zuen.
NUM 12:12 Kenè nu ituǥut he egkeiring si Miriam te vatà he neranran he is ketengà te lawa zin neredak en.”
NUM 12:13 Umbe, mibpehizuhizu si Moises te Nengazen he ke sikandin te, “He Megbevayè ku, edhangyù a ziyà te kenikew he bewii nu si Miriam.”
NUM 12:14 Midtavak te Nengazen si Moises te, “Kenè be ke ed-ilevan sikandin te amey zin diyà te zagwey zin tenged te kedsewaya zin kandin, ed-entusen din is keelezan seled te pitu he andew? Umbe ipeǥawas sikandin keniyan te kampu seled te pitu he andew, ne emun egkepasad haazà is pitu he andew ne egkehimu en he edlikù sikandin.”
NUM 12:15 Umbe, impeǥawas si Miriam puun te kampu seled te pitu he andew. Ne haazà is menge etew wazà medlaus te hipanew zan taman te nekelikù si Miriam diyà te kampu.
NUM 12:16 Ne liwas dutun mid-awè dan diyà te Hazerot ne ziyè dan megkampu te sibsivayan he Paran.
NUM 13:1 Migkaǥi is Nengazen diyà te ki Moises te,
NUM 13:2 “Suǥù ka te menge etew he ibpepeniid diyà te Canaan he iyan kes tanà he ibeǥey ku keniyu te menge Israilihanen. Suǥù ka te tigselimbaha he pengulu puun te kada tribu te Israel.”
NUM 13:3 Umbe, midtuman ni Moises haazà is insuǥù te Nengazen kandin. Impehendiyè din te Canaan is menge pengulu te menge Israilihanen puun diyà te sibsivayan he Paran.
NUM 13:4 Iyan heini menge tribu wey menge ngazan te menge pengulu: Tribu; Pengulu Reuben; Shamua he anak ni Zacur Simeon; Shafat he anak ni Hori Juda; Caleb he anak ni Jefune Isacar; Igal he anak ni Jose Efraim; Hoshea he anak ni Nun Benjamin; Palti he anak ni Rafu Zebulun; Gadiel he anak ni Sodi Manase he anak ni Jose; Gadi he anak ni Susi Dan; Amiel he anak ni Gemali Asher; Shetur he anak ni Micael Naftali; Nabi he anak ni Bofsi Gad; Geuel he anak ni Maki
NUM 13:16 Iyan sikandan menge etew he midsuǥù ni Moises te kebpeniid diyà te Canaan. (Mid-ilisan ni Moises is ngazan ni Hoshea he anak ni Nun te Josue.)
NUM 13:17 Hein wazè pa sikandan ipeǥenat ni Moises su wey zan mekepeniid diyà te Canaan, migkeǥiyan din sikandan te, “Hipanew kew pehendiyà te zizaya ne hendiyè kew te Negev.
NUM 13:18 Susiya niw ke hengkey is purma te tanà, wey is menge etew zuen ke memezesen be etawa memeluya, mezakel ve sikandan etawa deisey zà.
NUM 13:19 Susiya niw ke hengkey he kelasi te tanà is ed-ubpaan dan, meupiya ve etawa kenà. Susiya niw is menge inged dan ke miberengbengan be etawa wazà.
NUM 13:20 Susiya niw ke egkeveluyan be is tanè dan etawa kenà, wey ke zuen be zuen menge kayu etawa wazà. Ne peninguhaa niw he mekeuwit kew te menge prutas dutun te kedlikù niw zini.” (Timpu haazà te kegkengelutui te paras.)
NUM 13:21 Umbe, midhipanew sikandan ne midsusi zan haazà is tanà puun te sibsivayan he Zin pehendiyà te Rehob he uvey te Lebo Hamat.
NUM 13:22 Mibpuun sikandan diyà te Negev taman te nekeuma zan diyà te Hebron, he zutun ed-ubpà si Ahiman, si Sheshai, wey si Talmai, he menge kevuwazan ni Anak. (Heini is Hebron pitu en he tuig is kebenguna zuen human pa mevangun is Zoan diyà te Ehipto).
NUM 13:23 Ne hein nekeuma zan diyà te zal-ug he Eshcol, midtamped sikandan te sengerupung he paras, ne utew heini meveǥat umbe midtival haazà te zezuwa he etew. Mid-uwit daan sikandan te menge prutas he pumigranata wey higus.
NUM 13:24 Haazà he zal-ug migngezanan he Eshcol, tenged duen te sengerupung te paras he midtamped te menge Israilihanen.
NUM 13:25 Ne hein nepasad is 40 he andew te kebpeniid dan dutun te tanà, midlikù sikandan
NUM 13:26 diyà te ki Moises, ki Aaron, wey ziyà te tivuuk he keet-etawan te Israel ziyà te Kadesh he ziyà te sibsivayan he Paran. Migkaǥi zan diyà te langun he menge etew zutun is neehè dan, ne impeehè dan is uwiten dan he menge prutas.
NUM 13:27 Migkeǥiyan dan si Moises te, “Midhendiyè key te lugar he impesusi nu kenami, meupiya heini wey selebpeten he tanà. Heini zed is nekuwa zey he menge prutas.
NUM 13:28 Piru mekeǥeǥehem is menge etew he ed-ubpà duen, ne utew zezekelà is menge inged dan he nengeliǥuy te verengbeng. Neehè dey pa ganì is menge kevuwazan ni Anak.
NUM 13:29 Is menge Amalikanhen diyà ed-ubpà te Negev; is menge Hitihanen, menge Jebusihanen, wey is menge Amorihanen diyà ed-ubpà te menge vuvungan; ne is menge Canaanhen diyà ed-ubpà te veyvey te zaǥat wey veyvey te Wahig he Jordan.”
NUM 13:30 Ne impehenek ni Caleb is menge etew ziyà te etuvangan ni Moises, ne ke sikandin te, “Egenat kiw en guntaan ne ed-eǥawen tew haazà is tanà, su siguradu he egkaaǥew tew heini.”
NUM 13:31 Piru migkaǥi sikan is menge etew he zuma ni Caleb te neniid te, “Kenè kiw ebpekehimu he edsurung kandan su edhuna sikandan he melig-en kenitew.”
NUM 13:32 Ne midtudtulan dan is menge Israilihanen te mekesuǥeysuǥey mehitenged duen te tanà he midsusi zan. Iyan heini migkaǥi zan, “Kenà meupiya is tanà he midsusi zey, su ebpekekaid te menge meǥinged duen, ne liyu keniyan, is menge etew he neehè dey zutun ne utew memelangkew.
NUM 13:33 Duen dey pe man ganì naahà he menge eregasi he menge kevuwazan ni Anak. Henduen dà te menge pelaǥà is ked-isipa zey te keugelingen dey emun idhindeg kandan, ne iyan daan heeyan ked-isipa zan kenami.”
NUM 14:1 Dutun mismu he kezukileman nemenineǥew is menge Israilihanen.
NUM 14:2 Mibegulbul sikandan diyà te ki Moises wey ki Aaron. Ke sikandan te, “Deyzey pa ke nemematey kiw en diyà te Ehipto etawa kayi te sibsivayan.
NUM 14:3 Maan is ed-uwiten kiw pa te Nengazen dutun he tanà? Para zè be mebpematey kiw te tebek wey ebihaǥen is menge esawa tew wey menge anak tew? Deyzey pa vuwa ke edlikù kiw ziyà te Ehipto.”
NUM 14:4 Ne mibpelelelaǥè dan he ke sikandan te, “Deyzey pa ke ebpilì kiw te ebpekepengulu kenitew ne edlikù kiw ziyà te Ehipto.”
NUM 14:5 Ne si Moises wey si Aaron midluhud diyà te etuvangan te tivuuk he keet-etawan te Israel he netiǥum dutun.
NUM 14:6 Ne si Josue he anak ni Nun wey si Caleb he anak ni Jefune, mibindas dan is bisti zan tenged te kegkeseeng dan. Heini sikandan is dezuwa, miduma te kebpeniid duen te tanà.
NUM 14:7 Migkeǥiyan dan is menge Israilihanen te, “Utew meupiya sikan is tanà he mibeyaan dey.
NUM 14:8 Emun nekepenunuat kiw te Nengazen, egiyahan kiw zin te kedhendutun te tanà he meupiya wey selebpeten, ne ibeǥey zin kenitew.
NUM 14:9 Kenè niw zà supaka is Nengazen. Ne kenè kew mahandek te menge etew zutun su egkezaag tew sikandan. Wazà edtavang kandan, ne sikitew mulà, edtevangan kiw te Nengazen. Umbe kenè kew mahandek kandan.”
NUM 14:10 Ne zutun, ebpenulengen en pezem sikandan te vatu te menge zuma zan he Israilihanen, piru midtik-ew mebpaahà diyà te zivavew zuen te Tulda he Edtelevukaayan is mekeǥeǥehem he kebpekiduma te Nengazen.
NUM 14:11 Migkaǥi is Nengazen diyà te ki Moises te, “Keenu ves buwa ed-engked heini is menge etew te kedselikwey kedì? Keenu zan buwa ed-engkezi is kenè dan kedtuuwi kedì minsan neehè dan is egkengein-inuwan he mibeelan ku ziyà te kandan?
NUM 14:12 Ibpaaǥi ku ziyà te kandan is kezeetan, ne edezeetan ku sikandan, piru edhimuwen ku mulà sikew he sevaha he nasyun, he edhuna pa kandan he mekeǥeǥehem wey melig-en.”
NUM 14:13 Ne migkeǥiyan ni Moises is Nengazen te, “Hengkey is egkekaǥi te menge Ehiptohanen emun egketudtulan sikandan mehitenged kayi? Kenè be netuenan dan he pinaaǥi te ǥehem nu migkuwa nu is menge Israilihanen puun diyà te kandan?
NUM 14:14 Emun edèdeetan nu heini is menge etew nu, edtudtulen dan heini ziyà te menge meǥinged te Canaan. Ne heini is menge Canaanhen, nezineg dan en daan he iyan ka is Nengazen nekiduma te menge Israilihanen he mibpaahà pinaaǥi te ǥapun he egiya kandan. Edhuna ka kandan emun maandew pinaaǥi te ǥapun he henduen te tukud, ne emun mezukilem pinaaǥi te hapuy he henduen daan te tukud.
NUM 14:15 Ne emun egeraan nu heini he menge etew te kesevaha zà, is menge etew ziyà te menge nasyun he nekezineg te kegkevantug nu egkaǥi te,
NUM 14:16 ‘Wazà mekehimu is Nengazen he ed-uwit te menge Israilihanen diyà te tanà he insaad din kandan, umbe mibpenhimetayan din en sikandan diyà te sibsivayan.’ ”
NUM 14:17 “Umbe, ǥuntaan edhangyù a ziyà te kenikew, Nengazen, berakat he ipeehè nu is gehem nu sumalà te lalag nu he
NUM 14:18 veliǥeǥawen ka wey kenè ka melemu he egkepauk, wey mepineseyluwen ka te menge salà wey kedrapas te etew. Piru edsilutan nu is menge mekesesalà, taman te iketelu wey ikeepat he lapis te kevuwazan.
NUM 14:19 Tenged te zekelà he gaǥew nu, edhangyù a he peseyluwa nu is salà kayi te menge etew iring te kebpeseyluwa nu kandan puun pa te kegawas dan diyà te Ehipto.”
NUM 14:20 Midtavak is Nengazen te, “Ebpeseyluwen ku sikandan sumalà te midhangyù nu.
NUM 14:21 Piru ebpenangdù a, is uuyag he Nengazen, he mintras nekepenù te tivuuk he kelibutan is mekeǥeǥehem he kebpekiduma ku, tutuu zaan he
NUM 14:22 wazà minsan sevaha kandan he ebpekeseled diyà te tanà he insaad ku ziyà te menge kepuun dan. Su minsan neehè dan is mekeǥeǥehem he kebpekiduma ku kandan wey egkengein-inuwan he mibeelan ku ziyà te Ehipto wey ziyà te sibsivayan, layun e zan gihapun egezami wey wazè dan mebpezumazuma kedì. Umbe sikan is menge midselikwey kedì, ne kenà ebpekeseled keniyan he tanà.
NUM 14:24 Piru nekeviza mulà kandan is suluǥuen ku he si Caleb su mibpezumazuma mulà kedì te ebpuun diyà te gehinawa zin, umbe ibpeseled ku mulà duen te tanà he mibeeyaan din, ne ebpekeubpà daan is menge kevuwazan din dutun he tanà.
NUM 14:25 Ne ǥuntaan, kenè kew en laus su zuen menge Canaanhen wey menge Amalikanhen he ebpen-ubpà diyà te menge suǥud, kekenà, likù kew en nasì keeselem diyà te sibisivayan he ziyà te zalan pehendiyà te Zaǥat he Meriǥà.”
NUM 14:26 Migkaǥi is Nengazen diyà te ki Moises wey ki Aaron te,
NUM 14:27 “Keenu en buwa ed-engked he edriklamu kuntra kedì heini is lalung he menge etew? Nezineg ku is menge riklamu kayi te menge Israilihanen he menge riklemedur.
NUM 14:28 Umbe, keǥiya niw heini ziyà te kandan: ‘Siak is uuyag he Nengazen, ebpenangdù a he ebeelan ku ziyà te keniyu is migkaǥi niw.
NUM 14:29 Ebpematey kew kayi te sibsivayan. Su mibegulbulan a keniyu, wazà minsan sevaha keniyu he ebpenuiǥen te 20 pehendiyà te metikang,
NUM 14:30 he ebpekeseled duen te tanà he impenangdù ku he ibeǥey keniyu, gawas ki Caleb he anak ni Jefune wey ki Josue he anak ni Nun.
NUM 14:31 Ne sikan mulà is menge anak niw he egkeǥiyen niw he ebihaǥen, ne ed-uwiten ku sikandan duen te tanà he mid-engkezan niw ne egkaangken dan heini.
NUM 14:32 Piru sikiyu ebpematey kew kayi te sibsivayan.
NUM 14:33 Is menge anak niw, egkeiring te ed-elima te kerehidu he ebpekeriǥuriǥu kayi te sibsivayan seled te 40 he tuig. Ne tenged kayi egkerasey sikandan tenged te keniyu he kedluib kediey taman te ebpematey kew is langun.
NUM 14:34 Ne geina te 40 he andew is kebpeniizi te menge meniniid duen te tanà, ne ebpekaantus kew zaan te 40 he tuig tenged te menge salè niw, wey niw metueni ke hengkey is ebeelan ku ke egkepeukan ku is ebpekigkuntada kedì.
NUM 14:35 Iyan a is Nengazen migkaǥi kayi, ne kenà ebperis is kebeeli ku te nekaǥi ku he ebeelan ku kayi te mezaat he menge etew he nesevaha he egkuntada kedì. Ebpematey sikandan is langun kayi te sibsivayan.’ ”
NUM 14:36 Ne zutun, sikan is menge etew he midsuǥù ni Moises te kebpeniid he nenudtul te mezaat mehitenged duen te tanà he iyan nehimu he hinungdan te kebegulbul te menge Israilihanen, ne nematey te zaru ziyà te etuvangan te Nengazen.
NUM 14:38 Duen te 12 he menge meniniid ne iyan dà wazà mebpatey, si Josue he anak ni Nun wey si Caleb he anak ni Jefune.
NUM 14:39 Ne hein midtudtul haazà ni Moises diyà te langun he menge Israilihanen, neseeng sikandan.
NUM 14:40 Ne hein sunud he andew midsayu sikandan med-enew su edtekezeg sikandan diyà te menge vuvungan te Canaan. Ke sikandan te, “Netuenan dey he nekesalè key, ne ǥuntaan andam key en he edhendiyà te lugar he insaad te Nengazen!”
NUM 14:41 Piru migkaǥi si Moises te, “Maan is edsupaken niw en maan guntaan is insuǥù te Nengazen he medlikù kew zèpa ziyà te sibsivayan? Kenè kew ebmezeeǥen!
NUM 14:42 Kenè kew ǥenat, su is Nengazen wazà mebpekiduma keniyu, ne egkezaag kew te menge kuntada niw.
NUM 14:43 Emun ebpekidtebek keniyu is menge Canaanhen wey menge Amalikanhen ne ebpemematey kew; kenà ebpekiduma is Nengazen keniyu su inselikwey niw sikandin.”
NUM 14:44 Piru midhendiyà gihapun sikandan te menge vuvungan te Canaan minsan kenè dan duma si Moises wey sikan is Kavan te Kebpekid-uyun te Nengazen kandan.
NUM 14:45 Ne midsurung kandan is menge Amalikanhen wey menge Canaanhen he meǥinged dutun te menge vuvungan, ne nezaag sikandan, ne midal-as sikandan taman te Horma.
NUM 15:1 Midsuǥù te Nengazen si Moises
NUM 15:2 he keǥiya zin heini ziyà te menge Israilihanen: “Emun diyè kew en te tanà he ibeǥey ku keniyu he egkeubpaan niw,
NUM 15:3 ne pemuhat kew te para kediey te menge ibpemuhat he ebpuun te menge uyaǥen niw. Pemuhat kew te menge pemuhat he edtutungen, menge pemuhat para te kedtuman te menge penaad, menge pemuhat he kineugelingen he suat, etawa menge pemuhat para te kedsilibra te menge pista. Is kehemut kayi te menge pemuhat he pinaaǥi te hapuy ne ebpekepenunuat kedì.
NUM 15:4 Is ebpemuhat te nati he kerehidu he pemuhat he edtutungen para kedì ne mebpemuhat daan te pemuhat he para gasa. Heini he pemuhat is para gasa kinahanglan he zezuwa he kilu he meupiya he kelasi he herina he edsehuǥan te senge litru he lana. Ne edlepikan heini te pemuhat he inumen he senge litru he vinu.
NUM 15:6 Emun meǥurang en he kerehidu is ibpemuhat niw, lepiki niw heini te pemuhat he para gasa he heepat he kilu he meupiya he kelasi he herina he edsehuǥan te senge litru wey tengà he lana.
NUM 15:7 Ne edlepikan daan heini te pemuhat he inumen he senge litru wey tengà he vinu. Is kehemut kayi he pemuhat ebpekepenunuat kedì.
NUM 15:8 “Is ebpemuhat te turiti he vaka he pemuhat he edtutungen etawa pemuhat para te kedtuman te penaad, etawa pemuhat he para te meupiya he kedepità,
NUM 15:9 kinahanglan he mebpemuhat daan sikandin te pemuhat he para gasa he heenem he kilu he meupiya he kelasi te herina he edsehuǥan te zezuwa he litru he lana.
NUM 15:10 Edlepikan pa heini te pemuhat he inumen he zezuwa he litru he vinu. Is kehemut kayi he pemuhat te pinaaǥi te hapuy ne ebpekepenunuat kedì.
NUM 15:11 Iyan heeyan beeli niw emun ebpemuhat kew te tudu he vaka etawa meǥurang en he meemahan he kerehidu etawa nati he kerehidu etawa kambing.
NUM 15:12 Beeli niw heeyan diyà te kada sevaha he uyaǥen he ibpemuhat niw.
NUM 15:13 “Is langun he tutuu he Israilihanen he ebpemuhat te menge pemuhat pinaaǥi te hapuy he mehemut he pemuhat he ebpekepenunuat kedì, kinahanglan he edsunud keniyan he menge sulunuzen.
NUM 15:14 Ne is kenà menge Israilihanen he ed-ubpà duma keniyu, pirmeninti etawa kenà, he egkesuat he ebpemuhat te pemuhat pinaaǥi te hapuy he mehemut he pemuhat he ebpekepenunuat kedì, kinahanglan he edsunud dan daan keniyan he menge sulunuzen.
NUM 15:15 Sikiyu is menge Israilihanen wey kenà menge Israilihanen he mid-ubpà duma keniyu ne neked-iring dà kayi te etuvangan ku, ne neked-iring dà he kesuǥuan is edtumanen niw. Heini he sulunuzen kinahanglan he tumana niw taman te huziyan he lapis te menge kevuwazan.
NUM 15:16 Uya, neked-iring dà he menge suǥù wey menge sulunuzen is kinahanglan he edtumanen niw te menge Israilihanen wey is kenà menge Israilihanen he mid-ubpà duma keniyu.”
NUM 15:17 Midsuǥù pa te Nengazen si Moises
NUM 15:18 he keǥiya zin heini ziyà te menge Israilihanen: “Emun diyè kew en te tanà he ibeǥey ku keniyu,
NUM 15:19 ebpekekaan kew te sebpet kayi. Piru kinahanglan he edtapid kew zutun te para ibpemuhat niw kayi te kedì.
NUM 15:20 Pemuhat kew te supas he iyan ebeelan niw is herina he egkehuna he ǥinaling niw, iring te ebeelan niw ziyà te egkehuna he sebpet te trigu niw he ebpuun te gunasà.
NUM 15:21 Heini is pemuhat he ebpuun diyà te egkehuna he ginaling niw he herina, ne ipemuhat niw kayi te kedì taman te huziyan he lapis te menge kevuwazan niw taman te taman.
NUM 15:22 “Ne penenglitan, sikiyu is menge keet-etawan, nekerapas kew he wazè niw tivevaa zuen te sevaha te menge suǥù he imbeǥey ku ki Moises. (Ne heini he menge suǥù imbeǥey ku keniyu pinaaǥi ki Moises kinahanglan he edtumanen niw heini puun te andew te kebeǥaya ku kayi taman te taman.)
NUM 15:24 Ne emun wazè niw tivevaa is kedrapas niw kayi, su wazè niw metueni he nekerapas kew, sikiyu wey is langun he keet-etawan mebpemuhat kew te sevaha he turiti he vaka he iyan pemuhat he edtutungen hein netuenan niw he nekesalè kew. Pemuhat heini he ebpekepenunuat kedì is kehemut din. Ilapik niw kayi is egkinehenglanen he pemuhat he para gasa wey pemuhat he inumen, wey sevaha he meemahan he kambing he pemuhat he para idlumpiyu.
NUM 15:25 Ibpemuhat heini te memumuhat para mevelukasi is langun keniyu tenged te salè dan. Ebpeseyluwen ku sikandan su wazè dan man haazà tivevaa, wey mid-uwit man daan sikandan te pemuhat pinaaǥi te hapuy wey pemuhat he para idlumpiyu.
NUM 15:26 Uya, ebpeseyluwen ku is tivuuk he keet-etawan te Israel, ragkes is kenà menge Israilihanen he emurè dan te inged, su neuwit-uwit is langun dutun te salà he wazà tivevaa.
NUM 15:27 “Ne emun sevaha zà he etew is nekesalà te wazà tivevaa, ne med-uwit sikandin te sevaha he vehiyan he kambing he senge-tuig is keǥurang din he pemuhat he para idlumpiyu.
NUM 15:28 Ibpemuhat heini te memumuhat diyà te etuvangan ku su para mevelukasi haazà he etew tenged te salè din he wazè din tivevaa ne ebpeseyluwen ku sikandin.
NUM 15:29 Neked-iring dà is sulunuzen he para zuen te nekesalà he wazè din tivevaa, Israilihanen man etawa kenà Israilihanen he emurè niw te inged.
NUM 15:30 “Piru sikan is midtivevà is kebaal zin te salà, Israilihanen man etawa kenà, ne midsumpalit e zin. Ne kinahanglan he kenè en sikandin egkilelaan he zuma niw.
NUM 15:31 Su inselikwey zin is lalag ku wey midsupak din is suǥù ku. Kenè niw sikandin kilelaa he sakup niw. Ne televaken din is salè din.”
NUM 15:32 Hein diyà te sibsivayan is menge Israilihanen, duen etew he neehè dan he nengayu zutun te Andew te Kedhimeley.
NUM 15:33 Miduma sikandin duen te menge etew he nekaahà kandin diyà te ki Moises wey ki Aaron wey ziyà te kezekelan.
NUM 15:34 Ne mibpirisu zan sikandin su wazè dan pa mekesiguru ke hengkey is ereg he ebeelan dan kandin.
NUM 15:35 Ne migkaǥi is Nengazen diyà te ki Moises te, “Kinahanglan he edhimetayan haazà he etew, ibpetuleng sikandin te vatu te langun, diyà te ǥawas te kampu.”
NUM 15:36 Umbe, mid-uwit sikandin te menge etew pehendiyà te ǥawas te kampu ne mibpenuleng dan te vatu taman te minatey, sumalà te insuǥù te Nengazen ki Moises.
NUM 15:37 Midsuǥù te Nengazen si Moises
NUM 15:38 he keǥiya zin heini ziyà te menge Israilihanen: “Teuzi niw te egkengevitey is sidsid te visti niw ne teuzi niw te hiket he meitem is kaavuavu zin. Kinahanglan he ed-ul-ulahan niw heini wey te huziyan he lapis te menge kevuwazan niw taman te taman.
NUM 15:39 Heini is egkengevitey, ebpetanudtanud keniyu te langun he menge suǥù ku su wey niw tumana heini ne kenà iyan is keniyu zà he egkesuatan te ebaal.
NUM 15:40 Pinaaǥi kayi te egkengevitey edtentenuzan niw is kedtuman te langun he menge suǥù ku, ne egkehimu kew he ǥaked ku.
NUM 15:41 Iyan a is Nengazen he Megbevayè niw mibpeǥawas keniyu ziyà te Ehipto su wey a mehimu he Megbevayè niw. Uya, iyan a Nengazen he Megbevayè niw.”
NUM 16:1 Dutun he timpu, nekidsukulà ki Moises si Kora he anak ni Izhar, te anak ni Kohat te anak ni Levi. Duma zin te nekidsukulà si Datan wey si Abiram he menge anak ni Eliab, wey si On he anak ni Pelet he pudu kevuwazan ni Reuben. Duen pa zuma zan he 250 he menge Israilihanen he menge maama he nekilala wey mibpilì he menge pengulu te Israel puun te menge Israilihanen.
NUM 16:3 Midsevaha sikandan medhendiyà te ki Moises wey ki Aaron, he ke sikandan te, “Subre en heini is ebeelan niw kenami! Maan is ibpelavew niw is keugelingen niw kayi te mahabet he menge etew te Nengazen he mibpilì man pezem te Nengazen is tivuuk he menge Israilihanen he ebpenilbi kandin ne ebpekiduma zaan sikandin kayi?”
NUM 16:4 Kegkezineǥa ni Moises kayi, midluhud sikandin is nengemuyù diyà te Nengazen.
NUM 16:5 Ne migkeǥiyan din si Kora wey is langun he sumusunud kandin te, “Keeselem ke meselem ibpezayag te Nengazen ke hentei is tutuu he mibpilì din he ebpenilbi kandin pinaaǥi te kegkememumuhat, su ibpeuvey zin diyà te etuvangan din is mibpilì din. Umbe iyan heini veeli niw keeselem: Kuwa kew te teleǥuey te menge veyewà,
NUM 16:7 ne sevuki niw heini te vaǥa wey beyewà, ne uwita niw ziyà te etuvangan te Nengazen. Ne egkeehè tew ke hentei is mibpilì te Nengazen he ebpenilbi kandin. Iyan kew is menge Levihanen, mibpesubra te ebeelan niw!”
NUM 16:8 Migkaǥi pa si Moises diyà te ki Kora te, “Pemineg kew kayi is menge Levihanen.
NUM 16:9 Kenè pe be ereg para keniyu he ziyà te tivuuk he keet-etawan te Israel iyan kew mibpilì te Megbevayà te Israel he ebpekeuvey ziyà te etuvangan din pinaaǥi te kebpenilbi niw ziyà te Tulda zin wey kebpenilbi niw te kezekelan?
NUM 16:10 Mibpilì kew zin he ebpenilbi kandin, ne ǥuntaan egkesuat kew pa he egkehimu he memumuhat?
NUM 16:11 Sikew wey is menge sumusunud kenikew, nekidsukulà te Nengazen ne kenà diyà te ki Aaron.”
NUM 16:12 Ne kegkepasad dutun, impetawag ni Moises si Datan wey si Abiram, he menge anak ni Eliab. Piru migkaǥi sikandan te, “Kenè key edhendiyan!
NUM 16:13 Kenè pe be ereg is kegkuwaa nu kenami ziyà te Ehipto he meupiya wey uuzaran is tanà duen su wey key kenikew mehimetayi kayi te sibsivayan? Ne ǥuntaan egkesuat ke pa he edhadìhadì kenami.
NUM 16:14 Ne liyu keniyan, wazè key kenikew dumaha ziyà te tanà he meupiya wey selebpeten wey wazè key kenikew veǥayi te menge vevesukà etawa pemuleey te paras he egkaangken dey. Ne ǥuntaan, egkesuat ke pa he edtuntu kenami? Kenè key edhendiyan te kenikew!”
NUM 16:15 Ne utew nepauk si Moises ne ke sikandin diyà te Nengazen te, “Kenè nu zewata is menge pemuhat dan. Wazà a mekesalà diyà te minsan hentei kandan; wazà minsan sevaha he asnu he migkuwa ku ziyà te kandan.”
NUM 16:16 Migkeǥiyan ni Moises si Kora te, “Keeselem, sikew wey is menge sumusunud nu, hendiyè kew te etuvangan te Nengazen diyà te Tulda he Edtelevukaayan, su edhendiyà daan si Aaron.
NUM 16:17 Is kada sevaha zuen te 250 he menge sumusunud nu, ipeuwit nu te teleǥuey te veyewà ne peteǥui nu kandan te veyewà, he para te ibpemuhat diyà te Nengazen. Ne sikiyu ki Aaron, uwit kew zaan te tigselimbaha he teleǥuey te veyewà.”
NUM 16:18 Umbe, migkuwa is kada sevaha kandan te keugelingen din he teleǥuey ne midteǥuan din haazà te veyewà wey vaǥa, ne midhitindeg sikandan duma ki Moises wey ki Aaron diyà te gemawan te Tulda he Edtelevukaayan.
NUM 16:19 Ne hein netiǥum en ni Kora is menge sumusunud kandin diyà te etuvangan ni Moises wey ni Aaron, diyà te ǥemawan te Tulda he Edtelevukaayan, mibpeehè en te langun he etew zutun is mekeǥeǥehem he kebpekiduma te Nengazen kandan.
NUM 16:20 Migkeǥiyan te Nengazen si Moises wey si Aaron,
NUM 16:21 “Pekeziyù kew kayi te menge etew su ebpenhimetayan ku sikandan guntaan.”
NUM 16:22 Piru midluhud si Moises wey si Aaron he ke sikandan te, “He Megbevayà he ebpuunan te untung te langun he menge etew, edelehiǥen nu ve te pauk nu is langun he etew kayi te sevaha zè man is nekesalà?”
NUM 16:23 Migkaǥi is Nengazen diyà te ki Moises te,
NUM 16:24 “Keǥiyi nu is menge etew he mebpekeziyù dan diyà te menge tulda keniyan te tetelu he si Kora, si Datan, wey si Abiram.”
NUM 16:25 Ne mibeyaan ni Moises si Datan wey si Abiram, ne midtinundug kandin is menge perezumala te Israel.
NUM 16:26 Ne migkeǥiyan din is menge etew te, “Pekeziyù kew ziyà te menge tulda keniyan te lalung he menge etew! Kenè kew ǥawed te minsan hengkey he ǥaked dan, su emun ebeelan niw heini ne edèdeetan kew tenged te langun he menge salè dan.”
NUM 16:27 Umbe, mibpekeziyù is menge etew puun dutun te menge tulda ni Kora, ni Datan, wey ni Abiram. Ne migawas si Datan wey si Abiram ne midhitindeg dan diyà te ǥemawan te menge tulda zan duma te menge esawa zan wey menge anak dan.
NUM 16:28 Migkeǥiyan ni Moises is menge etew te, “Pinaaǥi kayi egketuenan niw he iyan midsuǥù kedì is Nengazen te kebaal kayi he menge vaal, ne kenà kediey zà he suat!
NUM 16:29 Emun netural he kemetayen is ibpatey kayi he menge etew, ne wazè e ves suǥua te Nengazen.
NUM 16:30 Iyan, emun edhimu is Nengazen te egkein-inuwan, ne ebeka is tanà he ed-eveleng kandan he uuyag duma te langun he menge azen dan pehendiyà te kelibutan te menge minatey, ne egketuenan niw he heini he menge etew inselikwey zan is Nengazen.”
NUM 16:31 Ne hein nekepasad si Moises he egkaǥi, mibeka is tanà he nehitindeǥan ni Datan wey ni Abiram.
NUM 16:32 Ne mid-eveleng sikandan duma is pemilya zan te tanà, duma is langun he menge sumusunud ki Kora wey is langun he azen dan.
NUM 16:33 Uuyag sikandan is langun he mid-eveleng te tanà duma is langun he azen dan. Nekedlikuey is tanà ne nahanew sikandan puun te kezekelan.
NUM 16:34 Is langun he menge Israilihanen he nekeliǥuy kandan mibpekeziyù hein nezineg dan is kulehian duen te menge etew, su neisip dan he kela ke elin sikandan evelenga te tanà.
NUM 16:35 Ne mibpengelinteuwan te Nengazen he medtuvù is hapuy ne neepur sikan is 250 he menge sumusunud ni Kora he nemuhat te veyewà.
NUM 16:36 Migkeǥiyan te Nengazen si Moises te,
NUM 16:37 “Keǥiyi nu si Eleazar he memumuhat, he anak ni Aaron, he kuwaa zin sikan is menge teleǥuey te veyewà duen te nemematey te kegketutung, su segradu heini he menge teleǥuey. Keǥiyi nu zaan sikandin he ipeyapat din diyà te meziyù sikan is menge vaǥa
NUM 16:38 zuen te menge teleǥuey he ebpuun duen te menge etew he nemematey tenged te menge salè dan. Ne ipelumpipì nu kandin sikan is menge teleǥuey ne ipekaple din haazà duen te pemuhatà su inhalad heini kayi te kediey ne nehimu heini he segradu. Ne heini he pekaplà duen te pemuhatà ne egkehimu he petizaan te menge Israilihanen.”
NUM 16:39 Ne tenged dutun te insuǥù te Nengazen pinaaǥi ki Moises, mibpenguwa ni Eleazar he memumuhat sikan is brunsi he menge teleǥuey te veyewà he uwiten duen te nengevinsulan, ne midlumpipì din heini su ibpekaple din duen te pemuhatà. Ne sevaha heini he petizaan te menge Israilihanen, he wazà minsan sevaha kandan he midtuǥutan te ked-uvey ziyà te pemuhatà te kedtutung te veyewà para te Nengazen gawas te menge kevuwazan ni Aaron, ne emun ebeelan dan heini egkeiring dan ki Kora wey te menge sumusunud kandin.
NUM 16:41 Ne sunud he andew, midriklamu en maan is tivuuk he keet-etawan te Israel ziyà te ki Moises wey ki Aaron. Ke sikandan te, “Mibpenhimetayan niw is menge etew te Nengazen.”
NUM 16:42 Dutun te kedtiǥum dan su ibpetuenan dan ki Moises wey ki Aaron is menge riklamu zan, midsinaru zan diyà te Tulda he Edtelevukaayan ne neehè dan he netembunan heini te ǥapun ne impaahà te Nengazen is mekeǥeǥehem he kebpekiduma zin.
NUM 16:43 Ne midhendiyà si Moises wey si Aaron te egkesineruwan duen te Tulda.
NUM 16:44 Ne migkaǥi is Nengazen diyà te ki Moises te,
NUM 16:45 “Pekeziyù kew keniyan te menge etew su segugunè ku sikandan edèdeeti.” Ne midluhud sikandan is dezuwa.
NUM 16:46 Ne migkeǥiyan ni Moises si Aaron te, “Kuwaa nu is teleǥuey nu te veyewà ne teǥui nu te veyewà wey vaǥa he ebpuun diyà te pemuhatà. Ne gaanggaan ka hendiyà te menge etew ne veeli nu is tulumanen su wey zan mevelukasi te menge salè dan, su nepauk en is Nengazen ne ebpuun en is limas.”
NUM 16:47 Ne midtuman ni Aaron haazà is insuǥù ni Moises, ne mibpelelaǥuy sikandin pehendiyà te teliwazà te menge etew. Mibpuun en is kedlimasa zutun te menge etew, piru impemuhat gihapun ni Aaron sikan is beyewà su wey mevelukasi haazà is menge etew tenged te menge salè dan.
NUM 16:48 Midhitindeg sikandin diyà te pid-elangan te nemematey wey menge uuyag ne neengked is kebpematey zan.
NUM 16:49 Piru 14,700 is nemematey tenged dutun he kezeetan kenà ragkes is nemematey tenged ki Kora.
NUM 16:50 Ne midlikù si Aaron diyà te ki Moises duen te ǥemawan te Tulda he Edtelevukaayan su neengked en sikan is kezeetan.
NUM 17:1 Migkaǥi is Nengazen diyà te ki Moises te,
NUM 17:2 “Keǥiyi nu is menge Israilihanen he mebeǥey te tuked diyà te kenikew is kada pengulu te tribu. Ne pesurati heini te kada ngazan dan. 12 langun he tuked.
NUM 17:3 Diyà te tuked te tribu ni Levi, ne idsurat dutun is ngazan ni Aaron su kinahanglan he zuen sevaha he tuked te kada pengulu te tribu.
NUM 17:4 Ne ziyà heini idsavuk is langun te Tulda he Edtelevukaayan, diyà te egkesineruwan duen te Kavan te Kebpekid-uyun he zutun a ebpekidhinguma keniyu ki Aaron.
NUM 17:5 Ne zutun ebpeneringsing is tuked te etew he ebpilien ku he ebpenilbi kedì pinaaǥi te kegkememumuhat ne pinaaǥi kayi egkeengked en is kedriklamu te menge Israilihanen ki Aaron wey kenikew.”
NUM 17:6 Umbe, migkeǥiyan ni Moises is menge Israilihanen, ne is kada pengulu mibeǥey kandin te tuked. 12 langun he tuked, ne in-amut dutun is ki Aaron.
NUM 17:7 Insavuk ni Moises haazà is langun he tuked diyà te etuvangan te Nengazen diyà te Tulda he midsevukan te Kesuǥuan.
NUM 17:8 Ne hein nepawà, midseled si Moises duen te Tulda he midsevukan te Kesuǥuan. Ne neehè din is tuked ni Aaron he midriprisintar te tribu ni Levi, ne kenè dà te neneringsing heini, kekena, midtuvù, nengevukad, wey nemeǥas te almindru.
NUM 17:9 Ne inggawas ni Moises is langun he tuked ne impeehè din te langun he menge Israilihanen. Mid-ehè dan heini, ne migkuwa te kada pengulu te tribu is kandin he tuked.
NUM 17:10 Ne migkaǥi is Nengazen diyà te ki Moises te, “Ilikù nu heeyan is tuked ni Aaron diyà te etuvangan duen te Kavan te Kebpekid-uyun ku su para mehimu heini he petizaan diyà te menge mesinupaken he ebpematey sikandan emun kenè dan ed-engked he edriklamu kayi te kedì.”
NUM 17:11 Midtuman ni Moises is insuǥù kandin te Nengazen.
NUM 17:12 Migkaǥi is menge Israilihanen diyà te ki Moises te, “Emun iyan heeyan ne ebpematey key en bes is langun!
NUM 17:13 Su ebpatey man is minsan ed-uvey zà diyà te Tulda te Nengazen. Ne ebpatey key ves is langun pinaaǥi kayi!”
NUM 18:1 Migkeǥiyan te Nengazen si Aaron te, “Sikew wey is menge anak nu he maama wey is menge kezuzumahi nu he ebpuun diyà te tribu ni Levi, keniyu he televaken is salà he egkeveelan niw zutun te kebpenilbi niw ziyà te Tulda he Edtelevukaayan. Piru iyan ke zà wey is menge anak nu is ebpekepenavak te salà he egkeveelan niw zutun te kegkememumuhat niw.
NUM 18:2 Emun ebpenilbi ka wey is menge anak nu ziyà te Tulda he midsevukan te Kesuǥuan, ipeuǥup niw is menge kezuzumahi niw he ebpuun diyà te tribu ni Levi.
NUM 18:3 Edterabahu sikandan he zizalem te kedumala nu, ne veeli zan is langun he vuluhaten duen te Tulda, piru kinahanglan he kenà sikandan medhilavet te segradu he menge gelemiten duen te Tulda etawa pemuhatà, su emun ebeelan dan haazà ne ebpemematey zan ne ragkes kew pa.
NUM 18:4 Edtavang sikandan kenikew, ne kandan he ketengdanan is ked-atur zuen te Tulda he Edtelevukaayan wey is kebaal te langun he vuluhaten kayi. Piru kinahanglan he wazà minsan hentei he ed-uǥup keniyu he kenà kevuwazan ni Levi.
NUM 18:5 “Ne kenikew he ketengdanan wey te menge anak nu is ked-atur zuen te Segradu he Lugar wey te pemuhatà, para kenè ku en meumani mepeuki is menge Israilihanen.
NUM 18:6 Iyan a mismu mibpilì te menge zuma nu he menge kevuwazan ni Levi puun te menge Israilihanen su wey zan mekeuǥup kenikew. Impehinungud sikandan kayi te kediey su wey zan mekepenilbi ziyà te Tulda he Edtelevukaayan.
NUM 18:7 Piru iyan ke zà wey is menge anak nu ebpekepenilbi pinaaǥi te kegkememumuhat, su iyan kew zà ebpekevaal te vuluhaten diyà te pemuhatà wey ziyà te Utew Segradu he Lugar. Gasa ku keniyu is kegkememumuhat niw. Is minsan hentei he ebaal kayi he kenà memumuhat ne edhimetayan.”
NUM 18:8 Ne migkaǥi is Nengazen diyà te ki Aaron te, “Iyan a mismu mibpilì kenikew para iyan ka mekezumala te vuluhaten para te segradu he menge pemuhat he ibpemuhat te menge Israilihanen kayi te kediey. Ibeǥey ku heini kenikew wey ziyà te menge anak nu he keniyu he vahin guntaan wey taman te taman.
NUM 18:9 Duen niw vahin duen te segradu he menge pemuhat he kenà edtutungen, he ibpemuhat te menge etew kayi te kedì he segradu he menge pemuhat. Ragkes en kayi is menge pemuhat he para gasa, pemuhat he para idlumpiyu, wey pemuhat he vayad te salà. Iyan heini vahin niw te menge anak nu.
NUM 18:10 Keena niw heini ziyà te utew mahal he lugar. Iyan dà is menge maama ebpekekaan kayi ne isipa niw heini he segradu.
NUM 18:11 Is duma he pemuhat te menge Israilihanen he ibayew ziyà te pemuhatà, ne para zaan keniyu. Imbeǥey ku heini kenikew wey te menge kevuwazan nu he keniyu he vahin taman te taman. Ebpekekaan kayi is minsan hentei ziyà te pemilya nu he ed-isipen he lumpiyu.
NUM 18:12 Imbeǥey ku zaan keniyu is meupiya he menge sebpet he idhalad te menge Israilihanen he ebpuun te egkehuna he sebpet dan: lana te ulibu, binu, wey trigu.
NUM 18:13 Uya, egkehimu he keniyu is langun he menge sebpet dan he idhalad dan kayi te kedì he ebpuun diyà egkehuna he egkeraǥun dan diyà te tanè dan. Ebpekekaan kayi is minsan hentei ziyà te pemilya nu he ed-isipen he lumpiyu.
NUM 18:14 “Is langun he menge vutang te menge Israilihanen he ebpuun te keputian te atey is kebeǥaya zuen kayi te kedì, ne egkehimu he keniyu.
NUM 18:15 Is langun he kinekekayan he anak he maama, etew man etawa uyaǥen, he idhalad kayi te kediey ne keniyu zaan. Piru kinahanglan he ibpelekat niw is menge kinekekayan he menge anak he maama wey is menge kinekekayan he menge uyaǥen he ed-isipen he meremerik.
NUM 18:16 Ipelekat niw heini emun senge vulan en is keǥurang dan, ne kinahanglan he ipelekat niw heini te lelima he vuuk he pelata, he ibpesikad diyà te keveǥat te pelata ziyà te timbangan he egemiten te menge memumuhat.
NUM 18:17 Piru kenè niw mulà ipelekat is kinekekayan he tudu he vaka, kerehidu, etawa kambing su kediey en haazà. Lepaa niw heini ne ipirik niw is lengesa kayi ziyà te pemuhatà ne tutunga niw is menge tavà he pemuhat pinaaǥi te hapuy. Is kehemut kayi he pemuhat te pinaaǥi te hapuy ne ebpekepenunuat kedì.
NUM 18:18 Keniyu is usa kayi, iring te kumeng wey kewanan he vuvun te pemuhat he ibayew he keniyu zaan.
NUM 18:19 Uya, ibeǥey ku keniyu heini is langun he menge segradu he pemuhat he ibayew te menge Israilihanen kayi te kedì. Para heini kenikew wey te menge kevuwazan nu he iyan keniyu he vahin taman te taman. Iyan heini kebpekid-uyun ku kenikew wey te menge kevuwazan nu he kenà egkahalin taman te taman.”
NUM 18:20 Migkaǥi pa is Nengazen diyà te ki Aaron te, “Sikiyu is menge memumuhat, wazè niw egkepengevilin he tanà te Israel, su iyan a mismu ebeǥey te menge kinehenglanen niw.
NUM 18:21 “Ne sikan is menge Levihanen, ebeyazan ku sikandan te kebpenilbi zan diyà te Tulda. Ibeǥey ku kandan is langun he ikepulù he ibeǥey te menge Israilihanen he kandan he egkepengevilin.
NUM 18:22 Puun guntaan wazè en menge Israilihanen he ebpekeuvey zuen te Tulda he Edtelevukaayan gawas te menge memumuhat wey menge Levihanen, su emun ed-uvey sikandan, televaken dan is salè dan ne ebpatey sikandan.
NUM 18:23 Is menge Levihanen, kandan he ketengdanan is menge vuluhaten diyà te Tulda he Edtelevukaayan, ne televaken dan is egkehimu zan he salà kayi te vuluhaten dan. Heini he sulunuzen kinahanglan he tumana niw taman te huziyan he lapis te menge kevuwazan. Is menge Levihanen ne wazà egkepengevilin dan he tanà te Israel.
NUM 18:24 Hinuun, ibeǥey ku kandan he kandan he vahin is menge ikepulù he ibeǥey te menge Israilihanen he halad dan kayi te kediey. Umbe migkaǥi a he is menge Levihanen wazà egkepengevilin dan he tanà te Israel.”
NUM 18:25 Midsuǥù te Nengazen si Moises
NUM 18:26 he keǥiya zin heini ziyà te menge Levihanen: “Emun egkezawat niw puun te menge Israilihanen is ikepulù he ibeǥey ku keniyu he iyan bahin niw, kinahanglan he veǥey kew zaan te ikepulù niw puun dutun te ikepulù, ne ihalad niw haazà kayi te kedì.
NUM 18:27 Ne ed-isipen ku heini he halad niw he ebpuun te menge sebpet, he iring te midhalad kew te trigu he ebpuun diyà te ǥunasà etawa vinu he ebpuun diyà te keresà te paras.
NUM 18:28 Pinaaǥi kayi ebpekeveǥey kew zaan te halad kayi te kedì puun te langun he ikepulù he egkezawat niw ziyà te menge Israilihanen. Ne is kediey he vahin he iyan is ikepulù te ikepulù he egkezawat niw ne iveǥey niw ziyà te ki Aaron he memumuhat.
NUM 18:29 Kinahanglan he iyan niw ivahin kedì is kineupiyahan he vahin he ibeǥey keniyu.
NUM 18:30 Emun igkahalad niw en is kineupiyahan he vahin, ed-isipen ku heini he halad niw he ebpuun diyà te ǥunasà etawa keresà te paras.
NUM 18:31 Egkehimu he egkeenen niw wey te pemilya niw is keniyu he vahin diyà te minsan hendei, su suhul niw heeyan tenged te kebpenilbi niw ziyà te Tulda he Edtelevukaayan.
NUM 18:32 Kenè kew ebpekesalà emun egkeenen niw heini emun ingkahalad niw en is kineupiyahan he vahin kayi ziyà te Nengazen. Umbe siguruwa niw he kenè niw egkependezeisek is segradu he menge halad te menge Israilihanen pinaaǥi te kegkeena niw te vahin niw te wazè niw pa ikeveǥey is kediey he vahin, su wey kew kenà mebpatey.”
NUM 19:1 Migkeǥiyan te Nengazen si Moises wey si Aaron te,
NUM 19:2 “Heini pa is sulunuzen he egkesuatan ku he tumana niw: Keǥiyi niw is menge Israilihanen he uwiti kew zan te sevaha he behiyan he vaka he meriǥà he wazè din sazir he wazè pa keenu meǥamit te ked-eradu.
NUM 19:3 Iveǥey niw haazà diyà te ki Eleazar he memumuhat, ne ed-uwiten heini ziyà te gawas te kampu ne edlepaan diyà te etuvangan din.
NUM 19:4 Ne egkuwa si Eleazar te lengesa kayi pinaaǥi te tezù din, ne ibpirik din haazà te kepipitu ziyà te egkesineruwan duen te Tulda he Edtelevukaayan.
NUM 19:5 Ne zutun te edtengteng si Eleazar ne edtutungen heini is senge vuuk he vaka: is lundis, is sapù, is lengesa, wey is menge vituka.
NUM 19:6 Ne egkuwa si Eleazar te tamped te kayu he sidru, sengerupung te pinemula he isupu, wey meriǥà he hiket ne idtimbag heini is langun dutun te ebinsulan he vaka.
NUM 19:7 Ne kegkepasad dutun kinahanglan he ebpìpian ni Eleazar he memumuhat is bisti zin, ne mebpemeziǥù sikandin. Ne kegkepasad egkehimu en sikandin he edseled diyà te kampu, piru ed-isipen pa ǥihapun sikandin he meremerik taman te egkesakep.
NUM 19:8 Is etew he mibinsul zuen te vaka, kinahanglan he ebpìpian din daan is bisti zin wey ebpemeziǥù ne ed-isipen daan sikandin he meremerik taman te mezukilem.
NUM 19:9 “Is etew he ed-isipen he lumpiyu iyan megkuwa te igmuk duen te vaka, ne isavuk din haazà diyà te lugar he ed-isipen he lumpiyu, he ziyà te gawas te kampu. Ne edtipiǥan heini zutun su egemiten te menge Israilihanen he idsahug te wahig he egemiten te kebpenlumpiyu. Ebeelan heini he tulumanen su para maawà is salà.
NUM 19:10 Is etew he egkuwa te igmuk duen te vaka, kinahanglan daan he ebpìpian din is bisti zin, ne ed-isipen daan sikandin he meremerik taman te egkesakep. Heini he sulunuzen kinahanglan he edtumanen niw te menge Israilihanen wey te kenà menge Israilihanen he zuma niw he meǥinged taman te taman.”
NUM 19:11 “Is minsan hentei he ebpekeǥawed te minatey, ed-isipen he meremerik seled te pitu he andew.
NUM 19:12 Kinahanglan he edlumpiyuwan din is keugelingen din duen te wahig he egemiten te kebpenlumpiyu te iketelu wey ikepitu he andew, ne zutun ed-isipen en sikandin he lumpiyu. Iyan, emun kenà sikandin ebpekelumpiyu te iketelu wey ikepitu he andew, kenà sikandin ed-isipen he lumpiyu.
NUM 19:13 Is minsan hentei he ebpekeǥawed te minatey he kenè din edlumpiyuwan is keugelingen din ne midremerikan din is Tulda te Nengazen. Kinahanglan he haazà he etew, kenà ed-isipen he sakup niw. Ne tenged te wazà sikandin mepiriki zuen te wahig he egemiten te kebpenlumpiyu, kenà egkaawà is kegkeremeriki kandin.
NUM 19:14 “Iyan heini sulunuzen he edsunuzen emun duen ebpatey ziyà te sevaha he tulda: Is minsan hentei he edseled dutun te tulda etawa zutun en he zaan te tulda he mibpetayan, ed-isipen he meremerik seled te pitu he andew.
NUM 19:15 Ed-isipen daan he meremerik is minsan hengkey he teleǥuey he wazè din tangeb he ziyà te seled te tulda.
NUM 19:16 “Ed-isipen daan he meremerik seled te pitu he andew is minsan hentei he ziyà te gawas te kampu he nekeǥawed te etew he minatey pinaaǥi te ispada etawa netural he kemetayen. Iring din daan is nekesamsam te tulan te etew he minatey etawa leveng.
NUM 19:17 “Ne para maawà is kegkeremeriki, idtaǥù diyà te teleǥuey is igmuk te vaka he ibpemuhat para te idlumpiyu, ne edwehiǥan heini.
NUM 19:18 Ne is etew he ed-isipen he lumpiyu, ne megkuwa te senge rupung he isupu, ne ibpevudseng din heini zuen te wahig ne ipirik din diyà te tulda he mibpetayan wey ziyà te langun he gelemiten kayi, wey is menge etew zutun te tulda. Ebpirikan daan is etew he nekesamsam te tulan te minatey he etew, leveng, etawa minatey he etew he nevunù etawa minatey te netural he kemetayen.
NUM 19:19 Dutun te iketelu wey ikepitu he andew, ebpirikan te etew he ed-isipen he lumpiyu is etew he mid-isip he meremerik. Ne emun ikepitu he andew, haazà is etew he midlumpiyuwan kinahanglan he ebpemìpì te visti zin wey ebpemeziǥù, ne zutun te kegkesakep ed-isipen en sikandin he lumpiyu.
NUM 19:20 Iyan, emun kenà ebpenlumpiyu is etew he meremerik, ne kinahanglan he kenà sikandin ed-isipen he zuma niw su midremerikan din is Tulda te Nengazen. Su wazà sikandin mepiriki te wahig he egemiten te kedlumpiyu, meremerik sikandin.
NUM 19:21 Heini he sulunuzen kinahanglan he edtumanen taman te taman. “Is etew he ebpirik te wahig he gelemiten te kedlumpiyu kinahanglan daan he ebpemìpì te visti zin, wey is minsan hentei he nekesamsam duen te wahig he gelemiten te kebpenlumpiyu ed-isipen he meremerik taman te egkesakep.
NUM 19:22 Is minsan hentei etawa minsan hengkey he egkesamsam te etew he meremerik, ne ebmeremerik daan taman te egkesakep.”
NUM 20:1 Hein nehuna he vulan nekeuma is tivuuk he keet-etawan te Israel ziyà te sibsivayan he Zin, ne migkampu zan diyà te Kadesh. Dutun mebpatey si Miriam wey zutun daan ileveng.
NUM 20:2 Wazà wahig dutun he lugar, umbe midsevehe en maan is menge etew te kebpekigkuntada ki Moises wey ki Aaron.
NUM 20:3 Mibasul zan si Moises; ne ke sikandan te, “Deyzey pa ke minatey key en duma te menge zuma zey zengan he nemematey ziyà te etuvangan te Nengazen.
NUM 20:4 Maan is miduma key kenikew is menge etew te Nengazen kayi te sibsivayan su wey key mebpatey zuma te menge uyaǥen dey.
NUM 20:5 Maan is impeǥawas key pa kenikew ziyà te Ehipto ne kayi key kenikew dumaha te wazè din pulus he lugar he wazà duen minsan trigu, higus, paras, etawa pumigranata? Ne wazè pa wahig he egkeinum!”
NUM 20:6 Umbe, mid-awà si Moises wey si Aaron diyà te menge etew, ne midhendiyè dan te gemawan te Tulda he Edtelevukaayan, ne midluhud dan is ebpengemuyù. Ne mibpaahà kandan is mekeǥeǥehem he kebpekiduma te Nengazen.
NUM 20:7 Migkaǥi is Nengazen diyà te ki Moises te,
NUM 20:8 “Kuwaa nu sikan is tuked nu ne tiǥuma niw zuen te suled nu he si Aaron is langun he menge etew. Ne zutun te edtengteng dan, ne keǥiyi nu is batu he mebeǥey te wahig, ne edtudà is wahig su wey niw meveǥayi te wahig is menge etew su wey zan mekeinum duma te menge uyaǥen dan.”
NUM 20:9 Umbe, migkuwa ni Moises sikan is tuked puun te etuvangan te Nengazen, diyà te Kavan te Kebpekid-uyun kandan he ziyà te seled te tulda sumalà te insuǥù te Nengazen kandin.
NUM 20:10 Ne hein nekuwa zin en, midtiǥum dan ki Aaron is langun he menge etew ziyà te egkesineruwan te vatu, ne migkeǥiyan sikandan ni Moises te, “Pemineg kew is menge mesinukulen, kinahanglan be he ebeǥayan dey sikiyu te wahig puun kayi te vatu?”
NUM 20:11 Ne imbayew ni Moises sikan is tuked din ne midlagkut din te kezezuwa sikan is batu, ne midlepew zutun is wahig, ne mid-inum is menge etew wey is menge uyaǥen dan.
NUM 20:12 Piru migkaǥi is Nengazen diyà te ki Moises wey ki Aaron te, “Tenged te wazè kew medsarig kedì pinaaǥi te kebpaahà te kegkewaǥas ku ziyà te etuvangan te menge Israilihanen, kenè kew iyan ebpekepengulu te keduma kayi te menge etew pehendiyà te tanà he ibeǥey ku kandan.”
NUM 20:13 Haazà he lugar migngezanan te serebseb te Meriba su mibpekidlalis is menge Israilihanen te Nengazen kayi he lugar, wey kayi zaan ipaahà te Nengazen kandan is kegkewaǥas din.
NUM 20:14 Hein diyè pa te Kadesh is menge Israilihanen, impehendiyà ni Moises is menge menunudtulè din te hadì diyà te Edom. Iyan heini impetudtul ni Moises kandan, “Heini he lalag ebpuun diyà te menge kezuzumahi nu he menge etew te Israel: Netuenan nu is langun he kemeresayan he neeǥiyan dey.
NUM 20:15 Is menge kepuun dey midhendiyà te Ehipto, ne neuǥet is ked-ubpè dey ziyà. Impaantus key wey is menge kepuun dey te menge Ehiptohanen,
NUM 20:16 piru mibuyù key te tavang diyà te Nengazen ne mibpemineg key zin, ne midsuǥù sikandin te velinsuǥuen he mibpeǥawas kenami ziyà te Ehipto. “Guntaan kayi key te Kadesh he inged he uvey te tanè nu.
NUM 20:17 Emun egkehimu ne ituǥut nu kenami is kebayà diyà te tanè nu. Kenè key ebayà diyà te menge bevesukè nu etawa pemuleey nu te paras wey kenè key ed-inum diyà te teheb. Diyè key zà ed-ikul te zekelà he beyeey ne kenè key en ebpenuweysuwey taman te ebpekeǥawas key puun te tanè nu.”
NUM 20:18 Piru iyan heini tavak te hadì te Edom: “Kenà egkehimu ke ebayè kew kayi te kenami. Emun ebayè kew, edsurungen dey sikiyu ne ebpenhimetayan.”
NUM 20:19 Midtavak is menge Israilihanen te, “Diyè key zà ed-ikul te dekelà he zalan; ne emun ebpekeinum key wey is menge uyaǥen dey te wahig niw, ne ebeyazan dey heini. Iyan dà tuyù dey is kebayà diyà te tanè niw, ne wazè en duma.”
NUM 20:20 Mid-uman medtavak is hadì te Edom: “Kenè kew iyan bayà kayi.” Ne midtiǥum duen te hadì te Edom is gemhanan wey melig-en he menge sundaru su ebpekidtebek dan te menge Israilihanen.
NUM 20:21 Ne geina te kenà ebpeveyaan te menge tig-Edom is tanè dan, ne midsuwey en nasì is menge Israilihanen.
NUM 20:22 Mid-awà is tivuuk he keet-etawan te Israel diyà te Kadesh ne midhendiyè dan te Buntud he Hor.
NUM 20:23 Diyà te Buntud he Hor, he uvey te netemanan te Edom, migkeǥiyan te Nengazen si Moises wey si Aaron,
NUM 20:24 “He Aaron, neume en is timpu he idtampu ke en diyà te menge kezuzumahi nu he nemematey en. Kenè ka ebpekeseled diyà te tanà he ibeǥey ku te menge Israilihanen su midsupak kew ki Moises te suǥù ku hein diyè kew te serebseb te Meriba.
NUM 20:25 Guntaan, Moises, dumaha nu si Aaron wey is anak din he si Eleazar ziyà te Buntud he Hor.
NUM 20:26 Ne luwasa nu ziyà te ki Aaron is bisti zin te kegkememumuhat ne ipevivisti heini te anak din he si Eleazar, su ebpatey si Aaron dutun te vuntud.”
NUM 20:27 Midtuman ni Moises is insuǥù kandin te Nengazen. Midtekezeg dan diyà te Buntud he Hor zutun te edtengteng is kezekelan.
NUM 20:28 Ne midluwas ni Moises is bisti ni Aaron ne impeseluub din ki Eleazar. Ne minatey si Aaron diyà te puntur te vuntud. Ne midtupang si Moises wey si Eleazar zutun te vuntud.
NUM 20:29 Ne hein netuenan te langun kandan he minatey en si Aaron, inlalew zan sikandin seled te 30 he andew.
NUM 21:1 Dutun he timpu is Canaanhen he hadì diyà te Arad he ed-ubpà diyà te Negev, netudtulan he ebpekeuma is menge Israilihanen he ziyà mebayà te zalan diyà te Atarim. Umbe midsurung din sikandan ne mibihag din is duma kandan.
NUM 21:2 Ne nenangdù is menge Israilihanen diyà te Nengazen he ke sikandan te, “Emun ebpeveyveyaan nu kenami heini he menge etew, ibeǥey zey zaan diyà te kenikew is tivuuk he inged dan pinaaǥi te kedezeeti zey kayi.”
NUM 21:3 Mibpemineg te Nengazen is pengemuyù te menge Israilihanen ne impezaag din kandan is menge Canaanhen. Ne midèdeetan dan is langun he menge Canaanhen dutun ragkes en is menge inged dan, umbe migngezanan haazà he lugar te Horma.
NUM 21:4 Puun te Buntud he Hor, midhipanew is menge Israilihanen he ziyà med-ikul te zalan he ibpenhendiyà te Zaǥat he Meriǥà, he ebpekeelingkus te tanà he Edom. Piru mibperuvas is menge etew zutun te hipanew zan,
NUM 21:5 umbe, midriklamu sikandan diyà te Megbevayà wey ziyà te ki Moises. Ke sikandan te, “Maan is impeǥawas key pa kenikew ziyà te Ehipto su wey key kayi mebpematey te sibsivayan? Wazà keenen wey wahig kayi! Neperahan key en kayi te mesemu he ‘manna’.”
NUM 21:6 Umbe, mibpeuwitan sikandan te Nengazen te edhereg he menge uled ne mibpengaǥat sikandan, ne mahabet kandan is minatey.
NUM 21:7 Midhendiyà is menge etew te ki Moises ne ke sikandan te, “Nekesalè key su mezaat is menge lalag dey mehitenged te Nengazen wey kenikew. Iampù nu te Nengazen he iawè din diyà te kenami heini is menge uled.” Umbe mid-ampù si Moises para te menge etew.
NUM 21:8 Migkaǥi is Nengazen diyà te ki Moises te, “Kuwa ka te brunsi, ne veeli nu he ledawan te edhereg he uled, ne kuwa ka te idtukud nu zuen ne itaud nu ziyà te purù. Is minsan hentei he nekaǥat te uled ne edtengteng dà dutun te uled he brunsi ne egkeuyag sikandin.”
NUM 21:9 Umbe, mibaal si Moises te uled he brunsi ne intaud din diyà te purù duen te intukud din. Ne is minsan hentei he nekeǥatan te uled, midtengteng dà dutun te uled he brunsi ne neuyag.
NUM 21:10 Midlaus medhipanew is menge Israilihanen, ne migkampu sikandan diyà te Obot.
NUM 21:11 Ne puun te Obot, midhipanew sikandan ne migkampu zan diyà te Iye Abarim, diyà te sibsivayan he zapit te edsilaan he atbang te Moab.
NUM 21:12 Ne puun dutun midhipanew sikandan ne migkampu zan diyà te zal-ug he Zered.
NUM 21:13 Ne puun te Zered midlaus sikandan medhipanew ne migkampu zan diyà te uvey te veyvey te zal-ug he Arnon, he ziyà te sibsivayan he uvey te tanà te menge Amorihanen. Is Arnon iyan dulunà te tanà te menge Moabitanhen wey menge Amorihanen.
NUM 21:14 Iyan heeyan hinungdan ke maan is ingkesurat diyà te Libru te Guǥud te Kebpekidtebek te Nengazen is inged diyà te Waheb he sakup te Sufa, is menge zal-ug ragkes en is Arnon,
NUM 21:15 wey is alug te menge zal-ug he ebpeketemu ziyà te inged he Ar he ziyà te dulunà te Moab.
NUM 21:16 Puun diyà te Arnon midhendiyà is menge Israilihanen te Beer, kes teheb he zutun megkaǥi is Nengazen diyà te ki Moises te, “Tiǥuma nu is menge etew su ebeǥayan ku sikandan te wahig.”
NUM 21:17 Ne zutun kentaha te menge Israilihanen heini he kentahan: “Ebpedayun ebeǥey te wahig heini he teheb! Egkanta kiw mehitenged kayi he teheb
NUM 21:18 he impekalut te menge pengulu wey dungganen he menge etew pinaaǥi te keǥehem dan.” Ne puun dutun he sibsivayan midhendiyè dan te Matana;
NUM 21:19 ne puun te Matana midhendiyè dan te Nahaliel; ne puun te Nahaliel midhendiyè dan te Bamot;
NUM 21:20 ne puun te Bamot midhendiyè dan te suǥud-suǥud te Moab, dutun he lugar emun diyè ki te puntur te Pisga edkepantew ta is sibsivayan.
NUM 21:21 Ne midsuǥù is menge Israilihanen te menge menunudtulà diyà te ki Sihon he hadì te menge Amorihanen. Iyan heini tudtul he uwiten dan:
NUM 21:22 “Emun egkehimu, ituǥut nu kenami is kebayà diyà te tanè niw. Kenè key ebayà diyà te menge bevesukè niw etawa pemuleey niw te paras wey kenè key ed-inum diyà te menge teheb niw. Ed-ikul key zà diyà te zekelà he zalan taman te ebpekeǥawas key te tanè niw.”
NUM 21:23 Piru wazà mebpezumazuma si Sihon he ebayà is menge Israilihanen diyà te tanè din. Midtiǥum din hinuun is langun he menge sundaru zin ne midhendiyè dan te sibsivayan su edsurungen dan is menge Israilihanen. Hein nekeuma zan diyà te Jahaz, midtebek dan is menge Israilihanen.
NUM 21:24 Piru migerà sikandan te menge Israilihanen, ne mid-aǥew te menge Israilihanen is tanè dan puun te wahig he Arnon pehendiyà te Wahig he Jabok. Piru taman dà sikandan te dulunà te tanà te menge Amunihanen, su melig-en is berengbeng dutun te dulunà.
NUM 21:25 Umbe, naaǥew te menge Israilihanen is langun he dezekelà he inged te menge Amorihanen ne mid-ubpaan dan haazà, ragkes is Heshbon wey is langun he dezeisey he inged he sakup kayi.
NUM 21:26 Dengan, heini is Heshbon iyan lavew he inged ni Sihon te hadì te menge Amorihanen. Nezaag din dengan is sevaha he hadì te Moab ne mid-aǥew zin is langun he tanà duen te hadì taman te Arnon.
NUM 21:27 Umbe, iyan heini erubasa te memetau he egkaǥi, ke sikandan te, “Agpas kew hendiyà te Heshbon, he inged ni Sihon, ne umana niw heini benguna. Dengan is menge sundaru ziyà te Heshbon, nenurung he henduen be te edriyubriyub he hapuy he nekevinsul te inged he Ar he sakup te Moab wey te metikang he menge lugar ziyà te Arnon.
NUM 21:29 Mekehizuhizu kew is menge tig-Moab! Nezeetan kew is ed-azap te ed-ezapen he si Kemosh. Sikiyu is menge anak din, mibey-anan din en he mevihag ni Sihon te hadì te menge Amorihanen.
NUM 21:30 Piru guntaan nezeetan dey en is menge Amorihanen. Nezeetan en is inged he Heshbon, ragkes is Dibon, Nofa, wey Medeba.”
NUM 21:31 Umbe, mid-ubpà is menge Israilihanen diyà te tanà te menge Amorihanen.
NUM 21:32 Ne liwas dutun midsuǥù si Moises te menge meniniid diyà te Jazer, ne mid-aǥew zan daan heini wey is dezeisey he menge inged he sakup din. Midsegseg dan is menge Amorihanen he ed-ubpà dutun.
NUM 21:33 Ne liwas dutun, midhendiyè dan en maan te Bashan. Piru midsurung sikandan ni Hadì Og he hadì te Bashan wey te langun he menge sundaru zin hein diyè dan pa te Edrei.
NUM 21:34 Migkaǥi is Nengazen diyà te ki Moises te, “Kenè nu kehendeki si Og su ibeǥey ku sikandin kenikew, ragkes is tivuuk he gin-etawan din wey menge tanè din. Beeli nu ziyà te kandin is mibeelan nu ziyà te ki Sihon te hadì te menge Amorihanen, he midhadì diyà te Heshbon.”
NUM 21:35 Umbe, midhimetayan te menge Israilihanen si Og, ragkes is menge anak din wey is langun he menge etew zin, ne wazà nesamà kandan. Ne liwas dutun, mid-angken te menge Israilihanen is tanà he nesakup te midhedian ni Og.
NUM 22:1 Midlaus medhipanew is menge Israilihanen taman te nekeuma zan diyà te suǥud te Moab. Ne migkampu zan diyà te zapit te edsilaan te Jordan, he etuvangan te Jerico.
NUM 22:2 Ne netuenan te hadì diyà te Moab he si Balak he anak ni Zipor, is langun he mibeelan te menge Israilihanen diyà te menge Amorihanen,
NUM 22:3 ne nahandek sikandin wey is menge Moabitanhen tenged te kahabet te menge Israilihanen.
NUM 22:4 Migkaǥi is menge Moabitanhen diyà te menge perezumala ziyà te Midian te, “Ed-eminen kiw kayi te mahabet he menge etew he henduen be te vaka he ed-eminen dan edtebtava is menge sagbet.” Umbe, si Balak he anak ni Zipor, he iyan hadì diyà te Moab dutun he timpu,
NUM 22:5 mibpesuǥuan din te menge menunudtulà si Balaam he anak ni Beor he meǥinged diyà te Petor he iyan tanà he mid-enakan kandin, he uvey te wahig he Eufrates. Iyan heini menge lalag ni Balak: “Duen menge etew he ebpuun diyà te Ehipto, utew sikandan mahabet ne kayi zan med-ubpà te uvey zey.
NUM 22:6 Umbe hendini ka ǥuntaan ne rewaki nu heini he menge etew, su edhuna sikandan he gemhanan kenami. Su kela ke mezaag ku zed sikandan ne egkesegseg ku puun kayi te tanè ku. Su netuenan ku he egketuman is ibpenuvadtuvad nu wey is idrawak nu te minsan hentei.”
NUM 22:7 Umbe, migenat is menge perezumala ziyà te Moab wey Midian he uwiten dan is ibayad ki Baalam. Midtudtulan dan heini te migkaǥi ni Balak.
NUM 22:8 Ne migkaǥi si Balaam diyà te kandan te, “Kayi kew zà hizeǥà guntaan he kezukileman, ne egkeǥiyen ku ziyà te keniyu keeselem is egkeǥiyen te Nengazen kayi te kedì.” Umbe ziyà medhizeǥà haazà is menge pengulu te Moab.
NUM 22:9 Ne mid-insà is Megbevayà diyà te ki Balaam, “Hentei heini is duma nu he menge etew?”
NUM 22:10 Midtavak ni Balaam is Megbevayà te, “Menge menunudtulà sikandan he midsuǥù ni Balak he hadì te Moab, he anak ni Zipor. Iyan heini menge lalag din:
NUM 22:11 ‘Duen menge etew he ebpuun diyà te Ehipto he utew mezakel. Umbe hendini ka ǥuntaan ne rewaki nu sikandan para kedì. Su kela ke mezaag ku zed sikandan ne egkesegseg ku pehendiyà te meziyù.’ ”
NUM 22:12 Piru migkeǥiyan te Megbevayà si Balaam te, “Kenè ka zuma kandan. Ne kenè nu rewaki haazà is menge etew he egkeǥiyen dan, su midtuvazan ku sikandan.”
NUM 22:13 Ked-enew ni Balaam hein meselem, migkeǥiyan din sikan is menge pengulu ni Balak te, “Ulì kew en nasì diyà te nasyun niw su kenà edtuǥut is Nengazen ke eduma a keniyu.”
NUM 22:14 Umbe, midlikù haaza is menge pengulu te Moab diyà te ki Balak he ke sikandan te, “Wazà meduma kenami si Balaam.”
NUM 22:15 Ne mid-uman medsuǥù si Balak te edhuna pa he mahabet he menge pengulu wey edhuna pa he dungganen duen te nehuna he midsuǥù din.
NUM 22:16 Midhendiyè dan te ki Balaam he ke sikandan te, “Iyan heini migkaǥi ni Balak he anak ni Zipor: ‘Kenè nu mehimuwa he zuen ebpekevelavag kenikew te kedhendini.
NUM 22:17 Edsuhulan ku sikew wey ebeelan ku is minsan hengkey he egkeǥiyan nu. Pekelalaglalag ka ne hendini ke en ne rewaki nu heini he menge etew para kediey.’ ”
NUM 22:18 Piru midtavak sikandan ni Balaam te, “Minsan ibeǥey pa kedì ni Balak is turuǥan din he nepenù te pelata wey vulawan, kenà egkehimu ke edrepasen ku is suǥù te Nengazen he Megbevayè ku, dekelà etawa zeisey he vaal.
NUM 22:19 Piru kayi kew zà dèpa hizeǥà guntaan he kezukileman iring te mibeelan te zuma he menge zuma niw, su kela he zuen pa zuma he egkeǥiyen te Nengazen kayi te kedì.”
NUM 22:20 Dutun he kezukileman migkaǥi is Megbevayà diyà te ki Balaam te, “Geina te midhengkayi en man heini is menge etew su edumahan ke zan, duma ke en nasì kandan, piru iyan nu zà beeli is egkeǥiyen ku.”
NUM 22:21 Umbe, hein meselem in-andam ni Balaam is asnu zin ne miduma zuen te menge pengulu te Moab,
NUM 22:22 duma is dezuwa he suluǥuen din. Piru zutun te edhipanew en si Balaam, utew nepauk is Megbevayà, umbe midhitindeg is belinsuǥuen te Nengazen diyà te zalan su ed-alang kandan.
NUM 22:23 Ne hein naahà duen te asnu he midhitindeg is belinsuǥuen te Nengazen diyà te zalan he egkulang te ispada, midsuwey heini zuen te zalan ne ziyà mebayà te vevesukà. Umbe mibpenlagkut heini ni Balaam su wey medlikù duen te zalan.
NUM 22:24 Ne midhitindeg sikan is belinsuǥuen te Nengazen diyà te meliǥet he ibayà su nekepetug-elang te zezuwa he verengbeng te pemuleey te paras.
NUM 22:25 Hein naahà duen te asnu sikan is belinsuǥuen te Nengazen utew heini mibpekilid duen te verengbeng ne nelipit is paa ni Balaam. Umbe mid-umanan din heini penlegkuta.
NUM 22:26 Ne midhipanew ziyà te egkehunaan sikan is belinsuǥuen te Nengazen ne midhitindeg diyà te meliǥet he lugar he wazè en duen egkeeliǥuwan diyà te zapit te kewanan etawa givang.
NUM 22:27 Ne hein naahà duen te asnu haazà is belinsuǥuen te Nengazen midleku en heini; utew nepauk si Balaam, ne mibpenlagkut din heini te tuked din.
NUM 22:28 Ne zutun impekaǥi te Nengazen haazà is asnu, migkaǥi heini te, “Hengkey ves is neveelan ku ziyà te kenikew maan is ketetelu ad kenikew penlegkuta?”
NUM 22:29 Midtavak ni Balaam haazà is asnu te, “Midhimu a kenikew he tulebung! Angin ke zuen ku ispada su edhimetayan ku en sikew ǥuntaan.”
NUM 22:30 Migkeǥiyan duen te asnu si Balaam, “Kenè be iyan a asnu nu he layun nu ed-untuzi? Mibeelan ku ve heini ziyà te kenikew zutun te nehuna he timpu.” Midtavak si Balaam te, “Wazà.”
NUM 22:31 Ne zutun impaahà te Nengazen ki Balaam is belinsuǥuen din he edhithitindeg diyà te zalan is egawed te ispada. Umbe midluhud si Balaam diyà te tanà.
NUM 22:32 Mid-insà kandin haazà is belinsuǥuen te Nengazen, “Maan is ketetelu nu en penlegkuta is asnu nu? Midhengkayi a te ked-alang kenikew su mezaat diyà te etuvangan ku is baal nu.
NUM 22:33 Naahà a te asnu nu ne midlikayan e zin te ketetelu. Emun wazà heini medlikey kediey, midhimetayan ku en pezem sikew ne kenè ku mulà edhimetayan is asnu nu.”
NUM 22:34 Migkeǥiyan ni Balaam haazà is belinsuǥuen te Nengazen te, “Nekesalà a! Wazè ku metueni he midhitindeg ke ves keniyan te ked-alang kedì. Emun mezaat diyà te kenikew is ebeelan ku, ne ed-ulì ad.”
NUM 22:35 Migkaǥi haazà is belinsuǥuen te Nengazen te, “Duma ka keniyan te menge etew, piru iyan nu zà keǥiya is egkeǥiyen ku ziyà te kenikew.” Umbe miduma si Balaam dutun te menge pengulu ni Balak.
NUM 22:36 Ne hein netuenan ni Balak he ebpelinggume en si Balaam, midsinuǥung sikandin diyà te sevaha he inged diyà te Moab he uvey te Arnon he dulunà te tanè din.
NUM 22:37 Migkaǥi si Balak diyà te ki Balaam te, “Kenè be migkaǥi a he ibpeǥaanggaan ka? Maan is wazè ka mediritsu medhendini? Egkeisip nu ve he kenè ku sikew edsuhulan?”
NUM 22:38 Midtavak si Balaam te, “Nekeuma ad. Piru wazè ku egkekaǥi ziyà te kenikew gawas te ibpekaǥi kedì te Megbevayà.”
NUM 22:39 Ne miduma si Balaam ki Balak pehendiyà te Kiriat Huzot.
NUM 22:40 Ne hein nekeuma zan nemuhat si Balak te vaka wey kerehidu. Imbeǥey zin is usa ki Balaam wey te menge pengulu he zuma zin.
NUM 22:41 Ne sunud he andew, miduma ni Balak si Balaam diyà te Bamot Baal, ne nepantew zin diyà te alug is duma he menge Israilihanen.
NUM 23:1 Migkeǥiyan ni Balaam si Balak te, “Peveeli a kayi te pitu he pemuhatà, ne endami a te pitu he tudu he vaka wey pitu he meemahan he kerehidu he memeǥurang en.”
NUM 23:2 Ne midtuman ni Balak is migkaǥi ni Balaam, ne nemuhat dan is dezuwa te tudu he vaka wey meemahan he kerehidu ziyà te kada pemuhatà.
NUM 23:3 Ne migkaǥi si Balaam diyà te ki Balak te, “Hitindeg ka ziyà te avey te pemuhat nu he edtutungen su egenat a dèpa. Su kela ke mebpekidhingume kedì is Nengazen. Egkeǥiyen ku zà kenikew ke hengkey is egkeǥiyen din kayi te kedì.” Umbe midtekezeg sikandin diyà te mehiǥawan he vuvungan.
NUM 23:4 Ne nekidhinguma kandin is Megbevayà, ne migkaǥi si Balaam te, “Mibpevaal a te pitu he pemuhatà, ne ziyà te kada pemuhatà nemuhat a te sevaha he tudu he vaka wey sevaha he kerehidu.”
NUM 23:5 Ne migkaǥi te Nengazen diyà te ki Balaam is ibpetuenan din, ke sikandin te, “Likù ka ziyà te ki Balak ne keǥiya nu kandin heini he menge lalag is migkaǥi ku.”
NUM 23:6 Umbe, midlikù si Balaam diyà te ki Balak, ne neehè din heini is edhithitindeg diyà te avey te pemuhat din duma te langun he pengulu te Moab.
NUM 23:7 Ne migkaǥi si Balaam, “He Balak he hadì te Moab, impaangey a kenikew puun te Aram he ziyà te menge vuvungan he zapit te edsilaan. Iyan lalag he impeuwit nu kayi te kediey is, ‘Agpas ka hendini, ne rewaki nu is menge kevuwazan ni Jacob para kediey. Rewaki nu sikandan is menge etew te Israel.’
NUM 23:8 Ebmenmenuwen ku te edezaat is menge etew he wazà dezeeti te Megbevayà? Ebmenmenuwen ku te edrawak is menge etew he wazà rewaki te Nengazen?
NUM 23:9 Nepantew ku sikandan hein diyà a te puntur te menge vuvungan. Nengugelingen sikandan mebpengungubpaan he nekesivey te zuma he menge nasyun.
NUM 23:10 Hentei is ebpekevilang te kahabet dan he iring te eliyavuk. Berakat he mebpatey a keuzemà iring te menge metazeng.”
NUM 23:11 Migkaǥi si Balak diyà te ki Balaam te, “Hengkey heini is mibeelan nu kayi te kediey? Mibpeveyaan ku sikew wey nu merewaki is menge kuntada ku, piru mibpenubtuvazan nu hinuun!”
NUM 23:12 Midtavak si Balaam te, “Kinahanglan he egkeǥiyen ku is ibpekagi te Nengazen kediey.”
NUM 23:13 Ne migkeǥiyan ni Balak te, “Ebpezumehè ki ziyà te sevaha pa he lugar he zutun egkeehè nu is senge vahin dà duen te menge etew te Israel, ne kenà langun sikandan. Ne zutun rewaki nu sikandan.”
NUM 23:14 Umbe, miduma ni Balak si Balaam diyà te sevaha he vevesukà diyà te Zofim, he ziyà te puntur te Pisga, ne zutun mibpevaal sikandan te pitu he pemuhatà ne nemuhat dan te pitu he tudu he vaka wey pitu he kerehidu, tigselimbaha ziyà te kada pemuhatà.
NUM 23:15 Migkaǥi si Balaam diyà te ki Balak te, “Kayi ke zà te avey te pemuhat nu he edtutungen su ebpekidhinguma a mulà te Nengazen diyà te egkehunaan.”
NUM 23:16 Ne nekidhinguma is Nengazen ki Balaam ne migkaǥi zin is ibpekaǥi zin ki Balaam. Ne migkeǥiyan din te, “Likù ka ziyà te ki Balak ne keǥiya nu heini he menge lalag.”
NUM 23:17 Umbe, midlikù si Balaam diyà te ki Balak, ne neehè din heini he edhithitindeg diyà te avey te pemuhat din he midtutung, duma te menge pengulu te Moab. Mid-insà si Balak diyà te ki Balaam te, “Hengkey is migkaǥi te Nengazen diyà te kenikew?”
NUM 23:18 Migkaǥi si Balaam te, “Hendini ka Balak he anak ni Zipor, ne pemineǥa a kenikew.
NUM 23:19 Is Megbevayà kenà iring te etew he edtarùtarù; kenà egkahalin is isip din. Duen be nekaǥi zin he ebeelan din he wazè din beeli? Duen be saad din he wazè din tumana?
NUM 23:20 Midsuǥù e zin he tuvazi ku is daan en he midtuvazan din, ne kenè ku en heini egkevelvelewanan.
NUM 23:21 Wazè ku naahà he kezeetan etawa kelised he egkehitavù diyà te Israel. Mibpekiduma kandan is Nengazen he Megbevayè dan; egkilelaan dan sikandin he hadì dan.
NUM 23:22 Impeǥawas sikandan te Megbevayà diyà te Ehipto; iring sikandin te mezesen he vaka.
NUM 23:23 Wazà beyilan etawa barang he ed-uteng diyà te kandan. Umbe egkaǥi is menge etew mehitenged te Israel te, ‘Utew egkein-inuwi is mibeelan te Megbevayà diyà te Israel.’
NUM 23:24 Heini he menge etew iring te erimaung he andam he edawi ne kenà edhimeley taman te egkekaan din is ebiktimahan din wey egkesupsup din is lengesa kayi.”
NUM 23:25 Ne migkaǥi si Balak diyà te ki Balaam te, “Emun kenè nu sikandan edrewakan ne kenè nu zaan tuvazi!”
NUM 23:26 Ne midtavak si Balaam te, “Kenè be migkaǥi ku en diyà te kenikew he kinahanglan he ebeelan ku is egkeǥiyen te Nengazen kayi te kedì?”
NUM 23:27 Mid-uman megkaǥi si Balak diyà te ki Balaam te, “Hendini ka, su edumahan ku sikew ziyà te selakew en maan he lugar. Su kela ke zutun he lugar ebpezumezume en is Megbevayà he edrewakan nu is Israel para kedì.”
NUM 23:28 Umbe, miduma ni Balak si Balaam diyà te puntur te Peor, he egkepantew zutun is sibsivayan diyà te alug.
NUM 23:29 Migkaǥi si Balaam diyà te ki Balak te, “Peveeli a kayi te pitu he pemuhatà, ne endami a te pitu he tudu he vaka wey pitu he meemahan he kerehidu para kedì.”
NUM 23:30 Ne mibeelan ni Balak is migkaǥi ni Balaam, ne nemuhat sikandin te tigselimbaha he vaka wey kerehidu ziyà te kada pemuhatà.
NUM 24:1 Hein nepurung mesavut ni Balaam he egkesuat is Nengazen he penubtuvazi is Israel, wazè din en gemita is kebpeveveyilan din he iring te nehuna he vaal zin. Kekenà, midsinaru sikandin diyà te sibsivayan,
NUM 24:2 ne zutun neehè din is menge Israilihanen he mibpesibsivayà megkampu is kada tribu. Ne mibpurungan sikandin ulini te Mulin-ulin te Megbevayà,
NUM 24:3 ne migkaǥi sikandin te, “Iyan a si Balaam he anak ni Beor, ne zuen ku meupiya he kedsavut.
NUM 24:4 Nezineg ku is menge lalag te Megbevayà, wey zuen nelewasan ku he impelewasan kediey te Mekeǥeǥehem he Megbevayà. Mibpekevava a ziyà te etuvangan din, ne impesavut e zin. Ne iyan heini menge lalag ku:
NUM 24:5 Utew mekempet is menge tulda he ed-ubpaan te menge etew te Israel he menge kevuwazan ni Jacob.
NUM 24:6 Iring heini te nezalandalan he menge palma, wey menge pemuleey ziyà te kilid te wahig. Iring daan heini te kayu he aloe he impemula te Nengazen, wey te menge kayu he sidru ziyà te kilid te menge wahig.
NUM 24:7 Edrepey is wahig diyà te teleǥuey zan, ne ebpemula zan te menge lisu ziyà te menge tanà he wehiǥen. Is menge hadì dan egkehimu he edhuna pa he gehemanen kenà ki Agag he hadì te menge Amalikanhen. Ne egkevantug is ginhedian dan.
NUM 24:8 Impeǥawas sikandan te Megbevayà puun te Ehipto; iring sikandin te mezesen he tudu he vaka para kandan. Ebpenaan dan wey edezeetan dan is menge kuntada zan he henduen be te ed-evelengen dan, wey henduen te edrupeten dan is menge tulan kayi.
NUM 24:9 Iring sikandan te menge erimaung he emun ebpekelipezeng en ne wazè en ebpeǥaruǥaru he ebpukew kandan. Edtuvazan is ebpenuvadtuvad kandan ne edrewakan is ebpenrawak kandan.”
NUM 24:10 Tenged dutun utew nepeuki ni Balak si Balaam. Midsumbag din is divaluy he palad din ne migkeǥiyan din si Balaam te, “Mibpesuǥuan ku sikew su wey nu merewaki is menge kuntada ku, piru nasì nu sikandan penubtuvazi te ketetelu.
NUM 24:11 Ne ǥuntaan ulì ke en! Migkaǥi a he edsuhulan ku sikew te meupiya, piru kenà edtuǥut is Nengazen he maangken nu is suhul.”
NUM 24:12 Midtavak ni Balaam si Balak te, “Kenè be migkeǥiyan ku is menge menunudtulè nu,
NUM 24:13 he minsan iveǥey nu pa kediey is turuǥan nu he nepenù te pelata wey vulawan, ne kena a ebpekehimu he ebaal te keugelingen ku he suat, mezaat man heini etawa meupiya. Kekenà, iyan dà egkeǥiyen ku is egkeǥiyen te Nengazen kayi te kediey.
NUM 24:14 Guntaan, ed-ulì ad diyà te menge emurè ku te inged. Piru ebpetizeenan ku sikew he zaan ke hengkey is ebeelan kayi he menge etew ziyà te menge etew nu ziyà te huziyan he menge andew.”
NUM 24:15 Ne migkaǥi ni Balaam heini he menge lalag: “Iyan a si Balaam he anak ni Beor, ne zuen ku meupiya he kedsavut.
NUM 24:16 Nezineg ku is lalag te Utew Lavew he Megbevayà, ne mibeǥayen e zin te ketau. Duen mibpelewasan kedì te Mekeǥeǥehem he Megbevayà. Mibpekevavà a ziyà te etuvangan din, ne impesavut e zin. Ne iyan heini menge lalag ku:
NUM 24:17 “Duen neehè ku ziyà te nelewasan ku he wazè pa mehitavù. Diyà te ebpekeuma he timpu, duen egkehimu he hadì te Israel he ebpuun diyà te kevuwazan ni Jacob. Ne edezeetan din is menge Moabitanhen wey is langun he kevuwazan ni Shet.
NUM 24:18 Dutun te ebmelig-en is Israel, edsekupen din is Edom he kuntada zin, he egngezanan daan te Seir.
NUM 24:19 Edumala is sevaha he pengulu te Israel ne edezeetan din is egkesamà he menge uuyag diyà te inged he Moab.”
NUM 24:20 Naahà ni Balaam diyà te kebpekelawas din is menge etew ni Amalek ne migkaǥi sikandin te, “Dengan iyan lavew he nasyun is Amalek, piru te huziyan he timpu egkezeetan heini.”
NUM 24:21 Ne naahà daan ni Balaam diyà te kebpekelawas din is menge Kinhanen, ne migkaǥi sikandin te, “Melig-en is ubpeey niw su ziyà heini te vatu he vuvungan.
NUM 24:22 Piru egkezeetan kew emun ebihaǥen kew en te Asiria.”
NUM 24:23 Migkaǥi pa ni Balaam heini he menge lalag: “Hentei vuwa is egkesamà he uuyag emun ebeelan en heini te Megbevayà?
NUM 24:24 Ebpekeuma is menge varku he ebpuun diyà te Kitim ne edsekupen dan is menge etew ziyà te Asiria wey Eber. Piru egkezeetan daan is Kitim.”
NUM 24:25 Ne mid-ulì si Balaam wey si Balak.
NUM 25:1 Dutun te migkampu is menge Israilihanen diyà te Shitim, is menge maama kandan mibpuun mebpekidhilavet te menge vahi he Moabitanhen.
NUM 25:2 Heini is menge vahi mid-iniyat kandan te kedtampu te kebpemuhata zan te menge ed-ezapen dan, ne migkaan haazà is menge maama te impemuhat ne mid-azap dan haazà is menge ed-ezapen.
NUM 25:3 Umbe, neketampu is menge Israilihanen te ked-azap ki Baal ziyà te Peor. Ne utew sikandan nepeuki te Nengazen.
NUM 25:4 Ne migkeǥiyan te Nengazen si Moises te, “Kuwaa nu is langun he pengulu kayi he menge etew, ne penhimetayi niw ziyà te etuvangan ku wey etuvangan te menge etew, su para mevehew is utew ku kegkepeuki te menge Israilihanen.”
NUM 25:5 Umbe, migkeǥiyan ni Moises is menge zatù te Israel te, “Kinahanglan he edhimetayan te kada sevaha keniyu is menge etew niw he midtampu te ked-azapa ki Baal ziyà te Peor.”
NUM 25:6 Duen sevaha he Israilihanen he miduma zin is bahi he Midianhen diyà te pemilya zin. Naahà heini ni Moises wey te tivuuk he keet-etawan te Israel dutun te edsineǥew sikandan diyà te gemawan te Tulda he Edtelevukaayan.
NUM 25:7 Ne hein naahà haazà ni Finehas he anak ni Eleazar wey apù ni Aaron he memumuhat, mid-awà sikandin diyà te ketiǥuman ne migkuwa te vangkew.
NUM 25:8 Ne midtundug din haazà is etew pehendiyà te kedseled din te tulda zin ne impedlembasè din te edtiyuk duen te vangkew zin haazà is maama wey vahi. Ne neengked is limas diyà te menge Israilihanen,
NUM 25:9 piru 24,000 is neǥerà tenged te limas.
NUM 25:10 Migkaǥi is Nengazen diyà te ki Moises te,
NUM 25:11 “In-awà ni Finehas he anak ni Eleazar wey apù ni Aaron he memumuhat is kegkepeuki ku te menge Israilihanen, su pinaaǥi te mibeelan din impeehè din is kegkepeuki ku te menge Israilihanen, umbe wazè ku sikandan emina te ebpenhimatey he iyan pezem ebeelan ku tenged te kegkepauk ku.
NUM 25:12 Umbe, keǥiyi nu sikandin he ebpekid-uyun a kandin he edtuvazan ku is kebpekesavuk din.
NUM 25:13 Ne uyun heini he ebpedayun is kegkememumuhat din su pehendiyè en te kegkelapislapis te menge kevuwazan din taman te taman, su impeehè din is utew zin kegkepauk tenged te salà ne mibelukasan din is menge Israilihanen te menge salè dan.”
NUM 25:14 Is Israilihanen he minatey zuma zuen te vahi he Midianhen iyan si Zimri he anak ni Salu, he pengulu te sevaha he pemilya te kevuwazan ni Simeon.
NUM 25:15 Ne sikan is bahi he Midianhen ne iyan si Cozbi he anak ni Zur he sevaha he pengulu te sevaha he pemilya he Midianhen.
NUM 25:16 Migkaǥi is Nengazen diyà te ki Moises te,
NUM 25:17 “Isipa niw he kuntada niw is menge Midianhen, ne penhimetayi niw sikandan,
NUM 25:18 su mid-isip kew zan daan he menge kuntada zan hein midlimbungan kew zan diyà te Peor, wey tenged daan ki Cozbi he anak te sevaha he Midianhen he pengulu. Heini he vahi nepatey hein duen limas diyà te Peor.”
NUM 26:1 Ne hein neipus sikan is limas, migkaǥi is Nengazen diyà te ki Moises wey ki Eleazar he anak ni Aaron he memumuhat te,
NUM 26:2 “Sinsusa niw is kada pemilya te tivuuk he keet-etawan te Israel sumalà te pemilya zan–sikan is langun he maama he 20 he tuig is penuiǥen dan pehendiyà te metikang he egkehimu he edsunderuwen te Israel.”
NUM 26:3 Umbe, mibpekidlalag si Moises wey si Eleazar he memumuhat te menge Israilihanen diyà te suǥud te Moab he kilid te Wahig he Jordan he uvey te Jerico.
NUM 26:4 Kesikandan diyà te kandan te, “Sinsusa niw is menge maama he 20 he tuig is penuiǥen dan pehendiyà te metikang, sumalà te insuǥù te Nengazen ki Moises.” Iyan heini menge Israilihanen he migawas puun te Ehipto:
NUM 26:5 Is menge kevuwazan ni Reuben te kinekekayan he anak ni Jacob, iyan is pemilya ni Hanoc, Palu,
NUM 26:6 Hezron, wey Carmi.
NUM 26:7 Iyan sikandan menge pemilya he ebpuun diyà te ki Reuben; 43,700 sikandan is langun.
NUM 26:8 Is anak ni Palu iyan si Eliab,
NUM 26:9 ne is menge anak ni Eliab iyan ensi Nemuel, Datan, wey si Abiram. Heini si Datan wey si Abiram iyan menge pengulu te menge etew he nekidsevaha ki Kora te kebpekidsukulà te Nengazen pinaaǥi te kegkuntedaha zan ki Moises wey ki Aaron.
NUM 26:10 Piru mid-eveleng sikandan te tanà duma ki Kora, ne sikan 250 he sumusunud kandan nemematey pinaaǥi te hapuy. Heini he hitavù nehimu he petizaan diyà te menge Israilihanen.
NUM 26:11 Piru is menge anak ni Kora, wazà mulà mebpatey zutun he hitavù.
NUM 26:12 Is menge kevuwazan ni Simeon iyan is menge pemilya eni, Nemuel, Jamin, Jakin,
NUM 26:13 Zera, wey Shaul.
NUM 26:14 Iyan sikandan menge pemilya he ebpuun diyà te ki Simeon; 22,200 sikandan is langun.
NUM 26:15 Is menge kevuwazan ni Gad iyan is menge pemilya eni Zefon, Hagi, Shuni,
NUM 26:16 Ozni, Eri,
NUM 26:17 Arod, wey Areli.
NUM 26:18 Iyan sikandan menge pemilya he ebpuun diyà te ki Gad; 40,500 sikandan is langun.
NUM 26:19 Si Juda zuen din dezuwa he anak he maama he iyan si Er wey si Onan, he minatey ziyà te tanà he Canaan. Piru zuen gihapun menge kevuwazan ni Juda he iyan is menge pemilya eni Shela, Perez, wey Zera.
NUM 26:21 Is menge kevuwazan ni Perez iyan is menge pemilya eni Hezron wey Hamul.
NUM 26:22 Iyan sikandan menge pemilya he ebpuun diyà te ki Juda; 76,500 sikandan is langun.
NUM 26:23 Is menge kevuwazan ni Isacar iyan is menge pemilya eni Tola, Pua,
NUM 26:24 Jashub, wey Shimron.
NUM 26:25 Iyan sikandan menge pemilya he ebpuun diyà te ki Isacar; 64,300 sikandan is langun.
NUM 26:26 Is menge kevuwazan ni Zebulun iyan is menge pemilya eni Sered, Elon, wey Jaleel.
NUM 26:27 Iyan sikandan menge pemilya he ebpuun diyà te ki Zebulun; 60,500 sikandan is langun.
NUM 26:28 Is menge kevuwazan ni Jose ebpuun diyà te zezuwa he anak din he si Manase wey si Efraim.
NUM 26:29 Is menge kevuwazan ni Manase iyan is menge pemilya ni Makir wey ziyà te anak din he si Gilead.
NUM 26:30 Is menge kevuwazan ni Gilead iyan is menge pemilya eni Iezer, Helek,
NUM 26:31 Asriel, Shekem,
NUM 26:32 Shemida, wey Hefer.
NUM 26:33 Is anak ni Hefer he si Zelofehad, wazè din anak he maama. Piru zuen din menge anak he vahi he is menge ngazan dan iyan ensi Mala, Noa, Hogla, Milca, wey Tirza.
NUM 26:34 Iyan sikandan menge pemilya he ebpuun diyà te ki Manase; 52,700 sikandan is langun.
NUM 26:35 Is menge kevuwazan daan ni Efraim iyan is menge pemilya eni Shutela, Beker, Tahan,
NUM 26:36 wey ziyà te anak ni Shutela he si Eran.
NUM 26:37 Iyan heini sikandan menge pemilya he ebpuun diyà te ki Efraim; 32,500 sikandan is langun. Heini he menge pemilya is ebpuun diyà te ki Manase wey ki Efraim iyan menge kevuwazan ni Jose.
NUM 26:38 Is menge kevuwazan ni Benjamin iyan is menge pemilya eni Bela, Ashbel, Ahiram,
NUM 26:39 Shufam, wey Hufam.
NUM 26:40 Is menge kevuwazan ni Bela, iyan is menge pemilya ni Ard wey ni Naaman.
NUM 26:41 Iyan sikandan menge pemilya he ebpuun diyà te ki Benjamin; 45,600 sikandan is langun.
NUM 26:42 Is menge kevuwazan ni Dan iyan is pemilya ni Shuham.
NUM 26:43 Is langun he menge kevuwazan ni Dan he menge Shuhamnon; 64,400 sikandan is langun.
NUM 26:44 Is menge kevuwazan ni Asher iyan is menge pemilya eni Imnah, Ishvi, wey Beria.
NUM 26:45 Is menge kevuwazan ni Beria iyan is menge pemilya ni Heber wey ki Malkiel.
NUM 26:46 (Duen anak he vahi ni Asher he si Sera.)
NUM 26:47 Iyan sikandan menge pemilya he ebpuun diyà te ki Asher; 53,400 sikandan is langun.
NUM 26:48 Is menge kevuwazan ni Naftali iyan is menge pemilya eni Jazeel, Guni,
NUM 26:49 Jezer, wey Shilem.
NUM 26:50 Iyan heini sikandan menge pemilya he ebpuun diyà te ki Naftali; 45,400 sikandan is langun.
NUM 26:51 Umbe, is kahabet te langun he maama he menge Israilihanen he nesinsus 601,730.
NUM 26:52 Ne migkaǥi is Nengazen diyà te ki Moises te,
NUM 26:53 “Behina nu is tanà he egkepengevilin dan sumalà te kahabet te kada tribu.
NUM 26:54 Is tribu he mezakel, behini nu te zekelà, is tribu he deisey zà behini nu te zeisey.
NUM 26:55 Kinahanglan he pinaaǥi te ripa is kebehina zuen te tanà diyà te zekelà wey zeisey he tribu he egketuenan pinaaǥi zuen te sinsus.”
NUM 26:57 Is menge kevuwazan ni Levi iyan is menge pemilya eni Gershon, Kohat, wey Merari.
NUM 26:58 Ne ziyà te kandan ebpuun is menge pemilya eni Libni, Hebron, Mali, Mushi, wey Kora. Si Kohat iyan kepuun ni Amram,
NUM 26:59 ne iyan esawa ni Amram si Jokebed he kevuwazan daan ni Levi. Diyà ianak si Jokebed te Ehipto. Si Amram wey si Jokebed iyan ginikanan eni Aaron, Moises, wey Miriam.
NUM 26:60 Ne si Aaron iyan amey eni Nadab, Abihu, Eleazar, wey Itamar.
NUM 26:61 Piru minatey si Nadab wey si Abihu hein nemuhat sikandan he migamit dan te hapuy he kenè diyè ebpuun te hapuy he egemiten para te kebpemuhata te Nengazen.
NUM 26:62 Is kahabet te maama he menge kevuwazan ni Levi he senge vulan pehendiyà te metikang is keǥurang dan ne 23,000. Wazà sikandan iragkes diyà te ketivuukan he vilang te menge Israilihanen su wazè man kandan he vahin duen te tanà he egkepengevilin te menge Israilihanen.
NUM 26:63 Iyan heini menge Israilihanen he nesinsus ni Moises wey ni Eleazar he memumuhat diyà te suǥud te Moab he kilid te Jordan he uvey te Jerico.
NUM 26:64 Ne wazè en nesamà he uuyag duen te neragkes duen te nehuna he kedsinsus ni Moises wey ni Aaron he memumuhat diyà te sibsivayan he Sinai.
NUM 26:65 Su zutun dengan, migkaǥi is Nengazen he siguradu he ebpematey sikandan diyà te sibsivayan ne wazà egkelibri kandan gawas ki Caleb he anak ni Jefune wey ki Josue he anak ni Nun.
NUM 27:1 Si Zelofehad, duen din menge anak he vahi he iyan ensi Mala, Noa, Hogla, Milca, wey Tirza. Heini si Zelofehad anak ni Hefer wey apù ni Gilead. Si Gilead anak ni Makir wey apù ni Manase. Si Manase anak ni Jose.
NUM 27:2 Midhendiyà heini he menge vahi te gemawan duen te Tulda he Edtelevukaayan ne midhitindeg dan diyà te etuvangan ni Moises, ni Eleazar wey te menge pengulu, wey te langun he menge Israilihanen. Migkaǥi sikandan te,
NUM 27:3 “Minatey is amey zey diyà te sibsivayan he wazè din anak he maama. Piru minatey sikandin kenà tenged te midsunud sikandin ki Kora te nekidsukulà te Nengazen, kekena, tenged te keugelingen din he salà.
NUM 27:4 Id-awè en be is ngazan din diyà te pemilya te Israel tenged te wazè din anak he maama? Beǥayi key zaan te tanà iring te nezawat te menge kezuzumahi zey.”
NUM 27:5 Umbe, migkaǥi ni Moises diyà te Nengazen haazà is hangyù dan.
NUM 27:6 Ne migkeǥiyan sikandin te Nengazen te,
NUM 27:7 “Benar is egkeǥiyen te menge anak he vahi ni Zelofehad. Kinahanglan he ebeǥayan nu sikandan te tanà duma te menge kezuzumahi te amey zan. Iveǥey nu kandan is para pezem te amey zan.
NUM 27:8 “Keǥiyi nu is menge Israilihanen he emun ebpatey is sevaha he etew he wazè din anak he maama, kinahanglan he iyan ibpepengevilin is anak din he vahi.
NUM 27:9 Emun wazè din anak he vahi, ne ziyà ibeǥey te menge suled din he maama.
NUM 27:10 Ne emun wazè din suled he maama, ne ibeǥey is tanè din diyà te menge anggam din diyà te amey zin.
NUM 27:11 Emun wazà suled he maama te amey zin, ne ibeǥey is tanè din diyà te kinemegegetan he kezuzumahi zin, ne haazà iyan ebpekaangken duen. Kinahanglan he edtumanen heini te menge Israilihanen su velaud en heini he sulunuzen, sumalà te insuǥù ku ziyà te kenikew Moises.”
NUM 27:12 Migkaǥi is Nengazen diyà te ki Moises te, “Tekezeg ka ziyà te vuntud he Abarim ne pentawa nu is tanà he ibeǥey ku te menge Israilihanen.
NUM 27:13 Ne emun egkeehè nu en heini, ne ebpatey ke en iring te suled nu he si Aaron.
NUM 27:14 Su hein nekidsukulà kedì is menge Israilihanen diyà te serebseb diyà te sibsivayan he Zin, midsupak niw ki Aaron is suǥù ku te kebpaahà te kegkewaǥas ku ziyà te menge etew.” (Heini he serebseb iyan is Meriba Kadesh he ziyà te sibsivayan he Zin.)
NUM 27:15 Migkaǥi si Moises diyà te Nengazen te,
NUM 27:16 “He Nengazen, Megbevayè ka he iyan ebpuunan te untung te langun he etew, deyzey ke ebpilì ka te etew he ebpekepengulu kayi te menge etew,
NUM 27:17 he ebpengulu kandan duen te tebek, su para kenà meiring is menge etew nu te menge kerehidu he wazà duen ebantey.”
NUM 27:18 Umbe, migkaǥi is Nengazen diyà te ki Moises te, “Pesuǥui nu si Josue he anak ni Nun, is sevaha he etew he ed-ulinan te Mulin-ulin, ne izampè nu is palad nu ziyà te ulu zin te ked-urdina kandin he pengulu.
NUM 27:19 Ipehitindeg nu sikandin diyà te etuvangan ni Eleazar he memumuhat wey ziyà te langun he menge etew ne ipetueni nu kandan he mibpilì nu sikandin he ilis kenikew.
NUM 27:20 Ne iveǥey nu kandin is duma he keǥehem nu su para pezumdumahi sikandin te langun he menge Israilihanen.
NUM 27:21 Pinaaǥi ki Eleazar egketuenan din is egkesuatan ku pinaaǥi te kegamit ni Eleazar te beveraan he Urim diyà te etuvangan ku. Pinaaǥi kayi egkeǥiyahan ni Eleazar si Josue wey is langun he menge Israilihanen te ereg he ebeelan dan.”
NUM 27:22 Ne mibeelan ni Moises haazà is insuǥù kandin te Nengazen. Mibpesuǥuan din si Josue ne impehitindeg din diyà te etuvangan ni Eleazar he memumuhat wey te langun he menge etew.
NUM 27:23 Ne sumalà te insuǥù te Nengazen kandin, indampè din is menge palad din diyà te ki Josue ne impetuenan din he si Josue is ebpekeilis kandin.
NUM 28:1 Migkaǥi is Nengazen diyà te ki Moises te,
NUM 28:2 “Keǥiyi nu is menge Israilihanen he kinahanglan he mebpemuhat sikandan kayi te kedì te menge pemuhat pinaaǥi te hapuy diyà te midtelaan he timpu. Heini he menge pemuhat iyan keenen ku. Ne is kehemut kayi ne ebpekepenunuat kedì. Umbe keǥiya nu heini ziyà te menge Israilihanen, ke sikew te,
NUM 28:3 ‘Iyan heini menge pemuhat pinaaǥi te hapuy he ibpemuhat niw ziyà te Nengazen: dezuwa he kerehidu he senge-tuig is keǥurang dan he wazè dan sazir. Pemuhat heini he edtutungen kada andew.
NUM 28:4 Sevaha is ibpemuhat niw emun meselem ne sevaha zaan emun mahapun.
NUM 28:5 Edlepikan heini te pemuhat he para gasa he zezuwa he kilu he meupiya he kelasi te herina ne midsehuǥan te senge litru he lana te mibevayu he ulibu.
NUM 28:6 Iyan heini pemuhat kada andew he edtutungen, he insuǥù dengan keniyu te Nengazen diyà te Buntud he Sinai. Is kehemut kayi he pemuhat te pinaaǥi te hapuy ne ebpekepenunuat te Nengazen.
NUM 28:7 Ragkes daan kayi is pemuhat he inumen he idragkes te kebpemuhata te kada kerehidu, he senge litru he vinu, he pemuhat diyà te Nengazen, he id-itis diyà te segradu he lugar para te Nengazen.
NUM 28:8 Ne iring ded kayi is beeli niw ziyà te ikezuwa he pemuhat niw he kerehidu he ibpemuhat niw ke mahapun. Lepiki niw zed heini te pemuhat he para gasa wey pemuhat he inumen. Pemuhat heini he edtutungen he ebpekepenunuat te Nengazen is kehemut din.’
NUM 28:9 “Emun Andew te Kedhimeley, pemuhat kew te zezuwa he kerehidu he tig senge-tuig is keǥurang dan he wazè dan sazir, he edlepikan te pemuhat he inumen wey pemuhat he para gasa he heepat he kilu he meupiya he kelasi he herina he midsehuǥan te lana.
NUM 28:10 Iyan heini pemuhat he edtutungen kada Andew te Kedhimeley, he gawas en duen te andew-andew he pemuhat ragkes is pemuhat he inumen he zuma kayi.
NUM 28:11 “Diyà te kada egkehuna he andew te vulan ne pemuhat kew ziyà te Nengazen te pemuhat he edtutungen. Is ibpemuhat niw zezuwa he turiti he vaka, sevaha he meǥurang en he meemahan he kerehidu, wey pitu he meemahan he kerehidu he tig senge-tuig is keǥurang dan. Is langun kayi kinahanglan he wazè din sazir.
NUM 28:12 Lepiki niw heini te pemuhat he para gasa he meupiya he kelasi te herina he midsehuǥan te lana–heenem he kilu is idlapik te kada sevaha he turiti he vaka, heepat he kilu is para te meǥurang en he kerehidu, ne zezuwa he kilu is para te kada nati he kerehidu. Menge pemuhat heini he edtutungen, is kehemut kayi ebpekepenunuat te Nengazen.
NUM 28:14 Is kada pemuhat he turiti he vaka edlepikan te pemuhat he inumen he zezuwa he litru he vinu. Ne sikan is meǥurang en he kerehidu edlepikan te senge litru wey tengà he vinu. Ne is kada sevaha he nati he kerehidu edlepikan te senge litru he vinu. Iyan heini binulan he pemuhat he edtutungen he ibpemuhat niw kada egkehuna he andew te vulan seled te tivuuk he tuig.
NUM 28:15 Pemuhata niw zaan is Nengazen te sevaha he meemahan he kambing he pemuhat he para idlumpiyu. Beeli niw heini gawas duen te andew-andew he pemuhat he edtutungen wey zuen te pemuhat he inumen he zuma kayi.
NUM 28:16 “Silibraha niw is Pista te Kedlavey te Belinsuǥuen te ike-14 he andew te egkehuna he vulan.
NUM 28:17 Ne sunud he andew zutun ebpuun is pitu he andew he pista. Ne seled kayi te pitu he andew he pista ne kenè kew kaan te supas he zuen din tapey.
NUM 28:18 Duen te egkehuna he andew zutun te pista, ne tiǥum kew te ked-azap te Nengazen, ne kenè kew terebahu keniyan he andew.
NUM 28:19 Pemuhata niw is Nengazen te pemuhat he edtutungen he zezuwa he turiti he vaka, sevaha he meǥurang en he meemahan he kerehidu, wey pitu he nati he menge kerehidu he tig senge-tuig is keǥurang dan. Heini is langun kinahanglan he wazè dan sazir.
NUM 28:20 Dutun te kebpemuhat niw kayi, lepiki niw heini te meupiya he kelasi he herina he midsehuǥan te lana–heenem he kilu zutun te herina is idlapik niw zuen te kada sevaha he turiti he vaka, heepat he kilu is idlapik niw zuen te meǥurang en he kerehidu.
NUM 28:21 Ne tig-dezuwa he kilu is idlapik diyà te kada sevaha he nati he kerehidu.
NUM 28:22 Pemuhat kew zaan te meemahan he kambing he pemuhat para idlumpiyu para mepesaylu kew te menge salè niw.
NUM 28:23 Ipemuhat niw heini he id-uman duen te kada-andew he pemuhat he edtutungen kada meselem.
NUM 28:24 Heini he pemuhat, ipemuhat niw he pemuhat pinaaǥi te hapuy he keenen te Nengazen. Beeli niw heini kada andew seled te pitu he andew. Is kehemut kayi he pemuhat te pinaaǥi te hapuy ne ebpekepenunuat te Nengazen. Ipemuhat niw heini he id-uman duen te pemuhat he edtutungen wey pemuhat he inumen he ibpemuhat niw kada andew.
NUM 28:25 Ne emun ikepitu en he andew, ne tiǥum kew en maan te ked-azap te Nengazen, ne kenè kew terebahu zutun he andew.
NUM 28:26 “Diyà te egkehuna he andew zutun te Pista te Kedraǥun, ne emun timpu en te kebpemuhat niw ziyà te Nengazen te veǥu he neraǥun niw he trigu, tiǥum kew te ked-azap te Nengazen ne kenè kew terebahu zutun he andew.
NUM 28:27 Pemuhat kew te pemuhat he edtutungen: he dezuwa he turiti he vaka, sevaha he meǥurang en he meemahan he kerehidu wey pitu he meemahan he nati he kerehidu he tig senge-tuig is keǥurang dan. Is kehemut kayi he pemuhat ebpekepenunuat te Nengazen.
NUM 28:28 Duen te kebpemuhata niw kayi, lepiki niw heini te pemuhat he para gasa he meupiya he kelasi te herina he midsehuǥan te lana–heenem he kilu is ilapik te kada turiti he vaka, heepat he kilu is para te meǥurang en he kerehidu,
NUM 28:29 ne zezuwa he kilu is ilapik niw ziyà te kada sevaha he nati he kerehidu.
NUM 28:30 Pemuhat kew zaan te sevaha he meemahan he kambing su wey kew mevelukasi tenged te menge salè niw.
NUM 28:31 Ipemuhat niw heini zuma zuen te pemuhat he inumen, iuman heini zuen te ibpemuhat niw kada andew he pemuhat he edtutungen wey pemuhat he para gasa. Kinahanglan he haazà he menge uyaǥen wazà duen igkesawey.
NUM 29:1 “Diyà te egkehuna he andew te ikepitu he vulan, tiǥum kew para te ked-azap te Nengazen, ne kenè kew terebahu. Iyan heini andew te kebpezaǥing niw te menge trumpita.
NUM 29:2 Dutun he andew, pemuhat kew te pemuhat he edtutungen he ebpekepenunuat te Nengazen is kehemut din. Is ibpemuhat kayi he pemuhat iyan is: sevaha he turiti he vaka, sevaha he meemahan he kerehidu he meǥurang en, pitu he meemahan he nati he menge kerehidu he tig senge-tuig is keǥurang dan. Ne heini is langun kinahanglan he wazè dan sazir.
NUM 29:3 Ne kebpemuhat niw kayi, lepiki niw te pemuhat he para gasa he meupiya he kelasi te herina he midsehuǥan te lana–heenem he kilu is idlapik diyà te kada sevaha he turiti he vaka, heepat he kilu is idlapik diyà te meǥurang en he kerehidu.
NUM 29:4 Ne zezuwa he kilu is idlapik diyà te kada sevaha he nati he kerehidu.
NUM 29:5 Pemuhat kew zaan te sevaha he meemahan he kambing he pemuhat he para idlumpiyu su wey kew mevelukasi tenged te menge salè niw.
NUM 29:6 Ipemuhat niw heini he id-uman duen te vinulan wey kada andew he menge pemuhat he edtutungen he edlepikan te menge pemuhat he para gasa wey pemuhat he inumen. Menge pemuhat heini he pinaaǥi te hapuy, is kehemut kayi ebpekepenunuat te Nengazen.
NUM 29:7 “Dutun te ikesepulù he andew kayi te ikepitu he vulan, tiǥum kew para te ked-azap te Nengazen. Kinahanglan he ebpuasa kew wey kenè kew edterebahu.
NUM 29:8 Ne pemuhat kew te menge pemuhat he edtutungen he ebpekepenunuat te Nengazen is kehemut din: he sevaha he meemahan he nati he vaka, sevaha he meǥurang en he meemahan he kerehidu, wey pitu he nati he meemahan he menge kerehidu he tig senge-tuig is keǥurang dan. Ne langun kayi kinahanglan he wazè dan sazir.
NUM 29:9 Dutun te kebpemuhat niw kayi, lepiki niw heini te pemuhat he para gasa he meupiya he kelasi te herina he midsehuǥan te lana–heenem he kilu is idlapik te kada turiti he vaka, heepat he kilu is para te meǥurang en he kerehidu,
NUM 29:10 ne zezuwa he kilu is idlapik niw ziyà te kada sevaha he nati he kerehidu.
NUM 29:11 Pemuhat kew zaan te sevaha he meemahan he kambing he pemuhat he para idlumpiyu, he id-uman duen te sevaha pa he pemuhat he para idlumpiyu, su wey mevelukasi kew tenged te menge salè niw wey te kada andew he pemuhat he edtutungen he edlepikan te pemuhat he para gasa wey pemuhat he inumen.
NUM 29:12 “Dutun te ike-15 he andew te iyan ded he vulan, tiǥum kew en maan para te ked-azap te Nengazen ne kenè kew terebahu zutun he andew. Silibra kew te pista para te Nengazen seled te pitu he andew.
NUM 29:13 Pemuhat kew te menge pemuhat he edtutungen he ebpekepenunuat te Nengazen is kehemut din. Diyà te egkehuna he andew iyan heini ipemuhat niw: 13 he turiti he vaka, dezuwa he meǥurang en he meemahan he menge kerehidu, wey 14 he nati he meemahan he menge kerehidu he tig senge-tuig is keǥurang dan. Ne heini is langun kinahanglan he wazè dan sazir.
NUM 29:14 Dutun te kebpemuhat niw kayi, lepiki niw heini te pemuhat he para gasa he meupiya he kelasi te herina he midsehuǥan te lana–heenem he kilu is idlapik diyà te kada sevaha he turiti he vaka, heepat he kilu is idlapik te kada sevaha he meǥurang en he kerehidu,
NUM 29:15 ne zezuwa he kilu is idlapik diyà te kada sevaha he nati he kerehidu.
NUM 29:16 Pemuhat kew zaan te sevaha he meemahan he kambing he pemuhat he para idlumpiyu, he id-uman heini zuen te kada andew he pemuhat he edtutungen he edlepikan te pemuhat he para gasa wey pemuhat he inumen.
NUM 29:17 “Ne ziyà te ikezuwa he andew te kedsilibra niw, ne iyan heini ipemuhat niw: 12 he turiti he vaka, dezuwa he meemahan he menge kerehidu he meǥurang en, wey 14 he nati he meemahan he menge kerehidu he tig senge-tuig is keǥurang din. Ne heini is langun kinahanglan he wazè dan sazir.
NUM 29:18 Dutun te kebpemuhata niw kayi, lepiki niw heini te hustu is kezekelè din he pemuhat he para gasa wey pemuhat he inumen.
NUM 29:19 Pemuhat kew zaan te sevaha he meemahan he kambing he pemuhat he para idlumpiyu, he id-uman heini zuen te kada andew he menge pemuhat he edtutungen he edlepikan te pemuhat he para gasa wey pemuhat he inumen.
NUM 29:20 “Diyà te iketelu he andew te kedsilibra niw iyan heini ipemuhat niw: 11 he meemahan he turiti he vaka, dezuwa he meǥurang en he meemahan he menge kerehidu wey 14 he nati he meemahan he menge kerehidu he tig senge-tuig is keǥurang din. Is langun kayi kinahanglan he wazè dan sazir.
NUM 29:21 Is kada sevaha kayi, lepiki niw te pemuhat he hustu is kezekelè din he pemuhat he para gasa wey pemuhat he inumen.
NUM 29:22 Pemuhat kew zaan te sevaha he meemahan he kambing he pemuhat he para idlumpiyu, he id-uman heini zuen te kada andew he pemuhat he edtutungen wey te zuma zin he pemuhat he para gasa wey pemuhat he inumen.
NUM 29:23 “Dutun te ikeepat he andew te kedsilibra niw iyan heini ipemuhat niw: 10 he turiti he vaka, dezuwa he meǥurang en he meemahan he menge kerehidu, wey 14 he nati he meemahan he menge kerehidu he tig senge-tuig is keǥurang din. Is langun kayi kinahanglan he wazè dan sazir.
NUM 29:24 Is kada sevaha kayi, lepiki niw te hustu is kezekelè din he pemuhat he para gasa wey pemuhat he inumen.
NUM 29:25 Pemuhat kew zaan te sevaha he meemahan he kambing he pemuhat para te idlumpiyu, he id-uman heini zuen te kada andew he pemuhat he edtutungen he edlepikan te pemuhat he para gasa wey pemuhat he inumen.
NUM 29:26 “Dutun te ikelima he andew te kedsilibra niw iyan heini ipemuhat niw: siyam he turiti he vaka, dezuwa he meǥurang en he meemahan he menge kerehidu, wey 14 he nati he meemahan he menge kerehidu he tig senge-tuig is keǥurang din. Is langun kayi kinahanglan he wazè dan sazir.
NUM 29:27 Is kada sevaha kayi, lepiki niw te hustu is kezekelè din he pemuhat he para gasa wey pemuhat he inumen.
NUM 29:28 Pemuhat kew zaan te sevaha he meemahan he kambing he pemuhat he para idlumpiyu, he id-uman heini zuen te kada andew he pemuhat he edtutungen he edlepikan te pemuhat he para gasa wey pemuhat he inumen.
NUM 29:29 “Emun ikeenem he andew te kedsilibra niw, iyan heini ipemuhat niw: walu he turiti he vaka, dezuwa he meǥurang en he meemahan he menge kerehidu, wey 14 he nati he meemahan he menge kerehidu he tig senge-tuig is keǥurang din. Is langun kayi kinahanglan he wazè dan sazir.
NUM 29:30 Is kada sevaha kayi, lepiki niw te hustu is kezekelè din he pemuhat he para gasa wey pemuhat he inumen.
NUM 29:31 Pemuhat kew zaan te sevaha he meemahan he kambing he pemuhat para idlumpiyu, he id-uman heini zuen te kada andew he pemuhat he edtutungen he edlepikan te pemuhat he para gasa wey pemuhat he inumen.
NUM 29:32 Dutun te ikepitu he andew te kedsilibra niw iyan heini ipemuhat niw: pitu he turiti he vaka, dezuwa he meǥurang en he meemahan he menge kerehidu wey 14 he nati he meemahan he menge kerehidu he tig senge-tuig is keǥurang din. Is langun kayi kinahanglan he wazè dan sazir.
NUM 29:33 Dutun te kebpemuhata niw kayi, lepiki niw te hustu is kezekelè din he pemuhat he para gasa wey pemuhat he inumen.
NUM 29:34 Pemuhat kew zaan te sevaha he meemahan he kambing he pemuhat para idlumpiyu, he id-uman heini zuen te kada andew he pemuhat he edtutungen he edlepikan te pemuhat he para gasa wey pemuhat he inumen.
NUM 29:35 “Dutun te ikewalu he andew te kedsilibra niw, sevaha kew te ked-azap te Nengazen ne kenè kew terebahu keniyan he andew.
NUM 29:36 Pemuhat kew te pemuhat he edtutungen he ebpekepenunuat te Nengazen is kehemut din: sevaha he turiti he vaka, sevaha he meǥurang en he meemahan he kerehidu wey pitu he nati he meemahan he menge kerehidu he tig senge-tuig is keǥurang din. Is langun kayi kinahanglan he wazè dan sazir.
NUM 29:37 Is kada sevaha kayi, lepiki niw te hustu is kezekelè din he pemuhat he para gasa wey pemuhat he inumen.
NUM 29:38 Pemuhat kew zaan te sevaha he meemahan he kambing he pemuhat para idlumpiyu, he id-uman heini zuen te kada andew he pemuhat he edtutungen he edlepikan te pemuhat he para gasa wey pemuhat he inumen.
NUM 29:39 “Ne liyu zuen te menge pemuhat he para te kedtuman te menge penaad niw wey menge keugelingen niw he suat, pemuhata niw zaan is Nengazen dutun te midtelaan he menge pista kayi he menge pemuhat: menge pemuhat he edtutungen, menge pemuhat he para gasa, menge pemuhat he inumen, wey menge pemuhat he para te meupiya he kedepità.”
NUM 29:40 Migkaǥi ni Moises heini is langun diyà te menge Israilihanen sumalà te insuǥù kandin te Nengazen.
NUM 30:1 Migkeǥiyan ni Moises is menge pengulu te menge tribu te Israel te, “Iyan heini menge suǥù te Nengazen:
NUM 30:2 Emun ebpenaad etawa ebpenangdù is sevaha he maama diyà te Nengazen he ebeelan din etawa kenà haazà is sevaha he vaal he midtendek din, kinahanglan he edtumanen din is langun he mibpengaǥi zin.
NUM 30:3 “Emun duen betan-en he vahi he ziyà gihapun ed-ubpa te ed-ubpaan te amey zin he ebpenaad etawa ebpenangdù te kebaal etawa kenà kebaal te vaal he midtendek din,
NUM 30:4 ne netuenan heini te amey zin piru wazà lalag te amey zin mehitenged kayi, kinahanglan he edtumanen din heini.
NUM 30:5 Iyan, emun mibelevaǥan heini te amey zin dutun te kegketueni zin kayi, ne kenà kinahanglan he edtumanen din. Ebpeseyluwen sikandin te Nengazen emun kenè din edtumanen su mibelavag kandin is amey zin.
NUM 30:6 “Penenglitan neesawa is sevaha he vetan-en he vahi he zaan en he ebpenaad etawa ebpenangdù he ebeelan din etawa kenè din ebeelan is sevaha he vaal. Minsan kenà tinutuuwà is kebpenaad din,
NUM 30:7 emun kenà haazà ebelevaǥan te esawa zin dutun te kegketueni zin duen, kinahanglan he edtumanen duen te vahi is penaad din.
NUM 30:8 Piru emun ebelavag is esawa zin dutun te kegketueni zin duen, ne kenè en kinahanglan he edtumanen din haazà, minsan pa ke tekew en sikandin nenaad he wazè din mepurung meisip etawa nepurung din meisip-isip, ne ebpeseyluwen sikandin te Nengazen.
NUM 30:9 “Emun is sevaha he valu he vahi etawa bahi he midsuwayan te esawa zin ebpenaad etawa ebpenangdù he ebelan din etawa kenà is sevaha he vaal he midtendek din, kinahanglan he edtumanen din heini.
NUM 30:10 “Emun ebpenaad etawa ebpenangdù is bahi he zuen din esawa te kebaal etawa kenà kebaal te vaal he midtendek din,
NUM 30:11 ne mibpereremek dà is esawa zin dutun te kegketueni zin kayi su wazè din heini belevaǥi, kinahanglan he edtumanen dutun te vahi haazà.
NUM 30:12 Iyan, emun ebelavag is esawa zin dutun te kegketueni zin kayi, kenè en kinahanglan he edtumanen din heini. Ebpeseyluwen sikandin te Nengazen su mibelavag man kandin is esawa zin.
NUM 30:13 Umbe, is maama, zuen din ketenged te kedtuǥut etawa kedwazà te minsan hengkey he impenaad etawa impenangdù te esawa zin.
NUM 30:14 Iyan, emun wazà mebelavag haazà is maama zutun te esawa zin dutun te andew te kegketueni zin, pinaaǥi kayi netuǥutan din is esawa zin he edtumanen din heini.
NUM 30:15 Iyan, emun impelavey pa zutun te maama is nepipira he andew ne human sikandin mebelavag, ne iyan egkesilutan haazà is maama te ereg pezem te esawa zin.”
NUM 30:16 Iyan heini menge sulunuzen he imbeǥey te Nengazen diyà te ki Moises mehitenged te teleesawa, wey mehitenged te amey wey is anak din he vetan-en he vahi he ziyè pa ed-ubpà te kandin.
NUM 31:1 Migkeǥiyan te Nengazen si Moises te,
NUM 31:2 “Belesi nu is menge Midianhen te mibeelan dan diyà te menge Israilihanen. Ne kegkepasad nu zutun, ebpatey ke en.”
NUM 31:3 Umbe, migkeǥiyan ni Moises is menge etew te, “Ipepengandam niw is duma keniyu para te kebpekidtebek te menge Midianhen su egkesuat is Nengazen he ebelesan tew is menge Midianhen.
NUM 31:4 Kada tribu ne 1,000 kandan is ebpekidtebek.”
NUM 31:5 Umbe 12,000 he menge etew he ebpuun diyà te 12 he tribu te Israel is nengandam te tebek.
NUM 31:6 Midsuǥù sikandan ni Moises pehendiyà te tebek, 1,000 is ebpuun diyà te kada tribu, he ebpenguluwan ni Finehas he anak ni Eleazar te memumuhat. Mid-uwit si Finehas te menge gelemiten he ebpuun diyà te Tulda he Edtelevukaayan wey menge trumpita he egemiten te kebmandar.
NUM 31:7 Nekidtebek sikandan te menge Midianhen, sumalà te insuǥù te Nengazen ki Moises ne mibpenhimetayan dan is langun he menge maama.
NUM 31:8 Ragkes dutun te mibpenhimetayan dan is lelima he hadì diyà te Midian he iyan ensi Evi, Rekem, Zur, Hur, wey Reba. Midhimetayan dan daan si Balaam he anak ni Beor pinaaǥi te ispada.
NUM 31:9 Ne mibihag dan is menge Midianhen he menge vahi wey menge vatà, wey mibpenguwa zan is menge uyaǥen wey menge azen.
NUM 31:10 Mibpeminsulan dan is langun he menge inged wey is langun he menge kampu te menge Midianhen.
NUM 31:11 Ne mid-uwit dan is langun he naaǥew zan, ragkes en is menge etew wey menge uyaǥen,
NUM 31:12 diyà te ki Moises, ki Eleazar he memumuhat, wey ziyà te langun he menge Israilihanen he ziyà te kampu zan he ziyà te suǥud te Moab he kilid te Jordan he uvey te Jerico.
NUM 31:13 Midsinuǥung sikandan ni Moises, ni Eleazar he memumuhat, wey te menge pengulu te Israel diyà te gawas te kampu.
NUM 31:14 Ne nepeukan ni Moises is menge upisyal he ebpuun te kebpekidtebek.
NUM 31:15 Migkaǥi si Moises diyà te kandan te, “Maan is wazè niw penhimetayi is menge vahi?
NUM 31:16 Iyan sikandan midsunud te sambag ni Balaam te ked-iniyat te menge Israilihanen te kedselikwey te Nengazen hein diyè kiw te Peor, he iyan hinungdan te kebpekesaǥad te limas te menge etew te Nengazen.
NUM 31:17 Umbe, geraa niw is langun he menge vatà he maama wey is langun he menge vahi he nehilevetan en te maama.
NUM 31:18 Piru semaa niw para keniyu is menge raǥa he wazè pa mehileveti.
NUM 31:19 Is langun keniyu he nekepatey etawa nekesamsam te minatey, kinahanglan he kayi zà te gawas te kampu seled te pitu he andew. Dutun iketelu wey ikepitu he andew, kinahanglan he mebpekelumpiyu kew wey is menge vihag niw.
NUM 31:20 Lumpiyuwi niw is langun he menge visti niw, ragkes en is langun he gelemiten niw he lundis, bulvul te kambing etawa kayu.”
NUM 31:21 Ne migkeǥiyan ni Eleazar he memumuhat is menge sundaru he ebpuun diyà te tebek te, “Iyan heini sulunuzen diyà te kesuǥuan he imbeǥey te Nengazen diyà te ki Moises:
NUM 31:22 Is minsan hengkey he azen he kenà egketutung iring te vulawan, pelata, brunsi, putew, wey timeǥà, kinahanglan he idsavuk niw ziyà te hapuy su wey mehimu he lumpiyu. Ne kegkepasad dutun, ne lùlui niw zuen te wahig he egemiten he para te kebpenlumpiyu. Is menge azen he egketutung edlùluan dà mulà duen te wahig.
NUM 31:24 Dutun te ikepitu he andew kinahanglan he ebpìpian niw is menge visti niw, ne kegkepasad dutun ed-isipen kew en he lumpiyu ne ebpekeseled kew en diyà te kampu.”
NUM 31:25 Migkaǥi is Nengazen diyà te ki Moises te,
NUM 31:26 “Bilanga niw ki Eleazar he memumuhat wey te langun he menge pengulu te menge pemilya te tivuuk he menge Israilihanen is langun he menge azen he netavan ragkes en is menge uyaǥen wey menge etew he nevihag.
NUM 31:27 Ne liwezaa niw heini ziyà te menge sundaru he mibpekidtebek wey menge Israilihanen he wazà mebpekidtebek.
NUM 31:28 Ne zutun te menge vahin te menge sundaru, sivey ka te para te Nengazen te sevaha te kada 500 he binihag he menge etew, etawa vaka, asnu, kerehidu, wey menge kambing.
NUM 31:29 Ne iveǥey nu heini ziyà te ki Eleazar he memumuhat su iyan heini vahin te Nengazen.
NUM 31:30 Ne zutun te menge vahin te menge Israilihanen he wazà mebpekidtebek, is kada 50 terini nu te sevaha is binihag he menge etew, menge vaka, menge asnu, menge kerehidu, wey menge kambing etawa zuma he kelasi te menge uyaǥen. Ne iveǥey nu heini ziyà te menge Levihanen he ketengdanan dan is ked-atur zuen te Tulda te Nengazen!”
NUM 31:31 Umbe, mibeelan ni Moises wey ni Eleazar he memumuhat haazà is insuǥù te Nengazen ki Moises.
NUM 31:32 Iyan heini nekuwa te menge sundaru puun te tebek: 675,000 he menge kerehidu, 72,000 he menge vaka, 61,000 he menge asnu, wey 32,000 he menge vahi he wazè pa mehileveti.
NUM 31:36 Iyan heini liwazà he vahin te menge sundaru he nekidtebek: 337,500 he menge kerehidu, ne is 675 kayi imbeǥey para te Nengazen, 36,000 he menge vaka, ne is 72 kayi imbeǥey para te Nengazen, 30,500 he menge asnu, ne is 61 kayi imbeǥey para te Nengazen, wey 16,000 he menge vahi, ne is 32 kayi imbeǥey para te Nengazen!
NUM 31:41 Imbeǥey ni Moises diyà te ki Eleazar he memumuhat is vahin te Nengazen sumalà te insuǥù kandin te Nengazen.
NUM 31:42 Iyan heini bahin te menge Israilihanen he liwazà duen te imbeǥey ni Moises diyà te menge sundaru he nekidtebek: 337,500 he menge kerehidu, 36,000 he menge vaka, 30,500 he menge asnu, wey 16,000 he menge vahi.
NUM 31:47 Midtarin si Moises diyà te kada 50 he etew etawa uyaǥen sumalà te insuǥù te Nengazen kandin, ne imbeǥey zin heini ziyà te menge Levihanen he ketengdanan dan is ked-atur zuen te Tulda te Nengazen!
NUM 31:48 Ne midhendiyà te ki Moises is menge upisyal te menge sundaru.
NUM 31:49 Ne migkaǥi sikandan te, “Datù, sikami is menge suluǥuen nu, mibilang dey is menge sundaru he sakup dey ne wazà minsan sevaha he netarin.
NUM 31:50 Umbe, idhalad dey ziyà te Nengazen is bulawan he menge azen he nekuwa zey ziyà te tebek–menge rintì, menge sising, menge eritis, wey menge velieg, su para mevelukasi is untung dey ziyà te etuvangan te Nengazen.”
NUM 31:51 Midawat ni Moises wey ni Eleazar is langun he vulawan he menge elahas.
NUM 31:52 Is keveǥat dutun te menge vulawan he mid-uwit duen te menge upisyal he inhalad ni Moises wey ni Eleazar ziyà te Nengazen menge 200 he kilu.
NUM 31:53 Ebpuun heini ziyà te nekuwa te kada sundaru ziyà te tebek.
NUM 31:54 Kegkezewata ni Moises wey ni Eleazar zuen te menge vulawan he imbeǥey te menge upisyal, mid-uwit dan heini ziyà te Tulda he Edtelevukaayan su para tentenuzi te Nengazen is menge Israilihanen.
NUM 32:1 Is tribu ni Reuben wey ni Gad duen dan utew mezakel he menge uyaǥen. Umbe hein neehè dan he meupiya he lugar para te menge uyaǥen is tanà diyà te Jazer wey Gilead,
NUM 32:2 midhendiyè dan te ki Moises wey ki Eleazar wey zuen te menge pengulu te kezekelan, ne ke sikandin te,
NUM 32:3 “Is menge lugar he midezeetan te Nengazen pinaaǥi te menge Israilihanen he iyan is Atarot, Dibon, Jazer, Nimra, Heshbon, Eleale, Sebam, Nebo, wey Beon–meupiya he lugar para te menge uyaǥen, ne sikami is menge suluǥuen nu mahabet is menge uyaǥen dey.
NUM 32:5 Umbe, emun nekepenunuat key kenikew, datù, is menge suluǥuen nu, iveǥey nu en nasì kenami haazà he tanà, iyan en heini kenami he vahin ne kenè key en kenikew zumaha ziyà layun te Wahig he Jordan.”
NUM 32:6 Ne migkaǥi si Moises diyà te tribu ni Gad wey ni Reuben te, “Iyan be ibpesavut niw he kayi kew zà mulà minsan ebpekidtebek is duma niw he menge Israilihanen?
NUM 32:7 Maan is id-awè niw is kezasig te menge Israilihanen te kedhendiyà te tanà he imbeǥey kandan te Nengazen?
NUM 32:8 Iyan daan heini mibeelan te menge kepuun niw hein impehipanew ku sikandan puun te Kadesh Barnea su wey zan mesusi heini is tanà.
NUM 32:9 Hein nekeuma zan en diyà te zal-ug he Eshcol wey nesusi zan en is tanà, mid-awè dan is kezasig te menge etew te kedhendiyà te tanà he imbeǥey kandan te Nengazen.
NUM 32:10 Utew nepauk is Nengazen dutun he andew ne utew meheǥet is kegkaǥi zin:
NUM 32:11 ‘Geina te wazè dan medsunud kedì te ebpuun diyà te gehinawa zan, ne wazà minsan sevaha kandan te ebpenuiǥen te 20 pehendiyà te metikang he migawas puun te Ehipto he ebpekaahà duen te tanà he insaad ku ki Abraham, ki Isaac wey ki Jacob
NUM 32:12 gawas ki Caleb he anak ni Jefune he Kinishen wey ki Josue he anak ni Nun su mibpezumazuma sikandan kediey te ebpuun diyà te tivuuk he gehinawa zan.’
NUM 32:13 Utew nepeuki te Nengazen is menge Israilihanen. Umbe, midtazintazin din sikandan diyà te sibsivayan seled te 40 he tuig, taman te nemematey haazà is tivuuk he lapis te kevuwazan he mibaal te mezaat diyà te etuvangan din.
NUM 32:14 “Ne sikiyu is kevuwazan te menge mekesesalà ne iyan kew en maan ed-ilis te menge kepuun niw, ne ed-umanan niw is kegkepeuki te Nengazen te menge Israilihanen.
NUM 32:15 Emun kenè kew ebpezumazuma te Nengazen ne ed-iniyuǥan din en maan kayi te sibsivayan heini is menge etew, ne iyan kew egkehimu he hinungdan te kegkezeeti zan.”
NUM 32:16 Piru mid-uvey pa sikandan diyà te ki Moises he ke sikandan te, “Ebaal key zà kayi te menge tudil para te menge uyaǥen dey, wey menge inged he para te menge vahi zey wey menge anak dey.
NUM 32:17 Piru andam key he ebpengegalen te menge zuma zey he menge Israilihanen te kebpekidtebek taman te egkeuwit dey sikandan diyà te kandan he lugar. Dutun te ebpekidtebek key, ne kayi zà mulà is menge vahi zey wey menge anak dey ne ed-ubpè dan diyà te binerengbeng he menge inged he ebeelan dey, su wey zan mekelikey te menge meǥinged kayi he lugar.
NUM 32:18 Kenè key ed-ulì taman te ebpekaangken te tanà he egkepengevilin dan is langun he menge Israilihanen.
NUM 32:19 Piru kenè key en egkesuat he ed-angken te tanà he egkepengevilin dey zuma kandan diyà layun te Jordan, su iyan en heini kenami he egkepengevilin is diyà te zapit te edsilaan te Jordan.”
NUM 32:20 Migkeǥiyan sikandan ni Moises te, “Emun tutuu ziyà te ǥehinawa niw kayi te etuvangan te Nengazen is kebpekiduma niw te kebpekidtebek,
NUM 32:21 ne edlayun is menge sundaru niw te Jordan taman te egkesegseg te Nengazen is menge kuntada zin,
NUM 32:22 ne emun egkepurung en egkaangken te menge Israilihanen haazà is tanà, ne egkehimu en he edlikù kew kayi su egketuman niw en is ketengdanan niw ziyà te Nengazen wey ziyà te menge zuma niw he menge Israilihanen. Ne heini he tanà egkehimu en he keniyu ziyà te etuvangan te Nengazen.
NUM 32:23 “Iyan, emun kenè niw heini edtumanen, ne ebpekesalè kew ziyà te Nengazen, ne siguradu he ebeyazan niw is salè niw.
NUM 32:24 Sigi, bangun kew te menge inged he para te menge vahi niw wey menge anak niw, wey vaal kew te menge tudil he para te menge uyaǥen niw. Piru kinahanglan he edtumanen niw is insaad niw.”
NUM 32:25 Ne midtavak is tribu ni Gad wey ni Reuben te, “Datù, sikami is menge suluǥuen nu, edtumanen dey is menge suǥù nu.
NUM 32:26 Kayi zà, te Gilead is menge esawa zey, menge anak dey, wey menge uyaǥen dey.
NUM 32:27 Piru sikami is ebpekehimu he ebpekidtebek edlayun key te Jordan te kebpekidtebek sumalà te mandù nu kenami zatù.”
NUM 32:28 Ne mibmenduan ni Moises si Eleazar he memumuhat, si Josue he anak ni Nun, wey is menge pengulu te menge tribu te Israel.
NUM 32:29 Ke sikandin te, “Emun tutuu ziyà te ǥehinawa niw kayi te etuvangan te Nengazen he edlayun te Jordan is menge sakup te tribu ni Gad wey ni Reuben te kebpekidtebek, ne emun egkaaǥew niw en haazà is tanà, ne iveǥey niw kandan is tanà he Gilead he kandan he tanà.
NUM 32:30 Iyan, emun kenè dan edlayun duma keniyu, kinahanglan he ed-angken sikandan te tanà duma keniyu ziyà te Canaan,”
NUM 32:31 Migkaǥi is menge tribu ni Gad wey ni Reuben te, “Sikami is menge suluǥuen nu edtumanen dey is migkaǥi te Nengazen.
NUM 32:32 Tutuu kayi te ǥehinawa zey diyà te etuvangan te Nengazen is kedlayun te Jordan pehendiyà te Canaan te kebpekidtebek, piru is ebpengevilinen dey, iyan heini is tanà he zapit te edsilaan te Jordan.”
NUM 32:33 Umbe, imbeǥey ni Moises te menge tribu ni Gad, ni Reuben, wey te ketengà he tribu ni Manase he anak ni Jose is ginhedian ni Sihon he hadì te menge Amorihanen wey is ginhedian ni Og he hadì diyà te Bashan; pudu zin imbeǥey is tivuuk he tanà he nesakup keniyan he menge ginhedian ragkes is menge inged wey menge lugar he nekeliǥuy kayi.
NUM 32:34 Mibangun umana te tribu ni Gad is menge inged he Dibon, Atarot, Aroer,
NUM 32:35 Atrot Shofan, Jazer, Jogbeha,
NUM 32:36 Bet Nimra, wey Bet Haran. Midliǥuy zan heini te menge verengbeng. Mibaal zaan sikandan te menge tudil he para te menge uyaǥen dan.
NUM 32:37 Is tribu ni Reuben mid-umanan dan benguna is menge inged he Heshbon, Eleale, wey Kiriataim
NUM 32:38 ragkes is menge lugar he egngezanan dan hein aney te Nebo wey Baal Meon, wey Sibma. Mid-ilisan dan is menge ngazan te menge inged he mid-uman dan benguna.
NUM 32:39 Is menge kevuwazan ni Makir te anak ni Manase midsurung dan is Gilead, mid-aǥew zan heini ne midsegseg dan is menge Amorihanen he ed-ubpà kayi.
NUM 32:40 Umbe, imbeǥey ni Moises is Gilead diyà te menge kevuwazan ni Makir, he menge kevuwazan daan ni Manase ne zutun dan en med-ubpà.
NUM 32:41 Si Jair he kevuwazan daan ni Manase nekaaǥew te zezeisey he menge inged diyà te Gilead ne migngezanan din heini te “Menge Inged ni Jair.”
NUM 32:42 Naaǥew zaan ni Noba is Kenat wey is dezeisey he menge inged diyà te peliǥuy zin ne migngezanan din heini te “Noba” he iyan ngazan din.
NUM 33:1 Iyan heini menge lugar he neveyaan te menge Israilihanen hein mid-awè dan en diyà te Ehipto, he iyan pengulu zan si Moises wey si Aaron.
NUM 33:2 Sumalà te suǥù te Nengazen, inlista ni Moises is nengeveyaan dan he menge lugar puun te mibpuunan dan.
NUM 33:3 Mid-awè dan diyà te Rameses hein ike-15 he andew te nehuna he vulan hein neipus is nehitavù he iyan puunà te Pista te Kedlavey te Belinsuǥuen. Migenat sikandan he wazè dan kegkahandek dutun te edtengtengan sikandan te menge Ehiptohanen
NUM 33:4 he edleveng te langun he kinekekayan he menge anak he maama he mibpenhimetayan te Nengazen tenged midhukuman te Nengazen is menge ed-ezapen dan.
NUM 33:5 Puun te Rameses migkampu sikandan diyà te Sucot.
NUM 33:6 Puun te Sucot migkampu sikandan diyà te Etam, he ziyà te kilid te sibsivayan.
NUM 33:7 Puun te Etam, midlikù dan diyà te Pi Hahirot he ziyà te zapit te edsilaan te Baal Zefon, ne migkampu zan diyà te uvey te Migdol.
NUM 33:8 Puun te Pi Hahirot midlayun dan te zaǥat pehendiyà te sibsivayan. Midhipanew zan seled te tetelu he andew diyà te sibsivayan te Etam, ne migkampu zan diyà te Mara.
NUM 33:9 Puun te Mara migkampu zan diyà te Elim, ne zutun duen 12 he menge serebseb wey 70 he menge palma.
NUM 33:10 Puun te Elim migkampu zan diyà te veyvey te Zaǥat he Meriǥà.
NUM 33:11 Puun te Zaǥat he Meriǥà migkampu sikandan diyà te sibsivayan he Sin.
NUM 33:12 Puun te sibsivayan he Sin migkampu sikandan diyà te Dofka.
NUM 33:13 Puun te Dofka migkampu zan diyà te Alush.
NUM 33:14 Puun te Alush migkampu zan diyà te Refidim, he zutun wazà wahig he egkeinum te menge etew.
NUM 33:15 Puun te Refidim migkampu zan diyà te sibsivayan he Sinai.
NUM 33:16 Iyan daan heini menge lugar he migkempuwan dan hein midhipanew sikandan puun te sibsivayan he Sinai pehendiyà te Kadesh he sibsivayan he Zin: Kibrot Hataava, Hazerot, Ritma, Rimon Perez, Libna, Risa, Kehelata, Buvungan he Shefer, Harada, Makhelot, Tahat, Tera, Mitca, Hashmona, Moserot, Bene Jaakan, Hor Hagidgad, Jotbata, Abrona, Ezion Geber, ne taman te nekeuma zan diyà te Kadesh he sibsivayan he Zin.
NUM 33:37 Puun te Kadesh migkampu zan diyà te Buntud he Hor, he dulunà te tanà he Edom.
NUM 33:38 Ne sumalà te mandù te Nengazen midtekezeg si Aaron he memumuhat diyà te Buntud he Hor, ne zutun sikandin mebpatey te penuiǥen he 123 he tuig. Nehitavù haazà hein nehuna he andew te ikelima he vulan te ike-40 he tuig puun te ked-awà te menge Israilihanen diyà te Ehipto.
NUM 33:40 Iyan daan haazà timpu he nezineg te Canaanhen he hadì diyà te Arad, he ed-ubpà diyà te Negev he sakup te Canaan, he ebpelinggume en is menge etew te Israel.
NUM 33:41 Is menge Israilihanen mid-awè dan diyà te Buntud he Hor ne midlaus dan medhipanew. Iyan heini menge lugar he migkempuwan dan: Zalmona, Punon, Obot, Iye Abarim, he ziyà te dulunà te Moab, Dibon Gad, Almon Diblataim, he ziyà te menge vuntud te Abarim he uvey te Nebo, taman te nekeuma sikandan diyà te menge suǥud te Moab he veyvey te Jordan he uvey te Jerico.
NUM 33:49 Migkampu sikandan diyà te kilid te Jordan puun te Bet Jeshimot taman te Abel Shitim he sakup gihapun te suǥud te Moab.
NUM 33:50 Ne zutun te migkampu zan diyà te suǥud te Moab, he kilid te Jordan he uvey te Jerico, migkaǥi is Nengazen diyà te ki Moises te,
NUM 33:51 “Keǥiyi nu is menge Israilihanen he emun edlayun dan en te Wahig he Jordan pehendiyà te Canaan
NUM 33:52 ne segseǥa zan is langun he meǥinged dutun wey pendèdeeti zan is langun he menge ed-ezapen te Canaanhen he mibpurma he menge vatu wey mital, wey is langun he menge simbahan dan diyà te metikang he menge lugar.
NUM 33:53 Engkena niw wey ubpai niw haazà he tanà su ibeǥey ku en haazà keniyu.
NUM 33:54 Behina niw haazà he tanà pinaaǥi te ripa he ibpesikad diyà te kezakel te kada tribu. Is tribu he mezakel ebehinan te zekelà, ne is tribu he zeisey ebehinan te zeisey. Is egkevunutan dan iyan en egkehimu he vahin dan. Pinaaǥi kayi egkevahin haazà is tanà diyà te kada tribu.
NUM 33:55 “Iyan, emun kenè niw edsegseǥen is menge meǥinged duen, is egkesamà kandan egkehimu he velavag diyà te egkehunaan niw; egkehimu sikandan he pesek te menge mata niw wey duǥi ziyà te tengkilizan niw. Ebpekeveǥey sikandan te kesamuk te ked-ubpè niw.
NUM 33:56 Ne ziyè ku te keniyu idsilut is silut he idsilut ku kandan.”
NUM 34:1 Migkeǥiyan te Nengazen si Moises te,
NUM 34:2 “Keǥiyi nu is menge Israilihanen he emun edseled dan en diyà te Canaan, iyan heini dulunà te tanà he egkepengevilin dan:
NUM 34:3 “Is dulunà diyà te zivavà iyan is sibsivayan he Zin, he dulunà te Edom. Ebpuun heini ziyà te zapit te zivavà he edsilaan he vahin te Daǥat he Minatey.
NUM 34:4 Ne ebulegkù diyà te zivavà pehendiyà te Beyeey te Akbarim, taman te sibsivayan he Zin, ne pehendiyè en te zivavà te Kadesh Barnea. Ne ediritsu heini ziyà te Hazar Adar taman te Azmon,
NUM 34:5 ne ebulegkù pehendiyà te zal-ug te Ehipto, ne edunggù diyà te Zaǥat he Mediteraneo.
NUM 34:6 “Is dulunà dapit te edsenlepan iyan is Daǥat he Mediteraneo.
NUM 34:7 “Is dulunà diyà te zizaya, ebpuun te Zaǥat he Mediteraneo pehendiyà te Buntud he Hor,
NUM 34:8 ne puun te Buntud he Hor ebpehendiyà te Lebo Hamat. Ebpekevayà heini te Zedad
NUM 34:9 wey te Zifon ne edunggù diyà te Hazar Enan.
NUM 34:10 “Is dulunà diyà te edsilaan, ebpuun te Hazar Enan pehendiyà te Shefam,
NUM 34:11 ne ebpetupang pehendiyà te Ribla, he ziyà te edsilaan he vahin te Ain, ne edlaus heini ziyà te menge mibuntud-buntud he ziyà te edsilaan te Ranew te Galilea
NUM 34:12 ne edtupang heini ziyà te Jordan, ne edunggù diyà te Daǥat he Minatey. “Iyan heini tanè niw, wey menge dulunè din diyà te peliǥuy.”
NUM 34:13 Ne migkaǥi si Moises diyà te menge Israilihanen, “Behina niw heini is tanà he egkepengevilin niw pinaaǥi te ripa. Migkaǥi is Nengazen he ibeǥey heini ziyà te siyam wey tengà he tribu.
NUM 34:14 Su is tribu ni Reuben, ni Gad, wey is ketengà he tribu ni Manase, nekezawat en man te kandan he egkepengevilin diyà te zapit te edsilaan te Jordan he uvey te Jerico.”
NUM 34:16 Migkaǥi is Nengazen diyà te ki Moises te,
NUM 34:17 “Si Eleazar he memumuhat wey si Josue he anak ni Nun iyan ebahin duen te tanà para te menge etew.
NUM 34:18 Ne pilì ka te sevaha he pengulu ziyà te kada tribu he ebpekeuǥup kandan te kebahin duen te tanà.”
NUM 34:19 Iyan heini menge ngazan te nengepilì: Tribu; Pengulu Juda; Caleb he anak ni Jefune Simeon; Shemuel he anak ni Amihud Benjamin; Elidad he anak ni Kislon Dan; Buki he anak ni Jogli Manase he anak ni Jose; Haniel he anak ni Efod Efraim he anak ni Jose; Kemuel he anak ni Shiftan Zebulun; Elisafan he anak ni Parnac Isacar; Paltiel he anak ni Azan Asher; Ahihud he anak ni Shelomi Naftali; Pedahel he anak ni Amihud
NUM 34:29 Iyan sikandan mibpilì te Nengazen he med-uǥup te kebehina zuen te tanà he Canaan he egkepengevilin te menge Israilihanen.
NUM 35:1 Hein migkampu is menge Israilihanen diyà te kilid te Jordan he suǥud te Moab he atbang te Jerico, migkeǥiyan te Nengazen si Moises te,
NUM 35:2 “Keǥiyi nu is menge Israilihanen he veǥayi zan is menge Levihanen te menge inged he egkeubpaan dan he ziyà te tanà he egkepengevilin dan. Ne veǥayi zan daan sikandan te menge penebtavà diyà te peliǥuy zutun he menge inged.
NUM 35:3 Pinaaǥi kayi zuen egkeubpaan dan he menge inged wey zuen egkepepenebtavan dan te menge uyaǥen dan.
NUM 35:4 Is menge penebtavà he ibeǥey niw kandan diyà te peliǥuy te kada inged dan, kinahanglan he zuen dan keziyù he 1,500 he ǥiek puun te verengbeng te menge inged dan.
NUM 35:5 Ne ziyà te peliǥuy te kada inged dan sukud kew te 3,000 he ǥiek puun te inged pehendiyà te edsilaan, divavà, edsenlepan, wey zizaya, ne ziyà te teliwazà kayi is inged. Ne iyan heini penebtavà diyà te menge inged dan.
NUM 35:6 “Beǥayi niw zaan is menge Levihanen te heenem he inged he eputà he zutun ebpelaǥuy is etew he ebpekepatey he wazè din tivevaa. Ne kenè en heini ragkes te 42 he menge inged he ibeǥey niw kandan.
NUM 35:7 Umbe 48 langun he menge inged is iveǥey niw te menge Levihanen ragkes is menge pepenebtavè dan.
NUM 35:8 Heini he menge inged, kevahin te menge tanà te menge tribu te Israel. Is tribu he mezakel ne zekelà is kandin he vahin, mebeǥey te mezakel he menge inged, ne is tribu he zeisey zà mebeǥey zà daan te egkepipira he inged.”
NUM 35:9 Ne migkaǥi is Nengazen diyà te ki Moises te,
NUM 35:10 “Keǥiyi nu is menge Israilihanen he emun ebpekelayun dan en te Jordan pehendiyà te Canaan,
NUM 35:11 mebpilì dan te menge inged he edhimuwen he eputà he zutun ebpelaǥuy is etew he ebpekepatey he wazè din tivevaa.
NUM 35:12 Ne egkedipinsahan sikandin dutun he menge inged wey kenà mepatey te egkesuat he ebales kandin. Kenà sikandin ereg he edhimetayan dutun te wazè pa sikandin mekeetuvang te kezekelan su wey mehukumi.
NUM 35:13 Haazà is heenem he inged, egkehimu he menge inged niw he eputà.
NUM 35:14 Is tetelu he inged ne ziyè niw benguna te zapit te edsilaan te Jordan ne is tetelu pa ne ziyà te Canaan.
NUM 35:15 Heini is heenem he menge inged ne kenà iyan kew zà ebpekaaput duen is menge Israilihanen, kekena, elin is kenà menge Israilihanen he zuma niw he meǥinged para is minsan hentei kandan he ebpekepatey he wazè din tivevaa ne ebpekepelaǥuy zutun he menge inged.
NUM 35:16 “Iyan, emun edlegkuten te sevaha he etew is duma zin he etew te putew ne ebpatey heini, ne ed-isipen he meveǥat is salà dutun he etew, ne kinahanglan he edhimetayan daan.
NUM 35:17 Emun ebpekepatey is sevaha he etew pinaaǥi te kegamit te vatu, ne ed-isipen heini he meveǥat is salè din, ne kinahanglan he edhimetayan daan sikandin.
NUM 35:18 Etawa edlegkuten din te kayu is sevaha he etew ne ebpatey heini, ed-isipen he meveǥat is salè din, ne kinahanglan he edhimetayan daan sikandin.
NUM 35:19 Is megeget he kezuzumahi te nepatey iyan duen din ketenged te kedhimatey zuen te nekepatey. Himetayi zin heini emun egkeehè din.
NUM 35:20 “Emun is sevaha he etew he edumut, ne nekepatey te etew pinaaǥi te kedsinumag etawa kedtuleng te minsan hengkey,
NUM 35:21 etawa kedsumbag, ne ed-isipen he meveǥat is salà te mibaal kayi, ne kinahanglan he edhimetayan sikandin. Is megeget he kezuzumahi zutun te nepatey iyan duen din ketenged te kedhimatey zuen te nekepatey. Himetayi zin heini emun egkeehè din.
NUM 35:22 “Piru penenglitan is sevaha he etew he wazè din kedumut, ebpekepatey te etew piru wazè din tivevaa he ingkesinumag din etawa netuleng din te minsan hengkey,
NUM 35:23 etawa wazè din mevembentayi he neuluǥan din heini te vatu. Ne tenged te nepatey zin haazà is etew, minsan kenè din kuntada wey kenè din tuyù is kedhimetayi kayi,
NUM 35:24 edumahan sikandin wey is etew he egkesuat he ebales diyà te kezekelan ne edhukuman sikandin sumalà kayi te nekaǥi en he sulunuzen:
NUM 35:25 Emun egkesusi he tutuu iyan he wazè din tivevaa is kedhimatey, kinahanglan he edipinsahan te kezekelan haazà is etew he nekepatey, para kenà mevelesi te ebales kandin, ne idlikù sikandin diyà te inged he eputà he zutun sikandin med-aput. Ne kinahanglan he kenà sikandin ed-awà dutun taman te ebpatey is lavew he memumuhat he impehinungud para te kebpenilbi.
NUM 35:26 “Iyan, emun egawas dutun te inged he eputà haazà is nekepatey
NUM 35:27 ne egkaahà duen te etew he egkesuat he ebales kandin, ne egkehimu ke edhimetayan sikandin dutun te etew. Ne heini is etew he mibales wazè din televaken.
NUM 35:28 Umbe, haazà is nekepatey kinahanglan he kenà ed-awà dutun te inged he eputà taman te ebpatey is lavew he memumuhat, ne egkehimu en human ke ed-ulì sikandin diyà te kandan.
NUM 35:29 “Iyan heini menge sulunuzen he ereg he edtumanen niw taman te taman minsan hendei kew ed-ubpà.”
NUM 35:30 “Is minsan hentei he edhimatey te iring din he etew, kinahanglan he edhimetayan, piru kinahanglan he zuen menge tistiǥus he ebpekepeǥumbenar he tutuu he nekepatey haazà he etew. Emun sevaha zà he tistiǥus is ebpeǥumbenar, ne kenà edhimetayan haazà is etew.
NUM 35:31 “Kenè niw zewata is ibayad para kenà mehimetayi is meveǥat is salè din he midhukuman he edhimetayan. Kinahanglan he edhimetayan heini.
NUM 35:32 Kenè niw zaan dewata is idlekat para te etew he mibpelaǥuy ziyà te inged he eputà su wey sikandin mekeulì diyà te kandan te kenè pa ebpatey is lavew he memumuhat.
NUM 35:33 Ne pinaaǥi kayi kenè niw egkeremerikan is tanà he ed-ubpaan niw, su is kedhimatey ebpekeremerik te tanà. Ne iyan dà ebpekelumpiyu kayi is kemetayen gihapun.
NUM 35:34 Umbe, kenè niw remeriki is tanà he ed-ubpaan niw. Su siak mismu is Nengazen, mibpekid-amur a keniyu te menge Israilihanen.”
NUM 36:1 Dutun he timpu, is menge pengulu te pemilya ni Gilead te anak ni Makir wey apù ni Manase, te anak ni Jose midhendiyà te ki Moises wey ziyà te menge pengulu te Israel.
NUM 36:2 Ne ke sikandan te, “Datù, hein mibmandù kenikew is Nengazen te kebahin duen te tanà he egkepengevilin te menge Israilihanen pinaaǥi te ripa, mibmandù daan sikandin he iveǥey is bahin te suled dey he si Zelofehad diyà te menge anak din he vahi.
NUM 36:3 Ne penenglitan ke ebpeesawa sikandan te ebpuun diyà te selakew en he tribu, ne tenged dutun is tanè dan egkaangken en te tribu he ebpekeesawa kandan, ne tenged kayi egketerinan is tanà he vahin te tribu zey.
NUM 36:4 Emun egkeuma is Tuig te Ked-ulì wey Kebeǥey te Bayàbayà, is tanè dan ebpekeuman te tanà te tribu he nekeesawa kandan, ne egkaawè en heini ziyà te vahin te tribu te menge kepuun dey.”
NUM 36:5 Ne tenged te kedsunud te suǥù te Nengazen, migkaǥi si Moises diyà te menge Israilihanen te, “Hustu is egkeǥiyen te tribu te menge kevuwazan ni Jose.
NUM 36:6 Umbe, iyan heini lalag te Nengazen mehitenged te menge anak he vahi ni Zelofehad: Ebpekepeesawa sikandan te egkesuatan dan emun diyè dà te kandan he tribu.
NUM 36:7 Is tanà he egkepengevilin te kada tribu ne kenà egkehimu ke egkaangken te zuma he tribu. Su kinahanglan he pirmeninti is kegkeengkena te kada tribu te tanà he egkepengevilin dan diyà te menge kepuun dan.
NUM 36:8 Is minsan hentei he vahi he nesakup te minsan hentei ki tribu, emun ebpekepengevilin sikandin te tanà, kinahanglan he ebpeesawa sikandin te sakup gihapun te kandan he tribu su para kenà maawà diyà te kada Israilihanen is tanà he egkepengevilin din diyà te kepuun din.
NUM 36:9 Is tanà he egkepengevilin te kada tribu kenà egkehimu ke egkaangken te zuma he tribu, su kinahanglan he pirmeninti is kegkeengkena te kada tribu te tanà he egkepengevilin dan.”
NUM 36:10 Umbe, midtuman te menge anak he vahi ni Zelofehad is migkaǥi te Nengazen pinaaǥi ki Moises. Is menge anak he vahi ni Zelofehad
NUM 36:11 iyan ensi Mala, Tirza, Hogla, Milca, wey Noa. Ne is nekeesawa kandan iyan is menge id-aǥew zan diyà te amey zan,
NUM 36:12 he menge kevuwazan ni Manase te anak ni Jose. Umbe is tanà he nepengevilin dan pirmeninti is kegkeengkena zuen te pemilya wey tribu te amey zan.
NUM 36:13 Iyan haazà menge suǥù wey menge sulunuzen he imbeǥey te Nengazen diyà te menge Israilihanen pinaaǥi ki Moises hein diyà sikandan te menge suǥud te Moab he ziyà te Jordan he uvey te Jerico.
DEU 1:1 Heini he libru mehitenged te menge lalag ni Moises diyà te langun he menge Israilihanen hein diyà sikandan te sibsivayan he zapit te edsilaan te Wahig he Jordan. Migkampu sikandan diyà te Araba he uvey te Suf, he nekepetug-elang te Paran, Tofel, Laban, Hazerot, wey Dizahab.
DEU 1:2 (Menge 11 he andew emun edhipenawen is ebpuun te Horeb pehendiyà te Kadesh Barnea emun diyè ki ebayà te Buntud he Seir.)
DEU 1:3 Dutun te nehuna he andew te ike-11 he vulan te ike-40 he tuig puun te ked-awà te menge Israilihanen diyà te Ehipto, migkaǥi ni Moises is langun he ibpekaǥi kandin te Nengazen diyà te kandan.
DEU 1:4 Neulaula heini hein neipus is kegkezaaǥa ni Moises ki Sihon he hadì te menge Amorihanen, he ziyà ed-ubpà te Heshbon, wey ki Og is hadì diyà te Bashan, he ed-ubpà diyà te Ashtarot wey Edrei.
DEU 1:5 Inseysey ni Moises diyà te menge Israilihanen is kesuǥuan te Nengazen hein diyà sikandan te zapit te edsilaan te Wahig he Jordan, he ziyà te tanà he Moab. Ke sikandin te,
DEU 1:6 “Hein diyè kiw te Horeb migkaǥi ziyà te kenitew is Nengazen he Megbevayè tew te, ‘Neuǥet en is ked-ubpè niw kayi he vuntud,
DEU 1:7 ereg kew en he ed-awà kayi. Laus kew ziyà te menge vuvungan he ed-ubpaan te menge Amorihanen ne pehendiyà kew en te Araba, diyà te menge vuvungan, diyà te lugtenaan te mibuntud-buntud diyà te edsenlepan, diyà te Negev, wey ziyà te menge lugar he veyvey te zaǥat. Hendiyè kew en te tanà te menge Canaanhen wey te Lebanon, ne laus kew en diyà te zekelà he wahig he Eufrates.
DEU 1:8 Heini he menge tanà ibeǥey ku keniyu. Hendiyè kew en ne ubpai niw heini he menge tanà is insaad ku ziyà te menge kepuun niw he si Abraham, si Isaac, wey si Jacob, wey te menge kevuwazan dan.’ ”
DEU 1:9 Migkaǥi pa si Moises te, “Dutun he timpu, migkeǥiyan ku sikiyu he kenà a ebpekehimu he ebpengulu keniyu emun sebsevaha ku zà.
DEU 1:10 Su impemahabet kew te Nengazen he Megbevayè niw, ne ǥuntaan iring kew en kahabet te menge vituen diyà te langit.
DEU 1:11 Berakat he ipeiseg kew pa ipemezakel te Nengazen he Megbevayà te menge kepuun niw; himuwa zin he linibu is kegketakep niw ne tuvazi kew zin sumalà is insaad din.
DEU 1:12 Piru kenè ku egkehimu te edhusey is menge kesevaan niw wey menge prublima niw emun iyan e zà.
DEU 1:13 Umbe, migkaǥi a he kinahanglan he mebpilì is kada tribu te nesakup te tribu zan he uluwanen, mesinevuten, wey telehuzen, ne idsarig ku kandan is kedumala keniyu.
DEU 1:14 “Ne nekeuyun kew zutun te pelanu ku.
DEU 1:15 Umbe, iyan impezumala ku keniyu is midhimu ku he menge zatù wey menge upisyal he uluwanen wey menge telehuzen he menge etew he ebpuun diyà te menge tribu niw. Duen impezumala ku te 1,000 he etew, ne is duma 100, ne is duma 50, ne is duma pa impezumala ku te 10 he etew.
DEU 1:16 Dutun he timpu mibmenduan ku is menge zatù he husaya zan is rirù te menge etew, ne kinahanglan he ed-ikulen dan is hustu he kukuman dutun te kedhusey zan. Ne kenà iyan dan dà husaya is menge Israilihanen, kekenà, ragkes en is kenà menge Israilihanen he ed-ubpà duma keniyu.
DEU 1:17 Kinahanglan he wazè dan edepiǥan dutun te kedhusey zan; iped-iring dan is kebpemineǥa zan te menge pubri wey menge sepian. Ne kenè dan mahandek te minsan hentei su is kedhukum dan, keǥehem he imbeǥey kandan te Megbevayà. Ne emun mereǥen he edhusayen is rirù ne uwita zan kayi te kediey, ne iyan a edhusey zutun.
DEU 1:18 Ne zutun he timpu migkeǥiyan ku sikiyu te langun he ereg he ebeelan niw.
DEU 1:19 “Ne tenged te mandù kenitew te Nengazen he Megbevayè tew, mid-awè kiw ziyà te Horeb ne midhipanew tew is meluag wey mekahandekhandek he sibsivayan he neehè niw mismu, ne midhendiyè kiw te vuvungan he ed-ubpaan te menge Amorihanen. Ne hein nekeuma kiw ziyà te Kadesh Barnea,
DEU 1:20 migkeǥiyan ku sikiyu te, ‘Nekeuma kew en kayi te vuvungan te menge Amorihanen he ibeǥey kenitew te Nengazen he Megbevayè tew.
DEU 1:21 Ahaa niw heini is tanà he ibeǥey zin keniyu! Engkena niw heini su insaad heini keniyu te Nengazen he Megbevayà te menge kepuun niw. Kenè kew mahandek wey kenè kew mebpenluyaluya.’
DEU 1:22 “Ne mid-uvey kew is langun kayi te kediey is egkaǥi te, ‘Edsuǥù kiw zèpa te ibpepeniid keniyan te tanà ne iyan sikandan ebpekekaǥi ziyà te kenitew te meupiya he ibayà wey te menge lugar he ereg he edhendutun kiw.’
DEU 1:23 “Ne neisip ku he meupiya haazà he pelanu; umbe mibpilì ku is 12 he menge etew, sevaha is mibpilì ku ziyà te kada tribu.
DEU 1:24 Ne midhipanew sikandan ne nekevayè dan te vuvungan, ne nekeuma zan diyà te zal-ug te Eshcol, ne neniid sikandan dutun.
DEU 1:25 Ne hein midlikù dan en mid-uwitan kiw zan te menge prutas he ebpuun dutun, ne midtudtul zan he meupiya is tanà he ibeǥey kenitew te Nengazen he Megbevayè tew.
DEU 1:26 “Piru kenè kew egkesuat he edhendutun; midsupak niw is suǥù te Nengazen he Megbevayè niw.
DEU 1:27 Mibegulbul kew ziyà te seled te menge tulda niw is egkaǥi te, ‘Egkeepesan kiw te Nengazen, umbe impeǥawas kiw zin diyà te Ehipto su para ikeveǥey kiw zin te menge Amorihanen wey kiw zan geraa.
DEU 1:28 Ebmenumenu kiw te kedlaus? Hein mibpelihandek kiw zuen te nemeniid duen te tanà. Migkaǥi sikandan he is menge etew ziyà memezesen wey memelangkew pa kenitew, ne dezekelà is menge inged dan he nengeliǥuy te verengbeng he henduen be te ebpekeume en diyà te langit is ketikang din. Ne neehè dan pa zutun is menge kevuwazan te eregasi he si Anak.’
DEU 1:29 “Ne zutun migkeǥiyan ku sikiyu te, ‘Kenè kew kulbai wey kenè niw sikandan ikahandek.
DEU 1:30 Su is Nengazen he Megbevayè niw, edhuna keniyu ne iyan sikandin ebpekidtebek para keniyu, iring te neehè niw he mibeelan din diyà te Ehipto
DEU 1:31 wey ziyà te sibsivayan. Neehè niw ke mibmenumenu kew te ed-elima te Nengazen he Megbevayè niw ziyà te menge hipanew niw kayi te sibsivayan, iring is ked-elimahi zin keniyu te ked-elima te amey te anak din taman te nekeuma kew kayi he lugar.’
DEU 1:32 “Piru minsan pa te iyan heini, wazè kew ǥihapun medsarig te Nengazen he Megbevayè niw he migiya keniyu te hipanew niw pinaaǥi te hapuy emun mezukilem ne pinaaǥi te ǥapun emun maandew. Iyan sikandin nen-ahà te meupiya he lugar he egkekempuwan niw ne impenurù din keniyu ke hendei kew ebayà.
DEU 1:34 “Hein nezineg te Nengazen is menge riklamu niw, ne nepauk sikandin ne nenangdù.
DEU 1:35 Ke sikandin te, ‘Gawas ki Caleb te anak ni Jefune, wazà minsan sevaha kayi te mezaat he lapis te kevuwazan he ebpekaahà duen te meupiya he tanà he impenaad ku ziyà te menge kepuun dan. Si Caleb, is anak ni Jefune, egkeehè din mulà haazà is tanà, ne ibeǥey ku kandin wey te menge kevuwazan din is kandan he vahin dutun te tanà he midlauy zin. Su ebpuun te tivuuk he gehinawa zin is kedsunud din kediey.’
DEU 1:37 “Ne tenged keniyu, minsan siak, ne nepeukan a te Nengazen. Ke sikandin te, ‘Ne sikew zaan, Moises, ne kenè ka ebpekeseled dutun he tanà.
DEU 1:38 Piru is timbang nu he si Josue he anak ni Nun, ne ebpekeseled mulà dutun te tanà. Ne desiǥa nu sikandin su iyan sikandin ebpengulu te menge Israilihanen te ked-angken keniyan he tanà.’
DEU 1:39 “Ne migkaǥi is Nengazen diyà te kenitew te langun te, ‘Ebpekeseled mulà dutun te tanà is menge anak niw he wazè dan pa hanew. Nahandek kew he kela ke vihaǥa sikandan, piru diyè ku te kandan ibeǥey haazà is tanà ne egkaangken dan heini.
DEU 1:40 Ne sikiyu, likù kew ziyà te sibsivayan pehendiyà te Zaǥat he Meriǥà.’
DEU 1:41 “Ne zutun migkaǥi kew te, ‘Nekesalè key ziyà te Nengazen. Egenat key su ebpekidtebek key sumalà is insuǥù kenami te Nengazen he Megbevayè dey.’ Umbe mid-andam te kada sevaha keniyu is menge ǥumaan din, su neisip niw he melemu zà is ked-aǥew zuen te menge vuvungan.
DEU 1:42 “Piru migkaǥi is Nengazen kayi te kedì te, ‘Keǥiya nu kandan he kenè dan megenat is ebpekidtebek, su kenà a ebpekiduma kandan. Ne egkezaag sikandan te menge kuntada zan.’
DEU 1:43 “Ne iyan haazà migkaǥi ku ziyà te keniyu, piru wazà a keniyu pemineǥa. Midsupak niw is suǥù te Nengazen, tenged te kebmepedeligen niw nenurung kew zuen te vuvungan.
DEU 1:44 Ne nekidtebek keniyu is menge Amorihanen he meǥinged dutun, ne henduen sikandan te petiyukan is edal-as keniyu puun te Seir taman te Horma, ne nezaag kew.
DEU 1:45 Ne nemenlikù kew ne midsineǥew kew ziyà te etuvangan te Nengazen, piru wazà sikandin mebpemineg keniyu.
DEU 1:46 Ne tenged dutun neuǥet is ked-ubpè niw ziyà te Kadesh.
DEU 2:1 “Ne zutun midlikù kiw ziyà te sibsivayan pehendiyà te Zaǥat he Meriǥà, su iyan haazà insuǥù te Nengazen kedì. Ne neuǥet he timpu is kebpekeriǥuriǥu tew ziyà te menge vuvungan he Seir.
DEU 2:2 Ne migkaǥi is Nengazen kayi te kedì te,
DEU 2:3 ‘Neuǥet en is kebpekeriǥuriǥu niw kayi te vuvungan. Guntaan hendiyè kew en te zizaya.
DEU 2:4 Keǥiyi nu is menge etew te, “Ebpekevayè kew ziyà te tanà te menge kezuzumahi niw he menge kevuwazan ni Esau, he ziyà ebpemen-ubpà te Seir. Egkahandek sikandan keniyu, piru mebpekevantey kew kandan,
DEU 2:5 ne kenè niw sikandan surunga. Su ibeǥey ku kandan is menge vuvungan diyà te Seir he kandan he tanà, ne kenè ku sikiyu ebeǥayan te minsan deisey zutun te tanè dan.
DEU 2:6 Beyazi niw sikandan te selapì he vayad te egkekaan niw wey egkeinum niw.
DEU 2:7 Tentenuzi niw is kedtuvazi ku te langun he mibeelan niw. Iyan a Nengazen he Megbevayè niw, iyan a mibantey keniyu ziyà te hipanew niw kayi te meluag he sibsivayan. Seled te 40 he tuig is kebpekiduma ku keniyu ne wazà megkurang is minsan hengkey he kinahanglan niw.” ’ Iyan haazà lalag te Nengazen kediey.
DEU 2:8 “Midlevayan tew zà is menge kezuzumahi tew he menge kevuwazan ni Esau, he menge meǥinged diyà te Seir. Wazè kiw ziyà mebayà te veyeey he ziyà te Araba, he ebpuun diyà te menge inged he Elat wey Ezion Geber. Ne zutun te kedhipanew tew ziyà te veyeey he ziyà te sibsivayan te Moab,
DEU 2:9 migkaǥi is Nengazen kayi te kedì te, ‘Kenè niw semuka wey tebeka is menge Moabitanhen he menge kevuwazan ni Lot, su imbeǥey ku kandan is tanà he Ar ne kandan haazà, ne kenè ku sikiyu ebeǥayan te tanè dan minsan deisey.’ ”
DEU 2:10 (Dutun te nehuna he timpu ziyà te Ar med-ubpà is mahabet wey memezesen he menge etew he egngezanan te Emhanen. Memelangkew heini he menge etew iring te menge kevuwazan ni Anak.
DEU 2:11 Egngezanan daan sikandan te menge Ripanhen, iring te igngazan te menge kevuwazan ni Anak, piru egngezanan sikandan te menge Moabitanhen te menge Emhanen.
DEU 2:12 Iyan aney he meǥinged diyà te Seir is menge Hurhanen, piru midezeetan wey midsegseg sikandan te menge kevuwazan ni Esau, ne iyan en sikandan midliwan med-ubpà dutun, iring is mibeelan dan te mibeelan te menge Israilihanen diyà te menge Canaanhen hein egkuwaan dan haazà is tanà he imbeǥey kandan te Nengazen.)
DEU 2:13 “Ne midsuǥù kiw te Nengazen te kedlayun te zal-ug he Zered, umbe midlayun tew haazà.
DEU 2:14 Neulaula heini hein midlavey en is 38 he tuig puun te timpu te kebpuun tew ziyà te Kadesh Barnea. Ne nemematey en diyà te sibsivayan is menge Israilihanen he menge sundaru zutun he lapis te kevuwazan, ne iyan heini sikan is impetizaan te Nengazen kandan.
DEU 2:15 Midsilutan sikandan te Nengazen taman te naamin din sikandan te ebpenhimatey ziyà te kampu zan.
DEU 2:16 “Ne hein nemematey en haazà is langun he menge sundaru zutun he lapis te kevuwazan,
DEU 2:17 migkaǥi is Nengazen kayi te kedì te,
DEU 2:18 ‘Layun kew ziyà te dulunà te Moab wey Ar.
DEU 2:19 Ne emun ebpekeuma kew en diyà te menge Amunihanen, he menge kevuwazan ni Lot, kenè niw sikandan semuka wey tebeka su heeyan is tanè dan ne imbeǥey ku kandan, ne kenè ku sikiyu ebeǥayan te tanè dan minsan deisey.’
DEU 2:20 “Heini he tanà, iyan dengan aney he meǥinged duen is menge Ripanhen. Ne heini sikandan migngezanan te menge Amunihanen te Zamzumnen.
DEU 2:21 Ne mezakel heini sikandan, memezesen, wey memelangkew iring te menge kevuwazan ni Anak. Piru mibpengelinteuwan te Nengazen he mezaag sikandan te menge Amunihanen. Midsegseg sikandan te menge Amunihanen ne iyan sikandan mid-ubpà dutun he tanà.
DEU 2:22 Ne iring ded keniyan is paaǥi te Nengazen te kedtavang te menge kevuwazan ni Esau he menge meǥinged diyà te Seir. Su mibpengelinteuwan gihapun te Nengazen he mezaag dan is menge Hurhanen. Ne midsegseg dan is menge Hurhanen ne iyan sikandan mid-ilis med-ubpà dutun he tanà taman en guntaan.
DEU 2:23 Ne iring ded daan keniyan is nehitavù hein midsurung te menge tig-Caftor is menge tig-Avim he menge meǥinged diyà te inged he Gaza. Midezeetan dan is menge tig-Avim ne mid-ubpaan dan haazà is tanà te menge tig-Avim.
DEU 2:24 “Ne migkaǥi is Nengazen te, ‘Layun kew te zal-ug he Arnon. Ibeǥey ku keniyu si Sihon is Amorihanen he hadì diyà te Heshbon, wey is tanè din. Surunga niw sikandin ne engkena niw is tanè din.
DEU 2:25 Puun guntaan ebpengelinteuwan ku he mahandek keniyu is menge etew ziyà te langun he menge nasyun kayi te tivuuk he kelibutan. Ebpengerkeren te kegkahandek is ebpekezineg mehitenged keniyu.’
DEU 2:26 “Ne hein diyè kiw te sibsivayan te Kedemot, midsuǥù ku is menge menunudtulà diyà te ki Hadì Sihon he hadì te Heshbon te kedlalag kandin su para meupiya is kedepitè dey.
DEU 2:27 Iyan lalag he impeuwit ku ziyà te kandin is: ‘Emun egkehimu ne ipevayè key ziyà te tanè niw. Kenè key en ebpenuweysuwey ziyà te menge zalan niw, kekenà, iyan dà ed-ikulen dey is dekelà he zalan.
DEU 2:28 Ebeyazan dey te selapì is egkekaan dey wey egkeinum dey. Iyan dà edhengyuen dey he ituǥut nu kenami is kebayà diyà te tanè niw.
DEU 2:29 Iring te kedtuǥuti kenami te menge kevuwazan ni Esau he menge meǥinged diyà te Seir wey te menge Moabitanhen he menge meǥinged diyà te Ar. Tuǥuti key te kebayà taman te ebpekelayun key te Wahig he Jordan pehendiyà te tanà he ibeǥey kenami te Nengazen he Megbevayè dey.’
DEU 2:30 Piru wazè kiw ipevayà ni Hadì Sihon he hadì te Heshbon. Su mibpekezesen te Nengazen he Megbevayè niw is gehinawa zin su ibeǥey zin sikandin diyà te kenitew, ne imbeǥey zin en iyan.
DEU 2:31 “Ne migkaǥi is Nengazen kayi te kedì te, ‘Ibeǥey ku en diyà te keniyu si Sihon wey is tanè din; surung kew en ne engkena niw en is tanè din.’
DEU 2:32 “Hein nekidtebek kenitew si Sihon wey is langun he menge sundaru zin diyà te Jahaz,
DEU 2:33 imbeǥey sikandin diyà te kenitew te Nengazen he Megbevayè tew ne midhimetayan tew sikandin ragkes is menge anak din wey is langun he menge sundaru zin.
DEU 2:34 Dutun he timpu mid-aǥew tew is langun he inged din wey miǥerè tew is menge maama, menge vahi, wey is menge vatà. Wazè tew midsamà kandan he uuyag.
DEU 2:35 Mibpen-uwit tew is menge uyaǥen dan wey menge azen dan he naaǥew tew zuen te inged dan.
DEU 2:36 “Midtevangan kiw te Nengazen he Megbevayè tew te ked-aǥew te Aroer he kilid te zal-ug he Arnon wey te zuma he inged he uvey kayi wey te menge lugar pehendiyà te Gilead. Wazà medselir kenitew is menge verengbeng te menge inged.
DEU 2:37 Ne tenged te mandù kenitew te Nengazen he Megbevayè tew, wazè tew uvayi is menge tanà te menge Amunihanen, minsan is tanà he ziyà te kilid te Jabok wey is menge inged he nekeliǥuy te menge vuvungan.
DEU 3:1 “Ne midhendiyè kiw te Bashan, piru nekidtebek kenitew ziyà te Edrei is hadì te Bashan he si Og duma te langun he menge sundaru zin.
DEU 3:2 Piru migkaǥi is Nengazen kayi te kedì te, ‘Kenè nu sikandin ikahandek, su ibeǥey ku sikandin kenikew ragkes is langun he sakup din wey is tanè din. Beeli nu ziyà te kandin is iring te mibeelan nu ziyà te ki Sihon te hadì te menge Amorihanen he midhadì diyà te Heshbon.’
DEU 3:3 Umbe, imbeǥey kenitew te Nengazen he Megbevayè tew is hadì te Bashan he si Og wey is langun he menge sundaru zin. Miǥerè tew sikandan ne wazè tew midsamà kandan he uuyag.
DEU 3:4 Mid-aǥew tew pudu sikan is 60 he menge inged he iyan tivuuk he sakup te Argob he sakup te ginhedian ni Og he hadì diyà te Bashan.
DEU 3:5 Heini he menge inged, pudu mibpeliǥuwi te metikang he verengbeng wey zuen lekeb te menge pultahan dutun he menge inged. Mid-aǥew tew zaan is mahabet he menge inged din he wazè dan menge verengbeng.
DEU 3:6 “Mibpurungan tew sikandan dèdeeti iring te mibeelan tew ziyà te ki Hadì Sihon he hadì te Heshbon. Mibpenhimetayan tew is langun he menge etew ziyà te kada inged he naaǥew tew; migerè tew is menge maama, menge vahi, wey menge vatà.
DEU 3:7 Iyan, mid-uwit tew mulà is langun duen te menge uyaǥen dan wey menge azen dan he nekuwa tew zutun te menge inged dan.
DEU 3:8 “Naaǥew tew zuen te zezuwa he hadì he menge Amorihanen is tanà diyà te Jordan he zapit te edsilaan puun te zal-ug he Arnon pehendiyà te Buntud he Hermon.
DEU 3:9 (Is Buntud he Hermon, egngezanan te Sirion te menge Sidunhanen, ne egngezanan te Senir te menge Amorihanen.)
DEU 3:10 Mid-aǥew tew is langun he menge inged diyà te suǥud te puntur te menge vuvungan, is tivuuk he Gilead, wey is tivuuk he Bashan taman te Saleca wey Edrei, heini he menge inged sakup te ginhedian ni Og te hadì diyà te Bashan.
DEU 3:11 (Si Hadì Og he hadì te Bashan iyan dà nesamà te menge kevuwazan te menge Ripanhen. Is putew he hizeǥaan din, 13 he ǥiek is kelayat din ne 6 he ǥiek is keluag din. Ne kemulu pa heeyan egkaahà diyà te Raba guntaan he inged te menge Amunihanen.)
DEU 3:12 “Hein naaǥew tew en heini he tanà, imbeǥey ku ziyà te menge kevuwazan ni Reuben wey te menge kevuwazan ni Gad is tanà he uvey te zal-ug he Arnon, ragkes en is ketengà te menge vuvungan te Gilead wey is menge inged kayi.
DEU 3:13 Ne is nesamà he parti te Gilead wey is tivuuk he Bashan, he iyan ginhedian ni Og, imbeǥey ku is ketengà he tribu ni Manase. (Is tivuuk he Argob diyà te Bashan, egngezanan dengan te tanà te menge Ripanhen.)
DEU 3:14 Si Jair he kevuwazan ni Manase, iyan nekaangken te tivuuk he Argob he sakup te Bashan taman te dulunà te tanà te menge Gisurhanen wey menge Maakatnen. Heini he lugar migngezanan ni Jair te kandin he ngazan, umbe minsan guntaan kemulu egngezani is Bashan te, ‘Menge Inged ni Jair.’
DEU 3:15 Imbeǥey ku is Gilead diyà te pemilya ni Makir.
DEU 3:16 Wey ziyà te menge kevuwazan ni Reuben wey ni Gad imbeǥey ku kandan is tanà he puun te Gilead taman te zal-ug he Arnon. Is tengàtengà te Arnon iyan dulunè dan diyà te divavà, ne iyan dulunè dan diyà te zizaya is dal-ug he Jabok, he iyan daan dulunà te menge Amunihanen.
DEU 3:17 Is dulunà diyà te edsenlepan iyan is Araba ragkes is Wahig he Jordan, puun te Ranew te Galilea taman te Daǥat he Minatey, he ziyà te alug te Buntud he Pisga he zapit te edsilaan.
DEU 3:18 “Dutun he timpu mibmenduan ku is menge tribu niw he ziyà ebpen-ubpà te zapit te edsilaan te Wahig he Jordan, he ke siak te, ‘Minsan imbeǥey en heini he tanà diyà te keniyu te Nengazen he Megbevayè niw su wey niw maangken, kinahanglan gihapun he edlayun te Wahig he Jordan is langun he menge sundaru niw he egkeǥumeenan su wey zan megiyahi is duma niw he menge Israilihanen te kebpekidtebek.
DEU 3:19 Piru itaǥak dan dà is menge esawa zan, wey menge anak dan, wey is mahabet he menge uyaǥen dan diyà te menge inged he imbeǥey ku keniyu.
DEU 3:20 Emun egkaangken en te zuma niw he menge Israilihanen is tanà he leyunè niw he ibeǥey kandan te Nengazen he Megbevayè niw, ne emun pinaaǥi kandin ne wazè en igkaawan dan iring te mibeelan din diyà te keniyu, ne egkehimu en he edlikù kew ziyà te tanà he imbeǥey ku keniyu.’
DEU 3:21 “Dutun he timpu, migkeǥiyan ku si Josue te, ‘Neehè nu en is langun he mibeelan te Nengazen he Megbevayè niw zuen te zezuwa he hadì. Ne iring ded dutun is ebeelan te Nengazen diyà te langun he ginhedian he ebeyaan niw.
DEU 3:22 Kenè kew mahandek kandan, su iyan is Nengazen he Megbevayè niw ebpekidtebek para keniyu.’
DEU 3:23 “Dutun he timpu, mibpehizuhizu a te Nengazen. Ke siak te,
DEU 3:24 ‘He Nengazen he MEGBEVAYÀ, impuun nu en ipaahà kedì te suluǥuen nu is kegkemekeǥeǥehem nu; wazà Megbevayà diyà te langit wey kayi te tanà he ebpekehimu te egkengein-inuwan he mibeelan nu.
DEU 3:25 Ne ke và nu zà ebmehimuwa, ne ituǥut nu kedì is kedlayun te Jordan, para meehè ku is meupiya he tanà, mekempet he menge vuvungan, ragkes en is menge vuvungan te Lebanon.’
DEU 3:26 “Piru nepeukan a te Nengazen tenged keniyu, ne wazè din ituǥut haazà is hangyù ku. Migkeǥiyan e zin te, ‘Ereg en heeyan! Kena ad kenikew umani keǥiyi mehitenged keniyan.
DEU 3:27 Tekezeg ka ziyà te puntur te Pisga ne pentawa nu is tanà diyà te minsan hendei zapit duen, su kenè ke en ebpekelayun te Jordan.
DEU 3:28 Piru penurua nu si Josue te ereg he ebeelan din. Desiǥa nu sikandin su iyan sikandin ebpengulu kayi te menge etew te kedlayun te Jordan. Ibpemeǥey zin kandan haazà is tanà he egkeehè nu zà mulà!’
DEU 3:29 Ne mid-ubpè kiw ziyà te suǥud-suǥud he uvey te Bet Peor.”
DEU 4:1 Ne migkaǥi si Moises te, “Menge Israilihanen, pemineǥa niw is menge suǥù wey is menge sulunuzen he ibpenurù ku keniyu. Tumana niw heini su wey kew meuyag ne ebpekeubpè kew zuen te tanà he ibeǥey keniyu te Nengazen he Megbevayà te menge kepuun niw.
DEU 4:2 Kenè niw umani wey kenè niw terini is menge suǥù he ibeǥey ku keniyu he ebpuun diyà te Nengazen he Megbevayè niw. Tumana niw iyan heini.
DEU 4:3 Neehè niw is mibeelan te Nengazen diyà te Baal Peor. Mibpenhimetayan te Nengazen he Megbevayè niw is duma niw he menge Israilihanen he mid-azap ki Baal.
DEU 4:4 Iyan, sikiyu is mepezumdumahan te Nengazen he Megbevayè niw, kemulu kew pa mulà uuyag guntaan.
DEU 4:5 “Ibpenurù ku keniyu is menge suǥù wey menge sulunuzen he imbeǥey kedì te Nengazen he Megbevayè ku, su para mesunud niw heini emun ebpekeuma kew en duen te tanà he ebpeveyaan niw wey ed-engkenen niw.
DEU 4:6 Purungi niw heini sunuza, su pinaaǥi kayi igkepeehè niw te menge etew ziyà te zuma he menge nasyun is ketau niw wey kedsavut niw. Emun egkezineg dan heini is langun he menge sulunuzen ebpekekaǥi zan te, ‘Tutuu iyan he zuen ketau wey kedsavut te menge etew kayi te gemhanan he nasyun.’
DEU 4:7 Wazà duma he mekeǥeǥehem he nasyun he uvey ziyà te kandan is megbevayè dan he iring kenitew te uvey ziyà te kenitew is Nengazen he Megbevayè tew ne ebpekesampit kiw kandin te minsan hengkey he timpu.
DEU 4:8 Ne wazè en daan duma he mekeǥeǥehem he nasyun he zuen dan menge suǥù wey menge sulunuzen he iring te ibpenurù ku ǥuntaan diyà te keniyu.
DEU 4:9 Piru kinahanglan he mebpekevantey kew! Kenè niw lipati is nengeehè niw he mibpemeelan te Nengazen. Kinahanglan he kenà heini egkaawà diyà te gehinawa niw mintras uuyag kew pa. Tudtula niw heini ziyà te menge anak niw wey ziyà te menge apù niw.
DEU 4:10 Tentenuzi niw is andew te kedhitindeg niw ziyà te etuvangan te Nengazen he Megbevayè niw ziyà te Buntud he Sinai he zutun migkaǥi sikandin kayi te kediey te, ‘Tiǥuma nu is menge etew ziyà te etuvangan ku su wey zan mekepemineg te menge lalag ku para mebmetau zan he edtahud kedì, mintras uuyag dan pa, wey para ikepenurù dan heini ziyà te menge anak dan.’
DEU 4:11 Ne zutun mid-uvey kew ne midhitindeg kew ziyà te lugtenaan te vuntud he edriyubriyub te regreg he henduen be te ebpekeume en diyà te langit, ne nevukusan heini te mekepal he kivel wey utew heini merusirem.
DEU 4:12 Ne zutun migkaǥi is Nengazen he zutun te teliwazà te hapuy. Ne nezineg niw is kegkaǥi zin piru wazè niw maahà.
DEU 4:13 Migkaǥi zin diyà te keniyu is kinahanglan he ebeelan niw te kedtuman te kebpekid-uyun niw kandin. Ne iyan haazà sikan is sepulù he suǥù, he insuǥù din he tumana niw. Insurat din haazà diyà te zezuwa he midlumpipì he vatu.
DEU 4:14 Dutun he timpu impepenurù kew kedì te Nengazen te menge suǥù wey menge sulunuzen he kinahanglan he edtumanen niw zutun te ked-ubpè niw ziyà te tanà he egkaangken niw.
DEU 4:15 “Hein nekidlalag keniyu is Nengazen diyà te Buntud he Sinai he ebpuun is laǥeng din diyà te teliwazà te hapuy, ne wazè niw naahà he purma te Nengazen. Umbe mebpekevantey kew,
DEU 4:16 he kenè niw egkeremerikan is keugelingen niw pinaaǥi te kebaal te ledawan he ed-ezapen he minsan hengkey is purma zin etawa zagwey zin, dagwey ve te maama etawa vahi,
DEU 4:17 langgam be he edhipanew etawa edlayang,
DEU 4:18 ebpenanap be etawa edlayewlayew.
DEU 4:19 Kinahanglan he kenè kew egke-iniyat he edsimba te egkengeehè niw ziyà te langit–andew, bulan wey menge vituen. Insavuk heini te Nengazen he Megbevayè niw he para te tivuuk he keet-etawan kayì te kelibutan.
DEU 4:20 Tentenuzi niw he midlibri kew te Nengazen su utew mepait is ked-antus niw zutun, iring te ziyè kew te edriyubriyub he rapug. Neulaula heini su para mehimu kew he menge etew zin, umbe menge etew kew zin en guntaan.
DEU 4:21 “Nepeukan a te Nengazen tenged keniyu, ne utew meheǥet is kegkeǥiyi zin kedì he kenà a ebpekelayun te Jordan ne kenà a ebpekeseled duen te meupiya he tanà he ibeǥey keniyu te Nengazen he Megbevayè niw.
DEU 4:22 Kayi e zà he tanà ebpatey ne kenà ad ebpekelayun te Jordan, piru sikiyu mulà ebpekelayun kew te Jordan su wey niw maangken haazà is meupiya he tanà.
DEU 4:23 Piru mebpekevantey kew he kenè niw melipati sikan is paaǥi te Nengazen he Megbevayè niw te kebpekid-uyun keniyu. Kenè kew mebaal te ledawan he ed-ezapen niw pinaaǥi te zagwey te minsan hengkey, su idawey heini te Nengazen he Megbevayè niw.
DEU 4:24 Kenà sikandin egkesuat ke zuen selakew en he ed-ezapen niw. Su emun edsilut is Nengazen he Megbevayè niw ne iring sikandin te hapuy he ebpekeepur.
DEU 4:25 “Dutun te huziyan he timpu, emun ebpemenganak kew wey ebpen-epuen kew en, ne ebpekeubpè kew en dutun te tanà seled te meluǥayad he timpu, kenè niw remeriki is keugelingen niw pinaaǥi te kebaal te ledawan he ed-ezapen minsan hengkey he purma. Su mezaat is ked-ahaa kayi te Nengazen he Megbevayè niw ne igkepauk din heini.
DEU 4:26 “Guntaan he andew ibpetistiǥu ku is langit wey tanà he emun ebaal kew te ledawan he ed-ezapen ne meǥaan kew zà egkahanew puun duen te tanà he ed-engkenen niw ziyà layun te Jordan. Mevavè dà he timpu is kebpekeubpè niw zutun ne egkepurung kew en egkezeeti.
DEU 4:27 Idsawed kew te Nengazen diyà te zuma he menge nasyun, ne zeisey zà is egkesamà keniyu ziyà te menge nasyun he edtimbaǥan keniyu te Nengazen.
DEU 4:28 Ne zutun ed-azap kew te zuma he menge ed-ezapen he vineelan dà te etew he kayu zà wey vatu, he kenà ebpekaahà, kenà ebpekezineg, kenà ebpekekaan, wey kenà ebpekahazek.
DEU 4:29 Piru emun ebpen-ahaan niw zutun is Nengazen he Megbevayè niw, egketuredu niw sikandin emun ebpen-ahaan niw sikandin pinaaǥi te tivuuk he ǥehinawa niw.
DEU 4:30 Emun egkehitavù heini he kelised diyà te keniyu te huziyan he timpu, edlikù kew ziyà te Nengazen he Megbevayè niw ne ebpezumdumahan niw en human is menge lalag din keniyu.
DEU 4:31 Su hihizuwen is Nengazen he Megbevayè niw. Kenè kew zin ebey-anan wey kenè kew zin edèdeetan. Kenè din edlipatan is kebpekid-uyun din he impenangdù din diyà te menge kepuun niw.
DEU 4:32 “Susiya niw is nengehitavù puun te timpu te kedlimbaǥa te Megbevayà te etew kayi te kelibutan taman en guntaan. Wey susiya niw is kegkehimuwa te tivuuk he kelibutan ke zuen pe be hitavù he iring is kegkein-inuwi zuen te kegkein-inuwi te kegkehimuwa te kelibutan.
DEU 4:33 Duen be zuma he menge etew he iring keniyu te neuyag pa, minsan nezineg niw is laǥeng te Megbevayà he ebpuun diyà te hapuy? Wazà!
DEU 4:34 Duen be selakew en he Megbevayà he migkuwa zin is grupu te menge etew puun te sevaha he nasyun pinaaǥi te penggezam, egkengein-inuwan he menge hitavù, tebek, dekelà he ǥehem, wey mekeǥeǥehem he menge vaal para maangken din? Wazà! Piru iyan heeyan mibeelan te Nengazen he Megbevayè niw ziyà te Ehipto, ne neseksiyan niw heeyan.
DEU 4:35 Impeehè keniyu haazà he menge hitavù su para metueni niw he is Nengazen iyan Megbevayà ne wazè en duma pa.
DEU 4:36 Mibpenurù kew zin pinaaǥi te kebpezineǥa zin keniyu te kegkaǥi zin he ebpuun te langit. Impeehè din keniyu kayi te tanà is mekeǥeǥehem he hapuy zin ne midlelaǥan kew zin he ebpuun dutun te hapuy.
DEU 4:37 Ne tenged te kebmahala zin te menge kepuun niw, mibpilì kew zin ne impeǥawas kew zin diyà te Ehipto pinaaǥi te kebpekiduma zin keniyu wey te zekelà he ǥehem din.
DEU 4:38 Impesegseg din keniyu is menge etew ziyà te zuma he menge nasyun he mekeǥeǥehem pa keniyu zutun te ked-uwita zin keniyu ziyà te tanè dan su ibpepengevilin din keniyu haazà he tanà, iring te neulaula ǥuntaan.
DEU 4:39 “Umbe tentenuzi niw heini ǥuntaan ne kenè niw lipati he is Nengazen he Megbevayà diyà te langit wey kayi te tanà, ne wazè en duma pa he Megbevayà.
DEU 4:40 Tumana niw is menge suǥù din wey is menge sulunuzen he ibeǥey ku guntaan diyà te keniyu, su para wazà mezaat he egkehitavù keniyu wey te menge kevuwazan niw, wey para mebmeluǥayad is untung niw zuen te tanà he ibeǥey keniyu te Nengazen he Megbevayè niw he egkaangken niw taman te taman.”
DEU 4:41 Ne mibpilì si Moises te tetelu he menge inged he zapit te edsilaan te Jordan
DEU 4:42 he para te egkeeputan te ebpelaǥuy he nekevunù he wazè din tivevaa wey wazè din pelenuwa. Egkehimu he ed-aput sikandin diyà te sevaha zutun te menge inged su para kenà sikandin mekeizi.
DEU 4:43 Ne iyan heini he menge inged: Inged he Bezer he ziyà te suǥud he sibsivayan, ne para heini te tribu ni Reuben; inged he Ramot he ziyà te Gilead, ne para heini te tribu ni Gad; wey inged he Golan he ziyà te Bashan, ne para te tribu ni Manase.
DEU 4:44 Imbeǥey ni Moises diyà te menge Israilihanen heini he menge suǥù,
DEU 4:45 menge penurù, wey menge sulunuzen dutun te kedligewang dan puun te Ehipto
DEU 4:46 hein migkampu sikandan diyà te suǥud-suǥud he uvey te Bet Peor diyà te zapit te edsilaan te Jordan. Heini he tanà nesakup dengan te tanà ni Sihon he hadì te menge Amorihanen, he ziyà ed-ubpà te Heshbon. Nezaag sikandin wey is menge etew zin ni Moises wey te menge Israilihanen hein migawas dan puun te Ehipto.
DEU 4:47 Mid-aǥew eni Moises is tanè din wey is tanà ni Hadì Og he hadì te Bashan. Iyan heini sikandan dezuwa he menge Amorihanen he menge hadì he ziyà te zapit te edsilaan te Jordan.
DEU 4:48 Is menge tanè dan he naaǥew te menge Israilihanen, ne ebpuun diyà te Aroer he egkezivavew te zal-ug he Arnon pehendiyè en te Buntud te Sirion he migngezanan daan te Hermon,
DEU 4:49 ragkes en is tivuuk he Araba he zapit te edsilaan ne taman en te Daǥat he Minatey, he egkeumbawan te Buntud he Pisga.
DEU 5:1 Impaamur-amur ni Moises is langun he menge kevuwazan ni Israel ne migkeǥiyan din te, “Sikiyu is menge Israilihanen, pemineǥa niw is menge suǥù wey menge sulunuzen he ibeǥey ku keniyu ǥuntaan. Istudyuwi niw heini ne sunuza niw.
DEU 5:2 Is Nengazen he Megbevayè tew midhimu te kebpekid-uyun din kenitew hein diyè kiw te Horeb.
DEU 5:3 Wazè din heini himuwa ziyà te menge kepuun tew, kekenà, diyà te kenitew te langun he uuyag pa ǥuntaan.
DEU 5:4 Dutun te vuntud mibpekidlalag is Nengazen keniyu he ziyà ebpuun is laǥeng din te hapuy ne zutun henduen be te ziyè en sikandin te etuvangan niw.
DEU 5:5 Ne zutun midhitindeg a ziyà te pid-elangan niw te Nengazen te kegkaǥi te menge lalag te Nengazen diyà te keniyu, su nahandek kew zuen te hapuy ne kenè kew ebpeketekezeg duen te vuntud. Migkaǥi is Nengazen te,
DEU 5:6 “ ‘Iyan a Nengazen he Megbevayè niw, iyan a mibpeǥawas keniyu ziyà te Ehipto he zutun kew uripena.
DEU 5:7 “ ‘Kenè kew med-azap te zuma he ed-ezapen gawas kedì.
DEU 5:8 “ ‘Kenè kew mebaal te ed-ezapen he ledawan te minsan hengkey he ziyà te langit, wey minsan hengkey he kayi te tanà, wey ziyà te wahig.
DEU 5:9 Kenè kew mebpenilbi wey med-azap kayi; su siak, is Nengazen, iyan a Megbevayè niw, ne kenà a egkesuat he zuen pa zuma he ed-ezapen niw. Edsilutan ku is menge nekesalà kedì, apil en is menge kevuwazan dan taman te iketelu wey ikeepat he lapis te kevuwazan dan he midselikwey kedì.
DEU 5:10 Piru ibpeehè ku is keupiya ku ziyà te mahabet he lapis te kevuwazan he ebmahal kedì wey edtuman te menge suǥù ku.
DEU 5:11 “ ‘Kenè niw ǥemita is ngazan ku te wazè din pulus su siak, is Nengazen he Megbevayè niw, edsilut te minsan hentei he egamit te ngazan ku te wazè din pulus.
DEU 5:12 “ ‘Tumana niw is ebpeveelan ku zutun te Andew te Kedhimeley, ne isipa niw haazà he segradu he andew para kediey te Nengazen he Megbevayè niw, sumalà is insuǥù ku keniyu.
DEU 5:13 Terebahu kew seled te heenem he andew,
DEU 5:14 piru is ikepitu he andew, iyan Andew te Kedhimeley, ipehinungud niw heeyan he andew kedì te Nengazen he Megbevayè niw. Dutun he andew ne kenè kew medterebahu te minsan hengkey. Kinahanglan daan he kenà medterebahu is menge anak niw, menge suluǥuen niw, minsan is kenà menge Israilihanen he mid-ubpà diyà te inged niw. Kenè niw zaan iterebahu is menge vaka niw, menge asnu niw, wey zuma pa he menge uyaǥen niw. Pinaaǥi kayi ebpekehimeley zaan is menge uripen niw iring keniyu.
DEU 5:15 Tentenuzi niw he menge uripen kew zaan dengan diyà te Ehipto, ne iyan a, is Nengazen he Megbevayè niw, mibpeǥawas keniyu ziyà pinaaǥi te zekelà he ǥehem ku. Umbe tumana niw is ebpeveelan ku zutun te Andew te Kedhimeley, su iyan a is Nengazen he Megbevayè niw midsuǥù keniyu.
DEU 5:16 “ ‘Tehuza niw is amey niw wey iney niw, sumalà te insuǥù ku keniyu, su para luǥeyazi kew te untung wey para mebmeupiya is kebpekesavuk niw zuen te tanà he ibeǥey ku keniyu.
DEU 5:17 “ ‘Kenè kew mebunù.
DEU 5:18 “ ‘Kenè kew mebpengumpadi.
DEU 5:19 “ ‘Kenè kew mebpenakew.
DEU 5:20 “ ‘Kenè kew medtarùtarù diyà te hukmanan te kedezaat te zuma niw he etew.
DEU 5:21 “ ‘Kenè niw meimahi is esawa te zuma niw, etawa valey, tanà, menge suluǥuen, menge uyaǥen dan, wey minsan hengkey he ǥaked dan.’
DEU 5:22 “Iyan heeyan insuǥù te Nengazen keniyu te langun he netiǥum diyà te vuntud. Hein mibpekezaǥing sikandin is egkaǥi he ebpuun is laǥeng din duen te teliwazà te hapuy he nevukusan te mekepal he ǥapun, imbeǥey zin heini he menge suǥù ne wazè en duma he migkaǥi zin. Insurat din heini ziyà te zezuwa he midlumpipì he vatu ne imbeǥey zin kayi te kediey.
DEU 5:23 “Hein nezineg niw is laǥeng he ebpuun duen te merusirem hein edriyubriyub te regreg sikan is buntud, mid-uvey kayi te kedì is langun he menge pengulu te menge tribu niw wey is ebpemendumala keniyu,
DEU 5:24 ne ke sikandan te, ‘Impaahà kenitew te Nengazen he Megbevayè tew is mekeǥeǥehem he kebpekiduma zin kenitew wey is dengeg din, ne nezineg tew is laǥeng din he ebpuun te hapuy. Ne neseksiyan tew ǥuntaan he egkeuyag ded bes is etew minsan ebpekidlalag kandin is Megbevayà.
DEU 5:25 Piru kenè key egkesuat he ebpemiligru. Su emun egkeuman dey egkezineg is laǥeng te Nengazen he Megbevayè tew, ne siguradu egkeepur key keniyan te mekeǥeǥehem he hapuy.
DEU 5:26 Duen be etew he egkeuyag minsan nezineg din is laǥeng te uuyag he Megbevayà he ebpuun te hapuy iring te nezineg tew?
DEU 5:27 Iyan ke zà uvey ziyà te Nengazen he Megbevayè tew ne pemineǥa nu is langun he egkeǥiyen din. Ne tudtula nu ziyà te kenami is langun he egkeǥiyen din, su ebpemineǥen dey wey edtumanen dey heini.’
DEU 5:28 “Ne nezineg te Nengazen haazà is migkaǥi niw zutun te kebpekidlalag niw kedì, ne migkaǥi sikandin kayi te kedì te, ‘Nezineg ku is migkaǥi kayi te menge etew ziyà te kenikew, ne meupiya is langun he migkaǥi zan.
DEU 5:29 Ne zeyzey ke layun dan edtahud kedì wey edtumanen dan is menge suǥù ku su para mebmeupiya is kebpekesavuk dan wey te menge kevuwazan dan te taman te taman.
DEU 5:30 Beyai nu sikandan ne keǥiyi nu he medlikù dan en diyà te menge tulda zan.
DEU 5:31 Ne petaǥak ka kayi te kediey su para ikeveǥey ku kenikew is langun he suǥù wey menge sulunuzen he igkepenurù nu kandan he sunuza zan te ked-ubpè dan duen te tanà he ibeǥey ku kandan para maangken dan.’
DEU 5:32 “Umbe purungi niw te edtuman is inmandù te Nengazen he Megbevayè niw keniyu. Kenè niw supaka is minsan sevaha zà duen te menge suǥù din.
DEU 5:33 Pengungubpaan kew he sungkad te insuǥù te Nengazen he Megbevayè niw keniyu, su para edluǥeyazan kew te untung wey mebmeuswaǥen kew zuen te tanà he ed-engkenen niw.
DEU 6:1 “Iyan heini menge suǥù wey menge sulunuzen he imbeǥey kedì te Nengazen he Megbevayè niw su wey ikepenurù diyà te keniyu. Tumana niw heini zutun te ked-ubpè niw zuen te tanà he ed-engkenen niw he ziyà layun te Jordan,
DEU 6:2 su wey sikiyu wey is menge anak niw wey is menge apù niw, medtahud te Nengazen he Megbevayè niw zutun te kebpengungubpaan niw. Emun edtumanen niw is langun he menge suǥù din wey is menge sulunuzen he imbeǥey ku keniyu, ne edluǥeyazan kew te untung.
DEU 6:3 Pemineg kew, is menge etew te Israel, ne purungi niw tumana is menge suǥù din su wey mebmeupiya is kebpekesavuk niw wey para mepurung kew mevuwad duen te meupiya he tanà wey uuzaran, sumalà is impenaad keniyu te Nengazen he Megbevayà te menge kepuun niw.
DEU 6:4 “Pemineg kew is menge etew te Israel: Is Nengazen he Megbevayè tew iyan dà Nengazen.
DEU 6:5 Mahala niw is Nengazen he Megbevayè niw ziyà te tivuuk he ǥehinawa niw, kedsavut niw, wey te tivuuk he zesen niw.
DEU 6:6 Kenè niw lipati heini is menge suǥù he imbeǥey ku keniyu ǥuntaan.
DEU 6:7 Layun niw heini ipenurù te menge anak niw. Ilalag niw heini kandan ke ziyè kew te valey wey ke edhipanew kew, ke edhizeǥà kew wey ke ed-enew kew.
DEU 6:8 Bevekelew kew wey tutubew kew te edsuratan kayi su para kenè niw heini melipati.
DEU 6:9 Isurat niw ziyà te marku te ǥemawan te menge valey niw wey marku te pultahan te menge inged niw.
DEU 6:10 “Ed-uwiten kew en te Nengazen he Megbevayè niw zutun te tanà he impenaad din he ibeǥey zin diyà te menge kepuun niw he si Abraham, si Isaac, wey si Jacob. Heini he tanà, duen dezekelà wey meuswaǥen he menge inged duen he kenè kew iyan mibangun duen.
DEU 6:11 Duen kayi menge valey he nepenù te meupiya he menge vutang he wazè kew iyan medhaǥù duen, duen kayi menge teheb he kenè kew iyan migkalut duen, duen kayi menge pemuleey te paras wey menge kayu he ulibu he kenè kew iyan nemula zuen. Umbe emun ebpekekaan kew en wey egkengahantey,
DEU 6:12 mebpekevantey kew he kenè niw melipati is Nengazen he iyan mibpeǥawas keniyu ziyà te Ehipto he zutun kew uripena.
DEU 6:13 “Tehuza niw is Nengazen he Megbevayè niw; iyan niw zà sikandin silbiyi, ne ngazan din dà is gemita niw emun ebpenangdù kew.
DEU 6:14 Kenè kew medsunud te zuma he menge ed-ezapen, he menge ed-ezapen te menge etew he nekeelingkus keniyu;
DEU 6:15 su is Nengazen he Megbevayè niw he miduma keniyu, kenà egkesuat he ed-azap kew te zuma. Emun ed-azap kew te menge ed-ezapen te zuma he menge etew ibpeǥezaman keniyu te Nengazen is pauk din ne edezeetan kew zin kayi te tanà.
DEU 6:16 Kenè niw ǥezami is Nengazen he Megbevayè niw iring te mibeelan niw ziyà te Masa.
DEU 6:17 Purungi niw tumana is menge suǥù, menge penurù, wey menge sulunuzen he imbeǥey keniyu te Nengazen he Megbevayè niw.
DEU 6:18 Beeli niw is mid-isip te Nengazen he hustu wey meupiya su para mebmeupiya is kebpekesavuk niw ne egkaangken niw sikan is meupiya he tanà he impenangdù din diyà te menge kepuun niw.
DEU 6:19 Ibpesegseg din keniyu is langun he menge kuntada niw su iyan heeyan migkaǥi zin.
DEU 6:20 “Dutun te huziyan he timpu, emun ed-insà diyà te keniyu is menge anak niw ke, ‘Hengkey is ibpesavut te menge penurù, menge sulunuzen, wey menge kesuǥuan he inmandù keniyu te Nengazen he Megbevayè tew?’
DEU 6:21 Keǥiyi niw sikandan te, ‘Menge uripen key zengan te hadì te Ehipto, piru impeǥawas key ziyà te Nengazen pinaaǥi te zekelà he ǥehem din.
DEU 6:22 Neehè dey en is menge vaal zin he utew egkengein-inuwi zuen te kedsiluti zin te menge etew ziyà te Ehipto, ragkes en is hadì dan wey is tivuuk he pemilya zin.
DEU 6:23 Ne impeǥawas key zin diyà te Ehipto su para meuwit key zin kayi te tanà he impenangdù din diyà te menge kepuun tew.
DEU 6:24 Midsuǥù key te Nengazen he tumana zey heini is langun he menge sulunuzen wey tehuza zey sikandin is Megbevayè tew, para layun key med-uswag wey para luǥeyazi key te untung iring kayi te neula-ule en guntaan.
DEU 6:25 Ne emun ebpurungan tew te edtuman heini is langun he suǥù te Nengazen he Megbevayè tew, sumalà te inmandù din kenitew, ne egkehimu kiw he metazeng diyà te etuvangan din.’
DEU 7:1 “Emun ed-uwiten kew en te Nengazen he Megbevayè niw zutun te tanà he edselezan niw su ed-engkenen niw, ibpesegseg din keniyu is menge etew ziyà te pitu he nasyun he edhuna he mahabet wey edhuna he gehemanen kenà sikiyu: is menge Hitihanen, menge Girgasihanen, menge Amorihanen, menge Canaanhen, menge Pirisihanen, menge Hivihanen, wey menge Jebusihanen.
DEU 7:2 Ne emun ibeǥey en sikandan te Nengazen he Megbevayè niw ziyà te keniyu su egkezaag niw en sikandan, kinahanglan he ebpurungan niw sikandan edèdeeti. Kenè kew mebaal te kesebutan diyà te kandan etawa kenè kew mebpaahà te hizu niw kandan.
DEU 7:3 Kenè kew mebpemengesawa wey mebpemeesawa kandan, wey kenè niw tuǥuti is menge anak niw he ebpemengesawa wey ebpemeesawa te menge anak dan,
DEU 7:4 su ebpekepekeziyù diyà te Nengazen is menge anak niw su ziyè dan man ibpepenilbi te zuma he menge ed-ezapen. Ne emun egkehitavù heeyan ne ibpeǥezaman keniyu te Nengazen is pauk din ne egkengezeetan kew.
DEU 7:5 Iyan heini ereg he ebeelan niw: pemengkaǥa niw is menge pemuhatè dan, penrupeta niw is tedeman dan he menge vatu, penempeza niw is menge tukud dan he simbulu te ed-ezapen dan he si Ashera, wey penutunga niw is menge ed-ezapen dan.
DEU 7:6 Su sikiyu he menge etew insivey kew he para zà te Nengazen he Megbevayè niw. Diyà te langun he menge etew, iyan kew mibpilì te Nengazen he Megbevayè niw he para mehimu he ispisyal he menge etew zin.
DEU 7:7 “Mibpilì kew wey mibmahal kew te Nengazen, kenà tenged te edhuna kew he mahabet kenà te zuma he menge etew, su iyan kew pa ganì kinezeisayan te langun.
DEU 7:8 Mibpilì kew zin su geina te mahal kew zin wey edtumanen din is penangdù din diyà te menge kepuun niw. Umbe impeǥawas kew zin diyà te Ehipto pinaaǥi te zekelà he ǥehem din, ne migaud kew zin puun te kegkeuripena keniyu te Faraon he hadì te Ehipto.
DEU 7:9 Isipa niw he is Nengazen he Megbevayè niw, iyan dà Megbevayà. Egkeseriǥan sikandin he Megbevayà, ne edtumanen din is kebpekid-uyun din he iyan is kebmahala zin te mahabet he kevuwazan he ebmahal kandin wey edtuman te menge suǥù din.
DEU 7:10 Piru is wazà mebmahal kandin, segugunè din edsiluti wey edèdeeti.
DEU 7:11 “Umbe purungi niw tumana is menge suǥù wey is menge sulunuzen he ibeǥey ku keniyu ǥuntaan.
DEU 7:12 Emun edtumanen niw heini he menge suǥù, wey ebpurungan niw edsunuza, edtumanen daan te Nengazen he Megbevayè niw is kebpekid-uyun din keniyu he iyan is ebmahalen kew zin, su iyan heini penangdù din diyà te menge kepuun niw.
DEU 7:13 Ebmahalen kew zin, edtuvazan kew zin, ne ibpemahabet kew zin. Ebeǥayan kew zin te mahabet he menge anak wey zekelà he sebpet puun te tanè niw: sebpet he trigu, binu, wey lana. Wey ibpemahabet din is menge uyaǥen niw zutun te tanà he impenangdù din he ibeǥey zin diyà te menge kepuun niw wey ziyà te keniyu.
DEU 7:14 Edtuvazan kew zin lavew te zuma he menge etew. Diyà te keniyu, wazà maama he kenà egkehimu he ebpekepaanak wey wazà bahi he kenà egkehimu he ebpekaanak, ne iring din ded daan is menge uyaǥen niw.
DEU 7:15 Ebpengelangan kew te Nengazen te langun he zaru. Kenè din ibpaaǥi ziyà te keniyu sikan is utew mezaat he menge zaru he neehè niw ziyà te Ehipto, piru ibpaaǥi zin mulà heini ziyà te langun he ebpekigkuntada keniyu.
DEU 7:16 Kinahanglan he egeraan niw is langun he menge etew he ibeǥey keniyu te Nengazen he Megbevayè niw. Kenè niw sikandan kehizuwi, wey kenè kew mebpenilbi te kandan he menge ed-ezapen su pekaid heini keniyu.
DEU 7:17 “Kela ke ebpekekaǥi kew te, ‘Edhuna he mekeǥeǥehem heini he menge nasyun kenà kenitew. Ebmenmenuwen tew is kedsegseg kandan?’
DEU 7:18 Iyan, kenè kew mahandek kandan, kekenà, purungi niw tentenuzi ke hengkey is mibeelan te Nengazen he Megbevayè niw ziyà te hadì te Ehipto wey te langun he Ehiptohanen.
DEU 7:19 Iyan kew mismu nekesaksi te zekelà he penggezam, egkein-inuwan he menge hitavù, wey is dekelà he ǥehem he migamit te Nengazen he Megbevayè niw te kebpeǥawas keniyu. Ne iring ded dutun is ebeelan te Nengazen he Megbevayè niw ziyà te langun he menge etew he igkahandek niw.
DEU 7:20 Ibpehurunan sikandan te Nengazen he Megbevayè niw te petiyukan su para mezeeti minsan sikan is egkengesamà he ebpemekeeles en.
DEU 7:21 Kenè kew mahandek kandan su zuma niw is Nengazen he Megbevayè niw, ne mekeǥeǥehem sikandin wey egkein-inuwan he Megbevayà.
DEU 7:22 Ibpetigdezeisey keniyu te Nengazen he Megbevayè niw is kedsegseg te menge etew keniyan he menge nasyun. Kenè niw sikandan diritsuwa emina, su emun ebeelan niw heeyan ne ebmahabet is leew he menge langgam.
DEU 7:23 Piru ibeǥey heini he menge nasyun te Nengazen he Megbevayè niw ziyà te keniyu. Edliveǥen din sikandan taman te egkengezeetan sikandan.
DEU 7:24 Ibeǥey zin diyà te keniyu is menge hadì dan. Ne penhimetayi niw sikandan, ne egkelipatan en sikandan. Wazà minsan sevaha kandan he ebpekezaag keniyu, ne emina niw sikandan te edhimatey.
DEU 7:25 Iagbur niw ziyà te hapuy is menge ledawan he ed-ezapen dan, ne kenè niw keimahi is menge vulawan wey menge pelata zutun. Kenè niw haazà kuwaa su pekaid haazà keniyu. Pekeziyui niw heini su utew mezaat is ked-isipa kayi te Nengazen he Megbevayè niw.
DEU 7:26 Kenè kew med-uwit kayi te utew mezaat he menge vutang diyà te valey niw su para kenè kew meragkes te kedezeeti kayi. Kinahanglan he mezaat daan is ked-isipa niw kayi, su heini he menge vutang, kinahanglan he ebpurungan edèdeeti.
DEU 8:1 “Purungi niw sunuza is langun he menge suǥù he ibeǥey ku keniyu ǥuntaan, su para mebpedayun is kegkeuyag-uyag niw wey ebmahabet kew, wey egkaangken niw sikan is tanà he impenangdù te Nengazen he ibeǥey zin diyà te menge kepuun niw.
DEU 8:2 Tentenuzi niw ke mibmenumenu te Nengazen he Megbevayè niw is kegiyahi zin keniyu zuen te hipanew niw ziyà te sibsivayan seled te 40 he tuig. Midhimu zin heini su para kenè kew mekepelavew, wey te kegezam keniyu su para metueni ke hengkey is netaǥù diyà te ǥehinawa niw, ke edtumanen niw ve is menge suǥù din etawa kenà.
DEU 8:3 Midhimu zin he kenè kew mekepelavew pinaaǥi te kebpesaǥad keniyu te kegkevitil, ne zutun mibeǥayan kew zin te ‘manna’–kelasi te keenen he sikiyu wey is menge kepuun niw wazè pa mekeǥezam kayi puun pa te nehuna he timpu. Midhimu heini te Nengazen su impenurù din keniyu he kenà iyan dà igkeuyag te etew is keenen, kekenà, elin is kada lalag he egkeǥiyen te Nengazen.
DEU 8:4 Seled te 40 he tuig wazà mezaan is menge visti niw wey wazà lupangi is menge paa niw te kehipanew niw.
DEU 8:5 Kinahanglan he ed-is-isipen niw he is amey ebmensuwen din is anak din, ne is Nengazen he Megbevayè niw ne ebmansu zaan keniyu.
DEU 8:6 “Umbe tumana niw is menge suǥù te Nengazen he Megbevayè niw. Pengungubpaan kew he sungkad te menge paaǥi zin wey tehuza niw sikandin.
DEU 8:7 Su ed-uwiten kew te Nengazen he Megbevayè niw ziyà te meupiya he tanà, he zuen duen edtudà he menge wahig wey menge teheb diyà te menge suǥud wey ziyà te menge vuvungan.
DEU 8:8 Heini he tanà duen kayi menge trigu, barli, paras, higus, pumigranata, ulibu, wey teneb.
DEU 8:9 Kenè kew egkeewaan te keenen kayi he tanà ne kenè kew egkekurangan te minsan hengkey. Kayi he tanà ebpekekuwa kew te menge putew he henduen dà te ebpengamì kew zà te vatu, ne dekelà daan is brunsi ziyà te menge vuntud.
DEU 8:10 Emun ebpekekaan kew en te minsan hengkey he egkesuatan niw, ne zeliǥa niw is Nengazen he Megbevayè niw tenged te kebeǥayi zin keniyu te utew meupiya he tanà.
DEU 8:11 “Mebpekevantey kew he kenè niw melipati is Nengazen he Megbevayè niw wey kenè niw mesupak is menge suǥù din wey is menge sulunuzen he ibeǥey ku keniyu ǥuntaan.
DEU 8:12 Emun egkepezaharan kew en te keenen wey ebpekevangun kew en te meupiya he menge valey he egkeubpaan niw,
DEU 8:13 wey ebmahabet en is menge uyaǥen niw, selapì niw, bulawan niw, wey zuma he menge azen niw,
DEU 8:14 mebpekevantey kew he kenè kew mekepahambug wey kenè niw melipati is Nengazen he Megbevayè niw he mibpeǥawas keniyu puun te Ehipto he zutun kew pen-uripena.
DEU 8:15 Migiyahan kew zin diyà te meluag wey mekahahandek he sibsivayan he zuen duen edhereg he menge uled wey menge venayew. Ne wazà wahig kayi he lugar, piru mibeǥayan kew zin te wahig he ebpuun te vatu.
DEU 8:16 Diyà te sibsivayan, ebeǥayan kew zin te ‘manna’–keenen he wazà hanew zuen te menge kepuun niw. Midhimu heini te Nengazen para kenè kew mekepelavew wey te kegezam keniyu su wey mebmeupiya is kebpekesavuk niw te huziyan he timpu.
DEU 8:17 Su kela ke megkaǥi kew te, ‘Pinaaǥi te kedì he ǥehem wey zesen naangken ku heini is langun he ketiǥeyunan.’
DEU 8:18 Piru tentenuzi niw he iyan is Nengazen he Megbevayè niw mibeǥey keniyu te ebilidad he insepian niw, ne mibeelan din heini su para metuman din is kebpekid-uyun din keniyu he impenangdù din diyà te menge kepuun niw. Ne edtumanen din en heini ǥuntaan.
DEU 8:19 “Piru ebpetizeenan ku en sikiyu ǥuntaan he emun edlipatan niw is Nengazen he Megbevayè niw, ne edsunud kew te zuma he menge ed-ezapen ne ed-ezapen niw wey ebpenilbiyan niw sikandan, kenè en ebperis he egkengezeetan kew.
DEU 8:20 Guntaan mibpendèdeetan te Nengazen diyà te etuvangan niw is menge etew ziyà te menge nasyun, ne emun kenè kew ebpezumazuma te Nengazen he Megbevayè niw ebpendezeetan kew zin daan.
DEU 9:1 “Pemineg kew is menge etew te Israel. Guntaan edlayun kew en te Wahig he Jordan su para maangken niw en is menge nasyun he edhuna he dezekelà wey menge mekeǥeǥehem kenà keniyu. Dezekelà is menge inged dan ne memetikang is berengbeng duen su henduen be te ebpekesungkul en diyà te langit.
DEU 9:2 Memezesen wey memelangkew is menge meǥinged duen he menge kevuwazan ni Anak! Netuenan niw man is mehitenged te menge kevuwazan ni Anak wey netudtulan kew he wazà ebpekesukul kandan.
DEU 9:3 Piru ǥuntaan egkeehè niw he iyan is Nengazen he Megbevayè niw edhuna edlayun he iring te hapuy he ebpekeepur te menge kuntada. Edaaǥen din sikandan su para melemu zà is kedsegseǥa niw wey kedezeeti niw kandan su iyan heini impenaad te Nengazen keniyu.
DEU 9:4 “Emun egkesegseg niw en sikandan pinaaǥi te Nengazen he Megbevayè niw, kenè kew kaǥi ziyà te ǥehinawa niw te, ‘Mid-uwit kiw te Nengazen para maangken tew heini he tanà su geina te metazeng kiw.’ Kenà heeyan iyan. Ibpesegseg sikandan te Nengazen keniyu ǥeina te lalung sikandan he menge etew.
DEU 9:5 Egkaangken niw is menge tanè dan, kenà tenged te ketazeng niw wey keupiya niw, kekenà, tenged te kelelalung dan, wey para metuman te Nengazen is impenangdù din diyà te menge kepuun niw he si Abraham, si Isaac, wey si Jacob.
DEU 9:6 Umbe, tentenuzi niw he kenà tenged te ketazeng niw is kebeǥaya te Nengazen he Megbevayè niw zuen te meupiya he tanà he ed-engkenen niw, su is tutuu, menge mesinupaken kew.
DEU 9:7 “Tentenuzi niw ke hengkey is menge ulaula niw he ingkepauk te Nengazen he Megbevayè niw. Hein diyè kew te sibsivayan. Puun te andew te kegawas niw ziyà te Ehipto ne taman en guntaan is kedtulung niw kebpekidsukulà te Nengazen.
DEU 9:8 Minsan diyà te Horeb mibaal kew pa te ingkepauk te Nengazen umbe egeraan kew zin en pezem.
DEU 9:9 Hein midtekezeg a zuen te vuntud te kegkuwa zuen te midlumpipì he menge vatu he midsuratan te kebpekid-uyun keniyu, 40 he andew wey 40 he kezukileman is wazà a mekekaan wey wazà a mekeinum.
DEU 9:10 Imbeǥey te Nengazen kayi te kediey sikan is dezuwa he midlumpipì he vatu he iyan en sikandin nenguney medsurat duen te langun he menge lalag he nezineg niw ziyà te kandin puun duen te hapuy ziyà te Buntud he Sinai dutun te kedtiǥum niw.
DEU 9:11 “Heini is dezuwa he midlumpipì he vatu he midsuratan te paaǥi te kebpekid-uyun te Nengazen keniyu, imbeǥey te Nengazen kediey hein neliwas is 40 he andew wey 40 he kezukileman.
DEU 9:12 Ne zutun migkaǥi is Nengazen kayi te kediey te, ‘Gaanggaan ke en tupang su sikan is menge etew he mibpenguluwan nu te kegawas puun te Ehipto nehimu en he menge lalung. Segugunè dan dà mid-iniyuǥi is insuǥù ku kandan ne mibaal sikandan te ledawan he ed-ezapen dan.’
DEU 9:13 “Ne migkaǥi pa is Nengazen kayi te kedì te, ‘Neehè ku he utew iyan mesinupaken heini he menge etew.
DEU 9:14 Bey-ani ad kenikew su edezeetan ku sikandan su wey melipati en sikandan. Ne edhimuwen ku sikew wey is menge kevuwazan nu he nasyun he mekeǥeǥehem pa wey mahabet pa kandan.’
DEU 9:15 “Umbe midtupang a puun duen te edriyubriyub he vuntud he uwiten ku sikan is dezuwa he midlumpipì he vatu he zutun isurat sikan is paaǥi te kebpekid-uyun te Nengazen.
DEU 9:16 Ne neehè ku sikiyu is ebaal te salà diyà te Nengazen he Megbevayè niw. Mibaal kew te ledawan he ed-ezapen niw he nati he vaka. Segugunè niw zà mid-iniyuǥi is insuǥù te Nengazen keniyu.
DEU 9:17 Umbe, imbadas ku ziyà te etuvangan niw sikan is dezuwa he midlumpipì he vatu ne nengeǥevà heini.
DEU 9:18 “Ne midlangkeb a ziyà te etuvangan te Nengazen seled te 40 he andew wey 40 he kezukileman he wazà kaankaan wey wazà inum-inum, tenged te langun he menge salà he mibeelan niw. Utew mezaat diyà te etuvangan te Nengazen is mibeelan niw ne ingkepauk din heini.
DEU 9:19 Nahandek a te zekelà he pauk te Nengazen keniyu, su kela ke penhimetayi kew zin en. Iyan, mibpemineg a ǥihapun te Nengazen.
DEU 9:20 Dutun dekelà is pauk te Nengazen ki Aaron ne egkesuatan din en te edhimatey, piru zutun he timpu nengemuyù a para kandin.
DEU 9:21 Ne migkuwa ku sikan is baka he mibeelan niw he midtukù keniyu te kebaal te salà, ne midtunew ku haazà diyà te hapuy. Ne hein nepasad mibekbek ku taman te nepurung mepurbus ne insimburè ku ziyà te wahig he edtudà puun te vuntud.
DEU 9:22 “Mibaal kew zaan te igkepauk te Nengazen hein diyè kew te Tabera, Masa, wey ziyà te Kibrot Hataava.
DEU 9:23 “Hein impeǥenat kew te Nengazen puun te Kadesh Barnea migkaǥi sikandin diyà te keniyu te, ‘Genat kew en ne engkenà niw en is tanà he ibeǥey ku keniyu.’ Piru mibpekidsukulè kew; wazè niw tumana is suǥù te Nengazen he Megbevayè niw. Wazè kew medsarig wey mebpezumazuma kandin.
DEU 9:24 Puun te kegkekilelaa ku keniyu ne pudu en kebpekidsukulà te Nengazen is menge vaal niw.
DEU 9:25 “Umbe zutun he timpu midlangkeb a ziyà te etuvangan te Nengazen seled te 40 he andew wey 40 he kezukileman su migkaǥi is Nengazen he edèdeetan kew zin.
DEU 9:26 Mib-ampù a ziyà te Nengazen he ke siak te, ‘He Nengazen he MEGBEVAYÀ, kenè nu zèdeeti heini is menge etew he ǥaked nu. Midlibri nu sikandan ne impeǥawas nu puun te Ehipto pinaaǥi te zekelà he ǥehem nu.
DEU 9:27 Kenè nu en seǥipaa is kesinupaken, kegkezaat, wey is menge salà kayi he menge etew, kekenà, tentenuzi nu is menge suluǥuen nu he si Abraham, si Isaac, wey si Jacob.
DEU 9:28 Emun edèdeetan nu sikandan, ebpekekaǥi is menge Ehiptohanen te, “Midèdeetan sikandan te Nengazen su kenà sikandin ebpekehimu he ed-uwit kandan diyà te tanà he insaad din kandan.” Emun kenà, ne ebpekekaǥi sikandan te, “Midèdeetan sikandan te Nengazen su nepeukan din sikandan; impeǥawas din sikandan puun te Ehipto ne iyan in-uwita zin kandan diyà te sibsivayan su egeraan din sikandan.”
DEU 9:29 “ ‘Piru menge etew nu sikandan. Iyan sikandan menge etew he ǥaked nu ne impeǥawas nu puun te Ehipto pinaaǥi te zekelà he ǥehem nu.’
DEU 10:1 “Dutun he timpu migkaǥi is Nengazen kayi te kediey te, ‘Basbas ka te zezuwa he melumpipì he vatu iring duen te nehuna ne tekezeg ka kayi te kediey zuen te vuntud. Ne vaal ka zaan te kavan he kayu.
DEU 10:2 Idsurat ku keniyan te melumpipì he vatu sikan is menge lalag he insurat ku zuen te nehuna he vatu he migevè nu. Ne itaǥù nu haazà duen te kavan.’
DEU 10:3 “Umbe mibaal a te kavan he kayu he ekasya ne mibasbas a te zezuwa he melumpipì he vatu he iring duen te nehuna, ne midtekezeg a ziyà te vuntud is ed-uwit duen te zezuwa he vatu.
DEU 10:4 Ne insurat te Nengazen duen te melumpipì he vatu sikan is insurat din duen te nehuna he vatu, he iyan sikan is Sepulù he Suǥù he imbeǥey zin diyà te keniyu hein nekidlalag sikandin keniyu he ebpuun is laǥeng din duen te hapuy zutun te kedtiǥum niw zuen te vuntud. Ne hein imbeǥey en te Nengazen heini kedì,
DEU 10:5 ne midtupang a zutun te vuntud ne intaǥù ku haazà duen te kavan he mibeelan ku, su iyan heini insuǥù kedì te Nengazen, ne taman en guntaan ne kemulu pa heini zutun.”
DEU 10:6 Ne migenat is menge Israilihanen puun te menge teheb te menge tig-Jaakan ne midhendiyè dan te Mosera. Ne zutun mebpatey si Aaron ne zutun dan sikandin ileveng. Ne is anak din he si Eleazar iyan nehimu he lavew he memumuhat su iyan mid-ilis kandin.
DEU 10:7 Ne ebpuun dutun midhendiyà sikandan te Gudgoda wey ziyà te Jotbata, ne heini he lugar zuen menge zal-ug.
DEU 10:8 Dutun he timpu mibpilì te Nengazen is tribu ni Levi he iyan ibpeuwit duen te Kavan te Kebpekid-uyun te Nengazen kandan, wey ebaal te vuluhaten diyà te etuvangan din, wey ebpenuvadtuvad te menge etew pinaaǥi te ngazan din. Ne taman en guntaan ne iyan heini buluhaten dan.
DEU 10:9 Iyan heini hinungdan ke maan is wazà mulà tanà he impepengevilin te menge kevuwazan ni Levi he nezawat mulà te zuma zan he menge Israilihanen. Iyan mismu kandan he kevilin is Nengazen sumalà is migkaǥi te Nengazen he Megbevayè niw.
DEU 10:10 “Iring duen te nehuna he mid-ulaula ku, wazà a med-awà duen te vuntud seled te 40 he andew wey 40 he kezukileman, ne mibpemineg a te Nengazen ne wazè kew zin dèdeeti.
DEU 10:11 Migkeǥiyan e zin te, ‘Genat kad ne penguluwi nu is menge Israilihanen te kedseled wey ked-angken duen te tanà he impenangdù ku he ibeǥey ku ziyà te menge kepuun niw.’
DEU 10:12 “Ne ǥuntaan, menge etew te Israel, is ebuyuen dà te Nengazen he Megbevayè niw ziyà te keniyu, iyan is tehuza niw sikandin, pengungubpaan kew he sungkad te menge paaǥi zin, mahala niw sikandin, penilbi kew kandin te ebpuun diyà te tivuuk he gehinawa niw wey kedsavut niw,
DEU 10:13 ne tuman kew te menge suǥù din wey te menge sulunuzen he ibeǥey ku keniyu ǥuntaan he para te keupiyaanan niw.
DEU 10:14 “Gaked te Nengazen he Megbevayè niw is langit, minsan is kinetikangan he langit, ragkes is kelibutan wey is langun he netaǥù kayi.
DEU 10:15 Piru mibpilì te Nengazen is menge kepuun niw he iyan ebmahalen din, ne mibpilì kew zin daan is menge kevuwazan dan lavew te langun he menge nasyun, ne taman en guntaan iyan kew ǥihapun menge etew he pinilì din.
DEU 10:16 Umbe, beǥuwa niw en is gehinawa niw ne engkezi niw en is kebmesinupaken niw.
DEU 10:17 Su is Nengazen he Megbevayè niw, Megbevayà te menge megbevayà wey Nengazen te menge nengazen. Mekeǥeǥehem wey egkein-inuwan sikandin he Megbevayà. Wazè din ibpelavi ne kenà sikandin egkeuwit te suhul.
DEU 10:18 Edlevanan din is menge ilu wey is menge valu he vahi. Ebmahalen din is menge lumelengyawà ne ebeǥayan din sikandan te keenen wey menge visti.
DEU 10:19 Umbe, mahala niw zaan is menge langyew, su nehimu kew zaan he menge langyew, ziyà te Ehipto.
DEU 10:20 Tehuza niw is Nengazen he Megbevayè niw wey silbiyi niw sikandin. Kenè kew awà diyà te kandin ne ngazan din dà is gemita niw emun ebpenangdù kew.
DEU 10:21 Deliǥa niw sikandin su iyan sikandin Megbevayè niw he mibaal te mekeǥeǥehem wey egkein-inuwan he menge vaal he neehè niw mismu.
DEU 10:22 Hein midhendiyà is menge kepuun niw te Ehipto, menge 70 dà sikandan, piru ǥuntaan impemezakel kew te Nengazen he Megbevayè niw he iring te menge vituen diyà te langit.
DEU 11:1 “Mahala niw is Nengazen he Megbevayè niw ne layun niw tumana is ibpetuman din, menge sulunuzen he imbeǥey zin, wey is menge suǥù din.
DEU 11:2 Tentenuzi niw ǥuntaan is nengeseǥazan niw he kebmansu keniyu te Nengazen he Megbevayè niw. Iyan kew nekesaǥad kayi ne kenà iyan is menge anak niw. Wazà sikandan mekesaksi te kegkelavew wey kegkemekeǥeǥehem te Nengazen,
DEU 11:3 wey te egkengein-inuwan he mibpemeelan din diyà te Ehipto kuntra te Faraon he hadì te Ehipto wey te tivuuk he nasyun.
DEU 11:4 Wazè dan maahà sikan is midhimu te Nengazen diyà te Ehiptohanen he menge sundaru wey ziyà te menge kudè dan wey menge kerwahi zan, wazè dan maahà ke mibmenumenu te Nengazen is kedleneza zin kandan diyà te Zaǥat he Meriǥà hein edel-asen kew zan. Mibpendezeetan din sikandan ne wazè en sikandan guntaan!
DEU 11:5 Wazà maahà te menge anak niw is mibeelan te Nengazen diyà te keniyu hein diyè kew te sibsivayan taman te kebpekeuma niw kayi he lugar.
DEU 11:6 Wey ke hengkey is mibeelan din diyà te ki Datan wey ki Abiram, te menge anak ni Eliab te kevuwazan ni Reuben. Mid-eveleng sikandan te mibeka he tanà ragkes is menge pemilya zan, tulda zan, wey langun he zuma zan. Ne neulaula heini ziyà te etuvangan te langun he menge Israilihanen.
DEU 11:7 Iyan kew mismu nekaahà kayi te mekeǥeǥehem he menge vaal te Nengazen.
DEU 11:8 “Umbe tumana niw is langun he menge suǥù he ibeǥey ku keniyu guntaan, para zuen niw zesen te kedhipanew wey te ked-angken duen te tanà he ziyà layun te Wahig he Jordan.
DEU 11:9 Emun metinumanen kew, edluǥeyayan kew te untung dutun te meupiya wey selebpeten he tanà, he impenangdù te Nengazen he ibeǥey zin diyà te menge kepuun niw wey te menge kevuwazan dan.
DEU 11:10 Su is tanà he edselezan niw wey ed-engkenen niw, ne kenà iring te tanà diyà te Ehipto he mibpuunan niw. Diyà te Ehipto, emun ebpemula kew kinahanglan he edhaǥù kew te kedtulung kebpeminyag.
DEU 11:11 Piru zuen te tanà he ed-engkenen niw, zuen kayi menge vuvungan wey menge suǥud he layun ed-uzani.
DEU 11:12 Heini he tanà ed-etimanen te Nengazen he Megbevayè niw; andew-andew is kebentayi zin kayi seled te tivuuk he tuig!
DEU 11:13 “Umbe emun layun niw edtumana is menge suǥù he ibeǥey ku keniyu ǥuntaan, he mahala niw is Nengazen he Megbevayè niw wey silbiyi niw sikandin te ebpuun diyà te tivuuk he ǥehinawa niw wey tivuuk he kedsavut niw,
DEU 11:14 ebpeuzanan kew zin dutun te hustu he timpu su wey kew sebpeta te trigu, paras he para ebeelan niw he vinu, wey ulibu he para ebeelan niw he lana.
DEU 11:15 Ebeǥayan din te penebtavà is menge uyaǥen niw, ne sikiyu zaan, dekelà is keenen niw.
DEU 11:16 “Mebpekevantey kew su kela ke meiniyat kew, ne ed-iniyuǥan niw is Megbevayà su iyan niw ed-ezapen is menge megbevayà he kenà tutuu ne ebpenilbi kew kandan.
DEU 11:17 Emun ebeelan niw heini, egkepeukan kew te Nengazen ne kenè din ibpeuzan ne wazè niw egkeraǥun, ne segugunè kew egkahanew puun duen te meupiya he tanà he ibeǥey keniyu te Nengazen.
DEU 11:18 Umbe, ipependalid niw heini is menge lalag ku ziyà te gehinawa niw wey isip niw. Bevekelew kew etawa tutubew kew te edsuratan kayi su para kenè niw melipati.
DEU 11:19 Ipenurù niw heini te menge anak niw. Ilalag niw heini kandan ke ziyè kew te valey niw wey ke edhipanew kew, zutun te kedhizeǥè niw wey zutun te ked-enew niw.
DEU 11:20 Isurat niw heini ziyà te menge marku te gemawan te menge valey niw wey ziyà te pultahan te menge inged niw,
DEU 11:21 para luǥeyazi kew te untung duma te menge anak niw duen te tanà he impenangdù te Nengazen he ibeǥey zin diyà te menge kepuun niw. Egkaangken niw heini mintras duen pa langit diyà te zivavew te kelibutan.
DEU 11:22 “Emun ebpurungan niw edtumana heini is langun he ibeǥey ku keniyu he menge suǥù, he ebmahalen niw is Nengazen he Megbevayè niw, wey ebpengungubpaan kew te sungkad te menge paaǥi zin, wey kenè niw sikandin ed-iniyuǥan,
DEU 11:23 edsegseǥen te Nengazen is menge etew zuen te menge nasyun dutun te tanà he ed-engkenen niw minsan dekelè dan wey mekeǥeǥehem dan kenà keniyu.
DEU 11:24 Is langun he tanà he egkeveyaan niw, egkehimu he keniyu: puun te sibsivayan pehendiyà te Lebanon, wey puun te Wahig he Eufrates pehendiyà te Zaǥat he Mediteraneo.
DEU 11:25 Wazà ebpekeeǥen keniyu. Su iyan impenaad te Nengazen he Megbevayè niw he ebpengelinteuwan din he mahandek keniyu is menge etew ziyà te minsan hendei he egkepeveyaan niw zutun he tanà.
DEU 11:26 “Pemineg kew! Ibpepilì ku sikiyu ǥuntaan te tuvad etawa rawak.
DEU 11:27 Edtuvazan kew emun edtumanen niw is menge suǥù te Nengazen he Megbevayè niw he ibeǥey ku keniyu ǥuntaan.
DEU 11:28 Edrewaken kew emun kenè niw edtumanen heini is menge suǥù te Nengazen he Megbevayè niw he ibeǥey ku keniyu ǥuntaan, wey ed-azap kew te ed-ezapen te zuma he wazè niw mekilala.
DEU 11:29 Emun ed-uwiten kew en te Nengazen he Megbevayè niw zutun te tanà he ed-engkenen niw, ne ipahayag niw is tuvad te Nengazen dutun te Buntud he Gerizim tenged te kedtuman niw, ne ipahayag niw zaan is rawak din dutun te Buntud he Ebal tenged te kenè niw kedtuman.
DEU 11:30 Heini he menge vuntud diyà dapit te edsenlepan te Wahig he Jordan, diyà te tanà te menge Canaanhen he meǥinged diyà te Araba he uvey te inged he Gilgal. Kenà heini meziyu te menge kayu he ulayan diyà te More.
DEU 11:31 Edlayun kew en te Jordan te kedseled wey ked-angken duen te tanà he ibeǥey te Nengazen he Megbevayè niw keniyu. Emun egkekuwa niw en heini wey ed-ubpaan niw en,
DEU 11:32 ne tumana niw is langun he menge suǥù wey is menge sulunuzen he ibeǥey ku keniyu ǥuntaan.
DEU 12:1 “Iyan heini menge suǥù wey menge sulunuzen he kinahanglan he ebpurungan niw edtumana zutun te ked-ubpè niw ziyà te tanà he ibeǥey keniyu te Nengazen, he Megbevayè te menge kepuun niw.
DEU 12:2 Emun edsegseǥen niw en is menge etew he ebpen-ubpà dutun, purungi niw pemengkaǥa is langun he menge lugar he zutun dan ed-ezapa is ebpen-ezapen dan he tarù he menge megbevayà he ziyà te metikang wey mevavà he menge vuntud wey sihung te merapung he menge kayu.
DEU 12:3 Pemengkaǥa niw is menge pemuhatè dan, penrupeta niw is tedeman dan he menge vatu, peminsuli niw is menge tukud he simbulu te vahi he ed-ezapen dan he si Ashera, wey penrupeta niw is ledawan te ebpen-ezapen dan su para melipati en heini zutun he lugar.
DEU 12:4 “Kenè niw iringi is paaǥi zan te ked-azap emun ed-ezapen niw is Nengazen he Megbevayè niw,
DEU 12:5 kekenà, dangep kew ziyà te Nengazen he Megbevayè niw ziyà te lugar he ebpilien din, ke hengkey he tribu is teǥiǥaked duen kayi te langun he menge tribu te Israel. Ne zutun niw ezapa is Nengazen su iyan haazà lugar he mibpilì din he zutun sikandin ebeǥayi te zengeg.
DEU 12:6 Dutun niw uwita is menge ibpemuhat niw he edtutungen wey is duma pa he menge pemuhat, is ikepulù niw, is ispisyal he menge gasa niw, is insaad niw he idhalad, is kineugelingen he menge halad, wey is kinekekayan te menge uyaǥen niw.
DEU 12:7 Ne ziyè kew egkaan te etuvangan te Nengazen he Megbevayè niw duma is menge pemilya niw, ne igkelipey niw is langun he nepasad niw su midtuvazan kew te Nengazen.
DEU 12:8 “Guntaan ebeelan niw is minsan hengkey he egkesuatan niw te ebaal, su ebpemuhat kew ǥuntaan diyà te minsan hendei zà duen he lugar he egkesuatan niw. Piru kenè niw en heeyan beeli
DEU 12:9 emun ebpekeuma kew en duen te lugar he zutun kew ebpekehimeley. Heini he lugar ibeǥey keniyu te Nengazen he Megbevayè niw he ibpepengevilin din keniyu.
DEU 12:10 Emun ebpekelayun kew en te Jordan ne ed-ubpè kew en duen te tanà he ibeǥey keniyu te Nengazen he Megbevayè niw he ibpepengevilin din keniyu, ne melinew is kebpekesavuk niw zutun su kenà idtuǥut te Nengazen he gurigawa kew te nekelingut he menge kuntada niw.
DEU 12:11 Kinahanglan he ed-uwiten niw is menge pemuhat niw ziyà te lugar he ebpilien te Nengazen he Megbevayè niw he zutun sikandin ebeǥayi te zengeg. Iyan heini menge pemuhat wey menge halad he ibpahalad ku keniyu: menge pemuhat he edtutungen wey zuma pa he menge pemuhat, is ikepulù niw, is ispisyal he menge gasa niw, wey is langun he kineupiyahan he menge halad he impenaad niw ziyà te Nengazen.
DEU 12:12 Ne medlipey kew zutun diyà te etuvangan te Nengazen he Megbevayè niw, duma te menge anak niw, menge suluǥuen niw, wey is menge Levihanen he wazà mekepengevilin te tanà he ebpen-ubpà diyà te inged niw.
DEU 12:13 Kenè niw ipemuhat is menge pemuhat niw he edtutungen diyà te minsan hendei zà duen he lugar he egkesuatan niw,
DEU 12:14 kekenà, diyè niw zà ipemuhat te lugar he ǥaked te sevaha he tribu niw he ebpilien te Nengazen, ne zutun niw veeli is langun he idsuǥù ku keniyu.
DEU 12:15 “Piru egkehimu mulà he edlapè kew wey egkaan kew te usa ziyà te minsan hendei he lugar. Egkehimu ke egkaan kew taman te egkesuatan niw iring te kegkaan niw te selazeng wey gasila sumalà te idtuvad keniyu te Nengazen he Megbevayè niw. Pudu kew ebpekehimu he egkaan, su egkehimu he egkaan sikan is ed-isipen he lumpiyu wey sikan is mid-isip he neremerikan.
DEU 12:16 Piru kenè niw keena is lengesa; iitis niw heini ziyà te tanà iring te wahig.
DEU 12:17 Iyan heini kinahanglan he kenè niw egkeenen diyà te keugelingen niw he ubpeey: is ikepulù te paras niw, binu niw, lana niw, kinekekayan te menge uyaǥen niw, is minsan hengkey he idsaad niw he idhalad, is kineugelingen he menge halad, wey is ispisyal he menge gasa.
DEU 12:18 Diyè niw zà heini keena te etuvangan te Nengazen he Megbevayè niw duma te menge anak niw, menge suluǥuen niw, wey menge Levihanen he ebpen-ubpà diyà te inged niw te lugar he ebpilien din. Lipey kew ziyà te etuvangan te Nengazen he Megbevayè niw pinaaǥi te langun he ed-ul-ulahan niw.
DEU 12:19 Kenè niw limbe pesegdana is menge Levihanen mintras kemulu kew pa ed-ubpà diyà te tanè niw.
DEU 12:20 “Emun edtumanen en te Nengazen he Megbevayè niw is impenaad din he ebpekeluaǥen din is tanè niw, ne egkesuat kew he egkaan te usa, egkehimu he egkaan kew minsan keenu.
DEU 12:21 Emun meziyù diyà te keniyu is lugar he ebpilien te Nengazen he Megbevayè niw he zutun sikandin ebeǥayi te zengeg, egkehimu ke edlapè kew wey egkaan kew te menge vaka niw wey menge kerehidu niw ziyà te keugelingen niw he menge ubpeey. Ne sumalà is insuǥù ku keniyu, ebpekekaan kew taman te egkesuatan niw zuen te menge langgam he ibpekaan keniyu te Nengazen,
DEU 12:22 iring te kegkeena niw te gasila wey selazeng. Is minsan hentei keniyu egkehimu he egkaan kayi, ed-isipen man sikandin he neremerikan etawa lumpiyu.
DEU 12:23 Mebpekevantey kew zà he kenè kew mekekaan te lengesa, su is untung ne ziyà te lengesa. Kenè niw ipedregkesà te egkaan is untung wey is usa.
DEU 12:24 Kekenà, iitis niw is lengesa ziyà te tanà iring te wahig.
DEU 12:25 Kenè niw heini keena su wey mebmeupiya is kebpekesavuk niw wey te menge kevuwazan niw, su meupiya ziyà te etuvangan te Nengazen is kenà kegkaan te lengesa.
DEU 12:26 “Uwita niw ziyà te lugar he ebpilien te Nengazen is segradu he menge pemuhat wey is halad he insaad niw ziyà te kandin.
DEU 12:27 Ipemuhat niw sikan is usa he pemuhat he edtutungen para te Nengazen he Megbevayè niw. Ne sikan is duma he menge pemuhat niw ne kinahanglan he id-itis niw is lengesa zan duen te pemuhatà para te Nengazen he Megbevayè niw, piru egkehimu ke egkeenen niw haazà is usa.
DEU 12:28 Tumana niw heini is langun he sulunuzen he ibeǥey ku keniyu, su wey layun meupiya is kebpekesavuk niw wey is menge kevuwazan niw te taman te taman, su is kedtuman kayi meupiya wey hustu ziyà te etuvangan te Nengazen he Megbevayè niw.
DEU 12:29 “Ebpengelinteuwan te Nengazen he Megbevayè niw he mezezeeti niw is menge etew ziyà te menge nasyun he edsurungen niw. Segseǥa niw is menge meǥinged duen ne ubpai niw is lugar zan.
DEU 12:30 Emun egkezezeetan niw en sikandan, mebantey kew he kenè kew mepekeizi pinaaǥi te ked-iring kandan. Kenè kew en mebpenginginsà bahin te menge ed-ezapen dan. Kenè kew kaǥi te, ‘Ebmenumenu zan is ebpenilbi te kandan he megbevayà? Ed-iringan tew is ebpen-ul-ulahan dan.’
DEU 12:31 Kenè niw iringi is paaǥi zan emun ed-ezapen niw is Nengazen he Megbevayè niw, su zutun te ked-azap dan ebeelan dan is langun he kelasi te utew mezaat he vaal he utew egkeepesi te Nengazen. Idtuug dan pa ganì is menge anak dan su ibpemuhat dan diyà te menge ed-ezapen dan.
DEU 12:32 “Tumana niw is langun he insuǥù ku keniyu. Kenè niw heini umani wey kenè niw terini.
DEU 13:1 “Emun duen ebpeneuven etawa pereseysey te kehuluǥan te teǥeinep he ebpenaad diyà te keniyu he ebpaahà sikandin te menge singyal wey menge egkein-inuwan he menge vaal,
DEU 13:2 ne egketuman is egkeǥiyen din, ne egkaǥi te, ‘Hendini kew su ed-azap kiw te selakew en he ebpen-ezapen’ (ebpen-ezapen he wazè niw mekilala),
DEU 13:3 kenè kew pemineg kandin. Egezaman kew zà te Nengazen he Megbevayè niw ke mahal niw ve sikandin diyà te tivuuk he gehinawa niw wey kedsavut niw.
DEU 13:4 Iyan dà is Nengazen he Megbevayè niw ereg he edsunuzen niw wey edtehuzen. Tumana niw is menge suǥù din wey sunuza niw sikandin; silbiyi niw sikandin wey kenè niw sikandin iniyuǥi.
DEU 13:5 Kinahanglan he edhimetayan haazà is ebpeneuven etawa pereseysey te kehuluǥan te teǥeinep, su ebpenuruen kew zin te kedribildi ziyà te Nengazen he Megbevayè niw he mibpeǥawas keniyu ziyà te Ehipto wey midlibri keniyu te kegkeuripen. Heeyan he etew, iyan tuyù din is para mekepekeziyù kew ziyà te menge paaǥi he inmandù keniyu te Nengazen he Megbevayè niw he sunuza niw. Mezaat heeyan ne ereg he id-awà.
DEU 13:6 “Penenglitan duen nu suled etawa anak, pinelanggè nu he esawa etawa utew nu emiǥu, he meeles he ed-iniyat kenikew ne egkaǥi te, ‘Ed-azap ki te selakew en he menge ed-ezapen’ (menge ed-ezapen he wazè nu mekilala wey te menge kepuun nu).
DEU 13:7 Emun ed-iniyaten ke zin te ked-azap te menge ed-ezapen te menge etew he nekeelingkus keniyu etawa menge etew ziyà te meziyù he lugar,
DEU 13:8 kenè ka mebpeuwit wey mebpemineg kandin. Kenè nu sikandin kehizuwi wey kenè nu levani.
DEU 13:9 Kinahanglan he edhimetayan sikandin. Iyan ka huna tuleng kandin te vatu te kedhimatey kandin, ne edsunud is kezekelan.
DEU 13:10 Ebpenulengen sikandin te vatu taman te kebpatey zin su geina te edtinguhà sikandin ebpekeziyù kenikew puun te Nengazen he Megbevayè nu, he mibpeǥawas kenikew ziyà te Ehipto he zutun kew pen-uripena.
DEU 13:11 Ne egkezineg heini te langun he menge Israilihanen ne egkengehandek sikandan, ne wazè en ebaal ziyà te keniyu te iring dutun te utew mezaat he vaal.
DEU 13:12 “Penenglitan ebpekezineg kew te tudtul he sevaha zuen te menge inged he ibeǥey te Nengazen he Megbevayà para egkeubpaan niw,
DEU 13:13 is duen duen lalung he menge etew he midtazin dan is menge meǥinged dutun he inged su migkaǥi sikandin te, ‘Ed-azap kiw te selakew en he menge ed-ezapen’ (menge ed-ezapen he wazè niw mekilala).
DEU 13:14 Kinahanglan he ebpurungan niw heini edsusiya ke tutuu ve. Ne emun tutuu he neulaula heini is utew mezaat he vaal,
DEU 13:15 kinahanglan he egeraan niw is langun he meǥinged dutun he inged ragkes en is menge uyaǥen dan. Kinahanglan he wazà edresik kandan.
DEU 13:16 Tiǥuma niw is langun he egkekuwa niw zutun he inged ne itambù niw ziyà te teliwazà te pelasa, ne vinsuli niw heini wey is tivuuk he inged he pemuhat he edtutungen para te Nengazen he Megbevayè niw. Ne ebey-anan en haazà is nezeetan he inged ne kenè en ed-umanan ebenguna taman te taman.
DEU 13:17 Kenè kew medtipig te minsan hengkey he vutang he zutun te inged su neteǥane en heeyan he edezeetan. Emun edtumanen niw heini is langun, id-awà te Nengazen is dekelà he pauk din, ne egkehizuwan kew zin. Ne tenged te hizu zin ibpemezakel kew zin sumalà is penangdù din diyà te menge kepuun niw.
DEU 13:18 Ebeelan heini te Nengazen he Megbevayè niw emun edtumanen niw is langun he menge suǥù din he ibeǥey ku keniyu ǥuntaan, wey ke ebaal kew te metazeng diyà te etuvangan din.
DEU 14:1 “Menge anak kew te Nengazen he Megbevayè niw. Umbe emun edlalew kew tenged te minatey, ne kenè niw pelii is keugelingen niw wey kenè niw kiskisi is ulu niw.
DEU 14:2 Su iyan kew menge etew he intapid puun te zuma he menge etew para te Nengazen he Megbevayè niw. Diyà te langun he menge etew kayi te kelibutan, iyan kew mibpilì te Nengazen he Megbevayè niw he para mehimu he ispisyal he menge etew zin.
DEU 14:3 “Kenè kew megkaan te minsan hengkey he langgam he ed-isipen he meremerik.
DEU 14:4 Iyan heini menge langgam he egkehimu he egkeenen niw: vaka, kerehidu, kambing,
DEU 14:5 selazeng, leew he kambing, leew he kerehidu, wey zuma he kelasi te selazeng.
DEU 14:6 Egkehimu he egkeenen niw is minsan hengkey he langgam he netevì is sulu zan wey ed-umanan dan edsepaa is kinaan dan.
DEU 14:7 Piru kenè niw keena is menge langgam he ed-uman edsepà te kinaan dan he wazà metevi is sulu zan, iring te kemilyu, rabit, wey badir. Heini he menge langgam isipa niw he meremerik.
DEU 14:8 Kenè niw zaan keena is bavuy, su minsan netevì is sulu kayi piru kenà kayi ed-umanan edsepaa is kinaan din. Kenè niw keena heini he menge langgam wey kenè niw semsama is minatey kandan.
DEU 14:9 “Egkehimu he egkeenen niw is minsan hengkey he egkeuyag diyà te wahig he zuen dan kapey wey hun-ap.
DEU 14:10 Piru kenè niw keena is wazè din kapey wey hun-ap. Isipa niw heini he meremerik.
DEU 14:11 Egkehimu he egkeenen niw is minsan hengkey he kelasi te tagbis he ed-isipen he lumpiyu.
DEU 14:12 Piru kenè niw keena is banug, uwak, menge tagbis he edaas te etew etawa langgam, dapay, ekang, kalamun, menge tagbis he ebpendawi te isdà, tulabung, dugwak, wey kaveg.
DEU 14:19 Kenè niw keena is menge dezeizey he keranapranap he ebpemenlayang.
DEU 14:20 Piru egkehimu he egkeenen niw is ebpemenlayang he ed-isipen he lumpiyu.
DEU 14:21 “Kenè niw keena is minsan hengkey he langgam he zaan he minatey. Egkehimu ke ibeǥey niw heini etawa ibelegyè niw ziyà te kenà menge Israilihanen he emurè niw te inged, ne egkeenen dan heini. Piru kenè kew mulà kaan kayi, su iyan kew menge etew he insivey para te Nengazen he Megbevayè niw. “Kenè niw sevawi is nati he kambing te gatas te iney zin.
DEU 14:22 “Kinahanglan he idtapid niw is ikepulù te langun he egkeraǥun niw ziyà te menge pemuleey niw kada tuig.
DEU 14:23 Uwita niw is ikepulù te menge paras, binu, wey lana niw, wey is kinekekayan te menge uyaǥen niw ziyà te lugar he ebpilien te Nengazen he Megbevayè niw he zutun sikandin ebeǥayi te zengeg. Ne ziyè niw heini keena te etuvangan din. Iyan id-ul-ulaha niw kayi su para mebmetau kew he layun edtahud te Nengazen he Megbevayè niw.
DEU 14:24 Iyan, emun meziyù diyà te keniyu is lugar he ebpilien te Nengazen, ne egkesemukan kew te ked-uwit te ikepulù te menge intuvad te Nengazen he Megbevayè niw keniyu,
DEU 14:25 liwai niw te selapì is ikepulù niw ne uwita niw haazà is selapì diyà te lugar he ebpilien te Nengazen he Megbevayè niw.
DEU 14:26 Ne ipemasa niw haazà is selapì te vaka, kerehidu, binu wey zuma pa he inumen, etawa minsan hengkey he egkesuatan niw. Ne zutun keena niw haazà te tivuuk he pemilya ziyà te etuvangan te Nengazen he Megbevayè niw duma is kedlipey.
DEU 14:27 Ne kenè niw lipati is menge Levihanen su wazà tanà he nepengevilin dan.
DEU 14:28 “Diyà te ketepusan te kada iketelu he tuig, tiǥuma niw is ikepulù te egkeraǥun niw zutun he tuig, ne uwita niw ziyà te teleǥuey kayì ziyà te inged niw.
DEU 14:29 Ne iveǥey niw heini ziyà te menge Levihanen (he wazà tanà he nepengevilin), diyà te kenà menge Israilihanen, diyà te menge ilu wey menge valu he vahi he ebpemen-ubpà diyà te menge inged niw su para mekekaan daan sikandan su wey zan mengahantey. Emun ed-ul-ulahan niw heini, edtuvazan kew te Nengazen he Megbevayè niw ziyà te langun he ebeelan niw.
DEU 15:1 “Ketepusan te kada ikepitu he tuig, kinahanglan he kenè niw en edsukuten is langun he utang diyà te keniyu.
DEU 15:2 Iyan heini veeli niw: kinahanglan he kenè en edsukuten te mibpeutang is utang te zuma zin he Israilihanen. Kenè din en edsukuten su neume en is timpu he midtelaan te Nengazen te ked-ewaa te menge utang.
DEU 15:3 Egkehimu ke edsukutan niw is kenà menge Israilihanen, piru kinahanglan he kenè niw en mulà edsukutan is duma niw he Israilihanen.
DEU 15:4 “Ereg he wazà pubri keniyu, su edtuvazan kew te Nengazen he Megbevayè niw zuen te tanà he ibeǥey zin keniyu wey niw maangken.
DEU 15:5 Iyan heeyan egkeulaula emun ebpezumdumahan niw is Nengazen he Megbevayè niw wey ebpurungan niw edsunuza is langun he menge suǥù he ibeǥey ku keniyu ǥuntaan.
DEU 15:6 Edtuvazan kew te Nengazen he Megbevayè niw sumalà te impenaad din keniyu. Mahabet he menge nasyun is ebpekepenambey ziyà te keniyu ne kenè kew mulà ebpekepenambey. Iyan kew edumala te zuma he menge nasyun ne kenè dan mulà ebpekezumala keniyu.
DEU 15:7 “Emun duen pubri ziyà te inged niw, zutun te tanà he ibeǥey keniyu te Nengazen he Megbevayè niw, kenè kew peleleǥed kandan.
DEU 15:8 Kekenà, tulengezi niw sikandan ne ipesambey niw sikandan te menge kinahanglan dan.
DEU 15:9 Kenè kew med-isip te selakew, kenè niw isipa he tenged te hapit en egkeuma is ikepitu he tuig, he iyan kes tuig he kenè en edsukuten is utang ne kenè kew en ebpeutang te pubri he zuma niw he meǥinged. Su emun edangep heini is pubri ziyà te Nengazen tenged te kebeeli niw zutun ne zuen niw televaken.
DEU 15:10 Kinahanglan he ebpuun te keputian te atey niw is kebeǥayi niw kandin. Emun ed-ul-ulahan niw heini ne edtuvazan kew te Nengazen he Megbevayè niw ziyà te langun he menge vaal niw.
DEU 15:11 Siguradu zuen menge pubri ziyà te nasyun niw, umbe ebmenduan ku sikiyu te kebeǥey kandan he ebpuun diyà te keputian te atey niw.
DEU 15:12 “Emun duen duma nu he Hebriyuhanen, maama man etawa vahi, he ebpeuripen kenikew, ne ebpekepenilbi en sikandin kenikew seled te heenem he tuig, ne zutun te ikepitu he tuig kinahanglan he ipeǥawas nu en sikandin te kegkeuripena nu kandin.
DEU 15:13 Ne emun ibpeǥawas nu en sikandin, ne kenè nu sikandin ipeǥenat he wazè din uwiten.
DEU 15:14 Tulengezi nu sikandin, beǥayi nu te menge uyaǥen, trigu, wey vinu, sumalà is kedtuvazi kenikew te Nengazen he Megbevayè nu.
DEU 15:15 Tentenuzi niw he menge uripen kew zengan diyà te Ehipto ne impeǥawas kew te Nengazen he Megbevayè niw. Iyan heeyan hinungdan ke maan is ibeǥey ku heini keniyu he suǥù guntaan.
DEU 15:16 “Piru emun egkaǥi haazà is uripen nu te, ‘Kenà a ed-awà diyà te kenikew su pelanggè ku sikew wey is pemilya nu, wey meupiya is kebpekesavuk ku ziyà te kenikew,’
DEU 15:17 ne zumaha nu sikandin diyà te ǥemawan te valey nu ne tinlangi nu is telinga zin ne zutun egkehimu en sikandin he uripen nu seled te tivuuk he untung din. Ne iring ded daan kayi is beeli nu ziyà te vahi he uripen nu.
DEU 15:18 “Kenè ka mebpengenuǥun emun ibpeǥawas nu en is uripen nu su is neǥastu nu kandin dutun te kebpenilbi zin kenikew seled te heenem he tuig, ne egketakep heeyan emun terebahanti is edsuhulan nu. Emun ed-ul-ulahan nu heini edtuvazan te Nengazen he Megbevayè nu is langun he menge vaal nu.
DEU 15:19 “Isivey niw he para te Nengazen he Megbevayè niw is kinekekayan he meemahan te menge uyaǥen niw. Kenè niw iterebahu is kinekekayan te menge vaka niw wey kenè niw eluti is kinekekayan te menge kerehidu niw.
DEU 15:20 Kekenà, keena niw heini zuma te pemilya niw ziyà te etuvangan te Nengazen he Megbevayè niw zuen te lugar he ebpilien din. Iyan heeyan beeli niw kada tuig.
DEU 15:21 Piru emun duen sazir zutun he uyaǥen, emun penenglitan piang etawa bulag etawa zuma he sazir, ne kinahanglan he kenè niw heini ipemuhat diyà te Nengazen he Megbevayè niw.
DEU 15:22 Kekenà, keena niw heini ziyà te menge inged niw. Ebpekekaan kayi is langun, ed-isipen man sikandin he neremerikan etawa lumpiyu, iring te kegkeena niw te selazeng etawa gasila.
DEU 15:23 Iyan, kinahanglan he kenè niw egkeenen is lengesa, iitis niw heini ziyà te tanà iring te wahig.
DEU 16:1 “Silibraha niw is Pista te Kedlavey te Belinsuǥuen te vulan he Abib para te kebeǥey te zengeg diyà te Nengazen he Megbevayè niw, su zutun he vulan impeǥawas kew zin diyà te Ehipto te mezukilem.
DEU 16:2 Pemuhat kew te kerehidu etawa vaka zutun te kedsilibraha niw te Pista te Kedlavey te Belinsuǥuen. Ipemuhat niw heini para te Nengazen he Megbevayè niw ziyà te lugar he ebpilien din he zutun sikandin ebeǥayi te zengeg.
DEU 16:3 Keena niw heini zuma te supas he wazè din tapey. Seled te pitu he andew kaan kew te supas he wazè din tapey iring te mibeelan niw hein egaanggaan kew is egenat puun te Ehipto, keenà niw heini he supas he simbulu te ked-antus niw, su para metenuzi niw seled te tivuuk he untung niw is timpu te kegawas niw puun te Ehipto.
DEU 16:4 Kinahanglan he wazà tapey he egkaahà diyà te menge valey niw seled te tivuuk he nasyun seled te pitu he andew. Wey kinahanglan he wazà egkesamà duen te usa he ibpemuhat taman te edsunud he meselem.
DEU 16:5 “Haazà is uyaǥen he ibpemuhat niw zutun te kedsilibriha niw te Pista te Kedlavey te Belinsuǥuen, ne kenè niw ipemuhat diyà te minsan hendei zà he inged he ibeǥey keniyu te Nengazen he Megbevayè niw,
DEU 16:6 kekenà, diyè niw zà ipemuhat te lugar he ebpilien din he zutun sikandin ebeǥayi te zengeg. Wey kinahanglan he ibpemuhat niw heini emun edsanlep en is andew he iyan kes uras te kebpuun niw ziyà te Ehipto.
DEU 16:7 Hilutua niw heini ne keena niw ziyà te lugar he ebpilien te Nengazen he Megbevayè niw. Ne emun meselem en ne likù kew ziyà te menge tulda niw.
DEU 16:8 Kaan kew te supas he wazè din tapey seled te heenem he andew. Ne te ikepitu he andew, kenè kew terebahu, kekenà, tiǥum kew te ked-azap te Nengazen he Megbevayè niw.
DEU 16:9 “Bilang kew te pitu he simana puun te kebpuun te tiraǥun.
DEU 16:10 Ne zutun silibraha niw is Pista te Kedraǥun te kebeǥey te zengeg diyà te Nengazen he Megbevayè niw pinaaǥi te kineugelingen he menge halad niw sumalà te menge tuvad he nezawat niw puun te Nengazen he Megbevayè niw.
DEU 16:11 Ne medlipey kew ziyà te etuvangan te Nengazen he Megbevayè niw ziyà te lugar he ebpilien din he zutun sikandin ebeǥayi te zengeg. Silibra kew zuma te menge anak niw, menge suluǥuen niw, menge Levihanen he menge meǥinged diyà te menge inged niw, menge kenà Israilihanen, menge ilu wey menge valu he vahi he menge meǥinged diyà te menge inged niw.
DEU 16:12 Tentenuzi niw he menge uripen kew zengan diyà te Ehipto, umbe purungi niw sunuza heini he menge sulunuzen.
DEU 16:13 “Silibraha niw is Pista te Kebaal te menge Lawig seled te pitu he andew zutun te kegketapus te tiraǥun, dutun te egkepasad en is kegunas te trigu wey egkekeres en is paras.
DEU 16:14 Medlipey kew is edsilibra kayi he pista duma te menge anak niw, menge suluǥuen niw, menge Levihanen, menge kenà Israilihanen, menge ilu wey menge valu he vahi he menge meǥinged diyà te inged niw.
DEU 16:15 Seled te pitu he andew is kedsilibraha niw kayi he pista te kebeǥey te zengeg te Nengazen he Megbevayè niw ziyà te lugar he ebpilien din. Su ebeǥayan kew te Nengazen he Megbevayè niw te zekelà he uzar wey edtuvazan din is langun he menge vaal niw, ne utew kew egkengelipey.
DEU 16:16 “Kada tuig, kinahanglan he edtampu is langun he menge maama niw kayi te tetelu he pista: is Pista te Supas he Wazè din Tapey, is Pista te Kedraǥun, wey is Pista te Kebaal te menge Lawig. Is kada sevaha kandan ne medhendiyà te etuvangan te Nengazen he Megbevayè niw ziyà te lugar he ebpilien din, ne kinahanglan he med-uwit sikandan te ibpemuhat dan diyà te Nengazen sumalà te egkehimu zan, sumalà te tuvad he imbeǥey kandan te Nengazen he Megbevayè niw.
DEU 16:18 “Pilì kew te menge zatù wey menge upisyal te kada tribu niw ziyà te langun he inged he ibeǥey keniyu te Nengazen he Megbevayè niw. Ne heini sikandan emun ebpenhusey zan ne kinahanglan he wazà egkevintahaan.
DEU 16:19 Kenè dan bulegkua is hustu he kukuman ne emun edhukum sikandan kinahanglan he wazè dan edlevanan. Kenè dan medawat te suhul su is suhul ebpekepelakap te uluwanen wey metazeng, wey ebpekeipiktu te kedhukum dan.
DEU 16:20 Kinahanglan he egkeikul is hustu he kukuman su wey kew meuyag ne egkaangken niw sikan is tanà he ibeǥey keniyu te Nengazen he Megbevayè niw.
DEU 16:21 “Kenè kew pehitindeg te tukud he simbulu zuen te vahi he ed-ezapen he si Ashera ziyà te avey te pemuhatà he ebeelan niw he para te Nengazen he Megbevayè niw,
DEU 16:22 wey kenè kew vangun te tedeman he vatu he para te ked-azap, su egkeepesan heini te Nengazen he Megbevayè niw.”
DEU 17:1 “Kenè niw pemuhata is Nengazen he Megbevayè niw te vaka etawa kerehidu he zuen din sazir, su utew mezaat is ked-isipa zin kayi.
DEU 17:2 “Penenglitan duen sevaha he maama etawa vahi he meǥinged diyà te sevaha zuen te menge inged he ibeǥey keniyu te Nengazen he Megbevayè niw he nezekepan he mibaal te vaal he mezaat is ked-isip duen te Nengazen he Megbevayè niw. Su midsupak din is paaǥi te Nengazen te kebpekid-uyun keniyu
DEU 17:3 wey midsupak te suǥù din pinaaǥi te ked-azap din te selakew en he ed-ezapen etawa andew etawa vulan etawa menge vituen.
DEU 17:4 Emun egkezineg niw heini kinahanglan he ebpurungan niw edsusiya. Ne emun tutuu he ebeelan diyà te Israel haazà is utew mezaat he vaal,
DEU 17:5 ne uwita niw haazà is mibaal ziyà te pultahan te inged niw ne penulenga niw te vatu taman te kebpatey zin.
DEU 17:6 Egkehimu he edhimetayan is etew emun egketuenan he nekesalà sikandin pinaaǥi te kebpenistiǥus te zezuwa etawa tetelu he menge tistiǥus, iyan, emun sevaha zà is ebpenistiǥus ne kenà egkehimu he edhimetayan.
DEU 17:7 Haazà is menge tistiǥus iyan edhuna edtuleng kandin te vatu, ne edsunud is kezekelan. Kinahanglan he id-awè niw haazà is mezaat he vaal pinaaǥi kayi.
DEU 17:8 “Penenglitan duen kasu ziyà te kurti niw he mehitenged te kedhimatey, kedtebek etawa kebpememuǥel he utew mereǥen he edisisyunan. Ne iyan beeli niw is, uwita niw heeyan he kasu ziyà te lugar he ebpilien te Nengazen he Megbevayè niw
DEU 17:9 he zutun is menge memumuhat he menge kevuwazan ni Levi wey is menge zatù he ebpengindatù dutun he timpu, ne iyan sikandan edisisyun dutun he kasu.
DEU 17:10 Kinahanglan he edewaten niw is disisyun he midhimu zan diyà te lugar he ebpilien te Nengazen. Tumana niw is langun he egkeǥiyen dan diyà te keniyu.
DEU 17:11 Ke hengkey is egkedisisyunan dan he pinesikad te kesuǥuan, ereg he edsunuzen niw. Kenè niw supaka is egkeǥiyen dan keniyu.
DEU 17:12 Is etew he kenà edawat te disisyun te zatù etawa memumuhat he ebpenilbi te Nengazen he Megbevayè niw zutun he timpu ereg he edhimetayan. Kinahanglan he id-awè niw heini he mezaat he vaal ziyà te Israel.
DEU 17:13 Ne ke egkezineg heini te langun he etew, ne egkahandek dan, ne kenè dan en human edsupak.
DEU 17:14 “Emun ebpekeseled kew en duen te tanà he ibeǥey keniyu te Nengazen he Megbevayè niw wey egkaangken niw en heini ne zutun kew en he meǥinged, egkaǥi kew te, ‘Ebpilì kiw te hadì he ebpengulu kenitew iring te menge nasyun diyà te peliǥuy kenitew.’
DEU 17:15 Kinahanglan he iyan niw ebpilien he hadì is etew he mibpilì te Nengazen he Megbevayè niw, wey kinahanglan he zuma niw he Israilihanen. Kenè kew pilì te kenà Israilihanen.
DEU 17:16 Kinahanglan he kenà ebpekehebeten te hadì niw is menge kudè din wey kenè din ipelikù diyà te Ehipto is menge etew zin te kebpemasa te menge kudà, su is Nengazen he Megbevayè niw migkaǥi ziyà te keniyu te kenè kew en likù diyà.
DEU 17:17 Kinahanglan he kenà mahabet is esawa zin su kela ke iniyuǥi zin is Nengazen wey kinahanglan he kenà sikandin med-angken te zekelà he selapì wey vulawan.
DEU 17:18 “Emun ebpinuu en sikandin diyà te pinuuwè din te kedhadì, kinahanglan he egkupya ziyà te etuvangan te menge memuhat he menge kevuwazan ni Levi kayi he menge kesuǥuan te para mismu kandin.
DEU 17:19 Kinahanglan he edtipiǥan din heini wey layun din ebesaha seled te tivuuk he untung din su para mekeistudyu te kedtahud te Nengazen he Megbevayè din ne egkepurung din egkesunud is langun he menge lalag kayi he menge kesuǥuan wey menge sulunuzen.
DEU 17:20 Pinaaǥi te layun din kebesaha kayi ne kenà sikandin ebpekepahambug he edhuna sikandin he meupiya te zuma zin he menge Israilihanen, ne kenà sikandin ebpekesupak te menge suǥù te Nengazen. Emun edtumanen din heini is langun ne ebpekahadì sikandin wey is menge kevuwazan din diyà te Israel te meluǥayad he timpu.
DEU 18:1 “Is menge memumuhat he kevuwazan ni Levi wey is duma pa he sakup te tribu ni Levi, iyan sikandan tribu te Israel he wazà tanà he egkepengevilin dan. Iyan dà egkekaan dan is puun duen te menge pemuhat pinaaǥi te hapuy he ibpemuhat diyà te Nengazen, su iyan heini kandan he egkepengevilin.
DEU 18:2 Kenè dan iring te menge zuma zan he menge Israilihanen su wazà mulà tanà he egkepengevilin dan; Nengazen is kandan he egkepengevilin sumalà te insaad din kandan.
DEU 18:3 “Iyan heini vahin te menge memumuhat he ebpuun te menge vaka etawa menge kerehidu he ibpemuhat te menge etew: is pemenayen, is bakà, wey is getek.
DEU 18:4 Iveǥey niw zaan diyà te menge memumuhat is egkehuna he vahin te trigu, binu, lana, wey vulvul te kerehidu niw.
DEU 18:5 Su ziyà te langun he tribu te Israel iyan sikandan wey is menge kevuwazan dan mibpilì te Nengazen he Megbevayè niw he ebpenilbi kandin taman te taman.
DEU 18:6 “Is minsan hentei he Levihanen he meǥinged diyà te minsan hendei he inged he sakup te Israel egkehimu ke edhendiyà te lugar he ebpilien te Nengazen,
DEU 18:7 ne ebpekepenilbi sikandin dutun te Nengazen he Megbevayè din iring te zuma zin he menge Levihanen he ebaal te vuluhaten diyà te etuvangan te Nengazen.
DEU 18:8 Ebpekezawat daan sikandin te kandin he vahin duen te menge ibpemuhat minsan duen selakew en he egkekuwa zin puun te pemilya zin.
DEU 18:9 “Emun ebpekeseled kew en duen te tanà he ibeǥey keniyu te Nengazen he Megbevayè niw, ne kenè niw iringi is utew mezaat he menge ulaula te menge meǥinged dutun.
DEU 18:10 Kinahanglan he wazà minsan sevaha keniyu he ibpemuhat din is anak din pinaaǥi te hapuy. Etawa ebpenagnà, etawa ebpeveveyilan, etawa ebpeǥingkuris, etawa teǥelemayan,
DEU 18:11 etawa mememarang, etawa ebaal te ebeelan te menge etew he edsarig te menge mulin-ulin, etawa ebpekidlalag te ǥimukud te nemematey en.
DEU 18:12 Is minsan hentei he ebaal kayi he menge vaal, ne mezaat is ked-isipa kandin te Nengazen. Iyan heeyan hinungdan ke maan is ibpesegseg keniyu te Nengazen he Megbevayè niw is menge etew keniyan he menge nasyun.
DEU 18:13 Kinahanglan he wazà igkesawey keniyu ziyà te etuvangan te Nengazen he Megbevayè niw.
DEU 18:14 “Heini he menge nasyun, is menge etew zuen he edsegseǥen niw, ne ebpemendangep diyà te ebpemenagnà etawa menge veyilan. Iyan, sikiyu mulà imbandu keniyu te Nengazen he Megbevayè niw is kebaal kayi.
DEU 18:15 Kekenà, duen ebpeneuven te Nengazen he Megbevayè niw he iring kedì su zuma niw he Israilihanen. Kinahanglan he ebpemineǥen niw sikandin.
DEU 18:16 Su iyan heini mibuyù niw ziyà te Nengazen he Megbevayè niw hein midtiǥum kew ziyà te Horeb. Migkaǥi kew te, ‘Kenè key en ipezineg te laǥeng te Nengazen he Megbevayè tew, wey kenè key ipaahà te edriyubriyub he hapuy su kela ke mebpemematey key.’
DEU 18:17 “Umbe migkaǥi is Nengazen kayi te kedì te, ‘Meupiya is hangyù dan.
DEU 18:18 Edsuǥù a ziyà te kandan te ebpeneuven ku he iring kenikew, su zuma zan he Israilihanen. Ne ibpekaǥi ku kandin is langun he egkesuatan ku te egkaǥi ziyà te kandan.
DEU 18:19 Edsilutan ku is minsan hentei he kenà ebpemineg te menge lalag ku he ibpekaǥi ku te ebpeneuven ku.
DEU 18:20 Kinahanglan he edhimetayan is ebpeneuven he wazè ku suǥua te kedlalag he egkaǥi he midsuǥù ku etawa egkaǥi te midsuǥù sikandin te selakew en he menge ed-ezapen.’
DEU 18:21 “Kela ke ed-insè kew te, ‘Hengkey is igketueni zey he is menge lalag te sevaha he ebpeneuven ne kenà diyà ebpuun te Nengazen?’
DEU 18:22 Emun kenà egkeulaula etawa kenà egketuman is egkeǥiyen te ebpeneuven he ibpekaǥi kun kandin te Nengazen, ne heeyan he lalag ne kenà lalag te Nengazen. Kekenà, keugelingen dà he lalag dutun te ebpeneuven, umbe kenè niw sikandin ikahandek.
DEU 19:1 “Emun edezeetan en te Nengazen he Megbevayè niw is menge etew ziyà te menge nasyun he ibeǥey zin keniyu is tanè dan, wey egkesegseg niw en sikandan ne ziyè kew en ebpemen-ubpà te menge inged dan wey menge valey zan,
DEU 19:2 ne pilì kew te tetelu he inged he eputà duen te tanà he ibeǥey keniyu te Nengazen he Megbevayè niw wey niw maangken.
DEU 19:3 Behina niw te tetelu he distritu sikan is tanà he ibeǥey keniyu te Nengazen he Megbevayè niw. Is kada distritu, kinahanglan he zuen duen inged he eputà. Ne purungi niw is menge zalan pehendutun te menge inged, para is minsan hentei he ebpekepatey te etew ne ebpekepelaǥuy ziyà te sevaha kayi he menge inged.
DEU 19:4 Emun ebpekepatey is sevaha he etew te zuma zin he etew he wazè din tivevaa wey wazà igkepeuki zin duen, ne ebpekepelaǥuy sikandin diyà te sevaha kayi he menge inged ne wazà edhilavet kandin.
DEU 19:5 “Penenglitan, mibpezumahà is dezuwa he telesiringan diyà te ketelunan su ebpengayu zan. Ne te kebpiley te kayu te sevaha kandan ne nepesuk is wasey zin, ne ziyà haazà meketimbag te zuma zin, ne impatey zin haazà. Ne egkehimu ke ebpelaǥuy sikandin diyà te sevaha kayi te menge inged he eputà ne wazà edhilavet kandin.
DEU 19:6 Emun sebsevaha zà is inged he eputà, kela ke meziyù diyà te etew he nekepatey, ne egkeseutan sikandin te edal-as kandin he ebpenimales, ne egkepatey sikandin. Kenà sikandin ereg he edhimetayan su wazè din tivevaa is kebpekepatey zin wey wazà igkepeuki zin dutun te nepatey zin.
DEU 19:7 Iyan heini hinungdan ke maan is idsuǥù ku keniyu is kebpilì te tetelu he inged he eputà.
DEU 19:8 “Ebpekeluaǥen te Nengazen he Megbevayè niw is tanè niw sumalà te impenaad din diyà te menge kepuun niw, ne ǥaked niw en haazà is tivuuk he tanà he impenaad din kandan.
DEU 19:9 Ebeelan heini te Nengazen he Megbevayè niw emun ebpurungan niw edsunuza heini is langun he suǥù he idsuǥù ku keniyu guntaan, he mahala niw sikandin wey pengungubpaan kew te edsungkad layun te menge paaǥi zin. Emun ebmeluag en is tanà niw ne umani niw en maan te tetelu is menge inged he eputà.
DEU 19:10 Umani niw is menge inged he eputà su para wazà etew he egkepatey he wazà mekesalà diyà te tanè niw he ibeǥey keniyu te Nengazen he Megbevayè niw para mepengevilin niw, wey para kenè kew mesukuti tenged te kegkepetaya te etew he wazà mekesalà.
DEU 19:11 “Piru emun edumut is sevaha he etew te iring din ne ebenteyanan din haazà ne edhimetayan din, ne ebpelaǥuy sikandin diyà te sevaha zuen te menge inged he eputà,
DEU 19:12 kinahanglan he ibpekuwa sikandin te menge edumala ziyà te inged din ne ibeǥey ziyà te egkesuat he ebales kandin su wey mehimetayi sikandin.
DEU 19:13 Kenè niw sikandin kehizuwi. Kinahanglan he id-awè niw puun te Israel is kebpenhimatey te wazà mekesalà he menge etew su para mebmeupiya is kebpekesavuk niw.
DEU 19:14 “Emun ebpekeuma kew en duen te tanà he ibeǥey keniyu te Nengazen he Megbevayè niw para maangken niw, kenè niw tekawa is tanà te zuma niw pinaaǥi te kedhelina te simintu te tanè din he impasek dengan te menge kepuun niw.
DEU 19:15 “Kenè kew hukum he nekesalà is sevaha he etew emun sevaha zà is ebpenististiǥus he nekesalà haazà. Is sumbung kinahanglan he zezuwa etawa tetelu he tistiǥus is ebpenistiǥus zuen.
DEU 19:16 Emun edtarùtarù diyà te husayen is sevaha he tistiǥus ne egkaǥi te nekesalà is sevaha he etew,
DEU 19:17 ne ibpehitindeg sikandan is dezuwa ziyà te etuvangan te Nengazen he ziyà te etuvangan te menge memumuhat wey menge zatù dutun he timpu.
DEU 19:18 Kinahanglan he ebpurungan sikandan ed-imbistigaha te menge zatù. Ne emun egkesusiyan dan he midtarùtarù haazà is tistiǥus pinaaǥi te ked-ulug te kewusa ziyà te zuma zin he etew,
DEU 19:19 ne kinahanglan he iyan sikandin edsilutan te silut he para pezem duen te insumbung din. Kinahanglan he id-awè niw heini he mezaat he vaal ziyà te keniyu.
DEU 19:20 Is ebpekezineg mehitenged kayi, ne egkahandek ne wazè en ebpekaaku he ebaal en maan te iring kayi te mezaat he vaal.
DEU 19:21 Kinahanglan he kenè kew mebpaahà te hizu niw. Emun edhimetayan te etew is iring din he etew, kinahanglan he edhimetayan daan sikandin. Emun mibpesè din is mata te iring din, kinahanglan he ebpesaan daan is mata zin. Emun midsepuan din is duma zin, kinahanglan he edsepuan daan sikandin. Emun midlepù din is belad etawa paa te zuma zin, kinahanglan he edlepuen daan is kandin he velad etawa paa.
DEU 20:1 “Emun edhipanew kew is ebpekidtebek te menge kuntada niw, ne egkeehè niw is menge kudè dan, menge kerwahi wey menge sundaru zan he edhuna he mahabet te keniyu, kenè niw sikandan ikahandek, su zuma niw is Nengazen he Megbevayè niw he mibpeǥawas keniyu ziyà te Ehipto.
DEU 20:2 Dutun te kenè kew pa edhendiyà te edtebekan medhitindeg dèpa ziyà te teliwazà is memumuhat ne keǥiyi zin is menge sundaru te,
DEU 20:3 ‘Pemineg kew is menge etew te Israel. Kenè kew mahandek kayi te kebpekidtebek niw ǥuntaan. Mebpekevurut kew wey kenè kew peteranta.
DEU 20:4 Su eduma keniyu is Nengazen he Megbevayè niw! Ebpekidtebek sikandin para keniyu kuntra te menge kuntada niw ne ibpezaag din keniyu sikandan!’
DEU 20:5 “Ne zutun egkaǥi is menge upisyal te menge sundaru te, ‘Ke zuen keniyu veǥu pa he nekevangun te valey zin he wazè din pa ikepehinungud diyà te Nengazen, ne med-ulì sikandin su kela ke mepatey sikandin te tebek ne sengeeetew en is ebpekepehinungud duen te valey zin.
DEU 20:6 Emun duen keniyu nekepemula te paras he wazè din pa mepulusi is beǥas kayi, med-ulì sikandin su kela ke mepatey sikandin te tebek ne sengeeetew is egkepulusan dutun.
DEU 20:7 Ke zuen keniyu hapit en ebpengesawa, med-ulì sikandin su kela ke mepatey sikandin te tebek ne sengeeetew is ebpekepengesawa te ed-esewaan din!’
DEU 20:8 “Ne megkaǥi pa is menge upisyal te, ‘Emun duen keniyu egkahandek etawa egkulbaan, ne med-ulì sikandin su kela ke elin kulbai is menge zuma zin.’
DEU 20:9 Ne emun ebpekepasad en he egkaǥi haazà is menge upisyal ziyà te menge sundaru, ne mebpilì dan te menge peremandar he ebpengulu te menge sundaru.
DEU 20:10 “Emun edsurungen niw is sevaha he inged, ne veǥayi niw te timpu is menge meǥinged te kedsurindir.
DEU 20:11 Emun edsurindir sikandan ne ebpuwasan dan is pultahan te inged dan para keniyu, ne uripena niw sikandan is langun ne ipeterebahu niw sikandan te para keniyu mesuat dan se kenà.
DEU 20:12 Iyan, emun kenè dan edsurindir su ebpekidtebek sikandan keniyu, lusuzi niw en sikandan.
DEU 20:13 Ne emun ibeǥey en sikandan keniyu te Nengazen he Megbevayè niw, penhimetayi niw is langun he menge maama kandan.
DEU 20:14 Piru egkehimu ke ebihaǥen niw is menge vahi, is menge vatà, wey menge uyaǥen dan, ne egkehimu ke egkuwaan niw is langun he menge azen he zutun te inged. Gemita niw heini he menge azen is imbeǥey te Nengazen he Megbevayè niw keniyu he ebpuun te menge kuntada niw.
DEU 20:15 Diyè niw zà heini veeli te meziyù he menge inged he wazà mesakup duen te tanà he ed-engkenen niw.
DEU 20:16 Piru is menge etew ziyà te menge inged he ibeǥey keniyu te Nengazen he Megbevayè niw su wey niw mepengevilin, geraa niw is langun.
DEU 20:17 Purungi niw zèdeeti is menge Hitihanen, menge Amorihanen, menge Canaanhen, menge Pirisihanen, menge Hivihanen, wey menge Jebusihanen, sumalà te insuǥù keniyu te Nengazen he Megbevayè niw.
DEU 20:18 Su emun kenè niw sikandan pudu egeraa, ne ibpenurù dan keniyu is langun he utew mezaat he menge vaal zan he ebeelan dan ke ed-ezapen dan is kandan he ebpen-ezapen, ne tenged kayi ebpekesalè kew ziyà te Nengazen he Megbevayè niw.
DEU 20:19 Emun egkeuǥet niw egkaaǥew is sevaha he inged, kenè niw pemilaya is menge kayu. Keena niw is menge veǥas kayi piru kenè niw pemilaya. Su kenè niw sikandan kuntada he ereg he edezeetan.
DEU 20:20 Piru egkehimu mulà ke ebpemilayen niw is menge kayu he kenà egkekaan is beǥas dan, ne egkeǥamit niw heini he himan para wazà ebpekepelaǥuy zutun te inged taman te egkaaǥew niw haazà.
DEU 21:1 “Penenglitan duen egkaahà he nepatey he etew ziyà te tanà he ibeǥey keniyu te Nengazen he Megbevayè niw su wey niw maangken, ne wazà metueni ke hentei is nekepatey kayi.
DEU 21:2 Kinahanglan he edsukuzen te ebpemendumala wey te menge zatù is keziyù dutun te nevunù diyà te menge inged he nekeelingkus.
DEU 21:3 Ne zutun haazà is ebpemendumala te inged he kineuvayan te nesevukan dutun te nepatey, megkuwa sikandan te vehiyan he vaka he wazè pa iketerebahu.
DEU 21:4 Ne uwita zan haazà diyà te tanà he uvey te zal-ug he wazè pa keenu meeradu wey wazè pa mepemulai is tanà he avey zin. Ne bunggua zan dutun haazà is baka.
DEU 21:5 Kinahanglan daan he edhendutun sikan is menge memumuhat he menge kevuwazan ni Levi, su mibpilì sikandan te Nengazen he Megbevayè niw he para ebpenilbi wey ebpenuvadtuvad pinaaǥi te ngazan te Nengazen, wey te kedhusey te langun he samuk.
DEU 21:6 Ne sikan is langun he ebpemendumala te inged he kineuvayan te nesevukan duen te nepatey, lùlui zan is menge velad dan diyà te zivavew zuen te vaka he mibunggù.
DEU 21:7 Ne megkaǥi sikandan te, ‘Kenè key iyan nekepatey wey wazè dey metueni ke hentei is nekepatey.
DEU 21:8 He Nengazen, peseyluwa nu is menge etew nu he Israilihanen he midlibri nu ziyà te Ehipto. Kenè nu sukuta ziyà te kenami is kemetayen kayi te etew he wazà mekesalà.’ Ne zutun wazè dan en televaken te kemetayen dutun te etew.
DEU 21:9 Pinaaǥi te kedtumana niw kayi kenè kew edsukutan te Nengazen te kemetayen he iring kayi, su neehè din he metazeng kew.
DEU 21:10 “Penenglitan mibpekidtebek kew te menge kuntada niw ne imbeǥey sikandan diyà te keniyu te Nengazen he Megbevayè niw, ne mibihag niw sikandan.
DEU 21:11 Ne penenglitan duen sevaha keniyu he nekaahà te mezagwey he vahi zuen te menge vihag ne nesuatan din haazà umbe egkesuatan din te ed-esawa.
DEU 21:12 Ne emun iyan heeyan, ne uwita zin haazà is bahi ziyà te valey zin ne venguli zin, penuluwi zin,
DEU 21:13 wey ilisi zin is imbivisti zutun te vahi hein nevihag sikandin. Kinahanglan he ibpeubpè din haazà is bahi ziyà te valey zin seled te senge vulan mintras idlalew zin is menge kepuun din. Ne emun egketapus en haazà, ne egkehimu en sikandin he ed-esewaan.
DEU 21:14 Piru emun egkepezaan sikandin dutun te vahi ke egkeuǥet, kinahanglan he ibpeǥenat din haazà is bahi diyà te minsan hendei he egkesuatan din te ebayà. Kenè din sikandin ivelegyà etawa kenè din uripena su mibpeel-elezan din en sikandin.
DEU 21:15 “Penenglitan duen sevaha he etew he zezuwa is esawa zin ne mahal zin is sevaha ne is sevaha wazè din mahala, ne zuen din menge anak diyà te kandan te zezuwa. Penenglitan is kinekekayan he anak din he maama ne anak duen te wazè din mahala.
DEU 21:16 Ne emun ebehinen din en is menge azen din diyà te menge anak din, kinahanglan he is bahin he para te kinekekayan he anak, ne kenè din iveǥey ziyà te anak duen te vahi he mahal zin. Kinahanglan he ibeǥey zin heini ziyà te kinekekayan he anak din minsan wazè din mahala is iney kayi.
DEU 21:17 Kinahanglan he egkilelaan din is kegkekakey zuen te kinekekayan he anak din minsan wazè din mahala is bahi he teǥianak duen. Ne ke sengemenu kezekelà is bahin te zuma, ne tekepa zin is ibahin din kandin su iyan sikandin nehuna he anak din ne zuen din ketenged te kedawat te vahin he para te kinekekayan he anak.
DEU 21:18 “Penenglitan duen sevaha keniyu he zuen din anak he maama he utew mesinupaken wey ebpekidsukulà, ne kenà ebpezumazuma te menge ginikanan din minsan ebmensuwen dan en sikandin.
DEU 21:19 Emun egkehitavù heini ne uwita zuen te menge ginikanan haazà is anak dan diyà te pultahan te inged he zutun sikan is ebpemendumala.
DEU 21:20 Ne egkeǥiyan dan haazà is ebpemendumala te, ‘Heini is anak dey, ne utew mesinupaken wey ebpekidsukulà kenami; ne kenà ebpezumazuma kenami. Gestedur sikandin wey lelenguten.’
DEU 21:21 Ne haazà, kinahanglan he ebpenulengen te vatu te langun he menge meǥinged dutun te inged taman te ebpatey. Kinahanglan he id-awè niw ziyà te keniyu heini he mezaat he vaal. Ne emun egkezineg heini te langun he menge Israilihanen ne egkahandek dan.
DEU 21:22 “Emun midsilutan is etew te kemetayen tenged te meveǥat he salà he nehimu zin, ne imbitey ziyà te kayu is lawa zin,
DEU 21:23 kinahanglan he kenà egkepewaan is lawa zin dutun te kayu. Kinahanglan he idleveng niw heini zutun dà te andew te kedhimetayi zuen, su is minsan hentei he imbitey ziyà te kayu ne midrewakan te Megbevayà. Kenè niw remeriki is tanà he ibeǥey keniyu te Nengazen he Megbevayè niw he egkepengevilin niw.
DEU 22:1 “Emun egkeehè niw he ebpekaawà is baka etawa kerehidu te zuma niw, ne kenè niw heini vey-ani kekenà, uwita niw ziyà te teǥiǥaked.
DEU 22:2 Piru emun meziyù is ed-ubpaan te teǥiǥaked etawa wazè niw mekilala is teǥiǥaked, uwita niw ziyà te keniyu haazà is uyaǥen ne taǥad kew te kebpekeuma te teǥiǥaked he ebpen-ahà duen. Ne iveǥey niw heini ziyà te kandin.
DEU 22:3 Ne iring daan kayi is beeli niw ke zuen asnu etawa manggad wey minsan hengkey he azen he egketazin te zuma niw. Kenè niw heini vey-ani.
DEU 22:4 “Emun egkeehè niw is asnu etawa vaka te zuma niw he nepiley ziyà te zalan, kenè niw heini vey-ani. Uǥupi niw is teǥiǥaked te kebpehitindeg kayi.
DEU 22:5 “Is bahi kenà mebivisti te visti he para te maama, ne is maama ne kenà mebivisti te visti he para te vahi, su egkeepesan te Nengazen he Megbevayè niw is ebaal kayi.
DEU 22:6 “Emun ebpekeehè kew te salag te tagbis diyà te uvey te zalan, diyà te kayu etawa tanà, he edlekupan duen te iney haazà is menge pispis din etawa menge impis din, ne kenè niw kuwaa haazà is iney zuma te menge pispis din etawa impis din.
DEU 22:7 Egkehimu ke egkuwaan niw is menge pispis etawa menge impis, piru kinahanglan he ibpaawè niw is iney, su para mebmeupiya is kebpekesavuk niw wey para mebmeluǥayad is untung niw.
DEU 22:8 “Emun ebevaley kew, kinahanglan he edteuzan niw te alang is ebpekeliǥuy zuen te patag he atep niw, su para wazè niw televaken emun duen ebpatey he egkeulug puun te atep niw.
DEU 22:9 “Kenè kew mebpemula te selakew en he pinemula ziyà te pemuleey niw te paras. Su emun ebeelan niw heini, ne egkeǥaked te valey te Nengazen is beǥas te menge impemula niw ragkes en is beǥas duen te impemula niw ziyà te pemuleey niw te paras.
DEU 22:10 “Emun ed-eradu kew ne kenè niw ipebperisà is baka wey is asnu.
DEU 22:11 Kenè kew mebivisti te hinavel he impedsahug is dezuwa he kelasi te helevelen.
DEU 22:12 “Pikiti niw te zayandayan is heepat he suyuk te melayat he samput niw.
DEU 22:13 “Penenglitan, mid-esawa te maama is bahi, ne kegkepasad te kebpeuvayè dan, ne nepeukan dutun te maama haazà is esawa zin
DEU 22:14 ne mibutbutangan din. Ke sikandin te, ‘Netuenan ku pinaaǥi te kedhileveti ku te esawa ku he zuen en nehuna he nekehilavet kandin.’
DEU 22:15 Ne medhendiyà is menge ginikanan dutun te vahi te ebpemendumala te inged he ziyà te pultahan te inged. Ne med-uwit sikandan te tuus he wazè pa zuma he nekehilavet duen ta anak dan.
DEU 22:16 Ne megkaǥi is amey zutun te vahi ziyà te ebpemendumala te, ‘Impeesawa ku is anak ku kayi he etew ne ǥuntaan nepeukan din is anak ku.
DEU 22:17 Ne mibutbutangan din is anak ku pinaaǥi te kegkaǥi te zuen en nehuna he nekehilavet te anak ku te wazè dan pa meked-esawa. Piru heini zed is tuus he wazè pa zuma he nekehilavet te anak ku.’ Ne zutun ibpeehè dan te ebpemendumala is dempas te hizeǥaan dutun te teleesawa he nengelengesahan.
DEU 22:18 Ne edekepen dutun te ebpemendumala haazà is maama ne edsilutan dan.
DEU 22:19 Edselaan dan sikandin te 100 he vuuk he selapì ne ibeǥey haazà diyà te amey te vahi, su mibpeel-elezan din is sevaha he Israilihanen he wazè pa mehileveti te zuma. Kinahanglan he kenè din suwayi haazà is bahi mintras uuyag pa sikandin.
DEU 22:20 “Piru emun tutuu is egkeǥiyen dutun te maama su wazà egkaahà he tuus he wazè pa zuma he nekehilavet dutun te vahi,
DEU 22:21 ne ed-uwiten haazà is bahi diyà te etuvangan te valey te amey zin ne edtulengen sikandin te vatu te menge maama zutun te inged taman te kebpatey zin. Su mekeeled-eled he vaal is mibeelan din diyà te Israel pinaaǥi te kebpehilavet dutun te ziyè pa sikandin ed-ubpà te valey te amey zin. Kinahanglan he id-awè niw heini he mezaat he vaal ziyà te keniyu.
DEU 22:22 “Emun egkezekepan is sevaha he etew he edhilavet te vahi he zuen din esawa ne kinahanglan he edhimetayan sikandan is dezuwa. Kinahanglan he id-awè niw heini he mezaat he vaal puun te Israel.
DEU 22:23 “Emun edhilavet is sevaha he etew te vahi he hapit en ed-esewaa, ne ziyà haazà mehitavù te sevaha he inged,
DEU 22:24 ne uwita niw haazà is dezuwa ziyà te pultahan te inged ne edtulengen sikandan te vatu taman te kebpatey zan. Edhimetayan haazà is bahi su minsan diyà sikandin te inged ne wazà mebpetavang pinaaǥi te kebpengulahi. Edhimetayan haazà is maama tenged te midhilevetan din is bahi he hapit en ed-esewaa. Kinahanglan he id-awè niw heini he mezaat he vaal ziyà te keniyu.
DEU 22:25 “Piru emun midlayug dutun te maama haazà is bahi he hapit en ed-esewaa diyà te gawas te inged, ne iyan dà edhimetayan sikan is maama.
DEU 22:26 Kenè niw mulà menuwa sikan is bahi, su wazà sikandin mekesalà te ereg he idhimetayi kandin. Heini he kasu iring ded te kasu te etew he midlusuzan din is duma zin ne midhimetayan din.
DEU 22:27 Geina te ziyà leyuǥa haazà is bahi te ǥawas te inged. Minsan ebpengulahì pa sikandin is ebpetavang ne wazà gihapun ebpeketavang su wazà ebpekezineg.
DEU 22:28 “Emun egkezekepan is sevaha he maama he midlayug din is raǥa he kenè pa ed-esewaan,
DEU 22:29 kinahanglan he ibpevayad haazà is maama te 50 he vuuk he pelata ziyà te amey te vahi. Ne kinahanglan he ed-esewaan din haazà is bahi su mibpeǥes din man, ne kinahanglan he kenè din edsuwayan mintras uuyag pa sikandin.
DEU 22:30 “Kinahanglan he kenà hileveti te anak is esawa te amey zin. Su egkepeel-elezan haazà is amey.
DEU 23:1 “Is etew he migkapun etawa midtamped is pid-etawan din kenà egkehimu he edtampu te upakat he para te Nengazen.
DEU 23:2 “Is etew he ingkeǥingey zà ne kenà egkehimu he edtampu te upakat he para te Nengazen ragkes en is menge kevuwazan din taman te ikesepulù he lapis.
DEU 23:3 Is menge Amunihanen wey is menge Moabitanhen etawa minsan hentei te menge kevuwazan dan taman te ikesepulù he lapis, ne kenà egkehimu he edtampu te upakat he para te Nengazen.
DEU 23:4 Su wazà kew zan beǥayi te keenen etawa wahig hein midhipanew kew puun te Ehipto, ne midsuhulan dan pa si Balaam is anak ni Beor he tig-Petor ziyà te Aram Naharaim te kedrawak keniyu.
DEU 23:5 Piru wazà pemineǥa te Nengazen he Megbevayè niw si Balaam. Kekenà, midhimu zin he tuvad sikan is rawak pezem keniyu, su mahal kew te Nengazen he Megbevayè niw.
DEU 23:6 Mintras uuyag kew pa ne kenè niw tevangi is menge Amunihanen etawa menge Moabitanhen te minsan hengkey he paaǥi.
DEU 23:7 “Kenè niw keepesi is menge Edomanhen, su kezuzumahi niw sikandan. Kenè niw zaan keepesi is menge Ehiptohanen, su nekeubpè kew ziyà te tanè dan hein lumelengyawè kew.
DEU 23:8 Is menge kevuwazan dan diyà te iketelu he lapis, ne egkehimu en he edtampu ziyà te menge etew te Nengazen.
DEU 23:9 “Emun ebpekidtebek kew te menge kuntada niw ne likayi niw is minsan hengkey he ebpekeremerik keniyu.
DEU 23:10 Ke zuen keniyu egewasan te similya zutun te kebpekelipezeng din ke mezukilem, kinahanglan he egawas sikandin diyà te kampu ne ziyè dèpa med-ubpàubpà te ǥawas.
DEU 23:11 Emun mahapun en, ne mebpemeziǥù sikandin, ne te kedsanlep te andew ne egkehimu en sikandin he edlikù diyà te kampu.
DEU 23:12 “Pilì kew te lugar he edhimuwen niw he indesà diyà te gawas te kampu.
DEU 23:13 Is kada sevaha keniyu, ne kinahanglan he zuen din himan he para te igkutkut, su para emun ed-indes kew ne egkutkut kew te ed-indesan niw ne tembuni niw haazà.
DEU 23:14 Su is Nengazen he Megbevayè niw edliǥuyliǥuy ziyà te kampu niw te kedlibri keniyu wey ibeǥey zin diyà te keniyu is menge kuntada niw. Umbe kinahanglan he lumpiyu is kampu niw su para wazè din egkaahà he kenà meupiya, su para kenè kew zin ewai.
DEU 23:15 “Emun duen uripen he ebpeleǥuyan din is egalen din ne ziyà edangep te kenikew, ne kenè nu sikandin teǥela te kedlikù diyà te egalen din.
DEU 23:16 Ipeubpè niw ziyà te lugar niw ke hendei sikandin he inged egkesuat. Ne kenè niw sikandin lisliseza.
DEU 23:17 “Kinahanglan he wazà Israilihanen he maama etawa vahi, he ebelegyà te zengeg din diyà te simbahan he paaǥi te ked-ezapa te zuma he menge ed-ezapen.
DEU 23:18 Kenè niw uwita ziyà te valey te Nengazen he Megbevayè niw is selapì he egkekuwa niw pinaaǥi keniyan su ibayad niw te penaad niw kandin, su utew heini mezaat diyà te kandin.
DEU 23:19 “Emun ibpesambey niw is duma niw he Israilihanen, ne kenè niw ipaanak, selapì man haazà etawa keenen etawa minsan hengkey he egkehimu he ibpaanak.
DEU 23:20 Egkehimu mulà ke ibpaanak niw is ibpesembayan niw te kenà Israilihanen, piru kenà egkehimu emun duma niw he Israilihanen. Beeli niw heini su para tuvazi kew te Nengazen he Megbevayè niw ziyà te langun he ebeelan niw zuen te tanà he ed-engkenen niw.
DEU 23:21 “Emun ebpenaad kew ziyà te Nengazen he Megbevayè niw, kenè kew meduwazuwa is edtuman dutun, su kenà duwazuwa he edsukuten heini te Nengazen he Megbevayè niw, wey ebpekesalè kew emun kenè niw heini edtumanen.
DEU 23:22 Kenà heeyan salà emun wazè kew mebpenaad diyà te Nengazen.
DEU 23:23 Piru minsan hengkey he ibpenaad niw ziyà te Nengazen he Megbevayè niw, kinahanglan he tumana niw.
DEU 23:24 “Emun ebpekehendiyè kew te pemuleey te paras te zuma niw he Israilihanen, egkehimu ke ebpehanteyhantey kew en te paras, piru kenè kew penguwa te ed-uwiten niw.
DEU 23:25 Emun ebpekehendiyè kew te pemuleey te trigu te zuma niw he Israilihanen, egkehimu he egketuwen niw is trigu, piru kenè niw heini ǥerava.
DEU 24:1 “Penenglitan, ebpengesawa is sevaha he maama ne te huziyan he timpu naawà is suat din dutun te esawa zin su zuen nesusi zin dutun te esawa zin he wazè din mesuati. Ne tenged dutun mibaal sikandin te surat he para te kebpekidsuwey ne imbeǥey zin haazà dutun te esawa zin, ne impeǥenat din puun te valey zin.
DEU 24:2 Ne emun ed-uman ebpeesawa haazà is bahi,
DEU 24:3 ne edsuwayan en maan sikandin duen te ikezuwa he esawa zin etawa ebpatey haazà is ikezuwa he esawa zin,
DEU 24:4 ne kenè en egkehimu ke ed-umanan sikandin ed-esawaa zuen te nehuna he esawa zin su mibmeremerik en sikandin. Emun ed-umanan sikandin ed-esewaa zuen te nehuna he esawa zin ne utew mezaat he vaal is ked-isipa te Nengazen keniyan. Kinahanglan he kenè niw veeli heeyan he salà dutun te ked-ubpè niw zuen te tanà he ibeǥey keniyu te Nengazen he Megbevayè niw he egkepengevilin niw.
DEU 24:5 “Emun beǥu he ebpekeesawa is etew, kinahanglan he kenà sikandin ibpetampu te tebek etawa kenà sikandin ebeǥayan te minsan hengkey he vuluhaten diyà te inged seled te senge-tuig, su para ziyè dà sikandin mekeubpàubpà te valey zin su wey zin meveǥayi te kelipey is esawa zin.
DEU 24:6 “Kenè nu kuwaa he sandà is gelingan te ed-utang diyà te kenikew, su egkuwaan nu ziyà te kandin is igkeuyag-uyag din.
DEU 24:7 “Ke zuen egkezekepan he migebpaan din is duma zin he Israilihanen ne mid-uripen din haazà etawa imbelegyè din, kinahanglan he edhimetayan haazà is nemenggebpà. Kinahanglan he id-awè niw heini he mezaat he vaal ziyà te keniyu.
DEU 24:8 “Bahin te mekelimlimezang he zaru te lundis, purungi niw sunuza is menge sulunuzen he ibpeveelan keniyu te menge memumuhat he menge kevuwazan ni Levi. Tumana niw is insuǥù ku kandan.
DEU 24:9 Tentenuzi niw ke hengkey is mibeelan te Nengazen he Megbevayè niw ki Miriam hein edhipanew kew puun te Ehipto.
DEU 24:10 “Emun ebpeutang kew te minsan hengkey te zuma niw he Israilihanen, kenè kew seled diyà te valey zin te kegkuwa te minsan hengkey he idsandè din.
DEU 24:11 Taǥad kew zà diyà te ǥawas ne ed-uwiten din diyà te keniyu is idsandè din diyà te keniyu.
DEU 24:12 Emun samput is insandà te pubri he etew ziyà te keniyu, ne kenè niw heini pepewai ziyà te keniyu. Iulì niw heini ziyà te kandin te kenè pa edsanlep is andew su wey zin meǥamit para te kedlipezeng din, ne ebpeselamatan ke zin pa. Ne metazeng he vaal is ked-isipa kayi te Nengazen he Megbevayè niw.
DEU 24:14 “Kenè kew mebpemintahà te pubri he terebahanti, Israilihanen man sikandin etawa kenà Israilihanen he meǥinged diyà te inged niw.
DEU 24:15 Beyazi niw sikandin te inandew he suwildu zin te kenè pa edsanlep is andew su pubri sikandin ne iyan midseriǥan din is suwildu zin. Su emun kenà, ne kela ke medsumbung sikandin diyà te Nengazen, ne ed-isipen heini he salè nu.
DEU 24:16 “Is menge ǥinikanan, kenà ereg he edhimetayan tenged te salà te menge anak dan etawa is menge anak tenged te salà te menge ginikanan dan; is kada sevaha edhimetayan tenged te keugelingen din he salà.
DEU 24:17 “Beǥayi niw te hustu he kukuman is menge ilu wey is kenà menge Israilihanen he zuma niw he meǥinged. Kenè niw pesendai te valu he vahi is utang din te samput din.
DEU 24:18 Tentenuzi niw he menge uripen kew zengan diyà te Ehipto ne midlibri kew te Nengazen he Megbevayè niw. Iyan heeyan idsuǥua ku keniyu te kebaal kayi.
DEU 24:19 “Emun edraǥun kew ne ke zuen egketaǥak niw he pira he rupung dutun te vevesukà, kenè niw en haazà likui te egkuwa. Teǥaka niw en heini he para te kenà menge Israilihanen, para te menge ilu wey menge valu he vahi, su para tuvazi kew te Nengazen he Megbevayè niw ziyà te langun he menge vaal niw.
DEU 24:20 Emun edraǥun kew te ulibu ne kenè niw en likui is egkesamà. Teǥaka niw en heini he para te kenà menge Israilihanen, para te menge ilu, wey te menge valu he vahi.
DEU 24:21 Emun edraǥun kew te paras niw, ne kenè niw en likui is nengesamà, kekenà, teǥaka niw en heini para te kenà menge Israilihanen, para te menge ilu, wey para te menge valu he vahi.
DEU 24:22 Tentenuzi niw he menge uripen kew zengan diyà te Ehipto. Iyan heeyan idsuǥua ku kayi keniyu.”
DEU 25:1 “Penenglitan duen egketebekaayan te zezuwa he etew ne haazà he kasu mid-uwit dan diyà te kurti, ne midhukum is menge datù ke hentei kandan is nekesalà wey ke hentei is wazà mekesalà.
DEU 25:2 Ne emun iyan hukum te zatù he ebpenlegkuten haazà is nekesalà, ne ibpelangkeb sikandin diyà te etuvangan duen te zatù ne ebpenlegkuten sikandin te sungkad is kahabet din te salà he nehimu zin.
DEU 25:3 Piru kenà ebpesubrahan te 40 he lagkut su emun edsubra te 40 ne egkepeel-elezan sikandin.
DEU 25:4 “Kenè niw busali is baka he ibpeǥunas niw.
DEU 25:5 “Is telesuled he maama he ed-ubpà diyà te sevaha zà he tanà, emun minatey is sevaha kandan he wazè din anak, is esawa zin kenà ereg he ebpeesawa te zuma he kenà sakup te pemilya te esawa zin. Is suled te esawa zin ne iyan ereg he ed-esawa kandin. Ne ketengdanan heini te ipag din diyà te kandin.
DEU 25:6 Ne is kinekekayan he anak dan ne ed-isipen he anak duen te minatey he suled dutun te maama su para kenà maawà is ngazan din diyà te Israel.
DEU 25:7 “Iyan, emun kenà egkesuatan te ed-esawa te suled duen te minatey haazà is balu, ne medhendiyà haazà is balu te ebpemendumala he ziyà te pultahan te inged ne megkaǥi te, ‘Kenà egkesuat is ipag ku he ebeǥey te kevuwazan he ebpekeuwit te ngazan te minatey he esawa ku kayi te Israel. Kenè din edtumanen is ketengdanan din kayi te kediey te ipag din.’
DEU 25:8 Ne zutun ibpetawag sikandin te ebpemendumala te inged ne ebpekidlalag sikandan kandin. Ne emun kenè din ed-esewaan haazà is balu,
DEU 25:9 ne med-uvey haazà is balu ziyà te etuvangan te ebpemendumala ne pul-uta zin is sandalyas duen te ipag din wey ilevi zin diyà te vuked duma is kegkaǥi te, ‘Iyan heini ebeelan diyà te etew he kenà egkesuat he ebeǥey te kevuwazan diyà te suled din he minatey.’
DEU 25:10 Ne is pemilya kayi he etew ne iyan igngazan duen diyà te Israel is pemilya he mibpul-utan te sandalyas.
DEU 25:11 “Emun duen dezuwa he maama he ebpetebekà ne ed-uvey is esawa te sevaha su edtevangan din is esawa zin pinaaǥi te keburegnusa zin te sineruwan te kuntra te esawa zin,
DEU 25:12 ne kinahanglan he edtempezen is belad dutun te vahi ne kenà egkehizuwan.
DEU 25:13 “Kenè kew medlimbung emun edtimbang kew etawa edsukud kew.
DEU 25:15 Gamit kew te hustu he timbangan wey hustu he sukud, su para mekembuwayan kew zuen te tanà he ibeǥey keniyu te Nengazen he Megbevayè niw.
DEU 25:16 Su mezaat is ked-isipa te Nengazen he Megbevayè niw te etew he ebpenlimbung.
DEU 25:17 “Tentenuzi niw ke hengkey is mid-ulaula te menge Amalikanhen diyà te keniyu hein migawas kew puun te Ehipto.
DEU 25:18 Midlusuzan kew zan dutun te utew kew en nengeveley, ne mibpenhimetayan dan is menge zuma niw he ziyà te huziyanan. Wazè dan kegkahandek te Megbevayà.
DEU 25:19 Umbe, dèdeeti niw is menge Amalikanhen emun ibpehimeley kew en te Nengazen he Megbevayè niw su egkezaag niw en is langun he menge kuntada niw zuen te tanà he ibeǥey zin keniyu su wey niw maangken. Ne kenè niw heini lipati.
DEU 26:1 “Emun egkaangken niw en sikan is tanà he ibeǥey keniyu te Nengazen he Megbevayè niw wey niw mepengevilin, ne zutun kew en he meǥinged,
DEU 26:2 itaǥù niw ziyà te revan is egkehuna he egkeraǥun niw. Ne uwita niw heini ziyà te lugar he ebpilien te Nengazen he Megbevayè niw he zutun sikandin ebeǥayi te zengeg.
DEU 26:3 Ne hendiyè kew te memumuhat he ebaal te vuluhaten dutun he timpu, ne kaǥi kew ziyà te kandin te, ‘Heini zed is halad ku he tuus te kegkilelaa ku he is Nengazen he Megbevayè tew iyan mid-uwit kedì kayi te tanà he impenangdù din diyà te menge kepuun tew he ibeǥey kenitew.’
DEU 26:4 “Ne zutun egkuwaan duen te memumuhat sikan is revan diyà te keniyu ne idsavuk din diyà te etuvangan te pemuhatà he para te Nengazen he Megbevayè niw.
DEU 26:5 Ne kaǥi kew ziyà te etuvangan te Nengazen he Megbevayè niw te: ‘Is kepuun dey he si Jacob, sevaha he Aramihanen he wazà dengan netendek he ubpeey zin. Midhendiyà sikandin te Ehipto ne mid-ubpà diyà duma te pemilya zin. Deisey zà sikandan dengan, piru te huziyan he timpu mibmahabet sikandan, midekelè dan, ne nehimu zan he mekeǥeǥehem he nasyun.
DEU 26:6 Mibpesipelahan key te menge Ehiptohanen. Impaantus key zan ne mibpeǥes key zan te kedterebahu.
DEU 26:7 Ne mibuyù key te tavang diyà te Nengazen, he Megbevayà te menge kepuun dey, ne mibpemineg key zin. Neehè din is ked-antus dey, kegkeveley zey, wey is kedluplupiǥa kenami.
DEU 26:8 Umbe, migkuwa key te Nengazen diyà te Ehipto pinaaǥi te zekelà he ǥehem din wey mekahandekhandek he menge vaal. Mibaal sikandin te menge singyal wey menge egkein-inuwan he menge vaal.
DEU 26:9 Ne mid-uwit key zin kayi he lugar, ne imbeǥey zin kenami heini is meupiya wey selebpeten he tanà.
DEU 26:10 Umbe, ed-uwiten dey ziyà te kenikew, Nengazen, is egkehuna egkeraraǥun dey te sebpet te tanà he imbeǥey nu kenami.’ Ne emun egkepasad niw en heeyan te egkaǥi, ne isavuk niw sikan is revan diyà te etuvangan te Nengazen he Megbevayè niw, ne ezapa niw sikandin.
DEU 26:11 Ne medlipey kew tenged te meupiya he menge vutang he ibeǥey keniyu te Nengazen he Megbevayè niw wey ziyà te pemilya niw. Dumaha niw te kedsilibra is menge Levihanen wey is kenà menge Israilihanen he zuma niw he meǥinged.
DEU 26:12 “Kada iketelu he tuig iveǥey niw is ikepulù te menge abut niw ziyà te menge Levihanen, diyà te kenà menge Israilihanen, diyà te menge ilu, wey menge valu he vahi, su para kenà megkurang is keenen dan.
DEU 26:13 Ne kaǥi kew ziyà te etuvangan te Nengazen he Megbevayè niw te: ‘Migkuwa ku en puun te valey ku is segradu he vahin he iyan is ikepulù, ne imbeǥey ku ziyà te menge Levihanen, diyà te kenà menge Israilihanen, diyà te menge ilu, wey te menge valu he vahi su iyan heini insuǥù nu kenami. Wazè ku repasa wey lipati is minsan sevaha zuen te menge suǥù nu.
DEU 26:14 Wazè ku heini keena zutun te timpu te kedlalew ku; wazè ku heini kevuta hein ed-isipen a he meremerik; wey wazè ku heini ipemuhat diyà te minatey. He Nengazen he Megbevayè ku, mibpezumazuma a kenikew. Mibeelan ku is langun he insuǥù nu kenami.
DEU 26:15 Seǥipaa key kenikew puun diyan te segradu he ubpeey nu ziyan te langit, ne tuvazi nu is menge etew nu he Israilihanen wey is meupiya wey selebpeten he tanà he imbeǥey nu kenami sumalà is impenangdù nu ziyà te menge kepuun dey.’
DEU 26:16 “Edsuǥuen kew ǥuntaan te Nengazen he Megbevayè niw he tumana niw heini is langun he suǥù wey sulunuzen. Purungi niw heini tumana te kedtuman he ebpuun diyà te tivuuk he gehinawa niw wey kedsavut niw.
DEU 26:17 Impahayag niw ǥuntaan he iyan is Nengazen Megbevayè niw ne ebpengungubpaan kew te sungkad te menge paaǥi zin, wey edtumanen niw is menge suǥù din wey is imbeǥey zin he menge sulunuzen, ne edsunuzen niw sikandin.
DEU 26:18 Ne impahayag daan te Nengazen ǥuntaan he iyan kew ispisyal he menge etew zin sumalà is penaad din, ne kinahanglan he edtumanen niw is langun he menge suǥù din.
DEU 26:19 Ne sumalà is penaad din, edhimuwen kew zin he lavew te langun he menge nasyun, ne edeliǥen kew wey ebeǥayan kew te dengeg. Egkehimu kew he menge etew he pinilì te Nengazen he Megbevayè niw.”
DEU 27:1 Ne mibmenduan ni Moises wey te ebpemendumala te Israel is menge etew, ke sikandin te: “Tumana niw is langun he suǥù he ibeǥey ku keniyu ǥuntaan.
DEU 27:2 Emun ebpekelayun kew en te Jordan ne ziyè kew en te tanà he ibeǥey keniyu te Nengazen he Megbevayè niw, ne tambù kew te zezekelà he vatu ne lupita niw heini te apug.
DEU 27:3 Ne isurat niw zutun te menge vatu is langun he kesuǥuan emun ebpekeseled kew en duen te meupiya wey selebpeten he tanà he ibeǥey keniyu te Nengazen he Megbevayè niw, kes Megbevayà te menge kepuun niw, iyan heini impenaad din keniyu.
DEU 27:4 Emun ebpekelayun kew en te Jordan, diyè niw venguna heini is menge vatu te Buntud he Ebal, sumalà is inmandù ku keniyu ǥuntaan, ne lupita niw heini te apug.
DEU 27:5 Ne vaal kew zutun te pemuhatà he vatu he para te Nengazen he Megbevayè niw. Kenè niw vesbasi is menge vatu he egemiten niw.
DEU 27:6 Kinahanglan he kenà egkesepsapan is menge vatu he ebeelan niw he pemuhatà. Ne pemuhat kew kayi te menge pemuhat he edtutungen para te Nengazen he Megbevayè niw.
DEU 27:7 Pemuhat kew zaan te pemuhat he para te meupiya he kedepità, ne keena niw haazà dutun, ne medlipey kew ziyà te etuvangan te Nengazen he Megbevayè niw.
DEU 27:8 Kinahanglan he keladu is kedsurata niw kayi te menge kesuǥuan te Megbevayà duen te menge vatu he mibpintalan niw te apug.”
DEU 27:9 Ne mid-uman pa megkaǥi si Moises wey sikan is menge memumuhat he menge kevuwazan ni Levi ziyà te langun he menge Israilihanen te, “Pemineg kew is menge etew te Israel! Guntaan he andew nehimu kew en he menge etew te Nengazen he Megbevayè niw.
DEU 27:10 Sunuza niw is Nengazen he Megbevayè niw ne tumana niw is menge suǥù din wey menge sulunuzen he ibeǥey ku keniyu ǥuntaan.”
DEU 27:11 Dutun daan he andew mibmenduan ni Moises is menge etew:
DEU 27:12 “Emun ebpekelayun kew en te Jordan, iyan heini menge tribu he edhitindeg diyà te Buntud he Gerizim te kebpenuvadtuvad te menge etew: is tribu ni Simeon, Levi, Juda, Isacar, Jose, wey Benjamin.
DEU 27:13 Ne iyan maan heini menge tribu he edhitindeg diyà te Buntud he Ebal te kedrawak te menge etew: is tribu ni Reuben, Gad, Asher, Zebulun, Dan, wey Naftali.
DEU 27:14 “Ne zutun edhabet ebensag is menge kevuwazan ni Levi ziyà te langun he menge Israilihanen te:
DEU 27:15 “Rinewakan is etew he ebaal te minsan hengkey he ledawan he ed-ezapen, batu etawa kayu etawa brunsi minsan meeles dà is ked-ezapa zin kayi. Su heini he menge ed-ezapen is bineelan dà te etew, utew egkeepesi te Nengazen.” Ne edtavak is langun te, “Amen!”
DEU 27:16 “Rinewakan is etew he wazà medtahud te menge ǥinikanan din.” Ne edtavak is langun te, “Amen!”
DEU 27:17 “Rinewakan is etew he idhalin din is simintu te tanà te zuma zin su para metakew zin haazà is tanà.” Ne edtavak is langun te, “Amen!”
DEU 27:18 “Rinewakan is etew he edtezinen din diyà te zalan is lakap.” Ne edtavak is langun te, “Amen!”
DEU 27:19 “Rinewakan is etew he kenà ebeǥey te hustu he kukuman diyà te kenà menge Israilihanen, diyà te menge ilu wey menge valu he vahi.” Ne edtavak is langun te, “Amen!”
DEU 27:20 “Rinewakan is etew he edhilavet te esawa ta amey zin, su ebpeel-elezan din is amey zin.” Ne edtavak is langun te, “Amen!”
DEU 27:21 “Rinewakan is etew he edtambid te minsan hengkey he langgam.” Ne edtavak is langun te, “Amen!”
DEU 27:22 “Rinewakan is etew he edhilavet te etevey zin, etevey zin diyà te amey zin etawa ziyà te iney zin.” Ne edtavak is langun te, “Amen!”
DEU 27:23 “Rinewakan is etew he edhilavet te enuǥang din he vahi.” Ne edtavak is langun te, “Amen!”
DEU 27:24 “Rinewakan is etew he edhimatey te zuma zin minsan meeles is kebeeli zin kayi.” Ne edtavak is langun te, “Amen!”
DEU 27:25 “Rinewakan is etew he edawat te suhul para himetayi zin is wazà mekesalà he etew.” Ne edtavak is langun te, “Amen!”
DEU 27:26 “Rinewakan is etew he kenà edsunud etawa kenà edtuman te langun kayi he menge suǥù.” Ne edtavak is langun te, “Amen!”
DEU 28:1 “Emun edsunuzen niw is Nengazen he Megbevayè niw wey edtumanen niw is langun he suǥù din he ibeǥey ku keniyu ǥuntaan, ne edhimuwen kew zin he lavew te langun he menge nasyun kayi te kelibutan.
DEU 28:2 Emun edsunuzen niw is Nengazen he Megbevayè niw ne egkaangken niw heini is langun he keupiyaanan:
DEU 28:3 “Edtuvazan din is menge inged niw wey menge pemuleey niw.
DEU 28:4 Edtuvazan kew zin pinaaǥi te kebeǥeyi zin keniyu te mahabet he menge vatà, uzar, wey mahabet he menge uyaǥen.
DEU 28:5 Edtuvazan kew zin pinaaǥi te kebpezekelaa zin te menge abut niw wey keenen niw.
DEU 28:6 Edtuvazan din is langun he menge vaal niw.
DEU 28:7 Ibpezaag te Nengazen keniyu is menge kuntada niw he edsurung keniyu. Edrapungrapung dan is edlusud keniyu piru ebpekedsusuwey is ebpemelaǥuy keniyu.
DEU 28:8 Edtuvazan te Nengazen he Megbevayè niw is langun he menge vaal niw ne ebpenuen din te menge abut niw is menge budiga niw. Edtuvazan kew zin dutun te tanà he ibeǥey zin keniyu.
DEU 28:9 Sumala te impenaad te Nengazen he Megbevayè niw keniyu, ne edhimuwen kew zin he pinilì din he menge etew, emun edtumanen niw is menge suǥù din wey ebpengungubpaan kew he sungkad te menge paaǥi zin.
DEU 28:10 Ne egkesayud is langun he menge etew kayi te kelibutan he mibpengunayan kew pilia te Nengazen, ne igkahandek kew zan.
DEU 28:11 Edtuvazan kew te Nengazen diyà te tanà he impenaad din diyà te menge kepuun niw he ibeǥey zin keniyu. Ibpemahabet din is menge anak niw, is menge uyaǥen niw, wey is menge abut niw.
DEU 28:12 Ibpeuzan te Nengazen diyà te keniyu te hustu he timpu he ebpuun diyà te midteǥuan din te zekelà he ketiǥeyunan din diyà te langit, ne edtuvazan din is langun he menge vaal niw. Ebpekepesambey kew ziyà te mahabet he menge nasyun, piru kenè kew mulà ebpekepemenambey.
DEU 28:13 Edhimuwen kew te Nengazen he pengulu te menge nasyun, ne kenà bà dà sumusunud. Uya, layun kew egkezivavew ne kenè kew egkezizalem emun ebpurungan niw edtumana wey edsunuza is menge suǥù te Nengazen he Megbevayè niw he ibeǥey ku keniyu ǥuntaan.
DEU 28:14 Umbe, kenè niw repasa is minsan hengkey he idsuǥù ku keniyu ǥuntaan, ne kenè kew medsunud te zuma he menge ed-ezapen wey kenè kew penilbi kandan.
DEU 28:15 “Piru emun kenè kew ebpemineg te Nengazen he Megbevayè niw ne kenè niw ebpurungan edsunuza is langun he menge suǥù din wey is menge sulunuzen he ibeǥey ku keniyu ǥuntaan, ne ebpekesuǥat diyà te keniyu heini is langun he rawak:
DEU 28:16 Edrawakan te Nengazen is menge inged niw wey menge vevesukè niw.
DEU 28:17 Idrawak din keniyu is kekurang te menge abut wey menge keenen.
DEU 28:18 Idrawak din keniyu he zeisey zà is menge anak niw, sebpet niw, wey menge uyaǥen niw.
DEU 28:19 Edrewakan din is langun he menge vaal niw.
DEU 28:20 Idrawak keniyu te Nengazen, is kegkeliveg wey kegkesemuki ziyà te langun he ebeelan niw taman te egkengezeetan kew wey egkengahanew kew tenged te mezaat he vaal niw pinaaǥi te ked-iniyuǥi niw kandin.
DEU 28:21 Ibpaaǥi te Nengazen diyà te keniyu is menge zaru taman te egkengezeetan kew ziyà te tanà he edselezan niw wey ed-engkenen niw.
DEU 28:22 Uya, ibpaantus kew te Nengazen te ibpatey he menge zaru, dateng, levag, wey meinit he keramag, gulavung, wey erat te pinemula taman te egkengahanew kew.
DEU 28:23 Is langit egkeiring te brunsi su kenè en ebeǥey te uzan ne is tanà egkeiring te putew su ebmezesen.
DEU 28:24 Ne kenà wahig is uzan he ibeǥey te Nengazen keniyu, kekenà, eliyavuk is ibeǥey zin. Ibpeuzan din te eliyavuk taman te egkengezeetan kew.
DEU 28:25 “Baal te Nengazen is kegkezeeǥa keniyu te menge kuntada niw. Edrapungrapung kew is edlusud kandan, piru ebpekedsusuwey kew is ebpemelaǥuy kandan. Ebpendemis keniyu is langun he ginhedian kayi te kelibutan.
DEU 28:26 Is menge lawa niw ke ebpatey kew ne egkeenen te menge tagbis wey te zumezaas he menge langgam, ne wazà ebuǥew kandan.
DEU 28:27 Ibpaantus kew te Nengazen te levag he iring te impaaǥi zin diyà te menge Ehiptohanen, wey menge tumur, mezeǥes, wey keriskis he kenà egkeulian.
DEU 28:28 Edhimuwen te Nengazen he buneǥa kew, melakap kew, wey meliveg kew.
DEU 28:29 Egkeiring kew te lakap su ebpenamsam kew minsan maandew. Ne kenè kew ed-uswag diyà te minsan hengkey he ebeelan niw. Layun kew edluplupiǥa wey ebpenakawi, ne wazà edtavang keniyu.
DEU 28:30 “Is bahi he ed-esewaan niw ne ed-eǥawen te zuma he maama. Ebevaley kew ne kenè kew ebpekeubpà duen. Ebpemula kew te paras piru kenà ebpulus diyà te keniyu is beǥas din.
DEU 28:31 Edlepaan is baka niw ziyà te etuvangan niw piru kenè kew ebpekekaan duen. Ed-eǥawen diyà te keniyu is asnu niw ne kenè en heini id-uli diyà te keniyu. Egkuwaan te menge kuntada niw is menge kerehidu niw, ne wazà ed-uǥup keniyu te kedhawì dutun.
DEU 28:32 Egkemetmetahan niw is kebihaǥa te menge anak niw te ebpuun te senge nenasyun en, ne andew-andew is kedteǥazi niw te kebpekelikù dan, piru wazè niw egkehimu.
DEU 28:33 Is menge etew he wazè niw mekilala ne iyan ebpekekaan te langun he hineǥuan niw, ne layun kew edluplupiǥa wey ibpaantus.
DEU 28:34 Ne emun egkemetmetahan niw is kegkehitavù kayi te langun, ne ebuneǥen kew.
DEU 28:35 Ebpetuvuan kew te Nengazen te levag puun te paa niw pehendiyà te ulu niw he kenà egkeulian.
DEU 28:36 “Sikiyu wey is pinilì niw he hadì ibpevihag te Nengazen te nasyun he wazè niw zuen hanew wey te menge kepuun niw. Diyà te kandan ed-azap kew te zuma he menge ed-ezapen he kayu wey vatu he vineelan.
DEU 28:37 Igkelimezangi kew, edhimuwen kew he peǥuseyanà, wey edsusudien kew te menge meǥinged diyà te menge nasyun he ebihag keniyu.
DEU 28:38 “Dekelà is ibpemula niw piru zeisey zà is egkeraǥun niw su edterepanen heini.
DEU 28:39 Ebpemula kew te paras ne ed-elimahan niw heini, piru kenè kew ebpekepenrupù te veǥas kayi wey kenè kew ebpekeinum te vinu kayi, su ed-eraten heini.
DEU 28:40 Ebpemula kew te mahabet he menge ulibu diyà te menge lugar niw, piru wazà lana he egkekuwa niw he ebpuun kayi, su egkerenà is menge veǥas kayi.
DEU 28:41 Ebpenganak kew piru kenà haazà edtinir ziyà te keniyu su ebihaǥen sikandan.
DEU 28:42 Egkeenen te terapan is langun he menge pinemula niw he kayu wey is duma he menge pinemula niw.
DEU 28:43 “Is kenà menge Israilihanen he mid-ubpà duma keniyu, ne ednaneynaney edekelà is gehem dan ne sikiyu mulà ednaneynaney edeisek is keniyu he ǥehem.
DEU 28:44 Iyan sikandan ebpekepeutang keniyu ne kenè kew iyan ebpekepeutang kandan. Iyan sikandan ebpekepengulu ne sikiyu mulà menge sumusunud kew zà.
DEU 28:45 Egkehitavù heini is langun he menge rawak diyà te keniyu taman te kebpemematey niw, emun kenè niw ebpemineǥen is Nengazen he Megbevayè niw wey kenè niw edtumanen is menge suǥù din wey is menge sulunuzen he imbeǥey zin keniyu.
DEU 28:46 Heini he menge rawak, petanudtanud wey petizaan keniyu wey te menge kevuwazan niw te taman te taman.
DEU 28:47 Tenged te wazè kew mebpenilbi te Nengazen he Megbevayè niw duma te kelipey wey keǥana, te timpu te kegkezeyzey niw,
DEU 28:48 ibeǥey kew zin diyà te menge kuntada he ibpehendiyè din te keniyu ne ebpekepenilbi kew kandan. Egkevitil kew, egkemazahan kew, egkurang kew te ugelingen, wey egkeewaan kew te minsan hengkey he azen. Ibpaantus kew zin he henduen be te ed-eyuǥuwan kew zin te putew taman te kebpemematey niw.
DEU 28:49 “Ketau te Nengazen he surunga kew te sevaha he nasyun he ziyà te utew meziyù, he kenè niw egkesavut is kineǥiyan dan. Iring dan te kulaǥu he edawi zutun te kedsurunga zan keniyu.
DEU 28:50 Mesipala sikandan ne wazè dan hizu te menge meǥurang wey menge vatà.
DEU 28:51 Egkeenen dan is menge uyaǥen niw wey is menge abut niw taman te ebpemematey kew. Wazè dan edsemaan duen te menge trigu niw, binu niw, lana niw, wey menge uyaǥen niw taman te egkengezeetan kew.
DEU 28:52 Edsurungen dan is langun he menge inged niw he ibeǥey keniyu te Nengazen he Megbevayè niw taman te egkelempag is metikang wey melig-en he menge verengbeng he iyan edseriǥan niw.
DEU 28:53 “Emun edliǥuyan kew en te menge kuntada niw, egkeenen niw is menge anak niw he imbeǥey keniyu te Nengazen he Megbevayè niw tenged te utew niw kegkevitil.
DEU 28:54 Minsan pa is beliǥeǥawen he etew ne wazè din en hizu te suled din, te pinelanggà din he esawa, wey te nesamà he menge anak din.
DEU 28:55 Kenè din sikandan ebeǥayan te egkeenen din he sapù te anak din su egkahandek ke meemini sikandin. Iyan heeyan egkehitavù diyà te keniyu emun edliǥuyan en te menge kuntada niw is langun he menge inged niw.
DEU 28:56 Minsan is beliǥeǥawen wey meredtan he vahi he henduen be te kenà ebpekeǥevà te pinggan, egkehimu en he mesekel te pinelanggà din he esawa wey te menge anak din.
DEU 28:57 Id-eles din is anak din he sikan pa ianak wey is inulunan kayi su ed-el-elesan din egkeena, su egkahandek sikandin he kela ke wazè din egkekaan dutun te kedliǥuyi te menge inged niw te menge kuntada niw.
DEU 28:58 “Emun kenè niw ebpurungan te edtuman heini is langun he suǥù he ingkesurat kayi te libru, wey kenè niw edtehuzen is lavew wey egkein-inuwan he ngazan te Nengazen he Megbevayè niw,
DEU 28:59 ibpaaǥi zin diyà te keniyu wey ziyà te menge kevuwazan niw is mekahandekhandek he menge zaru he utew mesakit wey kenà egkeulian.
DEU 28:60 Ibpaaǥi zin diyà te keniyu is mekahandekhandek he menge zaru he impaaǥi zin diyà te Ehipto, ne kenà heini egkaawà diyà te keniyu.
DEU 28:61 Ibpaaǥi zaan te Nengazen is langun he kelasi te menge zaru he wazà ikesurat kayi te libru te kesuǥuan, taman te ebpemematey kew.
DEU 28:62 Minsan iring kew kahabet te menge vituen diyà te langit, deisey zà is egkesamà keniyu su wazè kew mebpemineg te Nengazen he Megbevayè niw.
DEU 28:63 Iring te ingkelipey te Nengazen is kebpeuswag wey kebpezekelà keniyu, igkelipey zin daan is kedezaat wey kegerà keniyu, taman te egkengahanew kew puun duen te tanà he edselezan niw su wey niw maangken.
DEU 28:64 “Ibpeyapat kew te Nengazen diyà te langun he menge nasyun kayi te kelibutan, puun te kinekilizan pehendiyà te kinekilizan. Ne zutun he menge nasyun ed-azap kew te zuma he menge ed-ezapen he vineelan he ebpuun te kayu wey vatu, he wazà hanew niw zuen wey te menge kepuun niw.
DEU 28:65 Wazè niw zutun kelinew wey lugar he egkehimelayan. Edteǥuan kew te Nengazen te handek ne egkaawa is perateng niw, ne layun kew zà egkeseeng.
DEU 28:66 Ne layun mekulbà is ked-ubpè niw, maandew wey mezukilem ne layun kew egkulbai, ne wazà kesiguruwan te untung niw.
DEU 28:67 Tenged te kegkahandek niw te egkengeehè niw ziyà te peliǥuy, emun meselem egkaǥi kew te, ‘Deyzey ke ebmezukilem en.’ Ne emun mezukilem ne egkaǥi kew te, ‘Deyzey ke egkepawè en.’
DEU 28:68 Ibpelikù kew te Nengazen diyà te Ehipto he ibpeuntud kew te varku minsan pa te nenaad sikandin he kenè kew en ibpelikù diyà. Ne ziyà, ebpeuripen kew su ibelegyè niw en is keugelingen niw ziyà te menge kuntada niw, piru wazà ebpemasa kayi.”
DEU 29:1 Iyan heini kedseysaya te kedtumana te kebpekid-uyun he insuǥù te Nengazen diyà te ki Moises he imbeǥey ziyà te menge Israilihanen hein diyè dan te Moab. Ne ebpekeuman heini zuen te kebpekid-uyun din he midhimu zin diyà te kandan hein diyè dan te Horeb.
DEU 29:2 Impetawag ni Moises is langun he menge Israilihanen ne migkeǥiyan din te, “Nemetmetahan niw is mibeelan te Nengazen diyà te hadì te Ehipto wey te langun he menge upisyal zin wey pehendiyà en te nesakup te tivuuk he nasyun.
DEU 29:3 Neehè niw is dekelà he menge penggezam, wey egkengein-inuwan he menge vaal.
DEU 29:4 Piru taman en guntaan wazè pa pengelinteuwi te Nengazen he mesavut niw is neehè niw wey nezineg niw.
DEU 29:5 Seled te 40 he tuig te kebpenguluwi ku keniyu ziyà te sibsivayan, wazà mezaan is menge visti niw wey menge sandalyas niw.
DEU 29:6 Wazè niw egkekaan dutun, wazè niw vinu etawa zuma he inumen, piru imbeǥey haazà te Nengazen diyà te keniyu su para metueni niw he iyan sikandin Nengazen he Megbevayè niw.
DEU 29:7 “Hein kebpekeuma tew kayi he lugar, mibpekidtebek kenitew si Hadì Sihon he hadì te Heshbon wey si Hadì Og he hadì te Bashan, piru nezaag tew sikandan.
DEU 29:8 Mid-aǥew tew is tanè dan ne imbeǥey haazà diyà te menge tribu ni Reuben, ni Gad, wey ziyà te ketengà he tribu ni Manase he para egkepengevilin dan.
DEU 29:9 “Umbe purungi niw te edtuman is ibpetuman keniyu kayi te kebpekid-uyun keniyu, su para mebmeuswaǥen kew ziyà te langun he ebeelan niw.
DEU 29:10 Guntaan he andew midhitindeg kew is langun diyà te etuvangan te Nengazen he Megbevayè niw: is menge pengulu te menge tribu niw, is ebpemendumala, is menge upisyal, is langun he menge maama te Israel,
DEU 29:11 is menge esawa niw wey menge anak niw, wey is kenà menge Israilihanen he mid-ubpà duma keniyu he perepengayu niw wey peresekezu.
DEU 29:12 Midhitindeg kew ǥuntaan kayi te kebpekid-uyun te Nengazen he Megbevayè niw. Heini he kebpekid-uyun, ebeelan te Nengazen diyà te keniyu ǥuntaan he andew duma is kepenangdù din,
DEU 29:13 su ibpetuenan din en maan keniyu ǥuntaan he iyan kew menge etew zin ne iyan sikandin Megbevayè niw su iyan heeyan impenaad din diyà te keniyu wey ziyà te menge kepuun niw he si Abraham, si Isaac, wey si Jacob.
DEU 29:14 Piru kenè kew iyan dà ibpesunud duen te kebpekid-uyun din is nemenhitindeg kayi ǥuntaan te etuvangan te Nengazen he Megbevayè niw, kekenà, ragkes en minsan is huziyan he kevuwazan niw.
DEU 29:16 “Netuenan niw ke nemenumenu kiw hein diyè kiw pa ed-ubpà te Ehipto wey nemenumenu kiw hein midhipanew kiw ziyà te menge tanà te zuma he menge nasyun pehengkayi.
DEU 29:17 Neehè niw is utew mezaat he menge ed-ezapen dan he kayu, batu, pelata, wey vulawan.
DEU 29:18 Sigureduwa niw he wazà diyà te keniyu maama, bahi, pemilya, etawa tribu he ed-iniyug te Nengazen he Megbevayè tew, ne ed-azap te menge ed-ezapen te menge etew zutun he menge nasyun, para wazà minsan sevaha keniyu he egkeiring te zalid he edtuvù he mepait wey edhilu.
DEU 29:19 Is minsan hentei he nekezineg te menge petizaan pinaaǥi kayi te menge rawak, ne kenè din isipa he kenà sikandin egkemenu ke ebpedayun he ebaal te kandin dà he egkesuatan. Heini he ulaula ebpekeuwit te kezeetan diyà te keniyu te langun.
DEU 29:20 Kenà sikandin ebpeseyluwen te Nengazen. Iring te edriyubriyub he regreg is dekelà he pauk te Nengazen kandin, ne egkehitavù diyà te kandin is langun he menge rawak he ingkesurat kayi te libru, ne id-awà te Nengazen is ngazan din kayi te kelibutan.
DEU 29:21 Idsivey sikandin te Nengazen puun te langun he tribu te Israel, ne edresayen sikandin sumalà te menge rawak kayi te kebpekid-uyun he ingkesurat kayi te Libru te Kesuǥuan.
DEU 29:22 “Is huziyan he menge lapis te menge kevuwazan he menge kevuwazan niw wey menge lumelengyawà he ebpemuun diyà te meziyù he menge lugar, egkeehè dan is rimeǥas te vangkit wey menge zaru he ibpaaǥi te Nengazen diyà te tanè niw.
DEU 29:23 Is tivuuk he tanè niw egkeiring te disirtu he netembunan te esupri wey timus. Wazà ebpemula kayi he tanà su kenà edtuvuan te pinemula. Egkezeetan heini iring te kegkezeeti te Sodom wey Gomora, Adma wey Zeboyim he midezeetan te Nengazen tenged te utew zin kegkepauk.
DEU 29:24 Ne ed-insà is menge etew ziyà te langun he menge nasyun te, ‘Maan is midhimu heeyan te Nengazen diyà te nasyun dan? Maan is utew sikandin nepauk?’
DEU 29:25 “Ne iyan heini tavak: ‘Geina te midsupak kayi he menge etew is midhimu ziyà te kandan he kebpekid-uyun te Nengazen, he Megbevayà te menge kepuun dan, hein impeǥuwà sikandan puun te Ehipto.
DEU 29:26 Mid-azap dan wey nenilbi zan te selakew en he menge ed-ezapen he wazè dan mekilala he imbandu te Nengazen he kenè dan ezapa.
DEU 29:27 Umbe, utew nepeuki te Nengazen is menge etew ziyà te nasyun dan ne impeseǥazan din kandan is langun he menge rawak he ingkesurat kayi he libru.
DEU 29:28 Tenged te zekelà he pauk te Nengazen kandan, midsegseg din sikandan puun te nasyun dan ne impevihag din sikandan te zuma he menge nasyun he zutun sikandan guntaan ebpemen-ubpà.’
DEU 29:29 “Duen menge in-eles he iyan dà netau zuen is Nengazen he Megbevayè tew, piru impahayag din diyà te kenitew is kesuǥuan din ne kinahanglan he edsunuzen tew heini wey te menge kevuwazan tew te taman te taman.
DEU 30:1 “Penenglitan, egkehitavù diyà te keniyu heini is menge tuvad wey menge rawak he nekaǥi ku ziyà te keniyu ne egketenuzan niw heini ke ziyè kew en te menge nasyun he impevihag kew kandan te Nengazen he Megbevayè niw.
DEU 30:2 Ne emun ebpekid-uliey kew wey is menge anak niw te Nengazen he Megbevayè niw, ne edtumanen niw te kedtuman he ebpuun diyà te tivuuk he gehinawa niw wey kedsavut niw is langun he insuǥù ku keniyu ǥuntaan,
DEU 30:3 egkehizuwan kew te Nengazen he Megbevayè niw. Edtiǥumen kew zin puun te langun he menge nasyun he zutun kew zin ipevihag, ne zutun idlikù din is meupiya he kebpekesavuk niw.
DEU 30:4 Minsan diyè kew zin pa segseǥa te kinemeziyuan he parti te kelibutan, edtiǥumen kew ǥihapun te Nengazen he Megbevayè niw.
DEU 30:5 Ne ibpelikù kew zin diyà te tanà he ǥaked te menge kepuun niw, ne ed-umanan niw heini ed-engkena. Subra pa is kebpeuswaǥa wey kebpekehebeta zin keniyu te kebpeuswaǥa wey kebpekehebeta zin te menge kepuun niw.
DEU 30:6 Ebeǥuwen te Nengazen he Megbevayè niw is menge ǥehinawa niw wey is menge ǥehinawa te menge kevuwazan niw su para mahala niw sikandin te ebpuun diyà te tivuuk he ǥehinawa niw wey kedsavut niw, ne egkembuwayan kew.
DEU 30:7 Ibpeseǥazan te Nengazen he Megbevayè niw te menge kuntada niw he midumut wey midaagdaag keniyu sikan is menge rawak.
DEU 30:8 Ne ebpezumdumahan niw en maan is Nengazen ne edsunuzen niw en is langun he menge suǥù din he ibeǥey ku keniyu ǥuntaan.
DEU 30:9 Ibpeuswag kew te Nengazen he Megbevayè niw ziyà te langun he menge vaal niw. Ibpemahabet din is menge anak niw, menge uyaǥen niw, wey ibpezekelè din is menge abut niw, su igkelipey en maan te Nengazen is kedtuvad keniyu iring te ingkelipey zin is kedtuvad te menge kepuun niw.
DEU 30:10 Egkeulaula heini emun ebpezumdumahan niw is Nengazen he Megbevayè niw wey edsunuzen niw is langun he menge suǥù din wey is menge sulunuzen he ingkesurat kayi te Libru te Kesuǥuan. Uya, egkehitavù heini emun edlikù kew ziyà te kandin te ebpuun diyà te tivuuk he gehinawa niw wey kedsavut niw.
DEU 30:11 “Kenà mereǥen is kedsevuta wey kebeeli kayi he menge suǥù te ibeǥey ku keniyu ǥuntaan.
DEU 30:12 Kenè kew ebpekeinsà te, ‘Hentei is edhendiyà te langit te kegkuwa keniyan su para ikeseysey ziyà te kenitew su wey tew mesunud?’
DEU 30:13 Etawa kenè kew zaan ebpekeinsà te, ‘Hentei is edlayun te zaǥat te kegkuwa keniyan su para ikeseysey ziyà te kenitew su wey tew mesunud?’
DEU 30:14 Heini he menge lalag diyà te keniyu, diyà mismu te vèbè niw wey ǥehinawa niw, umbe egkehimu niw heini te edtuman.
DEU 30:15 “Pemineg kew! Guntaan he andew ibpepilì ku sikiyu kayi: untung etawa kemetayen, keuswagan etawa kezeetan.
DEU 30:16 Ebmenduan ku sikiyu ǥuntaan he mahala niw is Nengazen he Megbevayè niw, pengungubpaan kew he sungkad te menge paaǥi zin, wey tumana niw is menge suǥù din wey is menge sulunuzen. Emun ebeelan niw heini ebpekaangken kew te meupiya he ked-ubpà wey ebmahabet kew, ne edtuvazan kew te Nengazen he Megbevayè niw diyà te tanà he edselezan niw wey niw maangken.
DEU 30:17 “Piru emun kenè kew ebpezumazuma wey edsunud kandin, ne ed-azap kew wey ebpenilbi te selakew en he menge ed-ezapen,
DEU 30:18 ne ebpetizeenan ku en sikiyu ǥuntaan he kenà duwazuwa he egkengezeetan kew. Kenè kew ebmantas duen te tanà he edselezan niw su ed-engkenen niw he ziyà layun te Jordan.
DEU 30:19 “Guntaan he andew ebpengum-umawen ku is langit wey tanà su ibpetistiǥus ku ke hengkey is ebpilien niw kayi: untung etawa kemetayen, tuvad etawa rawak. Pilia niw is untung su para meuyag-uyag kew wey is menge anak niw.
DEU 30:20 Mahala niw is Nengazen he Megbevayè niw. Pezumdumahi niw sikandin wey kenè niw sikandin iniyuǥi, su iyan sikandin untung niw. Emun ed-ul-ulahan niw heini, ebmeluǥayad is untung niw zuen te tanà he impenangdù din he ibeǥey zin diyà te menge kepuun niw he iyan ensi Abraham, Isaac, wey Jacob.”
DEU 31:1 Mibpedayun megkaǥi si Moises diyà te menge Israilihanen.
DEU 31:2 Ke sikandin te, “120 he tuig is keǥurang ku ne kenà ad ebpekehimu he ebpengulu keniyu. Migkaǥi is Nengazen kayi te kedì he kenà a ebpekelayun te Jordan.
DEU 31:3 Iyan mismu is Nengazen he Megbevayè niw edhuna zutun te kedlayun niw. Edezeetan din is menge etew ziyà te menge nasyun dutun ne ed-engkenen niw is menge tanè dan. Si Josue is ebpengulu keniyu te kedlayun su iyan heeyan migkaǥi te Nengazen.
DEU 31:4 Ebeelan te Nengazen kayi he menge nasyun is iring te mibeelan din diyà te ki Sihon wey ki Og te menge hadì te menge Amorihanen, wey is mibeelan din diyà te tanè dan.
DEU 31:5 Ibeǥey sikandan te Nengazen diyà te keniyu, ne kinahanglan he ebeelan niw ziyà te kandan is langun he insuǥù ku keniyu.
DEU 31:6 Mebpekezesen kew wey mebpekevurut kew. Kenè niw sikandan ikahandek su zuma niw is Nengazen he Megbevayè niw; kenè kew zin ed-ewaan wey ed-iniyuǥan.”
DEU 31:7 Ne mid-umew ni Moises si Josue ne midlelaǥan din diyà te etuvangan te langun he menge Israilihanen te, “Mebpekezesen ka wey mebpekevurut ka, su iyan ka ebpengulu kayi te menge etew te kedhendiyà te tanà he impenangdù te Nengazen he ibeǥey zin diyà te menge kepuun dan, ne kinahanglan he ebehinen nu kandan haazà is tanà he egkepengevilin dan.
DEU 31:8 Egiyahan ka te Nengazen ne eduma sikandin kenikew; kenè ke zin ed-ewaan wey ed-iniyuǥan. Umbe kenè ka mahandek wey mebpekeluya.”
DEU 31:9 Insurat ni Moises heini he menge suǥù ne imbeǥey zin diyà te menge memumuhat he menge kevuwazan ni Levi, he iyan ed-uwit duen te Kavan te Kebpekid-uyun te Nengazen, wey ziyà te langun he ebpemendumala te Israel.
DEU 31:10 Ne mibmenduan sikandan ni Moises te, “Dutun te kegketapus te kada pitu he tuig he iyan kes tuig te Kebeǥey te Bayàbayà wey Ked-ulì, ne zutun te timpu te Pista te Kebaal te menge Lawig,
DEU 31:11 besaha niw heini he menge suǥù diyà te langun he menge Israilihanen emun edtiǥum en sikandan diyà te etuvangan te Nengazen he Megbevayè niw ziyà te lugar he ebpilien din.
DEU 31:12 Tiǥuma niw is menge etew: menge maama, menge vahi, menge vatà, wey is kenà menge Israilihanen he zuma niw he meǥinged su para mekepemineg sikandan su wey zan mekeistudyu te kedtahud te Nengazen he Megbevayè niw ne wey zan mapurungi te edtuman is langun he ibpetuman kayi he menge suǥù.
DEU 31:13 Beeli niw heini su para mekezineg sikan is menge anak niw he wazè pa metau kayi he menge suǥù ne ebpekeistudyu sikandan te kedtahud te Nengazen he Megbevayè niw zutun te ked-ubpè niw zuen te tanà he ed-engkenen niw he ziyà layun te Jordan.”
DEU 31:14 Migkaǥi is Nengazen diyà te ki Moises te, “Meǥaan ke en ebpatey; umbe ipetawag nu si Josue ne hendiyè kew te Tulda he Edtelevukaayan su ibpenurù ku kandin dutun is ereg he ebeelan din.” Umbe midhendiyà si Moises wey si Josue te Tulda he Edtelevukaayan.
DEU 31:15 Ne mibpaahà is Nengazen pinaaǥi te ǥapun he henduen be te tukud he ziyà te ǥemawan duen te Tulda.
DEU 31:16 Ne migkaǥi is Nengazen diyà te ki Moises te, “Meǥaan ke en ebpatey ne ebpekaamur ka ziyà te menge kepuun nu. Emun wazè ke en, ne heini he menge etew ed-azap te zuma he menge ed-ezapen he ed-ezapen te menge etew ziyà te tanà he ebpeveyaan dan. Ed-iniyuǥan e zan ne edrepasen dan is kebpekid-uyun ku kandan.
DEU 31:17 Dutun he andew egkepeukan ku sikandan ne ed-engkezan ku sikandan. Ed-iniyuǥan ku sikandan ne egkengezeetan dan. Mahabet he menge kemeresayan wey menge kemereǥenan he ebpekeuma ziyà te kandan, ne zutun he timpu ebpekeinsè sikandan te, ‘Iyan be ingkeul-ulaha te menge kemereǥenan diyà te kenitew is tenged te wazè en mebpekiduma kenitew is Megbevayà?’
DEU 31:18 Dutun he timpu ed-iniyuǥan ku sikandan tenged te langun he mezaat he menge vaal zan pinaaǥi te ked-azap dan te zuma he menge ed-ezapen.
DEU 31:19 “Umbe isurat nu heini he kanta ne ipenurù nu ziyà te menge Israilihanen. Ipekanta nu heini kandan su para mehimu heini he tistiǥus ku kuntra kandan.
DEU 31:20 Ed-uwiten ku sikandan diyà te meupiya wey selebpeten he tanà he impenangdù ku he ibeǥey ziyà te menge kepuun dan. Ed-ubpà sikandan dutun he meuswaǥen; ebpekekaan sikandan te langun he keenen he egkesuatan dan, ne egkengahantey sikandan. Piru ed-iniyuǥan e zan ne ed-azap sikandan te selakew en he menge ed-ezapen. Edrepasen dan is kebpekid-uyun ku kandan.
DEU 31:21 Emun ebpekeume en diyà te kandan is mahabet he menge kemeresayan wey menge kemereǥenan, heini he kanta egkehimu he tistiǥus kuntra kandan, su kenà heini egkelipatan te menge kevuwazan dan. Netuenan ku en is ebpelenuwan dan te ebaal minsan wazè ku pa sikandan meuwit duen te tanà he impenangdù ku he ibeǥey ku kandan.”
DEU 31:22 Dutun he andew insurat ni Moises haazà is kanta ne impenurù din te menge Israilihanen.
DEU 31:23 Ne mibmenduan te Nengazen si Josue he anak ni Nun te: “Mebpekezesen ka wey mebpekevurut ka, su iyan ka ed-uwit te menge Israilihanen diyà te tanà he impenangdù ku kandan, ne eduma a kenikew.”
DEU 31:24 Ne hein nepasad ni Moises is kedsurat duen te langun he menge suǥù diyà te libru,
DEU 31:25 ne mibmenduan din is menge Levihanen he iyan kes ed-uwit duen te Kavan te Kebpekid-uyun te Nengazen. Migkaǥi sikandin te,
DEU 31:26 “Kuwaa niw heini is Libru te Kesuǥuan ne isavuk niw ziyà te avey te Kavan te Kebpekid-uyun te Nengazen he Megbevayè niw. Ne kenà heini id-awà dutun su tistiǥus heini kuntra te menge etew te Israel.
DEU 31:27 Su netuenan ku ke sengemenu is kebpekidsukulè niw wey kebmesinupaken niw. Minsan guntaan te zume e pa keniyu, ebpekidsukulè kew en te Nengazen, ne lavew en ke ebpatey ad!
DEU 31:28 Tiǥuma niw ziyà te etuvangan ku is langun he ebpemendumala te menge tribu niw wey is langun he menge upisyal su wey ku mekaǥi ziyà te kandan heini. Ne ebpengum-umawen ku is langit wey is tanà su ibpetistiǥus ku kuntra kandan.
DEU 31:29 Su netuenan ku he emun ebpatey ad, ne ebaal kew te mezaat ne edsuwayan niw is langun he idsuǥù ku keniyu. Dutun te huziyan he timpu ebpekeuma ziyà te keniyu is menge kemeresayan su ebaal kew te mezaat is ked-isipa te Nengazen duen ne edhimuwen niw he mepauk sikandin pinaaǥi te vaal niw.”
DEU 31:30 Ne zutun migkaǥi ni Moises is langun he menge lalag duen te tivuuk he kanta ne nemineg kandin is tivuuk he keet-etawan te Israel.
DEU 32:1 He langit, pemineg ka su egkaǥi a! He tanà, pemineǥa nu is menge lalag ku.
DEU 32:2 Is menge penurù ku egkeulug he iring te uzan etawa zehemug. Is menge lalag ku iring te mereǥes he uzan diyà te menge sagbet ne iring te virisbiris diyà te menge pinemula.
DEU 32:3 Ibpahayag ku is ngazan te Nengazen! Edeliǥen ku is kegkemekeǥeǥehem te Megbevayè tew!
DEU 32:4 Iyan sikandin batu he endilungè ku; utew hustu is menge vaal zin, wey metazeng is langun he menge paaǥi zin. Metinumanen sikandin he Megbevayà ne kenà sikandin egkesayep; metazeng sikandin ne hustu is menge vaal zin.
DEU 32:5 Piru sikiyu mibaal kew te salà diyà te kandin ne wazè kew zin en isipa he menge anak din tenged te kezaat niw. Menge kevuwazan he mekesesalà wey edsuwey te hustu!
DEU 32:6 Iyan en be heeyan ibales niw te keupiya te Nengazen? Menge tulebung kew en iyan wey kurang te kedsavut. Kenè be iyan sikandin Amey niw he midlimbag keniyu?
DEU 32:7 Tentenuzi niw is midlavey he menge tuig; isipa niw is nengehuna he lapis te kevuwazan. Ne iinsè niw ziyà te menge kepuun niw ke hengkey is neulaula ne edtudtulan kew zan. Insai niw zaan is menge edumala keniyu ne igkelentey zan heini ziyà te keniyu.
DEU 32:8 Su hein mibeǥayan te Levew he Megbevayà is menge nasyun te tanè dan wey hein mibahinbahin din en is menge etew zutun, ne zuen dulunà te uman grupu kandan he insavuk din sumalà is kezakel te menge velinsuǥuen din.
DEU 32:9 Su mibpilì te Nengazen is menge kevuwazan ni Jacob he iyan mid-isip din he menge etew zin.
DEU 32:10 Neehè din sikandan diyà te disirtu he iyan kes lugar he wazè duen utew ebpeketuvù he pinemula. Mid-elimahan din sikandan wey mibpelembungan iring te kebpelembungi te etew te mata zin.
DEU 32:11 Mibentayan din sikandan dutun iring te ked-elima te kulaǥu te menge pispis din, dutun te ed-eǥaken din sikandan te kedlayang. Ebekaren din is menge pakpak din te kedtamuk wey ked-uwit kandan.
DEU 32:12 Nengazen dà is migiya te menge etew zin ne wazè en kinahanglan is tavang te zuma he menge tarù he ed-ezapen.
DEU 32:13 Impevayàbayà din sikandan te menge vuvungan wey impekaan din te menge abut te tanà. Mid-uyag din sikandan te teneb he ebpuun te kelendiǥan wey lana te ulibu he nenuvù diyà te betuwen he tanà.
DEU 32:14 Mibeǥayan din sikandan te menge kisu wey ǥatas he ebpuun diyà te menge vaka wey kerehidu, wey mibeǥayan te melambù he menge kerehidu, wey kambing he ebpuun diyà te Bashan. Mibeǥayan din daan sikandan te memeupiya he menge trigu wey impeinum te kinemeupiyahan he vinu he ebpuun te paras.
DEU 32:15 Mid-uswag is menge Israilihanen piru nekidsukulè dan gihapun. Mibmelembù dan wey midekelà, iyan mid-iniyuǥan dan is Megbevayà he iyan midlimbag kandan, wey mid-engkezan dan is endilungè dan he vatu he iyan daan menluluwas dan.
DEU 32:16 Impepengelikud dan wey midretem dan is pauk te Nengazen pinaaǥi te ked-azap dan te zuma he menge ed-ezapen.
DEU 32:17 Mibpemuhat dan is menge mezaat he mulin-ulin he kenà tutuu he megbevayà; menge ed-ezapen he wazè dan keenu mekilala he veǥu zà utew ne wazà mulà tehuza te menge kepuun dan.
DEU 32:18 Midlipatan dan is Megbevayà he iring te vatu he iyan melig-en he egkeendilungan dan he iyan midlimbag kandan.
DEU 32:19 Ne naahà heini te Nengazen, ne tenged te utew zin kegkepauk mid-engkezan din sikandan te ed-isip he anak.
DEU 32:20 Ke sikandin te, “Ed-iniyuǥan ku sikandan su ed-ahaan ta ke hengkey is egkepeveyaan dan, su mezaat sikandan he lapis te kevuwazan, menge anak he kenà metinumanen.
DEU 32:21 Impepengelikud e zan pinaaǥi te ked-azap dan te kenà tutuu he megbevayà, ne midhimu zan he mepauk a pinaaǥi te ked-azap dan te wazè din pulus he menge ed-ezapen. Kela su nasì ku edhimuwa he mesina zan te zuma he etew. Edhimuwen ku he mepauk dan pinaaǥi te kedtuvazi ku te menge etew he tulebung.
DEU 32:22 Su edriyubriyub is kepauk ku iring te hapuy. Ebpekevinsul heini te tanà wey te langun he abut kayi, wey te zizalem te tanà wey pundasyun te menge vuntud.
DEU 32:23 Ibpaaǥi ku sikandan te vangkit, su is pauk ku kandan ne idsuǥat ku kandan iring te menge vesut te panà.
DEU 32:24 Ebpeeǥiyan ku sikandan te vitil; ebpematey sikandan te vitil wey zaru. Edsuǥuen ku ziyà te kandan is mekahandekhandek he menge langgam he edezaat kandan wey ibpekaǥat ku sikandan te edhereg he uled.
DEU 32:25 Egkehitavù is kebpemematey te tebek diyà te ǥawas te valey zan, ne zutun utew egkeherati is diyà te seled. Ebpemematey is menge meǥurang, menge vetan-en, wey menge vatà.
DEU 32:26 Migkaǥi a te ibpedsusuwey ku sikandan taman te kenè en sikandan egketenuzan kayi te kelibutan.
DEU 32:27 Ne minsan pa zutun, ne kenè ku idtuǥut he mekepezalig is menge kuntada he edhenduen te, ‘Nezaag tew sikandan te kenitew he ketau ne kenà iyan is Nengazen midhimu kayi.’ ”
DEU 32:28 Is Israel sevaha he nasyun he wazè din ketau wey kedsavut.
DEU 32:29 Ke metau zan pa pezem ne egkesavut dan ke hengkey is egketemanan dan diyà te menge egkehuziyan he timpu.
DEU 32:30 Ebmenmenuwen man te kedal-as te sevaha he etew is nengkelibu he menge Israilihanen? Ebmenmenuwen te zezuwa he etew he melupig dan is sepulù he libu ziyà te kandan? Eghimu zan dà haazà emun idtuǥut kandan te Nengazen he iyan endilungè dan he iring te vatu.
DEU 32:31 Su is batu he iyan endilungà te menge kuntada tew ne kenà iring te kenitew he endilungà he vatu ne minsan sikandan nesayud kayi.
DEU 32:32 Ne is menge kuntada tew, he iring kezaat te menge meǥinged dengan diyà te Sodom wey Gomora, iring sikandan te mepait he paras wey ebpekehilu zaan is beǥas din.
DEU 32:33 Wey iring dan daan te hereg te uled he mibeelan he vinu.
DEU 32:34 Nesayud is Nengazen ke hengkey is ebeelan dan, ne ibpelavey zin en dè pa haazà su idtaǥad din ke egkeuma is midtendek din he timpu te kedsilut kandan.
DEU 32:35 Ke sikandin te, “Iyan e en ebales wey edsilut kandan, su egkeuma zed gihapun is netendek he timpu he ebpekezulas sikandan. Hapit en egkeuma is kedezeeti kandan ne kenè en daan heini egkeuǥet.”
DEU 32:36 Edhukum is Nengazen he edlavan te menge etew zin; egkehizuwan din sikandan is menge suluǥuen din, emun egkeehè din he wazè dan en desen wey zeisey zà is egkesamà kandan, uripen man etawa kenà uripen.
DEU 32:37 Ne ed-insà is Nengazen diyà te menge etew zin te, “Hendei en is menge ed-ezapen dan, he iring te vatu he endilungè dan?
DEU 32:38 Hendei en is menge ed-ezapen dan he egkaan te tavà te menge ibpemuhat dan wey ed-inum te pemuhat dan he vinu? Petavang kew kandan, aput kew ziyà te kandan!
DEU 32:39 Ahaa niw is puriba ǥuntaan he iyan e zà Megbevayà! Wazè en duma he Megbevayà gawas kedì. Iyan a edhimatey ne iyan a zaan ebeǥey te untung; iyan a ebpalì wey iyan a zaan ebawì te palì, ne wazà egkelibri emun edezeetan ku.
DEU 32:40 Guntaan ibayew ku is menge velad ku duma is kegkaǥi te, ‘Iring te uuyag a te wazà pidtemanan, ne kenà daan duwazuwa he egkemengaan ku is egkindab he ispada ku ne egemiten ku heini te kedsilut; ebelesan ku is menge kuntada ku wey edsukutan ku is ebpemendumut kediey.
DEU 32:42 Is besut te panè ku ne egkelupit te lengesa zan, ne egkeǥetad sikandan te ispada ku. Ebpemematey sikandan ragkes en is menge teǥepalì kandan wey is egkengezekepan kandan. Ebpemematey ragkes en is menge pengulu zan.’ ”
DEU 32:43 Sikiyu is menge etew ziyà te menge nasyun deliǥa niw is menge etew te Nengazen, su ebelesan te Nengazen is nemenhimatey kandan te menge suluǥuen din. Ebelesan din is menge kuntada zin, ne edlumpiyuwan din is tanè din wey is menge etew zin.
DEU 32:44 Iyan heini menge lalag kayi te kanta he migkaǥi ni Moises duma si Josue he anak ni Nun diyà te menge etew.
DEU 32:45 Ne kegkepasad te kegkeǥiya kayi ni Moises,
DEU 32:46 migkaǥi sikandin diyà te menge etew te, “Ipependalid niw ziyà te ǥehinawa niw is langun he migkaǥi ku keniyu ǥuntaan. Ne ipenurù niw zaan heini ziyà te menge anak niw su wey zan mepurungi te edtuman is langun he egkekaǥi kayi he menge suǥù.
DEU 32:47 Heini he menge suǥù ne kenà bastavasta zà he menge lalag, su ebpekeveǥey heini keniyu te untung. Emun edtumanen niw heini egkembuwayan kew ziyà te tanà he ed-engkenen niw ziyà layun te Jordan.”
DEU 32:48 Dutun mismu he andew migkaǥi is Nengazen diyà te ki Moises te,
DEU 32:49 “Hendiyè ka te Moab, diyà te menge vuntud te Abarim ne tekezeǥa nu is Buntud he Nebo he ebpekesinaru ziyà te Jerico. Ne zutun pentawa nu is Canaan, sikan is tanà he ibeǥey ku ziyà te menge Israilihanen su wey zan maangken.
DEU 32:50 Ne keniyan ka he vuntud ebpatey ne ebpekaamur ka te menge kezuzumahi nu he nemematey en, iring is egkehitavù kenikew te nehitavù te suled nu he si Aaron su minatey sikandin diyà te Buntud he Hor ne nekaamur ziyà te menge kezuzumahi zin.
DEU 32:51 Su pudu kew is dezuwa neewai te kedsarig kediey ziyà te etuvangan te menge Israilihanen hein diyè kew te serebseb te Meriba ziyà te Kadesh, he ziyà te sibsivayan he Zin. Wazè niw ikepaahà is kegkewaǥas ku ziyà te etuvangan dan.
DEU 32:52 Umbe, egkepantew nu zà diyà te meziyù is tanà he ibeǥey ku te menge Israilihanen, piru kenè ka ebpekeseled duen.”
DEU 33:1 Iyan heini menge lalag ni Moises te suluǥuen te Megbevayà hein mibpenubtuvazan din is menge Israilihanen dutun te wazè pa sikandin mebpatey.
DEU 33:2 Migkaǥi sikandin te, “Nekeuma is Nengazen puun te Sinai; midsilà sikandin diyà te kenitew puun te Buntud he Seir he iring te kedsilà ta andew. Midsiǥa sikandin puun te Buntud he Paran. Nekeuma sikandin duma te linibu he menge velinsuǥuen, ne is kewanan he velad din ebitbit te edriyubriyub he hapuy.
DEU 33:3 Mahal utew te Nengazen is menge etew zin. Ebpengelangan din heini is menge etew he menge pinilì din. Umbe, edsunuzen dan sikandin ne edtumanen dan is mandù din.
DEU 33:4 Imbeǥey kenitew ni Moises is kesuǥuan he egkepengevilin tew te menge kevuwazan ni Jacob.
DEU 33:5 Nehimu he hadì te Israel is Nengazen hein midtiǥum is menge pengulu zan wey menge tribu zan.”
DEU 33:6 Mehitenged te tribu ni Reuben migkaǥi si Moises te, “Berakat he kenà maawà is menge kevuwazan ni Reuben minsan pa te zeisey zà sikandan.”
DEU 33:7 Mehitenged te tribu ni Juda, migkaǥi si Moises te, “He Nengazen, pemineǥa nu is hangyù te penavang te tribu ni Juda. Iuman nu sikandan ilikù diyà te menge tribu te Israel. Pengelangi nu wey tevangi nu sikandan kuntra te menge kuntada zan.”
DEU 33:8 Mehitenged te tribu ni Levi, migkaǥi si Moises te, “He Nengazen, imbeǥey nu is beveraan he Thumim wey Urim diyà te metinumanen he menge suluǥuen nu he iyan is menge kevuwazan ni Levi. Migezaman nu sikandan diyà te Masa ne midsawey nu ziyà te wahig te Meriba.
DEU 33:9 Impeehè dan is kezekelà te kebpekid-unungen dan kenikew he lavew te kebpekid-unungen te menge ginikanan dan, menge suled dan, wey menge anak dan. Midtuman dan is lalag nu, wey midtipiǥan dan is insurat he kebpekid-uyun nu kandan.
DEU 33:10 Ebpenuruen dan is menge Israilihanen te mehitenged te imbeǥey nu he menge sulunuzen wey menge suǥù nu, ne ebpemuhat sikandan te menge veyewà wey menge pemuhat he edtutungen diyà te pemuhatà he para kenikew.
DEU 33:11 He Nengazen, tuvazi nu sikandan, ne verakat he igkelipey nu is langun he menge vaal zan. Dèdeeti nu is menge kuntada zan su para kenè dan en mekeenew.”
DEU 33:12 Mehitenged te tribu ni Benjamin, migkaǥi si Moises te, “Pinelanggà te Nengazen is tribu ni Benjamin, ne ibpekeziyù din sikandan te ebpekezezaat wey ebpengelangan din sikandan te tivuuk he andew.”
DEU 33:13 Mehitenged te tribu ni Jose, migkaǥi si Moises te, “Berakat he edtuvazan te Nengazen is tanè dan ne layun din ebpeuzani wey ebpelepawan din te wahig he ebpuun diyà te zizalem te tanà.
DEU 33:14 Berakat he pinaaǥi te tavang te andew ne mebeǥas is menge pinemula zan te meupiya he menge veǥas te timpu te tipemeǥas din.
DEU 33:15 Berakat he is kezaan he menge vuntud dan mekeveǥey te meupiya wey zekelà he uzar.
DEU 33:16 Berakat he is tanè dan mekeveǥey te kineupiyahan he menge pruduktu pinaaǥi te keupiya te Megbevayà he mibpekidlalag diyà te egkeregreg he zeisey he kayu. Berakat he kenà maawà diyà te tribu ni Jose heini he menge tuvad su lavew sikandin te menge suled din.
DEU 33:17 Is desen din meiring te zesen te kinekekayan he tudu he vaka. Is gehem din meiring te ǥehem te sungey te kelesanen he vaka. Pinaaǥi kayi edèdeetan din is menge nasyun minsan is diyà te kinemeziyuan he vahin kayi te kelibutan. Iyan heini penuvadtuvad ku te mahabet he menge etew he egkeǥepak diyà te ki Efraim wey ki Manase.”
DEU 33:18 Mehitenged te tribu ni Zebulun wey ki Isacar, migkaǥi si Moises te, “Egkelipey is tribu ni Zebulun, su ed-uswag dan pinaaǥi te kebpetiǥayun dan diyà te zuma he menge lugar. Egkelipey is tribu ni Isacar su ed-uswag sikandan diyà te kandan he lugar.
DEU 33:19 Edhinggaten dan is menge etew te kedhendiyà te vuntud para te kebpemuhat te hustu he menge pemuhat diyà te Megbevayà. Edsilibra zan tenged te zekelà he keupiyaanan he nekuwa zan diyà te zaǥat wey ziyà te veyvey.”
DEU 33:20 Mehitenged te tribu ni Gad, migkaǥi si Moises te, “Eedeliǥen is Megbevayà he mibpekeluag te tanà te tribu ni Gad! Ed-ubpà sikandan kayi he tanà he andam he ed-upangis te vekelawan etawa ulu te menge kuntada zan.
DEU 33:21 Mibpilì dan is tanà he kineupiyahan he engayan he para te menge pengulu. Emun edtiǥum is ebpemendumala te menge Israilihanen, edsunuzen kayi he tribu is ibpetuman kandan te Nengazen wey is menge sulunuzen para te Israel.”
DEU 33:22 Mehitenged te tribu ni Dan, migkaǥi si Moises te, “Is tribu ni Dan iring te anak te erimaung he edlingketew puun te Bashan.”
DEU 33:23 Mehitenged te tribu ni Naftali, migkaǥi si Moises te, “Dekelà is tuvad te Nengazen diyà te tribu ni Naftali. Berakat he maangken dan is tanà he zapit te edsenlepan wey zapit te zivavà.”
DEU 33:24 Mehitenged te tribu ni Asher, migkaǥi si Moises te, “Berakat he tuvazi is tribu ni Asher lavew te langun he tribu te Israel. Berakat he ikelipey sikandan te menge zuma zan he menge Israilihanen wey mehimu he zekelà is lana zan.
DEU 33:25 Berakat he is menge pultahan te menge inged dan ne putew wey brunsi is biǥer zan, wey verakat he kenà maawà is kegkemekeǥeǥehem dan mintras uuyag dan pa.
DEU 33:26 Wazà iring te Megbevayà he ed-ezapen niw te menge Israilihanen. Ed-untud sikandin te ǥapun is edtavang keniyu. Pinaaǥi te gehem din edseǥazan din is langit.
DEU 33:27 Iyan eputè niw is wazà pidtemanan he Megbevayà; edlig-enan kew zin pinaaǥi te gehem din he wazà pidtemanan. Ibpesegseg din keniyu is menge kuntada niw, ne edsuǥuen kew zin te kedezaat kandan.
DEU 33:28 Umbe, ebpekepengungubpaan is menge Israilihanen he meziyù te kezeetan, dutun te tanà he uuzaran te trigu wey vinu, wey zehemug he ebpuun diyà te langit he ebeǥey te wahig diyà te tanà.
DEU 33:29 Utew kew zeyzey is menge etew te Israel! Wazà iring keniyu su iyan kew menge etew he midlibri te Nengazen. Is Nengazen iyan ebpengalang wey edtavang keniyu, ne iyan sikandin ebpekidtebek para keniyu. Ebpenanap is menge kuntada niw pehendiyà te keniyu, ne edtekutakan niw is menge peka zan.”
DEU 34:1 Puun te suǥud te Moab, midtekezeg ni Moises is Buntud he Nebo, pehendiyà te puntur te Pisga he ebpekesinaru ziyà te Jerico. Ne zutun impeehè kandin te Nengazen sikan is tivuuk he tanà–puun te Gilead pehendiyà te Dan,
DEU 34:2 is tivuuk he tanà te Naftali, is tanà te Efraim wey Manase, is tivuuk he tanà te Juda taman te Zaǥat he Mediteraneo,
DEU 34:3 is Negev, wey is tivuuk he tanà he ebpuun te Suǥud te Jerico (sikan is mahabet is palma zuen) taman te Zoar.
DEU 34:4 Ne zutun migkaǥi is Nengazen diyà te ki Moises te, “Iyan heeyan sikan is tanà he impenaad ku ziyà te ki Abraham, ki Isaac, wey ki Jacob, ne migkaǥi a ziyà te kandan te ibeǥey ku heeyan diyà te menge kevuwazan dan. Impeehè ku heeyan kenikew piru kenè ka mulà ebpekehengkeniyan.”
DEU 34:5 Umbe, minatey si Moises he suluǥuen te Nengazen diyà te Moab, sumalà te nekaǥi te Nengazen.
DEU 34:6 Inleveng sikandin diyà te Moab, diyà te suǥud-suǥud he ebpekesinaru ziyà te Bet Peor, piru ǥuntaan wazà netau ke hendei sikandin ileveng.
DEU 34:7 Is keǥurang ni Moises 120 he tuig dutun te kebpatey zin, piru mezesen pa sikandin ne meupiya pa is ked-ehè din.
DEU 34:8 Midlalew is menge Israilihanen tenged ki Moises diyà te menge suǥud te Moab seled te 30 he andew.
DEU 34:9 Ne zutun, si Josue he anak ni Nun mibeǥayan te Mulin-ulin te ketau su mibpilì sikandin ni Moises he ilis kandin pinaaǥi te kedepeneti zin kandin. Umbe mibpezumazuma kandin is menge Israilihanen, ne mibeelan dan is langun he insuǥù te Nengazen pinaaǥi ki Moises.
DEU 34:10 Puun dutun wazè en ebpeneuven diyà te Israel he iring ki Moises te nepurung mekilala te Nengazen.
DEU 34:11 Midsuǥù te Nengazen si Moises diyà te Ehipto te kebaal te menge singyal wey menge egkein-inuwan he menge vaal su wey mezaag is hadì dan, menge upisyal zin, wey te tivuuk he nasyun din.
DEU 34:12 Wazà duma he nekehimu te mekeǥeǥehem wey egkein-inuwan he menge vaal he iring te mibeelan ni Moises diyà te etuvangan te langun he menge Israilihanen.
JOS 1:1 Hein minatey en si Moises is suluǥuen te Nengazen, ne migkaǥi is Nengazen diyà te timbang ni Moises he si Josue he anak ni Nun te,
JOS 1:2 “Minatey en is suluǥuen ku he si Moises. Umbe sikew wey is langun he menge Israilihanen, pengendami niw is kedlayun niw te Wahig he Jordan pehendiyà te tanà he ibeǥey ku keniyu.
JOS 1:3 Sumalà is impenaad ku ziyà te ki Moises, ne ibeǥey ku keniyu is langun he tanà he egkeumahan niw.
JOS 1:4 Iyan heini egkehimu he tanè niw: ebpuun diyà te sibsivayan is dapit te zivavà pehendiyà te menge vuvungan diyà te Lebanon he zapit te zizaya, wey puun te zekelà he Wahig he Eufrates is dapit te edsilaan, ne taman te Zaǥat he Mediteraneo is diyà dapit te edsenlepan, wey taman te tanà te menge Hitihanen.
JOS 1:5 “Wazà ebpekezaag kenikew mintras uuyag ke pa. Su ebpekiduma a kenikew iring te kebpekiduma ku ki Moises. Kenè ku sikew ed-ewaan wey ebpesegdanen.
JOS 1:6 Mebpekelig-en ka wey mebpekevurut ka, su iyan ka ebpengulu kayi te menge etew te ked-angken duen te tanà he impenaad ku ziyà te menge kepuun dan.
JOS 1:7 Basta mebpekelig-en ka wey mebpekevurut ka utew. Purungi nu sunuza is langun he kesuǥuan he imbeǥey kenikew ni Moises te suluǥuen ku. Kenè nu heini engkezi, su para medlampus ka te langun he ebeelan nu.
JOS 1:8 Kenè nu lipati te ebasa is Libru te Kesuǥuan. Ne purungi nu ngunngunua maandew wey mezukilem su para metueni nu ke ebmenmenuwen te edtuman is langun he ingkesurat kayi. Su pinaaǥi kayi ebmeuswaǥen ka wey ebmelempusen.
JOS 1:9 Tentenuzi nu heini is insuǥù ku kenikew: ‘Mebpekelig-en ka wey mebpekevurut ka. Kenè ka mahandek wey luyahi, su siak, is Nengazen he Megbevayè nu, eduma a kenikew minsan hendei ka ebpevayà.’ ”
JOS 1:10 Umbe, mibmenduan ni Josue sikan is ebpemendumala te Israel te,
JOS 1:11 “Liǥuya niw is kampu ne keǥiyi niw is menge etew he teǥenaha zan is menge egkekaan dan, su tetelu he andew puun guntaan ne edlayun kiw en te Wahig he Jordan te ked-angken duen te tanà he imbeǥey kenitew te Nengazen he Megbevayè tew.”
JOS 1:12 Ne migkeǥiyan ni Josue is tribu ni Reuben, ni Gad, wey is ketengà he tribu ni Manase te,
JOS 1:13 “Tentenuzi niw is migkaǥi keniyu ni Moises te suluǥuen te Nengazen. Migkaǥi sikandin te ebeǥayan kew te Nengazen he Megbevayè niw te tanà he zutun kew ebpekehimeley. Ne iyan heini he tanà imbeǥey zin keniyu:
JOS 1:14 Is menge esawa niw, wey is menge anak niw ne mebpetaǥak dà kayi te tanà he zapit te edsilaan he vahin te tanà kayi te Jordan duma te menge uyaǥen niw. Piru is menge sundaru niw kinahanglan he edhuna sikandan edlayun te ked-uǥup te menge suled niw,
JOS 1:15 taman te egkaangken dan en is tanà he egkehimelayan dan he imbeǥey te Nengazen iring te naangken niw en. Ne emun egkeulaula en heini, ne egkehimu en he ebpekehulenè kew te ked-angken te tanà kayi te Jordan he zapit te edsilaan he imbeǥey keniyu ni Moises te suluǥuen te Megbevayà.”
JOS 1:16 Ne midtavak dan si Josue te, “Ebeelan dey is langun he migkaǥi nu, ne edhendiyè key te minsan hendei he ebpeveyaan nu kenami.
JOS 1:17 Edsunud key kenikew iring te kedsunud dey ki Moises, su ebpekiduma kenikew is Nengazen he Megbevayè nu iring te kebpekiduma zin ki Moises.
JOS 1:18 Edhimetayan is minsan hentei he edsupak kenikew wey kenà edtuman te mandù nu. Mebpekelig-en ke zà wey mebpekevurut!”
JOS 2:1 Ne zutun meeles he midsuǥù ni Josue is dezuwa he etew puun te kampu te menge Israilihanen diyà te Shitim su para mekepeniid diyà te Canaan, lavew en te inged he Jerico. Ne hein nekeuma ziyà te Jerico haazà is dezuwa he meniniid, ne ziyè dan medateng te valey ni Rahab; heini he vahi ebelegyà te zengeg din.
JOS 2:2 Ne netudtulan is hadì diyà te Jerico, he zutun he kezukileman duen nekeuma he menge Israilihanen te kebpeniid kandan.
JOS 2:3 Umbe, impekeǥiyan duen te hadì si Rahab te, “Ipeǥawas nu is menge etew he midateng diyà te valey nu su iyan inhengkayi zan is kebpeniid kayi te inged tew.”
JOS 2:4 Migkaǥi si Rahab te, “Tutuu he zuen menge etew he nekehengkayi piru wazè ku metueni ke hendei zan ebpuun. Migenat dan hein merusirem en, he timpu en te kedlekeb duen te pultahan te inged. Ne wazè ku metueni ke hendei zan mebpevayà, iyan, emun egaangaan kew kela ke egkesaut niw pa sikandan.” (Piru iyan tutuu is in-eles ni Rahab haazà is dezuwa he meniniid diyà te atep te valey zin, ne midtembunan din sikandan te menge mibpenamped he menge pinemula he flax he ingkagkag din dutun.)
JOS 2:7 Ne midtelukunan diyà te ǥawas duen te menge midsuǥù te hadì sikan is dezuwa he meniniid. Kegawas dan duen te pultahan ne midlekevan dan heini. Ne nekeuma zan diyà te repasan diyà te Wahig he Jordan.
JOS 2:8 Ne hein wazè pa medhizeǥà haazà is dezuwa he meniniid, nemenahik si Rahab diyà te atep
JOS 2:9 ne migkeǥiyan din sikandan te, “Netuenan ku he imbeǥey keniyu te Nengazen heini he tanà ne utew kew ingkahandek te menge etew kayi.
JOS 2:10 Nezineg dey ke mibmenumenu te ebpemaza te Nengazen is Daǥat he Meriǥà dutun te kegawas niw puun te Ehipto. Nezineg dey zaan ke mibmenumenu niw is kebpurung kedezaat duen te zezuwa he hadì te menge Amorihanen he midhadì diyà dapit te edsilaan te Jordan he iyan si Sihon wey si Og.
JOS 2:11 Nengahandek key hein nezineg dey haazà ne naawà is kevurut te kada sevaha kenami tenged keniyu. Su is Nengazen he Megbevayè niw iyan Megbevayà diyà te langit wey zini te tanà.
JOS 2:12 Umbe, penangdù kew pinaaǥi te ngazan te Nengazen, he edtevangan niw is pemilya ku iring te kedtevangi ku keniyu. Beǥayi a keniyu te gerentiya
JOS 2:13 he kena a keniyu edhimetayan wey is amey ku, iney ku, menge suled ku, wey is langun he pemilya zan.”
JOS 2:14 Ne migkaǥi haazà is dezuwa he meniniid diyà te ki Rahab te, “Iyan igerentiya zey is untung dey! Basta kenè nu idtug-an is kebpeniid dey kayi, kenè dey sikew ebmenuwen emun ibeǥey en te Nengazen kenami heini he tanà.”
JOS 2:15 Is baley ni Rahab nekezegkit duen te elavat he verengbeng duen te inged, umbe midtevangan din sikan is dezuwa he meniniid wey zan mekepenaug he ebayà diyà te sulawà pinaaǥi te kegamit te pisì.
JOS 2:16 Migkaǥi si Rahab diyà te kandan te, “Hendiyè kew te menge vuvungan su para kenè kew maahà te ebpen-ahà keniyu. Eles kew ziyà taman te tetelu he andew para ebpekelikù en sikandan kayi. Ne kegkeipus dutun, ne egkehimu en ke edlaus kew ed-ulì.”
JOS 2:17 Ne migkaǥi haazà is dezuwa he meniniid diyà te ki Rahab te, “Edtumanen dey is impepenangdù nu kenami.
JOS 2:18 Piru kinahanglan he ebeelan nu zaan heini: Emun edsurung key en kayi te tanè niw, ihiket nu heini is meriǥà he pisì diyà te sulawà he mibpeveyaan nu kenami wey key mekepenaug. Ne tiǥuma nu kayi te valey nu is amey nu, iney nu, menge suled nu, wey is langun he pemilya zan.
JOS 2:19 Ne emun duen sevaha keniyu he egawas su edhendiyà te zalan, ne wazè dey en televaken emun egkepatey sikandin. Piru zuen dey televaken emun duen egkepatey ziyà te seled te valey nu.
JOS 2:20 Piru emun idtug-an nu heini is kebpeniid dey, ne wazè dey en televaken duen te impepenangduan nu kenami.”
JOS 2:21 Ne midtavak si Rahab te, “Uya, egketuman is migkaǥi niw.” Ne zutun impeǥenat din sikandan, ne inhiket din sikan is meriǥà he pisì diyà te sulawà.
JOS 2:22 Ne hein nekeǥenat en haazà is dezuwa he meniniid, ne midhendiyè dan te menge vuvungan. Ne zutun sikandan med-eles seled te tetelu he andew, ne zutun mibpen-ahà sikandan duen te menge sinuǥù te hadì diyà te menge zalan. Ne wazà sikandan meturedu, umbe nemen-ulì dà tekew haazà is menge sinuǥù te hadì.
JOS 2:23 Ne midtupang haazà is dezuwa he meniniid wey midlayun duen te wahig ne midlikù dan diyà te ki Josue. Ne midtudtul zan ki Josue is langun he neulaula kandan.
JOS 2:24 Migkaǥi sikandan te, “Tutuu iyan he imbeǥey kenitew te Nengazen is tivuuk he tanà. Is langun he etew zutun ne nengahandek kenitew.”
JOS 3:1 Utew midsayu med-enew si Josue wey is menge Israilihanen. Mid-awè dan diyà te Shitim ne midhendiyè dan te Wahig he Jordan. Migkampu zan dèpa zutun, te wazè pa sikandan medlayun.
JOS 3:2 Kedlavey te tetelu he andew, midliǥuy ziyà te kampu zan is menge edumala,
JOS 3:3 ne mibmenduan dan is menge etew te, “Emun egkeehè niw en he ebintingen en te menge memumuhat he menge kevuwazan ni Levi sikan is Kavan te Kebpekid-uyun te Nengazen he Megbevayè niw, ne tundug kew en kandan,
JOS 3:4 su wey niw metueni ke hendei kew ebayà, su wazè kew pa keenu mekevayà kayi. Piru kenè kew utew uvey zuen te Kavan te Kebpekid-uyun. Pekeziyui niw heini te keziyù he menge 1,000 he mitrus.”
JOS 3:5 Ne migkeǥiyan ni Josue is menge etew te, “Mebpekelumpiyu kew, su keeselem ebaal is Nengazen te egkengein-inuwan diyan te keniyu.”
JOS 3:6 Ne migkeǥiyan daan ni Josue is menge memumuhat te, “Uwita niw en is Kavan te Kebpekid-uyun ne huna kew zutun te menge etew.” Ne midtuman dan haazà is migkaǥi ni Josue.
JOS 3:7 Ne zutun migkaǥi is Nengazen diyà te ki Josue te, “Guntaan he andew ebpuunan ku is kebeǥey kenikew te zengeg diyà te etuvangan te menge etew te Israel, ne egketuenan dan he ebpekiduma a kenikew iring te kebpekiduma ku ki Moises.
JOS 3:8 Keǥiyi nu is menge memumuhat he ed-uwit duen te Kavan te Kebpekid-uyun ku he emun ebpekeuma zan en duen te Wahig he Jordan, ne mebpundu sikandan dutun te wahig.”
JOS 3:9 Ne zutun mid-umew ni Josue is menge etew te, “Hendini kew su edtudtulan ku sikiyu te migkaǥi te Nengazen he Megbevayè niw.
JOS 3:10 Guntaan egketuenan niw he mibpekiduma keniyu is uuyag he Megbevayà, su emun edsurung kew en ne iyan sikandin edsegseg te menge Canaanhen, menge Hitihanen, menge Hivihanen, menge Pirisihanen, menge Girgasihanen, menge Amorihanen, wey menge Jebusihanen.
JOS 3:11 Sigureduwa niw he egkehuna sikan is Kavan te Kebpekid-uyun te Nengazen he iyan ebayàbayà te tivuuk he kelibutan dutun te kedlayun niw te Wahig he Jordan.
JOS 3:12 Guntaan pilì kew te 12 he menge etew, sevaha ziyà te kada tribu te Israel.
JOS 3:13 Ne emun ebpekeǥiek en te wahig is menge memumuhat he ebinting duen te Kavan te Kebpekid-uyun te Nengazen he iyan teǥiǥaked te tivuuk he kelibutan, ne ed-engked he edtudà is Wahig he Jordan. Is wahig he edtudà ne ebpundu ziyà te sevaha he lugar.”
JOS 3:14 Timpu haazà te tiraǥun ne midalem haazà is wahig. Ne mid-awà is menge etew zuen te kampu zan su edlayun dan en duen te wahig. Ne iyan midhuna sikan is menge memumuhat he ebinting duen te Kavan te Kebpekid-uyun. Ne kebpekeǥiek duen te menge memumuhat duen te wahig,
JOS 3:16 ne mid-engked he edtudà haazà is wahig. Mibpundu is wahig diyà te sevaha he lugar he egngezanan te Adam, inged heini he uvey te Zaretan. Wazè en wahig he edtudà pehendiyà te Zaǥat te Araba, umbe nekelayun haazà is menge etew ziyà te lugar he uvey te Jerico.
JOS 3:17 Midhitindeg diyà te teliwazà dutun te nemezahan he wahig sikan is menge memumuhat he mibinting duen te Kavan te Kebpekid-uyun te Nengazen taman te nekelayun is langun he menge zuma zan.
JOS 4:1 Hein nekelayun en is langun he menge etew te Israel te Wahig he Jordan, ne migkaǥi is Nengazen diyà te ki Josue te,
JOS 4:2 “Pilì ka te 12 he etew, sevaha ziyà te kada tribu,
JOS 4:3 ne ipekuwa nu sikandan te tigselimbaha he vatu ziyà te teliwazà te Wahig he Jordan, duen mismu te midhitindeǥan te menge memumuhat. Ne uwita zan haazà diyà te lugar he zutun kew egkampu kengkuwan ke mezukilem.”
JOS 4:4 Umbe, mid-umew ni Josue sikan is 12 he menge etew he mibpilì din puun te kada tribu te Israel, ne migkeǥiyan din sikandan te,
JOS 4:5 “Hendiyè kew te teliwazà te wahig etuvangan duen te nesevukan te Kavan te Kebpekid-uyun te Nengazen he Megbevayè niw. Is kada sevaha keniyu ne megkuwa te sevaha he vatu he ed-uwiten din, sevaha te kada tribu te Israel.
JOS 4:6 Ne vurvuruna niw heini ne veeli niw he munyumintu he tedeman te mibeelan te Nengazen, su para heini te huziyan he timpu, emun ed-insà is menge anak niw ke hengkey is kehuluǥan kayi he menge vatu,
JOS 4:7 keǥiyi niw sikandan he mid-engked he edtudà is Wahig he Jordan hein inlayun sikan is Kavan te Kebpekid-uyun te Nengazen. Heini he menge vatu kenà egkaawà he tedeman te menge etew te Israel taman te taman.”
JOS 4:8 Ne midtuman duen te 12 he menge Israilihanen is insuǥù kandan ni Josue. Sumalà is migkaǥi te Nengazen diyà te ki Josue, ne migkuwa zan te 12 he vatu ziyà te teliwazà duen te wahig, sevaha he vatu is para te kada tribu te Israel. Mid-uwit dan haazà is menge vatu ziyà te lugar he migkempuwan dan, ne mibpunduk dan heini zutun.
JOS 4:9 Ne midsavuk daan si Josue te 12 he vatu ziyà te teliwazà duen te wahig, duen mismu te midhitindeǥan te menge memumuhat he ebinting duen te Kavan te Kebpekid-uyun. Ne taman en guntaan kemulu pa zutun haazà is menge vatu.
JOS 4:10 Wazà med-engked he edhitindeg diyà te teliwazà duen te wahig is menge memumuhat taman te netuman te menge etew is langun he insuǥù te Nengazen ki Josue, he iyan ded sikan is insuǥù ni Moises ki Josue. Migaanggaan medlayun is menge etew.
JOS 4:11 Ne hein nekelayun en sikandan is langun, inlaus daan ilayun duen te menge memumuhat sikan is Kavan te Kebpekid-uyun te Nengazen kandan. Ne midhunaan en maan duen te menge memuhat is menge etew.
JOS 4:12 Midhuna zaan medlayun is neǥumeenan he menge maama he edpuun te tribu ni Reuben, ni Gad, wey te ketengà he tribu ni Manase, sumalà is insuǥù ni Moises kandan.
JOS 4:13 Heini is 40,000 he neǥumeenan he menge maama mibayà diyà te etuvangan te Nengazen ne midhendiyè dan te menge suǥud te Jerico su ebpekidtebek dan.
JOS 4:14 Dutun he andew mibeǥayan te Nengazen si Josue te zengeg diyà te etuvangan te menge Israilihanen. Ne midtahud si Josue te menge etew seled te tivuuk he untung din iring te kedtahud dan ki Moises.
JOS 4:15 Ne zutun te kebpekelayun en te menge Israilihanen te Wahig he Jordan, migkaǥi is Nengazen diyà te ki Josue te,
JOS 4:16 “Heeyan is menge memumuhat he ebinting keniyan te Kavan te Kebpekid-uyun ku keniyu mendui nu te kegawas puun keniyan te edtudaan te Wahig he Jordan.” Ne midtuman haazà ni Josue.
JOS 4:18 Ne hein nekeǥawas en sikan is menge memumuhat he ebinting duen te Kavan te Kebpekid-uyun te Nengazen, ne mid-uman en medalem haazà is wahig iring hein aney zan mekeuma kayi.
JOS 4:19 Is kedlayun te menge Israilihanen te Wahig he Jordan nehitavù hein ikesepulù he andew te egkehuna he vulan. Ne migkampu sikandan diyà te Gilgal he zapit te edsilaan emun diyè ki te Jerico.
JOS 4:20 Ne zutun punduka ni Josue sikan is 12 he menge vatu he impekuwa zin puun te Wahig he Jordan.
JOS 4:21 Migkeǥiyan ni Josue is menge Israilihanen te, “Keuzemà, emun ed-insaan kew te menge anak niw ke hengkey is kehuluǥan kayi te menge vatu,
JOS 4:22 tudtuli niw sikandan he memaza he tanà is midhipenawan te menge Israilihanen hein midlayun dan te Wahig he Jordan.
JOS 4:23 Tudtuli niw sikandan he mibpemezahan te Nengazen he Megbevayè tew is Wahig he Jordan taman te nekelayun key iring ded te mibeelan din dengan diyà te Zaǥat he Meriǥà taman te nekelayun key.
JOS 4:24 Mibeelan heini te Nengazen su para kilelaa te langun he etew kayi te kelibutan he mekeǥeǥehem sikandin, wey kew layun medtahud kandin te Nengazen he Megbevayè niw.”
JOS 5:1 Netudtulan is langun he menge hadì he menge Amorihanen he ziyà te zapit te edsenlepan te Jordan wey is langun he menge hadì he menge Canaanhen he ziyà te veyvey te Mediteraneo ke mibmenumenu te Nengazen is kebpemezahi zin te Wahig he Jordan hein midlayun is menge Israilihanen. Umbe nengahandek sikandan ne naawà is kevurut dan te kebpekidtebek te menge Israilihanen.
JOS 5:2 Dutun he timpu migkaǥi is Nengazen diyà te ki Josue te, “Vaal ka te menge ubpit he lintikan he vatu, ne veeli nu en maan is kedsirkunsidar te menge Israilihanen he wazà mesirkunsidar.”
JOS 5:3 Umbe, mibaal si Josue te menge ubpit ne midsirkunsidar zin is menge Israilihanen diyà te vuntud he migngezanan te Midsirkunsidaran.
JOS 5:4 Iyan heini hinungdan ke maan is mibpensirkunsidar ni Josue is menge maama: Hein mibpuun is menge Israilihanen diyà te Ehipto, nesirkunsidar en is langun he menge maama kandan. Piru sikan is impen-anak seled te 40 he tuig te kebpekeriǥuriǥu zan diyà te sibsivayan ne wazè pa mengesirkunsidar. Ne zutun he timpu, is menge maama he hustu en he id-asdang te tebek su netengkaan en is keǥurang dan nemematey su wazè dan mebpezumazuma te Nengazen. Migkeǥiyan sikandan te Nengazen he kenè dan en egkaahà is meupiya wey selebpeten he tanà he impenaad din diyà te menge kepuun tew he ibeǥey kenitew.
JOS 5:7 Ne iyan heini sikandan midsirkunsidar ni Josue, su wazà heini sikandan mesirkunsidar zutun te timpu te kedtulung dan kedhipanew.
JOS 5:8 Ne hein nengesirkunsidar en sikandan, mid-ubpàubpà dà sikandan diyà te kampu zan taman te nengeulian dan.
JOS 5:9 Ne migkaǥi is Nengazen diyà te ki Josue te, “Guntaan he andew in-awè ku ziyà te keniyu is keelezan tenged te kegkeuripena keniyu ziyà te Ehipto.” Umbe iyan inngazan dutun he lugar is Gilgal taman en guntaan.
JOS 5:10 Ne zutun te kegkampu te menge Israilihanen diyà te Gilgal, he ziyà te suǥud te Jerico, midsilibra zan is Pista te Kedlavey te Belinsuǥuen. Mibeelan dan heini hein mezukilem te ike-14 he andew te nehuna he vulan.
JOS 5:11 Ne hein nepawà, nemengaan sikandan te sinandag he trigu wey supas he wazè din tapey he iyan kes menge abut dutun te tanà.
JOS 5:12 Ne puun dutun neengked en is kegkengeulug te ‘manna’, umbe puun dutun iyan en keuyaǥan dan is menge abut he ebpuun te tanà he Canaan.
JOS 5:13 Ne hein diyà si Josue te uvey te Jerico, duen etew he neehè din he edhithitindeg diyà te etuvangan din he egkulang te ispada. Ne mid-insaan sikandin ni Josue te, “Sundaru zey ve sikew etawa kuntada zey sikew?”
JOS 5:14 Ne midtavak haazà is etew te, “Kenà a keniyu sundaru he zumezapig keniyu ne kenà a zaan keniyu kuntada. Midhengkayi a he peremandar te menge sundaru te Nengazen.” Ne impaahà ni Josue is kedtahud din su midlangkeb sikandin, ne zutun mid-insà sikandin te, “Datù, hengkey is idsuǥù nu kediey te suluǥuen nu?”
JOS 5:15 Ne midtavak haazà is peremandar te menge sundaru te Nengazen te, “Pul-uta nu is sandalyas nu su segradu he lugar heini is nehitindeǥan nu.” Ne midtuman ni Josue haazà is insuǥù kandin.
JOS 6:1 Mibpurungan lekevi is Jerico te menge meǥinged duen su wey kenà mekeseled is menge Israilihanen. Wazà ebpekeseled wey ebpekeǥawas dutun te inged.
JOS 6:2 Migkaǥi is Nengazen diyà te ki Josue te, “Ibpesakup ku keniyu is Jerico ragkes is hadì kayi wey menge sundaru.
JOS 6:3 Ne sikew wey is langun he menge sundaru nu ne liǥuya niw heeyan is inged te kesevaha kada andew, seled te heenem he andew.
JOS 6:4 Ipehuna nu is ebivinting duen te Kavan te Kebpekid-uyun ku keniyu he pitu he menge memumuhat he ed-uwit te tigselimbaha he vudyung. Ne emun ikepitu en he andew, ne kepipitu niw liǥuya haazà is inged, duma te menge memumuhat he ebpezaǥing te vudyung.
JOS 6:5 Ne emun egkezineg niw en is mezaǥing wey egkeuǥet ebpengkusa he zaǥing te vudyung dan, ne kulahì kew is langun te utew mezaǥing. Ne zutun he timpu egkeregdas is berengbeng keniyan he inged. Ne zutun wazè en ebpekaalang keniyu te kedseled niw.”
JOS 6:6 Umbe, mid-umew ni Josue is menge memumuhat ne migkeǥiyan din te, “Uwita niw is Kavan te Kebpekid-uyun. Ne medhuna is pitu keniyu he ed-uwit te tigselimbaha he vudyung.”
JOS 6:7 Ne migkeǥiyan din is duma he menge etew te, “Genat kew en. Liǥuya niw heeyan is inged. Is duma he menge sundaru medhuna zuen te ebpemen-uwit te vudyung he pitu he menge memumuhat.”
JOS 6:8 Ne midtuman dan is mandù ni Josue. Midhuna is pitu he memumuhat duen te ebinting te Kavan te Kebpekid-uyun te Nengazen ne impezaǥing dan is menge vudyung dan.
JOS 6:9 Ne midhuna zuen te menge memumuhat he ebpezaǥing te menge vudyung dan is duma he menge sundaru, ne is duma pa edtinundug duen te Kavan te Kebpekid-uyun. Ne kena egkeengked is kedaǥing te menge vudyung.
JOS 6:10 Piru mibmenduan ni Josue is menge etew he kenè dan megkulahi etawa megurub taman te kenè pa sikandin ebmandar te kegkulahì.
JOS 6:11 Ne midtuman dan is insuǥù ni Josue, inliǥuy zan dutun te inged te kesevaha sikan is Kavan te Kebpekid-uyun te Nengazen. Ne kegkepasad midlikù dan diyà te kampu zan ne te kegkezukilem midlipezeng dan.
JOS 6:12 Ne kegkemeselem, utew midsayu med-enew si Josue. Ne mid-uwit en maan duen te menge memumuhat sikan is Kavan te Kebpekid-uyun te Nengazen,
JOS 6:13 ne midhuna ǥihapun sikan is pitu he menge memumuhat he ebpezaǥing te menge vudyung. Ne iyan ded mibeelan duen te menge sundaru is: edhuna is duma ne is duma pa, edtinundug duen te Kavan te Kebpekid-uyun te Nengazen, ne idtulung dan en ibpezaǥing is menge vudyung.
JOS 6:14 Ne iyan heini ikezuwa he andew te kedliǥuy zan te kesevaha zutun te inged, ne kegkepasad dutun midlikù dan en maan diyà te kampu zan. Ne iyan heeyan mid-ulaula zan seled te heenem he andew.
JOS 6:15 Ne hein ikepitu en he andew, ne egkeriwaswas pa ne mid-enew en sikandan ne midliǥuy sikandan dutun te inged iring te mibeelan dan te midlavey he heenem he andew. Piru kayi he andew kepipitu zan medliǥuy zutun te inged.
JOS 6:16 Ne hein ikepitu en te kedliǥuy zan, impezaǥing te menge memumuhat is menge vudyung dan ne mibmendaran ni Josue is menge etew te, “Kulahì kew su imbeǥey en keniyu te Nengazen heini is inged!
JOS 6:17 Heini is tivuuk he inged wey is langun he netaǥù kayi ibpemuhat diyà te Nengazen pinaaǥi te kedezeeti zuen. Si Rahab dà he ebelegyà te zengeg din wey is tivuuk he pemilya zin is edlibriyen su in-eles din sikan is menge meniniid tew.
JOS 6:18 Kenè kew megkuwa te minsan hengkey he vutang he para edezeetan. Su emun ebeelan niw heini egkezeetan kew, ne iyan kew egkehimu he hinungdan emun duen kezeetan he egkehitavù te Israel.
JOS 6:19 Piru is langun he menge azen he pelata, bulawan, brunsi, etawa putew, ne para heini te Nengazen, ne kinahanglan he idtaǥù diyà te teleǥuey te ketiǥeyunan te Nengazen.”
JOS 6:20 Impezaǥing te menge memumuhat is menge vudyung dan, ne nemengulahì is menge Israilihanen hein nezineg dan heini. Ne neregdas is berengbeng dutun te inged ne utew zà melemu is kedseled dan ne mid-aǥew zan haazà is inged.
JOS 6:21 Impurung dan ipemuhat diyà te Nengazen haazà is inged pinaaǥi te kegeraa zan te menge maama wey menge vahi, meǥurang wey vatà, ragkes en is menge vaka, menge kerehidu, wey menge asnu.
JOS 6:22 Ne migkeǥiyan ni Josue sikan is dezuwa he neniid diyà te Jerico te midlavey he timpu te, “Hendiyè kew te valey zuen te vahi he ebelegyà te zengeg din, ne iǥawas niw sikandin wey is langun he sakup te pemilya zin sumalà is insaad niw kandin.”
JOS 6:23 Umbe, migenat haazà is dezuwa ne miduma zan diyà te ǥawas si Rahab, duma te amey zin, iney zin, menge suled din, wey is langun he sakup te pemilya zin. Impeǥawas dan sikandan is langun ne impehulenè dan diyà te sevaha he lugar he gawas te kampu zan.
JOS 6:24 Ne mibinsulan dan haazà is tivuuk he inged wey is langun he netaǥù kayi gawas te menge azen he pelata, bulawan, brunsi, wey putew. Mibpenguwa zan haazà su wey zan iketaǥù diyà te teleǥuey te ketiǥeyunan te Nengazen.
JOS 6:25 Piru midlibri mulà ni Josue si Rahab wey is pemilya zin su ǥeina te in-eles din sikan is menge maama he midsuǥù ni Josue te kebpeniid te Jerico. Taman en guntaan ne kemulu meǥinged diyà te Israel is menge kevuwazan din.
JOS 6:26 Dutun he timpu mibpetizeenan ni Josue is menge Isaelihanen: “Edrewakan te Nengazen is minsan hentei he edtinguhà te ked-uman kebangun kayi te inged he Jerico. Is minsan hentei he ed-uman ebaal te pundasyun kayi ne ebpatey is kinekekayan he anak din. Is ebpeterebahu te menge pultahan kayi ebpatey is tinengkezan he anak din.”
JOS 6:27 Mibpekiduma ki Josue is Nengazen, ne nevantug sikandin seled te tivuuk he nasyun.
JOS 7:1 Piru midrapas iyan te menge Israilihanen is suǥù te Nengazen he kenè dan ibpekuwa te minsan hengkey he impurung en ipemuhat diyà te Nengazen. Su migkuwa si Acan te menge vutang he kenà engayan he egkuwaan, umbe utew nepauk is Nengazen kandan. Heini si Acan anak ni Carmi. Si Carmi anak ni Zabdi. Si Zabdi anak ni Zera. Heini sikandan sakup te tribu ni Juda.
JOS 7:2 Puun te Jerico midsuǥù si Josue te menge etew he ibpepeniid te Ai, sevaha heini he inged he zapit te edsilaan he vahin te Betel, he uvey te Bet Aven. Umbe migenat haazà he menge etew su ebpeniid dan.
JOS 7:3 Ne hein nekelikù dan en, migkaǥi sikandan diyà te ki Josue te, “Kenè en kinahanglan he pudu kiw edsurung diyà te Ai, su zeisey zà is meǥinged duen. Suǥù ke zà te 2,000 etawa 3,000 he menge etew he edsurung dutun te inged.”
JOS 7:4 Umbe menge 3,000 zà is midsurung diyà te Ai,
JOS 7:5 piru midal-as sikandan te menge tig-Ai puun te pultahan dutun te inged taman te Shebarim, ne menge 36 kandan is nepatey hein edtupang dan. Umbe naawà is kevurut te menge Israilihanen wey nengahandek dan.
JOS 7:6 Ne tenged te kegkeseeng, si Josue wey is ebpemendumala te Israel, mibindas dan is menge visti zan ne mibukbukan dan te eliyavuk is menge ulu zan, ne taman te mezukilem, midlangkeb dan diyà te etuvangan duen te Kavan te Kebpekid-uyun te Nengazen.
JOS 7:7 Migkaǥi si Josue te, “He Nengazen he MEGBEVAYÀ, maan is impelayun key pa kenikew te Wahig he Jordan ke ibpezaag key zè bes kenikew te menge Amorihanen? Deyzey pa ke wazè key en med-awà diyà layun te Jordan.
JOS 7:8 He Nengazen, hengkey en be is egkekaǥi ku te mibpeleǥuyan man te menge Israilihanen is menge kuntada zan?
JOS 7:9 Emun egkezineg heini te menge Canaanhen wey zuma pa he meǥinged kayi ne edliǥuyan key zan, ne ebpenhimetayan key zan. Ne emun iyan haazà, hengkey is ebeelan nu para kenà mezeeti is dengeg nu?”
JOS 7:10 Ne migkaǥi is Nengazen diyà te ki Josue te, “Hitindeg ka! Maan is edlangkeb ka?
JOS 7:11 Nekesalà is Israel; midrapas dan is kebpekid-uyun ku. Migkuwa zan te menge vutang he impurung en ipemuhat kayi te kedì. Midtakew zan heini, midtarùtarù dan bahin kayi, ne intampu zan heini te menge azen dan.
JOS 7:12 Iyan heini hinungdan ke maan is kenè dan ebpekesukul te menge kuntada zan. Mibpeleǥuyan dan is menge kuntada zan, su edezeetan man daan sikandan he pemuhat kayi te kedì. Kenà ad ebpekiduma keniyu taman te kenè niw edezeetan heeyan is menge azen he para zà kediey.
JOS 7:13 “Hitindeg ka ne keǥiyi nu is menge etew he lumpiyuwi zan is keugelingen dan para te ked-etuvang dan kedì keeselem, tenged te siak, is Nengazen he Megbevayà te Israel, egkaǥi te: ‘He Israel, duen niw in-eles he menge azen he para zà kediey. Kenè kew ebpekesukul te menge kuntada niw mintras wazè pa maawà diyà te keniyu heini he menge azen.’
JOS 7:14 Umbe, keeselem te meselem med-uvey kayi te kediey is kada tribu niw. Is tribu he idtezù ku he nekesalà ne med-uvey kayi te kediey is kada sengeepuan. Is kezuzumahi he idtezù ku he nekesalà med-uvey is kada pemilya kayi te kediey. Is pemilya he idtezù ku he nekesalà med-uvey is kada sevaha kayi te kediey.
JOS 7:15 Is etew he idtezù ku he mid-eles duen te menge vutang he impurung ipemuhat kayi te kedì edtutungen duma te pemilya zin wey te langun he menge azen din. Su midrapas din is kebpekid-uyun ku, ne mibaal sikandin te mekeeled-eled he vaal kayi te Israel.”
JOS 7:16 Ne hein meselem en, ne impesayu en ni Josue te ebpeuvey ziyà te Nengazen is kada tribu te Israel. Ne is intezù he nekesalà iyan is tribu ni Juda.
JOS 7:17 Ne impeuvey zin is kevuwazan ni Juda, ne iyan nepilì kandan is menge pemilya ni Zera. Ne impeuvey zin is menge kevuwazan ni Zera, ne is nepilì kandan iyan is pemilya ni Zabdi.
JOS 7:18 Ne impeuvey zin is pemilya ni Zabdi ne is intezù iyan si Acan. (Si Acan anak ni Carmi. Si Carmi anak ni Zabdi. Ne si Zabdi anak ni Zera te sakup te tribu ni Juda.)
JOS 7:19 Ne migkaǥi si Josue ziyà te ki Acan te, “Mama, beǥayi nu te zengeg is Nengazen he Megbevayà te Israel; keǥiya nu is tutuu ziyà te etuvangan din. Keǥiya nu kayi te kediey ke hengkey is mibeelan nu? Kenè nu heini ieles kediey.”
JOS 7:20 Ne midtavak si Acan te, “Tutuu he nekesalà a ziyà te Nengazen he Megbevayà te Israel. Iyan heini mibeelan ku:
JOS 7:21 Duen te menge azen he netavan tew, duen ku neehè he mekempet he visti he ebpuun diyà te Babilonia, pelata he menge dezuwa he kilu wey tengà, wey senge verita he vulawan he menge tengà te kilu. Utew ku neimahi heini he menge azen, umbe migkuwa ku. Ne inleveng ku heini ziyà te tanà he seled te tulda ku, ne ziyà te kinezizeleman sikan is pelata.”
JOS 7:22 Umbe, duen menge etew he midsuǥù ni Josue he megaanggaan medhendiyà te tulda ni Acan. Ne neehè dan iyan dutun is menge azen he inleveng, sumalà is nekaǥi ni Acan.
JOS 7:23 Ne mid-uwit dan heini ziyà te ki Josue wey te langun he menge Israilihanen, ne insavuk dan diyà te etuvangan te Nengazen.
JOS 7:24 Ne zutun mid-uwit ni Josue wey te langun he menge Israilihanen si Acan diyà te Suǥud te Acor, ragkes sikan is pelata, bisti, wey senge verita he vulawan, wey is menge anak din, menge vaka zin, menge asnu zin, menge kerehidu zin, tulda zin, wey is langun he azen din.
JOS 7:25 Migkaǥi si Josue ziyà te ki Acan te, “Maan is mid-uwit ka te samuk kayi te kenami? Umbe edsilutan ka ǥuntaan te Nengazen.” Ne zutun mibpenuleng te vatu te menge Israilihanen si Acan taman te kebpatey zin. Ne mibpenuleng dan daan te vatu is pemilya zin ne mibinsulan dan is menge azen din.
JOS 7:26 Ne kegkepasad dutun, midtembuan dan te vatu si Acan. Ne taman en guntaan dutun pa haazà is menge vatu. Ne haazà he lugar migngezanan te Suǥud te Acor taman guntaan. Ne tenged kayi naawà is pauk te Nengazen.
JOS 8:1 Ne migkaǥi is Nengazen diyà te ki Josue te, “Kenè ka mahandek etawa luyahi. Tiguma nu is langun he menge sundaru nu ne umani niw surunga is Ai, su ebpeveyveyaan ku en kenikew is hadì te Ai, is menge etew zin, is inged din, wey is tanè din.
JOS 8:2 Beeli niw ziyà te Ai wey ziyà te hadì dutun is iring te mibeelan niw ziyà te Jerico wey zuen te hadì te Jerico; piru ǥuntaan egkehimu en human ke egkuwaan niw is menge azen dan wey is menge uyaǥen dan he para en keniyu. Pengandam kew ne eyani niw sikandan, ne ziyè kew vayà te egkeiniyuǥan te inged.”
JOS 8:3 Umbe, nengandam si Josue wey is langun he menge sundaru zin para te kedsurung dan diyà te Ai. Mibpilì si Josue te 30,000 he menge sundaru he metau he ebpekidtebek ne impelapus din sikandan.
JOS 8:4 Ne ke sikandin diyà te kandan te, “Eles kew ziyà te egkeiniyuǥan te inged, piru kenè kew utew mebpekeziyù dutun te inged. Pengandam kew te kedsurung niw te minsan hengkey he uras.
JOS 8:5 Ne siak wey is menge zuma ku ne ziyè key mulà ebayà te etuvangan te inged is edsurung. Ne emun egawas en is menge tig-Ai te kebpekidtebek kenami, ne ebpemelaǥuy key iring duen te nehuna he kedsurung tew.
JOS 8:6 Ne zutun, ebpekekaǥi sikandan te nengahandek key iring duen te nehuna he nehitavù, ne zutun edel-asen key zan ne ebpezal-as key taman te ebpekepekeziyù sikandan puun te inged.
JOS 8:7 Ne zutun seǥuǥunè kew ǥawas puun te mid-elesan niw ne eǥawa niw is inged. Ibeǥey heini keniyu te Nengazen he Megbevayè niw.
JOS 8:8 Ne emun egkaaǥew niw en heini binsuli niw su iyan heeyan suǥù te Nengazen. Sigureduwa niw he metuman niw heini.”
JOS 8:9 Ne impeǥenat sikandan ni Josue, ne mid-eles dan diyà te zapit te edsenlepan emun dutun ki te Ai, diyà te pid-elangan te Ai wey Betel. Ne zutun he kezukileman wazè pa si Josue med-awà diyà te kampu zan duma te menge etew.
JOS 8:10 Ne hein nepawà, midsayu med-enew si Josue ne midtiǥum din is menge etew zin. Ne iyan sikandin wey is menge pengulu te Israel nengegalen te menge etew te kedhendiyà te Ai.
JOS 8:11 Ne nekeuma zan diyà te sevaha he lugar he egkesineruwan te pultahan dutun te inged he Ai, ne mibangun sikandan te menge tulda ziyà te egkezivavà kayi. Ne zuen suǥud-suǥud diyà te pid-elangan kayi wey Ai.
JOS 8:12 Duen en impehuna ni Josue he 5,000 he menge sundaru te kedsurung dutun te inged. Diyè dan mebpelastar te zapit te edsenlepan dutun te inged, diyà te tengàtengà te Ai wey Betel.
JOS 8:13 Umbe, iyan heini kebpekepelastar te menge sundaru: is duma he menge sundaru, ne ziyà te zivavà dutun te inged, ne is duma pa, diyà dapit te edsenlepan kayi. Ne zutun he kezukileman midhendutun ensì Josue te suǥud.
JOS 8:14 Ne hein naahà sikandan duen te hadì diyà te Ai, ne migaanggaan sikandin megawas dutun te inged duma te menge etew zin te utew pa meselem, ne midhendiyè dan te lugar he egkesineruwan te Suǥud te Jordan su ebpekidtebek dan te menge Israilihanen. Wazè dan metueni he zuen bes edsurung kandan he ebpuun diyà te egkeiniyuǥan dutun te inged.
JOS 8:15 Ne si Josue wey is menge etew zin ne uvag kun nezaag sikandan, ne mibpelaǥuy zan pehendiyà te sibsivayan.
JOS 8:16 Ne midal-as kandan is langun he menge maama ziyà te Ai taman te neziyuan dan en haazà is inged.
JOS 8:17 Is langun he menge maama ziyà te Ai wey ziyà te Betel midal-as dan is menge Israilihanen, umbe wazà nesamà he ebpekidtebek para kenà maaǥew haazà is inged.
JOS 8:18 Ne migkeǥiyan si Josue te Nengazen te, “Bentanga nu is bangkew nu ziyà te Ai su ibeǥey ku kenikew is Ai.” Umbe mibantang ni Josue is bangkew zin diyà te Ai.
JOS 8:19 Ne segugunà nenggawas sikan is menge etew zin puun te mid-elesan dan. Midseled dan dutun te inged ne migègaanan dan heini binsuli.
JOS 8:20 Ne kedlilingey te menge tig-Ai, neehè dan is evel he ebpuun dutun te inged. Wazè dan en egkepeleǥuyan su mid-etuvang en man sikandan duen te menge Israilihanen he edel-asen dan pehendiyà te sibsivayan.
JOS 8:21 Su hein naahà ni Josue wey te menge etew zin he nekeseled en duen te inged is menge zuma zan ne mibinsulan dan en heini, midlikù sikandan is ed-etaki te menge tig-Ai.
JOS 8:22 Ne mid-etaki zaan is menge Israilihanen he midseled dutun te inged, umbe nelingutan is menge tig-Ai. Mibpenhimetayan eni Josue sikandan is langun; wazà nekepelaǥuy kandan ne wazà neuyag kandan,
JOS 8:23 gawas duen te hadì dan. Mibihag dan heini ne mid-uwit dan diyà te ki Josue.
JOS 8:24 Hein naamin dan en te edhimatey is langun he menge tig-Ai he midal-as kandan diyà te menge pemuleey wey ziyà te sibsivayan, midlikuan dan sikan is inged ne mibpenhimetayan dan is langun he nesamà dutun.
JOS 8:25 Dutun he andew mibpatey is langun he meǥinged diyà te Ai–12,000 langun he menge maama wey menge vahi.
JOS 8:26 Wazà engkezi ni Josue is kebantang duen te vangkew zin diyà te Ai taman te naamin mebpatey is langun he meǥinged dutun.
JOS 8:27 Mibpenguwa te menge Israilihanen is menge uyaǥen wey menge azen dutun te inged, sumalà is migkaǥi te Nengazen diyà te ki Josue.
JOS 8:28 Ne kegkepasad dutun, mibpevinsulan ni Josue is tivuuk he Ai ne wazè en heini meuman mevangun. Ne taman en guntaan wazè en meǥinǥed kayi.
JOS 8:29 Impevitey zin sikan is hadì diyà te kayu ne mibey-anan heini zutun taman te mahapun. Ne kedsanlep te andew impekuwa ni Josue haazà is minatey he hadì ne impetimbag din diyà te ǥawas te pultahan dutun te inged. Ne midtembuan dan heini te menge vatu, ne taman en guntaan kemulu egkaahà haazà is menge vatu.
JOS 8:30 Ne zutun mibpevaal si Josue te pemuhatà diyà te Buntud he Ebal he para te Nengazen he Megbevayà te Israel.
JOS 8:31 Mibpeveelan din heini sumalà te suǥù te suluǥuen te Nengazen he si Moises diyà te menge Israilihanen. Heini he suǥù ingkesurat diyà te Libru te Kesuǥuan ni Moises, he edhenduen: “Beeli niw is pemuhatà he vatu he wazà mesepsapi wey wazà meǥemiti te putew.” Ne ziyà te zivavew zutun he pemuhatà, nemuhat dan diyà te Nengazen te menge pemuhat he edtutungen wey menge pemuhat he para te meupiya he kedepità.
JOS 8:32 Ne ziyà te etuvangan te menge Israilihanen, migkupya ni Josue ziyà te menge vatu sikan is kesuǥuan he insurat ni Moises.
JOS 8:33 Is langun he menge Israilihanen, duma te menge pengulu zan, menge upisyal, wey is menge zatù ragkes is kenà menge Israilihanen he zuma zan he meǥinged midhitindeg he ebpesinsineruwà. Ne ziyà medhitindeg te teliwazè dan is menge memumuhat (he menge kevuwazan ni Aaron) he mibinting duen te Kavan te Kebpekid-uyun kandan te Nengazen. Is ketengà kayi te menge etew, ne ed-iniyuǥan dan is Buntud he Gerizim ne is sevaha he ketengà, ne ed-iniyuǥan dan is Buntud he Ebal. Si Moises he suluǥuen te Nengazen is midsuǥù kandan te kebaal kayi emun egkeume en is timpu te kedewata zan te kebpenubtuvazi kandan.
JOS 8:34 Ne zutun mibasa ni Josue sikan is libru te kesuǥuan, ragkes en sikan is menge penuvadtuvad wey menge rawak he ingkesurat kayi.
JOS 8:35 Midtigseselimbaha vesaha ni Josue is menge suǥù ni Moises diyà te etuvangan te tivuuk he keet-etawan te Israel ragkes en is menge vahi, menge vatà, wey kenà menge Israilihanen he zuma zan he meǥinged.
JOS 9:1 Nezineg te langun he menge hadì diyà dapit te edsenlepan te Jordan is tudtul mehitenged te kebpekezaag te menge Israilihanen. (Iyan heini sikandan menge hadì te menge Hitihanen, menge Amorihanen, menge Canaanhen, menge Pirisihanen, menge Hivihanen, wey menge Jebusihanen.) Meǥinged sikandan diyà te menge vuvungan, menge mibuntud-buntud diyà te edsenlepan, wey menge veyvey te Zaǥat he Mediteraneo taman en te Lebanon.
JOS 9:2 Midsevaha sikandan te kebpekidtebek ki Josue wey te Israel.
JOS 9:3 Piru hein nezineg te menge tig-Gibeon is mibeelan ni Josue ziyà te Jerico wey ziyà te Ai,
JOS 9:4 neuyun dan he edterteruan dan si Josue. Impehendiyè dan te ki Josue is menge etew he zuen dan menge asnu he migkergahan te zaan he menge saku wey nengevindas wey menge tinepikan he lundis he teleǥuey te vinu.
JOS 9:5 Midsesendalyas daan sikandan te menge tinepikan wey mibivisti te utew en daan he menge visti. Memaza wey egkengepugpug en is menge supas he lutù dan.
JOS 9:6 Midhendiyè dan te ki Josue ziyà te kampu te Israel ziyà te Gilgal ne migkeǥiyan dan sikandin wey is menge Israilihanen te, “Midhendini key is ebpuun diyà te meziyù he lugar para zà te kedhangyù keniyu he ed-uyun kiw, ne penangdù kew ziyà te kenami he kenè key keniyu edhilevetan.”
JOS 9:7 Ne midtavak is menge Israilihanen te, “Kela ke uvayè dey zà sikiyu he menge meǥinged. Umbe kenà egkehimu ke ebpekid-uyun key keniyu.”
JOS 9:8 Ne mibpehizuhizu sikandan ki Josue. Ke sikandan te, “Andam key he ebpenilbi keniyu.” Ne mid-insà si Josue kandan te, “Hentei kew wey hendei kew ebpuun?”
JOS 9:9 Ne midtavak dan te, “Diyè key ebpuun te utew meziyù he lugar. Midhendini key su nekezineg key mehitenged te Nengazen he Megbevayè niw. Netudtulan key te langun he mibeelan din diyà te Ehipto,
JOS 9:10 wey is langun he mibeelan din duen te zezuwa he Amorihanen he hadì he ziyà dapit te edsilaan he iyan si Hadì Sihon he hadì te Heshbon, wey si Hadì Og he hadì te Bashan he ed-ubpà diyà te Ashtarot.
JOS 9:11 Umbe, midsuǥù key te menge pengulu zey wey zuma zey he menge meǥinged he endama zey is keenen he egkelutù dey ne medhengkayi key te kebpekidhinguma keniyu su wey zey sikiyu mekeǥiyi he andam key he ebpenilbi keniyu, basta ebpekid-uyun kew kenami he kenè key keniyu edhilevetan.
JOS 9:12 Ahaa niw man heini is uwiten dey he supas. Meinit pa heini te kegenat dey, piru ǥuntaan mibmezesen en ne nengepugpug en.
JOS 9:13 Heini is lundis he teleǥuey zey beǥu pa heini hein midteǥuan dey te vinu, iyan, guntaan egkevindas en. Is menge visti zey wey menge sandalyas dey ne nengezaan en tenged te kegkeuǥet te kedhipanew zey.”
JOS 9:14 Midsusi te menge Israilihanen haazà is menge lutù dan piru wazà sikandan mebpekisambag te Nengazen ke hengkey is ereg he ebeelan dan.
JOS 9:15 Ne mibpekid-uyun si Josue kandan he kenè din sikandan edhilevetan wey ebpenhimetayan. Ne nenangdù is menge pengulu te Israel mehitenged kayi.
JOS 9:16 Ne hein nekelavey en is tetelu he andew puun te kegkeuyun dan, netudtulan is menge Israilihanen he uvey zè bes is ed-ubpaan duen te menge etew.
JOS 9:17 Umbe, migenat is menge Israilihanen, ne iketelu he andew te kedhipanew zan nekeuma zan diyà te menge inged he ed-ubpan duen te menge etew. Heini he menge inged iyan is Gibeon, Kefira, Beerot, wey Kiriat Jearim.
JOS 9:18 Piru wazà sikandan surunga te menge Israilihanen su ǥeinà te nekepenangdù en diyà te kandan is menge pengulu te Israel te penangdù he mibpeseksiyan te Nengazen he Megbevayà te Israel. Midriklamu is menge Israilihanen diyà te menge pengulu zan,
JOS 9:19 piru midtavak haazà is langun he menge pengulu zan te, “Nekepenangdù kiw en diyà te kandan te mibpeseksiyan te Nengazen he Megbevayà te Israel, umbe kenè tew sikandan egkehilevetan.
JOS 9:20 Iyan dà heini ed-ul-ulahan tew: Kenè tew sikandan ebpenhimetayan su kela ke siluti kiw te Megbevayà su nekepenangdù kiw en diyà te kandan.
JOS 9:21 Kenè niw en sikandan penhimetayi. Piru edhimuwen tew sikandan he perepengayu wey peresekezu para kenitew te langun.” Ne iyan heeyan nehitavù te menge tig-Gibeon su iyan man heeyan migkaǥi zuen te menge pengulu mehitenged kandan.
JOS 9:22 Impetawag ni Josue is menge tig-Gibeon ne migkeǥiyan din te, “Maan is midterteruan key keniyu? Maan is migkaǥi kew he ziyè kew ebpuun te meziyù he lugar, he kayi kew zè bes he meǥinged te uvey zey?
JOS 9:23 Ne tenged kayi te vaal niw edrewakan kew te Megbevayà: Puun guntaan penilbi kew en pinaaǥi te kebpengayu wey kebpenekezu para te valey te Megbevayè ku.”
JOS 9:24 Ne midtavak dan si Josue te, “Mibeelan dey heini tenged te nahandek key he kela ke penhimetayi key keniyu. Su netuenan dey he midsuǥù te Nengazen he Megbevayè nu si Moises he suluǥuen din he ibeǥey ziyà te keniyu heini he menge tanà ne egeraan is langun he meǥinged kayi.
JOS 9:25 Ne ǥuntaan kayi key en te zizalem te ǥehem nu, ne iyan ke en metau ke hengkey is ereg he ebeelan nu kenami.”
JOS 9:26 Wazà ituǥut ni Josue he penhimetayi sikandan te menge Israilihanen.
JOS 9:27 Piru midhimu zin sikandan he menge perepengayu wey menge peresekezu para te menge Israilihanen wey para te pemuhatà para te Nengazen. Taman en guntaan is kebeeli zan kayi he vuluhaten diyà te lugar he mibpilì te Nengazen he zutun sikandin ed-ezapa.
JOS 10:1 Netudtulan si Hadì Adoni Zedek he hadì te Jerusalem he mid-aǥew ni Josue is Ai ne mibpurung din heini zèdeeti wey midhimetayan din is hadì kayi iring te mibeelan din diyà te Jerico wey te hadì kayi. Nezineg din daan he nekid-emiǥu is menge tig-Gibeon te menge Israilihanen ne mid-amur zan en med-ubpà kandan.
JOS 10:2 Ne utew nahandek sikandin wey is menge etew zin su netuenan dan he mekeǥeǥehem he inged is Gibeon. Minsan pa te wazà hadì kayi, dekelè pa ǥihapun he inged. Ne zekelè pa heini te Ai ne memetau he ebpekidtebek is menge sundaru kayi.
JOS 10:3 Umbe, mibpeuwit te lalag si Adoni Zedek diyà te ki Hadì Hoham he hadì te Hebron, ki Hadì Piram he hadì te Jarmut, ki Hadì Jafia he hadì te Lakish, wey ki Hadì Debir he hadì te Eglon he ke sikandin te:
JOS 10:4 “Uǥupi a keniyu te kedsurung te menge tig-Gibeon su nekid-emiǥu sikandan ki Josue wey te menge Israilihanen.”
JOS 10:5 Umbe, midsevaha heini is lelima he hadì te menge Amorihanen: is hadì te Jerusalem, Hebron, Jarmut, Lakish, wey Eglon. Midtiǥum dan is menge sundaru zan ne midsurung dan is Gibeon.
JOS 10:6 Ne mibpeuwit is menge tig-Gibeon te lalag diyà te ki Josue diyà te kampu zan diyà te Gilgal he edhenduen te, “Kenè key kenikew vey-ani is menge suluǥuen nu. Segugunè kew hendini ne libriya key. Tevangi key su midsevaha te kebpekigkuntra kenami is langun he menge hadì he Amorihanen he meǥinged diyà te menge vuvungan.”
JOS 10:7 Umbe, migenat si Josue duma te langun he menge sundaru zin, ragkes is utew memetau he ebpekidtebek.
JOS 10:8 Ne migkaǥi is Nengazen diyà te ki Josue te, “Kenè ka mahandek kandan. Imbeǥey ku en sikandan kenikew. Wazà minsan sevaha kandan he ebpekezaag kenikew.”
JOS 10:9 Tivuuk he kezukileman is kedhipanew eni Josue puun te Gilgal, ne midsurung dan is menge kuntada he wazà mekevantey.
JOS 10:10 Midteranta te Nengazen is menge kuntada hein neehè dan is menge Israilihanen. Ne ziyà te Gibeon mahabet kandan is mibpenhimetayan te menge Israilihanen. Midal-as te menge Israilihanen is duma kandan, ne mibpenhimetayan dan diyà te zalan he ebpeketekezeg diyà te Bet Horon taman te Azeka wey Makeda.
JOS 10:11 Hein edtupang sikandan puun te Bet Horon pehendiyà te Azeka edel-asen sikandan te menge Israilihanen. Ne mibpeuzanan sikandan te Nengazen te zezekelà he menge giyew ne nemematey zan. Mahabet pa is nemematey pinaaǥi te ǥiyew kenà te nemematey pinaaǥi te menge ispada te menge Israilihanen.
JOS 10:12 Dutun te andew he mibpengelinteuwan te Nengazen he mezaag te menge Israilihanen is menge Amorihanen, mid-ampù si Josue ziyà te Nengazen diyà te etuvangan te menge Israilihanen, ke sikandin te: “Nengazen, ipepundu nu is andew ziyà te zivavew te Gibeon, wey ipepundu nu is bulan diyà te Suǥud he Ayalon.”
JOS 10:13 Umbe, midpundu is andew wey is bulan taman te nezaag te menge Israilihanen is menge kuntada zan. Heini he hitavù ingkesurat diyà te Libru ni Jashar. Mibpundu is andew ziyà te tengàtengà te langit, ne wazà heini medsanlep te senge andew.
JOS 10:14 Wazè pa nehitavù he iring kayi te midineg te Nengazen is iring keniyan he ampù te etew. Tutuu iyan he nekidtebek is Nengazen para te Israel.
JOS 10:15 Ne midlikù si Josue wey is langun he menge Israilihanen diyà te kampu zan diyà te Gilgal.
JOS 10:16 Nemelaǥuy sikan is lelima he hadì ne mid-eles dan diyà te surung he Makeda.
JOS 10:17 Iyan, duen nekaahà he mid-eles sikandan dutun, ne midtudtul zin haazà ki Josue.
JOS 10:18 Umbe, migkaǥi si Josue te, “Elangi niw te zezekelà he vatu is bèbà duen te surung ne peventayi niw heini.
JOS 10:19 Piru kenè kew pundu kayi. Del-asa niw is menge kuntada niw; diyè kew puun te egkeiniyuǥan is edsurung kandan, ne kenè niw mehimuwa he mekeseled sikandan diyà te menge inged dan su imbeǥey en sikandan te Nengazen he Megbevayè niw.”
JOS 10:20 Hapit egkaamin egkepatey eni Josue is menge kuntada zan. Iyan, duen nepipira kandan he nekepelaǥuy ne nemekelikù mekeseled diyà te vinerengbeng he menge inged dan.
JOS 10:21 Ne zutun midlikù is langun he sundaru ni Josue ziyà te kampu zan diyà te Makeda he zutun edtaǥad si Josue. Puun dutun, wazè en nekaaku he egkaǥi te mezaat he lalag he ebpekesuǥat te menge Israilihanen.
JOS 10:22 Mibmandar si Josue te, “Puwasi niw sikan is surung ne uwita niw zini te kedì sikan is lelima he hadì.”
JOS 10:23 Umbe, migkuwa zan ne mid-uwit dan diyà te ki Josue sikan is lelima he hadì: hadì diyà te Jerusalem, Hebron, Jarmut, Lakish, wey Eglon.
JOS 10:24 Ne hein neuwit en diyà te ki Josue haazà is lelima he hadì, midtiǥum din is langun he menge Israilihanen, ne migkeǥiyan din is menge peremandar te menge sundaru zin, ke sikandin te, “Hendini kew, ne ǥieki niw is menge lieg kayi te menge hadì.” Umbe mid-uvey sikandan ne migiekan dan is menge lieg duen te menge hadì.
JOS 10:25 Migkaǥi si Josue ziyà te kandan te, “Kenè kew mahandek wey luyahi. Mebpekelig-en kew wey mebpekevurut. Su iyan heini ebeelan te Nengazen diyà te langun he menge kuntada niw.”
JOS 10:26 Ne zutun mibpenhimetayan ni Josue sikan is lelima he hadì ne imbitey haazà diyà te lelima he kayu taman te mahapun.
JOS 10:27 Ne hein edsanlep en is andew, impekuwa ni Josue is menge lawa zan, ne impetimbag din duen te surung he mid-elesan dan. Mid-elangan dan te zezekelà he menge vatu is bèbà duen te surung, ne taman en guntaan dutun pa heini he menge vatu.
JOS 10:28 Dutun he andew, midsakup ni Josue is Makeda. Midhimetayan din is hadì wey is langun he meǥinged dutun. Mibpurung din heini zèdeeti ne wazà nesamà he uuyag. Mibeelan ni Josue ziyà te hadì te Makeda is iring te mibeelan din duen te hadì te Jerico.
JOS 10:29 Puun diyà te Makeda midlaus si Josue wey is menge Israilihanen diyà te Libna ne midlusuzan dan heini.
JOS 10:30 Imbeǥey zaan te Nengazen kandan heini he inged wey is hadì dutun. Migerè dan is langun he meǥinged kayi, ne wazà nesamà he uuyag. Mibeelan daan ni Josue ziyà te hadì te Libna is iring te mibeelan din duen te hadì te Jerico.
JOS 10:31 Puun te Libna, midhendiyà si Josue wey is menge Israilihanen te Lakish. Midliǥuyan dan heini ne midlusuzan dan.
JOS 10:32 Imbeǥey te Nengazen diyà te menge Israilihanen is Lakish diyà te ikezuwa he andew te tebek. Is mibeelan dan iring ded te mibeelan dan diyà te Libna su miǥerè dan is langun he meǥinged dutun.
JOS 10:33 Hein kemulu zan pa edlusuzi is Lakish, si Hadì Horam he hadì te Gezer wey is menge sundaru zin midtavang te Lakish, piru nezaag gihapun sikandan eni Josue ne wazà nesamà kandan he uuyag.
JOS 10:34 Puun te Lakish, midhendiyà si Josue wey is menge Israilihanen te Eglon. Midliǥuyan dan daan heini ne midlusuzan dan.
JOS 10:35 Dutun he andew, nesakup dan is Eglon ne migerè dan is langun he meǥinged kayi. Mibpurung dan heini zèdeeti iring te mibeelan dan diyà te Lakish.
JOS 10:36 Ne midtekezeg si Josue wey is menge Israilihanen diyà te Hebron ne midlusuzan dan heini.
JOS 10:37 Midsakup dan haazà is inged, ne midhimetayan dan is hadì wey is langun he meǥinged kayi, ragkes is menge etew ziyà te nekepeliǥuy he menge inged. Ne wazà nesamà he uuyag. Mibpurung dan dèdeeti is inged iring te mibeelan dan diyà te Eglon.
JOS 10:38 Ne zutun midlikù si Josue wey is menge Israilihanen ne midsurung dan is Debir.
JOS 10:39 Mid-aǥew zan haazà is inged ne midhimetayan dan is hadì wey is langun he meǥinged kayi, ragkes is menge etew ziyà te nekepeliǥuy he menge inged. Mibpurung dan heini zèdeeti ne wazà nesamà he uuyag. Is mibeelan dan diyà te Hebron wey Libna wey te menge hadì kayi mibeelan dan daan diyà te Debir wey te hadì kayi.
JOS 10:40 Umbe, naaǥew ni Josue is tivuuk he tanà–is menge vuvungan, is Negev, is menge mibuntud-buntud diyà te edsenlepan, wey is lugtenaan te menge vuvungan. Nezaag din is menge hadì kayi, wazà nesamà he uuyag. Mibpenhimetayan dan is langun sumalà te insuǥù te Nengazen he Megbevayà te Israel.
JOS 10:41 Migerà ni Josue is menge etew ziyà te menge lugar he ebpuun te Kadesh Barnea taman te Gaza, wey is tivuuk he tanà te Goshen taman te Gibeon.
JOS 10:42 Naaǥew ni Josue is langun kayi he menge tanà wey nezaag din is menge hadì kayi te sengesurung dà, su is Nengazen he Megbevayà te Israel, mid-uǥup te kebpekidtebek dan.
JOS 10:43 Ne kegkepasad kayi, midlikù si Josue wey is langun he menge Israilihanen diyà te kampu zan diyà te Gilgal.
JOS 11:1 Hein nezineg ni Hadì Jabin he hadì te Hazor is menge kezeeǥan te menge Israilihanen, ne mibpeuwit sikandin te lalag kayi he menge hadì: diyà te ki Hadì Jobab he hadì te Madon, diyà te menge hadì te Shimron wey Acshaf,
JOS 11:2 diyà te menge hadì diyà te menge vuvungan he zapit te zizaya, diyà te menge hadì te Suǥud te Jordan diyà te zivavà te Ranew te Galilea, diyà te menge hadì te menge mibuntud-buntud diyà te edsenlepan, diyà te menge hadì diyà te veyvey te Dor he zapit te edsenlepan,
JOS 11:3 diyà te menge hadì te menge Canaanhen diyà te edsilaan wey edsenlepan te Wahig he Jordan, diyà te menge hadì te menge Amunihanen, diyà te menge hadì te menge Hitihanen, diyà te menge hadì te menge Pirisihanen, diyà te menge hadì te menge Jebusihanen he meǥinged diyà te menge vuvungan, wey ziyà te menge hadì te menge Hivihanen he menge meǥinged diyà te lugtenaan te Buntud he Hermon he ziyà te tanà he Mizpa.
JOS 11:4 Mibpeteltelevukà heini he menge hadì duma te menge sundaru zan. Iring sikandan kahabet te pantad diyà te veyvey, utew zaan mezakel is menge kudè dan wey menge kerwahi zan.
JOS 11:5 Midsevaha heini he menge hadì ne migkampu zan diyà te veyvey te Wahig he Merom su edtebeken dan is Israel.
JOS 11:6 Migkaǥi is Nengazen diyà te ki Josue te, “Kenè kew mahandek kandan, su keeselem te iring kayi he uras, ne egeraan ku sikandan is langun para te Israel. Penlepui niw is menge kudè dan wey peminsuli niw is menge kerwahi zan.”
JOS 11:7 Umbe, midtik-awan sikandan surunga ni Josue duma te menge sundaru zin dutun te Wahig he Merom.
JOS 11:8 Mibpengelinteuwan te Nengazen he mezaag te menge Israilihanen haazà is menge kuntada zan. Midal-as dan is menge kuntada zan taman diyà te Zekelà he Sidon wey ziyà te Misrefot Maim, wey taman diyà te Suǥud te Mizpa ziyà te edsilaan, taman te naamin dan mepatey is menge kuntada zan.
JOS 11:9 Mibeelan ni Josue ziyà te kandan is insuǥù te Nengazen: Mibpenlepuan din is menge kudè dan ne mibpeminsulan din is menge kerwahi zan.
JOS 11:10 Kegkepasad kayi midlikù ensi Josue ne mid-aǥew zan is Hazor ne midhimetayan dan is hadì kayi. (Is Hazor iyan utew mekeǥeǥehem he ginhedian dutun he timpu.)
JOS 11:11 Mibpenhimetayan dan daan is langun he meǥinged diyà te Hazor, ne wazà nesamà he uuyag. Ne mibinsulan dan haazà is inged.
JOS 11:12 Naaǥew eni Josue heini is langun he menge inged. Migerè dan is langun he menge meǥinged kayi, ragkes is menge hadì dan, su iyan heini insuǥù te suluǥuen te Nengazen he si Moises.
JOS 11:13 Iyan, wazà mulà binsuli te menge Israilihanen is menge inged he menge vuvungan, gawas te Hazor he mibinsulan ni Josue.
JOS 11:14 Mibpenguwa te menge Israilihanen is langun he menge azen wey menge uyaǥen kayi he menge inged. Piru mibpenhimetayan dan mulà is langun he meǥinged kayi, ne wazà nesamà he uuyag.
JOS 11:15 Iyan heeyan insuǥù te Nengazen ki Moises, ne insuǥù daan heini ni Moises diyà te ki Josue. Ne midtuman ni Josue is langun he insuǥù te Nengazen ki Moises.
JOS 11:16 Nekuwa ni Josue haazà is tivuuk he tanà: is menge vuvungan, is tivuuk he tanà te Negev, is tivuuk he tanà te Goshen, is menge mibuntud-buntud diyà te edsenlepan, is Araba, wey is menge metikang wey mevavà he menge vuntud diyà te Israel.
JOS 11:17 Is lugar he nesakup din, ne ziyà ebpuun te Buntud he Halak petekezeg diyà te Seir taman te Baal Gad he ziyà te Suǥud te Lebanon diyà te lugtenaan te Buntud he Hermon. Midakep din wey mibpenhimetayan din is menge hadì kayi he menge lugar.
JOS 11:18 Meluǥayad he timpu is kebpekidtebek dan ne human nepasad.
JOS 11:19 Wazà duma he mibpekid-emiǥu te menge Israilihanen kayi he lugar gawas te menge Hivihanen he meǥinged diyà te Gibeon. Is duma nezaag dan te tebek.
JOS 11:20 Su mibpekubalan te Nengazen is gehinawa zan su wey zan sukuli te tebek is menge Israilihanen. Ne pinaaǥi kayi egkepurung sikandan egkezeeti ne ebpenhimetayan he kenè ne egkelizuwan, su iyan insuǥù te Nengazen ki Moises.
JOS 11:21 Dutun daan he timpu, midsurung ni Josue is menge kevuwazan ni Anak he meǥinged diyà te menge vuvungan te Hebron, Debir, Anab, wey is diyà te langun he menge vuntud he nesakup guntaan te Juda wey Israel. Midèdeetan ni Josue sikandan is langun ragkes is menge inged dan.
JOS 11:22 Wazà kevuwazan ni Anak he nesamà diyà te lugar te menge Israilihanen gawas te ziyà te Gaza, Gat, wey ziyà te Ashdod.
JOS 11:23 Umbe, migkuwa ni Josue heini is tivuuk he tanà su iyan heini insuǥù te Nengazen diyà te ki Moises. Impemeǥey zin heini he tanà diyà te menge Israilihanen su wey zan mepengevilin. Ne mibehinan dutun is kada tribu. Ne zutun mibmelinew en haazà is tanà.
JOS 12:1 Nesakup en te menge Israilihanen is menge tanà diyà te edsilaan te Jordan, puun te zal-ug te Arnon taman te Buntud he Hermon, ragkes kayi is tanà diyà te edsilaan he vahin te Araba. Iyan heini menge hadì dutun he menge lugar he nezaag te menge Israilihanen: Si Sihon he Amorihanen he meǥinged diyà te Heshbon. Sakup te ginhedian din is ketengà te Gilead. Puun heini te Aroer he kilid te zal-ug te Arnon, ragkes en is inged diyà te teliwazà kayi he zal-ug taman te zal-ug te Jabok, he dulunà te menge Amunihanen.
JOS 12:3 Nesakup daan te ginhedian din is dapit te edsilaan he Araba, puun te Ranew te Galilea taman te Bet Jeshimot, he zapit te edsilaan te Zaǥat te Araba, ne taman pa ziyà te zivavà he lugtenaan te Buntud he Pisga.
JOS 12:4 Is ikezuwa ne iyan si Og, is hadì diyà te Bashan. Sevaha sikandin te nesamà he menge kevuwazan te menge Ripanhen. Meǥinged sikandin diyà te Ashtarot wey ziyà te Edrei.
JOS 12:5 Is nesakup te ginhedian din iyan is Buntud te Hermon, Saleca, is tivuuk he Bashan taman te zulunà te Geshur wey Maaca, wey is ketengà te Gilead taman te zulunà te Heshbon he nesakup te lugar ni hadì Sihon.
JOS 12:6 Nezaag sikandan ni Moises he suluǥuen te Nengazen wey te menge Israilihanen. Imbeǥey ni Moises is tanè dan diyà te tribu ni Reuben, tribu ni Gad, wey ketengà he tribu ni Manase wey zan mepengevilin.
JOS 12:7 Naaǥew zaan ni Josue wey te menge Israilihanen is menge tanà diyà dapit te edsenlepan te Jordan, puun te Baal Gad he Suǥud te Lebanon taman te Buntud he Halak petekezeg diyà te Seir. Imbeǥey ni Josue heini he menge tanà diyà te menge Israilihanen. Mibahin din heini ziyà te kada tribu te Israel wey zan mepengevilin. Ragkes kayi he tanà is menge vuvungan, is menge mibuntud-buntud diyà te edsenlepan, is Suǥud te Jordan, wey is lugtenaan te menge vuvungan, is menge disirtu ziyà te zivavà, wey is Negev. Iyan nehuna he menge meǥinged kayi is menge Hitihanen, Amorihanen, Canaanhen, Pirisihanen, Hivihanen, Jebusihanen. Iyan heini menge hadì kayi he menge lugar he midaag ni Josue wey te menge Israilihanen:
JOS 12:9 hadì te Jerico hadì te Ai (uvey te Betel)
JOS 12:10 hadì te Jerusalem hadì te Hebron
JOS 12:11 hadì te Jarmut hadì te Lakish
JOS 12:12 hadì te Eglon hadì te Gezer
JOS 12:13 hadì te Debir hadì te Geder
JOS 12:14 hadì te Horma hadì te Arad
JOS 12:15 hadì te Libna hadì te Adulam
JOS 12:16 hadì te Makeda hadì te Betel
JOS 12:17 hadì te Tapua hadì te Hefer
JOS 12:18 hadì te Afek hadì te Lasharon
JOS 12:19 hadì te Madon hadì te Hazor
JOS 12:20 hadì te Shimron Meron hadì te Acshaf
JOS 12:21 hadì te Taanac hadì te Megido
JOS 12:22 hadì te Kedesh hadì te Jokneam (diyà te Carmel)
JOS 12:23 hadì te Dor (diyà te Nafat Dor) hadì te Goim (diyà te Gilgal)
JOS 12:24 hadì te Tirza 31 langun he menge hadì.
JOS 13:1 Hein utew en meǥurang si Josue, migkaǥi is Nengazen diyà te kandin te, “Meǥurang ke en utew, ne mahabet pa he menge tanà is kinahanglan he ed-eǥawen.
JOS 13:2 Iyan heini menge tanà he wazè pa maaǥew: Is langun he menge tanà te menge Filistihanen wey menge Gisurhanen
JOS 13:3 he sakup te menge Canaanhen. Heini puun te wahig he Shihor ziyà te zapit te edsilaan he vahin te Ehipto taman te zulunà te Ekron diyà te zizaya, ragkes en is lelima he menge inged te menge Filistihanen he: Gaza, Ashdod, Ashkelon, Gat, wey Ekron. Elin is tanà te menge Aybihanen
JOS 13:4 diyà te zivavà; is langun he tanà te Canaanhen puun te Meara, he ǥaked dengan te menge Sidunhanen, taman te Afek he zulunà te tanà te menge Amorihanen.
JOS 13:5 Elin daan is tanà te menge Gibalnen, wey is tivuuk he Lebanon diyà te edsilaan, puun te Baal Gad diyà te lugtenaan te Buntud he Hermon taman te Lebo Hamat.
JOS 13:6 Ragkes daan is menge vuvungan puun te Lebanon taman te Misrefot Maim he ǥaked te menge Sidunhanen. “Emun edsurung kew en, iyan a ebpenguney edsegseg te menge meǥinged keniyan he menge lugar. Sigureduwa nu he mevahin heini he menge tanà diyà te menge Israilihanen su wey zan mepengevilin, sumalà te insuǥù ku kenikew.
JOS 13:7 Behina nu heini he menge tanà diyà te siyam he menge tribu wey te ketengà he tribu ni Manase.”
JOS 13:8 Is tribu ni Reuben, ni Gad, wey is ketengà he tribu ni Manase daan en mibeǥayan ni Moises he suluǥuen te Nengazen te kandan he vahin diyà te zapit te edsilaan te Jordan.
JOS 13:9 Is tanè dan, ne ziyà ebpuun te Aroer ziyà te kilid te zal-ug he Arnon (ragkes is inged diyà te kilid kayi he zal-ug) pehendiyà te tivuuk he suǥud puun te Medeba taman te Dibon.
JOS 13:10 Neragkes daan is langun he menge inged he zizalem te kebmandù ni Sihon te midhadì diyà te Heshbon, taman te zulunà te menge Amorihanen.
JOS 13:11 Ragkes daan is Gilead wey is menge tanà he mid-ubpaan te menge Gisurhanen wey menge Maakatnen, is tivuuk he Buntud he Hermon, wey is tivuuk he Bashan taman te Saleca.
JOS 13:12 Ragkes daan is tivuuk he ginhedian ni Og, he midhadì diyà te Ashtarot wey ziyà te Edrei. Si Og, ne sevaha te nesamà te menge kevuwazan te menge Ripanhen he midaag ni Moises ne midsegseg din sikandan puun te tanè dan.
JOS 13:13 Piru wazà mesegseg te menge Israilihanen is menge Gisurhanen wey is menge Maakatnen. Heini he menge etew nengungubpaan gihapun duma te menge Israilihanen taman en guntaan.
JOS 13:14 Wazà beǥayi ni Moises is tribu ni Levi te tanà he egkepengevilin dan. Kekenà, iyan egkezawat dan is bahin te menge pemuhat pinaaǥi te hapuy he ibpemuhat diyà te Nengazen he Megbevayà te Israel, sumalà is migkaǥi zin diyà te ki Moises.
JOS 13:15 Iyan heini kevahin te tanà te Israel he imbahin ni Moises diyà te tribu ni Reuben, he mibahin diyà te kada pemilya zan:
JOS 13:16 Ebpuun te Aroer he kilid te zal-ug he Arnon (ragkes is inged diyà te kilid kayi he zal-ug) taman te tivuuk he suǥud he nekepeliǥuy te Medeba.
JOS 13:17 Ragkes daan is Heshbon wey is langun he menge inged kayi ziyà te menge suǥud he iyan is: Dibon, Bamot Baal, Bet Baal Meon,
JOS 13:18 Jahaz, Kedemot, Mefaat,
JOS 13:19 Kiriataim, Sibma, Zeret Shahar (he ziyà te vuvungan te menge suǥud),
JOS 13:20 Bet Peor, is menge kelendiǥan diyà te Buvungan he Pisga, Bet Jeshimot,
JOS 13:21 is langun he menge inged diyà te menge suǥud wey is langun he menge inged he nesakup ni Sihon te hadì te menge Amorihanen he midhadì diyà te Heshbon. Nezaag sikandin ni Moises ragkes is menge pengulu te Midian he iyan ensi Evi, Rekem, Zur, Hur, wey Reba. Heini sikandan menge pengulu ziyà te menge tanè dan, dizalem sikandan te keǥehem ni Hadì Sihon.
JOS 13:22 Ragkes daan te midhimetayan te menge Israilihanen si Balaam he menenagnà he anak ni Beor.
JOS 13:23 Is Wahig he Jordan iyan dulunà te tribu ni Reuben. Iyan heini menge inged he imbeǥey ziyà te tribu ni Reuben, he mibahin diyà te kada pemilya zan.
JOS 13:24 Iyan heini kevahin te tanà he imbahin ni Moises te tribu ni Gad he mibahin diyà te kada pemilya zan he iyan is:
JOS 13:25 Jazer wey is langun he menge inged diyà te Gilead, wey is ketengà te tanà te menge Amunihanen taman te Aroer ziyà te edsilaan he vahin te Raba.
JOS 13:26 Ragkes daan is menge tanà puun te Heshbon taman te Ramat Mizpa wey Betonim, wey puun te Mahanaim taman te dulunà te Lo Debar.
JOS 13:27 Is tanà diyà te Suǥud te Jordan, he naangken dan iyan is Bet Haram, Bet Nimra, Sucot, Zafon, wey is nesamà he nesakup te ginhedian ni Hadì Sihon he hadì te Heshbon. Is dulunà diyà te edsenlepan iyan is Wahig he Jordan taman te Ranew te Galilea.
JOS 13:28 Iyan heini menge inged he imbeǥey ziyà te tribu ni Gad, he mibahin diyà te kada pemilya zan.
JOS 13:29 Iyan heini kevahin te tanà he imbeǥey ni Moises diyà te ketengà he tribu ni Manase he mibahin diyà te kada pemilya zan:
JOS 13:30 Puun te Mahanaim, pehendiyà te tivuuk he Bashan, kes tivuuk he ginhedian ni Hadì Og he hadì te Bashan, wey is 60 he menge inged diyà te Jair he sakup te Bashan.
JOS 13:31 Ragkes kayi is ketengà te Gilead, wey is Ashtarot wey Edrei, he menge dezekelà he inged diyà te Bashan he ginhedian ni Og. Iyan heini tanà he imbeǥey ziyà te ketengà te menge kevuwazan ni Makir te anak ni Manase, he mibahin diyà te kada pemilya zan.
JOS 13:32 Iyan heini paaǥi te kebehina ni Moises te menge tanà diyà dapit te edsilaan te Jerico wey Jordan, hein diyà sikandin te menge suǥud te Moab.
JOS 13:33 Iyan, wazà mulà beǥayi ni Moises te tanà he egkepengevilin dan is tribu ni Levi su iyan kandan he kevilin is Nengazen, he Megbevayà ni Israel, sumalà is migkaǥi zin kandan.
JOS 14:1 Iyan heini paaǥi te kebehina eni Eleazar he memumuhat, ni Josue he anak ni Nun, wey te menge pengulu te menge pemilya te kada tribu te Israel te zuma pa he menge tanà diyà te Canaan he nepengevilin te menge Israilihanen:
JOS 14:2 Midtuman dan is suǥù te Nengazen ki Moises, umbe sikan is siyam wey tengà he tribu mibahin diyà te kandan is tanà pinaaǥi te kedripa.
JOS 14:3 Mibeǥayan eni Moises te kandan he vahin sikan is dezuwa wey tengà he menge tribu ziyà te zapit te edsilaan te Jordan. Wazè din beǥayi te vahin is menge kevuwazan ni Levi, piru mibeǥayan din sikandan te menge inged he egkeubpaan dan wey menge penebtavà para te menge uyaǥen dan. Is kevuwazan ni Jose mibahin te zezuwa he tribu–is tribu ni Manase wey is tribu ni Efraim.
JOS 14:5 Nevahin haazà is tanà diyà te menge Israilihanen sumalà te insuǥù te Nengazen ki Moises.
JOS 14:6 Midhendiyà te ki Josue ziyà te Gilgal is nepipira he etew te tribu ni Juda. Is sevaha kandan iyan si Caleb he anak ni Jefune he Kinishanen. Migkaǥi sikandin te, “Egketenuzan nu pe be sikan is migkaǥi te Nengazen diyà te ki Moises he suluǥuen te Megbevayà mehitenged kenita te zezuwa hein diyè kiw pa te Kadesh Barnea?
JOS 14:7 Ne 40 dutun he tuig is keǥurang ku hein midsuǥù a ni Moises te kebpeniid kayi he tanà, ne hein nekelikù a, midtudtul ku kandin is langun he netuenan ku.
JOS 14:8 Piru mibpelihandek te menge zuma ku is menge etew. Piru siak, metinumanen a te kedsunud te Nengazen he Megbevayè ku.
JOS 14:9 Umbe, zutun he andew midsaad si Moises kayi te kedì he ke sikandin te, ‘Tenged te metinumanen ka te kedsunud te Nengazen he Megbevayè ku, sikew wey is menge kevuwazan nu, egkaangken niw haazà is tanà he neumahan nu zutun te kebpeniid nu.’
JOS 14:10 “Ne 45 he tuig is midlavey puun te kegkeǥiya zutun te Nengazen diyà te ki Moises. Kemulu pa zutun edhipanew is menge Israilihanen diyà te sibsivayan. Ne ǥuntaan 85 en he tuig is keǥurang ku ne uuyag e pa ǥihapun pinaaǥi te tavang te Nengazen,
JOS 14:11 ne is desen ku iring gihapun te zesen ku hein midsuǥù a ni Moises. Ebpekehimu e pa ǥihapun te minsan hengkey, minsan is kebpekidtebek su is egkehimu ku ǥuntaan ne iring ded te egkehimu ku zengan.
JOS 14:12 Umbe, iveǥey nu kediey is menge vuvungan he insaad kediey te Nengazen. Iyan ka mismu nekezineg dengan he iyan menge meǥinged kayi is menge kevuwazan ni Anak ne melig-en is menge inged dan he miberengbeng. Piru pinaaǥi te tavang te Nengazen edsegseǥen ku sikandan keniyan he tanà su iyan heeyan insaad din kediey.”
JOS 14:13 Mibpenubtuvazan ni Josue si Caleb is anak ni Jefune, ne imbeǥey kandin is Hebron he para egkepengevilin din.
JOS 14:14 Umbe, taman en guntaan, is Hebron gaked te menge kevuwazan ni Caleb te anak ni Jefune te Kinishanen, su ǥeinà te mibpezumdumahan ni Caleb is Nengazen he Megbevayà te Israel.
JOS 14:15 Dengan Kiriat Arba is ngazan te Hebron, su tedeman ki Arba te utew nevantug he kevuwazan ni Anak. Dutun he timpu neengked is tebek diyà te tanà te menge Israilihanen.
JOS 15:1 Is tanà he naangken te tribu ni Juda he mibahin diyà te kada pemilya zan. Nekeuma heini ziyà te dulunà te Edom he zapit egkezivavà, he sungkù te sibsivayan he Zin.
JOS 15:2 Is divavà he dulunà kayi he tanà, puun te egkezivavà he vahin te Daǥat he Minatey,
JOS 15:3 pehendiyà te egkezivavà te Beyeey te Akrabim taman te sibsivayan he Zin, pehendiyà heini te egkezivavà te Kadesh Barnea, ebpekevayà heini te Hezron petekezeg diyà te Adar, ne mibulegkù pehendiyà te Karka,
JOS 15:4 ne nekevayà diyà te Azmon, he nekeikul te zal-ug he dulunà te Ehipto taman te Zaǥat he Mediteraneo. Iyan heini dulunà te Juda ziyà te zivavà.
JOS 15:5 Is dulunà diyà te edsilaan ne iyan is Daǥat he Minatey taman te idsimbuwang te Wahig he Jordan. Is dulunà diyà te zizaya ebpuun daan diyà te idsimbuwang te Wahig he Jordan
JOS 15:6 petekezeg diyà te Bet Holga, pehendiyà te egkezizayà te Bet Araba, petekezeg taman te Batu ni Bohan te anak ni Reuben.
JOS 15:7 Ne puun dutun, mibpehendiyà heini te Suǥud te Acor taman te Debir, ne mibulegkù diyà te zizaya pehendiyà te Gilgal he zehipag te Beyeey te Adumim he zivavà he vahin te zal-ug. Pelaus diyà te menge serebseb diyà te En Shemesh, taman te En Rogel.
JOS 15:8 Puun dutun mibpehendiyà heini te Suǥud-suǥud te Ben Hinom he ebpekevayà diyà te menge kelendiǥan diyà te zivavà taman te inged te menge Jebusihanen. (Heini he inged iyan is Jerusalem.) Ne mibpetekezeg heini pehendiyà te puntur te vuntud he zapit te edsenlepan he Suǥud-suǥud te Ben Hinom, diyà te purù te egkezizaya te Suǥud he Refaim.
JOS 15:9 Ne puun dutun midlaus heini ziyà te Serebseb te Neftoa, ne ebpuun dutun ebpehendiyà te menge inged he uvey te Buntud he Efron. Ne mibulegkù heini petupang diyà te Baala he iyan is Kiriat Jearim,
JOS 15:10 ne mid-uman mebulegkù diyà dapit te edsenlepan te Baala pehendiyà te Buntud he Seir. Ne midlaus heini ziyà te egkezizayà he kelendiǥan te Buntud he Jearim he iyan is Kesalon, pehendiyà te Bet Shemesh wey midlaus diyà te Timnah.
JOS 15:11 Midlaus heini ziyà te egkezizaya he kelendiǥan te Ekron ne mibulegkù pehendiyà te Shikeron, he ebpekevayà te Buntud he Baala taman te Jabneel. Ne midsangkù heini ziyà te Zaǥat he Mediteraneo,
JOS 15:12 he iyan daan dulunà kayi he zapit te edsenlepan. Iyan heini nekeliǥuy he zulunà te tanà he mibahin diyà te menge pemilya te tribu ni Juda.
JOS 15:13 Midtuman ni Josue is insuǥù kandin te Nengazen, umbe imbeǥey zin is senge vahin duen te tanà te tribu ni Juda ziyà te ki Caleb he anak ni Jefune. Heini he tanà iyan is Kiriat Arba, he iyan is Hebron. (Su ngazan heini ni Arba te amey ni Anak.)
JOS 15:14 Midsegseg ni Caleb puun dutun he tanà is tetelu he kevuwazan ni Anak he iyan is menge pemilya ni Sheshai, ki Ahinam, wey ki Talmai.
JOS 15:15 Ne zutun midsurung dan is Debir (he migngezanan dengan te Kiriat Sefer).
JOS 15:16 Migkaǥi si Caleb te, “Ibpeesawa ku is anak ku he si Acsa te etew he ebpekaaǥew te Kiriat Sefer.”
JOS 15:17 Si Otniel he anak ni Kenaz te hazi ni Caleb iyan nekaaǥew zutun he inged. Umbe impeesawa ni Caleb kandin is anak din he si Acsa.
JOS 15:18 Ne hein neked-esawe en haazà is dezuwa midhengyuan ni Acsa is esawa zin he mebuyù diyà te amey zin te tanà para meumani is tanà dan. Ne zutun midhendiyà si Acsa te ki Caleb, ne hein nekerenè en sikandin puun te asnu zin, mid-insaan sikandin ni Caleb ke hengkey is tuud din.
JOS 15:19 Midtavak si Acsa te, “Umani a kenikew beǥayi te pebur, iyan pezem suat ku he ebeǥayan a kenikew te tanà he zuen duen serebseb su is tanà he imbeǥey nu kedì diyà te Negev wazà duen serebseb.” Umbe imbeǥey ni Caleb kandin is menge lugar he zuen duen menge serebseb diyà te vuvungan wey alug.
JOS 15:20 Iyan heini menge inged he nepengevilin te tribu ni Juda he mibahin diyà te kada pemilya zan:
JOS 15:21 Is menge inged he kinepuruan he egkezivavà he ziyà te Negev he uvey te dulunà te Edom he iyan is: Kabzeel, Eder, Jagur,
JOS 15:22 Kina, Dimona, Adada,
JOS 15:23 Kedesh, Hazor, Itnan,
JOS 15:24 Zif, Telem, Bealot,
JOS 15:25 Hazor Hadata, Keriot Hezron (he iyan is Hazor),
JOS 15:26 Amam, Shema, Molada,
JOS 15:27 Hazar Gada, Heshmon, Bet Pelet,
JOS 15:28 Hazar Shual, Beersheba, Biziotia,
JOS 15:29 Baala, Iim, Ezem
JOS 15:30 Eltolad, Kesil, Horma,
JOS 15:31 Ziklag, Madmana, Sansana,
JOS 15:32 Lebaot, Shilhim, Ain, wey Rimon: 29 langun he inged, ne ebpekeuman pa kayi is dezeisey he menge lugar ziyà te peliǥuy kayi he menge inged.
JOS 15:33 Is menge inged diyà te menge mibuntud-buntud diyà te edsenlepan iyan is: Eshtaol, Zora, Ashna,
JOS 15:34 Zanoa, En Ganim, Tapua, Enam,
JOS 15:35 Jarmut, Adulam, Soco, Azeka,
JOS 15:36 Shaaraim, Aditaim, wey Gedera (etawa Gederotaim): ne 14 langun he inged, ne ebpekeuman pa kayi is dezeisey he menge lugar ziyà te peliǥuy kayi he menge inged.
JOS 15:37 Ragkes daan is Zenan, Hadasha, Migdal Gad,
JOS 15:38 Dilean, Mizpa, Jokteel,
JOS 15:39 Lakish, Bozkat, Eglon,
JOS 15:40 Cabon, Lamas, Kitlish,
JOS 15:41 Gederot, Bet Dagon, Naama, wey Makeda: ne16 langun he inged, ne ebpekeuman pa kayi is dezeisey he menge lugar ziyà te peliǥuy kayi he menge inged.
JOS 15:42 Is Libna, Eter, Ashan,
JOS 15:43 Ifta, Ashna, Nezib,
JOS 15:44 Keila, Aczib, wey Maresha: ne 9 langun he inged, ne ebpekeuman pa kayi is dezeisey he menge lugar ziyà te peliǥuy kayi he menge inged.
JOS 15:45 Ragkes daan is Ekron wey malù dezekelà he inged wey is dezeisey he inged diyà te peliǥuy kayi,
JOS 15:46 wey is langun he malù dezekelà wey dezeisey he inged he uvey te Ashdod puun te Ekron pehendiyà te Daǥat he Mediteraneo.
JOS 15:47 Neragkes daan kayi is Ashdod wey Gaza, wey is malù dezekelà wey is dezeisey he menge inged kayi taman te wahig he dulunà te Ehipto wey te veyvey te Zaǥat he Mediteraneo.
JOS 15:48 Is malù dezekelà he menge inged diyà te menge vuntud iyan is: Shamir, Jatir, Soco,
JOS 15:49 Dana, Kiriat Sana (he iyan is Debir),
JOS 15:50 Anab, Eshtemo, Anim,
JOS 15:51 Goshen, Holon, wey Gilo: ne 11 langun he inged, ne ebpekeuman pa kayi is dezeisey he menge lugar ziyà te peliǥuy kayi he menge inged.
JOS 15:52 Is Arab, Duma, Eshan
JOS 15:53 Janim, Bet Tapua, Afeka,
JOS 15:54 Humta, Kiriat Arba (he iyan is Hebron), wey Zior: ne 9 langun he inged, ne ebpekeuman pa kayi is dezeisey he menge lugar ziyà te peliǥuy kayi he menge inged.
JOS 15:55 Is Maon, Carmel, Zif, Juta,
JOS 15:56 Jezreel, Jokdeam, Zanoa,
JOS 15:57 Kain, Gibea wey Timnah: ne 10 langun he inged, ne ebpekeuman pa kayi is dezeisey he menge lugar ziyà te peliǥuy kayi he menge inged.
JOS 15:58 Is Halhul, Bet Zur, Gedor,
JOS 15:59 Maarat, Bet Anot, wey Eltekon: ne 6 langun he inged, ne ebpekeuman pa kayi is dezeisey he menge lugar ziyà te peliǥuy kayi he menge inged.
JOS 15:60 Is Kiriat Baal (he iyan is Kiriat Jearim) wey is Raba: ne 2 langun he inged, ne ebpekeuman pa kayi is dezeisey he menge lugar ziyà te peliǥuy kayi he menge inged.
JOS 15:61 Is malù dezekelà he menge inged diyà te sibsivayan iyan is: Bet Araba, Midin, Secaca,
JOS 15:62 Nibshan, is Inged te Timus wey is En Gedi: ne 6 langun he inged, ne ebpekeuman pa kayi is dezeisey he menge lugar ziyà te peliǥuy kayi he menge inged.
JOS 15:63 Piru wazà mesegseg te tribu ni Juda is menge Jebusihanen he meǥinged diyà te Jerusalem. Umbe taman en guntaan kemulu pa sikandan ebpemen-ubpà dutun duma te tribu ni Juda.
JOS 16:1 Is tanà he imbeǥey ziyà te menge kevuwazan ni Jose ne puun te Wahig he Jordan uvey te Jerico, diyà te edsilaan he vahin te menge serebseb diyà te Jerico pehendiyà te sibsivayan pelaus diyà te menge vuvungan taman te Betel.
JOS 16:2 Puun te Betel (he iyan is Luz), ne ebpekevayà diyà te Atarot he mid-ubpaan te menge Arkanhen.
JOS 16:3 Ne petupang heini ziyà te edsenlepan pehendiyà te lugar te menge Jafletnen, pelaus en diyà te zulunà te Bet Horon, pelaus te Gezer taman te Daǥat he Mediteraneo.
JOS 16:4 Iyan heini kevahin te tanà he naangken te tribu ni Manase wey ni Efraim te menge kevuwazan ni Jose.
JOS 16:5 Iyan heini vahin te tribu ni Efraim he impemeǥey ziyà te kada pemilya zan: is dulunà kayi, ne ziyà te edsilaan puun te Atarot Adar pehendiyà te ebpekehinugnew te Bet Horon
JOS 16:6 pelaus diyà te Daǥat he Mediteraneo. Is dulunè dan diyà te zizaya ne puun te Micmetat. Ne mibulegkù heini pehendiyà te edsilaan he ebpekevayà te Taanat Shilo pehendiyà te edsilaan he vahin te Janoa.
JOS 16:7 Puun te Janoa impetupang heini ziyà te Atarot wey Naara, he ebpekevayà te Jerico pehendiyà te Wahig he Jordan.
JOS 16:8 Puun te Tapua, is dulunà impehendiyà te edsenlepan, nekeikul te zal-ug he Kana pelaus diyà te Daǥat he Mediteraneo. Iyan heini tanà he imbeǥey ziyà te tribu ni Efraim he mibahin diyà te kada pemilya zan.
JOS 16:9 Ragkes kayi is malù dezekelà wey dezeisek he menge inged he nesakup te tanà te menge kevuwazan ni Manase.
JOS 16:10 Wazè dan segseǥa is menge Canaanhen he ebpemen-ubpà diyà te Gezer; umbe zuen menge Canaanhen he nengungubpaan duma te menge Efraimnen taman en guntaan, piru mid-uripen dan sikandan.
JOS 17:1 Duen daan tanà he imbeǥey para te kevuwazan ni Manase te kakey he anak ni Jose. Is Gilead wey is Bashan he ziyà dapit te edsilaan te Wahig he Jordan imbeǥey ziyà te pemilya ni Makir su ǥeina te beǥani sikandin. (Si Makir he amey ni Gilead, iyan kinekekayan he anak ni Manase.)
JOS 17:2 Is tanà he ziyà dapit te edsenlepan te Wahig he Jordan, imbeǥey ziyà te zuma he menge kevuwazan ni Manase he iyan is menge pemilya ni Abiezer, Helek, Asriel, Shekem, Hefer, wey Shemida. Mibahinbahin heini ziyà te kada pemilya zan.
JOS 17:3 Ne zutun duen etew he iyan ngazan din si Zelofehad he anak ni Hefer te apù ni Gilead. Si Gilead anak ni Makir, ne si Makir anak ni Manase. Heini si Zelofehad wazè din menge anak he maama. Kekenà, pudu zà bahi he iyan ensi Mala, Noa, Hogla, Milca wey Tirza.
JOS 17:4 Midhendiyà dan te ki Eleazar he memumuhat, ki Josue he anak ni Nun, wey ziyà te menge pengulu, ne ke sikandan te, “Midsuǥù te Nengazen si Moises he ebpeveǥayan key te tanà iring te menge maama he menge kezuzumahi zey.” Umbe mibeǥayan sikandan te kandan he vahin su iyan heini migkaǥi te Nengazen.
JOS 17:5 Iyan heini hinungdan ke maan is nekaangken is tribu ni Manase te sepulù he vahin duen te tanà, gawas te Gilead wey Bashan he ziyà te edsilaan te Jordan,
JOS 17:6 su in-iring te menge kevuwazan din he menge maama is menge kevuwazan din he menge vahi su elin sikandan mibeǥayi te tanà. Is Gilead imbeǥey ziyà te zuma pa he menge kevuwazan ni Manase.
JOS 17:7 Is dulunà te tanà ni Manase, ne puun te Asher taman te Micmetat, diyà dapit te edsilaan he vahin te Shekem ne impehendiyà heini te zivavà, pehendiyà te tanà te menge meǥinged diyà te En Tapua.
JOS 17:8 (Is tanà he ebpekeelingkus te Tapua gaked te tribu ni Manase, piru is Tapua mismu he ziyà te dulunà te tanà ni Manase gaked te menge kevuwazan ni Efraim).
JOS 17:9 Ne is dulunà mibpehendiyà te zal-ug he Kana. Duen dezekelà he inged diyà te zivavà he vahin duen te zal-ug he ǥaked te tribu ni Efraim, minsan pa te neseled heini te tanà te tribu ni Manase. Is dulunà te tribu ni Manase midlaus diyà te egkezizaya he vahin duen te zal-ug taman te Daǥat he Mediteraneo.
JOS 17:10 Is tanà he ziyà te zivavà duen te zal-ug, ne gaked te tribu ni Efraim, ne is tanà he ziyà te zizaya zuen te zal-ug ne ǥaked te tribu ni Manase. Is dulunà te tribu ni Manase ziyà te edsenlepan iyan is Daǥat he Mediteraneo. Ne ziyà te zizaya he zapit te edsenlepan te tribu ni Manase dutun is tribu ni Asher, ne ziyà te zizaya he zapit te edsilaan dutun is tribu ni Isachar.
JOS 17:11 Diyà te tanà ni Isacar wey ni Asher, duen dutun menge lugar he ǥaked ni Manase he iyan is: Bet Shean, Ibleam, Dor (etawa Nafot), Endor, Taanac, Megido, wey is malù dezekelà he menge inged diyà te peliǥuy kayi.
JOS 17:12 Piru heini he menge inged wazà meubpai te menge kevuwazan ni Manase, su kenè dan egkesegseg is menge Canaanhen dutun.
JOS 17:13 Piru hein mibmelig-en en is menge Israilihanen, mid-uripen dan haazà is menge Canaanhen, piru wazè dan gihapun evuǥa sikandan.
JOS 17:14 Migkaǥi is menge kevuwazan ni Jose ziyà te ki Josue te, “Maan is senge vahin dà duen te tanà is imbeǥey nu kenami? Utew key mahabet su midtuvazan key te Nengazen.”
JOS 17:15 Midtavak si Josue te, “Emun utew kew en mahabet ne kenà ereg keniyu is menge vuvungan te Efraim, hendiyè kew te menge ketelunan te menge Pirisihanen wey menge Ripanhen. Ne hiǥawan kew ziyà te para keniyu.”
JOS 17:16 Mid-uman megkaǥi is menge kevuwazan ni Jose te, “Kenà ereg kenami is menge vuvungan, ne kenè dey egkezaag is menge Canaanhen diyà te menge suǥud su zuen dan menge kerwahi he putew. Ne iring ded daan te menge Canaanhen diyà te Bet Shean wey ziyà te menge inged he peliǥuy kayi, wey ziyà te Suǥud he Jezreel.”
JOS 17:17 Mid-uman medtavak si Josue te, “Geina te utew kew mahabet wey utew kew mekeǥeǥehem ne kenà senge vahin dà is bahin niw.
JOS 17:18 Egkaangken niw zaan is menge ketelunan diyà te vuvungan. Hiǥewani niw haazà is menge ketelunan ne egkaangken niw is kinetivuukan kayi. Ebpekehimu kew te kedsegseg te menge Canaanhen minsan mekeǥeǥehem dan wey zuen dan menge kerwahi he putew.”
JOS 18:1 Ne hein naaǥew en te tivuuk he keet-etawan te Israel haazà is tanà, midtiǥum sikandan is langun diyà te Shilo, ne mibaal sikandan te Tulda he Edtelevukaayan dan.
JOS 18:2 Duen pa pitu he tribu te menge Israilihanen he wazè pa meveǥayi te kandan he vahin duen te tanà.
JOS 18:3 Umbe, migkaǥi si Josue ziyà te menge Israilihanen te, “Keenu niw pe bes ed-engkena is tanà he imbeǥey keniyu te Nengazen he Megbevayà te menge kepuun niw?
JOS 18:4 Pilì kew te tigtetelu he etew ziyà te kada tribu niw. Ibpesusi ku kandan is tivuuk he tanà su para mesevuki zan te tuus is egkesuatan dan te ed-angken. Ne edlikù sikandan kayi te kediey he ed-uwit te vineelan dan he mapa he egkeehè ta zutun ke ebmenmenuwen heini te kebahin.
JOS 18:5 Kinahanglan he ebehinen haazà is tanà te pitu he vahin. Kenà idragkes is tanà te tribu ni Juda ziyà te zivavà wey is tanà te menge tribu ni Jose ziyà te zizaya.
JOS 18:6 Isurat niw is menge zulunà duen te pitu he vahin he tanà, ne uwita niw kayi te kediey, su edripahan ku heini ziyà te etuvangan te Nengazen he Megbevayè tew.
JOS 18:7 Piru kenè mulà ebehinan te tanà is menge Levihanen su iyan kandan he vahin is kebpenilbi te Nengazen pinaaǥi te kegkememumuhat dan. Is menge tribu ni Gad, ni Reuben, wey ketengà he tribu ni Manase nekezawat en te kandan he vahin diyà te tanà he zapit te edsilaan te Jordan, he imbeǥey kandan ni Moises te suluǥuen te Nengazen.”
JOS 18:8 Ne hein egenat en sikan is nepilì he menge etew, migkaǥi si Josue ziyà te kandan te, “Susiya niw is tanà ne vaal kew te mapa zin. Ne likù kew zini te kediey kayi te Shilo, su edripahan ku heini ziyà te etuvangan te Nengazen ke hentei ki tribu is egkevehinan te kada vahin dutun te tanà.”
JOS 18:9 Umbe, migenat haazà is menge etew te kedsusi zuen te tanà. Ne mibaal zan te mapa kayi he ebpaahà he pitu he vahin haazà is tanà. Ne inlista zan is dezekelà wey malù dezekelà he menge inged he nesakup te kada senge vahin. Ne kegkepasad dutun midlikù dan diyà te ki Josue ziyà te Shilo.
JOS 18:10 Ne pinaaǥi te kedripa mibeǥayan ni Josue te kandan he vahin is menge tribu te Israel he wazè pa kandan he tanà.
JOS 18:11 Is nehuna he neveǥayan pinaaǥi te kedripaha zuen te tanà iyan is tribu ni Benjamin. Is kandan he vahin nekepetug-elang te vahin te tribu ni Juda wey te menge tribu ni Jose.
JOS 18:12 Is dulunà kayi ziyà te zizaya ne puun te Wahig he Jordan, ne mibpehendiyè te zizaya he vahin te Jerico, pehendiyà en te menge vuvungan diyà te edsenlepan taman te sibsivayan te Bet Aven.
JOS 18:13 Ne puun dutun ebpehendiyà heini te zivavà he kelendiǥan te Luz (he iyan is Betel), ne mibpetupang heini ziyà te Atarot Adar, diyà te vuntud he ziyà te zivavà he vahin te alug he Bet Horon.
JOS 18:14 Puun dutun, ebpehendiyà heini te zapit te edsenlepan te vuntud he ebpekesinaru te Bet Horon diyà te zivavà. Midsangkù heini ziyà te Kiriat Baal (he iyan is Kiriat Jearim), he sevaha he zekelà he inged te tribu ni Juda. Iyan heini zulunà diyà te edsenlepan.
JOS 18:15 Is dulunà diyà te zivavà ne puun te zulunà te Kiriat Jearim. Puun dutun ebpehendiyà heini te edsenlepan diyà te menge teheb diyà te Neftoa.
JOS 18:16 Mibpetupang heini ziyà te lugtenaan te vuntud he zehipag te Suǥud-suǥud he Ben Hinom he ziyà te zizaya he vahin te Suǥud he Refaim. Midlaus heini ziyà te Suǥud-suǥud he Ben Hinom, nekeikul te zivavà he kelendiǥan te inged te menge Jebusihanen, pelaus diyà te En Rogel.
JOS 18:17 Ne mibulegku heini pezizaya pehendiyà te En Shemesh, laus diyà te Gelilot he atbang te Beyeey te Adumim, ne mibpetupang diyà te Batu ni Bohan te anak ni Reuben.
JOS 18:18 Puun dutun nekevayà heini te zizaya he kelendiǥan he atbang te Araba, ne midtupang dutun mismu he suǥud.
JOS 18:19 Ne midtupang en maan diyà te zizaya he kelendiǥan te Bet Holga, ne midunggù diyà te zizaya he suyuk te Daǥat he Minatey, he iyan divavà he purù te Wahig he Jordan. Iyan heini zulunà diyà te zivavà.
JOS 18:20 Is Wahig he Jordan iyan dulunà diyà te edsilaan. Iyan heeyan menge zulunà te tanà he naangken te menge pemilya te tribu ni Benjamin.
JOS 18:21 Iyan heini zezekelà he menge inged he imbeǥey ziyà te tribu ni Benjamin he mibahin diyà te kada pemilya zan: Jerico, Bet Hogla, Emek Keziz,
JOS 18:22 Bet Araba, Zemaraim, Betel,
JOS 18:23 Avim, Para, Ofra,
JOS 18:24 Kefar Amoni, Ofni, wey Geba: 12 langun he inged, ne ebpekeuman pa kayi is dezeisey he menge lugar ziyà te peliǥuy kayi he menge inged.
JOS 18:25 Ne elin ebpekeuman kayi is Gibeon, Rama, Beerot,
JOS 18:26 Mizpa, Kefira, Moza,
JOS 18:27 Rekem, Irpeel, Tarala,
JOS 18:28 Zela, Ha Elef, Jebus (he iyan Jerusalem), Gibea, wey Kiriat Jearim: ne 14 langun he inged, ne ebpekeuman pa kayi is dezeisey he menge lugar ziyà te peliǥuy kayi he menge inged. Iyan heini nepengevilin te tribu ni Benjamin he mibahin diyà te kada pemilya zan.
JOS 19:1 Is ikezuwa he neveǥayan te tanà pinaaǥi te kedripa iyan is menge pemilya te tribu ni Simeon. Is kandan he nepengevilin, diyà te teliwazà te tanà he imbeǥey ziyà te tribu ni Juda.
JOS 19:2 Neselakup kayi is Beersheba, Sheba, Molada,
JOS 19:3 Hazar Shual, Bala, Ezem,
JOS 19:4 Eltolad, Betul, Horma,
JOS 19:5 Ziklag, Bet Marcabot, Hazar Susa,
JOS 19:6 Bet Lebaot, wey Sharuhen: ne 13 langun he inged, ne ebpekeuman pa kayi is dezeisey he menge lugar ziyà te peliǥuy kayi he menge inged.
JOS 19:7 Iyan nekeuman kayi is Ain, Rimon, Eter, wey Ashan: ne 4 langun he inged, ne ebpekeuman pa kayi is dezeisey he menge lugar ziyà te peliǥuy kayi he menge inged,
JOS 19:8 taman te Baalat Beer (he iyan is Rama) diyà te Negev. Iyan heini nepengevilin te tribu ni Simeon he mibahin diyà te kada pemilya zan.
JOS 19:9 Is duma kayi ne kevahin te tanà he imbeǥey ziyà te tribu ni Juda su subra heini para kandan. Iyan heini hinungdan ke maan is diyà te seled te tanà te tribu ni Juda is bahin te tribu ni Simeon.
JOS 19:10 Is iketulu he mibehinan te tanà pinaaǥi te kedripa iyan is menge pemilya te tribu ni Zebulun. Is dulunà te tanè dan ebpuun diyà te Sarid.
JOS 19:11 Ne puun te Sarid mibpehendiyà heini te edsenlepan pehendiyà en te Marala, te Dabeshet, ne midlaus diyà te zal-ug diyà te edsilaan te Jokneam.
JOS 19:12 Puun te zivaluy he vahin te Sarid, is dulunà kayi mibpehendiyà te edsilaan pehendiyà te zulunà te Kislot Tabor, pelaus diyà te Daberat wey te Jafia.
JOS 19:13 Puun dutun, mibpehendiyà heini te edsilaan te Gat Hefer, diyà te Et Kazin, wey te Rimon, ne mibulegkù heini ziyà te Nea.
JOS 19:14 Is dulunà te Zebulun diyà te zizaya nekevayà te Hanaton, ne midsangkù diyà te Suǥud te Ifta El.
JOS 19:15 Ne 12 he dezekelà he inged is nesakup te Zebulun, ne ebpekeuman kayi is dezeisey he menge inged diyà te peliǥuy kayi he menge inged. Nekeuman pa kayi is menge inged he Katat, Nahalal, Shimron, Idala, wey Betlehem.
JOS 19:16 Iyan heini menge inged wey zezeisey he menge inged he nezawat te tribu ni Zebulun, he mibahin diyà te kada pemilya zan.
JOS 19:17 Is ikeepat he mibehinan te tanà pinaaǥi te kedripa iyan is menge pemilya te tribu ni Isachar.
JOS 19:18 Iyan heini menge inged he nesakup dan: Jezreel, Kesulot, Shunem,
JOS 19:19 Hafaraim, Shion, Anaharat,
JOS 19:20 Rabit, Kishion, Ebez,
JOS 19:21 Remet, En Ganim, En Hada, wey Bet Pazez.
JOS 19:22 Is dulunà nekeuma ziyà te Tabor, diyà te Shahazuma, wey te Bet Shemesh, ne ziyà metaman te Wahig he Jordan: ne 16 he menge inged is nesakup te Isacar, ne ebpekeuman kayi is dezeisey he menge inged diyà te peliǥuy kayi he menge inged.
JOS 19:23 Iyan heini nepengevilin te tribu ni Isachar he mibahin diyà te kada pemilya zan.
JOS 19:24 Is ikelima he mibehinan te tanà pinaaǥi te kedripa iyan is menge pemilya te tribu ni Asher.
JOS 19:25 Iyan heini menge inged he nesakup dan: Helkat, Hali, Beten, Acshaf,
JOS 19:26 Alamelec, Amad, wey Mishal. Is dulunà kayi ziyà te edsenlepan mibpuun te Carmel wey te Shihor Libnat.
JOS 19:27 Ne mibulegku heini ziyà te edsilaan pehendiyà te Bet Dagon ne nekeuma ziyà te Zebulun wey te Suǥud-suǥud te Ifta El. Ne mibpehendiyà heini te zizaya pehendiyà te Bet Emek wey Neil. Ne midlaus heini ziyà te zizaya pehendiyà te Cabul,
JOS 19:28 Ebron, Rehob, Hamon, Kana, taman te Zekelà he Sidon.
JOS 19:29 Ne mibulegku heini pehendiyà te Rama, ne midlaus heini ziyà te vinerengbeng he inged he Tyre, ne mibpehendiyà te Hosa, ne ziyà metaman te Daǥat he Mediteraneo. Is duma pa he menge inged he nesakup dan iyan is: Mahabal, Aczib,
JOS 19:30 Umma, Afek, wey Rehob: ne 22 langun he inged, ne ebpekeuman pa kayi is dezeisey he menge inged diyà te peliǥuy kayi he menge inged.
JOS 19:31 Iyan heini menge inged he nepengevilin te tribu ni Asher he mibahin diyà te kada pemilya zan.
JOS 19:32 Is ikeenem he mibehinan te tanà pinaaǥi te kedripa iyan is menge pemilya te tribu ni Naftali.
JOS 19:33 Is dulunè dan mibpuun te Helef wey te kayu he ulayan diyà te Zaananim, mibpehendiyà te Adami Nekeb wey Jabneel midlaus diyà te Lakum, ne ziyà metaman te Wahig he Jordan.
JOS 19:34 Puun dutun mibulegkù heini ziyà te edsenlepan, pehendiyà te Aznot Tabor, ne zutun mibpehendiyà te Hukok taman te dulunà te Zebulun diyà te zivavà, diyà te dulunà te Asher ziyà te edsenlepan, wey te Wahig he Jordan diyà te edsilaan.
JOS 19:35 Is duma he vinerengbeng he menge inged he nesakup kayi iyan is: Zidim, Zer, Hammat, Rakat, Kineret,
JOS 19:36 Adama, Rama, Hazor,
JOS 19:37 Kedesh, Edrei, En Hazor,
JOS 19:38 Iron, Migdal El, Horem, Bet Anat, wey Bet Shemesh: ne 19 langun he inged, ne ebpekeuman pa kayi is dezeisey he menge inged diyà te peliǥuy kayi he menge inged.
JOS 19:39 Iyan heini menge inged he nepengevilin te tribu ni Naftali, he mibahin diyà te kada pemilya zan.
JOS 19:40 Is ikepitu he mibehinan te tanà pinaaǥi te kedripa iyan is menge pemilya te tribu ni Dan.
JOS 19:41 Iyan heini menge inged he nesakup dan: Zora, Eshtaol, Ir Shemesh,
JOS 19:42 Shaalabin, Ayalon, Itla,
JOS 19:43 Elon, Timna, Ekron,
JOS 19:44 Elteke, Gibeton, Baalat,
JOS 19:45 Jehud, Bene Berak, Gat Rimon,
JOS 19:46 Me Jarkon, wey Rakon, wey is tanà atbang te Jopa.
JOS 19:47 Edlised is menge kevuwazan ni Dan te ked-aǥew zuen te tivuuk he tanà he imbahin kandan, umbe iyan dan dà dèpa midsurung is Leshem ne migerè dan is meǥinged kayi. Naaǥew zan heini ne zutun dan med-ubpà. Ne mid-ilisan dan is ngazan kayi he Leshem te Dan, he iyan ngazan te kepuun dan he si Dan.
JOS 19:48 Iyan heini menge inged he nepengevilin te tribu ni Dan, he mibahin diyà te kada pemilya zan.
JOS 19:49 Hein nepasad is kebehina zuen te tanà te menge Israilihanen, mibeǥayan dan si Josue he anak ni Nun, te kandin he vahin.
JOS 19:50 Midtuman dan is insuǥù te Nengazen, umbe imbeǥey zan kandin is inged he mibuyù din he iyan is Timnat Sera, diyà te vuvungan te Efraim. Mibangun din umana heini he inged ne mid-ubpà sikandin dutun.
JOS 19:51 Is mibahin duen te tanà iyan si Eleazar he memumuhat, si Josue he anak ni Nun, wey is menge pengulu te kada tribu ni Israel. Mibeelan dan heini pinaaǥi te kedripa ziyà te etuvangan te Nengazen diyà te Shilo, duen te ǥemawan te Tulda he Edtelevukaayan, ne nepasad dan en is kebahinbahin duen te tanà.
JOS 20:1 Ne migkaǥi is Nengazen diyà te ki Josue te,
JOS 20:2 “Kegiyi nu is menge Israilihanen he mebpilì dan te menge inged he eputà sumalà is migkaǥi ku keniyu zengan pinaaǥi ki Moises.
JOS 20:3 Is etew he ebpekepatey he wazè din tivevaa, ne ebpekaaput dutun ne kenà sikandin egkekeizan te menge etew he egkesuat he ebales kandin.
JOS 20:4 Ebpekaaput sikandin diyà te minsan hendei zutun he menge inged, ne ed-etuvangen din diyà te pultahan te inged is ebpemendumala ne egkeǥiyen din kandan is nehitavù. Ne ibpeseled dan sikandin ne ebeǥayan dan te lugar he egkeubpaan din.
JOS 20:5 Ne emun ebpekeuma zutun te inged is edal-as kandin he egkesuat he ebales kandin, kinahanglan he kenà sikandin iveǥey te menge meǥinged dutun su wazè din tivevaa is kegkepetaya zin te zuma zin, wey kenà daan heini tenged te kegkepauk din.
JOS 20:6 Ne kenà sikandin med-awà dutun te inged taman te egkehusey haazà he rirù diyà te etuvangan te kezekelan wey taman te ebpatey is lavew he memumuhat he iyan ebpenilbi zutun he timpu. Ne emun egkehitavù en heini ne egkehimu en ke ed-ulì sikandin diyà te kandan.”
JOS 20:7 Umbe, mibpilì dan is Kedesh diyà te Galilea he ziyà te vuvungan te Naftali wey is Shekem diyà te vuvungan te Efraim, wey is Kiriat Arba (he iyan is Hebron), he ziyà te vuvungan te Juda.
JOS 20:8 Diyà te edsilaan te Wahig he Jordan he uvey te Jerico, mibpilì dan is Bezer ziyà te sibsivayan he ziyà te menge suǥud he nesakup te tanà te tribu ni Reuben, is Ramot diyà te Gilead he nesakup te tanà te tribu ni Gad, wey is Golan diyà te Bashan he nesakup te tanà te tribu ni Manase.
JOS 20:9 Iyan heini menge inged he eputà he mibpilì para te menge Israilihanen wey kenà menge Israilihanen he zuma zan he meǥinged. Is minsan hentei he ebpekepatey he wazè din tivevaa ebpekaaput dutun para kenà sikandin mepatey te menge egkesuat he ebales kandin te wazè pa mehusey haazà is rirù diyà te etuvangan te kezekelan.
JOS 21:1 Ne zutun, is menge pengulu te menge kevuwazan ni Levi midhendiyà te ki Eleazar he memumuhat, ki Josue he anak ni Nun, wey ziyà te menge pengulu te kada tribu te Israel
JOS 21:2 diyà te Shilo he tanà te Canaan. Migkaǥi sikandan diyà te kandan te, “Midsuǥù is Nengazen pinaaǥi ki Moises he ebeǥayan key te menge inged he egkeubpaan dey wey menge penebtavà he para te uyaǥen dey.”
JOS 21:3 Umbe, sumalà dutun te insuǥù te Nengazen mibeǥayan is menge kevuwazan ni Levi te menge inged wey menge tanà he menge pepenebtavè dan he midtarin diyà te menge vahin te tanà te menge Israilihanen.
JOS 21:4 Is nehuna he mibeǥayan te menge inged iyan is menge kevuwazan ni Kohat. Kevahin te kevuwazan ni Kohat is menge kevuwazan ni Aaron, ne mibeǥayan sikandan te 13 he menge inged he nesakup diyà te tanà te tribu eni Juda, Simeon, wey Benjamin.
JOS 21:5 Is duma he menge kevuwazan ni Kohat mibeǥayan te 10 he menge inged he nesakup diyà te tanà te menge tribu eni Efraim, Dan, wey ketengà he tribu ni Manase.
JOS 21:6 Is menge kevuwazan ni Gershon mibeǥayan te 13 he menge inged he nesakup te menge tanà te tribu eni Isachar, Asher, Naftali, wey te ketenga he tribu ni Manase diyà te Bashan.
JOS 21:7 Is menge kevuwazan ni Merari mibeǥayan te 12 he menge inged he nesakup te menge tanà te menge tribu eni Reuben, Gad, wey Zebulun.
JOS 21:8 Pinaaǥi te kedripa, mibeǥayan te menge Israilihanen is menge kevuwazan ni Levi te menge inged wey menge penebtavà, su iyan heeyan insuǥù te Nengazen ki Moises.
JOS 21:9 Iyan heini menge inged he nesakup te tanà te tribu ni Juda wey ni Simeon he imbeǥey ziyà te menge kevuwazan ni Aaron. Heini sikandan menge kevuwazan ni Kohat te anak ni Levi. Iyan sikandan nehuna he neripahan he ebeǥayan te menge inged.
JOS 21:11 Imbeǥey kandan is Kiriat Arba (he iyan is Hebron) ziyà te menge vuvungan te Juda, ragkes en is menge penebtavà diyà te peliǥuy kayi. (Si Arba iyan amey ni Anak.)
JOS 21:12 Piru is menge vevesukà wey zezeisey he menge inged diyà te peliǥuy kayi he inged imbeǥey en mulà diyà te ki Caleb te anak ni Jefune he iyan kandin he vahin.
JOS 21:13 Umbe, imbeǥey ziyà te menge kevuwazan ni Aaron he memumuhat is Hebron (he sevaha zuen te menge inged he eputà he ebpekaaput dutun is etew he nekepatey he wazè din tivevaa). Elin imbeǥey kandan is Libna,
JOS 21:14 Jatir, Eshtemoa,
JOS 21:15 Holon, Debir,
JOS 21:16 Ain, Juta, wey Bet Shemesh, ragkes is menge penebtavà kayi. Ne 9 he menge inged is nesakup te tanà te tribu ni Simeon wey ni Juda.
JOS 21:17 Imbeǥey pa kandan is heepat he menge inged he nesakup te tanà te tribu ni Benjamin. Heini iyan is Gibeon, Geba,
JOS 21:18 Anatot, wey Almon, ragkes is menge penebtavà kayi.
JOS 21:19 Ne 13 he menge inged langun ragkes is menge penebtavà kayi is nezawat te menge memumuhat he menge kevuwazan ni Aaron.
JOS 21:20 Is duma he menge kevuwazan ni Kohat he ebpuun diyà te tribu ni Levi nekezawat te heepat he menge inged he nesakup te tanà te tribu ni Efraim. Heini iyan is Shekem (he ziyà te vuvungan te Efraim he sevaha zuen te menge inged he eputà he ebpekaaput dutun is etew he nekepatey he wazè din tivevaa), is Gezer, Kibzaim, wey Bet Horon, ragkes is menge penebtavà kayi.
JOS 21:23 Mibeǥayan daan sikandan te heepat he menge inged he nesakup te tanà te tribu ni Dan. Iyan is: Elteke, Gibeton, Ayalon, wey Gat Rimon, ragkes is menge penebtavà kayi.
JOS 21:25 Ne puun daan te tanà te ketengà he tribu ni Manase he ziyà te edsenlepan nekuwa zan daan is dezuwa he inged he iyan is: Taanak wey Gat Rimon, ragkes is menge penebtavà kayi.
JOS 21:26 Ne 10 langun he menge inged ragkes is menge penebtavà kayi, is imbeǥey ziyà te nesamà he menge kevuwazan ni Kohat.
JOS 21:27 Is menge kevuwazan ni Gershon he ebpuun daan diyà te tribu ni Levi, nekezawat te zezuwa he inged he nesakup te tanà te ketengà he tribu ni Manase he ziyà dapit te edsilaan he iyan is: Golan diyà te Bashan (he sevaha zuen te menge inged he eputà he ebpekaaput dutun is etew he nekepatey he wazè din tivevaa), wey is Beeshtera, ragkes is menge penebtavà kayi.
JOS 21:28 Mibeǥayan daan sikandan te heepat he menge inged he nesakup te tanà te tribu ni Isachar he iyan is: Kishion, Daberat, Jarmut, En Ganim, ragkes is menge penebtavà kayi.
JOS 21:30 Ne zuen te tanà he nesakup te tribu ni Asher, imbeǥey ziyà te kandan is heepat he inged he iyan is: Mishal, Abdon, Helkat, wey Rehob, ragkes is menge penebtavà kayi.
JOS 21:32 Ne mibeǥayan pa sikandan te tetelu he inged he nesakup te tanà te tribu ni Naftali he iyan is: Kedesh diyà te Galilea (he sevaha zaan duen te menge inged he eputà, he zutun egkehimu he ed-aput is sevaha he etew he nekepatey he wazè din tivevaa), is Hamot Dor wey is Kartan, ragkes is menge penebtavà kayi. Ne 13 he menge inged ragkes is menge penebtavà kayi is imbeǥey ziyà te kevuwazan ni Gershon.
JOS 21:34 Is nesamà he menge kevuwazan ni Levi he menge kevuwazan ni Merari mibeǥayan te heepat he menge inged he nesakup te tanà te tribu ni Zebulun. He iyan is Jokneam, Karta, Dimna, wey Nahalal, ragkes is menge penebtavà kayi.
JOS 21:36 Mibeǥayan daan sikandan te heepat he menge inged he nesakup te tanà te tribu ni Reuben. He iyan is Bezer, Jahaz, Kedemot, wey Mefaat ragkes is menge penebtavà kayi.
JOS 21:38 Ne ziyè daan te tanà he nesakup te tanà te tribu ni Gad mibeǥayan sikandan te heepat he inged, he iyan is: Ramot he ziyà te Gilead (he sevaha zuen te menge inged he eputà he ebpekaaput dutun is etew he nekepatey he wazè din tivevaa), is Mahanaim, Heshbon, wey Jazer, ragkes is menge penebtavà kayi.
JOS 21:40 Ne 12 he menge inged ragkes is menge penebtavà kayi is nekuwa te menge kevuwazan ni Merari he nesakup te tanà te tribu ni Levi.
JOS 21:41 Ne 48 he menge inged ragkes is menge pepenebtavà kayi is imbeǥey ziyà te menge kevuwazan ni Levi he nesakup te tanà te menge Israilihanen.
JOS 21:43 Iyan heini paaǥi te kebeǥaya te Nengazen diyà te Israel duen te tanà he impenaad din diyà te menge kepuun dan. Ne hein nekuwa zan en heini ne zutun en sikandan med-ubpà.
JOS 21:44 Ne impemelinew te Nengazen is ked-ubpè dan su wazè dan en mekepekidtebek te menge kuntada zan diyà te peliǥuy, su iyan heini insaad te Nengazen diyà te menge kepuun dan. Wazà sikandan mezaag te menge kuntada zan su impezaag kandan te Nengazen is langun he menge kuntada zan.
JOS 21:45 Midtuman te Nengazen is langun he insaad din diyà te menge etew te Israel.
JOS 22:1 Ne zutun midtiǥum ni Josue is menge tribu ni Reuben, ni Gad, wey is ketengà he tribu ni Manase.
JOS 22:2 Ne migkeǥiyan sikandan ni Josue te, “Mibeelan niw is langun he insuǥù keniyu ni Moises he suluǥuen te Nengazen ne midtuman niw zaan is langun he insuǥù ku.
JOS 22:3 Ne taman en guntaan wazè niw vey-ani is menge zuma niw he menge Israilihanen. Ne mibpurungan niw tumana is langun he insuǥù keniyu te Nengazen he Megbevayè niw.
JOS 22:4 Ne ǥuntaan naangken en te zuma niw he menge Israilihanen is kelinew he insaad kandan te Nengazen. Umbe, ulì kew en diyà te keniyu he tanà he ziyè layun te Wahig he Jordan, duen te tanà he imbeǥey keniyu ni Moises he suluǥuen te Nengazen.
JOS 22:5 Piru kenè niw lipati is kedtuman te menge suǥù wey menge penurù he imbeǥey keniyu ni Moises te suluǥuen te Nengazen: Mahala niw is Nengazen he Megbevayè niw, pengungubpaan kew he ed-ikul te menge paaǥi zin, tumana niw is menge suǥù din, pezumazuma kew kandin, wey silbiyi niw sikandin te ebpuun te tivuuk he ǥehinawa niw wey kedsavut niw.”
JOS 22:6 Ne zutun mibpenubtuvazan sikandan ni Josue ne impeulì din.
JOS 22:7 (Is ketengà he tribu ni Manase ne mibeǥayan ni Moises te tanà diyà te Bashan, ne is ketengà pa ne mibeǥayan ni Josue te tanà diyà te zapit te edsenlepan te Jordan duma te zuma pa he menge tribu). Hein ed-ulì en sikandan mibpenubtuvazan sikandan ni Josue
JOS 22:8 he ke sikandin te, “Ed-ulì kew he ed-uwit te mahabet he menge ketiǥeyunan–menge uyaǥen, pelata, bulawan, brunsi, putew wey menge visti. Behini niw is menge kezuzumahi niw he ziyà te keniyu te minsan hengkey he naaǥew niw ziyà te menge kuntada niw.”
JOS 22:9 Ne zutun nemen-ulì is tribu ni Reuben, ni Gad, wey is ketengà he tribu ni Manase. Mid-ewaan dan is menge zuma zan he menge Israilihanen diyà te Shilo, he tanà te Canaan ne nemen-ulì sikandan diyà te Gilead, sikan is tanà he nehimu he vahin dan he insuǥù te Nengazen ki Moises he iveǥey ziyà te kandan.
JOS 22:10 Kebpekeuma zan diyà te Gelilot, he uvey te Wahig he Jordan he nesakup pa te Canaan, mibaal sikandan dutun te zekelà he pemuhatà.
JOS 22:11 Ne hein netudtulan is duma he menge Israilihanen he mibaal te pemuhatà is tribu ni Reuben, ni Gad, wey is ketengà he tribu ni Manase ziyà te Gelilot, uvey te Wahig he Jordan he dulunà te Canaan, midtiǥum dan diyà te Shilo su ebpengandam dan te kebpekidtebek kandan.
JOS 22:13 Midsuǥù te menge Israilihanen si Finehas he anak ni Eleazar he memumuhat he medhendiyà te Gilead, diyà te tribu ni Reuben, ni Gad, wey te ketengà he tribu ni Manase.
JOS 22:14 Duen din duma he sepulù he menge pengulu he ebpuun diyà te kada tribu te Israel. Heini sikandan, menge pengulu zaan te menge pemilya te menge tribu zan.
JOS 22:15 Kebpekeuma zan diyà te Gilead, migkeǥiyan dan is tribu ni Reuben, ni Gad, wey is ketengà he tribu ni Manase te,
JOS 22:16 “Sikami is tivuuk he etew te Nengazen egkesuat key he metueni zey ke maan is midlimbungan niw is Megbevayà te Israel? Nekesupak kew te Nengazen pinaaǥi te kebaal niw te keugelingen niw he pemuhatà. Maan is mid-iniyuǥan niw sikandin?
JOS 22:17 Kenè pe be ereg is salà he neveelan tew ziyà te Peor? He tenged dutun mibpeeǥiyan kiw te Nengazen te vangkit, he minsan ganì guntaan kemulu tew pa ed-entusa is rimeǥas din.
JOS 22:18 Ne ǥuntaan nekehimu kew pa te ked-iniyug te Nengazen? Emun edsupak kew pa kandin guntaan he andew, ne keeselem egkepeukan din en is tivuuk he keet-etawan te Israel.
JOS 22:19 Umbe, emun egkinahanglan kew te pemuhatà su is tanà niw, kenè dait he zutun kew ed-azap, layun kew ziyà te kenami, diyà te tanà te Nengazen he zutun sikan is Tulda he ed-ezapan kandin, ne ziyè kew en ubpà te kenami. Piru kenè kew vaal te selakew en he pemuhatà gawas duen te pemuhatà he para te Nengazen he Megbevayè tew, su kedsupak heeyan kandin ne supak daan kenami.
JOS 22:20 Nelipatan niw en be is mibeelan ni Acan te anak ni Zera? Hein midsupak din is suǥù mehitenged te menge azen he para zà te Nengazen, midsilutan sikandin duma te tivuuk he keet-etawan te Israel. Kenà iyan dà sikandin minatey tenged te salè din.”
JOS 22:21 Ne midtavak te tribu ni Reuben, ni Gad, wey te ketengà he tribu ni Manase sikan is menge pengulu te menge pemilya te Israel te:
JOS 22:22 “Is Nengazen iyan sikan is Mekeǥeǥehem he Megbevayà! Netuenan din ke maan is mibeelan dey heini, ne ereg daan heini he egketuenan niw. Emun iyan imbeeli zey kayi is kebpekidsukulà etawa kedsupak te Nengazen, ne kenè kew en tuǥut he meuyag-uyag key pa ǥuntaan he andew.
JOS 22:23 Emun midsupak dey is Nengazen pinaaǥi te kebaal zey te keugelingen dey he pemuhatà he para te menge pemuhat he edtutungen, pemuhat he para gasa, etawa menge pemuhat he para te meupiya he kedepità, berakat he iyan en medsilut kenami is Nengazen.
JOS 22:24 “Umbe mibeelan dey heini su nahandek key he kela ke ziyà te huziyan he timpu megkaǥi is menge kevuwazan niw ziyà te menge kevuwazan dey te, ‘Hengkey is lavet niw te Nengazen he Megbevayà te Israel?
JOS 22:25 Midhimu te Nengazen he dulunà tew is Wahig he Jordan te kedsivaya zin keniyu puun diyà te kenami. Sikiyu is menge tribu ni Reuben wey ni Gad wazè niw lavet te Nengazen.’ Ne kela ke zewaya te menge kevuwazan niw is menge kevuwazan dey te ked-azap te Nengazen.
JOS 22:26 Is tutuu, mibeelan dey heini he pemuhatà, kenà para te menge pemuhat he edtutungen wey te zuma pa he menge pemuhat,
JOS 22:27 kekenà, para mehimu heini he tuus he ebpetanudtanud kenami, wey keniyu, wey te peleebuten he menge kevuwazan tew he ed-azap key zaan te Nengazen pinaaǥi te kebpemuhat te menge pemuhat he edtutungen, pemuhat he para te meupiya he kedepità, wey zuma pa he menge pemuhat diyà te Tulda he zutun sikandin ed-ezapa. Ne tenged kayi he pemuhatà kenà ebpekekaǥi is menge kevuwazan niw ziyà te menge kevuwazan dey he wazè dan lavet te Nengazen.
JOS 22:28 Su emun egkehitavù he egkeǥiyan is menge kevuwazan dey te iring dutun, ebpekekaǥi sikandan te, ‘Ahaa niw man! Mibaal is menge apù dey te pemuhatà he iring duen te pemuhatà he para te Nengazen, he kenà para te pemuhat he edtutungen wey te zuma pa he menge pemuhat, kekenà, para ebpetanudtanud kenami wey keniyu he sevaha zà he Megbevayà is ed-ezapen tew.’
JOS 22:29 “Kenà egkehimu he edsupaken dey wey ed-iniyuǥan dey is Nengazen pinaaǥi te kebaal te keugelingen dey he pemuhatà he para ebpemuhatan te menge pemuhat he edtutungen, menge pemuhat he para gasa, wey zuma pa he menge pemuhat. Iyan dà is pemuhatà para te Nengazen he Megbevayè tew ziyà te Tulda he zutun sikandin ed-ezapa ereg he ebpemuhatan.”
JOS 22:30 Nelipey si Finehas he memumuhat, wey sikan is menge pengulu te menge pemilya te keet-etawan te Israel hein nezineg dan haazà is migkaǥi te menge tribu ni Reuben, ni Gad, wey te ketengà he tribu ni Manase.
JOS 22:31 Umbe, migkaǥi si Finehas he anak te memumuhat he si Eleazar te, “Netuenan tew ǥuntaan he mibpekiduma kenitew is Nengazen su wazè kew medsupak kandin. Midlibri niw is Israel te silut te Nengazen.”
JOS 22:32 Ne zutun mid-ulì diyà te Canaan si Finehas wey sikan is menge pengulu, ne migkaǥi zan diyà te menge Israilihanen is rimeǥas te kebpekidlalag dan te tribu ni Reuben wey ni Gad diyà te Gilead.
JOS 22:33 Ingkelipey te menge Israilihanen haazà is nezineg dan ne midalig dan is Megbevayà. Ne wazè dan en meventeeni is bahin te kedsurung dan diyà te tanà he ed-ubpaan te menge tribu ni Reuben wey ki Gad.
JOS 22:34 Migngezanan haazà is pemuhatà te menge tribu ni Reuben wey ki Gad te “Tuus,” su ke sikandan te, “Tuus heini para kenitew te langun he is Nengazen Megbevayè tew.”
JOS 23:1 Seled te meluǥayad he timpu is kebeǥey te Nengazen te kelinew ziyà te Israel su wazè en sikandan mekepekidtebek te menge kuntada zan diyà te peliǥuy zan. Ne si Josue utew en meǥurang,
JOS 23:2 umbe impetawag din is langun he menge etew te Israel: is menge ebpemendumala, is menge pengulu, is menge zatù, wey is menge upisyal, ne ke sikandin diyà te kandan te, “Utew ad meǥurang.
JOS 23:3 Neehè niw en is langun he mibeelan te Nengazen he Megbevayè niw kayi te menge nasyun para keniyu. Is Nengazen he Megbevayè niw iyan mibpekidtebek para keniyu.
JOS 23:4 Mibahinbahin ku en keniyu he para egkepengevilin te menge tribu niw is langun he tanà kayi te menge nasyun he naaǥew ku. Heini he tanà puun te Wahig he Jordan diyà dapit te edsilaan pehendiyà te Zaǥat he Mediteraneo diyà te edsenlepan. Elin daan is menge tanà te menge etew ziyà te menge nasyun he wazè tew pa maaǥew.
JOS 23:5 Egkehimu he egkeangken niw zed is menge tanè dan, sumalà te impesarig keniyu te Nengazen he Megbevayè niw. Su edsegseǥen sikandan te Nengazen.
JOS 23:6 “Mebpekelig-en kew, ne peniguduwi niw he metuman niw is langun he ingkesurat diyà te Libru te Kesuǥuan ni Moises. Kenè niw repasa is minsan hengkey he vahin kayi.
JOS 23:7 Kenè kew pekidsevaha te menge etew ziyà te menge nasyun he kemulu zuma niw, kenè niw sempita is ngazan te menge ed-ezapen dan wey kenè kew penangdù pinaaǥi te kegemita te ngazan kayi. Kenè kew zaan med-azap wey mebpenilbi kandan.
JOS 23:8 Pezumazuma kew te Nengazen he Megbevayè niw, iring te nehuna he mibeelan niw.
JOS 23:9 “Midsegseg te Nengazen is menge etew ziyà te zezekelà wey mekeǥeǥehem he menge nasyun hein midsurung niw sikandan, ne taman en guntaan ne wazè pa minsan sevaha he nekezaag keniyu.
JOS 23:10 Is minsan hentei keniyu ebpekesegseg te 1,000 he menge etew, su is Nengazen iyan ebpekidtebek para keniyu, sumalà te insaad din.
JOS 23:11 Umbe, sigureduwa niw he mahal niw is Nengazen he Megbevayè niw.
JOS 23:12 “Iyan, emun ed-iniyuǥan niw sikandin, wey ebpekidsevaha kew te menge etew kayi te menge nasyun he kemulu pa menge zuma niw, wey ebpekid-esawa kew kandan,
JOS 23:13 siguradu kenè en edsegseǥen te Nengazen he Megbevayè niw heini he menge etew. Egkehimu sikandan he pekaid keniyu. Egkesekitan kew tenged kandan he henduen be te edletiguwen is menge peka niw etawa edtiyuken te zuǥi is menge mata niw. Ne kenà heini egkeengked taman te kebpemematey niw kayi te meupiya he tanà he imbeǥey keniyu te Nengazen he Megbevayè niw.
JOS 23:14 “Hapit ad ebpatey. Netuenan niw pinaaǥi te tivuuk he gehinawa niw wey isip niw he midtuman te Nengazen he Megbevayè niw is langun he menge meupiya he insaad din keniyu. Wazà minsan sevaha he wazà metuman.
JOS 23:15 Ne iring te midtuman te Nengazen he Megbevayè niw is langun he menge meupiya he insaad din keniyu, edtumanen din daan is kezeetan he impetizaan din keniyu emun edsupaken niw is kebpekid-uyun keniyu te Nengazen he Megbevayè niw he ibpetuman din keniyu. Wey emun ed-azap kew wey ebpenilbi kew te tarù he menge megbevayà, ibpeǥezaman din keniyu is pauk din, ne seled dà te mevavà he timpu egkeǥerè kew is langun kayi te meupiya he tanà he imbeǥey zin keniyu.”
JOS 24:1 Ne zutun midtiǥum ni Josue is langun he tribu te Israel ziyà te Shekem. Ne mid-umew zin is ebpemendumala, menge pengulu, menge zatù, wey menge upisyal te Israel, ne mid-uvey zan diyà te etuvangan te Megbevayà.
JOS 24:2 Migkaǥi si Josue ziyà te langun he menge etew te, “Iyan heini migkaǥi te Nengazen he Megbevayà te Israel: Dengan, menge meǥinged diyà layun te Wahig he Eufrates is menge kepuun niw ne ebpemen-azap dan te zuma he menge ed-ezapen. Is sevaha kandan iyan si Tera is amey ni Abraham wey ki Nahor
JOS 24:3 Iyan, migkuwa ku si Abraham puun dutun he lugar ne migiyahan ku sikandin pehendiyà te tanà te Canaan, ne impemahabet ku is menge kevuwazan din. Mibeǥayan ku sikandin te anak he si Isaac,
JOS 24:4 ne si Isaac ne iyan amey ni Esau wey ni Jacob. Imbeǥey ku ki Esau is buvungan te Seir he kandin he vahin, piru is kepuun niw he si Jacob wey is menge anak din ne midhendiyà te Ehipto.
JOS 24:5 Kedlavey te menge timpu, midsuǥù ku ziyà te Ehipto si Moises wey si Aaron te kedlibri keniyu ziyà, mibpeeǥiyan ku te vangkit is Ehipto ne kegkepasad dutun, impeǥawas ku sikiyu.
JOS 24:6 Piru hein nekeume en diyà te Zaǥat he Meriǥà is menge kepuun niw, midal-as sikandan te menge Ehiptohanen he ebpemen-untud te menge kerwahi zan wey menge kudè dan. Mibpetavang dan kedì, umbe insavuk ku ziyà te mid-elangan dan wey te menge Ehiptohanen is merusirem. Ne midlened ku is menge Ehiptohanen dutun te zaǥat. Neehè niw en is mibeelan ku ziyà te menge Ehiptohanen. Ne mid-ubpè kew ziyà te sibsivayan seled te meluǥayad he timpu.
JOS 24:8 “Ne mid-uwit ku sikiyu ziyà te tanà te menge Amorihanen diyà dapit te edsilaan te Wahig he Jordan. Nekidtebek dan keniyu piru imbeǥey ku sikandan keniyu. Midèdeetan ku sikandan ne nekuwa niw is tanè dan.
JOS 24:9 Ne nekidtebek te Israel is hadì te Moab he si Balak he anak ni Zipor. Midsuǥù din si Balaam he anak ni Beor te kedrawak keniyu.
JOS 24:10 Piru wazè ku tuǥuti si Balaam te kebaal kayi ziyà te keniyu. Edrewakan kew zin pezem piru mibpepenubtuvazan ku sikiyu ki Balaam, ne midlibri ku sikiyu te kegkeiza pezem keniyu ni Balak.
JOS 24:11 “Ne midlayun kew te Wahig he Jordan ne nekeuma kew ziyà te Jerico. Nekidtebek keniyu is menge tig-Jerico, wey is menge Amorihanen, menge Pirisihanen, menge Canaanhen, menge Hitihanen, menge Girgasihanen, menge Hivihanen, wey menge Jebusihanen. Piru nezaag niw sikandan pinaaǥi kedì.
JOS 24:12 Impezal-as ku te menge petiyukan sikan is dezuwa he hadì he menge Amorihanen su para zaan sikandan he mesegseg te kenè kew pa ebpekeuma. Nekezaag kew kenà tenged te menge ispada niw wey menge panè niw.
JOS 24:13 Mibeǥayan ku sikiyu te tanà he wazè niw heǥui. Impeubpè ku sikiyu ziyà te menge inged he kenè kew iyan mibangun duen. Egkaan kew ǥuntaan te menge paras wey menge ulibu he kenè kew iyan nemula zuen.
JOS 24:14 “Umbe ǥuntaan, ezapa niw is Nengazen ne penilbi kew kandin te tinutuuwà. Engkezi niw en is menge ed-ezapen he ebpen-ezapen dengan te menge kepuun niw ziyà layun te Wahig he Eufrates wey ziyà te Ehipto, ne penilbi kew te Nengazen.
JOS 24:15 Iyan, emun kenè niw igkelipey is kebpenilbi te Nengazen, pilì kew ǥuntaan he andew ke hentei is edsilbiyan niw. Iyan be is menge ed-ezapen he midsilbiyan te menge kepuun niw ziyà layun te Wahig he Eufrates, etawa iyan is menge ed-ezapen te menge Amorihanen he mid-ubpaan niw ǥuntaan is tanè dan. Piru siak mulà wey is pemilya ku, Nengazen is kenami he edsilbiyan.”
JOS 24:16 Ne midtavak is menge etew te, “Wazà kayi te isip dey he ed-iniyuǥan dey is Nengazen wey ebpenilbi key te zuma he ed-ezapan.
JOS 24:17 Is Nengazen he Megbevayè tew iyan mibpeǥawas kenitew wey te menge kepuun tew te kegkeuripen diyà te Ehipto. Ne neehè tew zaan is egkengein-inuwan he mibeelan din. Ne wazè din ituǥut he mekeizi kiw zuen te hipanew tew ziyà te teliwazà te menge nasyun he imbayè tew.
JOS 24:18 Dutun te kedhengkayi tew te tanà, midsegseg te Nengazen is menge Amorihanen wey zuma pa he menge etew he ebpemen-ubpà kayi. Umbe ebpenilbi key zaan te Nengazen, su iyan sikandin Megbevayè dey.”
JOS 24:19 Ne migkaǥi si Josue ziyà te menge etew te, “Kenè kew ebpekehimu he ebpenilbi te Nengazen su waǥas sikandin he Megbevayà wey tengelikuzen, su kenè din egkesuatan ke zuen selakew en he ed-ezapen niw. Kenè din ibpelavey is kebpekidsukulè niw wey menge salè niw.
JOS 24:20 Emun ed-engkezan niw is Nengazen ne ebpenilbi kew te zuma he menge ed-ezapen, egkepeukan kew zin ne edsilutan kew zin. Edèdeetan kew zin minsan pa te mibpurungan kew zin dutun te nehuna he timpu.”
JOS 24:21 Piru midtavak is menge etew ziyà te ki Josue te, “Ebpenilbi key iyan te Nengazen.”
JOS 24:22 Migkaǥi si Josue te, “Iyan kew en ebpeketistiǥus te keugelingen niw he penaad, nenaad kew he ebpenilbi kew te Nengazen.” Midtavak sikandan te, “Uya, iyan key en menge tistiǥus.”
JOS 24:23 Migkaǥi si Josue te, “Emun iyan heeyan, engkezi niw en is menge ed-ezapen niw, ne penilbi kew te Nengazen he Megbevayà te Israel.”
JOS 24:24 Midtavak is menge etew te, “Edsilbiyan dey is Nengazen he Megbevayè dey, ne edtumanen dey is menge suǥù din,”
JOS 24:25 Dutun he andew midheǥet ni Josue is kebpepenengdua zin te menge etew ziyà te Shekem, ne imbeǥey zin diyà te kandan is menge kesuǥuan wey menge sulunuzen.
JOS 24:26 Insurat din heini ziyà te Libru te Kesuǥuan te Megbevayà. Ne migkuwa sikandin te zekelà he vatu ne impelastar zin diyà te lempek te kayu he ulayan he uvey te segradu he lugar te Nengazen.
JOS 24:27 Ne migkeǥiyan ni Josue is langun he menge etew zutun te, “Heini is batu iyan tistiǥus te kebpekidlalag te Nengazen kenitew. Egkehimu heini he tistiǥus kuntra keniyu emun ed-iniyuǥan niw is Megbevayà.”
JOS 24:28 Ne impeulì ni Josue is menge etew ziyà te ed-ulian te kada sevaha kandan.
JOS 24:29 Ne hein neipus haazà minatey is suluǥuen te Nengazen he si Josue he anak ni Nun, te keǥurang he 110 he tuig.
JOS 24:30 Inleveng sikandin diyà te tanè din diyà te Timnat Sera, ziyà te vuvungan te Efraim, he zizaya te Buntud he Gaash.
JOS 24:31 Nenilbi te Nengazen is menge Israilihanen dutun te kaazen pa ni Josue. Ne minsan te minatey en si Josue mibpedayun dan gihapun he ebpenilbi te Nengazen dutun te uuyag pa is ebpemendumala te menge Israilihanen he nengetau te langun he mibeelan te Nengazen para te Israel.
JOS 24:32 Is menge tulan ni Jose he mid-uwit te menge Israilihanen puun te Ehipto inleveng diyà te Shekem, diyà te tanà he nepemasa ni Jacob te 100 he vuuk he pelata ziyà te anak ni Hamor he amey ni Shekem. Heini he tanà kevahin te tanà he nepengevilin te menge kevuwazan ni Jose.
JOS 24:33 Minatey zaan si Eleazar is anak ni Aaron ne inleveng diyà te Gibea, kes inged diyà te vuvungan te Efraim he imbeǥey ziyà te anak din he si Finehas.
JDG 1:1 Hein minatey en si Josue, mid-insà is menge Israilihanen diyà te Nengazen ke hentei zuen te menge tribu zan is edhuna ebpekidtebek te menge Canaanhen.
JDG 1:2 Midtavak is Nengazen te, “Iyan is tribu ni Juda, su ebpeveyveyaan ku kandan heeyan is tanà.”
JDG 1:3 Ne migkaǥi is tribu ni Juda ziyà te tribu ni Simeon he megeget dan te, “Uǥupi key keniyu te ked-aǥew te tanà te menge Canaanhen he imbahin kenami, ne ed-uǥupan dey zaan sikiyu te ked-aǥew te tanà he imbahin keniyu.” Umbe mid-uǥup is tribu ni Simeon te tribu ni Juda te kebpekidtebek.
JDG 1:4 Hein nenurung is tribu ni Juda, ne impezaag kandan te Nengazen is menge Canaanhen wey Pirisihanen. 10,000 he etew is nepatey zan diyà te Bezek. Hien mibpekidtebek dan diyà te Bezek, neingkuwintru zan si Adoni Bezek he hadì dutun he inged.
JDG 1:6 Mibpelaǥuy si Adoni Bezek, piru midal-as sikandin te menge Israilihanen ne nezekepan dan sikandin, ne midtamped dan is menge tindezekelà te menge velad din wey menge paa zin.
JDG 1:7 Migkaǥi si Adoni Bezek te, “70 he hadì is mibpenamped ku is tindezekelà te menge velad dan wey menge paa zan, ne nekepengimù sikandan te menge mumu ziyà te zizalem te lemisahan ku. Ne ǥuntaan mibeelan te Megbevayà kayi te kedì is mibeelan ku ziyà te kandan.” Mid-uwit dan sikandin diyà te Jerusalem ne ziyè en mebpatey.
JDG 1:8 Midsurung te menge kevuwazan ni Juda is Jerusalem ne naaǥew zan heini. Migerè dan is menge meǥinged dutun ne mibinsulan dan haazà is inged.
JDG 1:9 Ne kegkepasad dutun, midsurung dan is menge Canaanhen he meǥinged diyà te menge vuvungan, diyà te Negev, wey is diyà te lugtenaan te menge vuvungan diyà te edsenlepan.
JDG 1:10 Midsurung dan daan is menge Canaanhen he meǥinged diyà te Hebron (he iyan nehuna he ngazan din is Kiriat Arba), ne midhimetayan dan si Sheshai, si Ahiman, wey si Talmai.
JDG 1:11 Puun te Hebron, iyan en maan midsurung dan is menge meǥinged diyà te Debir (he iyan nehuna he ngazan din is Kiriat Sefer).
JDG 1:12 Migkaǥi si Caleb te, “Ibpeesawa ku is anak ku he si Acsa te maama he edsurung wey ebpekaaǥew te Kiriat Sefer.”
JDG 1:13 Si Otniel he anak ni Kenaz te hazi ni Caleb iyan nekaaǥew zutun te inged. Umbe impeesawa ni Caleb kandin is anak din he si Acsa.
JDG 1:14 Ne hein neked-esawa zan en, midhengyuan ni Acsa si Otniel he ebuyù dan diyà te amey zin te bevesukè dan. Ne zutun midhendiyà si Acsa te ki Caleb, ne hein nekerenè en sikandin puun te asnu zin, ne mid-insaan sikandin ni Caleb ke hengkey is tuyù din.
JDG 1:15 Midtavak si Acsa te, “Beǥayi e man kenikew te pebur. Egkesuatan ku pezem he ebeǥayan a kenikew te menge serebseb, su is tanà he imbeǥey nu kedì diyà te Negev ne wazà duen menge serebseb.” Umbe imbeǥey ni Caleb kandin is menge lugar he zuen menge serebseb diyà te vuvungan wey alug.
JDG 1:16 Miduma is menge Kinhanen he kevuwazan te enuǥang ni Moises diyà te menge kevuwazan ni Juda. Ebpuun te inged he Jerico ne midhendiyà sikandan te sibsivayan te Juda he ziyà te Negev, uvey te Arad, ne mid-ubpè dan dutun duma te menge meǥinged dutun.
JDG 1:17 Ne iyan en maan mid-uǥupan te tribu ni Juda is tribu ni Simeon te ked-aǥew te inged he Zefat he ed-ubpaan daan te menge Canaanhen. Mibpurungan dan dèdeeti heini he inged, umbe migngezanan heini te Horma.
JDG 1:18 Elin naaǥew zan is menge inged he Gaza, Ashkelon, wey Ekron, ragkes en is menge lugar ziyà te peliǥuy kayi he menge inged.
JDG 1:19 Midtevangan te Nengazen is tribu ni Juda. Umbe nesakup dan is menge vuvungan, piru wazè dan mesegseg is menge meǥinged diyà te menge suǥud su heini he menge etew duen dan menge kerwahi he putew.
JDG 1:20 Ne ǥeina te iyan insaad ni Moises, imbeǥey ki Caleb is Hebron. Midsegseg ni Caleb is tetelu he pemilya he menge meǥinged kayi he lugar he menge kevuwazan ni Anak.
JDG 1:21 Piru wazà mulà mesegseg te menge kevuwazan ni Benjamin is menge Jebusihanen he menge meǥinged diyà te Jerusalem. Umbe taman en guntaan kemulu ebpemen-ubpà diyà te Jerusalem is menge Jebusihanen duma te menge kevuwazan ni Benjamin.
JDG 1:22 Midsurung te menge tribu ni Jose is Betel, ne midtevangan sikandan te Nengazen. Hein duen midsuǥù dan he ibpepeniid diyà te Betel,
JDG 1:24 duen naahà te menge meniniid he sevaha he etew he egawas dutun te inged. Ne migkeǥiyan dan haazà te, “Penurua key ke ebmenmenuwen is kedseled keniyan te inged ne kenè dey sikew ebmenuwen.”
JDG 1:25 Ne mibpenurù din sikandan. Ne mibpenhimetayan dan is langun he meǥinged dutun te inged. Piru wazè dan iragkes sikan is mibpenurù kandan wey is tivuuk he pemilya zin.
JDG 1:26 Heini he etew midhendiyà te tanà te menge Hitihanen, ne mibangun sikandin te sevaha he inged he migngezanan din te Luz. Ne taman en guntaan iyan heini ngazan din.
JDG 1:27 Ne is tribu ni Manase, wazè dan mesegseg is menge meǥinged diyà te Bet Shean, Taanak, Dor, Ibleam, Megido, wey te menge inged he peliǥuy kayi, su meheǥet is gehinawa zutun he menge Canaanhen he kenè dan ed-ewaan haazà he tanà.
JDG 1:28 Ne hein mid-iseg is gehem te menge Israilihanen, mibpeǥes dan is menge Canaanhen he medterebahu para kandan te menge Israilihanen, piru wazè dan segseǥa sikandan.
JDG 1:29 Is tribu ni Efraim, wazè dan daan mesegseg is menge meǥinged diyà te Gezer. Umbe mibpedayun heini he menge Canaanhen he ed-ubpà duma kandan.
JDG 1:30 Is tribu ni Zebulun, wazè dan daan mesegseg is menge meǥinged diyà te Kitron wey Nahalol. Umbe mibpedayun heini he menge Canaanhen he ed-ubpà duma kandan. Piru mibpeǥes dan sikandan te kedterebahu para kandan.
JDG 1:31 Is tribu ni Asher, wazè dan daan mesegseg is menge meǥinged diyà te Aco, Sidon, Alab, Aczib, Helba, Afik, wey Rehob.
JDG 1:32 Umbe mibpedayun heini he menge Canaanhen he ed-ubpà duma kandan.
JDG 1:33 Is tribu ni Naftali, wazè dan daan mesegseg is menge meǥinged diyà te Bet Shemesh wey Bet Anat. Umbe mibpedayun heini he menge Canaanhen he ed-ubpà duma kandan. Piru mibpeǥes dan sikandan te kedterebahu para kandan.
JDG 1:34 Ne sikan is menge kevuwazan ni Dan, wazà sikandan tuǥuti te menge Amorihanen he mekehendiyè dan te menge suǥud, umbe ziyè dà sikandan te menge vuvungan.
JDG 1:35 Mezesen diyà te gehinawa te menge Amorihanen he kenè dan ed-ewaan is Buntud he Heres, Ayalon, wey Shaalbim. Piru hein mid-iseg en is gehem te menge tribu ni Jose, mibpeǥes dan sikandan te kedterebahu para kandan.
JDG 1:36 Is dulunà te tanà te menge Amorihanen mibpuun diyà te Beyeey te Akrabim ne taman en te egkehunaan te Sela.
JDG 2:1 Midhendiyà is belinsuǥuen te Nengazen te Bokim he ebpuun te Gilgal. Ne migkeǥiyan din is menge Israilihanen te, “Impeǥawas ku sikiyu puun te Ehipto, ne mid-uwit ku sikiyu kayi he tanà te impenaad ku ziyà te menge kepuun niw. Ne migkaǥi a zengan he kenè ku edèdeetan is kebpekid-uyun ku keniyu.
JDG 2:2 Migkaǥi a zaan he kenè kew pekid-uyun te menge etew kayi he tanà, kekenà, pemengkaǥa niw is menge pemuhatè dan. Iyan, hengkey is mibeelan niw? Wazà a keniyu pezumdumahi!
JDG 2:3 Umbe ǥuntaan, kenè ku sikandan edsegseǥen puun te tanè niw. Ne egkeiring sikandan te zuǥi ziyà te ibayè niw, ne sikan is ebpen-ezapen dan egkehimu he zekelà he penggezam keniyu.”
JDG 2:4 Ne hein nezineg haazà te menge Israilihanen, nemekesineǥew sikandan.
JDG 2:5 Umbe, migngezanan dan haazà is lugar te Bokim. Ne mibpemuhat dan is Nengazen dutun.
JDG 2:6 Duen te kebpeǥenata ni Josue te menge Israilihanen, ne migenat dan ne mid-angken is kada sevaha kandan dutun te tanà he para kandan.
JDG 2:7 Nenilbi sikandan te Nengazen hein uuyag pa si Josue. Wey minsan hein minatey en si Josue mibpedayun gihapun sikandan he ebpenilbi te Nengazen dutun te uuyag pa sikan is ebpemendumala he nemekaahà te langun he egkein-inuwan he mibeelan te Nengazen para te Israel.
JDG 2:8 Minatey is anak ni Nun he si Josue he suluǥuen te Nengazen te keǥurang he 110 he tuig.
JDG 2:9 Inleveng sikandin diyà te tanè din diyà te Timnat Heres, diyà te vuvungan te Efraim he egkezizaya te Buntud he Gaash.
JDG 2:10 Ne hein nemematey en is menge etew zutun he lapis te kevuwazan, nekeilis is sunud he lapis te kevuwazan he wazà mekekilala te Nengazen wey wazè dan hanew ke hengkey is mibeelan te Nengazen para te Israel.
JDG 2:11 Mibaal te mezaat diyà te etuvangan te Nengazen is menge Israilihanen wey mid-azap dan is ledawan te ed-ezapen he si Baal.
JDG 2:12 Mid-iniyuǥan dan is Nengazen, he Megbevayà te menge kepuun dan, he iyan mibpeǥawas kandan diyà te Ehipto. Midsunud dan wey mid-azap dan is nekedseselekawà he ebpen-ezapen te menge etew he nekeelingkus kandan. Mibeelan dan is igkepauk te Nengazen.
JDG 2:13 Su mid-iniyuǥan dan sikandin ne nenilbi zan ki Baal wey ki Ashtarot.
JDG 2:14 Ne tenged te pauk te Nengazen te menge Israilihanen, mibey-anan din sikandan he surunga te menge tulisan he egkuwa te menge azen dan.
JDG 2:15 Emun ebpekidtebek sikandan, ibpepildi sikandan te Nengazen, sumalà is migkaǥi zin. Umbe utew zan midlised.
JDG 2:16 Mibeǥayan te Nengazen is Israel te menge pengulu he edlibri kandan te menge tulisan he edsurung kandan.
JDG 2:17 Piru wazè dan pemineǥa is menge pengulu zan. Kekenà, mid-iniyuǥan dan is Nengazen ne mid-azap dan is duma he menge ed-ezapen. Kenè dan iring te menge kepuun dan su utew zà melemu ziyà te kandan is ked-iniyug te menge suǥù te Nengazen he midtuman mulà dengan te menge kepuun dan.
JDG 2:18 Is langun he menge pengulu he imbeǥey te Nengazen kandan ne midtevangan te Nengazen. Ne mintras uuyag pa is menge pengulu zan pedayun is kedlibriya kandan te Nengazen puun te menge kuntada zan. Su nehizuwan din sikandan dutun te kedag-es dan tenged te menge kemeresayan dan te kedèdaaǥa wey kebpesipelahi kandan.
JDG 2:19 Iyan, emun ebpatey en is pengulu zan, ne edlikuan dan en maan is daan he vaal zan wey edhuna pa is kandan he kebaal te salà te menge kepuun dan. Nenilbi zan wey mid-azap dan is duma he menge ed-ezapen ne wazè dan engkezi is mezaat he menge vaal wey is kebmesinupaken dan.
JDG 2:20 Umbe, utew sikandan nepeuki te Nengazen. Migkaǥi is Nengazen te, “Tenged te midrapas kayi te menge etew is midhimu ku ziyà te menge kepuun dan he kebpekid-uyun kandan, wey wazè e zan pezumdumahi,
JDG 2:21 kenè ku en edsegseǥen is menge etew he nesamà dutun te tanà he wazà mesakup ni Josue zutun te uuyag pa sikandin.
JDG 2:22 Egemiten ku heini he menge etew te kegezam te menge Israilihanen ke edtumanen dan be is menge suǥù ku, iring te mibeelan te menge kepuun dan.”
JDG 2:23 Umbe, wazà petuluy segseǥa te Nengazen haazà is nesamà he menge etew wey wazè din ituǥut he mezaag sikandan ni Josue.
JDG 3:1 Midsemaan te Nengazen te menge etew is Canaan su egezaman din is menge Israilihanen he wazà mekesaǥad te kebpekidtebek diyà te Canaan.
JDG 3:2 Mibeelan heini te Nengazen su wey mepenurù te kebpekidtebek is menge kevuwazan te menge Israilihanen, he wazà mekesaǥad kayi.
JDG 3:3 Iyan heini menge etew he midsamà te Nengazen: is menge meǥinged diyà te lelima he inged te menge Filistihanen, is langun he Canaanhen, menge Sidunhanen, wey menge Hivihanen he menge meǥinged diyà te menge vuvungan he Lebanon, he puun te Buntud he Baal Hermon taman te Lebo Hamat.
JDG 3:4 Midsamà heini sikandan su egezaman is menge Israilihanen ke edtumanen dan be is menge suǥù te Nengazen he imbeǥey zin diyà te menge kepuun dan pinaaǥi ki Moises.
JDG 3:5 Umbe, mid-ubpà is menge Israilihanen duma te menge Canaanhen, menge Hitihanen, menge Amorihanen, menge Pirisihanen, menge Hivihanen, wey menge Jebusihanen.
JDG 3:6 Midtuǥutan te menge Israilihanen is menge anak dan te kebpemengesawa wey kebpemeesawa kayi he menge etew, ne mid-azap dan is menge ed-ezapen kayi he menge etew.
JDG 3:7 Mezaat is mibeelan te menge Israilihanen diyà te etuvangan te Nengazen, su midlipatan dan is Nengazen he Megbevayè dan, ne mid-azap dan is menge ledawan ni Baal wey ni Ashera.
JDG 3:8 Tenged kayi nepeukan sikandan te Nengazen, umbe mibey-anan din sikandan he mezaag ni Hadì Cushan Rishataim he hadì te Aram Naharaim. Nesakup din sikandan seled te walu he tuig.
JDG 3:9 Piru hein mibuyù te tavang is menge Israilihanen diyà te Nengazen, mibegayan din sikandan te sevaha he etew he ebpekelibri kandan. Iyan sikandin si Otniel he anak ni Kenaz te hazi ni Caleb.
JDG 3:10 Mid-ulinan sikandin te Mulin-ulin te Nengazen, ne mibpenguluwan din is Israel. Nekidtebek sikandin ki Hadì Cushan Rishataim he hadì te Aram, ne mibpengelinteuwan te Nengazen he mekezaag sikandin.
JDG 3:11 Umbe, duen kelinew ziyà te Israel seled te 40 he tuig. Ne minatey en si Otniel.
JDG 3:12 Mid-uman en maan mebaal is menge Israilihanen te mezaat diyà te etuvangan te Nengazen. Ne tenged dutun midhimu te Nengazen he mesakup sikandan ni Hadì Eglon he hadì te Moab.
JDG 3:13 Pinaaǥi te tavang te menge Amunihanen wey menge Amalikanhen, midsurung ni Eglon is menge Israilihanen, ne mid-aǥew zin is inged he Jerico.
JDG 3:14 Midsakup ni Eglon is menge Israilihanen seled te 18 he tuig.
JDG 3:15 Piru, hein mibuyù en maan te tavang is menge Israilihanen diyà te Nengazen, ne mibeǥayan din sikandan te sevaha he etew he ebpekelibri kandan. Iyan sikandin kes givang he si Ehud he anak ni Gera he ebpuun diyà te tribu ni Benjamin. Impehendiyà sikandin te menge Israilihanen te Moab su wey zin ikeveǥey is buhis te Israel ziyà te ki Hadì Eglon.
JDG 3:16 Mibaal si Ehud te ubpit he zezuwa is gerangan din he tengà te mitrus is kelayat din ne human megenat. Ne imbagkes din haazà diyà te kewanan he vuvun din, ne netembunan haazà te visti zin.
JDG 3:17 Ne migenat sikandin wey zin ikeveǥey is buhis diyà te ki Hadì Eglon te utew melambù he etew.
JDG 3:18 Ne hein nezawat en ni Eglon haazà is buhis, impeulì ni Ehud is menge zuma zin he mid-uwit duen te vuhis.
JDG 3:19 Hein aney miduma sikandin kandan, iyan, hein nekeuma zan duen te midtiǥivan he menge vatu he uvey te Gilgal, midlikù si Ehud duen te hadì is migkaǥi te, “Mahal he Hadì, duen sikritu he egkeǥiyen ku ziyà te kenikew.” Umbe migkeǥiyan dutun te hadì is menge suluǥuen din te, “Ewai key zep-a keniyu.” Ne mid-awà dutun is langun he suluǥuen din.
JDG 3:20 Ne mid-uvey si Ehud duen te hadì he ebpimpinuu ziyà te meǥenew he ruǥu zin he ziyà te zivavew. Migkaǥi si Ehud te, “Duen egkeǥiyen ku kenikew he ibpekaǥi te Megbevayà.” Ne hein midhitindeg haazà is hadì,
JDG 3:21 midhulavut ni Ehud te ǥivang he velad din sikan is ubpit he ziyà te kewanan he vuvun din, ne midsundang din diyà te getek haazà is hadì.
JDG 3:22 Ne nelenep haazà is ubpit ragkes is suveng ne netembunan te tavà. Ne wazà heini vezuta ni Ehud.
JDG 3:23 Ne migawas si Ehud dutun te ruǥu ne migkendeduwan din is gemawan dutun.
JDG 3:24 Ne hein nekeǥenat en si Ehud, midlikù sikan is menge suluǥuen duen te hadì, ne neehè dan he siradu sikan is gemawan. Kunaan dan ke ziyè dà te indesà dutun te seled sikan is hadì.
JDG 3:25 Umbe, wazè dan en puwasi sikan is gemawan ne midtaǥad dà sikandan diyà te gawas. Ne hein kenè en ebpuwasan duen te hadì sikan is gemawan ne neipeng en sikandan. Umbe migkuwa zan te yawi ne mibpuwasan dan haazà, ne neehè dan sikan is hadì dan he nekesesavuk diyà te saag he minatey en.
JDG 3:26 Dutun te timpu te kedtaǥad duen te menge suluǥuen te kebpuwas duen te hadì, nekepekeziyù en si Ehud. Midsaǥad sikandin duen te midtiǥivan he menge vatu ne midlaus pehendiyà te Seira.
JDG 3:27 Kebpekeuma zin, mibpezaǥing sikandin te vudyung diyà te vuvungan te Efraim su ed-umawen din is menge Israilihanen su ebpekidtebek dan. Ne midtupang puun dutun te vuvungan is menge Israilihanen he ebpenguluwan ni Ehud.
JDG 3:28 Migkeǥiyan din sikandan te, “Sunud kew kediey su ebpengelinteuwan te Nengazen he mezaag niw is menge Moabitanhen he menge kuntada niw.” Umbe midsunud sikandan kandin ne mid-aǥew zan is lugar he repasan te menge Moabitanhen diyà te Wahig he Jordan. Ne wazà minsan sevaha he etew he impelayun dan dutun.
JDG 3:29 Dutun he andew nekepatey sikandan te menge 10,000 he menge Moabitanhen he pudu memezesen wey memevurut. Ne wazà minsan sevaha he nekepelaǥuy kandan.
JDG 3:30 Umbe, zutun he andew mid-aǥew te menge Israilihanen is Moab, ne puun dutun melinew is ked-ubpè dan seled te 80 he tuig.
JDG 3:31 Is nekesunud ki Ehud he pengulu iyan si Shamgar he anak ni Anat. Midlibri zin is Israel puun te menge Filistihanen. Menge 600 he menge Filistihanen is mibpenhimetayan din pinaaǥi te tuked he gelemiten te kedsegseg te vaka.
JDG 4:1 Hein minatey en si Ehud, mid-uman en maan mebaal is menge Israilihanen te mezaat diyà te etuvangan te Nengazen.
JDG 4:2 Umbe, impesakup en maan sikandan te Nengazen ki Hadì Jabin he Canaanhen, he midhadì diyà te inged he Hazor. Is pengulu te menge sundaru ni Jabin iyan si Sisera he meǥinged diyà te Haroshet Hagoyim.
JDG 4:3 Si Jabin duen din 900 he kerwahi he menge putew. Ne utew zin midlisedlised is menge Israilihanen seled te 20 he tuig. Umbe mibuyù en maan te tavang is menge Israilihanen diyà te Nengazen.
JDG 4:4 Dutun he timpu iyan pengulu te Israel si Debora. Ebpeneuven sikandin te Megbevayà ne esawa sikandin ni Lapidot.
JDG 4:5 Emun ebpehusey is menge Israilihanen te samuk dan diyà te ki Debora, edhendiyè dan te sihung te Palma ni Debora, ziyà te pid-elangan te Rama wey Betel he ziyà te vuvungan te Efraim.
JDG 4:6 Ne sevaha he andew, impetawag ni Debora si Barak he anak ni Abinoam te tig-Kedesh he sakup te tribu ni Naftali. Kebpekeuma ni Barak, migkaǥi si Debora te, “Is Nengazen he Megbevayà te Israel, edsuǥuen ke zin. Ke sikandin te, ‘Kuwa ke en te 10,000 he menge maama puun diyà te menge tribu ni Naftali wey ni Zebulun ne zumaha nu sikandan diyà te Buntud he Tabor.
JDG 4:7 Ne ed-iniyaten ku si Sisera, sikan is pengulu te menge sundaru ni Jabin te kedhendiyà te zal-ug he Kishon duma te menge sundaru zin wey menge kerwahi zin. Ne edhimuwen ku he mezaag niw sikandan.’ ”
JDG 4:8 Ne migkaǥi si Barak diyà te ki Debora te, “Egenat a emun eduma ka; piru emun kenè ka eduma ne kenà a egenat.”
JDG 4:9 Midtavak si Debora te, “Uya, eduma a kenikew; iyan, kenà kenikew is dengeg su vahi is ebpengelinteuwan te Nengazen he ebpekezaag ki Sisera.” Ne miduma si Debora ki Barak ne midhendiyè dan te Kedesh.
JDG 4:10 Ne zutun impehendiyà ni Barak te Kedesh is menge tribu ni Naftali wey ni Zebulun, ne 10,000 kandan is miduma kandin. Elin daan miduma si Debora.
JDG 4:11 Dutun he timpu, si Heber he Kinhanen, midsuwayan din is duma he menge Kinhanen he menge kevuwazan ni Hobab te uyang ni Moises. Ne mibpekeziyù sikandin wey midtukud te tulda zin uvey te puun te zekelà he kayu he ziyà te Zaananim, uvey te Kedesh.
JDG 4:12 Ne zuen neketudtul ki Sisera he midhendiyà si Barak te Buntud he Tabor.
JDG 4:13 Umbe, midtiǥum ni Sisera sikan is 900 he menge kerwahi zin he menge putew, wey is langun he menge sundaru zin. Ne migenat dan puun te Haroshet Hagoyim pehendiyà te zal-ug te Kishon.
JDG 4:14 Ne migkeǥiyan ni Debora si Barak te, “Genat ke en, su iyan heini andew he ebpengelinteuwan te Nengazen he mezaag nu si Sisera. Ebpetelihuna kenikew is Nengazen.” Umbe midtupang si Barak dutun te Buntud he Tabor zuma sikan is 10,000 he menge sundaru zin.
JDG 4:15 Hein edsurung en si Barak, midliveg te Nengazen si Sisera wey is langun he perekerwahi wey is langun he menge sundaru zin. Ne mid-umpak si Sisera puun te kerwahi zin ne mibpelaǥuy.
JDG 4:16 Midal-as ni Barak is menge sundaru ni Sisera wey sikan is menge perekerwahi zin taman te Haroshet Hagoyim ne migerè dan. Ne wazà minsan sevaha he nesamà.
JDG 4:17 Ne si Sisera mulà mibpelaǥuy pehendiyà te tulda ni Jael te esawa ni Heber, su geina te emiǥu ni Hadì Jabin he hadì te Hazor is pemilya ni Heber he Kinhanen.
JDG 4:18 Midsinuǥung ni Jael si Sisera ne migkeǥiyan din te, “Laus ka, datù, seled ka kayi te tulda ku, ne kenè ka mahandek.” Umbe midseled si Sisera ne midtembunan ni Jael te mekepal he malung su wey mekeeles.
JDG 4:19 Ne migkaǥi si Sisera ziyà te ki Jael te, “Betbetai a kenikew veǥayi te wahig. Su utew ed egkemezahi.” Umbe mid-ebriyan ni Jael is lundis he teleǥuey te ǥatas ne impeinum din si Sisera, ne hein nekepasad mid-umanan din tembuni.
JDG 4:20 Migkeǥiyan ni Sisera si Jael te, “Hithitindeg ke zà keniyan te ǥemawan te tulda ne emun duen ebpekeuma he ed-insà ke zuen duma he etew ne kaǥi ka te wazà.”
JDG 4:21 Ne tenged te utew kegkeveley ni Sisera ne nehurep sikandin. Migkuwa si Jael te mertilyu wey palpal te tulda ne midnaney sikandin med-uvey ziyà te ki Sisera. Ne mibpelpalan din is titingkazan ni Sisera taman te midlambas diyà te tanà, ne minatey si Sisera.
JDG 4:22 Ne hein nekeuma si Barak is ebpen-ahà ki Sisera, midsinuǥung sikandin ni Jael ne migkeǥiyan din te, “Laus ka, su ibpeehè ku kenikew is etew he ebpen-ahaan nu.” Umbe miduma si Barak ki Jael ziyà te seled duen te tulda. Ne zutun neehè din si Sisera is nekehidhizeǥà he minatey en he midlembasan te palpal is titingkazan din.
JDG 4:23 Dutun he andew, mibpengelinteuwan te Megbevayà he mezaag te menge Israilihanen si Hadì Jabin he Canaanhen.
JDG 4:24 Mibpedayun med-iseg is kelig-en te menge Israilihanen taman te nezaag dan si Jabin.
JDG 5:1 Dutun te andew te kebpekezaag dan, migkanta si Debora wey si Barak he anak ni Abinoam. Iyan heini kanta zan:
JDG 5:2 Mibpengulu te kebpekidtebek is menge pengulu te Israel ne mibpurung mebpezumazuma kandan is menge etew. Edeliǥen is Nengazen!
JDG 5:3 Pemineg kew is menge hadì wey menge pengulu! Egkanta a te kedalig te Nengazen he Megbevayà te Israel!
JDG 5:4 He Nengazen, hein migenat ka he ebpuun diyà te Buntud he Seir, wey migawas ka te tanà he Edom, midlinug wey mid-uzan te utew mereǥes.
JDG 5:5 Nehuyung is menge vuntud diyà te etuvangan nu, Nengazen. Iyan ka kes Megbevayà te Israel, ne impezayag nu is keugelingen nu ziyà te Buntud he Sinai.
JDG 5:6 Hein timpu ni Shamgar he anak ni Anat, wey te timpu ni Jael, tenged te kegkahandek wazà mid-ikul zuen te zekelà he zalan. Is ebpemenhipanew ne ziyà ebpemen-ikul te dezeisey he menge zalan.
JDG 5:7 Wazè en egkesuat he ed-ubpà diyà te Israel, taman te kebpekeuma nu, Debora, te migkilala he iney te menge Israilihanen.
JDG 5:8 Hein mid-azap sikandan te veǥu he menge ed-ezapen, nehitavù is tebek diyà te tivuuk he Israel. Piru te 40,000 he menge Israilihanen ne wazà minsan sevaha kandan he zuen din kelasag etawa vangkew.
JDG 5:9 Utew ingkelipey te gehinawa ku is menge pengulu te Israel wey is menge Israilihanen he mibpurung mebpezumazuma kandan. Ereg he edeliǥen is Nengazen!
JDG 5:10 Sikiyu is menge sepian he ebpemen-untud te meputì he menge asnu he ziyà ebpeminuu te mekempet he pinuuwà kayi, wey sikiyu zaan is menge pubri he ebpemenhipanew zà, pemineg kew!
JDG 5:11 Pemineǥa niw is edseysayen te menge etew he ebpemenliǥuy ziyà te menge teheb. Edseysayen dan is kezeeǥan te Megbevayà pinaaǥi te menge sundaru zin diyà te Israel. Ne midhendiyà is menge etew te Nengazen te pultahan te inged he ke sikandan te,
JDG 5:12 “Egenat ki, Debora, egenat ki ne egkanta ki te kedalig te Megbevayà. Ne Barak he anak ni Abinoam, duma ka zaan wey bihaǥa nu is menge bilihaǥen nu.”
JDG 5:13 Is nesamà he menge uuyag he menge etew te Nengazen midtupang dan duma kedì te kedsurung te dungganen wey gemhanan he menge etew.
JDG 5:14 Is duma kandan ebpuun diyà te Efraim he lugar he ǥaked dengan te menge Amalikanhen. Ne midtinundug kandan is tribu ni Benjamin. Midtupang is menge peremandar he ebpuun te pemilya ni Makir, wey is menge upisyal he ebpuun te tribu ni Zebulun.
JDG 5:15 Miduma zaan ki Debora wey ki Barak pehendiyà te menge suǥud is menge pengulu te tribu ni Isacar. Piru is tribu mulà ni Reuben, wazè dan mekehukum ke eduma zan etawa kenà.
JDG 5:16 Ne tribu ni Reuben, maan is mibpetaǥak kew zuma te menge kerehidu? Iyan be igkeiniyat niw is pengumawan te ebantey te menge kerehidu zan? Is tribu ni Reuben kenà ebpekidsevaha umbe kenè dan ebpekehukum ke hengkey is engayan he ebeelan dan.
JDG 5:17 Wazà daan medwaleng is tribu ni Gad diyà te zapit te edsilaan te Jordan, ne is tribu ni Dan ne wazè dan daan engkezi is terebahu zan diyà te menge varku. Ne wazà daan medwaleng is tribu ni Asher ziyà te ed-ubpaan dan he veyvey te zaǥat.
JDG 5:18 Piru impedserakan mulà te tribu ni Zebulun wey te tribu ni Naftali is untung dan su mibpekidtebek dan.
JDG 5:19 Nekeuma is menge hadì he menge Canaanhen ne nekidtebek dan te menge Israilihanen diyà te Taanak he uvey te veyvey te Wahig he Megido, piru wazà sikandan meketavan te minsan sevaha zà he pelata.
JDG 5:20 Kenà iyan dà nekidtebek engki Sisera is menge Israilihanen su elin is menge vituen.
JDG 5:21 Naanud sikandan diyà te zal-ug te Kishon, kes kezaan he zal-ug. Ebpedayun a he ebpekidtebek duma is kelig-en.
JDG 5:22 Ne egkezineg is debakdebak te menge kudà.
JDG 5:23 Ne migkaǥi is belinsuǥuen te Nengazen te, “Edrewakan is Meroz! Ebpurungan edrewaki is menge meǥinged kayi su wazè dan medtavang hein ebpekidtebek is Nengazen te mekeǥeǥehem he menge etew.”
JDG 5:24 Utew zeyzey si Jael is esawa ni Heber te Kinhanen te langun he menge vahi he ebpemen-ubpà diyà te menge tulda.
JDG 5:25 Hein ebuyù te wahig si Sisera, gatas is imbeǥey zin he ziyà itaǥù te mahalen he teleǥuey.
JDG 5:26 Ne migkuwa sikandin te mertilyu wey palpal te tulda ne mibpelpalan din is titingkazan ni Sisera.
JDG 5:27 Ne minatey si Sisera he nekesesavuk diyà te uvey te paa ni Jael.
JDG 5:28 Mibpememantew is iney ni Sisera duen te rinihasan he sulawà ne kenà sikandin ebpeketareg. Ne layun ebpekeinsà ke maan is egkeuǥet ebpekeuma is anak din.
JDG 5:29 Ne midtavak kandin is menge sakup din he uluwanen he menge vahi, ne is tavak dan iyan ed-ul-ulitan din ed-isipa he iyan heini:
JDG 5:30 “Iyan buwa ingkeuǥet dan is kebpenguwa wey kebahin te menge azen he naaǥew zan: kela ke sevaha etawa zezuwa he vahi is para te sevaha he sundaru, ne zuen mahalen he menge visti he para ki Sisera, wey zuen mekempet he menge visti he mibpurungan burdahi he para kediey.”
JDG 5:31 “Nengazen, berakat he mezeeti is langun he menge kuntada nu. Ne verakat mulà he meiring te andew he ebpurung edsiǥa is ebmahal kenikew.” Dutun he timpu melinawen is ked-ubpà diyà te Israel seled te 40 he tuig.
JDG 6:1 Ne mibaal en maan is menge Israilihanen te mezaat diyà te etuvangan te Nengazen, umbe impesakup sikandan te Nengazen te menge Midianhen seled te pitu he tuig.
JDG 6:2 Utew mesipala is menge Midianhen, umbe nepeǥes is menge Israilihanen te ked-eles diyà te menge vuvungan, menge surung, wey zuma pa he egkehimu he ed-elesan.
JDG 6:3 Emun ebpemula is menge Israilihanen, segugunà sikandan edsurunga te menge Midianhen, Amalikanhen, wey zuma pa he menge etew ziyà te edsilaan.
JDG 6:4 Heini sikandan egkampu ziyà te lugar te menge Israilihanen, ne ebpendezeetan dan is menge pinemula te menge Israilihanen taman te Gaza. Ebpenguwaan dan is langun he menge kerehidu, baka, wey asnu, ne wazà edsemaan dan he para te menge Israilihanen.
JDG 6:5 Ebpekeuma zan he ed-uwit te menge tulda zan wey menge uyaǥen dan. Kenà egkevilang is kahabet dan ragkes is menge kemilyu zan. Ne nekeveǥey sikandan te kezeetan diyà te tanà te menge Israilihanen.
JDG 6:6 Nehimu he utew mekehizuhizu is kebpekesavuk te menge Israilihanen tenged te menge Midianhen, umbe mibuyù sikandan te tavang diyà te Nengazen.
JDG 6:7 Dutun te kedtewaǥa zan te Nengazen,
JDG 6:8 midsuǥù te Nengazen diyà te kandan is sevaha he ebpeneuven he migkaǥi ziyà te kandan te, “Iyan heini egkeǥiyen te Nengazen he Megbevayà te Israel: ‘Impegawas ku sikiyu ziyà te Ehipto he zutun kew uripena.
JDG 6:9 Midlibri ku sikiyu te pesipala te menge Ehiptohanen wey te langun he edlisedlised keniyu. Impezaag ku keniyu is menge kuntada niw, ne imbeǥey ku keniyu is menge tanè dan.
JDG 6:10 Migkeǥiyan ku sikiyu he iyan a Nengazen he Megbevayè niw ne kinahanglan he kenè niw ezapa is menge ed-ezapen te menge Amorihanen he iyan kew ǥuntaan nekeilis he ed-ubpà diyà te ed-ubpaan dan. Piru wazà a keniyu pemineǥa.’ ”
JDG 6:11 Dutun he timpu nekeuma is belinsuǥuen te Nengazen diyà te Ofra. Mibpinuu sikandin diyà te sihung te kayu he ulayan he ǥaked ni Joash te kevuwazan ni Abiezer. Dutun he timpu si Gideon he anak ni Joash egunas te trigu ziyà te seled te keresà te paras su para kenà maahà te menge Midianhen kes trigu.
JDG 6:12 Ne mibpaahà ki Gideon is belinsuǥuen te Nengazen ne migkaǥi te, “Sikew is mevurut wey mezesen he etew, duma nu is Nengazen.”
JDG 6:13 Midtavak si Gideon te, “Datù, emun duma zey is Nengazen ne maan is iring kayi is kebpekesavuk dey? Maan is wazà sikandin mebaal te egkengein-inuwan, iring te mibeelan din dengan hein impeǥawas din puun te Ehipto is menge kepuun dey, sumalà is netudtul zan kenami? Iyan, guntaan mibey-anan key en te Nengazen ne imbeǥey key zin diyà te menge Midianhen.”
JDG 6:14 Ne migkaǥi is Nengazen diyà te kandin te, “Genat ka ne ǥemita nu is tivuuk he zesen nu te kedlibri te menge Israilihanen puun te ǥehem te menge Midianhen. Iyan a midsuǥù kenikew.”
JDG 6:15 Midtavak si Gideon te, “Nengazen, ebmenmenuwen ku te edlibri is menge Israilihanen te iyan kinemeluyahan he pemilya ziyà te tribu ni Manase is kenami he pemilya, ne iyan a kineminusan diyà te pemilya zey.”
JDG 6:16 Migkaǥi is Nengazen te, “Edtevangan ku sikew, ne egkehimu nu te edezaat is menge Midianhen he henduen te ebpekidtebek ke zà te sevaha he etew.”
JDG 6:17 Midtavak si Gideon te, “Emun nekepenunuat a kenikew, ne ipaahà a kenikew te tuus he tutuu he iyan ka midsuǥù kedì.
JDG 6:18 Ne kenè ka zèpa genat su ebpemuhaten ku sikew.” Ne midtavak is Nengazen te, “Edteǥazan ku sikew.”
JDG 6:19 Mid-ulì si Gideon ne midhilutù sikandin te nati he kambing, wey mibaal te supas he wazè din tapey he tengà te saku he harina. Ne hein ingketaǥù din en te baskit sikan is usa wey ingketaǥù din en diyà te kuzen is savew kayi, ne mid-uwit din haazà is keenen diyà te velinsuǥuen te Nengazen he ziyà te sihung te kayu he ulayan.
JDG 6:20 Ne migkaǥi haazà is belinsuǥuen te Megbevayà te, “Iuntud nu is usa wey supas kayi te vatu, ne vusbusi nu te savew.” Ne mibeelan haazà ni Gideon.
JDG 6:21 Ne insenggir zuen te velinsuǥuen te Nengazen is tuked he egewezan din duen te keenen. Ne segugunà midlepew is regreg puun duen te vatu, ne migkaan dutun te hapuy sikan is usa wey supas. Ne nahanew sikan is belinsuǥuen.
JDG 6:22 Ne hein nesavut ni Gideon he velinsuǥuen bes iyan te Nengazen is neehè din, nekekaǥi sikandin te, “He Nengazen he MEGBEVAYÀ, neehè ku is belinsuǥuen nu ne neked-etuvang key.”
JDG 6:23 Piru migkeǥiyan sikandin te Nengazen te, “Mebmelinawen ka. Kenè ka mahandek su kenè ka ebpatey.”
JDG 6:24 Ne mibaal zutun si Gideon te pemuhatà para te Nengazen ne migngezanan din haazà te, “Ebeǥey te Kelinew is Nengazen.” Ne taman en guntaan kemulu heini he pemuhatà diyà te Ofra, diyà te tanà te menge kevuwazan ni Abiezer.
JDG 6:25 Dutun daan he kezukileman migkaǥi is Nengazen diyà te ki Gideon te, “Kuwaa nu is ikezuwa he kineupiyahan he vaka te amey nu, sikan is pitu en he tuig. Ne bengkaǥa nu is pemuhatà he para ki Baal he mibangun te amey nu wey elin penempeza nu is tukud he simbulu te vahi he ed-ezapen he si Ashera he avey zuen te pemuhatà.
JDG 6:26 Ne emun egkepasad nu en ne bangun ka te hustu he pemuhatà he para kediey, te Nengazen he Megbevayè nu, kayi te mibuntud-buntud. Ne ipemuhat nu kayi te kedì sikan is tudu he vaka he pemuhat he edtutungen. Ne iyan nu itavun sikan is tukud he para ki Ashera he ebpenempezen nu.”
JDG 6:27 Umbe, miduma ni Gideon is sepulù he suluǥuen din ne mibeelan dan is insuǥù te Nengazen kandin. Piru mezukilem is kebeeli zin dutun su egkahandek sikandin te pemilya zin wey te menge emurè din te inged.
JDG 6:28 Ne kegkemeselem dutun, ne iyan en nehuna maahà te nepukew he menge etew is nevengkag en he pemuhatà para ki Baal, wey is nengetamped en he tukud he para ki Ashera ne iyan en intavun para zuen te vaka he impemuhat diyà te veǥu he pemuhatà.
JDG 6:29 Mibpein-inseey sikandan ke hentei is mibaal zutun. Mibpurungan dan heini susiya ne netuenan dan he si Gideon he anak ni Joash is mibaal zutun.
JDG 6:30 Umbe, migkeǥiyan dan si Joash te, “Ipeǥawas nu kayi is anak nu! Su edhimetayan dey, su mibengkag din is pemuhatà he para ki Baal wey mibpenamped din is tukud he para ki Ashera ziyà te avey kayi.”
JDG 6:31 Ne midtavak ni Joash haazà is egkengepauk he menge etew he mid-etuvang kandin, “Ebpekidtebek kew ve para ki Baal? Edlevanan niw ve sikandin? Is edlavan ki Baal iyan ereg he edhimetayan guntaan te meselem. Emun tutuu he megbevayà si Baal, ipedipinsahi kandin is keugelingen din, su pamuhatè man para kandin is mibengkag.”
JDG 6:32 Puun dutun migngezanan si Gideon te “Jerubaal” he iyan kehuluǥan din is, “Iyan si Baal ipedipinsa te keugelingen din,” su pamuhatè man para kandin is mibengkag.
JDG 6:33 Dutun he timpu midsevaha is menge Midianhen, menge Amalikanhen, wey zuma he menge etew ziyà te edsilaan. Midlayun sikandan te Wahig he Jordan ne migkampu zan diyà te suǥud he Jezreel.
JDG 6:34 Mid-ulinan si Gideon te Mulin-ulin te Nengazen, ne mibpezaǥing sikandin te vudyung su ed-umawen din is menge kevuwazan ni Abiezer para mekesunud sikandan kandin.
JDG 6:35 Mibpesuǥuan din is tivuuk he tribu ni Manase, ragkes is menge tribu ni Asher, Zebulun, wey Naftali, su wey zan mekezuma te kebpekidtebek. Ne miduma sikandan ki Gideon.
JDG 6:36 Migkaǥi si Gideon diyà te Megbevayà te, “Migkaǥi ka he egemiten a kenikew te kedlibri te menge Israilihanen.
JDG 6:37 Guntaan edsavuk a te vulvul te kerehidu ziyà te tanà he gunasè dey te trigu. Emun egkahames heini te zehemug, piru memaza is tanà diyà te peliǥuy kayi, ebpesavut he iyan a iyan egemiten nu he edlibri te menge Israilihanen sumalà te nekaǥi nu.”
JDG 6:38 Ne iyan haazà nehitavù. Su zutun te sunud he andew, midsayu med-enew si Gideon ne migkuwa zin sikan is bulvul te kerehidu ne migkeres din haazà, ne senge yehung is wahig he midtiǥis.
JDG 6:39 Ne migkaǥi si Gideon diyà te Megbevayà te, “Kenà a kenikew mepeuki su zuen pa sevaha he edhengyuen ku kenikew. Egkesuatan ku he memezahi heini is bulvul te kerehidu ne mebmahames is tanà diyà te peliǥuy zin.”
JDG 6:40 Kebmezukilem dutun ne mibeelan haazà te Megbevayà. Mibmemaza haazà is bulvul te kerehidu ne mibmahames mulà te zehemug is tanà diyà te peliǥuy zin.
JDG 7:1 Meselem pa, ne migenat si Jerubaal (he iyan si Gideon) duma te menge etew zin. Migkampu sikandan diyà te uvey te serebseb diyà te Harod. Is menge Midianhen diyà megkampu te divavè dan he ziyà te menge suǥud he uvey te Buntud he More.
JDG 7:2 Ne migkeǥiyan te Nengazen si Gideon te, “Utew mezakel is duma nu. Emun ebpekezaag dan en ne kela ke meisip dan he iyan ingkezeeǥa zan te menge Midianhen is pinaaǥi te kandan he nehimu ne kenà pinaaǥi te kedì he nehimu.
JDG 7:3 Umbe, keǥiyi nu sikandan he ke hentei kandan is egkahandek ne med-awè en kayi te Buntud he Gilead ne med-ulì en.” Ne hein migkaǥi haazà ni Gideon, ne mid-ulì is 22,000 ne 10,000 zà is nesamà.
JDG 7:4 Piru migkaǥi is Nengazen diyà te ki Gideon te, “Mahabet pa ǥihapun is nesamà. Dumaha nu sikandan diyà te wahig su idsivey ku is ibpezuma ku kenikew. Is minsan hentei he egkeǥiyen ku he ibpezuma, ne zumaha nu. Is minsan hentei he egkeǥiyen ku he kenà ibpezuma, ne kenè nu zumaha.”
JDG 7:5 Umbe, miduma sikandan ni Gideon diyà te wahig. Ne zutun migkaǥi is Nengazen te, “Isivey nu is langun he mid-akup te wahig he mid-iring te asu su midèdè dan haazà, wey isivey nu zaan sikan is midluhud su wey mekeinum.”
JDG 7:6 Ne 300 kandan is diyà med-inum te menge palad dan, is duma mid-inum he midluhud.
JDG 7:7 Ne migkeǥiyan te Nengazen si Gideon te, “Pinaaǥi kayi te 300 he etew edlibriyen ku sikew ne ibpezaag ku kenikew is menge Midianhen. Is nesamà he menge etew ipeulì nu en diyà te menge ed-ubpaan dan.”
JDG 7:8 Umbe, impeulì sikandan ni Gideon hein ingketaǥak dan en is menge lutù dan wey menge vudyung dan. Ne wazè din mulà ipeulì sikan is 300 he menge etew. Is kampu te menge Midianhen ne ziyà te menge suǥud, ne egkaalug dà eni Gideon.
JDG 7:9 Dutun he kezukileman migkaǥi is Nengazen diyà te ki Gideon te, “Pengandam kew en! Surunga niw en is menge Midianhen ne ibpezaag ku keniyu sikandan.
JDG 7:10 Iyan, emun egkahandek ka he edsurung guntaan, ne zumaha nu is suluǥuen nu he si Pura, ne hendiyè kew te kampu te menge Midianhen.
JDG 7:11 Pemineǥa niw ke hengkey is egkeǥiyen dan ne siguradu ebmevurut ka he edsurung pinaaǥi te egkezineg nu.” Umbe migenat sikandan is dezuwa pehendiyà te dulunà te kampu te menge Midianhen, he zuen duen ebantey he menge sundaru.
JDG 7:12 Is menge Midianhen, menge Amalikanhen, wey zuma pa he menge etew he ebpuun diyà te edsilaan, migkampu ziyà te menge suǥud he henduen be te kahabet te terapan is kahabet dan. Is menge kemilyu zan henduen be te kahabet te pantad diyà te veyvey te zaǥat he kenà egkevilang.
JDG 7:13 Ne hein dutun en ensi Gideon, duen nezineg dan he zezuwa he etew he ebpelelaǥà. Migkaǥi is sevaha te, “Neketeǥeinep a he zuen sevaha he supas he barli he metivurun he midlilid diyà te kampu tew ne neigù din is sevaha he tulda te menge Midianhen. Ne nepiley heini wey newaǥey.”
JDG 7:14 Midtavak is sevaha te, “Wazè en duma he ibpesavut keniyan, kekenà, iyan is ispada ni Gideon te Israilihanen he anak ni Joash. Ibpezaag kandin te Megbevayà is menge Midianhen, wey sikitew en is langun.”
JDG 7:15 Ne hein nezineg ni Gideon haazà is teǥeinep wey is kehuluǥan din, ne midalig din is Nengazen. Ne midlikù sikandin diyà te kampu te menge Israilihanen ne migkeǥiyan din is menge zuma zin te, “Gaanggaan kew en, su ibpezaag kenitew te Nengazen is menge Midianhen.”
JDG 7:16 Mibahin din te tetelu he grupu sikan is 300 he menge etew zin, ne mibeǥayan din is kada sevaha kandan te vudyung wey tivud he zuen sulù diyà te seled din.
JDG 7:17 Ne migkeǥiyan din sikandan te, “Emun diyè key en te dulunà te kampu te kuntada tew, bentayi a keniyu ne iringi niw is ebeelan ku.
JDG 7:18 Emun ibpezaǥing ku wey te menge zuma ku is menge vudyung dey, sikiyu is duma he ziyà daan te peliǥuy te kampu ne iyan haazà beeli niw, ne habet kew pengulahì is egkaǥi te, ‘Para te Nengazen wey ki Gideon!’ ”
JDG 7:19 Liwazè en te kezukileman hein nekeuma si Gideon wey sikan is 100 he menge zuma zin diyà te dulunà te kampu te kuntada zan. Wazè pa meuǥet is kegkeilisi te ebantey zutun. Impezaǥing eni Gideon is menge vudyung dan wey mibpenrupet dan is menge tivud dan.
JDG 7:20 Ne iyan daan haazà mibeelan duen te tetelu he grupu. Ne zutun te egewezan dan te ǥivang dan sikan is sulù ne egewazan dan daan te kewanan dan sikan is budyung ingkulahì dan is lalag he edhenduen te, “Ebpekidtebek kiw para te Nengazen wey para ki Gideon.”
JDG 7:21 Is kada sevaha kandan mibpelastar ziyà te peliǥuy zuen te kampu, piru sikan is menge kuntada zan, ne erang dan dà te ebpemelaǥuy.
JDG 7:22 Ne zutun te kebpezeǥinga zuen te 300 he menge Israilihanen te menge vudyung dan, mibpengelinteuwan te Nengazen he med-uney medtebek is menge etew zutun te kampu te menge Midianhen. Is duma kandan mibpelaǥuy pehendiyà te Bet Shita he uvey te Zerera pelaus diyà te dulunà te Abel Menola he uvey te Tabat.
JDG 7:23 Ne impetawag ni Gideon is menge Israilihanen he sakup te tribu ni Naftali wey ni Asher, wey sakup te tivuuk he tribu ni Manase, ne impezal-as kandan is menge Midianhen.
JDG 7:24 Midsuǥù daan si Gideon te menge menunudtulà diyà te menge meǥinged diyà te vuvungan te Efraim wey zan mekeǥiyi he ventayi zan is Wahig he Jordan taman te wahig he Bet Bara su para kenà mekelayun is menge Midianhen. Ne midtuman heini te langun he maama he kevuwazan ni Efraim ne mibentayan dan haazà he menge lugar.
JDG 7:25 Nevihag dan is dezuwa he pengulu te menge Midianhen he si Oreb wey si Zeeb. Ne midhimetayan dan si Oreb diyà te vatu he migngezanan te huziyan he Batu ni Oreb, ne si Zeeb midhimetayan dan diyà te keresà te paras he migngezanan te huziyan he Keresà te Paras ni Zeeb. Ne midsiguduwan dan del-asa is menge Midianhen. Ne hein nepasad, mid-uwit dan is ulu ni Oreb wey ulu ni Zeeb diyà te ki Gideon diyà te Wahig he Jordan.
JDG 8:1 Ne migkaǥi is menge Efraimnen diyà te ki Gideon te, “Hengkey heini is mibeelan nu? Maan is wazè key kenikew tewaǥa hein nekidtebek kew te menge Midianhen?” Ne midsawey zan si Gideon.
JDG 8:2 Ne migkeǥiyan sikandan ni Gideon te, “Deisey zà is kedì he nehimu emun id-iring te keniyu he nehimu. Minsan is deisey he nehimu niw lavew pa te langun he nehimu te pemilya zey.
JDG 8:3 Impezaag keniyu te Megbevayà is menge pengulu te menge Midianhen he si Oreb wey si Zeeb. Ne wazà nehimu ku he ebpekelavew keniyan.” Ne hein nekaǥi haazà ni Gideon, ne naawà is kegkepauk dan.
JDG 8:4 Midlayun si Gideon wey sikan is 300 he menge etew zin te Wahig he Jordan. Utew en sikandan neveley piru edsiguduwan dan gihapun edel-asa is menge kuntada zan.
JDG 8:5 Ne hein nekeuma zan diyà te Sucot, midhangyù si Gideon diyà te menge meǥinged dutun. Ke sikandin te, “Edhangyù key te keenen. Su utew key en neveley wey utew key en egkevitil, iyan, kinahanglan pa he edel-asen dey is dezuwa he hadì te menge Midianhen he si Zeba wey si Zalmuna.”
JDG 8:6 Iyan, midtavak is menge upisyal ziyà te Sucot te, “Dekepa niw zep-a si Zeba wey si Zalmuna ne human dey sikiyu ebeǥayi te keenen.”
JDG 8:7 Ne migkaǥi si Gideon te, “Ew iyan bes heeyan, emun ibeǥey en te Nengazen kedì si Zeba wey si Zalmuna. Edletiguwen ku sikiyu te zuǥiyen he dezeisey he kayu.”
JDG 8:8 Puun te Sucot midtekezeg ensi Gideon pehendiyà te Penuel ne midhangyù en maan si Gideon te keenen piru is tavak te menge tig-Penuel iring ded te tavak te tig-Sucot.
JDG 8:9 Ne migkeǥiyan ni Gideon is menge tig-Penuel te, “Emun egkezaag dey en is kuntada zey, edlikù key kayi ne edrundusen dey is turi niw.”
JDG 8:10 Dutun he timpu, si Zeba wey si Zalmuna diyà sikandan te Karkor zuma te menge sundaru zan. 15,000 zà is nesamà he menge sundaru he ebpuun te edsilaan. Menge 120,000 is nepatey kandan.
JDG 8:11 Midtekezeg ensi Gideon he edal-as kandan. Diyà sikandan mebayà te lugar te menge ebpemen-ubpà diyà te tulda he zapit te edsilaan he sakup te Noba wey Jogbeha. Ne midtik-awan dan etekiya is menge Midianhen.
JDG 8:12 Mibpelaǥuy si Zeba wey si Zalmuna, piru midal-as sikandan ni Gideon ne midakep din sikandan, ne nengeteranta is menge sundaru zan.
JDG 8:13 Hein mid-ulì en si Gideon puun dutun te lugar he zutun dan mebpekidtebek, diyà sikandan mebayà te Beyeey te Heres.
JDG 8:14 Ne nekezakep sikandan te vetan-en he maama he tig-Sucot, ne mid-insaan dan haazà ke hentei is menge upisyal ziyà te Sucot. Ne inlista zin is menge ngazan te 77 he menge upisyal he edumala te Sucot.
JDG 8:15 Ne kegkepasad dutun mibeyaan eni Gideon is menge tig-Sucot ne migkeǥiyan sikandan ni Gideon te, “Egketenuzan niw ve is ked-insultuwi niw kedì? Migkaǥi kew te, ‘Zekepa niw zep-a si Zeba wey si Zalmuna ne human dey ebeǥayi te keenen is menge nengeveley wey nengevitil he menge sundaru nu?’ Ne ǥuntaan, heini en si Zeba wey Zalmuna.”
JDG 8:16 Ne zutun migkuwa ni Gideon sikan is ebpemendumala ziyà te Sucot ne zuen impenurù din kandan pinaaǥi te kedletiguwa zin kandan te zuǥiyen he deisey he kayu.
JDG 8:17 Ne hein nepasad haazà ne iyan en maan midrundus dan is turi ziyà te Penuel ne mibpenhimetayan dan is menge maama zutun te inged.
JDG 8:18 Ne zutun mid-insaan ni Gideon si Zeba wey si Zalmuna te, “Memenumenu is paras te menge maama he mibpenhimetayan niw ziyà te Tabor?” Midtavak sikandan te, “Iring kenikew, henduen be te anak sikandan te hadì.”
JDG 8:19 Migkaǥi si Gideon te, “Menge suled ku sikandan; anak en sikandan te iney ku. Ne iyan ebpeketistiǥus is uuyag he Nengazen he emun wazè niw sikandan himetayi ne kenè ku zaan sikiyu edhimetayan.”
JDG 8:20 Ne migkeǥiyan din is kinekekayan he anak din he si Jeter te, “Himetayi nu sikandan.” Ne geina te vatè pa si Jeter, ne nahandek sikandin, umbe wazè din hulevuta is ispada zin.
JDG 8:21 Ne migkeǥiyan ni Zeba wey ni Zalmuna si Gideon te, “Maan is kenè ka iyan edhimatey kenami? Kenà ereg is batà he ebaal keniyan.” Umbe midhimetayan sikandan ni Gideon ne impekuwa zin is menge zayandayan diyà te lieg te menge kemilyu zan.
JDG 8:22 Migkaǥi is menge Israilihanen diyà te ki Gideon te, “Geina te iyan ka midlibri kenami te kedezaat te menge Midianhen, ne iyan ke en wey is menge anak nu wey menge apù nu mebpengulu kenami.”
JDG 8:23 Ne midtavak si Gideon te, “Siak wey is menge anak ku ne kenè key iyan ebpengulu keniyu, kekenà, iyan is Nengazen.
JDG 8:24 Iyan, duen dà ebuyuen ku ziyà te keniyu: is kada sevaha keniyu mebeǥey te sevaha he eritis kayi te kedì he nekuwa niw ziyà te menge Midianhen.” (Is menge Midianhen ed-eeritis te vulawan su iyan haazà neleyaman dan te menge kevuwazan ni Ishmael.)
JDG 8:25 Midtavak is menge etew te, “Uya, ebeǥayan dey sikew.” Ne midempas sikandan te manggad ne is kada sevaha kandan midsavuk dutun te indempas te eritis he nekuwa zan diyà te menge Midianhen.
JDG 8:26 Menge 20 he kilu he vulawan he menge eritis is netiǥum kenà ragkes is menge zayandayan, menge velieg, menge merudtem he visti te Hadì diyà te Midian, wey menge rantey he velieg te menge kemilyu zan.
JDG 8:27 Ne haazà is netiǥum he vulawan, mibpeveelan ni Gideon he ipud ne impelastar zin haazà diyà te Ofra he iyan inged din. Ne zutun mid-iniyuǥan en maan te menge Israilihanen is Megbevayà su iyan dan ed-ezapen haazà is mibpeveelan ni Gideon. Nehimu haazà he zekelà he penggezam ki Gideon wey te pemilya zin.
JDG 8:28 Nezaag te menge Israilihanen is menge Midianhen, ne kenè en sikandan ebpekehimu he ed-uman ebpekidtebek. Mibmelinew is Israel seled te 40 he tuig he zutun uuyag pa si Gideon.
JDG 8:29 Mid-ulì si Gideon diyà te keugelingen din he valey ne zutun sikandin med-ubpà.
JDG 8:30 Duen 70 he menge anak ni Gideon su mahabet is esawa zin.
JDG 8:31 Duen esawa zin diyà te Shekem ne zuen anak dan he maama he migngezanan din ki Abimelec.
JDG 8:32 Meǥurang en si Gideon hein minatey sikandin. Ne ziyà sikandin ileveng te penlevengà te amey zin he si Joash diyà te Ofra, he tanà te menge kevuwazan ni Abiezer.
JDG 8:33 Ne wazè en meuǥet is kebpatey ni Gideon, ne mid-iniyuǥan en maan te menge Israilihanen is Megbevayà ne iyan dan en maan ed-ezapen is menge ledawan te ed-ezapen he si Baal. Midhimu zan si Baal Berit he megbevayè dan.
JDG 8:34 Midlipatan dan is Nengazen he Megbevayè dan he iyan midlibri kandan te kedezeeti kandan te menge kuntada zan diyà te peliǥuy zan.
JDG 8:35 Wazè dan ipaahà is keupiya zan diyà te pemilya ni Jerubaal (he iyan si Gideon) minsan pa te zuen meupiya he nengeveelan din para te Israel.
JDG 9:1 Ne sevaha he andew, midhendiyà si Abimelec he anak ni Gideon te menge kezuzumahi te iney zin diyà te Shekem ne migkeǥiyan din sikandan te,
JDG 9:2 “Insai niw is langun he tig-Shekem ke hengkey is egkesuatan dan: egkesuat dan be ke ebpenguluwan sikandan duen te 70 he menge anak ni Gideon etawa iyan e zà is sevaha he anak ni Gideon is ebpengulu kandan? Tentenuzi niw he kezuzumahi a keniyu.”
JDG 9:3 Umbe, mibpekidlalag is menge kezumahan ni Abimelec te menge tig-Shekem. Ne nekeuyun sikandan he si Abimelec is ebpengulu kandan, su ǥeina te kezuzumahi zan sikandin.
JDG 9:4 Mibeǥayan dan si Abimelec te 70 he vuuk he pelata he ebpuun diyà te simbahan he zutun ed-ezapa si Baal Berit, ne migamit din haazà he selapì te kedsuhul te menge buguy para medsunud dan kandin.
JDG 9:5 Ne midhendiyà si Abimelec te valey te amey zin diyà te Ofra. Ne ziyà te zivavew te sevaha he vatu, mibpenhimetayan din sikan is 70 he menge suled din diyà te amey zin he si Gideon. Piru is tinengkezan he si Jotam wazà mulà mepatey su mid-eles sikandin.
JDG 9:6 Midhendiyà is menge tig-Shekem wey is menge tig-Bet Milo te lugar he zuen duen kayu he ulayan he ziyà te Shekem ne zutun dan himuwa si Abimelec he hadì.
JDG 9:7 Ne hein nezineg haazà ni Jotam, midtekezeg sikandin diyà te puntur te Buntud he Gerizim ne imbensag din diyà te kandan is menge lalag he edhenduen te, “Menge tig-Shekem, pemineg kew kedì emun egkesuat kew he ebpemineg keniyu is Megbevayà.
JDG 9:8 Edtetezeman ku sikiyu vahin te menge kayu he ebpen-ahà te edhadì kandan. Migkeǥiyan dan is kayu he ulibu te, ‘Iyan ka hadì kenami.’
JDG 9:9 Ne midtavak haazà is ulibu te, ‘Kenà egkehimu su lavew he meupiya is kebeǥey ku te lana he ǥelemiten te kebeǥey te zengeg te menge ed-ezapan wey te menge etew, kenà te kedhedii ku keniyu.’
JDG 9:10 “Ne iyan en maan migkeǥiyan dan is kayu he higus te, ‘Iyan ka hadì kenami.’
JDG 9:11 Midtavak haazà is higus te, ‘Kenà egkehimu su lavew he meupiya is kebeǥey ku te metaam he veǥas, kenà te kedhedii ku keniyu.’
JDG 9:12 “Ne iyan en maan migkeǥiyan dan is paras te, ‘Iyan ka hadì kenami.’
JDG 9:13 Ne midtavak haazà is paras te, ‘Kenà egkehimu su lavew he meupiya is kebeǥey ku te vinu he ebpekelipey te menge ed-ezapen wey menge etew.’
JDG 9:14 “Umbe iyan en migkeǥiyan dan te langun is duǥiyen he zeisey he kayu te, ‘Iyan ke en hadì kenami.’
JDG 9:15 Ne midtavak haazà is duǥiyen he deisey he kayu te, ‘Emun egkesuat kew he iyan a edhadì keniyu, kinahanglan he edhelung kew kayi te kedì. Iyan, emun kenè niw heeyan ebeelan, ebpeǥawas a te hapuy he ebpeketutung te menge kayu he sidru ziyà te Lebanon.’ ”
JDG 9:16 Ne migkaǥi si Jotam te, “Metazeng be wey hustu is kedhimuwa niw ki Abimelec he hadì? Meupiya ve is mibeelan niw ziyà te ki Gideon he amey ku wey te pemilya zin? Sungkad be is mid-ulaula niw te mid-ulaula te amey ku?
JDG 9:17 Tentenuzi niw he nekidtebek is amey ku te kedlibri keniyu te kedezaat te menge Midianhen. Impedserakan din is untung din para keniyu.
JDG 9:18 Iyan, guntaan migkuntada niw is pemilya te amey ku. Mibpenhimetayan niw is 70 he menge anak din diyà te zivavew te sevaha zà he vatu. Ne midhimu niw he hadì si Abimelec, he anak te amey ku ziyà te esawa zin he suluǥuen din tenged dà te kezuzumahi niw sikandin.
JDG 9:19 Umbe, emun metazeng wey hustu is ked-isipa niw te mibeelan niw ziyà te amey ku wey te pemilya zin, ne verakat he mekepenunuat keniyu si Abimelec wey mekepenunuat kew kandin.
JDG 9:20 Ne emun kenà, ne verakat he dèdeeti kew ni Abimelec he iring te egkeenen kew te hapuy. Ne sikiyu is menge tig-Shekem wey menge tig-Bet Milo, ne edèdeetan niw zaan si Abimelec he iring te egkeenen sikandin te hapuy.”
JDG 9:21 Ne hein nekaǥi en haazà ni Jotam, mibpelaǥuy sikandin pehendiyà te Beer ne zutun sikandin med-ubpà su nahandek sikandin duen te suled din he si Abimelec.
JDG 9:22 Ne hein midlavey en is tetelu he tuig te kedumala ni Abimelec te menge Israilihanen,
JDG 9:23 midsuǥù is Megbevayà te mulin-ulin he ebeǥey te kesamuk wey mekegkuntada si Abimelec wey is menge etew ziyà te Shekem, ne midsukulan dan si Abimelec.
JDG 9:24 Neulaula heini su ibpevayad si Abimelec wey is menge tig-Shekem he mid-uǥup kandin te kebpenhimatey zuen te 70 he menge anak ni Gideon he menge suled din.
JDG 9:25 Mibpeeyanan te menge tig-Shekem te menge etew si Abimelec diyà te menge vuvungan, ne edtulisen dan is langun he ebayà dutun. Ne netudtulan si Abimelec mehitenged kayi.
JDG 9:26 Dutun he timpu, si Gaal he anak ni Ebed midhendiyà te Shekem duma te menge suled din. Ne midsarig kandan is menge tig-Shekem.
JDG 9:27 Ne hein timpu te kedraǥun te paras, mibaal is menge etew te vinu he migkeres he paras. Midtukud dan te pista ziyà te simbahan he ed-ezapan te menge ed-ezapen dan. Ne zutun te kebpemengaan dan wey ked-iinum dan, edsudien dan si Abimelec.
JDG 9:28 Migkaǥi si Gaal te, “Hengkey kiw he kelasi te menge etew is kayi te Shekem? Maan is mibpesakup kiw ki Abimelec? Hentei man sikandin? Kenè be anak dà sikandan ni Gideon? Ne maan is mibpesakup kiw kandin wey te sineriǥan din he si Zebul. Diyè kew ereg he ebpesakup te kevuwazan te kepuun niw he si Hamor?
JDG 9:29 Emun iyan a keniyu ed-egelenen siguradu igkepaawè ku si Abimelec. Egkeǥiyan ku sikandin he umani zin is menge sundaru zin ne human mebpekidtebek kedì.”
JDG 9:30 Hein nezineg ni Zebul he pengulu te inged haazà is migkaǥi ni Gaal, nepauk sikandin.
JDG 9:31 Umbe, mibpesuǥuan din si Abimelec diyà te Aruma. Ne iyan heini impetudtul zin, “Si Gaal he anak ni Ebed wey is menge suled din midhengkayi te Shekem, ne ed-iniyaten dan is menge etew te kebpekigkuntada kenikew.
JDG 9:32 Umbe, kengkuwan te mezukilem, dumaha nu is menge etew nu, ne eles kew zep-a ziyà te menge pemuleey ziyà te ǥawas kayi te inged.
JDG 9:33 Ne keeselem te kedsilà te andew, tik-ew kew surung kayi te inged. Ne emun ebpekidtebek keniyu ensi Gaal, ne veeli nu ziyà te kandan ke hengkey is egkesuatan nu.”
JDG 9:34 Kegkezukilem dutun, migenat si Abimelec wey is menge etew zin. Midheepat dan he vahin is grupu zan ne nemen-ayan sikandan diyà te ǥawas te Shekem.
JDG 9:35 Ne hein nekeehè dan he midlawang si Gaal ne ziyà medhithitindeg te pultahan dutun te inged, migawas si Abimelec wey is menge etew zin diyà te mid-elesan dan su edsurung dan en.
JDG 9:36 Ne hein naahà sikandan ni Gaal, migkeǥiyan din si Zebul te, “Ahaa nu man! Duen menge etew he ebpemenupang puun te puntur te menge vuvungan.” Midtavak si Zebul te, “Alung dà heeyan te menge vuntud. Henduen dà te menge etew is ked-ahaa nu zuen.”
JDG 9:37 Migkaǥi si Gaal te, “Kela man ahaa nu! Duen menge etew he ebpuun diyà te mid-elangan keniyan te zezuwa he vuvungan, ne zuen pa ziyà te zalan he uvey te ulayan te menge meneglagnà!”
JDG 9:38 Ne midtavak si Zebul te, “Hendei en be sikan is hambug nu? Kenè be migkaǥi ka te, ‘Hentei man si Abimelec is ebpesakup kiw kandin?’ Ne ǥuntaan nekeume en sikan is ed-un-undahan nu! Maan is kenè ka ebpekidtebek kandan?”
JDG 9:39 Umbe, mibpenguluwan ni Gaal is menge tig-Shekem ne mibpekidtebek dan engki Abimelec.
JDG 9:40 Midal-as sikandin ni Abimelec, piru mibpelaǥuy sikandin. Mezakel is nemematey te tebek; nemekesesavuk is menge lawa zan diyà te pultahan dutun te inged.
JDG 9:41 Midlikù med-ubpà si Abimelec diyà te Aruma. Ne midsegseg ni Zebul si Gaal wey is menge suled din puun te Shekem.
JDG 9:42 Kegkemeselem, neisip te menge tig-Shekem he edhendiyè dan te vevesukà ne netudtul haazà diyà te ki Abimelec.
JDG 9:43 Umbe, mibahin din te tetelu he grupu is menge etew zin. Ne midhendiyà sikandan te menge vevesukà ne zutun dan med-ayan su ebpekidtebek dan. Ne hein neehè dan he nenggawas en puun dutun te inged is menge tig-Shekem, mibpuun en sikandan med-etaki.
JDG 9:44 Is grupu he mibpenguluwan ni Abimelec migaan-gaan medhendiyà te pultahan te inged te ked-aǥew zuen, dutun te ebpenhimetayan en duen te zezuwa he grupu is menge tig-Shekem he ziyà te menge vevesukà.
JDG 9:45 Sengaandew is kebpekidtebek eni Abimelec. Ne nesakup dan haazà is inged, ne mibpenhimetayan dan is menge meǥinged dutun. Ne hein nepasad midèdeetan dan haazà is inged ne midsewezan dan te timus.
JDG 9:46 Ne hein netudtulan is ebpemen-ubpà diyà te Turi te Shekem, mid-eles sikandan diyà te elesà he zizalem te lugar he ed-ezapan ki El Berit.
JDG 9:47 Ne hein netuenan haazà ni Abimelec,
JDG 9:48 miduma zin is menge etew zin pehendiyà te Buntud he Zalmon. Ne hein dutun dan en, migkuwa si Abimelec te wasey ne nenamped sikandin te subpang te kayu ne midtiang din haazà. Ne migkeǥiyan din is menge etew zin te, “Gaanggaan kew ne veeli niw is mibeelan ku.”
JDG 9:49 Umbe, is kada sevaha kandan midtiang te kayu is edtinundug ki Abimelec. Ne inrapug dan haazà duen te zivavew te melig-en he vahin duen te simbahan he ed-ezapan ki El Berit, ne mibinsulan dan. Umbe neǥerà is menge etew he zutun ed-ubpà te Turi te Shekem. Menge 1,000 sikandan langun ragkes is menge vahi.
JDG 9:50 Ne kegkepasad dutun ne iyan en maan mibeyaan eni Abimelec is Tebez, ne midliǥuyan dan heini, ne midsakup dan.
JDG 9:51 Piru zuen melig-en he turi he zutun mebpelaǥuy is menge tig-Tebez. Midsireduwan dan haazà ne nemenahik sikandan diyà te atep dutun te turi.
JDG 9:52 Midsurung eni Abimelec haazà is turi. Ne hein ebinsulan en ni Abimelec haazà,
JDG 9:53 mid-uluǥan sikandin te vahi te ǥelingan he vatu, ne mibeka is tulan te ulu zin.
JDG 9:54 Migègaanan din umawa is tig-uwit te ǥumaan din, ne migkeǥiyan din te, “Hulevuta nu is ispada nu ne himetayi a su para kenà sikandan mekekaǥi te vahi zà is nekepatey kediey.” Umbe midsundang sikandin dutun te suluǥuen din ne minatey sikandin.
JDG 9:55 Ne hein naahà te menge Israilihanen he minatey en si Abimelec, nemen-ulì sikandan.
JDG 9:56 Pinaaǥi kayi te neulaula, impevayad te Megbevayà si Abimelec te mezaat he mibeelan din diyà te amey zin he iyan is kebpenhimetayi zin duen te 70 he menge suled din.
JDG 9:57 Impevayad daan te Megbevayà is menge tig-Shekem te langun he mezaat he mid-ulaula zan. Pinaaǥi kayi netuman is rawak ni Jotam te anak ni Gideon.
JDG 10:1 Hein minatey en si Abimelec, si Tola he anak ni Pua wey apù ni Dodo iyan nengulu te kedlibri te Israel. Ebpuun sikandin diyà te tribu ni Isacar, piru ziyà sikandin ed-ubpà te Shamir he diyà te vuvungan te Efraim.
JDG 10:2 Mibpenguluwan din is Israel seled te 23 he tuig. Ne hein minatey en sikandin, inleveng sikandin diyà te Shamir.
JDG 10:3 Is neketundug ki Tola ne iyan si Jair he tig-Gilead. Mibpenguluwan din is Israel seled te 22 he tuig.
JDG 10:4 Duen din 30 he menge anak, is kada sevaha kandan duen din asnu he ed-untuzan. Heini sikandan iyan midumala te 30 he inged diyà te Gilead he egngezanan guntaan te menge inged ni Jair.
JDG 10:5 Hein minatey en si Jair, inleveng sikandin diyà te Kamon.
JDG 10:6 Mid-uman en maan mebaal is menge Israilihanen te mezaat he igkepauk te Nengazen. Mid-iniyuǥan dan is Nengazen su iyan dan mid-azap is menge ledawan te ed-ezapen he si Baal wey si Ashtoret, wey is menge ed-ezapen diyà te Aram, Sidon, Moab, Ammon, wey Filistia.
JDG 10:7 Tenged kayi nepeukan sikandan te Nengazen ne mibey-anan din sikandan he mesakup te menge Amunihanen wey te menge Filistihanen.
JDG 10:8 Seled te 18 he tuig is kebpeentusa zan te langun he menge Israilihanen he ziyà te lugar te menge Amorihanen diyà te Gilead, he ziyà dapit te edsilaan te Wahig he Jordan.
JDG 10:9 Midlayun is menge Amunihanen diyà te zapit te edsenlepan te Wahig he Jordan ne mibpekidtebek dan te menge tribu ni Juda, ni Benjamin, wey ni Efraim. Tenged kayi, utew nerasey is menge Israilihanen.
JDG 10:10 Umbe, mibuyù te tavang is menge Israilihanen diyà te Nengazen. Ke sikandan te, “Nekesalè key ziyà te kenikew, su mid-iniyuǥan dey sikew is Megbevayè dey su iyan dey mid-azap is menge ledawan te ed-ezapen he si Baal.”
JDG 10:11 Midtavak is Nengazen te, “Hein impaantus kew te menge Ehiptohanen, menge Amorihanen, menge Amunihanen, menge Filistihanen, menge Sidunhanen, menge Amalikanhen, wey menge Maonhen, mibuyù kew te tavang kayi te kediey ne midlibri ku sikiyu.
JDG 10:13 Piru mid-iniyuǥan a ǥihapun keniyu su iyan niw mid-azap is duma he menge ed-ezapen. Umbe kenè ku en sikiyu edlibriyen guntaan.
JDG 10:14 Maan is kenè kew ziyà ebuyù te tavang te menge ed-ezapen he mibpilì niw he iyan ed-ezapen niw? Iyan niw sikandan ipelibri keniyu emun edlised kew.”
JDG 10:15 Piru migkeǥiyan dan is Nengazen te, “Nekesalè key ziyà te kenikew umbe veeli nu kayi te kenami is egkesuatan nu. Piru kehizuwi key, ne libriya key ǥuntaan.”
JDG 10:16 Ne zutun mid-iniyuǥan dan is menge ed-ezapen dan ne iyan dan mid-azap is Nengazen. Ne hein neuǥet kenè en egkaantus te Nengazen is kegkaahaa zin kandan te egkengerasey ne nehizuwan din sikandan.
JDG 10:17 Dutun he timpu ebpetebekà is menge Amunihanen wey is menge Israilihanen. Migkampu is menge Amunihanen diyà te Gilead, ne ziyà mulà te Mizpa is menge Israilihanen.
JDG 10:18 Ebpelelelaǥà is menge pengulu ziyà te Gilead, ke sikandan te, “Ke hentei is ebpengulu kenitew te kebpekidtebek te menge Amunihanen ne iyan edhimuwen tew he pengulu te langun he meǥinged kayi te Gilead.”
JDG 11:1 Si Jefta he tig-Gilead sevaha he utew metau he sundaru. Is amey zin iyan si Gilead ne is iney zin sevaha he vahi he mezaat is dengeg.
JDG 11:2 Duen menge anak ni Gilead diyà te tutuu he esawa zin. Ne hein dezekelè en sikandan, midsegseg dan si Jefta. Ke sikandan te, “Wazè nu egkepengevilin diyà te amey zey su selakew en he vahi is iney nu.”
JDG 11:3 Umbe, mid-awà si Jefta ziyà te kandan ne ziyà med-ubpà te Tob. Ne miduma kandin dutun is senge grupu te menge buguy.
JDG 11:4 Dutun he timpu ebpetebekà is menge Amunihanen wey is menge Israilihanen.
JDG 11:5 Tenged dutun, mibpeveyaan te ebpemendumala ziyà te Gilead si Jefta is diyà te Tob.
JDG 11:6 Ke sikandan te, “Penguluwi key kenikew te kebpekidtebek te menge Amunihanen.”
JDG 11:7 Piru midtavak si Jefta te, “Kenè be nepeukan a keniyu ne midsegseg a keniyu puun te valey te amey ku? Ne ǥuntaan te edlised kew ne ebpetavang kew ves kedì?”
JDG 11:8 Piru migkaǥi sikandan te, “Kinahanglan dey sikew. Sigi en, dumahi key en te kebpekidtebek te menge Amunihanen, ne egkehimu ka he pengulu te Gilead.”
JDG 11:9 Ne midtavak si Jefta te, “Emun eduma a keniyu te kebpekidtebek wey emun ebpengelinteuwan te Nengazen he mekezaag a, tutuu ve he edhimuwen a keniyu he pengulu?”
JDG 11:10 Ne midtavak dan te, “Uya, iyan ka edhimuwen dey he pengulu. Ne iyan ebpeketistiǥus kayi is Nengazen.”
JDG 11:11 Umbe, miduma si Jefta kandan, ne midhimu sikandin te menge tig-Gilead he pengulu wey peremandar zan. Ne ziyà te Mizpa, nenangdù si Jefta ziyà te etuvangan te Nengazen dutun te kedawata zin te ketengdanen he kebpengulu.
JDG 11:12 Ne midsuǥù ni Jefta is menge menunudtulà te kebpenginginsà diyà te hadì te menge Amunihanen ke maan is edsurungen dan is Israel.
JDG 11:13 Ne iyan heini tavak duen te hadì te menge Amunihanen diyà te menunudtulà he midsuǥù ni Jefta: “Hein ked-awà te menge Israilihanen puun te Ehipto, mid-aǥew zan is tanè dey–puun te Wahig he Arnon taman te Wahig he Jabok, wey pehendiyè en te Wahig he Jordan. Ne iyan suat dey he iulì niw heini ziyà te kenami te melinawen he paaǥi.”
JDG 11:14 Ne mid-uman en maan medsuǥù si Jefta te menge menunudtulà diyà te hadì te menge Amunihanen
JDG 11:15 su wey zan mekaǥi heini he menge lalag, “Wazè eǥawa te menge Israilihanen is tanà diyà te Moab etawa tanà diyà te Ammon.
JDG 11:16 Hein ebpuun diyà te Ehipto is menge kepuun dey, mibayè dan diyà te sibsivayan pehendiyà te Zaǥat he Meriǥà taman te nekeuma zan diyà te Kadesh.
JDG 11:17 Ne zuen midsuǥù dan he impehendiyà te hadì te Edom su edhangyù dan he ipevayà sikandan diyà te Edom, iyan, wazà sikandan tuǥuti. Ne iring din ded daan dutun is mid-ulaula te hadì diyà te Moab diyà te kandan. Umbe malù neuǥet is ked-ubpèubpè dan diyà te Kadesh.
JDG 11:18 “Dutun te huziyan he timpu, midlaus sikandan medhipanew ziyà te sibsivayan. Midliǥuy sikandan diyà te Edom wey Moab taman te nekeuma sikandan diyà te zapit te edsilaan he vahin te Moab he veyvey te Wahig he Arnon. Dutun sikandan megkampu, iyan, wazà sikandan medlayun te Arnon su dulunà haazà te Moab.
JDG 11:19 “Ne zutun duen midsuǥù dan he menge menunudtulà diyà te Heshbon, diyà te ki Sihon he hadì te menge Amorihanen su edhengyuan dan sikandin he tuǥuti zin sikandan te kebayà diyà te tanè din su para mekeuma sikandan diyà te ebpeveyaan dan.
JDG 11:20 Iyan, wazà medsarig kandan si Sihon. Kekenà, midtiǥum din diyà te Jahaz is menge sundaru zin ne midsurung dan is menge Israilihanen.
JDG 11:21 Piru mibpengelinteuwan te Nengazen he Megbevayà te Israel he mezaag sikandan te menge Israilihanen. Umbe migkuwa te menge Israilihanen is langun he tanà te menge Amorihanen he ebpemen-ubpà dutun he lugar:
JDG 11:22 puun te Arnon taman te Jabok, wey puun te sibsivayan taman te Wahig he Jordan.
JDG 11:23 “Umbe iyan midsegseg te menge Amorihanen is Nengazen he Megbevayà te Israel, ne imbeǥey zin is tanè dan diyà te menge Israilihanen. Ne ǥuntaan edkesuatan niw te egkuwa heini?
JDG 11:24 Iyan niw engkena is tanà he ibeǥey keniyu te ed-ezapen niw he si Kemosh. Su sikami, ed-engkenen dey is langun he ibeǥey kenami te Nengazen he Megbevayè dey.
JDG 11:25 Edhuna ke ve ki Hadì Balak te hadì he Moab, he anak ni Zipor? Wazà sikandin keenu mebpekidtebek te Israel. Kenè be?
JDG 11:26 Menge 300 en he tuig is ked-ubpè te menge Israilihanen diyà te Heshbon wey Aroer, wey ziyà te menge inged he nekeelingkus kayi he menge lugar, ragkes en is menge inged diyà te kilid te Wahig he Arnon. Maan is guntaan kew en metanud te kegkuwa kayi?
JDG 11:27 Wazà mezaat he mibeelan dey ziyà te keniyu, piru sikiyu mezaat is ed-ul-ulahan niw kenami su egkesuat kew he ebpekidtebek kenami. Iyan is Nengazen edhukum kenitew ke hentei is ebpekevenar kenitew.”
JDG 11:28 Piru wazà seǥipaa te hadì te menge Amunihanen haazà is menge lalag he impeuwit ni Jefta.
JDG 11:29 Dutun he timpu mid-ulinan si Jefta te Mulin-ulin te Nengazen. Mid-eneb din beyai is tivuuk he Gilead wey is Manase, pehendiyà te Mizpa diyà te Gilead. Ne puun te Mizpa midsurung din is menge Amunihanen.
JDG 11:30 Ne mibpenengduan ni Jefta is Nengazen. Ke sikandin te, “Emun idtuǥut nu he mezaag ku is menge Amunihanen,
JDG 11:31 ibpemuhat ku ziyà te kenikew he pemuhat he edtutungen is egkehuna he egawas diyà te valey ku te kedsinuǥung kedì dutun te ked-ulì ku puun te tebek.”
JDG 11:32 Nekidtebek si Jefta te menge Amunihanen, ne mibpengelinteuwan te Nengazen he mekezaag sikandin.
JDG 11:33 Nezaag dan is menge Amunihanen ne mahabet is nepatey zan. Naaǥew zan is 20 he inged puun te Aroer pehendiyà te peliǥuy te Minit taman te Abel Keramim.
JDG 11:34 Ne hein mid-ulì si Jefta ziyà te Mizpa, midsinuǥung sikandin te anak din he vahi he ebpurung dà edsayewsayew is edtukar te tamburin. Budtung sikandin he anak ni Jefta.
JDG 11:35 Ne hein naahà sikandin ni Jefta, mibindas din is bisti zin tenged te kegkeseeng din, ne ke sikandin te, “Anak ku, midhimu nu he utew a meseeng! Su nekepenangdù a ziyà te Nengazen he ibpemuhat ku ziyà te kandin is egkehuna he edsinuǥung kedì, ne kenè ku en heini egkevelvelewanan!”
JDG 11:36 Midtavak haazà is anak ni Jefta te, “Amà, nekepenangdù ka ziyà te Nengazen. Umbe, tumana nu is penangdù nu, su impezaag keniyu te Nengazen is menge kuntada niw he menge Amunihanen.
JDG 11:37 Piru zuen ku zà edhengyuen diyà te kenikew: tuǥuti a kenikew te kedriǥuriǥu ziyà te menge vuntud seled te zezuwa he vulan, te kedlalew zuma te menge emiǥu ku he menge vahi, su ebpatey a he kenè en egkeesawa.”
JDG 11:38 Ne midtuǥutan sikandin ni Jefta. Umbe midriǥuriǥu sikandin diyà te menge vuntud duma te menge emiǥu zin he menge vahi seled te zezuwa he vulan su edlalew zan, su geina te ebpatey sikandin he kenè en egkeesawa.
JDG 11:39 Ne hein midlavey en is dezuwa he vulan, midlikù sikandin diyà te amey zin. Ne midtuman ni Jefta is penangdù din diyà te Nengazen, ne minatey haazà is anak din he wazè pa mehileveti. Pinaaǥi kayi, nehimu is sulunuzen diyà te Israel
JDG 11:40 he kada tuig, edlalew seled te heepat he andew is menge raǥa para te anak ni Jefta.
JDG 12:1 Dutun he timpu, midtiǥum is menge sundaru te Efraim para te kebpekidtebek, ne midlayun sikandan te Wahig he Jordan ne midhendiyè dan te Zafon su ed-etuvangen dan si Jefta. Migkaǥi sikandan diyà te kandin te, “Maan is wazè key kenikew ipetukew hein nekidtebek kew te menge Amunihanen? Tenged kayi te mibeelan nu ne ebinsulan dey is baley nu ne idragkes dey sikew.”
JDG 12:2 Piru migkaǥi si Jefta ziyà te kandan te, “Hein utew meinit is kebpekidtebek dey te menge Amunihanen, mibuyù a te tavang diyà te keniyu. Piru wazè kew medtavang.
JDG 12:3 Ne hein netuenan ku he kenè kew edtavang, impedserakan ku is untung ku te kebpekidtebek. Ne mibpengelinteuwan te Nengazen he mekezaag a. Ne ǥuntaan, maan is egkesuat kew he ebpekidtebek kedì?”
JDG 12:4 Ne midtavak is menge tig-Efraim te, “Sikiyu is menge tig-Gilead edluivan niw is menge zuma niw he menge kevuwazan ni Efraim wey ni Manase.” Umbe midtiǥum ni Jefta is menge maama te Gilead ne nekidtebek dan te menge tig-Efraim. Ne nezaag dan is menge tig-Efraim.
JDG 12:5 Mibentayan te menge tig-Gilead is menge leyunà diyà te Wahig he Jordan pehendiyà te Efraim. Emun duen ebpekepelaǥuy he tig-Efraim he edlayun, ed-insaan dan ke tig-Efraim be sikandin etawa kenà. Ne emun edtavak te “Kenà,”
JDG 12:6 ne ibpekaǥi zan sikandin te lalag he “Shibolit,” su is menge tig-Efraim, kenè dan metau he egkagi zuen. Ne zutun egketuusan ke hustu ve he kenà sikandin tig-Efraim. Ne emun kenà utew egkeuntul is kegkaǥi zin te “Shibolit,” edekepen dan ne edhimetayan dan dutun mismu te repasan diyà te Wahig he Jordan. Ne zutun he timpu 42,000 is nepatey he tig-Efraim.
JDG 12:7 Mibpenguluwan ni Jefta is Israel seled te heenem he tuig. Ne hein minatey en sikandin, inleveng sikandin diyà te sevaha he inged diyà te Gilead.
JDG 12:8 Hein minatey en si Jefta, iyan nekeilis kandin te kebpengulu te Israel si Ibzan he tig-Betlehem.
JDG 12:9 Si Ibzan duen din 60 he anak: 30 he menge maama wey 30 daan he menge vahi. Impepengesawa zin wey impemeesawa zin is menge anak din te kenà sakup te tribu zan. Mibpenguluwan din is Israel seled te pitu he tuig.
JDG 12:10 Ne hein minatey en sikandin, inleveng sikandin diyà te Betlehem.
JDG 12:11 Ne is nekeilis kandin te kebpengulu te Israel iyan si Elon he tig-Zebulun. Mibpenguluwan din is Israel seled te sepulù he tuig.
JDG 12:12 Ne hein minatey en sikandin, inleveng sikandin diyà te Ayalon he sakup te Zebulun.
JDG 12:13 Ne is nekeilis kandin te kebpengulu te Israel iyan si Abdon he anak ni Hilel he tig-Piraton.
JDG 12:14 Duen din 40 he anak he menge maama wey zuen din 30 he apù he menge maama, ne is kada sevaha kandan duen din untuzà he asnu. Mibpenguluwan din is Israel seled te walu he tuig.
JDG 12:15 Ne hein minatey en si Abdon, inleveng sikandin diyà te Piraton, diyà te vuvungan te Efraim, he tanà dengan te menge Amalikanhen.
JDG 13:1 Mibaal en maan is menge Israilihanen te igkepauk te Nengazen, umbe impesakup sikandan te Nengazen te menge Filistihanen seled te 40 he tuig.
JDG 13:2 Dutun he timpu zuen sevaha he maama he iyan ngazan din si Manoa he sakup te tribu ni Dan, ne ziyà sikandin ed-ubpà te Zora. Ne kenà ed-anak is esawa zin.
JDG 13:3 Duen timpu he mibpaahà te esawa zin is belinsuǥuen te Nengazen ne migkaǥi haazà te, “Taman en guntaan wazè nu pa anak. Iyan, kenà egkeuǥet ne ebmeǥingey ka ne ed-anak ka te maama.
JDG 13:4 Ne ǥuntaan, pekevantey ka. Kenè ke en inum te vinu wey minsan hengkey he kelasi te inumen he ebpekelangut wey kenè ka kaan te minsan hengkey he keenen he ed-isipen he meremerik.
JDG 13:5 Emun id-anak en is anak nu, kenè nu tempezi is bulvul zin su puun te ked-enaka kandin ibpeveyveyaan en sikandin te Megbevayà he sevaha he Nazareo. Ne edlibriyen din is Israel puun te ǥehem te menge Filistihanen.”
JDG 13:6 Midtudtulan duen te vahi is esawa zin. Ke sikandin te, “Mibpaahà kedì is suluǥuen te Megbevayà he henduen be te velinsuǥuen te Megbevayà. Migkulbaan a! Wazà a mekeinsà ke tighendei sikandin ne wazè din daan keǥiya ke hentei sikandin.
JDG 13:7 Migkeǥiyan e zin he ebmeǥingey e kun ne ed-anak a te maama. Ne migkeǥiyan e zin daan he kenà ad med-inum te vinu wey minsan hengkey he klasi te inumen he ebpekelangut wey kenà a megkaan te minsan hengkey he keenen he ed-isipen he meremerik, su is batà he id-anak ku ibpeveyveyaan te Megbevayà pinaaǥi te kedhimuwa kandin he Nazareo puun te kegkeetew zin taman te kebpatey zin.”
JDG 13:8 Tenged dutun nengemuyù si Manoa ziyà te Nengazen. Ke sikandin te, “Nengazen, emun egkehimu, ipelikù nu is suluǥuen nu he midsuǥù nu su wey key zin mepenurù ke hengkey is ereg he ed-ul-ulahan dey zuen te vatà emun id-anak en sikandin.”
JDG 13:9 Mibpemineg te Megbevayà is kebpengemuyù ni Manoa. Mibpeuman mebpaahà sikan is belinsuǥuen te Megbevayà diyà te esawa ni Manoa zutun te ebpimpinuu sikandin diyà te pemuleey, piru wazà dutun si Manoa.
JDG 13:10 Migègaanan peleleǥuya si Manoa te esawa zin ne migkeǥiyan din te, “Manoa, hengkayi ka! Su kayi sikan is etew he mibpaahà kedì hein sevaha he andew.”
JDG 13:11 Migenat si Manoa he edtinundug te esawa zin. Ne hein neehè din sikan is etew, mid-insaan din te, “Iyan ke ve sikan is mibpekidlalag te esawa ku?” Ne midtavak sikandin te, “Uya.”
JDG 13:12 Mid-insà si Manoa ziyà te kandin te, “Emun egketuman en is migkaǥi nu he ked-anak te esawa ku hengkey is kinahanglan he edsunuzen duen te vatà, wey hengkey is buluhaten din?”
JDG 13:13 Midtavak haazà is belinsuǥuen te, “Kinahanglan he edtumanen te esawa nu is langun he nekaǥi ku ziyà te kandin.
JDG 13:14 Kenà sikandin megkaan te minsan hengkey he ebpuun diyà te paras. Kenà daan sikandin med-inum te vinu etawa minsan hengkey he klasi te inumen he ebpekelangut wey kenà megkaan te minsan hengkey he keenen he ed-isipen he meremerik. Kinahanglan he edsunuzen din is langun he migkaǥi ku ziyà te kandin.”
JDG 13:15 Migkaǥi si Manoa zutun te velinsuǥuen te, “Kenè ka zèpa genat su edlapè key te nati he kambing para kenikew.”
JDG 13:16 Midtavak haazà is belinsuǥuen te, “Minsan kenè e pa egenat, ne kenè ku egkeenen is id-andam nu kedì he keenen. Piru egkehimu mulà ke ed-andam ka te pemuhat he edtutungen para te Nengazen.” (Wazà metueni ni Manoa he velinsuǥuen bes haazà te Nengazen.)
JDG 13:17 Migkaǥi si Manoa te, “Petueni nu kenami is ngazan nu, su para meveǥayi zey sikew te zengeg emun egketuman en sikan is migkaǥi nu.”
JDG 13:18 Midtavak haazà is belinsuǥuen te Nengazen te, “Maan is egkesuat ka he metueni nu is ngazan ku? He mereǥen man heini he edsevuten.”
JDG 13:19 Ne migkuwa si Manoa te nati he kambing wey pemuhat he para gasa, ne impemuhat din diyà te pemuhatà he vatu he para te Nengazen. Ne zutun te kedtengteng ni Manoa wey te esawa zin, mibaal is Nengazen te egkein-inuwan.
JDG 13:20 Nevatun sikan is hapuy pehendiyà te langit duma zuen te velinsuǥuen te Nengazen. Ne tenged dutun te neehè dan midluhud haazà is teleesawa.
JDG 13:21 Ne puun dutun wazè dan en meuman maahà sikan is belinsuǥuen. Ne zutun nesavut dan he velinsuǥuen bes te Nengazen sikan is neehè dan.
JDG 13:22 Migkeǥiyan ni Manoa is esawa zin te, “Siguradu ebpatey ki su neehè ta is Megbevayà.”
JDG 13:23 Piru midtavak is esawa zin te, “Emun edhimetayan ki te Nengazen, wazè din pezem dewata is menge pemuhat ta. Wey wazè din daan pezem ipaahà kenita is egkein-inuwan etawa ipenudtul kenita ǥuntaan heini is mehitenged te vatà.”
JDG 13:24 Ne neuma is timpu te ked-anak te esawa ni Manoa. Maama is in-anak din ne migngezanan dan ki Samson. Midekelà haazà is batà ne midtuvazan te Nengazen.
JDG 13:25 Is Mulin-ulin te Nengazen mibpuun med-ulin kandin hein diyà sikandin te Mahane Dan, he ziyà te pid-elangan te Zora wey Eshtaol.
JDG 14:1 Duen timpu he midhendiyà si Samson te Timnah, ne zuen din naahà dutun he raǥa he Filistihanen.
JDG 14:2 Ne hein mid-ulì sikandin, midtudtulan din is menge ginikanan din. Ke sikandin te, “Duen neehè ku he vahi ziyà te Timnah he Filistihanen. Ipeesawa niw sikandin kedì.”
JDG 14:3 Piru midtavak is menge ginikanan din te, “Maan is egkesuat ka he ebpengesawa te Filistihanen he wazà medtuu te Megbevayà? Wazè be nepilian nu ziyà te menge kezuzumahi tew?” Midtavak ni Samson is amey zin te, “Basta iyan niw kedì ipeesawa sikandin.”
JDG 14:4 Wazà metueni te menge ginikanan ni Samson he haazà is disisyun din ne iyan bes egkesuatan te Nengazen. Su ebpen-ahà is Nengazen te hinungdan para mekepekidtebek te menge Filistihanen, su zutun he timpu sakup te menge Filistihanen is menge Israilihanen.
JDG 14:5 Ne midhendiyà si Samson te Timnah duma te menge ginikanan din. Ne hein midhendiyà si Samson te menge pemuleey te paras diyà te Timnah, midtik-awan sikandin sinuǥunga te edhiniǥer he erimaung he kenè pa meǥurang.
JDG 14:6 Ne si Samson, mibeǥayan sikandin te ǥehem te Mulin-ulin te Nengazen, ne zutun mibaas din haazà is erimaung pinaaǥi zà te menge velad din he henduen be te nati zà he kambing is mibaas din. Piru wazè din haazà tudtula te menge ǥinikanan din.
JDG 14:7 Midhendiyà si Samson te vahi ne midlelaǥan din. Utew zin nesuati sikan is bahi.
JDG 14:8 Ne hein midlavey en is nepipira he andew, midlikù sikandin diyà te Timnah su ed-esewaan din en sikan is bahi. Ne midtuluy sikandin duen te lugar he zutun din mepatey sikan is erimaung, ne neehè din is mahabet he menge petiyukan wey is teneb dan diyà te lawa zuen te erimaung.
JDG 14:9 Migkuwa sikandin duen te teneb ne migkaan din dutun te kedhipanew zin. Ne hein nelambag din is menge ginikanan din, mibeǥayan din te teneb, ne migkaan dan haazà. Piru wazè din sikandan tudtuli he ziyè din haazà mekuwa te lawa zuen te minatey he erimaung.
JDG 14:10 Ne midhendiyà is amey ni Samson te valey zuen te egkehimu he ambey zin, ne zutun te valey nengemuran si Samson su vetasan dan he egastu is ebpengesawa.
JDG 14:11 Dutun te zutun si Samson, mibeǥayan sikandin te 30 he menge vetan-en he menge maama he Filistihanen he egkehimu he zuma zin.
JDG 14:12 Migkaǥi si Samson diyà te kandan te, “Duen ibpeentuk ku keniyu. Emun egkeentuk niw te kenè pa egketapus heini is pitu he andew he keemuran, ebeǥayan ku sikiyu te 30 he lukut he manggad he linu wey 30 he mahalen he menge visti.
JDG 14:13 Piru emun kenè niw egkeentuk, iyan kew veǥey kedì te 30 he lukut he manggad he linu wey 30 he mahalen he visti.” Ke sikandan te, “Sigi en, keǥiya nu en is peentukè nu.”
JDG 14:14 Migkaǥi si Samson te, “Puun te kumekaan, miguwà is keenen, puun te mezesen, miguwà is meemis.” Midlavey en is tetelu he andew ne wazè dan pa meentuk heini.
JDG 14:15 Ne hein ikeepat en he andew, migkeǥiyan dan is esawa ni Samson te, “Hengyui nu is esawa nu he kegiya zin diyà te kenikew is entuk duen te peentukè din su wey zey metueni. Su emun kenè nu heini ebeelan, ne ebinsulan dey sikew wey is pemilya te amey nu. Su iyan dè bes in-imbitaha niw kenami kayi te keemuran is egkuwaan niw is azen dey?”
JDG 14:16 Umbe, midhendiyà te ki Samson haazà is bahi he edsineǥew. Ke sikandin te, “Wazè e ves kenikew mahala. Su impeentuk nu is menge kezumahan ku piru wazè nu keǥiya kayi te kediey is entuk.” Midtavak si Samson te, “Wazè ku man ganì keǥiya ziyà te menge ginikanan ku ne ziyè ku en be nasì egkegiya te kenikew.”
JDG 14:17 Puun dutun midtulung en medsineǥew haazà is bahi taman te ikepitu he andew. Umbe nekaǥi ni Samson diyà te kandin is entuk su ǥeina te edteǥel sikandin. Ne is migkaǥi ni Samson diyà te kandin ne migkaǥi zin duen te menge zuma zin he Filistihanen.
JDG 14:18 Umbe, te wazè pa metapus is ikepitu he andew mid-entuk dan en sikan is peentukà. Ke sikandan te, “Wazè en edhuna pa he meemis te teneb, wey wazè en edhuna pa he mezesen te erimaung.” Ne midtavak si Samson te, “Emun wazè niw teǥela is esewa ku, ne wazè niw pezem geina metueni is entuk.”
JDG 14:19 Ne midumala en maan si Samson te Mulin-ulin te Nengazen. Midhendiyà sikandin te Ashkelon ne zutun midhimatey sikandin te 30 he etew ne midtavan din is kumbalè dan wey zuma he menge azen dan. Ne imbeǥey zin haazà is menge visti ziyà te menge etew he nekeentuk te peentukè din. Ne hein nepasad haazà mid-ulì sikandin diyà te menge ginikanan din is utew nepauk tenged dutun te nehitavù.
JDG 14:20 Ne sikan is esawa ni Samson impeesawa te maama he avey ni Samson hein nengesawa sikandin.
JDG 15:1 Dutun te kedlavey te menge timpu, hein neuma en is tiraǥun, mibpenumbelayan ni Samson is esawa zin he zuen din uwiten he nati he kambing. Migkeǥiyan din is enuǥang din he maama te, “Egkesuat a he edseled diyà te ruǥu te esawa ku.” Piru kenà sikandin ibpeseled te enuǥang din he maama.
JDG 15:2 Migkaǥi is enuǥang din he maama te, “Kunaan ku ke egkeepesan nu en sikandin, umbe impeesawa ku en sikandin duen te avey nu. Guntaan emun egkesuat ka, heeyan ded is hazi zin he edhuna pa he mezagwey kandin. Iyan nu esewaa.”
JDG 15:3 Migkaǥi si Samson te, “Tenged kayi te mibeelan niw kenà a keniyu egkevasul ke hengkey is ebeelan ku ziyà te keniyu te menge Filistihanen.”
JDG 15:4 Ne migenat si Samson ne mid-apul sikandin te 300 he menge leew he asu. Ne impedtevezè din is menge ikug te kada zezuwa zutun ne mibpemikitan din haazà te menge sulù.
JDG 15:5 Mibpenemteman din haazà ne impaawè din haazà is menge leew he asu ziyà te menge trigu te menge Filistihanen. Nevinsulan is langun he trigu, kenà iyan dà is neeǥani en, kekenà, ragkes en is wazè pa meeǥani. Nevinsulan daan is menge pemuleey te paras wey menge ulibu.
JDG 15:6 Mid-insà is menge Filistihanen ke hentei is mibaal zutun, ne netuenan dan he iyan si Samson. Ne netuenan dan daan he iyan imbeeli zutun ni Samson su geina te impeesawa te enuǥang ni Samson he tig-Timnah is esawa ni Samson duen te avey ni Samson. Umbe mibpen-ehè dan sikan is bahi wey is amey zin ne mibinsulan dan.
JDG 15:7 Migkeǥiyan ni Samson is menge Filistihanen te, “Tenged kayi te mibeelan niw, ne kenà a ed-engked he ebpenhimatey taman te ebpekevales a keniyu.”
JDG 15:8 Midsurung din sikandan ne utew mahabet is nepatey zin. Ne liwas dutun mibpelaǥuy sikandin ne mid-eles diyà te surung diyà te pangpang he ziyà te Etam.
JDG 15:9 Dutun he timpu migkampu is menge Filistihanen diyà te Juda, ne midsurung dan is inged he Lehi he sakup te Juda.
JDG 15:10 Umbe, mid-insaan sikandan te menge tig-Juda te, “Maan is edsurungen key keniyu?” Ne midtavak dan te, “Wey zey mezekepi si Samson su ebelesan dey tenged te mibeelan din diyà te kenami.”
JDG 15:11 Umbe is 3,000 he menge maama ziyà te Juda midhendiyà te surung diyà te pangpang he ziyà te Etam, ne migkeǥiyan dan si Samson te, “Wazè nu ve metueni he sakup kiw te menge Filistihanen? Ne ǥuntaan neuwit-uwit key te mibeelan nu.” Midtavak si Samson te, “Mibales e zà te mibeelan dan kediey.”
JDG 15:12 Migkaǥi zan te, “Midhendini key te kedakep kenikew, su wey zey sikew ikeveǥey ziyà te menge Filistihanen.” Midtavak si Samson te, “Ebpezakep a keniyu basta ebpenangdù kew he kenà a keniyu edhimetayan.”
JDG 15:13 Migkaǥi zan te, “Uya, kenè dey sikew edhimetayan. Ebekusen dey zà sikew ne ibpalad dey sikew ziyà te kandan.” Umbe mibakus dan sikandin te zezuwa he veǥu he menge pisì ne mid-uwit dan diyà te ǥawas duen te surung.
JDG 15:14 Hein nekeuma zan diyà te Lehi, midsinuǥung sikandin te menge Filistihanen he ebpememensag. Midumala si Samson te Mulin-ulin te Nengazen su nengebidtew is imbakus kandin he iring dà te tanur he edtutungen ne nengeulug heini puun te menge velad din.
JDG 15:15 Ne nekaahà si Samson te tulan te bakà te asnu he veǥu pa he minatey. Migkuwa zin haazà ne migamit din te kedhimatey te 1,000 he menge Filistihanen.
JDG 15:16 Migkaǥi si Samson te, “Pinaaǥi te tulan te vakà te asnu, nepatey ku is 1,000 he menge etew. Pinaaǥi te tulan te vakà te asnu, ingketambù ku heini he menge etew.”
JDG 15:17 Ne hein nekepasad sikandin he egkaǥi, intimbag din sikan is tulan te vakà te asnu. Ne haazà he lugar migngezanan te Ramat Lehi.
JDG 15:18 Utew nemezahi si Samson. Umbe nengumew-umew sikandin te Nengazen. Ke sikandin te, “Midhimu nu he mekezaag a, piru ǥuntaan henduen be te ebpatey ad te kegkemezahi ku ne ebihaǥen a te menge Filistihanen he wazà mekekilala kenikew.”
JDG 15:19 Umbe, impetudà te Megbevayà is wahig he ebpuun te nevudsiyan he tanà diyà te Lehi. Mid-inum dutun si Samson ne midlikù is desen din. Heini he serebseb migngezanan te En Hakore. Ne taman en guntaan kemulu heini ziyà te Lehi.
JDG 15:20 Mibpenguluwan ni Samson is menge Israilihanen seled te 20 he tuig. Dutun he timpu kemulu pa sikandan sakup te menge Filistihanen.
JDG 16:1 Duen timpu he midhendiyà si Samson te Gaza he sevaha he inged te menge Filistihanen. Ne zuen dutun neehè din he vahi he ebelegyà te zengeg din, ne midhulizan din haazà is bahi.
JDG 16:2 Netudtulan is menge tig-Gaza he zutun si Samson, umbe midliǥuyan dan haazà is inged wey mibentayan dan is menge pultahan dutun te inged te tivuuk he kezukileman. Wazà sikandan mebpuǥad dutun he kezukileman. Su iyan disisyun dan he meselem dan edhimetayi si Samson.
JDG 16:3 Piru taman dà te liwazà te kezukileman is kedhuliza ni Samson duen te vahi. Mid-enew sikandin ne midhendiyà te pultahan duen te inged. Migewezan din is menge tukud duen te pultahan ne mibazut din haazà ragkes is menge trangka zin. Ne ziyè din haazà uwita te puntur te vuntud he ebpekesinaru ziyà te Hebron.
JDG 16:4 Dutun te huziyan he timpu, mibmahal ni Samson is sevaha he vahi he ziyà ed-ubpà te zal-ug he Sorek. Is ngazan din, iyan si Delila.
JDG 16:5 Ne zutun, midhendiyà te ki Delila is menge pengulu te menge Filistihanen ne migkeǥiyan dan sikandin te, “Hengyui nu sikandin he keǥiya zin kenikew is hinungdan ke maan is utew sikandin mezesen wey ke ebmenmenuwen is kedaaǥa kandin, su wey zey sikandin mevakus su wey zey mevihag. Emun egkeveelan nu en heeyan, is kada sevaha kenami ebeǥey ziyà te kenikew te 1,100 he vuuk he pelata.”
JDG 16:6 Umbe, mid-insaan ni Delila si Samson. Ke sikandin te, “Keǥiyi a kenikew te hinungdan ke maan is utew ka mezesen. Wey penenglitan duen ebakus etawa edakep kenikew ebmenmenuwen din heini te ebaal?”
JDG 16:7 Midtavak si Samson te, “Emun ebekusen a te pitu he mehilew pa he tabpes te panà, egkeiring dà is desen ku te zesen te zuma he menge etew.”
JDG 16:8 Hein netuenan haazà te menge pengulu te menge Filistihanen, mibeǥayan dan si Delila te pitu he mehilew he tabpes te panà ne mibakus din si Samson.
JDG 16:9 Dutun duen nepipira he menge Filistihanen he mid-eles diyà te zivaluy he ruǥu. Ne mibensag si Delila te, “Samson, duen menge Filistihanen he nekeuma su edekepen ke zan.” Piru mibpemidtew zà ni Samson is imbakus kandin he henduen dà te menge tanur he netutung te hapuy. Wazè dan pa metueni is hinungdan te kezesen din.
JDG 16:10 Migkeǥiyan ni Delila si Samson te, “Midlimbungan e zà kenikew; midterteruan a kenikew. Sigi en, keǥiyi ad kenikew te paaǥi te kegkevekusa kenikew.”
JDG 16:11 Migkaǥi si Samson te, “Emun ebekusen a te beǥu he pisì he wazè pa meǥamit, egkeiring dà is desen ku te zesen te zuma he menge etew.”
JDG 16:12 Umbe, migkuwa si Delila te veǥu he pisì he wazè pa meǥamit ne mibakus din si Samson. Ne zuen nepipira he menge Filistihanen he mid-eles diyà te zivaluy he ruǥu. Ne mibensag si Delila te, “Samson, duen nekeuma he menge Filistihanen su edekepen ke zan!” Piru mibpemidtew ni Samson haazà is pisì he henduen dà te tanur.
JDG 16:13 Umbe, migkaǥi en maan si Delila te, “Taman en guntaan is kedlimbungi nu wey kedterteru-i nu kedì. Sigi en, keǥiya nu en is paaǥi te kegkevekusa kenikew.” Migkaǥi si Samson te, “Emun idragkes te edhavel is pitu he selapid te vulvul ku ziyà te lilizen te hevelan, ne egkeiring dà is desen ku te zesen te zuma he menge etew.”
JDG 16:14 Umbe, hein nekelipezeng si Samson, inhiket ni Delila is pitu he selapid te vulvul ni Samson diyà te lilizen te hevelan, ne nemensag sikandin te, “Samson, duen nekeuma he menge Filistihanen su edekepen ke zan.” Ne mid-enew si Samson ne nelaglag is hevelan wey hinavel.
JDG 16:15 Umbe, migkeǥiyan sikandin ni Delila te, “Egkeǥiyen nu he mahal a kenikew, piru kenè bes tutuu. Su ketetelu ad kenikew limbungi. Wazè nu keǥiya kedì ke hendei ebpuun is desen nu.”
JDG 16:16 Andew-andew is kebpenginginsà dutun te vahi ki Samson ne hein neuǥet kenè en sikandan ebpekaantus.
JDG 16:17 Umbe, migkaǥi zin en duen te vahi is tutuu. Ke sikandin te, “Wazà meǥuntingi is bulvul ku minsan kesevaha. Minsan hein ikeǥingey e pa, mibpeveyveyaan ad te Megbevayà pinaaǥi te kedhimuwa kedì he Nazareo. Umbe emun egkeǥuntingan is bulvul ku, egkeiring dà is desen ku te zesen te zuma he menge etew.”
JDG 16:18 Neǥezam ni Delila he tutuu is migkaǥi ni Samson. Umbe zuen midsuǥù din he ibpekaǥi ziyà te menge pengulu te menge Filistihanen he medlikù dan su migkaǥi en ni Samson diyà te kandin is tutuu. Umbe midlikù sikan is menge pengulu, ne mid-uwit dan en te selapì he ibayad dan diyà te ki Delila.
JDG 16:19 Impelipezeng ni Delila si Samson he impeulun diyà te vuvun din, ne hein nehurep en, mid-umew sikandin te sevaha he etew he ibpevangul zin ki Samson. Umbe mibmeluya si Samson, ne impezakep sikandin ni Delila.
JDG 16:20 Mibensag si Delila te, “Samson, duen menge Filistihanen he nekeuma su edekepen ke zan.” Ked-enew ni Samson kunaan din ke ebpekaawà sikandin pinaaǥi te kebeeli zin te iring duen te nehuna he mibeelan din. Wazè din metueni he mid-ewaan en sikandin te Nengazen.
JDG 16:21 Midakep sikandin te menge Filistihanen ne midluǥit dan is menge mata zin. Mid-uwit dan sikandin diyà te Gaza ne migkedinahan dan te brunsi. Midhimu zan sikandin he perepenggaling te trigu ziyà te seled te pirisuwan.
JDG 16:22 Piru ednaneynaney en edsuvul is bulvul zin.
JDG 16:23 Duen timpu, he midtiǥum is menge pengulu te menge Filistihanen su edsilibra zan wey ebpemuhat dan te mahabet he menge pemuhat he para te ed-ezapen dan he si Dagon. Dutun te kedsilibra zan migkanta zan is edhenduen te: “Mibpengelinteuwan te ed-ezapen tew he mezaag tew si Samson is kuntada tew.”
JDG 16:24 Ne hein naahà sikandin te menge etew midalig dan is ed-ezapen dan. Ke sikandan te, “Impalad te ed-ezapen tew kayi te kenitew is kuntada tew he mibeǥey te zekelà he kezeetan kayi te tanè tew wey midhimatey te mahabet kenitew.”
JDG 16:25 Tenged te kelipey zan, neisip dan he edhimuwen dan si Samson he velvelayen. Umbe impeǥawas dan si Samson dutun te pirisuwan ne impehitindeg dan diyà te pid-elangan te zezuwa he tukud ne midhimu zan he egkeengitan.
JDG 16:26 Migkeǥiyan ni Samson is suluǥuen he ed-aǥak kandin te, “Ipeǥawed a ziyà te tukud kayi te simbahan su wey a mekesandig.”
JDG 16:27 Nepenù te etew haazà is simbahan. Dutun daan is langun he menge pengulu te menge Filistihanen. Diyè dà te atep, ne zuen en 3,000 he menge etew, maama wey vahi. Nelangan sikandan he ed-ahà ki Samson.
JDG 16:28 Dutun nengemuyù si Samson he ke sikandin te: “He Nengazen he MEGBEVAYÀ, tentenuzi a kenikew. Emun egkehimu ilikù nu is desen ku minsan kesevaha zà su wey a mekevales te kedluǥita kayi te menge Filistihanen te menge mata ku.”
JDG 16:29 Ne migawed si Samson dutun te zezuwa he teliwazà he tukud he iyan biǥer zutun te simbahan. Is kewanan he velad din inggawed din diyà te sevaha, ne is givang diyà te sevaha pa he tukud.
JDG 16:30 Nengulahì sikandin te, “Ituǥut nu he mebpatey a zuma te menge Filistihanen!” Ne intukù din haazà is dezuwa he tukud he mid-amin din is desen din, ne nerundusan dutun te simbahan is menge pengulu wey is langun he menge etew zutun. Edhuna pa he mahabet is nepatey zin dutun he timpu kenà te nepatey zin hein uuyag pa sikandin.
JDG 16:31 Midhendiyà te Gaza is menge suled ni Samson wey menge kezuzumahi zin, ne migkuwa zan is lawa zin, ne inleveng dan diyà te midlevengan te amey zin he si Manoa ziyà te pid-elangan te Zora wey Eshtaol. Mibpenguluwan ni Samson is Israel seled te 20 he tuig.
JDG 17:1 Duen sevaha he etew he meǥinged diyà te vuvungan te Efraim he iyan ngazan din si Micas.
JDG 17:2 Sevaha he andew zutun, migkaǥi si Micas diyà te iney zin te, “Hein netazin is 1,100 he menge pelata nu, nezineg ku he midrewakan nu is migkuwa. Heini zed kes pelata. Iyan a midkuwa.” Migkaǥi is iney zin te, “Mama, berakat he tuvazi ka te Nengazen. Ne kenà med-uteng diyà te kenikew sikan is rawak.” In-ulì ni Micas haazà is 1,100 he menge pelata ziyà te iney zin. Migkaǥi is iney zin te, “Idhalad ku heini ziyà te Nengazen para te keupiyaanan nu te anak ku. Egemiten ku heini he apid te ledawan he kayu he ebpeveelan ku. Uya, idhalad ku heini su wey ka melibri te rawak.”
JDG 17:4 Ne migkuwa sikan is iney zin te 200 he pelata ne imbeǥey zin diyà te menenalsal te pelata. Ne migamit haazà he apid te menge ledawan he kayu. Ne hein nepasad en, diyà isavuk heini te valey ni Micas.
JDG 17:5 Duen keugelingen ni Micas he simbahan he para te menge ed-ezapen. Ne mibaal sikandin te ipud wey menge ledawan. Midhimu zin he memumuhat is sevaha te menge anak din he maama.
JDG 17:6 Dutun he timpu, wazà hadì diyà te Israel, umbe ebpegustu en is kada sevaha ke hengkey is egkesuatan din te ebaal.
JDG 17:7 Duen sevaha he vetan-en he maama he tig-Betlehem he sakup te Juda. Sevaha sikandin he Levihanen he midteǥaad med-ubpà duma te tribu ni Juda.
JDG 17:8 Ne sevaha he andew, midhipanew sikandin is ebpen-ahà te egkeubpaan din diyà te zuma he lugar. Dutun te kedhipanew zin, nekeuma sikandin diyà te valey ni Micas he ziyà te vuvungan te Efraim.
JDG 17:9 Mid-insaan sikandin ni Micas te, “Hendei ka ebpuun?” Midtavak sikandin te, “Tig-Betlehem a he sakup te Juda. Ne sevaha a te menge Levihanen. Ebpen-ahà a te egkeubpaan ku.”
JDG 17:10 Ne migkaǥi si Micas te, “Kayi ke en ubpà te kedì. Edhimuwen ku sikew he sumesambag ku wey memumuhat. Ne kada tuig ebeǥayan ku sikew te sepulù he vuuk he pelata, ne kenè en heeyan ragkes te visti wey keenen he ibeǥey ku kenikew.”
JDG 17:11 Ne mid-uyun haazà is Levihanen dutun te migkaǥi ni Micas ne mid-isip sikandin ni Micas he sevaha te menge anak din.
JDG 17:12 Midhimu sikandin ni Micas he memumuhat, ne ziyè din ipeubpà te valey zin.
JDG 17:13 Migkaǥi si Micas te, “Guntaan, siguradu he edtuvazan a te Nengazen su zuen ku en memumuhat he Levihanen.”
JDG 18:1 Dutun he timpu wazà hadì diyà te Israel. Ne zutun daan he timpu, is tribu ni Dan nengahà te lugar he egkeubpaan dan he egkehimu he kandan en he keugelingen. Su ziyà te menge tribu te Israel, iyan is tribu ni Dan wazè pa mekekuwa te tanà he kandan he egkepengevilin.
JDG 18:2 Umbe, mibpilì is menge kevuwazan ni Dan te lelima he memevurut he menge maama ziyà te tribu zan he iyan ebpen-ahà te egkeubpaan dan. Heini is lelima he maama ebpuun diyà te inged he Zora wey Eshtaol. Ne hein midhipanew zan en is ebpen-ahà te lugar, nekeuma zan diyà te valey ni Micas diyà te vuvungan te Efraim, ne zutun sikandan medlipezeng.
JDG 18:3 Ne hein dutun sikandan, netuusan dan diyà te kegkaǥi zuen te vetan-en he Levihanen he kenè sikandin meǥinged dutun. Umbe mid-insaan dan sikandin te, “Maan is kayi ka? Hentei is miduma kenikew kayi? Hengkey is baal nu kayi?”
JDG 18:4 Midtudtul zin diyà te kandan is mibeelan ni Micas kandin, ne migkaǥi sikandin te, “Iyan terebahu ku kayi is memumuhat a ni Micas, ne edsuhulan e zin.”
JDG 18:5 Ne migkeǥiyan dan sikandin, “Geina te memumuhat ke ves, ne insai nu is Megbevayà ke melempusen be heini is hipanew zey.”
JDG 18:6 Midtavak haazà is memumuhat te, “Kenà mesemuki is isip niw. Eduma keniyu is Nengazen kayi te hipanew niw.”
JDG 18:7 Midlaus medhipanew heini is lelima he maama ne nekeuma sikandan diyà te Laish. Neehè dan he dezeyaan is ked-ubpà te menge etew zutun iring te menge Sidunhanen. Melinew heini he lugar. Ne meupiya is kebpekesavuk dan su wazà midsamuk kandan etawa migezam medsakup kandan. Heini he lugar meziyù te menge Sidunhanen, ne wazè dan mebpekidsevaha te zuma.
JDG 18:8 Ne hein midlikù diyà te Zora wey Eshtaol haazà is lelima he maama, mid-insaan sikandan te menge zuma zan ke hengkey is neehè dan.
JDG 18:9 Migkaǥi zan te, “Nekeehè key te utew meupiya he lugar. Umbe kenè kiw en edlanganlangan. Edsurungen tew is menge meǥinged dutun su wey tew maangken haazà he tanà.
JDG 18:10 Meluag haazà he tanà wey selebpeten, ne zutun is langun he kinahanglan tew. Wey wazè dan isipa he zuen egkaid kandan. Imbeǥey en te Megbevayà kenitew haazà he lugar.”
JDG 18:11 Umbe, migenat puun te Zora wey Eshtaol is 600 he neǥumeenan he menge etew he sakup te tribu ni Dan su ebpekidtebek dan.
JDG 18:12 Migkampu sikandan diyà te avey te Kiriat Jearim he zapit te edsenlepan he sakup te Juda. (Umbe minsan guntaan egngezanan heeyan he lugar te Kampu ni Dan.)
JDG 18:13 Ne puun dutun, mibpedayun sikandan medhipanew taman te nekeuma sikandan diyà te valey ni Micas he ziyà te vuvungan te Efraim.
JDG 18:14 Ne sikan is lelima he maama he neniid diyà te Laish migkaǥi ziyà te menge zuma zan te, “Netuenan niw ve he is sevaha te menge valey kayi ne zuen duen ipud, duen daan ledawan he mid-epizan te pelata, wey zuma pa he menge ed-ezapen? Isip-isip kew ke hengkey is meupiya he ebeelan tew.”
JDG 18:15 Umbe, midhendiyè dan te valey ni Micas ne mibpengemusta zan sikan is betan-en he Levihanen he zutun ed-ubpà.
JDG 18:16 Ne hein ebpemenhithitindeg diyà te pultahan dutun te inged sikan is memumuhat wey sikan is 600 he neǥumeenan he menge maama he tribu ni Dan, midseled sikan is lelima he meniniid diyà te valey ni Micas ne migkuwa zan sikan is ipud, menge ledawan he mid-epizan te pelata, wey zuma pa he menge ed-ezapen.
JDG 18:18 Ne hein naahà duen te memumuhat he midselezan duen te lelima he meniniid is baley ni Micas ne mibpenguwa zan haazà he menge azen, mid-insà sikandin te, “Maan is ebpenguwaan niw heeyan?”
JDG 18:19 Midtavak sikandan te, “Kenè ka gusà. Duma ka kenami su edhimuwen dey sikew he memumuhat wey sumesambag. Kenè be meupiya pa ke egkehimu ka he memumuhat te sevaha he tribu te Israel kenà te memumuhat ke zà te senge pemilya?”
JDG 18:20 Ingkesuat dutun te memumuhat haazà is migkaǥi zan kandin, umbe mid-uǥup en sikandin te kebpenguwa zuen te ipud, menge ledawan he mid-epizan te pelata, wey zuma pa he menge ed-ezapen, ne miduma sikandin kandan.
JDG 18:21 Ne zutun te kedhipanew zan, diyà ipelastar te egkehunaan is menge anak dan, sunud is menge uyaǥen dan, wey menge gelemiten dan.
JDG 18:22 Malù dan en meziyù diyà te valey ni Micas hein netuenan ni Micas is neulaula. Umbe midtiǥum din is menge zuma zin he meǥinged ne midal-as dan is menge kevuwazan ni Dan.
JDG 18:23 Egkulehien dan sikandan, ne miberiyung is menge kevuwazan ni Dan ne mid-insà diyà te ki Micas te, “Hengkey ves is nehitavù maan is edel-asen key keniyu?”
JDG 18:24 Midtavak si Micas te, “Maan is ed-insè kew? Migkuwa niw is menge ed-ezapen he impeveelan ku, ragkes en is memumuhat ku, ne wazè en nesamà kayi te kediey.”
JDG 18:25 Ke sikandan te, “Ereg kad, su kela ke mepauk is duma he menge zuma zey ne edhimetayan ke zan ragkes is pemilya nu.”
JDG 18:26 Ne midlaus sikandan medhipanew. Nesavut ni Micas he wazè din egkehimu ke edsukul sikandin, umbe nekepeuulì sikandin.
JDG 18:27 Midhendiyà is menge kevuwazan ni Dan te Laish he uwiten dan sikan is menge ed-ezapen ni Micas wey zuma zan sikan is memumuhat din. Melinew he lugar is Laish, ne midsarig is menge meǥinged dutun he wazà egkevut kandan. Midsurung te menge kevuwazan ni Dan is Laish, mibpenhimetayan dan is menge etew zutun, wey mibinsulan dan haazà is inged.
JDG 18:28 Wazà neketavang te menge tig-Laish su meziyù haazà te Sidon wey wazà sikandan mebpekidsevaha te ziyà te zuma he inged. Is inged he Laish ne ziyà te menge suǥud he uvey te Bet Rehob. Ne mid-uman haazà benguna te menge kevuwazan ni Dan ne mid-ubpè dan dutun.
JDG 18:29 Mid-ilisan dan is ngazan kayi te Dan he iyan ngazan te kepuun dan he sevaha zuen te menge anak ni Jacob.
JDG 18:30 Impehitindeg dan dutun sikan is ed-ezapen ni Micas ne mid-azap dan haazà. Si Jonatan he anak ni Gershom wey apù ni Moises is midhimu zan he memumuhat. Puun dutun, is menge kevuwazan ni Jonatan iyan nenilbi he menge memumuhat te tribu ni Dan taman te timpu te kebihaǥa te menge tig-Israel.
JDG 18:31 Ne zutun te ziyè pa sikan is Tulda te Megbevayà te Shilo, iyan en midtulungan ezapa ziyà te Dan sikan is ed-ezapen ni Micas.
JDG 19:1 Dutun he timpu te wazè pa hadì te Israel, duen sevaha he Levihanen he meǥinged diyà te meziyù he vahin diyà te vuvungan te Efraim. Heini he Levihanen migkuwa sikandin te vahi he mid-esawa zin puun te Betlehem he sakup te Juda.
JDG 19:2 Iyan, midluib kandin haazà is esawa zin, ne mid-ulì diyà te valey te ginikanan din diyà te Betlehem, ne zutun sikandin seled te heepat he vulan.
JDG 19:3 Ne midisisyun sikan is Levihanen he edtelukunan din haazà is esawa zin ne edhengyuan din he ed-uman sikandan ebpeemurà. Umbe migenat sikandin duma te sevaha he suluǥuen din wey zezuwa he asnu. Ne hein nekeume en sikandin, impelaus sikandin duen te vahi. Ne hein naahà sikandin duen te amey te vahi, mibpurungan din sikandin seǥipaa.
JDG 19:4 Ne mibpeǥes sikandin dutun te enuǥang din he kenè en dèpa megenat. Umbe zutun sikandin te valey te enuǥang din seled te tetelu he andew.
JDG 19:5 Ne hein heepat en he andew, midselem med-enew sikan is Levihanen wey is suluǥuen din, ne midhimes dan su ed-ulì dan. Iyan, migkaǥi haazà is enuǥang din he maama te, “Kaan kew zèpa ne human kew ǥenat.”
JDG 19:6 Umbe, migkaan sikandan. Ne hein netegteǥaad migkaǥi zed sikan is enuǥang din te, “Keeselem kew en genat su edlipeylipey kiw zèpa kayi.”
JDG 19:7 Egenat en pezem sikandin piru midteǥel sikandin te enuǥang din, umbe wazè en sikandan medlaus megenat.
JDG 19:8 Kegkemeselem, dutun te ikelima he andew, midhimes sikandan su egenat dan, iyan, migkaǥi en maan is enuǥang din te, “Kaan kew zèpa ne kengkuwan kew en te mahapun genat.” Umbe migkaan sikandan.
JDG 19:9 Ne hein egenat en haazà is Levihanen wey sikan is esawa zin wey suluǥuen din, migkaǥi en maan haazà is enuǥang din te, “Mahapun en, ne meǥaan en egkezukilem. Deyzey ke ed-uman kew en dini edhizeǥà. Lipeylipey kew zèpa zini ne keeselem kew en ulì ke meselem.”
JDG 19:10 Iyan, wazè en human mebpemineg haazà is Levihanen, kekenà, migenat sikandin duma te esawa zin he mid-untud te zezuwa he asnu. Utew en mahapun hein nekeuma sikandan diyà te Jebus (he iyan is Jerusalem). Umbe migkaǥi sikan is suluǥuen duen te Levihanen te, “Deyzey vuwa ke kayi kiw zà edhizeǥà te inged te menge Jebusihanen.”
JDG 19:12 Ne midtavak haazà is Levihanen te, “Kenè kiw kayi edhizeǥà su kenà heini ǥaked te menge Israilihanen. Edlaus kiw ziyà te Gibea.
JDG 19:13 Agpas kew en, edtinguhaan tew he mekeuma kiw ziyà te Gibea etawa Rama, ne ziyè kiw edhizeǥà.”
JDG 19:14 Umbe, midsigudu en sikandan medhipanew. Midsanlep en is andew hein nekeuma sikandan diyà te uvey te Gibea he sakup te tanà ni Benjamin.
JDG 19:15 Midseled dan dutun te inged ne ziyè dan mebpimpinuu te pelasa, iyan, wazà mibpepemenahik kandan diyà te valey zan.
JDG 19:16 Ne hein mezukilem en, duen sevaha he meǥurang he maama he mid-ulì puun te midterebehuwan din he pemuleey zin. Heini he meǥurang, diyà dengan med-ubpà te vuvungan te Efraim, piru midhalin sikandin diyà te Gibea. Heini is Gibea ragkes te tanà te tribu ni Benjamin.
JDG 19:17 Ne hein naahà sikandan dutun te meǥurang, mid-uvayan din wey mid-insaan din, “Hendei kew ebpuun? Wey hendei kew ebpevayà?”
JDG 19:18 Midtavak haazà is Levihanen te, “Diyè key ebpuun te Betlehem he sakup te Juda ne ed-ulì key ziyà te valey zey he ziyà te vuvungan te Efraim. Wazà midhinggat kenami wey key mekelaus diyà te valey zin.
JDG 19:19 Duen dey egkekaan wey egkeinum kayi te esawa ku wey suluǥuen ku, wey zuen kumpey te menge asnu zey. Umbe wazè en duma he egkinehenglanen dey.”
JDG 19:20 Migkaǥi haazà is meǥurang te, “Kenè kew lipezeng kayi te pelasa. Ne ziyè kew te valey ku. Ne iyan ad metau te langun he kinahanglan niw. Kenè kew kayi zà lipezeng te pelasa.”
JDG 19:21 Ne miduma sikandan dutun te meǥurang. Kebpekeuma zan migkumpayan duen te meǥurang is menge asnu zan. Ne hein nekepasad sikandan he ebpenlùlù te menge paa zan, ne migkaan dan.
JDG 19:22 Dutun te kedlipeylipey zan, midtik-awan liǥuyi te lalung he menge etew zutun te inged haazà is baley ne mibpemukpuk dan is gemawan. Ne mibensaǥan dan sikan is meǥurang te, “Ipeǥawas nu heeyan is meǥeliyug nu he maama su edhilevetan dey sikandin.”
JDG 19:23 Midtavak haazà is meǥurang te, “Menge suled, meǥeliyug ku heini is etew, umbe kenè niw veeli ziyà te kandin heeyan is meremerik wey mekeeled-eled he vaal.
JDG 19:24 Ibeǥey ku keniyu is anak ku he raǥa wey is esawa kayi te etew, ne veeli niw ziyà te kandan ke hengkey is egkesuatan niw te ebaal. Asal kenè niw veeli kayi te meǥeliyug ku is meremerik wey mekeeled-eled he vaal.”
JDG 19:25 Wazà mebpemineg kandin haazà is menge etew, umbe impeǥawas duen te Levihanen sikan is esawa zin ne imbeǥey zin kandan. Wazè dan urami haazà is bahi; midhilevetan dan taman te egkepawà. Ne hein egkepawè en human dan ipeǥenat sikan is bahi.
JDG 19:26 Midlikù kes bahi zuen te valey he mibpemenehikan duen te esawa zin. Nepiley sikandin diyà te ǥemawan, ne zutun sikandin taman te midsilà is andew.
JDG 19:27 Ne zutun te meselem mid-enew haazà is Levihanen, ne mibpuwasan din haazà is gemawan. Ne zutun te kedlewang din su edlaus en edhipanew, neehè din sikan is esawa zin he nekelelangkeb he nekezezampà duen te idselang te ǥemawan.
JDG 19:28 Migkaǥi haazà is Levihanen te, “Enew ke en su egenat kiw en.” Iyan, minatey en bes haazà is bahi, ne in-untud din haazà te asnu zin ne migenat.
JDG 19:29 Ne hein nekeuma sikandin diyà te kandan, mibpenamped din te 12 he vahin is lawa zutun te esawa zin ne impeuwit din heini ziyà te 12 he tribu te Israel.
JDG 19:30 Ne nekekaǥi is langun he nekaahà kayi te, “Wazè pa nehitavù he iring kayi puun te kebpuun te menge Israilihanen diyà te Ehipto. Hengkey vuwa is ereg he ebeelan tew?”
JDG 20:1 Is langun he menge Israilihanen puun te Dan pehendiyà te Beersheba, wey puun te Gilead, midtiǥum diyà te Mizpa, diyà te etuvangan te Nengazen.
JDG 20:2 Dutun is menge pengulu te kada tribu te Israel te kedtiǥum te menge etew te Megbevayà. 400,000 sikandan is langun he menge sundaru he neǥumeenan te ispada.
JDG 20:3 Nezineg te menge kevuwazan ni Benjamin he is menge Israilihanen midtiǥum diyà te Mizpa. Migkaǥi is menge Israilihanen te, “Nemenumenu is kegkeul-ulaha kayi te utew mezaat?”
JDG 20:4 Ne midtudtul zuen te Levihanen is neulaula: “Nekehendiyè key te esawa ku te Gibea, he sakup te Benjamin su zutun key edhizeǥà.
JDG 20:5 Ne hein mezukilem en, is baley he nepemenehikan dey midliǥuyan te menge maama he tig-Gibea. Egkesuatan dan he mekuwa e zan su edhimetayan e zan pezem; piru iyan, midsinembeyaanan dan te edlayug is esawa ku taman te minatey.
JDG 20:6 Umbe, mid-uwit ku te ked-ulì ku is lawa zin ne mibpenamped ku te 12 he vahin ne impeuwit ku ziyà te 12 he tribu te Israel, su utew mezaat wey mekeeled-eled heini is mibeelan dan kayi te Israel.
JDG 20:7 Ne sikitew is langun he menge Israilihanen hengkey is ed-ul-ulahan tew?”
JDG 20:8 Nesevaha is menge etew zutun te kegkaǥi te, “Wazà med-ulì kenitew minsan sevaha.
JDG 20:9 Iyan ebeelan tew is edripa kiw ke hentei kenitew is edsurung diyà te Gibea.
JDG 20:10 Is ikesepulù he vahin te langun he menge maama te kada tribu iyan ed-atur te egkekaan te menge sundaru, ne is egkesamà iyan ebales te menge tig-Gibea tenged kayi te utew mezaat he mibeelan dan kayi te Israel.”
JDG 20:11 Umbe, midsevaha is menge maama te Israel te kedsurung diyà te Gibea.
JDG 20:12 Duen menge menunudtulà he midsuǥù te menge tribu te Israel ziyà te tivuuk he tribu ni Benjamin he ibpekaǥi te, “Hengkey heini is utew mezaat he nehitavù kayi te keniyu?
JDG 20:13 Guntaan, ipalad niw ziyà te kenami heeyan is lalung he menge tig-Gibea he mibaal kayi su edhimetayan dey su wey mepalis kayi te Israel haazà is utew mezaat he salà.” Piru wazà pemineǥa te menge kevuwazan ni Benjamin sikan is duma zan he menge Israilihanen,
JDG 20:14 kekenà, nenggawas sikandan puun te menge inged dan ne midtiǥum dan diyà te Gibea su ebpekidtebek dan te zuma zan he menge Israilihanen.
JDG 20:15 Dutun mismu he andew, neketiǥum is menge Benjaminhen te 26,000 he menge sundaru he ebpuun te menge inged dan, wazà lavet te 700 he pinilì he menge sundaru he menge tig-Gibea.
JDG 20:16 Heini is 700 he mibpilì dan, puun te tivuuk he menge sundaru zan, pudu ǥivang. Ne is kada sevaha kandan memetau he edlabyug te vatu he ebpekeigù minsan iring kezeisey te sengeleǥas he vulvul.
JDG 20:17 Ne gawas te tribu ni Benjamin, neketiǥum daan is menge Israilihanen te 400,000 he menge sundaru he memahagtì he ebpekidtebek.
JDG 20:18 Midhendiyà te Betel is menge Israilihanen ne mid-insè dan diyà te Megbevayà ke hentei ki tribu is edhuna edsurung te menge Benjaminhen. Ne midtavak is Nengazen te, iyan is tribu ni Juda.
JDG 20:19 Umbe, hein mid-ilis he andew, meselem pa migkampu en is menge Israilihanen diyà te uvey te inged he Gibea.
JDG 20:20 Ne nengandam dan wey mibpelastar is menge sundaru zan su ebpekidtebek te menge Benjaminhen.
JDG 20:21 Ne migawas is menge Benjaminhen puun te Gibea te kebpekidtebek kandan. Ne zutun dà he andew, 22,000 he menge Israilihanen is nepatey te menge Benjaminhen.
JDG 20:22 Umbe, mid-uman medtekezeg diyà te Betel is menge Israilihanen ne midsineǥew zan dutun taman te mezukilem. Mid-insaan dan is Nengazen te, “Ed-uman key pe be ebpekidtebek te menge kezumahan dey he menge Benjaminhen?” Midtavak is Nengazen te, “Uya.” Umbe midinesiǥà sikandan ne mid-uman dan mebpelastar zuen te mibpelastaran dan.
JDG 20:24 Ne sunud he andew midsurung dan en maan is menge Benjaminhen.
JDG 20:25 Iyan, mid-uman en maan megawas is menge Benjaminhen diyà te Gibea ne midsinuǥung dan heini is duma zan he menge Israilihanen. Ne kayi he timpu, nepatey zan is 18,000 he menge Israilihanen he memetau he eǥamit te menge ispada.
JDG 20:26 Umbe, mid-uman en maan medtekezeg diyà te Betel is langun he menge Israilihanen ne midsineǥew zan. Neminuu zan, ne mibpuasa zan diyà te etuvangan te Nengazen dutun he andew taman te kebmezukilem. Nemuhat dan te menge pemuhat he edtutungen wey menge pemuhat he para te meupiya he kedepità.
JDG 20:27 (Dutun he timpu, ziyà te Betel sikan is Kavan te Kebpekid-uyun te Megbevayà kandan.
JDG 20:28 Ne is edumala zutun, iyan si Finehas he anak ni Eleazar wey apù ni Aaron.) Mid-umanan insai te menge Israilihanen is Nengazen te, “Ed-uman key pe be ebpekidtebek te kezumahan dey he menge Benjaminhen etawa kenè en?” Midtavak is Nengazen te, “Uman kew pekidtebek su keeselem ebpengelinteuwan ku en he mezaag niw sikandan.”
JDG 20:29 Umbe, mibpeeyanan te menge Israilihanen te menge sundaru is peliǥuy te Gibea.
JDG 20:30 Dutun te iketelu he andew, mibpelastar zan su ebpekidtebek dan te menge Benjaminhen iring te mibeelan dan te nehuna he menge andew.
JDG 20:31 Ne iring te neulaula zuen te nengehuna he kebpekidtebek dan, midsinuǥung sikandan te menge Benjaminhen he nenggawas puun dutun te inged. Nekepatey is menge Benjaminhen te 30 he menge Israilihanen diyà te menge pemuleey wey ziyà te menge zalan pehendiyà te Betel wey Gibea.
JDG 20:32 Ne ǥeina te mibpelaǥuy is menge Israilihanen, kunaan te menge Benjaminhen ke egkezaag dan en maan is menge Israilihanen. Wazè dan meteuni he mibpezal-as is menge Israilihanen su para meuwit dan diyà te meziyù te inged heini is menge Benjaminhen.
JDG 20:33 Ne hein nekeuma is menge Israilihanen diyà te Baal-Tamar, ne mibpelastar zan dutun ne sikan mulà is nemen-eles he mid-ayan nemenggawas dan ne mibpelastar zan diyà te zapit te edsenlepan he vahin te Gibea.
JDG 20:34 Ne is 10,000 he pudu menge pinilì he menge sundaru te Israel, midsurung dan is Gibea. Nehitavù is dekelà he tebek, ne wazà metueni te menge Benjaminhen he hapit dan en egkepurung egkezeeti.
JDG 20:35 Mibpengelinteuwan te Nengazen he mekezaag is menge Israilihanen. Dutun he andew, nekepatey sikandan te 25,100 he menge Benjaminhen he mahagtì he menge sundaru.
JDG 20:36 Ne nesavut te menge Benjaminhen he nezaag en sikandan te menge Israilihanen. Mibpelaǥuy is dekelà he grupu te menge sundaru te Israel su midsarig sikandan duen te grupu he impeayan dan diyà te inged te Gibea.
JDG 20:37 Ne hein edal-as en kandan is menge Benjaminhen, midsurung en daan duen te nemen-ayan he menge sundaru is Gibea ne migerè dan is langun he menge etew zutun.
JDG 20:38 Iyan, te wazè pa heini meulaula, daan sikandan he mid-uyun he emun ebpekaahà te mekepal he evel ziyà te Gibea sikan is nemelaǥuy he menge Israilihanen, tuus haazà he
JDG 20:39 edlikù dan en te kebpekidtebek te menge Benjaminhen. Is menge Benjaminhen dutun, nekepatey en te 30 he menge Israilihanen, umbe kunaan dan ke egkezaag dan en maan is menge Israilihanen iring te nehuna he nengehitavù.
JDG 20:40 Ne midlipuwak is mekepal he evel ziyà te Gibea. Ne hein midlilingey is menge Benjaminhen, neehè dan is mekepal he evel he ebpuun diyà te inged dan.
JDG 20:41 Ne miberiyung is menge Israilihanen, ne mid-etaki zan is menge Benjaminhen. Nengeheratan is menge Benjaminhen su nesavut dan he hapit en sikandan egkepurung egkezeeti.
JDG 20:42 Mibpemelaǥuy sikandan pehendiyà te sibsivayan, piru midal-as dan te menge Israilihanen he migawas puun te inged.
JDG 20:43 Wazè dan en egkepelaǥuyan su midliǥuyan sikandan te menge Israilihanen, ne wazè dan engkezi te edal-as taman te zapit te edsilaan he vahin te Gibea.
JDG 20:44 Ne 18,000 he mevurut he menge sundaru te Benjaminhen is nepatey.
JDG 20:45 Is duma nekepelaǥuy ziyà te sibsivayan pehendiyà te Batu he Rimon. Piru 5,000 ǥihapun is nepatey kandan diyà te zalan. Midsiguduwan sikandan del-asa te menge Israilihanen taman te Gidom ne nekepatey en maan is menge Israilihanen te 2,000 kandan.
JDG 20:46 Is langun he nepatey zutun he andew, 25,000 he menge Benjaminhen he menge mevurut he menge sundaru he neǥumeenan te menge ispada.
JDG 20:47 Iyan, duen 600 he menge Benjaminhen he nekepelaǥuy ziyà te Batu he Rimon, ne zutun dan med-ubpà seled te heepat he vulan.
JDG 20:48 Midlikuan te menge Israilihanen is menge Benjaminhen ne mibpenhimetayan dan ragkes is menge uyaǥen wey is minsan hengkey he egkeehè dan. Mibinsulan dan is langun he menge inged te menge Benjaminhen he egkeseǥazan dan.
JDG 21:1 Diyà te Mizpa, midsesapà is menge Israilihanen he kenè dan ibpeesawa is menge anak dan he vahi te menge Benjaminhen.
JDG 21:2 Ne midhendiyà is menge Israilihanen te Betel ne mibpurung dan medsineǥew ziyà te etuvangan te Megbevayà taman te mezukilem.
JDG 21:3 Ke sikandan te, “He Nengazen he Megbevayà te Israel, maan is nehitavù heini? Maan is neterinan en te sevaha he tribu is Israel?”
JDG 21:4 Kegkemeselem, mibaal sikandan te pemuhatà ne nemuhat dan te menge pemuhat he edtutungen wey menge pemuhat he para te meupiya he kedepità.
JDG 21:5 Mibpein-inseey sikandan ke hengkey he tribu te Israel is wazà medhendutun te tiǥum dan diyà te etuvangan te Nengazen diyà te Mizpa, su nekepenangdù sikandan he edhimetayan is kenà edhendiyà.
JDG 21:6 Ingkeseeng te menge Israilihanen is nehitavù te kezumahan dan he menge Benjaminhen. Ke sikandan te, “Guntaan, neterinan en te sevaha he tribu is Israel.
JDG 21:7 Hendei kiw vuwà ebpen-ahà te ibpeesawa tew te nesamà he menge Benjaminhen, su nekepenangdù kiw en man diyà te Nengazen he kenè tew ibpeesawa kandan is menge anak tew he vahi?”
JDG 21:8 Dutun migkaǥi sikandan te, “Hengkey he tribu te Israel is wazà medhendiyà hein midtiǥum kiw ziyà te etuvangan te Nengazen diyà te Mizpa?” Netuenan dan he wazà minsan sevaha zutun he tig-Jabesh Gilead,
JDG 21:9 su hein mibilang is menge etew, wazà naahà he tig-Jabesh Gilead.
JDG 21:10 Umbe, mibpilì dan te 12,000 he memevurut he menge sundaru, ne migkeǥiyan dan te, “Hendiyè kew te Jabesh Gilead ne geraa niw is meǥinged dutun, batà etawa meǥurang, maama etawa vahi, gawas dà te menge raǥa he wazè pa mehileveti.”
JDG 21:12 Ne zutun nekeehè dan te 400 he menge raǥa he wazè pa mehileveti ne mid-uwit dan haazà diyà te kampu zan diyà te Shilo he sakup te Canaan.
JDG 21:13 Ne liwas dutun, midsuǥù is tivuuk he Israel te menge menunudtulà diyà te menge Benjaminhen he nemen-eles diyà te Batu he Rimon. Migkeǥiyan sikandan dutun te menge menunudtulà te ebpekid-emiǥu en kandan is menge zuma zan he menge Israilihanen.
JDG 21:14 Umbe, nemen-ulì haazà is menge Benjaminhen ne imbeǥey kandan te menge Israilihanen sikan is menge raǥa he tig-Jabesh Gilead. Iyan, kurang pa haazà is menge raǥa para kandan.
JDG 21:15 Ingkeseeng te menge Israilihanen haazà is nehitavù te menge Benjaminhen su migevà te Nengazen is kegkesevaha te menge tribu te Israel.
JDG 21:16 Umbe, mibpelelelaǥà is ebpemendumala te Israel. Ke sikandan te, “Wazè en bahi he nesamà diyà te menge Benjaminhen. Hengkey vuwa is ebeelan tew para mekeesawa is nesamà he menge maama he wazè pa mekeesawa?
JDG 21:17 Ebaal kiw te paaǥi su wey zuen mekepengevilin he kevuwazan te nesamà he menge Benjaminhen. Kinahanglan he wazà tribu te Israel he egkepuew.
JDG 21:18 Iyan, kenè man egkehimu he ibpeesawa tew kandan is menge anak tew he vahi su nekesesapè kiw en he meigù te rawak is ebaal kayi.”
JDG 21:19 Ne zutun netenuzan dan he hapit en egkeuma is tinuig he pista he para te Nengazen he ziyà ebeeli te Shilo. (Is Shilo egkezizaya te Betel ne egkezivavà te Lebona, wey zapit te edsilaan emun diyà ki te zalan he ebpuun te Betel pehendiyà te Shekem.)
JDG 21:20 Migkeǥiyan dan is menge Benjaminhen te, “Eles kew ziyà te menge pemuleey te paras,
JDG 21:21 ne ventayi niw is menge raǥa he tig-Shilo. Ne emun edsaǥad sikan is menge raǥa he edsayew zutun te pista, ne lepawa niw sikandan ne medakep is kada sevaha keniyu te ed-esewaan din ne uwita niw ziyà te keniyu.
JDG 21:22 Ne emun edriklamu is amey zan etawa suled dan he maama, ne iyan heini egkeǥiyen dey ziyà te kandan, ‘Pekelalaglalag kew he vey-ani niw en sikandan su kurang is menge raǥa he nekuwa tew hein midsurung tew is Jabesh Gilead. Minsan nekesesapè kew en piru wazè niw televaken su kenè man keniyu he ketau is kegkeesawa te menge anak niw te menge Benjaminhen.’ ”
JDG 21:23 Umbe, mibeelan haazà te menge Benjaminhen. Pesizakep sikandan te menge raǥa he midsayew, ne mid-uwit dan ne mid-esawa zan. Kebpekeuma zan diyà te tanè dan, mid-uman dan benguna is menge inged dan ne mid-ubpè dan dutun.
JDG 21:24 Mid-ulì daan is duma pa he menge Israilihanen diyà te keugelingen dan he tanà, wey keugelingen dan he tribu wey pemilya zan.
JDG 21:25 Dutun he timpu, wazà hadì te Israel, umbe ebaal en te egkesuatan din te ebaal is kada sevaha kandan.
RUT 1:1 Dengan te timpu he zatù pa is edumala te menge tig-Israel duen mid-aǥi he utew mepait he vitil. Ne zuen maama he meǥinged diyà te Betlehem he inged diyà te prubinsya he Juda he tenged dutun te vitil miduma zin is esawa zin wey is menge anak din he maama he zezuwa ne midteǥaad dan medhalin diyà te tanà he Moab.
RUT 1:2 Iyan ngazan dutun te maama, si Elimelek. Is esawa zin ne si Naomi, ne is menge anak din, ne si Mahlon wey si Kilion. Menge kevuwazan sikandan ni Efrata he tig-Betlehem he inged te Juda.
RUT 1:3 Ne hein diyè dan pa ed-ubpà te Moab minatey si Elimelek ne netaǥak si Naomi wey is menge anak din.
RUT 1:4 Ne haazà is menge anak ni Naomi, ne mibpengesawa te menge vahi he tig-Moab. Is ngazan te sevaha he vahi, ne si Orpah, ne is ngazan te sevaha, ne si Ruth. Ne hein menge sepulù en he tuig is ked-ubpè dan dutun te Moab,
RUT 1:5 minatey si Mahlon wey si Kilion, umbe iyan dà nesamà si Naomi.
RUT 1:6 Hein netuenan ni Naomi he edtentenuzan te Nengazen is menge etew zin pinaaǥi te kebeǥayi zin kandan te meupiya he sebpet, ne mibpenines sikandin wey ambey zin su edlikù dan diyà te Juda.
RUT 1:7 Migenat dan is ebpezumdumahà he edhendiyà te Juda,
RUT 1:8 iyan, hein diyè dan en te zalan migkaǥi si Naomi ziyà te menge ambey zin te, “Deyzey nasì ke ed-ulì kew en diyà te menge iney niw ne verakat he meupiya is tuvad keniyu te Nengazen iring te meupiya is mid-ulaula niw kediey wey te menge anak ku he minatey en.
RUT 1:9 Berakat he himuwa te Nengazen he zuen selakew he menge maama he ebpengesawa keniyu wey kew zan meelimahi ziyà te ubpeey zan.” Ne midhezekan sikandan ni Naomi su ibpeǥenat din, iyan, midsineǥew zan
RUT 1:10 ne ke sikandan te, “Kenè key ed-ulì su eduma key en kenikew kayi te ked-ulì nu ziyà te menge kezuzumahi nu.”
RUT 1:11 Ne migkaǥi zutun si Naomi te, “Ulì kew en diyà te keniyu, menge ambey. Maan is eduma kew pa kedì? Ed-isipen niw pe be he egkeesawa e pa ne ebpekeanak te maama he ebpekeesawa keniyu? Kenè en egkehimu su meritan e en. Piru penenglitan ke egkeesawa a ǥuntaan te mezukilem ne ebpekaanak e pa,
RUT 1:13 edteǥazan niw pa sikandan he ebpendezekelà? Kenè kew en be ebpeesawa tenged dà kandan? Kenà egkehimu, menge ambey. Is tutuu, lavew pa he mereǥen is egkeulaula ku kenà sikiyu, su impaantus a te Nengazen.”
RUT 1:14 Ne zutun, mid-uman dan en maan medsineǥew ne si Orpah, midhezekan din si Naomi is enuǥang din su egenat en, iyan, si Ruth mulà, wazà sikandin medsuwey ki Naomi.
RUT 1:15 Ne zutun migkeǥiyan sikandin ni Naomi te, “Ruth, egenat en is izas nu su ed-ulì en diyà te menge kezuzumahi zin wey ziyà te zaan he ed-ezapen din. Umbe ulì ke en daan; duma ke en kandin.”
RUT 1:16 Piru midtavak si Ruth te, “Kenà a kenikew teǥela te ked-ulì. Su ke hendei ka ebpevayà, eduma a kenikew ke hendei ka ed-ubpà, dutun a zaan ebpekeubpà. Is menge minahal nu he etew, ebmahalen ku zaan. Is ed-ezapen nu he Megbevayà, ed-ezapen ku zaan.
RUT 1:17 Ke hendei ka ebpatey zutun a zaan ebpatey, ne zutun a zaan idleveng. Berakat he siluti a te Nengazen te utew meveǥat emun edsuwayan ku sikew ǥawas te kemetayen.”
RUT 1:18 Ne zutun, hein nesavut ni Naomi he utew ves egkesuat si Ruth he eduma kandin, ne wazè en sikandin mibelivad.
RUT 1:19 Ne midlaus dan en medhipanew taman te nekeuma zan diyà te inged he Betlehem. Ne hein nekeseled dan en, utew nengeinuinu is tivuuk he meǥinged ne pesikaǥi is menge vahi te, “Si Naomi ve heeyan?”
RUT 1:20 Ne migkaǥi si Naomi te, “Kenè niw iyan kediey ingazan is Naomi, kekenà, iyan niw kediey ingazan is Mara su utew ad egkeseeng is impaantus te merasey te Mekeǥeǥehem he Megbevayà.
RUT 1:21 Su hein mid-awà a kayi, mezakel is ingkelipey ku, iyan, guntaan te impeulì e en te Nengazen, wazè ku en igkelipey. Kenà a keniyu ngezani te ‘Noemi,’ su is Nengazen he Mekeǥeǥehem impaantus e zin.”
RUT 1:22 Iyan en haazà kebpuun te tiraǥun te barli te kebpekeuma ni Naomi ziyà te Betlehem duma is ambey zin he Ruth he tig Moab.
RUT 2:1 Duen ipag ni Naomi he si Boaz. Sepian si Boaz wey edlingahaan te menge etew zutun. Ne id-aǥew sikandin ni Elimelek, sikan is esawa ni Naomi.
RUT 2:2 Duen timpu he migkaǥi si Ruth diyà te ki Naomi te, “Tuǥuti a kenikew he edhendiyà a te menge perayan su wey a mekepekirarew te barli. Kela ke zuen etew he idtuǥut din kediey is kebpekirarew ziyà te perayan din.” Ne midtavak si Naomi te, “Uya, bayi, hendiyè ka.”
RUT 2:3 Ne midhendiyà si Ruth ne mibpekirarew ziyà te ubpu te perayan ni Boaz he id-aǥew ni Elimelek.
RUT 2:4 Ne netegteǥaad dutun, ne nekeuma si Boaz he ebpuun te Betlehem, “Ipata kew te Nengazen,” ke sikandin diyà te menge sakup din. Ne midtavak dan te, “Ipata ka zaan te Nengazen.”
RUT 2:5 Ne zutun mid-insà si Boaz diyà te impezumala zin te menge ebpemenraǥun te, “Hentei haazà is bahi?”
RUT 2:6 Ne midtavak sikan is impezumala te, “Iyan sikan is tig-Moab he vahi he miduma ki Naomi.
RUT 2:7 Nenanghid sikandin geina ke egkehimu he ebpekepekirarew zini. Midsayu sikandin medterebahu ne sikan pa medhimeley kayi te lawig.”
RUT 2:8 Ne zutun migkaǥi si Boaz diyà te ki Ruth te, “Bayi, pemineg ka te sambag ku kenikew. Kayi ke zà pekirarew te neipusan kayi te menge suluǥuen ku he vahi. Kenè ka awà kayi ne kenè ka zaan pekirarew ziyà te selakew he perayan.
RUT 2:9 Dini ke zà pen-ahà te rerawen te perayan ku he ebpenggeraven te menge sakup ku ne zini ka terebahu uvey te menge suluǥuen ku he vahi. Migkeǥiyan ku is menge sakup ku he kenè ke zan semuka. Ne emun egkemezahan ka, diyà ka inum te menge umuy he mibpemenù dan te wahig.”
RUT 2:10 Ne si Ruth, hein nezineg din haazà is migkaǥi ni Boaz, ne midluhud sikandin su iyan betasan dan te kedtahud, ke sikandin te, “Maan is egkehizuwan a wey edtevangan a kenikew is lumelengyawà dà dini te keniyu?”
RUT 2:11 Ne midtavak si Boaz te, “Geina te netudtulan a te langun he tavang nu te enuǥang nu puun dutun te timpu he minatey is esawa nu. Netuenan ku he mid-ewaan nu is amey nu wey iney nu wey inged nu ne mid-ulì ka kayi te kenami he kenè nu egkengekilala.
RUT 2:12 Berakat he suhuli ka te Nengazen tenged te meupiya he mid-ulaula nu. Berakat he utew lavew is kedtuvazi kenikew te Nengazen he Megbevayà he Megbevayà te Israel, su mid-aput ka zini te kandin.”
RUT 2:13 Ne ke si Ruth te, “Utew zekelà is hizu nu kediey. Inmeupiya utew te ǥehinawa ku is menge lalag nu he menayù, minsan pa te siak wazè e en mekerepeng te menge suluǥuen nu.”
RUT 2:14 Ne hein iyan en uras te kegkaan, migkaǥi si Boaz diyà te ki Ruth te, “He bayi, uvey ka kayi. Kaan ka te supas wey izehulit nu kayi te sukà.” Ne hein mibpinuu si Ruth duma te menge ebpemenerebahu mibeǥayan ni Boaz te midsandag he barli. Ne migkaan si Ruth ne hein nahantey en sikandin duen din pa samà.
RUT 2:15 Ne hein midlikuan din is baal zin, migkaǥi si Boaz diyà te menge sakup din, ke sikandin te, “Tuǥuti niw ke ebpekirarew sikandin minsan dutun te uvey te menge vinagkes. Kenè niw vensaǥi,
RUT 2:16 kekenà, kuwa kew te menge pungu zutun te vinagkes niw wey ituyù niw iulug wey zin mekuwa ne kenè niw sikandin dewaya.”
RUT 2:17 Ne mibpenigudu en dutun si Ruth is ebpekirarew taman te mahapun en. Ne hein migunas din is nekuwa zin, ne menge keluwaan he kilu he parey is ginunas din.
RUT 2:18 Ne zutun mibitbit din kes parey zin ne mid-ulì diyà te inged ne impeehè din te enuǥang din ke sengemenu kezekelà is nekuwa zin. Impeehè din daan haazà is samè din duen te midsandag he barli he wazè din mekaan, ne imbeǥey zin duen te enuǥang din.
RUT 2:19 Ne zutun mid-insà kandin si Naomi te, “Hendei ka mebpekirarew ǥeina? Hentei ki perayan is mibpekirerawan nu? Berakat he tuvazi te Megbevayà haazà is etew he nehizu kenikew!” Ne zutun migkaǥi si Ruth he ziyà sikandin mebpekirarew te perayan te etew he migngezanan ki Boaz.
RUT 2:20 Ne ke si Naomi te, “Is Nengazen tew, ne kenè din egkelipatan is menge pesarig din dutun te nemematey en wey te menge uuyag pa. Berakat he tuvazi zin si Boaz. Haazà si Boaz, ne kezuzumahi ta; sevaha sikandin te menge etew he zuen dan ketenged te kebpemalu kayi te kenita.”
RUT 2:21 Ne migkaǥi zaan si Ruth te, “Ne kenà duen dà taman su migkeǥiyan e zin te, ‘Dini ke zà pekirarew he zuma te menge sakup ku taman te kenè dan pa ebpekepasad te ked-eǥani te parey ku.’ ”
RUT 2:22 Ne migkaǥi zutun si Naomi ziyà te ki Ruth te, “Deyzey iyan, bayi, ke ziyè ka pekirarew he zuma te menge suluǥuen din he vahi su emun diyè ka te senge perayan kela ke mepesipalahi ka.”
RUT 2:23 Ne tenged dutun, wazà si Ruth medhalin, kekenà, diyè dà sikandin mebpekirarew zuma te menge suluǥuen he vahi ni Boaz taman te wazè pa mepasad is ked-eǥani te barli wey trigu. Ne ziyà sikandin med-ubpà te valey te enuǥang din he si Naomi.
RUT 3:1 Ne sevaha he andew, migkaǥi si Naomi ziyà te ki Ruth. Ke sikandin te, “Egkesuatan ku he meesawa ka para zuen ebpekeuyamu kenikew.
RUT 3:2 Egketenuzan nu ve si Boaz is megeget he kezuzumahi ta, he nehimu he zuma nu te kedterebahu is suluǥuen din he vahi. Ne netuenan ta he ǥuntaan te mezukilem diyà sikandin te egunasan din su ebpemalid te barli.
RUT 3:3 Umbe, pemeziǥù ka, wey ǥamit ka te menge pehemut wey bivisti ka te meupiya ne tupang ka zutun te egunasan. Iyan, kenè ka zèpa paahà kandin emun kenè pa ebpekepasad sikandin he ed-inum wey egkaan.
RUT 3:4 Ne emun edlipezeng en, peniizi nu ke hendei sikandin edhizeǥà. Ne emun ebpekelipezeng en sikandin ne hendiyè ka ne luwisa nu is malung din diyà te paa zin ne hizeǥè ka zutun. Ne egkeǥiyan ke zin dutun ke hengkey is ibpeulaula zin kenikew.”
RUT 3:5 Ne migkaǥi si Ruth te, “Is langun he migkaǥi nu, edtumanen ku.”
RUT 3:6 Ne zutun midtupang sikandin dutun te egunasan ne haazà is langun he insuǥù kandin te enuǥang din, iyan daan mibeelan din.
RUT 3:7 Ne hein nekepasad si Boaz is egkaan wey ed-inum wey meupiya is gehinawa zin, midhizeǥà sikandin dutun te uvey te intambù he barli. Ne hein nekelipezeng mid-uvey si Ruth is ednaneynaney, ne midluwis din is malung diyà te menge paa ni Boaz, ne midhizeǥà dutun.
RUT 3:8 Ne hein metaneb en te kezukileman nepukew si Boaz su zuen ingketingkemed din ne mid-ehè din ne utew sikandin neinuinu su maan is duen bahi he edhidhizeǥà diyà te uvey te menge paa zin.
RUT 3:9 Ne ke sikandin te, “Hentei ka?” Ne ke si Ruth te, “Si Ruth a, is sevaha he edlingahà kenikew. Ebpeelima a kenikew su sevaha ka he anggam te esawa ku, ne zuen nu ketengdanan te kedtavang kedì, umbe ebpeesawa a kenikew.”
RUT 3:10 Migkaǥi si Boaz te, “Berakat he tuvazi ka, bayi, te Nengazen su pinaaǥi kayi te edhimuwen nu, utew pa zekelà is tavang nu ǥuntaan engki Naomi kenà duen te nehuna. Ne wazè ka zaan mebpeelima te menguhed he maama he sepian wey minsan kenà sepian.
RUT 3:11 Ne kenè ka, bayi, mahandek, su netuenan te langun he menge meǥinged kayi he utew ka metazeng he vahi. Edhimuwen ku is langun he egkesuatan nu.
RUT 3:12 Tutuu iyan he mesipeg a kenikew, ne zuen ku ketengdanan te ked-elima kenikew, piru zuen edhuna pa he mesipeg nu kenà siak.
RUT 3:13 Dini ke zà te heini he kezukilemi, ne keeselem ne ed-ahaan ta ke edhimuwen din is televaken din kenikew. Emun ebpemineg sikandin ne meupiya; piru emun kenà, ne ibpenangdù ku ziyà te uuyag he Nengazen he edhimuwen ku is televaken ku kenikew. Sigi, kayi ke zà lipezeng taman te egkepawà.”
RUT 3:14 Ne ziyà si Ruth medhidhizeǥà te uvey te paa zin taman te egkepawà. Ne hein kemulu pa merusrusirem ne mid-enew si Ruth su wey kenà sikandin mekilala, su kenà egkesuat si Boaz he zuen egkesayud he midhendiyà si Ruth te kandin diyà te gunasà.
RUT 3:15 Ne migkaǥi zutun si Boaz te, “Ihengkayi nu haazà is insamput nu ne izempas nu.” Ne hein mibeelan ni Ruth haazà, imbusbus dutun ni Boaz is menge heenem he kilu he barli ne mid-uǥupan din su wey mevava ni Ruth haazà. Ne zutun mid-ulì sikandin diyà te inged.
RUT 3:16 Ne hein nekeuma sikandin, mid-insaan sikandin ni Naomi te, “Hengkey, bayi, is neulaula kenikew?” Ne zutun midtudtulan sikandin ni Ruth te langun he mid-ulaula ni Boaz.
RUT 3:17 Ke sikandin daan te, “Migkaǥi zin he kenà meupiya ke ed-ulì a zini te kenikew te wazè ku uwiten, umbe imbeǥey zin kediey heini is barli.”
RUT 3:18 Ne migkaǥi zutun si Naomi te, “Ubpàubpà ke zà, bayi, taman te egketuenan ta ke hengkey is egkeulaula su kenà si Boaz edhimeley ǥuntaan taman te kenè din pa egkehusey heini is neulaula.”
RUT 4:1 Ne si Boaz, diyà sikandin medtandang te husayan he ziyà te pultahan dutun te inged ne zutun sikandin mebpinuu. Ne zutun nekeuma haazà is etew he migkaǥi ni Boaz he iyan sikan is mesipeg te esawa ni Ruth. Ne mid-umew sikandin ni Boaz, ke sikandin te, “Geli, uvey ka kayi ne pinuu ke zèpa.” Ne zutun mid-uvey haaza is etew ne mibpinuu.
RUT 4:2 Ne zutun mibeyaan ni Boaz is sepulù he menge ebmeǥurangen dutun te inged ne impepinuu zin daan. Ne hein nemekepinuu zan en,
RUT 4:3 migkeǥiyan ni Boaz haazà is kezuzumahi zin te, “Nekelikù en si Noemi he ebpuun te Moab, ne egkesuatan din he ibelegyà haazà is tanà te kezuzumahi tew he si Elimelek.
RUT 4:4 Neisip ku he ibpesayud ku kenikew. Ne emun egkesuatan nu, pemesaha nu kayi te etuvangan kayi te menge etew. Iyan, emun kenè nu egkesuatan, kaǥi ka. Kenikew is ketenged te kebpemesaha kayi, iyan, ke kenè nu ebpemesahan ne kediey en sikan is ketenged.” Ne midtavak dutun haazà is etew te, “Ebpemesahan ku.”
RUT 4:5 Ne ke si Boaz te, “Emun ebpemesahan nu ziyà te ki Naomi haazà is tanà, ebpekepemalu ka ki Ruth te vahi te tig-Moab su wey ǥaked pa te pemilya te minatey haazà is tanà.”
RUT 4:6 Ne migkaǥi zutun sikan is etew te, “Ne emun iyan haazà, ibeǥey ku kenikew is ketenged su ke ebpemalu a kenà utew zekelà is igkevilin ku te kediey he menge anak. Iyan ka nasì pemasa su kenè ku egkehimu.”
RUT 4:7 Ne zengan, ke zuen ebpemasa te tanà diyà te Israel, iyan betasan dan is: haazà is ebelegyà, ne id-awè din is sandalyas din ne ibeǥey zin diyà te ebpemasa. Pinaaǥi kayi ibpeehè dan he nepirmahan en haazà is ed-ul-ulahan dan.
RUT 4:8 Ne tenged dutun hein migkeǥiyan te etew si Boaz te, “Iyan ka pemasa,” in-awè din is sandalyas din ne imbeǥey zin ki Boaz.
RUT 4:9 Ne zutun migkaǥi si Boaz diyà te menge ebmeǥurangen wey te langun he menge etew ziyà, ke sikandin te, “Menge tistiǥus kew ǥuntaan he mibpemasa ku ziyà te ki Naomi haazà is langun he tanà he ǥaked dengan ni Elimelek wey ǥaked ni Kilion wey ni Mahlon.
RUT 4:10 Ed-esewaan ku en daan si Ruth, is tig-Moab, sikan is esawa ni Mahlon. Pinaaǥi kayi kemulu pa egkaǥaked te pemilya te minatey haazà is tanà. Ne pinaaǥi kayi zaan duen pa menge kevuwazan din he zuma te menge kezuzumahi zin wey zini te inged din. Ebpekepenistiǥus kew en kayi ǥuntaan.”
RUT 4:11 Ne zutun migkaǥi is menge ebmeǥurangen wey is menge zuma he etew te, “Uya, iyan key ebpekepenistiǥus. Ne haazà is bahi he ed-esewaan nu, berakat he edhimuwen te Nengazen he iring sikandin ki Raquel wey ki Lea te menge esawa ni Israel dengan he utew kiw mezakel is menge kevuwazan dan. Berakat he medsepian ka is kevuwazan ni Efrata; berakat he mevantug ka zini te Betlehem.
RUT 4:12 Berakat daan he pinaaǥi te menge anak he ibeǥey te Nengazen keniyu ki Ruth, mevantug is menge kevuwazan niw iring te nevantug daan is menge kevuwazan te kepuun nu he si Perez he anak ni Juda wey ni Tamar.”
RUT 4:13 Ne zutun mibeyaan ni Boaz si Ruth ne mid-esawa zin ne midtuvazan si Ruth te Nengazen, ne mibmeǥingey ne maama is in-anak din.
RUT 4:14 Ne migkeǥiyan si Naomi te langun he menge vahi te, “Deliǥa is Nengazen su imbeǥey zin kenikew ǥuntaan is apù nu he ebpekeelima kenikew keuzemà. Berakat he mevantug keuzemà heini is batà te langun he menge zuma tew te menge tig-Israel.
RUT 4:15 Mahal ka ziyà te ǥehinawa te ambey nu ne minsan pa ke pitu pa is menge anak nu he maama kenà egkehimu he egkelevawan dan is tavang kenikew ni Ruth. Ne ǥuntaan pinaaǥi kandin mid-apù ke en. Pinaaǥi kayi te vatà meupiya zed is kebpekesavuk nu keuzemà ke ebmeǥurang ka su iyan ed-elima kenikew.”
RUT 4:16 Layun egkuwaa ni Naomi haazà is batà su edsekepuwen din. Iyan sikandin ed-elima zuen te vatà.
RUT 4:17 Ne is menge vahi he siringan dan dutun, migngezanan dan is batà ki Obed. Ne ke sikandan diyà te langun te, “Duen en anak he maama ni Naomi.” Si Obed, ne amey ni Jesse. Ne si Jesse, ne amey ni David.
RUT 4:18 Is keguǥuza te menge kepuun ni David ne iyan heini: Si Perez, ne amey ni Hezron,
RUT 4:19 si Hezron, ne amey ni Ram, si Ram, ne amey Aminadab,
RUT 4:20 si Aminadab, ne amey ni Nashon, si Nashon, ne amey ni Salmon,
RUT 4:21 si Salmon, ne amey ni Boaz, si Boaz, ne amey ni Obed,
RUT 4:22 si Obed, ne amey ni Jesse, ne si Jesse, ne amey ni David.
1SA 1:1 Duen sevaha he etew he kevuwazan ni Zuf he egngezanan ki Elkana. Heini sikandin ne ziyà med-ubpà te Rama diyà te vuvungan te Efraim. Anak sikandin ni Jeroham he anak ni Elihu. Ne si Elihu anak sikandin ni Tuhu he anak ni Zuf, he ebpuun te tribu ni Efraim.
1SA 1:2 Si Elkana ne dezuwa is esawa zin. Iyan ngazan te sevaha si Hana, ne is sevaha si Penina. Duen mulà menge anak ni Penina, ne si Hana wazè din.
1SA 1:3 Ne te kada tuig iyan betasan ni Elkana wey is pemilya zin is edhendiyè dan te inged he Shilo su ed-azap dan wey ebpemuhat dan diyà te Nengazen he Mekeǥeǥehem. Iyan dutun menge memumuhat te Nengazen is dezuwa he anak ni Eli he egngezanan ki Hofni wey ki Finehas.
1SA 1:4 Kada ebpemuhat si Elkana, ebehinen din is duma ne ibeǥey zin ki Penina wey ziyà te menge anak dan.
1SA 1:5 Ne is ki Hana tenged te utew zin mahal minsan te wazè din anak su midhimu sikandin te Nengazen he kenà ebpekaanak, ne edezuwaan din mulà is kandin he vahin.
1SA 1:6 Ne tenged te kenà sikandin ed-anak, layun ebaal si Penina te igkererengiti wey ed-el-elezen din is duwey zin.
1SA 1:7 Iyan heini egkeulaula kada tuig. Kada edhendiyà si Hana te valey te Nengazen ne ed-un-undahan sikandin ni Penina umbe ebpekesineǥew zà sikandin ne kenà egkesuat he egkaan.
1SA 1:8 Migkeǥiyan ni Elkana sikandin te, “Maan is edsineǥew ka? Maan is kenè ka egkaan? Maan is layun ke zà egkeseeng? Kenè be mibmahal e pa kenikew kenà te sepulù he menge vatà?”
1SA 1:9 Sevaha he andew zutun, nekepasad dan he egkaan diyà te valey te Nengazen diyà te Shilo, midhitindeg si Hana ne nengemuyù ne ebpekesineǥew en, tenged te utew mesakit is gehinawa zin. Ebpimpinuu zutun si Eli is memumuhat te uvey te ǥemawan te valey te Nengazen.
1SA 1:11 Ne zutun midsaazan ni Hana is Nengazen he egkaǥi, “Nengazen he Mekeǥeǥehem, ahaa nu is ked-antus ku. Tentenuzi a is uripen nu ne kenà a kenikew lipati. Emun ebeǥayan a kenikew te anak he maama, ne ibeǥey ku sikandin kenikew para ebpenilbi kenikew te tivuuk he untung din. Ne iyan tuus te kebpenilbi zin is kenè ku edtempezan is bulvul zin.”
1SA 1:12 Ne te kemulu sikandin ebpengemuyù diyà te Nengazen, naahà ni Eli is bèbè din he ebekèbekè dà ne wazà egkezineg he laǥeng. Neisip din is nehubug sikandin.
1SA 1:14 Ne zutun migkeǥiyan din te, “Keenu ke en bes ed-engked te kebpelelangut? Engkezi nu en is ked-inum nu!”
1SA 1:15 Migkaǥi si Hana te, “Kenà a egkelangut, datù, wey wazà a keenu mekeinum te ebpekelangut he inumen. Egkeǥiyen ku zà diyà te Nengazen is utew mereǥen he egkeǥezam ku.
1SA 1:16 Kenè nu isipa he mezaat a he vahi. Nengemuyù e zà tenged te utew ku kegkeseeng.”
1SA 1:17 Migkaǥi si Eli te, “Hipanew kad ne kenè ke en maan meseeng. Berakat he is Megbevayà te Israel ne ibeǥey zin kenikew is ebuyuen nu kandin.”
1SA 1:18 Migkaǥi si Hana te, “Datù, selamat te ketulanged nu kedì.” Ne zutun migenat, ne migkaan en human sikandin ne mibmeupiye en is gehinawa zin.
1SA 1:19 Meselem utew zutun te sunud he andew, mid-enew si Elkana wey is tivuuk he pemilya zin ne mid-azap dan is Nengazen. Ne human dan med-ulì diyà te ubpaan dan he Rama. Ne midhulizan ni Elkana si Hana ne midtavak te Nengazen is menge pengemuyù ni Hana he ebeǥayan sikandin te anak.
1SA 1:20 Ne zutun mibmeǥingey sikandin, ne neuma is penahun ne mid-anak sikandin te maama. Migngezanan te Samuel, su ke sikandin te, “Geina te mibuyù ku sikandin diyà te Nengazen.”
1SA 1:21 Neuma is penahun he si Elkana wey is tivuuk he pemilya zin ebpemuhat sikandan diyà te Nengazen iring te ebeelan dan kada tuig. Iyan heini kes andew te kebpemuhat din te kedtuman te penaad din te Nengazen.
1SA 1:22 Piru si Hana wazà meduma. Migkeǥiyan din is esawa zin te, “Emun egkelutas en heini is batà, ne ed-uwiten ku sikandin diyà te valey te Nengazen ne idhalad ku ziyà te kandin, ne ziyè en sikandin ed-ubpà te tivuuk he untung din.”
1SA 1:23 Midtavak si Elkana te, “Beeli nu en ke hengkey is meupiya he egkesuatan nu. Kayi ke zà taman te egkelutas sikandin. Deyzey ke igkelipey te Nengazen is insaad nu kandin.” Ne mibpelintetaǥak si Hana is ed-etiman te anak din.
1SA 1:24 Hein nelutas en kes batà, mid-uwit ni Hana ziyà te valey te Nengazen diyà te Shilo. Mid-uwit daan sikandin te tudu he vaka he tetelu en he tuig, wey herina he tengà te saku, wey binu he ziyà itaǥù te lundis he teleǥuey.
1SA 1:25 Ne hein nelapè en kes baka mid-uwit dan si Samuel diyà te ki Eli.
1SA 1:26 Migkeǥiyan ni Hana si Eli te, “Datù, egketenuzan nu pa vuwa, iyan a kes bahi he midhitindeg kayi zengan is ebpengemuyù diyà te Nengazen.
1SA 1:27 Mibuyù ku heini he vatà diyà te Nengazen ne imbeǥey zin kedì is mibuyù ku.
1SA 1:28 Umbe, guntaan idhalad ku sikandin diyà te Nengazen, wey mekepenilbi sikandin te Nengazen seled te tivuuk he untung din.” Ne zutun midsimba zan is Nengazen.
1SA 2:1 Ne zutun nengemuyù si Hana, “Utew ku igkelipey is Nengazen tenged te in-awè din is igkeeled ku. Ed-engitan ku ǥuntaan is menge kuntada ku; melipayen a utew te kedluwasa zin kedì.
1SA 2:2 Wazà ebpekeiring te Nengazen su waǥas sikandin. Wazà ebpekerepeng kandin. Wazà eputà he vatu he iring te Megbevayè tew.
1SA 2:3 Wazà minsan hentei he ebpekepelavew wey ebpekepahambug su is Nengazen Megbevayà, ne wazà ebpekeeles kandin he minsan hengkey, wey ed-is-isipen din is ebeelan te menge etew.
1SA 2:4 Edèdeetan din is menge gemhanan, ne ebeǥayan din te zesen is menge meluya.
1SA 2:5 Is egkengezeyzey zengan, ne ebpesuhul su wey zan meuyag. Ne is nengevitil zengan, guntaan nengehantey en sikandan. Kes wazà med-anak dengan guntaan mid-anak te mezakel. Ne sikan is mahabet is anak neeminan.
1SA 2:6 Is Nengazen, egkehimu zin is kedhimatey wey is ked-uyag te etew. Egkehimu zin is kedsevuka zin kandan diyà te iveyaan wey kegkuwaa kandan puun dutun.
1SA 2:7 Edhimuwen din is duma he pubri, ne is duma, ibpesepian din. Ibpekevavè din is duma, wey ibpemetikang din is duma.
1SA 2:8 Ed-enawen din is menge pubri zutun te utew zan kegkeayuayu. Ibpepinuu zin sikandan duma te menge metikang is pid-etawan dan ne edhimuwen din he telehuzen. Iyan sikandin teǥiǥaked te pundasyun ne zutun din isavuk is kelibutan.
1SA 2:9 Ebentayan din is gaked din he menge metinumanen, ne is menge mezaat ne edèdeetan din. Su wazà etew he ebmezeeǥen pinaaǥi zà te kandin he ebilidad.
1SA 2:10 Id-awè din is menge etew he edsukul kandin. Ibperuǥung din is langit he tuus te kegkepeuki zin te menge kuntada zin. Su is Nengazen, edhukuman din is tivuuk he kelibutan. Tenged kandin egkehimu he gemhanan is pinilì din he hadì.”
1SA 2:11 Ne mid-ulì si Elkana wey si Hana ziyà te Rama. Piru intaǥak dan dà si Samuel wey mekepenilbi en te Nengazen he iyan egalen din wey ed-elima kandin si Eli he memumuhat.
1SA 2:12 Is dezuwa he menge anak ni Eli menge tulebung he menge etew. Wazè dan medtuman te suǥù kandan te Nengazen.
1SA 2:13 Tenged te wazè dan sunuza is menge sulunuzen mehitenged te egkezawat te menge memumuhat he ebpuun te pemuhat te menge etew. Iyan heini ebeelan dan dutun emun duen menge pemuhat: te kenè pa edheunen haazà is usa he ibpemuhat, ibpehendutun dan is menge suluǥuen dan he ed-uwit te zekelà he tinidur he tetelu is ngipen.
1SA 2:14 Ne edtiyuken dutun te suluǥuen haazà is usa zutun te seled te kuzen etawa te diniyun. Ne is egketiyuk dutun te tinidur ne iyan bahin dan te menge memumuhat. Iyan heini ebeelan dan kada ebpemuhat is menge Israilihanen diyà te Shilo.
1SA 2:15 Emun kenè pa edtutungen is tavà dutun te usa, ed-uvey haazà is menge suluǥuen dutun te etew he nemuhat ne ke sikandan te, “Beǥayi te usa is memumuhat para edtuuǥen. Kenà sikandin egkesuat te sinevawan, iyan egkesuatan din is mehilew.”
1SA 2:16 Emun egkaǥi is nemuhat he edteǥazan dèpa he ikepemuhat kes tavà te usa ne human din pa egkekuwa is egkesuatan din, iyan heini egkeǥiyen din, “Kenà egkehimu. Kinahanglan he iveǥey nu en guntaan, su emun kenà, ne ed-eǥawen ku heeyan diyà te keniyu.”
1SA 2:17 Utew heini zekelà he salà he nehimu te menge anak ni Eli he naahà te Nengazen diyà te kandan, su wazè dan tehuza is pemuhat para te Nengazen.
1SA 2:18 Dutun he timpu, is batà he si Samuel pedayun he mibpenilbi te Nengazen. Midsul-ub sikandin te ipud he linu.
1SA 2:19 Kada tuig ne ebeelan ni Hana si Samuel te pendivavew he visti, ne ed-uwiten din heini ke ebpemuhat sikandin te Nengazen duma te esawa zin, he edhimuwen dan te kada tuig.
1SA 2:20 Ne ebpenubtuvazan ni Eli si Elkana wey esawa zin he si Hana he egkaǥi te, “Berakat he pinaaǥi kayi te esawa nu, ebegayan kew te menge vatà he iyan idliwà dutun te mibuyù din hein inlikù niw iveǥey ziyà te Nengazen.” Ne zutun mid-ulì dan.
1SA 2:21 Nehizuwan te Nengazen si Hana. Nekaanak pa sikandin te menge maama he tetelu wey dezuwa he vahi. Ne si Samuel mulà, pedayun he midekelà diyà te etuvangan te Nengazen.
1SA 2:22 Meǥurang en utew si Eli. Netuenan din is langun he kenà meupiya he ed-ul-ulahan te menge anak din diyà te menge Israilihanen. Wey nezineg din daan he midhilevetan dan is menge vahi he ebpenilbi zutun te ǥemawan te Tulda he Edtelevukaayan.
1SA 2:23 Migkeǥiyan ni Eli sikandan te, “Nezineg ku ziyà te menge etew is langun he menge mezaat he vaal niw. Maan is ebpekevaal kew keniyan?
1SA 2:24 Engkezi niw heeyan, menge anak, su kenà heini meupiya is nezineg ku puun te menge etew te Nengazen.”
1SA 2:25 Mid-uman megkaǥi si Eli te, “Ke zuen etew he ebpekesalà diyà te zuma zin, egkehimu he iyan ebpeteliwazà kandan is Megbevayà; piru hentei is egkehimu he ebpeteliwazà ke ebpekesalà is etew ziyà te Nengazen?” Ne zutun wazà pemineǥa te menge anak din is lalag din tenged te nepasad en is hukum kandan te Nengazen he edhimetayan sikandan.
1SA 2:26 Mehitenged ki Samuel, midekelè en sikandin ne utew ingkelipey sikandin te Nengazen wey te menge etew.
1SA 2:27 Duen sevaha he suluǥuen te Megbevayà he mid-uvey ziyà te ki Eli he egkaǥi te, “Iyan heini lalag te Nengazen: Impesavut ku ziyà te gin-epuan niw he si Aaron wey ziyà te pemilya zin te kemulu zan pa neuripen te hadì te Ehipto.
1SA 2:28 Is langun he tribu te Israel, iyan ku mibpilì is pemilya zin he edhimuwen ku he menge memumuhat he ebpenilbi ziyà te pemuhatà, edtutung te veyewà, wey igkukumbalè dan is ipud diyà te etuvangan ku. Imbeǥey ku zaan is bahin duen te menge pemuhat pinaaǥi te hapuy he ibpemuhat te menge Israilihanen.
1SA 2:29 Guntaan, maan is egkevuten niw pa is menge pemuhat para kedì? Maan is iyan nu ibpelavi is menge anak nu kenà siak? Su ebeleǥazen nu sikandan he iyan dan ibpelambù is kandan he keugelingen dutun te menge meupiya he vahin dutun te pemuhat he ebpuun te menge etew ku he Israilihanen.
1SA 2:30 Dengan, siak is Nengazen niw he Megbevayà te Israel, midsaad a he iyan kew zà menge memumuhat he ebpekepenilbi kedì te taman te taman duma te zuma pa he menge kevuwazan te kepuun niw. Piru kenè en heeyan edtumanen guntaan, su iyan ebeǥayan ku te zengeg is edtahud kedì ne edrewakan ku mulà is mibpendezeisey kedì.
1SA 2:31 Tentenuzi nu heini, egkeuma is andew he ebpenhimetayan ku is langun he menge betan-en he menge maama te pemilya nu wey ziyà te zuma he menge kevuwazan te kepuun niw. Ed-antus kew wey kenè niw en egkeǥezaman is keuswaǥan he ibeǥey ku te zuma he menge Israilihanen. Wazè en ebmeǥurang keniyu.
1SA 2:33 Is duma he sakup te pemilya nu edtuǥutan ku he mekepedayun he ebpenilbi kedì pinaaǥi te kegkememumuhat, piru ebpekaantus pa sikandan te utew mereǥen wey kenè en egkeuǥet ne ebpematey zan.
1SA 2:34 Ne para metuusi nu he egkeulaula heini is migkaǥi ku, ebpatey is dezuwa he anak nu he si Hofni wey si Finehas te senge andew zà.
1SA 2:35 Ne ebpilì a te metazeng wey metinumanen he memumuhat he edsunud te egkesuatan ku. Ne ebeǥayan ku sikandin te menge kevuwazan he ebpenilbi te mibpilì ku he hadì taman te taman.
1SA 2:36 Ne is egkesamà te kevuwazan nu, ne ebpehizuhizu sikandan te menge kevuwazan te heini he memumuhat he veǥayi zin sikandan te selapì wey egkekaan. Edhangyù sikandan he himuwa sikandan he timbang he menge memumuhat su wey zan duen egkekaan.”
1SA 3:1 Dutun he menge andew he si Samuel ebpenilbi en te Nengazen, dizalem sikandin te kedumala ni Eli, ne mezelag dà ebpekidlalag is Nengazen, wey deisey zà is egkengelewasan.
1SA 3:2 Sevaha zutun he mezukilem, edlipezeng si Eli ziyà te ruǥu zin. Dutun he timpu kenè en utew ebpekaahà si Eli.
1SA 3:3 Ne si Samuel ziyà edliplipezeng te valey te Nengazen he zutun sikan is Kavan te Kebpekid-uyun. Is sulù te Megbevayà, wazè pa zutun evuki ne
1SA 3:4 mid-umew sikandin te Nengazen. Midtavak si Samuel te, “Hengkey, datù?”
1SA 3:5 Ne mibpelelaǥuy sikandin pehendiyà te ki Eli is mid-insà te, “Hengkey, datù, maan is ed-umawen a kenikew?” Ke si Eli te, “Wazè ku sikew umawa. Likù ke en diyan wey medlipezeng.” Ne zutun midlikù diyà te hizeǥaan din su edlipezeng.
1SA 3:6 Mid-uman en maan umawa sikandin te Nengazen, “Samuel! Samuel!” Mid-enew si Samuel ne midhendiyà te ki Eli, ke sikandin te, “Hengkey, datù, maan is ed-umawen a kenikew?” Midtavak si Eli te, “Mama, wazè ku sikew umawa, likù ke en wey med-uman medlipezeng.”
1SA 3:7 Dutun he penahun wazè pa mekilala ni Samuel is Nengazen su wazè pa meulaula is nekidlalag kandin is Nengazen.
1SA 3:8 Mid-umew sikandin umani te Nengazen te ketetelu. Mid-enew si Samuel ne midhendiyà te ki Eli is egkaǥi te, “datù, maan is ed-umawen a kenikew?” Ne zutun netuenan ni Eli he iyan ed-umew ki Samuel is Nengazen.
1SA 3:9 Ne migkeǥiyan din si Samuel te, “Likù ke en diyan wey medlipezeng, ne emun ed-umanan ke zin te ed-umew, ne keǥiyi nu te, ‘Nengazen, kaǥi kad, su siak is suluǥuen nu ebpemineg.’ ” Ne zutun midlikù si Samuel diyà te hizeǥaan din.
1SA 3:10 Midhendiyà is Nengazen te ki Samuel he midhitindeg. Ne iring ded te nehuna he mibeelan din, mid-umew zin en maan si Samuel te, “Samuel, Samuel.” Ne migkaǥi si Samuel te, “Kaǥi ka, Nengazen su ebpemineg a is suluǥuen nu.”
1SA 3:11 Migkaǥi is Nengazen te, “Timan-i nu, kenè ne egkeuǥet, duen ebeelan ku kayi te Israel. Ne is langun he ebpekezineg kayi, ne utew en egkeherati.
1SA 3:12 Emun egkeuma haazà he andew ne ebeelan ku is langun he migkaǥi ku he ebpekesuǥat te pemilya ni Eli.
1SA 3:13 Su mibpetizeenan ku sikandin he edsilutan ku is pemilya zin taman te taman tenged te mibpesagdan din is menge anak din te kebaal te salà he utew mekeeled-eled minsan netuenan din haazà.
1SA 3:14 Umbe, impenangdù ku he is salà te pemilya ni Eli taman te taman ne kenà egkepesaylu pinaaǥi te kebpemuhat te minsan hengkey he menge pemuhat.”
1SA 3:15 Nekelipezeng si Samuel taman te egkepawà, ne mibpuwasan din is gemawan te valey te Nengazen. Egkahandek si Samuel he ebpenudtul ziyà te ki Eli mehitenged te impahayag te Nengazen diyà te kandin.
1SA 3:16 Ne mid-umew zin te, “Samuel, anak.” Midtavak si Samuel, “Hengkey, datù.”
1SA 3:17 Migkaǥi si Eli te, “Hengkey is migkaǥi kenikew te Nengazen? Kenè nu i-eles kedì. Utew mereǥen is silut kenikew te Megbevayà emun kenè nu ibpenudtul is langun he migkaǥi zin kenikew.”
1SA 3:18 Ne zutun midtudtul ni Samuel is langun. Wazè din in-eles. Ke si Eli te, “Iyan sikandin kes Nengazen; is egkeisip din he meupiya, iyan ebeelan din.”
1SA 3:19 Hein dekelè en si Samuel pedayun is kegiyahi kandin te Nengazen; ne minsan hengkey is egkeǥiyen ni Samuel mibpengelinteuwan te Nengazen he metuman.
1SA 3:20 Umbe, migkilala sikandin te tivuuk he Israel puun te Dan pehendiyà te Beersheba he sevaha sikandin he ebpeneuven te Nengazen.
1SA 3:21 Ne pedayun is kebpezeyag te Nengazen ki Samuel ziyà te Shilo pinaaǥi te kebpekidlalag kandin.
1SA 4:1 Ne is menge lalag ni Samuel nezineg diyà te tivuuk he Israel. Dutun he timpu nekidtebek is menge Israilihanen te menge Filistihanen. Diyà te Ebenezer megkampu is menge Israilihanen, ne is menge Filistihanen, ne ziyè dan daan megkampu te Afek.
1SA 4:2 Ne midsurung te menge Filistihanen is menge Israilihanen ne zutun te meinit he tebek dan. Nengezaag te menge Filistihanen is menge Israilihanen; 4,000 is nepatey he menge Israilihanen.
1SA 4:3 Hein nepasad is tebek ne midlikù kes menge Israilihanen he nesamà diyà te kampu zan. Hein nekeuma zan mid-insà is menge pengulu te Israilihanen te, “Maan is mibelagad kiw te Nengazen. Maan is nezaag kiw te menge Filistihanen? Deyzey pa ke egkuwaan tew kes Kavan te Kebpekid-uyun diyà te Shilo para eduma kenitew is Nengazen ne edluwasen kiw zin dutun te menge kuntada tew.”
1SA 4:4 Umbe, midsuǥù sikandan te menge etew he ibpekuwa ziyà te Shilo kes Kavan te Kebpekid-uyun te Nengazen he Mekeǥeǥehem. Is tangeb din ne zuen dezuwa he ledawan te kirubin, ne zutun is Nengazen ed-ubpà te pid-elangan. Elin daan dutun miduma kes dezuwa he anak ni Eli he si Hofni wey si Finehas.
1SA 4:5 Hein nekeume en kes Kavan te Kebpekid-uyun dutun te kampu, nemengulahì is menge Israilihanen, ne utew mezaǥing is laǥeng dan tuus te kegkelipey zan, dutun henduen te newalwal is tanà.
1SA 4:6 Ne hein nezineg te menge Filistihanen is kulahì te menge Israilihanen, ke sikandan te, “Maan is nemengulahì kes menge Hebriyuhanen diyà te kampu zan?” Dutun te netuenan te menge Filistihanen he nekeuma kes Kavan te Nengazen dutun te kampu te menge Israilihanen,
1SA 4:7 nengahandek sikandan. Ke sikandan te, “Dilikadu kiw su nekeuma ziyà te kampu te menge Israilihanen kes menge megbevayè dan. Wazè pa heini meulaula puun pa zengan.
1SA 4:8 Kehizu tew utew! Hentei ve vuwa is ebpekeluwas kenitew zutun te mekeǥeǥehem he menge megbevayè dan? Iyan heini kes menge megbevayà he midhimatey te menge Ehiptohanen diyà te sibsivayan pinaaǥi te mibarangbarang he menge kezeetan.
1SA 4:9 Piru, ebpekevurut kiw, ne kenè kiw egkahandek para kenè kiw meuripen te menge Hebriyuhanen iring te kegkeuripena tew kandan dengan. Umbe ebpekidtebek kiw kandan!”
1SA 4:10 Umbe, nekidtebek is Filistihanen, ne nezaag dan haazà is menge Israilihanen. Utew mezakel is nemematey; 30,000 he menge Israilihanen is minatey. Ne is nengesamà he menge Israilihanen ne mibpemelaǥuy ne mibpen-ulì dan diyà te ubpaan dan.
1SA 4:11 Kenà iyan dà haazà, kekenà, naaǥew pa te menge Filistihanen kes Kavan te Kebpekid-uyun, wey nepatey kes dezuwa he anak ni Eli he si Hofni wey si Finehas.
1SA 4:12 Dutun he andew te tebek, duen sevaha he etew he nekepelaǥuy he sakup te pemilya ni Benjamin ne mibpehendiyà te Shilo. Mibindas din is kumbalè din, ne mibukbukan din is ulu zin te eliyavuk he tuus te utew mesakit is gehinawa zin.
1SA 4:13 Dutun te kebpekeuma zin diyà te Shilo, dutun si Eli is ebpimpinuu ziyà te bangkù he kilid te zalan su edtaǥad ke zuen ebpekepenudtul su igkeipeng din sikan is Kavan te Kebpekid-uyun te Megbevayà. Si Eli, ne 98 en is penuiǥen din, umbe kenè en utew ebpekaahà. Ne zutun, midtudtul zutun te etew ziyà te inged is neulaula te tebek. Nezineg haazà te menge meǥinged ne nemensineǥew zan. Nezineg haazà ni Eli ne mid-insà si Eli, “Hengkey is idsineǥew te menge etew?” Migaanggaan med-uvey haazà is etew ziyà te ki Eli.
1SA 4:16 Ke sikandin te, “Beǥu e pa he nekeuma is ebpuun diyà te tebek. Nekepelaǥuy a.” Migkaǥi si Eli te, “Hengkey ves is neulaula mamà?”
1SA 4:17 Midtavak kes etew te, “Nezaag is menge Israilihanen te menge Filistihanen ne mibpelaǥuy zan. Utew mezakel is nemematey he sundaru tew, naapil zaan kes dezuwa he menge anak nu he si Hofni wey si Finehas. Wey naaǥew zaan kes Kavan te Kebpekid-uyun te Megbevayà.”
1SA 4:18 Hein nehisgutan dutun te etew kes Kavan te Kebpekid-uyun te Megbevayà, ne nekeley-ang si Eli zutun te bangkù he mibpinuuwan din he ziyà te kilid te pultahan te inged. Ne nevadtì is lieg din te kebpekezakdak din su melambeg wey meǥurang en daan sikandin, ne segugunà sikandin mibpatey. Nehimu sikandin he pengulu te Israel seled te 40 he tuig.
1SA 4:19 Dutun he penahun ne meǥaan en ed-anak is ambey ni Eli he esawa ni Finehas. Hein nezineg din he naaǥew kes Kavan te Kebpekid-uyun te Megbevayà wey nezineg din he minatey is esawa zin wey enuǥang din he maama, segugunà mibelilit is getek din ne iyan en ked-anak din. Piru utew sikandin midreǥeni.
1SA 4:20 Ne hein nekaanak en sikandin ne edluwèluwà sikandin te gehinawa, migkeǥiyan sikandin te menge mengunguyamu te, “Pekevurut ka! Su maama is anak nu!” Piru wazè en sikandin medtavak.
1SA 4:21 Hein wazè pa sikandin mebpatey iyan inngazan din dutun te vatà is Ikabud, he ke và dà egkeǥiya, “Naawè en diyà te Israel is mekeǥeǥehem he kebpekiduma te Megbevayà te Israel.” Su ǥeina kun te naaǥew kes Kavan te Kebpekid-uyun te Megbevayà wey minatey is esawa zin wey enuǥang din he maama.
1SA 5:1 Hein naaǥew en te menge Filistihanen kes Kavan te Kebpekid-uyun te Megbevayà, mid-uwit dan puun te Ebenezer pehendiyà te Ashdod.
1SA 5:2 Ne ziyè dan itaǥù te valey he para te ed-ezapen dan he si Dagon ne zutun dan isavuk te zurug te ledawan din.
1SA 5:3 Utew pa meselem dutun te sunud he andew, naahà te menge tig-Ashdod kes ledawan ni Dagon he edlelelangkeb dutun te egkesineruwan te Kavan te Nengazen. Impehitindeg dan ne inlikù dan duen te nesevukan din.
1SA 5:4 Ne hein sunud en maan he meselem, neehè dan en maan he edlelelangkeb dutun te egkesineruwan ded dutun te Kavan te Nengazen. Ne is ulu zin wey zezuwa he velad din ne nengetamped, dutun mekesavuk te kilid te gemawan; iyan dà nesamà is lawa zin.
1SA 5:5 Umbe puun dutun, is menge memumuhat ni Dagon wey is langun he edseled dutun te simbahan dan diyà te Ashdod, kenè dan egiek duen te kilid he gemawan.
1SA 5:6 Mibpurungan siluti te Nengazen is tig-Ashdod wey zuma is menge meǥinged diyà te nekelingut he menge inged. Ne impetuvù te Nengazen diyà te lawa zan is menge levag.
1SA 5:7 Dutun te neehè dan is nengehitavù dutun te inged dan, migkaǥi zan te, “Kenà meupiya he kayi tew zà heini idtaǥù te kenitew is Kavan te Kebpekid-uyun te Megbevayà te Israel, su iyan heini hinungdan he edsilutan kiw wey si Dagon he ed-ezapen tew.”
1SA 5:8 Umbe, impetawag dan is langun he menge pengulu te Filistihanen. Ne mid-insaan sikandan te, “Ebmenmenuwen tew heini is Kavan te Kebpekid-uyun te Megbevayà te Israel?” Midtavak sikandan te, “Ed-uwiten heini ziyà te Gat.” Ne zutun mid-uwit dan pehendiyà te Gat kes Kavan te Kebpekid-uyun te Megbevayà te Israel.
1SA 5:9 Ne hein nekeume en diyà, midsilutan daan te Nengazen is menge meǥinged dutun, batà etawa meǥurang su mibpelevaǥan sikandan te Nengazen.
1SA 5:10 Ne zutun diyè dan en maan ihated te Ekron kes Kavan te Kebpekid-uyun te Megbevayà. Ne hein edseled dan en diyà te Ekron, wazà mesuat is menge etew zutun, su ke sikandan te, “Kayi zan uwita heini is Kavan te Kebpekid-uyun te Megbevayà te Israel para mengeǥerè kiw.”
1SA 5:11 Ne impetawag dan is langun he menge pengulu te menge Filistihanen ne migkeǥiyan dan te, “Ilikù niw heini is Kavan te Kebpekid-uyun te Megbevayà te Israel ziyà te kandin he lugar, su emun kenè niw idlikù ne egkengeǥerè key is meǥinged kayi.” Iyan heini hangyù dan tenged te utew zan neherati su mibpuun en medsilut is Megbevayà kandan su mezakel en is nemematey kandan.
1SA 5:12 Ne sikan is nengesamà he wazà mebpatey ne mibpenlevaǥan, ne nekeuma ziyà te langit is kebpekitavang dan.
1SA 6:1 Hein midlavey en is pitu he vulan te ked-uwita ziyà te Filistia zuen te Kavan te Nengazen,
1SA 6:2 impetawag te menge Filistihanen is menge memumuhat dan wey menge veyilan ne mid-insaan dan te, “Hengkey is ebeelan dey kayi te Kavan te Nengazen? Sembaǥi key ke ebmenmenuwen dey heini he ikeulì dey ziyà te lugar he nesevukan din.”
1SA 6:3 Midtavak sikandan te, “Emun id-ulì niw heini is Kavan te Kebpekid-uyun te Megbevayà te Israel, ne kinahanglan he ed-uwit kew te pemuhat he vayad te salà. Iyan heini paaǥi he egkengeulian kew wey egkesavut niw ke maan is edsilutan kew zin.”
1SA 6:4 Ne mid-insà kes menge Filistihanen, “Hengkey he pemuhat is ibpeuwit dey he ibayad te salè dey kandin?” Midtavak kes menge memumuhat wey menge veyilan te, “Diyun kew te lelima he vulawan he purma te levag wey lelima he vulawan he purma te rumat, su lelima is kezakel te menge pengulu tew, ne levag is kezeetan he neeǥiyan tew wey te menge pengulu tew, wey zuen daan menge rumat he mid-uwit te kezeetan kayi te nasyun tew. Ihalad niw heini su wey meveǥayi te zengeg is Megbevayà te Israel, su kela ke ed-engkezan kiw zin en te edsilut, wey is menge ed-ezapen tew, wey is nasyun tew.
1SA 6:6 Umbe, kenè niw ipemezesen is gehinawa niw iring te mid-ulaula te menge Ehiptohanen wey kes hadì dan. Wey zan en ipehipanew kes menge Israilihanen hein impaantus dan en utew te Megbevayà.
1SA 6:7 Ne guntaan, baal kew te veǥu he kerumata wey kuwa kew te zezuwa he vehiyan he vaka he wazè pa keenu mesengeni te eyuǥu. Ne sengeni niw te kerumata, piru kenè niw en ipezuma kes menge nati zan, kekenà, durengè niw heini ziyà te tudil.
1SA 6:8 Ne kuwaa niw kes Kavan te Nengazen ne isavuk niw zutun te kerumata. Ne izurug niw kes kavan he midteǥuan duen te menge vulawan he midkurtiyan, he iyan kes idlapik niw he pemuhat he vayad te salà. Ipehipanew niw kes menge vaka, ne beleǥaza niw en ke hendei ebpevayà,
1SA 6:9 piru ahaa niw zà. Emun edtekezeg he ebpehendiyà te Bet Shemesh, he sakup te tanà te menge Israilihanen, egketuenan tew he iyan is Nengazen teǥivaal te neulaula kayi te kenitew he utew mereǥen. Ne emun kenà, ne egketuenan tew he kenè bes heini vaal te Nengazen, kekenà, nehitavù dè bes.”
1SA 6:10 Ne midtuman dan haazà. Migkuwa sikandan te zezuwa he inayan he vaka ne midsengenan dan te kerumata. Ne is menge nati, ne midureng dan diyà te tudil.
1SA 6:11 In-untud dan te kerumata kes Kavan te Nengazen wey kes kavan he mid-ehukan dan duen te menge vulawan he midiyun dan he iring te menge rumat wey henduen te menge levag.
1SA 6:12 Ne impeǥenat dan haazà is menge vaka ne midtandang haazà diyà te Bet Shemesh ne wazà medsuwey te zalan, is ebpemen-engà. Ne midsunud kes menge pengulu te menge Filistihanen taman te dulunà te Bet Shemesh.
1SA 6:13 Ne zutun he penahun, ebpemenraǥun is tig-Bet Shemesh te trigu ziyà te menge suǥud. Ne hein neehè dan kes Kavan te Kebpekid-uyun, nengesuatsuat dan utew.
1SA 6:14 Hein nekeume en kes kerumata zutun te vevesukà ni Josue he tig-Bet Shemesh, ne ziyà heini medtaman te kilid he zuen duen dekelà he vatu. Migkuwa te menge kevuwazan ni Levi kes Kavan te Nengazen wey kes kavan he mid-ehukan duen te vulawan he migkurtiyan, ne in-untud dan dutun te zekelà he vatu. Ne migurey zan kes kerumata ne midhimetayan dan kes menge vaka su pemuhat he edtutungen para te Nengazen, wey zuen pa zuma he impemuhat dan.
1SA 6:16 Naahà te lelima he pengulu te menge Filistihanen haazà is mibeelan, ne nemen-ulì dan human diyà te Ekron te haazà he andew.
1SA 6:17 Haazà is lelima he ziniyun he vulawan he henduen te levag, ne impeuwit puun diyà te lelima he inged he sakup te Filistihanen: Ashdod, Gaza, Ashkelon, Gat, wey Ekron. Impeuwit dan heini para te Nengazen he pemuhat he vayad te salà.
1SA 6:18 Ne iring ded daan kes lelima he vulawan he iring te midiyun he rumat, su is kezakel zutun, ne iring te lelima he inged te Filistihanen he binerengbeng. Heini he menge inged wey is menge inged he nekepelingut kayi, ne midetuan te lelima he pengulu. Kes dekelà he vatu ziyà te vevesukà ni Josue diyà te Bet Shemesh, he mid-untuzan dan dutun te Kavan te Nengazen, kemulu pa heini ǥuntaan he menge penahun su sevaha heini he tuus te nengehitavù.
1SA 6:19 Duen 70 he tig-Bet Shemesh he midhimetayan te Megbevayà su mid-ehè dan kes seled dutun te Kavan te Nengazen. Inlalew te menge meǥinged haazà is utew mesakit he silut kandan te Nengazen.
1SA 6:20 Ne zutun nekekaǥi sikandan te, “Hentei is ebpekeetuvang te Nengazen, kes Waǥas he Megbevayà? Hendei tew vuwa ibpeuwit is Kavan te Nengazen para mekeziyù kayi te kenitew?”
1SA 6:21 Midsuǥù sikandan te etew he ibpepenudtul ziyà te tig-Kiriat Jearim he egkaǥi te, “Inlikù te menge Filistihanen kes Kavan te Nengazen. Kuwaa niw kayi wey uwita niw ziyan te keniyu.”
1SA 7:1 Migkuwa te menge tig-Kiriat Jearim kes Kavan te Nengazen ne mid-uwit dan diyà te valey ni Abinadab he ziyà te vuntud. Ne mibpilì dan sin Eleazar, he anak ni Abinadab, he iyan ibpevantey.
1SA 7:2 Neumahan te 20 he tuig diyà te Kiriat Jearim kes Kavan te Nengazen, ne zutun he menge tuig midlalew wey nemengumew te Nengazen is tivuuk he Israel he ebuyù te tavang.
1SA 7:3 Migkeǥiyan sikandan ni Samuel te, “Emun tutuu is kedlikù niw ziyà te Nengazen, itimbag niw heeyan is menge ed-ezapen niw apil heeyan is ledawan ni Ashtoret, ne pevayàbayè kew te Nengazen ne iyan dà sikandin silbiyi niw. Emun ebeelan niw heini ne edluwasen kew zin dutun te menge Filistihanen.”
1SA 7:4 Ne zutun impenimbag dan en kes ledawan ni Baal wey ni Ashtoret, ne puun dutun ne Nengazen dà is midsilbiyan dan.
1SA 7:5 Mid-uman megkaǥi si Samuel ziyà te menge Israilihanen te, “Medtiǥum kew is langun diyà te Mizpa, su ibpengemuyù ku sikiyu ziyà te Nengazen.”
1SA 7:6 Dutun te netiǥum en sikandan langun diyà te Mizpa, migkuwa zan te wahig ne in-itis dan diyà te etuvangan te Nengazen. Te haazà he andew mibpuasa zan ne mibuyù sikandan te pesaylu te menge salè he nehimu zan diyà te Nengazen. Si Samuel is nengulu te menge Israilihanen diyà te Mizpa.
1SA 7:7 Hein nezineg te menge Filistihanen he is menge Israilihanen ne midtiǥum dan diyà te Mizpa, nengandam is menge pengulu te Filistihanen su edsurung dan. Hein netudtulan is menge Israilihanen, utew zan nengahandek te menge Filistihanen.
1SA 7:8 Migkeǥiyan dan si Samuel te, “Kenè ka engked he ebpengemuyù te Nengazen he Megbevayè tew he luwasa kiw zin kayi te menge Filistihanen.”
1SA 7:9 Ne zutun migkuwa si Samuel te kerehidu he wazè pa lutasa ne midhimetayan din ne midtutung din haazà is senge vuuk he pemuhat he edtutungen para te Nengazen. Nengemuyù sikandin diyà te Nengazen su ebpekitavang para te Israel ne midtavak sikandin te Nengazen.
1SA 7:10 Ne te kemulu pa si Samuel ebpemuhat te pemuhat he edtutungen, nemekeume en is menge Filistihanen su ebpekidtebek dan te menge Israilihanen. Piru zutun he andew imperuǥung te Nengazen te utew mezaǥing ne nengahandek dan ne nekedsusuwey zan.
1SA 7:11 Ne mibpenlayas sikandan te Israilihanen ne mibpenhimetayan dan puun pa te Mizpa taman te alug te Bet Car.
1SA 7:12 Ne migkuwa si Samuel te vatu ne insavuk din diyà te pid-elangan te Mizpa wey Shen. Migngezanan din heini te Ebenezer su ke sikandin te, “Taman en guntaan is kedtevangi kenitew te Nengazen.”
1SA 7:13 Nezaag human te menge Israilihanen is menge Filistihanen, ne wazè dan en maan mekepenurung diyà te ubpaan te menge Israilihanen te uuyag pa si Samuel, su is menge Israilihanen, midtevangan sikandan te Nengazen.
1SA 7:14 Is menge inged he neteliwazà te Ekron wey Gat he naaǥew te Filistihanen ne nekelikù ded diyà te Israel. Neengked is kedtebek te menge Israilihanen wey menge Amorihanen.
1SA 7:15 Pedayun is kebpengulu ni Samuel te Israel te tivuuk he untung din.
1SA 7:16 Kada tuig, ne edlibuten din is ebpuun te Betel pehendiyà te Gilgal wey Mizpa, su ebpenguluwan din is menge Israilihanen kayi he menge lugar.
1SA 7:17 Ne ebpekepasad ne ed-ulì maan sikandin diyà te Rama, su pengulu zaan sikandin te menge etew zutun. Ne mibaal sikandin dutun te pemuhatà para te Nengazen.
1SA 8:1 Hein meǥurang en si Samuel, mibpilì din is menge anak din he egkehimu he pengulu te Israel.
1SA 8:2 Si Joel is kakey, ne si Abia is hazi. Iyan sikandan nehimu he menge pengulu ziyà te Beersheba.
1SA 8:3 Piru wazè dan sunuza is ulaula te amey zan. Edhuna ziyà te gehinawa zan is selapì, edawat dan te sipsip, wey edtuisen dan is hustu he kukuman.
1SA 8:4 Umbe, midtiǥum is langun he pengulu te Israel, ne midhendiyè dan te ki Samuel ziyà te Rama.
1SA 8:5 Ke sikandan te, “Meǥurang ke en; ne is menge anak nu ne wazè dan meiringi is meupiya he menge vaal nu. Guntaan, beǥayi key te hadì he ed-uwit kenami, iring te zuma he nasyun he zuen dan hadì.”
1SA 8:6 Dutun midmezaat is gehinawa ni Samuel te ebuyuen dan, ne zutun nengemuyù sikandin diyà te Nengazen.
1SA 8:7 Midtavak is Nengazen te pengemuyù din, ke sikandin te, “Tumana nu is egkeǥiyen dan kenikew; su kenè ka iyan mid-iniyuǥan dan, kekenà, siak.
1SA 8:8 Puun pa te kebpeǥewasa ku kandan diyà te Ehipto taman guntaan, ed-iniyuǥan e zan su iyan midsilbiyan dan is duma he menge ed-ezapen. Ne ǥuntaan iyan ded ebeelan dan kenikew.
1SA 8:9 Uya, pezumazuma kad te ebuyuen dan, piru petizeeni nu zà sikandan ke hengkey is ebeelan te hadì he edumala kandan.”
1SA 8:10 Midtudtul ni Samuel ziyà te menge etew he ebuyù te hadì diyà te kandin is langun he migkaǥi kandin te Nengazen.
1SA 8:11 Ke sikandin te, “Iyan heini ebeelan te hadì he ed-uwit keniyu: egkuwaan din is menge anak niw he maama ne edsunderuwen din. Is duma edhimuwen din he menge pereuntud te kerwahi, is duma ne iyan pereuntud te kudà, ne is duma ne iyan edhuna zutun te menge kerwahi.
1SA 8:12 Is duma kandan edhimuwen din he menge upisyal he edumala te tig-1,000 he sundaru, ne is duma 50 he sundaru. Ne is duma ne ibpeeradu te pemuleey zin wey ibpeeǥani te sebpet din, ne is duma ne ibpepandey zin te menge ǥumaan para te tebek wey zuma pa he menge gelemiten para te kerwahi.
1SA 8:13 Ne is menge anak niw he menge vahi, ne egkuwaan din he para perevaal te pehemut wey ibpepenlutù.
1SA 8:14 Egkuwaan din is pinekemeupiya he vevesukè niw, menge pemuleey niw te paras, wey is menge pemuleey niw te ulibu, ne ibeǥey zin heini te menge suluǥuen din.
1SA 8:15 Egkuwaan din is ikepulù te egkeraǥun niw he trigu wey menge paras, ne ibeǥey zin heini te menge upisyal zin wey te zuma pa he menge suluǥuen din.
1SA 8:16 Egkuwaan din daan is menge suluǥuen niw he menge maama wey menge vahi wey is pinekemeupiya he vaka niw wey menge asnu ne ziyè din egemita te kandin he terebahu.
1SA 8:17 Egkuwaan din pa is ikepulù te menge uyaǥen, ne egkehimu kew he menge uripen din.
1SA 8:18 Emun egkehitavù en heini, ebpekevuyù kew en maan te tavang te Nengazen tenged te kebpeǥesa keniyu te hadì he mibpilì niw. Ne zutun kenè kew edtevaken te Nengazen.”
1SA 8:19 Piru wazè dan pemineǥa is menge sambag ni Samuel. Ke sikandan te, “Kenà egkehimu! Egkesuatan dey he zuen hadì he ed-uwit kenami.
1SA 8:20 Para egkeiringan dey is duma he menge nasyun he zuen dan hadì su wey zuen ebmandù wey ebpengulu kenami te kebpekidtebek.”
1SA 8:21 Dutun te kegkezineǥa ni Samuel te langun he migkaǥi te menge etew, migkaǥi zin heini ziyà te Nengazen.
1SA 8:22 Ne midtavak is Nengazen kandin te, “Pezumdumahi nu is egkesuatan dan; beǥayi sikandan te hadì.” Ne migkeǥiyan ni Samuel is menge Israilihanen te, “Uya, iyan egketuman is egkesuatan niw; ulì kew en diyan te inged niw.”
1SA 9:1 Duen etew he kepuun te tribu ni Benjamin. Nekilala sikandin tenged te zekelà is ketiǥeyunan din. Iyan ngazan din si Kish, anak sikandin ni Abiel. Si Abiel ne anak ni Zeror. Si Zeror ne anak ni Becorat. Ne si Becorat anak ni Afia he kevuwazan ni Benjamin.
1SA 9:2 Heini si Kish, duen anak din he egngezanan ki Saul he vetan-en pa. Mekempet he kenakan. Diyà te Israel wazà ebpekerepeng kandin te kekempet wey wazà ebpekerepeng kandin te kelangkew; iyan sikandin kinemelengkawan diyà te Israel.
1SA 9:3 Sevaha zutun he andew, nengetazin kes menge asnu ni Kish, he amey ni Saul, ke sikandin te, “Dumaha nu is sevaha zutun te suluǥuen nu wey niw pen-ahaa kes menge asnu.”
1SA 9:4 Umbe, migenat si Saul wey kes suluǥuen is ebpen-ahà. Midhendiyè dan te vuvungan te Efraim wey ziyà te lugar he Shalisha, ne wazè dan en maahà kes menge asnu. Ne midhendiyè dan en maan te lugar he Shaalim wey te lugar te menge kevuwazan ni Benjamin, ne wazè dan en meturedu.
1SA 9:5 Ne hein nekeuma zan diyà te lugar he Zuf, migkeǥiyan ni Saul is suluǥuen din te, “Ed-ulì ki en nasì su kela ke iyan ki ikeipeng ni amà kenà kes menge asnu.”
1SA 9:6 Piru midtavak kes suluǥuen te, “Wey kan be! Henduen te zuen uvey kayi he inged he zuen dutun ed-ubpà he ebpeneuven te Megbevayà. Edtehuzen sikandin te menge etew, ne is menge egkeǥiyen din ne egkengetuman utew. Edhendiyè ki en guntaan te kandin, kela ke mepenurù ki zin ke hendei ta egketuredu kes menge asnu.”
1SA 9:7 Migkeǥiyan ni Saul kes suluǥuen din te, “Emun edhendiyè ki te kandin, hengkey ve is igkeveǥey ta kandin? Wazè en nesamà he keuyaǥan ta. Wazè te en igkeveǥey kandin.”
1SA 9:8 Midtavak kes suluǥuen din te, “Heini zed, duen kayi selapì ku. Ibeǥey ku heini ziyà te ebpeneuven te Megbevayà wey ki zin mepenurù ke hendei ta ekgeturedu kes menge asnu.”
1SA 9:9 Migkeǥiyan ni Saul sikandin te, “Meupiya utew! Kuwa ke en, edhendiyè ki te ebpeneuven.” (Te nehuna en he menge penahun te Israel, emun duen etew he egkesuat he ebpekezineg te lalag he ebpuun te Megbevayà, egkaǥi te, “Kuwa ke en, edhendiyè ki te menenagnà,” su is egngezanan guntaan te ebpeneuven ne iyan ngazan din dengan is menenagnà.) Midhendiyà si Saul wey kes suluǥuen te inged he zutun med-ubpà kes ebpeneuven te Megbevayà.
1SA 9:11 Ne hein ebpenekezeg dan en dutun te vuvungan pehendiyà te inged, duen dan nesinuǥung he menge raǥa he ebpuun dutun te inged is ebpemenekezu. Mid-insaan dan haazà is menge raǥa te, “Kayi ve kes menenagnà?”
1SA 9:12 Midtavak dan te, “Uya, kayi sikandin. Nehuna zà sikandin keniyu. Su veǥu pa utew sikandin mekeuma ziyà te inged dey para te kebpengulu te menge etew te kebpemuhat diyà te simbahan diyà te metikang he lugar. Pekeǥaan kew!
1SA 9:13 Selineuta niw sikandin te kenè pa ebpekeǥenat su ziyà egkaan. Su edteǥazan sikandin te menge etew he mid-imbitar ke ebpekeuma, su iyan sikandin ebpengumew-umew zutun te ibpemuhat ne human dan ebpemengaan. Umbe tekezeg kew en diyan su egkesaut niw pa.”
1SA 9:14 Ne zutun midtekezeg dan diyà te inged. Ne hein ebpeǥunseled dan en ne neehè dan si Samuel is ebpehendiyà te kandan he edhendutun te simbahan diyà te metikang he lugar.
1SA 9:15 Dutun te midlavey en he andew migkeǥiyan te Nengazen si Samuel te wazè pa mekeuma si Saul. Ke sikandin te,
1SA 9:16 “Keeselem te iring ded kayi he uras, duen sevaha he etew he ibpehendiyan ku he ebpuun te lugar he Benjamin. Lenahi is ulu zin he iyan tuus he iyan sikandin nepilì he pengulu te menge etew ku he Israilihanen. Iyan sikandin edlibri te menge etew ku he nengesakup te menge Filistihanen, su neehè ku is kebpekeantus dan utew, wey nezineg ku is kebuyù dan te tavang.”
1SA 9:17 Ne hein naahà ni Samuel si Saul, migkeǥiyan te Nengazen si Samuel te, “Iyan heini kes etew he migkaǥi ku kenikew. Sikandin is edumala te keet-etawan ku.”
1SA 9:18 Mid-uvey si Saul ki Samuel diyà te pultahan te inged ne mid-insaan din te, “Hendei kayi zapit is baley te menenagnà?”
1SA 9:19 Ke Samuel te, “Iyan ad menenagnà. Huna kew en diyan te simbahan diyà te metikang he lugar, su heini he andew zuma kew kedì te egkaan. Ne keeselem te meselem, egkeǥiyen ku kenikew is egkeisip nu, ne human kew ǥenat.
1SA 9:20 Mehitenged te menge asnu he tetelu en he andew is kegketazin dan, kenè ka meseeng su neehè en. Ne ǥuntaan egkeǥiyen ku kenikew he sikew wey is pemilya te amey nu, ne iyan ed-eluyen layun te menge Israilihanen he iyan egkehimu he ebpengulu kandan.”
1SA 9:21 Midtavak si Saul te, “Piru ebpuun a te tribu ni Benjamin, he iyan pinekezeisek he tribu te Israel, ne is pemilya ku ne iyan utew egkaayuayu te tribu zey. Maan is nekaǥi nu heini kedì?”
1SA 9:22 Ne hein diyè en sikandan te simbahan he ziyà te metikang he lugar, miduma ni Samuel si Saul wey kes suluǥuen din dutun te zekelà he ruǥu he zutun kes 30 he menge mibpen-imbitar. Ne zutun impepinuu zin si Saul wey kes suluǥuen din dutun te vangkù he pinuuwà te menge meǥeliyug he dungganen.
1SA 9:23 Ne migkeǥiyan ni Samuel kes peresuba te, “Uwita nu en kayi kes usa he impesivey ku kenikew.”
1SA 9:24 Ne zutun migkuwa zutun te peresuba kes buvun ne insavuk din dutun te etuvangan ni Saul. Migkeǥiyan ni Samuel si Saul te, “Sigi, kaan ke en, su impesivey ku heini para kenikew kayi he kevurunan, duma te menge etew he mibpen-imbitar ku.” Dutun migkaan si Saul duma ki Samuel te haazà he andew.
1SA 9:25 Hein midlikù dan diyà te inged puun diyà te simbahan diyà te metikang he lugar, mid-endaman ni Samuel te egkehizeǥaan si Saul ziyà te patag he atep te valey zin,
1SA 9:26 ne zutun medlipezeng si Saul. Hein meselem en, mid-umew ni Samuel si Saul ziyà te atep. Ke sikandin te, “Penines ke en, su ibpeulì ku en sikiyu.” Ne hein nekepenines en si Saul, migawas dan ki Samuel.
1SA 9:27 Hein diyè dan en te ǥawas dutun te inged, migkeǥiyan ni Samuel si Saul te, “Ipehuna nu en heeyan is suluǥuen nu su zuen pa ebitiyeraan ta meǥaan dà. Egkeǥiyen ku kenikew is migkaǥi te Megbevayà.” Umbe midhune en kes suluǥuen.
1SA 10:1 Migkuwa si Samuel te senge umuy he lana, ne in-itis din te ulu ni Saul. Neipus dutun midhezekan din si Saul ke sikandin te, “Is Nengazen iyan mibpilì kenikew he iyan ebpengulu te keet-etawan he gaked din.
1SA 10:2 Ked-awè nu guntaan kayì te kedì te heini en andew, duen igkedsinuǥung nu he dezuwa he etew uvey te leveng ni Raquel ziyà te Zelsa he dulunà te Benjamin. Egkaǥi sikandan diyà te kenikew te, ‘Neehè en kes asnu he ebpen-ahaan niw, ne is amey nu ne wazà meseeng duen, kekenà, iyan ka igkeseeng din, ne edtulung ebpenginginsà te menge etew ke hengkey is ed-ul-ulahan din wey zin maahà kes anak din?’ ”
1SA 10:3 Migkaǥi si Samuel te, “Emun ebpekeuma ka ziyà te kayu he ulayan diyà te Tabor, duen tetelu he etew he igkedsinuǥung nu he ebpehendiyà te Betel su ed-azap te Megbevayà. Is sevaha kandan ne ed-uwit te tetelu he nati te kambing, ne is ikezuwa ne ed-uwit te tetelu he supas, ne is iketelu ne ed-uwit te vinu he ziyà itaǥù te lundis he teleǥuey.
1SA 10:4 Ebpenelehuzan dan kenikew ne ebeǥayan ke zan te dezuwa he vuuk he supas, ne edewaten nu.
1SA 10:5 Ne te kebpekeuma nu ziyà te Buntud te Megbevayà, he zutun is kampu te menge Filistihanen ne zuen egkesinuǥung nu he grupu te menge ebpeneuven he edtupang puun te simbahan diyà te metikang he lugar. Edtukar sikandan te alpa, tamburin, pulalà, wey lira is ebpemenagnà.
1SA 10:6 Ne zutun, ed-ulinan ka te Mulin-ulin te Nengazen, ne ebpekaǥi ke en te kebpenagnà duma kandan, ne egkehimu ke en he veǥu en he etew.
1SA 10:7 Ne emun egketuman en heini, beeli nu en ke kengkey is meupiya, su zuma nu en is Megbevayà.
1SA 10:8 “Huna ke en kedì diyà te Gilgal. Edtelukun e zà kenikew su ebpemuhat a te pemuhat he edtutungen wey te menge pemuhat he para te meupiya he kedepità. Piru teǥazi a kenikew taman te pitu he andew taman te ebpekeuma a, su egkeǥiyen ku kenikew ke hengkey is ebeelan nu.”
1SA 10:9 Ne hein mid-awè en si Saul ziyà te ki Samuel, mibeǥu te Megbevayà si Saul. Ne kes langun he migkaǥi ni Samuel kandin ne segugunà nengetuman te haazè dà he andew.
1SA 10:10 Dutun te nekeuma si Saul wey kes suluǥuen din diyà te Gibea, midsinuǥung kandan is grupu te menge ebpeneuven ne midseled diyà te kandin is Mulin-ulin te Megbevayà ne miduma sikandin kandan is ebpenagnà.
1SA 10:11 Hein naahà sikandin dutun te menge etew he nekekilala kandin he ebpenagnà duma te menge ebpeneuven, mibpein-inseey zan, “Hengkey is neulaula te anak ni Kish? Nehimu en bes he ebpeneuven si Saul?”
1SA 10:12 Duen sevaha he etew he meǥinged dutun, midtavak te, “Kenà impurtanti is kegketueni ta te amey zin su egkehimu is minsan hentei he ebpeneuven.” Ne iyan heeyan ebpuunan te erubasa he egkaǥi te, “Ebpeneuven en bes si Saul?”
1SA 10:13 Hein neipus is kebpenagnà ni Saul, midhendiyà sikandin te simbahan he ziyà te metikang he lugar.
1SA 10:14 Ne zutun mid-insaan te anggam din si Saul wey kes suluǥuen din te, “Hendei kew ves ebpuun?” Midtavak si Saul te, “Mibpen-ehè dey is menge asnu. Hein wazè dey en maahà midhendiyè key te ki Samuel.”
1SA 10:15 Migkaǥi is anggam ni Saul te, “Tudtuli a ke hengkey is migkaǥi ni Samuel kenikew.”
1SA 10:16 Midtavak si Saul te, “Mibpesarig sikandin he egkeehè ded kes menge asnu.” Piru wazà keǥiya ni Saul ziyà te anggam din is migkaǥi ni Samuel mehitenged te kegkehimuwa kandin he hadì.
1SA 10:17 Ne mibpesuǥuan ni Samuel is menge Israilihanen diyà te Mizpa su ebpenudtulen din kandan is migkaǥi te Nengazen.
1SA 10:18 Hein diyè dan en, midtudtul ni Samuel is migkaǥi te Nengazen, kes Megbevayà te Israel: “Impeǥawas ku sikiyu is menge Israilihanen puun te Ehipto; midluwas ku sikiyu puun te menge Ehiptohanen wey te langun he ginhedian he midaagdaag keniyu.
1SA 10:19 Iyan a Megbevayè niw he midluwas keniyu te langun he ebpekekaid wey kegkerasey, piru ǥuntaan ed-iniyuǥan a keniyu. Su mibuyù kew te hadì he ebpengulu keniyu. Umbe ǥuntaan tiǥum kew kayi te edtuvangan ku he ebpesibsivayà is kada tribu wey kada sengeepuan.”
1SA 10:20 Ne zutun impeuvey ni Samuel is kada tribu te Israel, ne iyan nepilian is tribu ni Benjamin.
1SA 10:21 Impeuvey ni Samuel te etuvangan is tribu ni Benjamin he mibpesibsivayà is kada sengeepuan, ne iyan nepilì is teǥiapù ki Matri. Ne is nepilian dutun te menge grupu te menge pemilya he teǥiapù ki Marti iyan si Saul he anak ni Kish. Piru hein mibpen-ehè dan si Saul, wazè dan maahà.
1SA 10:22 Umbe, nenginginsà is menge etew ziyà te Nengazen te, “Kayi ve sikandin?” Midtavak is Nengazen, “Uya, kayi sikandin. Mid-eles dà sikandin kayi te menge uwiten.”
1SA 10:23 Ne zutun nemelelaǥuy sikandan ne migkuwa zan si Saul. Ne hein impehitindeg dan diyà te teliwazà, iyan sikandin kinemelengkawan te langun.
1SA 10:24 Umbe, migkeǥiyan ni Samuel is langun he menge etew te, “Iyan heini kes etew he mibpilì te Nengazen he iyan hadì niw. Wazà minsan sevaha kenitew he nekeiring kandin.” Ne zutun nemengulahì is menge etew he egkaǥi te, “Mebmeluǥayad is untung te hadì!”
1SA 10:25 Segugunà impesavut ni Samuel te menge etew is ketengdanan wey ketenged te hadì. Insurat din heini ziyà te midlulun he velesahan, ne ziyè din itaǥù te valey te Nengazen. Ne impeulì ni Samuel is menge etew.
1SA 10:26 Mid-ulì daan si Saul ziyà te valey zan diyà te Gibea. Midumahan sikandin te menge sundaru he mibpengelinteuwan te Megbevayà he mekezuma kandin.
1SA 10:27 Duen dutun menge etew he wazà menge pulus he ed-undaunda ki Saul. Ke sikandan te, “Ebmenmenuwen kayi he etew te kedluwas kenitew?” Wazè dan beǥayi si Saul te gasa. Piru wazè en megkaǥi si Saul.
1SA 11:1 Si Nahash he iyan hadì te menge Amunihanen, midhendiyà te inged he Jabesh Gilead duma is menge sundaru zin ne midlingutan dan su edsurungen dan. Migkaǥi ziyà te kandin is menge meǥinged dutun te, “Baal ka te kesebutan tew, ne ebpesakup key kenikew.”
1SA 11:2 Midtavak si Nahash te, “Egkehimu he ebaal a te kesebutan tew asal iyan egkesuatan ku is edluǥiten ku is kewanan he mata te kada sevaha keniyu wey mepeel-elezi is tivuuk he Israel.”
1SA 11:3 Midtavak is menge pengulu te Jabesh kandin te, “Edhangyù key he veǥayi key te timpu puun guntaan taman te pitu he andew su ibpesavut dey pa is tivuuk he Israel. Emun wazè en ebpekeuma he edluwas kenami ne ebpevayèbayè key en kenikew.”
1SA 11:4 Duen nemekeuma he menge menunudtulà diyà te Gibea, he zutun ed-ubpà si Saul. Ne hein midtudtul zan is menge lalag ni Nahash, nemenineǥew is langun he menge etew zutun.
1SA 11:5 Neserengà dutun he mid-ulì si Saul puun te pemuleey zin, midtundan din is menge vaka zin. Hein nezineg din is ebpemenineǥew mid-insà sikandin, “Hengkey ves is nehitavù? Maan is ebpemenineǥew is menge etew?” Ne zutun midtudtul te menge etew ziyà te kandin is migkaǥi te menge tig-Jabesh.
1SA 11:6 Kegkezineǥa ni Saul zutun ne segugunà sikandin mid-ulinan te Mulin-ulin te Megbevayà, wey utew sikandin nepauk.
1SA 11:7 Migkuwa sikandin te dezuwa he vaka ne mibpenggetad din. Ne impeuwit din dutun te menge menunudtulà, ne midsuǥù din sikandan he ibpehendiyà te tivuuk he tanà te Israel he ebpenudtul te menge etew, “Iyan heini egkeulaula te vaka te etew he kenà eduma ki Saul wey ki Samuel te kebpekidtebek.” Ne zutun intaǥù te Nengazen diyà te gehinawa te menge Israilihanen is kegkehendeki zan ki Saul, umbe nesevaha zan is eduma ki Samuel wey ki Saul.
1SA 11:8 Ne midtiǥum ni Saul diyà te Bezek is menge etew: 300,000 is ebpuun te Israel, ne 30,000 is ebpuun te Juda.
1SA 11:9 Migkeǥiyan dan kes menge menunudtulà diyà te Jabesh Gilead te, “Keǥiyi niw is menge etew ziyan he keeselem te meudtu ne egkeluwas sikandan.” Hein nezineg te menge zuma zan haazà is tudtul te menge menunudtulà ne utew zan nengelipey.
1SA 11:10 Migkeǥiyan dan is menge Amunihanen te, “Keeselem ne ebpevayèbayè key en keniyu, minsan hengkey is ebeelan niw kenami ne veeli niw en.”
1SA 11:11 Meǥaan en egkepawà dutun te sunud he andew, ne mibahinbahin ni Saul is menge sakup din te tetelu he grupu. Ne hein utew pa meselem dutun, midsurung dan is kampu te menge Amunihanen ne mibpenhimetayan dan taman te meudtu. Is wazà mepatey kandan nemelaǥuy he tigselimbaha.
1SA 11:12 Hein nepasad is tebek, migkeǥiyan te menge Israilihanen si Samuel te, “Hentei menge etawa kes egkaǥi te kenà engayan he egkehimu he hadì tew si Saul? Uwita niw kayi su edhimetayan dey sikandan.”
1SA 11:13 Piru migkaǥi si Saul te, “Wazà etew he edhimetayan guntaan, su guntaan midluwas te Nengazen is Israel.”
1SA 11:14 Ne zutun migkeǥiyan ni Samuel is menge etew te, “Kuwa kew en, edhendiyè kiw te Gilgal su id-uman tew ibpesavut he si Saul iyan nehimu he hadì tew.”
1SA 11:15 Umbe midhendiyè dan langun te Gilgal ne impekilala zan diyà te etuvangan te Nengazen he si Saul nehimu en he hadì. Ne nemuhat sikandan dutun te pemuhat he para te meupiya he kedepità, wey midlipeylipey zan langun.
1SA 12:1 Migkeǥiyan ni Samuel is langun he Israilihanen te, “Midtuman ku is mibuyù niw kedì; mibeǥayan ku sikiyu te hadì he iyan edumala keniyu.
1SA 12:2 Guntaan duen niw en hadì he ebpengulu keniyu. Siak, nehimu a he pengulu niw puun pa te betan-en e pa taman guntaan piru meǥurang ad su uvanen e en, ne guntaan, duma niw en daan is menge anak ku he maama.
1SA 12:3 Kayi a ǥuntaan te etuvangan niw, emun duen ingkesilag niw kedì, ne keǥiya niw kedì guntaan kayi te etuvangan te Nengazen wey te hadì he mibpilì din. Duen ku ve mibpeǥespeǥes keniyu te kegkuwaa ku te vaka wey ke asnu ziyà te minsan hentei keniyu? Duen ku ve midlimbungan keniyu etawa midlupiglupiǥ? Wazè ku ve ikula is hustu he kukuman su mibpesuhul a? Emun duen ebpekepenistiǥus he zuen ku neveelan kayi ziyà te minsan hentei keniyu, ne ebeyazan ku heeyan.”
1SA 12:4 Midtavak is menge etew te, “Wazè key kenikew limbungi wey pegpeǥesa. Wazè nu migkuwa ziyà te minsan hentei.”
1SA 12:5 Migkaǥi si Samuel ziyà te kandan te, “Te ǥuntaan he andew ebpekepenistiǥus is Nengazen wey is hadì he mibpilì din he wazè niw egkekaǥi he sayep ku.” Migkaǥi is menge etew te, “Uya, iyan netau is Nengazen.”
1SA 12:6 Mid-uman megkaǥi si Samuel te, “Is Nengazen, iyan mibpilì ki Moises wey ki Aaron he nehimu he iyan pengulu te kepuun niw, wey sikandin is mibpeǥawas kandan diyà te Ehipto.
1SA 12:7 Guntaan, kenè kew awà diyà te etuvangan te Nengazen he iyan is nehitindeǥan niw ǥuntaan, su idsumbung ku sikiyu. Ibpetentenuzan ku keniyu is menge keupiyaanan he mibeelan te Nengazen diyà te keniyu wey menge kepuun niw.
1SA 12:8 “Hein diyè pa te Ehipto is menge kevuwazan ni Jacob, mibuyù dan te penavang te Nengazen, ne midsuǥù te Nengazen si Moises wey si Aaron he iyan mibpeǥawas kandan diyà te Ehipto ne iyan miduma kandan kayi he tanà.
1SA 12:9 Piru midlipatan dan is Nengazen he iyan Megbevayè dan, umbe paaǥi te Nengazen is kegkezeeǥa kandan ni Sisera he peremandar te sundaru he tig-Hazor, wey te Filistihanen wey te hadì te Moab.
1SA 12:10 Mibuyù dan te tavang diyà te Nengazen. Ke sikandan te, ‘Nekesalè key, Nengazen. Mibelaǥad dey sikew su iyan mid-azap dey is ledawan ni Baal wey ni Ashtoret. Piru ǥuntaan, luwasa key puun te gehem te menge kuntada zey, ne ed-ezapen dey sikew.’
1SA 12:11 Ne midsuǥù te Nengazen si Gideon, si Barak, si Jefta wey siak, su midluwas dey sikiyu puun te kedsekupa keniyu te menge kuntada niw kayi te nekelingut, umbe guntaan meupiyè en is ked-ubpè niw.
1SA 12:12 Piru hein edsurungen kew ni Nahash he hadì te menge Amunihanen, mibuyù kew kedì te hadì he edumala keniyu, minsan pa te zuen en Nengazen he iyan Megbevayà, he iyan hadì niw.
1SA 12:13 Guntaan, heini en is hadì he mibpilì niw. Mibuyù niw sikandin, ne imbeǥey sikandin keniyu te Nengazen.
1SA 12:14 Sikiyu wey is hadì niw, wazà minsan hengkey he ebpekekaid keniyu, emun edtahud kew te Nengazen he iyan Megbevayè niw wey edsunud kew te menge suǥù din.
1SA 12:15 Piru emun kenè kew edsunud te Nengazen, ne kenè niw edtumanen is menge suǥù din, ne edsilutan kew zin iring ded te mibeelan din te kepuun niw.
1SA 12:16 “Taǥad kew zà kayi; ahaa niw is egkein-inuwan he ebeelan te Nengazen, kayi te etuvangan niw.
1SA 12:17 Kenè be gulavung man heini he timpu is tiraǥun te trigu? Piru edhengyuen ku is Nengazen he iperuǥung din wey ipeuzan din. Ne zutun egkeisip-isip niw he mezaat bes diyà te etuvangan te Nengazen haazà is kebuyù niw te hadì.”
1SA 12:18 Ne zutun mibuyù si Samuel ziyà te Nengazen, te haazà he andew, imperuǥung wey impeuzan te Nengazen. Nengahandek dutun is menge etew te Nengazen wey ki Samuel.
1SA 12:19 Migkeǥiyan dan si Samuel te, “Edhangyù key kenikew he, pengemuyù ka ziyà te Nengazen he Megbevayè nu he kenè key pezem mebpematey, su neumanan dà is menge salè dey te kebuyù dey te hadì.”
1SA 12:20 Midtavak si Samuel te, “Kenè kew mahandek. Minsan pa te nekevaal kew te kenà meupiya, kenè niw iniyuǥi is Nengazen, kekenà, silbiyi niw sikandin te tivuuk he gehinawa niw.
1SA 12:21 Kenè kew penilbi te menge ed-ezapen he wazè dan pulus. Su kenà heini ebpekeluwas wey ebpeketavang keniyu.
1SA 12:22 Kenè kew ed-iniyuǥan te Nengazen, su kenè din egkesuatan he mepeel-elezi is ngazan din. Wey ingkelipey zin utew is kegkehimuwa zin keniyu he menge sakup din.
1SA 12:23 “Emun mehitenged kediey, layun ku sikiyu ibpengemuyù diyà te Nengazen, su emun kenè ku heini ebeelan ne ebpekesalà a ziyà te Nengazen. Ne ebpenuruen ku sikiyu te kebpengungubpaan he meupiya wey hustu.
1SA 12:24 Kinahanglan he tehuza niw utew is Nengazen wey silbiyi niw te hustu pinaaǥi te tivuuk he gehinawa niw. Wey tentenuzi niw is egkein-inuwan he mibeelan din keniyu.
1SA 12:25 Emun ebpedayun kew he ebaal te salà, sikiyu wey is hadì niw ne egkezeetan.”
1SA 13:1 Mibpenuiǥen te 30 si Saul he nehimu sikandin he hadì te Israel, ne midhadì sikandin seled te 42 he tuig.
1SA 13:2 Ne mibpilì si Saul te 3,000 he menge maama te Israel he para ebpekidtebek te menge Filistihanen. Ne is duma he wazà mepilì ne impemeulì din. Ne miduma zin dutun is 2,000 ziyà te Micmash wey ziyà te vuntud te Betel, ne is 1,000 ne impezuma zin te anak din he si Jonatan diyà te Gibea he sakup te Benjamin.
1SA 13:3 Ne zutun midsurung ni Jonatan is kampu te menge Filistihanen diyà te Gibea, ne nezineg heini te zuma he menge Filistihanen. Umbe mibmandar si Saul te ipezaǥing is menge budyung te tivuuk he Israel para maandam is menge Israilihanen para te tebek.
1SA 13:4 Nezineg te menge Israilihanen he utew nengepauk is menge Filistihanen te kedsurunga ni Saul te kampu zan. Umbe midtiǥum ni Samuel is menge Israilihanen diyà te Gilgal duma ki Saul.
1SA 13:5 Nengandam is menge Filistihanen te kebpekidtebek te Israilihanen. Duen dan 3,000 he kerwahi, 6,000 he menge pereuntud te kudà, wey utew mezakel he menge sundaru, su iring dan te pantad diyà te veyvey te zaǥat. Midhendiyè dan te Micmash, he zapit te edsilaan te Bet Aven, ne ziyè dan megkampu.
1SA 13:6 Ne hein naahà te menge Israilihanen he dilikadu zan, ne nen-eles dan diyà te menge surung, wey ziyà te menge budsi, wey ziyà te menge nekesungkarub he menge vatu, wey ziyà te menge kalut.
1SA 13:7 Ne is duma kandan ne midlayun te Wahig he Jordan, ne nemelaǥuy zan diyà te Gad wey ziyà te Gilead. Ne si Saul mulà, ne mibpelintetaǥak diyà te Gilgal, ne ebpengerkeren en te kegkahandek is menge zuma zin dutun.
1SA 13:8 Midteǥazan ni Saul si Samuel ziyà te Gilgal seled te pitu he andew he iyan insaad ni Samuel kandin, piru wazà mekeuma si Samuel. Ne zutun naahà ni Saul he egkenaney egketerini is kahabet te menge zuma zin su ebpemelaǥuy,
1SA 13:9 ke sikandin te, “Uwita niw kayi te kediey sikan is pemuhat he edtutungen wey sikan is pemuhat he para te meupiya he kedepità.” Ne impemuhat ni Saul zutun kes pemuhat he edtutungen.
1SA 13:10 Hein egkepasad en dutun is kebpemuhat din ne nekeuma si Samuel. Midliǥawang si Saul ne migelǥelawan din,
1SA 13:11 piru mid-insà si Samuel te, “Hengkey is mibeelan nu?” Midtavak si Saul te, “Neehè ku he egkenaney en egketerini is kahabet te menge etew su ebpemelaǥuy, wey wazè ka mekeuma zuen te midtendek nu he uras, ne is menge Filistihanen he nekaandam dan en te kebpekidtebek diyà te Micmash su midtiǥum dan en.
1SA 13:12 Neisip ku he kela ke surunga key en te menge Filistihanen kayi te Gilgal ne wazè key pa mekepemuhat diyà te Nengazen para te kebuyù te tavang din, umbe nepeǥes ad te kebpemuhat te pemuhat he edtutungen.”
1SA 13:13 Migkaǥi si Samuel te, “Kelelelungan is mibeelan nu. Wazè nu tumana is insuǥù kenikew te Nengazen he iyan Megbevayè nu he intelaan din kenikew. Emun midtuman nu pezem, ne is menge kevuwazan nu ne iyan ebpedayun he edhadì te Israel.
1SA 13:14 Piru kenè en heeyan egkehitavù, su zuen en naahà te Nengazen he etew he ebpemineg kandin, wey iyan edhimuwen din he ebpengulu te keet-etawan din tenged te wazè nu tumana is suǥù din.”
1SA 13:15 Ne zutun migenat si Samuel puun te Gilgal ne mibpehendiyà te Gibea he sakup te Benjamin. Mibilang ni Saul is nengesamà he menge etew zin; menge 600 dà langun.
1SA 13:16 Migkampu si Saul wey is anak din he si Jonatan wey is menge sakup dan diyà te Gibea he sakup te Benjamin, ne is menge Filistihanen daan, ne migkampu zan diyà te Micmash.
1SA 13:17 Tetelu he grupu is menge Filistihanen he midsurung, is sevaha he grupu ziyà mebayà te Ofra, he tanà te Shual.
1SA 13:18 Is ikezuwa ne ziyà mebayà te Bet Horon, ne is iketelu ne ziyà mebayà te dulunà he egkepantew ta is suǥud-suǥud te Zeboim he zapit te sibsivayan.
1SA 13:19 (Dutun he timpu, wazà Israilihanen he metau he ebpenalsal. Kenà egkesuat is menge Filistihanen he zuen Israilihanen he egketau ebpenalsal su kela ke mebpemaal zan daan te menge ispada wey menge vangkew.
1SA 13:20 Umbe, edhendiyà is menge Israilihanen te menge Filistihanen su egkemengaan dan is punta te eradu zan, menge piku, wasey, wey menge garab.
1SA 13:21 Mahal is kebpevayad kandan. Is bayad te kebpekemanga zan te punta te eradu etawa piku, dezuwa he vuuk he pelata. Ne is bayad te kebpekemanga zan te wasey etawa kebpepurung te gelemiten he para te uyaǥen ne sevaha he selapì.)
1SA 13:22 Umbe, te timpu te tebek, wazà minsan sevaha he ispada wey bangkew te menge Israilihanen gawas ki Saul wey ki Jonatan.
1SA 13:23 Midsuǥù is menge Filistihanen te menge sundaru he ibpevantey te zalan diyà te Micmash.
1SA 14:1 Ne sevaha he andew, migkeǥiyan ni Jonatan kes betan-en he tig-uwit te ǥumaan din te, “Hengkayi ke en, su edhendiyè ki te bentayà te menge Filistihanen su ebpeniid ki.” Piru wazè din ipetukew is amey zin te mibeelan din.
1SA 14:2 Ne te haazà he andew diyà si Saul te sihung te kayu he pumigranata ziyà te Migron, te dulunà te Gibea. Duma is 600 he menge sakup din.
1SA 14:3 Sevaha zutun te sakup din si Ahia he memumuhat, he migkukumbalà te ipud. Si Ahia anak ni Ahitub, he suled ni Ikabud. Si Ahitub, anak ni Finehas. Si Finehas, anak ni Eli he memumuhat dengan te Nengazen diyà te Shilo. Wazà netau te kegenat ni Jonatan.
1SA 14:4 Dutun te zalan he ibayà ni Jonatan pehendiyà te bentayà te menge Filistihanen ne kelendiǥan is pesiziveluyà; is divaluy, ne egngezanan te Bozez, ne is divaluy, ne egngezanan te Sene.
1SA 14:5 Is divaluy zutun he zempilas, ne zapit te zizaya dehipag te Micmash, ne is divaluy he zapit te zivavà, dehipag te Geba.
1SA 14:6 Migkeǥiyan ni Jonatan kes tig-uwit te ǥumaan din te, “Hengkayi ke en, ebeyaan ta is kampu te menge etew he wazà mekekilala te Megbevayà. Kela ke edtevangan ki te Nengazen, su wazà ebpekevelavag kandin emun edhimuwen din he mekezaag is etew, mezakel man wey ke deisey.”
1SA 14:7 Midtavak haazà is tig-uwit te ǥumaan din te, “Beeli nu is egkesuatan nu; duma a kenikew minsan hengkey is egkehitavù.”
1SA 14:8 Migkaǥi si Jonatan te, “Kuwa ke en, edhendiyè ki su ebpeehè ki kandan.
1SA 14:9 Emun egkaǥi zan te teǥazi key su ebpekidtebek dan, kenè ki en edtekezeg, kekenà, edteǥazan ta.
1SA 14:10 Piru emun egkaǥi zan te iyan ki edtekezeg, edtekezeǥan ta sikandan, su iyan tuus haazà he ibpezaag te Nengazen sikandan kenita.”
1SA 14:11 Hein mibpeehè dan is dezuwa te menge Filistihanen, mid-undaunda zà sikandan te menge Filistihanen he egkaǥi te, “Ahaa niw man is menge Hebriyuhanen! Midliǥawang dan en dutun te budsi he ed-elesan dan.”
1SA 14:12 Ne zutun migkulahì dan si Jonatan wey kes sineriǥan din te gumaan, “Tekezeg kew kayi te kenami, su zuen ibpenurù dey keniyu!” Migkeǥiyan ni Jonatan kes tig-uwit te gumaan din te, “Sunud ka kedì su siguradu he ibpezaag en te Nengazen sikandan te Israel.”
1SA 14:13 Mibpenanap si Jonatan ne edsunud kandin kes tig-uwit te ǥumaan din he edtekezeg. Ne mibpenhimetayan din kes menge Filistihanen, ne iyan daan mibeelan te tig-uwit te ǥumaan din.
1SA 14:14 Ne te nehuna he kedsurung dan, ne 20 is nepatey zan he Filistihanen dutun te lugar he tengà he hiktarya is keluag din.
1SA 14:15 Utew nengahandek is menge Filistihanen sikan is dutun te kampu, diyà te vevesukà, diyà te bentayà, wey minsan sikan is nenurung. Ne zutun midlinug, ne utew zan dutun nengahandek.
1SA 14:16 Diyà te Gibea, he sakup te tanà he Benjamin, naahà te menge bantey ni Saul is menge sundaru te menge Filistihanen, ebpemelaǥuy minsan hendei zà ebpekepevayà.
1SA 14:17 Migkeǥiyan ni Saul is menge sakup din te, “Tiǥuma niw is menge sundaru wey ahaa niw ke hentei is naawà.” Netuenan dan dutun he si Jonatan wey kes tig-uwit te ǥumaan din is naawà dutun.
1SA 14:18 Migkeǥiyan ni Saul si Ahia te, “Uwita kayi kes Kavan te Kebpekid-uyun te Megbevayà.”
1SA 14:19 Ne te kemulu ebpekidlalag si Saul zutun te memumuhat mid-iseg is keǥurub diyà te kampu te menge Filistihanen. Umbe migkeǥiyan ni Saul kes memumuhat te, “Kenè nu en insai is Megbevayà.”
1SA 14:20 Ne zutun midtiǥum ni Saul is menge sakup din, ne migenat dan is ebpekidtebek. Neehè dan is menge Filistihanen he egkegurigew su mid-uuney zan mebpehimhimetayà te ispada.
1SA 14:21 Is menge Hebriyuhanen he midtampu ziyà te menge Filistihanen he miduma kandan ne ziyè en maan medtampu te ki Saul wey ki Jonatan wey te zuma pa he menge Israilihanen.
1SA 14:22 Is menge Israilihanen he nemen-eles diyà te vuvungan te Efraim nezineg dan he nemelaǥuy en is menge Filistihanen, ne mid-apil en sikandan he ebpendal-as te menge Filistihanen.
1SA 14:23 Ne zutun nekeume en diyà te Bet Aven is edtebek. Mibpengelinteuwan te Nengazen he mekezaag is menge Israilihanen.
1SA 14:24 Haazà he andew, mibpengguyaan is menge Israilihanen te kegkevitil su midsesapà si Saul he egkagi te, “Edrewakan is minsan hentei he egkaan te kenè pa ebmezukilem, te kenè e pa ebpekevales te menge kuntada ku.” Umbe wazà minsan hentei he migkaan kandan.
1SA 14:25 Ne is langun he menge sundaru ne nemenhendiyà te ketelunan, ne zuen neehè dan he teneb he edtiǥis diyà te tanà. Piru wazà migkaan kandan dutun tenged te nahandek dan te sapà.
1SA 14:27 Piru wazà metueni ni Jonatan is sapà te amey zin he engayan he edtumanen te menge etew. Umbe intiyuk din is purù te tuked din dutun te teneb ne migkaan sikandin, ne mibmeupiya is gehinawa zin.
1SA 14:28 Migkeǥiyan sikandin te sevaha zutun te menge sundaru te, “Kenà egkehimu he egkaan kiw su midsesapà is amey nu he edrewakan is minsan hentei he egkaan guntaan he andew. Umbe ebmemeǥuyà is menge etew.”
1SA 14:29 Migkaǥi si Jonatan te, “Kenà meupiya is ebeelan te amey ku kayi te nasyun. Ahaa niw man, utew a nekeuhang te nekeǥezam a te deisey zà he teneb.
1SA 14:30 Edhuna pa pezem he meupiya is kegezamgezam tew ke migkaan kiw zutun te nekuwa tew puun dutun te menge kuntada tew, wey mezakel pa utew is egkepatey tew he menge Filistihanen.”
1SA 14:31 Dutun he andew is menge Israilihanen, te nezaag dan en is menge Filistihanen puun te Micmash taman te Ayalon, nengeveley sikandan wey nengevitil utew.
1SA 14:32 Umbe, egkengezegdeǥusu zan is ebpemenguwa te nengaaǥew zan he menge kerehidu wey menge vaka, ne midlapè dan haazà, migkaan dan is usa he zuen pa zutun lengesa.
1SA 14:33 Duen sevaha zutun he midsumbung ki Saul, “Ahaa nu man mibaal is menge etew te salà diyà te Nengazen pinaaǥi te kegkaan te usa he zuen pa lengesa.” Migkaǥi si Saul te, “Menge limbungan! Ililid niw kayi te uvey ku heeyan is dekelà he vatu.
1SA 14:34 Ne beyai niw is menge etew ne keǥiyi niw te med-uwit is uman sevaha kandan te vaka wey kerehidu, ne lepaa zan kayi wey keena zan. Ne keǥiya niw kandan he kenè dan mebaal te salà diyà te Nengazen pinaaǥi te kegkaan te usa he zuen din pa lengesa.” Umbe te haazà he kezukileman mid-uwit is kada sevaha te kandin he vaka ziyà te ki Saul ne midlapè dan dutun.
1SA 14:35 Ne zutun mibaal si Saul te pemuhatà para te Nengazen. Iyan haazà nehuna he pemuhatà he mibeelan din.
1SA 14:36 Migkaǥi si Saul te, “Edsurungen tew ǥuntaan te mezukilem is menge Filistihanen. Ebpenhimetayan tew sikandan langun wey ebpenguwaan tew is menge azen dan taman te egkepawà.” Midtavak is menge etew te, “Beeli nu ke hengkey is meupiya.” Piru migkaǥi is memumuhat te, “Ed-insaan te pa is Megbevayà mehitenged keniyan.”
1SA 14:37 Umbe, mibpekisayud si Saul ziyà te Megbevayà te, “Edsurungen dey ve is menge Filistihanen? Ibpezaag nu en be kenami sikandan?” Iyan, wazà medtavak is Megbevayà te haazà he andew.
1SA 14:38 Ne zutun migkeǥiyan ni Saul is menge pengulu te menge Israilihanen te, “Uvey kew kayi, su wey tew metueni ke hengkey he salà is neveelan tew te heini he andew.
1SA 14:39 Idsaad ku te uuyag he Nengazen he iyan midluwas te menge Israilihanen, he is ebpekesalà ne edhimetayan, minsan si Jonatan he anak ku.” Ne zutun wazà minsan hentei he midtavak.
1SA 14:40 Migkeǥiyan ni Saul is langun he Israilihanen te, “Hitindeg kew keniyan, wey is anak ku he si Jonatan ne kayi edhitindeg.” Ne mibpemineg is menge etew.
1SA 14:41 Ne nengemuyù si Saul. Ke sikandin te, “Nengazen he Megbevayà te Israel, petueni nu kenami ke hentei is nekesalà.” Ne pinaaǥi te ripa, si Jonatan wey si Saul is nekesalà ne kenà iyan is menge etew.
1SA 14:42 Ne migkaǥi si Saul te, “Ripahi niw ke hentei kenami ki Jonatan is nekesalà.” Ne is neripahan ne iyan si Jonatan.
1SA 14:43 Ne migkeǥiyan ni Saul si Jonatan te, “Hengkey ves is mibeelan nu?” Midtavak si Jonatan te, “Intiyuk ku is purù te tuked ku zuen te teneb ne migkaan a te deisey zà. Ne, kinahanglan buwa he edhimetayan a?”
1SA 14:44 Midtavak si Saul te, “Uya! Su emun kenè ku sikew ebpehimetayan, deyzey pezem ke iyan ad edsilutan te Megbevayà te utew mereǥen.”
1SA 14:45 Piru migkaǥi is menge etew ziyà te ki Saul te, “Si Jonatan is nekeveǥey te kezeeǥan tew, ne ǥuntaan edhimetayan tew sikandin? Kenà egkehimu! Idsesapè dey ziyà te uuyag he Nengazen he kenà sikandin ebmenuwen, su is Megbevayà is midtavang te mibeelan din guntaan.” Umbe wazà himetayi si Jonatan, su midluwas sikandin te menge etew.
1SA 14:46 Ne si Saul wazè en mebpedayun te kedal-as te menge Filistihanen, ne midlikù sikandan diyà te lugar zan.
1SA 14:47 Hein kedhadì ni Saul te Israel, mibpekidtebek sikandin te nekelingut kandin he menge kuntada zin. Iyan heini menge kuntada zin: is menge tig-Moab, menge tig-Ammon, menge tig-Edom, is menge hadì diyà te Zoba, wey is menge tig-Filistia. Is minsan hentei he kuntada zin ne egkezaag din.
1SA 14:48 Mevurut sikandin he ebpekidtebek, wey nezaag din daan is menge Amalikanhen. Te heini he paaǥi midluwas din is menge Israilihanen puun te gehem te langun he menge midsurung kandan wey te mibpen-aǥew te menge azen dan.
1SA 14:49 Is menge anak he maama ni Saul iyan si Jonatan, si Ishvi wey si Malkishua. Ne is menge anak din he menge vahi iyan si Merab he iyan kakey, ne si Mical, is hazi.
1SA 14:50 Is esawa ni Saul iyan si Ahinoam, he anak ni Ahimaaz. Is peremandar te menge sundaru zin iyan is id-aǥew zin he si Abner, he anak te anggam din he si Ner.
1SA 14:51 Is amey ni Saul he si Kish wey is amey ni Abner he si Ner ne menge anak ni Abiel.
1SA 14:52 Layun dà edtebek is menge Israilihanen wey menge Filistihanen seled te kedhadì ni Saul. Ne emun duen egkeehè din he mevurut wey mezesen he etew edhimuwen din he sundaru.
1SA 15:1 Migkeǥiyan ni Samuel si Saul te, “Iyan a zengan midsuǥù te Nengazen te kebpetiǥisi te lana ziyà te kenikew he tuus te mibpilì ka iyan he hadì te keet-etawan din he menge Israilihanen. Umbe pemineǥa nu heini is lalag te Nengazen he Mekeǥeǥehem:
1SA 15:2 ‘Edsilutan ku is menge Amalikanhen tenged te kedsurunga zan te menge Israilihanen te kebpuun dan diyà te Ehipto.
1SA 15:3 Umbe ǥuntaan, surunga niw is Amalikanhen! Dezeeti niw is langun he zutun te kandan. Penhimetayi is menge maama zan, menge vahi, menge vatà, minsan is edsusu pa, apil is menge vaka, kerehidu, kemilyu, wey asnu.’ ”
1SA 15:4 Umbe, mibpemesuǥuan ni Saul is menge sundaru te Telaim. Duen 200,000 he menge sundaru he netiǥum, wey zuen 10,000 zaan he ebpuun te Juda.
1SA 15:5 Ne midhendiyà ensi Saul te inged te Amalek, ne ziyè dan te zal-ug is ed-ayan.
1SA 15:6 Mibpeuwit si Saul te lalag diyà te menge Kinhanen te, “Genat kew! Ewai niw heeyan is menge Amalikanhen para kenè ku sikiyu ikeapil te edhimatey duma kandan, su mid-uǥupan niw is menge Israilihanen te kegawas dan puun te Ehipto.” Ne zutun mibpekeziyù is menge Kinhanen.
1SA 15:7 Ne midsurung eni Saul is menge Amalikanhen puun te Havila taman te Shur, he zapit te edsilaan te Ehipto.
1SA 15:8 Nengepatey zan is langun he menge Amalikanhen, gawas ki Agag he hadì. Wazè dan mulà himetayi piru mibihag dan dà. Wazè dan daan penhimetayi is kerehidu he meupiya is lawa zin wey is menge vaka, minsan is menge nati. Is langun he meupiya ne wazè dan himetayi, iyan dan dà midhimetayan kes kanà memeupiya wey kenè en egkepulusan.
1SA 15:10 Dutun he timpu migkeǥiyan te Nengazen si Samuel te,
1SA 15:11 “Mibesulan ku is kedhimuwa ku ki Saul he hadì, tenged te mid-iniyuǥan e zin ne wazè din daan tumana is suǥù ku.” Hein nezineg haazà ni Samuel, utew sikandin nepauk, umbe midhangyù sikandin diyà te Nengazen te tivuuk he kezukileman.
1SA 15:12 Meselem utew zutun te sunud he andew, migenat sikandin is ebpekidhinguma ki Saul. Piru nezineg din te, “Midhendiyà si Saul te Carmel su ibpehitindeg din is ledawan he para mevantug sikandin, ne nepasad ne midlaus sikandin diyà te Gilgal.”
1SA 15:13 Mibeyaan ni Samuel si Saul. Ne hein neked-ehè dan, migkeǥiyan ni Saul te, “Deyzey ke tuvazi ka te Nengazen! Su midtuman ku is menge suǥù din.”
1SA 15:14 Midtavak si Samuel te, “Emun tutuu he midtuman nu is suǥù te Nengazen, ne maan is duen ku egkezineg he menge vaka wey kerehidu he ed-engà?”
1SA 15:15 Midtavak si Saul te, “Menge vaka wey kerehidu he pinekemeupiya he mid-uwit te menge sundaru he ebpuun te Amalikanhen. Wazè dan himetayi su ibpemuhat dan diyà te Nengazen he iyan Megbevayè nu, piru is duma midpenhimetayan dey emina.”
1SA 15:16 Midtavak si Samuel te, “Hustu en! Edtudtulan ku sikew ke hengkey is migkaǥi te Nengazen kedì geina he mezukilem.” Midtavak si Saul te, “Tudtuli a.”
1SA 15:17 Migkaǥi si Samuel te, “Minsan mid-isip nu zengan is keugelingen nu he egkaayuayu, mibpilì ka ǥihapun te Nengazen he egkehimu he hadì te mge tribu te Israel.
1SA 15:18 Wey midsuǥù ke zin. Ke sikandin te, ‘Purungi nu zèdeeti is menge Amalikanhen, is mekesesalà he menge etew. Tebeka nu sikandan taman te egkeamin sikandan he ebpematey.’
1SA 15:19 Piru maan is wazè nu pezumdumahi is Nengazen? Maan is mibpehimulusan niw te ebpenguwa is menge azen dan? Maan is mibeelan nu heini is mezaat he vaal ziyà te edtuvangan te Nengazen?”
1SA 15:20 Midtavak si Saul te, “Piru mibpezumdumahan ku is Nengazen. Mibeelan ku is mibpeveelan din kedì. Mibihag ku si Agag he hadì te menge Amalikanhen, ne midhimetayan ku is langun he sakup din.
1SA 15:21 Piru mid-uwit is menge sundaru ku te pinekemeupiya he menge kerehidu wey menge vaka he edhimetayan en daan pezem. Mid-uwit kayi te Gilgal para ibpemuhat diyà te Nengazen he Megbevayè nu.”
1SA 15:22 Midtavak si Samuel te, “Igkelipey ves te Nengazen is kebpemuhat niw kenà is kebpezumazuma kandin? Meupiya is kebpezumazuma te Nengazen kenà is kebpemuhat. Meupiya pa is kebpemineg kandin kenà is kebpemuhat te menge melambeg ke kerehidu.
1SA 15:23 Is kebpekidsukulà te Nengazen iring ded kezaat te kebpeveveyilan, ne is kegkemesinupaken iring ded kezaat te ked-azap te zuma he menge ed-ezapen. Geina te inselikwey nu is suǥù te Nengazen, idselikwey ke zin daan pinaaǥi te kegkeewaa kenikew he hadì.”
1SA 15:24 Ne migkaǥi si Saul ziyà te ki Samuel te, “Nekesalà a; midsupak ku is suǥù te Nengazen wey is menge migkaǥi nu kayi te kedì. Nahandek a te menge etew, umbe mibpezumdumahan ku sikandan.
1SA 15:25 Guntaan kehizuwi a ne peseyluwa a kenikew te menge salè ku, ne zuma ka kedì su ed-ezapen ku is Nengazen.”
1SA 15:26 Piru midtavak si Samuel te, “Kenà a eduma kenikew. Inselikwey nu is suǥù te Nengazen, umbe inselikwey ke zin he iyan hadì te Israel.”
1SA 15:27 Hein mid-iniyug en si Samuel su egenat en, migewezan ni Saul is kilid te kumbalè din, ne nevindas heini.
1SA 15:28 Migkeǥiyan ni Samuel te, “Iring kayi is egkeulaula kenikew: egkuwaan guntaan te heini he andew te Nengazen diyà te kenikew is ginhedian te Israel ne ibeǥey zin te iring nu zed he Israilihanen he meupiya pa kenà sikew.
1SA 15:29 Is Megbevayà utew lavew he ebentuǥen te Israel ne kenà teruen ne kenà daan egkehalin is isip din, su kenè man iring te etew he egkahalinhalin is isip.”
1SA 15:30 Midtavak si Saul te, “Nekesalà a. Piru edhangyù a he kenè nu zèdeeti is dengeg ku kayi te menge ebpemendumala te keet-etawan ku wey etuvangan te tivuuk he Israel pinaaǥi te kedumahi nu kedì te ked-azap te Nengazen he Megbevayè nu.”
1SA 15:31 Umbe, miduma si Samuel ki Saul, ne mid-azap si Saul te Nengazen.
1SA 15:32 Migkaǥi si Samuel te, “Guntaan uwita niw kayi te kedì si Agag he hadì te menge Amalikanhen.” Mid-uvey si Agag diyà te ki Samuel he wazà kulbai. Kunaan din ke kenà sikandin edhimetayan.
1SA 15:33 Ne zutun migkaǥi si Samuel te, “Guntaan utew mezakel is menge iney he neewaan te menge anak tenged te kebpemenhimatey nu, edhimetayan ku sikew su wey meewai is iney nu zaan te anak.” Ne zutun midhimetayan ni Samuel si Agag diyà te etuvangan te Nengazen diyà te Gilgal.
1SA 15:34 Ne midlikù si Samuel ziyà te Rama, ne si Saul ne mid-ulì daan diyà te Gibea.
1SA 15:35 Puun dutun wazè en mebpekidhinguma si Samuel ki Saul taman te minatey si Samuel, piru ingkeseeng ni Samuel is neulaula ni Saul. Nekedsendit is Nengazen te kedhimuwa zin ki Saul he hadì te Israel.
1SA 16:1 Neuma is timpu zutun, ne migkeǥiyan te Nengazen si Samuel te, “Sengemenu ves keluǥayad is kedlalew nu ki Saul? Id-awè ku en sikandin he hadì te Israel. Guntaan penua nu te lana heeyan is teleǥuey nu he sungey, ne hendiyè ka te ki Jesse he tig-Betlehem, su mibpilì ku is sevaha zutun te menge anak din he iyan egkehimu he hadì.”
1SA 16:2 Ne migkaǥi si Samuel te, “Ebmenumenu e ve he edhendiyà? Kela ke metueni heini ni Saul ne kela ke himetayi e zin.” Migkaǥi is Nengazen te, “Uwit ka te zumeraǥa he vaka ziyà te Betlehem, ne keǥiyi nu is menge etew ziyà he midhendutun ka su ebpemuhaten nu is Nengazen.
1SA 16:3 Ne hinggata nu si Jesse te kebpemuhat nu, ne ebpenuruen ku sikew te ebpeveelan ku kenikew. Ne idtezù ku kenikew is etew he mibpilì ku he iyan egkehimu he hadì. Ne lenahi nu is ulu zin.”
1SA 16:4 Midtuman ni Samuel is insuǥù kandin te Nengazen. Hein nekeume en sikandin diyà te Betlehem, ne midsinuǥung kandin is menge etew he edumala te inged is ebpengerkeren su egkengehandek. Mid-insè dan te, “Meupiya ve is tuud nu te kedhedini?”
1SA 16:5 Midtavak si Samuel te, “Uya, midhendini a su ebpemuhat a ziyà te Nengazen. Mebpekelumpiyu kew ne zuma kew kedì te ebpemuhat.” Ne midhimu ni Samuel is tulumanen para melumpiyuwi si Jesse wey is menge anak din, ne midhinggat din sikandan te kebpemuhat.
1SA 16:6 Hein nekeuma zan dutun te pemuhatà, ne naahà ni Samuel is sevaha zutun he anak ni Jesse he egngezanan ki Eliab, netaǥù te isip din is, “Siguradu iyan en heini kes mibpilì te Nengazen he egkehimu he hadì.”
1SA 16:7 Piru migkaǥi is Nengazen diyà te ki Samuel te, “Kenè nu iyan ahaa is dagwey wey is kelangkew. Is tutuu wazè ku sikandin pilia. Su is ed-ahaan ku ne kenà iring te ed-ahaan te etew. Su is etew iyan ed-ahaan din is dagwey, piru siak iyan ed-ahaan ku is gehinawa.”
1SA 16:8 Ne mid-umew ni Jesse is anak din he si Abinadab ne impehendiyè din te ki Samuel. Migkaǥi si Samuel te, “Kenà sikandin kes mibpilì te Nengazen.”
1SA 16:9 Ne impehendiyè en maan ni Jesse si Shama te ki Samuel. Migkaǥi si Samuel te, “Kenà sikandin kes mibpilì te Nengazen.”
1SA 16:10 Ne hein pudu en ingkepehendiyà ni Jesse te ki Samuel sikan is pitu he anak din, migkaǥi si Samuel te, “Wazà sevaha kandan he mibpilì te Nengazen.”
1SA 16:11 Mid-insaan ni Samuel si Jesse te, “Iyan dè be sikandan menge anak nu?” Midtavak si Jesse te, “Duen pa, is tinengkezan, piru wazà kayi su ebantey sikandin te kerehidu.” Migkaǥi si Samuel te, “Ipehendini, su kenè tew edhimuwen is kebpemuhat emun kenà ebpekeuma kayi.”
1SA 16:12 Umbe, mibpevayaan ni Jesse si David, ne impehendutun. Metaid he meriǥàriǥà is kedlulundis din, wey meupiya he ed-ahaan is mata zin. Migkeǥiyan te Nengazen si Samuel te, “Lenahi nu en is ulu zin su iyan en sikandin nepilì ku.”
1SA 16:13 Ne migkuwa ni Samuel kes lana ne midlenahan din is ulu ni David he zutun te etuvangan te menge suled din. Ne puun dutun mid-ulinan si David te Mulin-ulin te Nengazen. Ne mid-ulì human si Samuel ziyà te Rama.
1SA 16:14 Dutun he timpu mid-awà diyà te ki Saul is Mulin-ulin te Nengazen, ne midrasey sikandin te mezaat he mulin-ulin he midsuǥù te Nengazen.
1SA 16:15 Migkaǥi is menge suluǥuen ni Saul te, “Ibpaantus ka te mezaat he mulin-ulin he midsuǥù te Megbevayà.
1SA 16:16 Umbe, Mahal he Hadì, tuǥuti key te kebpen-ahà te metau he edtukar te alpa, su emun edsemuken ke en maan te mezaat he mulin-ulin he midsuǥù te Megbevayà, idtukar zin is alpa ne ebmeupiya maan is gehinawa nu.”
1SA 16:17 Umbe, migkeǥiyan ni Saul is menge suluǥuen din te, “Uya, pen-ehè kew te etew he metau he edtukar te alpa ne zumaha niw kayi te kedì.”
1SA 16:18 Migkaǥi is sevaha zutun te menge suluǥuen din te, “Duen neehè ku he sevaha he anak ni Jesse he tig-Betlehem ne metau he edtukar te alpa. Gawas pa zutun, mevurut sikandin wey metau he ebpekidtebek. Mataid sikandin wey metau he ebpengaǥikaǥi, wey edtevangan sikadin te Nengazen.”
1SA 16:19 Midsuǥù si Saul te menge menunudtulà diyà te ki Jesse ne ebpekeǥiyan te, “Ibpehendiyà te kandin si David he tigbantey te menge kerehidu.”
1SA 16:20 Umbe, midsuǥù ni Jesse si David diyà te ki Saul he ed-uwit te menge gasa: sevaha he asnu he migkergahan te menge supas, sevaha he teleǥuey te vinu he lundis he nepenù te vinu, wey sevaha he nati he kambing.
1SA 16:21 Ne hein diyè en si David te ki Saul, ne mibpenilbi sikandin ki Saul. Nesuatan utew sikandin ni Saul, ne midhimu sikandin ni Saul he tig-uwit te ǥumaan din.
1SA 16:22 Ne mibpeuwitan ni Saul si Jesse te lalag he edhenduen te, “Tuǥuti nu si David he ebpedayun he ebpenilbi kedì.”
1SA 16:23 Uman ebpekeuma ziyà te ki Saul is mezaat he mulin-ulin he edsuǥuen te Megbevayà, ne egkuwaan en maan ni David kes alpa zin ne idtukar zin. Ne egkeulian segugunà ne ed-awà diyà te kandin kes mezaat he mulin-ulin.
1SA 17:1 Dutun he timpu midtiǥum te menge Filistihanen is menge sundaru zan diyà te Soco he sakup te Juda, para te tebek. Migkampu zan diyà te Efes Damin he pid-elangan te Soco wey Azeka.
1SA 17:2 Midtiǥum daan ni Saul is menge Israilihanen ne ziyè dan megkampu uvey te menge Suǥud he Elah. Nengandam dan te kebpekidtebek te menge Filistihanen.
1SA 17:3 Nekedehipaǥà is buntud he midtiǥuman te menge Filistihanen wey is buntud he midtiǥuman te menge Israilihanen, ne suǥud-suǥud is nekepetug-elang dutun.
1SA 17:4 Duen sevaha he etew he tig-Gat he metau he ebpekidtebek. Iyan ngazan din si Goliat. Migawas dutun te kampu te menge Filistihanen ne mid-uvayan din is kampu te menge Israilihanen. Subra he siyam he ǥiek is kelangkew zin.
1SA 17:5 Is kalù din ne brunsi, wey brunsi zaan is pengalang te kumeng din he iyan keveǥat din is 60 he kilus.
1SA 17:6 Ne is menge vuvun din wey lisen ne mibpengelangan daan te brunsi, wey ziyà te peka zin is brunsi he kelawit.
1SA 17:7 Is bangkew zin ne meveǥat wey mekepal; is purù dà kayi he vangkew ne menge pitu he kilu is keveǥat. Ne edhuna kandin is tig-uwit te kelasag din.
1SA 17:8 Midhitindeg si Goliat ne migkulahì din is menge Israilihanen, “Maan is mezakel kew is ebpekidtebek? Sebsevaha ku zà he Filistihanen piru mezakel kew mulà is menge suluǥuen ni Saul. Pilì kew te sevaha he etew he ebpekidtebek kedì.
1SA 17:9 Emun egkepatey e zin, egkehimu he egkeuripen key keniyu, ne emun iyan sikandin egkepatey ku, iyan kew egkehimu he menge uripen dey wey ebpenilbi kenami.
1SA 17:10 Guntaan, edhinggaten ku sikiyu! Ipehendini niw is egkeseriǥan niw he ebpekidtebek kedì.”
1SA 17:11 Nezineg haazà ni Saul wey te menge Israilihanen ne utew zan nahandek.
1SA 17:12 Duen anak ni Jesse he si David. Si Jesse ne sevaha he Efratahanen he ziyà ed-ubpà te Betlehem he sakup te Juda. Meǥurang en sikandin dutun te timpu te iyan pa hadì si Saul te Israel. Walu is anak din he pudu maama.
1SA 17:13 Is tetelu he kakey he menge anak din miduma ki Saul te ebpekidtebek. Is kinekekayan ne iyan si Eliab, is ikezuwa ne si Abinadab, ne is iketelu ne si Shama.
1SA 17:14 Is kineheziyan ne iyan si David. Ne zutun te keduma zutun te tetelu ziyà te ki Saul te kebpekidtebek,
1SA 17:15 si David mulà ed-ulìulì dà diyà te Betlehem puun te kampu ni Saul su ed-atimanen din is menge kerehidu te amey zin.
1SA 17:16 Taman te 40 he andew is kebpenhinggat ni Goliat te tebek te menge Israilihanen maandew wey mezukilem.
1SA 17:17 Sevaha zutun he andew, migkeǥiyan ni Jesse si David te, “Mama, gaanggaan ka telukun te menge kakey nu ziyà te kampu ne uwita nu heini is tengà te saku he midsandag he trigu wey sepulù he vuuk he supas.
1SA 17:18 Uwiti nu zaan is peremandar te menge sundaru te sepulù he kisu. Susiya nu zaan ke nemenumenu en is menge kakey nu, ne likù ka kayi ne uwit ka te tuus he meupiya is kebpekesavuk dan.
1SA 17:19 Diyè dan guntaan te menge Suǥud he Elah, su ebpekidtebek dan te menge Filistihanen duma zan si Saul wey is duma he menge Israilihanen.”
1SA 17:20 Umbe, zutun te sunud he andew midsayu med-enew si David, ne mid-andam te egkeenen he ed-uwiten din. Ne impeventayan din is menge kerehidu zin duen te sevaha he bekidu, ne migenat sikandin sumalà te migkaǥi kandin te amey zin. Ne hein nekeuma sikandin diyà te kampu te menge Israilihanen, nenggawas is menge sundaru he ebpemengulahì te kulehian te ebpekidtebek.
1SA 17:21 Dutun ne naandam en is menge Israilihanen wey menge Filistihanen he ebpekidtebek.
1SA 17:22 Intaǥak ni David kes menge uwiten din dutun te sineriǥan he ebantey te menge azen te menge sundaru, ne mibpelelaǥuy sikandin diyà te edtebekan te menge sundaru ne migkemusta zin is menge suled din.
1SA 17:23 Ne te kemulu sikandin ebpekidlalag kandan, mid-uvey si Goliat kes tig-Gat he metau he ebpekidtebek, ne edhinggaten din is menge Israilihanen ne nezineg heini ni David.
1SA 17:24 Hein naahà te menge Israilihanen si Goliat, nemelaǥuy zan is utew egkengehandek.
1SA 17:25 Mibpetudtudtulà sikandan te, “Neehè niw ve kes etew he lelayun ebpenginggat kenitew te menge Israilihanen? Ebeǥayan kun te hadì te zekelà he suhul is ebpekepatey kandin. Ne kenà iyan dà heeyan, su ibpeesawa zin pa is anak din kandin, ne kenà ibpevayad te vuhis te Israel is pemilya zin.”
1SA 17:26 Mid-insaan ni David is menge etew he nemenhitindeg diyà te uvey zin, “Hentei ves heeyan is Filistihanen he wazà mekekilala te Megbevayà? Maan is ebpemenhinggat te menge sundaru te uuyag he Megbevayà? Ne hengkey is egkezawat te etew he ebpekepatey kandin wey meengked is kebpeel-elezi zin te Israel?”
1SA 17:27 Midtudtul te menge etew ziyà te kandin is nehisgutan mehitenged te suhul he egkezawat te etew he ebpekepatey ki Goliat.
1SA 17:28 Dutun te kegkezineǥa ni Eliab, he kinekekayan he suled ni David te nekidlalag sikandin te menge etew, nepauk sikandin. Migkeǥiyan din si David te, “Maan is midhengkayi ka? Hentei is impevantey nu te menge kerehidu tew ziyà te sibsivayan he pira zà he leǥas? Utew ka mepedeligen. Mezaat is ulaula nu! Midhengkayi ke zà wey ka mekaahà te tebek.”
1SA 17:29 Midtavak si David te, “Hengkey ves daan is mibeelan ku? Mid-insè e zè man!”
1SA 17:30 Ne midhendiyà si David te zuma is ebpenginginsà te iyan ded kes impenginginsè din, ne iyan tavak te menge etew kes intavak ded kandin.
1SA 17:31 Is menge kebpenginginsà ni David ne nezineg ni Saul, umbe impetawag sikandin ni Saul.
1SA 17:32 Hein nekeuma si David, migkeǥiyan din si Saul te, “Kenà engayan he zuen sevaha he egkaawà is kevurut tenged keniyan te Filistihanen. Iyan a is suluǥuen nu ebpekidtebek kandin.”
1SA 17:33 Midtavak si Saul te, “Kenè ka ebpekesukul te kebpekidtebek kandin. Batè ke pa ne sikandin mulà daan en he veǥani puun pa te vatè pa sikandin.”
1SA 17:34 Piru midtavak si David te, “Datù, puun pa te vatè e pa ebantey ad te kerehidu te amey ku. Emun edewiyen te erimaung wey ke bir is kerehidu,
1SA 17:35 edel-asen ku heini ne edlegkuten ku, ne egkuwaan ku haazà is kerehidu. Ne emun edsukul kedì edekepen ku ne egewezan ku ziyà te lieg ne ebpenlegkuten ku taman te ebpatey.
1SA 17:36 Neveelan ku en heini ziyà te erimaung wey ziyà te bir, ne ebeelan ku zaan heini keniyan te Filistihanen he wazà medtuu te Megbevayà, tenged te edhinggaten din is menge sundaru te uuyag he Megbevayà.
1SA 17:37 Is Nengazen he midluwas kedì dutun te erimaung wey bir edluwas daan kedì kayi te gehem te Filistihanen.” Migkeǥiyan ni Saul si David te, “Uya, hipanew kad, berakat he iyan is Nengazen eduma kenikew.”
1SA 17:38 Impeseluub ni Saul ki David kes bisti zin para te tebek–kes kalù he brunsi wey kes pengalang te kumeng.
1SA 17:39 Inseluniket ni David kes ispada ni Saul ne migezam medhiphipanew tenged te wazè din heini meleyami he gamit. Migkeǥiyan din si Saul te, “Kenà a edselu-ub te iring kayi emun ebpekidtebek a su wazè ku meleyami heini.” Ne mibpenluwas ni David haazà.
1SA 17:40 Ne migkuwa zin is tuked din, ne mid-amì te lelima he metilak he vatu ziyà te zal-ug ne intaǥù din diyà te lundis he mibeelan he puntir. Mid-uwit din is lempawes din ne mid-uvayan din si Goliat.
1SA 17:41 Mid-uvayan daan sikandin ni Goliat ne edhuna kandin is tig-uwit te ǥumaan din para te tebek.
1SA 17:42 Hein naahà ni Goliat si David he vetan-en pa wey mataid ne meriǥàriǥà is kedlulundis din, ne mid-undaunda zin dà.
1SA 17:43 Migkeǥiyan din si David te, “Asu e ve he mid-uwitan nu te lagkut?” Ne midrewakan din si David pinaaǥi te ngazan te ed-ezapen din.
1SA 17:44 Ne migkaǥi sikandin te “Uvey ka kayi, su ibpekaan ku is lawa nu he minatey te menge tagbis wey memevurut he langgam!”
1SA 17:45 Midtavak si David te, “Ed-uvayan a kenikew he ebpekidtebek he zuen ispada nu, wey bangkew, wey kelawit piru ed-sukulan ku sikew pinaaǥi te ngazan te Nengazen he Mekeǥeǥehem, is Megbevayà te menge sundaru te Israel he edhinggaten nu.
1SA 17:46 Guntaan he andew, ibeǥey ka kedì te Nengazen; edhimetayan ku sikew ne edtempezen ku is lieg nu. Wey te heini he andew ibpekaan ku te menge tagbis wey memevurut he langgam is menge ebpematey he menge Filistihanen. Ne egketuenan te tivuuk he kelibutan he zuen Megbevayà te Israel.
1SA 17:47 Is langun he nevurun kayi egketau he ebpekeluwas is Nengazen te keet-etawan din minsan wazà ispada wey vangkew, su is Nengazen iyan en ebpekidtebek, wey ibeǥey kew zin is langun kenami.”
1SA 17:48 Dutun te kemulu en ed uvey si Goliat kandin, mibpelelaǥuy si David he edtelavuk kandin.
1SA 17:49 Migkuwa si David te vatu zutun te teleǥuey zin he lundis te menanap, ne iyan heini imbala zin ne inlempawes din ki Goliat, ne ziyà meigù te vuked din. Neketeleveng kes batu zutun te vuked din, ne nepiley sikandin he nekelangkeb.
1SA 17:50 Umbe, pinaaǥi te lempawes nekezaag si David ki Goliat wey pinaaǥi zà te sevaha zà he vatu. Nepatey zin si Goliat minsan wazè din ispada.
1SA 17:51 Mibpelelaǥuy ni David si Goliat ne migkuwa zin is ispada zin, ne mibpungelan din te ulu. Hein naahà te menge Filistihanen he minatey en kes sundaru zan he metau he ebpekidtebek, nemelaǥuy zan.
1SA 17:52 Ne mid-uvayan te menge sundaru te Israel wey Juda he ebpemengulahì, ne midal-as dan is menge Filistihanen taman te Gat wey Ekron. Nekepeyapat is menge minatey wey menge tegepalì te menge Filistihanen diyà te zalan puun te Shaaraim taman te Gat wey Ekron.
1SA 17:53 Hein nepasad dan te edal-as is menge Filistihanen, nenlikù dan ne mibpenguwa zan is azen he nengetaǥak diyà te kampu te menge Filistihanen.
1SA 17:54 Migkuwa ni David is ulu ni Goliat ne mid-uwit din diyà te Jerusalem, ne ziyè din isavuk te tulda zin is menge ǥumaan ni Goliat.
1SA 17:55 Hein naahà ni Saul si David he ed-uvey ki Goliat he ebpekidtebek, mid-insaan din si Abner he peremandar te menge sundaru te, “Abner, hentei ves ki anak heeyan is betan-en?” Midtavak si Abner te, “Wazè ku metueni, Mahal he Hadì.”
1SA 17:56 Migkaǥi si Saul te, “Penginginsè ka ke hentei sikandin ki anak.”
1SA 17:57 Hein nekelikù si David diyà te kampu zan he nepatey zin en si Goliat, miduma sikandin ni Abner ziyà te ki Saul. Midbitbit ni David is ulu ni Goliat.
1SA 17:58 Mid-insaan ni Saul sikandin te, “Mama, hentei ke ves ki anak?” Midtavak si David te, “Anak a te sakup nu he si Jesse he tig-Betlehem.”
1SA 18:1 Nepasad is kebpelelaǥey ni David wey si Saul, ne neked-elukuy si David wey is anak ni Saul he si Jonatan. Utew zin mibmahal si David he iring te keugelingen din.
1SA 18:2 Puun dutun wazè en ipeulì ni Saul si David diyà te kandan.
1SA 18:3 Midsaad si Jonatan ki David he ebpeelukuyè dan taman te taman su mibmahal ni Jonatan si David iring te keugelingen din.
1SA 18:4 Impeehè din is tuus he tutuu is penangdù din, ne midluwas din is pendivavew he visti zin ne imbeǥey zin ki David, minsan is samput, ispada, panà, wey bakes.
1SA 18:5 Midmelempusen si David te mibpeveelan kandin ni Saul, umbe midhimu ni Saul sikandin he egalen te menge sundaru. Nesuatan sikandin te menge etew minsan is menge upisyal ni Saul.
1SA 18:6 Hein nepatey en ni David si Goliat ne nen-ulì is menge Israilihanen ne midsinuǥung si Saul te menge vahi he ebpuun te langun he inged he sakup te Israel. Melipayen dan he ebpemenganta wey edsesayew he zuen tamburin wey menge lira.
1SA 18:7 Iyan heini kanta zan: “Tignengkelibu is nepatey ni Saul, piru is ki David mulà tigsepulù he libu.”
1SA 18:8 Nepauk si Saul te nezineg din is kanta zan. Neisip din is, “Egkaǥi sikandan te tig-10,000 is nepatey ni David piru is kedì ne tig-1,000 zà. Ne sunud ne edhimuwen dan sikandin he hadì.”
1SA 18:9 Umbe, puun dutun he andew ebenteyanan ni Saul si David su nesina sikandin.
1SA 18:10 Sunud dutun he andew, midselezan si Saul te mezaat he mulin-ulin he midsuǥù te Megbevayà, ne ebmutegmuteg sikandin dutun te seled te valey zin. Ne migkuwa ni David is alpa ne intukar zin para ki Saul iring te layun din en ebeeli. Neisip ni Saul zutun te egawed te vangkew is, “Ebengkawen ku si David para mekezeket sikandin kayi te elavat.” Ne zutun mibangkew zin si David te kezezuwa, ne nekelikey si David.
1SA 18:12 Nahandek si Saul ki David su edumahan te Nengazen si David, ne sikandin mulà ne mid-ewaan en te Nengazen.
1SA 18:13 Umbe, impekeziyù din si David kandin, ne midhimu zin he peremandar te 1,000 he sundaru. Umbe iyan si David egalen te menge sundaru te kebpekidtebek.
1SA 18:14 Midmezeeǥen si David te langun he menge vaal zin tenged te midumahan sikandin te Nengazen.
1SA 18:15 Hein nezineg ni Saul he midmezeeǥen si David, utew sikandin nahandek.
1SA 18:16 Piru utew nengesuat is langun he Israilihanen wey tig-Juda ki David, tenged te iyan sikandin ebpengulu kandan te kebpekidtebek.
1SA 18:17 Ne zutun migkeǥiyan ni Saul si David te, “Andam ad he ibpeesawa ku kenikew is kinekekayan he anak ku he si Merab asal ibpeehè nu kedì is kevurut nu te kebpekidtebek para te Nengazen.” Diyà te isip ni Saul he te heini he paaǥi ne kenè en iyan sikandin ebpekepatey ki David ke kenà menge Filistihanen is ebpekepatey kandin.
1SA 18:18 Midtavak ni David si Saul te, “Hentei e ves wey is pemilya ku he egkehimu a he mekeamung te hadì?”
1SA 18:19 Neuma is telaan he ibpeesawa si Merab ki David, impeesawa maan ni Saul si Merab ki Adriel he tig-Mehola.
1SA 18:20 Duen anak ni Saul he vahi he si Mical he mibmahal zin si David. Nezineg haazà ni Saul ne utew sikandin nesuat.
1SA 18:21 Neisip din is, “Ibpeesawa ku si Mical ki David, ne edhimuwen ku sikandin he epan para mepatey si David te menge Filistihanen.” Umbe migkeǥiyan ni Saul si David te, “Duen pa penahun he egkehimu ku sikew he mekaamung.”
1SA 18:22 Netegteǥaad dutun midsuǥù ni Saul is menge sakup din he lelaǥi zan si David he wazà duma he egketau. Ibpekeǥiyan kandan te, “Egkesuatan ka utew te hadì wey is langun he menge suluǥuen din. Umbe pemineg ke en he ebmekeemungen din.”
1SA 18:23 Hein migkeǥiyan dan en si David, ne migkaǥi si David te, “Kenè ku egkeveleveg is sungguzanan diyà te ki Saul para meesawa ku is anak din. Pubri a ne kenè e pa egkekilala.”
1SA 18:24 Hein midtudtul zan is menge ketezengan ni David diyà te ki Saul,
1SA 18:25 migkaǥi si Saul te, “Keǥiyi niw si David te iyan dà ebuyù en ku he sunggud te kebpengesawa zin te anak ku is menge lundis te purù te sudiyà te 100 he menge Filistihanen, he iyan kebpekevales ku kandan te menge kuntada ku.” Iyan haazà planu ni Saul para mepatey si David te menge Filistihanen.
1SA 18:26 Hein midtudtul haazà dutun te menge suluǥuen ni Saul diyà te ki David, utew nesuat sikandin he mehimu he mekaamung te hadì. Umbe te wazè pa mauma is telaan ni Saul ki David,
1SA 18:27 nenurung si David wey is menge sakup din te menge Filistihanen ne nekepatey zan te 200 he menge Filistihanen. Impekuwa zin is menge lundis te purù te sudiyà te menge Filistihanen ne mid-uwit dan diyà te hadì, su wey mehimu he mekaamung sikandin te hadì. Umbe impeesawa ni Saul si Mical ki David.
1SA 18:28 Hein naahà ni Saul he is Nengazen miduma ki David wey nesuatan te anak din he si Mical si David,
1SA 18:29 utew sikandin egkahandek ki David. Wey pedayun is kegkuntedaha zin ki David te uuyag pa sikandin.
1SA 18:30 Pedayun is kebpekidtebek te menge Filistihanen te menge Israilihanen. Ne kada tebek dan, ne lelayun ebpekezaag si David lavew sikandin te zuma he menge sineriǥan ni Saul. Umbe nehimu he ventuǥan si David.
1SA 19:1 Migkeǥiyan ni Saul si Jonatan wey is langun he menge suluǥuen din he edhimetayan si David. Piru utew mibmahal ni Jonatan si David,
1SA 19:2 umbe mitudtulan din si David. Migkeǥiyan din te, “Ed-ehè dà te lugar is amey ku te kedhimatey kenikew, umbe andam ka. Keeselem hendiyè ka te vevesukà ne pen-ehè ka te lugar he ed-elesan nu, ne kenè ka awà dutun.
1SA 19:3 Ed-uwiten ku is amey ku ziyà ne edlelaǥan ku sikandin mehitenged kenikew. Ne idtazem ku kenikew is egketuenan ku.”
1SA 19:4 Ne miduma ni Jonatan si Saul ziyà te vevesukà, ne midalig ni Jonatan si David etuvangan te amey zin. Ke sikandin te, “Amà, kenè nu himetayi si David he suluǥuen nu. Wazè din neveelan he salà kenikew. Utew ganì dekelà is neveelan din he keupiyaanan kenikew.
1SA 19:5 Imbelavag din is untung din te kedhimetayi zin duen te Filistihanen he si Goliat, ne impezaag te Nengazen is tivuuk he Israel. Neehè nu heini ne utew ka nesuat. Ne maan is edhimetayan nu is sevaha he etew he wazà peleng he etew iring ki David te wazè nu zuen ibpuun?”
1SA 19:6 Mibpezumazuma si Saul ki Jonatan, ne nenaad sikandin pinaaǥi te uuyag he Nengazen he kenè din en ebpehimetayan si David.
1SA 19:7 Hein nepiraan impetawag ni Jonatan si David ne midtudtul zin is neupekatan dan ki Saul. Miduma zin si David diyà te ki Saul, ne zutun midsilbiyan ni David si Saul iring ded duen te nehuna.
1SA 19:8 Neuma en maan is tebek te menge Filistihanen wey te Israilihanen, ne mibpenguluwan ni David te kebpekidtebek is menge sakup din. Mibpelehilas en si David dutun te kebpekidtebek dan, umbe nemekepelaǥuy is menge Filistihanen.
1SA 19:9 Sevaha zutun he andew, nekeume en maan diyà te ki Saul is mezaat he mulin-ulin he midsuǥù te Nengazen hein ebpimpinuu sikandin diyà te valey zin is egawed te vangkew. Ne zutun te edtukar si David te alpa,
1SA 19:10 ne mibangkew ni Saul si David su tuyù din he edhimetayan din. Piru nekelikey si David. Ne mibpelaǥuy si David te haazà kezukilemi.
1SA 19:11 Ne zutun midsuǥù si Saul te menge etew he para ibpevantey te valey ni David wey ibpehimatey kandin te kegkepawà. Piru migkeǥiyan si David ni Mical he esawa zin te, “Emun kenè ka ebpelaǥuy guntaan te heini he kezukilemi, keeselem edhimetayan ka.”
1SA 19:12 Umbe, mid-uǥupan ni Mical si David he mekepelaǥuy, diyè din ibpevayà te bintanà, ne mibpelaǥuy si David.
1SA 19:13 Migkuwa si Mical te ledawan ne impehizeǥè din dutun te hizeǥaan. Mibmelungan din ne midsevukan te bulvul te kambing diyà te ulu.
1SA 19:14 Hein nemekeuma is menge etew he midsuǥù ni Saul te kedakep ki David, migkeǥiyan sikandan ni Mical te edezaru si David.
1SA 19:15 Hein midtudtul zan heini ki Saul, ne impelikù sikandan ni Saul su para ibpaahà kandan si David, ne migkeǥiyan din sikandan te, “Uwita niw sikandin kayi te kediey is edhidhizeǥà te hizeǥeey zin su edhimetayan ku sikandin.”
1SA 19:16 Hein midseled dan dutun te valey ni David, netuenan dan he haazà is dutun te hizeǥaan ne ledawan bes he midsevukan te bulvul te kambing is ulu zin.
1SA 19:17 Migkeǥiyan ni Saul si Mical te, “Maan is midlimbungan a kenikew ne impepelaǥuy nu is kuntada ku?” Midtavak si Mical te, “Migkeǥiyan e zin te edhimetayan e zin emun kenè ku sikandin edtevangan he mekepelaǥuy.”
1SA 19:18 Umbe, nekepelaǥuy si David ne midhendiyà te ki Samuel diyà te Rama, ne midtudtulan din te langun he mid-ulaula kandin ni Saul. Ne zutun midhendiyè dan ki Samuel te Nayot ne ziyè dan med-ubpà.
1SA 19:19 Duen neketudtul ki Saul he ziyà si David te Nayot diyà te Rama.
1SA 19:20 Ne midsuǥù sikandin te menge etew he edakep ki David. Hein nekeuma zan neehè dan is menge ebpeneuven he mibpenguluwan ni Samuel he mibpen-ulinan he ebpenagnà. Ne zutun mid-ulinan te Mulin-ulin te Megbevayà haazà is menge sakup ni Saul ne nekepenagnè dan daan.
1SA 19:21 Hein nezineg ni Saul is neulaula, midsuǥù en maan sikandin te menge sakup din he edakep ki David, piru hein nekeuma zan, ne nekepenagnà daan sikandan. Ne mid-uman en maan medsuǥù si Saul te iketelu he timpu, ne iyan ded neulaula is nekepenagnè ded sikandan.
1SA 19:22 Umbe, iyan en si Saul midhendiyà te Rama. Hein nekeuma sikandin dutun te dekelà he vudsi he punduwà te wahig diyà te Secu, nenginginsà sikandin ke hendei si Samuel wey si David. Midtudtulan dan te ziyà te Nayot.
1SA 19:23 Dutun te ebpehendiyè en sikandin, mid-ulinan sikandin te Mulin-ulin te Megbevayà ne nekepenagnà sikandin taman te nekeuma sikandin diyà te Nayot.
1SA 19:24 Hein diyè en sikandin, midluwas din is kumbalè din, ne ebpenagnè en sikandin dutun te etuvangan ni Samuel. Midluluwas sikandin te tivuuk andew wey mezukilem. Iyan heini menge insà te menge etew, “Nehimu en be he menenagnà si Saul?”
1SA 20:1 Si David mid-awà diyà te Nayot diyà te Rama ne midhendiyà te ki Jonatan ne nenginginsà, “Hengkey ves is salà he neveelan ku te amey nu maan is egkesuatan e zin te edhimatey?”
1SA 20:2 Midtavak si Jonatan te, “Kenè ka egkepatey! Wazà minsan hengkey he ebeelan te amey ku he kenè din egkeǥiyen kedì minsan kenà impurtanti. Emun suat din he edhimetayan ke zin, egkeǥiyan e zin daan. Umbe kenà heeyan tutuu.”
1SA 20:3 Midtavak si David te, “Netuenan te amey nu he utew ki teleelukuy, umbe ed-elesan ke zin te planu zin he edhimetayan e zin su kela ke mebmesakit is gehinawa nu. Piru egkeǥiyen ku kenikew ziyà te etuvangan te uuyag he Nengazen, he ǥuntaan ebpemiligru-a te kemetayen.”
1SA 20:4 Midtavak si Jonatan te, “Ebeelan ku is minsan hengkey he ebpeveelan nu kedì.”
1SA 20:5 Migkeǥiyan ni David si Jonatan te, “Keeselem Pista te Kebpuun te Hayag ne meupiya pezem ke dutun a is egkaan duma te amey nu. Piru emun ebpemineg ka he edhipanew a, ne ed-eles a taman te mezukilem te iketulu he andew.
1SA 20:6 Emun ebpen-ahaan a te amey nu ne keǥiya nu te nenanghid a kenikew he ed-ulì ziyà te Betlehem, su ebpekidsevaha a te tivuuk he pemilya ku te kebpemuhat, he ebeelan dan te kada tuig.
1SA 20:7 Emun egkaǥi te belaǥad, ne kenà a egkehandek. Ne emun egkepauk sikandin, siguradu he duen din tuyù te kedhimatey kedì.
1SA 20:8 Deyzey ke ebeelan nu heini he iyan ebpenistiǥus te kesebutan he migkaǥi nu kedì diyà te etuvangan te Nengazen. Piru emun nekesalà a iyan, ne minsan sikew zà is edhimatey kedì. Kenè en kinahanglan he ibpalad e pa kenikew te amey nu.”
1SA 20:9 Midtavak si Jonatan te, “Kenà egkeulaula is iring keniyan! Emun tutuu iyan he is amey ku duen din tuyù te kedhimatey kenikew ne egketuenan nu zà.”
1SA 20:10 Mid-insà si David te, “Hentei ve is egkaǥi kedì emun egkepauk is amey nu?”
1SA 20:11 Migkaǥi si Jonatan te, “Hengkayi ka, edhipanew ki, edhendiyè ki te pemuleey.” Ne migenat sikandan.
1SA 20:12 Migkeǥiyan ni Jonatan si David te, “Ibpenangdù ku ziyà te Nengazen he Megbevayà te Israel, he te iring kayi he uras keeselem wey ke sunud be he andew, ebpekidlalag a te amey ku, ne emun meupiya is gehinawa zin kenikew ne egkeǥiyen ku zà kenikew.
1SA 20:13 Ne emun duen tuyù te amey ku te kedhimatey kenikew, ne kenè ku egkeǥiyen kenikew wey ka mekepelaǥuy, ne deyzey pa ke siluti ad te Nengazen te utew mereǥen. Berakat he iyan is Nengazen eduma kenikew iring te keduma zin te amey ku zengan.
1SA 20:14 Wey deyzey ke, te uuyag e pa, ipeehè nu is kebmahala nu kedì iring te kebmahala te Nengazen kenita. Ne emun ebpatey ad,
1SA 20:15 ne ipedayun nu gihapun is kebmahala nu te pemilya ku, minsan te ed-eminen edhimetayi te Nengazen is langun he kuntada nu.”
1SA 20:16 Umbe, midhimu si Jonatan te kesebutan diyà te pemilya ni David, ne migkaǥi sikandin te, “Deyzey ke ipehimetayi ka te Nengazen te menge kuntada nu emun kenè nu edtumanen is hangyù ku.”
1SA 20:17 Impeuman ni Jonatan ipepenangdù si David he mahala zin sikandin su mibmahal zin daan si David iring te keugelingen din.
1SA 20:18 Dutun migkeǥiyan ni Jonatan si David te, “Keeselem Pista te Kebpuun te Hayag ne egketuenan he wazè ka ziyà su wazà ebpinuu te pinuuwey nu.
1SA 20:19 Sunud he andew, emun ebmezukilem en ne hendiyè ka zèpa te mid-elesan nu ziyà te pemuleey. Ne ziyè ka taǥad te duen batu te Ezel.
1SA 20:20 Ne ebpanà a te ketetelu te kilid kayi he vatu he henduen be te duen ku ebpenaan.
1SA 20:21 Ibpepelelaǥuy ku is sevaha he vatà su wey zin mepen-ahà is menge besut te panà. Emun egkaǥi a, te ziyà te avey zin is bala te menge panà, ne egkuwaan din heini ne ed-uwiten din kayi te kedì, ne gawas ka. Su edsigureduwen ku ziyà te kenikew, ziyà te uuyag he Nengazen, he wazà kezeetan he ereg he igkahandek nu.
1SA 20:22 Piru emun egkeǥiyan ku haazà is batà te is menge besut te panà dutun te hunaan din, ebpesavut heeyan he kinahanglan he pelaǥuy ka su ibpepelaǥuy ka te Nengazen.
1SA 20:23 Ne mehitenged te kesebutan ta ne tentenuzi nu he iyan is Nengazen tistiǥus ta taman te taman.”
1SA 20:24 Umbe, mid-eles si David diyà te pemuleey. Ne hein neume en dutun is andew te Pista te Kebpuun te Hayag mibpinuu si Hadì Saul su egkaan.
1SA 20:25 Diyà mebpinuu te neenazan din he pinuuwà he avey te elevat. Si Jonatan ne ziyà mebpinuu te egkesineruwan din, ne si Abner ne ziyà te durug din. Ne is pinuuwà dutun ni David ne wazà duen ebpinuu.
1SA 20:26 Wazè en kekeǥiyen ni Saul zutun mehitenged ki David te haazà he andew su egkeisip din is kela ke zuen neulaula ki David he kenà meupiya ne nehimu he nekeremerik kandin, umbe kenà ereg sikandin he ebpekidsevaha zutun te pista.
1SA 20:27 Hein sunud he andew, ikezuwa he andew te bulan, wazà gihapun ebpinuu zutun te pinuuwà ni David. Ne mid-insaan ni Saul si Jonatan te, “Maan is wazà mekehendini si David he anak ni Jesse te kegkaan gevii taman guntaan?”
1SA 20:28 Midtavak si Jonatan te, “Mibpenanghid kedì si David he ed-ulì diyà te Betlehem.
1SA 20:29 Su migkeǥiyan te suled din te ibpaapil sikandin te kebpemuhat te pemilya zin, wey egkesuatan din daan he meehè din is menge kezuzumahi zin. Umbe wazà kayi sikandin.”
1SA 20:30 Utew nepeuki ni Saul si Jonatan. Ke sikandin te, “Tulebung ka iyan he vatà! Netuenan ku he edlevanan nu si David. Ebpeel-elezan nu is keugelingen nu wey is iney nu.
1SA 20:31 Hein uuyag pa si David, kenè ka egkehimu he hadì. Guntaan, kuwaa nu sikandin ne zumaha nu kayi te kedì, su ereg sikandin he edhimetayan.”
1SA 20:32 Mid-insà si Jonatan te, “Maan is ereg sikandin he edhimetayan? Hengkey ves is salà he neveelan din?”
1SA 20:33 Piru mibangkew sikandin te amey zin su edhimetayan din. Ne zutun din metueni he disididu is amey zin te kedhimatey ki David.
1SA 20:34 Mid-awà dutun si Jonatan te lemisahan tenged te utew zin kegkeuringer, ne wazà sikandin megkaan te haazà he andew, tenged te mezaat is isip din te mekeeled-eled he mibeelan te amey zin ki David.
1SA 20:35 Meselem dutun, midhendiyà si Jonatan te pemuleey su ebpekidhinguma ki David. Duen din duma he maama he vatà.
1SA 20:36 Migkeǥiyan din is batà te, “Pelelaǥuy ka ne pen-ahaa nu is menge besut te panà he ibpanè ku.” Umbe zutun te kebpelelaǥuy te vatà mibpanà si Jonatan diyà te hunaan din.
1SA 20:37 Hein nekeuma kes batà dutun te netemanan te besut te panà, migkulahì ni Jonatan te, “Heeyan pa te hunaan nu is besut. Gaang-gaang ka kuwaa nu diritsu.” Mid-amì te vatà haazà is besut ne midlikù diyà te ki Jonatan he egalen din.
1SA 20:39 Wazà metueni zutun he vatà ke hengkey is ibpesavut dutun. Si Jonatan dà wey si David is netau.
1SA 20:40 Ne zutun imbeǥey ni Jonatan is menge besut te panà dutun he vatà ne migkeǥiyan din te, “Iulì nu heini ziyà te inged.”
1SA 20:41 Hein neipus kes batà, midlepew si David dutun te kilid te vatu he mid-elesan din, ne midluhud sikandin diyà te ki Jonatan te ketetelu he iyan kedtahud din kandin. Ne mibpehezekè dan is edsineǥew. Utew neseeng si David.
1SA 20:42 Ne migkeǥiyan ni Jonatan si David te, “Na, meupiya he kedhipanew. Deyzey ke edtevangan ki te Nengazen he kenà mezeeti is neupekatan ta he mibpetistiǥusan ta kandin he iyan is mehitenged te kedketeleemiǥu ta ne mekepedayun heini ziyà te menge kevuwazan ta.” Ne zutun midhipanew si David, ne si Jonatan mulà ne midlikù diyà te inged.
1SA 21:1 Midhendiyà si David te ki Abimelec he memumuhat diyà te Nob. Migkerker si Abimelec te kegkahandek te neehè din si David. Migkeǥiyan din te, “Maan is edhipanew ka te wazè nu zuma?”
1SA 21:2 Midtavak si David te, “Duen ku kayi tuyù he insuǥù te hadì, ne migkeǥiyan e zin te kenè ku kun egkeǥiyen diyà te minsan hentei is mehitenged kayi te insuǥù din. Ne mehitenged te menge sakup ku, ne migkeǥiyan ku sikandan he ebpekedtetelavuk key zà diyà te sevaha he lugar.
1SA 21:3 Guntaan, hengkey is egkekaan nu kayi? Beǥayi a te lelima he supas wey minsan hengkey en.”
1SA 21:4 Midtavak kes memumuhat te, “Wazè ku urdinaryu he supas, piru duen kayi supas he impemuhat. Ibeǥey ku heini emun sikew wey is menge sakup nu wazà mekepekidhulid te vahi te heini he menge andew.”
1SA 21:5 Midtavak si David te, “Kenè key ebpekidhulid te vahi emun duen tuyù dey. Minsan kenà utew impurtanti is ebeyaan dey ne ed-uraman dey is meremerik, lavi en be ǥuntaan he utew impurtanti is tuyù dey.”
1SA 21:6 Umbe, minsan te wazà urdinaryu he supas, imbeǥey te memumuhat kandin kes supas he ibpemuhat diyà te etuvangan te Megbevayà, he ziyà kuwaa te segradu he lemisa ne midliwanan te veǥu he supas.
1SA 21:7 Neserengà te haazà he andew ne ziyà is suluǥuen ni Saul he si Doeg he Edomanhen. Iyan sikandin pengulu te ebantey te menge uyaǥen ni Saul. Diyà sikandin su zuen din sulunuzen para te Nengazen.
1SA 21:8 Mid-insaan ni David si Ahimelec te, “Duen be ispada nu wey ke bangkew vè? Wazà a mekeuwit te ispada ku wey minsan hengkey he gumaan tenged te utew epiki is suǥù te hadì.”
1SA 21:9 Midtavak kes memumuhat te, “Kayi zed kes ispada ni Goliat kes Filistihanen, he midhimetayan nu ziyà te menge Suǥud he Elah. Mibukusan heini te manggad ne ziyà itaǥù te zivaluy te ipud. Kuwaa nu emun egkesuatan nu su wazè en duma pa he gumaan kayi.” Migkaǥi si David te, “Iveǥey nu heeyan kedì. Wazè en ispada he iring keniyan.”
1SA 21:10 Ne mibpeleǥuyan ni David si Saul ne midhendiyà te ki Hadì Akish he hadì te Gat.
1SA 21:11 Migkaǥi is menge sineriǥan ni Akish kandin te, “Kenè be si David man heini is hadì diyà te lugar zin? Kenè be iyan sikandin kes egkevantug te menge vahi zutun te ebpemenayew sikandan wey ebpemenganta te, ‘Tignengkelibu is nepatey ni Saul, piru is ki David mulà tigsepulù he libu’?”
1SA 21:12 Wazà maawà diyà te isip ni David is migkaǥi zan, ne nahandek sikandin ki Hadì Akish he hadì te Gat.
1SA 21:13 Umbe, uvag kun ebuneǥen si David te kemula pa sikandin diyà te Gat. Mibpenuristurisan din is gemawan te inged, ne edseyayat is ngingi zin he ibpetiǥis din te sumpè din.
1SA 21:14 Ne zutun migkeǥiyan ni Akish is menge sineriǥan din te, “Ahaa niw! Buneg heeyan he etew! Maan is mid-uwit niw sikandin kayi te kedì?
1SA 21:15 Mezakel en kayi he menge vuneg, maan is mid-uwit niw pa sikandin kayi te valey ku ne kenà meupiya is ebeelan din kayì te etuvangan ku?”
1SA 22:1 Mid-awà si David diyà te Gat ne midhendiyà te surung te Adulam. Ne hein netuenan te menge suled din wey te zuma pa he sakup te pemilya zin, ne midhendiyè dan te kandin su edtampu zan kandin.
1SA 22:2 Duen daan menge etew he miduma kandin he egkengaayuayu, wey menge utangan, wey kes menge etew he wazà mekuntintu te kebpekesavuk dan. Menge 400 he menge etew is miduma ki David, ne sikandin is nehimu he pengulu zan.
1SA 22:3 Puun dutun ne midhendiyà si David te Mizpa he sakup te Moab ne migkeǥiyan din is hadì te Moab te, “Edtuǥutan nu vuwa is menge ginikanan ku he ebpekeubpè dan pa kayi teǥaad te egketuenan ku ke hengkey is ebeelan te Megbevayà para kedì?”
1SA 22:4 Mibpemineg kes hadì, ne intaǥak ni David is menge ginikanan din dutun te hadì te Moab ne ziyà mulà sikandin te melig-en he elesà.
1SA 22:5 Sevaha zutun he andew migkeǥiyan te ebpeneuven he si Gad si David te, “Kenè ka pekeuǥet kayi te elesè nu. Hendiyè ka te Juda.” Ne migenat si David ne midhendiyà te ketelunan te Heret.
1SA 22:6 Haazà he andew nezineg ni Saul he zuen nekaahà ki David wey menge sakup din. Dutun ebpimpinuu si Saul te sihung te kayu he tamariska, diyà te vuntud te Gibea. Egewazan din is bangkew zin, ne midlingutan sikandin te langun he menge upisyal zin.
1SA 22:7 Migkeǥiyan ni Saul sikandan te, “Pemineg kew is menge tig-Benjamin! Kenè be mibpenengduan kew ni David he ebeǥayan kew zin langun te vevesukà wey menge pemuleey niw te paras? Mibpenengduan kew zin pa te edhimuwen kew zin pudu he menge peremandar te menge sundaru?
1SA 22:8 Tenged be keniyan mibpelanu kew te mezaat kayi te kedì is langun? Wazà midtazem kedì he is anak ku ne zuen upakat dan ki David. Wazè niw hizu kedì. Su wazà minsan sevaha he midtazem kedì he is anak ku mibaghet din is suluǥuen ku he si David te kidhimatey kedì he iyan tinguhè din guntaan.”
1SA 22:9 Sevaha te ebpemenhitindeg dutun duma te menge upisyal ni Saul iyan si Doeg he Edomanhen. Migkaǥi sikandin diyà te ki Saul te, “Hein diyà a te Nob, neehè ku si David is midhendiyà te ki Ahimelec he anak ni Ahitub.
1SA 22:10 Mid-insaan ni Ahimelec is Nengazen ke hengkey is ebeelan ni David, ne mibeǥayan din pa te keenen si David wey zuen te ispada ni Goliat he Filistihanen.”
1SA 22:11 Dutun mibpeveyaan ni Saul kes memumuhat he si Ahimelec he anak ni Ahitub, wey is tivuuk he pemilya zin he menge memumuhat diyà te Nob. Ne midhendiyè dan pudu te ki Saul.
1SA 22:12 Hein nekeuma zan, migkaǥi si Saul te, “Pemineg ka, Ahimelec!” Midtavak te, “Uya, Mahal he Hadì.”
1SA 22:13 Migkeǥiyan ni Saul sikandin te, “Maan is duen planu niw ki David he mezaat he ebpekesuǥat kedì? Impekaan nu pa wey mibeǥayan nu te ispada, ne mid-insaan nu pa is Megbevayà para kandin. Guntaan egkuntedahan e zin duen din pa ganì planu te kedhimatey kedì.”
1SA 22:14 Midtavak si Ahimelec te hadì te, “Kenà heeyan egkehitavù! Su si David mekaamung nu, ne iyan pa sikandin suluǥuen nu he metinumanen, iyan pa sikandin egalen te menge vantey nu ne utew sikandin edtehuza te pemilya nu.
1SA 22:15 Uya, mid-insaan ku is Megbevayà mehitenged kandin, kenà guntaan pa, kekenà, duen te nehuna pa. Piru edhangyù a kenikew he kenà a kenikew isumbung wey is tivuuk he pemilya ku, su wazè ku metueni heini he menge hitavù.”
1SA 22:16 Piru migkaǥi is hadì te, “Edhimetayan ku sikew, Ahimelec, wey is tivuuk he pemilya nu.”
1SA 22:17 Dutun midsuǥù ni Saul is menge vantey zin dutun te zurug din te, “Penhimetayi niw is menge memumuhat te Nengazen su ziyè dan edapig te ki David. Netuenan dan he mibpelaǥuy si David ne wazè dan tudtula kedì.” Piru wazà mebpezumazuma kes menge upisyal te hadì he edhimetayan is menge memumuhat te Nengazen.
1SA 22:18 Ne zutun midsuǥù te hadì si Doeg he Edomanhen he iyan ibpepenhimatey te menge memumuhat, ne mibpenhimetayan dan ni Doeg. Te haazè dà he andew ne 85 he menge memumuhat is mibpenhimetayan ni Doeg.
1SA 22:19 Mibpenhimetayan daan ni Saul is langun he mid-ubpà diyà te Nob, kes inged te menge memumuhat: menge maama, menge vahi, menge vatà, wey is kemulu pa edsusu, apil is menge vaka, asnu, wey menge kerehidu.
1SA 22:20 Piru nekepelaǥuy mulà si Abiatar he anak ni Ahimelec ne miduma ki David.
1SA 22:21 Midtudtulan din si David te mibpepenhimetayan ni Saul is menge memumuhat te Nengazen.
1SA 22:22 Migkeǥiyan ni David si Abiatar te, “Hein neehè ku si Doeg he midhendiyà te ki Ahimelec, netuenan ku he ebpenudtul ziyà te ki Saul. Umbe televaken ku is kegkepetaya te tivuuk he pemilya nu.
1SA 22:23 Kayi ke zà te kedì, su sevaha zà is egkesuat he ebpehimatey kenikew wey kediey. Kenè ka mahandek; wazà mezaat he egkeulaula kenikew emun kayi ka te kedì.”
1SA 23:1 Hein netudtulan si David he edsurungen te menge Filistihanen is Keila wey ebpenguwaan dan is menge neraǥun te menge tig-Keila,
1SA 23:2 mid-insà sikandin te Nengazen te, “Edsurungen ku ve is menge Filistihanen.” Midtavak is Nengazen te, “Uya, surunga nu en wey melibri is Keila.”
1SA 23:3 Migkaǥi is menge sakup ni David te, “Minsan te kayi zà te Juda ne egkahandek key wey pe be ke edhendiyè kiw te Keila te kebpekidtebek te menge Filistihanen!”
1SA 23:4 Mid-uman med-insà si David diyà te Nengazen, ne migkeǥiyan sikandin te, “Hendiyè ka te Keila, su edtevangan ku sikew ne egkezaag nu is menge Filistihanen.”
1SA 23:5 Midhendiyà si David te Keila duma is menge sakup din para ebpekidtebek te menge Filistihanen. Utew mezakel he menge Filistihanen is mibpenhimetayan dan, ne nekaaǥew zan te menge uyaǥen. Nelibri zan dutun is tig-Keila.
1SA 23:6 (Hein mibpelaǥuy si Abiatar he ziyà mebpevayà te ki David diyà te Keila, mid-uwit din is ipud te memumuhat.)
1SA 23:7 Duen neketudtul ki Saul he ziyà si David te Keila. Umbe nekekaǥi si Saul te, “Mibpeveyveyaan sikandin kedì te Megbevayà, su henduen be te mibpirisu zin is keugelingen din te kedseled din te inged he nelingut te verengbeng.”
1SA 23:8 Midtiǥum ni Saul is langun he menge sundaru zin su edhendiyè dan te Keila su edliǥuyan dan si David wey is menge sakup din.
1SA 23:9 Ne hein netuenan ni David is planu ni Saul, migkeǥiyan din si Abiatar kes lavew he memumuhat he kuwaa zin kes ipud.
1SA 23:10 Ne mid-ampù si David te, “He Nengazen, Megbevayà te Israel, netuenan ku te suluǥuen nu, he duen planu ni Saul he edhengkayi te Keila su ebpenhimetayan din is meǥinged kayi tenged kedì.
1SA 23:11 Edhengkayi ve vuwa si Saul sumalà te nezineg ku? Ibeǥey ed be vuwa te tig-Keila ki Saul? He Nengazen, Megbevayà te Israel, tug-ani a is suluǥuen nu.” Midtavak is Nengazen te, “Uya, edhendiyan si Saul.”
1SA 23:12 Mid-uman med-insà si David te, “Ibeǥey ed be vuwa wey is menge sakup ku te meǥinged te Keila ki Saul?” Midtavak is Nengazen te, “Uya, ibeǥey kew zan.”
1SA 23:13 Ne zutun mid-awà dutun si David te Keila wey kes 600 he menge sakup din ne midtazintazin dan diyà te zuma he lugar. Ne hein nezineg ni Saul he wazè en diyà te Keila si David, ne wazè en sikandin medhendiyà.
1SA 23:14 Mid-eles si David diyà te menge vuvungan diyà te sibsivayan te Zif. Andew-andew is kebpen-ahaa kandin ni Saul, piru wazà iveǥey sikandin te Megbevayà ki Saul.
1SA 23:15 Sevaha zutun he andew, te ziyà si David te Horesh diyà te sibsivayan te Zif, nezineg din he ebpehendiyà si Saul su edhimetayan sikandin ni Saul.
1SA 23:16 Midhendiyà si Jonatan te kandin diyà te Horesh su midasiǥ din he edtevangan sikandin te Megbevayà.
1SA 23:17 Migkaǥi si Jonatan te, “Kenè ka mahandek su is amey ku ne kenà ebpekekaid kenikew. Su netuenan en te amey ku he egkehimu ka he hadì te Israel, ne ikezuwè e zà kenikew.”
1SA 23:18 Mibaal zan dutun is dezuwa te kebpekid-uyun diyà te etuvangan te Nengazen. Ne zutun mid-ulì si Jonatan, ne si David mibpelintetaǥak dà diyà te Horesh.
1SA 23:19 Ne zuen, duen menge tig-Zif he midhendiyà te ki Saul ziyà te Gibea ne migkaǥi te, “Si David diyà med-eles te kenami ziyà te Horesh he vuntud te Hakila, dapit te divavà te Jeshimon.
1SA 23:20 Umbe, Mahal he Hadì, hendiyè ka ke hengkey is egkesuatan nu ne iyan key en metau te kebpelaza zey kandin kenikew.”
1SA 23:21 Midtavak si Saul te, “Tuvazi kew te Nengazen te kegkeseeng niw kedì.
1SA 23:22 Uya, ulì kew en ne keǥiyi e zà keniyu ke hendei sikandin wey hentei layun is ebpekaahà kandin dutun, su zuen neketudtul kedì he utew sikandin metau.
1SA 23:23 Peniizi niw is langun he lugar he ed-elesan din, ne likù kew kayi te kedì emun siguradu en. Ne eduma a keniyu; ne emun diyè pa te zuma he elesà ne ebpen-ahaan ku minsan meeneb ku pa is tivuuk he tanà te Juda.”
1SA 23:24 Ne zutun migenat dan medhuna ki Saul pehendiyà te Zip. Haazà he penahun ne ziyà si David wey is menge sakup din te sibsivayan te Maon diyà te Araba, he zapit te egkezivavà te Jeshimon.
1SA 23:25 Hein nekeuma si Saul wey is menge sakup din diyà te Zip, ne mibpen-ehè dan si David. Hein netuenan heini ni David, ne mid-eles sikandin dutun te zekelà he vatu ziyà te sibsivayan te Maon, ne ziyà sikandin med-ubpàubpà. Hein netuenan ni Saul, mibpen-ehè din diyà te sibsivayan te Maon.
1SA 23:26 Si Saul wey is menge sakup din ne ziyè dan te zivaluy te vuntud, ne si David wey is menge sakup din ne ziyè dan daan te zivaluy zutun te vuntud ne migaanggaan dan mebpelaǥuy su edlikayan dan si Saul. Ne hein meǥaan en egkeseuti ni Saul wey te menge sakup din si David wey is menge sakup din, ne
1SA 23:27 duen mid-uvey ki Saul he nenudtul te, “Gaanggaan ka, likù dèpa! Su edsurungen te menge Filistihanen is nasyun tew.”
1SA 23:28 Ne zutun neengkezan ni Saul te edlayas si David ne midlikù te kebpekidtebek te menge Filistihanen. Ne tenged te zutun he lugar mebpesuwayà si David wey si Saul, ne haazà he lugar iyan ngazan din is, “Batu he Midsuweyaan.”
1SA 23:29 Puun dutun, midhendiyà si David te En Gedi ne ziyà sikandin med-eles.
1SA 24:1 Hein midlikù si Saul puun te kebpekidtebek te menge Filistihanen ne netudtulan sikandin he ziyà si David te sibsivayan te En Gedi.
1SA 24:2 Umbe, mibpilì sikandin te 3,000 he etew puun te tivuuk he Israel he midhipanew para ebpen-ahà ki David wey te menge sakup din dutun te menge betuwen he ed-ubpaan te menge kambing he menge leew.
1SA 24:3 Nekeuma si Saul zuen te tudil te menge kerehidu he kilid te zalan he zuen dutun surung. Midseled dutun si Saul su ebpekeindes. Dutun bes te surung med-eles si David wey is menge sakup din.
1SA 24:4 Migkeǥiyan te menge sakup din si David te, “Iyan en heini penahun he migkaǥi te Nengazen he ibpalad din kenikew is kuntra nu ne iyan ke en bayàbayà ke hengkey is ed-ul-ulahan nu kandin.” Ne zutun mibpenanap si David pehendiyà te ki Saul ne wazà metukawi ni Saul is kebpitasi ni David te kilid te kumbalè ni Saul.
1SA 24:5 Hein nepasad ne mibmesakit is gehinawa ni David te mibeelan din he mibpitas te kilid te visti ni Saul.
1SA 24:6 Migkeǥiyan din is menge sakup din te, “Deyzey pezem ke kenà medtuǥut is Nengazen he mekevaal a te kenà meupiya ziyà te egalen ku, he mibpilì te Nengazen he edhadì.”
1SA 24:7 Ne pinaaǥi zutun te migkaǥi ni David midawey zin is menge sakup din, ne wazè din tuǥuti te kedhimatey ki Saul. Ne migawas si Saul zutun te surung ne migenat.
1SA 24:8 Ne migawas si David dutun te surung ne mid-umew zin si Saul, “Mahal he Hadì!” Midlilingey si Saul, ne midluhud si David su edtahud kandin.
1SA 24:9 Migkaǥi si David diyà te ki Saul te, “Maan is ebpemineǥen nu is menge etew he edsumbung kenikew he duen ku pelanu te kedhimatey kenikew?
1SA 24:10 Neehè en guntaan he andew ke mibmenumenu te Nengazen is paaǥi te kebpelaza zin kenikew kayi te kedì dutun te seled te surung. Migkeǥiyan a te menge zuma he sakup ku te himetayi nu en, piru wazè ku sikew himetayi. Migkeǥiyan ku sikandan te kenè ku egketikaan te edhimatey is egalen ku tenged te mibpilì sikandin te Nengazen he edhadì.
1SA 24:11 Amà, ahaa nu is kilid te kumbalè nu he egewezan ku. Mibpitas ku piru wazè ku sikew himetayi. Ebpesavut heini he wazè ku tuyù te kedezaat kenikew wey kebpekidsukulà kenikew. Wazè a mekesalà kenikew piru edtinguhaan nu is kedhimatey kedì.
1SA 24:12 Berakat he iyan is Nengazen edhukum kenita te zezuwa, ne berakat he iyan sikandin is ebales te mezaat he ebeelan nu kedì. Piru kenè ku mulà sikew egketikaan.
1SA 24:13 Iring te menge egkegkeǥiyen guntaan he egkaǥi te, ‘Iyan is mezaat he etew is ebaal te mezaat.’ Umbe kenè ku sikew ebmenuwen.
1SA 24:14 Iyan ka hadì te Israel ne ebpen-ahaan a kenikew. Maan, hentei e ves? Iring e zè man te minatey he asu wey tilema.
1SA 24:15 Iyan is Nengazen edhukum kenita wey edtimbangtimbang ke hentei is selaan kenita te zezuwa. Deyzey ke seǥipaa e zin, ne levani e zin wey luwasa e zin diyà te kenikew.”
1SA 24:16 Nepangkus is kegkaǥi ni David ne migkaǥi si Saul te, “Iyan ke ves heeyan David, anak ku?” Ne mibpurung medsineǥew.
1SA 24:17 Migkaǥi pa sikandin te, “Metazeng ka kenà siak. Mezaat is mibeelan ku kenikew, piru meupiya mulà is mibeelan nu kedì.
1SA 24:18 Imbeǥey a te Nengazen diyà te kenikew, piru wazà a kenikew himetayi.
1SA 24:19 Is duma mulà emun egkeehè dan is kuntada zan, ne kenè dan heini ebpesegdanen he mekepelaǥuy. Iyan is Nengazen ebales te keupiya nu he impeehè nu kedì guntaan.
1SA 24:20 Netuenan ku he egkehimu ka he hadì, ne is ginhedian te Israel ne ebmelig-en pinaaǥi te kenikew he kedumala.
1SA 24:21 Umbe, guntaan penangdù ka kayi te kedì pinaaǥi te ngazan te Nengazen he kenè nu ebpenhimetayan is menge kevuwazan ku, para kenà maawà is ngazan te pemilya ku.”
1SA 24:22 Ne zutun mibpesarig si David. Ne mid-ulì si Saul, piru si David mulà wey is menge sakup din ne midlikù dan dutun te elesey zan.
1SA 25:1 Ne mibpatey si Samuel, ne netiǥum dutun is langun he menge Israilihanen ne inlalew zan sikandin. Inleveng dan sikandin diyà te inged din he Rama. Hein nepasad, ne midhendiyà si David te sibsivayan te Maon.
1SA 25:2 Dutun te Maon duen sevaha he etew zutun he zekelà is ketiǥeyunan din, duen tanè din diyà te Carmel. 1,000 is kambing din ne 3,000 is kerehidu zin ne ebpen-elutan din diyà te Carmel.
1SA 25:3 Ne egngezanan haazà ki Nabal he ebpuun te kevuwazan ni Caleb, ne iyan esawa zin si Abigail. Mesinevuten wey metaid si Abigail, piru si Nabal melemu he egkepauk wey mezaat is betasan.
1SA 25:4 Hein nezineg ni David diyà te sibsivayan, he ziyà si Nabal te Carmel is ebpepen-alut te menge kerehidu zin,
1SA 25:5 midsuǥù ni David is sepulù he etew ziyà te Carmel. Midsuǥù din he ibpepenudtul kandan heini he lalag diyà te ki Nabal: “Kemusta ke en! Deyzey pezem ke mebmeluǥayad is untung nu. Wey zeyzey pezem ke meupiya is kebpekesavuk nu wey is kebpekesavuk te tivuuk he pemilya nu wey is langun he keniyan te kenikew.
1SA 25:7 Nezineg ku he ebpepen-elutan nu is menge kerehidu nu. Hein duma zey pa heeyan is ebantey te menge kerehidu nu ziyà te Carmel, wazè dey sikandan pesipelahi wey wazà netazin he kandan.
1SA 25:8 Insai nu sikandan ne edtudtulan ke zan. Guntaan, edhangyù a he purungi nu heeyan is menge sakup ku, pista man guntaan. Isipa a kenikew he anak wey menge suluǥuen ku he suluǥuen nu; beǥayi key te egkesuatan nu he ibeǥey nu kenami.”
1SA 25:9 Hein nekeuma is menge sakup ni David diyà te ki Nabal, midtudtul zan is telaan ni David. Ne midtaǥad dan.
1SA 25:10 Wazà itetepian ni Nabal si David. Migkeǥiyan din dà is menge sakup ni David te, “Hentei heini si David he anak ni Jesse? Guntaan he menge andew mezakel is menge suluǥuen he ebpen-awà diyà te egalen dan.
1SA 25:11 Maan is ibeǥey ku keniyu heini is supas ku wey wahig ku wey is usa he ebpuun te menge uyaǥen ku, para man heini te tig-alut te menge kerehidu ku? Wazè ku ganì sikiyu metueni ke hendei kew ebpuun.”
1SA 25:12 Nen-ulì is menge sakup ni David ne midtudtul zan is migkaǥi kandan ni Nabal.
1SA 25:13 Migkeǥiyan ni David is menge sakup din te, “Endama niw is menge ispada niw!” Ne zutun nengandam dan ne migkuwa zan is ispada zan, ne iyan daan haazà mibeelan ni David. Menge 400 he etew is miduma ki David. Ne 200 is mibpelintetaǥak su ebantey te menge gamit dan.
1SA 25:14 Duen sevaha he suluǥuen ni Nabal he nenudtul ki Abigail te esawa ni Nabal te, “Duen midsuǥù kayi ni David he ebpuun te sibsivayan, ne nengemusta sikandan ki Nabal he egalen dey, piru mid-insultu zin dà sikandan.
1SA 25:15 Utew meupiya is kedapit dutun he menge etew kenami; wazè key zan pesipelahi. Wey te penahun he neked-uuvayè key ziyà te pemuleey, wazà netazin he kenami.
1SA 25:16 Mibentayan key zan andew wey mezukilem te kebantey zey te kerehidu.
1SA 25:17 Guntaan is-isipa nu ke hengkey is meupiya he ebeelan nu, su ebpekeveǥey heini te kezeetan diyà te esawa nu pehendiyè en te tivuuk he pemilya. Utew mezaat is betasan din, ne wazè din ebpemineǥen he etew.”
1SA 25:18 Wazè en ipelavey ni Abigail is penahun. Mibpekuwa sikandin te 200 he vuuk he supas, wey dezuwa he teleǥuey he lundis he nepenù te vinu, lelima he kerehidu he midtuug wey sengesaku he midsandag he trigu, 100 he akup he pasas wey 200 he akup he ingkagkag he higus. Ne ibpekarga zin heini te menge asnu,
1SA 25:19 ne migkeǥiyan din is menge suluǥuen din te, “Huna kew, su edsunud e zà keniyu.” Piru wazè din tudtuli is esawa zin he si Nabal.
1SA 25:20 Hein mid-untud en si Abigail te asnu zin he ebpehendiyà te kilid te vuntud, neehè din he igkedsinuǥung din si David wey is menge sakup din is ebpehendiyà te kandin.
1SA 25:21 Wazè pa meuǥet is kegkaǥi ni David te, “Wazà pulus te kebantey ku te menge azen ni Nabal ziyà te sibsivayan para wazà metazin kayi. Is keupiya ku he impeehè ku kandin ne mibelesan din te mezaat.
1SA 25:22 Deyzey ke edsilutan a te Megbevayà te utew mereǥen ke kenè ku egkaamin te edhimatey is langun he menge maama he sakup din.”
1SA 25:23 Hein neehè en ni Abigail si David, ne migaanggaan mebpenaug dutun te asnu ne midluhud diyà te ki David is edtahud, migkaǥi sikandin te, “Datù, pemineǥa a kenikew. Iyan e zà besula.
1SA 25:25 Deyzey pezem ke ebeleǥazen nu en heeyan is mezaat he etew he si Nabal, su egkevunegbuneg heeyan, umbe Nabal is ngazan din. Piru, datù, wazè ku maahà is menge etew he menge sinuǥù nu.
1SA 25:26 “Umbe guntaan, kenà egkesuat is Nengazen he mekevales ka wey mekepatey ka. Ibpenangdù ku ziyà te uuyag he Nengazen wey ziyà te kenikew he is menge kuntada nu wey is langun he egkesuat he ebpesipala kenikew ne meiringi zan is egkeulaula ki Nabal.
1SA 25:27 Emun ibmeupiya te gehinawa nu, dewata nu heini is ibeǥey ku kenikew ne iveǥey nu ziyà te menge sakup nu.
1SA 25:28 Peseyluwa a kenikew te menge kegkurang ku. Siguradu he edhimuwen ka te Nengazen he hadì wey is menge kevuwazan nu, su mibpekidtebek ka tenged kandin. Deyzey ke kenè ka ebaal te mezaat te kemulu ke pa uuyag.
1SA 25:29 Minsan pa ke zuen edtinguhà te kedhimatey kenikew, ebpengelangan ka te Nengazen he Megbevayè nu iring te etew he edtipig te mahalen he menge azen. Piru is menge kuntada nu ne ibpenlimpawes iring te idlimpawes te etew he vatu.
1SA 25:30 Emun egkeulaula en is langun he menge meupiya he insaad kenikew te Nengazen, ne iyan ke en hadì te Israel,
1SA 25:31 ne kenè ka ebpekedsendit su wazè ka mebpenimales wey mebpenhimatey te wazà puunà. Wey emun edtuvazan ka te Nengazen ne kenè e zà kenikew lipati.”
1SA 25:32 Ne migkeǥiyan ni David si Abigail te, “Edeliǥen is Nengazen he Megbevayà te Israel, he iyan miduma kenikew guntaan he andew te kebpekid-ahà kedì.
1SA 25:33 Selamat te Megbevayà te meupiya he keisipanan wey kedhimu nu te paaǥi wey a kenà mekepenimales wey mekepenhimatey guntaan he andew.
1SA 25:34 Emun wazè ka megaanggaan mebpekid-ahà kedì, wazà pezem egkesamà he uuyag te menge sakup ni Nabal keeselem. Su iyan heeyan impenangdù ku te uuyag he Nengazen, he iyan Megbevayà te Israel, he iyan mibpugung kedì te kebaal te mezaat diyan te kenikew.”
1SA 25:35 Midawat ni David is imbeǥey kandin ni Abigail ne migkaǥi te, “Ulì ke en ne kenè ke en meseeng su edtumanen ku is menge hangyù nu.”
1SA 25:36 Hein nekeuma si Abigail ziyà te valey zan, ne midtukud te keemuran si Nabal he henduen te hadì. Utew sikandin melipayen ne utew sikandin nehubug. Ne wazà sikandin tudtuli ni Abigail taman te egkepawà.
1SA 25:37 Ne hein nehuwasan en dutun te meselem en, ne midtudtulan ni Abigail te neulaula. Ne zutun mid-etaki te zaru te gehinawa zin ne kenè en ebpekewaleng.
1SA 25:38 Neuma is sepulù he andew puun dutun, impeiseg pa te Nengazen is egkeǥezam din ne zutun minatey sikandin.
1SA 25:39 Hein nezineg ni David he minatey en si Nabal, migkaǥi sikandin te, “Edeliǥen is Nengazen! Su iyan sikandin mibales ki Nabal te ked insultuwa zin kedì, wey inlikey e zin te kebales. Midsilutan din si Nabal te kenà meupiya he mibeelan din kedì.” Ne midsuǥù si David te menge etew he ibpelalag ki Abigail he ed-esewaan din.
1SA 25:40 Hein nekeuma haazà is midsuǥù din diyà te Carmel, migkeǥiyan dan si Abigail te, “Impehendini key ni David te kenikew, su ibpaangey ke zin su ed-esewaan ke zin.”
1SA 25:41 Ne midluhud si Abigail ebpesavut he midtahud din sikandan he egkaǥi te, “Uya, ebpemineg a. Andam a he ebpenilbi kandin minsan diyà te menge suluǥuen din.”
1SA 25:42 Mid-untud si Abigail te asnu ne miduma zutun te midsuǥù ni David. Mid-uwit din daan is lelima he suluǥuen din he menge vahi. Ne neesawa sikandin ni David.
1SA 25:43 Ne mid-esawa zaan ni David si Ahinoam he tig-Jezreel, ne zezuwa zan is esawa zin.
1SA 25:44 Is esawa zin dengan he si Mical ne impeesawa ni Saul ki Paltiel he tig-Galim he anak ni Laish.
1SA 26:1 Sevaha zutun he andew, duen menge tig-Zif he midhendiyà te ki Saul ziyà te Gibea ne migkaǥi te, “Diyà si David te vuvungan he Hakila med-eles, he zehipag te Jeshimon.”
1SA 26:2 Ne midhendiyà si Saul te sibsivayan te Zif su ebpen-ahaan din si David. Miduma zin is 3,000 he menge sakup din he mibpilì din diyà te Israel.
1SA 26:3 Diyè dan megkampu te uvey te zalan diyà te vuntud he Hakila, he zehipag te edsilaan te Jeshimon. Si David diyà mulà med-ubpà te sibsivayan. Hein netuenan ni David he nenelukun kandin si Saul zutun,
1SA 26:4 midsuǥù sikandin te menge tigpeniid, umbe netuenan din he nekeume en si Saul zutun.
1SA 26:5 Ne midhendiyà si David te lugar he migkempuwan ni Saul. Neehè din dutun he nekelipezeng si Saul wey si Abner he anak ni Ner, he peremandar te menge sundaru. Egkepeliǥuyan si Saul te menge sundaru zin he nemekelipezeng daan.
1SA 26:6 Migkeǥiyan ni David si Abimelec he Hitihanen wey si Abishai he anak ni Zeruya wey suled ni Joab te, “Hentei keniyu is eduma kedì te edhendutun te kampu ni Saul?” Midtavak si Abishai te, “Iyan a eduma.”
1SA 26:7 Umbe, zutun he kezukileman, migenat si David wey si Abishai pehendiyà te kampu ni Saul ne neehè dan he nekelipezeng si Saul, ne is bangkew zin ne nekepepasek dutun te tanà he uvey te ulu zin. Si Abner wey zuma he menge sundaru ne nemekelipezeng diyà te nekelingut kandin.
1SA 26:8 Migkeǥiyan ni Abishai si David te, “Imbeǥey en te Megbevayà kenikew is kuntada nu te heini he andew. Guntaan tuǥuti a kenikew he ebpilaken ku sikandin te vangkew. Ibpezeket ku sikandin dutun te tanà te senge pilak dà.”
1SA 26:9 Midtavak ni David si Abishai te, “Kenè nu himetayi sikandin! Su edsilutan te Nengazen is edhimatey te mibpilì din he hadì.
1SA 26:10 Ibpesarig ku he edsilutan sikandin te uuyag he Nengazen, ne iyan is Nengazen edhimatey kandin, etawa ebpatey sikandin te daru etawa tebek.
1SA 26:11 Is Nengazen kenè din idtuǥut he iyan a ebpekepatey te mibpilì din he hadì. Egkuwaan te zà heini is bangkew zin wey heini is teleǥuey zin te wahig he kayi te ulunan din, ne egenat kid.”
1SA 26:12 Ne migkuwa ni David kes bangkew wey kes teleǥuey te wahig he zutun te ulunan ni Saul, ne migenat dan. Wazà nekaahà wey netau te neulaula; wazà nepukew kandan tenged te mibpengelinteuwan te Nengazen he utew zan mehurep.
1SA 26:13 Ne midhendiyà ensi David te divaluy zutun te menge suǥud ne midhendiyà sikandin te buvungan he malù meziyù dutun te migkempuwan ni Saul.
1SA 26:14 Migkulahì ni David ensi Abner, ne migkeǥiyan din kes peremandar zutun te menge sundaru ni Saul he si Abner te, “Abner, egkezineg e ve kenikew?” Midtavak si Abner te, “Hentei ka? Hengkey is tuyù nu te hadì?”
1SA 26:15 Midtavak si David te, “Kenè be iyan ke man kes pinekemevurut he etew te Israel? Maan is wazè nu meventayi heeyan is hadì he egalen nu? Duen midhengkeniyan he edhimatey kandin!
1SA 26:16 Kenà meupiya heini is kebpesegdana nu te hadì. Ibpenangdù ku ziyà te uuyag he Megbevayà he engayan ka he ebpatey wey is menge sakup nu, su wazè niw bentayi is egalen niw, he mibpilì te Nengazen he hadì. Ahaa nu ke keniyan ded be kes bangkew te hadì wey kes teleǥuey te wahig he keniyan te ulunan din.”
1SA 26:17 Nekilala ni Saul is laǥeng ni David, umbe migkaǥi sikandin te, “David, mama, iyan ke ves heeyan?” Midtavak si David te, “Uya, iyan a heini, Mahal he Hadì.
1SA 26:18 Maan is edel-asen nu is suluǥuen nu? Hengkey ves is mezaat he neveelan ku?
1SA 26:19 Mahal he Hadì, pemineǥa nu is egkeǥiyen ku. Emun iyan is Nengazen edsuǥù kenikew te kedhimatey kedì, deyzey pezem ke egkehizuwan e zin pinaaǥi te kedewata zin te pemuhat ku. Ne emun ketau zà te etew, ne deyzey pezem ke rewaki sikandan te Nengazen. Su impepelaǥuy e zan puun te tanà he gaked te Nengazen ne migkeǥiyan e zan te ibpesilbi ad te zuma he menge ed-ezapen.
1SA 26:20 Kenè nu ituǥut he ziyà a ebpatey te zuma he tanà, he meziyù te Nengazen. Sikew is hadì te Israel, maan is ebpen-ahaan a kenikew he iring e zè man pezem te tilema? Maan is edel-asen a kenikew he iring te tagbis diyà te vuntud?”
1SA 26:21 Migkaǥi si Saul te, “Nekesalà a. Likù ka kayi te kedì David, anak ku, ne kenè ku en ed-um-umanen is mibeelan ku kenikew, su wazà a kenikew himetayi. Henduen a te vuneg te mibeelan ku, ne utew ad iyan nesayep.”
1SA 26:22 Midtavak si David te, “Heini zed kes bangkew nu, ipekuwa nu heini te sevaha he sakup nu.
1SA 26:23 Imbeǥey ka te Nengazen kedì guntaan he andew, piru wazè ku zà sikew himetayi su iyan ka mibpilì te Nengazen he hadì. Te heini he mibeelan ku, edtuvazan a te Nengazen, su iyan sikandin ebales dutun te menge metazeng wey menge metinumanen.
1SA 26:24 Guntaan he andew, mibpekeveǥat ku is untung nu, deyzey zaan pezem ke ebpekeveǥaten din is untung ku ne edluwasen e zin te langun he kelised.”
1SA 26:25 Ne migkeǥiyan ni Saul si David te, “Berakat he tuvazi ka te Megbevayà, anak ku. Mezakel pa is ereg he ebeelan nu, ne ebmezeeǥen ka.” Ne zutun migenat si David, ne si Saul ne mid-ulì daan.
1SA 27:1 Neisip ni David is, “Duen timpu he edhimetayan a iyan ni Saul. Deyzey pa ke ebpelaǥuy ad nasì diyà te tanà te menge Filistihanen para meengkezi e en ni Saul te ebpen-ahà diyà te Israel, wey kenè e zin en mezekepi.”
1SA 27:2 Umbe, midhendiyà si David wey kes menge sakup din he 600 te ki Hadì Akish he hadì te Gat, te anak ni Maoc.
1SA 27:3 Diyè dan med-ubpà te Gat duma ki Akish. Miduma zan en diyà is pemilya zan. Miduma zaan ni David is dezuwa he esawa zin he si Ahinoam he tig-Jezreel wey si Abigail he tig-Carmel he iyan esawa zengan ni Nabal.
1SA 27:4 Hein netuenan ni Saul he mibpelaǥuy en si David diyà te Gat, ne wazè din en pen-ahaa.
1SA 27:5 Ne zutun migkeǥiyan ni David si Akish te, “Emun igkeǥaǥew a kenikew, beǥayi key te sevaha he inged he zutun key ed-ubpà. Kenà kinahanglan he kayi key ed-ubpà te inged he ed-ubpaan nu te hadì.”
1SA 27:6 Ne te haazè dà he andew imbeǥey ni Akish kandin is Ziklag. Ne puun dutun taman guntaan, is Ziklag ne ǥaked te menge hadì te Juda.
1SA 27:7 Mid-ubpà si David te lugar te menge Filistihanen seled te senge tuig wey heepat he vulan.
1SA 27:8 Dutun he timpu edsurungen ni David wey te menge sakup din is menge Gisurhanen, Girzanen, wey menge Amalikanhen. Puun pa zengan heini he menge etew ne ziyà med-ubpà te lugar he ebpehendiyà te Shur wey Ehipto.
1SA 27:9 Dutun te kedsurung eni David, ed-eminen dan edhimetayi is menge maama wey menge vahi, ne ebpenguwaan dan is menge kerehidu, menge vaka, menge asnu, menge kemilyu, wey apil en is menge visti. Ne edlikù dan diyà te ki Akish.
1SA 27:10 Emun ed-insà si Akish ke hendei zan medsurung te haazà he andew, ne edtavak si David te midsurung dan diyà te Negev diyà te Juda wey ke sakup be te Negev he ed-ubpaan te menge Jerameelinhen wey ke sakup be te Negev he ed-ubpaan te menge Kinhanen.
1SA 27:11 Ed-eminen eni David te edhimatey is menge maama wey menge vahi para wazà minsan sevaha he ebpekehendiyà te Gat he ebpekepenudtul ke hengkey is mibeelan din. Iyan heini ebeelan layun ni David hein diyà meke-ubpà te sakup te Filistia.
1SA 27:12 Dekelà is kedsarig ni Akish ki David, neisip din is, “Edumutan en guntaan si David te menge zuma zin he Israilihanen, umbe ǥuntaan, suluǥuen kud sikandin taman te taman.”
1SA 28:1 Dutun he timpu midtiǥum te menge Filistihanen is menge sundaru zan su ebpekidtebek dan te menge Israilihanen. Migkeǥiyan ni Akish si David te, “Sikew wey is menge sakup nu ne kinahanglan he meduma kenami te ebpekidtebek.”
1SA 28:2 Midtavak si David te, “Uya, para meehè nu ke hengkey is egkehimu ku, te suluǥuen nu.” Midtavak si Akish te, “Meupiya iyan! Su edhimuwen ku sikew he ebantey kedì taman te taman.”
1SA 28:3 Dutun he penahun daan en he minatey si Samuel. Hein kebpatey zin ne utew nenlalew is menge Israilihanen kandin, ne ziyè dan ileveng sikandin te inged din he Rama. Ne midsegseg ni Saul puun te Israel is menge veyilan he ebpekidlalag te gimukud te nemematey en.
1SA 28:4 Diyà megkampu is tig-Filistia te Shunem, ne ziyà daan megkampu si Saul wey menge Israilihanen te Gilboa.
1SA 28:5 Hein naahà ni Saul is menge sundaru te menge Filistihanen, utew sikandin nahandek.
1SA 28:6 Ne zutun mid-insaan din is Nengazen, ne wazà sikandin tevaka te Nengazen minsan te teǥeinep dà, wey pinaaǥi te Urim wey te menge ebpeneuven.
1SA 28:7 Migkeǥiyan ni Saul is menge sakup din te, “Pen-ahai a te vahi he edsarig te menge mulin-ulin he egkeinsaan ku.” Midtavak is menge sakup din te, “Duen diyà te Endor.”
1SA 28:8 Umbe, mibpeuvag-uvag si Saul pinaaǥi te kebivisti te kenà bisti te hadì, ne hein mezukilem en midhendutun sikandin te vahi, iyan duma zin is dezuwa he sakup din. Hein nekeuma zan, migkeǥiyan ni Saul haazà is bahi te, “Egkesuat a he ebpekidlalag ka te gimukud te sevaha he etew. Egkehimu vuwa he ed-umawen nu is gimukud din?”
1SA 28:9 Midtavak haazà is bahi kandin te, “Hengkey, egkesuatan nu ve he mepatey a? Netuenan nu man buwa is mibeelan ni Saul. Midsegseg din is langun he menge veyilan he ebpekidlalag te gimukud te nemematey en. Umbe kenè nu isavuk te piligru is untung ku.”
1SA 28:10 Nenaad si Saul kandin te, “Pinaaǥi te ngazan te uuyag he Nengazen, ne wazà mezaat he egkehitavù kenikew pinaaǥi kayi.”
1SA 28:11 Netegteǥaad migkaǥi haazà is bahi te, “Hentei ki gimukud is egkesuatan nu he ed-umawen ku?” Migkaǥi si Saul te, “Umawa nu si Samuel.”
1SA 28:12 Ne mid-umew zutun te vahi si Samuel, ne hein naahà dutun te vahi si Samuel ne nekekulahì sikandin te mezaǥing is egkaǥi ki Saul te, “Maan is midlimbungan a kenikew? Iyan ke ves si Saul!”
1SA 28:13 Migkeǥiyan ni Saul sikandin te, “Kenè ka mahandek. Hengkey ves is neehè nu?” Midtavak kes bahi te, “Neehè ku is sevaha he gimukud he migawas puun te tanà.”
1SA 28:14 Mid-insà si Saul te, “Memenumenu is paras din?” Midtavak sikandin te, “Sevaha he meǥurang he maama he midlelembung.” Ne zutun netuenan ni Saul he iyan haazà si Samuel, ne midluhud sikandin su midtahud kandin.
1SA 28:15 Migkeǥiyan ni Samuel si Saul te, “Maan is midsamuk a kenikew pinaaǥi te ked-umawa nu kedì?” Midtavak si Saul te, “Duen dekelà he prublima ku. Mibpekidtebek kedì is menge Filistihanen ne mid-iniyuǥan a te Megbevayà. Wazè e zin en tevaka, minsan pinaaǥi zà te menge ebpeneuven wey te menge teǥeinep. Umbe impeumew ku sikew su wey a kenikew mekeǥiyi ke hengkey is ebeelan ku.”
1SA 28:16 Migkaǥi si Samuel te, “Maan is ed-insè ke pa kedì? Kenè be mid-iniyuǥan ke en te Nengazen ne kuntada ke zin en?
1SA 28:17 Midtuman te Nengazen kes migkaǥi zin pinaaǥi kedì. Migkuwa zin is ginhedian te Israel ziyà te kenikew ne imbeǥey zin diyà te iring nu he Israilihanen he si David.
1SA 28:18 Mibeelan heini te Nengazen diyà te kenikew su wazè nu tumana is suǥù din he penhimetayi nu is menge Amalikanhen.
1SA 28:19 Umbe, keeselem ibpalad ke zin en wey is menge Israilihanen diyà te menge Filistihanen, ne egkehimu he ebpekeduma ki wey te menge anak nu he maama ziyà te lugar te menge minatey.”
1SA 28:20 Ne zutun nepiley si Saul ne nekelangkeb diyà te tanà. Utew sikandin nahandek te migkaǥi ni Samuel. Ne mibmeǥuyà sikandin su wazà sikandin mekekaan te tivuuk andew wey mezukilem.
1SA 28:21 Mid-uvayan dutun te vahi si Saul. Ne hein neehè din he utew nahandek si Saul, ke sikandin te, “Mahal he Hadì, midtuman ku is insuǥù nu kedì minsan te netuenan ku he piligru is untung ku.
1SA 28:22 Guntaan, edhengyuen ku sikew he pemineǥa a is suluǥuen nu. Ebeǥayan ku sikew te keenen su wey ka mebmezesen is edhipanew.”
1SA 28:23 Piru mibelivad si Saul. Ke sikandin te, “Kenà a egkaan.” Is menge sakup din ne ed-uǥup en dutun te vahi te edteǥel kandin wey mekekaan, ne zutun mibpemineg sikandin. Mid-enew sikandin ne mibpimpinuu zutun te hizeǥaan.
1SA 28:24 Ne midlapà dutun te vahi is impelambù din he turiti he vaka. Ne migkuwa te herina ne mibmasa zin ne midlutù sikandin te supas he wazè din tapey.
1SA 28:25 Ne hein nepasad impeǥana zin haazà ki Saul wey te menge sakup din, ne nemengaan dan. Ne human dan megenat te haazà he kezukileman.
1SA 29:1 Dutun midtiǥum te menge Filistihanen is langun he menge sundaru zan diyà te Afek, ne is menge Israilihanen ne ziyè dan megkampu te serebseb te Jezreel.
1SA 29:2 Dutun te kemulu edmartsa is menge pengulu te menge Filistihanen duma te menge sundaru zan he migrupu zan te ginatus wey linibu, midsunud daan dutun si David wey menge sakup din duma ki hadì Akish.
1SA 29:3 Ne zutun mid-insaan te menge peremandar te menge Filistihanen si Akish te, “Hengkey ves is ebeelan kayi te menge Hebriyuhanen?” Midtavak si Akish te, “Iyan heini si David he upisyal ni Hadì Saul he hadì te Israel. Subre en he senge-tuig is kebpekeduma zey wey puun dà te ked-awè din diyà te ki Saul taman guntaan ne wazà neehè ku he mezaat he mibeelan din.”
1SA 29:4 Piru nengepauk is menge peremandar te menge Filistihanen. Ke sikandan te, “Ipelikù heeyan he etew ziyà te lugar he imbeǥey nu kandin. Su kenà ereg he eduma sikandin kenitew te ebpekidtebek, su kela ke unaya kiw zin te edhimatey para maawà is kegkepeuki kandin te egalen din.
1SA 29:5 Henduen be te iyan heini kes mibantug te menge vahi te Israel hein ebpemenayew sikandan wey ebpemenganta te, ‘Tignengkelibu is nepatey ni Saul, piru is ki David mulà tigsepulù he libu’?”
1SA 29:6 Umbe, impehendiyà ni Akish si David te kandin ne migkeǥiyan din te, “Tutuu is egkeǥiyen ku kenikew ǥuntaan kayi te etuvangan te uuyag he Nengazen he egkeseriǥan ka iyan, ne egkesuatan ku pezem he meduma ka kedì te ebpekidtebek, su puun te keduzuma nu kedì taman guntaan wazè ku naahà he mezaat he vaal nu. Piru is duma he menge egalen ne kenè dan ebpekesarig kenikew.
1SA 29:7 Umbe ulì ke en, wey kenè ka mebaal te kenè dan egkesuatan. Sigi, meupiya is kedhipanew nu.”
1SA 29:8 Piru mid-insà si David te, “Hengkey ves is neveelan ku he salà puun pa te kedumazuma ku kenikew taman guntaan, Mahal he Hadì? Maan is kenà a ebpekezuma te kebpekidtebek te kuntada nu?”
1SA 29:9 Midtavak si Akish te, “Netuenan ku he meupiya ka iring te menge belinsuǥuen te Megbevayà. Piru is menge peremandar te menge sundaru ku ne kenà egkesuat he mekezumaa te kebpekidtebek.
1SA 29:10 Umbe, te egkepkepawà ne enew ke en duma is menge sakup nu ne ulì kew.”
1SA 29:11 Egkepkepawà ne mid-enew si David wey is menge sakup din, ne midlikù dan diyà te tanà te Filistihanen, ne is menge Filistihanen mulà nenhendiyè dan te Jezreel.
1SA 30:1 Hein iketelu en he andew, nekeuma si David wey is menge sakup din diyà te Ziklag. Netuenan dan he midsurung te menge Amalikanhen is Negev, apil en is Ziklag. Mibinsulan dan is Ziklag
1SA 30:2 ne mibpemihag dan is menge vahi wey menge vatà te haazà he inged. Wazè dan penhimetayi su mibihag dan dà sikandan.
1SA 30:3 Hein nekeuma zutun ensi David, neehè dan te menge sakup din he mibinsulan en is inged dan, ne wazè en is menge esawa zan wey menge anak dan.
1SA 30:4 Umbe, is menge etew zutun ne edluyahan dan en te kedsineǥew zan dà.
1SA 30:5 Naapil mevihag is dezuwa he esawa ni David he si Ahinoam wey si Abigail he esawa ni Nabal he tig-Carmel.
1SA 30:6 Midekelè en is prublima ni David su mezaat en is egkeisip te menge sakup din tenged te kegkevihaǥa te menge anak dan ne ebpelenuwan dan en te ebatu si David. Piru zutun midlig-enan si David te Nengazen he Megbevayè din.
1SA 30:7 Ne zutun migkeǥiyan ni David si Abiatar he memumuhat he anak ni Ahimelec te, “Uwita nu kayi kes ipud.” Ne zutun mid-uwit ni Abiatar ziyà te ki David.
1SA 30:8 Ne mibpenginginsà si David te Nengazen te, “Egkehimu ve he edtelukunan dey is midsurung kenami? Egkezaag dey vuwa sikandan?” Midtavak is Nengazen te, “Uya, telukuni niw sikandan su egkezaag niw, ne egkelibri niw is menge vinihag.”
1SA 30:9 Ne zutun migenat si David wey is 600 he sakup din taman te nekeuma zan diyà te zal-ug he Besor. Ne zutun dà mebpelintetaǥak is
1SA 30:10 200 he menge sakup din su utew zan en nengeveley ne kenè dan en ebpekelayun dutun te zal-ug. Piru si David ne midlaus mulà medal-as duma zin is 400 he sakup din.
1SA 30:11 Ne zutun duen naahà te menge sakup ni David he sevaha he Ehiptohanen diyà te pemuleey, ne mid-uwit dan haazà diyà te ki David. Ne mibeǥayan dan te supas wey wahig,
1SA 30:12 wey sengekemkem he ingkagkag he higus wey dezuwa he akup he pasas, su tetelu he andew he wazà mekekaan wey wazà mekeinum, ne hein nekekaan wey nekeinum sikandin ne human pa mebmezesen sikandin.
1SA 30:13 Ne human insai ni David te, “Hentei ves is egalen nu? Tege hendei ke ves?” Midtavak sikandin te, “Sevaha a he Ehiptohanen ne uripen a te sevaha he Amalikanhen. Mid-ewaan a te egalen ku, tetelu en he andew su midezaru a.
1SA 30:14 Midsurung dey is sakup te Negev he mid-ubpaan te menge Kiritnen, he sakup te Juda, wey apil pa is sakup te Negev he ed-ubpaan te menge kevuwazan ni Caleb. Ne mibinsulan dey zaan is Ziklag.”
1SA 30:15 Ne migkeǥiyan sikandin ni David te, “Igkepenurù nu ve kenami ke hendei megkampu heini is menge mengayew?” Midtavak sikandin te, “Penengdui a kenikew ziyà te etuvangan te Megbevayà he kenà a kenikew himetayi wey kenà a kenikew iveǥey te egalen ku, ne ibpeturedu ku human keniyu is kampu zan.”
1SA 30:16 Umbe, nenangdù si David, ne midumahan sikandan duen te Ehiptohanen diyà te migkempuwan duen te menge mengayew. Ne zutun neehè dan is menge Amalikanhen he nekepeyapat he ebpemengaan, ebpen-inum wey utew menge melipayen, tenged te utew mezakel is naaǥew zan diyà te menge Filistihanen wey ziyà te Juda.
1SA 30:17 Midsurung sikandan ni David duma is menge sakup din, ne dezuwa he kezukileman is kedtebek dan taman te mid-uman en maan mebmezukilem. Ne wazà minsan sevaha he nekepelaǥuy gawas te 400 he menge betan-en he nemen-untud te kemilyu he nemelaǥuy.
1SA 30:18 Ne zutun nahawì ni David is langun he menge gamit dan he mibpenguwa te menge Amalikanhen apil is dezuwa he esawa zin.
1SA 30:19 Wazà minsan sevaha he netarin dutun te nengaaǥew kandan te menge Amalikanhen, batà wey meǥurang, maama wey vahi, wey minsan hengkey he mibpenguwa te menge Amalikanhen. Pudu heini nahawì ni David.
1SA 30:20 Apil en dutun is menge kerehidu wey menge vaka. Te kemulu pa ed-evuǥa te menge sakup ni David haazà is langun he menge layud he edhuna kandan, ke sikandan te, “Ki David heini he naaǥew.”
1SA 30:21 Hein nekelikù en ensi David diyà te zal-ug he Besor, midsinuǥung sikandan dutun te 200 he menge sakup din he mibpelintetaǥak tenged te utew zan kegkeveley. Migkemusta sikandan ni David.
1SA 30:22 Ne zuen dutun menge sakup ni David he egkengelalunglalung, ke sikandan te, “Kenè tew ebehinan sikandan te nengaaǥew tew ziyà te menge Amalikanhen su wazè dan meduma kenitew. Ilikù niw zà kandan is menge esawa zan wey menge anak dan, ne ibpeǥenat en sikandan.”
1SA 30:23 Midtavak si David te, “Menge suled, kenè kew peleleǥed te imbeǥey te Nengazen kenitew. Midtevangan kiw zin ne nezaag tew is midlusud kenitew.
1SA 30:24 Wazà iyan ebpemineg keniyan te egkeǥiyen niw. Kinahanglan he ebehinan is langun! Is bahin te mibpelintetaǥak he ebantey te menge gamit tew, kinahanglan he id-repeng daan duen te midhendiyà te tebek.”
1SA 30:25 Mibeelan haazà ni David he meupiya he edsunuzen te menge Israilihanen puun dutun taman guntaan.
1SA 30:26 Hein nekeuma ensi David diyà te Ziklag, impeuwit din diyà te menge pengulu te Juda he menge emiǥu zin is duma he menge naaǥew zan, duma zutun is lalag he: “Heini zed is ibeǥey ku keniyu he naaǥew zey ziyà te menge kuntada te Nengazen.”
1SA 30:27 Iyan mibpeuwitan din is ebpemendumala te inged he: Betel, Ramot Negev, Jatir,
1SA 30:28 Aroer, Sifmot, Eshtemoa,
1SA 30:29 Racal, wey is diyà te menge inged te menge Jerameelinhen wey menge Kinhanen,
1SA 30:30 diyà te Horma, Borashan, Atac,
1SA 30:31 Hebron wey zuma pa he menge inged he nengeveyaan ni David wey menge sakup din.
1SA 31:1 Dutun he timpu, nekidtebek is menge Filistihanen te menge Israilihanen diyà te Buntud he Gilboa. Mezakel is nemematey te menge Israilihanen ne is duma ne mememelaǥuy.
1SA 31:2 Ne midal-as te menge Filistihanen si Saul wey is menge anak din he maama, ne midhimetayan dan is anak din he si Jonatan, Abinadab, wey si Malkishua.
1SA 31:3 Utew meinit is tebek eni Saul wey menge Filistihanen. Neigù si Saul te panà ne utew netigbak te palì.
1SA 31:4 Migkeǥiyan ni Saul is tig-uwit te ǥumaan din te, “Hulevuta nu heeyan is ispada nu wey a himatayi, su emun kenà, ne iyan is wazà mekekilala te Megbevayà edhimatey kedì, ne ed-un-undahan e zan.” Piru nahandek haazà is tig-uwit te ǥumaan din he edhimatey kandin, ne zutun migkuwa ni Saul kes ispada zin, ne midsundang din is lawa zin.
1SA 31:5 Hein naahà dutun te tig-uwit te ǥumaan din he minatey en, mid-uney zin daan sundanga is lawa zin te ispada zin, ne minatey sikandin duma ki Saul.
1SA 31:6 Umbe, te haazà he andew minatey si Saul, wey is tetelu he menge anak din he maama, is tig-uwit te gumaan din, wey is langun he menge sakup din.
1SA 31:7 Haazà he timpu ne zuen menge Israilihanen he ziyà med-ubpà te divaluy he menge suǥud he Jezreel wey ziyà layun te Wahig he Jordan. Hein neehè dan he nememelaǥuy is menge sundaru te Israel wey nepatey en si Saul wey kes menge anak din, ne mid-ewaan dan is menge inged dan ne mibpelaǥuy zan daan. Ne midselezan haazà te menge Filistihanen is menge inged ne iyan dan en dutun mid-ubpà.
1SA 31:8 Hein sunud he andew, te nepasad is tebek, midhendiyà is menge Filistihanen te Buntud he Gilboa su egkuwaan dan is menge ǥumaan te menge nengepatey. Neehè dan diyà si Saul he minatey en wey is tetelu he anak din.
1SA 31:9 Mibpungelan dan si Saul te ulu ne migkuwa zan is menge ǥumaan din. Ne midsuǥù dan te ibpepenudtul ziyà te tivuuk he tanà te menge Filistihanen su wey zan metudtul ziyà te simbahan he ed-ezapan dan te kenà tutuu he Megbevayà wey ziyà te menge zuma zan he minatey en si Saul.
1SA 31:10 Diyè dan isavuk haazà is menge ǥumaan ni Saul te valey he zutun is megbevayè dan he si Ashtoret ne inransang dan is minatey he lawa ni Saul ziyà te berengbeng te inged he Bet Shan.
1SA 31:11 Netuenan te menge tig-Jabesh Gilead is mid-ulaula te menge Filistihanen ki Saul.
1SA 31:12 Ne zutun migenat is langun he menge mevurut he etew zutun te kandan te tivuuk mezukilem taman te nekeuma zan diyà te Bet Shan. Migkuwa zan is lawa ni Saul wey is menge anak din dutun te berengbeng te Bet Shan, ne mid-uwit dan diyà te Jabesh ne mibinsulan dan.
1SA 31:13 Ne migkuwa zan is menge tulan ne inleveng dan diyà te dizalem te kayu he tamarisko ziyà te Jabesh, ne mibpuasa zan seled te pitu he andew.
2SA 1:1 Hein minatey en si Saul midlikù ensi David diyà te Ziklag te nezaag dan en dutun is menge Amalikanhen. Dezuwa he andew sikandan dutun te Ziklag.
2SA 1:2 Iketelu he andew, zuen nekeuma zutun te Ziklag he etew he ebpuun diyà te kampu ni Saul, he nengevindas is kumbalè din, ne nepurung te eliyavuk is ulu zin su ibpeehè din he edlalew sikandin. Midhendiyà sikandin te ki David ne midluhud su edtahud kandin.
2SA 1:3 Mid-insaan sikandin ni David te, “Hendei ke ves ebpuun?” Midtavak sikandin te, “Mibpelaǥuy a puun te kampu te menge Israilihanen.”
2SA 1:4 Mid-insaan ni David te, “Maan, hengkey ves is neulaula? Tezemi a.” Migkaǥi sikandin te, “Nemelaǥuy en is menge sundaru te Israel dutun te tebek. Utew mezakel kandan is nengepatey, apil en si Saul wey is anak din he si Jonatan.”
2SA 1:5 Mid-insà si David, “Maan is netuenan nu he minatey en si Saul wey si Jonatan?”
2SA 1:6 Midtavak haazà is menguhed pa he etew te, “Hein diyè e pa te Buntud he Gilboa, ne neehè ku si Saul zutun is nesendiǥan din dà is bangkew zin. Ne is menge kuntada zin ne mid-uvey en diyà te kandin is ed-untud te menge kerwahi wey menge kudà.
2SA 1:7 Kedlingì din ne neehè e zin ne mid-umew e zin. Midtavak a te, ‘Hengkey is igkeuǥup ku kenikew?’
2SA 1:8 Mid-insaan e zin ke hentei a. Midtavak a te Amalikanhen a.
2SA 1:9 Ne migkeǥiyan e zin te, ‘Uvey ka kayi wey a himetayi en, su henduen be te ibpatey ku en heini is palì ku.’
2SA 1:10 Ne mid-uvayan ku sikandin ne midhimetayan ku su netuenan ku he kenè en sikandin dutun egkeuyag te palì din. Ne migkuwa ku heini is kuruna te ulu zin wey rintì din, ne mid-uwit ku kayi te kenikew, datù.”
2SA 1:11 Dutun mibindas ni David wey te langun he menge sakup din is menge kumbalè dan su ibpeehè dan is kedlalew zan.
2SA 1:12 Nemenineǥew zan wey mibpuasa taman te mezukilem su midruǥur zan ki Saul, wey te anak din he si Jonatan, wey te nasyun he Israel, he menge etew te Nengazen, su utew mezakel kandan is nengepatey te tebek.
2SA 1:13 Ne mid-umanan insai ni David haazà is betan-en he mibpenudtul kandin te, “Hendei ka ed-ubpà?” Midtavak sikandin te, “Amalikanhen a he ziyà med-ubpà te tanè niw he Israel.”
2SA 1:14 Mid-insaan ni David te, “Maan is wazè ka mahandek he edhimatey te hadì he pinilì te Nengazen?”
2SA 1:15 Migkeǥiyan ni David haazà is Amalikanhen te, “Iyan ke zà hinungdan te kemetayen nu. Iyan ka nenistiǥus te keugelingen nu he iyan ka iyan midhimatey te pinilì te Nengazen he hadì.” Ne migkeǥiyan ni David is sevaha te menge sakup din te, “Hengkayi ka, himetayi nu heini!” Ne zutun midhimetayan din.
2SA 1:17 Migarey si David te penhulùhulù te kedlelawi zin ki Saul wey te anak din he si Jonatan,
2SA 1:18 ne insuǥù din he ibpenurù heini ziyà te menge meǥinged te Juda. Migngezanan heini te Kanta te Kedlalew, ne insurat heini ziyà te libru ni Jashar. Iyan heini penhulùhulù din:
2SA 1:19 “Menge Israilihanen, nemematey en is dungganen he menge pengulu ziyà te menge vuvungan te Israel. Nemematey en daan is memevurut he sundaru niw!
2SA 1:20 Kenà heini tudtula ziyà te inged he Gat, minsan diyà te menge zalan te inged he Ashkelon, su kela ke ikelipey zà heini te menge vahi te menge Filistihanen he wazà mekekilala te Megbevayà.
2SA 1:21 Berakat he wazè en uzan wey ke zehemug be, ziyà te menge vuntud he Gilboa wey verakat daan he wazè en edtuvù he menge pinemula ziyà te menge vevesukà kayi para idhalad te Megbevayà. Su keniyan buringi te menge kuntada is kelasag te mevurut he hadì he si Saul. Ne wazè en melenahi heini he kelasag para mebmetilak.
2SA 1:22 Pinaaǥi te ispada ni Saul wey te panà ni Jonatan, mezakel is nepatey zan he memevurut he menge kuntada zan.
2SA 1:23 Utew mibmahal te menge Israilihanen si Saul wey si Jonatan su nesuatan dan sikandan. Wazè dan mekedsuwey taman te kemetayen dan. Diyà te tebek, henduen be te meǥaan pa sikandan te vanug wey mezesen dan pa te erimaung.
2SA 1:24 Sikiyu is menge vahi te Israel, rurun kew para ki Saul. Su tenged kandin nekevivisti kew te mahal he visti wey menge elahas he vulawan.
2SA 1:25 Nemematey en is menge memevurut he sundaru te Israel te tebek. Minatey en si Jonatan diyà te menge vuvungan.
2SA 1:26 Utew mesakit is gehinawa ku tenged kenikew, Jonatan, he suled ku! Pelanggè ku utew sikew, su is kebmahala nu kedì, ne lavew pa te kebmahal nu te menge vahi.
2SA 1:27 Nemematey en is memevurut he menge sundaru te Israel. Is menge ǥumaan dan ne nengetazin en.”
2SA 2:1 Nepasad haazà, nenginginsà si David te Nengazen, “Edlikù e ve ziyà te sevaha he inged he sakup te Juda?” Midtavak is Nengazen te, “Uya.” Mid-insà si David te, “Hendei?” Midtavak is Nengazen te, “Diyà te Hebron.”
2SA 2:2 Dutun migenat si David duma is dezuwa he esawa zin he si Ahinoam he tig-Jezreel wey si Abigail he esawa zengan ni Nabal he tig-Carmel.
2SA 2:3 Miduma ni David is menge sakup din apil is pemilya zan, ne ziyè dan med-ubpà te Hebron wey ziyà te menge lugar he nengekelingut kayi.
2SA 2:4 Hein nepiraan en sikandan dutun, midhendiyà te Hebron is menge pengulu te Juda ne midlenahan dan is ulu ni David he tuus te iyan en sikandin nehimu he hadì te Juda. Hein netuenan ni David he is menge tig-Jabesh Gilead iyan midleveng ki Saul,
2SA 2:5 midsuǥù sikandin diyà te ibpepenudtul ziyà te kandan he egkaǥi te, “Berakat he tuvazi kew te Nengazen te impeehè niw he zekelà is kedmahal niw ki Saul te egalen niw pinaaǥi te kedlevenga niw kandin.
2SA 2:6 Berakat he ipaahà te Nengazen is gaǥew zin wey kebmetinumanen din diyà te keniyu, ne ibpeehè ku zaan is kebpurungi ku keniyu tenged te mibeelan niw.
2SA 2:7 Ne ǥuntaan, pekelig-en kew wey pekevurut kew minsan te minatey en si Saul he egalen niw. Iyan a mibpilì te menge tig-Juda he iyan hadì dan.”
2SA 2:8 Dutun he timpu, is peremandar te menge sundaru ni Saul he si Abner he anak ni Ner midhendiyà te Mahanaim. Miduma zin si Ishboshet he anak ni Saul.
2SA 2:9 Dutun impahayag ni Abner he iyan si Ishboshet hadì te tivuuk he Israel, ragkes en kayi is menge lugar ziyà te Gilead, Ashuri, Jezreel, Efraim, wey Benjamin.
2SA 2:10 Ne 40 he tuig is keǥurang ni Ishboshet hein nehimu sikandin he hadì te Israel, ne midhadì sikandin seled te zezuwa he tuig. Is menge tig-Juda mulà, si David is migkilala zan he hadì dan,
2SA 2:11 ne midhadì dutun si David seled te pitu he tuig wey heenem he vulan. Diyà sikandin med-ubpà te Hebron.
2SA 2:12 Sevaha zutun he andew, midhendiyà si Abner te Gibeon is ebpuun diyà te Mahanaim he zuma zin is menge sakup ni Ishboshet.
2SA 2:13 Midsinuǥung sikandan ni Joab he anak ni Zeruya wey te menge sakup ni David diyà te peneng te Gibeon. Nememinuu is grupu ni Abner ziyà te zivaluy he vahin dutun te peneng ne nememinuu zaan diyà te zivaluy zaan he vahin is grupu ni Joab.
2SA 2:14 Ne migkeǥiyan ni Abner si Joab te, “Ibpedtebek ta is duma he menge ventuǥan he sundaru ta kayi te etuvangan ta.” Midtavak si Joab te, “Uya!”
2SA 2:15 Dutun midhitindeg is 12 he menge sakup ni Ishboshet he ebpuun te tribu ni Benjamin para ebpekidtebek wey is 12 zaan he sakup ni David.
2SA 2:16 Midhitindeg dan ne mibpeǥewǥewezè dan diyà te ulu ne mibpezungdunggavey zan taman te naamin dan mebpematey. Umbe iyan ngazan dutun he lugar te Gibeon is Helkat Hazurim.
2SA 2:17 Ne zutun mibpurung medtebek haazà is dezuwa he grupu. Te haazà he andew nezaag si Abner wey is menge sakup te Israel te menge sakup ni David.
2SA 2:18 Ne zutun, is tetelu he anak ni Zeruya he si Joab, Abishai, wey si Asahel nekezuma te tebek. Si Asahel utew meǥaan he ebpelelaǥuy he henduen te selazeng, ne midal-as din si Abner he wazà kedlilingey.
2SA 2:20 Hein kedlilingey ni Abner, neehè din sikandin ne mid-insaan din te, “Sikew ve heeyan Asahel?” Midtavak si Asahel te, “Uya.”
2SA 2:21 Ne migkeǥiyan ni Abner sikandin te, “Kenè e en kenikew leyasa, iyan nu en leyasa haazà is duma ku he sundaru, ne eǥawa nu is menge ǥumaan din.” Piru wazà mebpemineg si Asahel.
2SA 2:22 Mid-uman megkaǥi si Abner ki Asahel te, “Engkezi ad kenikew te edlayas! Kenà a kenikew peǥesa te kedhimatey kenikew. Egkeeled a he ebpekid-etuvang te suled nu he si Joab emun egkepatey ku sikew.”
2SA 2:23 Piru wazà iyan engkezi ni Asahel te edal-as si Abner, umbe mibpilak din te vangkew zin diyà te ǥetek, ne midlambas diyà te peka zin. Nepiley sikandin ne segugunà mibpatey. Is menge etew he ebpekevayà dutun he lugar te nepetayan ki Asahel ne edteren.
2SA 2:24 Hein netuenan ni Joab wey ni Abishai is neulaula, midal-as dan si Abner. Hein midsanlep en is andew, nekeuma zan diyà te vuntud te Ama uvey te Gia, he ziyà te kilid te zalan he ibpehendiyà te sibsivayan te Gibeon.
2SA 2:25 Impaamur-amur ni Abner ziyà te puntur te menge vuvungan is menge sundaru he ebpuun te tribu ni Benjamin para ed-andam te kebpekidtebek.
2SA 2:26 Migkulahì ni Abner si Joab te, “Pedayun en be is kebpehimhimetayè tew? Wazè nu ve meisip-isip he is pangkus kayi iyan is kepezumdumutà? Maan is kenè nu egkezawey is menge sakup nu he edal-as kenami te menge kezuzumahi niw?”
2SA 2:27 Midtavak si Joab te, “Emun wazè ka megkaǥi, ibpesarig ku kenikew, kayi te etuvangan te uuyag he Megbevayà, ne edel-asen ka pezem te menge sakup ku taman te egkepawà.”
2SA 2:28 Ne impezaǥing ni Joab is budyung ne midteren is langun he menge sakup din he edal-as te menge tig-Israel. Ne zutun neengked is tebek.
2SA 2:29 Dutun tivuuk he mezukilem is kedhipanew ni Abner wey is menge sakup din dutun te Araba. Ne midrapas dan dutun te Wahig he Jordan, ne midlaus dan he edhipanew taman te meselem taman te nekeuma zan diyà te Mahanaim.
2SA 2:30 Dutun te ked-engkezi ni Joab te kedal-as ki Abner, ne mid-ulì sikandin duma is menge sakup din. Hein netiǥum dan en ne netuenan din he 19 is nepatey te sakup ni David gawas ki Asahel.
2SA 2:31 Piru is nepatey he sakup ni Abner ne 360, diyà heini ebpuun te tribu ni Benjamin.
2SA 2:32 Migkuwa eni Joab is minatey he lawa ni Asahel ne inleveng diyà te midlevengan te amey zin diyà te Betlehem. Ne zutun tivuuk he mezukilem is kedhipanew zan, ne nekeuma sikandan diyà te Hebron.
2SA 3:1 Iyan haazà puunà te meluǥayad he tebek te edapig ki Saul wey te edapig ki David. Ed-iseg ebmelig-en is grupu ni David ne ebmeluya mulà is grupu ni Saul.
2SA 3:2 Iyan heini menge anak ni David he neetew ziyà te Hebron. Is kinekekayan iyan si Amnon he anak din diyà te ki Ahinoam he tig-Jezreel.
2SA 3:3 Is ikezuwa iyan si Kileab he anak din diyà te ki Abigail te esawa zengan ni Nabal he tig-Carmel. Is iketelu iyan si Absalom he anak din diyà te ki Maaca he anak ni Hadì Talmai ziyè te Geshur.
2SA 3:4 Is ikeepat iyan si Adonia he anak din diyà te ki Hagit. Is ikelima iyan si Shefatia he anak din diyà te ki Abital.
2SA 3:5 Ne is ikeenem iyan si Itream he anak din diyà te ki Egla. Iyan sikandan impen-anak diyà te Hebron he menge anak ni David.
2SA 3:6 Dutun te kemulu pa is tebek te midapig ki David wey midapig ki Saul, si Abner is melig-en he pengulu te midapig ki Saul.
2SA 3:7 Ne sevaha he andew, migkeǥiyan ni Ishboshet si Abner te, “Maan is midhulizan nu is sevaha he esawa te amey ku he si Saul?” Is bahi he ibpesavut ni Ishboshet iyan si Rizpa he anak ni Aya.
2SA 3:8 Utew nepauk si Abner zutun te migkaǥi kandin ni Ishboshet, ne midtavak sikandin te, “Kunaan nu vuwa ke edluivan ku en is amey nu, ne ziyà a edapig te Juda? Puun pa zengan mid-unungan ku is amey nu wey is pemilya zin wey menge emiǥu zin, ne wazè ku iveǥey ki David. Guntaan edhelezan a kenikew he nekesalà a keniyan te vahi!
2SA 3:9 Emun iyan heeyan, ne deyzey pa ke ed-uǥupan ku si David he metuman is saad kandin te Nengazen, ne verakat he siluti a te Megbevayà emun ke kenè ku sikandin edtevangan.
2SA 3:10 Midsaad is Nengazen he kenè din en ibpahadì is minsan hentei he kevuwazan ni Saul, kekenà, si David en is edhimuwen din he hadì te Israel wey Juda, puun te Dan taman te Beersheba.”
2SA 3:11 Wazè en medtavak si Ishboshet su nahandek sikandin ki Abner.
2SA 3:12 Ne midsuǥù si Abner te menge etew he ebpekeǥiyan si David te, “Sikew is engayan he edhadì te tivuuk he tanà te Israel. Baal ka te kesebutan ta, ne edtevangan ku sikew he mesakup nu is tivuuk he nasyun te Israel.”
2SA 3:13 Midtavak si David te, “Uya, ebaal a te kesebutan ta, asal duen ku zaan hangyù kenikew: emun edlikù ka kayi te kedì ne uwita nu is esawa ku he si Mical he anak ni Saul.”
2SA 3:14 Midsuǥù si David te etew he ibpepenudtul ziyà te ki Ishboshet te, “Ilikù nu kayi te kedì is esawa ku he si Mical. Su 100 he Filistihanen is midhimetayan ku ne migkuwa ku is lundis te purù te sineruwan dan he iyan sunggud ku te ked-esewaa ku ki Mical.”
2SA 3:15 Umbe, midsuǥù si Ishboshet he ibpekuwa si Mical ziyà te nekeesawa kandin he si Paltiel he anak ni Laish.
2SA 3:16 Ne si Paltiel, midtinundug sikandin ki Mical he edsineǥew taman te Bahurim. Migkeǥiyan ni Abner si Paltiel he med-ulì en. Ne mid-ulì en daan sikandin.
2SA 3:17 Mibpekidsebutà si Abner wey menge sineriǥan te Israel. Migkaǥi sikandin te, “Neuǥet en he egkesuat kew he iyan egkehimu he hadì si David.
2SA 3:18 Guntaan, egkehimu tew en su midsaad is Nengazen he pinaaǥi te suluǥuen din he si David, edlibriyen din is keet-etawan din he menge Israilihanen su wey kenè en sikandan egkeveyveyaan te menge kuntada zan wey te menge Filistihanen.”
2SA 3:19 Mibpekidlalag daan si Abner te tribu ni Benjamin. Ne midhendiyà sikandin te Hebron te kebpenudtul ki David he ed-uyun is menge etew te Israel wey te Benjamin he iyan en hadì dan sikandin.
2SA 3:20 Hein nekeuma si Abner ziyà te Hebron duma is 20 he menge sakup din, migastu si David para kandan.
2SA 3:21 Migkeǥiyan ni Abner si David te, “Mahal he Hadì, pemineǥa a kenikew su edhipanew a ǥuntaan su egkeǥiyan ku is langun he etew te Israel he med-uyun dan he iyan ka hadì dan. Ibpevaal ku sikandan te kesebutan he edewaten ke zan he hadì dan. Ne pudu nu en egkehedii is egkesuatan nu he edhedian.” Umbe impeǥenat ni David si Abner he wazè din menuwa.
2SA 3:22 Nekeuma si Joab wey is duma he menge sakup ni David diyà te Hebron he ebpuun te kebpengayew, ne utew zekelà is neuwit dan he naaǥew zan. Piru wazè en diyà si Abner su impeǥenat en ni David he wazè din menuwa.
2SA 3:23 Hein netuenan ni Joab he midhendiyà si Abner te hadì he wazà menuwa,
2SA 3:24 midhendiyà si Joab te hadì he egkaǥi te, “Hengkey ves is baal nu? Midhengkayi en si Abner, maan is impeǥenat nu pa? Ne, guntaan wazè en sikandin!
2SA 3:25 Nekilala nu en si Abner. Midhendini sikandin su edlimbungan ke zin, wey ebpeniizan din is langun he ebeelan nu.”
2SA 3:26 Mid-awà si Joab dutun te ki David ne midsuǥù he ibpezal-as si Abner. Neseutan dan si Abner ziyà te teheb he Sira ne miduma zan wey mekelikù diyà te Hebron. Piru wazà heini metueni ni David.
2SA 3:27 Hein diyè en si Abner te Hebron, miduma sikandin ni Joab diyà te pultahan te inged he iyan dan dà is dezuwa. Mid-ekalan din te zuen dan kun edlelaǥen. Hein nekeuma zan dutun midunggab ni Joab si Abner ziyà te getek su impenimales din is kedhimetayi ni Abner ki Asahel te suled din. Ne minatey si Abner.
2SA 3:28 Hein netuenan haazà ni David, ke sikandin te, “Nesayud is Nengazen he siak wey is menge sakup ku ne wazà keseyuzan te kemetayen ni Abner he anak ni Ner.
2SA 3:29 Si Joab wey is pemilya zin iyan duen din televaken. Deyzey pezem ke is pemilya zin ne letuni te zaru he ebpenggewasan te meremerik is sudiyè dan, duen daru te lundis, mengehimu he inutil wey mebpematey te tebek wey layun bitila.”
2SA 3:30 (Iyan hinungdan te kedhimetayi ni Joab wey ni Abishai he suled din ki Abner su midhimetayan daan ni Abner is suled dan he si Asahel hein kedtebek diyà te Gibeon.)
2SA 3:31 Dutun migkeǥiyan ni David si Joab wey kes langun he menge zuma zin te, “Bindasa niw is menge kumbalè niw, wey iyan niw ikukumbalà is saku. Ne ilalew niw si Abner zutun te edhipanew kew ziyà te egkehunaan te minatey he lawa ni Abner zutun te kedlevenga kandin.” Miduma si Hadì David te kedleveng.
2SA 3:32 Diyà ileveng si Abner te Hebron; midsineǥew si Hadì David dutun te kedleveng. Midsineǥew is langun dutun he miduma te kedleveng.
2SA 3:33 Migkanta si Hadì David kayi he penhulùhulù para ki Abner: “Maan is minatey si Abner he iring te sevaha he selaan?
2SA 3:34 Wazà bekusa is menge velad wey menge paa zin; midhimetayan sikandin te lalung he menge etew.” Midsineǥew en maan is langun he menge etew tenged ki Abner.
2SA 3:35 Wazà megkaan si David dutun he andew, ne midteǥel sikandin te menge etew he ibpekaan. Piru midsesapà si David he egkaǥi te, “Berakat he purungi a siluti te Megbevayà ke egkaan a te minsan hengkey te kenè pa edsanlep is andew.”
2SA 3:36 Utew nengelipey is menge etew zutun te migkaǥi ni David, wey kenà iyan dà ingkelipey zan haazà, kekenà, elin daan is langun he mibeelan ni David.
2SA 3:37 Umbe, netuenan human te menge etew te Israel he si Hadì David wazè din kelevetan te kemetayen ni Abner.
2SA 3:38 Ne migkeǥiyan ni David is menge sakup din te, “Wazè niw ve mesavut he is minatey ǥuntaan he andew sevaha he ventuǥan he egalen te Israel?
2SA 3:39 Ne minsan iyan a mibpilì he hadì guntaan, kenè ku egkeveyveyaan si Joab wey si Abishai, he menge anak ni Zeruya. Nereǥenan a utew kandan. Umbe, iyan en is Nengazen ebales te lalung he menge etew te kelelalung he menge vaal zan.”
2SA 4:1 Hein netuenan ni Ishboshet, he anak ni Saul, he midhimetayan si Abner ziyà te Hebron, utew nahandek sikandin wey is langun he tig-Israel.
2SA 4:2 Duen dezuwa he sakup ni Ishboshet he iyan mibpengulu te kedsurung diyà te inged te menge kuntada zan. Si Baana wey si Recab. Menge anak sikandan ni Rimon he tig-Beerot, he ebpuun te tribu ni Benjamin. Heini is Beerot sakup te Benjamin,
2SA 4:3 su is nehuna he mid-ubpà kayi ne mibpemelaǥuy zan diyà te Gitaim, ne taman guntaan dutun dan en he meǥinged te kenà kandan he tanà.
2SA 4:4 Gawas ki Ishboshet duen pa kevuwazan ni Saul he nesamà he iyan si Mefiboshet, he anak ni Jonatan. Lelime en he tuig is penuiǥen din te kebpatey ni Saul wey si Jonatan diyà te Jezreel. Hein netuenan duen te egahat ki Mefiboshet he minatey en si Saul wey si Jonatan, migègaanan din enawa sikandin ne mibpelaǥuy. Dutun te utew zin kegkezeǥusu he ebpelaǥuy, nelekaan din haazà is batà umbe nehimu he begelid heini.
2SA 4:5 Ne sevaha he andew, midhendiyà te valey ni Ishboshet si Recab wey si Baanah he menge anak ni Rimon he tig-Beerot. Neudtu zutun is andew te kebpekeuma zan; si Ishboshet ne ebperperenggey.
2SA 4:6 Ne midseled dan su uvag kun egkuwa zan te trigu. Ne midseled sikandan diyà te ruǥu ni Ishboshet ne zutun sikandin te katri zin edhidhizeǥà ne segugunè dan dunggava ziyà te getek. Ne midtamped dan is lieg din ne migkuwa zan is ulu ne mid-uwit dan te ebpelaǥuy ne ziyè dan mebayà te Araba te tivuuk he mezukilem.
2SA 4:8 Hein nekeuma zan diyà te Hebron, mid-uwit dan is ulu ni Ishboshet diyà te ki David he ke sikandan te, “Heini en is ulu ni Ishboshet he anak duen te kuntada nu he si Saul he edhimatey pezem kenikew. Iyan is Nengazen mibales diyà te ki Saul ǥuntaan wey ziyà te menge kevuwazan din para kenikew.”
2SA 4:9 Midtavak ni David sikandan te, “Egkeǥiyen ku keniyu is tutuu kayi te etuvangan te uuyag he Nengazen he iyan midluwas kedì te langun he ebpekekaid.
2SA 4:10 Duen etew he midhendiyà te kedì diyà te Ziklag he nenudtul te minatey si Saul. Mid-isip din he igkesuat ku is kedtudtuli zin kedì. Piru impezakep ku sikandin ne midhimetayan ku. Iyan haazà suhul ku kandin te tudtul zin kedì.
2SA 4:11 Guntaan, sikiyu is menge mezaat is menge ulaula edsilutan ku sikiyu te subra pa kayi, su midhimetayan niw is etew he wazè din salà, he ziyè dà edhidhizeǥà te keugelingen din he valey zutun te hizeǥeey zin. Ebpeveyazan ku heini keniyu is kedhimetayi niw kandin para mahanew kew zaan kayi te kelibutan.”
2SA 4:12 Umbe, mibmenduan ni David is menge sakup din he ibpehimetayan si Recab wey si Baana. Ne midtuman dan haazà. Midpenamped is menge velad wey is menge paa zan ne imbitey is lawa zan diyà te peneng diyà te Hebron. Migkuwa zan is ulu ni Ishboshet ne inleveng dan diyà te midlevengan ki Abner ziyà te Hebron.
2SA 5:1 Midhendiyà is langun he tribu te Israel te ki David diyà te Hebron he egkaǥi te, “Menge kezuzumahi key kenikew.
2SA 5:2 Puun pa zengan, minsan te iyan pa si Saul hadì dey, ne iyan ke pa nengulu te menge Israilihanen te kebpekidtebek. Ne migkeǥiyan ka te Nengazen te, ‘Elimahi nu is menge etew ku he Israilihanen te iring te ked-elima te ebantey te menge kerehidu. Iyan ka egkehimu he pengulu zan.’ ”
2SA 5:3 Umbe, ziyà te Hebron, mibaal si David te kebpekid-uyun te menge pengulu te Israel ziyà te etuvangan te Nengazen, ne midlenahan dan is ulu ni David te lana he ibpeehè dan he iyan en sikandin hadì te Israel.
2SA 5:4 Ne 30 he tuig is keǥurang ni David hein nehimu sikandin he hadì, ne midhadì sikandin seled te 40 he tuig.
2SA 5:5 Pitu he tuig wey heenem he vulan is kedhadì din diyà te Juda hein diyè pa med-ubpà sikandin te Hebron, ne 33 he tuig is kedhadì din te tivuuk he Israel wey Juda hein diyà sikandin med-ubpà te Jerusalem.
2SA 5:6 Duen timpu he migenat si David wey is menge sakup din pehendiyà te Jerusalem su edsurungen dan is menge Jebusihanen he meǥinged dutun. Migkaǥi is menge Jebusihanen diyà te ki David te, “Kenè kew ebpekeseled kayi te Jerusalem! Minsan is menge lakap wey menge pigket ne ebpekepugung keniyu te edseled.” Iyan haazà kineǥiyan dan, su neisip dan he kenà iyan ebpekeseled ensi David.
2SA 5:7 Piru naaǥew ni David is melig-en he kutà te Zion, he egngezanan guntaan te Inged ni David.
2SA 5:8 Hein wazè pa meselezi ni David is Jerusalem, ne migkeǥiyan din is menge sakup din te, “Diyè kew vayà te ebeyaan te wahig para mekeseled kew ziyà te Jerusalem, ne egkezaag niw is menge Jebusihanen he iring te menge pigket wey menge lakap. Utew ku en sikandan kuntada!” Iyan heini erubasa he nehimu tenged dutun, “Kenà ebpekeseled is lakap wey pigket dutun te valey te Nengazen.”
2SA 5:9 Hein naaǥew en ni David haazà is Zion, diyè en sikandin med-ubpà, ne migngezanan din haazà te Inged ni David. Ne mibpeumanan din haazà pepelinguti te verengbeng puun te mevavà he vahin dutun te inged.
2SA 5:10 Utew mibmelig-en si David, tenged te edtevangan sikandin te Nengazen he Megbevayà he Mekeǥeǥehem.
2SA 5:11 Dutun he timpu, midsuǥù si Hadì Hiram he hadì te Tyre te menge menunudtulà diyà te ki David duma is menge pandey, menge tigsimintu, wey mibpeuwit te menge kayu he sidru, su ebengunen dan is turuǥan ni David.
2SA 5:12 Ne zutun nesavut ni David he iyan is Nengazen midsavuk kandin he hadì te Israel wey iyan mibpeuswag te ginhedian din para te menge etew zin he menge Israilihanen.
2SA 5:13 Hein midhalin si David diyà te Jerusalem is ebpuun diyà te Hebron, mahabet pa is mid-esawa zin; is duma he mid-esawa zin ne kenà lavew is ked-etew, ne neumanan is menge anak din.
2SA 5:14 Iyan heini ngazan te menge anak din he maama he neetew ziyà te Jerusalem: Shamua, Shobab, Natan, Solomon,
2SA 5:15 Ibhar, Elishua, Nefeg, Jafia,
2SA 5:16 Elishama, Eliada, wey si Elifelet.
2SA 5:17 Hein netuenan te menge Filistihanen he iyan si David nepilì he hadì te Israel, midtiǥum dan is langun he menge sundaru zan para te kedakep kandin. Piru netuenan ni David, umbe midhendiyà sikandin te sevaha he melig-en he kutà.
2SA 5:18 Dutun, migkampu is menge Filistihanen diyà te menge Suǥud he Refaim.
2SA 5:19 Umbe, nenginginsà si David te Nengazen, “Edsurungen dey ve is menge Filistihanen? Ibpezaag nu ve sikandan kenami?” Midtavak is Nengazen diyà te kandin, “Uya, ǥenat kew en, su ibpezaag ku sikandan keniyu.”
2SA 5:20 Ne nemenggenat ensi David pehendiyà te Baal Perazim, ne zutun nezaag dan is menge Filistihanen. Migkaǥi si David te, “Migerà te Nengazen is menge kuntada ku he henduen be te mibeyaan te zekelà he zalem, ne utew ku heini nemetmetahi.” Umbe migngezanan haazà he lugar he Baal Perazim.
2SA 5:21 Ne mid-ewaan te menge Filistihanen is menge ed-ezapen dan dutun, ne mibpen-uwit ni David wey te menge sakup din.
2SA 5:22 Midlikuan te menge Filistihanen haazà is Suǥud he Refaim ne migkampu zan dutun.
2SA 5:23 Ne mid-uman mebpenginginsà si David diyà te Nengazen, ne midtavak is Nengazen te, “Kenè niw ǥègaani te edsurung, kekenà, linguti niw sikandan ne surunga niw ziyà te uvey te menge kayu he balsam.
2SA 5:24 Emun egkezineg niw he henduen te ebmartsa is menge sundaru ziyà te zapit te zivavew zutun te menge kayu he balsam, ne surunga niw en su iyan tuus heeyan he iyan a edhuna te kedsurung niw te menge Filistihanen.”
2SA 5:25 Umbe, midtuman ni David is insuǥù kandin te Nengazen, ne nengepatey zan is menge Filistihanen puun te Geba taman te Gezer.
2SA 6:1 Midtiǥum umana ni David is egkeseriǥan he menge sundaru te Israel, 30,000 is kezakel zan.
2SA 6:2 Ne migenat dan pehendiyà te Baala he sakup te Juda su egkuwaan dan diyà kes Kavan te Kebpekid-uyun te Megbevayà, he zutun is Nengazen he Mekeǥeǥehem. Ne zutun is Nengazen te teliwazà te menge kirubin he zutun te divavew te Kavan.
2SA 6:3 Heini he Kavan te Kebpekid-uyun te Megbevayà ne ziyà te valey ni Abinadab he ziyà te vuntud. Migkuwa heini eni David, ne in-untud dan te veǥu he kerwahi. Si Uza wey si Ahio is menge anak ni Abinadab ne iyan migiya zutun te kerwahi; si Ahio ne iyan edhuna.
2SA 6:5 Midsilibra si David wey is langun he etew te Israel ziyà te etuvangan te Nengazen te tivuuk dan he zesen. Nemenganta zan wey midtukar te menge alpa, lira, tamburin, kastanitas, wey simbal.
2SA 6:6 Hein nekeuma zan duen te ǥunasà ni Nacon, migewezan ni Uza haazà is Kavan te Kebpekid-uyun te Megbevayà, su nekezulas is menge vaka.
2SA 6:7 Utew nepauk dutun is Nengazen ki Uza tenged te neveelan din. Umbe, midhimetayan sikandin te Megbevayà dutun dà te zurug te Kavan.
2SA 6:8 Nepauk si David su midsilutan te Nengazen si Uza tenged te kegkepauk din. Umbe taman guntaan ne iyan inngazan dutun he lugar is Perez Uza.
2SA 6:9 Nahandek si David te Nengazen te haazà he andew, ne nekekaǥi sikandin te, “Ebmenmenuwen en be he meuwit heini is Kavan te Nengazen diyà te inged ku?”
2SA 6:10 Ne zutun neisip din he kenè din en ed-uwiten diyà te inged din haazà is Kavan te Nengazen. Diyè din itaǥak haazà te valey ni Obed Edom he tig-Gat.
2SA 6:11 Diyà heini te valey ni Obed Edom itaǥù seled te tetelu he vulan, ne midtuvazan te Nengazen si Obed Edom wey is tivuuk he pemilya zin.
2SA 6:12 Netudtulan si Hadì David he midtuvazan te Nengazen is pemilya ni Obed Edom wey is langun he ǥaked din tenged dutun te Kavan te Kebpekid-uyun te Megbevayà. Ne zutun midhendiyà si David te valey ni Obed Edom ne migkuwa zin haazà is Kavan te Kebpekid-uyun te Megbevayà su ed-uwiten din diyà te inged din duma is kelipey.
2SA 6:13 Hein keheenem en mekelangkad haazà is mid-uwit dutun te Kavan te Nengazen, impeteren sikandan ni David su nemuhat sikandin te sevaha he tudu he vaka wey sevaha he impelambù he turiti he vaka.
2SA 6:14 Midsayew si David diyà te etuvangan te Nengazen pinaaǥi te tivuuk he zesen din, he migkukumbalà te ipud he linu.
2SA 6:15 Dutun te kedhipanew te menge etew te Israel he ed-uwit te Kavan te Nengazen, ebpemengulahì dan is ebpezaǥing te menge vudyung.
2SA 6:16 Hein idseled dan en haazà is Kavan te Nengazen dutun te Inged ni David, mibpantew si Mical he anak ni Saul ziyà te bintanà. Ne neehè din si Hadì David is edlinglingketew en is edsayew ziyà te etuvangan te Nengazen, ne neepes si Mical te mibeelan ni David.
2SA 6:17 Insavuk eni David haaza is Kavan te Nengazen dutun te seled te tulda he mibeelan ni David he edsevukan din dutun te Kavan. Ne nemuhat si David diyà te Nengazen te menge pemuhat he edtutungen wey menge pemuhat he para te meupiya he kedepità.
2SA 6:18 Hein nekepasad en sikandin he ebpemuhat, ne mibpenubtuvazan din is menge etew pinaaǥi te ngazan te Nengazen he Mekeǥeǥehem.
2SA 6:19 Ne is kada sevaha he Israilihanen, maama wey vahi, ne mibeǥayan din te supas, usa, wey menge pasas. Ne zutun nemen-ulì is menge etew ziyà te valey zan.
2SA 6:20 Ne mid-ulì daan si David su ebpenubtuvazan din is tivuuk he pemilya zin, ne midtelavuk sikandin ni Mical he anak ni Saul, ne migkeǥiyan din te, “Henduen te hentei he telehuzen is hadì te Israel guntaan he andew! Midsayew sikandin he samè dà kenà medlelevas dutun te etuvangan te menge suluǥuen he menge vahi te menge upisyal zin. Baal zà heeyan te wazè din keelezan.”
2SA 6:21 Migkeǥiyan ni David si Mical te, “Mibeelan ku haazà diyà te etuvangan te Nengazen he iyan mibpilì kedì he ilis te amey nu wey te minsan hentei he ziyà te pemilya zin. Mibpilì e zin he iyan edumala te keet-etawan din he menge Israilihanen. Umbe wazà ebpekevelavag te kedsilibra ku ziyà te etuvangan te Nengazen,
2SA 6:22 ne subra pa is ebeelan ku he mekeeled-eled. Igkeeled nu is ebeelan ku, piru ebentuǥen a mulà te menge vahi he egkeǥiyen nu he menge suluǥuen.”
2SA 6:23 Ne wazè en med-anak si Mical taman te kebpatey zin.
2SA 7:1 Diyè en si Hadì David med-ubpà te turuǥan din, ne mibeǥayan te Nengazen te kelinew is ginhedian din, he wazè en igkaandam he edsurung.
2SA 7:2 Ne sevaha he andew, migkeǥiyan ni David is ebpeneuven he si Natan te, “Kayi e en guntaan med-ubpà te utew mekempet he ubpeey he is menge pengawid din, ne ebpuun te kayu he sidru, piru haazà is Kavan te Kebpekid-uyun te Megbevayà ne zutun dà te tulda.”
2SA 7:3 Midtavak si Natan dutun te hadì te, “Beeli nu is egkesuatan nu te ebaal, su is Nengazen eduma kenikew.”
2SA 7:4 Piru te haazà he kezukileman mibpekidlalag is Nengazen ki Natan te,
2SA 7:5 “Genat ka, ne keǥiyi is suluǥuen ku he si David he iyan heini migkaǥi ku: ‘Iyan ke ves ebpehitindeg te valey he ed-ubpaan ku?
2SA 7:6 Wazè e pa mekeubpà te valey he zutun a ed-ezapa is Megbevayà puun pa te timpu te kebpeǥewasa ku te menge Israilihanen puun te Ehipto taman guntaan. Nekehalinhalin ad is diyà ed-ubpà te tulda.
2SA 7:7 Hein kedhalinhalin ku he zuma ku is menge etew ku he Israilihanen, wazà ad megkaǥi ziyà te menge pengulu, he midsuǥù ku te ked-elima kandan, te maan is wazè e zan tukuzi te utew mekempet he valey he zutun a ed-ezapa he sidru is menge pengawid din.’
2SA 7:8 “Keǥiyi nu pa si David he iyan a, is Nengazen he Mekeǥeǥehem, egkaǥi te, ‘Mibantey ke zà dengan te menge kerehidu, piru mibpilì ku sikew he edumala te menge etew ku he Israilihanen.
2SA 7:9 Midumahan ku sikew minsan hendei ka mebpevayà, ne impezaag ku kenikew is langun he kuntada nu. Guntaan edhimuwen ku sikew he mevantug iring te zuma he menge etew he egkevantug diyan te tivuuk he kelibutan.
2SA 7:10 Mibeǥayan ku en is menge etew ku he Israilihanen te ubpeey he pirmeninti, para zuen dan en keugelingen he ubpeey he wazè en ebpekesamuk kandan wey ebpekezaagdaag iring duen te nehuna,
2SA 7:11 puun pa te timpu te kedsevuki ku te menge pengulu te menge etew ku he Israilihanen. Ebeǥayan ku te kelinew is ginhedian nu, ne wazè en kuntada he ebpekeseled dutun. Iyan a, is Nengazen, migkaǥi kenikew he iyan edhadì layun is sevaha te menge kevuwazan nu.
2SA 7:12 Emun ebpatey kad ne idleveng ka zuma te menge kepuun nu, ibpuli ku kenikew is sevaha te menge anak nu, ne edlig-enan ku is ginhedian din.
2SA 7:13 Iyan sikandin ebangun te valey para te kebeǥey kedì te zengeg, wey edsigureduwen ku he is menge kevuwazan din ebpekahadì taman te taman.
2SA 7:14 Egkehimu he iyan a amey zin, ne iyan daan sikandin anak ku. Emun ebpekesalà sikandin, ne ebmensuwen ku sikandin iring te kebmansu te amey te anak din.
2SA 7:15 Piru kenà egkaawà is kebmahala ku kandin, kenà iring te mid-ulaula ku ki Saul he nepuliyan nu he hadì.
2SA 7:16 Ebpedayun te wazà pidtemanan is kenikew he ginhedian, ne is menge kevuwazan nu taman te taman is kedhadì dan.’ ”
2SA 7:17 Midtudtul ni Natan ki David is langun he impezayag te Megbevayà diyà te kandin.
2SA 7:18 Dutun midseled si Hadì David dutun te Tulda he zutun kes Kavan te Kebpekid-uyun. Ne mibpinuu sikandin diyà te etuvangan te Nengazen ne mibpengemuyù te, “He Nengazen he MEGBEVAYÀ, hentei e ves wey is pemilya ku maan is midtuvazan a kenikew te iring kayi?
2SA 7:19 Ne guntaan, Nengazen he MEGBEVAYÀ, duen pa penaad nu mehitenged te egkepaabut te pemilya ku. Iyan be heini kes neleyaman en he ebeelan nu te etew?
2SA 7:20 Hengkey pe be is egkekaǥi ku kenikew, Nengazen he MEGBEVAYÀ? Su netuenan nu en man ke hentei a is suluǥuen nu.
2SA 7:21 Tenged te insaad nu wey egkesuatan nu, mibeelan nu heini is dekelà he menge vaal wey mibpetuenan nu heini kediey te suluǥuen nu.
2SA 7:22 “Nengazen he MEGBEVAYÀ, utew ka iyan gemhanan! Wazà iyan ebpekerepeng kenikew wey wazè en minsan hentei pa he Megbevayà gawas kenikew. Wazè dey nezineg he megbevayà he iring kenikew.
2SA 7:23 Wey wazè en daan menge etew he iring te keet-etawan nu he menge Israilihanen. Iyan dà heini nasyun kayi te kelibutan he midluwas nu te kegkeuripen wey mehimu he keet-etawan nu. Nehimu ka he ventuǥan tenged te ǥehem nu wey egkein-inuwan he menge vaal nu hein midsegseg nu is menge etew ziyà te menge nasyun wey is menge ed-ezapen dan pinaaǥi te menge keet-etawan nu he midluwas nu puun te Ehipto.
2SA 7:24 Midhimu nu is menge Israilihanen he keet-etawan nu te wazà pidtemanan, wey iyan ka, Nengazen he Megbevayè dan.
2SA 7:25 “Ne ǥuntaan, Nengazen he Megbevayà, tumana nu is menge saad nu kedì te suluǥuen nu wey te pemilya ku, para iyan ka mevantug te wazà pidtemanan. Ne egkaǥi is menge etew te, ‘Is Nengazen he Mekeǥeǥehem iyan Megbevayà te Israel!’ Ne is kedhadì te pemilya ku ebpedayun taman te taman.
2SA 7:27 Nengazen he Mekeǥeǥehem, Megbevayà te Israel, zuen ku kevurut te kebpengemuyù kayi ziyà te kenikew tenged te impahayag nu kedì te suluǥuen nu he layun duen egkehimu he hadì he sevaha te menge kevuwazan ku.
2SA 7:28 Nengazen he MEGBEVAYÀ, iyan ka kes tutuu he Megbevayà! Insaad nu heini is menge meupiya kedì te suluǥuen nu, ne utew egkeseriǥi is menge saad nu.
2SA 7:29 Egkesuatan ku he igkelipey nu is kedtuvazi nu te pemilya ku wey mebpedayun heini minsan keenu ziyà te etuvangan nu, su iyan heini menge saad nu, Nengazen he MEGBEVAYÀ. Ne tenged kayi te kedtuvad nu, egkezeyzey is pemilya ku taman te taman.”
2SA 8:1 Hein huziyan he timpu nezaag ni David is menge Filistihanen ne nesakup din en sikandan. Naaǥew zin diyà te kandan is lugar he Meteg Ama.
2SA 8:2 Nezaag daan ni David is menge Moabitanhen. Impehizeǥè din sikandan diyà te tanà he impelinya ne midsukud din te pisì. Ne is neseled te kada zezuwa he sukud te pisì ne mibpenhimetayan, ne is nengesakup te iketelu he sukud te pisì ne wazà penhimetayi. Is duma he menge Moabitanhen he wazà himetayi, ne midsakup ni David ne impevayad din sikandan te vuhis diyà te kandin.
2SA 8:3 Nekidtebek daan si David ki Hadì Hadadezer he hadì te Zoba, he anak ni Rehob, hein egenat en si Hadadezer su ed-umanan din te ed-aǥew is tanà he uvey te Wahig he Eufrates.
2SA 8:4 Naaǥew eni David is 1,000 he menge kerwahi zan, 7,000 he ebpemen-untud te kerwahi, wey 20,000 he menge sundaru. Mibpemiangan eni David haazà is menge kudà he eguyud te kerwahi gawas te 100 he insamè din su egemiten din.
2SA 8:5 Hein nemekeuma is menge tig-Aram he ziyà ebpuun te Damascus su edtavang ki Hadadezer, mibpenhimetayan eni David is 22,000 kandan.
2SA 8:6 Mibpevaal si David te menge kampu ziyà te Damascus, he lugar te menge Aramihanen. Ne nehimu en he nesakup din sikandan, ne ebayad dan te vuhis diyà te kandin. Impezaag si David te Nengazen, minsan hendei sikandin ebpevayà is ebpekidtebek.
2SA 8:7 Migkuwa ni David is menge vulawan he menge kelasag te menge upisyal ni Hadadezer, ne mid-uwit din diyà te Jerusalem.
2SA 8:8 Migkuwa zin daan is mezakel he menge brunsi ziyà te Beta wey ziyà te Berotai, he menge sakup te inged ni Hadadezer.
2SA 8:9 Ne netuenan heini ni Hadì Tou he hadì te Hamat he nezaag ni David is langun he sundaru ni Hadadezer.
2SA 8:10 Umbe, impehendiyè din is anak din he si Joram te ki Hadì David te kebpengemusta kandin wey kebeǥey kandin te zengeg tenged te kezeeǥan din ki Hadadezer te kebpekidtebek. (Heini si Tou wey si Hadadezer ne neuǥet en he telekuntada.) Mid-uwit si Joram te menge azen he pelata, vulawan, wey brunsi he igasa zin.
2SA 8:11 Inhalad heini ni Hadì David diyà te Nengazen, iring ded te mid-ulaula zin te nengaaǥew zin he menge pelata, menge vulawan, diyà te zuma he menge nasyun he nengezaag din he iyan is:
2SA 8:12 Edom, Moab, Ammon, Filistia, wey Amalek. Inhalad din daan is nengaaǥew zan diyà te ki Hadì Hadadezer he hadì te Zoba, he anak ni Rehob.
2SA 8:13 Utew nevantug si David te kegkepetaya zin duen te 18,000 he menge Edomanhen diyà te menge suǥud he egngezanan te Timus.
2SA 8:14 Mibpevaal sikandin te menge kampu ziyà te tivuuk he Edom, ne nehimu he menge sakup din is langun he menge Edomanhen. Impezaag te Nengazen si David minsan hendei sikandin ebpevayà is ebpekidtebek.
2SA 8:15 Nehimu he hadì si David te tivuuk he Israel ne mibeelan din is metazeng wey hustu para te langun he menge etew zin.
2SA 8:16 Ne iyan pengulu te menge sundaru zin, si Joab he anak ni Zeruya. Ne iyan midseriǥan te menge libru te ginhedian din, si Jehoshafat he anak ni Ahilud.
2SA 8:17 Is lavew he menge memumuhat ne iyan si Zadok he anak ni Ahitub wey si Ahimelec he anak ni Abiatar. Ne iyan sikritaryu si Seraya.
2SA 8:18 Is pengulu te tigbantey ki David he menge Kiritnen wey menge Pilitnen, iyan si Benaya he anak ni Jehoyada. Ne is menge anak ni David he menge maama, iyan megsesambag din.
2SA 9:1 Ne sevaha he andew, nenginginsà si David te, “Duen pe be nesamà te pemilya ni Saul he igkepeehè ku kandin is gaǥew ku tenged ki Jonatan?”
2SA 9:2 Impetawag din is sevaha he etew he egngezanan ki Ziba, he suluǥuen dengan te pemilya ni Saul. Hein nekeuma sikandin ne mid-insaan sikandin ni David, “Iyan ke ve si Ziba?” Midtavak sikandin te, “Uya, Mahal he Hadì.”
2SA 9:3 Mid-insà is hadì, “Duen pe be nesamà he pemilya ni Saul he igkepeehè ku kandin is keupiya te Megbevayà?” Midtavak din is hadì te, “Duen pa, kes anak ni Jonatan he maama he nepigket.”
2SA 9:4 Mid-insà is hadì te, “Hendei sikandin?” Midtavak si Ziba te, “Diyà te Lo Debar, diyà te valey ni Makir he anak ni Amiel.” Ne midsuǥù si David te ibpekuwa kandin diyà.
2SA 9:6 Is ngazan te anak ni Jonatan ne iyan si Mefiboshet ne apù sikandin ni Saul. Hein nekeuma sikandin diyà te ki David ne midluhud sikandin he edtahud. Migkaǥi si David te, “Mefiboshet?” Ne midtavak sikandin te, “Uya, datù.”
2SA 9:7 Migkeǥiyan ni David sikandin te, “Kenè ka mahandek, su ibpeehè ku kenikew is keupiya ku tenged te amey nu he si Jonatan. Id-ulì ku kenikew is langun he menge tanà te apù nu he si Saul, ne kenà iyan dà heeyan, kekenà, kayi ku en sikew ibpekaan duma kedì.”
2SA 9:8 Midluhud si Mefiboshet ne migkaǥi te, “Hentei e ves is utew nu igkeǥaǥew? Iring e zè man te minatey he asu.”
2SA 9:9 Ne impetawag te hadì si Ziba, he suluǥuen dengan ni Saul, ne migkeǥiyan din te, “Ibeǥey ku ki Mefiboshet, he apù te egalen nu he si Saul, is langun he azen ni Saul wey te pemilya zin.
2SA 9:10 Sikew, is menge anak nu, wey is menge suluǥuen nu iyan edterebahu te tanà para kandin, ne uwita nu ziyà te kandin is menge abut, para zuen egkekaan te pemilya zin. Ne si Mefiboshet mulà iyan ad ebpekaan kandin kayi te kedì.” (Si Ziba ne zuen din 15 he anak he menge maama ne 20 is suluǥuen din.)
2SA 9:11 Migkeǥiyan ni Ziba is hadì te, “Mahal he Hadì, edtumanen ku is minsan hengkey he idsuǥù nu kedì te suluǥuen nu.” Puun dutun, diyè en egkaan si Mefiboshet te ki David he iring te sevaha te menge anak din.
2SA 9:12 Duen anak ni Mefiboshet he maama he egngezanan ki Mica. Is langun he sakup te pemilya ni Ziba ne nehimu en he suluǥuen ni Mefiboshet.
2SA 9:13 Si Mefiboshet is pigket ne ziyè en med-ubpà te Jerusalem ne ziyè en daan layun egkaan duma ki Hadì David.
2SA 10:1 Dutun te huziyan he timpu, minatey si Nahash he hadì te menge Amunihanen. Ne is anak din he si Hanun iyan nekeilis kandin te kedhadì.
2SA 10:2 Migkaǥi si David te, “Ibpeehè ku ki Hanun is meupiya he kebpekidepitè ku kandin tenged te meupiya zaan is kebpekidepità te amey zin kedì.” Umbe impehendiyà ni David is menge upisyal para ibpeehè din is kebpekid-unung din te kelised ni Hanun dutun te kebpatey te amey zin. Piru hein nekeume en haazà is menge upisyal ni David diyà te tanà te menge Amunihanen,
2SA 10:3 migkaǥi is menge upisyal te menge Amunihanen diyà te ki Hanun te, “Kunaan nu vuwa ke egketenuzan ni David is amey nu kayi te kedsuǥù din te menge etew para ed-unung kenikew te kelised? Kenà, su midsuǥù din buwa sikandan su para ibpepeniid te inged tew su wey kiw zin mezezeeti?”
2SA 10:4 Ne zutun impezakep ni Hanun is menge sakup ni David ne migkiskisan is ketengà te sumpè dan. Impetavas din daan is menge kumbalè dan puun te hawak pehendiyà te dizalem ne human ipeulì sikandan.
2SA 10:5 Egkeeled dan he ed-ulì. Hein netuenan ni David is nehitavù te menge sakup din, ne midsuǥù sikandin te menge menunudtulà he ebpekeǥiyan haazà is menge sakup din te diyè dan dà dèpa te Jerico taman te ebmelayat haazà is menge sumpè dan, ne human dan med-ulì.
2SA 10:6 Neisip-isip dutun te menge Amunihanen he egkepeukan dan ni David. Umbe midsuhulan dan is 20,000 he Aramihanen he menge sundaru he tig-Bet Rehob wey tig-Zoba, 1,000 he sundaru he ebpuun te hadì te Maaca, wey 12,000 he sundaru he ebpuun te Tob.
2SA 10:7 Hein nezineg heini ni David, impehendiyè din si Joab wey is langun he menge sundaru he memevurut he ebpekidtebek.
2SA 10:8 Mibpelastar en is menge Amunihanen diyà te pultahan te inged dan para te kebpekidtebek, ne is menge Aramihanen he tig-Zoba wey tig-Rehob wey is menge sundaru he tig-Tob wey tig-Maaca ne mibpelastar zan en daan diyà te menge suǥud.
2SA 10:9 Hein naahà ni Joab haazà is menge kuntada zan diyà te egkesineruwan dan wey ziyà te egkeiniyuǥan dan, mibpilì din is utew menge metau he sundaru te Israel ne iyan en sikandin mibpengulu te kebpekidtebek te menge Aramihanen.
2SA 10:10 Ne is nesamà dutun he menge sundaru ne impepenguluwan din ki Abishai he suled din para te kebpekidtebek te menge Amunihanen.
2SA 10:11 Migkeǥiyan ni Joab si Abishai te, “Emun egkeerangan nu he egkezaag key te menge Aramihanen ne tevangi key keniyu, ne emun daan egkeerangan dey he egkezaag kew te menge Amunihanen edtevangan dey zaan sikiyu.
2SA 10:12 Ebpekezesen kiw! Ebpekevurut kiw he ebpekidtebek para te menge keet-etawan tew wey te menge inged te Megbevayè tew. Su ebeelan te Nengazen ke hengkey is meupiya para kandin.”
2SA 10:13 Ne zutun midsurung en si Joab duma is menge sakup din, ne nekepelaǥuy is menge Aramihanen.
2SA 10:14 Hein naahà te menge Amunihanen he mibpemelaǥuy en is menge Aramihanen, mibpeleǥuyan dan daan si Abishai ne nemeneled dan diyà te inged dan. Umbe nemen-ulì ensi Joab diyà te Jerusalem puun dutun te kebpekidtebek dan te menge Amunihanen.
2SA 10:15 Hein neisip te menge Aramihanen he egkezaag sikandan te menge Israilihanen, ne miburunburun dan med-uman.
2SA 10:16 Midtevangan sikandan te zuma he menge Aramihanen he impetawag ni Hadadezer he ebpuun te diyà layun te Wahig he Eufrates. Ne midhendiyè dan te Helam he iyan mibpengulu kandan si Shobac he iyan peremandar te menge sundaru ni Hadadezer.
2SA 10:17 Hein netuenan haazà ni David, midtiǥum din is langun he menge sundaru te Israel para te kebpekidtebek. Ne midrapas dan te Wahig he Jordan ne midhendiyè dan te Helam. Nekaandam en is menge Aramihanen para te kebpekidtebek ki David, ne zutun midtebek sikandan.
2SA 10:18 Piru nepeleǥuyan te menge Aramihanen is menge Israilihanen. Ne 700 he ebpemen-untud te kerwahi is nengepatey eni David wey 40,000 he pereuntud te kudà. Nepatey zan daan si Shobac, is peremandar te menge sundaru.
2SA 10:19 Hein naahà te menge hadì te menge Aramihanen he menge sakup ni Hadadezer he egkezaag sikandan te menge Israilihanen, mibpekid-emiǥu zan te menge Israilihanen ne mibpesakup en sikandan te Israel. Umbe puun dutun nengahandek en is menge Aramihanen he edtavang te menge Amunihanen.
2SA 11:1 Neuma is timpu he iyan tinghipanew te menge hadì te kebpekidtebek, wazà mulà medhipanew si David, diyè dà sikandin mebpelintetaǥak te Jerusalem. Iyan din dà impehipanew te kebpekidtebek si Joab, wey is menge upisyal zin, wey is langun he menge sundaru te Israel. Nezaag eni Joab is menge Amunihanen ne midlingutan dan is Raba.
2SA 11:2 Hein sevaha he mahapun dutun te meǥaan en edsanlep is andew, mid-enew si David ne midhiphipanew zuen te patag he atep te turuǥan din. Dutun te ebpememantew sikandin, neehè din diyà te zizalem is utew metaid he vahi he ebpemeziǥù.
2SA 11:3 Midsuǥù si David te ibpaahà haazà ke hentei he vahi. Ne midtudtulan sikandin te haazà he vahi ne si Batsheba, he anak ni Eliam wey esawa ni Uria he Hitihanen.
2SA 11:4 Ne zutun impekuwa ni David si Batsheba. Ne hein nekeume en sikandin diyà te ki David, ne mibpehulizè dan. (Beveǥu pa zutun he nepasad ni Batsheba is tulumanen te kebpenlumpiyu tenged te vinulan he ebpekeuma te vahi.) Nepasad dutun is kebpekedhulid dan ne mid-ulì sikandin.
2SA 11:5 Wazà meuǥet ne egkeǥezam ni Batsheba he meǥingey en sikandin, ne mibpenelaan sikandin he ebpetudtulan si David he meǥingey sikandin.
2SA 11:6 Umbe, mibpeuwit si David te lalag diyà te ki Joab he ibpehendiyà si Uria he Hitihanen te kandin. Umbe impehendiyà ni Joab si Uria te ki David.
2SA 11:7 Hein nekeuma si Uria, mid-insaan ni David sikandin te kemusta si Joab, is menge sundaru, wey is kebpekidtebek dan.
2SA 11:8 Ne migkeǥiyan ni David sikandin te, “Ulì ke en diyà te valey nu, wey medhimeley.” Ne mid-awà si Uria zutun te turuǥan ne mibpeuwit si David te gasa ziyà te valey ni Uria.
2SA 11:9 Piru wazà med-uli si Uria, kekenà, diyè dà sikandin medlipezeng te ǥemawan te turuǥan duma is menge suluǥuen dutun te egalen din he si David.
2SA 11:10 Hein netudtulan si David he wazà med-ulì si Uria, impetawag din ne mid-insaan din te, “Maan is wazè ka med-uli? Neuǥet en he wazè ka mekeulì diyà te keniyu.”
2SA 11:11 Midtavak si Uria te, “Sikan is Kavan te Kebpekid-uyun wey is menge sundaru te Israel wey Juda diyà te kampu zan diyà te menge suǥud, ne zutun daan is peremandar zey he si Joab wey is menge upisyal zin. Ebpekehimu e pe be he ed-ulì te kegkaan, ked-inum, wey te kedhulid te esawa ku? Ibpenangdù ku kenikew he kenè ku egkeulaula is iring keniyan.”
2SA 11:12 Migkeǥiyan ni David sikandin te, “Pelintetaǥak ke zà dèpa kayi te senge kezukileman, ne keeselem ibpelikù ku sikew ziyà te kampu.” Ne zutun mebpelitetaǥak si Uria te haazà he andew ziyà te Jerusalem. Dutun te sunud he andew,
2SA 11:13 midhinggat sikandin ni David he megkaan wey med-inum duma kandin, ne midhubug sikandin ni David. Piru haazà he kezukileman wazè ded sikandin mekeulì, kekenà, nekeuman ded sikandin mekelipezeng duma kes menge suluǥuen ni David.
2SA 11:14 Meselem dutun, midsurat si David pehendiyà te ki Joab he impeuwit din ki Uria.
2SA 11:15 Iyan heini taǥù dutun te surat din: “Iyan ibpehuna si Uria, emun hendei is dekelà he tebek, ne ewai niw en para mepatey sikandin.”
2SA 11:16 Dutun te kemulu en edlinguti eni Joab is Raba, ne ziyè dan ipezapit si Uria te lugar he zutun is menge melig-en he menge sundaru te menge kuntada.
2SA 11:17 Nemenggawas haazà is menge sundaru zutun te inged ne mibpekidtebek dan, ne nepatey zutun si Uria wey is duma pa he menge sundaru ni David.
2SA 11:18 Mibpeuwit si Joab te tudtul ziyà te ki David mehitenged te langun he nehitavù te tebek.
2SA 11:19 Midteleenan din haazà is ibpepenudtul te, “Emun egkekaǥi nu en diyà te hadì is mehitenged te tebek,
2SA 11:20 kela ke egkepauk sikandin ne ed-insaan ke zin te, ‘Maan is mid-uvey kew utew zutun te inged is ebpekidtebek? Wazè niw ve metueni he egkesaut kew man te panè dan puun te verengbeng dan?
2SA 11:21 Kenè niw ves egketenuzan ke hengkey is ingkepetaya ki Abimelec he anak ni Jerubeshet diyà te Tebez? Kenè be iyan impatey zin is mid-uluǥan te vahi te ǥelingan he vatu puun diyà te zivavew te verengbeng, ne minatey sikandin? Maan is utew kew mid-uvey zutun te verengbeng?’ Ne emun iyan heini ibpenginginsè din, ne keǥiyi nu en sikandin te, ‘Nepatey kes suluǥuen nu he si Uria he Hitihanen.’ ”
2SA 11:22 Migenat haazà is ibpepenudtul, ne hein nekeume en sikandin diyà te ki David ne midtudtulan din te langun he intelaan kandin ni Joab.
2SA 11:23 Migkeǥiyan din si David te, “Midsurung key te menge kuntada ziyà te menge suǥud, piru mibpenlayas dey sikandan he edlikù diyà te pultahan te inged dan.
2SA 11:24 Ne mibpanè key te tigpanè dan he ziyà te verengbeng, ne zuen nengepatey he zuma he menge sundaru nu ne naapil is suluǥuen nu he si Uria he Hitihanen.”
2SA 11:25 Migkeǥiyan ni David haazà is mibpenudtul te, “Keǥiyi nu si Joab he kenà meseeng te nehitavù, su kenè ta egketuenan ke hentei is egkepatey ziyà te tebek. Keǥiya nu he mebpekelig-en sikandin, ne pedeyuna zin te edsurung haazà is inged taman te egkezezeetan heini.”
2SA 11:26 Hein netuenan ni Batsheba he nepatey si Uria is esawa zin, ne midlalew sikandin.
2SA 11:27 Neiwas is kedlalew zin, ne impekuwa sikandin ni David ne mid-uwit din diyà te turuǥan din. Mid-esawa sikandin ni David, ne wazà meuǥet ne mid-anak sikandin te maama. Piru wazà mesuat is Nengazen te mibeelan ni David.
2SA 12:1 Midsuǥù is Nengazen te ebpeneuven he si Natan diyà te ki David. Hein nekeuma sikandin diyà te ki David, migkaǥi sikandin te, “Duen dezuwa he etew he ed-ubpà te sevaha he inged. Is sevaha ne sepian ne is sevaha ne pubri.
2SA 12:2 Mezakel utew is kerehidu wey vaka zutun te sepian,
2SA 12:3 piru sikan is pubri ne sebsevaha zà is nati he kerehidu zin he pinemasa zin pa. Mid-elimahan din heini, ne midekelà duma te menge anak din. Impekaan din heini te kandin he keenen, ne impeinum din diyà te kandin he vasu, ne edsepsepipiyen din pa. In-iring din heini te anak din he vahi.
2SA 12:4 Sevaha zutun he andew, duen mibpenumbaley zutun te sepian, piru kenà sikandin egkesuat he edlapà te kerehidu wey ke vaka ve para ibpeǥana zin dutun te meǥeliyug din. Iyan din migkuwa haazà is nati he kerehidu zutun te pubri he etew ne iyan din midlapà ne iyan impekaan din dutun te meǥeliyug din.”
2SA 12:5 Utew nepeuki ni David haazà is etew he sepian ne migkaǥi sikandin diyà te ki Natan te, “Idsaad ku ziyà te uuyag he Nengazen he engayan he edhimetayan is etew he mibaal zutun.
2SA 12:6 Su wazè din kegkehizu zutun te pubri he etew, meupiya ke edliwanan din te heepat haazà is sevaha he kerehidu he nekuwa zin.”
2SA 12:7 Ne migkeǥiyan ni Natan si David te, “Iyan ka haazà! Iyan heini lalag te Nengazen he Megbevayà te Israel: ‘Mibpilì ku sikew he hadì te Israel ne midlibri ku sikew ziyà te ki Saul.
2SA 12:8 Imbeǥey ku kenikew is ginhedian din wey is menge esawa zin. Midhimu ku sikew he hadì te tivuuk he Israel wey Juda. Ne emun kurang pa heini ne ed-umanan ku pa te mezakel pa.
2SA 12:9 Ne maan is wazè nu tumana is menge lalag ku ne iyan nu maan heini mibeelan is kenè ku igkesuat? Mibpehimetayan nu si Uria he Hitihanen diyà te tebek; mibpehimetayan nu sikandin te menge Amunihanen, ne mid-aǥew nu pa is esawa zin.
2SA 12:10 Umbe, tenged te mibeelan nu, puun guntaan layun duen tebek wey ebpehimetayà diyà te pemilya nu, tenged te midsupak a kenikew ne migkuwa nu is esawa ni Uria.’
2SA 12:11 “Iyan pa heini egkeǥiyen te Nengazen: ‘Duen ebpuun te pemilya nu he edsukul kenikew. Ibeǥey ku is menge esawa nu ziyà te etew he kenè nu selakew, ne ebpekidhulid sikandin kandan minsan duen ebpekaahà.
2SA 12:12 In-eles nu is kenà meupiya he mibeelan nu, piru is ebeelan ku kenikew ne ibpeǥawaǥawa ku mulà.’ ”
2SA 12:13 Ne migkeǥiyan ni David si Natan te, “Nekesalà a te Nengazen.” Midtavak si Natan te, “Mibpesaylu ke en te Nengazen, ne kenè ke zed ebpatey kayi he salà.
2SA 12:14 Piru tenged dutun te mibeelan nu he nekeveǥey te higayun diyà te menge kuntada te Nengazen he egkesumpalit sikandin, siguradu he ebpatey is anak nu.”
2SA 12:15 Hein mid-ulì en si Natan, impezaru te Nengazen is anak ni David diyà te ki Batsheba.
2SA 12:16 Midhangyù si David diyà te Megbevayà para zutun te vatà. Midseled sikandin diyà te ruǥu zin ne mibpuasa ne kada mezukilem ne ziyè dà edlipezeng te saag.
2SA 12:17 Mibeyaan sikandin te menge upisyal zin su ibpeenew zan, piru kenà sikandin ebpemineg, ne kenà daan sikandin egkaan duma kandan.
2SA 12:18 Hein ikepitu en he andew, minatey haazà is batà. Nengahandek haazà is menge suluǥuen ni David he edtazem kandin he minatey en kes batà. Migkaǥi sikandan te, “Ebmenmenuwen tew en be he mekeǥiyi tew te minatey en kes batà? Wazè kiw zin man ganì pemineǥa te kedlelaǥi tew kandin hein uuyag pa haazà is batà, wey pe be ǥuntaan he minatey en haazà is batà. Kela ke zuen mezaat he ebeelan din diyà te lawa zin!”
2SA 12:19 Hein egkaahà ni David he ednenaasnaas haazà is menge suluǥuen din, ne netaǥù diyà te ǥehinawa zin is minatey en bes kes batà. Mid-insà sikandin te, “Minatey en be kes batà?” Midtavak dan te, “Uya.”
2SA 12:20 Ne mid-enew si David, nemeziǥù, midheplasan din is lawa zin te mehemut he lana ne mid-ilis. Ne midhendiyà sikandin te valey te Nengazen ne midsimba. Nekepasad ne mid-ulì sikandin ne mibuyù te keenen, ne migkaan sikandin.
2SA 12:21 Migkeǥiyan sikandin te menge suluǥuen din te, “Kenè dey egkesavut heini is mid-ulaula nu. Hein uuyag pa kes batà, ne wazè ka megkaan is edsineǥew, guntaan te minatey en kes batà, ne mid-enew ka ne migkaan ka!”
2SA 12:22 Midtavak si David te, “Uya, mibpuasa a wey midsineǥew a hein uuyag pa kes batà su iyan egkeisip ku is kela ke mehizuwi e zed te Nengazen ne kenè din ded idtuǥut he mebpatey kes batà.
2SA 12:23 Piru ǥuntaan te minatey en sikandin, maan is ebpuasa e pa? Egkeuyag ku pa be sikandin? Keuzemà ke ebpatey a, ebpekehendiyà a te kandin, piru kenè en mulà sikandin ebpekelikù kayi te kedì.”
2SA 12:24 Dutun ne midlangan ni David is esawa zin he si Batsheba ne mibpehulizè dan. Mibmeǥingey si Batsheba ne mid-anak te maama, ne migngezanan dan sikandin ki Solomon. Mibmahal te Nengazen haazà is batà,
2SA 12:25 ne midsuǥù din is ebpeneuven he si Natan he egngezanan din haazà is batà te Jedidia su mibmahal zin sikandin.
2SA 12:26 Midsurung eni Joab is Raba, he iyan kepital te Ammon, ne hapit dan en heini egkaaǥew.
2SA 12:27 Midsuǥù si Joab te menge etew he ibpepenudtul ziyà te ki David he egkaǥi te, “Midsurung dey is Raba ne naaǥew zey is kuweey zan te wahig.
2SA 12:28 Umbe, tiǥuma nu is nengesamà he menge sundaru wey leusa nu en te ed-aǥew haazà is inged para iyan ka egkevantug ne kenà a iyan.”
2SA 12:29 Dutun midtiǥum ni David is langun he nesamà he menge sundaru ne midsurung dan is Raba, ne naaǥew zan heini.
2SA 12:30 Migkuwa ni David is bulawan he inkuruna te ulu te hadì te menge Amunihanen ne insuup te ulu zin. Ne is keveǥat kayi he kuruna ne menge 35 he kilu, ne zuen kayi mahalen he menge vatu. Utew mezakel he menge azen is nengekuwa ni David dutun he inged.
2SA 12:31 Mid-uripen din is menge meǥinged kayi ne impemeterebahu zin he egamit te menge ǥavas, piku, wey wasey. Impevaal zin daan sikandan te menge brik. Iyan heini mibpeveelan din te langun he menge meǥinged diyà te menge inged te menge Amunihanen. Ne mid-ulì si David diyà te Jerusalem wey is langun he menge sundaru zin.
2SA 13:1 Duen utew mekempet he anak he raǥa ni David he egngezanan ki Tamar, he suled ni Absalom. Si Amnon ne suled ni Tamar ziyà te amey, ne mibmahal ni Amnon si Tamar.
2SA 13:2 Piru kenè din egkehimu is egkesuatan din he ebeelan diyà te ki Tamar su raǥa pa si Tamar ne zuen layun ebantey kandin. Ne tenged dutun midsiveysivey sikandin, ne hein neuǥet ne midezaru sikandin.
2SA 13:3 Duen elukuy ni Amnon he metau he edseligkep he iyan is id-aǥew zin he si Jonadab. Anak sikandin te suled ni David he si Simea.
2SA 13:4 Ne sevaha he andew, mid-insaan din si Amnon te, “Anak ka te hadì, maan is kada andew egkeehè ku sikew he henduen te meluya ka? Keǥiya nu kedì ke hengkey is igkeseeng nu.” Midtavak si Amnon te, “Egkesuatan ku si Tamar, is hazi ni Absalom te suled ku ziyà te amey.”
2SA 13:5 Migkaǥi si Jonadab te, “Hizeǥè ka, wey ka mebpezezaru. Ne emun edlauy kenikew is amey nu ne keǥiyi nu sikandin he tuǥuti zin si Tamar he medhendiyà te kenikew, he iyan ebpekaan kenikew. Keǥiyi nu sikandin he egkesuatan nu he egkeehè nu si Tamar he iyan ed-andam te keenen nu zutun te uvey nu he iyan edsungit kenikew.”
2SA 13:6 Umbe, midhidhizeǥà si Amnon he ebpezezaru. Hein midlauy sikandin ni Hadì David, migkaǥi sikandin te, “Egkesuatan ku pezem he medhengkayi is etevey ku he si Tamar wey mekevaal te supas kayi te uvey ku, ne egkepasad ne sungite e zin.”
2SA 13:7 Ne midsuǥù si David he ebpekeǥiyan si Tamar ziyà te valey te hadì he medhendiyà sikandin te meemahan din he si Amnon su iyan sikandin ibpevaal te keenen para kandin.
2SA 13:8 Midhendiyà si Tamar te valey te meemahan din he si Amnon, ne zutun neehè din he edhidhizeǥà. Ne migkuwa sikandin te herina, ne mibmasa zin heini, ne zutun din lutua te uvey ni Amnon.
2SA 13:9 Hein nelutù en haazà, ne migkuwa zin heini su ibpekaan din ki Amnon, piru kenà egkaan si Amnon. Migkaǥi si Amnon te, “Ipeǥawas is langun he menge etew kayi!” Dutun nenggawas is menge etew.
2SA 13:10 Ne migkeǥiyan ni Amnon si Tamar te, “Uwita nu heeyan is keenen kayi te uvey ku ne sungita a.” Ne mid-uwit ni Tamar haazà is keenen dutun te ki Amnon.
2SA 13:11 Piru zutun te edsungiten din en si Amnon ne migkepkepan ni Amnon sikandin ne migkeǥiyan din te ebpehulizè dan.
2SA 13:12 Migkeǥiyan ni Tamar sikandin te, “Kenà a leyuǥa! Telesuled ki! Kenè nu veeli heini is mekeeled-eled he vaal kayi te kedì. Kenà heini engayan he egkeulaula kayi te Israel.
2SA 13:13 Hengkey en buwa he paras is igkeetuvang ku te menge etew? Minsan sikew, buneg is igngazan kenikew kayi te Israel. Hengyua nu is amey ta mehitenged kayi; siguru he ebpemineǥen ke zin ke ebpengesawa ka kedì.”
2SA 13:14 Piru wazà mebpemineg is Amnon kandin, ne tenged te mezesen si Amnon ki Tamar ne midlayug din sikandin.
2SA 13:15 Ne zutun, utew nepauk si Amnon kandin, su is utew zin kegkepauk kandin lavew pa te kebmahala zin kandin dutun te nehuna he timpu. Migkeǥiyan ni Amnon sikandin te, “Enew ka wey megawas!”
2SA 13:16 Midtavak si Tamar te, “Kenà a egawas! Lavew pa utew he zekelà he salè nu is kedsegseǥa nu kedì kenà heini is mid-ulaula nu kedì.” Piru wazà haazà pemineǥa ni Amnon.
2SA 13:17 Kekenà, mid-umew zin is suluǥuen din ne migkeǥiyan din te, “Ipeǥawas niw heini he vahi ne lekevi niw is gemawan.”
2SA 13:18 Umbe, impeǥawas dutun si Tamar te suluǥuen ne midlekevan is gemawan. Ne zutun migkukumbalà si Tamar te meupiya he visti wey melayat su iyan haazà neleyaman he ibivisti te raǥa he anak te hadì te haazà he timpu.
2SA 13:19 Iyan mid-ulaula ni Tamar zutun is, mibindas din haazà is meupiya he visti wey melayat, ne mibukbukan din is ulu zin te avu. Ne midhipanew is edsinsineǥew ne mid-elangan din te velad din is dagwey zin.
2SA 13:20 Ne naahà sikandin te kakey zin he si Absalom ne mid-insaan din, “Duen be mezaat he mibeelan kenikew ni Amnon? Kenè nu heini tudtula ziyà te zuma, su telesuled kew ziyà te amey. Kenè nu itaǥù diyà te isip nu is neulaula kenikew.” Ne zutun diyà med-ubpà si Tamar te valey te kakey zin he si Absalom, ne layun dà sikandin edsebsevaha is edlalew.
2SA 13:21 Hein netuenan ni Hadì David is neulaula, utew sikandin nepauk.
2SA 13:22 Ne si Absalom, egkeepesan din utew si Amnon su mibpeel-elezan ni Amnon is etevey zin he si Tamar. Tenged kayi, kenè en sikandin ebpekidlalag ki Amnon.
2SA 13:23 Midlavey zutun is dezuwa he tuig, hein ebpeelutan ni Absalom is menge kerehidu zin diyà te Baal Hazor, uvey te Efraim, mid-imbitar zin is langun he anak te hadì te kedtelavuk dutun.
2SA 13:24 Midhendiyà sikandin te ki Hadì David he egkaǥi te, “Ebpeelutan ku is menge kerehidu ku. Edhendiyè ke ve wey is menge upisyal nu te kedtelavuk kayi he kevurunan?”
2SA 13:25 Midtavak kes hadì te, “Kenè en, mama, su egkeǥestuwan ke zà ke edtelavuk key is langun.” Ne midteǥel sikandin ni Absalom, piru kenà iyan ebpehendiyà. Mibpenubtuvazan din dà si Absalom.
2SA 13:26 Migkaǥi si Absalom te, “Emun kenè ka, ne si Amnon dà nasì he suled ku is ipehendiyè nu.” Mid-insà is hadì te, “Maan is utew nu egkinehenglana he ibpehendiyà?”
2SA 13:27 Piru midteǥel iyan si Absalom, ne impezume en nasì ni David si Amnon, wey kes duma he menge anak din he maama.
2SA 13:28 Migkeǥiyan ni Absalom is menge sakup din te, “Teǥazi niw ke egkelangut si Amnon, ne emun edsinyas a, ne himetayi niw en sikandin. Kenè kew mahandek; su iyan a midsuǥù keniyu. Pekezesen kew wey pekevurut kew.”
2SA 13:29 Ne zutun midhimetayan te menge sakup ni Absalom si Amnon su insuǥù din. Ne nen-untud is duma he menge anak he maama ni David te menge kudè dan ne nemelaǥuy zan.
2SA 13:30 Hein ed-ulì dan en diyà te Jerusalem, duen neketudtul ki David he mibpenhimetayan ni Absalom is langun he menge anak din he maama ne wazà nesamà.
2SA 13:31 Midhitindeg si David ne mibindas din is kumbalè din su impeehè din he utew sikandin neseeng, ne midlangkeb diyà te tanà. Mibpemindas daan te menge suluǥuen din is menge kumbalè dan ne midhitindeg dan dà mulà.
2SA 13:32 Piru migkaǥi si Jonadab he anak te suled ni David he si Simea, “Mahal he Hadì, wazà mepatey is langun he menge anak nu he maama, kekenà, iyan dà si Amnon. Neuǥet dà he duen planu ni Absalom te kedhimetayi zin ki Amnon puun dà dutun te andew te kedleyuǥa ni Amnon te suled din he si Tamar.
2SA 13:33 Kenè nu ikeseeng is tudtul he nengepatey is langun he menge anak nu he maama. Iyan dà si Amnon minatey.
2SA 13:34 Ne si Absalom, ne mibpelaǥuy sikandin.” Dutun he timpu is ebantey zuen te verengbeng te Jerusalem duen din naahà he utew mezakel he menge etew he ebpelingguma he ziyà mebayà te zivaluy he kilid te vuvungan. Midhendiyà te hadì haazà is ebantey ne nenudtul te, “Duen ku naahà he menge etew ziyà te zalan te Horonaim he ebpeleǥidlid te vuvungan.”
2SA 13:35 Migkeǥiyan ni Jonadab is hadì te, “Mahal he Hadì, ahaa nu! Heeyan en kes menge anak nu he menge maama, he iyan migkaǥi ku geina.”
2SA 13:36 Nepasad dutun is kegkeǥiyi zin ki David nekeuma kes menge anak ni David he ebpemenineǥew. Ne midsineǥew zaan si David wey langun he menge sakup din.
2SA 13:37 Midlalew si David te meluǥayad he timpu tenged te anak din he si Amnon. Hein mibpelaǥuy en si Absalom, midhendiyà sikandin te hadì te Geshur he si Talmai, he anak ni Amihud. Diyà sikandin med-ubpà seled te tetelu he tuig.
2SA 13:39 Hein malù en neulii si Hadì David te kegkeseeng din te kegkepatey ki Amnon, ne ebulungen sikandin ki Absalom.
2SA 14:1 Netuenan ni Joab he anak ni Zeruya he ebulungen si Hadì David ki Absalom.
2SA 14:2 Umbe, impetawag din is sevaha he vahi he uluwanen he ziyà te Tekoa. Hein nekeuma haazà is bahi, migkeǥiyan ni Joab te, “Uvag kun edlalew ka te minatey. Kukumbalè ka te visti he ibivisti te edlalew, ne kenè ka mebpurungpurung, kekenà, iringi nu is ulaula te vahi he neuǥet en is kedlalew zin tenged te minatey.
2SA 14:3 Ne pehendiyè ka te hadì ne keǥiya nu kandin is migkaǥi ku kenikew.” Ne migkaǥi ni Joab kandin is egkeǥiyen din diyà te hadì.
2SA 14:4 Hein nekeuma haazà is bahi ziyà te hadì, midluhud sikandin tuus te kedtahud he egkaǥi te, “Tevangi a, Mahal he Hadì!”
2SA 14:5 Mid-insaan sikandin te hadì, “Hengkey ves is igkeseeng nu?” Midtavak sikandin te, “Sevaha a he valu,
2SA 14:6 ne zuen dezuwa he anak ku he maama. Sevaha zutun he andew midtebek sikandan is dezuwa ziyà te pemuleey, ne tenged te wazà edsambag kandan dutun, ne nepatey is sevaha.
2SA 14:7 Ne zutun nemenhendiyà is langun he menge kezuzumahi ku he egkaǥi te, ‘Iveǥey nu kenami heeyan is anak nu, su edhimetayan dey sikandin su midhimetayan din is suled din. Kenà engayan sikandin he ebpengevilin te ketiǥeyunan te amey zin.’ Emun ebeelan dan heini, egkaawà kayi te kedì is nesamà he anak ku he iyan dà edseriǥan ku he ebpekeuǥup kedì, wey egketazin en is ngazan te esawa ku kayi te kelibutan.”
2SA 14:8 Migkeǥiyan te hadì haazà is bahi te, “Ulì ke en su iyan e en metau. Egkeǥiyan ku sikandan he kenè dan menuwa is anak nu.”
2SA 14:9 Migkaǥi haazà is bahi te, “Mahal he Hadì, ke zuen edsumbung kenikew tenged te mid-uǥupan a kenikew, ne televaken ku wey te pemilya ku heeyan ne kenà kenikew.”
2SA 14:10 Midtavak is hadì te, “Emun duen edriklamu ziyà te kenikew, ne dumaha nu sikandin kayi te kedì, ne kenè ke zin en ed-umanan edriklamuwi.”
2SA 14:11 Ne migkaǥi haazà is bahi te, “Mahal he Hadì, emun egkehimu ne penangdù ka ziyà te Nengazen he Megbevayè nu he kenè nu tuǥuti he zuen ebales te anak ku para kenà sikandin mepatey wey wazè en duma pa he egkeulaula.” Midtavak si Hadì David te, “Ibpenangdù ku te uuyag he Nengazen he wazè en egkevut te anak nu.”
2SA 14:12 Migkaǥi haazà is bahi te, “Mahal he Hadì, duen pa sevaha he idsarig ku kenikew.” Midtavak haazà is hadì te, “Uya, hengkey heeyan?”
2SA 14:13 Migkaǥi haazà is bahi te, “Kenè be salè nu heeyan diyà te menge etew te Megbevayà is kedlevani nu te anak ku piru is kenikew he anak he mibpelaǥuy ne wazè nu ipeulì?
2SA 14:14 Is langun he etew ebpatey, iring te wahig he egkeulaan diyà te tanà he kenè en ebpekelikù. Piru kenà igkesuat te Megbevayà is kegkuwaa te untung te etew; iyan pa ganì egkesuatan din he medlikù diyà te kandin is menge etew he mibpekeziyù kandin.
2SA 14:15 “Mahal he Hadì, midhengkayi a su edtudtulen ku kenikew is prublima ku su egkahandek a te ebeelan kedì te menge kezuzumahi ku. Egkeisip ku is ebpekidlalag a kenikew su kela ke ebpemineǥen nu is hangyù ku kenikew
2SA 14:16 he luwasa a wey is menge anak ku te menge etew he ebpelenuwan dan te egkuwa is tanà he imbeǥey te Megbevayà kenami.
2SA 14:17 Umbe ǥuntaan is egkeǥiyen nu ne iyan ebpekeveǥey kedì te kelinew su iring ka te velinsuǥuen te Megbevayà su netau ka te meupiya wey mezaat. Berakat he zumahi ka te Nengazen he Megbevayè nu.”
2SA 14:18 Ne migkeǥiyan te hadì haazà is bahi te, “Uya, tudtuli a te tutuu mehitenged te id-insè ku kenikew.” Midtavak haazà is bahi te, “Uya, Mahal he Hadì.”
2SA 14:19 Mid-insà is hadì te, “Iyan be si Joab mibpenurù kenikew kayi?” Midtavak haazà is bahi te, “Kena a ebpekevelivad te tavak te insè nu, Mahal he Hadì. Uya, si Joab he suluǥuen nu is midsuǥù kedì te kebaal kayi wey iyan sikandin mibpenurù ke hengkey is egkeǥiyen ku.
2SA 14:20 Mibeelan din is iring kayi para kun mebmeupiya is kedepitè niw ki Absalom. Piru netuenan nu heini, Mahal he Hadì, su iring ka te velinsuǥuen te Megbevayà–netuenan nu is langun he egkeulaula kayi te nasyun tew.”
2SA 14:21 Ne impetawag te hadì si Joab ne migkeǥiyan te, “Uya, hipanew ka ne dumaha nu si Absalom ke edlikù ka kayi.”
2SA 14:22 Midluhud si Joab su edtahud te hadì ne migkaǥi te, “Berakat he tuvazi ka te Nengazen, Mahal he Hadì. Guntaan netuenan ku he nezeliǥan a kenikew su midtuman nu is hangyù ku.”
2SA 14:23 Ne migenat si Joab pehendiyà te Geshur, ne miduma zin si Absalom te edlikù diyà te Jerusalem.
2SA 14:24 Piru migkaǥi is hadì te, “Dutun niw ipeubpà sikandin te valey zin; kenè ku egkesuatan he meehè ku kayi te turuǥan.” Ne mid-ulì si Absalom diyà te valey zin ne wazè en sikandin mebpaahà te hadì.
2SA 14:25 Wazà ebpekeiring te ketaid ni Absalom te tivuuk he Israel, umbe utew sikandin egkevantug te langun. Wazà igkesawey kandin puun te ulu pehendiyà te parapara.
2SA 14:26 Kesevaha zà sikandin ebpaalut te senge-tuig, ne ebpaalut sikandin su egkeveǥatan sikandin te bulvul zin. Emun edtimbangen is bulvul zin ne zezuwa he kilu is keveǥat emun dutun te timbangan te hadì.
2SA 14:27 Duen menge anak ni Absalom he tetelu he menge maama ne sevaha is bahi. Is ngazan dutun te vahi ne si Tamar, ne utew heini sikandin metaid.
2SA 14:28 Diyà med-ubpà si Absalom te Jerusalem seled te zezuwa he tuig he wazè din maahà is hadì.
2SA 14:29 Sevaha zutun he andew, impetawag ni Absalom si Joab su ibpehendiyè din te hadì para melelaǥi zin mehitenged kandin. Piru wazà mebpemineg si Joab he ibpehendiyà ni Absalom. Impeuman din ipetawag si Joab, piru wazà gihapun medhendiyà.
2SA 14:30 Migkeǥiyan ni Absalom is menge suluǥuen din te, “Binsuli niw is menge pemuleey ni Joab he mibpemulaan te barli. Durug dà te vevesukè ku.” Umbe mibinsulan dan is bevesukà ni Joab.
2SA 14:31 Midhendiyà si Joab te ki Absalom he egkaǥi te, “Maan is mibinsulan te menge suluǥuen nu is bevesukè ku?”
2SA 14:32 Midtavak si Absalom te, “Tenged te wazè ka medhendini te kebpetawaǥa ku kenikew. Egkesuatan ku pezem he medhendiyè ka te hadì wey nu meinsai sikandin ke maan is impaangey e zin pa ziyà te Geshur. Meupiya pa pezem ke diyè e zà. Guntaan, egkesuatan ku he meehè ku is hadì; emun nekesalà a, ne pehimetayi e zin.”
2SA 14:33 Midhendiyà si Joab te hadì, ne midtudtul zin is migkaǥi ni Absalom. Impetawag te hadì si Absalom, ne hein nekeuma sikandin, midluhud sikandin su edtahud te hadì. Ne zutun midhezekan sikandin te hadì.
2SA 15:1 Nenlavey is menge timpu nekekuwa si Absalom te menge kerwahi wey menge kudà, wey 50 he etew he vantey zin.
2SA 15:2 Neleyaman ni Absalom is emun egkepukew te meselem ne ziyà edhithitindeg te kilid te zalan pehendiyà te pultahan te inged. Ne emun duen ebpekeuma he etew he zuen sumbung din he ibpehusey te hadì, ne ed-insaan din ke hendei ed-ubpà, wey egkaǥi haazà is etew ke hengkey sikandin he tribu te Israel.
2SA 15:3 Ne egkeǥiyan ni Absalom sikandin te, “Meupiya wey meketezenganen is sumbung nu piru wazà midseriǥan te hadì te kedhusey keniyan.
2SA 15:4 Emun pezem iyan e zà ebpekehusey, ne ebpekeuvey is langun he zuen idsumbung etawa insumbung, ne wazà duwazuwa he ebeǥayan ku te hustu he kedhusey.”
2SA 15:5 Ne emun duen etew he ed-uvey kandin ne edluhud su edtahud kandin, egkepkepan din heini su iyan kegalewǥalew zin.
2SA 15:6 Iyan heini ebeelan ni Absalom te langun he Israilihanen he ebpehendiyà te hadì su ebpehusey. Umbe neuwit din is menge Israilihanen.
2SA 15:7 Neipus dutun is heepat he tuig, migkeǥiyan ni Absalom is hadì te, “Tuǥuti a he edhendiyà te Hebron su edtumanen ku is penangdù ku te Nengazen.
2SA 15:8 Hein diyè e pa med-ubpà te Geshur he sakup te Aram, nenangdù a he emun ibpelikù e pa te Nengazen diyà te Jerusalem, ne ed-ezapen ku sikandin diyà te Hebron.”
2SA 15:9 Migkeǥiyan sikandin te hadì te, “Uya, meupiya is hipanew nu.” Umbe midhendiyà si Absalom te Hebron.
2SA 15:10 Hein diyè en si Absalom te Hebron, ne mid-eles-eles sikandin medsuǥù te menge etew he ibpepenudtul ziyà te tivuuk he Israel he egkaǥi te, “Emun egkezineg niw is daǥing te vudyung, ne pemensag kew te, ‘Si Absalom en is hadì te Israel, ne ziyà sikandin midhadì te Hebron!’ ”
2SA 15:11 Duen 200 he etew ziyà te Jerusalem he mibpenhinggat ni Absalom he meduma kandin diyà te Hebron. Heini he menge etew ne wazà mesayud te planu ni Absalom.
2SA 15:12 Dutun te kemula pa ebpemuhat si Absalom te menge pemuhat, impetawag din si Ahitofel he ziyà te inged he Gilo. Heini si Ahitofel ne zutun heini he meǥinged, wey sevaha sikandin te menge megsesambag ni David. Hein neuǥet ne midmezakel en is midsunud ki Absalom, umbe mibmelig-en utew is pelanu zin te kebpekidsukulà ki David.
2SA 15:13 Duen sevaha he tigpenudtul he midtazem diyà te ki David he is menge Israilihanen ne midtampu en diyà te ki Absalom.
2SA 15:14 Ne migkeǥiyan ni David is langun he menge upisyal zin he zuma zin diyà te Jerusalem te, “Ebpelaǥuy kiw, su kela ke meumahi kiw ni Absalom kayi, ne penhimetayi kiw wey is langun he meǥinged kayi te Jerusalem. Pekeǥaan kew, emun egkesuat kew he ebpekelikey ki Absalom.”
2SA 15:15 Migkaǥi is menge upisyal te, “Mahal he Hadì, andam key he ebaal te minsan hengkey he egkeǥiyen nu kenami.”
2SA 15:16 Midhipanew si David duma is langun he nesakup te pemilya zin, piru intaǥak din is sepulù he esawa zin he kenà menge dungganen para ed-etiman duen te turuǥan.
2SA 15:17 Hein edhipanew en ensi David wey is menge sakup din, ne ziyè dan mebpundu te ketepusan he valey zutun te inged.
2SA 15:18 Ne impehuna ni David is langun he menge sakup din, wey is langun he ebantey kandin he menge Kiritnen wey menge Pilitnen. Ne edsunud daan is 600 he Gitanhen he miduma kandin he ebpuun diyà te Gat.
2SA 15:19 Migkeǥiyan ni David si Itai, he pengulu te menge Gitanhen, “Maan is eduma kew kenami? Likù kew ziyà te Jerusalem, ne ziyè kew zuma te veǥu he hadì he si Absalom, su menge lumelengyawè kew zà kayi te Israel he mibpemelaǥuy puun te inged niw.
2SA 15:20 Wazè pa utew meuǥet is kebpekeuma niw kayi, ne ǥuntaan eduma kew kenami he wazè dey ganì metueni ke hendei key ebpevayà? Likù kew ziyà te menge siringan niw, ne deyzey ke ipaahà te Nengazen is gaǥew zin wey keupiya zin keniyu.”
2SA 15:21 Midtavak ni Itai kes hadì te, “Idsaad ku ziyà te uuyag he Nengazen wey ziyà te kenikew, Mahal he Hadì, he minsan hendei ka ebpevayà ne eduma key kenikew, minsan kemetayen pa is ebpengkusan.”
2SA 15:22 Migkeǥiyan sikandin ni David te, “Ne emun iyan heeyan ne zuma kew en kenami.” Ne zutun midhipanew si Itai wey is langun he menge sakup din, wey is menge pemilya zan.
2SA 15:23 Utew subra is kebpemenineǥew te menge etew ziyà te Jerusalem dutun te kedsaǥad te menge sakup ni David. Dutun te kedlayun ni David te zal-ug he Kidron, is menge sakup din he ziyà te egkehunaan din midhendiyà te sibsivayan.
2SA 15:24 Ne ziyà daan kes menge memumuhat he si Zadok wey si Abiatar wey kes menge Levihanen he mid-uwit duen te Kavan te Kebpekid-uyun te Megbevayà. Diyè dan isavuk haazà is Kavan te Kebpekid-uyun te kilid te zalan ne nemuhat si Abiatar taman te nekaawà is menge sakup ni David dutun te inged.
2SA 15:25 Ne migkeǥiyan ni David si Zadok te, “Ilikù kes Kavan te Kebpekid-uyun te Megbevayà diyà te Jerusalem. Emun meupiya is gehinawa te Nengazen kedì, ne ibpelikù e zin diyà te Jerusalem ne egkeehè ku zed heini wey is lugar he egkesevukan din.
2SA 15:26 Piru emun kenè e zin en igkelipey ne andam ad minsan hengkey is ekegesuatan din he ebeelan din kedì.”
2SA 15:27 Ne migkeǥiyan pa ni David si Zadok te, “Likù kew ki Abiatar ziyà te Jerusalem he melinawen, duma is anak nu he si Ahimaaz wey is anak ni Abiatar he si Jonatan, wey kew mekepeniid diyà.
2SA 15:28 Diyà a edtaǥad te repasan pehendiyà te sibsivayan taman te kenè ku egkezawat is tudtul he ebpuun keniyu.”
2SA 15:29 Ne zutun inlikù ni Zadok wey ni Abiatar kes Kavan te Kebpekid-uyun te Megbevayà diyà te Jerusalem, ne ziyè dan med-ubpà.
2SA 15:30 Midtekezeg si David diyà te Buvungan te menge Olibo. Ne wazè din sendalyas ne edtembunan din is ulu zin he edsineǥew. Ne ebpemenineǥew zaan haazà is menge zuma zin he edtambun daan te menge ulu zan.
2SA 15:31 Duen mibpenudtul ki David he si Ahitofel ne sevaha te nekidsevaha ki Absalom. Ne zutun mid-ampù si David, “Nengazen, himuwa nu he wazà pulus te sambag ni Ahitofel.”
2SA 15:32 Hein diyè en ensi David te puntur te Buvungan te menge Olibo, he zutun ed-ezapa te menge etew is Megbevayà. Duen midsinuǥung ki David he si Hushai he Arkanhen. Nengevindas is kumbalè din ne eliyevuken is ulu zin he tuus te edlalew sikandin.
2SA 15:33 Migkeǥiyan ni David sikandin te, “Wazà igkeuǥup nu ke eduma ka kedì.
2SA 15:34 Deyzey ke edlikù ka ziyà te inged ne egkeǥiyan nu si Absalom te, ‘Suluǥuen ad kenikew hadì; iring te suluǥuen a te amey nu zutun te nehuna he timpu, ne ǥuntaan iyan ke en teǥisuluǥuen kedì, ne egkeuǥupan e pa kenikew he mevelevaǥi is menge sambag ni Ahitofel.’
2SA 15:35 Diyà si Zadok wey si Abiatar he menge memumuhat. Keǥiya nu ziyà te kandan is langun he egkezineg nu ziyà te turuǥan te hadì.
2SA 15:36 Ne ipehengkayi nu te kedì is menge anak dan he si Ahimaaz wey si Jonatan te kebpenudtul te nezineg nu.”
2SA 15:37 Ne zutun midlikù si Hushai he emiǥu ni David diyà te Jerusalem. Neserengà dutun he midseled si Absalom diyà te inged.
2SA 16:1 Hein nekelavey en si David dutun te puntur te vuvungan, midsinuǥung sikandin ni Ziba he suluǥuen ni Mefiboshet. Duen dezuwa he asnu zin he migkergahan te 200 he vuuk he supas, 100 he akup he pasas, 100 he nengelutuan he prutas, wey vinu he ziyà itaǥù te mibeelan he teleǥuey he lundis.
2SA 16:2 Mid-insaan ni David si Ziba te, “Maan is mid-uwit ka keniyan?” Midtavak si Ziba te, “Heini is menge asnu, ne ebpeuntuzan te pemilya nu, is menge supas wey menge prutas para egkeenen niw te menge zuma nu, ne is binu ed-inumen niw emun egkeveley kew ziyà te sibsivayan.”
2SA 16:3 Mid-insà si David te, “Hendei en be si Mefiboshet, is apù te egalen nu he si Saul?” Midtavak si Ziba te, “Mibpelintetaǥak sikandin diyà te Jerusalem, tenged te mid-isip din he iyan sikandin edhimuwen he hadì te keet-etawan te Israel kayi he menge timpu te ginhedian te apù din.”
2SA 16:4 Migkaǥi si David te, “Emun iyan heeyan, ne ǥuntaan ibeǥey ku kenikew is langun he ǥaked ni Mefiboshet.” Midtavak si Ziba te, “Mahal he Hadì, andam a he ebpenilbi kenikew. Berakat he igkelipey a kenikew.”
2SA 16:5 Hein nekeume en si Hadì David diyà te Bahurim, duen etew he migawas dutun he inged ne mibpenrewakan din si David. Heini he etew ne anak ni Gera he kezuzumahi ni Saul he iyan ngazan din si Shimei.
2SA 16:6 Mibpenuleng din te vatu si David wey is menge upisyal zin minsan te midlingutan si David te menge sakup din wey menge ebantey kandin.
2SA 16:7 Iyan heini menge impenrawak din ki David: “Kenè ka seled kayi he inged, sikew is memumunù wey wazè din pulus he etew!
2SA 16:8 Migkuwa nu is ginhedian ni Saul, ne ǥuntaan ebelesan ka te Nengazen te kedhimetayi nu ki Saul wey te pemilya zin. Mid-aǥew nu is ginhedian ni Saul, ne ǥuntaan imbeǥey heini te Nengazen te anak nu he si Absalom. Naawè ka tenged te kebpenhimatey nu.”
2SA 16:9 Migkaǥi ziyà te hadì si Abishai he anak ni Zeruya te, “Mahal he Hadì, maan is ebey-anan nu is kebpenulaa kenikew keniyan he etew he henduen dà daan te minatey he asu? Tuǥuti a kenikew he ebpungelan ku sikandin te ulu.”
2SA 16:10 Piru migkaǥi haazà is hadì te, “Sikiyu is menge anak ni Zeruya, hengkey is kelevetan niw? Emun midsuǥù sikandin te Nengazen he penrewaki e zin, ne hentei e ves is edawey kandin?”
2SA 16:11 Migkeǥiyan ni David si Abishai wey is langun he menge upisyal zin te, “Emun edtinguhà is anak ku te kedhimatey kedì, iyan pe be heini is kezuzumahi ni Saul? Beleǥaza niw en sikandin su Nengazen is midsuǥù kandin.
2SA 16:12 Kela ke meehè ded te Nengazen is kelised ku ǥuntaan ne ebelesan e zin te meupiya he ibales din te menge rawak kedì guntaan.”
2SA 16:13 Ne midlaus si David wey is menge sakup din he edhipanew. Ne edsunuzen sikandan ni Shimei, piru ziyè dà mebayà sikandin te kilid te vuvungan. Ne zutun te kedhipanew zin edrewakan din si David wey ebpenulengen din te vatu wey tanà.
2SA 16:14 Utew en neveley si David wey is menge sakup din, ne midhimeley sikandan hein nekeuma zan diyà te Wahig he Jordan.
2SA 16:15 Midhendiyà si Absalom te Jerusalem duma si Ahitofel wey is langun he keet-etawan te Israel.
2SA 16:16 Nekeuma zaan diyà si Hushai he Arkanhen, he emiǥu ni David, ne midhendiyà sikandin te ki Absalom ne migkeǥiyan din te, “Mebmeluǥayad is untung te hadì! Mebmeluǥayad is untung te hadì!”
2SA 16:17 Mid-insaan ni Absalom si Hushai te, “Hendei en is kebpekid-unung nu te emiǥu nu he si David? Maan is wazè ka meduma kandin?”
2SA 16:18 Midtavak si Hushai te, “Diyà a eduma te kenikew su iyan ka mibpilì te Nengazen wey te tivuuk he keet-etawan te Israel he iyan egkehimu he hadì.
2SA 16:19 Gawas pa keniyan, ne hentei pe be vuwa is ebpenilbiyan ku, kekenà, sikew is anak ni David? Mibpenilbi a te amey nu, ebpenilbi a zaan kenikew.”
2SA 16:20 Migkeǥiyan ni Absalom si Ahitofel te, “Keǥiya nu kun kedì ke hengkey is ebeelan ta.”
2SA 16:21 Midtavak si Ahitofel te, “Hulizi nu is menge esawa te amey nu he intaǥak din he para ed-atur te turuǥan. Ne egketuenan te langun he menge Israilihanen he midhimu nu he mepauk is amey nu, ne tenged kayi utew ebpekevurut is menge sakup nu.”
2SA 16:22 Ne zutun mibaal zan te tulda he ebpeubpaan ki Absalom duen te atep te turuǥan, ne naahà te menge etew he midseled dutun sikandin he edhulid te menge esawa te amey zin.
2SA 16:23 Dutun he timpu mibpemineg si Absalom te menge sambag ni Ahitofel, iring ded daan dutun is mibeelan ni David hein aney. Su is menge sambag ni Ahitofel in-iring daan te ziyà ebpuun te Megbevayà.
2SA 17:1 Migkeǥiyan ni Ahitofel si Absalom te, “Tuǥuti a kenikew te kebpilì te 12,000 he etew he ibpepengehè ta ki David guntaan he kezukilemi.
2SA 17:2 Edsurungen dey sikandin su neveley pa, ne meluya sikandin. Egketentanan sikandin ne ebpemelaǥuy is langun he menge sakup din. Iyan dà si David edhimetayan ku,
2SA 17:3 ne ibpelikù ku ziyà te kenikew is langun he menge sakup din he iring te kedlikù te esawa ziyà te tegiesawa kandin. Emun iyan dà si David edhimetayan, ne is menge sakup din ne kenè en ebpekidtebek.”
2SA 17:4 Heini he paaǥi meupiya para ki Absalom wey te langun he menge ebpemendumala te Israel.
2SA 17:5 Piru migkaǥi si Absalom te, “Ipehengkayi si Hushai he Arkanhen, wey ta mezineg ke hengkey is egkekaǥi zin.”
2SA 17:6 Ne hein nekeuma si Hushai ne midtudtul ni Absalom is menge sambag ni Ahitofel. Migkaǥi si Absalom te, “Ebeelan tew ve is migkaǥi zin? Emun kenà, ne hengkey ve is ebeelan tew?”
2SA 17:7 Migkeǥiyan ni Hushai si Absalom te, “Guntaan kenà meupiya heini is menge sambag ni Ahitofel.
2SA 17:8 Nekilala nu is amey nu wey is menge sakup din; mezesen sikandan wey zumezaas iring sikandan te bir he mid-eǥawan te menge anak din. Iring keniyan is amey nu he nelayam te tebek, wey kenà sikandin ebpekiduma te menge sakup din ke edlipezeng.
2SA 17:9 Minsan buwa ǥuntaan ne ziyè en sikandin te menge surung wey ke ziyè be te zuma he lugar. Emun diyà te egkehuna he kedtebek niw ebpematey is duma he menge sundaru nu, is ebpekezineg kayi, ebpekekaǥi zan he nezaag is menge sundaru nu.
2SA 17:10 Ne minsan is pinekemevurut he sundaru nu, he henduen te mevurut he erimaung, egkahandek. Su netuenan te langun he Israilihanen he is amey nu ne utew nelayam he ebpekidtebek wey mevurut is menge sakup din.
2SA 17:11 Umbe, edsembaǥan ku sikew he vurvuruna nu is langun he Israilihanen puun te Dan pehendiyà te Beersheba, he iyan egkeiringan niw is pantad diyà te veyvey he utew mezakel. Ne iyan ke en pengulu kandan te kebpekidtebek.
2SA 17:12 Ne ebpen-ahaan tew si David minsan hendei sikandin, ne edlingutan tew sikandin iring te zehemug he segugunà ebpekeeneb diyà te tanà; ne egkepatey tew sikandin wey is menge sakup din.
2SA 17:13 Emun ebpelaǥuy sikandin diyà te zuma he inged, ne edhiketan tew is menge verengbeng ne eguyuzen tew pehendiyà te wahig taman te egkerundus heini ne wazà dutun egkesamà he vatu!”
2SA 17:14 Migkaǥi si Absalom wey is langun he menge sineriǥan te Israel te, “Meupiya pa is sambag ni Hushai he Arkanhen kenà is ki Ahitofel.” Meupiya is sambag ni Ahitofel, piru ketau te Nengazen he kenà ebpemineǥen heini ni Absalom, su wey mezaat is egkepengkusan din.
2SA 17:15 Midtudtulan ni Hushai si Zadok wey si Abiatar kes menge memumuhat mehitenged te insambag ni Ahitofel ki Absalom wey te menge ebpemendumala te Israel, wey te kandin daan he insambag.
2SA 17:16 Ne migkeǥiyan din sikandan te, “Gègaani nu pesuǥui si David he kenà mebpeteǥak dutun te repasan te Jordan pehendiyà te sibsivayan te ǥuntaan he kezukilemi, kekenà, ipelaus en sikandan iperapas dutun te wahig su wey kenè dan mengeǥerà.”
2SA 17:17 Haazà he timpu, edtaǥad si Jonatan he anak ni Abiatar wey si Ahimaaz he anak ni Zadok diyà te En Rogel, su kenè dan egkesuat he egkaahà he egawas wey edseled dutun te Jerusalem. Duen sevaha he vahi he suluǥuen he ibpehendiyè dan su wey zan metueni ke hengkey is egkeulaula, ne edtudtulen dan maan diyà te ki David.
2SA 17:18 Piru, zuen nekaahà kandan he sevaha he egkengkenakan, ne intazem din diyà te ki Absalom. Ne zutun migaanggaan dan med-awà dutun is dezuwa ne midhendiyè dan te valey te etew ziyà te Baruhim. Heini he etew ne zuen din kalut diyà te uvey te valey zin, ne zutun mebpenaug si Jonatan wey si Ahimaaz te kalut ne zutun dan med-eles.
2SA 17:19 Ne migkuwa haazà is esawa zutun te maama te zahun ne midtembunan din haazà is kalut ne migkegkaǥan din te trigu haazà is intambun dutun su emun duen dutun ebpekaahà ne egkeisip din is wazà dutun mid-eles.
2SA 17:20 Hein nekeuma zutun is menge sakup ni Absalom te valey zutun te etew, ne mid-insaan dan haazà is esawa zin, “Neehè niw ve si Ahimaaz wey si Jonatan?” Midtavak haazà is esawa te, “Midlayun dan te wahig.” Mibpen-ehè dan sikandan piru wazè dan maahà, ne midlikù dan diyà te Jerusalem.
2SA 17:21 Hein wazè en dutun kes menge sakup ni Absalom, migawas si Jonatan wey si Ahimaaz dutun te kalut ne midhendiyè dan te ki David ne migkeǥiyan dan te, “Gaanggaan kew layun te wahig, su midsambag si Ahitofel he edhimetayan ka.”
2SA 17:22 Ne zutun midrapas si David wey is menge sakup din dutun te Wahig he Jordan, ne hein meǥaan en egkepawà ne nemekelayun dan en is langun.
2SA 17:23 Hein netuenan ni Ahitofel he wazà pezumdumahi is menge sambag din, ne mid-untuzan din is asnu zin ne mid-ulì diyà te inged din. Nemilinbilin sikandin te pemilya zin ne midhiket sikandin pinaaǥi te kebitey. Diyè ded ileveng sikandin te midlevengan te amey zin.
2SA 17:24 Nekeume en ensi David diyà te Mahanaim dutun te nekelayun en ensi Absalom wey is menge sakup din te Wahig he Jordan.
2SA 17:25 Mibpilì ni Absalom si Amasa he in-ilis din ki Joab he iyan peremandar te menge sundaru. Heini si Amasa ne anak ni Jeter he Ismailihanen. Iyan iney zin si Abigail, he anak ni Nahash, te suled te iney ni Joab he si Zeruya.
2SA 17:26 Diyà megkampu si Absalom wey menge Israilihanen te Gilead.
2SA 17:27 Hein nekeuma ensi David diyà te Mahanaim, ne migelǥelawan sikandan ni Shobi he anak ni Nahash he Amunihanen, he ziyà ed-ubpà te Raba, ni Makir he anak ni Amiel, he tig-Lo Debar, wey ni Barzilai he Gilyadnen, he tig-Rogelim.
2SA 17:28 Duen dan menge uwiten he hizeǥeey, malung, diniyun, trigu, barli, herina, midsandag he veǥas te trigu, lisu he menge utanen, menge velatung,
2SA 17:29 teneb, mentikilya, kerehidu, wey kisu. Imbeǥey zan heini ki David wey te menge sakup din, su netuenan dan he egkengevitil, egkengeveley, wey utew en sikandan egkemezahi zutun te kedhipanew zan.
2SA 18:1 Midtiǥum ni David is menge sakup din te tig-1,000 wey tig-100, ne mibpilì sikandin te peremandar he iyan ed-uwit kayi.
2SA 18:2 Ne impehipanew zin sikandan he tetelu he vahin. Si Joab is egalen te sevaha, si Abishai he suled ni Joab is egalen te ikezuwa, ne si Itai he tig-Gat is egalen te iketelu. Migkeǥiyan sikandan ni Hadì David te, “Iyan ad eduma keniyu te kebpekidtebek niw.”
2SA 18:3 Midtavak haazà is menge sakup din te, “Kenè en kinahanglan he meduma ke pa kenami. Su kenè key en idtetenged te menge kuntada ke ebpelaǥuy key, wey edhimetayan dan is ketengà kenami. Iyan dan pa ganì egkesuatan he iyan ke zan mepatey kenà ke iyan heini is tig-10,000 kayi te kenami. Umbe meupiya pa ke kayi ke zà pelintetaǥak te inged ne peuwiti key zà ke hengkey is igketavang nu kenami.”
2SA 18:4 Midtavak si Hadì David te, “Ebeelan ku is meupiya para keniyu.” Ne midhitindeg si Hadì David dutun te uvey te pultahan te inged dutun te kemulu en edliǥawang is langun he menge sakup din he mibahin te tig-1,000 wey tig-100.
2SA 18:5 Midsuǥù ni Hadì David si Joab, si Abishai, wey si Itai te, “Tenged kedì ne kenè niw menuwa is betan-en he si Absalom.” Nezineg haazà te langun he grupu is migkaǥi ni David diyà te menge peremandar zin.
2SA 18:6 Midhipanew is menge sundaru ni David su ebpekidtebek te menge sundaru te Israel, ne ziyà sikandan medtetebek te ketelunan te Efraim.
2SA 18:7 Nezaag is menge sundaru te Israel te menge sundaru ni David. Utew mezakel is nemematey, te haazà he andew 20,000 he etew.
2SA 18:8 Nekeeneb te tivuuk he ketelunan is kedtetebek, ne utew pa mezakel is minatey tenged te kepiligru zutun te ketelunan kenà is nepatey pinaaǥi te ispada.
2SA 18:9 Timpu te tebek, nesinuǥung te menge sakup ni David si Absalom, ne mibpelaǥuy sikandin he ed-untud te kudà. Ne nenursuriyuk diyà te dizalem te merapung he menge subpang te kayu he ulayan, ne nekesanggat is ulu zin dutun te kayu. Ne midlaus en is kudè din mebpelelaǥuy, ne netaǥak en sikandin is nevivitey zutun te kayu.
2SA 18:10 Duen sevaha he sakup ni David he nekaahà dutun ne mibeyaan din si Joab ne migkeǥiyan din te, “Neehè ku si Absalom is nevivitey zutun te kayu he ulayan.”
2SA 18:11 Ne migkeǥiyan ni Joab sikandin te, “Hengkey? Neehè nu sikandin? Maan is wazè nu sikandin himetayi? Emun midhimetayan nu pezem ne edsuhulan ku sikew te sepulù he vuuk he selapì wey vakes he para te upisyal.”
2SA 18:12 Midtavak haazà is etew te, “Minsan ebeǥayan a kenikew te 1,000 he selapì ne kenè ku edhimetayan is anak te hadì. Su nezineg dey is migkaǥi te hadì kenikew, ki Abishai, wey ki Itai, he kenè niw menuwa is betan-en he si Absalom tenged kandin.
2SA 18:13 Emun midhimetayan ku si Absalom ne egketuenan te hadì heini ne kenè e man kenikew edlevanan.”
2SA 18:14 Migkaǥi si Joab te, “Kenà a egkeuǥet kayi te kenikew!” Migkuwa si Joab te vangkew he tetelu ne mibeyaan din si Absalom he nevivitey zutun te kayu he ulayan he uuyag pa. Ne mibpilak din diyà te kumeng si Absalom.
2SA 18:15 Ne is sepulù he tig-uwit te ǥumaan ni Joab, midlingutan dan si Absalom, ne midhimetayan dan.
2SA 18:16 Ne zutun impezaǥing ni Joab is budyung he tuus te ibpeengked en te edlayas is menge sundaru zin te menge sundaru te Israel.
2SA 18:17 Migkuwa zan haaza is lawa ni Absalom ne in-ulug dan te vudsi ziyà te ketelunan ne midtembuan dan te mehabet he menge vatu. Ne nemelaǥuy is langun he menge sundaru te Israel ne mibpemen-ulì dan.
2SA 18:18 Hein uuyag pa si Absalom ne mibpehitindeg sikandin te munyumintu para te keugelingen din diyà te Suǥud te Hadì, su wazè din anak he maama he ebpekeuwit te ngazan din. Migngezanan din haazà te “Munyumintu ni Absalom,” ne iyan ded heini ngazan din taman guntaan.
2SA 18:19 Ne migkeǥiyan ni Ahimaaz he anak ni Zadok si Joab te, “Tuǥuti a te kedhendiyà te ki David su egkeǥiyen ku kandin is kedlibriya kandin te Nengazen puun te ǥehem te menge kuntada zin.”
2SA 18:20 Migkaǥi si Joab te, “Kenà ka iyan edtudtul ziyà te hadì guntaan he andew. Egkehimu ka he ebpenudtul emun duma he andew kenà guntaan, tenged te nepatey is anak te hadì.”
2SA 18:21 Ne migkeǥiyan ni Joab is sevaha he etew he tig-Etiopia te, “Hipanew ke en, ne tudtuli nu si Hadì David te neehè nu.” Ne hein nekepasad he edseludu haazà is etew ziyà te ki Joab, ne mibpelelaǥuy sikandin.
2SA 18:22 Mid-umanan keǥiyi ni Ahimaaz si Joab te, “Minsan hengkey is egkeulaula, tuǥuti a he edsunud a zutun te etew he tig-Etiopia.” Midtavak si Joab te, “Mama, maan is egkesuat ka he edhipanew? Wazà suhul nu keniyan te kebpenudtul nu.”
2SA 18:23 Migkaǥi sikandin te, “Minsan hengkey is egkeulaula ne edhipanew a.” Ne migkeǥiyan ni Joab sikandin te, “Uya, genat ke en!” Ne zutun mibpelelaǥuy si Ahimaaz, ne nememantek dà sikandin diyà te menge suǥud te Jordan, ne nehunaan din pa haazà is etew he tig-Etiopia.
2SA 18:24 Ne zutun te ebpimpinuu si David diyà te teliwazà duen te zezuwa he pultahan he ziyà te ǥawas wey ziyà te seled he vahin te verengbeng he zutun te inged. Nemenahik dutun te verengbeng is tigbantey te inged ne midhithitindeg dutun te atep te pultahan te inged. Ne mibpememantew sikandin, ne zuen neehè din he sevaha he etew he ebpelelaǥuy.
2SA 18:25 Ne mibensaǥan din si David diyà te sihung he zuen etew he ebpekeuma. Migkaǥi si David te, “Emun sevaha zin dà ne duen din buwa uwiten he tudtul.” Ne hein ebpekeuvey-uvey en haazà is etew,
2SA 18:26 ne zuen pa maan naahà dutun te tigbantey he sevaha he etew he ebpelelaǥuy. Migkulahì din is diyà te sihung te zuen pa sevaha he etew he ebpekeuma. Migkaǥi haazà is hadì te, “Duen din buwa uwiten he tudtul.”
2SA 18:27 Migkaǥi haazà is ebantey te, “Is nehuna he ebpelelaǥuy ne henduen te si Ahimaaz he anak ni Zadok.” Migkaǥi haazà is hadì te, “Metazeng heeyan he etew. Duen din buwa meupiya he tudtul.”
2SA 18:28 Hein nekeuma si Ahimaaz, migkemusta zin is hadì ne midluhud he tuus te kedtahud din. Ne migkaǥi sikandin te, “Ereg he edeliǥen is Nengazen he Megbevayè nu, Mahal he Hadì! Su iyan mibeǥey kenikew te kezeeǥan te menge etew he midsukul kenikew.”
2SA 18:29 Mid-insà haazà is hadì te, “Kemuste en si Absalom? Wazè be sikandin memenu?” Midtavak si Ahimaaz te, “Hein impetawag a ni Joab he suluǥuen nu ne neehè ku he egkeǥuliyaved is menge etew piru wazè ku metueni ke hengkey haazà.”
2SA 18:30 Migkaǥi haazà is hadì te, “Keniyan ke zà dèpa.” Ne midhitindeg sikandin diyà te kilid.
2SA 18:31 Netegteǥaad ne nekeuma haazà is tig-Etiopia he egkaǥi te, “Mahal he Hadì, duen meupiya he tudtul ku. Su midluwas ka te Nengazen guntaan he andew te langun he midsukul kenikew.”
2SA 18:32 Mid-insaan sikandin te hadì te, “Kemuste en si Absalom? Wazè ded be sikandin memenu?” Midtavak haazà is etew te, “Berakat he is neulaula kandin ne iyan daan egkeulaula te langun he menge kuntada nu, Mahal he Hadì.”
2SA 18:33 Migkerker si David. Ne nemenahik diyà te ruǥu zin diyà te divavew te pultahan dutun te inged ne midsineǥew. Dutun te kebpemenahik din, ke sikandin te, “He Absalom, anak ku, iyan e en pezem nepatey he elili kenikew. He Absalom, anak ku!”
2SA 19:1 Duen nenudtul ki Joab he edtulung edsineǥew is hadì wey midlalew sikandin tenged ki Absalom.
2SA 19:2 Hein nezineg heini te menge sundaru, ne neengked is kedlipeylipey zan te kezeeǥan dan, ne midlalew zan daan.
2SA 19:3 Mid-eles-eles dan mebpenlikù diyà te inged he Mahanaim, iring te menge sundaru he nengeeled su nemelaǥuy te tebek.
2SA 19:4 Mid-elangan ni David is dagwey zin ne nenderawit sikandin, “He Absalom, anak ku, anak ku!”
2SA 19:5 Ne midhendiyà si Joab te valey te hadì ne migkaǥi te, “Mibpeel-elezan nu ǥuntaan he andew is menge sakup nu he midluwas kenikew wey te menge anak nu wey te menge esawa nu.
2SA 19:6 Ebmahalen nu is ebpekigkuntada kenikew, ne egkuntedahan nu is nehizu kenikew. Impeehè nu he wazà pulus te menge upisyal nu wey menge sakup nu. Nesavut ku he meupiya pa ke iyan key nemematey ne si Absalom ne iyan uuyag.
2SA 19:7 Guntaan, gawas ka, ne peselemati nu is menge etew. Su emun kenè ka, ne ibpenangdù ku ziyà te etuvangan te Nengazen he wazà ebpelintetaǥak he eduma kenikew te guntaan he mezukilem. Ne iyan heini utew mezaat he egkeula-ula kenikew puun pa te nehuna taman guntaan.”
2SA 19:8 Ne midhitendeg si David ne ziyà mebpinuu te pultahan te inged. Hein netuenan heini te menge etew, ne miburunburun dan diyà te kandin. Dutun he timpu, ne nemekepelaǥuy en he ed-ulì is menge sundaru te Israel he menge sakup ni Absalom.
2SA 19:9 Nekedlelawan dutun is tivuuk he Israel. Ke sikandan te, “Midluwas kiw ni Hadì David diyà te menge kuntada tew he menge Filistihanen, piru mibpelaǥuy sikandin kayi te nasyun tew tenged dà ki Absalom.
2SA 19:10 Guntaan, si Absalom is mibpilì tew he iyan pengulu tew minatey ziyà te tebek. Deyzey ke ebpengehè kiw te paaǥi he ikepelikù tew si David te kedhadì?”
2SA 19:11 Hein netuenan ni Hadì David he iyan haazà pelanu zan, midsuǥù sikandin te ibpepenudtul ziyà te menge memumuhat he si Zadok wey si Abiatar, he egkaǥi te, “Keǥiya niw heini ziyà te menge edumala te Juda: ‘Nezineg ku he egkesuatan te menge sakup niw he ibpelikù a he hadì. Maan is nehuziyan kew he ebpelikù kedì te kedhadì? Menge kezuzumahi ku sikiyu?’
2SA 19:13 Ne keǥiya niw heini ki Amasa, ‘Tenged te lengesa ku en sikew, edhimuwen ku sikew he peremandar te menge sundaru ku he id-ilis ku ki Joab. Emun ke kenè ku heini ebeelan, ne berakat he purungi a siluti te Megbevayà.’ ”
2SA 19:14 Tenged kayi, neuwit ni David is langun he tig-Juda ne nesevaha is isip dan. Mibpeuwitan dan te lalag si David he egkaǥi te, “Sikew wey is langun he menge sakup nu, likù kew en kayi te kenami.”
2SA 19:15 Dutun te kedlikù eni David, midsinuǥung sikandin te menge tig-Juda ne ziyè dan medtiǥum te Gilgal su edtevangan dan si David te kedlayun dutun te Wahig he Jordan.
2SA 19:16 Sikan is tig-Benjamin he egngezanan ki Shimei he anak ni Gera, he ebpuun te Bahurim, migaanggaan medtupang su eduma te edsinuǥung ki David.
2SA 19:17 Duen miduma kandin he 1,000 he tig-Benjamin, apil zutun si Ziba he suluǥuen te pemilya ni Saul, duma is 15 he menge anak din he menge maama wey 20 he menge suluǥuen. Ne migaanggaan dan medhendiyà te Jordan is edtelavuk ki David.
2SA 19:18 Mid-uǥupan dan si David wey is pemilya zin he mekelayun dutun te wahig, ne midtuman dan is minsan hengkey he egkesuatan ni David. Hein edrapas en si David dutun te Wahig he Jordan, midluhud si Simei ziyà te kandin
2SA 19:19 he egkaǥi te, “Mahal he Hadì, peseyluwa a. Lipati nu en is kenà meupiya he neveelan ku kenikew hein ked-awè nu ziyà te Jerusalem.
2SA 19:20 Mid-angken ku he nekesalà a, Mahal he Hadì. Umbe mibpetelihuna a te kedhendini te zuma he menge tribu ziyà te tribu ni Jose para te kedsinuǥung kenikew.”
2SA 19:21 Ne migkaǥi si Abishai he anak ni Zeruya te, “Kenè be engayan he edhimetayan si Shimei su midrewakan din is hadì he mibpilì te Nengazen?”
2SA 19:22 Migkaǥi si David te, “Sikiyu is menge anak ni Zeruya, hengkey is lavet niw? Kenè niw supaka is ebeelan ku ǥuntaan. Iyan e en hadì guntaan te Israel, ne wazà edhimetayan he etew te Israel ǥuntaan he andew.”
2SA 19:23 Umbe, migkeǥiyan ni David si Shimei te, “Ibpesarig ku he kenè ka edhimetayan.”
2SA 19:24 Midhendiyà daan si Mefiboshet he apù ni Saul su midtelavuk ki David. Diyà sikandin ebpuun te Jerusalem. Wazà melùlui is paa zin, wazè din mekiskisi is sumpè din, wey wazè din pa meilisi is ingkukumbalè din puun pa te kebpekeawà ni David diyà te Jerusalem taman te nekelikù he wazà memenu sikandin. Hein nekeume en sikandin diyà, ne mid-insaan sikandin ni David te, “Mefiboshet, maan is wazè ka meduma kedì?”
2SA 19:26 Midtavak sikandin te, “Mahal he Hadì, netuenan nu he pigket a. Migkeǥiyan ku is suluǥuen ku he si Ziba he iandam din sikan is asnu ku para ed-untuzan ku te eduma kenikew. Piru mid-ekalan e zin.
2SA 19:27 Ne mibaalvaal te lalag he kenè e kun eduma kenikew. Piru wazè ka meelesi su iring ka te velinsuǥuen te Megbevayà, umbe veeli nu is mid-isip nu he meupiya.
2SA 19:28 Ereg pezem he ebpenhimetayan nu is menge kevuwazan te apù ku, piru siak is suluǥuen nu ne nehizuwan nu su impekaan nu zuma kenikew. Umbe kenà ad ereg he edhangyù pa kenikew te pebur.”
2SA 19:29 Migkeǥiyan sikandin ni David te, “Ereg en heeyan. Iyan en paaǥi ku is tengaa niw en ki Ziba is tanà ni Saul.”
2SA 19:30 Migkaǥi si Mefiboshet diyà te hadì te, “Iveǥey nu en kandin is langun. Su para kedì ne ingkelipey ku en is kebpekelikù nu he wazà mezaat he neulaula kenikew.”
2SA 19:31 Midhendiyà te ki David si Barzilai he tig-Gilead he ebpuun te Rogelim. Egkesuat daan sikandin he ed-uǥup te kebpekelayun ni David te Jordan.
2SA 19:32 Meǥurang en si Barzilai; 80 en is penuiǥen din. Dekelà is ketiǥeyunan din, su iyan sikandin mibeǥey te menge kinehenglanen ni David hein kebpeke-ubpà ni David diyà te Mahanaim.
2SA 19:33 Migkeǥiyan sikandin ni David te, “Duma ke en kedì te edlayun ne ziyè ka ubpà te Jerusalem. Iyan e en ed-elima kenikew ziyà.”
2SA 19:34 Midtavak si Barzilai te, “Kenà ad ebpekezuma kenikew ziyà te Jerusalem su meǥurang e en.
2SA 19:35 Su 80 en is penuiǥen ku, ne kenè ku en egketuenan is meupiya wey kenà meupiya. Kenè ku en egkeǥezam is taam te egkeenen ku wey ed-inumen ku. Kenè ku en egkezineg is ebpemenganta. Egkerikuran ke zà kedì, Mahal he Hadì.
2SA 19:36 Deisey zà he tavang is kedhated ku kenikew, maan is utew iring keniyan is ibales nu?
2SA 19:37 Ed-ulì e en, su emun ebpatey a ne ziyè e zed ebpatey te kediey he inged, he zutun daan ileveng is ginikanan ku. Heini zed is anak ku he si Kimhan ibpezuma ku kenikew para egkehimu he suluǥuen nu. Dumaha nu sikandin, Mahal he Hadì, ne iyan ke en metau ke hengkey is meupiya he ebpeveelan nu kandin para kenikew.”
2SA 19:38 Midtavak haazà is hadì te, “Ipezume en sikandin kedì ne ebeelan ku is minsan hengkey ziyà te kandin he meupiya para kenikew, ne ebeelan ku zaan is minsan hengkey he egkesuatan nu.”
2SA 19:39 Ne zutun, migkepkepan ni David si Barzilai ne mibpenubtuvazan din. Ne human medrapas si David wey kes langun he menge sakup din dutun te Wahig he Jordan. Ne mid-ulì en daan si Barzilai ziyà te ubpaan din.
2SA 19:40 Hein nekerapas en si David, ne midhendiyà sikandin te Gilgal duma si Kimhan wey is langun he menge sundaru te Juda wey is ketengà te menge sundaru te Israel.
2SA 19:41 Ne midhendiyà te ki David is langun he menge etew te Israel ne midriklamu su maan is menge tig-Juda is nendesen te kebpeleyuna kandin wey te pemilya zin, wey is langun he menge sakup din.
2SA 19:42 Midtavak haazà is menge etew te Juda ziyà te Israel te, “Mibeelan dey heini tenged te is hadì ne kezuzumahi zey. Maan is egkengepauk kew? Duen be ingkepekaan kenami te hadì? Duen be nezawat dey he imbeǥey zin kenami? Wazà.”
2SA 19:43 Midtavak haazà is menge etew te Israel te, “Sepulù key he tribu is diyà te Israel, umbe kesepulù edubliya is ketenged dey keniyan te hadì kenè kew. Maan is ibpekevavè key keniyu? Iyan key man nehuna he migkaǥi he ibpelikù tew is hadì tew?” Piru kenà egkelewanan is menge etew ziyà te Juda, ne mesakit is kineǥiyan te menge etew te Juda kenà is menge etew te Israel.
2SA 20:1 Duen sevaha he etew he tig-Benjamin he layun dà ebpen-ahà te samuk. Iyan ngazan din si Sheba, he anak ni Bicri. Impezaǥing din is budyung ne ebpengulahì te, “Menge tig-Israel, wazè tew lavet ki David he anak ni Jesse! Ebpen-ulì kiw is langun!”
2SA 20:2 Ne zutun nemenggenat haazà is menge tig-Israel ne mid-ewaan dan si David ne miduma zan ki Sheba he anak ni Bicri. Piru is menge tig-Juda ne wazè dan ewai is hadì dan, ne midumahan dan puun dutun te Wahig he Jordan pehendiyà te Jerusalem.
2SA 20:3 Hein nekelikù si David diyà te turuǥan din diyà te Jerusalem, ne impaangey zin kes sepulù he esawa zin he intaǥak din he para ed-etiman duen te turuǥan, ne zuen ibpevantey zin kandan. Ne mibeǥayen din sikandan te kinahanglan dan, piru wazè din en hulizi sikandan. Ne zutun en sikandan med-ubpà he henduen be te menge valu taman te kebpatey zan.
2SA 20:4 Ne zutun migkeǥiyan dutun te hadì si Amasa te, “Umawa nu is langun he menge sundaru te Juda ne pehendiyè kew te kedì te iketelu he andew puun guntaan.”
2SA 20:5 Ne migenat si Amasa ne impetawag din is menge sundaru te Juda, piru wazà sikandin mekelikù dutun te andew he migkaǥi kandin te hadì.
2SA 20:6 Umbe, migkeǥiyan te hadì si Abishai te, “Tuwas pa he mezaat is ebeelan kenitew ni Sheba, kenà te mibeelan ni Absalom. Umbe ǥuntaan, dumaha niw is menge sakup ku ne del-asa niw sikandin, su kela ke mekaaǥew sikandin te vinerengbeng he menge inged ne egkepeleǥuyan kiw zin.”
2SA 20:7 Ne migenat si Abishai puun te Jerusalem su edleyasen din si Sheba he anak ni Bicri. Miduma zin si Joab wey is menge sakup din, is menge vantey ni David he menge Kiritnen wey menge Pilitnen, wey is langun he menge memevurut he menge sundaru.
2SA 20:8 Hein diyè dan en te zekelà he vatu ziyà te Gibeon, neumahan sikandan ni Amasa. Ne si Joab, nekeyuyunipurmi ne edseseluniket te ispada. Hein egkeuvayan din en si Amasa, ne mid-el-elesan din hulevuta is ispada zin.
2SA 20:9 Migkeǥiyan din si Amasa te, “Egkemenumenu ke en suled?” Ne migewezan din te kewanan he velad din is sumpà ni Amasa, su uvag kun edhazek kandin.
2SA 20:10 Wazà mekevantey si Amasa he ziyà te ǥivang ni Joab is ispada. Ne midsundang ni Joab diyà te ǥetek ne nekeyakat diyà te tanà is bituka zin. Ne segugunà minatey sikandin, ne wazè en meumani mesundang ni Joab. Ne midlaus si Joab wey is suled din he si Abishai su edleyasen dan si Sheba.
2SA 20:11 Duen sevaha he sakup ni Joab ne midhitindeg dutun te minatey he lawa ni Amasa, he migkaǥi ziyà te menge sakup ni Amasa te, “Emun diyè kew edapig te ki Joab wey ki David, ne sunud kew en ki Joab!”
2SA 20:12 Nekesesavuk is lawa ni Amasa zutun te teliwazà te zalan he nepurung melupit te lengesa zin. Kada zuen ebayà dutun he ebpekaahà kandin ne edteren su ed-ahà. Ne hein netuenan heini te sakup ni Joab, ne miguyud din haazà is minatey he lawa ni Amasa puun dutun ne ziyè din uwita te vevesukà, ne midtembunan din te malung.
2SA 20:13 Hein naawè en dutun is lawa ni Amasa te dalan, ne nemenlaus dan is langun he edsunud ki Joab he edlayas ki Sheba.
2SA 20:14 Midhendiyà si Sheba te langun he tribu te Israel su edtiǥumen din is langun he menge kezuzumahi zin. Ne midsunud kandin is menge kezuzumahi zin, ne mid-amur-amur zan diyà te Abel Bet Maaca.
2SA 20:15 Hein netuenan heini ni Joab wey te menge sakup din ne midhendiyè dan te Abel Bet Maaca ne midlingutan dan heini. Ne midtembuan dan te tanà is kilid te verengbeng su para mekeawè dan, ne midnenenayan dan te edrundus haazà is berengbeng.
2SA 20:16 Duen dutun sevaha he vahi he uluwanen te seled te inged ne migkulahì din is menge sakup ni Joab te, “Pemineg kew kedì! Keǥiyi niw si Joab he medhendini te kedì su egkesuat a he ebpekidlalag kandin.”
2SA 20:17 Ne midhendiyà si Joab te kandin, ne mid-insà haazà is bahi te, “Iyan ke ve si Joab?” Midtavak si Joab te, “Uya.” Migkaǥi haazà is bahi te, “Datù, pemineǥa nu is egkeǥiyen ku kenikew.” Midtavak si Joab te, “Ne en, ebpemineg a.”
2SA 20:18 Migkaǥi haazà is bahi te, “Duen sevaha he erubasa he egkaǥi te, ‘Emun egkesuatan niw he mehusey is menge samuk niw, ne vuyù kew te sambag diyà te inged he Abel.’
2SA 20:19 Sevaha a te menge ebpenganduy he mebpedayun is kelinew te Israel. Piru sikew, maan is egkesuatan nu te edrundus is inged he ǥaked te Nengazen?”
2SA 20:20 Midtavak si Joab te, “Kenè ku egkesuatan te edrundus is inged niw!
2SA 20:21 Kenè dey heeyan tuyù. Iyan dey edleyasen si Sheba he anak ni Bicri he ebpuun diyà te vuvungan te Efraim. Iyan heini midsukul ki Hadì David. Iveǥey niw sikandin kenami ne ed-awè key kayi te inged niw.” Migkaǥi haazà is bahi te, “Idtimbag dey ziyà te kenikew is ulu zin puun kayi te seled te verengbeng.”
2SA 20:22 Ne zutun mibeyaan dutun te vahi is menge meǥinged dutun te inged ne midtudtulan din sikandan te planu zin. Mibpungelan dan te ulu si Sheba ne intimbag dan diyà te ki Joab. Ne segugunà impezaǥing ni Joab is budyung ne mid-awè dan dutun te inged duma is menge sakup din ne mid-ulì dan. Ne midlikù si Joab diyà te Jerusalem.
2SA 20:23 Iyan egalen te menge sundaru te tivuuk he Israel, si Joab. Is pengulu te tigbantey ki David he menge Kiritnen wey menge Pilitnen, iyan si Benaya he anak ni Jehoyada.
2SA 20:24 Ne is edumala te menge uripen he ebpeǥesen te kedterebahu ne iyan si Adoniram. Ne iyan midseriǥan te menge libru te ginhedian din si Jehoshafat he anak ni Ahilud.
2SA 20:25 Ne iyan sikritaryu te hadì si Sheva. Is lavew he memumuhat ne si Zadok wey si Abiatar.
2SA 20:26 Ne si Ira he tig-Jair iyan keugelingen ni David he memumuhat.
2SA 21:1 Dutun te kedhadì ni David, duen nehitavù he vitil seled te tetelu he tuig. Ne zutun nekidlalag si David diyà te Nengazen. Migkaǥi is Nengazen te, “Neulaula is bitil tenged te kebpenhimetayi ni Saul wey te pemilya zin te menge Gibyunhen.”
2SA 21:2 Kenà heini sikandan Israilihanen, kekenà, iyan heini kes nengesamà he menge uuyag te menge Amorihanen. Impenaad te menge Israilihanen he kenè dan en sikandan edhimetayan, piru si Saul, duen planu zin te kegeraa kandan tenged te igkeipeng din is Israel wey Juda. Impetawag ni David is menge Gibyunhen
2SA 21:3 Ne mid-insaan din te, “Hengkey is ebeelan ku keniyu para meveyazi is salà ni Saul he mibeelan din keniyu? Keǥiya niw kedì, para tuvazi en maan te Nengazen is keet-etawan din.”
2SA 21:4 Midtavak is menge Gibyunhen te, “Kenà egkeveyazan te selapì wey ke vulawan is kegkeepesi zey ki Saul wey te pemilya zin. Wazè dey zaan ketenged te kedhimatey te minsan hentei kayi te Israel gawas ke edtuǥutan key kenikew.” Mid-insà si David te, “Na, hengkey is egkesuatan niw he ebeelan ku para keniyu?”
2SA 21:5 Midtavak sikandan te, “Egkesuatan ni Saul he meǥerè key para wazè en egkesamà kenami kayi te Israel.
2SA 21:6 Umbe, iveǥey niw kenami kes pitu he menge kevuwazan din he menge maama, su edhimetayan dey sikandan, ne kenà id-awà is menge lawa zan diyà te egkesevukan dan he uvey te ed-ezapan te Nengazen diyà te Gibea, he inged ni Saul he mibpilì te Nengazen he hadì,” midtavak haazà is hadì te, “Uya ibeǥey ku en sikandan keniyu.”
2SA 21:7 Piru si Mefiboshet is anak ni Jonatan he apù ni Saul ne wazà mulà iapil ni David te ebeǥey kandan, tenged te penangdù dan ki Jonatan diyà te etuvangan te Nengazen.
2SA 21:8 Iyan imbeǥey zin is dezuwa he anak ni Saul he si Armoni wey si Mefiboshet, he anak ni Rizpa he anak ni Aya. Imbeǥey zaan ni David is lelima he anak ni Merab he menge maama. Si Merab anak ni Saul he esawa ni Adriel he anak ni Barzilai he tig-Mehola.
2SA 21:9 Imbeǥey sikandan ni David te menge Gibyunhen ne midhimetayan sikandan is pitu ziyà te vuvungan he uvey te inged he zutun ed-ezapa is Nengazen. Ne wazè en welenga zutun is menge minatey he lawa zan. Neulaula heini timpu te kebpuun ked-eǥani te barli.
2SA 21:10 Ne si Rizpa is anak ni Aya ne migkuwa te saku ne indempas din dutun te vatu su edhidhizeǥaan din. Su ebentayan din haazà is minatey he lawa para kenà mekaan te menge tagbis emun maandew, wey ke mezukilem ne kenà daan egkekaan te menge langgam diyà te ketelunan. Dutun sikandin med-ubpà puun pa te kebpuun te ting-eǥani taman te ked-uzan.
2SA 21:11 Hein netudtulan si David te mibeelan ni Rizpa he esawa ni Saul,
2SA 21:12 midhendiyà sikandin te menge meǥinged te Jabesh Gilead ne mibuyù din is menge tulan ni Saul wey anak din he si Jonatan. (Hein nepatey en si Saul wey si Jonatan te kebpekidtebek dan te menge Filistihanen diyà te Gilboa, ne imbitey te menge Filistihanen is minatey he lawa zan diyà te pelasa te Bet Shan, ne wazà petueni te menge tig-Jabes Gilead he migkuwa zan haazà is minatey he lawa.)
2SA 21:13 Ne mid-uwit ni David haazà is menge tulan ni Saul wey ni Jonatan, inragkes din daan is menge tulan dutun te pitu he mibpehimetayan te menge Gibyunhen.
2SA 21:14 Ne impeleveng din heini te menge sakup din diyà te midlevengan te amey ni Saul he si Kish diyà te inged he Zela ziyà te Benjamin. Netuman is langun he insuǥù ni David. Ne hein nepasad dutun, ne midtavak te Megbevayà is menge ked-ampù dan he meengked en is bitil zutun te nasyun dan.
2SA 21:15 Neuma is timpu zutun he mid-uman medtebek is menge Filistihanen wey menge Israilihanen. Ne zutun te kebpekidtebek ni David wey te menge sakup din, ne utew sikandin neluǥat.
2SA 21:16 Si Ishbi Benob he Filistihanen, utew zekelà he etew; sevaha sikandin he menge kevuwazan te menge Ripanhen, ne egkesuatan din te edhimatey si David. Is purù te vangkew zin ne brunsi ne heepat he kilu is keveǥat dutun, ne zuen daan beǥu he ispada zin.
2SA 21:17 Meupiya su nekeuma si Abishai he anak ni Zeruya is edtavang ki David, ne nepatey zin haazà is Filistihanen. Ne migkeǥiyan si David te menge sakup din te, “Kenè key en ebpemineg ke ed-uman ka eduma kenami te kebpekidtebek. Iring ka te sulù te Israel, ne kenè key egkesuat he maawè ka.”
2SA 21:18 Nepasad dutun, mid-uman en maan medtebek is menge Filistihanen wey menge Israilihanen, ne ziyà heini meulaula te Gob. Kayi he tebek ne nepatey ni Sibecai he tig-Husha si Saf he sevaha te menge kevuwazan te menge Ripanhen.
2SA 21:19 Ne zuen pa sevaha he kedtebek dan diyà te Gob, ne nepatey ni Elhanan he anak ni Jaare Oregim, he tig-Betlehem, si Goliat he tig-Gat. Is bangkew zin ne meveǥat wey mekepal.
2SA 21:20 Mid-uman en maan medtebek is menge Filistihanen wey menge Israilihanen; diyà heini meulaula te Gat. Kayi he tebek, duen etew he utew zekelà, he tig-heenem is kemer te kada velad wey paa zin. Sevaha zaan sikandin he menge kevuwazan te menge Rafa.
2SA 21:21 Hein mid-undaunda zin is menge Israilihanen, ne midhimetayan sikandin ni Jonatan he anak te suled ni David he si Simea.
2SA 21:22 Haazà is heepat he utew dezekelà he menge Filistihanen he menge kevuwazan te menge Rafa he tig-Gat. Mibpenhimetayan sikandan ni David wey te menge sakup din.
2SA 22:1 Migkentahan ni David is Nengazen dutun te kedluwasa kandin te Nengazen diyà te ǥehem te menge kuntada zin wey ziyà te ki Saul.
2SA 22:2 Iyan heini kanta zin: “Iyan ka, Nengazen, batu he endilungè ku; melig-en he elesè ku wey menluluwas. Iring ka te elesà he vatu, ne ed-eles a ziyà te kenikew. Iyan ka kelasag ku wey mekeǥeǥehem he menluluwas. Iyan ka eputè ku wey elesè ku. Iyan ka midluwas kedì dutun te utew mesipala he menge etew.
2SA 22:4 Edeliǥen ka, Nengazen, su emun ebuyù a te tavang diyà te kenikew, ne edluwasen a kenikew zutun te menge kuntada ku.
2SA 22:5 Is kemetayen iring te vaǥel he edlingut kedì. Is kezeetan iring te vendes te zalem he ed-anud kedì.
2SA 22:6 Is kemetayen, ne iring te pisì he ebpekevagkes kedì wey iring te litag dutun te ibayè ku.
2SA 22:7 Hein kedlised ku nengumew a kenikew, Nengazen. Mibuyù a te tavang diyà te kenikew te Megbevayè ku, ne zutun te valey nu mibpemineg nu is ked-ampù ku.
2SA 22:8 Ne zutun ne midlinug, ne minsan is menge pundasyun te menge vuvungan ne neyunggat, tenged te kegkepauk nu, Nengazen.
2SA 22:9 Migawas is evel puun te izung nu, ne ziyà te vèbè nu migawas is mekahandekhandek he hapuy wey egkeregreg he menge vaǥa.
2SA 22:10 Mibpuwasan nu is langit iring te kebpuwas te kurtina, ne mibpenaug ka he ziyà med-untud te mekepal he ǥapun.
2SA 22:11 Mid-untud ka te kirubin, ne utew heini meǥaan he edlayang he eduma te keramag.
2SA 22:12 Midhimu nu is merusirem he tambun te peliǥuy nu. Mid-eles ka ziyà te mekepal he ǥapun.
2SA 22:13 Midpengilat diyà te etuvangan nu, wey midlepew is egkeregreg he menge vaǥa.
2SA 22:14 Is laǥeng nu Nengazen, te Utew Lavew he Megbevayà, iring te ruǥung diyà te langit.
2SA 22:15 Mibpanè nu te kilat is menge kuntada nu, ne nemekepelaǥuy zan he egkengeteranta.
2SA 22:16 Emun edawey ka wey utew ka egkepauk ne egkengemezahan is daǥat ne egkaahà is tanà diyà te kinezizeleman kayi, wey egkaahà is pundasyun te kelibutan.
2SA 22:17 Puun te langit midawat a kenikew, ne inggaun a kenikew puun te mezalem he wahig.
2SA 22:18 Midluwas a kenikew zutun te mekeǥeǥehem he menge kuntada ku he kenè ku egkesukulan.
2SA 22:19 Midsurung e zan hein egkereǥenan a, piru mid-uǥupan a kenikew, Nengazen.
2SA 22:20 Midlibri a kenikew te ebpekekaid pezem kedì su ingkesuat a kenikew.
2SA 22:21 Edtuvazan a kenikew su ǥeina te metazeng a, wey wazè ku neveelan he salà.
2SA 22:22 Su edsunuzen ku is menge paaǥi nu, ne wazà a med-awà diyà te kenikew.
2SA 22:23 Edtumanen ku is langun he menge suǥù nu, ne wazè ku supaka is menge sulunuzen he ibpesunud nu.
2SA 22:24 Netuenan nu he wazà igkesawey te keugelingen ku, ne edlikayan ku is kebaal te salà.
2SA 22:25 Edtuvazan a kenikew su neehè nu he metazeng a, ne wazè ku eveelan he ibpekesalà ku.
2SA 22:26 Metinumanen ka ziyà te menge etew he metinumanen daan. Meupiya ka ziyà te menge etew he meupiya zaan.
2SA 22:27 Tinutuuwà is kebpekidepitè nu te menge etew he tinutuuwà daan is kebpekidepitè dan kenikew, ne metau ka zaan he bales te menge lalung.
2SA 22:28 Uya, edlibriyen nu is kenà menge mepelevawen, piru ibpekevavè nu mulà is menge etew he mepelevawen.
2SA 22:29 Nengazen, iyan ka kerayag ku. Emun merusirem, ne iyan ka sulù ku.
2SA 22:30 Tenged te kedtavang nu, ebpekehimu a he edsurung te menge sundaru, ne egpekehimu a zaan he ebpemenahik te verengbeng he nekeliǥuy te inged.
2SA 22:31 Is kenikew he paaǥi, Megbevayà, ne wazè din sayep. Is lalag nu egkeseriǥan. Iring ka te kelasag te langun he ebuyù kenikew te pengalang.
2SA 22:32 Iyan ke zà, Nengazen, kes Megbevayà; kes endilungè dey he vatu.
2SA 22:33 Iyan ka ebeǥey kedì te zesen wey ebantey kedì diyà te ibayè ku.
2SA 22:34 Edlig-enan nu is menge paa ku iring te paa te selazeng, para mezesen a he ebpenekezeg diyà te metikang he menge lugar.
2SA 22:35 Ebpenuruen a kenikew te kebpekidtebek, iring te kedhingat te mevisekeg he panà.
2SA 22:36 Mibpengelangan a kenikew iring te kelasag, umbe neluwas a. Ne nevantug a pinaaǥi te kedtevangi nu kedì.
2SA 22:37 Ebeǥayan a kenikew te meupiya he ibayà, umbe wazà mekezugkilas is menge paa ku.
2SA 22:38 Midal-as ku is menge kuntada ku ne nezaag ku sikandan. Ne human a medlikù hein nengezaag ku en sikandan.
2SA 22:39 Midezeetan ku sikandan ne nengepiley zan diyà te uvey te nehitindeǥan ku, ne kenè en sikandan ebpekeenew.
2SA 22:40 Mibeǥayan a kenikew, Nengazen, te zesen te kebpekidtebek ne nengezaag ku is menge kuntada ku.
2SA 22:41 Mibpepeleǥuyan a kenikew te menge kuntada ku ne midezeetan ku sikandan.
2SA 22:42 Mibuyù dan te tavang, piru wazà midlibri kandan. Nengumew-umew zan kenikew, piru wazè nu sikandan tevaka.
2SA 22:43 Midruntek ku sikandan taman te neiring en sikandan te eliyavuk. Midtekutakan ku sikandan he iring te tunaan diyà te menge zalan.
2SA 22:44 Midluwas a kenikew, Nengazen, te ebpekidsukulà kedì he menge etew. Midhimu a kenikew he pengulu te menge nasyun. Is menge lumelengyawà, ne ebpenilbi kedì.
2SA 22:45 Midluhud sikandan kedì tenged te kegkahandek dan, ne midtuman dan is suǥù ku.
2SA 22:46 Neewaan sikandan te kevurut, umbe migawas dan puun te mid-elesan dan he ebpengerkeren te kegkahandek.
2SA 22:47 Uuyag ka, Nengazen! Edeliǥen ka is endilungè ku he vatu. Ibayew ku sikew tenged te iyan ka Megbevayà he menluluwas ku.
2SA 22:48 Ebelesan nu is menge kuntada ku, ne ibpesakup nu kedì is menge nasyun.
2SA 22:49 Midluwas a kenikew zutun te utew menge mesipala he menge kuntada ku, ne ibpezaag nu kedì sikandan.
2SA 22:50 Umbe, ibpezalig ku sikew ziyà te menge nasyun. Egkentahan ku sikew te menge kedalig.
2SA 22:51 Is pinilì nu he hadì ebeǥayan nu te zekelà he menge kezeeǥan. Mahal nu si David wey is menge kevuwazan din te wazà pidtemanan.”
2SA 23:1 Si David he anak ni Jesse, midhimu he mevantug te Utew Lavew he Megbevayà. Mibpilì sikandin te Megbevayà ni Jacob he mehimu he hadì. Wey ebaal sikandin te menge kentahan te Israel. Iyan heini impeneltelaan din:
2SA 23:2 “Ebpekidlalag is Mulin-ulin te Nengazen pinaaǥi kedì; is menge lalag din, ne kayi te vèbè ku.
2SA 23:3 Is Megbevayà he iyan is endilungà he vatu te Israel, migkaǥi sikandin kedì, ke sikandin te, ‘Is etew he metazeng is kedumala wey zuen din kegkehandek te Megbevayà,
2SA 23:4 iring sikandin te anlag te andew he edsilà ke meselem he wazà gapun, he ebpekepesinew te neuzanan he menge sagbet!’
2SA 23:5 Iyan heeyan ked-ahà te Megbevayà te pemilya ku, su midhimu sikandin kayi te kedì te kebpekid-uyun he wazà pidtemanan. Heini he kebpekid-uyun, ne kenè en egkevelvelewanan ne kenè en daan egkeilisan. Umbe egkeperateng ku he lelayun a edluwasa te Megbevayà, wey ibeǥey zin kedì is langun he egkesuatan ku.
2SA 23:6 Piru is menge lalung he menge etew ne iring sikandan te zuǥiyen he menge rasang he idtimbag. Kenà belad is ibpunpun duen su zuen egemiten he igkerit, ne edtutungen heini ziyà te lugar he zutun heini burvuruna.”
2SA 23:8 Iyan heini menge sakup ni David he menge mevurut: Si Josheb Bashebet he tig-Takemon, he iyan kes edhuna zuen te tetelu he menge mevurut he sakup ni David. Te senge sangkè dà ne nekepatey sikandin te 800 he etew pinaaǥi te vangkew zin.
2SA 23:9 Ne iyan sunud kandin si Eleazar he anak ni Dodai he kevuwazan ni Ahoa, he sevaha zuen te tetelu he utew menge mevurut he sakup ni David. Sevaha sikandin te zuma ni David he nemenhinggat te tebek te menge Filistihanen he ziyà medtiǥum te Pas Damin para te kebpekidtebek. Nemelaǥuy is menge Israilihanen,
2SA 23:10 piru sikandin, ne wazà mulà su kemulu zin en ebpenhimetayi is menge Filistihanen, taman te neluǥat en is belad din ne kenè en ebpekekayew te ispada. Impezaag sikandan te Nengazen te haazè dà he andew. Kes mibpemelaǥuy he menge Israilihanen nemenlikù dan diyà te ki Eleazar su ebpenguwaan dan kes menge ǥumaan te menge mibpematey.
2SA 23:11 Ne sunud si Shama he anak ni Agee he tig-Harar. Sevaha he andew zutun, midtiǥum diyà te Lehi is menge Filistihanen, ne midsurung dan is menge Israilihanen diyà te vevesukà he neeneb te velatung. Nemelaǥuy is menge Israilihanen,
2SA 23:12 iyan dà wazà mebpelaǥuy si Shama dutun te teliwazà te vevesukà su mibentayan din heini. Mibpenhimetayan din is menge Filistihanen ne imbpezaag sikandan te Nengazen te haazà he andew.
2SA 23:13 Sevaha zutun he timpu te ting-eǥani, midhendiyà te ki David haazà is tetelu he sakup din duen te surung te Adulam. Heini is tetelu he etew, ne zuma heini sikandan te 30 he mevurut he menge sakup ni David. Dutun he timpu ne ziyà megkampu haazà is menge Filistihanen te Suǥud he Refaim
2SA 23:14 ne naaǥew zan is Betlehem. Hein diyè pa si David te melig-en he elesà,
2SA 23:15 utew sikandin ebpekeinum. Migkaǥi sikandin te, “Deyzey pezem ke zuen egkuwa te wahig he egkeinum ku ziyà te kalut he uvey te ǥemawan te Betlehem.”
2SA 23:16 Umbe, mid-eles-eles midseled haazà is tetelu he mevurut he menge etew zuen te kampu te menge Filistihanen, ne migkuwa zan te wahig dutun te kalut he uvey te ǥemawan te Betlehem, ne mid-uwit dan diyà te ki David. Piru wazà inuma haazà ni David; kekenà, in-itis din haazà su pemuhat din para te Nengazen.
2SA 23:17 Migkaǥi sikandin te, “Nengazen, kenè ku heini ed-inumen tenged te iring heini kemahal te lengesa te menge etew he impedserakan dan is untung dan te kegkuwa kayi.” Umbe wazà iyan med-inum si David. Iyan haazà mibeelan dutun te tetelu he mevurut he menge sakup ni David.
2SA 23:18 Si Abishai he suled ni Joab, he anak ni Zeruya iyan pengulu zutun te 30 he mevurut he menge sakup ni David. Nekepatey sikandin te 300 he menge Filistihanen pinaaǥi te vangkew zin. Umbe, nehimu he nevantug sikandin he iring duen te tetelu he mevurut he menge etew.
2SA 23:19 Ne tenged te iyan sikandin nevantug he zuma zutun te 30, iyan sikandin nehimu he peremandar zan, piru kenà sikandin ragkes duen te tetelu he menge mevurut.
2SA 23:20 Duen pa sevaha he mevurut he etew he egngezanan ki Benaya. Tig-Kabzeel sikandin, ne iyan amey zin si Jehoyada. Mibaal sikandin te wazè din iring he menge vaal, ragkes en is kedhimetayi zin te zezuwa he ventuǥan he sundaru te Moab. Duen timpu he zutun mibpendal-as din is erimaung minsan ebpenggiyew wey melandeg, ne mibpeneuǥan din duen te budsi ne midhimetayan din haazà is erimaung.
2SA 23:21 Sevaha pa maan dutun he timpu, midhimetayan din is utew zekelà he etew he Ehiptohanen. Ne is gumaan dutun te Ehiptohanen ne vangkew, piru is kandin mulà he ǥumaan ne kayu zà he idlagkut. Ne mid-aǥew zin haazà is bangkew zutun te Ehiptohanen ne iyan ded heini inhimatey zin kandin.
2SA 23:22 Iyan haazà menge vaal he mibeelan ni Benaya he anak ni Jehoyada. Nehimu sikandin he ventuǥan iring duen te tetelu he mevurut he menge etew,
2SA 23:23 piru kenè din duma sikandan. Ne tenged te iyan sikandin pinekeventuǥan duen te menge zuma zin he 30, midhimu sikandin ni David he pengulu te menge vantey.
2SA 23:24 Iyan heini menge sakup te 30 he menge mevurut he menge etew: Si Asahel he suled ni Joab; si Elhanan he anak ni Dodo he tig-Betlehem;
2SA 23:25 si Shama wey si Elika he menge tig-Harod;
2SA 23:26 si Helez he tig-Palti; si Ira he anak ni Ikesh he tig-Tekoa;
2SA 23:27 si Abiezer he tig-Anatot; si Mebunai he tig-Husha;
2SA 23:28 si Zalmon he tig-Ahoa; si Maharai he tig-Netofa;
2SA 23:29 si Heleb he anak ni Baanah he tig-Netofa; si Itai he anak ni Ribai he tig-Gibea, he sakup te Benjamin;
2SA 23:30 si Benaya he tig-Piraton; si Hidai he ziyà ed-ubpà te uvey te menge zal-ug te Gaas;
2SA 23:31 si Abi Albon he tig-Araba; si Azmavet he tig-Bahurim;
2SA 23:32 Si Eliaba he tig-Shaalbon; is menge anak ni Jashen;
2SA 23:33 si Jonatan he anak ni Shama he tig-Harar; si Ahiam he anak ni Sharar he tig-Harar;
2SA 23:34 si Elifilet he anak ni Ahasbai he tig-Maaca; si Eliam he anak ni Ahitofel he tig-Gilo;
2SA 23:35 si Hezro he tig-Carmel; si Paarai he tig-Arba;
2SA 23:36 si Igal he anak ni Natan he tig-Zoba; he anak ni Hagadi;
2SA 23:37 Si Zelek he tig-Ammon; si Naharai he tig-Beerot, he iyan tig-uwit te ǥumaan ni Joab he anak ni Zeruya;
2SA 23:38 si Ira wey si Gareb he menge tig-Jatir;
2SA 23:39 wey si Uria he Hitihanen. 37 is langun.
2SA 24:1 Neuman mepauk is Nengazen te menge Israilihanen ne impevaal zin si David te ebpekezezaat kandan. Migkeǥiyan din si David te, “Bilanga nu is menge keet-etawan te Israel wey Juda.”
2SA 24:2 Ne migkeǥiyan ni Hadì David si Joab wey is menge peremandar te menge sundaru te, “Beyai niw is langun he tribu te Israel, puun te Dan taman te Beersheba ne ipenlista niw is menge etew, wey ku metueni ke pira sikandan langun.”
2SA 24:3 Piru midtavak ni Joab is hadì te, “Berakat he ipemezakel te Nengazen he Megbevayè nu is keet-etawan nu te 100 he takep, ne meehè nu pezem heini. Piru Mahal he Hadì, maan is egkesuatan nu te ebaal heini?”
2SA 24:4 Piru iyan netuman is ki David dutun, umbe migenat si Joab wey is menge upisyal te menge sundaru te kedpenlista te menge keet-etawan te Israel.
2SA 24:5 Nekerapas dan te Wahig he Jordan ne ziyè dan mebpuun mebpenlista te Aroer, he zapit te edsenlepan te inged he kilid te zal-ug. Puun dutun mibpehendiyè dan te Gad ne midlaus dan diyà te Jazer.
2SA 24:6 Midhendiyè dan daan te Gilead, diyà te Tatim Hodshi, diyà te Dan Jaan, ne mid-eneb-eneb dan en pehendiyà te Sidon.
2SA 24:7 Ne midhendiyè dan te vinerengbeng he inged he Tyre wey langun he menge inged te menge Hitihanen wey Canaanhen. Ne te neipus dan dutun, midhendiyè dan te Beersheba, he zapit te zivavà te Juda.
2SA 24:8 Neliǥuy zan is tivuuk he nasyun seled te siyam he vulan wey 20 he andew, ne hein nepasad ne midlikù dan diyà te Jerusalem.
2SA 24:9 Ne midtudtul ni Joab diyà te ki Hadì David is kezakel te menge maama he ebpekesukul en te kebpekidtebek: 800,000 is diyà te Israel ne 500,000 is diyà te Juda.
2SA 24:10 Ne mibmezaat is gehinawa ni David hein nepasad is kedsinsusa zin te menge etew. Ne migkeǥiyan din is Nengazen te, “Nekesalà a kayi te mibeelan ku. Umbe ebpehizuhizu a kenikew, Nengazen, he peseyluwa a kenikew is suluǥuen nu te salè ku, su kelelalung is mibeelan ku.”
2SA 24:11 Sunud he meselem dutun te wazè pa med-enew si David, migkeǥiyan te Nengazen si Gad he menenagnà ni David te,
2SA 24:12 “Hendiyè ka te ki David ne ipepilì nu sikandin ke hendei zapit kayi te tetelu is egkesuatan din he idsilut ku kandin.”
2SA 24:13 Ne midhendiyà si Gad te ki David ne migkeǥiyan din sikandin te, “Hendei kayi is egkesuatan nu: Tetelu he tuig he vitil diyan te nasyun nu, tetelu he vulan is kebpelpelaǥuy niw su edleyasen kew te kuntada niw, wey ke tetelu he andew is sunudsunud he zuen ebpematey kayi te nasyun nu? Is-isipa nu purungi heeyan, ne keǥiya nu kedì ke hengkey is idtavak ku te Nengazen he iyan midsuǥù kedì.”
2SA 24:14 Midtavak si David diyà te ki Gad te, “Egkereǥenan a utew te kebpilì. Deyzey pa ke iyan en is Nengazen edsilut kenami te menge etew, su hihizuwen is Nengazen.”
2SA 24:15 Umbe, mibpaaǥi is Nengazen te kezeetan diyà te Israel puun dutun he meselem taman te neuma is andew he migkaǥi zin. Ne 70,000 he menge Israilihanen is mibpematey puun te Dan taman te Beersheba.
2SA 24:16 Hein naandam en is belinsuǥuen he edezaat pezem te Jerusalem, ne nahalin is isip te Nengazen te kedsilut te menge etew. Ne zutun migkeǥiyan din haazà is belinsuǥuen he edsilut dutun te menge etew te, “Hustu en! Kenè nu en sikandan siluti.” Haazà he timpu diyà haazà is belinsuǥuen te Nengazen te gunasà ni Arauna he Jebusihanen.
2SA 24:17 Hein naahà ni David haazà is belinsuǥuen he mibpenhimatey te menge etew, migkeǥiyan din is Nengazen te, “Iyan a nekesalà. Heini is menge etew ne wazè dan peleng iring te menge kerehidu. Wazè dan mekevaal te salà. Iyan e en wey is pemilya ku siluti.”
2SA 24:18 Haazà he andew midhendiyà si Gad te ki David ne migkeǥiyan din te, “Tekezeg ka zutun te ǥunasà ni Arauna he Jebusihanen ne vaal ka zutun te pemuhatà para te Nengazen.”
2SA 24:19 Ne midtekezeg si David sumalà is insuǥù kandin te Nengazen pinaaǥi ki Gad.
2SA 24:20 Hein naahà ni Arauna si David wey menge sakup din he ebpelingguma, ne migawas sikandin ne midluhud diyà te etuvangan ni David he tuus te midtahud din sikandin.
2SA 24:21 Migkaǥi si Arauna te, “Mahal he Hadì, maan is kayi ka?” Midtavak si David te, “Midhengkayi a su ebpemesahan ku heini is gunasè nu su ebaal a kayi te pemuhatà para te Nengazen, wey meengked en is kedlimasa te menge etew.”
2SA 24:22 Migkaǥi si Arauna te, “Kuwaa nu en wey nu ipemuhat te Megbevayà is minsan hengkey he kebayè nu, Mahal he Hadì. Heini zed is baka para te ibpemuhat nu he pemuhat he edtutungen, wey heini zed is eyuǥu zan wey menge kangga he egemiten te eǥunas he para idtavun.
2SA 24:23 Mahal he Hadì, ibeǥey ku heini langun kenikew. Deyzey ke dewata te Nengazen he Megbevayè nu is pemuhat nu.”
2SA 24:24 Piru midtavak ni David, ke sikandin te, “Kenè ku heini egkuwaan he wazà bayad; ebeyazan ku sikew. Kenè ku ibpemuhat diyà te Nengazen he Megbevayè ku is menge pemuhat he edtutungen he wazè din bali kayi te kedì.” Umbe mibpemasa ni David haazà is gunasà wey menge vaka te 50 he vuuk he pelata.
2SA 24:25 Ne mibaal sikandin dutun te pemuhatà he para te Nengazen ne nemuhat sikandin te menge pemuhat he edtutungen wey menge pemuhat he para te meupiya he kedepità. Midtavak te Nengazen is menge hangyù ni David para te Israel, ne neengked is limas.
1KI 1:1 Utew en meǥurang si Hadì David, ne minsan ebmelungan pa sikandin te mekepal he menge malung egkeǥenew ǥihapun.
1KI 1:2 Umbe, migkaǥi ziyà te kandin is menge suluǥuen din te, “Mahal he Hadì, tuǥuti key kenikew te kebpen-ahà te raǥaraǥa he ed-elima kenikew. Ibpehulid sikandin kenikew para kenè ka meǥenew.”
1KI 1:3 Umbe, nengahà sikandan te mekempet he raǥa seled te tivuuk he Israel, ne iyan neehè dan si Abishag he tig-Shunem, ne miduma zan sikandin diyà te hadì.
1KI 1:4 Utew mekempet si Abishag, ne nehimu sikandin he peraatur zuen te hadì. Piru wazà sikandin hileveti zuen te hadì.
1KI 1:5 Dutun, si Adonia he anak ni David diyà te sevaha te menge esawa zin he si Hagit, mibpahambug he egkehimu sikandin he hadì. Umbe mid-andam din is menge kerwahi wey menge kudà wey 50 he etew he vantey zin.
1KI 1:6 Puun pa te nengehuna he timpu pinesagdan sikandin ni David, ne kenè en edewayen ke hengkey is ebeelan din. Utew metaid si Adonia; nesekepu sikandin ni Absalom.
1KI 1:7 Mibpekidlalag si Adonia ki Joab he anak ni Zeruya wey ki Abiatar he memumuhat bahin te pelanu zin he kedhadì, ne mid-uyun sikandan te ked-uǥup kandin.
1KI 1:8 Piru wazà mulà meduyug kandin si Zadok he memumuhat, si Benaya he anak ni Jehoyada, si Natan he ebpeneuven, si Shimei, si Rei, wey is menge vantey ni David.
1KI 1:9 Ne sevaha he andew, midhendiyà si Adonia te Batu ziyà te Zohelet he uvey te En Rogel, ne nemuhat sikandin dutun te kerehidu, menge vaka, ragkes en is impelambù he turiti he menge vaka. Mid-imbita zin is hapit langun te menge suled din he menge maama he menge anak ni David, wey hapit langun te menge upisyal ziyà te Juda.
1KI 1:10 Piru wazè din mulà imbitaha si Natan he ebpeneuven, si Benaya, is menge vantey ni David, wey is suled din he si Solomon.
1KI 1:11 Midhendiyà si Natan te ki Batsheba he iyan iney ni Solomon, ne mid-insà te, “Wazè nu ve metueni he midhimu en ni Adonia is keugelingen din he hadì, ne wazà heini metueni ni Hadì David?
1KI 1:12 Emun egkesuat ka he kenè ka mebpatey wey kenà mebpatey is anak nu he si Solomon, tumana nu is idsambag ku kenikew.
1KI 1:13 Hendiyè ka te ki Hadì David ne keǥiyi nu sikandin te, ‘Mahal he Hadì, kenè be midsaad ka kayi te kedì he iyan nu ibpeilis kenikew te kedhadì is anak ta he si Solomon, ne maan is iyan nehimu he hadì si Adonia?’
1KI 1:14 Ne zutun te ebpekidlalag ka zuen te hadì, edseled a ne ebpenistiǥusan ku is egkeǥiyen nu.”
1KI 1:15 Umbe, midhendiyà si Batsheba te ruǥu zuen te hadì. Utew en meǥurang sikan is hadì ne iyan ed-atur kandin si Abishag he tig-Shunem.
1KI 1:16 Midluhud si Batsheba su edtahud dutun te hadì. Ne mid-insà haazà is hadì te, “Hengkey is tuyù nu?”
1KI 1:17 Midtavak si Batsheba te, “Mahal he Hadì, midsaad ka kayi te kediey pinaaǥi te ngazan te Nengazen he Megbevayè nu he iyan nu ibpeilis kenikew te kedhadì is anak ta he si Solomon.
1KI 1:18 Piru ǥuntaan si Adonia en is nehimu he hadì, ne wazè nu heini metueni.
1KI 1:19 Nemuhat sikandin te mezakel he tudu he menge vaka, impelambù he menge turiti he vaka, wey menge kerehidu, ne mid-imbita zin is hapit langun te maama he menge anak nu, gawas dà ki Solomon te suluǥuen nu. Mid-imbita zin daan si Abiatar he memumuhat wey si Joab he peremandar te menge sundaru nu.
1KI 1:20 Ne ǥuntaan Mahal he Hadì, edtaǥad is menge Israilihanen te disisyun nu ke hentei is ebpekeilis kenikew he hadì.
1KI 1:21 Emun kenè ka edisisyun, ne siak wey is anak ta he si Solomon ed-isipen he meluiven emun ebpatey ke en.”
1KI 1:22 Ne zutun te ebpekidlalag pa si Batsheba zuen te hadì, nekeuma si Natan he ebpeneuven.
1KI 1:23 Duen etew he migkeǥiyan din haazà is hadì te nekeuma si Natan, umbe impetawag sikandin duen te hadì. Kedseled ni Natan, midluhud sikandin su edtehuzen din haazà is hadì.
1KI 1:24 Ne ke sikandin te, “Mahal he Hadì, migkaǥi ke ve he si Adonia is ebpekeilis kenikew te kedhadì?
1KI 1:25 Nemuhat sikandin guntaan te mahabet he tudu he vaka, impelambù he menge turiti he vaka, wey menge kerehidu. Ne mid-imbita zin is hapit langun te maama he menge anak nu, is peremandar te menge sundaru nu, wey si Abiatar he memumuhat. Egkekaan dan wey ed-iinum dan guntaan, he ke sikandan te, ‘Mebmeluǥayad is untung ni Hadì Adonia!’
1KI 1:26 Piru siak is suluǥuen nu wazè e zin mulà imbitaha, ragkes en si Zadok he memumuhat, si Benaya he anak ni Jehoyada, wey si Solomon he suluǥuen nu.
1KI 1:27 Intuǥut nu ve heini, Mahal he Hadì, he wazè key kenikew ipesayud ke hentei is ebpekeilis kenikew te kedhadì?”
1KI 1:28 Migkaǥi si Hadì David te, “Ipehengkayi si Batsheba.” Umbe midhendiyà si Batsheba.
1KI 1:29 Ne nenangdù si Hadì David, ke sikandin te, “Ebpenangdù a ziyà te uuyag he Nengazen, he midlibri kedì te langun he kezeetan,
1KI 1:30 he edtumanen ku ǥuntaan sikan is penaad ku kenikew pinaaǥi te ngazan te Nengazen he Megbevayà te Israel, he iyan is anak ta he si Solomon ebpekeilis kedì te kedhadì.”
1KI 1:31 Ne zutun segugunà midluhud si Batsheba te kedtahud dutun te hadì, ke sikandin te, “Mahal he Hadì David, berakat he mebmeluǥayad is untung nu!”
1KI 1:32 Migkaǥi si Hadì David te, “Ipehengkayi si Zadok he memumuhat, si Natan he ebpeneuven, wey si Benaya he anak ni Jehoyada.” Umbe midhendutun dan te hadì,
1KI 1:33 ne migkaǥi haazà is hadì diyà te kandan te, “Ipeuntud niw sikan is anak ku he si Solomon duen te kudè ku, ne zumaha niw sikandin diyà te Gihon ragkes is menge upisyal ku.
1KI 1:34 Ne emun diyè kew en, sikiyu Zadok wey Natan, iyan kew medlana ziyà te ulu ni Solomon te kebpekilala he iyan sikandin pinilì he hadì te Israel. Ne zutun pezaǥing kew te vudyung ne ivensag niw is lalag he edhenduen te, ‘Mebmeluǥayad is untung ni Hadì Solomon!’
1KI 1:35 Ne kegkepasad dutun ne zumaha niw te kedlikù dini, ne ebpinuu sikandin diyà te pinuuwè ku te kedhadì su iyan sikandin ed-ilis kedì te kedhadì. Iyan sikandin mibpilì ku he edumala te tivuuk he Israel wey Juda.”
1KI 1:36 Midtavak si Benaya he anak ni Jehoyada te, “Ebeelan dey heeyan! Ne verakat he is Nengazen he Megbevayè nu, ebpenistiǥus kayi, Mahal he Hadì.
1KI 1:37 Ne iring te miduma kenikew is Nengazen, Mahal he Hadì, ne verakat he meduma zaan sikandin ki Solomon, ne himuwa zin he lavew pa he meuswaǥen is ginhedian din te kenikew he ginhedian.”
1KI 1:38 Umbe, migenat si Zadok he memumuhat, si Natan he ebpeneuven, si Benaya he anak ni Jehoyada, wey is menge tigbantey ni David he menge Kiritnen wey menge Pilitnen. Impeuntud dan si Solomon diyà te kudà ni Hadì David ne miduma zan diyà te Gihon.
1KI 1:39 Kebpekeuma zan diyà te Gihon, migkuwa ni Zadok diyà te segradu he tulda is lana he intaǥù diyà te teleǥuey he sungey, ne midheplasan din si Solomon diyà te ulu. Impezaǥing dan is budyung ne ingkulahì dan is lalag te, “Mebmeluǥayad is untung ni Hadì Solomon!”
1KI 1:40 Midtundug is menge etew ki Hadì Solomon he edtekezeg pehendiyà te Jerusalem is ebpemen-ugyab te kegkelipey he ebpemezaǥing te menge pulalà. Ne henduen be te egketegker is tanà te keǥurub dan.
1KI 1:41 Heini is langun nezineg ni Adonia wey te menge meǥeliyug din dutun te egkepasad en is kebibuwan dan. Kegkezineǥa ni Joab te trumpita, nekeinsà sikandin te, “Hengkey is nehitavù, maan is utew meǥurub diyà te inged?”
1KI 1:42 Dutun te kemulu pa sikandin egkaǥi, nekeuma si Jonatan is anak ni Abiatar te memumuhat. Ne migkeǥiyan ni Adonia te, “Seled ka su meupiya ka he etew; siguradu zuen meupiya he egketudtul nu.”
1KI 1:43 Midtavak si Jonatan te, “Kenà meupiya is tudtul ku, su midhimu ni Hadì David si Solomon he hadì.
1KI 1:44 Impehendiyè din si Solomon te Gihon duma si Zadok he memumuhat, si Natan he ebpeneuven, si Benaya he anak ni Jehoyada, wey is menge tigbantey zin he menge Kiritnen wey menge Pilitnen. Impeuntud dan pa ganì si Solomon te kudà duen te hadì.
1KI 1:45 Kebpekeuma zan diyà te Gihon, midlenahan sikandin ni Zadok wey si Natan he tuus te iyan sikandin pinilì he hadì. Puun dutun, midtekezeg sikandan medlikù dini te Jerusalem ne ebpemen-ugyab dan te kegkelipey wey is menge etew te inged. Ne iyan heeyan is meǥurub he egkezineg niw.
1KI 1:46 Ne ǥuntaan iyan en si Solomon mibpinuu ziyà te pinuuwà te hadì.
1KI 1:47 Ne elin daan midhendiyà te ki Hadì David is menge upisyal zin te kebeǥey te zengeg ki Solomon. Ke sikandan te, ‘Berakat he himuwa te Megbevayè nu si Solomon he tuwas pa he ventuǥan kenà sikew, wey himuwa zin he tuwas pa he meuswaǥen is ginhedian din te kenikew he ginhedian.’ Ne midungul si David diyà te hizeǥaan din te ked-azap te Nengazen,
1KI 1:48 he ke sikandin te, ‘Edeliǥen is Nengazen he Megbevayà te Israel, su intuǥut din he meehè ku ǥuntaan he andew is kegkeilisi kedì te anak ku te kedhadì.’ ”
1KI 1:49 Ne kegkezineǥa kayi te menge meǥeliyug ni Adonia, nemenhitindeg sikandan is utew egkengehandek, ne migenat is uman sevaha kandan.
1KI 1:50 Nahandek daan si Adonia ki Solomon, umbe midhendiyà sikandin te segradu he tulda ne migawed duen te menge sungeysungey te menge suyuk duen te pemuhatà.
1KI 1:51 Ne zuen migkaǥi ziyà te ki Solomon te, “Nahandek kenikew si Adonia, ne migawed sikandin duen te menge sungeysungey te menge suyuk duen te pemuhatà. Edhangyù sikandin he penangdù ka he kenè nu sikandin edhimetayan.”
1KI 1:52 Migkaǥi si Solomon te, “Emun kenè e zin edlimbungan, ne kenà sikandin egkemenu. Piru emun edlimbung edhimetayan ku.”
1KI 1:53 Ne impekua ni Hadì Solomon si Adonia dutun te pemuhatà, ne kebpekeuma ni Adonia, midluhud sikandin te kedtahud ki Hadì Solomon. Migkaǥi si Solomon diyà te kandin te, “Ulì ka.”
1KI 2:1 Hein hapit en ebpatey si David, duen pemilinbilin din diyà te anak din he si Solomon. Iyan heini pemilinbilin din:
1KI 2:2 “Hapit ad ebpatey. Umbe mebpekelig-en ka wey mebpekevurut,
1KI 2:3 ne tumana nu is ibpetuman te Nengazen he Megbevayè nu. Sunuza nu is menge paaǥi zin, wey tumana nu is menge sulunuzen wey menge suǥù he ingkesurat diyà te Kesuǥuan ni Moises, su wey ka med-uswag diyà te langun he ebeelan nu, minsan hendei ka ebpevayà.
1KI 2:4 Emun ebeelan nu heini, ne edtumanen te Nengazen is insaad din kayi te kedì, he iyan is: Emun ebpengungubpaan te hustu he paaǥi is menge kevuwazan ku wey metinumanen he edsunud kandin seled te tivuuk he untung dan, ne layun duen sevaha kandan he edhadì te Israel.
1KI 2:5 “Heini pa is pemilinbilin ku kenikew: Netuenan nu ke hengkey is mibeelan ni Joab he anak ni Zeruya kayi te kedì dutun te kedhimetayi zin te zezuwa he peremandar te menge sundaru te Israel he si Abner he anak ni Ner wey si Amasa he anak ni Jeter. Midhimetayan din sikandan he henduen be te menge kuntada, piru mibeelan din haazà te timpu he wazà tebek. Iyan sikandin duen din televaken te kemetayen dan.
1KI 2:6 Umbe, beeli nu ziyà te kandin is ereg he ebeelan sumalà is egkeisip nu he ereg he ebeelan, piru kenè nu ituǥut he melinawen sikandin he ebpatey tenged te keǥurang din.
1KI 2:7 “Iyan, purungi nu mulà is menge anak ni Barzilai he tig-Gilead, ne layun nu sikandan ipekaan duma kenikew, su midtevangan e zan hein mibpeleǥuyan ku is suled nu he si Absalom.
1KI 2:8 “Timan-i nu si Shimei he anak ni Gera, he sevaha he Benjaminhen he tig-Bahurim. Mibpurungan e zin penrewaki hein midhendiyà a te Mahanaim. Iyan, hein neked-uma key ziyà te Wahig he Jordan, nekepenangdù a ziyà te kandin pinaaǥi te ngazan te Nengazen he kenè ku sikandin edhimetayan.
1KI 2:9 Piru ǥuntaan iyan ka silut kandin. Metau ka, ne netuenan nu ke hengkey is ereg he ebeelan. Minsan meǥurang en sikandin ne ibpehimetayi nu.”
1KI 2:10 Ne te huziyan he timpu mibpatey si David ne inleveng diyà te inged din.
1KI 2:11 Midhedian din is tivuuk he Israel seled te 40 he tuig–7 he tuig is kedhadì din diyà te Hebron ne 33 he tuig is kedhadì din diyà te Jerusalem.
1KI 2:12 Iyan si Solomon nekeilis te amey zin he si David te kedhadì, ne utew melig-en is ginhedian din.
1KI 2:13 Dutun si Adonia he anak ni Hagit midhendiyà te ki Batsheba te iney ni Solomon. Mid-insà si Batsheba ziyà te kandin te, “Meupiya ve is tuud nu te kedhengkayi nu?” Midtavak si Adonia te, “Uya, meupiya.
1KI 2:14 Duen ku zà edhengyuen diyà te kenikew.” Mid-insà si Batsheba te, “Hengkey heeyan?”
1KI 2:15 Midtavak si Adonia te, “Netuenan nu he iyan e en pezem egkehimu he hadì, ne mibperateng heeyan kayi te tivuuk he Israel. Piru selakew is nehitavù su iyan is suled ku nehimu he hadì, su iyan heeyan egkesuatan te Nengazen.
1KI 2:16 Ne guntaan duen hangyù ku ziyà te kenikew. Ne emun egkehimu ne kenà a kenikew verawa.” Mid-insà si Batsheba te, “Hengkey heeyan?”
1KI 2:17 Midtavak si Adonia te, “Betbetai nu hengyui si Hadì Solomon he ipeesawa zin kedì si Abishag he tig-Shunem. Su netuenan ku he kenè ke zin eberawen.”
1KI 2:18 Midtavak si Batsheba te, “Uya, egkeǥiyan ku is hadì.”
1KI 2:19 Umbe, midhendiyà si Batsheba te ki Hadì Solomon te kegkaǥi ziyà te kandin te hangyù ni Adonia. Kegkaahaa kandin ni Solomon, midhitindeg si Solomon puun te pinuuwè din te kedhadì te kedsinuǥung kandin, ne midluhuzan din is iney zin te kedtahud kandin. Ne hein nepasad midlikù mebpinuu ziyà te pinuuwè din te kedhadì. Mibpekuwa sikandin te vangkù ne impesavuk din diyà te zapit te egkekewanan din ne zutun din ipepinuu is iney zin.
1KI 2:20 Migkaǥi si Batsheba te, “Duen deisey he edhengyuen ku ziyà te kenikew. Ne ke egkehimu kenà a kenikew verawa.” Migkaǥi sikan is hadì, “Hengkey heeyan, Inà? Kenè ku sikew eberawen.”
1KI 2:21 Migkaǥi si Batsheba te, “Ipeesawa nu te suled nu he si Adonia si Abishag he tig-Shunem.”
1KI 2:22 Migkaǥi si Hadì Solomon te, “Maan is edhengyuen nu he ipeesawa si Abishag ki Adonia? Kela ke edhengyuen nu zaan he iveǥey ku ziyà te kandin is ginhedian ku, su kakey ku sikandin ne edlavan kandin si Abiatar he memumuhat wey si Joab he anak ni Zeruya!”
1KI 2:23 Ne midsesapà si Hadì Solomon pinaaǥi te ngazan te Nengazen, he ke sikandin te, “Berakat he siluti a te Megbevayà emun kenà egkepatey si Adonia tenged kayi te hangyù din.
1KI 2:24 Is Nengazen iyan mibpilì wey midhimu kedì he ilis te amey ku he hadì he si David. Midtuman din is penaad din he ibeǥey zin kayi te kedì is ginhedian wey ziyà te menge kevuwazan ku. Umbe idsesapè ku ziyà te uuyag he Nengazen he ibpehimetayan ku si Adonia guntaan dà he andew.”
1KI 2:25 Ne midsuǥù ni Hadì Solomon si Benaya, he anak ni Jehoyada, te kedhimatey ki Adonia, ne midhimetayan din si Adonia.
1KI 2:26 Ne migkeǥiyan ni Hadì Solomon si Abiatar he memumuhat te, “Ulì ka ziyà te pemuleey nu ziyà te Anatot. Ereg ka pezem he edhimetayan, piru kenè ku sikew edhimetayan guntaan su iyan ka midseriǥan duen te Kavan te Nengazen he MEGBEVAYÀ hein duma ke pa te amey ku he si David, wey mid-ambit ka te menge kemereǥenan din.”
1KI 2:27 Ne in-awà ni Solomon si Abiatar ziyà te ketengdanan din he kegkememumuhat te Nengazen. Ne netuman sikan is migkaǥi te Nengazen diyà te Shilo vahin te pemilya ni Eli.
1KI 2:28 Si Joab wazà medtavang ki Absalom para mehimu he hadì si Absalom, piru midtavang sikandin ki Adonia. Umbe hein nezineg din is kedhimetayi ki Adonia, mibpelaǥuy sikandin pehendiyà te tulda te Nengazen ne migawed sikandin duen te menge sungeysungey te menge suyuk duen te pemuhatà.
1KI 2:29 Ne hein nezineg ni Hadì Solomon he mibpelaǥuy si Joab pehendiyà te tulda te Nengazen wey mid-uvey zuen te pemuhatà, midsuǥù din si Benaya te kedhimatey ki Joab.
1KI 2:30 Umbe, midhendutun te tulda te Nengazen si Benaya, ne migkeǥiyan din si Joab te, “Gawas ka keniyan su ibpeǥawas ka zuen te hadì!” Piru midtavak si Joab te, “Kayi e zà ebpatey su kenà a egawas!” Midlikù si Benaya zuen te hadì su midtudtul zin is tavak ni Joab,
1KI 2:31 ne migkeǥiyan ni Solomon si Benaya te, “Beeli nu is migkaǥi zin. Himetayi nu sikandin dutun te tulda ne ileveng, su para siak wey is pemilya te amey ku kenà mekepenavak te kedhimetayi zin ki Abner he anak ni Ner, he peremandar te menge sundaru te Israel, wey ki Amasa he anak ni Jeter, he peremandar te menge sundaru te Juda. Midhimetayan din heini is wazà mekesalà he menge etew he wazà metueni te amey ku. Metazeng pa wey meupiya pa sikandan kandin. Ne ǥuntaan ebelesan sikandin te Nengazen dutun te mibeelan din diyà te kandan.
1KI 2:33 Iyan sikandin wey is menge kevuwazan din ebpekepenavak minsan keenu te kemetayen keniyan he menge etew. Piru si David wey is menge kevuwazan din wey is ginhedian din ebeǥayan te meupiya he kebpekesavuk minsan keenu.”
1KI 2:34 Umbe, mibeyaan ni Benaya si Joab ne midhimetayan din. Inleveng sikandin diyà te uvey te valey zin diyà te sibsivayan.
1KI 2:35 Ne zutun midhimu zuen te hadì si Benaya he peremandar te menge sundaru ilis ki Joab, ne is in-ilis din ki Abiatar iyan si Zadok he memumuhat.
1KI 2:36 Ne impetawag duen te hadì si Shimei ne migkeǥiyan din te, “Bangun ka te keugelingen nu he valey kayi te Jerusalem ne zutun ka ubpà. Kenè ka awà kayi te inged, ne kenè ka hendiyà te zuma he lugar.
1KI 2:37 Dutun te timpu te ked-awè nu ne edlayun ka te zal-ug he Kidron, siguradu he ebpatey ka, ne iyan ka egkevasul emun egkehitavù heini.”
1KI 2:38 Midtavak si Shimei te, “Meupiya is migkaǥi nu, edtumanen ku heini!” Umbe malù meluǥayad he timpu is ked-ubpà ni Shimei ziyà te Jerusalem.
1KI 2:39 Piru kedlavey te tetelu he tuig, mibpelaǥuy is dezuwa he suluǥuen ni Shimei ne midhendiyè dan te hadì diyà te Gat he si Akish, he anak ni Maaca. Ne hein netuenan ni Shimei heini,
1KI 2:40 midsiyahan din is asnu zin ne mid-untud sikandin dutun, ne midhendiyà te ki Akish diyà te Gat su ebpen-ahaan din sikan is dezuwa he suluǥuen din. Neehè din sikandan ne miduma zin te ked-ulì din.
1KI 2:41 Ne hein netudtulan si Solomon he mid-awà si Shimei ziyà te Jerusalem su midhendiyà te Gat, ne nekelikù en,
1KI 2:42 impetawag din si Shimei, ne migkeǥiyan din te, “Kenè be impepenangdù ku sikew pinaaǥi te ngazan te Nengazen wey mibpetizeenan ka te timpu te ked-awè nu kayi te Jerusalem su edhendiyè ka te zuma he lugar ne siguradu he ebpatey ka? Kenè be migkaǥi ka he meupiya is migkaǥi ku ne edtumanen nu heini?
1KI 2:43 Ne maan is wazè nu tumana is impenangdù nu ziyà te Nengazen? Maan is wazè nu tumana is insuǥù ku kenikew?”
1KI 2:44 Migkeǥiyan pa sikandin duen te hadì te, “Siguradu egketenuzan nu is langun he mezaat he mibeelan nu ziyà te amey ku he si David. Guntaan ebelesan ka te Nengazen tenged te mezaat he menge vaal nu.
1KI 2:45 Piru siak, edtuvazan a te Nengazen, ne is ginhedian te amey ku he si David ebpedayunen din is kedlig-eni zin kayi minsan keenu.”
1KI 2:46 Ne midsuǥù duen te hadì si Benaya he himetayi zin si Shimei. Umbe mid-uwit ni Benaya si Shimei ziyà te guwà ne midhimetayan din. Mid-iseg mebmelig-en haazà is ginhedian he midumala ni Solomon.
1KI 3:1 Pinaaǥi te kebpengesawa ni Solomon te anak te Faraon, he hadì te Ehipto, nehimu sikandin he zumezapig kayi he nasyun. Mid-uwit din is esawa zin ne ziyè din dèpa ipeubpà te Inged ni David taman te nepasad is kebenguna te turuǥan din, baley te Nengazen, wey is menge verengbeng peliǥuy te Jerusalem.
1KI 3:2 Dutun he timpu wazè pa valey te Nengazen he para te kebeǥey te zengeg kandin, umbe ziyè dà ebpemuhat is menge etew te menge simbahan diyà te metikang he menge lugar.
1KI 3:3 Impaahà ni Solomon is kebmahala zin te Nengazen pinaaǥi te kedtuman te menge sulunuzen he impemilinbilin kandin te amey zin he si David. Iyan dà is, nemuhat sikandin wey midtutung te menge veyewà diyà te menge simbahan diyà te metikang he menge lugar.
1KI 3:4 Duen timpu he midhendiyà si Hadì Solomon te Gibeon su ebpemuhat, su zutun is utew nevantug he pemuhatà diyà te metikang he lugar. Nemuhat sikandin diyà te pemuhatà he 1,000 he menge pemuhat he edtutungen.
1KI 3:5 Ne kegkezukilem dutun, mibpeehà kandin is Nengazen pinaaǥi te teǥeinep. Migkaǥi is Megbevayà diyà te kandin te, “Buyù ka te minsan hengkey he egkesuatan nu su ibeǥey ku kenikew.”
1KI 3:6 Midtavak si Solomon te, “Impeehè nu is dekelà he ǥaǥew nu te amey ku he si David, he suluǥuen nu, su mepezumdumahan sikandin kenikew, metazeng, wey hustu is kebpengungubpaan din. Impelaus nu is kebpaahà nu te zekelà he keupiya nu pinaaǥi te kebeǥayi nu kandin te sevaha he anak he iyan ebpekeilis kandin te kedhadì guntaan.
1KI 3:7 Nengazen he Megbevayè ku, iyan a is suluǥuen nu in-ilis nu te amey ku he si David te kedhadì, minsan menguhed e pa he kenà metau he ebpengulu.
1KI 3:8 Ne ǥuntaan kayi a zuma te pinilì nu he menge etew he kenà egkevilang tenged te kahabet dan.
1KI 3:9 Umbe, beǥayi a te ketau te kedumala kayi te menge etew nu wey te kedsavut ke hengkey is meupiya wey ke hengkey is mezaat. Su iyan dà heeyan ibpekehimu ku te kedumala kayi te menge etew nu he utew mahabet.”
1KI 3:10 Ingkelipey te Nengazen haazà is mibuyù ni Solomon.
1KI 3:11 Umbe, migkaǥi is Megbevayà diyà te kandin te, “Tenged te iyan nu mibuyù is ketau te kedumala te menge etew ku, ne wazè nu iyan buyua is meluǥayad he untung etawa ketiǥeyunan etawa kemetayan te menge kuntada nu,
1KI 3:12 ibeǥey ku kenikew is mibuyù nu. Ebeǥayan ku sikew te ketau wey kedsavut he wazè pa maangken te minsan hentei he nehuna kenikew wey egkehuziyan kenikew.
1KI 3:13 Ibeǥey ku zaan kenikew is wazè nu vuyua, he iyan is ketiǥeyunan wey zengeg, su para wazà duma he hadì he ebpekerepeng kenikew seled te tivuuk he untung nu.
1KI 3:14 Ne emun edsunuzen nu is menge paaǥi ku wey edtumanen nu is ibpetuman ku he menge sulunuzen wey menge suǥù iring te mid-ulaula te amey nu he si David, ebeǥayan ku sikew te meluǥayad he untung.”
1KI 3:15 Nepukew si Solomon, ne zutun neisip-isip din he nekidlalag kandin is Nengazen pinaaǥi te teǥeinep. Te kedlikù ni Solomon diyà te Jerusalem, midhitindeg sikandin diyà te etuvangan duen te Kavan te Kebpekid-uyun te Nengazen, ne nemuhat sikandin te menge pemuhat he edtutungen wey menge pemuhat he para te meupiya he kedepità. Ne midhimu sikandin te keemuran para te langun he menge upisyal zin.
1KI 3:16 Ne zutun, duen dezuwa he vahi he terebahu zan is kebelegyà te zengeg dan he midhendiyà te ki Hadì Solomon.
1KI 3:17 Migkaǥi is sevaha kandan te, “Mahal he Hadì, siak wey heini is bahi he zuma ku telaamur ziyà te sevaha zà he valey. Ne te zutun sikandin te valey mid-anak a.
1KI 3:18 Ne kedlavey te tetelu he andew, iyan en maan sikandin mid-anak. Ne iyan key zà is dezuwa ed-ubpà dutun te valey ne wazè en duma.
1KI 3:19 Sevaha he kezukileman, nehizeǥaan din is kandin he anak ne minatey heini.
1KI 3:20 Ne hein liwazè en te kezukileman mid-enew sikandin ne migkuwa zin is anak ku ziyà te avey ku dutun te nekelipezeng a. Midhulid din haazà is anak ku, ne iyan din impehulid kedì sikan is minatey he anak din.
1KI 3:21 Ne hein meselem, mid-enew a su ibpesusu ku is anak ku, ne neehè ku he minatey en heini. Ne hein midsusi ku is batà diyà te merayag, nesusi ku he kenè bes iyan sikan is anak ku.”
1KI 3:22 Ne midtavak sikan is sevaha he vahi te, “Kenà heeyan tutuu! Kediey he anak kes uuyag, ne iyan minatey is kenikew.” Ne migkaǥi is nehuna he vahi te, “Kenà heeyan tutuu! Kenikew he anak is minatey, ne iyan uuyag is kediey.” Umbe mibpelelisà sikandan dutun te etuvangan te hadì.
1KI 3:23 Migkaǥi haazà is hadì te, “Pudu kew ed-angken keniyan te uuyag he vatà, ne wazà sevaha keniyu he ed-angken te minatey he vatà.”
1KI 3:24 Umbe, midmandar haazà is hadì he uwiti sikandin te ispada. Ne hein mid-uwitan en sikandin te ispada,
1KI 3:25 ne ke sikandin te, “Baasa heeyan is uuyag he vatà ne itukid diyà te kandan.”
1KI 3:26 Ne tenged te hizu zuen te tutuu he iney zuen te anak din, migkeǥiyan din haazà is hadì te, “Pekelalaglalag ka, Mahal he Hadì, kenè nu himetayi heeyan is batà. Iveǥey nu en lang keniyan te vahi.” Piru migkaǥi mulà haazà is sevaha he vahi te, “Baase en heeyan is batà su para wazà sevaha kenami he ebpekaangken duen.”
1KI 3:27 Ne zutun migkaǥi haazà is hadì te, “Kenè en baasa heeyan is batà. Iveǥey heini ziyà te vahi he midhangyù he kenà heini himetayi, su iyan tutuu he iney zin.”
1KI 3:28 Ne hein nezineg haazà is disisyun ni Hadì Solomon te menge etew te Israel, neteǥuan sikandan te zekelà he kedtahud kandin, su nemesahan dan he zuen din ketau te kedhukum te hustu he imbeǥey kandin te Megbevayà.
1KI 4:1 Midhadì si Solomon diyà te tivuuk he Israel.
1KI 4:2 Ne iyan heini lavew he menge upisyal zin: Is lavew he memumuhat iyan si Azaria he kevuwazan ni Zadok.
1KI 4:3 Is menge sikritaryu zuen te hadì iyan si Elihoref wey si Ahia he menge anak ni Shisha. Is midseriǥan te menge libru te ginhedian din iyan si Jehoshafat he anak ni Ahilud.
1KI 4:4 Is peremandar te menge sundaru iyan si Benaya he anak ni Jehoyada. Is menge lavew he memumuhat iyan si Zadok wey si Abiatar.
1KI 4:5 Is pengulu te menge gubirnedur ziyà te menge distritu te Israel iyan si Azaria he anak ni Natan. Is sumesambag duen te hadì iyan si Zabud he memumuhat, he anak daan ni Natan.
1KI 4:6 Is perezumala te turuǥan iyan si Ahishar. Ne is perezumala te menge uripen he edteǥelen te kebpeterebahu iyan si Adoniram he anak ni Abda.
1KI 4:7 Duen 12 he menge gubirnedur ni Solomon diyà te menge distritu te tivuuk he Israel. Iyan sikandan metau wey ikehated is keuyaǥan te hadì wey te pemilya zin. Is kada sevaha kandan edhated te keenen seled te senge vulan kada tuig.
1KI 4:8 Iyan heini menge ngazan dan: Si Ben Hur, is gubirnedur ziyà te vuvungan te Efraim.
1KI 4:9 Si Ben Deker, is gubirnedur te Makaz, Shaalbim, Bet Shemesh, wey te Elon Bet Hanan.
1KI 4:10 Si Ben Hesed, is gubirnedur te Arubot, ragkes en kayi is Soco wey is tivuuk he tanà te Hefer.
1KI 4:11 Si Ben Abinadab, is gubirnedur te Nafat Dor. (Esawa sikandin ni Tafat te vahi he anak ni Solomon.)
1KI 4:12 Si Banaa he anak ni Ahilud, is gubirnedur te Taanac, Megido, te tivuuk he Bet Shean he uvey te Zaretan he alug te Jezreel, wey te menge lugar puun te Bet Shean pehendiyà te Abel Mehola wey te leyunà te Jokmeam.
1KI 4:13 Si Ben Geber, is gubirnedur te Ramot Gilead, ragkes en kayi is menge inged ni Jair te anak ni Manase, wey is distritu te Argob diyà te Bashan, ragkes en is 60 he dezekelà he menge inged kayi he mibpeliǥuyan te verengbeng, he brunsi is menge trangka te menge pultahan din.
1KI 4:14 Si Ahinadab he anak ni Iddo, is gubirnedur te Mahanaim.
1KI 4:15 Si Ahimaaz, is gubirnedur te Naftali. (Esawa sikandin ni Basemat te anak he vahi ni Solomon.)
1KI 4:16 Si Baana he anak ni Hushai, is gubirnedur te Asher wey te Alot.
1KI 4:17 Si Jehoshafat he anak ni Parua, is gubirnedur te Isacar.
1KI 4:18 Si Shimei he anak ni Ela, is gubirnedur te Benjamin.
1KI 4:19 Si Geber he anak ni Uri, he gubirnedur te Gilead, he nesakup dengan ni Sihon te hadì te menge Amorihanen wey si Og he hadì diyà te Bashan. Si Geber zà is gubirnedur kayi te tivuuk he distritu.
1KI 4:20 Is kezakel te menge etew ziyà te Juda wey Israel henduen be te pantad diyà te veyvey te zaǥat he kenà egkevilang. Dekelà is egkekaan dan wey egkeinum dan, ne melipayen sikandan.
1KI 4:21 Si Solomon is midumala te langun he ginhedian puun te Wahig he Eufrates pehendiyà te tanà te menge Filistihanen taman te dulunà te Ehipto. Heini he menge ginhedian ebayad te vuhis dan diyà te ki Solomon ne mibpesakup kandin dutun te uuyag pa sikandin.
1KI 4:22 Is keenen he egkinehenglanen ni Solomon diyà te turuǥan din kada andew ne iyan heini: 100 he saku he utew meupiya he klasi te herina, 300 he saku he kenà utew meupiya he klasi te herina,
1KI 4:23 sepulù he vaka he impelambù diyà te tudil, 20 he vaka he impelayud dà diyà te penebtavà, 100 he kerehidu etawa kambing, kenà ragkes is nekedseselekawà he klasi te menge selazeng, wey meupiya he klasi te menge tagbis wey menge manuk.
1KI 4:24 Nesakup te ginhedian ni Solomon is tivuuk he tanà diyà dapit te edsenlepan te Wahig he Eufrates, puun te Tifsa taman te Gaza. Ne meupiya is kedepitè din diyà te langun he menge nasyun he nekeelingkus kandin.
1KI 4:25 Umbe, zutun te uuyag pa si Solomon, duen kelinew ziyà te Juda wey Israel puun te Dan taman te Beersheba. Is kada etew, edsihung diyà te pinemula zin he paras wey kayu he higus he zuen din kelinew.
1KI 4:26 Duen 40,000 he kuwadra ni Solomon he para te menge kudè din he para te kerwahi, ne zuen din 12,000 he pereuntud te kudà.
1KI 4:27 Is menge gubirnedur ziyà te menge distritu, iyan ebeǥey ki Hadì Solomon te keenen wey te langun he menge etew ziyà te turuǥan din. Is kada sevaha kandan midtendek he vulan is kebeǥey zin. Ebpeniguru sikandan he ikeveǥey zan is menge kinahanglan ni Solomon.
1KI 4:28 Ebeǥey zaan sikandan te barli wey kumpey he para te menge kudà he para te kerwahi wey te zuma pa he menge kudà. Ed-uwiten dan heini ziyà te lugar he ereg he ed-uwitan kayi zutun te midtendek he timpu te kebeǥey zan.
1KI 4:29 Mibeǥayan te Megbevayà si Solomon te nekeviza he ketau, kedsavut, wey keuluwanen he kenà egketegkad.
1KI 4:30 Is ketau zin lavew pa te ketau te langun he uluwanen diyà te edsilaan wey ziyà te Ehipto.
1KI 4:31 Iyan sikandin kinemeteuwan te langun. Edhuna pa sikandin he metau ki Etan he Ezranhon, wey te menge anak ni Mahol he ensi Heman, Calcol, wey si Darda. Ne nevantug sikandin diyà te nekeelingkus he menge nasyun.
1KI 4:32 Mibaal sikandin te 3,000 he menge erubasa wey 1,005 he menge kanta.
1KI 4:33 Igkeseysey zin is mehitenged te ebpemenuvù, puun te zezekelà he menge kayu pehendiyà te utew zezeisey he ebpemenuvù. Ebpekepenudtul zaan sikandin bahin te minsan hengkey he klasi te: ebpemenhipanew, ebpemenanap, ebpemenlayang, wey is ebpenlayewlayew.
1KI 4:34 Nezineg te langun he menge hadì kayi te kelibutan is ketau ni Solomon, umbe zuen menge etew he midsuǥù dan te kebpemineg te ketau ni Solomon.
1KI 5:1 Neuǥet is kebpeked-emiǥu ni Hadì Hiram he hadì te Tyre wey si Hadì David. Umbe hein nezineg ni Hiram he si Solomon is nekeilis te amey zin he hadì, duen menge upisyal zin he impehendiyè din te ki Solomon.
1KI 5:2 Ne mibpeuwit te lalag si Solomon diyà te ki Hiram, ke sikandin te,
1KI 5:3 “Netuenan nu he wazà mekepevangun is amey ku he si David te valey he para te Nengazen he Megbevayè din, su layun dà sikandin ebpekidtebek te menge kuntada zin diyà te menge nasyun te peliǥuy. Kenè din heini egkevangun taman te igkepezaag te Nengazen kandin is langun he kuntada zin.
1KI 5:4 Piru ǥuntaan mibeǥayan a te Nengazen he Megbevayè ku te kelinew diyà te peliǥuy, su wazè ku en menge kuntada wey wazè en daan bangkit.
1KI 5:5 Umbe, egkeisip ku he ebangun ad te valey te Nengazen he para te kebeǥey kandin te zengeg te Nengazen he Megbevayè ku, sumalà is nekaǥi te Nengazen diyà te amey ku he si David. Iyan heini migkaǥi zin diyà te ki David: ‘Is anak nu he idliwan ku kenikew te kedhadì, iyan ibpevangun ku te valey he para kediey.’
1KI 5:6 “Umbe suǥù ka te menge etew nu te kebpemiley te menge kayu he sidru ziyan te Lebanon para kediey. Ibpeuǥup ku kandan is kedì he menge etew, ne edsuhulan ku is kenikew he menge etew sumalà te egkesuatan nu he kezekelà te suhul. Su netuenan nu man he wazà kayi te kenami metau he ebpemiley te kayu he iring te menge etew nu he tig-Sidon.”
1KI 5:7 Utew nelipey si Hiram hein nezawat din haazà is lalag he impeuwit ni Solomon. Ke sikandin te, “Ereg he edeliǥen is Nengazen guntaan he andew, su mibeǥayan din si David te anak he metau he edumala te mekeǥeǥehem he nasyun!”
1KI 5:8 Ne zutun mibpeuwit si Hiram te lalag diyà te ki Solomon he edhenduen te, “Nezawat ku is lalag he impeuwit nu, ne ibeǥey ku kenikew is menge kayu he sidru wey sipris he egkinehenglanen nu.
1KI 5:9 Ibpahakut ku heini te menge etew ku puun te Lebanon taman te zaǥat, ne ebeelan dan heini he ǥakit ne ibpelayun dan pehendiyà te lugar he egkesuatan nu. Kebpekeuma kayi ibpedsusuwey zan ne iyan kew en human metau. Ne iyan bayad nu kedì, is beǥayi a kenikew te keenen para te menge etew ku ziyà te turuǥan ku.”
1KI 5:10 Umbe, mibeǥayan ni Hiram si Solomon te langun he egkinehenglanen din he menge kayu he sidru wey sipris.
1KI 5:11 Ne ebpeuwitan ni Solomon si Hiram te 60,000 he saku he trigu wey 110,000 he gelun te lana he ulibu kada tuig.
1KI 5:12 Mibeǥayan te Nengazen te ketau si Solomon sumalà is pesarig din. Meupiya is kedepità ni Solomon wey si Hiram, ne mid-uyun dan he kenè dan ebpetebekà.
1KI 5:13 Ne zutun mibpeǥes ni Hadì Solomon te kedterebahu is 30,000 he menge etew he ebpemuun diyà te tivuuk he Israel.
1KI 5:14 Ne kada vulan, 10,000 is edsuǥuen din diyà te Lebanon. Umbe is kada grupu kayi ne senge vulan diyà te Lebanon ne zezuwa he vulan diyà te keugelingen dan he lugar. Si Adoniram is pengulu kayi he menge terebahanti.
1KI 5:15 Ne 70,000 is menge etew ni Solomon he perehakut te menge idhiman, ne 80,000 is perevasbas te menge vatu ziyà te vuntud.
1KI 5:16 Ne zuen din daan 3,300 he menge purman he iyan edumala te terebahu wey te menge terebahanti.
1KI 5:17 Ne tenged te mandù ni Solomon, ebasbas dan te zezekelà wey meupiya he klasi te menge vatu he para te pundasyun te valey te Nengazen.
1KI 5:18 Umbe, in-andam te menge etew ni Solomon wey te menge etew ni Hiram duma te menge tig-Gebal is menge vatu wey menge kayu he para ibangun duen te valey te Nengazen.
1KI 6:1 Mibpuunan ni Solomon is kebangun duen te valey te Nengazen te ikezuwa he vulan, he iyan is bulan he Ziv, dutun te ikeepat he tuig te kedhadì din te Israel. Ike-480 he tuig haazà puun te ked-awà te menge Israilihanen diyà te Ehipto.
1KI 6:2 Is baley he mibangun ni Hadì Solomon para te Nengazen 90 he ǥiek is keluǥayad din, 30 he ǥiek is keluag din, ne 45 he ǥiek is ketikang din.
1KI 6:3 Is keluag te varkun din, 15 he ǥiek, is keluǥayad 30 he ǥiek; iring keluǥayad duen te valey.
1KI 6:4 Mibpeveelan daan ni Solomon haazà is baley te Nengazen te menge sulawà he meluag diyà te seled ne meliǥet diyà te gawas.
1KI 6:5 Mibpeveelan din daan te menge ruǥu is diyà te pesikilizà wey ziyà te egkeiniyuǥan duen te valey. Heini he menge ruǥu, tetelu he endanas, ne impikit diyà te elavat duen te valey.
1KI 6:6 Is keluǥayad te nehuna he endana pitu wey tengà he ǥiek, ne is ikezuwa he endana siyam he ǥiek, ne is iketelu he endana sepulù wey tengà he ǥiek. Mibpegpeǥendak diyà te gawas he vahin te elavat te valey te Nengazen para ikepelastar is menge ruǥu he kenè en egkewaleng is elavat emun idtaud is gumuǥuyud.
1KI 6:7 Hein mibangun haazà is baley te Nengazen, is menge vatu he migamit dutun, daan en he mibpenepsapan diyà te migkuwaan duen, umbe wazè en egkezineg he zaǥing te mertilyu, tiǥib, etawa minsan hengkey he ǥelemiten he putew.
1KI 6:8 Is gemawan te nehuna he endana ne ziyà te zivavà he vahin duen te valey. Ne zuen menge heǥezan pehendiyà te ikezuwa wey iketelu he endana.
1KI 6:9 Ne hein neelevatan en haazà is baley te Nengazen, mibpeteuzan ni Solomon te kisami he kayu he sidru is menge himan din.
1KI 6:10 Is menge ruǥu ziyà te pesikilizà wey egkeiniyuǥan duen te valey he pitu wey tengà he ǥiek is ketikang din, impikit haazà he menge ruǥu zutun te valey pinaaǥi te kegemita te kayu he sidru.
1KI 6:11 Migkaǥi is Nengazen diyà te ki Solomon te,
1KI 6:12 “Emun edtumanen nu is menge penurù ku wey menge suǥù ku, ne edtumanen ku zaan pinaaǥi kenikew is impenaad ku ziyà te amey nu he si David. Is menge etew ku he Israilihanen, ed-ubpà a zuma kandan kayi te valey ku he mibangun nu ne kenè ku sikandan ed-iniyuǥan.”
1KI 6:14 Nepasad is kebangun duen te valey te Nengazen.
1KI 6:15 Is elavat he zapit diyà te seled duen te valey te Nengazen mid-epizan te tabla he kayu he sidru puun te saag pehendiyà te kisami, ne is saag din, tabla he kayu he sipris.
1KI 6:16 Mibpevaal sikandin te zezuwa he ruǥu ziyà te seled dutun te valey te Nengazen pinaaǥi te kedtaud te dibisyun puun te saag pehendiyà te kisami. Is tabla he indibisyun, kayu he sidru. Haazà he ruǥu ziyà mekepelastar te zivaluy he vahin duen te valey te Nengazen, ne migngezanan heini te Utew Segradu he Lugar, ne is ketikang kayi, 30 he ǥiek.
1KI 6:17 Is keleyatan te ruǥu he ziyà te ǥawas duen te Utew Segradu he Lugar ne 60 he ǥiek.
1KI 6:18 Mid-epizan pudu te tabla he sidru is ketivuukan te elavat diyà te seled dutun te valey, umbe kenà egkaahà diyà te seled is batu he elavat din. Dutun te elavat in-ukir zuen is menge vulak wey edlangkat he menge pinemula.
1KI 6:19 Mid-andam ni Solomon is Utew Segradu he Lugar he iyan edsevukan duen te Kavan te Kebpekid-uyun te Nengazen.
1KI 6:20 Heini he ruǥu neked-iring is sukud te ketikang din, keluaǥan din, wey keleyatan din, pudu 30 he ǥiek. Is menge elavat wey kisami kayi ne pudu mid-epizi te vulawan, ne vulawan daan is in-apid te tabla he kayu he sidru he mibeelan he pemuhatà.
1KI 6:21 Is duma he vahin diyà te seled duen te valey te Nengazen, impeepizan ni Solomon te lunsey he vulawan. Mibpevaal sikandin te rantey he vulawan ne impeketer zin haazà diyà te idselang pehendiyà te Utew Segradu he Lugar.
1KI 6:22 Ne pudu neepizi te vulawan is diyà te seled dutun te valey ragkes en sikan is pemuhatà he ziyà te seled duen te Utew Segradu he Lugar.
1KI 6:23 Impesavuk ni Solomon diyà te seled duen te Utew Segradu he Lugar is dezuwa he ledawan te kirubin he menge kayu he ulibu, ne is kada sevaha zutun 15 he ǥiek is ketikang din.
1KI 6:24 Heini is dezuwa he ledawan te kirubin neked-iring is kezekelè dan wey kegkeveeli kandan. Is kada sevaha kandan, duen din dezuwa he pakpak, ne pitu wey tengà he ǥiek is kelayat te kada pakpak. Umbe is kelayat puun te purù pehendiyà te purù te sevaha he pakpak ne 15 he ǥiek.
1KI 6:27 Imped-avey haazà ni Solomon diyà te seled duen te Utew Segradu he Lugar he nevekar is menge pakpak dan. Ne nekedtemu is divaluy he pakpak dan diyà te liwezaan duen te ruǥu. Ne is divaluy pa he menge pakpak dan neketemu ziyà te elavat.
1KI 6:28 Ne mibpeepizan daan ni Solomon te vulawan heini is dezuwa he kirubin.
1KI 6:29 Is langun he elavat dutun te dezuwa he ruǥu zuen te valey te Nengazen mibpezeyzeyanan ni Solomon te menge kirubin, menge palma, wey menge vulak he nememekar en.
1KI 6:30 Minsan is saag dutun te zezuwa he ruǥu mibpeepizan din te vulawan.
1KI 6:31 Is beyeey pehendiyà te Utew Segradu he Lugar, ne zezuwa is lekeb din he menge kayu he ulibu, ne zuen kayi menge marku he lelima is suyuk dan.
1KI 6:32 Heini he menge ǥemawan mibpezeyzeyanan ni Solomon te druwing he menge kirubin, menge palma, wey menge vulak he nememekar en. Ne mid-epizan te vulawan haazà is menge himan dutun te ǥemawan.
1KI 6:33 Is beyeey pehendiyà te seled duen te valey te Nengazen mibpeveelan ni Solomon te menge marku he heepat is suyuk dan he menge kayu he ulibu.
1KI 6:34 Ne zuen kayi zezuwa he lekeb he kayu he sipris he mibpurma, ne is kada sevaha kayi zezuwa he vahin he egkehimu he edlumpien.
1KI 6:35 Mibpezeyzeyanan daan heini ni Solomon te menge druwing he kirubin, menge palma, wey menge vulak he nememekar en, wey mibpeepizan din te vulawan.
1KI 6:36 Mibpevaal zaan sikandin te lama zuen te valey te Nengazen. Neliǥuy heini te elavat he vinesbasan he menge vatu he is kada tetelu he apid duen mid-epizan te kayu he sidru.
1KI 6:37 Ingkepelastar is menge pundasyun duen te valey te Nengazen te ikezuwa he vulan he iyan is bulan he Ziv, dutun te ikeepat he tuig te kedhadì ni Solomon.
1KI 6:38 Ne nepasad haazà is baley te Nengazen te ikewalu he vulan, he iyan is bulan he Bul, dutun te ike-11 he tuig te kedhadì ni Solomon. Pitu he tuig is kebenguna zuen te valey te Nengazen, ne mibpurungan sunuza is langun he ziyà te planu.
1KI 7:1 Mibangun daan si Solomon te turuǥan din, ne 13 he tuig is kebenguna kayi.
1KI 7:2 Sevaha zuen te menge vilding ni Solomon is migngezanan te Ketelunan te Lebanon. Ne 150 he ǥiek is keleyatan kayi, ne 75 he ǥiek is keluaǥan din, ne 45 he ǥiek is ketikang din. Heepat he linya is menge tukud kayi he menge kayu te sidru; 15 is kada linya. Ne kayi ipikit is 45 he kayu he menge pepesanan he zutun ipikit is kisami he kayu he sidru.
1KI 7:4 Is dezuwa he kilid dutun te bilding ne tigtetelu is nekedrerenged he menge sulawè din.
1KI 7:5 Duen kayi tetelu he ǥemawan he nerengezan daan te tetelu he menge ǥemawan.
1KI 7:6 Ne is sevaha pa he bilding iyan is lugar he tiǥumanan he zuen din mahabet he tukud. 75 he ǥiek is keleyatan din, ne 45 he ǥiek is keluaǥan din. Duen kayi varkun diyà te egkesineruwan din he zuen din atep wey menge tukud.
1KI 7:7 Ne zuen daan bilding he impeveelan din he zutun is pinuuwè din te kedhadì. Ne iyan daan heini lugar he zutun sikandin ebpenhusey. Mibpeepizan din heini te menge tabla he sidru puun te saag pehendiyà te kisami.
1KI 7:8 Ne is bahin dutun te turuǥan he ed-ubpaan ni Solomon diyè dà te egkeiniyuǥan duen te bilding he zutun sikandin ebpenhusey, ne neked-iring is kegkeveeli kayi te zezuwa. Ne iring ded daan kayi is kegkeveeli te valey he impevangun din he para te esawa zin he anak te hadì te Ehipto.
1KI 7:9 Heini is langun he menge bilding, puun te pundasyun taman te atep, mibeelan heini puun te pinekemeupiya he menge vatu he mibpenevì wey midsepsapan pudu is menge kilid din sumalà te hustu he sukud.
1KI 7:10 Is menge pundasyun iyan mibeelan is dezekelà wey meupiya he klasi he menge vatu. Is keluǥayad te zuma he menge vatu 15 he ǥiek, ne is duma 12 he ǥiek.
1KI 7:11 Mid-epizan heini te menge kayu he sidru wey mahalen he menge vatu he sungkad te hustu he sukud is kedsepsapi zuen.
1KI 7:12 Is meluag he lama neliǥuy te elavat. Ne is kada tetelu he apid kayi te binesbasan he elavat he menge vatu mid-epizan te kayu he sidru. Ne iring daan kayi is kegkeveeli te menge elavat diyà te seled he lama zuen te valey te Nengazen wey is diyà te varkun din.
1KI 7:13 Duen pandey he tig-Tyre he egngezanan ki Huram. Impesinuǥung si kandin ni Hadì Solomon
1KI 7:14 su utew sikandin metau he pandey te menge putew. Anak sikandin te valu he vahi he ebpuun diyà te tribu ni Naftali, ne tig-Tyre is amey zin, he menenalsal zaan te menge putew. Midhendiyà si Huram te ki Hadì Solomon ne mibeelan din is langun he impeveelan kandin.
1KI 7:15 Mibaal si Huram te zezuwa he tukud he menge brunsi, ne is kada sevaha zutun 27 he ǥiek is kelayat din ne 18 he ǥiek peliǥuy is kezekelè din.
1KI 7:16 Mibaal zaan sikandin te zezuwa he brunsi he id-ulu zutun te menge tukud, he is kada sevaha pitu wey tengà he ǥiek is kelayat din.
1KI 7:17 Is kada sevaha zutun te id-ulu mideyzeyanan te pitu he midrara he kedina,
1KI 7:18 ne zuen midruwing duen he zezuwa he linya te prutas he pumigranata.
1KI 7:19 Is kegkeveeli zuen te menge in-ulu te menge tukud diyà te varkun henduen be te menge vulak he liryu, ne heenem he ǥiek is ketikang dan.
1KI 7:20 Is kada id-ulu zuen te zezuwa he tukud mibpeliǥuyan te zezuwa he linya te midruwing he prutas he pumigranata. Heini he zayandayan diyà te divavew he vahin duen te id-ulu, avey zuen te mid-iring te kedina.
1KI 7:21 Impehitindeg ni Huram is menge tukud te varkun duen te valey te Nengazen. Is tukud he zapit te divavà ne migngezanan din te Jakin, ne is tukud dapit te zizaya ne migngezanan din te Boaz.
1KI 7:22 Is kegkeveeli te menge in-ulu te menge tukud ne henduen be te menge vulak he liryu. Ne nepasad is kebeeli zuen te menge tukud.
1KI 7:23 Ne mibaal zaan si Huram te zekelà he teleǥuey te wahig he henduen te kawà, he migngezanan te Daǥat. Is kezalem kayi, pitu wey tengà he ǥiek, is keluaǥan din, 15 he ǥiek, ne is sukud te peliǥuy kayi, 45 he ǥiek.
1KI 7:24 Diyà te malù egkezizalem te vèbà kayi mibpeliǥuyan te zezuwa he linya te menge zayandayan. Heini he menge zayandayan, henduen be te edlangkat he menge pinemula, ne heenem dutun is diyà te teleǥuey. Ne haazà, inredsà is kebpurma zuen te kebeeli zutun te teleǥuey.
1KI 7:25 Haazà is teleǥuey in-untud diyà te peka te 12 he tudu he menge vaka he brunsi he ebpein-iniyuǥà. Is tetelu ziyà medsinaru te zizaya, is tetelu ziyà te edsenlepan, is tetelu ziyà te zivavà, is tetelu ziyà te edsilaan.
1KI 7:26 Is kekepal zutun te teleǥuey tetelu he vaney, is bèbà kayi iring te vèbà te tasa he netik-ew mevekar iring te mibekar en he vulak te liryu. Ne egketeǥuan heini te 11,000 he gelun he wahig.
1KI 7:27 Mibaal zaan si Huram te sepulù he untuzà he menge brunsi he egemiten te kedhakut te wahig. Is keleyatan din wey keluaǥan din tig-heenem he ǥiek, ne is ketikang din ne heepat wey tengà he ǥiek.
1KI 7:28 Iyan heini kegkeveeli zutun te menge untuzà: is menge elavat kayi zuen duen menge kuwadru-kuwadru
1KI 7:29 ne mideyzeyanan te zagwey te menge erimaung, menge tudu he vaka wey menge kirubin. Is egkezizalem wey egkezivavew zuen te menge erimaung wey menge tudu he vaka ne pudu mideyzeyani te henduen be te menge vulak.
1KI 7:30 Kada untuzà duen din heepat he ligid he menge brunsi wey zuen din daan menge ihi he brunsi. Is kada suyuk dutun te menge untuzà midtukuzan su para melig-en is kebpekesavuk te brunsi he bisin diyà te mid-untuzan duen. Ne haazà is menge intukud mideyzeyanan te henduen be te menge vulak he nekedlelambid. Is idlapew te untuzà te bisin dutun te untuzà, ne sevaha wey tengà he ǥiek, ne is keluag te vèbà dutun te untuzà, ne dezuwa he ǥiek wey tetelu he vaney. Ne kuwedradu is elevat kayi ne kenà lingin.
1KI 7:32 Ne ziyà te zizalem duen te kuwedradu he menge elavat ne zuen heepat he menge ligid he neketaud diyà te menge ihi he inredsà is kebpurmaha zuen te kebeeli zuen te untuzà. Is ketikang te kada ligid ne dezuwa he ǥiek wey tetelu he vaney,
1KI 7:33 ne iring heini te ligid te kerwahi. Is menge ihi, menge tuvu, menge rayus, wey menge yantas ne pudu brunsi.
1KI 7:34 Is kada untuzà duen dutun heepat he gewezà–sevaha ziyà te kada kilid, ne inredsè dà is kebeeli kayi te kebeeli zuen te untuzà.
1KI 7:35 Is lingin he lig-en te zivavew te kada untuzà, siyam he vaney is keluag din peliǥuy. Is menge lig-en wey menge elavat nekedredsà is kebpurma zuen hein mibeelan haazà is untuzà.
1KI 7:36 Mideyzeyanan is menge elavat wey is menge lig-en dutun te elavat te menge zagwey te kirubin, menge erimaung wey menge palma. Indayandayan heini ziyà te minsan hendei zutun te untuzà he egkehimu he edeyzeyanan kayi. Ne zuen daan kayi menge zayandayan diyà te peliǥuy he henduen be te menge vulak.
1KI 7:37 Iyan heeyan kebeeli ni Huram duen te sepulù he untuzà. Neked-iiring is kezekelà wey kegkeveeli zuen, su sevaha zà he hulmahan is neǥamit te kebpurmaha kandan.
1KI 7:38 Mibaal zaan si Huram te sepulù he bisin he menge brunsi, kada untuzà ne sevaha he bisin is para zuen. Ne heenem he ǥiek is ketikang te kada sevaha, ne egketeǥuan haazà te 220 he gelun he wahig.
1KI 7:39 Is lelima he untuzà diyà isavuk te egkezivavà he vahin duen te valey te Nengazen, ne is lelima pa ziyè din isavuk te egkezizaya he vahin. Ne insavuk din sikan is teleǥuey te wahig he egngezanan te Daǥat diyà te zapit te edsilaan he edramig diyà te zivavà ke zutun ki te valey te Nengazen.
1KI 7:40 Mibpevaal zaan sikandin te menge diniyun, menge pala, wey menge yehung he egemiten te kebpemirikpirik. Nengepasad haazà ni Huram is langun he mibpeveelan kandin ni Hadì Solomon he para zutun te valey te Nengazen. Ne iyan heini mibeelan din:
1KI 7:41 is dezuwa he tukud; is dezuwa he henduen be te menge yehung he in-ulu zuen te menge tukud; is dezuwa he impedlambid he mid-iring te kedina he zayandayan duen te menge in-ulu te menge tukud;
1KI 7:42 is 400 he mid-iring te prutas he pumigranata (nekepikit is dezuwa he linya kayi zuen te zezuwa he mid-iring te kedina he nekevedbed duen te in-ulu te menge tukud);
1KI 7:43 Is sepulù he untuzà wey sikan is sepulù he bisin;
1KI 7:44 is teleǥuey te wahig he egngezanan te Daǥat wey sikan is untuzà kayi te teleǥuey he ledawan te sepulù wey zezuwa he tudu he menge vaka;
1KI 7:45 is menge diniyun, menge pala, menge yehung, wey zuma pa he menge gelemiten. Is langun kayi he menge vutang he para zuen te valey te Nengazen, he mibeelan ni Huram para ki Hadì Solomon, ne pudu heini brunsi he impesinew.
1KI 7:46 Mibpeveelan heini ni Hadì Solomon pinaaǥi te selsalan diyà te Suǥud te Jordan, he ziyà te pid-elangan te Sucot wey Zaretan.
1KI 7:47 Dekelà heini he menge vutang umbe wazè en ipetimbang ni Solomon; wazè en metueni ke pira he kilu he menge brunsi.
1KI 7:48 Mibpevaal zaan si Solomon kayi he menge gelemiten he para zuen te valey te Nengazen: bulawan he pemuhatà; bulawan he lemisahan he selevukà te supas he ibpemuhat diyà te etuvangan te Megbevayà;
1KI 7:49 is menge selevukà te menge sulù he lunsey he vulawan he ibpehitindeg diyà te etuvangan duen te Utew Segradu he Lugar (lelima kayi is diyà te egkekewanan wey lelima zaan is diyà te egkeǥivang); is bulawan he menge vulak, menge sulù wey menge lipit;
1KI 7:50 is lunsey he vulawan he menge vasu, menge ibpenamped te menge pebilu, menge yehung, menge keluzà, wey menge teleǥuey te veyewà; is bulawan he menge bisagra he para te menge gemawan te Segradu he Lugar wey para mismu zuen te valey te Nengazen.
1KI 7:51 Hein nepasad is langun he mibpeveelan ni Hadì Solomon he para zuen te valey te Nengazen, mid-uwit din diyà te menge budiga zutun te valey te Nengazen is menge azen he impehinungud te amey zin he si David diyà te NENGAZEN–is menge pelata, menge vulawan, wey menge gelemiten.
1KI 8:1 Impetawag ni Hadì Solomon diyà te Jerusalem is menge edumala te Israel wey is langun he menge pengulu te menge tribu wey menge pemilya te Israel, su ibpekuwa zin kandan sikan is Kavan te Kebpekid-uyun te Nengazen puun te Zion he Inged ni David.
1KI 8:2 Midhendiyè dan is langun te ki Hadì Solomon hein Pista te Kebaal te menge Lawig, hein bulan te Etanim, he iyan kes ikepitu he vulan.
1KI 8:3 Hein nevurun en is langun he menge edumala te Israel, ne migkuwa zuen te menge memumuhat wey menge Levihanen kes Kavan te Nengazen, ragkes en kes Tulda he Edtelevukaayan wey kes menge segradu he menge gelemiten kayi, ne mid-uwit dan heini langun petekezeg diyà te valey te Nengazen.
1KI 8:5 Nemuhat si Hadì Solomon wey is tivuuk he keet-etawan te Israel ziyà te etuvangan duen te Kavan te Kebpekid-uyun te Nengazen. Utew mahabet is menge kerehidu wey menge vaka he impemuhat dan; kenà heini egkevilang.
1KI 8:6 Ne mid-uwit duen te menge memumuhat kes Kavan te Kebpekid-uyun te Nengazen diyà te lugar he kineselezan duen te valey te Nengazen, duen te Utew Segradu he Lugar, diyà te zizalem te menge pakpak duen te ledawan he menge kirubin.
1KI 8:7 Nevekar is menge pakpak dutun te menge kirubin, umbe netembunan sikan is Kavan wey sikan is menge tival zuen te kavan.
1KI 8:8 Heini he menge tival utew memelayat, ne egkaahà is menge purù dan diyà te Segradu he Lugar, diyà te etuvangan duen te kineselezan dutun te valey te Nengazen, piru kenà heini egkaahà diyà te gawas duen te Segradu he Lugar. Ne zutun pa heini taman en guntaan.
1KI 8:9 Wazà duma he taǥù duen te Kavan gawas duen te zezuwa he melumpipì he menge vatu he intaǥù dutun ni Moises hein diyà sikandin te Horeb, ne zutun himuwa te Nengazen is kebpekid-uyun din te menge Israilihanen hein migawas dan diyà te Ehipto.
1KI 8:10 Ne hein migawas sikan is menge memumuhat duen te Segradu he Lugar, ne zuen gapun he nekepenù duen te valey te Nengazen.
1KI 8:11 Ne kenè en ebpekehimu sikan is menge memumuhat te vuluhaten dan dutun te valey te Nengazen tenged dutun te ǥapun, su is mekeǥeǥehem ke kebpekiduma te Nengazen kandan nekeeneb dutun te valey zin.
1KI 8:12 Ne mid-ampù si Solomon te, “Nengazen, migkaǥi ka he ed-ubpè ka ziyà te kivel.
1KI 8:13 Ne ǥuntaan nekepevaal ad te utew mekempet he valey para kenikew, he egkeubpaan nu te wazà pidtemanan.”
1KI 8:14 Ne mid-etuvang ni Hadì Solomon is tivuuk he keet-etawan te Israel he ebpemenhitindeg dutun, ne mibpenubtuvazan din sikandan.
1KI 8:15 Migkaǥi sikandin, “Edeliǥen is Nengazen he Megbevayà te Israel. Midtuman din is insaad din te amey ku he si David. Migkaǥi zin dengan te,
1KI 8:16 ‘Puun dutun te kebpeǥewasa ku te menge etew ku he Israilihanen diyà te Ehipto, ne wazè ku pilia is inged te minsan hentei he tribu te Israel para edtukuzan te valey he para te kebeǥayi kedì te zengeg. Iyan mibeelan ku is, mibpilì ku si David he edumala te menge etew ku he Israilihanen.’
1KI 8:17 “Utew egkesuat is amey ku he si David he ebangun te valey he para te zengeg te Nengazen he Megbevayà te Israel.
1KI 8:18 Piru migkaǥi is Nengazen diyà te kandin te, ‘Meupiya su egkesuat ka he ebangun te valey he para te zengeg ku.
1KI 8:19 Piru kenè ka iyan ebpekevangun kayi, kekenà, iyan is anak nu. Iyan sikandin ebangun te valey he para te zengeg ku.’
1KI 8:20 “Ne midtuman en te Nengazen is insaad din. Iyan a nekeilis te amey ku he hadì te Israel, su iyan heini insaad te Nengazen. Ne mibangun ku is baley he para te kebeǥey te zengeg te Nengazen he Megbevayà te Israel.
1KI 8:21 Mibpevaal a te lugar zutun te valey he para zuen te Kavan he zutun itaǥù is insurat he kebpekid-uyun te Nengazen he midhimu zin diyà te menge kepuun tew hein impeǥawas din sikandan diyà te Ehipto.”
1KI 8:22 Midhitindeg si Solomon diyà te etuvangan te tivuuk he keet-etawan te Israel, diyà te etuvangan duen te pemuhatà te Nengazen, ne imbayew zin is menge velad din
1KI 8:23 ne ke sikandin te mid-ampù te, “Nengazen, Megbevayà te Israel, wazè en Megbevayà he iring kenikew ziyan te langit wey kayi te tanà. Metinumanen ka te saad nu wey layun nu ibpaahà is kebmahala nu te menge suluǥuen nu he edsunud kenikew te tivuuk he ǥehinawa zan.
1KI 8:24 Midtuman nu is saad nu te suluǥuen nu he si David he amey ku. Iyan ka kayi midsaad, ne midtuman nu heini guntaan he andew.
1KI 8:25 Ne ǥuntaan, Nengazen he Megbevayà te Israel, elin nu tumana is insaad nu ziyà te amey ku he si David he suluǥuen nu hein migkeǥiyan nu te, ‘Layun nu zuen kevuwazan he ebpekeilis kenikew te kedhadì te Israel emun meupiya is kedsunud te menge kevuwazan nu kedì, iring te mibeelan nu.’
1KI 8:26 Umbe ǥuntaan, Megbevayà te Israel, tumana nu is menge saad nu te suluǥuen nu he si David he amey ku.
1KI 8:27 “Piru, sikew, Megbevayà, tutuu ve iyan he ebpekeubpè ka kayi te tanà? Minsan is langit ne kenè ka ganì ed-ereg minsan diyà te pinekemetikang he vahin kayi, kayi ke pe be vuwa med-ereg te valey he midtukud ku?
1KI 8:28 Piru, Nengazen he Megbevayè ku, pemineǥa a kenikew is suluǥuen nu te menge kebpengemuyù ku wey kebpehizuhizu ku kenikew. Pemineǥa nu is kebpengumew ku wey kebpengemuyù ku ǥuntaan diyà te etuvangan nu.
1KI 8:29 Berakat he ipata nu heini is baley nu te maandew wey mezukilem, kayi te lugar he migkaǥi nu he kayi ka ebeǥayi te zengeg. Berakat he pemineǥa a kenikew is suluǥuen nu te kebpengemuyù ku he kayi a he lugar med-etuvang.
1KI 8:30 Pemineǥa nu is menge hangyù ku wey hangyù te menge etew nu he Israilihanen te kebpengemuyù dey he kayi he lugar ed-etuvang. Pemineǥa nu keniyan te ubpeey nu he langit. Ne emun egkezineg key kenikew, ne peseyluwa key.
1KI 8:31 “Emun is sevaha he etew idsumbung he nekesalà diyà te iring din he etew, ne haazà ibpehendiyà te pemuhatà para kenikew kayi te valey nu te kebpenangdù he wazè din salà,
1KI 8:32 pemineǥa nu heini ziyan te langit wey hukumi nu is menge suluǥuen nu–is edsumbung wey is idsumbung. Siluti nu is nekesalà sumalà te neveelan din, ne libriya nu is wazà salà para metueni he wazà sikandin mekesalà.
1KI 8:33 “Ne emun is menge etew nu he Israilihanen egkezaag te menge kuntada zan su nekesalè dan kenikew, ne emun edlikù dan diyan te kenikew ne edalig dan wey ebpengemuyù dan kayi te valey nu,
1KI 8:34 ne pemineǥa nu sikandan diyan te langit. Ne peseyluwa nu sikandan te salè dan ne ilikù nu sikandan diyà te tanà he imbeǥey nu ziyà te menge kepuun dan.
1KI 8:35 “Emun kenè nu ibpeuzan tenged te nekesalà is menge etew nu, ne emun ebpengemuyù dan he edsinaru kayi te valey nu wey edalig dan kenikew, wey ed-engkezan dan is kebaal te salà tenged te kedsiluti nu kandan,
1KI 8:36 ne pemineǥa nu sikandan diyan te langit. Peseyluwa nu sikandan is menge suluǥuen nu he menge etew nu he Israilihanen. Penurua nu sikandan te metazeng he kebpengungubpaan, ne peuzani nu is tanà he imbeǥey nu kandan he egkaangken dan.
1KI 8:37 “Emun ebpekeuma is bitil ziyà te tanà te menge etew nu, limas etawa meinit he keramag, etawa keranapranap he ebpekezezaat te menge pinemula, ragkes en is menge terapan wey menge tetaru, etawa edliǥuyan sikandan te menge kuntada zan diyà te minsan hendei te menge inged dan, etawa ebpekeuma ziyà te kandan is minsan hengkey he zaru,
1KI 8:38 ne emun duen kandan ebpengemuyù etawa ke ebpetavang kenikew, ne pemineǥa nu sikandan. Ne emun nesavut dan is pinaaǥi te kebpekesalè dan ne nekeuma ziyà te kandan heini is ked-antus dan, ne ebpengemuyù dan he ibpeketikang dan is menge velad dan he ed-etuvang kayi te valey nu,
1KI 8:39 ne pemineǥa nu sikandan diyan te ubpeey nu he langit. Ne peseyluwa nu sikandan, ne veeli nu ziyà te kada sevaha kandan is ereg te menge vaal zan, su netuenan nu is gehinawa te kada sevaha kandan. Su utew venar he iyan ke zà netau te ǥehinawa te langun he etew.
1KI 8:40 Beeli nu heeyan para medtahud dan kenikew zutun te ked-ubpè dan dutun te tanà he imbeǥey nu te menge kepuun dey.
1KI 8:41 “Emun duen kenà menge Israilihanen he meǥinged diyà te meziyù he lugar he ebpekezineg te ventuǥan nu wey kegkemekeǥeǥehem nu, ne edhengkayi zan te ked-azap kenikew wey ebpengemuyù dan he ed-etuvang kayi te valey nu,
1KI 8:43 pemineǥa nu sikandan keniyan te ubpeey nu he langit. Ne iveǥey nu ziyà te kandan is minsan hengkey he ebuyuen dan, para is tivuuk he menusiyà kayi te kelibutan ne ebpekekilala kenikew, ne edtehuzen ke zan iring te menge etew nu he Israilihanen, wey para metueni zan he midtukud ku heini is baley nu para te zengeg nu.
1KI 8:44 “Emun edhipanew is menge etew nu te kebpekidtebek su iyan inmandù nu, ne emun ed-ampù sikandan he edsinaru kayi he inged te pinilì nu wey kayi te valey nu he mibangun ku he para te zengeg nu,
1KI 8:45 pemineǥa nu is menge kebpengemuyù dan wey menge hangyù dan diyan te langit, ne iveǥey nu kandan is kezeeǥan.
1KI 8:46 Ne emun ebpekesalè dan kenikew–su wazà minsan hentei he wazè din salà–wey tenged te utew nu kekegpauk ne impezaag nu sikandan te menge kuntada zan ne mibihag dan pehendiyà te uvey etawa meziyù he lugar,
1KI 8:47 ne emun egkeveǥu is gehinawa zan dutun he lugar, ne ed-engkezan dan is kebaal te salà ne ebpehizuhizu zan he edhenduen te, ‘Nekesalè key wey mezaat is menge vaal zey,’
1KI 8:48 pemineǥa nu is menge kebpengemuyù dan. Ne emun ebpekid-uliey sikandan kenikew te ebpuun te tivuuk he ǥehinawa zan wey isip dan diyà te lugar te menge kuntada zan he mibihag kandan, ne ebpengemuyù dan he ed-etuvang kayi te tanà he imbeǥey nu te menge kepuun dan, he iyan heini is inged he mibpilì nu, wey heini is baley nu he midtukud ku para te zengeg nu,
1KI 8:49 ne pemineǥa nu is menge kebpengemuyù dan wey hangyù diyan te ubpeey nu he langit, ne veǥayi nu sikandan te kezeeǥan.
1KI 8:50 Peseyluwa nu sikandan te menge salè dan wey menge kedrapas dan te egkesuatan nu, ne ituǥut nu he mehizuwi sikandan te mibihag kandan.
1KI 8:51 Su menge etew nu sikandan he menge ǥaked nu. Impeǥawas nu sikandan diyà te Ehipto, kes lugar he iring te egkiràkirà he rapug.
1KI 8:52 “Berakat he edseǥipaan nu is menge hangyù ku wey is menge hangyù te menge etew nu he Israilihanen, ne verakat he pemineǥa nu sikandan emun ebuyù dan te tavang diyà te kenikew.
1KI 8:53 Su mibpilì nu sikandan, Nengazen he MEGBEVAYÀ. Su ziyà te menge nasyun kayi te kelibutan iyan sikandan mibpilì nu he menge etew he ǥaked nu, ne iyan heeyan migkaǥi nu ziyà te ki Moises he suluǥuen nu, hein impeǥawas nu is menge kepuun dey ziyà te Ehipto.”
1KI 8:54 Hein nepasad ni Solomon is menge kebpengemuyù din wey menge hangyù din diyà te Nengazen, midhitindeg sikandin diyà te etuvangan duen te pemuhatà he para te Nengazen. He zutun sikandin medluhud is ebayew te menge velad din diyà te zivavew.
1KI 8:55 Pinaaǥi te mezaǥing he kegkaǥi mibpenubtuvazan din is tivuuk he keet-etawan te Israel. Ke sikandin te,
1KI 8:56 “Ereg he edeliǥen is Nengazen su impehimeley zin is menge etew zin he menge Israilihanen sumalà is impenaad din. Midtuman din is langun he insaad din diyà te suluǥuen din he si Moises.
1KI 8:57 Berakat he zumahi kiw te Nengazen he Megbevayè tew iring te kedumahi zin te menge kepuun tew. Berakat he kenè kiw zin iselikwey wey vey-ani.
1KI 8:58 Berakat he himuwa kiw zin he menge metinumanen te menge suǥù din su para mekepengungubpaan kiw te sungkad te menge paaǥi zin, ne metuman tew is menge suǥù din wey menge sulunuzen he imbeǥey zin diyà te menge kepuun tew.
1KI 8:59 Berakat he mekeuma ziyà te Nengazen heini is menge kebpengemuyù ku te maandew wey mezukilem. Berakat he uǥupi e zin wey is menge etew zin he menge Israilihanen te sungkad te egkinehenglanen dan te kada andew,
1KI 8:60 su para metueni te langun he menge etew kayi te tivuuk he kelibutan he is Nengazen, iyan Megbevayà ne wazè en duma pa.
1KI 8:61 Wey verakat he mebmepezumdumahan kew is menge Israilihanen te Nengazen he Megbevayè tew. Tumana niw is imbeǥey zin he menge sulunuzen wey menge suǥù iring te ulaula niw en guntaan.”
1KI 8:62 Ne nemuhat diyà te Nengazen si Hadì Solomon wey is langun he menge Israilihanen he zuma zin dutun.
1KI 8:63 Nemuhat dan te pemuhat he para te meupiya he kedepità. Is kezakel te impemuhat dan 22,000 he vaka wey 120,000 he menge kerehidu wey menge kambing. Pinaaǥi kayi impehinungud duen te hadì wey te menge Israilihanen diyà te Nengazen sikan is baley te Nengazen.
1KI 8:64 Dutun daan he andew, impehinungud duen te hadì sikan is lama he ziyà te egkesineruwan duen te valey te Nengazen. Ne nemuhat dan dutun te menge pemuhat he edtutungen, menge pemuhat he para gasa, wey menge tavà he pemuhat he para te meupiya he kedepità. Su sikan is brunsi he pemuhatà diyà te egkesineruwan duen te valey te Nengazen he utew zeisey ne kenà ed-ereg heini he menge pemuhat.
1KI 8:65 Midsilibra si Solomon wey is langun he menge Israilihanen is Pista te Kebaal te menge Lawig seled te pitu he andew. Utew mezakel he menge etew is nevurun he ebpuun te Lebo Hamat he zapit te zizaya pehendiyà te zal-ug te Ehipto he zapit te zivavà. Haazà is kedsilibra zan diyà te etuvangan te Nengazen he Megbevayè dan 14 he andew pudu, pitu he andew is para te kebpehinunguza zuen te valey te Nengazen, ne pitu zaan he andew is kedsilibra he para zuen te Pista te Kebaal te menge Lawig.
1KI 8:66 Ne hein nepasad haazà is Pista impeulì ni Solomon is menge etew. Mibpenubtuvazan dutun te menge etew si Hadì Solomon, ne hein nepasad nemen-ulì dan he melipayen tenged te langun he meupiya he mibeelan te Nengazen diyà te suluǥuen din he si David wey ziyà te menge etew zin he menge Israilihanen.
1KI 9:1 Nepasad ni Solomon is kebangun duen te valey te Nengazen wey te turuǥan din, ragkes is duma he mibpelenuwan din te ebaal.
1KI 9:2 Ne mibpeuman mebpaahà kandin is Nengazen te iring duen te nehuna he kebpeehè din diyà te Gibeon.
1KI 9:3 Migkaǥi is Nengazen diyà te kandin te, “Nezineg ku is ampù nu wey hangyù nu kayi te kediey. Heini is baley ku he mibangun nu, mibpilì ku heini he lugar he kayi a ebeǥayi te zengeg taman te taman. Ebentayan ku heini wey layun ku ed-etura.
1KI 9:4 Ne sikew, emun ebpengungubpaan ka he egkeseriǥan wey metazeng diyà te etuvangan ku iring te amey nu he si David, ne ebeelan nu is langun he ebpeveelan ku kenikew wey edtumanen nu is ibeǥey ku he menge sulunuzen wey menge suǥù,
1KI 9:5 ibpehadì ku is menge kevuwazan nu te wazà pidtemanan. Insaad ku heini ziyà te amey nu he si David hein migkeǥiyan ku sikandin te, ‘Kenè ka egkeewaan te kevuwazan he edhadì te Israel.’
1KI 9:6 Piru emun ed-iniyuǥan a keniyu wey te menge kevuwazan niw su kenè niw edtumanen is menge suǥù wey menge sulunuzen he imbeǥey ku keniyu, wey ke ebpenilbi kew wey ed-azap te zuma he menge ed-ezapen,
1KI 9:7 ne ibpaawè ku sikiyu kayi te tanà he imbeǥey ku keniyu, ne ebeleǥazen ku heini is baley ku he iyan mibpilì ku he lugar he kayi a ebeǥayi te zengeg. Ne ed-un-undahan wey ed-engitan te langun he menge etew is Israel.
1KI 9:8 Ne minsan pa te mekempet wey nevantug heini is baley ku, ne edrundusen ku heini. Egketingkemed wey egkengeinuinu is langun he edsaǥad kayi, ne egkaǥi zan is ed-undaunda te, ‘Maan is mibeelan heini te Nengazen kayi he tanà wey kayi te valey zin?’
1KI 9:9 Edtavak is duma te, ‘Tenged te mid-iniyuǥan dan is Nengazen he Megbevayè dan, he iyan mibpeǥawas te menge kepuun dan diyà te Ehipto, ne mibpenilbi wey mid-azap dan te zuma he ed-ezapen. Umbe mibpeeǥiyan sikandan te Nengazen kayi he menge vangkit.’ ”
1KI 9:10 Kedlavey te 20 he tuig te kedtukuza ni Solomon te zezuwa he dezekelà he bilding–is baley te Nengazen wey is turuǥan,
1KI 9:11 imbeǥey ni Solomon ki Hadì Hiram, he hadì te Tyre is 20 he inged diyà te Galilea. Iyan imbeeli zin kayi is geina te imbeǥey kandin ni Hiram is langun he egkinehenglanen din he menge kayu he sidru wey sipris, wey menge vulawan he egkinehenglanen din.
1KI 9:12 Piru hein midhendiyà si Hiram te Galilea is ebpuun diyà te Tyre su ed-ahaan din haazà is menge inged he imbeǥey ni Solomon kandin, ne wazè din ikesuat heini.
1KI 9:13 Umbe, migkeǥiyan din si Solomon te, “Suled, kenà meupiya he menge inged heini is imbeǥey nu kedì.” Ne haazà he menge tanà migngezanan ni Hiram te Cabul, ne taman en guntaan iyan heeyan ngazan din.
1KI 9:14 Dutun te nehuna he timpu nekepeuwit si Hiram diyà te ki Solomon te menge 5,000 he kilu he vulawan.
1KI 9:15 Iyan heini kaaǥi te kedtiǥum ni Hadì Solomon te menge etew he mibpeǥes din te kedterebahu zuen te kebenguna te valey te Nengazen wey te turuǥan din, kedtambak te mevavà he vahin te tanà dutun te inged, kedlig-eni te verengbeng te Jerusalem, wey ked-umana kebenguna te menge inged he Hazor, Megido, wey Gezer.
1KI 9:16 (Heini is Gezer midsurung wey mid-aǥew te Faraon he hadì te Ehipto. Mibinsulan dan heini wey migerè dan is meǥinged kayi he menge Canaanhen. Imbeǥey heini zutun te hadì diyà te anak din he vahi su inggasa zin hein eseweey zan ki Solomon.
1KI 9:17 Ne mid-uman benguna ni Solomon heini is Gezer.) Mibangun daan ni Solomon is alug he vahin te Bet Horon,
1KI 9:18 is Baalat, is Tamar he ziyà te disirtu he nesakup te tanè din,
1KI 9:19 wey is langun he menge inged he zutun is menge budiga zin, menge kerwahi wey menge kudè din. Midtukud din is langun he egkesuatan din te edtukud diyà te Jerusalem, Lebanon wey te langun he nesakup din he tanà.
1KI 9:20 Duen pa menge etew he nengetaǥak diyà te Israel he kenà menge Israilihanen. Menge kevuwazan sikandan te menge Amunihanen, Hitihanen, Perisihanen, Hivihanen wey menge Jebusihanen he nengesamà he wazà mepatey te menge Israilihanen te ked-eǥawa zan te tanà te Canaan. Midhimu sikandan ni Solomon he menge uripen he ebpeǥesen he ibpeterebahu, ne taman guntaan kemulu he menge uripen sikandan.
1KI 9:22 Piru wazà minsan hentei he Israilihanen he mid-uripen ni Solomon, kekenà, midhimu zin sikandan he menge sundaru zin, menge upisyal, menge pengulu te menge sundaru, menge peremandar te menge kerwahi zin, wey te menge pereuntud te kudà.
1KI 9:23 Is 550 kandan midhimu zin he menge upisyal he edumala te menge edterebahu te menge pruyiktu zin.
1KI 9:24 Hein nepasad en haazà is turuǥan he mibpeveelan ni Solomon he para te esawa zin he anak te hadì te Ehipto, inhalin din is esawa zin diyà te Inged ni David. Ne hein nekahalin en, mibpetembakan din is mevavà he vahin dutun te inged.
1KI 9:25 Kada tuig ketetelu ebpemuhat si Solomon te menge pemuhat he edtutungen wey menge pemuhat he para te meupiya he kedepità diyà te pemuhatà he mibpeveelan din he para te Nengazen. Edtutung daan sikandin te veyewà diyà te etuvangan te Nengazen. Nepasad en ni Solomon is kebenguna zin duen te valey te Nengazen.
1KI 9:26 Mibpevaal pa si Solomon te menge varku ziyà te Ezion Geber, he uvey te Elot he nesakup te Edom, he veyvey te Zaǥat he Meriǥà.
1KI 9:27 Midsuǥù ni Hiram is menge etew zin he memetau ziyà te zaǥat te ked-etiman te varku duma te menge etew ni Solomon.
1KI 9:28 Mibiyahi zan diyà te Ofir, ne hein nekelikù dan duen dan en uwiten he 15,000 he kilu he vulawan, ne mid-uwit dan haazà diyà te ki Hadì Solomon.
1KI 10:1 Hein nezineg duen te rayna ziyà te Sheba is kegkevantug ni Solomon, he nekeveǥey ziyà te Nengazen te zengeg, midhendiyà sikandin te ki Solomon su egezaman din is ketau ni Solomon pinaaǥi te ked-insà te mereǥen he edtevaken he menge insà.
1KI 10:2 Nekeuma sikandin diyà te Jerusalem duma te mahabet he menge sakup din, ne zuen din uwiten he menge kemilyu he kergadu te menge gasa he penaket, mahabet he vulawan, wey mahalen he menge vatu. Ne hein neked-ehè dan en ki Solomon, ne mid-insaan din si Solomon te minsan hengkey he egkesuatan din he id-insà.
1KI 10:3 Midtavak ni Solomon is langun he menge insè din, ne wazà minsan hengkey he insà wey menge vutang he wazè din ikepesavut kandin.
1KI 10:4 Hein neperikesà dutun te rayna ziyà te Sheba is ketau ni Solomon, wey hein neehè din is utew mekempet he turuǥan he midtukud din,
1KI 10:5 henduen be te kenà sikandin ebpeketuu. Iring ded hein neehè din is menge keenen diyà te lemisahan te hadì, is kedumala te menge upisyal zin, is kebpenilbi te menge suluǥuen din he mekempet is menge yunipurmi zan, is menge tigsilbi te vinu zin, wey is menge pemuhat he edtutungen he impemuhat din diyà te valey te Nengazen.
1KI 10:6 Migkeǥiyan din haazà is hadì te, “Tutuu ves iyan is nezineg ku ziyà te nasyun ku mehitenged te menge mibeelan nu wey ketau nu.
1KI 10:7 Wazà a medtuu kayi umbe midhengkayi a ne neehè ku human. Is tutuu, ne wazà ganì mekedliliwezaan is netudtul kedì mehitenged kenikew te neehè ku. Is ketau nu wey ketiǥeyunan nu ne lavew pa zutun te nezineg ku.
1KI 10:8 Utew zeyzey is menge sakup nu! Utew zeyzey is menge upisyal nu he ebpenilbi kenikew su lelayun dan egkezineg is ketau nu.
1KI 10:9 Ereg he edeliǥen is Nengazen he Megbevayè nu, nelipey kenikew wey midhimu kenikew he hadì te Israel. Tenged te wazà pidtemanan he ǥaǥew te Nengazen te menge Israilihanen, midhimu ke zin he hadì su para egkezumahan te hustu he kukuman wey ketazeng is kegemita nu te ǥehem nu.”
1KI 10:10 Ne mibeǥayan duen te rayna si Hadì Solomon te vulawan he lelima he libu he kilu, mezakel he menge penaket wey mahalen he menge vatu. Wazè en ebpekerepeng te kezekelà te penaket he imbeǥey zuen te rayna te Sheba ki Hadì Solomon.
1KI 10:11 Is menge varku ni Hiram migkergahan daan te mid-uwit diyà te ki Hadì Solomon he menge vulawan, mezakel he kayu he almug, wey mahalen he menge vatu, he pudu ebpuun diyà te Ofir.
1KI 10:12 Impenheǥezan te hadì haazà is menge kayu he almug te turuǥan wey te valey te Nengazen, ne is duma, ne mibeelan he menge alpa wey menge lira para te menge musikiru. Iyan haazà kineupiyahan he menge kayu he almug he mid-uwit diyà te Israel; wazè en huziyan he egkaahà he iring dutun.
1KI 10:13 Imbeǥey ni Hadì Solomon duen te rayna ziyà te Sheba is minsan hengkey he mibuyù din, kenà ragkes is menge gasa he imbeǥey ni Solomon kandin. Ne mid-ulì haazà is rayna ziyà te inged din duma is menge sakup din.
1KI 10:14 Kada tuig ebpekezawat si Solomon te vulawan he 25,000 he libu he kilu,
1KI 10:15 kenà ragkes is menge vuhis he ebpuun diyà te menge nigusyanti, diyà te langun he menge hadì diyà te Arabia, wey ziyà te menge gubirnedur ziyà te Israel.
1KI 10:16 Mibpevaal si Hadì Solomon te 200 he zezekelà he menge kelasag ne is kada sevaha he kelasag ne mid-epizan te pitu he kilu he vulawan.
1KI 10:17 Mibpevaal zaan sikandin te 300 he zezeisey he menge kelasag he is kada sevaha ne mid-epizan te zezuwa he kilu he vulawan. Ne ziyè din heini isavuk is langun te vahin duen te turuǥan din he egngezanan te Ketelunan te Lebanon.
1KI 10:18 Mibpevaal zaan haazà is hadì te zekelà he pinuuwà te kedhadì. Mid-epizan haazà te lunsey he vulawan he ungal te ilipanti is indayandayan duen.
1KI 10:19 Heenem he huntù haazà is pinuuwà, ne melingin is diyà te egkeiniyuǥan. Ne kada kilid te untuzà te velad ne zuen dutun ledawan te edhitindeg he erimaung.
1KI 10:20 Ne zuen daan dutun ledawan te erimaung diyà te pesikilizà te kada huntù. 12 langun he menge ledawan te erimaung is dutun te heenem he huntù. Wazà ebpekeiring kayi he pinuuwà te kedhadì diyà te minsan hendei he ginhedian.
1KI 10:21 Is langun he inumà ni Hadì Solomon ne lunsey he vulawan, ne is langun he menge gelemiten duen te vahin te turuǥan he egngezanan te Ketelunan te Lebanon ne lunsey zaan he vulawan. Kenà pelata is mibeelan su zeisek dà is bali te pelata te timpu ni Solomon.
1KI 10:22 Duen daan menge varku ni Solomon he para te petiǥayun he ebiyahi zuma te menge varku ni Hiram. Heini he menge varku kesevaha ed-ulì kada tetelu he tuig, he ed-uwit te menge vulawan, menge pelata, menge ungal te ilipanti, wey zezekelà wey zezeisey he kelasi te menge uval.
1KI 10:23 Wazà minsan hentei he hadì kayi te kelibutan he ebpekerepeng te ketau wey ketiǥeyunan ni Hadì Solomon.
1KI 10:24 Is menge etew ziyà te langun he menge nasyun, edtinguhà he meuma zan si Solomon su para mekepemineg sikandan te ketau he imbeǥey kandin te Megbevayà.
1KI 10:25 Kada tuig, is kada sevaha he ebpenumbaley ziyà te kandin ed-uwit te menge gasa: menge azen he vineelan puun te pelata wey vulawan, menge visti, menge ǥumaan, menge penaket, menge kudà, wey menge mula.
1KI 10:26 Neketiǥum si Solomon te 1,400 he menge kerwahi wey 12,000 he kudà. Is duma kayi, ziyè din ipelastar te menge inged din he selevukà te menge kerwahi zin, ne is duma pa, ziyà te kandin diyà te Jerusalem.
1KI 10:27 Dutun te timpu te iyan sikandin hadì, henduen dà te vatu is ked-isipa te pelata tenged te kezekelè din, ne is kahabet te mahalen he kayu he sidru ne henduen be te ebpekeiring dà te urdinaryu he kayu he sikemur ziyà te menge mibuntud-buntud diyà te edsenlepan.
1KI 10:28 Is menge kudà ni Solomon diyà ebpuun te Ehipto wey Cilicia. Hustu he vali is impemasa kayi ziyà te Cilicia te menge perepemasa.
1KI 10:29 Dutun he timpu is bali te kerwahi he ebpuun diyà te Ehipto ne 600 he vuuk he pelata, ne is kudà 150 he vuuk he pelata. Ne imbelegyà heini te menge etew ni Solomon diyà te langun he menge hadì te menge Hitihanen wey te menge Aramihanen.
1KI 11:1 Mahabet he menge vahi he kenà menge Israilihanen is mibmahal ni Hadì Solomon. Gawas duen te anak te hadì te Ehipto, duen pa menge esawa ni Solomon he menge Moabitanhen, Amunihanen, Edomanhen, Sidunhanen, wey menge Hitihanen.
1KI 11:2 Daan en he migkeǥiyan te Nengazen is menge Israilihanen he kenè dan mebpengesawa etawa mebpeesawa te ebpuun keniyan he menge nasyun, su ebpekeuwit kandan is menge esawa zan wey zan mekaazap te zuma he menge ed-ezapen. Piru mibmahal gihapun ni Solomon heini he menge vahi.
1KI 11:3 Duen 700 he lavew he menge esawa ni Solomon wey zuen pa 300 he menge esawa zin he kenà lavew. Is menge esawa zin nekeǥuyud kandin wey sikandin mekeziyù te Megbevayà.
1KI 11:4 Hein meǥurang en sikandin neuwit sikandin te menge esawa zin te ked-azap te zuma he menge ed-ezapen. Kenè en meupiya is kedepitè dan te Nengazen he Megbevayè din; kenà sikandin iring te amey zin he si David.
1KI 11:5 Mid-azap din si Ashtoret, kes vahi he ed-ezapen te menge Sidunhanen, wey si Molec, kes utew mezaat he ed-ezapen te menge Amunihanen.
1KI 11:6 Pinaaǥi kayi nekevaal si Solomon te mezaat diyà te etuvangan te Nengazen. Wazà sikandin mebpurung mesunud te Nengazen; kenà iring is baal zin te vaal te amey zin he si David.
1KI 11:7 Mibpevaal si Solomon te simbahan diyà te metikang he lugar he zapit te edsilaan te Jerusalem, he para ki Kemosh, te utew mezaat he ed-ezapen te menge Moabitanhen. Mibpevaal zaan sikandin te simbahan he para ki Molec, kes utew mezaat he ed-ezapen te menge Amunihanen.
1KI 11:8 Mibpeveelan din te menge simbahan is menge ed-ezapen te langun he menge esawa zin he kenà menge Israilihanen, ne zutun sikandan edtutung te menge veyewà wey ebpemuhat para te menge ed-ezapen te menge esawa zin.
1KI 11:9 Ne nepeukan te Nengazen si Solomon su ǥeina te mid-iniyuǥan din is Nengazen he Megbevayà te Israel he mibpaahà kandin te kezezuwa.
1KI 11:10 Minsan mibpetizeenan din en si Solomon he kenà medsunud te zuma he menge ed-ezapen, wazà gihapun mebpezumazuma si Solomon kandin.
1KI 11:11 Umbe, migkeǥiyan din si Solomon te, “Tenged te wazè nu tumana is paaǥi ku te kebpekid-uyun wey is menge suǥù ku, egkuwaan ku ziyà te kenikew is ginhedian nu ne ibeǥey ku ziyà te sevaha zuen te menge suluǥuen nu.
1KI 11:12 Piru tenged te amey nu he si David ne kenè ku heini ebeelan mintras uuyag ke pa. Ebeelan ku heini zutun te timpu te kedhadì te anak nu.
1KI 11:13 Piru kenè ku ed-eminen egkuwaa ziyà te kandin is tivuuk he ginhedian; kekenà, edsemaan ku ziyà te kandin is sevaha he tribu tenged te suluǥuen ku he si David wey tenged te Jerusalem he pinilì ku he inged.”
1KI 11:14 Ketau te Nengazen he zuen mebpekigkuntada ki Solomon. Iyan sikandin si Hadad he Edomanhen, he kevuwazan te sevaha te menge hadì diyà te Edom.
1KI 11:15 Hein nehuna he timpu, he nekidtebek si David te menge Edomanhen, si Joab he peremandar te menge sundaru ni David midhendiyà te Edom te kedleveng te nemematey te tebek. Ne hein dutun en sikandin duma te menge etew zin, midhimetayan dan is langun he menge maama ziyà te Edom.
1KI 11:16 Dutun sikandan seled te heenem he vulan. Wazè dan haazà ewai taman te naamin dan te edhimatey is langun he menge maama zutun.
1KI 11:17 Piru si Hadad he vatè pa zutun he timpu nekepelaǥuy ziyà te Ehipto duma te zuma he menge Edomanhen he menge upisyal he nenilbi te amey zin.
1KI 11:18 Diyè dan ebpuun te Midian ne midhendiyè dan te Paran. Ne zuma te zuma he menge tig-Paran midhendiyè dan te Ehipto ne mibpekidhinguma zan te Faraon he hadì te Ehipto. Mibeǥayan duen te hadì si Hadad te valey, tanà, wey keenen.
1KI 11:19 Nekepenunuat dutun te hadì si Hadad, umbe impeesawa zin ki Hadad is ipag din, he suled te esawa zin he si Rayna Tapenes.
1KI 11:20 Ne te huziyan he timpu, mid-anak te maama is esawa ni Hadad, ne migngezanan dan haazà te Genubat. Si Tapenes is mibpezekelà dutun te vatà diyà te turuǥan. Ne nekeubpà haazà is batà duma te menge anak te hadì.
1KI 11:21 Ne zutun te ziyà si Hadad te Ehipto, netudtulan sikandin he minatey en si David wey si Joab he peremandar te menge sundaru. Ne migkaǥi si Hadad dutun te hadì te, “Ipeulì ad kenikew ziyà te nasyun ku.”
1KI 11:22 Ne mid-insà haazà is hadì te, “Maan? Hengkey is kurang nu zini maan is egkesuat ka he ed-ulì diyà te keniyu?” Midtavak si Hadad te, “Wazà; ipeulì e zà kenikew.”
1KI 11:23 Duen pa sevaha he etew he ketau te Megbevayà he kuntedaha zin si Solomon. Iyan sikandin si Rezon he anak ni Eliada. Mibpeleǥuyan din is egalen din he si Hadì Hadadezer he hadì te Zoba,
1KI 11:24 ne nehimu sikandin he pengulu te menge ribildi he midtiǥum din. Hein nezaag ni David is menge sundaru ni Hadadezer, midhendiyà si Rezon te Damascus duma te menge etew zin. Midsakup dan heini he lugar ne zutun dan med-ubpà.
1KI 11:25 Ne nehimu si Rezon he hadì diyà te Aram ne migkuntada zin is Israel. Nehimu sikandin he kuntada te Israel zutun te uuyag pa si Solomon. Mid-umanan din pa is kegubut he ebeelan ni Hadad diyà te Israel.
1KI 11:26 Is sevaha pa he nekigkuntada ki Solomon iyan si Jeroboam he sevaha te menge upisyal zin. Ebpuun sikandin diyà te inged he Zereda ziyà te Efraim. Is amey zin he si Nebat minatey en, piru is iney zin he si Zerua uuyag pa.
1KI 11:27 Iyan heini kaaǥi te kebpekidsukulè din te hadì: Te nehuna he timpu ebpetembakan ni Solomon is mevavà he lugar he nesakup te inged te amey zin he si David, wey ebpepurungan din is berengbeng kayi.
1KI 11:28 Ne heini si Jeroboam mevurut he etew, ne hein naahà ni Solomon is keǥied kayi he etew, ne impezumala zin te langun he menge etew he mibpeǥes din te kedterebahu he ebpuun diyà te tribu ni Efraim wey ni Manase.
1KI 11:29 Sevaha zutun he timpu migawas si Jeroboam puun te Jerusalem, ne midsinuǥung sikandin te ebpeneuven he si Ahia he tig-Shilo. Beǥu is pendivavew he visti he imbivisti ni Ahia. Ne iyan dan dà is dezuwa zutun te menge suǥud.
1KI 11:30 Ne midluwas ni Ahia haazà is pendivavew he visti zin ne mibindasbindas din te 12 he vahin.
1KI 11:31 Ne migkeǥiyan din si Jeroboam te, “Kuwaa nu is sepulù he vahin kayi, su iyan heini lalag te Nengazen he Megbevayà te Israel: Edhewien ku is ginhedian ni Solomon ne ibeǥey kenikew is sepulù he tribu kayi.
1KI 11:32 Piru tenged te suluǥuen ku he si David wey te inged he Jerusalem he iyan mibpilì ku ziyà te langun he menge inged te Israel, ne edsemaan ku ziyà te ki Solomon is sevaha he tribu.
1KI 11:33 Ne iyan ibeeli ku kayi su ǥeina te mid-iniyuǥan e zin ne iyan din mid-azap si Ashtoret, kes bahi he ed-ezapen te menge Sidunhanen, si Kemosh kes ed-ezapen te menge Moabitanhen, wey si Molec, kes ed-ezapen te menge Amunihanen. Wazà sikandin medsunud te menge paaǥi ku wey wazà mebpengungubpaan te hustu ziyà te etuvangan ku. Wazà sikandin medtuman te menge sulunuzen wey menge suǥù ku; kenà sikandin iring te amey zin he si David.
1KI 11:34 Piru kenè ku edhewien is tivuuk he ginhedian diyà te ki Solomon. Ebpekahadì sikandin seled te tivuuk he untung din tenged te suluǥuen ku he si David he pinilì ku he midtuman te menge suǥù ku wey menge sulunuzen he imbeǥey ku.
1KI 11:35 Edhewien ku is sepulù he tribu puun te ginhedian te anak din he ebpekeilis kandin te kedhadì, ne ibeǥey ku heini kenikew.
1KI 11:36 Ebeǥayan ku te sevaha he tribu is anak din su para mekepedayun te kedhadì is menge kevuwazan te suluǥuen ku he si David diyà te Jerusalem he iyan kes inged he mibpilì ku he zutun a ebeǥayi te zengeg.
1KI 11:37 Ne kevahin kenikew, Jeroboam, edhimuwen ku sikew he hadì te Israel. Edumelahan nu is langun he egkesuatan nu te edumala.
1KI 11:38 Emun edtumanen nu is langun he idsuǥù ku kenikew wey edsunuzen nu is menge paaǥi ku, wey emun ebaal ka te meupiya ziyà te etuvangan ku pinaaǥi te kedtumana nu te menge sulunuzen he ibpesunud ku wey menge suǥù iring te mibeelan ni David he suluǥuen ku, eduma a kenikew. Ebpekepedayun ebpekahadì is menge kevuwazan nu iring te menge kevuwazan ni David, ne ibeǥey ku kenikew is Israel.
1KI 11:39 Tenged te menge salà ni Solomon edsilutan ku is menge kevuwazan ni David, piru kenà taman te taman.”
1KI 11:40 Hein netudtul ki Solomon is migkaǥi te Nengazen diyà te ki Jeroboam, edhimetayan din pezem si Jeroboam, piru mibpelaǥuy si Jeroboam diyà te ki Shishak, he hadì te Ehipto, ne ziyà sikandin med-ubpà taman te kebpatey ni Solomon.
1KI 11:41 Is duma pa he ǥuǥud mehitenged te kedhadì ni Solomon, wey is langun he mibeelan din, wey vahin te ketau zin, ingkesurat heini ziyà te Libru he Midsuratan te menge Baal ni Solomon.
1KI 11:42 Diyà te Jerusalem med-ubpà si Solomon te kedhadì din te tivuuk he Israel seled te 40 he tuig.
1KI 11:43 Hein minatey en sikandin, ne ziyà ileveng te inged te amey zin he si David. Ne iyan maan nekeilis kandin te kedhadì is anak din he si Rehoboam.
1KI 12:1 Midhendiyà si Rehoboam te Shekem, su ziyà meburunburun is menge Israilihanen su ibpahayag dan is kedhimuwa zan kandin he hadì dan.
1KI 12:2 Hein nezineg haazà ni Jeroboam he anak ni Nebat, ne midlikù sikandin diyà te Israel. (Su ziyà sikandin meke-ubpà te Ehipto, su mibpeleǥuyan din si Hadì Solomon.)
1KI 12:3 Impetawag te keet-etawan te Israel si Jeroboam, ne pudu zan midhendiyà te ki Rehoboam ne ke sikandan te,
1KI 12:4 “Meveǥat is mibpeveelan kenami te amey nu. Piru emun ebpekemehegkapen nu heini, ne ebpenilbi key kenikew.”
1KI 12:5 Midtavak si Rehoboam te, “Beǥayi a zèpa keniyu te tetelu he andew te ked-isip-isip kayi, egkepasad haazà ne likù kew kayi te kedì.” Umbe mid-ulì haazà is menge etew.
1KI 12:6 Nekid-ahà si Hadì Rehoboam te ebpemendumala he nemenilbi te amey zin he si Solomon hein uuyag pa sikandin. Mid-insà si Rehoboam diyà te kandan te, “Hengkey is igkesambag niw kedì he igketavak ku zuen te menge etew mehitenged te hangyù dan?”
1KI 12:7 Ne midtavak dan te, “Emun ibeǥey nu kandan is hangyù dan, wey ibpeehè nu kandan he andam ka he ebpenilbi kandan, ne ebpenilbi sikandan kenikew taman te taman.”
1KI 12:8 Peru wazà pezumdumahi ni Rehoboam is sambag dan kandin, kekenà, iyan midhinguma zin is menge vetan-en he iring din te kengunguhezi he ebpenilbi kandin.
1KI 12:9 Mid-insaan din sikandan te, “Hengkey is sambag niw kedì te idtavak ku te hangyù kedì dutun te menge etew? Iyan hangyù dan is pekehegkapa ku is meveǥat he mibpeveelan kandan te amey ku.”
1KI 12:10 Midtavak haazà is menge vetan-en te, “Iyan heini itavak nu zutun te menge etew he midhangyù kenikew: ‘Is tindezeisey ku ne zekelè pa te hawak te amey ku.
1KI 12:11 He ke và dà egkegiya, meveǥat pa is ibpetuman ku keniyu kenà is impetuman te amey ku. Emun midlagkut kew te amey ku te letigu, ne iyan idlagkut ku keniyu is iring te venayew he meǥarang he menge putew.’ ”
1KI 12:12 Midlavey is tetelu zutun he andew, ne midlikù dutun si Jeroboam wey is menge etew ziyà te ki Hadì Rehoboam, sumalà te migkaǥi te hadì kandan.
1KI 12:13 Piru wazà pezumdumahi ni Rehoboam is menge sambag kandin dutun te menge ebpemendumala. Kekenà, midrengrengitan din dà haazà is menge etew
1KI 12:14 sumalà te sambag kandin duen te menge vetan-en. Migkeǥiyan din sikandan te, “Meveǥat is impetuman te amey ku keniyu, piru meveǥat pa is ibpetuman ku keniyu. Emun midlagkut kew te amey ku te letigu, ne iyan idlagkut ku keniyu is iring te venayew he memeǥarang he putew.”
1KI 12:15 Umbe wazà pemineǥa zutun te hadì is hangyù dutun te menge etew, su paaǥi te Nengazen he iyan egketuman is migkaǥi zin diyà te ki Jeroboam he anak ni Nebat pinaaǥi ki Ahia he tig-Shilo.
1KI 12:16 Hein neisip-isip te menge Israilihanen he wazè dan pemineǥa te hadì, ne migkeǥiyan dan is hadì te, “Wazè dey lavet kenikew te kevuwazan ni David! Belaǥad ka keniyan te ginhedian nu! Hengkayi kew en is menge Israilihanen, su ebpemen-ulì kiw!” Ne nemen-ulì is menge Israilihanen.
1KI 12:17 Iyan dà is menge Israilihanen he menge meǥinged diyà te Juda pedayun is kedumelaha kandan ni Rehoboam.
1KI 12:18 Duen timpu he impehendiyà ni Hadì Rehoboam te menge Israilihanen si Adoram, kes edumala te menge etew he ebpeǥesen te kedterebahu. Iyan inhendiyè din is ebpekidhusayà pezem kandan. Piru mibpenuleng dan te vatu si Adoniram taman te minatey. Ne zutun migaanggaan si Rehoboam med-untud te kerwahi zin ne mibpelaǥuy pehendiyà te Jerusalem.
1KI 12:19 Ne minsan guntaan edribildiyan te menge Israilihanen is menge kevuwazan ni David.
1KI 12:20 Ne si Jeroboam mulà, hein netuenan te langun he menge Israilihanen he nekeulì en sikandin, impetawag dan sikandin diyà te ketiǥuman dan, ne midhimu zan sikandin he hadì te tivuuk he Israel. Iyan dà is tribu ni Juda pedayun he nekid-uunungen te menge kevuwazan ni David.
1KI 12:21 Ne hein nekeuma si Rehoboam diyà te Jerusalem, midtiǥum din is memetau he menge sundaru ziyà te tribu ni Juda wey ni Benjamin. Neketiǥum sikandin te 180,000 he menge sundaru he id-asdang din te menge Israilihanen su edhewien din is ginhedian din.
1KI 12:22 Piru migkeǥiyan te Megbevayà si Shemaya he suluǥuen din te,
1KI 12:23 “Keǥiyi nu si Hadì Rehoboam he hadì te Juda, he anak ni Solomon, wey is langun he menge etew ziyà te Juda wey menge kevuwazan ni Benjamin wey is duma zan he menge meǥinged
1KI 12:24 he iyan a, is Nengazen migkaǥi te, ‘Kenè kew pekidtebek te menge kezuzumahi niw he menge Israilihanen. Ulì kew, su kediey he suat he mahadì si Jeroboam.’ ” Mibpezumazuma sikandan te Nengazen ne nemen-ulì dan, su iyan haazà insuǥù te Nengazen kandan.
1KI 12:25 Mibpeveelan ni Jeroboam te verengbeng is inged he Shekem diyà te vuvungan te Efraim, ne zutun sikandin med-ubpà. Dutun te huziyan he timpu, midhendiyà sikandin te Penuel ne midlig-enan din daan heini.
1KI 12:26 Kesikandin diyà te isip din te, “Kela ke mekelikù heini is ginhedian ku ziyà te menge kevuwazan ni David
1KI 12:27 emun ebpedayun is layun kedhendiyà te menge etew te Jerusalem te kebpemuhat diyà te valey te Nengazen. Egkehimu ke ed-uman dan ebpekid-uunungen te egalen dan diyà te Juda he si Hadì Rehoboam. Ne emun egkeulaula heeyan, ne edhimetayan e zan ne edlikù dan diyà te ki Rehoboam.”
1KI 12:28 Umbe, hein nepasad is kebpesambag ni Jeroboam mehitenged kayi te neisip din, ne mibpevaal sikandin te zezuwa he vulawan he vaka. Ne migkeǥiyan din is menge etew te, “Sikiyu is menge Israilihanen, egkereǥenan kew en te layun kedhendiyà te Jerusalem. Ne heini zed is menge ed-ezapen he mibpeǥawas keniyu ziyà te Ehipto.”
1KI 12:29 Is sevaha zutun te vulawan he vaka impesavuk din diyà te Betel ne is sevaha pa, ziyè din ipesavuk te Dan.
1KI 12:30 Heini is mibeelan ni Jeroboam nehimu he hinungdan te kebpekesalà te menge tig-Israel. Ebpekeumauma sikandan diyà te Dan is ed-azap.
1KI 12:31 Mibpevaal pa si Jeroboam te menge simbahan diyà te metikang he menge lugar, ne zuen menge etew he midhimu zin he menge memumuhat, minsan kenà sikandan kevuwazan ni Levi.
1KI 12:32 Midtukud daan sikandin te pista emun ike-15 he andew te ikewalu he vulan te iring te pista ziyà te Juda. Dutun he andew, ebpemuhat sikandin diyà te Betel te menge pemuhat diyà te pemuhatà he para zuen te menge vulawan he vaka he impeveelan din. Ne mibpilì sikandin te menge memumuhat he idsavuk din diyà te menge simbahan he mibpeveelan din diyà te metikang he menge lugar.
1KI 12:33 Dutun he andew te kebpemuhat din diyà te pemuhatà he impeveelan din diyà te Betel, mibpuunan din is pista he para te menge Israilihanen. Iyan mismu sikandin midtail te ike-15 he andew te ikewalu he vulan para kayi he pista.
1KI 13:1 Dutun he timpu midsuǥù te Nengazen is sevaha he suluǥuen din he tig-Juda te kedhendiyà te Betel. Ne kebpekeuma zin diyà, ne edhithitindeg si Jeroboam diyà te pemuhatà su ebpemuhat.
1KI 13:2 Midsuǥù haazà is suluǥuen te Nengazen te kedrawak dutun te pemuhatà. Ke sikandin te, “Iyan heini egkeǥiyen te Nengazen mehitenged kayi te pemuhatà: Duen batà he egkeetew ziyà te menge kevuwazan ni David he iyan ngazan din si Josia. Ebpenhimetayan din wey ibpemuhat din kayi he pemuhatà is menge memumuhat he ebpemenilbi ziyà te menge simbahan diyà te metikang he menge lugar wey ebpemuhat kayi he pemuhatà. Egkeepur is menge tulan dan kayi he pemuhatà.”
1KI 13:3 Dutun he andew, mibeǥey haazà is suluǥuen te Megbevayà te tuus he egketuman heini is migkaǥi te Nengazen. Ke sikandin te, “Egketempag heini he pemuhatà ne egkeulaan is avu kayi he pemuhatà.”
1KI 13:4 Ne kegkezineǥa zutun ni Hadì Jeroboam, ne intezù din haazà is etew he ke sikandin te, “Dekepa niw sikandin!” Ne midtinderan is belad duen te hadì, umbe kenè din en igkehendiyà te zizalem is belad din.
1KI 13:5 Ne zutun netempag haazà is pemuhatà ne neulaan is avu zuen, su iyan haazà nekaǥi zuen te suluǥuen te Megbevayà he impahayag kandin te Nengazen.
1KI 13:6 Ne migkaǥi haazà is hadì dutun te suluǥuen te Megbevayà te, “Iampù a kenikew ziyà te Nengazen he Megbevayè nu he vewii zin is belad ku.” Umbe mid-ampù haazà is suluǥuen te Megbevayà diyà te Nengazen, ne neulian is belad dutun te hadì.
1KI 13:7 Ne mid-umanan keǥiyi zutun te hadì haazà is suluǥuen te Megbevayà te, “Duma ka kedì diyà te valey ne kaan ka, ne ebeǥayan ku sikew te gasa.”
1KI 13:8 Piru midtavak haazà is suluǥuen te Megbevayà te, “Minsan ibeǥey nu pa kediey is ketengà te menge azen nu, kenà a eduma kenikew etawa kenà a egkaan etawa ed-inum kayi he lugar.
1KI 13:9 Su mibmenduan a te Nengazen he kenà a megkaan etawa med-inum mintras kayi a, wey emun ed-ulì a ne kenà a mebayà diyà te imbayè ku te kedhengkayi ku.”
1KI 13:10 Umbe, sengezezalan en is mid-ikul zin te ked-ulì din.
1KI 13:11 Dutun he timpu, duen sevaha he meǥurang he ebpeneuven he ziyà ed-ubpà te Betel. Midhendiyà te kandin is menge anak din he menge maama ne midtudtulan dan sikandin te mibeelan duen te suluǥuen te Megbevayà diyà te Betel dutun he andew. Ne elin dan midtudtul is migkaǥi zuen te suluǥuen te Megbevayà diyà te hadì.
1KI 13:12 Ne mid-insà haazà is amey zan te, “Hendei sikandin mebayà hein mid-ulì?” Ne migkaǥi zan kandin ke hendei mebayà.
1KI 13:13 Ne migkaǥi haazà is amey zan diyà te kandan te, “Iandam niw is asnu he egkeuntuzan ku.” Umbe in-andam dan is asnu ne mid-untud sikandin
1KI 13:14 ne midal-as din sikan is suluǥuen te Megbevayà. Neumahan din he ebpimpinuu ziyà te lempek te kayu he ulayan. Mid-insaan din haazà te, “Iyan ke ve sikan is suluǥuen te Megbevayà he ebpuun diyà te Juda?” Ne midtavak te, “Uya.”
1KI 13:15 Ne migkaǥi haazà is meǥurang he ebpeneuven te, “Ebpezumehè ki ziyà te valey su wey ka mekekaan.”
1KI 13:16 Ke sikandin te, “Es, kenà egkehimu ke edliku a wey eduma a kenikew, wey kenà daan egkehimu ke egkaan a etawa ed-inum a zuma kenikew kayi he lugar.
1KI 13:17 Su migkeǥiyan a te Nengazen he kenà a mebayà duen te imbayè ku te kedhengkayi ku.”
1KI 13:18 Migkaǥi haazà is meǥurang he ebpeneuven te, “Ebpeneuven e man daan iring kenikew. Ne midsuǥù te Nengazen is sevaha he velinsuǥuen din kayi te kediey su wey ku sikew hinggata su para mekekaan ka wey mekeinum.” (Piru midtarùtarù haazà is meǥurang he ebpeneuven.)
1KI 13:19 Umbe, miduma kandin diyà te valey zin haazà is suluǥuen te Megbevayà ne migkaan wey mid-inum sikandin dutun.
1KI 13:20 Dutun te ebpimpinuu sikandan uvey te lemisahan, duen migkaǥi te Nengazen duen te meǥurang he ebpeneuven.
1KI 13:21 Dutun migkeǥiyan duen te meǥurang he ebpeneuven sikan is suluǥuen te Megbevayà he ebpuun diyà te Juda te, “Iyan heini egkeǥiyen te Nengazen: ‘Midsupak nu is migkaǥi te Nengazen he Megbevayè nu; wazè nu tumana is insuǥù din kenikew.
1KI 13:22 Migkeǥiyan ke zin te kenè ka megkaan wey med-inum kayi he lugar, piru midlikù ka kayi ne migkaan ka wey mid-inum. Ne tenged kayi te mibeelan nu, ebpatey ka he kenà diyà igkeleveng te midlevengan te menge kepuun nu.’ ”
1KI 13:23 Ne hein nekepasad he egkaan wey ed-inum haazà is suluǥuen te Megbevayà, in-andam duen te meǥurang he ebpeneuven is asnu he egkeuntuzan din te ed-ulì.
1KI 13:24 Ne zutun te ked-ulì din, midhimetayan sikandin te erimaung he midsinuǥung kandin. Nekesesavuk sikandin diyà te zalan is minatey, ne sikan is asnu wey erimaung ne edhithitindeg diyà te avey zin.
1KI 13:25 Ne naahà haazà te menge sumeseǥazà is minatey he lawa wey sikan is erimaung diyà te avey zin, ne midtudtul zan heini ziyà te inged he ed-ubpaan duen te meǥurang he ebpeneuven.
1KI 13:26 Ne hein nezineg heini zuen te meǥurang he ebpeneuven, ke sikandin te, “Iyan sikandin sikan is suluǥuen te Megbevayà he midsupak din is migkaǥi kandin te Nengazen. Imbeǥey sikandin te Nengazen duen te erimaung he mid-etaki wey midhimatey kandin, su iyan heeyan nekaǥi te Nengazen diyà te kandin.”
1KI 13:27 Segugunà migkeǥiyi zuen te meǥurang he ebpeneuven sikan is menge anak din he maama te, “Endama niw is asnu he egkeuntuzan ku.” Ne in-andam dan haazà.
1KI 13:28 Migenat sikandin, ne neehè din haazà is minatey he nekesesavuk diyà te zalan wey sikan is erimaung wey asnu he edhithitindeg diyà te avey zutun. Wazà keena zutun te erimaung haazà ne wazà daan menuwa zuen te asnu.
1KI 13:29 Migkuwa zuen te meǥurang he ebpeneuven haazà is minatey he lawa zuen te suluǥuen te Megbevayà ne ingkarga zin te asnu, ne mid-uwit dutun te meǥurang diyà te inged din su wey sikandin mekelalew tenged kayi, ne wey zin daan ikeleveng heini.
1KI 13:30 Ne inleveng din heini ziyà te penlevengà he mibpeveelan din he para te pemilya zin, ne inlalew zan haazà is kemetayen te kezuzumahi zan.
1KI 13:31 Ne hein ingkeleveng dan en, ne migkeǥiyan duen te meǥurang he ebpeneuven sikan is menge anak din he menge maama te, “Emun ebpatey a ne ziyè e keniyu ileveng te midlevengan duen te suluǥuen te Megbevayà, ne iavey a keniyu kandin.
1KI 13:32 Su is menge lalag he migkaǥi te Nengazen diyà te kandin mehitenged te pemuhatà diyà te Betel wey te menge simbahan diyà te metikang he menge lugar ziyà te Samaria siguradu he egketuman.”
1KI 13:33 Minsan pa te iyan heini nehitavù, mibpedayun gihapun si Jeroboam te mezaat he vaal zin. Mibpilì gihapun sikandin te menge etew he midhimu zin he menge memumuhat diyà te menge simbahan he ziyà te memetikang he menge lugar. Is minsan hentei he egkesuat he edhimuwen he memumuhat mid-urdinahan din.
1KI 13:34 Heini is mibeelan ni Jeroboam nehimu he hinungdan te kebpekesalà te pemilya zin wey nekeuwit te kezeetan wey kemetayen diyà te kandan.
1KI 14:1 Dutun he timpu, nezeruwan is anak ni Jeroboam he maama he si Abia.
1KI 14:2 Umbe, migkeǥiyan ni Jeroboam is esawa zin te, “Peuvag-uvag ka su para kenè ka mekilala he esawa ku sikew, ne hendiyè ka te Shilo. Su ziyà si Ahia he iyan kes ebpeneuven he migkaǥi kayi te kedì te egkehimu a he hadì te Israel.
1KI 14:3 Hendiyè ka te kandin is ed-uwit te menge gasa he sepulù he supas, menge keenen, wey senge umuy he teneb, su egkeǥiyen din kenikew ke hengkey is egkehitavù kayi te anak ta.”
1KI 14:4 Umbe, midhendiyà haazà is esawa ni Jeroboam te valey ni Ahia ziyà te Shilo. Meǥurang en si Ahia ne kenè en ebpekaahà.
1KI 14:5 Piru migkeǥiyan te Nengazen si Ahia te, “Edhendini is esawa ni Jeroboam he ebpeuvag-uvag su para kenà sikandin mekilala. Ed-insà sikandin kenikew mehitenged te anak din he egkezeruwan, tevaka nu sikandin te egkeǥiyen ku ziyà te kenikew.”
1KI 14:6 Umbe, hein nezineg ni Ahia is kedseled din diyà te ǥemawan, migkaǥi si Ahia te, “Laus ka. Netuenan ku he esawa ka ni Jeroboam. Maan is mibpeuvag-uvag ka? Duen mezaat he egkeǥiyen ku ziyà te kenikew.
1KI 14:7 Ulì ka ne keǥiyi nu si Jeroboam te iyan heini egkeǥiyen te Nengazen he Megbevayà te Israel: Mibpilì ku sikew puun te menge etew, ne midhimu ku sikew he pengulu te menge etew ku he menge Israilihanen.
1KI 14:8 Migkuwa ku is ginhedian te menge kevuwazan ni David ne imbeǥey ku ziyà te kenikew. Piru kenè ka iring te suluǥuen ku he si David, he midtuman mulà te menge suǥù ku wey ebpuun te tivuuk he ǥehinawa zin is kedsunud din kediey, wey metazeng is menge vaal zin diyà te etuvangan ku.
1KI 14:9 Edhuna pa he mezaat is kenikew he mibeelan te mibeelan te menge hadì he nehuna kenikew. Mid-iniyuǥan a kenikew wey midhimu nu he mepauk a pinaaǥi te kebaal nu te mital he menge ed-ezapen.
1KI 14:10 Tenged kayi, edezeetan ku is pemilya nu. Ebpenhimetayan ku is langun he sakup te pemilya nu he menge maama, uripen etawa kenà. Ebpurungan ku edezeeti is pemilya nu iring te meremerik he vutang he ebinsulan he wazà duen egkesamà.
1KI 14:11 Is menge sakup te pemilya nu he ebpemematey ziyà te inged egkeenen te menge asu, ne is ebpemematey ziyà te vevesukà egkeenen te menge tagbis. Egkehitavù heini, su iyan a, is Nengazen, is migkaǥi kayi.”
1KI 14:12 Ne migkeǥiyan ni Ahia haazà is esawa ni Jeroboam te, “Ulì ke en diyà te keniyu. Ne kebpekeuma nu ziyà te inged niw, ebpatey is anak nu.
1KI 14:13 Edlalew kandin is langun he tig-Israel, ne idleveng sikandin. Iyan dà sikandin sakup te pemilya ni Jeroboam he egkepurungan is kedlevenga zuen, su iyan dà sikandin sakup te pemilya ni Jeroboam he nekepenunuat te Nengazen he Megbevayà te Israel.
1KI 14:14 Ne zutun he timpu, duen edhimuwen te Nengazen he mahadì te Israel he iyan edezaat te pemilya ni Jeroboam.
1KI 14:15 Edsilutan te Nengazen is menge etew ziyà te Israel taman te ebpengerkeren sikandan iring te kegkerkera te tigbew he egkeigù te seleg te wahig. Id-awè din sikandan kayi te meupiya he tanà he imbeǥey zin diyà te menge kepuun dan, ne ibpeyapat din sikandan diyà te egkehunaan te Wahig he Eufrates su ǥeina te midhimu zan he mepauk sikandin pinaaǥi te kebpehitindeg dan te tukud he simbulu te vahi he ed-ezapen he si Ashera.
1KI 14:16 Ebey-anan din sikandan tenged te menge salà ni Jeroboam, he nehimu he hinungdan te kebpekesalà te menge tig-Israel.”
1KI 14:17 Ne zutun mid-ulì is esawa ni Jeroboam diyà te Tirza. Ne kebpekeuma zin diyà te ǥemawan te valey zan, ne segugunà minatey sikan is anak din.
1KI 14:18 Ne inlalew te langun he menge tig-Israel haazà is batà ne inleveng dan sikandin, ne iyan heeyan nekaǥi te Nengazen pinaaǥi te suluǥuen din he mibpenaub din he si Ahia.
1KI 14:19 Is duma pa he ǥuǥud mehitenged te kedhadì ni Jeroboam, ragkes is kebpekidtebek din, ne ingkesurat diyà te Libru he Midsuratan te menge Keguǥuza te menge Hadì te Israel.
1KI 14:20 Midhedian ni Jeroboam is Israel seled te 22 he tuig. Ne hein minatey sikandin, iyan nekeilis kandin he hadì is anak din he si Nadab.
1KI 14:21 Si Rehoboam he anak ni Solomon iyan hadì diyà te Juda. Ne 41 he tuig is keǥurang din hein nehimu sikandin he hadì. Ne midhadì sikandin he ziyà te Jerusalem seled te 17 he tuig. Diyà te menge inged te menge tribu te Israel, iyan is Jerusalem nepilì te Nengazen he zutun sikandin ebeǥayi te zengeg. Is iney ni Rehoboam iyan si Naama he Amunihanen.
1KI 14:22 Mibaal te salà diyà te etuvangan te Nengazen is menge etew ziyà te Juda, ne tuwas pa he zekelà is pauk te Nengazen kandan te pauk din te menge kepuun dan, su tuwas he zekelà is menge salè dan.
1KI 14:23 Mibaal zaan sikandan te menge pemuhatà diyà te metikang he menge lugar wey te tedeman he menge vatu, wey mibpehitindeg sikandan te tukud he simbulu te vahi he ed-ezapen he si Ashera ziyà te puntur te kada vuvungan wey ziyà te sihung te kada merapung he kayu.
1KI 14:24 Ne liyu keniyan, duen pa menge maama wey menge vahi kandan he ebelegyà te zengeg dan diyà te menge lugar he ed-ezapan dan. Is menge etew ziyà te Juda mid-ulaula zan is langun he utew mezaat he ulaula he iyan aney he teǥi-ulaula zuen is menge etew ziyà te menge nasyun he impesegseg te Nengazen te menge Israilihanen.
1KI 14:25 Hein ikelima he tuig te kedhadì ni Rehoboam, midsurung ni Hadì Shishak he hadì te Ehipto is Jerusalem.
1KI 14:26 Mibpenguwa zin is menge ketiǥeyunan diyà te valey te Nengazen wey is diyà te turuǥan. Migkuwa zin is langun, ragkes en is langun he menge kelasag he vulawan he mibpeveelan ni Solomon.
1KI 14:27 Umbe, mibpevaal si Hadì Rehoboam te brunsi he menge kelasag he inliwan dutun, ne insarig din heini te menge upisyal te menge vantey he ebantey te ǥemawan te turuǥan.
1KI 14:28 Ne emun edhendiyà haazà is hadì te valey te Nengazen, ne ed-uwiten duen te menge vantey heini he menge kelasag, ne kegkepasad dutun ne idlikù dan diyà te menge ruǥu zan.
1KI 14:29 Is duma pa he ǥuǥud mehitenged te kedhadì ni Rehoboam, wey is langun he mibeelan din, ne ingkesurat diyà te Libru he Midsuratan te menge Keguǥuza te menge Hadì te Juda.
1KI 14:30 Dutun he timpu layun ebpetebekà si Rehoboam wey si Jeroboam.
1KI 14:31 Hein minatey en si Rehoboam, inleveng sikandin diyà te midlevengan te menge kepuun din diyà te Inged ni David. (Is iney ni Rehoboam ne egngezanan ki Naama he Amunihanen.) Is nekeilis kandin he hadì iyan is anak din he si Abia.
1KI 15:1 Nehimu he hadì diyà te Juda si Abia hein ike-18 he tuig te kedhadi ni Jeroboam te Israel.
1KI 15:2 Diyà med-ubpà te Jerusalem si Abia, ne midhadì sikandin seled te tetelu he tuig. Iyan iney zin si Maaca he apù ni Absalom.
1KI 15:3 Mibeelan din daan is langun he salà he mibeelan te amey zin. Kenà meupiya is kedepitè din te Nengazen he Megbevayè din; kenà iring te kepuun din he si David.
1KI 15:4 Piru tenged ki David, intuǥut te Nengazen he Megbevayè din he mahadì diyà te Jerusalem is kevuwazan din pinaaǥi te kebeǥey kandin te anak he ebpekeilis kandin te kedhadì he edlig-en te Jerusalem.
1KI 15:5 Su mid-ulaula ni David is metazeng diyà te etuvangan te Nengazen, ne zutun te uuyag pa sikandin wazè din supaka is menge suǥù te Nengazen, gawas duen te mibeelan din diyà te ki Uria he Hitihanen.
1KI 15:6 Hein aney, layun edtebek si Rehoboam wey si Jeroboam, piru te huziyan iyan en maan edtebek si Abia wey si Jeroboam. Is duma pa he ǥuǥud mehitenged te kedhadì ni Abia, wey is langun he mibeelan din, ne ingkesurat diyà te Libru he Midsuratan te menge Keguǥuza te menge Hadì te Juda.
1KI 15:8 Hein minatey en si Abia, inleveng sikandin diyà te Inged ni David. Ne si Asa he anak din iyan nekeilis kandin te kedhadì.
1KI 15:9 Nehimu he hadì diyà te Juda si Asa hein ike-20 he tuig puun te kedhedii ni Jeroboam te Israel.
1KI 15:10 Diyà med-ubpà te Jerusalem si Asa, ne midhadì sikandin seled te 41 he tuig. Is apù din he vahi iyan si Maaca he apù ni Absalom.
1KI 15:11 Metazeng diyà te etuvangan te Nengazen is mid-ulaula ni Asa, iring sikandin te kepuun din he si David.
1KI 15:12 Midsegseg din puun te Juda is menge maama wey menge vahi he ebelegyà te zengeg dan diyà te menge lugar he zutun dan ed-azap, ne impaawè din is menge ed-ezapen he mibpeveelan te menge kepuun din.
1KI 15:13 Minsan is apù ni Asa he vahi he si Maaca in-awè din diyà te kegkerayna, su mibaal si Maaca te utew mezaat he tukud he simbulu te ed-ezapen he si Ashera. Impetamped ni Asa heini he tukud ne mibpevinsulan din diyà te zal-ug te Kidron.
1KI 15:14 Minsan wazà maawà sikan is menge simbahan diyà te metikang he menge lugar, mepezumdumahan gihapun si Asa te Nengazen te tivuuk he untung din.
1KI 15:15 Mid-uwit din diyà te valey te Nengazen is menge pelata, menge vulawan, wey zuma pa he menge azen he inhalad dan te amey zin diyà te Nengazen.
1KI 15:16 Layun ebpetebekà si Asa wey si Baasha he hadì te Israel dutun te timpu te kedhadì dan.
1KI 15:17 Midsurung ni Baasha is Juda, ne midlig-enan din is berengbeng te inged he Rama su para wazà ebpekeǥawas etawa ebpekeseled diyà te lugar ni Hadì Asa he hadì te Juda.
1KI 15:18 Mibpenguwa ni Asa is langun he pelata wey vulawan he nesamà diyà te menge budiga zuen te valey te Nengazen wey ziyà te turuǥan din. Ne insarig din heini te menge upisyal zin, ne insuǥù din he uwita haazà diyà te ki Hadì Ben Hadad diyà te Aram he ziyà ed-ubpà te Damascus. Si Ben Hadad anak ni Tabrimon wey apù ni Hezion.
1KI 15:19 Iyan heini menge lalag he impeuwit ni Asa ziyà te ki Ben Hadad: “Ed-uyun ki he ebpelevanè ki, iring te mibeelan te amey ku wey amey nu. Ne zewata nu heini is gasa ku kenikew he pelata wey vulawan, ne edhangyù a ziyà te kenikew he engkezi nu en is kedlavan nu ki Hadì Baasha ziyà te Israel su para mevey-ani e zin en.”
1KI 15:20 Mibpezumdumahan ni Ben Hadad is hangyù ni Hadì Asa, ne midsuǥù din is menge peremandar te menge sundaru zin he surunga zan is menge inged te Israel. Naaǥew zan is Ion, Dan, Abel Bet Maaca, is tivuuk he Kineret, wey is tivuuk he Naftali.
1KI 15:21 Hein netuenan haazà ni Baasha, ne mibpeengkezan din is kedlig-eni te Rama, ne midlikù sikandin diyà te Tirza.
1KI 15:22 Ne mibmendaran ni Hadì Asa is langun he menge maama te Juda he ibpekuwa kandan is menge vatu wey menge zezekelà he menge kayu he migamit ni Baasha te kedlig-en te Rama. Ne migamit heini ni Hadì Asa te kedlig-en te Geba ziyà te Benjamin, wey Mizpa.
1KI 15:23 Is duma pa he ǥuǥud mehitenged te kedhadì ni Asa, wey is nevantug he menge vaal zin wey is langun he mibeelan din, ragkes is menge inged he midlig-enan din, ne ingkesurat diyà te Libru he Midsuratan te menge Keguǥuza te menge Hadì te Juda. Hein meǥurang en si Asa duen daru zin diyà te paa zin.
1KI 15:24 Ne hein minatey en sikandin inleveng diyà te midlevengan te menge kepuun din diyà te inged te kepuun din he si David. Ne si Jehoshafat he anak din iyan nekeilis kandin te kedhadì.
1KI 15:25 Nehimu he hadì diyà te Israel si Nadab he anak ni Jeroboam hein ikezuwa he tuig te kedhadì ni Asa ziyà te Juda. Midhadì si Nadab diyà te tivuuk he Israel te seled te zezuwa he tuig.
1KI 15:26 Mezaat is ulaula zin diyà te etuvangan te Nengazen. Mid-iringan din is betasan te amey zin wey is salà he mibeelan din, he nehimu he hinungdan te kebpekesalà te menge tig-Israel.
1KI 15:27 Ne si Baasha he anak ni Ahia, he ebpuun diyà te tribu ni Isacar, mezaat is pelanu zin diyà te ki Nadab. Midhimetayan din si Nadab hein kedsurung ni Nadab wey te tivuuk he Israel te Gibeton, he sevaha he inged te menge Filistihanen.
1KI 15:28 Is kedhimetayi ni Baasha ki Nadab nehitavù hein iketelu he tuig te kedhadì ni Asa he hadì te Juda. Ne iyan mid-ilis ki Nadab te kedhadì si Baasha.
1KI 15:29 Ne zutun te kebpuun kedhadì ni Baasha, mibpenhimetayan din is tivuuk he pemilya ni Jeroboam, ne wazè din midsamà minsan sevaha. Neulaula heini su iyan heini nekaǥi te Nengazen pinaaǥi te suluǥuen din he si Ahia he tig-Shilo.
1KI 15:30 Su nepeukan te Nengazen he Megbevayà te Israel si Jeroboam tenged te menge salà he mibeelan din, he nehimu he hinungdan te kebpekesalà te menge tig-Israel.
1KI 15:31 Is duma pa he ǥuǥud mehitenged te kedhadì ni Nadab, wey is langun he mibeelan din, ne ingkesurat diyà te Libru he Midsuratan te menge Keguǥuza te menge Hadì te Israel.
1KI 15:32 Layun ebpetebekà si Asa wey si Baasha te timpu te kedhadì dan.
1KI 15:33 Nehimu he hadì diyà te Israel si Baasha he anak ni Ahia hein iketelu he tuig te kedhadì ni Asa ziyà te Juda. Diyà te Tirza med-ubpà si Baasha, ne midhadì sikandin seled te 24 he tuig.
1KI 15:34 Mezaat is ulaula zin diyà te etuvangan te Nengazen. Mid-iringan din is ulaula ni Jeroboam wey is salà he mibeelan din, he nehimu he hinungdan te kebpekesalà te menge tig-Israel.
1KI 16:1 Iyan heini lalag te Nengazen he ebpekesuǥat diyà te ki Baasha he impekaǥi zin ki Jehu he anak ni Hanani:
1KI 16:2 “Migkuwa ku sikew puun te mevavà he kebpekesavuk, ne midhimu ku sikew he pengulu temenge etew ku he Israilihanen. Piru mid-iringan nu is ulaula ni Jeroboam ne iyan ka nehimu he hinungdan te kebpekesalà te menge etew ku, ne midhimu nu he mepauk a tenged te menge salè dan.
1KI 16:3 Umbe, edèdeetan ku sikew wey is pemilya nu, iring te mibeelan ku ziyà te pemilya ni Jeroboam he anak ni Nebat.
1KI 16:4 Is sakup te pemilya nu he ebpemematey ziyà te inged egkeenen te menge asu, ne is diyà ebpemematey te vevesukà egkeenen te menge tagbis.”
1KI 16:5 Is duma pa he ǥuǥud mehitenged te kedhadì ni Baasha, wey is nevantug he menge vaal zin, wey zuma pa he mibeelan din, ne ingkesurat diyà te Libru he Midsuratan te menge Keguǥuza te menge Hadì te Israel.
1KI 16:6 Ne hein minatey en si Baasha, inleveng sikandin diyà te Tirza. Ne iyan is anak din he si Elah nekeilis kandin te kedhadì.
1KI 16:7 Haazà is lalag te Nengazen he nekesuǥat diyà te ki Baasha wey te pemilya zin, migkaǥi te Nengazen pinaaǥi te ebpeneuven din he si Jehu he anak ni Hanani. Migkaǥi haazà te Nengazen tenged te langun he mezaat he menge vaal ni Baasha ziyà te etuvangan te Nengazen. Midhimu zin he mepauk is Nengazen tenged te menge vaal zin he iring te mibeelan te pemilya ni Jeroboam, wey tenged te kebpenhimetayi zin te tivuuk he pemilya ni Jeroboam.
1KI 16:8 Nehimu he hadì te Israel si Ela he anak ni Baasha hein ike-26 he tuig te kedhadì ni Asa ziyà te Juda. Diyà te Tirza med-ubpà si Ela, ne midhadì sikandin seled te zezuwa he tuig.
1KI 16:9 Dutun he timpu, si Zimri he sevaha te menge upisyal zin wey peremandar te ketengà te menge perekerwahi, duen din pelanu he mezaat diyà te ki Ela. Ne sevaha he andew, nelangut si Ela ziyà te Tirza, ziyà sikandin te valey ni Arza he iyan edumala te turuǥan diyà te Tirza.
1KI 16:10 Midseled dutun te valey si Zimri ne midhimetayan din si Ela. Neulaula heini hein ike-27 he tuig te kedhadì ni Asa ziyà te Juda. Ne iyan si Zimri nekeilis ki Elah te kedhadì.
1KI 16:11 Kebpuun kedhadì ni Zimri, mibpenhimetayan din is tivuuk he pemilya ni Baasha. Ne wazè din midsamà he maama minsan diyà te menge kezuzumahi wey menge emiǥu ni Baasha.
1KI 16:12 Mibpenhimetayan ni Zimri is tivuuk he pemilya ni Baasha he sungkad te migkaǥi te Nengazen pinaaǥi te ebpeneuven din he si Jehu.
1KI 16:13 Nehitavù heini su nepauk is Nengazen he Megbevayà te Israel ki Baasha wey te anak din he si Ela tenged te menge salà he mibeelan dan, he nehimu he hinungdan te kebpekesalà te menge tig-Israel, pinaaǥi te ked-azap dan te zuma he menge ed-ezapen.
1KI 16:14 Is duma pa he ǥuǥud mehitenged te kedhadì ni Ela, wey is langun he mibeelan din, ne ingkesurat diyà te Libru he Midsuratan te menge Keguǥuza te menge Hadì te Israel.
1KI 16:15 Nehimu he hadì diyà te Israel si Zimri hein ike-27 he tuig te kedhadì ni Asa ziyà te Juda. Diyà sikandin med-ubpà te Tirza, piru pitu zà he andew is kedhadì din. Su hein migkampu is menge sundaru te Israel ziyà te uvey te Gibeton he sevaha he inged te menge Filistihanen,
1KI 16:16 netudtulan haazà is menge sundaru he midhimetayan ni Zimri sikan is hadì. Umbe zutun mismu he andew te ziyà sikandan te kampu zan, midhimu zan he hadì te Israel si Omri. Heini si Omri iyan peremandar te menge sundaru te Israel.
1KI 16:17 Ne mid-awà dutun te Gibeton si Omri wey is menge zuma zin he menge tig-Israel, ne midsurung dan is Tirza.
1KI 16:18 Ne hein naahà ni Zimri he naaǥew en haazà is inged, midseled sikandin diyà te melig-en he vahin duen te turuǥan ne mibinsulan din haazà is turuǥan, umbe minatey sikandin.
1KI 16:19 Neulaula heini tenged te menge salà he mibeelan din. Mezaat is ulaula zin diyà te etuvangan te Nengazen, ne mid-iringan din is ulaula ni Jeroboam wey is salà he mibeelan din, he nehimu he hinungdan te kebpekesalà te menge tig-Israel.
1KI 16:20 Is duma pa he ǥuǥud mehitenged te kedhadì ni Zimri, wey is bahin te kedribildi zin, ne ingkesurat diyà te Libru he Midsuratan te menge Keguǥuza te menge Hadì te Israel.
1KI 16:21 Nevahin te zezuwa he grupu is menge etew ziyà te Israel. Is sevaha he grupu egkesuat he iyan edhimuwen he hadì si Tibni he anak ni Ginat, ne is sevaha pa he grupu si Omri is kandan he egkesuatan.
1KI 16:22 Piru edhuna he melig-en is lumelavan ki Omri te lumelavan ki Tibni te anak ni Ginat. Nepatey si Tibni, ne iyan nehimu he hadì si Omri.
1KI 16:23 Nehimu he hadì te Israel si Omri hein ike-31 he tuig te kedhadì ni Asa ziyà te Juda. Midhadì sikandin seled te 12 he tuig; is heenem he tuig dutun te kedhadì din ne ziyà sikandin te Tirza.
1KI 16:24 Ne mibpemasa zin diyà te ki Shemer is buvungan diyà te Samaria te 70 he kilu he pelata, ne mibangun sikandin dutun te inged. Ne migngezanan din haazà is inged he Samaria, he ebpuun te ngazan ni Shemer he iyan nehuna he teǥiǥaked dutun te vuvungan.
1KI 16:25 Mezaat is baal ni Omri ziyà te etuvangan te Nengazen. Lavew pa te nengehuna kandin he hadì is kandin he kebaal te salà.
1KI 16:26 Mid-iringan din is ulaula ni Jeroboam he anak ni Nebat wey is salà he mibeelan din, he nehimu he hinungdan te kebpekesalà te menge tig-Israel, he iyan is ked-azap te zuma he menge ed-ezapen. Pinaaǥi keniyan midhimu zan he mepauk is Nengazen he Megbevayà te Israel.
1KI 16:27 Is duma pa he ǥuǥud mehitenged te kedhadì ni Omri, wey nevantug he menge vaal zin wey zuma pa he mibeelan din, ne ingkesurat diyà te Libru he Midsuratan te menge Keguǥuza te menge Hadì te Israel.
1KI 16:28 Ne hein minatey en si Omri, inleveng sikandin diyà te Samaria. Ne si Ahab he anak din iyan nekeilis kandin te kedhadì.
1KI 16:29 Nehimu he hadì diyà te Israel si Ahab he anak ni Omri hein ike-38 he tuig te kedhadì ni Asa ziyà te Juda. Diyà med-ubpà te Samaria si Ahab ne midhadì sikandan seled te 22 he tuig.
1KI 16:30 Mezaat is ulaula zin diyà te etuvangan te Nengazen, lavew pa is kezaat din te mezaat he mibeelan te menge hadì he nehuna kandin.
1KI 16:31 Ne kurang pa ziyà te kandin is ked-iring te menge salà he mibeelan ni Jeroboam, kekenà, mid-esawa zin si Jezebel he anak ni Hadì Etbaal he tig-Sidon, ne nenilbi sikandin wey mid-azap te ed-ezapen he si Baal.
1KI 16:32 Mibangun sikandin te simbahan wey pemuhatà he para ki Baal ziyà te Samaria.
1KI 16:33 Mibpevaal zaan sikandin te tukud he simbulu te vahi he ed-ezapen he si Ashera. Midhimu zin iyan he mepauk is Nengazen he Megbevayà te Israel, lavew pa is kezaat kayi te mibeelan din te mibeelan te menge hadì he nehuna kandin.
1KI 16:34 Dutun te timpu te kedhadì ni Ahab, mid-umanan benguna ni Hiel he tig-Betel is Jerico. Hein ebengunen din en is menge pundasyun kayi, minatey is kinekekayan he anak din he si Abiram. Ne hein iyan din en ebpeveelan is menge pultahan kayi he inged, iyan en maan minatey is tinengkezan he anak din he si Segub. Neulaula heini is langun sumalà is lalag te Nengazen pinaaǥi ki Josue he anak ni Nun.
1KI 17:1 Ne zuen sevaha he ebpeneuven te Nengazen he iyan ngazan din si Elias. Meǥinged sikandin diyà te Tishbe, he sakup te Gilead. Migkeǥiyan din si Ahab te, “Kayi te etuvangan te uuyag he Nengazen he Megbevayà te Israel he iyan ed-zapen ku, egkeǥiyen ku kenikew he siguradu wazà dehemug etawa uzan he ebpekeuma seled te egkepipira he tuig emun kenà a egkaǥi he ebpekeuma heini.”
1KI 17:2 Dutun migkeǥiyan te Nengazen si Elias te,
1KI 17:3 “Awè ka kayi ne ziyè ka pevayà te zapit te edsilaan ne eles ka ziyà te zal-ug te Kerit he zapit te edsilaan te Wahig he Jordan.
1KI 17:4 Ne zutun ka inum te zal-ug, ne edsuǥuen ku is menge uwak te ked-uwit te egkekaan nu zutun.”
1KI 17:5 Ne midtuman ni Elias haazà is insuǥù kandin te Nengazen. Midhendiyà sikandin te zal-ug te Kerit he zapit te edsilaan te Wahig he Jordan ne zutun sikandin med-ubpàubpà.
1KI 17:6 Ne ed-uwitan sikandin te menge uwak te supas wey usa emun meselem wey mezukilem, ne zutun sikandin ed-inum te zal-ug.
1KI 17:7 Ne hein neuǥet nemezahan haazà is beuǥan su wazè en med-uzan.
1KI 17:8 Ne zutun migkeǥiyan te Nengazen si Elias te,
1KI 17:9 “Hendiyè ka te Zarefat diyà te Sidon, ne zutun ka ubpà su zuen balu he vahi he midsuǥù ku te kebpekaan kenikew.”
1KI 17:10 Umbe, midhendiyà si Elias te Zarefat. Ne hein nekeume en sikandin diyà te pultahan dutun te inged, neehè din is balu he vahi he ebpengayu. Ne migkeǥiyan din haazà is bahi te, “Betbetai a kenikew uwiti te zeisey zà he wahig su wey a mekeinum.”
1KI 17:11 Ne hein egkuwaan en dutun te valu haazà, ne mid-umanan sikandin keǥiyi ni Elias te, “Betbetai a zaan uwiti te zeisey he supas.”
1KI 17:12 Ne migkaǥi haazà is balu te, “Tutuu is egkeǥiyan ku ziyà te etuvangan te Nengazen he Megbevayè nu, he wazè ku en supas. Iyan dà nesamà is sengekemkem he herina ziyà te yehung wey is deisey he lana ziyà te umuy. Umbe ebpengamì a te pira he leǥas he kayu su ed-uwiten ku heini ziyà te valey su edhilutuen ku sikan is nesamà he herina para kedì wey para te anak ku, ne emun egkaamin dey en heini ne egkeumes key en.”
1KI 17:13 Ne migkaǥi si Elias diyà te kandin te, “Kenè ka meseeng. Ulì ka ne veeli nu is migkaǥi nu. Piru hunai a kenikew hilutui te zeisey zà he supas he ebpuun duen te nesamà he herina nu, ne segugunè nu uwita kayi te kediey. Ne emun igkahated nu en kayi te kediey ne hilutù ka zaan te para kenikew wey para te anak nu.
1KI 17:14 Su iyan heini lalag te Nengazen he Megbevayà te Israel, ‘Kenà egkaamin is herina ziyà te yehung nu wey kenà egkaamin is lana ziyà te umuy nu taman te andew he ibpeuzan ku en kayi te tanà.’ ”
1KI 17:15 Ne migenat haazà is bahi ne mibeelan din is nekaǥi ni Elias. Umbe zuen keenen kada andew he para ki Elias wey para zuen te valu wey te anak din.
1KI 17:16 Su layun duen herina zuen te yehung wey layun duen lana zuen te umuy, sumalà is nekaǥi te Nengazen pinaaǥi ki Elias.
1KI 17:17 Dutun te huziyan he timpu nezeruwan sikan is anak duen te vahi. Migerabi is daru zin taman te minatey sikandin.
1KI 17:18 Migkaǥi haazà is bahi ziyà te ki Elias te, “Sikew is suluǥuen te Megbevayà hengkey is ingkepeuki nu kediey? Iyan be inhendini nu su edhimetayan nu is anak ku su silut kedì tenged te menge salè ku?”
1KI 17:19 Midtavak si Elias te, “Ihengkayi nu heeyan is anak nu.” Migkuwa ni Elias haazà is batà puun te iney zin, ne mid-uwit din diyà te ruǥu he ziyà te zivavew, he iyan ubpeey ni Elias. Impehizeǥè din haazà is batà diyà te hizeǥaan din,
1KI 17:20 ne nengumew-umew sikandin te Nengazen, ke sikandin te, “He Nengazen he Megbevayè ku, maan is mibpeuwitan nu te kezeetan heini is balu he ed-ubpaan ku pinaaǥi te kedhimetayi nu te anak din?”
1KI 17:21 Ketetelu lengkevi ni Elias haazà is batà ne nengumew-umew sikandin te Nengazen he ke sikandin te, “He Nengazen he Megbevayè ku, uyaǥa nu heini is batà!”
1KI 17:22 Midtavak te Nengazen is ampù ni Elias, ne neuyaǥan haazà is batà.
1KI 17:23 Ne impenaug ni Elias haazà is batà ne imbeǥey zin diyà te iney zin. Ke si Elias te, “Ahaa nu man is anak nu, uuyag sikandin!”
1KI 17:24 Ne migkaǥi haazà is bahi ziyà te ki Elias te, “Guntaan netuenan ku en he tutuu iyan he suluǥuen ka te Megbevayà, wey tutuu he ebpekidlalag is Nengazen pinaaǥi kenikew.”
1KI 18:1 Tetelu en he tuig he wazà med-uzan. Ne sevaha zutun he timpu, migkaǥi is Nengazen diyà te ki Elias te, “Hipanew ka ne peehè ka ki Ahab, su ibpeuzan ku en.”
1KI 18:2 Umbe, midhendiyà si Elias te ki Ahab. Dutun utew en mepait is bitil ziyà te Samaria.
1KI 18:3 Umbe, impetawag ni Ahab si Obadias he iyan edumala te turuǥan din. (Ne si Obadias, dekelà is kedtahud din te Nengazen.
1KI 18:4 Hein mibpepenhimetayan ni Jezebel is menge ebpeneuven te Nengazen, in-eles ni Obadias is 100 he ebpeneuven diyà te zezuwa he surung; 50 is diyà te kada surung, ne mibeǥayan din sikandan te keenen wey wahig.)
1KI 18:5 Migkaǥi si Ahab diyà te ki Obadias te, “Ebeyaan ta is langun he serebseb wey beuǥan kayi te nasyun tew, su kela ke mekeehè ki te igkekumpey ta te menge kudà wey menge asnu tew, su para kenà mebpematey.”
1KI 18:6 Umbe, mibahin dan is edrigriǥuwan dan dutun te nasyun dan. Umbe midhipanew is kada sevaha kandan pehendiyà te netendek he edrigriǥuwan din.
1KI 18:7 Ne zutun te kedhipanew ni Obadias, neuma zin si Elias. Nekilala zin si Elias umbe midluhud sikandin te kedtahud ki Elias, ne ke sikandin te, “Iyan ke ve heeyan, Datù Elias?”
1KI 18:8 Midtavak si Elias te, “Uya. Genat ka ǥuntaan, ne keǥiyi nu is egalen nu he si Ahab he kayi a.”
1KI 18:9 Piru migkaǥi si Obadias te, “Datù, kenè nu himuwa he ebpemiligru is untung ku ki Ahab, su wazà salà he nehimu ku ziyà te kenikew.
1KI 18:10 Tutuu is migkaǥi ku ziyà te etuvangan te uuyag he Nengazen he Megbevayè nu, he wazà nasyun etawa ginhedian he wazà impehendutun te egalen ku te kebpen-ahà kenikew. Emun egkaǥi is menge pengulu zutun te menge nasyun wey menge ginhedian he wazè ka ziyà te kandan he lugar, ibpepenangdù sikandan ni Ahab he wazè ke zan maahà.
1KI 18:11 Ne ǥuntaan edsuǥuen a kenikew te kedhendiyà te egalen ku te kegkaǥi he kayi ka?
1KI 18:12 Hengkey ke ebpekeiniyug a ǥuntaan ne ed-uwiten ka te Mulin-ulin te Nengazen diyà te lugar he wazè ku metueni? Ne emun ebpekeuma kayi si Ahab he wazè ke en, ne edhimetayan e zin. Piru, datù, nenilbi a te Nengazen puun te menguhed e pa.
1KI 18:13 Wazè nu ve mezineg is mibeelan ku zuen te ebpenhimetayan ni Jezebel he menge ebpeneuven te Nengazen? In-eles ku is 100 he ebpeneuven te Nengazen diyà te zezuwa he surung, 50 is diyà te kada surung, ne mibeǥayan ku sikandan te keenen wey wahig.
1KI 18:14 Ne ǥuntaan edsuǥuen a kenikew te kedhendiyà te egalen ku te kegkaǥi he kayi ka? Siguradu edhimetayan e zin!”
1KI 18:15 Migkaǥi si Elias te, “Ebpenangdù a ziyà te uuyag he Nengazen he Mekeǥeǥehem, he edsilbiyan ku, he ebpaahà a ki Ahab guntaan he andew.”
1KI 18:16 Umbe, midhendiyà si Obadias te ki Ahab ne migkeǥiyan din he zutun si Elias, ne migenat si Ahab te kedhinguma ki Elias.
1KI 18:17 Ne hein neuma ni Ahab si Elias, ke sikandin te, “Iyan ke ves iyan heeyan is ebpendezaat te Israel.”
1KI 18:18 Midtavak si Elias te, “Kenà a iyan ebpendezaat te Israel, kekenà, iyan ka wey is pemilya te amey nu. Su wazè niw tumana is menge suǥù te Nengazen wey mid-azap niw is menge ledawan ni Baal.
1KI 18:19 Ne ǥuntaan, ipetiǥum nu is langun he menge etew te Israel kayi te kedì diyà te Buntud he Carmel. Ne ipehendiyè nu zaan sikan is 450 he ebpeneuven ni Baal wey is 400 he ebpeneuven ni Ashera, he ibpemekaan ni Jezebel.”
1KI 18:20 Umbe, midtiǥum ni Ahab is langun he menge etew ziyà te Israel wey sikan is ebpemeneuven diyà te Buntud he Carmel.
1KI 18:21 Mid-uvey si Elias diyà te menge etew is migkaǥi te, “Sengemenu keluǥayad is kedsunud niw te zezuwa he tuluuwen? Emun iyan Megbevayà is Nengazen ne sunuza niw sikandin piru emun iyan Megbevayà si Baal ne iyan niw sunuza.” Piru wazà medtavak is menge etew.
1KI 18:22 Mid-uman megkaǥi si Elias te, “Iyan e zà nesamà te menge ebpeneuven te Nengazen, piru si Baal 450 is kandin he ebpeneuven.
1KI 18:23 Ne ǥuntaan uwiti key te zezuwa he tudu he vaka. Ne mebpilì dutun is menge ebpeneuven ni Baal te kandan he edlepaan ne penggetaza zan ne id-untud dan haazà diyà te kayu he idtavun, piru kenà haazà edreteman te hapuy is ed-em-emuren he tavun. Ne iyan daan haazà ebeelan ku ziyà te sevaha he vaka; idsavuk ku zaan haazà diyà te tavun he ed-em-emuren ne kenè ku zaan haazà edreteman te hapuy is tavun.
1KI 18:24 Ne pengemuyù kew ziyà te keniyu he ed-ezapen he iyan medretem te hapuy, ne ebpengemuyù a zaan diyà te Nengazen. Ne sikan is edretem te hapuy ziyà te tavun, ne iyan tutuu he Megbevayà.” Ne nekeuyun dutun is menge etew.
1KI 18:25 Dutun migkeǥiyan ni Elias is menge ebpeneuven ni Baal te, “Iyan kew huna su mahabet kew. Pilì kew te sevaha he tudu he vaka ne endama niw heini. Ampù kew ziyà te ed-ezapen niw piru kenè niw retemi te hapuy is tavun niw.”
1KI 18:26 Umbe, migkuwa zuen te menge ebpeneuven ni Baal is tudu he vaka he mid-uwit diyà te kandan, ne mid-andam dan heini. Ne nengemuyù dan diyà te ki Baal puun te meselem taman te meudtu. Igkulahì dan en is lalag te, “He Baal, tevaka key kenikew!” Edsayewsayew en sikandan is edlingutlingut duen te pemuhatà he mibeelan dan. Piru wazà mibeǥey te hangyù dan.
1KI 18:27 Ne hein meudtu en ne ed-un-undahan en sikandan ni Elias he ke sikandin te, “Sigudu kew en pengulahì, su megbevayè man buwa sikandin! Kela ke mezalem is ked-isip-isip din etawa midhimeley, etawa zuen din nehipenawan, etawa nekelipezeng ne kinahanglan he ebpukawen.”
1KI 18:28 Umbe, midsigudu en sikandan megkulahì ne mibpemelian dan en is menge lawa zan te ubpit wey ispada, su iyan haazà neleyaman dan te ebaal, ne nenuravid en is lengesa zan.
1KI 18:29 Midlavey en is meudtu ne edsigudu ǥihapun sikandan ebpengulahì taman te neuma is uras te mahapun he kebpemuhat, piru wazà mibeǥey te hangyù dan.
1KI 18:30 Migkeǥiyan ni Elias is langun he etew zutun te, “Uvey kew zini te kedì.” Ne mid-uvey is menge etew ziyà te kandin. Ne mibpurungan din sikan is pemuhatà he para te Nengazen he nezeetan.
1KI 18:31 Migkuwa sikandin te 12 he menge vatu he iyan ibpesavut din is 12 he tribu he menge anak ni Jacob, sikan is etew he migngezanan te Nengazen ki Israel.
1KI 18:32 Ne mibeelan din haazà is menge vatu he pemuhatà para te Nengazen, ne migkenalan din is peliǥuy zutun te pemuhatà. Haazà is kanal ed-ereǥan te liwazà te saku he venì.
1KI 18:33 Impurung din ipemelastar is tavun dutun te pemuhatà ne midsapù din sikan is baka ne in-untud din duen te tavun. Ne migkeǥiyan din is menge etew te, “Busbusi niw te heepat he umuy te wahig heini is pemuhat wey is tavun din.” Ne hein nepasad dan haazà,
1KI 18:34 migkaǥi si Elias te, “Umani niw vusbusi.” Ne hein nepasad dan te ebusbus, mid-uman megkaǥi si Elias te, “Umani niw vusbusi te iketelu.” Midtuman dan haazà is nekaǥi ni Elias,
1KI 18:35 ne midtudà is wahig peliǥuy zuen te pemuhatà ne nepenù sikan is kanal.
1KI 18:36 Hein timpu en te kebpemuhat, mid-uvey si Elias he ebpeneuven duen te pemuhatà ne nengemuyù sikandin. Ke sikandin te, “Nengazen he Megbevayà ni Abraham, ni Isaac, wey ni Jacob, ipeehè nu is puriba ǥuntaan he andew he iyan ka Megbevayà te Israel ne suluǥuen a kenikew, ne mibeelan ku heini is langun he vaal su iyan insuǥù nu.
1KI 18:37 Iveǥey nu is hangyù ku, Nengazen su para metueni kayi te menge etew he iyan ka Nengazen Megbevayà, ne ibpelikù nu sikandan diyà te kenikew.”
1KI 18:38 Ne segugunà nekeuma is hapuy he ebpuun diyà te Nengazen, ne midtutung dutun te hapuy sikan is pemuhat, sikan is tavun, sikan is menge vatu, wey is tanà, wey mibpemezahan din is wahig duen te kanal.
1KI 18:39 Ne hein naahà haazà te langun he menge etew zutun, midlangkeb dan is egkaǥi te, “Is Nengazen, iyan Megbevayà! Is Nengazen iyan Megbevayà!”
1KI 18:40 Ne segugunà midsuǥù ni Elias is menge etew te, “Dekepa niw is menge ebpeneuven ni Baal. Kinahanglan he wazà ebpekepelaǥuy kandan!” Umbe midakep dan ne mid-uwit sikandan ni Elias diyà te zal-ug he Kishon ne zutun din penhimetayi.
1KI 18:41 Migkeǥiyan ni Elias si Ahab te, “Genat kad ne kaan ke en su ebpekeume en is mereǥes he uzan.”
1KI 18:42 Umbe, migenat si Ahab su egkaan, ne si Elias mulà, midtekezeg diyà te puntur te Carmel is mid-ampù he eduzungul ziyà te tanà.
1KI 18:43 Ne migkeǥiyan din is suluǥuen din te, “Tekezeg ka ne pentawa nu is daǥat.” Ne midtuman haazà duen te suluǥuen. Ne kedlikù din diyà te ki Elias ke sikandin te, “Wazè ku naahà.” Kepipitu sikandin ipelikù ni Elias te kebpantew.
1KI 18:44 Ne hein ikepitu en te kedlikù din, ke sikandin diyà te ki Elias te, “Zuen ku naahà he kivel he iring dà keluag te palad te etew he mibpezivavew he ebpuun te lawed.” Ne migkaǥi si Elias te, “Genat ka, ne keǥiyi nu si Ahab he med-untud en te kerwahi zin ne megenat en mintras kenè pa sikandin egkesaut te uzan.”
1KI 18:45 Ne netegteǥaad mibmerusirem en is hewhewanan tenged te menge kivel. Nengeramag wey mid-uzan te mereǥes, ne mid-untud te kerwahi zin si Ahab ne midhendiyà te Jezreel.
1KI 18:46 Ne zutun, mid-ulinan si Elias te Nengazen! Midlislis din is pendivavew he visti zin ne mibekesan din ne mibpelelaǥuy su edhuna sikandin ki Ahab diyà te Jezreel.
1KI 19:1 Midtudtulan ni Ahab is esawa zin he si Jezebel te langun he mibeelan ni Elias, wey is kebpenhimetayi ni Elias te langun he ebpeneuven ni Baal.
1KI 19:2 Umbe, mibpeuwitan ni Jezebel te lalag si Elias he ed henduen te, “Berakat he zekelà is silut te menge ed-ezapen kediey emun iring kayi he uras keeselem ne kenè ku pa sikew egkepatey, iring te mibeelan nu te menge ebpemeneuven.”
1KI 19:3 Ne nahandek dutun si Elias, umbe mibpelaǥuy sikandin pehendiyà te Beersheba he sakup te Juda, ne intaǥak din dutun is suluǥuen din.
1KI 19:4 Ne midhendiyà mulà sikandin te sibsivayan he senga andew is hipanew zin. Mibpundu sikandin he ebpimpinuu ziyà te lempek te kayu, ne mid-ampù he mebpatey en sikandin. Migkaǥi sikandin te, “Subre en heini Nengazen! Kuwaa nu en is untung ku, kenà a zeyzey te menge kepuun ku.”
1KI 19:5 Ne midhizeǥà sikandin duen te sihung te kayu. Ne nekelipezeng sikandin. Ne zutun dutun duen belinsuǥuen he migunggel kandin he migkaǥi te, “Enew ka wey megkaan.”
1KI 19:6 Ne kedtengteng din neehè din diyà te ulunan din is supas he midlutù pinaaǥi te midlangga he vatu wey wahig he neketaǥù diyà te umuy. Migkaan sikandin wey mid-inum ne mid-uman medhizeǥa.
1KI 19:7 Midlikù sikan is belinsuǥuen te Nengazen ne migunggel zin en maan si Elias duma is kegkaǥi te, “Enew ka wey megkaan, su meziyù pa is ebpeveyaan nu.”
1KI 19:8 Umbe, mid-enew si Elias ne migkaan wey mid-inum. Ne nekeveǥey kandin te zesen haazà is migkaan din, ne midhipanew sikandin seled te 40 he andew wey 40 he kezukileman, taman te nekeuma sikandin diyà te Horeb, he vuntud te Megbevayà.
1KI 19:9 Midseled sikandin diyà te sevaha he surung ne zutun sikandin medlipezeng hein mezukilem en. Dutun migkaǥi is Nengazen diyà te ki Elias te, “Hengkey is baal nu kayi?”
1KI 19:10 Midtavak sikandin te, “Nengazen he Megbevayà he Mekeǥeǥehem, metinumanen a he nenilbi kenikew. Piru inselikwey te menge Israilihanen is paaǥi nu te kebpekid-uyun kandan, midezeetan dan is menge pemuhatà para kenikew, wey mibpenhimetayan dan is menge ebpeneuven nu. Ne sebsevaha ku zà te nesamà, piru edtinguhè dan daan te kedhimatey kedì.”
1KI 19:11 Migkaǥi is Nengazen te, “Gawas ka ne hitindeg ka ziyà te etuvangan ku ziyà te puntur kayi te vuntud, su edsaǥad a.” Ne zutun nengeramag te utew mevandes he nekeǥadgad te menge vuntud wey nekelekat te menge vatu, piru wazà dutun te keramag is Nengazen. Ne hein mid-engked is keramag, midlinug piru wazà gihapun is Nengazen dutun te linug.
1KI 19:12 Ne hein mid-engked is linug, duen hapuy he neretem, piru wazà gihapun is Nengazen dutun te hapuy. Ne hein wazè en haazà is hapuy, duen utew menaney he laǥeng he henduen dà te naasnaas.
1KI 19:13 Ne hein nezineg haazà ni Elias, midtembunan din is buked din te samput ne migawas sikandin ne midhitindeg diyà te vèbà dutun te surung. Ne zutun duen laǥeng he migkaǥi te, “Elias, hengkey is baal nu kayi?”
1KI 19:14 Midtavak sikandin te, “Nengazen he Megbevayà he Mekeǥeǥehem, metinumanen a he nenilbi kenikew. Piru inselikwey te menge Israilihanen is paaǥi nu te kebpekidepità kandan, midezeetan dan is menge pemuhatà para kenikew, wey mibpenhimetayan dan is menge ebpeneuven nu. Ne sebsevaha ku zà is nesamà, ne edtinguhè dan daan te kedhimatey kedì.”
1KI 19:15 Migkaǥi is Nengazen diyà te kandin te, “Likù ka ziyà te imbayè nu, ne hendiyè ka te sibsivayan te Damascus. Ne emun ebpekeuma kad, ne edlenahan nu si Hazael he tuus he iyan en sikandin hadì diyà te Aram.
1KI 19:16 Lenahi nu zaan si Jehu he anak ni Nimshi su iyan sikandin hadì te Israel wey si Elisha he anak ni Shafat, he tig-Abel Mehola, su iyan sikandin ebpeneuven ku he ebpekeilis kenikew.
1KI 19:17 Ebpenhimetayan ni Hazael is ebpemen-azap ki Baal. Is ebpekepelaǥuy kandin, ne ebpenhimetayan ni Jehu, ne is ebpekepelaǥuy ki Jehu, ne si Elisha is ebpenhimatey kandan.
1KI 19:18 Piru edsemaan ku is 7,000 he menge Israilihanen he wazà medluhud wey medhazek te ledawan ni Baal.”
1KI 19:19 Ne migenat si Elias ne neehè din si Elisha he anak ni Shafat is ed-eradu. Duen 11 he paris te menge vaka ziyà te egkehunaan ni Elisha he id-eradu te menge zuma zin, ne iyan sikandin ed-eradu te ike-12 he paris. Mid-uvayan sikandin ni Elias, ne impesinabley ni Elias ki Elisha is samput ni Elias.
1KI 19:20 Mid-ewaan ni Elisha is menge vaka zin su midal-as din si Elias. Ne migkeǥiyan din te, “Edhezekan ku zep-a si amà wey si inà te kebpenemilit diyà te kandan, ne kegkepasad eduma a kenikew.” Midtavak si Elias te, “Uya, piru kenè nu lipati is mibeelan ku ziyà te kenikew.”
1KI 19:21 Midlikù si Elisha, su migkuwa zin is menge vaka zin ne mibpenlapè din. Ne iyan intavun din te kedhilutua zutun te menge vaka is menge himan din te ked-eradu. Ne hein nelutù en haazà, mibeǥayan din sikan is menge zuma zin te ed-eradu ne migkaan sikandan is langun. Ne zutun mibpekidume en sikandin ki Elias su ed-uǥup kandin.
1KI 20:1 Dutun he timpu midtiǥum ni Hadì Ben Hadad he hadì te Aram is langun he menge sundaru zin su wey zan mekepekidtebek. Miduma kandan is 32 he menge hadì he edlavan ki Ben Hadad, he zuen dan menge kudà wey menge kerwahi. Ne migenat dan su edsurung dan diyà te Samaria.
1KI 20:2 Mibpesuǥù si Ben Hadad te menge menunudtulà diyà te Samaria su wey zan metudtul heini he lalag diyà te ki Hadì Ahab he hadì te Israel: “Iyan heini migkaǥi ni Ben Hadad:
1KI 20:3 ‘Is menge pelata nu wey menge vulawan nu ne kediey, ne is menge esawa nu wey is mevurut he menge anak nu ne kediey zaan.’ ”
1KI 20:4 Ne is tavak he impetudtul ni Hadì Ahab edhenduen te, “Uyun a te nekaǥi nu, Mahal he Hadì, he gaked a kenikew wey is langun he kediey.”
1KI 20:5 Mid-uman medlikù haazà is menge menunudtulà diyà te ki Ahab he ke sikandan te, “Iyan heini menge lalag ni Ben Hadad: ‘Migkaǥi ad diyà te kenikew he iveǥey nu kedì is menge pelata nu, menge vulawan nu, menge esawa nu, wey menge anak nu.
1KI 20:6 Ne keeselem te iring kayi he uras, ibpehendiyan ku is menge upisyal ku su wey zan mesusi is turuǥan nu wey valey te menge upisyal nu. Egkuwaan dan is langun he ed-isipen nu he menge mahalen.’ ”
1KI 20:7 Impetawag te hadì te Israel is langun he ebpemendumala te Israel ne migkeǥiyan din te, “Ebpen-ahà iyan te paaǥi si Ben Hadad he mezezeeti kiw zin. Su ibeǥey ku en man is mibuyù din he iyan is: menge esawa ku, menge anak ku, menge pelata ku, wey vulawan ku.”
1KI 20:8 Ne midtavak is ebpemendumala wey is duma he menge etew te, “Kenè nu en iveǥey is ebuyuen din.”
1KI 20:9 Umbe, migkeǥiyan ni Ahab haazà is menge menunudtulà ni Ben Hadad te, “Keǥiya niw ziyà te mahal he hadì he ibeǥey ku kandin is nehuna he mibuyù din he iyan is menge pelata ku, menge vulawan ku, menge esawa ku, wey menge anak ku, piru kenè ku igkeveǥey heini is ikezuwa he mibuyù din.” Mid-ulì haazà is menge menunudtulà ne migkaǥi zan diyà te ki Ben Hadad is tavak ni Ahab.
1KI 20:10 Mibpeuman mebpeuwit te lalag si Ben Hadad diyà te ki Ahab he edhenduen te, “Berakat he purungi a siluti te menge ed-ezapen emun kenè ku egkepurung egkezezeeti is Samaria. Edsigureduwen ku he wazà egkesamà minsan eliyavuk he ereg he egkaakup te menge sundaru ku.”
1KI 20:11 Midtavak is hadì te Israel te, “Kegiyi niw sikandin he is sundaru he ebpengandam pa para te tebek kenà ereg he ebpehambug iring te sundaru he nekepasad en he ebpekidtebek.”
1KI 20:12 Nezawat ni Ben Hadad haazà is tavak ni Ahab dutun te ed-inum sikandin wey is duma zin he menge hadì diyà te tulda zan. Ne mibmendaran din is menge etew zin he mebpengandam su edsurung dan diyà te Samaria. Ne midtuman dan haazà.
1KI 20:13 Ne zuen, nekeuma he ebpeneuven te Nengazen diyà te ki Ahab he ke sikandin te, “Iyan heini lalag te Nengazen: ‘Neehè nu ve is utew mahabet he menge sundaru ni Ben Hadad? Piru ibpezaag ku sikandan kenikew ǥuntaan he andew, ne egketuenan nu he iyan a Nengazen.’ ”
1KI 20:14 Mid-insà si Ahab te, “Hentei is edaag kandan?” Midtavak haazà is ebpeneuven te, “Iyan heini lalag te Nengazen: ‘Is betan-en he menge sundaru, he zizalem te gehem te menge gubirnedur ziyà te menge prubinsya, iyan ebpekezaag kandan.’ ” Mid-insà si Ahab te, “Hentei is edhuna edsurung?” Midtavak haazà is ebpeneuven te, “Iyan kew.”
1KI 20:15 Umbe, impetawag ni Ahab sikan is betan-en he menge sundaru, he zizalem te keǥehem te menge gubirnedur ziyà te menge prubinsya–232 sikandan is langun wey elin midtiǥum din is duma pa he menge Israilihanen 7,000 sikandan is langun.
1KI 20:16 Meudtu is kedsurung dan, dutun te ebpemelelangut diyà te tulda zan si Ben Hadad wey sikan is 32 he menge hadì he edlavan kandin.
1KI 20:17 Iyan midhuna medsurung sikan is betan-en he menge sundaru. Dutun he timpu, is menge midsuǥù ni Ben Hadad te kebpeniid diyà te Samaria migkaǥi ziyà te kandin te, “Duen menge sundaru he ebpemuun diyà te Samaria he edhengkayi.”
1KI 20:18 Migkaǥi si Ben Hadad te, “Emun hengkey is idhendini zan, emun kebpekidtebek etawa kebpekidhusey, dekepa niw sikandan.”
1KI 20:19 Iyan nengegalen te menge Israilihanen sikan is betan-en he menge peremandar ne mibpenelukun kandan is menge sundaru,
1KI 20:20 ne midhimetayan te kada sevaha kandan is menge kuntada zan. Umbe nemelaǥuy is duma he menge sundaru pehendiyà te Aram, ne midal-as sikandan te menge Israilihanen. Piru si Ben Hadad wey is duma he menge zuma zin nekepelaǥuy he ed-untud te kudà.
1KI 20:21 Iyan heeyan sikan is kedsurung eni Hadì Ahab te Israel. Mahabet he menge Aramihanen is mibpenhimetayan dan, ne mibpenguwa zan is menge kudà wey menge kerwahi te menge Aramihanen.
1KI 20:22 Ne kedlavey zutun, mid-uvey ziyà te hadì te Israel is ebpeneuven ne ke sikandin te, “Pengandam ka wey mebpurung mebpelanu, su ed-uman edsurung is hadì diyà te Aram dutun te sunud he tuig.”
1KI 20:23 Ne ziyà mulà te menge Aramihanen, sikan is hadì diyà te Aram migkeǥiyan te menge upisyal zin te, “Is megbevayà te menge Israilihanen, megbevayà diyà te menge vuvungan, umbe nekezaag dan. Piru emun diyè tew sikandan edtebeka te menge suǥud, siguradu he egkezaag tew sikandan.
1KI 20:24 Ne kinahanglan he ebeelan nu heini: Iawè nu sikan is 32 he menge hadì diyà te ketengdanan dan ne iyan iilis nu kandan sikan is menge peremandar.
1KI 20:25 Ne pekehebeta nu is menge sundaru nu, menge kudè nu, wey menge kerwahi nu he iring kahabet duen te nehuna he naawà diyà te kenikew. Ne zutun ebpekidtebek kiw te menge Israilihanen diyà te menge suǥud, ne siguradu egkezaag tew sikandan.” Mibpezumazuma zutun si Ben Hadad, ne mibeelan din heini.
1KI 20:26 Ne zutun te sunud he tuig, midtiǥum ni Ben Hadad is menge Aramihanen, ne midhendiyè dan te inged he Afek su ebpekidtebek dan te menge Israilihanen.
1KI 20:27 Midtiǥum daan is menge Israilihanen wey in-andam dan is menge kinahanglan dan ne migenat dan is ebpekidtebek te menge Aramihanen. Ne atbang is kampu zan te kampu te menge Aramihanen. Piru henduen dà sikandan te dezuwa he dezeisey he layud te menge kambing emun idhindeg te menge Aramihanen he nekeeneb diyà te menge suǥud.
1KI 20:28 Midhendiyà is suluǥuen te Megbevayà te hadì diyà te Israel ne migkaǥi te, “Iyan heini lalag te Nengazen: Egkeisip te menge Aramihanen he megbevayà a ziyà te menge vuvungan ne kenà diyà te menge suǥud. Umbe ebpengelinteuwan ku he mezaag nu is utew mahabet he menge sundaru zan su para metueni niw he iyan a Nengazen.”
1KI 20:29 Migkampu is menge Israilihanen wey is menge Aramihanen he neked-atbang seled te pitu he andew. Ne hein ikepitu en he andew midtebek en sikandan. Ne senga andew zà ne nekepatey en is menge Israilihanen te 100,000 he menge sundaru he menge Aramihanen.
1KI 20:30 Ne is nesamà he menge Aramihanen nemelaǥuy ziyà te inged he Afek, ne zutun netempaǥan te verengbeng dutun te inged is 27,000 kandan. Mibpelaǥuy zaan dutun si Ben Hadad, ne mid-eles diyà te kineselezan he ruǥu te valey.
1KI 20:31 Migkeǥiyan sikandin te menge upisyal zin te, “Nezineg dey he hihizuwen kun is menge hadì te Israel. Umbe edhendiyè key te hadì te Israel ne ebpekevavè key pinaaǥi te kebivisti te saku wey kebagkes te pisì diyà te menge ulu zey. Ne kela ke kenè ke zin ded himetayi.”
1KI 20:32 Umbe, mibivisti sikandan te saku wey mibagkes dan te pisì is ulu zan. Ne midhendiyè dan te hadì te Israel ne ke sikandan te, “Si Ben Hadad he edtahud kenikew ebpehizuhizu he ke egkehimu kenè nu sikandin himetayi.” Midtavak haazà is hadì te, “Uuyag pe bes sikandin? In-iring ku sikandin te suled ku.”
1KI 20:33 Mid-isip dutun te menge upisyal he tuus haazà is tavak te hadì he ibeǥey zin is hangyù dan, umbe segugunà sikandan migkaǥi te, “Uya, si Ben Hadad ne henduen be te suled nu en.” Migkaǥi haazà is hadì te, “Dumaha niw sikandin dini te kedì.” Ne hein nekeuma si Ben Hadad, ne impeuntud sikandin ni Ahab te kerwahi zin.
1KI 20:34 Migkaǥi si Ben Hadad diyà te ki Ahab te, “Id-ulì ku ziyà te kenikew is menge inged he mid-aǥew te amey ku ziyà te amey nu. Ne egkehimu ke edtukud ka te menge tindahan diyà te Damascus, iring te mibeelan te amey ku ziyà te Samaria.” Migkaǥi si Ahab te, “Edhimuwen ta heini he sevaha he kesebutan, ne ibpaawè ku sikew.” Umbe mid-uyun sikandan, ne hein nepasad impeǥenat sikandin ni Ahab.
1KI 20:35 Dutun he timpu, midsuǥù te Nengazen is sevaha he etew he sevaha te menge ebpeneuven, te kegkaǥi ziyà te zuma zin te, “Pesekiti a kenikew.” Piru wazà mebpezumazuma haazà is etew.
1KI 20:36 Umbe, migkeǥiyan din haazà is etew te, “Geina te wazè nu tumana is suǥù te Nengazen, edhimetayan ka te erimaung dutun te ked-ulì nu puun dini.” Ne hein ked-ulì dutun te etew, naahà sikandin te erimaung ne midhimetayan sikandin duen te erimaung.
1KI 20:37 Duen en maan naahà dutun te ebpeneuven he sevaha he etew ne ke sikandin en maan te, “Pesekiti a kenikew.” Ne mibpesekitan dutun te etew ne nepelian sikandin.
1KI 20:38 Ne migenat haazà is ebpeneuven, ne midhitindeg diyà te zalan, su edteǥazan din is hadì te Israel he ebayà dutun. Mibpeuvag-uvag sikandin pinaaǥi te kebpezeket te bindahi ziyà te menge mata zin su para kenà sikandin mekilala.
1KI 20:39 Ne kebayà duen te hadì mibensaǥan sikandin dutun te ebpeneuven te, “Datù, nekezuma a te tebek, ne zuen etew he mid-uwit din kayi te kediey is bihag ne ke sikandin te, ‘Bentayi nu heini he etew. Emun ebpekepelaǥuy sikandin, edhimetayan ka etawa ibpevayad ka te 35 he kilu he pelata.’
1KI 20:40 Ne hein nepulikì a te zuma he vuluhaten ne nekepelaǥuy haazà is bihag.” Migkaǥi haazà is hadì te, “Ereg ka he edsilutan te sungkad te migkaǥi nu.”
1KI 20:41 Ne midlekat duen te ebpeneuven sikan is bindahi ziyà te menge mata zin, ne nekilala sikandin dutun te hadì te Israel he sevaha zuen te menge ebpeneuven.
1KI 20:42 Migkeǥiyan din haazà is hadì te, “Iyan heini lalag te Nengazen: Tenged te impaawè nu sikan is etew he migkaǥi ku he ereg he edhimetayan, ne iyan ka edhimetayan he ilis din, ebpenhimetayan daan is menge etew nu he ilis te menge etew zin.”
1KI 20:43 Mid-ulì haazà is hadì te Israel ziyà te turuǥan din diyà te Samaria he mibmezaat is gehinawa zin wey nepauk.
1KI 21:1 Ne kegkeipus dutun he menge hitavù, iyan en maan heini nehitavù. Duen sevaha he etew he tig-Jezreel he iyan ngazan din si Nabot. Duen pemuleey zin te paras diyà te Jezreel he avey te turuǥan ni Hadì Ahab he hadì te Samaria.
1KI 21:2 Duen timpu he migkaǥi si Ahab diyà te ki Nabot te, “Tenged te uvey ziyà te turuǥan ku is pemuleey nu te paras, iveǥey nu en lang kedì su edhimuwen ku he pemuleey te menge edlumbayen. Ne edliwaan ku te edhuna he meupiya he pemuleey te paras, wey emun egkesuat ka ne ebeyazan ku te ereg he vali zin.”
1KI 21:3 Piru midtavak si Nabot te, “Kenà idtuǥut te Nengazen ke ibeǥey ku kenikew is kevilin ku te menge kepuun ku.” Mid-ulì si Ahab he mibmezaat is gehinawa zin wey nepauk tenged te intavak ni Nabot kandin. Midhizeǥà sikandin he edsinaru ziyà te elavat, ne kenà egkaan.
1KI 21:5 Ne midhendiyà te kandin is esawa zin he si Jezebel ne mid-insà te, “Maan is egkeseeng ka? Maan is kenè ka egkaan?”
1KI 21:6 Midtavak din haazà is esawa zin te, “Migkeǥiyan ku si Nabot he ebpemesahan ku is pemuleey zin te paras, wey edliwaan ku te edhuna pa he meupiya he pemuleey te paras emun egkesuatan din, piru wazà sikandin mebpezumazuma.”
1KI 21:7 Migkaǥi si Jezebel te, “Kenè be hadì ka te Israel? Enew ka wey megkaan! Lipey ka su ibeǥey ku kenikew is pemuleey te paras ni Nabot he tig-Jezreel.”
1KI 21:8 Umbe, midsurat si Jezebel pinaaǥi te ngazan ni Ahab, ne midtetakan din heini te tatak te hadì, ne impeuwit din diyà te ebpemendumala wey zuma pa he menge upisyal te inged he ed-ubpaan ni Nabot.
1KI 21:9 Ne iyan heini netaǥù dutun te surat din: “Tiǥuma niw is menge etew para te kebpuasa, ne ipepinuu niw si Nabot diyà te egkehunaan te menge etew.
1KI 21:10 Ne ipepinuu niw ziyà te etuvangan din is dezuwa he menge buguy para isumbung dan sikandin he mibpenrewakan din is Megbevayà wey is hadì. Ne uwita niw sikandin diyà te gawas te inged ne penulenga niw te vatu taman te ebpatey.”
1KI 21:11 Ne mibeelan te ebpemendumala wey zuma pa he menge upisyal is migkaǥi ni Jezebel ziyà te kandan dutun te surat.
1KI 21:12 Midtiǥum dan is menge etew para mekepuasa ne impepinuu zan si Nabot diyà te egkehunaan dutun te menge etew.
1KI 21:13 Ne zutun dutun duen nekeuma he dezuwa he menge buguy ne mibpinuu zan diyà te etuvangan ni Nabot, ne insumbung dan sikandin diyà te etuvangan te menge etew. Ke sikandan te, “Mibpenrewakan ni Nabot is Megbevayà wey is hadì.” Umbe mid-uwit dan si Nabot diyà te ǥawas te inged ne mibpenuleng dan te vatu taman te kebpatey zin.
1KI 21:14 Ne mibpesuratan dan si Jezebel he mibpenuleng dan en te vatu si Nabot ne minatey en.
1KI 21:15 Ne kegketueni ni Jezebel he minatey en si Nabot, migkeǥiyan din si Ahab te, “Minatey en si Nabot. Umbe genat ka ne engkena nu en sikan is pemuleey ni Nabot te paras he kenè din ibelegyà diyà te kenikew.”
1KI 21:16 Kegkezineg ni Ahab he minatey en si Nabot, segugunà sikandin migenat is ed-angken te pemuleey ni Nabot te paras.
1KI 21:17 Ne zutun migkaǥi is Nengazen diyà te ki Elias he tig-Tishbe te,
1KI 21:18 “Genat ka, hendiyè ka te ki Hadì Ahab he hadì te Israel, he midhadì diyà te Samaria. Diyà sikandin te pemuleey ni Nabot te paras su egkesuatan din heini te ed-angken.
1KI 21:19 Keǥiyi nu sikandin te iyan heini lalag ku: ‘Nepasad nu te edhimatey is etew, ne elin nu en egkuwaan is tanè din? Tenged te mibeelan nu ne edilaan te menge asu is lengesa nu ziyà te ǥawas te inged, iring te kedilai zan diyà te ǥawas te inged te lengesa ni Nabot.’ ”
1KI 21:20 Ne hein naahà ni Ahab si Elias ke sikandin te, “Neehè e ves te kuntada ku!” Midtavak si Elias te, “Uya, midhengkayi a te kenikew su geina te iyan nu zà layun egkesuatan is kebaal te mezaat diyà te etuvangan te Nengazen!
1KI 21:21 Ne iyan heini egkeǥiyen te Nengazen diyà te kenikew: ‘Edezeetan ku sikew. Ebpenhimetayan ku is langun he kevuwazan nu he menge maama, uripen man etawa kenà.
1KI 21:22 Edezeetan ku is pemilya nu iring te mibeelan ku ziyà te pemilya ni Jeroboam he anak ni Nebat, wey te pemilya ni Baasha he anak ni Ahia, su ǥeina te midhimu nu he mepauk a, wey iyan ka nehimu he hinungdan te kebpekesalà te menge tig-Israel.’
1KI 21:23 “Ne vahin ki Jezebel, migkaǥi is Nengazen te egkeenen sikandin te menge asu ziyà te kutà te Jezreel.
1KI 21:24 Is sakup te pemilya nu he ebpemematey ziyà te inged ne egkeenen te menge asu, ne is diyà ebpematey te pemuleey ne egkeenen te menge tagbis.”
1KI 21:25 (Wazà etew he mibpeveyveyaan din is keugelingen din pinaaǥi te kebaal te mezaat diyà te etuvangan te Nengazen te iring kezaat te mibeelan ni Ahab, tenged te ked-iniyata kandin te esawa zin he si Jezebel.
1KI 21:26 Mid-ulaula sikandin te utew mezaat he vaal pinaaǥi te ked-azap te zuma he menge ed-ezapen, iring te mibeelan te menge Amorihanen he midsegseg te Nengazen puun kayi he tanà hein nekeuma is menge Israilihanen.)
1KI 21:27 Kegkezineǥa ni Ahab dutun te migkaǥi ni Elias, mibindas din is bisti zin ne mibivisti te saku, ne mibpuasa. Midlipezeng sikandin he bivisti te saku wey midhiphipanew is neseeng.
1KI 21:28 Ne migkeǥiyan te Nengazen si Elias he tig-Tishbe,
1KI 21:29 “Neehè nu ve ke sengemenu is kebpekevavà ni Ahab diyà te etuvangan ku? Tenged te kebpekevavè din, kenè ku ibpaaǥi is kezeetan dutun te kandin he timpu, ibpaaǥi ku is kezeetan diyà te pemilya zin emun iyan en edhadì is anak din.”
1KI 22:1 Wazà mebpetebekà is menge Aramihanen wey menge Israilihanen seled te tetelu he tuig.
1KI 22:2 Ne hein iketelu he tuig mibpekid-ahà si Hadì Jehoshafat he hadì te Juda ki Hadì Ahab he hadì te Israel.
1KI 22:3 Migkeǥiyan ni Ahab is menge upisyal zin te, “Netuenan niw he kenitew is Ramot Gilead. Piru maan is wazè kiw medhimu te paaǥi he mahawì tew heini ziyà te hadì te Aram?”
1KI 22:4 Umbe, mid-insaan ni Ahab si Jehoshafat te, “Eduma ke ve kenami te kebpekidtebek diyà te Ramot Gilead?” Ne midtavak ni Jehoshafat si Ahab te, “Andam a he eduma kenikew, wey andam a zaan he kebpeǥamit kenikew te menge sundaru ku wey menge kudè ku.
1KI 22:5 Piru ed-insaan ta zep-a is Nengazen ke hengkey is kandin he egkekaǥi.”
1KI 22:6 Umbe, impetawag ni Ahab is menge ebpeneuven–400 sikandan langun, ne mid-insà te, “Egenat e ve te kebpekidtebek diyà te Ramot Gilead etawa kenà?” Midtavak dan te, “Genat kad, su ebpengelinteuwan te Nengazen he mekezaag ka!”
1KI 22:7 Piru mid-insà si Jehoshafat te, “Wazè en be zuma kayi he ebpeneuven te Nengazen he egkepenginginsaan ta.”
1KI 22:8 Midtavak si Ahab ki Jehoshafat te, “Duen pa sevaha he egkepenginginsaan ta ke hengkey is egkekaǥi te NENGAZEN–si Micaya he anak ni Imla. Piru egkeepesan ku sikandin su wazà meupiya he menge tagnè din para kedì, kekenà, pudu zà kenà meupiya.” Midtavak si Jehoshafat te, “Kenè ka ereg he egkaǥi te iring keniyan.”
1KI 22:9 Umbe, impetawag ni Ahab is sevaha te menge upisyal zin ne migkeǥiyan din te, “Gègaani niw zumaha kayi si Micaya he anak ni Imla.”
1KI 22:10 Dutun he timpu, si Hadì Ahab he hadì te Israel wey si Hadì Jehoshafat he hadì te Juda, mibivisti zan te visti te hadì, he ebpinuu is kada sevaha kandan diyà te pinuuwè din te kedhadì diyà te uvey te gunasà he uvey te pultahan te Samaria. Ne ebpemineǥen dan is egkeǥiyen te menge ebpeneuven.
1KI 22:11 Si Zedekia he sevaha te menge ebpeneuven, he anak ni Kenaana, mibaal te mid-iring te sungey he putew. Ke sikandin te, “Iyan heini migkaǥi te Nengazen: Pinaaǥi kayi he sungey, edezeetan nu, Hadì Ahab, is menge Aramihanen taman te egkaamin sikandan.”
1KI 22:12 Iyan daan haazà migkaǥi te langun he menge ebpeneuven. Migkaǥi sikandan te, “Surunga nu is Ramot Gilead, Hadì Ahab ne ebpekezaag ka, su ibeǥey heini kenikew te Nengazen.”
1KI 22:13 Ne sikan mulà is midsuǥù te ked-angey ki Micaya ne migkaǥi te, “Is langun he menge ebpeneuven ne neked-iring is menge lalag dan he iyan ebpekezaag is hadì, umbe iyan daan heini ereg he egkeǥiyen nu.”
1KI 22:14 Piru midtavak si Micaya te, “Mibpenangdù a ziyà te uuyag he Nengazen he iyan dà egkeǥiyen ku is ibpekaǥi zin kedì.”
1KI 22:15 Kebpekeuma ni Micaya ziyà te ki Hadì Ahab ne mid-insaan sikandin dutun te hadì te, “Micaya, edsurungen dey ve is Ramot Gilead etawa kenà?” Midtavak si Micaya te, “Surunga niw ne ebpekezaag kew, su ibeǥey heeyan kenikew te Nengazen.”
1KI 22:16 Piru migkaǥi haazà is hadì diyà te ki Micaya te, “Kepipira ku ves sikew ibpepenangdù para keǥiya nu kayi te kediey is tutuu pinaaǥi te ngazan te Nengazen?”
1KI 22:17 Umbe, migkaǥi si Micaya te, “Neehè ku pinaaǥi te mibpelewasan kedì he is menge Israilihanen ne nekedsusuwey ziyà te menge vuvungan he iring te menge kerehidu he wazà ed-elima kandan, ne migkaǥi is Nengazen te, ‘Heini he menge etew ne wazè dan en pengulu. Ipeulì sikandan he melinawen.’ ”
1KI 22:18 Ne migkeǥiyan ni Hadì Ahab si Jehoshafat te, “Umbe man migkaǥi ku en kenikew he wazà meupiya he tagnè din bahin kedì, kekenà, pudu zà mezaat.”
1KI 22:19 Migkaǥi pa si Micaya te, “Pemineǥa nu is lalag te Nengazen! Neehè ku is Nengazen he ebpimpinuu ziyà te pinuuwè din te kedhadì, ne zuen menge ilengiten he menge linimbag he ebpemenhitindeg diyà te egkekewanan wey egkeǥivang din.
1KI 22:20 Ne migkaǥi is Nengazen te, ‘Hentei is ed-akal ki Ahab su para medsurung sikandin diyà te Ramot Gilead su para mepatey sikandin?’ Ne nekedseselekawà is tavak dutun te ilengiten he menge linimbag.
1KI 22:21 Ne netegteǥaad duen mulin-ulin he mid-uvey ziyà te Nengazen he egkaǥi te, ‘Iyan a ed-akal kandin.’
1KI 22:22 Ne mid-insà is Nengazen, ‘Te, hengkey he paaǥi?’ Midtavak sikandin te, ‘Egenat a ne ibpetarùtarù ku is menge ebpeneuven he sakup ni Ahab.’ Migkaǥi is Nengazen te, ‘Genat ka ne iyan heeyan beeli nu. Ebmezeeǥen ka te ked-akal kandin.’ ”
1KI 22:23 Impelaus ni Micaya is egkeǥiyen din, ke sikandin te, “Iyan heeyan neulaula. Midsuǥù te Nengazen is mulin-ulin para terterui zin is menge ebpeneuven he sakup nu. Su ketau te Nengazen he mezeeti ka.”
1KI 22:24 Ne mid-uvey si Zedekia ziyà te ki Micaya ne midtabpì din. Ne migkaǥi si Zedekia te, “Maan is ibpesavut nu he mid-awà kayi te kediey is Mulin-ulin te Nengazen ne nekidlalag kenikew?”
1KI 22:25 Midtavak si Micaya te, “Egketuenan nu heini zutun te andew he egkezaag kew en te tebek ne ed-eles ka ziyà te kineselezan he ruǥu te valey.”
1KI 22:26 Mibmandar si Hadì Ahab te, “Dekepa niw si Micaya ne ilikù niw ziyà te pengulu te inged dey wey ziyà te ki Joash he anak ku.
1KI 22:27 Ne keǥiyi niw sikandan he iyan suǥù ku is ebpirisuwen heini he etew, ne supas dà wey wahig is ibeǥey ziyà te kandin taman te kebpekelikù ku puun te tebek he wazà mekeizi.”
1KI 22:28 Migkaǥi si Micaya te, “Emun ebpekelikù ka he kenà egkekeizan, ne wazà heeyan keǥiya te Nengazen pinaaǥi kedì.” Ne zutun migkeǥiyan ni Micaya is langun he menge etew zutun te, “Tentenuzi niw heini is migkaǥi ku!”
1KI 22:29 Ne midsurung diyà te Ramot Gilead si Hadì Ahab he hadì te Israel wey si Hadì Jehoshafat he hadì te Juda.
1KI 22:30 Migkaǥi si Ahab diyà te ki Jehoshafat te, “Emun timpu en te tebek kenà a ebpekilala he iyan a hadì, piru sikew mulà bivisti ka te visti te hadì!” Umbe mibpeuvag-uvag si Ahab, ne mibpekidtebek sikandan.
1KI 22:31 Dutun he timpu, mibmandù is hadì te Aram diyà te 32 he menge peremandar zin te ebpemen-untud te kerwahi te, “Kenè niw etekiya is minsan hentei, kekenà, iyan dà is hadì te Israel.”
1KI 22:32 Hein naahà dutun te menge peremandar si Jehoshafat, ne kunaan dan ke iyan en sikan is hadì te Israel, umbe midtebek dan en sikandin. Piru hein nengulahì si Jehoshafat,
1KI 22:33 netuenan duen te menge peremandar he kenè bes iyan sikan is hadì te Israel, umbe mid-engkezan dan te edal-as.
1KI 22:34 Piru hein edtulung en ebpemanà is sevaha he sundaru te Aramihanen dutun te menge sundaru te Israel, ne neserab mesuǥat si Hadì Ahab he hadì te Israel ziyà te midtemuwaayan te pengalang din diyà te kumeng. Migkeǥiyan ni Hadì Ahab haazà is ed-uwit te kerwahi zin te, “Ipekeziyù a kayi te tebek! Su nepelian a.”
1KI 22:35 Utew en meinit is tebek dutun he andew, ne is hadì te Israel ne midsandig dà dutun te kerwahi zin he edsinaru ziyà te menge Aramihanen. Edtudà is lengesa zin dutun te saag te kerwahi. Ne kebmahapun dutun minatey en sikandin.
1KI 22:36 Ne hein midsanlep en is andew, duen mibensag dutun te menge sundaru te Israel te, “Is kada sevaha med-ulì en diyà te kandin he ed-ulian!”
1KI 22:37 Nepatey is hadì te Israel ne mid-uwit is lawa zin diyà te Samaria, ne ziyà ileveng.
1KI 22:38 Midlùluan dan sikan is kerwahi ziyà te pemeziǥuey ziyà te Samaria, he zutun ebpememeziǥù is menge vahi he ebelegyà te zengeg dan, ne midilaan te asu is lengesa zin. Daan he nekaǥi te Nengazen he iyan heini egkeulaula.
1KI 22:39 Is duma pa he ǥuǥud mehitenged te kedhadì ni Ahab, wey is langun he mibeelan din, ragkes is kebpehitindeg din te mekempet he turuǥan, wey keberengberenga zin te menge inged, ne ingkesurat diyà te Libru he Midsuratan te menge Keguǥuza te menge Hadì te Israel.
1KI 22:40 Ne hein minatey en si Ahab, is anak din he si Ahazia iyan nekeilis kandin te kedhadì.
1KI 22:41 Nehimu he hadì diyà te Juda si Jehoshafat he anak ni Asa hein ikeepat he tuig te kedhadì ni Ahab diyà te Israel.
1KI 22:42 Ne 35 he tuig is keǥurang ni Jehoshafat hein nehimu sikandin he hadì. Diyà sikandin te Jerusalem med-ubpà, ne midhadì sikandin seled te 25 he tuig. Is iney zin iyan si Azuba he anak ni Shilhi.
1KI 22:43 Midsunud din is ulaula te amey zin he si Asa. Metazeng diyà te etuvangan te Nengazen is mid-ulaula zin. Piru wazè din ipen-awà sikan is menge simbahan diyà te metikang he menge lugar, umbe mibpedayun is menge etew te kebpemuhat wey kedtutung te veyewà dutun.
1KI 22:44 Meupiya is kedepità ni Jehoshafat wey te hadì te Israel.
1KI 22:45 Is duma pa he ǥuǥud mehitenged te kedhadì ni Jehoshafat, wey is nevantug he menge vaal zin, wey is menge kebpekidtebek din, ne ingkesurat diyà te Libru he Midsuratan te menge Keguǥuza te menge Hadì te Juda.
1KI 22:46 Midsegseg din is menge maama wey menge vahi he ebelegyà te zengeg dan diyà te menge lugar he ed-ezapan, he wazà mesegseg hein timpu te amey zin he si Asa.
1KI 22:47 Dutun he timpu wazà hadì diyà te Edom; iyan dà edumala kayi is pengulu he mibpilì ni Jehoshafat.
1KI 22:48 Duen mibpeveelan ni Jehoshafat he menge varku he para te petiǥayun he ebiyahi ziyà te Ofir te kegkuwa te vulawan. Piru wazà heini mekeviyahi su nezeetan heini ziyà te Ezion Geber.
1KI 22:49 Dutun he timpu, migkaǥi si Ahazia he anak ni Ahab diyà te ki Jehoshafat te, “Ipezuma nu is menge etew ku te menge etew nu te kebiyahi ziyà te zaǥat.” Piru wazà mebpemineg si Jehoshafat.
1KI 22:50 Hein minatey en si Jehoshafat, inleveng sikandin diyà te midlevengan te menge kepuun din diyà te Inged ni David. Ne iyan nekeilis kandin te kedhadì is anak din he si Jehoram.
1KI 22:51 Nehimu he hadì te Israel si Ahazia he anak ni Ahab hein ike-17 he tuig te kedhadì ni Jehoshafat diyà te Juda. Diyà med-ubpà te Samaria si Ahazia, ne midhadì sikandin seled te zezuwa he tuig.
1KI 22:52 Mezaat is ulaula zin diyà te etuvangan te Nengazen, su mid-iringan din is amey zin wey iney zin, wey si Jeroboam he anak ni Nebat, he iyan nehimu he hinungdan te kebpekesalà te menge tig-Israel.
1KI 22:53 Mid-azap din wey midsilbiyan din si Baal, ne pinaaǥi kayi midhimu zin he mepauk is Nengazen he Megbevayà te Israel, iring te mibeelan te amey zin.
2KI 1:1 Hein minatey en si Ahab, is nasyun he Moab wazè en mebpezizalem te keǥehem te Israel.
2KI 1:2 Ne sevaha he andew, neulug si Hadì Ahazia ziyà te rihas-rihas puun diyà te zivavew he endana te turuǥan din diyà te Samaria, ne nepurung sikandin meruuǥi. Tenged dutun duen menge etew he midsuǥù din he ibpehendiyà te simbahan he zutun ed-ezapa si Baal Zebub, he ed-ezapen diyà te Ekron, su wey zan mekeinsa ke egkeulian ded be sikandin.
2KI 1:3 Piru migkeǥiyan te velinsuǥuen te Nengazen si Elias he tig-Tishbe te, “Genat ka ne hingumaa nu sikan is menge etew he midsuǥù duen te hadì te Samaria ne keǥiyi nu te, ‘Maan is edhendiyè kew te ki Baal Zebub, he ed-ezapen diyà te Ekron? Wazè be Megbevayà te Israel?
2KI 1:4 Ne tenged keniyan heini zed is egkeǥiyen te Nengazen diyà te hadì. Kenè ke en egkaawà keniyan te edhizeǥaan nu, su siguradu he ebpatey ka!’ ” Umbe migenat si Elias te kegkaǥi zutun te ibpekaǥi kandin.
2KI 1:5 Ne hein nelelaǥan en ni Elias sikan is menge menunudtulà, midlikù dan duen te hadì. Umbe mid-insaan sikandan dutun te hadì, “Maan is utew kew meǥaan he nekelikù?”
2KI 1:6 Ne midtavak dan te, “Duen etew he midhinguma kenami he ke sikandin te, ‘Likù kew ziyà te hadì ne tudtula niw heini is lalag te Nengazen diyà te kandin: Maan is midsuǥù ka te ibpehendiyà te ki Baal Zebub he ed-ezapen diyà te Ekron, te ked-insà ke egkeulian ke zed be? Wazè be Megbevayà te Israel? Ne ǥeina te mibeelan nu heini, ne kenè ke en ebpekeenew keniyan te edhizeǥaan nu, su siguradu he ebpatey ka!’ ”
2KI 1:7 Mid-insà haazà is hadì te, “Hentei heini etawa? Memenumenu sikandin?”
2KI 1:8 Midtavak dan te, “Mibivisti sikandin te hinavel he vulvul te uyaǥen wey bevakes te lundis.” Ne migkaǥi haazà is hadì te, “Iyan sikandin si Elias he tig-Tishbe.”
2KI 1:9 Ne midsuǥù is hadì te sevaha he upisyal duma te 50 he menge etew te kedakep ki Elias. Hein neturedu zuen te upisyal si Elias he ebpimpinuu ziyà te puntur te vuvungan, migkeǥiyan dutun te upisyal te, “Sikew is suluǥuen te Megbevayà, midsuǥù a te hadì he ibpehendiyè ka te kandin.”
2KI 1:10 Ne midtavak ni Elias haazà is upisyal te, “Geina te suluǥuen a te Megbevayà ne meulug guntaan is hapuy he ebpuun te langit he edezaat kenikew wey te 50 he menge etew nu!” Ne neulug is hapuy he ebpuun te langit he nekepatey zuen te kepitan wey te 50 he menge etew zin.
2KI 1:11 Ne mid-uman medsuǥù is hadì te sevaha he pa upisyal duma te 50 he menge etew te kedakep ki Elias. Migkeǥiyan duen te upisyal si Elias te, “Sikew is suluǥuen te Megbevayà, migkaǥi is hadì te kinahanglan he pehendiyà guntaan te kandin!”
2KI 1:12 Ne midtavak si Elias te, “Geina te suluǥuen a te Megbevayà ne meulug guntaan is hapuy he ebpuun te langit he edezaat kenikew wey te 50 he menge etew nu!” Ne neulug en maan is hapuy te Megbevayà he ebpuun te langit he nekepatey kandan.
2KI 1:13 Mid-uman en maan medsuǥù haazà is hadì te iketelu he upisyal duma te 50 he etew. Ne hein nekeuma haazà is upisyal ziyà te ki Elias midluhud sikandin diyà te ki Elias su edtahud, wey ebpehizuhizu, “Sikew is suluǥuen te Megbevayà, ikehizu a kenikew wey is menge etew ku. Kenè key kenikew himetayi is menge suluǥuen nu.
2KI 1:14 Su emun kenà, ne egkeiring key zuen te zezuwa he grupu he nezeetan pinaaǥi te hapuy he ebpuun diyà te langit. Piru sikami mulà, ne ikehizu key!”
2KI 1:15 Ne zutun mid-umanan keǥiyi si Elias te velinsuǥuen te Nengazen te, “Kenè ka mahandek. Duma ka kandin.” Ne midhitindeg si Elias ne miduma pehendiyà te hadì.
2KI 1:16 Ne migkeǥiyan ni Elias haazà is hadì te, “Iyan heini egkeǥiyen te Nengazen: ‘Maan is duen midsuǥù nu he menge etew he ibpehendiyà te ki Baal Zebub, he ed-ezapen diyà te Ekron, te ked-insà ke egkeulian ke zed be? Wazè be Megbevayà te Israel? Ne ǥeina te mibeelan nu heini, ne kenè ke en egkaawà keniyan te edhizeǥaan nu, su siguradu he ebpatey ka!’ ”
2KI 1:17 Umbe, minatey si Ahazia sumalà is nekaǥi te Nengazen pinaaǥi ki Elias. Ne ǥeina te wazè din anak he maama he ebpekeilis kandin, ne iyan si Joram he suled din nekeilis kandin te kedhadì. Mibpuun sikandin medhadì hein ikezuwa he tuig te kedhadì ni Jehoram he anak he maama ni Hadì Jehoshafat he hadì te Juda.
2KI 1:18 Is duma pa he ǥuǥud mehitenged te kedhadì ni Ahazia, wey is menge mibeelan din, ne ingkesurat diyà te Libru he Midsuratan te menge Keguǥuza te menge Hadì te Israel.
2KI 2:1 Hein hapit en ebetuna te Nengazen si Elias pehendiyà te langit pinaaǥi te eribpures, ne midhipanew si Elias wey si Elisha puun te Gilgal.
2KI 2:2 Ne migkeǥiyan ni Elias si Elisha te, “Kayi ke zà, su ibpehendiyà a te Nengazen te Betel.” Piru midtavak si Elisha te, “Ebpenangdù a ziyà te uuyag he Nengazen wey ziyà te kenikew he kenà a edsuwey kenikew.” Umbe mibpezumehè dan en diyà te Betel.
2KI 2:3 Ne zuen grupu te menge ebpeneuven he ebpuun diyà te Betel he midhendiyà te ki Elisha ne mid-insè dan te, “Netuenan nu ve he egkuwaan en te Nengazen is egalen nu ǥuntaan he andew?” Midtavak si Elisha te, “Uya, netuenan ku, piru kenè tew en heeyan edlelaǥen.”
2KI 2:4 Migkaǥi en maan si Elias diyà te ki Elisha te, “Kayi ke zà, su ibpehendiyà a te Nengazen te Jerico.” Ne mid-uman medtavak si Elisha te, “Ebpenangdù a ziyà te uuyag he Nengazen wey ziyà te kenikew he kenà a edsuwey kenikew.” Umbe mibpezumehè dan en diyà te Jerico.
2KI 2:5 Ne zuen grupu te menge ebpeneuven diyà te Jerico he midhendiyà te ki Elisha ne mid-insà sikandan te, “Netuenan nu ve he egkuwaan en te Nengazen is egalen nu ǥuntaan he andew?” Midtavak si Elisha te, “Uya, piru kenè tew en heeyan edlelaǥen.”
2KI 2:6 Ne migkaǥi si Elias diyà te ki Elisha te, “Kayi ke zà, su ibpehendiyà a te Nengazen te Wahig he Jordan.” Midtavak si Elisha, “Ebpenangdù a ziyà te uuyag he Nengazen wey ziyà te kenikew he kenà a edsuwey kenikew.” Umbe midlaus sikandan medhipanew is dezuwa.
2KI 2:7 Ne zuen 50 he menge etew he sakup te grupu te menge ebpeneuven he midtelukun, ne midhitindeg sikandan diyà te egkehunaan he ziyà medsinaru te lugar he mibpunduwan ni Elias wey ni Elisha he veyvey te Wahig he Jordan.
2KI 2:8 In-awà ni Elias is samput din ne midlumpì din, ne inlagkut din diyà te wahig. Ne neluwisan is nezalandalan he tanà ne zutun dan mebayà is edlayun.
2KI 2:9 Ne hein nekelayun dan en, migkeǥiyan ni Elias si Elisha te, “Hengkey is egkesuatan nu he ebeelan ku kayi te timpu he wazè e pa iawà diyà te kenikew?” Midtavak si Elisha te, “Egkesuatan ku he metakep is gehem nu he egkesunud ku.”
2KI 2:10 Migkaǥi si Elias te, “Mereǥen heeyan is ebuyuen nu. Piru egkezawat nu heeyan emun egkeventayan nu is kegkuwaa kedì, piru emun kenà, ne kenè nu heini egkezawat.”
2KI 2:11 Ne zutun te kedhipanew zan he ebpelelaǥà, neketik-ew mekeuma is kerwahi he hapuy he eguyuzen te menge kudà he hapuy. Mibayà heini ziyà te pid-elangan dan, ne imbpedsuwey zin sikandan, ne mid-uwit si Elias pehendiyà te langit pinaaǥi te eribpures.
2KI 2:12 Ne naahà heini ni Elisha ne nekevensag sikandin te, “Amey ku! Amey ku! Is menge kerwahi wey is ebpen-untud te menge kerwahi te Israel!” Ne hein wazè din en maahà si Elias, midliwazè din bindasa is kumbalè din su ibpeehè din he neseeng sikandin.
2KI 2:13 Ne mid-amì din sikan is samput ni Elias he neulug, ne midlikù sikandin diyà te veyvey te Wahig he Jordan ne midhitindeg dutun.
2KI 2:14 Ne inlagkut din diyà te wahig sikan is samput ni Elias ke sikandan te, “Hendei en is Nengazen he Megbevayà ni Elias?” Ne hein mibeelan din haazà, ne neluwisan dutun is nezalandalan he tanà ne segugunà sikandin midlayun.
2KI 2:15 Ne hein naahà haazà te grupu te menge ebpeneuven he ebpuun diyà te Jerico is nehitavù, ke sikandan te, “Diyà en bes te kandin is gehem ni Elias!” Umbe midsinuǥung dan sikandin ne midluhud dan su ibpeehè dan is kedtahud dan kandin.
2KI 2:16 Ke sikandan te, “Datù, sikami is menge suluǥuen nu, ne zuen dey 50 he melig-en he menge etew. Emun egkesuat ka, ne ibpepen-ehè tew kandan is egalen nu. Su kela ke mid-uwit dà sikandin te Mulin-ulin te Nengazen diyà te sevaha he vuvungan etawa suǥud-suǥud.” Midtavak si Elisha te, “Kenè niw sikandan ipeǥenat.”
2KI 2:17 Piru nekidteǥelà sikandan taman te egkeeled en si Elisha he ebarew. Umbe ke sikandin te, “Sigi, ipehipanew niw en nasì sikandan.” Umbe impeǥenat dan sikan is 50 he menge etew, ne seled te tetelu he andew is kebpen-ahaa zan ki Elias piru wazè dan maahà.
2KI 2:18 Ne kedlikù dan diyà te ki Elisha he kemulu pa ziyà te Jerico, migkeǥiyan sikandan ni Elisha te, “Kenè be migkeǥiyan ku en sikiyu he kenè kew en genat?”
2KI 2:19 Is menge etew ziyà te inged he Jerico migkeǥiyan dan si Elisha te, “Datù, neehè nu man he meupiya is nesevukan te inged dey. Piru kenà meupiya is wahig, ne tenged kayi kenè en edtuvù is menge pinemula.”
2KI 2:20 Migkaǥi si Elisha te, “Uwiti a keniyu te veǥu he yehung ne teǥui niw te timus.” Ne mid-uwit dan haazà diyà te kandin.
2KI 2:21 Ne migenat sikandin pehendiyà te wahig ne insimburè din haazà is timus he ke sikandin te, “Iyan heini egkeǥiyen te Nengazen: ‘Midlumpiyuwan ku en heini he wahig, ne kenè en heini ebpekepatey etawa ebpekepeengked te tuvù te pinemula.’ ”
2KI 2:22 Ne puun dutun, lumpiyu en haazà is wahig he sungkad te nekaǥi ni Elisha he egkeulaula.
2KI 2:23 Mid-awà si Elisha ziyà te Jerico ne midhendiyà te Betel. Ne zutun te kedhipanew zin diyà te zalan, duen menge vetan-en he menge maama he ebpuun diyà te sevaha he inged he ed-undaunda kandin. Ke sikandan te, “Awè ka kayi is bengulan! Awè ka kayi is bengulan!”
2KI 2:24 Nekelilingey si Elisha is edtengteng dutun te menge vetan-en ne midrewakan din sikandan pinaaǥi te ngazan te Nengazen. Ne zuen dezuwa he bir he ebpuun diyà te keyuwen ne mibpengaǥat sikan is 42 he menge vetan-en.
2KI 2:25 Ne midhendiyà si Elisha te Buntud he Carmel, ne hein mid-awà sikandin dutun midhendiyà sikandin te Samaria.
2KI 3:1 Nehimu he hadì diyà te Israel si Joram he anak ni Ahab hein ike-18 he tuig te kedhadì ni Jehoshafat diyà te Juda. Diyà med-ubpà te Samaria si Joram, ne midhadì sikandin seled te 12 he tuig.
2KI 3:2 Mezaat is ulaula zin diyà te etuvangan te Nengazen, piru kenà iring kezaat te ulaula te amey zin wey iney zin. Imperupet din sikan is tedeman he vatu he mibpeveelan te amey zin he para te kebeǥey te zengeg ki Baal.
2KI 3:3 Piru mid-iringan din is menge salà ni Jeroboam he anak ni Nebat, he nehimu he hinungdan te kebpekesalà te menge tig-Israel. Ne wazè din engkezi heini he menge salà.
2KI 3:4 Si Hadì Mesha he hadì te Moab, mid-uyag te menge kerehidu, ne geina te sakup te Israel is Moab, ebeǥey si Mesha ziyà te hadì te Israel te 100,000 he nati he menge kerehidu he meemahan, wey vulvul te 100,000 he meǥurang en he meemahan he menge kerehidu.
2KI 3:5 Piru hein minatey en si Ahab, nekidsukulà sikandin te hadì te Israel.
2KI 3:6 Umbe zutun he timpu, midtiǥum ni Joram is tivuuk he menge Israilihanen he sundaru ne migawas dan diyà te Samaria su edsurung dan diyà te Moab.
2KI 3:7 Ne mibpeuwit si Joram te lalag diyà te ki Hadì Jehoshafat he hadì te Juda he edhenduen te: “Nekidsukulà kediey is hadì te Moab. Eduma ke ve kedì te kebpekidtebek kandan?” Midtavak si Jehoshafat te, “Uya, andam a he eduma kenikew, wey andam a he ebpeǥamit kenikew te menge sundaru ku wey menge kudè ku.”
2KI 3:8 Ne mid-insà si Jehoshafat te, “Hendei kiw ebayà emun edsurung kiw?” Midtavak si Joram te, “Diyè kiw ebayà te sibsivayan diyà te Edom.”
2KI 3:9 Umbe, mibpezumahà haazà is hadì te Israel wey hadì te Juda, ne miduma zaan kandan is hadì te Edom. Ne hein pitu en he andew is kedhipanew zan, neeminan te wahig is menge sundaru wey is menge uyaǥen dan.
2KI 3:10 Migkaǥi is hadì te Israel te, “Mekehizuhizu kiw is tetelu he hadì! Iyan dà in-uwita te Nengazen kenitew kayi su ibeǥey kiw zin diyà te hadì te Moab.”
2KI 3:11 Piru mid-insà si Jehoshafat te, “Wazè tew ve zuma he ebpeneuven te Nengazen? Emun duen, ne ebpekeinsè kiw ziyà te Nengazen pinaaǥi kandin ke hengkey is ereg he ebeelan tew.” Midtavak is sevaha he upisyal te hadì te Israel te, “Si Elisha he anak ni Shafat ne kayi te kenitew. Ed-uǥup sikandin dengan ki Elias.”
2KI 3:12 Migkaǥi si Jehoshafat te, “Uya, tutuu iyan he ebpekepekidlalag is Nengazen pinaaǥi kandin.” Umbe midhendiyà te kandin haazà is hadì te Israel, Juda, wey Edom.
2KI 3:13 Ne migkeǥiyan ni Elisha haazà is hadì te Israel te, “Hengkey is lavet ku kenikew? Diyè ka pevayà te menge ebpeneuven he midseriǥan te amey nu wey iney nu!” Migkaǥi haazà is hadì te Israel te, “Kenà, su iyan is Nengazen mid-uwit kenami te tetelu kayi he lugar su wey key zin ikeveǥey ziyà te hadì te Moab.”
2KI 3:14 Migkaǥi si Elisha te, “Egkaǥi a te tutuu ziyà te etuvangan te uuyag wey Mekeǥeǥehem he Nengazen, he edsilbiyan ku, he kenè ku pezem sikew edseǥipaan emun kenà tenged te kedtahud ku ki Hadì Jehoshafat he hadì te Juda.
2KI 3:15 Sigi, dumaha kayi te kediey is etew he metau he edtukar te alpa.” Ne zutun te kedtukar te alpa, midumala si Elisha te ǥehem te Nengazen,
2KI 3:16 ne ke sikandin te, “Iyan heini migkaǥi te Nengazen: ‘Heini he zal-ug egkepurung egkewehiǥi.
2KI 3:17 Minsan wazà uzan wey keramag, egkepurung egkewehiǥi heini is dal-ug. Ne ebpekeinum kew wey is menge uyaǥen niw.
2KI 3:18 Melemu zà heini para te Nengazen. Ne liyu keniyan, ibpezaag din daan keniyu is menge Moabitanhen.
2KI 3:19 Edezeetan niw is meupiya he menge inged dan he miberengbeng. Ebpemilayen niw is meupiya he menge kayu zan, ebumbunan niw is menge teheb dan, wey edezeetan niw is selebpeten he menge vevesukè dan pinaaǥi te kedtembui niw zuen te menge vatu.’ ”
2KI 3:20 Ne hein neume en is uras te kebpemuhat hein mid-ilis he andew, midtudà is wahig he ebpuun diyà te Edom, ne neeneb te wahig haazà he tanà.
2KI 3:21 Dutun he timpu, nekezineg te tudtul is langun he menge Moabitanhen he edsurungen sikandan te tetelu he hadì. Umbe midtiǥum dan is langun kandan he ebpekehimu he ebpekidtebek, batà etawa meǥurang, ne impepelastar sikandan diyà te zulunà te Moab.
2KI 3:22 Ne hein mid-enew zan su meselem en, neehè dan is wahig he egkesilaan te andew he henduen be te lengesa.
2KI 3:23 Ke sikandan te, “Lengesa heeyan! Siguradu he mibpetebekà is tetelu he hadì ne mibpehimhimetayà sikandan. Ne egkuwaan tew is menge azen dan!”
2KI 3:24 Piru hein nekeuma is menge Moabitanhen diyà te kampu te menge Israilihanen, nenggawas is menge Israilihanen ne mid-etaki zan is menge Moabitanhen taman te nekepelaǥuy is menge Moabitanhen. Ne midal-as sikandan te menge Israilihanen taman diyà te Moab ne mibpenhimetayan dan.
2KI 3:25 Mibengkag dan is menge inged, ne midtembuan dan te menge vatu is selebpeten he menge pemuleey taman te nekezengkuur is menge vatu zutun. Mibumbunan dan is menge teheb wey mibpemiley zan is meupiya he menge kayu. Ne iyan dà nesamà is inged he Kir Hareset, piru midliǥuyan heini te menge sundaru zan he zuen dan menge limpawes ne midsurung dan heini.
2KI 3:26 Ne hein naahà duen te hadì te Moab he nezaag dan en te tebek, miduma zin is 700 he menge etew zin he zuen dan menge ispada su ebpelaǥuy zan he edreseng duen te menge sundaru te hadì te Edom, piru wazà sikandan mekepelaǥuy.
2KI 3:27 Umbe, migkuwa zin is kinekekayan he anak din he iyan pezem ebpekeilis kandin te kedhadì, ne impemuhat din heini ziyà te verengbeng he pemuhat he edtutungen. Tenged kayi, is menge Israilihanen, utew zekelà is kegkepeuki kandan te menge Moabitanhen, umbe mibey-anan dan is hadì te Moab ne nemen-ulì dan diyà te nasyun dan.
2KI 4:1 Duen balu he vahi he is esawa zin he minatey sevaha he sakup te grupu te menge ebpeneuven. Ne sevaha he andew, mibuyù sikandin te tavang diyà te ki Elisha. Ke sikandin te, “Minatey en is esawa ku he suluǥuen nu ne netuenan nu he edtahud sikandin te Nengazen. Ne ǥuntaan nekeuma is etew he neutangan din ne egkuwaan din is tanè dey wey is dezuwa he anak dey he menge maama ne ed-uripenen din su iyan kun sikandan bayad te utang te esawa ku.”
2KI 4:2 Migkaǥi si Elisha ziyà te kandin te, “Hengkey is igketavang ku kenikew? Keǥiya nu kediey ke hengkey is diyà te valey nu?” Midtavak haazà is bahi te, “Wazà datù, gawas te zeisey he lana ziyà te tivud.”
2KI 4:3 Migkaǥi si Elisha te, “Hendiyè ka te langun he zuma nu he menge meǥinged, ne penambey ka te mahabet he menge teleǥuey.
2KI 4:4 Ne seled kew te menge anak nu ziyà te valey niw ne lekevi niw is gemawan. Ne itisi niw te lana is langun he menge teleǥuey. Ne kada egkepenù he teleǥuey ne itapid niw te edsavuk.”
2KI 4:5 Umbe, mibeelan dutun te vahi haazà is nekaǥi ni Elisha ziyà te kandin, ne midlelekeb sikandan te menge anak din diyà te valey zan. Ne mid-uwit te menge anak din diyà te kandin is menge teleǥuey, ne midteǥuan din haazà te lana.
2KI 4:6 Ne hein nepenù en is langun he menge teleǥuey, migkeǥiyan din is anak din te, “Duwali e pa keniyu te teleǥuey.” Midtavak is anak din te, “Wazè en teleǥuey.” Ne zutun dutun mid-engked is kedtudà te lana.
2KI 4:7 Ne midhendiyà haazà is bahi te ki Elisha he suluǥuen te Megbevayà ne midtudtul zin is nehitavù. Ne migkeǥiyan sikandin ni Elisha te, “Hipanew ka ne ivelegyè nu is lana ne veyazi nu is utang nu. Ne zuen pa subra he selapì he egkesamà he ereg he igkeuyag nu wey te menge anak nu.”
2KI 4:8 Ne sevaha he andew, midhendiyà si Elisha te Shunem. Ne zuen dutun sepian he vahi he midhinggat kandin te kegkaan. Ne puun dutun emun edsaǥad si Elisha ziyà te Shunem, ne edtuluy sikandin diyà te valey zuen te vahi su egkaan.
2KI 4:9 Ne migkaǥi haazà is bahi ziyà te esawa zin te, “Netuenan ku he heini is etew he layun edtuluy kayi te kenita, ne suluǥuen te Megbevayà.
2KI 4:10 Ebeelan ta sikandin te zeisey he ruǥu ziyà te atep, ne edsevukan ta te katri, lemisahan, bangkù, wey sulù, su para egkehimu he ed-ubpàubpà sikandin kayi emun edhengkayi.”
2KI 4:11 Ne sevaha he andew, midhendiyà si Elisha te Shunem, nemenahik sikandin duen te ruǥu ne midhimeley.
2KI 4:12 Midsuǥù din is suluǥuen din he si Gehazi he umawa zin sikan is bahi. Umbe mid-umew ni Gehazi haazà is bahi, ne hein nekeume en sikandin,
2KI 4:13 migkeǥiyan ni Elisha sikan is suluǥuen din te, “Insai nu ke hengkey is meupiya he igkevales ta kayi te ked-elimahi zin kenita. Kela ke zuen ibpahangyù din kenita ziyà te hadì etawa ziyà te peremandar te menge sundaru.” Midtavak haazà is bahi te, “Kenè en kinahanglan su meupiyè en is kebpekesavuk ku duma te menge zuma ku he meǥinged.”
2KI 4:14 Mid-insà si Elisha ziyà te ki Gehazi te, “Hengkey is ereg he ebeelan ta ziyà te kandin?” Midtavak si Gehazi te, “Wazè din anak he maama ne meǥurang en is esawa zin.”
2KI 4:15 Migkaǥi si Elisha te, “Umani nu umawa.” Umbe mid-umew sikandin ni Gehazi, ne midhitindeg sikandin diyà te ǥemawan.
2KI 4:16 Migkeǥiyan ni Elisha te, “Te iring kayi he timpu zutun te sunud he tuig ne zuen nu en edsepipiyen he vatà he maama.” Midtavak haazà is bahi te, “Datù, kenà a kenikew terterui, su suluǥuen ka te Megbevayà.”
2KI 4:17 Piru mibmeǥingey iyan haazà is bahi, ne mid-anak sikandin te maama hein sunud he tuig, sumalà is nekaǥi ni Elisha.
2KI 4:18 Ne sevaha he andew, hein dekelè en haazà is batà, nenelukun sikandin te amey zin he edterebahu ziyà te vevesukà duma te menge ebpemenraǥun.
2KI 4:19 Netekewtekew is amey zin te midhabet sikandin megkaǥi te, “Amà, mesakit is ulu ku! Mesakit is ulu ku!” Ne migkeǥiyan te amey zin is suluǥuen din te, “Uwita nu ziyà te iney zin.”
2KI 4:20 Umbe, mid-uwit duen te suluǥuen haazà is batà diyà te iney zin, ne midsekepu zin haazà. Iyan, hein neudtu minatey en haazà is batà.
2KI 4:21 Ne mid-uwit dutun te iney haazà is anak din he minatey ziyà te ruǥu ni Elisha ziyà te zivavew, ne insavuk din duen te katri. Ne migawas sikandin dutun te ruǥu ne midlekevan din is gemawan.
2KI 4:22 Ne mid-umew zutun te vahi is esawa zin ne migkeǥiyan din te, “Ipehengkayi nu is sevaha he suluǥuen he ibpetundan te sevaha he asnu su para mekaagpas a he edhendiyà te suluǥuen te Megbevayà, ne petuluy e zà ebpekelikù.”
2KI 4:23 Mid-insà is esawa zin te, “Maan is edhendiyè ka ǥuntaan he andew te kenè man heini Pista te Kebpuun te Hayag etawa Andew te Kedhimeley?” Midtavak haazà is bahi te, “Maambe en.”
2KI 4:24 Ne midsiyahan din sikan is asnu ne migkeǥiyan din is suluǥuen din te, “Gaanggaan ke en! Ne kenè nu ipenaneynaney heini is asnu emun kenè ku sikew egkeǥiyan.”
2KI 4:25 Umbe, migenat sikandan, ne nekeuma zan diyà te Buntud he Carmel, he zutun sikan is suluǥuen te Megbevayà. Ne hein naahà ni Elisha haazà is bahi ziyà te egkehunaan, migkeǥiyan din is suluǥuen he si Gehazi te, “Ahaa nu man, ebpekeuma sikan is bahi he tig-Shunem!
2KI 4:26 Peleleǥuya nu sikandin te edsinuǥung ne insai nu ke egkemenumenu en sikandin, is esawa zin, wey is anak din.” Ne migkeǥiyan dutun te vahi si Gehazi te meupiya zed is langun.
2KI 4:27 Piru hein nekeume en sikandin diyà te ki Elisha zutun te vuvungan, midluhud sikandin is egawed diyà te paa ni Elisha. Mid-uvey si Gehazi su ebpekasen din haazà is bahi, piru migkaǥi si Elisha te, “Bey-ani nu en sikandin! Su nereǥenan sikandin, piru wazà keǥiya te Nengazen kedì ke maan.”
2KI 4:28 Migkaǥi haazà is bahi te, “Datù, wazà a mebuyù diyà te kenikew te anak he maama, iyan ka mismu migkaǥi he ebpekaanak a, migkaǥi e pa ganì diyà te kenikew te kenà a kenikew terterui.”
2KI 4:29 Ne hein nesavut ni Elisha he zuen nehitavù duen te vatà, migkeǥiyan din si Gehazì, “Pengandam ka te kedhendiyà te valey zin. Uwita nu is tuked ku ne pelelaǥuy ke en. Emun duen nu egkesinugung, ne kenè nu en lelaǥi, ne emun duen ebpekidlalag kenikew, ne kenè nu en tevaka. Ne emun ebpekeuma kad ne segugunè nu isavuk diyà te vuked duen te vatà is tuked ku.”
2KI 4:30 Piru migkaǥi is iney zuen te vatà te, “Ebpenangdù a ziyà te uuyag he Nengazen wey ziyà te kenikew, he kenà a ed-ulì emun kenè ka eduma kediey.” Umbe miduma si Elisha kandin.
2KI 4:31 Midhune en mulà si Gehazi ne insavuk din sikan is tuked diyà te vuked duen te vatà, piru wazè en mebulug med-eriǥues haazà is batà. Umbe midlikù si Gehazi te kedsinuǥung ki Elisha ne migkaǥi te, “Wazà meuyag sikan is batà.”
2KI 4:32 Ne hein nekeuma si Elisha ziyà te valey, neehè din sikan is batà he neketetayhad diyà te hizeǥaan din.
2KI 4:33 Midseled sikandin ne midlelekeb, ne mid-ampù diyà te Nengazen.
2KI 4:34 Ne midlengkevan din haazà is batà, ne indegkit din is bèbè din diyà te vèbà duen te vatà, is mata zin, indegkit din diyà te mata, is belad din indegkit din diyà te velad duen te vatà. Ne zutun te kedlengkevi zin duen te vatà, ne midnaneynaney mebmeinit is lawa zuen te vatà.
2KI 4:35 Midhitindeg si Elisha is ebpekesuǥuksuǥuk duen te ruǥu. Ne mid-umanan din lengkevi haazà is batà. Ne nekeetisà haazà is batà te kepipitu, ne migimerat sikandin.
2KI 4:36 Ne mid-umew ni Elisha si Gehazi ne migkeǥiyan din te, “Umawa nu is iney zin.” Umbe mid-umew zin, ne kebpekeuma zuen te vahi, migkeǥiyan ni Elisha te, “Kuwaa nu en is anak nu.”
2KI 4:37 Midseled haazà is bahi ne midluhud diyà te uvey te paa ni Elisha te kebpeselamat kandin. Ne migkuwa zin sikan is anak din ne impenaug din.
2KI 4:38 Hein midlikù si Elisha ziyà te Gilgal, ne vitil ziyà te Gilgal. Duen timpu he mibpekidlalag kandin is grupu te menge ebpeneuven, ne migkeǥiyan din is suluǥuen din te, “Iziken nu is dekelà he kuzen ne hilutù ka te supas para kayi te menge etew.”
2KI 4:39 Duen sevaha he ebpeneuven he midhendiyà sikandin te vevesukà su ebpekilumbey. Ne nekaahà sikandin te edlangkat he zuen din menge veǥas ne nenguwa sikandin te veǥas dutun he ereg he egkepuyut te kumbalè din. Ne hein nekeulì en sikandin, mibpengarad din haazà ne insahug din duen te edhilutuen he supas, he wazè din ganì metueni ke hengkey haazà.
2KI 4:40 Ne hein nelutù en haazà is supas impemeǥey en diyà te menge etew. Ne zutun te kegkaan dan, nekevensag sikandan te, “Suluǥuen te Megbevayà, kela ke ebpekehilu heini!” Ne kenè dan haazà egkehimu te egkaan.
2KI 4:41 Migkaǥi si Elisha te, “Kuwai a te herina.” Imbusbus din haazà is harina zuen te kuzen ne ke sikandin diyà te suluǥuen te, “Ipemeǥey nu en diyà te kandan su wey zan mekekaan en.” Ne meupiyè en human is taam kayi.
2KI 4:42 Duen timpu, ne zuen sevaha he etew he ebpuun diyà te Baal Shalisha ne mid-uwit sikandin diyà te ki Elisha te 20 he supas he iyan mibeelan is nehuna he neraǥun he barli, wey beǥu he neraǥun he trigu. Migkaǥi si Elisha te, “Iveǥey nu heeyan diyà te grupu te menge ebpeneuven su wey zan mekaan.”
2KI 4:43 Migkaǥi is suluǥuen din te, “Ebmenmenuwen ku para meketukid heini te 100 he menge etew?” Midtavak si Elisha te, “Iveǥey nu zà diyà te kandan su wey zan mekekaan. Su migkaǥi is Nengazen te ebpekekaan dan ne zuen pa egkesamà.”
2KI 4:44 Umbe, imbeǥey heini zuen te suluǥuen diyà te menge ebpeneuven ne nekekaan sikandan, ne zuen dan pa samà, sumalà is nekaǥi te Nengazen pinaaǥi ki Elisha.
2KI 5:1 Si Naaman he peremandar te menge sundaru ziyà te Aram, edtehuzen te hadì diyà te Aram, su pinaaǥi kandin mibpengelinteuwan te Nengazen he mekezaag is Aram. Meupiya sikandin he sundaru, piru zuen utew mezaat he zaru te lundis he ed-isipen he meremerik.
2KI 5:2 Ne hein midsurung te menge sundaru te Aram is Israel, duen dan nevihag he raǥaraǥa he nehimu he suluǥuen te esawa ni Naaman.
2KI 5:3 Ne sevaha he andew, migkaǥi heini is raǥaraǥa ziyà te egalen din te, “Emun ebpekidhinguma is egalen ku he si Naaman te ebpeneuven he ziyà te Samaria, ne ebewian din is daru te lundis din.”
2KI 5:4 Umbe, migkeǥiyan ni Naaman is hadì dan mehitenged te nekaǥi zuen te raǥaraǥa he ebpuun te Israel.
2KI 5:5 Midtavak haazà is hadì te Aram te, “Genat ka, ne uwita nu is surat ku ziyà te hadì te Israel.” Umbe migenat si Naaman he mid-uwit te gasa he 350 he kilu he pelata, 70 he kilu he vulawan, wey sepulù he lukut he visti.
2KI 5:6 Ne iyan heini lalag he netaǥù duen te surat he mid-uwit din diyà te hadì: “Ibpehendiyan ku si Naaman he suluǥuen ku su wey nu mevewii is daru te lundis din.”
2KI 5:7 Ne hein nevasa zuen te hadì te Israel haazà is surat, mibindas din is bisti zin su mibmezaat is gehinawa zin he ke sikandin te, “Maan is kayi zin te kediey suǥùa heini is etew he zuen daru te lundis din? Hengkey e ves, Megbevayà a? Duen ku ve gehem te kedhimatey wey ked-uyag te etew? Ebpen-ehè dà sikandin te hinungdan wey key mekedtebek!”
2KI 5:8 Ne hein netuenan ni Elisha, he suluǥuen te Megbevayà, haazà he hitavù, mibpeuwitan din te lalag haazà is hadì he edhenduen te: “Maan is mibindas nu is kumbalè nu? Ipehengkayi nu te kedì heeyan is etew, ne egketuenan din he zuen ebpeneuven kayi te Israel.”
2KI 5:9 Umbe, midhendiyà si Naaman duma is menge kudà wey menge kerwahi ne mid-ubpàubpà diyà te ǥemawan te valey ni Elisha.
2KI 5:10 Midsuǥù si Elisha te ibpekaǥi ziyà te ki Naaman he medhendiyà sikandin te Wahig he Jordan ne lùlui zin is lawa zin te kepipitu, ne egkeulian sikandin.
2KI 5:11 Piru nepauk si Naaman ne migenat is ebpeneremudtemud. Ke sikandin te, “Kunaan ku ke egawas sikandin is ed-etuvang kedì. Iyan ebpeebuten ku he ebpengumew sikandin te Nengazen he Megbevayè din ne ibayew zin is belad din diyà te zivavew te lundis ku he zuen din daru ne ebewian e zin.
2KI 5:12 Kenè be meupiya pa is wahig diyà te Abana wey Farfar ziyà te Damascus kenà te zuma he menge wahig kayi te Israel? Kenè be ziyè e zà mebpenhugas para meulii a?” Umbe migenat sikandin he utew egkepauk.
2KI 5:13 Piru mid-uvey ziyà te kandin is menge suluǥuen din he ke sikandan te, “Datù, emun mereǥen he ebeelan is idsuǥù kenikew te ebpeneuven, kenè be ebeelan nu? Ne melemu zà he ebeelan is insuǥù din he kebpenlùlù para meulii ka.”
2KI 5:14 Umbe, midhendiyà si Naaman te Wahig he Jordan ne midlùluan din is lawa zin te kepipitu, sumalà is nekaǥi te suluǥuen te Megbevayà he si Elisha. Ne neulian is daru zin, ne mibmetilak is lundis din he henduen be te lundis te zeisey pa he vatà.
2KI 5:15 Ne zutun midlikù si Naaman duma te menge zuma zin duen te suluǥuen te Megbevayà. Midhitindeg sikandin diyà te etuvangan ni Elisha he ke sikandin te, “Guntaan netuenan ku en he wazè en duma he Megbevayà kayi te tivuuk he kelibutan, kekenà, iyan dà is Megbevayà te Israel. Umbe zewata nu heini is igasa ku kenikew, datù.”
2KI 5:16 Ne midtavak si Elisha he ebpeneuven te, “Nenangdù a ziyà te Nengazen he edsilbiyan ku, he kenà a edawat te gasa.” Midteǥel sikandin ni Naaman he zewata zin haazà is gasa, piru wazè din dewata.
2KI 5:17 Migkaǥi si Naaman te, “Emun kenè ka edawat, datù, ne tuǥuti a kenikew he egkergahan ku te tanà he ebpuun kayì is dezuwa he asnu ku, ne haazà ed-uwiten ku ziyà te kenami su wey ku zuen egkepemuhatan. Su puun guntaan ed-engked ad he ebpemuhat te menge pemuhat he edtutungen wey zuma he menge pemuhat he para te zuma he menge ed-ezapen su iyan dà ebpemuhaten ku is Nengazen.
2KI 5:18 Piru, datù, berakat he peseyluwa a te Nengazen emun eduma a te hadì diyà te simbahan para te ed-ezapen he si Rimon te kedsimba zutun. Su iyan igkeveeli ku kayi su ǥeina te upisyal a he sineriǥan te hadì. Ne verakat he peseyluwa a te Nengazen emun edluhud a zutun.”
2KI 5:19 Migkaǥi si Elisha te, “Berakat he meupiya is hipanew niw te ed-ulì.” Piru kenè pa ganì meziyù is nehipenawan ni Naaman,
2KI 5:20 ne sikan is suluǥuen ni Elisha he si Gehazi, neisip din is, “Impeǥenat te egalen ku si Naaman he Aramihanen he wazè din dewata is igasa zin. Ebpenangdù a ziyà te uuyag he Nengazen he edel-asen ku sikandin ne egkuwa a ziyà te kandin te minsan hengkey.”
2KI 5:21 Umbe, migègaanan del-asa ni Gehazi si Naaman. Ne hein naahà ni Naaman si Gehazi is ebpelelaǥuy pehendiyà te kandin, nenaug sikandin puun te kerwahi zin su edsinuǥung kandin. Mid-insà si Naaman te, “Duen be mezaat he nehitavù?”
2KI 5:22 Midtavak si Gehazi te, “Wazà. Midsuǥù e zà te egalen ku te kegkaǥi ziyà te kenikew he zuen nekeuma he zezuwa he menge vetan-en he sakup te grupu te menge ebpeneuven, he ebpuun diyà te vuvungan te Efraim. Ne edhangyù is egalen ku ziyà te kenikew te 35 he kilu he pelata wey zezuwa he lukut he visti.”
2KI 5:23 Migkaǥi si Naaman te, “Uya, heini zed is 70 he kilu he pelata.” Ne midteǥel sikandin ni Naaman he zewata zin haazà. Intaǥù ni Naaman sikan is pelata ziyà te zezuwa he bag ragkes en is dezuwa he lukut he visti, ne imbeǥey zin haazà diyà te zezuwa he suluǥuen din he iyan ed-uwit dutun para ki Gehazi.
2KI 5:24 Ne hein nekeuma zan en diyà te vuvungan, migkuwa ni Gehazi zuen te menge suluǥuen sikan is dezuwa he bag ne impelikù din sikandan. Ne mid-uwit din haazà diyà te valey ne in-eles din.
2KI 5:25 Ne zutun mibpaahà sikandin ki Elisha. Mid-insaan sikandin ni Elisha te, “Hendei ka ebpuun, Gehazi?” Midtavak si Gehazi te, “Wazà a medhipanew.”
2KI 5:26 Piru migkaǥi si Elisha te, “Wazè nu ve metueni he pinaaǥi te ǥehem te Nengazen neventayan ku is kebpenaug ni Naaman puun te kerwahi zin te kedsinuǥung kenikew? Kenà heini timpu te kedawat te selapì, manggad, pemuleey te ulibu, pemuleey te paras, menge uyaǥen, wey menge suluǥuen.
2KI 5:27 Ne tenged te kebeeli nu kayi, edhalin diyà te kenikew is daru ni Naaman wey ziyà te menge kevuwazan nu taman te taman.” Ne hein mid-ewaan en ni Gehazi si Elisha mibmeputì is lundis din tenged duen te zaru.
2KI 6:1 Duen timpu he migkaǥi ziyà te ki Elisha is grupu te menge ebpeneuven te, “Neehè nu mismu he zeisey heini is lugar he netiǥuman tew.
2KI 6:2 Umbe, edhendiyè kiw te Wahig he Jordan he mahabet is menge kayu zuen. Ebaal kiw te lugar he zutun kiw edtiǥum.” Migkaǥi si Elisha te, “Sigi, hipanew kew en.”
2KI 6:3 Piru migkaǥi is sevaha kandan te, “Datù, emun egkehimu ne zuma ke en kenami.” Ne ke sikandin te, “Uya.”
2KI 6:4 Umbe, miduma sikandin kandan. Midhendiyè dan te Wahig he Jordan ne nemiley zan te menge kayu.
2KI 6:5 Ne is sevaha kandan he ebpiley te kayu, nepul-ut is wasey zin ne neulug diyà te wahig, ne nekevensag sikandin te, “Datù, sinembayan ku zà sikan!”
2KI 6:6 Mid-insà si Elisha te, “Hendei zapit meulug?” Ne intezù duen te etew ke hendei meulug, ne mibadtì si Elisha te rasang ne intimbag din duen te neuluǥan. Ne midletew haazà is wasey.
2KI 6:7 Migkaǥi si Elisha te, “Kuwaa nu en.” Ne migkuwa zuen te etew.
2KI 6:8 Dutun he timpu, edtebeken te hadì diyà te Aram is Israel. Midlelaǥan din is menge upisyal zin ke hendei zan he menge lugar egkampu.
2KI 6:9 Migkeǥiyan ni Elisha is hadì te Israel te, “Kenè kew ebpekevayà keniyan he lugar su keniyan ebantey is menge Aramihanen.”
2KI 6:10 Umbe, midsuǥù is hadì te Israel dutun te lugar he nekaǥi ni Elisha he kinahanglan he egkeǥiyan is menge meǥinged duen he med-andam dan. Layun heini ebeeli ni Elisha.
2KI 6:11 Tenged kayi nepauk is hadì diyà te Aram. Umbe impetawag din is menge upisyal zin ne migkeǥiyan din te, “Hentei keniyu is edlavan te hadì te Israel?”
2KI 6:12 Migkaǥi is sevaha zuen te menge upisyal zin te, “Wazà minsan sevaha kenami, Mahal he Hadì. Si Elisha is tig-Israel he ebpeneuven, iyan migkaǥi ziyà te hadì te Israel te langun he egkeǥiyen nu minsan is diyè nu keǥiya te ruǥu nu.”
2KI 6:13 Mibmandar haazà is hadì te, “Hipanew kew ne pen-ahaa niw sikandin su para mekesuǥù a te menge etew te kedakep kandin.” Ne hein migkeǥiyan haazà is hadì he ziyà si Elisha te Dotan,
2KI 6:14 impehendutun din is mahabet he menge sundaru he ebpemen-untud te menge kudà wey menge kerwahi. Mezukilem is kebpekeuma zan diyà te Dotan ne midliǥuyan dan heini.
2KI 6:15 Ne kegkemeselem, midselem med-enew is suluǥuen ni Elisha, ne neehè din is menge sundaru he ebpemen-untud te kudà wey menge kerwahi he midliǥuy zutun te inged. Migkaǥi sikandin diyà te ki Elisha te, “Datù, hengkey is ebeelan ta?”
2KI 6:16 Midtavak si Elisha te, “Kenè ka mahandek. Tuwas pa he mahabet kandan is kenita he zuma.”
2KI 6:17 Ne zutun mid-ampù si Elisha te, “Nengazen luwisi nu is ked-ehè din su wey mekaahà sikandin.” Ne midluwisan te Nengazen is menge mata zin, ne neehè din is menge vuvungan diyà te peliǥuy ni Elisha he gurenab is hapuy he menge kudà wey kerwahi.
2KI 6:18 Dutun te kebeyai ki Elisha te menge kuntada, mid-ampù sikandin te, “Nengazen, lekapa nu heini he menge etew.” Umbe midlakap sikandan te Nengazen sumalà is midhangyù ni Elisha.
2KI 6:19 Ne migkeǥiyan sikandan ni Elisha te, “Kenà heini iyan dalan wey kenà heini inged he Dotan. Tundug kew kedì su edumahan ku sikiyu ziyà te etew he ebpen-ahaan niw.” Ne ziyà sikandan dumaha ni Elisha te Samaria.
2KI 6:20 Ne hein nekeseled dan en dutun te inged, mid-ampù si Elisha te, “Nengazen, luwisi nu is ked-ehè dan su wey zan mekaahà.” Midluwisan te Nengazen is menge mata zan, ne neehè dan he ziyè dan bes te Samaria.
2KI 6:21 Ne hein naahà sikandan duen te hadì te Israel, mid-insaan din si Elisha te, “Datù, hengkey is kenikew? Ebpenhimetayan ku en be sikandan?”
2KI 6:22 Midtavak si Elisha, “Kenè nu sikandan penhimetayi. Su minsan pa is nengevihag pinaaǥi te tebek ne wazè tew penhimetayi. Beǥayi nu sikandan te keenen wey wahig su wey zan mekekaan wey mekeinum, ne kebpekepasad dan ne ipelikù nu sikandan diyà te hadì dan.”
2KI 6:23 Umbe, nengemuran haazà is hadì para kandan. Ne hein nepasad impeulì din sikandan diyà te hadì dan. Ne wazè en medsurung is menge Aramihanen diyà te tanà he Israel.
2KI 6:24 Piru te huziyan he timpu midtiǥum ni Hadì Ben Hadad he hadì te Aram, is langun he menge sundaru zin ne midliǥuyan dan is Samaria.
2KI 6:25 Tenged kayi utew vitil zutun te inged, ne mibmahal en is egkengepemasa. Is bali te ulu te asnu, ne 80 he vuuk he pelata, ne is bali te subra he senge salmun he tai te merepatik, ne lelima he vuuk he pelata.
2KI 6:26 Duen timpu, he mibayà is hadì te Israel ziyà te zivavew te verengbeng, duen sevaha he vahi he midhabet megkaǥi ziyà te kandin te, “Tevangi a, Mahal he Hadì!”
2KI 6:27 Midtavak haazà is hadì te, “Emun kenè ka edtevangan te Nengazen ne hengkey is kedì he egkehimu? Wazè ku en trigu etawa vinu he igkeveǥey ku kenikew.”
2KI 6:28 Ne zutun mid-insà haazà is hadì te, “Hengkey ves is prublima nu?” Midtavak haazà is bahi te, “Heini is bahi migkeǥiyan e zin he egkeenen dey is anak ku te egkehuna he andew, ne ed-ilis he andew ne iyan dey en maan egkeenen is kandin he anak.
2KI 6:29 Umbe, midhilutù dey is anak ku ne migkaan dey. Piru hein mid-ilis he andew, migkeǥiyan ku sikandin he iyan dey en maan egkeenen is kandin he anak piru in-eles din heini.”
2KI 6:30 Ne hein nezineg dutun te hadì haazà is migkaǥi zutun te vahi, mibindas din is bisti zin tenged te utew zin kegkeseeng. Dutun te kedhipanew zin diyà te zivavew te verengbeng, naahà sikandin te menge etew he mibpezizeleman din is bisti zin te visti he saku tenged te kedlalew zin.
2KI 6:31 Ke sikandin te, “Berakat he zekelà is silut kedì te Nengazen ke kenè ku igkepetamped is lieg ni Elisha he anak ni Shafat guntaan he andew!”
2KI 6:32 Dutun he timpu, ebpimpinuu si Elisha ziyà te valey zin is ebpekidlalag te menge ebpemendumala te Israel. Midsuǥù haazà is hadì te etew he ibpehuna zin diyà te ki Elisha. Piru zutun te wazè pa mekeuma haazà is midsuǥù te hadì, migkeǥiyan ni Elisha haazà is ebpemendumala te, “Heeyan is hadì tew he ebpemenhimatey, midsuǥù sikandin te etew he ibpetamped te lieg ku. Ne emun ebpekeume en heeyan he etew ne lekevi niw is gemawan ne kenè niw ipeseled. Is hadì he egalen din, edtinundug kandin.”
2KI 6:33 Ne zutun te edlelaǥan pa sikandan ni Elisha, nekeume en sikan is midsuǥù te hadì ne migkaǥi sikandin te, “Heini he kezeetan, ketau te Nengazen is kegkehitevua kayi. Umbe kenà ad edtaǥad te tavang din.”
2KI 7:1 Midtavak si Elisha te, “Pemineǥa nu is egkeǥiyen te Nengazen: ‘Te iring kayi he uras keeselem, eberatu is egkengepemasa ziyà te velegyeey ziyà te Samaria. Is bali te tetelu he ǥantang he herina, senge vuuk dà he pelata, ne iring ded dutun is bali te heenem he ǥantang he barli.’ ”
2KI 7:2 Ne Migkaǥi haazà is upisyal he sineriǥan te hadì te, “Kenà heeyan egkehitavù, su minsan dekelà is menge sebpet su ibpeuzan te Nengazen, ne kenà iring keniyan keveratu is keenen.” Midtavak si Elisha te, “Egkeehè nu is kegkeul-ulaha kayi, piru kenè ka ebpekekaan duen te nekaǥi ku.”
2KI 7:3 Dutun he timpu, duen heepat he menge etew he zuen daru te lundis dan he ebpemimpinuu ziyà te pultahan te inged. He ke sikandan te, “Maan is edtulung kiw zà kayi ed-ubpàubpà taman te kebpatey tew?
2KI 7:4 Emun edseled kiw ziyà te inged ne ebpatey kiw te kegkevitil, ne emun edtulung kiw zà ebpimpinuu kayi, ebpatey kiw ǥihapun. Umbe nasì kiw en edhendiyà te kampu te menge Aramihanen ne edsurindir kiw. Ne emun kenè kiw zan ebmenuwen, ne meupiya, piru emun edhimetayan kiw zan ne maambe en.”
2KI 7:5 Umbe, hein mezukilem en, midhendiyè dan te kampu te menge Aramihanen. Ne hein nekeuma zan ne wazà etew zuen.
2KI 7:6 Su impezineg te Nengazen is menge sundaru he menge Aramihanen te keǥurub te menge kerwahi, menge kudà, wey mahabet he menge sundaru, umbe kunaan duen te menge Aramihanen ke midsuhulan te hadì te Israel is hadì te menge Hitihanen wey is hadì te menge Ehiptohanen te kedsurung kandan.
2KI 7:7 Umbe, mibpelaǥuy sikandan hein mezukilem ne mid-ewaan dan is menge tulda zan, menge kudè dan, wey menge asnu zan. Mibpelaǥuy zan he wazè dan en meuwit is menge azen dan he zutun te kampu zan.
2KI 7:8 Ne kebpekeuma zuen te menge etew ziyà te kampu he zuen daru te lundis dan, midtigseselimbaha zan te edseled haazà is menge tulda. Edsigudu zan en egkaan wey ed-inum, wey ebpenguwa te menge pelata, menge vulawan, wey menge manggad. Ne impen-eles dan heini.
2KI 7:9 Ne hein malù neuǥet, ke sikandan te, “Kenà hustu heini is mibeelan tew. Midtudtul tew pezem guntaan he andew he nemelaǥuy en is menge kuntada tew, piru in-eles tew heini. Emun egkeeselemen tew pa is kedtudtula tew kayi, ne edsilutan kiw en. Ne kuwa kew en su egenat kiw, ne edtudtulen tew heini ziyà te turuǥan te hadì.”
2KI 7:10 Umbe, midlikù sikandan diyà te inged he Samaria ne mid-umew zan is menge vantey ziyà te pultahan te inged ne migkeǥiyan dan te, “Midhendiyè key te kampu te menge Aramihanen, ne wazà duen etew, gawas te menge kudà, wey menge asnu, he impenagkes. Ne zutun daan te menge tulda zan is menge azen dan.”
2KI 7:11 Ne netudtulan haazà is menge vantey te turuǥan.
2KI 7:12 Minsan mezukilem en haazà, mid-enew sikan is hadì ne migkeǥiyan din is menge upisyal zin te, “Egkeǥiyen ku keniyu ke hengkey is pelanu te menge Aramihanen. Netuenan dan he egkengevitil kiw, umbe mid-ewaan dan is kampu zan ne nemen-eles dan diyà te menge vuvungan. Su egkeisip dan he siguradu egawas kiw ne edekepen kiw zan ne ed-eǥawen dan is inged tew.”
2KI 7:13 Ne midtavak is sevaha zuen te menge upisyal zin te, “Duen pa nesamà he lelima he menge kudè tew, ne meupiya ke edsuǥù kiw te egkepipira he etew te kedsusi ke hengkey is nehitavù? Maambe en ke himetayi sikandan, su emun kayi zan dà ne ebpatey gihapun sikandan duma kenitew.”
2KI 7:14 Umbe, in-andam dan is dezuwa he kerwahi zuma te menge kudà, ne midsuǥù sikan is hadì te menge etew su wey zan mesusi ke hengkey is nehitavù te menge sundaru he Aramihanen.
2KI 7:15 Nekeuma sikandan taman diyà te Wahig he Jordan, ne neehè dan diyà te menge zalan is menge manggad wey menge gelemiten he impenimbag te menge Aramihanen tenged te kegkezeǥusu zan hein ebpemelaǥuy zan. Midlikù haazà is menge sinuǥù ne midtudtul zan heini ziyà te hadì.
2KI 7:16 Ne nenggawas dutun te inged is menge etew ne mibpenguwa zan is nengetaǥak diyà te kampu te menge Aramihanen. Ne neulaula iyan is nekaǥi te Nengazen he is bali te tetelu he ǥantang he herina ne senge vuuk dà he pelata, ne iring ded dutun is bali te heenem he ǥantang he barli.
2KI 7:17 Iyan insavuk duen te hadì he ed-atur te ebpemenlawang he menge etew ziyà te pultahan dutun te inged, sikan is upisyal he sineriǥan din. Piru nepiley sikandin ne neǥunas te menge etew zutun te pultahan, ne minatey sikandin sumalà te nekaǥi ni Elisha he suluǥuen te Megbevayà hein midhendiyà te kandin sikan is hadì.
2KI 7:18 Neulaula zaan is nekaǥi zuen te suluǥuen te Megbevayà diyà te hadì he ke sikandin te, “Iring kayi he timpu keeselem, ne eberatu is egkengepemasa ziyà te belegyeey ziyà te Samaria. Is bali te tetelu he ǥantang he herina, senge vuuk dà he pelata, ne iring ded dutun is bali te heenem he ǥantang he barli.”
2KI 7:19 Dutun he timpu midtavak sikan is upisyal te hadì te, “Kenà heeyan egkehitavù, su minsan dekelà is menge sebpet su ibpeuzan te Nengazen, ne kenà iring keniyan keveratu is keenen.” Midtavak si Elisha te, “Egkeehè nu is kegkeul-ulaha kayi, piru kenè ka ebpekekaan duen te nekaǥi ku.”
2KI 7:20 Ne iyan heini nehitavù duen te upisyal; neǥunas sikandin te menge etew he ebpemenlawang te pultahan te inged, ne minatey sikandin.
2KI 8:1 Dutun te nehuna he timpu migkeǥiyan ni Elisha sikan is bahi he mibanhew ni Elisha is anak din te, “Dumaha nu is pemilya nu ne ziyè kew upbà te selakew en he lugar, su migkaǥi is Nengazen te egkehitavù is pitu he tuig he vitil kayi te Israel.”
2KI 8:2 Ne mibpezumdumahan dutun te vahi haazà is migkaǥi zuen te suluǥuen te Megbevayà. Migenat sikandin duma is pemilya zin ne ziyà med-ubpà te tanà te menge Filistihanen seled te pitu he tuig.
2KI 8:3 Ne hein midlavey en is pitu he tuig, midlikù sikandin diyà te Israel ne midhendiyà sikandin te hadì su midhangyù he tevangi sikandin he mekelikù diyà te kandin is baley zin wey is tanè din.
2KI 8:4 Ne hein edseled en sikandin, mibpekidlalag sikan is hadì ki Gehazi he suluǥuen ni Elisha. Migkaǥi haazà is hadì te, “Tudtuli a kenikew te langun he egkein-inuwan he menge vaal he mibeelan ni Elisha.”
2KI 8:5 Ne zutun te edtudtulen ni Gehazi zutun te hadì ke mibmenumenu ni Elisha te ed-uyag sikan is batà he minatey, ne mid-uvey zutun te hadì sikan is iney zuen te vatà ne midhangyù he tevangi sikandin he mekelikù diyà te kandin is baley zin wey is tanè din. Migkaǥi si Gehazi te, “Mahal he Hadì, iyan heini sikan is bahi, ne iyan heini sikan is anak din he mid-uyag ni Elisha.”
2KI 8:6 Ne mid-insaan dutun te hadì haazà is bahi mehitenged dutun, ne midtudtulan sikandin duen te vahi. Umbe mibpetawag haazà is hadì te sevaha he upisyal he ebpekeuǥup dutun te vahi. Migkeǥiyan din haazà is upisyal te, “Tevangi nu sikandin he mekelikù diyà te kandin is langun he ǥaked din, ragkes en is langun he netiǥeyunan diyà te vevesukè din puun te kegenat din taman kayi te kebpekelikù din.”
2KI 8:7 Ne midhendiyà si Elisha te Damascus, he iyan kepital te Aram, he zutun mezeruwi si Hadì Ben Hadad he hadì te Aram. Ne hein netudtulan haazà is hadì he zutun sikan is suluǥuen te Megbevayà,
2KI 8:8 migkeǥiyan din si Hazael te, “Uwit ka te gasa ne sinuǥunga nu is suluǥuen te Megbevayà. Ne keǥiyi nu sikandin he insai zin is Nengazen ke egkeulian e pa kayi te zaru ku.”
2KI 8:9 Umbe, migkergahan ni Hazael is 40 he kemilyu te kinemeupiyahan he menge pruduktu ziyà te Damascus ne mid-uwit din diyà te ki Elisha su igasa zin. Ne hein nekeuma sikandin diyà te ki Elisha, ke sikandin te, “Midsuǥù a te suluǥuen nu he si Ben Hadad, he hadì te Aram, te ked-insà diyà te kenikew ke egkeulian pe be sikandin te zaru zin.”
2KI 8:10 Midtavak si Elisha te, “Ulì ke en ne keǥiyi nu sikandin he siguradu he egkeulian sikandin, piru impahayag te Nengazen kayi te kedì he ebpatey sikandin.”
2KI 8:11 Ne mibpemusiǥahan ni Elisha si Hazael taman te neeled heini. Ne midsineǥew si Elisha.
2KI 8:12 Mid-insaan sikandin ni Hazael, “Maan, datù, is midsineǥew ka?” Midtavak si Elisha, “Geina te netuenan ku is mezaat he ebeelan nu te menge Israilihanen. Ebinsulan nu is binerengbeng he menge inged dan, ebpenhimetayan nu is menge vetan-en kandan, edrunteken nu is dezeisey he menge vatà kandan, wey edsirian nu is meǥingey he menge vahi kandan.”
2KI 8:13 Midtavak si Hazael, “Datù, kenè ku heeyan egkehimu. Su wazè ku ǥehem te kebaal keniyan.” Midtavak si Elisha te, “Impahayag te Nengazen kayi te kedì he egkehimu ka he hadì diyà te Aram.”
2KI 8:14 Midlikù si Hazael ziyà te egalen din he si Ben Hadad, ne mid-insaan sikandin ni Ben Hadad te, “Hengkey is migkaǥi te Nengazen diyà te kenikew?” Midtavak si Hazael te, “Migkaǥi sikandin kayi te kedì he siguradu he egkeulian ka.”
2KI 8:15 Piru hein mid-ilis he andew, migkuwa si Hazael te mekepal he manggad ne intereb din ne nesuep heini te wahig ne iyan migamit din haazà te kebpueta zin duen te hadì taman te minatey. Ne si Hazael is mid-ilis kandin te kedhadì.
2KI 8:16 Nehimu he hadì diyà te Juda si Jehoram he anak ni Jehoshafat hein ikelima he tuig te kedhadì ni Joram diyà te Israel te anak ni Ahab.
2KI 8:17 Mibpenuiǥen si Jehoram te 32 he tuig hein nehimu sikandin he hadì. Diyà sikandin med-ubpà te Jerusalem, ne midhadì sikandin seled te walu he tuig.
2KI 8:18 Midsunud din is mibeelan te menge hadì te Israel, iring te mibeelan te pemilya ni Ahab, su neesawa zin is anak ni Ahab. Mezaat is ulaula zin diyà te etuvangan te Nengazen.
2KI 8:19 Piru tenged ki David, wazà dèdeeti te Nengazen is Juda, su nenaad is Nengazen diyà te ki David he ebpedayun is kebpekahadì te menge kevuwazan din taman te taman.
2KI 8:20 Hein timpu te kedhadì ni Jehoram, nekidsukulà is Edom te Juda, ne mibpilì dan te keugelingen dan he hadì.
2KI 8:21 Umbe, midhendiyà si Jehoram te Zair he mid-uwit din is langun he kerwahi zin. Midliǥuyan sikandin wey is menge peremandar te menge kerwahi zin te menge Edomanhen. Piru hein mezukilem, midtik-awan dan etekiya is menge Edomanhen, ne nekepelaǥuy zan su nekelawang dan. Ne zutun mid-ulì is menge sundaru ni Jehoram.
2KI 8:22 Taman en guntaan ne kemulu pa ebpekidsukulà is Edom te Juda. Ne zutun daan he timpu nekidsukulà daan is Libna te Juda.
2KI 8:23 Is duma pa he ǥuǥud mehitenged te kedhadì ni Jehoram, wey is langun he mibeelan din, ne ingkesurat diyà te Libru he Midsuratan te menge Keguǥuza te menge Hadì te Juda.
2KI 8:24 Ne hein minatey en si Jehoram inleveng sikandin diyà te midlevengan te menge kepuun din diyà te Inged ni David. Ne iyan nekeilis kandin te kedhadì is anak din he si Ahazia.
2KI 8:25 Nehimu he hadì diyà te Juda si Ahazia he anak ni Jehoram hein ike-12 he tuig te kedhadì ni Joram, he anak ni Ahab, diyà te Israel.
2KI 8:26 Mibpenuiǥen si Ahazia te 22 he tuig hein nehimu sikandin he hadì. Diyà sikandin med-ubpà te Jerusalem, ne midhadì sikandin seled te senge-tuig. Is iney zin iyan si Atalia he apù ni Hadì Omri he hadì te Israel.
2KI 8:27 Mid-iring sikandin te ulaula te pemilya ni Ahab. Mezaat is ulaula zin diyà te etuvangan te Nengazen iring te vaal te pemilya ni Ahab, su mibpengesawa sikandin te sevaha he sakup te pemilya ni Ahab.
2KI 8:28 Mibpezumahà si Ahazia wey si Joram he anak ni Ahab te kebpekidtebek ki Hadì Hazael he hadì te Aram. Mibpetebekè dan diyà te Ramot Gilead, ne nepelian si Joram.
2KI 8:29 Umbe, mid-ulì si hadì Joram diyà te inged he Jezreel su para meulii is palì din. Ne te zutun sikandin te inged, midlauy sikandin te Hadì Ahazia he hadì te Juda.
2KI 9:1 Impetawag ni Elisha is sevaha he etew he sakup te grupu te menge ebpeneuven ne migkeǥiyan din te, “Pengandam ka te kedhendiyà te Ramot Gilead ne uwita nu heini is tivud te lana.
2KI 9:2 Ne emun ebpekeuma kad, pen-ahaa nu si Jehu he anak ni Jehoshafat wey apù ni Nimshi. Ne ipaawè nu sikandin puun te menge zuma zin ne zumaha nu ziyà te ruǥu he iyan kew zà is dezuwa.
2KI 9:3 Ne kuwaa nu is lana ne itisi nu is ulu zin ne kaǥi ka te, ‘Iyan heini egkeǥiyen te Nengazen: Mibpilì ku sikew he hadì te Israel.’ Ne zutun gaanggaan ka ǥawas ne pelelaǥuy ka.”
2KI 9:4 Umbe, midhendiyà haazà is betan-en he ebpeneuven te Ramot Gilead.
2KI 9:5 Ne hein nekeuma sikandin, neehè din is upisyal te menge sundaru he ebpemimpinuu. Ke sikandin te, “Datù, duen edlelaǥen ku ziyà te kenikew.” Mid-insà si Jehu te, “Hentei kenami is edlelaǥan nu?” Midtavak haazà is etew te, “Iyan ke zà, datù.”
2KI 9:6 Midhitindeg si Jehu ne midseled diyà te valey. Ne mid-itisan duen te ebpeneuven is ulu ni Jehu te lana ne migkeǥiyan din te, “Iyan heini egkeǥiyen te Nengazen he Megbevayà te Israel: ‘Mibpilì ku sikew he hadì te menge etew ku he menge tig-Israel.
2KI 9:7 Dezeeti nu is pemilya ni Ahab he egalen nu, su para mevelesi ku si Jezebel te kebpenhimetayi zin te menge suluǥuen ku he mibpenaub ku wey te zuma pa he menge suluǥuen ku.
2KI 9:8 Egkezeetan is tivuuk he pemilya ni Ahab. Ebpenhimetayan ku is langun he sakup te pemilya zin he menge maama, uripen man etawa kenà.
2KI 9:9 Ebeelan ku ziyà te pemilya ni Ahab is mibeelan ku ziyà te pemilya ni Jeroboam he anak ni Nebat, wey te pemilya ni Baasa he anak ni Ahia.
2KI 9:10 Emun bahin ki Jezebel, egkeenen sikandin te menge asu ziyà te tanà he Jezreel, ne wazà edleveng kandin.’ ” Ne zutun midliǥawang haazà is ebpeneuven ne mibpelelaǥuy.
2KI 9:11 Ne hein midlikù si Jehu zuen te zuma zin he menge upisyal, ne mid-insà kandin is sevaha kandan, “Egkemenumenu kad? Maan is midhendiyà te kenikew sikan is egketalengtaleng he etew?” Midtavak si Jehu te, “Egkeentuk niw vuwa ke hentei sikandin wey ke hengkey is egkeǥiyen din.”
2KI 9:12 Midtavak sikandan te, “Kenè key kenikew terterui. Keǥiya nu kenami ke hengkey is migkaǥi zin.” Migkaǥi si Jehu te, “Migkeǥiyan e zin bahin te migkaǥi te Nengazen he mibpilì e zin he hadì te Israel.”
2KI 9:13 Mid-awà dutun te menge upisyal is samput dan ne indempas dan diyà te heǥezan he edhitindeǥan ni Jehu. Mibpezaǥing dan te vudyung ne ingkulahì dan is lalag he edhenduen te, “Si Jehu en is hadì!”
2KI 9:14 Mibpelenuwan ni Jehu is kedezaat ki Joram. (Dutun he timpu edipinsahan ni Joram wey te menge tig-Israel is Ramot Gilead su para kenà mekependezaat kandan si Hadì Hazael he hadì te Aram.
2KI 9:15 Piru nepelian si Joram dutun te kebpekidtebek dan te menge Aramihanen, umbe mid-ulì sikandin diyà te Jezreel su para meulii is palì din.) Migkeǥiyan ni Jehu is iring din he menge upisyal te, “Emun egkesuat kew he egkehimu a he hadì, kenè niw mehimuwa he zuen ebpekeǥawas kayi te inged. Su kela ke zuen medhendiyà te Jezreel he ebpeketudtul he midhimu a keniyu he hadì.”
2KI 9:16 Mid-untud si Jehu te kerwahi zin ne midhendiyà te Jezreel he zutun medhimeley si Joram. Ne zutun daan si Hadì Ahazia he hadì te Juda su nenumbaley ziyà te ki Joram.
2KI 9:17 Ne zutun, naahà te vantey te turi ziyà te Jezreel si Jehu is ebpekeuma zuma te menge sundaru zin, umbe migkulahì sikandin te, “Zuen edhengkayi he menge sundaru!” Midtavak si Joram te, “Suǥù ka te pereuntud te kudà he ibpesinuǥung kandan su wey metueni ke meupiya ve is tuyù dan te kedhengkayi.”
2KI 9:18 Umbe, migenat is sevaha he pereuntud te kudà te kedsinuǥung kandan, ne migkaǥi sikandin te, “Egkesuat is hadì he metueni zin ke meupiya is tuyù niw te kedhengkayi.” Ne midtavak si Jehu te, “Hengkey is lavet nu? Sunud ka kediey!” Mibensag is bantey te hadì te, “Nekeume en diyà sikan is pereuntud te kudà he midsuǥù nu piru wazè pa sikandin medlikù.”
2KI 9:19 Umbe, mid-uman en maan midsuǥù haazà is hadì te sevaha pa he pereuntud te kudà. Ne kebpekeuma zin diyà te kandan ke sikandin te, “Egkesuat is hadì he metueni zin ke meupiya is tuyù niw te kedhengkayi.” Midtavak si Jehu te, “Hengkey is lavet nu? Sunud ka kediey!”
2KI 9:20 Mid-uman en maan mebensag sikan is bantey te hadì, “Nekeume en sikan is ikezuwa he pereuntud te kudà he midsuǥù nu, piru wazà gihapun sikandin medlikù! Ne is pengulu keniyan te menge sundaru ne henduen be te si Jehu su utew meǥaan he ebpepelelaǥuy te kudà!”
2KI 9:21 Mibmandar si Joram te, “Iandam niw is kerwahi ku.” Ne hein naandam en migenat si Hadì Joram he hadì te Israel wey si Hadì Ahazia he hadì te Juda, su edsinuǥungen dan si Jehu. Tigselimbaha sikandan te kerwahi he mid-untuzan dan. Ne nesinuǥung dan si Jehu ziyà te tanà ni Nabot he tig-Jezreel.
2KI 9:22 Ne hein naahà ni Joram si Jehu, mid-insaan din te, “Meupiya ve is tuyù nu te kedhengkayi nu, Jehu?” Midtavak si Jehu te, “Kenà meupiya su kemulu edseriǥi kayi te kenitew is menlelamat wey kemulu ed-ezapa is menge ed-ezapen he kenà tutuu he megbevayà he mibpuunaan te iney nu he si Jezebel.”
2KI 9:23 Ne impeveriyung ni Joram is kudè din ne meǥaan is kebpepeleleǥuya zin kayi. Mibensaǥan din si Ahazia te, “Midluib kedì si Jehu!”
2KI 9:24 Ne migkuwa ni Jehu is panè din ne mibpanè din si Joram diyà te peka. Ne midlembasan te vesut is pusung din, ne nepiley sikandin diyà te kerwahi zin.
2KI 9:25 Migkeǥiyan ni Jehu si Bidkar he upisyal zin te, “Kuwaa nu is lawa ni Joram ne itimbag nu sikandin diyà te pemuleey ni Nabot he tig-Jezreel. Egketenuzan nu ve hein mid-untud ki he ziyè ki te egkeiniyuǥan te amey zin he si Ahab? Migkaǥi te Nengazen is menge lalag he ebpekesuǥat kandin he:
2KI 9:26 ‘Neehè ku gevii is kedhimetayi nu ki Nabot wey te menge anak din. Ne ebpenangdù a he ebelesan ku sikew kayi mismu te pemuleey ni Nabot. Iyan a, is Nengazen, is migkaǥi kayi.’ Umbe kuwaa nu sikandin ne itimbag nu ziyà te vevesukà ni Nabot sumalà te nekaǥi te Nengazen.”
2KI 9:27 Ne hein naahà ni Hadì Ahazia he hadì te Juda haazà is nehitavù, mibpelaǥuy sikandin pehendiyà te Bet Hagan. Midal-as sikandin ni Jehu he ebpemensag te, “Himetayi niw zaan sikandin!” Umbe mibpanè dan sikandin diyà te kerwahi zin hein ed-ikul sikandin te zalan pehendiyà te Gur, he uvey te Ibleam. Nekepelaǥuy sikandin he neteǥepalì taman te Megido, piru minatey sikandin dutun.
2KI 9:28 Ne migkuwa sikandin te menge suluǥuen din ne ingkarga zan te kerwahi pehendiyà te Jerusalem. Ne inleveng sikandin diyà te midlevengan te menge kepuun din diyà te Inged ni David.
2KI 9:29 Nehimu he hadì diyà te Juda si Ahazia hein ike-11 he tuig te kedhadì ni Joram diyà te Israel te anak ni Ahab.
2KI 9:30 Ne midhendiyà si Jehu te Jezreel. Ne hein netuenan haazà ni Jezebel mibpeguwapa sikandin ne midsulew ziyà te sulawà duen te turuǥan.
2KI 9:31 Ne hein midseled si Jehu ziyà te ǥemawan duen te turuǥan, migkeǥiyan sikandin ni Jezebel te, “Sikew is iring ki Zimri te ed-uney edhimatey te egalen din, meupiya ve is tuyù nu te kedhengkayi?”
2KI 9:32 Midlingahà si Jehu zutun te sulawà ne mid-insà sikandin te, “Duen be ziyan te zivavew edlavan kedì?” Duen dezuwa etawa tetelu he upisyal he mibpantew kandin dutun te sulawà.
2KI 9:33 Migkeǥiyan sikandan ni Jehu te, “Iulug niw sikandin!” Umbe in-ulug dan si Jezebel. Ne is duma he lengesa zin nemenresik diyà te verengbeng wey ziyà te menge kudà, ne midtekutakan sikandin te menge kudà ni Jehu.
2KI 9:34 Ne midseled si Jehu zutun te turuǥan ne migkaan wey mid-inum. Ne hein nekepasad, migkaǥi te, “Kuwaa niw heeyan is midrewakan he vahi ne ileveng niw, su anak man sikandin te hadì.”
2KI 9:35 Piru hein egkuwaan dan en is lawa zin su idleveng dan, ne wazè en nesamà gawas te ulu, menge paa, wey menge velad.
2KI 9:36 Umbe, midlikù dan ne migkaǥi zan heini ziyà te ki Jehu. Migkaǥi si Jehu te, “Iyan heini migkaǥi te Nengazen pinaaǥi te suluǥuen din he si Elias he tig-Tishbe: ‘Egkeenen te menge asu is sapù ni Jezebel ziyà te sevaha he tanà diyà te Jezreel.
2KI 9:37 Ebpekedsusuwey is lawa zin iring te ebpekepeyapat he tai te ayam ne wazè en ebpekekilala kandin.’ ”
2KI 10:1 Duen 70 he kevuwazan ni Ahab diyà te Samaria. Umbe mibpeuwitan ni Jehu te surat is menge upisyal zutun te inged, menge ebpemendumala, wey menge peraatur te menge kevuwazan ni Ahab. Iyan heini taǥù te surat:
2KI 10:2 “Iyan kew midseriǥan te menge kevuwazan ni Hadì Ahab, menge kerwahi zin, menge kudè din, binerengbeng he inged, wey menge ǥumaan.
2KI 10:3 Umbe, emun egkezawat niw en heini is surat ku, pilì kew te engayan he edhimuwen he hadì he ebpuun diyà te kevuwazan ni Hadì Ahab, ne pekidtebek kew kenami te kedipinsa te pemilya ni Hadì Ahab.”
2KI 10:4 Piru utew sikandan nahandek, ne ke sikandan te, “Si Jehu, emun wazà sikandin mezaag te zezuwa he hadì, ne iyan kiw pe man mekezaag kandin.”
2KI 10:5 Umbe, is administradur te turuǥan, is gubunedur te inged, is ebpemendumala, wey is menge peraatur te menge kevuwazan te hadì, mibpesuratan dan si Jehu. Ne iyan heini taǥù te surat dan: “Menge suluǥuen key kenikew, ne ebeelan dey is langun he idsuǥù nu kenami. Kenè key ebpilì te selakew en he hadì; beeli nu is mid-isip nu he meupiya.”
2KI 10:6 Mibelesan sikandan pesurati ni Jehu te: “Emun dumezapig kew kedì wey andam kew he edsunud kedì, penempezi niw te lieg is menge kevuwazan ni Ahab ne uwita niw kayi te kediey kayi te Jezreel is menge ulu zan, te iring kayi he uras keeselem.” Dutun he timpu, haazà is 70 he kevuwazan ni Hadì Ahab, ed-elimahan te dungganen he menge etew ziyà te inged he Samaria puun te menge vatè pa sikandan.
2KI 10:7 Ne hein nekeuma is surat ni Jehu, migkuwa zutun he menge etew sikan is 70 he kevuwazan duen te hadì ne mibpenhimetayan dan. Intaǥù is menge ulu kayi he menge etew ziyà te menge baskit ne impeuwit dan diyà te ki Jehu ziyà te Jezreel.
2KI 10:8 Ne hein nekeuma is mid-uwit dutun, migkeǥiyan din si Jehu te, “Impeuwit dan is menge ulu te menge kevuwazan duen te hadì.” Ne mibmandar si Jehu te, “Tepuka niw heini te zezuwa he tapuk diyà te pultahan te inged ne vey-ani niw en dutun taman te meselem.”
2KI 10:9 Hein meselem, migawas si Jehu ne midhitindeg dutun te etuvangan te menge etew ne migkaǥi te, “Wazè niw salà. Iyan a mibpelanu te ebpekesuǥat te egalen ku ne minatey sikandin. Piru hentei is midhimatey kandan te langun?
2KI 10:10 Pinaaǥi kayi egkesavut niw he is langun he migkaǥi te Nengazen he ebpekesuǥat te pemilya ni Ahab egketuman iyan. Midtuman te Nengazen is migkaǥi zin pinaaǥi ki Elias he suluǥuen din.”
2KI 10:11 Ne mibpenhimetayan ni Jehu is langun he kezumahan ni Ahab diyà te Jezreel, ragkes en is menge upisyal zin, menge emiǥu zin, wey is menge memumuhat din. Wazà nesamà kandan he uuyag.
2KI 10:12 Ne midhipanew si Jehu pehendiyà te Samaria. Ne zutun te kedhipanew zin diyà te zalan he ziyà te egngezanan te Tiǥumà te menge Bantey te Kerehidu,
2KI 10:13 neehè din is menge kezuzumahi ni Hadì Ahazia he hadì te Juda. Mid-insà sikandin te, “Hentei kew?” Midtavak dan te, “Menge kezumahan key ni Ahazia ne midhipanew key su ebpengemustahan dey is menge kevuwazan ni Hadì Ahab wey si Rayna Jezebel.”
2KI 10:14 Ne midsuǥù ni Jehu is menge etew zin te, “Dekepa niw sikandan, iyan, kenè niw pa himetayi.” Umbe miduma zan sikandan diyà te teheb ne zutun dan geraa. 42 sikandan is langun, ne wazà nesamà kandan he uuyag.
2KI 10:15 Ne ked-awà ni Jehu zutun, neehè din si Jehonadab he anak ni Recab is edhipanew su edsinuǥung kandin. Ne migkemusta sikandin ni Jehu ne mid-insaan din te, “Dumezapig ke ve kediey iring te kedapig ku ziyà te kenikew?” Midtavak si Jehonadab te, “Uya.” Migkaǥi si Jehu te, “Emun iyan heeyan, ne ikawè nu kayi te kediey is belad nu.” Ingkawà ni Jehonadab is belad din ne impepemenahik sikandin ni Jehu ziyà te kerwahi zin.
2KI 10:16 Migkaǥi si Jehu te, “Duma ka kediey su wey nu maahà is kegkemepezumdumahan ku te Nengazen.” Umbe mid-untud si Jehonadab duma kandin.
2KI 10:17 Kebpekeuma ni Jehu ziyà te Samaria mibpenhimetayan din is langun he nesamà te pemilya ni Ahab, he sungkad te nekaǥi te Nengazen pinaaǥi ki Elias.
2KI 10:18 Midtiǥum ni Jehu is langun he menge etew ne migkeǥiyan din sikandan te, “Kenà utew meheǥet is kebpenilbi ni Ahab ki Baal. Piru siak mulà, ibpeehè ku he meheǥet is kediey he kebpenilbi ki Baal.
2KI 10:19 Umbe, ipehengkayi niw te kediey is langun he ebpeneuven ni Baal, wey is menge memumuhat para kandin, wey is langun he ebpenilbi kandin. Kinahanglan he kayi sikandan is langun, su ebpemuhat a te zekelà he pemuhat para ki Baal. Is kenà edhengkayi ibpehimetayan ku.” Piru uvag-uvag dà haazà su para mehimetayi zin is ebpemenilbi ki Baal.
2KI 10:20 Migkaǥi si Jehu te, “Edhimu kiw te ispisyal he ketiǥuman su wey tew meveǥayi te zengeg si Baal.” Umbe impehibelu haazà diyà te menge etew.
2KI 10:21 Impetawag ni Jehu is langun he ebpenilbi ki Baal seled te tivuuk he Israel, ne midhendutun is kada sevaha kandan. Midseled dan is langun diyà te simbahan he para ki Baal, ne nepenù haazà is simbahan.
2KI 10:22 Migkeǥiyan ni Jehu sikan is ed-atur te idsimba he menge visti, “Ibpevivisti is langun he ebpenilbi ki Baal.” Umbe mibeǥayan din sikandan.
2KI 10:23 Ne midseled si Jehu wey si Jehonadab he anak ni Recab dutun te simbahan he para ki Baal. Migkeǥiyan ni Jehu sikan is ebpemenilbi ki Baal te, “Sigureduwa niw he wazà ebpekesahug keniyu he menge etew he ebpenilbi te Nengazen. Kinahanglan he iyan kew zà nekeseled kayi is ebpenilbi ki Baal.”
2KI 10:24 Ne zutun te seled te simbahan nemuhat sikandan te menge pemuhat he edtutungen wey zuma pa he menge pemuhat. Daan en he zuen 80 he menge etew ziyà te gawas duen te simbahan ne migkeǥiyan din sikandan te, “Insarig ku keniyu is kebpenhimatey kandan. Edhimetayan ku emun duen keniyu ebpesagdan ne ebpekepelaǥuy is minsan sevaha zà kandan.”
2KI 10:25 Ne hein nekepasad si Jehu he ebpemuhat te menge pemuhat he edtutungen, mibmendaran din is menge vantey wey menge upisyal te, “Seled kew ne penhimetayi niw sikandan! Kenè kew pesagdan su para wazà ebpekepelaǥuy kandan!” Umbe mibpenhimetayan dan haazà is menge etew pinaaǥi te ispada ne impenimbag dan haazà is nemematey ziyà te gawas. Ne midseled dan diyà te kineselezan he vahin duen te simbahan he para ki Baal
2KI 10:26 ne migkuwa zan dutun is tedeman he vatu ne mid-uwit dan diyà te gawas, ne mibinsulan dan.
2KI 10:27 Ne hein nepasad dan te edrupet sikan is tedeman he vatu ki Baal, mibengkag dan sikan is simbahan he para ki Baal, ne midhimu heini te menge etew he indesà taman en guntaan.
2KI 10:28 Pinaaǥi kayi in-awà ni Jehu is ulaula he iyan is ked-ezapa ki Baal diyà te Israel.
2KI 10:29 Piru mid-iringan din gihapun is menge salà ni Jeroboam he anak ni Nebat, he nehimu he hinungdan te kebpekesalà te menge tig-Israel. He iyan is ked-azap diyà te Betel wey Dan te vulawan he ledawan he menge vaka.
2KI 10:30 Migkeǥiyan te Nengazen si Jehu te, “Meupiya ziyà te etuvangan ku is mibeelan nu; midsunud nu is egkesuatan ku he mehitavù diyà te pemilya ni Ahab. Tenged te kebeeli nu kayi, ibpahadì ku is menge kevuwazan nu taman te ikeepat he lapis.”
2KI 10:31 Piru wazà medtuman si Jehu te menge kesuǥuan te Nengazen he Megbevayà te Israel, pinaaǥi te tivuuk he gehinawa zin. Kekenà, mid-iringan din is menge salà ni Jeroboam, he nehimu he hinungdan te kebpekesalà te menge tig-Israel.
2KI 10:32 Dutun he timpu impenaneynaney ipezeisey te Nengazen is tanà he nesakup te Israel. Naaǥew ni Hadì Hazael is menge lugar ziyà te Israel
2KI 10:33 he ziyà te zapit te edsilaan te Jordan: is tivuuk he Gilead, is Bashan, wey is menge lugar ziyà te zizaya te inged he Aroer he uvey te zal-ug he Arnon. Ed-ubpaan heini zengan he tanà te tribu ni Gad, ni Reuben, wey ni Manase.
2KI 10:34 Is duma pa he ǥuǥud mehitenged te kedhadì ni Jehu, wey te nevantug he menge vaal zin wey is menge kezeeǥan din, ne ingkesurat diyà te Libru he Midsuratan te menge Keguǥuza te menge Hadì te Israel.
2KI 10:35 Hein minatey en si Jehu, inleveng sikandin diyà te Samaria. Ne si Jehoahaz he anak din, iyan nekeilis kandin te kedhadì.
2KI 10:36 Midhedian ni Jehu is Israel ziyà te Samaria seled te 28 he tuig.
2KI 11:1 Hein netuenan ni Atalia he minatey en is anak din he si Hadì Ahazia he hadì te Juda, midisisyun sikandin he ebpenhimetayan din is langun he sakup te pemilya te hadì.
2KI 11:2 Piru midlibri ni Jehosheba is anak ni Ahazia he si Joash hein meǥaan en edhimetayi sikandin wey is duma pa he menge anak te hadì. Heini si Jehosheba etevey ni Ahazia he anak he vahi ni Hadì Jehoram. In-eles din si Joash wey is ed-elima kandin diyà te sevaha he ruǥu zuen te valey te Nengazen, umbe wazà sikandin mepatey.
2KI 11:3 Seled te heenem he tuig, ne ziyà i-eles te valey te Nengazen si Joash wey is ed-elima te iyan pa zutun ebmandù te Juda si Atalia he rayna.
2KI 11:4 Ne hein ikepitu he tuig, impetawag te memumuhat he si Jehoyada is menge peremandar te menge vantey te hadì wey is menge perevantey te turuǥan he medhendiyè dan te valey te Nengazen. Ne zuen neuyunan dan ne impepenangdù din sikandan diyà te valey te Nengazen. Ne hein nepasad impeehè din kandan is anak te hadì.
2KI 11:5 Migkeǥiyan din sikandan te, “Himuwa niw he tetelu kew he grupu. Iyan heini veeli niw: Is senge vahin keniyu te tetelu he vahin, he ebantey emun Andew te Kedhimeley, mebantey sikandan diyà te turuǥan te hadì.
2KI 11:6 Ne is senge vahin diyà mebantey te Pultahan te Sur. Ne is senge vahin pa, ne ziyà mebantey te ǥemawan te turuǥan su wey meuǥupi is duma he ebantey zutun.
2KI 11:7 Ne is dezuwa he grupu keniyu he kenà ebantey emun Andew te Kedhimeley ne ziyà sikandan mebantey te valey te Nengazen su para medipinsahi is hadì.
2KI 11:8 Kinahanglan he ebpurungan niw ebentayi is hadì he andam is menge ǥumaan niw, ne zumahi niw sikandin minsan hendei ebayà. Himetayi niw is minsan hentei he ed-uvey ziyà te kandin.”
2KI 11:9 Mibeelan dutun te menge peremandar is insuǥù kandan ni Jehoyada he memumuhat. Midtiǥum dan is menge etew zan he ebantey emun Andew te Kedhimeley, ragkes en is kenà ebantey keniyan he andew, ne miduma zan diyà te ki Jehoyada.
2KI 11:10 Ne mibeǥayan ni Jehoyada is menge peremandar te menge vangkew wey menge kelasag he ǥaked dengan ni Hadì David he ziyà itaǥù te valey te Nengazen.
2KI 11:11 Ne mibpelastar is neǥumeenan he menge vantey ziyà te peliǥuy te valey te Nengazen wey te pemuhatà te kedipinsa zuen te hadì.
2KI 11:12 Ne zutun impeǥawas ni Jehoyada si Joash he anak te hadì ne migkurunahan. Ne mibeǥayan din sikandin te kupya te menge sulunuzen mehitenged te kedumalà te hadì, ne impezayag din is kegkehimuwa ki Joash he hadì. Midlenahan din sikandin he ebpekilala he hadì en sikandin, ne mibpelakpak is menge etew wey nemengulahì te, “Mebmeluǥayad is untung te hadì!”
2KI 11:13 Ne hein nezineg ni Atalia is keǥurub te menge vantey wey te zuma he menge etew, midhendiyà sikandin te kandan diyà te valey te Nengazen.
2KI 11:14 Ne neehè din dutun is beǥu he hadì he midhitindeg uvey zuen te tukud, su iyan haazà neleyaman he vaal emun duen edhimuwen he hadì. Diyà te avey zuen te hadì is menge peremandar wey is menge perehiyup te trumpita, ne ebpemen-ugyab is langun he menge etew zutun wey ebpezaǥing te menge trumpita. Ne hein naahà ni Atalia haazà is langun, mibindas din is bisti zin su mibmezaat is gehinawa zin, ne nemensag sikandin te, “Menge meluiven! Menge meluiven!”
2KI 11:15 Mibmendaran ni Jehoyada is menge peremandar te menge sundaru te, “Uwita niw ziyà te gawas si Atalia. Kenè niw sikandin kayi himetayi te valey te Nengazen. Ne himetayi niw is minsan hentei he egkesuat he edlibri kandin.”
2KI 11:16 Umbe, midakep dan sikandin ne mid-uwit dan diyà te ǥawas te pultahan he ebpeveyaan te menge kudà te edhendiyà te turuǥan, ne zutun dan himetayi.
2KI 11:17 Ne impehimu ni Jehoyada haazà is hadì wey is menge etew te kebpekid-uyun te Nengazen he menge etew en sikandan te Nengazen. Impehimu zin daan is uyun te hadì wey menge etew.
2KI 11:18 Ne midhendiyà is langun he menge etew te simbahan he para ki Baal ne midrundus dan heini. Midrupet dan is menge pemuhatà wey is menge ed-ezapen dutun, ne midhimetayan dan si Matan he memumuhat para ki Baal ziyà te egkesineruwan duen te menge pemuhatà. Ne zuen menge impevantey ni Jehoyada zuen te valey te Nengazen.
2KI 11:19 Ne zutun, puun te valey te Nengazen, miduma zin is menge peremandar, menge vantey te hadì, menge vantey te turuǥan, wey is langun he menge etew zutun, ne midumahan dan haazà is hadì pehendiyà te turuǥan. Diyè dan mebayà te pultahan te menge vantey. Ne mibpinuu haazà is hadì diyà te pinuuwè din te kedhadì.
2KI 11:20 Nengelipey is menge etew, ne mibmelinew is inged hein minatey en si Atalia diyà te uvey te turuǥan.
2KI 11:21 Mibpenuiǥen si Joash te pitu he tuig dutun te kegkehimuwa kandin he hadì diyà te Judaa.
2KI 12:1 Nehimu he hadì diyà te Juda si Joash hein ikepitu he tuig te kedhadì ni Jehu ziyà te Israel. Diyà med-ubpà te Jerusalem si Joash, ne midhadì sikandin seled te 40 he tuig. Is iney zin iyan si Zibia he tig-Beersheba.
2KI 12:2 Metazeng is baal zin diyà te etuvangan te Nengazen seled te tivuuk he untung din, su mibpenurù sikandin ni Jehoyada he memumuhat.
2KI 12:3 Piru wazè din iperundus is menge simbahan diyà te metikang he menge lugar, umbe mibpedayun is menge etew te kebpemuhat te menge pemuhat wey kedtutung te menge beyewà dutun he menge simbahan.
2KI 12:4 Migkeǥiyan ni Joash is menge memumuhat te, “Tiǥuma niw is langun he selapì he mid-uwit diyà te valey te Nengazen he inhalad: is selapì he nekulikta tenged te sinsus, is selapì he vayad tenged te penaad, wey is selapì he pemuhat he kineugelingen he suat is kebpemuhata zuen.
2KI 12:5 Ne ǥemita niw heini para te kebpurungi zuen te valey te Nengazen.”
2KI 12:6 Piru taman en te ike-23 he tuig te kedhadì ni Joash, wazà gihapun mepurungi te menge memumuhat sikan is baley te Nengazen.
2KI 12:7 Umbe, impetawag ni Hadì Joash si Jehoyada wey is duma pa he menge memumuhat ne mid-insaan din te, “Maan is wazè niw pa pepurungi sikan is baley te Nengazen? Puun guntaan ne kenè niw en gestuwa is selapì diyà te keugelingen niw he menge kinahanglan. Ereg he ziyè en heini egemita te kebpurungi zuen te valey te Nengazen!”
2KI 12:8 Ne mibpezumazuma zutun is menge memumuhat wey mibpezumazuma zan daan he kenè en iyan sikandan ebpengulikta te selapì puun te menge etew, wey kenè en iyan sikandan ebpepurung duen te valey te Nengazen.
2KI 12:9 Migkuwa si Jehoyada te kahun ne mibudsiyan din is tangeb kayi. Ne insavuk din heini ziyà te kilid te pemuhatà, diyà te egkekewanan emun edseled ki zuen te valey te Nengazen. Emun duen edseled duen te valey te Nengazen he ebeǥey te selapì, ne id-ahuk heini te menge memumuhat he ebantey te gemawan duen te kahun.
2KI 12:10 Ne emun dekelè en is selapì dutun te kahun, edhendutun is sikritaryu zuen te hadì wey is lavew he memumuhat ne ebilangen dan haazà ne emun egkepasad, id-ahuk dan diyà te menge bag.
2KI 12:11 Ne ibeǥey zan haazà is selapì diyà te menge etew he edumala te kebpurung duen te valey te Nengazen su wey zan mekevayad duen te ebpemenerebahu he menge etew he ebpurung duen te valey te Nengazen wey te menge verengbeng din. Is duma he selapì, ibpemasa zan te menge kayu wey menge vatu he vinesbasan en he egkinehenglanen te kebpurungi zuen te valey te Nengazen. Ne ebeyazan dan daan is duma pa he gelestuwan te kebpurung duen te valey.
2KI 12:13 Is selapì he imbeǥey ziyà te valey te Nengazen, ne wazà gemita para te kebaal te pelata he menge inumà, menge penamped te pebilu te sulù, menge yehung, menge trumpita, etawa minsan hengkey he ǥelemiten he vulawan etawa pelata dutun te valey te Nengazen.
2KI 12:14 Kekenà, imbayad heini te menge etew he ebpurung duen te valey wey te menge egkeǥamit kayi.
2KI 12:15 Wazè en tulika is listahan te menge neǥastu su egkeseriǥan sikan is menge etew he midumala te kebpurungi zuen te valey te Nengazen.
2KI 12:16 Is selapì he imbeǥey zuma te menge halad su imbayad te salà wey is menge pemuhat he para idlumpiyu, wazà haazà iahuk duen te kahun diyà te valey te Nengazen, su para zà haazà te menge memumuhat.
2KI 12:17 Dutun he timpu, si Hadì Hazael he hadì te Aram midsurung diyà te Gat ne naaǥew zin heini. Ne midisisyun sikandin he edsurungen din daan is Jerusalem.
2KI 12:18 Midtiǥum ni Hadì Joash is langun he menge azen he inhalad te menge kepuun din diyà te Nengazen, ragkes en is kandin he menge inhalad. (Is menge kepuun ni Joash he midhalad dutun he menge azen iyan si Jehoshafat, si Jehoram, wey si Ahazia, he menge hadì diyà te Juda.) Heini is langun impeuwit ni Joash diyà te ki Hazael, ragkes en is langun he vulawan he ziyà te menge budiga zuen te valey te Nengazen wey is diyà te turuǥan. Umbe wazè en surunga ni Hazael is Jerusalem.
2KI 12:19 Is duma pa he ǥuǥud mehitenged te kedhadì ni Joash, wey is langun he mibeelan din, ne ingkesurat diyà te Libru he Midsuratan te menge Keguǥuza te menge Hadì te Juda.
2KI 12:20 Dutun te huziyan he timpu nekidsukulà kandin is menge upisyal zin, ne midhimetayan dan sikandin diyà te Bet Milo, diyà te zalan he pehendiyà te Silla.
2KI 12:21 Is menge upisyal he midhimatey kandin, iyan si Jozacar he anak ni Shimeat wey si Jehozabad he anak ni Shomer. Inleveng sikandin diyà te midlevengan te menge kepuun din diyà te Inged ni David. Ne si Amazia he anak din iyan nekeilis kandin te kedhadì.
2KI 13:1 Nehimu he hadì diyà te Israel si Jehoahaz he anak ni Jehu hein ike-23 he tuig te kedhadì ni Joash diyà te Juda te anak ni Ahazia. Diyà te Samaria med-ubpà si Jehoahaz, ne midhadì sikandin seled te 17 he tuig.
2KI 13:2 Mezaat is ulaula zin diyà te etuvangan te Nengazen. Mid-iringan din is menge salà ni Jeroboam he anak ni Nebat, he nehimu he hinungdan te kebpekesalà te menge tig-Israel. Ne wazè din engkezi heini he menge salà.
2KI 13:3 Umbe, nepeukan te Nengazen is menge Israilihanen. Ne meluǥayad he timpu is kebpesekupa zin kandan ki Hadì Hazael he hadì te Aram wey te anak din he si Ben Hadad.
2KI 13:4 Mibpengemuyù si Jehoahaz diyà te Nengazen, ne mibpemineg kandin is Nengazen, su naahà te Nengazen is utew subra he kedlisliseza te hadì diyà te Aram te menge Israilihanen.
2KI 13:5 Mibeǥayan sikandan te pengulu he ebpekepeǥawas kandan puun te kedluplupiǥa kandan te menge tig-Aram. Umbe mid-uman mebmelinew is kebpekesavuk te menge Israilihanen iring duen te nehuna.
2KI 13:6 Piru wazè dan engkezi is ked-iring te menge salà te pemilya ni Jeroboam, he nehimu he hinungdan te kebpekesalè dan. Wazè dan dèdeeti is tukud he simbulu te vahi he ed-ezapen he si Ashera he ziyà te Samaria.
2KI 13:7 Dutun te huziyan he timpu, is nesamà diyà te ki Jehoahaz, iyan dà is 50 he pereuntud te kudà, 10 he kerwahi, wey 10,000 he sundaru, su is duma mibpenhimetayan te hadì diyà te Aram, he henduen be te eliyavuk he midtekutakan.
2KI 13:8 Is duma pa he ǥuǥud mehitenged te kedhadì ni Jehoahaz, wey is nevantug he menge vaal zin wey is langun he mibeelan din, ne ingkesurat diyà te Libru he Midsuratan te menge Keguǥuza te menge Hadì te Israel.
2KI 13:9 Ne hein minatey en si Jehoahaz, inleveng diyà te Samaria. Ne si Jehoash he anak din, iyan nekeilis kandin te kedhadì.
2KI 13:10 Nehimu he hadì diyà te Israel si Jehoash he anak ni Jehoahaz hein ike-37 he tuig te kedhadì ni Joash diyà te Juda. Diyà med-ubpà te Samaria si Jehoash, ne midhadì sikandin seled te 16 he tuig.
2KI 13:11 Mezaat is ulaula zin diyà te etuvangan te Nengazen. Wazà sikandin med-engked he ed-iring te menge salà ni Jeroboam te anak ni Nebat, he nehimu he hinungdan te kebpekesalà te menge tig-Israel.
2KI 13:12 Is duma pa he ǥuǥud mehitenged te kedhadì ni Jehoash wey is nevantug he menge vaal zin wey is langun he mibeelan din, ragkes is kebpekidtebek din ki Hadì Amazia he hadì te Juda, ne ingkesurat diyà te Libru he Midsuratan te menge Keguǥuza te menge Hadì te Israel.
2KI 13:13 Ne hein minatey en si Jehoash, inleveng sikandin diyà te Samaria, diyà te midlevengan te menge hadì te Israel. Ne is anak din he si Jeroboam II iyan nekeilis kandin te kedhadì.
2KI 13:14 Hein uuyag pa si Hadì Jehoash, nezeruwan si Elisha ne henduen be te ebpatey en sikandin. Midhendiyà si Hadì Jehoash te kandin ne midsineǥew haazà is hadì. Ke si Jehoash te, “Amey ku! Amey ku! Is menge kerwahi wey is menge perekerwahi te Israel!”
2KI 13:15 Migkaǥi si Elisha te, “Kuwa ka te panà wey menge vesut.” Ne midtuman haazà ni Jehoash.
2KI 13:16 Ne migkeǥiyan sikandin ni Elisha he gewezi zin haazà is panà. Ne hein egewezan din en haazà, migewezan ni Elisha is belad din
2KI 13:17 ne migkeǥiyan din te, “Puwasi nu is sulawà he zapit te edsilaan.” Ne mibpuwasan din heini. Ne migkeǥiyan sikandin ni Elisha he mebpanà sikandin, ne mibpanà sikandin, migkaǥi si Elisha te, “Heeyan is besut iyan tuus he ibpezaag kenikew te Nengazen is Aram. Ebpurungan nu edezeeti is menge Aramihanen diyà te Afek.”
2KI 13:18 Mid-umanan keǥiyi ni Elisha si Jehoash he megkuwa te menge vesut. Ne hein nekekuwe en sikandin, migkaǥi si Elisha te, “Penaa nu is tanà.” Ne mibpanè din te ketetelu, ne mid-engked sikandin.
2KI 13:19 Nepauk si Elisha ne migkaǥi te, “Ereg pezem he kelelima etawa keheenem nu penaa su para mepurung nu mezezeeti is menge Aramihanen. Ne tenged te ketetelu ke zà mebpanà, ne ketetelu nu zà daan egkezaag is menge Aramihanen.”
2KI 13:20 Dutun te huziyan he timpu minatey si Elisha ne inleveng. Kada tuig duen grupu te menge Moabitanhen he edsurung te Israel.
2KI 13:21 Duen timpu he edleveng pezem is menge Israilihanen te minatey. Piru hein neehè dan te grupu te menge Moabitanhen he edsurung, inggaanggaan dan dà iseled haazà is minatey ziyà te surung he midlevengan ki Elisha ne mibpelaǥuy zan. Ne hein nekezegkit haazà is minatey ziyà te menge tulan ni Elisha, neuyaǥan haazà ne midhitindeg.
2KI 13:22 Midaagdaag ni Hadì Hazael he hadì te Aram is menge Israilihanen seled te tivuuk he timpu te kedhadì kandan ni Jehoahaz.
2KI 13:23 Piru ingkehizu wey ingkeipeng sikandan te Nengazen tenged te midhimu zin he kebpekid-uyun diyà te ki Abraham, ki Isaac, wey ki Jacob. Ne taman en guntaan ne wazè din sikandan dezeeti etawa ipaawà diyà te lugar zan he zutun kenà sikandin ebpekepekiduma kandan.
2KI 13:24 Minatey si Hadì Hazael he hadì te Aram, ne si Ben Hadad he anak din iyan nekeilis kandin te kedhadì.
2KI 13:25 Nezaag ni Jehoash is Aram te ketetelu, ne nahawì din diyà te ki Ben Hadad is menge inged he mid-aǥew te amey ni Ben Hadad he si Hazael hein nekidtebek sikandin te amey ni Jehoash he si Jehoahaz.
2KI 14:1 Nehimu he hadì diyà te Juda si Amazia he anak ni Joash hein ikezuwa he tuig te kedhadì ni Jehoash diyà te Israel, he anak ni Jehoahaz.
2KI 14:2 Mibpenuiǥen si Amazia te 25 hein nehimu sikandin he hadì. Diyà sikandin med-ubpà te Jerusalem, ne midhadì sikandin seled te 29 he tuig. Is iney zin iyan si Jehoadin he tig-Jerusalem.
2KI 14:3 Meupiya is ulaula ni Amazia ziyà te etuvangan te Nengazen, piru kenà iring te mibeelan ni David he kepuun din. Kekenà, mid-iringan din is amey zin he si Joash.
2KI 14:4 Wazè din daan iperundus is menge simbahan diyà te metikang he menge lugar, umbe zutun mibpedayun is menge etew te kebpemuhat te menge pemuhat wey kedtutung te menge beyewà.
2KI 14:5 Ne hein melig-en en is kedhadì ni Amazia, ne mibpehimetayan din sikan is menge upisyal he midhimatey te amey zin he hadì.
2KI 14:6 Piru wazè din mulà pehimetayi is menge anak dan, su sumalà is ingkesurat diyà te Libru te Kesuǥuan ni Moises, he migkaǥi is Nengazen te, “Kenà ereg he edhimetayan is menge ginikanan tenged te salà te menge anak dan, ne is menge anak, kenà ereg he edhimetayan tenged te menge salà te menge ginikanan dan. Iyan dà idhimetayi te etew is keugelingen din he salà.”
2KI 14:7 Si Amazia iyan midhimatey te 10,000 he menge tig-Edom diyà te menge suǥud he migngezanan te Timus. Naaǥew zin tenged te tebek is Sela, ne egngezanan din heini te Jokteel, ne taman en guntaan iyan heini ngazan din.
2KI 14:8 Ne sevaha he andew, midsuǥù ni Amazia ziyà te hadì te Israel he si Jehoash he anak ni Jehoahaz he apù ni Jehu is menge menunudtulà. Ne midhinggat din si Jehoash he ebpetebekè dan.
2KI 14:9 Piru midtavak sikandin ni Hadì Jehoash pinaaǥi kayi he menge lalag: “Diyà te Lebanon duen duǥiyen he sagbet he mibpeuwit te lalag diyà te kayu he sidru he ke sikandin: ‘Ipeesawa nu is anak nu he vahi te anak ku he maama.’ Piru zuen nekevayà dutun he leew he langgam ne midtekutakan din haazà is duǥiyen he sagbet.
2KI 14:10 Amazia, tutuu he nezaag nu is Edom ne ibpahambug nu heini. Mekuntintu ke en te kebpekezaag nu ne peeneng-eneng ke en keniyan te kenikew he lugar. Maan is ebpen-ehè ke pa te samuk he ebpekeuwit te kezeetan nu wey te Juda?”
2KI 14:11 Piru wazà mebpemineg si Amazia, umbe midsurung sikandin ni Hadì Jehoash wey te menge sundaru zin. Midtebek dan diyà te Bet Shemesh he sakup te Juda.
2KI 14:12 Nezaag is Juda te Israel, ne nekedsusuwey is menge sundaru te Juda he nemelaǥuy pehendiyà te ed-ulian dan.
2KI 14:13 Nezekepan ni Hadì Jehoash si Hadì Amazia diyà te Bet Shemesh. Ne midhendiyà si Jehoash te Jerusalem ne migevè din is menge verengbeng kayi puun diyà te Pultahan te Efraim pehendiyà te Pultahan diyà te Suyuk, he 600 he ǥiek is keluǥayad din.
2KI 14:14 Mibpenguwa zin is langun he vulawan, pelata, wey is menge gelemiten he neehè din diyà te valey te Nengazen wey ziyà te budiga te menge azen diyà te turuǥan. Nenduma zaan sikandin te menge vihag te kedlikù din diyà te Samaria.
2KI 14:15 Is duma pa he ǥuǥud mehitenged te kedhadì ni Jehoash, wey is nevantug he mibeelan din wey is duma pa he mibeelan din, ragkes en is kebpekidtebek din ki Hadì Amazia he hadì te Juda, ne ingkesurat diyà te Libru he Midsuratan te menge Keguǥuza te menge Hadì te Israel.
2KI 14:16 Hein minatey en si Jehoash, inleveng sikandin diyà te midlevengan te menge hadì te Israel diyà Samaria. Ne is anak din he si Jeroboam II, iyan nekeilis kandin te kedhadì.
2KI 14:17 Nengungubpaan pa seled te 15 he tuig si Hadì Amazia he hadì te Juda puun te kebpatey ni Hadì Jehoash he hadì te Israel.
2KI 14:18 Is duma pa he ǥuǥud mehitenged te kedhadì ni Amazia, ne ingkesurat diyà te Libru he Midsuratan te menge Keguǥuza te menge Hadì te Juda.
2KI 14:19 Dutun he timpu, duen menge etew he ebpelanu edhimatey ki Amazia ziyà te Jerusalem, umbe mibpelaǥuy sikandin diyà te Lakish. Piru mibpetelukunan dan sikandin diyà te Lakish. Ne midhimetayan sikandin dutun.
2KI 14:20 Is lawa zin ingkarga te kudà ne inlikù diyà te Jerusalem ne inleveng diyà te midlevengan te menge kepuun din diyà te Inged ni David.
2KI 14:21 Is midhimu te menge etew ziyà te Juda he ilis ki Amazia he hadì, iyan is anak din he si Azaria he 16 he tuig is keǥurang din.
2KI 14:22 Iyan sikandin nekehawì te Elat ne mid-umanan din benguna heini hein minatey en is amey zin he si Amazia.
2KI 14:23 Nehimu he hadì diyà te Israel si Jeroboam II he anak ni Joash hein ike-15 he tuig te kedhadì ni Amazia he anak ni Joash diyà te Juda. Diyà med-ubpà te Samaria si Jeroboam II, ne midhadì sikandin seled te 41 he tuig.
2KI 14:24 Mezaat is ulaula zin diyà te etuvangan te Nengazen. Wazè din engkezi te ebaal is menge salà he mibeelan ni Jeroboam he anak ni Nebat, he nehimu he hinungdan te kebpekesalà te menge tig-Israel.
2KI 14:25 Iyan sikandin nekehawì te menge lugar he gaked dengan te menge Israilihanen, he puun te Lebo Hamat taman te Zaǥat te Araba. Iyan heini impenaad te Nengazen he Megbevayà te Israel, pinaaǥi te suluǥuen din he mibpenaub din he si Jonas, he anak ni Amitai he tig-Gat Hefer.
2KI 14:26 Ketau te Nengazen is kegkeul-ulaha kayi su neehè din is utew subra he ked-antus te menge Israilihanen, uripen man etawa kenà. Ne wazà ebpeketavang kandan.
2KI 14:27 Wey tenged te wazà megkaǥi is Nengazen he id-awè din kayi te kelibutan is Israel, umbe midlibri zin sikandan pinaaǥi ki Jeroboam II, he anak ni Joash.
2KI 14:28 Is duma pa he ǥuǥud mehitenged te kedhadì ni Jeroboam II, wey is nevantug he vaal zin wey is duma pa he mibeelan din, ragkes en is kedhewia zin te Damascus wey Hamat he sakup dengan te Juda, ne ingkesurat diyà te Libru he Midsuratan te menge Keguǥuza te menge Hadì te Israel.
2KI 14:29 Ne hein minatey en si Jeroboam II, inleveng sikandin diyà te midlevengan te menge hadì te Israel. Ne si Zacarias he anak din, iyan nekeilis kandin te kedhadì.
2KI 15:1 Nehimu he hadì diyà te Juda si Azaria he anak ni Amazia hein ike-27 he tuig te kedhadì ni Jeroboam II diyà te Israel.
2KI 15:2 Mibpenuiǥen si Azaria te 16 hein nehimu sikandin he hadì. Diyà sikandin med-ubpà te Jerusalem, ne midhadì sikandin seled te 52 he tuig. Is iney zin iyan si Jecolia he tig-Jerusalem.
2KI 15:3 Meupiya is ulaula ni Azaria ziyà te etuvangan te Nengazen, iring te mibeelan te amey zin he si Amazia.
2KI 15:4 Piru wazè din iperundus is menge simbahan diyà te metikang he menge lugar, umbe mibpedayun dutun is menge etew te kebpemuhat te menge pemuhat wey kedtutung te menge beyewà.
2KI 15:5 Impaantus te Nengazen te melimezang he zaru te lundis si Azaria taman en te andew te kebpatey zin. Diyà sikandin med-ubpà te nekesivey he valey. Iyan si Jotam he anak din, nengulu ziyà te turuǥan wey te menge etew ziyà te Juda.
2KI 15:6 Is duma pa he ǥuǥud mehitenged te kedhadì ni Azaria, wey is langun he mibeelan din, ne ingkesurat diyà te Libru he Midsuratan te menge Keguǥuza te menge Hadì te Juda.
2KI 15:7 Hein minatey en si Azaria, inleveng sikandin diyà te midlevengan te menge kepuun din diyà te Inged ni David. Ne is anak din he si Jotam iyan nekeilis kandin te kedhadì.
2KI 15:8 Nehimu he hadì diyà te Israel si Zacarias he anak ni Jeroboam II hein ike-38 he tuig te kedhadì ni Azaria ziyà te Juda. Diyà te Samaria med-ubpà si Zacarias, ne midhadì sikandin seled te heenem he vulan.
2KI 15:9 Mezaat is ulaula zin diyà te etuvangan te Nengazen, iring te mibeelan te menge kepuun din. Wazè din engkezi te ebaal is menge salà he mibeelan ni Jeroboam he anak ni Nebat, he nehimu he hinungdan te kebpekesalà te menge tig-Israel.
2KI 15:10 Dutun he timpu, mibpelanu si Shalum he anak ni Jabesh te mezaat diyà te ki Zacarias. Midhimetayan din si Zacarias diyà te etuvangan te menge etew, ne iyan sikandin mid-ilis medhadì.
2KI 15:11 Is duma pa he ǥuǥud mehitenged te kedhadì ni Zacarias, ne ingkesurat diyà te Libru he Midsuratan te menge Keguǥuza te menge Hadì te Israel.
2KI 15:12 Umbe, netuman is migkaǥi te Nengazen diyà te ki Jehu he ke sikandin te, “Is menge kevuwazan nu ebpekahadì te Israel taman te ikeepat he lapis.”
2KI 15:13 Nehimu he hadì diyà te Israel si Shalum he anak ni Jabesh hein ike-39 he tuig te kedhadì ni Uzia diyà te Juda. Diyà te Samaria med-ubpà si Shalum, ne midhadì sikandin seled dà te senge vulan.
2KI 15:14 Su midhimetayan sikandin ni Menahem he anak ni Gadi hein midhendiyà sikandin te Samaria he ebpuun te Tirza ne iyan sikandin mid-ilis te kedhadì.
2KI 15:15 Is duma pa he ǥuǥud mehitenged te kedhadì ni Shalum ragkes sikan is pelanu zin te kedhimatey ki Zacarias, ne ingkesurat diyà te Libru he Midsuratan te menge Keguǥuza te menge Hadì te Israel.
2KI 15:16 Dutun he timpu, midsurung ni Menahem is Tifsa wey is menge lugar ziyà te peliǥuy kayi taman te Tirza, su is menge meǥinged kayi kenà edsurindir ziyà te kandin. Mibpenhimetayan din is langun he meǥinged diyà te Tifsa, ne midsirian din is getek te meǥingey he menge vahi.
2KI 15:17 Nehimu he hadì diyà te Israel si Menahem he anak ni Gadi hein ike-39 he tuig he kedhadì ni Azaria ziyà te Juda. Diyà te Samaria med-ubpà si Menahem ne midhadì sikandin seled te 10 he tuig.
2KI 15:18 Mezaat is ulaula zin diyà te etuvangan te Nengazen. Seled te tivuuk he kedhadì din wazà sikandin med-engked he ebaal te menge salà he mibeelan ni Jeroboam he anak ni Nebat, he nehimu he hinungdan te kebpekesalà te menge tig-Israel.
2KI 15:19 Dutun he timpu, midhendiyà si Hadì Tiglat Piliser he hadì te Asiria te Israel su edsurungen din heini. Mibeǥayan ni Menahem si Tiglat Piliser te 35,000 he kilu he pelata su para tevangi zin si Menahem te kebpeiseǥa te kelig-en te kedhadì din.
2KI 15:20 Haazà is menge pelata migkuwa ni Menahem diyà te menge sepian diyà te Israel pinaaǥi te kebpeǥes din he mebeǥey is kada sevaha kandan te 50 he vuuk he pelata. Umbe wazè en mebpekidtebek haazà is hadì te Asiria ne mid-ulì diyà te nasyun din.
2KI 15:21 Is duma pa he ǥuǥud mehitenged te kedhadì ni Menahem, wey is langun he mibeelan din, ne ingkesurat diyà te Libru he Midsuratan te menge Keguǥuza te menge Hadì te Israel.
2KI 15:22 Ne hein minatey en si Menahem, si Pekaya he anak din, iyan nekeilis kandin te kedhadì.
2KI 15:23 Nehimu he hadì diyà te Israel si Pekaya he anak ni Menahem hein ike-50 he tuig te kedhadì ni Azaria ziyà te Juda. Diyà te Samaria med-ubpà si Pekaya, ne midhadì sikandin seled te zezuwa he tuig.
2KI 15:24 Mezaat is ulaula zin diyà te etuvangan te Nengazen. Wazè din engkezi te ebaal is menge salà he mibeelan ni Jeroboam he anak ni Nebat, he nehimu he hinungdan te kebpekesalà te menge tig-Israel.
2KI 15:25 Dutun he timpu, mibpelanu te mezaat si Peka he anak ni Remalia ziyà te ki Pekaya. Heini si Peka iyan peremandar te menge sundaru ni Pekaya. Duma te 50 he menge etew ziyà te Gilead, midhimetayan ni Peka si Pekaya ragkes si Argob wey si Arie, diyà te melig-en he vahin te turuǥan diyà te Samaria. Ne iyan sikandin mid-ilis ki Pekaya te kedhadì.
2KI 15:26 Is duma pa he ǥuǥud mehitenged te kedhadì ni Pekaya, wey is langun he mibeelan din, ne ingkesurat diyà te Libru he Midsuratan te menge Keguǥuza te menge Hadì te Israel.
2KI 15:27 Nehimu he hadì diyà te Israel si Peka he anak ni Remalia hein ike-52 he tuig te kedhadì ni Azaria ziyà te Juda. Diyà te Samaria med-ubpà si Peka, ne midhadì sikandan seled te 20 he tuig.
2KI 15:28 Mezaat is baal zin diyà te etuvangan ne Nengazen. Wazè din engkezi te ebaal is menge salà he mibeelan ni Jeroboam he anak ni Nebat, he nehimu he hinungdan te kebpekesalà te menge tig-Israel.
2KI 15:29 Hein timpu te kedhadì ni Peka, midsurung ni Hadì Tiglat Piliser he hadì te Asiria is Israel, ne naaǥew zin is menge inged he Ion, Abel Bet Maaca, Janoa, Kedesh, wey Hazor. Naaǥew zin daan is Gilead, Galilea, wey tivuuk he tanà te Naftali. Ne mid-uwit din diyà te Asiria is menge meǥinged kayi su mibihag din.
2KI 15:30 Ne zutun mibpelanu te mezaat si Hoshea he anak ni Elah diyà te ki Peka he anak ni Remalia. Midhimetayan din si Peka ne iyan sikandin mid-ilis medhadì. Nehitavù heini hein ike-20 he tuig te kedhadì ni Jotam, he anak ni Uzia ziyà te Juda.
2KI 15:31 Is duma pa he ǥuǥud mehitenged te kedhadì ni Peka, wey is langun he mibeelan din, ne ingkesurat diyà te Libru he Midsuratan te menge Keguǥuza te menge Hadì te Israel.
2KI 15:32 Nehimu he hadì diyà te Juda si Jotam he anak ni Uzia hein ikezuwa he tuig te kedhadì ni Peka he anak ni Remalia ziyà te Israel.
2KI 15:33 Mibpenuiǥen si Jotam te 25 hein nehimu sikandin he hadì. Diyà sikandin med-ubpà te Jerusalem, ne midhadì sikandin seled te 16 he tuig. Is iney zin iyan si Jerusha he anak ni Zadok.
2KI 15:34 Meupiya is ulaula ni Jotam diyà te etuvangan te Nengazen, iring te mibeelan te amey zin he si Uzia.
2KI 15:35 Piru wazè din iperundus is menge simbahan diyà te metikang he menge lugar, umbe mibpedayun is menge etew te kebpemuhat te menge pemuhat wey te kedtutung te menge veyewà. Si Jotam is mibaal te Egkezizaya he Gemawan te valey te Nengazen.
2KI 15:36 Is duma pa he ǥuǥud mehitenged te kedhadì ni Jotam, wey is menge mibeelan din, ne ingkesurat diyà te Libru he Midsuratan te menge Keguǥuza te menge Hadì te Juda.
2KI 15:37 Dutun te timpu te kedhadì din, impepuun ipesurung te Nengazen diyà te Juda si Hadì Rezin he hadì te Aram wey si Peka he anak ni Remalia.
2KI 15:38 Hein minatey en si Jotam, inleveng sikandin diyà te midlevengan te menge kepuun din diyà te Inged ni David te kepuun din daan. Ne si Ahaz he anak din iyan nekeilis kandin te kedhadì.
2KI 16:1 Nehimu he hadì diyà te Juda si Ahaz he anak ni Jotam hein ike-17 he tuig te kedhadì ni Peka, he anak ni Remalia, diyà te Israel.
2KI 16:2 Mibpenuiǥen si Ahaz te 20 hein nehimu sikandin he hadì. Diyà sikandin med-ubpà te Jerusalem, ne midhadì sikandin seled te 16 he tuig. Mezaat is ulaula zin diyà te etuvangan te Nengazen he Megbevayè din, kenà iring te mibeelan te kepuun din he si David.
2KI 16:3 Mid-iringan din is ulaula te menge hadì te Israel, minsan ganì is anak din impemuhat din pinaaǥi te kedtutunga zin duen. Mid-iringan din is utew mezaat he menge vaal te menge etew ziyà te menge nasyun he impesegseg te Nengazen te menge Israilihanen.
2KI 16:4 Nemuhat sikandin te menge pemuhat wey midtutung te menge veyewà diyà te menge simbahan diyà te metikang he menge lugar, diyà te puntur te menge vuvungan wey ziyà te sihung te kada merapung he kayu.
2KI 16:5 Dutun te kedhadì ni Ahaz diyà te Juda, midsurung diyà te Jerusalem si Hadì Rezin he hadì te Aram wey si Hadì Peka he hadì te Israel, he anak ni Remalia, ne midliǥuyan dan is Jerusalem. Piru wazè dan mezaag si Ahaz.
2KI 16:6 Dutun he timpu, nahawì ni Hadì Rezin he hadì te Aram is Elat pinaaǥi te kedsegseǥa zin te menge etew ziyà te Juda. Ne midhalin med-ubpà diyà te Elat is duma he menge Aramihanen ne zutun pa sikandan taman en guntaan.
2KI 16:7 Midsuǥù si Ahaz te menge menunudtulà te kedtudtul ziyà te ki Hadì Tiglat Piliser he hadì te Asiria kayi he menge lalag: “Libriya a kenikew is suluǥuen nu su para kenà a mezezeeti te hadì te Aram wey hadì te Israel he midsurung kedì.”
2KI 16:8 Migkuwa ni Ahaz is pelata wey vulawan diyà te valey te Nengazen wey is diyà te budiga ziyà te turuǥan, ne impeuwit din diyà te hadì te Asiria su inggasa zin.
2KI 16:9 Mibpezumazuma haazà is hadì te Asiria te hangyù ni Ahaz, umbe midsurung din is Damascus ne mid-aǥew zin heini. Miduma zin is menge meǥinged dutun diyà te Kir su mibihag din, ne midhimetayan din si Rezin.
2KI 16:10 Ne midhendiyà si Hadì Ahaz te Damascus su ebpekidhinguma ki Hadì Tiglat Piliser he hadì te Asiria. Ne hein diyè en sikandin duen neehè din he pemuhatà. Umbe mibpeuwitan din is memumuhat he si Uria te mudilu zutun te pemuhatà ragkes en is menge paaǥi te kebeeli zuen.
2KI 16:11 Ne mibaal si Uria te pemuhatà he iring duen te mudilu he impeuwit ni Ahaz, ne nepasad din haazà is pemuhatà hein wazè pa mekelikù si Ahaz.
2KI 16:12 Ne hein nekeuma si Hadì Ahaz is ebpuun diyà te Damascus, neehè din haazà is pemuhatà. Mid-uvey sikandin dutun te pemuhatà ne nemuhat te pemuhat he edtutungen wey pemuhat he para gasa. Ne mid-itisan din te pemuhat he inumen haazà is pemuhatà wey mibpirikan din te lengesa zuen te ayam he impemuhat din he pemuhat para te meupiya he kedepità.
2KI 16:14 Ne impaawè din is daan he pemuhatà he brunsi he ziyà te etuvangan te Nengazen he nekepelastar ziyà te pid-elangan te veǥu he pemuhatà wey te valey te Nengazen, ne impesavuk din diyà te egkezizaya kayi te veǥu he pemuhatà.
2KI 16:15 Ne mibmenduan din si Uria he memumuhat te, “Gemita nu heini is beǥu he pemuhatà emun ebpemuhat ka te menge pemuhat he edtutungen kada meselem wey te menge pemuhat he para gasa kada mezukilem. Gemita nu zaan heini emun ebpemuhat ka te menge pemuhat he edtutungen wey menge pemuhat he para gasa he pemuhat te hadì wey te menge etew, ragkes en is pemuhat he inumen kada mezukilem. Ipirik nu kayi te veǥu he pemuhatà is lengesa te pemuhat he edtutungen wey zuma pa he klasi te menge pemuhat. Ne heeyan is brunsi he pemuhatà edhimuwen ku he kedì he empuey.”
2KI 16:16 Ne mibeelan ni Uria he memumuhat is insuǥù kandin ni Hadì Ahaz.
2KI 16:17 Ne migkuwa ni Hadì Ahaz is menge elavat wey is menge visin duen te untuzà he para te kedhakut te wahig diyà te valey te Nengazen. Migkuwa zin daan sikan is dekelà he teleǥuey te wahig he egngezanan te Daǥat he ziyà te peka te menge tudu he vaka he brunsi, ne insavuk din heini ziyà te selevukà he vatu.
2KI 16:18 Ne para melipey sikan is hadì te Asiria, migkuwa ni Ahaz diyà te turuǥan is iring te atep he egemiten emun Andew te Kedhimeley wey midlekevan din is beyeey te menge hadì te Juda emun edseled dan diyà te valey te Nengazen.
2KI 16:19 Is duma pa he ǥuǥud mehitenged te kedhadì ni Ahaz, wey is menge mibeelan din, ne ingkesurat diyà te Libru he Midsuratan te menge Keguǥuza te menge Hadì te Juda.
2KI 16:20 Hein minatey en si Ahaz, inleveng sikandin diyà te midlevengan te menge kepuun din diyà te Inged ni David. Ne si Hezekia he anak din iyan nekeilis kandin te kedhadì.
2KI 17:1 Nehimu he hadì diyà te Israel si Hoshea he anak ni Elah hein ike-12 he tuig te kedhadì ni Ahaz diyà te Juda. Diyà te Samaria med-ubpà si Hoshea, ne midhadì sikandin seled te siyam he tuig.
2KI 17:2 Mezaat is ulaula zin diyà te etuvangan te Nengazen, piru kenà iring kezaat te vaal te menge hadì te Israel he nehuna kandin.
2KI 17:3 Midsurung ni Hadì Shalmaneser he hadì te Asiria si Hoshea. Nehimu sikandin he sakup ni Shalmaneser ne impevayad sikandin te vuhis.
2KI 17:4 Ne hein neuǥet wazè en mebayad si Hoshea te vuhis he iring duen te nehuna he kada tuig is kebayad din, ne mibpetavang sikandin ki Hadì So he hadì te Ehipto. Ne hein netuenan ni Shalmaneser he midluib si Hoshea, midakep din ne mibpirisu zin.
2KI 17:5 Ne zutun midsurung duen te hadì te Asiria is tivuuk he Israel, ne mibpeliǥuyan din te menge sundaru is Samaria seled te tetelu he tuig.
2KI 17:6 Ne hein ikesiyam he tuig te kedhadì ni Hoshea, mid-aǥew en duen te hadì diyà te Asiria is Samaria, ne miduma zin is menge tig-Israel ziyà te Asiria su mibihag din sikandan. Diyè din sikandan ibpeubpà te inged he Hala, diyà te menge lugar he uvey te Wahig he Habor he ziyà te Gozan, wey ziyà te menge inged te menge Midianhen.
2KI 17:7 Nehitavù heini ziyà te menge tig-Israel su geina te nekesalè dan diyà te Nengazen he Megbevayè dan he mibpeǥawas kandan diyà te Ehipto wey te kebeyveyai kandan te Faraon he hadì te Ehipto. Mid-azap sikandan te zuma he menge ed-ezapen
2KI 17:8 wey mid-iringan dan is ulaula te menge etew ziyà te menge nasyun he impesegseg te Nengazen kandan. Midsunud dan is menge ulaula he impenurù te menge hadì te Israel.
2KI 17:9 Mid-eles-eles dan mebaal te menge vaal he ebpekekuntada te Nengazen he Megbevayè dan. Mibaal zaan sikandan te menge simbahan diyà te metikang he menge lugar minsan hendei he menge lugar ziyà te Israel, puun te zezeisey he menge inged pehendiyà te zezekelà he menge inged he miberengbeng.
2KI 17:10 Midsavuk dan te tedeman he menge vatu wey mibpehitindeg te menge tukud he simbulu te vahi he ed-ezapen he si Ashera diyà te puntur te kada vuvungan wey ziyà te sihung te kada merapung he kayu.
2KI 17:11 Midtutung dan te menge veyewà diyà te kada simbahan diyà te metikang he menge lugar, iring te mibeelan te menge etew ziyà te menge nasyun he impesegseg te Nengazen kandan. Mibaal zan te mezaat he menge vaal he ingkepauk te Nengazen.
2KI 17:12 Mid-azap dan te zuma he menge ed-ezapen. Minsan pa te migkaǥi is Nengazen te, “Kenè kew med-azap te zuma he menge ed-ezapen.”
2KI 17:13 Layun ebpetizeeni te Nengazen is Israel wey Juda pinaaǥi te menge ebpeneuven din wey menge menenagnà he edhenduen: “Engkezi niw en is mezaat he menge vaal niw. Tumana niw is menge suǥù ku wey menge sulunuzen he ziyà te tivuuk he Kesuǥuan he impetuman ku te menge kepuun niw ne imbeǥey ku ziyà te keniyu pinaaǥi te menge suluǥuen ku he mibpenaub ku.”
2KI 17:14 Piru kenà sikandan edtuman. Utew sikandan mesinupaken; iring sikandan te menge kepuun dan he wazà medsarig te Nengazen he Megbevayè dan.
2KI 17:15 Inselikwey zan is menge sulunuzen wey is kebpekid-uyun kandan te Nengazen he midhimu zin diyà te menge kepuun dan, ne wazè dan seǥipaa is menge petizaan din kandan. Midsunud dan is wazè din pulus he zuma he menge ed-ezapen, ne nehimu sikandan he wazà menge pulus. Mid-iringan dan is menge etew ziyà te menge nasyun he nekeelingkus kandan minsan mibmenduan sikandan te Nengazen he kenè dan heini iringi. Mibeelan dan is menge vaal he indawey kandan te Nengazen.
2KI 17:16 Inselikwey zan is langun he menge suǥù te Nengazen he Megbevayè dan, ne nengugelingen sikandan mebaal te ledawan te zezuwa he nati he vaka, wey te tukud he simbulu te vahi he ed-ezapen he si Ashera. Mid-azap dan is andew, is bulan, wey is menge vituen wey mibeǥayan dan si Baal te zengeg.
2KI 17:17 Impemuhat dan is menge anak dan pinaaǥi te hapuy; midangep dan diyà te menge menenagnà wey menge veyilan; mibpevayèbayè dan te mezaat he vaal ziyà te etuvangan te Nengazen, ne utew ingkepauk heini te Nengazen!
2KI 17:18 Nepeukan utew te Nengazen is menge Israilihanen ne impaawè din sikandan diyà te lugar zan, ne nekepekeziyù sikandan kandin. Iyan dà nesamà is tribu ni Juda.
2KI 17:19 Minsan ganì is tribu ni Juda wazè man medtuman te menge suǥù te Nengazen he Megbevayè dan. Mid-iringan dan is vaal he impenurù kandan te menge tig-Israel.
2KI 17:20 Umbe inselikwey te Nengazen is langun he menge etew ziyà te Israel. Midsilutan din sikandan pinaaǥi te kebeǥaya zin kandan diyà te menge midsurung kandan taman te impaawè din sikandan puun te lugar zan ne nekepekeziyù sikandan kandin.
2KI 17:21 Hein insivey te Nengazen is Israel puun te ginhedian ni David, midhimu te menge tig-Israel si Jeroboam he anak ni Nebat he hadì dan. Ne mid-iniyat ni Jeroboam is menge tig-Israel te ked-iniyug diyà te Nengazen, ne kandin he ketau is kebpekevaal zan te zekelà he salà.
2KI 17:22 Mibpedayun is menge tig-Israel te ked-iring te menge salà he mibeelan ni Jeroboam, ne wazè dan engkezi heini,
2KI 17:23 taman te impaawà sikandan te Nengazen diyà te lugar zan ne nekepekeziyù sikandan kandin, sumalà is impetizaan din kandan pinaaǥi te menge suluǥuen din he mibpenaub din. Umbe mibihag te menge tig-Asiria is menge etew ziyà te Israel ne ziyà sikandan mekeubpà taman en guntaan.
2KI 17:24 Duen menge etew he midsuǥù te hadì diyà te Asiria he medhendiyè dan te Samaria. Ebpemuun sikandan diyà te Babilonia, Cut, Ava, Hamat, wey Sefarvaim, ne impeubpè din sikandan diyà te menge inged diyà te Samaria he liwan te menge tig-Israel. Umbe midsakup dan is Samaria wey is duma pa he menge inged diyà te Israel.
2KI 17:25 Dutun te aney he ked-ubpè dan dutun, wazè dan med-azap te Nengazen, umbe impehendiyà te Nengazen te kandan is menge erimaung ne mibpenhimetayan dutun te menge erimaung is duma kandan.
2KI 17:26 Heini he hitavù midtudtul ziyà te hadì diyà te Asiria: “Is menge etew he midsuǥù nu he med-ubpà diyà te menge inged diyà te Samaria, wazà metau te menge kesuǥuan te diwata he ed-ezapen dutun he lugar. Umbe mibpeveyaan din sikandan te menge erimaung ne mibpenhimetayan te menge erimaung is duma kandan, su wazè dan metueni is menge kesuǥuan din.”
2KI 17:27 Ne segugunà mibmandù is hadì te Asiria te, “Ipelikù niw ziyà te Samaria is sevaha zuen te menge memumuhat he mibihag tew, ne ziyà sikandin ipeubpà su wey zin ikepenurù diyà te menge etew is kesuǥuan te diwata he ed-ezapen keniyan he lugar.”
2KI 17:28 Umbe, sevaha zuen te vihag he menge memumuhat is midlikù diyà te Samaria ne ziyà med-ubpà te Betel, ne mibpenurù din is menge etew ke ebmenmenuwen is ked-ezapa te Nengazen.
2KI 17:29 Piru heini is nekedseselekawà he grupu te menge etew, mibpedayun dan he ebaal te kandan he menge ed-ezapan. Diyà te kada inged he ed-ubpaan dan, impelastar zan is kandan he menge ed-ezapen diyà te menge simbahan he ziyà te metikang he menge lugar he mibeelan te menge tig-Samaria.
2KI 17:30 Is ebpuun diyà te Babilonia, mid-azap dan is kandan he ed-ezapen he si Sucot Benot. Is ebpuun diyà te Cut, mid-azap dan is kandan he ed-ezapen he si Nergal. Ne is ebpuun diyà te Hamat, mibaal te ed-ezapen dan he si Ashima.
2KI 17:31 Is ebpuun diyà te Ava, mid-azap dan is kandan he ed-ezapen he si Nibhaz wey Tartak. Ne is ebpuun diyà te Sefarvaim, mid-azap dan is kandan he ed-ezapen he si Adramilec wey si Anamelec; idtavun dan ganì is menge anak dan su ibpemuhat dan kayi he menge ed-ezapen.
2KI 17:32 Ed-azap sikandan te Nengazen, piru iyan sikandan mibpilì te menge memumuhat he menge zuma zan mismu he ebpekepengulu kandan te kebpemuhat diyà te menge simbahan diyà te metikang he menge lugar.
2KI 17:33 Ed-azap sikandan te Nengazen piru ed-azap daan sikandan te keugelingen dan he menge ed-ezapen sumalà te neleyaman te menge etew ziyà te menge nasyun he ebpuunan dan.
2KI 17:34 Taman en guntaan he menge andew is kebeeli zan kayi. Kenà tutuu is ked-ezapa zan te Nengazen, ne wazà sikandan medtuman te menge suǥù, menge sulunuzen, menge penurù, wey menge kesuǥuan he imbeǥey te Nengazen te menge kevuwazan ni Jacob, he migngezanan din te Israel.
2KI 17:35 Hein midhimu te Nengazen is kebpekid-uyun din te menge Israilihanen, mibmandù sikandin te: “Kenè kew med-azap etawa mebpenilbi te zuma he menge ed-ezapen wey kenè niw pemuhata sikandan.
2KI 17:36 Iyan e zà keniyu ezapa is Nengazen he mibpeǥawas keniyu ziyà te Ehipto pinaaǥi te zekelà he ǥehem ku. Iyan e zà ereg he ed-ezapen niw wey ebpemuhaten niw.
2KI 17:37 Kinahanglan he layun niw edtumana is menge suǥù ku, menge sulunuzen, menge penurù, wey menge kesuǥuan he insurat ku para keniyu.
2KI 17:38 Kenè niw lipati is kebpekid-uyun ku keniyu, ne kenè kew azap te zuma he menge ed-ezapen.
2KI 17:39 Iyan e zà keniyu ezapa, is Nengazen he Megbevayè niw, su iyan a edlibri keniyu te kedezaat te menge kuntada niw.”
2KI 17:40 Piru haazà he menge etew, wazà mebpezumazuma te Nengazen, kekenà, mibpedayun dan he ebaal te neleyaman dan he menge vaal.
2KI 17:41 Dutun te ked-ezapa zan te Nengazen, ed-ezapen dan daan is duma he menge ed-ezapen dan. Ne taman en guntaan iyan heini ebeelan te menge kevuwazan dan.
2KI 18:1 Nehimu he hadì diyà te Juda si Hezekia he anak ni Ahaz hein iketelu he tuig te kedhadì ni Hoshea diyà te Israel te anak ni Elah.
2KI 18:2 Mibpenuiǥen si Hezekia te 25 hein nehimu sikandin he hadì. Diyà sikandin med-ubpà te Jerusalem, ne midhadì sikandin seled te 29 he tuig. Is iney zin iyan si Abia he anak ni Zacarias.
2KI 18:3 Meupiya is ulaula ni Hezekia ziyà te etuvangan te Nengazen, iring te mibeelan te kepuun din he si David.
2KI 18:4 Imperundus din is menge simbahan diyà te metikang he menge lugar; imperupet din is tedeman he vatu, wey impepenamped din is menge tukud he simbulu te vahi he ed-ezapen he si Ashera. Imperuntek din daan is brunsi he uled he mibeelan ni Moises, su taman en dutun he timpu is ked-ezapa zuen te menge Israilihanen pinaaǥi te kedtutung te menge veyewà. Heini is brunsi he uled, migngezanan te Nehushtan.
2KI 18:5 Midsarig si Hezekia te Nengazen he Megbevayà te Israel. Wazà hadì diyà te Juda he iring kandin, minsan is nengehuna kandin wey is nengehuziyan kandin.
2KI 18:6 Metinumanen sikandin he edsunud te Nengazen, ne wazà sikandin med-engked he edsunud kandin. Ne midtuman din is kesuǥuan he imbeǥey te Nengazen ki Moises.
2KI 18:7 Mibpekiduma kandin is Nengazen, ne mezeeǥen sikandin diyà te langun he menge vaal zin. Nekidsukulà sikandin te hadì te Asiria ne wazà mebpenilbi kandin.
2KI 18:8 Nezaag din is menge Filistihanen he menge meǥinged diyà te zezeisey wey zezekelà he menge inged he miberengbeng taman te Gaza wey ziyà te menge lugar he sakup kayi.
2KI 18:9 Hein ikeepat he tuig te kedhadì ni Hezekia, he iyan ikepitu he tuig te kedhadì ni Hoshea ziyà te Israel, midsurung ni Hadì Salmanaser he hadì te Asiria is Samaria ne medliǥuyan dan heini.
2KI 18:10 Ne hein nekelavey is tetelu he tuig, naaǥew te Asiria is Samaria. Ne iyan haazà ikeenem he tuig te kedhadì ni Hezekia wey ikesiyam he tuig te kedhadì ni Hoshea.
2KI 18:11 Miduma te hadì diyà te Asiria is menge tig-Israel ziyà te Asiria su mibihag din, ne ziyè dan ipeubpà te inged he Hala, diyà te menge lugar he uvey te Wahig he Habor he ziyà te Gozan, wey ziyà te zezekelà he menge inged te menge Midianhen.
2KI 18:12 Nehitavù heini ziyà te menge tig-Israel su wazè dan mebpezumazuma te Nengazen he Megbevayè dan; midsupak dan is kebpekid-uyun te Nengazen kandan, wey midsupak dan is langun he menge suǥù he imbeǥey te Nengazen pinaaǥi te suluǥuen din he si Moises. Wazè dan heini pemineǥa wey wazè dan tumana.
2KI 18:13 Hein ike-14 he tuig te kedhadì ni Hezekia ziyà te Juda, midsurung ni Hadì Senakerib he hadì te Asiria is langun he vinerengbeng he menge inged diyà te Juda, ne naaǥew zin heini.
2KI 18:14 Umbe, mibpeuwit kayi he lalag si Hadì Hezekia ziyà te hadì te Asiria he ziyà te Lakish he edhenduen: “Nekesalà a tenged te kebpekidsukulè ku kenikew. Piru ibeǥey ku kenikew is minsan hengkey he ebuyuen nu, asal ed-awè kew kayi te kenami.” Umbe mibuyù haazà is hadì te Asiria te subra he 10,000 he kilu he pelata wey 1,000 he kilu he vulawan diyà te ki Hadì Hezekia.
2KI 18:15 Imbeǥey ni Hezekia ziyà te kandin is langun he pelata ziyà te valey te Nengazen wey is diyà te budiga he ziyà te turuǥan.
2KI 18:16 Ragkes en he impekuwa ni Hezekia sikan is menge vulawan he in-apid te menge himan te menge ǥemawan te valey te Nengazen wey is diyà te menge marku kayi, ne imbeǥey zin heini ziyà te hadì te Asiria.
2KI 18:17 Ne zutun te ziyà si Senakerib te Lakish, midsuǥù din is lavew he peremandar te menge sundaru zin, is egalen he upisyal zin, wey is peremandar te menge sundaru zin he zuen din mahabet he menge sundaru he medhendiyè dan te Jerusalem te kepekid-ahà ki Hadì Hezekia. Ne hein diyè dan en te ǥawas te Jerusalem, mibpundu zan diyà te uvey te edtudaan te wahig he ebpuun diyà te peneng, he ziyà te egkezivavew he ziyà te kilid te zalan he ibpehendiyà te lugar he pemìpiey.
2KI 18:18 Ne impetawag dan si Hadì Hezekia, piru is midsuǥù duen te hadì he medhendiyà te kandan iyan si Eliakim he anak ni Hilkia, he edumala te turuǥan, si Shebna he sikritaryu, wey si Joa he anak ni Asaf, he sineriǥan te menge libru te ginhedian.
2KI 18:19 Migkaǥi ziyà te kandan sikan is peremandar te menge sundaru te, “Keǥiyi niw si Hezekia he iyan heini egkeǥiyen duen te mekeǥeǥehem he hadì te Asiria: “ ‘Hengkey is edseriǥan nu?
2KI 18:20 Egkeisip nu ve he ebpekezaag ka te tebek pinaaǥi zà te lalag, ne kenà pinaaǥi te ebilidad wey zesen te menge sundaru nu? Hentei is edseriǥan nu he iyan ibpekidsulè nu kediey?
2KI 18:21 Iyan be is Ehipto? Heini he nasyun wey is hadì duen, iring dà te nevadtì he tuked he emun idtutuked nu ne ebpekepalì te belad nu.
2KI 18:22 Kela ke iyan egkeǥiyen niw kayi te kedì is iyan edseriǥan niw is Nengazen he Megbevayè niw. Kenè be imperundus nu man is menge simbahan he para kandin diyà te metikang he menge lugar, ragkes en is menge pemuhatà kayi, ne migkeǥiyan nu is menge meǥinged diyà te Jerusalem wey is diyà te zuma pa he menge inged diyà te Juda he kinahanglan he ziyè dan dà med-azap te sevaha zà he pemuhatà diyà te Jerusalem?’
2KI 18:23 “Guntaan duen idhanyag kenikew te egalen ku, he hadì te Asiria. Ebeǥayan dey sikew te 2,000 he kudà, emun duen nu zaan 2,000 he pereuntud te kudà!
2KI 18:24 Kenè nu egkezaag minsan is kineminusan he upisyal te egalen ku. Edsarig ke zà te Ehipto he ebeǥey kenikew te menge kerwahi wey menge pereuntud te kudà.
2KI 18:25 Egkeisip nu ve he wazà a suǥua te Nengazen te kedhendini te kedezaat kayi he nasyun? Iyan mismu is Nengazen midsuǥù kedì te kedsurung wey kedezaat kayi he nasyun.”
2KI 18:26 Migkeǥiyan ni Eliakim, ni Shebna, wey ni Joa haazà is peremandar te sundaru te, “Deyzey ke iyan nu egemiten te kebpekidlalag kenami is kineǥiyan he Aramico, su egkesavut dey heini. Kenè ka kaǥi te Hebriyuhanen su egkezineg ka te menge etew he ziyà te menge verengbeng te inged.”
2KI 18:27 Piru midtavak haazà is peremandar te menge sundaru te, “Midsuǥù a te egalen ku he ibpetuenan is lalag din te langun he meǥinged kayi te Jerusalem, kenà diyè dà te keniyu wey te hadì niw. Sikiyu is langun, egkengevitil kew wey egkengemezahan kew zutun te timpu te kedsurunga zey keniyu. Egkeenen niw is tai niw wey ed-inumen niw is ihì niw.”
2KI 18:28 Ne zutun, midhitindeg haazà is peremandar te menge sundaru ne nemensag te Hebriyuhanen te, “Pemineǥa niw is migkaǥi te mekeǥeǥehem he hadì diyà te Asiria!
2KI 18:29 Iyan heini egkeǥiyen din: Kenè kew petuntu ki Hezekia. Kenè kew zin egkelibri puun te kegkesekupa ku keniyu!
2KI 18:30 Kenè kew petuntu kandin mehitenged te kedsarig te Nengazen, emun egkaǥi sikandin te, ‘Siguradu he edlibriyen kiw te Nengazen; heini is inged tew, kenè din ibeǥey ziyà te hadì te Asiria.’
2KI 18:31 “Kenè kew pemineg ki Hezekia! Iyan heini egkeǥiyen te hadì te Asiria: Kenè kew en pekidtebek kediey; surindir kew en! Ne idtuǥut ku keniyu is kegkaan te veǥas te paras wey higus niw, ne ebpekeinum kew te wahig diyà te menge punduwè niw te wahig.
2KI 18:32 Egkehimu heini taman te ebpekelikù a ne edumahan ku sikiyu ziyà te tanà he iring te tanè niw. Haazà is tanà, ne zuen duen menge pemuleey te paras he ebpekeveǥey keniyu te vinu, wey trigu he egkehimu he supas niw, wey zuen daan menge kayu he ulibu wey menge teneb. Tumana niw is egkeǥiyen ku su para meuyag kew ne kenè kew mebpatey. Kenè kew pemineg ki Hezekia su edliveǥen kew zin dà emun egkaǥi sikandin te, ‘Edlibriyen kiw te Nengazen!’
2KI 18:33 Duen be menge ed-ezapen diyà te minsan hendei he nasyun he nekelibri te nasyun dan puun te kegkesekupa te hadì te Asiria? Wazà iyan!
2KI 18:34 Duen be nehimu te menge ed-ezapen diyà te Hamat, Arpad, Sefarvaim, Hena, wey Iva? Nelibri ve te menge ed-ezapen diyà te Samaria is tanè dan puun te gehem ku? Wazà daan!
2KI 18:35 Hentei te menge ed-ezapen kayi he menge nasyun is nekelibri te nasyun dan puun te gehem ku? Ne ebmenmenuwen man te Nengazen is kedlibriya zin te Jerusalem puun te gehem ku?”
2KI 18:36 Piru wazà medtavak is menge etew su mibmandù si Hadì Hezekia he kenè dan medtavak.
2KI 18:37 Ne zutun mibindas ni Eliakim, ni Shebna, wey ni Joa is bisti zan tenged te kegkeseeng dan, ne midhendiyè dan te ki Hezekia ne midtudtul zan is menge lalag duen te peremandar te menge sundaru.
2KI 19:1 Ne hein nezineg ni Hadì Hezekia is tudtul zan diyà te kandin, mibindas din is bisti zin ne midseluub sikandin te saku su ibpetuusan din is kedlalew zin, ne midhendiyà sikandin te valey te Nengazen.
2KI 19:2 Ne impehendiyè din te ki Isaias he anak ni Amoz ensi Eliakim he edumala te turuǥan, si Shebna he sikritaryu, wey is lavew he menge memumuhat. Pudu sikandan mibivisti te saku.
2KI 19:3 Ne hein nekeuma zan diyà te ki Isaias, migkaǥi sikandan diyà te kandin te, “Iyan heini egkeǥiyen ni Hezekia: ‘Menge andew heini te zekelà he samuk! Edsilutan kiw wey ebpeel-elezan. Iring kiw te vahi he ed-anak he wazè din en desen te ked-ineǥed para ilusad is anak din.
2KI 19:4 Midsuǥù te hadì te Asiria is peremandar te menge sundaru zin te ked-undaunda te uuyag he Megbevayà. Kela ke seǥipaa te Nengazen he Megbevayè nu is mibpengaǥi zuen te peremandar te menge sundaru ne edsilutan sikandin tenged dutun, umbe pengemuyù ka para kenitew te nengesamà.’ ”
2KI 19:5 Ne hein nekepasad he egkaǥi haazà is menge upisyal he midsuǥù ni Hadì Hezekia,
2KI 19:6 migkaǥi si Isaias diyà te kandan te, “Keǥiyi niw is egalen niw he si Hadì Hezekia he iyan heini egkeǥiyen te Nengazen: ‘Kenè ka mahandek te nezineg nu he ked-un-undaha kedì duen te menge sakup te hadì te Asiria.
2KI 19:7 Pemineg ka! Edtezinen ku is hadì te Asiria. Ebpekezineg sikandin te tudtul he ebpekepelikù kandin diyà te nasyun din. Ne zutun ibpehimetayan ku sikandin pinaaǥi te ispada.’ ”
2KI 19:8 Ne hein nezineg duen te peremandar te menge sundaru te Asiria he mid-awè en diyà te Lakish is hadì dan, ne nekidtebek diyà te Libna, midtelukun sikandin diyà.
2KI 19:9 Ne si Hadì Senakerib he hadì te Asiria, duen nezineg din he tudtul he si Hadì Tirhaka he hadì te Etiopia migenat en te kebpekidtebek kandin. Ne zutun, midsuǥù sikandin te menge menunudtulà diyà te ki Hezekia te kegkaǥi kayi he menge lalag:
2KI 19:10 “Kenè ka petuntu te ed-ezapen he edseriǥan nu emun egkaǥi sikandin te, ‘Kenè ku ibeǥey ziyà te hadì te Asiria is Jerusalem.’
2KI 19:11 Pemineg ka! Iyan ka mismu nekezineg ke hengkey is mibeelan te menge hadì te Asiria ziyà te hapit langun he menge nasyun. Mibpendezeetan dan heini purungi. Ne sikew, egkeisip nu ve he egkelibri ka mulà?
2KI 19:12 Mibpendezeetan dengan te menge kepuun ku is menge inged he Gosan, Haran, Resef, wey is menge etew ziyà te Eden he ziyà te Telasar. Ne wazà mekelibri kandan is menge ed-ezapen dan.
2KI 19:13 Duen be nehimu te menge hadì diyà te Hamat, Arpad, Sefarvaim, Hena, wey Iva?”
2KI 19:14 Ne hein nepasad ni Hezekia te ebasa is surat he imbeǥey kandin duen te menge menunudtulà, midhendiyà sikandin te valey te Nengazen ne mibekar zin haazà is surat diyà te etuvangan te Nengazen.
2KI 19:15 Ne nengemuyù sikandin te, “Nengazen he Megbevayà te Israel he ebpimpinuu ziyà te pinuuwè din te kedhadì diyà te teliwazà te menge kirubin, iyan ke zà Megbevayà he edumala te langun he menge ginhedian kayi te kelibutan. Mibeelan nu is langit wey is kelibutan.
2KI 19:16 Nengazen, pemineg ka, ne tengtengi nu is langun he nehitavù. Pemineǥa nu is langun he migkaǥi ni Senakerib te ked-undaunda kenikew te uuyag he Megbevayà.
2KI 19:17 Tutuu, Nengazen, he mibpendezeetan te menge hadì diyà te Asiria is mahabet he menge nasyun
2KI 19:18 wey is menge ed-ezapen dan pinaaǥi te kebpenimbaǥa zan kayi ziyà te hapuy. Su kenà heini tutuu he menge Megbevayà, kekenà, menge vatu zà wey menge kayu he vineelan te etew.
2KI 19:19 Umbe ǥuntaan, Nengazen he Megbevayè dey, libriya key puun te ǥehem te menge tig-Asiria, su para metueni te langun he ginhedian kayi te kelibutan he iyan ke zà Nengazen he Megbevayà.”
2KI 19:20 Ne mibpeuwit te lalag si Isaias he anak ni Amoz diyà te ki Hezekia he edhenduen te: “Iyan heini egkeǥiyen te Nengazen he Megbevayà te Israel: Nezineg ku is kebpengemuyù nu vahin ki Hadì Senakerib he hadì te Asiria.
2KI 19:21 Ne iyan heini lalag ku he ebpekesuǥat diyà te kandin: ‘Ed-engitan ka wey edsudien ka te menge meǥinged diyà te Zion, he inged he Jerusalem. Ebpemengelengkeleng sikandan is ed-undaunda kenikew zutun te kebpelaǥuy nu.
2KI 19:22 Hentei is mid-insultuwan nu wey edwelwelien? Hentei is midhenggeran nu wey mibpehembuǥan? Kenè be iyan a, is Waǥas he Megbevayà te Israel?
2KI 19:23 Pinaaǥi te menge suluǥuen nu, midsudì a kenikew. Migkaǥi ke pa te, “Pinaaǥi te mahabet he menge kerwahi ku netekezeg ku is metikang he menge vuntud, is puntur te menge vuntud he Lebanon. Mibpemiley ku is kinetewisan he menge kayu he sidru kayi wey is kinemeupiyahan he menge sipris. Nekeuma a ziyà te puntur kayi he zuen duen merapung he menge kayu.
2KI 19:24 Nekepekalut a te menge teheb diyà te zuma he menge lugar, ne nekeinum a puun dutun he menge teheb. Tenged te kedsaǥad ku, nemezahan is menge wahig diyà te Ehipto.”
2KI 19:25 Tutuu iyan he mibpemengkag nu is binerengbeng he menge inged. Piru wazè nu ve metueni he siak, is Megbevayà, neuǥet en he imbanglis ku is kegkeul-ulaha kayi? Neuǥet en diyà te pelanu ku is kegkeul-ulaha kayi ne ǥuntaan edtumanen ku en heini.
2KI 19:26 Is menge meǥinged diyà te menge inged he mibpemengkag nu, naawè en is desen dan; nahandek sikandan wey nepeel-elezan. Neiring sikandan te menge sagbet diyà te pemuleey he meǥaan dà egkeǥangu dutun te kedtuvù dan etawa iring te menge sagbet he nenuvù diyà te atep he seǥuǥunè dà egkeǥangu zutun te kedtuvù dan.
2KI 19:27 Piru netuenan ku is langun mehitenged kenikew, ke hendei ka ed-ubpàubpà, etawa hendei ka ebpuun wey ebpevayà, wey ke hengkey is igkepeuki nu kediey.
2KI 19:28 Su nezineg ku is kegkepeuki nu kedì wey is kebpehambug nu, egkew-itan ku is izung nu wey ebusalan ku is bèbè nu, ne eguyuzen ku sikew ziyà te zalan he mibeyaan nu, su wey ka mekelikù diyà te ebpuunan nu.’ ”
2KI 19:29 Ne migkeǥiyan ni Isaias si Hezekia te: “Iyan heini tuus he edipinsahan te Nengazen is Jerusalem te kedezaat te menge tig-Asiria: Guntaan he tuig is egkekaan niw, iyan is menge veǥas te pinemula he nenuvù dà, ne ed-ilis he tuig iyan is beǥas te menge pinemula he nenuvù diyà te midtuvuan duen te nehuna. Piru te iketelu he tuig, ebpekepemula kew en te trigu ne ebpekeraǥun kew en. Ebpekepemula kew en daan te paras ne ebpekekaan kew te veǥas kayi.
2KI 19:30 Ne ziyà te Juda, sikiyu is nengesamà he uuyag, ed-uswag kew iring te pinemula he mibpurung mebpendalid ne ebpemeǥas.
2KI 19:31 Su zuen egkengesamà he uuyag he ebpekepeyapat he ebpuun te Jerusalem, diyà te Buvungan he Zion. Ne kenà duwazuwa is kedtumana kayi te Nengazen he Mekeǥeǥehem.
2KI 19:32 “Ne iyan heini egkeǥiyen te Nengazen mehitenged te hadì te Asiria: Kenà sikandin ebpekeseled diyà te inged he Jerusalem wey kenè din heini egkepanà. Kenà sikandin ebpekeuvey kayi he kekelasag etawa kenà sikandin ebpekesurung kayi zuma te menge etew zin he edliǥuy kayi.
2KI 19:33 Edlikù sikandin diyà te mibpuunan din, he ed-uman ed-ikul ziyà te zalan he mid-ikul zin. Kenà sikandin ebpekeseled kayi he inged. Iyan a, is Nengazen, is migkaǥi kayi.
2KI 19:34 Edipinsahan ku wey edlibriyen ku heini he inged para meveǥayi a te zengeg wey tenged te penaad ku ki David he suluǥuen ku.’ ”
2KI 19:35 Kegkezukilem, midhendiyà is belinsuǥuen te Nengazen te kampu te menge tig-Asiria, ne migerè din is 185,000 he menge sundaru. Ne hein meselem en, ked-enew zuen te nesamà he menge uuyag, neehè dan is utew mahabet he nemematey.
2KI 19:36 Tenged kayi mid-ulì si Senakerib diyà te Nineve ne zutun med-ubpàubpà.
2KI 19:37 Ne sevaha he andew, zutun te edsimba si Senakerib diyà te simbahan te ed-ezapen din he si Nisroc, midhimetayan sikandin te zezuwa he anak din he maama he si Adramilec wey si Sharezer pinaaǥi te ispada. Ne mibpelaǥuy sikandan diyà te Ararat. Ne is anak din he si Esarhadon iyan mid-ilis kandin te kedhadì
2KI 20:1 Dutun he timpu, nezeruwan si Hezekia ne henduen be te ebpatey en. Midhendiyà te kandin is ebpeneuven he si Isaias he anak ni Amoz ne migkaǥi te, “Migkaǥi is Nengazen he veeli nu en is egkesuatan nu te ebaal su kenè ke en egkeulian, kekenà, ebpatey kad.”
2KI 20:2 Ne hein nezineg haazà ni Hezekia, midsinaru sikandin diyà te elavat ne nengemuyù diyà te Nengazen.
2KI 20:3 Ke sikandin te, “Nengazen, tentenuzi nu is kegkemepezumdumahan ku kenikew kayi te kebpengungubpaan ku, nenilbi a kenikew te ebpuun diyà te gehinawa ku, wey meupiya is baal ku ziyà te etuvangan nu.” Ne utew sikandin nekesineǥew.
2KI 20:4 Ne zutun te wazè pa mekaawà si Isaias diyà te tengàtengà he lama zuen te turuǥan, migkeǥiyan sikandin te Nengazen te,
2KI 20:5 “Likù ka ziyà te ki Hezekia, he pengulu te menge etew ku, ne keǥiya nu heini: ‘Iyan heini lalag te Nengazen he Megbevayà te kepuun nu he si David: Nezineg ku is pengemuyù nu wey neehè ku is menge luhè nu. Ne ebewian ku sikew. Iketelu he andew puun guntaan ne ebpekeenew ke en, ne hendiyè ka te valey ku.
2KI 20:6 Ed-umanan ku pa te 15 he tuig is untung nu. Edlibriyen ku sikew wey heini is inged puun te ǥehem te hadì diyà te Asiria. Edipinsahan ku heini he inged su wey a meveǥayi te zengeg wey tenged daan ki David te suluǥuen ku.’ ”
2KI 20:7 Migkeǥiyan ni Isaias is menge suluǥuen ni Hezekia he kepii zan te vinekbek he veǥas te higus is levag din. Midtuman dan heini ne neulian sikandin.
2KI 20:8 Hein wazè pa meulii si Hezekia, mid-insaan din si Isaias te, “Hengkey is tuus he tutuu he egkeulian a ne ebpekehendiyà a te valey te Nengazen te iketelu he andew puun guntaan?”
2KI 20:9 Midtavak si Isaias te, “Iyan heini tuus he ibpaahà te Nengazen he tutuu he edtumanen din heini is insaad din he egkeulian ka. Pilì ka kayi te zezuwa: edlaus te sepulù he sigundu is alung diyà te urasan etawa ed-endud te sepulù he sigundu?”
2KI 20:10 Midtavak si Hezekia te, “Layun edlaus is alung. Umbe ipeendud nu te sepulù he sigundu is alung!”
2KI 20:11 Umbe nengemuyù si Isaias diyà te Nengazen, ne impeendud te Nengazen te sepulù he sigundu is alung diyà te urasan he mibpeveelan ni Ahaz.
2KI 20:12 Dutun he timpu nezineg ni Merodac Baladan he hadì diyà te Babilonia, he anak ni Baladan he nezeruwan si Hezekia. Umbe mibpeuwit sikandin te menge surat wey gasa ziyà te ki Hezekia pinaaǥi te menge menunudtulà.
2KI 20:13 Mibpurungan seǥipaa ni Hezekia is menge menunudtulà, ne impeehè din kandan is langun he menge azen diyà te teleǥuey zin te ketiǥeyunan, is menge pelata, menge vulawan, menge penaket, menge meupiya he klasi te lana, is menge ǥumaan din wey zuma pa he menge ketiǥeyunan din. Wazà minsan hengkey he ziyà te turuǥan din etawa ginhedian din he wazè din ipaahà kandan.
2KI 20:14 Dutun he timpu, is ebpeneuven he si Isaias midhendiyà te ki Hadì Hezekia ne mid-insà te, “Hendei ebpuun heeyan he menge etew, wey hengkey is kinahanglan dan?” Midtavak si Hezekia te, “Ebpuun sikandan diyà te meziyù he lugar, he Babilonia.”
2KI 20:15 Mid-insè pa haazà is ebpeneuven te, “Hengkey is neehè dan diyà te turuǥan nu?” Midtavak si Hezekia te, “Neehè dan is langun he ziyà te turuǥan ku. Wazà minsan hengkey he ketiǥeyunan ku he wazè ku ipaahà kandan.”
2KI 20:16 Ne zutun migkaǥi si Isaias diyà te ki Hezekia te, “Pemineǥa nu heini is lalag te Nengazen:
2KI 20:17 Egkeuma is timpu he ed-uwiten diyà te Babilonia is langun he menge azen diyà te turuǥan nu, sikan is langun he netiǥum te menge kepuun nu he menge azen he kemulu pa taman en guntaan. Ne wazà egkesamà, migkaǥi is Nengazen.
2KI 20:18 Ne is duma te huziyan he menge kevuwazan nu, ebihaǥen ne egkehimu sikandan he menge suluǥuen diyà te turuǥan te hadì te Babilonia.”
2KI 20:19 Mid-isip ni Hezekia he kenà haazà egkehitavù dutun te kandin he timpu, kekenà, duen kelinew wey wazà kezeetan dutun te uuyag pa sikandin. Umbe migkaǥi sikandin diyà te ki Isaias te, “Meupiya heeyan is menge lalag te Nengazen he migkaǥi nu kedì.”
2KI 20:20 Is duma pa he ǥuǥud mehitenged te kedhadì ni Hezekia, wey is langun he nevantug he menge vaal zin wey is kebaal zin te peneng wey ebpetudaan dutun pehendiyà te inged, ne ingkesurat diyà te Libru he Midsuratan te menge Keguǥuza te menge Hadì te Juda.
2KI 20:21 Ne hein minatey en si Hezekia, si Manase he anak din iyan nekeilis kandin te kedhadì.
2KI 21:1 Mibpenuiǥen si Manase te 12 he tuig hein nehimu sikandin he hadì. Diyà sikandin med-ubpà te Jerusalem, ne midhadì sikandin seled te 55 he tuig. Is iney zin iyan si Hefziba.
2KI 21:2 Mezaat is ulaula zin diyà te etuvangan te Nengazen. Mid-iringan din is utew mezaat he menge vaal te menge etew ziyà te menge nasyun he impesegseg te Nengazen te menge Israilihanen.
2KI 21:3 Mid-umanan din benguna is menge simbahan diyà te metikang he menge lugar he imperundus dengan te amey zin he si Hezekia. Mibaal zaan sikandin te menge pemuhatà he para ki Baal wey mibpevaal sikandin te tukud he simbulu te vahi he ed-ezapen he si Ashera, iring te mibeelan ni Hadì Ahab he hadì te Israel. Mid-azap din is menge merayag he egkengaahà diyà te langit.
2KI 21:4 Mibpevaal zaan sikandin te menge pemuhatà diyà te valey te Nengazen, he sumalà te Nengazen, haazà he valey ziyà te Jerusalem iyan kes lugar he zutun sikandin ebeǥayi te zengeg.
2KI 21:5 Impelastar zin heini he menge pemuhatà diyà te zezuwa he lama zuen te valey te Nengazen ne egemiten haazà he menge pemuhatà te ked-azap te langun he merayag he egkengaahà diyà te langit.
2KI 21:6 Impemuhat ni Manase is keugelingen din he anak pinaaǥi te hapuy. Mibaal zaan sikandin te menge vaal te menge veyilan wey menge menenagnà, ne ed-insà daan sikandin diyà te menge veyilan he ebpekidlalag te ǥimukud te nemematey en. Utew subra is kebaal zin te salà diyà te Nengazen, ne ingkepauk heini te Nengazen.
2KI 21:7 Insavuk din diyà te valey te Nengazen sikan is tukud he simbulu te vahi he ed-ezapen he si Ashera he mibpeveelan din. Piru mehitenged dutun te valey te Nengazen, migkaǥi is Nengazen diyà te ki David wey ziyà te anak din he si Solomon, “Wazà pidtemanan te kebeǥayi kedì te zengeg kayi te valey ku wey kayi te Jerusalem he iyan kes lugar he nepilì ku ziyà te langun he menge lugar te langun he menge tribu te Israel.
2KI 21:8 Emun edtumanen te menge etew te Israel is langun he menge kesuǥuan he imbeǥey ku kandan pinaaǥi te suluǥuen ku he si Moises, kenè ku idtuǥut he mekaawà sikandan kayi te tanà he imbeǥey ku ziyà te menge kepuun dan.”
2KI 21:9 Piru wazà mebpemineg is menge etew. Mibpenguluwan sikandan ni Manase te kebaal te mezaat, ne edhuna pa he mezaat is baal zan te mezaat he vaal te menge etew ziyà te menge nasyun he mibpezezeetan te Nengazen te menge Israilihanen.
2KI 21:10 Migkaǥi is Nengazen pinaaǥi te menge suluǥuen din he mibpenaub din te:
2KI 21:11 “Mibaal si Hadì Manase he hadì te Juda kayi te utew mezaat he vaal, he edhuna pa he mezaat te mibeelan te menge Amorihanen he mid-ubpà kayi he tanà hein wazè pa mekeuma kayi is menge Israilihanen. Migiyahan din is menge tig-Juda te kebaal te salà pinaaǥi te kebpeezapa zin kandan te menge ed-ezapen din he tarù he Megbevayà.
2KI 21:12 Umbe siak, is Nengazen he Megbevayà te Israel, ebpeeǥiyan ku te kezeetan is Jerusalem wey is Juda, he igkelimezangi te kada ebpekezineg duen.
2KI 21:13 Edhukuman ku is Jerusalem iring te kedhukumi ku te Samaria wey te pemilya ni Hadì Ahab. Edlumpiyuwan ku is Jerusalem iring te pinggan he edterepuwan ne ibpelangkeb.
2KI 21:14 Idselikwey ku minsan is nengesamà duen te menge etew ku, ne ibeǥey ku sikandan diyà te menge kuntada zan he ed-aǥew te menge azen dan.
2KI 21:15 Egkehitavù heini kandan su mezaat is mibeelan dan diyà te etuvangan ku, ne midhimu zan he mepauk a, puun pa te kegawas te menge kepuun dan diyà te Ehipto taman en guntaan.”
2KI 21:16 Mahabet he menge etew is mibpenhimetayan ni Manase he kenà pezem ereg he ebpenhimetayan, taman te midtudà is lengesa ziyà te menge kersada te Jerusalem. Ne kenè en heini ragkes duen te salà he mibeelan din he nehimu he hinungdan te kebpekesalà te menge tig-Juda ziyà te etuvangan te Nengazen!
2KI 21:17 Is duma pa he ǥuǥud mehitenged te kedhadì ni Manase, wey is langun he mibeelan din, ragkes is menge salà he mibeelan din, ne ingkesurat diyà te Libru he Midsuratan te menge Keguǥuza te menge Hadì te Juda.
2KI 21:18 Hein minatey en si Manase, inleveng sikandin diyà te pemuleey te turuǥan din, kes pemuleey he egngezanan te Uza. Ne is anak din he si Amon iyan nekeilis kandin te kedhadì.
2KI 21:19 Mibpenuiǥen si Amon te 22 he tuig hein nehimu sikandin he hadì diyà te Juda. Diyà sikandin med-ubpà te Jerusalem, ne midhadì sikandin seled te zezuwa he tuig. Is iney zin iyan si Meshulemet he anak ni Haruz he tig-Jotba.
2KI 21:20 Mezaat is baal ni Amon diyà te etuvangan te Nengazen, iring te mibeelan ni Manase he amey zin.
2KI 21:21 Mid-iringan din is ulaula te amey zin. Mid-azap din is menge ed-ezapen he mid-azap te amey zin,
2KI 21:22 ne inselikwey zin is Nengazen, he Megbevayà te menge kepuun din. Wazè din sunuza is menge paaǥi te Nengazen.
2KI 21:23 Ne zutun, mezaat is pelanu te menge upisyal ni Amon diyà te kandin, ne midhimetayan dan sikandin diyà te turuǥan din.
2KI 21:24 Piru pudu midhimetayi te menge etew ziyà te Juda sikan is midhimatey ki Hadì Amon. Ne iyan in-ilis dan he hadì is anak ni Amon he si Josia.
2KI 21:25 Is duma pa he ǥuǥud mehitenged te kedhadì ni Amon, wey is menge vaal zin, ne ingkesurat diyà te Libru he Midsuratan te menge Keguǥuza te menge Hadì te Juda.
2KI 21:26 Inleveng si Amon diyà te penlevengè din he pemuleey he egngezanan te Uza. Ne si Josia he anak din, iyan nekeilis kandin te kedhadì.
2KI 22:1 Walu he tuig is keǥurang ni Josia hein nehimu sikandin he hadì. Diyà sikandin med-ubpà te Jerusalem, ne midhadì sikandin seled te 31 he tuig. Is iney zin iyan si Jedida he anak ni Adaya he tig-Bozkat.
2KI 22:2 Meupiya is baal zin diyà te etuvangan te Nengazen ne mid-iringan din is ulaula te kepuun din he si David. Midsunud din is hustu.
2KI 22:3 Hein ike-18 he tuig te kedhadì din, impehendiyè din te valey te Nengazen is sikritaryu zin he si Shafan, he anak ni Azalia wey apù ni Meshulam. Migkeǥiyan din si Shafan te,
2KI 22:4 “Hendiyè ka te pengulu he memumuhat he si Hilkia, ne ipetiǥum nu kandin is selapì he mid-uwit te menge etew ziyà te valey te Nengazen, he migkulikta te menge memumuhat he ebantey te ǥemawan te valey te Nengazen.
2KI 22:5 Ne keǥiyi nu si Hilkia he iveǥey zin heini ziyà te menge etew he midseriǥan te kedumala te kebpurungi te valey te Nengazen, su para iyan sikandan edsuhul te menge edterebahu ziyà te valey te Nengazen–
2KI 22:6 he iyan sikan is ed-andam te menge kayu, sikan is ebpurung dutun te valey wey te menge verengbeng kayi. Ne is duma he selapì ne para te ibpemasa zan te menge kayu wey menge vatu he vinesbasan en, he kinahanglan te kebpurungi zuen te valey.
2KI 22:7 Piru kenè en kinahanglan he ibpeehè dan is lista te menge neǥastu su egkeseriǥan sikandan.”
2KI 22:8 Ne migkaǥi haazà is lavew he memumuhat he si Hilkia ziyà te ki Shafan he sikritaryu te, “Neehè ku is Libru te Kesuǥuan diyà te valey te Nengazen.” Imbeǥey ni Hilkia haazà is libru ki Shafan ne mibasa zin heini.
2KI 22:9 Ne midhendiyà si Shafan te hadì ne migkaǥi te, “Migkuwe en te menge upisyal nu sikan is selapì diyà te valey te Nengazen ne imbeǥey zan en diyà te menge sineriǥan te kebpurung duen te valey.”
2KI 22:10 Ne migkaǥi pa sikandin dutun te hadì te, “Duen libru he imbeǥey kedì duen te memumuhat he si Hilkia.” Ne mibasa zin haazà diyà te etuvangan dutun te hadì.
2KI 22:11 Ne hein nezineg dutun te hadì is ingkesurat duen te Libru te Kesuǥuan, mibindas din is bisti zin tenged te kegkeseeng din.
2KI 22:12 Mibmenduan din si Hilkia he memumuhat, si Ahikam he anak ni Shafan, si Acbor he anak ni Mecaya, si Shafan he sikritaryu, wey si Asaya he keugelingen din he suluǥuen. Ke sikandin te,
2KI 22:13 “Insai niw is Nengazen para kedì wey para te menge etew kayi te Juda vahin kayi te ingkesurat kayi te libru he naahà. Dekelà is pauk te Nengazen kenitew su wazà medtuman is menge kepuun tew te ingkesurat kayi te libru, he ibpetuman daan kenitew.”
2KI 22:14 Umbe, midhendiyà si Hilkia he memumuhat, si Ahikam, si Acbor, si Shafan, wey si Asaya te ki Hulda te sevaha he vahi he ebpeneuven su ebpekidlalag dan kandin. Heini si Hulda, diyà ed-ubpà te veǥu he vahin te Jerusalem, ne esawa sikandin ni Shalum he anak ni Tikva wey apù ni Harhas. Si Shalum iyan ed-atur te menge visti ziyà te Baley te Nengazen.
2KI 22:15 Migkaǥi si Hulda ziyà te kandan te, “Keǥiyi niw is etew he midsuǥù keniyu kayi te kedì he iyan heini lalag te Nengazen he Megbevayà te Israel: ‘Edezeetan ku heini he lugar wey is menge meǥinged kayi, sumalà is ingkesurat diyà te libru he mibasa nu.
2KI 22:17 Ibpeehè ku is pauk ku kayi he lugar ne kenà heini egkeengked, su inselikwey a te menge etew ku; su midtutung dan te veyewà su mid-azap dan te zuma he menge ed-ezapen. Midhimu zan he mepauk a pinaaǥi te menge ulaula zan.’
2KI 22:18 “Piru keǥiyi niw is hadì te Juda, he midsuǥù keniyu te ked-insà diyà te Nengazen, he kenè pa sikandin meipeng su iyan heini lalag te Nengazen he Megbevayà te Israel:
2KI 22:19 Mibpemineg ku is pengemuyù nu tenged te kedsendit nu wey kebpekevevaa nu te keugelingen nu ziyà te etuvangan ku hein nezineg nu is migkaǥi ku he ebpekesuǥat kayi he lugar wey te menge meǥinged kayi, he edrewakan wey edezeetan heini he lugar. Mibindas nu is kumbalè nu wey midsineǥew ka ziyà te etuvangan ku su nekedsendit ka. Umbe siak is Nengazen migkaǥi a te,
2KI 22:20 mintras uuyag ke pa, kenè ku ebpeeǥiyan te kezeetan heini he lugar. Ebpatey ka he melinawen, ne ed-uwiten ku sikew ziyà te zivaluy he untung.” Ne migkeǥiyan dan sikan is hadì te tavak ni Hulda.
2KI 23:1 Ne zutun impetawag ni Hadì Josia is langun he edumala te Juda wey Jerusalem.
2KI 23:2 Midhendiyà sikandin te valey te Nengazen duma te langun he menge etew ziyà te Juda wey Jerusalem puun te utew lavew is pid-etawan din pehendiyà te utew minus is pid-etawan din. Miduma zaan is menge memumuhat wey menge ebpeneuven. Mibasa ni Josia ziyà te kandan is langun he ingkesurat duen te Libru te Kebpekid-uyun te Megbevayà he naahà diyà te valey te Nengazen.
2KI 23:3 Ne midhitendeg si Josia diyà te kilid te tukud he hitindeǥà te menge hadì. Ne nenangdù sikandin diyà te etuvangan te Nengazen he edsunud sikandin te Nengazen pinaaǥi te kedtuman te menge suǥù din, menge penurù, wey menge sulunuzen, te kedtuman he ebpuun diyà te tivuuk he gehinawa zin wey kedsavut din. Pinaaǥi kayi egketuman is ibpetuman diyà te paaǥi te kebpekid-uyun te Megbevayà he ingkesurat duen te libru. Ne midsaad daan is menge etew he edtumanen dan is paaǥi te kebpekid-uyun te Megbevayà.
2KI 23:4 Ne midsuǥù ni Hadì Josia si Hilkia he lavew he memumuhat, wey sikan is menge memumuhat he iring te kegkelavew ni Hilkia, wey kes menge memumuhat he ebantey te ǥemawan te valey te Nengazen, te ked-awà puun dutun te valey te Nengazen te langun he menge gelemiten he egemiten te ked-ezapa ki Baal, ki Ashera, wey te egkengaahà diyà te langit. Ne mibpevinsulan din heini ziyà te ǥawas te Jerusalem, he ziyà te vevesukà he zal-ug te Kidron, ne mid-uwit is avu kayi ziyà te Betel.
2KI 23:5 Impaawè din diyà te ketengdanan dan is menge memumuhat he ebpenilbi te zuma he menge ed-ezapen. Heini he menge memumuhat, insarig dengan kandan te menge hadì diyà te Juda is kedtutung te menge veyewà diyà te menge simbahan diyà te metikang he menge lugar ziyà te menge inged diyà te Juda wey ziyà te peliǥuy te Jerusalem. Midtutung sikandan te menge veyewà para ki Baal wey te egkengaahà diyà te langit–andew, bulan, wey menge vituen.
2KI 23:6 Impaawà daan ni Hadì Josia sikan is tukud he simbulu te vahi he ed-ezapen he si Ashera diyà te valey te Nengazen ne mid-uwit haazà diyà te ǥawas te Jerusalem, he ziyà te zal-ug te Kidron, ne mibinsulan dutun. Ne impevekvek din heini ne insawed diyà te penlevengà.
2KI 23:7 Imperundus din daan is menge valey te menge maama wey menge vahi he ebelegyà te zengeg dan, he ziyà te uvey te valey te Nengazen he zutun ebpenahì is menge vahi te menge visti he egemiten te ked-azap ki Ashera.
2KI 23:8 Impelikù ni Josia ziyà te Jerusalem is langun he menge memumuhat he ziyà med-ubpà te zuma he menge inged diyà te Juda. Midremerikan din is menge simbahan diyà te metikang he menge lugar, puun te Geba pehendiyà te Beersheba, he zutun edtutung te menge veyewà is menge memumuhat. Imperundus din is menge simbahan diyà te Pultahan ni Josue, he gubirnedur te Jerusalem. Heini he pultahan diyà te egkeǥivang emun edseled ki zuen te pultahan te inged.
2KI 23:9 Is menge memumuhat he ebpemenilbi ziyà te menge simbahan diyà te metikang he menge lugar, ne wazà tuǥuti te kebpenilbi ziyà te pemuhatà he para te Nengazen diyà te Jerusalem, piru midtuǥutan sikandan te kegkaan te supas he wazè din tapey zuma he menge memumuhat.
2KI 23:10 Midremerikan daan ni Josia is pemuhatà diyà te Tofet, he ziyà te Suǥud-suǥud te Ben Hinom, su para wazà ebpekepemuhat te anak din dutun diyà te ki Molec pinaaǥi te hapuy.
2KI 23:11 In-awè din daan diyà te ǥemawan te valey te Nengazen is menge kudà he impehinungud te menge hadì diyà te andew. Heini he menge kudà, diyà dapit te lama te valey te Nengazen, uvey te ruǥu te upisyal he si Natan Melec. Mibinsulan daan ni Josia is menge kerwahi he halad para te andew.
2KI 23:12 Imperundus din daan is menge pemuhatà he mibeelan te menge hadì diyà te Juda ziyà te patag he atep he zivavew te ruǥu ni Ahaz; elin daan imperundus din is menge pemuhatà he mibpeveelan ni Manase ziyà te zezuwa he lama zuen te valey te Nengazen. Impevekbek din heini ne insimburè din diyà te zal-ug te Kidron.
2KI 23:13 Midremerikan din daan is menge simbahan diyà te metikang he menge lugar he ziyà dapit te edsilaan te Jerusalem wey is diyà te egkezivavà te Buvungan te Kegkezeeti. Heini he menge simbahan mibangun ni Hadì Solomon he hadì te Israel he para ki Ashtoret, te utew mezaat he vahi he ed-ezapen te menge Sidunhanen, wey para ki Kemosh, te utew mezaat he ed-ezapen te menge Moabitanhen, wey para zaan ki Molec, te utew mezaat he ed-ezapen te menge Amunihanen.
2KI 23:14 Midpenrupet ni Josia is tedeman he menge vatu wey mibpenamped din is menge tukud he simbulu te vahi he ed-ezapen he si Ashera. Ne midremerikan din heini he menge lugar pinaaǥi te kebpeyepati zuen te tulan te menge etew.
2KI 23:15 Minsan is pemuhatà diyà te simbahan diyà te metikang he lugar he ziyà te Betel midrundus ni Josia. Heini he simbahan impeveelan ni Jeroboam he anak ni Nebat, he iyan nehimu he hinungdan te kebpekesalà te menge tig-Israel. Mibekbek heini ni Josia ne mibinsulan din ragkes is tukud he simbulu te vahi he ed-ezapen he si Ashera.
2KI 23:16 Ne hein nenlangulangu sikandin diyà te peliǥuy, neehè din is menge leveng diyà te kilid te vuvungan. Ne impekuwa zin is menge tulan dutun te menge leveng ne mibinsulan din diyà te pemuhatà diyà te Betel su paaǥi haazà te kedremeriki zuen. Is kegkeul-ulaha kayi, ne sumalà te nekaǥi te Nengazen pinaaǥi te suluǥuen din he midtagnà te kegkehitevua kayi.
2KI 23:17 Mid-insà si Hadì Josia mehitenged te leveng he neehè din te, “Hentei ki leveng haazà?” Midtavak is menge etew ziyà te inged te, “Leveng heeyan te suluǥuen te Megbevayà he tig-Juda iyan sikandin midtagnà kayi te mibeelan nu ǥuntaan keniyan te pemuhatà kayi te Betel.”
2KI 23:18 Migkaǥi haazà is hadì te, “Bey-ani niw en heeyan is leveng din. Kenè niw kuwaa is menge tulan din.” Umbe wazè dan kuwaa is menge tulan din ragkes is menge tulan te ebpeneuven he tig-Samaria.
2KI 23:19 Ne midrundus ni Josia is menge simbahan diyà te metikang he menge lugar, diyà te Samaria, iring te mibeelan din diyà te Betel. Heini he menge simbahan is impeveelan te menge hadì te Israel utew ingkepauk te Nengazen.
2KI 23:20 Mibpenhimetayan ni Josia is langun he menge memumuhat dutun he menge simbahan diyà mismu te menge pemuhatà dutun. Ne midtutung sikandin te menge tulan te etew zutun te menge pemuhatà he paaǥi te kedremeriki zuen. Ne midlikù sikandin diyà te Jerusalem.
2KI 23:21 Mibmenduan ni Josia is langun he menge etew te, “Edsilibra kiw te Pista te Kedlavey te Belinsuǥuen su wey meveǥayi te zengeg is Nengazen he Megbevayè tew, sumalà is ingkesurat kayi te Libru te Kebpekid-uyun te Megbevayà.”
2KI 23:22 Ne nekeviza heini he kedsilibraha te Pista te Kedlavey te Belinsuǥuen duen te kedsilibraha kayi hein timpu he menge zatù pa is edumala te Israel wey timpu te menge hadì te Israel wey Juda.
2KI 23:23 Midsilibra ziyà te Jerusalem heini he pista he paaǥi te kebeǥey te zengeg diyà te Nengazen hein ike-18 he tuig te kedhadì ni Josia.
2KI 23:24 In-awà ni Josia ziyà te Jerusalem wey te tivuuk he Juda is menge veyilan he ebpekidlalag te gimukud te nemematey en, is menge ledawan he ed-ezapen te menge pemilya, is duma he menge ed-ezapen, wey is langun he utew mezaat he ed-ezapen te menge etew. Mibeelan heini ni Josia su edtumanen din is menge suǥù he ingkesurat diyà te libru he naahà te memumuhat he si Hilkia ziyà te valey te Nengazen.
2KI 23:25 Wazè pa hadì he iring ki Josia he edsunud te egkesuatan te Nengazen te ebpuun te tivuuk he gehinawa zin, tivuuk he kedsavut din, tivuuk he zesen din. Mibpurungan din tumana is langun he Kesuǥuan ni Moises. Ne wazà iring kandin duen te nekesunud he menge hadì.
2KI 23:26 Piru minsan pa te iyan heini, wazà gihapun maawà is kegkepeuki te Nengazen te menge tig-Juda, tenged te langun he mibeelan ni Manase he utew zin ingkepauk.
2KI 23:27 Umbe, migkaǥi is Nengazen te, “Id-awè ku ziyà te etuvangan ku is menge tig-Juda iring te mibeelan ku te menge tig-Israel, ne idselikwey ku is Jerusalem, he pinilì ku he inged, wey heini is baley ku he nekaǥi ku he kayi a ebeǥayi te zengeg.”
2KI 23:28 Is duma pa he ǥuǥud mehitenged te kedhadì ni Josia, wey is langun he mibeelan din, ne ingkesurat diyà te Libru he Midsuratan te menge Keguǥuza te menge Hadì te Juda.
2KI 23:29 Hein edhadì pa si Josia, si Faraon Neco he hadì te Ehipto midhendiyà te Wahig he Eufrates su edtevangan din is hadì te Asiria. Ne migenat si Hadì Josia wey is menge sundaru zin su ebpekidtebek dan ki Neco, piru midhimetayan sikandin ni Neco hein neked-uma zan diyà te Megido.
2KI 23:30 Ingkarga te menge suluǥuen din te kerwahi is lawa zin ne inlikù dan diyà te Jerusalem ne inleveng dan sikandin diyà te keugelingen din he penlevengà. Ne iyan midhimu te menge etew ziyà te Juda he hadì he ilis kandin, is anak din he si Jehoahaz pinaaǥi te kedlenahi kandin.
2KI 23:31 Mibpenuiǥen si Jehoahaz te 23 he tuig hein nehimu sikandin he hadì. Diyà sikandin med-ubpà te Jerusalem, ne midhadì sikandin seled te tetelu he vulan. Is iney zin iyan si Hamutal he anak ni Jeremias he tig-Libna.
2KI 23:32 Mezaat is ulaula zin diyà te etuvangan te Nengazen iring te mibeelan te menge kepuun din.
2KI 23:33 Mibpirisu sikandin ni Faraon Neco ziyà te Ribla he sakup te tanà he Hamat, su para kenà sikandin mekahadì diyà te Jerusalem. Impevayad te vuhis ni Neco is Juda te 3,500 he kilu he pelata wey 35 he kilu he vulawan.
2KI 23:34 Si Eliakim he sevaha pa he anak ni Josia iyan midhimu ni Neco he hadì he ilis ki Jehoahaz. Mid-ilisan ni Neco is ngazan ni Eliakim te Jehoyakim. Ne si Jehoahaz miduma ni Neco ziyà te Ehipto ne ziyà mebpatey.
2KI 23:35 Impevayad ni Hadì Jehoyakim te vuhis is menge tig-Juda sumalà te ketiǥeyunan dan, su para mekevayad sikandin te vuhis he ibpevayad kandin ni Faraon Neco.
2KI 23:36 Mibpenuiǥen si Jehoyakim te 25 he tuig hein nehimu sikandin he hadì. Diyà sikandin med-ubpà te Jerusalem, ne midhadì sikandin seled te 11 he tuig. Is iney zin iyan si Zebida he anak ni Pedaya he tig-Ruma.
2KI 23:37 Mezaat is ulaula zin diyà te etuvangan te Nengazen, iring te mibeelan te menge kepuun din.
2KI 24:1 Dutun te timpu te kedhadì ni Jehoyakim, midsurung ni Hadì Nebucadnezar he hadì te Babilonia is Juda ne nehimu he sakup din si Jehoyakim seled te tetelu he tuig. Piru te huziyan he timpu nekidsukulà si Jehoyakim ki Nebucadnezar.
2KI 24:2 Mibpengelinteuwan te Nengazen he surunga te menge tig-Babilonia, tig-Aram, tig-Moab, wey tig-Amon is Juda, sumalà te migkaǥi te Nengazen pinaaǥi te menge suluǥuen din he mibpenaub din.
2KI 24:3 Nehitavù heini ziyà te Juda sumalà is insuǥù te Nengazen su para ikepaawè din sikandan diyà te lugar zan wey mekepekeziyù kandin, tenged te menge salà he mibeelan ni Manase,
2KI 24:4 ragkes en is kebpenhimetayi zin te menge etew he kenà ereg he edhimetayan. Impetiǥis din is lengesa zan diyà te Jerusalem, ne kenà heini egkepesaylu te Nengazen.
2KI 24:5 Is duma pa he ǥuǥud mehitenged te kedhadì ni Jehoyakim wey is langun he mibeelan din, ne ingkesurat diyà te Libru he Midsuratan te menge Keguǥuza te menge Hadì te Juda.
2KI 24:6 Ne hein minatey en si Jehoyakim, si Jehoyakin he anak din iyan nekeilis kandin te kedhadì.
2KI 24:7 Wazè en med-uman medsurung is hadì te Ehipto, su mid-aǥew te hadì te Babilonia is langun he menge lugar zin, puun te zal-ug te Ehipto taman te Wahig he Eufrates.
2KI 24:8 Mibpenuiǥen si Jehoyakin te 18 he tuig hein nehimu sikandin he hadì. Diyà sikandin med-ubpà te Jerusalem, ne midhadì sikandin seled te tetelu he vulan. Is iney zin iyan si Nehusta he anak ni Elnatan he tig-Jerusalem.
2KI 24:9 Mezaat is ulaula zin diyà te etuvangan te Nengazen, iring te mibeelan te amey zin he si Jehoyakim.
2KI 24:10 Duen te timpu te kedhadì din, midsurung te menge upisyal ni Hadì Nebucadnezar he hadì te Babilonia is Jerusalem, ne midliǥuyan dan heini.
2KI 24:11 Ne midhendiyà si Nebucadnezar te Jerusalem dutun te kedliǥuwi kayi.
2KI 24:12 Ne midsurindir ziyà te kandin si Hadì Jehoyakin, duma is iney zin, menge suluǥuen din, menge dungganen he menge etew zin, wey menge upisyal zin. Ne hein ikewalu he tuig te kedhadì ni Nebucadnezar ziyà te Babilonia, mibihag din si Jehoyakin.
2KI 24:13 Sumalà te nekaǥi zengan te Nengazen, mibpenguwa ni Nebucadnezar is langun he ketiǥeyunan diyà te valey te Nengazen wey ziyà te turuǥan, wey is langun he vulawan he menge gelemiten he mibpeveelan ni Hadì Solomon he hadì te Israel he para te valey te Nengazen.
2KI 24:14 Ne mibihag din is 10,000 he menge meǥinged diyà te Jerusalem, ragkes en is langun he menge upisyal wey is kinemeupiyahan he menge sundaru, ne is langun he memetau he ebaal, wey menge platiru. Iyan dà nesamà is utew menge pubri.
2KI 24:15 Mibihag ni Nebucadnezar si Jehoyakin ne mid-uwit din diyà te Babilonia, ragkes en is iney zin, menge esawa zin, menge upisyal wey dungganen he menge etew ziyà te Juda.
2KI 24:16 Mibihag daan ni Nebucadnezar is 7,000 he memevurut he menge sundaru wey 1,000 he memetau he ebaal wey menge platiru zuen te menge sundaru.
2KI 24:17 Is midhimu ni Nebucadnezar he hadì he ilis ki Jehoyakin iyan si Matania he anggam ni Jehoyakin. Ne mid-ilisan din is ngazan ni Matania te Zedekia.
2KI 24:18 Mibpenuiǥen si Zedekia te 21 he tuig hein nehimu sikandin he hadì. Diyà sikandin med-ubpà te Jerusalem, ne midhadì sikandin seled te 11 he tuig. Is iney zin iyan si Hamutal he anak ni Jeremias he tig-Libna.
2KI 24:19 Mezaat is ulaula zin diyà te etuvangan te Nengazen, iring te mibeelan ni Jehoyakim.
2KI 24:20 Umbe, hein neuǥet impaawà te Nengazen diyà te lugar zan is menge tig-Jerusalem wey menge tig-Juda wey mekepekeziyù kandin. Neulaula heini ziyà te kandan tenged te kegkepeuki te Nengazen kandan. Ne nekidsukulà si Zedekia te hadì te Babilonia.
2KI 25:1 Umbe, hein ikesiyam he tuig te kedhadì ni Zedekia, zutun te ikesepulù he andew te ikesepulù he vulan, nenurung si Hadì Nebucadnezar he hadì te Babilonia wey is langun he menge sundaru zin diyà te Jerusalem. Migkampu zan diyà te ǥawas te inged ne mibaal zan te menge turi-turi te peliǥuy kayi.
2KI 25:2 Midliǥuyan dan haazà is inged taman te ike-11 he tuig te kedhadì ni Zedekia.
2KI 25:3 Ne hein ikesiyam he andew te ikeepat he vulan dutun he tuig, utew mepait he vitil zutun te inged, ne wazè en egkekaan te menge etew.
2KI 25:4 Dutun he timpu, duen kevahin duen te verengbeng he midrundus te menge tig-Babilonia, umbe nekeisip si Zedekia wey is langun he menge sundaru zin he ebpelaǥuy zan. Piru ǥeina te neliǥuyan te menge tig-Babilonia haazà is inged, ne midteǥazan dan is kebmezukilem. Diyè dan mebayà te pultahan, he ziyà te pid-elangan te zezuwa he verengbeng uvey te pemuleey te hadì. Mibpelaǥuy zan diyà te Araba,
2KI 25:5 piru midal-as sikandan te menge sundaru te Babilonia, ne nesaut dan diyà te menge suǥud diyà te Jerico. Midsuwey ki Zedekia is langun he sundaru zin, ne nezekepan sikandin.
2KI 25:6 Ne mid-uwit dan sikandin diyà te hadì te Babilonia he ziyà te Ribla, he sakup te tanà he Hamat, ne zutun sikandin hukumi.
2KI 25:7 Midhimetayan diyà te etuvangan din is menge anak din he menge maama. Ne midluǥit is menge mata zin, ne migkedinahan sikandin is mid-uwit diyà te Babilonia.
2KI 25:8 Ne hein ikepitu he andew te ikelima he vulan dutun te ike-19 he tuig te kedhadì ni Nebucadnezar ziyà te Babilonia, midhendiyà te Jerusalem is peremandar te menge vantey te Babilonia he si Nebuzaradan.
2KI 25:9 Mibinsulan din is baley te Nengazen, is turuǥan, is langun he menge valey ziyà te Jerusalem, wey is langun he impurtanti he menge bilding.
2KI 25:10 Ne iyan sikandin midumala te menge sundaru te Babilonia te kebengkag duen te verengbeng he nekeliǥuy te Jerusalem.
2KI 25:11 Ne mibihag din is nesamà he menge etew zutun te inged, ragkes is menge etew he zumezapig te hadì te Babilonia.
2KI 25:12 Piru intaǥak din is duma he utew pubri he menge etew su para maatur zan is pemuleey te paras wey zuma he menge vevesukà.
2KI 25:13 Mibengkag te menge tig-Babilonia is menge azen diyà te valey te Nengazen he iyan is: brunsi he menge tukud, menge untuzà he para te kedhakut te wahig, wey is dekelà he teleǥuey te wahig he brunsi he migngezanan te Daǥat. Ne mid-uwit dan sikan is menge brunsi ziyà te Babilonia.
2KI 25:14 Migkuwa zan daan is menge karà, menge pala, menge penamped te pebilu, menge tasa, wey is duma pa he menge gelemiten he brunsi zutun te Baley te Nengazen.
2KI 25:15 Mibpenguwa zaan ni Nebuzaradan is menge selevukà te vaǥa, is menge yehung, wey is duma pa he vulawan wey pelata he menge gelemiten.
2KI 25:16 Dekelà, umbe hapit kenà egketimbang is menge brunsi he nekuwa zuen te zezuwa he tukud, duen te zekelà he teleǥuey te wahig he egngezanan te Daǥat, wey zuen te menge untuzà he gelemiten te kedhakut te wahig. Heini he menge azen mibpeveelan dengan ni Solomon he para zuen te valey te Nengazen.
2KI 25:17 Is kelayat te kada tukud 27 he ǥiek. Ne is kelayat te in-ulu te kada tukud ne heepat wey tengà he ǥiek. Heini is menge in-ulu mideyzeyanan te impedlambid he rantey wey mibpeliǥuyan te brunsi he zayandayan he mibpurma he iring te menge prutas he pumigranata.
2KI 25:18 Mibihag daan ni Nebuzaradan si Seraya he lavew he memumuhat, si Zefanias he ebpeketinundug is kegkelavew zin ki Seraya, wey is tetelu he perevantey te ǥemawan te valey te Nengazen.
2KI 25:19 Ne heini pa is neturedu zin dutun te inged he mibihag din: is upisyal te menge sundaru ziyà te Juda, is lelima te perezumala te hadì, is peremandar te menge sundaru he ebpen-ahà te edsunderuwen, wey is 60 he menge meǥinged dutun.
2KI 25:20 Miduma sikandan is langun ni Nebuzaradan diyà te hadì te Babilonia he ziyà te Ribla,
2KI 25:21 he sakup te Hamat. Ne zutun impehimetayan sikandan duen te hadì. Umbe is menge etew ziyà te Juda nekepekeziyù diyà te tanè dan he menge vihag.
2KI 25:22 Mibpilì ni Hadì Nebucadnezar he hadì te Babilonia si Gedalia he anak ni Ahikam wey apù ni Shafan, ne midhimu zin he gubirnedur te menge etew he nesamà diyà te Juda.
2KI 25:23 Ne hein netudtulan mehitenged kayi is menge upisyal ziyà te Juda wey is menge etew zan, ne midhendiyè dan te ki Gedalia ziyà te Mizpa. Iyan sikandan si Ishmael he anak ni Netania, si Johanan he anak ni Karea, si Seraya he anak ni Tanhumet he tig-Netofa, si Jaazania he tig-Maaca, wey is menge etew zan.
2KI 25:24 Nenangdù si Gedalia ziyà te kandan wey ziyà te menge etew zan te, “Kenè kew mahandek te menge upisyal te Babilonia. Ubpè kew zà kayi ne silbiyi niw is hadì te Babilonia, ne wazà mezaat he egkehitavù keniyu.”
2KI 25:25 Piru hein ikepitu he vulan dutun he tuig, si Ishmael he anak ni Netania wey apù ni Elishama, he sakup te lavew he pemilya, midhendiyà te Mizpa zuma te sepulù he etew ne midhimetayan dan si Gedalia wey is menge zuma zin he menge tig-Juda wey menge tig-Babilonia.
2KI 25:26 Ne tenged kayi, nemelaǥuy pehendiyà te Ehipto is langun he menge etew zutun puun te pinekelavew pehendiyà te kineminusan, ragkes en is menge upisyal wey menge sundaru, su nahandek dan he kela ke mebpenimales is menge tig-Babilonia.
2KI 25:27 Hein ike-37 he tuig te kegkevihag ni Hadì Jehoyakin he hadì te Juda, nehimu he hadì diyà te Babilonia si Evil Merodac. Ne impeǥawas din diyà te pirisuwan si Jehoyakin hein ike-27 he andew te ike-12 he vulan dutun he tuig.
2KI 25:28 Mibpurungan din si Jehoyakin, ne impelavew zin si Jehoyakin te zuma he menge hadì he mibihag daan diyà te Babilonia.
2KI 25:29 Umbe, wazè en mebivisti si Jehoyakin te visti te pinirisu, ne puun dutun dumè en sikandin duen te hadì emun egkaan dan.
2KI 25:30 Ne kada andew ebeǥayan sikandin duen te hadì te menge kinahanglan din seled te tivuuk he untung din.
1CH 1:1 Iyan heini menge kevuwazan ni Adan: si Set, Enosh,
1CH 1:2 Kenan, Mahalalel, Jared,
1CH 1:3 Enoc, Metusela, Lamec, wey si Noe.
1CH 1:4 Iyan heini menge anak ni Noe he menge maama: si Shem, Ham, wey Jafet.
1CH 1:5 Iyan heini menge anak ni Jafet he menge maama: si Gomer, Magog, Madai, Javan, Tubal, Meshec, wey si Tiras.
1CH 1:6 Is menge kevuwazan ni Gomer ne iyan si Ashkenaz, Rifat, wey Togarma.
1CH 1:7 Is menge anak ni Javan ne iyan si Elisha, Tarshish, Kitim, wey si Rodanim.
1CH 1:8 Is menge anak ni Ham he menge maama: si Cush, Mizraim, Put, wey si Canaan.
1CH 1:9 Si Cush ne zuen din menge anak he iyan heini si Sheba, Havila, Sabta, Raama, wey si Sabteca. Ne iyan heini menge anak ni Raama, si Sheba wey si Dedan.
1CH 1:10 Duen pa sevaha he anak ni Cush he iyan ngazan din si Nimrod. Si Nimrod nehimu he gemhanan he etew kayi te kelibutan.
1CH 1:11 Si Mizraim, ne iyan kepuun te menge Ludhanen, menge Anamnen, menge Lihabnen, menge Naftanen,
1CH 1:12 menge Patrusnen, menge Caslunen, wey is menge Caftornen he iyan menge kepuun te menge Filistihanen.
1CH 1:13 Si Canaan iyan amey ni Sidon wey ni Het. Ne iyan kakey si Sidon.
1CH 1:14 Kepuun daan si Canaan te menge Jebusihanen, menge Amorihanen, menge Girgasihanen,
1CH 1:15 menge Hivihanen, menge Erekihanen, menge Sinihanen,
1CH 1:16 menge Arbedihanen, menge Simarihanen, wey menge Hamatihanen.
1CH 1:17 Is menge anak ni Shem he menge maama iyan si Elam, si Ashur, si Arfaxad, si Lud, wey si Aram. Is menge anak ni Aram iyan si Uz, si Hul, si Geter, wey si Meshec.
1CH 1:18 Ne si Arfaxad ne iyan amey ni Shela, ne si Shela ne iyan amey ni Eber.
1CH 1:19 Dezuwa is menge anak ni Eber. Is sevaha, ne migngezanan ki Peleg, he ke và dà egkeǥiya, “kebpekedsusuwey”, su zutun he timpu nekedsusuwey is menge etew zini te lumpad. Is hazi zin ne migngezanan ki Joktan.
1CH 1:20 Si Joktan ne iyan amey ni Almodad, Shelef, Hazarmavet, Jera,
1CH 1:21 Hadoram, Uzal, Dikla,
1CH 1:22 Obal, Abimael, Sheba,
1CH 1:23 Ofir, Havila, wey Jobab. Heini is langun, ne menge anak ni Joktan.
1CH 1:24 Iyan heini menge kevuwazan he ebpuun ki Shem: si Arfaxad, Shela,
1CH 1:25 Eber, Peleg, Reu,
1CH 1:26 Serug, Nahor, Tera,
1CH 1:27 wey si Abram (he iyan si Abraham).
1CH 1:28 Is menge anak ni Abraham ne si Isaac wey si Ishmael.
1CH 1:29 Is menge anak ni Ishmael ne iyan ensi Nebayot (is kinekekayan), Kedar, Adbeel, Mibsam,
1CH 1:30 Mishma, Duma, Masa, Hadad, Tema,
1CH 1:31 Jetur, Nafish, wey Kedema. Iyan heini menge anak ni Ishmael.
1CH 1:32 Is menge anak ni Ketura he menge maama te sevaha he esawa ni Abraham ne iyan si Zimran, Jokshan, Medan, Midian, Ishbak, wey Shua. Is menge anak ni Jokshan he menge maama si Sheba wey si Dedan.
1CH 1:33 Is menge anak ni Midian ne iyan si Efa, si Efer, si Hanoc, si Abida, wey si Eldaa. Iyan heini sikandan menge kevuwazan ni Ketura.
1CH 1:34 Si Abraham ne amey ni Isaac. Is menge anak ni Isaac ne si Esau wey si Israel.
1CH 1:35 Is menge anak ni Esau ne iyan si Elifas, Reuel, Jeush, Jalam, wey Kora.
1CH 1:36 Is menge anak ni Elifaz iyan si Teman, Omar, Zefo, Gatam, Kenaz, wey si Amalek. Heini si Amalek ne anak din diyà te ki Timna.
1CH 1:37 Is menge anak ni Reuel he menge maama ne iyan ensi Nahat, Zera, Shama, wey Miza.
1CH 1:38 Is menge anak he maama ni Seir ne iyan si Lotan, Shobal, Zibeon, Ana, Dishon, Ezer, wey Dishan.
1CH 1:39 Is menge anak ni Lotan iyan si Hori, wey si Homam. Telesuled si Lotan wey si Timna he sevaha zuen te menge asawa ni Elifaz.
1CH 1:40 Is menge anak ni Shobal iyan si Alvan, Manahat, Ebal, Shefo, wey si Onam. Is menge anak ni Zibeon iyan si Aya wey si Ana.
1CH 1:41 Is menge anak ni Ana iyan si Dishon. Is maama he menge anak ni Dishon iyan si Hemdan, Eshban, Itran, wey si Keran.
1CH 1:42 Is menge anak ni Ezer iyan si Bilhan, Zaavan, wey si Akan. Is menge anak ni Dishan iyan si Uz wey si Aran.
1CH 1:43 Iyan heini sikandan menge hadì diyà te Edom dutun te timpu he wazè pa menge hadì te menge Israilihanen: Si Bela he tig-Dinhaba he anak ni Beor.
1CH 1:44 Hein minatey sikandin, iyan mid-ilis kandin si Jobab he anak ni Zera te tig-Bozra.
1CH 1:45 Hein minatey si Jobab, iyan mid-ilis kandin si Husham he tig-Teman.
1CH 1:46 Ne hein minatey si Husham, iyan mid-ilis kandin si Hadad he tig-Avet he anak ni Bedad. Si Hadad iyan kes nekezaag te menge Midianhen diyà te Moab.
1CH 1:47 Hein minatey si Hadad, iyan mid-ilis kandin si Samla he tig-Masreka.
1CH 1:48 Hein minatey si Samla, iyan mid-ilis kandin si Shaul he tig-Rehobot he uvey te Wahig he Eufrates.
1CH 1:49 Hein minatey si Shaul, iyan mid-ilis kandin si Baal Hanan he anak ni Acbor.
1CH 1:50 Hein minatey si Baal Hanan, iyan mid-ilis kandin si Hadad he tig-Pai. Iyan esawa zin si Mehetabel he anak ni Matred wey apù ni Mezahab.
1CH 1:51 Ne hein neuǥet ne minatey si Hadad. Iyan heini sikandan menge pengulu te tribu te Edom: Timna, Alva, Jetet,
1CH 1:52 Oholibama, Ela, Pinon,
1CH 1:53 Kenaz, Teman, Mibzar
1CH 1:54 Magdiel, wey Iram.
1CH 2:1 Iyan heini sikandan menge anak ni Israel he menge maama: Reuben, Simeon, Levi, Juda, Isacar, Zebulun,
1CH 2:2 Dan, Jose, Benjamin, Naftali, Gad, wey Asher.
1CH 2:3 Duen tetelu he anak ni Juda he menge maama ziyà te esawa zin he si Batshua he Canaanhen. Si Er, Oran, wey si Shela. Si Er, ne iyan kinekekayan. Kenà meupiya is ulaula zin diyà te etuvangan te Nengazen, umbe midhimetayan sikandin te Nengazen.
1CH 2:4 Duen pa anak ni Juda he menge maama ziyà te ambey zin he si Tamar. He iyan si Perez wey si Zera. Lelima langun is anak ni Juda he menge maama.
1CH 2:5 Is menge maama he anak ni Perez ne iyan si Hezron wey si Hamul.
1CH 2:6 Is menge anak ni Zera he menge maama, ne iyan si Zimri, Etan, Heman, Calcol, wey Darda–lelima sikandan langun.
1CH 2:7 Is anak ni Carmi he maama ne si Acar. Iyan heini si Acar kes mid-uwit te kezeetan te Israel tenged te kegkuwaa zin duen te vutang ne imbeǥey en diyà te Megbevayà.
1CH 2:8 Is anak ni Etan he maama ne si Azaria.
1CH 2:9 Is menge anak ni Hezron he menge maama, ne iyan si Jerameel, Ram, wey Caleb.
1CH 2:10 Si Ram, ne amey ni Aminadab, ne si Aminadab, ne amey ni Nashon he pengulu te Juda.
1CH 2:11 Si Nashon, ne amey ni Salmon, ne si Salmon, ne amey ni Boaz.
1CH 2:12 Si Boaz, ne amey ni Obed, ne si Obed, ne amey ni Jesse.
1CH 2:13 Ne iyan kinekekayan he anak ni Jesse, si Eliab, is ikezuwa, iyan si Abinadab, is iketelu, iyan si Shimea,
1CH 2:14 is ikeepat, iyan si Natanel, is ikelima, iyan si Radai,
1CH 2:15 is ikeenem, iyan si Ozem, ne is ikepitu, iyan si David.
1CH 2:16 Ne iyan menge suled dan he menge vahi si Zeruya wey si Abigail. Si Zeruya ne zuen tetelu he anak din he menge maama he si Abishai, Joab, wey Asahel.
1CH 2:17 Ne iyan nekeesawa ki Abigail, si Jeter he Ismailihanen ne zuen dan anak he maama he si Amasa.
1CH 2:18 Si Caleb he anak ni Hezron, duen menge anak din diyà te esawa zin he si Azuba he egngezanan daan ki Jeriot. Ne iyan heini menge anak ni Jeriot: si Jesher, Shobab, wey Ardon.
1CH 2:19 Hein minatey si Azuba ne mid-esawa ni Caleb si Efrat ne mid-anak dan ne iyan si Hur.
1CH 2:20 Si Hur, ne amey ni Uri, ne si Uri, ne amey ni Bezalel.
1CH 2:21 Ne hein 60 en is penuiǥen ni Hezron, ne nengesawa sikandin te anak ni Makir, te suled ni Gilead he vahi. Duen dan anak he si Segub.
1CH 2:22 Si Segub amey ni Jair, he iyan midumala te 23 he inged diyà te Gilead.
1CH 2:23 (Piru mid-aǥew ni Geshur wey ni Aram haazà is menge inged ni Jair apil is Kenat, wey menge inged he nekelingut kayi. 60 langun he lugar.) Pudu heini menge kevuwazan ni Makir he amey ni Gilead.
1CH 2:24 Wazà meuǥet ne minatey si Hezron diyà te Caleb Efrata hein mid-anak is esawa zin he si Abia. Is anak dan ne si Ashur he amey ni Tekoa.
1CH 2:25 Si Jerameel, is penganey ni Hezron, lelima is menge anak din he maama. Si Ram is kinekekayan, is menge sunud, ne si Buna, si Oren, si Ozem, wey si Ahia.
1CH 2:26 Si Jerameel ne zuen sevaha pa he esawa zin he egngezanan ki Atara. Ne si Atara, iyan iney ni Onam.
1CH 2:27 Is menge anak ni Ram he menge maama te kinekekayan ni Jerameel, ne iyan si Maaz, Jamin, wey Eker.
1CH 2:28 Is menge anak ni Onam he menge maama iyan si Shamai wey si Jada. Ne is menge anak ni Shamai he menge maama ne si Nadab wey si Abishur.
1CH 2:29 Iyan ngazan te esawa ni Abishur si Abihail. Duen menge anak dan he menge maama he iyan si Aban wey si Molid.
1CH 2:30 Is menge anak ni Nadab he menge maama iyan si Seled wey si Apaim. Minatey si Seled he wazè en mekaanak.
1CH 2:31 Is anak ni Apaim he maama, ne iyan si Ishi. Si Ishi ne amey ni Sheshan, ne si Sheshan amey ni Alai.
1CH 2:32 Si Jada is suled ni Shamai, dezuwa is menge anak din he maama he iyan si Jeter wey si Jonatan. Minatey si Jeter he wazè en mekaanak.
1CH 2:33 Is menge anak ni Jonatan he menge maama, ne iyan si Pelet wey Zaza. Iyan heini sikandan menge kevuwazan ni Jerameel.
1CH 2:34 Si Sheshan, ne wazè din anak he menge maama; menge vahi zà. Duen suluǥuen din he Ehiptohanen he egngezanan ki Jarha.
1CH 2:35 Impeesawa ni Sheshan ki Jarha is sevaha te menge anak din he vahi, ne mid-anak sikandan te maama ne iyan ngazan din si Atai.
1CH 2:36 Si Atai ne amey ni Natan, si Natan amey ni Zabad,
1CH 2:37 ne si Zabad amey ni Eflal. Si Eflal amey ni Obed,
1CH 2:38 si Obed amey ni Jehu, ne si Jehu amey ni Azaria.
1CH 2:39 Si Azaria amey ni Helez, si Helez amey ni Eleasa,
1CH 2:40 ne si Eleasa amey ni Sismai. Si Sismai amey ni Shalum,
1CH 2:41 si Shalum amey ni Jekamia, ne si Jekamia amey ni Elishama.
1CH 2:42 Is kinekekayan he anak ni Caleb he maama te suled ni Jerameel, ne iyan si Mesha he amey ni Zif. Ne is ikezuwa he anak din, ne si Maresha he amey ni Hebron.
1CH 2:43 Is menge anak ni Hebron he menge maama, ne iyan si Kora, Tapua, Rekem, wey si Shema.
1CH 2:44 Si Shema amey ni Raham, ne si Raham amey ni Jorkeam. Si Rekem amey ni Shamai,
1CH 2:45 si Shamai amey ni Maon, ne si Maon amey ni Bet Zur.
1CH 2:46 Is sevaha pa he esawa ni Caleb ne iyan si Efa he iney ni Haran, Moza, wey Gazez. Si Haran, ne zuen din anak he egngezanan daan ki Gazez.
1CH 2:47 Is menge anak ni Jahdai he menge maama, ne iyan si Regem, Jotam, Geshan, Pelet, Efa, wey Shaaf.
1CH 2:48 Ne is sevaha pa maan he esawa ni Caleb, ne iyan si Maaca. Duen menge anak dan he menge maama he iyan si Sheber, Tirhana,
1CH 2:49 Shaaf (he amey ni Madmana), wey Sheva (he amey ni Macbena wey ni Gibea). Is anak ni Caleb he vahi ne iyan si Acsa.
1CH 2:50 Iyan heini sikandan menge kevuwazan ni Caleb. Iyan si Hur kinekekayan he anak ni Caleb wey ni Efrata. Is menge anak ni Hur he menge maama, ne iyan si Shobal he amey ni Kiriat Jearim,
1CH 2:51 si Salma he amey ni Betlehem, wey si Haref he amey ni Bet Gader.
1CH 2:52 Is menge kevuwazan ni Shobal he amey ni Kiriat Jearim he iyan menge meǥinged te Haroe, is ketengà te menge etew he ed-ubpà diyà te Menuhot,
1CH 2:53 wey is menge kezuzumahi ni Kiriat Jearim ne iyan is Itranen, Puthanen, Shumatnen, wey Mishranen. Iyan heini mibpuunan te menge Zoratnen, wey Eshtaulinen.
1CH 2:54 Is menge kevuwazan ni Salma, ne iyan is menge tig-Betlehem, is menge tig-Netofa, is menge tig-Atrot Bet Joab, is ketengà te Manahatnen, is menge Zurhanen,
1CH 2:55 wey menge pemilya te utew memetau he edsurat te menge dukumintu he ziyà ed-ubpà te inged he Jabez he iyan is menge Tiratnen, menge Simiyatnen, wey menge Sucatnen. Iyan heini sikandan menge Kinhanen he ebpuun ki Hammat, he iyan midtukud te Bet Recab.
1CH 3:1 Iyan heini menge anak ni David he neetew ziyà te Hebron: Is kinekekayan iyan si Amnon he anak din diyà te ki Ahinoam he tig-Jezreel. Is ikezuwa iyan si Daniel he anak din diyà te ki Abigail he tig-Carmel.
1CH 3:2 Is iketelu iyan si Absalom ne iyan iney zin si Maaca he anak ni Hadì Talmai he hadì te Geshur. Is ikeepat iyan si Adonia ne iyan iney zin si Hagit.
1CH 3:3 Is ikelima iyan si Shefatia ne iyan iney zin si Abital. Ne is ikeenem iyan si Itream ne iyan iney zin si Egla.
1CH 3:4 Heini sikandan is heenem ne ziyà ianak te Hebron, he zutun medhadì si David seled te pitu he tuig wey heenem he vulan. Midhadì si David diyà te Jerusalem seled te 33 he tuig.
1CH 3:5 Ne iyan heini menge anak din he neetew ziyà: si Shimea, Shobab, Natan, wey Solomon. Heini sikandan is heepat ne anak din diyà te ki Batsheba he anak ni Amiel.
1CH 3:6 Duen pa siyam he menge anak din he iyan si Ibhar, Elishua, Elifelet,
1CH 3:7 Noga, Nefeg, Jafia,
1CH 3:8 Elishama, Eliada, wey Elifelet.
1CH 3:9 Iyan heini sikandan menge anak ni David he menge maama, gawas te zuma pa he menge anak din diyà te zuma pa he menge esawa zin. Duen daan anak ni David he vahi he si Tamar.
1CH 3:10 Iyan heini menge kevuwazan ni Solomon he nehimu he hadì: Rehoboam, Abia, Asa, Jehoshafat,
1CH 3:11 Jehoram, Ahazia, Joash,
1CH 3:12 Amazia, Azaria, Jotam,
1CH 3:13 Ahaz, Hezekia, Manase,
1CH 3:14 Amon, wey Josia.
1CH 3:15 Iyan heini sikandan menge anak ni Josia: is kinekekayan si Johanan, is ikezuwa si Jehoyakim, is iketulu si Zedekia, ne is ikeepat si Shalum.
1CH 3:16 Is nekeilis ki Jehoyakim he hadì ne si Jehoyakin he anak din. Ne is nekeilis ki Jehoyakin ne si Zedekia he anggam din.
1CH 3:17 Iyan heini menge anak ni Jehoyakin he menge maama, te hadì he nevihag pehendiyà te Babilonia: si Shealtiel,
1CH 3:18 Malkiram, Pedaya, Shenazar, Jekamia, Hoshama, wey si Nedabia.
1CH 3:19 Is menge anak ni Pedaya he menge maama iyan si Zerubabel wey si Shimei. Is menge anak ni Zerubabel he menge maama iyan si Meshulam wey si Hanania. Ne is etevey zan ne iyan si Shelomit.
1CH 3:20 Duen pa lelima he menge anak ni Zerubabel he menge maama he iyan si Hashuba, Ohel, Berekia, Hasadia, wey si Jushab Hesed.
1CH 3:21 Is menge anak ni Hanania he menge maama, ne iyan si Pelatia wey Jeshaya. Si Jeshaya ne amey ni Refaya, si Refaya ne amey ni Arnan, si Arnan ne amey ni Obadias, ne si Obadias amey ni Shecania.
1CH 3:22 Ne is menge kevuwazan ni Shecania ne iyan si Shemaya ne is menge anak ni Shemaya ne si Hatush, Igal, Baria, Nearia, wey si Shafat–heenem dan langun.
1CH 3:23 Is menge anak ni Nearia he menge maama, ne iyan si Elionai, Hizkia, wey Azrikam–tetelu zan langun.
1CH 3:24 Is menge anak ni Elionai he menge maama, ne iyan si Hodavia, Eliashib, Pelaya, Akub, Johanan, Delaya, wey si Anani–pitu zan langun.
1CH 4:1 Iyan heini zuma pa he menge kevuwazan ni Juda: si Perez, Hezron, Carmi, Hur, wey si Shobal.
1CH 4:2 Is anak ni Shobal he si Reaya iyan amey ni Jahat. Si Jahat iyan amey ni Ahumai wey ni Lahad. Iyan heini sikandan menge pemilya te menge Zoratnen.
1CH 4:3 Iyan heini menge anak ni Etam: si Jezreel, Ishma, wey Idbash. Is ngazan te suled dan he vahi ne si Hazelelponi.
1CH 4:4 Si Penuel is amey ni Gedor, ne si Ezer is amey ni Hasha. Iyan heini sikandan menge kevuwazan ni Hur, he kinekekayan he anak ni Efrata. Si Hur ne iyan kepuun te menge tig-Betlehem.
1CH 4:5 Si Ashur he amey ni Tekoa, dezuwa is esawa zin, si Hela wey si Naara.
1CH 4:6 Iyan heini sikandan menge anak ni Naara wey Ashur he menge maama: Ahuzam, Hefer, Temeni, wey Haahashtari.
1CH 4:7 Ne is menge anak mulà ni Hela wey Ashur ne iyan si Zeret, Izhar, Etnan,
1CH 4:8 wey Koz. Heini si Koz ne iyan amey ni Ahub wey Hazobeba, ne kepuun sikandin te pemilya ni Aharhel he anak ni Harum.
1CH 4:9 Duen sevaha he etew he iyan ngazan din si Jabez. Nevantug sikandin kenà is menge suled din he menge maama. Migngezanan sikandin te iney zin te Jabez su egkaǥi is iney zin te, “Utew a midreǥeni te ked-enaka ku kandin.”
1CH 4:10 Mid-ampù si Jabez diyà te Megbevayà te Israel, “Deyzey pezem ke tuvazi a kenikew ne mebmeluag pa is tanè ku. Dumahi a kenikew wey ilikey a te menge ebpekezezaat su wey a kenà mesekiti.” Ne midtavak te Megbevayà is hangyù din.
1CH 4:11 Si Kelub he suled ni Shuha, ne amey ni Mehir. Si Mehir ne amey ni Eshton, ne
1CH 4:12 si Eshton ne amey sikandin ni Bet Rafa, Pasea, wey ni Tehina. Si Tehina ne amey ni Irnahash. Iyan heini sikandan menge tig-Reca.
1CH 4:13 Is menge anak ni Kenaz he menge maama, ne iyan si Otniel wey si Seraya. Ne is menge anak ni Otniel he menge maama, ne si Hatat wey si Meonotai.
1CH 4:14 Si Meonotai ne amey ni Ofra, Si Seraya ne amey ni Joab, he iyan midtukud te lugar he Suǥud-suǥud te menge Pandey. Migngezanan heini he Suǥud-suǥud te menge Pandey su zutun med-ubpà is mahabet he menge pandey.
1CH 4:15 Iyan heini menge anak ni Caleb he menge maama he anak ni Jefune: si Iru, Ela, wey si Naam. Is anak ni Ela he maama ne iyan si Kenaz.
1CH 4:16 Is menge anak ni Jehalelel he menge maama, ne iyan si Zif, Zifa, Tiria, wey si Asarel.
1CH 4:17 Is menge anak ni Ezrah he menge maama, ne iyan si Jeter, Mered, Efer, wey Jalon. Si Mered ne zuen din esawa he si Bitia he anak te hadì te Ehipto. Duen dan menge anak he iyan si Miriam, Shamai, wey Ishba. Si Ishba ne amey ni Eshtemoa. Duen daan esawa ni Mered he tig-Juda ne iyan anak dan si Jered (he amey ni Gedor), Heber (he amey ni Soco), wey Jekutiel (he amey ni Zanoa).
1CH 4:19 Nengesawa si Hodia te suled ni Naham. Is sevaha he anak dan ne iyan is amey ni Keila he Garminhanen, wey is sevaha, ne iyan is amey ni Eshtemoa he Maakatnen.
1CH 4:20 Is menge anak ni Shimon he menge maama, ne iyan si Amnon, Rina, Ben Hanan, wey si Tilon. Ne is menge kevuwazan ni Ishi ne iyan si Zohet wey si Ben Zohet.
1CH 4:21 Iyan heini menge kevuwazan ni Shela he anak ni Juda: si Er (he amey ni Leca), si Laada (he amey ni Maresha), wey menge pemilya te menge tighavel te linu ziyà te Bet Ashbea.
1CH 4:22 Menge kevuwazan daan ni Shela si Jokim, is menge etew ziyà te Cozeba, si Joash, wey si Saraf he midumala zin is Moab wey Jashubi Lehem. (Heini he listahan ebpuun diyà te dukumintu he neuǥet en.)
1CH 4:23 Iyan sikandan kes menge mendiziyun he ziyà ed-ubpà te Netaim wey Gedera. Midterebahu zan para te hadì.
1CH 4:24 Is menge anak ni Simeon he menge maama, ne iyan si Nemuel, Jamin, Jarib, Zera, wey si Shaul.
1CH 4:25 Si Shaul ne amey ni Shalum, ne si Shalum ne amey ni Mibsam, ne si Mibsam ne amey ni Mishma.
1CH 4:26 Ne si Mishma ne amey ni Hamuel, ne si Hamuel ne amey ni Zacur, ne si Zacur ne amey ni Shimei.
1CH 4:27 Duen 16 he anak ni Shimei he menge maama ne heenem is menge anak din he vahi. Piru is menge suled din, ne zeisey zà is menge anak dan, umbe is tivuuk he tribu zan, ne wazà mekerepeng te kezakel te menge etew ziyà te Juda.
1CH 4:28 Diyè dan med-ubpà te Beersheba, Molada, Hazar Shual,
1CH 4:29 Bilha, Ezem, Tolad,
1CH 4:30 Betuel, Horma, Ziklag,
1CH 4:31 Bet Marcabot, Hazar Susim, Bet Biri, wey ziyà te Shaaraim. Iyan heini menge inged dan taman te kedhadì ni David.
1CH 4:32 Nekeubpè dan daan te lelima he inged: diyà te Etam, Ain, Rimon, Token, wey Ashan,
1CH 4:33 wey minsan diyà daan te menge nekelingut kandan he menge lugar taman te Baalat. Iyan heini menge lugar he menge ubpaan dan, ne intapid dan kes insurat he guǥud te kegkevuwad dan. Iyan heini duma pa he menge kevuwazan ni Simeon:
1CH 4:34 si Meshobab, Jamlec, Josha (he anak ni Amazia),
1CH 4:35 Joel, Jehu (he anak ni Joshibia wey apù ni Seraya, wey apù ni Asiel te vuel),
1CH 4:36 Elioenai, Jaakoba, Jeshohaya, Asaya, Adiel, Jesimiel, Benaya,
1CH 4:37 wey si Ziza (he anak ni Shifi wey apù ni Alon, wey apù ni Jedaya te vuel. Heini si Jedaya ne anak ni Simri wey apù ni Shemaya).
1CH 4:38 Iyan heini sikandan, menge pengulu te pemilya zan. Utew mibmahabet is menge pemilya zan.
1CH 4:39 Umbe nekeume en sikandan diyà te uvey te inged he Gedor, ne ziyè dan te suǥud-suǥud he zapit te edsilaan. Ebpemen-ehè dan dutun te egkepenebtavan te menge kerehidu zan,
1CH 4:40 ne neketuredu zan te utew merapung wey meupiya he ebpepenebtavan. Meluag heini wey melinew he lugar. Dutun dengan med-ubpà is menge kevuwazan ni Ham.
1CH 4:41 Ne hein timpu pa he iyan hadì te Juda si Hezekia, is menge kevuwazan ni Simeon he nekaǥi en is menge ngazan dan, midsurung dan is menge kevuwazan ni Ham wey midsurung dan daan is menge Meunhanen he zutun daan med-ubpà, ne mibpenhimetayan dan is langun. Ne iyan dan dutun mid-ubpà taman guntaan, su zutun is pepenebtavè dan te menge kerehidu zan.
1CH 4:42 Is 500 kandan ne iyan midsurung diyà te menge vuvungan te Seir. Iyan egalen dan si Pelatia, Nearia, Refaya, wey si Uziel he menge anak ni Ishi.
1CH 4:43 Mibpenhimetayan dan dutun is nesamà he menge Amalikanhen, ne zutun dan en med-ubpà taman en guntaan.
1CH 5:1 Si Reuben ne iyan kinekekayan he anak ni Israel, ne tenged te mibeelan din he nekidhulid te sevaha zuen te menge esawa te amey zin, ne mid-ewaan sikandin te ketenged din te kegkekakey ne ziyà iveǥey te menge anak te suled din he si Jose. Umbe wazà ilista is kegkekakey zin diyà te listahan te kegkevuwad dan.
1CH 5:2 Ne si Juda, minsan te edhuna sikandin he gemhanan kenà te menge suled din, wey ebpuun te tribu zin is menge pengulu ne in-awà diyà te kandin is ketenged te kegkekakey zin ne ziyà iveǥey te ki Jose.
1CH 5:3 Iyan heini menge anak ni Reuben he kinekekayan ni Israel: si Hanoc, Palu, Hezron, wey si Carmi.
1CH 5:4 Iyan heini menge kevuwazan ni Joel: si Shemaya, Gog, Shimei,
1CH 5:5 Micas, Reaya, Baal,
1CH 5:6 wey si Beera. Iyan si Beera kes pengulu te menge kevuwazan ni Reuben hein nevihag sikandan ni Hadì Tiglat Piliser he hadì te Asiria.
1CH 5:7 Iyan heini menge kezuzumahi ni Beera he nelista zutun te listahan te menge kevuwazan te kandan he tribu: si Jiel (he pengulu), si Zecarias,
1CH 5:8 wey si Bela he anak ni Azaz. Heini si Azaz ne anak ni Shema, ne apù ni Joel. Heini is menge kevuwazan ni Reuben, ne ziyè dan med-ubpà te lugar he ebpuun te Aroer pehendiyà te Nebo wey Baal Meon.
1CH 5:9 Ne tenged te utew en mibmezakel is menge uyaǥen dan diyà te Gilead ne neeneb dan en is dapit te edsilaan he kilid en te disirtu pehendiyà te Wahig he Eufrates.
1CH 5:10 Hein si Saul pa is hadì, ne nekidtebek is menge kevuwazan ni Reuben te menge Hagarnen ne nezaag dan sikandan. Ne nekuwa zan is tivuuk he egkengeubpaan dutun te Hagarnen he tivuuk he zapit te edsilaan te Gilead.
1CH 5:11 Ne ziyà te tanà te Bashan, diyà te zizaya te ed-ubpaan eni Reuben, iyan kes tanà eni Gad taman te Saleca.
1CH 5:12 Iyan heini menge kevuwazan ni Gad: si Joel, he iyan pengulu te lavew he pemilya kandan; ne is sunud kandin ne iyan si Shafam, ne human si Janai wey si Shafat.
1CH 5:13 Ne is menge kezuzumahi zan diyà te kada pemilya ne iyan si Micael, Meshulam, Sheba, Jorai, Jacan, Zia, wey si Eber–pitu zan langun.
1CH 5:14 Iyan heini sikandan menge kevuwazan ni Abihail he anak ni Huri. Heini si Huri ne anak ni Jaroa ne apù ni Gilead, wey apù ni Micael te vuel. Heini si Micael ne anak ni Jeshishai ne apù ni Jado wey apù ni Buz te vuel.
1CH 5:15 Ne si Ahi he anak ni Abdiel wey apù ni Guni, ne iyan pengulu te menge pemilya zan.
1CH 5:16 Diyà med-ubpà sikandan te Gilead diyà te Bashan wey ziyà te nekelingut kayi he menge lugar, wey te tivuuk he penebtavà te Sharon.
1CH 5:17 Iyan heini sikandan langun naapil te listahan te menge kevuwazan dutun te timpu he iyan hadì si Jotam te Juda, wey si Jeroboam te Israel.
1CH 5:18 Duen menge 44,760 he menge sundaru te tribu ni Reuben, Gad wey ketengà he tribu ni Manase. Mibansey sikandan para te kebpekidtebek wey metau sikandan he egamit te kelasag, ispada, wey panà.
1CH 5:19 Nekidtebek dan te Hagarnen, Jeturnen, Nafisnen, wey Nudabnen.
1CH 5:20 Ne mibuyù dan te tavang te Megbevayà hein ebpekidtebek dan en, ne midtavak te Megbevayà is ked-ampù dan tenged te midsarig sikandan kandin. Umbe impezaag kandan te Megbevayà is menge Hagarnen wey is langun he mid-uǥup kayi.
1CH 5:21 Mibpenguwa zan is menge uyaǥen te menge Hagarnen: 50,000 he menge kemilyu, 250,000 he menge kerehidu, wey 2,000 he menge asnu. Nevihag dan daan is 100,000 he menge etew,
1CH 5:22 wey mezakel pa is mibpenhimetayan dan tenged te mid-uǥupan sikandan te Megbevayà te kebpekidtebek. Ne kayi zan en med-ubpà he lugar taman te nevihag sikandan.
1CH 5:23 Mezakel is ketengà he tribu ni Manase. Is neubpaan dan puun te Bashan pehendiyà te Baal Hermon, Senir, wey Buntud te Hermon.
1CH 5:24 Iyan heini menge pengulu te menge pemilya zan: si Efer, Ishi, Eliel, Azriel, Jeremias, Hodavia, wey si Jadiel. Menge metau sikandan te kebpekidtebek wey nevantug sikandan he menge pengulu te menge pemilya zan.
1CH 5:25 Piru kenà sikandan menge mepezumdumahan te Megbevayà te menge kepuun dan su ed-ezapen dan is menge kenà tutuu he Megbevayà he ed-ezapen te menge etew he mibpenhimetayan te Megbevayà dutun he lugar.
1CH 5:26 Umbe, ketau te Megbevayà te Israel he surunga sikandan ni Hadì Pul he hadì te Asiria (he iyan si Tiglat Piliser). Nevihag ni Pul is menge tribu ni Reuben, Gad, wey ketengà he tribu ni Manase ne ziyè din uwita te Hala, Habor, Hara, wey ziyà te Wahig te Gozan, ne zutun sikandan taman guntaan.
1CH 6:1 Iyan heini menge anak ni Levi he menge maama: Si Gershon, Kohat, wey si Merari.
1CH 6:2 Is menge anak ni Kohat ne iyan si Amram, Izhar, Hebron, wey si Uziel.
1CH 6:3 Is menge anak ni Amram iyan si Aaron, Moises, wey si Miriam. Is menge anak ni Aaron ne iyan si Nadab, Abihu, Eleazar, wey si Itamar.
1CH 6:4 Si Eleazar ne amey ni Finehas, si Finehas ne amey ni Abishua,
1CH 6:5 ne si Abishua ne amey ni Buki. Si Buki ne amey ni Uzi,
1CH 6:6 ne si Uzi ne amey ni Zerahia. Ne si Zerahia ne amey ni Merayot.
1CH 6:7 Si Merayot ne amey ni Amaria, si Amaria ne amey ni Ahitub,
1CH 6:8 ne si Ahitub ne amey ni Zadok. Si Zadok ne amey ni Ahimaaz.
1CH 6:9 Si Ahimaaz ne amey ni Azaria, ne si Azaria ne amey ni Johanan.
1CH 6:10 Si Johanan ne amey ni Azaria he iyan lavew he memumuhat diyà te valey te Nengazen he midtukud ni Solomon diyà te Jerusalem.
1CH 6:11 Si Azaria ne amey ni Amaria. Ne si Amaria ne amey ni Ahitub,
1CH 6:12 ne si Ahitub amey ni Zadok. Si Zadok ne amey ni Shalum,
1CH 6:13 si Shalum, ne amey ni Hilkia, ne si Hilkia ne amey ni Azaria.
1CH 6:14 Si Azaria, ne amey ni Seraya, ne si Seraya, ne amey ni Jehozadak.
1CH 6:15 Heini si Jehozadak ne zuma sikandin te menge vihag hein impalad te Nengazen is keet-etawan te Juda wey Jerusalem diyà te ki Nebucadnezar.
1CH 6:16 Is menge anak ni Levi he menge maama iyan ensi Gershon, Kohat, wey si Merari.
1CH 6:17 Ne is menge anak ni Gershon ne iyan si Libni wey si Shimei.
1CH 6:18 Ne is menge anak ni Kohat ne iyan si Amram, Izhar, Hebron, wey Uziel.
1CH 6:19 Ne is menge anak ni Merari he menge maama ne si Mali wey si Mushi. Iyan heini menge pemilya te menge Levihanen he imbasi is kedlistaha zuen diyà te kada sengeepuan:
1CH 6:20 Diyà te menge kevuwazan ni Gershon: si Libni, Jahat, Zima,
1CH 6:21 Joa, Iddo, Zera, wey si Jeaterai.
1CH 6:22 Is menge kevuwazan ni Kohat: si Aminadab, Kora, Asir,
1CH 6:23 Elkana, Ebiasaf, Asir,
1CH 6:24 Tahat, Uriel, Uzia, wey si Shaul.
1CH 6:25 Is menge kevuwazan ni Elkana: si Amasai, Ahimot,
1CH 6:26 Elkana, Zofai, Nahat,
1CH 6:27 Eliab, Jehoram, Elkana, wey si Samuel.
1CH 6:28 Is menge anak ni Samuel ne iyan si Joel, is penganey, ne is ikezuwa ne si Abia.
1CH 6:29 Is menge kevuwazan ni Merari: si Mali, Libni, Shimei, Uza,
1CH 6:30 Shimea, Haggia, wey si Asaya.
1CH 6:31 Duen menge etew he insarig kandan ni David is kegkanta wey kedtukar ziyà te valey te Nengazen hein ingkepelastar en dutun sikan is Kavan te Kebpekid-uyun.
1CH 6:32 Nenilbi sikandan pinaaǥi te kegkanta zan dutun te Tulda he Ed-ezapan (egngezanan daan he Tulda he Edtelevukaayan), taman te ingkepehitindeg ni Solomon is baley te Nengazen diyà te Jerusalem. Mibeelan dan is menge vaal he ebpeveelan kandan he sungkad te menge sulunuzen he ibpetuman kandan.
1CH 6:33 Iyan heini sikandan ebpenilbi zuma is menge anak dan: Is kevuwazan ni Kohat, ne si Heman he musikiru. Si Heman ne anak ni Joel. Si Joel ne anak ni Samuel. Si Samuel ne anak ni Elkana.
1CH 6:34 Si Elkana ne anak ni Jehoram. Si Jehoram ne anak ni Eliel. Si Eliel ne anak ni Toa.
1CH 6:35 Si Toa ne anak ni Zuf. Si Zuf ne anak ni Elkana. Si Elkana ne anak ni Mahat. Si Mahat ne anak ni Amasia.
1CH 6:36 Si Amasia ne anak ni Elkana. Si Elkana ne anak ni Joel. Si Joel ne anak ni Azaria. Si Azaria ne anak ni Zefanias.
1CH 6:37 Si Zefanias ne anak ni Tahat. Si Tahat ne anak ni Asir. Si Asir ne anak ni Ebiasaf. Si Ebiasaf ne anak ni Kora.
1CH 6:38 Si Kora ne anak ni Izhar. Si Izhar ne anak ni Kohat. Si Kohat ne anak ni Levi. Si Levi ne anak ni Israel.
1CH 6:39 Is kevuwazan ni Gershon he si Asaf, ne iyan nehuna he mid-uǥup ki Heman. Si Asaf ne anak ni Berekia. Si Berekia ne anak ni Shimea.
1CH 6:40 Ne si Shimea ne anak ni Micael. Si Micael ne anak ni Baasea. Si Baasea ne anak ni Malkia.
1CH 6:41 Si Malkia ne anak ni Etni. Si Etni ne anak ni Zera. Si Zera ne anak ni Adaya.
1CH 6:42 Si Adaya ne anak ni Etan. Si Etan ne anak ni Zimna. Si Zimna ne anak ni Shimei.
1CH 6:43 Si Shimei ne anak ni Jahat. Si Jahat ne anak ni Gershon. Si Gershon ne anak ni Levi.
1CH 6:44 Is kevuwazan ni Merari he si Etan, he ikezuwa he mid-uǥup ki Heman. Si Etan ne anak ni Kishi. Si Kishi ne anak ni Abdi. Si Abdi ne anak ni Maluc.
1CH 6:45 Si Maluc ne anak ni Hashabia. Si Hashabia ne anak ni Amazia. Si Amazia ne anak ni Hilkia.
1CH 6:46 Ne si Hilkia ne anak ni Amzi. Si Amzi ne anak ni Bani. Si Bani ne anak ni Shemer.
1CH 6:47 Si Shemer ne anak ni Mali. Si Mali ne anak ni Mushi. Si Mushi ne anak ni Merari. Ne si Merari ne anak ni Levi.
1CH 6:48 Is menge iring dan he menge Levihanen, ne mibeǥayan te zuma he menge vuluhaten dutun te Tulda he Edtelevukaayan, he valey te Megbevayà.
1CH 6:49 Piru iyan dà si Aaron wey is menge kevuwazan din midhimu he menge memumuhat. Iyan sikandan ebpemuhat diyà te pemuhatà te edtutungen wey ziyà te pemuhatà he edtutungan te veyewà. Ne iyan daan sikandan ebaal te zuma he menge vuluhaten he egkelavet sikan is Utew Segradu he Lugar. Ebpemuhat dan su wey mevelukasi is menge Israilihanen puun te menge salè dan. Ebeelan dan heini sumalà te langun he insuǥù ni Moises he suluǥuen te Megbevayà.
1CH 6:50 Iyan heini menge kevuwazan ni Aaron: si Eleazar, Finehas, Abishua,
1CH 6:51 Buki, Uzi, Zerahia,
1CH 6:52 Merayot, Amaria, Ahitub,
1CH 6:53 Zadok, wey Ahimaaz.
1CH 6:54 Is menge kevuwazan ni Aaron he ebpuun te pemilya ni Kohat, iyan sikandan nehuna he neveǥayan te tanà pinaaǥi te ripa. Iyan heini menge lugar he imbeǥey kandan:
1CH 6:55 Apil en kayi he menge lugar is Hebron diyà te Juda wey is menge penebtavà he nekelingut kayi.
1CH 6:56 Piru is menge vevesukà wey is lugar he nekelingut te Hebron, ne imbeǥey ki Caleb he anak ni Jefune.
1CH 6:57 Imbeǥey ziyà te menge kevuwazan ni Aaron is sunud dutun he menge lugar apil en is menge penebtavà kayi: Hebron, (is eputà he inged), Libna, Jatir, Eshtemoa, Hilen, Debir, Ashan, Juta, wey Bet Shemesh.
1CH 6:60 Imbeǥey zaan kandan puun te tanà he ǥaked te tribu ni Benjamin is menge inged he Gibeon, Geba, Alemet, wey Anatot, apil en is menge penebtavà kayi. Ne 13 langun is inged he imbeǥey kayi he menge kevuwazan ni Kohat.
1CH 6:61 Ne is nesamà he menge kevuwazan ni Kohat ne mibeǥayan te sepulù he inged he ebpuun te menge tanà te ketengà he tribu ni Manase pinaaǥi te ripa.
1CH 6:62 Is menge kevuwazan ni Gershon, sumalà te kada pemilya, ne mibeǥayan te 13 he inged he menge inged te menge tribu ni Isacar, ni Asher, ni Naftali, wey te ketengà he tribu ni Manase diyà te Bashan.
1CH 6:63 Is menge kevuwazan ni Merari, sumalà te kada pemilya, mibeǥayan te 12 he inged he menge inged te menge tribu ni Reuben, ni Gad, wey ni Zebulun.
1CH 6:64 Imbeǥey te menge Israilihanen heini he menge inged wey is menge penebtavà kayi diyà te menge kevuwazan ni Levi.
1CH 6:65 Imbeǥey kandan pinaaǥi te ripa heini is nekaǥi kayi he menge inged he menge inged te tribu ni Juda, Simeon, wey Benjamin.
1CH 6:66 Is duma he menge kevuwazan ni Kohat, ne mibeǥayan daan te menge inged te tribu ni Efraim.
1CH 6:67 Imbeǥey kandan is Sekem (kes eputà he inged diyà te vuvungan te Efraim), is Gezer,
1CH 6:68 is Jokmeam, is Bet Horon
1CH 6:69 is Ayalon, wey is Gat Rimon, apil en is menge penebtavà kayi.
1CH 6:70 Ne is duma pa he menge kevuwazan ni Kohat, ne mibeǥayan sikandan te zuma zan he menge Israilihanen te menge inged diyà te tanà te ketengà he tribu ni Manase. Is imbeǥey kandan ne iyan is Aner wey is Beleam apil is menge penebtavà kayi.
1CH 6:71 Is menge kevuwazan ni Gershon, ne mibeǥayan te menge inged diyà te tanà te ketengà he tribu ni Manase he iyan is: Golan diyà te Bashan wey is Ashtarot, apil en is menge penebtavà kayi.
1CH 6:72 Is menge tanà te tribu ni Isacar he imbeǥey kandan iyan is: Kedesh, Daberat,
1CH 6:73 Ramot, wey Anem, apil kayi is menge penebtavà kayi.
1CH 6:74 Is menge inged te tribu ni Asher he imbeǥey kandan iyan is: Mashal, Abdon,
1CH 6:75 Hukok, wey Rehob, apil is menge penebtavà kayi.
1CH 6:76 Is menge inged te tribu ni Naftali he imbeǥey kandan iyan is: Kedesh diyà te Galilea, Hamon, wey Kiriataim, apil is menge penebtavà kayi.
1CH 6:77 Is nesamà he menge kevuwazan ni Merari mibeǥayan kayi he menge tanà: Is menge inged te tribu ni Zebulun he imbeǥey kandan iyan is: Jokneam, Karta, Rimono wey Tabor, apil is menge penebtavà kayi.
1CH 6:78 Is menge inged te tribu ni Reuben he ziyà layun te Wahig he Jordan he zapit te edsilaan te Jerico he imbeǥey kandan, iyan is: Bezer he ziyà te disirtu, Jaza,
1CH 6:79 Kedemot, wey Mefaat, apil is menge penebtavà kayi.
1CH 6:80 Ne is menge inged te tribu ni Gad he imbeǥey kandan iyan is: Ramot diyà te Gilead, Mahanaim,
1CH 6:81 Heshbon, wey Jazer, apil is menge penebtavà kayi.
1CH 7:1 Si Isacar, ne zuen anak din he heepat he menge maama: si Tola, si Pua, si Jashub, wey si Shimron.
1CH 7:2 Ne is menge anak ni Tola, ne iyan si Uzi, Refaya, Jeriel, Jamai, Ibsam, wey si Shemuel. Heini sikandan ne iyan menge pengulu te menge pemilya zan. Ne hein iyan hadì si David, ne is kezakel te menge maama he ebpuun te menge kevuwazan ni Tola he memahagtì he menge sundaru ne 22,600.
1CH 7:3 Is anak ni Uzi he maama, ne iyan si Izrahia. Si Izrahia wey kes heepat he menge anak din, ne iyan si Micael, Obadias, Joel, wey si Ishia ne menge pengulu te menge pemilya zan.
1CH 7:4 Mezakel is menge esawa zan wey menge anak dan, umbe sumalà te listahan te menge kevuwazan dan ne zuen kandan 36,000 he menge maama he andam he ebpenilbi pinaaǥi te kegkesundaru.
1CH 7:5 Is kezakel te menge maama he ebpuun te kevuwazan ni Isacar he memahagtì he menge sundaru, ne 87,000 sumalà is diyà te listahan te menge kevuwazan dan.
1CH 7:6 Si Benjamin, ne zuen anak din he tetelu he menge maama: si Bela, si Beker, wey si Jediel.
1CH 7:7 Si Bela, ne zuen anak din he lelima he menge maama: si Ezbon, si Uzi, si Uziel, si Jerimot, wey si Iri. Menge pengulu heini sikandan te menge pemilya zan. Ne is kezakel te memahagtì he menge sundaru zan, 22,034, sumalà is diyà te listahan te menge kevuwazan dan.
1CH 7:8 Is menge anak ni Beker ne si Zemira, Joash, Eliezer, Elioenai, Omri, Jeremot, Abia, Anatot, wey si Alemet. Iyan heini sikandan menge anak ni Beker.
1CH 7:9 Ne is kezakel te memahagtì he menge sundaru zan, 20,200. Heini sikandan wey is menge pengulu te menge pemilya zan ne nelista ziyà te listahan te kevuwazan dan.
1CH 7:10 Is anak ni Jediel ne si Bilhan. Ne is menge anak ni Bilhan, ne iyan si Jeush, Benjamin, Ehud, Kenaana, Zetan, Tarshish, wey si Ahishahar.
1CH 7:11 Heini sikandan ne menge pengulu te menge pemilya zan. Ne 17,200 is memahagtì kandan he andam he ebpesundaru.
1CH 7:12 Is menge anak ni Ir ne iyan si Shupim wey si Hupim, ne is anak ni Aher ne iyan si Hushim.
1CH 7:13 Is menge anak ni Naftali he menge maama, ne iyan si Jaziel, Guni, Jezer, wey si Shilem. Menge kevuwazan sikandan ni Bilha is iney ni Naftali.
1CH 7:14 Duen dezuwa he anak ni Manase ziyà te esawa zin he Aramihanen, he si Asriel wey si Makir. Si Makir ne amey ni Gilead
1CH 7:15 ne si Makir nen-ahà te ibpeesawa ki Hupim wey ki Shupim. Duen etevey ni Makir he egngezanan ki Maaca. Is sevaha pa he anak ni Makir iyan si Zelofehad he pudu vahi is menge anak din.
1CH 7:16 Duen daan anak ni Makir he menge maama ziyà te ki Maaca he egngezanan ki Peresh wey ki Sheresh. Is menge anak ni Peresh he menge maama iyan ensi Ulam wey Rakem.
1CH 7:17 Is anak ni Ulam he maama iyan si Bedan. Iyan heini sikandan menge kevuwazan ni Gilead he anak ni Makir, he apù ni Manase.
1CH 7:18 Is etevey ni Gilead he si Hamoleket duen menge anak din he menge maama he iyan si Ishhod, Abiezer, wey si Mala.
1CH 7:19 Ne is menge anak ni Shemida he menge maama ne si Ahian, Shekem, Likhi wey si Aniam.
1CH 7:20 Iyan heini menge kevuwazan ni Efraim: si Shutela, Bered, Tahat, Eleada,
1CH 7:21 Zabad, wey si Shutela. Is menge anak ni Efraim he si Ezer wey si Elead, midhimetayan sikandan te menge meǥinged diyà te Gat, su ebpenakew zan te menge uyaǥen.
1CH 7:22 Neuǥet is kedlalew ni Efraim te kemetayen dan, ne midhendiyà is menge kezuzumahi zin su edlenganen dan sikandin.
1CH 7:23 Ne liwas dutun, mid-uvayan ni Efraim is esawa zin ne mibmeǥingey ne mid-anak te maama. Ne migngezanan ni Efraim haazà is batà te Beria, tenged te utew mesakit he neulaula zutun te kandan he pemilya.
1CH 7:24 Duen anak ni Efraim he vahi he si Sheera. Heini sikandin ne iyan midtukud te mevavà wey metikang he lugar te Bet Horon wey te Uzen Sheera.
1CH 7:25 Duen pa menge kevuwazan ni Efraim he si Reshef, Tela, Tahan,
1CH 7:26 Ladan, Amihud, Elishama,
1CH 7:27 Nun, wey si Josue.
1CH 7:28 Is menge tanà he nekuwa wey ed-ubpaan te menge kevuwazan ni Efraim, ne iyan is Betel wey is nekeliǥuy kayi he menge lugar, is Naaran he zapit te edsilaan wey is Gezer he zapit te edsenlepan wey is menge lugar he nekeliǥuy kayi, is Sekem wey menge lugar he nekelingut kayi pehendiyà te Aya wey te menge sakup kayi he lugar.
1CH 7:29 Is menge kevuwazan ni Manase iyan nekeǥaked te menge lugar te Bet Shan, Taanac, Megido, wey Dor, wey apil is menge lugar he nekelingut kayi. Iyan haazà menge inged he mid-ubpaan te menge kevuwazan ni Jose he anak ni Israel.
1CH 7:30 Is menge anak ni Asher he menge maama, ne iyan si Imnah, Ishva, Ishvi, wey si Beria. Is etevey zan ne si Sera.
1CH 7:31 Is menge anak ni Beria he menge maama ne si Heber wey si Malkiel. Si Malkiel ne amey ni Birzait.
1CH 7:32 Si Heber amey ni Jaflet, Shomer, wey ni Hotam. Is etevey zan ne iyan si Shua.
1CH 7:33 Is menge anak ni Jaflet he menge maama, ne iyan si Pasac, Bimhal, wey si Ashvat.
1CH 7:34 Is menge anak ni Shomer he menge maama ne si Ahi, Roga, Huba, wey si Aram.
1CH 7:35 Is menge maama he anak te suled ni Shomer he si Helem ne iyan si Zofa, Imnah, Shelesh, wey si Amal.
1CH 7:36 Is menge anak ni Zofa he menge maama, ne iyan si Sua, Harnefer, Shual, Beri, Imra,
1CH 7:37 Bezer, Hod, Shama, Shilsha, Itran, wey si Beera.
1CH 7:38 Is menge anak ni Jeter he menge maama, ne iyan si Jefune, Pispa, wey si Ara.
1CH 7:39 Is menge anak ni Ula he menge maama, ne iyan si Ara, Haniel, wey si Rizia.
1CH 7:40 Sikandan is langun menge kevuwazan ni Asher he menge pengulu te menge pemilya zan. Memetau sikandan he menge sundaru wey nevantug he menge pengulu. Ne is kezakel zan te menge maama he kevuwazan ni Asher he andam he ebpesundaru 26,000 sumalà is diyà te listahan te menge kevuwazan dan.
1CH 8:1 Iyan hein menge anak ni Benjamin he menge maama he ebpuun te kinekekayan pehendiyà te tinengkezan: si Bela, Ashbel, Ahara,
1CH 8:2 Noha, wey si Rafa.
1CH 8:3 Ne is menge anak ni Bela ne si Addar, Gera, Abihud,
1CH 8:4 Abishua, Naaman, Ahoa,
1CH 8:5 Gera, Shefufan, wey si Huram.
1CH 8:6 Is menge kevuwazan ni Ehud, he menge pengulu te menge pemilya zan, impaawà diyà te Geba ne midhalin sikandan diyà te Manahat.
1CH 8:7 Iyan sikandan ensi Naaman, si Ahia, wey si Gera. Si Gera ne amey ni Uza wey ni Ahihub ne iyan nengegalen kandan te edhalin.
1CH 8:8 Midsuwayan ni Shaharaim is menge esawa zin, he iyan si Hushim wey si Baara. Ne ziyà med-ubpà te Moab ne zuen anak din
1CH 8:9 diyà te esawa zin he si Hodesh. Iyan heini menge anak dan he menge maama: si Jobab, Zibia, Mesha, Malcam,
1CH 8:10 Jeuz, Sakia, wey si Mirma. Heini sikandan nehimu he menge pengulu te menge pemilya zan.
1CH 8:11 Duen daan anak ni Shaharaim diyà te esawa zin he si Hushim. Iyan si Abitub wey si Elpaal.
1CH 8:12 Is menge anak ni Elpaal ne iyan si Eber, Misham, Shemed (he iyan midtukud te menge inged he Ono wey Lod, wey te nekepeliǥuy kayi he menge lugar),
1CH 8:13 si Beria wey si Shema. Iyan heini menge pengulu te menge pemilya zan he ziyà ed-ubpà te Ayalon. Ne midsegseg dan is menge meǥinged diyà te Gat.
1CH 8:14 Is menge anak ni Beria iyan ensi Ahio, Shashak, Jeremot, Zebadia, Arad, Eder, Micael, Ishpa, wey si Joha.
1CH 8:17 Is menge anak ni Elpaal iyan ensi Zebadia, Meshulam, Hizki, Heber, Ishmerai, Izlia, wey si Jobab.
1CH 8:19 Is menge anak ni Shimei iyan ensi Jakim, Zicri, Zabdi, Elienai, Ziletai, Eliel, Adaya, Beraya, wey si Shimrat.
1CH 8:22 Is menge anak ni Shashak iyan ensi Ishpan, Eber, Eliel, Abdon, Zicri, Hanan, Hanania, Elam, Antotia, Ifdea, wey si Penuel.
1CH 8:26 Is menge anak ni Jeroham iyan ensi Shamsherai, Sheharia, Atalia, Jaareshia, Elias, wey si Zicri.
1CH 8:28 Heini sikandan menge pengulu te menge pemilya zan sumalà is diyà te listahan te kevuwazan dan ne ziyè dan med-ubpà te Jerusalem.
1CH 8:29 Si Jiel he amey ni Gibeon ne ziyà med-ubpà te Gibeon. Ne iyan ngazan te esawa zin si Maaca.
1CH 8:30 Is menge anak din he menge maama ebpuun te kinekekayan pehendiyà te tinengkezan ne iyan si Abdon, Zur, Kish, Baal, Ner, Nadab,
1CH 8:31 Gedor, Ahio, Zeker,
1CH 8:32 wey si Miklot (he amey ni Shimea). Ne ziyè dan med-ubpà te uvey te menge kezuzumahi zan diyà te Jerusalem.
1CH 8:33 Si Ner ne amey ni Kish, si Kish ne amey ni Saul, ne si Saul ne amey ni Jonatan, Malkishua, Abinadab, wey si Eshbaal.
1CH 8:34 Is anak ni Jonatan ne si Merib Baal he amey ni Micas.
1CH 8:35 Is menge anak ni Micas iyan ensi Piton, Melec, Tarea, wey si Ahaz.
1CH 8:36 Si Ahaz ne amey ni Jehoada, ne si Jehoada ne amey ni Alemet, Azmavet, wey ni Zimri. Si Zimri ne amey ni Moza,
1CH 8:37 ne si Moza ne amey ni Binea. Is anak ni Binea he iyan si Rafah, ne is anak ni Rafah ne iyan si Eleasa, ne is anak ni Eleasa ne si Azel.
1CH 8:38 Si Azel ne zuen heenem he menge anak din he si Azrikam, Bokeru, Ishmael, Shearia, Obadias, wey si Hanan.
1CH 8:39 Is menge anak te suled ni Azel he si Eshek, ne si Ulam is kinekekayan, ne si Jeush is ikezuwa, ne si Elifelet is iketelu.
1CH 8:40 Utew memevurut is menge anak ni Ulam ne utew metau zaan he ebpemanà. Mezakel is menge anak dan wey menge apù dan su 150 zan langun. Iyan heini sikandan langun menge kevuwazan ni Benjamin.
1CH 9:1 Is langun he menge Israilihanen ne nelista ziyà te Libru he Midsuratan te menge Keguǥuza te menge Hadì te Israel. Is menge etew ziyà te Juda ne nengevihag te Babilonia tenged te kenè dan kebpezumazuma te Nengazen.
1CH 9:2 Is nehuna he nekeulì diyà te menge inged dan he keugelingen dan he tanà iyan is menge Israilihanen, menge memumuhat, menge Levihanen, wey menge suluǥuen diyà te valey te Nengazen.
1CH 9:3 Iyan heini menge keet-etawan te menge tribu te Juda, Benjamin, Efraim, wey Manase he nekelikù he ziyà med-ubpà te Jerusalem:
1CH 9:4 Si Utai he anak ni Amihud (si Amihud ne anak ni Omri; si Omri ne anak ni Imri. Si Imri ne anak ni Bani, he kevuwazan ni Perez he anak ni Juda).
1CH 9:5 Diyà te Silonhanen: si Asaya he iyan kinekekayan, wey is menge anak din.
1CH 9:6 Diyà te Sirahanen: iyan is pemilya ni Jeuel. 690 sikandan is langun he ebpuun te tribu ni Juda.
1CH 9:7 Diyà te tribu ni Benjamin: si Salu he anak ni Meshulam (si Meshulam ne anak ni Hodavia; si Hodavia ne anak ni Hasenua),
1CH 9:8 si Ibnea ne anak ni Jeroham, si Ela ne anak ni Uzi (si Uzi ne anak ni Micri), ne si Meshulam he anak ni Shefatia (si Shefatia ne anak ni Reuel; si Reuel ne anak ni Ibnia).
1CH 9:9 Heini sikandan is langun menge pengulu te menge pemilya zan. Ne 956 sikandan langun he ebpuun te tribu ni Benjamin is nekelikù, sumalà is diyà te listahan te kandan he kevuwazan.
1CH 9:10 Is menge memumuhat he nekelikù ne iyan: si Jedaya, si Jehoyarib, si Jakin,
1CH 9:11 si Azaria he iyan pinekelavew he upisyal ziyà te valey te Megbevayà (anak sikandin ni Hilkia; si Hilkia ne anak ni Meshulam; si Meshulam ne anak ni Zadok; si Zadok ne anak ni Merayot; si Merayot ne anak ni Ahitub).
1CH 9:12 Ne elin daan nekelikù, si Adaya he anak ni Jeroham (si Jeroham ne anak ni Pashur; si Pashur ne anak ni Malkia), si Maasai ne anak ni Adiel (si Adiel ne anak ni Jazera; si Jazera ne anak ni Meshulam; si Meshulam ne anak ni Meshilemit; si Meshilemit ne anak ni Imer).
1CH 9:13 Ne 1,760 sikandan is langun he menge memumuhat he nekelikù. Menge pengulu sikandan te menge pemilya zan, ne meupiya sikandan he menge pengulu. Iyan sikandan midseriǥan he ebpenilbi zuen te valey te Megbevayà.
1CH 9:14 Diyà te menge Levihanen: si Shemaya he anak ni Hashub (si Hashub ne anak ni Azrikam; si Azrikam ne anak ni Hashabia he kevuwazan ni Merari),
1CH 9:15 si Bakbakar, Heresh, Galal, Matania (si Matania ne anak ni Mica; si Mica ne anak ni Zicri; si Zicri ne anak ni Asaf),
1CH 9:16 si Obadias he anak ni Shemaya (si Shemaya ne anak ni Galal; si Galal ne anak ni Jedutun), ne si Berekia he anak ni Asa he apù ni Elkana, he ziyà med-ubpà te menge inged te Netofanhen.
1CH 9:17 Diyà te menge ebantey te menge ǥemawan iyan nekelikù: si Shalum, Akub, Talmon, Ahiman, wey is menge kezuzumahi zan. Si Shalum ne iyan pengulu zan.
1CH 9:18 Taman guntaan ne iyan sikandan ebantey zuen te Gemawan te Hadì he zapit te edsilaan he kilid duen te inged. Iyan sikandan dengan ebantey te ǥemawan te edseled diyà te kampu te menge kevuwazan ni Levi.
1CH 9:19 Si Shalum ne anak ni Kore ne apù ni Ebiasaf, he ebpuun te pemilya ni Kora. Si Shalum wey is menge kezuzumahi zin he menge kevuwazan ni Kora, ne iyan midseriǥan te kebantey zuen te ǥemawan te Tulda he Edtelevukaayan iring te menge kepuun dan he iyan midseriǥan he ibpevantey zutun te ǥemawan te Baley te Nengazen.
1CH 9:20 Si Finehas he anak ni Eleazar he iyan is nehuna he midseriǥan he ibpevantey zutun te ǥemawan, ne midumahan sikandin te Nengazen.
1CH 9:21 Si Zacarias he anak ni Meshelemia, ne tigbantey zaan sikandin te ǥemawan te Tulda he Edtelevukaayan.
1CH 9:22 Ne 212 langun is menge ebantey zutun te ǥemawan, ne inlista sikandan sumalà is diyà te listahan te kegkevuwad dan dutun te inged dan. Ne si David wey si Samuel he ebpeneuven, iyan mibeǥey te menge ketengdanan diyà te menge kepuun dan he iyan ebantey zutun te ǥemawan (tenged te egkengeseriǥan sikandan).
1CH 9:23 Heini he menge ebantey wey is menge kevuwazan dan, ne iyan midseriǥan he ebantey te menge ǥemawan duen te valey te Nengazen he egngezanan daan te Tulda.
1CH 9:24 Ebentayan dan is heepat he pesikilizà dutun: dapit te edsilaan, te edsenlepan, dapit te zizaya, wey te egkezivavà.
1CH 9:25 Edseletselet daan edsambey ebantey is menge kezuzumahi zan he ziyà ed-ubpà te zezeisek he inged. Ebantey zan seled te pitu he andew.
1CH 9:26 Piru is heepat he pengulu he menge ebantey, he menge kevuwazan ni Levi, ne iyan dan ibpevantey zutun te seled te menge kuwartu wey te menge budiga zuen te valey te Nengazen.
1CH 9:27 Ebpurang sikandan he ebantey ziyà te peliǥuy zutun te valey te Nengazen su kinahanglan haazà he ebentayan dan wey ebpuwasan dan kada meselem.
1CH 9:28 Is duma zutun kandan, ne midseriǥan te ked-atur te menge gelemiten dutun he egemiten te ked-azap. Ebilangen dan heini emun egemiten ne ebilangen dan ded ke egkepasad is kegemita zutun.
1CH 9:29 Is duma, midseriǥan te ked-atur te zuma pa he menge gelemiten dutun te valey te Nengazen, ragkes en dutun is menge herina, binu, lana, beyewà, wey zuma pa he menge penaket.
1CH 9:30 Piru baal te menge memumuhat is kebpedsesehuǥa zutun te menge penaket.
1CH 9:31 Si Matitia he kevuwazan ni Levi, he kinekekayan he anak ni Shalum he kevuwazan ni Kora, iyan midseriǥan te kedhilutù te supas he ibpemuhat.
1CH 9:32 Is duma pa he menge kevuwazan ni Kora midseriǥan te ked-endama wey kedsevuka te menge supas diyà te lemisahan te kada Andew te Kedhimeley.
1CH 9:33 Is menge musikiru zutun te valey te Nengazen, menge pengulu te menge pemilya te kevuwazan ni Levi. Ne wazè en duma pa he menge vaal zan su is buluhaten dan ebeelan dan te maandew wey mezukilem.
1CH 9:34 Heini sikandan langun menge pengulu te menge pemilya zan he kevuwazan ni Levi. Nelista sikandan diyà te listahan te kegkevuwad dan. Ne ziyè dan med-ubpà te Jerusalem.
1CH 9:35 Si Jiel he amey ni Gibeon ne ziyà med-ubpà te Gibeon. Ne iyan ngazan te esawa zin si Maaca.
1CH 9:36 Is menge anak din he menge maama ebpuun te kinekekayan pehendiyà te tinengkezan ne iyan si Abdon, Zur, Kish, Baal, Ner, Nadab,
1CH 9:37 Gedor, Ahio, Zecarias, wey si Miklot
1CH 9:38 (he amey ni Shemeam). Ne ziyè dan med-ubpà te uvey te menge kezuzumahi zan diyà te Jerusalem.
1CH 9:39 Si Ner ne amey ni Kish, si Kish ne amey ni Saul, ne si Saul ne amey ni Jonatan, Malkishua, Abinadab, wey si Eshbaal.
1CH 9:40 Is anak ni Jonatan, ne si Merib Baal he amey ni Micas.
1CH 9:41 Is menge anak ni Micas iyan ensi Piton, Melec, Tarea, wey si Ahaz.
1CH 9:42 Si Ahaz ne amey ni Jada, ne si Jada he amey ni Alemet, Azmavet, wey ni Zimri. Si Zimri ne amey ni Moza,
1CH 9:43 ne si Moza ne amey ni Binea. Is anak ni Binea he iyan si Refaya, ne is anak ni Refaya ne si Eleasa, ne is anak ni Eleasa ne iyan si Azel.
1CH 9:44 Si Azel ne zuen heenem he menge anak din he si Azrikam, Bokeru, Ishmael, Shearia, Obadias, wey si Hanan.
1CH 10:1 Dutun he timpu, nekidtebek is menge Filistihanen te menge Israilihanen diyà te Buntud he Gilboa. Mezakel is nemematey te menge Israilihanen, ne is duma ne mememelaǥuy.
1CH 10:2 Ne midal-as te menge Filistihanen si Saul wey is menge anak din he maama, ne midhimetayan dan is anak din he si Jonatan, Abinadab, wey si Malkishua.
1CH 10:3 Utew meinit is tebek eni Saul wey menge Filistihanen. Neigù si Saul te panà ne nepelian.
1CH 10:4 Migkeǥiyan ni Saul is tig-uwit te ǥumaan din te, “Hulevuta nu heeyan is ispada nu wey a himatayi, su emun kenà, ne iyan is wazà mekekilala te Megbevayà edhimatey kedì, ne ed-un-undahan e zan.” Piru nahandek haazà is tig-uwit te ǥumaan din he edhimatey kandin, ne zutun migkuwa ni Saul kes ispada zin, ne midsundang din is lawa zin.
1CH 10:5 Hein naahà dutun te tig-uwit te ǥumaan din he minatey en, mid-uney zin daan sundanga is lawa zin te ispada zin, ne minatey zaan sikandin.
1CH 10:6 Umbe, minatey si Saul, wey is tetelu he menge anak din he maama, ne wazè en kevuwazan din he nehimu he hadì.
1CH 10:7 Haazà he timpu ne zuen menge Israilihanen he ziyà med-ubpà te menge suǥud te Jezreel. Hein neehè dan he nememelaǥuy is menge sundaru te Israel wey nepatey en si Saul wey kes menge anak din, ne mid-ewaan dan is menge inged dan ne mibpelaǥuy zan daan. Ne midselezan haazà te menge Filistihanen is menge inged ne iyan dan en dutun mid-ubpà.
1CH 10:8 Hein sunud he andew, te nepasad is tebek, midhendiyà is menge Filistihanen te Buntud he Gilboa su egkuwaan dan is menge ǥumaan te menge nengepatey. Neehè dan diyà is minatey he lawa ni Saul wey menge anak din.
1CH 10:9 Migkuwa zan is menge ǥumaan ni Saul ne mibpungelan dan te ulu. Ne zutun midsuǥù dan te menge menunudtulà ziyà te tivuuk he tanà te Filistia he ebpesavut diyà te kandan wey te menge ed-ezapen wey te menge siringan dan te minatey en si Saul.
1CH 10:10 Diyè dan isavuk haazà is menge ǥumaan ni Saul te valey he zutun dan ed-ezapa is menge ledawan, ne zutun dan ivitey is ulu ni Saul te valey he zutun dan ed-ezapa is ledawan he si Dagon.
1CH 10:11 Netuenan te menge tig-Jabesh Gilead is langun he mid-ulaula te menge Filistihanen ki Saul.
1CH 10:12 Umbe, migenat is langun he menge beǥani kandan ne migkuwa zan is lawa ni Saul wey is menge anak din, ne mid-uwit dan heini ziyà te Jabesh. Ne inleveng dan haazà is menge minatey ziyà te zizalem te zekelà he kayu ziyà te Jabesh, ne mibpuasa zan seled te pitu he andew.
1CH 10:13 Minatey si Saul tenged te kenè din kebpezumazuma te Nengazen. Wazè din tumana is suǥù kandin te Nengazen, wey midangep sikandin te menge etew he edsarig te menge mulin-ulin.
1CH 10:14 Diyà pezem sikandin ereg he ebuyù te sambag te Nengazen. Umbe midhimetayan sikandin te Nengazen ne imbeǥey is ginhedian din diyà te ki David he anak ni Jesse.
1CH 11:1 Ne zutun, midhendiyà is langun he menge Israilihanen te ki David diyà te Hebron he egkaǥi te, “Menge kezuzumahi key kenikew.
1CH 11:2 Puun pa zengan, minsan te iyan pa si Saul hadì dey, ne iyan ke pa nengulu te menge Israilihanen te kebpekidtebek. Ne migkeǥiyan ka te Nengazen he Megbevayà te, ‘Elimahi nu is menge etew ku he Israilihanen he iring te ked-elima te ebantey te menge kerehidu. Iyan ka egkehimu he pengulu zan.’ ”
1CH 11:3 Umbe, ziyà te Hebron, mibaal si David te kebpekid-uyun te menge pengulu te Israel ziyà te etuvangan te Nengazen, ne midlenahan dan is ulu ni David te lana he ibpeehè dan he iyan en sikandin hadì te Israel, sumalà is insaad te Nengazen pinaaǥi ki Samuel.
1CH 11:4 Duen timpu he migenat si David wey is menge Israilihanen su edsurungen dan is Jerusalem (he egngezanan dengan te Jebus) is menge Jebusihanen he zutun mekeubpà
1CH 11:5 ne migkeǥiyan dan si David, “Kenè kew ebpekeseled kayi te Jerusalem.” Piru naaǥew eni David is melig-en he kutà te Zion, ne migngezanan haazà te Inged ni David hein huziyan he timpu.
1CH 11:6 Migkaǥi si David, “Is minsan hentei he edhuna he edsurung te menge Jebusihanen ne iyan egkehimu he peremandar te menge sundaru.” Si Joab he anak ni Zeruya iyan midhuna. Umbe iyan sikandin nehimu he peremandar.
1CH 11:7 Hein naaǥew en ni David haazà is utew melig-en he kutà, diyè en sikandin med-ubpà, umbe migngezanan te menge etew haazà te Inged ni David.
1CH 11:8 Ne mibpeumanan din haazà pepelinguti te verengbeng puun te mevavà he vahin dutun te inged. Iyan dutun midumala si Joab te kebpurung duen te zuma he vahin te inged.
1CH 11:9 Utew mibmelig-en si David, tenged te edtevangan sikandin te Nengazen he Mekeǥeǥehem.
1CH 11:10 Iyan heini menge pengulu te menge sakup ni David he menge mevurut. Sikandan wey is langun he menge Israilihanen midsupurtar te kedhadì ni David, sumalà is insaad te Nengazen mehitenged te Israel.
1CH 11:11 Si Jashobeam he Hakmuhanen, he iyan kes edhuna zuen te tetelu he menge mevurut he sakup ni David. Dutun te senge sangkè dà ne nekepatey sikandin te 300 he etew pinaaǥi te vangkew zin.
1CH 11:12 Ne iyan sunud kandin si Eleazar he anak ni Dodai he kevuwazan ni Ahoa he sevaha zaan dutun te tetelu he memevurut he menge sakup ni David.
1CH 11:13 Sevaha zaan sikandin te miduma ki David te kebpekidtebek dan te menge Filistihanen diyà te Pas Damin. Diyè dan medtetebek te pemuleey te barli. Nemelaǥuy is menge Israilihanen,
1CH 11:14 piru si Eleazar wey si David, ne wazè dan dutun med-awà te teliwazà te pemuleey, ne mibpenhimetayan dan kes menge Filistihanen. Impezaag sikandan te Nengazen.
1CH 11:15 Ne sevaha he andew, midhendiyà te ki David haazà is tetelu he sakup din duen te surung te Adulam. Heini is tetelu he etew, ne zuma heini sikandan te 30 he menge mevurut he menge sakup ni David. Dutun he timpu ne ziyà megkampu haazà is menge Filistihanen te Suǥud he Refaim
1CH 11:16 ne naaǥew zan is Betlehem. Hein diyè pa si David te melig-en he elesà,
1CH 11:17 utew sikandin ebpekeinum. Migkaǥi sikandin te, “Deyzey pezem ke zuen egkuwa te wahig he egkeinum ku ziyà te kalut he uvey te ǥemawan te Betlehem.”
1CH 11:18 Umbe, mid-eles-eles midseled haazà is tetelu he mevurut he menge etew zuen te kampu te menge Filistihanen, ne migkuwa zan te wahig dutun te kalut he uvey te ǥemawan te Betlehem, ne mid-uwit dan diyà te ki David. Piru wazà inuma haazà ni David; kekenà, in-itis din haazà su pemuhat din para te Nengazen.
1CH 11:19 Migkaǥi sikandin te, “Megbevayè ku, kenè ku heini ed-inumen tenged te iring heini kemahal te lengesa te menge etew he impedserakan dan is untung dan te kegkuwa kayi.” Umbe wazà iyan med-inum si David. Iyan haazà mibeelan dutun te tetelu he mevurut he menge sakup ni David.
1CH 11:20 Si Abishai he suled ni Joab, ne iyan pengulu zutun te 30 he mevurut he menge sakup ni David. Nekepatey sikandin te 300 he menge Filistihanen pinaaǥi te vangkew zin. Umbe nehimu he nevantug sikandin he iring duen te tetelu he mevurut he menge etew,
1CH 11:21 piru kenà sikandin ragkes duen te tetelu. Ne tenged te iyan sikandin nevantug he zuma zutun te 30, iyan sikandin nehimu he peremandar zan.
1CH 11:22 Duen pa sevaha he mevurut he etew he egngezanan ki Benaya. Tig-Kabzeel sikandin, ne iyan amey zin si Jehoyada. Mibaal sikandin te wazè din iring he menge vaal, ragkes en is kedhimetayi zin te zezuwa he ventuǥan he sundaru te Moab. Duen timpu he zutun mibpendal-as din is erimaung minsan ebpenggiyew wey melandeg, ne mibpeneuǥan din duen te budsi ne midhimetayan din haazà is erimaung.
1CH 11:23 Sevaha pa maan dutun he timpu, midhimetayan din is Ehiptohanen he is kelangkew zin ne pitu he ǥiek wey tengà. Ne is gumaan dutun te Ehiptohanen ne vangkew he meveǥat, ne is kandin mulà he ǥumaan ne kayu zà he idlagkut. Ne mid-aǥew zin haazà is bangkew zutun te Ehiptohanen ne iyan ded heini inhimatey zin kandin.
1CH 11:24 Iyan haazà menge vaal he mibeelan ni Benaya he anak ni Jehoyada. Nehimu sikandin he ventuǥan iring duen te tetelu he mevurut he menge etew,
1CH 11:25 piru kenè din duma sikandan. Ne tenged te iyan sikandin pinekeventuǥan duen te menge zuma zin he 30, midhimu sikandin ni David he pengulu te menge vantey.
1CH 11:26 Iyan heini menge memetau he menge sundaru: si Asahel he suled ni Joab; si Elhanan he anak ni Dodo he tig-Betlehem,
1CH 11:27 si Shamot he tig-Haror, si Helez he tig-Pelon,
1CH 11:28 si Ira he anak ni Ikesh he tig-Tekoa, si Abiezer he tig-Anatot,
1CH 11:29 si Sibecai he tig-Husha, si Ilai he tig-Ahoa
1CH 11:30 si Maharai he tig-Netofa, si Heled he anak ni Baanah he tig-Netofa,
1CH 11:31 si Itai he anak ni Ribai he tig-Gibea, he sakup te Benjamin, si Benaya he tig-Piraton,
1CH 11:32 Si Hurai he ziyà ed-ubpà te uvey te menge zal-ug diyà te Gaash, si Abiel he tig-Araba.
1CH 11:33 Si Azmavet he tig-Baharum, si Eliaba he tig-Shaalbon,
1CH 11:34 is menge anak ni Hashem he tig-Gizon, si Jonatan he anak ni Shagee he tig-Harar,
1CH 11:35 si Ahiam he anak ni Sacar he tig-Harar, si Elipal he anak ni Ur;
1CH 11:36 si Hefer he tig-Mekerat, si Ahia he tig-Pelon,
1CH 11:37 si Hezro he tig-Carmel, si Naarai he anak ni Ezbai.
1CH 11:38 Si Joel he suled ni Natan, si Mibhar he anak ni Hagri,
1CH 11:39 si Zelek he tig-Ammon, si Naharai he tig-Berot, he iyan tig-uwit te ǥumaan ni Joab he anak ni Zeruya,
1CH 11:40 si Ira wey si Gareb he menge tig-Jatir,
1CH 11:41 si Uria he Hitihanen, si Zabad he anak ni Alai,
1CH 11:42 si Adina he anak ni Shiza he sevaha he pengulu te tribu ni Reuben wey zuen 30 he menge sakup din.
1CH 11:43 Si Hanan he anak ni Maaca, si Joshafat he tig-Mitna,
1CH 11:44 si Uzia he tig-Ashterat, si Shama wey si Jiel he menge anak ni Hotam he tig-Aroer,
1CH 11:45 Si Jediel he anak ni Shimri, si Joha he tig-Tiz he suled ni Jediel,
1CH 11:46 Si Eliel he tig-Mahav, si Jeribai wey si Joshavia he menge anak ni Elnaam, si Itma he tig-Moab,
1CH 11:47 si Eliel, Obed, wey si Jaasiel he tig-Mezoba.
1CH 12:1 Iyan heini menge etew he midhendiyà te ki David diyà te Ziklag he miduma kandin hein kemulu pa sikandin ed-eles-eles ki Saul he anak ni Kish. Duma heini sikandan te mid-uǥup te kebpekidtebek ni David.
1CH 12:2 Memetau heini sikandan te panà, wey iyan heini vaal zan is kebpemanà wey kebpenlimpawes, metau is kewanan wey givang he velad dan. Menge kezuzumahi heini sikandan ni Saul he ebpuun te tribu ni Benjamin.
1CH 12:3 Iyan heini menge ngazan dan: si Ahiezer is pengulu zan wey si Joash. Menge anak sikandan ni Shemaa he tig-Gibeah. Iyan heini menge ngazan dan: si Jeziel wey si Pelet he menge anak ni Azmavet, si Beraca wey si Jehu he tig-Anatot,
1CH 12:4 si Ishmaya he tig-Gibeon, he sevaha he mevurut he pengulu zuen te 30 he mevurut he menge sundaru. Si Jeremias, Jahaziel, Johanan, Jozabad he tig-Gedera,
1CH 12:5 si Eluzai, Jerimot, Bealia, Shemaria, wey si Shefatia he tig-Haruf,
1CH 12:6 si Elkana, Ishia, Azarel, Joezer, wey si Jashobeam he menge kevuwazan ni Kora,
1CH 12:7 si Joela wey si Zebadia he menge anak ni Jehoram he tig-Gedor.
1CH 12:8 Duen daan menge etew he ebpuun te tribu ni Gad he miduma ki David diyà te melig-en he elesà diyà te sibsivayan. Mevurut sikandan he menge sundaru ne iyan layun egemiten dan is kelasag wey vangkew. Iring sikandan kevurut te menge erimaung wey iring sikandan keǥaan te selazeng diyà te menge vuvungan:
1CH 12:9 si Ezer ne iyan pengulu zan, si Obadias is ikezuwa; si Eliab is iketelu;
1CH 12:10 si Mishmana is ikeepat; si Jeremias is ikelima,
1CH 12:11 si Atai is ikeenem, si Eliel is ikepitu,
1CH 12:12 si Johanan is ikewalu, si Elzabad is ikesiyam;
1CH 12:13 si Jeremias is ikesepulù, ne iyan ike-11 si Macbanai.
1CH 12:14 Iyan heini sikandan menge kevuwazan ni Gad he menge peremandar te menge sundaru. Is pinekemeǥuyà kandan ne ebpekezumala te 100 he sundaru ne is pinekemezesen kandan ne ebpekezumala te 1,000 he sundaru.
1CH 12:15 Midlayun dan dengan is Wahig he Jordan hein timpu te tingdalem kayi, dutun te nehuna he vulan te tuig, ne midsegseg dan is langun he meǥinged diyà te suǥud he zapit te edsilaan wey edsenlepan te wahig.
1CH 12:16 Duen daan menge etew he ebpuun te tribu ni Benjamin wey ki Juda he midhendiyà te ki David diyà te melig-en he elesà.
1CH 12:17 Migawas si David ne midsinuǥung din sikandan ne migkaǥi, “Emun iyan inhendini niw is edtevangan a keniyu su menge emiǥu ku sikiyu ne edewaten ku sikiyu he eduma kenami. Piru emun iyan inhengkayi niw is ibpalad a keniyu te menge kuntada ku minsan wazè ku mibeelan he mezaat keniyu, ne iyan ebpekaahà kayi is Megbevayà te menge kepuun tew ne iyan edsilut keniyu.”
1CH 12:18 Ne zutun mid-uwit te Mulin-ulin si Amasai he nehimu he pengulu zuen te 30 he menge mevurut he menge sundaru ne migkaǥi sikandin te, “Edlavan key kenikew, David he anak ni Jesse! Deyzey pezem ke mebmezeeǥen ka wey is mid-uǥup kenikew, su iyan is Megbevayè nu mid-uǥup kenikew.” Ne midawat sikandan ni David ne midhimu zin sikandan he menge upisyal te menge sundaru zin.
1CH 12:19 Duen daan menge etew he ebpuun te tribu ni Manase he nekezuma ki David hein midhendiyà te menge Filistihanen su ebpekidtebek ki Saul. Piru wazà mebpemineg is menge Filistihanen he eduma si David wey is menge sakup din, su neisip dan he kela ke ziyè ded si David medlavan med-uman te egalen din he si Saul. Umbe hein nepasad is kebpelelelaǥè dan ne impelikù dan ensi David diyà te Ziklag.
1CH 12:20 Iyan heini menge etew he ebpuun te tribu ni Manase he miduma ki David diyà te Ziklag: si Adnah, Jozabad, Jediel, Micael, Jozabad, Elihu, wey si Ziletai. Kada sevaha kandan ne pengulu te tignengkelibu he menge sundaru te tribu ni Manase.
1CH 12:21 Mid-uǥupan dan si David te kebpekidtebek te ebpemenurung, su menge mahagtì heini langun he menge sundaru. Umbe nehimu sikandan he peremandar te menge sundaru ni David.
1CH 12:22 Kada andew ne zuen ebpemenhendiyà he menge etew te ki David su ed-uǥup dan kandin, taman te mibmezakel wey mibmelig-en is menge sundaru zin.
1CH 12:23 Iyan heini kezakel te neǥumeenan he menge sundaru he midhendiyà te ki David diyà te Hebron he ed-uǥup kandin he maaǥew zin is ginhedian ni Saul, sumalà te insaad te Nengazen.
1CH 12:24 Is ebpuun te tribu ni Juda: 6,800 he menge sundaru he neǥumeenan he zuen dan menge vangkew wey menge panà.
1CH 12:25 Is ebpuun te tribu ni Simeon: 7,100 he memetau he menge sundaru.
1CH 12:26 Is ebpuun te tribu ni Levi: 4,600 he menge sundaru,
1CH 12:27 apil en si Jehoyada is pengulu te pemilya ni Aaron wey is menge sakup din he 3,700,
1CH 12:28 wey si Zadok is sevaha zaan he metau he vetan-en he sundaru wey is 22 he menge upisyal he ebpuun te pemilya zin.
1CH 12:29 Is ebpuun te tribu ni Benjamin he menge kezuzumahi ni Saul: 3,000 he menge sundaru. Iyan, mezakel is menge kevuwazan ni Benjamin he mibpedayun med-unung ki Saul.
1CH 12:30 Is ebpuun te tribu ni Efraim: 20,800 he memetau he menge sundaru he nevantug diyà te pemilya zan.
1CH 12:31 Is ebpuun te ketengà he tribu ni Manase: 18,000 he menge sundaru he midsuǥù he para mekeuǥup he mehimu he hadì si David.
1CH 12:32 Is ebpuun te tribu ni Isacar: 200 he menge pengulu zuma is menge kezuzumahi zan he ebpenguluwan dan. Netau heini sikandan ke hengkey is ereg he ebeelan te Israel wey ke keenu zan heini ebeeli.
1CH 12:33 Is ebpuun te tribu ni Zebulun: 50,000 he memetau he menge sundaru he andam he ebpekidtebek. Neǥumeenan sikandan te nekedseselekawà he menge ǥumaan. Andam sikandan he ed-uǥup wey ed-unung ki David.
1CH 12:34 Is ebpuun te tribu ni Naftali: 1,000 he menge upisyal wey 37,000 he menge sundaru he ebpemen-uwit te menge kelasag wey menge vangkew.
1CH 12:35 Is ebpuun te tribu ni Dan: 28,600 he memetau he menge sundaru he andam he ebpekidtebek.
1CH 12:36 Is ebpuun te tribu ni Asher: 40,000 he menge memetau he menge sundaru he andam he ebpekidtebek.
1CH 12:37 Ne is ebpuun te tribu he ziyà te zapit te edsilaan te Wahig he Jordan: he tribu ni Reuben, Gad wey ketengà he tribu ni Manase: 120,000 he menge sundaru he neǥumeenan te mibarangbarang he menge ǥumaan.
1CH 12:38 Iyan heini langun he menge sundaru he mibuluntaryu he ebpekidtebek. Midhendiyè dan te Hebron he zekelà is tinguhè dan te kedhimuwa ki David he hadì te tivuuk he Israel. Hapit is langun he menge Israilihanen ne utew egkesuat he si David is egkehimu he hadì dan.
1CH 12:39 Menge tetelu he andew zan dutun he mibpekiduma ki David te kegkaan wey ked-inum su mibpeuwitan sikandan te menge siringan dan te menge egkekaan.
1CH 12:40 Mid-uwit daan te menge keenen is menge kezumahan dan he ebpuun pa te meziyù he lugar te Isacar, Zebulun, wey Naftali. Ingkarga zan heini te menge asnu, menge kemilyu, menge mula, wey menge vaka. Dekelà is herina zan, menge higus, pasas, binu, lana, baka, wey kerehidu. Utew zutun melipayen is tivuuk he Israel.
1CH 13:1 Mibpekidlalag si David te menge upisyal zin, he menge peremandar te linibu wey ǥinatus he menge sundaru zin.
1CH 13:2 Ne migkeǥiyan din is tivuuk he keet-etawan te Israel, “Emun egkesuat kew wey iyan daan egkesuatan te Nengazen he Megbevayè tew, ibpetudtulan tew is langun he menge zuma tew seled te tivuuk he Israel, apil en is menge memumuhat wey is menge Levihanen he zuma zan dutun te menge inged dan wey menge penebtavà dan. Ibpehendini tew sikandan wey zan mekepekidsevaha kenitew.
1CH 13:3 Timpu en heini he egkuwaan tew kes Kavan te Kebpekid-uyun te Megbevayè tew, su wazè tew heini seǥipaa hein iyan pa hadì si Saul.”
1CH 13:4 Mibpemineg dutun is tivuuk he meǥinged su neehè dan he iyan haazà hustu he ebeelan dan.
1CH 13:5 Umbe, miburunburun ni David is langun he menge Israilihanen, ebpuun diyà te Wahig he Shihor ziyà te Ehipto taman te Lebo Hamat, te kegkuwa te Kavan te Kebpekid-uyun te Megbevayà diyà te Kiriat Jearim.
1CH 13:6 Midhendiyà si David wey is menge Israilihanen diyà te Baala ziyà te Juda (he iyan is Kiriat Jearim). Ne migkuwa zan dutun sikan is Kavan te Nengazen he Megbevayà. Ne zutun is Nengazen te teliwazà te menge kirubin he zutun te zivavew te Kavan.
1CH 13:7 Migkuwa zan haazà is Kavan te Kebpekid-uyun te Megbevayà diyà te valey ni Abinadab ne in-untud dan te veǥu he kerumata. Si Uza wey si Ahio is migiya zutun te kerumata.
1CH 13:8 Midsilibra si David wey is langun he menge Israilihanen diyà te etuvangan te Megbevayà te tivuuk dan he zesen. Nemenganta zan wey midtukar te menge alpa, lira, tamburin, simbal, wey trumpita.
1CH 13:9 Hein nekeuma zan duen te gunasà ni Kidon, migewezan ni Uza haazà is Kavan, su nekezulas is menge vaka.
1CH 13:10 Utew nepauk dutun is Nengazen ki Uza tenged dutun te migewezan din haazà is Kavan. Umbe minatey sikandin dutun te etuvangan te Megbevayà.
1CH 13:11 Nepauk si David su midsilutan te Nengazen si Uza tenged te kegkepauk din. Umbe taman guntaan ne iyan inngazan dutun he lugar is Perez Uza.
1CH 13:12 Nahandek si David te Megbevayà te haazà he andew, ne nekekaǥi sikandin te, “Ebmenmenuwen en be he meuwit heini is Kavan te Kebpekid-uyun te Megbevayà diyà te inged ku?”
1CH 13:13 Ne zutun neisip din he kenè din en ed-uwiten diyà te inged din haazà is Kavan. Diyè din itaǥak haazà te valey ni Obed Edom he tig-Gat.
1CH 13:14 Diyà heini te valey ni Obed Edom itaǥù seled te tetelu he vulan, ne midtuvazan te Nengazen is pemilya zin wey is langun he azen din.
1CH 14:1 Dutun he timpu, midsuǥù si Hadì Hiram he hadì te Tyre te menge menunudtulà diyà te ki David duma is menge pandey, menge tigsimintu, wey mibpeuwit te menge kayu he sidru, su ebengunen dan is turuǥan ni David.
1CH 14:2 Ne zutun nesavut ni David he iyan is Nengazen midsavuk kandin he hadì te Israel wey iyan mibpeuswag te ginhedian din para te menge etew zin he menge Israilihanen.
1CH 14:3 Diyà te Jerusalem, mezakel pa is mid-esawa ni David, ne neumanan is menge anak din.
1CH 14:4 Iyan heini ngazan te menge anak din he maama he neetew ziyà: si Shamua, Shobab, Natan, Solomon,
1CH 14:5 Ibhar, Elishua, Elpelet,
1CH 14:6 Noga, Nefeg, Jafia,
1CH 14:7 Elishama, Beeliada, wey si Elifelet.
1CH 14:8 Hein netuenan te menge Filistihanen he iyan si David nepilì he hadì te tivuuk he Israel, midtiǥum dan is langun he menge sundaru zan para te kedakep kandin. Piru netuenan ni David, ne midsinuǥung din nasì sikandan.
1CH 14:9 Dutun, midsurung te menge Filistihanen is Suǥud he Refaim.
1CH 14:10 Umbe, nenginginsà si David te Megbevayà, “Edsurungen dey ve is menge Filistihanen? Ibpezaag nu ve sikandan kenami?” Midtavak is Nengazen diyà te kandin, “Uya, ǥenat kew en, su ibpezaag ku sikandan keniyu.”
1CH 14:11 Ne zutun midhendiyà si David wey is menge sakup din te Baal Perazim, ne zutun nezaag dan is menge Filistihanen. Migkaǥi si David te, “Migerà te Megbevayà is menge kuntada ku he henduen be te mibeyaan te zekelà he zalem, ne migamit e zin para meǥerè dan.” Umbe migngezanan haazà he lugar he Baal Perazim.
1CH 14:12 Ne mid-ewaan te menge Filistihanen is menge ed-ezapen dan dutun, ne insuǥù ni David he edtutungen haazà.
1CH 14:13 Mid-umanan surunga te menge Filistihanen is Suǥud he Refaim.
1CH 14:14 Ne mid-uman mebpenginginsà si David diyà te Megbevayà, ne midtavak is Megbevayà diyà te kandin te, “Kenè niw ǥègaani te edsurung, kekenà, linguti niw sikandan ne surunga niw ziyà te uvey te menge kayu he balsam.
1CH 14:15 Emun egkezineg niw he henduen te ebmartsa is menge sundaru ziyà te zapit te zivavew zutun te menge kayu he balsam, ne surunga niw en su iyan tuus heeyan he iyan a edhuna te kedsurung niw te menge Filistihanen.”
1CH 14:16 Umbe, midtuman ni David is insuǥù kandin te Megbevayà, ne nengepatey zan is menge Filistihanen puun te Gibeon pehendiyà te Gezer.
1CH 14:17 Ne tenged kayi nevantug si David diyà te minsan hendei ne mibpengelinteuwan te Nengazen he mengehandek kandin is langun he menge nasyun.
1CH 15:1 Mibpehitindeg si David te menge bilding para te keugelingen din diyà te Jerusalem he egngezanan te Inged ni David. Mibpevaal zaan sikandin te tulda para te Kavan te Kebpekid-uyun te Megbevayà. Ne impelastar zin diyà te lugar he in-andam din para kayi.
1CH 15:2 Migkaǥi si David, “Wazà minsan hentei he ebpekeuwit te Kavan te Kebpekid-uyun te Megbevayà gawas te menge Levihanen, su iyan sikandan mibpilì te Nengazen he ibpeuwit te Kavan te Nengazen wey ebpenilbi ziyà te etuvangan din taman te taman.”
1CH 15:3 Miburunburun ni David is langun he menge Israilihanen diyà te Jerusalem te ked-uwit duen te Kavan te Nengazen diyà te lugar he inteǥana zin para kayi.
1CH 15:4 Impetawag din daan is menge memumuhat wey is menge Levihanen, he iyan heini kezakel zan:
1CH 15:5 Is ebpuun te menge kevuwazan ni Kora, 120, ne iyan pengulu zutun si Uriel.
1CH 15:6 Is ebpuun te menge kevuwazan ni Merari, 220, ne iyan pengulu zutun si Asaya.
1CH 15:7 Is ebpuun te kevuwazan ni Gershon, 130, ne iyan pengulu zutun si Joel.
1CH 15:8 Is ebpuun te kevuwazan ni Elizafan, 200, ne iyan pengulu zutun si Shemaya.
1CH 15:9 Is ebpuun te kevuwazan ni Hebron, 80, ne iyan pengulu zutun si Eliel.
1CH 15:10 Is ebpuun te kevuwazan ni Uziel, 112, ne iyan pengulu zutun si Aminadab.
1CH 15:11 Ne impetawag ni David si Zadok wey si Abiatar he menge memumuhat, wey is menge Levihanen he si Uriel, Asaya, Joel, Shemaya, Eliel, wey si Aminadab.
1CH 15:12 Migkeǥiyan din sikandan te, “Iyan kew menge pengulu te menge pemilya te menge kevuwazan ni Levi. Mebpekelumpiyu kew wey is menge iring niw he menge kevuwazan ni Levi, para egkeuwit niw kes Kavan te Nengazen he Megbevayà te Israel, diyà te lugar he inteǥana ku para kayi.
1CH 15:13 Tenged te kenè kew iyan kes mid-uwit dutun te Kavan te Kebpekid-uyun te nehuna he timpu, midsilutan kiw te Nengazen he Megbevayè tew tenged te kegkepauk din. Wazè kiw mebpenginginsà te Nengazen ke ebmenmenuwen tew heini te ed-uwit te hustu he paaǥi.”
1CH 15:14 Ne zutun mibpekelumpiyu haazà is menge memumuhat wey kes menge Levihanen para meuwit dan kes Kavan te Nengazen he Megbevayà te Israel.
1CH 15:15 Mibinting te menge Levihanen haazà is Kavan te Kebpekid-uyun te Megbevayà sumalà te insuǥù te Nengazen ki Moises.
1CH 15:16 Midsuǥù ni David is menge pengulu te menge Levihanen te kebpilì te menge perekanta he ebpuun ded te iring dan he menge Levihanen, te kegkanta te menge kanta he ebpekelipey he eduyuǥan te menge lira, alpa, wey menge simbal.
1CH 15:17 Umbe, mibpilì te menge Levihanen si Heman he anak ni Joel, si Asaf he anak ni Berekia, wey si Etam he anak ni Kushaya he kevuwazan ni Merari.
1CH 15:18 Is mibpilì dan he ed-uǥup kandan ne iyan is menge kezuzumahi zan ded he iyan ensi Zacarias, Jaaziel, Shemiramot, Jehiel, Uni, Eliab, Benaya, Maasea, Matitia, Elifelehu, Miknea, wey is menge ebantey te ǥemawan te Tulda he iyan si Obed Edom wey si Jiel.
1CH 15:19 Is midseriǥan te kedtukar zutun te menge brunsi he simbal ne iyan si Heman, Asaf, wey si Etan.
1CH 15:20 Ne is midseriǥan te kedtukar te menge lira he ebpekezeǥingen iyan ensi Zacarias, Aziel, Shemiramot, Jehiel, Uni, Eliab, Maasea, wey si Benaya.
1CH 15:21 Ne is midseriǥan te kedtukar te menge alpa te menaney iyan ensi si Matitia, Elifelehu, Miknea, Obed Edom, Jiel, wey si Azazia.
1CH 15:22 Is midseriǥan he ebpengulu te kegkanta iyan si Kenania he pengulu te Levihanen, su metau sikandin he egkanta.
1CH 15:23 Ne is midseriǥan te kebantey zuen te Kavan te Kebpekid-uyun te Nengazen ne iyan si Berekia wey si Elkana.
1CH 15:24 Ne is midseriǥan te kebpezaǥing te trumpita zutun te etuvangan te Kavan te Kebpekid-uyun te Megbevayà he menge memumuhat ne iyan ensi Shebania, Joshafat, Netanel, Amasai, Zacarias, Benaya, wey si Eliezer. Si Obed Edom wey si Jehia iyan daan ebantey zutun te Kavan te Kebpekid-uyun.
1CH 15:25 Umbe, melipayen he midhendiyà si David wey is menge sineriǥan te Israel, wey is menge peremandar te menge linibu he menge sundaru diyà te valey ni Obed Edom te kegkuwa te Kavan te Kebpekid-uyun te Nengazen.
1CH 15:26 Ne tenged te midtevangan te Megbevayà is menge Levihanen te ked-uwita zan dutun te Kavan te Kebpekid-uyun te Nengazen, mibpemuhat dan te pitu he tudu he vaka wey pitu he kerehidu.
1CH 15:27 Ne si David wey is langun he menge Levihanen he mid-uwit dutun te Kavan te Kebpekid-uyun te Nengazen wey is menge perekanta, wey si Kenania he iyan midseriǥan he ibpepengulu te kegkanta, mibivisti zan pudu te linu. Migkukumbalà daan si David te ipud he linu.
1CH 15:28 Umbe, mid-uwit te langun he menge Israilihanen kes Kavan te Kebpekid-uyun te Nengazen duma is ked-ugyab, kebpezaǥing te menge trumpita, menge vudyung, wey menge simbal wey kedtukar te menge lira wey menge alpa.
1CH 15:29 Hein idseled dan en haazà is Kavan te Kebpekid-uyun te Nengazen dutun te Inged ni David, mibpantew si Mical he anak ni Saul ziyà te bintanà. Ne neehè din si Hadì David is edsayew te kegkelipey zin, ne neepesan din.
1CH 16:1 Insavuk eni David haaza is Kavan te Kebpekid-uyun te Megbevayà dutun te seled te tulda he mibeelan ni David he edsevukan din dutun te Kavan. Ne nemuhat dan diyà te Nengazen te menge pemuhat he edtutungen wey menge pemuhat he para te meupiya he kedepità.
1CH 16:2 Hein nepasad is kebpemuhat dan dutun, ne mibpenubtuvazan ni David is menge etew pinaaǥi te ngazan te Nengazen.
1CH 16:3 Ne is kada sevaha he Israilihanen, maama wey vahi, ne mibeǥayan din te supas, usa, wey menge pasas.
1CH 16:4 Mibpilì dutun si David te menge Levihanen he ebpenilbi etuvangan dutun te Kavan te Nengazen pinaaǥi te ked-ampù, te kebpeselamat, wey kedalig te Nengazen, kes Megbevayà te Israel.
1CH 16:5 Si Asaf is nengulu kandan wey tigpezaǥing te menge simbal. Ne iyan sunud kandin si Zacarias, ne nesunuzan eni Jiel, Shemiramot, Jehiel, Matitia, Eliab, Benaya, Obed Edom, wey si Jiel. Iyan heini menge peretukar te menge lira wey menge alpa.
1CH 16:6 Ne is menge memumuhat he si Benaya wey si Jahaziel ne iyan tigpezaǥing layun te menge trumpita zutun te etuvangan te Kavan te Kebpekid-uyun te Megbevayà.
1CH 16:7 Haazà he andew te nehuna he timpu, imbeǥey ni David diyà te ki Asaf wey ziyà te zuma zin he menge Levihanen heini is kanta te kebpeselamat diyà te Nengazen:
1CH 16:8 Peselemati niw is Nengazen; simbaha niw sikandin! Tudtula niw ziyà te menge etew is menge vaal zin.
1CH 16:9 Kentahi niw sikandin te menge kedalig; ipenudtul niw is langun he egkein-inuwan he menge vaal zin.
1CH 16:10 Deliǥa niw is kegkewaǥas din. Kelipey kew is midangep diyà te kandin.
1CH 16:11 Sarig kew te Nengazen wey te zesen din. Layun kew zangep diyà te kandin.
1CH 16:12 Sikiyu is menge pinilì te Megbevayà wey menge kevuwazan ni Israel he suluǥuen te Megbevayà, he iyan si Jacob, tentenuzi niw is menge egkein-inuwan he menge vaal zin, wey is menge kedhukum din.
1CH 16:14 Iyan sikandin kes Nengazen he Megbevayè tew, ne edhukuman din is tivuuk he kelibutan.
1CH 16:15 Edtentenuzan din layun is kebpekid-uyun din. Kenè din edlipatan is menge saad din taman te taman.
1CH 16:16 Heini is kebpekid-uyun din, midhimu zin diyà te ki Abraham ne insaad din daan diyà te ki Isaac.
1CH 16:17 Ne impelaus din heini he kebpekid-uyun din diyà te ki Jacob, he migngezanan daan ki Israel, ne heini is kebpekid-uyun din ebpedayun te taman te taman.
1CH 16:18 Migkaǥi sikandin diyà te kada sevaha kandan te, “Ibeǥey ku kenikew is tanà he Canaan ne egkepengevilin nu heini wey te menge kevuwazan nu.”
1CH 16:19 Dengan deisey zà is menge etew te Megbevayà, ne menge lumelengyawè pa sikandan diyà te tanà he Canaan.
1CH 16:20 Midhalinhalin sikandan diyà te menge nasyun wey menge ginhedian.
1CH 16:21 Piru wazà medtuǥut is Megbevayà he edèdaaǥen sikandan. Para mepengelangi sikandan, midawey zin is menge hadì he ebpekigkuntada kandan. Migkaǥi sikandin te,
1CH 16:22 “Kenè niw kevuta is menge pinilì ku he menge suluǥuen; kenè niw pesipelahi is menge ebpeneuven ku.”
1CH 16:23 Sikiyu is menge etew te tivuuk he kelibutan, kentahi niw is Nengazen. Tudtula niw kada andew is mehitenged te kedlibriya zin kenitew.
1CH 16:24 Ipetueni niw ziyà te langun he menge etew ziyà te menge nasyun is kegkemekeǥeǥehem din wey is egkein-inuwan he menge vaal zin.
1CH 16:25 Su mekeǥeǥehem is Nengazen, ne ereg sikandin he edeliǥen. Dait sikandin he edtehuzen lavew te langun he zuma he menge ed-ezapen,
1CH 16:26 su is langun he menge ed-ezapen te menge etew ziyà te zuma he menge nasyun, ne menge ledawan he mibeelan dan dà, piru iyan is Nengazen mibaal te langit.
1CH 16:27 Diyà te kandin is kegkemekeǥeǥehem wey kegkelavew, ne is desen wey kelipey ne ziyà te ubpeey zin.
1CH 16:28 Sikiyu is menge etew ziyà te menge nasyun, deliǥa niw is Nengazen. Deliǥa niw is gehem din wey zesen din.
1CH 16:29 Deliǥa niw is kegkemeǥeǥehem din, ne uwit kew te pemuhat diyà te etuvangan din. Azap kew kandin diyà te segradu he etuvangan din.
1CH 16:30 Sikiyu is menge etew kayi te tivuuk he kelibutan, medtahud kew kandin diyà te etuvangan din. Melig-en is kedsevuka zin te kelibutan ne kenà heini egkewaleng.
1CH 16:31 Medlipey is langit wey is kelibutan. Penudtula zan diyà te menge nasyun is “Midhadì is Nengazen.”
1CH 16:32 Mebpurung daan medlipey is menge zaǥat, menge vevesukà, wey is langun he netaǥù kayi.
1CH 16:33 Is menge kayu ziyà te ketelunan megkanta te kelipey ziyà te etuvangan te Nengazen. Su ebpekeuma sikandin is edhukum te menge etew kayi te kelibutan.
1CH 16:34 Peselemati is Nengazen te keupiya zin; wazà pidtemanan te gaǥew zin.
1CH 16:35 Hangyù kew te, “Libriya key, Megbevayà he Menluluwas dey; geuza key puun te menge nasyun ne umana key tiǥuma ziyà te tanè dey, su para mekepeselamat key wey mekezalig key te kegkewaǥas nu.
1CH 16:36 Edeliǥen is Nengazen he Megbevayà te Israel te wazà pidtemanan.” Ne midtavak dutun is langun he menge etew zutun te, “Amen.” Ne midalig dan is Nengazen.
1CH 16:37 Insarig ni David ki Asaf wey ziyà te menge iring din he Levihanen is kebpenilbi layun dutun te etuvangan te Kavan te Kebpekid-uyun te Nengazen, sumalà te buluhaten dutun kada andew.
1CH 16:38 Ragkes daan kayi si Obed Edom he anak ni Jedutun, si Hosa, wey 68 pa he menge Levihanen, he iyan ebantey te ǥemawan te Tulda.
1CH 16:39 Insarig daan ni David ki Zadok he memumuhat wey te menge iring din he menge memumuhat is Tulda te Nengazen diyà te metikang he lugar ziyà te Gibeon.
1CH 16:40 Iyan sikandan layun ebpemuhat te pemuhat he edtutungen dutun te pemuhatà maandew wey mezukilem, sumalà te langun he ingkesurat duen te kesuǥuan te Nengazen he imbeǥey zin te Israel.
1CH 16:41 Duma zan daan dutun si Heman, si Jedutun, wey is duma he nepilì he egkanta, te kebpeselamati te Nengazen tenged te gaǥew zin he wazà pidtemanan.
1CH 16:42 Ketengdanan ni Heman wey ni Jedutun is kebpezaǥing te menge trumpita, wey menge simbal, wey is duma pa he menge gamit he egemiten te kegkanta te menge kentahan para te Nengazen. Is menge anak ni Jedutun iyan impevantey zutun te ǥemawan.
1CH 16:43 Ne nemen-ulì is langun diyà te menge valey zan, ne si David ne mid-ulì daan su mibpenuvazan din is pemilya zin.
1CH 17:1 Hein diyè en med-ubpà si David te turuǥan din, ne migkeǥiyan din is ebpeneuven he si Natan te, “Kayi e en med-ubpà te utew mekempet he turuǥan he kayu he sidru is inhiman duen, piru haazà is Kavan te Kebpekid-uyun te Nengazen ne ziyè dà te tulda.”
1CH 17:2 Midtavak si Natan diyà te ki David te, “Beeli nu is egkesuatan nu te ebaal, su is Megbevayà eduma kenikew.”
1CH 17:3 Piru te haazà he kezukileman mibpekidlalag is Megbevayà diyà te ki Natan,
1CH 17:4 “Genat ka, ne keǥiyi is suluǥuen ku he si David he iyan heini migkaǥi ku: ‘Kenè ka iyan ebpehitindeg te valey he ed-ubpaan ku.
1CH 17:5 Wazè e pa mekeubpà te valey he zutun a ed-ezapa is Megbevayà puun pa te timpu te kebpeǥewasa ku te menge Israilihanen puun te Ehipto taman guntaan. Nekehalinhalin ad is diyà ed-ubpà te tulda.
1CH 17:6 Te kedhalinhalin ku he zuma ku is menge etew ku he Israilihanen, wazà ad megkaǥi ziyà te menge pengulu he midsuǥù ku te ked-elima kandan te, maan is wazè e zan tukuzi te utew mekempet he valey he zutun a ed-ezapa he sidru is menge pengawid din.’ ”
1CH 17:7 “Keǥiyi nu pa si David he iyan a, is Nengazen he Mekeǥeǥehem, egkaǥi te, ‘Mibantey ke zà dengan te menge kerehidu, piru mibpilì ku sikew he edumala te menge etew ku he Israilihanen.
1CH 17:8 Midumahan ku sikew minsan hendei ka mebpevayà, ne impezaag ku kenikew is langun he kuntada nu. Guntaan edhimuwen ku sikew he mevantug iring te zuma he menge etew he egkevantug diyan te tivuuk he kelibutan.
1CH 17:9 Mibeǥayan ku en is menge etew ku he Israilihanen te ubpeey he pirmeninti, para zuen dan en keugelingen he ubpeey he wazè en ebpekesamuk kandan wey ebpekezaagdaag iring duen te nehuna,
1CH 17:10 puun pa te timpu te kedsevuki ku te menge pengulu te menge etew ku he Israilihanen. Edaaǥen ku is langun he menge kundata nu David. Iyan a, is Nengazen egkaǥi kenikew he edhadì layun is sevaha te menge kevuwazan nu.
1CH 17:11 Emun ebpatey kad ne idleveng ka zuma te menge kepuun nu, ibpuli ku kenikew is sevaha te menge anak nu, ne edlig-enan ku is ginhedian din.
1CH 17:12 Iyan sikandin ebangun te valey para kedì, wey edsigureduwen ku he is menge kevuwazan din ebpekahadì taman te taman.
1CH 17:13 Ne iring a te amey zin, ne iring daan sikandin te anak ku. Kenà egkehalin is kebmahala ku kandin, kenà iring te mibeelan ku ki Saul he nepuliyan nu he hadì.
1CH 17:14 Iyan sikandin ibpezumala ku te menge keet-etawan ku wey ginhedian ku, ne is menge kevuwazan din ne edhadì te taman te taman.’ ”
1CH 17:15 Midtudtul ni Natan ki David is langun he impezayag te Megbevayà diyà te kandin.
1CH 17:16 Dutun midseled si Hadì David dutun te Tulda he zutun kes Kavan te Kebpekid-uyun. Ne mibpinuu sikandin diyà te etuvangan te Nengazen ne mibpengemuyù te, “He Nengazen he Megbevayà, hentei e ves wey is pemilya ku maan is midtuvazan a kenikew te iring kayi?
1CH 17:17 He Megbevayà, duen pa insaad nu he edtelinguma te pemilya ku. Midhimu a kenikew he utew dungganen he etew. He Nengazen he Megbevayà,
1CH 17:18 wazè en egkekaǥi ku kayi te kebeǥayi nu kedì te zengeg. Su netuenan nu en man ke hentei a is suluǥuen nu.
1CH 17:19 He Nengazen, tenged kedì te suluǥuen nu wey tenged te iyan egkesuatan nu, midhimu nu heini is dekelà he menge vaal ne impetuenan nu kediey.
1CH 17:20 Wazà iyan ebpekerepeng kenikew, Nengazen, wey wazè en minsan hentei pa he Megbevayà gawas kenikew. Wazè dey nezineg he megbevayà he iring kenikew.
1CH 17:21 Wey wazè en daan menge etew he iring te keet-etawan nu he menge Israilihanen. Iyan dà heini nasyun kayi te kelibutan he midluwas nu te kegkeuripen wey mehimu he keet-etawan nu. Nehimu ka he ventuǥan tenged te ǥehem nu wey egkein-inuwan he menge vaal nu hein midsegseg nu is menge etew ziyà te menge nasyun pinaaǥi te menge keet-etawan nu he midluwas nu puun te Ehipto.
1CH 17:22 Midhimu nu is menge Israilihanen he keet-etawan nu te wazà pidtemanan, wey iyan ka, Nengazen he Megbevayè dan.
1CH 17:23 Ne ǥuntaan, Nengazen, tumana nu is menge saad nu kedì te suluǥuen nu wey te pemilya ku, para mehitavù heini, ne iyan ka mevantug te wazà pidtemanan. Ne egkaǥi is menge etew te, ‘Is Nengazen he Mekeǥeǥehem iyan Megbevayà te Israel.’ Ne is kedhadì te pemilya ku ebpedayun taman te taman.
1CH 17:25 Duen ku kevurut te kebpengemuyù kayi ziyà te kenikew, tenged te impahayag nu kedì te suluǥuen nu he layun duen egkehimu he hadì he sevaha te menge kevuwazan ku.
1CH 17:26 “He Nengazen, iyan ka kes tutuu he Megbevayà. Insaad nu heini is menge meupiya kedì te suluǥuen nu.
1CH 17:27 Ne ǥuntaan ingkelipey nu is kedtuvazi nu te pemilya ku para mekepedayun heini taman te wazà ketepusan diyà te etuvangan nu. Emun edtuvad ka Nengazen, is kedtuvad nu wazà pidtemanan.”
1CH 18:1 Hein huziyan he timpu nezaag ni David is menge Filistihanen, ne nesakup din en sikandan. Naaǥew zin diyà te kandan is Gat wey is menge lugar he nemekelingut kayi.
1CH 18:2 Nezaag daan ni David is menge Moabitanhen, wey midsakup din sikandan ne ebayad dan te vuhis diyà te kandin.
1CH 18:3 Nekidtebek daan si David ki Hadì Hadadezer he hadì te Zoba he uvey te Hamat, su si Hadadezer, edsekupen din pezem is tanà he uvey te Wahig he Eufrates.
1CH 18:4 Naaǥew eni David is 1,000 he menge kerwahi zan, 7,000 he ebpemen-untud te kerwahi wey 20,000 he menge sundaru. Mibpemiangan eni David haazà is menge kudà he eguyud te kerwahi gawas te 100 he insamè din su egemiten din.
1CH 18:5 Hein nemekeuma is menge tig-Aram he ziyà ebpuun te Damascus su edtavang ki Hadadezer, mibpenhimetayan eni David is 22,000 kandan.
1CH 18:6 Mibpevaal si David te menge kampu ziyà te Damascus, he lugar te menge Aramihanen. Ne nehimu en he nesakup din sikandan, ne ebayad dan te vuhis diyà te kandin. Impezaag si David te Nengazen, minsan hendei sikandin ebpevayà is ebpekidtebek.
1CH 18:7 Migkuwa ni David is menge vulawan he menge kelasag te menge upisyal ni Hadadezer, ne mid-uwit din diyà te Jerusalem.
1CH 18:8 Migkuwa zin daan is mezakel he menge brunsi ziyà te Teba wey Cun, he menge sakup te inged ni Hadadezer. Heini he menge brunsi, ne migamit ni Solomon ne mibpeveelan din he teleǥuey te wahig he henduen be te kawà he egngezanan te Daǥat, wey menge tukud, wey menge gelemiten he brunsi he para egemiten duen te valey te Nengazen.
1CH 18:9 Ne netuenan heini ni Hadì Tou he hadì te Hamat he nezaag ni David is langun he sundaru ni Hadì Hadadezer he hadì te Zoba.
1CH 18:10 Umbe, impehendiyè din is anak din he si Hadoram te ki Hadì David te kebpengemusta kandin wey kebeǥey kandin te zengeg tenged te kezeeǥan din ki Hadadezer te kebpekidtebek. (Heini si Tou wey si Hadadezer ne neuǥet en he telekuntada.) Mid-uwit si Hadoram te menge azen he vulawan, pelata, wey brunsi he igasa zin.
1CH 18:11 Inhalad heini ni Hadì David diyà te Nengazen, iring ded te mid-ulaula zin te nengaaǥew zin he menge pelata, menge vulawan, diyà te zuma he menge nasyun he nengezaag din he iyan is: Edom, Moab, Ammon, Filistia wey Amalek.
1CH 18:12 Si Abishai he anak ni Zeruya nekepatey te 18,000 he menge Edomanhen diyà te menge suǥud he egngezanan te Timus.
1CH 18:13 Mibpevaal si David te menge kampu ziyà te Edom, ne nehimu he menge sakup din is langun he menge Edomanhen. Impezaag te Nengazen si David minsan hendei sikandin ebpevayà is ebpekidtebek.
1CH 18:14 Nehimu he hadì si David te tivuuk he Israel, ne mibeelan din is metazeng wey hustu para te langun he menge etew zin.
1CH 18:15 Ne iyan pengulu te menge sundaru zin, si Joab he anak ni Zeruya. Ne iyan midseriǥan te menge libru te ginhedian din si Jehoshafat he anak ni Ahilud.
1CH 18:16 Is lavew he menge memumuhat ne iyan si Zadok he anak ni Ahitub wey si Ahimelec he anak ni Abiatar. Ne iyan sikritaryu si Shavsha.
1CH 18:17 Is pengulu te tigbantey ki David he menge Kiritnen wey menge Pilitnen, iyan si Benaya he anak ni Jehoyada. Ne is menge anak ni David he menge maama, iyan upisyal zin.
1CH 19:1 Dutun te huziyan he timpu, minatey si Nahash he hadì te menge Amunihanen. Ne is anak din he si Hanun iyan nekeilis kandin te kedhadì.
1CH 19:2 Migkaǥi si David te, “Ibpeehè ku ki Hanun is meupiya he kebpekidepitè ku kandin tenged te meupiya zaan is kebpekidepità te amey zin kedì.” Umbe impehendiyà ni David is menge upisyal para ibpeehè din is kebpekid-unung din te kelised ni Hanun dutun te kebpatey te amey zin. Piru hein nekeume en haazà is menge upisyal ni David diyà te ki Hanun diyà te tanà te menge Amunihanen,
1CH 19:3 migkaǥi is menge upisyal te menge Amunihanen diyà te ki Hanun te, “Kunaan nu vuwa ke egketenuzan ni David is amey nu kayi te kedsuǥù din te menge etew para ed-unung kenikew te kelised? Kenà, su iyan inhendini zan su para ibpepeniid kayi te kenitew he nasyun su wey kiw zin mezezeeti?”
1CH 19:4 Ne zutun impezakep ni Hanun is menge sakup ni David ne migkiskisan is menge sumpè dan. Impetavas din daan is menge kumbalè dan puun te hawak pehendiyà te dizalem ne human ipeulì sikandan.
1CH 19:5 Egkeeled dan he ed-ulì. Hein netuenan ni David is nehitavù te menge sakup din, ne midsuǥù sikandin te menge menunudtulà he ebpekeǥiyan haazà is menge sakup din te diyè dan dà dèpa te Jerico taman te ebmelayat haazà is menge sumpè dan, ne human dan med-ulì.
1CH 19:6 Neisip te menge Amunihanen he nererengitan si David dutun te mibeelan dan. Umbe mibayad dan te menge 35,000 he libu he kilu he pelata su id-erkila zan te menge kerwahi wey menge perekerwahi, he menge tig-Aram Naharaim, Aram Maaca, wey Zoba.
1CH 19:7 Is kezakel te menge kerwahi wey menge perekerwahi 32,000. Nekidsevaha zaan kandan is hadì te Maaca wey is menge sundaru zin. Diyà heini megkampu te uvey te Medeba. Migawas daan is menge Amunihanen puun te menge inged dan su ed-andam dan daan te kebpekidtebek.
1CH 19:8 Hein nezineg heini ni David, impehendiyè din si Joab wey is langun he menge sundaru he memevurut he ebpekidtebek.
1CH 19:9 Mibpelastar en is menge Amunihanen diyà te pultahan te inged dan para te kebpekidtebek, ne is menge hadì he edlavan kandan, ne mibpelastar en daan diyà te menge suǥud.
1CH 19:10 Hein naahà ni Joab haazà is menge kuntada zan diyà te egkesineruwan dan wey ziyà te egkeiniyuǥan dan, mibpilì din is utew menge metau he sundaru te Israel ne iyan en sikandin mibpengulu te kebpekidtebek te menge Aramihanen.
1CH 19:11 Ne is nesamà dutun he menge sundaru ne impepenguluwan din ki Abishai he suled din para te kebpekidtebek te menge Amunihanen.
1CH 19:12 Migkeǥiyan ni Joab si Abishai te, “Emun egkeerangan nu he egkezaag key te menge Aramihanen ne tevangi key keniyu, ne emun daan egkeerangan dey he egkezaag kew te menge Amunihanen edtevangan dey zaan sikiyu.
1CH 19:13 Ebpekezesen kiw! Ebpekevurut kiw he ebpekidtebek para te menge keet-etawan tew wey te menge inged te Megbevayè tew. Su ebeelan te Nengazen ke hengkey is meupiya para kandin.”
1CH 19:14 Ne zutun midsurung en si Joab duma is menge sakup din, ne nekepelaǥuy is menge Aramihanen.
1CH 19:15 Hein naahà te menge Amunihanen he mibpemelaǥuy en is menge Aramihanen, mibpeleǥuyan dan daan si Abishai is suled ni Joab, ne nemeneled dan diyà te inged dan. Umbe nemen-ulì ensi Joab diyà te Jerusalem.
1CH 19:16 Hein naahà te menge Aramihanen he nezaag dan te menge Israilihanen, ne midsuǥù dan te ibpepenudtul te menge zuma zan he menge Aramihanen diyà te divaluy te wahig he Eufrates su ebpeuǥup dan. Nekeuma heini he grupu he iyan pengulu zan si Shofac he iyan peremandar te menge sundaru ni Hadadezer.
1CH 19:17 Hein netuenan haazà ni David, midtiǥum din is langun he menge sundaru te Israel para te kebpekidtebek. Ne midrapas dan te Wahig he Jordan ne mibpelastar zan he ed-etuvang te menge Aramihanen, ne zutun midtebek en sikandan.
1CH 19:18 Piru nepeleǥuyan te menge Aramihanen is menge Israilihanen. Ne 7,000 he ebpemen-untud te kerwahi is nengepatey eni David wey 40,000 he menge sundaru he ebpemenhipanew zà. Nepatey zan daan si Shofac is peremandar te menge sundaru.
1CH 19:19 Hein naahà ni Hadadezer he nezaag en sikandan te menge Israilihanen, ne nekid-emiǥu zan ki David, ne mibpesakup dan kandin. Umbe puun dutun ne kenè en ed-uǥup is menge Aramihanen te menge Amunihanen.
1CH 20:1 Neuma is timpu he iyan tinghipanew te menge hadì te kebpekidtebek, ne iyan nengegalen si Joab te menge sundaru te Israel te kebpekidtebek dan. Si David mulà ne mibpelintetaǥak dà diyà te Jerusalem. Mezeeǥen he midsurung ensi Joab diyà te tanà te menge Amunihanen. Ne midlingutan dan is Raba ne nezaag dan heini.
1CH 20:2 Ne midhendiyà si David te Raba, ne migkuwa zin kes bulawan he inkuruna te ulu te hadì te menge Amunihanen ne insuup te ulu zin. Ne is keveǥat kayi he kuruna ne menge 35 he kilu ne zuen kayi mahalen he menge vatu. Utew mezakel he menge azen is nengekuwa ni David dutun he inged.
1CH 20:3 Mid-uripen din is menge meǥinged kayi ne impemeterebahu zin he egamit te menge ǥavas, piku, wey wasey. Iyan heini mibeelan ni David dutun te menge meǥinged te langun he inged te menge Amunihanen. Ne mid-ulì si David wey is langun he menge sundaru zin diyà te Jerusalem.
1CH 20:4 Ne kegkeipus dutun, mid-uman en maan medtebek is menge Filistihanen wey menge Israilihanen, ne ziyà heini meulaula te Gezer. Kayi he tebek ne nepatey ni Sibecai he tig-Husha si Sipai he sevaha te menge kevuwazan te menge Ripanhen. Ne nezaag is menge Filistihanen.
1CH 20:5 Diyà te sevaha pa he tebek dan ne nepatey ni Elhanan he anak ni Jair si Lami he suled ni Goliat he tig-Gat. Is bangkew ni Lami ne meveǥat wey mekepal.
1CH 20:6 Mid-uman en maan medtebek is menge Filistihanen wey menge Israilihanen; diyà heini meulaula te Gat. Kayi he tebek, duen etew he utew zekelà, he tig-heenem is kemer te kada velad wey paa zin. Sevaha zaan sikandin he menge kevuwazan te menge Rafa.
1CH 20:7 Hein mid-undaunda zin is menge Israilihanen, ne midhimetayan sikandin ni Jonatan he anak te suled ni David he si Simea.
1CH 20:8 Haazà he menge Filistihanen he menge kevuwazan te menge Rafa he tig-Gat. Mibpenhimetayan sikandan ni David wey te menge sakup din.
1CH 21:1 Migkuntada ni Setanas is Israel, umbe kandin he ketau he mesinsus ni David is menge Israilihanen.
1CH 21:2 Ne migkeǥiyan ni David si Joab wey is menge peremandar te menge sundaru te, “Hipanew kew, wey niw vilanga is menge Israilihanen puun te Beersheba taman te Dan. Ne likù kew kayi su wey ku metueni ke pira sikandan langun.”
1CH 21:3 Piru midtavak si Joab te, “Berakat he ipemezakel te Nengazen heini is keet-etawan nu te 100 he takep. Piru, Mahal he Hadì, maan is egkesuatan nu te ebaal heini? Kenè be menge sakup nu man sikandan? Ne, maan is ed-uuwiten nu sikandan te salà he ebeelan nu?”
1CH 21:4 Piru iyan netuman is ki David dutun, umbe mid-elibet ni Joab is tivuuk he Israel, ne midlikù diyà te Jerusalem.
1CH 21:5 Ne midtudtul zin ki David is kezakel te menge maama he egkehimu en he ebpekidtebek: 1,100,000 is diyà te Israel ne 470,000 is diyà te Juda.
1CH 21:6 Piru wazè pa iapil ni Joab te kebilang is tribu ni Levi wey ki Benjamin su wazè din mesuati is suǥù te hadì.
1CH 21:7 Wazà daan mesuat is Megbevayà te heini he suǥù ni David, umbe midsilutan din is Israel.
1CH 21:8 Ne migkeǥiyan ni David is Megbevayà te, “Nekesalà a kayi te mibeelan ku. Umbe ebpehizuhizu a kenikew, Nengazen, he peseyluwa a kenikew is suluǥuen nu te salè ku, su kelelalung is mibeelan ku.”
1CH 21:9 Migkeǥiyan te Nengazen si Gad he menenagnà ni David te,
1CH 21:10 “Hendiyè ka te ki David ne ipepilì nu sikandin ke hendei zapit kayi te tetelu is egkesuatan din he idsilut ku kandin.”
1CH 21:11 Ne midhendiyà si Gad te ki David ne migkeǥiyan din te, “Hendei kayi is egkesuatan nu:
1CH 21:12 Tetelu he tuig he vitil, tetelu he vulan he kedèdeeti keniyu te menge kuntada niw, etawa tetelu he andew he pigada he ebpuun te Nengazen pinaaǥi te kedsuruy te velinsuǥuen te Nengazen he ebpendezaat diyà te tivuuk he tanà te Israel. Pilì ka wey keǥiya nu kedì ke hengkey is idtavak ku te Nengazen he midsuǥù kedì.”
1CH 21:13 Midtavak si David diyà te ki Gad te, “Egkereǥenan a utew te kebpilì. Deyzey pa ke iyan en is Nengazen edsilut kediey ne kenà iyan is etew su hihizuwen utew is Nengazen.”
1CH 21:14 Umbe, mibpaaǥi is Nengazen te kezeetan diyà te Israel, ne 70,000 he menge Israilihanen is mibpematey.
1CH 21:15 Ne midsuǥù daan is Megbevayà te velinsuǥuen diyà te Jerusalem para te kebpendezaat, piru zutun te kemulu en heini ebpendezaat nahalin is isip te Nengazen. Ne migkeǥiyan din haazà is belinsuǥuen he ebpendezaat te menge etew te, “Hustu en! Kenè nu en sikandan siluti.” Haazà he timpu ne diyà medhitindeg haazà is belinsuǥuen te Nengazen te gunasà ni Arauna he Jebusihanen.
1CH 21:16 Midlingahà si David ne neehè din is belinsuǥuen te Nengazen he midhitendeg diyà te hewhewanan, he teliwazà te langit wey tanà he egawed te lembitan he ebpeketezù diyà te Jerusalem. Ne midluhud si David wey haazà is menge ebpemendumala te Israel, he mibpengukumbalà te saku he tuus te kedlalew zan.
1CH 21:17 Migkeǥiyan ni David is Megbevayà te, “Iyan a midsuǥù he ibpepenlista is menge etew. Iyan a nekesalà. Heini he menge etew ne wazè dan peleng he iring te menge kerehidu. Wazè dan neveelan he salà. He Nengazen he Megbevayè ku, iyan e en siluti wey is pemilya ku. Kenè nu ipaantus heini is keet-etawan nu kayi te kemereǥenan.”
1CH 21:18 Ne midsuǥù te velinsuǥuen te Nengazen si Gad he keǥiyi zin si David he medtekezeg diyà te gunasà ni Arauna he Jebusihanen ne mebaal sikandin dutun te pemuhatà para te Nengazen.
1CH 21:19 Ne midtekezeg si David sumalà is insuǥù kandin te Nengazen pinaaǥi ki Gad.
1CH 21:20 Haazà he timpu, ne egunas si Arauna wey heepat he menge anak din he menge maama te trigu. Ne hein neehè dan haazà is belinsuǥuen te Nengazen nemelaǥuy wey nemen-eles haazà is heepat he menge anak ni Arauna.
1CH 21:21 Ne naahà ni Arauna he ebpelingguma si David. Ne mid-awà sikandin dutun te gunasà ne midluhud diyà te etuvangan ni David he tuus te midtahud din sikandin.
1CH 21:22 Migkeǥiyan ni David sikandin te, “Ivelegyè nu kedì heini is gunasè nu para ebpehitindeǥan ku te pemuhatà para te Nengazen, wey meengked en is kedlimasa te menge etew. Ebeyazan ku sikew ke pira is bali kayi.”
1CH 21:23 Migkaǥi si Arauna ziyà te ki David te, “Uya, kuwaa nud, Mahal he Hadì. Beeli nu ke hengkey is meupiya para kenikew. Ebeǥayan ku pa sikew te vaka para te ibpemuhat nu he pemuhat he edtutungen, menge kangga he egemiten te eǥunas he para idtavun, wey trigu he pemuhat he para gasa. Uya, ibeǥey ku heini langun kenikew he wazà bayad.”
1CH 21:24 Piru midtavak si Hadì David ki Arauna, “Kenè ku heini edewaten he wazà bayad. Ebeyazan ku sikew ke pira is bali kayi. Kenè ku egkehimu he egkuwaan ku zà heini ziyà te kenikew he idhalad diyà te Nengazen. Kenà a ebpemuhat te pemuhat he edtutungen he wazà bali kayi te kedì.”
1CH 21:25 Umbe, mibeyazan ni David si Arauna te 600 he vuuk he vulawan he para zutun he lugar.
1CH 21:26 Ne mibaal sikandin dutun te pemuhatà para te Nengazen ne nemuhat sikandin te menge pemuhat he edtutungen wey menge pemuhat he para te meupiya he kedepità. Ne mid-ampù sikandin. Ne midtavak sikandin te Nengazen pinaaǥi te kebpevulus te hapuy he ebpuun te langit te kedtutung dutun te menge pemuhat dutun te pemuhatà.
1CH 21:27 Ne migkeǥiyan te Nengazen haazà is belinsuǥuen te ilikù din en haazà is lembitan din dutun te gumè din.
1CH 21:28 Hein naahà ni David he midtavak te Nengazen is menge ked-ampù din, ne mid-uman pa sikandin mebpemuhat te menge pemuhat diyà te gunasà ni Arauna he Jebusihanen.
1CH 21:29 Haazà he timpu, kes Tulda te Nengazen wey kes pemuhatà para te menge pemuhat he edtutungen he mibpeveelan ni Moises diyà te sibsivayan ne ziyà te metikang he lugar te Gibeon.
1CH 21:30 Piru kenà ebpekehendiyà si David te kebpenginginsà te Megbevayà, su nahandek sikandin dutun te lembitan te velinsuǥuen te Nengazen.
1CH 22:1 Ne migkaǥi si David te, “Kayi he lugar edtukuza is baley te Nengazen he Megbevayà wey pemuhatà para te menge ibpemuhat te menge Israilihanen he edtutungen.”
1CH 22:2 Midsuǥù si David he meburunburun is kenà menge Israilihanen he zutun med-ubpà te Israel, ne mibpilì sikandin dutun te kandan te metau he ebasbas te menge vatu para te valey te Megbevayà.
1CH 22:3 Mibeǥey si David te utew mezakel he menge putew he ebeelan he menge ransang wey menge bisagra para te menge ǥemawan, wey mezakel he menge brunsi he kenè en egketimbang tenged te keveǥat din.
1CH 22:4 Mibeǥey zaan sikandin te menge kayu he sidru he kenè en egkevilang tenged te kezakel zin. Heini he menge kayu, ne mid-uwit te menge tig-Sidon wey menge tig-Tyre ziyà te kandin.
1CH 22:5 Migkaǥi si David te, “Betan-en pa is anak ku he si Solomon ne wazè din pa utew hanew. Kinahanglan he mekempet wey egkevantug kayi te tivuuk he kelibutan is edtukuzen he valey te Nengazen. Umbe edteǥenahan ku heini ǥuntaan.” Umbe mibpurungan heini pengendami ni David hein wazè pa sikandin mebpatey.
1CH 22:6 Ne impetawag ni David sikan is anak din he si Solomon, ne midsuǥù din te kabangun te valey te Nengazen he Megbevayà te Israel.
1CH 22:7 Migkeǥiyan ni David si Solomon te, “He mama, egkesuatan ku pezem he edtukud te valey te Nengazen para te kegkeveyawa te ngazan te Nengazen he iyan Megbevayè ku.
1CH 22:8 Piru iyan heini migkaǥi zin kedì: ‘Utew mezakel he menge etew is nengepatey nu te memeinit he neseǥazan nu he kebpekidtebek. Umbe kenè ka iyan edtukud te valey para te kegkeveyawa te ngazan ku.
1CH 22:9 Piru ebeǥayan ku sikew te anak he maama he edhadì he melinawen su kenà sikandin edsemuken te langun he menge kuntada zin he nekelingut kandin. Iyan ngazan din si Solomon, su ebeǥayan ku te kelinew is Israel dutun te kedhadì din.
1CH 22:10 Iyan sikandin edtukud dutun te valey ku para te kegkeveyawa te ngazan ku. Edhimuwen ku sikandin he anak ku, ne egkehimu a zaan he amey zin. Ne is menge kevuwazan din ne egkehimu he hadì te Israel te wazè en pidtemanan.’
1CH 22:11 “Umbe mama, berakat he iyan is Nengazen eduma kenikew wey mebmelempusen ka te kedtukuza nu te valey te Nengazen he Megbevayè nu, sumalà te migkaǥi zin he ebeelan nu.
1CH 22:12 Berakat he veǥayi ka te Nengazen he Megbevayè nu te ketau wey kedsavut wey nu meveeli is menge kesuǥuan din te timpu he iyan ke zin en ibpezumala te tivuuk he Israel.
1CH 22:13 Ne emun egkepurung nu egketuman is menge suǥù wey menge sulunuzen he imbeǥey zin te Israel pinaaǥi ki Moises, ne ebmelempusen ka. Umbe mebpekelig-en ka wey mebpekevurut ka. Kenè ka mahandek wey mebpenluyaluya.
1CH 22:14 Midheǥuan ku is kedteǥana te menge egkeǥamit kayi te kedtukuza te valey te Nengazen–3,500 he tunilada he vulawan, 35,000 he tunilada he pelata, wey mezakel pa he menge brunsi wey menge putew he kenè en egketimbang tenged te keveǥat dan. Midteǥana a zaan te menge kayu wey menge vatu, piru kinahanglan he umani nu pa heini.
1CH 22:15 Mezakel is egkekuwa nu he ibpemeterebahu nu: duen ebpemasbas te vatu, menge tigsimintu, menge pandey, wey mezakel pa he menge etew he zuen menge netuenan te minsan hengkey he kedterebehuwa,
1CH 22:16 te vulawan, pelata, brunsi, wey putew. Umbe ǥuntaan, puun ke en peterebahu ne verakat he zumahi ke te Nengazen.”
1CH 22:17 Ne zutun migkeǥiyan ni David is langun he menge pengulu te Israel he uǥupi zan si Solomon he anak din.
1CH 22:18 Migkaǥi sikandin diyà te kandan te, “Iyan duma niw is Nengazen he Megbevayè niw wey mibeǥayan kew zin te kelinew su wazè kew mekepekidtebek te nekeliǥuy keniyu he menge etew. Su imbeǥey zin kedì is langun he ed-ubpà kayi he tanà, ne ǥuntaan ne iyan en teǥiǥaked kayi is Nengazen, ne nesakup tew en heini te keet-etawan din.
1CH 22:19 Umbe ǥuntaan, uvey kew te Nengazen he iyan Megbevayè niw te tivuuk he ǥehinawa wey kedsavut niw. Puuni niw en is kedtukuza te valey te Nengazen he Megbevayà para ikesavuk niw en dutun kes Kavan te Kebpekid-uyun te Nengazen wey kes menge segradu he menge gelemiten te Megbevayà keniyan te valey te Nengazen he midtukud para te kegkeveyawa te ngazan din.”
1CH 23:1 Hein meǥurang en si David, midhimu zin he hadì is anak din he si Solomon.
1CH 23:2 Miburunburun din is langun he menge pengulu te Israel, ragkes is menge memumuhat wey is menge Levihanen.
1CH 23:3 Mibilang is menge Levihanen he ebpenuiǥen te 30 pehendiyà te metikang, ne is kezakel zan ne 38,000.
1CH 23:4 Migkaǥi si David te, “Is 24,000 kandan ne iyan edseriǥan te menge ebeelan dutun te valey te Nengazen, ne is 6,000 ne iyan menge upisyal wey menge menhuhusey.
1CH 23:5 Is 4,000 ne iyan ebantey te menge ǥemawan te valey te Nengazen, ne is 4,000 pa ne iyan sikandan tigdalig te Nengazen pinaaǥi te menge gelemiten te kedtukar he mibpeveelan ku para te heini he vuluhaten.”
1CH 23:6 Mibahin ni David te tetelu he grupu haazà is menge Levihanen sumalà is menge kepuun te menge anak ni Levi he si Gershon, Kohat, wey si Merari.
1CH 23:7 Is menge anak ni Gershon ne iyan si Ladan wey si Simei.
1CH 23:8 Si Ladan ne zuen tetelu he anak din he menge maama he iyan si Jehiel he iyan lavew he pengulu te pemilya zan, is sunud ne si Zetam wey si Joel.
1CH 23:9 Iyan heini sikandan menge pengulu te menge pemilya ni Ladan. Si Shimei ne tetelu zaan is anak din he menge maama he iyan si Shelomot, Haziel, wey si Haran.
1CH 23:10 Duen huziyan he heepat he anak ni Shimei he menge maama: si Jahat is lavew he pengulu te pemilya zan, is ikezuwa si Zina, sunud si Jeush wey si Beria. Deisey zà is menge anak ni Jeush wey ni Beria, umbe is ked-isipa kandan, ne senge pemilya zan dà.
1CH 23:12 Si Kohat ne zuen heepat he anak din he menge maama he iyan si Amram, Izhar, Hebron, wey si Uziel.
1CH 23:13 Is menge anak ni Amram he menge maama, ne iyan si Aaron wey si Moises. Insivey si Aaron wey is menge kevuwazan din he para te kebpehinungud te menge segradu he menge vutang, te kebpemuhat te menge pemuhat diyà te Nengazen, te kebpenilbi kandin, wey kebpenuvadtuvad te menge etew pinaaǥi te ngazan te Nengazen. Iyan heini ketengdanan dan taman en te taman.
1CH 23:14 Is menge maama he anak ni Moises te suluǥuen te Megbevayà neragkes dutun te menge Levihanen.
1CH 23:15 Is menge anak din he maama he si Gershon wey si Eliezer.
1CH 23:16 Is sevaha zutun te menge anak ni Gershon, ne si Shebuel he lavew he pengulu te pemilya zan.
1CH 23:17 Si Eliezer, sevaha zà is anak din he maama he si Rehabia he iyan lavew he pengulu te pemilya zan. Utew mezakel is menge kevuwazan ni Rehabia.
1CH 23:18 Is sevaha te menge anak ni Izhar, ne iyan si Shelomit he iyan lavew he pengulu te pemilya zan.
1CH 23:19 Is menge anak ni Hebron he menge maama, ne iyan si Jeria (is lavew he pengulu te pemilya zan), si Amaria is ikezuwa, si Jahaziel is iketulu, ne si Jekameam is ikeepat.
1CH 23:20 Is menge anak ni Uziel he menge maama, ne iyan si Micas, is lavew he pengulu te pemilya zan, ne ikezuwa si Ishia.
1CH 23:21 Is menge anak ni Meron he menge maama, ne iyan si Mali wey si Mushi. Is menge anak ni Mali he menge maama ne si Eleazar wey si Kish.
1CH 23:22 Minatey si Eleazar he wazè en mekeanak te maama, menge vahi zà. Iyan heini sikandan mid-esawa te menge id-aǥew zan he menge anak ni Kish.
1CH 23:23 Si Mushi ne tetelu is anak din he menge maama he iyan si Mali, si Eder, wey si Jeremot.
1CH 23:24 Iyan heini menge kevuwazan ni Levi sumalà te menge pengulu ziyà te pemilya zan. Nelista is menge ngazan te kada sevaha kandan. Iyan dà neragkes dutun is ed-idad te 20 pehendiyà te metikang he ebpekepenilbi zuen te valey te Nengazen.
1CH 23:25 Migkaǥi si David te, “Mibeǥayan kiw te Nengazen he Megbevayà te Israel, te kelinew ne ziyà sikandin ed-ubpà te Jerusalem taman te wazà pidtemanan.
1CH 23:26 Umbe, kenè en kinahanglan he ed-uwiten pa te menge Levihanen sikan is Tulda he Ed-ezapan wey is menge ǥelemiten dutun.”
1CH 23:27 Sumalà te ketepusan he suǥù ni David, is langun he menge Levihanen he ebpenuiǥen te 20 he tuig pehendiyà te metikang ne inlista para te kebpenilbi.
1CH 23:28 Is ketengdanan te menge Levihanen ne iyan is ked-uǥup te menge memumuhat he menge kevuwazan ni Aaron para edterebahu zutun te valey te Nengazen. Iyan sikandan ed-etiman te lama zuen te valey te Nengazen wey te menge ruǥu ziyà te menge kilid, wey sikandan daan is ed-uǥup te menge tulumanen te kebpenlumpiyu wey te zuma pa he menge vuluhaten dutun te valey te Megbevayà.
1CH 23:29 Iyan daan sikandan midseriǥan duen te segradu he supas he idsavuk diyà te lemisahan, te herina he para te menge pemuhat he para gasa, te supas he wazè din tapey, wey te zuma pa he edhilutuen wey ibpedsesahug. Iyan daan sikandan midseriǥan te kedtimbang wey kedtakes te langun he menge pemuhat.
1CH 23:30 Ketengdanan dan daan is kedhitindeg dutun te valey te Nengazen te kebpeselamat wey kedalig te Nengazen kada meselem wey kada mezukilem.
1CH 23:31 Sikandan daan is ed-uǥup te ebpemuhat te pemuhat he edtutungen para te Nengazen te menge Andew te Kedhimeley, te Pista te Kebpuun te Hayag, wey te zuma pa he menge pista. Duen menge sulunuzen ke pira te menge Levihanen is edterebahu kayi he menge vuluhaten wey ke ebmenmenuwen dan te ebaal.
1CH 23:32 Umbe, midhimu te menge Levihanen is ketengdanan dan te ked-etiman duen te Tulda he Edtelevukaayan wey zuen te Segradu he Lugar, wey te ked-uǥup te menge kezuzumahi zan he menge memumuhat he kevuwazan ni Aaron te kebpenilbi zutun te valey te Nengazen.
1CH 24:1 Iyan heini menge grupu te menge kevuwazan ni Aaron: Is menge anak ni Aaron he menge maama, ne iyan si Nadab, Abihu, Eleazar, wey si Itamar.
1CH 24:2 Piru iyan nehuna he minatey si Nadab wey si Abihu kenà is amey zan, ne wazè dan en med-anak; umbe iyan dà si Eleazar wey si Itamar nekepenilbi pinaaǥi te kegkememumuhat.
1CH 24:3 Pinaaǥi te tavang ni Zadok he kevuwazan ni Eleazar, wey ni Ahimelec he kevuwazan ni Itamar, ne migrupu ni Hadì David is menge kevuwazan ni Aaron sumalà te menge ketengdanan dan.
1CH 24:4 Is menge kevuwazan ni Eleazar mibahin te 16 he grupu, ne is kevuwazan ni Itamar mibahin daan te walu he grupu, su mezakel is menge pengulu te pemilya te menge kevuwazan ni Eleazar.
1CH 24:5 Is langun he menge vuluhaten ne mibahin dutun te menge grupu ne midripa zan su para wazà mevintahai, su zuen menge upisyal zutun te valey te Nengazen he ebpenilbi te Megbevayà he ebpuun te menge kevuwazan ni Eleazar wey te menge kevuwazan ni Itamar.
1CH 24:6 Si Shemaya he anak ni Netanel he Levihanen ne iyan sikritaryu. Inlista zin is menge ngazan te menge memumuhat dutun te etuvangan te hadì wey te menge upisyal he si Zadok he memumuhat, si Ahimelec he anak ni Abiatar, wey te menge pengulu te menge pemilya te menge memumuhat wey menge Levihanen. Mibpulipuli he edripa is menge kevuwazan ni Eleazer wey ni Itamar.
1CH 24:7 Is nehuna he neripahan ne iyan si Jehoyarib, is ikezuwa ne si Jedaya,
1CH 24:8 is iketelu ne si Harim, is ikeepat ne si Seorim,
1CH 24:9 is ikelima ne si Malkia, is ikeenem ne si Miamin,
1CH 24:10 is ikepitu ne si Hakoz, is ikewalu ne si Abia,
1CH 24:11 is ikesiyam ne si Jeshua, is ikesepulù ne si Shecania,
1CH 24:12 is ike-11 ne si Eliashib, is ike-12 ne si Jakim,
1CH 24:13 is ike-13 ne si Hupa, is ike-14 ne si Jeshebeab
1CH 24:14 is ike-15 ne si Bilga, is ike-16 ne si Imer,
1CH 24:15 is ike-17 ne si Hezir, is ike-18 ne si Hapizez,
1CH 24:16 is ike-19 ne si Petahia, is ike-20 ne si Jehezkel,
1CH 24:17 is ike-21 ne si Jakin, is ike-22 ne si Gamul,
1CH 24:18 is ike-23 ne si Delaya, ne is ike-24 ne si Maazia.
1CH 24:19 Iyan heini sikandan mibaal te menge ketengdanan dan dutun te valey te Nengazen sumalà te menge sulunuzen he ebpuun te Nengazen he Megbevayà te Israel he imbeǥey kandan te kepuun dan he si Aaron.
1CH 24:20 Iyan heini menge pengulu te zuma he pemilya te menge kevuwazan ni Levi: Is ebpuun te menge kevuwazan ni Amram: si Shebuel. Is ebpuun te menge kevuwazan ni Shebuel: si Jedea.
1CH 24:21 Is ebpuun te menge kevuwazan ni Rehabia: si Ishia, is lavew he pengulu te pemilya zan.
1CH 24:22 Is ebpuun te menge kevuwazan ni Izhar: si Shelomot. Is ebpuun te menge kevuwazan ni Shelomot: si Jahat.
1CH 24:23 Is ebpuun te menge kevuwazan ni Hebron: si Jeria is lavew he pengulu te pemilya zan, si Amaria is ikezuwa, si Jahaziel is eketelu, ne si Jekameam is ikeepat.
1CH 24:24 Is ebpuun te menge kevuwazan ni Uziel: si Micas. Is ebpuun te menge kevuwazan ni Micas: si Shamir,
1CH 24:25 Is ebpuun te menge kevuwazan ni Ishia he suled ni Micas: si Zacarias.
1CH 24:26 Is ebpuun te menge kevuwazan ni Merari: si Mali wey si Mushi. Is ebpuun te menge kevuwazan ni Jaazia: si Beno.
1CH 24:27 Is ebpuun te menge kevuwazan ni Merari pinaaǥi ki Jaazia: si Beno, Sholam, Zacur, wey si Ibri.
1CH 24:28 Is ebpuun te menge kevuwazan ni Mali: Si Eleazar, he wazè din menge anak he menge maama.
1CH 24:29 Is ebpuun te menge kevuwazan ni Kish: si Jerameel.
1CH 24:30 Is ebpuun te menge kevuwazan ni Mushi: si Mali, Eder, wey si Jerimot. Iyan heini menge Levihanen sumalà te kandan he menge pemilya.
1CH 24:31 Iring te mibeelan te menge kevuwazan ni Aaron, midripahan dan is kegketueni zan te menge ketengdanan dan, midripa is menge vetan-en wey menge meǥurang. Diyè dan heini veeli te etuvangan ni Hadì David, ni Zadok, ni Ahimelec, wey te menge pengulu te menge pemilya te menge memumuhat wey te menge Levihanen.
1CH 25:1 Mibpilì si David wey is menge peremandar te menge sundaru te menge etew he ebpuun te menge anak ni Asaf, Heman, wey ki Jedutun. Iyan impilìa kandan su wey zan meseysey is lalag te Megbevayà he eduyuǥan te menge alpa, lira, wey menge simbal. Iyan heini menge ngazan dan he impenurat wey is menge terebahu zan:
1CH 25:2 Is ebpuun te menge anak ni Asaf he menge maama: si Zacur, Jose, Netania, wey si Asarela. Midterebahu zan he zizalem te kedumala te amey zan he si Asaf. Idseysey ni Asaf is lalag te Megbevayà emun edsuǥù is hadì.
1CH 25:3 Is ebpuun te menge anak ni Jedutun he menge maama: si Gedalia, Zeri, Jeshaya, Shimei, Hashabia, wey si Matitia, heenem dan langun. Midterebahu zan he zizalem te kedumala te amey zan he si Jedutun. Edseysey sikandan te lalag te Megbevayà he eduyuǥan te alpa, he edumahan te kebpeselamat wey kedalig te Nengazen.
1CH 25:4 Is ebpuun te menge anak ni Heman he menge maama: si Bukia, Matania, Uziel, Shebuel, Jerimot, Hanania, Hanani, Eliata, Gidalti, Romanti Ezer, Joshbekasha, Maloti, Hotir, wey Mahaziot.
1CH 25:5 Iyan heini langun menge anak ni Heman he menenagnà te hadì. Mibeǥayan sikandin te Megbevayà te zengeg pinaaǥi te kebeǥayi kandin te 14 he menge anak he menge maama wey tetelu he menge vahi, sumalà is saad te Megbevayà diyà te kandin.
1CH 25:6 Heini sikandan he menge maama, ne dizalem sikandan te kedumala te amey zan te kedtukar te menge simbal, lira wey alpa te kebpenilbi zan dutun te valey te Megbevayà. Si Asaf, Jedutun, wey si Heman ne zizalem te kedumala te hadì.
1CH 25:7 Sikandan wey is menge kezuzumahi zan, he 288 langun, memetau utew sikandan he musikiru para te Nengazen.
1CH 25:8 Midripa zan para metueni te kada sevaha kandan is terebahu zin, menge vetan-en man etawa menge meǥurang en, menunudlù man etawa ke ebpenginenau pa.
1CH 25:9 Is nehuna he neripahan te pemilya ni Asaf ne iyan si Jose wey is menge anak din he menge maama wey menge kezuzumahi zin; 12 zan langun. Ne is ikezuwa ne iyan si Gedalia wey is menge anak din wey menge kezuzumahi zin; 12 zan daan.
1CH 25:10 Is iketulu ne iyan si Zacur wey is menge anak din wey menge kezuzumahi zin; 12 zan daan.
1CH 25:11 Is ikeepat ne iyan si Izri wey is menge anak din wey menge kezuzumahi zin; 12 zan daan.
1CH 25:12 Is ikelima ne iyan si Netania wey is menge anak din wey menge kezuzumahi zin; 12 zan daan.
1CH 25:13 Is ikeenem ne iyan si Bukia wey is menge anak din wey menge kezuzumahi zin; 12 zan daan.
1CH 25:14 Is ikepitu ne iyan si Jesarela wey is menge anak din wey menge kezuzumahi zin; 12 zan daan.
1CH 25:15 Is ikewalu ne iyan si Jeshaya wey is menge anak din wey menge kezuzumahi zin; 12 zan daan.
1CH 25:16 Is ikesiyam ne iyan si Matania wey is menge anak din wey menge kezuzumahi zin; 12 zan daan.
1CH 25:17 Is ikesepulù ne iyan si Shimei wey is menge anak din wey menge kezuzumahi zin; 12 zan daan.
1CH 25:18 Is ike-11ne iyan si Azarel wey is menge anak din wey menge kezuzumahi zin; 12 zan daan.
1CH 25:19 Is ike-12 ne iyan si Hashabia wey is menge anak din wey menge kezuzumahi zin; 12 zan daan.
1CH 25:20 Is ike-13 ne iyan si Shebuel wey is menge anak din wey menge kezuzumahi zin; 12 zan daan.
1CH 25:21 Is ike-14 ne iyan si Matitia wey is menge anak din wey menge kezuzumahi zin; 12 zan daan.
1CH 25:22 Is ike-15 ne iyan si Jerimot wey is menge anak din wey menge kezuzumahi zin; 12 zan daan.
1CH 25:23 Is ike-16 ne iyan si Hanania wey is menge anak din wey menge kezuzumahi zin; 12 zan daan.
1CH 25:24 Is ike-17 ne iyan si Joshbekasha wey is menge anak din wey menge kezuzumahi zin; 12 zan daan.
1CH 25:25 Is ike-18 ne iyan si Hanani wey is menge anak din wey menge kezuzumahi zin; 12 zan daan.
1CH 25:26 Is ike-19 ne iyan si Maloti wey is menge anak din wey menge kezuzumahi zin; 12 zan daan.
1CH 25:27 Is ike-20 ne iyan si Eliata wey is menge anak din wey menge kezuzumahi zin; 12 zan daan.
1CH 25:28 Is ike-21 ne iyan si Hotir wey is menge anak din wey menge kezuzumahi zin; 12 zan daan.
1CH 25:29 Is ike-22 ne iyan si Gidalti wey is menge anak din wey menge kezuzumahi zin; 12 zan daan.
1CH 25:30 Is ike-23 ne iyan si Mahaziot wey is menge anak din wey menge kezuzumahi zin; 12 zan daan.
1CH 25:31 Is ike-24 ne iyan si Romanti Ezer wey is menge anak din wey menge kezuzumahi zin; 12 zan daan.
1CH 26:1 Iyan heini menge grupu te menge ebantey te menge ǥemawan dutun te valey te Nengazen. Is ebpuun te pemilya ni Kora, si Meshelemia he anak ni Kore he sakup te pemilya ni Asaf,
1CH 26:2 wey pitu he anak din he menge maama, ne iyan si Zacarias is kinekekayan, sunud si Jediel, Zebadia. Jatniel,
1CH 26:3 Elam. Jehohanan, wey si Eliehoenai
1CH 26:4 Si Obed Edom wey kes walu he menge anak din he menge maama he iyan si Shemaya is kinekekayan, sunud si Jehozabad, Joa, Sacar, Netanel,
1CH 26:5 Amiel, Isacar, wey si Peuletai. Midtuvazan te Megbevayà si Obed Edom.
1CH 26:6 Is kinekekayan he anak ni Obed Edom he si Shemaya duen menge anak din he menge maama he menge pengulu te menge pemilya, su zuen dan menge ketau.
1CH 26:7 Iyan heini sikandan si Otni, Refael, Obed, wey si Elzabad. Is kezuzumahi zan he si Elihu wey si Semakia, ne zuen dan daan menge ketau.
1CH 26:8 Iyan heini langun menge kevuwazan ni Obed Edom. Sikandan wey is menge anak dan wey menge kezuzumahi zan, ne zuen dan egkehimu wey nengetuenan he menge terebahu. Is kahabet dan 62 langun.
1CH 26:9 Is 18 he menge anak wey menge kezuzumahi ni Meshelemia, ne zuen dan daan menge ketau.
1CH 26:10 Si Hosa he ebpuun te pemilya ni Merari, ne zuen din daan menge anak. Midhimu ni Hosa si Shimri he lavew he pengulu te pemilya zan minsan te kena sikandin kinekekayan he anak.
1CH 26:11 Ne is ikezuwa ki Shimri ne si Hilkia, is iketelu ne si Tebalia, ne is ikeepat ne si Zacarias. Ne 13 is langun he menge anak wey kezuzumahi ni Hosa he menge vantey zuen te ǥemawan te valey te Nengazen.
1CH 26:12 Migrupu is menge vantey zutun te menge ǥemawan te valey te Nengazen sumalà is pengulu te pemilya zan, ne zuen dan menge ketengdanan te kebpenilbi zutun te valey te Nengazen, iring te menge iring dan he menge Levihanen.
1CH 26:13 Midripa sikandan ke hendei zapit he ǥemawan ebpekevantey is menge pemilya zan, betan-en etawa meǥurang en.
1CH 26:14 Is dapit te edsilaan, ne iyan dutun neripahan si Shelemia, ne is dapit te zizaya he ǥemawan, ne iyan neripahan dutun is anak din he si Zacarias. Heini si Zacarias ne metau he edsambag.
1CH 26:15 Ne is dapit te egkezivavà he ǥemawan ne iyan dutun neripahan si Obed Edom, ne iyan midseriǥan is menge anak din te menge budiga.
1CH 26:16 Is dapit te edsenlepan he ǥemawan wey is gemawan he beyeey te idtekezeg dutun te valey te Nengazen, ne iyan dutun neripahan si Shupim wey si Hosa. Ebpesembayè dan dutun he ebantey sumalà te midtendek dan:
1CH 26:17 Is dapit te edsilaan ne heenem is ibpevantey zutun kada andew, is dapit te zizaya ne heepat, is dapit te divavà ne heepat, ne is kada budiga ne tig-dezuwa.
1CH 26:18 Is dapit te edsenlepan ne heepat is ibpevantey te ibayà he edtekezeg dutun te valey te Nengazen, ne dezuwa is ibpevantey zutun te lama.
1CH 26:19 Iyan heini sikandan grupu te menge vantey te menge ǥemawan te valey te Nengazen he menge kevuwazan ni Kora wey ni Merari.
1CH 26:20 Is duma he menge Levihanen ne iyan midseriǥan duen te menge budiga zuen te valey te Megbevayà, ragkes en dutun is menge budiga te menge azen he inhalad diyà te Megbevayà.
1CH 26:21 Si Ladan, kevuwazan ni Gershon, ne mahabet is menge kevuwazan ni Ladan he menge pengulu zaan te kevuwazan dan.
1CH 26:22 Is menge anak ni Jehieli he si Zetam wey si Joel ne iyan midseriǥan te menge budiga zutun te valey te Nengazen.
1CH 26:23 Iyan heini menge upisyal he ebpuun te menge kevuwazan ni Amram, Izhar, Hebron, wey si Uziel: Is ebpuun te menge kevuwazan ni Amram:
1CH 26:24 si Shebuel, he kevuwazan ni Gershon he anak ni Moises, iyan pengulu he upisyal zutun te menge budiga te valey te Nengazen.
1CH 26:25 Is menge kezuzumahi zin he menge kevuwazan ni Eliezer ne iyan si Rehabia, Jeshaya, Joram, Zicri, wey si Shelomit.
1CH 26:26 Is menge budiga he zutun idtaǥù is menge inhalad ni Hadì David wey te menge pengulu te menge pemilya, te menge peremandar te menge linibu, wey te menge ginatus he menge sundaru, wey te zuma pa he menge peremandar, insarig ki Selomit wey is menge kezuzumahi zin.
1CH 26:27 Inhalad dan is duma he nengaaǥew zan te kebpekidtebek dan para egemiten dutun te valey te Nengazen.
1CH 26:28 Si Shelomit wey is menge kezuzumahi zin ne iyan ed-atur te langun he inhalad ni Samuel he ebpeneuven, ni Saul he anak ni Kish, ni Abner he anak ni Ner, wey ni Joab he anak ni Zeruya. Is duma pa he inhalad ne mid-atur zan daan.
1CH 26:29 Is ebpuun te menge kevuwazan ni Izhar: si Kenania, wey is menge anak din he menge maama, menge administradur wey menge meghuhusey te Israel. Wazè dan ketengdanan dutun te valey te Nengazen.
1CH 26:30 Ebpuun te menge kevuwazan ni Hebron: si Hashabia wey is 1,700 he menge kezuzumahi zin he zuen dan menge ketau. Insarig kandan is kedumala te menge tanà he zapit te edsenlepan te wahig te Jordan. Iyan sikandan mid-atur te menge vuluhaten te Nengazen wey vuluhaten te hadì dutun he lugar.
1CH 26:31 Si Jeria is pengulu te menge kevuwazan ni Hebron sumalà diyà te listahan te pemilya zan. Hein ike-40 he tuig te kedhadì ni David, ne mibpen-ahà is listahan, ne naahà dutun he zuen menge kevuwazan ni Hebron diyà te Jazer he sakup te Gilead, ne heini sikandan, duen dan menge ketau.
1CH 26:32 Si Jeria ne zuen din 2,700 he menge kezuzumahi he zuen dan menge ketau wey menge pengulu sikandan te menge pemilya. Iyan sikandan impezumala ni Hadì David te menge kevuwazan ni Reuben, ni Gad, wey ketengà he tribu ni Manase. Ne iyan sikandan mid-atur te langun he vuluhaten te Megbevayà wey vuluhaten te hadì dutun he menge lugar.
1CH 27:1 Iyan heini menge nelista he menge pengulu, menge peremandar, wey menge upisyal te menge Israilihanen he ebpenilbi te hadì pinaaǥi te kedumala te menge grupu te menge sundaru he ebpenilbi te senge vulan kada tuig. Is kada grupu ne zuen 24,000 he menge sundaru.
1CH 27:2 Si Jashobeam he anak ni Zabdiel ne iyan peremandar te menge sundaru te egkehuna he vulan. 24,000 he menge sundaru is kandin he grupu.
1CH 27:3 Kevuwazan sikandin ni Perez wey pengulu te langun he upisyal te menge sundaru te egkehuna he vulan.
1CH 27:4 Si Dodai he kevuwazan ni Ahoa ne iyan peremandar te menge sundaru te ikezuwa he vulan. 24,000 he menge sundaru is kandin he grupu. Si Miklot ne iyan pinekelavew he upisyal te grupu ni Dodai.
1CH 27:5 Si Benaya he anak ni Jehoyada he memumuhat, ne iyan peremandar te menge sundaru te iketulu he vulan. 24,000 he menge sundaru is grupu zin.
1CH 27:6 Heini si Benaya, ne iyan mevurut he pengulu zuen te 30 he menge mevurut he menge sakup ni David. Ne is anak din he si Amizabad, ne iyan pinekelavew he upisyal zin diyà te grupu zin.
1CH 27:7 Si Asahel he suled ni Joab, ne iyan peremandar te menge sundaru te ikeepat he vulan. Is anak din he si Zebadia iyan mid-ilis kandin. Ne 24,000 he menge sundaru is diyà te grupu zin.
1CH 27:8 Si Shamhut he kevuwazan ni Izra, ne iyan peremandar te menge sundaru te ikelima he vulan. 24,000 he menge sundaru is diyà te grupu zin.
1CH 27:9 Si Ira he anak ni Ikesh he tig-Tekoa, ne iyan peremandar te menge sundaru te ikeenem he vulan. 24,000 he menge sundaru is diyà te grupu zin.
1CH 27:10 Si Helez he tig-Pelon he kevuwazan ni Efraim, ne iyan peremandar te menge sundaru te ikepitu he vulan. 24,000 he menge sundaru is diyà te grupu zin.
1CH 27:11 Si Sibecai he tig-Husha he kevuwazan ni Zera, ne iyan peremandar te menge sundaru te ikewalu he vulan. 24,000 he menge sundaru is diyà te grupu zin.
1CH 27:12 Si Abiezer he tig-Anatot he kevuwazan ni Benjamin, ne iyan peremandar te menge sundaru te ikesiyam he vulan. 24,000 he menge sundaru is diyà te grupu zin.
1CH 27:13 Si Maharai he tig-Netofa he kevuwazan ni Zera, ne iyan peremandar te menge sundaru te ikesepulù he vulan. 24,000 he menge sundaru is diyà te grupu zin.
1CH 27:14 Si Benaya he tig-Piraton he kevuwazan ni Efraim ne iyan peremandar te menge sundaru te ike-11 he vulan. 24,000 he menge sundaru is diyà te grupu zin.
1CH 27:15 Si Heldai he tig-Netofa he kevuwazan ni Otniel, ne iyan peremandar te menge sundaru te ike-12 he vulan. 24,000 he menge sundaru is diyà te grupu zin.
1CH 27:16 Iyan heini menge upisyal te menge tribu te Israel: Diyà te tribu ni Reuben: si Eliezer he anak ni Zicri. Diyà te tribu ni Simeon: si Shefatia he anak ni Maaca.
1CH 27:17 Diyà te tribu ni Levi: si Hashabia he anak ni Kemuel. Diyà te tribu ni Aaron: si Zadok.
1CH 27:18 Diyà te tribu ni Juda: si Elihu he suled ni David. Diyà te tribu ni Isacar: si Omri he anak ni Micael.
1CH 27:19 Diyà te tribu ni Zebulun: si Ishmaya he anak ni Obadias. Diyà te tribu ni Naftali: si Jeremot he anak ni Azriel.
1CH 27:20 Diyà te tribu ni Efraim: si Hoshea he anak ni Azazia. Diyà te ketengà he tribu ni Manase: si Joel he anak ni Pedaya.
1CH 27:21 Diyà te ketengè pa he tribu ni Manase diyà te Gilead: si Iddo he anak ni Zacarias. Diyà te tribu ni Benjamin: si Jaasiel he anak ni Abner.
1CH 27:22 Diyà te tribu ni Dan: si Azarel he anak ni Jeroham. Iyan heini sikandan menge upisyal te menge tribu te Israel.
1CH 27:23 Hein impemelista ni David is menge etew, ne wazè din iragkes is wazè pa mebpenuiǥen te 20 he tuig, su midsaad is Nengazen he ibpemezakel zin is menge Israilihanen he iring te menge vituen diyà te langit.
1CH 27:24 Ne mibpuunan ni Joab he anak ni Zeruya is kebpensinsus te menge etew, piru wazè din mepasad is kebpensinsus su nepauk is Megbevayà. Umbe wazà maamin melista ziyà te listahan ni Hadì David is tivuuk he kezakel te menge Israilihanen.
1CH 27:25 Si Azmavet he anak ni Adiel, ne iyan midseriǥan te menge budiga te turuǥan te hadì. Si Jonatan he anak ni Uzia, ne iyan midseriǥan te menge budiga ziyà te menge inged wey te menge turi.
1CH 27:26 Si Ezri he anak ni Kelub, ne iyan midseriǥan te kegketerebehuwa te vevesukà te hadì.
1CH 27:27 Si Shimei he tig-Rama, ne iyan sineriǥan te menge pemuleey te paras te hadì. Si Zabdi he tig-Shifam, ne iyan midseriǥan te menge paras wey menge vinu te hadì.
1CH 27:28 Si Baal Hanan he tig-Geder, ne iyan midseriǥan te menge kayu he ulibu wey sikemur ziyà te menge mibuntud-buntud diyà te edsenlepan. Si Joash, ne iyan midseriǥan te menge teleǥuey te lana te ulibu.
1CH 27:29 Si Shitrai he tig-Sharon, ne iyan midseriǥan te menge vaka he ebpemenabtab diyà te penebtavà te Sharon. Si Shafat he anak ni Adlai, ne iyan midseriǥan te menge vaka ziyà te menge suǥud.
1CH 27:30 Si Obil he Ismailihanen, ne iyan midseriǥan te menge kemilyu. Si Jedea he tig-Meronot, ne iyan midseriǥan te menge asnu.
1CH 27:31 Si Jaziz he Hagarnen, ne iyan midseriǥan te menge kerehidu. Iyan heini sikandan langun menge upisyal he menge sineriǥan te menge azen ni Hadì David.
1CH 27:32 Si Jonatan he anggam ni Hadì David, ne iyan megsesambag din. Sevaha sikandin he uluwanen he etew wey menunurat. Si Jehiel he anak ni Hacmoni, ne iyan tigpenurù te menge anak te hadì.
1CH 27:33 Si Ahitofel is sevaha pa he megsesambag te hadì. Si Hushai he Arkanhen ne utew emiǥu te hadì.
1CH 27:34 Hein minatey en si Ahitofel, ne nepuliyan sikandin ni Jehoyada (he anak ni Benaya) wey ni Abiatar. Si Joab, ne iyan peremandar te menge sundaru te hadì.
1CH 28:1 Dutun he timpu, impetawag ni Hadì David diyà te Jerusalem is langun he menge upisyal te Israel: Is menge upisyal te menge tribu, is menge peremandar te kada grupu te menge sundaru he ebpenilbi te hadì, is duma pa he menge peremandar te menge linibu wey ginatus he menge sundaru, is menge upisyal he menge sineriǥan te langun he menge azen wey menge layud dutun te hadì wey te menge anak din, is menge upisyal ziyà te turuǥan is menge gehemanen he menge etew, wey langun he memetau he menge sundaru.
1CH 28:2 Hein nengevurun dan en ne midhitindeg si David he migkaǥi te, “Pemineǥa a keniyu, menge suled wey menge keet-etawan ku. Egkesuat a he ebangun te valey te Nengazen para egkesevukan duen te Kavan te Kebpekid-uyun te Nengazen he Megbevayè tew, para zuen egkeuntuzan te paa zin. Ne neisip ku is edtukuzen en heini.
1CH 28:3 Piru migkeǥiyan a te Megbevayà te, ‘Kenè ka iyan ebpeketukud te valey te Nengazen para te zengeg ku tenged te sevaha ka he sundaru wey mezakel is mibpenhimetayan nu.’
1CH 28:4 Piru minsan te iring dutun, mibpilì a te Nengazen he Megbevayà te Israel, he ebpuun te tivuuk he pemilya zey he egkehimu he hadì te Israel te wazà pidtemanan. Mibpilì din is tribu te Juda he iyan pengulu he tribu. Ne ebpuun kayi he tribu, mibpilì din is pemilya ku, ne ebpuun te pemilya ku ingkelipey zin is kebpilia zin kedì he hadì te tivuuk Israel.
1CH 28:5 Mibeǥayan e zin te mezakel he menge anak he menge maama, ne ebpuun dutun te kandan mibpilì din si Solomon he edhadì te ginhedian din he iyan is Israel.
1CH 28:6 Migkeǥiyan e zin te, ‘Is anak nu he si Solomon iyan ebpekepetukud te valey ku wey te menge lama kayi. Su mibpilì ku sikandin he egkehimu he anak ku, ne egkehimu a zaan he amey zin.
1CH 28:7 Ne emun ebpedayun sikandin he edsunud te menge suǥù ku iring te ebeelan din guntaan, ne ibpahadì ku is menge kevuwazan din te wazà pidtemanan.’
1CH 28:8 “Umbe ǥuntaan, ebmenduan ku sikiyu kayi te etuvangan te langun he menge Israilihanen, he menge etew te Nengazen, wey ziyà te etuvangan te Megbevayè tew, he tumana niw purungi is langun he menge suǥù te Nengazen he Megbevayè niw. Emun ebeelan niw heini, ne pedayun he egkaangken niw heini is meupiya he tanà, he igkepepengevilin niw te menge kevuwazan niw te wazà pidtemanan.
1CH 28:9 “Ne sikew, Solomon he anak ku, kilelaa nu wey silbiyi nu is Megbevayà te amey nu te tivuuk he ǥehinawa nu wey isip nu, su naahà te Nengazen is kada ǥehinawa wey netuenan din is tuyù tew wey ked-isip-isip tew. Emun ed-aput ka ziyà te kandin, ne edtevangan ke zin; piru emun ed-iniyug ka kandin ne ebeleǥazen ke zin te wazà pidtemanan.
1CH 28:10 Umbe, is-isipa nu heini purungi. Mibpilì ka te Nengazen he ibpetukud duen te valey te Nengazen. Pekelig-en ka, wey terebehuwa nu heini he vuluhaten.”
1CH 28:11 Ne imbeǥey ni David ki Solomon is langun he pelanu te kebpetukud te valey te Nengazen wey te menge varkun kayi, menge bilding, menge budiga, menge ruǥu ziyà te zivavew, menge ruǥu ziyà te seled, wey te Utew Segradu he Lugar he zutun ebpeseyluwa is salà te menge etew.
1CH 28:12 Imbeǥey ni David heini is langun he pelanu he impenurù kandin te Mulin-ulin para te kebaal te menge lama te valey te Nengazen, wey te langun he menge ruǥu he nekelingut kayi wey te menge budiga te valey te Megbevayà, ragkes en is menge budiga te menge vutang he impenhalad.
1CH 28:13 Mibpenurù ni David daan si Solomon mehitenged te kegrupu te menge memumuhat wey te menge Levihanen wey te langun he menge vuluhaten te kebpenilbi zutun te valey te Nengazen, wey te langun he menge gelemiten te kebpenilbi.
1CH 28:14 Impenurù din daan ke pira is kezakel te menge pelata wey vulawan is egkeǥamit te kebaal kayi he menge gelemiten:
1CH 28:15 te menge sulù he vulawan wey menge selevukà kayi; te menge sulù he pelata wey te menge selevukà kayi;
1CH 28:16 te menge lemisahan he vulawan te selevukà te supas he ibpemuhat diyà te etuvangan te Megbevayà; te lemisahan he pelata;
1CH 28:17 te vulawan he menge tinidur he dezekelà; te menge yehung he vulawan wey pitsil; te vulawan wey pelata he menge pinggan,
1CH 28:18 wey pemuhatà he vulawan he edtutungan te veyewà. Mibpenurù daan ni David si Solomon ke ebmenmenuwen te ebaal is bulawan he kirubin he ebpekelambung is pakpak dan duen te divavew te Kavan te Kebpekid-uyun te Nengazen.
1CH 28:19 Migkaǥi si Hadì David te, “Heini he menge pelanu ne insurat pinaaǥi te kegiya te Nengazen, ne mibpenurù e zin ke ebmenmenuwen heini te ebaal is langun.”
1CH 28:20 Migkeǥiyan daan ni David is anak din he si Solomon, “Mebpekelig-en ka wey mebpekevurut ka. Puuni nu en is kebpeterebahu. Kenè ka mahandek wey mebmeluya, su is Nengazen he Megbevayà, he Megbevayè ku, eduma kenikew. Kenè ke zin ed-ewaan wey ebey-anan taman te egkepasad is langun he terebahu para te valey te Nengazen.
1CH 28:21 Ne andam en is grupu te menge memumuhat wey menge Levihanen te langun he terebahu para zuen te valey te Megbevayà wey zuen daan menge etew he zuen menge ketau te kedterebahu te minsan hengkey he vuluhaten he andam te ked-uǥup kenikew. Is menge upisyal wey is langun he menge etew ne andam he ebpezumazuma kenikew.”
1CH 29:1 Ne migkeǥiyan ni Hadì David is langun he menge Israilihanen te, “Si Solomon he anak ku he mibpilì te Megbevayà, betan-en pa ne wazè din pa kesinetian. Dekelà is buluhaten, su is edtukuzen he vilding ne kenà para te etew, kekenà, para te Nengazen he Megbevayà.
1CH 29:2 Mibeelan ku is taman te egkehimu ku te ked-andam te menge gamit para te valey te Megbevayè ku: menge vulawan, pelata, brunsi, putew, kayu, mahalen he menge vatu he uniks, ismiralda, menge vatu he nekedseselekawà is barek, wey zuma pa he utew menge mekempet he menge vatu wey mehabet he menge marmul.
1CH 29:3 Ne tenged te kebmahala ku zutun te valey te Megbevayè ku, ne ibeǥey ku is keugelingen ku he vulawan wey pelata para te kebangun kayi, wazà lavet duen te menge gamit he inteǥana ku en para te segradu he valey te Nengazen.
1CH 29:4 Is ibeǥey ku 100 he tunilada he vulawan he ebpuun te Ofir, wey menge 250 he tunilada he pelata. Egemiten heini para id-apid te menge elavat dutun te valey te Nengazen,
1CH 29:5 wey para te langun he menge gelemiten he ebeelan te menge platiru. Guntaan hentei is egkesuat he ebeǥey para te Nengazen?”
1CH 29:6 Ne zutun, is menge pengulu te menge pemilya, is menge pengulu te menge tribu te Israel, is menge peremandar te linibu wey ginatus he menge sundaru, wey is menge upisyal he menge sineriǥan te azen te hadì, mibeǥey zan daan he ebpuun te keputian te atey zan.
1CH 29:7 Mibeǥey sikandan para te kebeeli zuen te valey te Megbevayà te menge 175 he tunilada he vulawan, 10,000 he selapì he vulawan, 350 he tunilada he pelata, 630 he tunilada he brunsi, wey 3,500 he tunilada he putew.
1CH 29:8 Duen daan mibeǥey te mahalen he menge vatu, ne intaǥù heini ziyà te budiga zuen te valey te Nengazen he iyan edumala zuen si Jehiel he kevuwazan ni Gershon.
1CH 29:9 Utew nengelipey is menge etew su mibeǥey is menge pengulu zan he ebpuun te keputian te atey zan para te Nengazen. Utew zaan nelipey si Hadì David.
1CH 29:10 Midalig ni David is Nengazen dutun te etuvangan te tivuuk he keet-etawan. Migkaǥi sikandin te, “He Nengazen, he Megbevayà te kepuun dey he si Jacob, ereg ka he edeliǥen te wazà pidtemanan.
1CH 29:11 Gemhanan ka, telehuzen ka, dungganen wey ereg he edeliǥen. Su kenikew is langun diyà te langit wey zini te tanà. Iyan ka hadì, he Nengazen, wey lavew ka te langun.
1CH 29:12 Is menge ketiǥeyunan wey zengeg ne ziyà ebpuun te kenikew. Iyan ka edumala te langun. Gemhanan ka, wey iyan ka ebpekeveǥey te zesen wey ǥehem diyà te minsan hentei.
1CH 29:13 “He Megbevayè dey, guntaan ebpeselematan dey sikew wey edeliǥen dey is telehuzen he ngazan nu.
1CH 29:14 Piru hentei key, siak wey is keet-etawan ku, he ebpekeveǥey key te utew subra he iring kayi? Langun he menge vutang ne ziyà ebpuun te kenikew, ne ibeǥey zey kenikew is ebpuun ded kenikew.
1CH 29:15 Netuenan nu he humuhulevungà key zà kayi te kelibutan iring te menge kepuun dey. Is untung dey ne iring dà te alung he egkehanew zà.
1CH 29:16 “He Nengazen he Megbevayè dey, heini is langun he imbeǥey zey para te kedtukuza te valey nu, ne para te zengeg te waǥas he ngazan nu ne ebpuun ded kenikew. Kenikew heini is langun!
1CH 29:17 He Megbevayè ku, netuenan ku he iyan ka edsusi te menge ǥehinawa zey, ne igkelipey nu ke egkeehè nu he metazeng heini. Umbe tutuu wey ebpuun te keputian te atey is kebeǥaya ku kayi he menge vutang. Wey minsan is menge keet-etawan nu he kayi ǥuntaan ne neehè ku he mibeǥey zan daan te ebpuun te keputian te atey zan. Umbe utew a nelipey.
1CH 29:18 “He Nengazen, he Megbevayà te menge kepuun dey he si Abraham, si Isaac, wey si Jacob, deyzey ke lelayun nu heini idtaǥù diyà te menge ǥehinawa te menge keet-etawan nu, wey tevangi nu sikandan he mebmepezumdumahan kenikew.
1CH 29:19 Wey iveǥey nu zaan diyà te anak ku he si Solomon is dekelà he tinguhà te kedtuman te menge suǥù nu, menge penurù, wey te menge sulunuzen, wey te kebaal te langun he ibpetuman ku mehitenged te kedtukuza te valey te Nengazen he mibpurungan ku pengendami.”
1CH 29:20 Ne migkeǥiyan ni David is tivuuk he keet-etawan te, “Deliǥa niw is Nengazen he Megbevayè niw.” Ne zutun midalig dan is Nengazen, he Megbevayà te menge kepuun dan. Midluhud dan wey midungul he tuus te kebeǥayi zan te zengeg te Nengazen wey te hadì.
1CH 29:21 Sunud he andew ne mibpemuhat dan is Nengazen te menge pemuhat he edtutungen: 1,000 he menge tudu he vaka, 1,000 he memeǥurang en he menge meemahan he kerehidu, wey 1,000 he meemahan he menge nati pa. Nemuhat daan sikandan te menge pemuhat he inumen wey mezakel pa is impemuhat dan para te tivuuk he menge Israilihanen.
1CH 29:22 Nemengaan dan wey nemen-inum he melipayen diyà te etuvangan te Nengazen te haazà he andew. Ne sunud dutun, intubuy zan en si Solomon he anak ni David he iyan hadì dan. Midlenahan si Solomon he anak ni David diyà te etuvangan te Nengazen he tuus he iyan en hadì dan, midlenahan daan si Zadok he tuus te kegkememumuhat din.
1CH 29:23 Umbe, mibpinuu si Solomon duen te pinuuwey te Nengazen te kedhadì he ilis te amey zin he si David. Mid-uswag si Solomon wey mibpezumazuma kandin is tivuuk he Israel.
1CH 29:24 Nenangdù is langun he menge upisyal, wey menge gehemanen he menge etew, wey is langun he anak ni Hadì David he ebpesakup dan ki Hadì Solomon.
1CH 29:25 Midhimu te Nengazen he mevantug si Solomon te tivuuk he Israel wey mibeǥayan din sikandin te zengeg he wazà maangken te zuma he menge hadì te Israel.
1CH 29:26 Nehimu he hadì si David he anak ni Jesse te tivuuk he Israel seled te 40 he tuig–7 he tuig diyà te Hebron ne 33 he tuig diyà te Jerusalem.
1CH 29:28 Mibmeluǥayad is untung din wey sepian sikandin wey dungganen. Minatey sikandin he meǥurang en utew, ne neilisan sikandin te anak din he si Solomon te kedhadì.
1CH 29:29 Is guǥud mehitenged te kedhadì ni Hadì David, puun te puunà taman te ketepusan, ne ingkesurat heini ziyà te menge libru te menge ebpeneuven he si Samuel, Natan wey Gad.
1CH 29:30 Ingkesurat dutun ke mibmenumenu zin is kedhadì din, wey ke sengemenu is kegkegemhanan din, wey is langun he nehitavù kandin wey te Israel, wey te nekelingut he menge ginhedian.
2CH 1:1 Nehimu he utew melig-en is kedhadì ni Solomon he anak ni David diyà te ginhedian din su miduma kandin is Nengazen he Megbevayè din, wey midhimu zin sikandin he utew gehemanen.
2CH 1:2 Ne mibpekidlalag si Solomon te langun he menge Israilihanen, te menge peremandar te menge linibu wey menge ginatus he menge sundaru, te menge menhuhusey, te langun he menge pengulu te Israel, wey te langun he menge pengulu te menge pemilya.
2CH 1:3 Ne migenat si Solomon wey is tivuuk he keet-etawan pehendiyà te simbahan diyà te metikang he lugar ziyà te Gibeon, su ziyà kes Tulda he Edtelevukaayan te Megbevayà. Heini he Tulda ne mibpeveelan ni Moises he suluǥuen te Nengazen diyà te sibsivayan.
2CH 1:4 Dutun he timpu ne neuwit en ni David kes Kavan te Kebpekid-uyun te Megbevayà he ebpuun te Kiriat Jearim pehendiyà te tulda he inteǥana zin para kayi diyà te Jerusalem.
2CH 1:5 Piru sikan is brunsi he pemuhatà he mibeelan ni Bezalel he anak ni Uri he apù ni Hur, ne ziyè pa te Gibeon dutun te etuvangan te Tulda te Nengazen. Umbe ziyà medtiǥum si Solomon wey is tivuuk he keet-etawan te kebpenginginsà te Nengazen.
2CH 1:6 Ne nemenahik si Solomon diyà te pemuhatà he brunsi ziyà te etuvangan te Nengazen diyà te Tulda he Edtelevukaayan, ne mibpemuhat sikandin te 1,000 he menge pemuhat he edtutungen.
2CH 1:7 Haazà he kezukileman, mibpaahà is Megbevayà ki Solomon ne migkeǥiyan din sikandin te, “Buyù ka te minsan hengkey he egkesuatan nu su ibeǥey ku kenikew.”
2CH 1:8 Midtavak si Solomon te, “Impeehè nu is dekelà he ǥaǥew nu te amey ku he si David, ne ǥuntaan ne iyan a impuli nu he hadì.
2CH 1:9 Ne ǥuntaan, Nengazen he Megbevayà, tumana nu is impenangdù nu te amey ku he si David, su midhimu a kenikew he hadì te keet-etawan he iring kezakel te pantad.
2CH 1:10 Beǥayi a te ketau wey keuluwanen wey ku mezumala heini he keet-etawan. Su hentei zà buwa etawa is ebpekehimu he edumala kayi te utew mezakel he keet-etawan nu?”
2CH 1:11 Migkeǥiyan te Megbevayà si Solomon te, “Geina te mibuyù ka te ketau wey keuluwanen te kedumala kayi te keet-etawan ku he ebpehedian ku kenikew, ne wazè ka mebuyù te ketiǥeyunan etawa dengeg etawa kegkepetaya te menge kuntada nu etawa meluǥayad he untung,
2CH 1:12 ne ibeǥey ku kenikew is ebuyuen nu. Ne kenà iyan dà heeyan su ed-umanan ku pa sikew te zekelà he ketiǥeyunan wey zengeg he wazè pa maangken te minsan hentei he hadì he nehuna kenikew. Wey kenà daan egkaangken te edsunud pa he menge hadì.”
2CH 1:13 Ne zutun ne mid-awà dutun si Solomon te Tulda he Edtelevukaayan diyà te simbahan he ziyà te metikang he lugar ziyà te Gibeon, ne midlikù sikandin diyà te Jerusalem. Ne midhadì sikandin diyà te Israel.
2CH 1:14 Neketiǥum si Solomon te 1,400 he menge kerwahi wey 12,000 he kudà. Is duma kayi, ziyè din ipelastar te menge inged din he selevukà te menge kerwahi zin, ne is duma pa, ziyà te kandin diyà te Jerusalem.
2CH 1:15 Dutun te timpu te iyan sikandin hadì, henduen dà te vatu is ked-isipa te pelata wey vulawan tenged te kezekelè din, ne is kahabet te mahalen he kayu he sidru ne henduen be te ebpekeiring dà te urdinaryu he kayu he sikemur ziyà te menge mibuntud-buntud diyà te edsenlepan.
2CH 1:16 Is menge kudà ni Solomon diyà ebpuun te Ehipto wey Cilicia. Hustu he vali is impemasa kayi ziyà te Cilicia te menge perepemasa.
2CH 1:17 Dutun he timpu is bali te kerwahi he ebpuun diyà te Ehipto ne 600 he vuuk he pelata, ne is kudà 150 he vuuk he pelata. Ne imbelegyà heini te menge etew ni Solomon diyà te langun he menge hadì te menge Hitihanen wey te menge Aramihanen.
2CH 2:1 Dutun he timpu, insuǥù ni Solomon is kedtukuza te valey te Nengazen para te zengeg te Nengazen wey kedtukuza te turuǥan he para te keugelingen din.
2CH 2:2 Midtiǥum din is 70,000 he menge tighakut, 80,000 he tigbasbas te menge vatu ziyà te menge vuvungan, wey 3,600 he menge etew he iyan edumala.
2CH 2:3 Mibpeuwit si Solomon te lalag diyà te ki Hadì Hiram he hadì te Tyre he edhenduen te: “Peuwiti a kenikew te kayu he sidru iring te mibeelan nu zengan diyà te amey ku he si David te kedtukuza zin te turuǥan din.
2CH 2:4 Ebpehitendeg a te valey te Nengazen para te zengeg te Nengazen he Megbevayè ku. Egkehimu heini he segradu he lugar he zutun edtutunga is mehemut he veyewà wey ebpemuhatan layun te segradu he supas. Kayi zaan ebpemuhat te pemuhat he edtutungen kada meselem wey mezukilem, wey te menge Andew te Kedhimeley, te Pista te Kebpuun te Hayag wey te zuma he menge pista te kebeǥayi te zengeg te Nengazen he Megbevayè dey. Heini he sulunuzen kinahanglan he edtumanen te menge Israilihanen taman te taman.”
2CH 2:5 “Dekelà he valey te Nengazen is edtukuzen ku, su utew mekeǥeǥehem is Megbevayè dey kenà te zuma he ed-ezapen.
2CH 2:6 Piru hentei is ebpekehimu he edtukud te valey he para kandin? Su kenà ganì sikandin ed-ereg diyà te langit, minsan diyà te pinekemetikang he vahin te langit. Umbe kenà a zait he ebpekepehitindeg te valey te Nengazen. Is edtukuzen ku zà ne iyan dà is lugar he zutun edtutunga is menge pemuhat diyà te etuvangan din.
2CH 2:7 Umbe ǥuntaan, suǥua nu zini is etew he metau he edterebahu te vulawan, pelata, brunsi, putew wey metau he ebpenhavel te manggad, he merudtem, kanggan, wey meitem is kaavuavu zin, wey metau he ed-ukir. Edterebahu sikandin duma te menge metau he ibpemeterebahu ku he tig-Juda wey tig-Jerusalem, he mibpilì te amey ku he si David.
2CH 2:8 Peuwiti a zaan te kayu he sidru, sipris, wey algum he ebpuun te Lebanon, su netuenan ku he memetau is menge sakup nu he ebpemenamped te kayu. Ed-uǥupan te menge sakup ku is menge sakup nu,
2CH 2:9 te ked-andam te mezakel he menge kayu, su utew zekelà wey mekempet is baley te Nengazen he edtukuzen ku.
2CH 2:10 Ebeyazan ku is menge tigtamped nu te menge kayu te 60,000 he saku he trigu, 60,000 he saku he barli, 110,000 he gelun he vinu, wey 110,000 he gelun he lana te ulibu.”
2CH 2:11 Iyan heini tavak ni Hadì Hiram he hadì te Tyre ziyà te ki Solomon pinaaǥi te surat: “Tenged te mahal te Nengazen is mezakel he menge keet-etawan din ne midhimu ke zin he hadì dan.
2CH 2:12 Edeliǥen is Nengazen he Megbevayà te Israel he midlimbag te langit wey kelibutan! Mibeǥayan din si Hadì David te uluwanen he anak, he nepenù te keuluwanen wey kedsavut, he edtukud te valey te Nengazen wey turuǥan he para te keugelingen din.”
2CH 2:13 “Edsuǥuen ku ziyà te kenikew si Huram Abi, he sevaha te memetau he edterebahu.
2CH 2:14 Tig-Dan is iney zin, ne is amey zin tig-Tyre. Metau sikandin he edterebahu te vulawan, pelata, brunsi, putew, batu, wey kayu, wey te kebaal te manggad he merudtem, meitem is kaavuavu zin, wey kanggan wey linu, egketau sikandin te minsan hengkey he kelasi te ked-ukir, wey ebpekevaal sikandin te minsan hengkey he kelasi te zayandayan he ebpeveelan kandin. Edterebahu sikandin he iyan duma zin is kenikew he menge terebahanti wey is menge terebahanti he mibpilì te telehuzen he amey nu he si David.
2CH 2:15 “Ne ǥuntaan telehuzen he Solomon ipeuwit nu kayi te kenami is trigu, barli, wey vinu, wey lana te ulibu he insaad nu
2CH 2:16 ne ebpenempezen dey is minsan hengkey he kayu ziyà te Lebanon he egkinehenglanen nu. Ne ibpebpipikit dey heini ne ibpeǥampung dey zà heini te zaǥat pehendiyà te Jopa. Ne iyan kew uwit kayi ziyà te Jerusalem.”
2CH 2:17 Impemelista ni Solomon is langun he kenà Israilihanen diyà te Israel iring te mibeelan te amey zin he si David, ne is kezakel 153,600.
2CH 2:18 Midhimu zin is 70,000 he tighakut, is 80,000 iyan tigbasbas te menge vatu ziyà te menge vuvungan, ne is 3,600 ne iyan edumala te menge terebahanti.
2CH 3:1 Ne mibpuunan en ni Solomon is kedtukuza te valey te Nengazen diyà te Jerusalem diyà te Buvungan te Moria, he zutun mebpaahà is Nengazen te amey zin he si David. Diyè din heini tukuza te gunasà ni Arauna he Jebusihanen, kes lugar he inteǥana ni David.
2CH 3:2 Mibpuunan din en heini te edtukud te ikezuwa he andew te ikezuwa he vulan, te ikeepat he tuig te kedhadì din.
2CH 3:3 Is pundasyun kayi te valey te Megbevayà ne 90 he ǥiek is keluǥayad ne 30 he ǥiek is keluag.
2CH 3:4 Is barkun diyà te etuvangan te valey te Nengazen ne 30 he ǥiek iring duen te keluag te sukud te valey te Nengazen, ne 30 zaan he ǥiek is ketikang din. Ne mid-epizan ni Solomon te lunsey he vulawan is diyà te seled kayi.
2CH 3:5 Ne mibpeelevatan din is lewahan kayi te valey te Nengazen te kayu he sipris wey mid-epizan te pudu vulawan, wey mibpendeyzeyanan te menge palma wey menge kedina.
2CH 3:6 Mibpezeyzeyanan din daan haazà is baley te Nengazen te mahalen he menge vatu wey vulawan he ebpuun pa ziyà te Parvaim.
2CH 3:7 Mibpeepizan din te vulawan is menge selegunting, menge ǥemawan wey menge marku kayi, wey menge elavat. Ne mideyzeyanan te in-ukir he kirubin is menge elavat.
2CH 3:8 Is Utew Segradu he Lugar ne 30 he ǥiek is keluag din ne 30 he ǥiek is ketikang din, iring ded is keluaǥan din duen te keluaǥan te valey te Nengazen. Ne is seled kayi ne mid-epizan te menge 23 he tunilada he vulawan.
2CH 3:9 Is migamit he menge ransang mid-epizan daan te vulawan he menge tengà te kilu is keveǥat. Is menge elavat te menge ruǥu he zapit te zivavew ne mid-epizan daan te vulawan.
2CH 3:10 Mibpevaal zaan si Solomon diyà te seled te Utew Segradu he Lugar te zezuwa he kirubin, ne mibpeepizan din heini te vulawan.
2CH 3:11 Is kada kirubin ne zezuwa is pakpak, ne is kada pakpak ne pitu wey tengà he ǥiek is keluǥayad. Umbe is keluǥayad te nevekar he menge pakpak duen te zezuwa he kirubin ne 30 he ǥiek. Is divaluy he pakpak dan ne ebpeked-uma is purù, ne is divaluy pa he pakpak dan ne ebpekesenggir te elavat.
2CH 3:14 Is kurtina he nekaalang duen te Utew Segradu he Lugar manggad he linu he imburda zutun is meitem is kaavuavu zin, merudtem wey kanggan, imburda zaan dutun is kirubin.
2CH 3:15 Mibaal zaan si Solomon te zezuwa he tukud diyà te etuvangan duen te valey te Nengazen, ne is ketikang te kada sevaha ne 52 he ǥiek. Is kada tukud ne zuen din ulu he is keluǥayad din ne pitu wey tengà he ǥiek.
2CH 3:16 Is kada ulu mideyzeyanan te impedlambid he mid-iring te kedina ne impemikit dutun is mibpen-iring te prutas he pumigranata. Nenggatus is kezakel kayi he menge zayandayan.
2CH 3:17 Impehitindeg din haazà is menge tukud diyà te etuvangan te valey te Nengazen. Is tukud he zapit te divavà ne migngezanan din te Jakin, ne is tukud dapit te zizaya ne migngezanan din te Boaz.
2CH 4:1 Mibpevaal zaan si Solomon te pemuhatà he brunsi he 30 he ǥiek he kuwedradu wey 15 he ǥiek is ketikang.
2CH 4:2 Mibpevaal zaan sikandin te zekelà he teleǥuey te wahig he henduen te kawà, he egngezanan te Daǥat. Is kezalem kayi pitu wey tengà he ǥiek, is keluaǥan kayi 15 he ǥiek, ne is sukud te peliǥuy kayi 45 he ǥiek.
2CH 4:3 Diyà te malù egkezizalem te vèbà kayi mibpeliǥuyan te zezuwa he linya te menge zayandayan. Heini he menge zayandayan, henduen be te tudu he vaka, ne heenem dutun is diyà te teleǥuey. Ne haazà, inredsà is kebpurma zuen te kebeeli zutun te teleǥuey.
2CH 4:4 Haazà is teleǥuey in-untud diyà te peka te 12 he tudu he menge vaka he brunsi he ebpein-iniyuǥà. Is tetelu ziyà medsinaru te zizaya, is tetelu ziyà te edsenlepan, is tetelu ziyà te zivavà, is tetelu ziyà te edsilaan.
2CH 4:5 Is kekepal zutun te teleǥuey tetelu he vaney, is bèbà kayi iring te vèbà te tasa he netik-ew mevekar iring te mibekar en he vulak te liryu. Ne egketeǥuan heini te 17,500 he gelun he wahig.
2CH 4:6 Mibpevaal zaan sikandin te sepulù he visin para ebpenhugasan te menge ibpemuhat he edtutungen. Diyà isavuk is lelima te zapit te zivavà ne is lelima ne zapit te zizaya. Ne haazà is wahig dutun te teleǥuey he egngezanan te Daǥat ne iyan egemiten te menge memumuhat te kebpenhugas dan te keugelingen dan.
2CH 4:7 Mibpevaal zaan sikandin te sepulù he selevukà te sulù he vulawan sumalà te pelanu, ne ziyà haazà isavuk te valey te Nengazen, lelima is diyà te zapit te zizaya ne is lelima ziyà te zapit te zivavà.
2CH 4:8 Mibpevaal zaan sikandin te sepulù he lemisahan ne ziyà heini isavuk te valey te Nengazen, lelima is diyà te divavà ne lelima is diyà te zizaya. Mibpevaal zaan sikandin te 100 he yehung he vulawan he egemiten te kebpirik.
2CH 4:9 Mibpevaal zaan sikandin te lama para zà te menge memumuhat wey te meluag he lama ziyà te gawas. Mibpeveelan din heini te menge pultahan he ebeyaan te edseled dutun te lama ne mibpeepizan din haazà te brunsi.
2CH 4:10 Ne zutun din isavuk is teleǥuey te wahig he egngezanan te Daǥat te zapit te zivavà he edsilaan he iskina zutun te valey te Nengazen.
2CH 4:11 Mibpevaal zaan sikandin te menge diniyun, menge pala, wey menge yehung he egemiten te kebpemirikpirik. Nengepasad haazà is langun he mibpeveelan ni Solomon ki Huram he para zutun te valey te Megbevayà. Ne iyan heini mibeelan din:
2CH 4:12 is dezuwa he tukud; is dezuwa he henduen be te menge yehung he in-ulu zuen te menge tukud; is dezuwa he impedlambid he mid-iring te kedina he zayandayan duen te menge in-ulu te menge tukud;
2CH 4:13 is 400 he mid-iring te prutas he pumigranata (nekepikit is dezuwa he linya kayi zuen te zezuwa he mid-iring te kedina he nekevedbed duen te in-ulu te menge tukud);
2CH 4:14 is menge kerumata wey menge visin kayi;
2CH 4:15 is teleǥuey te wahig he egngezanan te Daǥat wey sikan is untuzà kayi te teleǥuey he ledawan te sepulù wey zezuwa he tudu he menge vaka;
2CH 4:16 is menge diniyun, menge pala, menge zezekelà he menge tinidur he para te usa, wey zuma pa he menge ǥelemiten. Is langun kayi he menge vutang para zuen te valey te Nengazen, he mibeelan ni Huram para ki Hadì Solomon, ne pudu heini brunsi he impesinew.
2CH 4:17 Mibpeveelan heini ni Hadì Solomon pinaaǥi te selsalan diyà te Suǥud te Jordan, he ziyà te pid-elangan te Sucot wey Zaretan.
2CH 4:18 Utew mezakel he brunsi is neǥamit ni Solomon, ne wazà metueni ke pira heini langun he kilu.
2CH 4:19 Mibpevaal zaan si Solomon kayi he menge gelemiten he para zuen te valey te Megbevayà: bulawan he pemuhatà; bulawan he menge lemisahan he selevukà te supas he ibpemuhat diyà te etuvangan te Megbevayà;
2CH 4:20 is menge selevukà te menge sulù he lunsey he vulawan wey is menge sulù kayi he ibpesiǥa etuvangan duen te Utew Segradu he Lugar sumalà is sulunuzen bahin kayi;
2CH 4:21 is dayandayan he menge vulak, is menge sulù wey is menge lipit, he pudu lunsey he vulawan;
2CH 4:22 is menge ibpenamped te pebilu, menge yehung he egemiten te kebpemirik, menge teleǥuey te menge veyewà, wey menge selevukà te vaǥa he pudu lunsey he vulawan; is menge ǥemawan dutun te valey te Nengazen wey menge ǥemawan pehendiyà te seled te Utew Segradu he Lugar, ne pudu heini mid-epizan te vulawan.
2CH 5:1 Hein nepasad en ni Solomon is langun he vaal zutun te valey te Nengazen, ne mid-uwit din diyà te menge budiga zutun te valey te Nengazen is langun he menge azen he impehinungud te amey zin he si David–is menge pelata, menge vulawan, wey zuma pa he menge ǥelemiten.
2CH 5:2 Impetawag ni Hadì Solomon diyà te Jerusalem is menge edumala te Israel wey is langun he menge pengulu te menge tribu wey menge pemilya te Israel, su ibpekuwa zin kandan sikan is Kavan te Kebpekid-uyun te Nengazen puun te Zion he Inged ni David.
2CH 5:3 Midhendiyè dan is langun te ki Hadì Solomon hein Pista te Kebaal te menge Lawig, te ikepitu he vulan.
2CH 5:4 Hein nevurun en is langun he menge edumala te Israel, ne migkuwa zuen te menge memumuhat wey menge Levihanen kes Kavan, ragkes en kes Tulda he Edtelevukaayan wey kes menge segradu he menge gelemiten kayi, ne mid-uwit dan heini langun petekezeg diyà te valey te Nengazen.
2CH 5:6 Nemuhat si Hadì Solomon wey is tivuuk he keet-etawan te Israel ziyà te etuvangan duen te Kavan te Kebpekid-uyun te Nengazen. Utew mahabet is menge kerehidu wey menge vaka he impemuhat dan; kenà heini egkevilang.
2CH 5:7 Ne mid-uwit duen te menge memumuhat kes Kavan te Kebpekid-uyun te Nengazen diyà te lugar he kineselezan duen te valey te Nengazen, duen te Utew Segradu he Lugar, diyà te zizalem te menge pakpak duen te ledawan he menge kirubin.
2CH 5:8 Nevekar is menge pakpak dutun te menge kirubin, umbe netembunan sikan is Kavan wey sikan is menge tival zuen te kavan.
2CH 5:9 Heini he menge tival utew memelayat, is menge purù dan edlavew pa zuen te Kavan ne egkaahà diyà te Segradu he Lugar, diyà te etuvangan duen te kineselezan dutun te valey te Nengazen, piru kenà heini egkaahà diyà te gawas duen te Segradu he Lugar. Ne zutun pa heini taman en guntaan.
2CH 5:10 Wazà duma he taǥù duen te Kavan gawas duen te zezuwa he melumpipì he menge vatu he intaǥù dutun ni Moises hein diyà sikandin te Horeb, ne zutun himuwa te Nengazen is kebpekid-uyun din te menge Israilihanen hein migawas dan diyà te Ehipto.
2CH 5:11 Ne kegkepasad dutun, ne migawas kes menge memumuhat dutun te Segradu he Lugar. Is langun he menge memumuhat he zutun ne nenlumpiyu te keugelingen dan, timpu man te kebpenilbi zan etawa kena.
2CH 5:12 Is menge Levihanen he menge musikiru ne iyan si Asaf, si Heman, si Jedutun, wey is menge anak dan he menge maama, wey menge kezuzumahi zan ne midhitindeg diyà te zapit te edsilaan he avey zutun te pemuhatà. Mibivisti zan te linu he edtukar te menge simbal, alpa, wey lira. Iyan duma zan dutun is 120 he menge memumuhat he ebpezaǥing te trumpita.
2CH 5:13 Is menge perekanta, ne midalig dan wey mibpeselamat dan te Nengazen he eduyuǥan te trumpita, simbal, wey zuma pa he menge gelemiten. Iyan heini kanta zan: “Meupiya is Nengazen; wazà pidtemanan te gaǥew zin.” Ne zutun nepenù te ǥapun haazà is baley te Nengazen.
2CH 5:14 Kenè en egkeveelan te menge memumuhat is buluhaten dan dutun te valey te Nengazen tenged te ǥapun, su is gemhanan he kebpekiduma te Nengazen nekepenù dutun te valey te Nengazen.
2CH 6:1 Ne mid-ampù si Solomon te, “Nengazen, migkaǥi ka he ed-ubpè ka ziyà te kivel.
2CH 6:2 Ne ǥuntaan nekepevaal ad te utew mekempet he valey para kenikew, he egkeubpaan nu te wazà pidtemanan.”
2CH 6:3 Ne mid-etuvang ni Hadì Solomon is tivuuk he keet-etawan te Israel he ebpemenhitindeg dutun, ne mibpenubtuvazan din sikandan.
2CH 6:4 Migkaǥi sikandin, “Edeliǥen is Nengazen he Megbevayà te Israel. Midtuman din is insaad din te amey ku he si David. Migkaǥi zin dengan,
2CH 6:5 ‘Puun dutun te kebpeǥewasa ku te menge etew ku he Israilihanen diyà te Ehipto, ne wazè ku pilia is inged te minsan hentei he tribu te Israel para edtukuzan te valey he para te kebeǥayi kedì te zengeg, wey wazà a mebpilì te hadì he edumala te menge etew ku he Israilihanen.
2CH 6:6 Piru ǥuntaan, mibpilì ku is Jerusalem he zutun a ebeǥayi te zengeg, wey mibpilì ku si David he edumala te menge etew ku he Israilihanen.’
2CH 6:7 “Utew egkesuat is amey ku he si David he ebangun te valey he para te zengeg te Nengazen he Megbevayà te Israel.
2CH 6:8 Piru migkaǥi is Nengazen diyà te kandin te, ‘Meupiya su egkesuat ka he ebangun te valey he para te zengeg ku.
2CH 6:9 Piru kenè ka iyan ebpekevangun kayi, kekenà, iyan is anak nu. Iyan sikandin ebangun te valey he para te zengeg ku.’
2CH 6:10 “Ne midtuman en te Nengazen is insaad din. Iyan a nekeilis te amey ku he hadì te Israel, su iyan heini insaad te Nengazen. Ne mibangun ku is baley he para te kebeǥey te zengeg te Nengazen he Megbevayà te Israel.
2CH 6:11 Ne zutun ku isavuk kes Kavan he midteǥuan te midsuratan te kebpekid-uyun te Nengazen he midhimu zin diyà te menge etew zin he menge Israilihanen.”
2CH 6:12 Midhitindeg si Solomon diyà te etuvangan te tivuuk he keet-etawan te Israel, diyà te etuvangan duen te pemuhatà te Nengazen ne imbayew zin is menge velad din.
2CH 6:13 Diyà sikandin medhitindeg te brunsi he intebladu he mibpeveelan din. Heini he intebladu ne pitu wey tengà he ǥiek is keluag wey keleyat, ne heepat wey tengà he ǥiek is ketikang kayi. Hein nepasad midluhud si Solomon dutun te etuvangan te keet-etawan te Israel he imbayew zin is menge velad din.
2CH 6:14 Ne nengemuyù sikandin, “He Nengazen, Megbevayà te Israel, wazè en Megbevayà he iring kenikew ziyan te langit wey kayi te tanà. Metinumanen ka te saad nu wey layun nu ibpaahà is kebmahala nu te menge suluǥuen nu he edsunud kenikew te tivuuk he ǥehinawa zan.
2CH 6:15 Midtuman nu is saad nu te suluǥuen nu he si David he amey ku. Iyan ka kayi midsaad, ne midtuman nu heini guntaan he andew.
2CH 6:16 Ne ǥuntaan, Nengazen he Megbevayà te Israel, elin nu tumana is insaad nu ziyà te amey ku he si David he suluǥuen nu hein migkeǥiyan nu te, ‘Layun nu zuen kevuwazan he ebpekeilis kenikew te kedhadì te Israel emun meupiya is kedsunud te menge kevuwazan nu te kesuǥuan ku iring te mibeelan nu.’
2CH 6:17 Umbe ǥuntaan, Nengazen he Megbevayà te Israel, tumana nu is menge saad nu te suluǥuen nu he si David he amey ku.
2CH 6:18 “Piru, sikew, Megbevayà, tutuu ve iyan he ebpekeubpè ka kayi te tanà duma te menge etew? Minsan is langit ne kenè ka ganì ed-ereg minsan diyà te pinekemetikang he vahin kayi, kayi ke pe be vuwa med-ereg te valey he midtukud ku?
2CH 6:19 Piru, Nengazen he Megbevayè ku, pemineǥa a kenikew is suluǥuen nu te menge kebpengemuyù ku wey kebpehizuhizu ku kenikew. Pemineǥa nu is kebpengumew ku wey kebpengemuyù ku ziyan te etuvangan nu.
2CH 6:20 Berakat he ipata nu heini is baley nu te maandew wey mezukilem, kayi te lugar he migkaǥi nu he kayi ka ebeǥayi te zengeg. Berakat he pemineǥa a kenikew is suluǥuen nu te kebpengemuyù ku he kayi a he lugar med-etuvang.
2CH 6:21 Pemineǥa nu is menge hangyù ku wey hangyù te menge etew nu he Israilihanen te kebpengemuyù dey he kayi he lugar ed-etuvang. Pemineǥa nu keniyan te ubpeey nu he langit. Ne emun egkezineg key kenikew, ne peseyluwa key.
2CH 6:22 “Emun is sevaha he etew idsumbung he nekesalà diyà te iring din he etew, ne haazà ibpehendiyà te pemuhatà para kenikew kayi te valey nu te kebpenangdù he wazè din salà,
2CH 6:23 pemineǥa nu heini ziyan te langit wey hukumi nu is menge suluǥuen nu–is edsumbung wey is idsumbung. Siluti nu is nekesalà sumalà te neveelan din, ne libriya nu is wazà salà para metueni he wazà sikandin mekesalà.
2CH 6:24 “Ne emun is menge etew nu he Israilihanen egkezaag te menge kuntada zan su nekesalè dan kenikew, ne emun edlikù dan diyan te kenikew ne edalig dan wey ebpengemuyù dan kayi te valey nu,
2CH 6:25 ne pemineǥa nu sikandan diyan te langit. Ne peseyluwa nu sikandan te salè dan ne ilikù nu sikandan diyà te tanà he imbeǥey nu ziyà te menge kepuun dan.
2CH 6:26 “Emun kenè nu ibpeuzan tenged te nekesalà is menge etew nu, ne emun ebpengemuyù dan he edsinaru kayi te valey nu wey edalig dan kenikew, wey ed-engkezan dan is kebaal te salà tenged te kedsiluti nu kandan,
2CH 6:27 ne pemineǥa nu sikandan diyan te langit. Peseyluwa nu sikandan is menge suluǥuen nu he menge etew nu he Israilihanen. Penurua nu sikandan te metazeng he kebpengungubpaan, ne peuzani nu is tanà he imbeǥey nu kandan he egkaangken dan.
2CH 6:28 “Emun ebpekeuma is bitil ziyà te tanà te menge etew nu, limas etawa meinit he keramag, etawa keranapranap he ebpekezezaat te menge pinemula, ragkes en is menge terapan wey menge tetaru, etawa edliǥuyan sikandan te menge kuntada zan diyà te minsan hendei te menge inged dan, etawa ebpekeuma ziyà te kandan is minsan hengkey he zaru,
2CH 6:29 ne emun duen kandan ebpengemuyù etawa ke ebpetavang kenikew, ne pemineǥa nu sikandan. Ne emun nesavut dan he pinaaǥi te kebpekesalè dan ne nekeuma ziyà te kandan heini is ked-antus dan wey kegkerasey zan, ne ebpengemuyù dan he ibpeketikang dan is menge velad dan he ed-etuvang kayi te valey nu.
2CH 6:30 Pemineǥa nu sikandan diyan te ubpeey nu he langit. Ne peseyluwa nu sikandan, ne veeli nu ziyà te kada sevaha kandan is ereg te menge vaal zan, su netuenan nu is gehinawa te kada sevaha kandan. Su utew venar he iyan ke zà netau te ǥehinawa te langun he etew.
2CH 6:31 Beeli nu heeyan para medtahud dan wey medsunud dan te kenikew he menge paaǥi zutun te ked-ubpè dan dutun te tanà he imbeǥey nu te menge kepuun dey.
2CH 6:32 “Emun duen kenà menge Israilihanen he meǥinged diyà te meziyù he lugar he ebpekezineg te ventuǥan nu wey kegkemekeǥeǥehem nu, ne edhengkayi zan te ked-azap kenikew wey ebpengemuyù dan he ed-etuvang kayi te valey nu,
2CH 6:33 pemineǥa nu sikandan keniyan te ubpeey nu he langit. Ne iveǥey nu ziyà te kandan is minsan hengkey he ebuyuen dan, para is tivuuk he menusiyà kayi te kelibutan ne ebpekekilala kenikew, ne edtehuzen ke zan iring te menge etew nu he Israilihanen, su wey zan metueni he midtukud ku heini is baley nu para te zengeg nu.
2CH 6:34 “Emun edhipanew is menge etew nu te kebpekidtebek su iyan inmandù nu, ne emun ed-ampù sikandan he edsinaru kayi he inged te pinilì nu wey kayi te valey nu he mibangun ku he para te zengeg nu,
2CH 6:35 pemineǥa nu is menge kebpengemuyù dan wey menge hangyù dan diyan te langit, ne iveǥey nu kandan is kezeeǥan.
2CH 6:36 “Ne emun ebpekesalè dan kenikew–su wazà minsan hentei he wazè din salà–wey tenged te utew nu kekegpauk ne impezaag nu sikandan te menge kuntada zan ne mibihag dan pehendiyà te uvey etawa meziyù he lugar,
2CH 6:37 ne emun egkeveǥu is gehinawa zan dutun he lugar, ne ed-engkezan dan is kebaal te salà, ne ebpehizuhizu zan he edhenduen te, ‘Nekesalè key wey mezaat is menge vaal zey,’
2CH 6:38 pemineǥa nu is menge kebpengemuyù dan. Ne emun ebpekid-uliey sikandan kenikew te ebpuun te tivuuk he ǥehinawa zan wey isip dan diyà te lugar he zutun dan bihaǥa, ne ebpengemuyù dan he ed-etuvang kayi te tanà he imbeǥey nu te menge kepuun dan, he iyan heini is inged he mibpilì nu, wey heini is baley nu he midtukud ku para te zengeg nu,
2CH 6:39 pemineǥa nu is menge kebpengemuyù dan wey menge hangyù diyan te ubpeey nu he langit, ne veǥayi nu sikandan te kezeeǥan. Peseyluwa nu sikandan te menge salè dan diyan te kenikew.
2CH 6:40 “He Nengazen ku, berakat he edseǥipaan nu is menge kebpengemuyù he ebeelan kayi he lugar.
2CH 6:41 “Guntaan, Nengazen he Megbevayà, hendiyè ke en te valey nu, kes lugar he himelayè nu, he zutun isavuk kes Kavan te Kebpekid-uyun nu, he ebpesavut te ǥehem nu. Berakat he meseǥazi te menge memumuhat nu is kedlibriya nu kandan, ne egkelipey is metinumanen he menge etew nu tenged te keupiya nu.
2CH 6:42 He Nengazen he Megbevayà, kenè nu iniyuǥi is pinilì nu he hadì. Kenè nu lipati is kebmahala nu te suluǥuen nu he si David.”
2CH 7:1 Hein nekepasad he ebpengemuyù si Solomon, ne zuen hapuy he ebpuun diyà te langit ne nengetutung haazà is pemuhat he edtutungen wey zuma pa he menge pemuhat, ne is mekeǥeǥehem he kebpekiduma te Nengazen ne nekepenù dutun te valey te Nengazen.
2CH 7:2 Kenà ebpemekeseled is menge memumuhat dutun te valey te Nengazen su midsirang sikandan te mekeǥeǥehem he kebpekiduma te Nengazen he nekepenù dutun te valey te Nengazen.
2CH 7:3 Hein naahà te langun he menge Israilihanen haazà is hapuy he mibulus wey is mekeǥeǥehem he kebpekiduma te Nengazen dutun te divavew te valey te Nengazen, ne midluhud dan ne mid-azap dan is Nengazen he zuma is kebpeselamat. Migkaǥi sikandan te, “Meupiya is Nengazen; wazà pidtemanan te gaǥew zin.”
2CH 7:4 Ne nemuhat diyà te Nengazen si Hadì Solomon wey is langun he menge Israilihanen.
2CH 7:5 Nemuhat dan te 22,000 he menge vaka wey 120,000 he menge kerehidu wey menge kambing. Te heini he paaǥi impehinungud duen te hadì wey langun he menge keet-etawan haazà is baley te Megbevayà.
2CH 7:6 Ne mibpelastar is menge memumuhat duen te valey te Nengazen, ne iring din ded daan is menge Levihanen he nemekesinaru kandan ne migkanta he edhenduen te, “Wazà pidtemanan te gaǥew zin.” Eduyuǥan dan haazà is kanta te menge gelemiten he mibpeveelan ni Hadì David te kedalig te Megbevayà. Dutun te etuvangan te menge Levihanen, is menge memumuhat mibpezaǥing daan te menge trumpita zutun te kemulu en ebpenhitindeg is langun he menge Israilihanen.
2CH 7:7 Impehinungud ni Solomon sikan is lama he ziyà te etuvangan te valey te Nengazen. Ne nemuhat dan dutun te menge pemuhat he edtutungen, menge pemuhat he para gasa, wey menge tavà he pemuhat he para te meupiya he kedepità. Ne sikan is brunsi he pemuhatà he mibpeveelan ni Solomon ne utew zeisey para kayi he menge pemuhat.
2CH 7:8 Midsilibra pa si Solomon wey is langun he menge Israilihanen te Pista te Kebaal te menge Lawig seled te pitu he andew. Utew mezakel he menge etew is nevurun he ebpuun te Lebo Hamat he zapit te zizaya pehendiyà te zal-ug te Ehipto he zapit te zivavà.
2CH 7:9 Hein ikewalu en he andew, mibeelan dan is ketepusan he keburunburun, su midsilibra zan is kebpehinunguza zuen te pemuhatà wey te tivuuk he valey te Nengazen seled te pitu he andew, wey te kedsilibra te Pista te Kebaal te menge Lawig seled daan te pitu he andew.
2CH 7:10 Sunud dutun he andew, he iyan ike-23 he andew te ikepitu he vulan, impeulì ni Solomon is menge etew. Mid-ulì dan he melipayen utew tenged te langun he meupiya he mibeelan te Nengazen ki David wey ki Solomon, wey te menge etew zin he menge Israilihanen.
2CH 7:11 Ne nepasad ni Solomon is kebangun duen te valey te Nengazen wey te turuǥan din. Nepasad din is langun he menge pelanu zin para kayi.
2CH 7:12 Ne sevaha zutun he mezukilem, mibpaahà kandin is Nengazen he egkaǥi, “Nezineg ku is menge kebpengemuyù nu ne mibpilì ku heini is baley ku he pemuhatà te menge pemuhat.
2CH 7:13 “Penenglitan kenè ku ibpeuzan, etewa ebpeeǥiyan ku te menge terapan is tanà he egkaan te menge pinemula kayi, wey ebpeeǥiyan ku is keet-etawan ku te kezeetan,
2CH 7:14 emun is menge etew he mid-umew ku kenà ebpelavew, ne ebpengemuyù wey ed-aput kayi te kedì, ne ed-iniyuǥan dan is menge mezaat he menge ulaula zan, ebpemineǥen ku sikandan kayi te langit ne ebpeseyluwen ku is menge salè dan, ne idlikù ku is uzar te menge tanè dan.
2CH 7:15 Edseǥipaan ku sikandan ne ebpemineǥen ku is menge kebpengemuyù dan te kayi he lugar,
2CH 7:16 su heini is baley ku ne mibpilì ku wey insivey ku heini he lugar para kedì su wey mehimu he zutun a ebeǥayi te zengeg he wazà pidtemanan. Ebentayan ku heini wey ed-eturen ku lelayun.
2CH 7:17 “Ne sikew, emun edsunud ka kedì iring te amey nu he si David, ne ebeelan nu is langun he ebpeveelan ku kenikew wey edtumanen nu is ibeǥey ku he menge sulunuzen wey menge suǥù,
2CH 7:18 ibpehadì ku is menge kevuwazan nu te wazà pidtemanan. Iyan heini impenaad ku ziyà te amey nu he si David hein migkeǥiyan ku sikandin te, ‘Kenè ka egkeewaan te kevuwazan he edhadì te Israel.’
2CH 7:19 Piru emun ed-iniyuǥan a keniyu ne kenè niw edtumanen is menge suǥù wey menge sulunuzen he imbeǥey ku keniyu, wey ke ebpenilbi kew wey ed-azap te zuma he menge ed-ezapen,
2CH 7:20 ne ibpaawè ku sikiyu kayi te tanà he imbeǥey ku keniyu, ne ebeleǥazen ku heini is baley ku he iyan mibpilì ku he lugar he kayi a ebeǥayi te zengeg. Ne ed-un-undahan wey ed-engitan te menge etew.
2CH 7:21 Ne minsan pa te mekempet wey nevantug heini is baley ku, ne edrundusen ku heini. Egketingkemed wey egkengeinuinu is langun he edsaǥad kayi, ne egkaǥi zan te, ‘Maan is mibeelan heini te Nengazen kayi he tanà wey kayi te valey zin?’
2CH 7:22 Edtavak is duma te, ‘Tenged te mid-iniyuǥan dan is Nengazen, is Megbevayà te menge kepuun dan, he iyan mibpeǥawas kandan diyà te Ehipto, ne mibpenilbi wey mid-azap dan te zuma he ed-ezapen. Umbe mibpeeǥiyan sikandan te Nengazen kayi he menge kezeetan.’ ”
2CH 8:1 Kedlavey te 20 he tuig te kedtukuza ni Solomon te valey te Nengazen wey te turuǥan din,
2CH 8:2 mid-uman din tukuza is menge inged he imbeǥey kandin ni Hiram ne mibpeubpaan din te menge Israilihanen.
2CH 8:3 Iyan heini timpu he midsurung ni Solomon is Hamat Zoba ne naaǥew zin heini.
2CH 8:4 Mid-umanan din tukuza is Tadmor he ziyà te sibsivayan wey menge inged diyà te Hamat he zutun is menge budiga.
2CH 8:5 Midlig-enan din is divavew wey zizalem he vahin te Bet Horon. Mibpelingutan din heini te menge verengbeng ne mibpemeelan dutun is menge pultahan he zuen dan menge terangka.
2CH 8:6 Iyan daan heini mibeelan din diyà te Baalat wey te zuma pa he menge inged he zutun is menge budiga zin, menge kerwahi wey menge kudè din. Midtukud din is langun he egkesuatan din te edtukud diyà te Jerusalem, Lebanon wey te langun he tanà he sakup din.
2CH 8:7 Duen pa menge etew he nengetaǥak diyà te Israel he kenà menge Israilihanen. Menge kevuwazan sikandan te menge Hitihanen, Amunihanen, Perisihanen, Hivihanen wey menge Jebusihanen he nengesamà he wazà mepatey te menge Israilihanen te ked-eǥawa zan te tanà te Canaan. Midhimu sikandan ni Solomon he menge uripen he ebpeǥesen he ibpeterebahu, ne taman guntaan kemulu he menge uripen sikandan.
2CH 8:9 Piru wazà minsan hentei he Israilihanen he mid-uripen ni Solomon, kekenà, midhimu zin sikandan he menge sundaru zin, menge upisyal, menge pengulu te menge sundaru, menge peremandar te menge kerwahi zin, wey menge pereuntud te kudà.
2CH 8:10 Is 250 kandan midhimu zin he menge upisyal he edumala te menge edterebahu te menge pruyiktu zin.
2CH 8:11 Hein nepasad en haazà is turuǥan he mibpeveelan ni Solomon he para te esawa zin he anak te hadì te Ehipto, in-awè din is esawa zin diyà te Inged ni David. Su migkaǥi sikandin te, “Kenà egkehimu he kayi ed-ubpà is esawa ku te turuǥan ni Hadì David he hadì te Israel, su segradu is minsan hendei he lugar he zutun dengan isavuk kes Kavan te Nengazen.”
2CH 8:12 Ne mibpemuhat si Solomon te pemuhat he edtutungen para te Nengazen dutun te pemuhatà he mibeelan din diyà te etuvangan te varkun te valey te Nengazen.
2CH 8:13 Midtuman din is suǥù ni Moises he ebpemuhat sumalà is kinahanglan he ibpemuhat kada andew wey te Andew te Kedhimeley, te Pista te Kebpuun te Hayag, wey te tetelu he pista he edsilibrahan kada tuig: is Pista te Supas he Wazè din Tapey, is Pista te Kedraǥun, wey is Pista te Kebaal te menge Lawig.
2CH 8:14 Ne sumalà te sulunuzen te amey zin he si David, migrupu zin is menge memumuhat wey menge Levihanen para te menge vuluhaten dan. Is menge Levihanen, ne iyan ebpengegalen te menge etew he edalig te Megbevayà, wey ed-uǥup dan te menge vuluhaten te menge memumuhat dutun te valey te Nengazen kada andew. Migrupu zin daan is menge ebantey te kada gemawan te valey te Nengazen su iyan heini insuǥù ni David he suluǥuen te Megbevayà.
2CH 8:15 Midtuman eni Solomon is langun he insuǥù ni Hadì David mehitenged te menge memumuhat wey menge Levihanen wey te menge budiga.
2CH 8:16 Nepasad is langun he mibpeveelan ni Solomon dutun te valey te Nengazen puun te kebpundara kayi taman te kegkepasad kayi.
2CH 8:17 Ne midhendiyà si Solomon te Ezion Geber wey ziyà te Elot, diyà te beyvey te Zaǥat he Meriǥà, diyà te tanà te Edom.
2CH 8:18 Mibpeuwitan sikandin ni Hiram te menge varku he iyan edumala zuen is menge upisyal zin he memetau ziyà te zaǥat. Heini sikandan mid-untud te varku zuma te menge sakup ni Solomon pehendiyà te Ofir. Ne hein midlikù sikandan ne nekeuwit dan te menge 16 he tunilada he vulawan, ne mid-uwit dan haazà diyà te ki Hadì Solomon.
2CH 9:1 Hein nezineg duen te rayna ziyà te Sheba is kegkevantug ni Solomon, ne midhendiyà sikandin te Jerusalem su egezaman din is ketau ni Solomon pinaaǥi te menge insà he menge mereǥen. Nekeuma sikandin diyà te Jerusalem duma te mahabet he menge sakup din, ne zuen din uwiten he menge kemilyu he kergadu te menge gasa he penaket, mahabet he vulawan, wey mahalen he menge vatu. Ne hein neked-ehè dan en ki Solomon, ne mid-insaan din si Solomon te minsan hengkey he egkesuatan din he id-insà.
2CH 9:2 Midtavak ni Solomon is langun he menge insè din, ne wazà minsan hengkey he insà wey menge vutang he wazè din ikepesavut kandin.
2CH 9:3 Hein neperikesà dutun te rayna ziyà te Sheba is ketau ni Solomon, wey hein neehè din is utew mekempet he turuǥan he midtukud din,
2CH 9:4 henduen be te kenà sikandin ebpeketuu. Iring ded hein neehè din is menge keenen diyà te lemisahan te hadì, is kedumala te menge upisyal zin, is kebpenilbi te menge suluǥuen din wey is menge tigsilbi te vinu zin he mekempet is menge yunipurmi zan, wey is menge pemuhat he edtutungen he impemuhat din diyà te valey te Nengazen.
2CH 9:5 Migkeǥiyan din haazà is hadì te, “Tutuu ves iyan is nezineg ku ziyà te nasyun ku mehitenged te menge mibeelan nu wey ketau nu.
2CH 9:6 Wazà a medtuu kayi umbe midhengkayi a ne neehè ku human. Is tutuu, ne wazà ganì mekedliliwezaan is netudtul kedì mehitenged kenikew te neehè ku. Is ketau nu ne lavew pa zutun te nezineg ku.
2CH 9:7 Utew zeyzey is menge sakup nu! Utew zeyzey is menge upisyal nu he ebpenilbi kenikew su lelayun dan egkezineg is ketau nu.
2CH 9:8 Ereg he edeliǥen is Nengazen he Megbevayè nu, he nelipey kenikew wey midhimu kenikew he hadì para edhadì ka para kandin. Tenged te gaǥew te Megbevayè nu te Israel wey te suat din he mebpedayun heini he nasyun te wazà pidtemanan, midhimu ke zin he hadì kayi, para meveeli nu is hustu wey metazeng diyà te menge etew.”
2CH 9:9 Ne mibeǥayan duen te rayna si Hadì Solomon te vulawan he lelima he libu he kilu, mezakel he menge penaket wey mahalen he menge vatu. Wazè en ebpekerepeng te kezekelà te penaket he imbeǥey zuen te rayna te Sheba ki Hadì Solomon.
2CH 9:10 Duen daan menge uwiten te menge sakup ni Hadì Solomon wey menge sakup ni Hiram he menge vulawan, menge kayu he almug, wey menge mahalen he menge vatu he ebpuun te Ofir.
2CH 9:11 Impenheǥezan ni Hadì Solomon haazà is menge kayu he almug te turuǥan wey te valey te Nengazen, ne is duma, ne mibeelan he menge alpa wey menge lira para te menge musikiru. Wazà iring kayi he almug diyà dengan te Juda.
2CH 9:12 Imbeǥey ni Hadì Solomon duen te rayna ziyà te Sheba is minsan hengkey he mibuyù din. Dekelè pa is ingkeveǥey ni Solomon kenà haazà is mibpen-uwit dutun te rayna ziyà te kandin. Ne mid-ulì haazà is rayna ziyà te inged din duma is menge sakup din.
2CH 9:13 Kada tuig ebpekezawat si Solomon te vulawan he 25,000 he libu he kilu,
2CH 9:14 kenà ragkes is menge vuhis he ebpuun te menge nigusyanti. Mibeǥey zaan kandin is langun he menge hadì diyà te Arabia wey menge gubirnedur ziyà te Israel te menge vulawan wey pelata.
2CH 9:15 Mibpevaal si Hadì Solomon te 200 he zezekelà he menge kelasag, ne is kada sevaha he kelasag ne mid-epizan te pitu he kilu he vulawan.
2CH 9:16 Mibpevaal zaan sikandin te 300 he zezeisey he menge kelasag he is kada sevaha ne mid-epizan te tetelu wey tengà he kilu he vulawan. Ne ziyè din heini isavuk is langun te vahin duen te turuǥan din he egngezanan te Ketelunan te Lebanon.
2CH 9:17 Mibpevaal zaan haazà is hadì te zekelà he pinuuwà te kedhadì. Mid-epizan haazà te lunsey he vulawan he ungal te ilipanti is indayandayan duen.
2CH 9:18 Heenem he huntù haazà is pinuuwà, ne zuen bulawan he untuzà te paa. Ne kada kilid te untuzà te velad ne zuen dutun ledawan te edhitindeg he erimaung.
2CH 9:19 Ne zuen daan dutun ledawan te erimaung diyà te pesikilizà te kada huntù. 12 langun he menge ledawan te erimaung is dutun te heenem he huntù. Wazà ebpekeiring kayi he pinuuwà te kedhadì diyà te minsan hendei he ginhedian.
2CH 9:20 Is langun he inumà ni Hadì Solomon ne lunsey he vulawan, ne is langun he menge gelemiten duen te vahin te turuǥan he egngezanan te Ketelunan te Lebanon ne lunsey zaan he vulawan. Kenà pelata is mibeelan su zeisek dà is bali te pelata te timpu ni Solomon.
2CH 9:21 Duen daan menge varku ni Solomon he para te petiǥayun, he iyan ed-uwit duen is menge sakup ni Hiram. Heini he menge varku kesevaha ed-ulì kada tetelu he tuig, he ed-uwit te menge vulawan, menge pelata, menge ungal te ilipanti, wey zezekelà wey zezeisey he kelasi te menge uval.
2CH 9:22 Wazà minsan hentei he hadì kayi te kelibutan he ebpekerepeng te ketau wey ketiǥeyunan ni Hadì Solomon.
2CH 9:23 Is langun he menge hadì kayi te kelibutan, ne egkesuat he meehè dan si Solomon wey zan mekezineg te ketau he imbeǥey kandin te Megbevayà.
2CH 9:24 Kada tuig, is kada sevaha he ebpenumbaley ziyà te kandin he ed-uwit te menge gasa: menge azen he vineelan puun te pelata wey vulawan, menge visti, menge ǥumaan, menge penaket, menge kudà, wey menge mula.
2CH 9:25 Duen menge 4,000 he menge teleǥuey ni Solomon te menge kudè din wey menge kerwahi. Duen din 12,000 he menge kudà he ziyè din ipelastar te menge inged he teleǥuey zin te menge kerwahi zin, ne is duma ne ziyè dà te kandin diyà te Jerusalem.
2CH 9:26 Midsakup din is langun he hadì he ebpuun te Wahig te Eufrates taman te tanà te menge Filistihanen wey te dulunà te Ehipto.
2CH 9:27 Dutun te timpu te iyan sikandin hadì, henduen dà te vatu is ked-isipa te pelata tenged te kezekelè din, ne is kahabet te mahalen he kayu he sidru ne henduen be te ebpekeiring dà te urdinaryu he kayu he sikemur ziyà te menge mibuntud-buntud diyà te edsenlepan.
2CH 9:28 Is menge kudà ni Solomon diyà ebpuun te Ehipto wey duma he menge nasyun.
2CH 9:29 Is duma pa he ǥuǥud mehitenged te kedhadì ni Solomon, puun pa te puunà taman te ketepusan, ne ingkesurat diyà te insurat ni Natan he ebpeneuven, wey ziyà te menge lalag ni Ahia he tig-Shilo, wey te Menge Nelewasan ni Iddo he ebpeneuven he ebpesavut daan te kedhadì ni Jeroboam he anak ni Nebat.
2CH 9:30 Diyà te Jerusalem med-ubpà si Solomon te kedhadì din te tivuuk he Israel seled te 40 he tuig.
2CH 9:31 Hein minatey en sikandin, ne ziyà ileveng te inged te amey zin he si David. Ne iyan maan nekeilis kandin te kedhadì is anak din he si Rehoboam.
2CH 10:1 Midhendiyà si Rehoboam te Shekem, su ziyà meburunburun is menge Israilihanen su ibpahayag dan is kedhimuwa zan kandin he hadì dan.
2CH 10:2 Hein nezineg haazà ni Jeroboam he anak ni Nebat, ne midlikù sikandin diyà te Israel. (Su ziyà sikandin meke-ubpà te Ehipto, su mibpeleǥuyan din si Hadì Solomon.)
2CH 10:3 Impetawag te menge Israilihanen si Jeroboam, ne pudu zan midhendiyà te ki Rehoboam ne ke sikandan te,
2CH 10:4 “Meveǥat is mibpeveelan kenami te amey nu. Piru emun ebpekemehegkapen nu heini, ne ebpenilbi key kenikew.”
2CH 10:5 Midtavak si Rehoboam te, “Beǥayi e zèpa keniyu te tetelu he andew te ked-isip-isip kayi, egkepasad haazà ne likù kew kayi te kedì.” Umbe mid-ulì haazà is menge etew.
2CH 10:6 Nekid-ahà si Hadì Rehoboam te ebpemendumala he nemenilbi te amey zin he si Solomon hein uuyag pa sikandin. Mid-insà si Rehoboam diyà te kandan te, “Hengkey is igkesambag niw kedì he igketavak ku zuen te menge etew mehitenged te hangyù dan?”
2CH 10:7 Midtavak sikandan te, “Emun ibpeehè nu kandan is keupiya nu kandan, ne igkeveǥey nu kandan is edhengyuen dan, ne ebpenilbi sikandan kenikew taman te taman.”
2CH 10:8 Peru wazà pezumdumahi ni Rehoboam is sambag dan kandin, kekenà, iyan midhinguma zin is menge vetan-en he iring din te kengunguhezi he ebpenilbi kandin.
2CH 10:9 Mid-insaan din sikandan te, “Hengkey is sambag niw kedì te idtavak ku te hangyù kedì dutun te menge etew? Iyan hangyù dan is pekehegkapa ku is meveǥat he mibpeveelan kandan te amey ku.”
2CH 10:10 Midtavak haazà is menge vetan-en te, “Iyan heini itavak nu zutun te menge etew he midhangyù kenikew: Is tindezeisey ku ne zekelè pa te hawak te amey ku.
2CH 10:11 He ke và dà egkegiya, meveǥat pa is ibpetuman ku keniyu kenà is impetuman te amey ku. Emun midlagkut kew te amey ku te letigu, ne iyan idlagkut ku keniyu is iring te venayew he meǥarang he menge putew.”
2CH 10:12 Midlavey is tetelu zutun he andew, ne midlikù dutun si Jeroboam wey is menge etew ziyà te ki Hadì Rehoboam, sumalà te migkaǥi te hadì kandan.
2CH 10:13 Piru wazà pezumdumahi ni Rehoboam is menge sambag kandin dutun te menge ebpemendumala. Kekenà, midrengrengitan din dà haazà is menge etew
2CH 10:14 sumalà te sambag kandin duen te menge vetan-en. Migkeǥiyan din sikandan te, “Meveǥat is impetuman te amey ku keniyu, piru meveǥat pa is ibpetuman ku keniyu. Emun midlagkut kew te amey ku te letigu, ne iyan idlagkut ku keniyu is iring te venayew he memeǥarang he putew.”
2CH 10:15 Umbe wazà pemineǥa zutun te hadì is hangyù dutun te menge etew, su paaǥi te Megbevayà he iyan egketuman is migkaǥi zin diyà te ki Jeroboam he anak ni Nebat pinaaǥi ki Ahia he tig-Shilo.
2CH 10:16 Hein neisip-isip te menge Israilihanen he wazè dan pemineǥa te hadì, ne migkeǥiyan dan is hadì te, “Wazè dey lavet kenikew te kevuwazan ni David! Belaǥad ka keniyan te ginhedian nu! Hengkayi kew en is menge Israilihanen, su ebpemen-ulì kiw!” Ne nemen-ulì is menge Israilihanen.
2CH 10:17 Iyan dà is menge Israilihanen he menge meǥinged diyà te Juda pedayun is kedumelaha kandan ni Rehoboam.
2CH 10:18 Ne impehendiyà ni Hadì Rehoboam te menge Israilihanen si Hadoram, kes edumala te menge etew he ebpeǥesen te kedterebahu. Piru mibpenuleng sikandin te vatu te menge Israilihanen taman te kebpatey zin. Ne migaanggaan med-untud si Hadì Rehoboam te kerwahi zin ne mibpelaǥuy pehendiyà te Jerusalem.
2CH 10:19 Ne minsan guntaan edribildiyan te menge Israilihanen is menge kevuwazan ni David
2CH 11:1 Ne hein nekeuma si Rehoboam diyà te Jerusalem, midtiǥum din is memetau he menge sundaru ziyà te tribu ni Juda wey ni Benjamin. Neketiǥum sikandin te 180,000 he menge sundaru he id-asdang din te menge Israilihanen su edhewien din is ginhedian din.
2CH 11:2 Piru migkeǥiyan te Nengazen si Shemaya he suluǥuen din,
2CH 11:3 “Keǥiyi nu si Hadì Rehoboam he hadì te Juda, he anak ni Solomon, wey langun he Israilihanen diyà te Juda wey Benjamin
2CH 11:4 te siak, is Nengazen, migkaǥi a te: ‘Kenè kew mebpekidtebek te menge kezuzumahi niw. Ulì kew, su kedì heini he kebayà is langun.’ ” Mibpezuma zan te Nengazen ne wazè dan surunga si Jeroboam.
2CH 11:5 Wazà med-awà si Rehoboam diyà te Jerusalem ne midlig-enan din heini is menge inged para kenà meselezi is Juda:
2CH 11:6 Betlehem, Etam, Tekoa,
2CH 11:7 Bet Zur, Soco, Adulam,
2CH 11:8 Gat, Maresha, Zip,
2CH 11:9 Adoraim, Lakish, Azeka,
2CH 11:10 Zora, Ayalon, wey Hebron. Iyan heini vinerengbeng he menge inged diyà te Juda wey Benjamin.
2CH 11:11 Midlig-enan din is menge verengbeng kayi ne midsevukan din heini te menge peremandar kayi he menge inged. Heini sikandan mibeǥayan din te egkeenen, lana te ulibu, wey vinu.
2CH 11:12 Mibpesevukan din heini he menge inged te menge kelasag wey menge vangkew he ebpekeuman te kelig-en kayi. Umbe mibpedayun is kegkesekupa zin te Juda wey Benjamin.
2CH 11:13 Is menge memumuhat wey menge Levihanen he ziyà med-ubpà te zuma he tribu te Israel, ne ziyè dan edapig te ki Rehoboam.
2CH 11:14 Heini he menge kevuwazan ni Levi ne mid-ewaan dan is menge valey wey menge tanè dan ne midhalin dan diyà te Juda wey Jerusalem su wazè dan isipa ni Jeroboam wey te menge anak din he menge memumuhat te Nengazen.
2CH 11:15 Midtezù si Jeroboam te keugelingen din he menge memumuhat diyà te menge simbahan diyà te metikang he menge lugar, he zutun dan ed-ezapa is menge ed-ezapen dan he mibpeveelan ni Jeroboam he kambing wey vaka.
2CH 11:16 Is menge Israilihanen diyà te zuma he tribu te Israel he egkesuat he edangep diyà te Nengazen he Megbevayà te Israel, ne nenelukun te menge kevuwazan ni Levi ziyà te Jerusalem, su para mekepemuhat dan te menge pemuhat diyà te Nengazen, he Megbevayà te menge kepuun dan.
2CH 11:17 Midlig-enan dan is ginhedian te Juda, ne seled te tetelu he tuig is ked-uǥupi zan ki Rehoboam he anak ni Solomon. Midsunud sikandan te Nengazen iring te mibeelan dan te iyan pa hadì si David wey si Solomon.
2CH 11:18 Mid-esawa ni Rehoboam si Mahalat, he iyan amey zin si Jerimot he anak ni David ne iyan iney zin si Abihail he anak ni Eliab wey apù ni Jesse.
2CH 11:19 Ne mid-anak si Rehoboam wey si Mahalat te tetelu he pudu maama he iyan si Jeush, si Shemaria, wey si Zaham.
2CH 11:20 Mid-esawa zaan ni Rehoboam si Maaca he anak ni Absalom. Ne iyan menge anak dan he menge maama si Abia, Atai, Ziza, wey si Shelomit.
2CH 11:21 Iyan utew pelanggà ni Rehoboam he esawa zin si Maaca. 18 is menge esawa ni Rehoboam he dungganen ne zuen pa 60 he esawa zin he kenà dungganen. Ne 28 is anak din he menge maama ne 60 is menge vahi.
2CH 11:22 Is anak din diyà te ki Maaca he si Abia iyan mibpilì din he pengulu te menge anak din he lavew, su egkesuatan din he iyan ebpekeilis kandin te kedhadì.
2CH 11:23 Nezumahan te ketau is kebeǥayi ni Rehoboam te zuma he menge anak din te menge ketengdanan. Is duma pa he menge anak din, impezumala zin te vinerengbeng he menge inged te Juda wey Benjamin. Ne mibeǥayan din sikandan te menge kinehenglanen dan wey mezakel he menge esawa.
2CH 12:1 Hein melig-en en is kedhadì ni Rehoboam wey gemhanan en sikandin, mid-iniyuǥan din en is kesuǥuan te Nengazen ne mid-iring kandin is tivuuk he menge Israilihanen.
2CH 12:2 Tenged te kenà sikandan metinumanen te Nengazen, midhimu zin he surunga ni Hadì Shishak he hadì te Ehipto is Jerusalem te ikelima he tuig te kedhadì ni Rehoboam.
2CH 12:3 Nenurung si Shishak duma te 1,200 he kerwahi, 60,000 he menge pereuntud te kudà, wey utew mahabet he menge sundaru, he is duma kandan ebpuun diyà te Libya, Sukot, wey Etiopia.
2CH 12:4 Ne midsakup ni Shishak is binerengbeng he menge inged te Juda ne midlaus dan pa medsurung pehendiyà te Jerusalem.
2CH 12:5 Ne midhendiyà is ebpeneuven he si Shemaya te ki Rehoboam wey te menge pengulu te Juda, he mibpelaǥuy pehendiyà te Jerusalem su nahandek dan ki Shishak. Migkeǥiyan sikandan ni Shemaya te, “Iyan heini lalag te Nengazen: Geina te mid-iniyuǥan a keniyu, ne ǥuntaan ebey-anan ku sikiyu keniyan te kedsurunga keniyu ni Shishak.”
2CH 12:6 Is hadì wey is menge pengulu te Israel, mid-angken dan is salè dan ne ke sikandan te, “Metazeng is Nengazen!”
2CH 12:7 Hein naahà te Nengazen he impekevavè dan is keugelingen dan, ne migkaǥi is Nengazen pinaaǥi ki Shemaya, “Geina te impekevavè dan is keugelingen dan, ne kenè ku sikandan edèdeetan, kekenà, edlibriyen ku sikandan te kenà egkeuǥet. Ne kenè ku en ibpesaǥad is Jerusalem te pauk ku pinaaǥi ki Shishak.
2CH 12:8 Piru ibpesakup ku sikandan kandin su wey zan metueni he meupiya pa is kebpenilbi kedì, kenà is kebpenilbi te kelibutanen he menge hadì.”
2CH 12:9 Hein midsurung ni Hadì Shishak he hadì te Ehipto is Jerusalem, mibpenguwa zin is menge ketiǥeyunan diyà te valey te Nengazen wey is diyà te turuǥan. Migkuwa zin is langun, ragkes en is menge kelasag he vulawan he mibpeveelan ni Solomon.
2CH 12:10 Umbe, mibpevaal si Hadì Rehoboam te brunsi he menge kelasag he inliwan dutun, ne insarig din heini te menge upisyal te menge vantey he ebantey te ǥemawan te turuǥan.
2CH 12:11 Ne emun edhendiyà haazà is hadì te valey te Nengazen, ne edumahan sikandin dutun te menge ebantey he ed-uwit kayi he menge kelasag, ne kegkepasad ne idlikù dan heini ziyà te ruǥu zan.
2CH 12:12 Tenged te impekevavà ni Rehoboam is keugelingen din, naawà is kegkepeuki kandin te Nengazen, ne wazè ded sikandin mepurung mezeeti. Ne zuen ded keupiyaanan diyà te Juda.
2CH 12:13 Mibpedayun he melig-en is kedumala ni Hadì Rehoboam wey mibpedayun sikandin he hadì diyà te Jerusalem. 41 he tuig is keǥurang din hein nehimu sikandin he hadì, ne midhadì sikandin seled te 17 he tuig diyà te Jerusalem, kes inged te langun he tribu te Israel he iyan nepilì te Nengazen he zutun sikandin ebeǥayi te zengeg. Is ngazan te iney ni Rehoboam iyan si Naama he sevaha he Amonihanen.
2CH 12:14 Mibaal si Rehoboam te mezaat tenged te wazè din isipa is kedangep diyà te Nengazen.
2CH 12:15 Is guǥud mehitenged te kedhadì ni Rehoboam puun te puunà taman te ketepusan, ne insurat diyà te Libru ni Shemaya he ebpeneuven wey ziyà te Libru ni Iddo he ebpeneuven he listahan te menge kevuwazan. Layun dengan edtebek si Rehoboam wey si Jeroboam.
2CH 12:16 Hein minatey en si Rehoboam, ne ziyà sikandin ileveng te Inged ni David. Ne si Abia he anak din is nekeilis kandin he iyan hadì.
2CH 13:1 Nehimu he hadì diyà te Juda si Abia hein ike-18 he tuig te kedhadi ni Jeroboam te Israel.
2CH 13:2 Diyà med-ubpà te Jerusalem si Abia, ne midhadì sikandin seled te tetelu he tuig. Iyan iney zin si Maaca he anak ni Uriel he tig-Gibeah. Mibpetebekà si Abia wey si Jeroboam.
2CH 13:3 Nenurung si Abia duma is 400,000 he menge mevurut he menge sundaru, ne mid-andam daan si Jeroboam te 800,000 he memetau he ebpekidtebek he menge sundaru.
2CH 13:4 Hein nekeuma ensi Abia ziyà te vuvungan te Efraim, ne midhitindeg si Abia ziyà te Buntud he Zemaraim ne migkulahì din si Jeroboam wey is menge tig-Israel, “Pemineg kew kedì.
2CH 13:5 Wazè niw ve metueni he is Nengazen he Megbevayà te Israel, nekid-uyun ki David te uyun he wazà pidtemanan, he iyan sikandin wey is menge kevuwazan din ebpekahadì te Israel te taman te taman?
2CH 13:6 Piru sikew Jeroboam is anak ni Nebat midsukul ka te egalen nu he si Solomon he anak ni David.
2CH 13:7 Miduma kenikew is engey wey wazà pulus he menge etew, ne nekidsukulè kew ki Rehoboam he anak ni Solomon dutun te vatè pa si Rehoboam wey wazè din pa neseǥazan ne kenè pa ebpekehimu he edsukul keniyu.
2CH 13:8 Ne ǥuntaan egkesuatan niw te egkuntada is ginhedian te Nengazen he ziyà isarig te kevuwazan ni David. Mibpegalbu kew he mezakel is menge sundaru niw wey neuwit niw kes bulawan he menge vaka he mibpeveelan ni Jeroboam he iyan menge megbevayè niw.
2CH 13:9 Midsegseg niw is menge memumuhat te Nengazen, he menge kevuwazan ni Aaron wey kes menge Levihanen. Ne mibpilì kew te keniyu he menge memumuhat iring te ebeelan te menge etew ziyà te zuma he menge nasyun. Su is minsan hentei he zuen din tudu he vaka wey pitu he kerehidu ne egkehimu en he edhimuwen he memumuhat te kenà tutuu he megbevayè niw.
2CH 13:10 “Sikami mulà, ne iyan is Nengazen Megbevayè dey, ne wazè dey sikandin iniyuǥi. Ne is menge memumuhat dey he ebpenilbi te Nengazen menge kevuwazan ni Aaron, ne ed-uǥupan sikandan te menge Levihanen.
2CH 13:11 Kada meselem wey mezukilem ne ebpemuhaten dan is Nengazen te menge ibpemuhat he edtutungen wey menge mehemut he veyewà. Edsavuk dan te supas diyà te lemisahan he ed-isipen he lumpiyu. Ne kada mezukilem edtemteman dan is menge sulù he zutun te selevukè din he vulawan. Ebpezumdumahan dey is menge suǥù te Nengazen he Megbevayè dey. Piru sikiyu mid-iniyuǥan niw sikandin.
2CH 13:12 Is Megbevayà ne eduma kenami; iyan sikandin pengulu zey. Ne emun edsurung key keniyu ne iyan ebpengulu kenami is menge memumuhat he ebpezaǥing te menge trumpita. Sikiyu is menge keet-etawan te Israel, kenè niw sukuli is Nengazen, he Megbevayà te menge kepuun niw, su kenè kew ebpekezaag.”
2CH 13:13 Hein kemulu pa si Abia egkaǥikaǥi, ne mid-eles-eles medsuǥù si Jeroboam te menge sundaru ziyà te egkeiniyuǥan te menge tig-Juda para meeyani sikandan.
2CH 13:14 Hein naahà te menge tig-Juda he nelingutan en sikandan te menge kuntada zan, ne mibuyù dan te tavang diyà te Nengazen. Impezaǥing te menge memumuhat is menge trumpita,
2CH 13:15 ne nemengulahì dan ne midaag te Megbevayà si Jeroboam wey is menge sundaru te Israel. Mibpendal-as sikandan ni Abia wey te menge sundaru te Juda.
2CH 13:16 Nemelaǥuy zan ne imbeǥey sikandan te Megbevayà diyà te menge tig-Juda.
2CH 13:17 Utew mezakel is nepatey ni Abia wey te menge sakup din–500,000 he menge memetau he menge sundaru te Israel.
2CH 13:18 Umbe, nezaag te menge tig-Juda is menge tig-Israel dutun he tebek, tenged te midsarig sikandan te Nengazen he Megbevayà te menge kepuun dan.
2CH 13:19 Midal-as ni Abia si Jeroboam ne naaǥew zin diyà te kandin is menge inged te Betel, Jeshana wey Efron, wey neragkes is menge inged he nekelingut dutun.
2CH 13:20 Wazè en mekelikù diyà te ki Jeroboam is gehem dutun te timpu ni Abia, ne taman en te midsilutan sikandin te Nengazen ne minatey.
2CH 13:21 Ne mid-iseg mulà is gehem ni Abia. Duen din 14 he menge esawa ne 22 is menge maama he menge anak din ne 16 is menge anak din he menge vahi.
2CH 13:22 Is duma pa he ǥuǥud mehitenged te kedhadì ni Abia, is menge paaǥi zin wey menge migkaǥi zin, ne ingkesurat diyà te Guǥud ni Iddo he ebpeneuven.
2CH 14:1 Ne hein minatey si Abia, ne ziyà ileveng te Inged ni David. Ne si Asa is anak din iyan nekeilis kandin te kedhadì. Ne hein iyan hadì si Asa, ne melinawen is Juda seled te 10 he tuig.
2CH 14:2 Metazeng diyà te etuvangan te Nengazen he Megbevayè din is mid-ulaula ni Asa.
2CH 14:3 Impemerundus din is menge pemuhatà para te zuma he menge ed-ezapen wey is menge simbahan diyà te metikang he menge lugar. Imperupet din daan kes tedeman he menge vatu wey impepiley is menge tukud he simbulu te ed-ezapen he si Ashera.
2CH 14:4 Ne mibmenduan din is menge etew te Juda te kedangep te Nengazen, is Megbevayà te menge kepuun dan, wey kedtuman te menge kesuǥuan din.
2CH 14:5 Imperundus din is menge simbahan diyà te metikang he menge lugar wey menge pemuhatà he edtutungan te menge veyewà diyà te langun he inged te Juda. Umbe zuen kelinew te ginhedian te Juda te timpu he iyan hadì si Asa.
2CH 14:6 Hein melinew en, mibpeveelan din te verengbeng is menge inged te Juda. Ne wazè en ebpekidtebek te haazà he timpu su mibeǥayan te Nengazen sikandin te kelinew.
2CH 14:7 Migkeǥiyan ni Asa is menge tig-Juda te, “Edlig-enan tew heini he menge inged pinaaǥi te kebeeli te menge verengbeng he ibpelingut kayi he zuen turi, menge pultahan, wey menge trangka. Iyan kiw zed nekaangken kayi he tanà, su midangep kiw te Nengazen he Megbevayè tew. Ne mibeǥayan kiw zin te kelinew su wazè kiw tebeka te menge kuntada tew kayi te nekelingut.” Umbe midlig-enan dan is menge inged dan ne mibmeuswaǥen dan.
2CH 14:8 Duen 300,000 he menge sundaru ni Asa he menge tig-Juda, he nehimanan te zezekelà he menge kelasag wey menge vangkew. Wey zuen din daan menge sundaru he 280,000 he tig-Benjamin he nehimanan te menge zezeisek he menge kelasag wey menge panà. Ne pudu heini sikandan menge memetau he menge sundaru.
2CH 14:9 Midhipanew si Zera he tig-Etiopia duma is mezakel utew he menge sundaru wey 300 he menge kerwahi su edsurung dan diyà te Juda. Nekeuma zan diyà te Maresha,
2CH 14:10 ne midhipanew zaan ensi Asa is edsurung ki Zera. Ne ziyè dan mebpelastar te suǥud-suǥud te Zefata he uvey te Maresha.
2CH 14:11 Ne nengemuyù si Asa ziyà te Nengazen he Megbevayè din, “He Nengazen, wazè en minsan hentei he ebpeketavang te menge etew he wazè din igkesukul te menge gemhanan kekenà sikew zà. He Nengazen he Megbevayè dey, tevangi key su midsarig key kenikew, wey pinaaǥi te ngazan nu ne midhendini key te kedsukul kayi te utew mezakel he menge sundaru. He Nengazen, iyan ka Megbevayè dey; kenè nu ituǥut he mekezaag is etew he ebpekigkuntada kenikew.”
2CH 14:12 Umbe, midaag te Nengazen is menge tig-Etiopia dutun te etuvangan ni Asa wey te menge tig-Juda. Mibpemelaǥuy is menge tig-Etiopia.
2CH 14:13 Ne midal-as dan ni Asa wey te menge sundaru zin taman te Gerar. Utew mezakel is nemematey kandan, ne tenged dutun kenè dan en ebpekepekidtebek. Su midaag sikandan te Nengazen wey te menge sundaru zin. Utew zekelà he menge azen is nengaaǥew te menge sundaru te Juda.
2CH 14:14 Ne midezeetan dan is menge inged he nekelingut te Gerar, su mibpelihandek te Nengazen is menge meǥinged dutun. Mibpenguwa zan is menge azen kayi su utew zekelà is menge azen dan.
2CH 14:15 Midsurung dan daan is menge kampu te ebantey te menge layud, ne mibpenguwa zan is mezakel he menge kerehidu, wey menge kambing, wey menge kemilyu. Ne midlikù dan diyà te Jerusalem.
2CH 15:1 Ne miduma te Mulin-ulin he Megbevayà si Azaria he anak ni Oded.
2CH 15:2 Ne mibpekid-ahà sikandin ki Asa ne migkeǥiyan din te, “Pemineǥa a keniyu Hadì Asa, wey sikiyu is langun he tig-Juda wey tig-Benjamin. Is Nengazen ne kenà edsuwey keniyu emun kenè kew edsuwey kandin. Emun edangep kew kandin ne egkeehè niw is keupiya zin. Piru ke ed-iniyuǥan niw sikandin, ne ed-iniyuǥan kew zin daan.
2CH 15:3 Meluǥayad he timpu ne wazà kilelalaa te menge Israilihanen is tutuu he Megbevayà; wazè dan menge memumuhat he mibpenurù kandan, wey wazè dan menge kesuǥuan.
2CH 15:4 Piru hein edlised dan en, ne midangep dan diyà te Nengazen he Megbevayà te Israel, ne midtevangan din sikandan.
2CH 15:5 Haazà he timpu dilikadu is kebiyahi su edsinamuk is menge etew.
2CH 15:6 Su edtetebek is menge etew ziyà te menge nasyun wey ziyà te menge inged, su migurigew sikandan te Megbevayà pinaaǥi te menge wazà med-iring-iring he menge kemereǥenan.
2CH 15:7 Sikiyu mulà guntaan, ne pekevurut kew ne kenè kew mebmeluya, su edsuhulan kew tenged te menge vaal niw.”
2CH 15:8 Dutun te kegkezineǥa ni Asa te migkaǥi ni Azaria he ebpeneuven he anak ni Oded, ne mibpekevurut sikandin. Ne impepen-awè din sikan is utew mezaat he menge ed-ezapen diyà te tivuuk he Juda wey Benjamin, wey ziyà te menge inged he menge naaǥew zin diyà te vuvungan te Efraim. Mibpepurungan din is pemuhatà para te Nengazen he ziyà te etuvangan te varkun te valey te Nengazen.
2CH 15:9 Ne midtiǥum din is langun he menge keet-etawan te Juda wey Benjamin, wey is menge etew he ebpuun te Efraim, Manase, wey Simeon he zuma zan he meǥinged. Mezakel is midhalin diyà te Juda he ebpuun te Israel hein neehè dan he miduma ki Asa is Nengazen he Megbevayè din.
2CH 15:10 Midtiǥum dan diyà te Jerusalem te iketelu he vulan te ike-15 he tuig te kedhadì ni Asa.
2CH 15:11 Ne te haazà he timpu nemuhat dan diyà te Nengazen te menge uyaǥen he ebpuun te menge naaǥew zan te kebpekidtebek–700 he vaka wey 7,000 he menge kerehidu wey kambing.
2CH 15:12 Neuyunan dan he edangep dan diyà te Nengazen, he Megbevayà te menge kepuun dan, te tivuuk he ǥehinawa zan wey kedsavut.
2CH 15:13 Ne is minsan hentei he kenà edangep diyà te Nengazen he Megbevayà te Israel, ne edhimetayan, batà etawa meǥurang, maama etawa vahi.
2CH 15:14 Mibpenaad dan diyà te Nengazen pinaaǥi te mezaǥing he laǥeng, duma is ked-ugyab wey impezaǥing dan is menge trumpita wey menge vudyung.
2CH 15:15 Utew nengelipey is langun he tig-Juda su nekevaal zan te kebpenaad he ebpuun te ǥehinawa zan. Ne utew meheǥet is gehinawa zan te kedangep te Nengazen, ne neehè dan is keupiya zin. Ne mibeǥayan din sikandan te kelinew su wazè dan mekepekidtebek te menge kuntada zan diyà te peliǥuy.
2CH 15:16 Impaawà daan ni Hadì Asa is apù din he si Maaca te kegkerayna zin tenged te mibaal sikandin te utew mezaat he tukud he simbulu te ed-ezapen he si Ashera. Impetamped ni Asa heini he tukud ne impeǥurey zin. Ne mibpevinsulan din diyà te zal-ug te Kidron.
2CH 15:17 Minsan te wazà maawà is langun he simbahan diyà te metikang he lugar te Israel, ne wazà si Asa med-awà diyà te Nengazen te tivuuk he untung din.
2CH 15:18 Mid-uwit din diyà te valey te Megbevayà is menge pelata, menge vulawan, wey zuma pa he menge azen he inhalad dan te amey zin diyà te Megbevayà.
2CH 15:19 Wazà tebek taman te ike-35 he tuig te kedhadì ni Asa.
2CH 16:1 Hein ike-36 he tuig te kedhadì ni Asa, ne midsurung ni Hadì Baasha he hadì te Israel is Juda. Ne midlig-enan din is berengbeng te inged he Rama su para wazà ebpekeǥawas etawa ebpekeseled diyà te lugar ni Hadì Asa he hadì te Juda.
2CH 16:2 Ne mibpenguwa ni Asa sikan is menge brunsi wey menge vulawan diyà te valey te Nengazen wey ziyà te turuǥan din. Ne imbeǥey zin heini ki Hadì Ben Hadad he hadì te Aram diyà te Damascus he iyan ed-ubpaan ni Ben Hadad. Iyan heini menge lalag ni Asa ki Ben Hadad:
2CH 16:3 “Ed-uyun ki he ebpelevanè ki, iring te mibeelan te amey ku wey amey nu. Ne zewata nu heini is ibeǥey ku kenikew he pelata wey vulawan, ne edhangyù a ziyà te kenikew he engkezi nu en is kedlavan nu ki Hadì Baasha ziyà te Israel su para mevey-ani e zin en.”
2CH 16:4 Mibpezumdumahan ni Ben Hadad is hangyù ni Hadì Asa, ne midsuǥù din is menge peremandar te menge sundaru zin he surunga zan is menge inged te Israel. Naaǥew zan is Ion, Dan, Abel, Maim, wey langun he menge inged te Naftali he zutun is menge budiga.
2CH 16:5 Hein netuenan haazà ni Baasha, ne mibpeengkezan din is kedlig-eni te Rama.
2CH 16:6 Ne mibmendaran ni Hadì Asa is langun he menge maama te Juda he ibpekuwa kandan is menge vatu wey menge zezekelà he menge kayu he migamit ni Baasha te kedlig-en te Rama. Ne migamit heini ni Hadì Asa te kedlig-en te Geba wey Mizpa.
2CH 16:7 Haazà he timpu, ne midhendiyà is ebpeneuven he si Hanani te ki Hadì Asa he ziyà te Juda he egkaǥi te, “Geina te midsarig ka te Hadì te Aram ne wazè ka medsarig diyà te Nengazen he Megbevayè nu, ne kenè niw en egkezezeetan is menge sundaru te hadì te Aram.
2CH 16:8 Egketenuzan nu ve ke hengkey is neulaula te menge tig-Etiopia wey tig-Libya, he is menge sundaru zan, menge kerwahi zan wey menge pereuntud dan te menge kudà he utew mezakel? Dutun he timpu ne midsarig ka te Nengazen, ne impezaag din sikandan keniyu.
2CH 16:9 Su is Nengazen, ne neehè din is tivuuk he menusiyà ne edlig-enan din is menge etew he edsunud kandin. Kelelalung is mibeelan nu! Umbe puun guntaan ne layun ke en ebpekepekidtebek.”
2CH 16:10 Tenged kayi, ne nepauk utew sikandin dutun te ebpeneuven, umbe impepirisu zin sikandin. Ne puun dutun he timpu mibpuun si Asa mebpendaagdaag te zuma he menge etew zin.
2CH 16:11 Is guǥud mehitenged te kedhadì ni Asa, puun pa te puunà taman te ketepusan, ne ingkesurat diyà te Libru he Midsuratan te menge Keguǥuza te menge Hadì te Juda wey Israel.
2CH 16:12 Hein ike-39 he tuig te kedhadì ni Asa, ne utew sikandin nekaantus te zaru ziyà te paa. Ne minsan te utew ed-iseg is daru zin, ne wazà sikandin mebuyù te tavang diyà te Nengazen, kekenà, diyà te menge mememawì.
2CH 16:13 Ne hein ike-41 he tuig te kedhadì din, ne minatey sikandin.
2CH 16:14 Inleveng sikandin diyà te penlevengà he mibpeveelan din para te keugelingen din diyà te Inged ni David. Impehizeǥè dan sikandin diyà te hizeǥeey he zuen duen nekedseselekawà he menge pehemut, wey midtetavun is menge etew te zekelà he hapuy para te kebeǥayi kandin te zengeg.
2CH 17:1 Ne is nekeilis ki Asa te kedhadì ne iyan is anak din he si Jehoshafat. Midlig-enan ni Jehoshafat is ginhedian din su para mekesukul sikandin te Israel.
2CH 17:2 Mibpepelestaran din te menge sundaru is langun he vinerengbeng he menge inged te Juda, ne midtukuzan din te menge kampu te menge sundaru is Juda wey is menge inged te Efraim he naaǥew te amey zin he si Asa.
2CH 17:3 Eduma is Nengazen ki Jehoshafat su zutun te nehuna he menge tuig te kedhadì din ne midsunud din is menge ulaula te kepuun din he si David. Wazà sikandin medangep diyà te menge ledawan ni Baal,
2CH 17:4 kekenà, diyà sikandin medangep te Megbevayà te amey zin wey midsunud din is kesuǥuan, ne wazè din sunuza is menge ulaula te menge tig-Israel.
2CH 17:5 Midlig-enan te Nengazen is ginhedian dutun te kandin he kedhadì. Mid-uwitan sikandin te langun he menge tig-Juda te gasa, umbe midekelà is ketiǥeyunan din wey nevantug.
2CH 17:6 Metinumanen sikandin te kedsunud te menge paaǥi te Nengazen. Imperundus din te menge tig-Juda is menge simbahan diyà te metikang he menge lugar wey kes tukud he simbulu te vahi he ed-ezapen he si Ashera.
2CH 17:7 Hein ike-3 en he tuig te kedhadì din, ne midsuǥù din is menge upisyal zin he si Ben Hail, Obadias, Zacarias, Netanel, wey si Micaya te kebpenurù diyà te menge inged te Juda.
2CH 17:8 Iyan duma zan he menge Levihanen ensi Shemaya, Netania, Zebadia, Asahel, Shemiramot, Jehonatan, Adonia, Tobia, Tob Adonia, wey menge memumuhat he si Elishama wey si Jehoram.
2CH 17:9 Mid-uwit dan kes Libru te Kesuǥuan te Nengazen ne mid-eneb dan is langun he inged te Juda ne mibpenurù dan is menge etew.
2CH 17:10 Mibpelihandek te Nengazen is langun he menge ginhedian he nekelingut te Juda, umbe wazè dan mebpekidtebek ki Jehoshafat.
2CH 17:11 Is duma he menge Filistihanen ne mid-uwitan dan si Jehoshafat te menge gasa wey pelata he ibuhis dan. Ne zuen daan menge tig-Arabia he mid-uwit diyà te kandin te 7,700 he menge kerehidu wey 7,700 he menge kambing.
2CH 17:12 Umbe, mibmelig-en utew si Jehoshafat. Umbe mibpehitindeg sikandin diyà te Juda te melig-en he menge kutà wey menge inged he para te menge budiga.
2CH 17:13 Utew zekelà he menge kinehenglanen is midtiǥum din dutun te inged te Juda. Midsavuk daan sikandin te menge memetau he menge sundaru ziyà te Jerusalem.
2CH 17:14 Is menge sundaru zin ne nelista sumalà te kandan he menge pemilya. Si Adnah iyan peremandar te 300,000 he menge memetau he menge sundaru he tig-Juda, he migrupu te tig-1,000.
2CH 17:15 Is sunud kandin ne iyan si Jehohanan he peremandar te 280,000 he menge sundaru.
2CH 17:16 Ne is sunud ne iyan si Amasia he anak ni Zicri, he peremandar te 200,000 he menge memetau he menge sundaru. Midbuluntaryu sikandin para te buluhaten te Nengazen.
2CH 17:17 Si Eliada, is sevaha he metau he sundaru, ne iyan peremandar te 200,000 he menge sundaru he tig-Benjamin. Heini he menge sundaru ne zuen dan menge kelasag wey menge panà.
2CH 17:18 Ne iyan sunud kandin si Jehozabad he peremandar te 180,000 he neǥumeenan he menge sundaru.
2CH 17:19 Iyan heini sikandan mibpenilbi ki Hadì Jehoshafat. Ne kenà ragkes kandan is menge sundaru he ziyè din ipelastar te vinerengbeng he menge inged diyà te tivuuk he Juda.
2CH 18:1 Kayi he timpu si Jehoshafat ne midekelà utew is ketiǥeyunan din wey nevantug, wey utew meupiya is kedepitè dan ki Ahab he Hadì te Israel tenged te kebpeked-esawa te menge sakup te pemilya zan.
2CH 18:2 Midlavey is pira he menge tuig, ne mibpenumbaley si Jehoshafat diyà te ki Ahab diyà te Samaria. Midlapà si Ahab te mezakel he menge kerehidu wey menge vaka su nengemuran sikandin para ki Jehoshafat wey te menge sakup din. Ne midhinggat din si Jehoshafat te kebpenurung diyà te Ramot Gilead.
2CH 18:3 Migkeǥiyan din si Jehoshafat te, “Eduma ke ve kenami te kebpekidtebek diyà te Ramot Gilead?” Ne midtavak si Jehoshafat te, “Andam a he eduma kenikew, wey andam a zaan he kebpeǥamit kenikew te menge sundaru ku. Uya, eduma key kenikew te ebpekidtebek.
2CH 18:4 Piru ed-insaan ta zep-a is Nengazen ke hengkey is kandin he egkekaǥi.”
2CH 18:5 Umbe, impetawag ni Ahab is menge ebpeneuven–400 sikandan langun, ne mid-insà te, “Egenat key ve te kebpekidtebek diyà te Ramot Gilead etawa kenà?” Midtavak dan te, “Genat kad, su ebpengelinteuwan te Megbevayà he mekezaag ka!”
2CH 18:6 Piru mid-insà si Jehoshafat te, “Wazè en be zuma kayi he ebpeneuven te Nengazen he egkepenginginsaan ta?”
2CH 18:7 Midtavak si Ahab ki Jehoshafat te, “Duen pa sevaha he egkepenginginsaan ta ke hengkey is egkekaǥi te NENGAZEN–si Micaya he anak ni Imla. Piru egkeepesan ku sikandin su wazà meupiya he menge tagnè din para kedì, kekenà, pudu zà kenà meupiya.” Midtavak si Jehoshafat te, “Kenè ka ereg he egkaǥi te iring keniyan.”
2CH 18:8 Umbe, impetawag ni Ahab is sevaha te menge upisyal zin ne migkeǥiyan din te, “Gègaani niw zumaha kayi si Micaya he anak ni Imla.”
2CH 18:9 Dutun he timpu, si Hadì Ahab he hadì te Israel wey si Hadì Jehoshafat he hadì te Juda, mibivisti zan te visti te hadì, he ebpinuu is kada sevaha kandan diyà te pinuuwè din te kedhadì diyà te uvey te gunasà he uvey te pultahan te Samaria. Ne ebpemineǥen dan is egkeǥiyen te menge ebpeneuven.
2CH 18:10 Si Zedekia he sevaha te menge ebpeneuven, he anak ni Kenaana, mibaal te mid-iring te sungey he putew. Ke sikandin te, “Iyan heini migkaǥi te Nengazen: ‘Pinaaǥi kayi he sungey, edezeetan nu, Hadì Ahab, is menge Aramihanen taman te egkaamin sikandan.’ ”
2CH 18:11 Iyan daan haazà migkaǥi te langun he menge ebpeneuven. Migkaǥi sikandan te, “Surunga nu is Ramot Gilead, Hadì Ahab ne ebpekezaag ka, su ibeǥey heini kenikew te Nengazen.”
2CH 18:12 Ne sikan mulà is midsuǥù te ked-angey ki Micaya ne migkaǥi te, “Is langun he menge ebpeneuven ne neked-iring is menge lalag dan he iyan ebpekezaag is hadì, umbe iyan daan heini ereg he egkeǥiyen nu.”
2CH 18:13 Piru midtavak si Micaya te, “Mibpenangdù a ziyà te uuyag he Nengazen he Megbevayè ku he iyan dà egkeǥiyen ku is ibpekaǥi zin kedì.”
2CH 18:14 Kebpekeuma ni Micaya ziyà te ki Hadì Ahab ne mid-insaan sikandin dutun te hadì te, “Micaya, edsurungen dey ve is Ramot Gilead etawa kenà?” Midtavak si Micaya te, “Surunga niw ne ebpekezaag kew su ibeǥey heini keniyu.”
2CH 18:15 Piru migkaǥi haazà is hadì diyà te ki Micaya te, “Kepipira ku ves sikew ibpepenangdù para keǥiya nu kayi te kediey is tutuu pinaaǥi te ngazan te Nengazen?”
2CH 18:16 Umbe, migkaǥi si Micaya te, “Neehè ku pinaaǥi te mibpelewasan kedì he is menge Israilihanen ne nekedsusuwey ziyà te menge vuvungan he iring te menge kerehidu he wazà ed-elima kandan, ne migkaǥi is Nengazen te, ‘Heini he menge etew ne wazè dan en pengulu. Ipeulì sikandan he melinawen.’ ”
2CH 18:17 Ne migkeǥiyan ni Hadì Ahab si Jehoshafat te, “Umbe man migkaǥi ku en kenikew he wazà meupiya he tagnè din bahin kedì, kekenà, pudu zà mezaat?”
2CH 18:18 Migkaǥi pa si Micaya te, “Pemineǥa nu is lalag te Nengazen! Neehè ku is Nengazen he ebpimpinuu ziyà te pinuuwè din te kedhadì, ne zuen menge ilengiten he menge linimbag he ebpemenhitindeg diyà te egkekewanan wey egkeǥivang din.
2CH 18:19 Ne migkaǥi is Nengazen te, ‘Hentei is ed-akal ki Hadì Ahab su para medsurung sikandin diyà te Ramot Gilead su para mepatey sikandin?’ Ne nekedseselekawà is tavak dutun te ilengiten he menge linimbag.
2CH 18:20 Ne netegteǥaad, duen mulin-ulin he mid-uvey ziyà te Nengazen he egkaǥi te, ‘Iyan a ed-akal kandin.’ Ne mid-insà is Nengazen, ‘Te, hengkey he paaǥi?’
2CH 18:21 Midtavak sikandin te, ‘Egenat a ne ibpetarùtarù ku is menge ebpeneuven he sakup ni Ahab.’ Migkaǥi is Nengazen te, ‘Genat ka ne iyan heeyan beeli nu. Ebmezeeǥen ka te ked-akal kandin.’ ”
2CH 18:22 Impelaus ni Micaya is egkeǥiyen din, ke sikandin te, “Iyan heeyan neulaula. Midsuǥù te Nengazen is mulin-ulin para terterui zin is menge ebpeneuven he sakup nu. Su ketau te Nengazen he mezeeti ka.”
2CH 18:23 Ne mid-uvey si Zedekia ziyà te ki Micaya ne midtabpì din. Ne migkaǥi si Zedekia te, “Maan is ibpesavut nu he mid-awà kayi te kediey is Mulin-ulin te Nengazen ne nekidlalag kenikew?”
2CH 18:24 Midtavak si Micaya te, “Egketuenan nu heini zutun te andew he egkezaag kew en te tebek ne ed-eles ka ziyà te kineselezan he ruǥu te valey.”
2CH 18:25 Mibmandar si Hadì Ahab te, “Dekepa niw si Micaya ne ilikù niw ziyà te pengulu te inged dey wey ziyà te ki Joash he anak ku.
2CH 18:26 Ne keǥiyi niw sikandan he iyan suǥù ku is ebpirisuwen heini he etew, ne supas dà wey wahig is ibeǥey ziyà te kandin taman te kebpekelikù ku puun te tebek he wazà mekeizi.”
2CH 18:27 Migkaǥi si Micaya te, “Emun ebpekelikù ka he kenà egkekeizan, ne wazà heeyan keǥiya te Nengazen pinaaǥi kedì.” Ne zutun migkeǥiyan ni Micaya is langun he menge etew zutun te, “Tentenuzi niw heini is migkaǥi ku.”
2CH 18:28 Ne midsurung diyà te Ramot Gilead si Hadì Ahab he hadì te Israel wey si Hadì Jehoshafat he hadì te Juda.
2CH 18:29 Migkaǥi si Ahab diyà te ki Jehoshafat te, “Emun timpu en te tebek kenà a ebpekilala he iyan a hadì, piru sikew mulà bivisti ka te visti te hadì!” Umbe mibpeuvag-uvag si Ahab, ne mibpekidtebek sikandan.
2CH 18:30 Dutun he timpu, mibmandù is hadì te Aram diyà te menge peremandar zin te ebpemen-untud te kerwahi te, “Kenè niw etekiya is minsan hentei, kekenà, iyan dà is hadì te Israel.”
2CH 18:31 Hein naahà dutun te menge peremandar te menge kerwahi si Jehoshafat, ne kunaan dan ke iyan en sikan is hadì te Israel, umbe midtebek dan en sikandin. Piru mibuyù te tavang si Jehoshafat diyà te Nengazen, ne midtevangan din sikandin pinaaǥi te kebpeeliǥuwa te menge kuntada zin.
2CH 18:32 Su hein netuenan te menge peremandar te menge kerwahi he kenè bes iyan sikandin kes hadì te Israel, ne mid-engkezan dan sikandin te edal-as.
2CH 18:33 Piru hein edtulung en ebpemanà is sevaha he sundaru te Aramihanen dutun te menge sundaru te Israel, ne neserab mesuǥat si Hadì Ahab he hadì te Israel ziyà te midtemuwaayan te pengalang din diyà te kumeng. Migkeǥiyan ni Hadì Ahab haazà is ed-uwit te kerwahi zin te, “Ipekeziyù a kayi te tebek! Su nepelian a.”
2CH 18:34 Utew en meinit is tebek dutun he andew, ne is hadì te Israel ne midsandig dà dutun te kerwahi zin he edsinaru ziyà te menge Aramihanen taman en te mahapun. Ne hein midsanlep en is andew ne iyan en daan kebpatey zin.
2CH 19:1 Hein nekeulì si Jehoshafat diyà te turuǥan din diyà te Jerusalem he wazà mekeizi,
2CH 19:2 ne midsinuǥung sikandin te ebpeneuven he si Jehu he anak ni Hanani ne migkeǥiyan din te, “Maan is mid-uǥupan nu is lalung wey mibmahal nu haazà is menge etew he mibpekidkuntada te Nengazen? Tenged kayi, nepauk is Nengazen kenikew.
2CH 19:3 Piru zuen ded meupiya he naahà diyà te kenikew. Impepen-awè nu kayi te Juda is menge tukud he simbulu te vahi he ed-ezapen he si Asera su iyan nu egkesuatan is kedangep te Megbevayà.”
2CH 19:4 Diyà med-ubpà si Jehoshafat te Jerusalem, piru mibpemeyaan din is menge etew puun te Beersheba pehendiyà diyà te vuvungan te Efraim su ibpelikù din sikandan diyà te Nengazen he Megbevayà te menge kepuun dan.
2CH 19:5 Duen menge zatù he midhimu zin he menhuhusey ziyà te kada vinerengbeng he inged diyà te Juda.
2CH 19:6 Ne migkeǥiyan din sikandan te, “Purung kew isip-isip te kenè kew pa edhukum, su is kedhukum niw, ne kenà para zà te etew, kekenà, para te Nengazen. Ne iyan is Nengazen eduma keniyu te kebpenhusey niw.
2CH 19:7 Tehuza niw is Nengazen, ne hukum kew te hustu su kenà igkesuat te Nengazen he Megbevayè tew is kebpemintahà, wey kedhukum he zuen edepiǥan, wey iyan ibpevenar is ebpekeveǥey.”
2CH 19:8 Duen daan menge Levihanen, menge memumuhat, wey menge pengulu te menge pemilya te menge Israilihanen he midhimu ni Jehoshafat he menge menhuhusey te menge rirù he zuen kelevetan te kesuǥuan te Nengazen wey kedhusey te menge ebpekedtetebek. Ne ziyè dan med-ubpà te Jerusalem.
2CH 19:9 Iyan heini menge mandù din kandan: Kinahanglan he mebpenilbi kew he metinumanen wey ebpuun te ǥehinawa niw duma is kedtahud te Nengazen.
2CH 19:10 Ne emun duen samuk he egkehitavù diyan te keniyu he vaal te menge zuma niw ziyà te minsan hendei he inged he zuen kelevetan te kedhimatey wey zuma pa he paaǥi te kebpekesupak te menge suǥù wey menge sulunuzen, petizeeni niw sikandin he kenè dan mebaal te salà diyà te Nengazen, su wey kenà mepauk sikandin keniyu wey diyà te kandan. Ul-ulaha niw heini para kenè kew mekesalà.
2CH 19:11 Emun duen menge kasu mehitenged te kegkesupaka te velaud te Nengazen he kenè niw egkehusey, si Amaria he lavew he memumuhat is ipehusey niw zuen. Ne emun duen kasu mehitenged te kegkesupaka te velaud te gubirnu he kenè niw egkehusey, ne si Zebadia he anak ni Ishmael he pengulu te tribu te Juda ne iyan ipehusey niw zuen. Ed-uǥup keniyu is menge Levihanen para mesunud is hustu he kukuman. Pekevurut kew he ebaal te kinahanglan he ebeelan niw. Berakat he zumahi te Megbevayà is menge etew he ebaal te hustu.
2CH 20:1 Neuma is timpu he migenat is menge Moabitanhen wey menge Amonihanen, duma zan is duma he menge Meunhanen su ebpekidtebek dan ki Jehoshafat.
2CH 20:2 Duen midhendiyà te ki Jehoshafat he menge etew he migkaǥi te, “Duen ebpekeuma he menge sundaru he utew mezakel su edsurungen ke zan. Diyà heini sikandan ebpuun te Edom he ziyà layun te Daǥat he Minatey. Diyè dan en te Hazazon Tamar” (he iyan is En Gedi).
2CH 20:3 Utew nahandek si Jehoshafat, ne midangep sikandin diyà te Nengazen. Ne mibmandù sikandin he mebpuasa is langun he tig-Juda.
2CH 20:4 Ne zutun netiǥum is menge etew he ebpuun te langun he inged te Juda para te kebuyù te tavang te Nengazen.
2CH 20:5 Ne midhitindeg si Jehoshafat diyà te etuvangan te keet-etawan te Juda wey te Jerusalem diyà te etuvangan te veǥu he lama te valey te Nengazen.
2CH 20:6 Ne migkaǥi te, “He Nengazen, Megbevayà te menge kepuun dey, iyan ka kes Megbevayà he ziyà te langit. Iyan ka mibayàbayà te langun he ginhedian kayi te kelibutan. Gemhanan ka ne wazà ebpekesukul kenikew.
2CH 20:7 He Megbevayè dey, kenè be is menge meǥinged kayi he tanà impesegseg nu te menge etew nu he menge Israilihanen? Kenè be imbeǥey nu heini he tanà kandan te menge kevuwazan ni Abraham he emiǥu nu, su wey zan maangken heini taman te taman?
2CH 20:8 Kayi med-ubpà sikandan wey kayi zan tukuza is baley te Nengazen para te zengeg nu. Migkaǥi sikandan te,
2CH 20:9 ‘Emun duen ebpekeuma he kemereǥenan kayi te kenami iring te tebek, dalem, daru, wey ke vitil, ne edhitindeg key ziyà te etuvangan nu ziyà te etuvangan kayi te valey te Nengazen he kayi ka ebeǥayi te zengeg. Ne netuenan dey he ebpekevuyù key te tavang kenikew te menge kemereǥenan dey, ne ebpemineǥen key kenikew wey edluwasen key kenikew.’
2CH 20:10 “Ne ǥuntaan edsurungen key te menge etew he ebpuun te Ammon, Moab, wey Buntud he Seir. Dengan ne wazè nu ituǥut haazà is ubpeey zan he edsekupen te menge Israilihanen hein nekeǥawas dan diyà te Ehipto. Midlevayan dà heini te menge Israilihanen ne wazè dan sikandan penhimetayi.
2CH 20:11 Ne ǥuntaan iyan heini ibales dan kenami. Edsurungen key zan para mesegseg key kayi te tanà he imbeǥey nu kenami he egkepengevilin dey.
2CH 20:12 He Megbevayè dey, kenè nu ve sikandan edsilutan? Kenè key ebpekehimu he edsukul kayi te utew mezakel he menge sundaru he edsurung kenami. Kenè dey egketuenan ke hengkey is ebeelan dey, piru edsarig key kenikew.”
2CH 20:13 Hein kemulu pa zutun ebpemenhitindeg is langun he menge maama te Juda duma te menge esawa zan wey menge anak dan, ragkes dutun is dezeisek he menge anak dan,
2CH 20:14 ne zutun midumala te Mulin-ulin te Nengazen si Jahaziel he zuma zan te midhitindeg dutun te kezekelan. Si Jahaziel ne anak ni Zacarias. Si Zacarias ne anak ni Benaya. Si Benaya ne anak ni Jeiel. Ne si Jiel ne anak ni Matania he Levihanen he kevuwazan ni Asaf.
2CH 20:15 Migkaǥi si Jahaziel te, “Hadì Jehoshafat, wey sikiyu is langun he mid-ubpà kayi te Juda wey Jerusalem, pemineg kew! Iyan heini egkeǥiyen te Nengazen keniyu, ‘Kenè kew mahandek wey mebmeluya tenged kayi te mezakel he menge sundaru, su kenè kew iyan ebpekidtebek, kekenà, iyan a is Megbevayà.
2CH 20:16 Keeselem tupang kew pehendiyà te kandan. Egkeehè niw sikandan he edtekezeg diyà te Beyeey te Ziz, he netemanan te zal-ug he ebpehendiyà te sibsivayan diyà te Jeruel.
2CH 20:17 Kenè en kinahanglan he ebpekidtebek kew pa. Andam kew zà wey mebpekelig-en, ne ahaà niw is kezeeǥan he ebeelan te Nengazen para keniyu. Sikiyu is menge tig-Juda wey tig-Jerusalem, kenè kew mahandek wey mebmeluya. Etuvanga niw sikandan keeselem su is Nengazen iyan eduma keniyu.’ ”
2CH 20:18 Ne midluhud si Jehoshafat wey is langun he tig-Juda wey tig-Jerusalem te ked-azap te Nengazen.
2CH 20:19 Ne nemenhitindeg is duma he menge Levihanen he ebpuun te menge pemilya ni Kohat wey ni Kora ne midalig dan te Nengazen he Megbevayà te Israel, te utew mezesen he laǥeng.
2CH 20:20 Meselem dutun te sunud he andew, si Jehoshafat wey is menge sundaru zin, midhipanew zan pehendiyà te sibsivayan te Tekoa. Te kemulu pa sikandan edhipanew, midteren si Jehoshafat ne migkaǥi te, “Pemineǥa a keniyu, sikiyu is tig-Juda wey tig-Jerusalem! Tuu kew te Nengazen he Megbevayè niw, ne ebmelig-en kew. Tuuwi niw is menge ebpeneuven din ne ebmezeeǥen kew.”
2CH 20:21 Hein nekepasad sikandin ne mibpekisambag sikandin te menge etew. Ne zutun mibpilì sikandin te menge perekanta he iyan edhuna kandan he egkanta te kedalig te Nengazen tenged te egkein-inuwan he kegkewaǥas din. Iyan heini kanta zan: “Peselemati niw is Nengazen tenged te wazà pidtemanan te gaǥew zin.”
2CH 20:22 Ne hein mibpuun dan en megkanta te kedalig, is menge Amonihanen, menge Moabitanhen, wey menge tig-Buntud he Seir he edsurung te Juda, ne impedtebek sikandan te Nengazen.
2CH 20:23 Midsurung te menge Amonihanen wey menge Moabitanhen is menge sundaru ziyà te menge tig-Buntud he Seir ne nengepatey zan langun. Ne hein nengepatey zan en sikandan, ne mid-uuney zan mebpehimhimetayà.
2CH 20:24 Hein nemekeuma is menge sundaru te Juda ziyà te metikang he lugar he zutun egkepantew haazà is sibsivayan, ne neehè dan is menge kuntada zan he nemematey he nemekererey-as dutun te tanà. Wazà minsan sevaha he uuyag.
2CH 20:25 Ne mibeyaan haazà ni Jehoshafat duma is menge sakup din ne mibpenguwa zan is menge azen dan. Dekelà is nekuwa zan he menge gelemiten, menge visti wey zuma pa he menge vutang he menge mahalen he kenè dan egkeekatan te ed-uwit. Tetelu he andew is kedtiǥuma zan dutun su utew zekelà haazà he azen.
2CH 20:26 Hein ikeepat en he andew ne midtiǥum sikandan diyà te Suǥud te Beraca ne midalig dan dutun is Nengazen. Umbe egngezanan heini te Suǥud te Bereca taman guntaan.
2CH 20:27 Ne midlikù dan diyà te Jerusalem he mibpenguluwan ni Jehoshafat. Utew zan nengelipey tenged te impezaag kandan te Nengazen is menge kuntada zan.
2CH 20:28 Hein nekeuma zan diyà te Jerusalem, ne ziyè dan medlaus te valey te Nengazen, is edtukar te menge alpa, lira, wey menge trumpita.
2CH 20:29 Hein nezineg te langun dutun te ginhedian ke mibmenumenu mebpekidtebek is Nengazen te menge kuntada te Israel, utew zan nengahandek te Megbevayà.
2CH 20:30 Umbe, melinawen is ginhedian ni Jehoshafat su midhimu te Megbevayà he kenè sikandin mekepekidtebek te menge etew he nekeliǥuy kandin.
2CH 20:31 Iyan haazà kedhadì ni Jehoshafat diyà te Juda. Ne 35 he tuig is keǥurang ni Jehoshafat hein nehimu sikandin he hadì. Diyà sikandin te Jerusalem med-ubpà, ne midhadì sikandin seled te 25 he tuig. Is iney zin iyan si Azuba he anak ni Shilhi.
2CH 20:32 Midsunud din is menge ulaula te amey zin he si Asa ne wazè din heini ewai he menge vaal. Nekepenunuat te Nengazen is menge vaal zin.
2CH 20:33 Piru wazè din ewaa is langun he menge simbahan diyà te menge metikang he lugar, ne is menge etew, wazè dan gihapun mebpurung medsunud te Megbevayà te menge kepuun dan.
2CH 20:34 Is duma pa he ǥuǥud mehitenged te kedhadì ni Jehoshafat, puun pa te puunà taman te ketepusan, miguǥud ni Jehu he anak ni Hanani, diyà te insurat din he neragkes diyà te ingkesurat diyà te Libru he Midsuratan te Kaaǥi te menge Hadì te Juda.
2CH 20:35 Piru te huziyan en he vahin te kedhadì ni Jehoshafat diyà te Juda, nekiduma sikandin ki Hadì Ahazia he hadì te Israel he sevaha he mezaat he etew.
2CH 20:36 Neuyun sikandan he ebpevaal te menge varku para te kebpetiǥayun. Diyè dan heini peveeli te pentalan te Ezion Geber.
2CH 20:37 Piru migkeǥiyan ni Eliezer he anak ni Dodavahu he tig-Maresha si Jehoshafat te, “Tenged te nekidsevaha ka ki Ahazia, ne edèdeetan te Nengazen is mibpeveelan niw.” Ne nezeetan haazà is barku ne wazè en heini mekeǥenat para te kebpetiǥayun.
2CH 21:1 Hein minatey en si Jehoshafat, inleveng sikandin diyà te midlevengan te menge kepuun din diyà te Inged ni David. Ne iyan nekeilis kandin te kedhadì is anak din he si Jehoram.
2CH 21:2 Iyan heini menge suled ni Jehoram si Azaria, Jehiel, Zacarias, Azariahu, Micael, wey si Shefatia. Iyan heini menge anak langun ni Hadì Jehoshafat he hadì te Juda.
2CH 21:3 Mibeǥayan sikandan ni Jehoshafat te mezakel he menge gasa he pelata wey vulawan, mahalen he menge azen, wey menge vinerengbeng he menge inged diyà te Juda. Piru iyan din impeilis kandin si Jehoram te kedhadì su iyan man kinekekayan.
2CH 21:4 Hein melig-en en is kedhadì ni Jehoram diyà te ginhedian te amey zin, ne mibpepenhimetayan din is langun he menge suled din, ragkes is duma he menge upisyal te Juda.
2CH 21:5 Mibpenuiǥen si Jehoram te 32 he tuig hein nehimu sikandin he hadì. Diyà sikandin med-ubpà te Jerusalem, ne midhadì sikandin seled te walu he tuig.
2CH 21:6 Midsunud din is mibeelan te menge hadì te Israel, iring te mibeelan te pemilya ni Ahab, su neesawa zin is anak ni Ahab. Mezaat is ulaula zin diyà te etuvangan te Nengazen.
2CH 21:7 Piru tenged te kebpekid-uyun te Nengazen ki David, ne wazè din dèdeeti is kevuwazan ni David. Su midsaad is Nengazen ki David he zuen menge kevuwazan din he edhadì taman te taman.
2CH 21:8 Hein timpu te kedhadì ni Jehoram, nekidsukulà is Edom te Juda, ne mibpilì dan te keugelingen dan he hadì.
2CH 21:9 Umbe, midhendiyà si Jehoram duma is menge upisyal zin wey langun he menge kerwahi zin su edsurungen dan is Edom. Midliǥuyan sikandin wey is menge peremandar te menge kerwahi zin te menge Edomanhen. Piru hein mezukilem, midtik-awan dan etekiya is menge Edomanhen, ne nekepelaǥuy zan su nekelawang dan.
2CH 21:10 Taman en guntaan ne kemulu pa ebpekidsukulà is Edom te Juda. Ne zutun daan he timpu nekidsukulà daan is Libna te Juda. Haazà he timpu ne nekidsukulà daan is Libna te Juda, tenged te mid-iniyuǥan ni Jehoram is Nengazen he Megbevayà te menge kepuun din.
2CH 21:11 Midtukud sikandin te menge simbahan diyà te menge vuvungan te Juda he iyan hinungdan te ked-azap te menge tig-Jerusalem wey menge tig-Juda te zuma he menge ed-ezapen.
2CH 21:12 Mibpeuwitan te ebpeneuven he si Elias si Jehoram te surat ne iyan heini egkeǥiyen din: “Iyan heini egkeǥiyen te Nengazen he Megbevayà te kepuun nu he si David: wazè nu sunuza is mid-ulaula te amey nu he si Jehoshafat wey te apù nu he si Asa he nehimu he hadì daan te Juda.
2CH 21:13 Kekenà, iyan nu midsunud is mibeelan te menge hadì te Israel. Mid-iniyat nu is menge tig-Juda wey menge tig-Jerusalem te ked-azap te zuma he menge ed-ezapen, iring te mibeelan ni Ahab. Mibpenhimetayan nu zaan is menge suled nu he meupiya pa kenà sikew.
2CH 21:14 Umbe, edezeetan guntaan te Nengazen is menge etew nu, menge anak nu, menge esawa nu, wey is langun he menge azen nu. Dekelà he kezeetan is ebpeseǥazan din keniyu.
2CH 21:15 Ebpekaantus ka te utew mereǥen he zaru te ǥetek taman te egawas is bituka nu.”
2CH 21:16 Midhimu te Nengazen he mepeuki si Jehoram te menge Filistihanen wey menge Arabo he menge meǥinged diyà te uvey te Etiopia.
2CH 21:17 Ne midsurung dan is Juda, ne mibpenguwa zan is menge ketiǥeyunan diyà te turuǥan te hadì, ragkes is menge esawa zin wey menge anak din. Iyan dà wazà mekuwa is kineheziyan he anak din he si Ahazia.
2CH 21:18 Hein neiwas is kegkeul-ulaha zutun, ne midrasey te Nengazen si Jehoram te daru te ǥetek he wazè din en kegkeulii.
2CH 21:19 Midlavey is dezuwa he tuig, ne migawas is bituka zin tenged dutun te daru zin, ne iyan impatey zin is utew mesakit. Wazà sikandin beǥayi te zengeg te menge etew zin pinaaǥi te kedtetavun he iyan daan mibeelan dan diyà te menge kepuun din.
2CH 21:20 Mibpenuiǥen si Jehoram te 32 he tuig hein nehimu sikandin he hadì. Diyà sikandin med-ubpà te Jerusalem, ne midhadì sikandin seled te walu he tuig. Dutun te kebpatey zin ne wazà neseeng kandin. Diyè ded ileveng te Inged ni David; piru wazà dutun te edlevengan te menge hadì.
2CH 22:1 Si Ahazia is kineheziyan he anak ni Jehoram ne iyan midhimu te menge etew ziyà te Jerusalem he hadì dan. Su is duma he menge anak ni Jehoram ne mibpenhimetayan te menge Arabo he nemenurung diyà te Juda. Umbe iyan nehimu he hadì diyà te Juda si Ahazia he anak ni Hadì Jehoram.
2CH 22:2 Mibpenuiǥen si Ahazia te 22 he tuig hein nehimu sikandin he hadì. Diyà sikandin med-ubpà te Jerusalem, ne midhadì sikandin seled te senge-tuig. Is iney zin iyan si Atalia he apù ni Omri.
2CH 22:3 Iyan daan midsunud ni Ahazia is mid-ulaula te pemilya ni Ahab, su mid-iniyat sikandin te iney zin te kebaal te mezaat.
2CH 22:4 Mezaat is ulaula zin diyà te etuvangan te Nengazen iring te mibeelan te pemilya ni Ahab, su hein minatey en is amey zin, ne iyan en nehimu he megsesambag din is menge sakup te pemilya ni Ahab.
2CH 22:5 Iyan midsunud din is sambag dan he mibpekidsevaha sikandin ki Joram he anak ni Hadì Ahab he hadì te Israel. Miduma sikandin ki Joram te kebpekidtebek ki Hadì Hazael he hadì te Aram. Midtebek dan diyà te Ramot Gilead, ne nepelian si Joram. Ne mid-ulì sikandin diyà te inged he Jezreel su zutun din edteǥazi is kegkeulii te menge palì din. Ne hein diyè en sikandin, ne mibpenumbaley ziyà te kandin si Hadì Ahazia he hadì te Juda.
2CH 22:7 Heini is kebpenumbaley ni Ahazia ki Joram ne migamit te Megbevayà para mepatey si Ahazia. Su hein diyè en si Ahazia te Jezreel, ne mid-uǥupan din si Joram te kebpekidtebek ki Jehu he anak ni Nimshi. Si Jehu is mibpilì te Nengazen te kedezaat te pemilya ni Ahab.
2CH 22:8 Ne te kemulu edezeeti ni Jehu is pemilya ni Ahab, ne neehè din is menge upisyal te Juda wey is menge anak te menge kezuzumahi ni Ahazia he miduma ki Ahazia. Ne mibpenhimetayan din sikandan.
2CH 22:9 Ne impepen-ahà ni Jehu te menge sakup din si Ahazia ne ziyè dan maahà te inged he Samaria is mid-eles. Ne mid-uwit dan sikandin diyà te ki Jehu ne midhimetayan din. Ne inleveng dan is minatey he lawa zin tenged te kedtehuza zan te apù din he si Jehoshafat, su ke sikandan te, “Apù sikandin ni Jehoshafat, kes etew he midangep te Nengazen te tivuuk he ǥehinawa zin.” Ne zutun wazè en minsan sevaha he nesamà te sakup te pemilya ni Ahazia he ereg he egkahadì.
2CH 22:10 Hein netuenan ni Atalia he minatey en is anak din he si Ahazia, midisisyun sikandin he ebpenhimetayan din is langun he sakup te pemilya te hadì te Juda.
2CH 22:11 Piru midlibri ni Jehosheba is anak ni Ahazia he si Joash hein meǥaan en edhimetayi sikandin wey is duma pa he menge anak te hadì. Heini si Jehosheba etevey ni Ahazia he anak he vahi ni Hadì Jehoram, he esawa te memumuhat he si Jehoyada. In-eles din si Joash wey is ed-elima kandin diyà te sevaha he ruǥu zuen te valey te Nengazen, umbe wazà sikandin mehimetayi ni Atalia.
2CH 22:12 Seled te heenem he tuig, ne ziyà i-eles te valey te Megbevayà si Joash te iyan pa zutun ebmandù te Juda si Atalia he rayna.
2CH 23:1 Hein ikepitu en he tuig, ne midwaleng en si Jehoyada. Mibpekid-upakat sikandin te lelima he peremandar te menge ginatus he sundaru he iyan si Azaria he anak ni Jehoram, si Ishmael he anak ni Jehohanan, si Azaria he anak ni Obed, si Maasea he anak ni Adaya, wey si Elisafat he anak ni Zicri.
2CH 23:2 Heini sikandan mid-eneb te inged te Juda te kedtiǥum te menge Levihanen wey te menge pengulu te menge pemilya. Hein nemekeuma is langun diyà te Jerusalem,
2CH 23:3 midhendiyè dan te valey te Megbevayà, ne nekid-uyun sikandan ki Joash he anak te hadì. Migkeǥiyan ni Jehoyada is menge etew te, “Iyan en heini timpu he edhadì is anak te hadì, sumalà te insaad te Nengazen he layun duen kevuwazan ni David he edhadì.
2CH 23:4 Ne ǥuntaan iyan heini veeli niw: is sevaha zutun te tetelu he vahin te menge memumuhat wey menge Levihanen, he ebantey emun Andew te Kedhimeley, ne mebantey ziyà te menge ǥemawan te valey te Nengazen.
2CH 23:5 Ne is sevaha pa zutun te tetelu he vahin ne mebantey ziyà te turuǥan te hadì. Ne is sevaha pa zutun te tetelu he vahin ne mebantey ziyà te ǥemawan te pundasyun. Is duma he menge etew ne ziyà te menge lama te valey te Nengazen.
2CH 23:6 Wazà ibpeseled dutun te valey te Nengazen gawas te menge memumuhat wey menge Levihanen he ebpenilbi te haazà he timpu. Egkehimu he ebpekeseled dan su ǥeina te impehinungud sikandan para te buluhaten kayi. Piru is duma ne kinahanglan he ziyè dà ebantey te gawas sumalà is insuǥù te Nengazen.
2CH 23:7 Kinahanglan he ebpurungan te ebantey te menge Levihanen is hadì, he andam is menge ǥumaan dan, ne layun dan dumahi minsan hendei ebpevayà. Is minsan hentei he edseled dutun te valey te Nengazen he kenà memumuhat etawa Levihanen ereg he edhimetayan.”
2CH 23:8 Mibeelan te menge Levihanen wey te langun he menge tig-Juda is insuǥù ni Jehoyada he memumuhat. Midtiǥum te menge peremandar is langun he menge sakup dan, is menge ebantey te Andew te Kedhimeley, apil en is kenà ebantey zutun he andew. Wazè pa ipeulì ni Jehoyada is menge Levihanen minsan te nepasad dan en is kandan he vaal.
2CH 23:9 Ne mibeǥayan ni Jehoyada is menge peremandar te menge vangkew wey zezekelà wey zezeisek he menge kelasag he ǥaked dengan ni Hadì David, he ziyà itaǥù te valey te Megbevayà.
2CH 23:10 Impepelastar zin is neǥumeenan he menge maama ziyà te peliǥuy te valey te Nengazen wey te pemuhatà te kedipinsa zuen te hadì.
2CH 23:11 Ne zutun impeǥawas ni Jehoyada wey te menge anak din si Joash he anak te hadì ne migkurunahan. Ne mibeǥayan din sikandin te kupya te menge sulunuzen mehitenged te kedumalà te hadì, ne impezayag din is kegkehimuwa ki Joash he hadì. Midlenahan din sikandin he ebpekilala he hadì en sikandin ne nemengulahì is menge etew te, “Mebmeluǥayad is untung te hadì!”
2CH 23:12 Ne hein nezineg ni Atalia is keǥurub te menge etew he ebpemelelaǥuy wey ebpemengulahì te kedalig te hadì, ne midhendiyà sikandin te kandan dutun te valey te Nengazen.
2CH 23:13 Ne neehè din dutun is beǥu he hadì he midhitindeg uvey zuen te tukud he edhithitindeǥan te menge hadì duen te ǥemawan te valey te Nengazen. Dutun te avey te Hadì is menge peremandar wey is menge perehiyup te trumpita, ne langun he menge etew nemen-uruhuy wey mibpezaǥing te trumpita. Is menge perekanta he zuen dan menge instrumintu ne edhuna sikandan is edalig te Megbevayà. Ne hein naahà ni Atalia haazà is langun, mibindas din is bisti zin su mibmezaat is gehinawa zin, ne nemensag sikandin te, “Menge meluiven! Menge meluiven!”
2CH 23:14 Mibmendaran ni Jehoyada is menge peremandar te menge sundaru te, “Uwita niw ziyà te gawas si Atalia. Kenè niw sikandin kayi himetayi te valey te Nengazen. Ne himetayi niw is minsan hentei he egkesuat he edlibri kandin.”
2CH 23:15 Umbe, midakep dan sikandin ne mid-uwit dan diyà te idselang duen te Pultahan te menge Kudà he ebpehendiyà te turuǥan, ne zutun dan sikandin himetayi.
2CH 23:16 Ne zutun si Jehoyada, is menge etew, wey is hadì, utew meheǥet is kebpekid-uyun dan he ebpesakup dan te Nengazen.
2CH 23:17 Ne midhendiyà is langun he menge etew te simbahan he para ki Baal ne midrundus dan heini. Midrupet dan is menge pemuhatà wey is menge ed-ezapen dutun, ne midhimetayan dan si Matan he memumuhat para ki Baal ziyà te egkesineruwan duen te menge pemuhatà.
2CH 23:18 Ne insarig ni Jehoyada te menge memumuhat he menge kevuwazan ni Levi is kedumala zutun te valey te Nengazen iring te mibeelan dengan ni David. Ebpemuhat dan te menge pemuhat he edtutungen sumalà te ingkesurat diyà te Kesuǥuan ni Moises, wey ed-ugyab dan wey egkanta sumalà te insuǥù ni David.
2CH 23:19 Mibpeventayan daan ni Jehoyada is menge ǥemawan te valey te Nengazen para wazà ebpekeseled dutun he etew he ed-isipen he meremerik.
2CH 23:20 Ne miduma zin is menge peremandar, is menge telehuzen he menge etew, is menge upisyal wey is langun he menge etew, ne inhated dan is hadì diyà te turuǥan he ziyà ebpuun te valey te Nengazen. Ne ziyè dan mebayà te ǥemawan he zapit te zizaya. Ne impepinuu zan is hadì diyà te pinuuwè din te kedhadì.
2CH 23:21 Nengelipey is menge etew, ne mibmelinew is inged hein minatey en si Atalia.
2CH 24:1 Is penuiǥen ni Joash te kedhadì din ne pitu he tuig. Ne ziyà sikandin med-ubpà te Jerusalem, ne midhadì sikandin seled te 40 he tuig. Iyan iney zin si Zibia he tig-Beersheba.
2CH 24:2 Meupiya is ulaula ni Joash diyà te etuvangan te Nengazen dutun te uuyag pa si Jehoyada he memumuhat.
2CH 24:3 Mibpen-ahaan sikandin ni Jehoyada te zezuwa he esawa, ne zuen din menge anak he menge maama wey vahi.
2CH 24:4 Ne hein neiwas haazà ne midisisyun si Joash he ebpepurungan din is baley te Nengazen.
2CH 24:5 Impetawag din is menge memumuhat wey menge Levihanen ne migkeǥiyan din te, “Pehendiyè kew te menge inged te Juda ne kuwaa niw is menge veleyazan te menge Israilihanen kada tuig, su para mepepurungi tew heini is baley te Megbevayè tew. Kinahanglan he segugunè niw veeli heini.” Piru is menge Levihanen midlanganlangan dan.
2CH 24:6 Umbe, impatawag ni Hadì Joash is lavew he memumuhat he si Jehoyada ne mid-insaan din te, “Maan is wazè nu ipekuwa te menge Levihanen is beleyazan te menge tig-Juda wey tig-Jerusalem? Kenè be insuǥù ni Moises he suluǥuen te Nengazen diyà te menge keet-etawan te Israel he iveǥey zan heini para te Tulda he midsevukan te Kesuǥuan?”
2CH 24:7 Dengan, is menge anak te vahi he mekesesalà he si Atalia, ne midseled dan dutun te valey te Megbevayà ne mibpenguwa zan te menge segradu he menge gelemiten para egemiten dan te ked-ezapa zan ki Baal.
2CH 24:8 Umbe, midsuǥù si Hadì Joash he ebaal te kahun he selevukà te selapì, ne ziyà heini idsavuk te ǥawas te ǥemawan te valey te Nengazen.
2CH 24:9 Ne impesavut din is menge tig-Juda wey menge tig-Jerusalem he kinahanglan he uwita te menge etew te Nengazen is menge veleyazan dan sumalà te insuǥù ni Moises he suluǥuen te Megbevayà diyà te keet-etawan te Israel hein diyè dan pa te sibsivayan.
2CH 24:10 Ingkelipey te langun he menge upisyal is kebeǥey zan wey is menge etew. In-ulug dan dutun te kahun is selapì dan taman te nepenù heini.
2CH 24:11 Emun egkepenù en haazà is kahun, ne ed-uwiten heini te menge Levihanen diyà te menge upisyal te hadì. Ne ebilangen heini te sikritaryu te hadì wey te upisyal te lavew he memumuhat, ne emun egkepasad ne idlikù dan ded kes kahun diyà te ǥemawan te valey te Nengazen he zutun ed-ezapa is Nengazen. Iyan heini ed-ul-ulahan dan kada andew taman te midekelà is netiǥum dan.
2CH 24:12 Ne imbeǥey ni Hadì Joash wey ni Jehoyada is selapì diyà te menge etew he edumala zutun te ebpepurungan he valey te Nengazen. Ne migkuwa zan te menge pandey wey menge memetau he ebpandey te menge putew wey brunsi.
2CH 24:13 Menge meǥied utew is edumala zutun te terebahu, umbe meǥaan is kedterebahu. Nepurungan dan haazà is baley te Megbevayà he iring ded is kegkeveeli zuen te zaan he kebeeli kayi, ne midlig-enan dan pa heini.
2CH 24:14 Hein nepasad is terebahu, ne in-ulì dan diyà te hadì wey ziyà te ki Jehoyada is nesamà he selapì. Ne migamit heini te kebpevaal te menge gelemiten dutun te valey te NENGAZEN–he egemiten para te ked-azap, te kebpemuhat te menge ibpemuhat he edtutungen, ragkes en is menge yehung wey menge teleǥuey he vulawan wey pelata. Dutun te uuyag pa si Jehoyada, ne wazè dan engkezi is kebpemuhat te menge pemuhat he edtutungen dutun te valey te Nengazen.
2CH 24:15 Midluǥeyazan utew te untung si Jehoyada, ne minatey sikandin he 130 is penuiǥen din.
2CH 24:16 Diyà sikandin ileveng te penlevengà te menge hadì diyà te Inged ni David, tenged te menge meupiya he nengeveelan din para te Israel wey para te Megbevayà wey para te valey zin.
2CH 24:17 Piru hein minatey en si Jehoyada, midhendiyà is menge upisyal te Juda te ki Hadì Joash. Ne midluhud dan su edtahud dan kandin. Ne migkeǥiyan dan sikandin te mebpemineg sikandin kandan.
2CH 24:18 Mid-isip dan he ed-iniyuǥan dan en haazà is baley te Nengazen, he Megbevayà te menge kepuun dan, ne iyan dan ed-ezapen is tukud he simbulu te vahi he ed-ezapen he si Ashera wey zuma pa he menge ed-ezapen. Tenged dutun te mibeelan dan ne nepeukan te Megbevayà is menge tig-Juda wey menge tig-Jerusalem.
2CH 24:19 Mibpevayaan te Nengazen te menge ebpeneuven din is menge etew su wey zan mekelikù diyà te kandin. Ne minsan mibpetizeenan sikandan te menge ebpeneuven, ne wazè dan mebpemineg.
2CH 24:20 Ne midumala te Mulin-ulin te Megbevayà si Zacarias he anak ni Jehoyada he memumuhat. Midhitindeg sikandin diyà te etuvangan te menge etew he egkaǥi te, “Iyan heini lalag te Megbevayà: Maan is wazè niw tumana is menge suǥù te Nengazen? Wazè niw en ed-iseǥan. Su mid-iniyuǥan niw is Nengazen, ne ed-iniyuǥan kew zin daan.”
2CH 24:21 Mibpen-ahaan te menge upisyal te paaǥi he mepatey zan si Zacarias. Ne tenged te suǥù mismu te hadì, mibpenuleng dan te vatu si Zacarias dutun te lama te valey te Nengazen, ne minatey sikandin.
2CH 24:22 Midlipatan ni Hadì Joash is kebpurungi kandin ni Jehoyada, he amey ni Zacarias, kekenà, mibpehimetayan din si Zacarias. Ne hein egkevidtawan en sikandin, ne ke sikandin te, “Berakat he seǥipaa te Nengazen is ebeelan niw, ne iyan sikandin mebales keniyu.”
2CH 24:23 Dutun te kebpuun te veǥu he tuig, ne midsurung te menge sundaru te Aram is Juda. Nezaag dan is Juda wey Jerusalem, ne mibpenhimetayan dan is menge upisyal te Juda. Ne mid-uwit dan diyà te hadì dan diyà te Damascus is menge azen he naaǥew zan.
2CH 24:24 Deisek dà is menge sundaru te Aram he midsurung kenà is menge sundaru te Juda. Piru impezaag te Nengazen kandan is Juda, su mid-iniyuǥan dan is Nengazen he Megbevayà te menge kepuun dan. Umbe nekeuma heini he silut ki Joash.
2CH 24:25 Hein migenat en is menge tig-Aram, ne negerebiyan te palì si Joash. Tenged te kedhimetayi zin te anak ni Jehoyada he memumuhat, mibpelanu zaan is menge upisyal zin he mepatey zan sikandin. Ne midhimetayan dan sikandin diyà te hizeǥaan din. Diyà sikandin ileveng te Inged ni David, piru kenà diyà te penlevengà te menge hadì.
2CH 24:26 Ne iyan heini midhimatey kandin, si Zabad he anak te sevaha he Amonihanen he vahi he si Shimeat, wey si Jehozabad he anak te sevaha he Moabitanhen he vahi he si Shimrit.
2CH 24:27 Is menge ǥuǥud mehitenged te menge anak ni Joash, is menge penagnà mehitenged kandin, wey te kebpepurungi zin te valey te Megbevayà ne ingkesurat diyà te Impesavut Mehitenged te Keguǥuza te menge Hadì. Si Amazia he anak din iyan nekeilis kandin te kedhadì.
2CH 25:1 Mibpenuiǥen si Amazia te 25 he tuig hein nehimu sikandin he hadì. Diyà sikandin med-ubpà te Jerusalem, ne midhadì sikandin seled te 29 he tuig. Is iney zin iyan si Jehoadan he tig-Jerusalem.
2CH 25:2 Meupiya is ulaula ni Amazia ziyà te etuvangan te Nengazen, piru kurang is kedsunud din te Nengazen.
2CH 25:3 Ne hein melig-en en is kedhadì ni Amazia, ne mibpehimetayan din sikan is menge upisyal he midhimatey te amey zin he hadì.
2CH 25:4 Piru wazè din mulà pehimetayi is menge anak dan, su sumalà is ingkesurat diyà te Libru te Kesuǥuan ni Moises he migkaǥi is Nengazen te, “Kenà ereg he edhimetayan is menge ginikanan tenged te salà te menge anak dan, ne is menge anak, kenà ereg he edhimetayan tenged te menge salà te menge ginikanan dan. Iyan dà idhimetayi te etew is keugelingen din he salà.”
2CH 25:5 Mid-urgenisar ni Amazia is menge sundaru zin he ebpuun te Juda wey Benjamin. Mibpunduk din sikandan sumalà te pemilya zan ne zuen menge peremandar he impezumala zin te tig-100 wey tig-1,000 he menge sundaru. Ne mibilang din is menge sundaru zin he ebpenuiǥen te 20 wey subra pa, ne is kezakel zan ne 300,000. Memetau heini he egawed te vangkew wey kelasag.
2CH 25:6 Migkuwa zaan sikandin te 100,000 he memetau he menge sundaru he ebpuun te Israel. Mibayad sikandin te 3,500 he kilu he pelata he idsuhul kayi te menge sundaru.
2CH 25:7 Piru zuen sevaha he suluǥuen te Megbevayà he midhendiyà te ki Amazia he egkaǥi te, “Mahal he Hadì, kenè ka kuwa te menge sundaru he ebpuun te Israel, su wazè en mebpekiduma is Nengazen kayi he nasyun. Heini is keet-etawan te Efraim ne wazè en uǥupi te Nengazen.
2CH 25:8 Emun edumahan niw sikandan ke ebpekidtebek kew, egkezaag kew minsan utew kew en ebpenigudu. Iyan dà is Megbevayà ebpekepezaag etawa ebpekepezezaat keniyu.”
2CH 25:9 Midtavak ni Amazia haazà is suluǥuen te Nengazen te, “Ne ebmenmenuwen ku en be haazà is ingkeveǥey ku he 3,500 he kilu he pelata?” Midtavak haazà sikandin te, “Subra pa keniyan is ibeǥey kenikew te Nengazen.”
2CH 25:10 Umbe, impeulì ni Amazia is menge sundaru he tig-Efraim. Ne nemen-ulì dan ne utew zan egkepeuki is Juda.
2CH 25:11 Mibpekevurut si Amazia te kebpenurung, ne mibpenguluwan din is menge sundaru zin te kedhendiyà te menge suǥud he egngezanan te Timus, ne zutun dan mekepatey te 10,000 he menge Edomanhen.
2CH 25:12 Nekezakep pa sikandan te 10,000 he menge sundaru, ne mid-uwit dan heini ziyà te zempilas ne impen-ulug dan, ne utew nengeruntek is menge lawa kayi.
2CH 25:13 Ne haazà mulà is menge sundaru he impemeulì ni Amazia su wazè dan dumaha te tebek ne nemenurung dan diyà te menge inged te Juda ebpuun te Samaria pehendiyà te Bet Horon. Nekepatey zan te 3,000 he menge etew, wey mezakel he menge azen is mibpenguwa zan.
2CH 25:14 Hein midlikù si Amazia he ebpuun te kebpenhimetayi zin te menge Edomanhen, mibpen-uwit din is menge ed-ezapen te menge Edomanhen. Midhimu zin heini he menge ed-ezapen din, mid-azap din, wey mibpemuhat din te menge pemuhat.
2CH 25:15 Umbe, utew nepauk is Nengazen ki Amazia. Mibpeveyaan din si Amazia te ebpeneuven he migkaǥi te, “Maan is midangep ka keniyan te menge ed-ezapen he wazè dan man ganì melibri is menge ed-azap kandan he mibpenhimetayan nu?”
2CH 25:16 Dutun te kemulu pa egkaǥi haazà is ebpeneuven, ne midtavak haazà is hadì te, “Maan is edsembaǥan a kenikew? Midhimu ku ve sikew he peresambag? Mebpereremek ka, emun kenè ka egkesuat he ebpatey.” Umbe, mibpereremek haazà is ebpeneuven hein nekepasad sikandin he egkaǥi kayi: “Siguradu he edèdeetan ka te Megbevayà tenged te mid-azap nu is duma he menge ed-ezapen ne wazè ka mebpemineg kedì.”
2CH 25:17 Mibpekidlalag si Hadì Amazia te menge sumesambag din ne hein nepasad din haazà, mibpeuwit sikandin te lalag diyà te hadì te Israel he si Jehoash he anak ni Jehoahaz he apù ni Jehu. Ne midhinggat din si Jehoash he ebpetebekè dan.
2CH 25:18 Piru midtavak sikandin ni Hadì Jehoash pinaaǥi kayi he menge lalag: “Diyà te Lebanon duen duǥiyen he sagbet he mibpeuwit te lalag diyà te kayu he sidru he ke sikandin: ‘Ipeesawa nu is anak nu he vahi te anak ku he maama.’ Piru zuen nekevayà dutun he leew he langgam ne midtekutakan din haazà is duǥiyen he sagbet.
2CH 25:19 Amazia, tutuu he nezaag nu is Edom ne ibpahambug nu heini. Piru zeyzey pa ke kenè ke en ebpekidtebek kenami, kekenà, tireneb ke zà keniyan te kenikew he lugar. Maan is ebpen-ehè ke pa te samuk he ebpekeuwit te kezeetan nu wey te Juda?”
2CH 25:20 Piru kenà ebpemineg si Amazia, su ketau te Megbevayà he mezezeeti sikandin ni Jehoash tenged te ked-azap din te menge ed-ezapen diyà te Edom.
2CH 25:21 Umbe, midsurung sikandin ni Hadì Jehoash wey te menge sundaru zin. Diyè dan medtebek te Bet Shemesh he sakup te Juda.
2CH 25:22 Nezaag is Juda te Israel, ne nekedsusuwey is menge sundaru te Juda he nemelaǥuy pehendiyà te ed-ulian dan.
2CH 25:23 Nezekepan ni Hadì Jehoash si Hadì Amazia diyà te Bet Shemesh, ne miduma zin sikandin diyà te Jerusalem. Ne zutun mibengkag ni Jehoash is menge verengbeng te Jerusalem puun te Pultahan te Efraim pehendiyà te Pultahan diyà te Suyuk, he 600 he ǥiek is keluǥayad din.
2CH 25:24 Mibpenguwa zin is langun he menge vulawan, pelata, wey menge gelemiten he neehè din duen te valey te Megbevayà he ed-etimanen dengan ni Obed Edom. Mibpenguwa zin daan is menge ketiǥeyunan diyà te turuǥan. Mid-uwit din heini wey is menge vihag din te ked-ulì din diyà te Samaria.
2CH 25:25 Nengungubpaan pa seled te 15 he tuig si Hadì Amazia he hadì te Juda puun te kebpatey ni Hadì Jehoash he hadì te Israel.
2CH 25:26 Is duma pa he ǥuǥud mehitenged te kedhadì ni Amazia, puun pa te puunà taman te ketepusan, ne ingkesurat diyà te Libru he Midsuratan te menge Keguǥuza te menge Hadì te Juda wey Israel.
2CH 25:27 Hein mid-iniyuǥan en ni Amazia is Nengazen, ne zuen menge etew he mibpelanu te kedhimetayi kandin diyà te Jerusalem, umbe mibpelaǥuy sikandin diyà te Lakish, piru mibpetelukunan dan sikandin ne midhimetayan dan.
2CH 25:28 Is lawa zin ingkarga te kudà ne inlikù diyà te Jerusalem ne inleveng diyà te midlevengan te menge kepuun din diyà te Inged ni David.
2CH 26:1 Is in-ilis te keet-etawan te Juda ki Amazia te kedhadì ne iyan is anak din he si Uzia he ebpenuiǥen te 16 he tuig.
2CH 26:2 Iyan sikandin nekehawì te Elat ne mid-umanan din tukuza hein minatey en is amey zin he si Amazia.
2CH 26:3 Mibpenuiǥen si Uzia te 16 he tuig hein nehimu sikandin he hadì. Diyà sikandin med-ubpà te Jerusalem, ne midhadì sikandin seled te 52 he tuig. Is iney zin iyan si Jecolia he tig-Jerusalem.
2CH 26:4 Meupiya is ulaula ni Uzia ziyà te etuvangan te Nengazen, iring te mibeelan te amey zin he si Amazia.
2CH 26:5 Midangep sikandin te Megbevayà hein timpu ni Zacarias, he iyan mibpenurù kandin te kedtahud te Megbevayà. Te kebpedayun din te kedangep te Nengazen, ne ibpeuswag sikandin te Megbevayà.
2CH 26:6 Mibpekidtebek sikandin te menge Filistihanen ne midrundus din is menge verengbeng he nekelingut te inged he Gat, Jabne, wey Ashdod. Ne midtukud sikandin te veǥu he menge inged uvey te Ashdod wey te zuma pa he menge lugar ziyà te Filistia.
2CH 26:7 Mid-uǥupan sikandin te Megbevayà te kebpekidtebek din te menge Filistihanen, menge Meunhanen, wey te menge Arabo he ziyà med-ubpà te Gur Baal.
2CH 26:8 Mibayad te vuhis is menge Amonihanen diyà te kandin, ne nevantug sikandin taman te Ehipto, tenged te mibmelig-en utew sikandin.
2CH 26:9 Midlig-enan pa utew ni Uzia is Jerusalem pinaaǥi te kedtukuza te menge turi ziyà te Pultahan diyà te Suyuk, kes Pultahan he Ebpekesinaru ziyà te Suǥud-suǥud, wey nepekùan duen te verengbeng.
2CH 26:10 Midtukud daan sikandin te menge turi ziyà te sibsivayan ne mibpekalut te mezakel he menge vudsi he punduwà te wahig su utew mezakel is menge ayam din diyà te menge mibuntud-buntud diyà te edsenlepan wey ziyà te menge suǥud. Mevasuk daan sikandin. Duen din menge sakup he ebantey zutun te menge vevesukè din wey menge pemuleey te paras diyà te menge vuvungan wey ziyà te egkeveluyan he menge suǥud.
2CH 26:11 Duen daan menge sundaru ni Uzia he menge metau he andam he ebpekidtebek. Heini sikandan ne mid-urgenisar wey migrupugrupu ni Jiel he sikritaryu wey ni Maasea he upisyal, he dizalem te kedumala ni Hanania he sevaha te menge upisyal zutun te hadì.
2CH 26:12 Is menge peremandar te memetau he menge sundaru iyan is menge pengulu te menge pemilya he 2,600 langun.
2CH 26:13 Is kezakel te menge sundaru ne menge 307,500. Heini sikandan ne memetau he ebpemekidtebek, ne andam he edtavang te hadì te kebpekidtebek te menge kuntada zin.
2CH 26:14 Mibeǥayan sikandan ni Uzia te menge kelasag, bangkew, wey kalù he putew, bisti he limbutung te lawa, panà wey limpawes.
2CH 26:15 Mibpevaal zaan si Uzia te menge gelemiten diyà te memetau he ebpemaal he para gelemiten te kebpanà wey kedtimbag te zezekelà he menge vatu puun te menge turi wey menge suyuk te menge verengbeng. Nevantug si Uzia ziyà te minsan hendei, tenged te midtevangan sikandin te Nengazen taman te nehimu sikandin he gemhanan.
2CH 26:16 Piru hein gemhanan en sikandin, ne mibpegalbu en sikandin. Ne iyan heini nekezezaat kandin. Wazà sikandin mebmetinumanen te egkesuatan te Nengazen he Megbevayè din, su midseled sikandin diyà te valey te Nengazen he nenguney medtutung te veyewà duen te pemuhatà.
2CH 26:17 Midtelukunan sikandin ni Azaria he lavew he memumuhat wey te 80 he menge mevurut he menge memumuhat te Nengazen
2CH 26:18 ne midawey zan si Uzia. Ke sikandan te, “Uzia, kenè ka engayan he edtutung te veyewà para te Nengazen. Heeyan he vuluhaten ne para zà te menge memumuhat he menge kevuwazan ni Aaron. Iyan sikandan mibpilì te Nengazen he edtutung te veyewà. Gawas ka keniyan te valey te Nengazen, su wazè ka medsunud te Nengazen. Kenè ka egkezeliǥan te Nengazen he Megbevayà kayi te mibeelan nu.”
2CH 26:19 Utew nepeuki ni Uzia is menge memumuhat. Ne te kemulu zin pa egewezi kes teleǥuey te veyewà he zutun te pemuhatà he ziyà te seled te valey te Nengazen, ne midtuvuan is buked din te zaru te lundis.
2CH 26:20 Hein naahà ni Azaria he lavew he memumuhat wey zuen te zuma zin he menge memumuhat he midtuvuan is buked ni Uzia te zaru te lundis, ne impeǥaanggaan dan ipeǥawas dutun te valey te Nengazen. Ne egkezeǥusu zaan sikandin he egawas tenged te midsilutan sikandin te Nengazen.
2CH 26:21 Ne midtuvuan te zaru te lundis si Hadì Uzia taman te andew te kebpatey zin. Diyà sikandin med-ubpà te sevaha he valey he nekesivey, ne wazà sikandin tuǥuti he ebpekeseled duen te valey te Nengazen. Si Jotam he anak din ne iyan mibpengulu ziyà te turuǥan wey te menge keet-etawan te Juda.
2CH 26:22 Is duma pa he ǥuǥud mehitenged te kedhadì ni Uzia, puun pa te puunà taman te ketepusan, ne insurat te ebpeneuven he si Isaias he anak ni Amoz.
2CH 26:23 Hein minatey en si Uzia, inleveng sikandin diyà te uvey te midlevengan te menge kepuun din he menge hadì. Wazà sikandin i-amur kandan, su zuen daru te lundis din. Si Jotam he anak din ne iyan nekeilis kandin te kedhadì.
2CH 27:1 Mibpenuiǥen si Jotam te 25 he tuig hein nehimu sikandin he hadì. Diyà sikandin med-ubpà te Jerusalem, ne midhadì sikandin seled te 16 he tuig. Is iney zin iyan si Jerusha he anak ni Zadok.
2CH 27:2 Meupiya is ulaula ni Jotam diyà te etuvangan te Nengazen, iring ded te mibeelan te amey zin he si Uzia. Piru wazè din iringi is salà te amey zin he iyan en midtutung te veyewà diyà te valey te Nengazen. Meupiya is ulaula ni Jotam, piru is menge etew mulà, ne mibpedayun dan te kebaal te mezaat.
2CH 27:3 Si Jotam is mibaal te Egkezizaya he Gemawan te valey te Nengazen, ne mibpemepurungan din is menge verengbeng te Jerusalem diyà te vuvungan te Ofel.
2CH 27:4 Iyan daan sikandin midtukud te menge inged diyà te menge vuvungan seled te Juda, wey midtukud daan te melig-en he menge kutà wey menge turi ziyà te menge keyuwen.
2CH 27:5 Mibpekidtebek si Jotam te menge Amonihanen wey te hadì dan, ne nezaag din sikandan. Te haazà he tuig ne mibeǥayan sikandin te menge Amonihanen te menge 3,500 he kilu he pelata, 30,000 he saku he trigu, wey 30,000 he saku he barli. Midhimu zan heini taman te iketelu he tuig.
2CH 27:6 Mibmelig-en pa utew si Jotam tenged te midsunud sikandin he metinumanen te Nengazen he Megbevayè din.
2CH 27:7 Is duma pa he ǥuǥud mehitenged te kedhadì ni Jotam, ragkes is langun he kaaǥi zin te kebpekidtebek wey menge neveelan din, ne ingkesurat diyà te Libru he Midsuratan te menge Keguǥuza te menge Hadì te Israel wey Juda.
2CH 27:8 Mibpenuiǥen si Jotam te 25 he tuig hein nehimu sikandin he hadì. Diyà sikandin med-ubpà te Jerusalem, ne midhadì sikandin seled te 16 he tuig.
2CH 27:9 Hein minatey en si Jotam, inleveng sikandin diyà te Inged ni David. Ne si Ahaz he anak din iyan nekeilis kandin te kedhadì.
2CH 28:1 Mibpenuiǥen si Ahaz te 20 he tuig hein nehimu sikandin he hadì. Diyà sikandin med-ubpà te Jerusalem, ne midhadì sikandin seled te 16 he tuig. Mezaat is ulaula zin diyà te etuvangan te Nengazen, kenà iring te mibeelan te kepuun din he si David.
2CH 28:2 Iyan midsunud din is menge ulaula te menge hadì te Israel, ne mibaal te mital he ledawan ni Baal.
2CH 28:3 Midtutung sikandin te menge pemuhat diyà te Suǥud-suǥud te Ben Hinom, ne minsan is anak din impemuhat din diyà te hapuy. Mid-iringan din is utew mezaat he menge vaal te menge etew ziyà te menge nasyun he impesegseg te Nengazen te menge Israilihanen.
2CH 28:4 Nemuhat sikandin te menge pemuhat wey midtutung te menge veyewà diyà te menge simbahan diyà te metikang he menge lugar, diyà te puntur te menge vuvungan wey ziyà te sihung te kada merapung he kayu.
2CH 28:5 Umbe, imbeǥey sikandin te Nengazen he Megbevayè din diyà te hadì te Aram. Nezaag sikandin te menge Aramihanen wey mezakel is menge sakup din he nengevihag diyà te Damascus. Imbeǥey zaan sikandin diyà te hadì te Israel, he nenhimatey te mezakel he menge sakup din.
2CH 28:6 Senga andew zà ne 120,000 he menge sundaru te Juda is nengepatey ni Hadì Peka he hadì te Israel, he anak ni Remalia. Neulaula heini ziyà te Juda tenged te mid-iniyuǥan dan is Nengazen, he Megbevayà te menge kepuun dan.
2CH 28:7 Si Zicri is sevaha zuen te utew memevurut he menge sundaru te Israel, midhimetayan din si Maasea he anak ni Hadì Ahaz, si Azrikam he sineriǥan diyà te turuǥan, wey si Elkana he ikezuwa te hadì.
2CH 28:8 Mibihag te menge tig-Israel is menge kezuzumahi zan ded he menge tig-Juda he 200,000 he menge vahi wey menge vatà. Mibpenguwa zan is menge ketiǥeyunan te menge tig-Juda ne mid-uwit dan diyà te Samaria.
2CH 28:9 Piru hein ebpelingguma is menge sundaru ziyà te Samaria, ne midsinuǥung sikandan ni Oded he ebpeneuven te Nengazen, ne migkeǥiyan din te, “Imbeǥey keniyu te Nengazen he Megbevayè niw is menge tig-Juda tenged te nepeukan din sikandan. Piru kenè en ereg is mibeelan niw: mibpenhimetayan niw sikandan te wazà kegkehizu, netuenan heini te Nengazen he ziyà te langit.
2CH 28:10 Ne guntaan egkesuatan niw pa te ed-uripen heini is menge maama wey menge vahi he ebpuun te Juda wey Jerusalem. Wazè niw ve metueni he nekesalè kew zaan diyà te Nengazen he Megbevayè niw?
2CH 28:11 Pemineg kew kedì! Utew nepauk is Nengazen keniyu. Umbe, ipeulì niw heini is menge kezuzumahi niw he mibihag niw.”
2CH 28:12 Iyan daan heini migkaǥi te zuma he menge pengulu te Israel diyà te menge sundaru he nemekeuma he ebpuun te tebek. Heini he menge pengulu iyan ensi Azaria he anak ni Jehohanan, Berekia he anak ni Meshilemot, Jehizkia he anak ni Shalum, wey si Amasa he anak ni Hadlai.
2CH 28:13 Migkaǥi sikandan te, “Kenè niw heeyan pendumaha kayi is menge nevihag, su televaken tew heini ziyà te Nengazen. Kenè tew en ed-umanan is salè tew. Dekelè en is menge salè tew, ne egkepeukan kiw en te Nengazen is menge tig-Israel.”
2CH 28:14 Umbe, insarig te menge sundaru ziyà te menge pengulu wey ziyà te kezekelan is menge vihag wey menge azen he naaǥew zan pinaaǥi te tebek.
2CH 28:15 Ne zutun mid-uvey ziyà te menge vihag sikan is heepat he pengulu he nesempitan is menge ngazan dan, ne mid-atur zan haazà is menge vihag. Migkuwa zan te menge visti puun duen te menge azen he naaǥew te menge sundaru, ne impesul-ub dan heini zuen te menge vihag he wazà bisti. Mibeǥayan dan is menge vihag te menge visti, menge sandalyas, menge keenen, menge inumen wey menge vawì. Impeuntud dan te menge asnu is menge meluya, ne inlikù dan haazà is langun he menge vihag diyà te menge emurè dan te inged. Diyè dan itaǥak sikandan te Jerico, he Inged te menge Palma, ne kegkepasad dutun ne mid-ulì dan diyà te Samaria.
2CH 28:16 Dutun te haazà he timpu ne mibpetavang si Hadì Ahaz te hadì diyà te Asiria.
2CH 28:17 Su mid-umanan surunga te menge tig-Edom is Juda ne nezaag dan ne nevihag is duma he menge meǥinged kayi.
2CH 28:18 Ne gawas kayì, midsurung daan te menge Filistihanen is menge inged te Juda he ziyà te menge mibuntud-buntud diyà te edsenlepan wey te Negev. Ne naaǥew zan is Bet Shemesh, Ayalon, Gederot, Soco, Timnah, wey Gimzo, ragkes en is menge lugar he nekelingut kayi ne zutun en sikandan med-ubpà.
2CH 28:19 Midhimu te Nengazen he mezizalem is Juda tenged te mid-iniyat ni Hadì Ahaz is menge meǥinged dutun te kebaal te mezaat, ne wazà sikandin medsunud te Nengazen.
2CH 28:20 Umbe, hein nekeuma si Hadì Tiglat Piliser he hadì te Asiria, wazè din tevangi si Ahaz kekena, nasì din lisliseza.
2CH 28:21 Mibpenguwa si Ahaz te menge vutang duen te valey te Nengazen, duen te turuǥan, wey ziyà te menge valey te menge upisyal, ne imbeǥey zin heini te hadì te Asiria. Piru wazà heini meketavang ki Ahaz.
2CH 28:22 Emun duen kemereǥenan he ebpekeuma ziyà te ki Hadì Ahaz, ne ed-iseg pa is kedsupak din te Nengazen.
2CH 28:23 Nemuhat sikandin te menge pemuhat diyà te menge ed-ezapen te menge tig-Damascus he nekezaag kandin. Su ke sikandin te, “Is menge hadì te Aram ne midtevangan te menge ed-ezapen dan. Umbe ebpemuhaten ku zaan heini he menge ed-ezapen para tevangi e zan.” Piru iyan heini nekezezaat kandin wey te tivuuk he Israel.
2CH 28:24 Mibpenguwa ni Ahaz is menge gelemiten duen te valey te Megbevayà ne mibpendèdèetan din heini. Mibpenlekevan din is menge gemawan te valey te Nengazen ne midtukud sikandin te menge pemuhatà diyà te kada suyuk te Jerusalem.
2CH 28:25 Midtukud daan sikandin te menge simbahan diyà te metikang he menge lugar ziyà te langun he menge inged he sakup te Juda su wey zin mepemuhat is duma he menge ed-ezapen. Ne utew heini ingkepauk te Nengazen, he Megbevayà te menge kepuun din.
2CH 28:26 Is duma pa he ǥuǥud mehitenged te kedhadì ni Ahaz wey te ulaula zin, puun pa te puunà taman te ketepusan, ne ingkesurat diyà te Libru he Midsuratan te menge Keguǥuza te menge Hadì te Juda wey Israel.
2CH 28:27 Hein minatey en si Ahaz, inleveng sikandin diyà te inged he Jerusalem piru kenà duen te penlevengà te menge hadì te Israel. Ne si Hezekia is anak din iyan nekeilis kandin te kedhadì.
2CH 29:1 Mibpenuiǥen si Hezekia te 25 he tuig hein nehimu sikandin he hadì. Diyà sikandin med-ubpà te Jerusalem, ne midhadì sikandin seled te 29 he tuig. Is iney zin iyan si Abia he anak ni Zacarias.
2CH 29:2 Meupiya is ulaula ni Hezekia ziyà te etuvangan te Nengazen, iring te mibeelan te kepuun din he si David.
2CH 29:3 Dutun te nehuna he vulan te nehuna he tuig te kedhadì ni Hadì Hezekia, ne mibpeumanan din pepuwasi is menge gemawan te valey te Nengazen ne mibpepurungan din.
2CH 29:4 Impetawag din is menge memumuhat wey menge Levihanen ne midtiǥum din diyà te lama he zapit te edsilaan dutun te valey te Nengazen.
2CH 29:5 Ne migkeǥiyan din sikandan te, “Pemineǥa a keniyu, sikiyu is menge kevuwazan ni Levi. Guntaan, ihalad niw is keugelingen niw wey lumpiyuwi niw zaan is baley te Nengazen, he Megbevayà te menge kepuun niw. Iawè niw keniyan te valey te Nengazen is langun he menge vutang he ed-isipen he meremerik.
2CH 29:6 Kenà metinumanen is menge kepuun tew. Kenà meupiya is ked-ahaa te Nengazen he Megbevayè tew te mibeelan dan. Ne mid-iniyuǥan dan sikandin. Mid-iniyuǥan dan is baley he ed-ubpaan te Nengazen ne mid-ewaan dan sikandin.
2CH 29:7 Midlekevan dan is menge gemawan duen te varkun te valey te Nengazen, ne mibpen-evukan dan is menge sulù. Wazè dan medtutung te veyewà wey wazè dan mebpemuhat diyà te valey te Nengazen te menge pemuhat he edtutungen he para te Megbevayà te Israel.
2CH 29:8 Umbe, utew nepeuki te Nengazen is menge tig-Juda wey menge tig-Jerusalem. Wey tenged te silut din kenitew, midhimu zin he igkelimezangi, ebpendemisan, wey ed-un-undahan kiw te menge etew iring te neehè niw ǥuntaan.
2CH 29:9 Nemematey is menge kepuun tew te tebek wey mibpemihag is menge esawa tew wey menge anak tew.
2CH 29:10 Piru ǥuntaan disididu a he ebpekid-uyun kew te Nengazen he Megbevayà te Israel, su wey maawà is utew zin kegkepeuki kenitew.
2CH 29:11 Umbe, sikiyu is menge minahal ku, ne kenè kew en mebpesagdan. Iyan kew mibpilì te Nengazen he ibpehitindeg diyà te etuvangan din, te kebpenilbi wey kebpemuhat,” ke si Hezekia.
2CH 29:12 Umbe, segugunà mibpuun medterebahu heini he menge Levihanen: Diyà te pemilya ni Kohat: si Mahat he anak ni Amasai wey si Joel he anak ni Azaria. Diyà te pemilya ni Merari: si Kish he anak ni Abdi wey si Azaria he anak ni Jehalelel. Diyà te pemilya ni Gershon: si Joa he anak ni Zema wey si Eden he anak ni Joa.
2CH 29:13 Diyà te menge kevuwazan ni Elizafan: si Shimri wey si Jiel. Diyà te menge kevuwazan ni Asaf: si Zacarias wey si Matania.
2CH 29:14 Diyà te menge kevuwazan ni Heman: si Jehiel wey si Shimei. Diyà te menge kevuwazan ni Jedutun: si Shemaya wey si Uziel.
2CH 29:15 Midtiǥum dan is menge zuma zan he menge Levihanen ne mibpekelumpiyu sikandan. Ne midlumpiyuwan dan is baley te Nengazen su iyan inmandù te hadì. Midsunud dan is migkaǥi te Nengazen.
2CH 29:16 Midseled is menge memumuhat dutun te valey te Nengazen su edlumpiyuwan dan heini. Inggawas dan dutun te Baley te Nengazen is langun he menge gelemiten he mid-isip he meremerik. Ne mid-uwit heini te menge Levihanen diyà te zal-ug he Kidron.
2CH 29:17 Mibpuunan dan lumpiyuwi haazà is baley te Nengazen hein nehuna he andew te nehuna he vulan, ne hein ikewalu en he andew nekeuma zan en is ebpenlumpiyu ziyà te varkun dutun te Baley te Nengazen. Ne impedayun dan is kedlumpiyu zutun te Baley te Nengazen te walu pa he andew, ne nepasad dan heini te ike-16 he andew zutun he vulan.
2CH 29:18 Ne hein neipus haazà ne midhendiyè dan te ki Hadì Hezekia he ke sikandan te, “Nelumpiyuwan dey en is tivuuk he valey te Nengazen ragkes en is pemuhatà te menge pemuhat he edtutungen wey is langun he menge gelemiten kayi, ragkes en is lemisahan he selevukà te supas he ibpemuhat diyà te etuvangan te Megbevayà wey is langun he menge gelemiten kayi.
2CH 29:19 Ingkelikù dey zaan is langun he menge gelemiten he migkuwa ni Hadì Ahaz tenged te ked-iniyuǥi zin te Megbevayà. Midlumpiyuwan dey heini ne egkehimu en he egemiten. Diyè en heini ǥuntaan te etuvangan te pemuhatà he para te Nengazen.”
2CH 29:20 Ne meselem pa zutun te sunud he andew, midtiǥum ni Hadì Hezekia is menge upisyal ziyà te inged ne midhendiyè dan te valey te Nengazen.
2CH 29:21 Midtundan dan te pitu he tudu he vaka, pitu he meemahan he menge kerehidu he memeǥurang en, pitu he meemahan he menge kerehidu he menge nati pa, wey pitu he meemahan he kambing he pemuhat he para idlumpiyu te ginhedian dan, wey te Baley te Nengazen wey te menge etew ziyà te Juda. Midsuǥù ni Hadì Hezekia is menge memumuhat he menge kevuwazan ni Aaron te kebpemuhat keniyan he menge pemuhat diyà te pemuhatà he para te Nengazen.
2CH 29:22 Umbe, midlapà dutun te menge memumuhat sikan is tudu he menge vaka ne impirik dan is lengesa kayi ziyà te pemuhatà. Midlapè dan daan sikan is memegurang en menge kerehidu ne impirik dan daan is lengesa kayi zuen te pemuhatà, ne kegkepasad dutun iyan en maan sikan is menge nati he kerehidu ne impirik dan daan is lengesa kayi zuen te pemuhatà.
2CH 29:23 Sikan is menge kambing he pemuhat he para idlumpiyu, mid-uwit diyà te hadì wey ziyà te kezekelan, ne indampè dan is menge velad dan dutun te menge kambing.
2CH 29:24 Ne midlapà dutun te menge memumuhat haazà is menge kambing ne in-itis dan is lengesa ziyà te pemuhatà he pemuhat he para idlumpiyu su wey mepalis is salà te langun he menge Israilihanen. Su insuǥù te hadì is kebpemuhat te menge pemuhat he edtutungen wey menge pemuhat he para idlumpiyu he para te langun he menge Israilihanen.
2CH 29:25 Ne impepelastar ni Hezekia ziyà te valey te Nengazen is menge Levihanen he zuen dan menge simbal, menge alpa, wey menge lira. Ne kedtuman heini te insuǥù te Nengazen ki Hadì David pinaaǥi ki Gad he menenagnà ni David wey te ebpeneuven he si Natan.
2CH 29:26 Mibpelastar is menge Levihanen he zuen dan menge instrumintu he gaked dengan ni Hadì David, wey is menge memumuhat he zuen dan menge trumpita.
2CH 29:27 Ne mibmandù si Hezekia he ipemuhat en diyà te pemuhatà is menge pemuhat he edtutungen. Ne zutun te kebpemuhat, migkanta is menge etew te kedalig te Nengazen, he miduyuǥan te menge trumpita wey zuma pa he menge instrumintu he iring te mibpemeveelan dengan ni Hadì David he hadì te Israel.
2CH 29:28 Is langun he menge etew zutun, mid-azap dan is Nengazen dutun te egkanta is menge perekanta wey is menge perehiyup te trumpita taman te nepasad is kebpemuhat te menge pemuhat he edtutungen.
2CH 29:29 Ne hein nepasad is kebpemuhat, ne midluhud si Hadì Hezekia wey is langun he menge zuma zin ne mid-azap dan is Nengazen.
2CH 29:30 Midsuǥù ni Hadì Hezekia wey te menge upisyal zin is menge Levihanen te kedalig te Nengazen pinaaǥi te kegkentaha zan te menge kentahan he vineelan ni Hadì David wey ni Asaf he ebpeneuven. Ne melipayen sikandan he egkanta te menge kentahan he idalig dutun te midluhud sikandan is ed-azap te Megbevayà.
2CH 29:31 Ne migkaǥi si Hezekia te, “Ǥuntaan te ingkahalad niw en is keugelingen niw ziyà te Nengazen, uwit kew te menge pemuhat diyà te Baley te Nengazen, ragkes en is menge pemuhat he para te kebpeselamat.” Umbe mid-uwit is menge etew ziyà te valey te Nengazen te menge pemuhat he migkaǥi te hadì, ne is duma, keugelingen dan he suat is kebpemuhat dan te menge pemuhat he edtutungen.
2CH 29:32 Is kahabet te menge pemuhat he edtutungen he mid-uwit te menge etew 70 he tudu he menge vaka, 100 he meǥurang en he meemahan he menge kerehidu, wey 200 he nati he meemahan he menge kerehidu.
2CH 29:33 Mid-uwit dan daan te zuma pa he menge pemuhat he 600 he tudu he menge vaka wey 3,000 he menge kerehidu wey menge kambing.
2CH 29:34 Piru kurang is kezakel te menge memumuhat he edlapà kayi te langun he menge uyaǥen. Umbe mid-uǥup kandan is menge kezuzumahi zan he menge Levihanen, ne mibmezakel zaan is menge memumuhat he nenlumpiyu te keugelingen dan su wey zan mekeuǥup taman te kegkepasad dutun he terebahu. Su metinumanen pa is menge Levihanen te kebpenlumpiyu te keugelingen dan kenà te menge memumuhat.
2CH 29:35 Utew mezakel is menge pemuhat dan he edtutungen, mahabet daan is menge tavà te menge uyaǥen he pemuhat he para te meupiya he kedepità, wey pemuhat he inumen he idlapik duen te pemuhat he edtutungen. Pinaaǥi kayi nelikuan te ebaal is menge vuluhaten diyà te valey te Nengazen.
2CH 29:36 Midlipey si Hezekia wey is menge etew tenged te tavang te Megbevayà, su meǥaan dan dà nepasad is langun kayi.
2CH 30:1 Kayi he timpu, mibpeuwit si Hezekia te lalag diyà te langun he menge etew ziyà te Israel wey Juda, ragkes en is menge etew ziyà te Efraim wey Manase. Mid-imbita zin sikandan te kedhendiyà te valey te Nengazen te kedsilibra te Pista te Kedlavey te Belinsuǥuen he paaǥi te kebeǥayi te zengeg te Nengazen he Megbevayà te Israel.
2CH 30:2 Midisisyun si Hadì Hezekia wey is menge upisyal zin, wey is langun he menge etew te Jerusalem he edsilibrahan is Pista te Kedlavey te Belinsuǥuen te ikezuwa he vulan.
2CH 30:3 Ereg pezem he edsilibrahan heini he pista ziyà te egkehuna he vulan, piru zeisey zà is menge memumuhat he nenlumpiyu te keugelingen dan dutun he timpu wey wazà daan metiǥum is menge etew ziyà te Jerusalem.
2CH 30:4 Heini is pelanu te kedsilibra te pista nesuatan te hadì wey te langun he menge etew,
2CH 30:5 umbe impetuenan dan heini ziyà te tivuuk he Israel, puun te Beersheba taman te Dan, he ibpehendiyà te Jerusalem is menge etew te kedsilibra te Pista te Kedlavey te Belinsuǥuen he paaǥi te kebeǥey te zengeg diyà te Nengazen he Megbevayà te Israel. Te nengehuna he kedsilibraha kayi deisek dà is nemenelavuk, piru sumalà is diyà te kesuǥuan ne kenà heeyan dait.
2CH 30:6 Tenged te mandù te hadì, midhipanew te menge menunudtulà is tivuuk he Israel wey Juda he uwiten dan is menge surat he ebpuun te hadì wey ziyà te menge upisyal zin. Iyan heini egkeǥiyen dutun te surat: “Menge etew te Israel, guntaan te nelibri kew en puun te gehem te menge hadì te Asiria, iyan en guntaan timpu he edlikù kew ziyà te Nengazen, he Megbevayà te menge kepuun niw he si Abraham, si Isaac, wey si Jacob, su wey kew zin daan likui.
2CH 30:7 Kenè niw iringi is menge kepuun niw wey menge kezuzumahi niw he kenà mepezumdumahan te Nengazen he Megbevayè dan, ne tenged kayi midhimu te Nengazen he utew mezaat is silut din iring te neehè niw ziyà te kandan.
2CH 30:8 Kenè kew mebmesinupaken iring te menge kepuun niw, kekenà, pesakup kew te Nengazen. Hendiyè kew te Baley te Nengazen he midhimu zin he segradu te wazà pidtemanan. Ne silbiyi niw is Nengazen he Megbevayè niw, su wey maawà is dekelà he pauk din keniyu.
2CH 30:9 Su emun edlikù kew ziyà te Nengazen ne egkehizuwan is menge anak niw wey menge kezumahan niw te menge mibihag kandan, ne ibpeulì sikandan kayi he tanà. Su veliǥeǥawen wey hihizuwen is Nengazen he Megbevayè niw. Kenè kew zin ed-iniyuǥan emun edlikù kew ziyà te kandin.”
2CH 30:10 Midtukid beyai te menge menunudtulà is kada inged diyà te tivuuk he Efraim wey Manase taman te Zebulun, piru mid-engitan dà sikandan wey midsudì te menge etew.
2CH 30:11 Piru zuen ebpemuun diyà te Asher, Manase, wey Zebulun he wazà mebpelavew ne midhendiyè dan mulà te Jerusalem.
2CH 30:12 Midhimu zaan te Megbevayà is menge tig-Juda he mesevaha sikandan te kedtuman te mandù te hadì wey te menge upisyal, sumalà is insuǥù te Nengazen.
2CH 30:13 Umbe, hein ikezuwa he vulan, utew mahabet is menge etew he midtiǥum diyà te Jerusalem te kedsilibra te Pista te Supas he Wazè din Tapey.
2CH 30:14 Mibpen-awè dan is menge pemuhatà diyà te Jerusalem he para ebpemuhatan te zuma he menge ed-ezapen, ragkes is menge pemuhatà he tutungà te veyewà, ne pudu zan heini intimbag diyà te zal-ug he Kidron.
2CH 30:15 Hein ike-14 he andew te ikezuwa he vulan, midlapà te menge etew is menge kerehidu zan he para te Pista te Kedlavey te Belinsuǥuen. Ne tenged kayi, is menge memumuhat wey menge Levihanen he menge meremerik, nengeeled sikandan, umbe mibpekelumpiyu sikandan ne nemuhat dan diyà te Baley te Nengazen te menge pemuhat he edtutungen.
2CH 30:16 Ne mibpelastar zan diyà te lugar he para kandan dutun te valey te Nengazen, sumalà is sulunuzen he ingkesurat diyà te Kesuǥuan ni Moises he suluǥuen te Megbevayà. Ne impirik te menge memumuhat diyà te pemuhatà is lengesa he mid-uwit te menge Levihanen diyà te kandan.
2CH 30:17 Ne ǥeina te mezakel he menge etew zutun is wazà mekepenlumpiyu te keugelingen dan, ne iyan is menge Levihanen midlapà te menge kerehidu zan su wey ikepemuhat diyà te Nengazen.
2CH 30:18 Kezekelan te midhendutun he menge kevuwazan ni Efraim, Manase, Isacar, wey ni Zebulun wazà mekepenlumpiyu te keugelingen dan, piru migkaan gihapun sikandin te impemuhat para te Pista te Kedlavey te Belinsuǥuen, minsan supak heini te kesuǥuan. Piru nengemuyù si Hadì Hezekia para kandan. Ke sikandin te, “He Nengazen, berakat he tenged te keupiya nu ne ebpeseyluwen nu is kada etew
2CH 30:19 he nenganduy te kedangep diyà te kenikew, te Megbevayà te menge kepuun din, minsan pa ke kenà sikandin lumpiyu sumalà te sulunuzen diyà te valey te Nengazen!”
2CH 30:20 Mibpemineg te Nengazen si Hezekia ne mibpesaylu zin is menge etew.
2CH 30:21 Seled te pitu he andew is kedsilibraha te menge Israilihanen he ziyà te Jerusalem te Pista te Supas he Wazè din Tapey he zuen dan dekelà he kelipey. Andew-andew is kegkanta te menge Levihanen wey menge memumuhat te kedalig te Nengazen, he eduyuǥan te mezaǥing he menge instrumintu he gelemiten te kedalig te Nengazen.
2CH 30:22 Nezeliǥan ni Hezekia is langun he menge Levihanen tenged te meupiya he terebahu he impeehè dan dutun te kebpenilbi zan te Nengazen. Ne mibpedayun is kedsilibra zan seled te pitu he andew. Migkaan dan is kandan he vahin dutun te menge pemuhat. Wey nemuhat dan te menge pemuhat he para te meupiya he kedepità, wey midalig dan is Nengazen he Megbevayà te menge kepuun dan.
2CH 30:23 Ne zutun midisisyun is langun he menge etew he ed-uman dan pa edsilibra seled te pitu he andew. Ne mibeelan dan haazà duma is utew kegkelipey.
2CH 30:24 Mibeǥayan ni Hadì Hezekia is menge etew te 1,000 he tudu he menge vaka wey 7,000 he menge kerehidu wey menge kambing. Mibeǥey zaan is menge upisyal te 1,000 he tudu he menge vaka wey 10,000 he menge kerehidu wey menge kambing. Mahabet he menge memumuhat is nenlumpiyu te keugelingen dan.
2CH 30:25 Midlipey is langun he menge etew ziyà te Juda, is menge memumuhat, is menge Levihanen, wey is langun he mid-amur-amur he ebpuun te Israel, ragkes is kenà menge Israilihanen he meǥinged daan diyà te Israel wey Juda.
2CH 30:26 Utew bibu is Jerusalem. Wazà iring kayi he nehitavù diyà te Jerusalem puun te timpu he si Solomon he anak ni David is midhadì te Israel.
2CH 30:27 Ne zutun midhitindeg is menge memumuhat wey menge Levihanen ne mibpenubtuvazan dan is menge etew. Ne mibpemineg heini te Megbevayà he ziyà te segradu he ubpeey zin diyà te langit.
2CH 31:1 Ne hein nepasad haazà is pista, is menge Israilihanen he midtelavuk dutun midhendiyà te menge inged te Juda ne mibpenrupet dan is tedeman he menge vatu wey mibpenamped dan is menge tukud he simbulu te vahi he ed-ezapen he si Ashera. Mibpenrundus dan is menge simbahan diyà te metikang he menge lugar wey is menge pemuhatà diyà te tivuuk he Juda wey Benjamin, wey ziyà te Efraim wey Manase. Ne hein nepasad dan haazà te ebpenrundus, ne mid-ulì sikandan diyà te menge inged dan wey tanè dan.
2CH 31:2 Migrupugrupu ni Hadì Hezekia is menge memumuhat wey menge Levihanen he para ebaal te nengetendek he menge vuluhaten dan. Apil kayi is kebpemuhat te menge pemuhat he edtutungen wey is menge pemuhat he para te meupiya he kedepità, is kebpenilbi ziyà te valey te Nengazen, is kebpeselamat wey is kegkanta te menge kedalig diyà te menge ǥemawan te valey te Nengazen.
2CH 31:3 Mibeǥey si Hadì Hezekia te keugelingen din he menge uyaǥen he para te menge pemuhat he edtutungen te meselem wey mahapun, wey para zaan te menge pemuhat emun Andew te Kedhimeley, emun Pista te Kebpuun te Hayag, wey te zuma pa he menge pista he ingkesurat diyà te Kesuǥuan te Nengazen.
2CH 31:4 Mibmenduan din daan is menge etew he menge meǥinged te Jerusalem he veǥayi zan te vahin is menge memumuhat wey menge Levihanen su wey zan mekepurung mekepenilbi sumalà is insuǥù te Kesuǥuan te Nengazen.
2CH 31:5 Hein ingkepehibelu en heini ziyà te menge etew, mibpeketulanged is menge Israilihanen te kebeǥey te egkehuna he vahin te sebpet dan he trigu, binu, lana, teneb, wey te zuma pa he egkekuwa zan diyà te tanà. Imbeǥey zan is ikepulù te langun he pruduktu zan.
2CH 31:6 Is menge tig-Israel he midhalin med-ubpà diyà te Juda, wey is menge tig-Juda mismu, imbeǥey zan daan is ikepulù te menge vaka zan, menge kerehidu zan, wey menge kambing dan, wey is ikepulù te menge azen he impehinungud dan diyà te Nengazen he Megbevayè dan. Ne intambù dan heini.
2CH 31:7 Mibpuun dan medtambu hein iketelu he vulan, ne nepasad hein ikepitu en he vulan.
2CH 31:8 Hein naahà ni Hezekia wey te menge upisyal zin haazà is menge intambù, midalig dan is Nengazen wey is menge etew he menge Israilihanen.
2CH 31:9 Mid-insaan ni Hezekia is menge memumuhat wey menge Levihanen mehitenged dutun te menge intambù.
2CH 31:10 Midtavak si Azaria, is lavew he memumuhat he kevuwazan ni Zadok, te, “Puun te kedsuǥud ked-uwit te menge etew te menge halad kayi te valey te Nengazen ne kenè en kurang is keenen dey, kekenà, dekelà pa is subra, su midtuvazan te Nengazen is menge etew zin.”
2CH 31:11 Insuǥù ni Hezekia is kebaal te menge budiga ziyà te valey te Nengazen. Ne netuman heini.
2CH 31:12 Ne midmetinumanen he mid-uwit dutun is menge etew te menge halad dan, menge ikepulù, wey is menge azen he impehinungud dan diyà te Nengazen. Si Conania he sevaha he Levihanen iyan midseriǥan kayi he menge azen, is umuuǥup din iyan is suled din he maama he si Shimei.
2CH 31:13 Mid-uǥup daan kandan he zizalem te kedumala zan ensi Jehiel, Azazia, Nahat, Asahel, Jerimot, Jozabad, Eliel, Ismakia, Mahat, wey si Benaya. Mibpilì sikandan ni Hadì Hezekia wey ni Azaria te kinelevawan he upisyal ziyà te valey te Megbevayà.
2CH 31:14 Si Kore he anak ni Imnah he Levihanen he vantey ziyà te zapit te edsilaan he gemawan te valey te Nengazen, iyan midseriǥan te kedumala vahin te menge halad he keugelingen he suat is kebeǥaya zuen diyà te Megbevayà. Ketengdanan din is kebpemeǥey ziyà te menge memumuhat wey menge Levihanen te menge azen he impehinungud diyà te Nengazen wey segradu he menge halad.
2CH 31:15 Is metinumanen he menge umuuǥup din iyan ensi Eden, Miniamin, Jeshua, Shemaya, Amaria, wey si Shecania. Midhendiyè dan te menge inged he ed-ubpaan te menge memumuhat he menge kezuzumahi zan ne impemeǥey zan kandan is kandan he vahin te menge halad; imbeǥey zan heini ziyà te kada grupu ne mibpurung bevehina ziyà te menge vatà etawa menge meǥurang.
2CH 31:16 Mibeǥayan is langun he menge memumuhat ragkes is menge anak dan he menge maama he tetelu he tuig is keǥurang dan pehendiyà te metikang, he edhendiyà te valey te Nengazen te kebaal te andew-andew he vuluhaten dan sumalà is buluhaten te kada grupu zan. Neragkes kayi is menge memumuhat he wazà ikelista ziyà te listahan te menge kevuwazan te menge memumuhat.
2CH 31:17 Heini sikandan, mibeǥayan te kandan he vahin iring duen te menge memumuhat he ingkelista, ne mibeǥayan daan is menge Levihanen he 20 he tuig is keǥurang dan pehendiyà te metikang, he ebaal zaan te buluhaten diyà te kandan he grupu.
2CH 31:18 Mibeǥayan daan is menge pemilya te menge Levihanen, menge esawa zan, menge anak dan, ragkes en is dezeisey pa he menge vatà. Mibeelan heini te langun he menge Levihanen he ingkelista ziyà te listahan te menge kevuwazan, su metinumanen sikandan te kebpenlumpiyu te keugelingen dan.
2CH 31:19 Ne emun mehitenged duen te menge memumuhat he menge kevuwazan ni Aaron he ziyà ebpen-ubpà te menge vevesukà diyà te peliǥuy te menge inged, duen menge etew he midseriǥan te kebpemeǥey te kandan he vahin wey te vahin te menge Levihanen he ingkelista ziyà te listahan te menge kevuwazan.
2CH 31:20 Iyan heeyan mibeelan ni Hadì Hezekia ziyà te tivuuk he Juda. Mibeelan din is meupiya wey hustu, ne metinumanen sikandin diyà te etuvangan te Nengazen he Megbevayè din.
2CH 31:21 Mibmezeeǥen sikandin, su is langun he mibeelan din ne para te valey te Megbevayà wey para te kedtuman te kesuǥuan, wey midangep sikandin diyà te Megbevayè din te kedangep he ebpuun diyà te tivuuk he gehinawa zin.
2CH 32:1 Hein nepasad ni Hezekia is buluhaten din duma is kebmetinumanen din, midsurung ni Hadì Senakerib he hadì te Asiria is Juda. Duma sikandin te menge sundaru zin ne midliǥuyan dan is binerengbeng he menge inged, su neisip din he egkezaag din heini para te keugelingen din.
2CH 32:2 Ne hein netuenan ni Hezekia he ragkes en is Jerusalem te edsurungen ni Senakerib.
2CH 32:3 Mibpekidlalag sikandin te menge upisyal zin wey te menge pengulu te menge sundaru zin. Ne iyan nepesazan dan is ibpeengked dan is kedtudà te menge wahig diyà te gawas te Jerusalem.
2CH 32:4 Umbe, midtiǥum dan is mahabet he menge etew ne midtembuan dan is tudeey te menge wahig pehendiyà te menge tanà he ebpuun diyà te menge serebseb. Su ke sikandan te, “Emun ebpekeume en kayi is menge hadì te Asiria, ne wazè dan en egkekuwaan te wahig.”
2CH 32:5 Ne mid-umanan pa ni Hezekia is kelig-en te menge pengalang din pinaaǥi te kebpepurungi zin te menge verengbeng wey kebpehitindeg te menge turi. Mid-umanan din peliǥuwi te verengbeng is inged diyà te gawas duen te nehuna he verengbeng, ne mibpetembuan din is mevavà he vahin dutun te Inged ni David. Mibpevaal zaan sikandin te mezakel he menge ǥumaan wey menge kelasag.
2CH 32:6 Midsavuk sikandin te menge peremandar te menge etew, ne impetiǥum din sikandan diyà te pelasa, he ziyà te pultahan he kilid te inged. Midasig din sikandan he ke sikandin te,
2CH 32:7 “Mebpekelig-en kew wey mebpekevurut. Kenè kew mahandek wey mebpenluyaluya tenged te kegkeevek niw te hadì te Asiria wey te mahabet he menge sundaru zin. Su zuen lavew he gemhanan he ebpekiduma kenitew.
2CH 32:8 Menge etew zà is duma keniyan te hadì, piru is kenitew he zuma, ne iyan is Nengazen he Megbevayè tew. Iyan sikandin edtavang kenitew wey ebpekidtebek para kenitew.” Umbe mibmelig-en is menge etew tenged dutun te migkaǥi ni Hadì Hezekia he hadì te Juda.
2CH 32:9 Ne zutun te kedliǥuyi ni Hadì Senakerib wey te menge sundaru zin te Lakish, midsuǥù din is menge upisyal zin pehendiyà te Jerusalem te kegkaǥi kayi he menge lalag diyà te ki Hadì Hezekia wey te menge etew zutun:
2CH 32:10 “Iyan heini migkaǥi ni Hadì Senakerib he hadì te Asiria: Hengkey is edseriǥan niw, maan is kenè niw ed-ewaan is Jerusalem minsan edliǥuyan kew en?
2CH 32:11 Migkaǥi si Hezekia ziyà te keniyu he edlibriyen kew te Nengazen he Megbevayè niw puun te gehem te hadì te Asiria. Piru edliveǥen kew zin dà, su emun kenè kew ed-awà kayi te Jerusalem ne ebpematey kew te kegkevitil wey kegkemezahi.
2CH 32:12 Kenè be iyan man si Hezekia mibperundus te menge ed-ezapan te Nengazen diyà te metikang he menge lugar, ragkes en is menge pemuhatà kayi? Midsuǥù kew zin pa is menge tig-Juda wey menge tig-Jerusalem he kinahanglan he azap kew wey tutung kew te menge pemuhat diyà te sevaha zà he pemuhatà.
2CH 32:13 “Netuenan niw en ke hengkey is mibeelan ku wey mibeelan te menge kepuun ku ziyà te menge etew ziyà te menge nasyun. Nelibri ve sikandan te menge ed-ezapen dan puun te gehem ku?
2CH 32:14 Wazà minsan sevaha zutun te menge ed-ezapen diyà te menge nasyun he midezeetan ku etawa midezeetan te menge kepuun ku he nekelibri te menge etew zin puun te gehem ku. Ne kenà daan ebpekelibri keniyu is megbevayè niw.
2CH 32:15 Kenè kew peliveg wey petuntu ki Hezekia. Kenè niw sikandin tuuwi, su wazà ed-ezapen diyà te minsan hendei he nasyun etawa ginhedian he ebpekelibri te menge etew zin puun te gehem ku etawa gehem te menge kepuun ku. Ne tuwas pa he kenà ebpekelibri is keniyu he megbevayà!”
2CH 32:16 Ne zuen pa zuma he mezaat he menge lalag he migkaǥi zutun te menge upisyal ni Senakerib he ebpekesuǥat te Nengazen he Megbevayà wey te suluǥuen din he si Hezekia.
2CH 32:17 Mibpeuwit pa si Hadì Senakerib te menge surat he ed-insultu te Nengazen he Megbevayà te Israel. Iyan heini insurat din: “Is menge ed-ezapen diyà te zuma he menge nasyun ne wazè dan melibri is menge etew zan puun te ǥehem ku. Umbe is megbevayà he ed-ezapen ni Hezekia ne kenà daan ebpekelibri te menge etew zin puun te menge gehem ku.”
2CH 32:18 Ne mezaǥing is kegkeǥiya kayi te menge upisyal ni Senakerib te Hebriyuhanen he kegkaǥi su wey mahandek is menge meǥinged te Jerusalem he midtiǥum duen te uvey te verengbeng. Su emun egkahandek en is menge etew ne melemu zan dà egkaaǥew haazà is inged.
2CH 32:19 Heini he menge upisyal mezaat is menge lalag dan he ebpekesuǥat te Megbevayà he ed-ezapen te menge tig-Jerusalem iring te menge lalag dan he ebpekesuǥat daan diyà te menge ed-ezapen diyà te zuma he menge nasyun he bineelan dà te etew.
2CH 32:20 Nengumew-umew te Megbevayà diyà te langit si Hadì Hezekia wey si Isaias he ebpeneuven he anak ni Amos.
2CH 32:21 Ne midsuǥù te Nengazen is belinsuǥuen he mibpurung medezaat te menge memetau he menge sundaru, menge peremandar, wey te menge upisyal te Asiria ziyà te kampu te hadì te Asiria. Umbe mid-ulì si Hadì Senakerib he nepeel-elezan utew. Ne hein midseled sikandin diyà te simbahan he ed-ezapan te ed-ezapen din, midhimetayan sikandin te zuma he menge anak din pinaaǥi te ispada.
2CH 32:22 Midlibri te Nengazen si Hezekia wey is menge etew ziyà te Jerusalem te gehem ni Hadì Senakerib he hadì te Asiria wey te gehem te zuma pa he menge kuntada zan. Ne melinawen dan su wazè en sikandan tebeka te menge kuntada zan diyà te peliǥuy zan.
2CH 32:23 Mahabet he menge etew is mid-uwit te menge halad diyà te Jerusalem he para te Nengazen. Mid-uwit dan daan te mahalen he menge gasa para ki Hadì Hezekia. Puun dutun mibeǥayan te zengeg si Hezekia te langun he menge nasyun.
2CH 32:24 Dutun he timpu midaru si Hezekia ne henduen be te ebpatey en sikandin. Nengemuyù sikandin diyà te Nengazen, ne mibeǥayan sikandin te Nengazen te tuus he egkeulian sikandin.
2CH 32:25 Piru mebpagalbu si Hezekia ne wazè din beliya is keupiya he impaahà te Nengazen kandin. Umbe nepeukan sikandin te Nengazen wey is menge tig-Juda wey menge tig-Jerusalem.
2CH 32:26 Ne mid-engkezan ni Hezekia wey te menge tig-Jerusalem is kebpelavew zan. Umbe wazà ipeseǥazi kandan te Nengazen is rimeǥas te pauk din dutun te uuyag pa si Hezekia.
2CH 32:27 Sepian wey nevantug si Hezekia. Mibpevaal sikandin te menge budiga te menge azen din he menge pelata, menge vulawan, mahalen he menge vatu, menge penaket, menge kelasag, wey zuma pa he mahalen he menge azen.
2CH 32:28 Mibpevaal zaan sikandin te menge budiga para te trigu zin, binu, wey lana. Ne gawas kayi mibpevaal zaan sikandin te menge tudil para te menge uyaǥen din,
2CH 32:29 su utew mahabet is menge uyaǥen din. Mibangun daan sikandin te menge inged, su mibeǥayan sikandin te Megbevayà te zekelà he ketiǥeyunan.
2CH 32:30 Si Hezekia is midsuǥù te kedtambun te lepawà te wahig he ziyà te zivavew he vahin te serebseb diyà te Gihon ne ziyà heini ipetudà te zapit te edsenlepan dutun te Inged ni David. Midlampus si Hezekia te langun he mibeelan din.
2CH 32:31 Piru mibey-anan sikandin te Megbevayà hein nekeuma is menge upisyal he ebpemuun te Babilonia he nenginginsà mehitenged te egkein-inuwan he nehitavù diyà te Juda. Mibeelan heini te Megbevayà su wey metueni ke hengkey is diyà te gehinawa ni Hezekia.
2CH 32:32 Is duma pa he ǥuǥud mehitenged te kedhadì ni Hezekia wey is kebmahala zin te Nengazen, ne ingkesurat diyà te insurat he nelewasan te ebpeneuven he si Isaias he anak ni Amos, he elin ingkesurat diyà te Libru he Midsuratan te Kaaǥi te menge Hadì te Juda wey Israel.
2CH 32:33 Hein minatey en si Hezekia, inleveng sikandin diyà te egkevuvungan he vahin te penlevengà te menge kevuwazan ni David. Mibeǥayan sikandin te zengeg te langun he menge etew te Juda wey Jerusalem dutun te kebpatey zin. Ne iyan is anak din he si Manase iyan nekeilis kandin te kedhadì.
2CH 33:1 Mibpenuiǥen si Manase te 12 he tuig hein nehimu sikandin he hadì. Diyà sikandin med-ubpà te Jerusalem, ne midhadì sikandin seled te 55 he tuig.
2CH 33:2 Mezaat is ulaula zin diyà te etuvangan te Nengazen. Mid-iringan din is utew mezaat he menge vaal te menge etew ziyà te menge nasyun he impesegseg te Nengazen te menge Israilihanen.
2CH 33:3 Mid-umanan din benguna is menge simbahan diyà te metikang he menge lugar he imperundus dengan te amey zin he si Hezekia. Mibaal zaan sikandin te menge pemuhatà he para te menge ledawan ni Baal wey mibpevaal te menge tukud he simbulu te vahi he ed-ezapen he si Ashera. Midluhuzan din wey mid-azap din is langun he egkaahà diyà te langit.
2CH 33:4 Mibpevaal zaan sikandin te menge pemuhatà diyà te valey te Nengazen, he sumalà te Nengazen haazà he valey ziyà te Jerusalem iyan kes lugar he zutun sikandin ebeǥayi te zengeg taman te taman.
2CH 33:5 Impelastar zin heini he menge pemuhatà diyà te zezuwa he lama zuen te valey te Nengazen ne egemiten haazà he menge pemuhatà te ked-azap te langun he merayag he egkengaahà diyà te langit.
2CH 33:6 Impemuhat din is menge anak din diyà te hapuy diyà te Suǥud-suǥud te Ben Hinom. Mibeelan din daan is baal te menge veyilan, menelagnà wey menge mememarang, ne ebpenginginsà daan diyà te menge veyilan he ebpekidlalag te ǥimukud te nemematey en. Utew subra is kebaal zin te salà diyà te Nengazen, ne ingkepauk heini te Nengazen.
2CH 33:7 Insavuk din diyà te valey te Megbevayà is ledawan he mibpeveelan din he iyan man pezem heini sikan is simbahan he migkaǥi te Megbevayà diyà te ki David wey ziyà te anak din he si Solomon, he ke sikandin te, “Wazà pidtemanan te kebeǥayi kedì te zengeg kayi te valey ku wey kayi te Jerusalem he iyan kes lugar he nepilì ku ziyà te langun he menge lugar te langun he menge tribu te Israel.
2CH 33:8 Emun edtumanen te menge etew te Israel is langun he menge kesuǥuan ku wey menge sulunuzen he imbeǥey kandan ni Moises, kenè ku idtuǥut he mekaawà sikandan kayi te tanà he imbeǥey ku ziyà te menge kepuun dan.”
2CH 33:9 Piru mid-iniyat ni Manase is menge etew ziyà te Juda wey Jerusalem te kebaal te mezaat, ne edhuna pa he mezaat is kandan he menge vaal kenà te menge vaal te menge etew ziyà te menge nasyun he mibpezezeetan te Nengazen te menge Israilihanen.
2CH 33:10 Minsan mibpetizeenan en te Nengazen si Manase wey is menge etew zin, wazà gihapun sikandan mebpemineg te Nengazen.
2CH 33:11 Umbe, impesurung sikandan te Nengazen te menge sundaru te Asiria. Mibihag dan si Manase, migkew-itan dan is izung din, migkedinahan dan te brunsi, ne miduma zan diyà te Babilonia.
2CH 33:12 Ne tenged te kedlised din, ne wazè en human sikandin mebpelavew, ne mibpehizuhizu sikandin te Nengazen he Megbevayè din, he Megbevayà daan te menge kepuun din.
2CH 33:13 Ne zutun te kebpengemuyù din, nemineg is Nengazen kandin. Newaleng is Nengazen dutun te kebpehizuhizu ni Manase. Umbe impelikù sikandin te Nengazen diyà te Jerusalem wey ziyà te ginhedian din. Ne zutun nepurung meisip-isip ni Manase he iyan dà Megbevayà is Nengazen.
2CH 33:14 Ne puun dutun, mibpepurungan ni Manase sikan is berengbeng diyà te gawas dutun te Inged ni David, puun te zapit te edsenlepan te serebseb diyà te Gihon he ziyà te zal-ug taman te Pultahan te menge Isdà, ne impevulegkù heini ziyà te menge mibuntud-buntud he egngezanan te Ofel. Mid-umanan din daan is ketikang kayi. Ne mibpepelestaran din te menge peremandar is langun he vinerengbeng he menge inged te Juda.
2CH 33:15 Is menge ed-ezapen te zuma he menge nasyun wey sikan is ledawan, impepen-awè din diyà te valey te Nengazen. Impaawè din daan is menge pemuhatà diyà te vuvungan he iyan kes epehitindeǥan te valey te Nengazen wey is menge pemuhatà diyà te zuma he vahin te Jerusalem, ne impetimbag din heini ziyà te gawas te inged.
2CH 33:16 Ne zutun mibpepurungan din sikan is pemuhatà he para te Nengazen ne mibpemuhatan heini te menge pemuhat he para te meupiya he kedepità wey menge pemuhat he para te kebpeselamat. Migkeǥiyan din is menge meǥinged diyà te Juda he mebpenilbi zan te Nengazen he Megbevayà te Israel.
2CH 33:17 Piru ebpemuhat gihapun is menge etew ziyà te menge simbahan diyà te metikang he menge lugar, piru ibpemuhat dan heini ziyà te Nengazen he Megbevayè dan.
2CH 33:18 Is duma pa he ǥuǥud mehitenged te kedhadì ni Manase, ragkes is kebpengemuyù din diyà te Megbevayà wey is menge migkaǥi te menge ebpeneuven diyà te kandin pinaaǥi te ngazan te Nengazen he Megbevayà te Israel, ne ingkesurat diyà te Libru he Midsuratan te menge Keguǥuza te menge Hadì te Israel.
2CH 33:19 Is pengemuyù ni Manase wey is tavak te Nengazen kandin, ragkes en is langun he menge salè din wey menge kedsupak din te Nengazen, ne ingkesurat diyà te libru te menge ebpeneuven. Ingkelista zaan kayi is menge lugar he mibpehitindeǥan din te menge simbahan, te menge tukud he simbulu te vahi he ed-ezapen he si Ashera, wey is duma pa he menge ed-ezapen he mid-azap din dutun te kemulu pa sikandin ebpelavew ziyà te etuvangan te Megbevayà.
2CH 33:20 Hein minatey en si Manase, inleveng sikandin diyà te turuǥan din. Ne iyan nekeilis kandin te kedhadì is anak din he si Amon.
2CH 33:21 Mibpenuiǥen si Amon te 22 he tuig hein nehimu sikandin he hadì. Diyà sikandin med-ubpà te Jerusalem, ne midhadì sikandin seled te zezuwa he tuig.
2CH 33:22 Mezaat is baal ni Amon diyà te etuvangan te Nengazen, iring te mibeelan ni Manase he amey zin. Mid-azap din wey mibpemuhat din is menge ed-ezapen he mibpeveelan ni Manase.
2CH 33:23 Piru kenà sikandin iring te amey zin, su wazè din mulà ibpekevavà is keugelingen din diyà te etuvangan te Nengazen, kekenà, mid-umanan din pa is kebaal zin te salà.
2CH 33:24 Ne zutun, mezaat is pelanu te menge upisyal ni Amon diyà te kandin, ne midhimetayan dan sikandin diyà te turuǥan din.
2CH 33:25 Piru pudu midhimetayi te menge etew ziyà te Juda sikan is midhimatey ki Hadì Amon. Ne iyan in-ilis dan he hadì is anak ni Amon he si Josia.
2CH 34:1 Mibpenuiǥen si Josia te walu he tuig hein nehimu sikandin he hadì. Diyà sikandin med-ubpà te Jerusalem, ne midhadì sikandin seled te 31 he tuig.
2CH 34:2 Meupiya is baal zin diyà te etuvangan te Nengazen ne mid-iringan din is ulaula te kepuun din he si David. Midsunud din is hustu.
2CH 34:3 Dutun te ikewalu he tuig te kedhadì din he vatè pa sikandin, mibpuun en sikandin medangep diyà te Megbevayà te kepuun din he si David. Ne hein ike12 he tuig te kedhadì din, mibpuunan din lumpiyuwi is Juda wey Jerusalem pinaaǥi te kebpependezeeti zin te menge simbahan diyà te metikang he menge lugar, te menge tukud he simbulu te vahi he ed-ezapen he si Ashera, zuma he menge ed-ezapen wey menge ledawan.
2CH 34:4 Mibpezèdeetan din daan is menge pemuhatà he para te menge ledawan te ed-ezapen he si Baal wey is menge pemuhatà he edtutungan te veyewà diyà te avey kayi. Imperuntek din is menge tukud he simbulu te vahi he ed-ezapen he si Ashera wey is duma he menge ed-ezapen wey menge ledawan, ne insawed din heini ziyà te menge leveng te menge etew he nemuhat kayi he menge ed-ezapen.
2CH 34:5 Impetutung din daan is menge tulan te menge memumuhat kayi he menge ed-ezapen diyà te menge pemuhatà he iyan pemuhatè dan. Pinaaǥi kayi midlumpiyuwan din is Juda wey Jerusalem.
2CH 34:6 Iyan daan heini mibeelan din diyà te menge inged he Manase, Efraim, wey Simeon, wey pehendiyè en te Naftali, ragkes en is nezeetan he menge inged diyà te peliǥuy kayi.
2CH 34:7 Mibpezèdeetan din is menge pemuhatà wey menge tukud he simbulu te vahi he ed-ezapen he si Ashera, wey imperuntek din is menge ed-ezapen wey is menge pemuhatà he edtutungan te veyewà. Ne hein nepasad din te ebaal heini ziyà te tivuuk he Israel, ne mid-ulì sikandin diyà te Jerusalem.
2CH 34:8 Hein ike-18 he tuig te kedhadì ni Josia, dutun te nelumpiyuwan din en is tanà wey is baley te Nengazen, midisisyun sikandin he ebpurungan sikan is baley te Nengazen he Megbevayè din. Insarig din heini he terebahu ziyà te ki Shafan he anak ni Azalia, diyà te gubirnedur te Juda he si Maasea, wey ziyà te edumala te menge libru te ginhedian dan he si Joa, he anak ni Joahaz.
2CH 34:9 Heini sikandan midhendiyà te ki Hilkia he lavew he memumuhat su ibeǥey zan is selapì he mid-uwit te menge etew ziyà te valey te Megbevayà. Heini he selapì nekulikta te menge Levihanen he perevantey te ǥemawan te valey te Nengazen he ebpuun diyà te menge etew ziyà te Manase, Ifraim, wey ziyà te nesamà he menge etew ziyà te Israel, wey ziyà te menge etew ziyà te Juda wey Benjamin, ragkes en is diyà he meǥinged te Jerusalem.
2CH 34:10 Ne zutun, imbeǥey zan haazà is selapì diyà te menge etew he midseriǥan te kedumala te kebpurungi zuen te valey te Nengazen ne migamit dan haazà he suhul te menge terebahanti.
2CH 34:11 Is duma he selapì imbeǥey zan diyà te menge terebahanti su wey zan ikepemasa te vinesbasan en he menge vatu wey te menge kayu he para zutun te valey te Nengazen he minsan egkezeetan en ne mibey-anan te menge hadì te Juda.
2CH 34:12 Metinumanen is menge terebahanti he edterebahu. Midumala sikandan te heepat he menge Levihanen he iyan ensi Jahat wey si Obadias, he menge kevuwazan ni Merari, wey si Zacarias wey si Meshulam, he menge kevuwazan ni Kohat. Heini he menge Levihanen memetau he edtukar te menge instrumintu.
2CH 34:13 Iyan sikandan midseriǥan te kedumala te menge terebahanti he nekedseselekawà is menge terebahu zan. Is duma he menge Levihanen menge sikritaryu sikandan, menge peresurat te dukumintu he memetau, wey menge perevantey te ǥemawan te valey te Nengazen.
2CH 34:14 Ne hein egkuwaan en is selapì he nekulikta zutun te valey te Nengazen, naahà te memumuhat he si Hilkia is Libru te Kesuǥuan te Nengazen he imbeǥey ziyà te menge Israilihanen pinaaǥi ki Moises.
2CH 34:15 Midtudtul zin diyà te ki Shafan, he sikritaryu te hadì, he neehè din diyà te valey te Nengazen is Libru te Kesuǥuan. Ne imbeǥey zin haazà diyà te ki Shafan,
2CH 34:16 ne mid-uwit haazà ni Shafan diyà te hadì. Ne migkeǥiyan din haazà is hadì te, “Sikami is menge upisyal, mibeelan dey is langun he ebpeveelan nu.
2CH 34:17 Migkuwa zey sikan is selapì diyà te Baley te Nengazen ne imbeǥey zey ziyà te midseriǥan para te kebpurung duen te valey te Nengazen.”
2CH 34:18 Migkeǥiyan din pa haazà is hadì te, “Duen libru he imbeǥey kedì te memumuhat he si Hilkia.” Ne mibasa zin haazà diyà te etuvangan dutun te hadì.
2CH 34:19 Ne hein nezineg dutun te hadì is ingkesurat diyà te kesuǥuan, mibindas din is kumbalè din he tuus te kegkeseeng din.
2CH 34:20 Segugunè din mibmendui si Hilkia, wey si Ahikam he anak ni Shafan, si Abdon he anak ni Micas, si Shafan he sikritaryu, wey si Asaya he suluǥuen din. Ke sikandin te,
2CH 34:21 “Insai niw is Nengazen para kedì wey para te nesamà he menge etew te Israel wey Juda mehitenged te ingkesurat kayi te libru he naahà. Utew kiw nepeuki te Nengazen su wazà medtuman is menge kepuun tew te lalag te Nengazen. Wazè kiw medtuman te menge ingkesurat kayi he libru.”
2CH 34:22 Umbe, migenat si Hilkia wey is menge midsuǥù te hadì he ibpezuma kandin pehendiyà te vahi he ebpeneuven he si Hulda su ebpenginginsè dan kandin. Heini si Hulda ziyà med-ubpà te veǥu he vahin te Jerusalem ne esawa sikandin ni Shalum he anak ni Tokhat wey apù ni Hasra. Si Shalum iyan midseriǥan te ked-atur te menge visti ziyà te valey te Nengazen.
2CH 34:23 Migkaǥi si Hulda ziyà te kandan te, “Keǥiyi niw is etew he midsuǥù keniyu kayi te kedì he iyan heini lalag te Nengazen he Megbevayà te Israel: Edezeetan ku heini he lugar wey is menge meǥinged kayi, sumalà is ingkesurat diyà te libru he mibasa ziyà te etuvangan nu.
2CH 34:25 Ibpeehè ku is pauk ku kayi he lugar ne kenà heini egkeengked, su inselikwey a te menge etew ku; su midtutung dan te veyewà su mid-azap dan te zuma he menge ed-ezapen. Midhimu zan he mepauk a pinaaǥi te menge ulaula zan.
2CH 34:26 “Piru keǥiyi niw is hadì te Juda, he midsuǥù keniyu te ked-insà diyà te Nengazen, he kenè pa sikandin meipeng su iyan heini lalag te Nengazen he Megbevayà te Israel:
2CH 34:27 Mibpemineg ku is pengemuyù nu tenged te kedsendit nu wey kebpekevevaa nu te keugelingen nu ziyà te etuvangan ku hein nezineg nu is migkaǥi ku he ebpekesuǥat kayi he lugar wey te menge meǥinged kayi. Mibindas nu is kumbalè nu wey midsineǥew ka ziyà te etuvangan ku su nekedsendit ka. Umbe siak is Nengazen migkaǥi a te
2CH 34:28 mintras uuyag ke pa, kenè ku ebpeeǥiyan te kezeetan heini he lugar wey is menge meǥinged kayi. Ebpatey ka he melinawen, ne ed-uwiten ku sikew ziyà te zivaluy he untung.” Ne migkeǥiyan dan sikan is hadì te tavak ni Hulda.
2CH 34:29 Ne zutun impetawag ni Hadì Josia is langun he edumala te Juda wey Jerusalem.
2CH 34:30 Midhendiyà sikandin te valey te Nengazen duma te langun he menge etew ziyà te Juda wey Jerusalem puun te utew lavew is pid-etawan din pehendiyà te utew minus is pid-etawan din. Miduma zaan is menge memumuhat wey menge Levihanen. Mibasa ni Josia ziyà te kandan is langun he ingkesurat duen te Libru te Kebpekid-uyun te Megbevayà he naahà diyà te valey te Nengazen.
2CH 34:31 Ne midhitendeg si Josia diyà te kilid te tukud he hitindeǥà te menge hadì. Ne nenangdù sikandin diyà te etuvangan te Nengazen he edsunud sikandin te Nengazen pinaaǥi te kedtuman te menge suǥù din, menge penurù, wey menge sulunuzen, te kedtuman he ebpuun diyà te tivuuk he gehinawa zin wey kedsavut din. Ne midsaad sikandin he edtumanen din is menge ibpetuman diyà te paaǥi te kebpekid-uyun te Megbevayà he ingkesurat dutun te libru.
2CH 34:32 Ne migkeǥiyan din daan is menge etew ziyà te Jerusalem wey Benjamin he medsaad sikandan he edtumanen dan is paaǥi te kebpekid-uyun te Megbevayà. Umbe midtuman dan is paaǥi te kebpekid-uyun te Megbevayà, he Megbevayà te menge kepuun dan.
2CH 34:33 Ne zutun impepen-awà ni Josia is langun he utew mezaat he menge ed-ezapen diyà te tivuuk he tanà te Israel, ne impepenilbi zin is menge etew ziyà te Nengazen he Megbevayè dan. Dutun te uuyag pa sikandin, midsunud dan is Nengazen he Megbevayà te menge kepuun dan.
2CH 35:1 Hein ike-14 he andew te nehuna he vulan, midsilibra ni Hadì Josia ziyà te Jerusalem is Pista te Kedlavey te Belinsuǥuen he paaǥi te kebeǥey te zengeg diyà te Nengazen. Midlapè dan te menge kerehidu wey menge kambing para kayi he pista.
2CH 35:2 Mibeǥayan ni Josia is menge memumuhat te buluhaten dan diyà te valey te Nengazen, ne midasig din sikandan dutun te kebpenilbi zan.
2CH 35:3 Mibeǥayan din daan te menge vuluhaten is menge Levihanen he menge menunudlù te menge Israilihanen, he impehinungud para te kebpenilbi te Nengazen. Migkeǥiyan din sikandan te, “Ingkepelastar en is segradu he kavan diyà te valey te Nengazen he mibangun ni Solomon he anak ni David, ne kenè en kinahanglan he ebintingen niw pa. Gemita niw en is timpu niw te kebpenilbi te Nengazen he Megbevayè niw wey te menge etew zin he menge Israilihanen.
2CH 35:4 Beeli niw en is menge terebahu niw ziyà te valey te Nengazen sumalà is ketengdanan te kada pemilya niw. Ikula niw is ingkesurat he menge sulunuzen ni Hadì David te Israel, wey te anak din he si Solomon.
2CH 35:5 Mebpelastar is kada grupu niw ziyà te valey te Nengazen, ne is menge pemilya he insarig keniyu, uǥupi niw he ebpemuhat.
2CH 35:6 Mebpekelumpiyu kew wey endama niw is keugelingen niw para te kedsilbi te menge zuma niw. Ne lepaa niw is menge kerehidu wey menge kambing he para te Pista te Kedlavey te Belinsuǥuen. Ikula niw is menge suǥù te Nengazen keniyu pinaaǥi ki Moises.”
2CH 35:7 Mibeǥey si Josia te kandin he menge uyaǥen he 30,000 he menge kerehidu wey menge kambing, wey 3,000 he menge vaka he para igkepemuhat te menge etew zutun te timpu te Pista te Kedlavey te Belinsuǥuen.
2CH 35:8 Mibeǥey zaan diyà te menge etew, ziyà te menge memumuhat, wey ziyà te menge Levihanen is menge upisyal ni Josia te kebeǥey he ebpuun te keugelingen dan he suat. Is menge edumala ziyà te valey te Nengazen he si Hilkia, si Zacarias, wey si Jehiel mibeǥey ziyà te iring dan he menge memumuhat te 2,600 he menge kerehidu wey menge kambing, wey 300 he menge vaka, he pemuhat dutun te pista.
2CH 35:9 Is menge pengulu te menge Levihanen he iyan ensi Conania wey is menge suled din he si Shemaya wey si Netanel, si Hashabia, si Jiel, wey si Jozabad, mibeǥey ziyà te menge zuma zan he menge Levihanen te 5,000 he menge kerehidu wey menge kambing, wey 500 he menge vaka, he para te pemuhat dutun te pista.
2CH 35:10 Hein naandam en is langun he para te pista, mibpelastar ziyà te valey te Nengazen is menge memumuhat wey menge Levihanen, he ebaal te vuluhaten te kada grupu zan, su iyan heini insuǥù te hadì.
2CH 35:11 Midlapà te menge Levihanen is menge kerehidu wey menge kambing, ne imbeǥey zan is lengesa zutun diyà te menge memumuhat. Ne impirik heini te menge memumuhat diyà te pemuhatà ne zutun ed-enisi te menge Levihanen is menge midlapà he menge uyaǥen.
2CH 35:12 Ne mibahin dan haazà diyà te kada grupu te menge pemilya is menge pemuhat he edtutungen he para ibpemuhat diyà te Nengazen, sumalà te ingkesurat diyà te libru ni Moises. Ne iring ded dutun is mibeelan dan duen te menge vaka.
2CH 35:13 Ne midlitsun dan sikan is menge uyaǥen he para te pista, sumalà is ingkesurat diyà te kesuǥuan, ne midsevawan dan is segradu he menge pemuhat diyà te menge diniyun, ziyà te menge kuzen, wey menge kawà, ne mibpenalad dan haazà diyà te menge etew.
2CH 35:14 Huziyan, ne mid-andam te menge Levihanen is kandan he keenen wey keenen te menge memumuhat, su is menge memumuhat he menge kevuwazan ni Aaron kenà egkeengked is kebpemuhat dan te menge pemuhat he edtutungen wey menge tavà te menge uyaǥen taman te mezukilem.
2CH 35:15 Is menge musikiru he menge kevuwazan ni Asaf, diyà daan sikandan te kandan he lugar zutun te valey te Nengazen, su iyan haazà sulunuzen he imbeǥey ni Hadì David, ni Asaf, ni Heman, wey ni Jedutun he ebpeneuven he sineriǥan te hadì. Is menge vantey ziyà te kada gemawan dutun te valey te Nengazen wazè en med-awà diyà te kandan he lugar su iyan mid-andam te keenen dan is menge zuma zan he menge Levihanen.
2CH 35:16 Nepasad dutun he andew is tivuuk he tulumanen para te Pista te Kedlavey te Belinsuǥuen he midsilibra para te Nengazen, ragkes is kebpemuhat te menge pemuhat he edtutungen diyà te pemuhatà he para te Nengazen, sumalà is insuǥù ni Hadì Josia.
2CH 35:17 Midsilibra te menge tumetelevukà he menge Israilihanen haazà he pista, ragkes en is Pista te Supas he Wazè din Tapey te seled te pitu he andew.
2CH 35:18 Puun te timpu ni Samuel, ne wazè pa iring kayi he kedsilibraha te Pista te Kedlavey te Belinsuǥuen. Wazà mekesilibra is nehuna he menge hadì te iring te kedsilibra ni Hadì Josia wey te menge memumuhat, menge Levihanen, menge meǥinged te Jerusalem, wey menge etew te tivuuk he Juda wey Israel.
2CH 35:19 Haazà he kedsilibra te pista nehitavù hein ike-18 he tuig te kedhadì ni Josia.
2CH 35:20 Hein nepasad heini is menge mibeelan ni Josia para te valey te Nengazen, mibpenguluwan ni Hadì Neco he hadì te Ehipto is menge sundaru zin te kebpekidtebek diyà te Carkemish, he ziyà te Wahig he Eufrates. Midhendutun si Josia wey is menge sundaru zin su edtebeken dan si Neco.
2CH 35:21 Piru midsuǥù si Neco te menge menunudtulà diyà te ki Josia he ibpekaǥi te, “Hengkey is lavet nu kedì te hadì te Juda? Kenè ka iyan edsurungen ku, kekenà, iyan is nasyun he mibpekidtebek kedì. Ne migkaǥi is Megbevayà kayi te kedì te egègaanan ku te edsurung. Duma ku is Megbevayà umbe kenà a kenikew kuntedaha su kela ke dèdeeti ke zin.”
2CH 35:22 Piru meheǥet diyà te gehinawa ni Josia is kebpekidtebek. Wazà sikandin mebpemineg ki Neco te migkeǥiyan te Megbevayà, kekenà, midsurung din si Neco ziyà te suǥud te Megido.
2CH 35:23 Mibpanà si Josia ne nepelian sikandin. Kesikandin diyà te menge upisyal zin te, “Kuwaa a keniyu kayi su gerabi is palì ku.”
2CH 35:24 Umbe, migkuwa zan sikandin diyà te kerwahi zin, ne ingkarga zan te sevaha pa he kerwahi zin, ne mid-uwit dan diyà te Jerusalem. Minatey sikandin dutun, ne inleveng dan diyà te midlevengan te menge kepuun din. Midlalew para kandin is langun he menge etew ziyà te Juda wey Jerusalem.
2CH 35:25 Mibaal si Jeremias te menge penhulùhulù he tedeman para ki Josia, ne taman en guntaan is kegkentaha kayi te menge perekanta. Heini he menge penhulùhulù ne layun egkentaha ziyà te Israel, ne ingkesurat diyà te menge penhulùhulù.
2CH 35:26 Is duma pa he ǥuǥud mehitenged te kedhadì ni Josia, puun te puunà taman te ketepusan, ne ingkesurat diyà te Libru he Midsuratan te menge Keguǥuza te menge Hadì te Israel wey Juda. Ingkesurat daan kayi is bahin te kebmahala ni Josia te Nengazen he impeehè din pinaaǥi te kedtuman din te Kesuǥuan te Nengazen.
2CH 36:1 Is anak ni Josia he si Jehoahaz iyan in-ilis te menge etew te kedhadì diyà te Jerusalem.
2CH 36:2 Mibpenuiǥen si Jehoahaz te 23 he tuig hein nehimu sikandin he hadì. Diyà sikandin med-ubpà te Jerusalem, ne midhadì sikandin seled te tetelu he vulan.
2CH 36:3 Diyà te huziyan he timpu impeengked sikandin te kedhadì te hadì diyà te Ehipto he si Neco, ne impevayad ni Neco te vuhis is menge tig-Juda te menge 3,000 he kilu he pelata wey 35 he kilu he vulawan.
2CH 36:4 Mibihag ni Neco si Jehoahaz pehendiyà te Ehipto, ne midhimu zin si Eliakim he suled ni Jehoahaz he hadì diyà te Juda wey Jerusalem. Mid-ilisan ni Neco is ngazan ni Eliakim te Jehoyakim.
2CH 36:5 Mibpenuiǥen si Jehoyakim te 25 he tuig hein nehimu sikandin he hadì. Diyà sikandin med-ubpà te Jerusalem, ne midhadì sikandin seled te 11 he tuig. Mezaat is ulaula zin diyà te etuvangan te Nengazen.
2CH 36:6 Midsurung sikandin ni Hadì Nebucadnezar he hadì te Babilonia, ne migkedinahan sikandin ne mid-uwit diyà te Babilonia.
2CH 36:7 Mid-uwit daan ni Nebucadnezar is duma he menge gelemiten diyà te valey te Nengazen ne intaǥù din diyà te turuǥan din.
2CH 36:8 Is duma pa he ǥuǥud mehitenged te kedhadì ni Jehoyakim wey is utew mezaat he menge vaal he mibeelan din, ne ingkesurat diyà te Libru he Midsuratan te menge Keguǥuza te menge Hadì te Israel wey Juda. Iyan nekeilis kandin te kedhadì is anak din he si Jehoyakin.
2CH 36:9 Mibpenuiǥen si Jehoyakin te 18 he tuig hein nehimu sikandin he hadì. Diyà sikandin med-ubpà te Jerusalem, ne midhadì sikandin seled te tetelu he vulan wey sepulù he andew. Mezaat is ulaula zin diyà te etuvangan te Nengazen.
2CH 36:10 Kebpuun te veǥu he tuig mibihag ni Hadì Nebucadnezar si Jehoyakin pehendiyà te Babilonia. Mibpenguwa zin is mahalen he menge azen diyà te valey te Nengazen. Ne is anggam ni Jehoyakin he si Zedekia, midhimu zin he hadì te Juda wey Jerusalem.
2CH 36:11 Mibpenuiǥen si Zedekia te 21 he tuig hein nehimu sikandin he hadì. Diyà sikandin med-ubpà te Jerusalem, ne midhadì sikandin seled te 11 he tuig.
2CH 36:12 Mezaat is ulaula zin diyà te etuvangan te Nengazen he Megbevayè din, ne wazè din ipekevavà is keugelingen din te ebpeneuven he si Jeremias he perekaǥi te Nengazen.
2CH 36:13 Nekidsukulà daan sikandin ki Hadì Nebucadnezar, minsan pa te impepenangdù din sikandin pinaaǥi te ngazan te Megbevayà he kenà sikandin medluib kandin. Utew mesinupaken si Zedekia. Kenà sikandin edlikù diyà te Nengazen he Megbevayà te Israel.
2CH 36:14 Ne gawas kandin, minsan is lavew he menge memumuhat wey is menge pengulu te menge etew midluib en te Megbevayà. Mid-iringan dan is utew mezaat he vaal te menge etew ziyà te zuma he menge nasyun ne midremerikan dan is baley te Nengazen, he mid-isip din he segradu he lugar ziyà te Jerusalem.
2CH 36:15 Layun ebpekidlalag kandan is Nengazen, he Megbevayà te menge kepuun dan, pinaaǥi te menge ebpeneuven din, su egkehizuwan din sikandan wey egkenuǥunan din sikan is baley zin.
2CH 36:16 Piru mid-undaunda zan dà is menge ebpeneuven te Megbevayà, mid-engitan dan, wey wazè dan beliya is menge lalag kayi te menge ebpeneuven. Umbe nepeukan sikandan te Nengazen, ne wazà ebpekeeǥen kandin.
2CH 36:17 Impesurung din sikandan te menge tig-Babilonia. Mibpenhimetayan te menge tig-Babilonia is betan-en he menge maama kandan minsan ed-aput pa ziyà te valey te Nengazen. Wazè dan kegkehizu te minsan hentei maama etawa bahi, batà etawa meǥurang, deruwanen etawa kenà. Imbeǥey te Megbevayà is langun he menge etew zin diyà te ki Nebucadnezar.
2CH 36:18 Mid-uwit ni Nebucadnezar ziyà te Babilonia is langun he menge gelemiten diyà te valey te Megbevayà, deisey etawa zekelà, wey is langun he ketiǥeyunan dutun te valey te Nengazen, wey is menge ketiǥeyunan te hadì wey te menge upisyal zin.
2CH 36:19 Mibinsulan dan is baley te Megbevayà wey mibengkag dan is berengbeng te Jerusalem. Mibinsulan dan daan is langun he melig-en he vahin dutun te inged, ne migevè dan is langun he mahalen he menge azen.
2CH 36:20 Mibihag ni Nebucadnezar pehendiyà te Babilonia is menge Israilihanen he wazè mepatey, ne nehimu sikandan he menge uripen din wey te menge anak din, ne wazà meengked is kegkeuripena kandan taman te iyan en nehimu he gemhanan is ginhedian te Persia.
2CH 36:21 Umbe, netuman is migkaǥi te Nengazen pinaaǥi te ebpeneuven he si Jeremias he egkehimu he mekevulungbulung haazà is tanà ne ebpekehimeley heini seled te 70 he tuig.
2CH 36:22 Dutun te nehuna he tuig te kedhadì ni Cyrus diyà te Persia, insavuk te Nengazen diyà te ǥehinawa ni Cyrus he medsurat te sevaha he pehibelu he ibpehibelu ziyà te tivuuk he ginhedian din. Nehitavù heini su wey metuman is migkaǥi te Nengazen pinaaǥi ki Jeremias.
2CH 36:23 Iyan heini pehibelu ni Hadì Cyrus he hadì te Persia: “Imbeǥey kedì te Nengazen he Megbevayà diyà te langit, is langun he ginhedian kayi te kelibutan, ne insarig din kedì is kebpehitindeg te valey zin diyà te Jerusalem he sakup te Juda. Sikiyu is langun he menge etew te Megbevayà, ne ulì kew ziyà te tanè niw. Ne verakat he zumahi kew zin.”
EZR 1:1 Dutun te nehuna he tuig te kedhadì ni Cyrus diyà te Persia, insavuk te Nengazen diyà te ǥehinawa ni Cyrus he medsurat te sevaha he pehibelu he ibpehibelu ziyà te tivuuk he ginhedian din. Nehitavù heini su wey metuman is migkaǥi te Nengazen pinaaǥi ki Jeremias.
EZR 1:2 “Iyan heini impehibelu ni Hadì Cyrus he hadì te Persia: “Imbeǥey kedì te Nengazen he Megbevayà diyà te langit, is langun he ginhedian kayi te kelibutan, ne insarig din kedì is kebangun diyà te Jerusalem he sakup te Juda te valey he para kandin.
EZR 1:3 Sikiyu is langun he menge etew te Megbevayà, likù kew en diyà te Jerusalem ne umana niw venguna is baley te Nengazen he Megbevayà te Israel, he mid-ubpà keniyan he inged. Ne verakat he mebpekiduma sikandin keniyu.
EZR 1:4 Is menge etew ziyà te menge lugar he ed-ubpaan niw te nesamà he menge Israilihanen, ereg sikandan he edtavang keniyu zutun te kegenat niw. Mebeǥey sikandan keniyu te menge pelata wey vulawan, menge vutang he egkinehenglanen niw, menge uyaǥen, wey tavang he ebpuun te keugelingen he suat he para te valey te Megbevayà diyà te Jerusalem.”
EZR 1:5 Duen menge Israilihanen he insavuk te Megbevayà diyà te gehinawa zan is suat te ked-ulì diyà te Jerusalem. Umbe nengandam sikandan te kedhendiyà su ebengunen dan is baley te Nengazen. Duma kandan is menge pengulu te menge pemilya te tribu ni Juda wey te tribu ni Benjamin, is menge memumuhat, wey is menge Levihanen.
EZR 1:6 Is duma he menge etew midtavang kandan pinaaǥi te kebeǥey te pelata he menge gelemiten, menge vulawan, menge azen he kinahanglan dan, menge uyaǥen, duma pa he mahalen he menge azen, wey tavang he ebpuun te keugelingen he suat he para te valey te Nengazen.
EZR 1:7 In-ulì ni Hadì Cyrus diyà te kandan is menge gelemiten diyà te valey te Nengazen he migkuwa ni hadì Nebucadnezar ziyà te Jerusalem ne mid-uwit din diyà te simbahan he ed-ezapan te menge ed-ezapen din.
EZR 1:8 Insarig heini ni Hadì Cyrus ki Mitredat he iyan trisuriru te ginhedian din. Mibilang heini ni Mitredat ne imbeǥey zin is listahan diyà te ki Sheshbazar, he gubirnedur ziyà te Juda.
EZR 1:9 Iyan heini nevilang he menge gelemiten: bulawan he menge bendihadu; 30 pelata he menge bendihadu; 1,000 menge kutsilyu; 29 bulawan he menge yehung; 30 pelata he menge yehung; 410 duma pa he menge gelemiten; 1,000
EZR 1:11 Is langun, ne 5,400 he menge gelemiten he vulawan wey pelata. Mid-uwit ni Sheshbazar heini is langun hein mid-ulì sikandin diyà te Jerusalem puun te Babilonia duma te zuma he menge vihag.
EZR 2:1 Listahan heini te menge Israilihanen diyà te prubinsya he Juda he mibihag dengan ni Hadì Nebucadnezar ziyà te Babilonia. Kayi he timpu mid-awe en sikandan diyà te Babilonia ne midlikù en diyà te Jerusalem wey ziyà te zuma pa he menge inged dan diyà te Juda.
EZR 2:2 Is nengulu kandan dutun te ked-ulì dan, iyan ensi Zerubabel, Jeshua, Nehemias, Seraya, Reeleya, Mordecai, Bilshan, Mispar, Bigvai, Rehum, wey si Baanah. Iyan heini listahan te menge etew te Israel he nemen-ulì puun te kegkevihaǥa kandan:
EZR 2:3 Mga Kevuwazan ni Parosh; 2,172 Shefatia; 372 Ara; 775 Pahat Moab (puun te menge pemilya ni Jeshua wey ni Joab); 2,812 Elam; 1,254 Zatu; 945 Zacai; 760 Bani; 642 Bebai; 623 Azgad; 1,222 Adonikam; 666 Bigvai; 2,056 Adin; 454 Ater (he egngezanan daan te Ezequias); 98 Bezai; 323 Jora; 112 Hashum; 223 Gibar; 95
EZR 2:21 Iyan heini kahabet te menge etew he mid-ubpà is menge kepuun dan kayi he menge inged: Betlehem; 123 Netopa; 56 Anatot; 128 Azmavet; 42 Kiriat Jerim, Kefira, wey Beerot; 743 Rama wey Geba; 621 Micmash; 122 Betel wey Ai; 223 Nebo; 52 Magbish; 156 is sevaha pa he Elam; 1,254 Harim; 320 Lod, Hadid, wey Ono; 725 Jerico; 345 Senaa; 3,630
EZR 2:36 Iyan heini menge kevuwazan te menge memumuhat he nemen-ulì puun te kegkevihag: Menge kevuwazan ni Jedaya (puun te pemilya ni Jeshua); 973 Imer; 1,052 Pashur; 1,247 Harim; 1,017
EZR 2:40 Iyan heini kevuwazan te menge Levihanen he nemen-ulì daan puun te kegkevihag: Menge kevuwazan ni Jeshua wey ni Kadmiel (puun te pemilya ni Hodavia); 74 Menge perekanta ziyà te valey te Nengazen he menge kevuwazan ni Asaf; 128 Menge vantey te menge pultahan te valey te Nengazen he menge kevuwazan ni Shalum, ni Ater, ni Talmon, ni Akub, ni Hatita, wey ni Shobai; 139
EZR 2:43 Iyan heini menge kevuwazan te menge suluǥuen diyà te valey te Nengazen he nemen-ulì daan puun te kegkevihag: Menge kevuwazan ni Ziha, Hasufa, Tabaot, Keros, Siaha, Padon, Lebana, Hagaba, Akub, Hagab, Shalmai, Hanan, Gidel, Gahar, Reaya, Rezin, Nekoda, Gazam, Uza, Pasea, Besai, Asna, Meunim, Nefusim, Bakbuk, Hakufa, Harhur, Bazlut, Mehida, Harsha, Barkos, Sisera, Tema, Nezia, wey Hatifa.
EZR 2:55 Mid-ulì daan puun te kegkevihag is menge kevuwazan te menge suluǥuen ni Solomon: He iyan is menge kevuwazan eni Sotai, Hasoferet, Peruda, Jaala, Darkon, Gidel, Shefatia, Hatil, Pokeret Hazebaim, wey Ami.
EZR 2:58 Is kahabet te kevuwazan te menge suluǥuen diyà te valey te Nengazen ragkes is kahabet te menge suluǥuen ni Solomon ne 392.
EZR 2:59 Duen daan 652 he nemen-ulì diyà te Juda he ebpemuun diyà te menge inged he Tel Mela, Tel Harsha, Kerub, Adon, wey Imer. Heini sikandan menge kevuwazan eni Delaya, Tobia, wey Nekoda, piru kenè dan igkepaahà is puriba he menge Israilihanen sikandan.
EZR 2:61 Kenà daan ebpekepaahà te puriba is menge kevuwazan eni Habaya, Hakoz, wey Barzilai he menge memumuhat sikandan. (Hein nengesawa heini si Barzilai iyan din mid-uwit is ngazan te enuǥang din he si Barzilai he tig-Gilead.) Ne ǥeina te kenè dan igkepaahà is listahan te menge kepuun dan, ne wazà sikandan dewata he menge memumuhat.
EZR 2:63 Migkeǥiyan sikandan te gubirnedur ziyà te Juda he kenà egkehimu ke egkaan dan te menge keenen he impemuhat diyà te Megbevayà dutun te wazè pa memumuhat he nekeinsà diyà te Megbevayà mehitenged te kegkememumuhat dan pinaaǥi te veveraan he Urim wey Thumim.
EZR 2:64 Is kahabet te langun he nemen-ulì puun te kegkevihag ne 42,360, kenà ragkes is menge suluǥuen dan he 7,337, wey is menge perekanta he 200 he menge maama wey menge vahi. Duen dan uwiten he 736 he menge kudà, 245 he menge mula, 435 he menge kemilyu, wey 6,720 he menge asnu.
EZR 2:68 Hein nekeuma zan diyà te valey te Nengazen diyà te Jerusalem, is duma he menge pengulu te menge pemilya mibeǥey te tavang he puun te keugelingen dan he suat he para te ked-umana kebenguna zuen te valey te Nengazen diyà te mibengunan ded duen hein aney.
EZR 2:69 Mibeǥey zan dutun he vuluhaten sumalà te egkeveleveg dan. Ne is langun he netiǥum dan 500 he kilu he vulawan, 3,000 he kilu he pelata, wey bisti he 100 he lukut he para te menge memumuhat.
EZR 2:70 Is kada sevaha kandan midlikù diyà te menge inged he mibpuunan te menge pemilya zan, ragkes is menge memumuhat, menge Levihanen, menge perekanta, menge vantey te menge ǥemawan te valey te Nengazen, wey is menge suluǥuen diyà te valey te Nengazen.
EZR 3:1 Ne hein neume en is pitu he vulan te ked-ubpà te menge Israilihanen diyà te menge inged dan, midtiǥum sikandan is langun diyà te Jerusalem he zuen dan kegkesevaha.
EZR 3:2 Ne mid-umanan dan beeli is pemuhatà he para te Megbevayà te Israel su wey mepemuhati heini te menge pemuhat he edtutungen, sumalà te ingkesurat diyà te Kesuǥuan ni Moises he suluǥuen din. Is mibaal kayi iyan ensi Jeshua he anak ni Jozadak wey is duma zin he menge memumuhat, wey si Zerubabel he anak ni Shealtiel wey is menge kezuzumahi zin.
EZR 3:3 Minsan nahandek dan te menge etew he zaan he nemen-ubpà dutun te tanà, mibangun dan is pemuhatà diyà te nehuna he mibengunan kayi. Ne nemuhat sikandan te menge pemuhat he edtutungen meselem wey mezukilem.
EZR 3:4 Midsilibra zan daan is Pista te Kebaal te menge Lawig sumalà te ingkesurat diyà te Kesuǥuan ni Moises. Ne nemuhat dan te menge pemuhat he edtutungen he kinahanglan he ibpemuhat kada andew kayi he pista.
EZR 3:5 Kenà ragkes kayi is menge pemuhat he edtutungen he ibpemuhat dan te meselem wey mahapun, ebpemuhat daan sikandan te menge pemuhat te kada Pista te Kebpuun te Hayag wey te zuma pa he menge pista te ked-azap te Nengazen. Ebpemuhaten dan daan is Nengazen te menge pemuhat he keugelingen he suat is kebeeli zuen.
EZR 3:6 Minsan wazè pa mepuuni is kebenguna ked-umana zuen te valey te Nengazen, mibpuun en is menge Israilihanen te kebpemuhat te menge pemuhat he edtutungen duen te nehuna he andew te ikepitu he vulan dutun he tuig.
EZR 3:7 Mibeǥey is menge Israilihanen te selapì he ibayad te menge edsapsap te vatu wey te menge pandey. Mibeǥey zaan sikandan te menge keenen, menge inumen, wey lana he ibayad diyà te menge tig-Sidon wey te menge tig-Tyre para te menge kayu he sidru he ebpuun diyà te Lebanon. Heini he menge kayu, igkarga te varku ne ed-uwiten diyà te Jopa. Intuǥut heini ni Hadì Cyrus he hadì te Persia.
EZR 3:8 Mibpuunan is kebenguna zuen te valey te Nengazen te ikezuwa he vulan te ikezuwa he tuig puun te kebpekeulì te menge Israilihanen diyà te Jerusalem. Mibpeug-uǥupà he edterebahu is langun he mid-ulì diyà te Jerusalem puun te kegkevihag, ragkes en ensi Zerubabel he anak ni Shealtiel, Jeshua he anak ni Jozadak wey is duma zin he menge memumuhat, wey menge Levihanen. Is midseriǥan te kedumala te kebenguna zuen te valey te Nengazen iyan is menge Levihanen he 20 he tuig is keǥurang dan pehendiyà te metikang.
EZR 3:9 Iyan sikandan ensi Jeshua, is menge anak din wey kezuzumahi zin, si Kadmiel wey menge anak din. Menge kevuwazan sikandan ni Juda is langun. Mid-uǥup daan kandan is menge kevuwazan wey menge kezuzumahi ni Henadad he menge Levihanen daan.
EZR 3:10 Hein nepasad en duen te ebpemenerebahu is pundasyun duen te valey te Nengazen, mibpelastar is menge memumuhat su ebpezaǥing dan te menge trumpita. Heini sikandan nekevivisti te visti zan te kegkememumuhat. Mibpelastar zaan is menge Levihanen he menge kevuwazan ni Asaf su edtukar zan te menge simbal su edeliǥen dan is Nengazen sumalà te paaǥi he impenurù kandan ni Hadì David he hadì te Israel.
EZR 3:11 Dutun midalig dan wey mibpeselematan is Nengazen; migkanta zan he edhenduen te, “Meupiya iyan is Nengazen, su is kebmahala zin te Israel ne wazà pidtemanan.” Ne ingkulahì te mezaǥing te langun he menge etew zutun is kedeliǥa zan te Nengazen su ǥeina te nepasad en is pundasyun duen te valey te Nengazen.
EZR 3:12 Mahabet dutun is meǥurang en he menge memumuhat, menge Levihanen, wey menge pengulu te menge pemilya he nekeehè pa zuen te nehuna he valey te Nengazen. Ne utew sikandan nekesineǥew hein neehè dan is pundasyun te veǥu he valey te Nengazen. Piru mahabet he menge etew zutun is nemengulahì tenged te kegkelipey zan.
EZR 3:13 Kenè te en egketuenan is kulahì te egkelipey wey is kulahì te edlelendag su utew en subra is keǥurub te menge etew, ne egkezineg heini ziyà te meziyù.
EZR 4:1 Netudtulan is menge kuntada te menge tig-Juda wey menge tig-Benjamin he mid-uman benguna zuen te nemen-ulì puun te kegkevihag is baley te Nengazen he Megbevayà te Israel.
EZR 4:2 Ne midhendiyà sikandan te ki Zerubabel wey zuen te menge pengulu te menge pemilya, ne ke sikandan te, “Ed-uǥupan dey sikiyu te kebangun te valey te Nengazen su ed-ezapen dey man is Megbevayè niw iring te ed-ul-ulahan niw. Neuǥet en is kebpemuhata zey kandin te menge pemuhat, puun pa te timpu ni Hadì Esarhadon he hadì te Asiria he iyan mid-uwit kenami kayi.”
EZR 4:3 Piru iyan heini tavak eni Zerubabel, Jeshua, wey te menge pengulu te menge pemilya: “Midsuǥù key ni Hadì Cyrus he hadì te Persia he umana zey venguna is baley te Nengazen, piru wazè niw kayi lavet te kebangun kayi para te Megbevayè dey. Iyan key zà ebangun kayi para te Nengazen he Megbevayà te Israel.”
EZR 4:4 Umbe, mibpelihandek wey mibpeluyahan te menge etew he zaan he ebpemen-ubpà dutun he lugar is menge etew te Juda su wey zan kenà melaus is kedterebehuwa zuen te valey te Nengazen.
EZR 4:5 Midsuhulan dan is menge upisyal te ginhedian te Persia su wey zan belevaǥi is menge pelanu te menge etew te Juda. Mibpedayun sikandan te kebaal kayi puun te timpu ni Cyrus he hadì te Persia taman en te timpu he si Darius en is hadì diyà te Persia.
EZR 4:6 Hein mibpuun medhadì si Ahasuerus, is menge kuntada te menge meǥinged diyà te Juda wey Jerusalem midsurat te menge sumbung dan kuntra kayi he menge meǥinged.
EZR 4:7 Ne minsan hein si Artaserkses en is hadì diyà te Persia, mibpesuratan dan daan. Iyan sikandan ensi Bishlam, Mitredat, Tabeel, wey is duma pa he menge zuma zan. Insurat dan heini ziyà te kineǥiyan he Aramico ne midhuvad heini ziyà te kineǥiyan te menge tig-Persia.
EZR 4:8 Midsurat daan si Rehum he gubirnedur wey si Shimshai he sikritaryu ziyà te ki Hadì Artaserkses te igkuntra zan te menge tig-Jerusalem. Iyan heini taǥù te surat dan: “Minahal he Hadì Artaserkses, “Edhuna key ebpengemusta kenikew, is menge suluǥuen nu kayi te prubinsya he zini layun te Eufrates. Ragkes he nengemusta kenikew is menge zuma zey he menge pengulu wey menge upisyal, is menge etew te Tripolis, Persia, Erec, Babilonia, wey is menge etew ziyà te Susa he tanà diyà te Elam. Ebpengemusta zaan is menge etew he impaawà diyà te menge lugar zan ni Osnapar, kes nevantug wey mekeǥeǥehem he hadì diyà te Asiria. Heini he menge etew impeubpè din diyà te inged he Samaria wey ziyà te zuma pa he menge lugar he zini layun te Eufrates.
EZR 4:12 “Mahal he Hadì, egkesuat key he metueni nu he mid-umanan benguna te menge Judio is inged he Jerusalem, he ubpeey te menge lalung wey menge ribildi he menge etew. Heini sikandan nekeume kayi he inged he ebpuun diyà te menge lugar he nesakup nu. Ebpurungan dan en is menge verengbeng wey menge pundasyun kayi.
EZR 4:13 Mahal he Hadì, emun egkeuman egkevangun heini he inged wey egkepurungan en is menge verengbeng kayi, edribildi is menge meǥinged kayi ne kenè dan en ebayad te menge vuhis wey zuma pa he menge veleyazan. Ne edeisey is egketiǥeyunan te ginhedian nu.
EZR 4:14 “Ne ǥeina te zuen dey ketengdanan diyà te kenikew, Mahal he Hadì, wey kenè dey egkesuatan he mepeel-elezi ka, ibpehibelu zey heini ziyà te kenikew
EZR 4:15 su wey nu mesusi is menge surat he intaǥù te menge kepuun nu. Ne kayi egketuenan nu he is menge meǥinged diyà te Jerusalem menge ribildi puun pa te nehuna he timpu. Umbe midezeetan heini he inged su nehimu heini he prublima te menge hadì wey te menge lugar he egkesuat he edsakup kayi.
EZR 4:16 Ibpehibelu zey zà diyà te kenikew, Mahal he Hadì, he emun egkeuman egkevangun heini he inged wey egkepurungan is menge verengbeng kayi, ne egkaawà diyà te kenikew is prubinsya he zini layun te Eufrates.”
EZR 4:17 Iyan heini tavak he impeuwit duen te hadì: “Ebpengemusta a kenikew Rehum he gubirnedur, wey ziyà te kenikew Shimshai he sikritaryu, wey te menge zuma niw he ed-ubpà diyà te Samaria wey is diyà te zuma pa he menge lugar he ziyan layun te Eufrates. “Berakat he meupiya is kebpekesavuk niw.
EZR 4:18 “Is surat he impeuwit niw midhuvad diyà te kenami he kineǥiyan dutun te kebesaha zuen kayi te kedì.
EZR 4:19 Midsuǥù a he susiya is menge surat, ne naahà dutun he tutuu iyan he puun pa zengan is menge meǥinged diyà te Jerusalem ebpekigkuntada te menge hadì. Neleyaman dan en te ed-ula-ula keniyan he lugar is kedribildi kuntra te gubirnu.
EZR 4:20 Netuenan ku zaan pinaaǥi te menge surat he midumala is Jerusalem te mekeǥeǥehem he menge hadì he midhadì te tivuuk he prubinsya ziyan layun te Eufrates ne mibayad heini he prubinsya ziyà te kandan te vuhis wey zuma pa he menge veleyazan.
EZR 4:21 “Ne ǥuntaan mebmandù kew he ibpeengkezan keniyan he menge etew is ked-uman kebangun keniyan he inged taman te kenè e pa ebmandù te kebenguna zuen.
EZR 4:22 Kinahanglan he segugunè niw veeli heini su wey kenà mezeeti is ginhedian ku.”
EZR 4:23 Ne hein nepasad te ebasa eni Rehum, Shimshai, wey te menge zuma zan is surat ni Hadì Artaserkses, segugunè dan midhendiyà te Jerusalem ne midteǥel zan is menge Judio he engkezi zan is ked-uman kebangun duen te inged.
EZR 4:24 Neengked is kebenguna zuen te valey te Megbevayà diyà te Jerusalem taman te ikezuwa he tuig te kedhadì ni Darius diyà te Persia.
EZR 5:1 Dutun he timpu, midsuǥù te Megbevayà diyà te Israel is menge ebpeneuven he si Haggai wey si Zacarias he apù ni Iddo te kegkaǥi te menge lalag din diyà te menge Judio ziyà te Juda wey Jerusalem.
EZR 5:2 Nemineg kandan si Zerubabel he anak ni Shealtiel wey si Jeshua he anak ni Jozadak. Umbe midlaus dan is kebenguna zuen te valey te Megbevayà diyà te Jerusalem ne midtevangan sikandan dutun te zezuwa he ebpeneuven te Megbevayà.
EZR 5:3 Piru wazè en meuǥet, ne nekeuma ziyà te Jerusalem si Tatenai he gubirnedur te prubinsya zini layun te Eufrates, si Shetar Bozenai, wey is menge zuma zan. Mid-insaan dan is menge Judio te, “Hentei is midsuǥù keniyu te ked-uman kebangun kayi te valey?”
EZR 5:4 Mid-insè dan daan te, “Hentei is menge ngazan te menge etew he midterebahu kayi?”
EZR 5:5 Piru mibentayan te Megbevayà is menge pengulu te menge Judio, umbe midisisyun si Tatenai, si Shetar Bozenai, wey is menge zuma zan he menge upisyal te prubinsya he dini layun te Eufrates he kenè dan en ibpeengkezan is kebenguna zuen te valey te Nengazen taman te egketudtulan sikandan te menge lalag ni Hadì Darius mehitenged kayi wey ke hengkey is tavak din. Iyan heini taǥù te surat he impeuwit dan diyà te ki Hadì Darius: “Minahal he Hadì Darius, “Berakat he meupiya is kebpekesavuk nu.
EZR 5:8 “Ibpehibelu zey kenikew, Mahal he Hadì, he midhendiyè key te prubinsya he Juda, diyà te ebengunan te valey te mekeǥeǥehem he Megbevayà. Dezekelà he menge vatu is egemiten te kebenguna zuen te simbahan, ne is menge verengbeng din midteuzan te menge trusu su wey mebmelig-en. Mesigudu sikandan he edterebahu, umbe meǥaan is kebenguna zan kayi.
EZR 5:9 Mid-insaan dey is menge pengulu zan ke hentei is midsuǥù kandan te ked-uman kebangun duen te valey te Megbevayà.
EZR 5:10 Ne in-insè dey zaan is menge ngazan dan su wey zey ikepetueni kenikew ke hentei is menge pengulu te kebenguna zuen te valey te Megbevayà.
EZR 5:11 “Iyan heini tavak dan kenami: ‘Menge suluǥuen key te Megbevayà diyà te langit wey kayi te kelibutan, ne ed-umanan dey ebenguna is baley te Megbevayà he mibangun dengan te sevaha he mekeǥeǥehem he hadì te Israel.
EZR 5:12 Ne ǥeina te mibaal is menge kepuun dey te ingkepauk te Megbevayà diyà te langit, mibey-anan din sikandan he mesakup ni Nebucadnezar te Kildiyanhen he hadì te Babilonia. Ne midrundus ni Nebucadnezar heini is baley te Megbevayà ne mibihag din is menge kepuun dey pehendiyà te Babilonia.
EZR 5:13 Piru hein nehuna he tuig te kedhadì ni Cyrus diyà te Babilonia, mibmandù sikandin he ed-umanan ebenguna is baley te Megbevayà.
EZR 5:14 In-ulì din is menge vulawan wey menge pelata he menge gelemiten diyà te valey te Megbevayà. Heini he menge gelemiten migkuwa zengan ni Nebucadnezar ziyà te valey te Megbevayà diyà te Jerusalem ne intaǥù din diyà te simbahan diyà te Babilonia. Insarig ni Hadì Cyrus heini he menge gelemiten diyà te ki Sheshbazar he iyan mibpilì din he gubirnedur ziyà te Juda.
EZR 5:15 Migkaǥi sikan is hadì diyà te ki Sheshbazar te ed-umanan ebenguna is baley te Megbevayà diyà te Jerusalem diyà te nehuna he mibengunan duen, ne idtaǥù dutun sikan is menge gelemiten kayi.
EZR 5:16 Umbe, midhendiyà si Sheshbazar te Jerusalem ne impetukud din is menge pundasyun duen te valey te Megbevayà. Ne taman en guntaan is kebenguna kayi te valey te Megbevayà ne wazè pa heini mepasad.’
EZR 5:17 “Guntaan, Mahal he Hadì, ipesusi nu is menge surat he impetaǥù te menge hadì te Babilonia ke tutuu ve he insuǥù ni Hadì Cyrus is ked-umana kebenguna zuen te valey te Megbevayà diyà te Jerusalem. Ne ipetueni nu kenami ke hengkey is disisyun nu mehitenged kayi.”
EZR 6:1 Umbe, midsuǥù si Hadì Darius he susiya is menge surat he intaǥù diyà te teleǥuey kayi ziyà te Babilonia.
EZR 6:2 Piru ziyà maahà te turuǥan diyà te Ecbatana, he sakup te prubinsya he Media, is sevaha he linulun he velesahan he zuen duen nekesurat he edhenduen te:
EZR 6:3 “Heini he menge surat ebpetanudtanud he heini nehuna he tuig te kedhadì ni Cyrus, midsuǥù sikandin he ed-umanan ebenguna is baley te Megbevayà diyà te Jerusalem he zutun ibpemuhat is menge pemuhat. Kinahanglan he melig-en is menge pundasyun kayi. Kinahanglan he 90 he ǥiek is ketikang kayi wey 90 zaan he ǥiek is keluaǥan din.
EZR 6:4 Is kada tetelu he dezekelà he menge vatu he ibped-uuntud, kinahanglan he ebpezivevawan te sevaha he trusu. Is langun he gelestuwan, egkuwaan diyà te selapì te ginhedian.
EZR 6:5 Ne sikan is bulawan wey pelata he menge gelemiten diyà te valey te Megbevayà he mid-uwit ni Hadì Nebucadnezar ziyà te Babilonia, kinahanglan he idlikù diyà te teleǥuey zuen diyà te valey te Megbevayà diyà te Jerusalem.”
EZR 6:6 Ne heini he menge lalag impeuwit ni Hadì Darius diyà te ki Tatenai, he gubirnedur te prubinsya he zini layun te Eufrates, ki Shetar Bozenai, wey te zuma zan he menge upisyal keniyan he prubinsya: “Pekeziyù kew keniyan te valey te Megbevayà.
EZR 6:7 Kenè niw semuka is kebenguna kayi. Bey-ani niw en is gubirnedur wey is duma he menge pengulu te menge Judio he mevangun dan heini ziyà te nehuna he mibengunan kayi.
EZR 6:8 “Edsuǥuen ku zaan sikiyu he uǥupi niw is menge pengulu te menge Judio pinaaǥi te kediritsuwa kebeyazi te langun he ǥastu su para kenà mesanggen is terebahu. Diyè niw kuwaa is bayad he selapì te ginhedian he ebpuun diyà te vuhis te prubinsya niw.
EZR 6:9 Kinahanglan he ebeǥayan niw kada andew is menge memumuhat diyà te Jerusalem te menge kinahanglan dan iring te turiti he vaka wey meǥurang wey menge nati he meemahan he menge kerehidu he edtutungen he ibpemuhat diyà te Megbevayà diyà te langit, ragkes daan is trigu, timus, binu, wey lana. Kinahanglan he kenà egkesalang is kebeǥaya niw kayi,
EZR 6:10 su wey zan mekepemuhat te menge pemuhat he ebpekepenunuat te Megbevayà diyà te langit, ne igkaampù e zan wey is menge anak ku.
EZR 6:11 “Ne elin daan suǥù ku he is minsan hentei he kenà edtuman kayi edtiyuken te kayu he edtengtangen puun te valey zin, ne edrundusen is baley zin taman te wazà kayi egkesamà he ebpekehitindeg.
EZR 6:12 Berakat he dezeeti te Megbevayà he mibpilì te Jerusalem he zutun sikandin ebeǥayi te zengeg is minsan hentei he hadì etawa nasyun he edsupak kayi he suǥù wey edrundus te valey te Megbevayà diyà te Jerusalem. “Iyan a si Darius, is midsuǥù kayi. Ne ereg heini he edtumanen.”
EZR 6:13 Ne midtuman heini ni Tatenai he gubirnedur, ni Shetar Bozenai, wey te menge zuma zan is suǥù ni Hadì Darius.
EZR 6:14 Umbe, mibpedayun te kedterebahu is menge pengulu te menge Judio duma is kedlig-eni kandan te menge lalag te menge ebpeneuven he iyan si Haggai wey si Zacarias he menge apù ni Iddo. Nepasad dan te edterebahu is baley te Megbevayà sumalà te insuǥù te Megbevayà te Israel he impetuman eni Cyrus, Darius, wey Artaserkses, he nekesunud he menge hadì diyà te Persia.
EZR 6:15 Nepasad sikan is baley te Megbevayà hein iketelu he andew te ike-12 he vulan, he iyan kes bulan he Adar, dutun te ikeenem he tuig te kedhadì ni Darius.
EZR 6:16 Melipayen he midsilibra is kebpehinunguza zuen te valey te Megbevayà te menge etew te Israel–menge memumuhat, menge Levihanen, wey te zuma pa he nemen-ulì puun te kegkevihag.
EZR 6:17 Kayi te kebpehinunguza zuen te valey te Megbevayà nemuhat sikandan te 100 he tudu he vaka, 200 he meǥurang he meemahan he menge kerehidu, wey 400 he meemahan he nati he menge kerehidu. Nemuhat daan sikandan te 12 he meemahan he menge kambing he pemuhat he para idlumpiyu te kada tribu te Israel.
EZR 6:18 Insavuk dan is menge memumuhat wey menge Levihanen diyà te kada ketengdanan dan diyà te valey te Megbevayà diyà te Jerusalem sumalà te ingkesurat diyà te Libru ni Moises.
EZR 6:19 Dutun te ike-14 he andew te nehuna he vulan te midsunud he tuig, midsilibra te menge nemen-ulì puun te kegkevihag is Pista te Kedlavey te Belinsuǥuen.
EZR 6:20 Mibpekelumpiyu is menge memumuhat wey menge Levihanen su wey zan mehimu he zait he ebpengulu ziyà te menge tulumanen. Ne midlapà te menge Levihanen is menge kerehidu he pemuhat te kedsilibraha te Pista te Kedlavey te Belinsuǥuen. Mibeelan dan heini para te langun he nemen-ulì puun te kegkevihag, para te menge memumuhat he menge kezuzumahi zan, wey para te keugelingen dan.
EZR 6:21 Heini he menge pemuhat migkaan te langun he menge Israilihanen he nemen-ulì puun te kegkevihag wey te zuma he menge etew he mid-ubpà dutun he mid-engked en he ebaal te menge ebeelan te menge etew he wazà mekekilala te Megbevayà te Israel.
EZR 6:22 Seled te pitu he andew is melipayen he kedsilibraha zan te Pista te Supas he Wazè din Tapey. Su mibeǥayan dan te Nengazen te kelipey pinaaǥi te kedwelenga zin te ǥehinawa te hadì te Asiria para tevangi zin sikandan te kedterebehuwa zuen te valey te Megbevayà, sikan is Megbevayà te Israel.
EZR 7:1 Kedlavey te mahabet he menge tuig, dutun te iyan hadì diyà te Persia si Artaserkses, nekeuma si Ezra ziyà te Jerusalem is ebpuun diyà te Babilonia. Heini si Ezra anak ni Seraya. Si Seraya anak ni Azaria. Si Azaria anak ni Hilkia. Si Hilkia anak ni Shalum. Si Shalum anak ni Zadok. Si Zadok anak ni Ahitub. Si Ahitub anak ni Amaria. Si Amaria anak ni Azaria. Si Azaria anak ni Merayot. Si Merayot anak ni Zerahia. Si Zerahia anak ni Uzi. Si Uzi anak ni Buki. Si Buki anak ni Abishua. Si Abishua anak ni Finehas. Si Finehas anak ni Eleazar. Si Eleazar anak ni Aaron te lavew he memumuhat. Si Ezra sevaha he menunudlù he nepurungan din metueni is Kesuǥuan ni Moises he imbeǥey te Nengazen he Megbevayà te Israel. Imbeǥey te hadì is langun he mibuyù ni Ezra su ǥeina te edtevangan sikandin te Nengazen he Megbevayè din.
EZR 7:7 Duen daan miduma kandin he menge Israilihanen dutun te ked-ulì din diyà te Jerusalem dutun te ikepitu he tuig te kedhadì ni Artaserkses. Ragkes te miduma kandin is menge memumuhat, menge Levihanen, menge perekanta, menge vantey te menge ǥemawan te valey te Nengazen, wey is menge suluǥuen dutun te valey te Nengazen.
EZR 7:8 Mibpuun si Ezra ziyà te Babilonia hein nehuna he andew te nehuna he vulan. Ne tenged te tavang te Megbevayà kandin, nekeuma sikandin diyà te Jerusalem te nehuna he andew te ikelima he vulan dutun te ikepitu he tuig te kedhadì ni Artaserkses.
EZR 7:10 Midtevangan sikandin te Megbevayà su ǥeina te impehinungud din is keugelingen din pinaaǥi te ked-istudyu wey kedtuman te Kesuǥuan te Nengazen, wey kebpenurù te menge sulunuzen wey menge suǥù din diyà te menge Israilihanen.
EZR 7:11 Iyan heini surat he imbeǥey ni Hadì Artaserkses diyà te ki Ezra he memumuhat wey menunudlù he nepurung metau te menge suǥù wey menge sulunuzen he imbeǥey te Nengazen he Megbevayà te Israel:
EZR 7:12 “Iyan a si Hadì Artaserkses he hadì te menge hadì. Ebpengemusta a kenikew Ezra, he memumuhat wey menunudlù te Kesuǥuan te Megbevayà diyà te langit.
EZR 7:13 “Midsuǥù a he minsan hentei te menge Israilihanen kayi te ginhedian ku, ragkes en is menge memumuhat wey menge Levihanen, he egkesuat he eduma kenikew te ked-ulì diyà te Jerusalem egkehimu he eduma kenikew.
EZR 7:14 Siak wey is pitu he menge sumesambag ku, edsuǥuen dey sikew he susiya nu is nengehitavù diyà te Juda wey Jerusalem ke edsunuzen be te menge etew kayi is Kesuǥuan te Megbevayè nu, he nepurungan nu metueni.
EZR 7:15 Edsuǥuen ku zaan sikew he uwita nu is menge vulawan wey menge pelata he keugelingen he suat is kebeǥaya ku zuen wey te menge sumesambag ku ziyà te Megbevayà te Israel he ed-ubpà diyà te Jerusalem.
EZR 7:16 Uwita nu zaan is langun he pelata wey vulawan he egkezawat nu puun te prubinsya he Babilonia, ragkes is ebpuun te keugelingen he suat he tavang te menge etew te Israel wey te menge memumuhat dan he para te valey te Megbevayè dan diyà te Jerusalem.
EZR 7:17 Sigureduwa nu he heini he selapì egkeǥamit te kebpemasa te tudu he menge vaka, meǥurang wey nati he meemahan he menge kerehidu, menge trigu, wey vinu, he ibpemuhat diyà te pemuhatà diyà te valey te Megbevayè niw ziyà te Jerusalem.
EZR 7:18 Is egkesamà he vulawan wey pelata ne egkehimu he egemiten niw te menge zuma nu ziyà te minsan hengkey he egkeǥemitan duen he sungkad te egkesuatan te Megbevayè niw.
EZR 7:19 Piru is menge gelemiten he insarig kenikew he egemiten te kebaal te menge vuluhaten diyà te valey te Megbevayè nu ne pudu nu iveǥey ziyà te Megbevayà te Jerusalem.
EZR 7:20 Emun duen pa zuma he egkinehenglanen nu he para te valey te Megbevayà, ne kuwa ke zà te ekgeǥastu nu ziyà te selapì te ginhedian.
EZR 7:21 “Iyan a, si Hadì Artaserkses, mibmenduan ku sikiyu is langun he menge trisuriru ziyà te prubinsya he ziyan layun te Eufrates he iveǥey niw is minsan hengkey he ebuyuen ni Ezra he memumuhat wey menunudlù te Kesuǥuan te Megbevayà diyà te langit.
EZR 7:22 Beǥayi niw sikandin taman te 3,500 he kilu te pelata, 300 he saku he trigu, 550 he gelun he vinu, 550 he gelun te lana he ulibu, wey minsan sengemenu kezekelà te timus he egkinehenglanen.
EZR 7:23 Iveǥey niw is langun he kinehenglanen diyà te valey te Megbevayà sumalà te inmandù te Megbevayà diyà te langit. Su emun kenà, ne egkepeukan din is ginhedian ku wey is menge anak ku.
EZR 7:24 Ibpehibelu zey zaan diyà te keniyu he kenè niw ipevayad te vuhis wey zuma pa he menge veleyazan is menge memumuhat, menge Levihanen, menge musikiru, menge vantey te menge ǥemawan te valey te Nengazen, menge suluǥuen diyà te valey te Nengazen, wey is duma pa he ebpemenerebahu zutun te valey te Nengazen.
EZR 7:25 “Ne sikew Ezra, sumalà te ketau he imbeǥey kenikew te Megbevayà, ne pilì ka te menge meghuhukum wey menge upisyal he edumala te langun he etew keniyan te prubinsya he ziyan layun te Eufrates. Kinahanglan he netuenan dan is Kesuǥuan te Megbevayè nu. Ne penurua nu is menge etew he wazà metau zutun te Kesuǥuan.
EZR 7:26 Is minsan hentei he kenà edtuman te Kesuǥuan te Megbevayè nu etawa kesuǥuan te hadì, edsilutan te kemetayen, etawa edsegseǥen puun te lugar zin, etawa egkuwaan is menge azen din, etawa ebpirisuwen.”
EZR 7:27 Migkaǥi si Ezra te: Ereg he edeliǥen is Nengazen, he Megbevayà te menge kepuun tew, he midwaleng din is gehinawa te hadì su wey zin meveǥayi te zengeg is baley te Nengazen diyà te Jerusalem.
EZR 7:28 Tenged te kebpurungi kediey te Nengazen, mibpurungan a te hadì wey te menge sumesambag din, ragkes en is langun he mekeǥeǥehem he menge upisyal zin. Ne ǥeina te edtevangan a te Nengazen he Megbevayè ku, neteǥuan a te kevurut te kedtiǥum te menge pengulu te Israel wey zan mekezuma kedì diyà te Jerusalem.
EZR 8:1 Migkaǥi si Ezra te: Iyan heini pengulu te menge pemilya he miduma kediey pehendiyà te Jerusalem he ebpuun diyà te Babilonia, dutun te timpu te kedhadì ni Artaserkses:
EZR 8:2 si Gershom, he ebpuun diyà te pemilya ni Finehas si Daniel, he ebpuun diyà te pemilya ni Itamar
EZR 8:3 si Hatush he anak ni Shecania he ebpuun diyà te pemilya ni David si Zacarias wey is menge zuma zin he 150 he menge maama, he ebpuun diyà te pemilya ni Parosh. (Duen listahan te menge kepuun dan.)
EZR 8:4 Si Eliehoenai he anak ni Zerahia wey is menge zuma zin he 200 he menge maama, he ebpuun diyà te pemilya ni Pahat Moab
EZR 8:5 si Shecania he anak ni Jahaziel wey is menge zuma zin he 300 he menge maama, he ebpuun diyà te pemilya ni Zatu;
EZR 8:6 si Ebed he anak ni Jonatan wey is menge zuma zin he 50 he menge maama, he ebpuun diyà te pemilya ni Adin
EZR 8:7 si Jeshaya he anak ni Atalia wey is menge zuma zin he 70 he menge maama, he ebpuun diyà te pemilya ni Elam
EZR 8:8 si Zebadia he anak ni Micael wey is menge zuma zin he 80 he menge maama, he ebpuun diyà te pemilya ni Shefatia
EZR 8:9 si Obadias he anak ni Jehiel wey is menge zuma zin he 218 he menge maama, he ebpuun diyà te pemilya ni Joab
EZR 8:10 si Shelomit he anak ni Josifia wey is menge zuma zin he 160 he menge maama, he ebpuun diyà te pemilya ni Bani
EZR 8:11 si Zacarias he anak ni Bebai wey is menge zuma zin he 28 he menge maama, he ebpuun diyà te pemilya ni Bebai
EZR 8:12 si Johanan he anak ni Hakatan wey is menge zuma zin he 110 he menge maama, he ebpuun diyà te pemilya ni Azgad
EZR 8:13 si Elifelet, si Jeuel, wey si Shemaya wey is menge zuma zan he 60 he menge maama, he iyan nesamà diyà te Babilonia he ebpuun diyà te pemilya ni Adonikam
EZR 8:14 si Utai wey si Zacur wey is menge zuma zan he 70 he menge maama, he ebpuun diyà te pemilya ni Bigvai.
EZR 8:15 Midtiǥum ku ziyà te wahig he edtudà pehendiyà te lugar he Ahava is menge eduma kedì pehendiyà te Jerusalem. Migkampu key zutun seled te tetelu he andew. Hein mid-ehè ku is listahan te menge etew he eduma kedì, ragkes en is menge memumuhat, nesusi ku he wazà dutun is menge Levihanen.
EZR 8:16 Umbe, impetawag ku is menge pengulu te grupu he iyan ensi Eliezer, Ariel, Shemaya, Elnatan, Jarib, Elnatan, Natan, Zacarias, wey Meshulam, wey dezuwa he metau he etew he iyan si Joyarib wey si Elnatan.
EZR 8:17 Impehendiyè ku sikandan te ki Iddo he pengulu ziyà te lugar he Casifia su wey zan mehengyui sikandin wey menge kezuzumahi zin he menge suluǥuen diyà te valey te Megbevayà he medsuǥù dan te menge etew he ebpekepenilbi ziyà te valey te Megbevayà.
EZR 8:18 Ne tenged te edtevangan key te Megbevayà, impehendiyè dan te kenami si Sherebia, duma zin is menge anak din wey menge suled din he 18 he menge maama. Si Sherebia egkeseriǥan he etew ne kevuwazan sikandin ni Mali te kevuwazan ni Levi. Si Levi anak ni Israel.
EZR 8:19 Midsuǥù dan daan diyà te kenami si Hashabia wey is menge suled din wey is 20 he menge enaken din, elin duma zan si Jeshaya he ebpuun te pemilya ni Merari.
EZR 8:20 Midsuǥù dan daan pehendiyà te kenami is 220 he menge suluǥuen diyà te valey te Megbevayà. Heini is menge suluǥuen diyà te valey te Megbevayà mibpilì dengan ni Hadì David wey te menge upisyal zin he ibpeuǥup te menge Levihanen. Pudu nekelista is menge ngazan dan.
EZR 8:21 Hein diyè key te veyvey te Wahig he Ahava, migkeǥiyan ku is menge zuma ku zutun te grupu zey te ebpuasa key wey ebpekevevaan dey is keugelingen dey ziyà te etuvangan te Megbevayè dey su edhangyù key ziyà te kandin he ventayi key zin dutun te hipenawan dey, ragkes is menge anak dey wey menge azen dey.
EZR 8:22 Su egkeeled a he edhangyù diyà te hadì te menge sundaru wey menge pereuntud te kudà he ebpekevantey kenami wey key kenà mekevut te menge kuntada zutun te kedhipanew zey, su nekeǥiyan dey en is hadì he edtevangan te Megbevayè dey is langun he edsarig diyà te kandin. Piru egkepeukan te Megbevayà is edselikwey kandin.
EZR 8:23 Umbe, mibpuasa key wey nengemuyù key ziyà te Megbevayè dey he ventayi key zin, ne midtavak din is pengemuyù dey.
EZR 8:24 Mibpilì a te 12 he menge etew he ebpuun diyà te pengulu he menge memumuhat, kenà ragkes si Sherebia, si Hashabia, wey sepulù he menge kezuzumahi zan.
EZR 8:25 Ne hein nepasad ne insarig ku ziyà te kandan he wazà kurang sikan is menge pelata wey vulawan, wey is menge gelemiten he imbeǥey te hadì, wey te menge sumesambag din, te menge upisyal zin, wey te mahabet he menge Israilihanen he tavang para te valey te Megbevayè dey.
EZR 8:26 Iyan heini insarig ku kandan: 22,000 he kilu he pelata 3,000 he kilu he pelata he mibeelan en he menge gelemiten 3,000 he kilu he vulawan 20 he vulawan he yehung he walu wey tengà he kilu 2 he brunsi he yehung he impesinew, he is bali zin iring te vali te menge yehung he vulawan.
EZR 8:28 Migkeǥiyan ku is menge memumuhat te, “Sikiyu wey heini is menge gelemiten impehinungud diyà te Nengazen. Is menge pelata wey menge vulawan inhalad diyà te Nengazen, he Megbevayà te menge kepuun niw he ebpuun diyà te keugelingen he suat.
EZR 8:29 Pekeventayi niw heini taman te egkeuwit niw ziyà te budiga ziyà te valey te Nengazen diyà te Jerusalem he kena egketerinan, he egkeseksiyan te nengulu he menge memumuhat, menge Levihanen, wey te menge pengulu te menge pemilya te menge Israilihanen.”
EZR 8:30 “Umbe migkuwa te menge memumuhat wey menge Levihanen sikan is menge pelata, menge vulawan, wey is menge gelemiten, su wey zan meuwit diyà te valey te Megbevayè dey ziyà te Jerusalem. Ne pudu haazà wazè din kurang.”
EZR 8:31 Mibpuun key ziyà te Wahig he Ahava ne midhipanew key pehendiyà te Jerusalem dutun te ike12 he andew te nehuna he vulan. Midtevangan key te Megbevayè dey wey mibpengelangan key zin te menge kuntada wey menge tulisan dutun te kedhipanew zey.
EZR 8:32 Ne hein nekeuma key ziyà te Jerusalem ne midhimeley key zep-a seled te tetelu he andew.
EZR 8:33 Ne hein ikeepat he andew, midhendiyè key te valey te Megbevayè dey ne indata zey sikan is menge pelata, menge vulawan, wey menge gelemiten he pudu wazà mengeterini ziyà te ki Meremot he memumuhat he anak ni Uria. Duma zin si Eleazar he anak ni Finehas wey zezuwa he Levihanen he si Jozabad he anak ni Jeshua wey si Noadia he anak ni Binui.
EZR 8:34 Mibilang wey midtimbang haazà is langun, ne inlista.
EZR 8:35 Ne zutun, is langun he nemen-ulì puun te kegkevihag nemuhat diyà te Megbevayà te Israel te menge pemuhat he edtutungen: 12 he tudu he vaka he para te tivuuk he Israel, 96 he meemahan he memeǥurang en he menge kerehidu, 77 he meemahan he nati he menge kerehidu. Nemuhat daan sikandan te 12 he meemahan he menge kambing he pemuhat he para idlumpiyu. Heini is langun, menge pemuhat he edtutungen para te Nengazen.
EZR 8:36 Imbeǥey zan daan diyà te menge gubirnedur wey menge upisyal te prubinsya zini layun te Eufrates is dukumintu he midsuratan te mandù te hadì. Heini he menge pengulu mid-uǥup te menge etew te Israel wey te vuluhaten diyà te valey te Megbevayà.
EZR 9:1 Migkaǥi pa si Ezra te: Ne hein neulaula en heini, midhendiyà te kedì is menge pengulu te menge Judio he ke sikandan te, “Mahabet he menge etew te Israel, ragkes en is menge memumuhat wey menge Levihanen, is mid-iring te ulaula te menge etew ziyà te peliǥuy zan. Ebeelan dan is utew mezaat he menge vaal te menge Canaanhen, menge Hitihanen, menge Pirisihanen, menge Jebusihanen, menge Amorihanen, menge Moabitanhen, menge Ehiptohanen, wey menge Amunihanen.
EZR 9:2 Nemengesawa pa ganì sikandan wey is menge anak dan te menge vahi he ebpemuun keniyan he menge etew. Umbe is menge etew he pinilì te Megbevayà nesehuǥan te zuma he menge etew. Ne is menge pengulu tew wey menge upisyal iyan en nengulu te kebaal kayi.”
EZR 9:3 Ne hein nezineg ku heini mibindas ku is kumbalè ku tenged te kegkeseeng ku; migingit ku is bulvul ku wey sumpè ku, ne mibpinuu a is neseeng.
EZR 9:4 Ne mid-amur-amur kayi te kedì is menge etew he nahandek te menge lalag te Megbevayà diyà te menge Israilihanen mehitenged te kegkemesinupaken te zuma zan he menge Israilihanen he nemen-ulì puun te kegkevihag. Mibpinuu e zà is neseeng taman te neuma is uras te mahapun he kebpemuhat.
EZR 9:5 Dutun te kegkeuma keniyan he uras, mid-engked a he edseengseeng. Midluhud a is nevindas is bisti, ne nengemuyù a he ebayew te menge velad ku ziyà te Nengazen he Megbevayè ku.
EZR 9:6 Ke siak te, “Megbevayè ku, utew a neeled. Ebpekezuzungul a tenged te kegkeeled ku su utew zekelà is menge salè dey; henduen be te nelapew key en kayi wey nekeume en diyà te langit.
EZR 9:7 Puun pa te timpu te menge kepuun dey taman en guntaan, ne utew zekelà is salè dey, ne tenged kayi, sikami wey is menge hadì dey wey menge memumuhat layun en edsekupa te menge hadì diyà te zuma he menge nasyun. Mibpenhimetayan dan is duma kenami, ne is duma mibihag dan, mibpenekawan key wey mibpeel-elezan, iring te nehitavù kenami ǥuntaan.
EZR 9:8 “Ne ǥuntaan, seled te mevavà he timpu, nehizuwan key kenikew, Nengazen he Megbevayè dey. Intuǥut nu he zuen nesamà kenami, ne impeubpè key kenikew kayi he lugar he wazà ebpekekaid kenami te menge pinilì nu. Impeperateng key kenikew wey midhimu nu he malù mebmahagkap is elentusen dey tenged te kegkeuripena kenami.
EZR 9:9 Minsan menge uripen key, ne wazè key kenikew vey-ani zutun he kebpekesavuk, kekenà, ibpeehè nu kenami is gaǥew nu pinaaǥi te kebpurungi kenami te hadì te Persia. Mibeelan nu heini su wey key kenikew meveǥayi te veǥu he untung, ne wey zey meuman mevangun is nerundus he valey nu, ne wey key kenikew mepengelangi kayi te Juda wey Jerusalem.
EZR 9:10 “Iyan, guntaan te nekesalè key, Megbevayè dey, henduen be te wazè dey en egkekaǥi. Su mibpekahagkap dey is menge suǥù nu
EZR 9:11 he imbeǥey nu kenami pinaaǥi te menge suluǥuen nu he menge ebpeneuven. Migkaǥi sikandan diyà te kenami he is tanà he zutun key ebpevayà su ed-engkenen dey, meremerik he tanà tenged te kelelalung te menge meǥinged duen. Midremerikan dan is minsan hendei he vahin kayi he tanà pinaaǥi te utew mezaat he menge vaal zan.
EZR 9:12 Migkaǥi zaan is menge ebpeneuven diyà te kenami he kenè key mebpengesawa etawa mebpeesawa kandan, wey kenè dey sikandan ed-uǥupan para med-uswag sikandan, su wey key mebmelig-en wey mebmeuswaǥen, su para kenà maawà heini he keuswagan diyà te menge kevuwazan dey taman te taman.
EZR 9:13 Midsilutan key kenikew, Megbevayè dey, tenged te menge salè dey. Piru is silut nu kenami, kenè en ereg he vayad te salà he nehimu zey, ne intuǥut nu pa he zuen mesamà he uuyag kenami.
EZR 9:14 Piru minsan pa te iyan haazà, mid-umanan dey ǥihapun supaka is menge suǥù nu, wey nengesawa key wey mibpeesawa te menge etew he ebaal te utew mezaat he menge vaal. Kenà duwazuwa he egkepeukan key kenikew ne edezeetan key kenikew taman te wazè en egkesamà kenami.
EZR 9:15 He Nengazen he Megbevayà te Israel, metazeng ka. Su intuǥut nu he zuen nesamà kenami he uuyag taman en guntaan. Idtug-an dey is menge salè dey, su kenè key ebpekehimu he ed-etuvang kenikew tenged kayi.”
EZR 10:1 Dutun te edluhud si Ezra ziyà te egkesineruwan duen te valey te Megbevayà, wey edsineǥew he ed-ampù wey edtug-an te menge salà te menge Israilihanen, mahabet he menge Israilihanen he menge maama, menge vahi, wey menge vatà is midtiǥum diyà te peliǥuy zin. Heini sikandan kenà daan alang-alang is kedsineǥew zan.
EZR 10:2 Ne zutun migkeǥiyan si Ezra ni Shecania he anak ni Jehiel, he kevuwazan ni Elam te, “Kenè key mepezumdumahan te Megbevayè tew su nengesawa key te menge vahi he kena Israilihanen he ebpuun diyà te menge etew he nekeliǥuy kenitew. Piru minsan pa te iyan heeyan ebpekeperateng kiw ǥihapun is menge etew te Israel.
EZR 10:3 Umbe, ǥuntaan ebpezumdumahan dey is sambag nu wey is sambag te zuma he edtahud te menge suǥù te Megbevayè tew. Ebpenangdù key ziyà te Megbevayè tew he edsegseǥen dey heini he menge vahi ragkes en is menge anak dan. Edtumanen dey is nekaǥi te Kesuǥuan.
EZR 10:4 Hitindeg ka su kenikew he vuluhaten is kegiya kenami mehitenged kayi. Mebpekelig-en ka ne veeli nu is ereg he ebeelan. Ed-uǥup key kenikew.”
EZR 10:5 Umbe, midhitindeg si Ezra ne impepenangdù din is nengulu he menge memumuhat, is menge Levihanen, wey is langun he menge Israilihanen, he veeli zan is migkaǥi ni Shecania. Ne nenangdù sikandan.
EZR 10:6 Ne mid-awà si Ezra ziyà te egkesineruwan duen te valey te Megbevayà ne midhendiyà te ruǥu ni Jehohanan te anak ni Eliashib. Ne hein dutun en sikandin ne wazà sikandin megkaan wey med-inum, su midlalew sikandin tenged te kenà metinumanen is menge Israilihanen he nemen-ulì puun te kegkevihag.
EZR 10:7 Mibpehibelu is menge pengulu wey menge edumala te menge Israilihanen diyà te tivuuk he Juda wey Jerusalem he is langun he mid-ulì puun te kegkevihag ne midtiǥum diyà te Jerusalem. Ne is minsan hentei he kenà edtelavuk seled te tetelu he andew ne egkuwaan diyà te kandin is langun he menge azen din ne kenè en sikandin ed-isipen he zuma te menge etew he nemen-ulì puun te kegkevihag.
EZR 10:9 Umbe, seled te tetelu he andew midtiǥum is langun he menge etew te Juda wey Benjamin, ne mibpinuu zan diyà te pelasa te valey te Megbevayà diyà te Jerusalem. Neulaula heini hein ike-20 he andew te ike-9 he vulan. Ebpengerkeren is menge etew zutun su utew meheǥet is ketuyuan te ketiǥuman dan wey tenged te mereǥes he uzan.
EZR 10:10 Ne zutun midhitindeg si Ezra he memumuhat ne migkeǥiyan din sikandan te, “Nekesalè kew tenged te mibpengesawa kew te kenà menge Israilihanen. Ne tenged kayi mid-umanan niw pa is salà te Israel.
EZR 10:11 Ne ǥuntaan itug-an niw is menge salè niw ziyà te Nengazen, he Megbevayà te menge kepuun niw, ne veeli niw is egkesuatan din. Isivey niw is keugelingen niw ziyà te kenà menge Israilihanen he nekeliǥuy keniyu, wey suwayi niw is menge esawa niw he kenà menge Israilihanen.”
EZR 10:12 Mibpekezaǥing medtavak is tivuuk he keet-etawan dutun te, “Benar heeyan! Ne ebeelan dey is egkeǥiyen nu.
EZR 10:13 Piru is kebeeli kayi, ne kenà egkepasad seled dà te senga andew etawa zezuwa he andew, su mezakel kenami is nekevaal keniyan he salà. Ed-uzan guntaan, ne kenè key ebpeketigker he ebpeuzan kayi te ǥawas.
EZR 10:14 Is menge upisyal tew zà is ibpepelintetaǥak kayi para te ked-atur te tivuuk he menge etew. Ibpehengkayi zà is nemengesawa te kenà menge Israilihanen te edteilen he timpu duma te menge edumala wey menge meghuhukum diyà te inged dan. Ebeelan tew heini su wey maawà is utew kegkepeuki kenitew te Megbevayè tew tenged te neveelan tew.”
EZR 10:15 Wazà duma he midsupak kayi he pelanu gawas ki Jonatan he anak ni Asahel wey si Jazea he anak ni Tikva. Ne midlavan kandan si Meshulam wey si Shabetai he Levihanen.
EZR 10:16 Midtuman duen te nemen-ulì puun te kegkevihag haazà he pelanu. Umbe mibpilì si Ezra he memumuhat te menge maama he pengulu te menge pemilya, ne inlista is menge ngazan dan. Ne hein nehuna he andew te ikesepulù he vulan, mibpinuu sikandan ne mibpuunan dan is ked-imbistiga bahin te kebpengesawa te menge Israilihanen te menge vahi he kenà menge Israilihanen. Nepasad dan is ked-imbistiga te langun he kasu hein nehuna he andew te nehuna he vulan te nekesunud he tuig.
EZR 10:18 Iyan heini menge maama he nemengesawa te kena menge Israilihanen, ne midsaad sikandan he edsuwayan dan is menge esawa zan: (Nemuhat is kada sevaha kandan te meemahan he kerehidu he vayad te salè dan.) Diyà te menge memumuhat: si Maasea, Eliezer, Jarib, wey si Gedalia, he ebpuun diyà te pemilya ni Jeshua he anak ni Jozadak wey is menge suled din;
EZR 10:20 Si Hanani wey si Zebadia, he ebpuun diyà te pemilya ni Imer;
EZR 10:21 si Maasea, Elias, Shemaya, Jehiel, wey si Uzia, he ebpuun diyà te pemilya ni Harim;
EZR 10:22 si Elioenai, Maasea, Ishmael, Netanel, Jozabad, wey si Elasa, he ebpuun diyà te pemilya ni Pashur.
EZR 10:23 Diyà te menge Levihanen: si Jozabad, Shimei, Kelaya (he egngezanan daan te Kelita), Petahia, Juda, wey si Eliezer.
EZR 10:24 Diyà te menge musikiru: si Eliashib. Diyà te menge vantey te menge ǥemawan te valey te Megbevayà: si Shalum, Telem, wey si Uri.
EZR 10:25 Diyà te zuma pa he menge Israilihanen: si Ramia, Izia, Malkia, Miamin, Eleazar, Hashabia, wey si Benaya, he ebpuun diyà te pemilya ni Parosh;
EZR 10:26 si Matania, Zacarias, Jehiel, Abdi, Jeremot, wey si Elias, he ebpuun diyà te pemilya ni Elam;
EZR 10:27 si Elioenai, Eliashib, Matania, Jeremot, Zabad, wey si Aziza, he ebpuun diyà te pemilya ni Zatu;
EZR 10:28 si Jehohanan, Hanania, Zabai, wey si Atlai, he ebpuun diyà te pemilya ni Bebai;
EZR 10:29 si Meshulam, Maluc, Adaya, Jashub, Sheal, wey si Jeremot, he ebpuun diyà te pemilya ni Bani;
EZR 10:30 si Adna, Kelal, Benaya, Maasea, Matania, Bezalel, Binui, wey Manase, he ebpuun diyà te pemilya ni Pahat Moab;
EZR 10:31 si Eliezer, Ishia, Malkia, Shemaya, Shimeon, Benjamin, Maluc, wey si Shemaria, he ebpuun diyà te pemilya ni Harim;
EZR 10:33 si Matenai, Matata, Zabad, Elifelet, Jeremai, Manase, wey si Shimei, he ebpuun diyà te pemilya ni Hashum;
EZR 10:34 si Maadai, Amram, Uel, Benaya, Bedea, Keluhi, Bania, Meremot, Eliashib, Matania, Matenai, wey si Jaasu, he ebpuun diyà te pemilya ni Bani;
EZR 10:38 si Shimei, Shelemia, Natan, Adaya, Macnadebai, Shashai, Sharai, Azarel, Shelemia, Shemaria, Shalum, Amaria, wey si Jose, he ebpuun diyà te pemilya ni Binui;
EZR 10:43 si Jiel, Matitia, Zabad, Zebina, Jadai, Joel, wey si Benaya, he ebpuun diyà te pemilya ni Nebo.
EZR 10:44 Heini sikandan is langun, nemengesawa te menge vahi he kenà menge Israilihanen, ne is duma kandan duen dan en menge anak dutun he menge vahi.
NEH 1:1 Iyan heini keguǥuza mehitenged te menge vaal ni Nehemias he anak ni Hacalia. Hein ikesiyam he vulan he iyan kes bulan he Kislev, duen te ike-20 he tuig te kedhadì ni Artaserkses diyà te Persia, diyà a te vinerengbeng he inged he Susa.
NEH 1:2 Midhendiyà te kedì si Hanani is sevaha te menge suled ku; ebpuun sikandin diyà te Juda duma te nepipira he menge maama. Mid-insaan ku sikandan mehitenged te Jerusalem wey te menge Judio he vihag te Babilonia he nemenlikù diyà.
NEH 1:3 Midtavak dan te, “Ebpemenlised is menge nemenlikù diyà te Juda, ne ebpeel-elezan sikandan te menge etew ziyà te peliǥuy zan. Ne taman en guntaan wazè pa mepurungi is berengbeng te Jerusalem wey neepur is menge pultahan din.”
NEH 1:4 Ne hein nezineg ku haazà, mibpinuu a is midsineǥew. Nepipira he andew is kedlalew ku, kebpuasa ku, wey kebpengemuyù ku ziyà te etuvangan te Megbevayà diyà te langit.
NEH 1:5 Ke siak te, “Nengazen he Megbevayà diyà te langit, mekeǥeǥehem ka wey egkein-inuwan he Megbevayà. Edtumanen nu is paaǥi nu te kebpekid-uyun duma is kebmahala nu te menge ebmahal kenikew wey edtuman te menge suǥù nu.
NEH 1:6 Siak is suluǥuen nu, ebpengemuyù a ziyà te kenikew te maandew wey mezukilem para te menge etew ziyà te Israel he menge suluǥuen nu. Pemineǥa a wey tevaka nu is ampù ku. Idtug-an ku kenikew is menge salà te menge Israilihanen, ragkes en is kedì he menge salà wey is menge salà te menge kepuun ku.
NEH 1:7 Mezaat is menge vaal zey ziyà te kenikew. Wazè dey tumana is menge suǥù nu wey menge sulunuzen he imbeǥey nu kenami pinaaǥi ki Moises he suluǥuen nu.
NEH 1:8 “Tentenuzi nu heini is nekaǥi nu ziyà te ki Moises he: ‘Ibpeyapat ku sikiyu ziyà te zuma he menge nasyun emun kenè kew ebpezumazuma kediey.
NEH 1:9 Piru emun edlikù kew zini te kediey ne edtumanen niw is menge suǥù ku, minsan ebpekepeyapat kew pa ziyà te kinemeziyuan he menge lugar, ed-umanan ku sikiyu edtiǥuma ziyà te lugar he mibpilì ku he zutun a ebeǥayi te zengeg.’
NEH 1:10 “Menge suluǥuen key kenikew wey menge etew nu he midlibri nu pinaaǥi te zekelà he ǥehem nu wey zesen nu.
NEH 1:11 Nengazen, pemineǥa nu is ampù ku te suluǥuen nu, wey is ampù te zuma he menge suluǥuen nu he igkelipey zan is kedtehuza kenikew. Pengelinteuwi nu he ituǥut te hadì is edhengyuen ku ziyà te kandin. Ne verakat he purungi e zin.” Dutun he timpu, iyan a edsilbi te vinu ziyà te hadì.
NEH 2:1 Hein nehuna he vulan, he iyan is bulan he Nisan, dutun te ike-20 he tuig te kedhadì ni Artaserkses, midsilbiyan ku te vinu haazà is hadì. Iyan pa haazà timpu he neehè e zin is egkeseeng.
NEH 2:2 Umbe, mid-insaan e zin te, “Maan is egkeseeng ke te wazè nu man daru? Kela ke zuen nu prublima.” Utew a migkulbai zutun,
NEH 2:3 piru midtavak ku haazà is hadì te, “Mebmeluǥuyad is untung nu, Mahal he Hadì! Egkeseeng a su ǥeina te nevengkag is inged he midlevengan te menge kepuun ku ne neepur is menge pultahan din.”
NEH 2:4 Mid-insà haazà is hadì te, “Hengkey is egkesuatan nu?” Dutun mid-ampù a ziyà te Megbevayà diyà te langit,
NEH 2:5 ne hein nekepasad a, midtavak ku haazà is hadì te, “Mahal he Hadì, emun nekepenunuat a kenikew, ne ke egkehimu, egkesuat a he ed-ulì diyà te Juda, su ed-umanan ku ebenguna is inged he Jerusalem he iyan midlevengan te menge kepuun ku.”
NEH 2:6 Ne mid-insà kayi te kediey haazà is hadì, ne sikan is rayna ebpimpinuu ziyà te avey zin, ke sikandin te, “Sengemenu keluǥayad is kegkeuǥet nu ziyà, wey keenu ka ed-ulì dini te Babilonia?” Ne migkaǥi ku kandin ke keenu a edlikù, ne midtuǥutan e zin.
NEH 2:7 Midhangyù a zaan dutun te hadì he ke siak te, “Mahal he Hadì, emun egkehimu, beǥayi a kenikew te menge surat he igkeveǥey ku ziyà te menge gubirnedur ziyà te menge prubinsya he zapit te edsenlepan te wahig he Eufrates, su para ituǥut dan kedì is kebayà diyà te kandan dutun te ked-ulì ku ziyà te Juda.
NEH 2:8 Emun egkehimu beǥayi a zaan te surat he igkeveǥey ku ki Asaf, te ebantey te ketelunan nu, su para veǥayi e zin te menge kayu he egemiten te kebaal te pultahan te melig-en he kutà diyà te avey te valey te Nengazen, wey kebangun te verengbeng te inged, wey para te valey he ed-ubpaan ku.” Intuǥut te hadì haazà is menge hangyù ku su mibpurungan a te Megbevayà.
NEH 2:9 Ne hein migenat ad, mibpezumahan e pa zuen te hadì te menge upisyal te menge sundaru wey menge pereuntud te kudà. Ne hein nekeuma ad diyà te zapit te edsenlepan te Eufrates, ne imbeǥey ku ziyà te menge gubirnedur sikan is surat te hadì.
NEH 2:10 Piru hein netuenan ni Sanbalat he tig-Horon wey ni Tobia he sevaha he upisyal he Amunihanen he nekeuma a is ed-uǥup te menge Israilihanen, nepauk utew sikandan.
NEH 2:11 Hein nekelavey en is tetelu he andew puun te kebpekeuma ku ziyà te Jerusalem,
NEH 2:12 midsuǥuksuǥuk a hein liwazà te kezukileman duma te nepipira he menge zuma ku. Wazè ku keǥiya ziyà te minsan hentei is neǥezam ku he egkesuatan te Megbevayà he veeli ku tenged te Jerusalem. Wazà duma he uyaǥen he neuwit ku, kekenà, iyan dà is asnu he ed-untuzan ku.
NEH 2:13 Migawas a zuen te Pultahan he Ebpekesinaru ziyà te Suǥud-suǥud ne midhendiyà a te Teheb he Dragun, ne ziyè e en te Pultahan te Pehendiyà te Timbaǥà te Besura. Mibpurungan ku susiya is nevengkag he menge verengbeng te Jerusalem wey is neepur he menge pultahan kayi.
NEH 2:14 Ne midlaus a ziyà te Pultahan Pehendiyà te Serebseb, ne midlaus e pa ziyà te pemeziǥuey te hadì, piru kenà ebpekevayà dutun is asnu ku.
NEH 2:15 Umbe, ziyà a mebpevayà te zal-ug te Kidron, ne zutun he kezukileman edtulungan ku en edsusiya is menge verengbeng. Ne hein nepasad ku haazà, midliku a ne ziyè e zed mebayà te Pultahan he Ebpekesinaru ziyà te Suǥud-suǥud.
NEH 2:16 Wazà metueni te menge upisyal te inged ke hendei a ebpuun wey ke hengkey is mibeelan ku. Su wazè pa Judio he migkeǥiyan ku mehitenged te pelanu ku, minsan is menge memumuhat, menge pengulu, menge upisyal, wey zuma pa he ebpengetengdanan diyà te gubirnu.
NEH 2:17 Iyan, dutun he timpu, migkaǥi a ziyà te kandan te, “Neehè niw is mekehizuhizu he kebpekesavuk te inged tew. Nevengkag is Jerusalem wey neepur is menge pultahan din. Ed-umanan tew ebenguna is menge verengbeng te Jerusalem su wey kiw kenè en mepeelimungawi.”
NEH 2:18 Midtudtul ku zaan kandan is menge meupiya he mibeelan te Megbevayà kayi te kedì wey ke hengkey is migkaǥi te hadì kayi te kedì. Midtavak sikandan te, “Sigi, ed-umanan tew ebenguna sikan is menge verengbeng.” Umbe nengandam sikandan te kebpuun kayi te meupiya he vuluhaten.
NEH 2:19 Piru hein netuenan heini ni Sanbalat he tig-Horon, ni Tobia he sevaha he upisyal he Amunihanen, ni Geshem he Arabo, mid-undaunda key zan wey mid-engitan. Ke sikandan te, “Hengkey heeyan is ebeelan niw? Mibpelanu kew ve he ebpekidsukulà te hadì?”
NEH 2:20 Midtavak ku sikandan te, “Ebmelempusen key pinaaǥi te tavang te Megbevayà diyà te langit. Sikami is menge suluǥuen din ebpuunan dey is kebangun te menge verengbeng te Jerusalem. Piru sikiyu, wazè niw lavet wey ketenged kayi te Jerusalem, wey wazè kew meragkes te keguǥuza mehitenged kayi he inged.”
NEH 3:1 Is mibangun te Pultahan te menge Kerehidu iyan si Eliashib he lavew he memumuhat wey is duma zin he menge memumuhat. Ne hein nepasad dan te edtaud is menge lekeb kayi, impehinungud dan heini ziyà te Megbevayà. Mibangun dan daan wey impehinungud dan is menge verengbeng pehendiyà te Turi te Nenggatus wey Turi ni Hananel.
NEH 3:2 Ne is mibangun te sunud he vahin duen te verengbeng iyan is menge tig-Jerico. Ne is mibangun sunud kandan iyan si Zacur he anak ni Imri.
NEH 3:3 Is mibangun te Pultahan te menge Isdà iyan is menge anak ni Hasenaa. Midsevukan dan heini te menge velavag, ne zutun dan itaud is menge lekeb, ne mibeelan dan te menge trangka.
NEH 3:4 Is mibangun te sunud he vahin duen te verengbeng iyan si Meremot he anak ni Uria wey apù ni Hakoz. Ne is sunud kandan iyan si Meshulam he anak ni Berekia wey apù ni Meshezabel. Ne is nekesunud pa iyan si Zadok he anak ni Baana.
NEH 3:5 Ne is nekesunud kandin iyan is menge tig-Tekoa. Piru wazà medtuman is menge pengulu zan te ebpeveelan kandan te ebpemendumala te terebahu.
NEH 3:6 Is mibangun te Zaan he Pultahan iyan si Joyada he anak ni Pasea wey si Meshulam he anak ni Besodea. Midsevukan dan heini te menge velavag, ne zutun dan itaud is menge lekeb, ne mibeelan dan te menge trangka.
NEH 3:7 Is mibangun te sunud pa he vahin duen te verengbeng iyan en si Melatia he tig-Gibeon, si Jadon he tig-Meronot, wey is menge maama he menge tig-Gibeon wey tig-Mizpa. Heini is menge lugar zan, midumala te gubirnedur ziyà te prubinsya he zapit te edsenlepan te Eufrates.
NEH 3:8 Ne is mibangun te sunud pa he vahin te verengbeng iyan si Uziel he platiru, he anak ni Harhaya. Ne is sunud kandin iyan si Hanania he perevaal te pehemut. Mibangun dan haazà he vahin te verengbeng te Jerusalem taman te Meluag he Berengbeng.
NEH 3:9 Is sunud kandan iyan is anak ni Hur he si Refaya, he pengulu te ketengà te distritu te Jerusalem.
NEH 3:10 Is sunud kandin iyan si Jedaya he anak ni Harumaf. Mibangun din is bahin te verengbeng he uvey te valey zin. Is sunud kandin iyan si Hatush he anak ni Hashabnea.
NEH 3:11 Is mibangun te sunud pa he vahin te verengbeng wey Turi he zuen duen menge Hepuyan iyan si Malkia he anak ni Harim wey si Hashub he anak ni Pahat Moab.
NEH 3:12 Is sunud kandan iyan is anak ni Halohesh he si Shalum, he pengulu te ketengà he distritu te Jerusalem. Mid-uǥupan sikandin te menge anak din he menge vahi.
NEH 3:13 Is mibangun te Pultahan he Ebpekesinaru ziyà te Suǥud-suǥud iyan si Hanun wey is menge tig-Zanoa. Intaud dan is menge lekeb kayi, ne mibeelan dan te menge trangka. Mibangun dan daan is 1,500 he ǥiek he verengbeng he taman te Pultahan te Pehendiyà te Timbaǥà te Besura.
NEH 3:14 Is mibangun te Pultahan te Pehendiyà te Timbaǥà te Besura iyan si Recab he anak ni Malkia, he pengulu te distritu te Bet Hakerem. Intaud din is menge lekeb kayi, wey mibeelan te menge trangka.
NEH 3:15 Is mibangun te Pultahan Pehendiyà te Serebseb iyan is anak ni Col Hoze he si Shalum, he pengulu te distritu te Mizpa. Mid-etepan din heini, intaud din is menge lekeb, wey mibeelan din te menge trangka. Mibangun din daan is berengbeng te pemeziǥuey he Siloam, he uvey te pemuleey te hadì, taman te veyeey he mid-iring te heǥezan he impetupang puun te Inged ni David.
NEH 3:16 Is sunud kandin iyan is anak ni Azbuk he si Nehemias, he pengulu te ketengà te distritu te Bet Zur. Mibangun din is berengbeng he ebpekesinaru ziyà te penlevengà ni David taman diyà te pemeziǥuey he mibpeveelan wey ubpeey te menge sundaru.
NEH 3:17 Is mibangun te sunud pa he vahin te verengbeng iyan is menge Levihanen he mibpenguluwan ni Rehum he anak ni Bani. Is sunud kandin iyan si Hashabia he pengulu te ketengà te distritu te Keila.
NEH 3:18 Is sunud kandin iyan is emurè din te meǥinged he mibpenguluwan te anak ni Henadad he si Binui, he pengulu te ketengà te distritu te Keila.
NEH 3:19 Is sunud iyan is anak ni Jeshua he si Ezer he pengulu te Mizpa. Mibangun din is bahin te verengbeng he ebpekesinaru ziyà te teleǥuey te menge ǥumaan taman diyà te suyuk te verengbeng.
NEH 3:20 Is sunud pa ne iyan si Baruc he anak ni Zabai. Mevaghet sikandin he mibangun te vahin te verengbeng puun te suyuk te verengbeng pehendiyà te pultahan diyà te leǥidlizan te valey ni Eliashib te lavew he memumuhat.
NEH 3:21 Is sunud kandin iyan si Meremot he anak ni Uria wey apù ni Hakoz. Mibangun din is bahin te verengbeng puun te pultahan he ziyà te leǥidlizan te valey ni Eliashib taman te kilid kayi he valey.
NEH 3:22 Is sunud he mibangun te vahin te verengbeng iyan is menge memumuhat he ziyà te peliǥuy te Jerusalem.
NEH 3:23 Is sunud kandan iyan si Benjamin wey si Hashub. Mibangun dan is bahin te verengbeng he ebpekesinaru ziyà te valey zan. Is sunud kandan iyan si Azaria he anak ni Maasea wey apù ni Anania. Mibangun din is bahin te verengbeng he ziyà te kilid te valey zin.
NEH 3:24 Is sunud iyan si Binui he anak ni Henadad. Mibangun din is bahin te verengbeng puun te valey ni Azaria taman te suyuk te verengbeng. Ikezuwe en heini he vahin te verengbeng he mibangun dan.
NEH 3:25 Is sunud pa ne iyan si Palal he anak ni Uzai. Mibangun din is bahin te verengbeng puun te suyuk duen te verengbeng wey zuen te turi he ebpekelapew te turuǥan, he uvey te ubpeey te menge vantey. Is sunud kandin iyan si Pedaya he anak ni Parosh,
NEH 3:26 wey is menge suluǥuen diyà te valey te Nengazen he meǥinged diyà te mibuntud-buntud he Ofel. Mibangun dan is bahin te verengbeng he zapit te edsilaan, taman te Pultahan Pehendiyà te Wahig wey zuen te ebpekelapew he turi.
NEH 3:27 Is sunud kandan iyan is menge tig-Tekoa. Mibangun dan is bahin te verengbeng he puun te ebpekelapew te zekelà he turi taman te verengbeng diyà te mibuntud-buntud te Ofel. Ikezuwe en heini he vahin te verengbeng he mibangun dan.
NEH 3:28 Is mibangun te vahin te verengbeng he puun te Pultahan te menge Kudà petekezeg iyan is menge memumuhat. Mibangun te kada sevaha kandan is berengbeng he ziyà ebpekesinaru te valey zin.
NEH 3:29 Is sunud kandan iyan si Zadok he anak ni Imer. Mibangun din is bahin te verengbeng he ziyà ebpekesinaru te valey zin. Is sunud kandin iyan is anak ni Shecania he si Shemaya, he vantey te Pultahan diyà te Edsilaan.
NEH 3:30 Is sunud kandin iyan si Hanania he anak ni Shelemia wey si Hanun he ikeenem he anak ni Zalaf. Ikezuwe en heini he vahin te verengbeng he kandin he mibangun. Is nekesunud kandan iyan si Meshulam he anak ni Berekia. Mibangun din is bahin te verengbeng he ziyà ebpekesinaru te valey zin.
NEH 3:31 Is sunud pa ne iyan si Malkia he sevaha te menge platiru. Mibangun din is bahin te verengbeng taman te ubpeey te menge suluǥuen he ziyà edterebahu te valey te Nengazen wey menge nigusyanti, he zutun ebpekesinaru te Pultahan te Tiǥumà, wey taman te ruǥu he ziyà te zivavew zuen te suyuk te verengbeng.
NEH 3:32 Is mibangun te vahin te verengbeng puun dutun he ruǥu taman te Pultahan te menge Kerehidu iyan is menge platiru wey menge nigusyanti.
NEH 4:1 Hein netudtulan si Sanbalat he mid-uman dey venguna is berengbeng, nepauk sikandin ne mid-undaunda key zin is menge Judio.
NEH 4:2 Diyà te etuvangan te menge zuma zin wey te menge sundaru ziyà te Samaria, migkaǥi sikandin te, “Hengkey is ebeelan kayi te mekehizuhizu he menge Judio? Kunaan dan buwa ke egkeuman dan egkevangun is menge verengbeng te Jerusalem seled dà te senga andew, ne ebpekeuman dan ebpekepemuhat. Kunaan dan buwa ke egkeǥamit dan pa is netutung wey nerupet he menge vatu zuen te verengbeng!”
NEH 4:3 Ne migkaǥi zaan si Tobia he Amunihanen he ziyà te avey ni Sanbalat te, “Minsan laku zà is egampan keniyan he verengbeng ne egketempag en!”
NEH 4:4 Ne zutun mid-ampù a, ke siak te, “He Megbevayè dey, pemineǥa key kenikew su edsusudien key. Deyzey ke ziyà egkehitavù te kandan is menge insultu zan kenami. Berakat he vihaǥa sikandan diyà te zuma he lugar.
NEH 4:5 Kenè nu sikandan peseyluwa su midhimu zan he mepauk ka ziyà te etuvangan dey te ebpemenerebahu te kebangun te verengbeng.”
NEH 4:6 Mibpedayun key he edterebahu taman te nevangun dey en is ketengà te ketikang te verengbeng, su nenigudu medterebahu is menge etew.
NEH 4:7 Piru hein netuenan ni Sanbalat, ni Tobia, wey menge Arabo, menge tig-Amon, menge tig-Ashdod he ebpeniguduwan dey is kebangun te verengbeng te Jerusalem wey nesengseng en is menge vudsi kayi, ne nepauk sikandan.
NEH 4:8 Mibpelanu zan is langun he edsurungen dan is Jerusalem su para megurigew key.
NEH 4:9 Piru nengemuyù key ziyà te Megbevayè dey. Ne maandew wey mezukilem duen ibpevantey zey su para kenè key mekeizi.
NEH 4:10 Dutun he timpu, migkaǥi is menge tig-Juda te, “Neveley key en he edterebahu. Ne zekelè pa is nengerupet he vahin te verengbeng he kinahanglan he edhekuten. Umbe kenè dey heini egkehimu te edhimasad.”
NEH 4:11 Dutun daan he timpu, migkaǥi is menge kuntada zey te, “Edhendiyè kiw te kandan te meeles. Ne ebpenhimetayan tew sikandan su para meengked is kedterebahu zan.”
NEH 4:12 Is menge Judio he meǥinged diyà te uvey zutun te menge kuntada zey, layun key zan edtudtuli mehitenged te pelanu zutun he menge etew te kedsurung kenami.
NEH 4:13 Umbe, zuen menge impevantey ku zuen te kinemevevaan he menge vahin dutun te verengbeng he melemu zà ebpekevayà dutun is edseled. Impevantey ku sikandan dutun he migrupu is kada pemilya, ne neǥumeenan sikandan te ispada, bangkew, wey panà.
NEH 4:14 Ne zutun te kemulu ku pa ed-is-isipa is kebpekesavuk dey, impetawag ku is menge pengulu, menge upisyal, wey menge meǥinged, ne migkeǥiyan ku te, “Kenè kew mahandek te menge kuntada tew. Edtentenuzan tew zà is mekeǥeǥehem wey egkein-inuwan he Nengazen. Ebpekidtebek kiw su para melibri tew is menge kezuzumahi tew, menge anak tew, menge esawa tew, wey menge valey tew.”
NEH 4:15 Piru hein netuenan te menge kuntada zey he netuenan dey is pelanu zan te kedsurung kenami, wey neisip-isip dan he midezeetan te Megbevayà is pelanu zan, midlikù key pudu medterebahu te kebangun te verengbeng.
NEH 4:16 Iyan, puun dutun he andew, liwazè dà te menge etew ku is impeterebahu ku ziyà te verengbeng, su is liwazà impevantey ku he zuen dan pengalang te kumeng, menge vangkew, menge kelasag, wey menge panà. Is menge upisyal ziyà ebpemenhitindeg te egkeiniyuǥan te menge tig-Juda
NEH 4:17 he ebpemenerebahu zuen te verengbeng. Is ebpemenerebahu, egkulang te ǥelemiten te kedterebahu is divaluy he velad dan ne egkulang te gumaan is divaluy,
NEH 4:18 ne edseseluniket pa sikandan te ispada. Ne is ebpezaǥing te vudyung, layun diyà te avey ku.
NEH 4:19 Migkeǥiyan ku is menge pengulu, menge upisyal, wey menge meǥinged te, “Meluag is edterebehuwan tew ne ebpekediziyù kiw.
NEH 4:20 Umbe, emun egkezineg niw is daǥing te vudyung, ne tiǥum kew kayi te kediey. Iyan ebpekidtebek para kenitew is Megbevayè tew.”
NEH 4:21 Umbe, ebpenigudu key en edterebahu puun te meselem taman te egkesakep, ne is ketengà kenami ebantey he neǥumeenan.
NEH 4:22 Dutun he timpu, migkeǥiyan ku zaan is menge zuma zey he ziyà ebpemen-ubpà te ǥawas te Jerusalem he medseled dan dutun te inged duma te menge suluǥuen dan emun mezukilem su wey zan mekevantey, ne kegkemeselem ebpeketerebahu zan en maan.
NEH 4:23 Ne tenged te kenè key ed-engked he ebantey, ne siak wey is menge kezuzumahi ku, menge etew ku, wey is menge vantey, ne wazè key en med-ilis te kumbalè dey. Ne minsan edhendiyè key te wahig, uwiten dey is menge ǥumaan dey.
NEH 5:1 Kayi he timpu, midriklamu is duma he menge maama wey is menge esawa zan diyà te zuma zan he menge Judio.
NEH 5:2 Ke sikandan te, “Merapung is pemilya zey ne egkinahanglan key te egkekaan su para meuyag key.”
NEH 5:3 Duen duma kandan he migkaǥi te, “Insandè dey en ganì is menge bevesukè dey, menge pemuleey zey te paras, wey is menge valey zey su para zuen dey egkekaan ke timpu te vitil.”
NEH 5:4 Ne zuen pa zuma kandan he migkaǥi te, “Kinahanglan he ed-utang key te selapì he para ibayad dey ziyà te hadì te vuhis para te menge bevesukè dey, wey menge pemuleey zey te paras.
NEH 5:5 Ne Judio key man daan iring kandan, wey Judio zaan is menge anak dey, piru sikami mulà kinahanglan he ibpeuripen dey kandan is menge anak dey su wey key mekeselapì. Iyan tutuu is, nengeuripen en is duma he menge anak dey he vahi su ingkevelegyè dey en. Piru wazà duma he egkehimu zey su is menge vevesukè dey wey menge pemuleey zey te paras ne egkaangken en te zuma.”
NEH 5:6 Ne hein nezineg ku haazà is menge riklamu zan, utew a nepauk.
NEH 5:7 Mibpurungan ku is-isipa haazà he kebpekesavuk, ne midsawey ku is menge pengulu wey menge upisyal ne ke siak te, “Edèdaaǥen niw is duma niw he menge meǥinged! Su emun ed-utang sikandan te selapì diyà te keniyu ne ibpetuvù niw.” Ne impeumew ku sikandan su edtiǥum key.
NEH 5:8 Ke siak te, “Edhimuwen tew is taman te egkehimu tew para melekat tew is duma tew he menge Judio he imbelegyè dan is keugelingen dan pinaaǥi te kebpeuripen diyà te menge meǥinged diyà te zuma he lugar. Piru ǥuntaan tenged kayi te vaal niw, nepeǥes en maan sikandan he ebelegyà te keugelingen dan diyà te keniyu mismu. Layun tew ves sikandan edlekata?” Ne zutun mibpereremek dà sikandan su wazè dan egkekaǥi.
NEH 5:9 Ne impelaus ku is lalag ku, “Kenà meupiya is baal niw. Ereg pezem he egkezumahan te kegkahandek te Megbevayà is kebpengungubpaan niw su para kenè kiw sudia te menge etew ziyà te zuma he menge nasyun he menge kuntada tew.
NEH 5:10 Siak mismu wey is menge kezuzumahi ku wey menge etew ku mibpesambey key te selapì wey trigu ziyà te menge zuma tew he edlised. Piru ǥuntaan kenè tew en sikandan ibpevayad te menge utang dan.
NEH 5:11 Guntaan mismu iulì niw is menge vevesukè, menge pemuleey te paras, menge pemuleey te ulibu, wey menge valey te nekeutang diyà te keniyu. Iulì niw is tuvù te mibpesembayan niw he selapì, trigu, binu, wey lana.”
NEH 5:12 Midtavak dan te, “Id-ulì dey is langun diyà te kandan. Kenè dey en sikandan edsukutan. Edtumanen dey heeyan is migkaǥi nu.” Ne zutun impetawag ku is menge memumuhat ne impepenangdù ku ziyà te etuvangan dan is menge pengulu wey menge upisyal he edtumanen dan is insaad dan.
NEH 5:13 Ne zutun mibengkas ku is bagkes te hawak ku ne ke siak te, “Berakat he iring kayi is ebeelan te Megbevayà diyà te valey niw wey menge azen niw emun kenè niw edtumanen is insaad niw. Berakat he iawè din heini is langun diyà te keniyu.” Midtavak is langun he etew zutun te, “Berakat he metuman,” ne midalig dan is Nengazen. Ne midtuman te menge pengulu wey menge upisyal is insaad dan.
NEH 5:14 Seled te 12 he tuig te kebpenirbisyu ku he gubirnedur ziyà te Juda, he puun te ike-20 he tuig pehendiyà te ike-32 he tuig te kedhadì ni Artaserkses, wazà a mekezawat wey is menge kezuzumahi ku te keenen he para te gubirnedur.
NEH 5:15 Piru is menge gubirnedur he nehuna kediey nehimu he peveǥat te menge etew, su kada andew ebuyù dan te egkekaan dan wey egkeinum dan he vinu wey 40 he vuuk he pelata. Minsan is menge upisyal zan mibpehimulus diyà te menge etew. Piru wazè ku mulà haazà beeli, su zuen ku kedtahud te Megbevayà.
NEH 5:16 Kekenà, mibeelan ku is langun para meuman mevangun sikan is berengbeng pinaaǥi te tavang te menge etew ku. Ne wazà a megaked te tanà.
NEH 5:17 Layun ku ganì ibpekaan is 150 he menge Judio he menge upisyal wey elin is menge meǥeliyug ku he ebpemuun diyà te nekeliǥuy he menge nasyun.
NEH 5:18 Kada andew ebpelapà a te sevaha he vaka, heenem he melambù he menge kerehidu, wey ebpeiyew a te mahabet he manuk. Ne kada sepulù he andew ebpeǥawas a te zekelà he vinu he nekedseselekawà he klasi. Minsan pa te iyan heini gelestuwan ku, wazà a mebpelibri te keenen he para te gubirnedur, su netuenan ku he egkeveǥatan is menge etew.
NEH 5:19 Mid-ampù a, ke siak te, “He Megbevayè ku, berakat he edtuvazan a kenikew tenged te langun he mibeelan ku kayi te menge etew.”
NEH 6:1 Hein nezineg ni Sanbalat, ni Tobia, ni Geshem he Arabo, wey te zuma pa he menge kuntada zey he nepasad dey en is kebangun te verengbeng ne wazè en kayi menge vudsi, su iyan dà wazà iketaud is menge lekeb te menge pultahan.
NEH 6:2 Ne mibpeuwit te lalag kayi te kediey si Sanbalat wey si Geshem he ke sikandan te: “Egkesuat key he ebpekidhinguma kenikew ziyà te sevaha te zezeisey he inged diyà te suǥud he Ono.” Piru netuenan ku he zuen mezaat he pelanu zan kayi te kediey.
NEH 6:3 Umbe, midsuǥù ku is menge menunudtulà te kegkaǥi ziyà te kandan te, “Impurtanti is terebahu ku ǥuntaan, umbe kenà a ebpekehendiyan. Kenè ku egkehimu te ed-engked is terebahu ku para zà mekehendiyan a.”
NEH 6:4 Keheepat e zan peuwiti te iyan ded he lalag, ne keheepat ku zaan sikandan tevaka te iyan ded he lalag.
NEH 6:5 Ne ikelima he bisis iyan midsuǥù ni Sanbalat kayi te kedì is suluǥuen din he impeuwit din te surat he neebriyan en, he edhenduen te:
NEH 6:6 “Migkeǥiyan a ni Geshem he minsan kun hendei sikandin ebpevayà egkezineg din is tudtul he sikew wey is duma nu he menge Judio ebpelanu he edribildi, umbe mid-uman niw benguna is berengbeng. Ne sumalà is nezineg din, egkesuat ke kun he egkehimu he hadì te menge Judio,
NEH 6:7 ne mibpilì nu en is menge ebpeneuven he ebpahayag diyà te Jerusalem he iyan ke en hadì diyà te Juda. Ne siguradu egkezineg heini te hadì, umbe hengkayi ka su ebpelelaǥè ki mehitenged kayi.”
NEH 6:8 Ne iyan heini tavak ku kandin: “Kenà tutuu heeyan is egkeǥiyen nu. Mibèbeelan nu zà heeyan.”
NEH 6:9 Netuenan ku he ebpelihendeken key zan su para mekeengked key he edterebahu. Piru mid-ampù a ziyà te Megbevayà he lig-eni e zin pa.
NEH 6:10 Ne sevaha he andew, midhendiyà a te ki Shemaya he anak ni Delaya wey apù ni Mehetabel, su kinahanglan he kenè din egkeewaan is baley zin. Migkaǥi sikandin kayi te kedì te, “Ebpehingumeey ki ziyà te seled te valey te Megbevayà, ne edlekevan ta is menge ǥemawan. Su ebpekeuma kengkuwan te mezukilem is menge kuntada tew ne edhimetayan ke zan.”
NEH 6:11 Piru midtavak a te, “Gubirnedur a; ne kenè ku egkehimu is ked-eles diyà te valey te Nengazen su wey a kenà mebpatey. Kenà a ed-eles!”
NEH 6:12 Nesavut ku he wazà mebpekidlalag is Megbevayà kandin, kekenà, midsuhulan sikandin ni Sanbalat wey ni Tobia he keǥiya zin haazà kayi te kediey.
NEH 6:13 Egkesuatan dan he mahandek a su wey a mekevaal te salà pinaaǥi te kebpezumdumahi ku te migkaǥi ni Shemaya, ne zuen dan egkekaǥi te kebpendezeisaya zan kedì su para kenà a pemineǥa te menge etew.
NEH 6:14 Umbe, mid-ampù a, ke siak te, “He Megbevayè ku, belesi nu si Tobia wey si Sanbalat tenged te mezaat he vaal zan, ragkes en is bahi he ebpeneuven he si Noadia wey is duma pa he menge ebpeneuven he ebpelihandek kediey.”
NEH 6:15 Nepasad sikan is berengbeng hein ike-25 he andew te ikeenem he vulan, he iyan is bulan he Elul. Nepasad heini seled te 52 he andew.
NEH 6:16 Ne hein nezineg te menge kuntada zey ziyà te peliǥuy he menge nasyun he nepasad en is berengbeng, nahandek dan wey nepeel-elezan dan su nesavut dan he nepasad heini he vaal pinaaǥi te tavang te Megbevayà.
NEH 6:17 Dutun he timpu, mibpesuratà si Tobia wey is menge upisyal ziyà te Juda.
NEH 6:18 Mahabet he menge tig-Juda is nenangdù he ebpekid-uunungen ki Tobia su ǥeina te mekaamung sikandin ni Shecania te anak ni Ara. Ne elin daan is, geina te neesawa te anak din he si Jehohanan is anak ni Meshulam he vahi te anak ni Berekia.
NEH 6:19 Heini he menge etew, layun dan dà edtudtula kayi te kedì is meupiya he menge vaal ni Tobia, ne layun dan daan edtudtula ziyà te ki Tobia is menge lalag ku. Ne wazà med-engked si Tobia he ebpelihandek kedì pinaaǥi te menge surat din.
NEH 7:1 Hein nepasad en is berengbeng te inged, wey ingkepenaud en is menge lekeb te menge pultahan kayi, mibpilì is edhimuwen he menge vantey te menge ǥemawan te valey te Nengazen, menge perekanta kayi, wey menge Levihanen.
NEH 7:2 Imbeǥey ku is ketengdanan te kedumala te Jerusalem diyà te suled ku he si Hanani, ne iyan duma zin si Hanania he peremandar te menge vantey te melig-en he kutà. Mibpilì ku si Hanania su egkeseriǥan sikandin wey zekelà is kedtahud din te Megbevayà lavew te kezekelan.
NEH 7:3 Migkeǥiyan ku sikandin te, “Kenè niw pesegdana he ebirtu is menge pultahan te inged ke meudtu, minsan duen ebantey he menge vantey. Kinahanglan he edsirahan heini wey egkendeduwan. Ipevantey niw is menge vantey he meǥinged te Jerusalem. Is duma kandan diyè niw ipevantey te verengbeng te inged he uvey te menge valey zan, ne is duma pa ziyè niw ipevantey te zuma pa he menge vahin duen te verengbeng.”
NEH 7:4 Dutun he timpu, minsan meluag is Jerusalem, deisey zà is menge meǥinged duen wey menge valey.
NEH 7:5 Ne insavuk te Megbevayè ku ziyà te isip ku he tiǥuma ku is menge pengulu, menge upisyal, wey zuma he menge meǥinged su wey sikandan mesinsus sumalà te kada pemilya. Neehè ku is listahan te nevihag he menge pemilya he nehuna he nemen-ulì. Ne iyan heini nekesurat duen:
NEH 7:6 Mahabet he menge Israilihanen diyà te prubinsya he Juda is mibihag ni Hadì Nebucadnezar ne miduma zin diyà te Babilonia. Ne ǥuntaan mid-awe en sikandan diyà te Babilonia su mid-ulì dan diyà te Jerusalem ne is duma ziyà te keugelingen dan he menge inged diyà te Juda.
NEH 7:7 Is nengulu kandan te kedlikù iyan si Zerubabel, si Jeshua, si Nehemias, si Azaria, si Raamia, si Nahamani, si Mordecai, si Bilshan, si Misperet, si Bigvai, si Nehum, wey si Baanah. Iyan heini lista te nevihag he menge Israilihanen piru nemen-ulì en:
NEH 7:8 Menge kevuwazan ni Parosh; 2,172 Shefatia; 372 Ara; 652 Pahat Moab (he ebpuun te pemilya ni Jeshua wey ni Joab); 2,818 Elam; 1,254 Zatu; 845 Zacai; 760 Binui; 648 Bebai; 628 Azgad; 2,322 Adonikam; 667 Bigvai; 2,067 Adin; 655 Ater (he egngezanan daan te Hezekia); 98 Hashum; 328 Bezai; 324 Harif; 112 Gibeon; 95
NEH 7:26 Iyan heini kahabet te menge etew he ziyà med-ubpà is menge kepuun dan te: Betlehem wey Netofa; 188 Anatot; 128 Bet Azmavet; 42 Kiriat Jearim, Kefira, wey Beerot; 743 Rama wey Geba; 621 Micmash; 122 Betel wey Ai; 123 Nebo; 52 Elam; 1,254 Harim; 320 Jerico; 345 Lod, Hadid, wey Ono; 721 Senaa; 3,930
NEH 7:39 Iyan heini kevuwazan te menge memumuhat he nengevihag piru nemen-ulì en: Menge kevuwazan ni Jedaya (he ebpuun te pemilya ni Jeshua); 973 Imer; 1,052 Pashur; 1,247 Harim; 1,017
NEH 7:43 Iyan heini menge kevuwazan te menge Levihanen he nengevihag piru nemen-ulì en daan: Is menge kevuwazan ni Jeshua wey ni Kadmiel (he ebpuun te pemilya ni Hodavia); 74 Is menge perekanta ziyà te valey te Nengazen he menge kevuwazan ni Asaf; 148 Is menge vantey ziyà te menge ǥemawan te valey te Nengazen he menge kevuwazan eni Shalum, Ater, Talmon, Akub, Hatita, wey Shobai; 138
NEH 7:46 Iyan heini menge kevuwazan te menge suluǥuen diyà te valey te Nengazen he nengevihag piru nemen-ulì en: Menge kevuwazan eni Ziha, Hasufa, Tabaot, Keros, Sia, Padon, Lebana, Hagaba, Shalmai, Hanan, Gidel, Gahar, Reaya, Rezin, Nekoda, Gazam, Uza, Pasea, Besai, Meunim, Nefushesim, Bakbuk, Hakufa, Harhur, Bazlut, Mehida, Harsha, Barkos, Sisera, Tema, Nezia, wey Hatifa.
NEH 7:57 Nemen-ulì daan puun te kegkevihaǥa kandan is menge kevuwazan te menge suluǥuen ni Solomon: Is menge kevuwazan ni Sotai, Soferet, Perida, Jaala, Darkon, Gidel, Shefatia, Hatil, Pokeret Hazebaim, wey ni Amon.
NEH 7:60 Is kahabet dan te menge kevuwazan te menge suluǥuen diyà te valey te Nengazen wey is menge kevuwazan te menge suluǥuen ni Solomon, 392.
NEH 7:61 Duen daan 642 he nemen-ulì diyà te Jerusalem he ebpemuun diyà te menge inged he Tel Mela, Tel Harsha, Kerub, Adon wey Imer. Heini sikandan menge kevuwazan ni Delaya, ni Tobia, wey ni Nekoda, piru kenè dan igkepaahà is puriba he menge Israilihanen sikandan.
NEH 7:63 Kenà daan ebpekepaahà te puriba is menge kevuwazan ni Habaya, ni Hakoz, wey ni Barzilai he menge memumuhat sikandan. (Hein nekepengesawa heini si Barzilai, midhimu zin he epilidu zin is ngazan te enuǥang din he si Barzilai he tig-Gilead.)
NEH 7:64 Tenged te netazin is listahan te menge kepuun dan, wazà sikandan dewata he menge memumuhat.
NEH 7:65 Migkeǥiyan sikandan te gubirnedur te Juda he kenà egkehimu ke egkaan dan te menge keenen he impemuhat diyà te Megbevayà emun wazè pa memumuhat he ebpekeinsà diyà te Megbevayà mehitenged te kegkememumuhat dan pinaaǥi te dezuwa he beveraan he Urim wey Thumim he egemiten para metueni is egkesuatan te Megbevayà.
NEH 7:66 Is langun he nemen-ulì puun te kegkevihaǥa kandan, 42,360, kenà ragkes is menge suluǥuen dan he menge maama wey menge vahi he 7,337 wey is menge perekanta he menge maama wey menge vahi he 245. Duen dan uwiten he 736 he menge kudà, 245 he mulà, 435 he kemilyu, wey 6,720 he asnu.
NEH 7:70 Is duma he menge pengulu te menge pemilya mid-amut te para te ked-umana kebenguna te valey te Nengazen. Is gubirnedur mibeǥey te walu he kilu he menge sinsilyu he vulawan, 50 he yehung he ǥelemiten diyà te valey te Nengazen, wey bisti he 530 he lukut he para te menge memumuhat.
NEH 7:71 Is duma he menge pengulu te menge pemilya mibeǥey zaan te para kayi he vuluhaten te 168 he kilu he menge sinsilyu he vulawan wey 1,200 he kilu he pelata.
NEH 7:72 Is langun he imbeǥey te zuma pa he menge etew, 168 he kilu he menge sinsilyu he vulawan, 1,100 he kilu he pelata, wey bisti he 67 he lukut he para te menge memumuhat.
NEH 7:73 Ne nemenlikù sikandan diyà te menge inged he mibpuunan te pemilya zan, ragkes en is menge memumuhat, menge Levihanen, menge vantey te menge ǥemawan te valey te Nengazen, menge perekanta, wey menge suluǥuen diyà te valey te Nengazen.
NEH 8:1 midtiǥum sikandan is langun diyà te Jerusalem, ne nepurung sikandan mesevaha ziyà te pelasa he egkesineruwan te Pultahan Pehendiyà te Wahig. Midhengyuan dan si Ezra he menunudlù te Kesuǥuan he kuwaa zin wey vesaha zin is Libru te Kesuǥuan ni Moises he ibpetuman te Nengazen te menge Israilihanen.
NEH 8:2 Haazà he andew, iyan nehuna he andew te ikepitu he vulan, mid-uwit ni Ezra is Kesuǥuan diyà te etuvangan te menge etew–menge maama, menge vahi, wey menge vatà he zuen dan en hanew. Ne ziyà te pelasa he egkesineruwan te Pultahan Pehendiyà te Wahig, mibpekezaǥing sikandin is ebasa kayi puun te kedsilà te andew taman te meudtu. Ne mibpurungan pemineǥa haazà is Libru te Kesuǥuan te langun he menge etew zutun.
NEH 8:4 Midhitendeg si Ezra ziyà te metikang he intebladu he kayu he mibeelan para zutun he ketiǥuman. Ne ziyà te egkekewanan din midhitindeg si Matitia, si Shema, si Anaya, si Uria, si Hilkia, wey si Maasea. Ne ziyà te egkeǥivang din midhitindeg si Pedaya, si Mishael, si Malkia, si Hashum, si Hashbadana, si Zacarias, wey si Meshulam.
NEH 8:5 Egkaahà si Ezra te langun kandan su metikang is midhitindeǥan. Ne hein mibekar zin sikan is libru, nemenhitindeg is langun he menge etew zutun.
NEH 8:6 Midalig ni Ezra is Nengazen, he mekeǥeǥehem he Megbevayà. Ne midtavak is menge etew te, “Amen! Amen!” dutun te ibayew zan is belad dan. Ne midluhud sikandan is ed-azap te Nengazen.
NEH 8:7 Ne hein midhitindeg en is menge etew, impesavut diyà te kandan is Kesuǥuan. Is mibpesavut kandan iyan is menge Levihanen he ensi Jeshua, Bani, Sherebia, Jamin, Akub, Shabetai, Hodia, Maasea, Kelita, Azaria, Jozabad, Hanan, wey si Pelaya.
NEH 8:8 Mibasa zan is Libru te Kesuǥuan te Megbevayà ne impesavut dan is kehuluǥan kayi, su para mesavut te menge etew.
NEH 8:9 Dutun te ebpemineg is menge etew te menge lalag diyà te Kesuǥuan, nemekesineǥew sikandan. Migkaǥi ziyà te kandan si Nehemias he gubirnedur, si Ezra he memumuhat wey menunudlù te Kesuǥuan, wey is menge Levihanen he mibpesavut kandan te Kesuǥuan te, “Heini he andew segradu para te Nengazen he Megbevayè niw, umbe kenè kew sineǥew.”
NEH 8:10 Migkaǥi pa si Nehemias te, “Silibra kew ne kaan kew te metaam he menge keenen wey inum kew te metaam he inumen. Beǥayi niw is wazè dan egkekaan, su heini he andew segradu para te Nengazen. Ne kenè kew lalew, su is kelipey he ibeǥey te Nengazen ebpekepelig-en keniyu.”
NEH 8:11 Ne migkaǥi pa is menge Levihanen te, “Kenè kew ǥurub! Kenè kew lalew! Su segradu heini he andew.”
NEH 8:12 Umbe, migenat is langun he menge etew zutun su egkaan dan wey ed-inum dan, wey ebpemeǥey zan te keenen diyà te zuma. Midsilibra zan he zuen dan dekelà he kelipey su nesavut dan is lalag te Megbevayà he mibasa ziyà te kandan.
NEH 8:13 Hein ikezuwa he andew zutun he vulan, midtiǥum diyà te ki Ezra is menge pengulu te menge pemilya, is menge memumuhat wey is menge Levihanen, su ed-istudyuwan dan is Kesuǥuan.
NEH 8:14 Nediskubri zan diyà te Kesuǥuan he pinaaǥi ki Moises midsuǥù sikandan te Nengazen is menge Israilihanen he kinahanglan med-ubpè dan diyà te menge lawig dutun te timpu te pista he edhimuwen te ikepitu he vulan.
NEH 8:15 Kinahanglan he ibpeseyuzan dan diyà te Jerusalem wey ziyà te zuma he menge inged dan is suǥù te Nengazen he medhendiyè dan te menge vuvungan te kebpenguwa te menge subpang te menge ulibu, mirtu, palma, wey te zuma pa he merapung he menge kayu su para ebeelan he menge lawig, sumalà is ingkesurat diyà te Kesuǥuan.
NEH 8:16 Umbe, nenguwa is menge etew te menge subpang ne mibeelan dan heini he lawig diyà te patag he atep te menge valey zan, diyà te lama te menge valey zan, diyà te lama te valey te Megbevayà, diyà te pelasa he ziyà te egkesineruwan te Pultahan Pehendiyà te Wahig, wey te Pultahan ni Efraim.
NEH 8:17 Mibaal te lawig he egkeubpaan dan dutun he timpu is langun he nemen-ulì puun te kegkevihaǥa kandan. Utew sikandan melipayen; sikan dan pa meseǥazi haazà he paaǥi te kedsilibra puun te kaazen pa ni Josue he anak ni Nun.
NEH 8:18 Andew-andew ne mibasa ni Ezra kes Libru te Kesuǥuan te Megbevayè diyà te etuvangan te menge etew, puun te nehuna he andew zutun te pista taman en te ketepusan he andew. Midsilibra zan haazà is pista taman te pitu he andew, ne te ikewalu he andew ne midtiǥum dan para te ked-azap te Nengazen, sumalà is diyà te Kesuǥuan.
NEH 9:1 Hein ike-24 he andew zutun he vulan, midtiǥum is menge Israilihanen su ebpuasa zan. Migkukumbalà sikandan te saku wey mibpen-evuwan dan is ulu zan su ibpeehè dan is kedlalew zan.
NEH 9:2 Wazè dan ipetampu is kenà menge Israilihanen. Midhitindeg dan ne intug-an dan is menge salè dan wey is menge salà te menge kepuun dan.
NEH 9:3 Wazà sikandan med-engked he edhitindeg seled te tetelu he uras dutun te kemulu zin pa ebesahan diyà te kandan is Kesuǥuan te Nengazen he Megbevayè dan. Ne seled te tetelu he uras is kedtug-ana zan te menge salè dan wey ked-ezapa zan te Nengazen he Megbevayè dan.
NEH 9:4 Is duma he menge Levihanen nemenhitindeg diyà te heǥezan, is nenigudu medtawag te Nengazen he Megbevayè dan. Iyan sikandan ensi Jeshua, Kadmiel, Bani, Shebania, Buni, Sherebia, Bani, wey si Kenani.
NEH 9:5 Is menge Levihanen he nengumew para te ked-azap iyan ensi Jeshua, Kadmiel, Bani, Hashabnea, Sherebia, Hodia, Shebania, wey si Petahia. Ke sikandan te, “Hitindeg kew ne zeliǥa niw is wazà pidtemanan he Nengazen he Megbevayè niw!” Ne migkaǥi is menge etew te, “He Nengazen, ereg he edeliǥen is kegkemekeǥeǥehem nu! Is kegkemekeǥeǥehem nu lavew pa te egkekaǥi zey.
NEH 9:6 Iyan ke zà Nengazen! Mibeelan nu is langit, tanà, daǥat, wey is langun he netaǥù kayi. Ebeǥayan nu te untung is langun he menge linimbag nu, ne ed-ezapen ka te menge velinsuǥuen diyà te langit.
NEH 9:7 “Iyan ka, Nengazen he Megbevayà mibpilì ki Abram, ne impeǥawas nu sikandin puun te Ur, he sakup te Babilonia. Ne migngezanan nu sikandin te Abraham.
NEH 9:8 Neehè nu he mepezumdumahan sikandin kenikew, ne nenangdù ka ziyà te kandin he ibeǥey nu ziyà te menge kevuwazan din is tanà te menge Canaanhen, Hitihanen, Amorihanen, Pirisihanen, Jebusihanen, wey menge Girgasihanen. Ne midtuman nu is insaad nu ziyà te kandan, su metazeng ka.
NEH 9:9 “Neehè nu is ked-antus te menge kepuun dey ziyà te Ehipto. Nezineg nu is kebuyù dan te tavang diyà te kenikew hein diyè sikandan te Zaǥat he Meriǥà.
NEH 9:10 Mibaal ka te menge singyal wey menge egkein-inuwan he menge vaal he nekesuǥat te hadì te Ehipto, wey te langun he menge upisyal zin wey menge etew zin. Su netuenan nu he midaagdaag dan is menge kepuun dey. Ne taman en guntaan kemulu egkevantug is ngazan nu.
NEH 9:11 Midluwisan nu is nezalandalan he tanà diyà te zizalem te zaǥat diyà te etuvangan te menge etew nu su wey zan duen igkevayà. Iyan, midlened nu mulà is menge kuntada zan he edal-as kandan. Neiring sikandan te vatu he inlegdang diyà te meseleg he wahig.
NEH 9:12 Emun maandew egiyahan nu sikandan pinaaǥi te mekepal he ǥapun he egkeiring te tukud, ne emun mezukilem pinaaǥi te regreg he egkeiring te tukud, su para meteyawi is ibayè dan.
NEH 9:13 “Puun te langit nenaug ka pehendiyà te Buntud he Sinai ne nekidlalag ka kandan. Mibeǥayan nu sikandan te hustu he menge penurù wey meupiya he menge suǥù wey menge sulunuzen.
NEH 9:14 Impenurù nu kandan is mehitenged te ed-ul-ulahan dan emun Andew te Kedhimeley. Ne pinaaǥi te suluǥuen nu he si Moises midsuǥù nu sikandan he tumana zan is menge suǥù, menge sulunuzen, wey menge penurù nu.
NEH 9:15 Hein egkevitil sikandan, mibeǥayan nu sikandan te keenen he ebpuun te langit. Ne hein egkemezahan sikandan, impeinum nu sikandan te wahig he ebpuun diyà te vatu. Migkeǥiyan nu sikandan he selezi zan wey engkena zan is tanà he impenangdù nu he ibeǥey nu kandan.
NEH 9:16 Piru haazà is menge kepuun dey nehimu he mepelevawen, mesinupaken, wey kenà metinumanen te menge suǥù nu.
NEH 9:17 Kenè dan egkesuat he ebpemineg te menge lalag nu, ne midlipatan dan dà is egkengein-inuwan he mibeelan nu ziyà te kandan. Nehimu sikandan he mesinupaken, wey nekidsukulà sikandan kenikew pinaaǥi te kebpilì te pengulu he ebpelikù kandan diyà te kegkeuripen diyà te Ehipto. Piru mepineseyluwen ka he Megbevayà, beliǥeǥawen ka, iipengen ka, kenè ka pepeuken, wey nepenù ka te kebmahal. Umbe wazà nu sikandan iselikwey.
NEH 9:18 Minsan mibaal sikandan te ledawan he vaka, ne ke sikandan te, ‘Iyan heini ed-ezapen he mibpeǥawas kenitew puun te Ehipto.’ Utew subra is kedsumpelita zan kenikew!
NEH 9:19 Piru tenged te zekelà he hizu nu kandan, wazè nu sikandan bey-ani ziyà te sibsivayan. Wazè nu iawà sikan is mekepal he ǥapun he egiya kandan emun maandew, wey sikan is regreg he edtayew te edhipenawan dan emun mezukilem.
NEH 9:20 Imbeǥey nu kandan is meupiya he Mulin-ulin nu he iyan ebpenurù kandan. Wazè ka med-engked he ebpekaan kandan te ‘manna’, ne mibeǥayan nu sikandan te wahig he egkeinum dan ke egkemezahan dan.
NEH 9:21 Mibeǥayan nu sikandan te menge kinahanglan dan seled te 40 he tuig te ziyà sikandan te sibsivayan. Umbe kenà kurang is menge kinehenglanen dan. Wazà mezaan is menge visti zan wey wazà lupangi is menge paa zan te kedtulung dan kedhipanew.
NEH 9:22 “Impezaag nu kandan is menge ginhedian, menge nasyun, wey is menge meǥinged diyà te menge tanà he nekeelingkus kandan. Mid-aǥew zan is tanà he Heshbon he iyan edumala zutun si Hadì Sihon, wey is tanà he Bashan he iyan edumala zuen si Hadì Og.
NEH 9:23 Impeiring nu te menge vituen diyà te langit is menge kevuwazan te menge Israilihanen su impemahabet nu. Ne mid-uwit nu sikandan diyà te tanà he impenaad nu ziyà te menge kepuun dan he edselezan dan wey ed-engkenen dan.
NEH 9:24 Midseled dan iyan dutun ne mid-angken dan. Mibpengelinteuwan nu he mezaag dan is menge Canaanhen he meǥinged dutun he tanà. Imbeǥey nu kandan is menge Canaanhen ragkes en is menge hadì dan su para meveeli te menge etew nu is egkesuatan dan te ebaal ziyà te kandan.
NEH 9:25 Mid-aǥew te menge etew nu is binerengbeng he menge inged wey is selebpeten he menge tanà. Mid-aǥew zan daan is menge valey he nezengkuuran te meupiya he menge azen, menge teheb, menge pemuleey te paras, menge pemuleey te ulibu, wey zuma pa he ebpemeǥas he menge kayu he utew mahabet. Migkaan sikandan ne nahantey zan ne mibmeupiya is lawa zan. Nelipey sikandan tenged te utew nu kebpurungi kandan.
NEH 9:26 “Piru minsan pa te iyan haazà, midsupak dan wey nekidsukulà kenikew. Mid-iniyuǥan dan is Kesuǥuan nu. Mibpenhimetayan dan is menge ebpeneuven nu he ed-umew kandan te kedlikù diyà te kenikew. Utew subra is kedsumpelita zan kenikew!
NEH 9:27 Umbe, imbeǥey nu sikandan diyà te menge kuntada zan he midlisedlised kandan. Piru hein edlislisezen en sikandan mibuyù dan diyà te kenikew te tavang, ne mibpemineg nu ǥihapun sikandin diyà te langit. Ne tenged te zekelà he hizu nu kandan, mibeǥayan nu sikandan te menge pengulu he ebpekepeǥawas kandan puun te ǥehem te menge kuntada zan.
NEH 9:28 “Piru emun ebmeupiyè en is kebpekesavuk dan ne ed-uman dan en maan ebaal te mezaat diyà te etuvangan nu. Ne ebey-anan nu sikandan diyà te ǥehem te menge kuntada zan su para meveyveyai sikandan. Ne emun ebuyù en maan sikandan te tavang diyà te kenikew, ne ebpemineǥen nu sikandan diyà te langit. Ne tenged te hizu nu kandan layun nu sikandan edlibriya.
NEH 9:29 Mibpetizeenan nu sikandan he med-uman dan medtuman te Kesuǥuan nu, piru mibmepelevawen sikandan ne wazè dan tumana is menge suǥù nu. Wazè dan sunuza is menge suǥù nu he iyan ebpekeveǥey te meupiya he untung duen te edtuman kayi. Tenged te kesinupaken dan mid-iniyuǥan ke zan, ne kenè dan egkesuat he ebpemineg kenikew.
NEH 9:30 Tenged te kebmahala nu kandan mahabet en he menge tuig is midlavey te kebpelavey nu, ne mibpetizeenan sikandan te Mulin-ulin nu pinaaǥi te menge ebpeneuven nu. Piru wazà sikandan mebpemineg, umbe imbeǥey nu sikandan diyà te menge etew he nekeelingkus kandan.
NEH 9:31 Piru tenged te zekelà he hizu nu kandan, ne wazè nu sikandan bey-ani etawa wazà nu sikandan purungi zèdeeti, su hihizuwen ka wey veliǥeǥawen he Megbevayà.
NEH 9:32 “Sikew is Megbevayè dey, mekeǥeǥehem ka wey utew egkein-inuwi. Edtumanen nu is paaǥi nu te kebpekid-uyun wey ibpeehè nu is gaǥew nu. Ne ǥuntaan, kenè nu isipa he kenè key kenikew edtevangan kayi te kemereǥenan dey. Nekebmereǥen key is langun he menge etew nu, ragkes is menge hadì dey, is menge pengulu zey, is menge memumuhat dey, is menge ebpeneuven kayi te kenami, wey is menge kepuun dey, nekebmereǥen puun pa te timpu te kedlisliseza kenami te hadì te Asiria ne taman en guntaan.
NEH 9:33 Metazeng is mibeelan nu te kedsilut kenami. Metinumanen ka ziyà te kenami, piru menge mekesesalè key mulà.
NEH 9:34 Is menge hadì dey, menge pengulu zey, menge memumuhat dey, wey is menge kepuun dey, wazà medtuman te Kesuǥuan nu. Wazè dan seǥipaa is menge suǥù nu wey menge petizaan nu.
NEH 9:35 Minsan duen dan keugelingen he ginhedian, wey nekesaǥad sikandan te utew nu kandan kebpurungi, wey minsan mibeǥayan nu sikandan te meluag wey selebpeten he tanà, wazà gihapun sikandan mebpenilbi kenikew wey wazè dan iniyuǥi is mezaat he menge ulaula zan.
NEH 9:36 Iyan heini hinungdan ke maan is menge uripen key ǥuntaan kayi te tanà he imbeǥey nu te menge kepuun dey, ne kayi zan mekekaan te menge abut kayi wey zuma pa he meupiya he menge pruduktu kayi.
NEH 9:37 Ne ǥuntaan, is dekelà he menge abut kayi te tanà, ne iyan ebpekezawat duen is menge hadì he impahadì nu kenami tenged te menge salè dey. Ebeelan dan diyà te kenami wey ziyà te menge uyaǥen dey is egkesuatan dan te ebaal, ne utew key nekebmereǥen.”
NEH 9:38 “Ne tenged dutun, midhimu key is menge Judio te sevaha he melig-en he kebpekid-uyun. Insurat haazà ne mibpirmahan te menge pengulu zey, menge memumuhat dey, wey menge Levihanen.”
NEH 10:1 Is nehuna he mibpirma iyan si Gubirnedur Nehemias he anak ni Hacalia, wey si Zedekia.
NEH 10:2 Is menge memumuhat he mibpirma iyan ensi Seraya, Azaria, Jeremias, Pashur, Amaria, Malkia, Hatush, Shebania, Maluc, Harim, Meremot, Obadias, Daniel, Gineton, Baruc, Meshulam, Abia, Miamin, Maazia, Bilga, wey si Shemaya.
NEH 10:9 Is menge Levihanen he mibpirma iyan ensi Jeshua he anak ni Azania, Binui he ebpuun diyà te pemilya ni Henadad, Kadmiel, Shebania, Hodia, Kelita, Pelaya, Hanan, Mica, Rehob, Hashabia, Zacur, Sherebia, Shebania, Hodia, Bani, wey Beninu.
NEH 10:14 Is menge pengulu he mibpirma iyan en si Parosh, Pahat Moab, Elam, Zatu, Bani, Buni, Azgad, Bebai, Adonia, Bigvai, Adin, Ater, Hezekia, Azur, Hodia, Hashum, Bezai, Harif, Anatot, Nebai, Magpiash, Meshulam, Hezir, Meshezabel, Zadok, Jadua, Palatia, Hanan, Anaya, Hoshea, Hanania, Hashub, Halohesh, Pilha, Shobek, Rehum, Hashabna, Maasea, Ahia, Hanan, Anan, Maluc, Harim, wey si Baanah.
NEH 10:28 Is duma he menge etew ziyà te Israel, ragkes is menge memumuhat, menge Levihanen, menge vantey te menge ǥemawan te valey te Nengazen, menge perekanta, menge suluǥuen diyà te valey te Nengazen, wey is langun he nekidsivayà te kenà menge Israilihanen he meǥinged diyà te Israel su edtuman mulà te Kesuǥuan te Megbevayà, ragkes is menge esawa zan wey is menge anak dan he zuen dan en hanew,
NEH 10:29 nesevaha key te kebpenangdù duma te menge pengulu zey he edtumanen dey is Kesuǥuan he imbeǥey te Megbevayà pinaaǥi te suluǥuen din he si Moises. Nenangdù key zaan he edewaten dey is rawak te Megbevayà emun kenè dey egketuman is insaad dey he ed-ikulen dey is langun he menge suǥù wey menge sulunuzen he imbeǥey te Nengazen he Megbevayè dey.
NEH 10:30 Midsaad key he kenè dey edtuǥutan is menge anak dey te kebpengesawa etawa kebpeesawa te kenà menge Israilihanen he ed-ubpà kayi te Israel.
NEH 10:31 Midsaad key zaan he emun ebelegyà heini is kenà menge Israilihanen te trigu etawa minsan hengkey he klasi te velegyà, dutun te Andew te Kedhimeley etawa zuma he segradu he andew, ne kenè dey ebpemesahan. Kada ikepitu he tuig, ne kenè dey ebpemulaan is tanè dey, wey kenè dey edsukuten is utang te zuma.
NEH 10:32 Midsaad key zaan he edtumanen dey is suǥù he ebeǥey key kada tuig te heepat he gramu he pelata he para te vuluhaten diyà te valey te Megbevayè dey.
NEH 10:33 Ne iyan egkepeveyaan kayi is para te supas he ibpemuhat diyà te etuvangan te Megbevayà, menge pemuhat he edtutungen wey menge pemuhat he para gasa he andew-andew is kebpemuhata zuen, menge pemuhat he para te menge Andew te Kedhimeley, para te Pista te Kebpuun te Hayag, wey zuma pa he menge pista, wey para te zuma pa he menge pemuhat he segradu iring te pemuhat he para idlumpiyu, he velukas te menge Israilihanen tenged te menge salè dan. Egemiten daan haazà he selapì para te zuma pa he menge kinehenglanen diyà te valey te Nengazen he Megbevayè dey.
NEH 10:34 Sikami is menge Israilihanen, ragkes is menge memumuhat dey wey is menge Levihanen, midripa key su para metueni zey ke hentei he menge pemilya is kinahanglan he ed-uwit te idtetavun he para idtavun te tinuig he menge pemuhat diyà te pemuhatà para te Nengazen he Megbevayè dey, sumalà te ingkesurat diyà te Kesuǥuan.
NEH 10:35 Midsaad key zaan he kada tuig ed-uwiten dey ziyà te valey te Nengazen is egkehuna he egkeraǥun dey ziyà te vevesukè dey wey is egkehuna he veǥas te menge pinemula zey.
NEH 10:36 Ne ed-uwiten dey zaan diyà te menge memumuhat he ebpenilbi ziyà te valey te Megbevayè dey is maama he kinekekayan he anak dey, ragkes is kinekekayan te menge vaka zey, menge kerehidu zey, wey menge kambing dey, sumalà te ingkesurat diyà te Kesuǥuan.
NEH 10:37 Midsaad key pa he idata zey ziyà te menge memumuhat, diyà te budiga ziyà te valey te Megbevayè dey, is kineupiyahan he klasi te herina wey zuma he menge halad he para gasa. Ed-uwiten dey zaan is kineupiyahan he menge prutas dey, wey is kineupiyahan he veǥu he vinu, wey lana he ulibu. Ed-uwiten dey zaan diyà te menge Levihanen is ikepulù te menge abut dey, su iyan sikandan ebpengulikta te ikepulù diyà te langun he menge inged he zuen duen menge vevesukà. Emun ebpengulikte en te ikepulù is menge Levihanen,
NEH 10:38 eduma kandan is memumuhat he kevuwazan ni Aaron. Ne is ikesepulù he vahin dutun te egkekulikta zan ed-uwiten dan diyà te budiga ziyà te valey te Megbevayè dey.
NEH 10:39 Is menge Israilihanen, ragkes en is menge Levihanen kinahanglan he ed-uwit te menge halad he trigu, beǥu he vinu wey lana diyà te budiga he zutun idtaǥù is menge gelemiten diyà te valey te Nengazen wey zutun ed-ubpàubpà is menge memumuhat he ebaal te vuluhaten, wey is menge vantey te menge ǥemawan te valey te Nengazen, wey is menge perekanta. Umbe, midsaad key he kenè dey ebey-anan is baley te Megbevayè dey.
NEH 11:1 Dutun he timpu, is menge pengulu te menge etew ziyà te Israel ziyè ed-ubpà te Jerusalem, he iyan kes segradu he inged. Dutun midripa is menge etew he ziyè med-ubpà te gawas te Jerusalem su egkeusatan dan he kada sepulù he pemilya ne zuen senge pemilya he ziyà ebpekeubpà te Jerusalem, ne sikan is egkesamà ne kenè en mulà ed-awà diyà te menge inged dan.
NEH 11:2 Midalig te menge etew is langun he mibuluntaryu he ed-ubpà diyà te Jerusalem.
NEH 11:3 Is duma he menge Israilihanen, ragkes is menge memumuhat, menge Levihanen, menge suluǥuen diyà te valey te Nengazen, wey is menge kevuwazan te menge suluǥuen ni Solomon, mibpedayun dan med-ubpà diyà te keugelingen dan he menge tanà diyà te nekedseselekawà he menge inged diyà te Juda. Is duma he menge etew ziyà te Juda wey Benjamin, diyà med-ubpà te Jerusalem. Iyan heini menge pengulu ziyà te prubinsya he Juda wey Benjamin he ziyà med-ubpà te Jerusalem. Is ebpuun diyà te tribu ni Juda: Si Ataya he anak ni Uzia. (Si Uzia anak ni Zacarias. Si Zacarias anak ni Amaria. Si Amaria anak ni Shefatia. Ne si Shefatia anak ni Mahalalel he ebpuun diyà te kevuwazan ni Perez.)
NEH 11:5 Si Maasea he anak ni Baruc (si Baruc anak ni Col Hose; si Col Hose anak ni Hazaya; si Hazaya anak ni Adaya; si Adaya anak ni Joyarib; ne si Joyarib anak ni Zacarias he ebpuun diyà te kevuwazan ni Shela).
NEH 11:6 (Is menge kevuwazan ni Perez, duen kandan 468 he egkeseriǥan he menge maama he ziyè en med-ubpà te Jerusalem.)
NEH 11:7 Is ebpuun diyà te tribu ni Benjamin: Si Salu he anak ni Meshulam (si Meshulam anak ni Joed; si Joed anak ni Pedaya; si Pedaya anak ni Kolaya; si Kolaya anak ni Maasea; si Maasea anak ni Itiel; ne si Itiel anak ni Jeshaya);
NEH 11:8 is sunud ki Salu iyan si Gabai wey si Salai. Is kezakel te menge Benjaminhen 928 langun.
NEH 11:9 Si Joel he anak ni Zicri iyan lavew he pengulu zan ne is ebpeketinundug kandin iyan si Juda he anak ni Hasenua.
NEH 11:10 Is ebpuun diyà te menge memumuhat: si Jedaya he anak ni Joyarib, si Jakin,
NEH 11:11 wey si Seraya he anak ni Hilkia (si Hilkia anak ni Meshulam; si Meshulam anak ni Zadok; si Zadok anak ni Merayot; ne si Merayot anak ni Ahitub he edumala te valey te Megbevayà);
NEH 11:12 is duma zan he edterebahu ziyà te valey te Nengazen 822 he menge maama; si Adaya he anak ni Jeroham (si Jeroham anak ni Pelalia; si Pelalia anak ni Amzi; si Amzi anak ni Zacarias; si Zacarias anak ni Pashur; ne si Pashur anak ni Malkia);
NEH 11:13 is menge zuma ni Adaya 242 he menge maama he menge pengulu te menge pemilya; si Amashsai he anak ni Azarel (si Azarel anak ni Azai; si Azai anak ni Meshilemot; ne si Meshilemot anak ni Imer);
NEH 11:14 is menge zuma ni Amashsai 128 he egkeseriǥan he menge maama. Is lavew he pengulu zan iyan si Zabdiel he anak ni Hagedolim.
NEH 11:15 Is ebpuun diyà te menge Levihanen: si Shemaya he anak ni Hashub (si Hashub anak ni Azrikam; si Azrikam anak ni Hashabia; ne si Hashabia anak ni Buni);
NEH 11:16 si Shabetai wey si Jozabad, he iyan kes dezuwa he midseriǥan te kedumala te menge vuluhaten te menge Levihanen diyà te ǥawas te valey te Nengazen;
NEH 11:17 si Matania he anak ni Mica (si Mica anak ni Zabdi, ne si Zabdi anak ni Asaf). Si Matania iyan nengegalen te menge perekanta te kegkanta te ampù he para te kebpeselamat; si Bakbukia he zuma ni Matania; si Abda he anak ni Shamua (si Shamua anak ni Galal, ne si Galal anak ni Jedutun).
NEH 11:18 Is kezakel te menge Levihanen he mid-ubpà diyà te Jerusalem, he iyan kes segradu he inged, 248 langun.
NEH 11:19 Is ebpuun diyà te menge vantey te menge ǥemawan te valey te Nengazen: si Akub wey si Talmon, wey is menge zuma zan he ebantey ziyà te menge ǥemawan te valey te Nengazen he 172 he menge maama.
NEH 11:20 Is duma he menge Israilihanen, ragkes is menge memumuhat wey menge Levihanen, diyà med-ubpà te nepengevilin dan he menge tanà he ziyà te nekedseselekawà he menge inged diyà te Juda.
NEH 11:21 Piru is menge suluǥuen diyà te valey te Nengazen he ebpenguluwan ni Ziha wey ni Gishpa, diyè dan med-ubpà te mibuntud-buntud he Ofel.
NEH 11:22 Is lavew he pengulu te menge Levihanen diyà te Jerusalem iyan si Uzi he anak ni Bani. (Si Bani anak ni Hashabia. Si Hashabia anak ni Matania. Ne si Matania anak ni Mica.) Si Uzi sevaha te menge kevuwazan ni Asaf, he iyan menge perekanta ziyà te valey te Megbevayà.
NEH 11:23 Iyan is hadì ebmandù te menge perekanta vahin te vuluhaten dan kada andew.
NEH 11:24 Si Petahia he anak ni Meshezabel, he sevaha te menge kevuwazan ni Zera te anak ni Juda, iyan beǥelawa te menge Israilihanen te ked-etuvang te hadì te Persia.
NEH 11:25 Is duma he menge etew ziyà te Juda, ziyè med-ubpà te menge inged he uvey te menge vevesukà dan. Is duma kandan, diyè med-ubpà te Kiriat Arba, Dibon, Jekabzeel, wey ziyà te zezeisey he menge inged he nekeliǥuy kayi he menge inged.
NEH 11:26 Ne is duma pa, ziyè med-ubpà te Jeshua, Molada, Bet Pelet,
NEH 11:27 Hazar Shual, Beersheba, wey ziyà te menge inged he nekeliǥuy kayi.
NEH 11:28 Duen kandan diyà med-ubpà te Ziklag, Mecona wey ziyà te menge inged he nekeliǥuy kayi he menge inged,
NEH 11:29 te En Rimon, Zora, Jarmut,
NEH 11:30 Zanoa, Adulam, wey ziyà te menge inged he nekeliǥuy kayi he menge inged. Is duma pa kandan diyè med-ubpà te Lakish wey ziyà te uvey he menge vevesukà, wey ziyà te Azeka, wey ziyà te menge inged peliǥuy kayi. Umbe is neperenrenakan te neubpaan te menge etew ziyà te Juda ne puun te Beersheba taman te Suǥud-suǥud te Hinom.
NEH 11:31 Is duma he menge etew ziyà te Benjamin, diyè med-ubpà te Geba, Micmash, Aya, Betel, wey te menge inged he nekeelingkus kayi.
NEH 11:32 Is duma pa kandan diyè med-ubpà te Anatot, Nob, Anania,
NEH 11:33 Hazor, Rama, Gitaim,
NEH 11:34 Hadid, Zeboim, Nebalat,
NEH 11:35 Lod, Ono, wey ziyà te Suǥud-suǥud te menge Meturiǥes.
NEH 11:36 Is duma he menge Levihanen he menge meǥinged diyà te Juda impeubpà duma te menge etew te Benjamin.
NEH 12:1 Iyan heini listahan te menge memumuhat wey menge Levihanen he mid-ulì puun te kegkevihaǥa kandan duma ki Zerubabel he anak ni Shealtiel wey ki Jeshua he lavew he memumuhat. Is menge memumuhat kandan iyan ensi Seraya, Jeremias, Ezra, Amaria, Maluc, Hatush, Shecania, Rehum, Meremot, Iddo, Ginetoi, Abia, Miamin, Moadia, Bilga, Shemaya, Joyarib, Jedaya, Salu, Amok, Hilkia, wey si Jedaya. Iyan sikandan menge pengulu te iring dan he menge memumuhat wey te menge zuma zan hein timpu ni Jeshua.
NEH 12:8 Is menge Levihanen iyan ensi Jeshua, Binui, Kadmiel, Sherebia, Juda, wey si Matania. Si Matania wey is menge zuma zin iyan midseriǥan te kegkanta te menge kentahan he para te kebpeselamat.
NEH 12:9 Ne si Bakbukia, Uni, wey is menge zuma zan iyan midseriǥan te kedtavak dutun he menge kanta.
NEH 12:10 Si Jeshua amey ni Joyakim. Si Joyakim amey ni Eliashib. Si Eliashib amey ni Joyada.
NEH 12:11 Si Joyada amey ni Jonatan. Ne si Jonatan amey ni Jadua.
NEH 12:12 Hein si Joyakim is lavew he memumuhat iyan heini menge pengulu te menge pemilya te menge memumuhat: Si Meraya is pengulu te pemilya ni Seraya. Si Hanania is pengulu te pemilya ni Jeremias.
NEH 12:13 Si Meshulam is pengulu te pemilya ni Ezra. Si Jehohanan is pengulu te pemilya ni Amaria.
NEH 12:14 Si Jonatan is pengulu te pemilya ni Maluc. Si Jose is pengulu te pemilya ni Shebania.
NEH 12:15 Si Adna is pengulu te pemilya ni Harim. Si Helkai is pengulu te pemilya ni Merayot.
NEH 12:16 Si Zacarias is pengulu te pemilya ni Iddo. Si Meshulam is pengulu te pemilya ni Gineton.
NEH 12:17 Si Zicri is pengulu te pemilya ni Abia. Si Piltai is pengulu te pemilya ni Miniamin wey ni Moadia.
NEH 12:18 Si Shamua is pengulu te pemilya ni Bilga. Si Jehonatan is pengulu te pemilya ni Shemaya.
NEH 12:19 Si Matenai is pengulu te pemilya ni Joyarib. Si Uzi is pengulu te pemilya ni Jedaya.
NEH 12:20 Si Kalai is pengulu te pemilya ni Salu. Si Eber is pengulu te pemilya ni Amok.
NEH 12:21 Si Hashabia is pengulu te pemilya ni Hilkia. Si Netanel is pengulu te pemilya ni Jedaya.
NEH 12:22 Hein timpu te kedhadì ni Darius ziyà te Persia, inlista is menge ngazan te menge pengulu te menge pemilya te menge memumuhat wey menge Levihanen, dutun te timpu te lavew he menge memumuhat he ensi Eliashib, Joyada, Johanan, wey si Jadua.
NEH 12:23 Is menge pengulu te menge pemilya te menge Levihanen inlista ziyà te Libru te Keguǥuza taman te timpu ni Johanan te apù ni Eliashib.
NEH 12:24 Iyan heini menge pengulu te menge pemilya te menge Levihanen: Si Hashabia, Sherebia, wey si Jeshua he anak ni Kadmiel, wey zuma pa he menge zuma zan he ebpemenhitindeg diyà te atbang dan emun timpu te kegkanta ziyà te valey te Nengazen te menge kedalig wey kebpeselamat te Megbevayà. Iyan heini sikandan edtavak te kanta te zivaluy he grupu, sumalà te insuǥù ni David he suluǥuen te Megbevayà.
NEH 12:25 Ragkes en kandan si Matania, si Bakbukia, wey si Obadias. Is menge vantey te menge ǥemawan te valey te Nengazen he ebantey te budiga he zurug te ǥemawan iyan si Meshulam, si Talmon, wey si Akub.
NEH 12:26 Nenilbi heini sikandan hein timpu ni Joyakim he anak ni Jeshua wey apù ni Jozadak, wey te timpu ni Nehemias he gubirnedur wey ni Ezra he memumuhat wey menunudlù te Kesuǥuan.
NEH 12:27 Hein timpu te kebpehinunguza te verengbeng te Jerusalem, impetawag is menge Levihanen diyà te ed-ubpaan dan. Impehendiyà sikandan te Jerusalem su wey zan meketampu te melipayen he kedsilibra te kebpehinunguza zuen te verengbeng pinaaǥi te kegkanta te menge kentahan te kebpeselamat wey kedtukar te menge simbal, alpa, wey lira.
NEH 12:28 Impehendiyà daan is menge perekanta he ebpemuun diyà te dezeisey he menge inged he nekeelingkus te Jerusalem wey te menge inged he Netopa.
NEH 12:29 Duen kandan diyà ebpuun te inged diyà te Bet Gilgal, wey ziyà te lugar he ziyà te Geba wey Azmavet. Su is menge perekanta mibangun te keugelingen dan he menge inged diyà te nekeelingkus te Jerusalem.
NEH 12:30 Midhimu te menge memumuhat wey menge Levihanen is tulumanen te kebpenlumpiyu su wey sikandan melumpiyuwi, ne iyan daan haazà mibeelan dan wey melumpiyuwi is menge etew, is menge pultahan te inged wey is berengbeng kayi.
NEH 12:31 Miduma ku is menge pengulu te Juda pehendiyà te zivavew te verengbeng, ne impetiǥum ku is dezuwa he dezekelà he grupu te menge perekanta su wey mepeselemati is Megbevayà pinaaǥi te menge kanta. Is sengegrupu mibmartsa ziyà te zivavew te verengbeng pehendiyà te Pultahan te Timbaǥà te Besura.
NEH 12:32 Midtinundug kandan si Hoshaya wey is ketengà te menge pengulu te Juda,
NEH 12:33 miduma zaan ensi Azaria Ezra, Meshulam,
NEH 12:34 Juda, Benjamin, Shemaya, Jeremias,
NEH 12:35 wey nepipira he menge memumuhat he ebpezaǥing te trumpita. Midtinundug daan si Zacarias he anak ni Jonatan. (Si Jonatan anak ni Shemaya. Si Shemaya anak ni Matania. Si Matania anak ni Micaya. Ne si Micaya anak ni Zacur te kevuwazan ni Asaf.)
NEH 12:36 Midtinundug daan ki Zacarias is menge zuma zin he ensi Shemaya, Azarel, Milalai, Gilalai, Maai, Netanel, Juda wey Hanani. Mid-uwit dan te instrumintu he iring te midtukar zengan ni Hadì David he suluǥuen te Megbevayà. Heini he grupu ebpenguluwan ni Ezra he menunudlù te Kesuǥuan.
NEH 12:37 Hein nekeuma zan diyà te Pultahan Pehendiyà te Serebseb, midtekezeg dan diyà te mid-iring te heǥezan he ibpehendiyà te Inged ni David. Midseǥazan dan is turuǥan ni David taman te nekeuma zan diyà te Pultahan Pehendiyà te Wahig, diyà te zapit te edsilaan he kilid dutun te inged.
NEH 12:38 Is ikezuwa he grupu mibmartsa ziyà te egkeǥivang he vahin duen te zivavew te verengbeng. Midtinundug a kayi he grupu duma te ketengà te menge etew. Mibayè key ziyà te kilid te Turi he zuen Duen menge Hepuyan he ibpehendiyà te Meluag he Berengbeng.
NEH 12:39 Ne puun dutun midlaus key ne mibayè key ziyà te Pultahan ni Efraim, diyà te Zaan he Pultahan, diyà te Pultahan te menge Isdà, diyà te Turi ni Hananel, wey ziyà te Turi te Nenggatus. Ne zutun mibayè key ziyà te Pultahan te menge Kerehidu ne mibpundu key ziyà te Pultahan te Bantey.
NEH 12:40 Is dezuwa he grupu he mibpeselamat te Megbevayà dutun te ebmartsa zan, midiritsu zan diyà te valey te Megbevayà. Midiritsu e zaan wey is ketengà te menge upisyal he zuma ku.
NEH 12:41 Dutun daan is menge memumuhat he ebpezaǥing te trumpita he iyan ensi Eliakim, Maasea, Miniamin, Micaya, Elioenai, Zacarias, wey si Hanania,
NEH 12:42 wey is menge perekanta he ensi Maasea, Shemaya, Eleazar, Uzi, Jehohanan, Malkia, Elam, wey si Ezer. Heini he menge perekanta ebpenguluwan ni Jezrahia.
NEH 12:43 Dutun he andew, nemuhat sikandan te mezakel he menge pemuhat wey midlipeylipey zan, su utew sikandan midlipey te Megbevayà. Ragkes he midlipey is menge vahi wey menge vatà. Umbe is keǥurub te kedlipey zan ne egkezineg pa ziyà te meziyù.
NEH 12:44 Dutun daan he andew, duen menge maama he impezumala te menge budiga he teleǥuey te menge gasa, egkehuna he egkeraǥun, wey ikepulù. Iyan sikandan egkulikta te menge halad he ebpuun diyà te menge vevesukà diyà te nekeelingkus he menge inged ne para haazà te menge memumuhat wey menge Levihanen, sumalà te insuǥù diyà te Kesuǥuan. Su nelipey is menge etew ziyà te Juda te vuluhaten te menge memumuhat wey menge Levihanen.
NEH 12:45 Midhimu zan is tulumanen he kebpenlumpiyu wey zuma pa he menge vuluhaten he ibpetuman kandan te Megbevayè dan. Mibeelan daan te menge perekanta wey menge vantey te menge ǥemawan te valey te Nengazen is kandan he vuluhaten he iyan insuǥù ni Hadì David wey te anak din he si Solomon.
NEH 12:46 Puun pa te timpu ni Hadì David wey ni Asaf, duen en nengulu te menge perekanta te kedalig wey kebpeselamat te Megbevayà.
NEH 12:47 Umbe, hein timpu ni Zerubabel wey ni Nehemias, is langun he menge Israilihanen mibeǥey te menge halad he para te menge perekanta wey te menge vantey te menge ǥemawan te valey te Nengazen, wey ragkes is para te menge Levihanen. Ne is nezawat te menge Levihanen, mibehinan dan dutun is menge memumuhat he menge kevuwazan ni Aaron.
NEH 13:1 Hein mibesahan is menge etew zuen te Libru ni Moises dutun he andew, nevasa he ebenduwan is menge Amunihanen wey menge Moabitanhen te kedtampu ziyà te kedsevaha te menge etew te Megbevayà.
NEH 13:2 Su ǥeina te wazè dan beǥayi te keenen wey inumen is menge Israilihanen hein migawas is menge Israilihanen puun te Ehipto. Kekenà, midsuhulan dan si Baalam su wey zin rewaki is menge Israilihanen. Piru is rawak kandan midhimu te Megbevayà he penuvadtuvad.
NEH 13:3 Ne hein nezineg te menge Israilihanen haazà he kesuǥuan, wazè dan ipetampu kandan is kenà tutuu he menge Israilihanen.
NEH 13:4 Hein wazè pa haazà mehitavù, si Eliashib he memumuhat, he edumala te menge budiga ziyà te valey te Megbevayè dey he kezuzumahi ni Tobia,
NEH 13:5 midtuǥutan din si Tobia te kegamit te zekelà he ruǥu zuen te valey te Nengazen. Heini he ruǥu egkeǥemit he para budiga te menge pemuhat he para gasa, beyewà, menge gelemiten dutun te valey te Nengazen, menge halad te menge memumuhat, menge ikepulù he trigu, binu, wey lana, he sumalà te Kesuǥuan para haazà te menge Levihanen, menge perekanta, wey te menge vantey te menge ǥemawan te valey te Nengazen.
NEH 13:6 Wazà a ziyà te Jerusalem hein nehitavù haazà, su hein ike-32 he tuig te kedhadì ni Artaserkses diyà te Babilonia, midhendiyà a te kandin. Ne te huziyan he timpu midtuǥutan e zin
NEH 13:7 te kedlikù diyà te Jerusalem. Ne hein nekeuma a, netuenan ku is mezaat he mibeelan ni Eliashib he iyan is kebpeubpaa zin ki Tobia ziyà te ruǥu he ziyà te lama zuen te valey te Megbevayà.
NEH 13:8 Ne tenged te utew ku kegkepauk, impenimbag ku is langun he menge gelemiten ni Tobia ziyà te ǥawas duen te ruǥu.
NEH 13:9 Ne impelumpiyuwan ku haazà is ruǥu, ne hein nepasad, impelikù ku zutun sikan is menge gelemiten duen te valey te Nengazen ragkes en is menge halad he para gasa wey veyewà.
NEH 13:10 Netuenan ku he wazà meveǥayi is menge Levihanen te kandan he vahin. Umbe sikandan wey is menge perekanta he midseriǥan te menge vuluhaten diyà te valey te Nengazen nemen-ulì en is nemenerebahu ziyà te tanà.
NEH 13:11 Umbe, mibpemeukan ku is menge upisyal he ke siak te, “Maan is mibey-anan niw is baley te Megbevayà.” Impetawag ku is menge Levihanen wey menge perekanta ne impelikù ku sikandan diyà te menge vuluhaten dan diyà te valey te Nengazen.
NEH 13:12 Ne zutun mid-umanan uwita te langun he menge etew ziyà te Juda ziyà te menge budiga is ikepulù te trigu zan, binu zan, wey lana zan.
NEH 13:13 Is impezumala ku te menge budiga iyan si Shelemia he memumuhat, si Zadok he menunudlù te Kesuǥuan, wey si Pedaya he sevaha he Levihanen. Ne impeuǥup ku kandan si Hanan he anak ni Zacur wey apù ni Matania. Iyan sikandan mibpilì ku su egkeseriǥan sikandan. Insarig ku zaan kandan is kebpemeǥey te menge vahin te iring dan he ebpemenerebahu ziyà te valey te Nengazen.
NEH 13:14 Ne zutun mid-ampù a, ke siak te, “He Megbevayè ku, tentenuzi a wey kenè nu lipati is menge meupiya he mibeelan ku para te valey nu wey te menge vuluhaten kayi.”
NEH 13:15 Dutun he timpu zuen neehè ku he menge tig-Juda he egkeres te paras te Andew te Kedhimeley. Is duma kandan egkergahan dan is menge asnu zan te trigu, binu, paras, higus, wey zuma pa, su ed-uwiten dan diyà te Jerusalem su ibelegyè dan. Umbe mibpetizeenan ku sikandan he kenè dan mebelegyà te menge pruduktu zan emun Andew te Kedhimeley.
NEH 13:16 Duen daan menge tig-Tyre he nemen-ubpà diyà te Jerusalem he mid-uwit te menge isdà wey zuma pa he menge velegyà. Ne imbelegyè dan haazà diyà te menge tig-Juda he ziyà te Jerusalem dutun he Andew te Kedhimeley.
NEH 13:17 Umbe, mid-etuvang ku is menge pengulu ziyà te Juda, ne migkeǥiyan ku te, “Hengkey heini is mezaat ebeelan niw? Wazè niw isipa he segradu is Andew te Kedhimeley!
NEH 13:18 Kenè be iyan heini mibeelan te menge kepuun niw, umbe midsilutan kiw te Megbevayà wey zuen samuk kayi te inged tew? Ne ǥuntaan, ibpeiseg niw is kegkepauk te Megbevayà pinaaǥi te vaal niw, su wazè niw isipa he segradu is Andew te Kedhimeley.”
NEH 13:19 Umbe, insuǥù ku he edsireduwan is pultahan te inged emun mezukilem te Birnis, ne kenà heini ed-ebriyen taman te egketapus is Andew te Kedhimeley. Impeventayan ku te menge etew ku is menge pultahan su para wazà minsan hengkey he velegyà he igkeseled dutun te inged te Andew te Kedhimeley.
NEH 13:20 Usahay ed-ul-ulahan te menge nigusyanti is kedlipezeng diyà te guwà te Jerusalem emun mezukilem te Birnis.
NEH 13:21 Piru mibpetizeenan ku sikandan he ke siak te, “Maan is kayi kew edlipezeng te verengbeng te inged? Emun ed-umanan niw heini ed-ul-ulaha ne edekepen ku sikiyu.” Umbe puun dutun ne wazè en sikandan medlikù dutun te Andew te Kedhimeley.
NEH 13:22 Ne mibmenduan ku is menge Levihanen he mebpekelumpiyu zan, ne ventayi zan is menge pultahan su para isipa te menge etew he segradu he andew is Andew te Kedhimeley. Ne zutun mid-ampù a, ke siak te, “He Megbevayè ku, is-isipa nu heini is mibeelan ku, ne kehizuwi a kenikew sumalà te kezekelà te gaǥew nu.”
NEH 13:23 Dutun daan he andew, netuenan ku he zuen menge tig-Juda he nengesawa te menge vahi he menge tig-Ashdod, tig-Amon, wey menge tig-Moab.
NEH 13:24 Is ketengà te menge anak dan egkaǥi te kineǥiyan te menge tig-Ashdod etawa kineǥiyan te menge etew ziyà te zuma pa he menge lugar, ne kenà sikandan ebpekekaǥi te kineǥiyan diyà te Juda.
NEH 13:25 Umbe, mibpemeukan ku wey midrewakan ku heini he menge tig-Juda. Midlagkut ku is duma kandan wey migingit ku. Impepenangdù ku sikandan pinaaǥi te ngazan te Megbevayà, he sikandan wey is menge anak dan, ne kenè en mebpengesawa etawa mebpeesawa te kenà menge Israilihanen.
NEH 13:26 Ne migkeǥiyan ku sikandan te, “Kenè be iyan heini hinungdan te kebpekesalà ni Hadì Solomon he hadì te Israel? Wazà hadì diyà te minsan hendei he nasyun he iring kandin. Pinelanggà sikandin te Megbevayè din, ne midhimu sikandin te Megbevayà he hadì te tivuuk he Israel. Piru liyu zutun nekevaal sikandin te salà tenged te ked-iniyata kandin te menge esawa zin he kenà menge Israilihanen.
NEH 13:27 Ne kenè dey idtuǥut keniyu is kebaal kayi te mezaat he vaal he paaǥi te kedluib te Megbevayè tew he iyan is kebpengesawa niw te kenà menge Israilihanen.”
NEH 13:28 Si Joyada he anak te lavew he memumuhat he si Eliashib duen din anak he nekeesawa te anak ni Sanbalat he tig-Horon, umbe midsegseg ku sikandin.
NEH 13:29 Ne zutun mid-ampù a, ke siak te, “He Megbevayè ku, kenè nu vey-ani zà sikandan tenged te kebpekehegkapa zan te kegkememumuhat dan wey menge penangdù dan dutun te kegkememumuhat dan wey kegke-Libihanen dan.”
NEH 13:30 Ne mibpeniguduwan ku he kenè en meuwit is menge etew ziyà te Israel te kenà menge Israilihanen. Ne mibeǥayan ku te terebahu is menge memumuhat wey menge Levihanen sumalà te buluhaten te kada sevaha kandan.
NEH 13:31 Midsiguru ku zaan he sikan is menge idtavun he para te kebpemuhat ne kenà melimpasi is ked-uwita zuen, ragkes is menge egkehuna he egkeraǥun. Ne zutun mid-ampù a, ke siak te, “He Megbevayè ku, tentenuzi a kenikew wey tuvazi a.”
EST 1:1 Duen sevaha he hadì te Persia he migngezanan ki Ahasuerus. Diyà sikadin med-ubpà te turuǥan he miberengbeng diyà te inged he Susa. Edhedian din is 127 he prubinsya puun te India taman te Etiopia.
EST 1:3 Ne hein iketelu en he tuig te kedhadì din, midhimu sikandin te zekelà he keemuran para te menge upisyal zin, wey te zuma pa he ebpenilbi kandin. Midtelavuk daan is menge pengulu te sundaru zutun te Persia wey Media, ne elin daan midtelavuk is dungganen he menge etew wey is menge upisyal ziyà te menge prubinsya.
EST 1:4 Heenem he vulan is keluǥayad te midhimu zin he keemuran, ne impaahà ni Ahasuerus is kesesepian din dutun te ginhedian din, wey is dekelà he ventuǥan din wey kegketelehuzen.
EST 1:5 Ne hein neiwas haazà, mid-uman en maan sikandin medhimu te pitu he andew he keemuran he para te langun he meǥinged diyà te vinerengbeng he inged he Susa, ebpuun te pinekedungganen pehendiyà te menge egkengeayuayu. Diyà haazà umani himuwa is keemuran te lama te turuǥan te hadì.
EST 1:6 Ne haazà is lugar ne mideyzeyanan te meputì wey meitem is kaavuavu zin he menge kurtina he midhiketan te hiket he iyan mibeelan is merudtem he linu, ne impikit haazà duen te menge mibpen-iring te sising he pelata zuen te menge tukud he marmul. Ne zuen dutun menge vangkù he vulawan wey pelata, he ziyà ipelastar te saag he meupiya he ed-ahaan he kristal, marmul, perlas wey zuma pa he menge mahalen he menge vatu.
EST 1:7 Mid-inum is menge visita ne migamit is menge inumà he vulawan he nekedseselekawà te zayandayan. Impevayèbayè en sikandan te hadì te menge mahalen he vinu. Midsuǥù is hadì te menge suluǥuen he iyan en ibpevayàbayà is menge visita.
EST 1:9 Dutun te kemulu is keemuran haazà is menge maama he menge visita, midhimu zaan te keemuran si Rayna Bashti para te menge vahi he zutun te turuǥan ni Hadì Ahasuerus.
EST 1:10 Dutun te ikepitu he andew zutun te keemuran, melipayen is hadì te subra he ked-inum. Midsuǥù din is pitu he menge keugelingen din he sineriǥan he si Mehuman, si Bizta, si Harbona, si Bigta, si Abagta, si Zetar, wey si Carkas. Midsuǥù din sikandan
EST 1:11 he zumaha zan diyà te kandin si Rayna Bashti he midsun-uzan is ulu zin te kuruna su wey maahà te menge upisyal zin wey te langun he menge visita zin is kempet din, su si Bashti, utew mekempet he vahi.
EST 1:12 Piru hein midtudtulan te menge suluǥuen si Rayna Bashti mehitenged dutun te suǥù te hadì, ne wazà sikandin mebpezumazuma, umbe utew nepauk haazà is hadì.
EST 1:13 Ne ǥeina te iyan neleyaman he ed-ul-ulahan te hadì dutun he timpu is kebpekisambag diyà te menge uluwanen he sumesambag he nesayud te menge kesuǥuan wey menge vetasan te menge etew ziyà te Persia.
EST 1:14 Ne iyan heini menge ngazan dutun te menge memetau he sumesambag: si Carshena, si Shetar, si Admata, si Tarshish, si Meres, si Marsena, wey si Memucan. Heini sikandan is pitu he lavew he menge upisyal zutun te Media wey Persia. Emiǥu sikandan dutun te hadì wey lavew is ketengdanan dan dutun te ginhedian.
EST 1:15 Ne mid-insà diyà te kandan haazà is hadì te, “Sumalà is diyà te kesuǥuan, hengkey is kinahanglan he ed-ul-ulahan diyà te ki Rayna Bashti tenged te kenè din kebpezumdumahi te suǥù ku he impetudtul ku ziyà te kandin te menge sineriǥan ku?”
EST 1:16 Ne zutun te etuvangan te hadì wey te zuma he lavew he menge upisyal, midtavak si Memucan. Ke sikandin te, “Nekevaal te mezaat si Rayna Bashti, ne is mezaat he mid-ulaula zin, ne kenè ka iyan dà nerumbu zutun is hadì dey, kekenà, elin key nerumbu zutun is langun he lavew he menge upisyal wey langun he menge etew he ebpen-ubpà diyà te langun he prubinsya he neseled te ginhedian nu, telehuzen he Hadì Ahasuerus.
EST 1:17 Haazà is mid-ulaula zin, egkehimu he petug-iringan su emun egketuenan en haazà te langun he menge vahi, ne ebpuunan dan en is kenà kebpezumazuma te esawa zan su egkeisip dan man is, ‘Maan be si Rayna Bashti is midsuǥù te hadì he med-etuvang kandin ne wazà mebpezumazuma.’
EST 1:18 Siguradu he puun guntaan, ne egkezineg te menge vahi kayi te Persia wey Media he esawa te lavew he menge upisyal is mid-ulaula ni Rayna Bashti. Umbe, layun dà egkeula-ula is kenà kedtinehuzà te telteleesawa.
EST 1:19 “Umbe ke meupiya zà te ǥehinawa nu, Mahal he Hadì, beeli nu is suǥù he iyan is: Kenè en maan ebpekeetuvang kenikew si Rayna Bashti te minsan keenu, ne is kegkerayna zin, ibeǥey nu en te zuma he edhuna pa kandin he meupiya. Ne iragkes nu heini he suǥù duen te menge kesuǥuan kayi te ǥinhedian tew he Persia wey Media su para kenà heini mahalin.
EST 1:20 Ne heini he suǥù, emun egketuenan te langun he nesakup kayi te meluag he ginhedian nu, ne is langun he menge vahi, egketahud dan is menge esawa zan, deisey etawa zekelà is pid-etawan din.”
EST 1:21 Ne haazà is hadì, wey sikan is lavew he menge upisyal zin, ingkesuat dan haazà is sambag, umbe mid-ulaula zutun te hadì haazà is insambag kandin ni Memucan.
EST 1:22 Mibpesuratan din is langun he menge etew ziyà te minsan hendei he prubinsya he neseled te ginhedian din, ne iyan migamit is keugelingen dan he menge kineǥiyan. Ne is taǥù dutun te surat iyan is: kada maama iyan mebpengulu wey mebayàbayà te pemilya zin.
EST 2:1 Ne hein malù neuǥet, ne naawà dutun is kegkepauk ni Hadì Ahasuerus, netenuzan din si Bashti wey is mibeelan din. Netenuzan daan ni Hadì Ahasuerus is belaud he midhimu zin kuntra ki Bashti.
EST 2:2 Umbe, migkaǥi sikan is keugelingen din he menge sineriǥan te, “Mahal he Hadì, maan is kenè ka ebpen-ahà te mekempet wey vetan-en he menge raǥa?
EST 2:3 Pilì ka te menge upisyal ziyà te kada prubinsya he sakup te ginhedian nu para ebpekepen-ahà te mekempet he menge raǥa wey ed-uwit kandan diyà te ebpeubpaan te menge vahi kayì te miberengbeng he inged te Susa. Ipaatur nu is menge raǥa ki Hegai he upisyal nu he midseriǥan nu te ked-atur te menge vahi ziyà te turuǥan. Ne iyan en sikandin metau he ebeǥey te menge kinehenglanen dan para mebmekempet dan.
EST 2:4 Ne is egkesuatan nu he raǥa, ne iyan nu iliwan ki Bashti he rayna.” Nesuatan te hadì haazà is migkaǥi ziyà te kandin, umbe mibpezumdumahan din heini.
EST 2:5 Ne zutun te miberengbeng he inged diyà te Susa, ne zuen Judio he kevuwazan ni Benjamin he iyan ngazan din si Mordecai. Anak sikandin ni Jair he anak ni Shimei te anak ni Kish.
EST 2:6 Si Mordecai, sevaha te menge nevihag puun te Jerusalem duma ki Hadì Jehoyakin he hadì te Juda, he mibihag ni Hadì Nebucadnezar he hadì te Babilonia.
EST 2:7 Duen id-aǥew ni Mordecai he utew mezagwey wey mekempet he ed-ahaan is lawa zin. Iyan ngazan din si Hadasa ne egngezanan daan te Ester. Ne hein minatey en is ginikanan ni Ester, mid-elimahan sikandin ni Mordecai ne mid-isip din sikandin he hustu en he anak din.
EST 2:8 Ne hein nesangyew en is suǥù te hadì mehitenged te kedtiǥuma te mekempet he menge raǥa, ne mezakel he menge raǥa is mid-uwit diyà te turuǥan te hadì diyà te vinerengbeng he inged he Susa. Ne is sevaha kandan iyan si Ester. Ne iyan mid-elima kandan si Hegai, kes midseriǥan he ed-elima te menge vahi zutun te turuǥan.
EST 2:9 Ne utew nezeliǥi ni Hegai si Ester, ne utew zin midseǥipà. Segugunè din mid-endami te keenen wey menge kinehenglanen para med-iseg is kekempet din. Mibeǥeyan din sikandin te pitu he menge suluǥuen he vahi he ebpuun diyà te turuǥan te hadì. Ne impeubpà ni Hegai sikandin wey haazà is menge suluǥuen diyà te kinemeupiyahan he ruǥu.
EST 2:10 Ne wazà ipetueni ni Ester he Judio sikandin su imbandu man kandin ni Mordecai haazà.
EST 2:11 Kada andew edhendiyà si Mordecai te lama zutun te turuǥan he ed-ubpaan te menge vahi su wey zin maahà wey ikesusi ke hengkey en is egkeulaula ziyà ni Ester.
EST 2:12 Ne is kada sevaha zutun te menge vahi, wey sikandin ibpehendiyà te ki Hadì Ahasuerus emun egketapus en is 12 he vulan te kedhimuwa te menge paaǥi wey med-iseg is kekempet din; seled te heenem he vulan is kedlenahi zin te lawa zin te mira ne heenem daan he vulan is kedsevuki zin te lawa zin te menge pehemut wey minsan hengkey he kelasi he menge ebpekeuman te kekempet din.
EST 2:13 Ne zutun te kenè pa edhendiyà te hadì is kada sevaha kandan, ebeǥayan sikandan te minsan hengkey he visti wey elahas he egkesuatan dan te edsul-ub dutun te kedhendiyè dan te hadì.
EST 2:14 Is kada sevaha kandan kinahanglan he mezukilem is kedhendiyè din te hadì ne kegkemeselem dutun ibpeulì sikandin, diyà te turuǥan he mibpeubpaan te menge esawa te hadì. Ne zutun sikandin ed-elimahi te sevaha he kapun he sineriǥan he si Shaashgaz. Si Shaashgaz, insarig kandin dutun te hadì is ked-elima te menge esawa zin. Ne haazà is bahi, kenè en ibpelikù dutun te hadì gawas ke nesuatan sikandin dutun te hadì su ibpetawag din man sikandin.
EST 2:15 Hein ikesepulù he vulan, he iyan kes Tebet, dutun te ikepitu he tuig te kedhadì ni Ahasuerus, ne neuma is penahun te kedhendiyà ni Ester te hedì diyà te turuǥan. Midtuman ni Ester is sambag kandin ni Hegai, kes sineriǥan duen te hadì he ed-elima zuen te menge vahi zutun te turuǥan. Is migkaǥi kandin ni Hegai he ibpevivisti kandin te ebpehendiyà te hadì ne iyan din imbivisti, ne utew sikandin nezeliǥi te langun he nekaahà kandin.
EST 2:17 Utew nesuati te hadì si Ester lavew zuen te langun he menge vahi he mid-uwit diyà te kandin. Utew zin nesuati sikandin, mibpurungan din utew sikandin. Migkurunahan din sikandin ne midhimu he rayna ilis ki Bashti.
EST 2:18 Ne midtukud te zekelà he keemuran haazà is hadì su ibpehivantug din si Ester. Mid-imbita zin is langun he menge upisyal zin wey is duma pa he ebpemenilbi kandin. Midhimu zutun te hadì he mahal haazà he andew seled te tivuuk he ginhedian din. Ne mahalen he menge azen is impemeǥey zin diyà te menge etew.
EST 2:19 Ne hein ikezuwa he kedtiǥum te menge raǥa, ne si Mordecai, sevehe en he upisyal ziyà te turuǥan.
EST 2:20 Dutun ne wazè pa ipetueni ni Ester he Judio sikandin, sumalà te imbandu kandin ni Mordecai. Edtumanen gihapun ni Ester is migkaǥi kandin ni Mordecai iring te vaal zin hein kemulu pa sikandin ed-elimahi ni Mordecai.
EST 2:21 Ne zutun te timpu he upisyal en si Mordecai ziyà te turuǥan, utew nepauk is dezuwa he upisyal te hadì he si Bigtana wey si Teresh he iyan bantey te ǥemawan te ruǥu te hadì. Iyan netaǥù diyà te isip dan is edhimetayan dan sikan is hadì.
EST 2:22 Ne netuenan ni Mordecai is netaǥù diyà te isip dutun te zezuwa ne mibpetuenan din ki Rayna Ester. Ne inlitu haazà ipeseyuzi ni Ester zuen te hadì ne migkaǥi zin he si Mordecai is netau zutun.
EST 2:23 Impeimbistiga heini te hadì. Ne hein nesusi zin he tutuu iyan heini, impevitey zin si Bigtana wey si Teresh diyà te kayu. Midsuǥù is hadì he isurat heini he neulaula zuen te libru te keguǥuza te ginhedian.
EST 3:1 Ne liwas te kegkeul-ulaha kayi, impeuswag ni Hadì Ahasuerus is ketengdanan ni Haman he anak ni Hamedata te kevuwazan ni Agag. Midhimu zin sikandin he pinekelavew he upisyal te ginhedian din.
EST 3:2 Insuǥù te hadì he is langun he upisyal, edluhud diyà te ki Haman he iyan kedtehuza kandin. Piru si Mordecai wazà mulà medluhud te kedtahud kandin.
EST 3:3 Ne mid-insà diyà te kandin sikan is duma he menge upisyal, ke si kandan te, “Maan is kenè nu edtumanen is insuǥù te hadì?”
EST 3:4 Midtavak sikandin te sevaha sikandin he Judio. Kada andew ne ed-iniyaten sikandin te menge iring din he menge upisyal piru kenà iyan sikandin ebpezumazuma. Umbe impesayud dan ki Haman haazà su wey zan metueni ke ebey-anan dè be sikandin ni Haman.
EST 3:5 Ne hein netuenan ni Haman he kenà edluhud si Mordecai te kedtahud kandin, utew sikandin nepauk.
EST 3:6 Hein netuenan din pa he sevaha he Judio si Mordecai, mibpelenuwan din he kenè dà si Mordecai is ebpehimetayan din, kekenà, ragkes daan is langun he menge Judio zutun te tivuuk he ginhedian ni Hadì Ahasuerus.
EST 3:7 Duen te nehuna he vulan, he iyan kes bulan he Nisan, te ike-12 he tuig te kedhadì ni Ahasuerus, insuǥù ni Haman he edripahan is kedtendùa te andew wey vulan te kedtumana te menge pelanu zin. (Is migamit dan te keripa ne egngezanan te “pur.”) Ne iyan neripahan is ike-13 he andew te ike-12 he vulan, he iyan kes bulan te Adar.
EST 3:8 Ne migkeǥiyan ni Haman si Hadì Ahasuerus te, “Duen sevaha he kevuwazan he nemekeubpà diyà te minsan hendei zapit kayi te prubinsya te ginhedian nu ne zuen dan keugelingen he velaud he selakew te zuma he menge etew. Wazà sikandan medtuman te menge suǥù nu, ne kenè heini meupiya para kenikew, Mahal he Hadì, ke ebpesegdanen sikandan.
EST 3:9 Emun egkesuat ka, Mahal he hadì, himu ka te velaud he ebpenhimetayan sikandan. Ne ebeǥey a te 350 he tunilada he pelata ziyà te menge edumala te ginhedian nu, su wey zan iketaǥù diyà te teleǥuey te ketiǥeyunan te ginhedian.”
EST 3:10 Ne migkuwa zutun te hadì is sising din he ibpenmarka ne imbeǥey zin heini ki Haman he kuntada te menged Judio, he anak ni Hamedata he kevuwazan ni Agag.
EST 3:11 Ne migkaǥi haazà is hadì te, “Minsan kenè ke en ebeǥey te selapì. Egkehimu he ed-ul-ulahan nu is egkesuatan nu te ed-ulaula ziyà te menge Judio.”
EST 3:12 Umbe hein ike-13 he andew te nehuna he vulan, impetawag ni Haman is menge sikritaryu te hadì. Ne impesurat kandan is ibpeuwit diyà te menge gubirnedur, he menge pengulu wey upisyal ziyà te kada prubinsya te ginhedian din wey te menge kineǥiyan te menge meǥinged dutun. Midhimu zan heini is surat pinaaǥi te ngazan ni Hadì Ahasuerus, ne mibmerkahan duen te sising din.
EST 3:13 Heini he surat ne ibpeuwit diyà te langun he menge prubinsya zutun te ginhedian pinaaǥi te menge menunudtulà. Iyan taǥù kayi he surat is kebmandù he ebpenhimetayan is langun he menge Judio seled te senge andew zà, betan-en etawa meǥurang, ragkes is menge vahi wey menge vatà, ne egkuwaan is langun he menge azen dan. Edhimuwen heini zutun te ike-13 he andew te ike-12 he vulan, he iyan is bulan he Adar.
EST 3:14 Tenged te suǥù te hadì midhipanew is menge menunudtulà ne mibpemeǥayan dan is kada prubinsya te kupya zuen te suǥù, ne impehibelu zan heini ziyà te menge etew su wey zan mepengendami is andew te kegeraa te langun he menge Judio. Impehibelu zaan heini he suǥù diyà te vinerengbeng he inged he Susa. Mibpinuu is hadì wey si Haman su ed-inum dan, ne egkengeinu-inu mulà is menge etew ziyà te Susa ke hengkey is egkehitavù.
EST 4:1 Ne hein netuenan ni Mordecai is planu kuntra kandan, mibindas din is bisti zin he tuus te kegkeseeng din. Ne mibivisti te saku wey mibpen-evuwan din is ulu zin, ne midhendiyà sikandin te inged is midsineǥew.
EST 4:2 Piru zuen dà sikandin metaman te ǥawas duen te pultahan te turuǥan su wazà minsan hentei he edtuǥutan te kedseled dutun te turuǥan he ebivisti te saku.
EST 4:3 Ne ziyà te kada prubinsya he neumahan dutun te suǥù te hadì, utew grabi is kedlalew te menge Judio zutun. Mibpuasa zan, nemenineǥew zan, wey nemenlelendag dan. Ne mahabet kandan is nemengukumbalà te saku wey midtelilid diyà te avu.
EST 4:4 Hein impenudtul ki Ester te menge suluǥuen din he menge vahi wey te menge upisyal he ed-atur kandin is mehitenged ki Mordecai, ne utew mibmesakit is gehinawa zin. Ne mibpeuwitan din si Mordecai te visti su wey zin meilisi sikan is saku he ingkukumbalè din, piru wazè din dewata haazà.
EST 4:5 Ne impetawag ni Ester si Hatac, he sevaha he upisyal te hadì he sineriǥan he impesilbi ki Ester. Ne midsuǥù sikandin ni Ester te kedsusi ki Mordecai ke hengkey is utew zin ingkeseeng wey ke maan is egkehenduen sikandin.
EST 4:6 Umbe, mibeyaan ni Hatac si Mordecai ziyà te pelasa zutun te inged, he atbang duen te pultahan te turuǥan.
EST 4:7 Ne inseysey ni Mordecai ziyà te ki Hatac is langun he hinungdan te utew zin kegkeseeng, ragkes sikan is kezekelà te selapì he impenaad ni Haman he ibeǥey zin diyà te hadì he vayad te kegeraa te menge Judio.
EST 4:8 Ne mibeǥayan daan ni Mordecai si Hatac te kupya zuen te suǥù te hadì he midhimu ziyà te Susa he midhisgut te kebpuawa kandan te menge Judio su wey zin ikeseysey wey ikepaahà diyà te ki Ester. Intelaan din daan diyà te ki Hatac he kinahanglan he mebpekidhinguma si Ester zuen te hadì su wey zin mehengyui he ikehizu zin sikandan is menge Judio.
EST 4:9 Ne midlikù si Hatac diyà te ki Ester ne midtudtul zin is langun he intelaan kandin ni Mordecai.
EST 4:10 Ne impelikù sikandin ni Ester ziyà te ki Mordecai su wey zin metudtuli kayi:
EST 4:11 “Netuenan duen te langun he menge upisyal te hadì wey te langun he menge etew ziyà te minsan hendei he neseled te ginhedian din, maama etawa vahi he ebpekid-etuvang te hadì minsan pa te wazà sikandin pesuǥui, ne sevaha zà is belaud te hadì mehitenged dutun he iyan is: Kinahanglan he edhimetayan haazà he etew. Ne wey zà sikandin kenà edhimetayi ke ibayew zuen te hadì diyà te kandin sikan is tuked din he vulawan. Ne siak, seled en te senge vulan ne wazè e pa ipetawag duen te hadì.”
EST 4:12 Ne hein netudtulan dutun si Mordecai,
EST 4:13 iyan heini tavak din he impetudtul zin diyà te ki Ester: “Kenè nu kun isipa he iyan ke zà ebpekelingkawas te egkehitavù diyà te langun he menge Judio tenged te ziyè ka ed-ubpà te turuǥan te hadì.
EST 4:14 Su minsan ebpeeemew ke en kayi te mereǥen he timpu, zuen selakew en he ed-uǥup wey edlibri te menge Judio, piru sikew wey is pemilya nu egkekeizan mulà. Kela ke iyan ingkehimuwa kenikew he rayna su wey ka meketavang te zuma nu he menge Judio te timpu he iring kayi.”
EST 4:15 Ne impetudtul ni Ester ziyà te ki Mordecai is tavak din. Ke sikandin te,
EST 4:16 “Genat ka, ne tiǥuma nu is langun he menge Judio he kayi te Susa ne puasa kew para kediey. Kenè kew megkaan wey med-inum seled te tetelu he andew wey tetelu he kezukileman. Ebpuasa a zaan wey is menge suluǥuen ku he menge vahi. Ne emun egkepasad, ne edhendiyà a te hadì minsan pa te supak heini te kesuǥuan. Belaǥad ke himetayi a.”
EST 4:17 Ne migenat si Mordecai ne midtuman din haazà is langun he mibpeveelan ni Ester.
EST 5:1 Ne hein iketelu en he andew, imbivisti ni Ester is bisti zin te kegkerayna, ne midhitindeg sikandin dutun te lama te turuǥan he egkesineruwan duen te pinuuwà te hadì. Dutun he timpu ebpimpinuu sikan is hadì diyà te pinuuwè din he edsinaru ziyà te ǥemawan.
EST 5:2 Ne hein naahà duen te hadì si Rayna Ester, ne utew sikandin neǥalew ne imbayew zin diyà te ki Ester sikan is tuked din he vulawan. Ne mid-uvey si Ester ne migewezan din is purù dutun te tuked.
EST 5:3 Ne mid-insà haazà is hadì diyà te ki Ester te, “Hengkey is tuud nu, Rayna Ester? Keǥiya nu su ibeǥey ku kenikew, minsan ketengè pa kayi te ginhedian ku.”
EST 5:4 Ne midtavak si Ester te, “Emun egkesuat ka, Mahal he Hadì, hendiyè kew kan ki Haman, su zuen in-andam ku he idlavung para keniyu.”
EST 5:5 Ne migkeǥiyan dutun te hadì is suluǥuen din te, “Ipeǥaangaan nu ipehengkayi si Haman su wey zey metuman is inhangyù ni Ester.” Umbe midhendiyà sikan is hadì wey si Haman te idlavung he in-andam ni Ester.
EST 5:6 Ne hein ed-inum dan en te vinu, mid-uman en maan med-insà is hadì diyà te ki Ester te, “Hengkey ves iyan is kinahanglan nu? Keǥiya nu su ibeǥey ku kenikew, minsan ketengè pa kayi te ginhedian ku.”
EST 5:7 Midtavak si Ester te, “Iyan edhengyuen ku is:
EST 5:8 Emun tutuu he nekepenunuat a kenikew, wey kelipey nu is kebeǥey te ebuyuen ku, ne ed-umanan ku sikiyu ed-imbitara ki Haman te idlavung he id-andam ku keeselem para keniyu. Ne egkeǥiyen ku human is idhangyù ku kenikew.”
EST 5:9 Ne zutun he andew melipayen si Haman he migawas dutun te turuǥan. Piru hein neehè din si Mordecai ziyà te pultahan te hadì he wazà mebpaahà te kedtahud kandin, ne utew sikandin nepauk.
EST 5:10 Piru midtigker zin is pauk din ne mid-ulì sikandin. Kebpekeuma zin, ne mibpesuǥuan din is menge emiǥu zin wey is esawa zin he si Zeresh.
EST 5:11 Ne mibpehembuǥan din sikandan te kesesepian din, kahabet te menge anak din, wey te langun he kaaǥi te kebpeuswaǥa kandin duen te hadì, ne lavew en is kegkehimuwa kandin he kinelevawan te langun he menge upisyal te hadì.
EST 5:12 Ne migkaǥi pa si Haman te, “Kenà taman dà keniyan, kekenà, iyan e zà mid-imbita ni Rayna Ester he eduma te hadì te kedlavung te in-andam din. Ne mid-umanan e zin en maan imbitara te idlavung keeselem duma te hadì.
EST 5:13 Piru heini is langun ne kenà ebpekelipey kediey emun egkeehè ku pa he ebpimpinuu ziyà te pultahan te turuǥan sikan is Judio he si Mordecai.”
EST 5:14 Ne migkaǥi ziyà te kandin is esawa zin wey is menge emiǥu zin te, “Pevaal ka te vitayà he 75 he giek is ketikang din ne keeselem ke meselem hengyui nu sikan is hadì he isuǥù din he vitayà dutun si Mordecai, su wey ka mebmelipayen he ebpekiduma te hadì te kedlavung.” Ne utew ingkesuat ni Haman haazà, umbe mibpevaal sikandin te vitayà.
EST 6:1 Dutun he kezukileman, kenà ebpekelipezeng si Hadì Ahasuerus, umbe insuǥù din he uwita ziyà te kandin wey vesaha sikan is libru he midsuratan te kaaǥi te kedhadì din wey ginhedian din.
EST 6:2 Ne nevasa zutun te libru is mehitenged te kedsumbung ni Mordecai te planu eni Bigtana wey ni Teresh he kedhimatey ki Hadì Ahasuerus. Heini si Bigtana wey si Teresh menge sineriǥan sikandan te hadì te kebantey zuen te ǥemawan te ruǥu zin.
EST 6:3 Ne mid-insà is hadì te, “Hengkey is imbales ki Mordecai tenged kayi te meupiya he mibeelan din kayi te kedì?” Ne midtavak kes menge upisyal zin te, “Wazà, Mahal he Hadì.”
EST 6:4 Ne zutun he timpu iyan daan kebpekeuma ni Haman diyà te lama te turuǥan, su edhengyuan din kes hadì he ebitayen si Mordecai ziyà te impeveelan din he vitayà para ki Mordecai. Ne mid-insà kes hadì te, “Hentei heeyan is edhithitindeg keniyan te lama?”
EST 6:5 Midtavak sikan is menge suluǥuen te, “Si Haman.” Ne migkaǥi haazà is hadì te, “Ipeseled niw sikandin dini.”
EST 6:6 Ne hein nekeseled en si Haman, mid-insaan sikandin dutun te hadì te, “Hengkey is dait he ebeelan ku ziyà te etew he nekepenunuat kedì te kebeǥayi ku kandin te zengeg?” Kunaan ni Haman ke sikandin is egkeǥiyen duen te hadì,
EST 6:7 umbe midtavak sikandin te, “Iyan meupiya he ebeelan nu ziyà te kandin is:
EST 6:8 Ipevistiyi nu sikandin te visti nu he neǥamit nu en, wey ipeuntud nu sikandin te kudà he neuntuzan nu en, ne haazà is kudà ne zuen tuus nu te hadì diyà te ulu zin.
EST 6:9 Ne iyan ipesun-ud nu kandin dutun te visti is sevaha zuen te lavew he menge upisyal nu, ne haazà sikandin, iyan daan egiya zutun te etew he ebeǥayan nu te zengeg su nekepenunuat kenikew he ed-untud te kudà he ed-elibet dutun te inged. Ne zuen daan ibpepempemensag te, ‘Iyan heini ed-ul-ulahan diyà te etew he ebeǥayan te hadì te zengeg su nekepenunuat kandin.’ ”
EST 6:10 Nekeuyun dutun haazà is hadì ne ke sikandin diyà te ki Haman te, “Iyan ku sikew ibpevaal keniyan te nekaǥi nu, ne gègaani nu veyai sikan is bisti he ibivisti ku wey sikan is kudè ku ne sumalà is nekaǥi nu ne iyan ul-ulaha nu ziyà te Judio he si Mordecai he ebpimpinuu ziyà te pultahan kayi te turuǥan. Ne purungi nu tumana sikan is nekaǥi nu.”
EST 6:11 Umbe migkuwa ni Haman sikan is bisti wey kudà ne midsun-uzan din si Mordecai ne impeuntud din duen te kudà ne in-elibet din diyà te inged duma is layun din kebensag te, “Iyan heini ed-ul-ulahan diyà te etew he ebeǥayan te hadì te zengeg su nekepenunuat kandin.”
EST 6:12 Ne hein nepasad haazà midlikù si Mordecai ziyà te pultahan te turuǥan. Ne si Haman, migaanggaan med-ulì is midtembunan din is ulu zin tenged te utew zin kegkeeled.
EST 6:13 Midtudtul zin diyà te esawa zin he si Zeresh wey zuen te menge emiǥu zin sikan is langun he veǥu pa he nehitavù kandin. Ne migkaǥi ziyà te kandin is menge sumesambag din wey esawa zin te, “Egkenaneynaney ke en egkezaag ni Mordecai. Kenè nu sikandin egkezaag su Judio sikandin. Ne siguradu iyan ka egkezaag.”
EST 6:14 Ne zutun te kemulu pa sikandan ebpelelelaǥà, nekeuma is menge sineriǥan duen te hadì, ne migègaanan dan dumaha si Haman diyà te in-andam ni Ester he idlavung.
EST 7:1 Ne midlavung si Hadì Ahasuerus wey si Haman duma ki Rayna Ester.
EST 7:2 Ne hein ed-inum dan en te vinu zutun te ikezuwa he kedlavung dan, mid-insè en maan sikan is hadì diyà te ki Rayna Ester, ke sikandin te, “Rayna Ester, hengkey is utew nu egkinehenglana? Keǥiya nu su ibeǥey ku kenikew minsan ketengè pa kayi te ginhedian ku.”
EST 7:3 Ne zutun midtavak si Rayna Ester, “Mahal he Hadì, emun nekepenunuat a kenikew, iyan egkesuatan ku wey iyan edhengyuen ku is libriya a kenikew wey is menge emurè ku te inged te kemetayen wey is langun he kezumahan ku. Iyan heini ebuyuen ku kenikew.
EST 7:4 Su zuen suhul he ibeǥey ziyà te minsan hentei he egerà kenami. Emun imbelegyà key zà su wey key mehimu he menge uripen, kenè ku en sikew edsemuken su kenè en haazà ereg he idsamuk kenikew.”
EST 7:5 Ne midtavak si Hadì Ahasuerus kandin te, “Hentei is nekaaku he ebaal keniyan wey hendei sikandin guntaan?”
EST 7:6 Ne midtavak si Ester te, “Iyan en heini is lalung he Haman; iyan sikandin utew zey kuntada.” Ne neheratan utew si Haman dutun te etuvangan te hadì wey rayna.
EST 7:7 Ne zutun midhitindeg haazà is hadì tenged te utew zin kegkepauk. Mid-ewaan din is binu he ed-inumen din ne midhendiyà sikandin te pemuleey ziyà te turuǥan. Piru mibpetaǥak si Haman ne mibpehizuhizu sikandin ki Rayna Ester su netuenan din he siguradu he edsilutan sikandin te hadì.
EST 7:8 Ne hein midlikù kes hadì puun diyà te pemuleey ziyà te turuǥan pehendiyà te lugar he zutun dan med-inum, neehè din si Haman is ed-ul-ulembà duen te midhizeǥaan ni Ester is edhangyù. Ne migkaǥi haazà is hadì te, “Es! Es! Egkesuatan nu pa te edlayug is rayna kayi te turuǥan ku minsan kayi te etuvangan ku?” Hein nekepasad he egkaǥi haazà is hadì, midtembunan te menge suluǥuen is ulu ni Haman.
EST 7:9 Ne migkaǥi si Harbona, is sevaha zuen te menge sineriǥan te hadì te, “Mibpevaal si Haman te vitayà he menge 75 he ǥiek is ketikang din diyà te uvey te valey zin. Mibpeveelan din haazà para ki Mordecai, he iyan kes etew he neketavang kenikew, Mahal he Hadì.” Ne zutun mibmandù kes hadì te, “Bitaya niw zutun si Haman!”
EST 7:10 Umbe imbitey zan si Haman diyà te vitayà he mibpeveelan din he para pezem ki Mordecai. Ne zutun naawà is pauk duen te hadì.
EST 8:1 Dutun daan he timpu, imbeǥey ni Hadì Ahasuerus diyà te ki Rayna Ester is keǥehem te kebayàbayà te langun he azen ni Haman te kuntada te menge Judio. Ne midtudtul ni Ester is kedepitè dan ki Mordecai, umbe mibpesuǥuan dutun te hadì si Mordecai su wey zan meked-etuvang.
EST 8:2 Ne zutun te kebpeetuvengè dan, mibpul-ut duen te hadì sikan is sising he para idtuus he midhawì din diyà te ki Haman, ne imbeǥey zin diyà te ki Mordecai. Ne si Ester, imbeǥey zin diyà te ki Mordecai is keǥehem te kebayàbayà te langun he azen ni Haman.
EST 8:3 Ne mid-uman en maan si Ester medhangyù dutun te hadì te meheǥet he kedhangyù su midlangkeb en sikandin diyà te uvey te paa zutun te hadì is edsineǥew. Midhangyù sikandin he kenè en edleusen is mezaat he pelanu ni Haman he kevuwazan ni Agag, he idezaat din te menge Judio.
EST 8:4 Ne imbayew zutun te hadì diyà te ki Ester sikan is tuked din he vulawan, ne midhitindeg si Ester ziyà te etuvangan din.
EST 8:5 Migkaǥi si Ester te, “Emun tutuu he ebpurungan a kenikew, Mahal he Hadì, wey nekepenunuat a kenikew, wey ke hustu ziyà te kenikew: Pevaal ka te velaud he kenè en edleusen edtumana sikan is suǥù ni Haman he anak ni Hamedata he kevuwazan ni Agag. Heini he suǥù impesurat ni Haman, ne egkaǥi te ebpuawen is langun he menge Judio ziyà te minsan hendei he prubinsya he sakup te ginhedian nu.
EST 8:6 Kenè ku egkaantus he egkeehè ku is kegkeǥerà te menge emurè ku te inged wey menge kezuzumahi ku.”
EST 8:7 Ne migkaǥi si Hadì Ahasuerus ziyà te ki Rayna Ester wey ki Mordecai te, “Impevitey ku en si Haman tenged te mezaat he vaal zin he idezaat din te menge Judio. Imbeǥey ku en diyà te kenikew, Rayna Ester, is keǥehem te kebayàbayà te langun he azen ni Haman.
EST 8:8 Guntaan, surat kew en te sevaha pa he suǥù pinaaǥi te ngazan ku para te menge Judio. Ne isurat niw ke hengkey is meupiya para keniyu, ne merkahi niw heini te sising ku. Su is minsan hengkey he dukumintu, kenà egkehimu he edhelinen emun ingkemarka zuen is ngazan ku wey sising ku.”
EST 8:9 Ne hein ike-23 he andew te iketelu he vulan te tuig he migngezanan te vulan he Sivan, mibpesuǥuan sikan is menge sikritaryu zuen te hadì. Ne insurat dan is suǥù he impesurat kandan ni Mordecai he para te menge Judio, menge gubirnedur, menge pengulu, wey te lavew he menge upisyal zutun te 127 he menge prubinsya su puun dà te nasyun he India ne pehendiyè en te Etiopia. Ne is paaǥi te kedsurata zutun he suǥù, migamit dan is keugelingen he kineǥiyan te menge etew ziyà te kada prubinsya wey is kineǥiyan te menge Judio.
EST 8:10 Impesurat heini ni Mordecai pinaaǥi te ngazan ni Hadì Ahasuerus, wey midtuusan te sising te hadì. Ne impeuwit te menge sinuǥù he nemen-untud diyà te meǥaan he menge kudà te hadì.
EST 8:11 Ne zutun te surat, intuǥut te hadì diyà te menge Judio he ziyà te minsan hendei he inged dutun te ginhedian is ketenged te kedsevaha, su wey zan mepengelangi is keugelingen dan. Intuǥut kandan is kedezaat, kebpenhimatey, wey kebpuew te menge edsurung kandan, minsan hengkey he nasyun is ebpuunan dan wey minsan hengkey he prubinsya, ragkes en is menge vahi wey menge vatà. Ne elin daan intuǥut kandan is kedtavan te menge azen te menge kuntada zan.
EST 8:12 Ne ebeelan heini te menge Judio ziyà te langun he menge prubinsya he sakup te ginhedian ni Hadì Ahasuerus seled dà te senga andew he iyan is ike-13 he andew zutun te ike-12 he vulan he iyan kes migngezanan te vulan he Adar.
EST 8:13 Is menge kupya kayi he surat, ibpeuwit diyà te kada prubinsya zutun te ginhedian he sevaha he velaud te hadì. Ne haazà, impetuenan te langun he menge etew zutun te ginhedian su wey mekepengandam is menge Judio te kebales te menge kuntada zan.
EST 8:14 Tenged te suǥù te hadì, migenat is menge menunudtulà he mid-untud te mezesen he menge kudà te hadì. Impehibelu zaan haazà he suǥù diyà te vinerengbeng he inged he Susa.
EST 8:15 Ne si Mordecai mulà, migawas diyà te turuǥan is mibivisti te visti te hadì he meitem is kaavuavu zin wey meputì, ne zuen din pendivavew he visti he linu he merudtem. Ne kukuruna sikandin te zekelà he kuruna he vulawan. Ne uruhuyan dà te menge meǥinged diyà te Susa tenged te utew zan kegkengelipey tenged duen te suǥù.
EST 8:16 Ne utew heini ingkelipey te menge Judio wey nekeveǥey kandan te zengeg.
EST 8:17 Diyà te kada prubinsya wey kada inged he neumahan dutun te suǥù te hadì, mibmelipayen wey midlipeylipey is menge Judio ne mid-andam dan te pista te kedsilibraha kayi. Ne mahabet he menge etew zutun te ginhedian he kenà menge Judio, iyan, nehimu sikandan he menge Judio su egkahandek dan te menge Judio.
EST 9:1 Ne neume en is ike-13 he andew te ike-12 he vulan he iyan kes bulan he Adar. Iyan en heini andew te kedtumana zuen te suǥù te hadì. Ne zutun he andew kunaan te menge etew he kuntada te menge Judio ke iyan dan ebpekezaag. Iyan, neveriyung su iyan dan nezaag te menge Judio.
EST 9:2 Su zutun he andew, midtiǥum is menge Judio ziyà te kada inged he ed-ubpaan dan he sakup te kada prubinsya zutun te ginhedian ni Hadì Ahasuerus, su wey zan mehimetayi is minsan hentei he edsurung kandan. Ne wazà nekesukul kandan su nengahandek kandan is langun he menge etew.
EST 9:3 Ne is langun he lavew he menge upisyal ziyà te menge prubinsya, wey is menge gubirnedur, menge pengulu wey menge sineriǥan te hadì, midtevangan dan is menge Judio su egkahandek dan man ki Mordecai.
EST 9:4 Su si Mordecai utew en dekelà is gehem din diyà te turuǥan te hadì; nekeeneb en is bentuǥan din diyà te tivuuk he ginhedian. Ne mid-iseg pa is kegkemekeǥeǥehem din.
EST 9:5 Ne mibpenhimetayan te menge Judio is langun he kuntada zan pinaaǥi te ispada. Midhimu zan is minsan hengkey he egkesuatan dan te ed-ulaula ziyà te menge etew he ebpesipala kandan.
EST 9:6 Diyè dà te inged te Susa, 500 is mibpenhimetayan dan.
EST 9:7 Elin daan midhimetayan dan si Parshandata, si Dalfon, si Aspata,
EST 9:8 si Porata, si Adalia, si Aridata,
EST 9:9 si Parmashta, si Arisai, si Aridai wey si Bayzata.
EST 9:10 Ne heini sikandan is sepulù ne pudu menge anak ni Haman te anak ni Hamedata, he kuntada te menge Judio. Iyan, wazà tevana te menge Judio is menge azen te menge kuntada zan.
EST 9:11 Ne zutun daan he andew, midtudtul zuen te hadì is kahabet te midhimetayan te menge Judio ziyà te inged he Susa.
EST 9:12 Ne migkaǥi sikan is hadì diyà te ki Rayna Ester te, “Kayi zà te Susa, 500 is midhimetayan te menge Judio gawas duen te sepulù he menge anak ni Haman he midhimetayan dan. Hengkey vuwa is mid-ulaula zan diyà te zuma he menge prubinsya kayi te ginhedian ku? Ne ǥuntaan, hengkey is edhengyuen nu? Is edhengyuen nu idtuǥut ku kenikew.”
EST 9:13 Ne migkaǥi si Ester te, “Emun meupiya zà te ǥehinawa nu, Mahal he Hadì, ne iyan edhengyuen ku is: Tuǥuti nu is menge Judio kayi te Susa te ked-uman kebpengalang te keugelingen dan keeselem, iring te mibeelan dan guntaan. Ne ipevitey nu ziyà te vitayà sikan is sepulù he menge anak ni Haman he nemematey en.”
EST 9:14 Ne insuǥù dutun te hadì he edtumanen is hangyù ni Ester. Impehibelu te menge meǥinged diyà te Susa haazà is suǥù te hadì. Ne impevitey zan sikan is sepulù he menge anak ni Haman he nemematey en.
EST 9:15 Meselem dutun te ike-14 he andew zutun te vulan he Adar, mid-uman medtiǥum is menge Judio he zutun te Susa, ne nekepatey zan te 300 he menge etew. Iyan, wazè dan tevana is menge azen dutun te menge kuntada zan.
EST 9:16 Hein midlavey is menge andew, midtiǥum is menge Judio he ziyà te nekedseselekawà he vahin te ginhedian su para mepengelangi wey melibri zan is keugelingen dan diyà te menge kuntada zan. 75,000 he menge etew is nepatey zan, piru wazè dan penguwaa is menge azen te menge kuntada zan. Sunud he andew zutun, te ike-14 he andew, midhimeley zan ne mid-andam dan para te pista duma te kedlipeylipey.
EST 9:18 (Ne is menge Judio ziyà te Susa midtiǥum sikandan hein ike-13 he andew pehendiyà te ike-14 he andew, ne nemenhimeley zan dutun te ike-15 he andew. Midhimu zan heini he andew te kedsilibra wey kedlipey.)
EST 9:19 Ne iyan heini hinungdan he nehimu he sulunuzen te menge Judio he ziyà ebpen-ubpà te dezeisek he menge inged is kedsilibra te ike-14 he andew te vulan he Adar. Dutun he andew ne ebpeteltelewizè dan te gasa.
EST 9:20 Insurat ni Mordecai is langun he neulaula, ne mibpeuwitan din te surat is langun he menge Judio, meziyù man etawa uvey, he ziyà te langun he menge prubinsya he nesakup ni Hadì Ahasuerus.
EST 9:21 Kayi he surat, migkeǥiyan ni Mordecai is menge Judio he silibraha zan kada tuig is ike-14 wey is ike-15 he andew te vulan he Adar,
EST 9:22 su iyan heini kes menge andew he zutun nelibri zan puun te gehem te menge kuntada zan. Su iyan kes bulan he zutun neilisan te kelipey is kegkeseeng dan wey neilisan te andew te kedlipeylipey kes andew pezem te kedlalew zan. Ne migkeǥiyan dan en maan ni Mordecai zutun te surat he silibraha zan heini pinaaǥi te pista zuma is kedlipeylipey, wey mebpeteltelewizè dan te gasa, ne veǥayi zan is menge egkengeayuayu.
EST 9:23 Ne midtuman te menge Judio sikan is pahayag ni Mordecai pinaaǥi te surat ne nehimu he sevaha he sulunuzen dan is kada tuig he kedsilibraha zutun.
EST 9:24 Si Haman he anak ni Hamedata he kevuwazan ni Agag he kuntada te langun he menge Judio, mibpelanu te kegerà te menge Judio. Midripa si Haman su wey zin metueni ke keenu zin sikandan egeraa. Is butang he egemiten te kedripa ne egngezanan he “pur.”
EST 9:25 Piru hein netuenan duen te hadì haazà he pelanu pinaaǥi ki Rayna Ester, mibpesurat sikandin te belaud he is mezaat he pelanu ni Haman kuntra te menge Judio ne ziyà edhimuwa te kandin. Ne imbitey si Haman ragkes is menge anak din he menge maama.
EST 9:26 Umbe is kedseuluǥa zan dutun he ne egngezanan te Purim, ebpuun he lalag he “pur.” Ne tenged te surat ni Mordecai wey tenged te neseǥazan dan,
EST 9:27 neuyun is menge Judio he edsilibrahan dan haazà is dezuwa he andew kada tuig, pinaaǥi te paaǥi he nekaǥi ni Mordecai. Ne heini, impesilibra zan daan te menge kevuwazan dan wey te langun he nehimu he Judio.
EST 9:28 Heini is dezuwa he andew te Purim kinahanglan he kenà edlipatan, kekenà, edsilibrahan te kada pemilya te menge Judio te kada lapis te kevuwazan diyà te langun he prubinsya wey inged te ginhedian. Kinahanglan he kenè dan ed-engkezan wey edlipatan minsan te menge kevuwazan dan.
EST 9:29 Para melig-eni sikan is surat mehitenged te Purim, midsurat daan si Rayna Ester, he anak ni Abihail, wey si Mordecai mehitenged kayi he sulunuzen.
EST 9:30 Ne haazà is surat, impeuwit ni Mordecai ziyà te langun he menge Judio ziyà te 127 he prubinsya zutun te ginhedian ni Hadì Ahasuerus, ne zuen dutun penuvadtuvad he meveǥayi te kelinew wey kelig-en is menge Judio,
EST 9:31 ne insuǥù dutun te surat he silibraha zan is andew te Purim te hustu he timpu sumalà te insuǥù ni Mordecai he Judio, he iyan daan insuǥù ni Rayna Ester. Edsunuzen dan heini, iring te kedsaunuza zan wey te menge kevuwazan dan te menge sulunuzen mehitenged te kebpuasa wey kedlalew.
EST 9:32 Haazà is suǥù ni Ester he mibpelig-en te menge sulunuzen mehitenged te Purim, insurat diyà te libru.
EST 10:1 Ne impevayad ni Hadì Ahasuerus te vuhis is langun he meǥinged dutun te ginhedian din, ragkes sikan is diyà ebpen-ubpà te meziyù.
EST 10:2 Ne is langun he nehimu ni Hadì Ahasuerus tenged te kezekelà te ǥehem din, wey is tivuuk he keguǥuza te utew kegkeventuǥa ki Mordecai, ne ingkesurat diyà te Libru he Midsuratan te menge Keguǥuza te menge Hadì te Media wey Persia.
EST 10:3 Ne si Mordecai, ebpeketinundug is kandin he kegkelavew te utew kegkelavew ni Hadì Ahasuerus. Si Mordecai edlingahaan wey edtehuzen te zuma zin he menge Judio, ne edtehuzen dan sikandin su nekeveǥey te keupiyaanan te menge emurè din te inged, wey te zuma zin he menge Judio, wey nekidlalag sikandin te hadì para kandan.
JOB 1:1 Duen etew he ed-ubpà diyà te tanà he Uz he iyan ngazan din si Job. Metazeng wey wazà igkesawey kandin. Edtahud sikandin te Megbevayà wey ebpeninguhà he kenà mekevaal te mezaat.
JOB 1:2 Duen din pitu he anak he menge maama wey tetelu he menge vahi.
JOB 1:3 Duen din 7,000 he menge kerehidu, 3,000 he menge kemilyu, 500 he paris he vaka, wey 500 he menge vehiyan he menge asnu. Ne zuen din daan mahabet he menge suluǥuen. Iyan sikandin pinekesepian te langun he menge etew ziyà te zapit te edsilaan te Israel.
JOB 1:4 Neleyaman duen te menge anak din he menge maama is ebpesemsembayè dan ebpengemuran diyà te menge valey zan ne ibpetelavuk dan sikan is tetelu he etevey zan.
JOB 1:5 Ne kada egkepasad is keemuran, ebpemuhat si Job para melumpiyuwi haazà is menge anak din. Edsayu sikandin ed-enew ne ebpemuhat sikandin te menge pemuhat he edtutungen he para te kada anak din su egkeisip din he kela ke nekesalà is menge anak din, ne kela ke nekekaǥi zan te mezaat mehitenged te Megbevayà. Ne iyan heini layun ebeeli ni Job.
JOB 1:6 Ne sevaha he andew, midtiǥum is menge velinsuǥuen diyà te etuvangan te Nengazen, ne midtampu kandan si Setanas.
JOB 1:7 Migkaǥi is Nengazen diyà te ki Setanas te, “Hendei ka ebpuun?” Ne midtavak ni Setanas is Nengazen te, “Midriǥuriǥu a ziyà te kelibutan.”
JOB 1:8 Migkaǥi is Nengazen diyà te kandin te, “Neseǥipè nu ve is suluǥuen ku he si Job? Wazà iring kandin diyà te kelibutan. Metazeng sikandin wey wazà igkesawey kandin. Midtahud e zin wey ebpeninguhà he kenà mekevaal te mezaat.”
JOB 1:9 Midtavak si Setanas te, “Iyan dà idtehuza zin kenikew su ǥeina te edtuvazan nu sikandin.
JOB 1:10 Idlikey nu te kezeetan sikandin wey is pemilya zin, ragkes en is langun he menge azen din. Edtuvazan nu is langun he ebeelan din, umbe mibmahabet is menge uyaǥen din diyà te tivuuk he tanà.
JOB 1:11 Piru kuwaa nu is langun he ziyà te kandin, ne siguradu edrewakan ke zin.”
JOB 1:12 Migkaǥi is Nengazen diyà te ki Setanas te, “Sigi, kuwaa nu is langun he ziyà te kandin, piru kenè nu sikandin menuwa.” Umbe migenat si Setanas puun te etuvangan te Nengazen.
JOB 1:13 Ne sevaha he andew, nengemuran is menge anak ni Job diyà te valey te kinekekayan he suled dan,
JOB 1:14 ne zuen nekeuma he sevaha he etew ziyà te ki Job he ke sikandin te, “Dutun te id-eradu zey is menge vaka nu, wey ebpemenabtab diyà te egkehunaan dey is menge asnu nu,
JOB 1:15 ne midtik-awan key surunga te menge Sabyanhen. Mibpen-uwit dan is menge uyaǥen nu, ne mibpenhimetayan dan is menge suluǥuen nu. Ne sebsevaha ku zà te nekepelaǥuy para te kedtudtul kenikew.”
JOB 1:16 Ne zutun te kemulu pa egkaǥi haazà is etew, ne nekeume en maan is sevaha pa he etew he ke sikandin te, “Midtibas te kilat is menge kerehidu nu wey is menge ebantey kayi, ne nemematey sikandan. Ne iyan e zà ebpeketudtul kenikew su iyan e zà wazà meragkes.”
JOB 1:17 Ne zutun te kemulu pa egkaǥi haazà is etew, ne nekeume en maan is sevaha pa he etew he ke sikandin te, “Midsurung key te tetelu he grupu te menge Kildiyanhen. Mibpenguwa zan is menge kemilyu nu, ne mibpenhimetayan dan is menge suluǥuen nu, ne iyan e zà nekepelaǥuy te kedtudtul kenikew.”
JOB 1:18 Ne zutun te kemulu pa egkaǥi haazà is etew, ne nekeume en maan is sevaha pa he etew he ke sikandin te, “Dutun te kebpengemuran te menge anak nu ziyà te valey te kinekekayan he suled dan,
JOB 1:19 neketik-ew mekeuma is mevandes he keramag he ebpuun diyà te disirtu, ne nerundus is tivuuk he valey. Nerundusan is menge anak nu he nemematey sikandan. Ne iyan e zà nekepelaǥuy te kedtudtul kenikew.”
JOB 1:20 Ne hein nezineg haazà ni Job, midhitindeg sikandin ne mibindas din is bisti zin tenged te kegkeseeng din. Ne impekiskisan din is ulu zin ne midlangkeb sikandin diyà te tanà te ked-azap te Nengazen.
JOB 1:21 Ke sikandin te, “In-anak a he wazè ku uwiten ne ebpatey a zaan he wazè ku uwiten. Is Nengazen is mibeǥey te langun he naangken ku, ne iyan daan sikandin migkuwa kayi. Ereg he edeliǥen is ngazan te Nengazen!”
JOB 1:22 Minsan pa te iyan haazà nehitavù, wazà mekesalà si Job, su wazè din besula is Megbevayà.
JOB 2:1 Ne sevaha he andew, midtiǥum en maan is menge velinsuǥuen diyà te etuvangan te Nengazen, ne midtampu zaan kandan si Setanas.
JOB 2:2 Migkaǥi is Nengazen diyà te ki Setanas te, “Hendei ka ebpuun?” Midtavak ni Setanas is Nengazen te, “Midriǥuriǥu a ziyà te kelibutan.”
JOB 2:3 Migkaǥi is Nengazen diyà te kandin te, “Neseǥipè nu ve is suluǥuen ku he si Job? Wazà iring kandin diyà te kelibutan. Metazeng sikandin wey wazà igkesawey kandin. Midtahud e zin wey ebpeninguhà he kenà mekevaal te mezaat. Wazà maawà is kegkemepezumdumahan din kedì minsan pa ke impepesipelahan nu sikandin kedì te wazà hinungdan.”
JOB 2:4 Midtavak si Setanas te, “Edewaten te etew is kegkehanew te langun he ziyà te kandin basta meuyag sikandin.
JOB 2:5 Piru emun iyan en sikandin ebpesekitan nu ne siguradu ebpenrewakan ke zin.”
JOB 2:6 Migkaǥi is Nengazen diyà te ki Setanas te, “Sigi, beeli nu is egkesuatan nu te ebaal ziyà te kandin, piru kenè nu sikandin himetayi.”
JOB 2:7 Umbe, migenat si Setanas puun diyà te etuvangan te Nengazen ne mibpesekitan din si Job pinaaǥi te menge levag he nenuvù puun diyà te igiek din taman te ulu zin.
JOB 2:8 Ne migkuwa si Job te keving te ziniyun he neǥevà ne ingkaǥis din haazà duen te menge levag din dutun te ebpinuu sikandin te avu.
JOB 2:9 Migkaǥi is esawa zin te, “Ibpedayun nu ve ǥihapun is kegkemepezumdumahan nu te Megbevayà? Penrewaki nu sikandin wey ka mebpatey en!”
JOB 2:10 Midtavak si Job te, “Wazà pulus keniyan te egkeǥiyen nu. Su kinahanglan he kenà iyan te zà edewaten diyà te Megbevayà is meupiya, kekenà, elin ta edewaten is mezaat.” Minsan pa te iyan haazà nehitavù ki Job piru wazà sikandin mekesalà pinaaǥi te kegkaǥi te mezaat.
JOB 2:11 Duen tetelu he emiǥu ni Job he iyan en si Elifas he tig-Teman, si Bildad he tig Shua, wey si Zofar he tig-Naama. Hein nezineg dan is langun he kelised he nehitavù diyà te ki Job, neuyun dan he edhendiyè dan te kandin su eduyuǥan dan wey edlenganen dan.
JOB 2:12 Ne hein nepantew zan sikandin ne hapit dan kenà egkekilala. Midlelendag sikandan wey mibpemindas dan is bisti zan ne mibukbukan dan te eliyavuk is ulu zan su ibpeehè dan is kegkeseeng dan.
JOB 2:13 Ne mibpinuu zan diyà te tanà duma ki Job seled te pitu he andew wey pitu he kezukileman. Wazè dan mebpekidlalag kandin su neehè dan he utew merasey is nehitavù kandin.
JOB 3:1 Hein neuǥet migkaǥi si Job te mibmehey sikandin ke maan is neetew pa sikandin.
JOB 3:2 Ke sikandin te,
JOB 3:3 “Edrewakan ku is andew te kegkeetew ku.
JOB 3:4 Deyzey pa ke mibmerusirem en haazà he andew ne wazè en silai te andew. Wazè en heini pezem tentenuzi te Megbevayà diyà te langit.
JOB 3:5 Deyzey ke netembunan en haazà te kerusireman etawa mekepal he ǥapun, ne netenges en pezem te kerusireman is kerayag din.
JOB 3:6 Deyzey ke nehimu he merusirem he kezukileman is ked-enaka kedì, ne wazè en haazà pezem mekeragkes diyà te pitsa te kelindar.
JOB 3:7 Deyzey ke wazà ad meetew zutun he kezukileman, wazè en pezem nelipey zutun he timpu.
JOB 3:8 Deyzey ke rewaki haazà he kezukileman te edrawak he metau he ebpukew te dragun he egngezanan te Leviatan.
JOB 3:9 Wazè en pezem medsiǥa is mekevugwas dutun he andew wey wazè en mebmeselem.
JOB 3:10 Edrewakan ku haazà he andew su wazè din eǥena is ked-enaka kedì su wey ku kenè en meseǥazi heini he menge kemeresayan.
JOB 3:11 “Deyzey pa ke minatey e en diyà te ǥetek te iney ku.
JOB 3:12 Maan is nesepipi e pa wey ingkepesusu e pa te iney ku?
JOB 3:13 Emun pezem minatey ad dutun he timpu ne melinawen ad pezem guntaan, he midlipezeng wey midhimeley
JOB 3:14 duma te menge hadì wey menge pengulu te kelibutan he mibangun te menge turuǥan hein kaazen dan pa.
JOB 3:15 Nekehimeley ad pezem duma te ebpemendumala he nepenù te vulawan wey pelata is menge valey zan.
JOB 3:16 Deyzey pezem ke neiring a te menge vatà he nemematey zutun te ked-enaka kandan, ne inleveng he wazè en mekaahà te kerayag.
JOB 3:17 Diyà te lugar te menge minatey, is menge lalung kenè en ebaal te kelelalung, ne is nengeveley nemekehimeley en.
JOB 3:18 Dutun he lugar, is menge vinihag ebpeeyehey en ne kenè dan en egkezineg is kegkulehia kandan te menge etew he ebpeǥes kandan ebpeterebahu.
JOB 3:19 Ne zutun he lugar is langun he klasi te menge etew, bentuǥan etawa kenà. Is menge uripen, kenè en egkeveyveyaan te menge egalen dan.
JOB 3:20 “Maan is edtuǥutan pa he meuyag is etew he egkerasey wey egkeseeng?
JOB 3:21 Egkesuat sikandan he ebpatey, piru wazè dan mebpatey. Ebpen-ahaan dan is kemetayen subra pa te kebpen-ahà te etew te ketiǥeyunan he nekeeles.
JOB 3:22 Wey sikandan ebmelipayen emun ebpatey zan en wey igkeleveng dan en.
JOB 3:23 Maan is edtuǥutan he meuyag is etew he wazè din man hanew ke hengkey is egkepengkusan din? Ketau te Megbevayà he kenà metueni te etew is diyà te huziyan he egkehitavù kandin.
JOB 3:24 Kenà a ebpekekaan tenged te subra he kegkeseeng, kenè en egkeengked is kebpekezag-es ku.
JOB 3:25 Is merasey he egkeulaula he igkahandek ku ne nehitavù en kayi te kedì.
JOB 3:26 Wazè ku kelinew wey keeyehey. Kenà ad ebpekehimeley su layun dà kesamuk is egkehitavù kedì.”
JOB 4:1 Ne midtavak si Elifaz is tig-Teman,
JOB 4:2 “Egkepauk ke ve emun egkaǥi a? Kenà egkehimu ke ebpereremek e zà.
JOB 4:3 Dengan te nehuna he timpu mahabet is menge etew he mibpenurù nu he medsarig dan te Megbevayà. Midasig nu is menge etew he edluyahan.
JOB 4:4 Is menge lalag nu, ebpekelig-en te edluyahan wey egkepiley.
JOB 4:5 Iyan, guntaan te iyan ke en nekaantus te merasey midluyahan ka wey nesemukan.
JOB 4:6 Kenè be ke edtahud ka te Megbevayà wey metazeng ka, duen nu kedsarig wey perateng?
JOB 4:7 “Guntaan, purungi nu is-isipa. Duen be etew he wazà mekesalà etawa metazeng he nezeetan?
JOB 4:8 Sumalà te nepeniizan ku, iyan ebpekesaǥad te mezaat wey kesamuk is menge etew he ebaal te mezaat wey kesamuk.
JOB 4:9 Egkengezeetan sikandan te sengehiyup dà te Megbevayà. Tenged te pauk din, egkepurung sikandan egkezeeti.
JOB 4:10 Minsan iring dan pa te mezesen wey zumezaas he erimaung, edsepuen gihapun te Megbevayà is menge ngipen dan.
JOB 4:11 Egkevitil zan, ne ebpekedsusuwey is menge anak dan.
JOB 4:12 “Duen meeles is kegkeǥiya zuen kayi te kediey. Innaasnaas haazà kayi te kedì.
JOB 4:13 Nehitavù heini kayi te kediey pinaaǥi te teǥeinep dutun te sevaha he mezukilem he ebpemenlipezeng wey egkengehurep is menge etew.
JOB 4:14 Nahandek a ne migkerker is tivuuk he lawa ku.
JOB 4:15 Duen mulin-ulin he midsaǥad diyà te vuked ku ne mibpenggiǥisingan a.
JOB 4:16 Ne kegkepasad dutun, ne segugunà a nekaahà te henduen be te edhitindeg, piru kenà keladu is ked-ahaa ku zuen. Ne zuen deisey he laǥeng he nezineg ku he migkaǥi te,
JOB 4:17 ‘Duen be etew he metazeng diyà te etuvangan te Megbevayà? Duen be etew he lumpiyu ziyà te etuvangan te midlimbag kandin?
JOB 4:18 Emun wazà medsarig is Megbevayà te menge velinsuǥuen he menge suluǥuen din, ne ebpekaahà gihapun sikandin te sayep dan,
JOB 4:19 ne iyan pe be is menge etew he tanè dà is mibpuunan te kedlimbaǥa zuen, ne melemu zà he edrunteken iring te menge zezeizey he keranapranap!
JOB 4:20 Uuyag sikandan ke meselem piru kegkemezukilem ne ebpatey zan en. Ne kenè en sikandan egkaahà taman te taman.
JOB 4:21 Henduen sikandan te valey he egkerundus. Ebpemematey zan he kurang te ketau.’
JOB 5:1 “Job, minsan ebpetavang ke pa, ne wazà edtavang kenikew. Minsan is menge velinsuǥuen, kenà edtavang kenikew.
JOB 5:2 Is pauk wey kesina, edhimatey te tulebung he etew he wazè din ketau.
JOB 5:3 Sumalà te nepeniizan ku, egkehimu he ed-uswag is ked-ubpà te tulebung, piru edtik-awan edrewaki te Megbevayà is pemilya zin.
JOB 5:4 Is menge anak din, ne wazà egkepeveyaan dan he ebpekelibri kandan, ne wazà edlavan kandan diyà te hukmanan.
JOB 5:5 Is menge abut din, ragkes en is menge veǥas te pinemula zin he nenuvù duma te zuǥiyen he zezeisey he kayu, ebpenguwaan te menge etew he egkengevitil. Ne is menge ketiǥeyunan din egkuwaan te menge etew he utew egkesuat te ketiǥeyunan.
JOB 5:6 Is kelised wey kemereǥenan ne wazà medtuvù diyà te tanà, kekenà,
JOB 5:7 iyan ibpekebmereǥen te etew is rimeǥas te mezaat he vaal zin; iring heini te igmuk he ebpekelayang diyà te zivavew te hapuy.
JOB 5:8 “Emun iyan a sikew, edangep a ziyà te Megbevayà ne ibpeehè ku kandin is kebpekesavuk ku.
JOB 5:9 Su ebaal sikandin te egkengein-inuwan he menge vaal he kenà egkesavut wey kenà egkevilang.
JOB 5:10 Ebpeuzanan din heini is kelibutan su wey mewehiǥi is menge pemuleey.
JOB 5:11 Ebpeketikangen din is menge egkeayuayu, ne edlibriyen din is egkengeseeng.
JOB 5:12 Edezeetan din is menge pelanu te limbungan he menge etew, su para kenà sikandan mebmezeeǥen.
JOB 5:13 Iyan dà idhingutel zin te memetau is kegkelimbungan dan, wey id-awè din is ebpekezezaat he pelanu te limbungan.
JOB 5:14 Egkerusireman sikandan minsan maandew. Ebpekepenamsam dan su minsan meudtu ne henduen be te egkezukileman sikandan.
JOB 5:15 Edlibriyen te Megbevayà is menge egkengaayuayu te kemetayen wey te kedezaat te gehemanen he menge etew he edaagdaag kandan.
JOB 5:16 Umbe, duen egkeperateng te menge egkengaayuayu, piru kenà mulà ibpelampus te Megbevayà is menge lalung.
JOB 5:17 “Deyzey is etew he edtulizen te Megbevayà is betasan din. Umbe kenè nu isipa he mezaat is kebmensuwa kenikew te Mekeǥeǥehem he Megbevayà,
JOB 5:18 su is ebpelian din, ne edtembaran din; ne is ebpesekitan din, ne ebewian din wey meulii.
JOB 5:19 Layun ke zin edlibriya te vangkit wey kezeetan.
JOB 5:20 Edlibriyen ke zin te kemetayen emun timpu te vitil etawa tebek.
JOB 5:21 Iyan sikandin metau para kenà mekezezaat kenikew is kebpekezeeta kenikew te zuma he etew, ne wazà igkahandek nu emun egkehitavù is bangkit.
JOB 5:22 Ed-engitan nu zà is kezeetan wey vitil, ne kenè ka egkahandek te zumezaas he langgam,
JOB 5:23 su kenè en heini egkaid kenikew. Ne kenè ke en egkereǥenan he ebpemula ziyà te vetuwen he vevesukè nu.
JOB 5:24 Ebpekesiguru ka he meupiya is kebpekesavuk te pemilya nu, wey wazà egketazin he uyaǥen nu.
JOB 5:25 Ebmahabet is menge kevuwazan nu ne egkeiring kahabet te menge sagbet diyà te tanà.
JOB 5:26 Ebmeluǥayad is untung nu ne kenè ka ebpatey te kenè pa hustu he timpu.
JOB 5:27 Sumalà te nesusi zey, ne tutuu heini is langun. Umbe pemineǥa nu heini wey ul-ulaha nu.”
JOB 6:1 Ne midtavak si Job,
JOB 6:2 “Emun egketimbang dà is kemereǥenan wey kedlised ku,
JOB 6:3 ne edhuna pa heini he meveǥat te pantad diyà te veyvey. Iyan heeyan hinungdan ke maan is nekekaǥi a te menge lalag he wazè ku mepurung meisip-isip.
JOB 6:4 Henduen be te mibpanà a te Mekeǥeǥehem he Megbevayà te vesut he midsevukan te hilu, ne is hilu kayi nekeeneb diyà te lawa ku. Is mekahandekhandek he menge vesut te Megbevayà, ne ziyà mekesinaru te kedì.
JOB 6:5 Wazè ku ve ketenged te kedriklamu? Minsan ganì is asnu wey vaka ne ed-engà emun wazè din egkepenebtavan etawa kumpey.
JOB 6:6 Is etew edriklamu emun wazà timusi is egkeenen din, lavew en ke iyan din egkeenen is meputì duen te impis.
JOB 6:7 Minsan siak ne kenà a egenahan he egkaan keniyan.
JOB 6:8 “Deyzey pezem ke ibeǥey te Megbevayà is ebuyuen ku. Deyzey pezem ke egkezawat ku is mibpenganduy ku.
JOB 6:9 Iyan penganduy ku is himetayi e en te Megbevayà.
JOB 6:10 Ne emun egkehitavù heini, ne melipayen a gihapun, su minsan nekaantus a te merasey wazè ku sumpelita is menge lalag te Waǥas he Megbevayà.
JOB 6:11 “Wazè ku en desen te kebperateng. Wazè ku en egkeperateng he tenged dutun egkesuat a he meuyag-uyag e pa.
JOB 6:12 Duen ku ve zesen iring te vatu? Brunsi ve is lawa ku? Kenà!
JOB 6:13 Wazè ku zesen te kedlibri te keugelingen ku. Wazè ku en timpu te kebmelempusen.
JOB 6:14 “Ne ǥeina te menge emiǥu ku sikiyu, ereg pezem he ebpekid-uunungen kew kedì kayi te kemeresayan ku, minsan pa ke iyan kedsavut niw is mid-iniyuǥan ku is Mekeǥeǥehem he Megbevayà.
JOB 6:15 Piru sikiyu is mid-isip ku he menge suled ku, ne kenè kew egkeseriǥan; iring kew te zal-ug he usahay edrepey is wahig ne usahay egkemezahan.
JOB 6:16 Edrepey heini emun egketenggungan te egketunew he ayis,
JOB 6:17 ne egkemezahan emun gulavung.
JOB 6:18 Emun edsaǥad dutun te wahig is grupu te menge etew he ebpemenhipanew, ne wazà wahig he egkeinum dan dutun, umbe ebpemematey zan emun diyè dan en te disirtu.
JOB 6:19 Is menge nigusyanti he tig-Tema wey tig-Sheba he ebiyahi, ebperateng dan te wahig he egkeinum dan dutun,
JOB 6:20 piru nepakyas dan. Ebperateng dan he zuen wahig dutun, piru wazè bes.
JOB 6:21 Uya, iring kew zutun te nemezahan he wahig. Su wazè kew zaan meketavang kediey. Nahandek kew hein neehè niw is mekahandekhandek he kebpekesavuk ku.
JOB 6:22 Piru maan? Mibuyù e ve ziyà te keniyu te gasa? Midhangyù e ve he tevangi a keniyu te ketiǥeyunan niw,
JOB 6:23 etawa libriya a keniyu te kedezaat te mesipala he kuntada ku?
JOB 6:24 Wazà! Iyan dà edhengyuen ku ziyà te keniyu he keǥiya niw ke hengkey is hustu he hinungdan kayi te nehitavù kediey, ne zutun ebpereremek ad. Keǥiya niw kediey ke hengkey is salè ku.
JOB 6:25 Kenè ku ebeliyen is kesakit te menge lalag niw vasta tutuu heini. Piru kenà tutuu is sumbung niw kediey, ne kenè niw igkepeletew he tutuu heini.
JOB 6:26 Egkesuatan niw te edtulid is menge lalag ku, su iyan isip niw he wazà kayi pulus su lalag te etew he nekebmereǥen.
JOB 6:27 Maan, metazeng kew ve? Te egkehimu niw ganì he ibpeuripen is sevaha he ilu etawa kebelegyà te emiǥu niw?
JOB 6:28 Ahaa a keniyu! Teruen e ve?
JOB 6:29 Engkezi niw en is kedhukumi niw kedì, su wazè ku salà.
JOB 6:30 Midtarùtarù e ve? Kenè ku ve egketuenan ke hengkey is mezaat wey ke hengkey is kenà mezaat?
JOB 7:1 “Is kebpekesavuk te etew kayi te kelibutan ne utew melised; iring kelised te andew-andew he terebahu te sevaha te terebahanti,
JOB 7:2 etawa iring te uripen he ngenaan din he mebmahapun en su wey mekehimeley en, wey iring te terebahanti he ebperateng te suwildu zin.
JOB 7:3 Ne iring keniyan is kediey he kebpekesavuk. Nepipire en he vulan is kebpekaantus ku te wazè ku zuen egkepupulus. Minsan mezukilem ne egkerasey a.
JOB 7:4 Emun edhizeǥà a ke mezukilem egkeisip ku is sengemenu pa vuwa is keluǥayad ne human egkepawà. Utew menaney is kedhipanew te menge uras. Ne ebpekevelvelehey a taman te egkeriwaswas.
JOB 7:5 Utew grabi is tagkey wey keǥang diyà te lawa ku. Midtezak is menge levag ku ne midturavid is nanà.”
JOB 7:6 “Nenlavey is menge andew kayi te ked-ubpè ku he wazè ku egkeperateng. Nenlavey heini he edhuna pa he meǥaan te meǥaan he edwaleng he himan te mengengavel.
JOB 7:7 He Megbevayà, tentenuzi nu he iring dà te keramag is untung ku, ne kenè ad maan ebpekesaǥad te kelipey.
JOB 7:8 Egkaahà a ǥuntaan kenikew piru kenà heini ebpedayun. Emun ebpen-ahaan a kenikew ne kenà ad kenikew egkaahà.
JOB 7:9 Su iring a te egkahanew he kivel he kenè en egkaahà, is minatey en ne kenè en edlikù.
JOB 7:10 Kenè en sikandin ebpekeulì diyà te valey zin, ne egkelipatan en te nekekilala kandin.
JOB 7:11 “Umbe kenà egkehimu ke ebpereremek e zà; mezaat utew is kegezamgezam ku. Egkeǥiyen ku is kezaat te kegeǥehinawa ku.
JOB 7:12 He Megbevayà, maan is mibenteyanan a kenikew? Dragun e ve ziyà te zaǥat?
JOB 7:13 Emun edhizeǥà a pezem su wey a mekehimeley su para malù meterini is mesakit he egkeǥezam ku,
JOB 7:14 ebpelihendeken a kenikew pinaaǥi te menge teǥeinep.
JOB 7:15 Umbe, meupiya pa ke ebpekelen a wey a mebpatey kenà te uuyag a he iyan heini kedlelawa ku.
JOB 7:16 Egkeepesan ku heini is kebpekesavuk ku. Ne kenè ku egkesuatan he meuyag-uyag e pa. Bey-ani ad su wazè en pulus kayi te untung ku.
JOB 7:17 “Hengkey ves is etew he igkeipeng nu wey utew nu edsiǥipaa?
JOB 7:18 Su andew-andew is kedsusiya nu kandin, ne layun nu egezami.
JOB 7:19 Bey-ani ad kenikew minsan meǥaan dà.
JOB 7:20 Nekesalè e ve? Hengkey man he salà is neveelan ku ziyà te kenikew te perevantey te etew? Maan is edsuǥaten a kenikew? Iring e ve te meveǥat he bevaan nu?
JOB 7:21 Emun nekesalà a, ne maan is kenà a kenikew ebpeseyluwen? Kenè en egkeuǥet ne ebpatey ad, ne minsan ebpen-ahaan a kenikew, ne kenà ad kenikew egkaahà.”
JOB 8:1 Ne midtavak si Bildad he tig-Shua te,
JOB 8:2 “Keenu ke ves ed-engked he egkaǥi te iring keniyan? Ebpekeuringer ka, ne wazà pulus te ebpengeǥiyen nu.
JOB 8:3 Kenà egkehimu he egurivizen te Mekeǥeǥehem he Megbevayà is kukuman etawa ebulegkuen din is hustu.
JOB 8:4 Nekesalà is menge anak nu ziyà te Megbevayà, umbe ereg he edsilutan din sikandan.
JOB 8:5 Iyan, emun edangep ka ziyà te Mekeǥeǥehem he Megbevayà wey ebpehizuhizu ka kandin,
JOB 8:6 wey lumpiyu wey metazeng is menge ulaula nu, ne minsan guntaan segugunè ke zin edtevangi ne idlikù din is meupiya he kebpekesavuk nu.
JOB 8:7 Ne is ketiǥeyunan he egkehimu he kenikew te huziyan he timpu ne edhuna pa he utew zekelà duen te nehuna he ketiǥeyunan nu.
JOB 8:8 “Insai nu is nehuna he menge lapis te kevuwazan. Ne susiya nu ke hengkey is neseǥazan te menge lukes dan.
JOB 8:9 Su henduen be te veǥu kiw pa he nengeetew ne zeisey zà is kenitew he netuenan, ne edlavey kiw zà kayi te kelibutan iring te alung he kenà ebpedayun.
JOB 8:10 Pemineǥa nu sikandan su ebpenuruen ke zan te netuenan dan.
JOB 8:11 “Kenà egkeuyag is sedsed he ziyà edtuvù te wahig emun wazà wahig.
JOB 8:12 Ebpatey heini zutun te kemulu pa pezem edtuvù su kenè pa timpu te kegerava zuen.
JOB 8:13 Ne iring daan keniyan is egkepeveyaan te langun he etew he ed-iniyug te Megbevayà. Wazà egkeperateng te etew he wazà medsarig te Megbevayà.
JOB 8:14 Is langun he edseriǥan din ne egkaamur-amur he iring te valey te kelelawà.
JOB 8:15 Edsandig sikandin dutun piru egkevidtew haazà; ebpenggawed sikandin dutun piru egkepekas haazà.
JOB 8:16 Emun ed-ahaan ta ne henduen be te meupiya is kebpekesavuk din; iring heini te pinemula he nepurungan mevinyaǥi wey nesilaan te andew. Edlangkat heini ziyà te lama
JOB 8:17 ne ebpurung ebpendalid diyà te menge vatu.
JOB 8:18 Iyan, emun egkevazut en heini ne wazè en edseǥipà kayi.
JOB 8:19 Ne iyan heeyan ketepusan te kegkeuyag-uyag din, ne zuen en maan edliwan edtuvù duen te tanà he midtuvuan din.
JOB 8:20 “Benar iyan, he kenà ed-engkezan te Megbevayà is etew he wazà igkesawey te kebpengungubpaan din, ne kenè din edtevangan is lalung he etew.
JOB 8:21 Ibpeuman ke zin ibpeengit wey ibpeuruhuy ke zin tenged te kegkelipey nu.
JOB 8:22 Ebpeel-elezan din is lalung he menge kuntada nu, ne edèdeetan din is menge pemilya zan.”
JOB 9:1 Ne migkaǥi si Job,
JOB 9:2 “Uya, tutuu heeyan is lalag nu. Piru hengkey is paaǥi para igkepaahà te etew he wazè din salà diyà te etuvangan te Megbevayà?
JOB 9:3 Minsan ebpekidlalis pa sikandin te Megbevayà diyà te hukmanan, ne wazè din egkehimu, su is nengkelibu he insà kandin te Megbevayà ne wazà minsan sevaha zutun he egketavak din.
JOB 9:4 Metau wey utew mekeǥeǥehem is Megbevayà. Hentei man is nekezaag he nekigkuntada kandin?
JOB 9:5 “Kenè en sikandin ebpetizaan, ne edhuyungen din is menge vuntud ne egkengetempag heini tenged te pauk din.
JOB 9:6 Ibpelinug din kayi te tanà puun diyà te nesevukan kayi.
JOB 9:7 Pinaaǥi zà te kebmandù din ne egkehimu he kenà edsilà is andew wey kenà edsiǥa is menge vituen.
JOB 9:8 Iyan dà sikandin midempas te langit, wey iyan dà sikandin ebpekepeengked te menge vaǥel.
JOB 9:9 Iyan sikandin mibaal te grupu te menge vituen he egngezanan te Oso, Belatic, Penikapan, wey menge vituen diyà te zivavà he vahin te kelimbaǥan.
JOB 9:10 Mibaal sikandin te egkein-inuwan he menge vaal he kenà egketegkad wey kenà egkevilang.
JOB 9:11 Emun edseǥazan e zin ne kenè ku sikandin egkaahà wey kenè ku egkeǥezam.
JOB 9:12 Emun duen din egkesuatan te egkuwa, ne wazà ebpekeeǥen kandin. Wazà etew he zuen din gehem te kedriklamu ke hengkey is ebeelan te Megbevayà.
JOB 9:13 Wazà eǥena te Megbevayà is pauk din. Minsan si Rahab is umuuǥup te dragun, ne ebpekeseludu te Megbevayà tenged te egkehandek kandin.
JOB 9:14 Umbe, wazà egkehimu ku he pengalang para kenà a mezezeeti te Megbevayà.
JOB 9:15 Minsan wazè ku salà kenè ku egkepengelangan is keugelingen ku emun edezeetan e zin. Iyan dà egkehimu ku is kebpehizuhizu te Megbevayà he Meghuhukum ku.
JOB 9:16 Minsan edhengyuan ku sikandin he ebpeetuvangè key ne ebpezumazuma, ne kenè e zin gihapun ebpemineǥen.
JOB 9:17 Su ibpaantus e zin he henduen be te edel-asen a te vagyu, ne ibpeiseg din is kegkesekiti ku te wazà hinungdan.
JOB 9:18 Henduen be te kenè e zin en ibpeǥeǥehinawa te menge mesakit he ibpaantus din kedì.
JOB 9:19 Emun desen is ed-ahaan, ne utew mezesen sikandin! Ne emun sinumbungà, ne wazà ebpekesumbung kandin.
JOB 9:20 Minsan wazè ku salà, edhukuman e zin gihapun te silut tenged te ebpengeǥiyen ku he idlavan ku te keugelingen ku.
JOB 9:21 Minsan wazà igkesawey kedì ne wazà keniyan bali kayi te kediey. Egkeepesan ku is untung ku.
JOB 9:22 Su ebpeked-iring dà is midtinazeng wey wazà; su edezeetan te Megbevayà is metazeng wey is lalung.
JOB 9:23 Ed-engit dà sikandin emun segugunà ebpatey is metazeng tenged te vangkit.
JOB 9:24 Mibpeveyveyaan din te menge lalung is kelibutan. Edsebpengen din is mata te menge meghuhukum. Emun kenà iyan sikandin mibaal kayi ne hentei ves?
JOB 9:25 “Utew meǥaan he ebpenlavey is menge andew te untung ku; henduen be te edhuna pa he meǥaan te ebpekidlumbà. Nenlavey heini zuma te kegkeseeng.
JOB 9:26 Uya, utew meǥaan he edlavey is untung ku; iring keǥaan te meǥaan he untuzà etawa vanug he edawi.
JOB 9:27 Minsan kenà ad edriklamu wey kenà ad edseengseeng, ne egemen ad,
JOB 9:28 egkahandek a ǥihapun te menge elentusen he ebpekeuma kayi te kedì. Su netuenan ku he kenè din ed-isipen he wazè ku salà.
JOB 9:29 Su ǥuntaan ed-isipen e zin he mekesesalà, umbe wazà pulus te tinguhè ku he idlavan ku te keugelingen ku.
JOB 9:30 Minsan pa ke edsebunan ku is tivuuk he lawa ku su para lumpiyu a,
JOB 9:31 id-ahuk e zin gihapun diyà te vesaken he vudsi, su para minsan is bisti ku egkeremerik kedì.
JOB 9:32 Kenà etew is Megbevayà iring kedì, umbe kenè ku sikandin egkevarew wey kenè ku igkesumbung diyà te hukmanan.
JOB 9:33 Angin pezem ke zuen ebpekepeteliwazà kenami he edhusey kenami te zezuwa.
JOB 9:34 Ne igkepeengked din is Megbevayà te kedlagkut kediey, su para kenà ad mahandek.
JOB 9:35 Ne zutun, kenà ad egkahandek is egkaǥi ziyà te kandin, piru ǥuntaan kenè ku pa heini egkehimu.”
JOB 10:1 “Egkeepesan ku is untung ku, umbe ebpetakà ad he edriklamu. Egkeǥiyen ku is ikezaat te ǥehinawa ku.
JOB 10:2 Ne iyan heini egkeǥiyen ku ziyà te Megbevayà: ‘Kenà a kenikew hukumi he mezaat a, kekenà, ipetueni nu kedì ke hengkey is insumbunga nu kedì.
JOB 10:3 Ingkelipey nu ve is kebpeentusa nu kedì? Maan is idselikwey a kenikew is keugelingen nu he vineelan, ne ebpeburan nu mulà is pelanu te kebpendezaat te menge mezaat he etew?
JOB 10:4 Iring be is ked-ehè nu te ked-ahà te etew?
JOB 10:5 Iring dè be kevavà is untung nu te untung te etew?
JOB 10:6 Maan is kenè en ereg ne edseyepen ad kenikew?
JOB 10:7 Netuenan nu he wazè ku salà, piru wazà ebpekelavan kedì emun iyan ka kuntada.
JOB 10:8 “ ‘Iyan ka mibpurma wey mibaal kedì, ne ǥuntaan edezeetan e zà kenikew.
JOB 10:9 Tentenuzi nu he mibpurma a kenikew he ebpuun te tanà, ne ǥuntaan, idlikù e en be kenikew ziyà te tanà?
JOB 10:10 Iyan ka mibpurma kedì diyà te ǥetek te iney ku ne neiring a te ǥatas he mibeelan he kisu.
JOB 10:11 Mibpurma a kenikew he zuen din menge tulan wey menge uǥat ne midtenges a kenikew te sapù wey lundis.
JOB 10:12 Mibeǥayan a kenikew te untung wey impeehè nu kedì is keupiya nu, wey midtipiǥan nu is untung ku.
JOB 10:13 Piru ǥuntaan netuenan ku is tutuu he pelanu nu mehitenged kedì
JOB 10:14 he iyan is ebentayan a kenikew ke ebpekesalà a, ne zutun kenà a kenikew ebpeseyluwen.
JOB 10:15 Nekesalè e man etawa wazà, ne neked-iring dà he mekehizuhizu a. Su neeled-eled a wey utew subra is kebpekaantus ku.
JOB 10:16 Ebpenigudu a he mekeenew a, piru iring ka te erimaung is ebpeniid kedì su wey a kenikew mezezeeti. Ibpeehè nu is gehem nu te kedezaat kedì.
JOB 10:17 Kenè en egkeengked is kedsumbunga nu kedì, ne layun egkeumani is pauk nu kedì. Ne kenà a kenikew ed-engkezan te edsurung.
JOB 10:18 “ ‘Maan is intuǥut nu pa he meetew a? Deyzey pezem ke minatey ad hein wazè pa nekaahà kediey.
JOB 10:19 Deyzey pezem ke wazà ad melimbag. Deyzey ke minatey e en diyà te ǥetek te iney ku ne indiritsu ad ileveng dutun te kedlusaza kedì.
JOB 10:20 Deisey zà he timpu is nesamà para kedì, umbe engkezi ad te edrasey su para melipey a minsan te mevavè dà he timpu
JOB 10:21 zutun te kenè e pa edhendiyà te lugar he mekeseseeng wey merusirem, he zutun kenà ad ebpekelikù dini.
JOB 10:22 Utew merusirem haazà; wazà bulug kerayag, wey wazà kehusey.’ ”
JOB 11:1 Ne midtavak si Zofar is tig-Naama te,
JOB 11:2 “Ereg he edtevaken heini is ebpengeǥiyen nu. Kenà ebpekelepew he wazè nu salà pinaaǥi zà te kedtulung nu kegkaǥi.
JOB 11:3 Kenè key kenikew igkepepereremek pinaaǥi te ebpengeǥiyen nu he wazè din pulus. Egkeisip nu ve he kenè dey sikew edewayen te ked-undaunda nu?
JOB 11:4 Migkaǥi ka he hustu is kedtuu nu wey lumpiyu ka ziyà te etuvangan te Megbevayà.
JOB 11:5 Deyzey pezem ke edlelaǥan ka te Megbevayà
JOB 11:6 ne egkeǥiyen din kenikew is wazè nu pa mengetueni. Duen nengetuenan nu en ne zuen daan wazè nu pa mengetueni. Netuenan nu en be he is silut te Megbevayà kenikew kurang pa te ereg he idsilut kenikew?
JOB 11:7 Egketegkad nu ve is langun he mehitenged te Megbevayà?
JOB 11:8 Metikang pa te langit is mehitenged kandin wey mezalem pa te iveyaan. Dekelà pa heini te kelibutan wey meluag pa te zaǥat. Ne egkeǥawhat be heeyan te ked-isip-isip nu?
JOB 11:10 “Penenglitan, edekepen ka te Megbevayà ne ed-uwiten ke zin diyà te hukmanan wey ebpirisuwen ke zin, hentei man is ebpekeeǥen kandin?
JOB 11:11 Netuenan din ke hentei is limbungan he menge etew wey neehè din is kegkezaat dan.
JOB 11:12 Henduen be te kenè en egkehimu he ed-uluwanen is tulebung iring te kenà egkehimu he ed-anak te etew is asnu.
JOB 11:13 “Job, emun ed-iniyug ka te mezaat wey edangep ka ziyà te Megbevayà,
JOB 11:14 ne kenè ke en ebaal te salà wey kenè nu edtuǥutan is pemilya nu te kebaal te salà,
JOB 11:15 kenà duwazuwa he kenè ke en egkepeel-elezan; ebmelig-en ka wey wazè nu igkahandek.
JOB 11:16 Ne egkelipatan nu en is mesakit he neeǥiyan nu, ne egkeiring dà heini te wahig he midsaǥad.
JOB 11:17 Egkehimu is untung nu he merayag pa te silà te andew ke meudtu. Is merusirem diyà te untung nu ebmerayag iring te meselem.
JOB 11:18 Ebmeli g-en is kebpengungubpaan nu su zuen meupiya he egkeperateng nu. Ebpengelangan ka te Megbevayà ne edhimeley ka he wazè nu igkahandek.
JOB 11:19 Edhizeǥè ka he wazè ebpelihandek kenikew, wey mahabet is ebpetavang kenikew.
JOB 11:20 Piru egkepakyas mulà is menge lalung ne wazè dan en egkepeleǥuyan, ne kemetayen dà is egkeperateng dan.”
JOB 12:1 Ne midtavak si Job te,
JOB 12:2 “Iyan diyà te isip niw he iyan kew zà metau ne wazè en egkesamà he metau emun ebpatey kew en.
JOB 12:3 Piru metau a zaan iring keniyu; kenè kew lavew kediey. Netuenan ku zaan heini is langun he mibpengaǥi niw.
JOB 12:4 Nehimu a he egkeengitan te menge emiǥu ku minsan metazeng a wey wazà kedì igkesawey, wey minsan edtevaken dengan te Megbevayà is menge kebpengemuyù ku.
JOB 12:5 Is menge etew he iring kedì, te zuen din elentusen he henduen be te egkepiley en, ed-un-undahan te menge etew he ebpeeyehey zà.
JOB 12:6 Piru is menge tulisan wey is menge etew he ebaal te igkepauk te Megbevayà, melinawen mulà is kebpengungubpaan dan, minsan is kebpekegaga zan, ne iyan ed-isipen dan he megbevayè dan.
JOB 12:7 “Istudyu ka pinaaǥi te kebpeniid te minsan hengkey he kelasi te zuen din gehinawa: is ebpemenhipanew, is ebpemenlayang, is ebpemenanap, wey is ebpemenlayewlayew.
JOB 12:9 Su sikandan is langun, netau kayi te mibeelan te Nengazen.
JOB 12:10 Diyà te velad din is untung etawa gehinawa te langun he linimbag ragkes is etew.
JOB 12:11 Emun is dilà te etew egketau ke hengkey is metaam etawa mezaat he keenen, is telinga te etew egketau zaan ke hengkey is meupiya etawa mezaat he menge lalag.
JOB 12:12 Mezakel is netuenan te meǥurang en he etew, su emun ebmeluǥayad is untung te etew, ebmahabet daan is egketuenan din.
JOB 12:13 “Piru Megbevayè dà is duen din ketau he egkezumahan te ǥehem, ne iyan dà sikandin duen din tutuu he kedsavut ke hengkey is ereg he ebeelan.
JOB 12:14 Wazà ebpekeped-uliey te egevaan din, wey wazà ebpekepeǥawas te ebpirisuwen din.
JOB 12:15 Emun edsebpengan din is uzan, ebmemaza is tanà, emun ebpesegdanen din is uzan, edalem ne egkezeetan is tanà.
JOB 12:16 Mezesen sikandin wey mezeeǥen, su zizalem te ǥehem din is ebpenlimbung wey is edlimbungan.
JOB 12:17 Ed-ewaan din is ketau te menge sumesambag, wey edhimuwen din he tulebung is menge meghuhukum.
JOB 12:18 Id-awè din is menge hadì puun te kegkahadì dan wey ibpevihag din sikandan.
JOB 12:19 Id-awè din is menge memumuhat wey is menge etew puun diyà te ketengdanan he ebpekeveǥey kandan te ǥehem.
JOB 12:20 Ibpepereremek din is egkeseriǥan he menge sumesambag, wey id-awè din is hustu he kedsavut te menge meǥurang.
JOB 12:21 Edsudien din is nevantug he menge etew, ne id-awè din is gehem te gehemanen he menge etew.
JOB 12:22 Ibpeǥawaǥawa zin is menge in-eles, ne ibpemerayag din is merusirem.
JOB 12:23 Edhimuwen din he gehemanen wey ebmeluag is menge nasyun, piru edaaǥen din wey edezeetan din heini.
JOB 12:24 Edhimuwen din he tulebung is menge pengulu zan, wey edtezinen din sikandan diyà te sibsivayan.
JOB 12:25 Ebpemekekaapkaap sikandan diyà te merusirem wey egkengetevereg he henduen be te egkengelangut.”
JOB 13:1 “Neehè ku wey nezineg ku is langun he migkaǥi niw, wey nesavut ku heini.
JOB 13:2 Ke hengkey is netuenan niw ne netuenan ku zaan; kenè kew lavew kediey.
JOB 13:3 Piru kenà a ebpekidlalis keniyu mehitenged te kasu ku, kekenà, diyà a ebpekidlalis te Megbevayà he Mekeǥeǥehem.
JOB 13:4 Su ebpenigudu kew he ebawì kedì te ketetarù niw. Pudu kew iring te duktur he wazè din pulus.
JOB 13:5 Deyzey pa ke pudu kew ebpereremek. Iyan heeyan kineupiyahan he ereg he ebeelan niw.
JOB 13:6 “Guntaan, pemineǥa niw is ketezengan ku.
JOB 13:7 Edlevanan niw ve is Megbevayà pinaaǥi te kedtarùtarù niw?
JOB 13:8 Edlevanan niw ve sikandin wey edipinsahan niw is kasu zin?
JOB 13:9 Emun edsusiyen kew te Megbevayà, duen be vuwa meupiya he egkeehè din diyà te keniyu? Kenè niw isipa he egkelimbungan niw sikandin iring te kegkelimbungi niw te menge etew.
JOB 13:10 Kenà duwazuwa he edewayen kew te Megbevayà minsan pa te edlevanan niw sikandin.
JOB 13:11 Wazè kew ve mahandek te ǥehem din?
JOB 13:12 Henduen dà te avu is menge erubasa niw su wazè din pulus; wey henduen dà te ziniyun he tanà is menge ketezengan niw su melemu heini he eberawen.
JOB 13:13 “Kenè kew kaǥi emun egkaǥi a, ne vey-ani ad keniyu minsan hengkey is egkehitavù kedì.
JOB 13:14 Su ibpedseraken ku en is untung ku.
JOB 13:15 Siguradu he edhimetayan a te Megbevayà; wazè ku en meupiya he egkeperateng. Piru edipinsahan ku ǥihapun is keugelingen ku ziyà te etuvangan din.
JOB 13:16 Su kela ke pinaaǥi kayi egkelibri a, su is etew he kenà edsunud te Megbevayà kenà ebpekeuvey ziyà te etuvangan din.
JOB 13:17 “Purungi niw pemineǥa is ebpengeǥiyen ku.
JOB 13:18 Guntaan te andam ad he edipinsa te keugelingen ku, netuenan ku he iyan hukum kedì is wazè ku salà.
JOB 13:19 Ke zuen ebpekesumbung kedì he nekesalà a, ebpereremek ad taman te kebpatey ku.
JOB 13:20 “He Megbevayà, kenà a ed-eles kenikew emun ibeǥey nu kediey heini is dezuwa he ebuyuen ku:
JOB 13:21 engkezi ad kenikew te ebpaantus, wey kenà ad kenikew pelihendeka te mekahandekhandek he menge vaal nu kayi te kedì.
JOB 13:22 Ne ǥuntaan, kaǥi ka kayi te kediey ne edtevaken ku sikew, etawa iyan a egkaǥi ne tevaka a kenikew.
JOB 13:23 Keǥiyi a kenikew ke hengkey he salà is nehimu ku. Ipeehè nu kedì is menge kerepasan ku wey menge salè ku.
JOB 13:24 Maan is edlikayan a kenikew, wey ed-isipen a kenikew he kuntada nu?
JOB 13:25 Maan is ebpelihendeken a wey edel-asen a kenikew is iring dà te reǥami etawa zahun he idlayap te keramag?
JOB 13:26 Insurat nu is mesakit he sumbung nu kediey, ne ebpeveyazan nu kediey is menge salà he neveelan ku zengan te vetan-en e pa.
JOB 13:27 Henduen be te egkedinahan nu is menge paa ku. Ebenteyanan nu is kada langkad ku, wey edsunuzen nu is menge nayè ku.
JOB 13:28 Umbe, iring a te repuk he egkeredak en wey visti he egketketen te zezeizey he keranapranap.”
JOB 14:1 “Sikami is menge etew, ne mevavè dà is untung dey ne mahabet is ebpekerasey kenami.
JOB 14:2 Iring key te vulak he ebekar ne kenà egkeuǥet ne egkeǥangu en, wey iring te alung he segugunà egkahanew.
JOB 14:3 Ne maan is ebpekeventayan nu is etew, Nengazen? Ne egkesuatan nu pa sikandin te edhukum.
JOB 14:4 Duen be etew he wazà kurang is kegkelumpiyu zin? Wazà! Su is langun, neetew he meremerik.
JOB 14:5 Imbanglis nu en ke sengemenu keluǥayad is untung te etew. Ne kenè din egkepesubrahan is timpu he inteǥana nu kandin.
JOB 14:6 Umbe, kenè nu en lisliseza is etew, bey-ani nu en sikandin he ebpekepeeyehey zaan iring te terebahanti he ebpekepasad te terebahu.
JOB 14:7 “Emun edtempezen is kayu, egkehimu pa he egkeuyag wey ed-uman edtuvù.
JOB 14:8 Minsan metesan en is dalid din wey egkeǥangu en is tued din,
JOB 14:9 emun egkevinyaǥan heini ebpeneringsing pa he iring is tuvù din te veǥu he pinemula.
JOB 14:10 Piru is etew mulà he ebpatey, ne egkaawè en is langun he zesen din. Kegkevidtew te ǥehinawa zin ne iyan en haazà ketepusan din.
JOB 14:11 Iring te edeisey is wahig diyà te zaǥat wey egkemezahan is wahig he edtudà,
JOB 14:12 is etew ebpatey, ne kenè en ebpekeenew etawa kenè en egkepukew te lipezeng din mintras duen pa langit.
JOB 14:13 “He Nengazen, deyzey ke id-eles a kenikew ziyà te lugar te menge minatey taman te egkaawà is pauk nu, ne edteleenen nu is timpu he edtentenuzan a kenikew zutun he lugar.
JOB 14:14 Emun ebpatey is etew egkeuman pe be sikandin egkeuyag? Piru ed-entusen ku is tivuuk he timpu te kebpekaantus ku taman te egkeuma is timpu te kegkepasad kayi.
JOB 14:15 Emun timpu te ked-umew nu kedì, Nengazen, edtavak a. Tentenuzi a kenikew is linimbag nu.
JOB 14:16 Minsan pa ke ebentayan nu is menge vaal ku, piru kenè nu en mulà isipa is salè ku.
JOB 14:17 Henduen dà te idtaǥù nu heini ziyà te teleǥuey su wey mekeeles ne kenè nu en egkaahà.
JOB 14:18 Piru iring te egketempag is buntud wey egkengeulug is menge vatu puun te kelendiǥan,
JOB 14:19 wey iring te egkehilis is batu te kegketulungi zuen kegketudai te wahig wey egkevanlas is tanà tenged te utew mereǥes he uzan, egevaan nu zaan is perateng te etew.
JOB 14:20 Layun nu edaaǥa is etew ne ebpatey sikandin, ne ebeǥuwen nu is kegkeveeli kandin emun ebpatey en sikandin.
JOB 14:21 Kenè din en egketuenan ke ebeǥayan be te zengeg is menge anak din etawa ebpendezeisayen.
JOB 14:22 Iyan din dà neǥezam is kandin he kegkesekiti wey kegkeseeng.”
JOB 15:1 Ne zutun midtavak si Elifaz he tig-Teman te,
JOB 15:2 “Job, is metau he etew kenà egkaǥi te wazè din pulus.
JOB 15:3 Emun ebpekidlalis ne kenè din egemiten is tinulebung he menge lalag.
JOB 15:4 Piru is ebpengeǥiyen nu ne ebpekesuǥù te etew te kenà kedtahud wey kenà kebpenilbi te Megbevayà.
JOB 15:5 Is ebpengeǥiyen nu veǥas te kegkezaat nu. Ne edlimbungan nu is duma pinaaǥi te menge lalag nu.
JOB 15:6 Kenè en kinahanglan he edhukuman ku sikew su is ebpengeǥiyen nu, iyan en ebpengumbenar he nesayep ka.
JOB 15:7 Mid-isip nu ve he iyan ka nehuna he neetew? Neetew ke en be hein wazè pa limbaǥa is menge vuntud?
JOB 15:8 Nezineg nu en be is menge pelanu te Megbevayà? Iyan ke zè be etew he metau?
JOB 15:9 Hengkey is netuenan nu he wazè dey metueni? Hengkey is nesavut nu he wazè dey zaan mesavut?
JOB 15:10 Nekeistudyu key ziyà te menge etew he memeǥurang en, edhuna pa he meǥurang te amey nu!
JOB 15:11 Migkeǥiyan dey sikew te menge lalag he ebpuun diyà te Megbevayà he ebpekezasig wey ebpekelipey kenikew. Kurang pe be heini?
JOB 15:12 Maan is mibpeuwit ka te egkeǥezam nu? Hengkey is nekepelakap kenikew he iyan kenè nu igketueni te tutuu,
JOB 15:13 umbe utew nu nepeuki is Megbevayà ne nekaǥi nu heeyan is mezaat he menge lalag he ebpekesuǥat kandin?
JOB 15:14 Egkehimu ve te etew is kebpengungubpaan he tutuu lumpiyu wey metazeng?
JOB 15:15 Wazà ganì medsarig is Megbevayà te menge velinsuǥuen din! Emun kenà lumpiyu is ked-ahaa zin kayi te menge ilengiten he menge linimbag,
JOB 15:16 iyan pe be is etew he neetew he mezaat wey mekesesalà, he igkemezahi zin is kebaal te mezaat?
JOB 15:17 “Job, pemineǥa a kenikew. Egkeǥiyen ku wey ibpahayag ku ziyà te kenikew is neseǥazan ku.
JOB 15:18 Egkekaǥi zaan heini te uluwanen he menge etew he nekeistudyu ziyà te menge lukes dan.
JOB 15:19 Utew sikandan uluwanen, su iyan dà sikandan nekaangken te menge tanè dan, ne wazà sikandan sekupa te menge lumelengyawà.
JOB 15:20 “Is lalung he etew duen din elentusen seled te tivuuk he untung din.
JOB 15:21 Layun sikandin egkulbai. Minsan timpu he wazà kezeetan, egkulbaan sikandin su kela ke surunga te menge tulisan.
JOB 15:22 Egkahandek sikandin su netuenan din he kenè din egkelikayan is kemetayen.
JOB 15:23 Ebpekeriǥuriǥu sikandin diyà te minsan hendei is ebpen-ahà te keenen. Netuenan din he hapit en sikandin ebpatey.
JOB 15:24 Utew subra is kulbè din su iring sikandin te hadì he edsurung te kebpekidtebek.
JOB 15:25 Egkehitavù heini ziyà te kandin su ǥeina te midribildiyan din is Megbevayà he Mekeǥeǥehem wey midsukulan din.
JOB 15:26 Henduen be te migawed sikandin te melig-en he kelasag he andam en he edsukul te Megbevayà.
JOB 15:27 Minsan sepian sikandin wey melambù ǥuntaan,
JOB 15:28 ebpekeubpà sikandin diyà te menge valey he wazà duen ed-ubpà he henduen te egkerundus en, he ziyà te nezeetan he menge inged.
JOB 15:29 Kenè en sikandin ebpedayun he edsepian. Meǥaan dà egkaawà diyà te kandin is ketiǥeyunan din, ne is menge azen din kenà ebmahabet kayi te tanà.
JOB 15:30 Kenà sikandin ebpekelikey te kezeetan. Egkeiring sikandin te kayu he egketutung is menge seringsing din. Ne sengehiyup dà te Megbevayà ne egkahanew is langun he azen din.
JOB 15:31 Deyzey ke kenè din edlimbungan is keugelingen din pinaaǥi te kedsarig te menge vutang he wazè din pulus, su wazè din egkekuwa puun kayi.
JOB 15:32 Iring sikandin te kayu he egkeǥangu te kenè pa timpu te kebpemeǥas su zaan din en egkezawat is silut kandin ne kenè en sikandin ed-uswag.
JOB 15:33 Egkeiring sikandin te paras he nepugpug is mehilew he menge veǥas din, wey iring te kayu he ulibu he nerapì is kevukazan din.
JOB 15:34 Is kenà edsunud te Megbevayà ne ebpematey he wazè dan menge kevuwazan. Egkengevinsulan is menge valey he mibangun dan pinaaǥi te kebpenapì dan.
JOB 15:35 Layun dan ed-isip te kedsinamuk, kebaal te mezaat, wey kebpenlimbung.”
JOB 16:1 Ne midtavak si Job te,
JOB 16:2 “Neuǥet ku en heeyan he nezineg. Edlipayen e man pezem keniyu piru nasì niw umani is kegkeseeng ku.
JOB 16:3 Kenè kew en be ed-engked he egkaǥi te wazè din pulus? Hengkey ves is nekesamuk te isip niw maan is edtulung kew ebpekidlalis kedì?
JOB 16:4 Emun iyan kew kayi te kediey he kebpekesavuk guntaan, egkehimu ke egkaǥi a zaan te iring te ebpengeǥiyen niw kayi te kedì. Utew ku ebeghetà is kedlalag ku keniyu ne ebpengelkelengan ku sikiyu.
JOB 16:5 Piru kenè ku heeyan ebeelan. Kekenà, egkaǥi a te menge lalag he ebpekezasig wey ebpekelipey keniyu.
JOB 16:6 Piru ǥuntaan, kenà egkaawà is kegkesekiti ku minsan hengkey is egkeǥiyen ku. Ne emun daan ebpereremek a ne kenà gihapun heini egkaawà.
JOB 16:7 “He Megbevayà, mibeley a kenikew. Midezeetan nu is tivuuk he pemilya ku.
JOB 16:8 Impeǥasà a kenikew; utew grabi is daru ku, umbe iyan isip te zuma is tuus heini he nekesalà a.
JOB 16:9 Tenged te pauk nu, Megbevayà, midsurung a kenikew. Henduen ka te zumezaas he langgam he mibpitaspitas te sapù ku. Mibpekiǥetan a kenikew te menge ngipen nu wey mibpemusiǥahan a kenikew he henduen te kuntada a kenikew.
JOB 16:10 “Edsusudien a wey ed-eengitan a te menge etew. Midtabpì dan is buked ku te kedsudì kedì. Midlivangan e zan te edsurung.
JOB 16:11 Imbeǥey a te Megbevayà diyà te menge lalung wey mekesesalà he menge etew.
JOB 16:12 Meupiya is kebpekesavuk ku zutun te nehuna he timpu, piru midezeetan e zin. Henduen be te mibpekel e zin wey midruntek. Midsinuǥat e zin.
JOB 16:13 Midliǥuyan a te menge perepanè din, ne wazà e zan urami te ebpanà. Netiyuk a ne midtiǥis is epezu ku ziyà te tanà.
JOB 16:14 Ne kenè e zin ed-engkezan te ebpalì. Henduen sikandin te sundaru is midsurung kedì.
JOB 16:15 Mibivisti a te saku wey mibpinuu a ziyà te tanà is egkeseeng.
JOB 16:16 Mibmeriǥà is kedezagwey ku wey nenlevag is menge mata ku tenged te kebpeketulung ku kebpekesineǥew.
JOB 16:17 Wazà neveelan ku he salà, wey tinutuuwà is ked-ampù ku.
JOB 16:18 “Iring a te etew he midhimetayan he edhangyù diyà te tanà he kenà bumbuni is lengesa zin su wey pinaaǥi zutun ikeveǥey kandin is kukuman he kenà sikandin egkevintahaan.
JOB 16:19 Minsan guntaan, diyà te langit is tistiǥus ku. Ne iyan sikandin egkaǥi he wazè ku salà.
JOB 16:20 Edsudien a te menge emiǥu ku, piru midsineǥew a wey mid-ampù a ziyà te Megbevayà is ebuyù te tavang.
JOB 16:21 Angin pezem ke zuen ebpehizuhizu ziyà te Megbevayà para kediey iring te kebpehizuhizu te etew para te emiǥu zin.
JOB 16:22 Su kenè en egkeuǥet ne egenat ad ne kenà ad edliku.”
JOB 17:1 “Hapit e en ebpatey; henduen be te egkevidtew en is gehinawa ku. Andam en he edawat kedì is penlevengà.
JOB 17:2 Edliǥuyan a te menge mesudì. Utew inmezaat te ǥehinawa ku is kedsudia zan kedì.
JOB 17:3 He Megbevayà, tevangi a wey a melibri. Wazè en duma he ebpeketavang kedì, kekenà, iyan ke zà.
JOB 17:4 Midsabpeng nu is ked-isip-isip te menge emiǥu ku su wey zan kenà mekesavut. Umbe kenè nu ituǥut he ebpekezaag dan kayi te kedsumbunga zan kedì.
JOB 17:5 Iring sikandan te etew he edluib te menge emiǥu zin su wey mekeselapì, he iyan egkehimu he hinungdan te kebpekebmereǥen te menge anak din.
JOB 17:6 “Midhimu a te Megbevayà he meengiti te menge etew, ne ed-ilevan e zan diyà te vuked.
JOB 17:7 Mibmerusirem en is ked-ehè ku tenged te kegkeseeng ku, ne henduen be te neiring en te ǥimukud is lawa ku.
JOB 17:8 Is menge etew he mid-isip dan he metazeng sikandan neinuinu kayi te nehitavù kedì. Ed-isipen e zan he lalung he iring te etew he wazà medsarig te Megbevayà.
JOB 17:9 Iyan isip dan he melig-en wey edsigudu ed-iseg is kelig-en te kebpengungubpaan te etew he metazeng.
JOB 17:10 Piru ebpeuman a ebpesusi kandan. Ne siguradu egkesavut ku zutun te kedsusi zan he wazà minsan sevaha kandan he nekesavut.
JOB 17:11 Meǥaan en egketapus is menge andew ku. Wazà medlampus is menge pelanu wey menge tinguhè ku.
JOB 17:12 Piru migkaǥi sikandan te kela ke mebmeupiya zed is kebpekesavuk ku te huziyan he timpu. Ke sikandan te, ‘Divaluy te merusirem ne zuen kerayag he ebpekeuma.’
JOB 17:13 Emun ebperateng a, ne iyan ebperetengen ku is kebpekeubpè ku ziyà te lugar te menge minatey. Egkesuatan ku en te ebpelastar is hizeǥaan ku keniyan te merusirem he lugar.
JOB 17:14 Is leveng ed-isipen ku he amey ku, ne is menge tagkey he egketket kedì, ed-isipen ku he iney ku wey menge etevey ku.
JOB 17:15 Duen ku pe be egkeperateng? Hentei is ebpekekaǥi he zuen ku pa egkeperateng?
JOB 17:16 Is perateng ku eduma kediey ziyà te lugar te menge minatey. Ebpezumehè key ziyà te zizalem te tanà.”
JOB 18:1 Ne midtavak si Bildad is tig-Shua te,
JOB 18:2 “Job, keenu nu ves ed-engkezi te egkaǥi heeyan is ebpengeǥiyen nu? Purungi nu is kegkaǥi nu su wey zey sikew melelaǥi.
JOB 18:3 Ed-isipen nu ve he iring key te menge vaka he wazè dan kedsavut?
JOB 18:4 Ebpesekitan nu zà is keugelingen nu pinaaǥi te pauk nu. Mid-isip nu ve he tenged dà kenikew ebey-anan te Megbevayà is kelibutan etawa idhalin din is menge vatu puun te nesevukan dan?
JOB 18:5 “Benar iyan, he siguradu he ebpatey is lalung he etew. Iring sikandin te sulù he kenè en edsiǥa.
JOB 18:6 Ebpekeiring sikandin te tulda he merusirem en su egkeevukan is sulù diyà te seled din.
JOB 18:7 Dutun te nehuna he timpu meupiya is lengkazan din, iyan, guntaan ebpekeziregdireg sikandin. Kandin mismu he paaǥi is ebpekezezaat kandin.
JOB 18:8 Iyan sikandin midhipanew pehendiyà te litag, ne nelitag sikandin.
JOB 18:9 Ne kenè ne egkehekazan is menge paa zin.
JOB 18:10 Idlitag heini ziyà te ebeyaan din, ne nekeeles heini ziyà te tanà.
JOB 18:11 Neliǥuy sikandin te igkahandek din ne henduen be te edal-as heini kandin.
JOB 18:12 Is bangkit henduen be te etew he egkevitil he egkesuat he ed-eveleng kandin. Is kezeetan andam en he edezaat kandin.
JOB 18:13 Is lundis din egketketen te ebpekepatey he zaru ne egkeredak is menge paa wey menge velad din.
JOB 18:14 Ibpaawà sikandin diyà te ubpeey zin he ebpekepengalang kandin, ne ed-uwiten diyà te mekahandekhandek he hadì.
JOB 18:15 Egkaawà is ubpeey zin su egkevinsulan heini te egkeregreg he esupri.
JOB 18:16 Egkeiring sikandin te kayu he egkeǥangu is menge zalid wey menge subpang din.
JOB 18:17 Ne wazè en ebpeketanud kandin kayi te kelibutan. Egkepurung en sikandin egkelipati.
JOB 18:18 Edsegseǥen sikandin puun kayi te merayag he kelibutan pehendiyà te merusirem he lugar te menge minatey.
JOB 18:19 Wazè din menge anak etawa menge kevuwazan, ne wazà egkesamà he uuyag diyà te pemilya zin.
JOB 18:20 Is menge etew ziyà te minsan hendei he lugar, egkengeinuinu wey egkengehandek tenged te nehitavù kandin.
JOB 18:21 Tutuu he iyan heeyan egketemanan te lalung he etew, he wazà megkilala te Megbevayà.”
JOB 19:1 Ne midtavak si Job te,
JOB 19:2 “Sengemenu keluǥayad is kebpeentusa wey kebpesekiti niw kediey pinaaǥi te menge lalag niw?
JOB 19:3 Kepipira ad keniyu insultuwi. Wazè kew meeled is edezaat kedì.
JOB 19:4 Emun tutuu he nekesalà a ne kediey en heeyan he prublima.
JOB 19:5 Mid-isip niw he metazeng kew kediey, ed-isipen niw he is kebpekesaǥad ku te elentusen tuus he nekesalà a.
JOB 19:6 Piru Megbevayà is mibaal kayi te kediey. Iyan sikandin nenlitag diyà te peliǥuy ku.
JOB 19:7 “Nengumew a is ebuyù te tavang, piru wazà midtavak kedì. Mibuyù a te hustu he kukuman, piru wazà mibeǥey kayi kedì.
JOB 19:8 Mid-elangan te Megbevayà is beyeey ku su wey a kenà mekevayà. Midtembunan din te merusirem is beyeey ku.
JOB 19:9 In-awè din is meupiya he zengeg ku.
JOB 19:10 Ibpaantus e zin minsan hendei a edlingì, nepurung ad meverengbeng te kemeresayan, ne henduen be te ebpatey ad. In-awè din is perateng ku te meupiya iring te kayu he mibazut.
JOB 19:11 Utew e zin nepeuki, ne ed-isipen e zin he sevaha te menge kuntada zin.
JOB 19:12 Henduen be te impesurung e zin te menge sundaru. Ne edliǥuyan dan is tulda ku.
JOB 19:13 “Impepelaǥuy zin puun kayi te kedì is menge kezuzumahi ku. Is menge kilala ku ne meziyù en kayi te kedì.
JOB 19:14 Wazè en is menge etew he uvey kayi te kediey. Midlipatan ad te menge kilala ku.
JOB 19:15 Mid-isip a he langyew te menge meǥeliyug ku wey menge suluǥuen ku he menge vahi. Lumelengyawà is ked-ahaa zan kedì.
JOB 19:16 Emun ebpengumew a te suluǥuen, ne wazà edtavak kedì, minsan ebpehizuhizu ad.
JOB 19:17 Egkemehuan te ǥehinawa ku is esawa ku, ne igkeremerik a te menge suled ku he maama.
JOB 19:18 Minsan is dezeisey pa he menge vatà edsudì kedì. Emun egkeehè e zan, ed-engitan e zan.
JOB 19:19 Ingkeremerik a te langun duen te utew ku menge emiǥu. Mid-iniyuǥan a te menge mahal ku.
JOB 19:20 Henduen a te tulan dà he nevukusan te lundis, ne henduen be te ebpatey ad.
JOB 19:21 “Kehizuwi a keniyu, te menge emiǥu ku, su edresayen a te Megbevayà.
JOB 19:22 Maan is edresayen a keniyu iring te ebeelan kediey te Megbevayà? Kurang pe be is kebpeentusa niw kediey?
JOB 19:23 Deyzey pezem ke insurat diyà te libru is mibpengaǥi ku,
JOB 19:24 emun kenà, ne impurung isilsil ziyà te vatu wey kenà mepanas taman te taman.
JOB 19:25 “Piru netuenan ku he is uuyag he Megbevayà iyan edlavan kedì, ne egkeuma is timpu keuzemà te kebpekeuma zin dini te tanà te kedlavan kedì.
JOB 19:26 Minsan egkeredak en is lundis ku wey ed-awà ad kayi te lawa ku, ne egkeehè ku gihapun is Megbevayà.
JOB 19:27 Menge mata ku mismu is ebpekaahà kandin. Ne megeget ku en sikandin. Utew zekelà is tinguhè ku he meehè ku sikandin.
JOB 19:28 “Emun ibpelaus niw is hukum niw he iyan impekebmereǥen ku is tenged te salè ku,
JOB 19:29 ebpekeuma ziyà te keniyu is mekahandekhandek he silut te Megbevayà. Uya, edsilutan kew zin tenged te pauk din. Ne zutun egketuenan niw he edhukuman kew te Megbevayà.”
JOB 20:1 Ne midtavak si Zofar is tig-Naama te,
JOB 20:2 “Kinahanglan he edtavak a su henduen be te kenà ebpeketanà is gehinawa ku.
JOB 20:3 Midawey ka kedì duma is ked-insultu, ne midsuǥù a te isip ku te kedtavak kenikew.
JOB 20:4 Siguradu netuenan nu he puun pa te nehuna he timpu, zutun te kedlimbaǥa te etew kayi te seled te kelibutan,
JOB 20:5 ne edlavey zà is kelipey te lalung he etew. Uya, kenà egkeuǥet is kelipey te etew he wazà medtuu te Megbevayà.
JOB 20:6 Minsan utew subra is kebpelavew zin, su henduen te ebpekeume en diyà te menge ǥapun,
JOB 20:7 egkahanew sikandin te wazà pidtemanan iring te tai zin. Is nekekilala kandin egkeinuinu ke hendei en sikandin.
JOB 20:8 Egkahanew sikandin iring te teǥeinep wey iring te egkelewasan ke mezukilem, ne kenè en sikandin egkaahà.
JOB 20:9 Kenè en sikandin egkaahà te nekekilala kandin, ne wazè en diyà te lugar he ubpeey zin te nehuna he timpu.
JOB 20:10 Is menge anak din iyan ebayad diyà te menge pubri te tinakew zin diyà te kandan.
JOB 20:11 Ebpatey sikandin ne igkeleveng he vetan-en wey mezesen pa.
JOB 20:12 “Is kebaal te mezaat iring te kegkaan te meemis diyà te vèbà,
JOB 20:13 ne ebpekeuǥeten is kebpurunga kedsepsepaa kayi su wey mepurung meǥezam is taam din.
JOB 20:14 Piru kebpekeuma kayi ziyà te ǥetek din ne ebmepezes heini ne edhilu iring te hereg te uled.
JOB 20:15 Iring te keenen he egkeutà, egkeutà te lalung he etew is tinakew zin. Minsan diyè en heini te ǥetek din ne ibpeuta heini kandin te Megbevayà.
JOB 20:16 Iring sikandin te edsupsup te hereg te uled he iyan ibpatey zin.
JOB 20:17 Kenè din en egkeǥezaman is taam te zekelà he lana, gatas wey teneb, he henduen be te edtudà he zezeisey wey zezekelà he menge wahig.
JOB 20:18 Kenà sikandin ebpekezawat te veǥas te kedhaǥù din. Kenà sikandin ebpekelipeylipey pinaaǥi te ketiǥeyunan din.
JOB 20:19 Su midaagdaag din is menge pubri wey mibey-anan din is ebpemenlised. Mid-angken din is menge valey he kenà kandin.
JOB 20:20 Minsan dekelà is azen din tenged te kebpeleleǥed din ne kenà sikandin egkeperahan. Ne kenà ebpekelibri kandin is langun he egkesuatan din.
JOB 20:21 Wazè en egkesamà diyà te kandin he egkekaan din, su egkahanew is ketiǥeyunan din.
JOB 20:22 Dutun te timpu he zekelà is azen din, egkeumahan sikandin te kelised. Utew subra he elentusen is ebpekeuma ziyà te kandin.
JOB 20:23 Edhentayen sikandin te Megbevayà te kemeresayan. Ibpeǥezaman kandin te Megbevayà is dekelà he pauk din, ne ebpeuzanan din te silut.
JOB 20:24 Minsan egkelikayan din is putew he ǥumaan, egketiyuk gihapun sikandin te brunsi he vesut te panà.
JOB 20:25 Egketiyuk is epezu zin, ne edlehusan dutun te vesut is lawa zin. Ne utew sikandin egkahandek.
JOB 20:26 Egketazin diyà te utew merusirem is ketiǥeyunan din. Ne ebinsulan sikandin wey is langun he nesamà diyà te ubpeey zin te hapuy he kenà etew is edretem duen.
JOB 20:27 Ibpezayag te langit is salè din ne edtistiǥus is tanà kuntra kandin.
JOB 20:28 Egkaanud te zalem is baley zin dutun te andew te kebpeǥezama kandin te Megbevayà te pauk din.
JOB 20:29 Iyan heeyan egkepeveyaan te lalung he etew he imbanglis te Megbevayà kandin.”
JOB 21:1 Ne midtavak si Job te,
JOB 21:2 “Purungi a keniyu pemineǥa su wey a keniyu melipey.
JOB 21:3 Pemineg kew emun egkaǥi a, ne emun ebpekepasad ad, ne sudia ad keniyu ke iyan egkesuatan niw.
JOB 21:4 Kenà a ziyà edriklamu te etew, kekenà, diyà a edriklamu te Megbevayà. Iyan heini hinungdan ke maan is melemu a egkepauk.
JOB 21:5 Tengtengi e man keniyu, ne siguradu egkesabpeng niw is bèbè niw te kegkeinuinu niw te nehitavù kedì he henduen te kenà egketuuwan.
JOB 21:6 Emun ed-isipen ku is nengehitavù kedì, ne egkerkeren a te kegkahandek ku.
JOB 21:7 “Maan is ebpedayun is kegkeuyag-uyag te lalung? Ebmemeǥurang sikandan wey ebmeuswaǥen.
JOB 21:8 Ne egkeehè dan pa is kedezekelà te menge anak dan wey menge apù dan.
JOB 21:9 Ne ebpekeubpè pa sikandan diyà te menge valey zan he wazà kezeetan wey wazè dan igkahandek, ne wazà sikandan siluti te Megbevayà.
JOB 21:10 Kenà edsalang ed-anak is menge vaka zan wey kenè daan egkengerenranan.
JOB 21:11 Henduen be te menge kerehidu is menge anak dan su mahabet. Edsesayew zan,
JOB 21:12 egkanta, wey edlilipeylipey te tukar te tamburin, alpa, wey pulalà.
JOB 21:13 Ebpengungubpaan sikandan he meuswaǥen wey ebpemematey zan he melinawen.
JOB 21:14 Piru egkeǥiyan dan is Megbevayà te, ‘Bey-ani key en kenikew! Su wazè key medtinguhà he metueni zey is menge paaǥi nu.
JOB 21:15 Hentei ke man is egngezanan he Mekeǥeǥehem? Maan is ereg ka he edsilbiyan dey? Ne hengkey is egkekuwa zey emun ed-ampù key ziyà te kenikew?’
JOB 21:16 Piru is tutuu, is ked-uswag dan ne kenà tenged te keugelingen dan he kedhaǥù. Umbe kenè ku ebpemineǥen is sambag kayi te lalung he menge etew.
JOB 21:17 “Piru zeisey zà kandan te menge lalung is ebpematey. Mezelag dà sikandan ebpekesaǥad te kelised etawa silut he ebpeseǥazan te Megbevayà kandan tenged te pauk din.
JOB 21:18 Mezelag dà sikandan edsegseǥa iring te reǥami etawa ukap he idlayap te mevandes he keramag.
JOB 21:19 Egkaǥi kew te emun kenà sikandan edsilutan te Megbevayà, iyan din edsilutan is menge anak dan. Piru iyan kedì he egkekaǥi is: iyan ereg he edsilutan te Megbevayà is nekesalà, su para meseǥazi zan
JOB 21:20 wey meǥezamgezam dan is kegkezeeti kandan. Belaǥad en ke egkeǥezaman dan is pauk te Mekeǥeǥehem he Megbevayà.
JOB 21:21 Emun ebpatey zan en ne wazè dan en hanew te egkehitavù te pemilya zan.
JOB 21:22 “Egkepenurù be te etew is Megbevayà te iyan man sikandin kes meghuhukum te minsan menge lavew he ilengiten he linimbag?
JOB 21:23 Duen menge etew he nemematey he zekelà is azen dan wey eyehey is kebpekesavuk dan,
JOB 21:24 wey meupiya is kedlelawa zan.
JOB 21:25 Ne zuen daan menge etew he nemematey he utew subra is seeng dan, wey wazà mekeǥezam te meupiya he kebpengungubpaan.
JOB 21:26 Piru ebpeked-iring dan dà su pudu zan idleveng wey pudu egkeena te tagkey.
JOB 21:27 “Netuenan ku ke hengkey is ed-is-isipen niw. Netuenan ku is paaǥi niw te kebaal te mezaat he ebpekesuǥat kedì.
JOB 21:28 Edtudtulan a keniyu mehitenged te sepian he menge etew he nengerundus is menge valey zan tenged te kelelalung dan.
JOB 21:29 Piru insai niw is sumeseǥazà, wey pemineǥa niw is ebpengeǥiyen dan. Su edtudtulan kew zan
JOB 21:30 he minsan is lalung he menge etew, egkelibri emun ebpekeuma is bangkit tenged te pauk te Megbevayà.
JOB 21:31 Wazà etew he ibpeǥawaǥawa zin is kedewaya zin te lalung he etew. Wazà daan etew he ebales kandin te mezaat he vaal zin.
JOB 21:32 Emun igkeleveng en sikandin, duen pa vantey he ebantey te leveng din.
JOB 21:33 Mahabet is eduyug kandin, ne is tanà ebeǥey kandin te egkehimelayan din.
JOB 21:34 “Umbe kenà egkehimu he egkelipey a pinaaǥi te menge lalag niw he wazè din pulus. Kenà tutuu is ebpengeǥiyen niw.”
JOB 22:1 Ne midtavak si Elifaz is tig-Teman te,
JOB 22:2 “Hengkey ves is igketavang te etew ziyà te Megbevayà? Minsan is metau he etew, kenà ebpeketavang kandin.
JOB 22:3 Egkepenunuat nu ve is Mekeǥeǥehem he Megbevayà emun metazeng ka? Duen be egkekuwa zin diyà te kenikew emun wazà igkesawey kenikew?
JOB 22:4 Edewayen ka wey edhukuman te Megbevayà kenà tenged te kedtehuza nu kandin,
JOB 22:5 kekenà, tenged te utew en subra is kelelalung nu ne kenè ke en ed-engked he ebaal te salà.
JOB 22:6 Egkuwaan nu is bisti te iring nu he etew su ibpesandè nu tenged te utang din kenikew.
JOB 22:7 Wazè nu veǥayi te wahig is egkemezahan, wey wazè nu veǥayi te keenen is egkevitil.
JOB 22:8 Egemiten nu is kegkemekeǥeǥehem nu wey is kezekelà te zengeg nu wey ka mekaangken te tanà.
JOB 22:9 Emun ebpekitavang diyà te kenikew is balu he menge vahi, ibpeulì nu sikandan he wazè dan uwiten. Wey elin daan is menge ilu wazè nu purungi etura.
JOB 22:10 Iyan heeyan hinungdan ke maan is ebpeliǥuyan ka te menge litag, wey egkeumahan ka te egketik-ew he kegkahandek.
JOB 22:11 Umbe, egkerusireman ka ne kenè ke en ebpekaahà, wey egkelapew ke en te zalem.
JOB 22:12 “Is Megbevayà, ne ziyà te kinetikangan he langit, lavew pa te kinetikangan he menge vituen.
JOB 22:13 Umbe, egkaǥi ka te, ‘Wazà metueni te Megbevayà is ebeelan ku. Ne kenè e zin egkehukuman su neelangan sikandin te kivel.
JOB 22:14 Netembunan sikandin te mekepal he menge ǥapun, umbe kenè kiw zin egkaahà ke edhiphipanew sikandin diyà te zivavew te langit.’
JOB 22:15 “Ebpedayun ke ve he ed-ikul te vetasan he neuǥet en he edsunuzen te lalung he menge etew?
JOB 22:16 Nepenggevuan is untung dan; iring sikandan te pundasyun te valey he naanud te zalem.
JOB 22:17 Migkeǥiyan dan is Mekeǥeǥehem he Megbevayà te, ‘Bey-ani key en kenikew! Su wazè nu egkehimu kayi te kenami!’
JOB 22:18 Piru iyan is Megbevayà mibpenù te menge valey zan te meupiya he menge vutang. Umbe emun duen idsambag kayi te lalung he menge etew, ne kenè ku ebpemineǥen.
JOB 22:19 “Emun egkaahà te metazeng wey wazà mekesalà he menge etew is kegkezeeti te lalung he menge etew, egkelipey zan wey ed-engitan dan sikandan.
JOB 22:20 Ke sikandan te, ‘Nezeetan is menge kuntada tew, ne migkaan te hapuy is ketiǥeyunan dan.’
JOB 22:21 “Job, pesakup ka te Megbevayà wey pekidhusey ka kandin su wey ke zin penubtuvazi.
JOB 22:22 Dewata nu is menge penurù din wey tepiza nu ziyà te ǥehinawa nu is menge lalag din.
JOB 22:23 Emun ebpekid-uliey ka te Mekeǥeǥehem he Megbevayà, wey id-awè nu is kelelalung he ziyà te pemilya nu, ne idlikù din is meupiya he kebpekesavuk nu.
JOB 22:24 Kenè nu dekelaa ziyà te ǥehinawa nu is ketiǥeyunan nu, kekenà, isipa nu is menge vulawan nu he wazà utew pulus su iring dà te pantad etawa menge vatu ziyà te wahig.
JOB 22:25 Ne iyan egkehimu he ketiǥeyunan nu is Mekeǥeǥehem he Megbevayà. Iring sikandin te waǥas he vulawan wey selapì para kenikew.
JOB 22:26 Ne zutun egkeǥezaman nu is kelipey he ebpuun diyà te Mekeǥeǥehem he Megbevayà, ne kenè ka egkeeled he ed-uvey ziyà te kandin.
JOB 22:27 Ampù ka ziyà te kandin ne ebpemineǥen ke zin, wey tumana nu is menge saad nu ziyà te kandin.
JOB 22:28 Ne ke hengkey is ebpelenuwen nu te ebaal ne egketuman heini, wey ebmerayag is beyeey nu.
JOB 22:29 Emun duen etew he edluyahan, ne emun id-ampù nu ziyà te Megbevayà he lig-eni sikandin, ne edtevangan din haazà is etew.
JOB 22:30 Minsan is menge etew he ebpekesalà, edlibriyen din pinaaǥi te ketazeng nu.”
JOB 23:1 Ne migkaǥi si Job te,
JOB 23:2 “Taman en guntaan utew meveǥat is riklamu ku. Impaantus a utew te Megbevayà ne utew ad ebpekezag-es.
JOB 23:3 Angin pezem ke netuenan ku ke hendei ku sikandin ebpen-ahaa; angin ke ebpekehendiyà a te ed-ubpaan din,
JOB 23:4 su egkeǥiyen ku ziyà te kandin is kasu ku wey is ketezengan ku.
JOB 23:5 Egkesuat a he metueni ku is idtavak din kedì, wey egkesuat a ke mesavut ku is egkeǥiyen din.
JOB 23:6 Ebpekiberawè be sikandin kedì pinaaǥi te ǥehem din? Simpri kenà! Su ebpemineǥen din is egkeǥiyen ku.
JOB 23:7 Is metazeng he etew iring kedì, ne ebpekepengetezengan diyà te etuvangan te Megbevayà he Meghuhukum ku ne edlibriyen e zin taman te taman.
JOB 23:8 “Mibpen-ehè ku is Megbevayà diyà te peliǥuy: edsilaan, edsenlepan, dizaya, wey zivavà, piru wazè ku sikandin maahà.
JOB 23:10 Piru netuenan din is menge vaal ku. Emun egkeǥezaman e zin en, egkeǥiyen din he lumpiyu a iring te lunsey he vulawan.
JOB 23:11 Mid-ikul ku is menge paaǥi zin ne wazà a medsuwey kayi.
JOB 23:12 Layun ku edtumana is suǥù din, wey edtipiǥan ku heini kayi te ǥehinawa ku.
JOB 23:13 Piru ebayàbayà is Megbevayà ke hengkey is ebeelan din; wazà ebpekevelavag kandin. Ebeelan din is egkesuatan din te ebaal.
JOB 23:14 Umbe, edhimuwen din is pelanu zin he iyan ebeelan din kayi te kedì, ne mahabet is pelanu zin mehitenged kedì.
JOB 23:15 Umbe, egkahandek a kandin. Emun ed-isipen ku heini, ne utew subra is kegkahandek ku.
JOB 23:16 Midhimu te Megbevayà he Mekeǥeǥehem he luyahi a wey mahandek a.
JOB 23:17 Piru wazà a med-engked he ebpengetezengan minsan henduen be te netembunan ad te kerusireman.
JOB 24:1 “Maan is wazà teleena te Mekeǥeǥehem he Megbevayà is timpu te kedhukumi zin te lalung he menge etew? Maan is wazà mekaahà is menge migkilala kandin dutun te timpu te kedhukum?
JOB 24:2 Ebpenakew te tanà is lalung he menge etew pinaaǥi te kedhelina zan te simintu. Ebpenakew zan te menge uyaǥen ne idtampu zan heini ziyà te kandan he menge uyaǥen.
JOB 24:3 Edtekawen dan is asnu te menge ilu, wey egkuwaan dan is baka te valu he vahi su ibpesendaan dan is utang din.
JOB 24:4 Edèdaaǥen dan is menge pubri, umbe nepeǥes is menge pubri te ked-eles.
JOB 24:5 Iring dan te leew he asnu he ebpen-ahà te egkeenen dan diyà te sibsivayan. Ne wazè en duma he inged he egkepengahaan dan te ibpekaan dan te menge anak dan.
JOB 24:6 Ebpekirarew zan te menge abut te pinemula, ragkes en is diyà te menge pemuleey te paras te lalung he menge etew.
JOB 24:7 Egkeǥenew sikandan emun edlipezeng dan ke mezukilem, su wazè dan malung wey visti.
JOB 24:8 Egkahames dan te uzan he edtanà diyà te menge vuvungan, ne egkeenget dan diyà te sihung te menge vatu su wazà duma he egkehelungan dan.
JOB 24:9 “Emun ebpekeutang is balu wey pubri he vahi, anak din is ibpevayad kandin te lalung he menge etew.
JOB 24:10 Edhipanew is menge pubri he wazè dan bisti; ibpepeniang sikandan te rinaǥun he trigu, piru wazà kandan he egkekaan.
JOB 24:11 Ibpekeres sikandan te ulibu wey paras piru egkengemezahan dan.
JOB 24:12 Egkezineg diyà te inged is dag-es te menge edserupatey wey is kebuyù te tavang te negerebiyan te palì, piru wazà belesi te Megbevayà is mibaal te mezaat diyà te kandan.
JOB 24:13 “Duen menge etew he ebpekigkuntada te kerayag. Wazè dan medhipanew ziyà te kerayag wey wazè dan mesavut heini.
JOB 24:14 Is memumunù edsayu ed-enew su edhimetayan din is pubri, ne emun mezukilem ebpenakew sikandin.
JOB 24:15 Is ebpengumpadi te zuen din esawa edtaǥad he ebmerusirem su para kenà maahà. Edtembunan din is buked din su wey kenà mekilala.
JOB 24:16 Emun mezukilem edseled is menge tekawen diyà te menge valey, piru emun maandew ed-eles sikandan, su edlikayan dan is kerayag.
JOB 24:17 Ed-isipen dan he merayag is merusirem, su iyan dan utew egkesuati is mekahahandek he kerusireman.
JOB 24:18 “Piru kenà egkeuǥet is lalung he menge etew, iring sikandan te dìdì te wahig. Is tanà he ǥaked dan edrewakan te Megbevayà. Umbe wazà edhendutun minsan diyà te pemuleey zan te paras.
JOB 24:19 Iring te egkereney is ayis ne egkahanew emun meinit wey ǥulavung, is menge mekesesalà, egkahanew zaan kayi te kelibutan.
JOB 24:20 Kenè en sikandan egketenuzan, kekenà, egkelipatan en sikandan minsan te iney zan. Egkeenen sikandan te tagkey, ne edezeetan sikandan iring te kayu he midtamped.
JOB 24:21 Su wazè dan purungi is menge vahi he kenà ebpekaanak. Wey wazè dan kegkehizu te valu he menge vahi.
JOB 24:22 “Pinaaǥi te ǥehem te Megbevayà edezeetan din is gehemanen he menge etew. Minsan melig-en sikandan, piru kenà siguradu he layun meupiya is ked-ubpè dan.
JOB 24:23 Egkehimu he idtuǥut te Megbevayà he dezeyaan is ked-ubpè dan, piru ebentayan te Megbevayà is langun he waleng dan.
JOB 24:24 Ed-uswag sikandan seled te mevavà he timpu, ne kenà egkeuǥet egkahanew sikandan iring te vulak he egkeǥangu etawa pungu he edlegtayen.
JOB 24:25 Emun kenà hustu heini is egkeǥiyen ku, hentei is ebpekepengintutuu he midtarùtarù a? Hentei is ebpekekaǥi he sayep a?”
JOB 25:1 Ne midtavak si Bildad is tig-Shua te,
JOB 25:2 “Gemhanan wey telehuzen is Megbevayà. Edhimuwen din he melinew is langit he ginhedian din.
JOB 25:3 Egkevilang be is menge sundaru zin? Duen be lugar he wazà meteyawi te kerayag din?
JOB 25:4 Ebmenmenuwen te egkaǥi te etew he metazeng sikandin diyà te etuvangan te Megbevayà? Duen be etew he lumpiyu?
JOB 25:5 Emun minsan is bulan wey menge vituen kenà merayag is ked-ahaa zin duen,
JOB 25:6 iyan pe be is etew he utew minus is bali zin su iring dà te tetaru.”
JOB 26:1 Ne midtavak si Job te,
JOB 26:2 “Kunaan nu vuwa ke netevangan a kenikew is meluya wey wazà egkehimu.
JOB 26:3 Kunaan nu vuwa ke nesembaǥan a kenikew is kenà metau pinaaǥi te zekelà he ketau nu.
JOB 26:4 Hendei ves ebpuun is mibpengaǥi nu? Hentei ki mulin-ulin is mibpenurù kenikew te kegkaǥi kayi?
JOB 26:5 “Egkerkeren te kegkahandek is menge minatey ziyà te nesevukan dan he ziyà te zizalem te wahig.
JOB 26:6 Wazà mekeeles diyà te Megbevayà is lugar te menge minatey. Wazà ebpeketambun te lugar te kezeetan.
JOB 26:7 Indempas te Megbevayà is dizaya he langit diyà te mehiǥawan he lugar, ne insavuk din is kelibutan diyà te kawangkawang.
JOB 26:8 Edtengesen din is uzan te mekepal he ǥapun, ne wazà mebensì is gapun minsan meveǥat haazà.
JOB 26:9 Edtembunan din te ǥapun is anlag te vulan.
JOB 26:10 Midhimu zin is henduen be te midtelevukaayan te langit wey zaǥat, he iyan taltal te kerayag wey kerusirem.
JOB 26:11 Emun edawey sikandin egkengehuyung is menge tukud te langit.
JOB 26:12 Tenged te ǥehem din egurigawen din is daǥat, ne pinaaǥi te ketau zin midèdeetan din is dragun he si Rahab.
JOB 26:13 Tenged te kedhiyup din mibmetingew is langit, ne pinaaǥi te ǥehem din midhimetayan din is edagmang he dragun.
JOB 26:14 Heini zeisey zà he menge vaal he mibeelan din. Igkepetug-iring dà heini te naasnaas he nezineg ta. Ne ǥuntaan hentei man is ebpeketegkad te kegkemekeǥeǥehem te Megbevayà?”
JOB 27:1 Impelaus ni Job is menge lalag din te,
JOB 27:2 “Duen ibpenangdù ku ziyà te uuyag wey Mekeǥeǥehem he Megbevayà. Minsan wazà sikandin mebeǥey kedì te hustu he kukuman wey minsan mibpeǥezam kedì te mesakit he ǥehinawa,
JOB 27:3 iyan penangdù ku is: mintras egeǥehinawa e pa, ne idtuǥut pa kedì te Megbevayà is kegkeuyag-uyag,
JOB 27:4 ne kenà a egkaǥi te mezaat wey kenà a edtarùtarù.
JOB 27:5 Kenà a ebpengumbenar keniyu. Idliet ku te egkaǥi he wazè ku salà taman te ebpatey a.
JOB 27:6 Edtindeǥan ku he metazeng a, ne kenè ku heini ed-engkezan. Mintras uuyag e pa ne kenè ku ed-isipen he mekesesalà a.
JOB 27:7 “Deyzey ke edsilutan te Megbevayà is mibpekigkuntada kedì te silut he ereg he idsilut te lalung he menge etew.
JOB 27:8 Ebmenmenuwen te Megbevayà te kegkehewi a zin te untung te etew he wazà medtuu kandin?
JOB 27:9 Ebpemineg be is Megbevayà te kebuyù din te tavang emun egkeumahan sikandin te kemereǥenan?
JOB 27:10 Igkelipey zin be vuwa is Mekeǥeǥehem he Megbevayà? Ebpengumew-umew ve sikandin te Megbevayà seled te langun he timpu?
JOB 27:11 “Ebpenuruen ku sikiyu mehitenged te ǥehem te Mekeǥeǥehem he Megbevayà. Egkeǥiyen ku ziyà te keniyu is menge paaǥi zin.
JOB 27:12 Piru sikiyu is langun netau kayi. Ne maan is migkaǥi kew kayi te kediey te wazè din pulus?
JOB 27:13 “Iyan heini egkeulaula he inteǥana te Megbevayà he Mekeǥeǥehem diyà te lalung wey mesipala he etew.
JOB 27:14 Is lalung he etew, minsan mezakel is menge anak din, is duma kandan, ebpatey te tebek etawa vitil.
JOB 27:15 Is egkesamà kandan he uuyag ne ebpatey te zaru, ne wazà edlalew mehitenged te kebpatey zan, minsan is menge esawa zan.
JOB 27:16 “Minsan edtiǥum is lalung he etew te zekelà he selapì wey visti,
JOB 27:17 kenà heini ebpulus diyà te kandin. Is metazeng wey wazà mekesalà he menge etew iyan ebpekesul-ub te visti te lalung he etew, ne ebehinen dan is selapì din.
JOB 27:18 Is baley he ebengunen din iring keǥevù te valey te kelelawà etawa vuǥawan diyà te pemuleey.
JOB 27:19 Ebpurung edrerey-as is sepian, piru kegkepukew zin ne egkahanew en is langun he ketiǥeyunan din.
JOB 27:20 Ebpekeuma ziyà te kandin is kegkahandek he iring te zalem he ed-anud kandin ke mezukilem.
JOB 27:21 Idlayap sikandin te keramag he ebpuun diyà te edsilaan, ne egkaawà sikandin diyà te ubpeey zin.
JOB 27:22 Henduen be te kenè en heini egkehizu he edhiyup kandin te ebpenigudu para mekelingkawas.
JOB 27:23 Ebpelakpak wey ebpemunsuwit te kedsudia kandin su naawà sikandin diyà te ubpeey zin.
JOB 28:1 “Duen menge minahan he zutun egketuredu is menge pelata, wey zuen menge lugar he zutun edtunawa is menge vulawan.
JOB 28:2 Is putew egkekuwa puun te tanà, ne is brunsi edtunawen puun te vatu.
JOB 28:3 Egamit is menge etew te sulù su para kenà sikandan merusiremi is egkalut diyà te utew zizalem he vahin te tanà. Egkalut dan te menge vatu ziyà te kinezizeleman.
JOB 28:4 Egkalut dan te veyeey ziyà te minahan, diyà te lugar he wazà ubpai wey wazà beyai te menge etew. Ebpenaug dan pinaaǥi te menge pisì he edsayugsayug.
JOB 28:5 Diyà te zivavew he tanà edtuvù is menge pinemula he ebpuunan te keenen, piru ziyà te zizalem kayi henduen be te mibpurma te hapuy.
JOB 28:6 Is menge vatu zutun duen menge sapiru ne is eliyavuk dutun duen menge vulawan.
JOB 28:7 Is menge veyeey pehendiyà te minahan, wazà maahà te menge uwak etawa menge banug,
JOB 28:8 wey wazà egkeveyaan dutun te zumezaas he menge langgam etawa erimaung.
JOB 28:9 Egkeluten te menge etew is kinezesenan he menge vatu minsan diyà te zizalem he vahin te menge vuntud.
JOB 28:10 Ebudsiyan dan is dezekelà he menge vatu, su para zuen dan egkeveyaan, ne egketuredu zan is nekedseselekawà he klasi te mahalen he menge vatu.
JOB 28:11 Egkalut dan te ebpuunan te menge wahig, ne ed-uwiten dan diyà te merayag is nekeeles dutun he menge ketiǥeyunan.
JOB 28:12 “Piru hendei ves egkaahà is ketau wey kedsavut?
JOB 28:13 Wazà metueni te etew ke hendei heini egketuredu. Kenà heini egketuredu kayi te kelibutan.
JOB 28:14 Kenà daan heini egketuredu minsan diyà te kinezizeleman te zaǥat.
JOB 28:15 Kenà heini egkepemasa te vulawan etawa selapì.
JOB 28:16 Kenà ebpekerepeng te vali kayi is bali te lunsey he vulawan etawa mahalen he menge vatu he uniks wey sapiru.
JOB 28:17 Lavew pa heini te vulawan etawa kristal. Kenà heini egkeliwaan te elahas he vulawan.
JOB 28:18 Is bali kayi lavew pa te vali te paǥang, haspi, etawa rubi.
JOB 28:19 Kenà heini egkerepengan te tupasyu he ebpuun diyà te Etiopia, wey kenà heini egkepemasa te lunsey he vulawan.
JOB 28:20 “Ne hendei ves egkaahà is ketau wey is kedsavut?
JOB 28:21 Wazà linimbag he egeǥehinawa he ebpeketuredu kayi minsan pa is menge tagbis.
JOB 28:22 Minsan diyà te lugar te kezeetan he iyan is lugar te menge minatey ne vinèbeelan dà he tudtul mehitenged kayi is nezineg diyà.
JOB 28:23 Megbevayè dà is netau ke hendei egketuredu is ketau.
JOB 28:24 Su egkeehè din is minsan diyà te utew meziyù he vahin te kelibutan, ne egkeehè din is langun diyà te sihung te langit.
JOB 28:25 Hein inhiyup din is keramag, wey hein midsukud din ke sengemenu kezekelà is uzan he ibpetanè din,
JOB 28:26 wey hein midisisyunan din ke hendei zin ibpetanà is uzan wey ke hendei zin ibpevayà is kilat he egkezumahan te ruǥung,
JOB 28:27 iyan haazà timpu te kebpaahaa zin te ketau wey is ikemahal kayi. Migezaman din heini ne nekeuyun sikandin.
JOB 28:28 Ne migkaǥi sikandin diyà te menge etew te, ‘Egkehimu he zuen niw ketau wey kedsavut emun edtehuzen niw is Nengazen wey edlikey kew te mezaat he ulaula.’ ”
JOB 29:1 Ne impelaus ni Job is menge lalag din,
JOB 29:2 “Angin pezem ke edlikù is nenlavey he menge andew he zutun ebentayan e pa te Megbevayà,
JOB 29:3 hein edteyawan din pa is ibayè ku zutun te kedhipanew ku ziyà te merusirem.
JOB 29:4 Dutun te timpu he meupiya pa is kebpekesavuk ku, iyan is Megbevayà utew ku emiǥu, ne edtuvazan din is pemilya ku.
JOB 29:5 Dutun he timpu ebpekiduma pa kedì is Mekeǥeǥehem he Megbevayà, wey zuma ku pa is menge anak ku.
JOB 29:6 Dutun he timpu is menge vaka ku nekeveǥey te utew zekelà he ǥatas, is menge ulibu ku nekeveǥey te utew zekelà he lana.
JOB 29:7 Emun edhendiyà a te pultahan te inged su edtampu a te ebpemendumala te inged dutun te kebmiting dan,
JOB 29:8 ebpekilid is betan-en he menge maama emun egkeehè e zan ne ebpemenhitindeg is menge meǥurang te kedtahud kedì.
JOB 29:9 Ebpereremek minsan is menge pengulu
JOB 29:10 wey dungganen he menge etew emun egkeehè e zan.
JOB 29:11 Is minsan hentei he nekaahà etawa nekezineg kedì he egkaǥi, edalig kedì.
JOB 29:12 Su edtevangan ku is menge pubri he mibpetavang kedì wey is menge ilu he wazà ebpeketavang kandan.
JOB 29:13 Ebpenubtuvazan a te edserupatey he menge etew he netevangan ku, wey nelipey is balu he menge vahi he netevangan ku zaan.
JOB 29:14 Layun ku edhimuwa is metazeng wey hustu; iring heini te visti wey tengkulu he idselu-ub ku.
JOB 29:15 Nehimu a he mata te etew he nelakap wey paa te etew he nepigket.
JOB 29:16 Nehimu a he amey te menge pubri; minsan is menge lumelengyawà, midtevangan ku te menge kasu zan.
JOB 29:17 In-awè ku is gehem te lalung he menge etew ne midlibri ku is menge mibiktima zan.
JOB 29:18 “Mid-isip ku he ebmeluǥayad is untung ku ne emun ebpatey ad egkeliǥuyan a te pemilya ku.
JOB 29:19 Wey mid-isip ku he egkeiring a te melig-en he kayu he nendalid diyà te wahig he layun egkezehemuǥi is menge subpang din.
JOB 29:20 Layun a edeliǥa te menge etew wey layun a melig-en.
JOB 29:21 Emun ebeǥey a te sambag ebpereremek is menge etew su ebpurung dan ebpemineg.
JOB 29:22 Emun ebpekepasad a he egkaǥi ne wazè dan en igkeuman su ereg en kandan is mibpengaǥi ku.
JOB 29:23 Ebpengenduyen dan is menge lalag ku iring te kebpengenduya zan te uzan. Utew zan heini egkesuati te ebpemineg.
JOB 29:24 Henduen be te kenè dan ebpeketuu emun egemenan ku sikandan; is melipayen he kedezagwey ku ebpekezasig kandan.
JOB 29:25 Ne iring a te pengulu su ebpenuruen ku sikandan te ereg he ebeelan dan. Ebpenguluwan ku sikandan te iring te kebpengulu te hadì te menge sundaru. Edlipayen ku sikandan emun egkeseeng dan.
JOB 30:1 “Iyan, guntaan edsudien a te menge etew he menge vetan-en pa kedì, he kenà egkeseriǥan is menge amey zan. Egkeseriǥan pa is menge asu ku he vantey te menge kerehidu ku.
JOB 30:2 Hengkey is egkekuwa ku puun kayi te menge etew he memeluya wey egkeveley?
JOB 30:3 Utew sikandan memeǥasà tenged te kewewezai wey kegkevitil zan. Ebpengamuy-amuy zà sikandan te egkekaan dan diyà te sibsivayan minsan mezukilem en.
JOB 30:4 Ebpemezuten dan wey egkeenen dan is ebpenuvù diyà te sibsivayan, minsan is meladsem he zalid te kayu he inibru.
JOB 30:5 Edsegseǥen sikandan pehendiyà te meziyù te menge emurè dan te inged, ne egkulehien sikandan he henduen be te menge tekawen.
JOB 30:6 Diyè dan dà ed-ubpà te menge zal-ug, diyà te vudsi te menge vatu, wey ziyà te menge vudsi te tanà.
JOB 30:7 Henduen sikandan te menge langgam he edtaul ziyà te ketelunan, ne edhahasekhasek sikandan diyà te lempek te zezeisey he kayu.
JOB 30:8 Wazè dan pulus wey wazà nekekilala kandan, ne midsegseg sikandan puun te tanè dan.
JOB 30:9 “Ne ǥuntaan edsudien a te menge anak dan pinaaǥi te kanta. Nehimu a he egkeengitan para kandan.
JOB 30:10 Igkelimezangi e zan wey edlikayan e zan. Ne kenè dan en egkenawànawà is ed-ileb te vuked ku.
JOB 30:11 Guntaan te ebpeluyahan a wey edresayen a te Megbevayà, ebeelan dan en is egkesuatan dan te ebaal kayi te kediey.
JOB 30:12 Edsurungen a kayi te wazà pulus he menge etew. Midlitaǥan dan is ebeyaan ku, wey edtinguhè dan te kedezaat kedì.
JOB 30:13 Ebelevaǥan dan is beyeey ku te kedezaat kedì. Mibmezeeǥen dan minsan wazà midtavang kandan.
JOB 30:14 Edsurungen e zan, iring dan te menge sundaru he ziyà mebayà te meluag he vudsi te migevà he verengbeng.
JOB 30:15 Utew subra is kegkahandek ku, wey naawà is dengeg ku wey ketiǥeyunan ku he iring te ǥapun he inlayap te mevandes he keramag.
JOB 30:16 Ne ǥuntaan henduen be te ebpatey ad; kenà egkeengked is kegkerasey ku.
JOB 30:17 Emun mezukilem ne ed-al-al is menge tulan ku; is mesakit he egkeǥezam ku kenà egkeengked.
JOB 30:18 Pinaaǥi te zesen te Megbevayà, mibpekel e zin. Migewezan din is lieg te kumbalè ku
JOB 30:19 ne intimbag e zin diyà te vasak. Ne neiring a te eliyavuk wey avu.
JOB 30:20 “Nengumew-umew a kenikew, Megbevayà, piru wazè ka medtavak. Midhitindeg a ziyà te etuvangan nu, piru wazà a kenikew seǥipaa.
JOB 30:21 Nehimu ka he mesipala kediey. Migamit nu is dekelà he ǥehem nu te kedrasey kedì.
JOB 30:22 Henduen be te ibpelayap a kenikew te keramag wey ibpevelvelikid a kenikew te vagyu.
JOB 30:23 Netuenan ku he ed-uwiten a kenikew ziyà te lugar te menge minatey, ziyà te lugar he inteǥana nu he egkepeveyaan te langun he etew.
JOB 30:24 “Wazà etew he mibpesipelahan ku he zuen din elentusen wey ebpehizuhizu tenged te kelised.
JOB 30:25 Ebpekesineǥew a ganì emun duen etew he edlised. Utew ku igkehizu is menge pubri.
JOB 30:26 Piru te kebperateng ku he meupiya is ebeelan kayi te kediey, mezaat hinuun is mibeelan kayi te kedì. Ebpen-ahà a te merayag piru kerusireman is nekeuma kayi te kedì.
JOB 30:27 Kenè en egkeengked is kesakit te ǥehinawa ku. Andew-andew is kebpekesaǥad ku te elentusen.
JOB 30:28 Mibmeitem is lundis ku kenà tenged te keinit te andew, kekenà, tenged te zaru. Midhitindeg a ziyà te kezekelan su ebpetavang a.
JOB 30:29 Is laǥeng ku henduen be te taul te leew he asu wey kegkaǥi te ekang.
JOB 30:30 Mibmeitem is lundis ku wey egkengepadpad is keǥang ku. Ne utew metikang is dateng ku.
JOB 30:31 Nehimu he mekeseseeng is daǥing te alpa ku wey pulalè ku.”
JOB 31:1 “Nenangdù a he kenè ku ebpezumahan te arig is kedtengteng ku te menge raǥa.
JOB 31:2 Su hengkey man is bales he ibeǥey te Mekeǥeǥehem he Megbevayà diyà te langit te ebeelan te etew?
JOB 31:3 Kenè be kezeetan wey vangkit is para te ebaal te mezaat?
JOB 31:4 Netuenan te Megbevayà is langun he ebeelan ku.
JOB 31:5 Emun midtarùtarù a wey nenlimbung a,
JOB 31:6 ne zeyzey ke edhukuman a te Megbevayà. Su egketuenan din emun ebpekesalà a.
JOB 31:7 Emun wazà a med-ikul te hustu he zalan su iyan ku mibpezumdumahan is iveg te menge mata ku, wey midremerikan ku is keugelingen ku,
JOB 31:8 deyzey ke egkengezeetan is menge pinemula ku etawa zeyzey ke zuma he etew is ebpekekaan kayi.
JOB 31:9 Emun netintal a te vahi etawa neeriǥan a te esawa te zuma ku he meǥinged,
JOB 31:10 deyzey ke egkuwaan etawa edhulizen te senge memaama is esawa ku.
JOB 31:11 Su is kebpekivahi, mekeeled-eled he salà, ne ereg he edsilutan is ebaal zuen.
JOB 31:12 Iring heini te hapuy he ebpekeigmuk su ebpekezezaat heini te langun he azen ku.
JOB 31:13 “Emun wazè ku veliya is ketenged te menge suluǥuen ku zutun te kedriklamu zan kayi te kedì,
JOB 31:14 hengkey is egkehimu ku emun edhukuman a te Megbevayà? Hengkey is idtavak ku ke ed-imbistigahan e zin?
JOB 31:15 Kenè be is Megbevayà he mibaal kedì iyan daan mibaal te menge suluǥuen ku?
JOB 31:16 “Emun wazà a medtavang te menge pubri wey valu he menge vahi he edlised,
JOB 31:17 wey mibpeleleǥed a te keenen diyà te menge ilu, deyzey ke edsilutan a te Megbevayà.
JOB 31:18 Piru puun pa te vatè e pa ed-eturen ku en is menge ilu; seled te tivuuk he untung ku wazè ku vey-ani is menge valu he vahi.
JOB 31:19 Emun duen etew he egkeehè ku he egkerasey te kegkeǥenew su kurang sikandin te visti,
JOB 31:20 ne ebeǥayan ku te visti he para te meǥenew he vineelan puun te vulvul te menge kerehidu ku. Ne ebpeselamat sikandin kayi te kedì te ebpuun diyà te ǥehinawa zin.
JOB 31:21 Emun mibpesekitan ku pinaaǥi te velad ku is ilu, su ǥeina te zuen ku ǥehem diyà te hukmanan,
JOB 31:22 ne zeyzey ke metamped is belad ku.
JOB 31:23 Kenè ku egkehimu heeyan he menge vaal su igkahandek ku is silut wey ǥehem te Megbevayà.
JOB 31:24 “Wazà a medsarig te ketiǥeyunan ku; wazè ku isipa he iyan heini ebpekeveǥey kedì te kesiguruwan.
JOB 31:25 Wazà a mebpegalbu tenged te zekelà he ketiǥeyunan ku wey te langun he menge azen he naangken ku.
JOB 31:26 Wazè ku ezapa is andew he merayag is kedsilè din wey is bulan he mekaayam-ayam is kedwaleng din.
JOB 31:27 Wazà mevulug metaǥù diyà te ǥehinawa ku is ked-azap kayi.
JOB 31:28 Emun tutuu he mibeelan ku heini he menge salà ne ereg a he edsilutan su midluivan ku is Megbevayà diyà te langit.
JOB 31:29 “Wazè ku ikelipey is kegkezeeti te menge kuntada ku etawa kebpekebmereǥen dan.
JOB 31:30 Wazà a mebaal te salà pinaaǥi te kedrewaki ku kandan.
JOB 31:31 Wazà nevitil ziyà te pemilya ku.
JOB 31:32 Wazè ku ikesuat ke minsan hendei zà duen mekehizeǥà is menge langyew su ebirtu is baley ku para kandan.
JOB 31:33 Wazè ku ieles is menge salè ku iring te ebeelan te zuma.
JOB 31:34 Wazà a mebpereremek dà wey med-eles tenged te kegkahandek te egkeǥiyen te menge etew.
JOB 31:35 “Emun duen pezem ebpemineg kedì! Guntaan, andam a he ebpirma te kemetuuzan he wazè ku salà. Emun duen igkesumbunga kedì te Mekeǥeǥehem he Megbevayà, egkesuat a he keǥiya zin kedì, ne emun kenà ne isurat din.
JOB 31:36 Su ibpikit ku heini ziyà te pemenayen etawa ziyà te ulu ku he iring te kuruna su ibpeehè ku he andam a he ed-etuvang kayi.
JOB 31:37 Egkeǥiyan ku is Megbevayà te langun he ebeelan ku. Ed-etuvang a ziyà te kandin he iring te pengulu he wazà meeled.
JOB 31:38 “Emun mezaat is kegemita ku te tanè ku etawa midtakew ku heini ziyà te zuma,
JOB 31:39 etawa mibeǥayan ku te mezaat he ǥehinawa is nemenerebahu ziyà te tanè ku su migkuwa ku is menge abut dan he wazè ku sikandan beyazi,
JOB 31:40 ne zeyzey ke iyan edtuvù diyà te tanè ku is dezeisey he kayu wey menge sagbet ne kenà iyan is trigu wey barli.” Kayi metapus is menge lalag ni Job.
JOB 32:1 Ne mid-engkezan en si Job te edtavak duen te tetelu he menge emiǥu zin, su midhitindeǥan man ni Job he wazè din salà.
JOB 32:2 Ne zutun, duen sevaha he etew he iyan ngazan din si Elihu. Anak sikandin ni Barakel he tig-Buz he kevuwazan te pemilya ni Ram. Nepeukan din si Job su wazà besula ni Job is keugelingen din, kekenà, iyan mibasul zin is Megbevayà.
JOB 32:3 Nepeukan din daan sikan is tetelu he emiǥu ni Job su kenè dan igkepeletew he nekesalà si Job ne nekeletew hinuun he iyan nekesalà is Megbevayà.
JOB 32:4 Midtaǥad si Elihu ke ebpekepasad he egkaǥi sikandan is langun ne human din egkeǥiyi si Job, su geina te meǥurang sikandan kandin.
JOB 32:5 Ne hein neehè din he wazè en egkekaǥi zuen te tetelu, ne utew sikandin nepauk.
JOB 32:6 Umbe, migkaǥi sikandin te, “Batè e pa ne meǥurang kew en mulà, umbe ebpeneǥana a he egkaǥi. Wazà a mebpeǥaruǥaru he egkaǥi ziyà te keniyu te netuenan ku.
JOB 32:7 Su neisip ku he iyan kew ereg he ebpenurù, su meǥurang kew en ne zekelè en is netuenan niw.
JOB 32:8 Piru iyan heini tutuu: Is mulin-ulin te Mekeǥeǥehem he Megbevayà he imbeǥey zin diyà te etew, iyan ebeǥey kandin te kedsavut.
JOB 32:9 Is kegkeǥurang ne kenà gerentiya he is sevaha he etew uluwanen wey metau te hustu.
JOB 32:10 Umbe, pemineǥa a keniyu. Egkeǥiyen ku is netuenan ku.
JOB 32:11 Midtaǥad a hein ed-isip-isip kew pa ke hengkey is ereg he egkeǥiyen niw. Mibpemineg ku is menge ketezengan niw.
JOB 32:12 Mibpurungan ku sikiyu pemineǥa, piru wazà minsan sevaha keniyu he nekepeletew he nekesalà si Job; wazè niw metavak is menge ketezengan din.
JOB 32:13 Kenè kew kaǥi te, ‘Nesavut dey he edhuna sikandin he metau kenami. Iyan en ibpetavak kandin is Megbevayà, ne kenà iyan is etew.’
JOB 32:14 Emun iyan a edlelisen ni Job, ne kenè ku sikandin edtevaken te iring te keniyu he kedtavak.
JOB 32:15 Guntaan nekepereremek kew ne wazè niw en egkekaǥi.
JOB 32:16 Kinahanglan pe be he edtaǥad a, te ǥuntaan mibpereremek kew en ne wazè niw en igketavak?
JOB 32:17 Duen daan egkeǥiyen ku; egkeǥiyen ku is netuenan ku.
JOB 32:18 Mezakel iyan is egkekaǥi ku, ne henduen be te kenè en heini egkeeǥen.
JOB 32:19 Iring a te veǥu he lundis he teleǥuey te vinu he nepurung mepenù he henduen be te ebensì en.
JOB 32:20 Ne kinahanglan he egkaǥi a su wey meterini is taǥù ku.
JOB 32:21 Wazà edepiǥan ku wey wazè ku edigdiǥen.
JOB 32:22 Wazà a melayam te kedigdig. Ne emun ebeelan ku heini, ne segugunà a edsiluti te Megbevayà he iyan mibaal kedì.”
JOB 33:1 “Guntaan, Job, purungi nu pemineǥa is langun he egkeǥiyen ku ziyà te kenikew.
JOB 33:2 Andam e en he egkaǥi ne ziyè en te purù te zilè ku is egkeǥiyen ku.
JOB 33:3 Egkaǥi a te ebpuun diyà te metazeng he ǥehinawa ku. Kenà duwazuwa is kegkeǥiya ku te netuenan ku.
JOB 33:4 Mulin-ulin te Mekeǥeǥehem he Megbevayà iyan mibaal kedì wey iyan mibeǥey kedì te untung.
JOB 33:5 Sevuta a kenikew ke egkehimu nu. Endama nu is menge ketezengan nu ne etuvanga a.
JOB 33:6 Iring a kenikew ziyà te etuvangan te Megbevayà. Mibpurma a zaan he ebpuun diyà te tanà.
JOB 33:7 Umbe, kenà a kenikew ikahandek wey kenè nu isipa he edèdaaǥen ku sikew.
JOB 33:8 “Nezineg ku is mibpengaǥi nu. Migkaǥi ka te,
JOB 33:9 ‘Wazè ku salà; lumpiyu a wey wazè ku salà.
JOB 33:10 Piru ebpen-ahaan te Megbevayà is hinungdan para ikepaantus e zin. Ed-isipen e zin he kuntada zin.
JOB 33:11 Egkedinahan din is menge paa ku; ebenteyanan din is langun he ebeelan ku.’
JOB 33:12 “Piru Job, nesayep ka zutun te migkaǥi nu. Kenè be lavew is Megbevayà te etew?
JOB 33:13 Ne maan is ed-ekusaran nu sikandin he wazè din pemineǥa is riklamu te etew?
JOB 33:14 Iyan heini tutuu, layun egkaǥi is Megbevayà, piru wazè dà heini metuusi te etew.
JOB 33:15 Ebpekidlalag sikandin pinaaǥi te teǥeinep dutun te egkehurep is etew ke mezukilem.
JOB 33:16 Ednaasnaas sikandin diyà te telinga zan te kebpaandam kandan, ne ingkahandek dan heini.
JOB 33:17 Ebeelan din heini su wey mekeengked is etew te kebaal te salà wey te kebpelavew,
JOB 33:18 ne para melibri sikandin te kemetayen.
JOB 33:19 Usahay ebmensuwen te Megbevayà is etew pinaaǥi te zaru he ebpekerasey kandin iring te kenà egkeengked he kebmesakit te menge tulan,
JOB 33:20 he ebpekaawà te ǥana zin te kegkaan minsan utew metaam he keenen.
JOB 33:21 Egasà sikandin, wey ebpenlepew is menge tulan din.
JOB 33:22 Meǥaan en sikandin ebpatey, meǥaan en edhendiyà te lugar te menge minatey.
JOB 33:23 “Piru emun duen sevaha zuen te linibu he menge velinsuǥuen he ebpeteliwazà diyà te pid-elangan dan te Megbevayà, he ebpetanudtanud kandin ke hengkey is hustu he ereg he ebeelan din,
JOB 33:24 egkehizuwan sikandin te Megbevayà. Egkaǥi is Megbevayà te, ‘Libriya sikandin te kemetayen. Su nekaahà a te idlekat kandin.’
JOB 33:25 Ne zutun edlikù is meupiya he kedlelawa zin. Ed-uman sikandin ed-enew he iring te vetan-en pa.
JOB 33:26 Emun ebpengemuyù sikandin diyà te Megbevayà edtevaken sikandin te Megbevayà. Melipayen is Megbevayà he edawat kandin ne idlikù te Megbevayà diyà te kandin is metazeng he kebpengungubpaan.
JOB 33:27 Ne egkeǥiyan din is menge etew te, ‘Nekesalà a; mibaal a te kenà hustu, piru wazè ku mezawat is silut te Megbevayà he ereg kediey.
JOB 33:28 Midlibri e zin te kemetayen, ne pedayun is kegkeuyag-uyag ku.’
JOB 33:29 “Uya, layun heini ebeeli te Megbevayà diyà te etew.
JOB 33:30 Edlibriyen din is etew te kemetayen su para meuyag heini.
JOB 33:31 Job, purungi a kenikew pemineǥa. Pereremek ke zà, ne vey-ani ad is egkaǥi.
JOB 33:32 Piru emun duen nu egkekaǥi ne kaǥi ka, su egkesuat a he metueni ku ke tutuu he wazè nu salà.
JOB 33:33 Piru emun wazè nu egkekaǥi, ne pereremek ka wey pemineǥa nu is ketau ku.”
JOB 34:1 Migkaǥi si Elihu te,
JOB 34:2 “Sikiyu is egkaǥi te uluwanen kew wey zekelà is netuenan niw, purungi a keniyu pemineǥa.
JOB 34:3 Su iring te egketuenan te zilà ke hengkey is metaam wey kenà metaam he keenen, is telinga egketau zaan ke hengkey is hustu etawa kenà hustu he menge lalag.
JOB 34:4 Umbe, edsevuten tew ke hengkey is hustu; ed-istudyuwan tew ke hengkey is meupiya.
JOB 34:5 Su migkaǥi si Job te, ‘Wazè ku salà piru wazà a beǥayi te Megbevayà te kukuman he kenà a egkevintahaan.
JOB 34:6 Minsan metazeng a, ed-isipen a he teruen. Minsan wazà salà he nehimu ku, mibeǥayan e zin te zaru he kenà egkeulian.’
JOB 34:7 “Wazà etew he iring ki Job te utew egkesuat he edsudien.
JOB 34:8 Metaam diyà te kandin is kebpekiduma te menge lalung wey mekesesalà he menge etew.
JOB 34:9 Su ke sikandin te, ‘Wazà egkekuwa te etew emun edtinguhà sikandin te kebpenunuat te Megbevayà.’
JOB 34:10 Umbe, pemineg kew kedì, sikiyu is egkaǥi he ebpekesavut kew. Kenà ebaal te mezaat is Mekeǥeǥehem he Megbevayà.
JOB 34:11 Ebelesan din is etew sumalà te vineelan din; edhimuwen din diyà te kandin is sungkad te vetasan te etew.
JOB 34:12 Kenà egkehimu he ebaal te sayep is Mekeǥeǥehem he Megbevayà. Kenè din ebulegkuen is hustu he kukuman.
JOB 34:13 Duen be midsuǥù kandin te kedumala te tivuuk he kelibutan? Wazà!
JOB 34:14 Emun egkesuat is Megbevayà he egkuwaan din is gehinawa he imbeǥey zin te etew,
JOB 34:15 ebpematey is langun he menge etew ne ebpekelikù dan diyà te tanà.
JOB 34:16 “Emun duen nu kedsavut, Job, pemineǥa nu is egkeǥiyen ku:
JOB 34:17 Ebpekezumala ve is Megbevayà ke kenè din egkesuatan is metazeng he kukuman? Maan is ed-isipen nu he mezaat is metazeng wey mekeǥeǥehem he Megbevayà?
JOB 34:18 Kenè be ke mezaat wey wazà pulus te menge hadì wey menge upisyal edewayen te Megbevayà sikandan?
JOB 34:19 Wazè din ibpelavi te menge pengulu; wazè din peburi is menge sepian lavew te menge pubri, su pudu zin sikandan linimbag.
JOB 34:20 Minsan is gemhanan he menge etew edtik-ew ebpatey ke mezukilem, he wazà etew he midhilavet kandan.
JOB 34:21 Ebpekeventayan te Megbevayà is langun he ebeelan te etew.
JOB 34:22 Wazà merusirem he lugar he egkehimu he ed-elesan te menge lalung.
JOB 34:23 Kenè en kinahanglan he edtewaǥen din pa is etew he medhendiyà te etuvangan din su ed-imbistigahan din su wey zin mehukumi.
JOB 34:24 Kenè en kinahanglan he ebpenginginsà sikandin ke ereg be he ibpaawà diyà te kegkelavew zan is gemhanan he menge etew ne ed-ilisan te zuma.
JOB 34:25 Su netuenan din is menge vaal zan, id-awè din is gehem dan wey edèdeetan din sikandan minsan mezukilem.
JOB 34:26 Edsilutan din sikandan diyà te etuvangan te menge etew tenged te kelelalung dan.
JOB 34:27 Ebeelan din heini su ǥeina te mid-engked sikandan he edsunud kandin, wey wazè dan seǥipaa is menge paaǥi zin.
JOB 34:28 Edèdaaǥen dan is menge pubri, ne nezineg te Megbevayà is kebuyù dan te tavang.
JOB 34:29 Piru minsan ebpereremek wey ed-eles is Megbevayà, ne wazà ebpekekaǥi he kenà hustu is ebeelan din. Piru is tutuu, ebentayan te Megbevayà is menge etew wey is menge nasyun,
JOB 34:30 su wey zin meeǥen is kedumala te menge etew he wazà medtuu kandin he ebpekezezaat te menge etew.
JOB 34:31 “Job, maan is kenè ka ed-uvey ziyà te Megbevayà is egkaǥi te, ‘Nekesalà a, piru ed-engked ad he ebaal te salà’
JOB 34:32 etawa egkaǥi ka te, ‘Ipeteuni nu kedì is salè ku. Emun nekesalà a ne kenè ku en ed-umanan te ebaal.’
JOB 34:33 Kenà ibeǥey te Megbevayà is hangyù nu emun kenè nu ed-engkezan is mezaat he vaal nu. Diyan te kenikew is disisyun ne kenà dini te kedì. Umbe keǥiya nu kedì ke hengkey is egkekaǥi nu.
JOB 34:34 Is menge etew he uluwanen wey ebpekesavut, he nemineg kedì,
JOB 34:35 ebpekekaǥi he is egkeǥiyen nu, Job, ne wazà mezumahi te ketau wey wazè din pulus.
JOB 34:36 Ereg ka he ebpurungan egezami su is menge lalag nu iring te menge lalag te lalung he etew.
JOB 34:37 Mid-umanan nu pa is salè nu pinaaǥi te kebpekidsukulè nu te Megbevayà. Edsudien nu wey ed-insultuwen nu is Megbevayà diyà te etuvangan dey.”
JOB 35:1 Ne mid-uman pa megkaǥi si Elihu te,
JOB 35:2 “Egkeisip nu ve he hustu is migkaǥi nu he wazè nu salà diyà te etuvangan te Megbevayà?
JOB 35:3 Piru ed-insè ka man te, ‘Hengkey is egkekuwa ku emun kenà a ebaal te salà?’
JOB 35:4 “Edtevaken ku sikew wey is menge emiǥu nu.
JOB 35:5 Lingehè ka ziyà te langit ne purungi nu ahaa ke sengemenu ketikang is menge ǥapun.
JOB 35:6 Emun nekesalè ka, ne kenà heeyan ebpekeipiktu te Megbevayà, minsan edsigudu ka ebaal te salà.
JOB 35:7 Ne emun metazeng ka, ne hengkey he keupiyaanan is igkeveǥey nu te Megbevayà?
JOB 35:8 Iyan dà egkeipiktuwan te meupiya etawa mezaat he vaal nu is iring nu he etew.
JOB 35:9 “Is menge edèdaaǥen ebuyù te tavang he libriya sikandan te kedèdaaǥa kandan te gehemanen he menge etew.
JOB 35:10 Piru wazà sikandan mebpengumew-umew te Megbevayà he midlimbag kandan wey mibeǥey kandan te zesen dutun te timpu te kelised.
JOB 35:11 Wazè dan medangep diyà te Megbevayà he midlimbag kandan he metau pa te menge langgam wey menge tagbis.
JOB 35:12 Ne emun ebpengumew-umew zan ne kenè dan edtevaken te Megbevayà su mepelevawen sikandan wey lalung he menge etew.
JOB 35:13 Uya, kenà ebpemineǥen te Mekeǥeǥehem he Megbevayà is kebuyù dan te tavang he wazè din pulus.
JOB 35:14 Ne lavew en he kenè din ebpemineǥen is kebpengumew-umew nu, Job, emun egkaǥi ka he wazè nu maahà is tavang din te kasu nu he mid-uwit nu ziyà te kandin, ne ebpeketulung ke zà ebpeketaǥad kandin.
JOB 35:15 Migkaǥi ke pa te wazà medsilut is Megbevayà minsan nepauk sikandin, wey wazè din seǥipaa is mezaat he vaal te menge etew.
JOB 35:16 Job, wazà pulus te ebpengeǥiyen nu. Utew keladu he sikew is egkagi wazè nu kedsavut mehitenged te egkeǥiyen nu.”
JOB 36:1 Mibpedayun megkaǥi si Elihu te:
JOB 36:2 “Pemineǥa a zèpa kenikew, su zuen ku pa egkeǥiyen he idlavan ku te Megbevayà.
JOB 36:3 Mahabet is netuenan ku ne ibpeehè ku kenikew he wazà mesayep is Megbevayà he midlimbag kedì.
JOB 36:4 Utew venar he wazè ku sikew terterui, su utew a metau is ed-etuvangen nu.
JOB 36:5 “Utew mekeǥeǥehem is Megbevayà, piru kenè din betasan is kedsudì te etew. Netuenan din is langun.
JOB 36:6 Wazè din ituǥut he meuyag-uyag is lalung, ne ibeǥey zin is metazeng he kukuman diyà te edèdaaǥen he menge pubri.
JOB 36:7 Wazè din bey-ani is menge metazeng. Ebeǥayan din sikandan te zengeg te wazà pidtemanan duma te menge hadì.
JOB 36:8 Iyan, emun edèdaaǥen sikandan, he iring te egkedinahan,
JOB 36:9 ibpahayag te Megbevayà is salà he nehimu zan duma te kebpelavew.
JOB 36:10 Ibpepemineg din sikandan te petizaan din, wey idsuǥù din kandan is ked-engked te kelelalung dan.
JOB 36:11 Emun ebpezumazuma zan wey ebpenilbi zan te Megbevayà, ebmeuswaǥen wey ebmelipayen dan seled te tivuuk he untung dan.
JOB 36:12 Piru emun kenè dan ebpezumazuma kandin, ebpatey zan te tebek he kurang dan te kedsavut.
JOB 36:13 Is menge etew he wazà medtuu te Megbevayà, duen pauk diyà te gehinawa zan, ne minsan edsilutan sikandan te Megbevayà, ne kenà sikandan ebpetavang kandin.
JOB 36:14 Ebpematey zan he egkepeel-elezan te vetan-en dan pa.
JOB 36:15 Piru pinaaǥi te menge elentusen, ebpenuruen te Megbevayà is menge etew. Ebpekeistudyu zan te kebpemineg kandin pinaaǥi te menge kegkerasey.
JOB 36:16 “Inlikey ka te Megbevayà te kezeetan wey wazè ke zin ipeveyveyai te zuma, ne impeuswag ke zin. Ne nepenù te metaam he keenen is lemisahan nu.
JOB 36:17 Piru ǥuntaan egkeseǥazan nu is silut he ereg te menge lalung. Kenè ka ebpekelikey te metazeng he kukuman.
JOB 36:18 Mebpekevantey ka he kenè ka meuwit te ketiǥeyunan wey zekelà he sipsip.
JOB 36:19 Ebpeketavang be te kelised nu is ketiǥeyunan nu wey is kebpekegaga nu?
JOB 36:20 Kenè nu isipa is ebpeebuten he mezukilem he iyan is timpu he egkezeetan is menge nasyun.
JOB 36:21 Andam ka he kenè ka mekevaal te kelelalung. Ibpaantus ka su para mekelikey ka te kebaal kayi.
JOB 36:22 “Isipa nu ke sengemenu is kegkemekeǥeǥehem te Megbevayà. Wazà menunudlù he ebpekeiring kandin.
JOB 36:23 Wazà ebpekepenurù kandin ke hengkey is ereg he ebeelan din, wey wazà ebpekekaǥi ziyà te kandin te, ‘Nekesalè ka’.
JOB 36:24 Kenè nu lipati is kedalig te menge vaal zin he iyan daan ebeelan te zuma emun egkanta zan.
JOB 36:25 Naahà te tivuuk he menusiyà is menge vaal te Megbevayà, minsan pa te meziyù is ked-ahaa zan duen.
JOB 36:26 Mekeǥeǥehem is Megbevayà, ne kenè tew egketegkad is kegkemeǥeǥehem din, ne kenè tew egkekaǥi ke sengemenu en is keǥurang din.
JOB 36:27 Iyan is Megbevayà mibpepemenahik te wahig puun te tanà ne ebeelan din heini he uzan.
JOB 36:28 Egkevusbus is uzan puun te menge ǥapun ne para heini te menge etew.
JOB 36:29 Wazà etew he netau ke mibmenumenu is kebpeyepata te ǥapun, wey ke egkemenumenu is kedruǥung diyà te langit he iyan ed-ubpaan te Megbevayà.
JOB 36:30 Ahaa nu ke mibmenumenu zin te ebpekilat diyà te peliǥuy zin, wey ke egkemenumenu is kegkindab kayi pehendiyà te netemanan te zaǥat.
JOB 36:31 Pinaaǥi kayi te ǥehem te Megbevayà, edumelahan din is menge nasyun wey ebeǥayan din te zekelà he egkekaan is menge etew.
JOB 36:32 Egewezan din is kilat ne edsuǥuen din te kedsinuǥat te edsinuǥaten din.
JOB 36:33 Is ruǥung tuus te ebpekeuma he vagyu, ne minsan is menge vaka egketau ke zuen bagyu he ebpekeuma.
JOB 37:1 “Ebpekehuyab is kumeng ku tenged keniyan te vagyu.
JOB 37:2 Pemineǥa niw is edraǥeb he laǥeng te Megbevayà.
JOB 37:3 Impekilat din diyà te langit taman te kineziyuan he vahin te kelibutan.
JOB 37:4 Ne egkezineg is kedraǥeb te mezaǥing he laǥeng din. Wazè din eǥena is kedraǥeb te laǥeng din.
JOB 37:5 Egkein-inuwan is edraǥeb he laǥeng te Megbevayà. Mibaal sikandin te egkein-inuwan he menge vaal he kenè tew egketegkad.
JOB 37:6 Ebmenduan din is ayis te kedtanà diyà te tanà wey is uzan te ked-uzan te mereǥes,
JOB 37:7 su para mekehimeley is menge etew te terebahu zan, ne ebpekepurung dan ebpekeisip-isip te menge vaal te Megbevayà.
JOB 37:8 Is menge langgam, ed-eles diyà te menge elesè dan ne zutun dan dà emun timpu te vagyu.
JOB 37:9 Is bagyu wey is meǥenew he keramag ne ziyà ebpuun te midteǥuan duen.
JOB 37:10 Pinaaǥi te ǥehinawa te Megbevayà nepurma is ayis, wey nehimu he ayis is meluag he wahig.
JOB 37:11 Ebpenuen din te wahig is menge ǥapun, ne ibpekilat din heini.
JOB 37:12 Ed-eneb-eneb is menge ǥapun seled te tivuuk he kelibutan sumalà te mandù te Megbevayà.
JOB 37:13 Ibpeuzan te Megbevayà te mereǥes su para zuen wahig diyà te tanà, etawa pinaaǥi te kebmansu zin te etew, etawa pinaaǥi te kebpaahaa zin te gaǥew zin.
JOB 37:14 “Pemineǥa nu heini, Job, wey ngunngunua nu is egkengein-inuwan he ebeelan te Megbevayà.
JOB 37:15 Netuenan nu ve ke ebmenmenuwen te Megbevayà te edumala is menge ǥapun, wey ke ebmenmenuwen din is kebpekindab te kilat?
JOB 37:16 Netuenan nu ve ke maan is edletewletew is menge ǥapun diyà te zivavew? Baal heini te egkein-inuwan he Megbevayà he kenà edtaman is ketau zin.
JOB 37:17 Sikew is edrimrimusengan tenged te meinit he keramag he ebpuun diyà te zivavà,
JOB 37:18 ebpekeuǥup ke ve te Megbevayà te kedempas te langit wey te kedhimuwa kayi he mezesen iring te peǥelungan he brunsi?
JOB 37:19 Emun uluwanen ka, keǥiyi key ke hengkey is ereg he egkeǥiyen dey ziyà te Megbevayà. Kenè dey egketuenan ke ebmenmenuwen te egkaǥi is ketezengan dey su nerusireman is ked-isip-isip dey.
JOB 37:20 Kenà a egkaǥi ziyà te Megbevayà he ebpekidlalis a kandin, su kela ke zèdeeti e zin.
JOB 37:21 Wazà etew he egkepurungan din egketengtengi is andew su ebpekesirang heini su utew mesiǥa he ziyà te langit emun idlayap te keramag is menge ǥapun.
JOB 37:22 Puun te zizaya, egawas is Megbevayà he ed-ilak-ilak iring te vulawan ne egkein-inuwan is kebpekesirang din.
JOB 37:23 Kenè tew egketegkad is Mekeǥeǥehem he Megbevayà he lavew te langun, ne kenè kiw ebpekeuvey ziyà te kandin. Metazeng sikandin wey kenà ebpenlupiglupig,
JOB 37:24 umbe, edtehuzen sikandin te menge etew. Ne kenè din edseǥipaan is menge etew he kunaan dan ke metau sikandan.”
JOB 38:1 Ne midtavak te Nengazen si Job he ebpuun te eribpures is laǥeng din,
JOB 38:2 “He Job, egkezuwazuwa ke ves te ketau ku? Pinaaǥi te menge lalag nu egketuusan he wazè nu netuenan.
JOB 38:3 Ne ǥuntaan, pengandam ka, ne tevaka nu is menge insè ku.
JOB 38:4 Hendei ka hein mibeelan ku is pundasyun te kelibutan? Keǥiya nu kediey ke zuen nu netuenan.
JOB 38:5 Netuenan nu ve ke hentei is mibayàbayà ke sengemenu kezekelà heini he pundasyun etawa hentei is midsukud kayi? Siguradu netuenan nu heini!
JOB 38:6 Hengkey is nekepelig-en te pundasyun te kelibutan? Wey hentei is mibpelastar kayi he pundasyun?
JOB 38:7 Dutun he timpu, nesevaha te kegkanta is menge mekevugwas wey nemen-uruhuy te kegkelipey is langun he menge velinsuǥuen.
JOB 38:8 Hentei is midsavuk te dulunà te egketemanan te zaǥat dutun te kebugwak din puun te zizalem?
JOB 38:9 Iyan a midtambun te zaǥat te menge ǥapun wey kerusirem.
JOB 38:10 Midsevukan ku te zulunà is daǥat, ne neiring heini te midsireduwan ku wey midtrengkahan.
JOB 38:11 Migkeǥiyan ku is daǥat te, ‘Taman ke zà kayi ne kenè ke en medlapey pa; kayi zà taman is dezekelà he menge vaǥel nu.’
JOB 38:12 “He Job, nekesuǥù ke en be te andew he medsilà heini,
JOB 38:13 para mekeeneb te tivuuk he kelibutan is kerayag din su wey zin ikepeengked is mezaat he ebeelan te mezukilem?
JOB 38:14 Tenged te kerayag kayi, nehimu he keladu is kelibutan he iring te marka te silyu wey linumpian te visti.
JOB 38:15 Tenged te kerayag, kenà ebpekeuyayà is menge lalung, su kenè dan ebpekepesipala te zuma.
JOB 38:16 “Nekehendiyè ke en be te menge serebseb diyà te zizalem te zaǥat etawa ziyà te kinezizeleman he vahin te zaǥat?
JOB 38:17 Ingkepeturedu en be kenikew is pultahan pehendiyà te merusirem he lugar te menge minatey?
JOB 38:18 Netuenan nu ve ke sengemenu kezekelà is kelibutan? Keǥiya nu kayi te kediey ke netuenan nu heini is langun!
JOB 38:19 Netuenan nu ve ke hendei ebpuun is kerayag wey kerusirem?
JOB 38:20 Igkepelikù nu ve sikandan diyà te ebpuunan dan?
JOB 38:21 Kunaan nu ves ke netuenan nu heini is langun! Henduen be te zaan ke en he neetew hein midlimbag ku is kelibutan. Utew ke en bes meǥurang!
JOB 38:22 “Nekehendiyè ke en be te ebpuunan te uzan he giyew?
JOB 38:23 Heini he ǥiyew idteǥana ku para te timpu te kesamuk wey timpu te tebek.
JOB 38:24 Netuenan nu ve is beyeey pehendiyà te ebpuunan te kilat etawa lugar he ebpuunan te keramag he ebpuun diyà te edsilaan?
JOB 38:25 Hentei is mibaal te veyeey te uzan wey vagyu?
JOB 38:26 Hentei is edsuǥù te uzan para med-uzan diyà te disirtu, he lugar he wazà duen ed-ubpà he etew?
JOB 38:27 Hentei is ebpeuzan te tanà he mehiǥawan para meketuvù is menge sagbet?
JOB 38:28 Hentei is ebpuunan te uzan, wey zehemug,
JOB 38:29 wey te ǥiyew he ebpuun te langit?
JOB 38:30 Nehimu he ayis is wahig ne neiring kezesen te vatu, ragkes en is divavew he vahin te zaǥat.
JOB 38:31 Igketagkes nu ve etawa egkehekazan is grupu te menge vituen he egngezanan te Penikapan wey Belatic?
JOB 38:32 Egkehimu nu ve te egiya is menge vituen te kebpaahà dutun te timpu te kebpeehè dan? Egkehimu nu iyan te egiya is menge vituen he egngezanan te Dekelà wey Deisey he menge Bir?
JOB 38:33 Netuenan nu ve is paaǥi te kegkezumelaha te kelimbaǥan diyà te kewkewangan etawa kayi te kelibutan?
JOB 38:34 Egkemendaran nu ve is menge ǥapun para med-uzan?
JOB 38:35 Igkepekilat nu ve is kilat? Edsinuǥaten din be is ibpesinuǥat nu?
JOB 38:36 Hentei is mibeǥey te etew te ketau wey kedsavut?
JOB 38:37 Hentei is metau he ebpekevilang te menge ǥapun? Hentei is ebpekevusbus te wahig puun te langit
JOB 38:38 he ebpeketivuuk te eliyavuk?
JOB 38:39 “Iyan ke ve ebpen-ahà te egkekaan te menge erimaung wey edhantey kandan
JOB 38:40 dutun te edleku sikandan diyà te elesè dan etawa sihung te zezeisey he kayu?
JOB 38:41 Hentei is edsavud te menge uwak emun egkevitil zan wey ebpesavud kedì is menge pispis dan?
JOB 39:1 “Netuenan nu ve ke keenu ed-anak is leew he menge kambing? Nekevantey ke ve te ked-anak te menge selazeng?
JOB 39:2 Ebilangen nu ve is menge vulan te keǥingayan dan taman te ked-anak dan? Netuenan nu ve ke keenu sikandan ed-anak?
JOB 39:3 Edleku zan is ebeliliten taman te ebpekaanak dan.
JOB 39:4 Emun edekelè en is anak dan diyà te sibsivayan, edhipanew heini ne kenè en edlikù.
JOB 39:5 Hentei is nengelintau wey mekeuyayà is leew he asnu?
JOB 39:6 Iyan a mibeǥey kandin te sibsivayan he egkeubpaan din; ibpeubpè ku ziyà te tanà he mibey-anan en.
JOB 39:7 Ebpekeziyù heini te meǥurub he inged ne kenà egkesuat he ebuǥawen.
JOB 39:8 Edriǥuriǥu heini ziyà te menge vuntud is ebpen-ahà te egketabtab din.
JOB 39:9 “Igkepeterebahu nu ve is baka he simadun? Kenè be heini ed-awà diyà te tudil nu emun mezukilem?
JOB 39:10 Egkehiketan nu ve heini ne igkeeradu nu ziyà te vevesukè nu?
JOB 39:11 Ebpekesarig ke ve te zesen din para egketerebahu zin is meveǥat he terebahu nu?
JOB 39:12 Ebpekesarig ke ve kayi he edtiǥumen din wey edhekuten din is neraǥun pehendiyà te gunasà?
JOB 39:13 “Utew mekempet he ed-ahaan is pakpak te ustrits emun edseripakpak, piru kenà heini ebperepeng te kekempet te pakpak te tulabung.
JOB 39:14 Ed-ewaan te ustrits is impis din diyà te tanà su para meinit heini.
JOB 39:15 Kenè din igkeipeng is kegkeǥieki etawa kegketekutaki zuen te leew he menge langgam.
JOB 39:16 Mesipala sikandin te menge pispis din he henduen be te kenà kandin. Kenà sikandin egkeipeng he kela ke mehimu he wazà pulus te midheǥuan din.
JOB 39:17 Su wazè ku sikandin beǥayi te ketau wey kedsavut.
JOB 39:18 Piru emun lumbà te kebpelelaǥuy ne và din dà ed-engiti is kudà wey is ed-untud kayi.
JOB 39:19 “Job, iyan ke ve mibeǥey te kudà te zesen? Iyan ke ve mibeǥey te keburey ziyà te lieg din?
JOB 39:20 Iyan ke ve nengelintau wey mekelingketew he iring te terapan ne wey zaan mekeherìhì te igkahandek te menge etew?
JOB 39:21 Meviserviser heini he egkahiskahis te tanà, he ebpaahà te zesen din. Ne ebpelelaǥuy pehendiyà te edtebekan.
JOB 39:22 Wazè din igkahandek ne kenè din ebpeleǥuyan is tebek.
JOB 39:23 Edleletingkik wey edsinew is menge ǥumaan te ed-untud kandin.
JOB 39:24 Ebpengelivegbeg is eliyavuk tenged te keǥaan te kebpelelaǥuy zin. Ne kenè en egkesanggen emun ibpezaǥing is budyung.
JOB 39:25 Edherìhì emun egkezineg din is daǥing te vudyung. Minsan meziyù pa heini egketuusan din is tebek, ne egkezineg din is kulehian te edtetebek wey is mandar te menge peremandar.
JOB 39:26 “Iyan ke ve nenurù te dapay te kedlayang wey kedhendiyà te zivavà?
JOB 39:27 Iyan ke ve midsuǥù te kulaǥu te kedlayang wey kebaal te salag diyà te metikang he lugar?
JOB 39:28 Diyà ed-ubpà te zempilas is kulaǥu; is metikang he menge vatu ne iyan elesè din.
JOB 39:29 Dutun sikandin ebpememantew te egkehimu he edewiyen din, ne egkeehè din haazà minsan diyè dà sikandin te meziyù.
JOB 39:30 Emun duen egkeehè din he minatey ebeyaan din heini, ne edsupsupen te menge pispis din is lengesa kayi te minatey.”
JOB 40:1 Ne migkaǥi pa is Nengazen diyà te ki Job te,
JOB 40:2 “Iyan a Megbevayà he Mekeǥeǥehem. Piru ibpeletew nu ves diyà te kebpekidlalis nu kedì he nesayep a. Ne ǥuntaan tevaka a kenikew.”
JOB 40:3 Umbe, midtavak ni Job is Nengazen te,
JOB 40:4 “Kenà a ereg he edtavak kenikew. Hengkey is idtavak ku? Ebpereremek e zà.
JOB 40:5 Mezakel en is nekaǥi ku. Kenà ad ebpedayun te kegkaǥi.”
JOB 40:6 Ne mid-uman megkaǥi is Nengazen diyà te ki Job he ebpuun diyà te eribpures is laǥeng din,
JOB 40:7 “Pengandam ka, ne tevaka nu is menge insè ku.
JOB 40:8 Iyan be ibpeletew nu he kenà a metazeng su para medletew he iyan ka metazeng?
JOB 40:9 Mekeǥeǥehem ke ve iring kedì? Edraǥeb be is laǥeng nu iring te kedì?
JOB 40:10 Emun egkehimu nu heeyan, ne ipeheehè nu is kegkemekeǥeǥehem nu, kegkelavew nu, wey zengeg nu.
JOB 40:11 Ipeehè nu is dekelà he pauk nu te menge mepelevawen pinaaǥi te kebpekevevaa nu kandan. Ne runteka nu is menge lalung diyà te edhitindeǥan dan.
JOB 40:13 Ileveng nu sikandan is langun diyà te tanà, diyà te lugar te menge minatey.
JOB 40:14 Emun egkehimu nu heeyan, iyan a mismu edalig kenikew, ne ebpeǥumbenar a he zuen nu egkehimu te kedlibri te keugelingen nu.
JOB 40:15 “Ahaa nu is langgam he hipuputamus, he linimbag ku iring kenikew. Ebpenabtab dà sikandin iring te vaka,
JOB 40:16 piru utew sikandin mezesen. Is lawa zin ne utew melig-en.
JOB 40:17 Is ikug din iring te kayu he sidru, nepenù te zesen is menge vuvun din.
JOB 40:18 Is menge tulan din ne iring kelig-en te tuvu he brunsi etawa kebilya.
JOB 40:19 Edhuna heini he egkein-inuwan kenà te zuma he menge linimbag ku, piru siak is midlimbag kayi egkezaag ku heini.
JOB 40:20 Ebpenabtab sikandin diyà te menge vuvungan dutun te eguǥusà is leew he menge langgam diyà te uvey zin.
JOB 40:21 Edleku heini ziyà te lempek te ebpenuvù he zuǥiyen, he egketembunan te menge ribpes he uvey te wahig.
JOB 40:22 Iyan egkehimu he helungè din is ebpenuvù he menge zuǥiyen wey zuma pa he ebpenuvù diyà te uvey te zal-ug.
JOB 40:23 Kenè din igkahandek is deǥurus te wahig. Melinew is kegeǥehinawa zin minsan henduen be te egketembunan en te Wahig he Jordan.
JOB 40:24 Hentei is ebpekezakep kandin pinaaǥi te kedezeeti te mata zin? Hentei is ebpeketinlang te izung din pinaaǥi te kedhingutela kandin?
JOB 41:1 “Job, egkevunuwit nu ve is dragun he Leviatan? Egkehiketan nu ve is bèbè din te pisì?
JOB 41:2 Igkepelahus nu ve is pisì diyà te izung din? Etawa egkekew-itan nu ve te vunuwit is bakè din?
JOB 41:3 Layun be sikandin edhangyù diyà te kenikew he ipaawè nu? Etawa ebpehizuhizu ve sikandin kenikew?
JOB 41:4 Ebpekid-uyun be sikandin kenikew he ebpeuripen kenikew seled te tivuuk he untung din?
JOB 41:5 Egkehimu nu ve heini he ayam iring te tagbis? Etawa igkeveǥey nu ve heini ziyà te menge anak nu he vahi he para velvelayen?
JOB 41:6 Egkepemasa ve heini te menge nigusyanti he ebevehinen dan wey zan ikevelegyà?
JOB 41:7 Ed-utengan be te serapang nu is lundis din etawa ulu zin?
JOB 41:8 Emun egkeutel nu heini ne kenè nu egkelipatan is kereǥen te kedhingutela nu kayi, ne kenè nu en heini ed-umanan ebeeli.
JOB 41:9 Wazà pulus te kedtinguhà ked-utel kandin. Su kegkaahaa nu pa kandin egkaawè en is burut nu.
JOB 41:10 Emun wazà ebpeǥaruǥaru he edsamuk kandin ne hentei man is ebpeǥaruǥaru he edsukul kedì?
JOB 41:11 Hentei man is ebpekekaǥi te nekeutang a ziyà te kandin te ereg he ebelesan ku te meupiya? Te kediey man is langun he kayi te kelibutan.
JOB 41:12 “Ed-umanan ku pa egkeǥiya ziyà te kenikew is bahin te lawa te Leviatan wey ke sengemenu is kegkemekeǥeǥehem din wey kezesen din.
JOB 41:13 Hentei is ebpekaanis te lundis din etawa igkepeutengan din heini?
JOB 41:14 Hentei is ebpekehimu he ebpeǥinganga kandin? Te mekahandekhandek man is menge ngipen din!
JOB 41:15 Is peka zin ne zuen mekepal he menge pengalang he henduen be te nekelinya he menge kelasag.
JOB 41:16 Nekedliliib heini he minsan is keramag ne kenà duen ebpekevayà, wey wazà ebpekaanis kayi.
JOB 41:18 Emun ebpemusenga ne zuen edtik-ew edsiǥa, ne is menge mata zin edsiǥa he iring te kedsilà te andew.
JOB 41:19 Ibpelepew zin is hapuy puun te vèbè din,
JOB 41:20 egawas is evel puun te izung din he henduen be te sengew te edìdì he kuzen he meregreg is tavun din.
JOB 41:21 Is gehinawa zin ebpekevaǥa te vurit, su hapuy is egawas diyà te vèbè din.
JOB 41:22 Nepenù te zesen is lieg din, ne utew egkahandek is ebpekaahà kandin.
JOB 41:23 Minsan is sapù din ne nepurung mahasek wey mezesen.
JOB 41:24 Mezesen is gehinawa zin iring te ǥelingan he vatu.
JOB 41:25 Emun ed-enew sikandin ne egkengeteranta tenged te kegkahandek is mekeǥeǥehem he menge etew.
JOB 41:26 Wazà ispada, bangkew, besut etawa kelawit he ebpekezezaat kandin.
JOB 41:27 Diyà te kandin iring dà kelemineg te reǥami is putew, ne is brunsi iring dà te repuk he kayu.
JOB 41:28 Emun ebpenaan sikandin ne kenà sikandin ebpelaǥuy. Is menge vatu he idlimpawes diyà te kandin ne henduen dà te ukap is kegezama zin kayi.
JOB 41:29 Is kayu he idlagkut kandin, henduen dà te reǥami ziyà te kandin. Ed-engitan din dà is hagyung te vangkew he ibunlawit diyà te kandin.
JOB 41:30 Is getek din, ne zuen meǥarang he menge hun-ap he henduen be te menge bildu. Umbe ednayà heini emun edula ziyà te vasak.
JOB 41:31 Edsimbeǥen din is daǥat he henduen be te egkaràkarà he wahig diyà te kuzen etawa lana he edìdì diyà te kitang.
JOB 41:32 Is wahig he egkeveyaan din eburàburà te meputì, he henduen be te meputì he vulvul is ked-ahaa zuen.
JOB 41:33 Wazà iring kandin kayi te kelibutan. Sevaha heini he linimbag he kenà egkahandek.
JOB 41:34 Ebpekevevaan din is langun he gelbuwen he menge langgam. Iyan heini hadì te langun he langgam he kenà ebpekeuram.”
JOB 42:1 Ne zutun midtavak ni Job is Nengazen te,
JOB 42:2 “Netuenan ku he egkehimu nu is minsan hengkey, ne wazà ebpekeeǥen kenikew.
JOB 42:3 Mid-insaan a kenikew ke maan is egkezuwazuwa a te ketau nu he wazè ku man netuenan. Tutuu iyan he migkaǥi ku is menge hitavù he kenè ku egketegkad.
JOB 42:4 Mibpekidlalag ka kedì ne migkaǥi ka he ebpemineǥen ku sikew wey edtevaken ku is menge insè nu.
JOB 42:5 Hein aney nezineg ku zà diyà te zuma is mehitenged kenikew, piru ǥuntaan neehè ku en sikew.
JOB 42:6 Umbe, ingkeeled ku is langun he mibpengaǥi ku mehitenged kenikew, ne idsendit ku haazà pinaaǥi te kebpinuu ku ziyà te eliyavuk wey avu.”
JOB 42:7 Hein nepasad te egkaǥi te Nengazen diyà te ki Job heini, migkeǥiyan din si Elifas he tig-Teman te, “Nepeukan ku sikew wey is dezuwa he emiǥu nu, su kenè kew iring te suluǥuen ku he si Job su wazè kew mulà megkaǥi te tutuu mehitenged kedì.
JOB 42:8 Umbe, ǥuntaan kuwa kew te pitu he tudu he vaka wey pitu he meemahan he kerehidu ne hendiyè kew te ki Job, ne ipemuhat niw heini he pemuhat he edtutungen para te keugelingen niw. Id-ampù kew ni Job ne edtevaken ku is ampù din ne kenè ku sikiyu edsilutan te silut he ereg te kedtinurebung niw. Kenè kew iring te suluǥuen ku he si Job su wazè kew mulà megkaǥi te tutuu mehitenged kedì.”
JOB 42:9 Umbe, mibeelan ni Elifaz he tig-Teman, ni Bildad he tig-Shua, wey ni Zofar he tig-Naama is insuǥù te Nengazen kandan. Ne midtavak te Nengazen is ampù ni Job.
JOB 42:10 Ne hein ingkaampù ni Job haazà is menge emiǥu zin, impeuman sikandin ipeuswag te Nengazen ne midtakep din sikan is nehuna he imbeǥey zin ki Job.
JOB 42:11 Ne zutun midhendiyà is langun he menge suled din wey is langun he menge emiǥu zin te valey zin ne migkaan dan duma kandin. Ne midlangan dan si Job tenged te langun he kemereǥenan he imbeǥey te Nengazen kandin. Ne is kada sevaha kandan, mibeǥey ziyà te kandin te selapì wey vulawan he sising.
JOB 42:12 Umbe, midtuvazan te Nengazen is huziyan he vahin te ked-ubpà ni Job te lavew pa zuen te nehuna. Mibeǥayan din sikandin te 14,000 he menge kerehidu, 6,000 he menge kemilyu, 1,000 he paris te menge vaka, wey 1,000 he vehiyan he menge asnu.
JOB 42:13 Mibeǥayan din daan sikandin te pitu pa he anak he menge maama wey tetelu pa he anak he menge vahi.
JOB 42:14 Is kinekekayan he vahi he anak din ne iyan si Jemina, ne nesekepu zin si Kezia, ne nekesunud si Keren Hapuc.
JOB 42:15 Ne wazà bahi he iring kandan kekempet dutun te inged dan. Ne in-iring ni Job is menge azen he imbeǥey zin kandan he egkepengevilin dan te egkepengevilin te menge meemahan dan.
JOB 42:16 Ne puun dutun neuyag-uyag pa si Job seled te 140 pa he tuig, ne neehè din pa is menge kevuwazan din taman te ikeepat he lapis.
JOB 42:17 Ne meǥurang en sikandin dutun te kebpatey zin.
PSA 1:1 Deyzey is etew he kenà ebpemineg te penurù te menge lalung, wey kenà ed-iring te ebeelan te menge mekesesalà, wey kenà ebpekiduma kandan he ed-undaunda te Megbevayà.
PSA 1:2 Kekenà, iyan mulà kandin he igkelipey is kedtuman te menge penurù te Nengazen, ne iyan heini ebpurungan din egngunngunua te maandew wey te mezukilem.
PSA 1:3 Iring sikandin te kayu he ziyà ipemula te veyvey te wahig ne ebpemeǥas sikandin dutun te timpu te tipemeǥas, ne kenà egkeǥangu is menge zahun din. Is etew he iring kayi, ed-uswag diyà te menge vaal zin.
PSA 1:4 Piru kenà mulà iring kayi is lalung he menge etew, kekenà, iring sikandan te ukap he idlayap te keramag su wazè dan pulus.
PSA 1:5 Umbe te andew te kedhukum, edsilutan sikandan te Megbevayà ne kenà sikandan ebpeketampu te menge metazeng.
PSA 1:6 Su egiyahan te Nengazen is menge metazeng, piru is menge ulaula te menge lalung iyan ed-uwit kandan diyà te kezeetan.
PSA 2:1 Maan is ed-isipen te menge etew is kedsukul te Nengazen? Maan is ed-isipen dan is wazè din pulus?
PSA 2:2 Is menge hadì wey is menge pengulu kayi te kelibutan, ne midtiǥum dan wey nengandam te kebpekidtebek te Nengazen wey te hadì he mibpilì din.
PSA 2:3 Ke sikandan te, “Kinahanglan he kenè kiw ebpevayàbayà wey ebpesakup kandan.”
PSA 2:4 Piru is Nengazen he ziyà te langit he ebpimpinuu te pinuuwè din te kedhadì, ed-engitan din dà sikandan.
PSA 2:5 Tenged te kegkepauk din, ebpetizeenan din sikandan, egkengehandek dan.
PSA 2:6 Ke sikandin te, “Diyà te Zion, kes segradu he vuvungan ku, insavuk ku is mibpilì ku he hadì.”
PSA 2:7 Ne migkaǥi haazà is hadì he mibpilì te Megbevayà te, “Ibpehayag ku is migkaǥi kedì te Nengazen te, ‘Iyan ka Anak ku, ne ǥuntaan ibpekilala ku he amey ad kenikew.
PSA 2:8 Buyù ka kayi te kediey ne ibeǥey ku kenikew is menge nasyun, taman te pinekemeziyù he lugar te tivuuk he kelibutan para maangken nu heini, ne edtumanen ku heeyan.
PSA 2:9 Dumelaha nu sikandan, he wazè ebpekesukul te kedumala nu. Iring sikandan te ziniyun he ǥelemiten he edrupeten nu.’ ”
PSA 2:10 Umbe, sikiyu is menge hadì wey menge pengulu kayi te kelibutan, sevuta niw heini he menge lalag, ne pemineǥa niw is petizaan keniyu.
PSA 2:11 Penilbiyi niw is Nengazen duma is kedtahud ne ikelipey niw sikandin.
PSA 2:12 Tehuza niw is hadì he mibpilì din, su emun kenà, ne egkepeukan kew zin ne edèdeetan kew zin. Deyzey is langun he ed-aput diyà te Nengazen.
PSA 3:1 Nengazen, mahabet is kuntada ku; mahabet is ebpekigkuntada kedì!
PSA 3:2 Kesikandan te kenè ke kun edtavang kedì.
PSA 3:3 Piru is tutuu, iring ka te kelasag he ebpengalang kedì. Iyan ka ebeǥey kedì te kezeeǥan wey kelig-en.
PSA 3:4 Ed-umawen ku sikew, Nengazen, ne edtevaken a kenikew ziyà te segradu he vuvungan nu.
PSA 3:5 Edhizeǥà a wey edlipezeng ne egkepukew a, ne wazà ebpekekaid kedì su iyan man ed-ipat kedì is Nengazen.
PSA 3:6 Minsan linibu pa he menge kuntada is edliǥuy kedì, ne kenà a egkahandek.
PSA 3:7 Sigi en, Nengazen he Megbevayè ku, libriya a! Su zengan mibpeel-elezan nu is langun he kuntada ku he menge lalung; ne in-awè nu is gehem dan he iyan pezem kedezaat kedì.
PSA 3:8 Iyan ka edlibri, Nengazen, wey edtuvad te menge etew nu.
PSA 4:1 Sikew is metazeng he Megbevayè ku, tevaka a kenikew zutun te ked-umawa ku kenikew. Hein nekebmerasey a zengan, midtevangan a kenikew. Umbe ǥuntaan, pemineǥa nu is menge kebpengemuyù ku wey kehizuwi a.
PSA 4:2 Sikiyu is menge etew he egkuntada kediey, sengemenu keluǥayad is kebpeel-elezi niw kedì? Sengemenu keluǥayad is kebmahala niw te menge tuluuwen he wazè dan pulus wey kedsunud te ketetarù?
PSA 4:3 Tentenuzi niw he mibpilì te Nengazen is menge etew he edsunud kandin para mehimu he ǥaked din. Tenged kayi, ebpemineǥen e zin emun ebpengumew-umew a kandin.
PSA 4:4 Emun egkepauk kew, kinahanglan he kenè kew ebpekesalà tenged dutun. Ne emun edhizeǥè kew en diyà te menge hizeǥaan niw, pekelinawa niw is gehinawa niw ne purung kew ngunùngunù.
PSA 4:5 Sarig kew ziyà te Nengazen ne iyan niw layun ul-ulaha is kebpemuhat te hustu he menge pemuhat.
PSA 4:6 Mahabet is egkaǥi te, “Nengazen kehizuwi key; iyan ka metau he uzara key. Ipeehè nu is keupiya nu kenami!”
PSA 4:7 Piru lavew pa is kelipey he ibeǥey nu kediey; kenà is kelipey te menge etew he zekelà is keenen dan wey inumen dan.
PSA 4:8 Su iyan ka is Nengazen ed-ipat kedì, umbe kenà a egkehandek su wazà ebpekekaid kedì minsan dutun te timpu te kedlipezeng ku.
PSA 5:1 Nengazen, pemineǥa nu is pengemuyù ku he egkezumahan te zag-es.
PSA 5:2 Pemineǥa nu is kebuyù ku te tavang diyà te kenikew, he Megbevayà he hadì ku, su ziyà a te kenikew ebpengemuyù.
PSA 5:3 Emun meselem ed-endamen ku is gehinawa ku te kebpengemuyù diyà te kenikew. Ne emun ebpekepasad e en, ne edteǥazan ku is tavak nu te hangyù ku.
PSA 5:4 Sikew is tutuu he Megbevayà, ne kenè nu igkelipey is mezaat he ulaula; kenè nu edewaten is lalung he menge etew.
PSA 5:5 Kenà ebpekeuvey kenikew is menge mepelevawen; egkepeukan nu is langun he ebaal te mezaat.
PSA 5:6 Edezeetan nu is menge teruen ne egkeepesan nu is menge etew he ebpenhimatey te etew wey is menge men-aakal.
PSA 5:7 Iyan, siak mulà, ebpekeseled a ziyà te valey nu he segradu su ǥeina te utew a kenikew mibmahal. Ne zutun ku sikew ed-ezapa te ked-azap duma te zekelà he kedtahud kenikew.
PSA 5:8 Nengazen, tenged te mahabet is menge kuntada ku, giyahi-a kenikew sumalà te ketazeng nu. Pekeleduwi nu kediey is utew hustu he paaǥi nu su wey ku iyan mesunud.
PSA 5:9 Kenà egkeseriǥan is lalag te menge kuntada ku, su iyan dà tuyù dan is kedezaat te zuma he etew. Is menge lalag dan igkepetug-iring te neebriyan he leveng he edsengew is kemahù din. Is menge egkeǥiyen dan ne pudu limbung.
PSA 5:10 Megbevayè ku, siluti nu is menge kuntada ku. Deyzey ke egkeuney sikandan te mezaat he menge tuyù dan. Iselikwey nu sikandan tenged te utew subra is menge salè dan, su mibpekidsukulè dan kenikew.
PSA 5:11 Piru berakat he mebmelipayen is langun he menge etew he ziyà med-aput te kenikew. Deyzey ke ebpekeuruhuy sikandan te kegkelipey zan. Ilikey nu te kezeetan is menge etew he mibmahal kenikew su para mebmelipayen sikandan tenged dutun.
PSA 5:12 Edtuvazan nu, Nengazen, is menge metazeng. Is kebmahala nu kandan ne iyan nehimu he kelasag dan he kenà egkezeetan.
PSA 6:1 Nengazen, minsan duen nu pauk kedì, ne kenà a kenikew siluti.
PSA 6:2 Kehizuwi a wey vewii a, su utew ad meluya.
PSA 6:3 Nesemukan utew is isip ku, Nengazen. Keenu e en be kenikew ebewii?
PSA 6:4 Etura a kenikew, Nengazen, ne ǥeuza a. Tenged te kebmahala nu kediey, libriya a te kemetayen.
PSA 6:5 Su emun ebpatey a, ne kenè ku en maan sikew egketenuzan; kenà ad maan ebpekezalig kenikew ziyà te lugar te menge minatey.
PSA 6:6 Mibmeluye e en tenged te utew ku kegkesekiti. Kada mezukilem egkahames is ulunè ku te luhà.
PSA 6:7 Nemenlevag en is menge mata ku su ebpeketulung ad ebpekesineǥew tenged te vaal te langun he menge kuntada ku.
PSA 6:8 Sikiyu is memezaat is baal, pekeziyù kew kediey, su nezineg en te Nengazen is sineǥawan ku.
PSA 6:9 Nezineg din en is kebuyù ku te tavang, ne edtevaken din en is ampù ku.
PSA 6:10 Egkepeel-elezan wey egkengeheratan is langun he menge kuntada ku. Egkengelagewlagew sikandan he ebpekeziyù tenged te kegkeeled dan.
PSA 7:1 Nengazen he Megbevayè ku, ed-aput a ziyà te kenikew. Libriya a su zuen menge etew he edsurung kediey,
PSA 7:2 su emun kenà a kenikew edlibriyen, ne kela ke edhimetayan e zan; ebpitpitasen dan is lawa ku iring te ebeelan te erimaung te egkezawi zin, ne zutun wazè en ebpekelibri kediey.
PSA 7:3 Nengazen he Megbevayè ku, emun nekevaal a te mezaat diyà te iring ku he etew,
PSA 7:4 emun mibelesan ku te mezaat is meupiya he mibeelan kedì te emiǥu ku, emun mid-eǥawan ku te menge azen is kuntada ku te wazà hustu he hinungdan,
PSA 7:5 ne vey-ani ad kenikew pinaaǥi te kedtuǥut nu he mezaag a te menge kuntada ku ke edsurungen e zan. Bey-ani ad ke edtekutakan e zan taman te kebpatey ku, ne ed-ewaan e zan is minatey en.
PSA 7:6 Nengazen he Megbevayè ku, ipeehè nu en guntaan is pauk nu te menge kuntada ku he utew egkengepauk kedì, su iyan man ebpen-ahaan nu is hustu he kukuman.
PSA 7:7 Tiǥuma nu is langun he menge tribu ziyà te kenikew, ne dumelaha nu sikandan te ziyè ke zà te langit.
PSA 7:8 Iyan ka, Nengazen, edhukum te menge etew. Ipeehè nu he wazè ku salà, su netuenan nu man he metazeng a ne wazè ku mibeelan he mezaat.
PSA 7:9 Kenè nu ituǥut he ebpedayun is ulaula te mezaat he menge etew, ne tuvazi is menge metazeng, su metazeng ke man he Megbevayà, wey egkesusi nu is isip dey wey gehinawa zey.
PSA 7:10 Iyan ka, He Megbevayà, nehimu he kelasag ku. Iyan ka edlibri te menge metazeng.
PSA 7:11 Egkezumahan te ketazeng is kedhukum nu, ne kada andew egkepeukan nu is menge lalung.
PSA 7:12 Ne emun kenè dan ed-engkezan is menge mezaat he vaal zan, ne andam ka he edsilut kandan. Iring ka te sundaru he naandam en is idhimatey zin he menge gumaan. Migkemanga zin en is ispada zin wey zaan din en he edhingaten is panè din he ebelahan te egkeregreg he vesut.
PSA 7:14 Is lalung he menge etew ne mezaat is ed isipen dan; edtinguhè dan te kebaal te samuk ne ebpenlimbung sikandan.
PSA 7:15 Edlikù diyà te kandan is kebaal zan te samuk wey kebpesipala. Iring sikandan te mibudsi para egkeuluǥan te zuma zan, piru iyan mulà sikandan egkeulug dutun.
PSA 7:17 Sikew, Nengazen, is Utew Lavew he Megbevayà. Ebpeselamatan ku sikew tenged te ketazeng nu. Edeliǥen ku sikew pinaaǥi te kegkanta ku.
PSA 8:1 He Nengazen he iyan Egalen dey, is kegkemekeǥeǥehem nu egkaahà kayi te tivuuk he kelibutan! Egkezineg nu ziyan te langit is kedeliǥa te menge etew kenikew.
PSA 8:2 Minsan is dezeisey pa he menge vatà mibpenurù nu te kedalig kenikew, su wey mepeel-elezi is menge kuntada nu he ebpeninguhà he mekavales.
PSA 8:3 Emun edtengteng a ziyà te langit he mibeelan nu, ne egkeehè ku is bulan wey menge vituen he insavuk nu ziyà te nengesevukan dan,
PSA 8:4 ebpekeinsà a ziyà te ǥehinawa ku te hengkey ves is menusiyà, maan is utew nu edseǥipaa? Menusiyè dà sikandin, piru maan is utew nu igkeseeng?
PSA 8:5 Midhimu nu sikandin he minus pa is gehem din, kenà haazà is menge velinsuǥuen nu, piru imbeǥey nu kandin is dengeg, in-iring nu sikandin te hadì.
PSA 8:6 Midhimu nu sikandin he iyan edumala te menge linimbag nu; ne mibpeveyveyaan nu kandin is langun,
PSA 8:7 ragkes en kayi is langun he menge langgam wey menge keranapranap: sikan is ebpenhipanew,
PSA 8:8 sikan is ebpemenlayang, wey sikan is diyà ebpen-ubpà te wahig.
PSA 8:9 He Nengazen he iyan Egalen dey, is kegkemekeǥeǥehem nu egkaahà kayi te tivuuk he kelibutan!
PSA 9:1 Ebpeselematan ku sikew, Nengazen, te ebpuun kayi te tivuuk he ǥehinawa ku. Ibpenudtul ku is langun he egkein-inuwan he menge vaal nu.
PSA 9:2 Utew Lavew he Megbevayà, egkelipey a wey egkanta a te idalig ku kenikew.
PSA 9:3 Emun edlepawen nu en is menge kuntada ku, ne ebpemelaǥuy sikandan he ebpemekeurambak, ne ebpemematey sikandan.
PSA 9:4 Su metazeng ka he menhuhukum he ebpimpinuu ziyà te pinuuwè nu te kedhadì; midhukuman a kenikew ne zutun neehè nu is puriba he kenà a zait he edsilutan.
PSA 9:5 Midhukuman nu ne midèdeetan nu is menge mezaat he menge nasyun, umbe kenè en sikandan egketenuzan taman te taman.
PSA 9:6 Mibpurungan nu zèdeeti is menge kuntada ku, ne kenè ne maan sikandan egkaahà taman te taman. Mibpemengkag nu is menge inged dan, ne kenè ne sikandan egketenuzan.
PSA 9:7 Iyan sikew, Nengazen, edhadì ka te wazà pidtemanan; andam ke en te kedhukum puun te pinuuwè nu te kedhadì.
PSA 9:8 Edhukuman nu te hustu is menge etew kayi te kelibutan; mezait wey wazà egkevintahaan dutun te kedhukum nu.
PSA 9:9 Nengazen, iyan ka egkeeputan te menge etew he edèdaaǥen dutun te timpu te kelised.
PSA 9:10 Edsarig kenikew is menge etew he nekekilala kenikew. Su wazè pa mid-aput diyà te kenikew he wazè nu zewata.
PSA 9:11 Sikiyu is menge etew, kentahi niw te kedalig is Nengazen he edhadì diyà te Zion. Iseysey niw ziyà te menge nasyun is nengeveelan din!
PSA 9:12 Ebelesan din is ebpemendaagdaag, su edseǥipaan din is kebpekitavang te menge dinaagdaag.
PSA 9:13 Nengazen, dekelà is ked-antus ku tenged te kedèdaaǥa kedì te menge kuntada ku. Ikehizu a kenikew ne libriya a te kemetayen,
PSA 9:14 su wey ku ikeseysey ziyà te menge etew ziyà te menge pultahan te inged he Zion is menge mibeelan nu, he iyan igkezeliǥa ku kenikew. Ne edlipey a zutun tenged te kedlibriya nu kediey.
PSA 9:15 Nehitavù diyà te menge nasyun is mezaat he pelanu zan. Iring te iyan sikandan neulug diyà te vudsi he mibeelan dan, etawa iring te iyan sikandan nelitag te kandan he litag.
PSA 9:16 Impekilala te Nengazen ke hentei sikandin pinaaǥi te metazeng he kedhukum din, ne is lalung he menge etew, iyan nekezezaat kandan is mezaat he menge vaal zan.
PSA 9:17 Kemetayen is egkepeveyaan te lalung he menge etew ziyà te langun he menge nasyun, su ǥeina te ebey-anan dan is Megbevayà.
PSA 9:18 Kenà taman te taman is kebey-ani te Megbevayà te menge egkengeayuayu. Ebpekeperateng gihapun is menge egkengeayuayu he edlibriyen sikandan te Megbevayà.
PSA 9:19 Sigi en Nengazen, kenè nu ituǥut he iyan ebmezeeǥen is kebpekegaga te menge etew zà duen. Hukumi nu is menge nasyun diyà te etuvangan nu.
PSA 9:20 Ipeǥezam nu, Nengazen, is gehinawa zan te kegkahandek kenikew. Ipeisip-isip nu kandan he menge etew zà sikandan.
PSA 10:1 Nengazen, maan is mibpekeziyù ka? Maan is mid-eles ka zutun te timpu he edlised key?
PSA 10:2 Tenged te kegkemepelevawen te lalung he menge etew, ibpaantus dan is menge egkaayuayu. Berakat he iyan sikandan melitag te idlitag dan te zuma he menge etew.
PSA 10:3 Ibpahambug dan is menge mezaat he tinguhè dan. Is menge etew he azen is dekelà diyà te ǥehinawa zan, ebpenrawak wey ed-undaunda kenikew, Nengazen.
PSA 10:4 Tenged te kegkemepelevawen te menge lalung, ne kenè en sikandan ebpetavang kenikew. Kenè dan ed-isipen is mehitenged kenikew.
PSA 10:5 Ne minsan pa zutun, layun sikandan ed-uswag, umbe wazè en diyà te isip dan is kedhukumi nu kandan. Ne và dan dà ed-un-undaha is menge kuntada zan.
PSA 10:6 Iyan diyà te isip dan is: wazà mezaat he egkehitavù kandan, kekenà layun dan ebmelipayen ne wazà ebpekekaid kandan.
PSA 10:7 Nepenù te rawak, tarù, wey hulga is menge lalag dan. Melemu zà diyà te kandan is kebpenrawak.
PSA 10:8 Ed-eyanan dan diyà te menge inged is menge etew he wazà mekesalà diyà te kandan. Ebpeniizan dan ne edhimetayan dan.
PSA 10:9 Iring sikandan te erimaung he ed-eles he ed-ayan su edekepen dan is menge egkaayuayu, ne emun ebpekezakep dan en ne eguyuzen dan haazà.
PSA 10:10 Mekehizuhizu is egkekeizan dan su ed-eminen dan en is desen dan te kedruuǥa zan kandin taman te kenè en sikandin ebpekeenew.
PSA 10:11 Iyan diyà te isip dan is iring te midsebpengan te Megbevayà is menge mata zin su kenè en ebpekilavet dutun te mezaat he vaal zan.
PSA 10:12 Nengazen he Megbevayà, kenè nu pekeuǥeta is kedsiluti nu te menge mezaat he etew! Ne kenè nu vey-ani is menge egkaayuayu he menge etew.
PSA 10:13 He Megbevayà, kenè nu ituǥut he un-undaha ka te menge mezaat he etew. Ipeehè nu kandan he tarù is egkeisip dan he kenè nu sikandan edsilutan tenged te menge mezaat he vaal zan.
PSA 10:14 Neehè nu is menge etew he ed-antus wey sikan is ebpenlised, ne andam ka he edtavang kandan. Edangep diyà te kenikew is mekehizuhizu he menge etew he iring te menge ilu, ne edtevangan nu sikandan.
PSA 10:15 Iawè nu is gehem te menge mezaat he etew. Siluti nu sikandan tenged te kezaat dan taman te egkeengkezan dan is ked-ulaula te mezaat.
PSA 10:16 Nengazen, edhadì ka te wazà pidtemanan. Egkengeawà is mezaat he menge nasyun kayi te kelibutan he midlimbag nu.
PSA 10:17 Nengazen, nezineg nu is ampù te menge egkaayuayu he menge etew. Ne ǥeina te ebpemineǥen nu sikandan, edlig-enan nu sikandan.
PSA 10:18 Ebpemineǥen nu is pengemuyù te menge ilu wey menge etew he edèdaaǥen, su wey ikeveǥey ziyà te kandan is hustu he kukuman, su wey wazè en ebpelihandek kandan he etew he kelibutanen dà.
PSA 11:1 Diyà a te Nengazen edhangyù he kelesaǥi e zin. Ne maan is egkaǥi kew kayi te kedì te, “Pelaǥuy ka iring te tagbis pehendiyà te menge vuvungan,
PSA 11:2 su zutun te merusirem edhingaten en te menge mezaat he etew is menge panè dan, su ebpenaan dan en is menge etew he edtinazeng.
PSA 11:3 Wazè en egkehimu te menge metazeng emun naawè en diyà te inged is metazeng he kukuman.”
PSA 11:4 Diyà is Nengazen ed ubpà te segradu he valey zin; diyà te langit is pinuuwè din te kedhadì. Ed-ahaan din wey edsusiyen din is langun he menge etew.
PSA 11:5 Edsusiyen din is menge metazeng wey is menge lalung he menge etew. Ne egkeepesan din is menge mesipala.
PSA 11:6 Ebpeuzanan din te egkeregreg he menge vaǥa wey esupri is menge lalung he etew; ne edsilutan din sikandan pinaaǥi te meinit he keramag he ebpekelupa kandan.
PSA 11:7 Su metazeng is Nengazen ne iyan igkelipey zin is metazeng he menge vaal. Umbe, is etew he edtinazeng ebpekeuvey ziyà te etuvangan din.
PSA 12:1 Tevangi a, Nengazen, su wazè en etew he nesamà he metinumanen wey egkeseriǥan.
PSA 12:2 Langun he menge etew ne ebpemenarùtarù diyà te menge zuma zan. Egemiten dan is meungangen he menge lalag te kebpenlimbung dan.
PSA 12:3 Deyzey pezem Nengazen ke ibpetiem nu sikandan is ebpemenlimbung pinaaǥi te meungangen he menge lalag wey sikan is menge gelbuwen.
PSA 12:4 Ke sikandan te, “Ebmezeeǥen key pinaaǥi te kebpahambug dey. Ebpekehimu key he egkaǥi te minsan hengkey he egkesuatan dey, ne wazà ebpekezawey kenami.”
PSA 12:5 Migkaǥi is Nengazen te, “Edtevangan ku is menge egkaayuayu su edèdaaǥen sikandan, ne utew subra is kebpekeantus dan. Egkelesaǥan ku sikandan su iyan heini ebperetengen dan.”
PSA 12:6 Egkeseriǥan utew is menge saad te Nengazen. Iring heini te pelata he ebpekesarig ki he lunsey heini su kepipitu ipaaǥi ziyà te hapuy para maawà is menge sahug din.
PSA 12:7 Nengazen, layun key kenikew ventayi, ne ilikey key te lalung he menge etew te minsan hengkey he timpu.
PSA 12:8 Su nekeelingkus kenami is lalung he menge etew ne edeliǥen pa te kezekelan is kelelalung dan.
PSA 13:1 Nengazen, sengemenu keluǥayad is kenè nu kedseǥipaa kediey? Taman en be heini te wazà pidtemanan? Sengemenu keluǥayad is ked-elesi nu kediey?
PSA 13:2 Sengemenu keluǥayad is kebpekaantus ku te kegkeliveg. Sengemenu keluǥayad is kebpekaantus ku te kegketeǥui te seeng te ǥehinawa ku? Sengemenu keluǥayad is kegkezeeǥa kedì te menge kuntada ku?
PSA 13:3 Nengazen he Megbevayè ku kenà a kenikew pesegdana; iveǥey nu en kedì is mibuyù ku pinaaǥi te ked-ampù ku. Ilikù nu kayi te kedì is desen ku su para kenà a mebpatey.
PSA 13:4 Su utew egkelipey is menge kuntada ku emun egkezaag e zan. Kenè nu ituǥut he mekezayandayan sikandan pinaaǥi te kegkezeeǥa zan kedì.
PSA 13:5 Ebpekesarig a kenikew, Nengazen, su ǥeina te kenà egkaawà is kebmahala nu kediey. Ne utew a egkelipey su edlibriyen e man kenikew.
PSA 13:6 Egkentahan ku sikew, Nengazen, su puun pa zengan mibpurungan a kenikew.
PSA 14:1 Is menge tulebung, egkaǥi sikandan diyà te gehinawa zan te, “Wazà Megbevayà!” Pudu sikandan lalung ne utew mezaat is menge vaal zan. Wazà minsan sevaha kandan he ebaal te meupiya.
PSA 14:2 Diyà te langit mid-ahà te Nengazen is keet-etawan su edsusiyen din ke zuen be nekesavut te tutuu wey ke zuen be edangep diyà te kandin.
PSA 14:3 Sikandan is langun, midsuwey zan te tutuu he zalan ne pudu memezaat is ulaula zan. Wazà minsan sevaha kandan he ebaal te meupiya.
PSA 14:4 Wazè be metueni kayi te lalung he menge etew is menge vaal zan? Netuenan dan heini! Ebpegpeǥesen dan is menge emurè ku te inged wey zan mekeselapì he iring dà sikandan te edsupal te keenen, ne kenà sikandan ed-ampù diyà te Nengazen.
PSA 14:5 Piru egkengeheratan sikandan, su edlevanan te Megbevayà is menge metazeng.
PSA 14:6 Edhimuwen dan he kenè edlampus is menge pelanu te menge egkaayuayu, piru iyan is Nengazen ebpengalang te menge egkaayuayu.
PSA 14:7 Deyzey ke ebpekeume en is edlibri te Israel he ebpuun diyà te Zion. Utew ebmelipayen is menge tig-Israel he menge etew te Nengazen, emun idlikù din en is meupiya he kebpekesavuk dan.
PSA 15:1 Nengazen, hentei is edtuǥutan nu he mekeubpàubpà diyà te valey nu? Hentei is edtuǥutan nu he ebpekeubpà diyà te segradu he vuvungan nu?
PSA 15:2 Is tavak te Nengazen, “Iyan is etew he wazà duen igkesawey wey meupiya is menge ulaula zin. Tutuu wey tinutuuwà is kegkaǥikaǥi zin.
PSA 15:3 Wazà sikandin mekeulug te kewusa ziyà te zuma, wey wazà sikandin medhimu wey megkaǥi te mezaat diyà te iring din he etew.
PSA 15:4 Ed-isipen din he wazà pulus te menge etew he kenè ku edewaten, iyan ebentuǥen din mulà is menge etew he edtahud kediey. Edtumanen din is pesarig din minsan pa ke egkereǥenan sikandin te kedtumana kayi.
PSA 15:5 Kenè din ibpaanak is selapì he ibpeutang din, wey kenà sikandin egkeuwit te suhul emun ibpetistiǥus sikandin su wey mehukumi te silut is kenà dait he edsilutan.” Is etew he iyan heeyan ulaula zin, ne egkehimu sikandin he layun melig-en ne kenà sikandin egkewaleng te minsan keenu.
PSA 16:1 He Megbevayà, bentayi a, su ziyà a te kenikew med-aput.
PSA 16:2 Iyan ka Nengazen ku, diyè dà ebpuun te kenikew is langun he menge meupiya he nezawat ku.
PSA 16:3 Emun bahin te metinumanen he menge etew nu he ziyà med-ubpà te tanà he Israel he utew menge vuutan, dekelà is kelipey ku tenged kandan.
PSA 16:4 Piru is menge etew he edsarig te menge ed-ezapen ed-iseg dà is kelised dan. Ne kenà a edtampu kandan te kebpelengesa zan para te zuma he menge ed-ezapen, ne kenè ku ebpengum-umawen is menge ngazan keniyan he menge ed-ezapen.
PSA 16:5 Nengazen, is kegkeengkena ku kenikew iyan en kegkeengkena ku te langun. Ibeǥey nu kediey is langun he kinahanglan ku. Ne ziyà te menge velad nu is untung ku.
PSA 16:6 Utew mekempet is imbeǥey nu kediey. Meupiya utew is langun he nezawat ku he ebpuun diyà te kenikew.
PSA 16:7 Edeliǥen ku sikew, Nengazen, su iyan ka layun edsambag kedì. Minsan mezukilem ne iyan ebpenurù kedì is isip he imbeǥey nu kediey.
PSA 16:8 Layun ku sikew ed-isipa, Nengazen. Umbe, kenà a egkahandek su geina te duma ku sikew.
PSA 16:9 Iyan heeyan hinungdan he melipayen a; utew zekelà is kelipey ku kayi te kebpengungubpaan ku. Ne ebpengungubpaan a he wazè ku igkelenew,
PSA 16:10 su kenà a kenikew ebpesegdanen he mekehendiyà a te lugar te menge minatey. Kenè nu idtuǥut he meredak is lawa te metinumanen he suluǥuen nu.
PSA 16:11 Ipenurù nu kediey is paaǥi wey ku maangken is ebpedayun he untung. Ne tenged te kebpekiduma nu kediey, wazè en kurang te kelipey ku; wazà pidtemanan te kelipey ku ziyà te avey nu.
PSA 17:1 Pemineǥa nu, Nengazen, is pengemuyù ku, para kenà a mevintahai. Pemineǥa nu is utew tutuu he ked-ampù ku.
PSA 17:2 Netuenan nu ke hengkey is hustu, umbe iyan ka zait he ebpekekaǥi he wazà mezaat he mid-ulaula ku.
PSA 17:3 Minsan is gehinawa ku ke mezukilem ne midsusi nu. Migezaman a kenikew ne wazè nu naahà he mezaat kayi te kediey. Midisisyun a he kenà a egkaǥi te mezaat
PSA 17:4 iring te ed-ul-ulahan te zuma. Midtuman ku is menge suǥù nu, ne pinaaǥi kayi, nelikayan ku is kebpesipala.
PSA 17:5 Layun ku ed-ikula is dalan nu, ne wazà a medsuwey zutun.
PSA 17:6 Megbevayè ku, ed-ampù a ziyà te kenikew su netuenan ku he edtevaken a kenikew. Pemineǥa nu is ampù ku.
PSA 17:7 Ipeehè nu is egkein-inuwan he ǥaǥew nu. Pinaaǥi te ǥehem nu, edlibriyen nu is menge etew he ebpekelasag kenikew tenged te menge kuntada zan.
PSA 17:8 Ilikey a kenikew te kezeetan iring te kedlikaya te etew te mata zin wey kenà mesazir, ne pengelangi a kenikew iring te kebpengalang te tagbis te menge anak din pinaaǥi te kedlekupi zin kandan.
PSA 17:9 Kelesaǥi a te menge kuntada ku he edsurung kediey kayi te nekeliǥuy su edhimetayan e zan.
PSA 17:10 Wazè dan hizu, ne pinaaǥi te kegkagi zan, ebpelavew zan.
PSA 17:11 Midpen-ehè e zan, ne ǥuntaan edliǥuyan e zan en. Edtaǥad dan dà te kebpekelugar zan te kedezaat kedì.
PSA 17:12 Iring sikandan te ed-ayan he erimaung diyà te elesè din, he andam he ebpitaspitas te egkezawi zin.
PSA 17:13 Nengazen, tebeka nu en sikandan wey zaaǥa nu is lalung he menge kuntada ku. Libriya a pinaaǥi te ǥehem nu, su wey e zan kenà mekeizi.
PSA 17:14 Libriya a wey a kenà mekeizi kayi te menge etew he iyan dà ed-isipen dan is kelibutanen he menge vutang. Siluti nu sikandan te silut he inteǥana nu kandan, ne iragkes nu en daan is menge anak dan. Ne elin nu teǥenahi te silut is menge apù dan.
PSA 17:15 Piru siak mulà, egkeehè ku sikew, su wazà a mebaal te salà. Emun egkepukew e en ne utew a zutun melipayen su egkeehè ku en sikew.
PSA 18:1 Nengazen, iyan ka mibeǥey kedì te zesen, ne mahal ku sikew.
PSA 18:2 Iyan ka, Nengazen, batu he endilungè ku, melig-en he elesè ku wey menluluwas. Iring ka te elesà he vatu, he ed-eles a ziyà te kenikew. Iyan ka kelasag ku, mekeǥeǥehem he menluluwas, wey eputà.
PSA 18:3 Edeliǥen ka, Nengazen, su emun ebuyù a te tavang diyà te kenikew, ne edluwasen a kenikew zutun te menge kuntada ku.
PSA 18:4 Is kemetayen iring te pisì he ebpekevakus kediey, wey iring te litag diyà te veyeey ku. Is kezeetan iring te vendes te zalem he ed-anud kedì.
PSA 18:6 Umbe, te kedlised ku, nengumew a kenikew, Nengazen. Mibuyù a te tavang diyà te kenikew te Megbevayè ku, ne zutun te valey nu mibpemineg nu is ked-ampù ku.
PSA 18:7 Ne zutun ne midlinug, ne minsan is menge pundasyun te menge vuvungan ne neyunggat, tenged te kegkepauk nu, Nengazen.
PSA 18:8 Migawas is evel puun te izung nu, ne ziyà te vèbè nu migawas is mekahandekhandek he hapuy wey egkeregreg he menge vaǥa.
PSA 18:9 Mibpuwasan nu is langit iring te kebpuwas te kurtina, ne mibpenaug ka he ziyà med-untud te mekepal he ǥapun.
PSA 18:10 Mid-untud ka te kirubin, ne utew heini meǥaan he edlayang he eduma te keramag.
PSA 18:11 Midhimu nu is merusirem he tambun te peliǥuy nu. Mid-eles ka ziyà te mekepal he ǥapun.
PSA 18:12 Midpengilat diyà te etuvangan nu, ne puun te kivel mid-uzan te menge ǥiyew wey egkeregreg he menge vaǥa.
PSA 18:13 Is laǥeng nu Nengazen, te Utew Lavew he Megbevayà, iring te ruǥung diyà te langit.
PSA 18:14 Mibpanè nu te kilat is menge kuntada nu, ne nemekepelaǥuy zan he egkengeteranta.
PSA 18:15 Emun edawey ka wey utew ka egkepauk ne egkengemezahan is daǥat ne egkaahà is tanà diyà te kinezizeleman kayi, wey egkaahà is pundasyun te kelibutan.
PSA 18:16 Puun te langit midawat a kenikew, ne inggaun a kenikew puun te mezalem he wahig.
PSA 18:17 Midluwas a kenikew zutun te mekeǥeǥehem he menge kuntada ku he kenè ku egkesukulan.
PSA 18:18 Midsurung e zan hein egkereǥenan a, piru mid-uǥupan a kenikew, Nengazen.
PSA 18:19 Midlibri a kenikew te ebpekekaid pezem kedì su ingkesuat a kenikew.
PSA 18:20 Edtuvazan a kenikew su ǥeina te metazeng a, wey wazè ku neveelan he salà.
PSA 18:21 Su edsunuzen ku is menge paaǥi nu, ne sikew is Nengazen he Megbevayè ku, wazè ku sikew engkezi.
PSA 18:22 Edtumanen ku is langun he menge suǥù nu, ne wazè ku supaka is menge sulunuzen he ibpesunud nu.
PSA 18:23 Netuenan nu he wazà igkesawey te keugelingen ku, ne edlikayan ku is kebaal te salà.
PSA 18:24 Edtuvazan a kenikew su neehè nu he metazeng a, ne wazè ku eveelan he ibpekesalà ku.
PSA 18:25 Metinumanen ka ziyà te menge etew he metinumanen daan. Meupiya ka ziyà te menge etew he meupiya zaan.
PSA 18:26 Tinutuuwà is kebpekidepitè nu te menge etew he tinutuuwà daan is kebpekidepitè dan kenikew, ne metau ka zaan he bales te menge lalung.
PSA 18:27 Uya, edlibriyen nu is kenà menge mepelevawen, piru ibpekevavè nu mulà is menge etew he mepelevawen.
PSA 18:28 Nengazen he Megbevayè ku, iyan ka kerayag ku. Emun merusirem, ne iyan ka sulù ku.
PSA 18:29 Tenged te kedtavang nu, ebpekehimu a he edsurung te menge sundaru, ne egpekehimu a zaan he ebpemenahik te verengbeng he nekeliǥuy te inged.
PSA 18:30 Is kenikew he paaǥi, Megbevayà, ne wazè din sayep. Is lalag nu egkeseriǥan. Iring ka te kelasag te langun he ebuyù kenikew te pengalang.
PSA 18:31 Iyan ke zà, Nengazen, kes Megbevayà; kes endilungè dey he vatu.
PSA 18:32 Iyan ka ebeǥey kedì te zesen wey ebantey kedì diyà te ibayè ku.
PSA 18:33 Edlig-enan nu is menge paa ku iring te paa te selazeng, para mezesen a he ebpenekezeg diyà te metikang he menge lugar.
PSA 18:34 Ebpenuruen a kenikew te kebpekidtebek, iring te kedhingat te mevisekeg he panà.
PSA 18:35 Ebpengelangan a kenikew iring te kelasag, umbe nelibri is untung ku. Ed-ipaten a kenikew pinaaǥi te ǥehem nu, Ne nevantug a pinaaǥi te kedtevangi nu kedì.
PSA 18:36 Ebeǥayan a kenikew te meupiya he ibayà, umbe wazà mekezugkilas is menge paa ku.
PSA 18:37 Midal-as ku is menge kuntada ku ne nesaut ku sikandan. Ne human a medlikù hein nengezaag ku en sikandan.
PSA 18:38 Midezeetan ku sikandan ne nengepiley zan diyà te uvey te nehitindeǥan ku, ne kenè en sikandan ebpekeenew.
PSA 18:39 Mibeǥayan a kenikew te zesen te kebpekidtebek, ne nengezaag ku is menge kuntada ku.
PSA 18:40 Mibpepeleǥuyan a kenikew te menge kuntada ku, ne midezeetan ku sikandan.
PSA 18:41 Mibuyù dan te tavang, piru wazà midlibri kandan. Nengumew-umew zan kenikew, piru wazè nu sikandan tevaka.
PSA 18:42 Midruntek ku sikandan taman te neiring en sikandan te eliyavuk he idlayap te keramag. Midtekutakan ku sikandan he iring te tunaan diyà te menge zalan.
PSA 18:43 Midluwas a kenikew te ribildi he menge etew. Midhimu a kenikew he pengulu te menge nasyun. Is menge lumelengyawà ne ebpenilbi kedì.
PSA 18:44 Midluhud sikandan kedì tenged te kegkehandek dan, ne midtuman dan is suǥù ku.
PSA 18:45 Neewaan sikandan te kevurut, umbe migawas dan puun te mid-elesan dan he ebpengerkeren te kegkahandek.
PSA 18:46 Uuyag ka, Nengazen! Edeliǥen ka is endilungè ku he vatu. Ibayew ku sikew tenged te iyan ka Megbevayà he menluluwas ku.
PSA 18:47 Ebelesan nu is menge kuntada ku, ne ibpesakup nu kedì is menge nasyun.
PSA 18:48 Midluwas a kenikew zutun te utew menge mesipala he menge kuntada ku, ne ibpezaag nu kedì sikandan.
PSA 18:49 Umbe, ibpezalig ku sikew ziyà te menge nasyun. Egkentahan ku sikew te menge kedalig.
PSA 18:50 Is pinilì nu he hadì ebeǥayan nu te zekelà he menge kezeeǥan. Mahal nu si David wey is menge kevuwazan din te wazà pidtemanan.
PSA 19:1 Is hewhewanan ebpahayag te utew kegkemekeǥeǥehem te Megbevayà, su zutun egkeehè ta is menge linimbag din.
PSA 19:2 Ke và dan dà etew ne edtudtulen dan is gehem te Megbevayà te maandew wey te mezukilem.
PSA 19:3 Minsan kenè ta egkezineg is menge lalag dan,
PSA 19:4 ne ebpekeuma ziyà te minsan hendei kayi te kelibutan is tudtul zan; nekeeneb heini ziyà te minsan hendei. Mibeelan te Megbevayà diyà te kewkewangan is egkesevukan te andew.
PSA 19:5 Ne puun dutun, egawas is andew ke meselem he melipayen iring te ebpengesawa he ibpenahik, wey iring te ebpekidlumbà he andam en he ebpelelaǥuy.
PSA 19:6 Edsilà heini ziyà te edsilaan ne edsanlep diyà te edsenlepan. Ne egkesuǥat is langun te keinit din.
PSA 19:7 Is kesuǥuan te Nengazen wazè din sayep. Ne ebpekezasig heini kenita. Egkeseriǥan is menge penurù te Nengazen ne ebpekeveǥey heini te ketau te kenà metau.
PSA 19:8 Hustu is menge sulunuzen te Nengazen, ne ebpekeveǥey heini te kelipey. Wazà sayep te menge suǥù te Nengazen ne ebpeketayew te isip te etew.
PSA 19:9 Meupiya is kedtahud te Nengazen, ne ereg heini he ed-ul-ulahan te wazè din pidtemanan. Is kedhukum te Nengazen hustu wey metazeng.
PSA 19:10 Ne is langun kayi edhuna pa he mahal te lunsey he vulawan, he ke và dà keenen, edhuna pa he meemis te teneb he wazè din sahug.
PSA 19:11 Pinaaǥi kayi, Nengazen, egkeleǥuyan a is suluǥuen nu. Ne emun edtumanen ku heini ne mahabet is keupiyaanan he egkekuwa ku.
PSA 19:12 Usahay kenà egketuenan te etew he nekesalà sikandin. Tenged kayi Nengazen, peseyluwa a kenikew te menge salà he neveelan ku he wazè ku metueni.
PSA 19:13 Ne tevangi a zaan kenikew wey a kenà mekevaal te menge salà he edtivevaan ne kenè nu ituǥut he meuripen a kayi, su para wazà igkesawey kedì ne zutun egkelikayan ku is mehabet he kelasi te kebpekesalà.
PSA 19:14 Sikew, Nengazen, is eputè ku, wey mibelukas kedì, berakat he ebpekepenunuat kenikew is menge lalag he egkengekaǥi ku wey egkeisip ku.
PSA 20:1 Berakat he edtevaken te Nengazen is ampù nu ke edlised ka. Berakat he idlikey ka te Megbevayà ni Jacob te ebpekekaid kenikew.
PSA 20:2 Berakat he egkeumahan ka te tavang din kenikew he ebpuun diyà te valey zin diyà te Zion.
PSA 20:3 Berakat he zewata zin is menge halad nu, iring te pemuhat he edtutungen.
PSA 20:4 Berakat he iveǥey zin kenikew is ebpengeduyen nu. Berakat he medlampus is menge pelanu nu.
PSA 20:5 Ed-ugyab key tenged te kezeeǥan nu, ne edsilibra key he edalig te Megbevayè tew. Berakat he iveǥey te Nengazen is langun he ebuyuen nu.
PSA 20:6 Guntaan netuenan ku he ibeǥey te Nengazen is kezeeǥan diyà te mibpilì din he hadì. Ne ziyà te langit he iyan kes segradu he ubpeey zin, edtevaken din is ked-ampù dutun te mibpilì din. Ne layun din ibpezaag pinaaǥi te gehem din.
PSA 20:7 Emun duen tebek, is duma edsarig te menge kerwahi zan, ne is duma pa ne edsarig te menge kudè dan, iyan, sikami mulà, iyan edseriǥan dey is Nengazen he iyan Megbevayè dey.
PSA 20:8 Sikan is edsarig te menge kerwahi wey menge kudà egkengezeetan, iyan, sikami mulà, ebpekezaag key wey kenà egkaawà is kelig-en dey.
PSA 20:9 Nengazen, beǥayi nu te kezeeǥan is mibpilì nu he hadì, ne tevaka key kenikew emun ebpengum-umawen dey sikew.
PSA 21:1 Nengazen, mibmelipayen is hadì he pinilì nu, tenged te mibeǥayan nu sikandin te zesen. Utew sikandin nelipey su mibpengelinteuwan nu he mekezaag sikandin.
PSA 21:2 Imbeǥey nu kandin is penganduy zin; imbeǥey nu kandin is ebuyuen din.
PSA 21:3 Midawat nu sikandin ne mibeǥayan nu te meupiya he menge vutang. Migkurunahan nu sikandin te lunsey he vulawan.
PSA 21:4 Mibuyù din diyà te kenikew he sumpuli nu is untung din, ne mibeǥayan nu sikandin te meluǥayad he untung.
PSA 21:5 Tenged te kezeeǥan he imbeǥey nu ziyà te kandin nevantug sikandin wey midekelà is dengeg din.
PSA 21:6 Ne ebpedayun is menge tuvad nu kandin. Ne utew nekeveǥey kandin te kelipey is kebpekiduma nu kandin,
PSA 21:7 su edsarig man sikandin kenikew te Nengazen he iyan kes Utew Lavew he Megbevayà. Ne tenged te kebmahala nu kandin, ne kenà sikandin egkemenu.
PSA 21:8 Is gehem nu ne iyan ebpekezaag te langun he menge kuntada nu.
PSA 21:9 Emun ebpeehè ke en kandan, edezeetan nu sikandan, ne egkeiring sikandan te rapug he utew meregreg. Ne tenged te pauk nu kandan, ed-epuren nu sikandan te hapuy.
PSA 21:10 Edhimetayan nu is langun he kevuwazan dan, ne wazà edresik kandan.
PSA 21:11 Mezaat is pelanu zan kenikew, piru kenè dan edlampus.
PSA 21:12 Su ebpelaǥuy sikandan emun egkeehè dan he andam ke en te kedsilut kandan, he iring te ziyè nu en ibpesinaru te kandan is edhingaten nu he panà.
PSA 21:13 Nengazen, ereg ka he edeliǥen tenged te zesen nu. Umbe, egkanta key te idalig kenikew tenged te kegkemekeǥeǥehem nu.
PSA 22:1 Megbevayè ku, Megbevayè ku, maan is mibey-anan a kenikew? Maan is meziyù ka kayi te kedì? Nezumahan en te zag-es is ked-antus ku, piru wazè e pa ǥihapun kenikew tevangi.
PSA 22:2 Megbevayè ku, wazè ku en himeley su maandew wey mezukilem is kebpengumew-umew ku kenikew, iyan, wazà a kenikew tevaka.
PSA 22:3 Iyan waǥas ka, ne edeliǥen ka te menge tig-Israel su iyan ka hadì dan.
PSA 22:4 Midsarig kenikew is menge kepuun dey ne midlibri nu sikandan.
PSA 22:5 Mignganey ke zan ne midtevangan nu sikandan. Midsarig sikandan kenikew ne wazà sikandan mepakyas.
PSA 22:6 Ebpeel-elezan a wey edsudien a te menge etew, ke sikandan te, “Wazè din pulus; kenà sikandin iring te etew, kekenà, iring sikandin te tagkey.”
PSA 22:7 Is kada sevaha he ebpekaahà kedì ne ed-insultu kedì, ne ebpengelengkeleng is egkaǥi te,
PSA 22:8 “Midsarig ke man buwa te Nengazen, ne maan is wazè ke zin libriya? Ke tutuu he nekepenunuat ka kandin, ne maan is wazè ke zin tevangi?”
PSA 22:9 Piru iyan ka mibpeǥawas kedì puun te ǥetek te iney ku, ne puun pa te edsusu e pa, ne inlikey a kenikew te ebpekezezaat kedì.
PSA 22:10 Ne puun te kedlusaza kedì ne insarig e en diyà te kenikew, ne iyan ke zà Megbevayè ku.
PSA 22:11 Umbe, kenà a kenikew vey-ani su meǥaan en egkeula-ula is melised ne wazà duma he ebpeketavang kedì.
PSA 22:12 Edliǥuyan a te menge kuntada ku, iring sikandan te memezesen he tudu he vaka ziyà te tanà he Bashan.
PSA 22:13 Iring daan sikandan te menge erimaung he ebpemenhiniǥer is eginganga he andam en he edaas kedì.
PSA 22:14 Naawè en is desen ku; iring a te wahig he id-ulà, ne henduen be te nekegkikiwey en is menge tulan ku. Naawè en daan is kevurut ku; iring a te netunew he kendilà.
PSA 22:15 Naawè en is desen ku; iring a te tanà he mibadtik, ne mibmevisekeg en is dilè ku. Nengazen, ebey-anan a kenikew minsan pa te edserupatey ad.
PSA 22:16 Midliǥuyan a te lalung he menge etew; iring sikandan te menge asu he ebpemen-erungut kayi te kedì. Mibpelehusan dan is menge belad ku wey menge paa ku.
PSA 22:17 Nenletew en is menge tulan ku; ne is menge etew, ne edtengtengan e zan dà.
PSA 22:18 Mibahinbahin dan is menge visti ku pinaaǥi te ripa.
PSA 22:19 Piru, sikew, Nengazen, kenà a kenikew pekeziyui. Iyan ka ebpekeveǥey kedì te zesen ne tevangi ad guntaan.
PSA 22:20 Libriya a su edhimetayan a te menge kuntada ku; kenè nu ituǥut he mepatey a kayì te henduen be te menge asu.
PSA 22:21 Libriya a su egkeizen a te iring te menge erimaung. Tevaka nu is ampù ku ne libriya a su egkeizen a te iring te menge tudu he vaka.
PSA 22:22 Idsangyew ku ziyà te menge emurè ku te inged is mibpemeelan nu. Edeliǥen ku sikew ziyà te menge kevurunan dan.
PSA 22:23 Sikiyu is edtahud te Nengazen, deliǥa niw sikandin! Sikiyu is menge etew kayì te Israel he menge kevuwazan ni Jacob, bentuǥa niw wey kehendeki niw is Nengazen!
PSA 22:24 Su wazè din pesegdana is menge elentusen te menge egkaayuayu. Wazè din sikandan iniyuǥi, kekenà, ebpemineǥen din is kebuyù dan te tavang.
PSA 22:25 Midasig a kenikew su wey a medalig kenikew diyà te kevurunan te menge etew nu. Diyà te etuvangan te menge etew he edtahud kenikew, edtumanen ku is menge pesarig ku he ibpemuhat ku ziyà te kenikew.
PSA 22:26 Egkaan is menge egkaayuayu ne egkahantey sikandan. Is menge etew he midangep diyà te kenikew ne edalig kenikew. Berakat he mebmeupiya wey mebmeluǥayad is untung dan.
PSA 22:27 Egketenuzan ka te langun he menge etew ziyà te minsan hendei kayi te tivuuk he kelibutan ne edlikù dan diyà te kenikew, Nengazen, ne ed-ezapen ke zan,
PSA 22:28 Su iyan ka hadì, ne iyan ka edumala te menge nasyun.
PSA 22:29 Kenà duwazuwa he edsimba kenikew is langun he menge sepian he etew kayi te kelibutan. Minsan is langun he menge etew he henduen be te ebpematey en, ne ibpeehè dan is kedtahud dan kenikew su edluhud dan. Wey minsan sikan is nemematey en,
PSA 22:30 ebpenilbi kenikew is menge kevuwazan dan. Ebpenuruen mehitenged kenikew te Nengazen is huziyan he menge lapis te menge kevuwazan.
PSA 22:31 Ne sikan is huziyan he egkengeetew, edtudtulan daan sikandan he midlibri nu is menge etew nu. Ne iyan ka mibaal kayi.
PSA 23:1 Nengazen, iyan ka ed-elima kedì, umbe egkekuwa ku is langun he egkinehenglanen ku.
PSA 23:2 Iring a te kerehidu he ibpehimeley nu ziyà te penebtavà he zutun is gerabi he memeilem he sagbet. Ne ibpeikul a kenikew ziyà te meleneng he wahig.
PSA 23:3 Edlig-enan a kenikew. Ibpeikul a kenikew te hustu he zalan te ketazeng su wey ka meveǥayi te zengeg.
PSA 23:4 Minsan pa ke edhipanew a ziyà te suǥud he zuen duen ebpekepatey, ne kenà a egkahandek su zuma ku man sikew. Ebpekeveǥey kedì te kelig-en wey kelipey is kegiyahi nu wey kebpengelangi nu kedì.
PSA 23:5 Ed-endaman a kenikew te keenen diyà te etuvangan te menge kuntada ku. Impurung a kenikew itetepian su midlenahan nu is ulu ku. Ne ebpepezaharan a kenikew te inumen.
PSA 23:6 Nesiguru ku he ke sengemenu keluǥayad is untung ku ne iyan daan keluǥayad te kebpurungi nu wey kebmahala nu kedì. Ne ziyà a ed-ubpa te valey nu, Nengazen, te wazà pidtemanan.
PSA 24:1 Is kelibutan wey is langun he ed-ubpà kayi, ne gaked te Nengazen.
PSA 24:2 Iyan sikandin mibangun te kelibutan ne ziyè din benguna te mezalem he wahig.
PSA 24:3 Hentei is egkehimu he edtekezeg diyà te vuvungan te Nengazen? Hentei is ebpekeseled diyà te segradu he valey zin?
PSA 24:4 Iyan sikan is meupiya is ulaula zin wey lumpiyu is isip din, wazà med-azap te zuma he menge ed-ezapen, wey kenà tarù is penangdù din.
PSA 24:5 Edtuvazan wey ed-isipen sikandin he metazeng te Nengazen, is Megbevayà he menluluwas din.
PSA 24:6 Iyan heeyan kelasi te etew he egkehimu he ed-aput wey edsimba te Megbevayà ni Jacob.
PSA 24:7 Puwasi is kezaan he menge ǥemawan duen te valey te Megbevayà su para mekeseled sikan is mekeǥeǥehem he Hadì.
PSA 24:8 Hentei ves heini is mekeǥeǥehem he Hadì? Iyan sikandin sikan is Nengazen he mezesen wey melig-en he ebpekidtebek.
PSA 24:9 Puwasi is kezaan he menge ǥemawan duen te valey te Megbevayà su para mekeseled sikan is mekeǥeǥehem he Hadì!
PSA 24:10 Hentei ves heini is mekeǥeǥehem he Hadì? Iyan sikandin sikan is Nengazen he Mekeǥeǥehem. Uya, iyan sikandin is mekeǥeǥehem he Hadì.
PSA 25:1 Nengazen he Megbevayè ku, iyan ka ed-empuan ku wey edseriǥan ku. Kenè nu ituǥut he mezaag a te menge kuntada ku, su para kenà a meeled-eled.
PSA 25:3 Is edsarig kenikew kenà egkepeel-elezan, iyan, egkepeel-elezan sikan is edluib kenikew.
PSA 25:4 Penurua a, Nengazen, te menge paaǥi nu.
PSA 25:5 Penurua a te paaǥi para kenà a mekesuwey te tutuu, su iyan ka Megbevayà he menluluwas ku. Layun a edsarig kenikew.
PSA 25:6 Tentenuzi nu, Nengazen, is hizu wey ǥaǥew nu he impeehè nu puun pa zengan.
PSA 25:7 Ne kenè nu en tentenuzi is menge salà he neveelan ku hein betan-en e pa. Tenged te ǥaǥew nu, tentenuzi a, Nengazen, su wey nu ikepaahà is keupiya nu.
PSA 25:8 Meupiya ka wey metazeng ka, Nengazen, umbe ipenurù nu ziyà te menge nengetazin is hustu he zalan.
PSA 25:9 Egiyahan nu is kenà menge mepelevawen te kebaal te hustu. Ipenurù nu kandan is kenikew he menge paaǥi.
PSA 25:10 Dutun te langun he ebeelan nu, ipeehè nu is gaǥew nu wey kegkemetinumanen nu ziyà te menge edsunud te ibpetuman diyà te kesuǥuan nu.
PSA 25:11 Nengazen, minsan mahabet is menge salè ku, peseyluwa a kenikew, su para mezeliǥi ka.
PSA 25:12 Nengazen, is menge etew he edtahud kenikew, egiyahan nu wey zan meikul is dalan he ereg he ed-ikulen.
PSA 25:13 Meuswaǥen is ked-ubpè dan, ne ebpedayun is ked-ubpà te menge kevuwazan dan diyà te tanà he Israel.
PSA 25:14 Nengazen, utew nu emiǥu is menge etew he edtahud kenikew ne ibpetentenuzan nu kandan is kebpekid-uyun nu kandan.
PSA 25:15 Diyè e zà layun edangep te kenikew, su iyan ka edlibri kedì te ebpekezezaat kedì.
PSA 25:16 Pemineǥa a wey kehizuwi a, su midsebsevaha a ne edèdaaǥen a.
PSA 25:17 Mid-iseg en is menge kemereǥenen ku; libriya a te kegkeliveg ku.
PSA 25:18 Is-isipa a kenikew kayi te menge elentusen ku, ne peseyluwa a te langun he menge salè ku.
PSA 25:19 Ahaa nu man, utew mahabet is menge kuntada ku ne zekelà is kedumut dan kedì.
PSA 25:20 Tipiǥi nu is untung ku, ne libriya a kenikew! Kenà a kenikew peel-elezi, su ziyà a med-aput te kenikew para kenà a mekeizi.
PSA 25:21 Metazeng a wey wazà igkesawey kediey; umbe iyan ke en metau he kenà a mekeizi. Edsarig e zà kenikew.
PSA 25:22 Ipelingkawas nu, Megbevayè ku, is menge tig-Israel te langun he menge kelised dan.
PSA 26:1 Nengazen, ipeehè nu he wazè ku salà, su nengungubpaan a he wazà igkesawey kedì ne mibpurung a medsarig kenikew.
PSA 26:2 Susiya a, Nengazen; susiya nu is isip ku wey ǥehinawa ku.
PSA 26:3 Su layun ku edtentenuzi is gaǥew nu, ne layun ku sikew ebpezumdumahi.
PSA 26:4 Wazà a mebpekiduma te menge etew he limbungan wey uvag-uvag dà is menge ulaula zan.
PSA 26:5 Kenà a uyun te menge kevurunan te mezaat he menge etew. Ne wazà a mulà mebpekiduma kandan.
PSA 26:6 Edlùluan ku is menge velad ku he tuus te wazè ku salà. Ne edhendiyà a te pemuhatà he zutun ka ebpemuhata su ed-azap a kenikew, Nengazen.
PSA 26:7 Ne zutun egkanta a te menge kentahan he para te kebpeselamat, wey edseysayen ku is langun he egkein-inuwan he menge vaal nu.
PSA 26:8 Nengazen, mahal ku is baley he ubpeey nu, he iyan kes lugar he zutun egkaahà is kegkemekeǥeǥehem nu.
PSA 26:9 Kenà a kenikew zèdeeti duma te menge mekesesalà, iring te menge teremunù.
PSA 26:10 Heini sikandan, layun ebevaal te mezaat ne ebpenepian dan is duma.
PSA 26:11 Iyan, siak mulà, wazà igkesawey kediey, umbe libriya a wey kehizuwi a.
PSA 26:12 Guntaan netuenan ku he kenè e en egkemenu, umbe, edeliǥen ku sikew Nengazen diyà te ketiǥuman te menge etew nu.
PSA 27:1 Is Nengazen iyan kerayag ku, menluluwas ku, wey eputè ku, umbe wazà ereg he igkahandek ku.
PSA 27:2 Emun edsurungen a te lalung he menge kuntada ku su edhimetayan e zan, ne iyan dan egkezaag ne kenà a iyan.
PSA 27:3 Minsan edliǥuyan a te mahabet he menge sundaru, ne kenà a egkahandek. Minsan pa ke edsurungen e zan, edsarig a te Megbevayà.
PSA 27:4 Duen sevaha he mibuyù ku ziyà te Nengazen he utew ku en egkesuati he iyan is: kebpekeubpè ku ziyà te valey zin seled te tivuuk he untung ku, ne zutun egkepurung ku egkengunùngunù is keupiya zin, ne ebpekahangyù a ziyà te kandin he giyahi e zin.
PSA 27:5 Emun timpu te kesamuk id-eles e zin wey edhimu sikandin te paaǥi wey a kenà memenu zutun te valey zin. Diyè e zin ibpehulenà te lugar he kenà a zuen egkekeizan.
PSA 27:6 Umbe, egkezaag ku is menge kuntada ku he edliǥuy kediey. Ne ebpemuhat a zutun te valey te Nengazen duma is ked-uruhuy ku su utew a egkelipey. Ne egkentahan ku sikandin.
PSA 27:7 Pemineǥa a, Nengazen, ke ebpengum-umawen ku sikew; kehizuwi a ne iveǥey nu kedì is ebuyuen ku.
PSA 27:8 Neǥezam ku kayi te ǥehinawa ku he ibpezangep a kenikew ziyan te kenikew, umbe kenà duwazuwa is kedangep ku ziyan te kenikew, Nengazen.
PSA 27:9 Kenà a kenikew elesi! Kenà a kenikew iselikwey tenged te pauk nu kedì te suluǥuen nu. Iyan ka neketavang kedì, umbe kenà a pesegdana wey iselikwey, Megbevayà he menluluwas ku.
PSA 27:10 Minsan pa ke ed-engkezan a te amey ku wey iney ku, ed-eturen e zed gihapun kenikew, Nengazen.
PSA 27:11 Impenurù nu kedì is kenikew he menge paaǥi. Ne ziyà a kenikew ipeikul te hustu he zalan, su zuen ku menge kuntada.
PSA 27:12 Kenà a kenikew ipalad diyà te kandan; edèdeetan e zan kun su egkeǥiyen dan he neveelan ku is wazè ku meveeli.
PSA 27:13 Piru midtuu a he egkeseǥazan ku is keupiya nu mintras ebpengungubpaan e pa kayì te tanà.
PSA 27:14 Sarig kew te Nengazen! Mebpekelig-en kew ne kenè kew medarà. Purung kew sarig diyà te Nengazen!
PSA 28:1 Nengazen he iyan kutè ku. Ebpengumew a kenikew. Pemineǥa nu is ked-ampù ku! Su emun kenà a kenikew ebpemineǥen, ne megaan a ebpatey.
PSA 28:2 Pemineǥa nu is hangyù ku te tavang diyà te kenikew, zutun te ziyà a medsinaru te segradu he valey nu he imbayew ku is menge velad ku.
PSA 28:3 Kenà a siluti zuma te menge lalung. Uvag dà sikandan ebpekid-emiǥu su mezaat is pelanu zan.
PSA 28:4 Belesi nu sikandan te sungkad te menge vaal zan. Siluti nu sikandan tenged te mezaat he menge vaal zan.
PSA 28:5 Su wazè dan seǥipaa is menge mibeelan nu. Umbe zezeeti nu sikandan ne veleǥaza nu en sikandan dutun te kebpekesavuk dan.
PSA 28:6 Nengazen, ereg ka he edeliǥen, su midineg nu is kebpehizuhizu ku kenikew.
PSA 28:7 Iyan ka mibeǥey kedì te zesen; iyan ka migkelasag kedì. Midsarig a kenikew ne edtevangan a kenikew. Umbe utew a melipayen ne migkanta a te peselamat diyà te kenikew.
PSA 28:8 Iyan ka, Nengazen, mibeǥey te zesen diyà te menge etew nu. Iyan ka melig-en he eputà wey menluluwas te pinilì nu.
PSA 28:9 Libriya nu wey tuvazi nu is menge etew he ǥaked nu. Bentayi nu sikandan he iring te ed-elima te kerehidu; etimana nu sikandan te wazà pidtemanan.
PSA 29:1 Sikiyu is menge linimbag diyà te langit, deliǥa niw is Nengazen. Deliǥa niw is gehem din wey zesen din.
PSA 29:2 Deliǥa niw is kegkemekeǥeǥehem din. Ezapa niw sikandin diyà te segradu he etuvangan din.
PSA 29:3 Ebpenriǥungriǥung is laǥeng te Nengazen he iyan kes mekeǥeǥehem he Megbevayà, ne egkezineg heini ziyà te menge zaǥat.
PSA 29:4 Is laǥeng te Nengazen, mekeǥeǥehem wey zekelà is dengeg din
PSA 29:5 ne ebpekevadtì te melig-en he kayu ziyà te Lebanon.
PSA 29:6 Edhuyungen te Nengazen is menge vuntud diyà te Lebanon wey Hermon, ne egkeiring heini te nati he vaka he edlinglingketew.
PSA 29:7 Is laǥeng te Nengazen, ebpekepekilat
PSA 29:8 wey ebpekehuyung te sibsivayan; egkehuyung din minsan is sibsivayan diyà te Kadesh.
PSA 29:9 Is laǥeng te Nengazen, ebpekepaanak te selazeng wey ebpekepetaktak te zahun te menge kayu. Ne ziyà te valey zin ibensag te langun is lalag he, “Mekeǥeǥehem is Megbevayà!”
PSA 29:10 Is Nengazen iyan ebmandù te zalem te menge wahig; iyan sikandin kes hadì he ebmandù te wazà pidtemanan.
PSA 29:11 Edlig-enan te Nengazen is menge etew zin, ne ebeǥayan din sikandan te meupiya he kebpekesavuk.
PSA 30:1 Edeliǥen ku sikew, Nengazen, su midlibri a kenikew te kezeetan ne wazè nu ituǥut he mekezayandayan is menge kuntada ku tenged te kebpekesavuk ku.
PSA 30:2 Nengazen he Megbevayè ku, mibpetavang a kenikew tenged te zaru ku, ne mibewian a kenikew.
PSA 30:3 Midlibri a kenikew te kemetayen. Wazà nu ituǥut he mepatey a.
PSA 30:4 Sikiyu is metinumanen he menge etew te Nengazen, deliǥa niw is Nengazen pinaaǥi te kegkanta niw. Deliǥa niw sikandin te kedalig pinaaǥi te kedtentenuzi niw te kegkewaǥas din.
PSA 30:5 Su melemu egkaawà is pauk din, iyan, is keupiya zin mulà, ebpedayun te wazà pidtemanan. Egkeseeng ki emun timpu te mezukilem, piru egkelipey ki zed emun ebmeselem en.
PSA 30:6 Nengazen, tenged te keupiya nu in-iring a kenikew te vuntud su midlig-enan a kenikew. Ne tenged te melig-en is kebpekesavuk ku, ne ziyà te ǥehinawa ku ebpekekaǥi a te, “Kenà ad iyan egkemenu.” Piru hein wazà a kenikew seǥipaa, neǥezam ku is kegkahandek.
PSA 30:8 Nengumew-umew a kenikew, Nengazen, ne midhangyù a. Ke siak te,
PSA 30:9 “Hengkey is egkekuwa nu emun ebpatey a? Su kenè en man ebpekezalig kenikew is minatey en. Ne kenè din en daan igkeseysey is kebmetinumanen nu.
PSA 30:10 Pemineǥa a kenikew, Nengazen, ne kehizuwi a. Ne tevangi a.”
PSA 30:11 Tenged te tavang nu, mid-ilisan nu te melipayen he kedsayew is keseengan ku. Impeluwas nu kedì is bisti ku he saku he tuus te kedlalew ku, ne mibeǥayan a kenikew te kelipey.
PSA 30:12 Umbe, kenà a ebpereremek dà, kekenà, egkanta a te menge kedalig kenikew. Nengazen he Megbevayè ku, ebpeselamatan ku sikew te wazà pidtemanan.
PSA 31:1 Nengazen, diyà a te kenikew med-aput. Ne kenè nu ituǥut he mepeel-elezi a. Libriya a su metazeng ke man.
PSA 31:2 Pemineǥa a, ne segugunà a kenikew libriya. Kelesaǥi a he iring te nekeendilung a ziyà te vatu; pengelangi a he iring te nekeeles a ziyà te melig-en he elesà.
PSA 31:3 Geina te iyan ka endilungè ku wey melig-en he elesà, penurua a wey ǥiyahi a su wey ka meveǥayi te zengeg.
PSA 31:4 Ilikey a kenikew te litag he idlitag kedì te menge kuntada ku, su iyan ka pengalang ku.
PSA 31:5 Idsarig ku kenikew is untung ku. Libriya a kenikew, Nengazen, su iyan ka kes Megbevayà he egkeseriǥan.
PSA 31:6 Utew ku egkeepesi is menge etew he ed-azap te wazà menge pulus he menge ed-ezapen, su ziyè e man mulà te kenikew medsarig, Nengazen.
PSA 31:7 Egkelipey a su veliǥeǥawen ke man. Ne wazà mekeeles kenikew is menge elentusen ku, ne netuenan nu is menge kelised ku.
PSA 31:8 Wazà a kenikew iveǥey ziyà te menge kuntada ku, kekenà, midlibri a kenikew te kezeetan.
PSA 31:9 Kehizuwi a, Nengazen, su edlised e en. Nemenlevag en is menge mata ku te kedtulung ku kedsineǥew, ne mibmeluya ad.
PSA 31:10 Layun ku zuen igkeseeng. Nepipire en he tuig is kebpeketulung ku kebpekesineǥew. Mibmeluya ad tenged te menge elentusen ku, ne henduen be te wazè en desen te menge tulan ku.
PSA 31:11 Ebpeel-elezan a te menge kuntada ku, lavew en is menge emurè ku te inged. Minsan is menge kilala ku ne nengahandek en he ed-uvey kediey. Emun egkeehè e zan diyà te zalan ne ebpekeziyuan e zan.
PSA 31:12 In-iring e zan en te minatey su edlipatan e zan en. Iyan ked-isipa zan kedì he iring a te ziniyun he nerupet he wazè din en pulus.
PSA 31:13 Egkezineg ku is kebpenènaasà te mezakel he menge kuntada. Ebpemiligru a minsan hendei a ebpevayà, su mibpelenuwan e zan te edhimatey.
PSA 31:14 Iyan, midsarig a ziyà te kenikew, Nengazen. Iyan ka Megbevayè ku.
PSA 31:15 Is untung ku ne ziyan te kenikew; libriya a te menge kuntada ku he edezaat kedì.
PSA 31:16 Ipeehè nu is keupiya nu kedì te suluǥuen nu; ne ǥeina te mahal a kenikew, ne libriya a kenikew.
PSA 31:17 Nengazen, kenè nu ituǥut he mepeel-elezi a, su ziyà a te kenikew megnganey. Iyan nu zà peel-elezi is menge lalung he etew ne penhimetayi nu sikandan, su wey zan mekepereremek en diyà te leveng dan.
PSA 31:18 Ipetiem nu heeyan is menge teruen he ebpegalbu wey edsudì te menge metazeng.
PSA 31:19 Utew zekelà is keupiyaanan he idteǥana nu te menge etew he edtahud wey edsarig kenikew. Egkaahà te langun is keupiya nu.
PSA 31:20 Id-eles nu sikandan diyà te lugar he zutun ka, ne zutun kenà sikandan egkesudì wey egkeinsultuwan te menge etew.
PSA 31:21 Nengazen, ereg ka he edeliǥen! Su egkein-inuwan is paaǥi te kebpaahaa nu te ǥaǥew nu kedì hein diyà a te sevaha he inged he midlingutan te menge kuntada.
PSA 31:22 Tenged te utew ku kegkahandek, kunaan ku ke mibpekidsuwey ke en kedì. Iyan, dutun, midineg nu is kebpehizuhizu ku zutun te kebuyù ku te tavang diyà te kenikew.
PSA 31:23 Sikiyu is menge etew te Nengazen he metinumanen, mahala niw sikandin. Ebentayan te Nengazen is menge metinumanen, iyan, dekelà mulà is idsilut din te menge mepelevawen.
PSA 31:24 Sikiyu is ebperateng te tavang te Nengazen, mebpekelig-en kew wey mebpekevurut.
PSA 32:1 Utew zeyzey is etew he nepesaylu en is menge kedrapas din te menge suǥù, wey mibpanas en is menge salè din.
PSA 32:2 Utew zeyzey is etew he wazè en isipa te Nengazen he mekesesalà sikandin, wey wazà sikandin mebpenlimbung.
PSA 32:3 Hein wazè ku pa iketug-an is menge salè ku, mibmeluya a, ne henduen te nerupet en is menge tulan ku, tenged te kebpekezag-es ku seled te tivuuk he andew.
PSA 32:4 Su maandew wey mezukilem is kedsiluti nu kedì; naawè en is desen ku ne henduen be te nekagkag a te meinit he andew.
PSA 32:5 Ne intug-an ku ziyà te kenikew is menge salè ku; wazè ku in-eles. Ke siak te idtug-an ku is menge salè ku ziyà te kenikew. Ne zutun te kedtug-an ku, mibpesaylu a kenikew.
PSA 32:6 Umbe, is langun he metinumanen kinahanglan he med-ampù diyà te kenikew zutun te timpu te kelised, su emun ebpekeuma is kelised he iring te zalem, ne kenè dan egkemenu.
PSA 32:7 Iyan ka elesè ku; pengalang ku zutun te timpu te kelised. Himuwa nu he ebpekeliǥuy kayi te kediey is menge etew he ebpemen-ugyab te kegkelipey zan tenged te kedlibriya nu kediey.
PSA 32:8 Nengazen, migkaǥi ka kayi te kedì te, “Ibpenurù ku kenikew is dalan he zait he ed-ikulen nu. Ne zutun te kebentayi ku kenikew ne edsembaǥan ku sikew.
PSA 32:9 Kenè nu iringi is kudà he kenà ebpekesavut, he kinahanglan pa he egkekangan wey edrindahan su para mekepezumazuma.”
PSA 32:10 Mahabet is menge kemereǥenan he egkeseǥazan te lalung he menge etew, iyan, sikan mulà, is midsarig diyà te Nengazen, ebmahalen din wey edlevanan din sikandan.
PSA 32:11 Umbe, sikiyu is menge metazeng, lipey kew tenged te mibeelan te Nengazen diyà te keniyu! Sikiyu is nengungubpaan te hustu he paaǥi, ugyab kew tenged te kegkelipey niw!
PSA 33:1 Sikiyu is menge metazeng, ugyab kew tenged te kegkelipey niw. Sikiyu is nengungubpaan te hustu he paaǥi, deliǥa niw su mezait sikandin he edeliǥen!
PSA 33:2 Deliǥa niw is Nengazen pinaaǥi te alpa. Tukari niw is Nengazen te zuma pa he menge pezaǥing he zuen din menge kuwirdas.
PSA 33:3 Kentahi niw sikandin te veǥu he kanta; tukari niw sikandin te meupiya, ne ugyab kew tenged te kegkelipey niw.
PSA 33:4 Su tutuu is lalag te Nengazen, ne egkeseriǥan is langun he ebeelan din.
PSA 33:5 Egkasuat is Nengazen he ebaal te metazeng wey hustu. Egkaahà kayi te tivuuk he kelibutan is gaǥew zin.
PSA 33:6 Pinaaǥi te lalag te Nengazen, nehimu is langit: andew, bulan, wey menge vituen.
PSA 33:7 Midtingeb din is wahig te zaǥat he henduen be te intaǥù diyà te gerepun etawa insavuk diyà te budiga.
PSA 33:8 Is langun he etew kayi te kelibutan ereg he edtahud te Nengazen.
PSA 33:9 Su migkaǥi zà sikandin ne nehimu en is kelibutan. Mibmandù dà sikandin ne nehimu is langun.
PSA 33:10 Edèdeetan te Nengazen is pelanu te menge nasyun, ne kenè din idtuǥut he medlampus is menge tuyù dan.
PSA 33:11 Piru is kandin mulà he menge pelanu ne ebpedayun te wazà pidtemanan; is kandin he menge ketuyuan kenà egkaawà taman te taman.
PSA 33:12 Utew zeyzey is nasyun he iyan Megbevayè din is Nengazen. Utew zeyzey is menge etew he migaked te Nengazen.
PSA 33:13 Puun diyà te langit edtengtengan te Nengazen is langun he menge etew.
PSA 33:14 Diyà sikandin te ubpeey zin ne edtengtengan din is langun he ed-ubpà kayi te kelibutan.
PSA 33:15 Iyan sikandin mibeǥey te isip diyà te langun he menge etew, ne netuenan din is langun he ebpen-ul-ulahan dan.
PSA 33:16 Is hadì kenà ebpekezaag te tebek tenged dà te kezakel te menge sundaru zin. Is sevaha he sundaru kenà ebpekeǥawas he libri puun te tebek tenged dà te kezesen din.
PSA 33:17 Kenà tenged te menge kudà is kebpekesiguru te kebpekezaag te tebek. Kenà ebpekelibri is kezesen dan.
PSA 33:18 Ebentayan te Nengazen is menge edtahud kandin, he edsarig te kebmahala zin kandan.
PSA 33:19 Iyan sikandin edlibri kandan te kemetayen wey ed-uyag kandan emun timpu te vitil.
PSA 33:20 Edtaǥad kiw zuma is kedsarig te Nengazen. Iyan sikandin edtavang wey ebpengalang kenitew.
PSA 33:21 Egkelipey kiw tenged kandin. Su edsarig kiw ziyà te kandin te waǥas he Megbevayà.
PSA 33:22 Nengazen, deyzey ke kenà egkaawà is kebmahala nu kenami, iring te edsarig key ziyà te kenikew.
PSA 34:1 Layun ku edeliǥa is Nengazen; kenà a ed-engked he edalig kandin.
PSA 34:2 Ibpegalbu ku is Nengazen, ne sikiyu is menge edèdaaǥen, pemineg kew wey medlipey.
PSA 34:3 Duma kew kedì te edalig te Nengazen; edsevaha kiw te kedalig kandin.
PSA 34:4 Mid-ampù a ziyà te Nengazen ne midtavak e zin. In-awè din is langun he kegkehandek ku.
PSA 34:5 Ebmelipayen is menge etew he edsarig diyà te kandin, ne kenè dan en egkepeel-elezan.
PSA 34:6 Mibpengumew is egkaayuayu he etew te Nengazen, ne midtavak din sikandin. Midlibri zin sikandin te langun he kelised din.
PSA 34:7 Ebentayan te velinsuǥuen te Nengazen is menge etew he edtahud te Nengazen, ne edlibriyen din sikandan te kezeetan.
PSA 34:8 Gezami niw wey niw metueni ke sengemenu keupiya is Nengazen. Utew zeyzey is etew he midsarig te pengalang te Nengazen kandin.
PSA 34:9 Sikiyu is metinumanen he menge etew te Nengazen, tehuza niw sikandin. Su is menge edtahud kandin, egkekuwa zan is langun he kinahanglan dan.
PSA 34:10 Is menge erimaung egkehimu he egkaamin is keenen dan ne egkengevitil zan, iyan, is menge etew mulà he edangep diyà te Nengazen, kenà egkeeminan te meupiya he menge vutang.
PSA 34:11 Hendini kew is egkengesuat he mebmetau, pemineǥa a keniyu. Ebpenuruen ku sikiyu te kedtahud te Nengazen.
PSA 34:12 Egkesuat kew ve he mekaangken te kelipey wey melugayad he untung?
PSA 34:13 Likayi niw is kegkaǥi te mezaat wey kedtarùtarù.
PSA 34:14 Likayi niw is mezaat he vaal, ne iyan niw veeli is meupiya. Himuwa niw is paaǥi para layun melinew is kebpekidepitè niw te zuma.
PSA 34:15 Ebentayan te Nengazen is menge metazeng, ne ebpemineǥen din is menge pengemuyù dan.
PSA 34:16 Piru egkuntedahan din is menge etew he ebaal te mezaat. Edèdeetan din sikandan taman te kenè en sikandan egketenuzan te menge etew kayi te kelibutan.
PSA 34:17 Ebuyù te tavang diyà te kandin is menge metazeng, ne edtevangan din sikandan. Edlibriyen din sikandan te langun he menge kemereǥenen dan.
PSA 34:18 Uvey is Nengazen diyà te nengepakyas, ne edlibriyen din is menge etew he naawà is perateng dan.
PSA 34:19 Minsan mahabet is menge mereǥen he egkehitavù diyà te etew he metazeng, iyan, edlibriyen sikandin te Nengazen te langun dutun.
PSA 34:20 Kenà duwazuwa is ked-ipata te Nengazen kandin, ne wazà minsan sevaha he tulan din he egkelepù.
PSA 34:21 Is menge mezaat he vaal, ne iyan ebpekepatey te menge mezaat he etew. Edsilutan te Nengazen sikan is egkeepesan dan is menge metazeng.
PSA 34:22 Edlibriyen te Nengazen is menge etew zin he menge suluǥuen din. Ne is langun he ed-aput diyà te kandin ne kenè din edsilutan.
PSA 35:1 Kuntedaha nu, Nengazen, is menge etew he mibpekigkuntada kedì. Pekidtebek ka te menge etew he mibpekidtebek kedì.
PSA 35:2 Kuwaa nu is kelasag nu wey penagang nu, ne tevangi a.
PSA 35:3 Endama nu is dezeisey wey dezekelà he vangkew nu wey pemilaka nu is menge etew he edal-as kedì, ne peseriǥi a he edlibriyen a kenikew.
PSA 35:4 Deyzey ke egkepeel-elezan is menge etew he edtinguhà he edhimatey kedì. Berakat he mekepelaǥuy he egkengeteranta is menge etew he mibpelanu he edezaat kedì.
PSA 35:5 Deyzey ke egkeiring sikandan te ukap he idlayap te keramag dutun te kedsegseǥa kandan te velinsuǥuen nu.
PSA 35:6 Berakat he ebmerusirem wey ebmelandeg is egkepeveyaan dan dutun te kedel-asa kandan te velinsuǥuen nu.
PSA 35:7 Su minsan wazà hustu he hinungdan, mibaal zan te litag he idlitag dan kedì, wey mibangbang dan su para meulug a zutun.
PSA 35:8 Berakat he metik-awi sikandan meumahi te kezeetan. Berakat he iyan sikandan meuney zuen te idlitag dan kedì. Berakat he iyan sikandan meulug duen te vangbang dan.
PSA 35:9 Ne zutun egkelipey a tenged te kedlibriya nu kedì, Nengazen.
PSA 35:10 Ne zutun, ibensag ku is menge lalag he ebpuun diyà te tivuuk te ked-etew ku he edhenduen te, “Wazè nu iyan iring, Nengazen. Edlibriyen nu is menge egkaayuayu wey menge pubri te kedluplupiǥa wey kebintahai kandan.”
PSA 35:11 Is mesipala he menge etew ebpenistiǥus kuntra kedì. Ed-uluǥan a zan te kewsa.
PSA 35:12 Mezaat is ibales dan te meupiya he ebeelan ku ziyà te kandan, umbe neselekawan a utew.
PSA 35:13 Piru emun egkezeruwan dan, ebpetuusan ku he igkeseeng ku sikandan pinaaǥi te kebivisti ku te saku wey kebpuasa. Ne emun kenà edtevaken is ampù ku para kandan,
PSA 35:14 epekeriǥuriǥu a is edlalew he iring te suled ku wey emiǥu ku is igkeseeng ku. Nekezuzungul a is egkeseeng su is kegkeseeng ku kandan iring daan te kegkeseeng te sevaha he etew te iney zin.
PSA 35:15 Iyan, hein iyan ad midlised, mid-amur-amur zan is egkengelipey. Mid-amur-amur zan is edezaat kedì. Ne wazè ku metueni ke maan. Ne edsiguduwan e zan en ed-ituka.
PSA 35:16 Duma zan is memesudì he wazà medtuu te Megbevayà su utew zekelà is pauk dan kedì.
PSA 35:17 Nengazen, kenè nu ipedayun is kenè nu kedtavangi kedì. Libriya ad te ked-etekiya kedì kayi te iring te menge erimaung.
PSA 35:18 Ne zutun te kedlibriya nu kedì, edeliǥen ku sikew wey ebpeselamatan diyà te ketiǥuman te menge etew nu.
PSA 35:19 Kenè nu ituǥut he melipey is limbungan he menge kuntada ku tenged te kegkezeeǥa zan kedì. Is ebpemendumut kedì te wazà hustu he hinungdan, kenè nu ituǥut he meengiti e zan.
PSA 35:20 Wazà menge lalag dan he meupiya he ebpekepeupiya te zuma he etew, kekenà, ebaalvaal sikandan te mezaat he tudtul su wey megurigew sikan is melinawen en is ked-ubpè dan kayì he lugar.
PSA 35:21 Imbensag dan kayi te kediey is pesangil zan, he ke sikandan te, “Neehè dey is mezaat he mibeelan nu.”
PSA 35:22 Nengazen, neehè nu heeyan, umbe kenè ka và dà redtan. Kenà a kenikew pekeziyui.
PSA 35:23 Nengazen he Megbevayè ku, levani e en kenikew kayi te menge etew he mibpesangil kedì.
PSA 35:24 Nengazen he Megbevayè ku, ǥeina te kenè ka ebpemintahà, ne ipetueni nu te menge etew he wazè ku salà. Kenè nu ituǥut he ed-eengitan e zan.
PSA 35:25 Kenè nu ituǥut he mekekaǥi sikandan te, “Netuman en human is penganduy zey te kedezaat kandin!”
PSA 35:26 Is langun he iyan igkelipey zan is menge kebpekaantus ku, berakat he egkepeel-elezan wey egkeliveg sikandan. Berakat he sikan is langun he neminusan kediey, kenà medlampus is tuyù dan wey mepeel-elezi sikandan.
PSA 35:27 Berakat he mekeugyab te kegkelipey is menge etew he igkelipey zan is kenà ked-utengi kedì te salà he impesangil kedì. Berakat he layun sikandan mekekaǥi te, “Utew zait he edeliǥen is Nengazen ne igkelipey zin is keupiyaanan te suluǥuen din.”
PSA 35:28 Edtudtulen ku is ketazeng nu, wey layun ku sikew edeliǥa.
PSA 36:1 Iyan heini lalag he taǥù kayi te ǥehinawa ku mehitenged te kegkemekesesalà te lalung he etew: Is lalung he etew ne kenà egkahandek te Megbevayà.
PSA 36:2 Su metikang is ked-isipa zin te keugelingen din, kenè din egkaahà is kelelalung din he ereg pezem he egkeepesan din.
PSA 36:3 Mezaat wey tarù is menge lalag din, ne kenè din en ed-ul-ulahan is hustu wey meupiya.
PSA 36:4 Minsan edhidhizeǥà sikandin ne ebpelanu sikandin te mezaat. Dekelà is gehinawa zin te kebaal te kenà meupiya, ne kenè din id-awà diyà te isip din is kebaal te mezaat.
PSA 36:5 Nengazen, is gaǥew nu wey kegkemetinumanen, ne kenà egkesukud; metikang pa heini te langit.
PSA 36:6 Is ketazeng nu, ne melig-en; igkepetug-iring te metikang he menge vuntud. Is hustu he kedhukum nu, ne kenà egketegkad; igkepetug-iring te mezalem he zaǥat su kenà egketegkad. Ed-eturen nu, Nengazen, is menge etew wey menge langgam.
PSA 36:7 Megbevayè ku, utew mahal is gaǥew nu. Ebpengelangan nu is menge etew iring te kedlekupi te tagbis te pispis din.
PSA 36:8 Nengeperahan sikandan te idsegkayà he keenen diyà te valey nu; ipeinum nu sikandan te metaam he wahig nu.
PSA 36:9 Su iyan ka ebpuunan te untung. Edteyawan key kenikew, ne neteyawan is menge isip dey.
PSA 36:10 Ipedayun nu is kebmahala nu te menge etew he migkilala kenikew. Ipedayun nu is kebaal nu te meupiya ziyà te menge etew he midtinazeng.
PSA 36:11 Kenè nu ituǥut he mezaag a te menge lalung wey menge gelbuwen he kuntada ku.
PSA 36:12 Egkezeetan is lalung he menge etew, ne kenè en sikandan ebpekeenew.
PSA 37:1 Kenè ka mesemuki mehitenged te lalung he menge etew; kenè ka mesina te memezaat is baal.
PSA 37:2 Su kenà egkeuǥet ne egkeiring sikandan te sagbet he ebpatey, etawa iring te menge pinemula he egkeǥangu.
PSA 37:3 Sarig ka te Nengazen, ne ul-ulaha nu is meupiya. Pengungubpaan ka kayi te tanà he wazè nu igkahandek he ebpekekaid.
PSA 37:4 Tinguhaa nu he iyan mekeveǥey kenikew te kelipey is Nengazen, ne ibeǥey zin kenikew is ebpengenduyen nu.
PSA 37:5 Ipeveyveyai nu te Nengazen is tivuuk he untung nu; sarig ka ziyà te kandin ne ebeelan din heini ziyà te kenikew:
PSA 37:6 Edhimuwen din he utew keladu is kebpezeyaǥa zin he metazeng ka wey wazè nu salà, iring kekeladu te silà te andew ke meudtu.
PSA 37:7 Mebmelinawen ka ziyà te etuvangan te Nengazen ne kenè ka medarà is edtaǥad te ebeelan din. Kenè ka mesemuki emun duen menge etew he ebmeuswaǥen wey edlampus is mezaat he menge pelanu zan.
PSA 37:8 Kenè nu ituǥut he zuen pauk etawa seeng diyà te ǥehinawa nu tenged kandan. Kenè ka mesemuki, su ebpekezezaat heini kenikew.
PSA 37:9 Su is lalung he menge etew edsegseǥen puun te tanà he Israel, piru is menge etew he edsarig te Nengazen ne ebpedayun is ked-ubpè dan kayi he tanà.
PSA 37:10 Kenà egkeuǥet egkahanew is lalung he menge etew. Ne minsan ke ebpen-ahaan niw pa sikandan, ne kenè niw en egkaahà.
PSA 37:11 Piru is kenà memepelevawen ebpedayun is kandan he ked-ubpà kayì te tanà he Israel he dezeyaan is kebpekesavuk dan.
PSA 37:12 Is lalung he menge etew ebpelanu te mezaat diyà te menge metazeng, wey utew zan egkeepesi is menge metazeng.
PSA 37:13 Iyan, ed-engitan dà sikandan te Nengazen, su netuenan din he hapit en egkeuma is timpu te kedezeeti kandan.
PSA 37:14 Edhulevuten te lalung he menge etew is ispada zan, wey edhingaten dan is panè dan, su edhimetayan dan is menge egkaayuayu wey menge pubri he midtinazeng.
PSA 37:15 Piru iyan sikandan egkeuney egketiyuk te ispada zan, ne egkengevadtì is menge panè dan.
PSA 37:16 Is deisey he azen te metazeng meupiya pa kenà is mahabet he ketiǥeyunan te lalung he menge etew.
PSA 37:17 Su id-awà te Nengazen is desen te menge lalung, ne edtevangan din mulà is menge metazeng.
PSA 37:18 Ed-eturen te Nengazen is menge etew he wazà igkesewayi kandan. Ne is egkepengevilin dan ne kenà egkaawà diyà te kandan te taman te taman.
PSA 37:19 Ne minsan timpu te vangkit kenà sikandan egkemenu, ne minsan timpu te vitil ne zekelà is keenen dan.
PSA 37:20 Iyan, is menge lalung egkengezeetan mulà sikandan. Is menge kuntada te Nengazen egkeiring te bulak su ebpematey zan dà. Egkengahanew sikandan iring te evel.
PSA 37:21 Is lalung he menge etew ne emun ed-utang ne kenà ebayad. Ne kelelaǥan mulà is menge metazeng.
PSA 37:22 Is menge etew he edtuvazan te Nengazen, ebpedayun is ked-ubpè dan kayi te tanà he Israel. Piru is etew he edrewakan din edsegseǥen puun kayi he tanà.
PSA 37:23 Egiyahan te Nengazen is kada langkad te etew he ebpekepenunuat te Nengazen is kebpengungubpaan din.
PSA 37:24 Minsan ebpekesipà sikandin ne kenà egkepiley su egewazen sikandin te Nengazen.
PSA 37:25 Puun te vatè e pa taman en guntaan te meǥurang e en, ne wazè e pa mekaahà te metazeng he menge etew he mibey-anan te Nengazen etawa mekepekilimus te keenen is menge anak dan.
PSA 37:26 Layun pa sikandan ebpekepememeǥey wey ebpekepesambey, ne is menge anak dan nehimu he tuvad diyà te zuma he menge etew.
PSA 37:27 Likayi niw is mezaat ne veeli niw is meupiya su para taman te taman is kebpekeubpè niw kayi te tanà he Israel.
PSA 37:28 Su igkesuat te Nengazen is hustu he kukuman ne kenè din ebpesegdanen sikan is menge metinumanen he edsunud kandin. Edtipiǥan din sikandan te taman te taman, piru is menge kevuwazan te lalung he menge etew ne edsegseǥen mulà puun te tanà he Israel.
PSA 37:29 Is menge metazeng mulà pedayun he ebpekeubpà dutun te tanà te taman te taman.
PSA 37:30 Hustu is menge lalag te metazeng ne egkezumahan te ketau.
PSA 37:31 Edtipiǥan din diyà te ǥehinawa zin is menge kesuǥuan te Megbevayè din ne kenè din heini edrepasen.
PSA 37:32 Is lalung he menge etew, ed-eyanan dan is menge metazeng, su egkesuatan dan te edhimatey.
PSA 37:33 Piru kenà idtuǥut te Nengazen he mepatey zan is menge metazeng. Ne kenà idtuǥut te Nengazen he mehukumi te silut is menge metazeng emun ebpekeetuvang dan diyà te hukmanan.
PSA 37:34 Sarig ka te Nengazen ne tumana nu is paaǥi zin, ne ebeǥayan ke zin te zengeg pinaaǥi te pedayun he kebpeubpaa zin kenikew kayi te tanà kayi te Israel. Ne egkeehè nu is kedsegseǥa te menge mezaat he etew puun keniyan he tanà.
PSA 37:35 Hein nehuna he timpu, duen neehè ku he lalung he etew he ebpendaagdaag. Ed-isipen din is keugelingen din he lavew te zuma; iring sikandin te metawis he kayu he sidru ziyà te Lebanon.
PSA 37:36 Iyan, te huziyan he timpu minatey sikandin; nahanew en sikandin. Mibpen-ehè ku sikandin, ne wazè ku en maahà.
PSA 37:37 Ne ahaa nu purungi is etew he wazà duen igkesawey he ebpengungubpaan te hustu wey melinew. Duen din mulà meupiya he egkepaabut.
PSA 37:38 Piru is menge mekesesalà ne pudu ebpendezeeti; wazà meupiya he egkepaabut dan.
PSA 37:39 Baal te Nengazen is kelibriyanan te menge metazeng. Iyan sikandin edhimu te paaǥi para kenà sikandan memenu emun timpu te kelised.
PSA 37:40 Edtevangan din sikandan ne edlibriyen din te kegkeiza kandan te menge mezaat he etew, su ziyè man sikandan med-aput te kandin.
PSA 38:1 Nengazen, minsan egkepeukan a kenikew ne kenà a kenikew sewaya.
PSA 38:2 Henduen be te mibpanà a kenikew wey midlepadu te mesakit.
PSA 38:3 Tenged te kegkepauk nu te kebpekevaal ku te menge salà, ne kenà meupiya is kegezamgezam ku kayi te lawa ku.
PSA 38:4 Henduen be te egkelened ad te menge salè ku, iring heini te meveǥat he uwiten he kenè ku egkehenat.
PSA 38:5 Tenged te kezuzupangi ku, nengeredak is menge palì ku ne mibmemahù.
PSA 38:6 Egkevekut e en te utew ku kegkesekiti, ne tivuuk he andew is kedlalew ku.
PSA 38:7 Ne kenà meupiya is kegezamgezam ku kayi te tivuuk he lawa ku su ed-al-al is peka ku.
PSA 38:8 Ne utew e en meluya. Ebpekezag-es a tenged te mesakit he egkeǥezam ku.
PSA 38:9 Nengazen, netuenan nu is langun he penganduy ku he meulii a, wey nezineg nu is kedag-es ku.
PSA 38:10 Ebpekehuyab is kumeng ku; wazè ku en desen, ne kenè e en utew ebpekaahà.
PSA 38:11 Midlikayan ad te menge emiǥu ku wey menge zuma ku tenged te zaru ku. Minsan is menge kezuzumahi ku ne mibpekeziyuan e zan en.
PSA 38:12 Edtuǥesen a te menge etew he egkesuat he edhimatey kedì. Ne sikan is egkesuat he ebpaantus kedì, midhisgutan dan is paaǥi te kedezeeti zan kedì. Tivuuk he andew is kebpelanu zan te kedluib kedì.
PSA 38:13 Mibpevevengel e zà wey mibpeeemew he henduen be te kena a ebpekezineg wey ebpekekaǥi.
PSA 38:14 Ebpevevengelan ku zà is mezaat he menge pelanu zan ne wazà ad megkaǥi.
PSA 38:15 Su midsarig a kenikew, Nengazen. Iyan ka, Nengazen he Megbevayè ku, iyan ka edtavak te ampù ku.
PSA 38:16 Su mid-ampù a ziyà te kenikew he kenè nu ituǥut he melipey wey mekepahambug is menge kuntada ku tenged te kegkezèdeeti zan kediey.
PSA 38:17 Henduen be te egkezeetan ad, ne kenà egkeengked is ked-antus ku.
PSA 38:18 Idtug-an ku is menge salè ku he nekesamuk kediey.
PSA 38:19 Melig-en wey mahabet is menge kuntada ku. Egkeepesan e zan minsan te wazà hustu he hinungdan.
PSA 38:20 Mezaat is ibales dan te menge meupiya he vaal ku kandan. Ne egkuntedahan a zan su ebpeninguhà a he ebaal te meupiya.
PSA 38:21 Nengazen he Megbevayè ku, kenà a kenikew pesegdana; kenà a kenikew pekeziyui.
PSA 38:22 Tevangi e en guntaan kenikew, Nengazen he menluluwas ku.
PSA 39:1 Nekekaǥi a kayi te gehinawa ku te, “Ebpekeventayan ku is ed-ul-ulahan ku, ne edlikayan ku he mekesalà a pinaaǥi te kegkaǥikaǥi ku. Ebpeninguhaan ku he kenà a mekeriklamu ziyà te Megbevayà. Lavew en ke ziyà te uvey ku is lalung he menge etew.”
PSA 39:2 Umbe, mibpereremek e zà, ne wazà ad megkaǥikaǥi. Iyan, wazà heini meketavang kedì su nasì en med-iseg is mesakit he egkeǥezam ku.
PSA 39:3 Ne nesemukan utew is isip ku. Ne hein edtulungan ku en egngunngunua ke ebpedayun e ve he ebpereremek etawa kenà, ne nasì en med-iseg is kegkesemuki te isip ku. Umbe wazè ku en meeǥen is gehinawa ku; nekekaǥi a te,
PSA 39:4 “Nengazen, petentenuzi nu kedì he zuen ketepusan te untung ku wey nevilang en is kahabet te menge andew te ked-ubpè ku; ipesavut nu kedì ke sengemenu zà keluǥayad is untung ku.”
PSA 39:5 Utew zà mevavà is untung he imbeǥey nu kediey. Diyà te kenikew is keluǥayad te untung ku ne wazè din bali. Su is tutuu iyan heini: is untung te etew ne iring dà te keramag he edlavey zà,
PSA 39:6 wey iring te alung he egkaawà. Utew egkesamuk is etew te menge vuluhaten he wazè din pulus. Edtiǥum sikandin te menge ketiǥeyunan, iyan, emun ebpatey en sikandin, ne kenè din en egketuenan ke hentei is egkepulusan dutun.
PSA 39:7 Guntaan, Nengazen, wazè en duma he edseriǥan ku. Iyan ke zà edseriǥan ku.
PSA 39:8 Ipelingkawas a te langun he menge salè ku, ne kenè nu ituǥut he sudia a te menge tulebung.
PSA 39:9 Ebpereremek e en; kenà ad edriklamu, su iyan ka midrasey kedì.
PSA 39:10 Guntaan, kenà ad kenikew siluti. Su henduen e en te ebpatey kayi te kebpeentusa nu kedì.
PSA 39:11 Ebmensuwen nu is etew pinaaǥi te kedsewaya nu kandin, tenged te menge salè din. Ne iring is ebeelan nu te kegketket su id-awè nu id-amin is mahalen he menge azen din. Tutuu iyan he iring dà te keramag is untung te etew su edlavey zà.
PSA 39:12 Nengazen, tevaka nu is ked-ampù ku; pemineǥa nu is kebuyù ku te tavang. Seǥipaa nu is kedsineǥew ku. Su iring e zà te lumelengyawà he meǥeliyug nu kayi te kelibutan, iring te langun he menge kepuun ku.
PSA 39:13 Kena ad kenikew kepeuki, su para mebmelipayen a te kenè e pa ebpatey.
PSA 40:1 Wazà a medarà he edtaǥad te Nengazen, ne mibpemineg din is kebuyù ku te tavang diyà te kandin.
PSA 40:2 Henduen be te mibatun e zin puun te mekulbà he vudsi etawa tunaan, ne iring te impeuntud e zin diyà te vatu su para kenà a mekeizi.
PSA 40:3 Mibpenurù e zin te veǥu he kanta, kanta te kedalig kandin te Megbevayè tew. Ne mahabet he etew is ebpekaahà te mibeelan te Megbevayà ne ebpeketahud wey ebpekesarig dan kandin.
PSA 40:4 Utew zeyzey is etew he edsarig te Nengazen, ne kenà edangep diyà te menge gelbuwen he iyan edsunuzen dan is tarù.
PSA 40:5 Nengazen he Megbevayè ku, wazà ebpekeiring kenikew. Mahabet is egkein-inuwan he mibeelan nu, wey mahabet is menge pelanu nu para kenami. Ne kenè ku heini igkeseysey pudu su utew medmezakel.
PSA 40:6 Wazà mekepenunuat kenikew is nekedseselekawà he kelasi te menge pemuhat. Wazè ka mebuyù te menge pemuhat he edtutungen wey pemuhat he para idlumpiyu. Kekenà, midhimu a kenikew he mepezumdumahan kenikew.
PSA 40:7 Umbe, migkaǥi a te, “Heini e zed, andam a he edtuman te menge suǥù nu sumalà is ingkesurat he menge lalag nu mehitenged kedì.
PSA 40:8 Megbevayè ku, igkelipey ku is kedtuman te egkesuatan nu. Edtipiǥan ku ziyà te ǥehinawa ku is menge kesuǥuan nu.”
PSA 40:9 Edtudtulen ku is kedlibriya nu kedì diyà te egketiǥum he menge etew nu. Netuenan nu Nengazen he kenà a ed-engked he edtudtul kayi.
PSA 40:10 Is kedlibriya nu kediey wazè ku ziyè dà tipiǥi te ǥehinawa ku, kekenà, ibpenudtul ku zaan he metinumanen ka wey edluwas ka. Ne wazè ku ieles is gaǥew nu wey ketutuanan diyà te ketiǥuman dey te menge etew nu.
PSA 40:11 Nengazen, kenè nu eǥena is hizu nu kediey. Berakat he is gaǥew nu wey kebmetinumanen nu egkehimu he iyan layun pengalang ku.
PSA 40:12 Henduen be te edliǥuy kedì is menge kelised he utew subra is kahabet. Henduen be te egketembunan ad te menge salè ku, ne kenà ad ebpeketuredu te hustu he ibayè ku. Henduen be te edhuna pa he mezakel is menge salè ku te vulvul ku, ne tenged kayi naawè en is kevurut ku.
PSA 40:13 Nengazen, libriya a kenikew. Tevangi ad guntaan.
PSA 40:14 Berakat he is langun he edtinguhà he edezaat kedì ne egkepeel-elezan wey egkeliveg.
PSA 40:15 Berakat he is menge etew he edsudì kedì egkeinuinu ne egkepeel-elezan sikandan.
PSA 40:16 Berakat he melipey is langun he midangep diyà te kenikew. Berakat he layun mekekaǥi sikan is menge etew he mepeselematen te kedlibriya nu kandan te, “Dait he edeliǥen is Nengazen”
PSA 40:17 Bahin kedì, egkaayuayu a wey pubri a. Berakat he isipa a kenikew, Nengazen. Iyan ka ebpeketavang wey ebpekelibri kedì. He Megbevayè ku, tevangi e en guntaan.
PSA 41:1 Utew zeyzey is etew he edtevang te menge egkaayuayu. Su edtevangan sikandan te Nengazen emun timpu te kelised.
PSA 41:2 Egkelesaǥan sikandin te Nengazen wey edtipiǥan is untung din. Edtuvazan sikandin te Nengazen kayi te tanà he Israel; kenà sikandin ibeǥey ziyà te menge kuntada zin.
PSA 41:3 Edtevangan sikandin te Nengazen ke egkezeruwan; ebewian din sikandin te egkeǥezam din.
PSA 41:4 Migkaǥi a te, “Nengazen, kehizuwi a kenikew. Bewii a, su edtug-an a he nekesalà a ziyà te kenikew.”
PSA 41:5 Mezaat is migkaǥi te menge kuntada ku mehitenged kedì. Ke sikandan te, “Deyzey ke ebpatey en sikandin su wey melipati en.”
PSA 41:6 Uvag kun edleuyen e zan, piru ebpen-ehè dan bes te mezaat he egketudtul zan mehitenged kediey. Ne emun diyè dan en te ǥawas ne ebpenudtulen dan haazà diyà te zuma.
PSA 41:7 Is langun he egkeepes kedì ne ebpenèneesà mehitenged kediey, ne ed-isip-isip dan te mezaat ke ebmenumenu zan para mezeeti a.
PSA 41:8 Ke sikandan te, “Utew en gerabi is daru zin, umbe kenè ne sikandin ebpekeenew.”
PSA 41:9 Minsan is emiǥu ku utew he egkeseriǥan ku he mibpekidtuǥen kedì te egkaan ne iyan midluib kedì.
PSA 41:10 Piru sikew, Nengazen, kehizuwi a kenikew; bewii a kenikew su wey a mekevales te menge kuntada ku.
PSA 41:11 Ne egketuenan ku he nekepenunuat a kenikew, su kenè nu idtuǥut he mezaag a te menge kuntada ku.
PSA 41:12 Tenged te wazà mezaat he vaal ku, ne idtuǥut nu he mekeubpà a zuma kenikew te wazà pidtemanan.
PSA 41:13 Edeliǥen is Nengazen he Megbevayà te Israel te wazà pidtemanan. Amen! Amen!
PSA 42:1 Is kebpenginahanglan ku kenikew te Megbevayè ku, iring te kebpenginahanglan te selazeng te wahig emun egkemezahan sikandin.
PSA 42:2 Egkemezahan a kenikew he iyan uuyag he Megbevayà. Keenu e pa vuwa ebpekehendiyà te valey nu te ked-uvey ziyà te etuvangan nu?
PSA 42:3 Maandew wey mezukilem is kebpekesineǥew ku ne samè dà kenè ku meinum is luhè ku, ne zutun edtulung ed-insà is menge etew te, “Hendei en be is Megbevayè nu he edtavang kenikew?”
PSA 42:4 Kenà meupiya is isip ku emun egketenuzan ku he zutun te nehuna he timpu iyan a nengulu te mezakel he menge etew te kedhendiyà te valey nu. Ne edsilibra key zuma is ked-ugyab te kegkelipey wey kebpeselamat kenikew.
PSA 42:5 Piru kenà a ereg he egkeseeng wey egkeǥiyaǥiya. Ereg a he edsarig kenikew. Uya, ed-umanan ku sikew edeliǥa, is menluluwas wey Megbevayè ku.
PSA 42:6 Utew a neseeng; is kegkeseeng ku iring te edeǥurus he seleg te evaǥa he ebpeketambun kediey. Umbe edtentenuzan ku sikew ǥuntaan te kayi a te tanà he uvey te Jordan wey Hermon, kayi te Buntud he Mizar.
PSA 42:8 Emun maandew ibpeehè nu is gaǥew nu Nengazen, umbe emun mezukilem en, egkanta a te ked-ampù diyà te kenikew te Megbevayà he mibeǥey kedì te untung ku.
PSA 42:9 He Megbevayà he endilungè ku, egkaǥi a ziyà te kenikew te, “Maan is edlipatan a kenikew? Maan is kinahanglan pa he egkeseeng a tenged te kedèdaaǥa kedì te menge kuntada ku?”
PSA 42:10 Henduen be te nerupet en is menge tulan ku tenged te kebpeel-elezi zan kedì. Egkeǥiyan e zan te, “Hendei en be is Megbevayè nu he edtavang kenikew?”
PSA 42:11 Maan is egkeseeng a wey egkeǥiyaǥiya? Te ereg e man he edsarig kenikew, ne ed-umanan ku sikew edeliǥa is menluluwas ku he Megbevayè ku.
PSA 43:1 He Megbevayà, ipeehè nu he wazè ku salà, ne levani a su wey a kenà mezezeeti te menge etew he kenà edtuu te Megbevayà. Libriya a te kedezeeti kedì te limbungan wey lalung he menge etew.
PSA 43:2 Iyan ka, Megbevayà melig-en he eputè ku. Ne maan is inselikwey a kenikew? Maan is kinahanglan pa he egkeseeng a tenged te kedèdaaǥa kedì te menge kuntada?
PSA 43:3 Teyawi a ne penurua a te tutuu su para meǥiyahi a te kebpekid-uliey kenikew ziyà te valey nu he ziyà te segradu he vuvungan.
PSA 43:4 Ne zutun ed-uvey a ziyà te pemuhatà he zutun ka ebpemuhata, Megbevayè ku, iyan ka ebeǥey kedì te kelipey. Megbevayè ku, edeliǥen ku sikew pinaaǥi te kedtukar te alpa.
PSA 43:5 Maan is egkeseeng a wey egkeǥiyaǥiya? Ereg a he edsarig kenikew. Uya, ed-umanan ku sikew edeliǥa, is menluluwas wey Megbevayè ku.
PSA 44:1 He Megbevayà, netudtul kenami te menge kepuun dey is mibpemeelan nu hein kaazen dan pa zutun te neuǥet en he timpu,
PSA 44:2 he mibpenegseg nu is menge etew he wazà medtuu kenikew ne iyan nu impeubpà diyà te ed-ubpaan dan is menge kepuun dey. Impaantus nu haazà he menge etew ne impeuswag nu mulà is menge kepuun dey.
PSA 44:3 Piru iyan tutuu is, kenà pinaaǥi te ǥumaan wey ketau te kebpekidtebek is ingkeengkena te menge kepuun dey kayi he tanà, kekenà, tenged te ǥehem nu, ebilidad nu, wey hizu nu kandan tenged te kebmahala nu kandan.
PSA 44:4 Iyan ka hadì ku wey Megbevayè ku; iyan ka mibeǥey te kezeeǥan diyà te kenami te menge kevuwazan ni Jacob.
PSA 44:5 Pinaaǥi kenikew egkezaag dey is menge kuntada zey.
PSA 44:6 Wazà a medsarig he iyan ibpekezaag ku is panè ku wey ispada ku.
PSA 44:7 Su iyan ka ebpengelintau para mezaag dey is menge kuntada zey. Ebpeel-elezan nu is ebpekidtebek kenami.
PSA 44:8 He Megbevayà, iyan ka ibpehivantug dey layun, ne edeliǥen dey sikew te wazà pidtemanan.
PSA 44:9 Piru ǥuntaan, inselikwey key en kenikew ne intuǥut nu he mepeel-elezi key. Wazè nu en dumahi is menge sundaru zey.
PSA 44:10 Ketau nu is kegkepeleǥuwi zey te menge kuntada zey. Ne mibpenavan dan is menge azen dey.
PSA 44:11 Intuǥut nu he mebpematey key iring te menge kerehidu he mibpenlapà. Ne impeyapat key kenikew ziyà te menge nasyun.
PSA 44:12 Sikami is menge etew nu, ne henduen be te imbelegyè key zà kenikew te veratu. Henduen te wazè dey pulus diyà te kenikew.
PSA 44:13 Kenikew he ketau is kegkepeel-elezi kenami wey ked-eengiti kenami te siringan dey he menge nasyun.
PSA 44:14 Duen pa menge erubasa zan he ebpekeinsultu kenami, ne ebpurung dà sikandan ebpenggemen-gemen is edsudì kenami.
PSA 44:15 Layun ad ebpeel-elezi. Ne igkeeled ku en is kegkaahaa te vuked ku,
PSA 44:16 tenged te ebpengeǥiyen wey ked-insultuwi kedì te menge kuntada ku he egkesuat he ebpenimales kedì.
PSA 44:17 Nehitavù heini is langun minsan pa te wazè dey sikew lipati, ne wazè key zaan medrapas te paaǥi te kebpekid-uyun nu kenami.
PSA 44:18 Wazè key med-iniyug kenikew ne wazè key medsuwey ziyà te zalan he ibpeikul nu kenami.
PSA 44:19 Iyan, henduen be te midrupet key kenikew wey mibey-anan diyà te utew merusirem he ed-ubpaan te leew he menge asu.
PSA 44:20 He Megbevayà, egketuenan nu emun midlipatan dey sikew wey ke ziyè key ed-ampù te zuma he menge megbevayà, su egketuenan nu man minsan is id-eles te etew he isip din.
PSA 44:22 Iyan, tenged te kedtuu zey kenikew, ne layun key en ebpemiligru te kemetayen. Iring key te kerehidu he para edlepaan.
PSA 44:23 Sigi en, Nengazen, waleng kad! Kenè key kenikew iniyuǥi taman te taman.
PSA 44:24 Maan is mid-elesan key kenikew wey wazè key kenikew seǥipaa kayi te menge elentusen dey wey kedèdaaǥa kenami?
PSA 44:25 Iring key te nengepiley ziyà te tanà he kenè en ebpekeenew.
PSA 44:26 Gègaani key en tevangi; libriya key su mahal key man kenikew.
PSA 45:1 Is isip ku nepenù te mekempet he menge lalag hein idseysey ku en is ebpemulvulakan he menge lalag he para zuen te hadì. Ne is ketau ku te kegkaǥi ne iring te ketau zuen te utew metau he menunurat.
PSA 45:2 Mahal he Hadì, iyan ka utew mezagwey te langun he menge maama, ne is menge lalag he egawas diyà te vèbè nu ebpekeveǥey te keupiyaanan te zuma he etew, su ǥeina te layun ka edtuvazi te Megbevayà.
PSA 45:3 Inseluniket nu is ispada nu, mevurut he hadì; mekeǥeǥehem ka wey meupiya is dengeg nu.
PSA 45:4 Utew meupiya is dengeg nu; mezeeǥen ka ke edsurung ka para te kedlevani nu te tutuu wey hustu he kukuman para te menge edèdaaǥen. Ne tenged te ǥehem nu ebeelan nu is egkein-inuwan he menge vaal.
PSA 45:5 Pelii nu te meǥarang he menge vala te panè nu is menge pusung te menge kuntada nu. Ebpesakup kenikew is menge nasyun.
PSA 45:6 Is ginhedian nu, Megbevayà, ebpedayun te wazà pidtemanan, ne metazeng is kedumelaha nu kayi.
PSA 45:7 Igkesuat nu is metazeng, iyan, igkeepes nu mulà is mezaat. Umbe, mibpilì ka te Megbevayà he Megbevayè nu, ne imbeǥey zin kenikew is kelipey he lavew pa te kelipey te menge zuma nu.
PSA 45:8 Is bisti nu mehemut te pehemut he mira, aloe, wey kasia. Edlenganen ka te menge musikiru te menge gelemiten te kedtukar he ziyà te seled te turuǥan nu, ne haazà he turuǥan, mahal is indayandayan duen.
PSA 45:9 Nepipira zuen te dungganen he menge vahi nu is menge anak te menge hadì. Ne ziyà te egkekewanan nu, edhithitindeg is egkehimu he rayna nu he midsun-ud te elahas he lunsey he vulawan he ebpuun te Ofir.
PSA 45:10 Sikew is ed-esewaan te hadì, pemineǥa nu is egkeǥiyen ku: lipati nu en is menge emurè nu te inged wey is menge kezuzumahi nu,
PSA 45:11 su utew ka nesuati te hadì tenged te kekempet nu. Tehuza nu sikandin su egalen nu sikandin.
PSA 45:12 Is menge meǥinged diyà te Tyre, ragkes en is utew menge sepian, ebeǥayan ke zan te menge azen su wey nu mepurung sikandan meseǥipà.
PSA 45:13 Utew ka mekempet keniyan te seled te turuǥan nu. Is bisti nu binurdahan te vulawan.
PSA 45:14 Idsun-ud diyà te kenikew is mekempet he visti nu ne ed-uwiten ka ziyà te hadì. Ne is menge raǥa he edumahan diyà te kenikew edtinundug kenikew, su iyan sikandan avey nu.
PSA 45:15 Ne utew zekelà is kelipey niw zutun te kedseled niw ziyà te turuǥan dutun te hadì.
PSA 45:16 Mahal he Hadì, is menge kevuwazan nu he menge maama egkengehimu zaan he hadì he iring te menge kepuun dan. Ne edhimuwen nu sikandan he menge pengulu te tivuuk he tanà.
PSA 45:17 Edhimuwen ku he kenè ka egkelipatan te langun he egkelapislapis he kevuwazan. Umbe taman te taman is kedeliǥa kenikew te menge nasyun.
PSA 46:1 Is Megbevayà iyan ebpengalang kenitew wey iyan ebeǥey kenitew te zesen. Ne layun sikandin andam he edtavang emun timpu te kelised.
PSA 46:2 Umbe, kenè kiw egkahandek minsan pa ke egkehuyung is tanà ne egkengetempag is menge vuntud ne egkengeulug diyà te zizalem te zaǥat,
PSA 46:3 minsan pa ke ebpurung ebpemaǥel is daǥat he iyan igkengehuyung te menge vuntud.
PSA 46:4 Duen wahig he ebpekeveǥey te kelipey ziyà te inged te Megbevayà, kes segradu he ubpeey te Utew Lavew he Megbevayà.
PSA 46:5 Kayi he inged ed-ubpà is Megbevayà, umbe kenà heini egkezeetan. Kenà edlanganlangan is Megbevayà para te kedtavang kayi he inged.
PSA 46:6 Egkengeheratan is menge nasyun; egkengehuyung is menge ginhedian. Tenged te kulehian te Megbevayà henduen be te egketunew en te kegkahandek is menge etew kayi te tivuuk he kelibutan.
PSA 46:7 Duma tew is Nengazen he Mekeǥeǥehem. Iyan sikandin Megbevayà ni Jacob, ne iyan sikandin eputè tew.
PSA 46:8 Hengkayi kew, ahaa niw is menge bineelan te Nengazen, is egkengein-inuwan he menge vaal zin kayi te kelibutan.
PSA 46:9 Ibpeengked din is menge tebek kayi te tivuuk he kelibutan. Ebpemedtìen din is menge panà wey menge vangkew, ne idrapug din is menge kelasag.
PSA 46:10 Migkaǥi sikandan te, “Engked kew en he ebpetebtebekà. Ne kilelaa a keniyu is Megbevayà. Ebentuǥen a te menge nasyun kayi te tivuuk he kelibutan.”
PSA 46:11 Duma tew is Nengazen he Mekeǥeǥehem. Iyan sikandin Megbevayà ni Jacob, ne iyan sikandin eputè tew.
PSA 47:1 Sikiyu is langun he keet-etawan diyà te menge nasyun, pelakpak kew wey ugyab kew te kedalig te Megbevayà he egkezumahan te kelipey.
PSA 47:2 Utew telehuzen is Nengazen he iyan kes Utew Lavew he Megbevayà. Mekeǥeǥehem sikandin he hadì te tivuuk he kelibutan.
PSA 47:3 Edhimuwen din he iyan key edumala is menge tig-Israel te menge nasyun.
PSA 47:4 Mibpilì din is tanà he egkepengevilin dey, he iyan kes tanà he impehivantug te pinelanggè din he si Jacob.
PSA 47:5 Dutun te kedhendiyà te Megbevayà te pinuuwè din te kedhadì, ed-ugyab is menge etew te kegkelipey zan duma is kebpezaǥing te menge vudyung.
PSA 47:6 Kanta kew te kedalig te Megbevayà. Kanta kew te kedalig te hadì tew.
PSA 47:7 Su iyan is Megbevayà hadì te tivuuk he kelibutan. Deliǥa niw sikandin pinaaǥi te menge kanta.
PSA 47:8 Ebpinuu sikandin diyà te segradu he pinuuwè din te kedhadì su edhedian din is menge nasyun.
PSA 47:9 Edtiǥum is menge pengulu te menge nasyun duma is menge etew te Megbevayà ni Abraham. Su is menge pengulu te kelibutan gaked te Megbevayà. Mezait iyan sikandin he edeliǥen.
PSA 48:1 Mekeǥeǥehem is Nengazen he Megbevayè tew, ne ereg sikandin he edeliǥen is diyà te inged din he iyan is Jerusalem he ziyà te segradu he vuvungan din.
PSA 48:2 Mekempet is ketikang kayi he vuvungan ne ebpekeveǥey te kelipey te tivuuk he kelibutan. Heini is segradu he Buvungan he Zion iyan inged te Mekeǥeǥehem he Hadì.
PSA 48:3 Diyà is Megbevayà te melig-en he menge vahin te Jerusalem, ne impeehè din en te menge meǥinged kayi he iyan sikandin eputè dan.
PSA 48:4 Midtigum is menge hadì su edsurungen dan is Jerusalem.
PSA 48:5 Piru zuen dan naahà he ingkeinuinu zan; nahandek dan ne mibpemelaǥuy zan.
PSA 48:6 Mibpengerker sikandan te kegkahandek wey kegkesekiti; neiring sikandan te vahi he ebeliliten.
PSA 48:7 Midèdeetan sikandan te Megbevayà; neiring sikandan te varku ziyà te Tarshish he nesuǥat te mevendes he keramag he ebpuun diyà te edsilaan.
PSA 48:8 Netudtulan key zà dengan te menge vaal te Megbevayà, ne guntaan neehè dey en heini ziyà te inged te Megbevayè dey, he Mekeǥeǥehem he Nengazen. Edlig-enan din heini he inged te taman te taman.
PSA 48:9 He Megbevayà, mibpurungan dey ngunngunua is gaǥew nu hein diyè key te seled te valey nu.
PSA 48:10 Ebentuǥen ka ne edeliǥen ka te menge etew seled te tivuuk he kelibutan, tenged te mezeeǥen ka pinaaǥi te ǥehem nu.
PSA 48:11 Egkelipey is menge meǥinged diyà te Zion wey is diyà te zuma pa he menge inged diyà te Juda, tenged te metazeng he kedhukum nu.
PSA 48:12 Menge tig-Israel, liǥuya niw is Zion ne vilanga niw is menge turi kayi.
PSA 48:13 Purungi niw ahaa is menge verengbeng wey is melig-en he menge vahin kayi te inged, su para metudtul niw ziyà te edsunud he menge lapis te kevuwazan
PSA 48:14 he is Megbevayà he edsilbiyan tew ǥuntaan iyan kes Megbevayè tew te wazà pidtemanan. Iyan sikandin egiya kenitew te wazà pidtemanan.
PSA 49:1 Pemineg kew is langun he menge etew he ed-ubpà kayi te kelibutan,
PSA 49:2 dekelà is dengeg din etawa kenà, sepian etawa pubri.
PSA 49:3 Egkaǥi a te egkezumahan te ketau ne zekelà is pulus te ked-isip-isip ku.
PSA 49:4 Ebpemineg a te menge erubasa ne idseysey ku is menge kehuluǥan dan, dutun te edtukar a te alpa.
PSA 49:5 Minsan ke egkehitavù is bangkit, ne minsan ke edliǥuyan a te lalung wey limbungan he menge etew he edsarig wey ebpahambug tenged te azen dan, ne kenà a egkahandek.
PSA 49:7 Is etew kenà ebpekehimu he ebayad diyà te Megbevayà para kenè en sikandin mebpatey.
PSA 49:8 Su ǥeina te utew mahal is untung, ne minsan sengemenu kezekelà ne kenà ereg he ibayad
PSA 49:9 para meuyag is etew te wazà pidtemanan ne kenè en mebpatey.
PSA 49:10 Su netuenan en te langun he minsan is uluwanen he etew ne ebpematey, iring din daan sikan is menge tulebung wey menge taleng. Ne emun ebpematey zan en igketaǥak dan dà is menge ketiǥeyunan dan diyà te zuma.
PSA 49:11 Is menge leveng dan iyan en baley zan te wazà pidtemanan. Ne zutun sikandan ebpekeubpà te taman te taman, minsan pa ke zuen dan tanà hein uuyag dan pa.
PSA 49:12 Minsan ke sepian is etew ne ebpatey ǥihapun iring te uyaǥen etawa leew.
PSA 49:13 Iyan heini egkepeveyaan te menge etew he edsarig te keugelingen dan wey sikan is ebpekeuyun te egkeǥiyen dan.
PSA 49:14 Netendek en is kebpatey zan iring te menge kerehidu. Ne is kemetayen iyan egiya kandan pehendiyà te penlevengà, iring te ed-elima he iyan egiya te menge kerehidu. Emun egkepawà, egkeveyveyaan sikandan duen te menge etew he midtinazeng. Egkengeredak is nemematey. Iyan en egkehimu he ubpeey zan, is leveng.
PSA 49:15 Piru siak mulà, edlibriyen a te Megbevayà te ǥehem te kemetayen, su egkuwaan e zin.
PSA 49:16 Kenè ka mesina ke edsepian is duma, wey emun egkeumanan pa is ketiǥeyunan te pemilya zan.
PSA 49:17 Su kenè dan heeyan egkeuwit emun ebpatey zan en; is ketiǥeyunan dan kenè dan egkeuwit diyà te leveng.
PSA 49:18 Dutun te uuyag pa sikandan, ne iyan ked-isipa zan te keugelingen dan he midtuvazan sikandan te Megbevayà, ne edeliǥen sikandan te menge etew tenged te kegkemeuswaǥen dan,
PSA 49:19 iyan, ebpekaamur ǥihapun sikandan te menge kepuun dan he nemematey en, diyà te lugar he kenè dan en ebpekevulug ebpekaahà te merayag.
PSA 49:20 Is sepian he etew he wazè din kedsavut, ebpatey he iring te menge langgam.
PSA 50:1 Is Nengazen he iyan kes mekeǥeǥehem he Megbevayà, ebpekidlalag wey ebpengumew te menge etew kayi te tivuuk he kelibutan.
PSA 50:2 Ed-anlag sikandin he ebpuun diyà te Zion, he iyan kes inged he wazà kurang te kekempet din.
PSA 50:3 Ne ebpekeuma is Megbevayà he ebpetuus, su ziyà te egkehunaan din duen egkeregreg he hapuy, ne ziyà te ebpekeliǥuy kandin ne zuen bagyu.
PSA 50:4 Ed-umawen din is langit wey is kelibutan su ibpepirma zin te kedhukumi zin te menge etew zin.
PSA 50:5 Egkaǥi sikandin te, “Tiguma niw kayi te kediey is metinumanen he menge etew ku he mibaal te kedpekid-uyun kedì pinaaǥi te kebpemuhat.”
PSA 50:6 Ebpahayag is langit he metazeng is Megbevayà, su iyan sikandin edhukum.
PSA 50:7 Migkaǥi pa is Megbevayà te, “Sikiyu is menge etew ku, pemineǥa niw is egkeǥiyen ku. Iyan a Megbevayà, kes Megbevayà he iyan ed-ezapen niw; iyan a ebpenistiǥus te ebpekesuǥat keniyu te menge tig-Israel.
PSA 50:8 Wazè ku sikiyu zewaya te menge kebpemuhat niw, etawa menge pemuhat he edtutungen he layun niw ibpemuhat.
PSA 50:9 Piru wazè ku kinehenglana is menge tudu he vaka niw wey menge kambing niw.
PSA 50:10 Su kediey is langun he langgam: is menge langgam diyà te ketelunan, is menge vaka ziyà te linibu he menge vuvungan,
PSA 50:11 is menge tagbis diyà te menge vuvungan, wey is menge langgam diyà te vevesukà.
PSA 50:12 Angin ke egkevitil a, ne kenà a ebuyù te keenen diyà te keniyu, su kediey is tivuuk he kelibutan wey is langun he taǥù din.
PSA 50:13 Kenè ku man egkeenen is usa zuen te tudu he vaka he ibpemuhat niw, ne kenè ku zaan ed-inumen is lengesa zuen te menge kambing.
PSA 50:14 Siak, is Utew Lavew he Megbevayè niw, iyan egkesuatan ku he ibpemuhat niw kedì is: kebpeselamat wey is kedtumana niw te menge pesarig niw kedì.
PSA 50:15 Umawa a keniyu te timpu te kelised su edlibriyen ku sikiyu, ne zutun edeliǥen a keniyu.”
PSA 50:16 Egkaǥi mulà is Megbevayà diyà te lalung he menge etew te, “Wazè niw ketenged te kegkaǥi zuen te menge suǥù ku wey kebpekid-uyun ku.
PSA 50:17 Egkeepesan niw is menge penurù ku; wazè niw seǥipaa is menge lalag ku.
PSA 50:18 Emun ebpekeehè kew te tekawen ne ebpekid-emiǥu kew kandin, wey ebpekidrerempungen kew zaan te menge mengungumpadi.
PSA 50:19 Mezaat is ebpengeǥiyen niw ne utew zà melemu ziyà te keniyu is kedtarùtarù.
PSA 50:20 Layun mezaat is menge lalag niw mehitenged te menge suled niw.
PSA 50:21 Ne hein mibeelan niw heini is langun, wazè ku sikiyu dewaya; umbe kunaan niw ke iring a keniyu. Piru guntaan, edewayen ku sikiyu ne ibpeehè ku keniyu he utew kew lalung.
PSA 50:22 Pemineǥa niw heini, sikiyu is nengelipat te Megbevayà, su emun kenà, edezeetan ku sikiyu ne wazà ebpekelibri keniyu.
PSA 50:23 Is ebpemuhat kayi te kedì te kebpeselamat ebeǥey kedì te zengeg, ne edlibriyen ku sikan is ebpekeventayan din he kenà sikandin mekevaal te mezaat.”
PSA 51:1 He Megbevayè ku, kehizuwi a kenikew tenged te kebmahala nu kedì. Iawè nu is menge salè ku tenged te zekelà he hizu nu kedì.
PSA 51:2 Lùlui nu is kegkezaat ku; lumpiyuwi a te menge salè ku.
PSA 51:3 Su langun he timpu ed-isipen ku wey ed-engkenen ku is menge salè ku.
PSA 51:4 Diyè e zà te kenikew mekesalà. Mibeelan ku is menge vaal he mid-isip nu he mezaat. Umbe hustu is menge lalag nu he ebpekesuǥat kedì. Utew hustu is kedhukumi nu kediey.
PSA 51:5 Lalung a wey mekesesalà a puun pa te kegkeetew ku.
PSA 51:6 Iyan egkesuatan nu is ebpuun te keputian te atey he meheǥet wey tinutuuwà he ked-ul-ulaha te hustu; umbe penurua a su wey a mehimu he uluwanen.
PSA 51:7 Iawè nu is menge salè ku su wey a melumpiyuwi; lùlui a su wey a mebmeputì.
PSA 51:8 Ipeǥezam nu kediey is kelipey wey keǥalew, para zuen ku ǥihapun kelipey minsan pa te henduen te edrupeten nu is menge tulan ku.
PSA 51:9 Iawè nu is menge salè ku; penasa nu is langun he kelelalung ku.
PSA 51:10 He Megbevayè ku, lumpiyuwi nu is gehinawa ku, ne beǥayi a te veǥu wey mepezumdumahan he ǥehinawa.
PSA 51:11 Kena a kenikew segseǥa puun te etuvangan nu, ne kenè nu iawà kayi te kediey is waǥas he Mulin-ulin nu.
PSA 51:12 Ilikù nu kayi te kediey sikan is kelipey he neseǥazan ku hein midlibri a kenikew. Ne veǥayi a te metinumanen he ǥehinawa.
PSA 51:13 Ne zutun ibpenurù ku is menge paaǥi nu ziyà te menge mekesesalà su para mekelikù sikandan diyà te kenikew.
PSA 51:14 He Megbevayà he menluluwas ku, libriya a te salè ku he iyan is kedhimatey, ne ebpekezaǥing a is edtudtul te kedlibriya nu kedì.
PSA 51:15 Nengazen, tevangi a kenikew su wey a mekekaǥi te menge lalag he idalig kenikew, ne edeliǥen ku sikew.
PSA 51:16 Kenè nu igkesuat is menge pemuhat, ne minsan pa ke ebpemuhat a ziyà te kenikew te pemuhat he edtutungen, ne kenè nu heini igkelipey.
PSA 51:17 Is pemuhat he ebpekeveǥey kenikew te kelipey, Megbevayè ku, iyan is kenà kebpelavew wey is ked-iniyuǥi te menge salà. Ne iyan heini he kelasi te pemuhat edewaten nu.
PSA 51:18 He Megbevayè ku, tuvazi nu is Zion, he iyan is inged he Jerusalem su igkelipey nu is kebaal kayi. Umana nu venguna sikan is menge verengbeng kayi.
PSA 51:19 Ne zutun igkelipey nu human is hustu he menge pemuhat, ragkes en is menge pemuhat he ed-eminen edtutunga. Ne ibpemuhat en maan is tudu he menge vaka ziyà te pemuhatà he zutun ka ebpemuhata.
PSA 52:1 Sikiyu is mekeǥeǥehem he menge etew, maan is ibpehivantug niw is kelelalung niw? Kenè be layun kew ebpurungi te Megbevayà?
PSA 52:2 Ebpelenuwan niw is igkezeeti te zuma he etew. Is menge zilè niw ne iring te meǥarang he kutsilyu su ebpekepalì te ǥehinawa te zuma. Kedlimbung is layun niw ed-ul-ulaha.
PSA 52:3 Dekelà diyà te ǥehinawa niw is mezaat kenà is meupiya, ne ibpelavi niw is kedlalag te tarù kenà te kedlalag te tutuu.
PSA 52:4 Sikiyu is menge limbungan, utew niw igkesuat is kebpesekiti niw te zuma pinaaǥi te menge lalag niw.
PSA 52:5 Siguradu he edezeetan kew te Megbevayà te wazà pidtemanan. Edekepen kew zin ne eguyuzen kew zin pehendiyà te ǥawas te valey niw. Ne edhewien din is untung niw.
PSA 52:6 Egkaahà heini te menge metazeng, ne egkeinuinu sikandan. Ne ed-engit sikandan is egkaǥi te,
PSA 52:7 “Ahaa niw is menge etew he kenà edsarig te Megbevayà he melig-en pezem he eputè dan. Su iyan dan edseriǥan is mahabet he menge azen dan, ne mid-iseg is kegkemekeǥeǥehem dan pinaaǥi te kedezaat dan te zuma he etew.”
PSA 52:8 Piru siak mulà egkeiring a te kayu he ulibu he ziyà meketuvù te valey te Megbevayà. Edseriǥan ku is kebmahala zin kedì te wazà pidtemanan.
PSA 52:9 He Megbevayè ku, ebpeselamatan ku sikew te taman te taman tenged te mibeelan nu. Edsarig a kenikew su ebpurungan nu is metinumanen he menge etew nu.
PSA 53:1 Diyà te ǥehinawa te menge tulebung egkaǥi sikandan te, “Wazà Megbevayà!” Pudu sikandan lalung ne utew mezaat is menge vaal zan. Wazà minsan sevaha kandan he ebaal te meupiya.
PSA 53:2 Puun te langit edtengtengan te Megbevayà is keet-etawan, su edsusiyen din ke zuen be nekesavut te tutuu wey ke zuen be midangep diyà te kandin.
PSA 53:3 Is langun mid-awà diyà te Megbevayà ne pudu memezaat is ulaula zan. Wazà minsan sevaha kandan he ebaal te meupiya.
PSA 53:4 Wazè be metueni kayi te lalung he menge etew is menge vaal zan? Netuenan dan heini! Ebpegpeǥesen dan is menge amurè ku te inged wey zan mekeselapì he iring dà sikandan te edsupal te keenen, ne kenà sikandan ed-ampù diyà te Megbevayà.
PSA 53:5 Piru egkengeheratan sikandan. Egkeǥezam dan is kegkahandek he wazè dan pa keenu meseǥazi, su ibpeyapat te Megbevayà is menge tulan dan. Sikandan is menge edsurung keniyu te menge tig-Israel, ebpeel-elezan niw sikandan, su inselikwey sikandan te Megbevayà.
PSA 53:6 Deyzey ke ebpekeume en is edlibri te Israel he ebpuun diyà te Zion. Utew ebmelipayen is menge tig-Israel he menge etew te Megbevayà, emun idlikù din en is meupiya he kebpekesavuk dan.
PSA 54:1 He Megbevayà, libriya a; pinaaǥi te ǥehem nu, petueni nu he wazè ku salà.
PSA 54:2 Pemineǥa nu is menge kebpengemuyù ku
PSA 54:3 su zuen menge lumelengyawà he midsurung kedì su edhimetayan e zan. Menge mesipala sikandan ne wazè dan mekekilala kenikew.
PSA 54:4 Kenà a egkezuwazuwa he sikew is Megbevayè ku, ne iyan ka edtavang kediey. Iyan ka, Nengazen, sendiǥè ku.
PSA 54:5 Berakat he medlikù diyà te menge kuntada ku is menge pesipala zan. He Megbevayà dèdeeti nu sikandan tenged te kebmetinumanen nu.
PSA 54:6 Nengazen, ebpemuhat a ziyà te kenikew te pemuhat he kineugelingen he suat. Edeliǥen ku sikew su iyan haazà meupiya.
PSA 54:7 Su ibpelingkawas a kenikew te langun he kelised ku, ne egkeehè ku is kegkezeeǥa te menge kuntada ku.
PSA 55:1 He Megbevayà, pemineǥa nu is ked-ampù ku; seǥipaa nu is kebuyù ku te tavang diyà te kenikew.
PSA 55:2 Pemineǥa a ne tevaka a. Egkeliveg ad te kegkesemuki ku.
PSA 55:3 Egkeǥiyaǥiya a te kebpenhulgà wey kebpendaagdaag te lalung he menge kuntada ku. Su edsinemukan e zan wey edumutan tenged te kegkepeuki zan kedì.
PSA 55:4 Utew subra is kebpekehuyab te kumeng ku su nahandek a te kemetayen.
PSA 55:5 Egkerkeren ad te kegkahandek ku, su utew subra is kegkeheratì ku.
PSA 55:6 Ke vè e zà merepatik ne edlayang e en su ebpen-ahà a te egkehimelayan ku.
PSA 55:7 Edlayang a pezem pehendiyà te meziyù he sibsivayan ne zutun a ed-ubpà.
PSA 55:8 Egaanggaan a ebpen-ahà te egkeelesan ku su wey a kenà meturedu te menge kuntada ku he egkepauk kedì su iring is pauk dan te utew mevendes he vagyu.
PSA 55:9 Nengazen, dèdeeti nu is menge kuntada ku; gurigawa nu is menge isip dan su wey zan kenà meuyun. Su neehè ku is kebpesipala wey kebpetebtebekà te menge etew ziyà te inged.
PSA 55:10 Maandew wey mezukilem egkehitavù heini ziyà te minsan hendei zutun te inged. Nepenù te kelelalung wey kesamuk haazà is inged.
PSA 55:11 Minsan hendei zutun ne zuen kelelalung wey kebpendezaat, ne kenè en egkeengked is kebpendaagdaag wey kebpenlimbung diyà te menge kelesada.
PSA 55:12 Ke và ku zà kuntada is ed-insultu kedì ne egkaantus ku heini. Ke và ku zà ukag is ebpendezeisey kedì ne egkelikayan ku sikandin.
PSA 55:13 Piru utew ku emiǥu is mid-insultu kedì su zuma ku wey neked-iring key.
PSA 55:14 Dengan utew key teleemiǥu, ne ebpezumehè key is edhendiyà te valey te Megbevayà duma te mahabet pa he menge etew.
PSA 55:15 Berakat he medtik-ew mebpematey is menge kuntada ku. Berakat he evelenga sikandan te penlevengà minsan uuyag dan pa. Su ziyà te kandan is kelelalung wey ziyè daan te menge ubpeey zan.
PSA 55:16 Piru ebuyù a mulà te tavang diyà te Nengazen he Megbevayà ne edlibriyen e zin.
PSA 55:17 Meselem, meudtu, wey mezukilem ebpekeriklamu a zuma is kedag-es ne ebpemineǥen e zin.
PSA 55:18 Edluwasen e zin te ebpekekaid kedì te kebpekidtebek ku, minsan mahabet is ebpekigkuntada kedì.
PSA 55:19 Is Megbevayà he edhadì te wazà pidtemanan ebpemineǥen e zin, ne ebpekevevaan din is menge kuntada ku. Heini sikandan ne wazà kegkeveǥu te kineiya zan, wey wazè dan kedtahud te Megbevayà.
PSA 55:20 Is emiǥu ku te nehuna he timpu nekigkuntada te menge emiǥu zin; wazè din tumana is menge pesarig din.
PSA 55:21 Menayù wey meupiya is kebpengaǥikaǥi zin, iyan, duen bes kedumut diyà te ǥehinawa zin, ne ibmesakit te ǥehinawa is menge lalag din, su iring heini te meǥarang he ispada.
PSA 55:22 Isarig nu ziyà te Nengazen is igkeseeng nu, ne edtevangan ke zin. Kenà egkehimu he ebpesegdanen din is menge metazeng te minsan hengkey he timpu.
PSA 55:23 Piru is menge teremunù wey menge limbungan idtimbag din diyà te mezalem he lugar te menge minatey, dutun te kenè pa sikandan edliwezeenan. Piru siak mulà, edsarig a te Megbevayà.
PSA 56:1 He Megbevayà, kehizuwi a kenikew, su edsurungen a te menge kuntada ku. Layun e zan edresaya.
PSA 56:2 Layun a edsurunga te menge kuntada ku. Utew Lavew he Megbevayà, mahabet is egkuntada kediey.
PSA 56:3 Emun ebpekeǥezam a te kegkahandek, ne edsarig a ziyà te kenikew.
PSA 56:4 He Megbevayà, edeliǥen ku sikew tenged te penaad nu. Kenà a egkahandek su edsarig a kenikew. Wazà etew he ebpekezezaat kedì.
PSA 56:5 Layun ibpesuwey te menge kuntada ku is menge lalag ku. Layun dan ebpelanu te kedezaat kedì.
PSA 56:6 Ed-eles-eles dan edtigum, ne ebentayan dan is langun he ebeelan ku su iyan tuyù dan is kedhimetayi zan kedì.
PSA 56:7 He Megbevayà, kenè nu ituǥut he mekelikey sikandan te silut tenged te kelelalung dan. Dèdeeti nu sikandan tenged te pauk nu kandan.
PSA 56:8 Netuenan nu is menge keseengan ku. Edtentenuzan nu is menge timpu he zutun nekesineǥew a. Kenè be inlista nu heini ziyà te libru nu?
PSA 56:9 He Megbevayà, dutun te ked-umawa ku kenikew ebpemekepelaǥuy is menge kuntada ku. Neseǥazan ku heini tenged te edlevanan a kenikew te Megbevayè ku.
PSA 56:10 Nengazen he Megbevayà, edeliǥen ku sikew tenged te saad nu.
PSA 56:11 Kenà a egkahandek su edsarig a kenikew. Wazà etew he ebpekezezaat kedì.
PSA 56:12 Edtumanen ku, Megbevayè ku, is pesarig ku kenikew. Ibpemuhat ku is pemuhat te kebpeselamat kenikew.
PSA 56:13 Su midlibri a kenikew te kemetayen, ne wazè nu mehimuwa he mezaag a, su wey a mekepengungubpaan diyà te etuvangan nu, Megbevayà, te kebpengungubpaan he merayag.
PSA 57:1 Kehizuwi a, Megbevayè ku, su ziyà a te kenikew med-aput, iring a te pispis te tagbis he ebpelekup te iney zin. Ed-aput a ziyà te kenikew taman te wazè en bangkit.
PSA 57:2 Ed-umew a ziyà te kenikew te Utew Lavew he Megbevayà, iyan ka edtuman te mibpeleyaǥan nu kediey.
PSA 57:3 Puun te langit ebpekeuma is tavang nu te kedlibri kediey. Ebpeel-elezan nu is menge etew he edsurung kediey. Ibpeehè nu is gaǥew nu wey kebmetinumanen nu para kediey.
PSA 57:4 Edliǥuyan a te menge kuntada ku he iring te menge erimaung he andam he edawi te etew. Is menge ngipen dan iyan is menge vangkew wey menge vesut te panà. Is menge zilè dan iyan is meǥarang he menge ispada.
PSA 57:5 Ipeehè nu, Megbevayè ku, is kegkemekeǥeǥehem nu ziyà te langit wey kayi te tivuuk he kelibutan.
PSA 57:6 Neseeng a su edlitaǥen a te menge kuntada ku. Ne mibangbang daan sikandan te para egkeuluǥan ku, piru iyan sikandan neulug duen.
PSA 57:7 Edsarig a ziyà te kenikew Megbevayè ku. Egkanta a te kanta he idalig kenikew.
PSA 57:8 Ed-enew a emun egkeriwaswas en, ne ed-endamen ku is gehinawa ku wey is menge gelemiten ku te kedtukar he zuen menge kuwirdas su para egkeǥamit ku te kedalig kenikew.
PSA 57:9 Edeliǥen ku sikew, Nengazen, diyà te teliwazà te menge etew. Egkentahan ku sikew ziyà te teliwazà te keet-etawan diyà te senge nenasyun.
PSA 57:10 Su is gaǥew nu wey kebmetinumanen nu ne kenà egkesukud; metikang pa heini te langit.
PSA 57:11 Ipeehè nu Nengazen is kegkemekeǥeǥehem nu ziyà te langit wey kayi te tivuuk he kelibutan.
PSA 58:1 Sikiyu is menge pengulu, metazeng be is kedhukum niw te menge etew?
PSA 58:2 Kenà! Su iyan niw zà ed-isipen is kebaal te mezaat. Ebpelebleviyan niw is menge etew ziyà te inged niw.
PSA 58:3 Is menge lalung, ebpekeziyuan dan is Megbevayà ne edtarùtarù dan puun pa te kegkeetew zan.
PSA 58:4 Mevisa sikandan iring te menge uled. Iring sikandan te zurepu he kenà ebpemineg te laǥeng te metau he ebmansu te uled.
PSA 58:6 He Nengazen he Megbevayà, iawè nu is kebpekegaga zan te kebpendezaat he iring te edsepù ka te ngipen te menge erimaung.
PSA 58:7 Mahanew pezem sikandan iring te wahig he egkemezahan, ne emun ebpanà sikandan, ne kenè dan pezem mekeigù.
PSA 58:8 Meiring pezem sikandan te tuwey he egkaapug, etawa vatà he neranran he wazè en mekevulug mekaahà te merayag.
PSA 58:9 Dezeeti nu sikandan, batà etawa meǥurang. Dezeeti sikandan he meǥaan pa te ed-initen he ziniyun he edtevunan te menge zezeisey he kayu.
PSA 58:10 Egkelipey is menge metazeng emun egkeehè dan he edsilutan nu is menge lalung ne ebpematey sikandan.
PSA 58:11 Dutun ebpekekaǥi is menge etew te, “Tutuu iyan he zuen suhul te menge metazeng; ne zuen Megbevayà he edhukum te menge etew kayi te kelibutan.”
PSA 59:1 He Megbevayà, libriya a te kedezaat kedì te menge kuntada ku; iyan ka metau he kenà a mekeizi te menge etew he egkuntada kedì.
PSA 59:2 Libriya a te kegkaid te lalung he menge etew he ebpemenhimatey.
PSA 59:3 Nengazen, ahaa nu man, mid-eyanan e zan, su edhimetayan e zan minsan pa te wazà a mekesalà diyà te kandan.
PSA 59:4 Wazà neveelan ku he salà, piru andam sikandan he ed-surung kedì. He Nengazen he Megbevayà he Mekeǥeǥehem, Megbevayà te Israel, seǥipaa ad ne tevangi ad guntaan. Siluti nu en is menge etew he wazà medtuu kenikew. Kenè nu ikehizu is menge seligkep.
PSA 59:6 Ebpemenlikù dan ke egkesakep en is iring te asu he ebpemenhiniǥer he edliǥuyliǥuy te inged.
PSA 59:7 Pemineǥa nu is ebpengeǥiyen dan; memesakit heini he iring te ispada. Egkaǥi pa sikandan te, “Wazà ebpekezineg kenami.”
PSA 59:8 Piru ed-engitan nu zà sikandan, Nengazen. Ed-un-undahan nu zà sikandan is wazà medtuu kenikew.
PSA 59:9 He Megbevayà, iyan ka zesen ku; edtaǥad a kenikew su ziyà a layun te kenikew edangep,
PSA 59:10 ne iyan ka Megbevayà he mibmahal kedì. Iyan ka huna kedì ne ipeehè nu kedì is kegkezaaǥa te menge kuntada ku.
PSA 59:11 Piru hunaa nu sikandan resaya ne human nu himetayi su para kenà egkelipatan te menge etew ku is paaǥi nu te kedsilut te menge kuntada nu. He Nengazen he iyan layun ebpengalang kenami, tezina nu wey zèdeeti nu is menge kuntada ku pinaaǥi te ǥehem nu.
PSA 59:12 Edhimu sikandan te salà pinaaǥi te ebpengeǥiyen dan, umbe verakat he iyan mekeutel kandan is kegkemepelevawen dan. Ebpenrawak dan wey edtarùtarù,
PSA 59:13 umbe tenged te pauk nu kandan, dèdeeti nu sikandan taman te egkepurung sikandan egkahanew. Ne zutun egketuenan te keet-etawan kayi te tivuuk he kelibutan he iyan ka hadì te Israel.
PSA 59:14 Emun mezukilem ebpemenlikù is menge kuntada ku he iring te asu he ebpemenhiniǥer he edliǥuyliǥuy te inged.
PSA 59:15 Iring sikandan te asu he edliǥuyliǥuy su ebpen-ahà te egkekaan din, ne egngesnges emun kenà egkahantey.
PSA 59:16 Iyan, siak mulà, egkanta a mehitenged te ǥehem nu. Kada meselem ebpekezaǥing a is egkanta mehitenged te ǥaǥew nu. Su ǥeina te ziyà a layun te kenikew edangep ne iyan ka ebpengelintau para wazà mezaat he egkehitavù kedì emun timpu te kelised.
PSA 59:17 He Megbevayà, iyan ka ebeǥey kedì te zesen; egkanta a te menge idalig kenikew, su iyan ka eputè ku, is Megbevayà he mibmahal kedì.
PSA 60:1 He Megbevayà, mid-engkezan key kenikew ne ketau nu is kegkezaaǥa kenami. Nepeukan key kenikew, ne ǥuntaan seǥipaa key en.
PSA 60:2 Midhuyung nu wey impeveka nu is tanà he Israel, iyan, guntaan edhangyù a ziyà te kenikew he purungi nu en heini su hapit en egketempag.
PSA 60:3 Sikami is menge etew nu ibpepurung key kenikew ibpaantus. Ebpekeziregdireg key en he henduen be te midlangut key kenikew te vinu.
PSA 60:4 Piru sikami is edtahud kenikew, ebpetizeenan key kenikew su wey key mekelikey te vesut te panà te menge kuntada.
PSA 60:5 Luwasa key pinaaǥi te ǥehem nu. Tevaka nu is menge kebpengemuyù dey su para melibri key is menge minahal nu.
PSA 60:6 He Megbevayà, migkaǥi ka ziyà te valey nu te, “Ebpekezaag a; ebehinen ku is Shekem wey is Suǥud he Sucot ne ibpemeǥey ku ziyà te menge etew ku.
PSA 60:7 Kediey is Gilead wey is Manase. Is Efraim iyan menlelavan ku, ne is Juda iyan perezumala ku.
PSA 60:8 Ne suluǥuen ku mulà is Moab ne ed-engkenen ku is Edom. Ne idsegyawan ku is kegkezeeǥa ku te Filistia.”
PSA 60:9 Hentei is ed-uwit kedì diyà te Edom wey ziyà te inged kayi he mibpeliǥuyan te menge verengbeng?
PSA 60:10 Kenè be iyan ka, is Megbevayà he midselikwey kenami he wazè en meduma te menge sundaru zey?
PSA 60:11 Tevangi key te kebpekidtebek te menge kuntada zey, su kenà ebpulus is tavang te etew.
PSA 60:12 He Megbevayà, ebpekezaag key pinaaǥi te tavang nu, su iyan ka ebpekezaag te menge kuntada.
PSA 61:1 He Megbevayà, pemineǥa nu is ked-umew ku, pemineǥa nu is ked-ampù ku.
PSA 61:2 Puun dini te meziyù he lugar ebpengumew a kenikew su neewaan ad te perateng. Uwita a kenikew ziyà te lugar he wazà duen ebpekekaid,
PSA 61:3 su iyan ka pengalang ku; iring ka te turi he iyan kenà ibpekeseled te menge kuntada ziyà te inged.
PSA 61:4 Ipeubpà a ziyà te valey nu te wazà pidtemanan. Ipaaput a ziyà te kenikew iring te kebpeeputa te tagbis te menge pispis din pinaaǥi te kedlekupi zin kandan.
PSA 61:5 Su nezineg nu, Megbevayè ku, is menge penaad ku kenikew, ne mibeǥayan a kenikew te menge vutang he ibeǥey nu ziyà te menge etew he edtahud kenikew.
PSA 61:6 Pekeluǥeyaza nu is untung te hadì ne ipahadì nu seled te wazà pidtemanan pinaaǥi te kegkehimu he hadì te menge kevuwazan din.
PSA 61:7 Berakat he medhadì sikandin te wazà pidtemanan he iyan ka eduma kandin, is Megbevayà. Levani nu sikandin tenged te ǥaǥew nu wey kebmetinumanen nu.
PSA 61:8 Ne zutun layun a egkanta te kedalig kenikew, ne layun ku edtumana is menge penaad ku kenikew.
PSA 62:1 Diyè e zà te Megbevayà ebpekehimeley, ne ebpuun diyà te kandin is kelibriyanan ku.
PSA 62:2 Iyan sikandin endilungè ku wey menluluwas ku. Iyan sikandin eputè ku, umbe kenà a egkezeetan.
PSA 62:3 Sikiyu is langun he menge kuntada ku, sengemenu keluǥayad is kedtulunga niw kedsurunga kediey te kedezaat kedì? Iring a te verengbeng he egketempag en wey te kudal he midsulad en.
PSA 62:4 Egkesuatan a keniyu te ebpaawà puun te metikang he ketengdanan ku. Ne igkelipey niw is kedtarùtarù. Meupiya uvag is menge lalag niw kayi te kedì piru ziyà te ǥehinawa niw ebpenrewakan a keniyu.
PSA 62:5 Diyè ku zà te Megbevayà egkaangken is kebpekehimeley ku su ibpeperateng e zin.
PSA 62:6 Iyan dà sikandin endilungè ku wey menluluwas ku. Iyan sikandin eputè ku, umbe kenà a egkezeetan.
PSA 62:7 Iyan is Megbevayà edlibri kedì wey ebeǥey kedì te zengeg. Iyan sikandin melig-en he endilungè ku he edlavan kedì.
PSA 62:8 Sikiyu is menge etew te Megbevayà, sarig kew kandin te langun he timpu! Keǥiya niw ziyà te kandin is langun he igkeǥiyaǥiya niw su iyan sikandin kelasag tew.
PSA 62:9 Is menge etew, dungganen man etawa kenà, ne kenà egkeseriǥan. Neked-iring dà he wazà pulus; emun edtimbangen sikandan ne edhuna pa sikandan he mahagkap te keramag.
PSA 62:10 Kenè kew medsarig te kebpeneligkep te azen. Kenè niw peretenga is keupiyaanan pinaaǥi te kebpenakew. Minsan edekelè pa is ketiǥeyunan niw, ne kenè niw heini seriǥi.
PSA 62:11 Layun ku en egkezineg he egkaǥi is Megbevayà te kandin is gehem wey is gaǥew.
PSA 62:12 Kenà duwazuwa he ebelesan te Nengazen is menge etew sumalà is mibeelan dan.
PSA 63:1 He Megbevayà, iyan ka Megbevayè ku, ne meselem pa utew ne edangep e en diyà te kenikew. Ke và ke zà wahig ne egkemezahan a kenikew. Iring te ziyà a te memaza he tanà he wazà duen wahig.
PSA 63:2 Neehè ku is kegkemekeǥeǥehem nu wey kegketelehuzen nu ziyà te valey nu.
PSA 63:3 Edeliǥen ku sikew su is gaǥew nu edhuna pa he mahal kenà is untung.
PSA 63:4 Ebpeselematan ku sikew te kemulu e pa uuyag. Ibayew ku is menge velad ku te ked-ampù diyà te kenikew.
PSA 63:5 Egkekuntintu a iring te etew he nahantey te ǥastu. Ne ed-ugyab a is egkelipey he edalig kenikew.
PSA 63:6 Ne zutun te kedhizeǥè ku ne edtentenuzan ku sikew. Ebpurungan ku sikew ed-is-isipa te tivuuk he kezukileman,
PSA 63:7 su iyan ka midtavang kedì. Ne ed-ugyab a te kegkelipey zutun te kebpeeputa nu kedì diyà te kenikew he iring te kedlekupi te tagbis te menge pispis din.
PSA 63:8 Mid-uvey a ziyà te kenikew, ne migewezan a kenikew su para kenà a mekeizi.
PSA 63:9 Is egkesuat he edhimatey kedì ne ziyà ebpekepevayà te ubpeey te menge minatey.
PSA 63:10 Ebpematey sikandan te tebek, ne is menge lawa zan egkeenen te leew he menge asu.
PSA 63:11 Egkelipey is hadì tenged te midhimu te Megbevayà diyà te kandin. Egkelipey zaan is langun he ebpenangdù diyà te Megbevayà. Piru ibpetiem mulà te Megbevayà is menge teruen.
PSA 64:1 He Megbevayà, pemineǥa nu is riklamu ku. Tipiǥi nu is untung ku su midhulgà a te menge kuntada ku.
PSA 64:2 Iyan ka metau he kenà medlampus is mezaat he planu kedì te grupu te menge lalung.
PSA 64:3 Mesakit is kebpengaǥikaǥi zan, iring te ispada wey vala te panà.
PSA 64:4 Utew zà melemu ziyà te kandan is kegkaǥi te mesakit he lalag diyà te menge etew he wazà duen igkesawey, ne wazè en kegkahandek dan te kegkaǥi kayi.
PSA 64:5 Ebpehinghinggatè dan te kebaal te mezaat he pelanu. Ne ebpelenuwan dan ke hendei zan idlitag is menge litag dan. Ke sikandan te, “Wazà ebpekaahà kayi.”
PSA 64:6 Mibpelanu zan te mezaat ne ke sikandan te, “Utew meupiya is pelanu tew.” Kenè egketegkad is isip wey ǥehinawa te etew.
PSA 64:7 Iyan, ebpenaan sikandan te Megbevayà, ne egketik-ew zà sikandan egkengetiyuk.
PSA 64:8 Edezeetan sikandan te Megbevayà tenged te ebpengeǥiyen dan. Is langun he ebpekaahà kandan ne ebpemenggemenggemen te kedsudì kandan.
PSA 64:9 Ne zutun egkengahandek is langun he menge etew. Ne egngunngunuen dan is mibpemeelan te Megbevayà, ne edtudtulen dan haazà.
PSA 64:10 Egkelipey wey edalig te Nengazen is langun he menge metazeng tenged te mibeelan din, ne ebuyù dan he kelesaǥi zin sikandan.
PSA 65:1 He Megbevayà, ereg ka he edeliǥen dey ziyà te Zion! Ne edtumanen dey is penangdù dey kenikew.
PSA 65:2 Is langun he menge etew ed-uvey ziyà te kenikew su edtevaken nu is menge kebpengemuyù dan.
PSA 65:3 Minsan mahabet is menge salè dey, ebpeseyluwen key ǥihapun kenikew.
PSA 65:4 Deyzey is etew he mibpilì nu wey midhinggat nu he ziyà med-ubpà te valey nu. Diyà te valey nu he iyan kes segradu he ubpeey nu egkeveyangan key te meupiya he menge vutang.
PSA 65:5 He Megbevayà he menluluwas dey, edtevaken key kenikew pinaaǥi te egkein-inuwan he menge vaal he mibeelan nu te kedlibriya nu kenami. Iyan ka ebpekeveǥey te keupiyaanan te menge etew kayi te tivuuk he kelibutan.
PSA 65:6 Mekeǥeǥehem ka, ne pinaaǥi te kegkemekeǥeǥehem nu insavuk nu is menge vuntud.
PSA 65:7 Ibpeengked nu is rekabù te menge vaǥel wey keǥurub te menge etew.
PSA 65:8 Minsan sikan is diyà ebpemen-ubpà te meziyù ne nengahandek kenikew, tenged te egkein-inuwan he menge vaal nu. Ebpekeugyab te kegkelipey is menge etew kayi te tivuuk he kelibutan tenged kenikew.
PSA 65:9 Ed-etimanen nu is tanà wey ebpeuzanan nu, ne midhimu nu he mekeveǥey te sebpet. He Megbevayà, is menge wahig nu kenà egkemezahan, ne ebeǥayan nu te sebpet is menge etew. Id-andam nu is tanà he uuzaran.
PSA 65:10 Ebpeuzanan nu is ineradu he tanà taman te ebmeyunek heini, ne edtuvazan nu is nenuvù he menge pinemula.
PSA 65:11 Edhimuwen nu he zekelà is menge abut emun tiraǥun. Is langun he menge lugar he egkepeveyaan nu ne ebpekaangken te zekelà he uzar.
PSA 65:12 Is menge penebtavà diyà te sibsivayan ne zekelà is memeilem he sagbet duen; is menge vuvungan henduen be te menge etew he egkengelipey.
PSA 65:13 Is menge penebtavà neeneb te menge ebpemenabtab; is menge suǥud neeneb te menge trigu. Heini he menge lugar henduen be te menge etew he ebpemen-ugyab wey ebpemenganta te kegkelipey.
PSA 66:1 Sikiyu is menge etew kayi te tivuuk he kelibutan, ugyab kew ziyà te Megbevayà te kegkelipey.
PSA 66:2 Kanta kew te kedalig kandin. Iveǥey niw kandin is dengeg pinaaǥi te kedeliǥa niw kandin.
PSA 66:3 Keǥiyi niw sikandin te, “He Megbevayà, utew iyan egkein-inuwi is menge vaal nu. Tenged te zekelà he ǥehem nu nekeluhud diyà te etuvangan nu is menge kuntada nu.
PSA 66:4 Is langun he menge etew kayi te tivuuk he kelibutan, ed-azap dan kenikew. Ne egkanta zan te kedalig kenikew.”
PSA 66:5 Hendini kew, ehaà niw is egkengein-inuwan he mibpemeelan te Megbevayà diyà te menge etew.
PSA 66:6 Nekehipanew is menge kepuun tew ziyà te zaǥat, su mibpengelinteuwan din he meluwis is daǥat su wey mekelepew is tanà; ne umbe edlipey kiw.
PSA 66:7 Edhadì sikandin te wazà pidtemanan pinaaǥi te ǥehem din, ne ebpeniizan din is menge nasyun. Ne kenà ereg he ebpegalbu is menge mesinupaken te Megbevayà.
PSA 66:8 Sikiyu is menge etew, deliǥa niw is Megbevayà. Ipezineg niw is kedeliǥa niw kandin.
PSA 66:9 Edtipiǥan din is untung tew, ne wazè din ituǥut he mezeeti kiw.
PSA 66:10 He Megbevayà, iyan tutuu is migezaman key kenikew; midhimu key kenikew he lunsey iring te pelata he midlunsey pinaaǥi te hapuy.
PSA 66:11 Intuǥut nu he meutel key wey impevavè key kenikew te meveǥat he uwiten.
PSA 66:12 Mibpetekutakan key kenikew te menge kuntada zey; iring key te mideleman wey nekeǥawas puun te nevinsulan. Iyan, guntaan midhimu nu en he meupiya is kebpekesavuk dey.
PSA 66:13 Ebpemuhat a ziyà te valey nu te menge pemuhat he edtutungen. Edtumanen ku is menge penangdù ku ziyà te kenikew,
PSA 66:14 he migkaǥi ku kenikew hein egkereǥenan a.
PSA 66:15 Ebpemuhat a ziyà te kenikew te melambù he menge uyaǥen he kerehidu, tudu he vaka, wey kambing. Iyan heini pemuhat he edtutungen.
PSA 66:16 Sikiyu is langun he edtahud te Megbevayà, hendini kew wey a keniyu pemineǥa; edtudtulan ku sikiyu ke hengkey is mibeelan din kedì.
PSA 66:17 Mibuyù a te tavang diyà te kandin ne midalig ku sikandin.
PSA 66:18 Emun wazè ku itug-an is menge salè ku ne kenà a pezem ebpemineǥen te Nengazen.
PSA 66:19 Piru mibpemineg a te Megbevayà; midineg din is ked-ampù ku.
PSA 66:20 Edeliǥen ku is Megbevayà, su midseǥipè din is ked-ampù ku, ne kenà duwazuwa is kebmahala zin kedì.
PSA 67:1 He Megbevayà, kehizuwi key wey tuvazi key. Ipeehè nu kenami is keupiya nu,
PSA 67:2 su para metueni ziyà te langun he menge nasyun te tivuuk he kelibutan is paaǥi nu wey is kedluwas nu.
PSA 67:3 He Megbevayà, berakat he edeliǥen ka te tivuuk he menusiyà.
PSA 67:4 Berakat he meǥalew he egkanta te kegkelipey is langun he menge etew kayi te tivuuk he kelibutan, tenged te ketazeng te kedhukum nu kandan wey kegiyahi nu kandan.
PSA 67:5 Berakat he edeliǥen ka te langun he menge etew, Megbevayè ku.
PSA 67:6 Berakat he mebeǥey te sebpet is tanà. Berakat he edtuvazan kiw te Megbevayè tew. Berakat he edtahud kandin is langun he menge etew ziyà te minsan hendei kayi te kelibutan.
PSA 68:1 He Megbevayà, ipedsusuwey nu en is menge kuntada nu. Berakat he mekepelaǥuy sikandan.
PSA 68:2 Segseǥa nu sikandan iring te evel he idlayap te keramag. Dezeeti nu is menge lalung diyà te etuvangan nu, iringa nu te kendilà he egketunew te hapuy.
PSA 68:3 Piru is menge metazeng, ed-ugyab sikandan te kegkelipey ziyà te etuvangan nu.
PSA 68:4 Kentahi niw is Megbevayà, kentahi niw sikandin te menge kedalig. Deliǥa niw sikandin is ed-untud te ǥapun. Is ngazan din iyan is Nengazen; mebmelipayen kew ziyà te etuvangan din.
PSA 68:5 Is Megbevayà he ziyà ed-ubpà te segradu he valey zin, ed-elimahan din is menge ilu ne edlevanan din is menge valu he vahi.
PSA 68:6 Ebeǥeyan din te pemilya sikan is egketawantawan ne melipayen is menge vihag he edlibriyen din. Iyan, is menge mesinupaken mulà, diyà sikandan ebpekeubpà te meinit he lugar he memaza is tanà duen.
PSA 68:7 He Megbevayà, hein mibpenguluwan nu is menge etew nu te kedhipanew ziyà te sibsivayan,
PSA 68:8 nehuyung is tanà wey mid-uzan su geina te nekeuma ka, is Megbevayà te Israel. Impezayag nu is keugelingen nu ziyà te Sinai.
PSA 68:9 Ne wazà kurang te uzan he imbeǥey nu, umbe nepurung mahames is memaza he tanà he imbeǥey nu ziyà te menge etew nu.
PSA 68:10 Ne zutun med-ubpà is menge etew nu, ne tenged te keupiya nu mibeǥayan nu is menge pubri he menge etew te egkinehenglanen dan.
PSA 68:11 Nenelaan ka, Nengazen, ne impenudtul haazà te mahabet he menge vahi:
PSA 68:12 “Nemelaǥuy is menge hadì wey is menge sundaru zan, ne is menge azen dan mibahin te menge vahi he tig-Israel.
PSA 68:13 Minsan sikan is mibpetaǥak diyà te tudil te menge kerehidu nekezawat te vahin he menge ledawan he merepatik, he is menge pakpak dan mid-epizan te pelata ne mid-epizan te lunsey he vulawan is purù dutun te pakpak dan.”
PSA 68:14 Hein impedsusuwey te Megbevayà he Mekeǥeǥehem sikan is menge hadì, henduen sikandan te menge ayis he midtanà diyà te Buntud he Zalmon.
PSA 68:15 Utew mekempet is Buntud he Bashan; mahabet is menge vuvungan dutun.
PSA 68:16 Maan is nesina heini te vuntud he mibpilì te Megbevayà he iyan ed-ubpaan din te wazà pidtemanan?
PSA 68:17 Nekeuma is Nengazen diyà te valey zin he ebpuun diyà te Sinai duma te linibu he menge kerwahi zin.
PSA 68:18 Hein mibpeketikang sikandin, mahabet he menge vihag is mid-uwit din, ne midawat din is menge gasa he ebpuun diyà te menge etew, minsan is ebpuun diyà te mesinupaken kandin. Ne kayi te kenitew ed-ubpà is Nengazen he Megbevayà.
PSA 68:19 Ereg he edeliǥen is Nengazen he Megbevayà he menluluwas tew, su andew-andew edtevangan kiw zin te menge prublima tew.
PSA 68:20 Is Megbevayè tew, Megbevayà he edlibri. Iyan sikandin Nengazen he Megbevayà he edlibri kenitew te kemetayen.
PSA 68:21 Kenà duwazuwa he ebekbeken te Megbevayà is ulu te menge kuntada zin he kenà ed-engked te kebaal te salà.
PSA 68:22 Migkaǥi is Nengazen te, “Ibpelikù ku is menge kuntada ku he ebpuun diyà te Bashan; ibpelikù ku sikandan ebpuun diyà te zizalem te zaǥat,
PSA 68:23 su ebpenhimetayan sikandan ne edtekutakan niw is lengesa zan ne edtulungan heini ebpendilai te menge asu niw.”
PSA 68:24 He Megbevayà wey Hadì ku, egkaahà te langun is kedsilibraha te menge etew nu te kezeeǥan nu pinaaǥi te kedhendiyè dan te valey nu.
PSA 68:25 Edhuna is ebpemenganta, ne ebpehuziyan is ebpemenduyug te kanta, ne ziyà te pid-elangan dan iyan is menge raǥa he ebpezaǥing te menge tamburin.
PSA 68:26 Ne ibensag dan is lalag he edhenduen te, “Deliǥa niw is Megbevayà ke edtiǥum kew! Sikiyu is langun he kevuwazan ni Israel, deliǥa niw is Nengazen!”
PSA 68:27 Edhuna is deisey he tribu ni Benjamin, ne iyan edtinundug is menge pengulu te Juda duma is menge grupu zan, ne edtinundug kandan is menge pengulu te Zebulun wey Naftali.
PSA 68:28 He Megbevayà, ipeehè nu is gehem nu iring te mibeelan nu ziyà te kenami zengan.
PSA 68:29 Tenged te valey nu ziyà te Jerusalem ed-uwit is menge hadì te ǥasa zan kenikew.
PSA 68:30 Dewaya nu heeyan is nasyun he iring te kumekaid he langgam diyà te meribpesen. Dewaya nu zaan is menge nasyun he iring te menge tudu he vaka duma te menge nati taman te edluhud sikandan ne idhalad dan diyà te kenikew is menge pelata zan. Ipedsusuwey nu is menge etew he igkelipey zan is kebpekidtebek.
PSA 68:31 Ebpesakup kenikew is menge tig-Ehipto. Ne egkengelagewlagew is menge tig-Etiopia te kebeǥey te ǥasa ziyà te kenikew.
PSA 68:32 Sikiyu is menge sakup te menge ginhedian kayi te kelibutan, kentahi niw is Megbevayà. Kanta kew te kedalig te Nengazen
PSA 68:33 he ed-untud te kezaan he langit. Pemineǥa niw is ebpenriǥungriǥung he laǥeng din.
PSA 68:34 Ipezayag niw is kegkemekeǥeǥehem te Megbevayà he edhadì te Israel. Is langit ebpaahà te kegkemekeǥeǥehem din.
PSA 68:35 Ebpendeǥubduven ki is ed-etuvang te Megbevayà te Israel ziyà te segradu he ubpeey zin. Ebeǥayan din te ǥehem wey zesen is menge etew zin. Dait he edeliǥen is Megbevayà!
PSA 69:1 Libriya a, Megbevayè ku, su neiring ad te etew he hapit en egkelened.
PSA 69:2 Henduen be te egkelenep e en diyà te mezalem he vasak he kenà egketegkad. Ne henduen be zaan te egketembunan a te menge vaǥel su ziyà a te mezalem he wahig.
PSA 69:3 Neveley ad te kebuyù te tavang ne mesakit en is bekereng ku. Mibmerusirem en is ked-ehè ku te kedtaǥad te tavang nu, Megbevayè ku.
PSA 69:4 Utew mahabet is edumut wey egkesuat he edhimatey kedì te wazà hustu he hinungdan. Iyan erubasa ku he edhuna pa sikandan he mezakel te vulvul ku. Ed-uluǥan e zan te kewusa ne idteǥel zan ibpeulì kedì is menge vutang he wazè ku tekawa.
PSA 69:5 He Megbevayè ku, netuenan nu is ketutulebungi ku; wazà mekeeles kenikew is menge salè ku.
PSA 69:6 He Nengazen he MEGBEVAYÀ he Mekeǥeǥehem he Megbevayà te Israel, berakat he kenà mepeel-elezi tenged kediey is menge etew he edsarig wey edangep diyà te kenikew.
PSA 69:7 Su tenged kenikew ed-insultuwan a wey ebpeel-elezan.
PSA 69:8 Su in-iring a te langyew te menge kezuzumahi ku, ne is menge suled ku wazè e zan isipa he suled dan.
PSA 69:9 Ebpesipelahan a tenged te kebmahala ku te valey nu. Ibmesakit te gehinawa ku is lalag te menge etew he insultu kenikew.
PSA 69:10 Emun edsineǥew a wey ebpuasa a, ne ebpeel-elezan e zan.
PSA 69:11 Emun ebivisti a te saku su wey maahà he egkeseeng a, ne edsudien e zan.
PSA 69:12 Iyan a layun ed-ituka te menge etew he ebpemimpinuu ziyà te pultahan te inged, ne egkekanta is egkengelangut te kanta he idsudì kedì.
PSA 69:13 Iyan, ed-ampù a ziyà te kenikew, Nengazen. Ne zeyzey ke zutun te timpu te kegkehizuwi nu en kedì, ne edtevaken nu is ampù ku tenged te zekelà he ǥaǥew nu kedì. Su metinumanen ka te saad nu te kedlibri,
PSA 69:14 tevangi a para kenà a melenep diyà te vasak. Libriya a kenikew te menge edezaat kedì he iring te edlibriyen a kenikew ziyà te mezalem he wahig.
PSA 69:15 Kenè nu ituǥut he mebpatey a tenged te kegketembuni kedì te menge vaǥel.
PSA 69:16 Nengazen, tevaka a tenged te keupiya nu wey kebmahala nu kedì. Seǥipaa a tenged te zekelà he hizu nu kedì.
PSA 69:17 Kena a kenikew elesi is suluǥuen nu. Tevaka ad kenikew ǥuntaan su melised is kebpekesavuk ku.
PSA 69:18 Uvey ka kayi te kediey ne libriya a te kedezaat kedì te menge kuntada ku.
PSA 69:19 Netuenan nu is kebpeel-elezi kedì, is ked-insultuwi kedì, wey is kedezeeti te zengeg ku. Neehè nu is langun he menge kuntada ku.
PSA 69:20 Inmesakit te ǥehinawa ku is kebpeel-elezi zan kedì ne mibmezaat is isip ku. Ebperetengen ku is kegkehizuwi kedì, piru wazà nehizu kedì. Ebperetengen ku is kedlipaya kedì, piru wazà midlipey kedì.
PSA 69:21 Midsevukan dan hinuun te hilu is keenen ku, ne hein egkemezahan a, sukà is imbeǥey zan kedì.
PSA 69:22 Emun egastu sikandan, berakat he mehimu haazà he igkezeeti zan duma te menge meǥeliyug dan.
PSA 69:23 Berakat he mengelakap sikandan wey pen-elia.
PSA 69:24 Nengazen, ivusbus nu ziyà te kandan is pauk nu. Ipeǥezami nu kandan is rerangit nu.
PSA 69:25 Berakat he ewai zan en is ed-ubpaan dan wey wazè en dutun ed-ubpà.
PSA 69:26 Su ebpesipelahan dan is menge etew he edsilutan nu, ne idantal zan is kebpekebmereǥen dutun te midsilutan nu.
PSA 69:27 Ne iuman nu heeyan te menge salè dan ne kenè nu en sikandan libriya.
PSA 69:28 Penasa nu is menge ngazan dan diyà te libru he edlistahan nu te menge uuyag, ne kenè nu sikandan ilista zuma te menge metazeng.
PSA 69:29 He Megbevayà, nesekitan a wey nekaantus a, umbe levani a kenikew pinaaǥi te kedlibriya nu kediey.
PSA 69:30 Edeliǥen ku is Megbevayà pinaaǥi te kanta. Ibeǥey ku kandin is dengeg pinaaǥi te kebpeselamat ku.
PSA 69:31 Ebpekelipey pa heini te Nengazen kenà te menge pemuhat he vaka.
PSA 69:32 Emun egkaahà heini te menge egkaayuayu, ne egkengelipey zan; ebmelig-en is menge etew he midangep diyà te Megbevayà.
PSA 69:33 Ebpemineǥen te Nengazen is menge egkaayuayu, ne kenè din egkelipatan is menge etew zin he mibihag.
PSA 69:34 Deliǥa niw is Megbevayà, sikiyu is langun he ziyà te langit, kayi te kelibutan, wey ziyà te zaǥat.
PSA 69:35 Su edlibriyen te Megbevayà is Jerusalem, ne ed-umanan din ebenguna is menge inged diyà te Juda. Dutun ed-ubpà is menge etew zin ne iyan dan ebpekaangken keniyan he tanà.
PSA 69:36 Is menge kevuwazan te menge suluǥuen din iyan ebpekepengevilin kayi, ne sikan is mibmahal kandin ne ebpekeubpà dutun.
PSA 70:1 Nengazen he Megbevayà, libriye e en wey tevangi e en guntaan.
PSA 70:2 Berakat he mepeel-elezi wey meliveg is menge etew he egkesuat he edhimatey kedì. Berakat he ebpemelaǥuy he egkepeel-elezan is langun he egkesuat he mezeeti a.
PSA 70:3 Berakat he is menge etew he edsudì kedì ebpekeiniyug tenged te kegkeeled dan.
PSA 70:4 Ne is langun he midangep diyà te kenikew, berakat he melipey zan tenged kenikew. Ne sikan is utew zan igkesuat is kedlibri nu, ne verakat he layun dan megkaǥi te, “Dait he edeliǥen is Megbevayà!”
PSA 70:5 Bahin kedì, egkaayuayu wey pubri a. Uveyi a kenikew, Megbevayè ku! Iyan ka edtavang wey menluluwas ku. Nengazen, gègaani ad kenikew tevangi ǥuntaan.
PSA 71:1 Nengazen, diyà a te kenikew med-aput. Kenè nu ituǥut he mepeel-elezi a.
PSA 71:2 Tevangi a wey luwasa a su metazeng ke man. Pemineǥa a wey luwasa a.
PSA 71:3 Kelesaǥi a iring te nekeendilung a te vatu, su ziyè e zà layun te kenikew edangep. Kenà duwazuwa he edlibriyen a kenikew, su iyan ke man endilungè ku wey melig-en he elesà ku.
PSA 71:4 He Megbevayè ku, luwasa a te kezeetan he edhimuwen te menge lalung wey mesipala he menge etew.
PSA 71:5 He Nengazen he MEGBEVAYÀ, diyà te kenikew is perateng ku. Su puun te vatè e pa ne midsarig e en kenikew.
PSA 71:6 Puun pa te ked-enaka kedì, edsarig e en diyà te kenikew ne edlevanan a kenikew. Ne edeliǥen ku sikew te wazà pidtemanan.
PSA 71:7 Mahabet is nekeiring kedì he ziyà ed-aput te kenikew su ǥeina te neehè dan pinaaǥi te kedlevani nu kedì he iyan ka iyan melig-en he eputà.
PSA 71:8 Layun ku edeliǥa is kegkemekeǥeǥehem nu.
PSA 71:9 Kena a kenikew engkezi emun meǥurang ad. Kenà a kenikew pesegdana emun meluya ad.
PSA 71:10 Su midtiǥum is menge kuntada ku su mid-uyun dan mehitenged kediey; egkesuatan e zan te edhimatey.
PSA 71:11 Ke sikandan te, “Mibey-anan en sikandin te Megbevayà, umbe edel-asen tew sikandin ne edekepen tew, su wazè en edtavang kandin.”
PSA 71:12 He Megbevayè ku, kenà a kenikew pekeziyui; kenè ka langanlangan is edtavang kedì.
PSA 71:13 Berakat he mepeel-elezi wey mengezeeti is menge etew he mibutangbutang kedì. Berakat he mepeel-elezi wey susudia is menge etew he egkesuat he edezaat kedì.
PSA 71:14 Piru siak, Megbevayè ku, layun a ebperateng te tavang nu, ne ibpeiseg ku pa is kedeliǥa ku kenikew.
PSA 71:15 Layun ku edtudtula is metazeng he ebeelan nu he kedlibri te menge etew nu, minsan pa te kenè ku heini egketegkad ke maan.
PSA 71:16 Edhendiyà a te valey nu, Nengazen he MEGBEVAYÀ, ne edeliǥen ku sikew tenged te menge mibeelan nu he nezumahan te zekelà he ǥehem. Iyan dà edtudtulen ku is ketazeng nu.
PSA 71:17 He Megbevayà, puun te vatè e pa, mibpenurù ad kenikew mehitenged te egkein-inuwan he menge vaal nu, ne taman en guntaan is kebpenudtula ku kayi.
PSA 71:18 Ne minsan pa te ebmeǥurang e en su ed-uvanen ad, ne kenà a kenikew pesegdana, Megbevayè ku, zutun te kebpenudtula ku te ǥehem nu wey zesen nu ziyà te huziyan he menge lapis te menge kevuwazan.
PSA 71:19 Is ketazeng nu, Megbevayè ku, kenà egketegkad. Egkein-inuwan is mibpemeelan nu; wazà iyan iring kenikew.
PSA 71:20 Minsan ibpesaǥad a kenikew te mahabet he menge elentusen, ne ebeǥayan a ǥihapun kenikew te veǥu he untung; egkeiring a te minatey he ebenhawen nu zed.
PSA 71:21 Ebeǥayan a kenikew te zekelà he zengeg, ne ed-umanan a kenikew edlipaya.
PSA 71:22 He Megbevayè ku, tenged te kebmetinumanen nu edeliǥen ku sikew pinaaǥi te kedtukar te alpa. Edeliǥen ku sikew, is Waǥas he Megbevayà te Israel, pinaaǥi te kegkanta ku he eduyuǥan te alpa.
PSA 71:23 Igkulahì ku is kegkelipey ku zutun te kegkanta ku te kedalig kenikew tenged te kedlibriya nu kediey.
PSA 71:24 Layun ku edtudtula is ketazeng nu, su is egkesuat he edezaat kedì nepeel-elezan wey neliveg.
PSA 72:1 He Megbevayà, penurua nu is hadì te kenikew he paaǥi te kedhukum he metazeng,
PSA 72:2 para egkezumahan te ketazeng is kedhukumi zin te menge etew nu lavew en is egkengaayu-ayu.
PSA 72:3 Berakat he ebpekeveǥey te keuswagan te menge etew nu is menge vuntud wey menge vuvungan tenged te ketazeng te hadì.
PSA 72:4 Berakat he edlevanan wey edtevangan te hadì is menge egkaayuayu, ne edaaǥen din is menge etew he edaagdaag kandan.
PSA 72:5 Berakat he ebpedayun is kedhadì din te wazà pidtemanan pinaaǥi te kegkehimu he hadì te menge kevuwazan din, mintras duen pa andew wey vulan.
PSA 72:6 Berakat he egkeiring sikandin te uzan he ebpekeveǥey te wahig kayi te kelibutan.
PSA 72:7 Dutun te timpu te kedhadì din, berakat he kenà egkaawà is ketazeng ne kenà egkaawà is kegkemeuswaǥen te ked-ubpà te menge etew taman te taman.
PSA 72:8 Berakat he is ginhedian din ebpuun te sevaha he zaǥat ne taman en te sevaha pa he zaǥat, wey puun te Wahig he Eufrates ne taman te kinemeziyuan he vahin te kelibutan.
PSA 72:9 Berakat he mebpesakup kandin is menge kuntada zin he ziyà ebpemen-ubpà te sibsivayan.
PSA 72:10 Berakat he is menge hadì diyà te Tarshish, menge pulu, wey te Sheba, ebeǥey ziyà te kandin te menge ǥasa te kebpekilala he ebpesakup sikandan kandin.
PSA 72:11 Berakat he ebpesakup kandin is langun he menge hadì ne ebpenilbi kandin is langun he menge nasyun.
PSA 72:12 Su edtevangan din is pinesagdan he menge egkaayuayu, he ebuyù te tavang diyà te kandin.
PSA 72:13 Egkehizuwan din is menge wazà egkehimu wey egkengaayuayu, ne edtevangan din su wey kenà sikandan ebpatey.
PSA 72:14 Edlibriyen din sikandan te kedèdaaǥa wey kebpesipelahi kandan, su utew mevali sikandan diyà te kandin.
PSA 72:15 Berakat he luǥeyazi te untung is hadì! Berakat he ebeǥey kandin te vulawan is Sheba. Berakat he layun sikandin id-ampù he tuvazi sikandin te Megbevayà.
PSA 72:16 Berakat he mebeǥey te menge abut is tanà minsan is puntur te menge vuntud, ne meiring te Lebanon he utew uuzaran. Berakat he mebmahabet is ebpemen-ubpà diyà te menge inged, meiring sikandan kezakel te menge sagbet diyà te menge vevesukà.
PSA 72:17 Berakat he kenà egkelipatan is ngazan te hadì te taman te taman mintras duen pa andew. Berakat he pinaaǥi kandin edtuvazan is langun he menge nasyun, ne ebpekekaǥi is menge etew ziyà te menge nasyun te, “Deyzey sikandin.”
PSA 72:18 Mezait he edeliǥen is Nengazen he Megbevayà, kes Megbevayà te Israel, he iyan dà ebpekehimu keniyan he menge egkengein-inuwan.
PSA 72:19 Ereg he edeliǥen is kegkemekeǥeǥehem din te wazà pidtemanan. Berakat he maahà te menge etew kayi te tivuuk he kelibutan is kegkemekeǥeǥehem din. Amen! Amen!
PSA 72:20 Iyan heini ketepusan he menge kebpengemuyù ni David te anak ni Jesse.
PSA 73:1 Meupiya iyan is Megbevayà te Israel, lavew en diyà te menge etew he lumpiyu is gehinawa zan.
PSA 73:2 Piru siak, hapit en egkaawà is kedtuu ku,
PSA 73:3 su nesina a te gelbuwen wey lalung he menge etew hein neehè ku he mid-uswag sikandan.
PSA 73:4 Meupiya is kedlelawa zan ne kenà mesakit is kemetayen dan.
PSA 73:5 Wazà menge elentusen dan ne kenà sikandan edlised iring te zuma he menge etew.
PSA 73:6 Umbe, melemu zà diyà te kandan is kebpaahà te kegkegelbuwen dan wey kegkemesipala zan.
PSA 73:7 Is menge ǥehinawa zan nepenù en te kelelalung, ne iyan dan dà layun egkeisip is kebaal te mezaat.
PSA 73:8 Edsudien dan wey mezaat is ebpengeǥiyen dan diyà te zuma. Utew sikandan hembugiru he ebpenhulgà wey ebpendaagdaag te zuma.
PSA 73:9 Mezaat is menge lalag dan he igkuntada zan te Megbevayà diyà te langit wey te menge etew kayi te kelibutan.
PSA 73:10 Umbe, minsan is menge etew te Megbevayà edsunud kandan wey ebpengumbenar te egkeǥiyen dan.
PSA 73:11 Ke sikandan te, “Kenà egkesayud is Megbevayà? Wazà hanew te Utew Lavew he Megbevayà.”
PSA 73:12 Iring keniyan is menge lalung he etew, wazè dan igkeliveǥ ne mid-iseg pa is kegkesepian dan.
PSA 73:13 Tenged kayi wazè ku maahà is pulus te kedtinazeng ku wey kedlikey ku te salà.
PSA 73:14 Layun a kenikew ibpaantus, Megbevayè ku; hapit kada meselem is kedsiluti nu kedì.
PSA 73:15 Angin ke mid-iringan ku is lalung he menge etew te ked-un-undaha zan kenikew, ne nelimbungan ku en is menge etew nu.
PSA 73:16 Nenigudu a wey ku mesavut heini, piru utew a midlised,
PSA 73:17 taman te midhendiyà a te valey nu, ne zutun nesavut ku human ke hengkey is egkehitavù diyà te lalung he menge etew.
PSA 73:18 Benar he idsavuk nu sikandan diyà te wazà kesiguruwan he kebpekesavuk, ne edezeetan nu sikandan.
PSA 73:19 Egketik-ew zà sikandan egkengezeeti; egkeumahan sikandan te mekahandekhandek he hitavù ne ebpematey sikandan is langun.
PSA 73:20 Is kegkahanew zan iring te teǥeinep he emun edkepukew ki is nekelipezeng ne wazè en. Egkelipatan en sikandan emun egkesilutan nu en sikandan.
PSA 73:21 Hein neseeng a wey nesekitan a,
PSA 73:22 nehimu a he iring te tulebung he langgam diyà te etuvangan nu su wazè ku sikew mesavut.
PSA 73:23 Piru ed-uvey a ǥihapun diyà te kenikew ne egiyahan a kenikew.
PSA 73:24 Egiyahan a kenikew pinaaǥi te menge sambag nu, ne ziyà te egkehuziyanan ed-uwiten a kenikew ziyà te utew meupiya he kebpekesavuk.
PSA 73:25 Wazè en duma ziyà te langit he egkinehenglanen ku, kekenà, iyan ke zà. Su ǥeina te kayi ka te kediey, wazè en duma pa he ebpengenduyen ku kayi te kelibutan.
PSA 73:26 Minsan edluyahan is lawa ku wey isip ku, iyan ka, Megbevayè ku, ebpuunan te zesen ku. Iyan ke zà egkinehenglanen ku taman te taman.
PSA 73:27 Is menge etew he ed-iniyug kenikew, ne kenà duwazuwa he egkengahanew sikandan; edezeetan nu is wazà medtuman te egkesuatan nu.
PSA 73:28 Piru mid-isip ku mulà he utew meupiya is ked-uvey ziyà te kenikew, Megbevayà. Nengazen he MEGBEVAYÀ, midhimu ku sikew he kutè ku, su wey ku ikeseysey is langun he menge vaal nu.
PSA 74:1 He Megbevayà, maan is ebpedayun en is ked-iniyuǥi nu kenami? Maan is nepeukan key kenikew is menge etew he ebentayan nu?
PSA 74:2 He Megbevayà, tentenuzi nu is menge etew nu he mibpilì nu zengan para mehimu he kenikew ne midlibri nu para maangken nu en. Tentenuzi nu is Buvungan he Zion he ubpeey nu.
PSA 74:3 Leuya nu ne ahaa nu is ebpedayun he kegkezeeti zuen te valey nu tenged te mibeelan te menge kuntada.
PSA 74:4 Nen-ugyab dutun te valey nu is menge kuntada nu, su ibpeehè dan is kegkezeeǥa zan kenami te menge etew nu. Midsavuk dan te bendira zan he tuus te kebpekezaag dan.
PSA 74:5 Midrundus dan is baley nu he henduen dan te egkamet diyà te ketelunan.
PSA 74:6 Midèdeetan dan sikan is mibpurungan ukiri he menge kayu he himan te valey nu pinaaǥi te menge wasey wey menge piku zan.
PSA 74:7 Mibinsulan dan is baley nu; midremerikan dan heini is ubpeey nu.
PSA 74:8 Iyan diyà te isip dan is ebpurungan key zan edezeeti. Mibinsulan dan is langun he tiǥumà kayi te Israel he para te ked-ezapa kenikew.
PSA 74:9 Wazè en tuus te kebpekiduma nu kenami; wazè en nesamà duen te ebpemeneuven nu, ne wazè en netau kenami ke keenu egkeengked heini is pesipala kenami.
PSA 74:10 He Megbevayà, sengemenu keluǥayad is kebpeel-elezi te kuntada zey kenikew? Taman en be te taman is ked-un-undaha zan kenikew?
PSA 74:11 Maan is wazè nu pa sikandan siluti? Maan is henduen be te kenè nu edwelengen is menge velad nu? Dèdeeti nu en sikandan!
PSA 74:12 Iyan ka, Megbevayà, hadì dey puun pa zengan, ne kemahabet nu en libriya is menge etew kayi te kelibutan.
PSA 74:13 Pinaaǥi te ǥehem nu neluwisan is tanà diyà te dizalem te zaǥat, iyan ka migevà te menge ulu te zezekelà he menge langgam diyà te zaǥat.
PSA 74:14 Iyan ka migevà te menge ulu te menge dragun he Leviatan wey mibpekaan te menge lawa zan te menge langgam diyà te sibsivayan.
PSA 74:15 Iyan ka mibpetudà te menge serebseb wey te menge wahig he edtudà. Iyan ka mibpemazà te menge wahig he edtudà he kenà pezem egkemezahan.
PSA 74:16 Iyan ka mibaal te maandew wey mezukilem, iyan ka midsavuk te andew wey vulan diyà te nesevukan dan.
PSA 74:17 Iyan ka midsavuk te langun he menge taltal kayi te kelibutan, iyan ka midhimu te ǥulavung wey timpu te meǥenew.
PSA 74:18 Tentenuzi nu, Nengazen, is kebpeel-elezi wey kedsudia kenikew te menge tulebung he menge kuntada.
PSA 74:19 Kenè nu iveǥey is menge etew nu he iring te menge merepatik te menge kuntada he iring te kumekaan te etew he menge langgam. Kenè nu lipati minsan keenu is edèdaaǥen he menge etew nu.
PSA 74:20 Tentenuzi nu is kebpekid-uyun nu kenami, su utew mesipala is menge kuntada zey, ne mibmerusirem is nasyun dey tenged te kelelalung.
PSA 74:21 Kenè nu ituǥut is kegkepeel-elezi te menge edèdaaǥen. Berakat he edeliǥen ka te menge egkaayuayu wey menge pubri.
PSA 74:22 He Megbevayà, levani nu en guntaan is dengeg nu. Tentenuzi nu he edtulungan ke en ebpeel-elezi te menge tulebung.
PSA 74:23 Kenè nu ituǥut he ebpedayun is kedtulung kebpengulahì te menge kuntada nu he tuus te kegkepauk dan.
PSA 75:1 He Megbevayà, mepeselematen key kenikew. Mepeselematen key su uvey ka kenami. Edtudtulen dey is egkein-inuwan he menge vaal nu.
PSA 75:2 Ke sikew te, “Duen timpu he midtail ku he para te kedhukum, ne metazeng is kedhukum ku.
PSA 75:3 Emun egkehuyung is kelibutan ne ebpengerkeren te kegkahandek is menge meǥinged kayi, ne iyan a edlig-en te mibengunan kayi.
PSA 75:4 Migkeǥiyan ku is menge hembugiru he menge lalung te med-engked en sikandan he ebpahambug wey ebpehivantug tenged te egkehimu zan.
PSA 75:5 Migkeǥiyan ku sikandan he engkezi zan en is kebpezalig dan.”
PSA 75:6 Hustu heeyan is egkaǥiyen te Megbevayà, su wazà duma he ebeǥey te zengeg,
PSA 75:7 kekenà, iyan dà is Megbevayà. Iyan sikandin edhukum; ebpekevevaan din is ked-etew te zuma, ne is duma ebeǥayan din te zengeg.
PSA 75:8 Su egkulang is Nengazen te tasa he nepenù te eburàburà he utew mevisa he vinu he iyan is pauk din. Ne edteǥayen din heini su wey meinum te langun he lalung he menge etew kayi te kelibutan taman te egkaamin dan.
PSA 75:9 Iyan, siak mulà, kenà a ed-engked he ebpenudtul mehitenged te Megbevayà ni Jacob, ne egkentahan ku sikandin te menge idalig kandin.
PSA 75:10 Id-awè din is gehem te menge lalung he menge etew, ne ed-umanan din mulà is gehem te menge metazeng.
PSA 76:1 Diyà te Juda nekilala utew is Megbevayà; nevantug sikandin diyà te Israel.
PSA 76:2 Ed-ubpà sikandin diyà te Buvungan te Zion he ziyà te Jerusalem.
PSA 76:3 Dutun he lugar mibpendezeetan din is edhagyung he menge vesut te panà te menge kuntada, is menge kelasag dan, is menge ispada zan, wey is duma pa he menge ǥumaan dan.
PSA 76:4 He Megbevayà, mekeǥeǥehem ka wey utew lavew zutun te kedtupang nu puun te menge vuvungan he zutun nu penhimetayi is menge kuntada nu.
PSA 76:5 Mibpen-aǥew nu ziyà te mevurut he menge sundaru is menge vutang he inaǥew zan diyà te zuma. Ne mibpematey sikandan is langun, ne wazà minsan sevaha kandan he nekehimu he egkayew te velad din.
PSA 76:6 He Megbevayà ni Jacob, nemematey en is menge pereuntud te kudà wey is menge kudè dan pinaaǥi zà te kedawey nu.
PSA 76:7 Mekahahandek ka, Megbevayà. Wazà ebpekehimu he edsukul kenikew emun egkepauk ka.
PSA 76:8 Ebpuun te langit imbeǥey nu is kukuman nu. Ne nengahandek is menge etew kayi te kelibutan ne wazà sikandan mekekaǥi hein
PSA 76:9 midhukum ka, Megbevayà, he edlibriyen nu is langun he menge edèdaaǥen kayi te kelibutan.
PSA 76:10 Kenà duwazuwa he is kegkepauk nu te lalung he menge etew igkezeliǥi kenikew, ne kemulu pa is pauk nu.
PSA 76:11 Pesarig kew ziyà te Nengazen he Megbevayè niw ne tumana niw heini. Ipeuwit niw is menge meǥinged te kesikbit niw he menge nasyun te menge gasa ziyà te telehuzen he Megbevayà.
PSA 76:12 Ibpekevavè din is mepelevawen he menge pengulu; igkehandek sikandin te menge hadì kayi te kelibutan.
PSA 77:1 Mibpekezaǥing a is ebuyù te tavang diyà te Megbevayà. Nengumew a su wey e zin mezineg.
PSA 77:2 Dutun te timpu te kelised ed-ampù a ziyà te Nengazen. Ne zutun te ked-ampù ku ke mezukilem kenà a egkeveley he ebayew te menge velad ku, piru wazè ku ǥihapun kelipey.
PSA 77:3 Emun ebpurungan ku egngunngunua is Megbevayà egkesuǥey a ne egkaawà is perateng ku.
PSA 77:4 Wazè e zin ipelipezeng; kenè ku egketuenan ke hengkey is egkeǥiyen ku, su utew a nesemuki.
PSA 77:5 Ed-isipen ku is nemenlavey he menge andew wey is menge tuig he neuǥet en he nenlavey.
PSA 77:6 Emun mezukilem ne mezalem is ed-is-isipen ku. Ebpurung a egngunùngunù ne iyan heini menge insà he neuma te isip ku:
PSA 77:7 “Taman en be vuwa te taman is ked-iniyuǥi kenami te Nengazen? Kenà key en buwa ebpekepenunuat kandin?
PSA 77:8 Kela ke naawè en is kebmahala zin kenami? Kenè din en buwa edtumanen is penangdù din?
PSA 77:9 Kela ke nelipat en sikandin he egkehizu? Kenè en be sikandin egkehizu tenged te pauk din?”
PSA 77:10 Ne ke siak te, “Is ibmesakit te ǥehinawa ku iyan is: kenè en bes edtavang kenami is lavew he Megbevayà.”
PSA 77:11 Nengazen, edtentenuzan ku is menge vaal nu. Uya, edtentenuzan ku is egkengein-inuwan he mibeelan nu zengan.
PSA 77:12 Ed-isipen ku wey egngunùngunuen is langun he mekeǥeǥehem he menge vaal nu.
PSA 77:13 He Megbevayà, is menge paaǥi nu ne kenà iring te menge paaǥi te zuma. Wazà ebpekerepeng te kegkemekeǥeǥehem nu.
PSA 77:14 Iyan ka Megbevayà he mibaal te egkengein-inuwan. Ibpeehè nu te menge etew is gehem nu.
PSA 77:15 Midlibri nu is menge etew nu he menge kevuwazan ni Jacob wey ni Jose pinaaǥi te ǥehem nu.
PSA 77:16 He Megbevayà, is menge wahig neiring te etew he emun egkeehè ke zin ebpengerkeren te kegkahandek din.
PSA 77:17 Mibusbus te uzan is menge kivel; midruǥung diyà te zivavew ne nengilat diyà te minsan hendei.
PSA 77:18 Ne egkezineg is selenuhug te menge vagyu; is menge kilat neketayew te kelibutan; ne neyunggat is kelibutan.
PSA 77:19 Midlayun nu is daǥat he nemaǥel te dezekelà he menge vaǥel, piru wazè ka maahà is edsaǥad.
PSA 77:20 Migiyahan nu is menge etew nu he iring te menge kerehidu, pinaaǥi ki Moises wey ki Aaron.
PSA 78:1 Sikiyu is menge lumunè ku te inged, pemineǥa niw is menge penurù ku.
PSA 78:2 Ebpenuruen ku sikiyu pinaaǥi te menge sempità. Edtudtulen ku keniyu is in-eles he menge ketutuanan dengan
PSA 78:3 he netuenan tew en, su midtudtul kenitew te menge kepuun tew.
PSA 78:4 Kenè tew heini id-eles te menge vatà; edtudtulen tew heini ziyà te edsunud he menge lapis te kevuwazan. Edtudtulan tew sikandan te ǥehem te Nengazen wey te egkengein-inuwan wey zait he edeliǥen he menge vaal zin.
PSA 78:5 Mibeǥayan din te kesuǥuan is menge etew ziyà te Israel he menge kevuwazan ni Jacob. Ne insuǥù din diyà te menge kepuun tew he ipenurù dan heini ziyà te menge anak dan,
PSA 78:6 su para metueni heini te ebpekesunud he lapis te kevuwazan, ne igkepenurù dan daan heini ziyà te menge anak dan.
PSA 78:7 Ne pinaaǥi kayi edsarig sikandan te Megbevayà, ne kenè dan egkelipatan is mibpemeelan din ne edtumanen dan is menge suǥù din.
PSA 78:8 Ne kenà sikandan egkeiring te menge kepuun dan he menge supekiru, kenà menge metinumanen, kenà melig-en is kedsarig dan te Megbevayà, wey kenè dan mepezumdumahan kandin.
PSA 78:9 Is menge sundaru he menge kevuwazan ni Efraim, minsan neǥumeenan sikandan te menge panà, nemelaǥuy sikandan dutun te timpu te tebek.
PSA 78:10 Wazè dan tumana is kebpekid-uyun dan te Megbevayà; wazè dan sunuza is kesuǥuan din.
PSA 78:11 Midlipatan dan is egkein-inuwan he menge vaal zin he impeehè din kandan.
PSA 78:12 Egkein-inuwan is mibeelan te Megbevayà diyà te Zoan he sakup te tanà he Ehipto, ne naahà haazà te menge kepuun tew.
PSA 78:13 Midtevì din is daǥat ne impevayè din sikandan; diyè din isavuk te pesikilizà te nezalandalan he tanà is wahig he henduen be te menge elavat.
PSA 78:14 Emun maandew, egiyahan din sikandan pinaaǥi te ǥapun, ne te mezukilem, ne pinaaǥi te kerayag te hapuy.
PSA 78:15 Impeveka zin is menge vatu ziyà te sibsivayan ne midtudà puun dutun is wahig he henduen be te ziyà ebpuun te serebseb, umbe kenà alang-alang he wahig is imbeǥey zin kandan.
PSA 78:16 Impetudè din puun dutun te vatu is wahig, ne henduen be haazà te ziyà ebpuun te zekelà he wahig he edtudà.
PSA 78:17 Piru is menge kepuun tew, mibpedayun dan mulà he ebaal te salà diyà te kandin. Dutun te sibsivayan midsukulan dan is Utew Lavew he Megbevayà.
PSA 78:18 Midtivevè dan gezami is Megbevayà pinaaǥi te kebuyù dan te ampey zan he keenen.
PSA 78:19 Mid-insultuwan dan is Megbevayà pinaaǥi te kegkaǥi zan te, “Kenè kiw vuwa igkepekaan te Megbevayà kayi te sibsivayan.
PSA 78:20 Tutuu iyan he hein midtabpì din sikan is batu ne migawas is wahig, piru egkeveǥayan kiw zin be zaan buwa te supas wey usa is menge etew zin?”
PSA 78:21 Umbe, nepauk is Nengazen te kegkezineǥa zin kandan. Iring te hapuy is pauk din te menge tig-Israel he menge kevuwazan ni Jacob.
PSA 78:22 Su wazè dan kedtuu kandin, ne wazè dan medsarig he edlibriyen din sikandan.
PSA 78:23 Piru minsan pa te iyan haazà, midsuǥù din is langit he med-abri,
PSA 78:24 ne mibpeud-uzanan din sikandan te keenen he egngezanan te ‘manna’. Imbeǥey zin kandan is keenen he ebpuun te langit su wey zan mekaan.
PSA 78:25 Sikandan is menge etew zà duen, nekekaan dan te keenen te menge velinsuǥuen. Ne impezahar te Megbevayà heini he keenen diyà te kandan.
PSA 78:26 Impepengeramag te Megbevayà te keramag he ebpuun te edsilaan wey edsenlepen pinaaǥi te ǥehem din.
PSA 78:27 Ne mibpantad is menge tagbis he impeuzan-uzan din diyà te kandan.
PSA 78:28 Impelugtanè din haazà diyà te ebpekeliǥuy te menge tulda zan duen te kampu zan.
PSA 78:29 Umbe, nekekaan sikandan ne nengahantey zan, su imbeǥey te Megbevayà kandan is egkesuatan dan.
PSA 78:30 Ne zutun te ebpetakè en sikandan egkaan,
PSA 78:31 nepeukan sikandan te Megbevayà. Mibpenhimetayan din is tig-Israel he menge vetan-en he memeupiya is kedlelawa wey memezesen.
PSA 78:32 Piru minsan pa te neseǥazan dan heini is langun he egkein-inuwan he mibpemeelan te Megbevayà, wazè dan med-engked he ebaal te salà wey wazè dan medtuu kandin.
PSA 78:33 Umbe, migègaanan din tepusa is menge untung dan pinaaǥi te netik-ew he kezeetan.
PSA 78:34 Ne hein mibpenhimetayan din is duma kandan, ne is duma zuen te nengesamà, midsendit dan ne midangep dan diyà te kandin ne zekelà is suat dan te tavang din.
PSA 78:35 Neisip dan he iyan endilungè dan wey edlibri kandan is Utew Lavew he Megbevayà.
PSA 78:36 Piru kenà diyà ebpuun te ǥehinawa zan is kedeliǥa zan kandin su menge teruen sikandan.
PSA 78:37 Kenà meheǥet is gehinawa zan diyà te kandin; kenè dan metinumanen te kebpekid-uyun kandan.
PSA 78:38 Minsan pa te iyan heini, hihizuwen gihapun kandan is Megbevayà. Mibpesaylu zin sikandan te menge salè dan ne wazè din sikandan dèdeeti. Layun din ed-eǥena is pauk din kandan minsan utew en sikandin egkepauk.
PSA 78:39 Midtentenuzan din he menge etew zà sikandan, he iring te keramag he edlavey zà su ebpematey sikandan.
PSA 78:40 Diyà te sibsivayan, layun dan edsupaka wey ebeǥayi te seeng is Megbevayà.
PSA 78:41 Layun dan egezami is Megbevayà; ebeelan dan is igkeepes te Waǥas he Megbevayà te Israel.
PSA 78:42 Midlipatan dan is gehem din he impeehè din hein midlibri zin sikandan te kegkeiza kandan te menge kuntada zan,
PSA 78:43 ne midlipatan dan sikan is egkein-inuwan he mibeelan din diyà te Zoan he sakup te tanà he Ehipto.
PSA 78:44 Midhimu zin he lengesa sikan is edtudà he menge wahig te menge tig-Ehipto, umbe wazà egkeinum dan.
PSA 78:45 Mibpehurepunan din sikandan te utew subra he langew para merasey sikandan; impelepew zin is gerabi he menge vakbak he nekezezaat te menge pinemula zan.
PSA 78:46 Impekaan din te terapan is menge pinemula zan wey menge abut dan.
PSA 78:47 Mibpendèdeetan din is menge perasan dan wey menge kayu zan he sikemur pinaaǥi te ǥiyew.
PSA 78:48 Mibpenhimetayan din is menge uyaǥen dan pinaaǥi te ǥiyew wey kilat.
PSA 78:49 Tenged te utew zin kegkepeuki kandan, midsuǥù din is duma zuen te menge velinsuǥuen din te kedezaat kandan.
PSA 78:50 Wazè din eǥena is pauk din; wazè din sikandan libriya te kemetayen, kekenà, mibpenhimetayan din sikandan pinaaǥi te mezaat he menge hitavù.
PSA 78:51 Mibpenhimetayan din is langun he penganey he menge anak he maama diyà te Ehipto, he iyan kes menge kevuwazan ni Ham.
PSA 78:52 Impeǥawas din puun te Ehipto is menge etew zin he iring te menge kerehidu he migiyahan din diyà te sibsivayan.
PSA 78:53 Midumahan din sikandan, umbe wazà sikandan mahandek. Piru nengelened mulà diyà te zaǥat is menge kuntada zan.
PSA 78:54 Mid-uwit din sikandan diyà te tanà he mibpilì din; diyà te menge vuntud he mid-aǥew zin pinaaǥi te ǥehem din.
PSA 78:55 Midsegseg din sikandan pehendiyà te meziyù te menge etew zin, ne mibahinbahin din haazà is tanà. Mibehinan is kada tribu te Israel su para maangken dan haazà, ne zutun din sikandan ipeubpà.
PSA 78:56 Iyan, migezaman dan is Utew Lavew he Megbevayà, su midsupak dan sikandin ne wazè dan tumana is menge suǥù din.
PSA 78:57 Iring te menge kepuun dan, mibpekeziyuan dan wey midluivan dan is Megbevayà. Ne iring sikandan te nevadtì he panà su kenà sikandan egkeseriǥan.
PSA 78:58 Midhimu zan he mepauk wey mebpengelikud kandan is Megbevayà pinaaǥi te kebangun dan te menge simbahan diyà te metikang he menge lugar wey te ked-azap dan te zuma he menge ed-ezapen.
PSA 78:59 Netuenan te Megbevayà heini is mibeelan te menge tig-Israel, umbe nepauk sikandin ne mid-iniyuǥan din en sikandan.
PSA 78:60 Mid-ewaan din sikan is tulda zin diyà te Shilo he iyan ubpeey zin kayi te kelibutan.
PSA 78:61 Intuǥut din he maaǥew te menge kuntada sikan is Kavan te Kebpekid-uyun he simbulu te kegkemekeǥeǥehem din wey kegkelavew zin.
PSA 78:62 Nepeukan din is menge etew he ǥaked din, umbe mibpenhimetayan din sikandan pinaaǥi te tebek.
PSA 78:63 Mibpeminsulan is menge vetan-en he menge maama kandan, umbe wazè en ebpekeesawa te menge raǥa zan.
PSA 78:64 Nemematey te tebek is menge memumuhat dan, ne is nengevalu he menge esawa zan ne wazè en mekelalew para kandan.
PSA 78:65 Piru nehitavù he henduen be te neelimukawan is Nengazen; neiring sikandin te mezesen he etew he mibmevurut tenged te vinu.
PSA 78:66 Midsegseg din is menge kuntada zin; ne wazà pidtemanan is kegkepeel-elezi zin kandan.
PSA 78:67 Wazè din pilia is tribu ni Efraim he menge kevuwazan ni Jose.
PSA 78:68 Su iyan din mibpilì is tribu ni Juda wey is Buvungan he Zion he utew zin minahal.
PSA 78:69 Dutun din benguna is baley zin, ne iring heini te langit wey tanà su taman te taman is kelig-en kayi.
PSA 78:70 Si David is mibpilì te Megbevayà he egkehimu he suluǥuen din. Perevantey zà si David te menge kerehidu, piru impeuswag din su midhimu zin si David he hadì te Israel he iyan kes menge etew he ǥaked din. Umbe igkepetug-iring gihapun si David te perevantey te menge kerehidu,
PSA 78:72 ne tinutuuwà is ked-etura zin te menge tig-Israel ne mibpurungan din sikandan penguluwi.
PSA 79:1 He Megbevayà, midsurung te meǥinged diyà te senge nenasyun is meǥinged diyà te tanà he ǥaked nu. Midremerikan dan is segradu he valey nu ne midezeetan dan is Jerusalem.
PSA 79:2 Impekaan dan te zumezaas he menge tagbis wey zumezaas he menge langgam is nemematey he menge etew nu he menge metinumanen he suluǥuen nu.
PSA 79:3 Impetiǥis dan is lengesa te menge etew nu ne iring te wahig is kedtudà kayi ziyà te tivuuk he Jerusalem, ne wazà minsan sevaha he nesamà he ebpekeleveng te nemematey.
PSA 79:4 Ebpeel-elezan key wey edsudien key te menge nasyun he nekeliǥuy kenami.
PSA 79:5 Keenu en buwa egkaawà, Nengazen, is pauk nu kenami? Taman en be te taman is pauk nu kenami? Eriyubriyub en be he iring te hapuy is kebpengelikud nu?
PSA 79:6 Ipeehè nu is pauk nu ziyà te menge nasyun wey menge ginhedian he wazà megkilala wey medsimba kenikew.
PSA 79:7 Su mibpenhimetayan dan is menge etew nu ne midezeetan dan is nasyun te menge etew nu.
PSA 79:8 Kenè key kenikew siluti tenged te menge salà te menge kepuun dey. Kekenà, kenè nu en pekeuǥeta is kegkehizuwi nu kenami su wazè dey en egkehimu.
PSA 79:9 Tevangi key kenikew, Megbevayà he Menluluwas dey, su wey ka mezeliǥi. Luwasa key wey peseyluwa key te menge salè dey su wey ka mevantug.
PSA 79:10 Kenè nu itugut he ebpekekaǥi ziyà te kenami is menge etew ziyà te zuma he menge nasyun te, “Hendei en is Megbevayè niw?” Ipeehè nu kenami is penimales nu te menge nasyun tenged te kebpenhimetayi zan te menge etew nu he menge suluǥuen nu.
PSA 79:11 Pemineǥa nu is dag-es te menge etew nu he menge vihag. Edhimetayan sikandan, umbe libriya nu sikandan pinaaǥi te ǥehem nu.
PSA 79:12 Nengazen, kepipitu nu tekepa is penimales nu te uvey zey he menge nasyun te kebpeel-elezi zan kenikew.
PSA 79:13 Ne sikami is menge etew nu he iring te menge kerehidu he ebentayan nu, ne wazà pidtemanan te kebpeselemati zey kenikew. Layun dey sikew edeliǥa taman te taman.
PSA 80:1 Sikew is ebantey te Israel, pemineǥa key kenikew, iyan ka migiya te iring te menge kerehidu he menge kevuwazan ni Jose. Sikew is ebpimpinuu ziyà te pinuuwè nu te kedhadì he egkezivavew te nepelestaran te menge kirubin, ipeehè nu is gehem nu
PSA 80:2 ziyà te etuvangan te tribu ni Efraim, ni Benjamin, wey ni Manase. Ipeehè nu en is gehem nu, ne veyai key ne ibriya key.
PSA 80:3 He Megbevayà, iliku nu kayi te kenami is keupiya te kebpekesavuk dey zengan. Ipeehè nu kenami is hizu nu su wey key melibri.
PSA 80:4 Nengazen he Megbevayà he Mekeǥeǥehem, sengemenu keluǥayad is timpu he igkeepes nu zà is menge kebpengemuyù dey te menge etew nu?
PSA 80:5 Mibpenù key kenikew te seeng ne samè dà kenè dey meinum is luhè dey.
PSA 80:6 Intuǥut nu he tebeka key te kesikbit dey he menge nasyun, ne sikandan is menge kuntada zey ne ed-undaunda kenami.
PSA 80:7 He Megbevayà he Mekeǥeǥehem, ilikù nu kayi te kenami is meupiya he kebpekesavuk dey zengan. Ipeehè nu kenami is keupiya nu su wey key melibri.
PSA 80:8 Sikami is menge etew nu, neiring key te pinemula he paras he migkuwa nu ziyà te Ehipto ne impemula nu ziyà te tanà te menge etew he midsegseg nu.
PSA 80:9 Mibpurungan nu hiǥewani haazà is tanà, ne nendalid haazà is paras ne neeneb te langkat din heini is tanà.
PSA 80:10 Nelembungan te menge subpang din is menge vuntud wey is dezekelà he kayu he sidru.
PSA 80:11 Nekeuma is menge subpang din diyà te Daǥat he Mediteraneo ne taman en te zekelà he Wahig he Eufrates.
PSA 80:12 He Megbevayà, maan is midrundus nu is menge verengbeng kayi te paras? Egketakew en hinuun te langun he sumeseǥazà is menge veǥas din.
PSA 80:13 Egkeenen heini te kenà ayam he menge vavuy wey zuma pa he menge leew he langgam.
PSA 80:14 Seǥipaa key zed umani, Megbevayà he Mekeǥeǥehem! Puun diyan te langit ahaa nu is kebpekesavuk dey. Is-isipa key kenikew is menge etew nu,
PSA 80:15 he iring te pinemula he paras he impemula nu pinaaǥi te ǥehem nu. Tentenuzi key kenikew is menge anak nu he impehitindeg nu su para mevantug ka.
PSA 80:16 He Megbevayà, iring key te midtamped he paras he mibinsulan. Egkezumahan te pauk nu is kedtengtengi nu kenami ne midezeetan key kenikew.
PSA 80:17 Piru ǥuntaan tevangi key en kenikew is menge etew he mibpilì nu he ebpekeuvey kenikew wey midlig-enan nu su para mevantug ka,
PSA 80:18 ne kenè dey en sikew ed-ewaan. Ilikù nu zini te kenami is meupiya he kebpekesavuk dey, ne ed-ezapen dey sikew.
PSA 80:19 He Nengazen he Mekeǥeǥehem he Megbevayà, ilikù nu zini te kenami is meupiya he kebpekesavuk dey! Ipeehè nu kenami is hizu nu su wey key melibri.
PSA 81:1 Kentahi niw he melipayen kew is Megbevayà he iyan mibeǥey kenitew te zesen. Ugyab kew ziyà te etuvangan te Megbevayà ni Jacob!
PSA 81:2 Puuni niw is kegkanta; ipezaǥing niw is tamburin, tukara niw is utew meupiya he ebpemineǥen he menge instrumintu he zuen dan menge kuwirdas.
PSA 81:3 Ipezaǥing niw is budyung te kedsilibra te Pista te Kebpuun te Hayag wey zuen te pista he ebeelan tew emun tuker.
PSA 81:4 Su iyan heini sulunuzen te menge tig-Israel. Su suǥù heini te Megbevayà ni Jacob.
PSA 81:5 Impenurù din heini he penurù te menge kevuwazan ni Jose hein midsurung din is Ehipto. Nekezineg a te laǥeng he wazè ku mekilala he edhenduen te,
PSA 81:6 “Impelingkawas ku sikiyu te kegkeuripena keniyu; in-awè ku is menge meveǥat he uwiten niw.
PSA 81:7 Hein egkereǥenan kew mid-umew a keniyu ne midlibri ku sikiyu. Ne ziyà te mid-elesan ku he kivel midtavak ku is umew niw. Ne migezaman ku sikiyu ziyà te serebseb te Meriba.
PSA 81:8 Sikiyu is menge etew ku he menge tig-Israel, pemineǥa niw is petizaan ku keniyu. Deyzey pezem ke ebpemineǥen a keniyu!
PSA 81:9 Kinahanglan he liyu kedì, kenè kew med-azap te zuma; kenè niw ezapa is tarù he menge Megbevayà.
PSA 81:10 Iyan a kes Nengazen he iyan Megbevayè niw he iyan kes mibpeǥawas keniyu ziyà te Ehipto. Buyù kew kayi te kediey ne ebeǥayan ku sikiyu te menge kinahanglan niw.
PSA 81:11 Piru sikiyu is menge Israilihanen he menge etew ku, wazè kew mebpemineg wey mebpezumazuma kedì.
PSA 81:12 Umbe, mibpesagdan ku sikiyu te kebmesinupaken niw, ne mibeelan niw is egkesuatan niw.
PSA 81:13 Emun pezem ebpemineg kew kedì wey edtumanen niw is menge paaǥi ku,
PSA 81:14 ne diritsu ku zà edsiluti wey edaaǥa is menge kuntada niw.
PSA 81:15 Is menge edumut kediey, ne ebpekeluhud kedì su egkahandek. Ne wazà pidtemanan te silut dan.
PSA 81:16 Iyan, sikiyu mulà is menge etew ku, ibpekaan ku sikiyu. Edhentayen ku sikiyu te utew meupiya he trigu wey teneb.”
PSA 82:1 Midumala te Megbevayà is ketiǥuman te menge gemhanan, ne edhukuman din sikandan.
PSA 82:2 Ke sikandin te, “Sengemenu keluǥayad is kedtulung niw kedhimu te hukum he kenà metazeng? Sengemenu keluǥayad is kedtulungi niw kedepiǥi te menge lalung?
PSA 82:3 Iveǥey niw is hustu he kukuman diyà te menge utew egkengeey-eyuwi wey menge ilu. Levani niw is ketenged te menge egkaayuayu he edèdaaǥen.
PSA 82:4 Luwasa is menge utew egkengeey-eyuwi wey is menge pubri ziyà te ǥehem te menge mezaat he etew!
PSA 82:5 Utew kew menge paglung! Utew kew menge taleng! Diyè kew te kerusireman, umbe negurigew en heini is kelibutan.
PSA 82:6 Siak, is Utew Lavew he Megbevayà, egkeǥiyan ku sikiyu te menge megbevayè kew, ne pudu ku sikiyu menge anak.
PSA 82:7 Ebpatey kew iring te etew. Egketapus is untung niw iring te minsan hentei he pengulu.”
PSA 82:8 Sigi en, Megbevayà, hukumi nu en is menge etew ziyà te langun he menge nasyun kayi te kelibutan, su ǥaked nu sikandan.
PSA 83:1 He Megbevayà, kenè ka pereremek, kekenà, waleng ka!
PSA 83:2 Hanu man te menge kuntada nu, egkegurigew zan he edsurung ne ebpegalbu sikandan su ebpekezaag dan kun.
PSA 83:3 Duen meeles he pelanu zan he para te kezeetan te menge etew nu he ed-eturen nu.
PSA 83:4 Ke sikandan te, “Gaang-gaang kew su edèdeetan tew is nasyun he Israel su para melipati en heini taman te taman.”
PSA 83:5 Nesevaha sikandan te mezaat he pelanu zan. Mid-uyun sikandan te kegkuntada kenikew.
PSA 83:6 Iyan sikandan kes menge Edomanhen, menge Ismailihanen, menge Moabitanhen, menge Hagarnen,
PSA 83:7 menge Gibalnen, menge Amunihanen, menge Amalikanhen, menge Filistihanen, wey menge etew te Tyre.
PSA 83:8 Midtavang daan kandan is Asiria he mezesen he tumetavang te menge kevuwazan ni Lot.
PSA 83:9 Daaǥa nu sikandan Nengazen, iring te mibeelan nu ziyà te menge Midianhen, wey ziyà te ki Sisera wey ki Jabin diyà te zal-ug he Kishon.
PSA 83:10 Mibpatey sikandan diyà te Endor ne neredak is menge lawa zan ne nehimu he abunu te tanà.
PSA 83:11 Dèdeeti nu is menge pengulu zan iring te mibeelan nu ki Oreb, ki Zeeb, ki Zeba, wey ki Zalmuna.
PSA 83:12 Su migkaǥi sikandan te, “Ed-eǥawen tew is tanà te Megbevayà.”
PSA 83:13 He Megbevayà, ipeyapat nu sikandan iring te eliyavuk wey ukap he idlayap te keramag.
PSA 83:14 Iring te hapuy he midelandap he nekevinsul te menge kayu ziyà te vuvungan, del-asa nu sikandan ne pelihendeka nu pinaaǥi te vagyu.
PSA 83:16 Peel-elezi nu sikandan, Nengazen, taman te edangep sikandan diyà te kenikew.
PSA 83:17 Berakat he mepeel-elezi wey utew mengehandek sikandan te wazà pidtemanan. Berakat he mebpatey zan he utew zan egkeeled!
PSA 83:18 Berakat he metueni zan he iyan ka, Nengazen, he iyan dà Utew Lavew he Megbevayà kayi te tivuuk he kelibutan.
PSA 84:1 Nengazen he Mekeǥeǥehem, utew mekempet is baley nu.
PSA 84:2 Egkesuat a utew he edhendutun! Mibulung ad te kedseled diyà te valey nu, He Nengazen. Is tivuuk he ǥehinawa ku engkanta te kegkelipey tenged kenikew te uuyag he Megbevayà.
PSA 84:3 Nengazen he Mekeǥeǥehem, Hadì ku wey Megbevayè ku, minsan is menge maya wey is menge keluǥeyluǥey, duen dan menge salag diyà te uvey te pemuhatà, ne zutun is menge pispis dan.
PSA 84:4 Utew zeyzey is menge etew he ziyà ed-upbà te valey nu; layun sikandan egkanta te kedalig kenikew.
PSA 84:5 Utew zeyzey is menge etew he nekaangken te zesen he ebpuun diyà te kenikew, he mezesen is penganduy zan he ebisita ziyà te valey nu.
PSA 84:6 Dutun te kebpekevayè dan diyà te Memaza he Suǥud, henduen be te neǥezam dan he zuen dutun menge serebseb, ne henduen be te mid-uzanan haazà su zuen dutun wahig he nengetang-el.
PSA 84:7 Ne mid-iseg pa is desen dan dutun te kedhipanew zan, taman te ziyè en is kada sevaha kandan te etuvangan te Megbevayà diyà te Zion.
PSA 84:8 Nengazen he Megbevayà he Mekeǥeǥehem, he Megbevayà ni Jacob, pemineǥa nu is ked-ampù ku!
PSA 84:9 He Megbevayà, peburi nu is kelasag dey he iyan is hadì dey he mibpilì nu.
PSA 84:10 Is senga andew he ked-ubpà diyà te valey nu ne meupiya pa te nengkelibu he andew he ked-ubpà diyà te minsan hendei he lugar. Edtumuen ku is kedhithitindeg diyà te ǥemawan te valey nu, He Megbevayà, kenà is ked-ubpà diyà te valey te menge lalung.
PSA 84:11 Su sikew, is Nengazen he Megbevayà, iring ka te andew he ebpeketayew, wey te kelasag he egkehimu he pengalang. Ebeǥey ka te pebur wey zengeg. Kenè nu idsekel is minsan hengkey he meupiya ziyà te nengungubpaan he wazà duen igkesawey.
PSA 84:12 Nengazen he Mekeǥeǥehem, utew zeyzey is edsarig diyà te kenikew.
PSA 85:1 Nengazen, impeehè nu is keupiya nu pinaaǥi te kebpekeveǥey te keupiyaanan te tanè nu he Israel; impeuswag key en maan kenikew.
PSA 85:2 Mibpesaylu nu is menge salè dey; ne in-awè nu en diyà te isip nu.
PSA 85:3 Wazè key en kenikew mepeuki.
PSA 85:4 He Megbevayà he menluluwas dey, ilikù nu kayi te kenami is meupiya he kebpekesavuk dey. Iawè nu en is pauk nu kenami.
PSA 85:5 Taman te taman en be is kegkepeuki nu kenami?
PSA 85:6 Kenè be egkehimu ke idlikù nu kayi te kenami is meupiya he kebpekesavuk dey su wey key melipey tenged kenikew?
PSA 85:7 Nengazen, ipeehè nu kenami is kebmahala nu kenami ne libriya key.
PSA 85:8 Ebpemineǥen ku is egkeǥiyen te Nengazen he Megbevayà, su ibpenaad din diyà te kenitew te metinumanen he menge etew zin is meupiya he kebpekesavuk; emun kenè tew edlikuan is tinulebung he menge vaal tew.
PSA 85:9 Tutuu iyan he edlibriyen din is menge etew he edtahud kandin su para metuusi he kemulu edterebahu is gehem din kayi te tanè tew.
PSA 85:10 Ebpekeduma is gaǥew wey kebmetinumanen, ne ebpekeduma zaan is ketazeng wey is kelinew.
PSA 85:11 Is kebmetinumanen te etew kayi te tanà ne netuenan te Megbevayà diyà te langit. Ne is ketazeng te Megbevayà diyà te langit egkezawat te etew kayi te tanà.
PSA 85:12 Siguradu he edtuvazan kiw te Nengazen, ne edekelà is sebpet te tanè tew.
PSA 85:13 Is ketazeng iring te menunudtulà he edhuna te Nengazen su ed-endamen din is ibayà te Nengazen.
PSA 86:1 Nengazen, pemineǥa nu wey tevaka nu is ked-ampù ku su egkaayuayu a wey pubri a.
PSA 86:2 Tipiǥi nu is untung ku su meheǥet is kedsunud ku kenikew. Iyan ka Megbevayè ku; luwasa a kenikew is suluǥuen nu he midsarig diyan te kenikew.
PSA 86:3 Kehizuwi a, Nengazen, su layun a ebpengumew-umew kenikew.
PSA 86:4 Lipaya a kenikew, Nengazen, is suluǥuen nu su ziyà a te kenikew med-ampù.
PSA 86:5 Tutuu he meupiya ka wey mepineseyluwen, ne utew nu mibmahal is langun he ebpengumew-umew kenikew.
PSA 86:6 Pemineǥa nu, Nengazen, is ked-ampù ku; pemineǥa nu is kebpehizuhizu ku kenikew.
PSA 86:7 Ebpengumew-umew a kenikew te timpu te kelised su edtevaken e man kenikew.
PSA 86:8 Wazà megbevayà he iring kenikew, Nengazen; wazà minsan hentei he ebpekehimu te nengehimu nu.
PSA 86:9 Edsimba kenikew is langun he menge etew ziyà te menge nasyun he midlimbag nu. Ne edeliǥen ke zan.
PSA 86:10 Su mekeǥeǥehem ka, ne egkein-inuwan is menge vaal nu; iyan ke zà Megbevayà.
PSA 86:11 Penurua a Nengazen te paaǥi nu, ne edtumanen ku heini te kenà duwazuwa. Tevangi a he mehimu he utew hustu is kedtehuza ku kenikew.
PSA 86:12 Nengazen he Megbevayè ku, edeliǥen ku sikew te kedalig he ebpuun kayi te tivuuk he ǥehinawa ku. Edeliǥen ku sikew te wazà pidtemanan.
PSA 86:13 Su utew a kenikew mibmahal; midlibri a kenikew te kemetayen.
PSA 86:14 He Megbevayà, edsurungen a te gelbuwen he menge etew su edhimetayan e zan. Mesipala sikandan ne wazè dan mekekilala kenikew.
PSA 86:15 Piru sikew, Nengazen, hihizuwen ka wey veliǥeǥawen ka he Megbevayà. Beliǥeǥawen ka wey metinumanen, ne kenè ka melemu he egkepauk.
PSA 86:16 Seǥipaa a wey kehizuwi a; beǥayi a te zesen nu ne libriya a is suluǥuen nu.
PSA 86:17 Ipetuusi nu kayi te kediey is keupiya nu su wey mepeel-elezi is menge kuntada ku ke egkeehè dan haazà. Su iyan ka, Nengazen, edtavang wey ebeǥey kedì te kelipey.
PSA 87:1 Midtukud te Megbevayà is inged he Zion; diyè din benguna te segradu he menge vuvungan. Lavew is kebmahala zin kayi he inged te kebmahala zin te langun he zuma he menge lugar ziyà te Israel.
PSA 87:3 Meupiya is menge lalag din mehitenged kayi he inged.
PSA 87:4 Ke sikandin te, “Emun idlista ku is menge nasyun he migkilala kedì, idragkes ku is Ehipto wey is Babilonia, idragkes ku zaan is Filistia, Tyre, wey Etiopia. Is menge etew he ebpemuun kayi he menge nasyun ed-isipen ku he hustu en he tig-Zion.”
PSA 87:5 Tutuu he egkekaǥi heini mehitenged te Zion, he mahabet he menge etew is kenà tig-Zion he ed-isipen he hustu en he tig-Zion. Ne iyan edlig-en kayi he inged is Utew Lavew he Megbevayà.
PSA 87:6 Idlista te Nengazen is menge etew zin, ne idragkes din is menge etew he ziyà ebpemuun te zuma he menge nasyun he mid-isip din he hustu en he tig-Zion.
PSA 87:7 Edsayew wey egkanta sikandan is langun, ke sikandan te, “Ebpuun te Zion is langun he menge tuvad kenitew!”
PSA 88:1 Nengazen, iyan ka Megbevayà he menluluwas ku. Ed-umawen ku sikew te maandew wey mezukilem.
PSA 88:2 Pemineǥa nu is ampù ku; tevaka nu is kebuyù ku te tavang.
PSA 88:3 Su mahabet he menge kelised is nengeseǥazan ku, ne henduen be te ebpatey ad.
PSA 88:4 Sevaha a zuen te menge etew he edserupatey en. Neiring a te etew he kenè en egketavang.
PSA 88:5 Mibey-anan ad iring duen te nemematey en. Neiring a zuen te nemematey en he nemeketayhad diyà te leveng; neiring a zuen te mibpenlipatan nu en he kenè nu en egketevangan.
PSA 88:6 Henduen be te intimbag a kenikew ziyà te vudsi he utew mezalem wey utew merusirem.
PSA 88:7 Utew a kenikew nepeuki. Is pauk nu iring te menge vaǥel he neketaplì kayi te kediey.
PSA 88:8 Impekeziyù nu kayi te kediey is menge emiǥu ku. Midhimu nu he utew mezaat is ked-ahaa zan kedì. Nezureng a ne kenà ad ebpekepelaǥuy.
PSA 88:9 Tenged te menge elentusen ku, ne kenà ad utew ebpekaahà. Nengazen, andew-andew is kebpengumew-umew ku kenikew duma is kebeyawa ku te menge velad ku.
PSA 88:10 Wazè ka mebaal te menge egkein-inuwan para te menge nemematey en, ne wazà sikandan med-enew is edalig kenikew.
PSA 88:11 Is gaǥew nu wey kebmetinumanen nu ne kenà egketudtul te nemematey en.
PSA 88:12 Kenà egkaahà is egkengein-inuwan he menge vaal nu wey is ketazeng nu ziyà te merusirem he lugar te nemematey en, su zutun he lugar kenè en egketenuzan is langun.
PSA 88:13 Piru siak mulà, Nengazen, ne ebuyù a te tavang diyà te kenikew. Kada meselem ed-ampù a ziyà te kenikew.
PSA 88:14 Piru maan is ed-engkezan a kenikew, Nengazen? Maan is mid-elesan a kenikew?
PSA 88:15 Puun te vatè e pa, ne nekaantus ad ne hapit ad ebpatey. Naantus ku is menge mekahandekhandek he mibeelan nu kayi te kediey.
PSA 88:16 Is pauk nu iring te mevendes he keramag he nekeigù kayi te kediey. Edezeetan a kenikew pinaaǥi te mekahandekhandek he menge vaal nu,
PSA 88:17 he iring te zalem he layun ebpekeliǥuy kayi te kediey; ne wazè ku en edlewangan.
PSA 88:18 Impekeziyù nu kayi te kediey is menge minahal ku wey is menge emiǥu ku; ne kerusireman dà is nesamà he zuma ku.
PSA 89:1 Nengazen, layun ku egkentaha is dekelà he ǥaǥew nu. Ne taman te taman is kedtudtula ku te kebmetinumanen nu.
PSA 89:2 Idsangyew ku he utew melig-en is gaǥew nu he wazè din pidtemanan, ne iring te langit he kenà egkaawà.
PSA 89:3 Migkaǥi ka te, “Midhimu ku is kebpekid-uyun ku te suluǥuen ku he si David, he mibpilì ku he egkehimu he hadì. Ne iyan heini impesarig ku kandin:
PSA 89:4 Is kada egkehimu he hadì te Israel ne ebpuun te menge kevuwazan nu taman te taman; is ginhedian nu ebpedayun te wazà pidtemanan.”
PSA 89:5 Nengazen, is menge ilengiten he linimbag edalig te egkein-inuwan he menge vaal nu wey te kebmetinumanen nu.
PSA 89:6 Wazà minsan sevaha ziyà te langit he iring kenikew, Nengazen. Wazà ilengiten he linimbag he igkepetug-iring kenikew.
PSA 89:7 Edtehuzan ka ziyà te menge ketiǥuman te ilengiten he menge linimbag. Is langun he edliǥuy kenikew ne zuen dan kegkahandek kenikew.
PSA 89:8 Nengazen he Megbevayà he Mekeǥeǥehem, wazà minsan hentei he iring kenikew; mekeǥeǥehem ka wey metinumanen diyà te langun he ebeelan nu.
PSA 89:9 Edumelahan nu pinaaǥi te ǥehem nu is ebpemaǥel he zaǥat; ibpeengked nu is dezekelà he vaǥel zin.
PSA 89:10 Midezeetan nu is dekelà he langgam he si Rahab ne mibpatey heini. Impedsusuwey nu is menge kuntada nu pinaaǥi te ǥehem nu.
PSA 89:11 Kenikew is langit wey is kelibutan; mibeelan nu is kelibutan wey is langun he netaǥù kayi.
PSA 89:12 Mibeelan nu is dizaya wey is divavà. Is Buntud he Tabor wey is Buntud he Hermon iring heini is dezuwa te menge etew he egkanta te kegkelipey tenged kenikew.
PSA 89:13 Mekeǥeǥehem ka! Utew subra is desen nu!
PSA 89:14 Is kedhadì nu egkezumahan te ketazeng wey hustu he kukuman, wey egkezumahan daan te ǥaǥew wey kebmetinumanen.
PSA 89:15 Nengazen, utew zeyzey is menge etew he nemekesaǥad te melipayen he ked-ugyab tenged kenikew, wey nengungubpaan tenged te hizu nu.
PSA 89:16 Tenged te keupiya nu kandan, layun sikandan egkelipey. Ne edeliǥen dan is ketazeng nu.
PSA 89:17 Ebpekezantal key tenged te zesen he imbeǥey nu kenami; ne tenged te keupiya nu kenami ed-umanan nu is egkehimu zey.
PSA 89:18 Nengazen, Waǥas he Megbevayà te Israel, gaked nu is hadì dey he iyan kelasag dey.
PSA 89:19 Dengan nekidlalag ka te metinumanen he menge suluǥuen nu pinaaǥi te kebpelawas nu kandan. Ke sikew te, “Midtevangan ku is sevaha he sundaru. Mid-aram ku sikandin puun te menge etew ku su para mehimu he hadì.
PSA 89:20 Si David he suluǥuen ku, iyan mibpilì ku he hadì pinaaǥi te kedlenahi kandin te segradu he lana ku.
PSA 89:21 Is gehem ku eduma kandin wey edlig-en kandin.
PSA 89:22 Kenà sikandin egkelupiglupig te menge kuntada zin; ne kenà sikandin egkezaagdaag te menge lalung.
PSA 89:23 Ebekbeken ku ziyà te etuvangan din is menge kuntada zin taman te ebpemematey sikandan.
PSA 89:24 Ebmahalen ku sikandin wey ebpekid-uunungen a kandin. Ne ed-umanan ku is egkehimu zin pinaaǥi te ǥehem ku.
PSA 89:25 Ibpeiseg ku is keluag te ginhedian din su edhimuwen ku he puun dà te Daǥat he Mediteraneo ne taman en te Wahig he Eufrates.
PSA 89:26 Egkaǥi sikandin kayi te kediey te, ‘Iyan ka amey ku wey Megbevayè ku; iyan ka endilungè ku wey menluluwas ku.’
PSA 89:27 Ed-isipen ku sikandin he kinekekayan he anak ku, iyan sikandin lavew te langun he menge hadì.
PSA 89:28 Ebpedayun is kebmahala ku kandin te wazà pidtemanan, ne kenà egkaawà taman te taman is kebpekid-uyun ku kandin.
PSA 89:29 Is kada hadì te Israel ne ziyà ebpuun te menge kevuwazan din taman te taman. Ne iring te langit is ginhedian din su kenà egkaawà.
PSA 89:30 Iyan, emun kenà edtuman is menge kevuwazan din te menge kesuǥuan ku, menge sulunuzen ku, wey menge penurù ku,
PSA 89:32 edletiguwen ku sikandan te mesakit tenged te menge salè dan.
PSA 89:33 Piru ebmahalen ku wey ed-unungan ku ǥihapun si David.
PSA 89:34 Edtumanen ku is kebpekid-uyun ku kandin, wey is impesarig ku kandin.
PSA 89:35 Pinaaǥi te waǥas he ngazan ku nenangdù a ziyà te ki David, ne kenà duwazuwa he edtumanen ku is insaad ku kandin su kenè e man teruen.
PSA 89:36 Is kada hadì te Israel ne ziyà ebpuun te menge kevuwazan din taman te taman. Is ginhedian din iring te andew he kenà egkaawà diyà te etuvangan ku.
PSA 89:37 Ebpedayun heini taman te taman su iring heini te vulan he egkeseriǥan he tistiǥus diyà te langit.”
PSA 89:38 Piru, Nengazen, nepeukan nu is pinilì nu he hadì; mid-iniyuǥan nu sikandin wey mid-engkezan nu.
PSA 89:39 Wazè nu leusa te edtuman is kebpekid-uyun nu kandin te suluǥuen nu, ne in-awè nu is gehem te hadì diyà te kandin.
PSA 89:40 Midlempag nu is menge verengbeng te inged din wey migevè nu is menge kutà kayi.
PSA 89:41 Is menge azen dutun te inged din ne mibpenguwa te menge sumeseǥazà. Mibpeel-elezan sikandin te kesikbit din he menge nasyun.
PSA 89:42 Mibeǥayan nu te zesen is menge kuntada zin; midlipey nu sikandan is langun.
PSA 89:43 Midhimu nu he wazà pulus te menge ǥumaan din, ne midhimu nu he mezaag sikandin te tebek.
PSA 89:44 In-awè nu ziyà te kandin is kegkemekeǥeǥehem wey is gehem te hadì.
PSA 89:45 Henduen be te midtik-ew zà sikandin mebmeǥurang; ne mibpeel-elezan nu sikandin.
PSA 89:46 Sengemenu keluǥayad is ked-eles nu Nengazen? Taman en be te wazà pidtemanan? Sengemenu keluǥayad is pauk nu he henduen be te hapuy?
PSA 89:47 Tentenuzi nu Nengazen, he mevavè dà is untung te etew; tentenuzi nu he midhimu nu is etew he zuen din kemetayen.
PSA 89:48 Hentei is etew he kenà ebpatey? Ebpekelikey ve is etew te kemetayen?
PSA 89:49 Nengazen, hendei en is gaǥew nu he iring duen te nehuna, he insaad nu ziyà te ki David dengan tenged te kebmetinumanen nu?
PSA 89:50 Tentenuzi nu, Nengazen, he mibpeel-elezan te menge etew ziyà te mezakel he menge nasyun is menge suluǥuen nu, ne ed-entusen ku heini.
PSA 89:51 Iyan, is menge kuntada nu, Nengazen, edsudì te pinilì nu he hadì minsan hendei sikandin ebayà.
PSA 89:52 Dait he edeliǥen is Nengazen te wazà pidtemanan! Amen! Amen!
PSA 90:1 Nengazen, puun pa zengan ne ziyè key en med-ubpà te kenikew.
PSA 90:2 Hein wazà nu pa limbaǥa is menge vuntud wey is kelibutan, ne Megbevayè ke en, ne iyan ka ǥihapun Megbevayà te wazà pidtemanan.
PSA 90:3 Kenikew he vayàbayà is kemetayen te etew; idlikù nu sikandin diyà te tanà he iyan kes ebpuunan din.
PSA 90:4 Is nengkelibu he tuig kayi te kenami ne iring dà mulà te senga andew ziyà te kenikew, etawa iring dà heini te nepipira zà he uras te mezukilem.
PSA 90:5 Edsevukan nu te ketepusan is untung dey iring heini te teǥeinep he meǥaan dà egkahanew.
PSA 90:6 Wey iring te sagbet he edreteb wey edtuvù te meselem, ne emun mahapun en ne egkelay-ub ne egkeǥangu en.
PSA 90:7 Igkeherati zey is pauk nu; igkezeeti zey is rerangit nu.
PSA 90:8 Neehè nu is menge salè dey. Minsan is meeles is kebeeli zey zuen ne nepurung nu heini maahà.
PSA 90:9 Ibpatey zey is pauk nu kenami; ne henduen dà te naasnaas is kegketapus te untung dey.
PSA 90:10 Is keluǥayad te untung dey ne 70 dà he tuig, etawa 80 he tuig emun melig-en is kedlelawa zey. Piru minsan pa is kineupiyahan he menge tuig te ked-ubpè dey, ne mahabet gihapun he menge keseengan wey menge kelised is egkengeseǥazan dey. Tutuu iyan he meǥaan dà egketapus is untung dey ne egkahanew key en.
PSA 90:11 Wazè pa nekesaǥad te ipiktu te zekelà he pauk nu. Ne zutun te ked-iseg te keuluwanen dey te pauk nu, ne ed-iseg daan is kedtahud dey kenikew.
PSA 90:12 Ipeisip-isip nu kenami he mevavè dà is untung dey, su para mebmetau key kayi te kebpengungubpaan dey.
PSA 90:13 Nengazen, sengemenu keluǥayad is kegkepeuki nu kenami? Seǥipaa key en wey kehizuwi key en is menge suluǥuen nu.
PSA 90:14 Kada meselem ipetuusi nu kenami is kebmahala nu kenami su para mekekanta key te kedlipey, ne ebmelipayen key te tivuuk he untung dey.
PSA 90:15 Beǥayi key kenikew te kelipey he iring keluǥayad te menge tuig te kedsiluti nu wey kebpeentusa nu kenami.
PSA 90:16 Ipeehè nu kenami te menge suluǥuen nu wey te menge kevuwazan dey, is egkein-inuwan he vaal nu wey is kegkemekeǥeǥehem nu.
PSA 90:17 Nengazen he Megbevayè dey, berakat he edtuvazan key kenikew, wey ebeǥayan key kenikew te kelempusan te langun he ebeelan dey.
PSA 91:1 Is minsan hentei he ed-aput diyà te Utew Lavew he Megbevayà he Mekeǥeǥehem, wazà ebpekekaid kandin.
PSA 91:2 Ebpekekaǥi a, ke siak te, “Is Nengazen, iyan sikandin eputè ku wey melig-en he elesà. Iyan sikandin Megbevayè ku he edseriǥan ku.”.
PSA 91:3 Emun ed-aput ka ziyà te kandin, idlikey ke zin te menge pekaid wey te ebpekepatey he menge zaru.
PSA 91:4 Edlekupan ke zin iring te piyak ne wazà ebpekekaid kenikew. Is kebmetinumanen din iyan kelasag nu wey pengalang nu.
PSA 91:5 Kenè ka ereg he egkahandek te mekehandekhandek he menge hitavù, wey te ebpenggezamen he menge zaru, wey menge vangkit he egkehitavù ke mezukilem etawa maandew.
PSA 91:7 Minsan linibu pa he menge etew is ebpematey ziyà te ebpekeliǥuy kenikew, kenè ka egkemenu.
PSA 91:8 Egkeehè nu zà ke ebmenmenuwen te edsilut is lalung he menge etew, ne kenè ka egkeragkes.
PSA 91:9 Geina te ziyè ke man med-aput te Nengazen he iyan kes Utew Lavew he Megbevayà he iyan ebpengalang kedì,
PSA 91:10 umbe wazà limas etawa vangkit he ebpekezezaat kenikew wey te pemilya nu.
PSA 91:11 Su edsuǥuen te Megbevayà is menge velinsuǥuen din te kebantey kenikew minsan hendei ka ebpevayà.
PSA 91:12 Edselupepayen ke zan wey kenà mepelii is menge paa nu te menge vatu.
PSA 91:13 Bà nu zà egieki is menge erimaung wey is edhereg he menge uled.
PSA 91:14 Migkaǥi is Megbevayà te, “Edlibriyen ku wey edlevanan ku is mibmahal wey migkilala kedì.
PSA 91:15 Emun ed-umawen e zin, ne edtevaken ku sikandin; emun edlised sikandin, ne eduma a kandin; edlibriyen ku sikandin wey ebeǥayan ku te zengeg.
PSA 91:16 Ebeǥayan ku sikandin te meluǥayad he untung, ne ibpeehè ku kandin is kedlibriya ku kandin.”
PSA 92:1 Nengazen he Utew Lavew he Megbevayà, meupiya is kebpeselemati kenikew wey is kegkanta te menge idalig kenikew.
PSA 92:2 Maandew wey mezukilem meupiya is kebpeheyaǥa te ǥaǥew nu,
PSA 92:3 he ebpezumahan te kedtukari te menge instrumintu he zuen dan menge kuwirdas.
PSA 92:4 Su midlipey a kenikew, Nengazen, pinaaǥi te egkein-inuwan he menge vaal nu. Tenged te mibpemeelan nu, egkanta a te kegkelipey ku.
PSA 92:5 Utew egkein-inuwi is mibpemeelan nu, Nengazen! Kenè dey egketegkad is isip nu.
PSA 92:6 Kenà egkesavut te menge tulebung wey menge taleng
PSA 92:7 he minsan iring te nenuvù he menge sagbet is ked-uswag te kebpekesavuk te menge lalung, edezeetan gihapun sikandan te wazà pidtemanan.
PSA 92:8 Piru sikew, Nengazen, lavew ka te langun te wazè din pidtemanan.
PSA 92:9 Kenà duwazuwa he ebpekedsusuwey is lalung he menge kuntada nu ne ebpemematey sikandan.
PSA 92:10 Mibeǥayan a kenikew te zesen he iring te zesen te tudu he vaka, wey mibeǥayan a kenikew te kelipey.
PSA 92:11 Nezineg ku wey neehè ku mismu is kepildiyan te lalung he menge kuntada ku.
PSA 92:12 Is ked-uswag te menge metazeng igkepetug iring te meveǥas he palma, ne is kebpekesavuk dan igkepetug iring te kayu he sidru ziyà te Lebanon he midtuvù he melig-en.
PSA 92:13 Iring sikandan te menge kayu he impemula ziyà te valey te Nengazen he Megbevayè tew he meupiya is tuvù dan,
PSA 92:14 he ebpemeǥas gihapun minsan meǥurang en, ne kemulu ǥihapun meilem wey melig-en.
PSA 92:15 Ne puriba heini he metazeng is Nengazen he iyan endilungè ku; wazà minsan hengkey he mezaat diyà te kandin.
PSA 93:1 Hadì ka, Nengazen; is bisti nu iyan is kegkemekeǥeǥehem nu wey is utew nu kegkelavew. Utew melig-en is kebenguna nu te kelibutan ne kenà heini egkehuyung.
PSA 93:2 Is kedhadì nu puun pa te puunà, su zaan ke en hein wazè pa is kelibutan.
PSA 93:3 Utew mezaǥing is daǥat, Nengazen, ne edreǥuuk is menge vaǥel.
PSA 93:4 Piru sikew is Nengazen he ziyà te langit, lavew ke pa he mekeǥeǥehem te kezaǥing te zaǥat; lavew ke pa he mekeǥeǥehem te menge vaǥel kayi.
PSA 93:5 Nengazen, egkeseriǥan utew is menge suǥù nu, wey is kegkesegradu te baley nu te wazà pidtemanan.
PSA 94:1 Nengazen he Megbevayà, sikew is ebpenimales; ipeehè nu en is pauk nu.
PSA 94:2 Iyan ka edhukum te langun he menge etew; umbe, sigi en, belesi nu en is menge gelbuwen te zait he ibales kandan.
PSA 94:3 Sengemenu pa keluǥayad is kedlipey te menge lalung, Nengazen?
PSA 94:4 Utew en ebpemahambug is langun he menge etew he memezaat is baal.
PSA 94:5 Edèdaaǥen dan is menge etew he ǥaked nu.
PSA 94:6 Mibpenhimetayan dan is menge valu he vahi, is menge ilu, wey is menge lumelengyawà.
PSA 94:7 Ke sikandan te, “Kenà egkaahà te Nengazen is menge vaal tew; kenè en heini edseǥipaan te Megbevayà ni Jacob.”
PSA 94:8 Sikiyu is menge taleng wey menge tulebung, keenu kew pa ebpekesavut? Sevuta niw kun be heini:
PSA 94:9 Kenè be is Megbevayà iyan mibaal te menge telinga tew wey menge mata tew? Maan is egkeǥiyen niw he kela ke kenà sikandin ebpekezineg wey ebpekaahà?
PSA 94:10 Kenè be ebmensuwen din is menge nasyun? Maan is egkeǥiyen niw he kela ke kenà sikandin edsilut? Kenè be ebpenuruen din is menge etew? Maan is egkeǥiyen niw he kela ke kenà sikandin metau?
PSA 94:11 Netuenan te Nengazen he is ed-isipen te menge etew, ne pudu wazè din pulus.
PSA 94:12 Nengazen, utew zeyzey is etew he ebmensuwen nu pinaaǥi te kebpenurua nu kandin te menge kesuǥuan nu.
PSA 94:13 Ebpenuruen nu sikandin su para zuen din kelinew emun timpu te kesamuk, wey taman en te timpu te kedsiluti nu te menge lalung.
PSA 94:14 Su kenè nu ed-engkezan, Nengazen, is menge etew he ǥaked nu.
PSA 94:15 Siguradu he egkeuman egkehitavù is metazeng he menge kedhukum, ne ebpekeuyun kayi is langun he midtinazeng.
PSA 94:16 Wazà duma he ebpeketavang kedì ke edsurungen a te lalung he menge etew, kekenà, iyan ke zà, Nengazen.
PSA 94:17 Emun wazà a kenikew tevangi, ne minatey ad guntaan.
PSA 94:18 Hein migkaǥi a ziyà te kenikew, Nengazen, he henduen be te ebpatey ad, midtevangan a kenikew su mibmahal a kenikew.
PSA 94:19 Hein utew a nesemuki, midlig-enan a kenikew ne nelipey a.
PSA 94:20 Kenà egkehimu he edepiǥan nu is lalung he menge menhuhusey, he ebaal te supak te kesuǥuan.
PSA 94:21 Nesevaha zan te kebpekidkuntada te menge metazeng, ne midhukuman dan te kemetayen is wazè dan menge salà.
PSA 94:22 Piru, sikew, Nengazen he Megbevayè ku, iyan ka eputè ku wey endilungè ku he vatu.
PSA 94:23 Edsilutan nu wey edèdeetan nu sikandan tenged te menge salè dan. Nengazen, he Megbevayè dey, edèdeetan nu sikandan.
PSA 95:1 Kuwa kew en su edlipey kiw pinaaǥi te kegkanta, ne ed-ugyab kiw para te Nengazen he endilungè tew wey menluluwas tew.
PSA 95:2 Ed-uvey kiw ziyà te kandin duma is kebpeselamat, ne ed-ugyab kiw is egkanta te kedeliǥa tew kandin.
PSA 95:3 Su is Nengazen, mekeǥeǥehem sikandin he Megbevayà. Mekeǥeǥehem sikandin he hadì wey lavew sikandin te langun he zuma he menge ed-ezapen.
PSA 95:4 Kandin is kinezizeleman kayi te kelibutan wey is puntur te menge vuntud.
PSA 95:5 Kandin daan is daǥat wey is tanà su iyan sikandin mibaal kayi.
PSA 95:6 Kuwa kew en, edluhud kiw te ked-ezapa te Nengazen he midlimbag kenitew.
PSA 95:7 Su iyan sikandin Megbevayè tew, ne iyan kiw menge etew zin he mibentayan din wey mid-elimahan din iring te kebantey wey ked-elima te menge kerehidu. Emun egkezineg niw ǥuntaan is egkeǥiyen te Megbevayà,
PSA 95:8 ne kenè niw pekezesena is gehinawa niw iring te mibeelan te menge kepuun niw zengan hein diyà sikandan te Meriba, wey hein diyà sikandan te sibsivayan he Masa.
PSA 95:9 Migkaǥi is Megbevayà te, “Migezaman e zan dutun minsan pa neehè dan is tavang ku kandan.
PSA 95:10 Ne seled te 40 he tuig is kegkepeuki ku zutun he lapis te kevuwazan. Ne migkaǥi ku he mid-iniyuǥan a zutun he menge etew ne wazè dan sunuza is impenurù ku kandan.
PSA 95:11 Ne tenged te pauk ku, ne utew meheǥet is lalag ku he kenè dan ebpekeseled diyà te tanà he zutun ku pezem sikandan ibpehimeley.”
PSA 96:1 Sikiyu is menge etew te tivuuk he kelibutan, kentahi niw te veǥu he kanta is Nengazen!
PSA 96:2 Kentahi niw is Nengazen ne deliǥa niw sikandin. Tudtula niw kada andew is mehitenged te kedlibriya zin kenitew.
PSA 96:3 Ipetueni niw ziyà te langun he menge etew ziyà te menge nasyun is kegkemekeǥeǥehem din wey is egkein-inuwan he menge vaal zin.
PSA 96:4 Su mekeǥeǥehem is Nengazen, ne ereg sikandin he edeliǥen. Dait sikandin he edtehuzen lavew te langun he zuma he menge ed-ezapen.
PSA 96:5 Su is langun he menge ed-ezapen te menge etew ziyà te zuma he menge nasyun, ne menge ledawan he mibeelan dan dà, piru iyan is Nengazen mibaal te langit.
PSA 96:6 Diyà te kandin is kegkemekeǥeǥehem wey kegkelavew, ne ziyà te valey zin is desen wey kekempet.
PSA 96:7 Sikiyu is menge etew ziyà te menge nasyun, deliǥa niw is Nengazen. Deliǥa niw is gehem din wey zesen din.
PSA 96:8 Deliǥa niw is kegkemeǥeǥehem din, ne uwit kew te pemuhat dutun te kedseled niw ziyà te valey zin.
PSA 96:9 Azap kew kandin diyà te segradu he etuvangan din. Sikiyu is menge etew kayi te tivuuk he kelibutan, medtahud kew kandin diyà te etuvangan din.
PSA 96:10 Tudtula niw ziyà te menge nasyun is edhenduen te, “Edhadì is Nengazen.” Melig-en is kedsevuka zin te kelibutan ne kenà heini egkewaleng. Edhukuman din is menge etew te kedhukum he wazà egkevintahaan.
PSA 96:11 Medlipey is langit wey is kelibutan, ragkes en is daǥat, menge vevesukà, wey is langun he netaǥù kayi. Is langun he menge kayu ziyà te ketelunan henduen be te menge etew he ebpemenganta te kegkelipey
PSA 96:13 ziyà te etuvangan te Nengazen. Su edhendini sikandin te kedhukum te menge etew kayi te kelibutan. Egkezumahan te ketazeng wey ketutuanan is kedhukum din.
PSA 97:1 Edhadì is Nengazen! Umbe ereg he edlipey is kelibutan, ragkes en is menge isla.
PSA 97:2 Nekeliǥuy kandin is mekepal he ǥapun, ne egkezumahan te ketazeng wey hustu he kukuman is kedhadì din.
PSA 97:3 Duen hapuy ziyà te egkehunaan din ne iyan haazà ebpekeepur te menge kuntada zin diyà te peliǥuy.
PSA 97:4 Is kilat din neketayew te kelibutan. Ne hein naahà heini te menge etew ne mibpengerker sikandan te kegkahandek.
PSA 97:5 Nengetunew is menge vuvungan he henduen be te kendilà diyà te etuvangan te Nengazen, is Nengazen iyan ebayàbayà te tivuuk he kelibutan.
PSA 97:6 Impahayag te langit he metazeng sikandin, ne naahà te langun he menge etew is kegkemekeǥeǥehem din.
PSA 97:7 Egkepeel-elezan is langun he edsimba te ledawan wey is ibpegalbu zan is duma he menge ed-ezapen. Is langun he tarù he megbevayà edluhud te ked-azap te tutuu he Megbevayà.
PSA 97:8 Nengazen, nezineg te menge meǥinged te Jerusalem wey te zuma pa he menge inged diyà te Juda he edsilutan nu is menge kuntada zan, umbe nengelipey sikandan.
PSA 97:9 Iyan ka, Nengazen, Utew Lavew he Megbevayà, he ebayàbayà kayi te tivuuk he kelibutan. Utew ka lavew te langun he mid-isip te menge etew he menge megbevayè dan.
PSA 97:10 Is menge etew he mibmahal zan is Nengazen ne kinahanglan he igkeepes dan is mezaat. Su edtipiǥan te Nengazen is untung te metinumanen he menge etew zin. Ne kenà ebpekezezaat kandan is menge lalung su edlibriyen din sikandan.
PSA 97:11 Is keupiya te Megbevayà ne iring te andew he edsilà diyà te menge metazeng ne ebpekeveǥey heini te kelipey kandan.
PSA 97:12 Sikiyu is menge metazeng, lipey kew tenged te mibeelan te Nengazen diyà te keniyu. Tentenuzi niw is kegkewaǥas din pinaaǥi te kedeliǥa niw kandin.
PSA 98:1 Egkentahan tew is Nengazen te veǥu he kanta, su egkein-inuwan is menge vaal zin! Pinaaǥi te kandin he keugelingen he ǥehem wey zesen, midaag din is menge kuntada tew.
PSA 98:2 Impaahà te Nengazen diyà te menge nasyun he midtevangan kiw zin ne mibpengelinteuwan din he mekezaag kiw.
PSA 98:3 Wazè din melipati is insaad din he ebmahalen kiw zin wey ebpekid-uunungen sikandin kenitew te menge tig-Israel. Naahà te langun he menge etew ziyà te minsan hendei he vahin kayi te kelibutan ke mibmenumenu te Megbevayè tew is kedhimuwa zin he mekezaag kiw.
PSA 98:4 Sikiyu is menge etew kayi te tivuuk he kelibutan, ugyab kew para te Nengazen tenged te kegkelipey niw. Kanta kew he melipayen te kedalig kandin.
PSA 98:5 Kanta kew te menge kentahan he idalig te Nengazen he eduyuǥan te menge alpa, menge trumpita, wey menge vudyung. Ne ugyab kew te kegkelipey ziyà te etuvangan te Nengazen he Hadì tew.
PSA 98:7 Medlipey is kelibutan wey is langun he ed-ubpà kayi, ragkes en is daǥat wey is langun he netaǥù kayi.
PSA 98:8 Henduen be te menge etew is menge wahig he ebpelakpak, ne ebperedredseey te kegkanta te kegkelipey is menge vuvungan.
PSA 98:9 Egkelipey zan diyà te etuvangan te Nengazen su edhendini sikandin te kedhukum te menge etew kayi te kelibutan. Metazeng is kedhukumi zin kandan wey wazà bintahà.
PSA 99:1 Edhadì is Nengazen ne ebpimpinuu sikandin diyà te pinuuwè din te kedhadì he ziyà te teliwazà te menge kirubin. Nehuyung is kelibutan tenged te ǥehem din; ebpengerkeren is menge etew te kezekelà te kedtahud dan kandin.
PSA 99:2 Mekeǥeǥehem is Nengazen he ziyà te Zion; iyan sikandin ebayàbayà te tivuuk he kemenmenusiyaan.
PSA 99:3 Edeliǥen sikandin te menge etew su mekeǥeǥehem wey egkein-inuwan sikandin. Waǥas sikandin!
PSA 99:4 Mekeǥeǥehem sikandin he Hadì, ne zekelà diyà te ǥehinawa zin is hustu he kukuman. Wazè din ibpelavi ke edhukum sikandin, ne metazeng wey hustu is ebeelan din diyà te Israel.
PSA 99:5 Deliǥa is Nengazen he Megbevayè tew. Ezapa niw sikandin diyà te valey zin. Waǥas sikandin!
PSA 99:6 Si Moises wey si Aaron, dezuwa sikandan duen te menge memumuhat din dengan, ne si Samuel, sevaha sikandin duen te mid-ampù diyà te kandin. Nengumew-umew sikandan kandin ne midtavak din sikandan.
PSA 99:7 Nekidlalag sikandin kandan hein diyà sikandin te mekepal he ǥapun; ne midtuman dan is menge penurù din wey menge sulunuzen he imbeǥey zin kandan.
PSA 99:8 Nengazen he Megbevayè dey, midtavak nu is menge kebpengemuyù te menge etew nu. Impeehè nu kandan he mepeseyluwen ka he Megbevayà minsan midsilutan nu sikandan tenged te menge salè dan.
PSA 99:9 Deliǥa is Nengazen he Megbevayè tew. Simbaha niw sikandin diyà te segradu he vuvungan he migaked din, su waǥas is Nengazen he Megbevayè tew.
PSA 100:1 Sikiyu is menge etew kayi te tivuuk he kelibutan, ugyab kew te kegkelipey tenged te Nengazen.
PSA 100:2 Silbiyi niw is Nengazen duma is kelipey. Uvey kew ziyà te kandin he egkanta te kegkelipey.
PSA 100:3 Kilelaa niw he Megbevayà is Nengazen! Iyan sikandin midlimbag kenitew, ne ǥaked kiw zin. Menge etew kiw zin ne iring kiw te menge kerehidu he mid-elimahan din.
PSA 100:4 Seled kew ziyà te valey zin duma is kedalig wey kebpeselamat. Deliǥa niw wey peselemati niw sikandin.
PSA 100:5 Su meupiya is Nengazen; wazà pidtemanan te ǥaǥew zin, ne ebpedayun is kebmetinumanen din te taman te taman.
PSA 101:1 Nengazen, egkanta a mehitenged te ǥaǥew nu wey hustu he kukuman. Egkanta a te menge idalig kenikew.
PSA 101:2 Ebpekevantey a para wazà igkesawey kedì. Keenu ke man edhendini te kediey? Ebpekevantey a para wazà igkesawey kedì kayi te ed-ubpaan ku.
PSA 101:3 Ne kenè ku ebpesegdanen is kebpedayun te kelelalung. Utew ku igkeepes is menge ulaula te menge etew he ed-iniyug te Megbevayà, ne kenè ku ebeelan is iring keniyan.
PSA 101:4 Edlikayan ku is menge etew he kulived; ne kenà a edtampu te kelelalung dan.
PSA 101:5 Edèdeetan ku is minsan hentei he ebpendezaat te zengeg te zuma zin pinaaǥi te menge lalag din. Kenè ku ebey-anan is kelelalung te menge gelbuwen wey mepelevawen.
PSA 101:6 Piru ibpeehè ku is keupiya ku ziyà te menge etew kayi te kenitew he menge metinumanen he edsunud te Megbevayà wey nengungubpaan he wazà igkesawey kandan. Ibpeubpè ku sikandan duma kedì ne edtuǥutan ku he ebpenilbi kedì.
PSA 101:7 Is menge etew he limbungan wey teruen ne kenà ebpekeubpà diyà te turuǥan ku.
PSA 101:8 Kada andew edèdeetan ku is lalung he menge etew kayi te kenitew. Ibpaawè ku sikandan kayi te inged te Nengazen.
PSA 102:1 Nengazen, pemineǥa nu is ampù ku. Pemineǥa nu en is kebuyù ku te tavang diyà te kenikew.
PSA 102:2 Kenà a kenikew elesi zutun te timpu te kelised ku. Pemineǥa a emun ebpengumew a kenikew, ne segugunà a tevaka.
PSA 102:3 Su is untung ku meǥaan dà egkaawà iring te evel; is lawa ku ne henduen be te edtutungen.
PSA 102:4 Henduen ad te sagbet he neǥangu su migkires ad. Ne naawè en is gana ku te kegkaan
PSA 102:5 tenged te egkeǥezam ku ebpekezag-es a. Henduen be te tulan e zà wey lundis.
PSA 102:6 Sebsevaha ku zà, henduen a te seǥuksuk diyà te sibsivayan. Henduen a te ekang diyà te mid-ewaan en su egkeregdas en he vinelayan.
PSA 102:7 Kenà a ebpekelipezeng; iring a te tagbis he sebsevaha zin diyà te atep te valey.
PSA 102:8 Layun a ebpeel-elezi te menge kuntada ku. Edsudien e zan ne egemiten dan he petug-iring is mezaat he kebpekesavuk ku emun edrewakan dan is duma.
PSA 102:9 Edsudien e zan su wazè ku en kaankaan, ne ebpekezuzungul e zà diyà te avu is edsineǥew
PSA 102:10 tenged te utew nu kegkepeuki kedì. Edsudien e zan su ǥeina te iring a te vesura he mid-amì nu ne intimbag nu.
PSA 102:11 Is untung ku iring te alung he meǥaan dà egkaawà diyà te nesevukan din. Wey iring a te sagbet he neǥangu.
PSA 102:12 Piru sikew mulà, Nengazen, edhadì ka te wazà pidtemanan; edtentenuzan ka te menge etew taman te taman.
PSA 102:13 Andam en is hizu nu para te Zion, su neume en is midtelaan he timpu he zutun ibpeehè nu is keupiya nu para te Zion.
PSA 102:14 Su heini he inged mibmahal ǥihapun te menge etew nu he menge suluǥuen nu minsan pa te nezeetan en heini.
PSA 102:15 Is menge meǥinged diyà te menge nasyun, edtahud dan te Nengazen; is langun he menge hadì kayi te kelibutan edtahud diyà te etuvangan din.
PSA 102:16 Su ed-umanan ebenguna te Nengazen is Zion; ne ibpeehè din is mekeǥeǥehem he kebpekiduma zin.
PSA 102:17 Edtevaken din is ampù te menge mekehizuhizu; kenè din ebpekewezaan is ked-ampù dan.
PSA 102:18 Isurat heini para te huziyan he menge lapis te menge kevuwazan, su para mezalig dan is Nengazen:
PSA 102:19 Puun diyà te segradu he lugar he iyan is langit, edtengtengan te Nengazen is kelibutan,
PSA 102:20 su para mezineg din is dag-es te menge etew zin he menge vinihag ne wey zin melibri is menge etew zin he ebpenhimetayan.
PSA 102:21 Ne tenged kayi, idsangyew ziyà te Zion he iyan is inged he Jerusalem is menge mibeelan te Nengazen, ne zutun he inged sikandin edeliǥa.
PSA 102:22 Egkeulaula heini emun edtiǥum en dutun is menge etew he ebpemuun diyà te menge nasyun wey menge ginhedian te ked-azap te Nengazen.
PSA 102:23 Wazè pa meepus is untung ku, ne impemeluya ad te Nengazen; impemevavè din is untung ku.
PSA 102:24 Umbe, midhangyù a ziyà te kandin, ke siak te, “He Megbevayè ku he wazà pidtemanan te untung din, kenè nu en dèpa kuwaa is untung ku te kenè e pa meǥurang.
PSA 102:25 Dengan mibeelan nu is kelibutan wey is langit.
PSA 102:26 Egkengahanew heini piru ebpedayun ka mulà. Ebmerunut is langun iring te visti. Wey iring daan te visti, ne ed-ilisan nu wey egkengahanew zan.
PSA 102:27 Piru sikew mulà, ne iyan ke zed gihapun; wazè nu ketepusan.
PSA 102:28 Is menge kevuwazan te menge etew nu he menge suluǥuen nu, ne kenà sikandan egkengezeetan te vangkit ne ebentayan nu sikandan.”
PSA 103:1 Ereg he edeliǥen ku is Nengazen. Edeliǥen ku is kegkewaǥas din seled te tivuuk he untung ku.
PSA 103:2 Ereg he edeliǥen ku is Nengazen, ne kenè ku edlipatan is keupiya zin.
PSA 103:3 Mibpesaylu zin is langun he menge salè ku, wey neulian is langun he menge zaru ku tenged te kebewii zin kedì.
PSA 103:4 Midlibri e zin te kemetayen, ne midtuvazan e zin tenged te kebmahala zin wey kegkehizuwi zin kedì.
PSA 103:5 Kayi te kebpengungubpaan ku, mahabet is menge keupiyaanan he imbeǥey zin kedì, ne mezesen a iring te vanug su henduen be te kenà egkaawà kayi te kedì is kengunguhezi.
PSA 103:6 Edepiǥan te Nengazen is menge edèdaaǥen emun edhukum sikandin, ne ibeǥey zin kandan is hustu he kukuman.
PSA 103:7 Impezayag din diyà te ki Moises is paaǥi zin, wey impeehè din te menge tig-Israel is mekeǥeǥehem he menge vaal zin.
PSA 103:8 Hihizuwen sikandin, beliǥeǥawen sikandin, ebmahal sikandin, ne kenà sikandin melemu he egkepauk.
PSA 103:9 Kenà ebpedayun is kedsewaya zin kenitew, wey kenà taman te taman is pauk din.
PSA 103:10 Wazè kiw zin siluti te silut he zait te menge salè tew. Wazè kiw zin belesi te sungkad te kelelalung tew.
PSA 103:11 Is kezekelà te mid-elangan te langit wey tanà, ne iyan daan kezekelà te kebmahala zin te menge edtahud kandin.
PSA 103:12 Ke sengemenu keziyù is edsilaan diyà te edsenlepan, iyan daan kebpekeziyua zin kenitew puun te menge salè tew.
PSA 103:13 Is amey hihizuwen te menge anak din, ne iring din ded daan is Nengazen su hihizuwen te menge edtahud kandin.
PSA 103:14 Su netuenan din ke mibmenumenu kiw zin te ebaal. Ne edtentenuzan din he mibeelan kiw zin he ebpuun diyà te eliyavuk.
PSA 103:15 Is untung tew te menge etew ne iring te sagbet. Ed-uswag kiw wey edekelà iring te ebpengevukad he vulak diyà te sibsivayan.
PSA 103:16 Ne edhiyupen te keramag heini is kevukad, ne egketazin heini ne kenè en egkaahà.
PSA 103:17 Piru wazà ketepusan te kebmahala te Nengazen te menge etew he edtahud kandin, menge edtuman te kebpekid-uyun din, wey menge edtanudtanud te kedtuman te menge suǥù din. Ne is kebpurungi zin kandan ebpedayun pehendiyà en te menge kevuwazan dan.
PSA 103:19 Insavuk te Nengazen diyà te langit is pinuuwè din te kedhadì, ne edhedian din is langun.
PSA 103:20 Deliǥa niw is Nengazen, sikiyu is mekeǥeǥehem he menge velinsuǥuen he ebpemineg wey edtuman te menge lalag din.
PSA 103:21 Deliǥa niw is Nengazen, sikiyu is langun he ilengiten he menge linimbag he ebpenilbi kandin wey edtuman te egkesuatan din.
PSA 103:22 Deliǥa niw is Nengazen, sikiyu is langun he menge linimbag he ziyà te langun he menge lugar su zizalem heini te keǥehem din. Ereg he edeliǥen ku is Nengazen.
PSA 104:1 Ereg he edeliǥen ku is Nengazen. Nengazen he Megbevayè ku, mekeǥeǥehem ka iyan. Is kezekelà te zengeg nu wey is kegkelavew nu, menge kineiya heini he insun-ud nu iring te visti.
PSA 104:2 Midtembunan nu is keugelingen nu te kerayag he henduen be te visti, ne indempas nu is langit he henduen be te tulda.
PSA 104:3 Mibangun nu is ubpeey nu ziyà te zivavew pa te kewkewangan. Ne iyan midhimu nu he menge kerwahi nu is menge ǥapun, ne ed-untud ka he egkeuwit te keramag.
PSA 104:4 Midhimu nu he menge menunudtulè nu is keramag, ne menge suluǥuen nu is menge kilat.
PSA 104:5 Impelastar nu is kelibutan diyà te nesevukan din, ne kenà heini egkewaleng taman te taman.
PSA 104:6 Iring te manggad is wahig he intambun nu te kelibutan, ne nesapal is menge vuvungan.
PSA 104:7 Tenged te mezaǥing he mandar nu mid-awà is wahig.
PSA 104:8 Ne midtudà heini ziyà te menge vuvungan wey menge suǥud, wey ziyà te zuma pa he menge lugar he in-andam nu para kandan.
PSA 104:9 Duen menge taltal he insavuk nu para zutun dà sikandan taman, su para kenè dan en meumani mesapal is kelibutan.
PSA 104:10 Ne impetudè nu is menge serebseb diyà te menge zal-ug, ne midtudà is menge wahig diyà te pid-elangan te menge vuvungan.
PSA 104:11 Umbe, is langun he menge leew he langgam, ragkes en is leew he menge asnu, nekeinum kayi.
PSA 104:12 Ne ziyà te uvey zutun te menge wahig, midsesalag is menge tagbis diyà te subpang te menge kayu ne henduen be sikandan te ebpemenganta.
PSA 104:13 Ne ebpuun diyà te ubpeey nu he langit, mibpeuzanan nu is menge vuntud. Ne tenged kayi te vaal nu nekezawat te tuvad nu is kelibutan.
PSA 104:14 Impetuvù nu is menge sagbet he para te menge leew wey menge uyaǥen, wey is menge pinemula he para te menge etew su wey zan mekekaan te menge abut kayi.
PSA 104:15 Duen binu he ebpekelipey kandan, duen lana he ibmesinew te zagwey zan, wey zuen keenen he ebpekepezesen te lawa zan.
PSA 104:16 Nepurungan mevinyaǥi is menge kayu nu he sidru ziyà te Lebanon, he iyan ka nenguney nemula zuen.
PSA 104:17 Ne zutun mebpenesalag is menge tagbis; is menge tagbis he dugwak he ebpenesalag diyà te kayu he abitu.
PSA 104:18 Is leew he menge kambing diyà ebpen-ubpà te metikang he menge vuntud, ne sikan is menge badir ziyà ebpen-eles te menge vatu.
PSA 104:19 Mibeelan nu is bulan he para tuus te timpu; ne ibpesanlep nu is andew te hustu he timpu.
PSA 104:20 Mibeelan nu is kerusireman; ne emun mezukilem ebpemenggawas is mahabet he menge langgam diyà te ketelunan.
PSA 104:21 Edhiniǥer is menge erimaung emun ebpen-ahà sikandan te egkekaan dan he inteǥana nu kandan.
PSA 104:22 Ne emun edsilè en is andew, ne edlikù sikandan diyà te elesè dan ne zutun dan ebpemenleku.
PSA 104:23 Ne is menge etew ebpemenggawas diyà te menge valey zan su edterebahu zan taman te egkesakep.
PSA 104:24 Nengazen, utew mahabet is mibpemeelan nu. Mibeelan nu heini is langun pinaaǥi te ketau nu. Nepenù is kelibutan te menge mibeelan nu.
PSA 104:25 Is daǥat utew subra is keluag din, ne kenà egkevilang is menge linimbag nu he ebpen-ubpà kayi, dekelà se zeisey.
PSA 104:26 Ebiyahi kayi is menge varku he ebpemenlikùlikù, ne is dragun he Leviatan he linimbag nu ne ed-en-enunung kayi te zaǥat.
PSA 104:27 Is langun he uuyag he menge linimbag edsarig te kebeǥayi nu kandan te keenen te timpu te kegkinehenglana zan kayi.
PSA 104:28 Mibeǥayan nu sikandan te egkekaan dan, ne migkaan dan haazà ne nengahantey sikandan.
PSA 104:29 Iyan, ke ebey-anan nu sikandan, ne egkengehandek dan; emun id-awè nu is gehinawa zan, ne ebpematey sikandan ne ebpekelikù sikandan diyà te tanà he iyan ebpuunan dan.
PSA 104:30 Egkeuyag sikandan emun ebeǥayan nu sikandan te ǥehinawa. Iyan heini paaǥi te kebmahabet te uuyag he menge linimbag kayi te kelibutan.
PSA 104:31 Berakat he ebpedayun is gehem nu, Nengazen, te wazà pidtemanan. Berakat he igkelipey nu is mibpemeelan nu.
PSA 104:32 Emun edtengtengan nu is kelibutan, ne egkehuyung heini. Ne emun edsemsamen nu is buntud, ne ed-evel heini.
PSA 104:33 Egkentahan ku is Nengazen seled te tivuuk he untung ku. Egkentahan ku te menge kedalig is Megbevayè ku te uuyag e pa.
PSA 104:34 Berakat he igkelipey zin is kebpurunga ku ked-is-isipa kayi te langun. Igkelipey ku is Nengazen.
PSA 104:35 Iyan, is menge lalung wey mekesesalà edèdeetan kayi te kelibutan ne egkengahanew sikandan. Ereg he edeliǥen ku is Nengazen. Deliǥa is Nengazen!
PSA 105:1 Peselemati niw is Nengazen; simbaha niw sikandin! Tudtula niw ziyà te menge etew is menge vaal zin.
PSA 105:2 Kentahi niw sikandin te menge kedalig; ipenudtul niw is langun he egkein-inuwan he menge vaal zin.
PSA 105:3 Deliǥa niw is kegkewaǥas din. Kelipey kew is midangep diyà te kandin.
PSA 105:4 Sarig kew te Nengazen wey te zesen din. Layun kew zangep diyà te kandin.
PSA 105:5 Sikiyu is menge pinilì te Megbevayà wey kevuwazan ni Abraham he suluǥuen te Megbevayà, wey menge kevuwazan daan ni Jacob, tentenuzi niw is egkein-inuwan he menge paaǥi zin, wey is egkein-inuwan he menge vaal zin, wey is menge kedhukum din.
PSA 105:7 Iyan sikandin kes Nengazen he Megbevayè tew, ne edhukuman din is tivuuk he kelibutan.
PSA 105:8 Edtentenuzan din layun is kebpekid-uyun din. Kenè din edlipatan is menge saad din taman te taman
PSA 105:9 Heini is kebpekid-uyun din, midhimu zin diyà te ki Abraham ne insaad din daan diyà te ki Isaac.
PSA 105:10 Ne impelaus din heini he kebpekid-uyun din diyà te ki Jacob, he migngezanan daan ki Israel, ne heini is kebpekid-uyun din ebpedayun te taman te taman.
PSA 105:11 Migkaǥi sikandin diyà te kada sevaha kandan te, “Ibeǥey ku kenikew is tanà he Canaan ne egkepengevilin nu heini wey te menge kevuwazan nu.”
PSA 105:12 Dengan deisey zà is menge etew te Megbevayà, ne menge lumelengyawè pa sikandan diyà te tanà he Canaan.
PSA 105:13 Midhalinhalin sikandan diyà te menge nasyun wey menge ginhedian.
PSA 105:14 Piru wazà medtuǥut is Megbevayà he edèdaaǥen sikandan. Para mepengelangi sikandan, midawey zin is menge hadì he ebpekigkuntada kandan. Migkaǥi sikandin te,
PSA 105:15 “Kenè niw kevuta is pinilì ku he menge suluǥuen; kenè niw pesipelahi is menge ebpeneuven ku.”
PSA 105:16 Mibpengelinteuwan te Megbevayà he mehitavù is bitil ziyà te Canaan. Mid-amin din kuwaa is langun he keuyaǥan dan.
PSA 105:17 Piru zaan he impehuna zin diyà te Ehipto si Jose su wey metevangi sikandan. Dutun he timpu uripen si Jose su imbelegyà sikandin.
PSA 105:18 Migkedinahan is menge paa zin ne midsuupan is lieg din te putew,
PSA 105:19 taman te netuman is midtagnè din. Is netuman he lalag te Nengazen diyà te kandin kemetuuzan he metazeng sikandin.
PSA 105:20 Impaawà sikandin diyà te pirisuwan te hadì diyà te Ehipto he nengulu te mahabet he menge etew.
PSA 105:21 Ne impezumala kandin duen te hadì is turuǥan din wey is langun he menge azen din.
PSA 105:22 Ne ǥeine te iyan sikandin edumalà, ne zuen din keǥehem te kedawey te menge upisyal te hadì wey te kebpenurù te menge sumesambag te hadì.
PSA 105:23 Ne midhendiyà ensi Jacob te Ehipto he iyan kes tanà te menge kevuwazan ni Ham, ne mid-ubpà sikandan dutun he menge lumelengyawà.
PSA 105:24 Ne impemezakel te Nengazen is menge etew zin; ne egkereǥenan he edaag kandan is menge tig-Ehipto he menge kuntada zan.
PSA 105:25 Ne intuǥut te Nengazen he meepesi wey limbungi te menge tig-Ehipto is menge etew zin he menge suluǥuen din.
PSA 105:26 Ne zutun midsuǥù din si Moises he suluǥuen din wey si Aaron he pinilì din.
PSA 105:27 Ne impeehè dan diyà te tanà te menge kevuwazan ni Ham is egkein-inuwan he menge vaal te Megbevayà.
PSA 105:28 Impemerusirem te Megbevayà is Ehipto; piru midsupak gihapun te menge tig-Ehipto is menge suǥù din kandan.
PSA 105:29 Midhimu zin he lengesa is menge wahig dan, umbe nemematey is menge isdà.
PSA 105:30 Utew migerabi is bakbak diyà te tanè dan, ne minsan is menge ruǥu te menge pengulu midselezan te utew gerabi he vakbak.
PSA 105:31 Pinaaǥi te suǥù te Megbevayà, duen utew gerabi he langew wey kutu ziyà te tanè dan.
PSA 105:32 Ne wazè din ipeuzan, kekenà, impepenggiyew zin wey impepengilat din dutun te tanè dan.
PSA 105:33 Mibpendezeetan din is menge pinemula zan he paras wey menge kayu he igira, wey zuma pa he menge kayu.
PSA 105:34 Pinaaǥi te suǥù din, nekeuma is utew gerabi he terapan he kenè en egkevilang.
PSA 105:35 Ne migkaan kayi is langun he menge pinemula ziyà te tanè dan ragkes en is menge abut dan.
PSA 105:36 Mibpenhimetayan te Megbevayà is langun he kinekekayan he menge anak dan he maama.
PSA 105:37 Ne impeǥawas din is menge tig-Israel puun te Ehipto, ne wazà sikandan memenu, kekenà, nekeuwit dan pa te menge pelata wey menge vulawan.
PSA 105:38 Nengelipey is menge tig-Ehipto te ked-awà te menge tig-Israel, su ǥeina te nahandek dan kandan.
PSA 105:39 Dutun te timpu te kedhipanew te menge tig-Israel, midsavuk is Megbevayà te ǥapun su para melembungi sikandan wey hapuy he ebpeketayew kandan emun mezukilem.
PSA 105:40 Mibuyù dan te keenen, ne mibpeuwitan din sikandan te menge piyuǥù, ne midhantey zin sikandan te keenen he ebpuun te langit.
PSA 105:41 Mid-ebriyan din is batu ne migawas is wahig. Ne neiring heini te wahig he edtudà su midtudà heini pehendiyà te disirtu.
PSA 105:42 Ne mibeelan heini te Megbevayà is langun su wazè din lipati sikan is insaad din diyà te ki Abraham te suluǥuen din.
PSA 105:43 Impeǥuwè din puun te Ehipto he melipayen wey ebpemen-ugyab te kegkelipey is menge etew he pinilì din.
PSA 105:44 Ne imbeǥey zin kandan is tanà te zuma he menge etew; ne nesunud dan is hineǥuan te zuma.
PSA 105:45 Midhimu heini te Megbevayà su para tumana zan is menge sulunuzen he ibpesunud din wey kesuǥuan din. Deliǥa is Nengazen!
PSA 106:1 Deliǥa is Nengazen! Peselemati sikandin su meupiya sikandin; wazà pidtemanan te ǥaǥew zin.
PSA 106:2 Wazà minsan hentei he wazà kurang te kedseysaya zin wey kedeliǥa zin te nezumahan te ǥehem he menge vaal te Nengazen.
PSA 106:3 Utew zeyzey is etew he ebaal te hustu wey metazeng seled te langun he timpu.
PSA 106:4 Nengazen, elin a kenikew tentenuzi emun edtevangan nu is menge etew nu; ne libriya a zaan ke edlibriyen nu sikandan,
PSA 106:5 su wey e zaan mekesaǥad te keuswagan te pinilì nu he nasyun, su wey e zaan mekaambit te kelipey zan ne ebpekezalig a kenikew duma kandan.
PSA 106:6 Nekesalè key iring te menge kepuun dey; utew mezaat is mibeelan dey.
PSA 106:7 Hein diyà te Ehipto is menge kepuun dey, wazè dan seǥipaa is egkein-inuwan he menge vaal nu. Wazè dan tentenuzi is kepipira nu ipaahà kandan he kebmahala nu kandan, ne midsukul zan kenikew hein diyè dan te Zaǥat he Meriǥà.
PSA 106:8 Piru midlibri nu sikandan para te zengeg nu wey te kebpaahà kandan te ǥehem nu.
PSA 106:9 Midsuǥù te Nengazen is Daǥat he Meriǥà he medtevì su wey meluwisi is egkezalandalan he tanà; ne migiyahan din sikandan te kedlayun dutun te zaǥat he iring te ziyè dan medhipanew te disirtu.
PSA 106:10 Midlibri zin sikandan puun te ǥehem te menge kuntada zan.
PSA 106:11 Ne nekedlikuey is wahig ne nengelened is menge kuntada zan ne wazà minsan sevaha he nelibri kandan.
PSA 106:12 Umbe, midtuuwan dan is menge saad din ne migkanta zan te kedalig kandin.
PSA 106:13 Piru meǥaan dà ne nelipatan dan en is mibeelan din, ne wazè en sikandan medtaǥad te sambag din.
PSA 106:14 Migezaman dan is Megbevayà hein diyà sikandan te sibsivayan tenged te utew zan kegkesuat te keenen.
PSA 106:15 Umbe, imbeǥey zin kandan is mibuyù dan, piru impaaǥi zin daan diyà te kandan is daru he inmeluya zan.
PSA 106:16 Diyà te kampu zan diyà te sibsivayan nesina sikandan ki Moises wey ki Aaron. Si Aaron mibpili he ebpenilbi te Nengazen.
PSA 106:17 Umbe, mibeka is tanà ne neulug dutun si Datan wey si Abiram wey is menge pemilya zan.
PSA 106:18 Wey zuen daan hapuy he midtutung duen te menge sumusunud kandan he menge lalung daan.
PSA 106:19 Hein diyà te Horeb is menge Israilihanen mibaal zan te vulawan he vaka ne mid-azap dan haazà.
PSA 106:20 Inliwè dan dà is mekeǥeǥehem he Megbevayè dan te ledawan te tudu he vaka he ebpenabtab dà te sagbet.
PSA 106:21 Midlipatan dan is Megbevayà he midlibri kandan wey mibaal te mekeǥeǥehem wey egkein-inuwan he menge vaal ziyà te Ehipto he tanà te menge kevuwazan ni Ham, wey sikan is baal zin diyà te Zaǥat he Meriǥà.
PSA 106:23 Edezeetan en pezem te Megbevayà is menge etew zin ke wazà mebpeteliwazà si Moises is suluǥuen din he midhangyù he eǥena zin is pauk din ne kenè din leusa te edezaat sikandan.
PSA 106:24 Ne wazè pa sikandan medseled duen te meupiya he tanà su wazè dan medtuu te saad te Megbevayà.
PSA 106:25 Mibegulbul sikandan diyà te menge tulda zan, ne wazè dan mebpezumazuma te Nengazen.
PSA 106:26 Umbe, nenangdù is Megbevayà he ebpenhimetayan din sikandan dutun te sibsivayan,
PSA 106:27 ne ibpeyapat din is menge kevuwazan dan diyà te zuma he menge nasyun, ne zutun sikandan ebpematey.
PSA 106:28 Ne mibpevayàbayà sikandan te ed-ezapen he si Baal ziyà te Buvungan te Peor, ne migkaan sikandan te impemuhat diyà te menge minatey.
PSA 106:29 Midhimu zan is igkepauk te Nengazen he iyan is mezaat he menge vaal zan, umbe nehitavù diyà te kandan is bangkit.
PSA 106:30 Piru mibpeteliwazà si Finehas, umbe neengked haazà is bangkit.
PSA 106:31 Mid-isip si Finehas he metazeng dutun te mibeelan din, ne edtentenuzan heini te menge etew taman te taman.
PSA 106:32 Ne hein diyè daan is menge Israilihanen te serebseb te Meriba, midhimu zan gihapun is igkepauk te Nengazen, ne utew ingkesemuki ni Moises is menge vaal zan.
PSA 106:33 Tenged te midhimu zan is ibmezaat te isip ni Moises, ne nekekaǥi sikandin te menge lalag he kenè din pezem ereg he egkeǥiyen.
PSA 106:34 Wazà penhimetayi te menge Israilihanen is menge etew ziyà te Canaan he iyan pezem insuǥù kandan te Nengazen.
PSA 106:35 Nekidsevaha pa ganì sikandan te menge tig-Canaan, ne mid-iring dan te vetasan kayi he menge etew.
PSA 106:36 Mid-azap dan is menge ed-ezapen kayi he menge etew, ne iyan haazà nekeveǥey kandan te kezeetan.
PSA 106:37 Impemuhat dan is menge anak dan diyà te menge mezaat he mulin-ulin
PSA 106:38 he menge ed-ezapen te menge tig-Canaan. Ne tenged dutun te kebpenhimetayi zan te menge anak dan he wazè pa hanew, midremerikan dan is tanà he Canaan,
PSA 106:39 wey ragkes en daan is keugelingen dan. Ne heeyan is baal zan, iyan paaǥi te kedluivi zan te Megbevayà, iring dan te vahi he midselselaan din is esawa zin.
PSA 106:40 Umbe, nepeukan te Nengazen is menge etew he ǥaked din, ne ingkeremerik din sikandan.
PSA 106:41 Imbeǥey zin sikandan diyà te menge nasyun he menge kuntada zan, ne nezizalem sikandan te keǥehem dan.
PSA 106:42 Midaagdaag sikandan wey mid-uripen te menge kuntada zan.
PSA 106:43 Kemezakel en sikandan libriya te Megbevayà, piru mibpedayun sikandan te kedsupak kandin, umbe midezeetan sikandan tenged te salè dan.
PSA 106:44 Piru ebpemineǥen gihapun sikandan te Megbevayà ke ebpengumew zan, ne edtevangan din gihapun sikandan te menge kelised dan.
PSA 106:45 Midtentenuzan te Megbevayà is kebpekid-uyun din kandan, ne tenged te utew zin kebmahala kandan, nahalin is isip din ne kenè din en sikandan edsilutan.
PSA 106:46 Ne mibpengelinteuwan din he mehizuwi sikandan te menge mibihag kandan.
PSA 106:47 Libriya key, Nengazen he Megbevayè dey, ne kuwaa key puun te zuma he menge nasyun. Ne umana key tiǥuma ziyà te tanè dey, su para mekepeselamat key wey mekezalig key te kegkewaǥas nu.
PSA 106:48 Edeliǥen is Nengazen he Megbevayà te Israel te wazà pidtemanan. Is langun he menge etew edtavak te, “Amen!” Deliǥa is Nengazen!
PSA 107:1 Peselemati is Nengazen, su meupiya sikandin; wazà pidtemanan te ǥaǥew zin.
PSA 107:2 Keǥiya niw heeyan, sikiyu is midlibri zin te kezeetan he ebeelan te menge kuntada niw.
PSA 107:3 Su midtigum kew zin puun te menge tanà diyà te edsilaan, edsenlepan, dizaya, wey zivavà.
PSA 107:4 Duen menge etew he nengetazintazin diyà te sibsivayan; kenè dan egketuredu is beyeey pehendiyà te inged he egkehimu he egkeubpaan dan.
PSA 107:5 Nevitil wey nemezahan sikandan, ne egkeǥezam dan he hapit en sikandan ebpatey.
PSA 107:6 Ne zutun te kedlised dan, mibpetavang sikandan te Nengazen, ne midlibri zin sikandan.
PSA 107:7 Impenurù din kandan is dalan he ebpekediritsu zuen te inged he zuen duen menge meǥinged.
PSA 107:8 Ereg sikandan he ebpeselamat te Nengazen tenged te ǥaǥew zin wey te egkein-inuwan he menge vaal zin diyà te menge etew.
PSA 107:9 Su ibpemeinum din is egkengemezahan wey ibpekaan din is egkengevitil.
PSA 107:10 Duen menge etew he mibpirisu he kinedinahan, ne ebpimpinuu sikandan diyà te utew merusirem he pirisuwan.
PSA 107:11 Nepirisu sikandan su midsupak dan is menge suǥù te Utew Lavew he Megbevayà, wey wazè dan beǥayi te keveǥat is menge sambag din.
PSA 107:12 Umbe, midlisedlised din sikandan te meveǥat he menge terebahu. Nengepiley sikandan ne wazà midtavang kandan.
PSA 107:13 Ne zutun te kedlised dan, mid-umew zan is Nengazen, ne midlibri zin sikandan.
PSA 107:14 Mibpemidtew zin is ingkedina kandan, ne in-awè din sikandan dutun te utew merusirem he menge pirisuwan.
PSA 107:15 Ereg sikandan he ebpeselamat te Nengazen tenged te ǥaǥew zin wey te egkein-inuwan he menge vaal zin diyà te menge etew.
PSA 107:16 Su mibpenggevè din is menge ǥemawan he brunsi, wey mibpemadtì din is menge rihas he putew.
PSA 107:17 Duen menge tulebung he nekebmereǥen tenged te menge kedrapas dan wey kelelalung.
PSA 107:18 Wazè dan en gana te langun he keenen ne hapit en sikandan ebpematey.
PSA 107:19 Ne zutun te kelised dan, mid-umew zan is Nengazen, ne midlibri zin sikandan.
PSA 107:20 Migkaǥi zà sikandin ne nengeulian sikandan. Midlibri zin sikandan te kemetayen.
PSA 107:21 Ereg sikandan he ebpeselamat te Nengazen tenged te ǥaǥew zin wey egkein-inuwan he menge vaal zin diyà te menge etew.
PSA 107:22 Ereg sikandan he ebpemuhat para te kebpeselamat diyà te Megbevayà; ne pinaaǥi te kegkanta tenged te kegkelipey ne tudtula zan is menge vaal zin.
PSA 107:23 Duen menge etew he mid-untud te menge varku, su pinaaǥi te kebiyahi ziyà te zaǥat is igkekuwaa zan te igkeuyag dan.
PSA 107:24 Neehè dan is egkein-inuwan he menge vaal te Nengazen diyà te menge zaǥat.
PSA 107:25 Su pinaaǥi te suǥù din, mibpengeramag te mevendes ne midekelà is menge vaǥel.
PSA 107:26 Tenged dutun ebpehendiyà te zivavew wey ebpehendiyà te zizalem haazà is untuzè dan. Naawà is kevurut dan tenged dutun he hitavù.
PSA 107:27 Henduen be sikandan te egkengelangut, su ebpemekeziregdireg sikandan ne wazè dan en metueni ke hengkey is ebeelan dan.
PSA 107:28 Dutun te kedlised dan, mid-umew zan is Nengazen, ne midtevangan din sikandan.
PSA 107:29 Impeengked din sikan is mevendes he keramag ne mibmelinew is daǥat.
PSA 107:30 Nelipey sikandan hein mibmelinew en is daǥat, ne impeturedu kandan te Megbevayà is dungguan he iyan mibpenganduy zan.
PSA 107:31 Ereg sikandan he ebpeselamat te Nengazen tenged te ǥaǥew zin wey egkein-inuwan he menge vaal zin diyà te menge etew.
PSA 107:32 Ereg dan he ibpehivantug is Megbevayà diyà te kedtiǥum dan wey edeliǥen dan daan sikandin diyà te kedtiǥum te ebpemendumala kandan.
PSA 107:33 Midhimu te Nengazen he disirtu is edtudà he menge wahig, wey midhimu zin he memaza he tanà is menge serebseb.
PSA 107:34 Midhimu zin he wazà pulus duen te meupiya he tanà, su ǥeina te menge lalung is nen-ubpà duen.
PSA 107:35 Midhimu zin he zuen menge wahig diyà te disirtu, wey midhimu zin he menge serebseb is memaza he menge tanà.
PSA 107:36 Impeubpè din dutun is ebpemitilen ne mibangun dan dutun is inged he ed-ubpaan dan.
PSA 107:37 Mid-ezek dan diyà te bevesukè dan wey nememula zan te paras, ne zekelà is menge abut dan.
PSA 107:38 Midtuvazan sikandan te Megbevayà, ne mibmezakel zan. Minsan is menge uyaǥen dan ne wazè din mehimuwa he medeisey.
PSA 107:39 Ne tenged te kedèdaaǥa, kebpesekiti, wey kebpeentusa kandan, mideisey zan ne nepeel-elezan dan.
PSA 107:40 Mibpendezeisey te Megbevayà is menge midaagdaag kandan pinaaǥi te kedtezina zin kandan diyà te disirtu he wazà duen menge zalan.
PSA 107:41 Piru midtevangan din mulà is menge egkaayuayu te menge elentusen dan, ne mibpengelinteuwan din he mevuwad is menge pemilya zan iring te menge uyaǥen.
PSA 107:42 Naahà heini te menge metazeng ne nelipey sikandan, iyan, is langun he menge lalung ne wazè dan egkekaǥi.
PSA 107:43 Is menge uluwanen ereg he ebpurung ed-isip-isip mehitenged kayi; ereg he ed-isipen dan is dekelà he ǥaǥew te Nengazen.
PSA 108:1 He Megbevayà, utew zekelà is kedsarig ku kenikew. Egkentahan ku sikew te menge kedalig kayi te tivuuk he ǥehinawa ku.
PSA 108:2 Egkeriwaswas pa ne egimerat e en, su wey ku maandam en is menge instrumintu ku he zuen dan menge kuwirdas para meǥamit ku te kedalig kenikew.
PSA 108:3 Nengazen, edeliǥen ku sikew ziyà te teliwazà te menge etew. Egkentahan ku sikew ziyà te teliwazà te menge etew he meǥinged diyà te senge nenasyun.
PSA 108:4 Su kenà egkesukud is gaǥew nu wey kebmetinumanen nu.
PSA 108:5 He Megbevayà, ipeehè nu is kegkemekeǥeǥehem nu ziyà te langit wey kayi te tivuuk he kelibutan.
PSA 108:6 Libriya key pinaaǥi te ǥehem nu. Tevaka nu is ked-ampù ku su para melibri key is menge minahal nu.
PSA 108:7 He Megbevayà, migkaǥi ka ziyà te valey nu te, “Ebpekezaag a; ebehinen ku is Shekem wey is Suǥud he Sucot, ne ibpemeǥey ku heini te menge etew ku.
PSA 108:8 Kediey is Gilead wey is Manase. Is Efraim iyan pengalang ku te menge etew ku ne is Juda iyan ibpezumala ku kandan.
PSA 108:9 Is Moab suluǥuen ku, ne ǥaked ku is Edom. Igkulahì ku is kegkezeeǥa ku te Filistia.”
PSA 108:10 He Megbevayà, hentei is ed-uwit kedì diyà te Edom wey ziyà te inged kayi he neliǥuy te verengbeng?
PSA 108:11 Kenè be iyan ka, is Megbevayà he mid-iniyug kenami ne wazè en meduma te menge sundaru zey?
PSA 108:12 Tevangi key te ked-asdang te menge kuntada zey, su kenà ebpulus is tavang te etew.
PSA 108:13 Ebpekezaag key pinaaǥi te tavang nu, He Megbevayà, su edaaǥen nu is menge kuntada zey.
PSA 109:1 He Megbevayà, he edeliǥen ku, tevaka nu is ked-umew ku kenikew.
PSA 109:2 Su idsumbung a te lalung wey limbungan he menge etew. Tarù is lalag dan mehitenged kedì.
PSA 109:3 Layun mezaat is menge lalag dan he ebpekesuǥat kedì minsan wazà hinungdan.
PSA 109:4 Minsan ebpekid-emiǥu a kandan, ne edtebeken e zan; piru in-ampù ku ǥihapun sikandan.
PSA 109:5 Mibelesan e zan te mezaat te meupiya he mibeelan ku kandan, wey mibelesan e zan te pauk te kebpekid-emiǥu ku kandan.
PSA 109:6 Ke sikandan te, “Ebpen-ehè kiw te lalung he etew he egkuntra wey edsumbung kandin diyà te hukmanan.
PSA 109:7 Berakat he led-ani sikandin te salà emun timpu en te kedhukumi kandin. Berakat he isipa he salà is ked-ampù din!
PSA 109:8 Berakat he kenà mebmeluǥayad is untung din ne ikeveǥey en te zuma is buluhaten din.
PSA 109:9 Berakat he mebpatey en sikandin su para meilu is menge anak din wey para mevalu is esawa zin.
PSA 109:10 Berakat he mekeriǥuriǥu is menge anak din te kebpekilimus, wey verakat he segseǥa sikandan puun te egkeregdas en he ubpeey zan.
PSA 109:11 Berakat he eǥawa te neutangan din is langun he menge azen din, wey verakat he kuwaa te menge lumelengyawà is hineǥuan din.
PSA 109:12 Ne emun ebpatey en sikandin ne verakat he wazà mehizu kandin wey te egkeilu he menge anak din.
PSA 109:13 Berakat he mebpematey is menge kevuwazan din, su para melipati en sikandan te ebpekesunud he lapis te kevuwazan.
PSA 109:14 Berakat he kenà peseyluwa wey kenà lipati te Nengazen is salà te menge ginikanan din wey te menge kepuun din; berakat he ituǥut te Nengazen he melipati en sikandan kayi te kelibutan.
PSA 109:16 Su wazè din hizu; midlisedlised din wey mibpenhimetayan din is menge egkaayuayu, menge pubri, wey sikan is utew dezekelà is seeng dan.
PSA 109:17 Igkelipey zin is kebpenrawak te zuma; berakat he ziyà mehitavu te kandin is rawak din. Kenè din ebpenubtuvazan is duma; berakat he wazà daan mebpenuvadtuvad kandin.
PSA 109:18 Neleyaman din en is kebpenrawak te zuma; iring en heini te visti he imbivisti zin. Berakat he medlikù diyà te kandin is rawak din meiring te wahig he edreheb diyà te lawa zin wey meiring te lana he edsenep diyà te menge tulan din.
PSA 109:19 Berakat he kenè en heini maawà diyà te kandin, iring te visti he imbivisti zin wey te vakes he layun diyà te hawak din.”
PSA 109:20 Nengazen, berakat he iyan heeyan isilut nu te menge etew he mibutangbutang kedì wey migkaǥi te mezaat he menge lalag mehitenged kediey.
PSA 109:21 Piru tevangi a mulà, Nengazen he MEGBEVAYÀ, para ikeveǥey kenikew is dengeg. Libriya a tenged te keupiya nu wey gaǥew nu.
PSA 109:22 Su egkaayuayu a wey pubri a, ne utew mibmesakit is gehinawa ku.
PSA 109:23 Egkenaneynaney en egkaawà is untung ku iring te lambung he egkahanew emun mezukilem. Wey iring a zaan te terapan he mibpeyupas.
PSA 109:24 Wazè en desen te menge vuel ku tenged te kedtulung ku kebpuasa. Utew ad migasà.
PSA 109:25 Utew ad edsusudia te menge kuntada ku. Ebpemenggemenggemen dan emun egkeehè e zan.
PSA 109:26 Tevangi a, Nengazen he Megbevayè ku; libriya a tenged te ǥaǥew nu.
PSA 109:27 Ipetueni nu te menge kuntada ku he iyan ka, is Nengazen, midlibri kedì.
PSA 109:28 Midrewakan e zan, piru edtuvazan a mulà kenikew. Egkepeel-elezan is menge kuntada ku emun edsurungen e zan, ne egkelipey a mulà is suluǥuen nu.
PSA 109:29 Berakat he mepurung mepeel-elezi heini is menge etew he mibutangbutang kedì; meiring te visti he ebpeketambun te lawa zan is keelezan dan.
PSA 109:30 Ebpeselematan ku is Nengazen; edeliǥen ku sikandin diyà te etuvangan te mahabet he menge etew.
PSA 109:31 Su edlevanan din is menge etew he pubri, su para melibri sikandan te edhukum kandan te kemetayen.
PSA 110:1 Migkaǥi is Nengazen diyà te Nengazen ku he hadì te, “Pinuu ka kayi te egkekewanan ku, taman te igkepezizalem ku ziyà te menge paa nu is menge kuntada nu.”
PSA 110:2 Mahal he Hadì, ebpuun te Zion ibpemeluag te Nengazen is ginhedian nu, ne edhedian nu is menge kuntada nu.
PSA 110:3 Dutun te andew te kedtebeka nu te menge kuntada nu, andam is menge etew nu te ked-uǥup kenikew. Is menge vetan-en he menge etew nu edhendiyà te kenikew zutun te segradu he menge vuvungan he henduen be sikandan te menge zehemug emun meselem.
PSA 110:4 Nenangdù is Nengazen, ne kenà egkahalin is isip din, he memumuhat ka te wazà pidtemanan, iring te kegkememumuhat ni Melkizedek.
PSA 110:5 Is Nengazen diyà te egkekewanan nu; edèdeetan din is menge hadì emun ibpeehè din en is pauk din.
PSA 110:6 Edsilutan din is menge nasyun ne mahabet is ebpenhimetayan din. Edèdeetan din is ebpemendumala seled te tivuuk he kelibutan.
PSA 110:7 Sikew, Mahal he Hadì, ed-inum ka ziyà te wahig he edtudà he ziyà te kilid te zalan, umbe edlikù is desen nu ne ebpekezaag ka.
PSA 111:1 Deliǥa is Nengazen! Ebpeselematan ku is Nengazen te ebpuun kayi te tivuuk he ǥehinawa ku ziyà te ketiǥuman te menge metazeng.
PSA 111:2 Mekeǥeǥehem is menge vaal te Nengazen; egngunngunuen heini is langun te menge egkesuat kayi.
PSA 111:3 Mekeǥeǥehem wey zekelà is dengeg te menge vaal te Megbevayà, ne is kegkemetazeng din ebpedayun te wazà pidtemanan.
PSA 111:4 Ne ibpetentenuzan din kenitew is egkein-inuwan he menge vaal zin. Meupiya sikandin wey hihizuwen;
PSA 111:5 ebeǥayan din te keenen is edtahud kandin, ne layun din edtentenuzi is kebpekid-uyun din.
PSA 111:6 Impeehè din te menge etew zin ke sengemenu is kegkemekeǥeǥehem te menge vaal zin, pinaaǥi te kebeǥaya zin diyà te kandan te menge tanà te menge etew te zuma he menge nasyun.
PSA 111:7 Egketuusan is ketazeng din wey kebmetinumanen din diyà te langun he menge vaal zin, ne egkeseriǥan is langun he menge suǥù din.
PSA 111:8 Ne heini is menge suǥù din ebpedayun te wazà pidtemanan, ne nezumahan te kebmetinumanen wey ketazeng is kebeǥaya zin kayi.
PSA 111:9 Midlibri zin is menge etew zin, ne midhimu zin is kebpekid-uyun kandan te wazà pidtemanan. Waǥas sikandin wey egkein-inuwan.
PSA 111:10 Emun egkesuat is etew he mebmetau, kinahanglan he edtahud sikandin te Nengazen. Is langun he edtuman te menge suǥù din ne zuen dan hustu he kedsavut. Ereg sikandin he edeliǥen te wazà pidtemanan.
PSA 112:1 Deliǥa is Nengazen! Utew zeyzey is etew he edtahud te Nengazen, wey igkelipey zin is kedtuman te menge suǥù din.
PSA 112:2 Ebmeuswaǥen is menge anak din, su is kevuwazan te menge etew he edtinazeng edtuvazan te Megbevayà.
PSA 112:3 Edsepian is pemilya zin, ne kenà egkelipatan is keupiya zin taman te taman.
PSA 112:4 Minsan merusirem duen gihapun kerayag para te menge etew he hustu is paaǥi zan te kebpengungubpaan, kelelaǥan, hihizuwen, wey metazeng.
PSA 112:5 Edtuvazan is etew he kelelaǥan, wey ibpesambey zin is duma, wey kenè din ibpeiseg is kegketiǥayun din pinaaǥi te limbung.
PSA 112:6 Kenà duwazuwa he ebmelig-en is kebpekesavuk din te minsan keenu. Ne kenà sikandin egkelipatan te wazà pidtemanan.
PSA 112:7 Kenà sikandin egkahandek te mezaat he menge tudtul, su melig-en is kedsarig din te Nengazen.
PSA 112:8 Kenà sikandin egkeǥiyaǥiya wey egkahandek, su netuenan din he ziyà te huziyan he timpu egkeehè din is kegkezaaǥa te menge kuntada zin.
PSA 112:9 Kelelaǥan sikandin diyà te menge pubri; is keupiya zin egketenuzan taman te taman ne ebeǥayan sikandin te Megbevayà te zengeg pinaaǥi te ked-umani te Megbevayà te egkehimu zin.
PSA 112:10 Egkaahà heini te menge lalung ne egkekeǥetket is menge ngipen dan te kegkepauk dan, ne henduen be sikandan te egkereney tenged te kegkeeled dan. Kenà edlampus is menge pelanu zan.
PSA 113:1 Deliǥa is Nengazen! Sikiyu is menge etew te Nengazen he menge suluǥuen din, deliǥa niw sikandin.
PSA 113:2 Berakat he zeliǥa sikandin guntaan wey taman te taman.
PSA 113:3 Ebpuun te edsilaan pehendiyà te edsenlepan is langun he menge etew edalig te Nengazen.
PSA 113:4 Edhedian te Nengazen is langun he menge nasyun, ne kenà egkerepengan is kegkemekeǥeǥehem din.
PSA 113:5 Wazà iring te Nengazen he Megbevayè tew he ebpimpinuu ziyà te pinuuwè din te kedhadì diyà te zivavew he utew metikang.
PSA 113:6 Edungul sikandin te ked-ahà te langit wey kelibutan.
PSA 113:7 Inggaun din te kelised is menge egkaayuayu wey menge pubri.
PSA 113:8 Ebeǥayan din daan sikandan te zengeg duma te dezekelà is dengeg duen te menge etew zin.
PSA 113:9 Edlipayen din is bahi he kenà ebpekaanak diyà te ubpeey zin pinaaǥi te kebeǥayi zin kandin te menge anak. Deliǥa is Nengazen!
PSA 114:1 Is menge Israilihanen he menge kevuwazan ni Jacob, mid-ubpè dan dengan diyà te Ehipto, he selakew is kineǥiyan te menge etew zutun.
PSA 114:2 Ne hein migawas dan en diyà te Ehipto, ne midhimu te Megbevayà is Juda he segradu he lugar zin, ne midumala zin is Israel.
PSA 114:3 Is Daǥat he Meriǥà mibpelaǥuy te kegkaahaa zin kandin. Ne is Wahig he Jordan mid-endud.
PSA 114:4 Neyunggat is menge vuntud wey menge vuvungan he henduen be te ebpemenlinglingketew he menge kambing wey menge kerehidu.
PSA 114:5 Maan is mibpelaǥuy is Daǥat he Meriǥà wey mid-engked te kedtudà is Wahig he Jordan?
PSA 114:6 Maan is neyunggat is menge vuntud wey is menge vuvungan he henduen be te ebpemenlinglingketew he menge kambing wey menge kerehidu?
PSA 114:7 Egkeyunggat daan minsan is tivuuk he kelibutan diyà te etuvangan te Nengazen he Megbevayà ni Jacob;
PSA 114:8 ne midhimu zin he peneng wey serebseb he edtudà sikan is lintikan he vatu.
PSA 115:1 Kenè key iyan ereg he ebeǥayan te zengeg, Nengazen, kekenà, iyan ka, tenged te kebmahala nu kenami wey te kebmetinumanen nu.
PSA 115:2 Maan is mid-insultuwan key te zuma he menge nasyun pinaaǥi te kegkaǥi te, “Hendei en is Megbevayè niw?”
PSA 115:3 Diyà te langit is Megbevayè dey ne ebeelan din ke hengkey is egkesuatan din.
PSA 115:4 Piru is kandan he menge megbevayà menge pelata zà wey vulawan he mibeelan te etew.
PSA 115:5 Duen dan menge vèbà, piru kenè dan ebpekekaǥi; duen dan menge mata, piru kenè dan ebpekaahà.
PSA 115:6 Duen dan menge telinga, piru kenè dan ebpekezineg; duen dan menge izung, piru kenè dan ebpekahazek.
PSA 115:7 Duen dan menge velad, piru kenè dan ebpekeǥawed; duen dan menge paa, piru kenè dan ebpekehipanew, ne minsan is laǥeng ne kenè ta egkezineg diyà te kandan.
PSA 115:8 Is mibaal kayi te kenà tutuu he menge megbevayà wey sikan is midsarig kandan, ne egkeiring daan kandan te wazè dan pulus.
PSA 115:9 Sikiyu is menge etew te Israel, ragkes en is menge kevuwazan ni Aaron, sarig kew te Nengazen. Iyan sikandin edtavang wey ebpengalang keniyu.
PSA 115:11 Sikiyu is langun he edtahud te Nengazen, sarig kew ziyà te kandin. Iyan sikandin edtavang wey ebpengalang keniyu.
PSA 115:12 Edtentenuzan kiw te Nengazen, ne edtuvazan kiw zin. Edtuvazan din is menge etew te Israel ragkes en is menge kevuwazan ni Aaron.
PSA 115:13 Edtuvazan din is langun he edtahud kandin dekelà se zeisey is pid-etawan dan.
PSA 115:14 Berakat he ipemezakel kew te Nengazen wey is menge kevuwazan niw.
PSA 115:15 Berakat he tuvazi kew te Nengazen he midlimbag te langit wey te kelibutan.
PSA 115:16 Gaked dà te Nengazen is langit piru imbeǥey zin mulà te menusiyà is kelibutan.
PSA 115:17 Kenà iyan edalig te Nengazen is nemematey en, su kenè en sikandan ebpekekaǥi,
PSA 115:18 kekenà, iyan kiw is menge uuyag pa edalig kandin guntaan wey taman te taman. Deliǥa is Nengazen.
PSA 116:1 Mibmahal ku is Nengazen, su ebpemineǥen din wey edtevaken din is kebuyù ku te tavang diyà te kandin.
PSA 116:2 Ne ǥeina te ebpemineǥen e zin, ne kenà a ed-engked he ebpengumew kandin mintras uuyag e pa.
PSA 116:3 Nahandek a su neǥezam ku he henduen be te hapit ad ebpatey; is kemetayen henduen be te pisì he nekevedbed kediey. Nesemukan a wey neipeng a,
PSA 116:4 umbe mid-umew ku is Nengazen, “Nengazen, libriya a!”
PSA 116:5 Is Nengazen he Megbevayè tew meupiya, metazeng, wey hihizuwen.
PSA 116:6 Egkelesaǥan din is iring te kedsarig te vatà is kedsarig dan kandin. Hein wazè ku en egkehimu, midlibri e zin.
PSA 116:7 Ereg a he kenà egkeǥiyaǥiya, su utew a ebpurungi te Nengazen,
PSA 116:8 su midlibri e zin te kemetayen, kegkeseeng, wey kezeetan.
PSA 116:9 Umbe, ed-uvey a ziyà te Nengazen kayi te kebpengungubpaan ku kayi te kelibutan te menge uuyag.
PSA 116:10 Edtuu a ǥihapun kenikew minsan ke ebpekekaǥi a te, “Utew subra is menge elentusen ku.”
PSA 116:11 Tenged te kegkehandek ku migkaǥi a te, “Wazà iyan etew he egkeseriǥan.”
PSA 116:12 Hengkey is igkevales ku te Nengazen te langun he meupiya he mibeelan din kayi te kediey?
PSA 116:13 Edsimbahan ku is Nengazen ne ed-uwit a te vinu he ibpemuhat ku te kebpeselamat kandin te kedlibriya zin kedì.
PSA 116:14 Edtumanen ku is menge saad ku he nepirmahan te langun he menge etew zin.
PSA 116:15 Egkesekitan is Nengazen emun duen ebpatey zuen te menge etew zin.
PSA 116:16 Nengazen, tutuu he suluǥuen a kenikew. Impelingkawas a kenikew hein nevihag a.
PSA 116:17 Ed-ezapen ku sikew ne edhalad a para te kebpeselamat kenikew.
PSA 116:18 Edtumanen ku is menge saad ku ziyà te kenikew he nepirmahan te langun he menge etew nu
PSA 116:19 ziyà te lama te valey nu ziyà te Jerusalem. Deliǥa is Nengazen!
PSA 117:1 Sikiyu is langun he menge nasyun, deliǥa niw is Nengazen! Sikiyu is langun he menge etew, beǥayi niw sikandin te zengeg!
PSA 117:2 Su utew kiw mibmahal te Nengazen, ne wazà pidtemanan te kebmetinumanen din. Deliǥa is Nengazen!
PSA 118:1 Peselemati is Nengazen su meupiya sikandin; Wazà pidtemanan te ǥaǥew zin.
PSA 118:2 Megkaǥi is menge etew te Israel te, “Wazà pidtemanan te ǥaǥew zin.”
PSA 118:3 Megkaǥi is menge kevuwazan ni Aaron te, “Wazà pidtemanan te ǥaǥew zin.”
PSA 118:4 Megkaǥi is menge edtahud te Nengazen te, “Wazà pidtemanan te ǥaǥew zin.”
PSA 118:5 Dutun te timpu te kelised ku, mid-umew ku is Nengazen, ne midtavak e zin pinaaǥi te kedlibriya zin kediey.
PSA 118:6 Duma ku is Nengazen, umbe kenà a egkahandek. Wazà kezeetan he egkehimu te etew kayi te kediey.
PSA 118:7 Duma ku is Nengazen. Iyan sikandin edtavang kedì, ne egkeehè ku is kegkezaaǥa ku te menge kuntada ku.
PSA 118:8 Meupiya pa is kedangep diyà te Nengazen kenà is kedsarig diyà te etew.
PSA 118:9 Meupiya pa is kedangep diyà te Nengazen kenà is kedsarig diyà te mekeǥeǥehem he menge etew.
PSA 118:10 Midliǥuyan a te menge etew he ebpuun diyà te mahabet he menge nasyun he menge kuntada ku, piru nezaag ku sikandan pinaaǥi te ǥehem te Nengazen.
PSA 118:11 Tutuu he midliǥuyan e zan, piru nezaag ku sikandan pinaaǥi te ǥehem te Nengazen.
PSA 118:12 Henduen dan te petiyukan is midsurung kedì, piru neiring dà sikandan te nevinsulan he reǥami he segugunè dà neevuki. Nezaag ku sikandan pinaaǥi te ǥehem te Nengazen.
PSA 118:13 Mibpurungan e zan etekiya ne hapit e zan en egkezaag, piru midtevangan a te Nengazen.
PSA 118:14 Iyan is Nengazen mibeǥey kedì te zesen; iyan sikandin migkanta ku. Iyan sikandin menluluwas ku.
PSA 118:15 Pemineǥa is ked-ugyab te menge etew te Megbevayà diyà te menge kampu zan tenged te kezeeǥan dan: “Heini he kezeeǥan mibeelan te Nengazen pinaaǥi te ǥehem din! Is gehem te Nengazen iyan mibpezaag kenitew!”
PSA 118:17 Kenè e pa ebpatey, kekenà, ebpedayun e pa he uuyag, su wey ku ikeseysey is mibpemeelan te Nengazen.
PSA 118:18 Minsan utew zekelà is silut te Nengazen kedì, piru wazè din ituǥut he mebpatey a.
PSA 118:19 Puwasi a te menge ǥemawan te valey te Nengazen su edseled a te kebpeselamat te Nengazen.
PSA 118:20 Iyan heini menge ǥemawan te Nengazen he menge metazeng dà is ebpekeseled duen.
PSA 118:21 Ebpeselamat a kenikew, Nengazen, su midtavak nu is ked-ampù ku. Ne iyan ka midluwas kediey.
PSA 118:22 Is batu he mid-engkezan te menge pandey iyan pa hinuun nehimu he pundasyun he vatu.
PSA 118:23 Midhimu heini te Nengazen, ne utew heini egkein-inuwi.
PSA 118:24 Iyan heini andew te kezeeǥan te Nengazen, umbe edlipey kiw wey edsilibra kiw.
PSA 118:25 Nengazen, ebpengemuyù key ziyà te kenikew he ipelaus nu is kedlibriya nu kenami. Himuwa nu he mebmelempusen is menge vaal zey.
PSA 118:26 Midtuvazan te Nengazen is sinuǥù din. Ne sikiyu is menge etew, berakat he tuvazi kew zaan te Nengazen puun kayi te valey zin.
PSA 118:27 Is Nengazen, iyan sikandin Megbevayà; ne utew kiw zin mibpurungi. Ed-uwit kiw te menge subpang te kayu te kedsilibra tew te pista, ne edliǥuy kiw zuen te pemuhatà.
PSA 118:28 Nengazen, iyan ka Megbevayè ku; ebpeselamat a wey edalig kenikew.
PSA 118:29 Peselemati is Nengazen, su meupiya sikandin; wazà pidtemanan te ǥaǥew zin.
PSA 119:1 Utew zeyzey is menge etew he wazà igkesawey kandan, wey nengungubpaan he ed-ikul te kesuǥuan te Nengazen.
PSA 119:2 Utew zeyzey is menge etew he edsunud te menge penurù te Megbevayà, ne ebpezumazuma kandin te kebpezumazuma he ebpuun diyà te tivuuk he ǥehinawa zan.
PSA 119:3 Wazà sikandan mebaal te mezaat, kekenà, edsunuzen dan is menge paaǥi te Megbevayà.
PSA 119:4 Nengazen, imbeǥey nu kenami is menge sulunuzen he ibpesunud nu su para tumana zey heini te tinutuuwà.
PSA 119:5 Utew zekelà is tinguhè ku he mehimu a he metinumanen te kedtuman te menge sulunuzen he ibpesunud nu.
PSA 119:6 Emun edtumanen ku is langun he menge suǥù nu, kenà a egkepeel-elezan.
PSA 119:7 Edeliǥen ku sikew duma is lumpiyu he ǥehinawa ku zutun te ked-istudyuwi ku te metazeng he menge suǥù nu.
PSA 119:8 Edtumanen ku is menge sulunuzen he ibpesunud nu, umbe kenà a kenikew vey-ani.
PSA 119:9 Hengkey is ebeelan te vetan-en para lumpiyu is gehinawa zin? Is kinahanglan he ebeelan din iyan is kedsunud te lalag nu.
PSA 119:10 Ebpuun diyà te tivuuk he gehinawa ku is kedangep ku kenikew, umbe kenè nu ituǥut he meiniyuǥi ku is menge suǥù nu.
PSA 119:11 Edtipiǥan ku kayi te ǥehinawa ku is menge lalag nu, su wey a kenà mekesalà diyà te kenikew.
PSA 119:12 Dait ka he edeliǥen, Nengazen! Penurua a te menge sulunuzen he ibpesunud nu.
PSA 119:13 Edliklikuan ku te egkaǥi is menge suǥù nu he imbeǥey nu.
PSA 119:14 Kelipey ku is kedsunud te menge penurù nu, lavew pa te kelipey ku emun ebpekekuwa a te zekelà he ketiǥeyunan.
PSA 119:15 Egngunngunuen ku is menge sulunuzen he ibpesunud nu, ne ebpurungan ku ed-is-isipa is menge paaǥi nu.
PSA 119:16 Ingkelipey ku is menge sulunuzen he ibpesunud nu, ne kenè ku edlipatan is menge lalag nu.
PSA 119:17 Impeehè nu kedì te suluǥuen nu is keupiya nu, su wey a mekepedayun he edtuman te lalag nu kayi te ked-ubpè ku.
PSA 119:18 Puwasi nu is isip ku su wey ku mesavut is mekempet he menge ketutuanan diyà te kesuǥuan nu.
PSA 119:19 Edlavey e zà kayi te kelibutan, umbe ipehayag nu kedì is menge suǥù nu.
PSA 119:20 Seled en te langun he timpu is kegkesuat ku he mesavut ku is kesuǥuan nu.
PSA 119:21 Midsawey nu is menge gelbuwen, he menge rinewakan nu. Heini sikandan mid-iniyug te menge suǥù nu.
PSA 119:22 Ilikey a te kebpeelimungew wey kedsudì dan, su midtuman ku is menge penurù nu.
PSA 119:23 Minsan pa ke edtiǥum is menge ebpemendumala te ked-ituk kedì, ne siak is suluǥuen nu ebpurungan ku egngunngunua is menge sulunuzen nu.
PSA 119:24 Is menge penurù nu nekeveǥey kedì te kelipey; ne kayi ku egkuwaa is sambag.
PSA 119:25 Henduen be te ebpatey ad, umbe pekeluǥeyaza nu pa is untung ku sumalà te insaad nu.
PSA 119:26 Migkaǥi ku kenikew is mehitenged te untung ku, ne mibpemineg a kenikew. Penurua a te menge sulunuzen he ibpesunud nu.
PSA 119:27 Ipesavut nu kedì is menge sulunuzen he ibpesunud nu, su para mengunùngunù ku is egkein-inuwan he menge vaal nu.
PSA 119:28 Henduen be te egkelened ad te seeng ku, umbe lig-eni a kenikew sumalà te saad nu.
PSA 119:29 Tevangi a para kenà a mekevaal te mezaat; ne ituvad nu kediey is kebpekeikul te menge kesuǥuan nu.
PSA 119:30 Mibpilì ku is hustu he zalan; su utew ku egkesuati is kedtuman te menge suǥù nu.
PSA 119:31 Midsunud ku iyan, Nengazen, is menge penurù nu, umbe kenè nu mehimuwa he mepeel-elezi a.
PSA 119:32 Ebpeniguduwan ku is kedtuman te menge suǥù nu su ed-umanan nu is kedsavut ku.
PSA 119:33 Nengazen, ipenurù nu kedì is menge sulunuzen he ibpesunud nu, ne edtumanen ku heini taman te taman.
PSA 119:34 Ipesavut nu kedì is kesuǥuan nu, ne edtumanen ku heini wey edtipiǥan ku kayi te tivuuk he ǥehinawa ku.
PSA 119:35 Giyahi a te kedsunud te menge suǥù nu, su igkelipey ku heini.
PSA 119:36 Iveǥey nu kediey is dekelà he tinguhà te kedtuman te menge penurù nu, kenà te kedtinguhà te kedsepian.
PSA 119:37 Ilikey a kenikew te kedtinguhà te menge vutang he wazè dan pulus. Ne pekeluǥeyaza nu pa is untung ku sumalà te insaad nu.
PSA 119:38 Tumana nu is insaad nu kediey te suluǥuen nu, he iyan kes insaad nu ziyà te menge etew he edtahud kenikew.
PSA 119:39 Kenè nu himuwa he mehitavù kayi te kediey is igkahandek ku he keelezan, su mid-isip ku he meupiya is menge suǥù nu.
PSA 119:40 Igkesuat ku is kedtuman te menge sulunuzen he ibpesunud nu. Ne tenged te ketazeng nu, pekeluǥeyaza nu pa is untung ku.
PSA 119:41 Nengazen, ipeehè nu is kebmahala wey kedlibriya nu kedì, sumalà is insaad nu.
PSA 119:42 Ne zutun egketavak ku is mid-eled-eled kedì, su edsarig a te menge lalag nu.
PSA 119:43 Ipekaǥi a kenikew te tutuu, he iyan is menge lalag nu, te minsan hengkey he timpu. Su iyan midseriǥan ku is menge suǥù nu.
PSA 119:44 Layun ku edtumana is kesuǥuan nu taman te taman.
PSA 119:45 Kayi te kebpengungubpaan ku ne kenà a uripen, su ebpeninguhà a te kedtuman te sulunuzen nu.
PSA 119:46 Kenè ku igkeeled is kedtudtul te menge penurù nu minsan diyà te etuvangan te menge hadì.
PSA 119:47 Utew ku igkelipey is kedtuman te menge suǥù nu he mibmahal ku.
PSA 119:48 Midtahud ku wey mibmahal ku is menge suǥù nu, ne egngunngunuen ku is menge sulunuzen he ibpesunud nu.
PSA 119:49 Tentenuzi nu is saad nu kayi te kedì te suluǥuen nu, su iyan heini ebpekeveǥey kedì te perateng.
PSA 119:50 Egkeuyag-uyag a tenged te penaad nu wey ebpekeveǥey heini kedì te kelipey kayi te menge elentusen ku.
PSA 119:51 Layun a edsudia te menge mepelavawen, piru wazè ku ewai is kesuǥuan nu.
PSA 119:52 Nengazen, midtentenuzan ku is menge suǥù nu he neuǥet en he imbeǥey nu, su nekeveǥey heini kedì te kelipey.
PSA 119:53 Dekelà is pauk ku, tenged te menge lalung he mid-iniyug te kesuǥuan nu.
PSA 119:54 Egkanta a mehitenged te menge sulunuzen he ibpesunud nu minsan hendei a ed-ubpà.
PSA 119:55 Nengazen, emun timpu te mezukilem ne edtentenuzan ku sikew, ne ebpurungan ku ed-is-isipa is kedtuman te kesuǥuan nu.
PSA 119:56 Iyan heini kelipey ku: is kedsunud te menge sulunuzen he ibpesunud nu.
PSA 119:57 Sikew, Nengazen, iyan ke zà iyan kinahanglan ku. Midsaad a te kedtuman te menge lalag nu.
PSA 119:58 Ebpuun kayi te ǥehinawa ku is kedhangyù ku kenikew he kehizuwi a kenikew sumalà te saad nu.
PSA 119:59 Mid-isip-isip a ke mibmenumenu ku is kebpengungubpaan ku, ne midisisyun a te kedsunud te menge penurù nu.
PSA 119:60 Ne seǥuǥunè ku midtuman is menge suǥù nu.
PSA 119:61 Minsan pa te mibakus a te menge lalung, wazè ku lipati is kesuǥuan nu.
PSA 119:62 Minsan liwazè en te kezukileman egimerat a su ebpeselamat a ziyà te kenikew tenged te metazeng he menge suǥù nu.
PSA 119:63 Emiǥu a te langun he edtahud kenikew wey edtuman te menge sulunuzen he ibpesunud nu.
PSA 119:64 Nengazen, mibmahal nu is langun he menge etew kayi te kelibutan. Penurua-a te menge sulunuzen he ibpesunud nu.
PSA 119:65 Nengazen, tulengezi a kenikew is suluǥuen nu, sumalà te insaad nu.
PSA 119:66 Beǥayi a te ketau wey keuluwanen, su edsarig a te menge suǥù nu.
PSA 119:67 Hein aney he wazè e pa kenikew mensuwa, ne mid-awà a ziyà te kenikew, piru ǥuntaan midtuman ku en is lalag nu.
PSA 119:68 Meupiya ka iyan wey meupiya is mibpemeelan nu. Penurua a te menge sulunuzen he ibpesunud nu.
PSA 119:69 Minsan mibutbutangan a te menge gelbuwen, midtuman ku ǥihapun is menge sulunuzen he ibpesunud nu te ebpuun te tivuuk he ǥehinawa ku.
PSA 119:70 Heini is menge gelbuwen, kenà sikandan ebpekesavut te kesuǥuan nu. Piru siak, igkelipey ku is kedtuman kayi.
PSA 119:71 Meupiya is kedsilut nu, su pinaaǥi kayi nepenurù a te menge penurù nu.
PSA 119:72 Para kediey, is kesuǥuan he imbeǥey nu edhuna pa he mahal te utew zekelà he ketiǥeyunan.
PSA 119:73 Midlimbag a wey mibpurma a kenikew; beǥayi a te kedsavut su para meistudyuwi ku is menge suǥù nu.
PSA 119:74 Egkelipey is menge etew he edtahud kenikew emun egkeehè e zan, su edsarig a te lalag nu.
PSA 119:75 Netuenan ku, Nengazen, he metazeng is menge suǥù nu. Ne ǥeina te metinumanen ka te egkeǥiyen nu, umbe mibmansu a kenikew.
PSA 119:76 Berakat he mekeveǥey kedì te kelipey is gaǥew nu su iyan heini insaad nu kedì te suluǥuen nu.
PSA 119:77 Kehizuwi a su para mebpedayun is kegkeuyag-uyag ku; su igkelipey ku is kedsunud te kesuǥuan nu.
PSA 119:78 Berakat he mepeel-elezi is menge gelbuwen tenged te kebutbutangi zan kediey. Iyan, siak mulà, egngunngunuen ku is menge sulunuzen he ibpesunud nu.
PSA 119:79 Berakat he med-uvey kayi te kediey is menge etew he edtahud kenikew wey netau te menge penurù nu.
PSA 119:80 Berakat he metuman ku te ebpuun te tivuuk he ǥehinawa ku is menge sulunuzen he ibpesunud nu su para kenà a mepeel-elezi.
PSA 119:81 Edarà ad is edtaǥad te kedlibriya nu kedì, piru edsarig a ǥihapun te lalag nu.
PSA 119:82 Mibmerusirem en is ked-ehè ku te kedtulung ku kedtaǥad te pesarig nu. Nekeinsà a te, “Keenu e pa vuwa kenikew edlig-eni wey edlipaya?”
PSA 119:83 Minsan pa ke neiring ad te lundis he teleǥuey te vinu he wazè din en pulus, wazè ku lipati is menge sulunuzen he ibpesunud nu.
PSA 119:84 Sengemenu keluǥayad is kebpeketaǥad ku? Keenu nu pa edsiluti is menge etew he mibpesipala kediey te suluǥuen nu?
PSA 119:85 Mibangbang is menge gelbuwen he wazà medsunud te kesuǥuan nu te para te egkeuluǥan ku.
PSA 119:86 Egkeseriǥan is langun he menge suǥù nu. Tevangi a, su ebpesipelahan a te menge etew minsan wazà hustu he hinungdan.
PSA 119:87 Hapit e zan en egkepatey, piru wazè ku engkezi is menge sulunuzen he ibpesunud nu.
PSA 119:88 Tipiǥi nu is untung ku tenged te ǥaǥew nu; su para mekepedayun a he edtuman te menge penurù nu.
PSA 119:89 Nengazen, is lalag nu ebpedayun te wazà pidtemanan; melig-en heini iring te langit.
PSA 119:90 Is kebmetinumanen nu ebpedayun te wazà pidtemanan. Melig-en is kebpelestara nu te kelibutan, umbe kemulu pa heini.
PSA 119:91 Is langun he menge naazen kemulu pa taman en guntaan tenged te iyan suat nu. Su haazà is langun ebpenilbi kenikew.
PSA 119:92 Emun wazà mekeveǥey kedì te kelipey is kesuǥuan nu, ne minatey ad pezem geina tenged te menge elentusen ku.
PSA 119:93 Kenè ku edlipatan is menge sulunuzen he ibpesunud nu, su pinaaǥi kayi is ked-uy-uyaǥa nu kediey.
PSA 119:94 Iyan ka teǥiǥaked kedì, umbe libriya a! Su ebpeninguhà a te kedtuman te menge sulunuzen he ibpesunud nu.
PSA 119:95 Is menge lalung ed-ayan te kedhimatey kedì, piru egngunngunuen ku is menge penurù nu.
PSA 119:96 Neehè ku he zuen ketepusan te langun he menge naazen, piru is menge suǥù nu, wazè din mulà ketepusan.
PSA 119:97 Utew zekelà kayi te ǥehinawa ku is kesuǥuan nu; layun ku heini egngunngunua.
PSA 119:98 Ne ǥeina te layun kayi te kediey is kesuǥuan nu, edhuna a he metau te menge kuntada ku.
PSA 119:99 Mahabet pa is kedì he nesavut, kenà te menge menunudlù ku, su is menge penurù nu iyan ebpurungan ku ed-is-isipa.
PSA 119:100 Edhuna is kedì he kedsavut te kedsavut te menge meǥurang, su midtuman ku man is menge sulunuzen he ibpesunud nu.
PSA 119:101 Midlikayan ku is langun he mezaat he vaal su wey ku metuman is lalag nu.
PSA 119:102 Wazè ku ewai is menge suǥù nu, su iyan ke man nenurù kayi kediey.
PSA 119:103 Ke và dà keenen, ne utew meemis is menge saad nu, edhuna pa he meemis te teneb.
PSA 119:104 Nekaangken a te kedsavut he ebpuun diyà te menge sulunuzen he ibpesunud nu, umbe egkeepesan ku is langun he mezaat he vaal.
PSA 119:105 Is lalag nu iring te sulù he ebpeketeyew te ibayè ku.
PSA 119:106 Edtumanen ku iyan is penangdù ku he edsunud a te metazeng he menge suǥù nu.
PSA 119:107 Utew subra is kebpekaantus ku, umbe pekeluǥeyaza nu pa is untung ku, Nengazen, su iyan heini saad nu.
PSA 119:108 Dewata nu, Nengazen, is keugelingen ku he suat te kedalig kenikew, ne penurua a te menge suǥù nu.
PSA 119:109 Minsan pa te layun a edhephepiti te kemetayen, ne wazè ku lipati is kesuǥuan nu.
PSA 119:110 Midlitaǥan a te menge lalung, piru wazè ku ewai is menge sulunuzen he ibpesunud nu.
PSA 119:111 Is menge penurù nu iyan utew mahal he ketiǥeyunan ku te wazà pidtemanan, su iyan heini ebpekeveǥey kedì te kelipey.
PSA 119:112 Midisisyun a he edtumanen ku is menge sulunuzen he ibpesunud nu taman te taman.
PSA 119:113 Egkeepesan ku is menge etew he kenà tinutuuwà is kebpekid-uyun dan kenikew, piru mibmahal ku mulà is kesuǥuan nu.
PSA 119:114 Iyan ka elesè ku wey endilungè ku; midsarig a te lalag nu.
PSA 119:115 Sikiyu is mezaat is menge vaal, pekeziyui a keniyu, su wey ku metuman is menge suǥù te Megbevayè ku.
PSA 119:116 Beǥayi a te zesen su iyan heini saad nu su para mebpedayun is kegkeuyag-uyag ku; ne kenè nu ituǥut he egkaawà is perateng ku.
PSA 119:117 Tevangi a su para melibri a; ne layun ku ibpesuǥat is isip ku ziyà te menge sulunuzen he ibpesunud nu.
PSA 119:118 Inselikwey nu is langun he midselikwey te menge sulunuzen he ibpesunud nu. Ne tutuu iyan he wazà pulus te kebpenlimbung dan.
PSA 119:119 Mid-isip nu he iring te menge besura is langun he lalung he menge etew kayi te kelibutan. Ne tenged kayi mibmahal ku is penurù nu.
PSA 119:120 Egkerkeren a te kegkahandek kenikew; ingkahandek ku utew is kedhukum nu.
PSA 119:121 Midhimu ku is metazeng wey hustu, umbe kenà a kenikew vey-ani he edezeetan te menge kuntada ku.
PSA 119:122 Peseriǥi a he edtevangan a kenikew is suluǥuen nu; kenè nu mehimuwa he edèdaaǥen a te menge gelbuwen.
PSA 119:123 Mibmerusirem en is ked-ehè ku te kedtulung ku kedtaǥad te pesarig nu he edlibriyen a kenikew.
PSA 119:124 Himuwa nu kayi te kedì te suluǥuen nu is baal he tenged te kebmahala nu kedì, ne penurua a te menge sulunuzen he ibpesunud nu.
PSA 119:125 Suluǥuen a kenikew, umbe beǥayi a te kedsavut su para mesavut ku is menge penurù nu.
PSA 119:126 Nengazen, ereg ke en he edwaleng guntaan he timpu, su wazè en medtuman is menge etew te kesuǥuan nu.
PSA 119:127 Tutuu he mibmahal ku is menge suǥù nu lavew pa te vulawan, minsan pa te lunsey he vulawan.
PSA 119:128 Tutuu he midtuman ku is menge suǥù nu, ne egkeepesan ku is langun he mezaat he vaal.
PSA 119:129 Utew mekempet is menge penurù nu, umbe midsunud ku heini te kedsunud he ebpuun kayi te tivuuk he ǥehinawa ku.
PSA 119:130 Is kedseysaya te lalag nu ebpekeveǥey te kerayag diyà te isip te menge etew wey ketau te wazè din ketau.
PSA 119:131 Utew zekelà is kebpengenduya ku te suǥù nu.
PSA 119:132 Seǥipaa a wey kehizuwi a, su layun nu heeyan ebeeli ziyà te menge etew he mibmahal kenikew.
PSA 119:133 Giyahi a kenikew pinaaǥi te lalag nu; kenè nu mehimuwa he meuwit a te kelelalung.
PSA 119:134 Libriya a te kedèdaaǥa kedì, su wey ku metuman is menge sulunuzen he ibpesunud nu.
PSA 119:135 Ipeehè nu kedì te suluǥuen nu is keupiya nu, ne penurua a te menge sulunuzen.
PSA 119:136 Nekepurung a mekesineǥew su ǥeina te wazà medtuman is menge etew te kesuǥuan nu.
PSA 119:137 Metazeng ka, Nengazen, wey hustu is menge suǥù nu.
PSA 119:138 Metazeng wey egkeseriǥan is menge penurù he imbeǥey nu.
PSA 119:139 Utew subra is pauk ku su ǥeina te mid-iniyuǥan te menge kuntada ku is menge lalag nu.
PSA 119:140 Nepurung en meǥezami he egkeseriǥan iyan is saad nu, ne mibmahal ku heini te suluǥuen nu.
PSA 119:141 Minsan egkaayuayu a wey edsusudien a, ne wazè ku lipati is menge sulunuzen he ibpesunud nu.
PSA 119:142 Is ketazeng nu wazà pidtemanan wey tutuu is kesuǥuan nu.
PSA 119:143 Nekesaǥad a te kedlised wey kemereǥenan, piru nekeveǥey kedì te kelipey is menge suǥù nu.
PSA 119:144 Wazà pidtemanan is ketazeng te menge penurù nu. Beǥayi a te kedsavut te menge penurù nu su para mebpedayun is kegkeuyag-uyag ku.
PSA 119:145 Nengumew a kenikew, Nengazen, te ebpuun kayi te tivuuk he ǥehinawa ku; tevaka a kenikew ne edtumanen ku is menge sulunuzen he ibpesunud nu.
PSA 119:146 Nengumew a kenikew; libriya a, ne edtumanen ku is menge penurù nu.
PSA 119:147 Mid-enew ad te wazè pa medsilà is andew, ne mibuyù a te tavang diyan te kenikew. Midseriǥan ku is saad nu.
PSA 119:148 Wazà a medlipezeng seled te tivuuk he kezukileman su egngunngunuen ku is menge saad nu.
PSA 119:149 Pemineǥa a, Nengazen, tenged te kebmahala nu kedì; iyan ka metau he kenè e pa mebpatey sumalà te metazeng he kukuman nu.
PSA 119:150 Mid-uvey kayi te kediey is menge lalung he mibpesipala kediey he wazà medawat te kesuǥuan nu.
PSA 119:151 Piru uvey ka kayi te kediey, Nengazen; ne egkeseriǥan is langun he menge suǥù nu.
PSA 119:152 Pinaaǥi te ked-istudyu ku zengan te menge penurù he midhimu nu, netuenan ku he ebpedayun te wazà pidtemanan heini is menge penurù nu.
PSA 119:153 Ahaa nu is ked-antus ku ne libriya a, su wazè ku lipati is kesuǥuan nu.
PSA 119:154 Levani a kuntra te menge etew he mibutangbutang kedì wey libriya a; pekeluǥeyaza nu pa is untung ku sumalà te insaad nu.
PSA 119:155 Kenà egkelibri is menge lalung su wazà sikandan medtinguhà te kedtuman te menge sulunuzen he ibpesunud nu.
PSA 119:156 Dekelà is hizu nu, Nengazen; pekeluǥeyaza nu pa is untung ku sumalà te kukuman nu.
PSA 119:157 Mahabet is menge kuntada ku he mibpesipala kediey, piru wazè ku ewai is menge penurù nu.
PSA 119:158 Egkeepesan ku is menge etew he kenà tinutuuwà is kebpekidepità dan kenikew, su wazè dan tumana is lalag nu.
PSA 119:159 Ahaa nu, Nengazen, ke mibmenumenu ku te ebmahal is menge sulunuzen he ibpesunud nu. Pekeluǥeyaza nu pa is untung ku tenged te kebmahal nu.
PSA 119:160 Tutuu is langun he menge lalag nu, ne wazà pidtemanan te langun he metazeng he menge suǥù nu.
PSA 119:161 Mibpesipelahan a te ebpemendumala minsan wazà hustu he hinungdan, piru ebpuun te ǥehinawa ku is kedtehuza ku te lalag nu.
PSA 119:162 Igkelipey ku is saad nu iring te kelipey te etew he nekaahà te zekelà he ketiǥeyunan.
PSA 119:163 Igkererengiti ku wey egkeepesan ku is langun he tarù, piru mibmahal ku mulà is kesuǥuan nu.
PSA 119:164 Kepipira a edalig kenikew te senga andew, su ǥeina te metazeng is menge suǥù nu.
PSA 119:165 Ebmeupiya utew is kebpekesavuk te menge etew he ebmahal te kesuǥuan nu. Ne wazà ebpekezezaat kandan.
PSA 119:166 Ebperateng a he edlibriyen a kenikew, Nengazen, ne edtumanen ku is menge suǥù nu.
PSA 119:167 Utew ku mibmahal is menge penurù nu, umbe midpurungan ku heini tumana.
PSA 119:168 Netuenan nu is langun he mibeelan ku, umbe midtuman ku is menge sulunuzen he ibpesunud nu wey menge penurù nu.
PSA 119:169 Nengazen, berakat he ebpemineǥen nu is ked-umawa ku kenikew. Beǥayi a te kedsavut sumalà te insaad nu.
PSA 119:170 Berakat he ebpemineǥen nu is ked-ampù ku. Libriya a sumalà is saad nu.
PSA 119:171 Layun ku sikew edeliǥa, su mibpenurù a kenikew te menge sulunuzen he ibpesunud nu.
PSA 119:172 Egkanta a mehitenged te lalag nu, su metazeng is langun he menge suǥù nu.
PSA 119:173 Berakat he layun ka andam he edtavang kedì, su mibpilì ku is kedtuman te menge sulunuzen he ibpesunud nu.
PSA 119:174 Nenganduy a he libriya a kenikew, Nengazen. Nekeveǥey kedì te kelipey is kesuǥuan nu.
PSA 119:175 Pekeluǥeyaza nu pa is untung ku su wey ku sikew mezalig, ne verakat he meketavang kedì is menge suǥù nu.
PSA 119:176 Netazin a iring te kerehidu he netazin, umbe pen-ahaa a is suluǥuen nu, su wazè ku lipati is menge suǥù nu.
PSA 120:1 Dutun te kedlised ku, mid-umew ku is Nengazen ne midtavak e zin.
PSA 120:2 Nengazen, libriya a te kezeetan he edhimuwen te menge teruen wey menge limbungan.
PSA 120:3 Sikiyu is menge limbungan, hengkey vuwa is idsilut te Megbevayà keniyu?
PSA 120:4 Edsilutan kew zin pinaaǥi te kegkepenaa keniyu te sundaru te midlangga he vesut.
PSA 120:5 Mekehizuhizu a su nekeubpà a zuma keniyu te iring kezaat te menge meǥinged diyà te Meshec wey Kedar.
PSA 120:6 Neuǥet en is ked-ubpè ku zuma keniyu te menge etew he kenà egkesuat te kelinew.
PSA 120:7 Egkesuat a te kelinew piru emun edhisgut a mehitenged kayi, ne tebek mulà is keniyu he egkesuatan.
PSA 121:1 Midtengtengan ku is menge vuvungan; hendei ves ebpuun is tavang kediey?
PSA 121:2 Is tavang kediey ne ziyà ebpuun te Nengazen, he iyan mibaal te langit wey kelibutan.
PSA 121:3 Kenè din idtuǥut he meseligkat ka. Sikandin is ed-ipat kenikew, ne kenà ebpekelipezeng.
PSA 121:4 Pemineg kew! Is ed-ipat te Israel ne kenà ebpekelipezeng wey kenà edlipezeng.
PSA 121:5 Is Nengazen, iyan ed-ipat kenikew; diyà sikandin te uvey nu is edlavan kenikew.
PSA 121:6 Is keinit te andew wey siǥa te vulan ke mezukilem, kenà ebpekezezaat kenikew.
PSA 121:7 Ed-ipaten ka te Nengazen ne kenà ebpekezezaat kenikew is minsan hengkey he vangkit; ebpekeventayan din is untung nu.
PSA 121:8 Is Nengazen iyan ed-ipat kenikew ǥuntaan wey taman te taman, minsan hendei ka ebpevayà.
PSA 122:1 Nelipey a hein migkeǥiyan e zan te, “Edhendiyè kiw te valey te Nengazen.”
PSA 122:2 Ne ǥuntaan kayi key en mekehitindeg te pultahan te Jerusalem!
PSA 122:3 Is Jerusalem sevaha he inged he meupiya wey melig-en is kebenguna zuen.
PSA 122:4 Kayi ebpevayà is menge tribu te Israel te kedalig te Nengazen, su iyan heini insuǥù din kandan.
PSA 122:5 Kayi te Jerusalem edhimuwa te menge hadì he menge kevuwazan ni David is husayen.
PSA 122:6 Ampù kew para te meupiya he kebpekesavuk te menge etew ziyà te Jerusalem pinaaǥi te kegkaǥi te, “Berakat he mebmeuswaǥen is menge etew he mibmahal zan heini he inged.
PSA 122:7 Berakat he melinawen wey meupiya is kebpekesavuk diyà te seled te Jerusalem wey te menge melig-en he vahin kayi.”
PSA 122:8 Para te keupiyaanan te menge kezuzumahi ku wey menge emiǥu ku, egkaǥi a te, “Berakat he meupiya is kebpekesavuk te Jerusalem.”
PSA 122:9 Para te keupiyaanan te valey te Nengazen he Megbevayè tew, ed-ampù a he med-uswag is Jerusalem.
PSA 123:1 Nengazen, edlingahà a kenikew; diyan te kenikew he ebpimpinuu te pinuuwè nu te kedhadi diyan te langit.
PSA 123:2 Iring te suluǥuen he edtaǥad te kebeǥayi kandin te egalen din, sikami edtaǥad key zaan te tavang nu kenami, Nengazen he Megbevayè dey, taman te egkehizuwan key en kenikew.
PSA 123:3 Kehizuwi key, Nengazen, su utew key en ebpendezeisaya.
PSA 123:4 Utew key en edsusudia te menge etew he ebpeeyehey zà he menge hembugiru.
PSA 124:1 Emun wazè kiw levani te Nengazen, hengkey vuwa is egkehitavù kenitew? Tavak kew is menge tig-Israel!
PSA 124:2 “Emun wazè kiw levani te Nengazen hein midsurung kiw te menge kuntada tew,
PSA 124:3 mibpenhimetayan kiw zan en geina tenged te utew zan kegkepeuki kenitew.
PSA 124:4 Neiring kiw en pezem te naanud te zalem etawa nelened te meseleg he wahig.
PSA 124:6 Dait he edeliǥen is Nengazen, su wazè din ituǥut he zèdeeti kiw te menge kuntada tew he henduen be te menge langgam he zumezaas.
PSA 124:7 Nekepelaǥuy kiw iring te tagbis he nelitag he nekaawà su merunut en is tali.
PSA 124:8 Is tavang kenitew ne ziyà ebpuun te Nengazen he iyan mibaal te langit wey is kelibutan.”
PSA 125:1 Is menge etew he edsarig te Megbevayà ne iring te Buvungan he Zion he kenà egkehuyung, kekenà, kenà egkaawà te wazà pidtemanan.
PSA 125:2 Iring te nehimu he pengalang te Jerusalem is menge vuntud he nekeliǥuy kayi he inged, is Nengazen iyan pengalang te menge etew zin guntaan wey taman te taman.
PSA 125:3 Kenè din idtugut he ebpedayun is kedumala te menge lalung diyà te tanà te menge metazeng, su kela ke mekevaal zaan te mezaat is menge metazeng.
PSA 125:4 Nengazen, himuwa nu is meupiya ziyà te meupiya he menge etew, he hustu is paaǥi zan te kebpengungubpaan.
PSA 125:5 Piru siluti nu zuma te menge lalung is menge etew nu he edsunud te mezaat he vetasan. Berakat he meupiya is kebpekesavuk te menge etew te Israel!
PSA 126:1 Hein impeuman ipeuswag te Nengazen is Zion, henduen be te teǥeinep dà heini.
PSA 126:2 Nemen-engit kiw wey migkanta kiw te kegkelipey. Ne zutun migkaǥi is menge etew ziyà te zuma he menge nasyun te, “Mibaal is Nengazen diyà te kandan te menge vaal he nezumahan te zekelà he ǥehem.”
PSA 126:3 Tutuu he mibaal is Nengazen te menge vaal he nezumahan te zekelà he ǥehem kayi te kenitew, ne utew kiw zutun nengelipey.
PSA 126:4 Nengazen, ilikù nu is meupiya he kebpekesavuk dey iring te nemezahan he wahig he newehiǥan en maan.
PSA 126:5 Berakat he sikan is nekesineǥew hein timpu te ked-ezek din, ne mebmelipayen emun edraǥun en.
PSA 126:6 Is midhipanew he nekesineǥew, he ed-uwit te venì he id-ezek, mekeulì sikandin he egkelipey is ed-uwit te neraǥun din.
PSA 127:1 Emun kenà edtavang is Nengazen te kedtukud te valey, ne kenà ebpulus is kahaǥù te midtukud kayi. Emun kenà ebentayan te Nengazen is inged, ne kenà ebpulus is kebentayi kayi te menge vantey.
PSA 127:2 Emun kenà edtavang is Nengazen, wazà daan pulus te kedhaǥù te kedsayu ked-enew wey is kedlapus te kedterebahu para zuen egkekaan. Su iyan is Nengazen ebeǥey te menge kinahanglan te menge etew he mibmahal zin, minsan nekelipezeng sikandan.
PSA 127:3 Is menge anak beǥey wey gasa he ebpuun te Nengazen.
PSA 127:4 Is amey he zuen din menge anak he nengeetew hein betan-en pa sikandin iring te sevaha he sundaru he zuen din menge panà.
PSA 127:5 Utew zeyzey is etew he zuen din mahabet he menge anak, su zuen ebpeketavang kandin te ked-etuvang te menge kuntada zin diyà te hukmanan.
PSA 128:1 Utew kew zeyzey is menge edtahud te Nengazen, he nengungubpaan he ed-ikul te menge paaǥi zin.
PSA 128:2 Is rimeǥas te menge kedhaǥù niw ne utew ereg te menge kinahanglan niw; ebmelipayen kew wey ebmeuswaǥen.
PSA 128:3 Is menge esawa niw he ziyà te menge valey niw ne egkeiring te utew meveǥas he paras, ne is menge anak niw edtigum he ebpekeliǥuy ziyà te lemisahan niw he henduen be te menguhed he menge kayu he ulibu.
PSA 128:4 Iyan heini tuvad he egkezawat te menge etew he edtahud te Nengazen.
PSA 128:5 Berakat he tuvazi kew te Nengazen puun te ed-ezapan he valey zin diyà te Zion. Berakat he meehè niw is ked-uswag te Jerusalem taman te kayi kew pa te kelibutan.
PSA 128:6 Wey verakat he meehè niw pa is menge apù niw. Berakat he meupiya is kebpekesavuk te menge etew kayi te Israel.
PSA 129:1 Menge tig-Israel, keǥiya niw ke mibmenumenu kew te ebpaantus te menge kuntada niw puun pa te aney en he kegketukud te nasyun niw.
PSA 129:2 “Dekelà is kebpeentusa zan kenami puun pa te kebpuun te nasyun dey. Piru wazè key zan mezèdeeti.
PSA 129:3 Mibpelian dan te mezalem is menge peka zey; henduen be heini te tanà he mid-eradu.
PSA 129:4 Piru metazeng is Nengazen, su impelingkawas key zin te kebpen-uripen te lalung he menge etew.”
PSA 129:5 Berakat he ebpekepekeziyù tenged te kegkeeled is langun he edumut te Zion.
PSA 129:6 Berakat he meiring sikandan te menge sagbet he nenuvù diyà te atep, he iyan pa kedtuvù dan ne egkeǥangu zan en.
PSA 129:7 Wazà edseǥipà te kedtiǥum kayi he menge sagbet wey wazà ed-uwit kayi he vinagkes.
PSA 129:8 Berakat he sikan is edsaǥad kenà megkaǥi ziyà te kandan te, “Berakat he tuvazi kew te Nengazen! Ebpenubtuvazan dey sikiyu pinaaǥi te ngazan te Nengazen.”
PSA 130:1 Tenged te subra he kelised nengumew a ziyan te kenikew, Nengazen.
PSA 130:2 Pemineǥa nu is kebpehizuhizu ku kenikew.
PSA 130:3 Nengazen, ke và nu zà inlista is menge salè dey, ne hentei zà buwa is egkesamà diyan te etuvangan nu?
PSA 130:4 Piru mibpesaylu key kenikew, umbe edtehuzen dey sikew.
PSA 130:5 Edtaǥad a iyan kenikew, Nengazen, wey edsarig a te lalag nu.
PSA 130:6 Edtaǥad a kenikew, Nengazen, lavew pa te kedtaǥad te perevantey te kebmeselem.
PSA 130:7 Menge tig-Israel, sarig kew te Nengazen, su veliǥeǥawen sikandin, ne layun sikandin andam te kedluwas.
PSA 130:8 Iyan sikandin edluwas keniyu te langun he menge salè niw.
PSA 131:1 He Nengazen, kenà a gelbuwen wey mepelevawen. Wazà a mebpenganduy te zekelà wey mekeayam-ayam he menge vutang he kenè ku egkevaug.
PSA 131:2 Kekenà, kuntintu ad wey mibmelinawen ad iring te vatà he midlutas te iney zin he kenè en egkesuat he edsusu.
PSA 131:3 Menge tig-Israel, sarig kew te Nengazen guntaan wey taman te taman.
PSA 132:1 Nengazen, kenè nu lipati si David wey is langun he elentusen din.
PSA 132:2 Tentenuzi nu is saad din diyà te kenikew, Nengazen, is Mekeǥeǥehem he Megbevayà ni Jacob. Midsaad sikandin he ke sikandin te,
PSA 132:3 “Kenà a ed-ulì wey kenà a edhizeǥà;
PSA 132:4 kenà a edlipezeng
PSA 132:5 taman te kebpeketuredu ku te lugar he egkeubpaan te Nengazen, he iyan kes Mekeǥeǥehem he Megbevayà ni Jacob.”
PSA 132:6 Hein diyè key te Efrata netudtul kenami ke hendei sikan is Kavan te Kebpekid-uyun, ne ziyè dey haazà meturedu te vevesukà diyà te Jaar.
PSA 132:7 Ne zutun migkaǥi key te, “Edhendiyè kiw te valey te Nengazen ne ed-azap kiw ziyà te etuvangan te pinuuwè din te kedhadì.”
PSA 132:8 Agpas ka, Nengazen, hendiyè ke en te valey nu he ed-ezapan duma sikan is Kavan te Kebpekid-uyun he simbulu te ǥehem nu.
PSA 132:9 Berakat he layun edtinazeng is menge memumuhat nu, ne egkanta te kegkelipey is metinumanen he menge etew nu.
PSA 132:10 Tenged te suluǥuen nu he si David, kenè nu engkezi is pinilì nu he hadì.
PSA 132:11 Nenangdù ka zengan diyà te ki David, ne kenà duwazuwa he edtumanen nu haazà ne kenè nu ebelvelewanan. Ke sikew te, “Sevaha te menge kevuwazan nu is id-ilis ku kenikew he hadì.
PSA 132:12 Is menge kevuwazan nu he menge hadì, emun edtumanen dan is kebpekid-uyun ku keniyu wey is menge penurù he impenurù ku kandan, edhadì daan sikandan te taman te taman.”
PSA 132:13 Tutuu he mibpilì wey midtinguhà te Nengazen is Zion, he iyan edhimuwen din he ubpeey zin. Ke sikandin te,
PSA 132:14 “Iyan heini ubpeey ku taman te taman; kayi a ed-ubpà su kayi a egkesuat.
PSA 132:15 Ibeǥey ku ziyà te Zion is langun he kinahanglan din, ne edhentayen ku is menge pubri he menge meǥinged kayi.
PSA 132:16 Layun ku edlibriya is menge memumuhat kayi, ne is metinumanen he menge meǥinged kayi he menge etew ku, layun ebpemenganta te kegkelipey zan.
PSA 132:17 Ibpahadì ku ziyà te Zion is hadì he kevuwazan ni David ne egkeiring sikandin te sulù he kenà egkeevukan.
PSA 132:18 Ebpeel-elezan ku is menge kuntada zin, piru ibpeuswag ku mulà is ginhedian din.”
PSA 133:1 Utew meupiya he ed-ahaan is menge etew te Megbevayà he ebpengungubpaan he egkesevaha.
PSA 133:2 Iring heini te utew meupiya he lana he inlana ki Aaron he midtudà diyà te sumpè din ne nekeuma ziyà te kuwilyu te visti zin.
PSA 133:3 Iring heini te zehemug diyà te Buntud he Hermon he nengetaktak diyà te Buvungan he Zion. Ne kayi te Zion medsaad is Nengazen te tuvad, he iyan is untung he wazà pidtemanan.
PSA 134:1 Hendini kew, deliǥa niw is Nengazen, langun te sikiyu is menge suluǥuen te Nengazen he edterebahu ziyà te valey zin emun mezukilem.
PSA 134:2 Ivayew niw is menge velad niw zutun te ked-ampù niw ziyà te seled te valey zin, ne zeliǥa niw is Nengazen.
PSA 134:3 Berakat he tuvazi kew te Nengazen he ziyà te Zion, he iyan mibaal te langit wey kelibutan.
PSA 135:1 Deliǥa is Nengazen! Deliǥa niw sikandin, sikiyu is menge suluǥuen din
PSA 135:2 he edterebahu ziyà te valey te Nengazen he Megbevayè tew.
PSA 135:3 Deliǥa is Nengazen su meupiya sikandin. Kanta kew te kedalig kandin su hihizuwen sikandin.
PSA 135:4 Deliǥa niw sikandin su mibpilì din is menge etew te Israel he menge kevuwazan ni Jacob, para mehimu he ispisyal he menge etew zin.
PSA 135:5 Netuenan ku he mekeǥeǥehem is Nengazen, he lavew te langun he zuma he menge ed-ezapen.
PSA 135:6 Midhimu te Nengazen is minsan hengkey he egkesuatan din, diyà te langit, dini te tanà, diyà te menge zaǥat, wey ziyà te kinezizeleman kayi.
PSA 135:7 Impezivavew zin is menge ǥapun he ebpuun diyà te meziyù he menge vahin kayi te kelibutan, ne midhimu zin he mebpengilat duma is ked-uzan. Ibpeǥawas din is keramag puun te neteǥuan kayi.
PSA 135:8 Mibpenhimetayan din is kinekekayan he menge anak he maama te menge tig-Ehipto, wey is kinekekayan he menge anak te menge uyaǥen dan.
PSA 135:9 Diyà te Ehipto, mibaal sikandin te menge singyal wey menge egkein-inuwan he menge vaal te kedsilut te hadì te Ehipto wey is langun he menge upisyal zin.
PSA 135:10 Mibpendezeetan din is menge meǥinged diyà te mahabet he menge nasyun wey mibpenhimetayan din is mekeǥeǥehem he menge hadì,
PSA 135:11 iring ki Sihon te hadì te menge Amorihanen, ki Og he hadì diyà te Bashan, wey is langun he menge hadì diyà te Canaan.
PSA 135:12 Ne imbeǥey zin is menge tanè dan diyà te menge etew zin he menge Israilihanen para maangken dan haazà.
PSA 135:13 Nengazen, is ngazan nu wey is kegkevantug nu egketenuzan taman te taman.
PSA 135:14 Su ibpeehè nu, Nengazen, he wazà mekesalà is menge etew nu he menge suluǥuen nu, ne egkehizuwan nu sikandan.
PSA 135:15 Is menge ed-ezapen diyà te zuma he menge nasyun pelata wey vulawan, ne etew zà is mibaal zuen.
PSA 135:16 Duen dan menge vèbà, piru kenè dan ebpekekaǥi, duen dan menge mata, piru kenè dan ebpekaahà,
PSA 135:17 duen dan menge telinga, piru kenè dan ebpekezineg, wey kenè dan ebpekeǥehinawa.
PSA 135:18 Is menge mibaal kayi te menge ed-ezapen wey is langun he edsarig kayi ne egkehimu zaan sikandan he iring kayi te menge ed-ezapen he wazà pulus.
PSA 135:19 Sikiyu is menge etew te Israel, ragkes en is menge kevuwazan ni Aaron wey is duma pa he menge kevuwazan ni Levi, deliǥa niw is Nengazen! Sikiyu is edtahud te Nengazen, deliǥa niw sikandin!
PSA 135:21 Deliǥa niw is Nengazen he ziyà te Zion. Diyà sikandin med-ubpà te inged he Jerusalem. Deliǥa is Nengazen!
PSA 136:1 Peselemati is Nengazen su meupiya sikandin. Wazà pidtemanan te ǥaǥew zin.
PSA 136:2 Peselemati is Megbevayà he lavew te langun he zuma he menge ed-ezapen. Wazà pidtemanan te ǥaǥew zin.
PSA 136:3 Peselemati is Nengazen he utew lavew te langun he menge egalen. Wazà pidtemanan te ǥaǥew zin.
PSA 136:4 Iyan dà sikandin midhimu te egkein-inuwan he menge hitavù. Wazà pidtemanan te ǥaǥew zin.
PSA 136:5 Pinaaǥi te ketau zin, mibeelan din is langit. Wazà pidtemanan te ǥaǥew zin.
PSA 136:6 Impelastar zin is tanà diyà te ebpekelapew te wahig. Wazà pidtemanan te ǥaǥew zin.
PSA 136:7 Mibeelan din is andew wey vulan. Wazà pidtemanan te ǥaǥew zin.
PSA 136:8 Mibeelan din is andew para meketayew heini emun maandew. Wazà pidtemanan te ǥaǥew zin.
PSA 136:9 Mibeelan din is bulan wey menge vituen su para meketayew heini emun mezukilem. Wazà pidtemanan te ǥaǥew zin.
PSA 136:10 Mibpenhimetayan din is kinekekayan he menge anak he maama te menge tig-Ehipto. Wazà pidtemanan te ǥaǥew zin.
PSA 136:11 Impeǥawas din is menge Israilihanen puun te Ehipto. Wazà pidtemanan te ǥaǥew zin.
PSA 136:12 Impeǥawas din sikandan pinaaǥi te zekelà he ǥehem din. Wazà pidtemanan te ǥaǥew zin.
PSA 136:13 Midtevì din is Daǥat he Meriǥà. Wazà pidtemanan te ǥaǥew zin.
PSA 136:14 Ne zutun mebayà te mid-elangan is impelayun din he menge etew zin. Wazà pidtemanan te ǥaǥew zin.
PSA 136:15 Piru midlened din mulà is hadì diyà te Ehipto wey is menge sundaru zin diyà te Zaǥat he Meriǥà. Wazà pidtemanan te ǥaǥew zin.
PSA 136:16 Migiyahan din diyà te sibsivayan is menge etew zin. Wazà pidtemanan te ǥaǥew zin.
PSA 136:17 Mibpendezeetan din is mekeǥeǥehem he menge hadì. Wazà pidtemanan te ǥaǥew zin.
PSA 136:18 Mibpenhimetayan din is bentuǥan he menge hadì. Wazà pidtemanan te ǥaǥew zin.
PSA 136:19 Midhimetayan din si Sihon, is hadì te menge Amorihanen. Wazà pidtemanan te ǥaǥew zin.
PSA 136:20 Midhimetayan din daan si Og, is hadì te Bashan. Wazà pidtemanan te ǥaǥew zin.
PSA 136:21 Imbeǥey zin is tanè dan diyà te menge etew zin su para maangken dan heini. Wazà pidtemanan te ǥaǥew zin.
PSA 136:22 Heini he tanà naangken te menge Israilihanen he menge suluǥuen din. Wazà pidtemanan te ǥaǥew zin.
PSA 136:23 Netenuzan kiw zin hein kenà meupiya is kebpekesavuk tew. Wazà pidtemanan te ǥaǥew zin.
PSA 136:24 Midlibri kiw zin te kedezaat te menge kuntada tew. Wazà pidtemanan te ǥaǥew zin.
PSA 136:25 Mibeǥayan din te keenen is langun he menge linimbag din. Wazà pidtemanan te ǥaǥew zin.
PSA 136:26 Peselemati is Megbevayà diyà te langit. Wazà pidtemanan te ǥaǥew zin.
PSA 137:1 Nememinuu key ziyà te veyvey te menge wahig diyà te Babilonia he ebpemenineǥew hein netenuzan dey is Zion.
PSA 137:2 Impenanggat dey zà is menge alpa zey ziyà te menge subpang te kayu.
PSA 137:3 Su ibpekanta key te menge mibihag kenami. Midsuǥù key zan te kedlangan kandan. Ke sikandan te, “Kentahi key te kanta he mehitenged te Zion!”
PSA 137:4 Ebmenumenu key te kegkanta te kanta mehitenged te Nengazen diyà te tanà te menge mibihag kenami?
PSA 137:5 Berakat he kenè ku en mewaleng is kewanan he velad ku ke egkelipatan ku is Jerusalem!
PSA 137:6 Berakat he kenà ad mekekaǥi emun kenè ku edtentenuzan wey ed-isipen he iyan ebpekeveǥey kedì te zekelà he kelipey is Jerusalem.
PSA 137:7 Tentenuzi nu, Nengazen, is mibeelan te menge Edomnen hein mid-aǥew te menge tig-Babilonia is Jerusalem. Migkaǥi zan te, “Purungi niw heeyan bengkaǥa.”
PSA 137:8 Sikiyu is menge meǥinged te Babilonia, edezeetan kew! Utew zeyzey is menge etew he ebales keniyu tenged te mibeelan niw ziyà te kenami.
PSA 137:9 Utew zeyzey is egkuwa te menge anak niw ne idrumbag dan diyà te vatu.
PSA 138:1 Ebpeselematan ku sikew, Nengazen, te ebpuun kayi te tivuuk he ǥehinawa ku. Egkanta a te menge idalig kenikew ziyà te etuvangan te zuma he menge ed-ezapen.
PSA 138:2 Edluhud a he edsinaru ziyà te valey nu he edalig kenikew tenged te ǥaǥew nu wey kebmetinumanen nu. Su impeehè nu he sikew wey is lalag nu lavew te langun he menge vutang.
PSA 138:3 Hein mid-umew ku sikew, ne midtavak a kenikew; midlig-enan a kenikew pinaaǥi te zesen nu.
PSA 138:4 Edalig kenikew, Nengazen, is langun he menge hadì kayi te tivuuk he kelibutan su egkezineg dan is menge lalag nu.
PSA 138:5 Egkanta zan mehitenged te mibeelan nu, su zekelà is gehem nu.
PSA 138:6 Minsan lavew ka te langun, Nengazen, ed-isipen nu is menge egkaayuayu. Ne minsan diyè ka te meziyu su metikang ka, netuenan nu is langun he menge vaal te menge mepelevawen.
PSA 138:7 Minsan utew a edlised, ne wazè nu ituǥut he mebpatey a. Midsilutan nu is utew egkengepauk he menge kuntada ku. Ne midlibri a kenikew pinaaǥi te ǥehem nu.
PSA 138:8 Edtumanen nu, Nengazen, is menge saad nu kayi te kediey. Wazà pidtemanan te ǥaǥew nu. Kenè nu pesegdana heini is menge linimbag nu.
PSA 139:1 Nengazen, midsusi a kenikew umbe nekilala a kenikew.
PSA 139:2 Netuenan nu ke keenu a ebpinuu wey edhitindeg. Minsan diyè ka te meziyù netuenan nu is nengetaǥù te isip ku.
PSA 139:3 Egkaahà a kenikew ke edterebahu a wey ke edhimeley a. Netuenan nu is langun he ebeelan ku.
PSA 139:4 Nengazen, minsan kenè e pa ebpekekaǥi, ne netuenan nu en he zaan ke hengkey is egkeǥiyen ku.
PSA 139:5 Diyè ka te peliǥuy ku, ne egkelesaǥan a kenikew pinaaǥi te ǥehem nu.
PSA 139:6 Is kegketueni nu mehitenged kediey ne utew egkein-inuwi; kenè ku heini egkesavut.
PSA 139:7 Hendei e man ebayà para melikayi ku is Mulin-ulin nu? Egkehimu ve he ed-elesan ku sikew?
PSA 139:8 Emun edhendiyà a te langit, ne ziyè ka; emun edhendiyà a te iveyaan, ne ziyè ka zaan.
PSA 139:9 Emun be e zà ebpekelayang ne edlayang a pehendiyà te edsilaan etawa ziyà a ed-ubpà te utew meziyù he ziyà te edsenlepan,
PSA 139:10 ne zutun ka is ed-aǥak wey edtavang kedì.
PSA 139:11 Minsan mebpetambun e pa te merusirem wey minsan meveeli pa he mezukilem heini is kerayag he nekeliǥuy kediey kenà a ebpekeeles.
PSA 139:12 Su minsan is merusirem ne kenà merusirem diyà te kenikew, ne is mezukilem iring ded kerayag te maandew.
PSA 139:13 Nekilala a kenikew su iyan ka mibaal te tivuuk he lawa ku. Iyan ka mibpurma kediey ziyà te ǥetek te iney ku.
PSA 139:14 Edeliǥen ku sikew su egkein-inuwan is kebeeli nu kediey. Egkein-inuwan is menge vaal nu, ne netuenan ku heeyan.
PSA 139:15 Neehè nu is menge tulan ku hein mibpurma a kenikew ziyà te seled te ǥetek te iney ku.
PSA 139:16 Naahà ad kenikew minsan hein wazè e pa mepurma. Is kahabet te menge andew te kegkeuyag-uyag ku ne nekesurat en diyà te libru nu, minsan wazè pa mebpuun is untung ku.
PSA 139:17 He Megbevayà, kenè ku egketegkad is menge ed-isipen nu; utew heini mahabet.
PSA 139:18 Emun ebilangen ku heini ne edhuna pa he mahabet te menge pantad. Te kegkepukew ku, is isip ku ziyà gihapun te kenikew.
PSA 139:19 He Megbevayà, berakat he ebpenhimetayan nu is menge lalung! Berakat he mebpekeziyù kayi te kediey is menge ebpenhimatey te menge etew.
PSA 139:20 Mezaat is menge lalag dan mehitenged kenikew. Heini is menge kuntada nu, undaunda is kedsempita zan te ngazan nu.
PSA 139:21 Nengazen, egkeepesan ku is egkeepes kenikew. Egkeepesan ku is ebpekigkuntada kenikew.
PSA 139:22 Utew ku egkeepesi sikandan; mid-isip ku sikandan he menge kuntada ku.
PSA 139:23 Susiya a kenikew, Megbevayè ku, su para metueni nu is kayi te ǥehinawa ku. Gezami a, su para metueni nu is ed-isipen ku.
PSA 139:24 Ahaa nu ke zuen mezaat he vaal ku, ne eǥaka a ziyà te zalan he ereg he ed-ikulen ku taman te taman.
PSA 140:1 He Nengazen, luwasa a zutun te lalung wey mesipala he menge etew.
PSA 140:2 Ebpelanu zan te mezaat wey layun dan ebulanga is menge etew.
PSA 140:3 Iring te edhereg he uled is dilè dan; is menge lalag dan ne ebpekepesakit iring te hereg te uled.
PSA 140:4 Endilungi a, Nengazen, wey a kenà mesuǥat te menge etew he mesipala he tuyù dan is edezaat kediey.
PSA 140:5 Is menge mepelevawen, mid-endaman e zan te paaǥi he iyan igkeutela zan kedì. Ke và e zà pait, iring te puket he intaan is paaǥi zan te kedhingutela zan kedì.
PSA 140:6 He Nengazen, iyan ka Megbevayè ku. Pemineǥa nu, Nengazen, is kebpehizuhizu ku kenikew.
PSA 140:7 Nengazen he MEGBEVAYÀ, iyan ka mezesen he menluluwas ku. Iyan ka nengalang kedì te timpu te tebek.
PSA 140:8 Nengazen, kenè nu ituǥut diyà te lalung he menge etew is tinguhè dan. Kenè nu mehimuwa he medlampus is tuyù dan, su kela ke mekepezalig dan.
PSA 140:9 Berakat he meuney is menge kuntada ku he nekelingut kedì te mezaat he tuyù dan pezem kediey.
PSA 140:10 Berakat he meuluǥi sikandan te regreg, ne iulug sikandan diyà te menge vudsi ne kenè dan en mekaawà.
PSA 140:11 Berakat ke kenè en mebpedayun kayi te tanà is menge etew he menge tigbutangbutang te zuma. Berakat daan he meumahi te vangkit is menge mesipala he iyan ebpekezezaat kandan.
PSA 140:12 Nengazen, netuenan ku he edlevanan nu is ketenged te menge ayu-ayu; ibeǥey nu kandan is hustu he kukuman.
PSA 140:13 Siguradu he edeliǥen ka te menge metazeng ne ebpengungubpaan sikandan duma kenikew.
PSA 141:1 He Nengazen, ebpengumew-umew a kenikew, ne segugunà a tevangi. Pemineǥa nu heini is kebpengumew-umew ku kenikew.
PSA 141:2 Isipa nu he iring te veyewà heini is ampù ku ziyà te kenikew. Isipa nu is kebeyawa ku te menge velad ku he iring kemahal te mahapun he kebpemuhat.
PSA 141:3 Giyahi nu, Nengazen, is kebpengaǥikaǥi ku su wey a kenà mekekagi te mezaat.
PSA 141:4 Ilikey a te kebpekevaal te mezaat wey te kedtampu te ebeelan te menge lalung. Ilikey a te kebpekivahin te ǥastu zan.
PSA 141:5 Mezawat ku is kedawey wey kedsawey kedì te metazeng he etew; kenè ku haazà mevelivezi su iyan idhimuwa zin dutun is tenged te ǥaǥew zin wey keupiya zin kedì. Iyan, is menge lalung mulà layun ku id-ampù he kenà medlampus is mezaat he menge vaal zan.
PSA 141:6 Emun ibpenimbag en diyà te pangpang is menge edumala kandan, ebpeketuu zan he tutuu is menge lalag ku.
PSA 141:7 Ne zutun egkaǥi zan te, “Ebpekedsusuwey en bes is menge tulan tew ziyà te edlevengan kenitew ne egkeiring heini te menge vatu he ebpemekeǥawas ke egkeeradu.”
PSA 141:8 Umbe, Nengazen he MEGBEVAYÀ, diyan e zà edsarig; ed-aput a ziyà te kenikew, umbe kenè nu ituǥut he egkepatey a.
PSA 141:9 Ilikey a kenikew zuen te menge penuǥes te lalung he menge etew he idhingutel zan kedì.
PSA 141:10 Himuwa nu he iyan sikandan meutel zuen te penuǥes dan, ne mekelikey a mulà dutun.
PSA 142:1 Nengazen, mezesen is ked-umew ku kenikew. Ebpengemuyù a he ikehizu a kenikew.
PSA 142:2 Idtug-an ku kenikew is menge riklamu ku wey is menge kelised ku.
PSA 142:3 Ne emun neewaan ad te perateng, ne heeyan ke zed is ebpekevantey te menge egkengehitavù kedì. Diyà te ibayè ku zuen idtuǥes kedì te menge kuntada ku.
PSA 142:4 Ahaa nu man is nekelingut kedì, wazà midtavang kedì, wazà nengalang kedì, wey wazà neipeng kedì.
PSA 142:5 Ebpengum-umawen ku sikew, Nengazen; iyan ka ebpengalang kedì. Iyan ke zà utew egkinehenglanen ku kayi te kelibutan.
PSA 142:6 Pemineǥa nu is kebuyù ku te tavang diyan te kenikew, su wazè en duma he egkehimu ku. Ilikey a te edtelinguma he edrasey kediey, su memezesen dan kenà siak.
PSA 142:7 Ipeǥawas a kenikew kayi te kegkepirisuwa kedì, wey a mekezalig kenikew. Ne zutun ed-erungut kayi te kediey is menge metazeng tenged te kebpurungi nu kediey.
PSA 143:1 He Nengazen, pemineǥa nu heini is ked-ampù ku kenikew. Dineǥa nu heini is kebpehizuhizu ku kenikew. Tenged te metazeng wey metinumanen ka, ne tevangi a.
PSA 143:2 Peseyluwa a te menge nehimu ku he mezaat is suluǥuen nu. Su wazà minsan hentei he metazeng diyà te etuvangan nu.
PSA 143:3 Nezaag a te menge kuntada ku, ne mibpesipelahan e zan. Ne hein mibpirisu e zan diyà te merusirem, neiring a te minatey he neuǥet dà diyà te penlevengà.
PSA 143:4 Dutun ne naawà is perateng ku ne utew a neherati.
PSA 143:5 Iyan, dutun daan netenuzan ku is nengehimu nu ziyà te nengehuna he timpu. Ne egngunngunuen ku heini is langun,
PSA 143:6 umbe imbayew ku is menge velad ku zuma te ked-ampù he edhenduen te: Nenginahanglan a kenikew Nengazen! Ne iring e en te utew memaza he tanà he egkinahanglan te wahig.
PSA 143:7 Segugunà a tevaka, Nengazen. Naawè en is perateng ku. Kenà a kenikew elesi su kela ke ibpatey ku.
PSA 143:8 Kada meselem, ipetentenuzi nu kedì is kebmahala nu kedì. Su iyan ke zà midseriǥan ku. Ipenuru nu kediey is hustu he paaǥi te kedsunud ku kenikew. Su iyan ke zà ed-empuen ku.
PSA 143:9 Luwasa a, Nengazen, te kedezaat kedì te menge kuntada ku, su iyan ka midhengyuan ku he mebpengalang kedì.
PSA 143:10 Ipenurù nu kedì is paaǥi te kedtuman te egkesuatan nu, su iyan ke man Megbevayè ku. Berakat he is hihizuwen he Mulin-ulin nu iyan megiya kedì pehendiyà te dezeyaan he kebpekesavuk.
PSA 143:11 Luwasa a, Nengazen, su wey ka mezeliǥi. Geina te metazeng ka, luwasa a te kelised ku.
PSA 143:12 Geraa nu is menge kuntada ku tenged te ǥaǥew nu kedì, su suluǥuen e man kenikew.
PSA 144:1 Ereg he edeliǥen is Nengazen he iring te vatu he endilungè ku. Iyan sikandin midlumbad kedì te kebpekidtebek.
PSA 144:2 Iyan sikandin beliǥeǥawen he Megbevayè ku wey melig-en he elesà. Iyan sikandin eputè ku wey menluluwas ku. Iyan sikandin kelasag ku ne ziyà a te kandin ebuyù te pengalang.
PSA 144:3 He Nengazen, hengkey ves is menusiyà? Maan is utew nu sikandin igkeseeng? Menusiyè dà sikandin, maan is kenè nu egkehimu te ed-awà sikandin diyà te isip nu?
PSA 144:4 Is etew, iring dà sikandin te keramag su meǥaan dà egkaawà is untung din, ne is menge andew zin ne iring dà te alung he edlavey zà.
PSA 144:5 He Nengazen, puwasi nu is langit ne vulus ka. Semsama nu is menge vuntud wey med-evel.
PSA 144:6 Gemita nu is menge kilat he iring te panè nu su wey mengekepelaǥuy is menge kuntada ku ne mekedsusuwey zan.
PSA 144:7 Puun diyan te langit, kewaa a kenikew wey luwasa a puun te ǥehem te menge kuntada he lumelengyawà he memezesen su iring dan te meseleg he zalem.
PSA 144:8 Wazà tutuu he egkeǥiyen dan. Ne minsan edsesapà sikandan, ne tarù is egkeǥiyen dan.
PSA 144:9 Egkantahan ku sikew, Megbevayè ku, duma te keduyug te alpa.
PSA 144:10 Kenikew he ketau he mekezaag is menge hadì ne midluwas nu si David te kemetayen.
PSA 144:11 Luwasa a te ǥehem te menge kuntada he lumelengyawà, he kenà egkaǥi te tutuu ne edtarùtarù minsan ebpengulivet.
PSA 144:12 Berakat he is menge anak dey he maama, te vetan-en dan pa ne meiring sikandan te pinemula he mehinuvù. Henduen ded daan is menge anak dey he vahi su iyan maan meiringi zan is menge tukud he mekempet diyà te turuǥan.
PSA 144:13 Berakat he mepenù is menge budiga zey te langun he kelasi te neraǥun. Berakat he med-anak te mahabet is menge kerehidu zey ziyà te vevesukà.
PSA 144:14 Ne mekergahi is menge vaka zey te zekelà he menge pruduktu. Berakat he kenè key en surunga te menge kuntada zey ne kenè key en mevihag. Ne verakat he wazè en maan menge sineǥawan te egkeseeng diyà te menge zalan dey.
PSA 144:15 Utew zeysey is menge etew he egkeiring kayi is ked-ubpè dan. Deyzey is menge etew he nekekilala wey midtuu te tutuu he Megbevayà he Nengazen.
PSA 145:1 Edeliǥen ku sikew, Megbevayè ku he Hadì. Edeliǥen ku sikew te wazà pidtemanan.
PSA 145:2 Edeliǥen ku sikew te kada andew, ne ed-ul-ulahan ku heini te taman te taman.
PSA 145:3 Mekeǥeǥehem ka he Nengazen, umbe ereg ka he edeliǥen. Kenà egketegkad is kegkemekeǥeǥehem nu.
PSA 145:4 Is kada lapis te kevuwazan, ne idsangyew zan is nezumahan te ǥehem he menge vaal nu ziyà te edsunud kandan he menge kevuwazan.
PSA 145:5 Egngunngunuen ku is kegkelavew wey kegkemekeǥeǥehem nu, wey is igkeinuinu he menge vaal.
PSA 145:6 Is menge etew, idsangyew zan is utew egkein-inuwi he menge vaal nu, ne ibpenudtul ku zaan is kegkemekeǥeǥehem nu.
PSA 145:7 Ibpenudtul zan daan is kegkevantug te keupiya nu he wazè din repeng, wey egkanta zan mehitenged te ketazeng nu.
PSA 145:8 Nengazen, hihizuwen ka wey iipengen; beliǥeǥawen wey kenà daan melemu he egkepauk.
PSA 145:9 Nengazen, edtulengezan nu is langun; duen nu hizu te langun he linimbag nu.
PSA 145:10 Ebpekepeselamat kenikew, Nengazen, is langun he linimbag nu; edeliǥen ka te metinumanen he menge etew nu.
PSA 145:11 Ibpenudtul zan is kegkemekeǥeǥehem te ginhedian nu wey is kegkemekeǥeǥehem nu,
PSA 145:12 su wey mesayud is langun he keet-etawan te nezumahan te ǥehem he menge vineelan nu wey is mekeǥeǥehem he ginhedian nu.
PSA 145:13 Is kedhadì nu wazà pidtemanan. Nengazen ka he metinumanen te langun he menge penaad nu, wey veliǥeǥawen ka te langun he linimbag nu.
PSA 145:14 Midtevangan nu is langun he edlised wey midlig-enan nu is langun he meǥuyà.
PSA 145:15 Midsarig diyà te kenikew is langun he uuyag he linimbag, ne mibeǥayan nu sikandan te keuyaǥan dan te timpu he egkinehenglanen dan en.
PSA 145:16 Ne kenè kurang is ibeǥey nu umbe egkengahantey sikandan.
PSA 145:17 Nengazen, metazeng ka, ziyà te langun he paaǥi nu, ne hihizuwen ka ziyà te langun he ebeelan nu.
PSA 145:18 Uvey nu zà, Nengazen, is langun he epengumew-umew kenikew te tinutuuwà.
PSA 145:19 Is menge edtahud kenikew ne ebeǥayan nu sikandan te penganduy zan; ebpemineǥen nu is pengumew-umew zan kenikew, ne edluwasen nu sikandan.
PSA 145:20 Binentayan nu layun is langun he etew he mibmahal kenikew, iyan, edezeetan nu mulà is langun he menge lalung.
PSA 145:21 Edeliǥen ku sikew, Nengazen. Is langun he linimbag nu edalig daan kenikew te wazà pidtemanan.
PSA 146:1 Deliǥa is Nengazen! Ereg he edeliǥen ku is Nengazen.
PSA 146:2 Edalig a kandin seled te tivuuk he untung ku. Egkanta a te kedalig te Megbevayà mintras uuyag e pa.
PSA 146:3 Kenè niw iyan seriǥi is mekeǥeǥehem he menge etew wey minsan hentei, su kenè dan ebpekeluwas keniyu.
PSA 146:4 Ebpekelikù sikandan diyà te tanà ke ebpatey zan en. Ne zutun ebpekeengked sikandan he ebpelanu.
PSA 146:5 Utew zeyzey is etew he iyan edtavang kandin kes Megbevayà he ed-ezapen ni Jacob, ne iyan edseriǥan din is Nengazen he Megbevayè din,
PSA 146:6 su haazà he edseriǥan, ne iyan sikandin kes Nengazen he nenlimbag te langit, tanà, daǥat, wey te langun he taǥù kayi. Iyan heini kes Nengazen he engayan he edseriǥan te wazà pidtemanan.
PSA 146:7 Is kedhukum din ne edapig diyà te menge edèdaaǥen. Wey iyan sikandin ebeǥey te keuyaǥan te langun he egkinahanglan kayi. Ibpelingkawas din is menge vihag,
PSA 146:8 ebpekaahà is menge lakap he ebewian din, midlig-enan din is menge meluya, mibmahal zin is menge metazeng,
PSA 146:9 ebentayan din is menge langyew, edtevangan din is menge ilu wey menge valu he vahi, iyan, ebengkaǥen din mulà is paaǥi te menge lalung.
PSA 146:10 Sikiyu is menge meǥinged diyà te Zion, is Nengazen he Megbevayè niw iyan sikandin kes edhadì te wazà pidtemanan. Deliǥa is Nengazen.
PSA 147:1 Deliǥa is Nengazen! Utew meupiya is kegkanta te menge idalig te Megbevayè tew. Ne meupiya heini su zait man iyan sikandin he edeliǥen.
PSA 147:2 Mid-umanan tukuza te Nengazen is inged he Jerusalem; wey midtiǥum din umana is menge kevuwazan ni Israel he nevihag.
PSA 147:3 In-awè din is seeng te egkengeseeng; mibewian din is menge palì dan.
PSA 147:4 Kandin he ketau ke pira is kezakel te menge vituen ne migngezanan din is kada sevaha kandan.
PSA 147:5 Utew iyan mekeǥeǥehem is Nengazen, ne is ketau zin ne kenà egketegkad.
PSA 147:6 Impeketikang din is menge egkengaayuayu. Iyan, is menge lalung mulà ne mid-ey-eyazan din te edezaat sikandan.
PSA 147:7 Kentahi niw is Nengazen duma te kebpeselamat diyà te kandin. Ipezaǥing niw is alpa para te Megbevayè tew.
PSA 147:8 Midilungan din is langit te menge ǥapun, ne mibpeuzanan din is dini te kelibutan, wey mibpetuvuan din is menge vuntud te menge sagbet.
PSA 147:9 Iyan sikandin mibeǥey te egkeenen te menge langgam dini te lumpad. Iring din daan te menge pispis te uwak ke egkinahanglan te egkeenen dan.
PSA 147:10 Is igkelipey zin ne kenà iyan is kezesen te menge kudà etawa is meǥaan he menge sundaru,
PSA 147:11 kekenà, iyan is edtahud kandin wey edsarig te ǥaǥew zin.
PSA 147:12 Sikiyu is menge meǥinged diyà te Zion he inged he Jerusalem, deliǥa niw is Nengazen he iyan Megbevayè niw.
PSA 147:13 Su midlig-enan din is menge pultahan te inged niw. Ne midtuvazan kew zin.
PSA 147:14 Mibeǥayan kew zin te kelinew ziyan te ed-ubpaan niw. Ne midhantey kew zin te meupiya he egkeenen.
PSA 147:15 Ebmenduan din is kelibutan, ne segugunà heini edtuman.
PSA 147:16 Midtembunan din is tanà te ayis ne iring heini te meputì he malung, ne ingkayar zin is pinu he ayis he henduen be te avu.
PSA 147:17 Impeuzan din te ayis he iring te zezeisey he vatu. Ne wazà minsan hentei he ebpeketigker te keǥenew kayi.
PSA 147:18 Ne mibmenduan din heini ne nengetunew heini. Impepengeramag din ne midtudà is wahig.
PSA 147:19 Impahayag din is menge lalag din, menge sulunuzen he ibpesunud din, wey menge suǥù din diyà te menge tig-Israel he menge kevuwazan ni Jacob.
PSA 147:20 Wazè din heini ul-ulaha ziyà te zuma he menge nasyun; wazè dan mulà haazà metueni is menge suǥù din. Deliǥa is Nengazen!
PSA 148:1 Deliǥa is Nengazen! Sikiyu is diyan te langit, deliǥa niw is Nengazen!
PSA 148:2 Deliǥa niw sikandin, sikiyu is langun he menge velinsuǥuen, he menge sundaru zin diyà te langit.
PSA 148:3 Deliǥa niw sikandin, andew, bulan, wey menge vituen.
PSA 148:4 Deliǥa niw sikandin, kinetikangan he langit wey is wahig diyà te zivavew.
PSA 148:5 Medalig dan is langun te Nengazen! Su pinaaǥi te kebmandù din, nelimbag sikandan is langun.
PSA 148:6 Wazà pidtemanan is kebpekesavuk dan diyà te midsevukan din kandan, ne kenè en heini egkahalin is kebpekesavuk dan.
PSA 148:7 Deliǥa niw is Nengazen, sikiyu is langun kayi te kelibutan, menge dezekelà he langgam he ziyà te zaǥat, wey is langun diyà te kinezeleman en te zaǥat.
PSA 148:8 Deliǥa niw te Nengazen, sikiyu is menge kilat, menge ǥiyew, menge ǥapun, wey mevendes he keramag he edtuman ke edsuǥuen din.
PSA 148:9 Deliǥa niw is Nengazen, sikiyu is menge vuntud, menge vuvungan, wey menge kayu he zuen din beǥas wey wazà,
PSA 148:10 langun he menge langgam: he leew wey is ayam, wey zuma pa he kelasi te langgam he ebpenanap wey ebpemenlayang.
PSA 148:11 Deliǥa niw zaan is Nengazen, sikiyu is menge hadì, menge upisyal, menge ebpemendumala, wey is langun he etew zini te kelibutan;
PSA 148:12 menge menguhed man, wey is menge meǥurang en, wey ke iyan be menge vatà.
PSA 148:13 Langun te sikandan ne medalig te Nengazen su iyan sikandin lavew te langun. Iyan sikandin lavew he mekeǥeǥehem te langun he ziyà te langit.
PSA 148:14 Midlig-enan din wey mibeǥayan din te zengeg is metinumanen he menge etew zin, he iyan is menge tig-Israel he utew zin pelanggà. Deliǥa is Nengazen!
PSA 149:1 Deliǥa is Nengazen! Megkanta kew te veǥu he kentahan para te Nengazen. Deliǥa sikandin diyà te ketiǥuman te menge etew zin he metinumanen.
PSA 149:2 Medlipey kew is menge tig-Israel; ikelipey niw is midlimbag keniyu. Medlipey kew is menge etew ziyà te Zion tenged te hadì niw.
PSA 149:3 Deliǥa niw sikandin duma is kedsayew wey kedtukar te tamburin wey menge alpa.
PSA 149:4 Su igkelipey te Nengazen is menge etew zin; mibeǥayan din te zengeg is kenà memepelavawen pinaaǥi te kebpekezaag dan.
PSA 149:5 Medlipey is menge etew he mepezumdumahan te Megbevayà tenged te kebpekezaag dan; megkanta zan te kegkelipey minsan diyà te menge hizeǥaan dan.
PSA 149:6 Kinahanglan he igkulahì dan is kedalig dan te Megbevayà dutun te egawed sikandan te meǥarang he menge ispada,
PSA 149:7 te kebales wey kedsilut te menge etew ziyà te zuma he menge nasyun,
PSA 149:8 te kebekusa te menge hadì wey menge pengulu zan,
PSA 149:9 su iyan kedsiluti kandan he insuǥù te Megbevayà. Ne para heini te kegkezeliǥi te langun he menge etew te Megbevayà. Deliǥa is Megbevayà!
PSA 150:1 Deliǥa niw is Nengazen! Deliǥa niw is Megbevayà diyà te valey zin. Deliǥa niw sikandin he ziyà te langit, is melig-en he ubpeey zin.
PSA 150:2 Deliǥa niw sikandin tenged te nezumahan te ǥehem he menge vaal zin. Deliǥa niw sikandin tenged te wazà ebpekerepeng te kegkemekeǥeǥehem din.
PSA 150:3 Deliǥa niw sikandin pinaaǥi te kebpezaǥing te menge vudyung. Deliǥa niw sikandin pinaaǥi te zaǥing te menge alpa wey menge lira.
PSA 150:4 Deliǥa niw sikandin pinaaǥi te menge tamburin wey kedsayew. Deliǥa niw sikandin pinaaǥi te zuma pa he instrumintu he zuen menge kuwirdas wey menge pulalà.
PSA 150:5 Deliǥa niw sikandin pinaaǥi te mezaǥing he menge simbal.
PSA 150:6 Is langun he uuyag medalig te Nengazen. Deliǥa is Nengazen!
PRO 1:1 Iyan heini sikan is menge erubasa ni Solomon he anak ni David te hadì diyà te Israel.
PRO 1:2 Heini he menge erubasa, ebpekeveǥey te ketau wey ebpekemansu kenikew, ne egkesavut nu is mezalem he menge lalag he ebpekeveǥey te ketau.
PRO 1:3 Ebpekemansu heini kenikew para mehimu ka he uluwanen, he ebpengungubpaan te hustu, metazeng, wey mezait he menge ulaula.
PRO 1:4 Ebpkeveǥey heini te ketau te wazè din ketau, wey ebpekeveǥey heini te keuluwanen te menge vetan-en te ked-isip-isip ke hengkey is hustu.
PRO 1:5 Pinaaǥi te kebpemineg kayi, ne egkeumanan pa is ketau te menge uluwanen wey egkegiyahan is duen din menge netuenan,
PRO 1:6 su wey zan mesavut is ibpesavut te menge erubasa, menge sempità, wey menge peentukà te menge metau.
PRO 1:7 Is kedtahud te Nengazen iyan ebpuunan te hustu he ketau, piru is tulebung he etew kenè din egkesuatan is hustu he ketau, ne kenè din daan egkesuatan he metulid is mezaat he vetasan din.
PRO 1:8 Mama, pemineǥa nu is sambag ku ne kenè nu iniyuǥi is penurù te ǥinikanan nu.
PRO 1:9 Is penurù dey ebpekeveǥey kenikew te meupiya he vetasan iring te kuruna he menge vulak etawa velieg he ebpekeveǥey kenikew te mekempet he kedezagwey wey zengeg.
PRO 1:10 Mama, kenè ka peuwit te menge mekesesalà.
PRO 1:11 Emun ke sikandan te, “Duma ka kenami su ed-ayan kiw, ne edhimetayan tew is edsaǥad minsan pa te wazà mekesalà.
PRO 1:12 Is edsanggar ziyà te kenitew ne kenè tew en edsemaan te ǥehinawa.
PRO 1:13 Su emun egkepatey tew sikandan egkaangken tew is mahal he menge azen dan su wey mepenù is menge valey tew te menge azen he tinakew.
PRO 1:14 Duma ka kenami ne emun egketiǥayun kiw en, ne ebehinen tew is tinakew tew.”
PRO 1:15 Mama, kenè ka zuma te menge etew he iring dutun, kekenà, likayi nu sikandan.
PRO 1:16 Su utew sikandan meǥaan he ebaal te mezaat wey ebunù te etew.
PRO 1:17 Wazà pulus te penuǥes te tagbis emun netuenan en dutun te menge tagbis he edtuǥesen nu sikandan.
PRO 1:18 Ne iring kayi is tulebung he menge etew: ne iring dà te iyan dan edhimatey te lawa zan etawa iring dà te iyan dan ed-eyanan is keugelingen dan.
PRO 1:19 Iyan heini egkehitavù te menge etew he mid-angken te ketiǥeyunan pinaaǥi te mezaat he paaǥi. Haazà is paaǥi, iyan kes dalan pehendiyà te kemetayen.
PRO 1:20 Is ketau, iring te sevaha he etew he edwali te mezaǥing diyà te menge zalan, menge pelasa, menge mirkadu, wey ziyà te menge pultahan te menge inged. Ke sikandin te,
PRO 1:22 “Sikiyu is menge wazè din hanew, taman te taman en be he iring kew keniyan? Sikiyu is menge mesudì, taman te taman en be is kegkelipey niw te kedsudì? Sikiyu is menge tulebung, taman te taman en be he kenè kew egkesuat he mebmetau?
PRO 1:23 Mebpezumazuma kew te kedawey ku keniyu. Guntaan, egkeǥiyen ku keniyu is egkeisip ku; ibpetuenan ku keniyu is egkeǥiyen ku keniyu.
PRO 1:24 Tenged te kenè kew ebpezumazuma te ked-umew ku wey kenà a keniyu edseǥipaan,
PRO 1:25 ne tenged te mibey-anan niw is menge sambag ku wey kenè kew egkesuat he ebpepenurù,
PRO 1:26 bà ku zà sikiyu ed-engiti emun ebpekebmereǥen kew; bà ku zà sikiyu ed-un-undaha zutun te kemereǥenan wey mekahandekhandek he egkeulaula niw he iring te eribpures.
PRO 1:28 Ne ed-umawen a keniyu, iyan, kenà ad edtavak; ebpen-ahaan a keniyu, iyan, kenà a keniyu egketuredu.
PRO 1:29 Su geina te kenè kew egkesuat he ebpenuruen wey wazè niw kedtahud te Nengazen.
PRO 1:30 Wazè niw seǥipaa is menge sambag ku wey wazè niw itetenged is kedawey ku keniyu,
PRO 1:31 ne egkeraǥun niw is mezaat he menge beǥas te vaal niw, wey is menge mezaat he pelanu niw.
PRO 1:32 Su is kewewalì te etew he wazè din hustu he ketau iyan ibpatey zin, ne is kebpeeyehey te tulebung iyan ebpekezezaat kandin.
PRO 1:33 Iyan, is ebpemineg kedì, dezeyaan is kebpekesavuk din. Ne kenà sikandin egkehandek he egkekeizan.”
PRO 2:1 Mama, tentenuzi nu is menge penurù he idsuǥù ku kenikew ne kenè nu lipati.
PRO 2:2 Pemineǥa nu is menge penurù he ebpekeveǥey te ketau wey te meupiya he kedsavut.
PRO 2:3 Peniguduwi nu he mekaangken ka te kedsavut,
PRO 2:4 iring te kebpeniguduwi nu kebpen-ahaa te selapì etawa nekeeles he ketiǥeyunan.
PRO 2:5 Ne emun egkeveelan nu heini, egkesavut nu is kehuluǥan te kedtehuza te Nengazen, wey egkesavut nu is ketau mehitenged kandin.
PRO 2:6 Su is Nengazen iyan ebeǥey te ketau. Ne iyan daan sikandin ebpuunan te keuluwanen wey kedsavut.
PRO 2:7 Egkelesaǥan din wey edteǥenahan din te kezeeǥan is menge metazeng is menge ulaula,
PRO 2:8 su wey sikandan is menge metazeng wey menge metinumanen, ne egkepengelangan din sikandan dutun te menge ebeelan dan.
PRO 2:9 Emun ebpemineg ka kedì, egketuenan nu ke hengkey is meupiya he ed-ul-ulahan: is hustu, metazeng, wey mezait he menge ulaula.
PRO 2:10 Ne egkehimu ka he uluwanen, ne ebpekeveǥey heini kenikew te kelipey.
PRO 2:11 Egkehimu he kutè nu is hustu he kedsavut nu,
PRO 2:12 ne iyan ebpekepelikey kenikew te mezaat he ebeelan wey te menge etew he egkaǥi te sayep.
PRO 2:13 Heini he menge etew mid-awà diyà te metazeng he kebpengungubpaan, ne iyan mid-ikul zan is menge ulaula pehendiyà te merusirem.
PRO 2:14 Igkelipey zan is kebaal te mezaat, ne igkelangan dan is kelelalung he ebeelan dan.
PRO 2:15 Mezaat is ulaula zan; ne midsuwey zan puun te hustu he zalan.
PRO 2:16 Pinaaǥi te ketau, ebpekelikey ka wey ka kenà metintal emun edtintalen ka te vahi he edsalàsalà pinaaǥi te menge lalag he ebpeketintal.
PRO 2:17 Haazà he vahi nekidsuwey te esawa zin hein betan-en pa sikandin; wazè din en isipa is meupiya he menge penangdù din diyà te Megbevayà.
PRO 2:18 Benar iyan, emun edhendiyè ka te valey zin ne iring te iyan nu ebeyaan is kemetayen nu. Ne is ked-ikul nu te zalan pehendiyà te valey zin, ne iring te iyan nu ed-ikulen is dalan pehendiyà te iveyaan.
PRO 2:19 Wazà ebpekehendiyà te kandin he ebpekelikù. Is ebpekehendiyà te kandin, ne kenè en ebpekeikul te zalan pehendiyà te ubpeey te menge uuyag.
PRO 2:20 Umbe, iringi nu is kebpengungubpaan te etew he metazeng; ikula nu is metazeng he menge ulaula zan.
PRO 2:21 Su iyan ebpekeubpà kayi te tanè tew is menge metazeng; ne iyan kenà egkaawà kayi is wazà duen igkesewayi.
PRO 2:22 Iyan, sikan is ebpemen-ulaula te mezaat wey meluiven ne id-awà. Iring sikandan te sagbet he ebezuten.
PRO 3:1 Mama, kenè nu lipati is menge penurù ku kenikew; tipiǥi nu ziyà te gehinawa nu is menge suǥù ku,
PRO 3:2 su pinaaǥi kayi edluǥeyazan ka te untung wey ebmeuswaǥen ka.
PRO 3:3 Kenè nu ewaa ziyà te kenikew is kebpekid-uunungen wey is kegkemetinumanen; ke và dà belieg ne ipurung nu ivevelieg, ne ke và dà litra ne isurat nu ziyà te ǥehinawa nu.
PRO 3:4 Emun ed-ul-ulahan nu heini, egkezeliǥan ka ne ebpekepenunuat ka te Megbevayà wey menge etew, ne meupiya is kedtengtengi zan kenikew.
PRO 3:5 Purung ka sarig te Nengazen ne kenè nu iyan seriǥi is kenikew he keugelingen he ketau.
PRO 3:6 Minsan hengkey is ed-ul-ulahan nu ne isipa nu is Nengazen, ne iyan sikandin metau wey nu iyan meikul is metandang he zalan.
PRO 3:7 Kenè nu isipa he utew ke en uluwanen, kekenà, tehuza nu is Nengazen, ne kenè nu ul-ulaha is mezaat.
PRO 3:8 Iring heini te tambar he ibmeupiya te lawa nu.
PRO 3:9 Beǥayi nu te zengeg is Nengazen pinaaǥi te kedhelaza nu te ketiǥeyunan nu wey te egkehuna he veǥas te langun he menge pinemula nu.
PRO 3:10 Ne emun ed-ul-ulahan nu heini, ne egkepeuluwan is budiga nu, ne edrepey te inumen is menge teleǥuey nu.
PRO 3:11 Mama, kenè nu isipa he mezaat is kebmansu te Nengazen wey kenè nu ikeepes is kedawey zin.
PRO 3:12 Su ebmensuwen te Nengazen is menge mibpelanggè din iring te ebeelan te sevaha he amey ziyà te anak din he pelanggè din.
PRO 3:13 Utew zeyzey is etew he zuen din ketau wey kedsavut.
PRO 3:14 Su zekelè pa is pulus kayi kenà is selapì wey vulawan,
PRO 3:15 ne mahal pa heini kenà is menge elahas, ne wazà minsan hengkey he egkesuatan nu he ebpekerepeng kayi.
PRO 3:16 Is ketau ne ebpekepeluǥayad te untung nu wey ebpekeveǥey zaan te ketiǥeyunan nu wey zengeg.
PRO 3:17 Ebpekeuǥup heini te kebpengungubpaan nu wey te meupiya he kebpekesavuk nu.
PRO 3:18 Utew zeyzey is etew he edtulung ebpepenurù su wey mebmetau; is ketau ebpekelipey kandin wey ebpekepeluǥayad te untung din.
PRO 3:19 Pinaaǥi te ketau wey keuluwanen, midlimbag te Nengazen is tanà wey langit, ne nemenlepew is menge serebseb ne nehimu is uzan pinaaǥi te ǥapun.
PRO 3:21 Mama, tipiǥi nu is ketau wey keuluwanen nu. Ne kenè nu heini mehimuwa he maawà diyà te kenikew,
PRO 3:22 su ebpekeveǥey heini kenikew te meluǥayad wey mekempet he ked-ubpà.
PRO 3:23 Ebpengungubpaan ka he wazà ebpekekaid kenikew ne kenè ka egkemenu.
PRO 3:24 Emun edhizeǥè ka ne kenè ka egkahandek wey meupiya zaan is kedlipezeng nu.
PRO 3:25 Umbe, kenè ka ereg he egkehandek emun egketik-ew egkehitavù is mekahandekhandek he hitavù, etawa edezeetan is menge lalung,
PRO 3:26 su ebpekesarig ka he iyan ebantey kenikew is Nengazen, wey ka kenà mekeizi.
PRO 3:27 Tevangi nu is kinahanglan he edtevangan sumalà is egkehimu nu.
PRO 3:28 Ne emun duen ebpekitavang ne kenè nu en kèkeeselema pa is kedtevangi nu kandin emun duen en igketavang nu kandin.
PRO 3:29 Kenè ka mebpelanu te ebpekezezaat te sengeeetew he uvayè nu he midsarig kenikew.
PRO 3:30 Kenè nu tebeka is sengeeetew emun wazà mezaat he neveelan din diyà te kenikew.
PRO 3:31 Kenè ka mesina te etew he mesipala ne kenè nu zaan iringi is menge ulaula zin.
PRO 3:32 Su egkeepesan te Nengazen is etew he mesinupaken, iyan, ebpekid-emiǥu mulà sikandin te etew he metazeng.
PRO 3:33 Edrewakan te Nengazen is pemilya te etew he mezaat is menge vaal zin, iyan, edtuvazan din mulà is pemilya te etew he metazeng.
PRO 3:34 Edsudien din is menge mesudì, ne edtuvazan din is kenà mepelevawen.
PRO 3:35 Is menge uluwanen, ne egkezeliǥan, piru is menge tulebung ne egkepeel-elezan.
PRO 4:1 Menge anak, purungi niw pemineǥa is menge penurù te amey niw, su wey zuen niw metueni.
PRO 4:2 Meupiya is penurù ku keniyu umbe kenè niw iselikwey.
PRO 4:3 Siak, hein batè e pa, is budtung he anak te ginikanan ku, pinelanggà a te iney ku.
PRO 4:4 Mibpenurù a te amey ku. Migkeǥiyan e zin te, “Ipurung nu itaǥù diyà te isip nu is menge penurù ku. Layun nu tumana is menge suǥù ku su wey mebmeluǥayad is untung nu.
PRO 4:5 Peniguduwi nu he maangken nu is ketau wey kedsavut. Kenè nu lipati is menge lalag ku kenikew, ne kenè nu heini suwayi.
PRO 4:6 Kenè nu iselikwey is ketau, kekenà, mahala nu heini su iyan heini ebantey wey ed-elima kenikew.
PRO 4:7 Is ketau etawa is kedsavut iyan utew impurtanti he kinahanglan te etew, umbe penigudu ka wey nu maangken heini minsan maamin pa is langun he azen nu.
PRO 4:8 Mahala nu utew wey tipiǥi nu is ketau, ne pinaaǥi kayi egkevantug ka.
PRO 4:9 Iring heini te kuruna he menge vulak he ebpekeveǥey kenikew te kekempet wey zengeg.”
PRO 4:10 Mama, pemineǥa nu wey tumana nu is menge egkeǥiyen ku su wey ka luǥeyazi te untung.
PRO 4:11 Mibpenurù ku en sikew ke ebmenmenuwen is kebpengungubpaan he egkezumahan te ketau wey kebpurungpurung.
PRO 4:12 Emun edtumanen nu heini, wazà egkehimu he velavag te kebpengungubpaan nu, wey wazà mezaat he egkehitavù kenikew.
PRO 4:13 Pekezeseni nu te egawed is penurù ku; kenè nu ituǥut he maawà diyà te kenikew, pekeventayi nu su iyan heini untung nu.
PRO 4:14 Kenè nu iringi is menge vaal te menge lalung.
PRO 4:15 Likayi nu heini ne pedeyuna nu is metazeng he kebpengungubpaan.
PRO 4:16 Su kenè dan ebpekelipezeng emun kenè dan pa ebpekevaal te mezaat etawa ebpekependelahig te zuma.
PRO 4:17 Is mezaat he menge ulaula wey is kebpesipala, impeiring dan te keenen wey inumen.
PRO 4:18 Is kebpengungubpaan te menge etew he metazeng ne igkepetug-iring te aney en he kedsilà te andew ke egkepawà he ebmerayag taman te meudtu.
PRO 4:19 Ne is kebpengungubpaan mulà te menge etew he mezaat is menge ulaula zan, igkepetug-iring te utew merusirem, ne kenè dan egketuenan ke hengkey is hinungdan te kegkezeeti kandan.
PRO 4:20 Mama, purungi nu pemineǥa is menge penurù ku kenikew.
PRO 4:21 Tentenuzi nu heini, ne tipiǥi nu heini ziyà te ǥehinawa nu.
PRO 4:22 Su ebpekeveǥey heini te meupiya he kedlelawa wey meluǥayad he untung te edawat kayi.
PRO 4:23 Purungi nu pekeventayi is diyà te isip nu, su ke hengkey is ed-is-isipen nu, iyan daan egkeveelan nu.
PRO 4:24 Iselikwey nu is mezaat wey is mahawag he kegkaǥi.
PRO 4:25 Tengteng ka ziyà te egkehunaan wey ziyà te menge meupiya he menge vutang.
PRO 4:26 Ikula nu is hustu he zalan su para wazà mezaat he egkeulaula kenikew.
PRO 4:27 Pengungubpaan ka he metazeng; likayi nu is kebaal te mezaat.
PRO 5:1 Mama, purungi nu pemineǥa is menge lalag ku he egkezumahan te ketau,
PRO 5:2 su wey nu ikepaahà is hustu wey kedlalag he egkezumahan te ketau.
PRO 5:3 Is lalag te vahi he mengungumpadi meemis pa te teneb, ne is kegkaǥi zin ebpekevihag iring te idhamham he lana te ulibu.
PRO 5:4 Piru ziyà te egkehuziyanan is igketaǥak din diyà te kenikew iyan is keseengan wey kemereǥenan.
PRO 5:5 Emun eduma ka kandin ne edumahan ke zin diyà te lugar te menge minatey; is dalan he ed-ikulen din ne ebpekepehendiyà te kemetayen.
PRO 5:6 Wazè din seǥipaa is dalan pehendiyà te untung. Bulegkù is dalan he ed-ikulen din, ne wazè din heini metueni.
PRO 5:7 Umbe, menge anak, pemineǥa a keniyu wey pezumdumahi.
PRO 5:8 Likayi niw is bahi he mengungumpadi, minsan is ked-uvey zà diyà te ǥemawan te valey zin ne kenè niw ul-ulaha.
PRO 5:9 Su emun ebeelan niw heini, egkaawà is dengeg niw ne egkaangken heini te zuma, ne edhimetayan kew te menge etew he wazà kegkehizu.
PRO 5:10 Ne is langun he ketiǥeyunan niw wey is duma pa he hineǥuan niw egkuwaan te menge lumelengyawà.
PRO 5:11 Ne ebpekezag-es kew emun edserupatey kew en, ne egkeǥuǥus en utew is lawa niw.
PRO 5:12 Ne ebpekekaǥi kew te, “Geina iyan te igkeepes ku zà is kebmensuwa kedì; geina iyan te midsupak ku is indawey kedì.
PRO 5:13 Wazè ku pemineǥa is ebpemenurù kedì.
PRO 5:14 Umbe, iyan nepengkusan ku is hapit a egkepeel-elezi ziyà te etuvangan te nevurun he menge etew.”
PRO 5:15 Iring te ed-inum ka te wahig he ebpuun te sekezuwè nu, iyan nu zà daan hileveti is esawa nu.
PRO 5:16 Kenè nu ituǥut he egkehimu ka he iring te serebseb he minsan hentei zà he vahi is ebpekekuwa wey ebpekeinum duen.
PRO 5:17 Kinahanglan he para zà heini keniyu te teleesawa; ne kenè niw heini peǥezami te zuma.
PRO 5:18 Umbe, lipey ka pinaaǥi te esawa nu, ne verakat he tuvazi sikandin te Megbevayà.
PRO 5:19 Mekempet sikandin wey ebpekahalin te ǥehinawa su iring is kekempet din te nati he selazeng, umbe zeyzey ke mewili ka kandin wey layun nu egkeisip is kebmahal zin.
PRO 5:20 Mama, kenè nu iyan isipa is bahi he mengungumpadi. Kenè nu iyan egkesuati is esawa te sengememaama.
PRO 5:21 Su egkaahà te Nengazen is langun he menge vaal nu. Ne minsan hendei ka ebpevayà ne egkeehè ke zin.
PRO 5:22 Is mezaat he menge ulaula te lalung he etew iring te litag he ebpekehiket kandin.
PRO 5:23 Ebpatey sikandin tenged te kebpezumdumahi zin te mezaat he suat te lawa zin. Is ketutulebungi zin iyan ed-uwit kandin pehendiyà te penlevengà.
PRO 6:1 Mama, emun nenangdù ka he iyan ka ebayad te utang te sengeeetew wey mibpesarig ka he iyan ka ebpenavak te televaken te zuma,
PRO 6:2 ne egkezeetan ka zutun te penangdù nu,
PRO 6:3 ne zuen nu en televaken diyà te zuma. Piru iyan heini ul-ulaha nu su wey ka melibri zutun te penangdù nu ziyà te kandin: Hendiyè ka te kandin ne hangyù ka he tevangi ke zin he mekelingkawas ka zutun te televaken nu.
PRO 6:4 Kenè ka lipezeng wey himeley taman te ebpekelingkawas ka.
PRO 6:5 Libriya nu is keugelingen nu iring te selazeng etawa tagbis he nekaawà he nelitaǥan te mengenganup.
PRO 6:6 Sikiyu is menge peǥulen, ahaa niw wey istudyuwi niw ke mibmenumenu te menge lemetik is kedlaǥud te igkeuyag dan, para mehimu kew he uluwanen.
PRO 6:7 Minsan wazè dan egalen etawa pengulu he ebmandar kandan,
PRO 6:8 iyan, edtiǥum sikandan te egkekaan dan timpu te ǥulavung wey tiraǥun su para zuen dan mekaan emun tipenguzan.
PRO 6:9 Sikiyu is menge peǥulen, edtulung kew zè be edliplipezeng? Keenu kew en be ed-enew?
PRO 6:10 Hidhizeǥè kew, liplipezeng kew, pahareyharey kew,
PRO 6:11 ne egketik-ew egkehitavù diyà te keniyu is kewewezai he iring te kebpekeuma te neǥumeenan he tulisan.
PRO 6:12 Is menge etew he wazè dan pulus wey is mezaat is menge ulaula zan, ne iyan dà idsuǥuksuǥuk dan is ebpemenudtul te tarù.
PRO 6:13 Ebpemengendat sikandan wey ebpeuy-uyawà pinaaǥi te menge velad wey paa zan para te kedlimbung te zuma.
PRO 6:14 Tenged te kebmesinupaken dan, layun dan ebpelanu te kebaal te mezaat, wey iyan sikandan ebpemuunà te samuk.
PRO 6:15 Umbe, egketik-ew egkehitavù diyà te kandan is kezeetan; segugunè dan ebpekehendiyà te kezeetan ne wazè en paaǥi wey zan melibri.
PRO 6:16 Duen pitu he kelasi te etew he egkeepesan wey edumutan te Nengazen:
PRO 6:17 is menge gelbuwen, is menge teruen, is menge memumunù,
PRO 6:18 is menge ebpelanu te mezaat, is menge elistu te kebaal te mezaat,
PRO 6:19 is menge ebpemenistiǥus te tarù, is menge edretem te menge kesamuk diyà te zuma zan.
PRO 6:20 Mama, sunuza nu is menge suǥù wey ibpenurù te ginikanan nu kenikew.
PRO 6:21 Ipemula nu heini ziyà te ǥehinawa nu su wey kenè nu heini melipati.
PRO 6:22 Emun edhipanew ka ne iyan heini egkehimu he ǥiya nu, ne emun edlipezeng ka ne iyan heini egkehimu he vantey nu, ne emun egkepukew ke en ne iyan heini edsambag kenikew.
PRO 6:23 Su heini is menge suǥù dan wey menge penurù iring te sulù he ed-anlag diyà te kenikew. Ne is menge kedawey zan kenikew, ebpeketandang te vetasan nu, ebpekeuǥup wey ebpekepeluǥayad te untung nu.
PRO 6:24 Ne pinaaǥi kayi ebpekelikey ka te vahi he mengungumpadi wey kenè ka egkeuwit te mekevivihag he menge lalag din.
PRO 6:25 Kenè ka petintal tenged te kekempet din. Kenè ka peuwit te mekevivihag he menge mata zin.
PRO 6:26 Su is kebpekidhilavet te vahi he ebelegyà te zengeg din, utew ebpekepepubri zutun te edhilavet, piru kedhilavet te esawa te zuma, ne ebeyazan nu te untung.
PRO 6:27 Is etew he edsepipi te hapuy, egketutung is bisti zin;
PRO 6:28 is edhipanew ziyà te vaǥa, egketutung is paa zin.
PRO 6:29 Ne iring din ded daan is maama he egkevut te vahi he zuen din en esawa su kenà ebpeseyluwen, kekenà, edsilutan sikandin.
PRO 6:30 Kenà edsudien te menge etew is tekawen emun iyan ibpenakew zin te keenen su ǥeina te egkeumes en sikandin.
PRO 6:31 Iyan, emun egkezekepan sikandin, ne ibpevayad sikandin te kepipitu edtekepa is bali zutun te midtakew zin, minsan pa ke pinaaǥi kayi egkeamin is langun he azen din.
PRO 6:32 Is etew he edhilavet te zuen din esawa ne kenà metau he ed-isip te hustu. Iyan dà sikandin ed-uney edezaat te lawa zin.
PRO 6:33 Ebpesekitan sikandin ne egkepeel-elezan taman te taman.
PRO 6:34 Ne is ebpengelikud he teǥiesawa zutun te vahi he edhilevetan, ne utew egkererengiti, ne wazè din en kegkehizu emun ebelesan din is midsalàsalà diyà te kandin.
PRO 6:35 Kenè din en edewaten is ibayad diyà te kandin ne kenè en sikandin egkepeypeyuan minsan sengemenu pa kezekelà is ibpayùpayù kandin.
PRO 7:1 Mama, layun nu tumana is menge lalag ku ne kenè nu lipati is menge suǥù ku.
PRO 7:2 Tumana nu is menge suǥù ku ne edluǥeyazan ka te untung. Ne pekeventayi nu is menge penurù ku iring te ked-urami nu te mata nu.
PRO 7:3 Ipemula nu heini ziyà te isip nu wey nu kenà melipati.
PRO 7:4 Is ketau, isipa nu he iring te etevey nu, ne is kedsavut, isipa nu he iring te utew nu emiǥu.
PRO 7:5 Tenged kayi egkelikayan nu is bahi he edsalàsalà te esawa zin, wey te mekevivihag he menge lalag dan.
PRO 7:6 Diyà te valey ku zuen timpu he midsulew a,
PRO 7:7 ne neehè ku is menge vetan-en he menge maama he wazè dan pa utew pereg, ne nesusi ku he is sevaha kandan egketalengtaleng.
PRO 7:8 Midhipanew sikandin pehendiyà te suyuk he zutun kes ed-ubpaan te sevaha he vahi he mengungumpadi.
PRO 7:9 Mahapun en dutun ne malù en ebmerusirem.
PRO 7:10 Ne midsinuǥung sikandin te vahi he mibivisti te iring te visti te vahi he ebelegyà te zengeg din, ne zuen din mezaat he pelanu.
PRO 7:11 Berèbaan heini he vahi ne wazè din keelezan. Ne layun en sikandin wazà diyà te valey zin.
PRO 7:12 Ed-ayan sikandin diyà te menge kelesada, etawa ziyà te kada suyuk, wey ziyà te menge pelasa.
PRO 7:13 Migkepkepan din sikan is maama, ne midhezekan din. Ne wazè en sikandin menawànawà is egkaǥi te,
PRO 7:14 “Midtuman ku ǥeina is penangdù ku ziyà te Nengazen he ebpemuhat a, umbe zuen usa ziyà te valey.
PRO 7:15 Umbe, mibpen-ehè ku sikew, ne meupiya su neehè ku sikew.
PRO 7:16 Daan ku en he mibpurungi te edempas is hizeǥaan ku te dikulur he manggad he linu he ebpuun diyà te Ehipto.
PRO 7:17 Mibpehemutan ku en te menge pehemut he mira, aloe, wey sinamun.
PRO 7:18 Ne hendiyè ki en, su ebpehulizà ki; ebpemulpulusan ta is kebpeked-eriǥè ta taman te egkepawà,
PRO 7:19 su is esawa ku ne wazà diyà te valey. Meziyù is midhipenawan din.
PRO 7:20 Dekelà is selapì he mid-uwit din ne edlavey pa is dezuwa he simana ne human sikandin ebpekeulì.”
PRO 7:21 Pinaaǥi te keungangen te menge lalag din neuwit din haazà is maama.
PRO 7:22 Segugunà sikandin miduma zutun te vahi, ne iring sikandin te tudu he vaka he eduma te edtuyuk kandin pehendiyà te lugar he zutun edlepaa, wey iring te selazeng he ebpetandang en diyà te litag
PRO 7:23 he zutun edhimetayi pinaaǥi te panà. Iring daan sikandin te sevaha he tagbis he edhendiyè en te litag, wazè din metueni he kemetayen en bes is egkepengkusan din.
PRO 7:24 Umbe, ǥuntaan menge anak, purungi niw pemineǥa is egkeǥiyen ku.
PRO 7:25 Likayi niw is bahi he iring dutun, ne kenè kew peuwit kandin.
PRO 7:26 Mahabet en he menge maama is nengezeetan tenged kandin.
PRO 7:27 Emun ebpehendiyè kew te valey zin, ne henduen be te mid-ikul niw is dalan pehendiyà te kemetayen.
PRO 8:1 Is ketau wey is meupiya he kedsavut iring te etew he edwali.
PRO 8:2 Edhithitindeg sikandin diyà te metikang he menge lugar ziyà te kilid te zalan, diyà te menge suyuk,
PRO 8:3 wey ziyà te menge ǥemawan te inged, wey ziyà te menge veyeey. Ne ebpengumew sikandin te,
PRO 8:4 “Sikiyu is langun he menge etew, edlelaǥan ku sikiyu.
PRO 8:5 Sikiyu is menge wazè din utew hanew, penigudu kew wey kew mebmetau. Sikiyu is menge tulebung, gemita niw is kedsavut niw.
PRO 8:6 Pemineg kew su zekelà is pulus wey hustu heini is egkeǥiyen ku.
PRO 8:7 Egkaǥi a te tutuu, su egkeepesan ku is kegkaǥi te mezaat.
PRO 8:8 Tutuu is langun he egkeǥiyen ku; wazà tarù wey limbung he menge lalag ku.
PRO 8:9 Is etew he zuen din kedsavut, ne utew zin egkekeleduwi is langun he menge lalag ku, ne wazà igkesawey zin duen.
PRO 8:10 Ne isipa niw he lavew pa he mahal is penurù ku kenà te pelata, ne isipa niw zaan he lavew pa he mahal is ketau kenà te pinilì he vulawan.
PRO 8:11 Su is ketau mahal pa kenà is mahalen he menge vatu, ne wazà minsan hengkey he egkesuatan te etew he ebpekerepeng kayi.
PRO 8:12 Siak, is ketau, metau he ed-isip-isip ke hendei is hustu etawa kenà, wey netuenan ku ke ebmenmenuwen te ed-angken is ketau wey kedsavut.
PRO 8:13 Is langun he edtahud te Nengazen, igkeepes dan is mezaat. Egkeepesan ku is kegkegelbuwen, is kegkemepelevawen, is mezaat he menge vetasan, wey is winalì he menge lalag.
PRO 8:14 Metau a he edsambag, duen ku hustu he ketau. Duen ku meupiya he kedsavut wey ǥehem.
PRO 8:15 Pinaaǥi kediey ebpekezumala is menge hadì, wey edhimu is menge pengulu te metazeng he menge kesuǥuan.
PRO 8:16 Ne pinaaǥi zaan kediey ebpekezumala is langun he metazeng he ebpemendumala wey menge upisyal.
PRO 8:17 Ebmahalen ku is mibmahal kediey, ne is ebpen-ahà kediey egketuredu e zin.
PRO 8:18 Ebpekeveǥey a te ketiǥeyunan, dengeg, keuswaǥan wey kezeeǥan he kenà egkahanew.
PRO 8:19 Is keupiyaanan he egkekuwa te etew he nekaangken kedì, mahal pa kenà is kuruna he vulawan etawa pelata.
PRO 8:20 Edsunuzen ku is metazeng wey is hustu.
PRO 8:21 Is mibmahal kediey ebeǥayan ku te ketiǥeyunan; ebpenuen ku is teleǥuey zan te ketiǥeyunan.
PRO 8:22 Puun pa te puunà, daan e en dutun te wazè pa limbaǥa te Nengazen is langun.
PRO 8:23 Impelastar e zin en puun pa te puunà. Daan e en dutun te wazè pa is kelibutan: is daǥat, is menge serebseb, is menge vuntud, is menge vuvungan, is menge vevesukà, wey minsan pa is menge eliyavuk.
PRO 8:27 Daan e en hein midlimbag din is langit. Daan e en hein insavuk din is mid-elangan te langit wey tanà.
PRO 8:28 Daan e en hein midhimu zin is gapun, wey is menge ulu te wahig diyà te kinezizeleman,
PRO 8:29 hein midteltalan din is egketemanan te zaǥat su wey kenà medlapey, wey hein insavuk din is menge pundasyun te kelibutan.
PRO 8:30 Hein mibpelanu wey mibpundar is Nengazen te langun kayi, diyà a is ketau te avey zin. Iyan a igkelipey zin kada andew, ne layun a melipayen diyà te etuvangan din.
PRO 8:31 Ingkelipey ku is kelibutan he midlimbag din, wey is menusiyà.
PRO 8:32 Umbe ǥuntaan menge anak, pemineǥa a keniyu, su utew zeyzey is edsunud te menge lalag ku.
PRO 8:33 Pemineǥa niw is menge penurù ku wey kew mehimu he uluwanen; ne kenè niw heini iselikwey.
PRO 8:34 Utew zeyzey is etew he layun ebantey wey edtaǥad su wey mekepemineg kedì.
PRO 8:35 Is etew he ebpen-ahà kedì ne ebpeketuredu te untung, ne igkesuat sikandin te Nengazen.
PRO 8:36 Piru is etew he wazà meketuredu kedì, edezeetan din is keugelingen din. Ne is langun he egkeepes kedì, ne iyan dan egkesuatan is kemetayen.”
PRO 9:1 Is ketau, iring te sevaha he etew he mibevaley te zekelà wey mekempet he valey.
PRO 9:2 Ne nengemuran sikandin. In-andam din is menge keenen wey menge inumen.
PRO 9:3 Ne midsuǥù din is menge suluǥuen din he menge vahi te kedhendiyà te metikang he menge lugar zutun te inged su wey zan ikepesayud heini:
PRO 9:4 “Sikiyu is menge wazà hanew wey kedsavut, mid-imbita kew te kegkaan te ǥastu.
PRO 9:5 Hendiyè kew wey kew mekekaan te keenen he in-andam ku, ne wey kew zaan mekeinum te vinu he inteǥana ku.
PRO 9:6 Kenè niw ipedayun is kedtinulebung niw ne ebmeupiya is ked-ubpè niw, ne pengungubpaan kew zuma is kedsavut.”
PRO 9:7 Emun edewayen nu is etew he mesudì, bà ke zin dà ed-insultuwi. Ne emun edewayen nu is lalung he etew, bà ke zin dà edsumpalita wey ed-ebusari.
PRO 9:8 Kenè nu zewaya is etew he mesudì su và ke zin dà egkeepesi. Iyan nu zewaya is etew he uluwanen su ebmahalen ke zin.
PRO 9:9 Penurua nu is etew he uluwanen ne ed-iseg pa is ketau zin. Penurua nu is etew he metazeng ne ed-iseg pa is netuenan din.
PRO 9:10 Tehuza nu is Nengazen wey ka mekaangken te ketau. Kilelaa nu is Waǥas he Megbevayà ne egkeangken nu is meupiya he kedsavut.
PRO 9:11 Pinaaǥi te ketau ebmeluǥayad is untung.
PRO 9:12 Emun uluwanen ka, ne ebpekeveǥey kenikew te keupiyaanan, piru emun edsudien nu is ketau, ibpaantus nu zà is gehinawa nu.
PRO 9:13 Is ketutulebungi iring te sevaha he vahi he wazè din betasan, wazà memansu wey wazè din ketau.
PRO 9:14 Ebpimpinuu sikandin diyà te ǥemawan te valey zin, diyà te vangkù diyà te metikang he menge lugar zutun te inged.
PRO 9:15 Ne ed-umawen din is menge etew he edsaǥad he ebpemenhendiyà te menge terebahu zan.
PRO 9:16 Ke sikandin te, “Sikiyu is wazè din pereg wey kedsavut, hendini kew.”
PRO 9:17 “Is tinakew he wahig utew meupiya he ed-inumen, ne is keenen he id-eles is kegkeena zuen ne utew metaam.”
PRO 9:18 Piru wazà mesayud heini he menge etew he is edhendiyà te kandin ebpatey. Is nekehendiyè en te kandin diyè en te iveyaan.
PRO 10:1 Iyan heini menge erubasa ni Solomon: Is anak he uluwanen ebpekeveǥey te kelipey te ǥinikanan din, iyan, is anak he tulebung ebpekeveǥey te seeng kandan.
PRO 10:2 Is ketiǥeyunan he nekuwa te mezaat he paaǥi kenà ebpekeveǥey te keupiyaanan. Is metazeng he kebpengungubpaan ebpekelibri kenikew te kemetayen.
PRO 10:3 Kenà idtuǥut te Nengazen he mevitil is menge metazeng, iyan, kenè din ebmehimuwen he mekuwa te menge lalung is egkesuatan dan.
PRO 10:4 Is kepepeǥul te etew egkehimu he iyan hinungdan te kegkeey-eyuwi zin. Ne is keǥied te etew egkehimu he iyan hinungdan te kebpekaangken din te zekelà he ketiǥeyunan.
PRO 10:5 Is anak he edezerengdeng emun timpu te tiraǥun uluwanen sikandin, iyan, is anak he và dà edliplipezeng emun timpu te tiraǥun, ebpekeveǥey te keelezan.
PRO 10:6 Edtuvazan te Megbevayà is metazeng he etew, iyan, is menge lalag te lalung he etew ebpekezezaat.
PRO 10:7 Is metazeng he etew, egkehimu sikandin he tuvad te zuma ne layun sikandin egketenuzi, piru is lalung he etew egkelipatan en.
PRO 10:8 Is uluwanen he etew, ebpezumdumahan din is menge suǥù, iyan, is etew he sumalè en is ebpengeǥiyen din, ne kezeetan is egkepengkusan din.
PRO 10:9 Is etew he metazeng meziyù te kezeetan, piru is etew he ebaal te mezaat egketuenan is salè din.
PRO 10:10 Is etew he limbungan ebpekeveǥey te samuk, ne is etew he sumalè en is ebpengeǥiyen din egkezeetan.
PRO 10:11 Is menge lalag te etew he metazeng ebpekeveǥey te keupiyaanan diyà te zuma, piru is menge lalag te lalung he etew ebpekezezaat.
PRO 10:12 Is kegkeepes ebpeketuvù te kesamuk, piru is etew he zuen din kebmahal ne ebpekepesaylu te langun he menge sayep.
PRO 10:13 Duen menge meupiya he penurù he egkekuwa ta ziyà te menge lalag te etew he metau, iyan, is engey ereg he ebmensuwen etawa edsilutan.
PRO 10:14 Is menge uluwanen ebpenigudu pa wey meumani is ketau zan, piru is menge tulebung edtulung egkaǥi te ebpekezezaat kandan te kenà egkeuǥet.
PRO 10:15 Is menge sepian iyan kutè dan is ketiǥeyunan dan, ne is menge ayu-ayu, iyan ebpekezezaat kandan is kewewezai.
PRO 10:16 Is suhul te etew he metazeng iyan is meupiya wey meluǥayad he untung, piru silut mulà is egkeraǥun te lalung he etew.
PRO 10:17 Is etew he ebpezumazuma te menge penurù, ebpekaangken te meupiya wey meluǥayad he untung, piru is etew he kenà ebpemineg te menge penurù egketazin.
PRO 10:18 Teruen is etew he id-eles din is kegkepauk din, ne tulebung is etew he pereituk.
PRO 10:19 Is etew he verak melemu ebpekesalà. Piru is uluwanen he etew egketuenan din te ked-eǥen is dilè din.
PRO 10:20 Is menge lalag te metazeng he etew mahal iring te pelata, piru is isip te lalung he etew wazè din pulus.
PRO 10:21 Is lalag te metazeng he etew ebpekeveǥey te keupiyaanan diyà te mezakel he menge etew, piru is menge tulebung ebpemematey tenged te kekurang te kedsavut dan.
PRO 10:22 Ebpekepesepian te etew is kedtuvazi kandin te Nengazen, ne kenà heini egkekuwa pinaaǥi te subra he kebpenigudu.
PRO 10:23 Is igkelipey te tulebung iyan is kebaal te mezaat, piru is igkelipey te etew he zuen din kedsavut iyan is kebpengungubpaan duma is ketau.
PRO 10:24 Iring te is igkeherati te etew he mezaat is menge ulaula zin, ne egkelaus egkehitavù diyà te kandin, is etew he metazeng, egkekuwa zin is edtinguhaan din.
PRO 10:25 Emun ebpekeuma is menge penggezam te ked-ubpà he iring te vagyu, egkehanew is lalung he etew, piru is etew he metazeng kenà egkewaleng, edhitindeg he melig-en.
PRO 10:26 Iring te sukà he ebpekengingilu te ngipen, wey is evel ebpekepeluhà te mata, ne is peǥulen he etew igkererengiti zaan te edsuǥù kandin.
PRO 10:27 Is kedtahud te Nengazen ebpekepeluǥayad te untung, piru mevavà is untung te lalung he etew.
PRO 10:28 Kelipey is egkeperateng te etew he metazeng, iyan, is ebperetengen te etew he mezaat is menge ulaula zin, ne kenè din egkekuwa.
PRO 10:29 Is kedsunud te menge suǥù te Nengazen iyan iliyan te menge metazeng, iyan, is menge lalung he edsupak kayi ne egkengezeetan mulà.
PRO 10:30 Is menge etew he metazeng, ebpedayun is ked-ubpè dan, iyan, is menge etew he mezaat is menge ulaula zan, ne kenà ebpekepedayun is ked-ubpè dan kayi te tanà.
PRO 10:31 Is menge lalag te metazeng he etew ebpekeveǥey te ketau, iyan, is ebpengeǥiyen te etew he limbungan ne kenà ibpepedayun.
PRO 10:32 Is metazeng, egketuenan din ke hengkey is dait he egkeǥiyen, iyan, is menge etew he mezaat is menge ulaula, ne winalì dà is egketuenan dan.
PRO 11:1 Igkeepes te Nengazen is limbung he paaǥi te kedtimbang, piru iyan din igkesuat is kenà kedlimbung.
PRO 11:2 Is ebpelavew ne egkepeel-elezan sikandin, piru is kenà mepelevawen egkehimu he uluwanen.
PRO 11:3 Is etew he metazeng, egketuenan din ke hengkey is ereg he ebeelan din su hustu man is paaǥi zin, piru is etew he edlimbung, egkezeetan su kenà hustu is paaǥi zin.
PRO 11:4 Kenà ebpulus diyà te kenikew is ketiǥeyunan emun iyan en kebpatey nu, iyan, is ketazeng mulà, ebpekelibri kenikew te kemetayen.
PRO 11:5 Is ketazeng te etew he wazà duen igkesewayi, iyan ebpekepelemu te ked-ubpè din, ne is mezaat he ulaula te etew ne iyan ebpekezezaat kandin.
PRO 11:6 Is metazeng he kebpengungubpaan te etew iyan hustu he ebpekelibri kandin, piru is mezaat he penganduy te etew he meluiven ne ebpekezezaat kandin.
PRO 11:7 Emun ebpatey en is menge etew he lalung, ne egkaawà is perateng dan; is menge penganduy zan egkehimu he wazè dan pulus.
PRO 11:8 Edlibriyen te Megbevayà te kelised is metazeng he etew, piru kenè din mulà edlibriyen is lalung.
PRO 11:9 Edezeetan te menge etew he wazà medtuu te Megbevayà is duma zan pinaaǥi te menge ebpekezezaat he ebpengeǥiyen dan, iyan, egkelibri mulà is metazeng he menge etew pinaaǥi te kegkeuluwanen dan.
PRO 11:10 Ed-ugyab te kegkelipey is menge meǥinged diyà te inged dan emun ed-uswag is menge metazeng he etew; igkelipey zaan te menge meǥinged dutun emun ebpatey is menge etew he mezaat is menge ulaula.
PRO 11:11 Pinaaǥi te kedtuvazi te metazeng he menge etew ed-uswag is inged, iyan, pinaaǥi te menge lalag te menge etew he mezaat is menge ulaula, egkezeetan is inged.
PRO 11:12 Is etew he wazè din utew kedsavut mesudì te zuma zin, iyan, is etew he metau he edsavut, ne kenà mulà mesudì.
PRO 11:13 Is etew he pereituk, kenà egkeseriǥan su edtudtulen din is kenà duen ibpetudtul, iyan, is etew he metazeng, egkeseriǥan mulà su kenè din edtudtulen is kenà dait he edtudtulen.
PRO 11:14 Egkezaag te tebek is nasyun he wazà duen ebpekepenurù ke hengkey is hustu he ed-ul-ulahan, iyan, ebpekezaag mulà is nasyun he mahabet is metau he edsambag ke hengkey is hustu he ed-ul-ulahan.
PRO 11:15 Is etew he ebpesarig te utang te zuma he etew ne meniǥù en he ebpekedsendit, piru is etew he kenà ebpesarig te zuma ebpekelikey te selenditan.
PRO 11:16 Telehuzen is bahi he meupiya is ulaula zin. Piru kenà telehuzen is mevurut he maama su ketiǥeyunan dà is egkekuwa zin. Is etew he peǥulen egkaayuayu, piru is etew he meǥied edsepian mulà.
PRO 11:17 Is etew he metinevangen, iring te iyan din edtevangan is keugelingen din, ne is mesipala, iring te iyan din ebpesipelahan is keugelingen din.
PRO 11:18 Is lalung he etew, kunaan din ke meupiya is suhul kandin, iyan, meupiya mulà is suhul te etew he meupiya is menge ulaula zin.
PRO 11:19 Meluǥayad is untung te etew he metazeng, iyan, is etew he kenà ed-engked he ebaal te mezaat, kemetayen is egkepengkusan din.
PRO 11:20 Egkeepesan te Nengazen is menge etew he iyan dan ed-isipen is mezaat, iyan, igkelipey zin mulà is menge etew he wazà igkesawey te menge ulaula zan.
PRO 11:21 Siguradu he edsilutan is menge etew he mezaat is menge ulaula zan, iyan, kenà mulà edsilutan is menge metazeng.
PRO 11:22 Is kekempet te vahi he tulebung, wazà pulus diyà te kandin; iring dà te vulawan he inggalunggalung te vavuy.
PRO 11:23 Meupiya is rimeǥas te tinguhà te etew he metazeng, piru igkepauk mulà is tinguhà te lalung.
PRO 11:24 Duen etew he ibpemeǥey zin dà is ketiǥeyunan din, iyan, nasì ed-iseg is kegketiǥayun din, ne zuen daan utew subra is kegkenuǥun din te azen din, iyan, nasì egkaawà diyà te kandin is menge azen din.
PRO 11:25 Is kelelaǥan he etew, ed-uswag sikandin, ne is edtavang te zuma zin, edtevangan daan sikandin te zuma zin.
PRO 11:26 Edrewakan te menge etew is etew he idsekel zin is keuyaǥan, iyan, ebpenubtuvazan dan mulà is andam he ebelegyà te keuyaǥan su wey metevangi is duma.
PRO 11:27 Is etew he meupiya is tuyù din, meupiya is isip te menge etew ziyà te kandin, iyan, is etew he mezaat is tuyù din, mezaat daan is ed-ul-ulahan te menge etew ziyà te kandin.
PRO 11:28 Is etew he edsarig te ketiǥeyunan din, egkeulug iring te zahun he egkepugpug, piru is metazeng, ed-uswag iring te melambeg he pinemula.
PRO 11:29 Is etew he ed-sinamuk diyà te keugelingen din he pemilya, ne wazà egkepupulus din, ne is menge tulebung, egkehimu zà he suluǥuen te menge metau.
PRO 11:30 Is rimeǥas te menge ulaula te etew he metazeng, igkepetug-iring te kayu he ebpekeveǥey te untung, ne is ed-ul-ulahan te etew he metau ibpenurù din diyà te menge etew is paaǥi te hustu he kebpengungubpaan.
PRO 11:31 Ne zini te kelibutan egkezawat te menge metazeng is bales te meupiya he menge vaal zan, ne lavew pa he ebpekezawat te vales te mezaat he menge vaal zan is menge etew he kenà edtuu te Megbevayà wey menge mekesesalà.
PRO 12:1 Is etew he egkesuat he ibperangka ziyà te kandin is sayep din egkesuat he egkehimu he uluwanen, iyan, is etew he paglung ne egkeepes emun egkeǥiyen diyà te kandin is menge sayep din.
PRO 12:2 Egkehizuwan te Nengazen is meupiya he etew, iyan, edsilutan din mulà is ed-isip te mezaat.
PRO 12:3 Kenà iyan ibmelig-en te etew is mezaat he menge ulaula, piru is etew he metazeng iring te kayu he midtuaneb is dalid din.
PRO 12:4 Is bahi he egkezeliǥan tenged te meupiya he menge vaal zin, ne zengeg sikandin te esawa zin, piru is bahi he mekeeled-eled is menge ulaula zin, ne iring sikandin te vaus he midtuvù diyà te peka te esawa zin.
PRO 12:5 Hustu is ed-is-isipen te etew he metazeng, iyan, limbung mulà is idsambag te etew he mezaat is menge ulaula zin.
PRO 12:6 Is menge lalag te lalung he etew, igkepetug-iring te etew he ed-ayan su wey mekevunù su pinaaǥi zutun egketuvù is samuk, ne is menge lalag te etew he metazeng, igkepetug-iring mulà te etew he edlaǥuy te mid-eyanan su pinaaǥi zutun egkehusey is egketuvù he samuk.
PRO 12:7 Is menge etew he lalung edezeetan ne wazè en egkesamà kandan, iyan, is etew he metazeng ebpedayun mulà is kevuwazan din.
PRO 12:8 Egkezeliǥan is etew pinaaǥi te ketau zin, piru is etew he egketultulebung, edsudien sikandin.
PRO 12:9 Deyzey pa is etew he ed-isipen din he minus is pid-etawan din, he ebpekeveǥey te suhul te suluǥuen din, kenà te etew he ed-isipen din he lavew is pid-etawan din, piru edlised su wazè din egkekaan.
PRO 12:10 Is metazeng he etew, ed-elimahan din is menge uyaǥen din, piru is ketulanged te etew he mezaat is menge ulaula zin, ebpekezezaat su seligkep dà.
PRO 12:11 Is mevasuk, ne layun dekelà is keuyaǥan din, piru sikan is etew he kenà utew metau he ed-isip ke hengkey is hustu, kenè din egkenuǥunan is timpu he egkeusik.
PRO 12:12 Is etew he lalung, iyan din layun egkesuati is kebaal te mezaat, umbe kenà melig-en is kebpekesavuk din, piru is metazeng mulà, melig-en iring te kayu he mezalem is nesenevan te menge zalid din.
PRO 12:13 Is mezaat he kegkaǥikaǥi te mezaat he etew iyan ebpuunan te samuk, iyan, is metazeng he etew ebpekelikey mulà te samuk.
PRO 12:14 Is meupiya he menge lalag wey meupiya he menge ulaula, ne meupiya zaan is rimeǥas din.
PRO 12:15 Is etew he tulebung, kenà ebpemineg te sambag su kunaan din ke hustu en is paaǥi zin, iyan, ebpemineg mulà te sambag is etew he uluwanen.
PRO 12:16 Is tulebung he etew, emun ed-insultuwan segugunà egkepauk, iyan, is etew he uluwanen kenè din edseǥipaan is ked-insultuwi kandin.
PRO 12:17 Is kenà teruen he tistiǥus, hustu is ebpengeǥiyen din diyà te hukmanan, iyan, is tarù he tistiǥus, tarù is kandin he ebpengeǥiyen.
PRO 12:18 Is kenà binentayan he kegkaǥi, iring te lembitan su ebpekepalì te ǥehinawa, iyan, is menge lalag he mibpurungan is-isipa ne ebpekevey te keupiyaanan.
PRO 12:19 Is menge lalag he tutuu kenà egkaawà te wazà pidtemanan, iyan, is lalag he tarù meǥaan dà egkahanew.
PRO 12:20 Limbung is egketaǥù diyà te ǥehinawa te etew he iyan ed-isipen din is kebaal te mezaat, iyan, kelipey mulà is egketaǥù diyà te ǥehinawa te etew he ebpen-ahà te melinew he kebpekesavuk.
PRO 12:21 Wazà ebpekekaid te etew he metazeng, iyan, samuk mulà is egkeperateng te menge etew he mezaat is menge ulaula zan.
PRO 12:22 Egkeepesan te Nengazen is teruen, piru igkelipey zin mulà is kenà menge teruen.
PRO 12:23 Kenà ebpehivantug is etew he uluwanen mehitenged te netuenan din, piru is menge tulebung, ibpezalig dan mulà is tinulebung he menge vaal zan.
PRO 12:24 Is etew he meǥied egkehimu he pengulu, iyan, is etew he peǥulen, egkehimu zà mulà he uripen.
PRO 12:25 Is kegkeipeng ne ebpekeveǥey te seeng, iyan, is meupiya he lalag, ebpekeveǥey te kelipey.
PRO 12:26 Is metazeng he etew ebpekegiya te emiǥu zin, piru ebpeketazin mulà is lalung he etew.
PRO 12:27 Is peǥulen he etew, kenè din egkekuwa is egkesuatan din, iyan, edsepian mulà is etew he meǥied.
PRO 12:28 Emun ebpengungubpaan ka he metazeng, pedayun ka he ed-ubpà wey egkelibri ka te kemetayen.
PRO 13:1 Is anak he uluwanen, ebpezumazuma te kebmensuwa kandin te amey zin, piru is anak he sumpalit, ne kenà ebpemineg he edewayen.
PRO 13:2 Is etew he meupiya is kebpengaǥikaǥi zin, ne meupiya is ibales kandin, piru is etew he meluiven ne edezeetan.
PRO 13:3 Is etew he ebenteyanan din is kebpengaǥikaǥi zin, ne iring te iyan din ebentayan is keugelingen din, piru sikan is kenè din ebenteyanan is kebpengaǥikaǥi zin, edezeetan din is keugelingen din.
PRO 13:4 Emun peǥulen is sevaha he etew, duen pezem egkesuatan din, ne kenè din egkekuwa heini, piru emun meǥied sikandin, egkekuwa zin is subra pa te egkesuatan din.
PRO 13:5 Is etew he metazeng, igkeepes din is kedtarùtarù, iyan, is etew he mezaat is menge ulaula zin, mekeeled-eled mulà is menge lalag din.
PRO 13:6 Is meupiya he menge ulaula, iyan bantey te menge metazeng, piru is mezaat he menge ulaula, iyan ebpuew te menge mekesesalà.
PRO 13:7 Duen etew he uvag kun sepian sikandin, iyan, wazè din ketiǥeyunan. Ne zuen daan uvag kun pubri, iyan, dekelà is ketiǥeyunan din.
PRO 13:8 Is sepian egkevelukasan din is untung din, iyan, wazà edhulgà te etew he egkeey-eyuwan.
PRO 13:9 Is kerayag te menge metazeng ebpurung edsiǥa, iyan, is sulù te ebpemen-ulaula te mezaat ne egkeevukan mulà.
PRO 13:10 Samuk dà is egketuvù pinaaǥi te kebpelavew. Ne is etew he metau, ebpesambag sikandin.
PRO 13:11 Is selapì he melemu is paaǥi te kegkekuwaa zuen, meǥaan dà egkahanew, iyan, ed-uswag mulà is selapì he mereǥen is paaǥi te kegkekuwaa zuen.
PRO 13:12 Is kenà kegkeengkena te etew te penganduy zin ne ebpekezezaat te ǥehinawa zin, piru is etew he naangken din is penganduy zin ne ebpekelig-en wey ebpekelipey kandin.
PRO 13:13 Is etew he kenà ebpezumazuma te ibpenurù, iyan edsuǥù kandin he merasey, piru is etew he ebpezumazuma te suǥù, ebpekehendiyà mulà te keupiyaanan.
PRO 13:14 Is ibpenurù te etew he uluwanen, iring te kedtudà te wahig he ebpekeveǥey te untung, su pinaaǥi zutun, egkesenggilahan ta is ebpekepemevavà te umur ta.
PRO 13:15 Edtehuzen is etew he meupiya is ked-isip-isip din. Piru is etew he kenà edtuman te hustu, ne iring sikandin te ed-ikul ziyà te zalan he vetuwen.
PRO 13:16 Is etew he metau he ed-isip-isip ke hendei is hustu etawa kenà, ed-is-isipen din dèpa, ne human din ebeeli heini, piru is lalung mulà kenè din en ed-is-isipen, umbe ibpeehè din iyan is kelelalung din.
PRO 13:17 Is menunudtulà he kenà egkeseriǥan ebpekeveǥey te rirù, iyan, is menunudtulà he egkeseriǥan ebpekeveǥey mulà te kelinew.
PRO 13:18 Is etew he kenà egkesuat he ebpenuruen, iyan egkepengkusan din is egkepeey-eyuwan wey egkepeel-elezan, iyan, egkezeliǥan mulà is etew he ebpekeventayan din is idawey kandin.
PRO 13:19 Utew ta igkelipey emun egkekuwa ta is utew ta egkesuati, iyan, kenà mulà egkesuat he ed-iniyug te mezaat is menge tulebung.
PRO 13:20 Is etew he uluwanen layun ebpekiduma te iring din he uluwanen, iyan, ebpekebmereǥen mulà is etew he layun ebpekiduma te tulebung.
PRO 13:21 Ebpekeuma is ebpekezezaat te mekesesalà, piru is menge metazeng ne ebelesan te meupiya.
PRO 13:22 Is ketiǥeyunan te etew he metazeng ne egkepengevilin te menge apù din, iyan, is azen te mekesesalà, iyan ebpekaangken duen is menge metazeng.
PRO 13:23 Dekelà pezem he keuyaǥan is egkekuwa ziyà te tanà te egkengeey-eyuwan, piru kenè dan egkepulusan heini tenged te kenà metazeng is ebeelan te zuma.
PRO 13:24 Wazè nu pelenggaa is anak nu emun kenè nu ebmensuwen, wazè nu heini pelenggaa. Emun pelanggè nu sikandin, edtulizen nu is mezaat he betasan din.
PRO 13:25 Kenà ebitilen is menge metazeng, iyan, ebitilen mulà is kenà menge metazeng.
PRO 14:1 Is bahi he uluwanen, ebpurungan din is pemilya zin, iyan, is tulebung mulà he vahi edezeetan din is kandin he pemilya.
PRO 14:2 Is kedtinazeng, ne paaǥi te kedtehuza te Nengazen, piru is kenà kebpengungubpaan te hustu, ne paaǥi te kedsudia kandin.
PRO 14:3 Is menge ebpengeǥiyen te tulebung he etew, iyan ebpekezezaat kandin, piru is ebpengeǥiyen te uluwanen, iyan egkehimu he pengalang din.
PRO 14:4 Emun wazà ayam he igkeeradu ne wazè daan taǥù te budiga su pinaaǥi te zesen te ayam ebmeluag is terebahu ta ne zekelà is egkeraǥun ta.
PRO 14:5 Is kenà teruen he tistiǥus kenà edlimbung, iyan, is tarù he tistiǥus, ebpengaǥi zaan te tarù.
PRO 14:6 Is etew he sumpalit, kenà egkehimu he uluwanen, iyan, is etew he uluwanen, melemu zà mulà egketau.
PRO 14:7 Likayi nu is etew he tulebung su kenà ebpekeveǥey te ketau is menge lalag din.
PRO 14:8 Is ketau te etew he metau he ed-isip-isip te ed-ul-ulahan din ke hendei is hustu wey kenà, ne iyan ebeǥey kandin te keuluwanen ke hengkey is ebeelan din, piru is ketutulebungi te menge tulebung, ne ebpekelimbung kandin.
PRO 14:9 Kenè en ebeliyen te menge tulebung is salè dan, iyan, is menge metazeng he etew, ne meupiya mulà is kebpengungubpaan dan; egkesuatan dan he ebpekepenunuat sikandan te Megbevayà.
PRO 14:10 Iyan ke zà nesayud te utew nu kegkelipey etawa kegkeseeng.
PRO 14:11 Edezeetan is pemilya te etew he mezaat is menge ulaula zin, piru ipeuswag is pemilya te ebpengungubpaan te hustu.
PRO 14:12 Duen dalan he kunaan te etew ke iyan hustu he zalan, iyan, is egkepengkusan dutun ne iyan is kemetayen.
PRO 14:13 Egkehimu he id-eles ta is mezaat he ǥehinawa ta pinaaǥi te ked-engit, iyan, emun ebpekepasad ka he ed-engit mesakit gihapun is gehinawa nu.
PRO 14:14 Is etew, ne egkezawat din is bales te mibeelan din, meupiya etawa mezaat.
PRO 14:15 Is etew he wazè din utew hanew, edtuu te minsan hengkey zà duen; is etew he metau, ne ed-is-isipen din ke hendei is meupiya etawa mezaat ne ebentayan din is kedlangkad din.
PRO 14:16 Is etew he uluwanen, ne ed-empingan din is keugelingen din ne edlikey sikandin te samuk, piru is tulebung, melemu egkepauk ne ebeyveyanan din is hustu.
PRO 14:17 Is etew he melemu egkepauk ebpekevaal te tinulebung. Is etew he metau te kebpekelimbung din, ne egkukuntedahan te menge zuma zin.
PRO 14:18 Is etew he wazè din utew pereg, egkezawat din is rimeǥas te ketutulebungi zin, ne is etew he layun din ebpekeventayi is ed-ul-ulahan din, egkevantug sikandin tenged te ketau zin.
PRO 14:19 Ebpekezunghuy wey ebpekepehizuhizu ziyà te menge metazeng is menge etew he mezaat is menge ulaula zan.
PRO 14:20 Is etew he egkeey-eyuwan, minsan is siringan din, ne kenà edsegseǥipà kandin, iyan, mahabet mulà is emiǥu te sepian he etew.
PRO 14:21 Is etew he edsudì te zuma zin, ne ebpekesalà, iyan, utew zeyzey is etew he metinevangen te kinahanglan he edtevangan.
PRO 14:22 Is etew he ebpelanu te mezaat, ebpekevaal te sayep, iyan, is etew he meupiya is ebpelenuwen din, ebmahalen wey ebpezumdumahan sikandin te zuma he menge etew.
PRO 14:23 Emun edterebahu ki ne layun ta egkekuwa is rimeǥas te kedhaǥù ta, iyan, emun bà ki zà ebembentaan ne iyan dà egkepengkusan ta is kegkeayuayu.
PRO 14:24 Is menge uluwanen, ne iyan suhul zan is dekelà he ketiǥeyunan dan, iyan, is tinulebung he vaal te menge tulebung, ne iyan dà rimeǥas din is ketutulebungi.
PRO 14:25 Is kenà teruen he tistiǥus, ebpekelibri te menge etew wey zan kenà mehimetayi, iyan, is tarù he tistiǥus ne utew limbungan.
PRO 14:26 Is kedtehuza te Nengazen, ne iyan ebpekeveǥey te kelig-en wey kenà kegkekeizi te etew wey te menge anak din.
PRO 14:27 Is kedtehuza te Nengazen iring te kedtudà te wahig he ebpekeveǥey te untung, su pinaaǥi zutun egkelikayan ta is ebpekepevavà te umur ta.
PRO 14:28 Is kegkemekeǥeǥehem te hadì ne pinaaǥi te kahabet te menge sakup din; emun wazè din menge sakup ne wazè din daan gehem.
PRO 14:29 Is etew he uluwanen, ne mepelevayen sikandin, ne egketuusan ta is tulebung su melemu sikandin egkepauk.
PRO 14:30 Is melinew he isip, ibmeupiya te lawa, iyan, is kegkesina, iring te zaru he kansir su ebpekezezaat.
PRO 14:31 Is kedèdaaǥa te menge pubri, paaǥi te kedsupaka te Megbevayà, iyan, is kedtevangi te etew he kinahanglan he edtevangan, paaǥi te kebentuǥa te Megbevayà.
PRO 14:32 Edezeetan te Megbevayà is menge mekesesalà tenged te mezat he ulaula zan, piru ebpengelangan din is metazeng minsan ke ebpatey, ne zuen din mulà egkeeputan.
PRO 14:33 Ke và dà etew is ketau ne midlipezeng sikandin diyà te isip te etew he pereudseb, ne ebpekilala sikandin minsan diyà te menge tulebung.
PRO 14:34 Emun metazeng is menge meǥinged egkevantug is inged, iyan, is salà mulà ebpekeveǥey te keelezan.
PRO 14:35 Igkelipey te hadì is sineriǥan din he uluwanen, iyan egkeepesan din mulà is sineriǥan din he mekeeled-eled is baal zin.
PRO 15:1 Is menayù he kedtavak, ebpekepevehew te pauk, iyan, is hangger he kedtavak, ebpekepeiseg te pauk.
PRO 15:2 Emun egkezineg te menge etew is menge lalag te uluwanen, egkesuat dan he mebmetau, piru is edlelaǥen te menge tulebung pudu zà tinulebung.
PRO 15:3 Egkaahà te Nengazen is minsan hendei. Egkeehè din is ed-ul-ulahan te minsan hentei, metazeng etawa lalung.
PRO 15:4 Is lalag he menayù, ebpekepayùpayù te gehinawa, iyan, is menge lalag he ebpekelimbung, ebpekaawà te kezasig.
PRO 15:5 Is taleng he etew ne kenè din ebpezumdumahan is penurù te amey zin, piru is uluwanen mulà, ebpemineg te ibpenurù kandin.
PRO 15:6 Duen dekelà he ketiǥeyunan te menge metazeng diyà te valey zan. Ne is egketiǥeyunan te menge lalung, ebpekeveǥey kandan te samuk.
PRO 15:7 Edseysayen te menge uluwanen is ketau; kenà heini egkeveelan te menge tulebung.
PRO 15:8 Egkeepesan te Nengazen is pemuhat te menge lalung, piru igkesuat din mulà is menge kebpengemuyù te menge metazeng.
PRO 15:9 Egkeepesan te Nengazen is etew he ed-ulaula te mezaat, piru ebmahalen din mulà is ebpeninguhà he mekeulaula te metazeng.
PRO 15:10 Utew merasey is ibmansu te etew he ed-engked he ed-ulaula te meupiya, ne is kenà ebpezawey, iyan egkepengkusan din is kemetayen.
PRO 15:11 Kenà ebpekeeles diyà te Nengazen is egketagu diyà te isip wey ǥehinawa te minsan hentei su minsan is egkengeulaula ziyà te iveyaan, ne netuenan din.
PRO 15:12 Is etew he sumpalit, kenà egkesuat he ebpenuruen ne kenà sikandin ebpekisambag diyà te metau.
PRO 15:13 Emun duen kelipey ziyà te ǥehinawa te etew ne ebpekeǥemen sikandin, iyan, emun mesakit is gehinawa zin ebmerembunut is kebuvuked din.
PRO 15:14 Is etew he pereudseb, ebpenigudu wey meumani is netuenan din, iyan, is tulebung, kenè en mulà ebpeninguhà he mebmetau sikandin.
PRO 15:15 Is menge pubri layun edlised, piru emun egkekuntintu zan ne layun dan egkelipey.
PRO 15:16 Deyzey pa is etew he zeisey zà is ketiǥeyunan din, iyan, edtahud sikandin te Nengazen kenà is etew he zekelà is ketiǥeyunan din, iyan, layun egkesemuki.
PRO 15:17 Deyzey pa is menge etew he lumbey zà is sezè dan, iyan, egiǥineǥawè dan, kenà is menge etew he usa is sezè dan, iyan, ebpekunkuntedehè dan.
PRO 15:18 Is etew he melemu egkepauk, egkehimu he hinungdan te kesevaan, iyan, is etew he mepelevayen, ebpekehusey te egkesavà.
PRO 15:19 Layun edlised is etew he tepulan, iyan, is etew he metandang is ulaula zin, kenà mulà edlised.
PRO 15:20 Is anak he metau, igkelipey te amey zin, iyan, is anak he tulebung, edsaweyen din is iney zin.
PRO 15:21 Is etew he kenà meudseb, igkelipey zin is ketutulebungi zin, iyan, is etew he meudseb, layun hustu is ed-ul-ulahan din.
PRO 15:22 Egkehimu he kenè ta egkekuwa is ebpelenuwan ta te egkuwa emun wazà ebpekesambag kenita te meupiya he paaǥi, iyan, emun mahabet is ebpekesambag kenita ne egkekuwa ta.
PRO 15:23 Igkelipey te etew emun egkeisip din is hustu he kegkeǥiya te egkeǥiyen din, lavew en ke egkekaǥi zin haazà diyà te hustu he timpu te kegkeǥiya zuen.
PRO 15:24 Is etew he metau, iyan ed-ikulen din is dalan pehendiyà te untung ne kenà iyan is dalan pehendiyà te kemetayen.
PRO 15:25 Edrundusen te Nengazen is baley te etew he mepelevawen, iyan, edtipiǥan din mulà is menge azen te valu.
PRO 15:26 Igkeepes te Nengazen is ked-isip-isip te lalung, piru igkesuat din mulà is ked-isip-isip te metazeng he etew.
PRO 15:27 Is etew he leǥezen, egkesemukan is pemilya zin tenged kandin, ne is etew he kenà ebpesipsip, edluǥeyazan te umur.
PRO 15:28 Is etew he metazeng, edtimtimbangen din edhuna a ziyà te isip din ke hengkey is idtavak din, iyan, iburaswang mulà te etew he lalung is mezaat he menge lalag.
PRO 15:29 Meziyù is Nengazen te menge lalung, piru uvey sikandin te menge metazeng, su ebpemineǥen din is kebpengemuyù dan.
PRO 15:30 Ebpekelipey is kebpenggemenggemen, ne is meupiyè he tudtul ebpekezasig.
PRO 15:31 Is etew he ebpemineǥen din wey edewaten din is sawey kandin su wey mebmeluǥayad is untung din, ne ebpekaamur sikandin te menge metau.
PRO 15:32 Is etew he kenè din idtetenged is penurù kandin pinaaǥi te kedsewaya kandin, iring te iyan dà sikandin mezesen he edsudì te keugelingen din. Iyan, emun ebpemineg sikandin te penurù, ebmetau sikandin.
PRO 15:33 Is kedtehuza te Nengazen iyan ebpekepenurù kenita wey ki mebmetau, ne kenè ki egkezeliǥan emun ebpelavew ki.
PRO 16:1 Is etew, edhimu te menge pelanu, piru is Nengazen, iyan ebayàbayà te langun.
PRO 16:2 Is langun he ed-ul-ulahan te etew, midtuuwan din he hustu, piru edsusiyen te Nengazen is tuyù te uman sevaha.
PRO 16:3 Isarig nu ziyà te Nengazen is minsan hengkey he ed-ul-ulahan nu, ne egketuman nu is menge pelanu nu.
PRO 16:4 Is minsan hengkey he ebeelan te Nengazen ne zuen din tuyù dutun, ne netuenan din ke keenu zin edtepusa, ne is imbanglis diyà te lalung he menge etew iyan is kezeetan.
PRO 16:5 Egkeepesan te Nengazen is menge mepelevawen, ne siguradu edsilutan din sikandan.
PRO 16:6 Emun mahal ta is Nengazen he metinumanen, ebpeseyluwen din is menge salè ta. Emun edtehuzen ta sikandin, egkelikayan ta is mezaat he egkeulaula.
PRO 16:7 Emun igkesuat te Nengazen is menge ulaula ta, edhimuwen din he meemiǥu ta is menge kuntada ta.
PRO 16:8 Deyzey pa is deisey he ketiǥeyunan he meupiya he paaǥi is kegketiǥeyuni zuen, kenà is dekelà he ketiǥeyunan he netiǥeyunan pinaaǥi te limbung.
PRO 16:9 Pinaaǥi te isip te etew edhimuwen din is pelanu zin piru iyan egiya kandin is Nengazen.
PRO 16:10 Emun edhukum is hadì he egiyahan te Megbevayà, layun hustu is kukuman din.
PRO 16:11 Kenà igkesuat te Nengazen emun edlimbung ki is ebpetiǥayun.
PRO 16:12 Igkeepes te menge hadì is mezaat he vaal su iyan man ebpekelig-en te ginhedian dan is ketazeng.
PRO 16:13 Ebpekepenunuat te menge hadì is etew he kenà teruen, ne zekelà is kedtahud dan kandin.
PRO 16:14 Dekelà is keǥehem te hadì umbe emun egkepauk sikandin egkehimu he edhimetayan din is egkepeukan din, ne iyan ebpekepayùpayù kandin is etew he metau.
PRO 16:15 Emun nekepenunuat te hadì is etew ne kenè din sikandin edhimetayan; ibpeehè din kandin is keupiya zin he iring te uzan he ebpekepetuvù te menge pinemula.
PRO 16:16 Meupiya pa he egkaangken is ketau wey kedsavut kenà is bulawan wey pelata.
PRO 16:17 Is etew he metandang is menge ulaula zin edlikey te mezaat, ne is ebentayan din is keugelingen din ebpekelikey te kezeetan.
PRO 16:18 Is kebpelavew wey kegkemesinupaken, edrimeǥas te kezeetan.
PRO 16:19 Deyzey pa is kenà kebpelavew wey kegkeey-eyuwi kenà is kebpelavew wey kebpekaangken te menge azen pinaaǥi te ked-aǥew.
PRO 16:20 Is etew he ebpekeventayan din is penurù, ed-uswag sikandin, ne utew zeyzey is etew he edsarig te Nengazen.
PRO 16:21 Is etew he uluwanen, egkekilala he metau he edsavut, ne emun metau he edlalag ne ebpekeistudyu is duma ziyà te kandin.
PRO 16:22 Is kegkesevuta te hustu, iyan ked-isipa zuen te menge pereudseb is iring te tudà te wahig he ebpekeveǥey te untung su ebpekepeluǥayad te untung te etew, iyan, is tinulebung he menge vaal, iyan igkesiluti te menge tulebung.
PRO 16:23 Is uluwanen he etew, edhuna ebpurung ed-isip-isip ne human egkaǥi, umbe utew egkesuati te ebpemineg is ibpenurù din.
PRO 16:24 Is menge lalag he meupiya he ebpemineǥen, ne iring te teneb is kegedgezama ta zuen diyà te ǥehinawa ta ne ebpekevawì kenita.
PRO 16:25 Duen dalan he kunaan te etew ke meupiya he ed-ikulen, iyan, diyè bes ebpekepevayà te kemetayen.
PRO 16:26 Is edsuhulan, edterebahu su wey mevewii is kegkevitil zin.
PRO 16:27 Is engey he etew, iyan pelanu zin is ked-ulaula te mezaat, ne is menge lalag din ebpeketutung iring te hapuy.
PRO 16:28 Is etew he mezaat is kebpemèbè din, ebpeketuvù te samuk wey egkehimu he hinungdan te kebpekegkuntedaha te teleemiǥu.
PRO 16:29 Is etew he mesipala, egkelimbungan din is duma zin pinaaǥi te pesarig din, ne egkeuwit din diyà te kezeetan.
PRO 16:30 Is ebpurung dà ebpengpengendat, lagmit mezaat is ed-isipen din, ne is ebpurung dà ebpenggemen-gemen, lagmit daan mezaat is tuyù din.
PRO 16:31 Utew meupiya emun egkembuwayan ki taman te ked-indelawi te vulvul ta, ne ziyè heeyan egkeulaula te etew he metazeng.
PRO 16:32 Deyzey pa is etew he mepelevayen, kenà is etew he veǥani; deyzey pa is etew he ed-eǥenen din is pauk din, kenà is ebihag te sengeingezan.
PRO 16:33 Ebarà is etew su wey zin metueni is dait he ed-ul-ulahan din piru iyan is Nengazen ebpuunan te minsan hengkey he penurù he zait he ed-ul-ulahan.
PRO 17:1 Meupiya pa is pemilya he usahay vehew zà is egkeenen dan, iyan, melinew is kedezepitè dan, kenà is pemilya he layun dà meupiya is sezè dan, iyan, ebpekunkuntedahà.
PRO 17:2 Is uluwanen he suluǥuen, ne ebpekemandù te taleng he anak te egalen din, ne ebeǥayan sikandin te egkepengevilin duma te zuma pa he menge anak te egalen din.
PRO 17:3 Is bulawan wey pelata, egezaman pinaaǥi te hapuy, ne egezaman daan te Nengazen is gehinawa te etew.
PRO 17:4 Is lalung, egkesuat he ebpemineg te mezaat he menge lalag, ne is teruen, egkesuat he ebpemineg te tarù.
PRO 17:5 Is etew he ed-un-undahan din is menge pubri, iyan din egkesudì is Megbevayà su iyan man midlimbag kandan, ne is igkesuat din is kegkehitevua te mezaat diyà te sengeetew, siguradu edsilutan sikandin.
PRO 17:6 Dengeg te meǥurang is menge apù din ne zengeg daan te menge vatà is ginikanan dan.
PRO 17:7 Wazà igkepegalbu te tulebung ne kenè dait he edtarùtarù is pengulu.
PRO 17:8 Is etew he edsipsip, kunaan din ke iring te kegkeselemengkiru is kedsipsip su pinaaǥi zutun, egkehimu kun minsan is kenà pezem egkehimu.
PRO 17:9 Is etew he ebpeseyluwen din is ebpekesalà diyà te kandin, igkepenurù din pinaaǥi zutun he iyan hustu he ed-ul-ulahan is kegiǥineǥawa, ne is ed-uman egkeyungkat dutun te sayep ne ebpekebulang te utew teleemiǥu.
PRO 17:10 Is etew he meudseb, kesevaha zà edsewaya ne egkepenurù en, iyan, is tulebung, minsan penletiguwa pa ne kenà egkepenurù.
PRO 17:11 Is lalung he etew, edsukul te gubirnu, ne zuen daan edsuǥuen wey mekaasdang kandin.
PRO 17:12 Piligru pa is kebpekesinuǥung te engey kenà is kebpekesinugung te bir he ed-uraingen tenged te veǥu pa he midawi te sengelelanggam is menge anak din.
PRO 17:13 Emun mezaat is ibales ta te meupiya ne is mezaat kenà egkaawà diyà te valey ta.
PRO 17:14 Is puunà te kesevaan, ne iring te zeisey he vudsi ziyà te teleǥuey te wahig; umbe edsengsengen heini te wazè pa medekelà.
PRO 17:15 Is kedlibriya te nekesalà wey is kedsiluti te wazà mekesalà, ne pudu kenà igkesuat te Nengazen.
PRO 17:16 Wazà pulus te selapì he egkeǥastu tenged te kebpetunghaa te tulebung su wazè din man tinguhà he mebmetau sikandin.
PRO 17:17 Is elukuy nu, ne egkehizuwan kezin te langun he timpu, wey iyan ketuyuan ke maan is duen nu perinti, para zuen edtavang kenikew te timpu te kelised.
PRO 17:18 Is etew he kenà metau he ed-isip ke hengkey is hustu, ne segugunè din ebpeseriǥa is beleyazan te zuma zin.
PRO 17:19 Is etew he zekelà diyà te ǥehinawa zin is samuk, ne zekelà diyà te ǥehinawa zin is salà; ne is etew he lalung ne ebpen-ahà te kegkezeeti zin.
PRO 17:20 Kenà ed-uswag is etew he layun mezaat is ed-isipen din, ne ebpekaagbur ziyà te kesamuk is etew he layun mezaat is ebpengeǥiyen din.
PRO 17:21 Emun engey is anak ta egkeveǥayan ki te seeng, ne wazè ta kelipey.
PRO 17:22 Emun layun duen kelipey he egketaǥù diyà te ǥehina ta, ebmeupiya is kedlelawa ta, iyan, emun layun dà seeng is egketaǥù diyà te gehinawa ta, egkezeetan is kedlelawa ta.
PRO 17:23 Is lalung he etew, edewaten din is idsipsip diyà te kandin su para kenà metuman is hustu he kukuman.
PRO 17:24 Is etew he meudseb, egketuenan din ke hengkey is dait he ebeelan din, iyan, is tulebung, minsan hengkey zà duen is ebeelan din.
PRO 17:25 Is tulebung he anak, egkeveǥayan din te seeng is amey zin ne igkeperuǥur zin is iney zin.
PRO 17:26 Kenà meupiya is kebpigada te etew he wazà mekesalà wey is kebuǥala te menge upisyal tenged te kedtinazeng dan.
PRO 17:27 Is etew he uluwanen, emun egkaǥi, ebpekeventayan din is menge lalag din su wey kenà mekekaǥi te kenè hustu, ne is meudseb he etew mevented sikandin.
PRO 17:28 Minsan is tulebung kunaan ta ke uluwanen wey meudseb emun ebperpereremek dà sikandin.
PRO 18:1 Is etew he kenà ebpekid-emiǥu ne iyan dà ed-isipen din is kandin he keupiyaanan, ne edsupaken din is hustu he ed-isipen te zuma.
PRO 18:2 Is tulebung he etew ne wazè din isipa is kebpeiseg te kedsavut din; iyan egkesuatan din he ibpahayag is kandin he egkengeisip umbe layun din ibpezineg.
PRO 18:3 Is kebaal te mezaat wey mekeeled-eled he vaal ne iyan ebpekeveǥey te keelezan.
PRO 18:4 Is menge lalag te uluwanen he etew ne ebpekeveǥey te ketau te zuma; iring te edtudà he wahig he ziyà ebpuun te mezalem he serebseb he kenà egkemezahan.
PRO 18:5 Kenà meupiya is kedapig te selaan wey is kenà kebeǥey te kevenar ziyà te ebpekevenar.
PRO 18:6 Is menge lalag te tulebung he etew, iyan puunà te tebek wey iyan igkesekiti zin.
PRO 18:7 Is kegkaǥikaǥi te tulebung he etew ne iyan ebpekezezaat kandin.
PRO 18:8 Is ituk, iring te metaam he keenen he egenahan ki he ed-eveleng duen.
PRO 18:9 Is etew he igkepeǥuli zin is terebahu zin, ne iring te etew he ebpendezaat.
PRO 18:10 Is Nengazen, iring te melig-en he turi he iyan egkeeputan te menge metazeng su wey zan kenà mekeizi.
PRO 18:11 Is ketiǥeyunan te menge sepian, midtuuwan dan he iyan kutè dan he iring te metikang he verengbeng he nekeliǥuy te inged.
PRO 18:12 Is kebpelavew te etew ebpekezezaat kandin, iyan, edeliǥen mulà is etew he kenà mepelevawen.
PRO 18:13 Taleng wey ebpeeled-eled is etew he tekew en edtavak te wazè din pemineǥa.
PRO 18:14 Is kelipey he egketaǥù diyà te ǥehinawa te etew, iyan ibpekesustinir zin emun egkezeruwan, iyan, emun seeng is egketaǥù diyà te ǥehinawa zin ne kenà sikandin ebpekesustinir.
PRO 18:15 Is etew he uluwanen wey zuen din kedsavut, egkesuat he meumani pa is netuenan din.
PRO 18:16 Melemu is kebpekidhinguma ta te dungganen he etew emun ed-uwit ki te ibeǥey ta kandin.
PRO 18:17 Emun diyà te husayen, is egkehuna he egkaǥi, henduen be te iyan en ebpekevenar, iyan, wey ebpekelepew is hustu emun ebpekedtevakè en haazà is dezuwa he edhusayen.
PRO 18:18 Is kedripa ebpeketavang te kesamuk, ebpeketavang daan te kedhusey te kasu te zezuwa he gemhanan he etew.
PRO 18:19 Is telesuled he ebpekedsilaǥà utew mereǥen he ibped-uliey te meupiya he gehinawa. Mereǥen pa heini he ebeelan kenà is kedseled te miberengbeng he inged. Iring ded kereǥen te kedrundus te trangka te ǥemawan te turuǥan, mereǥen he edhusayen is dezuwa he telesuled.
PRO 18:20 Iyan ke zed ebpulus te menge meupiya he rimeǥas te menge lalag nu.
PRO 18:21 Is kedlalag, dezuwa is rimeǥas din, kedlalag he ebpekelibri wey kedlalag he ebpekekaid. Umbe is berèbaan egkezawat din is rimeǥas te menge egkeǥiyen din.
PRO 18:22 Emun ebpekeesawa is etew ne meupiya heeyan, ne tuus heeyan he midtuvazan sikandin te Nengazen.
PRO 18:23 Is pubri, edhangyù diyà te sepian he ikehizu sikandin, ne is sepian, singka mulà is kandin he idtavak.
PRO 18:24 Duen kebpeemiǥuwà he kenà egkeuǥet, iyan, duen daan kebpeemiǥuwà he edhuna pa te kedtelesuled.
PRO 19:1 Meupiya pa is egkeey-eyuwan he wazà igkesawey te menge vaal zin kenà is tulebung he mezaat is kebpemèbè din.
PRO 19:2 Kenà meupiya emun tekew ki en egkeleglegetayi te wazè ta metueni is ked-ul-ula zuen wey is egkehimu he rimeǥas din. Kenà meupiya is kedegdeǥusu su kela ke mesayep ki.
PRO 19:3 Duen menge etew he edezeeten dan is keugelingen dan tenged te kedtinulebung dan, ne iyan ebesulan dan is Nengazen.
PRO 19:4 Tenged te kesepian te etew egkehimu he mahabet is menge emiǥu zin, ne tenged daan te kegkeey-eyuwi te etew, ed-engkezan sikandin te menge emiǥu zin.
PRO 19:5 Edsilutan is teruen he tistiǥus, ne kenà ebpekeǥawas te silut is minsan hentei he edtarùtarù.
PRO 19:6 Mahabet is edhimu te paaǥi wey zin mepenunuat is etew he lavew is pid-etawan din, ne emun duen etew he ebpekeveǥey te menge keupiyaanan ne mahabet is egkaǥi he emiǥu zin haazà is nekeveǥey te menge keupiyaanan.
PRO 19:7 Is etew he pubri, kenà idtetepian te menge kezuzumahi zin, iyan pe be medseǥipà kandin is menge emiǥu zin dà. Emun ebpetavang ka kandan ne ed-eles dan.
PRO 19:8 Is kebpenigudu te etew su wey mehimu he uluwanen, ne tuus he igkeseeng din is keugelingen din, ne heini he etew ed-uswag.
PRO 19:9 Edsilutan is teruen he tistiǥus, ne is minsan hentei he ebpengaǥi te tarù ne egkezeetan.
PRO 19:10 Kenà dait is tulebung he etew he ebpengungubpaan he zekelà is ketiǥeyunan din, ne tuwas pa he kenà dait is uripen he ebayàbayà te menge edumala.
PRO 19:11 Tenged te ketau te etew, egkehimu sikandin he mepelevayen. Ne igkelipey zin is kebpesaylu zin te nekesalà diyà te kandin.
PRO 19:12 Emun egkepauk is hadì ne iring haazà te edhiniǥer he erimaung, iyan, is tavang din igkepetug-iring daan te zehemug he ebpekepetuvù te pinemula.
PRO 19:13 Is tulebung he anak, ebpekezezaat te amey zin, ne is bahi he peretebek te esawa zin, ne iring te edtiǥisan he atep.
PRO 19:14 Is baley wey zuma pa he menge azen, egkepengevilin diyà te ginikanan, iyan, Nengazen mulà is ebpekeveǥey te uluwanen he esawa.
PRO 19:15 Emun ebpepepeǥul ka wey edtulung ke zà edlipezeng ne siguradu ebitilen ka.
PRO 19:16 Is kebpezumazuma te etew te menge suǥù te Megbevayà, iyan egkehimu he ibmeluǥayad te ked-ubpè din, piru is kenà edtuman ne meǥaan dà egkeumuri.
PRO 19:17 Emun ebeǥey ki ziyà te menge pubri, ne iring te impesambey nu is Nengazen, su iyan is Nengazen ebayad kenikew.
PRO 19:18 Mensuwa nu is menge anak nu zutun te zuen pa timpu. Emun kenè nu sikandan ebmensuwen, iring te mid-uǥup ka he edhimatey kandan.
PRO 19:19 Beleǥaza nu is etew he uuringeren te ked-etuvang te neveelan din, su emun ed-uǥupan nu sikandin, ne egkelayam ne edsublien din is mibeelan din.
PRO 19:20 Pemineǥa nu is idsambag kenikew ne zewata nu is ibpenurù kenikew ne emun egkeuǥet egkehimu ka he uluwanen.
PRO 19:21 Mahabet is pelanu te etew piru iyan gihapun egkeulaula is egkesuatan te Nengazen.
PRO 19:22 Iyan egkesuatan te etew is; kenà sikandin engkezi te ebmahal. Deyzey pa is egkeey-eyuwan kenà is teruen.
PRO 19:23 Is etew he edtahud te Nengazen, edluǥeyazan te untung, melipayen wey ebpekelikey te kesamuk.
PRO 19:24 Duen menge etew he utew tepulan minsan is keenen ne kenè din pa igkesungit.
PRO 19:25 Kinahanglan he edsilutan is menge sumpalit para is iring dan he kenà memetau ne egkehimu sikandan he uluwanen. Is uluwanen he etew ne ed-iseg pa is kedsavut din emun edewayen sikandin.
PRO 19:26 Mekeeled eled wey ebpesudìsudì he anak is edsukul te amey zin wey edsegseg te iney zin.
PRO 19:27 Mama, emun kenè nu ebpemineǥen is menge penurù ku kenikew, ne idselikwey nu is menge penurù he ebpekeveǥey te ketau.
PRO 19:28 Is teruen he tistiǥus, edsumpeliten din is hustu he ketezengan, wey is menge etew he lalung, iyan egkesuatan dan is kelelalung.
PRO 19:29 Ebmultahan is etew he sumpalit ne ebuǥelen is egkeengey-engey.
PRO 20:1 Is subra he ked-inum te vinu he ebpekelangut, iyan ibmesamuk te etew. Is etew he lelenguten kenà egkehimu he uluwanen.
PRO 20:2 Emun egkepauk is hadì henduen be te edhiniǥer he erimaung. Umbe, emun ebaal ka te igkepauk din, ne edhimetayan ke zin.
PRO 20:3 Egkezeliǥan is etew he edlikey te samuk; is tulebung he etew egkesuat te samuk.
PRO 20:4 Is tepulan he ed-eradu emun timpu te kebpemula, wazè din egkekuwa emun timpu te tiraǥun.
PRO 20:5 Is egketaǥù diyà te isip te etew, iring te wahig he mezalem, piru emun uluwanen ka, egketegkad nu heini.
PRO 20:6 Mahabet he menge etew is egkaǥi he metau sikandan, iyan, tutuu ve he zuen kandan egkeseriǥan?
PRO 20:7 Is etew he metazeng kenà egkesewayan is menge ulaula zin. Deyzey is menge anak te etew he metazeng su ketazeng is egkelingehè dan.
PRO 20:8 Emun edhukum is hadì, ebpurungan din edsusiya ke hengkey is mezaat he mid-ulaula zutun te edhukuman din.
PRO 20:9 Wazà minsan hentei he ebpekekaǥi he wazà mezaat diyà te ǥehinawa zin; ne wazè din salà.
PRO 20:10 Is kedlimbung pinaaǥi te timbangan wey is kedlimbung pinaaǥi te sukud, ne pudu igkeepes te Nengazen.
PRO 20:11 Egketuenan ta is betasan te minsan menguhed pa he etew su egkeehè ta ziyà te menge vaal zin, ke metazeng be sikandin etawa kenà.
PRO 20:12 Midhimu te Nengazen is telinga ta su wey ki mekezineg, wey midhimu zin is mata ta su wey ki mekaahà.
PRO 20:13 Emun edtulung ke zà edlipezeng, ne ebitilen ka, piru ke ed-enew ka ne edterebahu, ne zekelà is egkekaan nu.
PRO 20:14 Edsewayen te kumpredur is ibelegyà su para mekehangyù sikandin. Piru emun egkekumpra zin en, ne kenè din en maan edsudien, kekenà ibpenhambug din pa.
PRO 20:15 Mahabet he menge vulawan wey mahalen he menge vatu, piru mezelag dà is etew he egkezumahan te ketau is kegkaǥi zin.
PRO 20:16 Emun mibpesarig is sevaha he etew he iyan ebayad diyà te kenikew te utang te etew he kenè din kilala, siguruwa nu he zuen din igkegerentiya, minsan bisti zin, para siguradu he mekevayad sikandin.
PRO 20:17 Is keenen he egkekuwa te etew pinaaǥi te limbung ne meupiya is kegkèkèena zin dutun, iyan, emun edhingungunà haazà henduen dà te pantad diyà te vèbè din.
PRO 20:18 Emun duen ebpelenuwen nu, kinahanglan he ebpekisambag ka ziyà te zuma. Kenè ka hendiyà te tebek emun wazè ka mebpesambag diyà te zuma.
PRO 20:19 Likayi niw is etew he verèbaan su ebpenudtulen din is id-iinelesà pezem.
PRO 20:20 Is ebpenrawak te ginikanan din, ne iring sikandin te sulù he egkeevukan su edhimetayan sikandin.
PRO 20:21 Is kevilin he edseyuwan nu egkuwaa te kenè pa hustu he timpu, ne kenà ebpulus diyà te kenikew te huziyan he timpu.
PRO 20:22 Kenè ka vales. Sarig ke zà te, Nengazen, ne edtevangan ke zin.
PRO 20:23 Egkeepesan te Nengazen is mge ebpemenlimbung pinaaǥi te timbangan. Kenà heeyan meupiya he vaal.
PRO 20:24 Iyan ebayàbayà is Nengazen te untung ta, umbe kenè ta egketuenan ke hengkey is egkeulaula kenita.
PRO 20:25 Ebpekezezaat is kegkemeǥègaanen te kebpenangdù he ibpemuhat nu is sevaha he azen diyà te Nengazen. Kinahanglan he purung ka isip-isip ne human ka penangdù.
PRO 20:26 Emun edhukum is hadì he uluwanen, ne edtegteǥaman din he metueni zin ke hentei is nekevaal te sayep, ne edsilutan din heini.
PRO 20:27 Is isip ta ne egamiten te Nengazen wey mereyaǥi is untung ta, ne pinaaǥi kayi egkesusi ta is keugelingen ta.
PRO 20:28 Emun hihizuwen wey metinumanen is sevaha he hadì, ne wazà ebpekezezaat kandin ne ebpedayun is kedhadì din.
PRO 20:29 Is igkezeliǥi te menge vetan-en he maama iyan is desen dan, ne iyan igkeventuǥa te menge meǥurang is keǥuǥurangi zan.
PRO 20:30 Is kedsilut te mekesesalà iyan ebpeketavang kandin su wey inyuǥi zin is mezaat.
PRO 21:1 Is isip te menge hadì ne iring te wahig he iyan ebayàbayà is Nengazen te kedtudè din. Iyan ebayàbayà kayi sikandin sumalà te egkesuatan din.
PRO 21:2 Minsan pa ke iyan egkeisip te etew is utew hustu is langun he menge ulaula zin, iyan hustu is hukum te Nengazen kandin.
PRO 21:3 Lavew pa he igkesuat te Nengazen is ked-ulaula te etew te meupiya wey metazeng kenà is kebpemuhat din te menge ibpemuhat.
PRO 21:4 Salà is ked-undaunda wey kebmepelevawen. Egketuusan nu is menge lalung he menge etew pinaaǥi kayi he ulaula.
PRO 21:5 Emun ebpurung ka ebpelanu ne ebpekeǥied ka, ne ed-uswag ka. Piru ke emeǥègaanen ka, ne kenè en ebperis he egkeayuayu ka.
PRO 21:6 Is ketiǥeyunan he egkekuwa pinaaǥi te limbung, meǥaan dà egkehanew wey ebpekepevavà daan te umur.
PRO 21:7 Pinaaǥi te kebebagis te etew he lalung, egketipu sikandin su kenè man sikandin egkesuat he ed-ulaula te hustu.
PRO 21:8 Kenà metandang is betasan te mekesesalà, ne metandang mulà is ulaula te kenà mekesesalà.
PRO 21:9 Deyzey pa is kedsivey kenà is kebpekid-amur te esawa he peretebek.
PRO 21:10 Is menge lalung he etew, utew zekelà is suat dan te ked-ulaula te mezaat; ne wazè dan hizu te zuma zan.
PRO 21:11 Emun edsilutan is menge sumpalit, pinaaǥi zutun egkepenurù is iring dan he wazà kedsavut ne egkehimu he uluwanen. Is uluwanen he etew, ed-iseg pa is ketau zin emun egkepenurù sikandin.
PRO 21:12 Is Megbevayà he metazeng netuenan din is menge vaal te menge etew he lalung, ne edsilutan din sikandan.
PRO 21:13 Emun kenè ta idtetepian is egkengeayuayu he ebpekitavang kenita, ne kenè ki zaan idtetepian emun iyan ki ebpekitavang.
PRO 21:14 Emun ebeǥayan nu te gasa he wazà metueni te zuma haazà is egkepauk kenikew, ne egkeawà is rerangit din.
PRO 21:15 Emun ed-ikulen is hustu he kukuman, egkelipey is menge metazeng, iyan, egkengeheratan mulà is menge lalung.
PRO 21:16 Kemetayen is egkepengkusan te etew he edlikayan din is kegketau.
PRO 21:17 Is etew he iyan dekelà diyà te ǥehinawa zin is kedlipeylipey wey kebpengemuran ne egkepubri, ne kenè en edsepian, kekenà, egkeey-eyuwan.
PRO 21:18 Edsilutan is menge lalung wey is meluiven su wey melibri is menge metazeng.
PRO 21:19 Deyzey pa is kedsivey ked-ubpà diyà te sibsivayan, kenà is kebpekid-amur te peretebek he esawa.
PRO 21:20 Is uluwanen he etew ne edteǥana para te huziyan he timpu, piru is tulebung he etew ebpetakè en mulà te kegastu.
PRO 21:21 Is etew he egkesuat he meupiya is ked-ubpè din wey metazeng, ebmeluǥayad is untung din, wey ebmezeeǥen, ne egkezeliǥan sikandin.
PRO 21:22 Is peremandar he metau te paaǥi ebpekaaǥew te inged he mezakel is menge sundaru zuen, ne ebpekerundus heini te menge verengbeng he edseriǥan dutun te menge sundaru.
PRO 21:23 Is etew he ebpekeventayan din is kebpengaǥikaǥi zin, ebpekelikey te samuk.
PRO 21:24 Is hembugiru wey mepelevawen he etew, ne egkekilala ta sikandin su masudì sikandin, wey utew mepedeligen.
PRO 21:25 Is tepulan, egkehimu he iyan ibpatey zin is kegkeseeng din tenged te kenè din egkekuwa is edtinguhaan din; kenè din egkekuwa su kenè man sikandin edterebahu.
PRO 21:26 Is tepulan he etew ne egkesuat layun he ebpekekuwa, piru is metazeng he etew ebeǥey he wazà kegkenuǥun.
PRO 21:27 Kenà igkesuat te Nengazen is ibpemuhat te menge lalung, lavew en ke mezaat is tuyù dan te ked-ul-ulaha zan dutun.
PRO 21:28 Is teruen he tistiǥus ne kenè en ibpekaǥi, piru is tistiǥus he tutuu is egkeǥiyen din ne iyan ibpelaus ibpelalag.
PRO 21:29 Is etew he lalung, ne kenè din igkeseeng is ed-ulaula din, piru is metazeng mulà, ebpurungan din ed-isipa is ed-ul-ulahan din.
PRO 21:30 Wazà edlampus he ketau, kedsavut, etawa sambag he igkuntra te Nengazen.
PRO 21:31 Minsan andam en is menge kudà he egemiten te kebpekidtebek, iyan, ketau zà te Nengazen is kebpekezaag.
PRO 22:1 Is meupiya he zengeg lavew pa he meupiya he ebpilien kenà is dekelà he ketiǥeyunan. Is kedtehuza kenita te menge etew ne lavew pa he meupiya kenà is kegkeengkena ta te pelata wey vulawan.
PRO 22:2 Is sepian wey pubri pudu midlimbag te Nengazen.
PRO 22:3 Is etew he uluwanen, egketuenan din te edlikey emun duen kemereǥenan he ebpekesuǥat kandin, iyan, is etew he wazè din utew emet ne kenà ed-eliǥu zutun, umbe ebpekebmereǥen sikandin.
PRO 22:4 Pinaaǥi te kenà kebpelavew te etew wey te kedtehuza zin te Nengazen, egkehimu he egkaangken din is dekelà he ketiǥeyunan, meupiya he zengeg, wey keluǥayad te untung.
PRO 22:5 Is ibayà te lalung he menge etew, ne iring te zalan he zuǥiyen wey zuen duen menge litag. Is etew he ebpekeziyù keniyan he zalan ne ed-empingan din is untung din.
PRO 22:6 Kinahanglan he ibansey ta ziyà te menge vatà is menge ulaula, he zait he ed-ul-ulahan, ne emun ebmeǥurang en sikandan, ne kenè dan edsuwey zutun.
PRO 22:7 Is menge egkengaayuayu ne egkeveyveyaan te menge sepian, ne is menge ebpengutang uripen te menge neutangan dan.
PRO 22:8 Is ebpemula te kelelalung ebpekeraǥun te kezeetan, ne kenè en ebpekependezaat te zuma.
PRO 22:9 Edtuvazan te Nengazen is etew he kelelaǥan, su edtelewizen din is menge pubri.
PRO 22:10 Emun ibpaawà diyà te inged is menge etew he sumpalit, egkaawà daan is kebpelewlewanà, kesevaan, wey is kebpein-insultuwà.
PRO 22:11 Is etew he lumpiyu is gehinawa zin wey menayù is kebpengaǥikaǥi zin ne egkehimu he emiǥu te hadì.
PRO 22:12 Ebpurungan ebentayi te Nengazen is menge uluwanen, piru edezeetan din is menge pelanu te menge teruen.
PRO 22:13 Mezakel is menge pesangil te tepulan. Kenè kun sikandin egawas su zuen kun erimaung diyà te ǥawas he edawi kandin.
PRO 22:14 Is kegkaǥikaǥi te vahi he lebag ne ebpeketintal, iring te mezalem he vudsi, ne heini he vudsi ne egkeulug kayi is egkeepesan te Nengazen.
PRO 22:15 Kineiya te vatà is kelelalung, piru egkaawà heeyan diyà te kandin pinaaǥi te kebmensuwa kandin.
PRO 22:16 Egkepubri is etew he edèdaaǥen din is egkeey-eyuwan su wey meumani is ketiǥeyunan din etawa iyan din ebegayan is sepian.
PRO 22:17 Heini is menge lalag te uluwanen he menge etew. Pemineǥa nu heini purungi zutun te kebpenurua ku kayi kenikew,
PRO 22:18 su ebpekeveǥey heini kenikew te kelipey emun kenè nu heini egkelipatan.
PRO 22:19 Ibpenurù ku heini kenikew ǥuntaan su wey nu iyan meseriǥi is Nengazen.
PRO 22:20 Insurat ku is 30 he menge erubasa he ebpekeveǥey te ketau wey menge selembaǥan.
PRO 22:21 Pinaaǥi kayi egketuenan nu ke hengkey is hustu, ne ebpekeveǥey ka te egkeseriǥan he menge tavak diyà te menge etew he ed-insà kenikew.
PRO 22:22 Kenè ka pemintahà te menge pubri, wey kenè nu sikandan pegpeǥesa ziyà te hukmanan,
PRO 22:23 su is Nengazen iyan edlavan kandan. Emun hengkey is ebeelan niw ziyà te kandan he kenà meupiya ne iyan daan ebeelan te Nengazen diyà te keniyu.
PRO 22:24 Kenè ka mebpekid-emiǥu te etew he melemu egkepauk,
PRO 22:25 su kela ke mekeiring ka kandin, ne egke-uwit-uwit ka zutun he kineiya.
PRO 22:26 Kenè ka mebpesarig he iyan ka ebayad te utang te zuma.
PRO 22:27 Su emun kenè ka ebpekevayad, egkuwaan dan is hizeǥaan nu.
PRO 22:28 Kenè nu ihalin is taltal te tanè nu, he iyan kes taltal he intaltal te menge apù nu.
PRO 22:29 Is etew he metau he ebaal te edterebehuwen din ebpekepenilbi te hadì ne kenè diyà te menge etew zà duen.
PRO 23:1 Emun egkaan ka zuma te pengulu, purungi nu is kebpenwalengwaleng nu.
PRO 23:2 Emun buleǥuk ka, ne kenè nu pezumdumahi is gehinawa nu.
PRO 23:3 Kenè ka meima te meupiya he menge keenen he indtangel zin, su kela ke igezam din dà te ulaula nu.
PRO 23:4 Kenè nu pesubrahi is kedhaǥù nu tenged te kedtinguhà he medsepian ka. Kekenà, pugungi nu is keugelingen nu ne is-isipa nu ke hengkey is hustu.
PRO 23:5 Is selapì, ne egkehanew te senge perè dà he iring te zuen din pakpak he edlayang pehendiyà te meziyù iring te vanug.
PRO 23:6 Kenè ka megkaan etawa meima te keenen te etew he kuriput, minsan meupiya pa heini.
PRO 23:7 Su is etew he iring keniyan, ebelensiyen din is kezekelà te egkekaan nu. Ke sikandin, “Pengaan ka.” Piru kenè bes ebpuun diyà te meupiya he ǥehinawa zin is kegkekeǥiya zin dutun.
PRO 23:8 Umbe, kenè ka penigudu kaan su egkeutè nu is nekaan nu ne egkaawè is pulus te kedeliǥa nu kandin.
PRO 23:9 Kenè ka mebpekidlalag te menge tulebung, su minsan metau ke pa he ed-lalag wazà pulus gihapun kayi ziyà te kandan.
PRO 23:10 Kenè nu eǥawa is tanà te menge ilu pinaaǥi te kedhelina te menge kezaan he menge simintu kayi.
PRO 23:11 Su is Nengazen iyan mekeǥeǥehem he edlavan kandan. Iyan sikandin ebpengalang kandan kuntra kenikew.
PRO 23:12 Pemineg ka emun ebpenuruen ka su wey ka mebmetau.
PRO 23:13 Kenè ka mebpeneǥana he ebmansu te anak nu. Su is kedlegkuta nu kandin ne kenè din ibpatey,
PRO 23:14 kekenà, iyan idluǥeyazi kandin te untung.
PRO 23:15 Mama, melipayen a emun uluwanen ka,
PRO 23:16 wey hustu is menge lalag nu.
PRO 23:17 Kinahanglan he kenè ka egkesina te menge mekesesalà, kekenà, tehuza nu layun is Nengazen.
PRO 23:18 Su emun edtehuzen nu sikandin, tutuu iyan he zuen meupiya he egkeperateng nu; kenà egkehimu he wazà pulus te menge tinguhè nu.
PRO 23:19 Mama, pemineǥa nu is egkeǥiyen ku. Penigudu ka wey ka mehimu he uluwanen ne isipa nu is hustu he ed-ul-ulahan.
PRO 23:20 Kenè ka mebpekiduma te menge lelenguten wey vuleǥuk,
PRO 23:21 su heeyan he kelasi te menge etew ne melemu he egkepubri. Edtulung dan dà ebpenlipezeng, umbe iyan egketemanan dan is ebpekekukumbalè dan dà te tuǥak.
PRO 23:22 Pemineǥa nu is ginikanan nu he iyan mid-uyag kenikew ne kenè nu iyan dà ivaras kandan is bà nu zà edsudia emun ebmeǥurang dan en.
PRO 23:23 Peniguduwi nu he maangken nu is ketutuanan, ketau, kegkemansu, wey kedsavut. Ne kenè nu heini iliwà te minsan hengkey he menge azen.
PRO 23:24 Utew igkelipey te ǥinikanan nu emun metazeng ka wey uluwanen ka,
PRO 23:25 lavi en is iney nu.
PRO 23:26 Mama, pemineǥa nu purungi is egkeǥiyen ku, ne sunuza nu is menge ulaula ku.
PRO 23:27 Is bahi he ebelegyà te zengeg din, ne ebpekezezaat kenikew. Iring heini te mezalem he vitu wey meliǥet he vudsi.
PRO 23:28 Iring sikandin te tulisan he edtaǥad te egkebiktima zin, ne iyan sikandin hinungdan te kedlseselai te menge maama te menge esawa zan.
PRO 23:29 Hentei is mekehizuhizu he etew, peretebek, riklemedur, melemu he egkengepelian, wey layun dà meriǥà is mata zin? Iyan heini sikan is etew he lelenguten, he egkesuat layun he egezam te nekedselekawà he inumen.
PRO 23:31 Kenè ka petintal te keriǥa wey ked-ilak-ilak te vinu ziyà te seled te vasu wey is ketaam kayi he ed-inumen.
PRO 23:32 Su emun egkelangut ke en, ne selakew en is egkeǥezam nu te lawa nu, iring te edhereg he uled he egkaǥat kenikew.
PRO 23:33 Ne minsan hendei ke zà meketengteng, ne kenà meupiya is ked-isip-isip nu.
PRO 23:34 Henduen be te ziyè ka medhizeǥà te varku he ziyà te lawed te zaǥat.
PRO 23:35 Ne egkeisip nu is: “Midsusumbag a, iyan, wazà a mevuǥel, midlelagkut a iyan, wazè ku ǥezama. Keenu ad buwa egkehuwasi su wey a mekeuman en maan mekeinum?”
PRO 24:1 Kenè ka mesina te menge etew he lalung etawa tinguhà te kebpekid emiǥu kandan.
PRO 24:2 Su iyan dà ed-isipen dan is kebpesipala wey edhisgutan dan is kedsinamuk.
PRO 24:3 Emun metau ka, egkevangun nu wey igkepeuswag nu is pemilya nu.
PRO 24:5 Is etew he uluwanen dekelà is igkeuǥup din he med-iseg is kebpekegaga te menge ebpekidtebek,
PRO 24:6 su kinahanglan dan is menge sambag din te kebpekidtebek. Ne kelegmitan iyan ebpekezaag is mahabet is menge peresambag dan.
PRO 24:7 Is tulebung kenè din egkesavut is mezalem he menge lalag. Wazè din igkesambag emun impurtanti is egkevitiyeraan.
PRO 24:8 Is etew he ebpelanu layun te mezaat ne egkilelaan he iyan ebaal te kezeetan.
PRO 24:9 Salà is minsan hengkey he pelanu te etew he tulebung, ne egkeepesan te menge etew is ked-undaunda.
PRO 24:10 Emun egkeewaan ka te perateng te timpu te kemereǥenan, tuus heeyan he meluya ka.
PRO 24:11 Kenè ka peneǥana te kedlibri te menge etew he wazà salà he midsintinsiyahan he edhimetayan.
PRO 24:12 Egkehimu he ebpemarew ka he wazè nu metueni heini. Piru netuenan te Megbevayà ke tutuu ve is migkaǥi nu wey kekenà, su ebentayan ke zin ne netuenan din ke hengkey is diyà te isip nu. Ebelesan ke zin sumalà te nengeveelan nu.
PRO 24:13 Mama, kaan ka te teneb su meupiya heini para kenikew,
PRO 24:14 su iring keniyan is ketau. Su ke uluwanen ka, duen meupiya he egkeperateng nu ne kenà egkehimu he wazà pulus te menge penganduy nu.
PRO 24:15 Kenè nu iringi is lalung he etew, he ebpeniid su ebpenulis diyà te valey te etew he metazeng.
PRO 24:16 Su minsan kepipitu pa mepiley is etew he metazeng, iyan, layun sikandin ebpekeenew. Ne emun iyan is lalung egkepiley, kenè en sikandin ebpekeenew.
PRO 24:17 Kenè nu ikelipey emun duen mezaat he egkeulaula te kuntada nu.
PRO 24:18 Egkaahà te Nengazen is baal nu, ne kenè din heeyan egkesuatan; ne kenè din en edsilutan haazà is kuntada nu.
PRO 24:19 Kenè ka mesemuki wey mesina te menge lalung he menge etew,
PRO 24:20 su wazà meupiya he egkepaabut dan, su is untung dan iring te sulù he egkeevukan.
PRO 24:21 Mama, tehuza nu is Nengazen wey is hadì. Kenè ka medtampu te menge etew he edsukul kandan,
PRO 24:22 su egketik-awan sikandan te silut. Wazè nu metueni ke hengkey he kelasi te kemeresayan is ibpigada te Megbevayà etawa te hadì diyà te kandan.
PRO 24:23 Heini pa is duma he menge erubasa te menge etew he uluwanen: Kenà meupiya is kedhukum nu he zuen nu ibpelavi.
PRO 24:24 Emun egkaǥi ka he wazà salà dutun te nekesalà, ebpenrewakan ka wey egkepeukan ka te menge etew.
PRO 24:25 Piru emun ebpigedahan nu haazà is nekesalà, edtuvazan ka wey ed-uswag ka.
PRO 24:26 Is tavak he hustu ne tuus te tutuu he teleemiǥu.
PRO 24:27 Hunaa nu endama is igkeuyag-uyag nu, iring te pemuleey nu, ne human ka tukud te pemilya.
PRO 24:28 Kenè ka penistiǥus he kaatbang te idsumbung he siringan nu emun kenè ka zait he ebpenistiǥus dutun he kasu.
PRO 24:29 Kenè ka megkaǥi te, “Ed-ul-ulahan ku ziyà te kandin is mid-ulaula zin kayi te kedì, ne ibpevayad ku sikandin tenged te mezaat he mid-ulaula zin kayi te kedì.”
PRO 24:30 Nekesaǥad a ziyà te vevesukà te etew he tepulan he wazè din utew emet.
PRO 24:31 Mid-erikumunan en heini te ribpes wey zuǥiyen he menge zezeisey he kayu, ne nerundus en is menge alad kayi.
PRO 24:32 Ne mibpurungan ku is-isipa ke maan is neulaula haazà is neehè ku, ne neisip ku is penurù he iyan is:
PRO 24:33 Is ed-isipen te etew he mevavè dà he kedlipezeng, mevavè dà he kebpeuurek wey mevavè dà he kebpahareyharey su wey mekehimeley;
PRO 24:34 ne iring te ebpekeuma he tulisan he egkeǥumeenan is kewewezai.
PRO 25:1 Heini pa is duma he menge erubasa ni Solomon he migkupya te menge maama he sakup ni Hadì Hezekia he hadì te Juda:
PRO 25:2 Ebentuǥen tew is Megbevayà tenged te menge egkengeulaula he wazè din ipezayag kenitew; ebentuǥen tew is menge hadì tenged te menge ibpezayag dan kenitew.
PRO 25:3 Kenè ta egkesavut is ed-isipen te menge hadì su iring heini ketikang te langit wey iring kezalem te zaǥat.
PRO 25:4 Ewaa nu is tangis te pelata, ne is etew he pandey te pelata ebpekehimu te ǥelemiten puun dutun.
PRO 25:5 Iring din ded daan emun ibpaawà te hadì is lalung he peresambag din, ne egkelig-enan is kedumala zutun te hadì pinaaǥi te ketazeng.
PRO 25:6 Emun sevaha ka te menge upisyal te hadì, ne kenè nu isipa is keugelingen nu he lavew tenged te nekepinuu ka zuma te dungganen he menge etew.
PRO 25:7 Deyzey pa ke egkeǥiyan ka zutun te hadì te zutun ka pinuu kenà ke egkeǥiyan ke zin te awè ka, ne egkepeel-elezan ka zutun te etuvangan te dungganen he menge etew.
PRO 25:8 Emun duen egkeehè nu, kenè nu segugunà isumbung diyà te hukmanan su emun duen ebpekepenistiǥus he igkepeletew zin he nesayep ka ne zutun egkepeel-elezan ka.
PRO 25:9 Emun ebpekedlawan kew te siringan nu, egkehimu ke ebpelewanè kew, piru kenè niw tudtula is in-eles niw.
PRO 25:10 Su emun egketuenan heini te zuma, ne kela ke peel-elezi kew zan, ne egkezeetan is dengeg niw taman te taman.
PRO 25:11 Is lalag nu he edsungkad te hustu he timpu, iring heini te mensanas he vulawan he idsavuk diyà te selevukà he pelata.
PRO 25:12 Is kedawey te etew he uluwanen te etew he egkesuat he ebpemineg mahal pa heini kenà te elahas he vulawan.
PRO 25:13 Is egkeseriǥan he menunudtulà, ebpekepahagkap te egezamen te midsuǥù kandin, iring te meǥenew he wahig emun timpu te gulavung.
PRO 25:14 Ne is etew he ebpenangdù he zuen ibeǥey zin, iyan, kenè din idlaus, haazà is penangdù din igkepetug-iring te ǥapun wey keramag he kenà egkezumahan te uzan.
PRO 25:15 Is kebmepelevayen wey menayù he kegkaǥikaǥi ne ebpekeuwit te menge pengulu minsan te menge mezesen is gehinawa.
PRO 25:16 Kenè ka mebpesubra te kegkaan te teneb su kela ke mekeutè ka.
PRO 25:17 Kenè ka layun penumbaley ziyà te siringan nu, su kela ke meperahi sikandin ne egkeepesan ke zin.
PRO 25:18 Is etew he ebpenistiǥus te tarù kuntra te zuma zin, ne ebpekezezaat iring te ispada, badas, wey panà.
PRO 25:19 Emun timpu te kesamuk ne is kedsarig diyà te etew he kenà metinumanen, igkepetug-iring te ngipen he meǥaan en egkesepù wey iring daan te paa te pigket.
PRO 25:20 Is kedlengana te etew he utew egkeseeng, pinaaǥi te kegkentahi nu kandin, ne igkepetug-iring te edluwasen nu is kumbalè din dutun te timpu te meǥenew etawa edsevukan nu te sukà is palì din.
PRO 25:21 Emun egkevitil is kuntada nu, ipekaan nu, ne emun egkemezahan ipeinum nu.
PRO 25:22 Ne emun ebeelan nu heini, ne egkeeled sikandin kenikew, ne is Nengazen ebales kenikew.
PRO 25:23 Is keramag he ebpuun diyà te zizaya ed-uwit te uzan, ne iring dutun is etew he pereituk su ed-uwit te tudtul he igkesavà.
PRO 25:24 Deyzey pa is kedsivey ked-ubpa kenà is kebpekid-amur te esawa he peretebek.
PRO 25:25 Is kebpemineg te meupiya he tudtulanen he ebpuun diyà te meziyù, ne iring te ked-inum te meǥenew he wahig emun egkemazahan ki.
PRO 25:26 Is metazeng he etew he egkeuwit te lalung he etew iring te leveg he serebseb etawa meremerik he teheb.
PRO 25:27 Kenà meupiya emun ebpesubra ki te kegkaan te teneb, iring din daan is kedtinguhà he mezeliǥi ka layun te menge etew.
PRO 25:28 Is etew he kenè din egkeeǥen is suat din ne melemu egkezeeti iring te sevaha he inged he wazè din berengbeng.
PRO 26:1 Kenà ereg he ebpenggiyew emun gulavung ne kenè daan edrendeng emun tiraǥun, ne iring keniyan is tulebung su kenà dait he edeliǥen.
PRO 26:2 Kenà ed-utengan te rawak is etew he wazè din salà. Iiring dà heini te tagbis he edlayang, iyan kenà edlatun.
PRO 26:3 Kinahanglan he edlegkuten wey ebusalan is kudà wey asnu. Iring din is tulebung, kinahanglan he ebpigahan.
PRO 26:4 Kinahanglan he kenè nu tevaka is tulebung emun tinulebung is kebpekidlalag din kenikew, su kela ke mekeiring ka kandin.
PRO 26:5 Piru meupiya zaan ke edtevaken nu sikandin, su para metueni zin he kenà sikandin uluwanen sumalà is diyà te isip din.
PRO 26:6 Is etew he idsarig din diyà te tulebung is kegketudtula te ibpesavut din, ne iring dà te edtempezen din is paa zin su samuk is egkeperateng din.
PRO 26:7 Is erubasa he egkeǥiyen te menge tulebung ne wazè din pulus iring te paa te pigket.
PRO 26:8 Kelelelungan emun idhiket nu ziyà te petik is batu; iring din daan is kedeliǥa te tulebung.
PRO 26:9 Is erubasa he egkeǥiyen te menge tulebung ebpekezezaat iring te zuǥiyen he menge rasang he egewezan te langut.
PRO 26:10 Kelelalung heeyan emun ebpenaan nu is minsan hentei; iring din ke ibpeterebahu nu is minsan hentei he tulebung he edsaǥad.
PRO 26:11 Is asu, egkeenen din is ingkeutè din, iring te tulebung su ed-umanan din gihapun ebeeli is mezaat he vaal zin.
PRO 26:12 Deyzey pa is egkepengkusan te tulebung he etew, kenà is etew he kunaan din ke uluwanen sikandin.
PRO 26:13 Is tepulan, iyan kun kenè din igawasgawas dutun te valey su egkahandek kun sikandin he egkeizen te erimaung.
PRO 26:14 Is tepulan he etew ne ebelvelikid dà diyà te katri zin iring te lekeb he egketulung egkewangigwangig is bisagra zin.
PRO 26:15 Duen tepulan he menge etew he minsan is kedsungit dan te keenen ne igkepeǥuli zan.
PRO 26:16 Is tepulan, egkeisip din he metau pa sikandin kenà is pitu he etew he utew hustu is kegketevaka zan te id-insà diyà te kandan.
PRO 26:17 Is kebpesahugsahug te kesevaan te zuma; iring te ked-apul te ebpemengaǥat he asu pinaaǥi te kegewezi te telinga zin.
PRO 26:18 Is etew he ebinuangan din is duma zin, ne egkeǥiyen din he suyat din dà haazà, iring sikandin te ebuneǥen he henduen te edriyubriyub he vala te panà is ibpanè din he ebpekepatey.
PRO 26:20 Egkeevukan is hapuy emun wazè din tavun, ne egkeengked is kesevaan emun ed-engkezan is kebpemengituk.
PRO 26:21 Is uring iyan egkehimu he ebpekelangga, ne is tavun iyan ebpeketuvù te regreg, ne iring keniyan is etew he peretebek su ebpeketuvù sikandin te rirù.
PRO 26:22 Is menge lalag te pereituk henduen be te utew metaam he keenen he utew ta egkesuati te ed-eveleng.
PRO 26:23 Emun id-eles nu is mezaat diyà te ǥehinawa nu pinaaǥi te meupiya he kegkaǥikaǥi, iring ka te ziniyun he mibpekeplaan te pelata he kenà lunsey.
PRO 26:24 Is kuntada, ne uvag meupiya is egkeǥiyen din, iyan, minsan pa ke egkepenù te mezaat is gehinawa zin, edtembunan din pinaaǥi te menge lalag din.
PRO 26:25 Minsan pa ke utew meupiya he ebpemineǥen is menge lalag din, kenà ereg he edtuuwan su utew mezaat is netaǥù diyà te gehinawa zin.
PRO 26:26 Egkehimu he edtembunan din is mezaat he menge tuyù din pinaaǥi te akal, iyan, egketuenan ded is kelelalung din te minsan hentei.
PRO 26:27 Is ebangbang para meulug is duma, iyan sikandin egkeulug dutun. Is edlilid te vatu su wey melilizi is duma, iyan sikandin egkelikuan egkelilizi zutun.
PRO 26:28 Egkeepesan te teruen he etew is menge etew he mibiktima zin pinaaǥi te kedtarùtarù. Is etew he edigdig kenikew ebpekezezaat kenikew.
PRO 27:1 Kenè nu izantal is ed-ul-ulahan nu wey is meupiya he egkeulaula ziyà te kenikew te huziyan he timpu, su minsan pa is egkehitavù te sunud he andew wazè nu metueni.
PRO 27:2 Kinahanglan he iyan edalig kenikew is duma he etew; kenà te iyan ka edalig te keugelingen nu.
PRO 27:3 Meveǥat is batu wey meveǥat daan is pantad, iyan, edhuna pa he meveǥat is samuk he egkehimu he rimeǥas te kelelalung te menge tulebung diyà te kenikew.
PRO 27:4 Ebpekezezaat is pauk wey rerangit, iyan, edhuna pa is kebpengelikud.
PRO 27:5 Deyzey pa is kedawey te egkesayep diyà te etuvangan te sevaha he etew kenà ke egkaǥi ka te, igkeǥaǥew nu sikandin piru ebey-anan nu zà sikandin.
PRO 27:6 Is mesakit he kedawey te tutuu he emiǥu duen meupiya he ketuyuan, piru is hazek te kuntada kenà egkeseriǥan.
PRO 27:7 Is egkahantey en, ne minsan is teneb, kenè en sikandin egenahan he egkaan duen, iyan, is egkevitil, minsan is mepait, ne henduen be te meemis en is kegedgezama zin duen.
PRO 27:8 Is etew he ebpekeziyù diyà te valey zin ne kenè en ed-ulì, iring sikandin te tagbis he mid-engkezan din is salag din.
PRO 27:9 Is menge pehemut wey veyewà ebpekeveǥey te kelipey te gehinawa te etew; iring din ded daan is hustu he sambag te sevaha he emiǥu ne ebpekelipey kenita.
PRO 27:10 Kenè nu lipati is emiǥu nu wey is emiǥu te amey nu. Ne emun ebpekebmereǥen ka, kenè nu iyan peleleǥuya is suled nu he nekeziyù kenikew, su tuwas pa he ebpeketavang kenikew is siringan nu, kenà is suled nu he nekeziyù kenikew.
PRO 27:11 Mama, mebpekeuluwanen ka su iyan heini ebpekeveǥey kedì te kelipey, ne egketavak ku is minsan hentei he edsudì kedì.
PRO 27:12 Is etew he uluwanen egketuenan din emun duen piligru he egkehitavù kandin, piru is etew he kenà uluwanen ne kenà mevantey, umbe ebpekaantus sikandin.
PRO 27:13 Emun ebpesarig is etew he iyan sikandin ebayad diyà te kenikew te utang te etew he wazè din mekilala, siguruwa nu he zuen din igkesandà kenikew, minsan is bisti zin, su para mesiguru nu he mekevayad sikandin.
PRO 27:14 Is etew he iyan en igkepukew zin ke meselem is mezaǥing he kebpenuvadtuvad nu, ne ibpetug-iring din heini te kebpenrewaki kandin.
PRO 27:15 Is bahi he peretebek te esawa zin ne iring te edtiǥisan he atep emun rendeng.
PRO 27:16 Ne emun edewayen ta sikandin ne egkeiring ki zà te edawey te keramag wey te egkemkem te lana.
PRO 27:17 Is putew ebpekepeǥarang te putew zaan, ne is etew zaan, iyan ibmetau te zuma zin.
PRO 27:18 Is ed-elima te kayu he higus ebpekekaan te veǥas dutun te ed-elimahan din. Ne is suluǥuen he ebpurung ebpenilbi te egalen din ne egkezeliǥan.
PRO 27:19 Iring te egkeehè ta is alung ta ziyà te wahig, pinaaǥi te keugelingen ta he gehinawa, egketuusan ta ke metazeng ki he etew wey ke kenà.
PRO 27:20 Kenà egkeengked is kebpemematey te etew; ne is suat te etew ne kenè daan egkeengked.
PRO 27:21 Egketuenan is hustu he vulawan wey is hustu he pelata pinaaǥi te kegezami zuen pinaaǥi te hapuy, ne is etew zaan egketuenan is ked-etew zin pinaaǥi te kegkezeliǥi kandin.
PRO 27:22 Is tulebung minsan ed-iringen te pa te parey he ed-ey-eyazan ebeveyuwa su wey maawà is ukap, iyan, kenà gihapun egkaawà is ketutulebungi zin.
PRO 27:23 Pekeventayi nu wey kenè nu lemlemuwi is menge uyaǥen nu,
PRO 27:24 su is menge ketiǥeyunan wey kevantug, kenà edtaman te taman is kegkeengkena zuen te etew.
PRO 27:25 Egeraven nu is menge igkumpey nu; ne egkesuvul ǥihapun haazà is migeravan nu, su para zuen layun sagbet he egkekaan te menge uyaǥen nu puun te menge vuvungan.
PRO 27:26 Ebpekehimu ka te visti pinaaǥi te vulvul te menge kerehidu, ne ebpekepemasa ka te tanà pinaaǥi te halin te menge kambing nu.
PRO 27:27 Ebpekekuwa ka zaan te zekelà he ǥatas puun dutun te menge kambing para te pemilya nu ragkes is menge suluǥuen nu he vahi.
PRO 28:1 Is etew he lalung tekew en ebpelaǥuy minsan wazà edal-as kandin; iyan, is etew he metazeng iring te erimaung su mevurut mulà sikandin.
PRO 28:2 Emun egkeilis-ilis is menge pengulu ziyà te sevaha he ginhedian, tuus heeyan he mesinupaken is menge etew zutun. Piru ke zuen uluwanen he pengulu kayi, ebmelig-en wey ebpedayun is inged.
PRO 28:3 Is pubri he edlislisezen din is iring din he pubri, ne iring sikandin te utew mereǥes he uzan he ebpekezezaat te menge pinemula.
PRO 28:4 Is etew he kenà edtuman te Kesuǥuan, igkesuat din is kelelalung, iyan, is etew he edtuman kayi, igkeepes din mulà is kelelalung.
PRO 28:5 Is menge etew he lalung kenè dan egkesavut is hustu he kukuman, piru is menge etew he edangep te Nengazen egkepurung dan mulà egkesavut is hustu.
PRO 28:6 Deyzey pa is pubri he wazà duen igkesawey kenà is sepian he kenà hustu is menge ulaula zin.
PRO 28:7 Is anak he edtuman te Kesuǥuan ne uluwanen, piru is anak he ebpekid-elukuy te wazè din pulus he etew, ne egkepeel-elezan din is amey zin.
PRO 28:8 Is etew he ibpeuswag din is ketiǥeyunan din pinaaǥi te utew subra he kebpepursintu, is ketiǥeyunan he egketiǥum din, egkehimu he egkaangken te etew he igkeǥaǥew zin mulà is menge pubri.
PRO 28:9 Is minsan hentei he kenà edtuman te Kesuǥuan, egkeepesan te Megbevayà minsan is menge pengemuyù din.
PRO 28:10 Is etew he edhimuwen din is paaǥi wey mekeulaula te mezaat is etew he metandang, ne egkeuney sikandin te mezaat he vaal zin. Iyan, is etew he wazà duen igkesawey ed-uswag mulà.
PRO 28:11 Is menge etew he sepian, ed-isipen dan he uluwanen en sikandan, piru is pubri he etew he zuen din kedsavut, egketuenan din ke hengkey he kelasi he etew is sepian.
PRO 28:12 Emun metazeng is egkehimu he zekelà is keǥehem din, ne henduen be te ibayew is menge etew tenged te kegkelipey zan, iyan, emun lalung is egkehimu he zekelà is keǥehem din ne edliyasen is menge etew.
PRO 28:13 Is etew he id-eles din is menge salè din ne kenà ed-uswag, iyan, is etew he idtug-an din wey ed-engkezan din te ed-ulaula is menge salè din, igkehizu sikandin te Megbevayà.
PRO 28:14 Utew zeyzey is etew he layun din edtehuza is Nengazen, iyan, is etew he kenà ebpezumazuma, ne ziyà sikandin ebpekepevayà te kezeetan.
PRO 28:15 Iring te edhiniǥer he erimaung wey ebpemendurus he bir is lalung he etew he edumala te menge pubri.
PRO 28:16 Is pengulu he mesipala te menge sakup din iyan kes pengulu he kenà metau. Piru is pengulu he kenà egkesuat he edsepian te kenà meupiya he paaǥi ne edluǥeyazan te untung.
PRO 28:17 Is etew he edsemuken te isip din tenged te kebpekevaal zin te mezaat pinaaǥi te kebpemumunù din, wazè din kelinew taman te kebpatey zin. Ne kenà sikandin ipetevangi te minsan hentei.
PRO 28:18 Is etew he wazè duen igkesawey ne kenà egkekeizan, piru is etew he kenà hustu is ulaula zin ne meǥaan egkahanew.
PRO 28:19 Is mevasuk ne ed-uzaren, iyan, is peǥulen mulà ne egkeey-eyuwan.
PRO 28:20 Is etew he egkeseriǥan ne edtuvazan te Megbevayà; iyan, is etew he egègaanen din is kegketiǥayun din te zekelà, ne iyan egkepengkusan din is kegkesiluti kandin.
PRO 28:21 Kenà meupiya emun duen edepiǥan nu. Piru zuen duma he menge etew he mibaal kayi tenged te midsipsipan sikandan, minsan deisey zà heini.
PRO 28:22 Is etew he legezen, eggègaanen din is kedsepian din, iyan, wazè din metueni he iyan edtaǥad kandin is kewewezai.
PRO 28:23 Igkesuat pa te etew emun edewayen nu sikandin su wey mepenurù, kenà ke edigdiǥen nu sikandin.
PRO 28:24 Is etew he edtuu he kenà sayep emun iyan din dà ebpenekawan is amey zin wey iney zin, ne iring sikandin te tulisan.
PRO 28:25 Is etew he leǥezen ebpeketuvù te kesevaan, iyan, is etew he edsarig te Nengazen ed-uswag mulà sikandin.
PRO 28:26 Is etew he edsarig te keugelingen din ne tulebung. Is etew he ebpenigudu para med-uluwanen ne kenà egkemenu.
PRO 28:27 Is etew he edtelewizen din is pubri kenà egkeeminan te minsan hengkey he kinahanglan din, iyan, is etew he kenè din en ebeliyen is menge pubri ebpenrewakan sikandin.
PRO 28:28 Emun lalung is egkehimu he edumala edliyasen is menge etew. Piru emun ebpematey haazà is menge lalung, ne iyan en maan edumala is menge metazeng.
PRO 29:1 Is etew he kenà ebpezumazuma minsan layun en edewaya, ne iyan egkepengkusan din is egkerumpak sikandin diyà te kezeetan ne wazè en paaǥi wey meǥaud sikandin dutun.
PRO 29:2 Emun metazeng is pengulu, egkelipey is menge etew, iyan, emun lalung is egkehimu he pengulu, egkengeseeng is menge etew.
PRO 29:3 Is etew he zekelà is suat din he mebmetau ebpekeveǥey te kelipey ziyà te amey zin. Is etew he ebpengumpadi te vahi he ebelegyà te zengeg din, ne edhelhelasen din is ketiǥeyunan din.
PRO 29:4 Emun iyan igkeseeng te hadì is ked-ikul te hustu he kukuman, egkelig-enan is ginhedian din, puru emun ebpeheheramham sikandin su egkesuat he edsipsipan, ne edezeetan din is ginhedian din.
PRO 29:5 Is etew he edigdiǥen din is duma zin, ne iring te ebaal te lelevù su wey meuney melelevù sikandin.
PRO 29:6 Is lalung he etew egkelitag te keugelingen din he salà, iyan, is etew he metazeng, ne egkanta te kegkelipey zin.
PRO 29:7 Is etew he metazeng midlevanan din is ketenged te menge pubri. Kenà heini egkesavut te etew he lalung.
PRO 29:8 Is menge etew he sumpalit iyan edretem te kesamuk te sevaha he inged, iyan, ebmelinew mulà is inged pinaaǥi te etew he uluwanen.
PRO 29:9 Wazà egkepeveyaan emun ebpeked-etuvang diyà te hukmanan is uluwanen he etew wey is tulebung, ne wazà kelinew zutun su haazà is tulebung ebpelelanget wey ebpemenulà.
PRO 29:10 Is etew he utew egkesuat he ebunù, ne minsan is etew he ebpeninidtuwan edumutan din, ne edtinguhaan din te edhimatey.
PRO 29:11 Is etew he tulebung kenè din egkeeǥen is pauk din, iyan, is etew he uluwanen egkeeǥen din mulà is kandin he pauk.
PRO 29:12 Emun ebpemineg is pengulu te tarù he menge tudtul, ne egkehimu he lalung is langun he menge upisyal zin.
PRO 29:13 Is pubri wey is ebpendaagdaag kandin neked-iiring dà su imbeǥey zà te Nengazen is mata zan.
PRO 29:14 Emun metazeng is kukuman te sevaha he hadì diyà te menge pubri, epedayun is kedumala zin wey egkelig-enan heini.
PRO 29:15 Is kebmensuwa te vatà pinaaǥi te kedlegkuta kandin, ebpekepenurù kandin ne egkehimu he uluwanen, iyan, emun pinesagdan is batà, egkepeel-elezan din is iney zin.
PRO 29:16 Emun lalung is ebpemendumala, ne ed-uswag daan is ked-ulaula te salà. Piru heini sikandan egkezeetan, ne egkemetmetahan heini te menge metazeng.
PRO 29:17 Mensuwa nu is anak nu, ne ebpekeveǥey sikandin kenikew te kelinew te ǥehinawa wey kelipey.
PRO 29:18 Emun wazà lalag te Megbevayà he ebpenurù te sevaha he inged, wazà kayi kegkelinew. Utew zeyzey is menge etew he edtuman te menge ibpenurù te Megbevayà.
PRO 29:19 Duen suluǥuen he kenà egkesuat he ebpenuruen pinaaǥi te kegkeǥiyi nu kandin, su minsan ebpekesavut ne kenè ke zin ebpemineǥen.
PRO 29:20 Deyzey pa is egkepengkusan te tulebung he etew, kenà te etew he ebpengaǥi te wazà pulus.
PRO 29:21 Emun ibpaangè nu is suluǥuen nu puun pa te kengunguhezi zin, iyan egkepengkusan is ebpekeveǥey sikandin te seeng kenikew.
PRO 29:22 Is etew he melemu he egkepauk, ebpeketuvù te kesevaan, ne layun dà ebpekehimu te salà.
PRO 29:23 Tenged te kebpelavew te etew, ebminus is pid-etawan din; iyan, tenged te kenè din kebpelavew, edtehuzen wey edeliǥen sikandin.
PRO 29:24 Is etew he kumpeniya te tekawen, iyan ebpekezezaat te keugelingen din. Minsan ibpepenangdù pa sikandin he iketug-an din ke hentei is duma zin, ne kenà sikandin edtug-an.
PRO 29:25 Is kegkahandek, ebpekezezaat te etew; iyan, ke edsarig ki zà te Nengazen, ne wazè ta igkemenu.
PRO 29:26 Mahabet is edsarig te hukum te pengulu, iyan, Nengazen dà is ebpekeveǥey te hustu he kukuman.
PRO 29:27 Is menge metazeng egkeepesan dan is menge lalung, ne is menge lalung egkeepesan dan daan is menge metazeng.
PRO 30:1 Iyan heini menge erubasa ni Agur he anak ni Jake he tig-Masa. Migkaǥi zin heini ziyà te ki Itiel wey ziyà te ki Ucal:
PRO 30:2 “Iyan a kinepeglungan te langun he menge etew. Is ked-isip-isip ku ne henduen be te kenà ked-isip-isip te etew.
PRO 30:3 Wazà a mebpenginenau he mehimu a he uluwanen, ne wazè ku zaan netuenan mehitenged te Megbevayà.
PRO 30:4 Duen be etew he nekehendiyà te langit he midliku ded kayi te kelibutan? Duen be etew he nekekemkem te keramag etawa neketenges te wahig te manggad? Duen be etew he nengelintau wey mekesavuk is menge zulunà te kelibutan? Emun duen nu nekilala, keǥiya nu kedì is ngazan din wey is ngazan te menge anak din.
PRO 30:5 Is kada lalag te Megbevayà ne egkeseriǥan utew. Iring sikandin te kelasag te menge etew he ed-aput diyà te kandin.
PRO 30:6 Kenè nu umani is ibpesavut din, su emun ed-ul-ulahan nu heini, edsewayen ke zin ne wazè en igkevarew nu emun egkeǥiyen ke zin he teruen.”
PRO 30:7 Nengazen, duen dezuwa he ebuyuen ku ziyà te kenikew. Emun egkehimu ne edhangyù a he iveǥey nu kediey heini te kenè e pa ebpatey.
PRO 30:8 Iyan heini: iyan ka metau he kenà a meketarùtarù. Ikezuwa, iyan ka metau he kenà a mehimu he utew egkeey-eyuwi etawa mehimu he sepian su iyan dà egkesuatan ku he zuen ku mekaan te kada andew.
PRO 30:9 Su emun utew zekelà is ketiǥeyunan ku kela ke iyan ku haazà meseriǥi ne iyan ku sikew egkeiniyuǥan; ne emun pubri a, kela ke mekepemenakew a ne egkepeel-elezan ku sikew.
PRO 30:10 Kenè nu pemeyunga is suluǥuen emun ebpekedlalag kew te egalen din, su emun ed-ul-ulahan nu heeyan ne ebpenrewakan ka zutun te suluǥuen ne egkepigedahan ka.
PRO 30:11 Duen menge etew he kenà ebpekehimu he ebpengemuyù he tuvazi te Megbevayà is menge ǥinikanan dan, kekenà, nasì dan dà ebpenrewaki.
PRO 30:12 Duen daan menge etew he egkeisip dan he wazè en igkesewayi kandan, piru is tutuu meremerik is ulaula zan.
PRO 30:13 Duen menge etew he utew en hembugiru, minsan is kebpenirapsirap dan ne henduen te hentei sikandan.
PRO 30:14 Duen menge etew he henduen te vuaya, iyan baal zan is kebpemintahà te menge pubri.
PRO 30:15 Is etew he zekelà is kadar zin ne iring te limatek. Layun dà egkaǥi te, “Beǥayi a!” Duen daan tetelu etawa heepat he kenà egkeperahan:
PRO 30:16 is iveyaan, is bahi he kenà ebpekaanak, is tanà su kenà egkeperahan te uzan wey hapuy su kenà daan heini egkeperahan te idtavun duen.
PRO 30:17 Is etew he ed-undaunda wey kenè din ebpemineǥen is menge ǥinikanan din ne edtuktukan te menge uwak is menge mata zin, ne edeesan te menge kulaǥu is minatey he lawa zin.
PRO 30:18 Duen daan heepat he utew ku igkeinuinu ne kenè ku heini egkesavut:
PRO 30:19 Ebmenumenu is kulaǥu he mekelayang diyà te hewhewanan, is uled ebmenumenu he ebpenanap diyà te menge vetuwen, is barku ebmenmenuwen he mekeǥampung diyà te zaǥat, wey ebmenmenuwen te kenakan he mekepengulitawu te raǥa.
PRO 30:20 Iyan heini ed-ul-ulahan te vahi he mengungumpadi: Ebpehilavet sikandin te zuma he maama, ne kegkeipus dutun ebpemeziǥù ne ke sikandin diyà te esawa zin te wazè din mid-ulaula he mezaat.
PRO 30:21 Duen tetelu etawa heepat he kenà egkaantus te menge etew kayi te kelibutan:
PRO 30:22 Is suluǥuen he nehimu he hadì, is tulebung he neezenan te minsan hengkey he egkesuatan din te egkaan, is egkengeepesan he vahi he neesawa, wey is uripen he vahi he ebpekeliwan te vahi he teǥiuripen kandin.
PRO 30:24 Duen heepat he zezeisey he linimbag, iyan, utew memetau:
PRO 30:25 Is menge lemetik, minsan dezeisey zà wey meluya sikandan, ebpeketiǥum dan te keuyaǥan dan timpu te ǥulavung,
PRO 30:26 is menge badir, kenà sikandan memezesen, iyan, diyè dan ebaal te ubpeey zan te vetuwen,
PRO 30:27 is menge terapan, wazè dan pengulu, iyan, egkesevaha zan emun edlayang dan,
PRO 30:28 is menge telètà, melemu zà he ed-emien, iyan, diyè ta egkengaahà te turuǥan te hadì.
PRO 30:29 Duen tetelu etawa heepat he menge linimbag he hembuǥen ke edhipanew:
PRO 30:30 is erimaung, iyan utew mezesen te langun he langgam he wazà igkahandek,
PRO 30:31 is lumansad he manuk, is meemahan he kambing, wey is hadì he edhuna te menge sundaru zin.
PRO 30:32 Emun nekevaal ka te tinulebung tenged te kebpelavew nu, wey emun ebpelanu ka te mezaat ne engkezi nu heeyan!
PRO 30:33 Emun edtulungan nu egkutawa is gatas egkehimu heini he mentikà? Ne emun edsumbaǥen nu is izung te duma nu kenè be edsengguwen man hei? Umbe emun ebaal ka te igkepauk te sevaha he etew, iyan heeyan ebpuunan te samuk.
PRO 31:1 Iyan heini menge erubasa ni Hadì Lemuel he tig-Masa, he impenurù kandin te iney zin:
PRO 31:2 Mama, neetew ka he iyan tavak te menge kebpengemuyù ku. Migkeǥiyan ku sikew he kenè nu
PRO 31:3 usiki is timpu wey selapì nu para te menge vahi, su iyan sikandan hinungdan he nezeetan is menge hadì.
PRO 31:4 Lemuel, kenà dait he ed-inum is menge hadì te vinu. Kenà dait he edtinguhà is menge pengulu te minsan hengkey he ebpekelangut he menge inumen.
PRO 31:5 Su emun egkelangut sikandan, ne kela ke melipati zan is menge kesuǥuan, ne ed-ewaan dan te ketenged is menge pubri.
PRO 31:6 Iyan ereg he ebpelelangut is etew he egkeewaan en te perateng, wey mesakit is gehinawa zan.
PRO 31:7 Ereg sikandan he ed-inum te vinu su wey zan melipati is kewewezai zan ne wey zan kenà metenuzi is menge elentusen dan.
PRO 31:8 Levani nu is ebpekevenar he mekehizuhizu he etew, he kenà metau he ebpengetezengan he iyan ebpekeuǥup kandin.
PRO 31:9 Emun egkukum ka ne ipeikul nu te hustu he kukuman, ne levani nu is ketenged te menge pubri.
PRO 31:10 Is buutan he esawa mahal pa kenà is menge rubi, iyan, utew mereǥen he ebpen-ahaan.
PRO 31:11 Is maama he buutan is esawa zin, utew zekelà is kedsarig din dutun te esawa zin, ne kenà sikandin egkeǥansi.
PRO 31:12 Is buutan he vahi ne taman en te kebpatey zin, ne kenà sikandin ed-ula-ula te minsan hengkey he ebpekezezaat te esawa zin.
PRO 31:13 Meǥied sikandin he ebpemaal te manggad he welin wey linu.
PRO 31:14 Igkepetug-iring sikandin te varku te menge nigusyanti; ne ed-uwit sikandin te keuyaǥan minsan te meziyù is ebpuunan din he menge inged.
PRO 31:15 Merusirem pa ne ed-enew en sikandin is ed-andam te egkekaan para te pemilya zin, wey egkeǥiyan din is menge suluǥuen din he menge vahi ke hengkey is ebeelan dan.
PRO 31:16 Metau sikandin he ebpilì te tanà, ne ebpemesahan din heini. Ebpepemulaan din heini te paras he ebpemesahan din te selapì he netiǥum din.
PRO 31:17 Meviserviser sikandin wey utew mesigudu he edterebahu.
PRO 31:18 Metau sikandin he ebpetiǥayun, ne mesigudu sikandin he edterebahu su taman en te ebmerusirem.
PRO 31:19 Iyan en sikandin ebpenhavel te ebeelan he kumbalà.
PRO 31:20 Igkeǥaǥew zin is menge pubri wey ebpenginahanglan.
PRO 31:21 Emun timpu te meǥenew, ne kenè din igkeseeng haazà su zuen mekepal he manggad para te pemilya zin.
PRO 31:22 Ebpengavel sikandin te para te idempas diyà te hizeǥaan. Ne ebivisti sikandin te mekempet wey mahalen.
PRO 31:23 Diyà te inged dan, ne telehuzen is esawa zin wey sevaha te menge edlingahaan dutun.
PRO 31:24 Haazà is bahi ebpenahì te mekempet he menge visti su manggad he linu, wey ebpemaal zaan sikandin te vakes ne haazà pudu zin ibpemelegyà diyà te menge tumitinda.
PRO 31:25 Melig-en sikandin wey edtehuzen, ne kenè din igkehandek is egkehitavù te huziyan he menge andew.
PRO 31:26 Emun egkaǥi sikandin ne egketuusan ta he uluwanen sikandin, ne meelima sikandin he ebpenurù.
PRO 31:27 Meǥied sikandin, ne edsusiyen din ebpurungi is dutun te pemilya zin.
PRO 31:28 Utew sikandin egkezeliǥi te menge anak din wey te esawa zin.
PRO 31:29 Ne egkaǥi is esawa zin diyà te kandin te, “Mahabet he vahi is meupiya is menge vaal zan, iyan, kenè dan ebpekerepeng kenikew.”
PRO 31:30 Is kekempet te vahi ebpekelimbung, ne edlavey zà. Is bahi he edtahud te Nengazen ne iyan dait he edeliǥen.
PRO 31:31 Dait sikandin he edsuhulan tenged te meupiya he menge vaal zin wey edeliǥen diyà te mezakel he menge etew.
ECC 1:1 Iyan heini menge lalag te megwewali he anak ni Hadì David, he hadì diyà te Jerusalem:
ECC 1:2 Wazà pulus te minsan hengkey. Wazà iyan menge pulus te langun!
ECC 1:3 Hengkey is egkekuwa te menge etew ziyà te langun he hineǥuan dan kayi te kelibutan?
ECC 1:4 Egkeawà is sevaha he lapis te kevuwazan ne egkepuliyan en maan te sevaha, piru is kelibutan kenà egkahalin.
ECC 1:5 Edsilà is andew, ne edsanlep; ne edlikù-likù dutun te mibpuunan din.
ECC 1:6 Edsamber is keramag pehendiyà te zivavà wey zizaya; ne edlibut-libut dà heini wey edlikù-likù.
ECC 1:7 Is menge wahig edtudà pehendiyà te zaǥat, ne kenà heini egkepenù. Ne haazà is wahig ne ebpekelikù gihapun diyà te mibpuunan din, ne ed-uman en maan edtudà pehendiyà te zaǥat.
ECC 1:8 Mekeveveley he ed-is-isipen is minsan hengkey! Minsan utew en mahabet is neehè ta ne egkesuat ki pa he ed-uman ed-ahà. Ne minsan utew en mahabet is nezineg ta ne egkesuat ki pa he ed-uman ebpemineg.
ECC 1:9 Is nengehitavù en ne egkeuman gihapun egkengehitavù. Is egkengehitavù guntaan ne nengehitavù en dengan. Umbe wazà beǥu he nengehitavù kayi te kelibutan.
ECC 1:10 Kayi te kelibutan wazà egkekaǥi ta he veǥu su is egkeǥiyen ta he veǥu ne zengan dà heeyan.
ECC 1:11 Kenè te en egketenuzan is mengehitavù te nehuna he menge timpu. Ne is huziyan he menge lapis te menge kevuwazan, ne kenè dan en daan egketenuzan keuzemà is mibpemeelan tew ǥuntaan.
ECC 1:12 Siak is megwewali ne hadì a te Israel, ne ziyà a ed-ubpà te Jerusalem.
ECC 1:13 Mibpurungan ku istudyuwi is mehitenged te kedsavut, ne pinaaǥi te ketau ku, mibpurungan ku susiya is minsan hengkey he egkengeulaula kayi te kelibutan. Ne zutun, netuenan ku he utew merasey is ibanglis te Megbevayà te menusiyà.
ECC 1:14 Neehè ku is langun he ebpen-ul-ulahan kayi te kelibutan, ne wazè din menge pulus; iring dà te edal-as a te keramag.
ECC 1:15 Ke hengkey is sayep ne kenè en egkevelvelewanan. Ne is wazà meengkà ne kenè en egkehimu he ed-engkaan.
ECC 1:16 Ne neisip ku is, “Edhuna a he metau te nehuna kedì he menge hadì he nemendumala te Jerusalem. Lavew is ketau ku wey keuluwanen ku te minsan hentei kandan.”
ECC 1:17 Nenigudu a wey ku metueni is mibizahayan te ketau wey ketutulebungi. Ne ǥuntaan neisip-isip ku he wazà daan kayi pulus; iring dà te edal-as a te keramag.
ECC 1:18 Su is ked-iseg te ketau ku, ne iyan daan ked-iseg te seeng ku.
ECC 2:1 Guntaan egezaman ku is kedlipeylipey para metueni ku ke hengkey is meupiya he kebpengungubpaan. Ne nesusi ku he wazà daan dutun pulus.
ECC 2:2 Su is ked-engit wey kedlipeylipey tinulebung dà ne wazè din pulus.
ECC 2:3 Migezaman ku he edlipeylipey a pinaaǥi te vinu. Ne minsan uluwanen a, migezam a medtinulebung. Neisip ku he kela ke iyan heini kineupiyahan he ereg he ebeelan te etew kayi te mevavà he kebpengungubpaan din kayi te kelibutan.
ECC 2:4 Mibaal a te zezekelà he menge vutang: midtukud a te menge valey ku ne mibpemula a te menge paras.
ECC 2:5 Mibpevaal a zaan te menge pemuleey he mibpepemulaan ku te langun he kelasi te menge prutas.
ECC 2:6 Mibaal a zaan te menge risirbuwir para metiǥum ku is wahig su wey ku mepetudai is mahabet he menge kayu ku.
ECC 2:7 Nemasa a te menge uripen menge maama wey menge vahi, ne is duma ne ziyè en mengeetew te valey ku. Ne iyan a utew mahabet is menge uyaǥen te langun he nekeubpà diyà te Jerusalem.
ECC 2:8 Ne midtiǥum a zaan te zekelà he selapì, bulawan, wey zuma he menge ketiǥeyunan he ebpuun te menge hadì wey ziyè te menge lugar he nesakup ku. Mezakel is memetau he menge perekanta ku, he menge maama wey menge vahi, ne zuen ku mahabet he menge esawa. Naangken ku is minsan hengkey he egkesuatan te etew!
ECC 2:9 Iyan a pinekesepian te langun he etew he nekeubpà diyà te Jerusalem, ne wazà maawà is keuluwanen ku.
ECC 2:10 Migkuwa ku is minsan hengkey he egkesuatan ku. Mibeelan ku is minsan hengkey he ebpekelipey kedì. Ne utew ku ingkelipey is langun he menge vaal ku, ne iyan heini vales te menge kedhaǥù ku.
ECC 2:11 Piru hein mibpurungan ku is-isipa is langun kayi te mibeelan ku, iyan neuma te isip ku is wazà pulus kayi te langun. Iring dà te edal-as a te keramag. Wazà iyan pulus te kedhaǥù kayi te kelibutan.
ECC 2:12 Hengkey pa is egkehimu te ebpekesunud he menge hadì? Hengkey pa kekenà, iyan ded kes neveelan en duen te nehuna kandan. Migezaman ku te edhindeg is ketau wey ketutulebungi.
ECC 2:13 “Meupiya is ketau kenè te ketutulebungi, su iring ded heini te kerayag su zeyzey heini te kerusireman.”
ECC 2:14 Su is uluwanen he etew egketuenan din ke hendei sikandin ebpekepevayà, iyan is tulebung mulà ne kenà. Iyan, netuenan ku he ebpeked-iring is egkepegkusan dan te dezuwa su ebpatey zan pudu.
ECC 2:15 Umbe, nekekaǥi a ziyà te ǥehinawa ku te, “Ke hengkey is egkeula-ula te tulebung iyan daan egkeulaula kedì. Umbe hengkey is egkekuwa ku he keupiyaanan kayi te ketau ku? Wazà iyan kayi pulus!
ECC 2:16 Su ebpatey pudu is uluwanen he etew wey is tulebung, ne te huziyan he menge andew ne pudu sikandan egkelipati.”
ECC 2:17 Umbe, wazà mekepenunuat kedì is kebpengungubpaan ku, su is menge vuluhaten kayi te kelibutan ne iyan nekeuwit kedì diyà te kemereǥenan. Heini is langun wazè din pulus; henduen e zà te edal-as te keramag.
ECC 2:18 Nesuǥey a su geina te kinahanglan he igketaǥak ku ziyà te zuma is rimeǥas te menge kedhaǥù ku.
ECC 2:19 Ne wazà ku en metueni ke metau ve wey ke tulebung is ebpekepangevilin. Piru iyan dan en ebpekevayàbayà te minsan hengkey he egkekuwa ku pinaaǥi te ketau ku wey kedhaǥù ku. Wazè kayi pulus.
ECC 2:20 Umbe, nesuǥey-a te langun he midheǥuan ku kayi te kelibutan.
ECC 2:21 Minsan pa ke edhaǥù ka duma is keuluwanen wey abilidad, igketaǥak nu zà is langun he midheǥuan nu ziyà te menge etew he wazà iyan medhaǥù kayi. Wazà kayi pulus, ne utew heini mezaat.
ECC 2:22 Hengkey is egkekuwa te etew te kedhaǥù din wey kebpeningkamut din kayi te kelibutan?
ECC 2:23 Dutun te kedterebahu zin egkeseǥazan din is kegkesekiti wey kegkeseeng ne minsan mezukilem ne kenè en ebpekehimeley is isip din. Utew heini wazè din pulus.
ECC 2:24 Umbe, is utew meupiya he ed-ul-ulahan te etew iyan is kegkaan wey ked-inum, kedlipeylipey zuen te hineǥuan din. Ne neisip ku he minsan heini ebpuun diyà te Megbevayà.
ECC 2:25 Su ebmenmenuwen ta he mekekaan ki wey mekelipeylipey te hineǥuan ta emun kenà heini ibeǥey te Megbevayà?
ECC 2:26 Megbevayà is ebeǥey te ketau, keuluwanen wey kelipey zutun te menge etew he ebpekepenunuat kandin. Iyan, is menge mekesesalà mibpengelinteuwan din he mebpenigudu sikandan te kedtiǥum te menge azen su is egkengetiǥum dan ne ibeǥey zin diyà te menge etew he nekepenunuat kandin. Is kedhaǥù te menge mekesesalà wazè din pulus; henduen dà te edal-as sikandan te keramag.
ECC 3:1 Duen netail he timpu te kada vuluhaten kayi te kelibutan:
ECC 3:2 Duen timpu te kegkeetew wey timpu zaan te kebpatey, duen timpu te kebpemula wey timpu zaan te kedraǥun,
ECC 3:3 duen timpu te kedhimatey wey timpu zaan te kebawì, duen timpu te kedrundus wey timpu zaan te ked-uman kedtukud,
ECC 3:4 duen timpu te kedsineǥew wey timpu zaan te ked-engit, duen timpu te kedlalew wey timpu zaan te kedsayew,
ECC 3:5 duen timpu te kebpeyapat te menge vatu wey timpu zaan te kedtiǥum te menge vatu, duen timpu te kegkepkep wey timpu zaan te kenà kegkepkep,
ECC 3:6 duen timpu te kebpen-ahà wey timpu zaan te kedtazin, duen timpu te kedtipig wey timpu zaan te kedlaga,
ECC 3:7 duen timpu te kebindas wey timpu zaan te kedapi, duen timpu te kebpereremek wey timpu zaan te kegkaǥi,
ECC 3:8 duen timpu te kebmahal wey timpu zaan te kedumut, duen timpu te kedtebek wey timpu zaan te kebpeelukuyà.
ECC 3:9 Hengkey is egkekuwa te menge etew pinaaǥi te langun he hineǥuan dan?
ECC 3:10 Neehè ku is menge vuluhaten he imbeǥey te Megbevayà he igkeipeng te etew.
ECC 3:11 Ne heini ne inteǥane en te Megbevayà is egkengehitavù dutun te hustu he timpu. Mibeǥayan ki zin te penganduy he metueni ta is peleebuten, piru kenè ta heini egketegkad is menge mibeelan din puun pa te puunà taman te ketepusan.
ECC 3:12 Netuenan ku he is pinekemeupiya he ebeelan te etew te kemulu pa sikandin uuyag ne iyan is kedlipey, is kebaal te meupiya,
ECC 3:13 is kegkaan wey ked-inum, wey kedlipey zin te midheǥuan din. Heini he menge vutang ne tuvad te Megbevayà.
ECC 3:14 Ne netuenan ku he is mibeelan te Megbevayà ne ebpedayun taman te taman, ne kenè en heini egkevelvelewanan. Mibeelan heini te Megbevayà para medtahud is etew kandin.
ECC 3:15 Ne ke hengkey is nehitavù guntaan wey is egkehitavù pa te huziyan he timpu nehitavù en heeyan. Su id-ulit-ulit dà te Megbevayà is menge nehitavù.
ECC 3:16 Neehè ku he kayi te kelibutan he kelelalung is ebpedayun, ne kenà iyan is hustu he kukuman wey ketazeng.
ECC 3:17 Ne nekekaǥi a ziyà te ǥehinawa ku te, “Edhukuman te Megbevayà is metazeng wey menge lalung he menge etew, su zuen intail zin he timpu te uman sevaha he vuluhaten.
ECC 3:18 Migezaman te Megbevayà is menge etew para ikepaahà kandan he iring dà sikandan te menge langgam.
ECC 3:19 Is etew wey langgam ne neked-iring dà is egkepengkusan dan; pudu sikandan ebpatey. Neked-iiring sikandan he egeǥehinawa, umbe wazà mibizahaayan te etew wey langgam. Tutuu iyan he is langun wazè din pulus.
ECC 3:20 Neked-iiring is egkepengkusan te langun he egeǥehinawa he linimbag. Sikandan pudu ne ziyà ebpuun te tanà, ne ziyè ded te tanà sikandan edlikù.
ECC 3:21 Wazà nesayud ke is gimukud te etew ebpehendiyè be te zivavew wey is gimukud te langgam ne ebpehendiyà be te zizalem te tanà?”
ECC 3:22 Ne tenged kayi, neehè ku he wazè en duma pa he meupiya para te etew, kekenà, iyan dà is kedlipey pinaaǥi te hineǥuan din, su para heini kandin. Su wazà ebpekepenudtul te etew ke hengkey is egkeulaula ke ebpatey en sikandin.
ECC 4:1 Ne neehè ku is menge kebpenlupig kayi te kelibutan. Neehè ku is menge luhà te menge edèdaaǥen, ne wazà ebpekelangan wey edlig-en kandan. Dekelà is gehem te menge edaagdaag kandan.
ECC 4:2 Umbe, nekekaǥi a te zeyzey pa sikan is menge nemematey en kenà is menge uuyag.
ECC 4:3 Ne iyan edhuna utew he zeyzey sikan is wazè en ipen-anak, su wazè en sikandan mekaahà te langun he menge mezaat he menge vaal kayi te kelibutan.
ECC 4:4 Neehè ku he is etew ebpenigudu wey ebeelan din is taman te egkehimu zin su egkesina sikandin te zuma zin. Wazà daan kayi pulus; henduen dà te edal-as ka te keramag.
ECC 4:5 Is tulebung he etew ebpepepeǥul, ne pinaaǥi kayi ne midezeetan din is keugelingen din.
ECC 4:6 Meupiya pa ke zeisey zà is keenen ta he melinawen ki, kenà ke zekelà is keenen ta he utew ta ingkeveley is kedleǥuza kayi, su wazà kayi pulus. Henduen dà te edal-as ka te keramag.
ECC 4:7 Duen pa neehè ku kayi te kelibutan he wazè din pulus:
ECC 4:8 Duen sevaha he etew he sebsevaha zin; wazè din anak wey suled. Piru edsigudu en sikandin edhaǥù su kenà sikandin kuntintu te netiǥeyunan din. Kesikandin diyà te gehinawa zin te, “Kenà ad ebpekelipeylipey tenged te subra he kebpenigudu ku kedhaǥù.” Piru wazà ku egketeǥakan te hineǥuan ku. Wazà kayi pulus! Mekeseseeng heini he kelasi te ked-ubpà!
ECC 4:9 Meupiya ke zuen nu zuma kenè ke sebsevaha nu, su is ikeupiya ke zuen nu zuma ne iyan heini:
ECC 4:10 emun edlised ka, ne egketevangan ka te zuma nu. Piru mekehizuhizu ka ke edlised ka he wazà ebpeketavang kenikew.
ECC 4:11 Emun meǥenew, ebpehulizè kew zutun te zuma nu ne ebpeked-initè kew. Piru kenà heeyan egkehitavù emun sebsevaha nu.
ECC 4:12 Melemu ka egkezaag emun sebsevaha nu, piru emun duen nu zuma, ne mereǥen kew he edaaǥen. Iring ded heini te pisì he emun tetelu he luvid ne mereǥen he ebidtawen.
ECC 4:13 Meupiya pa is betan-en he pubri piru metau kenà is meǥurang he hadì he tulebung, he kenà egkesuat he edsembaǥan.
ECC 4:14 Ne haazà is betan-en egkehimu he egkahadì sikandin minsan nepirisu sikandin, ne haazà is hadì egkehimu he egkepubri sikandin minsan pa te neetew sikandin he ebpuun diyà te lavew he pemilya.
ECC 4:15 Piru netuenan ku he minsan mahabet is menge etew kayi te kelibutan he edsunud te paaǥi te kedumala zuen te vetan-en he nekeilis te hadì,
ECC 4:16 ne kenè egkevilang is menge etew he edumelahan din, ne egkehimu ǥihapun he kenà sikandin ebpekepenunuat te huziyan he menge lapis te kevuwazan. Ne wazà daan kayi pulus; henduen dà te edal-as ka te keramag.
ECC 5:1 Kinahanglan he ebpekeventayan nu is ed-ul-ulahan nu ke edhendiyè ka te valey te Megbevayà. Meupiya pa ke egkezumahan te kebmetinumanen is ked-uvey nu zutun, kenà te ebpemuhat ke zà te iring te kebpemuhat te menge tulebung he wazà mesayud he sayep is baal zan.
ECC 5:2 Kenè nu zegdeǥusuwi is egkeǥiyen nu. Kinahanglan he ebpurung ka ed-isip-isip ne human ka ebpenaad diyà te Megbevayà. Tentenuzi nu he ziyà te langit is Megbevayà ne sikew kayi ke zà te tanà, umbe kenè ka mebpetakè dà megkaǥi.
ECC 5:3 Su iring te melemu ke zà ebpeketeǥeinep emun egketulung ka egkeseeng, ne melemu ke zà daan ebpekekaǥi te tinulebung emun ebpetakè ka egkaǥi.
ECC 5:4 Emun duen ibpenaad nu ziyà te Megbevayà, ne kenè nu pekeuǥeta is kedtumana nu zutun. Tumana nu is penaad nu kandin su kenè din igkesuat is menge tulebung he wazà medtuman te menge penaad dan.
ECC 5:5 Meupiya pa nasì ke kenè ke en edsaad emun kenè nu edtumanen is saad nu.
ECC 5:6 Kenè ka mebaal te salà pinaaǥi te kegkaǥi nu, emun ebpekekaǥi ka te sayep ne kenè ka megkaǥi te wazè nu haazà tivevaa, su igkepauk te Megbevayà ke egkeǥiyen nu haazà ne edèdeetan din is hineǥuan nu.
ECC 5:7 Is subra he kebpeneǥeinep wey kegkaǥi ne wazè din pulus. Umbe tehuza nu is Megbevayà.
ECC 5:8 Kenè ka meinuinu emun egkeehè nu ziyà te inged niw he edèdaaǥen is menge pubri, ne kenà ibeǥey kandan is hustu he kukuman wey kenà ebeliyen is ketenged dan. Su haazà is upisyal he edlupiglupig kandan edlevanan te upisyal he lavew kandin, ne heini is dezuwa edlevanan te upisyal he lavew pa kandan.
ECC 5:9 Ne ke ebpekevintahà is menge upisyal ne lavew pa he ebpekevintahà is hadì kayi te tanà.
ECC 5:10 Is minsan hentei he mahal ziyà te gehinawa zin is selapì wey is duma pa he ketiǥeyunan ne kenè din haazà igkekuntintu. Ne wazà daan kayi pulus.
ECC 5:11 Emun egkeumanan is ketiǥeyunan ta, ne egkeumanan daan is egastu zutun, ne kenè ta haazà egkepehimulusan.
ECC 5:12 Is terebahanti zà ne meupiya is kedlipezeng din deisey se zekelà is keuyaǥan din, piru is sepian mulà ne kenà meupiya is kedlipezeng din minsan dekelà is ketiǥeyunan din.
ECC 5:13 Duen pa neehè ku kayi te kelibutan he kenà meupiya: Is ketiǥeyunan te sevaha he etew egkehimu he ebpekezezaat kandin
ECC 5:14 etawa egkahanew heini pinaaǥi te kenà meupiya he paaǥi te kebpetiǥeyuna zuen, ne wazè en egkesamà para te menge anak din.
ECC 5:15 Neetew kiw he wazè din uwiten, ne ebpatey kiw zaan he wazè din uwiten. Wazè tew en egkevulug egkeuwit duen te menge hineǥuan tew.
ECC 5:16 Ne kenà heini meupiya! Ebpatey ki he wazè din egkeuwit iring te kegkeetew ta. Hengkey is egkekuwa ta pinaaǥi te kedhaǥù ta he wazè man kayi pulus?
ECC 5:17 Kayi te ked-ubpè ta ne mahabet he menge timpu he zutun edlised ki, egkeseeng ki, egkezeruwan ki, wey egkepauk ki.
ECC 5:18 Umbe, netaǥù kayi te isip ku he is meupiya he ed-ul-ulahan te etew seled kayi te mevavà he untung he imbeǥey kandin te Megbevayà iyan is kegkaan, ked-inum, wey kedlipeylipey pinaaǥi te hineǥuan din kayi te kelibutan, su para man heini kandin.
ECC 5:19 Mibeǥayan te Megbevayà is etew te azen wey zuma pe he menge ketiǥeyunan, ne midtuǥutan din te kebpehimulus kayi, su para mezawat te etew is para kandin ne igkelipey zin is hineǥuan din. Imbeǥey heini kandin te Megbevayà.
ECC 5:20 Is kelipey, imbeǥey te Megbevayà su para kenè utew meseǥipà te etew is kedseengseeng tenged te kevavè dà te untung din.
ECC 6:1 Duen pa neehè ku kayi te kelibutan he kenà meupiya he igkeveǥati te etew:
ECC 6:2 Duen menge etew he mibeǥayan te Megbevayà te langun he egkesuatan dan he mekuwa zan: dengeg, azen wey zuma pa he ketiǥeyunan. Piru wazè din sikandan tuǥuti he ebpekepehimulus dutun, kekenà, iyan is duma he etew. Wazà kayi pulus, ne kenà heini meupiya.
ECC 6:3 Egkehimu he mahabet is anak te sevaha he etew wey meluǥayad is untung din, piru minsan meluǥayad is untung din ke wazè din kelipey zuen te meupiya he menge vutang he nezawat din wey kenà sikandin igkeleveng ke ebpatey, ne meupiya pa is batà he neranran kenà sikandin.
ECC 6:4 Minsan wazà pulus te kegkeetew te vatà, ne minsan midhendiyà sikandin te lugar te menge minatey he zutun kenè en sikandin egketenuzan,
ECC 6:5 wey minsan kenè en sikandin ebpekaahà te kereyag te andew wey minsan wazè din en hanew mehitenged te untung, duen din mulà kelinew kenà duen te etew
ECC 6:6 he wazè din kelipey zuen te meupiya he menge vutang he nezawat din. Uya, minsan utew pa melugayad is untung dutun he etew. Kenè be neked-iring dà he lugar is egkepeveyaan te langun he etew?
ECC 6:7 Is etew edhaǥù su para zuen din egkekaan, piru kenà gihapun sikandin egkekuntintu.
ECC 6:8 Hengkey is ibpekevintahà te etew he uluwanen te etew he tulebung? Hengkey is keupiyaanan he egkekuwa te pubri he etew emun metau sikandin te paaǥi te kebpengungubpaan?
ECC 6:9 Wazà kayi pulus; henduen dà te edal-as ka te keramag. Umbe meupiya pa ke egkekuntintu ke en ke hengkey is naazen nu, ne kenè ke en medtulung mebpenganduy te zuma pa.
ECC 6:10 Dengdengani zà is kegketueni te Megbevayà te langun, ne netuenan din en ke hengkey is egkehitavù kenitew. Umbe kenè tew egkevarew is imbanglis kenitew te Megbevayà, su mezesen pa sikandin kenà kenitew.
ECC 6:11 Emun edtulung ki ebpemarew ne ebpekeuman dà heini te nengekaǥi ta he wazè din pulus, ne kenà heini ebpekeveǥey kenita te keupiyaanan.
ECC 6:12 Wazà nesayud ke hengkey is meupiya para kenita te etew seled kayi te mevavà wey wazè din pulus he ked-ubpè ta he iring dà te alung su edlavey zà. Wazà ebpekepenudtul kenita ke hengkey is egkeulaula kayi te kelibutan emun ebpatey ki en.
ECC 7:1 Meupiya pa is meupiya he zengeg kenà te mahalen he pehemut, ne iring din ded daan meupiya pa is andew te kebpatey ta kenà te andew te ked-enaka kenita.
ECC 7:2 Meupiya pa is kedhendiyà te mibpetayan kenà te kedhendiyà te keemuran he zuen gastu, su kemetayen man is egkepengkusan te langun. Ne kinahanglan he edtentunuzan heini te menge uuyag pa.
ECC 7:3 Meupiya pa is kegkeseeng kenà te kegkelipey su is kegkeseeng ebpeketulid kenita.
ECC 7:4 Is metau he etew layun din ed-isipa is mehitenged te kemetayen, piru is tulebung he etew iyan din layun ed-isipa is kedlipeylipey.
ECC 7:5 Meupiya pa ke edsewayen ki te metau he etew kenà te edeliǥen ki te tulebung he etew.
ECC 7:6 Is engit te tulebung he etew ne iring te menge zuǥi he ebpenleleǥetì diyà te hapuy. Wazà kayi pulus.
ECC 7:7 Is metau he etew egkehimu he tulebung emun ebpenlimbung sikandin wey mekeselapì. Su emun ebpesipsip ka ne paaǥi heeyan te kedezeeti nu te ked-etew nu.
ECC 7:8 Meupiya pa is kedhimasad kenà te kebpuunà. Meupiya pa is kebmepelevayen kenà te kebpelavew.
ECC 7:9 Kenè ka melemu he mepauk, su is kegkepauk ne iyan neleyaman he ed-ul-ulahan te menge tulebung he etew.
ECC 7:10 Kenè ka insà te, “Maan is meupiya is nehuna he timpu kenà te ǥuntaan?” Su kenà heeyan hustu he insà.
ECC 7:11 Meupiya is ketau, iring heini keupiya te menge vutang he egkepengevilin ta. Ebpeketavang heini kenita kayi te ked-ubpè ta kayi te kelibutan,
ECC 7:12 wey eputè ta heini iring te selapì. Umbe utew ebpeketavang is keuluwanen; ebpeketavang heini wey ki luǥeyazi te untung.
ECC 7:13 Isipa nu ke hengkey is mibeelan te Megbevayà. Hentei is ebpeketulid te mibulegkù te Megbevayà?
ECC 7:14 Medlipey ka emun meupiya is kebpekesavuk nu. Piru emun edlised ka, tentenuzi nu he iyan is Megbevayà mibeǥey te meupiya he kebpekesavuk wey te kelised. Umbe kenè ta egketuenan ke hengkey is huziyan he egkehitavù.
ECC 7:15 Kayi te untung ku he wazè din pulus, neehè ku is langun: is menge metazeng ne nemematey zutun te metazeng he kebpengungubpaan wey is menge mezaat ne ebpengungubpaan te meluǥayad dutun te mezaat he kebpengungubpaan dan.
ECC 7:16 Kenè nu pesubrahi is ked-isipa nu te keugelingen nu he metazeng ka etawa metau ka. Su paaǥi heini te kedezeeti nu te keugelingen nu.
ECC 7:17 Kenè nu zaan pesubrahi is kegkezaat nu, wey kenè ka medtinulebung. Su emun ebeelan nu heini egkepenggevuan is umur nu.
ECC 7:18 Kenè nu haazà pesubrahi; kinahanglan he ziyè ke zà te liwezaan, su kenà ebpesubra is etew he edtahud te Megbevayà.
ECC 7:19 Dekelà is egkehimu pinaaǥi te ketau te sevaha he etew kenà te egkehimu te sepulù he pengulu te inged.
ECC 7:20 Wazà etew kayi te kelibutan he layun dà metazeng is menge vaal zin wey kenà egkesayep.
ECC 7:21 Kenè nu siǥipaa is langun he egkeǥiyen te etew, su kela ke mezineg nu he ed-rewakan ka te suluǥuen nu.
ECC 7:22 Su netuenan nu he sikew mismu layun nu ed-rewaki is duma.
ECC 7:23 Migezaman ku te edsavut is langun he nengehitavù kayi te kelibutan pinaaǥi te ketau ku. Ed-is-isipen ku he mesavut ku, piru kenè bes haazà.
ECC 7:24 Kenè ku egketegkad is nengehitavù; mereǥen heini he edsevuten. Ne wazà ebpekesavut kayi.
ECC 7:25 Piru mibpedayun a he ed-istudyu wey edsusi, su wey a mekaangken te ketau wey tavak te menge insè ku, wey para mesavut ku ke maan is tulebung is etew he ebaal te mezaat ne taleng is etew he edtinulebung.
ECC 7:26 Nesusi ku he is meungangen he vahi ne mepait pa te kemetayen. Is arig din ne iring te litag, wey is menge velad din he igkepkep din kenikew ne iring te kedina. Ebpekelikey kandin is ebpenunuat te Megbevayà, iyan, egkelitag din mulà is mekesesalà.
ECC 7:27 Siak is megwewali egkaǥi te, “Mibpurungan ku te ed-isip-isip is minsan hengkey te kebpen-ahà te tavak te menge insè ku. Piru wazè ku ǥihapun meturedu is menge tavak kayi. Piru nesusi ku: te 1,000 he menge maama ne zuen dà sevaha kandan he metazeng: ne te 1,000 he menge vahi ne wazà minsan sevaha zà kandan he metazeng.
ECC 7:29 Ne lavew te langun, nesusi ku he midlimbag te Megbevayà is etew para medtinazeng piru kezekelan te menge paaǥi te etew ne kenà metazeng.”
ECC 8:1 Wazà ebpekerepeng te uluwanen he etew, he metau he edseysey te menge egkengeulaula. Melipayen is kebuvuked te metau he etew ne kenà ebmerembunut.
ECC 8:2 Tumana nu is suǥù te hadì su insaad nu ziyà te Megbevayà he ebeelan nu heini.
ECC 8:3 Kenè nu pesegdana is ketengdanan nu ziyà te hadì, ne kenè ka medtampu te menge etew he ebpelanu ebaal te mezaat diyà te hadì, su egkehimu te hadì is minsan hengkey he egkesuatan din.
ECC 8:4 Duen gehem te menge suǥù te hadì, ne wazà ebpekesupak kayi.
ECC 8:5 Ne kenà egkemenu is minsan hentei he edtuman kayi. Is uluwanen he etew netuenan din ke keenu wey ke ebmenmenuwen is kebeeli te vuluhaten.
ECC 8:6 Su is kada vuluhaten ne zuen hustu he timpu wey paaǥi te kebeeli zuen minsan mahabet he menge kelised is egkeetuvang te etew.
ECC 8:7 Ne ǥeina te wazà etew he netau mehitenged te huziyan he timpu, ne wazà ebpekekaǥi ziyà te minsan hentei ke hengkey is egkehitavù.
ECC 8:8 Is keramag kenà egkeeǥen te etew, ne kenà daan egkeeǥan te etew is kemetayen din. Kebpekidtebek heini he kenà egkepeliǥuyan. Ne is kelelalung te etew ne kenà ebpekelibri kandin te kemetayen.
ECC 8:9 Neehè ku heini langun hein mid-isip-isip ku is mehitenged te minsan hengkey he ebpen-ul-ulahan kayi te kelibutan, iring te emun is sevaha he etew he zuen din gehem te kedezaat te zuma zin he etew.
ECC 8:10 Ne neehè ku zaan is menge lalung he inleveng. Heini sikandan layun edseled diyà te segradu he inged he iyan is Jerusalem ne zutun sikandan mebaal te kelelalung. Ne zutun daan sikandan mezeliǥi te menge etew. Wazà kayi pulus.
ECC 8:11 Emun kenà segugunà edhukumi is etew he ebpekesalà, ne ebpekeisip daan is duma te kebaal te mezaat.
ECC 8:12 Minsan utew mezakel is salà te etew, egkehimu ǥihapun he edluǥeyazan sikandin te untung. Tutuu iyan he netuenan ku he meupiya is egkehitavù diyà te etew he edtahud te Megbevayà,
ECC 8:13 ne mezaat is egkehitavù diyà te lalung he etew he kenà edtahud te Megbevayà, ne kenà sikandin egkembuwayan, kekenà, egkeiring is untung din te lambung he meǥaan dà egkaawà.
ECC 8:14 Piru zuen egkengeulaula kayi te kelibutan he kenè ta egkesavut. Usahay iyan is metazeng ebpekezawat te silut he para pezem te lalung he etew, ne is lalung iyan ebpekezawat te suhul he para pezem te metazeng. Ne iyan egkekaǥi ku is wazà kayi pulus.
ECC 8:15 Umbe para kediey, iyan meupiya he ed-ul-ulahan te etew is kedlipey kayi te kebpengungubpaan din. Wazà duma he meupiya para kandin kayi te kelibutan, kekenà, iyan is kegkaan, ked-inum wey kedlipey. Pinaaǥi kayi egkeseǥazan din is kelipey zutun te kedterebahu zin seled te tivuuk he untung din he imbeǥey kandin te Megbevayà kayi te kelibutan.
ECC 8:16 Maandew wey mezukilem kenà a ebpekelipezeng tenged te kebpeninguhè ku he maangken ku is ketau he iyan igkesevuta ku te egkengeulaula kayi te kelibutan.
ECC 8:17 Neehè ku is langun he mibpemeelan te Megbevayà kayi te kelibutan, ne wazà etew he ebpekesavut kayi. Minsan sengemenu pa is kebpeninguhà te etew he mesavut din heini, ne kenè din heini egkesavut. Minsan egkaǥi pa is metau he etew he nesavut din en heini, piru iyan tutuu is wazè din heini mesavut.
ECC 9:1 Mibpurungan ku is-isipa haazà is langun he egkengeulaula ne netuenan ku he vineyveyaan te Megbevayà is menge vaal te metazeng wey uluwanen he etew. Piru wazà metueni kayi he etew ke gaǥew ve etawa pauk is egkepaabut din.
ECC 9:2 Neked-iring dà is egkepengkusan te minsan hengkey he kelasi te etew–metazeng wey lalung, meupiya wey mezaat, lumpiyu wey meremerik, is ebpemuhat wey kenà ebpemuhat. Neked-iring dà is egkepengkusan te meupiya he etew wey mekesesalà, wey neked-iring dà sikan is nenangdù wey wazà mebpenangdù.
ECC 9:3 Iyan heini edhuna he kenà meupiya te langun he egkengeulaula kayi te kelibutan: neked-iring dà is egkepeveyaan te langun. Ne te kemulu pa uuyag is etew ne iyan ebpeketaǥù te isip din is mezaat wey tinulebung; ne te huziyan he timpu ebpatey sikandin iring te zuma.
ECC 9:4 Is uuyag he asu meupiya pa kenà te minatey he erimaung, is uuyag he etew ne meupiya pa kenà te minatey he etew. Su is menge uuyag ne zuen din pa egkeperateng,
ECC 9:5 ne netuenan din he ebpatey sikandin. Piru is minatey en ne wazè en egketuenan din ne wazè en egkezawat din wey egkelipatan en sikandin.
ECC 9:6 Wazè dan en gaǥew, pauk wey kesina. Ne wazè dan en lavet te langun he egkengehitavù kayi te kelibutan.
ECC 9:7 Megkaan ka wey med-inum ka te vinu he melipayen, su intuǥut heini te Megbevayà.
ECC 9:8 Mebivisti ka te mekempet duma is kebpehemut, he ka và dà egkeǥiya layun ka medlipey.
ECC 9:9 Ikelipey nu is ked-ubpè nu zuma te esawa nu he mibmahal nu. Is tivuuk he untung nu he wazè din pulus he imbeǥey kenikew te Megbevayà kayi te kelibutan ne ikelipey nu. Su iyan heeyan pulus te kedhaǥù nu kayi te kelibutan.
ECC 9:10 Beeli nu is minsan hengkey he ebeelan nu he egkehimu nu, su ziyà te ubpaan te menge minatey, he zutun is egkepengkusan nu, ne wazè en ketau etawa keuluwanen.
ECC 9:11 Duen pa neehè ku kayi te kelibutan: kenà is langun he mezesen he ebpelelaǥuy he ebpekezaag te lumbà, wey kenà is langun mezesen he ebpekezaag te tebek. Kenà is langun he uluwanen he ebpekaahà te igkeuyag-uyag dan, kenà is langun he uluwanen ne edsepian. Su egkeseǥazan te uman sevaha he etew is imbanglis kandin.
ECC 9:12 Ne wazà hanew te etew ke keenu heeyan egkehitavù. Umbe iring is etew te tagbis he nelitag etawa isdà he nepuket; egkebiktima sikandin te mezaat he hitavù he egketik-ew egkeulaula ziyà te kandin.
ECC 9:13 Neehè ku zaan kayi te kelibutan is sevaha he penenglitan te ketau he utew ku nesuati:
ECC 9:14 Duen sevaha he zeisey he inged, ne zeisey zà daan is meǥinged kayi. Ne midlingutan heini te mekeǥeǥehem he hadì duma te menge sundaru zin. Mibaal sikandan te ibpenrudus dan duen te verengbeng, ne midsurung dan haazà is inged.
ECC 9:15 Dutun te inged duen etew he pubri piru uluwanen, he iyan pezem ebpekelibri zutun te inged pinaaǥi te ketau zin. Piru wazà nekeseǥipà kandin.
ECC 9:16 Ne nekekaǥi a te meupiya pa is ketau kenè te zesen, piru is ketau zuen te pubri he etew ne wazà beǥeyi te keveǥat ne wazà midseǥipà te lalag din.
ECC 9:17 Meupiya pa is kebpemineg te menayù he kegkaǥi te uluwanen he etew kenà te kebpemineg te bensaǥen te egalen te menge tulebung.
ECC 9:18 Is ketau meupiya pa kenà te menge ǥumaan te tebek. Piru is mekesasalà ebpekezezaat te mahabet he menge keupiyaanan.
ECC 10:1 Is minatey he langew ebpekemahu te pehemut, ne is deisey he tinulebung ebpekezezaat te ketau wey zengeg.
ECC 10:2 Is uluwanen he etew egkesuat he ebaal te meupiya, piru is tulebung he etew egkesuat he ebaal te mezaat.
ECC 10:3 Minsan diyà te hinipenawan te tulebung egketuusan ta he wazè din kedsavut. Ibpeehè din te langun is ketutulebung din.
ECC 10:4 Emun egkepeukan ka te pengulu kenè nu vey-ani is ketengdanan nu, su emun egkevehew en is pauk din kela ke peseyluwa ke zin minsan dekelà is salà he nehimu nu.
ECC 10:5 Duen pa sevaha he kenà meupiya he neehè ku kayi te kelibutan, ne ed-ul-ulahan heini te menge pengulu:
ECC 10:6 Is menge tulebung ebeǥayan dan te metikang he keǥehem, piru is menge sepian mulà ebeǥayan te mevavà he keǥehem.
ECC 10:7 Neehè ku zaan he zuen menge uripen he ebpurung dà ebpemen-untud te kudà ne sikan is dungganen he menge etew ne ebpemenhipanew zà he iring te menge uripen.
ECC 10:8 Emun ebangbang ka, kela ke meulug ka zuen. Emun edlesag ka ziyà te verengbeng te inged, kela ke keǥata ka te uled.
ECC 10:9 Emun edlekat ka te vatu etawa egurey ka te kayu, kela ke mepelii ka,
ECC 10:10 Emun mezumpel is wasey nu ne wazè nu heini kemengaa, ne kinahanglan he ebpendesendesen ka is egamit dutun. Meupiya ke uluwanen ka su pinaaǥi kayi ebpekezaag ka.
ECC 10:11 Emun duen nu ketau para kenà mekekaǥat is uled ne wazà dutun pulus emun nekaǥat ke zin en.
ECC 10:12 Is menge ebpengeǥiyen te uluwanen he etew ne ebpekeveǥey kandin te keupiyaanan, piru is menge ebpengeǥiyen te tulebung he etew ne ebpekezezaat kandin.
ECC 10:13 Kebpuun din kegkaǥi ne tinulebung en is menge ebpengeǥiyen din, ne emun ebpengkusen din en is menge lalag din ne mezaat en is ebpengeǥiyen din, ne henduen be sikandin te ebuneǥen en.
ECC 10:14 Ne kenè en sikandin ed-engked he egkaǥi. Wazà netau te edtelinguma, ne wazà ebpekekaǥi ziyà te kenita ke hengkey is egkehitavù emun ebpatey ki en.
ECC 10:15 Igkeveley te tulebung is terebahu zin, umbe egkeisip din he kenè en sikandin edhendiyà te inged su para kenà meketerebahu.
ECC 10:16 Mekehizuhizu is nasyun he mid-aǥi te kegkeuripen is hadì duen, ne is menge pengulu kayi ne ebpetakè en ebpengemuran.
ECC 10:17 Iyan, utew zeyzey is nasyun he is hadì duen neetew he ebpuun te pemilya he meupiya is dengeg din, ne is menge pengulu zuen id-ehè dan te hustu he timpu is kedlipeylipey zan pinaaǥi te kegkaan wey egkeeǥen dan is suat dan ne kenè dan ebpekepelelangut.
ECC 10:18 Emun igkepeǥuli te etew is kebpurung ta atep te valey zin, ne edtiǥisan heini ne egkewaǥey.
ECC 10:19 Is kegkaan wey ked-inum ebpekeveǥey te kelipey ziyà te etew, ne is selapì ebpekeveǥey te langun he egkinehenglanen te etew.
ECC 10:20 Kenè nu rewaki is hadì minsan pinaaǥi zà te isip nu, wey is sepian minsan meeles dà, su kela ke zuen meketudtul kayi ziyà te kandan.
ECC 11:1 Isavuk nu is selapì nu ziyà te petiǥayun ne ebpekegenansya ka te huziyan he timpu.
ECC 11:2 Isavuk nu is selapì nu ziyà te nekedseselekawà he petiǥayun, su wazè nu metueni ke hengkey he mezaat he hitavù is egkehitavù kayi te kelibutan.
ECC 11:3 Emun mekepal is kivel ne ed-uzan, ne ke hendei mepiley is kayu ne kenè heini egkaawà dutun.
ECC 11:4 Emun timpu zà is ebentayan nu ne kenè ka ebpekepemula ne wazà nu egkeraǥun.
ECC 11:5 Iring te kenè nu egkesavut ke egkemenumenu is kebpuun te untung te vatà diyà te ǥetek te iney zin, ne kenè nu zaan egkesavut is menge vaal te Megbevayà he iyan mibaal te langun.
ECC 11:6 Pemula te tivuuk he andew, su kenè nu egketuenan ke meupiya ve is kedtuvù dutun etawa ke iyan dè be haazà is duma.
ECC 11:7 Meupiya utew ke uuyag ke pa.
ECC 11:8 Minsan sengemenu keluǥayad is untung nu, medlipey ka seled te tivuuk he untung nu. Piru tentenuzi nu is menge andew te kerusireman su ebmahabet heini. Kenà egkeseriǥan is egkengehitavù te huziyan he timpu.
ECC 11:9 Sikew is betan-en, medlipey ka kayi te kebpengungubpaan nu te vetan-en ke pa. Beeli nu is egkesuatan nu te ebaal, piru tentenuzi nu he edhukuman ka te Megbevayà pinaaǥi te langun he menge vaal nu.
ECC 11:10 Kenè ka medseengseeng wey kenè nu lisliseza is keugelingen nu. Pemulpulusi nu is kegkevetan-en nu su edlavey zà heini.
ECC 12:1 Tentenuzi nu is Midlimbag kenikew mintras betan-en ke pa, zutun te kenè pa egkeuma is timpu te kelised he zutun ebpekekaǥi ka te, “Wazà a melipey kayi te kebpengungubpaan ku.”
ECC 12:2 Tentenuzi nu sikandin te kenè pa ebmerusirem diyà te kenikew is kerayag ta andew, bulan wey menge vituen, wey kenè pa ebmerusirem diyà te kenikew is nekeliǥuy kenikew he henduen be te layun ebmerusirem tenged te ǥapun.
ECC 12:3 Egkeuma is andew he zutun ebpengerkeren en is menge vekelawan nu wey ebmeluye en is menge paa nu. Ne kenè en ebpekesepà is menge ngipen nu su pira zà he leǥas, ne is menge mata nu kenè en utew ebpekaahà.
ECC 12:4 Is menge telinga nu ne kenè en ebpekepurung ebpekezineg, te minsan keǥurub te ǥelingan wey kegkaǥi te menge tagbis etawa sunata.
ECC 12:5 Egkahandek ke en he ebpenekezeg etawa edhipanew ziyà te kersada. Ebmeputì en is menge vulvul nu ne egkaawè en is arig nu. Ne te huziyan he timpu ebpekehendiyè ka te lugar he iyan egkeubpaan nu te wazà pidtemanan, ne mezakel is egkeseeng kenikew ziyà te menge kersada.
ECC 12:6 Umbe, tentenuzi nu is Megbevayà te wazè ke pa mebpatey, zutun te kenè pa egkevidtew is pelata he kedina wey kenè pa egkaawa is bulawan he teleǥuey, etawa zutun te kenè pa egkevidtew is hiket te tivud he idsekilut diyà te teheb, ne egkerupet haazà is tivud.
ECC 12:7 Edlikù ka ziyà te tanà he iyan mibpuunan nu, ne sikan is gehinawa he mibeǥey kenikew te untung ne edlikù diyà te Megbevayà he iyan mibeǥey kayi.
ECC 12:8 Siak is megwewali egkaǥi te, “Wazà iyan pulus! Wazà iyan pulus kayi te langun!”
ECC 12:9 Uluwanen haazà is megwewali ne kenà iyan dà sikandin mibpulus te ketau zin, su impenurù din diyà te menge etew is netuenan din. Mibpurungan din istudyuwi is menge erubasa ne impelastar zin haazà kayi te surat din.
ECC 12:10 Midtinguhè din he meǥamit din is hustu he menge lalag, ne hustu wey tutuu is insurat din kayi.
ECC 12:11 Is menge lalag te uluwanen he etew iring te medidis he tuked te pereelima te menge uyaǥen he egemiten din te kegiya zuen te ebpen-elimahan din, wey iring daan heini te ransang he ebpurung ed-uteng. Imbeǥey heini te Megbevayà he iyan perevantey kenitew.
ECC 12:12 Mamà, heini pa is ibpetizaan ku kenikew: Kenà egkepangkus is kedsurat te menge velesahan, ne mekeveveley kenikew is kebpurung ked-istudyu.
ECC 12:13 Ne ǥuntaan te nevasa nu en heini is langun, ne iyan heini penapus he egkeǥiyen ku kenikew: Tehuza nu is Megbevayà wey tumana nu is menge suǥù din, su iyan heini ketengdanan te kada etew.
ECC 12:14 Su edhukuman kiw te Megbevayà pinaaǥi te langun he menge vaal tew, meupiya etawa mezaat, ragkes en is meeles is ked-ul-ulaha tew zuen.
SOL 1:1 Is utew meupiya he kentahan ni Solomon.
SOL 1:2 Diǥua a kenikew te menge hazek nu, su is kebmahal nu edhuna pa he meemis te vinu.
SOL 1:3 Mehemut utew is menge pehemut nu, ne utew meupiya is ngazan nu. Umbe, kenà igkeinuinu is kegkesuati kenikew te menge raǥa.
SOL 1:4 Dumaha a kenikew ne egaangaan ki egenat. Iyan ka hadì ku, ne uwita a ziyà te ruǥu nu. Menge Bahi ziyà te Jerusalem Utew zey sikew igkelipey! Edhuna is kegkesuati zey te kebmahal nu kenà te vinu. Bahi Ereg iyan he egkesuatan ke zan!
SOL 1:5 Menge vahi ziyà te Jerusalem, meitem a iring te tulda ziyà te Kedar, piru mekempet a iring te menge kurtina ziyà te turuǥan ni Solomon.
SOL 1:6 Kenè niw idemdemerì is keitem ku tenged te subra he kegkekagkag. Nepeukan a te menge suled ku he menge maama, ne impeterebahu e zan diyà te pemuleey te paras. Umbe wazè ku en timpu te ked-atur te keugelingen ku.
SOL 1:7 Tezemi a kenikew, pelanggè ku, ke hendei nu ibpepenabtab is menge kerehidu nu? Ne hendei nu sikandan ibpehimeley emun meudtu? Tezemi a kenikew su wey ku sikew kenè en mepengahà diyà te menge emiǥu nu he ebpemepenabtab daan te menge kerehidu. Su kela ke kunaan dan ke vahi a he ebelegyà te dengeg din.
SOL 1:8 Emun wazè nu metueni, te utew mekempet he vahi, ikula nu is imbayà te menge kerehidu ku pehendiyà te menge tulda te menge vantey te menge kerehidu, ne zutun nu ipepenabtab is menge kambing nu.
SOL 1:9 He pelanggè ku, iring ka te behiyan he kudà he nesuatan te meemahan he kudà he eguyud te kerwahi te hadì te Ehipto.
SOL 1:10 Utew mekempet is dagwey nu he mid-iseg mebmekempet tenged te menge eritis nu. Mekempet is lieg nu he mibelieǥan.
SOL 1:11 Ebeelan dey sikew te eritis he vulawan he edsehuǥan te pelata.
SOL 1:12 Ebpimpinuu is hadì diyà te pinuuwè din, ne ebmeǥuymuyan is pehemut ku.
SOL 1:13 Is minahal ku mehemut iring te veyewà dutun te ed-ulun sikandin diyà te kumeng ku.
SOL 1:14 Iring sikandin te rupung te vulak he hina, he nemekar ziyà te menge pemuleey te paras diyà te En Gedi.
SOL 1:15 Utew ka mekempet is pelanggè ku. Mekempet he ed-ahaan is menge mata nu, iring te menge mata te merepatik.
SOL 1:16 Utew ka iyan mekempet, pelanggè ku. Mekewiwili ka zutun te kedhidhizeǥè ta ziyà te meilem he menge sagbet,
SOL 1:17 he egkelembungan te menge kayu he sidru wey sipris.
SOL 2:1 Henduen a te rusas diyà te Sharon wey henduen a te liryu ziyà te menge suǥud.
SOL 2:2 Uya, emun ibpetug-iring te zuma he vahi is pinelanggè ku, ne iring sikandin te liryu he nemekar ziyà te teliwazà te zuǥiyen he zezeisey he kayu.
SOL 2:3 Emun idhindeg te zuma he vetan-en he menge maama, is minahal ku, ne iring sikandin te mensanas he zuma te menge kayu ziyà te ketelunan. Utew ku ingkesuat is kedhelung diyà te sihung din ne meemis is beǥas din.
SOL 2:4 Midume e zin diyà te kebibuwan su wey maahà te langun ke sengemenu is kebmahala zin kediey.
SOL 2:5 Ipemezesen a keniyu pinaaǥi te pasas wey menge mensanas, su mibmeluya a tenged te kebmahal ku.
SOL 2:6 Ebpeulun a te givang he velad din, ne egkepkep kedì is kewanan.
SOL 2:7 Sikiyu is menge vahi te Jerusalem, penangdù kew pinaaǥi te menge selazeng wey menge gasila he kenè niw ebpukawen is kebmahal zutun te kenè pa hustu he timpu.
SOL 2:8 Nezineg ku is laǥeng te minahal ku. Ebpekeuma sikandin he edlinglingketew ziyà te menge vuntud
SOL 2:9 iring te selazeng. Ahàa niw man, diyà sikandin te gawas is edhithitindeg diyà te kilid te elavat dey is ebpantew kedì diyà te sulawà.
SOL 2:10 Migkaǥi sikandin kayi te kedì te, “Hendini kad is pelanggè ku. Duma ka kedì, is minahal ku he utew mekempet.
SOL 2:11 Netapus en is timpu te meǥenew wey tipenguzan.
SOL 2:12 Nemekar en is menge vulak diyà te menge pemuleey, ne timpu en heini te kegkanta. Egkezineg en diyà te menge pemuleey is laǥeng te menge merepatik.
SOL 2:13 Ebpemeǥas en is menge higus, ne ebmeǥuymuyan en is ebpengevukad he menge paras. Hendini kad is pelanggè ku. Duma ka kedì, is minahal ku he utew mekempet.”
SOL 2:14 Iring ka te merepatik he ed-eles diyà te vudsi te kelendiǥan. Ipeehè nu kediey is mekempet he zagwey nu wey ipezineg nu kedì is menayù he laǥeng nu.
SOL 2:15 Agpas kew! Hingutela niw is dezeisey he menge laku he edezaat te menge pemuleey te paras dey he ebpengevukad en.
SOL 2:16 Kediey zà is minahal ku, ne kandin e zà. Ibpepenabtab din is menge uyaǥen din diyà te zuen duen menge liryu.
SOL 2:17 Dutun te kenè pa egkeriwaswas wey kenè pa egkaawà is merusirem, ne likù ke en, pelanggè ku. Likù ka he iring keǥaan te selazeng diyà te vuvungan.
SOL 3:1 Dutun te mezukilem he edhidhizeǥà a, ebulungen a te minahal ku. Egkesuat a he zuma ku sikandin piru wazà sikandin.
SOL 3:2 Umbe, mid-enew a ne mid-eneb ku hipenawa is inged, is menge zalan, wey is menge pelasa. Mibpen-ehè ku is minahal ku piru wazè ku sikandin maahà.
SOL 3:3 Naahà a te menge vantey zutun te edrunda sikandan dutun te inged. Mid-insaan ku sikandan te, “Neehè niw ve is minahal ku?”
SOL 3:4 Ne wazè en meuǥet dutun te ked-ewai ku zuen te menge vantey ne neturedu ku is minahal ku. Mibpurungan ku sikandin kepkepi, ne wazè ku en lekai taman te neuwit ku sikandin diyà te valey te iney ku, ziyà te ruǥu he zutun a meetew.
SOL 3:5 Sikiyu is menge vahi ziyà te Jerusalem, penangdù kew pinaaǥi te selazeng wey gasila he kenè niw ebpukawen is kebmahal zutun te kenè pa hustu he timpu.
SOL 3:6 Hentei heini is ebpekeuma he ebpuun te sibsivayan he henduen be te mekepal he evel he ebmeǥuymuyan te kehemut te mira wey beyewà–menge pehemut he ibelegyà te menge nigusyanti?
SOL 3:7 Iyan heeyan sikan is kerwahi ni Solomon he edliǥuyan te 60 he utew memetau he menge sundaru te Israel.
SOL 3:8 Pudu sikandan midseseluniket te ispada, ne memetau sikandan he ebpekidtebek. Mibpengendaman dan is edsurung minsan ke mezukilem.
SOL 3:9 Heini he kerwahi is mibpeveelan ni Hadì Solomon, iyan migamit te kebeeli kayi is menge kayu he ebpuun diyà te Lebanon.
SOL 3:10 Midtukuzan heini te mibpekeplaan te pelata, ne imburda ziyà te tambun kayi is bulawan. Is menge kutsun diyà te pinuuwà kayi, ne mibputus te manggad he merudtem. Ne is diyà te seled kayi he kerwahi impemekempet te menge vahi te Jerusalem.
SOL 3:11 Gawas kew en is menge vahi te Jerusalem, ne ahàa niw si Hadì Solomon is midseluub te kuruna. Ingkuruna heini kandin te iney zin dutun te andew he utew sikandin melipayen, he iyan kes andew te eseweey zin.
SOL 4:1 Utew ka iyan mekempet is pelanggè ku. Is menge mata nu he netembunan te lembung nu ne henduen be te menge mata te merepatik. Is bulvul nu henduen be te menge sengeleyuzan he kambing he edtupang puun te Buntud he Gilead.
SOL 4:2 Is menge ngipen nu iring keputì te kerehidu he veǥu he neelutan wey neziǥù. Wazà netarin kayi wey meupiya is kebpekesavuk dan.
SOL 4:3 Is bivig nu henduen be te kanggan he ribun. Utew iyan heini mekempet. Is enaping nu he netembunan te lembung nu ne henduen be te meriǥàriǥà he prutas he pumigranata.
SOL 4:4 Is lieg nu henduen be te turi ni David he utew mekempet is kebenguna zuen. Mibelieǥan heini te henduen be te utew mahabet he kelasag te menge sundaru.
SOL 4:5 Is dezuwa he susu nu henduen be te sereping he nati te kuleping he ebpenabtab diyà te zuen duen menge liryu.
SOL 4:6 Dutun te kenè pa egkeriwasriwas wey kenè pa egkaawà is merusirem, ne kenà a ed-awà diyà te kumeng nu he henduen be te menge vuntud he ebmeǥuymuyan te kehemut te mira wey veyewà.
SOL 4:7 Utew ka iyan mekempet is pelanggè ku. Wazà iyan igkesawey kenikew.
SOL 4:8 Duma ka kediey puun te Lebanon, minahal ku. Edtupang ki puun te puntur te menge vuntud te Amana, Senir, wey Hermon, he ed-ubpaan te menge erimaung wey menge liyupardu.
SOL 4:9 He pelanggè ku he minahal, sengepedsirap nu zà kedì ne nevihag nu en is gehinawa ku wey tenged te sevaha zà he zayandayan te belieg nu.
SOL 4:10 Utew iyan meemis is kebmahala nu kedì, pelanggè ku he minahal. Meemis pa heini kenà te vinu. Is pehemut nu, ne edhuna pa he mehemut te minsan hengkey he kelasi te pehemut.
SOL 4:11 Henduen be te teneb is keemis te menge hazek nu, minahal ku. Uya, is dilè nu henduen be te zuen duen teneb wey gatas. Is kehemut te kumbalè nu ne iring kehemut te kayu he sidru ziyà te Lebanon.
SOL 4:12 He pelanggè ku he minahal, henduen ka te pemuleey he midsireduwan he zuen duen edtudà he serebseb.
SOL 4:13 Ebpemeǥas heini te pumigranata wey zuma pa he utew meupiya he menge veǥas. Dekelà is egkekuwa kayi he pehemut he hina, nardu,
SOL 4:14 asapran, kalamu, sinamun, nekedseselekawà he kelasi te veyewà, mira, alus, wey zuma pa he utew mehemut he menge pehemut.
SOL 4:15 Uya, iring ka te pemuleey he edtudaan te serebseb he ebpuun diyà te menge vuvungan he Lebanon.
SOL 4:16 Sikiyu is keramag he ebpuun diyà te zizaya wey zivavà. Hiyupa niw is pemuleey ku su wey mekepeyapat is kehemut kayi. Ipehendiyà is minahal ku te pemuleey zin su wey mekekaan te kinemeupiyahan he menge veǥas te pinemula kayi.
SOL 5:1 Midseled a ziyà te pemuleey ku, pelanggè ku he minahal. Mid-amur-amur ku is mira ku wey menge pehemut ku. Migkaan a te teneb ku wey mid-inum a te vinu ku wey ǥatas ku. Menge Bahi ziyà te Jerusalem Sikiyu is mibminahalà, megkaan kew wey med-inum.
SOL 5:2 Dutun te nekelipezeng a ne neketeǥeinep a. Nezineg ku he ebpeneǥuktuk is minahal ku. Ke sikandin te, “Puwasi a, pelanggè ku he mekempet. Su nahames en is ulu ku te zehemug.”
SOL 5:3 Piru migkaǥi a te, “Neluwas ku en is kumbalè ku, ne id-uman ku en be maan heini idseluub? Neledlezan kud is menge paa ku, ne ed-umanan ku en be maan heini eburingi?”
SOL 5:4 Midsikep duen te minahal ku is terangka te gemawan, ne zutun utew a nelipey.
SOL 5:5 Mid-enew a is ibpeseled ku sikandin. Ne hein migewezan ku is gewezà duen te ǥemawan midtiǥis diyà te velad ku is mira.
SOL 5:6 Mibpuwasan ku is minahal ku, piru wazè en sikandin. Egkesuat a he mezineg ku is laǥeng din. Umbe mid-umew ku sikandin, piru wazè en sikandin medtavak. Mibpen-ehè ku sikandin, piru wazè ku meturedu.
SOL 5:7 Naahà a te menge vantey zutun te kedrunda zan diyà te inged. Midlagkut e zan ne nepelian a. Migkuwa zan is samput ku.
SOL 5:8 Sikiyu is menge vahi te Jerusalem, penangdù kew he emun egkeehè niw is minahal ku ne keǥiyi niw sikandin he midluyahan a tenged te kebmahal.
SOL 5:9 Sikew is kezegwayan he vahi, hengkey is meupiya ziyà te minahal nu su ibpepenangdù key man kenikew? Edhuna ve sikandin he meupiya kenà te zuma?
SOL 5:10 Mekempet wey meriǥàriǥà is minahal ku. Te sepulù he libu he menge maama, ne iyan sikandin edhuna.
SOL 5:11 Edhuna pa he mevali is ulu zin kenà te vulawan. Mekurkuruten is bulvul zin ne iring keitem te uwak.
SOL 5:12 Is mata zin iring kekempet te mata te merepatik he iring keputì te gatas, he ziyà te veyvey te wahig. Ne iring heini kekempet te mahalen he menge vatu.
SOL 5:13 Is enaping din mehemut iring te pemuleey he neeneb te menge pinemula he ebeelan he pehemut. Is menge bivig din henduen be te menge liryu he edtudà duen is mira.
SOL 5:14 Is menge vekelawan din, ne henduen be te kebilya he vulawan he zuen duen mahalen he menge vatu. Is lawa zin henduen be te impesinew he ungal te ilipanti he nezeyzeyanan te menge vatu he sepiru.
SOL 5:15 Is menge vuvun din, ne henduen be te menge tukud he marmul he ziyà ipehitindeg te peuntuzà he lunsey he vulawan. Utew sikandin mekempet he ed-ahaan, iring te menge kayu he sidru ziyà te Lebanon.
SOL 5:16 Meupiya he edhezekan is bivig din, ne utew sikandin mekempet. He menge vahi te Jerusalem, iyan sikandin minahal ku; iyan sikandin emiǥu ku.
SOL 6:1 He kezegwayan he vahi, hendei en is minahal nu? Hendei man sikandin mebpevayà su ed-uǥupan dey sikew te kebpen-ahà kandin?
SOL 6:2 Midhendiyà is minahal ku te pemuleey zin he neeneb te menge pinemula he ebeelan he pehemut. Ebpepenabtab sikandin dutun te menge uyaǥen din wey ebpenguwa te menge liryu.
SOL 6:3 Kediey zà is minahal ku, ne kandin e zà. Ibpepenabtab din is menge uyaǥen din diyà te zuen duen menge liryu.
SOL 6:4 Utew ka mekempet, pelanggè ku. Iring is kekempet nu te kekempet te inged he Tirza wey Jerusalem. Utew ka meupiya he ed-ahaan iring te menge sundaru he zuen dan menge bendirà.
SOL 6:5 Kenà a kenikew tengtengi su henduen be te egkereney a tenged kenikew. Is bulvul nu henduen be te sengeleyuzan he kambing he edtupang puun te Buntud te Gilead.
SOL 6:6 Is menge ngipen nu iring keputì te kerehidu he veǥu pa he neziǥù. Wazà netarin kayi ne meupiya is kebpemekesavuk dan.
SOL 6:7 Is enaping nu he netembunan te lembung nu meriǥàriǥà iring te prutas he pumigranata.
SOL 6:8 Minsan duen ku pa 60 he rayna he menge esawa wey 80 he urdinaryu he menge esawa, wey mahabet he menge raǥa he ibpeesawa kedì,
SOL 6:9 ne sevaha zà is pelanggè ku. Mekempet sikandin ne wazè igkesawey kandin. Budtung sikandin he anak he vahi te iney zin ne edhuna is kebpelenggaa kandin te iney zin. Emun egkaahà sikandin te menge vahi, ne ebeǥayan dan sikandin te zengeg, ne minsan is menge rayna wey menge esawa ne edalig kandin.
SOL 6:10 Ke sikandan te, “Hentei ves heini is emun edtengtengan ta ne iring te egkeriwaswas is kekempet din, wey iring te ebpenerètà he vulan, wey iring te edsilà he andew. Mekevivihag sikandin iring te menge vituen.”
SOL 6:11 Midtupang a ziyà te pemuleey te kayu he almindru su ed-ahaan ku is beǥu he menge pinemula he nenuvù diyà te zal-ug, wey ed-ahaan ku ke neneringsing en be is menge paras wey ke nengevukad en be is menge pumigranata.
SOL 6:12 Ne wazè ku mevembentayi he ziyè ed bes te utew mekempet he hizeǥaan duma te pinelanggè ku.
SOL 6:13 Likù ka, is raǥa ziyà te Shulam, likù ka su wey zey sikew maahà. Maama Maan is egkesuatan niw te ed-ahà is raǥa ziyà te Shulam he edsayew ziyà te teliwazà te ebpemenan-ew?
SOL 7:1 He vahi he dungganen, utew iyan mekempet is menge paa nu he zuen duen menge sandalyas. Meupiya is kegkepurma te menge vuvun nu. Henduen be heini te menge elahas he mibeelan te utew metau he mememaal.
SOL 7:2 Is pused nu iring te tasa he layun din duen taǥù he metaam he vinu. Is hawak nu iring te vinagkes he trigu he neliǥuy te menge liryu.
SOL 7:3 Is menge susu nu henduen be te sereping he nati te kuleping.
SOL 7:4 Is lieg nu iring te turi he iyan inhiman duen is menge ungal te ilipanti. Is menge mata nu iring ketingew te pemeziǥuey ziyà te Heshbon, he ziyà te gemawan te Bat Rabim. Is izung nu iring kekempet te turi ziyà te Lebanon he nekesinaru ziyà te Damascus.
SOL 7:5 Is ulu nu iring is kekempet din te kekempet te Buntud he Carmel. Is bulvul nu iring te utew mahalen he manggad. Utew nesuati te hadì is kempet kayi.
SOL 7:6 Utew ka mezagwey is pelanggè ku; utew ka mekewiwili.
SOL 7:7 Is tindeg nu iring te tindeg te kayu he palma, ne is menge susu nu henduen be te menge rupung te veǥas kayi.
SOL 7:8 Migkaǥi a te, “Ebpemenahik a ziyà te palma ne egewezan ku is menge veǥas kayi.” Etuwey, is menge susu nu henduen be te menge pungpung te paras ne is kehemut te gehinawa nu henduen be te kehemut te mensanas.
SOL 7:9 Is menge hazek nu iring is keemis din te kinemeupiyahan he vinu. Bahi Heini he vinu ednaneynaney edtudà diyà te menge vivig wey ngipen te minahal ku.
SOL 7:10 Gaked a te minahal ku ne iyan e zà ibulunga zin.
SOL 7:11 Hendini ka, pelanggè ku, edhendiyè ki te vevesukà, ne ziyà ki edlipezeng te zuen duen menge vulak he hina.
SOL 7:12 Edsayu ki ed-enew ne ed-ahaan ta ke neneringsing en wey ke nemekar en is menge kevukad te menge paras. Ed-ahaan te zaan ke nengevukad en is pumigranata. Ne zutun ibpeǥezam ku kenikew is kebmahal ku.
SOL 7:13 Egkahazek ta is kehemut te pinemula he mandragura, ne ziyà te uvey te gemawan ta ne zutun is langun he meupiya he menge prutas, is daan wey is beǥu. Su inteǥana ku heini kenikew, pelanggè ku.
SOL 8:1 Angin pezem ke suled ku zà sikew he impesusu ziyà te iney ku, ne egkehimu ke edhezekan ku sikew minsan hendei ne kenà mezaat is ked-isipa kedì te zuma.
SOL 8:2 Edumahan ku sikew ziyà te valey te iney ku, ne zutun penurua a kenikew te kebmahal. Ibpeinum ku sikew te mehemut he vinu he wahig te egkeresen he prutas ku he pumigranata.
SOL 8:3 Ebpeulun a te givang he velad nu ne ikepkep nu kedì is kewanan nu.
SOL 8:4 Sikiyu is menge vahi te Jerusalem, penangdù kew he kenè niw ebpukawen is kebmahal zutun te kenè pa hustu he timpu.
SOL 8:5 Hentei ves heini is ebpekeuma he ebpuun te sibsivayan he edsandig diyà te minahal zin? Bahi Mibpukew ku is gehinawa nu zutun te ziyè ki te sihung te mensanas, he zutun ka meetew.
SOL 8:6 Kenè ke en mahal te zuma, kekenà, iyan e zà kenikew mahala. Kenè ke en kepkep te zuma, kekenà, iyan e zà kenikew kepkepi. Su is kebmahal, iring is gehem din te kemetayen; is keinit te egkeǥezam ta ne kenà egkeeǥen iring te kebpekeuma te kemetayen. Is kebmahal iring te egkeregreg wey edriyubriyub he hapuy.
SOL 8:7 Kenà heini egkeevukan minsan ebusbusan te zekelà he wahig. Minsan delemi pa heini ne kenà gihapun egkeevukan. Kenà heini egkepemasa minsan ivayad pa te etew is langun he ketiǥeyunan din.
SOL 8:8 Duen dey etevey he vetan-en pa su ebpemiyesungan pa. Emun duen ebpengulitawu kandin hengkey is ebeelan dey?
SOL 8:9 Nehilevetan en man sikandin etawa wazè pa ne edipinsahan dey sikandin.
SOL 8:10 Wazè e pa mehileveti ne is menge susu ku henduen be te menge turi. Ne kuntintu is minahal ku kediey.
SOL 8:11 Si Solomon, duen din pemuleey te paras diyà te Baal Hamon he mibpeseupan din te menge perevasuk dutun. Is kada sevaha kandan mibeǥey ziyà te ki Solomon te 1,000 he vuuk he pelata he iyan bahin ni Solomon te bali te pruduktu zutun te pemuleey.
SOL 8:12 Bayèbayè ka, Solomon, emun is bahin nu 1,000 he vuuk he pelata ne is bahin te menge perevasuk nu 200 he vuuk he pelata. Piru ebeyveyaan ku zaan is kediey he egkesuatan mehitenged te pemuleey ku.
SOL 8:13 Ipezineg nu kedì is laǥeng nu, pelanggè ku, iring te ebpemineg daan te laǥeng nu is menge emiǥu nu guntaan te keniyan kew te pemuleey edhiphipanew.
SOL 8:14 Gaanggaan ka hendini te kediey, pelanggè ku, he iring keǥaan te selazeng he edlinglingketew ziyà te menge vuntud he neeneb te menge pinemula he ebeelan he pehemut.
ISA 1:1 Heini he libru, ne mehitenged te impahayag te Megbevayà diyà te ki Isaias he anak ni Amoz. Ne heini, mehiten ged te Jerusalem wey Juda hein kedhadì diyà te Juda ni Uzia, ne nesunuzan ki Jotam, ki Ahaz, wey ki Hezekia.
ISA 1:2 Pemineg ka is langit wey is tanà, su migkaǥi is Nengazen te, “Mid-elimahan ku wey impezekelè ku is menge Israelinhon he menge anak ku, piru midsukul sikandan kediey.
ISA 1:3 Minsan ganì is menge vaka ebpekekilala te egalen dan, is menge asnu ebpeketuredu te selemakà he zutun sikandan ibpekaan te egalen dan, piru is menge kevuwazan ni Israel he menge etew ku ne wazà mekekilala kediey.”
ISA 1:4 Mekesesalà sikandan he nasyun, menge etew he utew subra is kelelalung dan, kevuwazan sikandan te mememaal te mezaat wey mesipala. Inselikwey zan wey mid-undaunda is Nengazen, kes Waǥas he Megbevayà te Israel, ne mid-iniyuǥan dan sikandin.
ISA 1:5 Menge tig-Israel, maan is mibpedayun kew mebpekidsukulà? Egkesuat kew ve he edsilutan? Iring kew te etew he nepurung te palì is ulu zin wey utew mesakit is gehinawa zin.
ISA 1:6 Puun te ulu zin taman te parapara zin ne wazè en egkekaǥi ta he meupiya, su pudu en palì, daǥem, wey levag. Wazà heini melùlui, etawa mevukusi, etawa mevewii.
ISA 1:7 Nehimu he mekevulungbulung is nasyun niw; ne nengevinsulan is menge inged niw. Ne nevembentayan niw is kebpenguwaa te menge veǥas te pinemula niw ziyà te vevesukè niw te menge etew ziyà te zuma he lugar. Edezeetan dan is tanè niw taman te kenè en heini egkepulusan.
ISA 1:8 Ne wazè en nesamà gawas te Jerusalem. Neiring heini te helungà diyà te pemuleey te paras etawa lawig diyà te menge pemuleey te timun he iyan dà nekehitindeg. Ne iring daan heini te inged he edliǥuyan te menge kuntada.
ISA 1:9 Emun wazà uuyag he midsamà kenitew te Nengazen he Mekeǥeǥehem, ne egkeiring kiw en te Sodom wey Gomora.
ISA 1:10 Sikiyu is menge ebpemendumala wey menge etew ziyà te Jerusalem, he iring te menge tig-Sodom wey tig-Gomora, pemineǥa niw is lalag wey kesuǥuan te Nengazen he Megbevayè tew.
ISA 1:11 Ke sikandin te, “Wazà bali kayi te kediey te mahabet he menge pemuhat niw. Midsemu ad te menge pemuhat niw he edtutungen menge kerehidu wey menge tavà te menge uyaǥen he impelambù niw. Wazè ku ikelipey is lengesa te menge tudu he vaka, menge kerehidu, wey menge kambing.
ISA 1:12 Hentei ves is midsuǥù keniyu he uwita niw heini is langun emun uvag ed-ezapen a keniyu? Hentei is midsuǥù keniyu te kedtekutak te valey ku?
ISA 1:13 Engked kew en te ked-uwit te menge pemuhat he wazè dan pulus. Igkeremerik ku is beyewè niw. Kenè ku en egkaantus is menge kevurunan niw emun Pista te Kebpuun te Hayag wey emun Andew te Kedhimeley, su minsan edtiǥum kew ne mezaat is baal niw.
ISA 1:14 Egkeepesan ku is menge Pista niw te Kebpuun te Hayag wey is duma he menge pista niw. Igkeveǥati ku heini; ne kenè ku egkaantus.
ISA 1:15 “Emun ebpengemuyù kew ne kenè ku sikiyu ebpemineǥen. Kenà a ebpemineg minsan kepipira kew pa med-ampù, su mahabet en is mibpenhimetayan niw he menge etew.
ISA 1:16 Mebpekelumpiyu kew! Engked kew en he ebaal te mezaat diyà te etuvangan ku.
ISA 1:17 Penginenau kew te kebaal te meupiya, wey iyan niw ikula is hustu he kukuman. Dewaya niw is menge ebpemeǥespeǥes, wey levani niw is ketenged te menge ilu wey menge valu he vahi.”
ISA 1:18 Migkaǥi pa is Nengazen te, “Hendini kew, su edhusayen tew heini. Minsan sengemenu keremerik is menge salè niw, edlumpiyuwan ku heeyan su wey kew mehimu he lumpiyu.
ISA 1:19 Emun ebpezumazuma kew kedì, ne edtuvazan ku sikiyu.
ISA 1:20 Piru emun edsupak kew wey ebpekidsukulè kew, ne siguradu ebpemematey kew. Egkehitavù heini, su iyan a, is Nengazen, is migkaǥi kayi.”
ISA 1:21 Ahàa niw man is inged he Jerusalem. Hein aney metinumanen is menge meǥinged kayi, piru ǥuntaan neiring en sikandan te vahi he ebelegyà te zengeg din. Hein aney metazeng he menge etew is ebpemen-ubpà diyà te Jerusalem, piru ǥuntaan menge teremunù.
ISA 1:22 He Jerusalem, hein aney mevali ka iring te pelata, piru ǥuntaan wazè nu en pulus. Hein aney iring ka te vinu he wazè din sahug piru ǥuntaan nesehuǥan te wahig.
ISA 1:23 Is menge pengulu nu ne mibpekidsukulà wey miduma te menge tekawen. Egkesuat dan he layun edsipsip, wey ebuyù sikandan te menge gasa. Wazè dan levani is ketenged dutun te menge ilu wey wazè dan pemineǥa is riklamu te valu he menge vahi.
ISA 1:24 Umbe, migkaǥi is Nengazen, he Mekeǥeǥehem he Megbevayà te Israel te, “Ebelesan ku sikiyu is menge tig-Jerusalem he menge kuntada ku, su wey kenà ad mesekiti tenged te menge vaal niw.
ISA 1:25 Edsilutan ku sikiyu su wey kew melumpiyuwi iring te pelata he edlunsayen pinaaǥi te hapuy.
ISA 1:26 Ed-umanan ku sikiyu ebeǥayi te menge pengulu wey menge sumesambag iring duen te nehuna. Ne ziyà te huziyan he timpu egkengezanan is inged niw te inged te menge metazeng wey menge metinumanen he menge etew.”
ISA 1:27 Pinaaǥi te metazeng he kukuman te Megbevayà, edlibriyen din is Jerusalem wey is menge meǥinged kayi he ed-iniyug te mezaat.
ISA 1:28 Piru edezeetan din mulà is menge mesinupaken wey menge mekesesalà, he edselikwey te Nengazen.
ISA 1:29 Egkepeel-elezan kew is menge tig-Jerusalem tenged te ked-azap niw ziyà te menge kayu he ulayan wey ziyà te pinilì niw he menge pemuleey.
ISA 1:30 Egkeiring kew te kayu he ulayan he neǥangu, wey te pemuleey he wazà mevinyaǥi.
ISA 1:31 Is menge gehemanen diyà te keniyu egkeiring te kayu he neǥangu he melemu zà egkevinsuli, ne is mezaat he menge vaal zan egkeiring te regreg he iyan ebpekevinsul kandan, ne wazà ebpekeevuk keniyan he hapuy.
ISA 2:1 Iyan heini impehayag te Megbevayà diyà te ki Isaias he anak ni Amoz mehitenged te Juda wey Jerusalem:
ISA 2:2 Diyà te huziyan he menge andew, sikan is buvungan he edhitindeǥan duen te valey te Nengazen egkehimu he lavew he impurtanti te langun he menge vuvungan. Ne ebpekeuma kayi he vuvungan is mahabet he menge etew he ebpemuun diyà te langun he menge nasyun.
ISA 2:3 Egkaǥi sikandan te, “Hendini kew en, su edtekezeg kiw ziyà te vuntud te Nengazen, diyà te valey te Megbevayà ni Jacob. Su ebpenuruen kiw zin te menge paaǥi zin su wey tew metuman heini.” Umbe, ed-ulì is menge etew he ebpuun diyà te Zion, he iyan is inged he Jerusalem, ne ed-uwiten dan is kesuǥuan te Nengazen.
ISA 2:4 Ne pinaaǥi te kesuǥuan din, edhusayen din is menge kebikilan te mahabet he menge nasyun. Umbe kenè ne ebpetebtebekà is menge etew ziyà te menge nasyun, wey kenè dan en mebpenurù te menge etew te para te kebpekidtebek. Ebeelan dan dà maan he punta te menge eradu is menge ispada zan, wey ebeelan dan dà he para te igkamet is menge vangkew zan.
ISA 2:5 Hendini kew is menge kevuwazan ni Jacob, ebpengungubpaan kiw he sungkad te ketutuanan he ibeǥey kenitew te Nengazen tew.
ISA 2:6 Tutuu iyan he inselikwey nu, Nengazen, is menge etew nu, kes menge kevuwazan ni Jacob, su midtuu sikandan te menge tuluuwen he ebpuun diyà te edsilaan wey te menge menenagnà iring te menge Filistihanen. Mid-iringan dan is menge vetasan te menge lumelengyawà.
ISA 2:7 Mahabet he menge pelata wey vulawan diyà te tanè dan, ne kenà egkaamin is ketiǥeyunan dan. Mahabet is menge kudè dan, ne kenà egkaamin is menge kerwahi zan.
ISA 2:8 Mahabet is menge ed-ezapen dan. Ed-ezapen dan is menge vutang he vineelan dan dà.
ISA 2:9 Umbe, ebminusen is ked-etew te kada sevaha kandan wey ebpeel-elezan nu. Kenè nu sikandan peseyluwa, Nengazen!
ISA 2:10 Menge Israilihanen, pelaǥuy kew pehendiyà te menge surung etawa menge vudsi su wey niw meelesi is egkepeuk he Nengazen wey is utew zekelà he ǥehem din.
ISA 2:11 Egkeuma is andew he iyan dà is Nengazen edeliǥen. Ibpekevavè din is ked-etew te menge hembugiru wey menge mepelevawen.
ISA 2:12 Su zuen andew he midtelaan te Nengazen he Mekeǥeǥehem he zutun ibpekevavè din is ked-etew te menge hembugiru, menge mepelevawen, wey mid-isip dan he gemhanan sikandan.
ISA 2:13 Ebpemilayen din is langun he metawis he kayu he sidru ziyè te Lebanon, wey is langun he kayu he ulayan diyà te Bashan.
ISA 2:14 Ebpetaǥen din is langun he metikang he menge vuntud wey menge vuvungan,
ISA 2:15 wey edtempaǥen din is langun he metikang he menge turi wey menge verengbeng.
ISA 2:16 Edlenezen din is langun he menge varku ziyà te Tarshish wey is mekempet he menge untuzà.
ISA 2:17 Dutun he andew iyan dà edeliǥen is Nengazen. Ibpekevavè din is ked-etew te menge hembugiru wey menge mepelevawen.
ISA 2:18 Ne egkahanew is langun he tarù he menge ed-ezapen.
ISA 2:19 Ebpememelaǥuy is menge etew pehendiyà te menge surung diyà te kelendiǥan wey ziyà te menge vudsi te tanà su ed-elesan dan is Nengazen he egkepauk wey is utew subra he ǥehem din emun edhuyungen din en is kelibutan.
ISA 2:20 Dutun he andew, is menge ed-ezapen he menge pelata wey menge vulawan he mibeelan dan su ed-ezapen dan, ibpenimbag dan diyà te menge rumat wey menge kaveg.
ISA 2:21 Ebpememelaǥuy zan pehendiyà te menge surung diyà te kelendiǥan wey ziyà te zezekelà he menge vatu su ed-elesan dan is Nengazen he egkepauk wey is utew subra he ǥehem din emun edhuyungen din en is kelibutan.
ISA 2:22 Kenè kew sarig te etew su ebpatey heini. Ne wazè kayi igketavang.
ISA 3:1 Pemineg kew! Egkuwaan te Nengazen, sikan is Mekeǥeǥehem he Nengazen, is langun he edseriǥan te menge etew ziyà te Jerusalem wey Juda: is keenen dan wey wahig,
ISA 3:2 is menge bentuǥan he menge etew, is menge sundaru, is menge zatù, is menge ebpeneuven, is menge menenagnà, is menge edumala,
ISA 3:3 is menge pengulu te menge sundaru, is menge dungganen he menge etew, is menge sumesambag, is memetau he menge selemengkiru zan, wey menge veyilan.
ISA 3:4 Ibpezizalem sikandan te Nengazen te ǥehem te menge vetan-en.
ISA 3:5 Edluplupiǥen te kada sevaha he etew is iring din he etew. Is menge vatà edsukul te menge meǥurang, wey edsukul zaan is menge egkaayuayu te menge dungganen.
ISA 3:6 Dutun he timpu ebeyaan te sevaha he etew is kezuzumahi zin ne egkeǥiyan din te, “Tenged te meupiya pa is bisti nu, ne iyan ke en pengulu kenami kayi te timpu he nevengkag is lugar tew.” Piru egkaǥi haazà te, “Kenè ku sikiyu egketevangan. Wazè man ganì egkekaan wey igkevisti te pemilya ku, umbe kena a keniyu himuwa he pengulu.”
ISA 3:8 Kenà duwazuwa he egkezeetan is Jerusalem wey is Juda, tenged te iyan dan ebeelan wey ebpengeǥiyen is igkeepes te Nengazen. Wazè dan mebpezizalem te zekelà he keǥehem te Nengazen.
ISA 3:9 Is dagwey zan midtistiǥus te ebpekesuǥat kandan. Utew keladu is kebaal zan te salà iring te mibeelan te menge tig-Sodom. Wazè dan heini ieles. Mekehizuhizu sikandan! Iyan dan mismu mid-uwit te kandan he kezeetan.
ISA 3:10 Keǥiyi niw is menge metazeng te meupiya is ukur zan, su egkeraǥun dan is beǥas te meupiya he menge vaal zan.
ISA 3:11 Piru mekehizuhizu mulà is menge lalung, su ebpekeuma ziyà te kandan is bangkit. Ebelesan sikandan tenged te menge vaal zan.
ISA 3:12 Migkaǥi is Nengazen te, “Edèdaaǥen te menge vetan-en is menge etew ku. Iyan ebpengulu kandan is menge vahi. “Sikiyu is menge etew ku, edtezinen kew te menge pengulu niw. Diyè kew zan ibpeikul te kenà hustu he zalan.”
ISA 3:13 Andam en is Nengazen he edhukum te menge etew zin
ISA 3:14 Edhukuman din is menge ebpemendumala wey menge pengulu te menge etew zin. Iyan heini sumbung din kandan, “Midezeetan niw is pemuleey ku te paras he iyan is menge etew ku. Nepenù is menge valey niw te menge azen he mibpenguwa niw ziyà te menge pubri.
ISA 3:15 Maan is edèdaaǥen niw is menge etew ku wey edresayen niw is egkengaayuayu?” Iyan heini migkaǥi te Nengazen he MEGBEVAYÀ he Mekeǥeǥehem.
ISA 3:16 Migkaǥi pa is Nengazen te, “Gelbuwen is menge vahi ziyà te Jerusalem. Henduen be te hentei sikandan emun edhipanew zan wey edtitikes sikandan te menge elahas. Ne emun edtengteng sikandan ne ebpezumahan dan te kebpengendat.
ISA 3:17 Umbe, ibpemezeǥes ku is ulu zan, ne egkeupew sikandan.”
ISA 3:18 Dutun he timpu egkuwaan te Nengazen is menge elahas diyà te menge paa zan, ulu zan, wey lieg dan.
ISA 3:19 Egkuwaan daan diyà te kandan is menge eritis dan, rintì dan, lambung dan,
ISA 3:20 tengkulu zan, elahas dan diyà te velad, bagkes dan, pehemut dan, wey hinepetan dan.
ISA 3:21 Egkuwaan pa is menge sising dan diyà te tezù dan wey ziyà te izung dan,
ISA 3:22 is mahalen he menge visti zan, apid te visti, samput, kahita,
ISA 3:23 peǥelungan, bisti he linu, tengkulu, wey tezung.
ISA 3:24 Kenè en hinuun sikandan ebmehemut, kekenà, ebmemahù dan. Pisì dà is bagkes dan, ne ed-upawan is meupiya he vulvul zan. Is mahalen he menge visti zan ed-ilisan te saku, ne egkaawà is kekempet dan.
ISA 3:25 Epemematey tenged te tebek is menge maama ziyà te Jerusalem minsan is memevurut he menge sundaru zan.
ISA 3:26 Duen edlalew wey ebpemenineǥew ziyà te menge pultahan dutun te inged. Ne haazà is inged egkeiring te vahi ha nekezuzungul ziyà te tanà he nahanew is langun he azen din.
ISA 4:1 Dutun he timpu, pitu he vahi is ebpeeg-eǥawà te sevaha he maama he ke sikandan te, “Iyan key en metau te egkekaan dey wey visti zey, esewaa key zà su wey key kenà mepeel-elezi tenged te wazè dey esawa.”
ISA 4:2 Egkeuma is timpu he ibpeuswag wey ibpemekempet te Nengazen is menge pinemula ziyà te Israel, ne is menge sebpet dutun te tanà, egkehimu he zengeg wey kelipey te egkesamà he menge etew ziyà te Israel.
ISA 4:3 Egngezanan he menge segradu is menge etew he egkesamà diyà te Zion, he iyan is inged he Jerusalem.
ISA 4:4 Pinaaǥi te ǥehem din edhukuman din wey edlumpiyuwan din is kelelalung te menge vahi ziyà te Jerusalem wey is kebpemenhimatey zutun.
ISA 4:5 Ne ebaal is Nengazen te ǥapun he ebpekelambung te Jerusalem wey te mid-amur-amur zutun. Wey ebaal zaan sikandin te edriyubriyub he hapuy he ebpeketeyew emun mezukilem. Epeketambun heini te Jerusalem iring te meluag he tulda.
ISA 4:6 Ne egkeiring heini te lawig he egkehelungan emun meinit is andew wey egkehelungan daan amun duen bagyu wey uzan.
ISA 5:1 Egkanta a mehitenged te minahal ku, mehitenged te pemuleey zin te paras: Duen pemuleey te paras te minahal ku ziyà te vuvungan he meupiya is tanà duen.
ISA 5:2 Mid-eradu zin heini wey mibpen-awè din is menge vatu zuen, ne mibpemulaan din te utew meupiya he menge paras. Mibaal sikandin te ubpeey te ebantey ziyà te teliwazà kayi te pemuleey, ne mibpevudsiyan din is batu he para egkeresan te paras. Midtaǥad sikandin he mebeǥas heini te meemis, piru mibeǥas heini te mepezes.
ISA 5:3 Iyan heini migkaǥi te teǥiǥaked te pemuleey te paras: “Sikiyu is menge meǥinged diyà te Jerusalem wey Juda, hukumi a keniyu wey is pemuleey ku.
ISA 5:4 Hengkey pa vuwa is nelipatan ku te ebaal zutun te pemuleey ku? Midtaǥad a he mebeǥas heini te meemis, piru mibeǥas heini te mepezes.
ISA 5:5 “Guntaan egkeǥiyan ku sikiyu ke hengkey is ebeelan ku zutun te pemuleey ku. Id-awè ku is menge nenuvù diyà te nekeliǥuy kayi he iyan nehimu he kudal zin, wey ebengkaǥen ku is menge alad kayi su para penebtavà heini te menge langgam ne wey zan daan metekutaki.
ISA 5:6 Ebpesegdanen ku en heini he pemuleey. Kenè ku en ebpenempezen is subpang etawa edterebehuwen is tanà duen. Etuvuan dà heini te menge sagbet wey duǥiyen he dezeisey he kayu. Ne egkeǥiyan ku is menge ǥapun he kenè dan heini petiǥisi te uzan.”
ISA 5:7 Is pemuleey te Nengazen he Mekeǥeǥehem he mid-elimahan din wey igkelipey zin, iyan is menge etew ziyà te Israel wey Juda. Edtaǥad sikandin he tumana zan is hustu he kukuman, piru nasì dan mebpenhimatey. Edtaǥad sikandin he veeli zan is metazeng, piru nasì dan mebpendaagdaag.
ISA 5:8 Mekehizuhizu kew is mibpekezakel te menge valey wey mibpekeluag te tanà taman te wazè en lugar para te zuma, ne iyan kew zà nesamà he ed-ubpà kayi he tanà.
ISA 5:9 Nezineg ku he migkaǥi is Nengazen he Mekeǥeǥehem te, “Heeyan is dezekelà wey mekempet he menge valey, kenè en egkeubpaan.
ISA 5:10 Is dezuwa he hiktaryas he perasan ne menge heenem dà he gelun he vinu is egkekuwa zuen. Ne is ingkeezek he sepulù he ǥantang ne senge-ǥantang dà is egkeraǥun duen.”
ISA 5:11 Mekehizuhizu kew is utew pa meselem he ed-enew en wey mekepuun en he ed-inum, ne taman te mezukilem is kebpelelengut niw.
ISA 5:12 Diyà te menge keemuran niw duen niw banda wey vinu. Piru wazè niw seǥipaa is menge vaal te Nengazen.
ISA 5:13 Umbe sikiyu is menge etew ku, ebihaǥen kew su wazè niw mesavut is menge vaal ku. Egkeǥerè kew wey is menge edumala keniyu tenged te kegkevitil wey kegkemezahi.
ISA 5:14 Egingange en is penlevengà. Edtaǥad en heini he ed-ahuk duen is dungganen he menge etew ziyà te Jerusalem, ragkes en is menge meǥinged kayi he ebpemen-ugyab wey edlilipeylipey.
ISA 5:15 Ebpekevevaan is ked-etew te langun he etew, lavew en sikan is menge gelbuwen.
ISA 5:16 Piru is Nengazen mulà he Mekeǥeǥehem edeliǥen tenged te kedhukum din. Pinaaǥi te metazeng he kedhukum din, ibpeehè din he waǥas sikandin he Megbevayà.
ISA 5:17 Is nevengkag he menge inged he iyan mid-ubpaan te menge sepian, egkehimu he penebtavà te kerehidu.
ISA 5:18 Mekehizuhizu kew is mibaal te salà wey kelelalung pinaaǥi te kedtarùtarù.
ISA 5:19 Ed-undaunda kew pa he ke sikiyu te, “Egègaanen te Waǥas he Megbevayà te Israel is kedsilut din sumalà te migkaǥi zin he ebeelan din, su wey zey maahà. Deyzey ke egkehitavù en is pelanu zin su wey zey metueni heini.”
ISA 5:20 Mekehizuhizu kew is iyan niw ed-isipen he mezaat is meupiya, ne is meupiya ne iyan niw ed-isipen he mezaat. Is kerusireman ne iyan niw egngezanan he kerayag, ne is kerayag iyan niw egngezanan he kerusireman. Is mepait edhimuwen niw he meemis ne is meemis edhimuwen niw he mepait.
ISA 5:21 Mekehizuhizu kew is ed-isipen niw he metau kew wey uluwanen.
ISA 5:22 Mekehizuhizu kew is buleǥuk te vinu, wey iyan layun edtimpla te menge inumen.
ISA 5:23 Edlibriyen niw is ebpekesalà tenged te sipsip, piru wazè niw veǥayi te hustu he kukuman is wazà mekesalà.
ISA 5:24 Umbe, iring kew te neǥangu he reǥami wey sagbet he meǥaan dà edeketi te hapuy wey egkeigmuk; segugunè kew egkengezeeti. Egkeiring kew te pinemula he neredak is dalid din, ne is menge kevukad din, inlayap he henduen dà te eliyavuk, su geina te inselikwey niw is Kesuǥuan te Nengazen he Mekeǥeǥehem, kes Waǥas he Megbeveyà te Israel.
ISA 5:25 Umbe tenged te utew kegkepeuki keniyu te Nengazen te menge etew zin, ne edsilutan kew zin. Egkehuyung is menge vuvungan ne ebpekepeyapat kew ziyà te kersada is ebpemematey he egkeiring te menge vesura. Ne minsan pa zutun kenè pa egkaawà is pauk te Nengazen. Andam pa ǥihapun sikandin he edsilut keniyu.
ISA 5:26 Ed-uyawan din is menge nasyun diyà te meziyù; egkulehian din te ked-umew is menge meǥinged diyà te utew meziyù he vahin te kelibutan, ne segugunà sikandan ebpekeuma is edsurung keniyu.
ISA 5:27 Wazà minsan sevaha kandan he edluyahan wey ebpekeuseng, wazà minsan sevaha kandan he edhimeley etawa edlipezeng. Wazà bakes dan he egkepekas etawa hiket te sendalyas he egkevidtew.
ISA 5:28 Merewidit is basut te menge panè dan ne naandam en is menge panè dan. Is sulu te menge kudè dan iring te utew mezesen he vatu, henduen be te eribpures is kegketileng te ligid te menge kerwahi zan.
ISA 5:29 Dutun te ked-surung dan ebpengulahì dan he iring te edhiniǥer he erimaung. Ne is egkebiktima zan, ed-uwiten dan diyà te meziyù ne wazà egkelibri kandan.
ISA 5:30 Dutun te kedsurunga zan te Israel, ebpengulahì dan te iring te deǥurus te zaǥat. Ne emun edtengtengan te etew is tanà te Israel, iyan egkeehè din is kerusirem wey kelised. Is kereyag ebmerusirem su edtembunan te mekepal he menge ǥapun.
ISA 6:1 Dutun te tuig te kebpatey ni Hadì Uzia, neehè ku is Nengazen he ebpimpinuu ziyà te metikang he pinuuwà te kedhadì. Is melayat he visti zin nekeeneb duen te valey te Nengazen.
ISA 6:2 Duen menge ilengiten he linimbag he ziyà dapit te ulu zin. Ne is kada sevaha zutun, ne heenem is pakpak din: is dezuwa he pakpak dan neketambun diyà te vuked dan, ne is dezuwa neketambun te menge paa zan, ne is dezuwa pa egemiten dan te kedlayang.
ISA 6:3 Ne ebpekegkeǥiyà sikandan te: “Waǥas, waǥas, waǥas is Nengazen he Mekeǥeǥehem he is kebpekiduma zin nekeeneb te tivuuk he kelibutan.”
ISA 6:4 Tenged te laǥeng dan, nehuyung is menge pundasyun te valey te Nengazen ne nepenù te evel is baley te Nengazen.
ISA 6:5 Ne migkaǥi a te, “Mekehizuhizu a! Su kenà duwazuwa he edezeetan a, su mezaat is ebpengeǥiyen ku wey is menge etew he emurè ku, mezaat daan is kandan he ebpengeǥiyen. Ne ǥuntaan neehè ku is Hadì he iyan is Nengazen he Mekeǥeǥehem.”
ISA 6:6 Ne zutun is sevaha zuen te menge ilengiten he linimbag din, midlayang pehendiyà te kedì is ed-uwit te vaǥa he midsipit din diyà te pemuhatà.
ISA 6:7 Ne indegkit din haazà diyà te vèbè ku; ke sikandin te, “Indegkit heini ziyà te vivig nu, ne ǥuntaan wazè nu en salà su mibpesaylu ke en.”
ISA 6:8 Ne nezineg ku is laǥeng te Nengazen he migkaǥi te “Hentei vuwa is edsuǥuen ku? Hentei vuwa is edhipanew para kenami?” Midtavak a te, “Heini e zed! Iyan a suǥua.”
ISA 6:9 Ne migkaǥi sikandin te, “Genat ka ne keǥiyi nu is menge etew ziyà te Israel te, ‘Edsigudu kew zà ebpemineg, piru kenè kew ebpekesavut. Edtulung kew zà edtengteng, piru kenè kew ebpekaahà.’ ”
ISA 6:10 Ne migkaǥi pa sikandin te, “Ipemezesen nu is gehinawa kayi he menge etew. Himuwa nu sikandan he vengel wey lakap, su kela ke mekeehè dan wey mekezineg, ne ebpekesavut sikandan ne edlikù dan kayi te kediey, ne egkeulian sikandan.”
ISA 6:11 Ne mid-insà a te, “Sengemenu is kegkeuǥet kayi, Nengazen?” Midtavak sikandin te, “Taman te egkengewaǥey is menge inged diyà te Israel ne wazè en duen menge etew. Taman te wazè en ebpen-ubpà diyà te menge valey, ne is tanà egkepurung en egkezeeti.
ISA 6:12 Taman te edsegseǥen ku is menge Israilihanen ne is tanè dan henduen te pinesagdan.
ISA 6:13 Minsan mesamè pa is ikesepulù he vahin te menge Israilihanen diyà te tanà te Israel, edezeetan ǥihapun sikandan. Piru zuen mibpilì ku ziyà te kandan ne iyan sikandan egkesamà. Egkeiring sikandan te tued te kayu he ulayan he mibpiley.”
ISA 7:1 Si Ahaz he anak ni Jotam wey apù ni Uzia, hein hadì sikandin diyà te Juda, duen midsurung diyà te Jerusalem. Is nenurung iyan si Hadì Rezin he hadì te Aram wey si Hadì Peka he hadì te Israel, he anak ni Remalia. Piru wazè dan maaǥew is Jerusalem.
ISA 7:2 Ne hein nezineg te hadì te Juda he midsevaha is Aram wey Israel, migkerker sikandin wey is menge etew zin tenged te kegkahandek. Migkerker zan iring te menge kayu he egkehuyung te keramag.
ISA 7:3 Ne migkaǥi is Nengazen diyà te ki Isaias te, “Dumaha nu is anak nu he si Shear Jashub ne sinuǥunga niw si Ahaz diyà te netemanan te zal-ug diyà te zivavew he peneng, dutun te kilid te zalan pehendiyà te lugar he pemìpiey.
ISA 7:4 Ne iyan heini keǥiya nu kandin, ‘Pengandam ka! Ipehulenè nu is gehinawa nu wey kenè ka mahandek. Kenè ka mebpekulbà tenged dà te utew kegkepauk ni Hadì Rezin he hadì diyà te Aram wey ni Hadì Peka he anak ni Remalia. Heini sikandan, iring dà te zezuwa he tued he ed-evel piru wazà duen hapuy.
ISA 7:5 Mibpelanu sikandan te kedezaat kenikew. Ke sikandan te,
ISA 7:6 “Edsurungen ta is Juda ne edaaǥen ta. Ebehinen ta is tanà kayi ne iyan ta ibpahadì duen is anak ni Tabeel.”
ISA 7:7 “ ‘Piru migkaǥi is Nengazen he MEGBEVAYÀ te kenà heeyan egkehitavù.
ISA 7:8 Su is Damascus iyan dà kepital te Aram, ne si Rezin, diyè dà sikandin midhadì te Damascus. Ne is Samaria iyan dà kepital te Israel, ne si Peka he anak ni Remalia ziyè dà sikandin midhadì te Samaria. Egkezeeten is Israel seled te 65 he tuig, umbe kenè ne heini egketawag he sevaha he nasyun. Emun kenà melig-en is kedtuu niw ne egkezeetan kew iyan.’ ”
ISA 7:10 Dutun mid-uman megkaǥi is Nengazen diyà te ki Ahaz te,
ISA 7:11 “Buyù ka te tuus kayi te kediey, te Nengazen he Megbevayè nu he ebpenistiǥus he edtumanen ku is impenaad ku. Ibeǥey ku minsan pa ke haazà is tuus diyà ebpuun te zizalem, he ziyà te iveyaan, etawa ziyà te zivavew, diyà te langit.”
ISA 7:12 Midtavak si Ahaz te, “Kenà a ebuyù te tuus. Kenè ku egezaman is Nengazen.”
ISA 7:13 Migkaǥi si Isaias te, “Pemineg kew is menge kevuwazan ni David! Kenè be subre en is kebpetigkerà niw te menge zuma niw he menge etew? Ne ǥuntaan iyan niw en maan ibpetigker is Megbevayè ku!
ISA 7:14 Umbe iyan mismu is Nengazen ebeǥey keniyu te tuus. Ne iyan heini tuus: Ebmeǥingey is betan-en he vahi ne ed-anak te maama. Ne egngezanan din haazà is batà te ‘Emmanuel.’
ISA 7:15 Gatas wey teneb is egkehimu he keuyaǥan kayi he vatà taman te egketeǥuan en te hustu he isip.
ISA 7:16 Ne te kenè pa sikandin egketeǥuan te hustu he isip, is tanà duen te zezuwa he hadì he igkahandek nu, Ahaz, egkezeeten ne ebey-anan dà heini.
ISA 7:17 Diyà te huziyan he timpu, sikew wey is menge etew nu, ragkes en is lavew he pemilya nu, ibpesurung te Nengazen te hadì te Asiria. Ne egkeseǥazan niw is kelised he wazè niw pa keenu meseǥazi puun te kebpekidsivayà te Israel te Juda.
ISA 7:18 “Dutun he timpu, ebpemunsuwit is Nengazen he ed-umew te menge tig-Ehipto wey tig-Asiria. Ne ebpekeuma is menge tig-Ehipto he henduen be te menge langew he ebpuun diyà te meziyù he menge wahig diyà te Ehipto, ne ebpekeuma zaan is menge tig-Asiria he henduen be te menge petiyukan.
ISA 7:19 Ebpekeuma heini sikandan ne ed-ubpè dan diyà te minsan hendei: diyà te merusirem he menge zal-ug, diyà te vudsi te zezekelà he menge vatu, diyà te zuǥiyen he zezeisey he kayu, wey ziyà te menge penebtavà.
ISA 7:20 “Dutun he timpu, egemiten te Nengazen is hadì te Asiria te kebpurung kedezaat te tanè niw. Iring sikandin te men-aalut he ebpuun te ziyà layun te Wahig he Eufrates he midsuhulan te kegkiskis te vulvul niw, berehibu niw, wey ragkes en is sumpè niw.
ISA 7:21 “Dutun he timpu, is egkeelimahan te menge etew tigselimbaha zà he zumeraǥa he vaka wey zezuwa he kambing,
ISA 7:22 ne iyan dà haazà egkuwaan dan te ǥatas. Gatas wey teneb is egkehimu he keuyaǥan te langun he egkesamà diyà te Juda.
ISA 7:23 Dutun daan he timpu, is pemuleey te paras he zuen duen 1,000 he puun he 1,000 he pelata is bali zin egkeeneb te zuǥiyen he zezeisey he kayu ne ebmeribpesen en heini.
ISA 7:24 Ebpenuǥes is menge etew zutun he uwiten dan is menge panà wey vangkew zan, su geina te meribpesen en heini he neeneb te zuǥiyen he dezeisey he kayu.
ISA 7:25 Wazè en edhendiyà te menge vuvungan dutun he hein aney ebpemulaan, su ǥeina te neeneb en heini te zuǥiyen he zezeisey he kayu. Egkehimu zà heini he penebtavà te menge vaka wey menge kerehidu.”
ISA 8:1 Migkaǥi is Nengazen kayi te kedì te, “Kuwa ka te meluag he edsuratan, ne isurat nu heini he menge lalag is edhenduen te: ‘Maher Shalal Hash Baz.’
ISA 8:2 Ne zutun migkuwa a te zezuwa he egkeseriǥan he menge tistiǥus he edtistiǥus he insurat ku heini. He iyan si Uria he memumuhat wey si Zacarias he anak ni Jeberekia.”
ISA 8:3 Ne midhilevetan ku is esawa ku he ebpeneuvan, ne mibmeǥingey sikandin ne mid-anak te maama. Migkaǥi is Nengazen kayi te kedì te, “Ngezani nu heeyan is batà te Maher Shalal Hash Baz.
ISA 8:4 Ne te kenè pa egketau heeyan is batà he edsampit te Amà etawa Inà, ne is ketiǥeyunan diyà te Damascus wey is midtavan te menge tig-Samaria ne egkuwaan te hadì te Asiria.”
ISA 8:5 Mid-uman pa megkaǥi is Nengazen kayi te kedì te,
ISA 8:6 “Geina te inselikwey kayi he menge etew is wahig te Shiloa he midtudà te menaney, ne ingkelipey zan is kebpekidtampu ki Hadì Rezin wey ki Hadì Peka,
ISA 8:7 ibpesurung ku sikandan te hadì te Asiria wey te menge sundaru zin he iring te zalem te Wahig he Eufrates he ebpekelapew te menge pangpang din.
ISA 8:8 Edeǥurus sikandan diyà te Juda he iring te zalem he teǥelieg is kezalem ne edlepayan dan is tivuuk he tanà.” Piru zuma zey ǥihapun is Megbevayà!
ISA 8:9 Sikiyu is menge etew ziyà te menge nasyun, minsan mebpetemtempuwè kew pa, ebpekedsusuwey kew ǥihapun. Pemineg kew is diyà te menge meziyù! Minsan mebpengandam kew pa para te kebpekidtebek, egkezaag kew ǥihapun.
ISA 8:10 Ke hengkey is pelanu niw he ebpekesuǥat kenami, kenà heini ebmezeeǥen, su zuma zey is Megbevayà.
ISA 8:11 Mibpetizeenen a te Nengazen he ke sikandin te, “Kenè kew med-iring te menge paaǥi te menge emurè niw te inged.
ISA 8:12 Kenè niw tuuwi is egkeǥiyen dan he menge meluiven kew. Kenè kew mahandek te igkahandek dan, ne kenè kew mebpekulbà.
ISA 8:13 Siak, is Nengazen he Mekeǥeǥehem, kinahanglan he egkilelaan a keniyu he waǥas. Iyan a ereg he egkehendekan niw.
ISA 8:14 Iyan a egkehimu he eputè niw. Piru para te menge tig-Israel wey tig-Juda, iring a te vatu he egkesipè dan wey ebpekeurambak dan, ne para te menge etew ziyà te Jerusalem, iring a te penuǥes.
ISA 8:15 Mezakel kandan is egkeseligkat, ebpekeurambak, wey egkezeetan. Egkeutel sikandan wey egkezekepan.”
ISA 8:16 Sikiyu is menge edsunud kedì, kenè niw lipati is menge penurù ku.
ISA 8:17 Ebperateng a ziyà te Nengazen minsan pà te mid-iniyuǥan din is menge kevuwazan ni Jacob. Edsarig a ziyà te kandin.
ISA 8:18 Heini e zed wey is menge anak ku he imbeǥey te Nengazen kedì. Menge tuus key para te Israel he ebpuun diyà te Nengazen he Mekeǥeǥehem. Ed-ubpà sikandin diyà te Buvungan he Zion.
ISA 8:19 Emun duen egkaǥi keniyu he penginginsè kew te menge minatey pinaaǥi te menge veyilan wey menge etew he edsarig te menge mulin-ulin, ne kenè niw haazà beeli. Insè kew ziyà te Megbevayè niw. Heeyan sikandan ebekèbekè dà is bèbè dan. Ne maan is ed-insè kew ziyà te menge minatey te para te menge uuyag?
ISA 8:20 Kinahanglan he is kesuǥuan wey penurù te Nengazen ne iyan niw ebpemineǥen. Emun duen menge etew he egkaǥi te supak te menge penurù te Nengazen, heeyan he menge etew wazà meteyawi is isip dan.
ISA 8:21 Edhipanew zan he egkeveley wey egkevitil. Ne tenged te kegkevitil zan, egkepauk sikandan ne edrewakan dan is hadì dan wey is Megbevayè dan. Ne edlingahà sikandan diyà te langit
ISA 8:22 etawa edtengteng dan diyà te tanà, wazè duma he egkeehè dan, kekenà, iyan dà is kelised wey kerusireman. Ne ziyè dan ed-uwita te mekahandek-handek he kerusireman.
ISA 9:1 Piru egkeuma is timpu he egkaawè en is merusirem dutun he tanà te zutun is kemereǥenan. Dutun te nehuna he timpu mibpeel-elezan te Nengazen is menge etew ziyà te Zebulun wey Naftali, piru ziyà te huziyan he timpu, ebeǥayan din sikandan te zengeg is menge etew he ed-ubpà diyà te veyeey pehendiyà te zaǥat he ziyà layun te Wahig he Jordan. Heini he menge lugar sakup te Galilea he ed-ubpaan te kenà menge Judio.
ISA 9:2 Is menge etew keniyan he nerusireman, ebpekaahà te utew merayag. Is menge nerusireman he egkahandek he ebpatey, egketeyawan.
ISA 9:3 Nengazen, ebeǥayan nu sikandan te utew zekelà he kelipey. Egkelipey sikandan diyà te etuvangan nu iring te menge etew he egkelipey emun tiraǥun etawa iring te menge etew he igkelipey zan is bahin dan te menge azen he netavan dan diyà te kebpekidtebek dan.
ISA 9:4 Su ibpekeziyù nu sikandan diyà te midlupiglupig kandan. Iring sikandan te uyaǥen he ebedtien nu is id-eyuǥu zuen wey is tuked he idlagkut duen. Is ebeelan nu kandan iring te mibeelan nu zengan hein midaag nu is menge Midianhen.
ISA 9:5 Egkelipey zaan sikandan su egkeengked en is kebpetebtebekà. Ebinsulan is menge yunipurmi te menge sundaru he nengelupit te lengesa, ragkes en is menge butas dan.
ISA 9:6 Egkelipey pa zaan sikandan su id-anak is batà he maama ne edhedian key zin. Egngezanan sikandin te, “Egkein-inuwan he Sumesambag, Mekeǥeǥehem he Megbevayà, Wazà Pidtemanan he Emey, wey Pengulu he Ebpekeveǥey te Kelinew!”
ISA 9:7 Wazà pidtemanan is ked-uswag te kedumala zin, ne layun dà melinawen heini. Ebpengevilinen din is ginhedian ni David. Ibpemelig-en din heini ne edhedian din he zuen hustu he kukuman wey ketazeng he wazà pidtemanan. Edsigureduwen te Nengazen he Mekeǥeǥehem he metuman heini.
ISA 9:8 Migkaǥi is Nengazen he edsilutan din is menge Israilihanen, he menge kevuwazan ni Jacob.
ISA 9:9 Ne egketuenan heini te langun he menge etew ziyà te Israel, ragkes en is diyà te Samaria he kepital zin. Ne ǥuntaan ebpelavew zan pa wey ebpahambug he ke sikandan te,
ISA 9:10 “Nengerundus is menge valey zey he iyan inhiman duen is brik wey kayu he sikemur, piru edliwanan dey heini te melig-en wey mekempet he menge valey he iyan idhiman duen is batu he vinesbasan wey kayu he sidru.”
ISA 9:11 Umbe ibpesurung sikandan te Nengazen te menge tig-Asiria, he menge kuntada ni Hadì Rezin.
ISA 9:12 Edezeetan dan te menge Aramihanen he ziyà te edsilaan wey menge Filistihanen he ziyà te edsenlepan, he iring te zumezaas he menge langgam he andam he ed-emeluk. Piru kenè pa egkeengked is pauk te Nengazen. Andam pa ǥihapun sikandin te kedsilut kandan.
ISA 9:13 Piru is menge etew te Israel kenà gihapun edlikù diyà te Nengazen he Mekeǥeǥehem he midsilut kandan.
ISA 9:14 Umbe, edtik-ew edsilut is Nengazen diyà te tivuuk he Israel. Egkeiring sikandan te uyaǥen he edtempezan te ikug wey ebpungelan te ulu.
ISA 9:15 Is ulu iyan is ebpemendumala wey menge dungganen he menge etew, ne is ikug iyan is teruen he menge ebpeneuven.
ISA 9:16 Is menge mibpengulu te menge etew te Israel iyan neketazin kandan, ne heini he menge etew nengetazin.
ISA 9:17 Umbe kenà igkelipey te Nengazen is betan-en dan he menge maama, ne kenè din egkehizuwan is menge ilu kandan wey menge valu he vahi. Su lalung sikandan is langun ne kenà edsunud te Megbevayà; pudu mekeeled-eled is ebpengeǥiyen dan. Piru is pauk te Nengazen kenè pa egkeengked. Andam gihapun sikandin he edsilut kandan.
ISA 9:18 Su is kelelalung dan iring te hapuy he nekevinsul te zuǥiyen he zezeisey he kayu. Edriyubriyub heini iring te hapuy he nekevinsul te menge kayu, ne mekepal he evel is midlipuwak pehendiyà te zivavew.
ISA 9:19 Tenged te pauk te Nengazen he Mekeǥeǥehem, egkevinsulan is tanè dan, ne egkehimu sikandan he tavun he ed-epuren te hapuy. Kenè dan egkehizuwan minsan is iring dan he menge Israilihanen.
ISA 9:20 Minsan hengkey he keenen is egkeehè dan diyà te peliǥuy egkuwaan dan ne egkeenen dan piru kenè dan gihapun egkahantey. Ragkes en he egkeenen dan is menge anak dan.
ISA 9:21 Ebpetebekà is tribu he Manase wey Efraim, ne heini is dezuwa ne edsurung diyà te Juda. Piru kenè pa egkeengked is pauk te Nengazen. Andam pa ǥihapun sikandin he edsilut.
ISA 10:1 Mekehizuhizu kew is ebaal te kenè hustu he menge kesuǥuan he nenlupiglupig te menge pubri he emurè ku te inged, wey mibpekewazà te ketenged dan wey wazà medtuman te hustu he kukuman para kandan. Pinaaǥi kayi he menge kesuǥuan egkuwaan niw is azen te menge valu he vahi wey menge ilu.
ISA 10:3 Hengkey is ebeelan niw zutun te andew he edsilutan kew? Hengkey is ed-ul-ulahan niw emun ebpekeuma is kezeetan he ebpuun te meziyù? Hentei is ebuyuan niw te tavang? Wey hendei niw id-eles is ketiǥeyunan niw?
ISA 10:4 Wazà egkesamà keniyu, kekenà, egkengevihag kew etawa ebpemematey. Piru kenè pa ǥihapun egkeengked is pauk te Nengazen! Andam pa ǥihapun sikandin he edsilut keniyu.
ISA 10:5 Migkaǥi is Nengazen te, “Mekehizuhizu is menge tig-Asiria. Iyan sikandan egemiten ku he lagkut he para te kedsilut te menge egkeepesan ku.
ISA 10:6 Edsuǥuen ku is menge tig-Asiria te kedsurung te egkeepesan ku he nasyun. Heini is nasyun, kenà sikandan edsunud kedì te Megbevayè dan. Heini sikandan, edezeetan ku iring te vasak diyà te kersada he edtekutakan, wey mepenguwa te menge tig-Asiria is langun he menge azen dan.”
ISA 10:7 Piru kenà egketuenan te hadì te Asiria he egemiten dà sikandin te Nengazen. Kunaan din ke ebpendezeetan din dà is mezakel he menge nasyun.
ISA 10:8 Ebpahambug sikandin he egkaǥi te, “Is menge peremandar te menge sundaru ku ne henduen be te menge hadì.
ISA 10:9 Wazà mibizahayan te Carkemish te Calno, wey Arpad te Hamat, wey is Damascus te Samaria? Neked-iiring dà heini he menge inged su pudu ku naaǥew.
ISA 10:10 Kayi en te palad ku heini is menge ginhedian he ed-azap te menge ed-ezapen he lavew pa te menge ed-ezapan diyà te Jerusalem wey Samaria.
ISA 10:11 Midezeetan ku en is Samaria wey menge ed-ezapen kayi. Ne iyan gihapun heeyan ebeelan ku te Jerusalem wey te menge ed-ezapen kayi.”
ISA 10:12 Piru iyan heini migkaǥi te Nengazen he egkehitavù emun egkepasad din en is ebeelan din he ebpekesuǥat te Buvungan he Zion wey ziyà te Jerusalem: “Edsilutan ku is hadì te Asiria tenged te kegkemepelevawen din wey kegkegelbuwen!
ISA 10:13 Su migkaǥi is hadì te Asiria te, ‘Nehimu ku heini tenged te zesen ku wey ketau ku: Midpen-aǥew ku is mezakel he menge nasyun wey is menge ketiǥeyunan dan. Iring a te tudu he vaka; nezaag ku is menge hadì dan.
ISA 10:14 Mibpenguwa ku is ketiǥeyunan te menge nasyun he iring dà te nenguwa a te impis diyà te mid-ewaan he selaǥà. Wazè en midrerekubkub etawa nemekak.’ ”
ISA 10:15 Lavew ve is wasey etawa gavas te migamit duen? Iyan be egkevitbit te lagkut is migawed duen?
ISA 10:16 Umbe, is Nengazen he Mekeǥeǥehem ebpeeǥiyan din te zaru is menge sundaru te hadì te Asiria, he menge meupiya is kedlelawa. Ebinsulan te Nengazen is ketiǥeyunan kayi te edriyubriyub he hapuy.
ISA 10:17 Is Nengazen he iyan sulù te Israel wey waǥas he Megbevayè dan, egkeiring sikandin te edriyubriyub he hapuy. Ebinsulan din seled te meǥaan dà heini is duǥiyen he zezeisey he kayu he iyan is Asiria.
ISA 10:18 Iring te edezeetan te zaru is lawa te etew, edezeetan daan te Nengazen is ketelunan wey is uuzaran he vevesukà te hadì te Asiria.
ISA 10:19 Deisey zà is egkesamà he menge kayu ziyà te menge ketelunan din. Ne minsan is batà ebpekehimu he ebilang kayi.
ISA 10:20 Egkeuma is andew he is egkengesamà he menge kevuwazan ni Israel, he iyan si Jacob, kenè ne edsarig te Asiria he mibpaantus kandan, kekenà, diyè en edsarig te Nengazen, he Waǥas he Megbevayà te Israel. Ebpekid-uliey zan te Mekeǥeǥehem he Megbevayà.
ISA 10:22 Minsan pa te iring kehabet is menge kevuwazan ni Israel te pantad diyà te veyvey te zaǥat, piru zeisey zà kandan is edlikù. Netelaan en is kedezeeti te tanè dan. Kenè en egkeeǥen is metazeng he kedsilut te Nengazen he MEGBEVAYÀ he Mekeǥeǥehem. Edtumanen din iyan heini.
ISA 10:24 Umbe, migkaǥi is Nengazen he MEGBEVAYÀ he Mekeǥeǥehem, “Sikiyu is menge etew ku he meǥinged te Jerusalem, kenè kew mahandek te menge tig-Asiria minsan pa te edresayen kew zan iring te mibeelan te menge tig-Ehipto ziyà te keniyu.
ISA 10:25 Su kenè en egkeuǥet ne egkaawè en is pauk ku keniyu ne ziyè ku maan te kandan ibpaahà is pauk ku taman te ebpemematey sikandan.
ISA 10:26 Edsilutan ku sikandan iring te mibeelan ku ziyà te menge Midianhen diyà te Batu he Oreb wey te menge tig-Ehipto hein midlened ku sikandan diyà te zaǥat.
ISA 10:27 Dutun he andew, ibpeǥawas ku sikiyu puun te ǥehem te Asiria he henduen be te meveǥat he uwiten he midtiang niw wey iring te eyuǥu he nekeveǥat te tengel niw. Ebpekeǥawas kew puun te ǥehem din su egkehimu kew he gemhanan.”
ISA 10:28 Midsurung te menge tig-Asiria is Ayat. Diyà sikandan mebayà te Migron ne intaǥak dan diyà te Micmash is menge uwiten dan.
ISA 10:29 Mibayè dan diyà te leyunà, ne ziyè dan mebpemenlipezeng te Geba. Nengahandek is menge tig-Rama, ne nemelaǥuy is menge meǥinged te Gibea he iyan inged ni Hadì Saul.
ISA 10:30 Kulahì kew is menge tig Galim! Pemineg kew is menge tig-Laish wey sikiyu is menge tig-Anatot he menge mekehizuhizu!
ISA 10:31 Nemelaǥuy en is menge meǥinged te Madmena wey Gebim.
ISA 10:32 Guntaan he andew ebpekeuma is menge tig-Asiria ziyà te Nob. Ne ed-uyew sikandan su edsurung dan diyà te Jerusalem, kes Buvungan he Zion.
ISA 10:33 Pemineg kew! Is Nengazen he Mekeǥeǥehem edezeetan din is menge tig-Asiria pinaaǥi te utew zekelà he ǥehem din. Ed-iringen din sikandan te ebpenempezen he menge subpang te kayu. Ebpekevevaan din sikandan is menge gelbuwen iring te kebpemiley te memetawis he kayu.
ISA 10:34 Edezeeten din sikandan he iring te ebpemilayen sikandan he kayu ziyà te ketelunan pinaaǥi te wasey heini skandan is iring te menge kayu ziyà te Lebanon, edezeetan te mekeǥeǥehem Megbevayà.
ISA 11:1 Is menge kevuwazan ni David he menge hadì dengan, iring sikandan te mibpiley he kayu. Ne ǥeina te neneringsing en guntaan is tued kayi, duen gihapun kevuwazan daan ni David he egeraran te Subpang. Egkehimu sikandin he veǥu he hadì tew.
ISA 11:2 Edumelahan sikandin te Mulin-ulin te Nengazen su wey meveǥayi sikandin te ketau, kedsavut, ebilidad te kebpelanu, gehem, keuluwanen, wey kedtahud diyà te Nengazen.
ISA 11:3 Ne igkelipey zin is kedtahud te Nengazen. Kenà sikandin edhukum tenged dà te neehè din etawa nengezineg din he tudtul, kekenà,
ISA 11:4 ebeǥayan din te metazeng he kukuman is menge pubri ne edlevanan din sikandan pinaaǥi te kebeǥey kandan te ketenged dan. Ne pinaaǥi te kebmandù din, edsilut sikandin kayi te kelibutan ne ebpematey is lalung he menge etew.
ISA 11:5 Layun diyà te kandin is ketazeng wey kegkeseriǥi, iring te idseluub din heini.
ISA 11:6 Duen kelinew zutun te kedhadì din. Ne zutun ebpeemurà is dumezaas he menge asu wey is menge kerehidu. Edleku is liyupardu zuma te menge kambing. Ebpezumahà is nati he vaka wey is anak te erimaung, ne iyan ed-atur kandan is dezeisey pa he menge vatà.
ISA 11:7 Ebpezumahà is baka wey is bir emun egkaan dan, ne is menge nati zan ebpezumdumahà he ebpemenleku. Is erimaung ebpenabtab te reǥami iring te vaka.
ISA 11:8 Minsan egusà is batà diyà te uvey te vudsi te uled he edhereg, etawa idsikep din dutun is belad din, ne kena sikandin egkemenu.
ISA 11:9 Wazè en ebpesipala etawa ebpendezaat te segradu he vuvungan ku. Su is menge linimbag kayi te kelibutan egkepurung egketeǥui te keuluwanen mehitenged te Nengazen, iring te kegkepenua te zaǥat te wahig.
ISA 11:10 Egkeuma is andew he is beǥu he hadì he kevuwazan ni David, egkeiring te bendirà he iyan tuus te menge etew ziyà te menge nasyun he kinahanglan edtiǥum dan. Edtiǥum dan diyà te kandin. Ne egkevantug is ubpeey zin.
ISA 11:11 Dutun daan he timpu, ed-umanan egemita te Nengazen is gehem din te kebpeulì te nesamà he menge etew zin diyà te Asiria, Ehipto, Patros, Etiopia, Elam. Babilonia, Hamat, wey is diyà te menge pulu.
ISA 11:12 Ibayew te Nengazen is sevaha he bendirà su ibpeehè din te menge nasyun he edtiǥumen din en is menge etew zin diyà te Israel wey Juda he ebpuun te nekedseselekawà he vahin te kelibutan.
ISA 11:13 Egkeawà is kesina te Israel te Juda ne kenè dan en edtebek.
ISA 11:14 Edsevaha sikandan te kedsurung te menge Filistihanen diyè dapit te edsenlepan. Edsurungen dan daan is menge nasyun diyà te edsilaan ne edtevanen dan is menge azen kayi. Edsekupen dan is Edom wey Moab, ne is menge Amunihanen ebpesakup daan kandan.
ISA 11:15 Ebpekemezahan te Nengazen is Daǥat te Ehipto, ne ebpekeremaǥan din te meinit he keramag is Wahig he Eufrates para mehimu zà heini he pitu he zezeisey he menge zal-ug para egkehimu zà heini he edrepasen te etew he edlayun.
ISA 11:16 Ne iring te zuen meluag he zalan he mid-ikul te menge etew te Israel hein mid-awà sikandan diyà te Ehipto, ne zuen daan meluag he zalan he egkeikul te menge nesamà he menge etew zin diyà te Asiria.
ISA 12:1 Emun egkeume en haazà he andew megkanta kew te: “Nengazen, edeliǥen ku sikew. Nepeukan a kenikew, piru ǥuntaan naawè en is pauk nu, ne edlipeyen a kenikew.
ISA 12:2 Sikew Megbevayà, iyan ka menluluwas ku. Edsarig a kenikew ne kenà a egkahandek. Iyan ka, Nengazen, mibeǥey kedì te zesen, ne iyan ka egkentahan ku. Iyan ka midlibri kedì.”
ISA 12:3 Iring te ebpekeveǥey te kelipey is wahig he meǥenew te egkemezahan, ne egkelipey kew ke edluwasen kew en te Nengazen.
ISA 12:4 Emun egkeuma en haazà he andew, ne egkanta kew te: “Deliǥa niw is Nengazen! Ezapa niw sikandin! Tudtula niw ziyà te menge etew is menge vaal zin. Penudtul kew he ereg sikandin he edeliǥen.
ISA 12:5 Kentahi niw is Nengazen su ǥeina te egkein-in-inuwan is menge mibeelen din. Ipetueni niw heini ziyà te tivuuk he kelibutan.
ISA 12:6 Ugyab kew wey megkanta te kelipey, is menge etew te Jerusalem. Su mekeǥeǥehem is Waǥas he Megbevayà te Israel he iyan duma niw.”
ISA 13:1 Iyan heini lalag he mehitenged te Babilonia he impehayag te Nengazen diyà te ki Isaias he anak ni Amoz:
ISA 13:2 Ivayew is sevaha he bendirà diyà te puntur te mehiǥawan he vuntud. Ne zutun kulehia niw te mezaǥing is menge sundaru ne uyawi niw sikandan wey zan mekesurung duen te menge pultahan te inged te menge dungganen he menge etew.
ISA 13:3 Midsuǥù ku en is pinilì ku he menge sundaru te kedsilut te menge etew he egkeepesan ku. Heini he menge sundaru nengelipey sikandan su edsarig dan he edhimuwen ku heini he kedsilut.
ISA 13:4 Pemineǥa niw is keǥurub diyà te menge vuvungan te utew mahabet he menge etew. Pemineǥa niw is keǥurub diyà te menge ginhedian wey menge nasyun he edtiǥum. Edtiǥumen te Nengazen he Mekeǥeǥehem is menge sundaru zin he para te tebek.
ISA 13:5 Ebpuun sikandan diyà te utew meziyù he menge lugar. Edezeetan te Nengazen wey te menge sundaru zin is tivuuk he tanà.
ISA 13:6 Sineǥew kew su hapit en is andew te Nengazen, kes andew te kebpendezaat te Mekeǥeǥehem he Megbevayà.
ISA 13:7 Dutun he timpu eguyaan is langun he menge velad. Egkaawà is kevurut te langun he menge etew.
ISA 13:8 Egkerkeren sikandan tenged te kegkahandek. Egkeǥezam dan is utew mesakit; iring dan te vahi he ebeliliten. Ebpetengtengtengà sikandan he egkengehilewhilew su egkengeeled.
ISA 13:9 Pemineg kew! Egkeume en is andew te Nengazen, is andew te kegkaid wey utew zekelà he pauk. Edezeetan is tanà taman te kenè en egkeubpaan, ne ragkes en he edezeetan is mekesesalà dutun.
ISA 13:10 Kenè en ed-anlag is menge vituen. Egawas is andew he merusirem, wey minsan is bulan ne kenè en ed-anlag.
ISA 13:11 Migkaǥi is Nengazen te, “Ebpeeǥiyan ku te limas is kelibutan tenged te kelelalung kayi, wey is menge mekesealà tenged te salè dan. Ibpeengked ku is menge gelbuwen, wey is menge mepelevawen he wazè dan hizu.
ISA 13:12 Deisey zà is egkesamà he menge etew. Edhuna pa he mereǥen is kebpen-ahà kandan kenà te lunsey he vulawan he ebpuun diyà te Ofir.
ISA 13:13 Edhuyungen ku is langit wey is kelibutan. Ebeelan ku heini zutun te andew he ibpeehè ku is utew ku kegkepauk.”
ISA 13:14 Is menge midlangyew ziyà te Babilonia ebpemelaǥuy he ebpemenlikù diyà te menge lugar he ebpuunan dan ne henduen be te selazeng he ebpendel-asen. Ed-ulì dan he henduen be te kerehidu he wazè duen ebantey.
ISA 13:15 Is kada egkezekepan ne edresayen pinaaǥi te ispada taman te ebpatey.
ISA 13:16 Edrunteken is dezeisey pa he menge anak dan diyà te etuvangan dan. Egkuwaan is menge azen dan diyà te menge valey zan ne edleyuǥen is menge esawa zan.
ISA 13:17 Pemineg kew! Ibpesurung ku is menge tig-Babilonia te menge tig-Media he kenà ebpevayad te pelata wey vulawan.
ISA 13:18 Ebpenhimetayan dan pinaaǥi te panà is menge vetan-en diyà te Babilonia. Kenè dan egkehizuwan is menge vatà wey minsan is peririǥè pa.
ISA 13:19 Edezeetan ku iring te Sodom wey Gomora is Babilonia; iyan heini utew mekempet he ginhedian te langun, bentuǥan heini wey zekelà is dengeg te menge meǥinged kayi.
ISA 13:20 Ne kenè en heini egkeubpaan minsan keenu. Wazà Arabo he ebangun te tulda zin dutun. Wey wazà daan ebantey te menge kerehidu he ebpepenabtab te menge kerehidu zin dutun.
ISA 13:21 Egkehimu zà heini he ubpeey te menge leew he menge langgam. Is menge valey zan egkehimu zà he ubpeey te menge ekang wey zuma pa he langgam. Edlinglingketew zutun is leew he menge kambing.
ISA 13:22 Is menge langgam he henduen be te menge asu, ne edtaul ziyà te menge turi wey menge turuǥan dutun te Babilonia. Meǥaan en is ketepusan te Babilonia; kenè en heini egkeuǥet.
ISA 14:1 Benar iyan, egkehizuwan te Nengazen is menge tig-Israel ne ed-umanan din sikandan ebpilia he menge etew zin. Ne ibpeuman din sikandan ibpeubpà diyà te keugelingen dan he tanà, ne zuen menge lumelengyawà he ed-ubpà duma kandan.
ISA 14:2 Edtevangan te zuma he menge nasyun is Israel su para mekelikù is menge Israilihanen diyà te tanà he imbeǥey kandan te Nengazen. Ne zutun egkehimu he uripen dan is ebpemuun diyà te zuma he menge nasyun. Egkengevihag dan is mibihag dengan kandan, ne edhimuwen dan he menge sakup dan is midaagdaag kandan.
ISA 14:3 Sikiyu is menge tig-Israel, dutun te timpu te kebpehimelaya keniyu te Nengazen te menge ked-antus, kelised, wey kegkeuripen,
ISA 14:4 ne un-undaha niw is hadì te Babilonia. Ne iyan heini keǥiya niw: “Nezeetan en is hadì he ebpendaagdaag. Netapus en is kebpegalbu zin.
ISA 14:5 In-awà te Nengazen is gehem te lalung he menge pengulu,
ISA 14:6 he tenged te pauk dan wazà sikandan med-engked he ebpaantus te menge etew wey utew zan mibpesipelahi is menge etew ziyà te menge inged he nelupig dan.
ISA 14:7 Ne kayi te huziyan he timpu, melinawen en is tivuuk he kelibutan, ne egkezineg en kayi is kanta te kegkelipey.
ISA 14:8 Minsan is menge kayu he sipris wey sidru ziyà te Lebanon nengelipey tenged te nehitavù duen te hadì. Henduen be sikandan te etew he egkaǥi te, ‘Guntaan te naawè ke en wazè en human ebpiley kenami!’
ISA 14:9 “Is lugar te menge minatey edtaǥad kenikew he egkeǥalew; nengandam en heini te kesinuǥung kenikew. Is menge ǥimukud te menge etew he menge gemhanan dengan kayi te kelibutan, utew egkegalew kenikew. Nemenhitindeg puun te pinuuwà is menge ǥimukud te menge hadì su edsinuǥungen ke zan.
ISA 14:10 Egkaǥi sikandan te: ‘Meǥuyè ke en guntaan iring kenami. Neked-iiring kiw en.
ISA 14:11 Guntaan te minatey ke en, ne naawè en is kegkemekeǥeǥehem nu zuma te zaǥing te alpa he mibeǥey kenikew te zengeg. Menge tagkey is hizeǥaan nu ne menge tagkey zaan is malung nu.’
ISA 14:12 “Neulug ka puun te langit is egngezanan te Mekevugwas. Intimbag ka ziyà te tanè, is nendezaat te menge nasyun.
ISA 14:13 Migkaǥi ka ziyà te ǥehinawa nu te, ‘Ebpemenahik a ziyà te langit, ne idsavuk ku is pinuuwè ku te kedhadì diyà te zivavew te menge vituen te Megbevayà. Ebpinuu a ziyà te zivavew te vuntud he ziyà te zizaya he zutun edtiǥuman is menge ed-ezapen.
ISA 14:14 Ebpemenahik a ziyà te zivavew te menge ǥapun; ne edrepeng a te Utew Lavew he Megbevayà.’
ISA 14:15 “Piru ziyè ka uwita te lugar te menge minatey he ziyà te kinezizeleman te vudsi.
ISA 14:16 Edtengtengan ka te menge minatey ne egkaǥi sikandan te, ‘Kenè be iyan heini sikan is etew he igkikinehendekà te menge etew ziyà te kelibutan wey mibpelihandek din is menge ginhedian?
ISA 14:17 Kenè be iyan sikandin kes mibengkag te menge inged wey midhimu te kelibutan he iring te disirtu, wey wazè din engkezi te ed-uripen is mibihag din?’
ISA 14:18 “Is langun he menge hadì kayi te kelibutan duen dengeg te kebpelestara kandan diyà te menge leveng dan.
ISA 14:19 Iyan, sikew mulà, kenè ka idleveng diyà te penlevengè nu, kekenà, idtimbag dà is lawa nu iring te subpang he wazè din pulus. Iyan idtambun kenikew is menge lawa te nemematey he menge sundaru tenged te tebek, ne id-ulug ka zuma kandan diyà te vudsi ne edtembakan te menge vatu. Egkeiring ka te minatey he edtekutakan dà.
ISA 14:20 Kenè ka idleveng iring te zuma he menge hadì, su midezeetan nu is nasyun nu ne mibpenhimetayan nu is menge etew nu. Wazà egkesamà he uuyag diyà te mezaat he pemilya nu.
ISA 14:21 “Endama is lugar he zutun edhimetayi is menge anak din tenged te menge salà te menge kepuun dan! Kenè en sikandan dait he ed-angken te menge tanà etawa ebangun te zezekelà he menge inged diyà te tivuuk he kelibutan.”
ISA 14:22 Migkaǥi is Nengazen he Mekeǥeǥehem te, “Edsurungen ku wey edezeetan ku is Babilonia. Wazà edsemaan ku he uuyag dutun he lugar. Wazà egkesamà te menge kevuwazan dan.
ISA 14:23 Edhimuwen ku heini he sibsivayan he mahabet is menge linew zuen. Edezeetan ku heini, ne is kedezeeti ku kayi, iring te ebpeyupasen ku is menge meǥinged kayi. Iyan a, is Nengazen he Mekeǥeǥehem, migkaǥi kayi.”
ISA 14:24 Utew meheǥet is kegkeǥiya te Nengazen he Mekeǥeǥehem te, “Siguradu he egketuman is pelanu ku wey ketuyuan ku.
ISA 14:25 Edezeetan ku is menge tig-Asiria emun diyà sikandan te Israel he tanè ku. Edtekutakan ku sikandan diyà te menge vuvungan ku. Ne kenè dan en uripen is menge etew ku.
ISA 14:26 Iyan heini pelanu ku para te tivuuk he kelibutan. Iyan heini silut he ibpeehè ku ziyà te langun he menge nasyun.”
ISA 14:27 Wazà ebpekehimu he edhalin te pelanu te Nengazen he Mekeǥeǥehem. Wazà ebpekeeǥen kandin emun edsilut.
ISA 14:28 Heini he menge lalag impahayag te Megbevayà hein tuig te kebpatey ni Hadì Ahaz:
ISA 14:29 Sikiyu is menge Filistihanen, kenè kew lipey tenged te kebpatey zuen te hadì he midsurung keniyu. Su is anak din he ebpekeilis kandin edhuna pa he ebpekezezaat kenà sikandin, iring sikandin te uled he minatey he nekaanak te edlayang he uled he edhuna pa he edhereg.
ISA 14:30 Is menge etew ku he menge pubri ed-elimahan ku wey ibpehimeley he wazà edhilavet kandan. Piru sikiyu is menge Filistihanen, ebpenhimetayan ku is menge kevuwazan niw pinaaǥi te vitil. Ne is egkesamà kandan ebpenhimetayan ku gihapun.
ISA 14:31 Lelendag kew is menge meǥinged diyà te menge inged he sakup te Filistia. Su zuen edsurung keniyu he iring te evel he ebpuun diyà te zizaya ne pudu sikandan memevurut.
ISA 14:32 Hengkey is idtavak tew te menge menunudtulà he ebpuun te Filistia? Egkeǥiyan tew sikandan te, “Is Nengazen iyan mibangun te Jerusalem, ne dengepà heini te menge etew zin he nengerasey.”
ISA 15:1 Heini he menge lalag ne mehitenged te Moab: Seled dà te sengekezukileman ne egkevengkag en is menge inged he Ar wey Kir he sakup te Moab.
ISA 15:2 Edtekezeg is menge tig-Dibon diyà te lavew he simbahan dan wey ziyà te menge simbahan dan diyà te metikang he menge lugar su edsineǥew zan dutun. Edsineǥawan te menge tig-Moab is Nebo wey Medeba. Is kada sevaha kandan mibpevangul wey mibpemarbas su ibpeehè dan is kedlalew zan.
ISA 15:3 Ebivisti sikandan te saku zutun te kedhipanew zan diyà te kersada. Midsineǥew sikandan diyà te atep te menge valey zan wey ziyà te menge pelasa.
ISA 15:4 Edsineǥew is menge tig-Heshbon wey menge tig-Eleale, ne taman en te Jahaz is kegkezineǥa kayi. Umbe is menge sundaru ziyà te Moab nemengulahì tenged te kegkehandek dan.
ISA 15:5 Ingkeseeng ku is menge tig-Moab. Mibpelaǥuy is menge etew zutun pehendiyà te Zoar wey Eglat Shelishiya. Midsineǥew sikandan is edtekezeg diyà te Luhit. Is duma kandan nemen-eerang dutun te kedhendiyè dan te Horonaim, tenged te nehitavù kandan.
ISA 15:6 Nemezahan is wahig he Nimrim, ne neǥangu is menge sagbet. Wazè en midtuvù he pinemula.
ISA 15:7 Umbe, inlayun dan te zal-ug he Arabim is menge ketiǥeyunan he midheǥuan dan wey netiǥum dan.
ISA 15:8 Is kegkezineǥa te ked-erang dan ne taman en te zulunà te Moab wey Eglaim wey taman te Beer Elim.
ISA 15:9 Mibmeriǥà tenged te lengesa is wahig he Dibon, piru zuen ku pa ibpezezaat kandan he edhuna pa: erimaung is edsuǥuen ku wey zin mezawi is nemelaǥuy puun te Moab wey is nengesamà keniyan he inged.
ISA 16:1 Is menge tig-Moab he nemelaǥuy pehendiyà te Sela, he sevaha he inged diyà te sibsivayan, mibpeuwitan dan te gasa he nati he menge kerehidu is midhadì diyà te Jerusalem.
ISA 16:2 Is menge vahi he menge tig-Moab he ziyà te repasan te Arnon neiring sikandan te menge tagbis he mibuǥew puun te menge salag dan.
ISA 16:3 Migkeǥiyan te menge vahi he tig-Moab is menge tig-Juda te: “Sembaǥi key ke hengkey is ereg he ebeelan dey. Pengelangi key keniyu he iring te ebpekehelung key ziyà te merapung he kayu ke meudtu. Mibpelaǥuy key puun diyà te kenami, ne wazè key en diyà te kenami he ubpeey.
ISA 16:4 Ipeubpè key is menge tig-Moab diyà te tanè niw. Pengelangi key keniyu te egkesuat he edezaat kenami.” Egkeengked is kebpendaagdaag wey kebpendezaat. Egkaawè en is ebpendaagdaag diyà te tanà he Israel.
ISA 16:5 Ne zutun edhadì en is sevaha he kevuwazan ni David he metinumanen wey beliǥeǥawen. Emun edhukum sikandin ibpeletew zin is hustu he kukuman. Wey abtik sikandin he ebaal te metazeng.
ISA 16:6 Nezineg dey is kegkegelbuwen te menge tig-Moab. Menge gelbuwen sikandan wey menge mepelevawen, iyan, wazè en kayi pulus.
ISA 16:7 Umbe, edsineǥawan te menge tig-Moab is nasyun dan. Edsineǥew sikandan is langun tenged te kegkaawà te metaam he keenen dan diyà te Kir Hareset.
ISA 16:8 Nengezeetan is menge vevesukè diyà te Heshbon ragkes en is menge pemuleey te paras diyà te Sibma. Midezeetan te menge pengulu te menge nasyun is menge pemuleey te paras he taman en diyà te Jazer, pehendiyà te disirtu, wey taman en te Daǥat he Meriǥà.
ISA 16:9 Umbe edsineǥew a, iring te tig-Jazer he midsineǥew tenged duen te pemuleey te paras diyà te Sibma. Edsineǥawan ku is Heshbon wey Eleale su kenè ne egkezineg dutun is kedlipey te menge kedraǥun dan.
ISA 16:10 Naawà is kelipey wey kegkebibu tenged te zekelà he selebpeten he menge vevesukà. Wazè en egkanta etawa ed-ugyab diyà te menge pemuleey te paras. Wazè en egkeres te paras he para ebeelan he vinu. Impeengked en te Nengazen is kebpekeugyab dan.
ISA 16:11 Umbe, neiring is gehinawa ku te mekevulungbulung he zaǥing te alpa su ingkeseeng ku is nehitavù diyà te Moab. Ingkeseeng ku zaan is nehitavù te Kir Hareset.
ISA 16:12 Bà dà egkeveley is menge tig-Moab te kedlikù-likù diyà te menge simbahan dan diyà te metikang he menge lugar. Kenà ebpulus is kedhendiyè dan te lavew he simbahan dan para te kebpengemuyù.
ISA 16:13 Nekaǥi en heini zengan te Nengazen is mehitenged te Moab.
ISA 16:14 Ne ǥuntaan iyan en maan heini egkeǥiyen din, “Seled te tetelu he tuig egkaawà is ketiǥeyunan te Moab, ne egkepeel-elezan is menge etew kayi. Deisey zà is egkesamà he uuyag te menge etew kayi, ne heini sikandan kenè pa memelig-en.”
ISA 17:1 Heini he menge lalag mehitenged te Damascus: “Pemineg kew! Kenè en maan inged is Damascus su egkevengkag heini.
ISA 17:2 Wazè en ed-ubpà diyà te menge inged diyà te Aroer. Egkehimu zà heini he pepenebtavà te menge langgam, ne wazà ebuǥew kandan.
ISA 17:3 Egkengevengkag is binerengbeng he menge inged diyà te Israel, ne egkaawà is kegkemekeǥeǥehem te Damascus. Is egkehitavù diyà te egkesamà he menge tig-Aram egkeiring te nehitavù te menge Israilihanen.” Iyan a, is Nengazen he Mekeǥeǥehem, is migkaǥi kayi.
ISA 17:4 “Dutun he andew, egkaawè en is gehem te Israel, wey is ketiǥeyunan din, ne egkehimu heini he pubri.
ISA 17:5 Egkeiring is Israel te pemuleey he is menge pungu zuen midlegtey en te ebpemenraǥun, iring te pemuleey ziyà te Suǥud he Refaim he netevasan.
ISA 17:6 Deisey zà is egkesamà he menge etew zutun. Egkeiring te kayu he ulibu he mibpenrupù en is menge veǥas din: egkesemaan dà heini te zezuwa etawa tetelu he veǥas diyà te kinepuruan he menge subpang din; ne heepat etawa lelima he veǥas diyà te zuma he menge subpang.” Iyan a, is Nengazen he Megbevayà te Israel, is migkaǥi kayi.
ISA 17:7 Dutun he andew, edangep en is menge etew ziyà te midlimbag kandan he iyan is Waǥas he Megbevayà te Israel.
ISA 17:8 Kenè dan en edangep diyà te menge pemuhatà he mibeelan dan dà. Kenè dan en edseǥipaan is menge tukud he simbulu te ed-ezapen he si Ashera, wey is menge pemuhatà he edtutungan dan te veyewà, menge pemuhatà he vineelan dan dà daan.
ISA 17:9 Dutun he andew egkengevengkag is melig-en he menge inged dan, ne ed-ewaan dan dà heini. Egkeiring heini te menge inged te menge Amunihanen wey menge Hivihanen he mid-ewaan dan hein nekeuma is menge Israilihanen.
ISA 17:10 Egkehitavù heini keniyu te menge tig-Israel, su ǥeinà te midlipatan niw is Megbevayà he menluluwas niw, he iyan batu he egkeendilungan niw. Umbe minsan ebpemula kew pa te meupiya he kelasi te menge pinemula, iring te paras he ebpuun pa ziyà te zuma he lugar,
ISA 17:11 minsan pa ke edtuvù heini wey ebpengevukad dutun mismu te andew te kebpemulaa niw zuen, ne wazà beǥas he egkekuwa niw puun kayi, su iyan dà egkekuwa niw is kedlised wey kenà egkeengked he kegkerasey.
ISA 17:12 Is keǥurub diyà te mahabet he menge etew, iring te deǥurus te zezekelà he menge vaǥel.
ISA 17:13 Iyan, minsan meǥurub sikandan iring te zezekelà he menge vaǥel, ebpemelaǥuy sikandan emun edewayen dan te Megbevayà. Egkeiring sikandan te ukap diyà te vuvungan he idlayap te keramag, wey reǥami he idlayap te eribpures.
ISA 17:14 Ebpenginggat sikandan te tebek emun mezukilem, piru egkahanew sikandan ke egkepawà. Iyan heini egkehitavù te menge midsurung kenitew wey mid-aǥew te menge azen tew.
ISA 18:1 Mekehizuhizu is menge etew ziyà te veyvey te zezekelà he menge wahig diyà te Etiopia, he zutun egkezineg is rekubkub te zezeisey he menge keranapranap.
ISA 18:2 Ebpuun kayi he lugar, duen menge menunudtulà he midsuǥù he ed-untud te mibeelan he ǥakit he tigbew ne midlayun dan te Wahig he Nilo. Sikiyu is meǥaan he edhipanew he menge menunudtulà, likù kew ziyà te tanè niw he nevahin pinaaǥi te zezekelà he menge wahig, diyà te menge zuma niw he memelangkew wey metilak is kedlulundis, menge etew he gemhanan he igkikinehendekà diyà te minsan hendei.
ISA 18:3 Sikiyu is langun he meǥinged kayi te kelibutan, bentayi niw is kebeyawa te bendirà diyà te vuntud, ne pemineǥa niw is daǥing te vudyung.
ISA 18:4 Su iyan heini migkaǥi te Nengazen kayi te kediey: “Ke hendei a ebpinuu ne edtengteng a puun dutun he melinawen. Iring te kedsilà te andew emun meudtu wey kegkepurma te zehemug dutun te meǥenew he kezukileman emun tiraǥun.”
ISA 18:5 Kenè pa egkeuma is tiraǥun, su timpu pa te kebpengevukad te paras wey egkenaneynaney pa egkengelutui is beǥas kayi, ebpenempezen te Megbevayà is menge subpang kayi.
ISA 18:6 Uya, edezeetan din is menge tig-Etiopia, ne ebey-anan en is menge lawa zan ke egkeenen te menge tagbis wey te zumezaas he menge langgam. Egkehimu sikandan he keenen te menge tagbis emun gulavung wey te zumezaas he menge langgam emun timpu te meǥenew.
ISA 18:7 Piru zuen timpu he egkeuma he zutun edawat is Nengazen he Mekeǥeǥehem te gasa he ebpuun kayi te tanà he nevahin pinaaǥi te zezekelà he menge wahig. Ibeǥey heini te menge etew kayi he memelangkew wey memetilak is kedlulundis. Mekeǥeǥehem sikandan ne igkikinehendekà diyà te minsan hendei. Ed-uwiten dan is menge gasa zan diyà te Buvungan he Zion, he zutun ebeǥayi te zengeg is Nengazen he Mekeǥeǥehem.
ISA 19:1 Heini he menge lalag ne mehitenged te Ehipto: Pemineg kew! Ed-untud is Nengazen te meǥaan he ǥapun su edhendiyà sikandin te Ehipto. Ne emun ebpekeume en, ne ebpengerkeren te kegkahandek is menge ed-ezapen diyà te Ehipto, ne egkeheratan is menge Ehiptohanen.
ISA 19:2 Migkaǥi is Nengazen te, “Ibped-uney ku ibpedtetebek is menge Ehiptohanen: suled kuntra te suled, siringan kuntra te siringan, inged kuntra te inged, wey ginhedian kuntra te ginhedian.
ISA 19:3 Egkaawà is kevurut te menge Ehiptohanen, ne edhimuwen ku he meliveg sikandan is ebpelanu. Edangep dan diyà te menge ed-ezapen dan, diyà te menge ǥimukud te nemematey en, diyà te menge veyilan, wey menge etew he edsarig te menge mulin-ulin.
ISA 19:4 Ibpezizalem ku sikandan te gehem te mesipala he hadì.” Iyan heini migkaǥi te Nengazen he MEGBEVAYÀ he Mekeǥeǥehem.
ISA 19:5 Ebmevavew is Wahig he Nilo taman te egkemezahan heini.
ISA 19:6 Ebmengazeg is menge edtudaan dutun te wahig wey egkemezahan heini. Egkengeǥangu is menge memelayat he menge sagbet,
ISA 19:7 ragkes is menge pinemula ziyà te veyvey te Wahig he Nilo. Ebadtik is langun he menge vevesukà diyà te uvey te Wahig he Nilo, ne ebpematey is menge pinemula kayi.
ISA 19:8 Edsineǥew wey ebpenhulùhulù is menge mengingisdà diyà te Wahig he Nilo,
ISA 19:9 ne edlalew is menge mememaal te manggad he linu.
ISA 19:10 Egkeseeng is menge mengengavel wey is duma he menge terebahanti.
ISA 19:11 Menge tulebung is menge upisyal ziyà te Zoan! Egkilelaan sikandan he kinemeteuwan he menge sumesambag te hadì te Ehipto, piru wazà pulus te menge sambag dan. Ne kenà sikandan ereg he egkaǥi te, “Menge kevuwazan key te uluwanen he menge etew wey menge hadì dengan.”
ISA 19:12 Sikew is hadì te Ehipto, hendei en is uluwanen he menge etew nu? Emun uluwanen sikandan, ne ipekaǥi kandan ke hengkey is pelanu te Nengazen he Mekeǥeǥehem para te Ehipto.
ISA 19:13 Utew menge tulebung is menge upisyal ziyà te Zoan, wey is menge upisyal ziyà te Memfis egkehimu he edigdiǥen. Iyan pezem sikandan sikan is menge pengulu he ereg he egiya te menge etew ziyà te Ehipto, piru iyan en hinuun sikandan midtazin kayi he menge etew.
ISA 19:14 Edlivegen te Nengazen is menge Ehiptohanen. Egkengeliveg sikandan te langun he ebeelan dan. Iring sikandan te egkelangut he ebpekeziregdireg is ebpekeutà.
ISA 19:15 Wazà minsan sevaha ziyà te Ehipto he ebpekehimu he ebpekelibri te nasyun dan, sepian man etawa pubri, dungganen man etawa kenà dungganen.
ISA 19:16 Dutun he timpu, is menge Ehiptohanen egkehimu he meluya iring te vahi. Ebpengerkeren sikandan tenged te kegkahandek dan te silut he idsilut kandan te Nengazen he Mekeǥeǥehem.
ISA 19:17 Igkahandek dan is Juda, minsan egkezineg dan dà is kegngezani kayi ne egkengeheratan en sikandan. Egkeulaula heini tenged te pelanu te Nengazen he Mekeǥeǥehem he nekesuǥat diyà te kandan.
ISA 19:18 Dutun daan he timpu is menge meǥinged diyà te lelima he inged diyà te Ehipto edsunud en te Nengazen he Mekeǥeǥehem, ne Hebriyuhanen is kineǥiyan he egemiten dan. Is sevaha kayi he inged egngezanan te Inged te Andew.
ISA 19:19 Dutun he timpu ebengunen is pemuhatà para te Nengazen diyà te teliwazà te tanà he Ehipto, ne ibpelastar zaan is tedeman he vatu ziyà te dulunà kayi.
ISA 19:20 Egkehimu heini he tuus wey pengintutuu he zutun is Nengazen he Mekeǥeǥehem te tanà he Ehipto. Emun ebuyù te tavang is menge Ehiptohanen diyà te Nengazen tenged te kebpeentusa wey kedèdaaǥa kandan, edsuǥù sikandin te ebpekelibri wey ebpekepengalang kandan.
ISA 19:21 Ibpekilala te Nengazen is keugelingen din diyà te kandan, ne zutun he timpu egkilelaan dan is Nengazen. Ed-ezapen dan sikandin pinaaǥi te kebpemuhat te nekedseselekawà he menge pemuhat. Ebpenaad dan diyà te Nengazen ne edtumanen dan heini.
ISA 19:22 Edsilutan te Nengazen is menge Ehiptohanen pinaaǥi te kebpeeǥiya zin te vangkit diyà te kandan, piru ebewian din sikandan. Edangep sikandan diyà te kandin, ne ebpemineǥen din is menge kebpengemuyù dan ne ebewian din sikandan.
ISA 19:23 Dutun he timpu zuen meluag he zalan he ebpuun te Ehipto pehendiyà te Asiria. Umbe ebpekedsusuvar zà is menge Ehiptohanen wey menge Asiryanhen, ne edsevaha sikandan te kedsimba.
ISA 19:24 Dutun he timpu ebpekidsevaha is Israel te Ehipto wey Asiria, ne heini is tetelu he nasyun egkehimu he tuvad te kelibutan.
ISA 19:25 Ebpenubtuvazan sikandan te Nengazen he Mekeǥeǥehem he edhenduen te, “Ebpenubtuvazan ku is menge Ehiptohanen he menge etew ku, is menge Asiryanhen he menge linimbag ku, wey is menge Israilihanen he ǥaked ku.”
ISA 20:1 Tenged te suǥù ni Hadì Sargon te hadì te Asiria, midsurung te peremandar te menge sundaru ziyà te Asiria is Ashdod, ne mid-aǥew zan heini.
ISA 20:2 Dutun te wazè pa heini mehitavù ne migkaǥi is Nengazen diyà te ki Isaias he anak ni Amoz te, “Luwasa nu is bisti nu he saku wey pul-uta nu is sendalyas nu.” Midtuman heini ni Isaias, ne midhiphipanew sikandin is wazà bisti wey sendalyas.
ISA 20:3 Ne migkaǥi is Nengazen te, “Is suluǥuen ku he si Isaias midhiphipanew he wazè din bisti wey sendalyas seled te tetelu he tuig. Ne sevaha heini he simbulu wey petizaan te Ehipto wey Etiopia.
ISA 20:4 Su ebihaǥen te hadì te Asiria is menge tig-Ehipto wey menge tig-Etiopia, batà etawa meǥurang. Ne ibpehipanew zin sikandan he wazà menge visti wey menge sendalyas. Egkaahà sikandan he menge lelevas, ne egkepeel-elezan is menge Ehiptohanen.
ISA 20:5 Is menge midsarig te Etiopia wey is ebantug te Ehipto egkengeheratan wey egkengepeel-elezan.
ISA 20:6 Ne emun egkehitavù en heini, egkaǥi is menge Filistihanen te, ‘Ahàa niw man is nehitavù te menge nasyun he midseriǥan tew wey mibuyuan tew te tavang su para melibri kiw te kedeezeti kenitew te hadì te Asiria. Ne ebmenumenu kiw en buwa wey kiw mekelikey?’ ”
ISA 21:1 Heini he menge lalag ne mehitenged te Babilonia: Edsurung is menge kuntada he iring te eribpures he edeǥurus pehendiyà te Negev. Ebpuun heini ziyà te sibsivayan, he ziyà te mekahandekhandek he tanà.
ISA 21:2 Nekelawas a te mekahandekhandek mehitenged te kedluib wey kebpendezaat. Sikiyu is menge tig-Elam wey menge tig-Media, liǥuwi niw is Babilonia ne surunga niw. Edhimesazen te Megbevayà is kebpeentusa zin te zuma he menge nasyun.
ISA 21:3 Migkerker a wey mibmesakit is lawa ku tenged te neehè ku wey nezineg ku pinaaǥi te kebpekelawas ku, nesekitan a iring te vahi he ebeliliten.
ISA 21:4 Nekehuyabhuyab is kumeng ku su egkerkeren a tenged te kegkahandek ku. Kenà a ebpekehimeley ke mezukilem, tenged te kegkulbai kedì.
ISA 21:5 Nengandam te keemuran is menge upisyal. Midempasan dan is ebpinuuwan dan. Migkaan sikandan wey mid-inum, ne netekewtekew zan te mibensaǥan sikandan te, “Hendini kew, pengandam kew para te tebek!”
ISA 21:6 Migkaǥi is Nengazen kayi te kedì te, “Savuk ka te vantey he ibpevantey te inged, ne ipekaǥi kandin is egkeehè din.
ISA 21:7 Kinahanglan he ebpurung sikandin ebantey ne emun ebpekaahà sikandin te kerwahi wey pereuntud te kudà he ebparisparis, wey menge etew he ebpemen-untud te menge asnu wey menge kemilyu, kinahanglan he segugunè din petueni.”
ISA 21:8 Ne mibensag is bantey te, “Datù, maandew wey mezukilem is kebantey ku he kayi a te turi.
ISA 21:9 Ne ǥuntaan, ahàa niw man duen egkeehè ku he edhendini he menge kerwahi wey pereuntud te kudà he mibparisparis.” Ne mibpedayun megkaǥi haazà is bantey te, “Nezeetan en bes utew is Babilonia. Nengerupet en is langun he menge ledawan he menge ed-ezapen kayi ne nekepeyapat diyà te tanà.”
ISA 21:10 Ne migkaǥi a te, “Sikiyu is menge emurè ku te inged he menge Israilihanen, he henduen be te trigu he migunas, edtudtulen ku keniyu is nezineg ku ziyà te Nengazen he Mekeǥeǥehem, he Megbevayà te Israel.”
ISA 21:11 Heini he menge lalag ne mehitenged te Edom: Duen etew ziyà te Edom he edtulung ed-insà kayi te kediey te, “Bantey, egkeuǥet pe be egkepawà.”
ISA 21:12 Ne ke siak te, “Kenè en egkeuǥet ne egkepawè en, piru egkeuman ded egkezukilem. Ne emun egkesuat ka he ed-uman ed-insà, ne umani a kenikew insai.”
ISA 21:13 Heini he menge lalag ne mehitenged te Arabia: Sikiyu is menge etew ziyà te Dedan, he is menge grupu te menge nigusyanti niw he ebpemenhipanew he egkampu ziyà te sibsivayan te Arabia,
ISA 21:14 beǥayi niw te wahig is egkengemezahan. Sikiyu is menge meǥinged diyà te Tema, beǥayi niw te keenen is menge etew he nemelaǥuy puun te inged dan.
ISA 21:15 Nemelaǥuy zan tenged te zekelà he tebek; edel-asen sikandan te neǥumeenan te ispada wey panà he menge kuntada zan.
ISA 21:16 Migkaǥi is Nengazen kayi te kedì te, “Seled te senge-tuig, ne egketapus is kegkemekeǥeǥehem te Kedar.
ISA 21:17 Deisey zà is egkesamà te menge mevurut he mememanà kayi. Egkehitavù heini su iyan a, is Nengazen he Megbevayà te Israel, is migkaǥi kayi.”
ISA 22:1 Heini he menge lalag ne mehitenged te suǥud-suǥud he zuen duen egkengelewasan: Hengkey is nehitavù. Maan is nemenahik kew is langun diyà te menge atep?
ISA 22:2 Negurigew wey nemengulahì is menge etew ziyà te tivuuk he inged. Is nemematey keniyu ne wazà mebpatey te tebek.
ISA 22:3 Nemelaǥuy is langun he menge pengulu niw, ne utew zà sikandan meǥaan nezekepi. Is duma keniyu neninguhà he mekepelaǥuy, piru nezekepan gihapun.
ISA 22:4 Guntaan, bey-ani ad keniyu ke edsineǥawan ku is menge siringan ku he nemematey. Kenà ad keniyu lengana.
ISA 22:5 Su iyan en heini timpu he midtelaan te Nengazen he MEGBEVAYÀ he Mekeǥeǥehem he timpu te kegkegurigew, kebpemelaǥuy, wey kegkengeliveǥi te menge etew ziyà te suǥud-suǥud he zutun duen egkengelewasan. Egkengetempag is menge verengbeng kayi, ne is kulehian te menge etew ebpekeuma is kegkezineǥa zuen diyà te menge vuvungan.
ISA 22:6 Nenurung is menge sundaru he tig-Elam he ebpemen-untud te menge kudà he zuen dan menge panà. Is menge sundaru ziyà te Kir nenurung daan he zuen dan egewazan he menge kelasag.
ISA 22:7 Edliǥuyan dan is uuzaran he menge suǥud diyà te keniyu, ne ed-amur-amur zan diyà te menge pultahan te inged niw.
ISA 22:8 Naaǥew zan is menge pengalang te Juda. Dutun he andew migkuwa kew te menge ǥumaan niw ziyà te teleǥuey kayi.
ISA 22:9 Mid-ehè niw is menge verengbeng te Inged ni David su wey niw metueni ke hendei is nengeǥevà kayi. Midtiǥum kew te wahig he ebpuun diyà te peneng he ziyà te alug.
ISA 22:10 Mid-ehè niw is menge valey ziyà te Jerusalem ne midrundus niw is duma zutun su egemiten niw is menge vatu zuen te kebpurung te verengbeng te inged.
ISA 22:11 Mibaal kew te punduwà te wahig diyà te mid-elangan te zezuwa he verengbeng, su para egketiǥum dutun is wahig he ebpuun diyà te zaan he peneng. Iyan, wazà kew medsarig wey medseǥipà te Megbevayà he iyan mibpelanu kayi, wey iyan mibayàbayà te kegkehitevùa kayi.
ISA 22:12 Dutun he andew mid-umew kew te Nengazen he MEGBEVAYÀ he Mekeǥeǥehem su ibperuǥur kew zin wey ibpesineǥew. Migkeǥiyan kew zin he ipetuusi niw is kedlalew niw pinaaǥi te kepevangul niw wey kebivisti niw te saku.
ISA 22:13 Piru midlipey kew wey midsilibra kew hinuun. Midlapè kew te menge vaka wey menge kerehidu, ne migkaan kew te usa wey mid-inum kew te vinu. Ke sikiyu te, “Egkaan kiw wey edlipey kiw su kela ke mebpatey kiw en keeselem.”
ISA 22:14 Migkaǥi is Nengazen he Mekeǥeǥehem kayi te kediey te heini is salè niw kenè din ebpeseyluwen taman te kebpatey niw.
ISA 22:15 Midsuǥù a te Nengazen he MEGBEVAYÀ he Mekeǥeǥehem te kedhendiyà te ki Shebna, he iyan edumala te turuǥan, ne egkeǥiyen heini ziyà te kandin:
ISA 22:16 “Hentei ka is edturtur keniyan te kelendiǥan te para te edlevengan kenikew zuma te dungganen he menge etew? Hentei is midtuǥut kenikew te kebaal keniyan?
ISA 22:17 Bantey ka su minsan mekeǥeǥehem ka, ne edekepen ka te Nengazen, ne idtimbag ke zin.
ISA 22:18 Egketilengtileng ka he iring te vula ne idtimbag ke zin diyà te meluag he lugar. Ne ebpatey ka zutun, ne egkengewaǥey zaan dutun is ibpahambug nu he menge kerwahi. Mibeǥayan nu te keelezan is pemilya te egalen nu.
ISA 22:19 Migkaǥi is Nengazen diyà te kenikew te, ‘Ibpeawè ku sikew ziyà te terebahu nu!
ISA 22:20 Dutun he andew ibpetawag ku is suluǥuen ku he si Eliakim he anak ni Hilkia.
ISA 22:21 Ibpeǥamit ku kandin is bisti nu, wey vakes nu he para te kegkeupisyal nu, ne ibeǥey ku kandin is keǥehem nu. Ne egkeiring sikandin te amey te menge tig-Jerusalem wey menge tig-Juda.
ISA 22:22 Idsarig ku kandin is yawi te ginhedian ni David. Is ebpuwasan din ne wazà duen ebpekelekeb ne is edlekevan din ne wazà duen ebpekepuwas.
ISA 22:23 Edhimuwen ku sikandin he melig-en diyà te ketengdanan din iring te senggatà diyà te elavat. Ne ebpekeveǥey sikandin te zengeg diyà te pemilya zin.
ISA 22:24 Ne is tivuuk he pemilya zin wey menge kezuzumahi zin ne edsarig kandin. Iring sikandin te selenggatà he zutun isanggat is nekedseselekawà he zezeisey he menge teleǥuey, puun te menge yehung pehendiyà te menge tivud.
ISA 22:25 Ne emun mahabet en is idsanggat dutun, ne egketangtang haazà is selenggatà ne egkengeulug wey egkengewaǥey is langun he insanggat dutun. Egkeulaula heini su iyan a is Nengazen migkaǥi kayi.’ ”
ISA 23:1 Heini he menge lalag ne mehitenged te Tyre: Sineǥew kew is menge ebpemen-untud te menge varku ziyà te Tarshish! Su nezeetan is pentalan niw ziyà te Tyre. Midtudtul en heini keniyu te ebpemuun diyà te Cyprus.
ISA 23:2 Pereremek kew is menge meǥinged diyà te pulu, ragkes kew en is menge nigusyanti ziyà te Sidon. Is menge nigusyanti niw he iyan insepian niw, ed-untud sikandan te menge varku
ISA 23:3 ziyà te menge zaǥat su para mekepemasa zan wey mekepemelegyà te menge abut he ebpuun diyà te Shihor he uvey te Wahig he Nilo. Ne mibpetiǥayun diyà te keniyu is menge nasyun.
ISA 23:4 Meeled ka is inged he Sidon he iyan edengepan te menge etew he ziyà ed-ubpà te veyvey te zaǥat. Ke và dà etew is daǥat ne idselikwey zin en is Sidon he ke sikandin te, “Wazè ku en anak, wazè ku mid-anak-anak he vatà he maama etawa vahi.”
ISA 23:5 Egkeseeng is menge Ehiptohanen emun egkezineg dan is nehitavù diyà te Tyre.
ISA 23:6 Sineǥew kew is ebpemen-ubpà diyà te pulu. Layun kew ziyà te Tarshish!
ISA 23:7 Dengan, ne menge melipayen is ed-ubpà kayi te inged he Tyre he mibangun dutun te nehuna he timpu; is menge ed-upà kayi, ne nemekeuma ziyà te meziyù he menge lugar ne midsakup dan haazà he menge lugar. Piru ǥuntaan hengkey en is nehitavù kayi he inged?
ISA 23:8 Hentei is mibpelanu para mezeeti is Tyre he iyan kes inged he midsakup din dengan is duma he menge lugar, wey nekilala kayi te kelibutan is dungganen he menge nigusyanti zuen?
ISA 23:9 Is Nengazen he Mekeǥeǥehem iyan mibpelanu kayi su ibpekevavè din is ebpelavew te kegkemekeǥeǥehem din wey is egkilelaan he ventuǥan kayi te kelibutan.
ISA 23:10 Sikiyu is menge meǥinged diyà te Tarshish, melinawen en human is kedsaǥad niw ziyà te Tyre iring en heini te melinawen he kedtuda te Wahig he Nilo, su wazè en ebpekeeǥen keniyu.
ISA 23:11 Imbayew te Nengazen is belad din diyà te zaǥat su edezeetan din heini, umbe mibpengerker tenged te kegkahandek is menge meǥinged diyà te menge ginhedian. Mibmandar sikandin he bengkaǥa is melig-en he verengbeng te Fenecia.
ISA 23:12 Migkaǥi is Nengazen te, “Sikiyu is menge meǥinged diyà te Sidon, egkeengked en is kegkelipey niw. Nezeetan kew en. Minsan ebpelaǥuy kew pehendiyà te Cyprus, wazè niw ǥihapun egkehimelayan diyà.”
ISA 23:13 Ahàa niw is tanà te menge tig-Babilonia. Hendei en buwa is menge meǥinged duen? Midhimu te Asiria heini he lugar he ubpeey zà te leew he menge langgam. Su midsurung dan heini, midrundus dan is menge melig-en he vahin kayi, ne mibey-anan dan en heini is lugar he nevengkag.
ISA 23:14 Sineǥew kew is ebpemen-untud te varku ziyà te Tarshish, su nevengkag en is inged he dengepè niw.
ISA 23:15 Egkelipatan is Tyre seled te 70 he tuig, he iyan keluǥayad te untung te hadì. Ne emun edlavey en haazà, ne egkehimu is Tyre he iring te vahi he ebelegyà te zengeg din he iyan edhisgutan kayi te kanta: “Sikew is bahi he ebelegyà te zengeg din, nelipatan ke en.
ISA 23:16 Umbe, kuwaa nu is alpa nu, ne purungi nu heini te edtukar zutun te edrigurigu ka ziyà te inged. Mehebeta nu is kanta nu, su wey ka metenuzi.”
ISA 23:17 Ne kedlavey te 70 he tuig, edtentenuzan en maan te Nengazen is Tyre. Piru ed-umanan ebeeli te Tyre is nehuna he mibeelan din, iring te ebeelan te vahi he ebelegyà te zengeg din. Ebeelan din is mezaat su para mepenepii zin is langun he menge ginhedian kayi te kelibutan.
ISA 23:18 Piru ziyà te huziyan he timpu, is genansya zin ne kenà edtipiǥan, kekenà, idhalad diyà te Nengazen su wey ikepemesa te zekelà he keenen wey meupiya he menge visti he para te menge etew he ebpenilbi te Nengazen.
ISA 24:1 Pemineg kew! Edezeetan te Nengazen is kelibutan taman te kenè en heini egkepulusan, ibpeyapat din is menge meǥinged kayi.
ISA 24:2 Sevaha zà is egkepeveyaan te langun–memumuhat etawa meǥinged, egalen etawa suluǥuen, ebpememelegyà etawa ebpememasa, ebpeutang etawa ed-utang.
ISA 24:3 Egkepurung egkezeeti is kelibutan ne wazè en egkesamà kayi he menge azen. Egkehitavù heini su iyan is Nengazen migkaǥi kayi.
ISA 24:4 Egkemezahan wey ebadtik is tanà. Ebmeluya is menge etew te tivuuk he kelibutan, ragkes en is dungganen he menge etew kayi te kelibutan.
ISA 24:5 Midremerikan is kelibutan te menge meǥinged kayi, su wazè dan tumana is menge kesuǥuan wey menge sulunuzen he ibpesunud te Megbevayà. Midrapas dan is wazà pidtemanan he kebpekid-uyun te Megbevayà kandan.
ISA 24:6 Umbe, edrewakan te Megbevayà is kelibutan, ne televaken heini te menge meǥinged kayi tenged te menge salè dan. Edezeetan sikandan he iring te ebinsulan te hapuy, ne zeisey zà is egkesamà kandan.
ISA 24:7 Egkeǥangu is menge paras ne egkaamin is binu. Egkengeseeng is ebpemenlipeylipey,
ISA 24:8 ne kenè en egkezineg is egkezumahan te kelipey he tukar te menge tamburin wey menge alpa, wey is ugyab te menge etew he edsilibra.
ISA 24:9 Kenè en egkezumahan te kanta is ked-inum dan, ne ebmepait is inumen dan.
ISA 24:10 Egkevengkag is inged ne kenè en heini egkepulusan. Kada valey ne edlekevan is gemawan din su para wazà ebpekeseled.
ISA 24:11 Ebpemengulahì is menge etew ziyà te menge zalan su ebuyù dan te vinu. Is kelipey zan egkeliwanan te kegkeseeng. Wazè en kelipey kayi te kelibutan.
ISA 24:12 Egkevengkag is inged ne kenè en egkepurungan, ne egkengeǥevà is menge pultahan kayi.
ISA 24:13 Deisey zà is menge etew he egkesamà kayi te langun he menge nasyun kayi te kelibutan, egkeiring te ulibu etawa paras he rerawen dà is egkesamà.
ISA 24:14 Is egkesamà he menge etew ne ebpemen-ugyab te kegkelipey zan. Is diyà te edsenlepan idsangyew zan is kegkemekeǥeǥehem te Nengazen.
ISA 24:15 Umbe, is menge etew ziyà te edsilaan wey is diyà te menge veyvey te zaǥat, ereg sikandan he edalig te Nengazen he Megbevayà te Israel.
ISA 24:16 Egkezineg is kanta ziyà te kinemeziyuan he vahin te kelibutan he edhenduen te, “Edeliǥen is Metazeng he Megbevayà!” Piru mekehizuhizu a su midluyahan a. Su mibpedayun gihapun is kedluib te menge meluiven he menge etew.
ISA 24:17 Sikiyu is menge etew kayi te kelibutan, kegkahandek, budsi, wey litag is edtaǥad keniyu.
ISA 24:18 Is ebpelaǥuy su egkahandek, ne egkeulug diyà te vudsi ne is egawas puun dutun te vudsi ne egkelitag. Edtanà is mereǥes he uzan, ne egkehuyung is pundasyun te kelibutan.
ISA 24:19 Ebeka is tanà ne egketevì heini.
ISA 24:20 Ebpekeziregdireg heini iring te egkelangut. Egkehuyung heini he iring te lawig he egkesuǥat te keramag. Egkeveǥatan heini tenged te salà, ne egkezeetan ne kenè en ebpekeuman ebpekeenew.
ISA 24:21 Dutun he timpu edsilutan te Nengazen is mekeǥeǥehem he menge linimbag diyà te langit, wey is menge hadì dini te kelibutan.
ISA 24:22 Edtiǥumen sikandan diyà te vudsi iring te menge pinirisu. Ebpirisuwen sikandan, ne edsilutan keuzemà.
ISA 24:23 Ebmerusirem is andew wey vulan su edhadì is Nengazen he Mekeǥeǥehem diyà te Buvungan he Zion diyà te Jerusalem. Ne zutun egkezayag is gehem din diyà te etuvangan te ebpemendumala te menge etew zin.
ISA 25:1 Nengazen, iyan ka Megbevayè ku! Edalig a wey ebeǥey te zengeg kenikew su utew egkein-inuwi is menge mibpemeelan nu. Midtuman nu is menge pelanu nu he midhimu nu zengan te nehuna he timpu.
ISA 25:2 Mibengkag nu is binerengbeng he menge inged te menge etew ziyà te zuma he menge nasyun. Midrundus nu is melig-en he menge vahin te inged dan, ne kenè en heini egkeuman egkevangun.
ISA 25:3 Umbe, ebeǥayan ka te zengeg te mekeǥeǥehem he menge etew, wey edtehuzen ka te mesipala he menge nasyun.
ISA 25:4 Iyan ka kes melig-en he eputà te menge pubri emun timpu te kedlised. Helungè ka emun timpu te vagyu wey gulavung. Su is kedsurung te mesipala he menge etew, iring te vagyu he ebpekesuǥat diyà te verengbeng,
ISA 25:5 wey iring te keinit diyà te disirtu. Piru impeengked nu is kulehian te menge etew ziyà te zuma he nasyun. Impeengked nu is kegkanta te mesipala he menge etew, iring te keinit te andew he naawà su nenggapun.
ISA 25:6 Kayi te Buvungan he Zion, ebpengandam is Nengazen he Mekeǥeǥehem te sevaha he keemuran te para te langun he menge etew. Ne zutun metaam he menge keenen wey menge inumen is id-andam din.
ISA 25:7 Ne kayi zaan he vuvungan, id-awè te Nengazen is kegkeseeng te menge etew ziyà te langun he menge nasyun.
ISA 25:8 Id-awà te Nengazen he MEGBEVAYÀ is gehem te kemetayen ne ebpunasen din is luhà te langun he menge etew. Id-awè din is keelezan te menge etew zin puun te tivuuk he kelibutan. Egkehitavù heini su iyan migkaǥi kayi is Nengazen
ISA 25:9 Emun egkeulaula en heini, egkaǥi is menge etew te: “Iyan sikandin Megbevayè tew! Midsarig kiw kandin, ne midlibri kiw zin. Iyan sikandin Nengazen he midseriǥan tew. Edlipey kiw wey edlipeylipey su midlibri kiw zin.”
ISA 25:10 Benar iyan, edtevangan te Nengazen is menge etew ziyà te Buvungan he Zion, ne edsilutan din mulà is menge tig-Moab. Edtekutakan din sikandan iring te kedtekutaki te reǥami ne ebpesegdanen en he meredak.
ISA 25:11 Ebpenigudu zan para mekelingkawas sikandan keniyan te mezaat he kebpekesavuk iring te kebpenigudu kegkapeykapey te etew he ed-emparas. Piru minsan metau sikandan he ed-emparas, edlenezen dan gihapun te Nengazen; ibpekevavè din sikandan is menge gelbuwen.
ISA 25:12 Ebengkaǥen din is metikang wey melig-en he menge verengbeng dan taman te ebpekepeyapat heini ziyà te tanà.
ISA 26:1 Dutun he timpu, heini he kanta egkentahan diyà te Juda: “Melig-en en is inged tew. Is kedlibriya kenitew te Megbevayà ne iring te melig-en he verengbeng he nekeliǥuy kenitew.
ISA 26:2 Puwasi is menge pultahan te inged su wey mekeseled is metazeng he menge etew ziyà te menge nasyun, menge etew he mepezumdumahan te Nengazen.
ISA 26:3 “Ebeǥayan nu, Nengazen te kelinew he wazè din kurang is etew he iyan ka zekelà diyà te isip din, su midsarig sikandin kenikew.
ISA 26:4 “Layun kew sarig te Nengazen, su is Nengazen iyan endilungè tew te wazè din pidtemanan.
ISA 26:5 Benar iyan, ibpekevavè din is menge mepelevawen. Midezeetan din is menge inged dan taman te netempag heini ziyà te tanà.
ISA 26:6 Midtekutakan heini te menge pubri he menge dinaagdaag.
ISA 26:7 “Patag is dalan te menge metazeng, ne iyan ka is Metazeng he Megbevayà, mibpekeupiya kayi.
ISA 26:8 Nengazen, edsunuzen dey is menge suǥù nu, ne midsarig key kenikew. Iyan penganduy zey he meveǥayi ka te zengeg.
ISA 26:9 Ebpengenduyen ku sikew ke timpu te mezukilem, te ebpuun te tivuuk he gehinawa ku. Tutuu he emun edhukuman nu is menge etew kayi te kelibutan, ne egketau sikandan te metazeng he kebpengungubpaan.
ISA 26:10 Minsan egkehizuwan nu is lalung he menge etew, wazà gihapun sikandan mebpenginenau te metazeng he kebpengungubpaan. Minsan diyà sikandan ed-ubpà te tanà te menge metazeng, edsigudu zan gihapun ebaal te mezaat, ne wazè dan kilelaa is kegkemekeǥeǥehem nu.
ISA 26:11 Nengazen, andam ke en he edsilut kandan, iyan, wazè dan metueni heini. Petueni nu kandan Nengazen! El-eleza nu sikandan pinaaǥi te kebpaahaa nu kandan te kebmahala nu te menge etew nu. Binsuli nu sikandan te hapuy is menge kuntada nu.
ISA 26:12 “Nengazen, beǥayi key te meupiya he kebpkesavuk. Su is langun he nehimu zey nehimu zey tenged te tavang nu.
ISA 26:13 Nengazen he Megbevayè dey, nezizalem key te gehem te zuma he menge egalen, piru iyan ke zà ed-ezapen dey.
ISA 26:14 Guntaan nemematey en sikandan ne kenè en sikandan egkeuyag. Midsilutan nu sikandan wey midezeetan nu; midhimu nu he melipati sikandan.
ISA 26:15 Nengazen, impeiseg nu is kezekelà te nasyun dey; impemeluag nu heini pinaaǥi te kebpeiseǥa nu te menge zulunà kayi, ne nekeveǥey heini kenami te zengeg,
ISA 26:16 Nengazen, mibmansu nu is menge etew nu, ne tenged te kedlised dan midangep dan wey mibpengumew-umew kenikew.
ISA 26:17 Neehè nu Nengazen is kemeresayan dey. Iring key te vahi he ebeliliten he ebpekepengulahì tenged te utew mesakit.
ISA 26:18 Ebpekezag-es key te kesakit piru wazà batà he inlusad. Wazè dey egkehimu para kenà maaǥew is menge tanè dey, ne wazè dey zaan mezezeeti is menge etew kayi te kelibutan he menge kuntada zey.
ISA 26:19 Piru egkevanhew is menge etew nu he nemematey. Ed-enew sikandan is egkanta tenged te kelipey iring te zehemug emun meselem he ebpekeveǥey te keǥenew te tanà, sikew Nengazen ebenhawen nu is menge minatey.”
ISA 26:20 Sikiyu is menge emurè ku te inged, seled kew ziyà te menge valey niw ne lelekeb kew. Eles kew zèpa taman te egkaawà is pauk te Nengazen.
ISA 26:21 Su edhendini en sikandin puun te ubpeey zin su edsilutan din is menge meǥinged kayi te kelibutan tenged te menge salè dan. Ibpeǥawaǥawe en diyà te tanà is menge etew he mibpenhimetayan; ne kenè din en heini id-eles.
ISA 27:1 Dutun he timpu, egemiten te Nengazen is meǥarang wey mekeǥeǥehem he ispada zin te kedhimatey te Leviatan, kes edlayewlayew he langgam diyà te zaǥat.
ISA 27:2 Dutun daan he timpu, egkanta kew mehitenged te zekelà he sebpet he egkekuwa niw ziyà te pemuleey niw te paras.
ISA 27:3 Iyan a, is Nengazen, mid-etiman keniyan he pemuleey te paras. Layun ku heini ebinyaǥi. Ebentayan ku heini te maandew wey mezukilem su para wazà ebpekezezaat kayi.
ISA 27:4 Naawè en is pauk ku kayi he pemuleey. Piru emun duen egkeehè ku ziyà te kandin he zuǥiyen he zezeisey he menge kayu, egkuntedahan ku sikandin ne ebinsulan ku.
ISA 27:5 Piru egkelibri sikandin emun ebpekid-emiǥu sikandin kediey, ne edhangyù he pengelangi ku.
ISA 27:6 Egkeuma is timpu he zutun is menge tig-Israel, he menge kevuwazan ni Jacob, ebpendalid iring te pinemula. Ebpeneringsing heini wey ebpengevukad. Ebpemeǥas heini te mahabet ne ebpekeeneb te tivuuk he kelibutan.
ISA 27:7 Wazà siluti wey wazà penhimetayi te Nengazen is menge tig-Israel iring te kedsiluti zin wey kebpenhimetayi zin te menge kuntada zan.
ISA 27:8 Impevihag te Nengazen is menge etew zin su iyan silut din kandan. Midsegseg din sikandan pinaaǥi te kegkesuǥata kandan te mevendes he keramag he ebpuun te edsilaan.
ISA 27:9 Wey zà sikandan egkepesaylu emun edrupeten dan is menge vatu he pemuhatè dan, ne ebekbeken dan heini, wey id-awè dan is menge tukud he simbulu te ed-ezapen he si Ashera, wey is menge pemuhatà he edtutungan dan te veyewà.
ISA 27:10 Nevengkag en is inged he neliǥuy te verengbeng. Nehimu en heini he mekevulungbulung iring te sibsivayan, ne wazè en ed-ubpà kayi. Nehimu zà heini he penebtavà wey himelayà te menge vaka. Ed-eminen edtebtava te menge vaka is menge zahun te menge subpang.
ISA 27:11 Ne hein nengeǥangu en haazà is menge subpang ne nengevadtì heini, ne ed-em-emuren te menge vahi su wey iketavun. Su is menge etew kayi he inged ne wazè dan kedsavut, kenà sikandan egkehizuwan te Megbevayà he mibaal kandan.
ISA 27:12 Emun egkeume en haazà, edtiǥumen te Nengazen is menge Israilihanen puun te Wahig he Eufrates taman te zal-ug te Ehipto he iring te kedtiǥum te ginunas he trigu.
ISA 27:13 Dutun he timpu ibpezaǥing is mezaǥing he vudyung. Ne ebpemenlikù diyà te Jerusalem is menge Israilihanen he nekaantus te kegkevihaǥa kandan diyà te Asiria wey Ehipto. Ne ed-ezapen dan is Nengazen, diyà te segradu he vuvungan diyà te Jerusalem.
ISA 28:1 Mekehizuhizu is Samaria, he henduen be te kuruna he vulak, he ibpegalbu te menge lelenguten he menge pengulu te Israel. Heini he inged diyà mekepelastar te uuzaran he suǥud, piru egkaawà is kekempet din iring te vulak he egkeǥangu.
ISA 28:2 Pemineg kew! Duen melig-en wey mekeǥeǥehem he nasyun he id-andam te Nengazen he ibpezezaat din te Samaria. Iring heini te ebpekezezaat he vagyu he egkelepikan te ǥiyew, wey iring te mevendes he zalem.
ISA 28:3 Edtekutakan is Samaria, he henduen be te kuruna he vulak, he ibpegalbu te menge lelenguten he menge pengulu te Israel.
ISA 28:4 Heini he inged diyà mekepelastar te uuzaran he suǥud, piru egkaawà is kekempet din iring te vulak he egkeǥangu. Segugunà heini egkezeeti. Iring te egkehuna egkelutui he menge beǥas te higus he edrupuen te ebpekaahà duen su egkeenen din.
ISA 28:5 Dutun he timpu, is Nengazen he Mekeǥeǥehem, egkehimu he iring te mekempet he kuruna he vulak te nesamà he menge etew zin.
ISA 28:6 Ebeǥayan din is menge zatù te tinguhà te layun kebeǥey te hustu he kukuman. Wey ebeǥayan din te kevurut is menge sundaru he ebantey su wey kenà ebpekeseled is menge edsurung diyà te inged.
ISA 28:7 Piru ǥuntaan ebpemekeziregdireg te kegkelangut is menge memumuhat wey menge ebpeneuven he kenè en hustu is isip dan. Kenà egkesavut te menge ebpeneuven is ibpelewasan kandan, ne egkengesayep is menge memumuhat emun edhukum dan.
ISA 28:8 Neketambù is utè dan diyà te lemisahan dan, ne wazè en dutun lugar he wazà meremeriki.
ISA 28:9 Ne edriklamu zan pa mehitenged kediey he ke sikandan te: “Hengkey ves is ked-isipa zin kenitew, menge vatà he sikan pa lutasa? Maan is binatà is kebpenurua zin kenitew?
ISA 28:10 Emun ebpenurù sikandin utew zin en ebpurpurungi te ebpesavut is ibpenurù din.”
ISA 28:11 Ne ǥeina te kenà sikandan ebpemineg, ebpekidlalag is Nengazen kandan pinaaǥi te kegemita zin te menge lumelengyawà he selakew en is kandan he kineǥiyan.
ISA 28:12 Iyan heini egkeǥiyen din: “Deyzey ke ebpekaangken kew te egkehimelayan niw ziyà te tanè niw. Piru kenè kew egkesuat he ebpemineg kediey.”
ISA 28:13 Umbe, ebpenuruen sikandan te Nengazen ne ebpurungan din sikandan ebpenurùa. Ne nasì en sikandan ebpemekeurambak, egkengepelian, egkengelitag, wey egkengezekepan.
ISA 28:14 Umbe, sikiyu is memesudì he menge edumala kayi te menge etew ziyà te Jerusalem, pemineǥa niw is Nengazen.
ISA 28:15 Su ibpehambug niw is kegkaǥi niw te, “Nekidsebutè key te kemetayen he kenè key zin kevuta, wey nekid-uyun key te iveyaan he kenè key zin ipehendiyà. Umbe kenè key egkekeizan minsan ebpekeuma is bangkit he iring te zalem, su midsarig key te menge ketetarù wey mid-endilung key ziyà te menge limbung.”
ISA 28:16 Umbe, iyan heini egkeǥiyen te Nengazen he MEGBEVAYÀ: “Pemineg kew! Idsavuk ku ziyà te Zion is batu he pundasyun; batu he egkeseriǥan, melig-en wey mevali. Is midtuu kandin ne kenà meǥègaanen te menge ebeelan dan.
ISA 28:17 Edhimuwen ku he sukud is hustu he kukuman ne edhimuwen ku he tuntun is ketazeng. Ibpelayap ku te vagyu wey ed-enuzen ku te zalem is kedtarùtarù he edseriǥan niw he iyan egkeendilungan niw.
ISA 28:18 Kenà ebpulus is kebpekidsebutè niw te kemetayen, wey is kebpekid-uyun niw te iveyaan. Su emun ebpekeuma is bangkit he iring te zalem, ne egkezeetan kew.
ISA 28:19 Layun heini ebpekeuma su kada andew, meselem wey mezukilem, ne edezaat heini keniyu.” Egkahandek kew emun egkesavut niw heini he menge lalag.
ISA 28:20 Su egkeiring kew te etew he edhizeǥà he kenà ebpekepengengeteng su mevavà is katri wey zeisey is malung din.
ISA 28:21 Siguradu he edsurung is Nengazen iring te mibeelan din diyà te Buntud he Perazim wey ziyà te Suǥud te Gibeon. Edhimuwen din is kezeetan he kunaan te menge etew zin ke kenà egkehitavù.
ISA 28:22 Umbe, kenè kew en medwalìwalì, su kela ke ibpeiseg din pa is idsilut din keniyu. Su nezineg ku he impesavut te Nengazen he MEGBEVAYÀ he Mekeǥeǥehem he edezeetan din is tivuuk he tanà.
ISA 28:23 Purungi niw pemineǥa is egkeǥiyen ku.
ISA 28:24 Edsigudu zè be ed-eradu is ebasuk, ne kenè en ebpemula?
ISA 28:25 Kenè be emun egkaandam en is tanà he vevesukè din, ed-ezekan din heini te menge venì he nekedseselekawà para te kada pemuleey kayi, iring te menge penaket, trigu, barli, wey zuma pa?
ISA 28:26 Ebpenuruen te Megbevayà is ebasuk te hustu he ebeelan umbe egketuenan din ke hengkey is ereg he ebeelan.
ISA 28:27 Kenè din edliǥisen te ligid te kerumata zin is rinaǥun he menge penaket para meǥunas heini, kekenà, ebpenlempesan din dà heini.
ISA 28:28 Is trigu he ebeelan he supas, melemu egkerupet. Umbe kenè din heini edsiguduwan te egunas. Kerumata is igunas din kayi, piru ebpekeventayan din he kenà heini egkengerupet.
ISA 28:29 Heini he ketau ebpuun diyà te Nengazen he Mekeǥeǥehem. Utew meupiya is sambag din wey utew egkein-inuwi is ketau zin.
ISA 29:1 Migkaǥi is Nengazen te, “Mekehizuhizu is Jerusalem, kes inged he mid-ubpaan ni David! Edtulung edsilibra te menge pista is menge meǥinged kayi kada tuig,
ISA 29:2 piru edsurungen ku heini, ne ebpemekesineǥew wey ebpemenhulùhulù haazà is menge meǥinged. Ne edhimuwen ku haazà is tivuuk he inged he iring te pemuhatà he egkepenù te lengesa.
ISA 29:3 Ebpeliǥuyan ku is inged he Jerusalem. Ne ebpeveelan ku te menge turi-turi he veyeey te edsurung kayi, ne ebdtembuan ku te tanà is kilid te verengbeng su wey meǥampan heini.
ISA 29:4 Egkezeetan heini, ne egkeiring te ǥimukud he ebpengumew, iyan, ebpekenaasnaas dà diyà te zizalem te tanà.
ISA 29:5 Piru ziyà te huziyan he timpu is mahabet he menge kuntada zin, egkeiring te eliyavuk etawa ukap he idlayap te keramag. Egketik-ew zà heini egkehitavù diyà te kandan.
ISA 29:6 Edtentenuzan te Nengazen he Mekeǥeǥehem is Jerusalem, ne ebpekeuma sikandin he zuen ruǥung, linug, dekelà he keǥurub, eribpures, bagyu, wey edriyubriyub he hapuy.
ISA 29:7 Egkahanew iring te teǥeinep is mahabet he menge nasyun he nekidtebek te Jerusalem wey mibengkag te verengbeng kayi. Egkeiring sikandan te etew he neketeǥeinep he egkaan, piru kegkepukew zin ne egkevitil pa sikandin, etawa iring te etew he neketeǥeinep he ed-inum, piru te kegkepukew zin ne egkemezahan pa sikandin.”
ISA 29:9 Sikiyu is menge tig-Juda, liveǥa niw is isip niw wey tinulebung kew. Sebpengi niw is menge mata niw ne mebpekelakap kew. Pelelangut kew piru kenà pinaaǥi te vinu, diregdireg kew piru kenà tenged te visa te vinu.
ISA 29:10 Su impelipezeng kew te Nengazen. Midtembunan din is menge ulu niw wey menge mata niw he iyan is menge ebpeneuven diyà te keniyu.
ISA 29:11 Su ziyà te keniyu, heini is langun he impezayag keniyu iring te libru he siradu. Ne emun ibpevasa heini te etew he metau he ebasa, ne ke sikandin te, “Kenè ku heeyan ebesahan su siradu.”
ISA 29:12 Ne emun ibpevasa nu te kenà metau he ebasa, ne ke sikandin te, “Kenà a metau he ebasa.”
ISA 29:13 Migkaǥi is Nengazen te, “Heini he menge etew ziyè dà te vèbè dan is kedeliǥa wey kebeǥayi zan kedì te zengeg, piru meziyù kayi te kedì is gehinawa zan. Ne is ked-ezapa zan kedì, ne tenged dà te edtumanen dan is kandan dà he sulunuzen.
ISA 29:14 Umbe, ed-umanan ku edhimuwa heini kayi te menge etew is ebpekedsusunud he menge egkein-inuwan he menge vaal ku. Id-awè ku is ketau te menge uluwanen wey is kedsavut te menge metau.”
ISA 29:15 Mekehizuhizu kew is nenigudu para mekeeles diyà te Nengazen is menge pelanu niw. Mibeelan niw is menge vuluhaten niw ziyà te merusirem, ne ke sikiyu te, “Wazà ebpekaahà wey egketau te ebeelan tew.”
ISA 29:16 Menge tulebung kew! Ed-isipen niw he iring te ziniyun is mendiziyun. Ebpekekaǥi ve is bineelan diyà te mibaal zuen te, “Kenè ke iyan mibaal kedì?” Ebpekekaǥi vè is diniyun diyà te midiyun duen te, “Kenè ka metau?”
ISA 29:17 Kenà egkeuǥet ne egkehimu is ketelunan diyà te Lebanon he uuzaran he pemuleey, ne is uuzaran he pemuleey iyan egkehimu he ketelunan.
ISA 29:18 Dutun he timpu, is bengel ebpekezineg en te menge lalag he ebesahan diyà te libru. Ne is lakap he merusirem dà is egkeehè din ne ebpekeehè en.
ISA 29:19 Ed-uman edlipey is kenà menge mepelevawen wey is menge egkengeey-eyuwan tenged te Nengazen, he Waǥas he Megbevayà te Israel.
ISA 29:20 Su egkaawè en is menge mesipala wey menge mesudì he menge etew. Ebpematey is langun he zekelà diyà te gehinawa zan is kebaal te salà
ISA 29:21 ragkes is langun he ebpen-ulug te kewusa, is edtuis te ketazeng diyà te hukmanan, wey is menge tistiǥus he edtarùtarù su para kenà mevaǥayì te hustu he kukuman is wazà mekesalà.
ISA 29:22 Umbe is Nengazen, is Megbevayà he midlibri ki Abraham, migkaǥi mehitenged te menge kevuwazan ni Jacob, ke sikandin te, “Puun guntaan, wazè en ereg he igkeeled dan wey wazè dan en igkahandek.
ISA 29:23 Su emun egkeehè dan is menge vaal ku para kandan, ne edtehuzen e zan is Waǥas he Megbevayà ni Jacob, ne egkilelaan dan is kegkewaǥas ku. Igkahandek e zan is Megbevayà te Israel.
ISA 29:24 Is menge egkeliveg ebpekesavut en te tutuu, ne is layun ebegulbul ne igkelipey zin en is kebpenurua kandin.”
ISA 30:1 Migkaǥi is Nengazen te, “Mekehizuhizu is menge anak ku he menge mesinukulen. Mibpelanu sikandan te menge pelanu he supak te egkesuatan ku. Nekid-uyun sikandan te zuma te kandan dà he ketau, ne kenà kediey. Umbe mid-iseg medekelà is salè dan.
ISA 30:2 Midhendiyà sikandan te Ehipto su ebpelavan dan te hadì, ne wazè en sikandan mebpekisambag kedì.
ISA 30:3 Piru egkepeel-elezan dà sikandan dutun te kebpelavan dan te hadì te Ehipto.
ISA 30:4 Su minsan pa te nekeuma ziyà te Zoan wey Hanes is gehem te hadì te Ehipto,
ISA 30:5 egkepeel-elezan dà is menge tig-Juda su is menge etew ziyà te Ehipto wazè dan pulus. Wazà kayi igketavang kekenà, ebpekeveǥey zà sikandan te keelezan.”
ISA 30:6 Iyan heini menge lalag te Megbevayà mehitenged te menge langgam diyà te Negev: Ingkevayà te menge tig-Juda is sibsivayan he mereǥen he ibayà, he zuen menge erimaung, wey edhereg he menge uled, wey henduen be te ebpemenlayang. Igkarga zan te menge asnu wey menge kemilyu is menge ketiǥeyunan dan su igasa zan diyà te Ehipto he kenà ebpeketavang kandan.
ISA 30:7 Is tavang te nasyun he Ehipto, ne wazè din pulus. Umbe egngezanan ku heini te “Dragun he Midleku.”
ISA 30:8 Migkaǥi is Nengazen kayi te kedì te, “Genat ka, isurat nu ziyà te libru is egkeǥiyen ku he ebpekesuǥat te menge Israilihanen su wey zuen pengintutuu ziyà te menge etew te huziyan he timpu. Egkehimu heini he wazè din pidtemanan he pengintutuu te kelelalung dan.
ISA 30:9 Su menge mesinupaken sikandan, menge teruen, wey kenà egkesuat he ebpemineg te menge penurù ku.
ISA 30:10 Migkeǥiyan dan is menge ebpeneuven ku te, ‘Kenè niw en tudtula ziyà te kenami is impezayag te Megbevayà diyà te keniyu. Kenè key en keniyu keǥiyi te hustu. Iyan tudtula niw kenami is ebpekelipey kenami wey is menge nelewasan niw he kenà egkehitavù.
ISA 30:11 Awè kew ziyà te ibayè dey, kenè key keniyu elangi. Kenè key en keniyu tudtuli mehitenged te Waǥas he Megbevayà te Israel.’ ”
ISA 30:12 Umbe, migkaǥi is Waǥas he Megbevayà te Israel te, “Geina te inselikwey niw is menge lalag ku wey midsarig kew te kebpendaagdaag niw wey kebpenlimbung niw,
ISA 30:13 segugunè kew egkezeeti. Is salè niw egkeiring te veka te metikang he verengbeng.
ISA 30:14 Egkerupet kew iring te ziniyun he egkepurung egkerupet ne wazè en keving kayi he egkehimu he idsekilut te vaǥa ziyà te avu etawa idsekilut te wahig diyà te teleǥuey zuen.”
ISA 30:15 Migkaǥi pa is Nengazen he MEGBEVAYÀ, is Waǥas he Megbevayà te Israel te, “Likù kew kayi te kediey ne ipehulenè niw is gehinawa niw su edlibriyen ku sikiyu. Pekelinew kew ne sarig kew kedì su edlig-enan ku sikiyu. Piru kenè niw heini egkesuatan te ebaal.
ISA 30:16 Migkaǥi kew hinuun te, ‘Ebpeleǥuyan dey is menge kuntada zey pinaaǥi te menge kudà he mezesen he ebpelelaǥuy.’ Uya, ebpelaǥuy kew, piru edhuna pa he meǥaan is edal-as keniyu.
ISA 30:17 Is kebpenhulgà te sevaha kandan ne ibpekepelaǥuy te nengkelibu he menge sundaru niw. Ne is kebpenhulgà te lelima kandan ibpekepelaǥuy niw te langun. Egkeiring kew te tukud te bendirà he sebsevaha zà diyà te puntur te vuntud.”
ISA 30:18 Piru edtaǥad is Nengazen te ked-uvey niw ziyà te kandin su para ikepeehè din is hizu zin keniyu. Andam sikandin he ebpaahà te kegkeipeng din keniyu. Su is Nengazen, metazeng he Megbevayà, ne utew zeyzey is langun he midsarig diyà te kandin.
ISA 30:19 Sikiyu is menge etew ziyà te Zion he menge meǥinged diyà te Jerusalem, kenè kew en ebpekeuman ebpekesineǥew! Egkehizuwan kew te Nengazen, emun ebpetavang kew kandin. Emun egkezineg din is pengemuyù niw, ne edtevaken kew zin.
ISA 30:20 Minsan imbeǥey te Nengazen keniyu is kemeresayan wey kelised he henduen be te iyan en heini keenen niw wey inumen niw, iyan sikandin is menunudlù niw ne kenè kew zin en human ed-elesan. Egkeehè niw sikandin
ISA 30:21 wey egkezineg niw is laǥeng din he iyan egiya keniyu ziyà te hustu he zalan, minsan hendei kew.
ISA 30:22 Igkeremerik niw en is menge ed-ezapen niw he mibpekeplaan te pelata wey vulawan. Idtimbag niw heini iring te meremerik he terapu, ne egkaǥi kew te, “Kenè ku en sikiyu egkesuatan te ed-ahà!”
ISA 30:23 Ebeǥayan kew te Nengazen te uzan dutun te timpu te kebpemula, ne ed-uzaren kew. Dutun he timpu ebpenabtab is menge ayam niw ziyà te meluag he menge penebtavà.
ISA 30:24 Is menge vaka niw wey menge asnu he para te id-eradu, ebpenabtab te igketaami zan he kumpey.
ISA 30:25 Dutun te andew te kebpenhimetayi te menge kuntada niw wey kedrundusa te menge turi zan, edtudà is wahig diyà te kada metikang he vuntud wey vuvungan.
ISA 30:26 Is kerayag te vulan egkehimu he iring te kerayag te andew, ne is kerayag te andew ne kepipitu egketakep, iring kerayag te kerayag te pitu he andew he impedtempuwà. Egkeulaula heini zutun te timpu te kebewii te Nengazen te menge palì he nehimu tenged te kedletiguwa zin keniyu te menge etew zin.
ISA 30:27 Pemineg kew! Edhendini is Nengazen he ebpuun diyà te meziyù he utew egkepauk, ne neliǥuy sikandin te evel. Is menge lalag din he egkezumahan te pauk he henduen be te edriyubriyub he hapuy.
ISA 30:28 Is gehinawa zin iring te zalem he teǥelieg. Edezeetan din is menge nasyun he henduen be te ebpesiriyen din iring te trigu. Iring sikandan te uyaǥen he mibusalan wey miguyud.
ISA 30:29 Piru sikiyu is menge etew te Megbevayà egkanta kew mulà iring te layun niw ebeeli zutun te mezukilem he edsilibrahan niw is pista te kebeǥayi te Nengazen te zengeg. Edlipey kew mulà iring te menge etew he ebmartsa he egkumpas te zaǥing te pulalà dutun te kedhendiyè dan te Buntud te Nengazen te ked-azap kandin te vatu he endilungà te Israel.
ISA 30:30 Ibpezineg te Nengazen is mezaǥing he laǥeng din, wey ibpeehè din is belad din he andam en he edsilut tenged te utew zin kegkepauk. Egkezumahan heini te edriyubriyub he hapuy, egketik-ew he kedtanà te uzan, kebpenruǥung wey kebpengilat, wey ked-uzan te ǥiyew he iring kengezekelà te menge vatu.
ISA 30:31 Siguradu he egkahandek is menge tig-Asiria emun egkezineg dan is laǥeng te Nengazen. Ebpurungan din sikandan edsiluti.
ISA 30:32 Edsurungen din sikandan. Ne kada sikandan edlegkuta te Nengazen ne eduyuǥan haazà te zaǥing te tamburin wey alpa.
ISA 30:33 Neuǥet en he naandam is lugar he zutun ebinsuli is hadì te Asiria. Meluag wey mezalem heini he lugar, ne zutun dekelà is hapuy wey kayu he tavun. Is gehinawa te Nengazen he iring te edriyubriyub he esupri ne iyan ebpekeregreg duen te tavun.
ISA 31:1 Mekehizuhizu kew is mibuyù te tavang diyà te Ehipto. Midsarig kew te meǥaan he menge kudè dan, mahabet he menge kerwahi zan, wey memezesen he menge pereuntud dan te kudà. Piru wazè kew midsarig te Nengazen, he Waǥas he Megbevayà te Israel, ne wazè kew mebuyù te tavang din.
ISA 31:2 Tenged te ketau te Nengazen, ne ibpaaǥi zin is kezeetan; ne kenè din ebelvelewanan is nekaǥi zin. Edsilutan din is pemilya te lalung he menge etew wey is menge midtavang kandan.
ISA 31:3 Is menge Ehiptohanen menge etew zà ne kenè Megbevayà. Is menge kudè dan, ne kenà heini menge mulin-ulin, kekenà, iring ded te zuma he menge kudà. Emun edsilut en is Nengazen, egkezeetan is Ehipto ragkes is menge nasyun he edtevangan kayi. Pudu heini egkezeeti.
ISA 31:4 Iyan heini migkaǥi te Nengazen kayi te kedì, “Wazà ebpekeeǥen te erimaung te kedawi te edewiyen din minsan ebpengulahì pa is menge ebantey zutun te edewiyen. Ne iring daan kediey, wazà ebpekeeǥen kedì te kedipinsahi ku te Buvungan he Zion.
ISA 31:5 Iyan a, Nengazen he Mekeǥeǥehem, iyan a ebantey te Jerusalem he iring te tagbis he ebantey te salag din. Edipinsahan ku wey edlibriyen ku heini.”
ISA 31:6 Sikiyu is menge Israilihanen, likù kew en diyà te Nengazen he midsupak niw.
ISA 31:7 Su egkeuma is timpu he idselikwey niw is tarù he menge ed-ezapen niw he pelata wey vulawan, he mibeelan niw tenged te mekesesalè kew.
ISA 31:8 Ebpematey is menge tig-Asiria, piru kenà tenged te ispada te etew. Ebpeleǥuyan dan is tebek, ne egkehimu he menge uripen is menge vetan-en kandan.
ISA 31:9 Ebpemelaǥuy is menge sundaru zan tenged te utew zan kegkahandek ne ebpekedsusuwey is menge upisyal zan emun egkeehè dan is bendirà te menge kuntada zan. Iyan heini migkaǥi te Nengazen, he egkeregreg is hapuy zin diyà te Zion, kes inged he Jerusalem.
ISA 32:1 Duen keuzemà hadì he metazeng, ne is menge upisyal zin, wazà egkevintahaan diyà te kedumala zan.
ISA 32:2 Is kada sevaha kandan egkehimu he iring te endilungà emun duen mevendes he keramag wey bagyu. Egkeiring daan sikandan te zezeisey he wahig he midtudà diyà te disirtu, wey alung te zekelà he vatu ziyà te meinit wey memaza he lugar.
ISA 32:3 Ebpen-ehè en wey ebpemineg en is menge etew te Megbevayà.
ISA 32:4 Is meǥègaanen ebpurung en ed-isip-isip su wey zin metueni ke hengkey is ereg he ebeelan din. Is etew he kenà egketau ke hengkey is egkeǥiyen din, ebpekekaǥi en te hustu wey keladu.
ISA 32:5 Is menge tulebung kenè en ebeǥayan te zengeg, ne is menge limbungan kenè en edtehuzen.
ISA 32:6 Su tinulebung is egkeǥiyen te tulebung, ne is mezaat he isip din dutun is pelanu te kebaal te vaal he kenà sungkad te egkesuatan te Megbevayà, tarù is menge lalag din mehitenged te Nengazen, wey kenè din edseǥipaan is menge egkevitil wey egkemezahan.
ISA 32:7 Mezaat is menge paaǥi te limbungan he etew. Ed-isip sikandin he edezeetan din is menge pubri pinaaǥi te kedtarùtarù, minsan dutun te timpu he ebuyù te hustu he kukuman is menge pubri.
ISA 32:8 Piru sikan is etew he tutuu he dungganen ebpelanu te kebaal te dungganen he menge vaal, ne edtumanen din heini layun.
ISA 32:9 Sikiyu is menge vahi he ebpeeyehey zà wey wazà igkeipeng, pemineǥa niw is egkeǥiyen ku ziyà te keniyu!
ISA 32:10 Subra zà he senge-tuig puun guntaan, ne ebpengerkeren kew en su kenè en ebpekeveǥas is paras, ne wazè niw egkepenrupù.
ISA 32:11 Kinahanglan he utew kew mahandek, is menge vahi he ebpeeyehey zà wey wazà igkeipeng. Luwasa niw is menge visti niw ne tetapis kew te saku.
ISA 32:12 Tebpia niw is kumeng niw tenged te kegkeseeng niw te egkehitavù te selebpeten he vevesukè niw wey pemuleey niw te paras.
ISA 32:13 Is tanà te menge etew ku edtuvuan dà te zuǥiyen he zezeisey he kayu wey menge sagbet. Ne egkaawà is melipayen he menge pemilya wey is inged he melipayen is menge etew zuen.
ISA 32:14 Is inged he mezakel zengan is mid-ubpà duen, ne kenè en maan ed-ubpaan. Is melig-en he menge vahin kayi, ebey-anan en. Is mibuntud-buntud wey turi kayi egkeiring te sibsivayan minsan keenu. Edriǥuriǥu kayi is menge asnu ne ebpemenabtab is menge langgam.
ISA 32:15 Egkehitavù heini taman te ibpehendini te kenitew is Mulin-ulin he ebpuun te langit. Ne is sibsivayan egkehimu he uuzaran he vevesukà.
ISA 32:16 Ne zutun te sibsivayan wey uuzaran he vevesukà, wazà pidtemanan te hustu he kukuman wey ketazeng.
ISA 32:17 Is beǥas te ketazeng iyan is meupiya he ked-ubpà, kelinew, wey kenà egkekeizan te wazè din pidtemanan.
ISA 32:18 Sikiyu is menge etew te Megbevayà, ebpekeubpè kew ziyà te melinawen he menge ubpeey, he meziyù te vangkit, ne wazà edsamuk keniyu.
ISA 32:19 Minsan egkezeetan is ketelunan wey egkengevengkag is menge inged tenged te ǥiyew he iring te menge vatu,
ISA 32:20 edtuvazan kew te Megbevayà. Layun egkevinyagì is menge pinemula niw, ne ebpekeuyayà he ebpenabtab is menge ayam niw ziyà te minsan hendei.
ISA 33:1 Mekehizuhizu kew is menge ebpendezaat he wazà mekesaǥad he edezeetan. Mekehizuhizu kew is menge meluiven he wazà mekesaǥad he edluivan. Emun egkepasad en is kebpendezaat niw wey kebpenluib, ne iyan kew en maan edezeetan wey edluivan.
ISA 33:2 Nengazen, kehizuwi key. Midsarig key kenikew. Lig-eni key kada andew, wey libriya key zutun te timpu te kelised.
ISA 33:3 Ebpemelaǥuy is menge etew emun egkezineg dan is daǥing te laǥeng nu he henduen be te ruǥung. Emun edhitindeg ka su edsilut ka ebpekedsusuwey is menge etew ziyà te menge nasyun.
ISA 33:4 Edtevanen is menge azen dan; egkeiring sikandan te pinemula he midterapan.
ISA 33:5 Is Nengazen, lavew te langun! Su ziyà sikandin ed-ubpà te langit. Kenè din id-awà diyà te Jerusalem is hustu he kukuman wey ketazeng.
ISA 33:6 Edlig-enan kew zin dutun te keniyu he timpu. Layun kew zin edlibriya wey ebeǥayan kew zin te ketau wey keuluwanen. Is mahal he ketiǥeyunan niw iyan is kedtehuza niw te Nengazen.
ISA 33:7 Pemineg kew! Is duma niw he menge mevurut nengulahì diyà te menge zalan is ebpetevang; edsineǥew is menge imbehedur niw su iyan suat dan he kenà maawà is kelinew.
ISA 33:8 Wazè en ebayà diyà te menge zalan; wazè en edriǥuriǥu zuen. Midsupak en is neuyunan ne wazè en beliya is menge tistiǥus kayi. Wazè en dutun etew he edtehuzen.
ISA 33:9 Nezeetan is tanà he Israel. Nengeǥangu is menge kayu ziyà te Lebanon, ne ke và dà etew ne neeled-eled heini. Neiring te sibsivayan is menge suǥud diyà te Sharon. Netaktak is menge zahun te menge kayu ziyà te Bashan wey Carmel.
ISA 33:10 Migkaǥi is Nengazen te, “Iyan en heini timpu te kedwaleng ku, ne ebeǥayan a te zengeg te menge etew.
ISA 33:11 Sikiyu is menge tig-Asiria, wazà pulus te pelanu niw wey vaal niw. Is pauk niw he henduen be te egkeregreg he hapuy, ne iyan dà ebpekezezaat keniyu.
ISA 33:12 Egkevinsulan kew taman te egkeiring kew te apug. Egkeiring kew te zuǥiyen he zezeisey he kayu he ebpenempezen ne ebinsulan.
ISA 33:13 Sikiyu is menge meǥinged diyà te menge nasyun diyà te meziyù wey ziyà te uvey, pemineǥa niw ke hengkey is mibeelan ku wey kilelaa niw is kegkemekeǥeǥehem ku.”
ISA 33:14 Mibpengerker tenged te kekahandek is menge mekesasalà diyà te Zion. Egkaǥi sikandan te, “Is Megbevayà, iring te edriyubriyub he hapuy he kenà egkeuvukan. Hentei man kenitew is ebpekeubpà diyà te etuvangan te Megbevayà?”
ISA 33:15 Is ebpekeubpà dutun, iyan is etew he nengungubpaan he metazeng wey tutuu is menge lalag din, ne wazà mebpenapì, wey wazà medawat te sipsip. Wazà sikandin mebpekiduma te mibpelanu te kebpemenhimatey wey te kebaal te zuma pa he mezaat he menge vaal.
ISA 33:16 Iyan heini ked-etew te menge etew he ebpekelingkawas te vangkit, ne iring te ziyè dan med-ubpà te metikang he menge lugar, ne iyan egkehimu he endilungè dan is dezekelà he menge vatu. Ne kenà sikandan egkeewaan te keenen wey wahig.
ISA 33:17 Sikiyu is menge Israilihanen, egkeehè niw is sevaha he hadì he mekeǥeǥehem, he utew meluag is ginhedian din.
ISA 33:18 Egketenuzan niw is nehuna he mekahandekhandek he hitavù he zutun midhendiyà te keniyu is menge upisyal ziyà te Asiria, ne mibilang dan ke pira is menge turi niw, wey midsusi zan ke pira he menge azen is egkekuwa zan diyà te keniyu.
ISA 33:19 Piru kenè niw en egkeuman egkaahà haazà is gelbuwen he menge etew he kenè niw egkesavut is kineǥiyan dan.
ISA 33:20 Ahàa niw is Zion, kes inged he zutun kiw edsilibra te menge pista. Heini he inged, egngezanan daan te Jerusalem, egkeehè niw he melinawen wey melig-en. Iring heini te melig-en he tulda, he kenà egkevazut is menge palpal zin wey kenà egkevidtew is menge hiket din.
ISA 33:21 Kayi he lugar ibpeehè te Nengazen kenitew he mekeǥeǥehem sikandin. Is Jerusalem, egkeiring te sevaha he lugar he meluag is menge zezekelà wey zezeisey he menge wahig duen he edtudà, ne kenà ebpekehimu he edlayun duen is untuzà te menge kuntada.
ISA 33:22 Ebeelan heini te Nengazen su iyan sikandin perehukum tew, perevaal te kesuǥuan tew, wey edhadì kenitew. Ne iyan sikandin edlibri kenitew.
ISA 33:23 Is Jerusalem guntaan, iring te untuzà diyà te zaǥat he nelugkà is menge hiket din wey menge layag, ne kenà egkevekar is menge layag din. Piru egkeuma is timpu he mahabet he menge azen is egkaaǥew te menge tig-Jerusalem diyà te menge kuntada zan. Umbe minsan is menge piang ne egkevehinan.
ISA 33:24 Dutun he timpu, wazà meǥinged diyà te Jerusalem he ebpekekaǥi te, “Deruwanen a.” Ebpeseyluwen te Nengazen is menge salè dan.
ISA 34:1 Uvey kew, is menge etew ziyà te menge nasyun, ne purung kew pemineg. Is tivuuk he kelibutan wey is langun he netaǥù kayi, kinahanglan he mebpemineg.
ISA 34:2 Su nepeukan te Nengazen is langun he menge meǥinged diyà te menge nasyun; nepeukan din is menge sundaru zan. Umbe ebpurungan din sikandan edezeeti, ne ebpenhimetayan din sikandan is langun.
ISA 34:3 Kenè en idleveng is menge lawa zan, umbe edsengew is kemahù kayi, ne edranew is lengesa ziyà te menge vuvungan.
ISA 34:4 Egketunew is langun he ziyà te langit, ne egkelulun is langit iring te papil. Egkengeulug is menge vituen iring te neǥangu he menge zahun te paras wey higus he egketaktak.
ISA 34:5 Ne emun egkepasad en te egamit te Nengazen is ispada zin diyà te langit, ne ebpenaug en sikandin diyà te Edom he zutun is menge etew he edezeetan din su edsilutan din sikandan.
ISA 34:6 Is ispada te Nengazen egkelupit te lengesa wey tavà, egkeiring te egemiten te kedlapà te menge ibpemuhat he kambing wey kerehidu. Su ebpenhimetayan te Nengazen is menge etew ziyà te Bozra ne pemuhat haazà diyà te kandin. Mahabet is ebpenhimetayan din diyà te zuma pa he menge inged diyà te Edom.
ISA 34:7 Ebpenhimetayan din daan is mekeǥeǥehem he menge etew he henduen be te menge tudu te vaka. Ebpeketambù diyà te tanè dan is lengesa wey tavà.
ISA 34:8 Su zuen timpu he idteǥana te Nengazen he zutun ebelesan din is menge kuntada zin su edtevangan din is menge tig-Jerusalem.
ISA 34:9 Is menge zal-ug diyà te Edom, egkehimu he ispaltu, ne is tanà ne egkehimu he esupri. Is tivuuk he nasyun egkehimu he ispaltu he egkeregreg.
ISA 34:10 Ne kenà heini egkeevukan te maandew wey mezukilem. Is evel kayi edlipuwak te wazà pidtemanan. Wazè en ed-ubpà wey edsaǥad diyà te Edom taman te taman.
ISA 34:11 Ed-ubpaan dà heini te menge ekang wey menge uwak. Mibpelenuwan en te Nengazen is ked-ewaa zin te purma wey taǥù kayi.
ISA 34:12 Egngezanan heini te, “Wazè din Pulus he Ginhedian.” Egkahanew is langun he menge ebpemendumala kayi.
ISA 34:13 Ebpenuvuan dà te menge zuǥiyen he zezeisey he kayu is binerengbeng he menge inged dan wey is melig-en he menge vahin kayi. Ne ed-ubpà dutun is menge ekang wey is leew he menge asu.
ISA 34:14 Is leew he menge langgam wey is dumezaas he menge langgam he henduen be te menge asu, ne ebpeked-uuma zutun. Is leew he menge kambing ebpengumew zutun te menge zuma zan, ne is menge langgam he mezukilem dà is kegawas dan, edhendutun su edhimeley.
ISA 34:15 Is menge ekang, edsesalag dutun, ed-impis, ebpesà, ne edipinsahan dan is menge pispis dan pinaaǥi te kedlekupi zan duen. Edhendutun daan is menge uwak he ebparisparis.
ISA 34:16 Ahaa niw is libru te Nengazen ne vesaha niw. Wazà minsan hengkey he migkaǥi ku he kenà egketuman. Wazà minsan sevaha he egkaawà kayi he menge langgam, ne wazà sevaha kandan he wazè din paris. Su iyan heini kebayà te Nengazen, ne iyan mismu sikandin edtiǥum kayi he menge langgam.
ISA 34:17 Inteǥana zin en is tanà he imbahin din te menge langgam. Ne egkaangken dan heini taman te taman, ne zutun dan ebpekeubpà te wazà pidtemanan.
ISA 35:1 Ke vè dà etew is disirtu etawa memaza he menge tanà, ne edlipey heini. Ebpemekar is menge vulak dutun te sibsivayan.
ISA 35:2 Iring heini te etew su egkanta zaan wey ed-ugyab te kegkelipey, ne ebpemekar is mahabet he menge vulak kayi. Ne egkehimu heini he mekempet iring te Buntud he Lebanon. Ne uuzaran heini iring te pemuleey iring te Carmel wey Sharon. Ne egkaahà dutun is gehem wey utew kegkelavew te Nengazen he Megbevayè tew.
ISA 35:3 Umbe, lig-eni niw is menge mibmeluya.
ISA 35:4 Kegiyi niw is menge egkahandek te, “Mebpekelig-en kew wey kenè kew mahandek. Ebpekeuma is Megbevayè niw su ebelesan din is menge kuntada niw, ne edlibriyen kew zin.”
ISA 35:5 Ne zutun ebpekeehè en is lakap wey ebpekezineg en is bengel.
ISA 35:6 Edlinglingketew en is piang iring te selazeng, ne egkulahì is emew tenged te kegkelipey zin. Ebugwak is wahig diyà te disirtu, wey edtudà is menge zal-ug pehendiyà te sibsivayan.
ISA 35:7 Is meinit he pantad egkehimu he wehiǥen, ne is memaza he tanà egkehimu he serebseb. Edtuvù is nekedseselekawà he menge sagbet diyà te menge lugar he ubpeey zengan te leew he menge asu.
ISA 35:8 Ebeelan dutun te disirtu is meluag he kersada, ne egngezanan heini te “Segradu he Zalan.” Wazà mekesesalà wey tulebung he ebpekeikul zutun. Su para zà haazà te menge etew he edsunud te menge paaǥi te Megbevayà.
ISA 35:9 Wazà menge erimaung wey minsan hengkey he kelasi te zumezaas he menge langgam he ebpekevayà dutun. Iyan dà ebpekeikul zutun is menge etew he midlibri te Nengazen.
ISA 35:10 Heini is menge nevelukasan te Nengazen edlikù sikandan diyà te Jerusalem is ebpemenganta. Melipayen dan layun; egkaawè en is menge seeng dan wey menge kegkerasey zan.
ISA 36:1 Hein ike-14 he tuig te kedhadì ni Hezekia ziyà te Juda, midsurung ni Hadì Senakerib he hadì te Asiria is langun he vinerengbeng he menge inged diyà te Juda, ne naaǥew zin heini.
ISA 36:2 Ne zutun te ziyà si Senakerib te Lakish, midsuǥù din is peremandar te menge sundaru zin duma te mahabet he menge sundaru he menge sakup din te kedhendiyà te Jerusalem te kebpekidhinguma ki Hadì Hezekia. Ne hein diyè en is peremandar te gawas te inged he Jerusalem, diyà sikandan mebpundu te uvey te veyeey te wahig he ebpuun diyà te egkezivavew he peneng, he ziyà dapit te zalan he ibpenhendiyà te pemìpiey.
ISA 36:3 Midhendiyà te kandin si Eliakim he anak ni Hilkia, te edumala te turuǥan, si Shebna he sikritaryu, wey si Joa he anak ni Asaf, he sineriǥan te menge libru te ginhedian.
ISA 36:4 Migkaǥi ziyà te kandan sikan is peremandar te menge sundaru te, “Keǥiyi niw si Hezekia he iyan heini egkeǥiyen duen te mekeǥeǥehem he hadì te Asiria: “Hengkey is edseriǥan nu?
ISA 36:5 Egkeisip nu ve he ebpekezaag ka te tebek pinaaǥi zà te lalag, ne kenà pinaaǥi te ebilidad wey zesen te menge sundaru nu? Hentei is edseriǥan nu he iyan ibpekidsulè nu kediey?
ISA 36:6 Iyan be is Ehipto? Heini he nasyun wey is hadì duen, iring dà te nevadtì he tuked he emun idtutuked nu ne ebpekepalì te belad nu.
ISA 36:7 Kela ke iyan egkeǥiyen nu kayi te kedì is iyan edseriǥan niw is Nengazen he Megbevayè niw. Kenè be imperundus nu man is menge simbahan he para kandin diyà te metikang he menge lugar ragkes en is menge pemuhatà kayi, ne migkeǥiyan nu is menge meǥinged diyà te Juda wey Jerusalem he kinahanglan he ziyè dan dà med-azap te sevaha zà he pemuhatà?”
ISA 36:8 Impelaus dutun te peremandar is lalag din, “Ne guntaan keǥiyi niw is hadì niw he zuen idhanyag kandin te egalen ku he hadì te Asiria. Ebeǥayan dey sikandin te 2,000 he menge kudà emun duen din daan 2,000 he pereuntud te kudà.
ISA 36:9 Wazè din igkesukul minsan te kinemevevaan he upisyal te egalen ku. Edsarig dà sikandin te Ehipto he ebeǥey kandin te menge kerwahi wey menge pereuntud te kudà.
ISA 36:10 Kunaan din buwa ke wazà a suǥua te Nengazen te kedhendini te kedezaat kayi he nasyun? Iyan mismu is Nengazen midsuǥù kedì te kedsurung wey kedezaat kayi he nasyun.”
ISA 36:11 Migkeǥiyan ni Eliakim, ni Shebna, wey ni Joa haazà is peremandar te sundaru te, “Deyzey ke iyan nu egemiten te kebpekidlalag kenami is kineǥiyan he Aramico, su egkesavut dey heini. Kenè ka kaǥi te Hebriyuhanen su egkezineg ka te menge etew he ziyà te menge verengbeng te inged.”
ISA 36:12 Piru midtavak haazà is peremandar te menge sundaru te, “Midsuǥù a te egalen ku he ibpetuenan is lalag din te langun he meǥinged kayi te Jerusalem, kenà diyè dà te keniyu wey te hadì niw. Sikiyu is langun, egkengevitil kew wey egkengemezahan kew zutun te timpu te kedsurunga zey keniyu. Egkeenen niw is tai niw wey ed-inumen niw is ihì niw.”
ISA 36:13 Ne zutun, midhitindeg haazà is peremandar te menge sundaru ne nemensag te Hebriyuhanen te, “Pemineǥa niw is migkaǥi te mekeǥeǥehem he hadì diyà te Asiria!
ISA 36:14 Iyan heini egkeǥiyen din: Kenè kew petuntu ki Hezekia. Kenè kew zin egkelibri puun te kegkesekupa ku keniyu!
ISA 36:15 Kenè kew petuntu kandin mehitenged te kedsarig te Nengazen, emun egkaǥi sikandin te, ‘Siguradu he edlibriyen kiw te Nengazen; heini is inged tew, kenè din ibeǥey ziyà te hadì te Asiria.’
ISA 36:16 “Kenè kew pemineg ki Hezekia! Iyan heini egkeǥiyen te hadì te Asiria: Kenè kew en pekidtebek kediey; surindir kew en! Ne idtuǥut ku keniyu is kegkaan te veǥas te paras wey higus niw, ne ebpekeinum kew te wahig diyà te menge punduwè niw te wahig,
ISA 36:17 taman te edliku a is eduma keniyu pehendiyà te tanà he iring te tanè niw–tanà he zuen duen menge pemuleey te paras he ebpekeveǥey keniyu te vinu, wey zuen duen menge trigu he egkehimu he keuyaǥan niw.
ISA 36:18 Kenè kew pelimbung ki Hezekia emun egkaǥi sikandin te edlibriyen kew te Nengazen. Duen be menge ed-ezapen diyà te minsan hendei he menge nasyun he nekelibri te menge meǥinged duen para kenà sikandan mezaag te hadì te Asiria?
ISA 36:19 Duen be nehimu te menge ed-ezapen diyà te Hamat, Arpad, wey Sefarvaim? Nelibri ve te menge ed-ezapen diyà te Samaria is tanè dan puun te gehem ku? Wazà daan!
ISA 36:20 Hentei te menge ed-ezapen kayi he menge nasyun is nekelibri te nasyun dan puun te gehem ku? Ne ebmenmenuwen man te Nengazen is kedlibriya zin te Jerusalem puun te gehem ku?”
ISA 36:21 Piru wazà medtavak is menge etew su mibmandù si Hadì Hezekia he kenè dan medtavak.
ISA 36:22 Ne zutun mibindas ni Eliakim, ni Shebna, wey ni Joa is bisti zan tenged te kegkeseeng dan, ne midhendiyè dan te ki Hezekia ne midtudtul zan is menge lalag duen te peremandar te menge sundaru.
ISA 37:1 Ne hein nezineg ni Hadì Hezekia is tudtul zan diyà te kandin, mibindas din is bisti zin ne midseluub sikandin te saku su ibpetuusan din is kedlalew zin, ne midhendiyà sikandin te valey te Nengazen.
ISA 37:2 Ne impehendiyè din te ki Isaias he anak ni Amoz ensi Eliakim he edumala te turuǥan, si Shebna he sikritaryu, wey is lavew he menge memumuhat. Pudu sikandan mibivisti te saku.
ISA 37:3 Ne hein nekeuma zan diyà te ki Isaias, migkaǥi sikandan diyà te kandin te, “Iyan heini egkeǥiyen ni Hezekia: ‘Menge andew heini te zekelà he samuk! Edsilutan kiw wey ebpeel-elezan. Iring kiw te vahi he ed-anak he wazè din en desen te ked-ineǥed para ilusad is anak din.’
ISA 37:4 Midsuǥù te hadì te Asiria is peremandar te menge sundaru zin te ked-undaunda te uuyag he Megbevayà. Kela ke seǥipaa te Nengazen he Megbevayè nu is mibpengaǥi zuen te peremandar te menge sundaru ne edsilutan sikandin tenged dutun, umbe pengemuyù ka para kenitew te nengesamà.”
ISA 37:5 Ne hein nekepasad he egkaǥi haazà is menge upisyal he midsuǥù ni Hadì Hezekia,
ISA 37:6 migkaǥi si Isaias diyà te kandan te, “Keǥiyi niw is egalen niw he si Hadì Hezekia he iyan heini egkeǥiyen te Nengazen: Kenè ka mahandek te nezineg nu he ked-un-undaha kedì duen te menge sakup te hadì te Asiria.
ISA 37:7 Pemineg ka! Edtezinen ku is hadì te Asiria. Ebpekezineg sikandin te tudtul he ebpekepelikù kandin diyà te nasyun din. Ne zutun ibpehimetayan ku sikandin pinaaǥi te ispada.”
ISA 37:8 Ne hein nezineg duen te peremandar te menge sundaru te Asiria he mid-awè en diyà te Lakish is hadì dan, ne nekidtebek diyà te Libna, midtelukun sikandin diyà.
ISA 37:9 Ne si Hadì Senakerib he hadì te Asiria, duen nezineg din he tudtul he si Hadì Tirhaka he hadì te Etiopia, migenat en te kebpekidtebek kandin. Ne zutun, midsuǥù sikandin te menge menunudtulà diyà te ki Hezekia te kegkaǥi kayi he menge lalag:
ISA 37:10 “Kenè ka petuntu te ed-ezapen he edseriǥan nu emun egkaǥi sikandin te, ‘Kenè ku ibeǥey ziyà te hadì te Asiria is Jerusalem.’
ISA 37:11 Pemineg ka! Iyan ka mismu nekezineg ke hengkey is mibeelan te menge hadì te Asiria ziyà te hapit langun he menge nasyun. Mibpendezeetan dan heini purungi. Ne sikew, egkeisip nu ve he egkelibri ka mulà?
ISA 37:12 Mibpendezeetan dengan te menge kepuun ku is menge inged he Gosan, Haran, Resef, wey is menge etew ziyà te Eden he ziyà te Telasar. Ne wazà mekelibri kandan is menge ed-ezapen dan?
ISA 37:13 Duen be nehimu te menge hadì diyà te Hamat, Arpad, Sefarvaim, Hena, wey Iva?”
ISA 37:14 Ne hein nepasad ni Hezekia te ebasa is surat he imbeǥey kandin duen te menge menunudtulà, midhendiyà sikandin te valey te Nengazen ne mibekar zin haazà is surat diyà te etuvangan te Nengazen.
ISA 37:15 Ne nengemuyù sikandin te,
ISA 37:16 “Nengazen he Mekeǥeǥehem, he Megbevayà te Israel he ebpimpinuu ziyà te pinuuwè din te kedhadì diyà te teliwazà te menge kirubin, iyan ke zà Megbevayà he edumala te langun he menge ginhedian kayi te kelibutan. Mibeelan nu is langit wey is kelibutan.
ISA 37:17 Nengazen, pemineg ka, ne tengtengi nu is langun he nehitavù. Pemineǥa nu is langun he migkaǥi ni Senakerib te ked-undaunda kenikew te uuyag he Megbevayà.
ISA 37:18 Tutuu, Nengazen, he mibpendezeetan te menge hadì diyà te Asiria is mahabet he menge nasyun,
ISA 37:19 wey is menge ed-ezapen dan pinaaǥi te kebpenimbaǥa zan kayi ziyà te hapuy. Su kenà heini tutuu he menge Megbevayà, kekenà, menge vatu zà wey menge kayu he vineelan te etew.
ISA 37:20 Umbe ǥuntaan, Nengazen he Megbevayè dey, libriya key puun te ǥehem te menge tig-Asiria, su para metueni te langun he ginhedian kayi te kelibutan he iyan ke zà Nengazen he Megbevayà.”
ISA 37:21 Ne mibpeuwit te lalag si Isaias he anak ni Amoz diyà te ki Hezekia he edhenduen te: Iyan heini egkeǥiyen te Nengazen he Megbevayà te Israel: Geina te nengemuyù ka mehitenged ki Hadì Senakerib he hadì te Asiria,
ISA 37:22 iyan heini egkeǥiyen te Nengazen he ebpekesuǥat diyà te kandin: “Ed-engitan ka wey edsudien ka te menge meǥinged diyà te Zion, he inged he Jerusalem. Ebpemengelengkeleng sikandan is ed-undaunda kenikew zutun te kebpelaǥuy nu.
ISA 37:23 Hentei is mid-insultuwan nu wey edwelwelien? Hentei is midhenggeran nu wey mibpehembuǥan? Kenè be iyan a is Waǥas he Megbevayà te Israel?
ISA 37:24 Pinaaǥi te menge suluǥuen nu, midsudì a kenikew. Migkaǥi ke pa te, ‘Pinaaǥi te mahabet he menge kerwahi ku netekezeg ku is metikang he menge vuntud, is puntur te menge vuntud he Lebanon. Mibpemiley ku is kinetewisan he menge kayu he sidru kayi wey is kinemeupiyahan he menge sipris. Nekeuma a ziyà te puntur kayi he zuen duen merapung he menge kayu.
ISA 37:25 Nekepekalut a te menge teheb diyà te zuma he menge lugar, ne nekeinum a puun dutun he menge teheb. Tenged te kedsaǥad ku, nemezahan is menge wahig diyà te Ehipto.’
ISA 37:26 “Tutuu iyan he mibpemengkag nu is binerengbeng he menge inged. Piru wazè nu ve metueni he siak, is Megbevayà, neuǥet en he imbanglis ku is kegkeul-ulaha kayi? Neuǥet en diyà te pelanu ku is kegkeul-ulaha kayi ne ǥuntaan edtumanen ku en heini.
ISA 37:27 Is menge meǥinged diyà te menge inged he mibpemengkag nu, naawè en is desen dan; nahandek sikandan wey nepeel-elezan. Neiring sikandan te menge sagbet diyà te pemuleey he meǥaan dà egkeǥangu dutun te kedtuvù dan etawa iring te menge sagbet he nenuvù diyà te atep he seǥuǥunè dà egkeǥangu zutun te kedtuvù dan.
ISA 37:28 “Piru netuenan ku is langun mehitenged kenikew, ke hendei ka ed-ubpàubpà, etawa hendei ka ebpuun wey ebpevayà, wey ke hengkey is igkepeuki nu kediey.
ISA 37:29 Su nezineg ku is kegkepeuki nu kedì wey is kebpehambug nu, egkew-itan ku is izung nu wey ebusalan ku is bèbè nu, ne eguyuzen ku sikew ziyà te zalan he mibeyaan nu, su wey ka mekelikù diyà te ebpuunan nu.”
ISA 37:30 Ne migkeǥiyan ni Isaias si Hezekia te: Iyan heini tuus he edipinsahan te Nengazen is Jerusalem te kedezaat te menge tig-Asiria: Guntaan he tuig is egkekaan niw, iyan is menge veǥas te pinemula he nenuvù dà, ne ed-ilis he tuig iyan is beǥas te menge pinemula he nenuvù diyà te midtuvuan duen te nehuna. Piru te iketelu he tuig, ebpekepemula kew en te trigu ne ebpekeraǥun kew en. Ebpekepemula kew en daan te paras ne ebpekekaan kew te veǥas kayi.
ISA 37:31 Ne ziyà te Juda, sikiyu is nengesamà he uuyag ed-uswag kew iring te pinemula he mibpurung mebpendalid ne ebpemeǥas.
ISA 37:32 Su zuen egkengesamà he uuyag he ebpekepeyapat he ebpuun te Jerusalem, diyà te Buvungan he Zion. Ne kenà duwazuwa is kedtumana kayi te Nengazen he Mekeǥeǥehem.
ISA 37:33 “Ne iyan heini egkeǥiyen te Nengazen mehitenged te hadì te Asiria: Kenà sikandin ebpekeseled diyà te inged he Jerusalem wey kenè din heini egkepanà. Kenà sikandin ebpekeuvey kayi he kekelasag etawa kenà sikandin ebpekesurung kayi zuma te menge etew zin he edliǥuy kayi.
ISA 37:34 Edlikù sikandin diyà te mibpuunan din, he ed-uman ed-ikul ziyà te zalan he mid-ikul zin. Kenà sikandin ebpekeseled kayi he inged. Iyan a, is Nengazen, is migkaǥi kayi.
ISA 37:35 Edipinsahan ku wey edlibriyen ku heini he inged para meveǥayi a te zengeg wey tenged te penaad ku ki David he suluǥuen ku.”
ISA 37:36 Ne zutun midhendiyà is belinsuǥuen te Nengazen te kampu te menge tig-Asiria ne migerè din is 185,000 he menge sundaru. Ne hein meselem en, ked-enew zuen te nesamà he menge uuyag, neehè dan is utew mahabet he nemematey.
ISA 37:37 Tenged kayi mid-ulì si Senakerib diyà te Nineve ne zutun med-ubpàubpà.
ISA 37:38 Ne sevaha he andew, zutun te edsimba si Senakerib diyà te simbahan te ed-ezapen din he si Nisroc, midhimetayan sikandin te zezuwa he anak din he maama he si Adramilec wey si Sharezer pinaaǥi te ispada. Ne mibpelaǥuy sikandan diyà te Ararat. Ne is anak din he si Esarhadon iyan mid-ilis kandin te kedhadì.
ISA 38:1 Dutun he timpu, nezeruwan si Hezekia ne henduen be te ebpatey en. Midhendiyà te kandin is ebpeneuven he si Isaias he anak ni Amoz ne migkaǥi te, “Migkaǥi is Nengazen he veeli nu en is egkesuatan nu te ebaal su kenè ke en egkeulian, kekenà, ebpatey kad.”
ISA 38:2 Ne hein nezineg haazà ni Hezekia, midsinaru sikandin diyà te elavat ne nengemuyù diyà te Nengazen
ISA 38:3 Ke sikandin te, “Nengazen, tentenuzi nu is kegkemepezumdumahan ku kenikew kayi te kebpengungubpaan ku, nenilbi a kenikew te ebpuun diyà te gehinawa ku, wey meupiya is baal ku ziyà te etuvangan nu.” Ne utew sikandin nekesineǥew.
ISA 38:4 Ne migkaǥi is Nengazen diyà te ki Isaias
ISA 38:5 he medlikù sikandin diyà te ki Hezekia ne keǥiya zin heini: “Iyan heini egkeǥiyen te Nengazen, sikan is Megbevayà te kepuun nu he si David; ke sikandin te, ‘Nezineg ku is pengemuyù nu wey neehè ku is menge luhè nu. Ne ed-umanan ku pa te 15 he tuig is untung nu.
ISA 38:6 Edlibriyen ku sikew wey heini is inged puun te gehem te hadì te Asiria. Ebpengelangan ku heini he inged.
ISA 38:7 Iyan heini tuus he ibeǥey ku he kemetuuzan he edtumanen ku heini is insaad ku:
ISA 38:8 Ibpelikù ku te sepulù he sigundu is alung te andew ziyà te urasan he mibpeveelan ni Ahaz.’” Ne netuman heini.
ISA 38:9 Iyan heini insurat ni Hadì Hezekia he hadì te Juda hein neulian sikandin te zaru zin:
ISA 38:10 Kunaan ku ke ebpatey ad he vetan-en e pa, ne kenà ad egkaawà diyà te lugar te menge minatey.
ISA 38:11 Kunaan ku ke kenè ku en egkaahà is Nengazen kayi te kelibutan te menge uuyag, etawa kenè ku en egkaahà is menge etew kayi he kelibutan.
ISA 38:12 Hapit en egkahanew is untung ku iring te tulda te ebantey te kerehidu he inlayap te keramag. Kunaan ku ke egketamped en is untung ku iring te manggad he midtamped te mengengavel. Puun te meselem taman te mezukilem, edtaǥad a te kedtepusa nu te untung ku.
ISA 38:13 Wazà a mebpelavew is midtaǥad taman te meselem, ne egkeisip ku he ebpatey ad, henduen be te edrupeten te erimaung is menge tulan ku. Puun te meselem taman te mezukilem midtaǥad a he edtepusen nu en is untung ku.
ISA 38:14 Mibpetavang a he is laǥeng ku henduen be te kegkaǥi te tagbis he sayaw etawa dugwak. Midag-es a he is laǥeng ku henduen be te kegkaǥi te merepatik. Neveley is menge mata ku te kedlingehè ku ziyà te langit. Ke siak te Nengazen, tevangi a kayi he kelised.
ISA 38:15 Piru hengkey pa is egkekaǥi ku? Midtavak e zin ne iyan mismu sikandin mibawì kedì wey a meulii. Ebpengungubpaan a he kenà ebpelavew tenged te mereǥen he neseǥazan ku.
ISA 38:16 Pinaaǥi kayi Nengazen, ebmelig-en is untung te etew, ne siak mismu, mibmelig-en a. Neulian a te kebewii nu kedì ne intuǥut nu he meuyag a.
ISA 38:17 Tutuu, he is kemeresayan ku para te keupiyaanan ku. Tenged te kebmahala nu kedì, midlibri a kenikew te kezeetan wey mibpesaylu a kenikew te menge salè ku.
ISA 38:18 Ebmenmenuwen ku is kedalig kenikew emun minatey ad? Is menge minatey kenè en ebpekezalig kenikew wey kenè en ebpekeperateng te kebmetinumanen nu.
ISA 38:19 Iyan dà ebpekezalig kenikew is menge uuyag iring te ebeelan ku ǥuntaan. Is kada lapis te kevuwazan ebpenudtul ziyà te edsunud he lapis te kevuwazan te kebmetinumanen nu.
ISA 38:20 Nengazen, edlibriyen a kenikew, umbe seled te tivuuk he untung dey, egkanta key ziyà te valey nu he eduyuǥan te menge instrumintu.
ISA 38:21 Hein wazè pa meulii si Hezekia, migkeǥiyan sikandin ni Isaias he kepii zin te vinekbek he veǥas te higus is levag din wey meulii sikandin.
ISA 38:22 Ne mid-insà si Hezekia te, “Hengkey is tuus he tutuu he egkeulian a ne ebpekehendiyà a te valey te Nengazen?”
ISA 39:1 Dutun he timpu nezineg ni Merodac Baladan he hadì diyà te Babilonia, he anak ni Baladan he neulian en si Hezekia te zaru zin. Umbe mibpeuwit sikandin te menge surat wey gasa ziyà te ki Hezekia pinaaǥi te menge menunudtulà.
ISA 39:2 Mibpurungan seǥipaa ni Hezekia is menge menunudtulà ne impeehè din kandan is menge azen diyà te teleǥuey zin te ketiǥeyunan, is menge pelata, menge vulawan, menge penaket, menge meupiya he klasi te lana, is menge ǥumaan din wey zuma pa he menge ketiǥeyunan din. Wazà minsan hengkey he ziyà te turuǥan din etawa ginhedian din he wazè din ipeehè kandan.
ISA 39:3 Dutun he timpu, is ebpeneuven he si Isaias midhendiyà te ki Hadì Hezekia ne mid-insà te, “Hendei ebpuun heeyan he menge etew, wey hengkey is kinahanglan dan?” Midtavak si Hezekia te, “Ebpuun sikandan diyà te meziyù he lugar, he Babilonia.”
ISA 39:4 Mid-insè pa haazà is ebpeneuven te, “Hengkey is neehè dan diyà te turuǥan nu?” Midtavak si Hezekia te, “Neehè dan is langun he ziyà te turuǥan ku. Wazà minsan hengkey he ketiǥeyunan ku he wazè ku ipaahà kandan.”
ISA 39:5 Ne zutun migkaǥi si Isaias diyà te ki Hezekia te, “Pemineǥa nu heini is lalag te Nengazen he Mekeǥeǥehem.
ISA 39:6 Egkeuma is timpu he ed-uwiten diyà te Babilonia is langun he menge azen diyà te turuǥan nu, sikan is langun he netiǥum te menge kepuun nu he menge azen he kemulu pa taman en guntaan. Ne wazà egkesamà, migkaǥi is Nengazen.
ISA 39:7 Ne is duma te huziyan he menge kevuwazan nu, ebihaǥen ne egkehimu sikandan he menge suluǥuen diyà te turuǥan te hadì te Babilonia.”
ISA 39:8 Mid-isip ni Hezekia he kenà haazà egkehitavù dutun te kandin he timpu, kekenà, duen kelinew wey wazà kezeetan dutun te uuyag pa sikandin. Umbe migkaǥi sikandin diyà te ki Isaias te, “Meupiya heeyan is menge lalag te Nengazen he migkaǥi nu kedì.”
ISA 40:1 Migkaǥi is Megbevayà te, “Lipaya niw wey desiǥa is menge etew ku.
ISA 40:2 Lelaǥi niw te menayù is menge etew ziyà te Jerusalem. Tudtula niw kandan he nepasad en is kegkerasey zan wey nepesaylu en is menge salè dan. Su nezawat dan en is silut he para te langun he menge salè dan.”
ISA 40:3 Duen menunudtulà he ebpemensag diyà te sibsivayan. Ke sikandin te, “Endama niw is beyeey ziyà te sibsivayan he zutun ed-ikul is Nengazen. Tendanga niw is dalan he ed-ikulen te Megbevayè tew.
ISA 40:4 Is kada lis-evu, edtembakan te tanà, ne is kada vuntud etawa buvungan, ne ebpenhayen, ragkes is menge lugar he ebpemukbuketur.
ISA 40:5 Ne ibpezayag is mekeǥeǥehem he kebpekiduma te Nengazen, ne egkaahà heini te langun he menge etew. Su iyan mismu migkaǥi is Nengazen kayi.”
ISA 40:6 Duen migkaǥi kayi te kediey te, “Wali ka!” Midtavak a te, “Hengkey is idwali ku?” Migkaǥi sikandin te, “Iwali nu he is langun he etew, ne iring te sagbet, ne is bentuǥan dan, iring te vulak te sagbet.
ISA 40:7 Is sagbet egkeǥangu ne egketaktak is menge vulak din su egkeremaǥen heini te keramag he ibpekeramag te Nengazen. Tutuu he iring te sagbet is etew.
ISA 40:8 Is sagbet egkeǥangu ne egkengeulug is menge kevukad din, piru is lalag te Megbevayè tew ebpedayun te wazà pidtemanan.”
ISA 40:9 Sikiyu is edsangyew ziyà te Zion, is inged he Jerusalem te meupiya he tudtulanen, tekezeg kew ziyà te metikang he vuntud, ne pekezaǥing kew is edsangyew te meupiya he tudtulanen. Kenè kew mahandek he ebpemensag. Keǥiyi niw is menge etew ziyà te menge inged he sakup te Juda he nekeume en is Megbevayè dan.
ISA 40:10 Uya, nekeume en is Nengazen he MEGBEVAYÀ he mekeǥeǥehem, ne edhadì sikandin he mekeǥeǥehem. Ebpekeuma sikandin he ed-uwit te suhul he para te menge etew zin.
ISA 40:11 Ed-etimanen din is menge etew zin iring te ked-etiman te ebantey te menge kerehidu: Edsepipiyen din is dezeisey pa he menge kerehidu ne meelima sikandin he egiya zuen te menge telenati.
ISA 40:12 Hentei is ebpeketakes te zaǥat diyà te palad din wey ebpekesukud te langit pinaaǥi te kedrengawa kayi? Hentei is igkaahuk din diyà te tekesà is langun he tanà, etawa ebpekehimu he edtimbang te menge vuntud wey menge vuvungan?
ISA 40:13 Hentei is nesayud te isip te Nengazen etawa ebpekepenurù kandin ke hengkey is ereg he ebeelan din?
ISA 40:14 Hentei is mibuyuan din te sambag para mekesavut sikandin wey hentei is nenurù kandin te hustu he zalan? Hentei is mibeǥey kandin te ketau etawa migiya kandin pehendiyà te zalan te kedsavut? Wazà!
ISA 40:15 Iyan benar, is menge nasyun iring dà te tiǥis te wahig puun te teleǥuey kayi, etawa eliyavuk diyà te timbangan. Para te Megbevayà, is menge isla ke ebitbiten din, iring dà kahagkap te eliyavuk.
ISA 40:16 Is langun he menge langgam diyà te Lebanon, kenà ereg he ibpemuhat diyà te kandin, ne is menge kayu kayi, kenè pa zaan ereg he idtavun te menge pemuhat.
ISA 40:17 Kenà ebpekesusuluwan kandin is menge nasyun. Diyà te isip din, wazà bali te menge nasyun.
ISA 40:18 Umbe hentei is igkehindeg niw te Nengazen? Etawa hengkey is ibpetug-iring niw kandin?
ISA 40:19 Iyan be is menge ed-ezapen he ebeelan dà te pandey, ne ed-epizan te vulawan wey edeyzeyanan te kedina he pelata?
ISA 40:20 Etawa iyan is menge ed-ezapen he ed-as-as he kayu, he ebpeveelan te pubri he etew su idhalad din? Ebpeveelan din heini te metau he pandey su para kenà mepiley.
ISA 40:21 Wazè kew ve mesayud etawa wazà kew ve mekezineg? Wazè be nenudtul ziyà te keniyu puun te puunà ke mibmenumenu is kedlimbaǥa te kelibutan?
ISA 40:22 Iyan midhimu kayi is Megbevayà he ebpimpinuu ziyà te pinuuwè din te kedhadì diyà te zivavew te kelibutan, ne is kandin he ked-ahaa te menge etew kayi te zizalem henduen dà te menge lemetik. Mibekar zin is langit iring te kurtina. Mibekar zin heini he iring te tulda su para meubpai.
ISA 40:23 Id-awè din is gehem te menge pengulu kayi te kelibutan, ne midhimu zin sikandan he wazà menge pulus.
ISA 40:24 Neiring sikandan te pinemula he veǥu pa he midtuvù, he henduen te wazè pa mekependalid. Ne hein midhiyup te Nengazen ne neǥangu heini, ne neiring te ukap he inlayap te eribpures.
ISA 40:25 Migkaǥi is Waǥas he Megbevayà te, “Hentei is ebpetug-iringan niw kediey? Duen be iring kediey?”
ISA 40:26 Lingehè kew ziyà te langit! Hentei man is midlimbag keniyan te menge vituen? Is midlimbag keniyan iyan is Megbevayà. Midtigseselimbaha zin is kebpelepawa zin kandan ne migngezanan din te menge ngazan dan. Ne tenged te ǥehem din ne wazà minsan sevaha kandan he naawà.
ISA 40:27 Sikiyu is menge etew ziyà te Israel he menge kevuwazan ni Jacob, maan is edriklamu kew he wazà beliya te Megbevayà is menge pelanu niw wey ketenged niw?
ISA 40:28 Wazè niw ve metueni wey mezineg he is Nengazen iyan kes wazà pidtemanan he Megbevayà he midlimbag te tivuuk he kelibutan? Kenè sikandin egkeveley wey edluyahan, ne wazà ebpeketegkad te isip din.
ISA 40:29 Ebeǥayan din te zesen is menge meluya wey nengeveley.
ISA 40:30 Minsan is menge vetan-en egkeveley wey ebmeluya, ne egkengepiley sikandan,
ISA 40:31 piru sikan is edsarig te Nengazen ebpekeuman ebpekaangken te zesen. Egkeiring sikandan te edlayang he vanug; emun ebpelelaǥuy sikandan ne kenè dan egkeveley, emun edhipanew sikandan kenè dan edluyahan.
ISA 41:1 Migkaǥi is Nengazen te, “Sikiyu is menge etew ziyà te meziyù he menge lugar, kenè kew megurub ne pemineg kew kedì. Sikiyu is menge meǥinged diyà te menge nasyun, mebpekelig-en kew ne uvey kew kayi te kediey, ne keǥiya niw is menge riklamu niw. Edtiǥum kiw ne edhusayen tew heini.
ISA 41:2 Hentei is mid-umew zin is metazeng wey mezeeǥen puun te edsilaan para mekepenilbi kandin? Hentei is mibeǥey ziyà te kandin te meǥinged diyà te menge nasyun wey te menge hadì kayi? Ebpendezeetan din sikandan pinaaǥi te ispada zin wey panà; neiring sikandan te eliyavuk wey ukap he inlayap te keramag.
ISA 41:3 Edel-asen din sikandan ne wazà ebpekevelavag kandin, minsan diyà te menge lugar he sikan din pa meveyai.
ISA 41:4 Hentei man is mibaal kayi te langun? Hentei man is mibayàbayà te langun he nehitavù puun pa te nehuna he lapis te kevuwazan? Kenè be iyan a, is Nengazen he zaan en puun pa te kebpuunà te kelibutan ne kemulu gihapun taman te kegketapus te kelibutan.
ISA 41:5 “Is menge etew ziyà te meziyù he menge lugar, minsan is diyà te kinemeziyuan he vahin te kelibutan, nekaahà te menge vaal ku, ne migkerker sikandan te kegkahandek. Midtiǥum sikandan
ISA 41:6 ne mibpetebtevangè dan wey midinesiǥà.
ISA 41:7 Is menge pandey, menge platiru, wey zuma pa he menge terebahanti he ebpemaal te menge ed-ezapen midinesiǥà, he ke sikandan te, ‘Meupiya is terebahu tew.’ Ne idransang dan haazà is menge ed-ezapen diyà te selevukà duen su para kenà mepiley.
ISA 41:8 “Piru sikew Israel, is suluǥuen ku wey pinilì, he iyan menge etew nu is menge kevuwazan ni Abraham te emiǥu ku,
ISA 41:9 midtawag ku sikew wey migkuwa puun te utew meziyù he vahin te kelibutan, ne migkeǥiyan ku sikew te iyan ka suluǥuen ku. Mibpilì ku sikew ne wazè ku sikew iselikwey.
ISA 41:10 Kenè ka mahandek su iyan a zuma nu. Kenè ka meipeng su iyan a Megbevayè nu. Edlig-enan ku wey edtevangan ku sikew. Ebpengelangan ku sikew pinaaǥi te gehem ku he iyan daan ebpekeluwas kenikew.
ISA 41:11 Is langun he egkepeukan ke zan ne kenà duwazuwa he egkepeel-elezan wey egkeliveǥan. Ebpematey is langun he zuen dan pauk kenikew.
ISA 41:12 Minsan ebpen-ahaan nu pa is menge kuntada nu ne kenè nu en sikandan egkaahà. Su is nekidtebek kenikew egkehimu he wazè dan pulus.
ISA 41:13 Su siak, is Nengazen he Megbevayè nu, midlig-enan ku sikew wey migkeǥiyan te, kenè ka mahandek su edtevangan ku sikew.
ISA 41:14 Minsan deisey ka wey meluya, kenè ka mahandek su iyan a mismu edtavang kenikew. Iyan a, is Nengazen, is migkaǥi kayi. Iyan a menluluwas nu, is waǥas he Megbevayà te Israel.
ISA 41:15 Pemineg ka! Edhimuwen ku sikew he iring te gelemiten te kegunas he veǥu wey zuen din mahabet wey meǥarang he menge ngipen. Egunasen nu wey edrunteken is menge vuntud, ed-iringen nu te ukap is menge vuvungan.
ISA 41:16 Ed-ukapan nu haazà ne idlayap te keramag, ne ibpedsusuwey te eribpures. Piru sikew mulà igkelipey nu is Nengazen; edeliǥen nu is Waǥas he Megbevayà te Israel.
ISA 41:17 “Emun ebpen-ahà te wahig is pubri he menge etew ku, ne wazè dan egkaahà ne ebmemaze en is bekereng dan tenged te kegkemezahi, ne siak is Nengazen iyan edtavang kandan; siak is Megbevayà te Israel kenè ku sikandan idselikwey.
ISA 41:18 Ibpetudè ku is dekelà he menge wahig diyà te zemilag he menge vuvungan wey ibpelepew ku is menge serebseb diyà te menge suǥud. Edhimuwen ku he wehiǥen is disirtu, ne is memaza he tanà edhimuwen ku he zuen dutun teheb.
ISA 41:19 Ibpetuvù ku ziyà te disirtu is menge kayu he sidru, ekasya, mirtu, ulibu, pinu, inibru, wey sipris,
ISA 41:20 para maahà, metueni, wey mesavut te menge etew he iyan a is Nengazen, Waǥas he Megbevayà te Israel, ne iyan a midlimbag kayi.”
ISA 41:21 Migkaǥi is Nengazen, he hadì te Israel ziyà te menge ed-ezapen te, “Sigi, riklamu kew en wey mebpengetezengan!
ISA 41:22 Uvey kew ne keǥiya niw kenami ke hengkey is huziyan he egkehitavù. Keǥiya niw kenami is migkaǥi niw zengan su para metimbangtimbang dey ke netuman be heini.
ISA 41:23 Keǥiya niw kenami ke hengkey is egkehitavù keuzemà su para metueni zey he menge megbevayà kew. Baal kew te meupiya etawa mezaat su wey key meinuinu ne egkahandek key keniyu.
ISA 41:24 Piru iyan tutuu is, wazè niw pulus, ne wazè niw egkehimu. Is menge etew he mibpilì kew zan he iyan ed-ezapen dan ne utew lalung.
ISA 41:25 Mibpilì ku he edumala is sevaha he etew he ziyà ebpuun te zizaya. Midangep sikandin kayi te kediey; ne ǥuntaan ebpekeuma sikandin puun te edsilaan. Edezeetan din is menge ebpemendumala iring te kedtekutaki te mendiziyun te vasak he ebeelan din he ziniyun.
ISA 41:26 Hentei keniyu is mibpezayag he egkehitavù heini su para metueni zey ne ebpekekaǥi key he hustu is impezayag din? Wazè minsan sevaha keniyu he mibpezayag mehitenged kayi, ne wazà nekezineg te migkaǥi niw mehitenged kayi.
ISA 41:27 Iyan a, is Nengazen nehuna he migkaǥi kayi ziyà te Zion, is inged he Jerusalem. Impehendiyè ku is sevaha he menunudtulà su wey zin metudtul is meupiya he tudtul he zuen en edtavang kandan.
ISA 41:28 Mid-ehè ku ke zuen be selakew en he ed-ezapen he ebpekesambag, iyan, wazè ku naahà. Wazà minsan sevaha kandan he ebpeketavak te menge insè ku.
ISA 41:29 Pudu zan wazà pulus, ne kenà sikandan ebpekehimu. Iring dan te keramag he edlavey zà.”
ISA 42:1 Migkaǥi is Nengazen te, “Heini zed is suluǥuen ku he edlig-enan ku. Mibpilì ku heini ne ingkelipey ku sikandin. Midumala ku sikandin te Mulin-ulin ku, ne edhimuwen din diyà te menge nasyun is paaǥi he wazà duen egkevintahaan.
ISA 42:2 Kenà sikandin ebpengulahì etawa ebpemensag diyà te menge zalan.
ISA 42:3 Kenè din ebey-anan is menge meluya is kedtuu zan, etawa kenè din ed-iniyuǥan is neewaan te perateng. Tenged te kebmetinumanen din ibpetuman din is hustu he kukuman.
ISA 42:4 Kenà sikandin egkeewaan te perateng wey kezasig taman te pinaaǥi kandin kenè en egkeengkezan te edtuman is hustu he kukuman kayi te kelibutan. Minsan is menge etew ziyà te meziyù he menge lugar ebperateng te menge penurù din.”
ISA 42:5 Iyan heini egkeǥiyen te Megbevayà, kes Nengazen he mibaal te langit he henduen be te manggad he indempas din. Mibeelan din is kelibutan wey is langun he uuyag he netaǥù kayi. Iyan daan sikandin mibeǥey te ǥehinawa te menge etew wey te langun he uuyag he menge linimbag kayi te kelibutan.
ISA 42:6 Migkaǥi sikandin diyà te suluǥuen din te, “Iyan a, is Nengazen, midtawag kenikew su ibpeehè ku is ketazeng ku. Edtevangan ku wey ebpengelangan ku sikew ne pinaaǥi kenikew ebaal a te kebpekid-uyun ku te menge etew. Edhimuwen ku sikew he iring te sulù he ebpeketeyew te menge nasyun,
ISA 42:7 su wey mekaahà is menge lakap ne wey zaan ikepeǥawas is menge vihag, he nengepirisu ziyà te merusirem he pirisuwan.
ISA 42:8 Iyan a Nengazen, iyan heeyan ngazan ku! Kinahanglan he kenà ibeǥey ziyà te minsan hentei is kediey he zengeg wey kenà idalig diyà te zuma he menge ed-ezapen is kedalig he para kediey.
ISA 42:9 Is menge midtagnè ku ne nengetuman en, ne ǥuntaan ibpezayag ku is huziyan he egkengehitavù te kenè pa heini egkehitavù.”
ISA 42:10 Kentahi niw is Nengazen te veǥu he kanta! Kanta kew te menge idalig kandin, minsan sikiyu is diyà te meziyù he vahin kayi te kelibutan. Deliǥa niw sikandin, sikiyu is ebpemen-untud te varku wey is langun he menge linimbag diyà te zaǥat, wey sikiyu is diyà ed-ubpà te meziyù he menge lugar.
ISA 42:11 Deliǥa niw sikandin, sikiyu is diyà te menge inged he ziyà te sibsivayan wey sikiyu is menge meǥinged diyà te Kedar. Kanta kew tenged te kegkelipey, is menge etew ziyà te Sela. Ugyab kew ziyà te puntur te menge vuntud.
ISA 42:12 Beǥayi niw te zengeg wey deliǥa niw is Nengazen, sikiyu is diyà te meziyù he menge lugar.
ISA 42:13 Ebpekidtebek is Nengazen he iring te sundaru he andam en he ebpekidtebek. Ebpengulahì sikandin he tuus te edsurung en, ne egkezaag din is menge kuntada zin.
ISA 42:14 Egkaǥi sikandin te, “Neuǥet en he timpu he mibpereremek e zà wey mid-eǥen ku is gehinawa ku. Iyan, guntaan ibuswang ku en is pauk ku. Ebpengulahì a he ebpekeeǥes-eǥes iring te vahi he edheǥed is ebeliliten.
ISA 42:15 Edtempaǥen ku is menge vuntud ne egenguwen ku is nenuvù he menge pinemula zutun. Edhimuwen ku he memaza he tanà is menge wahig he edtudà ne ebpemezahan ku is menge wahig.
ISA 42:16 Ed-eǥaken ku is lakap he menge etew ku pehendiyà te ketutuanan, diyà te zalan he wazè dan pa zuen hanew wey wazè dan pa meikul. Is kerusireman diyà te veyeey zan edhimuwen ku he kerayag, ne ebpetaǥen ku is menge ebpemukbuketur he menge lugar ziyà te edhipenawan dan. Ebeelan ku heini, ne kenè ku sikandan idselikwey.
ISA 42:17 Piru sikan is iyan menge midseriǥan dan is menge ed-ezapen, sikan is mid-isip dan he iyan megbevayè dan is midtunew zan he menge ledawan, ebpemelaǥuy he egkengeeled-eled.”
ISA 42:18 Migkeǥiyan te Nengazen is menge etew zin te, “Sikiyu is iring te vengel wey lakap, pemineg kew wey tengteng kew!
ISA 42:19 Menge suluǥuen ku sikiyu wey menge pinilì, edsuǥuen ku sikiyu wey kew mekepenudtul, piru wazà ebpekelavew te kegkelakap wey kegkevengel niw.
ISA 42:20 Mahabet en is neehè niw piru wazè niw seǥipaa. Ebpekezineg kew pezem piru kenè kew ebpemineg.”
ISA 42:21 Egkesuatan te Nengazen he ikepaahà is ketazeng din, su wey meveǥayi te zengeg is kesuǥuan din.
ISA 42:22 Piru ǥuntaan is menge etew zin, mibpenekawan, mid-aǥew is menge azen dan, mibpirisu zan diyà te vudsi wey pirisuwan, ne wazà midtavang kandan.
ISA 42:23 Duen be keniyu egkesuat he ebpemineg etawa edseǥipà kayi te nezineg niw puun guntaan?
ISA 42:24 Hentei is midtuǥut he ebpenekawan wey ed-eǥawan te menge azen is menge Israilihanen? Kenè be iyan is Nengazen he neselaan tew? Su wazè kiw medsunud te menge paaǥi zin wey wazè kiw medtuman te kesuǥuan din.
ISA 42:25 Umbe impaahà te Nengazen kenitew is dekelà he pauk din pinaaǥi te kebpeentusa zin kenitew te tebek. Is pauk din iring te hapuy he nekevekuku wey neketutung kenitew, piru wazè tew heini isipa wey seǥipaa.
ISA 43:1 Piru ǥuntaan iyan heini egkeǥiyen te Nengazen, he midlimbag kenikew, He Israel: “Kenè ka mahandek su edlibriyen ku sikew, ngazan nu is in-umew ku kenikew, ne ǥaked ku sikew.
ISA 43:2 Emun ebayè ka ziyà te wahig, ne eduma a kenikew. Emun edlayun ka ziyà te zezekelà he menge wahig he edtudà ne kenè ka egkelened. Emun ebayè ka ziyà te hapuy, ne kenè ka egketutung; is regreg kayi ne kenà ebpekemenu kenikew.
ISA 43:3 Su iyan a, is Nengazen Megbevayè nu, he Waǥas he Megbevayà te Israel, ne iyan a menluluwas nu. Ibeǥey ku ziyà te zuma he nasyun is Ehipto, Etiopia wey Seba he ilis kenikew.
ISA 43:4 Ibeǥey ku is duma he menge etew ilis kenikew, tenged te mevali wey dungganen is ked-isipa ku kenikew, wey tenged te minahal ku sikew.
ISA 43:5 Kenè ka mahandek su zuma a kenikew. Edtiǥumen ku is menge kevuwazan nu puun te edsilaan wey edsenlepan.
ISA 43:6 Egkaǥi a ziyà te menge nasyun he ziyà te zizaya wey zivavà te vey-ani zan en is menge kevuwazan nu he edlikù diyà te tanè dan, ne ibpeulì en sikandan puun te meziyù he menge lugar.
ISA 43:7 Iyan sikandan menge etew he midtawag ku; midlimbag ku sikandan para meveǥayi a te zengeg.”
ISA 43:8 Migkaǥi zaan is Nengazen te, “Umawa is menge etew ku he zuen dan menge mata piru kenè dan ebpekaahà, duen dan menge telinga piru kenè dan ebpekezineg!
ISA 43:9 Sevahaa te kedtiǥum is langun he menge etew ziyà te nasyun. Hentei te menge ed-ezapen dan is ebpeketagnà te egkengehitavù te huziyan he timpu? Hentei kandan is nekepezayag dengan te nengehitavù guntaan? Ipezuma sikandan te menge tistiǥus he hustu is nekaǥi zan su para mezineg heini te zuma ne ebpekekaǥi zan te tutuu iyan.
ISA 43:10 Sikiyu is menge etew ziyà te Israel, iyan kew menge tistiǥus ku. Mibpilì ku sikiyu he menge suluǥuen ku wey a keniyu mekilala, ne edtuu kew kedì ne egkesavut niw he iyan e zà Megbevayà. Ne wazè en duma he Megbevayà he nehuna kedì etawa ebpeketinundug kedì.
ISA 43:11 Iyan e zà Nengazen, ne ǥawas kedì wazè en duma pa he Menluluwas.
ISA 43:12 Iyan e zà midtagnà he egkelibri kew, ne midtuman ku heini. Wazà duma he ed-ezapen he mibaal kayi ziyà te keniyu; iyan kew menge tistiǥus ku.” Migkaǥi pa is Nengazen te, “Iyan a Megbevayà.
ISA 43:13 Puun pe zengan iyan e en Megbevayà. Wazà ebpekelingkawas puun te ǥehem ku. Wazà ebpekehimu he edhalin te menge vaal ku.”
ISA 43:14 Iyan heini egkeǥiyen te Nengazen, he menluluwas niw, he Waǥas he Megbevayà te Israel, “Para melibri kew, ibpesurung ku is Babilonia te menge sundaru te sevaha he nasyun, ne ebpemelaǥuy is menge tig-Babilonia ziyà te menge varku he ibpahambug dan.
ISA 43:15 Iyan a, is Nengazen, he Waǥas he Megbevayè niw, iyan a mibaal te Israel, iyan a hadì niw.
ISA 43:16 Iyan a, kes Nengazen he mibaal te veyeey ziyà te teliwazà te zaǥat.
ISA 43:17 Midtiǥum ku is menge kerwahi, menge kudà, wey menge sundaru te Ehipto, ne midezeetan sikandan diyà te zaǥat, ne kenè en sikandan ebpekeenew. Neiring sikandan te sulù he neevukan.
ISA 43:18 Piru kenè niw en siguduwi isipa is midlavey en,
ISA 43:19 su beǥu en is menge ebeelan ku. Ne neveelan en heini, wazè niw ve maahà? Ebaal a te zalan wey menge teheb diyà te disirtu.
ISA 43:20 Minsan is leew he menge langgam ebeǥey kedì te zengeg, ragkes is leew he menge asu wey is menge ekang, su mibeǥey a te menge teheb diyà te disirtu su para zuen meinum te menge etew he pinilì ku.
ISA 43:21 Iyan heini menge etew he midlimbag ku su para mehimu he kediey, wey para deliǥa e zan.
ISA 43:22 “Piru wazè ka mebuyù te tavang kayi te kediey, Israel, su midsemu ke en kediey.
ISA 43:23 Wazà a kenikew pemuhata te menge kerehidu he pemuhat he edtutungen. Wazà a kenikew beǥayi te zengeg pinaaǥi te menge pemuhat su wazè ku man sikew lisliseza wey ka bungasa pinaaǥi te kebuyù diyà te kenikew te menge pemuhat he para gasa wey menge veyewà.
ISA 43:24 Wazà a kenikew pemesahi te veyewà etawa wazà a kenikew pezaa te tavà te menge pemuhat nu. Piru mibpeveǥatan a hinuun kenikew wey midsamuk nu te menge salè nu.
ISA 43:25 “Iyan a mismu mid-awà te menge salè nu su para meveǥayi a te zengeg, ne kenè ku en heini edtentenuzan.
ISA 43:26 Ed-isipen ta is nenlavey en; ne edhusey ki. Ipahayag nu is ketezengan nu te kepengintutuu he wazè nu salà.
ISA 43:27 Nekesalà is nehuna he kepuun nu, wey midsupak kedì is menge pengulu nu.
ISA 43:28 Umbe mibpeel-elezan ku is menge memumuhat nu ne mibpezèdeetan ku sikew, Israel, wey mibpeel-elezan.
ISA 44:1 “Piru ǥuntaan, pemineg ka, Israel is suluǥuen ku, kes menge etew he mibpilì ku, he menge kevuwazan ni Jacob.
ISA 44:2 Iyan a Nengazen, iyan a midlimbag kenikew wey midtavang kenikew. Kenè ka mahandek, is suluǥuen ku wey pinilì ku he menge etew.
ISA 44:3 Su ebeǥayan ku sikew te wahig he ebpekevawì te kegkemezahi nu wey edhames te memaza he tanè nu. Ebpeulinan ku te Mulin-ulin ku is menge kevuwazan nu wey edtuvazan ku sikandan.
ISA 44:4 Ed-uswag dan iring te merapung he menge sagbet diyà te wehiǥen etawa menge kayu ziyà te veyvey te dezeisey he menge wahig.
ISA 44:5 Duen egkaǥi te, ‘Gaked a te Nengazen,’ ne is duma egkaǥi te, ‘Kevuwazan a ni Jacob.’ Duen daan idsurat dan diyà te menge velad dan is ngazan te Nengazen, ne ed-isipen dan is keugelingen dan he ragkes sikandan te menge Israilihanen.
ISA 44:6 “Iyan heini egkeǥiyen te Nengazen, kes hadì wey Menluluwas te Israel, he Mekeǥeǥehem he Nengazen: Iyan a kes nehuna wey egkepengkusan te langun. Wazè en duma he Megbevayà gawas kediey.
ISA 44:7 Hentei is iring kediey? Ipekaǥi sikandin diyà te etuvangan ku ke hengkey is nehitavù puun te kedhimuwa ku te menge etew ku he sevaha he nasyun dutun te nehuna he timpu. Ne keǥiya zin daan ke hengkey is egkehitavù keuzemà.
ISA 44:8 Kenè kew mahandek wey kulbai. Kenè be impezayag ku en keniyu zengan is menge tuyù ku keniyu? Ne iyan kew mismu menge tistiǥus ku is menge Israilihanen. Duen pe be selakew en he Megbevayà gawas kedì? Wazè en! Wazè en netuenan ku he endilungà he vatu gawas kediey.”
ISA 44:9 Wazà pulus te langun he ebaal te menge ed-ezapen. Heini is menge ed-ezapen he mid-isip dan he mahal ne wazè din bali. Iyan mismu sikandan ebpekepengintutuu he wazà kayi vali. Su kenà heini ebpekaahà wey wazà netuenan din. Umbe và dà egkepeel-elezi is ed-azap kayi.
ISA 44:10 Tulebung is etew he ebaal te menge ed-ezapen su kenè man heini ebpulus diyà te kandin.
ISA 44:11 Pemineg kew! Egkepeel-elezan is langun he ed-azap te zuma he menge ed-ezapen, su is mibaal kayi menge etew zà daan. Ipetiǥum sikandan is langun para mepengelangi zan is keugelingen dan, ne egkahandek dan su egkepeel-elezan dan.
ISA 44:12 Is pandey te vulawan etawa pelata idsavuk din haazà diyà te vaǥa. Ne ebpendesdesenan din heini te ebmasu su para mepurma he ledawan he ed-ezapen. Edluhayan sikandin tenged te kegkevitil wey henduen be te egkevidtawan en tenged te kegkemezahi zin.
ISA 44:13 Is pandey te kayu edsukuzen din is sengetamped he kayu. Edtuusan din heini ne ebpurmahan din he etew pinaaǥi te menge himan din ne ebeelan din heini te mekempet he zagwey te etew ne ibpelastar zin diyà te simbahan.
ISA 44:14 Ne para zuen kayu he egkeǥamit din te kebaal kayi, edtamped sikandin te kayu he sidru, etawa ulayan he ibpetuvù din diyà te ketelunan. Ebpemula zaan sikandin te kayu he pinu, ne pinaaǥi te uzan edtuvù heini.
ISA 44:15 Ne egemiten din is duma he menge kayu he para te idtavun din, su wey sikandin mekehizazang, ne wey zaan mekehilutù te supas. Ne is duma zutun ebeelan din he ed-ezapen, ne edluhuzan din heini wey ed-ezapen.
ISA 44:16 Idtavun din is duma he menge kayu su wey sikandin meketuug te usa diyà te vaǥa kayi. Ne egkeenen din haazà is tinuug ne egkahantey sikandin. Edhizazang daan sikandin dutun te hapuy, ne ke sikandin te, “Meupiya su neinitan a.”
ISA 44:17 Ne is duma he menge kayu ebeelan din he ed-ezapen. Edluhuzan din wey ed-ezapen din heini he ed-ezapen, ne ebpengemuyù sikandin dutun he egkaǥi te, “Libriya a, su iyan ka megbevayè ku.”
ISA 44:18 Heini he menge etew wazà mesayud wey wazà mekesavut te ebeelan dan. Nesebpengan is menge mata zan umbe kenà sikandan ebpekaahà. Nesirahan is menge isip dan umbe kenè dan ebpekesavut.
ISA 44:19 Wazè en kandan ebpurung ed-isip-isip wey zin meisip te, “Intavun ku is duma zuen te menge kayu, ne midhilutù a te supas, ne midtuug a te usa diyà te vaǥa kayi, ne migkaan a. Ne ǥuntaan ebeelan ku ve he utew mezaat he vutang is nesamà he kayu? Ed-ezapen ku ve is sevaha he tamped te kayu?”
ISA 44:20 Iring dà sikandin te migkaan te avu. Is nerusireman he isip din iyan midtazin kandin, ne kenè din egkelibri is keugelingen din. Kenè din egkezawat he haazà is ed-ezapen he migewezan din ne kenà tutuu he megbevayà.
ISA 44:21 Migkaǥi is Nengazen te, “He Israel, tentenuzi nu heini, su suluǥuen ku sikew. Midlimbag ku sikew su wey a kenikew mesilbiyi, ne kenè ku sikew egkelipatan.
ISA 44:22 Id-awè ku en is menge salè nu iring te kivel etawa gapun. He Israel, likù ka kayi te kedì, su edlibriyen ku sikew.”
ISA 44:23 Megkanta tenged te kegkelipey, is langit! Habet ka pengulahì, is kelibutan! Kanta kew is menge vuvungan wey menge kayu ziyà te ketelunan, su ebeelan heini te Nengazen. Edlibriyen din is menge kevuwazan ni Jacob; ibpeehè din diyà te Israel is kegkemekeǥeǥehem din.
ISA 44:24 Iyan heini egkeǥiyen te Nengazen he Menluluwas niw, he midlimbag keniyu: Iyan a Nengazen he mibaal te langun he menge vutang. Iyan e zà midempas te langit wey mibaal te kelibutan.
ISA 44:25 Wazè ku mehimuwa he metuman is menge tagnà te teruen he menge ebpeneuven. Ne edhimuwen ku he menge tulebung is menge menenagnà. Edhimuwen ku he kenà medselir is ketau te menge uluwanen, wey edhimuwen ku he kenà ebpulus is netuenan dan.
ISA 44:26 Edtumanen ku is menge tagnà te suluǥuen ku wey menunudtulà. Migkaǥi a he egkeumanan egkeubpai is Jerusalem, ne ed-umanan ebenguna is menge inged diyà te Juda he nengevengkag.
ISA 44:27 Emun edsuǥuen ku is wahig he edtudà he mebpekemaza ne egkemezahan heini.
ISA 44:28 Migkeǥiyan ku si Cyrus te, “Iyan ka ed-elima te menge etew ku, ne veeli nu is langun he egkesuatan ku. Ne suǥù ka he ed-umanan ebenguna is Jerusalem wey is baley kayi.”
ISA 45:1 Iyan heini migkaǥi te Nengazen diyà te ki Cyrus he pinilì din, ne iyan sikandin midlig-en te ǥehem kayi, “Sekupa nu is menge nasyun, ne zaaǥa nu is menge hadì. Puwasi nu is menge pultahan te menge inged dan te ked-aǥew kayi ne kenè en heini edlekevan.
ISA 45:2 Ebpetelihuna a su ed-endamen ku is beyeey nu, ne ebpetaǥen ku is menge vuvungan. Ebengkaǥen ku is menge pultahan he brunsi wey is putew he menge trangka kayi.
ISA 45:3 Ibeǥey ku kenikew is nekeeles he menge ketiǥeyunan, su wey nu metueni he iyan a, is Nengazen he Megbevayà te Israel midtawag kenikew.
ISA 45:4 Midtawag ku sikew su wey nu metevangi is Israel he suluǥuen ku, he iyan kes menge etew he pinilì ku. Mibeǥayan ku sikew te zengeg minsan wazè ka mekekilala kedì.
ISA 45:5 Iyan a Nengazen, ne wazè en duma; gawas kediey ne wazè en duma he Megbevayà. Ebeǥayan ku sikew te zesen minsan wazà a kenikew mekilala,
ISA 45:6 su para metueni te menge etew kayi te tivuuk he kelibutan he wazè en duma he Megbevayà gawas kedì. Iyan a Nengazen, ne wazè en duma.
ISA 45:7 Iyan a mibaal te kerayag wey kerusireman. Kediey he ketau is keupiyaanan wey kezeetan. Iyan a Nengazen, iyan a mibaal kayi te langun.
ISA 45:8 Ebeǥey a te kezeeǥan duma is ketazeng, iring te kebeǥey te langit etawa kivel te uzan. Ne edewaten heini te menge etew kayi te kelibutan. Ebpekelepew is keluwasan wey is kezeeǥan duma is ketazeng iring te pinemula he edtuvù. Iyan a, is Nengazen midhimu kayi.
ISA 45:9 Mekehizuhizu is ebpekiberawà te Megbevayà he mibaal kandin. Iring dà sikandin te diniyun. Ebpekeriklamu ve is tanà diyà te mendiziyun ke hengkey is ebeelan din? Etawa ebpekeriklamu ve sikandin te kenà utew metau is mendiziyun?
ISA 45:10 Mekehizuhizu is anak he egkaǥi ziyà te ginikanan din te, ‘Maan is in-anak a keniyu he iring kayi?’ ”
ISA 45:11 Iyan heini migkaǥi te Nengazen he Waǥas he Megbevayà te Israel wey midlimbag kandin, “Edriklamu kew ve tenged te menge vaal ku? Ebeyveyaan e ve keniyu te ereg he ebeelan ku?
ISA 45:12 Iyan a mibaal te kelibutan, wey te etew he ed-ubpà kayi. Is menge velad ku iyan midempas te langit, ne kediey he suǥù is kedlepew te andew, bulan, wey menge vituen.
ISA 45:13 Iyan a mismu mibpezumala ki Cyrus te kedtuman te metazeng he tuyù ku. Iyan a metau para hustu is langun he menge paaǥi zin. Ed-umanan din ebenguna is inged ku ne ebeǥayan din te vayàbayà is menge etew ku he menge vinihag. Ebeelan din heini, kenà tenged te edsuhulan sikandin etawa ebprimyuwan.” Iyan a, is Nengazen he Mekeǥeǥehem, is migkaǥi kayi.
ISA 45:14 Migkeǥiyan te Nengazen is Israel te, “Egkehimu he sakup nu is menge tig-Ehipto wey menge tig-Etiopia, ragkes en is menge tig-Seba he memelangkew is menge maama kandan. Edhendiyà sikandan te kenikew he ed-uwit te menge ketiǥeyunan dan wey menge pruduktu. Egkehimu sikandan he menge vihag nu. Edluhuzan ke zan duma is kebpehizuhizu he egkaǥi te, ‘Tutuu he nekiduma kenikew is Megbevayà ne iyan dà sikandin Megbevayà!’ ”
ISA 45:15 He Megbevayà wey Menluluwas te Israel, tutuu he Megbevayè ka he kenà ebpaahà.
ISA 45:16 Egkepeel-elezan wey edsudien is langun he mibaal te menge ledawan he ed-ezapen.
ISA 45:17 Piru edlibriyen nu mulà, Nengazen, is Israel, ne wazà pidtemanan te kelibriyanan dan. Kenè en sikandan egkepeel-elezan taman te taman.
ISA 45:18 Iyan ka Nengazen, kes Megbevayà. Midlimbag nu is langit wey is kelibutan. Wazè nu himuwa is kelibutan he mehiǥawan, kekenà, mibeelan nu heini su wey meubpai. Migkaǥi ka te, “Iyan a Nengazen, ne wazè en duma pa.
ISA 45:19 Wazè ku ieles is kegkaǥi ku, he wazà duen netau. Wazè ku keǥiyi is menge kevuwazan ni Jacob he medangep dan kayi te kedì he wazè dan egkepupulus. Siak, is Nengazen, egkeǥiyen ku is tutuu. Ibpehayag ku ke hengkey is hustu.”
ISA 45:20 Migkaǥi zaan is Nengazen te, “Medtiǥum kew ne uvey kew kayi te kediey, sikiyu is nemekepelaǥuy puun te menge nasyun. Wazà ketau te menge etew he ed-uwit-uwit te menge kayu he ed-ezapen dan. Mibpengemuyù dan kayi te menge ed-ezapen dan he kenà ebpekelibri kandan.
ISA 45:21 Pein-inseey kew, ne ipezayag niw is ketezengan niw. Hentei is midtagnè dengan te egkengehitavù? Kenè be iyan a, is Nengazen? Wazè en duma he Megbevayà, kekenà, iyan e zà–kes metazeng he Megbevayà wey Menluluwas.
ISA 45:22 “Sikiyu is langun he menge etew kayi te tivuuk he kelibutan, dangep kew kayi te kediey su wey kew melibri, su iyan a Megbevayà, ne wazè en duma.
ISA 45:23 Nenangdù a pinaaǥi te keugelingen ku, ne egkeseriǥan is mibpengaǥi ku ne kenè en heini egkahalin: Edluhuzan a te langun he etew, ne ebpenangdù dan he ebpekid-uunungen sikandan kediey.
ISA 45:24 Egkaǥi sikandan te, ‘Pinaaǥi zà te Nengazen ebpekaangken is etew te zesen wey kezeeǥan duma is ketazeng.’ ” Is langun he edumut te Nengazen ed-uvey ziyà te kandin is egkengepeel-elezan.
ISA 45:25 Tenged te tavang te Nengazen, is langun he kevuwazan ni Israel ebpekaangken te kezeeǥan duma is ketazeng, ne edalig dan kandin.
ISA 46:1 Is menge ed-ezapen diyà te Babilonia he si Bel wey si Nebo ebpekezungul zutun te kegkergaha kandan te kerwahi he eguyuzen te menge asnu. Meveǥat heini he karga te egkeveley he menge asnu.
ISA 46:2 Pudu heini ebpekezungul ne kenè dan ebpekehimu he edlibri te mid-uwit kandan. Ragkes mismu heini is dezuwa he mibihag.
ISA 46:3 Pemineg kew kediey is menge kevuwazan ni Jacob, wey sikiyu is langun he nesamà he menge etew te Israel. Mid-atur ku sikiyu puun pa te kegkeetew niw.
ISA 46:4 Minsan ebmeǥurang kew en wey ed-uvanen en, iyan a ed-atur keniyu. Midlimbag ku sikiyu ne ebentayan ku sikiyu. Edtevangan ku sikiyu wey edlibriyen.
ISA 46:5 Hentei is ebpetug-iringan niw kediey? Duen be iring kedì?
ISA 46:6 Is duma he menge etew ibpeǥawas dan is bulawan wey pelata zan, ne edsuluhan dan is platiru su wey zin heini meveeli he ledawan su ed-ezapen dan, ne ed-ezapen dan heini.
ISA 46:7 Edtiangen dan heini, ne id-untud dan diyà te selevukà duen, ne zutun dà heini. Ne kenè en ebpekaawà dutun. Emun duen ebpengemuyù dutun, ne kenà heini edtavak, ne kenà heini ebpekelibri kandan te menge kelised dan.
ISA 46:8 Tentenuzi niw heini, sikiyu is menge mesinupaken, ne ipemula niw heini ziyà te isip niw.
ISA 46:9 Tentenuzi niw zaan is menge mibeelan ku zutun te nengehuna he timpu. Su iyan e zà Megbevayà, ne wazè en duma. Iyan a Megbevayà ne wazà iring kediey.
ISA 46:10 Puunè pa, impezayag ku en is diyà te egkehunaan. Puun pa zengan, midtagnè ku en ke hengkey is egkehitavù. Egketuman is menge pelanu ku; ebeelan ku is langun he egkesuatan ku te ebaal.
ISA 46:11 Ed-umew a te sevaha he etew he ebpuun diyà te meziyù he lugar ziyà te edsilaan, ne edtumanen din is pelanu ku. Edagmang sikandin iring te tagbis he ebpendawi. Is nekaǥi ku wey pelanu ku ne edtumanen ku heini.
ISA 46:12 Pemineg kew kediey, is utew menge mesinupaken. Kenè kew ebpekaangken te metazeng he kezeeǥan.
ISA 46:13 Kenà egkeuǥet, ebeǥayan ku te kezeeǥan wey ketazeng is Jerusalem. Uya, meǥaan ku en heini edlibriya, ne ebeǥayan ku te zengeg is Israel.
ISA 47:1 Migkaǥi is Nengazen te, “Pinuu ka ziyà te tanà, Babilonia. Pinuu ka he wazè nu pinuuwà te kedhadì. Sikew is iring te vahi he wazè pa mehileveti kenè ke en edtewaǥen he mezagwey etawa meredtan.
ISA 47:2 Neuripen ke en guntaan, umbe kuwa ka te ǥelingan ne ǥaling ka te trigu. Iawè nu is lembung nu, ne lislisa nu is bisti nu su para maahà is menge vuvun nu zutun te kedlayun nu te wahig.
ISA 47:3 Egkaahà is kegkelavasi nu ne egkepeel-elezan ka. Ebelesan ku sikew ne kenè ku en sikew egkehizuwan.”
ISA 47:4 Is Menluluwas tew, he iyan ngazan din is Nengazen he Mekeǥeǥehem, iyan Waǥas he Megbevayà te Israel.
ISA 47:5 Migkaǥi pa is Nengazen te, “He Babilonia, pinuu ka he melinawen diyà te merusirem he lugar. Su kenè ke en maan egngezanan te rayna te menge ginhedian.
ISA 47:6 Nepeukan ku is menge etew he ǥaked ku, ne inselikwey ku sikandan. Umbe imbeǥey ku sikandan kenikew, ne wazè nu sikandan mehizuwi. Ne minsan ganì is menge meǥurang en kandan ne midaagdaag nu.
ISA 47:7 Migkaǥi ke pa te is kegkerayna nu ne wazà pidtemanan! Umbe wazè nu en is-isipa heini is mibeelan nu te menge etew ku wey ke hengkey is egkehimu he rimeǥas kayi ziyà te kenikew.
ISA 47:8 Umbe ǥuntaan pemineǥa nu heini, sikew is dekelà is gehinawa zin te kedlipeylipey wey egkeisip nu he wazè en ebpekezezaat kenikew. Migkaǥi ka ziyà te gehinawa nu he iyan ke en Megbevayà, ne wazè en duma gawas kenikew. Mid-isip nu he kenè ke en egkevalu etawa egkeewaan te anak.
ISA 47:9 Piru egketik-ew heini egkehitavù kenikew: Egkevalu ka wey egkaawà diyà te kenikew is menge anak nu. Egkehitavù heini is langun diyà te kenikew minsan mahabet is netuenan nu he kedserumangka wey kedlamat.
ISA 47:10 Minsan lalung ka ne kunaan nu ke wazà ebpekezezaat kenikew su wazà nekaahà kenikew zutun te kedlalunglalung nu. Is ketau wey keuluwanen nu iyan neketazin kenikew, wey midsuǥù kenikew te kegkaǥi te, ‘Iyan a Megbevayà, ne wazè en duma gawas kediey.’
ISA 47:11 Umbe, ebpekeuma ziyà te kenikew is kezeetan ne kenè nu egketuenan ke ebmenmenuwen nu te edsegseg pinaaǥi te kegkeselemengkiru nu. Ebpekeuma ziyà te kenikew is kezeetan he kenà egkehimu he ebayad ka para med-engked. Ebpeketik-ew ebpekeuma ziyà te kenikew is kezeetan he wazè nu isipa.
ISA 47:12 Sigi, ipelaus nu en is kegkeselemengkiru nu wey lamat he ebeelan nu puun te vatè ke pa. Kela ke mebmezeeǥen ka, etawa egkahandek is menge kuntada nu.
ISA 47:13 Emun edtepulen ke en te mahabet he egkesuatan nu te ebaal, ne peuǥup ka te menge etew nu he menge memimituen wey menge menenagnà he kada vulan is kedtegnaa zan te egkehitavù kenikew.
ISA 47:14 Benar iyan, iring dà sikandan te reǥami he melemu zà egkevinsuli. Kenà ganì sikandan ebpekelibri te keugelingen dan wey zan kenà metutung. Heini he hapuy kenà egkehimu he edhizezangan su utew meinit.
ISA 47:15 Ne hengkey is egkehimu te menge etew he ebuyuan nu te sambag puun te vatè ke pa? Ne netazin is kada sevaha kandan ne kenè dan ebpekelibri kenikew.
ISA 48:1 “Pemineg kew is menge kevuwazan ni Jacob, he egngezanan te Israel, he ebpuun diyà te tribu ni Juda. Nenangdù kew pinaaǥi te ngazan te Nengazen, wey mid-umew niw is Megbevayà te Israel. Piru kenà heini ebpuun diyà te gehinawa niw, su kenè kew menge metazeng.
ISA 48:2 Egngeranan niw is keugelingen niw he meǥinged diyà te segradu he inged, ne egkaǥi kew te edsarig kew te Megbevayà te Israel, he iyan ngazan din is Nengazen he Mekeǥeǥehem.”
ISA 48:3 Egkeǥiyan kew zin te, “Midtagnè ku en dengan ke hengkey is egkehitavù keuzemà te huziyan he timpu. Ne midtik-awan ku heini tumana.
ISA 48:4 Netuenan ku ke sengemenu is kebmesinupaken niw. Is tengel niw igkepetug-iring te kezesen te putew ne is buked niw igkepetug-iring te kezesen te brunsi.
ISA 48:5 Umbe, zaan ku en he migkaǥi ziyà te keniyu is ebeelan ku. Te wazè pa heini mehitavù mibpeseyuzan ku en keniyu su para kenè kew mekekaǥi he iyan is menge kayu wey menge mital he ed-ezapen niw midtagnà wey midtuman kayi.
ISA 48:6 Nezineg niw is menge tagnè ku wey neehè niw is kegketumana kayi, piru kenè niw edewaten he kediey he vaal haazà. Puun guntaan egkeǥiyan ku sikiyu te veǥu he egkengeulaula he wazè ku pa ikepezayag diyà te keniyu; ne wazè niw pa metueni.
ISA 48:7 Guntaan ku pa heini ebeeli; wazè niw pa heini mezineg dutun te nehuna he timpu su para kenè kew mekekaǥi te, ‘A, netuenan ku en heeyan!’
ISA 48:8 Wazè niw mezineg wey mesavut heini he menge hitavù su puun pa zengan mibpevevengel kew en. Netuenan ku ke sengemenu is kemeluiven niw, su puun pa te kegkeetew niw ne menge mesinupaken kew en.
ISA 48:9 Ne para meveǥayi a te zengeg, ed-eǥenen ku is pauk ku keniyu, su wey kew kenà mezeeti.
ISA 48:10 Pemineg kew! Edlumpiyuwan ku sikiyu, piru kenà iring te kedlumpiyuwi te pelata; su edlumpiyuwan ku sikiyu pinaaǥi te kemeresayan.
ISA 48:11 Ebeelan ku heini para te zengeg ku. Kenè ku idtuǥut he mepeel-elezi a. Kenè ku idtuǥut he iyan egkeveǥayan te zengeg is duma he menge ed-ezapen.
ISA 48:12 “Pemineg kew, is menge tig-Israel he menge pinilì ku. Iyan a Megbevayà; iyan a kes nehuna wey egkepengkusan te langun.
ISA 48:13 Iyan a mismu midsavuk te pundasyun te kelibutan wey iyan a midempas te langit. Ne ebpezumazuma heini ke edsuǥuen ku.
ISA 48:14 “Medtiǥum kew is langun, ne pemineg kew: Hentei te menge ed-ezapen is midtagnè din he edsurungen te emiǥu ku is Babilonia su wey zin metuman is pelanu ku he ebpekesuǥat kayi he nasyun? Wazà!
ISA 48:15 Iyan a mismu migkaǥi wey mid-umew kayi te emiǥu ku. Edsuǥuen ku sikandin ne edlampus sikandin te ebeelan din.
ISA 48:16 Uvey kew kayi te kediey ne pemineǥa niw heini. Puun pa te puunà ne wazà a megkaǥi ziyà te meeles; ne zutun te timpu te kegkehitevua te migkaǥi ku, ne zutun a.” Ne ǥuntaan, is Nengazen he MEGBEVAYÀ wey is Mulin-ulin din midsuǥù kediey wey ku metudtul heini he menge lalag:
ISA 48:17 “Migkaǥi is Nengazen he Menluluwas niw, he iyan kes Waǥas he Megbevayà te Israel: Iyan a kes Nengazen he Megbevayè niw, nenurù keniyu ke hengkey is meupiya para keniyu wey migiya keniyu pehendiyà te hustu he zalan.
ISA 48:18 Angin pezem ke midtuman niw is menge suǥù ku, su egkeiring pezem te wahig he edtudà diyà te keniyu is menge keupiyaanan, ne ebpekedtutundug dà pezem is menge kezeeǥan niw iring te menge vaǥel he ebpenhendiyà te veyvey.
ISA 48:19 Egkeiring pezem te pantad he kenà egkevilang is menge kevuwazan niw, ne kenà pezem sikandan egkezeetan wey egkahanew ziyà te etuvangan ku.”
ISA 48:20 Awè kew ziyà te Babilonia! Isangyew niw kayi te tivuuk he kelibutan duma is kelipey he midlibri te Nengazen is menge suluǥuen din, he iyan is menge etew ziyà te Israel.
ISA 48:21 Wazà sikandan memezahi hein mibpenguluwan sikandan te Megbevayà diyà te sibsivayan, su impetudè din puun te vatu is wahig he egkeinum dan. Impeveka zin is batu ne midlepew zutun is wahig.
ISA 48:22 Piru is menge lalung kenà sikandan ebpekaangken te meupiya he kebpekesavuk.
ISA 49:1 Pemineg kew kediey, sikiyu is diyà te meziyù he menge lugar. Hein wazà e pa ianak mid-umew e en te Nengazen te kedsilbi kandin.
ISA 49:2 Midhimu zin is menge lalag ku he iring keǥarang te ispada. Midipinsahan e zin pinaaǥi te ǥehem din. Midhimu e zin he iring kesinew te besut te panà he andam en he egemiten.
ISA 49:3 Migkaǥi sikandin kayi te kedì te, “Israel, iyan ka suluǥuen ku. Pinaaǥi kenikew, ebeǥayan a te menge etew te zengeg.”
ISA 49:4 Piru migkaǥi a te, “Wazà mebpulus is kedhaǥù ku; tekew e zà neveley te kebaal te wazè din pulus.” Piru idsarig ku en heini te Nengazen he Megbevayè ku; iyan en sikandin metau he edsuhul kedì.
ISA 49:5 Puun pa ziyà te ǥetek te iney ku in-andam ad te Nengazen he egkehimu he suluǥuen din su para metiǥum wey ikelikù is menge Israilihanen diyà te kandin. Mibeǥayan a te Nengazen te zengeg, ne mibeǥayan a te zesen kayi te Megbevayè ku.
ISA 49:6 Migkaǥi sikandin te, “Sikew is suluǥuen ku, zuen pa zekelà he vuluhaten ku he ebpeveelan ku kenikew, gawas te kebpelikùa nu te menge Israilihanen he ebpengelangan ku. Edhimuwen ku pa sikew he iring te sulù he ebpeketayew te menge nasyun, su para zuen kelibriyanan kayi te tivuuk he kelibutan he egkaangken te menge etew.”
ISA 49:7 Is Nengazen, he Menluluwas wey Waǥas he Megbevayà te Israel, migkaǥi sikandin diyà te etew he edsudien wey igkeremerik te menge etew ziyà te menge nasyun, wey te suluǥuen te menge pengulu. Ke sikandin te, “Egkaahà te menge hadì ke hentei ka ne edhitindeg sikandan te kedtahud kenikew. Is menge pengulu edunghuy te kebeǥey te zengeg kenikew. Egkeulaula heini tenged kediey te Nengazen he metinumanen, he iyan kes Waǥas he Megbevayà te Israel. Iyan a mibpilì kenikew.”
ISA 49:8 Iyan heini migkaǥi te Nengazen: “Dutun te hustu he timpu edlibriyen ku sikew, edtevaken wey edtevangan ku sikew. Edipinsahan ku sikew ne pinaaǥi kenikew ebpekid-uyun a te menge etew. Ed-umanan nu ebenguna is nasyun he Israel he nevengkag, ne idlikù nu ibeǥey te menge etew ku.
ISA 49:9 Egkeǥiyan nu is menge Israilihanen he vinihag wey pinirisu ziyà te merusirem he lugar te, ‘Gawas kew! Su gewasnen kew en!’ “Ne egkeiring sikandan te menge kerehidu he ebpemenabtab diyà te kilid te menge zalan wey menge vuvungan he mehiǥawan dengan.
ISA 49:10 Kenà sikandan egkevitil wey egkemezahan. Kenà ebpekekaid kandan is keinit te andew wey meinit he keramag diyà te disirtu. Su siak is hihizuwen, egiyahan ku sikandan diyà te menge teheb.
ISA 49:11 Ebeelan ku he zalan is menge vuvungan ku su para veyeey zan. Ne is metikang he menge lugar egkehimu he meluag he menge zalan.
ISA 49:12 Ebpekeuma is menge etew ku he ebpemuun diyà te meziyù–is duma ebpuun diyà te zizaya, is duma ebpuun diyà te edsenlepan, ne is duma pa ebpuun diyà te Sinim.”
ISA 49:13 Kanta ka te kegkelipey, is langit! Lipey ka, is kelibutan! Kanta kew is menge vuvungan! Su edlipayen wey egkehizuwan te Nengazen is menge etew zin he nengerasey.
ISA 49:14 Piru migkaǥi is menge etew ziyà te Jerusalem te, “Inselikwey key en te Nengazen; midlipatan key zin en.”
ISA 49:15 Iyan, midtavak is Nengazen te, “Egkelipatan be te iney is anak din? Kenè din be egkehizuwan is batà he in-anak din? Minsan egkelipatan din, ne kenè ku mulà sikiyu egkelipatan!
ISA 49:16 “He Jerusalem, kenè ku sikew egkelipatan. Insurat ku is ngazan nu ziyà te menge palad ku. Layun ku ed-is-isipa is ked-umana kebenguna te menge verengbeng nu.
ISA 49:17 Hapit en ebpekeuma is ed-uman ebangun kenikew, ne ed-ewaan ke en duen te menge midezaat kenikew.
ISA 49:18 Ahaa nu is peliǥuy nu, is menge etew nu, midtiǥum en ne mid-uvey ziyà te kenikew. Siak, is uuyag he Nengazen, ebpenangdù a he igkepehivantug nu sikandan iring te kebpehivantug te vahi he ed-esewaan te menge zayandayan he egemiten din.
ISA 49:19 Nezeetan ka wey nehimu he mekevulungbulung, piru ǥuntaan ed-ubpaan ke en te menge etew nu; hapit sikandan kenà ed-ereg diyà te kenikew. Ne sikan is menge midezaat kenikew ne ebpekepeziyù en.
ISA 49:20 Is menge etew nu he nengeetew zutun te timpu te kedlalew nu, egkaǥi ziyà te kenikew te, ‘Utew zà meliǥet heini he lugar para kenami. Kinahanglan dey is meluag pa kayi he lugar.’
ISA 49:21 Ne egkaǥi ka ziyà te gehinawa nu te, ‘Hentei ves is mid-anak kandan para kediey? Neǥerà is mahabet he menge etew ku, ne tenged kayi neseeng a. Is duma kandan mibihag pehendiyà te zuma he lugar, ne sebsevaha ku zà te nesamà. Ne hendei heini sikandan ebpuun? Hentei is mid-anak-anak kandan?’ ”
ISA 49:22 Iyan heini egkeǥiyen te Nengazen he MEGBEVAYÀ: “Pemineg ka! Ed-uyawan ku is menge nasyun, ne idlikù dan diyà te kenikew is menge etew nu he iring te menge vatà he edsepipiyen.
ISA 49:23 Ebpenilbi kenikew is menge hadì wey menge rayna. Iyan sikandan ed-atur kenikew. Edluhud sikandan is edtahud kenikew, ne ebpesakup dan kenikew. Ne zutun egketuenan nu he iyan a Nengazen, ne is edsarig kediey ne kenà egkepakyas.”
ISA 49:24 Egkahawì nu ve is mibpen-aǥew te mesipala he menge sundaru? Egkelibri nu ve is menge mibihag dan?
ISA 49:25 Piru iyan heini egkeǥiyen te Nengazen: “Uya, egkelibri nu is menge mibihag te mesipala he menge sundaru, ne egkahawì nu is mibpen-aǥew zan. Su ebpekidtebek a te menge nekidtebek kenikew, ne edlibriyen ku is menge etew nu.
ISA 49:26 Ibpekaan ku te menge midaagdaag kenikew is keugelingen dan he lawa, ne iring te vinu egkelangut dan te keugelingen dan he lengesa. Ne egketuenan te langun he etew he iyan a Nengazen, iyan a Menluluwas nu wey Perevelukas, iyan a Mekeǥeǥehem he Megbevayà ni Jacob.”
ISA 50:1 Migkeǥiyan te Nengazen is menge etew zin te, “Inselikwey ku ve is Jerusalem iring te maama he mid-engkezan din is esawa zin? Peǥumbenara niw! Impevihag ku ve sikiyu iring te etew he impeuripen din is anak din diyà te neutangan din su wey mekevayad? Wazà! Nevihag kew tenged te menge salè niw; inselikwey is Jerusalem tenged te menge kedrapas niw.
ISA 50:2 Maan is hendei kew vuwa hein nekeuma a? Maan is wazà midtavak te pengumawan ku? Kenè e ve ebpekehimu he edlibri keniyu? Egkehimu ku man ganì te ebpekemaza is daǥat pinaaǥi zà te kedsuǥù ku wey kedhimu te menge wahig he iring te disirtu he egkehimu he hinungdan te kebpematey te menge isdà.
ISA 50:3 Egkehimu ku zaan te ebpekerusirem is langit he iring keitem te visti he ibivisti te edlalew.”
ISA 50:4 Mibpenurù a te Nengazen he MEGBEVAYÀ ke hengkey is egkeǥiyen ku para mezasig ku is ebpenluyahan. Ebpukawen e zin kada meselem su wey a mekepemineg te ibpenurù din kedì.
ISA 50:5 Midlelaǥan a te Nengazen he MEGBEVAYÀ, ne nemineg a. Wazà a medsupak wey mebpekeziyù diyà te kandin.
ISA 50:6 Idtaan ku is peka ku ziyà te menge edlagkut kedì wey is buked ku ziyà te menge ebpemazut te sumpè ku. Ebpesegdanen ku en sikandan te kebpe-el-elezi zan kedì wey ked-ilevi zan te vuked ku.
ISA 50:7 Piru wazè ku meǥezam is kegkeeled, su edtevangan a te Nengazen he MEGBEVAYÀ. Umbe mebpekelig-en a iring te lintikan he vatu, su nesayud a he kenà a egkepeel-elezan.
ISA 50:8 Kayi te uvey ku is Megbevayà he mibpahayag he wazà a mekesalà. Hentei is ebpekesumbung kedì? Mebpaahà sikandin su ebpeetuvangè key!
ISA 50:9 Pemineg kew! Is Nengazen he MEGBEVAYÀ, iyan midtavang kedì. Hentei is ebpekepengintutuu he nekesalà a? Ebmerunut dan iring te manggad he egketketen te dezeisey he menge keranapranap.
ISA 50:10 Hentei keniyu is edtahud te Nengazen wey ebpezumazuma te menge penurù te suluǥuen din? Ereg sikandin he edsarig te Nengazen he Megbevayè din minsan midhipanew sikandin diyà te merusirem he wazà duen bulug kerayag.
ISA 50:11 Piru mebpekevantey kew mulà is ed-isip edezaat te zuma he etew; egkeuney kew zuen te mezaat he mid-isip niw! Iyan mismu is Nengazen edsilut keniyu; ebpematey kew tenged te kebpurungi zin kedsiluti keniyu.
ISA 51:1 Migkaǥi is Nengazen te, “Pemineg kew kediey, sikiyu is egkesuat he egkelibri wey midangep kayi te kediey. Tentenuzi niw si Abraham wey si Sara he kepuun niw, iring sikandan te vatu he zutun kew tipaka etawa vudsi he zutun kew keluta. Hein mid-umew ku si Abraham, ne sebsevaha zin dà, piru midtuvazan ku sikandin ne mibeǥayan ku te mahabet he menge kevuwazan.
ISA 51:3 “Egkenuǥunan ku utew is Jerusalem he nevengkag. Is menge disirtu kayi edhimuwen ku he iring te Eden he pemuleey ku, egkaahà diyà te Jerusalem is kelipey wey kedlipey wey egkezineg kayi he lugar is kebpeselamat wey menge kegkanta.
ISA 51:4 “Pemineg kew kediey! Sikiyu is menge etew ku, pemineǥa a keniyu, sikiyu is nesakup te nasyun ku! Ibeǥey ku is belaud ku, ne ebpekeveǥey heini te kerayag diyà te menge nasyun.
ISA 51:5 Hapit ku en sikiyu ebeǥayi te kezeeǥan duma is ketazeng. Kenè en egkeuǥet ne edlibriyen ku en sikiyu. Edumelahan ku is menge nasyun. Is diyà te meziyù he menge lugar edtaǥad kediey wey ebperateng te gehem ku.
ISA 51:6 Ahaa niw is langit wey is kelibutan. Egkahanew is langit iring te evel, ne ebmerunut is kelibutan iring te manggad, ne ebpematey is menge meǥinged kayi iring te menge dezeisey he menge keranapranap. Piru is kelibriyanan he ibeǥey ku, ebpedayun te wazà pidtemanan. Is kezeeǥan duma is ketazeng, egkaangken niw taman te taman.
ISA 51:7 Pemineg kew kediey is nengesayud ke hengkey is hustu wey edtuman te kesuǥuan ku! Kenè kew mahandek te kedsudì wey ked-eled-eled te menge etew keniyu.
ISA 51:8 Su iring dan dà te manggad he egketketen te dezeisey he menge keranapranap. Piru is ibeǥey ku he kezeeǥan duma is ketazeng wey kelibriyanan ebpedayun te wazà pidtemanan.”
ISA 51:9 Sigi en Nengazen, tevangi key en. Gemita nu is gehem nu te kedlibri kenami. Tevangi key iring te mibeelan nu zengan. Kenè be iyan ka midtadtad te dragun he si Rahab?
ISA 51:10 Kenè be iyan ka mibpemaza te zaǥat para meveeli is beyeey ziyà te teliwazà kayi su wey mekelayun is menge etew he midlibri nu puun te Ehipto?
ISA 51:11 Edlikù diyà te Zion is menge etew he midlibri nu he ebpemenganta he kenà egkeengked is kegkelipey zan. Egkaawè en is kegkeseeng dan, ne utew subra is kegkelipey zan.
ISA 51:12 Midtavak is Nengazen te, “Iyan a midasig wey midlipey keniyu. Ne maan is egkahandek kew te menge etew zà duen he ebpatey iring te sagbet?
ISA 51:13 Nelipatan niw en be he iyan a mibaal keniyu? Iyan a midempas te langit wey mibpelastar te midtukuzan te kelibutan. Maan is nengungubpaan kew he layun egkahandek te pauk te ebpesipala wey egkesuat he edezaat keniyu? Is pauk dan kenè en ebpekekaid keniyu.
ISA 51:14 Kenè en egkeuǥet ibpaawè en is menge vinihag keniyu. Kenè dan ebpatey ziyà te mibpirisuwan kandan, wey kenè dan egkeewaan te keenen.
ISA 51:15 Su iyan a is Nengazen he Megbevayè niw, migkutew te zaǥat wey mibpesenuhug te menge vaǥel kayi. Mekeǥeǥehem he Nengazen is ngazan ku.
ISA 51:16 Impenurù ku keniyu is ereg he egkeǥiyen niw, wey ebpengelangan ku sikiyu pinaaǥi te ǥehem ku. Iyan a mibpelastar te langit wey midsavuk te menge midtukuzan te kelibutan, wey iyan a migkaǥi ziyà te Jerusalem te, ‘Gaked ku sikew.’ ”
ISA 51:17 Enew ke en Jerusalem! Is pauk te Nengazen iring te inumen he mid-amin nu inuma taman te nekeziregdireg ka te kegkelangut nu.
ISA 51:18 Wazà minsan sevaha zuen te menge etew nu he ebpekaaǥak kenikew; wazà sevaha kandan he ebpeketavang kenikew.
ISA 51:19 Dezuwa he vangkit is nehitavù kenikew: nevengkag ka tenged te tebek wey nerasey te vitil is menge etew nu. Wazà nesamà duen te menge etew nu he egkehimu he edigdig wey edlipey kenikew.
ISA 51:20 Nengevidtawan sikandan ne nemekehidhizeǥà diyà te suyuk te kada kersada he henduen be te selazeng he nengelitag. Nesuǥat sikandan te utew kegkepauk te Nengazen; wey kebpendawey te Megbevayè nu.
ISA 51:21 Umbe, sikiyu is nengerasey wey nengelangut te kenè binu, pemineǥa niw heini.
ISA 51:22 Iyan heini egkeǥiyen te Nengazen he Megbevayè niw, kes Megbevayà he edlavan keniyu: “Pemineg kew! In-awè ku en is pauk ku keniyu he iring te inumen he ebpekelangut. Kenè ku en heini ibpeuman ibpeinum keniyu, kekenà,
ISA 51:23 diyè ku heini ibpeinum te midrasey keniyu, wey midsuǥù keniyu te kedlangkab su wey kew zan meǥieki, midhimu zan is peka niw he iring te zalan he zutun dan ed-ikul.”
ISA 52:1 He Zion, enew ke en, wey mebpekelig-en! Sikew is segradu he inged he Jerusalem, ipeehè nu is kegkemekeǥeǥehem nu! Su is menge kuntada nu he kenà menge Israilihanen he ed-isipen he meremerik, kenè en ebpekeseled diyà te kenikew.
ISA 52:2 Kenè ke en meseeng he iring te etew he edungdungerù diyà te tanà, kekenà, hitindeg ka hinuun wey pengandam ka te kedumala. Ne sikiyu is menge meǥinged diyà te Jerusalem, engked kew en he ebpeuripen.
ISA 52:3 Su iyan heini egkeǥiyen te Nengazen he MEGBEVAYÀ, “Mibihag kew he henduen te uripen he imbelegyà he wazà beyazi, umbe ebelukasan ku zaan sikiyu te wazà bayad. Dengan midhendiyè kew te Ehipto su zutun kew ed-ubpà, ne midaagdaag kew ziyà. Ne hein neuǥet iyan en maan midaagdaag keniyu is menge tig-Asiria.
ISA 52:5 Ne ǥuntaan hengkey en maan is nehitavù keniyu? Mibihag kew te menge tig-Babilonia te wazà hustu he hinungdan. Edumelahan kew zan wey edsudien. Ne layun e zan pa edsumpelita.
ISA 52:6 Piru egkeuma is timpu he zutun egkesayud kew ke hentei a is Megbevayà, su iyan a mismu migkaǥi ziyà te keniyu. Uya, iyan a mismu.”
ISA 52:7 Utew mekempet he ed-ahaan is menge menunudtulà he ed-abley ziyà te menge vuvungan su wey zan metudtul is meupiya he tudtul he zuen en kelinew ziyà te Jerusalem ne ebmeupiyè en is kebpekesavuk kayi su edlibriyen heini te Megbevayà. Egkeǥiyan dan is menge tig-Jerusalem te, “Midhadì is Megbevayè niw!”
ISA 52:8 Ebpengulahì tenged te kegkelipey is menge vantey te inged su egkeehè dan is kedlikù te Nengazen diyà te Jerusalem.
ISA 52:9 Ebpengulahì te kegkelipey is Jerusalem he nevengkag su edlipayen wey edlig-enan te Nengazen is menge etew zin. Edlibriyen din is Jerusalem!
ISA 52:10 Ibpaahà te Nengazen is nekeviza he ǥehem din diyà te langun he menge nasyun, ne egkaahà kayi te tivuuk he kelibutan is kedlibriya kenitew te Megbevayè tew.
ISA 52:11 Sikiyu is ed-uwit te menge gelemiten diyà te valey te Nengazen, awè kew en diyà te Babilonia! Gawas kew en keniyan! Kenè kew ǥawed te ed-isipen he meremerik. Gawas kew en diyà te Babilonia, ne mebpekewaǥas kew.
ISA 52:12 Piru kayi he timpu kenè en kinahanglan he edegdeǥusu kew te ked-awà he iring te ebpelaǥuy kew su ebpetelihuna is Nengazen keniyu. Is Megbevayà te Israel iyan ebpengalang keniyu.
ISA 52:13 Migkaǥi is Nengazen te, “Pemineg kew! Ebmeuswaǥen is suluǥuen ku, egkevantug sikandin wey ebeǥayan te zengeg.
ISA 52:14 Mahabet is egkeinuinu kandin, su egkezeetan is dagwey zin ne henduen be te kenè en paras te etew is paras din.
ISA 52:15 Minsan is menge meǥinged diyà te menge nasyun ne egkeinuinu zaan kandin. Kenà ebpekekaǥi is menge hadì mehitenged kandin, su egkeehè dan man is wazà keǥiya kandan, wey egkesavut dan is wazè pa keenu metudtul.”
ISA 53:1 Hentei is ebpeketuu te menge lalag dey? Hentei is mibpeheyaǥan te Nengazen te ǥehem din he midtuu?
ISA 53:2 Egkesuatan te Nengazen he med-uswag is suluǥuen din he iring te pinemula he midtuvù he nendalid diyà te memaza he tanà. Wazè din keguwapu etawa tindeg he ibpekekabig din kenita.
ISA 53:3 Mid-undaunda sikandin wey inselikwey te menge etew. Mahabet is neseǥazan din he menge kemeresayan wey menge elentusen. Mid-iniyuǥan tew sikandin, midsudì tew, wey mid-isip tew he wazè din bali.
ISA 53:4 Benar iyan, mid-antus din is menge kemeresayan wey menge elentusen he para pezem kenitew. Piru kunaan tew ke midsilutan sikandin te Megbevayà tenged te menge salè din.
ISA 53:5 Iyan tutuu is, mibpelian sikandin tenged te menge kedrapas tew; nevuǥel sikandin tenged te kelelalung tew. Is silut he mid-antus din iyan nekeveǥey kenitew te meupiya he kebpekesavuk; ne pinaaǥi te menge palì din nengeulian kiw.
ISA 53:6 Iring kiw is langun te nengetazin he menge kerehidu; is kada sevaha kenitew ne iyan en mibeelan din is egkesuatan din. Piru iyan sikandin impaantus te Nengazen te silut he para pezem kenitew te langun.
ISA 53:7 Midaagdaag sikandin wey mibpesekitan, iyan, wazà sikandin medriklamu. Iring sikandin te kerehidu he ed-uwiten diyà te lepeey, wey iring te kerehidu he ebpereremek dà emun ed-elutan.
ISA 53:8 Midakep sikandin, midhukuman, wey midhimetayan. Wazè nekeseǥipà dutun he lapis te kevuwazan he iyan inhimetayi kandin is tenged te menge salè dan, ne mid-antus din is silut he para pezem kandan.
ISA 53:9 Minsan wazà salà he nehimu zin wey wazà sikandin medlimbung, inleveng sikandin he henduen be te utew mekesesalà. Inleveng sikandin duma te menge sepian.
ISA 53:10 Piru egkasuatan te Nengazen he edresayen wey ibpaantus sikandin. Piru minsan midhimu te Nengazen is untung din he pemuhat para meveyazi is salà te menge etew, egkeehè din ded is menge kevuwazan din wey ebpekaangken ded sikandin te meluǥayad he untung, ne pinaaǥi kandin egketuman is egkesuatan te Nengazen.
ISA 53:11 Emun egkeehè din is beǥas te menge ked-antus din, ne egkelipey sikandin. Migkaǥi is Nengazen te, “Pinaaǥi te ketau te metazeng he suluǥuen ku mahabet is ebmetzengen din; ed-antus sikandin para te menge salè dan.
ISA 53:12 Umbe, ebeǥayan ku sikandin te zengeg he para te ventuǥan wey gemhanan he menge etew, su imbeǥey zin is untung din: Mid-isip sikandin he sevaha te menge mekesesalà. Ne nekaantus sikandin para te mahabet he menge mekesesalà ne mid-ampù sikandin he peseyluwa sikandan te Megbevayà.”
ISA 54:1 Migkaǥi is Nengazen te, “Kanta ka, Jerusalem, is iring te vahi he kenà ebpekaanak. Kanta ka wey derag-ey ka te kegkelipey, is wazè pa mekesaǥad te velilit. Su minsan mid-ewaan ka te esawa nu, egkehimu he mahabet pa is kenikew he menge anak kenè te vahi he wazà ewai te esawa zin.
ISA 54:2 Ipezekelè nu wey lig-eni nu is ubpeey nu. Kenè nu eǥena is kebpekeluaǥa kayi.
ISA 54:3 Su ibpeiseg ku is menge dulunè nu, edsekupen te menge etew nu is duma he menge nasyun, ne ed-ubpaan dan is menge inged kayi.
ISA 54:4 Kenè ka mahandek su kenè ka egkepeel-elezan. Egkelipatan nu is kegkeeled-eled nu hein betan-en ke pa wey is kegkevalu nu.
ISA 54:5 Su siak is midlimbag kenikew, egkehimu a he iring te esawa nu. Mekeǥeǥehem he Nengazen is ngazan ku. Siak, is Waǥas he Megbevayà te Israel, iyan a Menluluwas nu. Egngezanan a he ‘Megbevayà te tivuuk he kelibutan.’
ISA 54:6 “Jerusalem, iring ka te vetan-en he vahi he midlalew su mid-ewaan te esawa zin. Iyan, guntaan ed-umawen ku sikew he likù ka kayi te kedì.
ISA 54:7 Seled te mevavà he timpu mid-ewaan ku sikew, piru tenged te zekelà he hizu ku ed-umanan ku sikew egkuwaa.
ISA 54:8 Tenged te utew ku kenikew kegkepeuki, mid-iniyuǥan ku sikew seled te mevavà he timpu, piru tenged te gaǥew ku he wazà pidtemanan, egkehizuwan ku sikew. Iyan a, is Nengazen he Menluluwas nu, is migkaǥi kayi.
ISA 54:9 “Iyan ked-isipa ku kayi is, iring te timpu ni Noe he zutun nenangdù a he kenè ku en ibpeuman ibpelapey is wahig kayi te kelibutan. Ne ǥuntaan ebpenangdù a zaan he kenè ku en sikew egkepeukan wey edsilutan.
ISA 54:10 Minsan egkengetempag pa is menge vuntud wey menge vuvungan, ne kenà mulà egkaawà is gaǥew ku wey penangdù ku he ebeǥayan ku sikew te meupiya he kebpekesavuk. Iyan a, is Nengazen he nehizu kenikew, is migkaǥi kayi.
ISA 54:11 “He Jerusalem, he henduen be te migkusukusu te vagyu. Nerasey ka ne wazà midlipey wey midasig kenikew. Piru ed-umanan ku sikew ebenguna he ziyà ibpehitindeg te menge vatu he sepiru, ne egemiten ku is mahalen he menge vatu te kebaal te menge elavat te menge valey nu.
ISA 54:12 Egemiten ku is menge vatu he rubi he para te turi nu, wey is mekempet he menge vatu te kebaal te menge pultahan wey menge verengbeng nu.
ISA 54:13 Iyan a mismu ebpenurù te menge etew nu, ne utew sikandan ed-uswag.
ISA 54:14 Ebmelig-en ka su edtinazeng is menge etew nu. Ebpeleǥuyan ka te menge kuntada nu, umbe wazè nu en igkahandek. Kenè en ed-uvey ziyà te kenikew is menge kuntada nu, ne kenè ke en egkeheratan.
ISA 54:15 Emun duen edsurung kenikew; kenà heini kediey he suat. Ebpekesurindir is edsurung kenikew.
ISA 54:16 Pemineg ka! Iyan a mibaal te menge pandey te mital he edhiyup te hapuy wey vaǥa te uring wey ebpemaal te ǥumaan. Ne kediey zaan he limbag is menge ebpendezaat he egamit kayi he menge ǥumaan te kebpendezaat dan.
ISA 54:17 Is kada ǥumaan he mibeelan su igkuntra kenikew ne kenà ebpekekaid kenikew, ne egketavak nu is menge ibpesangil kenikew. Is egkepengevilin te menge suluǥuen ku, iyan is kezeeǥan duma is ketazeng. Iyan a, is Nengazen, is migkaǥi kayi.”
ISA 55:1 Migkaǥi is Nengazen te, “Uvey kew, sikiyu is langun he egkemezahan, su heini zed is wahig! Minsan wazè niw selapì, ne pemasa kew wey megkaan! Hendini kew en, pemasa kew te vinu wey ǥatas he wazè din bayad.
ISA 55:2 Maan is egastu kew te selapì niw te kenà egkekaan? Maan is egestuwen niw is menge suwildu niw te kenà ebpekahantey keniyu? Pemineg kew kediey, ne ebpekekaan kew te metaam he menge keenen ne egkahantey kew.
ISA 55:3 Uvey kew wey mebpemineg kediey su wey kew meuyag. Ebpekid-uyun a keniyu te wazà pidtemanan. Ibpeehè ku keniyu is gaǥew wey kebmetinumanen ku he insaad ku ki David.
ISA 55:4 Midhimu ku sikandin he pengulu te menge nasyun, ne pinaaǥi kandin impeehè ku kandan is gehem ku.
ISA 55:5 Ed-umawen niw is menge etew ziyà te menge nasyun he kenè niw zuma, ne egaangaan sikandan edhendiyà te keniyu su iyan a is Nengazen he Megbevayè niw, he Waǥas he Megbevayà te Israel mibeǥey keniyu te zengeg.”
ISA 55:6 Dangep kew ziyà te Nengazen ne umawa niw sikandin mintras wazè pa med-awà sikandin is edtavang keniyu.
ISA 55:7 Ipeengked en is menge lalung te kedlalunglalung, ne ipeengkezi kandan is mezaat he ked-isip-isip dan. Ipelikù en sikandan diyà te Nengazen he Megbevayè tew su egkehizuwan din sikandan wey ebpeseyluwen.
ISA 55:8 Migkaǥi is Nengazen te, “Is ked-isip-isip ku, ne kenà iring te keniyu he ked-isip-isip, ne is menge ulaula ku, ne kenà iring te keniyu he menge ulaula.
ISA 55:9 Su iring te nekediyù is langit wey tanà, ne meziyù is ked-isip-isip niw te kedì he ked-isip-isip wey meziyù daan is keniyu he menge paaǥi te kedì he menge paaǥi.
ISA 55:10 Is uzan wey is ayis ne ebpuun te langit, ne kenè en heini edlikù diyà emun kenè pa ebpekeveǥey te wahig kayi te kelibutan he ebpetuvù te menge pinemula he ebpekeveǥey te venì te menge ebpemula wey keenen te menge etew.
ISA 55:11 Ne iring daan keniyan is menge lalag he egkeǥiyen ku, kenà egkehimu he wazà kayi pulus, kekenà, edtumanen kayi is pelanu ku; edlampus heini para meulaula is tuyù te kebpetudtula ku kayi.
ISA 55:12 “Menge Israilihanen, awè kew ziyà te Babilonia he melipayen, ne egiyan ku sikiyu wey kenà mekeizi. Henduen be te egkanta tenged te utew kegkelipey is menge vuntud wey menge vuvungan, ne henduen be te ebpakpak is langun he menge kayu.
ISA 55:13 Edtuvù is menge kayu he sipris wey mirtu ziyà te edtuvuan guntaan te zuǥiyen he zezeisey he kayu. Tenged te kegkeul-ulaha kayi egkeveǥayan a te zengeg; egkehimu heini he tuus te kegkemekeǥeǥehem ku te wazà pidtemanan.”
ISA 56:1 Iyan heini egkeǥiyen te Nengazen: “Ipeehè niw is hustu he kukuman wey veeli niw is metazeng, su kenè en egkeuǥet edlibriyen ku en sikiyu wey egkeehè niw is ketazeng ku.
ISA 56:2 Utew zeysey is etew he ebaal wey edtuman te ebpeveelan ku zutun te Andew te Kedhimeley. Wey zeyzey zaan is etew he wazà mebaal te mezaat.”
ISA 56:3 Is kenà menge Israilihanen he mibpeveyveyaan dan is untung dan te Nengazen, kenà ereg he ed-isip he kenà sikandan idtampu te Nengazen te menge etew zin. Ne is menge etew he migkapun ne kenà daan ereg he ed-isipen he tenged te kenà sikandan ebpekaanak, kenà sikandan egkehimu he zuma te menge etew te Megbevayà.
ISA 56:4 Su iyan heini egkeǥiyen te Nengazen: “Edtuvazan ku is migkapun he menge etew he edtuman te ebpeveelan ku mehitenged te Andew te Kedhimeley, wey ebaal te menge vaal he ebpekelipey kediey wey edtuman te kebpekid-uyun ku.
ISA 56:5 Edtuǥutan ku sikandan te kedseled diyà te valey ku ne ebeǥayan ku sikandan te zengeg he lavew pa te zengeg he egkezawat dan emun duen dan menge anak. Kenà sikandan egkelipatan te menge etew te taman te taman.
ISA 56:6 “Edtuvazan ku zaan is kenà menge Israilihanen he insarig dan kediey is untung dan su edsilbiyan e zan, ebmahalen e zan, wey ed-ezapen e zan, ne edtumanen dan is menge ibpetuman ku zutun te Andew te Kedhimeley, wey edtumanen dan is kebpekid-uyun ku.
ISA 56:7 Ed-uwiten ku sikandan diyà te segradu he vuvungan ku, ne edlipayen ku sikandan diyà te valey ku he elempuanan. Edewaten ku ziyà te pemuhatà he para kediey is menge pemuhat dan he edtutungen wey zuma pa he menge pemuhat; su is baley ku egngezanan te valey he elempuanan te menge etew ziyà te langun he menge nasyun.”
ISA 56:8 Migkaǥi zaan is Nengazen he MEGBEVAYÀ he midtiǥum te menge vinihag he menge Israilihanen te, “Edtiǥumen ku pa is duma, gawas duen te zaan en he netiǥum ku.”
ISA 56:9 Uvey kew is menge etew ziyà te menge nasyun he iring kemesipala te menge langgam, ne dèdeeti niw is menge etew ziyà te Israel.
ISA 56:10 Su is menge pengulu zan he iyan pezem impevantey kayi he nasyun, henduen be te menge lakap wey wazè dan ketau. Iring sikandan te menge perevantey he asu he emew he kenà ebpekeǥevu. Iyan dà egkesuatan dan is kedleku, kedlipezeng, wey kebpeneǥeinep.
ISA 56:11 Iring sikandan te leǥezen he menge asu he kenà egkepezaan. Menge perevantey sikandan te Israel he wazè dan kedsavut. Is kada sevaha kandan mibpenigudu en mebaal te egkesuatan din te ebaal ne iyan dà edtinguhaan din is kandin dà he keupiyaanan.
ISA 56:12 Ke sikandan te, “Hendini kew, su egkuwa kiw te inumen ne ebpelelangut kiw! Iring ded kayi is ed-ul-ulahan tew keeselem, ne edhimuwen tew he edhuna pa he zekelà is egkeinum tew!”
ISA 57:1 Emun ebpatey is sevaha he etew he metazeng, wazà ed-insà ke maan. Wazà utew ebpekesavut he egkuwaan te Megbevayà is menge etew he edsunud kandin su wey zan mekelikey te kezeetan.
ISA 57:2 Emun ebpatey is etew he metazeng, ebpekehimeley en sikandin wey ebmelinawen en.
ISA 57:3 Piru sikiyu, iring kew te menge veyilan, menge mengungumpadi, wey menge vahi he ebelegyà te zengeg dan, uvey kew su wey kew mehukumi.
ISA 57:4 Ed-un-undahan niw is menge metazeng; ebingiǥan niw wey edyewyawan sikandan. Menge kevuwazan kew te menge mesinupaken wey menge teruen.
ISA 57:5 Ed-ezapen niw is menge ed-ezapen pinaaǥi te kebpekidhilavet diyà te sihung te kada merapung he kayu. Ibpemuhat niw pa is menge anak niw ziyà te zal-ug he alug te menge kelendiǥan.
ISA 57:6 Is metilak he menge vatu ziyà te menge zal-ug, iyan menge megbevayè niw. Ed-ezapen niw heini pinaaǥi te kebpemuhat te menge pemuhat he inumen wey pemuhat he para gasa. Kenè ku igkelipey heini is baal niw.
ISA 57:7 Edtekezeg kew ziyà te metikang he menge vuvungan ne ebpemuhat kew zutun wey ebpekidhilavet.
ISA 57:8 Idsavuk niw pa is menge ledawan te menge ed-ezapen niw ziyà te zivaluy te ǥemawan te menge valey niw. Idselikwey a keniyu. Iring kew te vahi he mengungumpadi he nemenahik diyà te meluag he katri zin he nekidsebutà te kumpadi zin he ebpehulizè dan. Egkelipey sikandin he ebpekidhilavet te kumpadi zin. Ebpezumdumahan din is arig din.
ISA 57:9 Midhendiyè kew te ed-ezapen niw he si Molec is ed-uwit te lana wey mahabet he menge pehemut. Midsuǥù niw pa is menge etew te kebpengahà te menge ed-ezapen diyà te meziyù he menge lugar su wey niw maazap. Ne ibpehendiyè niw is edsuǥuen niw minsan diyà te lugar te menge minatey.
ISA 57:10 Minsan egkeveley kew en he ebpen-ahà te menge ed-ezapen, wazà gihapun maawà is perateng niw he ebpeketuredu kew. Edlig-enan niw is keugelingen niw, umbe wazè kew luyahi.
ISA 57:11 Migkaǥi is Nengazen te, “Hentei ves heini is menge ed-ezapen he utew niw igkahandek ne midterteruan a keniyu? Midlipatan ad keniyu ne wazà ad keniyu seǥipaa. Hengkey ves is hinungdan maan is wazè kew en medtahud kedì? Tenged be te mibpereremek e zà seled te meluǥayad he timpu?
ISA 57:12 Ed-isipen niw he metazeng en is ebeelan niw, piru ibpeehè ku ke hengkey kew he kelasi te menge etew. Ne kenà ebpeketavang keniyu is menge ed-ezapen niw.
ISA 57:13 Uya, kenà ebpeketavang is menge ed-ezapen niw emun ebuyù kew te tavang diyà te kandan. Id-amin sikandan idlayap te keramag; idlayap dan te sengehiyup dà. Piru is menge midsarig kediey ebpekeubpà diyà te tanà ne ed-ezapen e zin diyà te segradu he vuvungan.
ISA 57:14 Egkaǥi a te, ‘Purungi is dalan. Iawà is nemekevelavag diyà te veyeey te menge etew ku.’ ”
ISA 57:15 Iyan daan heini egkeǥiyen te Utew Lavew he Megbevayà, kes Waǥas he Megbevayà he wazà pidtemanan te untung din: “Diyà a ed-ubpà te metikang wey segradu he lugar, piru ed-ubpa a zaan duma te menge etew he kenà ebpelavew wey mid-iniyug te mezaat he ulaula su wey ku sikandan melig-eni.
ISA 57:16 Benar iyan, kenà a ebpekigkuntada wey kenà taman te taman is kegkepauk ku su emun ebeelan ku heini, ebpematey is menge etew he linimbag ku.
ISA 57:17 Nepauk a tenged te salà wey keleleǥed te menge tig-Israel, umbe midsilutan ku sikandan wey mid-iniyuǥan. Piru mibpedayun dan gihapun te kebaal te salà.
ISA 57:18 Neehè ku is mezaat he menge vaal zan, piru ebewian ku sikandan wey zan meulii. Egiyahan ku sikandan, wey edlipayen ku is egkengeseeng kandan.
ISA 57:19 Ne zutun ebpekezalig dan kedì. Ebeǥayan ku sikandan te meupiya he kebpekesavuk, ke ziyè dan man te meziyù etawa ziyè dà te uvey. Ebewian ku sikandan wey zan meulii. Iyan a, is Nengazen, is migkaǥi kayi.
ISA 57:20 Piru is menge lalung, ne wazè dan kelinew; iring sikandan te ebpemaǥel he zaǥat he edtampil te menge sagbet wey menge meremerik diyà te veyvey.
ISA 57:21 Kenà ebpekaangken te meupiya he kebpekesavuk is menge lalung.” Iyan heini egkeǥiyen te Megbevayè ku.
ISA 58:1 Migkaǥi is Nengazen te, “Habet kew pengulahì; iringa niw te kezaǥing te vudyung! Kenè niw heini eǥena! Ipetueni niw te menge etew ku he menge kevuwazan ni Jacob is menge salè dan wey menge kedrapas.
ISA 58:2 Andew-andew is kedangep dan kayi te kediey, henduen be te egkesuat dan he metueni zan is menge paaǥi ku. Emun ed-ahaan, henduen be te metazeng sikandan he menge etew, ne henduen be te wazè dan iselikwey is menge suǥù ku. Ibpeehè dan he henduen te egkesuat dan he ed-uvey kayi te kediey is ebuyù te metazeng he kukuman.
ISA 58:3 Egkeǥiyan e zan pa te, ‘Mibpuasa key, piru wazè ka medseǥipà. Midrasey zey is keugelingen dey, piru wazè nu heini beliya.’ “Midtavak a te: Iyan tutuu is, dutun te kebpuasa niw keugelingen niw zà he kelipey is ed-isipen niw, ne edèdaaǥen niw is menge terebahanti niw.
ISA 58:4 Ebpuasa kew iyan piru ebpetebtebekà wey ebpelewlewanè kew, wey ebpesumsumbaǥè kew pa ganì. Kenè niw isipa he is puasa he ebeelan niw ǥuntaan ebpeketavang wey ku pemineǥa is menge kebpengemuyù niw.
ISA 58:5 Emun ebpuasa kew, edresayan niw is keugelingen niw. Idungul niw is menge ulu niw he henduen be te sagbet, ne edhizeǥè kew ziyà te avu is bivisti te saku. Iyan be heeyan egngezanan niw te puasa? Kunaan niw vuwa ke ebpekelipey en kediey heeyan?
ISA 58:6 Is kelasi te puasa he egkesuatan ku iyan is puasa he egkezumahan te metazeng he ulaula: Engkezi niw is kebpendaagdaag wey kebpepirisu te menge wazà mekesalà, wey libriya niw is menge edèdaaǥen.
ISA 58:7 Beǥayi niw te keenen is egkengevitil, ipeubpè niw ziyà te menge valey niw is menge wazà egkeubpaan, bistiyi niw is menge wazà bisti, wey tevangi niw is menge kezuzumahi niw he ebpenginahanglan.
ISA 58:8 Emun ebeelan niw heini, ebpekeuma ziyà te keniyu is kelibriyanan he iring te edsilà he andew, ne segugunè ku sikiyu ebewii wey kew meulii. Siak is metazeng he Megbevayè niw, ebpetelihuna a keniyu ne ebpengelangan ku sikiyu pinaaǥi te mekeǥeǥehem he kebpekiduma ku.
ISA 58:9 Emun ed-umawen a keniyu su ebpetavang kew, edtevaken ku sikiyu. “Emun ed-engkezan niw is kebpendaagdaag, is kebpemesangil te binèbeelan dà, wey is kegkaǥi te mezaat,
ISA 58:10 wey emun ibpekaan niw is menge egkengevitil wey ebeǥayan niw is menge pubri te menge kinahanglan dan, ebpekeuma ziyà te keniyu is kelibriyanan he edsiǥa ziyà te merusirem he kebpekesavuk niw ne egkeiring heini te meudtu.
ISA 58:11 Layun ku sikiyu egiyahi, ne edhimuwen ku he mekuntintu kew en minsan mereǥen is kebpekesavuk niw. Ebbeǥayan ku sikiyu te meupiya he kedlelawa, ne egkeiring kew te pemuleey he kenà egkekurang is wahig etawa serebseb he kenà egkemezahan.
ISA 58:12 Ed-umanan ebenguna te menge kevuwazan niw is menge inged niw he neuǥet en he nevengkag, ne ebpurungan dan is daan en he menge pundasyun. Egngezanan kew he menge etew he memumurung te nerundus he menge verengbeng wey menge valey.
ISA 58:13 “Kinahanglan he edtumanen niw is menge ebpeveelan ku zutun te Andew te Kedhimeley. Kenè niw veeli is menge vaal he para zà te keugelingen niw he kelipey zutun te segradu he andew. Ikelipey niw is Andew te Kedhimeley, ne pekeveǥata niw heini pinaaǥi te kenà kebpetuyang te egkesuatan niw, wey ked-engked kegkaǥi te menge lalag he wazè din pulus. Emun ebeelan niw heini,
ISA 58:14 ebmelipayen kew te kebpenilbi niw kedì. Ebeǥayan ku sikiyu te zengeg kayi te tivuuk he kelibutan, ne ebpezaharan ku sikiyu te menge abut te tanè he nepengevilin niw ziyà te kepuun niw he si Jacob. Egkehitavù heini, su iyan a, is Nengazen, is migkaǥi kayi.”
ISA 59:1 Pemineg kew! Kunaan niw vuwa ke meluya wey vengel is Nengazen, ne tenged dutun kenè kew zin egkehimu te edlibri wey kenà sikandin ebpekezineg ke ed-umawen niw.
ISA 59:2 Iyan nekepesuwey keniyu puun te Megbevayà is menge salè niw ne iyan daan heini hinungdan he mid-iniyuǥan kew zin wey kenè en ebpemineg te menge kebpengemuyù niw.
ISA 59:3 Su ebpenhimatey kew te etew, wey ebaal kew te zuma pa he mezaat. Midtarùtarù kew wey migkaǥi kew te mezaat he menge lalag.
ISA 59:4 Wazà diyà te keniyu is hustu he kukuman; ne tarù is menge sumbung niw mehitenged te iring niw he etew. Ebpelanu kew te mezaat, ne ebeelen niw heini.
ISA 59:5 Is mezaat he menge pelanu niw, iring te impis te edhereg he uled, he ebpatey is egkaan duen. Iring daan heini te valey te kelelawà he kenà egkehimu he ebeelan he visti, umbe wazà pulus te mezaat he menge pelanu niw. Mezaat is menge vaal niw wey mesipala kew.
ISA 59:7 Elistu kew he ebaal te salà ne abtik kew he edhimatey te wazà mekesalà. Mezaat is menge ed-is-isipen niw, ne minsan hendei kew ebpevayà ne ebpendezaat kew.
ISA 59:8 Wazè niw netuenan mehitenged te melinew he kebpekesavuk. Wazè niw veliya is hustu he kukuman, kekenà, edtuisen niw heini. Is ed-iring kayi te menge vaal niw, ne kenè daan ebpekesaǥad te melinew he kebpekesavuk.
ISA 59:9 Tenged kayi wazè pa siluti te Megbevayà is menge kuntada tew, ne wazè kiw zin pa veǥayi te kezeeǥan duma is ketazeng. Edtaǥad kiw te kerayag piru kerusireman is nekeuma. Umbe midhipanew kiw ziyà te kerusireman.
ISA 59:10 Iring kiw te lakap he ebpekepenamsam diyà te elavat, ne ebpemekeurambak kiw minsan meudtu, henduen be te edhipanew kiw ziyà te merusirem. Minsan pa te mezesen is menge lawa tew, henduen kiw te menge minatey su wazè tew egkehimu.
ISA 59:11 Tenged te kegkeseeng tew nekezag-es kiw he henduen kiw te edhiniǥer he bir wey egkaǥi he merepatik. Ebperateng kiw he edsilutan te Megbevayà is menge kuntada tew ne edlibriyen kiw zin, piru wazà heini mehitavù.
ISA 59:12 Su mahabet en is menge salè tew ziyà te etuvangan te Megbevayà, ne iyan heini ebpeǥumbenar he ereg kiw he edsilutan. Uya, netuenan tew he layun kiw ebaal te salà.
ISA 59:13 Midsupak wey midluivan tew is Nengazen; mid-iniyuǥan tew is Megbevayè tew. Edèdaaǥen wey ebpesipelahan tew is duma. Ebpurungan tew ed-is isipa ke ebmenmenuwen tew is kedtarùtarù tew.
ISA 59:14 Ne iyan heeyan hinungdan he wazè pa siluti te Megbevayà is menge kuntada tew wey wazè kiw zin pa veǥayi te kezeeǥan duma is ketazeng. Egketembunan en is tutuu ziyà te minsan hendei; is menge etew kenè en egkeseriǥan.
ISA 59:15 Uya, naawè en is ketutuanan, ne is menge edlikey te kebaal te mezaat ne ebpesipelahan. Naahà heini te Nengazen, ne wazè din ikelipey is kenà ked-ikul te hustu he kukuman.
ISA 59:16 Neinuinu sikandin hein neehè din he wazà minsan sevaha he edtavang te menge edèdaaǥen. Umbe migamit din is kandin he gehem te kedluwas kandan, wey is kandin mismu he ketazeng iyan neketavang kandin.
ISA 59:17 Egemiten din he iring te pengalang te kumeng is ketazeng, ne egemiten din he iring te hilmit is keluwasan. Idsul-ub din iring te visti is penimales wey rerangit.
ISA 59:18 Ebelesan din is menge kuntada zin sumalà te menge vaal zan; minsan is diyà te meziyù. Egkeǥezaman dan is rerangit din.
ISA 59:19 Minsan hendei edtehuzen sikandin wey ebeǥayan te zengeg te menge etew, su ebpekeuma sikandin he iring te edeǥurus he wahig he edhiyupen te mevendes he keramag.
ISA 59:20 Migkaǥi is Nengazen te, “Ebpekeuma ziyà te Zion is menluluwas niw te menge kevuwazan ni Jacob, ne edlibriyen din is ed-engked he ebaal te salà.
ISA 59:21 Ne iyan heini kebpekid-uyun ku keniyu: Kenà egkaawà is Mulin-ulin ku he ziyà te keniyu wey is menge lalag he migkaǥi ku keniyu. Tudtula niw heini ziyà te menge anak niw, ne edtudtulen dan daan heini ziyà te kandan he menge anak, ne ebpedayun heini pehendiyà te huziyan he menge lapis te kevuwazan. Iyan a, is Nengazen, is migkaǥi kayi.”
ISA 60:1 Enew ka, Jerusalem, ne silè ka iring te andew su neume en is kegkelibri nu, ne midsilè en diyà te kenikew is mekeǥeǥehem he kebpekiduma te Nengazen.
ISA 60:2 Egketembunan te utew merusirem is menge nasyun kayi te kelibutan, ne sikew mulà, ed-enlaǥan te mekeǥeǥehem he kebpekiduma te Nengazen.
ISA 60:3 Ed-uvey is menge etew ziyà te menge nasyun wey is menge hadì dan diyà te kerayag nu.
ISA 60:4 Tengteng ka ziyà te peliǥuy nu; netiǥum en is menge etew nu, ed-ulì en sikandan diyà te kenikew is ebpuun diyà te meziyù he menge lugar; henduen sikandan te menge vatà he edsepipiyen.
ISA 60:5 Emun egkeehè nu en heini ne melipayen ka, ne edrepey is kelipey ziyà te gehinawa nu, su is menge ketiǥeyunan diyà te menge nasyun ne ed-uwiten diyà te kenikew.
ISA 60:6 Ne sikew, Jerusalem, egkeeneb is menge tanè nu te menge kemilyu te menge tig-Median wey menge tig-Efa. Ne zuen menge etew ziyà te Sheba he ed-uwit te menge vulawan wey menge beyewà su ed-azap dan te Nengazen.
ISA 60:7 Ed-uwiten te menge tig-Kedar wey menge tig-Nebayot is mahabet he menge kerehidu zan diyà te kenikew, ne ibpemuhat heini ziyà te pemuhatà he para te Nengazen su wey melipey sikandin. Edhimuwen pa te Nengazen he mevantug is baley zin.
ISA 60:8 Ebiyahi is menge varku he henduen be te menge ǥapun he ebpemenlayang, wey henduen be te menge merepatik he edhendiyà te menge salag dan. Heini he menge varku gaked te menge etew he ziyà ebpen-ubpà te meziyù he menge lugar he ebperateng te Nengazen. Iyan ebpengegalen kandan is menge varku te Tarshish te ked-uwit te menge etew nu su wey mekelikù diyà te kenikew sikandan is ebpuun diyà te meziyù he lugar. Ed-uwit dan daan te menge vulawan wey menge pelata para te Nengazen he Megbevayè nu, he iyan kes waǥas he Megbevayà te Israel. Ne ebpekeveǥey heini kenikew te zengeg.
ISA 60:10 Migkeǥiyan te Nengazen is Jerusalem te, “Ebengunen te menge lumelengyawà is menge verengbeng nu, ne ebpenilbi kenikew is menge hadì dan. Minsan midsilutan ku sikew tenged te pauk ku, egkehizuwan ku zed sikew tenged te keupiya ku.
ISA 60:11 Dutun layun en abri is pultahan nu maandew wey mezukilem, su edewaten nu is menge ketiǥeyunan puun te menge nasyun. Ebparid is menge hadì he edseled diyà te kenikew.
ISA 60:12 Su egkepurung egkezeeti is menge nasyun etawa menge ginhedian he kenà ebpenilbi kenikew.
ISA 60:13 Egkehimu he kenikew is menge ketiǥeyunan diyà te Lebanon ragkes en is menge kayu zutun he pinu, inibru, wey sipris–su wey ikezayandayan diyà te valey he ubpeey ku.
ISA 60:14 Is menge kevuwazan te menge midaagdaag kenikew, ed-uvey ziyà te kenikew is edunghuy. Edluhud diyà te uvey te menge paa nu is menge midsudì kenikew, ne egngezanan ke zan he ‘Inged te Nengazen,’ etawa ‘Zion he Inged te Waǥas he Megbevayà te Israel.’
ISA 60:15 Minsan inselikwey ka wey midumutan, wey wazà edseǥipà kenikew zengan, edhimuwen ku he mevantug ka te wazà pidtemanan, wey igkelipey te langun he lapis te kevuwazan.
ISA 60:16 Ed-eturen ka te menge etew ziyà te menge nasyun wey te menge hadì dan he iring te vatà he ibpesusu te iney zin. Ne egketuenan nu he iyan a is Nengazen, kes Menluluwas nu wey Perevelukas, kes Mekeǥeǥehem he Megbevayà ni Jacob.
ISA 60:17 Edliwanan ku is menge inhiman te simbahan nu: is menge brunsi edliwanan ku te vulawan, is menge putew edliwanan ku te pelata, is menge kayu edliwanan ku te brunsi, is menge vatu edliwanan ku te putew. Ne kenà egkaawà diyà te kenikew is kelinew wey ketazeng.
ISA 60:18 Wazè en kebpenlupiglupig he egkehitavù diyà te tanè nu. Wazè en kezeetan he ebpekeuma ziyà te kenikew. Ebpekeliǥuy kenikew is kelibriyanan he iring te menge verengbeng, ne edalig kedì is edseled diyà te menge pultahan nu.
ISA 60:19 “Is andew wey vulan kenè en iyan ebpekeveǥey kenikew te kerayag maandew man etawa mezukilem, su siak, is Nengazen, iyan e en kerayag nu te wazà pidtemanan. Siak is Megbevayà, iyan e en kempet nu.
ISA 60:20 Iyan a egkehimu he andew nu wey vulan nu he kenà edsanlep; iyan a kerayag nu te wazà pidtemanan. Ne egketapus en is menge kemereǥenan nu.
ISA 60:21 Is langun he menge etew nu egkehimu he metazeng, ne egkaangken dan is tanà he Israel taman te taman. Midlimbag ku sikandan; iring sikandan te pinemula he impemula ku su wey a meveǥayi te zengeg.
ISA 60:22 Deisey zà sikandan, piru ebmahabet sikandan. Menge egkaayuayu zan, piru egkehimu sikandan he gemhanan he nasyun. Iyan a, is Nengazen he segugunà ebaal kayi zutun te hustu he timpu.”
ISA 61:1 Is Mulin-ulin te Nengazen he MEGBEVAYÀ ne kayi te kediey. Su mibpilì e zin he ibpewali te meupiya he tudtulanen diyà te menge pubri. Midsuǥù e zin te kedlipey te egkengeseeng wey kebpenudtul ziyà te menge vihag wey menge pirisu he ebpekeǥawas dan en.
ISA 61:2 Midsuǥù e zin daan te kebpenudtul he neume en is timpu te kedlibriya te Nengazen te menge etew zin, ne edsilutan din is menge kuntada zan. Midsuǥù e zin daan te kedlipey te egkengeseeng diyà te Jerusalem, su para kenà avu is igkesavuk dan diyà te ulu zan he tuus te kegkeseeng dan, kekenà, kuruna he vulak, ne edlenahan dan is ulu zan he tuus te melipayen sikandan. Egkeiring dan te kayu he ulayan he impemula te Nengazen. Egngezanan sikandan he menge metazeng para te zengeg te Nengazen.
ISA 61:4 Ed-umanan dan ebenguna is menge inged dan he neuǥet en he nevengkag.
ISA 61:5 Sikiyu is menge etew te Megbevayà, ebpenilbi keniyu is menge lumelengyawà. Ebentayan dan is menge uyaǥen niw, wey edterebahu sikandan diyà te menge bevesukè niw wey menge pemuleey niw te paras.
ISA 61:6 Egngezanan kew he menge memumuhat te Nengazen, wey menge suluǥuen te Megbevayè tew. Ebpezaharan kew te ketiǥeyunan te menge nasyun, ne egkelipey kew te kegkeengkena niw kayi.
ISA 61:7 Kenè kew egkepeel-elezan, kekenà, egketakep is tuvad he egkezawat niw puun te tanè niw, ne igkelipey niw haazà is egkezawat niw. Is kelipey niw ebpedayun taman te taman.
ISA 61:8 “Su siak, is Nengazen, dekelà diyà te gehinawa ku is hustu he kukuman. Egkeepesan ku is kebpenakew wey zuma pa he mezaat he vaal. Tenged te kebmetinumanen ku ebeǥayan ku te suhul is menge etew ku wey ebpekid-uyun a kandan te uyun he wazà pidtemanan.
ISA 61:9 Is menge kevuwazan dan egkilelaan diyà te menge nasyun. Is langun he ebpekaahà kandan egkilala he iyan sikandan menge etew he edtuvazan ku.”
ISA 61:10 Utew ku igkelipey is Nengazen he Megbevayè ku, su iring te mibistiyan e zin te kelibriyanan wey kezeeǥan duma is ketazeng. Iring a te ebpengesawa he zuen din mekempet he tengkulu wey te ed-esewaan he midsun-ud te menge elahas.
ISA 61:11 Is tanà ebpetuvù te venì ne is Nengazen he MEGBEVAYÀ ebeǥey te kezeeǥan duma is ketazeng, ne edeliǥen sikandin te menge etew ziyà te langun he menge nasyun.
ISA 62:1 Tenged te pelanggè ku is Zion, kes inged he Jerusalem, kenà a ebpereremek taman te ebpekeuma is kezeeǥan din duma is ketazeng he iring te edsilà he andew, wey taman te egkaangken din is kelibriyanan din he iring te edsiǥa he sulù.
ISA 62:2 Ne sikew is Jerusalem, egkaahà te menge etew ziyà te menge nasyun wey te menge hadì dan is kezeeǥan nu he zuma is ketazeng wey kegkemekeǥeǥehem nu. Ebeǥayan ka te Nengazen te veǥu he ngazan.
ISA 62:3 Egkeiring ka te mekempet he kuruna he migewezan te Nengazen he Megbevayè nu.
ISA 62:4 Kenè ke en egngezanan he “Sinelikwey” etawa “Mekevulungbulung,” kekenà, egngezanan ke en he “Kelipey te Megbevayà” etawa “Esawa te Megbevayà,” su ingkelipey ka te Nengazen ne iring te mibpees-eseweey kew.
ISA 62:5 Is midlimbag kenikew, ed-esewaan ke zin iring te betan-en he maama he ebpengesawa te wazè pa mekeremaǥi. Ne iring te igkelipey te maama is ed-esewaan din, igkelipey ka zaan te Megbevayè nu.
ISA 62:6 He Jerusalem, mibpeventayan ku te menge vantey is menge verengbeng nu, ne kenà sikandan ed-engked te ked-ampù te Nengazen. Sikiyu is ebuyù te tavang te Megbevayà, penigudu kew medhangyù.
ISA 62:7 Kenè kew engked he edhangyù diyà te kandin he umana zin benguna is Jerusalem ne himuwa zin he egkezeliǥan heini kayi te kelibutan.
ISA 62:8 Nenangdù is Nengazen he pinaaǥi te gehem din ebeelan din heini. Ke sikandin te, “Kenè ku en ibpekaan is menge trigu niw te menge kuntada niw he lumelengyawè, ne kenè dan en ed-inumen is binu he midheǥuan niw.
ISA 62:9 Sikiyu is edraǥun te trigu, ne iyan kew ebpekekaan dutun te rinaǥun niw, ne edeliǥen a keniyu. Sikiyu is ebpenrupù te menge paras ne iyan kew ed-inum te wahig dutun diyà te valey ku.”
ISA 62:10 Sikiyu is menge etew ziyà te Jerusalem, gawas kew ziyà te menge pultahan keniyan te inged niw, ne endama niw is egkeveyaan te zuma pa he menge zuma niw. Hiǥewani niw heini; iawè niw is menge vatu, ne ipekayabkayab niw is bendirà he iyan ebpetuus te menge etew ziyà te menge nasyun he ibpelikù en te Nengazen is menge etew zin.
ISA 62:11 Pemineg kew! Mibpeuwit is Nengazen kayi he menge lalag diyà te tivuuk he kelibutan: “Kegiyi niw is menge meǥinged diyà te Zion he ebpekeume en is Menluluwas dan, ne zuen din uwiten he suhul.
ISA 62:12 Egngezanan sikandan te ‘Segradu he menge Etew’ wey ‘Menge Linuwas te Nengazen,’ ne is Jerusalem egngezanan he ‘Ebpengenduyen he Inged’ wey ‘Inged he Wazè en Iselikwey.’ ”
ISA 63:1 Hentei heini is ebpekeuma he ebpuun te Bozra he inged diyà te Edom, he nezekiyan te meriǥà is mekempet he visti zin? Ebpekeuma sikandin he utew zekelà is gehem din. Iyan sikandin kes Nengazen he ebpenudtul he egkaangken en te menge etew zin is kezeeǥan duma is ketazeng.
ISA 63:2 Maan is utew meriǥa is bisti zin he iring te visti te etew he perekeres te paras.
ISA 63:3 Midtavak is Nengazen te, “Tenged te pauk ku migkeres ku is menge etew ziyà te menge nasyun iring te paras. Iyan e zà migkeres kayi, ne wazà miduma kedì. Is lengesa zan, midresik diyà te visti ku, umbe nezekiyan heini.
ISA 63:4 Mibeelan ku heini su neume en is andew te kebelesi ku te menge kuntada ku ne edlibriyen ku is menge etew ku.
ISA 63:5 Neinuinu a hein neehè ku he wazà minsan sevaha he mid-uǥup kedì pinaaǥi te kedtevangi zan te menge etew ku. Umbe iyan e zà midlibri te menge etew ku pinaaǥi te ǥehem ku. Is pauk ku iyan midtukù kedì te kedsilut te menge kuntada ku.
ISA 63:6 Tenged te pauk ku, midtekutakan ku is menge nasyun, ne impeziregdireg ku sikandan he iring te egkengelangut. Imperanew ku ziyà te tanà is lengesa zan.”
ISA 63:7 Edtudtulen ku is gaǥew te Nengazen. Edeliǥen ku sikandin tenged te langun he mibeelan din kenitew. Mezakel is meupiya he mibeelan din diyà te kenitew te menge etew ziyà te Israel tenged te zekelà he hizu zin wey kebmahala zin kenitew.
ISA 63:8 Migkaǥi is Nengazen te, “Tutuu iyan he menge etew ku sikandan; menge anak ku sikandan he kenà edluib kedì.” Umbe midlibri zin sikandan.
ISA 63:9 Diyà te langun he menge elentusen dan, nekaantus daan sikandin, ne midlibri zin sikandan pinaaǥi te velinsuǥuen he mibpezayag diyà te etuvangan din. Tenged te kebmahala wey kegkehizuwi zin kandan midlibri zin sikandan; mid-etiman din sikandan seled te langun he andew zutun te nehuna he timpu.
ISA 63:10 Piru nekidsukulà sikandan, ne pinaaǥi zutun midhimu zan he meseeng is Waǥas he Mulin-ulin din. Umbe migkuntada sikandan te Nengazen, ne nehimu sikandin he kuntada zan.
ISA 63:11 Ne hein neuǥet, netenuzan dan is midlavey he timpu he zutun impeǥawas ni Moises is menge etew zin puun te Ehipto. Ne nekeinsè dan te, “Hendei en is Nengazen he mibpelayun kenitew ziyà te zaǥat duma te pengulu tew he si Moises he iring te perevantey te menge kerehidu? Hendei en is Nengazen he mibpeuwit diyà te kenitew te Waǥas he Mulin-ulin din?
ISA 63:12 Hendei en is Nengazen he mibeǥey te gehem ki Moises, he midtevì din is daǥat diyà te etuvangan tew, su para mevantug sikandin te wazà pidtemanan.
ISA 63:13 Hendei en sikandin is nengulu kenitew te kedlayun te zaǥat? Wazè kiw mekeuseng, kekenà, iring kiw te kudà he ziyà mebayà te mehiǥawan he lugar.
ISA 63:14 Mibeǥayan kiw zengan te egkehimelayan tew te Mulin-ulin te Nengazen ne iring kiw te menge vaka he midtupang diyà te penebtavà diyà te suǥud.” Nengazen, mid-aǥak key kenikew is menge etew nu su wey ka meveǥayi te zengeg.
ISA 63:15 Nengazen, tengtengi key guntaan kenikew puun diyan te langit he segradu wey dungganen he ubpeey nu. Hendei en guntaan is ipeng nu kenami wey ǥehem nu he impeehè nu zengan kenami? Hendei en is kebmahala wey kegkehizuwi nu kenami?
ISA 63:16 Su iyan ka Amey zey minsan kenè key egkilelaan te menge kepuun dey he si Abraham wey si Jacob he menge kevuwazan dan. Uya, iyan ka Nengazen, amey zey, iyan ka Menluluwas dey puun pa zengan.
ISA 63:17 Nengazen, maan is idtuǥut nu he mekesuwey key ziyà te menge paaǥi nu? Maan is ibpemezesen nu is gehinawa zey, he tenged kayi naawà is kedtahud dey kenikew? Seǥipaa key en maan kenikew, su menge suluǥuen key kenikew wey ǥaked key kenikew.
ISA 63:18 Seled te mevavà he timpu naangken dey te menge etew he gaked nu is baley nu he, piru mibengkag heini te menge kuntada zey.
ISA 63:19 Gaked key kenikew puun pa zengan. Piru henduen be te ed-isipen nu he kenè key kenikew ǥaked, ne henduen be te wazè key kenikew dumelaha.
ISA 64:1 Tevia nu is langit, Nengazen, ne penaug ka su para mehuyung is menge vuvungan diyà te etuvangan nu.
ISA 64:2 Iring te hapuy ebpeketutung te neǥangu he menge subpang wey ebpekepezìdì te wahig, is kebpekeuma nu ebpekehuyung te menge nasyun he menge kuntada nu, ne egkekilala zan ke hentei ka.
ISA 64:3 Hein mibpenaug ka zengan is mibaal te egkengein-inuwan he wazè dey peebuta, nehuyung is menge vuvungan diyà te etuvangan nu.
ISA 64:4 Puun pa zengan wazè pa nekezineg wey nekaahà te Megbevayà he iring kenikew he edtavang te menge edsarig kandin.
ISA 64:5 Edewaten nu is menge etew he igkelipey zan is kebaal te metazeng, wey ed-ikul te menge paaǥi nu. Piru nepeukan key kenikew su mibpedayun key te kedsupak te menge paaǥi nu. Egkehimu ve ke egkelibri key?
ISA 64:6 Neiring key is langun te vutang he meremerik, ne is langun he meupiya he menge vaal zey, ne iring dà te meremerik he terapu. Iring key is langun te zahun he neǥangu, ne is kelelalung dey ne iring te keramag he midlayap kenami.
ISA 64:7 Wazà minsan sevaha kenami he midangep kenikew wey neninguhà he egawed kenikew. Iyan heeyan hinungdan ke maan is mid-iniyuǥan key kenikew, ne mibey-anan key en kenikew is ebpematey tenged te menge salè dey.
ISA 64:8 Piru minsan pa te iyan heeyan, iyan ka gihapun Amey zey, Nengazen. Iring ka te mendiziyun, ne sikami iring te vasak. Iyan ka mibaal kenami te langun.
ISA 64:9 Nengazen, kenè nu pesubrahi is kegkepeuki nu kenami; kenè nu tentenuzi taman te taman is menge salè dey. Edhangyù key ziyà te kenikew he seǥipaa key, su menge etew key kenikew is langun.
ISA 64:10 Is segradu he menge inged nu, ragkes en is Jerusalem neiring te sibsivayan he wazà duen ed-ubpa.
ISA 64:11 Nevinsulan is segradu wey mekempet he valey nu, he zutun ka ezapa te menge kepuun dey. Neǥevà is langun he menge vutang he utew zey mibmahal.
ISA 64:12 Ne minsan pa te iyan heini, kenè key pe be ǥihapun kenikew edtevangan, Nengazen? Ebpereremek ke zè be, ne ebpurungan key en be kenikew edsiluti?
ISA 65:1 Migkaǥi is Nengazen te, “Mibpekilala a te menge etew he wazà med-insa mehitenged kediey. Ebpeturedu a te wazà mebpen-ahà kediey. Impezayag ku is keugelingen ku ziyà te nasyun he wazà med-umew kedì is menge meǥinged duen.
ISA 65:2 “Edsigudu ad edtaǥad he mekelikù kayi te kedì is menge etew ku he menge mesinupaken, he wazà med-ikul te meupiya he vetasan, su iyan dan dà ebpezumdumahan is keugelingen dan he isip.
ISA 65:3 Edhimuwen dan he mepauk a; ibpeehè dan diyà te etuvangan ku is kebpedayun dan ked-azap te menge ed-ezapen dan pinaaǥi te kebpemuhat dan diyà te menge pemuleey zan wey kedtutung te veyewà diyà te atep te menge valey zan.
ISA 65:4 Emun mezukilem ebpinuu sikandan diyà te menge leveng wey ziyà te meeles he menge lugar su ebpekidlalag dan te ǥimukud te menge minatey en. Egkaan pa sikandan te usa he vavuy wey te zuma pa he keenen he indawey kandan.
ISA 65:5 Egkeǥiyan dan is duma te, ‘Kenè ka uvey kediey su kela ke meremeriki a kenikew. Lumpiyu a kenà sikew!’ Heini he menge etew layun dan edhimuwa he mepauk a. Is pauk ku kandan iring te egkeregreg he hapuy seled te tivuuk he andew.”
ISA 65:6 Migkaǥi pa is Nengazen te, “Pemineg kew! Kayi en te etuvangan ku is insurat ku he hukum ku te menge etew ku. Kenà a ebpereremek, kekenà, ebales a. Ebelesan ku sikandan. Ebpeveyazan ku kandan is langun he menge salè dan wey is menge salà te menge kepuun dan. Su edtutung man sikandan te veyewà wey edsumpeliten e zan diyà te menge vuntud wey menge vuvungan. Umbe ebelesan ku sikandan te timbang te mibeelan dan.”
ISA 65:8 Migkaǥi zaan is Nengazen, “Wazà dèdeeti is mezaat he rupung dutun te menge paras su zuen pa zutun beǥas he egkepulusan, ne iring keniyan is ebeelan ku te menge etew ku, kenè ku zaan ed-eminen te edezaat is langun he menge etew ku. Edlibriyen ku is menge nenilbi kediey.
ISA 65:9 Duen edsemaan ku he menge uuyag diyà te menge kevuwazan ni Jacob wey ni Juda, ne iyan sikandan ebpekepengevilin te tanè ku he mahabet is menge vuntud duen. Iyan sikandan is menge pinilì ku wey menge suluǥuen ku ebpekeubpà kayi he tanà.
ISA 65:10 Edtuvazan ku sikandan is midangep kayi te kediey. Is menge suǥud diyà te Sharon wey Acor egkehimu he penebtavà te menge uyaǥen dan.
ISA 65:11 “Piru edsilutan ku sikiyu is edselikwey kediey wey kenà edseǥipà te segradu he vuvungan ku, kekenà, iyan ebpemuhaten niw is menge ed-ezapen he edtuuwan niw he ebpekeveǥey keniyu te meupiya he ked-ubpà.
ISA 65:12 Is ukur niw ne iyan is kemetayen, ne egkeamin kew ebpematey, su hein nengumew a ne wazè kew medtavak, ne hein migkaǥi a ne wazè kew mebpemineg. Mibaal kew te mezaat diyà te etuvangan ku, ne ke hengkey is kenè ku egkesuatan, ne iyan ebeelan niw.
ISA 65:13 Umbe, siak, is Nengazen he MEGBEVAYÀ migkaǥi a te, ‘Ebpekekaan wey ebpekeinum is menge suluǥuen ku, piru sikiyu mulà egkevitil wey egkemezahan kew. Egkelipey zan mulà piru sikiyu ebpeel-elezan kew.
ISA 65:14 Egkanta zan tenged te kegkelipey piru sikiyu, edsineǥew kew tenged te kegkeseeng wey kezaat te gehinawa niw.
ISA 65:15 Egemiten te menge pinilì ku is ngazan niw emun ebpenrawak dan, ne siak, is Nengazen he MEGBEVAYÀ, iyan a edhimatey keniyu. Piru is menge suluǥuen ku egngezanan ku te veǥu he ngazan.
ISA 65:16 Is minsan hentei ziyà te tanà te Israel he ebpenuvadtuvad etawa ebpenangdù, ebeelan din heini pinaaǥi te ngazan ku te Megbevayà he egkeseriǥan. Su edlipatan ku en is midlavey he menge kelised; id-awè ku en heini ziyà te ked-ehè ku.’
ISA 65:17 “Pemineg kew! Ebaal a te veǥu he langit wey beǥu he tanà. Ne kenè en edtentenuzan is daan he langit wey tanà.
ISA 65:18 Umbe, medlipey kew wey medlipeylipey te wazà pidtemanan tenged kayi te ebeelan ku. Su edhimuwen ku is Jerusalem he kelipey te menge etew, ne ebpekeveǥey zaan te kelipey is menge meǥinged kayi.
ISA 65:19 Egkelipey a tenged te Jerusalem wey te menge meǥinged kayi. Kenè en egkezineg dutun is kedsineǥew etawa kebuyù te tavang.
ISA 65:20 Dutun wazè en ebpatey he edsusu pa etawa betan-en pa. Is ebpatey he 100 he tuig is keǥurang din ed-isipen he vetan-en pa, ne is ebpatey he kenè en ebpekeuma te 100 he tuig is keǥurang din ed-isipen he midsilutan ku.
ISA 65:21 Dutun he timpu ebangun is menge etew ku te menge valey ne ed-ubpaan dan heini. Ebpemula zan te menge paras wey egkeenen dan is beǥas kayi.
ISA 65:22 Kenè en iyan ebpekepehimulus te menge valey zan wey menge pinemula zan is menge kuntada zan. Is kayu kenà ebpatey seled te meluǥayad he timpu, ne kenè daan ebpatey is menge etew ku seled te meluǥayad he timpu, ne ebpekepurung sikandan ebpekepehimulus te hineǥuan dan.
ISA 65:23 Kenè dan en edhaǥù te wazè din pulus, wey kenè dan en ed-anak te mezaat is egkepengkusan din. Su sikandan he menge etew wey is menge kevuwazan dan, ne edtuvazan ku.
ISA 65:24 Dutun te kenè dan pa ebpekevuyù etawa zutun mismu te kebuyù dan, ne edtevaken ku en sikandan.
ISA 65:25 Ebpetuǥenà te kegkaan is dumezaas he menge asu wey menge kerehidu. Is menge erimaung ebpenabtab te reǥami iring te menge vaka. Ne is menge uled kenè en ebpemengaǥat. Wazè en ebpesipala etawa edezaat te segradu he vuvungan ku. Iyan a, is Nengazen, is migkaǥi kayi.”
ISA 66:1 Iyan heini egkeǥiyen te Nengazen: “Is langit iyan pinuuwè ku te edhadì, ne is tanà iyan ebpeuntuzan ku te menge paa ku. Egkehimu ve ke edtukuzan a keniyu te valey? Egkehimu ve ke ebeǥayan a keniyu te lugar he egkehimelayan ku?
ISA 66:2 Kenè be iyan a mibaal te langun he menge vutang? “Siak, is Nengazen egkaǥi te: Edseǥipaan ku is menge etew he kenà ebpelavew wey ed-engked he ebaal te salà wey igkahandek dan is lalag ku.
ISA 66:3 Piru iyan heini paaǥi te kedseǥipaa ku te menge etew he iyan ebpezumdumahan dan is keugelingen dan dà he suat, ne igkelipey zan is utew mezaat he menge vaal zan: Emun edlapà sikandan te vaka he ibpemuhat dan, ne ibpeiring ku haazà te kedhimatey te etew. Emun ebpemuhat sikandan te kerehidu, ibpeiring ku haazà te midhimatey zan te asu. Emun ebpemuhat sikandan te pemuhat he para gasa, ibpeiring ku haazà te mibpelengesa zan te lengesa te vavuy. Ne emun edtutung sikandan te veyewà su edtentenuzan e zan, ibpeiring ku haazà te mibpenubtuvazan dan is duma he menge ed-ezapen.
ISA 66:4 Ne gawas keniyan, ebpeeǥiyan ku zaan sikandan te silut he igkeherati zan. Su hein nengumew a, wazà sikandan medtavak; ne hein migkaǥi a, wazà sikandan mebpemineg. Mibaal sikandan te kelelalung diyà te etuvangan ku, ne ke hengkey is kenè ku egkesuatan iyan ebeelan dan.”
ISA 66:5 Sikiyu is egkahandek he edsupak te lalag te Nengazen, pemineǥa niw is lalag din: “Tenged te kegkemepezumdumahan niw kediey, is duma he menge emurè niw te inged edumut wey edselikwey keniyu. Ed-un-undahan kew zan, ke sikandan te, ‘Mebpaahà is Nengazen te gehem din su wey zey maahà is kelipey niw!’ ” Piru egkepeel-elezan sikandan.
ISA 66:6 Nezineg niw ve is keǥurub diyà te inged wey ziyà te valey te Nengazen? Keǥurub heeyan te Nengazen he ebpenimales te menge kuntada zin.
ISA 66:7 Egkaǥi pa is Nengazen te, “Is Jerusalem, iring te vahi he ed-anak he wazè pa ganì belilita ne midlusazan en.
ISA 66:8 Hentei is nekezineg wey nekaahà te iring kayi? Segugunè be egkehimu is sevaha he inged etawa nasyun seled dà te mevavà utew he timpu? Piru sikan pa ganì belilita is Jerusalem, inlusad en is menge etew zin.
ISA 66:9 Kediey he suat he hapit en sikandan ianak. Ne ǥuntaan ed-eǥenen ku ve is ked-enaka kandan. Uya edtuǥutan ku sikandan! Kenè ku ed-eǥenen is ked-enaka kandan. Iyan a, is Megbevayè niw, is migkaǥi kayi.”
ISA 66:10 Sikiyu is langun he mibmahal niw is Jerusalem wey midlalew kew tenged kandin, lipey kew wey lipeylipey zuma kandin,
ISA 66:11 su wey kew mekeǥezam te keuswagan din iring te vatà he egkahantey te gatas te iney zin.
ISA 66:12 Su migkaǥi is Nengazen te, “Ibpeuswag ku is Jerusalem; iring te edeleman te menge ketiǥeyunan, su ed-uwiten diyà te kandin is menge ketiǥeyunan te menge nasyun. Ed-etimanen kew te Jerusalem iring te vatà he edsepipiyen, ibpesusu, wey edsekepuwen te iney zin.
ISA 66:13 Edlipayen ku sikiyu ziyà te Jerusalem iring a te iney he edlipayen din is menge anak din.”
ISA 66:14 Emun egkemetmetahan niw en heini is mibpengaǥi ku, ne utew kew egkelipey, ebmelig-en kew egkeiring kew te pinemula he mehinuvù. Ibpaahà te Nengazen is gehem din diyà te menge suluǥuen din, piru ibpeehè din diyà te menge kuntada zin is pauk din.
ISA 66:15 Pemineg kew! Ebpekeuma is Nengazen he egkezumahan te hapuy. Ed-untud sikandin te menge kerwahi zin he henduen be te eribpures. Ibpeehè din te menge kuntada zin is pauk din, ne edsilutan din sikandan te edriyubriyub he hapuy.
ISA 66:16 Su edsilutan din pinaaǥi te hapuy wey ispada zin, is langun he mekesesalà he menge etew, ne mahabet is egkepatey zin.
ISA 66:17 Migkaǥi is Nengazen te, “Ebpekedreredsà is kebpatey te menge etew he midwaǥas dan wey midlumpiyuwan dan is keugelingen dan pinaaǥi te ked-azap dan te menge ed-ezapen dan diyà te pemuleey. Ebpematey sikandan is egkaan te vavuy, rumat, wey te zuma pa he keenen he utew mezaat.
ISA 66:18 Netuenan ku is menge ulaula zan wey isip dan. Umbe edhendiyan a ne edtiǥumen ku is menge etew ziyà te langun he menge nasyun, ne egkeehè dan is gehem ku.
ISA 66:19 Ibpeehè ku sikandan te singyal. Ne is egkesamà kandan, edhimuwen ku he menge menunudtulà, ne edsuǥuen ku sikandan diyà te menge nasyun diyà te Tarshish, Pul, Lud (he nevantug is menge etew zuen te kegkemememanè dan), Tubal, Grecia, wey ziyà te zuma pa he meziyù he menge lugar he is menge etew zuen he wazà mekezineg te ventuǥan ku wey wazà mekaahà te ǥehem ku. Edtudtulen dan is gehem ku ziyà te menge nasyun.
ISA 66:20 Ne id-ulì dan is langun he menge zuma niw he Israilihanen puun keniyan he menge nasyun; ne ed-untud dan te menge kudà, menge mula wey menge kemilyu, wey menge kerwahi wey kerumata. Edumahan dutun te menge menunudtulà sikandan diyà te segradu he vuvungan ku ziyà te Jerusalem su iring sikandan te pemuhat kayi te kediey. Iring heini te ebeelan te menge Israilihanen he ed-uwit diyà te valey ku te menge pemuhat he para gasa he intaǥù diyà te lumpiyu he teleǥuey.
ISA 66:21 Ne edhimuwen ku is duma kandan he menge memumuhat wey menge Levihanen. Iyan a, is Nengazen, is egkaǥi kayi.”
ISA 66:22 Migkaǥi pa zaan is Nengazen te, “Iring te kenà egkaawà te taman te taman is beǥu he langit wey beǥu he tanà he ebeelan ku, ne kenà daan egkaawà te wazà pidtemanan is menge kevuwazan niw, ne kenè kew egkelipatan.
ISA 66:23 Ne kada kebpuun te hayag wey kada Andew te Kedhimeley ne ed-azap kedì is langun he menge etew. Iyan a, is Nengazen, is egkaǥi kayi.
ISA 66:24 Ne emun egawas dan diyà te Jerusalem is ebpemen-azap dutun, egkeehè dan is menge lawa te mibpematey he menge etew he nekidsukulà kediey. Is menge tagkey he egkaan kandan ne kenà ebpatey, ne is hapuy he ebpeketutung kandan ne kenà egkeevukan. Ne igkelimezangi sikandan te langun he menge etew.”
JER 1:1 Iyan heini menge lalag ni Jeremias he anak ni Hilkia. Si Hilkia sevaha te menge memumuhat diyà te Anatot he ziyà te tanà ni Benjamin.
JER 1:2 Impahayag te Nengazen is menge lalag he ibpekaǥi zin ki Jeremias hein ike-13 he tuig te kedhadì ni Josia diyà te Juda. Heini si Josia anak ni Amon.
JER 1:3 Ne mibpedayun is kebpahayag te Nengazen te menge lalag he ibpekaǥi zin ki Jeremias taman te timpu te kedhadì ni Jehoyakim, ne pehendiyè en te ike-11 he tuig te kedhadì ni Zedekia he anak ni Josia. Ne ikelima he vulan dutun he tuig mibihag is menge etew ziyà te Jerusalem.
JER 1:4 Migkaǥi is Nengazen kayi te kedì te,
JER 1:5 “Hein wazè ku pa sikew purmaha ziyà te ǥetek te iney nu, mibpilì ku en sikew. Te wazè ke pa meetew, insivey ku en sikew. Mibpilì ku sikew he ebpeneuven ku wey ka mehimu he perekaǥi ziyà te menge nasyun.”
JER 1:6 Midtavak a te, “He Nengazen MEGBEVAYÀ, kenà a metau he ebpengaǥikaǥi, ne vetan-en e pa.”
JER 1:7 Piru migkaǥi is Nengazen kayi te kedì te, “Kenè ka megkaǥi te vetan-en ke pa. Kinahanglan he hipanew ka minsan hendei ku sikew edsuǥua, ne keǥiya nu is minsan hengkey he ibpekaǥi ku kenikew.
JER 1:8 Kenè ka mahandek te menge etew su eduma a is edtavang kenikew.”
JER 1:9 Ne migkevit te Nengazen is bèbè ku he ke sikandin te, “Idsavuk ku guntaan diyà te vèbè nu is menge lalag ku he egkeǥiyen nu.
JER 1:10 Guntaan he andew mibpilì ku sikew he perekaǥi ziyà te menge nasyun wey menge ginhedian. Keǥiyi nu is menge etew ziyà te menge nasyun wey menge ginhedian he is duma kandan egkengepiley wey egkengezeetan. Ne is duma kandan, ed-enew ne ed-uman edhitindeg.”
JER 1:11 Ne mid-uman megkaǥi is Nengazen kayi te kedì te, “Jeremias, hengkey is neehè nu?” Ne midtavak a te, “Subpang te kayu he almindru.”
JER 1:12 Ne migkaǥi is Nengazen te, “Hustu is neehè nu, ne ebpesavut heeyan he ebpekeventayan ku he metuman is lalag ku.”
JER 1:13 Mid-uman med-insà is Nengazen kayi te kedì te, “Hengkey pa is neehè nu?” Midtavak a te, “Sevaha he ziniyun he zuen din wahig he edìdì, ne henduen be te egkeulaan heini puun te zizaya.”
JER 1:14 Ne zutun migkaǥi is Nengazen kayi te kedì te, “Duen kezeetan he ebpuun diyà te zizaya he egkeseǥazan te langun he ed-ubpà kayi he tanà.
JER 1:15 Pemineg ka! Edsuǥuen ku is menge sundaru ziyà te menge ginhedian diyà te zizaya he surunga zan is Jerusalem. Is menge hadì dan ne edsavuk te menge pinuuwè dan te kedhadì diyà te menge pultahan te Jerusalem. Edliǥuyan dan is menge verengbeng kayi, wey edsurungen dan daan is duma he menge inged kayi te Juda.
JER 1:16 Edsilutan ku is menge etew ku tenged te kelelalung dan. Inselikwey e zan pinaaǥi te kedtutung dan te veyewà para te zuma he menge ed-ezapen. Uya, mid-azap dan is menge ledawan he vineelan dan.
JER 1:17 Ne ǥuntaan, endama nu is keugelingen nu. Genat ka ne keǥiya nu kandan is langun he insuǥù ku kenikew. Kenè nu sikandan ikahandek. Su emun egkahandek ka, ibpeiseg ku pa is kegkahandek nu ziyà te etuvangan dan.
JER 1:18 Pemineg ka! Guntaan he andew, edlig-enan ku sikew iring te inged he melig-en etawa putew he tukud, emun kenà ne brunsi he verengbeng. Kenè ka egkezaag te menge hadì, menge upisyal, menge memumuhat, etawa menge etew ziyà te Juda.
JER 1:19 Egkuntedahan ke zan, piru kenè ke zan egkezaag, su zuma a kenikew ne edtevangan ku sikew. Iyan a, is Nengazen, is migkaǥi kayi.”
JER 2:1 Migkaǥi is Nengazen kayi te kedì te,
JER 2:2 “Genat ka ne keǥiya nu heini ziyà te menge tig-Jerusalem: ‘Netenuzan ku is keheǥet te gehinawa niw kayi te kedì wey is kebpelenggaa niw kedì dengan he iring te kebpelenggaa te maama te betan-en he vahi he sikan din pa meesawa. Midsunud kew kedì minsan diyà te sibsivayan he wazà duen menge pinemula.
JER 2:3 Sikiyu is menge Israilihanen insivey kew para kediey. Ne iring kew te nehuna he neraǥun he imbeǥey kayi te kediey. Is menge midaagdaag keniyu, midsilutan ku, ne nengezeetan sikandan. Iyan a, is Nengazen, is migkaǥi kayi.’ ”
JER 2:4 Pemineǥa niw is migkaǥi te Nengazen, diyà te keniyu te menge etew ziyà te Israel he menge kevuwazan ni Jacob.
JER 2:5 Iyan heini migkaǥi te Nengazen: “Hengkey is sayep ku he naahà te menge kepuun niw he iyan hinungdan te kebpekeziyui zan kedì? Iyan dan midsunud is menge ed-ezapen he wazà menge pulus, ne tenged dutun nehimu zaan sikandan he wazà menge pulus.
JER 2:6 Wazè e zan en pen-ahaa minsan pa te iyan a mid-uwit kandan diyà te gawas te Ehipto, ne migiyahan ku sikandan pehendiyà te sibsivayan he wazà duen menge pinemula. Haazà he tanà disirtu, duen menge vudsi, memaza, dilikadu, wey wazà duen ed-ubpà wey minsan edsaǥad.
JER 2:7 Mid-uwit ku sikiyu ziyà te meupiya he tanà su wey niw mepulusi is meupiya he menge sebpet kayi. Iyan, hein nekeuma kew zuen, pinaaǥi te menge salè niw, midremerikan niw haazà is tanà he ǥaked ku, ne midhimu niw heini he utew meremerik.
JER 2:8 Minsan is menge memumuhat ne wazè en mebpen-ahà kedì. Is ebpenurù te kesuǥuan wazà mekekilala kedì. Is menge pengulu ne nekidsukulà kedì. Ne is menge ebpeneuven, midheǥet dan is menge lalag dan pinaaǥi te ed-ezapen he egngezanan ki Baal, ne midsunud dan te zuma he menge ed-ezapen he wazà menge pulus.
JER 2:9 Umbe, id-uman ku sikiyu ibpedsalà pehendiyè en te huziyan he menge kevuwazan niw. Iyan a is Nengazen, is migkaǥi kayi.
JER 2:10 “Hendiyè kew te edsenlepan, diyà te isla te Kitim, wey hendiyè kew te edsilaan, diyà te tanà he Kedar. Purungi niw susiya ke zuen be nehitavù he iring kayi:
JER 2:11 Duen be nasyun he is menge meǥinged duen, mid-ilisan dan is midtuuwan dan he megbevayà, minsan ke kenà heini tutuu he megbevayà? Piru siak is dungganen he Megbevayà, mid-ilisan a te menge etew ku te menge ed-ezapen he wazà pulus.
JER 2:12 Netingkemed is menge linimbag diyà te langit kayi te mibeelan dan; migkerker sikandan tenged te utew zan kegkelimezangi. Iyan a, is Nengazen, is migkaǥi kayi.
JER 2:13 “Is menge etew ku, nekehimu te zezuwa he salà: Mid-iniyuǥan e zan, is serebseb he ebpekeveǥey te untung, wey migkalut dan te vudsi he punduwà te wahig he egkemezahan, he iyan is ked-azap te zuma he menge ed-ezapen.
JER 2:14 Is Israel wazà meetew he uripen. Piru maan is midezeetan sikandin te menge kuntada zin?
JER 2:15 Is menge kuntada zin henduen be te erimaung he edhiniǥer ziyà te kandin. Mibpendezeetan dan is menge tanà kayi, wey mibpemengkag dan is menge inged duen, ne wazè en ed-ubpà duen.
JER 2:16 Is menge tig-Memfis wey tig-Tapanhes is midezaat kayi.
JER 2:17 “Iyan kew mismu is menge Israilihanen, mid-uwit kayi he kezeetan diyà te keniyu. Su hein mibpenguluwan ku sikiyu ziyà te zalan, inselikwey a keniyu, is Nengazen he Megbevayà,
JER 2:18 Guntaan, hengkey is nekuwa niw te kedangep niw ziyà te Ehipto wey Asiria? Kunaan niw vuwa ke ebpekeinum kew pa ziyà te Wahig he Nilo wey te Wahig he Eufrates.
JER 2:19 Tenged te kelelalung niw wey ked-iniyuǥi niw kedì, edsilutan ku sikiyu. Purungi niw is-isipa ke hengkey is ikezaat wey ikereǥen te kedselikwaya niw wey kenè niw kedtehuza te Nengazen he Megbevayè niw. Iyan a, is Nengazen he MEGBEVAYÀ he Mekeǥeǥehem, is migkaǥi kayi.
JER 2:20 “Hein menge uripen kew pa, iring kew te vaka he mid-eyuǥuwan wey pinirisu he migkedinahan, piru hein midlibri ku en sikiyu, kenè kew ebpenilbi kedì. Mid-azap kew hinuun te zuma he menge ed-ezapen diyà te kada metikang he vuvungan wey ziyà te sihung te kada merapung he kayu. Iring kew te vahi he ebelegyà te zengeg din.
JER 2:21 Iring kew man pezem te meupiya he klasi te paras he impemula ku. Piru neiring kew te leew he paras he wazè din pulus.
JER 2:22 Minsan ebpemeziǥù kew pa wey ebpurung ebpenabun egkeehè ku gihapun is keremerik te salè niw. Iyan a, is Nengazen he Megbevayà, is migkaǥi kayi.
JER 2:23 “Maan is nekekaǥi kew he wazè kew meremeriki wey wazè kew med-azap te menge ledawan ni Baal? Susiya niw ke hengkey he salà is nehimu niw ziyà te suǥud-suǥud te Hinom. Is-isipa niw is salà he neveelan niw. Iring kew te behiyan he kemilyu he mibpelelevag he kenà ebpeketeren.
JER 2:24 Iring kew te behiyan he asnu he ebpekemurmuriwad te kebpelelevag din. Emun egkesuat he ebpeniwelayan ne wazè en ebpekeeǥen kandin. Melemu he ebpen-ahaan te meemahan emun timpu te kebpepeniwaley.
JER 2:25 “Sikiyu is menge Israilihanen, egkehilis en is sendalyas niw, wey egkemezahan en is bekereng niw te kedtulung niw kedtundug te zuma he menge ed-ezapen. Egkaǥi kew pa te, ‘Kenà egkehimu ke ed-iniyuǥan dey is duma he menge ed-ezapen. Mahal zey sikandan ne edsunud key kandan.’
JER 2:26 “Iring te egkepeel-elezan is tekawen emun egkezekepan, ne egkepeel-elezan kew zaan is menge etew te Israel. Uya, egkepeel-elezan kew wey is menge hadì niw, menge upisyal niw, menge memumuhat niw, wey menge ebpeneuven diyà te keniyu.
JER 2:27 Egkeǥiyen niw he kayu is amey niw ne vatu is iney niw. Mid-iniyuǥan a keniyu, piru emun edlised kew, ebuyù kew te tavang kayi te kediey.
JER 2:28 Hendei en is menge ed-ezapen he mibeelan niw para keniyu? Ipeuvey niw ziyà te keniyu su ed-ahaan ta ke ebpekehimu ve sikandan he edlibri keniyu te kelised niw. Su utew mezakel is menge ed-ezapen niw iring kezakel te menge inged diyà te Juda.
JER 2:29 Maan is edriklamu kew kayi te kedì? Kenè be iyan kew nekidsukulà kedì?
JER 2:30 Midsilutan ku is menge anak niw para memansu, piru wazà heini medrimeǥas te meupiya ziyà te kandan. Kenà sikandan egkesuat he ebpenuruen. Iyan kew mismu midhimatey te menge ebpeneuven diyà te keniyu; neiring kew te egkevitil he erimaung.
JER 2:31 “Sikiyu is menge etew kayi he lapis te kevuwazan, pemineǥa niw is egkeǥiyen ku. Neiring e ve te disirtu ziyà te Israel etawa neiring a te utew merusirem he lugar? Maan is migkaǥi kew te, ‘Ebeelan dey en is minsan hengkey he egkesuatan dey te ebaal. Ne kenè key en ed-uvey ziyà te Megbevayà.’
JER 2:32 “Egkelipatan be te raǥa is elahas din etawa visti zin te eseweey? Kenà, piru sikiyu is menge etew ku, nelipatan a keniyu seled te neuǥet he timpu.
JER 2:33 Metau kew te paaǥi para mahala kew te mibmahal niw he menge ed-ezapen. Minsan is bahi he metau he ebelegyà te zengeg din ne ebpekeistudyu pa ziyà te keniyu.
JER 2:34 Is menge visti niw nezekiyan te lengesa te wazà mekesalà he menge pubri. Mibpenhimetayan niw sikandan minsan wazà sikandan mezekepi he midseled diyà te valey niw te kebpenakew. Ne minsan mibeelan niw heini,
JER 2:35 egkaǥi pa is kada sevaha keniyu te, ‘Wazà a mekesalà. Ne kenà a egkepeukan te Nengazen.’ Piru edsilutan ku sikiyu tenged te kegkaǥi niw he wazè kew mekesalà.
JER 2:36 “Melemu zà diyà te keniyu is ked-ilis-ilis te kezapig niw he menge nasyun. Piru utew kew ebpeel-elezi te Ehipto he kezapig niw iring te kebpeel-elezi keniyu te Asiria.
JER 2:37 Ibpaawè ku sikiyu kayi he tanà he idampè niw is menge velad niw ziyà te menge ulu niw tenged te kegkeseeng niw. Su inselikwey ku is menge nasyun he midseriǥan niw. Heini he menge nasyun kenà ebpeketavang keniyu.”
JER 3:1 “Emun edsuwayan te maama is esawa zin ne mibpeuman mebpeesawa, ne kenè din en haazà ed-umanan ed-esewaa su utew heini ebpekeremerik te tivuuk he tanà. Piru sikiyu is menge Israilihanen nengungubpaan kew he iring te vahi he ebelegyà te zengeg din. Mahabet is menge ed-ezapen he mibmahal niw. Piru minsan pa te iyan haazà, mid-umew ku pa ǥihapun sikiyu te kedlikù kayi te kedì. Iyan a, is Nengazen, is migkaǥi kayi.
JER 3:2 “Tengtengi niw is demilag te menge vuvungan. Duen pe be lugar zutun he wazè niw meremeriki? Midremerikan niw is tanà pinaaǥi te ked-azap niw te zuma he menge ed-ezapen wey menge kelelalung niw. Iring kew te vahi he ebelegyà te zengeg din he ebpimpinuu ziyà te kilid te zalan is edtaǥad te maama. Iring kew zaan te tulisan he ed-ayan te egkeizen din.
JER 3:3 Tenged keniyan, wazà med-uzan diyà te keniyu minsan timpu pezem te tipenguzan, su iring kew te vahi he ebelegyà te zengeg din he kenà egketau he egkeeled.
JER 3:4 Ne ǥuntaan egkaǥi kew kayi te kedì te, ‘Amey ku, duma ku sikew puun pa te vatè e pa.
JER 3:5 Egketulungan e ve kenikew egkepeuki? Ebpedayun be is pauk nu taman te taman?’ Iyan heeyan menge lalag niw, piru ebeelan niw is langun he mezaat he egkesuatan niw te ebaal.”
JER 3:6 Dutun te timpu te kedhadì ni Josia migkaǥi is Nengazen kayi te kedì te, “Neehè nu ve is mibeelan te kenà menge metinumanen he menge Israilihanen? Mid-azap dan is duma he menge ed-ezapen diyà te kada metikang he vuntud wey ziyà te sihung te kada merapung he kayu. Iring sikandan te vahi he ebelegyà te zengeg din.
JER 3:7 Kunaan ku ke edlikù sikandan kayi te kedì emun egkepasad dan en te ebaal is langun, iyan, wazà sikandan medlikù. Ne naahà heini te meluiven he suled dan he iyan is Juda.
JER 3:8 Midsuwayan ku is Israel ne midsegseg ku tenged te kebpekimaama zin. Piru minsan pa te iyan heini wazà mehandek is meluiven he suled din he iyan is Juda.
JER 3:9 Ne tenged te wazè din beliya is kebpekimaama he iyan is ked-azap te zuma neremerikan din is tanà pinaaǥi te ked-azap din te menge ed-ezapen he vatu wey kayu.
JER 3:10 Minsan pa kayi te langun, kenà tinutuuwà is kedlikù te meluiven he Juda kayi te kedì. Uvag-uvag dà is kedlikù din kayi te kedì. Iyan a, is Nengazen, is migkaǥi kayi.”
JER 3:11 Migkaǥi is Nengazen kayi te kedì te, “Minsan midluib kediey is Israel, deyzey heini kenà te meluiven he Juda.
JER 3:12 Ne ǥuntaan, genat ka, ne keǥiya nu heini he lalag diyà te Israel: Iyan a is Nengazen, migkaǥi a te: Likù ka kayi te kedì, sikew is kenà metinumanen he Israel, su hihizuwen a. Kenè ku en sikew egkepeukan.
JER 3:13 Engkena nu zà he nekesalè ka pinaaǥi te kebpekidsukulè nu te Nengazen he Megbevayè nu, wey midsunud ka te zuma he menge ed-ezapen pinaaǥi te ked-ezapa nu kandan diyà te sihung te kada merapung he kayu. Engkena nu he wazè ka mebpezumazuma kediey. Iyan a is Nengazen, is migkaǥi kayi.”
JER 3:14 Migkaǥi pa is Nengazen, “Likù kew is kenà metinumanen he menge anak, su ǥaked ku sikiyu. Egkuwaan ku is sevaha etawa zezuwa keniyu ziyà te kada inged etawa tribu ne ed-uwiten ku ziyà te Jerusalem.
JER 3:15 Ne ebeǥayan ku sikiyu te menge pengulu he mid-isip ku he zait he ebpengulu keniyu he zuen dan ketau wey kedsavut.
JER 3:16 Emun egkeume en is timpu he utew kew en ebmahabet keniyan he tanà, ne kenè niw en human edtentenuzan is Kavan te Kebpekid-uyun ku keniyu. Kenè niw en heini ed-isipen wey edtentenuzan. Kenè kew en ebulungen kayi wey kenè kew en ed-uman ebaal te iring kayi.
JER 3:17 Dutun he timpu egngezanan niw is Jerusalem he ‘Pinuuwà te Nengazen te Kedhadì Din,’ ne is langun he menge etew ziyà te menge nasyun edtiǥum dan diyà te Jerusalem te kebayew te ngazan te Nengazen. Kenè dan en ebpezumdumahan is kegkemesinupaken te mezaat he ǥehinawa zan.
JER 3:18 Dutun he timpu, is menge tig-Juda wey menge tig-Israel ebpezumahà te ked-ulì is ebpuun te kegkevihaǥa kandan diyà te zizaya; diyà sikandan ebpevayà te tanà he imbeǥey ku te menge kepuun dan para egkepengevilin dan.
JER 3:19 Iyan a mismu migkaǥi te, ‘Utew a melipayen pezem he egkilelaan ku sikiyu he menge anak ku ne ebeǥayan ku sikiyu te meupiya he tanà he kinemeupiyahan he kevilin kayi te tivuuk he kelibutan.’ Kunaan ku ke ‘Amey’ is id-umew niw kedì ne kenà ad keniyu ed-ewaan.
JER 3:20 Piru iring is ked-isipa ku keniyu te vahi he meluiven te esawa zin. He menge etew te Israel, iyan a, is Nengazen migkaǥi kayi.
JER 3:21 “Egkezineg is keǥurub diyà te zemilag te menge vuvungan. Ed-erang wey ebpehizuhizu is menge etew te Israel tenged te mezaat he menge vaal zan wey kedlipati zan kedì, te Nengazen he Megbevayè dan.
JER 3:22 Sikiyu is kenà metinumanen he menge etew, likù kew kayi te kediey su ebewian ku is kegkeengey-engey niw.” Midtavak dan te, “Uya, ed-uvey key ziyà te kenikew su iyan ka Nengazen he Megbevayè dey.
JER 3:23 Tutuu iyan he is ked-azap dey te zuma he menge ed-ezapen diyà te menge vuntud ne zekelà he sayep. Diyè dà te kenikew is kelibriyanan te Israel, Nengazen he Megbevayè dey.
JER 3:24 Puun pa te vetan-en key pa is mekeeled-eled he menge ed-ezapen iyan en nekepehimulus te veǥas te kedhaǥù te menge kepuun dey, he iyan is menge uyaǥen dan wey menge anak dan.
JER 3:25 Ereg key he ed-eles tenged te kegkeeled su sikami wey is menge kepuun dey nekesalà diyà te kenikew, Nengazen he Megbevayè dey. Puun pa te kegkevatè dey taman en guntaan ne wazè key medsunud kenikew.”
JER 4:1 Migkaǥi is Nengazen te, “He Israel, likù ka pezem kayi te kediey. Emun idselikwey nu en is utew mezaat he zuma he menge ed-ezapen ne kenà ad kenikew ewai,
JER 4:2 ne ngazan ku zà is gemita nu emun edheǥeten nu is penangdù nu ne pengungubpaan ka he egkeseriǥan, hustu wey metazeng, ne egkehimu ka he tuvad te menge nasyun, ne ebeǥayan ke zan te zengeg.”
JER 4:3 Iyan heini migkaǥi te Nengazen diyà te menge etew ziyà te Juda wey Jerusalem: “Iringi niw is ebasuk he edhimu te paaǥi wey mebmelemineg is tanà, kinahanglan he pekelemineǥa niw zaan is mesinupaken he ǥehinawa niw; wey iring te ebasuk he ibpen-awà din is duǥiyen he menge sagbet su wey meketuvù is benì din, kinahanglan he kenè niw ul-ulaha is salà he ebpekezezaat te untung niw.
JER 4:4 Sikiyu is menge etew ziyà te Juda wey Jerusalem, lumpiyuwi niw is gehinawa niw ziyà te etuvangan te Nengazen, su emun kenà, ne egkeǥezaman niw is pauk ku he iring te hapuy he kenà egkeevukan tenged te kezaat te vaal niw.
JER 4:5 “Keǥiyi is menge tig-Juda wey menge tig-Jerusalem he ipezaǥing dan is budyung diyà te tivuuk he tanà. Ne kulehia zan te mezaǥing is menge etew he mebpelaǥuy zan wey med-eles diyà te menge inged he neliǥuy te menge verengbeng.
JER 4:6 Ivayew is bendirà wey metueni te menge etew he ibpehendiyà sikandan te Jerusalem. Genat kew en ne eles kew su ebpeuwit a te zekelà he kezeetan he ebpuun diyà te zizaya.”
JER 4:7 Edsurung en is ebpendezaat te menge nasyun he henduen be te erimaung he migawas puun te elesè din. Migenat en sikandin puun te inged din su edezeetan din is tanè niw. Ebengkaǥen din is menge inged niw taman te kenè en egkehimu he ed-ubpaan.
JER 4:8 Umbe, bivisti kew te saku he tuus te kegkeseeng niw. Lelendag kew su utew kiw egkepeuki te Nengazen.
JER 4:9 Migkaǥi is Nengazen te, “Dutun he andew, is hadì wey menge upisyal egkaawà is kevurut dan, egkulbaan is menge memumuhat, wey is menge ebpeneuven, ne egkeinu-inu.”
JER 4:10 Ne migkaǥi a te, “He Nengazen he MEGBEVAYÀ, nelimbungan nu is menge etew tenged te migkaǥi nu, su midsaad ka te kelinew te Jerusalem. Piru naandam en bes is ispada he idhimatey kandan.”
JER 4:11 Egkeuma is timpu he zutun egkaǥi is Nengazen diyà te menge etew ziyà te Juda wey Jerusalem te, “Ebpengeramag te utew meinit ebpuun diyà te zemilag he menge vuvungan te disirtu pehendiyà te menge etew ku. Ne kenà heini para te kebpalid dà te trigu zan.
JER 4:12 Utew heini mevendes he keramag he ebpuun kayi te kediey. Guntaan, egkeǥiyen ku ziyà te kandan is idsilut ku.”
JER 4:13 Tengteng kew! Ebpekeume en is kuntada tew he iring te ǥapun. Is menge kerwahi zin, henduen be te eribpures, ne is menge kudè din, edhuna pa he elistu te menge mendereǥit. Mekehizuhizu kiw! Su egkezeetan kiw en.
JER 4:14 “Menge tig-Jerusalem, lumpiyuwi niw is kezaat te gehinawa niw su wey kew melibri. Ebpedayun en be is kezaat te isip niw?
JER 4:15 Is kezeetan niw midtudtul en te menge menunudtulà puun te Dan pehendiyà diyà te vuvungan te Efraim.
JER 4:16 Midsuǥù sikandan he mebpetizaan dan diyà te menge nasyun wey ziyà te Jerusalem he zuen edsurung he menge sundaru he ebpuun diyà te meziyù he inged. Edhinggaten dan te tebek is menge meǥinged diyà te menge inged te Juda.
JER 4:17 Midliǥuyan dan is Jerusalem he henduen be te ebantey sikandan te pinemula zan, su midsukulan a te menge tig-Jerusalem. Iyan a, is Nengazen, is migkaǥi kayi.
JER 4:18 Keniyu mismu he menge vetasan wey menge vaal is mid-uwit kayi he kezeetan diyà te keniyu. Iyan heini silut niw. Utew heini merasey! Henduen be te midsundang is gehinawa niw tenged kayi.”
JER 4:19 Kenè ku en egkaantus is kegkeseeng ku; utew subra is kebpekezag-es ku. Henduen be te ebpemevayu is kumeng ku tenged te kekulbà ne kenà a ebpeketeren. Su nezineg ku is daǥing te vudyung ne nezineg ku zaan is kulehian te ebpekidtebek.
JER 4:20 Ebpekedtitinundug dà is menge kezeetan. Ne nevengkag is tivuuk he tanà. Minsan is menge tulda he ubpeey ku, segugunè dà neregdas.
JER 4:21 Keenu pa vuwa egkeengked is kegkaahaa ku te bendirà te ebpekidtebek wey is kegkezineǥa ku te zaǥing te vudyung?
JER 4:22 Migkaǥi is Nengazen te, “Tulebung is menge etew ku; wazè e zan mekilala. Iring sikandan te engey he menge vatà he kenà ebpekesavut. Utew zan metau he ebaal te mezaat, ne kenè dan mulà egketau he ebaal te meupiya.”
JER 4:23 Neehè ku is kelibutan he wazè din purma wey taǥù. Neehè ku zaan is langit he wazè din kerayag.
JER 4:24 Neehè ku is menge vuntud wey menge vuvungan he nengehuyung.
JER 4:25 Neehè ku zaan he wazà menge etew, ne is langun he menge tagbis midlayang pehendiyà te meziyù.
JER 4:26 Neehè ku he is daan he selebpeten he tanà ne nehimu he disirtu. Nengezeetan is langun he menge dezekelà he menge inged tenged te utew kegkepauk te Nengazen.
JER 4:27 Iyan heini migkaǥi te Nengazen: “Egkevengkag is tivuuk he kelibutan, piru kenè ku heini ebpurungan edezeeti.
JER 4:28 Egkeseeng is kelibutan ne ebmerusirem is langit, su nekaǥi ku en is silut, ne kenè ku en ebelvelewanan is nekaǥi ku. Nekedisisyun ad ne kenè en egkahalin is isip ku.”
JER 4:29 Tenged te keǥurub te ebmartsa he menge pereuntud te kudà wey menge mememanà, nemelaǥuy tenged te kegkahandek is menge meǥinged diyà te menge inged. Is duma ziyà mebpelaǥuy te ketelunan, wey is duma midtekezeg diyà te menge vetuwen. Mid-ewaan is langun he menge inged ne wazè en dutun meǥinged.
JER 4:30 He Jerusalem he midezeetan, hengkey is baal nu? Maan is midsul-ub ka te mekempet he visti wey menge elahas? Maan is mibpintalan nu is menge mata nu? Is kebpemekempet nu ne wazè din en pulus. Is mibmahal nu he kezapig nu he menge nasyun midselikwey en kenikew ne egkesuatan ke zan en te edhimatey.
JER 4:31 Nezineg ku is erang wey zag-es, he iring te erang wey zag-es te vahi he ed-anak te penganey. Erang heini te menge meǥinged diyà te Jerusalem he kenè en ebpekeǥehinawa is ebpenepayà he egkaǥi te, “Mekehizuhizu key; henduen be egkevidtawan key en. Su heeyan en is menge kuntada zey he edhimatey kenami.”
JER 5:1 Migkaǥi is Nengazen te, “Sikiyu is menge meǥinged diyà te Jerusalem, hendiyè kew te menge zalan! Ne ehàa niw is menge pelasa! Emun duen egketuredu niw he minsan sevaha zà he metazeng wey egkeseriǥan he etew, ebpeseyluwen ku is menge meǥinged te inged niw.
JER 5:2 Iyan, minsan pa te edheǥeten niw is penangdù niw pinaaǥi te ngazan ku, edtarùtarù kew ǥihapun.”
JER 5:3 Ne zutun migkaǥi a te, “He Nengazen, kenè be nengeehè ka te etew he egkeseriǥan? Mibpesekitan nu is menge etew nu, piru wazè dan heini seǥipaa. Midsilutan nu sikandan wey zan mepenurù, piru kenè dan egkesuat he ebpenuruen. Wazè dan en keelezan ne kenè en sikandan ed-engked te kebaal te mezaat.
JER 5:4 “Kunaan ku ke menge pubri zà sikandan, iyan, menge tulebung dan bes. Su wazè dan metueni is menge paaǥi te Nengazen he Megbevayè dan he ibpetuman kandan.
JER 5:5 Umbe, midhendiyà a te menge pengulu zan su wey ku sikandan melelaǥi. Siguradu he netuenan dan is menge paaǥi te Nengazen he Megbevayè dan he ibpetuman kandan.” Piru minsan sikandan, inselikwey zan daan is menge ibpetuman te Megbevayà.
JER 5:6 Umbe, edsurungen sikandan te menge kuntada zan he henduen be te erimaung he ebpuun diyà te ketelunan etawa zumezaas he asu he ebpuun diyà te disirtu, wey iring te liyupardu he ed-ayan diyà te uvey te inged su edawi te minsan hentei he egawas. Neulaula heini kandan su utew en subra is kebpekidsukulè dan te Megbevayà wey layun dan en ed-iniyuǥi sikandin.
JER 5:7 Migkaǥi is Nengazen te, “Kenè ku en sikiyu ebpeseyluwen. Su minsan is menge anak niw midselikwey kedì, wey emun edheǥeten dan is penangdù dan, ngazan te tarù he megbevayà is egemiten dan. Imbeǥey ku kandan is menge kinahanglan dan piru nekehimu zan gihapun he ebpengumpadi, ne edhahasekhasek dan en diyà te valey te menge vahi he ebelegyà te zengeg dan.
JER 5:8 Neiring sikandan te menge tudu he kudà he mibpelelevag is nepurungan meelimahi. Is kada sevaha kandan egkeeriǥan te esawa te zuma.
JER 5:9 Kenè be ereg he edsilutan ku sikandan tenged kayi? Kenè be ereg he ebelesan ku is menge meǥinged diyà te nasyun he iring kayi is baal zan? Iyan a, is Nengazen, is migkaǥi kayi.
JER 5:10 “Sikiyu is menge kuntada te menge Israilihanen, dèdeeti niw is menge pemuleey te paras dan, piru kenè niw emina. Penempeza niw is menge subpang kayi, su kenè ku en gaked heini he menge etew.
JER 5:11 Is menge etew ziyà te Israel wey Juda, ne kenè en ebpezumazuma kediey. Iyan a, is Nengazen, is migkaǥi kayi.
JER 5:12 Wazè dan megkaǥi te tutuu mehitenged kedì. Migkaǥi sikandan te, ‘Kenè kiw ebmenuwen te Nengazen! Wazà kezeetan he ebpekeuma ziyà te kenitew; wazà tebek etawa vitil.
JER 5:13 Is menge ebpeneuven wazè dan pulus, is menge lalag dan, kenà diyà ebpuun te kediey. Berakat he mehitavù diyà te kandan is menge tagnè dan.’ ”
JER 5:14 Umbe, iyan heini migkaǥi te Nengazen he Megbevayà he Mekeǥeǥehem kayi te kediey: “He Jeremias, geina te iyan heini migkaǥi kayi he menge etew, ibeǥey ku kenikew is menge lalag he iring te hapuy he ebpeketutung kandan. Egkeiring dan te kayu he netutung.”
JER 5:15 Migkaǥi is Nengazen te, “Menge etew te Israel, ebpeuwitan ku sikiyu te menge etew he ebpuun diyà te meziyù he nasyun he edsurung keniyu. Mekeǥeǥehem heini wey kezaan en he nasyun; is kineǥiyan dan kenè niw egkesavut.
JER 5:16 Ebpekepatey is menge gumaan dan, ne memevurut sikandan he menge sundaru.
JER 5:17 Ed-eminen dan is menge abut niw, menge keenen niw, menge paras wey menge higus niw. Ebpenhimetayan dan is menge anak niw wey is menge uyaǥen niw. Ebengkaǥen dan is dezekelà he menge inged niw he neliǥuy te verengbeng he midseriǥan niw.
JER 5:18 Piru minsan pa te iyan heeyan egkehitavù dutun he timpu, ne kenè ku sikiyu ebpurungan edezeeti. Iyan a, is Nengazen, is migkaǥi kayi.
JER 5:19 Emun ed-insà is menge etew te, ‘Maan is mibeelan heini is langun te Nengazen he Megbevayè tew ziyà te kenitew?’ Keǥiyi nu sikandan te, ‘Geina te inselikwey niw is Nengazen, ne nenilbi kew te zuma he menge ed-ezapen diyà mismu te tanè niw. Ne ǥuntaan ebpekepenilbi kew te menge lumelengyawà dutun te kenà keniyu he tanà.’
JER 5:20 “Ipetueni nu heini te menge etew ziyà te Israel wey Juda:
JER 5:21 Pemineǥa niw heini te tulebung he menge etew. Duen niw menge mata piru kenà ebpekaahà, duen niw menge telinga piru kenà ebpekezineg.
JER 5:22 Wazà niw ve kedtahud kediey? Maan is wazè kew kerkera ziyà te etuvangan ku? Iyan a is Nengazen migkaǥi te mibeelan ku is beyvey he netemanan te zaǥat. Pirmeninti heini he dulunà ne kenà egkelapew. Edtampil kayi is baǥel piru kenè en edlavey is daǥat kayi.
JER 5:23 Piru heini he menge etew menge mesinupaken wey mesinukulen. Mid-iniyug dan wey mibpekeziyù kayi te kedì.
JER 5:24 Kenà ebpuun diyà te ǥehinawa zan is kegkaǥi zan te, ‘Edtehuzen tew is Nengazen he Megbevayè tew he mibeǥey te uzan dutun te hustu he timpu wey mibeǥey kenitew te sebpet dutun te timpu te kedraǥun.’
JER 5:25 Is kelelalung niw iyan hinungdan he wazà heini mesigudu meulaula ziyà te keniyu. Is menge salè niw iyan mid-eǥen para kenè niw mezawat heini he menge tuvad.
JER 5:26 “Duen lalung he menge etew keniyan te menge etew ku he edtaǥad te egkebiktima zan, iring sikandan te etew he ebpenlitag te tagbis. Midlitag dan para melitag is duma he etew.
JER 5:27 Iring te beleyanà he nepenù te menge tagbis, is baley kayi he menge etew nepenù te ketiǥeyunan he nekuwa zan te mezaat he paaǥi. Umbe midsepian sikandan wey nehimu he gehemanen.
JER 5:28 Midlambù dan wey mibmeupiya is lawa zan. Kenè en edtaman is kebaal zan te mezaat. Wazè dan beǥayi te hustu he kukuman is menge ilu, wazè dan depiǥi is ketenged te menge pubri he menge etew.
JER 5:29 Kenè be ereg he edsilutan ku sikandan tenged kayi? Kenè be ereg he ebelesan ku is menge meǥinged diyà te menge nasyun he iring kayi is baal zan?
JER 5:30 Mekahandekhandek wey mekulba is nengehitavù kayi he tanà:
JER 5:31 Is menge ebpeneuven tarù is tagnè dan. Is menge memumuhat kandan he keǥehem is egemiten dan te kedumala zan. Ne nekaangey kayi is menge etew ku. Piru hengkey vuwa is ebeelan dan emun egkeume en is ketepusan he timpu?”
JER 6:1 “Pelaǥuy kew wey med-eles is menge kevuwazan ni Benjamin! Gawas kew ziyà te Jerusalem! Ipezaǥing niw is budyung diyà te Tekoa ne uyawi niw is Bet Hakerem. Su ebpekeuma is dekelà he kezeetan he ebpuun diyà te zizaya.
JER 6:2 Egevaan ku is mekempet he inged he Jerusalem.
JER 6:3 Edliǥuyan heini te menge peremandar wey menge sundaru zan. Idlelawig dan is menge tulda zan diyà te peliǥuy kayi ne zutun dan ebpelastar.
JER 6:4 Ne egkaǥi sikandan te, ‘Ebpengandam kiw te kedsurung te Jerusalem. Edsurungen tew pezem sikandan te meudtu. Iyan, ǥuntaan hapit en edsanlep is andew ne ebpehendiyè en te kebmerusirem.
JER 6:5 Umbe, nasì tew en sikandan edsurunga kengkuwan te mezukilem ne ebengkaǥen tew is melig-en he menge vahin kayi he inged dan.’ ”
JER 6:6 Iyan heini migkaǥi te Nengazen he Mekeǥeǥehem: “Penamped kew te menge kayu he egkeǥamit niw te kebengkag te verengbeng te Jerusalem, ne tambù kew te tanà diyà te kilid te verengbeng he iyan egkepemenehikan niw. Heini he inged ereg en he edezeetan, su midelandap en kayi he lugar is kebpendaagdaag.
JER 6:7 Iring heini te serebseb he kenà ed-engked he edtuda, su kenà daan egkeengked is kebaal te mezaat kayi. Layun egkezineg kayi he inged is kebpaantus wey kebpendezaat. Is daru wey palì kayi iyan layun ku egkaahà.
JER 6:8 Ebpetizeenan ku sikew is Jerusalem: emun kenè ka ebpemineg, ed-iniyuǥan ku sikew; ne edhimuwen ku he mekevulungbulung is tanè nu su para wazè en ed-ubpè kayi.”
JER 6:9 Ne heini pa is migkaǥi te Nengazen he Mekeǥeǥehem: “Is egkesamà he uuyag diyà te Jerusalem ibpepenginrarew ku te menge kuntada, iring te kebpekirarew te ebpenrupù te paras he midliku su edsusiyen din is menge subpang ne midrarew zin is nesamà he menge veǥas kayi.”
JER 6:10 Midtavak a te, “Piru hentei man is ebpetizeenan ku? Hentei man is ebpemineg kedì? Midampè dan is menge telinga zan para kenà sikandan mekezineg. Wazè dan kedtahud te lalag te Nengazen, ne kenè dan igkelipey is kebpemineg kayi.
JER 6:11 Neǥezam ku zaan is dekelà he pauk he iyan is pauk te Nengazen, ne kenè ku heini egkeeǥen.” Migkaǥi is Nengazen te, “Ibpeǥezaman ku is pauk ku ziyà te menge vatà he eguǥusà diyà te zalan, diyà te menge vetan-en he menge maama he edtitiǥum, diyà te menge telteleesawa, wey ragkes en is utew en memeǥurang.
JER 6:12 Is menge valey zan ibeǥey ziyà te zuma, ragkes en is menge pemuleey zan wey menge esawa zan. Egkehitavù heini emun edsilutan ku en is menge etew he ed-ubpà kayi he tanà. Iyan a, is Nengazen, is migkaǥi kayi.
JER 6:13 “Puun te kinemevevaan pehendiyà te kinetikangan is ked-etew zin, ne ebpenlimbung su para mekeselapì. Minsan is menge ebpeneuven wey is menge memumuhat ne ebpengilad daan.
JER 6:14 Wazè dan seǥipaa is palì te menge etew ku he iyan is uvag dà he kedtuu. Minsan gerabi heini, egkaǥi zan te ‘melinawen kiw’ minsan pa te iyan tutuu is duen tebek.
JER 6:15 Neeled dan be tenged te utew mezaat he vetasan dan? Wazà! Su wazè dan en keelezan, minsan deisek! Umbe egkezeetan daan sikandan iring te kezekelan. Egkezeetan sikandan dutun te timpu te kedsiluti ku kandan. Iyan a, is Nengazen, is migkaǥi kayi.”
JER 6:16 Ne heini pa is migkaǥi te Nengazen: “Hitindeg kew ziyà te lembaǥan te menge zalan ne purung kew pekisusi. Insè kew ke hendei is kezaan wey meupiya he zalan he meupiya he ed-ikulen, ne zutun kew ikul. Emun ed-ul-ulahan niw heini ne ebpekaangken kew te kelinew. Piru migkaǥi kew te, ‘Kenè key mulà keniyan ed-ikul.’
JER 6:17 Mibpilì a te vantey he ibpekaǥi ku keniyu te, ‘Pemineǥa niw is kebpezaǥing te vudyung su wey kew mekepengandam.’ Piru migkaǥi kew te, ‘Kenè key mulà ebpemineg.’
JER 6:18 “Umbe pemineg kew is menge nasyun. Ahàa niw ke hengkey is egkehitavù te menge etew ku.
JER 6:19 Pemineg ka, is kelibutan! Ebpeuwitan ku te kezeetan heini he menge etew he idsilut ku kandan tenged te mezaat he menge planu zan. Su wazè dan pemineǥa is menge lalag ku wey inselikwey zan is kesuǥuan ku.
JER 6:20 Kenè ku ebeliyen is edtutungen dan he veyewà he ebpuun pa te Sheba, wey is menge pehemut he ebpuun pa ziyà te meziyù he lugar. Kenè ku egkezawat is menge pemuhat dan he edtutungen. Is menge pemuhat dan kenà ebpekelipey kedì.
JER 6:21 Umbe siak, is Nengazen, migkaǥi a te, ‘Edsavuk a te ebpekeseligkat kayi he menge etew. Ne tenged kayi egkezeetan is menge ginikanan wey is menge anak dan, ragkes en is telteleemiǥu wey teltelesiringan.’ ”
JER 6:22 Mid-uman pa megkaǥi is Nengazen te: “Tengteng kew! Duen menge sundaru he ebpekeuma he ebpemuun diyà te tanà he zizaya. Ebpuun sikandan diyà te sevaha he nasyun he mekeǥeǥehem he ziyà te meziyù he lugar he andam en te kedsurung.
JER 6:23 Neǥumeenan sikandan te menge panà wey menge vangkew. Mesipala sikandan wey wazè dan hizu. Is keǥurub dan henduen be te keǥurub te zezekelà he menge vaǥel dutun te ked-untud dan te menge kudè dan. Ebpekeuma zan su edsurungen kew zan, is menge tig-Jerusalem.”
JER 6:24 Mahabet is nezineg dey he tudtul mehitenged kandan ne midluyahan key. Kegkehandek wey kesakit te gehinawa is neǥezam dey iring te kegkesekiti te vahi he ebeliliten.
JER 6:25 Kenè kew hendiyà te menge vevesukà wey kenè kew hiphipanew ziyà te menge zalan, su zuen menge kuntada he andam he edhimatey kenitew. Mekahandekhandek is minsan hendei he nekeelingkus kenitew.
JER 6:26 Sikiyu is menge emurè ku te inged, bivisti kew te saku wey telilid kew te avu he tuus te kedlalew niw. Purung kew seengseeng he iring te minatey is budtung he anak niw he maama. Su kenè en egkeuǥet edsurungen kiw en te kuntada tew.
JER 6:27 Migkaǥi is Nengazen kayi te kedì te, “Midhimu ku sikew he iring te pereǥezam te mital su wey nu meǥezami is menge vetasan te menge etew ku.
JER 6:28 Pudu sikandan mesinupaken wey kenà ebpezumazuma; iring sikandan te kenà egkepekù he brunsi wey putew. Wazà duma he vaal zan, kekenà, iyan dà is kebutangbutang wey kedtuntu te zuma.
JER 6:29 Is hapuy ebpurungan edregreǥa su wey metunew pezem is timeǥà he nekesahug te pelata, piru kenà egketunew. Ne iring keniyan is menge etew ku, wazà pulus te kedhimuwa kandan he lunsey, su is menge kelelalung wazà gihapun maawà diyà te kandan.
JER 6:30 Egkengezanan sikandan te, ‘Inselikwey he Pelata,’ su inselikwey ku sikandan.”
JER 7:1 Migkaǥi pa is Nengazen diyà te ki Jeremias:
JER 7:2 “Hitindeg ka ziyà te ǥemawan te valey ku ne keǥiya nu heini he menge lalag: ‘Pemineg kew is menge etew kayi te Juda he edseled kayi te ked-azap te Nengazen.
JER 7:3 Iyan heini migkaǥi te Nengazen he Mekeǥeǥehem, he Megbevayà te Israel: Helina niw en is menge vetasan niw wey menge ulaula niw, su para ibpeubpè ku zed sikiyu kayi he lugar.
JER 7:4 Kenè kew pelimbung te menge etew he edtulung egkaǥi te kenè kiw egkemenu su kayi te kenitew is baley te Nengazen.
JER 7:5 “ ‘Helina niw is betasan wey ulaula niw. Ipedrerepeng niw is kedseǥipaa niw te kada sevaha.
JER 7:6 Kenè niw en dèdaaǥa is menge langyew, menge ilu, wey menge valu he vahi. Engkezi niw is kedhimatey te wazà mekesalà, wey kenè kew azap te zuma he menge ed-ezapen he ebpekezezaat dà keniyu.
JER 7:7 Emun egkeveelan niw heini, ibpeubpè ku ǥihapun sikiyu kayi te tanà he imbeǥey ku ziyà te menge kepuun niw te wazà pidtemanan.
JER 7:8 “ ‘Piru hengkey is mibeelan niw! Midsarig kew te tarù he menge lalag he kenà ebpeketavang keniyu.
JER 7:9 Nenakew kew, nememunù, nengumpadi, nenangdù te tarù, midtutung te veyewà diyà te ki Baal, wey mid-azap kew te zuma he menge ed-ezapen he wazè niw ganì mekilala.
JER 7:10 Ne mid-uvey kew wey midhitindeg diyà te etuvangan ku kayi te valey ku, he mibpili ku he kayi a ebeǥayi te zengeg. Ne migkaǥi kew te, “Wazè kiw memenu.” Ne mibpedayun kew gihapun mebaal te utew mezaat he menge vaal.
JER 7:11 Egkeisip niw ve he heini is baley ku, he mibpili ku he kayi a ebeǥayi te zengeg, egkehimu he elesà te menge tulisan? Neehè ku is langun he mezaat he menge vaal niw keniyan. Iyan a, is Nengazen, is migkaǥi kayi.
JER 7:12 “ ‘Hendiyè kew te Shilo he iyan kes nehuna he lugar he zutun a ebeǥayi te zengeg, ne ahàa niw ke hengkey is mibeelan ku zutun he lugar tenged te kelelalung te menge etew ku he Israilihanen.
JER 7:13 Dutun te kebeeli niw kayi te mezaat he menge vaal, edtulungan ku en sikiyu ebpetizeeni, piru wazè kew mebpemineg. Mid-umew ku sikiyu piru wazè kew medtavak.
JER 7:14 Umbe, ke hengkey is mibeelan ku ziyà te Shilo, iyan daan ebeelan ku ǥuntaan diyà te valey ku he zutun a ebeǥayi te zengeg, kes baley ku he midseriǥan niw he zutun te lugar he imbeǥey ku keniyu wey te menge kepuun niw.
JER 7:15 Sikiyu is menge tig-Juda, edsegseǥen ku sikiyu ziyà te etuvangan ku iring te mibeelan ku ziyà te menge kezuzumahi niw, he menge etew he tig-Israel.’
JER 7:16 “Umbe sikew, Jeremias, kenè ka ampù para kayi he menge etew. Kenè ka pehizuhizu wey hangyù kayi te kedì para kandan, su kenè ku sikew ebpemineǥen.
JER 7:17 Wazè nu ve maahà is menge ebeelan dan guntaan diyà te menge inged diyà te Juda wey te menge zalan diyà te Jerusalem?
JER 7:18 Ebpengayu is menge vatà, ne idtetavun haazà te menge amey zan, ne is menge vahi ebmasa te herina, su ebeelan dan he supas para te ed-ezapen he egngezanan te Rayna ziyà te Langit. Ebpemuhaten dan daan te inumen is duma he menge ed-ezapen su wey a mepauk.
JER 7:19 Piru iyan a vè egkezeetan keniyan? Kenà! Kandan he keugelingen is midezeetan dan wey mibpeel-elezan.
JER 7:20 Ne iyan a, is Nengazen he Megbevayà, migkaǥi kayi: Ibpeǥezaman ku is utew ku kegkepauk kayi te lugar, ziyà te menge etew, ziyà te menge uyaǥen, diyà te menge kayu, wey menge abut te tanà. Is pauk ku iring te hapuy he kenà egkeevukan.”
JER 7:21 Mibpedayun megkaǥi is Nengazen he Mekeǥeǥehem, he Megbevayà te Israel te, “Sigi, kuwaa niw is menge pemuhat niw he edtutungen duma te zuma pa he menge pemuhat niw, ne keena niw is usa kayi!
JER 7:22 Hein impeǥawas ku is menge kepuun niw ziyà te Ehipto kenà iyan dà insuǥù ku kandan is kebpemuhat te menge pemuhat he edtutungen wey zuma pa he menge pemuhat,
JER 7:23 kekenà, midsuǥù ku zaan sikandan he ke siak te: ‘Pezumdumahi a keniyu, ne egkehimu a he Megbevayè niw ne egkehimu kew he menge etew ku. Pengungubpaan kew te sungkad te menge paaǥi he insuǥù ku keniyu su wey mebmeupiya is kebpekesavuk niw.’
JER 7:24 “Piru wazè dan mebpemineg wey medtuman te migkaǥi ku. Su iyan dan mibpezumdumahan is indikta te mezaat he gehinawa zan. Wazà sikandan med-uvey kayi te kedì, kekenà, mid-iniyuǥan e zan.
JER 7:25 Puun pa te ked-awà te menge kepuun niw ziyà te Ehipto ne taman en guntaan edsigudu ad edsuǥù diyà te keniyu te menge suluǥuen ku he ebpeneuven ku.
JER 7:26 Piru wazè niw sikandan pemineǥa wey tuuwi. Edhuna kew pa he menge mesinupaken wey edhuna pa he mezaat is menge vaal niw kenà te menge kepuun niw.
JER 7:27 “Jeremias, emun egkeǥiyen nu heini is langun diyà te kandan, ne kenà sikandan ebpemineg kenikew. Emun ed-umawen nu sikandan su wey zan mekeuvey kayi te kedì, ne kenà sikandan edtavak.
JER 7:28 Umbe, keǥiya nu heini ziyà te kandan: Iyan heini he nasyun he is menge etew zuen kenè dan ebpezumazuma te Nengazen he Megbevayè dan, wey kenà egkesuat he edewayen. Wazè en diyà te kandan is ketutuanan; kenè dan en egkaǥi te tutuu.
JER 7:29 He menge tig-Jerusalem, pekiskisi niw is menge ulu niw ne itimbag is menge vulvul niw he tuus te kegkeseeng niw. Lalew kew ziyà te menge zemilag he menge vuvungan, su inselikwey wey mibey-anan kew te Nengazen is lapis te menge kevuwazan niw he egkepeukan din.”
JER 7:30 Migkaǥi is Nengazen te, “Mezaat is menge vaal te menge etew ziyà te Juda. Diyè dan ipenavuk is utew mezaat he menge ed-ezapen dan te valey ku, he mibpili ku he zutun a ebeǥayi te zengeg, ne tenged dutun mibmeremerik heini.
JER 7:31 Mibangun daan sikandan te menge pemuhatà diyà te Tofet, he ziyà te Suǥud-suǥud he Ben Hinom, ne zutun dan edtutunga is menge anak dan he ibpemuhat dan. Wazè ku heini isuǥù kandan; wazè man ganì heini metaǥù te isip ku.
JER 7:32 Pemineg kew su egkeuma is timpu he kenè en maan heini egngezanan he Tofet etawa Suǥud-suǥud he Ben Hinom, kekenà, Suǥud-suǥud he Lepeey, su zutun ibpenleveng is utew mahabet he ebpematey taman te wazè en lugar zutun he egkelevengan.
JER 7:33 Is ebpematey he menge etew ku egkeenen te menge tagbis wey zumezaas he menge langgam, ne wazà ebuǥew kandan.
JER 7:34 Ibpeengked ku en is kegalew wey kedlipey ziyà te menge zalan te Jerusalem. Is melipayen he kegkaǥi te beuǥu kenè en egkezineg diyà te menge inged te Juda su egkehimu heini he mekevulungbulung.”
JER 8:1 Midpedayun megkaǥi is Nengazen te, “Dutun he timpu ibpen-awà diyà te menge leveng is menge tulan te menge hadì wey menge upisyal ziyà te Juda, wey is menge tulan te menge memumuhat, menge ebpeneuven, wey menge etew ziyà te Jerusalem.
JER 8:2 Ne ebpekepeyapat heini ziyà te tanà he egkesilaan te andew, bulan wey menge vituen he mibmahal zan, midsunud dan, midengepan dan, wey mid-azap dan. Kenè en edtiǥumen is menge tulan dan wey ikeleveng, kekenà, ebpekepeyapat dà heini ziyà te tanà he henduen be te menge tai.
JER 8:3 Is egkesamà he uuyag kayi te mezaat he nasyun ibpeyapat ku ziyà te zuma he menge nasyun, ne zutun edtumuen dan is kebpatey kenà te kegkeuyag. Iyan a, is Nengazen he Mekeǥeǥehem, is migkaǥi kayi.”
JER 8:4 Migkeǥiyan a te Nengazen he keǥiya ku heini he menge lalag diyà te menge etew: “Emun egkepiley is etew, kenè be ed-enew man sikandin? Emun egketazin sikandin, kenè be edlikù sikandin diyà te mibeyaan din?
JER 8:5 Maan is sikiyu is menge tig-Jerusalem mibpedayun kew med-iniyug kedì? Maan is kenè niw egkehimu te ed-awà is menge ed-ezapen niw he edtuntu keniyu. Maan is kenè kew edlikù kayi te kediey?
JER 8:6 Mibpurungan ku pemineǥa is menge lalag niw ne wazà nekaǥi niw he hustu. Wazà minsan sevaha keniyu he mid-engked te kelelalung din. Wazà nekekaǥi keniyu te, ‘Utew mezaat is neveelan ku?’ Is kada sevaha keniyu elistu he ebaal te salà, iring te kudà he ed-untuzan te edhendiyà te tebek.
JER 8:7 Is tagbis he tulabung, is merepatik, is selimbatang wey is dugwak, netuenan dan ke keenu zan edlayang pehendiyà te zuma he lugar wey keenu zan edlikù, piru sikiyu is menge etew ku wazè niw mulà metueni is menge velaud ku.
JER 8:8 Maan is egkaǥi kew he uluwanen kew su ziyà te keniyu is kesuǥuan te Nengazen? He iyan man tutuu is, midhalin heini te menge teruen he menunudlù niw.
JER 8:9 Egkepeel-elezan is migkilala zan is keugelingen dan he uluwanen sikandan. Utew sikandan egkengahandek su ebihaǥen man sikandan, tenged te kedselikwaya zan te menge lalag ku. Tutuu ve he metau sikandan?
JER 8:10 Umbe, ibeǥey ku ziyà te zuma he menge etew is menge esawa zan wey menge vevesukè dan. Su ǥeina te puun te kinemevevaan pehendiyà te kinetikangan is ked-etew zin, ne ebpenlimbung dan su para mekeselapì. Minsan is menge ebpeneuven wey is menge memumuhat edpenlimbung daan.
JER 8:11 Wazè dan seǥipaa is palì te menge etew ku minsan pa te grabi en heini. Kesikandan te meupiya zed is langun minsan pa te kenà haazà tutuu.
JER 8:12 Ingkeeled dan be haazà is utew mezaat he vaal zan? Wazà! Su wazè dan en keelezan! Umbe ebpematey sikandan iring te zuma he menge etew. Ebpematey sikandan dutun te timpu te kedsiluti ku kandan. Iyan a, is Nengazen, is migkaǥi kayi.
JER 8:13 Egkuwaan ku is menge sebpet dan te paras wey higus. Minsan is menge zahun kayi egkengeǥangu. Is menge imbeǥey ku kandan edhewien ku ziyà te kandan.
JER 8:14 “Ne zutun egkaǥi sikandan te, ‘Na, hengkey pa is edteǥazan tew? Kuwa kew en su edhendiyè kiw te menge inged he vinerengbeng, ne zutun kiw ebpekimatey. Su iyan en hukum te Nengazen he Megbevayè tew is edhimetayan kiw. Iring te mibeǥayan kiw zin te wahig he zuen duen hilu he egkeinum tew, su ǥeina te nekesalè kiw ziyà te kandin.
JER 8:15 Ngenaan tew he mebmelinew piru wazà mebmelinew. Edtaǥad kiw te keupiyaanan piru kegkahandek is nekeuma ziyà te kenitew.
JER 8:16 Is mezaǥing he herìhian te menge kudà te menge kuntada tew iyan nezineg tew ziyà te Dan. Minsan herìhian dà dutun te menge kudè dan egkahandek kiw en is langun he meǥinged kayi he tanà. Nekeuma zan su edezeetan dan heini he tanà wey is menge netaǥù kayi–is menge inged wey is langun he menge meǥinged kayi.’ ”
JER 8:17 Migkaǥi is Nengazen te, “Pemineg kew! Edsuǥuen ku ziyà te keniyu is menge kuntada he iring te menge uled he edhereg he kenà egketawaran, ne ebpengeǥaten kew zan.”
JER 8:18 Ne migkaǥi si Jeremias te: Kenà egkaawà is kegkeseeng ku. Utew mesakit is gehinawa ku.
JER 8:19 Pemineǥa is kebpekitavang te menge emurè ku te inged; egkezineg heini kayi te tivuuk he tanà. Ke sikandan te, “Wazè en be ziyà te Jerusalem is Nengazen? Wazè en be kayi is Megbevayà he Hadì te Jerusalem?” Midtavak is Nengazen te, “Maan is midhimu niw he mepauk a pinaaǥi te ked-azap niw te zuma he menge ed-ezapen he wazà menge pulus?”
JER 8:20 Midriklamu is menge etew he ke sikandan te, “Nepasad en man is tiraǥun, piru wazè key ǥihapun melibri.”
JER 8:21 Migkaǥi si Jeremias te, “Utew mesakit is gehinawa ku. Ingkesekiti ku is utew kegkerasey te menge emurè ku te inged. Midlalew a wey utew a neseeng.
JER 8:22 Wazè be bawì diyà te Gilead? Wazè be ebpemawì diyà? Maan is wazà meulii is palì te menge emurè ku te inged?
JER 9:1 “Angin pezem ke serebseb te menge luhà is menge mata ku su edsineǥew e en te maandew wey mezukilem tenged te menge emurè ku te inged he mibpenhimetayan.
JER 9:2 Angin pezem ke zuen ku egkeubpaan diyà te sibsivayan su ebpekeziyuan ku en is menge emurè ku te inged, su pudu sikandan menge meluiven he iring te vahi he mengungumpadi.”
JER 9:3 Migkaǥi is Nengazen te, “Menge tarù is egawas diyà te vèbà te menge etew ku he iring te panà he andam en he ibpanà. Tarù is egkeseksiyan kayi he tanà ne kenà tutuu. Midsubre en is kebaal zan te salà, ne wazè e zan kilelaa.
JER 9:4 “Mebpekevantey kew te zuma niw, ne kenè kew sarig te kezuzumahi niw, su limbungan is kada sevaha ne ebpen-ulug te kewusa.
JER 9:5 Is kada sevaha edlimbungan din is iring din he etew, ne wazà minsan sevaha he egkaǥi te tutuu. Nelayam en is dilè dan te kedtarùtarù, ne edheǥuan dan is kebaal te salà.
JER 9:6 Pudu kedlimbung is menge vaal zan, ne wazè dan en megkilala kediey.
JER 9:7 Umbe siak, is Nengazen he Mekeǥeǥehem, edhimuwen ku he lunsey is menge etew ku iring te vulawan, ne egezaman ku sikandan. Su iyan heini ereg he ebeelan ku ziyà te kandan.
JER 9:8 Su is menge zilè dan iring te ibpatey he panà, ne pudu tarù is ebpengeǥiyen dan. Uvag egkaǥi sikandan te meupiya ziyà te iring dan he etew, piru ziyà te gehinawa zan ebpelanu zan te kedezaat kandan.
JER 9:9 Umbe, ereg he edsilutan ku sikandan. Ereg he ebelesan ku is nasyun he iring kayi.”
JER 9:10 Migkaǥi si Jeremias te: Edlelendag a tenged te menge vuntud; edlalew a tenged te menge penebtavà diyà te sibsivayan. Su egkehimu en heini he mekevulungbulung ne wazè en edsaǥad kayi. Kenè en egkezineg kayi is ked-engà te menge vaka, ne mibpekeziyù en is menge tagbis wey minsan is dumezaas he menge langgam.
JER 9:11 Su migkaǥi is Nengazen te, “Edezeetan ku is Jerusalem, ne egkehimu zà heini he ubpeey te leew he menge asu. Is menge inged diyà te Juda egkeiring te disirtu he wazà duen ed-ubpà.”
JER 9:12 Mid-insaan ku is Nengazen, “Hentei is uluwanen he etew he ebpekesavut kayi he menge hitavù? Hentei is midseysayan nu mehitenged kayi he iyan ebpekepesavut kayi? Ke maan is nezeetan heini he tanà he henduen be te nehimu he sibsivayan he wazè en duen ebayà?”
JER 9:13 Midtavak is Nengazen, “Neulaula heini su ǥeina te wazè dan tumana is menge suǥù he imbeǥey ku kandan. Wazà sikandan mebpezumazuma kedì wey wazè dan sunuza is menge kesuǥuan ku.
JER 9:14 Iyan dan nasì midsunud is kemesinupaken te ǥehinawa zan. Mid-azap dan is duma he menge ed-ezapen sumalà te impenurù kandan te menge kepuun dan.
JER 9:15 Umbe siak, is Nengazen he Mekeǥeǥehem, he Megbevayà te Israel, migkaǥi a te ibpekaan ku heini he menge etew te mepait he menge keenen wey ibpeinum ku te wahig he zuen duen hilu.
JER 9:16 Ibpeyapat ku sikandan diyà te zuma he menge nasyun he wazè dan duen hanew wey is menge kepuun dan. Ibpezal-as ku sikandan te menge kuntada zan taman te egkaamin sikandan egkepatey.”
JER 9:17 Mibpedayun megkaǥi is Nengazen he Mekeǥeǥehem, “Ngunngunua niw is nengehitavù. Umawa niw is menge vahi he peresineǥew, lavew en sikan is utew metau he edluluǥib.
JER 9:18 Ipeǥaangaan utew sikandan ipehengkayi, su wey zan mesineǥawi is menge etew ku taman te medtiǥis is menge luhè dan.
JER 9:19 Pemineǥa niw is kedlelendag diyà te Jerusalem. Egkaǥi is menge etew te, ‘Nezeetan kiw! Mekeeled-eled heini is nehitavù kenitew! Kinahanglan he ed-ewaan tew heini is tanè tew su mibpenregdas is menge valey tew!’ ”
JER 9:20 Guntaan, sikiyu is menge vahi, pemineǥa niw is migkaǥi te Nengazen. Purungi niw heini pemineǥa. Penurua niw is menge anak niw he menge vahi wey menge zuma niw te kedruǥur wey te kegkanta para te minatey.
JER 9:21 Nekeuma ziyà te pemilya tew wey inged tew is kemetayen wey te melig-en he parti kayi. Mibpenhimetayan is menge vatà he ebevaleyvaley ziyà te menge zalan wey is betan-en he menge maama he midtiǥum diyà te menge pelasa.
JER 9:22 Migkaǥi is Nengazen te, “Ne nekepeyapat diyà te tanà is nemematey he henduen be te menge tai. Wey henduen be te menge pungu he netaǥak te menge ebpemenraǥun, ne wazè en heini seǥipaa.”
JER 9:23 Migkaǥi pa is Nengazen te, “Kenà ereg he ibpahambug te uluwanen is ketau zin, wey is desen din emun mezesen sikandin, wey is ketiǥeyunan din emun sepian sikandin.
JER 9:24 Iyan ereg he ibpegalbu zin is kegkesevuta zin wey kegkekilelaa zin kedì he iyan a Nengazen he mepinelenggaan; iyan a ebaal te hustu wey metazeng kayi te kelibutan su iyan heini ebpekelipey kediey.”
JER 9:25 Migkaǥi pa is Nengazen te, “Egkeuma is timpu he edsilutan ku is langun he nesirkunsidar he wazà mahalin is ulaula zan:
JER 9:26 is menge tig-Ehipto, tig-Juda, tig-Edom, tig-Amon, tig-Moab wey is langun he ebpemen-ubpà diyà te sibsivayan he mibpen-elutan is dapit te kendingen dan. Iyan tutuu is, heini is langun he meǥinged diyà te menge nasyun, ragkes en is langun he menge etew ziyà te Israel, henduen be te neked-iring dà he wazà menge sirkunsidar su meremerik is netaǥù diyà te gehinawa zan.”
JER 10:1 Sikiyu is menge etew te Israel, pemineǥa niw is migkaǥi te Nengazen.
JER 10:2 Migkaǥi sikandin te, “Kenè niw iringi is baal te menge etew ziyà te zuma he menge nasyun, ne kenè kew mahandek te menge tuus diyà te langit minsan pa te igkehandek heini te ziyà te zuma he menge nasyun.
JER 10:3 Wazà pulus te neleyaman he menge vaal keniyan he menge etew. Edtamped dan te kayu ziyà te ketelunan ne ibpeukiran dan te pandey.
JER 10:4 Mideyzeyanan heini te pelata wey vulawan, ne impurung iransang su wey kenà mepiley.
JER 10:5 Heini he menge ed-ezapen iring dà te menge etew-etew he pelihandek te maya su kenà ebpekekaǥi. Kinahanglan he ebitbiten su kenà ebpekehipanew. Kenè niw ikahandek heini he menge ed-ezapen su kenà heini ebpekevaal te kezeetan wey keupiyaanan.”
JER 10:6 He Nengazen, wazà iring kenikew. Mekeǥeǥehem ka ne utew lavew is ngazan nu.
JER 10:7 Hentei man is kenà edtahud kenikew te hadì te menge nasyun? Utew ke man dait he edtehuzen. Wazà ebpekeiring kenikew zuen te langun he uluwanen diyà te nekedseselekawà he menge nasyun, ne kenà ebpekeiring kenikew is langun he menge hadì dan.
JER 10:8 Menge wazà dan pereg wey menge tulebung. Is penurù mehitenged te ed-ezapen dan he menge kayu, ne wazè din pulus.
JER 10:9 Ebpevaal zan te menge pandey wey menge platiru te menge ledawan he ed-ezapen dan he ebpekeplaan te pelata he ebpuun diyà te Tarshish wey vulawan he ebpuun diyà te Ufaz. Ne ebistiyan heini te meitem is kaavuavu zin merudtem he manggad he midtahì te memetau he menge menenahì.
JER 10:10 Piru iyan is Nengazen tutuu he Megbevayà. Iyan sikandin uuyag he Megbevayà ne Hadì sikandin te wazà pidtemanan. Emun egkepauk sikandin, egkehuyung is kelibutan ne ed-eles is diyà te menge nasyun.
JER 10:11 Keǥiya heini te menge ed-azap te zuma he menge ed-ezapen: “Is menge ed-ezapen niw he wazà iyan medlimbag te kelibutan wey langit, ne egkahanew kayi te kelibutan.”
JER 10:12 Piru iyan is Megbevayà midlimbag te langit wey kelibutan pinaaǥi te ǥehem din wey ketau zin.
JER 10:13 Pinaaǥi te kebmandù din, edreǥuuk is wahig diyà te langit. Iyan sikandin ebpeǥawas te menge kivel he ebpuun diyà te meziyù he vahin te kelibutan. Ibpekilat din ke ed-uzan, wey ibpepengeramag din te ebpuun diyà te midteǥuan din duen.
JER 10:14 Is menge ed-azap te zuma he menge ed-ezapen, menge paglung wey wazà menge ketau. Egkepeel-elezan dà is menge platiru tenged te menge vineelan dan he menge ed-ezapen, su kenà heini tutuu. Wazà kayi untung.
JER 10:15 Wazè kayi pulus wey telemayen heini. Emun timpu en te kedsilut ne egkezeetan sikandan is langun.
JER 10:16 Piru kenà mulà iring keniyan is Megbevayà ni Jacob. Iyan sikandin mibaal te langun, ragkes en is Israel, he iyan kes menge etew he migaked din. Nengazen he Mekeǥeǥehem is ngazan din.
JER 10:17 Sikiyu is menge etew ziyà te Jerusalem, tinesa niw en is menge azen niw ne ǥenat kew en, su hapit en edsurunga is inged niw.
JER 10:18 Su iyan heini migkaǥi te Nengazen: Pemineg kew! Ibpaawè ku sikiyu kayi he tanà. Edresayen ku sikiyu wey niw meǥezami is pauk ku.
JER 10:19 Migkaǥi is menge tig-Jerusalem te, “Mekehizuhizu kiw tenged te kezeetan tew. Kenè en heini egkeulian. Piru kinahanglan he ed-entusen tew heini.
JER 10:20 Nerundus en is tulda tew; nengevidtew en is menge hiket kayi. Nahanew en is menge anak tew; wazè en nesamà he ed-uman ebpehitindeg te tulda he mid-ubpaan tew.”
JER 10:21 Midtavak a te, “Wazà pereg te menge pengulu tew; wazà sikandan medangep diyà te Nengazen. Umbe wazà sikandan med-uswag, ne nekepeyapat is langun he menge sakup dan.
JER 10:22 Pemineǥa niw is utew subra he keǥurub te menge sundaru he ebpuun diyà te zizaya. Edezeetan dan is menge inged kayi te Juda, ne egkehimu zà heini he ubpeey te leew he menge asu.”
JER 10:23 He Nengazen, netuenan ku he is untung te etew ne kenè kandin. Kenè din egkeveyveyaan is ebpekeuma he menge hitavù.
JER 10:24 Mensuwa key Nengazen, piru kenè nu heini pesubrahi. Beeli nu heini kenè tenged te pauk nu su kela ke maamin key.
JER 10:25 Ipeǥezami nu is pauk nu ziyà te menge etew he wazà megkilala kenikew, wey wazà medangep diyà te kenikew. Su midezeetan dan is menge kevuwazan ni Jacob wey mibpenregdas is menge ubpeey zan.
JER 11:1 Migkaǥi en maan is Nengazen diyà te ki Jeremias te,
JER 11:2 “Petentenuzi nu te menge tig-Juda wey menge tig-Jerusalem is menge sulunuzen dutun te kebpekid-uyun dey.
JER 11:3 Kegiyi nu sikandan he iyan a, is Nengazen he Megbevayà te Israel, migkaǥi a he edrewakan ku is etew he kenà edtuman te tulumanen kayi te kebpekid-uyun ku.
JER 11:4 Heini he menge sulunuzen impetuman ku te menge kepuun niw hein impeǥawas ku sikandan diyà te Ehipto, he iyan kes lugar he iring keinit te rapug. Migkeǥiyan ku sikandan te, ‘Emun ebpezumdumahan a keniyu wey edtumanen niw is langun he menge suǥù ku, egkehimu kew he menge etew ku, ne egkehimu a he Megbevayè niw.
JER 11:5 Ne zutun, edtumanen ku is impenaad ku ziyà te menge kepuun niw he ebeǥayan ku sikandan te meupiya wey selebpeten he tanà. Ne haazà is tanà, iyan is tanè niw ǥuntaan.’ ” Midtavak a te, “Berakat he metuman, Nengazen.”
JER 11:6 Migkaǥi en maan is Nengazen kayi te kedì te, “Kegiya nu heini he menge lalag diyà te menge inged diyà te Juda wey ziyà te menge zalan diyà te Jerusalem: Tentenuzi niw wey tumana niw is menge sulunuzen dutun te kebpekid-uyun ku keniyu.
JER 11:7 Puun pa te timpu te kebpeǥewasa ku te menge kepuun niw ziyà te Ehipto ne taman en guntaan, edsiguduwan ku en sikandan ebpetizeeni he pezumdumahi e zan.
JER 11:8 Piru wazà sikandan mebpemineg wey medtuu. Iyan dan nasì mibpezumdumahan is kesinupaken te mezaat he gehinawa zan. Midsuǥù ku sikandan he tumana zan is kebpekid-uyun ku kandan, piru wazè dan heini tumana. Umbe mibpeseǥazan ku kandan is langun he rawak he ingkesurat kayi te kebpekid-uyun ku.”
JER 11:9 Migkaǥi pa is Nengazen kayi te kedì te, “Duen menge tig-Juda wey menge tig-Jerusalem he mibpelanu te ebpekesuǥat kayi te kedì.
JER 11:10 Midsunud dan is menge salà te menge kepuun dan he wazà mebpemineg te menge lalag ku. Mid-azap daan sikandan te zuma he menge ed-ezapen. Is menge tig-Israel wey menge tig-Juda neked-iring su pudu zan midrapas te kebpekid-uyun ku he midhimu ku ziyà te menge kepuun dan.
JER 11:11 Umbe siak, is Nengazen, migkaǥi a te ibpaaǥi ku ziyà te kandan is kezeetan he kenè dan egkelikayan. Ne minsan ebuyù pa sikandan te tavang kayi te kediey ne kenè ku sikandan ebpemineǥen.
JER 11:12 Ne ziyà sikandan ebuyù te tavang te menge ed-ezapen he ebpemuhaten dan te edtutungen he veyewà, piru kenà heini ebpeketavang kandan emun egkeumahan dan en te kezeetan.
JER 11:13 “He menge tig-Juda, utew mezakel is menge ed-ezapen niw, iring kezakel te menge inged niw. Ke sengemenu kahabet is menge zalan diyà te Jerusalem ne iyan daan kahabet te menge pemuhatà he para edtutungan niw te veyewà he para te utew mezaat he ed-ezapen he si Baal.
JER 11:14 “Umbe sikew Jeremias, kenè ka pengemuyù para kayi he menge etew. Kenè ka pehizuhizu kedì para kandan, su kenè ku sikandan ebpemineǥen emun ed-umawen e zan dutun te timpu te kedlised dan.
JER 11:15 Is menge etew he mibmahal ku mibaal te mahabet he mezaat he menge vaal. Guntaan, wazè dan ketenged te kedhendiyà te valey ku he ed-ezapan. Is menge pemuhat dan kenà ebpekeeǥen te kezeetan he ebpekeuma ziyà te kandan. Emun ebaal zan te mezaat igkelipey zan pa heini!”
JER 11:16 Dengan impetug-iring sikandan te Nengazen te merapung he kayu he ulibu he zuen din mahabet he meupiya he menge veǥas. Piru ǥuntaan kesevaha zà sikandan egkeremaǥa te vagyu ne egkengezeetan dan en, he iring te nengetamped he menge subpang he inrapug.
JER 11:17 Is Nengazen he Mekeǥeǥehem iyan midtukud te Juda wey Israel, iyan, guntaan midsuǥù sikandin he zezeeti heini tenged te mezaat he menge vaal te menge etew kayi. Midhimu zan he mepauk sikandin tenged te kebpemuhata zan ki Baal pinaaǥi te kedtutung te veyewà.
JER 11:18 Migkeǥiyan a te Nengazen mehitenged te kebpelenuwi kedì te menge kuntada.
JER 11:19 Iring a te kerehidu he wazè din hanew he ed-uwiten en bes diyà te lepeey. Wazè ku metueni he zuen bes pelanu zan he edhimetayan e zan. Ke sikandan te, “Edhimetayan tew sikandin iring te kebpiley te kayu he zuen din beǥas, su para maawà sikandin kayi te kelibutan su wey kenè en metenuzi.”
JER 11:20 Piru mid-ampù a, ke siak te, “He Nengazen he Mekeǥeǥehem, metazeng is kedhukum nu wey nesayud ka te isip wey gehinawa te etew. Ipeehè nu kedì is kebelesi nu kandan, su insarig ku kenikew is kasu ku.”
JER 11:21 Egkesuatan te menge etew ziyà te Anatot he himetayi a emun kenà a ed-engked te kebpenudtul te menge lalag te Nengazen. Umbe iyan heini migkaǥi te Nengazen he Mekeǥeǥehem, “Edsilutan ku sikandan. Ebpematey te tebek is menge vetan-en he menge maama kandan, ne ebpematey te vitil is menge vatà kandan.
JER 11:23 Wazà egkesamà he uuyag te menge tig-Anatot, su ebpeeǥiyan ku sikandan te kezeetan dutun te timpu te kedsiluti ku kandan.”
JER 12:1 He Nengazen, layun hustu is kukuman nu emun edriklamu a ziyà te kenikew. Ne ǥuntaan ed-insà a mehitenged te hustu he kukuman nu: Maan is ed-uswag is menge lalung? Maan is dezeyaan is ked-ubpà te menge etew he midluib kenikew?
JER 12:2 Midtuvazan nu sikandan iring te kayu he nendalid he midtuvù wey nemeǥas. Ne pinaaǥi zà te vèbà is kebeǥayi zan kenikew te zengeg ne kenà diyà ebpuun te ǥehinawa zan.
JER 12:3 Piru siak nekilala a kenikew, Nengazen. Neehè nu is mibpemeelan ku ne netuenan nu ke hengkey is kegkilelaa ku kenikew. Guyuza nu heini he menge etew he iring te eguyud ka te kerehidu he edlepaan. Itapid nu sikandan he para te edlepaan.
JER 12:4 Keenu egkeengked is kebmemaza te tanà wey kegkeǥangu te menge sagbet diyà te langun he menge vevesukà? Nemematey is menge langgam wey menge tagbis tenged te kelelalung te menge etew he ed-ubpà keniyan he tanà. Migkaǥi pa sikandan te, “Wazè mebpekilavet is Megbevayà te egkepeveyaan tew.”
JER 12:5 Migkaǥi is Nengazen te, “Jeremias, emun neveley ka te kebpekidlumbè nu te menge etew, wey pe man ke kudà is edlumbaan nu? Emun ebpeketulung ka ebpekeuseng diyà te mehiǥawan he lugar, wey pe man ke diyè ka te ketelunan he uvey te Wahig he Jordan?
JER 12:6 Minsan is menge suled nu he maama, he sakup pezem te pemilya nu, ne midluib kenikew. Mezaat is pelanu zan diyà te kenikew. Kenè ka sarig kandan minsan meupiya pa is egkeǥiyen dan diyà te kenikew.
JER 12:7 “Inselikwey ku is menge etew ku he iyan is nasyun he migaked ku. Imbeǥey ku is mibmahal ku he menge etew ziyà te menge kuntada zan.
JER 12:8 Midsukul zan kediey he iring te edhiniǥer he erimaung diyà te ketelunan, umbe egkeepesan ku sikandan.
JER 12:9 Iring sikandan te tagbis he ebpendawi. Ne ǥuntaan, iyan sikandan edewiyen te midliǥuy he menge tagbis he ebpendawi. Edtiǥumen ku is langun he zumezaas he menge langgam su ibpezawi ku zaan sikandan.
JER 12:10 Midezeetan te mahabet he menge pengulu is Juda he mid-isip ku he pemuleey ku te paras. Midtekutakan dan heini is mekempet he tanè ku ne midhimu zan he sibsivayan.
JER 12:11 Midhimu zan heini he lugar he wazè din en pulus diyà te etuvangan ku. Ne nehimu heini he sibsivayan su wazè en edseǥipà kayi.
JER 12:12 Ebpekeuma ziyà te zemilag he menge vuvungan diyà te disirtu is ebpendezaat te tivuuk he tanà, ne wazà ebpekepelaǥuy te menge etew zutun.
JER 12:13 Ebpemula is menge etew ku te trigu piru zuǥi is egkeraǥun dan. Mibpurung dan medhaǥù piru wazè dan nekuwa. Nekeraǥun dan te keelezan tenged te utew ku kegkepauk.”
JER 12:14 Migkaǥi pa is Nengazen te, “Iyan heini ebeelan ku ziyà te langun he mezaat he meǥinged diyà te menge nasyun he nekeelingkus te Israel, he midezaat te tanà he imbeǥey ku te menge etew ku para mepengevilin dan: Ebpepeleǥuyan ku kandan is tanè dan, iring te kebpepeleǥuwi ku te menge tig-Juda te tanà te mibihag kandan.
JER 12:15 Piru ziyà te huziyan he timpu egkehizuwan ku heini he menge meǥinged ne idlikù ku sikandan diyà te keugelingen dan he tanà.
JER 12:16 Emun ebpurungan dan ed-istudyuwi is menge paaǥi te kebpengungubpaan te menge etew ku ne edheǥeten dan is penangdù dan pinaaǥi te ngazan ku, iring te impenurù dan dengan te menge etew ku he kedheǥeta te penangdù pinaaǥi te ngazan ni Baal, egkehimu zan he kevahin te menge etew ku.
JER 12:17 Piru emun kenà dan ebpezumazuma kedì, ebpepeleǥuyan ku iyan kandan is tanè dan wey edezeetan ku. Iyan a, is Nengazen, is migkaǥi kayi.”
JER 13:1 Migkaǥi is Nengazen kayi te kedì te, “Hipanew ka ne pemasa ka te vahag he linu, ne ivevahag nu heini. Piru kenè nu heini pìpii.”
JER 13:2 Umbe, nemasa a te vahag he linu, ne imbevahag ku heini, su iyan heini migkaǥi te Nengazen.
JER 13:3 Ne mid-uman en maan megkaǥi is Nengazen kayi te kedì te,
JER 13:4 “Levasa nu heeyan is mibpemasa nu he vahag ne hendiyè ka te Perath ne ieles nu heeyan is bahag diyà te budsi te vatu.”
JER 13:5 Umbe, midhendiyà a te Perath ne in-eles ku ziyà sikan is bahag sumalà te insuǥù te Nengazen kediey.
JER 13:6 Ne hein neuǥet en, migkeǥiyan ad maan te Nengazen te, “Hendiyè ka te Perath ne kuwaa nu sikan is bahag he impeeles ku kenikew ziyà.”
JER 13:7 Umbe, midhendiyà a te Perath, ne migkuwa ku kes bahag diyà te mid-elesan ku zuen, piru merunut en heini ne kenè en egkeǥamit.
JER 13:8 Ne migkaǥi is Nengazen kayi te kedì te, “Iring daan keniyan is egkehitavù te kebpehambug te menge tig-Juda wey kebpelavew te menge tig-Jerusalem.
JER 13:10 Heini is lalung he menge etew kenè dan edtuman te menge lalag ku. Ebpezumdumahan dan is kenà kegkemepezumdumahan te gehinawa zan, ne ebpenilbi zan wey ed-azap te zuma he menge ed-ezapen. Ne egkeiring sikandan te vahag he wazè din en pulus.
JER 13:11 Is bahag egkeheǥet diyà te hawak te etew, ne egkesuatan ku zaan he is langun he menge etew ziyà te Israel wey Juda ne meheǥet is kegewezi zan kediey. Midhimu ku sikandan he menge etew ku, su para mevantug a wey para meveǥayi a te zengeg, piru kenè dan ebpemineg kedì. Iyan a, is Nengazen, is migkaǥi kayi.
JER 13:12 “Jeremias, keǥiyi nu is menge etew ziyà te Israel he siak, is Nengazen he Megbevayà te Israel, migkaǥi a te, ‘Is langun he lundis he teleǥuey niw te vinu ne kinahanglan he egkepenù te vinu.’ Ne emun egkeǥiyan ke zan te, ‘Netuenan dey en he pudu egkepenù te vinu is langun he lundis he teleǥuey zey.’
JER 13:13 Keǥiyi nu sikandan he iyan heini ibpesavut ku: Edsilutan ku is langun he meǥinged kayi he tanà ragkes is menge hadì, he menge kevuwazan ni David, menge memumuhat, menge ebpeneuven wey is langun he meǥinged te Jerusalem. Edhimuwen ku sikandan he iring te egkengelangut.
JER 13:14 Ibpebevantig ku sikandan, is menge ginikanan wey menge anak. Kenè ku ibpeehè kandan is hizu ku zutun te kedezeeti ku kandan. Iyan a, is Nengazen, is migkaǥi kayi.”
JER 13:15 Purung kew pemineg, ne kenè kew mebpelavew su migkaǥi heini te Nengazen.
JER 13:16 Beǥayi niw te zengeg is Nengazen he Megbevayè niw mintras wazè din pa ipeseǥazi keniyu is kerusireman, wey mintras wazè kew pa mekesukung te merusirem he menge vuntud. Is kerayag he ebperetengen niw edhimuwen din he utew merusirem.
JER 13:17 Emun kenè kew pa edtuu, ne edsineǥew a te meeles tenged te utew niw kebpelavew. Edsineǥew a te kenà alang-alang he edtudà is menge luhè ku, su ebihaǥen man is menge etew te Nengazen.
JER 13:18 Midsuǥù a te Nengazen te kegkaǥi ziyà te hadì wey ziyà te iney zin he mebpenaug en sikandan diyà te pinuuwè te kedhadi dan su hapit en id-awà diyà te kandan is mekempet he menge kuruna zan.
JER 13:19 Edsirahan is menge pultahan te menge inged diyà te Negev, ne wazè en ebpekeǥawas wey wazè en ebpekeseled kayi. Ne ebihaǥen is langun he menge etew ziyà te Juda.
JER 13:20 Ahàa niw is menge kuntada he ebpekeuma he ebpuun diyà te zizaya. He Jerusalem, hendei en is menge meǥinged he impehivantug nu, he insarig ku kenikew wey nu maatur?
JER 13:21 Kenè be ibmesakit te ǥehinawa nu ke egkezizalem ka te ǥehem te nasyun he kunaan nu ke kezapig nu? Kenè ke ve vuwa egkesekitan iring te vahi he ed-anak?
JER 13:22 Kenè ke ve vuwa ebpekeinsà diyà te ǥehinawa nu ke maan is nehitavù heini ziyà te kenikew? Midezeetan ka he iring te vahi he midlayug, su tenged te mahabet he menge salè nu.
JER 13:23 Egkehimu ve he ed-ilisan te meitem he etew is meitem he kedlulundis din? Egkehimu ve ke id-awà te langgam he liyupardu is kavang din? Kenà egkehimu! Umbe sikiyu zaan is menge tig-Jerusalem, kenè kew ebpekevaal te meupiya, su neleyaman niw en is kebaal te mezaat.
JER 13:24 Ibpeyapat ku sikiyu he iring te ukap he inlayap te keramag he ebpuun te disirtu.
JER 13:25 Iyan heini egkepeveyaan niw he kediey he kebayà para keniyu, su ǥeina te midlipatan a keniyu, ne midsarig kew te kenà tutuu he menge megbevayà.
JER 13:26 Edlevasan ku sikiyu su wey kew mepeel-elezi.
JER 13:27 Neehè ku is utew mezaat he menge vaal niw he iyan is ked-azap niw te zuma he menge ed-ezapen diyà te menge vuvungan wey menge vevesukà. Neiring kew te vahi he mengungumpadi he utew subra is kegkeeriǥi zin, wey te mekeeled-eled he vahi he ebelegyà te zengeg din. Mekehizuhizu kew is menge tig-Jerusalem! Keenu vuwa egkaawà is keremerik niw?
JER 14:1 Iyan heini migkaǥi te Nengazen kayi te kedì mehitenged te meluǥayad he ǥulavung:
JER 14:2 “Egkeseeng utew is Juda; is menge inged kayi ebpengguyaan. Ebpemekepimpinuu is menge meǥinged kayi he tanà is egkengeseeng, ne egkezineg is ebpemenineǥew ziyà te Jerusalem.
JER 14:3 Midsuǥù te menge sepian is menge suluǥuen dan te kedsekezu. Midhendiyè dan te menge vudsi he punduwà te wahig piru wazà wahig. Umbe midlikù dà sikandan he wazè meteǥui is menge teleǥuey zan. Ne tenged te kegkeseeng dan wey kegkeeled dan, midtembunan dan is menge ulu zan.
JER 14:4 Nemeka is tanà su wazà uzan. Ne tenged te kegkeeled te menge perevasuk midtembunan dan is menge ulu dan.
JER 14:5 Minsan is selazeng mid-ewaan din is beǥu pa he in-anak din su wazè sagbet he egketabtab din.
JER 14:6 Is leew he menge asnu ebpemenhitindeg diyà te zemilag he menge vuvungan is ebelhalen he henduen be te egkemezahan he leew he menge asu. Mibmerusirem en is ked-ehè dan tenged te wazè dan en egketabtab.”
JER 14:7 Migkaǥi is menge etew te, “He Nengazen, nekesalè key ziyà te kenikew. Layun dey sikew ed-iniyuǥi, ne ereg key he edsilutan. Piru tevangi key para meveǥayi ka te zengeg.
JER 14:8 He Nengazen, diyè dà te kenikew is perateng dey te menge Israilihanen. Iyan ka ebpekelibri kenami emun timpu he edlised key. Maan is henduen te lumelengyawè ke zà kayi te kenami? Maan is henduen te humuhulevungè ke zà kayi te tanè dey?
JER 14:9 Ingketingkemed nu ve heini he menge hitavù? Maan is henduen ka te sundaru he wazè din egkehimu te kedtavang? Duma zey sikew, Nengazen. Ne menge etew key kenikew, umbe kenè key kenikew pesegdana.”
JER 14:10 Iyan heini tavak te Nengazen te menge etew: “Ingkelipey niw is kebpekeziyu kediey; mid-ulaula niw is minsan hengkey he egkesuatan niw. Umbe kenè ku en sikiyu egkilelaan he menge etew ku. Edtentenuzan ku is kelelalung niw ne edsilutan ku sikiyu tenged te menge salè niw.”
JER 14:11 Ne migkaǥi is Nengazen kayi te kedì te, “Kenè ka pengemuyù para te keupiyaanan kayi he menge etew.
JER 14:12 Minsan mebpuasa pa sikandan, ne kenè ku ebpemineǥen is kebuyù dan te tavang kayi te kediey. Minsan mebpemuhat pa sikandan te menge pemuhat he edtutungen wey pemuhat he para gasa, ne kenè ku heini edewaten. Kekenà, ebpenhimetayan ku sikandan pinaaǥi te tebek, bitil, wey menge vangkit.”
JER 14:13 Piru migkaǥi a te, “He Nengazen he MEGBEVAYÀ, netuenan nu he layun sikandan egkeǥiyi te menge ebpeneuven he wazè kun ebpekeuma he tebek wey vitil, su geina te migkaǥi ka he ebeǥayan nu sikandan te kelinew kayi te nasyun dan.”
JER 14:14 Midtavak is Nengazen, “Ne haazà he menge ebpeneuven tarù is menge tagnè dan pinaaǥi te ngazan ku. Wazè ku sikandan suǥùa, ne wazà a mebpekidlalag kandan. Is inseysey zan keniyu he nengelewasan dan ne kenà diyà ebpuun te kediey; is menge tagnè dan he wazè din pulus diyè dà ebpuun te limbungan he isip dan.
JER 14:15 Umbe siak, is Nengazen, egkaǥi a he edsilutan ku heini is teruen he menge ebpeneuven. Ebpenagnè dan pinaaǥi te ngazan ku, minsan wazè ku sikandan suǥua. Egkaǥi pa sikandan he wazà tebek wey vitil he egkehitavù kayi he nasyun. Piru heeyan he menge ebpeneuven egkengezeetan gihapun pinaaǥi te tebek wey vitil.
JER 14:16 Ne mehitenged te menge etew he midseysayan dan te menge ibpeseyuzan dan, ebpemematey zan ne ibpenimbag sikandan diyà te menge zalan te Jerusalem. Ebpematey zan tenged te tebek wey vitil. Wazè edleveng kandan wey te menge esawa zan wey menge anak dan. Ibpeǥezaman ku kandan is silut he ereg kandan.”
JER 14:17 “Jeremias, keǥiya nu heini te menge etew, ‘Maandew wey mezukilem ne kenè en egkeengked is kebpekesineǥew ku su zekelà is palì te menge etew ku ne utew sikandan egkesekiti.
JER 14:18 Emun edhendiyà a te menge vevesukà wey menge inged, egkeehè ku is mibpematey te tebek wey vitil. Is menge ebpeneuven wey is menge memumuhat mibpedayun te vuluhaten dan, piru wazè dan metueni ke hengkey is mibeelan dan.’ ”
JER 14:19 He Nengazen, inselikwey nu en be is Juda? Egkeepesan nu ve is Jerusalem? Maan is mibpurungan key kenikew pelii, ne kenè key en egkeulian? Ebperateng key he ebeǥayan key kenikew te kelinew, piru wazè dey heini mezawat. Ebperateng key he ebewian key kenikew wey key meulii, piru kegkahandek is nekeuma ziyà te kenami.
JER 14:20 He Nengazen, mid-angken dey is kelelalung dey wey is menge salà te menge kepuun dey. Nekesalè key ziyà te kenikew.
JER 14:21 He Nengazen, tenged te zengeg te ngazan nu, edhengyuan ku sikew he kenè key kenikew iselikwey. Kenè nu ituǥut he egkependezeisey is lavew he pinuuwè nu te kedhadì. Tentenuzi nu is kebpekid-uyun nu kenami, ne kenè nu heini pekyasa.
JER 14:22 Ebpekehimu ve te ebpeuzan is menge ed-ezapen diyà te menge nasyun? Minsan is langit kenà ebpekehimu he ebpeuzan te kandin dà he ketau, kekenà, iyan ke zà, Nengazen, he Megbevayè dey. Iyan ke zà ebpekehimu kayi, umbe ebperateng key ziyà te kenikew.
JER 15:1 Migkaǥi is Nengazen kayi te kedì te, “Minsan si Moises pa wey si Samuel is ebpehizuhizu kediey para kayi he menge etew, ne kenè ku sikandan egkehizuwan. Umbe ipekeziyù sikandan kayi te etuvangan ku. Ipawè niw en sikandan!
JER 15:2 Emun ed-insà sikandan ke hendei zan ebpevayà, keǥiyi nu te iyan heini migkaǥi ku: Is midtelaan en is kebpatey zin ne ebpatey. Is duma ibanglis kandan is kebpatey pinaaǥi te tebek, ne is duma pinaaǥi te vitil. Ne is duma pa ibanglis kandan is kegkevihag.
JER 15:3 Ibpeseǥazan ku kandan is heepat he klasi te kezeetan: Ebpenhimetayan sikandan pinaaǥi te tebek, idtangag te menge asu is menge lawa zan te ebpematey, egkeenen sikandan te menge tagbis, ne is egkesamà he menge lawa zan ed-eminen egkeena te zumezaas he menge langgam.
JER 15:4 Edhimuwen ku he kerkera tenged te kegkelimezangi is langun he ginhedian te kelibutan he ebpekaahà te egkeula-ula kandan te menge etew ku. Egkeula-ula heini tenged te mibeelan ni Manase he anak ni Hezekia diyà te Jerusalem hein iyan sikandin nehimu he hadì te Juda.
JER 15:5 “Sikiyu is menge etew te Jerusalem, hentei vuwa is egkehizu keniyu? Hentei is egkeseeng keniyu? Hentei vuwa is ebpenginginsà ke hengkey en is kebpekesavuk niw? Wazà!
JER 15:6 Inselikwey a keniyu; layun a keniyu ed-iniyuǥi. Umbe egemiten ku is gehem ku te kedezaat keniyu. Neperahan ad he ebpaahà te hizu ku keniyu.
JER 15:7 Edsilutan ku sikiyu ziyà te menge pultahan te inged pinaaǥi te kebpeyapata ku keniyu iring te ukap he inlayap te keramag. Edezeetan ku sikiyu wey is menge anak niw, su wazè kew med-engked te mezaat he menge vaal niw.
JER 15:8 Ibpemahabet ku is menge vahi keniyu he egkevalu, henduen be te edhuna pa he mahabet sikandan kenà te pantad diyà te veyvey. Meudtu, ne edsuǥuen ku is ebpendezaat te menge iney te menge anak niw he maama. Egketik-awan kew egkeumahi te kegkeseeng wey kegkahandek.
JER 15:9 Egkelipeng wey edlised he egehinawa is iney he ebpatey is pitu he anak din he menge maama. Is menge anak din egkeiring te andew he midsayu medsanlep. Egkepeel-elezan sikan is egkaawà diyà te kandin is menge anak din. Ne is egkesamà he uuyag ibpehimetayan ku te menge kuntada zan. Iyan a, is Nengazen, is migkaǥi kayi.”
JER 15:10 Utew a mekehizuhizu! Deyzey pa ke wazà ad ianak te iney ku! Layun a egkuntedaha te menge etew ziyà te tivuuk he Juda. Wazè ku man pezem neutangan etawa impeutang, piru edrewakan a te langun.
JER 15:11 Midtavak a te Nengazen te, “Benar iyan, egkehimu zed he meupiya is langun para kenikew. Emun timpu te kedlised wey kegkezeeti te menge kuntada nu edhangyù dan he ipengemuyù nu sikandan.”
JER 15:12 Iring te wazà ebpekevadtì te kebilya he putew etawa brunsi, ne wazà daan ebpekezaag te menge kuntada he ebpuun diyà te zizaya.
JER 15:13 Ibpaaǥew ku te menge kuntada niw is menge ketiǥeyunan niw wey menge azen niw tenged te langun he salà he nehimu niw kayi te tivuuk he nasyun.
JER 15:14 Ibpeuripen ku sikiyu te menge kuntada niw ziyà te lugar he wazè niw metueni. Ne ibpeǥezaman ku keniyu is pauk ku he iring te edriyubriyub he hapuy.
JER 15:15 Migkaǥi si Jeremias te, “He Nengazen, netuenan nu is langun he nehitavù kediey. Tentenuzi a wey uǥupi a. Belesi nu is edtinguhà te kezeetan ku. Netuenan ku he kenè ka melemu egkepauk, umbe kenè nu kuwaa is untung ku. Tentenuzi nu is ked-entusa ku te keelezan tenged kenikew.
JER 15:16 Hein nekidlalag ka kedì nemineg a kenikew. Is menge lalag nu iyan ebpekelipey kedì ne migkaǥi ka he ǥaked a kenikew, he Nengazen he Megbevayà he Mekeǥeǥehem.
JER 15:17 Wazà a medtampu te kedlipeylipey wey kegkebibu te zuma. Mibpimpinuu a he midsebsevaha su netuenan ku is menge paaǥi nu ne midhimu nu he utew ku igkererengiti is kelelalung dan.
JER 15:18 Maan is kenè en egkepangkus is kegkesekiti ku? Maan is kenà egkeulian is palì ku? Kenè en be heini egkevewian? Id-awè nu ve is perateng ku he iring te wahig he egkemezahan penahun te gulavung?”
JER 15:19 Umbe, migkaǥi is Nengazen kayi te kedì te, “Emun ed-iniyuǥan nu is salè nu, ibpelikù ku sikew kayi te kedì su wey ka mekepedayun he ebpenilbi kedì. Emun egkaǥi ka te menge lalag he zuen din pulus ne kenà menge lalag he wazè din pulus, edhimuwen ku sikew he perekaǥi ku. Kinahanglan he iyan sikandan ebpekezangep diyà te kenikew, ne kenè ka iyan ebpekezangep diyà te kandan.
JER 15:20 Edhimuwen ku sikew he iring te melig-en he verengbeng he brunsi he kenà egkelewangan kayi he menge etew. Ebpekidtebek sikandan kenikew piru kenè ke zan egkezaag, su eduma a kenikew para te kedlavan wey kedlibri kenikew.
JER 15:21 Uya, edlibriyen ku sikew puun te ǥehem te menge lalung wey mesipala he menge etew.”
JER 16:1 Migkaǥi pa is Nengazen kayi te kedì te,
JER 16:2 “Kenè ka mebpengesawa wey med-anak kayi he lugar.
JER 16:3 Egkeǥiyen ku kenikew ke hengkey is egkehitavù te menge vatà he egkengeetew kayi he lugar wey te menge ginikanan dan.
JER 16:4 Ebpematey sikandan tenged te grabi he zaru. Wazè en egkesamà he egkeseeng wey edleveng kandan, kekenà, ebpekepeyapat is menge lawa zan he henduen be te menge tai he ebpekepeyapat diyà te tanà. Is duma kandan ebpematey tenged te tebek wey vitil, ne egkeenen sikandan te menge tagbis wey zumezaas he menge langgam.”
JER 16:5 Migkaǥi pa is Nengazen te, “Kenè ka medseled diyà te valey he zuen duen egkeseeng tenged te minatey. Kenè ka meseeng wey kenè ka mebpaahà te hizu ziyà te minsan hentei. Su in-awè ku en is tuvad ku, kebmahal ku, wey hizu ku kayi he menge etew.
JER 16:6 Ebpematey is minsan hentei kayi he tanà, sepian man etawa pubri, ne wazà ebpekeleveng kandan wey wazà edlalew tenged kandan. Wazè en ebpelian din is lawa zin etawa ebpevangul su ibpetuusan din is kedlalew zin tenged te minatey he zuma zin.
JER 16:7 Wazà ebpekeveǥey te keenen wey inumen he idlangan te edlalew he mibpetayan, minsan is mibpetayan te iney etawa amey.
JER 16:8 Kenè ka zaan medseled diyà te valey he zuen duen keemuran te kegkaan wey ked-inum dutun.
JER 16:9 Su iyan a, is Nengazen he Mekeǥeǥehem, he Megbevayà te Israel, migkaǥi kayi: ‘Ibpeengked ku is kedlilipeylipey wey kedlipey kayi he lugar, minsan is kedlipey te beuǥu. Egkesaksiyan nu heini kayi te kenikew he timpu.’
JER 16:10 “Emun egkeǥiyen nu heini ziyà te menge etew, ne ke ed-insè sikandan te, ‘Hengkey ves is salà he nehimu zey ziyà te Nengazen he Megbevayè tew he iyan hinungdan te kebpetizeeni zin kenitew he egkeumahan kiw te zekelà he kezeetan?’
JER 16:11 Keǥiyi nu sikandan he iyan heini tavak ku: Iyan imbeeli ku kayi is geine te inselikwey a te menge kepuun niw. Nenilbi zan wey mid-azap te zuma he menge ed-ezapen. Inselikwey e zan ne wazè dan tumana is menge kesuǥuan ku.
JER 16:12 Ne sikiyu edhuna kew pa he lalung kenà te menge kepuun niw. Wazè kew mebpezumazuma kedì, kekenà, iyan niw mibpezumdumahan is kenà mepezumdumahan he mezaat he gehinawa niw.
JER 16:13 Umbe, edsegseǥen ku sikiyu puun kayi he tanà pehendiyà te tanà he sikiyu wey is menge kepuun niw wazè niw zuen hanew. Ne zutun ebpekevayèbayè kew te kedsilbi te zuma he menge ed-ezapen; ne kenè ku sikiyu egkehizuwan.
JER 16:14 “Piru egkeuma zed is timpu he is menge etew kenè en maan ebpenangdù pinaaǥi te kegkaǥi te, ‘Ebpenangdù a pinaaǥi te uuyag he Nengazen he mibpeǥawas te menge Israilihanen diyà te Ehipto.’
JER 16:15 Kekenà, egkaǥi zan te, ‘Ebpenangdù a pinaaǥi te uuyag he Nengazen he mibpeǥawas te menge Israilihanen diyà te menge nasyun diyà te zizaya wey ziyà te langun he menge lugar he zutun din sikandan ipeyapat.’ Su idlikù ku sikandan diyà te tanà he imbeǥey ku ziyà te menge kepuun dan.
JER 16:16 “Piru ǥuntaan, ibpehendiyè ku zep-a te kandan is mezakel he menge kuntada zan he iring te menge mengingisdà he edhingutel kandan. Is menge kuntada zan iring daan te menge mengengasu he ebpen-ahà kandan diyà te menge vuntud, menge vuvungan, wey ziyà te menge sihung te vatu.
JER 16:17 Neehè ku is langun he menge vaal zan. Wazà nekeeles kayi te kediey. Neehè ku is menge salè dan.
JER 16:18 Umbe, edtekepen ku is ibpevayad ku kandan tenged te kelelalung dan wey menge salè dan, su midremerikan dan is tanè ku pinaaǥi te mezaat wey wazè din untung he menge ed-ezapen.”
JER 16:19 Migkaǥi a te, “He Nengazen, iyan ka zesen ku wey eputà emun timpu te kelised. Ed-uvey ziyà te kenikew is menge etew ziyà te menge nasyun he ebpemuun diyà te nekedseselekawà he vahin kayi te kelibutan ne ke sikandan te, ‘Wazà pulus te menge ed-ezapen te menge kepuun dey. Wazà keupiyaanan he nehimu kayi ziyà te kandan.
JER 16:20 Egkeveelan be te etew is megbevayè din? Emun egkeveelan din, ne kenà heeyan tutuu he megbevayà!’ ”
JER 16:21 Migkaǥi is Nengazen te, “Umbe ibpeehè ku kandan is gehem ku wey ebilidad ku su wey zan metueni he iyan a Nengazen.”
JER 17:1 Migkaǥi is Nengazen te, “Sikiyu is menge etew ziyà te Juda, is menge salè niw in-ukir ziyà te kenà mepezumdumahan he gehinawa niw, henduen be te menge litra he in-ukir ziyà te vatu etawa menge sungeysungey te menge suyuk te menge pemuhatè niw.
JER 17:2 Minsan is menge anak niw ed-azap diyà te menge pemuhatè niw wey te menge tukud he simbulu te vahi he ed-ezapen he si Ashera diyà te sihung te merapung he kayu wey ziyà te puntur te menge vuntud,
JER 17:3 ragkes is diyà te menge vuvungan diyà te vevesukà. Umbe ibpaaǥew ku te menge kuntada niw is menge ketiǥeyunan niw wey menge azen niw, ragkes en is menge simbahan niw ziyà te metikang he menge lugar, tenged te salà he neveelan kayi te tivuuk he nasyun.
JER 17:4 Egkaawà diyà te keniyu is tanà he imbeǥey ku keniyu. Ibpeuripen ku sikiyu te menge kuntada niw ziyà te tanà he wazè niw zuen hanew, su midhimu niw he mepauk a te pauk he zekelà su henduen be te edriyubriyub he hapuy he kenà egkeevukan.”
JER 17:5 Migkaǥi pa is Nengazen te, “Edrewakan ku is etew he ed-awà kayi te kedì ne edsarig dà te etew.
JER 17:6 Iring sikandin te pinemula ziyà te sibsivayan he kenè en edekelà. Ebpekeubpà sikandin diyà te memaza wey timusen he tanà he wazà duen ed-ubpà.
JER 17:7 Piru deyzey mulà is etew he edsarig kedì, he kayi te kedì is perateng din.
JER 17:8 Iring sikandin te kayu he impemula ziyà te veyvey te wahig, he edhendiyà is menge zalid din te wahig. Heini he kayu kenè egkahandek wey egkeseeng emun ebpekeuma is meluǥayad he gulavung. Is menge zahun din layun meilem ne kenà edsalang he ebpemeǥas.
JER 17:9 Utew limbungan is gehinawa te etew ne wazà meupiya he egkehimu zin. Hentei is egketau ke sengemenu is kezaat kayi?
JER 17:10 Iyan a, is Nengazen, netau a te gehinawa wey isip te etew. Ebelesan ku is etew sumalà te vetasan din wey menge ulaula zin.
JER 17:11 Is etew he nekaangken te ketiǥeyunan pinaaǥi te mezaat he paaǥi ne iring te tagbis he mid-eren te kenà kandin he impis. Diyà te huziyan he timpu emun edliwezeenan en sikandin, egkaawà diyà te kandin is ketiǥeyunan din ne ebpekelepew is ketetaleng din.”
JER 17:12 He Nengazen, is baley nu iyan mekempet he pinuuwè nu te kedhadì puun pa zengan.
JER 17:13 Iyan ka Nengazen, egkeperateng te menge Israilihanen. Egkepeel-elezan is langun he mid-awà diyà te kenikew. Idleveng sikandan diyà te zizalem te tanà, su inselikwey ke zan, is serebseb he ebpekeveǥey te untung.
JER 17:14 He Nengazen, iyan ke zà ebpekevawì kedì wey a meulii; iyan ke zà ebpekelibri kediey. Iyan ka midalig ku.
JER 17:15 Migkaǥi is menge etew kayi te kedì te, “Hendei en sikan is migkaǥi te Nengazen? Maan be te wazè pa heini mehitavù.”
JER 17:16 He Nengazen, wazè ku lemlemuwi is buluhaten ku he kebantey te menge etew nu. Wazè ku sikew peǥesa he ipeseǥazi nu en kandan is kezeetan. Netuenan nu is mibpengaǥi ku.
JER 17:17 Kenà a kenikew pelihendeka, su iyan ka eputè ku emun timpu te kezeetan,
JER 17:18 Peel-elezi nu wey pelihendeka nu is menge edtinguhà te kezeetan ku, ne kenà a mulà. Ipeseǥazi nu kandan is kezeetan su para mengezeeti sikandan is langun.
JER 17:19 Migkaǥi is Nengazen kayi te kedì te, “Hitindeg ka ziyà te menge pultahan te Jerusalem. Diyè ka huna hitindeg te pultahan he veyeey te menge hadì te Juda, ne emun egkepasad, ne ziyè ke en te zuma he menge pultahan.
JER 17:20 Ne keǥiyi nu is menge etew te, ‘Pemineǥa niw is lalag te Nengazen, sikiyu is menge hadì wey menge meǥinged kayi te Juda, ragkes kew en is menge meǥinged te Jerusalem he ebayà kayi he pultahan.
JER 17:21 Iyan heini migkaǥi te Nengazen: Emun mibpekeveǥat niw is keugelingen niw, kenè kew edterebahu wey ed-uwit te menge velegyè niw zutun te timpu te Andew te Kedhimeley.
JER 17:22 Uya, kenè kew iyan edterebahu wey ed-uwit te menge velegyè niw puun te menge valey niw zutun he andew. Isipa niw heini he segradu he andew. Insuǥù ku heini te menge kepuun niw,
JER 17:23 piru wazè dan mebpemineg kediey. Kenà sikandan mepezumdumahan! Kenè dan edewaten is kebmensuwa ku kandan.
JER 17:24 Piru emun ebpezumazuma kew kedì, he kenè kew edterebahu etawa ed-uwit te menge velegyè niw ziyà te menge pultahan te Jerusalem dutun te Andew te Kedhimeley, kekenà, ed-isipen niw heini he segradu he andew para kediey,
JER 17:25 ne layun duen egkahadì kayi te Jerusalem he kevuwazan ni David. Ed-untud is hadì wey menge upisyal zin te menge kerwahi wey menge kudà ne ebparid sikandan pinaaǥi te kedselang te menge pultahan te inged, duma te menge etew te Juda wey Jerusalem. Ne heini is inged he Jerusalem egkeubpaan taman te taman.
JER 17:26 Edsimba is menge etew ziyà te valey te Nengazen he ebpemuun diyà te menge lugar he nekeelingkus te Jerusalem wey ziyà te menge inged diyà te Juda wey Benjamin, wey ziyà te menge mibuntud-buntud diyà te edsenlepan, diyà te menge vuvungan, wey ziyà te Negev. Ed-uwit dan diyà te valey ku is menge pemuhat he edtutungen wey zuma pa he menge pemuhat, iring te pemuhat he para gasa, pemuhat he para te kebpeselemat, wey menge veyewà.
JER 17:27 Iyan, emun kenè kew edsunud kediey su kenè niw ed-isipen he segradu he andew is Andew te Kedhimeley, kekenà, ed-uwit kew te menge velegyè niw ziyà te menge pultahan te Jerusalem dutun he andew, ebinsulan ku is menge pultahan te Jerusalem ragkes is melig-en he menge vahin kayi he inged, ne wazà ebpekeevuk kayi he hapuy.’ ”
JER 18:1 Migkaǥi pa is Nengazen kayi te kedì te,
JER 18:2 “Hendiyè ka te valey te mendiziyun, ne zutun egkeǥiyen ku kenikew is menge lalag ku.”
JER 18:3 Umbe, midhendiyà a te valey te mendiziyun ne zutun neehè ku he kemulu pa sikandin ebaal te ziniyun.
JER 18:4 Emun ganì kenà meupiya is purma zutun te ziniyun he ebeelan din, ne edhelinen din heini taman te egkehimu is purma he egkesuatan din.
JER 18:5 Ne zutun migkeǥiyan a te Nengazen,
JER 18:6 “He menge etew te Israel, kenè ku ve egkehimu ziyà te keniyu is iring te mibeelan duen te mendiziyun duen te vasak? Iring te sikan is basak ne ziyà te velad duen te mendiziyun, ne sikiyu ziyè kew zaan te velad ku.
JER 18:7 Emun egkaǥi a he is sevaha he nasyun etawa ginhedian egkaawà is gehem din wey egkezeetan,
JER 18:8 ne is menge meǥinged dutun te nasyun etawa ginhedian ed-engked te kelelalung, kenè ku edleusen is pelanu ku te kedezaat kandan.
JER 18:9 Ne emun egkaǥi a he ebpekeenew wey ed-umanan ebenguna is sevaha he nasyun etawa ginhedian,
JER 18:10 ne is menge meǥinged dutun te nasyun ebaal te kelelalung wey kenà ebpezumazuma kediey, ne kenè ku edleusen is pelanu ku he para te keupiyaanan dan.
JER 18:11 “Umbe keǥiyi nu is menge etew ziyà te Jerusalem he iyan heini migkaǥi ku: ‘Pemineg kew! Mid-andam ku is mibpelanuwan ku he kezeetan para keniyu. Umbe engkezi niw en is mezaat he vetasan niw. Beǥuwe en te kada sevaha keniyu is menge vetasan din wey menge ulaula zin.’
JER 18:12 Piru edtavak is menge etew te, ‘Kenè en egkehimu! Edsiguduwan dey en is menge vaal zey; edsunuzen dey is kenà kegkemepezumdumahan te gehinawa zey!’ ”
JER 18:13 Umbe, iyan heini migkaǥi te Nengazen: “Duen be nehitavù diyà te zuma he menge nasyun he migkaǥi te iring kayi? Is Israel he iring te vahi he wazè pa mehileveti mibaal te utew mezaat he vaal.
JER 18:14 Netunew ve is ayis ziyà te vetuwen he vuntud te Lebanon? Ed-engked be te kedtudà is meǥenew he wahig puun te menge vuntud? Kenà!
JER 18:15 Piru is menge etew ku nelipatan e zan en. Midtutungan dan te veyewà is wazè din pulus he menge ed-ezapen. Mid-ewaan dan is hustu he zalan he kezaan en ne ziyè dan med-ikul te kenà hustu he zalan ne zutun sikandan meseligkat.
JER 18:16 Egkehimu he mekevulungbulung is tanè dan ne edsudien heini taman te taman. Is langun he edsaǥad kayi ebpekepengelengkeleng tenged te kegkeinuinu wey kegkehandek dan.
JER 18:17 Egkeiring a te keramag he ebpuun diyà te edsilaan he ebpeyapat kandan dutun te etuvangan te menge kuntada zan. Ed-iniyuǥan ku sikandan ne kenè ku edtevangan dutun te timpu te kegkezeeti zan.”
JER 18:18 Ne migkaǥi is menge etew te, “Hendini kew, su ebpen-ehè kiw te paaǥi wey tew ikepeengked si Jeremias te kegkaǥi! Duen tew man daan menge memumuhat he ebpekepenurù kenitew te kesuǥuan wey menge ebpeneuven he ebpekeseysey ziyà te kenitew te menge lalag te Megbevayà. Umbe ebaal kiw te serupet he tudtul he ebpekezezaat kandin ne kenè tew en ebpemineǥen is ebpengeǥiyen din.”
JER 18:19 Umbe, mid-ampù a, ke siak te, “He Nengazen, tevangi a! Pemineǥa nu is ebpengeǥiyen te menge kuntada ku he idezaat dan kedì.
JER 18:20 Meupiya is mibeelan ku ziyà te kandan ne ebelesan e zan te mezaat. Mibangbang sikandan su para meulug a zutun. Tentenuzi nu he midangep a ziyà te kenikew te kedhangyù he kenè nu en sikandan kepeuki.
JER 18:21 Piru ǥuntaan, bey-ani nu en ke ebpematey is menge anak dan te vitil wey tebek. Bey-ani nu en he mevalu wey meewai te menge anak dan is menge vahi. Bey-ani nu en he ebpematey te zaru is menge maama kandan wey ebpematey te tebek is menge vetan-en he menge maama kandan.
JER 18:22 Ipeerang nu sikandan tenged te utew kegkahandek emun ibpetik-ew nu ibpesurung diyà te menge valey zan is menge kuntada zan. Su mibangbang dan su para meulug a, wey midlitag sikandan su wey a melitag.
JER 18:23 Piru netuenan nu Nengazen is langun he pelanu zan te kedhimatey kedì. Umbe kenè nu sikandan peseyluwa te menge salè dan wey kelelalung. Pengelinteuwi nu he mezaag sikandan te menge kuntada zan dutun te edtengtengan nu sikandan. Siluti nu sikandan tenged te pauk nu.”
JER 19:1 Migkaǥi is Nengazen kayi te kedì te, “Pemasa ka te umuy ziyà te mendiziyun. Ne zumaha nu is menge edumala te menge etew wey menge edumala te menge memumuhat,
JER 19:2 ne hendiyè kew te Suǥud-suǥud he Ben Hinom, he uvey te Pultahan te Ibpehendiyà te Timbaǥà te Egkengeǥevà he menge Ziniyun. Ne tudtula nu zutun is migkaǥi ku ziyà te kenikew.
JER 19:3 Kaǥi ka te, ‘He menge hadì te Juda wey menge etew ziyà te Jerusalem, pemineǥa niw is menge lalag te Nengazen he Mekeǥeǥehem, he Megbevayà te Israel. Iyan heini migkaǥi zin: Ebpeeǥiyan ku te kezeetan heini he lugar he igketingkemed te minsan hentei he ebpekezineg duen.
JER 19:4 Umbe ebeelan ku heini, su inselikwey a te menge etew ku, ne heini he suǥud-suǥud midhimu zan he pemuhatà te menge pemuhat he edtutungen he para te zuma he menge ed-ezapen. Menge ed-ezapen he wazè dan ganì mekilala wey minsan is menge kepuun dan wey is menge hadì diyà te Juda ne wazà mekekilala. Ne ebpenhimatey pa sikandan te wazè pa hanew he menge vatà kayi he lugar.
JER 19:5 Mibpetukud pa sikandan te menge simbahan he para ki Baal, ne zutun dan ibpemuhat is menge anak dan he pemuhat he edtutungen para kandin. Wazè ku heini isuǥù kandan; wazè ku ganì meisip heini.
JER 19:6 Umbe, pengandam kew, su iyan a, is Nengazen migkaǥi te egkeuma is timpu he heini he lugar kenè en maan egngezanan te menge etew te Tofet etawa Suǥud-suǥud he Ben Hinom, kekenà, egngezanan dan te Suǥud-suǥud he Lepeey.
JER 19:7 Kayi he lugar edezeetan ku is pelanu te menge tig-Juda wey menge tig-Jerusalem. Ibpehimetayan ku sikandan te menge kuntada zan pinaaǥi te tebek, ne ibpekaan ku is menge lawa zan te menge tagbis wey zumezaas he menge langgam.
JER 19:8 Ibpezezeetan ku heini he inged ne egkehimu heini he edsudien. Egkeinuinu is langun he edsaǥad ne ebpekepenerektek sikandan tenged te kegkezeeti kayi.
JER 19:9 Edliǥuyan heini he inged su edhimetayan is meǥinged kayi te menge kuntada zan. Egkeeminan is menge meǥinged duen te keenen. Umbe, egkeenen dan en is duma zan he etew, minsan is menge anak dan.’ ”
JER 19:10 Ne migkaǥi is Nengazen kayi te kedì te, “Rupeta nu is umuy ziyà te etuvangan te menge etew he eduma kenikew.
JER 19:11 Ne keǥiyi nu sikandan te, iyan a, is Nengazen he Mekeǥeǥehem migkaǥi te, ‘Ebpurungan ku edezeeti is Juda wey is Jerusalem iring te kegkerupet kayi te umuy he kenè en egkehimu he ebpurungan. Ibpenleveng is utew mahabet he ebpematey ziyà te Tofet taman te wazè en lugar he egkelevengan.
JER 19:12 Iyan heini ebeelan ku ziyà te Jerusalem wey te menge meǥinged kayi. Ed-isipen heini he meremerik iring te Tofet.
JER 19:13 Uya, is langun he ubpeey ziyà te Jerusalem, ragkes en is turuǥan te menge hadì te Juda, ed-isipen he meremerik iring te Tofet. Diyà te atep kayi he menge valey, edtutung is menge etew te menge veyewà he para te ed-ezapen dan he menge vituen, wey ebpemuhat dan kayi te pemuhat he inumen he para te zuma he menge ed-ezapen.’ ”
JER 19:14 Ne mid-awà si Jeremias diyà te Tofet, he zutun din keǥiya is menge lalag te Nengazen, ne midhendiyà te lama zuen te valey te Nengazen ne migkeǥiyan din is menge etew te,
JER 19:15 “Pemineg kew, su iyan heini migkaǥi te Nengazen he Mekeǥeǥehem, he Megbevayà te Israel: Ibpaaǥi ku kayi he inged wey ziyà te menge inged he nekeelingkus kayi is kezeetan he nekaǥi ku he idezaat kandan, geina te utew sikandan mesinupaken ne wazè dan mebpemineg te menge lalag ku.”
JER 20:1 Dutun he timpu, is memumuhat he si Pashur he anak ni Imer, iyan kinelevawan he upisyal ziyà te valey te Nengazen. Ne hein nezineg din is menge lalag ni Jeremias,
JER 20:2 impevuǥel zin heini ne impepirisu zin diyà te uvey te ǥemawan te valey te Nengazen he migngezanan te Pultahan ni Benjamin.
JER 20:3 Ne sunud he andew impeǥawas ni Pashur si Jeremias. Ne migkeǥiyan sikandin ni Jeremias te, “Pashur, mid-ilisan en te Nengazen is ngazan nu. Guntaan iyan en igngazan kenikew si Magor Misabib (he ke và dà egkegiya, ‘Is Etew he Layun Egkeherati’).
JER 20:4 Su iyan heini migkaǥi te Nengazen: Igkeherati nu is kebpekesavuk nu wey is kebpekesavuk te langun he menge emiǥu nu. Egkeseksiyan nu is kebpenhimetayi kandan te menge kuntada zan diyà te tebek. Ibeǥey ku is tivuuk he Juda ziyà te hadì te Babilonia. Is duma he menge meǥinged kayi ebpenhimetayan, ne is duma ebihaǥen.
JER 20:5 Ibeǥey ku te menge kuntada is langun he ketiǥeyunan diyà te inged he Jerusalem: is langun he midheǥuan dan, is langun he mahalen he menge azen wey is langun he ketiǥeyunan te menge hadì te Juda. Edleglaǥen dan heini is langun diyà te Babilonia.
JER 20:6 Ne minsan sikew Pashur, wey is tivuuk he pemilya nu, ebihaǥen diyà te Babilonia. Diyè ka ebpatey te Babilonia wey idleveng, ragkes is langun he menge emiǥu nu he tarù is tagnè nu mehitenged kandan.”
JER 20:7 He Nengazen, midlimbungan a kenikew wey mibpildi. Nehimu a he ed-eengitan te menge etew, ne kenè e zan ed-engkezan te edsudì.
JER 20:8 Su emun egkaǥi a ne ibpengulahì ku is kebpendaagdaag wey kezeetan. Ne iyan heini he menge lalag is ebpuun diyà te kenikew igkeengiti wey igkesudii kedì.
JER 20:9 Usahay ebpekekaǥi a te kenà ad egkaǥi mehitenged kenikew wey ebpenudtul te menge lalag nu. Piru kenè ku egkeeǥen, su is menge lalag nu henduen be te hapuy he egkeregreg diyà te gehinawa ku wey menge tulan ku. Neveley a te ked-eǥen kayi para kenè ku pezem mekaǥi.
JER 20:10 Nezineg ku is ked-undaunda kedì te menge etew. Ke sikandan te, “Mekaharatharat is nekeliǥuy! Idsumbung tew sikandin!” Minsan is langun he menge emiǥu ku, edtaǥad he mesayep a. Ke sikandan te, “Kela ke egkelimbungan tew sikandin. Ne egkelupig tew sikandin ne ebpekevales kiw.”
JER 20:11 Piru zuma ku sikew, Nengazen. Iring ka te mevurut he sundaru, umbe is menge edal-as kedì egkezeetan wey kenà edlampus. Egkepeel-elezan sikandan ne kenè dan edlampus, ne kenà egkelipatan is keelezan dan taman te taman.
JER 20:12 He Nengazen he Mekeǥeǥehem, netuenan nu ke hentei is metazeng. Netuenan nu is gehinawa wey isip te etew. Ipeehè nu kedì is penimales nu kandan, su insarig ku kenikew is kasu ku.
JER 20:13 Egkanta kiw wey edalig te Nengazen! Su midlibri zin is menge egkengaayu-ayu puun te ǥehem te menge etew he lalung.
JER 20:14 Piru ǥuntaan ingkeepes ku is andew te ked-enaka kedì! Wazè ku ikesuat is andew te ked-enaka kedì te iney ku.
JER 20:15 Midrewakan ku is etew he migkaǥi ziyà te amey ku te, “Maama is anak nu!” he utew ingkelipey te amey ku.
JER 20:16 Deyzey ke heeyan he etew egkeiring te menge inged he midezeetan te Nengazen he wazè din mehizuwi is menge meǥinged duen. Berakat he mezineg din seled te tivuuk he andew is erang wey kulehian dutun te timpu te tebek.
JER 20:17 Su wazè e zin himetayi hein diyè e pa te ǥetek te iney ku. Ne iyan en pezem egkehimu he leveng ku is getek te iney ku.
JER 20:18 Maan is neetew e pa? Te iyan dè bes egkeehè ku is keǥuvut wey kelised, ne ebpatey a te kegkeeled?
JER 21:1 Mibpekidlalag is Nengazen pinaaǥi ki Jeremias hein si hadì Zedekia, he hadì te Juda, midsugù din diyà te ki Jeremias si Pashur he anak ni Malkia wey is memumuhat he si Zefanias he anak ni Maasea. Ne migkaǥi sikandan diyà te ki Jeremias te,
JER 21:2 “Betbetai nu hengyui is Nengazen te kedtavang kenami, su midsurung key ni Hadì Nebucadnezar he hadì te Babilonia. Su kela ke mebaal is Nengazen te egkein-inuwan iring te mibeelan din dengan, su para meengked is kedsurung ni Nebucadnezar.”
JER 21:3 Piru midtavak si Jeremias te,
JER 21:4 “Keǥiyi niw si Zedekia te iyan heini migkaǥi te Nengazen he Megbevayà te Israel: Edhimuwen ku he kenà mebpulus is menge ǥumaan niw, he egemiten niw te kebpekidtebek ki Nebucadnezar wey te menge sundaru zin he edliǥuy ziyà te menge verengbeng niw. Edtiǥumen ku sikandan kayi te inged.
JER 21:5 Iyan a mismu ebpekidtebek keniyu pinaaǥi te ǥehem ku tenged te utew ku kegkepauk.
JER 21:6 Egeraan ku is langun he ed-ubpà kayi he inged, etew etawa ayam. Ebpematey sikandan te grabi he zaru.
JER 21:7 Ne sikew Hadì Zedekia he hadì te Juda, wey is menge upisyal nu, wey is menge etew he egkesamà he kenà ebpatey te zaru, te vitil, wey te tebek, ibeǥey ku sikiyu te kuntada niw he si Hadì Nebucadnezar he hadì te Babilonia wey te zuma pa he menge kuntada niw he egkesuat he edhimatey keniyu. Kenà sikandin egkehizu he edhimatey keniyu. Iyan a, is Nengazen, is migkaǥi kayi.
JER 21:8 “Keǥiyi niw zaan is menge etew ziyà te Jerusalem he iyan heini migkaǥi te Nengazen: ‘Guntaan ibpepilì ku sikiyu te zalan pehendiyà te untung etawa zalan pehendiyà te kemetayen.
JER 21:9 Is minsan hentei he kenà ed-awà kayi he inged ebpatey te tebek, bitil, etawa zaru. Piru sikan is egawas wey edsurindir ziyà te menge tig-Babilonia he edsurung keniyu ne egkeuyag-uyag. Uya, egkelibri is untung din.
JER 21:10 Nekehukum ad he ibpaaǥi ku kayi te inged is kezeetan ne kenà keupiyaanan. Ibeǥey ku heini ziyà te hadì te Babilonia ne ebinsulan din heini.’
JER 21:11 “Keǥiyi niw zaan is lavew he menge pemilya ziyà te Juda, he menge kevuwazan ni David, he pemineǥa zan heini is migkaǥi te Nengazen: Kenè niw engkezi te ed-ikul is hustu he kukuman. Layun niw tevangi is mibpenekawan; libriya niw sikandan te kedresaya kandan. Su emun kenà, egkeregreg is pauk ku he iring te hapuy he kenà egkeevukan tenged te mezaat he menge vaal niw.
JER 21:13 Kuntada ku sikiyu is menge tig-Jerusalem, sikiyu is ebpemen-ubpà diyà te melig-en he lugar he ebpekepantew te suǥud. Sikiyu is ebpegalbu he egkaǥi te, ‘Kenè kiw egkemenu kayi! Wazà ebpekeseled kayi te melig-en he inged tew.’
JER 21:14 Piru edsilutan ku sikiyu ǥihapun te sungkad te menge vaal niw. Ebinsulan ku is turuǥan te hadì niw ne egkevinsulan is langun diyà te peliǥuy kayi. Iyan a, is Nengazen, is migkaǥi kayi.”
JER 22:1 Migkeǥiyan a te Nengazen te, “Hendiyè ka te turuǥan te hadì te Juda ne keǥiya nu heini he menge lalag:
JER 22:2 ‘He hadì te Juda, he kevuwazan ni David, pemineǥa nu heini is menge lalag te Nengazen. Ipepemineg nu is menge upisyal nu wey is menge etew nu he kayi ebayà te menge ǥemawan te turuǥan.
JER 22:3 Migkaǥi is Nengazen te: Baal kew te hustu wey metazeng. Tevangi niw is menge mibpenekawan; libriya niw sikandan puun te gehem te midrasey kandan. Kenè niw dèdaaǥa wey pesipelahi is kenà menge Israilihanen, is menge ilu, wey is menge valu. Kenè kew zaan himatey te wazà mekesalà.
JER 22:4 Su emun edtumanen niw heini he menge suǥù, ne layun duen egkahadì kayi te Jerusalem he kevuwazan ni David. Ed-untud is hadì te menge kerwahi wey menge kudà, ne ebparid pinaaǥi te kedselang te menge pultahan kayi te turuǥan, duma te menge upisyal wey menge etew zin.
JER 22:5 Piru emun kenè niw edtumanen heini he menge suǥù, ne ibpenangdù ku he egkezeetan heini he turuǥan, ne siak is Nengazen, egkeǥiyen ku keniyu he kenà egkehimu he kenà heini egketuman.’ ”
JER 22:6 Iyan heini migkaǥi te Nengazen bahin duen te turuǥan te hadì te Juda: “Diyà te kediey iring is kekempet kayi te kekempet te Gilead etawa puntur te vuntud he Lebanon. Piru siguradu he edhimuwen ku heini he disirtu, iring te inged he wazà duen ed-ubpà
JER 22:7 Duen menge etew he edsuǥuen ku te kedrundus kayi he turuǥan. Is kada sevaha kandan duen din gelemiten he para te idtamped te menge pinilì nu he tukud he sidru, ne idrapug dan heini.
JER 22:8 Is menge etew he ebpemuun diyà te nekedseselekawà he menge nasyun he edsaǥad kayi he inged ebpein-inseey te, ‘Maan buwa is mibeelan heini te Nengazen kayi te nevantug he inged?’
JER 22:9 Ne is tavak iyan heini, ‘Tenged te inselikwey zan is kebpekid-uyun te Nengazen he Megbevayè dan, ne mid-azap wey nenilbi sikandan te zuma he menge ed-ezapen.’ ”
JER 22:10 Sikiyu is menge etew ziyà te Juda, kenè niw sineǥawi si Hadì Josia is minatey en, kekenà, iyan niw purungi sineǥawi is anak din he si Jehoahaz he mid-ilis kandin te kedhadì diyà te Juda, su mibihag sikandin ne kenè en ebpekelikù diyà te tanà he mid-enakan kandin. Su migkaǥi is Nengazen te, “Kenè en sikandin ebpekelikù.
JER 22:12 Ebpatey sikandin diyà te inged he zutun sikandin bihaǥa. Kenè din en egkeuman egkaahà heini he tanà.”
JER 22:13 Mekehizuhizu ka, Hadì Jehoyakim, is mibpevangun te turuǥan nu pinaaǥi te kenà metazeng he paaǥi. Impeterebahu nu is iring nu he etew he wazè nu veyazi.
JER 22:14 Migkaǥi ke pa te, “Ebangun a te turuǥan he zuen din meluag he menge ruǥu diyà te zivavew. Ebpeveelan ku heini te meluag he menge sulawà ne ebpeelevetan ku te kisami he sidru, ne ebpepintalan ku te meriǥà.”
JER 22:15 Egkeisip nu ve is egkehimu ka he ventuǥan he hadì emun ebpekepehitindeg ka te turuǥan he sidru? Maan is kenè nu edsunuzen is amey nu? Hustu wey metazeng is menge vaal zin, umbe mid-uswag sikandin wey meupiya is kebpengungubpaan din.
JER 22:16 Midlevanan din is ketenged te menge pubri wey egkengeey-eyuwan, umbe midlampus sikandin. Iyan heeyan hustu he paaǥi te kedtehuza kedì te Nengazen.
JER 22:17 Ne sikew mulà, wazè duma he tinguhè nu, kekenà, iyan dà is kebpenlimbung, kebpemenhimatey te menge wazà mekesalà, kebpendaagdaag, wey kebpenhukhuk.
JER 22:18 Umbe, iyan heini migkaǥi te Nengazen mehitenged ki Hadì Jehoyakim he hadì te Juda, he anak ni Josia: “Wazà egkeseeng emun ebpatey sikandin. Is pemilya zin, is menge upisyal zin, wey kandan he ginsekupan ne kenà egkeseeng kandin.
JER 22:19 Is kedlevenga kandin egkeiring dà te kedlevenga te minatey he asnu; eguyuzen ne idtimbag diyà te ǥawas te menge pultahan te Jerusalem.”
JER 22:20 Sikiyu is menge etew ziyà te Juda, sineǥew kew su nezeetan en is kezapig niw he menge nasyun. Lalew kew ziyà te menge vuvungan te Lebanon. Sineǥawi niw sikandan diyà te Bashan wey Abarim.
JER 22:21 Mibpetizeenan ku sikiyu hein meupiya pa is kebpekesavuk niw, piru wazè kew mebpemineg. Iyan en iyan heeyan betasan niw puun pa te kegkevatè niw; wazè kew mebpezumazuma kedì.
JER 22:22 Ibpeyapat ku is langun menge pengulu niw, ne ebihaǥen is menge etew ziyà te kezapig niw he menge nasyun. Egkepeel-elezan kew tenged te langun he kelelalung niw.
JER 22:23 Sikiyu is ebpemen-ubpà diyà te turuǥan he mibeelan pinaaǥi te menge kayu he sidru he ebpuun diyà te Lebanon, ebpekezag-es kew emun egkeumahan kew en te kemeresayan, iring te kedag-es te vahi he ebeliliten.
JER 22:24 “Siak, is uuyag he Nengazen, ebpenangdù a he idselikwey ku sikew, Hadì Jehoyakin he hadì te Juda, he anak ni Jehoyakim. Minsan pa neiring ka te sising diyà te kewanan he velad ku ebpul-uten ku sikew.
JER 22:25 Ibeǥey ku sikew te edtinguhà he edhimatey kenikew he igkahandek nu. Uya, ibeǥey ku sikew ziyà te ki Hadì Nebucadnezar he hadì te Babilonia wey te menge sundaru zin.
JER 22:26 Idtimbag ku sikew wey is iney nu ziyà te selakew en he lugar, he kenà iyan mid-anakan keniyu, ne zutun kew is dezuwa ebpatey.
JER 22:27 Kenè kew en ebpekelikù diyà te tanà he iyan pezem suat niw he mekelikù kew zutun.
JER 22:28 Jehoyakin, neiring ka te nerupet he ziniyun he intimbag su wazè din en pulus. Iyan heeyan hinungdan ke maan is idtimbag ku sikew wey is menge anak nu ziyà te inged he wazè niw zuen hanew.”
JER 22:29 Sikiyu is menge tig-Juda, pemineǥa niw is lalag te Nengazen.
JER 22:30 Su iyan heini migkaǥi zin, “Idsurat he heini si Jehoyakin wazè din anak, su wazà minsan sevaha zuen te menge anak din he ebpekepengevilin te kedhedii ni David te Juda. Heini he etew ebpengungubpaan he kenà ebmeuswaǥen.”
JER 23:1 Migkaǥi is Nengazen he Megbevayà te Israel te, “Mekehizuhizu kew is menge pengulu te menge etew ku! Iring kew pezem te menge perevantey te menge kerehidu. Iyan kew pezem ed-elima te menge etew ku, piru mibelaǥad niw sikandan ke ebpematey wey egkengetazintazin. Umbe, geina te migurigew niw is menge etew ku ne wazè niw etura, edsilutan ku sikiyu tenged kayi te mezaat he vaal niw.
JER 23:3 Iyan a mismu edtiǥum te nesamà he menge etew ku puun diyà te nekedseselekawà he menge lugar he zutun ku sikandan ipeyapat, ne idlikù ku sikandan diyà te tanè dan, ne zutun ebmahabet sikandan utew.
JER 23:4 Ebeǥayan ku sikandan te menge pengulu he ed-atur kandan, ne kenè dan en egkahandek wey egkeheratan, ne wazè en egketazin kandan. Iyan a, is Nengazen, is migkaǥi kayi.”
JER 23:5 Migkaǥi pa is Nengazen te, “Egkeuma is timpu he ibpahadì ku is sevaha he metazeng he hadì he kevuwazan ni David. Edhadì sikandin he zuen din ketau, ne edhimuwen din is metazeng wey hustu para kayi he tanà.
JER 23:6 Iyan heini ngazan he igngazan kandin: ‘Is Nengazen iyan Mibeǥey Kenitew te Ketazeng.’ Dutun he timpu egkelibri is Juda wey ebpekaangken te kelinew is Israel.
JER 23:7 “Dutun he timpu is menge etew he ebpenangdù, kenè dan en egkaǥi te, ‘Ebpenangdù a pinaaǥi te uuyag he Nengazen he mibpeǥawas te menge Israilihanen puun te Ehipto.’
JER 23:8 Kekenà, egkaǥi sikandan te, ‘Ebpenangdù a pinaaǥi te uuyag he Nengazen he mibpeǥawas te menge Israilihanen puun te nasyun diyà te zizaya wey ziyà te langun he nasyun he zutun din sikandan ipeyapat.’ Ne zutun ed-ubpà sikandan diyà te keugelingen dan he tanà.”
JER 23:9 Henduen be te egkaawè en is gehinawa ku tenged te teruen he menge ebpeneuven. Mibpengerker is menge tulan ku, ne henduen be te nelangut a tenged te kegkesegradu te menge lalag he migkaǥi te Nengazen he ebpekesuǥat kandan.
JER 23:10 Nepenù en is tanà te menge etew he ed-azap te tarù he menge megbevayà, su mibaal te mezaat is menge ebpeneuven wey mezaat is kegemita zan te ǥehem dan. Ne tenged kayi midrewakan te Nengazen is tanà, umbe mibmemaza heini ne nengeǥangu is menge pinemula.
JER 23:11 Iyan heini migkaǥi te Nengazen: “Is menge memumuhat wey is menge ebpeneuven pudu kenà edsunud te Megbevayà, ne mibaal sikandan te mezaat minsan diyà te valey ku.
JER 23:12 Umbe, egkehimu he melandeg wey merusirem is dalan dan. Ebpemekezulas wey egkengepiley sikandan, su ibpaaǥi ku ziyà te kandan is kezeetan dutun te timpu te kedsiluti ku kandan. Iyan a, is Nengazen, is migkaǥi kayi.
JER 23:13 “Neehè ku he utew subra is kelelalung te menge ebpeneuven diyà te Samaria, su edheǥeten dan is menge tagnè dan pinaaǥi te ngazan ni Baal ne midtazin dan is menge etew ku he Israilihanen.
JER 23:14 Piru neehè ku he edlavew pa he lalung is menge ebpeneuven diyà te Jerusalem. Mid-azap dan te zuma he menge ed-ezapen ne midtarùtarù dan pa. Ed-iniyaten dan is menge lalung te kebpeiseg te kelelalung dan. Umbe wazè dan engkezi is kelelalung dan. Is menge etew ziyà te Jerusalem, iring kezaat te menge etew ziyà te Sodom wey Gomora.
JER 23:15 “Umbe siak, is Nengazen he Mekeǥeǥehem, migkaǥi a mehitenged kayi te menge ebpeneuven te: Ibpekaan ku sikandan te mepait he menge keenen wey ibpeinum ku te inumen he edsehuǥan te hilu; su tenged kandan midelandap en is kelelalung keniyan te tivuuk he tanà.”
JER 23:16 Migkeǥiyan te Nengazen he Mekeǥeǥehem is menge etew ziyà te Jerusalem te, “Kenè kew pemineg te egkeǥiyen kayi te teruen he menge ebpeneuven. Ibpeperateng kew zan dà te tarù. Is egkeǥiyen dan he nengelewasan dan ne kenà diyà ebpuun te kediey su ziyè dà te isip dan.
JER 23:17 Iyan heini layun egkeǥiyen dan diyà te menge etew he edsudì kedì wey ebpezumazuma te mesinupaken he ǥehinawa zan: ‘Egkehimu he utew meupiya is kebpekesavuk niw, migkaǥi is Nengazen. Wazà mezaat he egkehitavù keniyu.’
JER 23:18 Piru hentei man kayi te menge teruen he ebpeneuven is netau te isip ku? Wazè man ganì sikandan mebpemineg te lalag ku wey wazè dan beliya is mibpengaǥi ku.
JER 23:19 Pemineg kew! Is pauk ku iring te vagyu etawa eribpures he ebpekesuǥat te lalung he menge etew.
JER 23:20 Kenà iyan egkaawà is pauk ku taman te egkeveelan ku is egkesuatan ku te ebaal. Ne ziyà te huziyan he timpu egkepurung niw zed egkesavut heini.
JER 23:21 Wazè ku suǥua heini he menge ebpeneuven, piru migenat sikandan gihapun. Wazè ku sikandan lelaǥi, piru nenagnè dan ded.
JER 23:22 Emun pezem netuenan dan ke hengkey is diyà te isip ku, midtudtul zan en pezem is menge lalag ku ziyà te menge etew ku, su para meengkezi zan is mezaat he menge vetasan dan wey menge vaal zan.
JER 23:23 Megbevayà a he ziyà te minsan hendei ne kenà diyè dà te sevaha he lugar.
JER 23:24 Wazà etew he ebpekeeles diyà te meeles he lugar he kenè ku egkaahà. Wazè niw ve metueni he ziyà a te minsan hendei ziyà te langit wey ziyà te tanà? Iyan a, is Nengazen, is migkaǥi kayi.
JER 23:25 “Nezineg ku is tarù he mibpengaǥi te menge ebpeneuven he midheǥet dan pinaaǥi te ngazan ku. Egkaǥi sikandan te, ‘Duen menge lalag he migkaǥi te Nengazen diyà te kenami pinaaǥi te teǥeinep!’
JER 23:26 Keenu ves buwa sikandan ed-engked he egkaǥi te tarù he ebpuun dà diyà te limbungan he isip dan?
JER 23:27 Kunaan dan ke pinaaǥi te kedtudtula zan te menge teǥeinep dan, igketukù dan is menge etew ku para melipat kedì, iring te kegkelipati kedì te menge kepuun dan he pinaaǥi te ked-azap dan ki Baal.
JER 23:28 Bey-ani en heini he menge ebpeneuven ke ebpenudtul zan te menge teǥeinep dan, piru sikan is menge ebpeneuven he nekezineg te lalag ku kinahanglan he edtudtulen dan heini te tinutuuwà. Su zuen kebpekedselekawà te teǥeinep dan wey is lalag ku iring te kebpekedselekawà te reǥami wey veǥas din.
JER 23:29 Kenè be mekeǥeǥehem is lalag ku? Iring heini te hapuy he ebpeketutung wey masu he ebpekerupet te vatu.
JER 23:30 “Umbe siak, is Nengazen, migkaǥi a te kuntada ku is menge ebpeneuven he ebpenudtul te menge lalag he ebpuun dà diyà te zuma he menge ebpeneuven ne egkeǥiyen dan he ziyà ebpuun te kedì.
JER 23:31 Kuntada ku zaan is menge ebpeneuven he ebpenudtul te kandan dà he menge lalag ne egkeǥiyen dan te iyan a migkaǥi.
JER 23:32 Kuntada ku is menge ebpeneuven he ebpenudtul te tarù he menge teǥeinep dan, ne midtazin dan is menge etew ku pinaaǥi te kebpenarùtarù dan. Wazè ku sikandan suǥùa te kebpenudtul. Umbe, wazà minsan hengkey he keupiyaanan he igkeveǥey zan diyà te menge etew. Iyan a, is Nengazen, is migkaǥi kayi.
JER 23:33 “Jeremias, emun ed-insà diyà te kenikew heini he menge etew, etawa ebpeneuven, etawa memumuhat ke hengkey is menge lalag ku, ne keǥiyi nu sikandan he iyan migkaǥi ku is inselikwey ku sikandan.
JER 23:34 Emun duen ebpeneuven, etawa memumuhat, etawa minsan hentei he egkaǥi te zuen menge lalag he edtudtulen din he ibpetudtul ku, edsilutan ku haazà he etew wey is pemilya zin.
JER 23:35 Deyzey pa ke ed-insà is kada sevaha keniyu ziyà te menge emiǥu zin wey menge kezuzumahi zin ke hengkey is menge lalag ku,
JER 23:36 kenè te egkaǥi sikandin te, ‘Duen menge lalag he ibpetudtul kandin te Nengazen.’ Su iyan heini egkeǥiyen dan su para tuuwi sikandan te zuma, umbe egketuis is menge lalag te uuyag he Megbevayà, he Nengazen he Mekeǥeǥehem.
JER 23:37 “Jeremias, emun ed-insaan nu is sevaha he ebpeneuven ke zuen be egketudtul zin he ebpuun kayi te kediey,
JER 23:38 ne ke egkaǥi sikandin te, ‘Uya, zuen egketudtul ku he ebpuun diyà te Nengazen.’ Kinahanglan he egkeǥiyan nu sikandin te iyan heini migkaǥi ku: ‘Geina te migkaǥi ka he zuen nu egketudtul he ebpuun kayi te kediey, minsan te imbandu ku kenikew is kegkaǥi keniyan,
JER 23:39 edlipatan ku en sikew ne edsegseǥen ku sikew puun te etuvangan ku. Ne ebey-anan ku heini is inged he imbeǥey ku te menge kepuun niw.
JER 23:40 Ibpeseǥazan ku keniyu is keelezan he taman te taman, he kenà egkelipatan.’ ”
JER 24:1 Duen impelewasan kedì te Nengazen hein mibihag en ni Hadì Nebucadnezar he hadì te Babilonia si Hadì Jehoyakin he hadì te Juda, he anak ni Jehoyakim. Mid-uwit si Jehoyakin diyà te Babilonia ragkes is menge upisyal zin wey is memetau he menge pandey wey menge terebahanti. Hein neipus heini he hitavù ne zuen impelewasan te Nengazen kedì. Dutun te nelewasan ku neehè ku is dezuwa he vaskit he veǥas te higus he ziyà te egkesineruwan duen te valey te Nengazen.
JER 24:2 Is menge higus diyà te sevaha he vaskit utew memeupiya wey nengelutuan. Piru is menge higus duen te sevaha pa he vaskit ne memezaat ne kenà egkekaan.
JER 24:3 Ne zutun mid-insà is Nengazen kayi te kedì te, “Jeremias, hengkey is neehè nu?” Midtavak a te, “Menge higus. Is duma utew memeupiya, ne is duma utew memezaat ne kenà egkekaan.”
JER 24:4 Ne zutun migkaǥi is Nengazen kayi te kedì te,
JER 24:5 “Siak is Nengazen he Megbevayà te Israel, egkaǥi a te ed-isipen ku he iring te meupiya he menge higus is menge Israilihanen he impevihag ku ziyà te Babilonia.
JER 24:6 Ebentayan ku sikandan wey ed-eturen ku, ne idlikù ku sikandan kayi he tanà. Ibpeuswag ku sikandan ne kenè ku en edezeetan. Edlig-enan ku sikandan ne kenè ku ebpilayen.
JER 24:7 Idsavuk ku ziyà te ǥehinawa zan is tinguhà te kegkilala kediey te Nengazen dan. Egkehimu sikandan he menge etew ku ne egkehimu a he Megbevayè dan, su edlikù sikandan kayi te kediey te kedlikù he ebpuun diyà te gehinawa zan.
JER 24:8 “Piru ed-isipen ku he iring te mezaat he menge higus he kenà egkekaan si Hadì Zedekia he hadì te Juda wey is menge upisyal zin, wey is menge Israilihanen he egkesamà he uuyag keniyan te Jerusalem wey sikan is diyà te Ehipto.
JER 24:9 Edhimuwen ku he ebpendemisan sikandan diyà te langun he ginhedian kayi te kelibutan. Edsudien sikandan wey ed-un-undahan wey ebpenrewakan diyà te langun he lugar he edsegseǥan ku kandan.
JER 24:10 Ibpaaǥi ku ziyà te kandan is tebek, bitil, wey menge zaru taman te egkaamin ebpematey sikandan keniyan te tanà he imbeǥey ku kandan wey te menge kepuun dan.”
JER 25:1 Heini he tudtul mehitenged te menge etew ziyà te Juda migkaǥi te Nengazen diyà te ki Jeremias hein ikeepat he tuig te kedhadì ni Jehoyakim diyà te Juda, te anak ni Josia. Ne iyan daan heini nehuna he tuig te kedhadì ni Nebucadnezar ziyà te Babilonia.
JER 25:2 Migkeǥiyan te ebpeneuven he si Jeremias is langun he menge etew ziyà te Juda wey is langun he meǥinged diyà te Jerusalem te:
JER 25:3 Seled te 23 he tuig–puun te ike-13 he tuig te kedhadì ni Josia ziyà te Juda, he anak ni Amon ne taman en guntaan is kebpekidlalag te Nengazen kedì. Ne edtulungan ku en edtudtula ziyà te keniyu is menge lalag din, piru wazè kew iyan mebpemineg.
JER 25:4 Ne minsan layun edsuǥù is Nengazen te menge suluǥuen din he menge ebpeneuven diyà te keniyu, wazè kew ǥihapun medseǥipà wey mebpemineg.
JER 25:5 Migkaǥi is Nengazen pinaaǥi te menge ebpeneuven din te, “Engkezi niw en is mezaat he menge vetasan niw wey menge ulaula niw su para meubpai niw taman te taman heeyan is tanà he imbeǥey ku keniyu wey te menge kepuun niw.
JER 25:6 Kenè kew penilbi wey azap te zuma he menge ed-ezapen. Kenè niw himuwa he mepauk a pinaaǥi te kebpenilbi niw wey ked-azap te menge ed-ezapen he bineelan niw zà, su para kenè ku sikiyu siluti.”
JER 25:7 Piru wazè kew iyan mebpemineg te Nengazen. Midhimu niw he mepauk sikandin pinaaǥi te menge vineelan niw he zuma he menge ed-ezapen. Umbe iyan kew mismu mid-uwit te silut para keniyu.
JER 25:8 Umbe, iyan heini migkaǥi te Nengazen he Mekeǥeǥehem: “Ǥeina te wazè kew mebpemineg te menge lalag ku,
JER 25:9 ibpesurung ku sikiyu te menge etew ziyà te zizaya he ebpenguluwan te suluǥuen ku he si Hadì Nebucadnezar he hadì te Babilonia. Edsurungen dan heini he tanà wey is langun he meǥinged kayi, ragkes en is langun he menge nasyun diyà te nekeelingkus kayi. Ebpurungan ku sikiyu edezeeti, ne egkeheratan is menge etew he ebpekaahà te egkehitavù keniyu ne egkehimu kew he telemayen. Uya, egkezeetan kew taman te taman.
JER 25:10 Edhimuwen ku he kenè kew en ebpekeǥusà wey ebpekelipeylipey. Kenè en egkezineg is kebpeeyuwà te veuǥu, wey wazè en daǥing te ebpenggaling te trigu wey edtemtem te sulù ke mezukilem.
JER 25:11 Egkehimu he mekevulungbulung heini is tivuuk he tanà. Heini he nasyun wey is menge nasyun diyà te peliǥuy kayi ebpenilbi te hadì te Babilonia seled te 70 he tuig.
JER 25:12 “Iyan, emun egketapus en is 70 he tuig, edsilutan ku is hadì te Babilonia wey is menge etew zin tenged te salè dan. Edhimuwen ku zaan is nasyun dan he mekevulungbulung taman te taman.
JER 25:13 Ibpeǥezaman ku ziyà te nasyun dan is langun he migkaǥi ku he ebpekesuǥat kandan wey is langun he nekaǥi ni Jeremias he ebpekesuǥat te zuma he menge nasyun he ingkesurat kayi te libru.
JER 25:14 Egkeuripen sikandan te mahabet he menge nasyun wey te mekeǥeǥehem he menge hadì. Edsilutan ku sikandan te sungkad te menge vaal zan.”
JER 25:15 Migkaǥi kayi te kedì is Nengazen he Megbevayà te Israel te, “Kuwaa nu ziyà te velad ku is tasa he nepenù te pauk ku, ne ipeinum nu te menge etew ziyà te langun he menge nasyun he zutun ku sikew suǥùa.
JER 25:16 Emun ebpekeinum sikandan kayi, ebpekeziregdireg sikandan is henduen be te ebuneǥen, tenged te tebek he ibpaaǥi ku ziyà te kandan.”
JER 25:17 Umbe, migkuwa ku haazà is tasa ziyà te velad te Nengazen ne impeinum ku te menge etew ziyà te langun he menge nasyun he zutun e zin suǥùa.
JER 25:18 Impeinum ku is menge etew ziyà te Jerusalem, wey is menge etew ziyà te menge inged diyà te Juda, ragkes is menge hadì dan wey menge upisyal su para mezeeti sikandan. Igkeherati is egkeula-ula kandan; edsudien wey ebpenrewakan sikandan iring te nehitavù guntaan.
JER 25:19 Impeinum ku zaan is Faraon he hadì te Ehipto, is menge upisyal zin, menge pengulu wey is langun he menge etew zin,
JER 25:20 ragkes en is kenà menge Ehiptohanen he ed-ubpà dutun te Ehipto. Impeinum ku zaan is menge hadì wey menge etew kayi he menge lugar: Uz, menge meǥinged diyà te menge inged diyà te Filistia (he iyan is Ashkelon, Gaza, Ekron, wey Ashdod),
JER 25:21 Edom, Moab, Ammon,
JER 25:22 Tyre, Sidon, is menge lugar he zehipag te zaǥat,
JER 25:23 Dedan, Tema, Buz, is menge mibpen-elutan is dapit te kendingen dan,
JER 25:24 Arabia, is menge tribu ziyà te disirtu,
JER 25:25 Zimri, Elam, Media,
JER 25:26 is menge lugar ziyà te zizaya, meziyù etawa uvey–is langun he ginhedian kayi te kelibutan. Ne is huziyan he ibpeinum ku iyan is diyà te Babilonia.
JER 25:27 Ne migkaǥi is Nengazen kayi te kedì te, “Keǥiya nu kayi he menge nasyun he siak, is Nengazen he Mekeǥeǥehem, he Megbevayà te Israel, migkaǥi te, ‘Sigi, inum kew kayi te tasa te pauk ku taman te egkengelangut kew, ebpengutè kew, ne egkengepiley he kenè en ebpemekeenew, su ebpeeǥiyan ku sikiyu te tebek.’
JER 25:28 “Emun kenè dan ed-inum, ne keǥiyi nu sikandan he iyan a, is Nengazen he Mekeǥeǥehem migkaǥi te: Kinahanglan he ed-inum kew!
JER 25:29 Ahàa niw man! Mibpuunan ku en is kebpaaǥi te kezeetan diyà te Jerusalem, kes inged he para te zengeg ku. Guntaan egkeisip niw ve he kenè ku sikiyu edsilutan? Edsilutan ku sikiyu! Su ibpedtetebek ku is langun he menge nasyun kayi te tivuuk he kelibutan. Iyan a, is Nengazen he Mekeǥeǥehem, is migkaǥi kayi.
JER 25:30 “Jeremias, keǥiya nu ziyà te kandan is langun he migkaǥi ku, ke sikew te: ‘Puun te langit iring te erimaung he edhiniǥer is Nengazen; edraǥeb is laǥeng din he ebpuun diyà te segradu he ubpeey zin. Ebpekezeǥingen din is kedhinigera zin te menge etew zin. Egkulehian din is langun he ed-ubpà kayi te kelibutan iring te etew he ebpengulahì emun egkeres sikandin te paras.
JER 25:31 Is laǥeng din egkezineg kayi te tivuuk he kelibutan, su ed-ekusaran din is menge nasyun. Edhukuman din is langun he menge etew, wey edsintinsyahan din pinaaǥi te tebek is menge lalung.’ ”
JER 25:32 Impelaus te Nengazen he Mekeǥeǥehem is menge lalag din: “Pengandam kew! Is kezeetan ebpekeuma ziyà te menge nasyun he henduen te mevendes he bagyu he ebpuun diyà te kinemeziyuan he vahin te kelibutan.”
JER 25:33 Dutun he andew mahabet is ebpenhimetayan te Nengazen. Ne minsan ebpekepeyapat diyà te minsan hendei is ebpematey, ne wazà egkeseeng etawa edtiǥum etawa edleveng kandan. Ebey-anan dà sikandan he henduen be te menge tai he nemekesavuk diyà te tanà.
JER 25:34 Sikiyu is menge pengulu, purung kew sineǥew he edtelulid diyà te eliyavuk tuus te utew niw kegkeseeng. Su neume en is timpu he edhimetayan kew he iring te edlepaan he kerehidu. Egkeruntek kew iring te mahalen he ziniyun he nerupet.
JER 25:35 Wazà lugar he egkehelinan niw etawa egkepeleǥuyan niw.
JER 25:36 Egkezineg is kedsineǥew wey kedlelendag niw, su midezeetan te Nengazen is nasyun niw.
JER 25:37 Tenged te utew kegkepauk te Nengazen, is melinawen he penebtavà egkehimu he disirtu.
JER 25:38 Is Nengazen, egkeiring te erimaung he migawas puun te elesè din su ebpen-ahà te edewiyen din. Egkehimu is tanà he mekevulungbulung tenged te tebek, wey tenged te utew kegkepauk te Nengazen.
JER 26:1 Hein beǥu pa he midhadì diyà te Juda si Jehoyakim, he anak ni Josia, migkaǥi is Nengazen kayi te kedì te, “Hitindeg ka ziyà te lama te valey ku ne keǥiyi nu is langun he menge etew he ebpemuun diyà te menge inged diyà te Juda he edhendutun te ked-azap. Keǥiya nu ziyà te kandan is langun he ibpekaǥi ku kenikew, ne kenè nu heini terini.
JER 26:3 Su kela ke mebpemineg ded sikandan kenikew ne ed-engkezan dan is mezaat he vetasan dan. Su emun ebeelan dan heeyan, ne kenè ku edleusen is kezeetan he mibpelenuwan ku te ebaal ziyà te kandan tenged te mezaat he menge vaal zan.
JER 26:4 Keǥiya nu kandan he iyan heini migkaǥi ku: Emun kenè kew ebpemineg kedì wey kenè kew edtuman te menge kesuǥuan ku he imbeǥey ku keniyu,
JER 26:5 wey emun kenè niw ebpemineǥen is mibpengaǥi te menge suluǥuen ku he menge mibpenaub ku, he layun ku ibpehendiyà te keniyu piru wazè niw gihapun pemineǥa,
JER 26:6 edezeetan ku heini is baley ku iring te kedezeeti ku te Shilo. Ne heini he inged, edrewakan te menge etew ziyà te langun he menge nasyun kayi te tivuuk he kelibutan.”
JER 26:7 Is menge memumuhat, is menge ebpeneuven, wey is langun he menge etew nekezineg te migkaǥi ni Jeremias diyà te valey te Nengazen.
JER 26:8 Ne hein nekepasad si Jeremias te kegkaǥi kayi, midakep sikandin te menge memumuhat, menge ebpeneuven, wey zuma he menge etew, ne migkeǥiyan dan te, “Ereg ka he ebpatey!
JER 26:9 Maan is migkaǥi ka pinaaǥi te ngazan te Nengazen he heini is baley te Nengazen edezeetan iring te kedezeeti te Shilo, ne heini is inged egkehimu he mekevulungbulung ne kenè en egkeubpaan?” Ne midakep dan si Jeremias dutun te valey te Nengazen.
JER 26:10 Ne hein nezineg heini te menge upisyal te Juda, migenat dan puun te turuǥan, ne midhendiyè dan te valey te Nengazen. Mibpinuu zan diyà te veyeey he migngezanan te Beǥu he Gemawan he valey te Nengazen he para te kedhukum.
JER 26:11 Ne migkaǥi is menge memumuhat wey is menge ebpeneuven diyà te menge upisyal wey ziyà te langun he menge etew zutun te, “Heini he etew ereg he edhukuman te silut he kemetayen, su migkaǥi sikandin te mezaat he ebpekesuǥat kayi he inged. Iyan kew mismu nekezineg kandin!”
JER 26:12 Ne zutun migkeǥiyan ni Jeremias is menge upisyal wey is langun he menge etew zutun te, “Midsuǥù a te Nengazen te kegkaǥi te mezaat he ebpekesuǥat kayi te valey zin wey kayi te inged, ne iyan heini nezineg niw.
JER 26:13 Umbe, beǥuwa niw en is betasan niw wey menge vaal niw, ne sunuza niw is Nengazen he Megbevayè niw. Su emun ebeelan niw heini kenà edleusen te Nengazen is kezeetan he nekaǥi zin he ebpekesuǥat keniyu.
JER 26:14 Ne bahin kedì, ne wazè ku egkehimu. Beeli niw kayi te kedì ke hengkey is meupiya wey hustu para keniyu.
JER 26:15 Piru tentenuzi niw heini: Emun edhimetayan a keniyu, zuen niw televaken wey is menge etew kayi te inged tenged te kedhimatey niw te wazà mekesalà, su is tutuu midsuǥù a te Nengazen te kegkaǥi kayi te langun he nezineg niw ǥuntaan.”
JER 26:16 Ne migkeǥiyan te menge upisyal wey te langun he menge etew zutun is menge memumuhat wey menge ebpeneuven te, “Kenà sikandin ereg he edhukuman te silut he kemetayen, su migkaǥi sikandin diyà te kenitew pinaaǥi te ngazan te Nengazen he Megbevayè tew.”
JER 26:17 Ne zuen nepipira he menge edumala he midhitindeg diyà te etuvangan ne migkeǥiyan dan is langun he netiǥum dutun, te,
JER 26:18 “Hein si Hezekia pa is hadì te Juda, si Mica he tig-Moreshet, midtudtul zin diyà te langun he menge etew kayi te Juda is menge lalag te Nengazen. Ke sikandin te, ‘Migkaǥi is Nengazen he Mekeǥeǥehem he edezeetan is Zion, is inged te Jerusalem. Egkeiring heini te mid-eradu he bevesukà, ne egkehimu heini he egketembuan te menge nengeǥevà. Ne egkehimu heini he ketelunan is buvungan he mibengunan te valey te Nengazen.’
JER 26:19 Ne midhimetayan be sikandin ni Hezekia wey te minsan hentei kayi te Juda? Wazà! Su midtahud ni Hezekia is Nengazen ne midangep diyà te kandin. Umbe wazà leusa te Nengazen is kezeetan he migkaǥi zin he ebpekesuǥat kandan. Ne ǥuntaan emun edhimetayan niw si Jeremias, ne iyan kew mismu ed-uwit te mekahandekhandek he idsilut keniyu.”
JER 26:20 Dutun he timpu, zuen etew he midtudtul zin is ibpekaǥi te Nengazen. Is ngazan din iyan si Uria he anak ni Shemaya he tig-Kiriat Jearim. Migkaǥi zin daan is mezaat he ebpekesuǥat kayi he inged wey nasyun iring te migkaǥi ni Jeremias.
JER 26:21 Ne hein nezineg ni Hadì Jehoyakim wey te langun he menge upisyal zin wey te menge pengulu is migkaǥi ni Uria, midtinguhè dan is kedhimetayi kandin. Piru nezineg haazà ni Uria umbe mibpelaǥuy sikandin pehendiyà te Ehipto tenged te kegkahandek din.
JER 26:22 Piru midsuǥù ni Hadì Jehoyakim si Elnatan he anak ni Acbor zuma te zuma he menge etew te kedhendiyà te Ehipto.
JER 26:23 Migkuwa zan si Uria ne miduma zan diyà te ki Hadì Jehoyakim, ne impehimetayan sikandin ni Hadì Jehoyakim pinaaǥi te ispada ne impetimbag din diyà te penlevengà te menge etew zà duen.
JER 26:24 Si Jeremias midtevangan ni Ahikam te anak ni Shafan. Umbe wazà sikandin ikeveǥey ziyà te menge etew wey zan mehimetayi.
JER 27:1 Hein beǥu pa he midhadì si Zedekia ziyà te Juda is anak ni Josia, migkaǥi is Nengazen kayi te kedì te, “Jeremias, baal ka te eyuǥu ne lìlìeǥi nu te panit ne ieyuǥu nu ziyà te tengel nu.
JER 27:3 Ne heini is menge lalag, tudtula nu ziyà te menge hadì te Edom, Moab, Ammon, Tyre, wey Sidon pinaaǥi te menge perekaǥi zan he midhendiyà te Jerusalem su ebpekidhinguma ki Hadì Zedekia te Juda.
JER 27:4 Keǥiya nu ziyà te kandan heini he menge lalag; ne para heini te menge hadì dan. Ne ke sikew te, ‘Iyan heini migkaǥi te Nengazen he Mekeǥeǥehem, he Megbevayà te Israel:
JER 27:5 Pinaaǥi te zekelà he ǥehem ku midlimbag ku is kelibutan, is menge etew, wey is menge langgam, ne iyan a ebayàbayà ke hentei is ibpezumala ku kayi.
JER 27:6 Guntaan ganì ne ibeǥey ku is menge nasyun niw ziyà te suluǥuen ku he si Hadì Nebucadnezar he hadì te Babilonia. Minsan is dumezaas he menge langgam ibpezizalem ku te kedumala zin.
JER 27:7 Ebpenilbi kandin is menge etew ziyà te langun he menge nasyun. Ebpenilbi zan daan te menge anak din wey menge apù din taman te timpu he iyan en maan edezeetan is Babilonia. Dutun he timpu, iyan en maan ebpekepenilbi is menge tig-Babilonia te mahabet he menge nasyun wey te mekeǥeǥehem he menge hadì.
JER 27:8 “ ‘Piru ǥuntaan, emun duen nasyun etawa ginhedian he kenà ebpenilbi etawa kenà ebpesakup ki Hadì Nebucadnezar he hadì te Babilonia, edsilutan ku haazà he nasyun etawa ginhedian pinaaǥi te tebek, bitil, wey menge zaru taman te igkepesakup ku sikandan ki Nebucadnezar.
JER 27:9 Umbe, kenè kew tuu te menge ebpeneuven niw, menge menenagnà, menge edluwas te kehuluǥan te menge teǥeinep, menge veyilan etawa menge etew he edsarig te menge mulin-ulin, su egkaǥi zan he kenè kew edsekupen te hadì te Babilonia.
JER 27:10 Tarù is egkeǥiyen dan diyà te keniyu su pinaaǥi kayi, egkengaawè kew kayi te tanè niw. Edsegseǥen ku sikiyu wey edezeetan.
JER 27:11 Piru is menge etew ziyà te nasyun he ebpesakup wey ebpenilbi te hadì te Babilonia, idtugut ku he kenà egkengaawà sikandan diyà te keugelingen dan he tanà. Dutun dan egkeuyag-uyag wey ed-ubpà. Iyan a, is Nengazen, is migkaǥi kayi.’ ”
JER 27:12 Iyan ded heini he menge lalag migkaǥi ku ziyà te ki Hadì Zedekia he hadì te Juda. Migkaǥi a te, “Pesakup kew te hadì te Babilonia. Penilbi kew kandin wey te menge etew zin ne egkeuyag-uyag kew.
JER 27:13 Su emun kenà, ebpatey ka wey is menge etew nu te tebek, bitil, wey zaru, iring te nekaǥi te Nengazen he egkehitavù te menge etew ziyà te nasyun he kenà ebpenilbi te hadì te Babilonia.
JER 27:14 Kenè kew tuu te egkeǥiyen te menge ebpeneuven he kenè kew edsekupen te hadì te Babilonia, su tarù is egkeǥiyen dan diyà te keniyu.
JER 27:15 Iyan heini migkaǥi te Nengazen: ‘Wazè ku suǥùa heeyan is menge ebpeneuven. Edheǥeten dan is tarù he egkeǥiyen dan pinaaǥi te kegemita zan te ngazan ku. Umbe emun edtuu kew kandan, ne edsegseǥen ku sikiyu wey edezeetan, ragkes en heeyan is menge ebpeneuven.’ ”
JER 27:16 Ne migkeǥiyan ku is langun he menge memumuhat wey is langun he menge etew te, “Migkaǥi is Nengazen he kenè kew tuu te menge ebpeneuven he egkaǥi te kenè en egkeuǥet idlikù en puun te Babilonia is menge gelemiten diyà te valey te Nengazen. Tarù is egkeǥiyan dan diyà te keniyu.
JER 27:17 Kenè kew pemineg kandan. Kekenà, silbiyi niw is hadì te Babilonia, ne egkeuyag-uyag kew. Kinahanglan pe be he egkezeetan heini he inged!
JER 27:18 Emun tutuu sikandan he menge ebpeneuven ne is ebpengeǥiyen dan ne ziyà ebpuun te Nengazen, ne ipahangyù sikandan diyà te Nengazen he Mekeǥeǥehem, he sikan is nesamà he menge gelemiten diyà te valey te Nengazen, diyà te turuǥan te hadì te Juda, wey turuǥan te hadì te Jerusalem, ne kenè en meuwit diyà te Babilonia.
JER 27:19 Su migkaǥi is Nengazen he Mekeǥeǥehem te: Sikan is brunsi he menge tukud duen te valey te Nengazen, sikan is teleǥuey te wahig he egngezanan te Daǥat, sikan is menge untuzà, wey is duma pa he menge gelemiten kayi he inged, ne ed-uwiten diyà te Babilonia.
JER 27:20 Heini he menge gelemiten wazà uwita ni Hadì Nebucadnezar ziyà te Babilonia hein mibihag din puun te Jerusalem si Hadì Jehoyakin he hadì te Juda, he anak ni Jehoyakim, duma te menge upisyal ziyà te Juda wey Jerusalem.
JER 27:21 Iyan guntaan migkaǥi is Nengazen he Mekeǥeǥehem, he Megbevayà te Israel te, ‘Heini he menge gelemiten ed-uwiten diyà te Babilonia ne ziyè dà heini taman te timpu te kegkuwaa ku kayi su idlikù ku ziyà te Jerusalem.’ ”
JER 28:1 Dutun te iyan ded he tuig, hein ikelima he vulan dutun te ikeepat he tuig te kedhadì ni Zedekia ziyà te Juda, is ebpeneuven he si Hanania he anak ni Azur he tig-Gibeon, migkaǥi kayi te kediey ziyà te valey te Nengazen diyà te etuvangan te menge memumuhat wey te langun he menge etew zutun. Ke sikandin te,
JER 28:2 “Iyan heini migkaǥi te Nengazen he Mekeǥeǥehem, he Megbevayà te Israel: Egevaan ku en is gehem te hadì te Babilonia.
JER 28:3 Seled te zezuwa he tuig idlikù kayi he lugar is langun he ǥelemiten diyà te valey ku he mibpenguwa ni Hadì Nebucadnezar ne mid-uwit din diyà te Babilonia.
JER 28:4 Ibpelikù ku zaan kayi si Hadì Jehoyakin he hadì te Juda he anak ni Jehoyakim, wey is langun he menge tig-Juda he mibihag diyà te Babilonia, su egevaan ku en is gehem te hadì te Babilonia. Iyan a, is Nengazen, is migkaǥi kayi.”
JER 28:5 Ne midtavak te ebpeneuven he si Jeremias is ebpeneuven he si Hanania diyà te etuvangan te menge memumuhat wey te ebpemenhitindeg he menge etew ziyà te valey te Nengazen.
JER 28:6 Ke sikandin te, “Amen! Deyzey pezem ke ebeelan te Nengazen heeyan is migkaǥi nu he idlikù din kayi is menge gelemiten kayi te valey zin wey is langun he mibihag pehendiyà te Babilonia.
JER 28:7 Piru pemineǥa nu heini is egkeǥiyen ku ziyà te kenikew wey ziyà te langun he menge etew he nemineg.
JER 28:8 Is menge ebpeneuven he nehuna kenita nenagnè dan dengan he zuen ebpekeuma he tebek, vitil, wey menge zaru diyà te mahabet he menge nasyun wey ziyà te mekeǥeǥehem he menge ginhedian.
JER 28:9 Umbe, is ebpeneuven he edtagnà te kelinew kinahanglan he zuen din puriba. Emun egkehitavù is migkaǥi zin, egkilelaan sikandin he tutuu he midsuǥù te Nengazen.”
JER 28:10 Ne zutun, migkuwa zuen te ebpeneuven he si Hanania sikan is eyuǥu ziyà te tengel ni Jeremias ne mibadtì din heini.
JER 28:11 Ne migkeǥiyan din is menge etew zutun te, “Iyan heini migkaǥi te Nengazen: Is menge etew ziyà te menge nasyun he midsakup ni Hadì Nebucadnezar he hadì te Babilonia iring te mid-eyuǥuwan. Piru edezeetan ku is eyuǥu seled te zezuwa he tuig.” Ne mid-awè dutun si Jeremias.
JER 28:12 Ne wazè en meuǥet dutun te kebedtia te ebpeneuven he si Hanania zuen te eyuǥu ziyà te tengel ni Jeremias, migkaǥi is Nengazen diyà te ki Jeremias te,
JER 28:13 “Genat ka, ne keǥiyi nu si Hanania he iyan heini migkaǥi ku: Mibadtì nu is eyuǥu he kayu piru ed-ilisan ku heini te eyuǥu he putew.
JER 28:14 Siak, is Nengazen he Mekeǥeǥehem, he Megbevayà te Israel migkaǥi a te: Ed-eyuǥuwan ku kayi te eyuǥu he putew is menge etew ziyà te langun he menge nasyun, su wey zan mekepenilbi ki Hadì Nebucadnezar he hadì te Babilonia. Minsan is dumezaas he menge langgam ibpezizalem ku te kedumala zin.”
JER 28:15 Ne migkaǥi is ebpeneuven he si Jeremias diyà te ebpeneuven he si Hanania te, “Pemineg ka, Hanania! Is Nengazen wazà medsuǥù kenikew! Ne impetuu nu is menge etew kayi te nasyun te tarù. Umbe iyan heini migkaǥi te Nengazen: Id-awè ku sikew kayi te kelibutan. Guntaan mismu he tuig ebpatey ka su mibpenurù nu is menge etew te kebpekidsukulà kedì!”
JER 28:17 Umbe, hein ikepitu he vulan dutun he tuig, minatey is ebpeneuven he si Hanania.
JER 29:1 Diyà te Jerusalem, midsurat si Jeremias te para te ebpemendumala, menge memumuhat, menge ebpeneuven, wey te zuma pa he mibihag ni Nebucadnezar ziyà te Babilonia puun te Jerusalem. Insurat heini ni Jeremias hein nevihag en si Hadì Jehoyakin, is iney zin, is menge upisyal ziyà te turuǥan, is menge ebpemendumala ziyà te Juda wey Jerusalem, wey is memetau he menge pandey wey menge terebahanti.
JER 29:3 Impeuwit ni Jeremias haazà is surat din diyà te ki Elasa he anak ni Shafan, wey ziyà te ki Gemaria he anak ni Hilkia. Midsuǥù heini sikandan ni Hadì Zedekia he hadì te Juda pehendiyà te ki Nebucadnezar ziyà te Babilonia. Iyan heini taǥù dutun:
JER 29:4 Iyan heini migkaǥi te Nengazen he Mekeǥeǥehem, he Megbevayà te Israel ziyà te langun he menge tig-Jerusalem he mibihag ni Nebucadnezar ziyà te Babilonia:
JER 29:5 “Petukud kew te menge valey ne zutun kew ubpà. Pemula kew ne kaan kew te sebpet niw.
JER 29:6 Mebpengesawa is menge maama ne mebpeesawa is menge vahi ne penganak kew. Ipeesawa niw is menge anak niw su wey zan mekaanak daan. Mebpekahabet kew.
JER 29:7 Uǥup kew para mebmeupiya wey mebmeuswaǥen is inged he zutun kew ed-ubpà is impevihag ku. Ipengemuyù niw heini, su emun ed-uswag heini, ne ed-uswag kew zaan.”
JER 29:8 Migkaǥi pa is Nengazen he Mekeǥeǥehem, he Megbevayà te Israel te, “Kenè kew peuwit te menge ebpeneuven wey menge menenagnà he ziyà te keniyu. Kenè niw zaan tuuwi is menge teǥeinep dan,
JER 29:9 su edtarùtarù sikandan ne egemiten dan is ngazan ku. Wazè ku sikandan suǥùa.
JER 29:10 Iyan a, is Nengazen, migkaǥi he emun egketapus en is 70 he tuig he kebpensakup te Babilonia, ne edlikuan ku sikiyu ne edtumanen ku is insaad ku he idlikù ku sikiyu ziyà te keniyu he lugar.
JER 29:11 Netuenan ku ke ebmenmenuwen ku te edtuman is pelanu ku para keniyu, pelanu te kebpeuswag keniyu ne kenà kedrasey, pelanu te kebeǥey keniyu te perateng he zuen meupiya ziyà te egkeumahan niw he timpu.
JER 29:12 Ne edsampit kew wey ebpengemuyù kayi te kedì, ne zutun ebpemineǥen ku sikiyu.
JER 29:13 Emun edangep kew kayi te kedì te ebpuun diyà te gehinawa niw, ne edtevangan ku sikiyu.
JER 29:14 Uya, edtevangan ku sikiyu, ne idlikù ku ziyà te keniyu is ketiǥeyunan niw. Edtiǥumen ku sikiyu puun te nekedseselekawà he menge nasyun he zutun ku sikiyu ipeyapat, ne idlikù kew ziyà te keugelingen niw he lugar. Iyan a, is Nengazen, is migkaǥi kayi.
JER 29:15 “Kela ke egkaǥi kew te zuen menge ebpeneuven he midsuǥù ku ziyà te keniyu ziyan te Babilonia,
JER 29:16 piru iyan heini migkaǥi ku mehitenged te menge hadì he ebpuun diyà te kevuwazan ni David wey ziyà te langun he menge zuma niw he kemulu ziyà te inged he Jerusalem su wazà meduma keniyu te mibihag:
JER 29:17 Ebpeeǥiyan ku sikandan te tebek, bitil, wey menge zaru. Egkeiring sikandan te neredak he higus he kenà egkekaan.
JER 29:18 Uya, edlislisezen ku sikandan pinaaǥi te tebek, bitil, wey zaru, ne egkahandek is langun he menge ginhedian tenged te egkehitavù kandan. Edsegseǥen ku sikandan pehendiyà te zuma he menge nasyun ne zutun sikandan ebpenrewaki, edsudien, wey ed-un-undahan.
JER 29:19 Su wazà sikandan mebpemineg te menge lalag ku he layun ku ibpetudtul ziyà te kandan pinaaǥi te menge suluǥuen ku he menge ebpeneuven ku, wey minsan sikiyu is nevihag en wazè kew ǥihapun mebpemineg.”
JER 29:20 Umbe, pemineg kew te migkaǥi te Nengazen, sikiyu is impevihag puun te Jerusalem pehendiyà te Babilonia.
JER 29:21 Iyan heini migkaǥi te Nengazen he Mekeǥeǥehem, he Megbevayà te Israel, mehitenged ki Ahab he anak ni Kolaya wey ki Zedekia he anak ni Maasea, “Heini he menge etew egkaǥi te tarù diyà te keniyu, ne egemiten dan is ngazan ku. Umbe ibeǥey ku sikandan ki Hadì Nebucadnezar he hadì te Babilonia ne ibpehimetayan din sikandan diyà mismu te etuvangan niw.
JER 29:22 Heini is egkehitavù kandan egemiten te menge tig-Juda he mibihag diyà te Babilonia emun ebpenrawak dan te zuma. Egkaǥi zan te, ‘Berakat he himetayi ka te Nengazen iring ki Zedekia wey ki Ahab he intavun te hadì te Babilonia.’
JER 29:23 Egkehitavù heini kandan su nekevaal zan te mezaat he vaal ziyà te Israel. Nengumpadi sikandan te esawa te zuma wey migamit dan is ngazan ku zutun te kedtarùtarù dan, ne wazà ku isuǥù kandan is kebaal kayi. Netuenan ku heini is mibeelan dan, ne igkepeehè ku is puriba kayi. Iyan a, is Nengazen, is migkaǥi kayi.”
JER 29:24 Duen menge lalag he insarig kedì te Nengazen he para ki Shemaya he tig-Nehelam: “Iyan heini migkaǥi te Nengazen he Mekeǥeǥehem, he Megbevayà te Israel: Mibpeuwit ka te surat diyà te ki Zefanias he anak ni Maasea he memumuhat he keugelingen nu zà he keǥehem is migamit nu, ne mibpeuwitan nu te menge kupya kayi is duma pa he menge memumuhat wey is langun he menge etew ziyà te Jerusalem. Iyan heini taǥù te surat nu ziyà te ki Zefanias,
JER 29:26 ‘Mibpilì ka te Nengazen he liwan ki Jehoyada te memumuhat he edumala te valey te Nengazen. Ketengdanan nu is kedakep wey kegkedina te lieg te minsan hentei he tulebung he uvag ebpeneuven.
JER 29:27 Piru maan is mibey-anan nu si Jeremias he tig-Anatot, he uvag kun ebpeneuven diyà te keniyu?
JER 29:28 Mibpesuratan key zin pa ganì kayi te Babilonia he egkeuǥet key pe kun kayi. He ke sikandin te mebpetukud key te menge valey he egkeubpaan dey, wey mebpemula key wey megkaan key te menge sebpet dey.’ ”
JER 29:29 Ne hein nezawat ni Zefanias he memumuhat haazà is surat ni Shemaya, mibasa zin haazà diyà te ki Jeremias he ebpeneuven.
JER 29:30 Ne zutun migkaǥi is Nengazen diyà te ki Jeremias te,
JER 29:31 “Ipetueni heini he menge lalag te langun he menge vihag. Keǥiyi nu sikandan he iyan heini migkaǥi ku vahin ki Shemaya he tig-Nehelam: Wazè ku suǥùa si Shemaya te kebpenudtul ziyà te keniyu. Impetuu kew zin te tarù din.
JER 29:32 Umbe, migkaǥi a, is Nengazen te, ‘Edsilutan ku sikandin wey is menge kevuwazan din. Wazà minsan sevaha te menge kevuwazan din he ebpekaahà te meupiya he ebeelan ku ziyà te keniyu, su mibpenurù kew zin te kebpekidsukulè kedì. Iyan a, is Nengazen, is migkaǥi kayi.’ ”
JER 30:1 Migkeǥiyan te Nengazen si Jeremias te, “Iyan a, is Nengazen he Megbevayà te Israel, migkaǥi he isurat nu ziyà te sevaha he libru is langun he migkaǥi ku kenikew.
JER 30:3 Su egkeuma is timpu he ibpeuli ku is nengevihag he menge etew ku he menge tig-Israel wey menge tig-Juda ziyà te tanè dan. Uya, ibpeuli ku sikandan diyà te tanà he imbeǥey ku ziyè te menge kepuun dan wey zan meengken. Iyan a, is Nengazen, is migkaǥi kayi.”
JER 30:4 Mid-uman pa megkaǥi is Nengazen mehitenged te Israel wey Juda: “Egkezineg is kedlelendag te menge etew, kenà tenged te kegkelipey, kekenà, tenged te utew kegkahandek.
JER 30:6 Guntaan duen id-insè ku keniyu. Ed-anak be is maama? Kenà. Piru, maan is neehè ku is menge maama he mibmemeluntak he egawed te ǥetek dan he henduen be te vahi he ebeliliten?
JER 30:7 Utew subra is mekahandekhandek emun egkeume en heeyan he timpu! Wazè en ebpekeiring keniyan he timpu. Timpu heeyan te kelised te menge kevuwazan ni Jacob, piru ziyà te huziyan he timpu egkelibri sikandan keniyan he kebpekesavuk.
JER 30:8 Iyan a, is Nengazen he Mekeǥeǥehem, migkaǥi he zutun he timpu, kenè dan en uripen te menge lumelengyawà. Iring te mibadtì ku en is eyuǥu ziyà te tengel zan wey midtangtang ku en is ingkedina kandan.
JER 30:9 Ebpenilbi zan en kedì, te Nengazen he Megbevayè dan, wey te hadì dan he kevuwazan ni David he edsuǥuen ku.
JER 30:10 “Umbe kenè kew mahandek wey mesuǥey is menge kevuwazan ni Jacob he menge suluǥuen ku. Iyan a is Nengazen migkaǥi te egkuwaan ku sikiyu ziyà te meziyù he lugar he zutun kew uwita te mibihag keniyu. Ne ed-ubpè kew he zuen kelinew. Wazè en igkehandek niw wey wazè en ebpekezezaat keniyu.
JER 30:11 Su zuma a keniyu ne edlibriyen ku sikiyu. Ebpurungan ku edezeeti is menge nasyun he zutun kew ipeyapat. Piru kenè ku mulà heini ed-ul-uluhan diyà te keniyu. Piru kenà heini ebpesavut he kenè ku sikiyu edsilutan. Ebmensuwen ku sikiyu te hustu he paaǥi.”
JER 30:12 Migkeǥiyan pa te Nengazen is menge etew zin te, “Is menge palì niw kenè en heini egkeulian su utew en grabi. Wazà ebpeketavang wey ebpeketambar keniyu. Wazè en bawì para keniyu.
JER 30:14 Midlipatan kew en te kezapig niw he menge nasyun; wazè kew zan en seǥipaa. Midsurung ku sikiyu iring te kedsurung te kuntada niw. Mibpurungan ku sikiyu siluti su utew en meveǥat is menge salè niw wey utew en heini mahabet.
JER 30:15 Kenè kew riklamu tenged te palì niw he kenà egkeulian. Midsilutan ku sikiyu su utew en meveǥat is menge salè niw wey utew en mezakel.
JER 30:16 “Piru is langun he midezaat keniyu edezeetan daan; is langun he menge kuntada niw ebihaǥen. Is langun he midsurung keniyu wey mid-aǥew te menge azen niw ne edsurungen daan, ne ed-eǥawen is menge azen dan.
JER 30:17 Piru sikiyu ebewian ku mulà, edtembaran ku is menge palì niw. Minsan egkaǥi is duma te, sikiyu is menge tig-Jerusalem inselikwey wey mibey-anan en.”
JER 30:18 Migkaǥi pa is Nengazen te, “Idlikù ku is menge ketiǥeyunan diyà te menge inged te menge kevuwazan ni Jacob, ne egkehizuwan ku sikandan. Ed-umanan dan ebenguna is inged wey is turuǥan diyè mismu te lugar he zutun dan heini tukuza hein aney.
JER 30:19 Ne egkanta sikandan te menge peselamat wey ed-ugyab dan tenged te kegkelipey. Ibpemahabet ku sikandan wey ebeǥayan ku te zengeg.
JER 30:20 Is menge anak dan ed-uswag iring dengan. Edlig-enan ku sikandan diyà te etuvangan ku, ne edsilutan ku is minsan hentei he edrasey kandan.
JER 30:21 Is pengulu zan, ne ziyè mismu ebpuun te kandan. Ibpeuvey ku sikandin kayi te kediey, ne ed-uvey sikandin. Su wazà etew he ebpeǥaruǥaru ed-uvey kayi te kedì emun kenè ku ibpeuvey. Iyan a, is Nengazen, is migkaǥi kayi.
JER 30:22 Egkehimu sikandan he menge etew ku ne egkehimu a he Megbevayè dan.
JER 30:23 Pemineg kew! Is pauk ku egkeiring te vagyu etawa eribpures he ebpekeigù te ulu te lalung he etew.
JER 30:24 Ne kenà egkaawà is utew ku kegkepauk emun kenè ku pa egkeveelan is egkesuatan ku te ebaal. Ne ziyà te huziyan he menge andew egkesavut niw zed heini.”
JER 31:1 Mibpedayun pa megkaǥi is Nengazen te, “Dutun he timpu, egkehimu a he Megbevayà te langun he pemilya te Israel, ne egkehimu zan he menge etew ku.
JER 31:2 Iyan a is Nengazen migkaǥi he ed-eturen ku is nesamà kandan he menge uuyag dutun te kedhipanew zan diyà te sibsivayan. Edlikù a te kebeǥey te menge Israilihanen te egkehimelayan dan.”
JER 31:3 Dengan mibpaahà is Nengazen te menge Israilihanen he migkaǥi te, “Mahal ku sikiyu te wazà pidtemanan he kebmahal. Tenged te keupiya ku, impeuvey ku sikiyu kayi te kedì.
JER 31:4 Ibpeuman ku sikiyu ibpehitindeg is menge tig-Israel he iring te vahi he wazè pa mehileveti. Ne ebpekesayew kew tenged te kegkelipey te ebpezumahan te tukar te menge tamburin niw.
JER 31:5 Ne ebpemula kew en maan te menge paras diyà te menge vuntud te Samaria, ne iyan kew ebpekepulus te menge veǥas din.
JER 31:6 Egkeuma is timpu he zutun is menge vantey ziyà te menge vuvungan he Efraim ne ebpemensag, ‘Hendini kew, su edtekezeg kiw ziyà te Jerusalem te ked-azap te Nengazen he Megbevayè tew.’ ”
JER 31:7 Migkaǥi pa is Nengazen te, “Kanta kew wey ugyab kew tenged te kegkelipey para te Israel he iyan lavew te langun he menge nasyun. Dalig kew wey ihabet niw ivensag is, ‘Nengazen, libriya nu is menge etew nu he nengesamà he uuyag he menge Israilihanen.’
JER 31:8 Pemineg kew! Iyan a mismu egkuwa wey edtiǥum kandan puun te zizaya wey ziyà te minsan hendei he vahin te kelibutan. Ragkes en he ebpekezuma kandan, is menge lakap wey menge pigket. Iring din daan is menge meǥingey wey umaanak. Utew mahabet is ebpemen-ulì.
JER 31:9 Ed-umanan ku sikandan ed-uwità is edsineǥew wey ebpengemuyù. Ed-uwiten ku sikandan diyà te menge wahig, ne ed-ikul sikandan diyà te meupiya he zalan he kenè dan duen ebpekesipà. Su iyan a amey te menge Israilihanen, ne si Efraim is kakey he anak ku.
JER 31:10 “Sikiyu is menge etew ziyà te menge nasyun, pemineǥa niw is egkeǥiyen ku te Nengazen, ne tudtula niw ziyà te meziyù he lugar: Impeyapat ku is menge Israilihanen, piru edtiǥumen ku zed sikandan, ne ebentayan ku sikandan iring te kebantey te ebantey te menge kerehidu.
JER 31:11 Edlibriyen ku sikandan is menge kevuwazan ni Jacob diyà te ǥehem te menge etew he edhuna he mekeǥeǥehem kandan.
JER 31:12 Edhendiyè dan te Buvungan he Zion ne ed-ugyab sikandan tenged te kegkelipey. Egkelipey zan tenged te menge keupiyaanan he ibeǥey ku kandan–he iyan is uzar he trigu, binu, lana, wey menge uyaǥen. Egkeiring sikandan te pemuleey he layun ebinyaǥi, ne kenè dan en egkeseeng.
JER 31:13 Is menge raǥa wey menge kenakan kandan ragkes en is memeǥurang, edsayew tenged te kegkelipey. Edliwanan ku is kebpekesineǥew zan te kelipey. Kenè en sikandan ebpekelalew su edlipayen ku sikandan.
JER 31:14 Edhentayen ku is menge memumuhat te utew zekelà wey metaam he menge keenen. Ebpezaharan ku is menge etew ku te meupiya he menge vutang.”
JER 31:15 Mibpedayun te Nengazen is menge lalag din te, “Duen egkezineg he sineǥawan wey lendag diyà te inged he Rama. Edsineǥew si Raquel tenged te menge anak din. Egketulung en sikandin egkeiinek su nemematey is menge anak din.”
JER 31:16 Piru guntaan migkaǥi is Nengazen te, “Kenè ke en meiinek su edsuhulan ku sikew tenged te menge vaal nu. Ed-ulì is menge anak nu puun te tanà te menge kuntada zan.
JER 31:17 Umbe, duen nu egkeperateng diyà te egkehuziyanan. Su kenà duwazuwa he edlikù is menge anak nu ziyà te keugelingen dan he tanà. Iyan a, is Nengazen, is migkaǥi kayi.”
JER 31:18 Nezineg ku is sineǥawan te menge tig-Efraim. Ke sikandan te, “Nengazen, neiring key te nati he vaka he wazà melayam te eyuǥu, iyan, mibpenurù key kenikew te kebpezumazuma kenikew. Iyan ka Nengazen he Megbevayè dey, umbe ilikù key kenikew ziyà te tanè dey.
JER 31:19 Dengan mid-ewaan dey sikew, iyan, guntaan kenè dey en heeyan ed-ul-ulahan. Hein neseǥipè dey en he nekesalè key nekeisip-isip key tenged te kegkeseeng dey. Utew zey ingkeeled is mibeelan dey hein menguhed key pa.”
JER 31:20 Midtavak is Nengazen te, “Sikiyu is menge tig-Efraim he pelanggè ku he menge anak, ingkelipey ku sikiyu. Minsan migkaǥi a te ebpekesuǥat keniyu, pinelanggè ku ǥihapun sikiyu. Mibulung a keniyu wey nehizuwan ku sikiyu.
JER 31:21 “Sevuki niw te tuus etawa menge pasek he iyan ibpeketuredu niw te zalan. Purungi niw tentenuzi is mid-ikul niw su iyan ded heini egkeikul niw emun ed-ulì kew en. He menge tig-Israel he iring te vahi he wazè pa mehileveti, likù kew en diyà te menge inged niw.
JER 31:22 Keenu kew pe bes edlikù kayi te kedì, is menge anak ku he nengetazin. Ebaal a te veǥu kayi te kelibutan–iring te is bahi iyan en maan pengalang te maama.”
JER 31:23 Migkaǥi is Nengazen he Mekeǥeǥehem, he Megbevayà te Israel te, “Emun igkepelikù ku en is menge etew ziyà te Juda ziyà te tanè dan, ne egkaǥi en maan sikandan te, ‘Berakat he tuvazi te Nengazen is segradu he vuntud he iyan is Jerusalem, he iyan ubpeey zin.’
JER 31:24 Ed-ubpaan te menge etew is Juda wey is menge inged he nesakup kayi, ragkes en he ed-ubpà kayi is menge perevasuk wey is menge perevantey te menge kerehidu.
JER 31:25 Su ibpehimeley ku is nengeveley ne edhentayen ku is menge midluyahan tenged te kegkevitil. Umbe egkaǥi is menge etew te,
JER 31:26 ‘Hein nepukew a, neǥezam ku he utew meupiya is kedlipezeng ku.’ ”
JER 31:27 Midpedayun megkaǥi is Nengazen te, “Egkeuma is timpu he utew ku ibpemahabet is menge etew ziyà te Israel wey Juda ragkes is menge uyaǥen dan.
JER 31:28 Dengan midezeetan ku, mibengkag ku, wey midaag ku sikandan. Piru ziyà te huziyan he timpu edtukuzen ku wey ibpeuman ku ibpehitindeg sikandan.
JER 31:29 Dutun he timpu is menge etew kenè en ebpekekaǥi te, ‘Migkaan is ginikanan te mepezes he paras ne elin kayi egkepezesan is menge anak dan.’
JER 31:30 Dutun, iyan dà egkepezesan sikan is migkaan te mepezes he paras. Iyan dà edhimetayan is etew he ebpekesalà.”
JER 31:31 Mibpedayun pa keǥiya te Nengazen is menge lalag din te, “Egkeuma is timpu he zutun edhimu a te veǥu he kebpekid-uyun ku te menge tig-Israel wey menge tig-Juda.
JER 31:32 Ne kenà heini iring te paaǥi he midhimu ku ziyà te menge kepuun dan hein migiyahan ku pa sikandan is ebpuun diyà te Ehipto. Minsan neiring a te esawa zan, wazè dan medtuman duen te nehuna he kebpekid-uyun ku kandan.” Iyan a, is Nengazen, is migkaǥi kayi.
JER 31:33 Migkaǥi pa is Nengazen te, “Is beǥu he kebpekid-uyun he edhimuwen ku ziyà te menge tig-Israel te egkeuma he timpu iyan heini: Idtaǥù ku is menge suǥù ku ziyà te isip dan wey idsurat ku heini ziyà te gehinawa zan. Egkehimu a he Megbevayè dan, ne egkehimu zan he menge etew ku.
JER 31:34 Wazè en egkaǥi ziyà te emurè din te inged etawa suled din te kinahanglan he egkilelaan nu is Nengazen. Su pudu en sikandan egkilala kedì, puun te kinemevevaan pehendiyà te kinetikangan is ked-etew zan. Su ebpeseyluwen ku sikandan te menge mezaat he neveelan dan, ne kenè ku en edtentenuzan is menge salè dan.” Iyan a, is Nengazen, is migkaǥi kayi.
JER 31:35 Mid-uman pa megkaǥi is Nengazen te, “Iyan a midsuǥù te andew te kedsilà emun maandew, wey te vulan wey menge vituen emun mezukilem. Ne migkutew ku is daǥat wey medreǥuuk is menge vaǥel. Mekeǥeǥehem he Nengazen is ngazan ku.
JER 31:36 Mintras kemulu pa is langit wey is kelibutan, ne ebpedayun daan is sevaha he nasyun is Israel te wazà pidtemanan.
JER 31:37 Iring te kenà egkesukud is langit wey kenà egketegkad is kezalem te pundasyun te kelibutan diyà te kinezizeleman, ne kenè ku zaan idselikwey is langun he kevuwazan ni Israel tenged te menge salà he neveelan dan.” Iyan a, is Nengazen, is migkaǥi kayi.
JER 31:38 Mibpedayun megkaǥi is Nengazen te, “Egkeuma is timpu he ed-umanan ebenguna is Jerusalem puun te Turi ni Hananel pehendiyà te Pultahan diyà te Suyuk.
JER 31:39 Ne puun keniyan he lugar, ebpedayun heini pehendiyà te vuntud he Goreb, ne ebulegkù pehendiyà te Goa.
JER 31:40 Minsan is tivuuk he suǥud-suǥud he timbaǥà te ebpematey wey menge igmuk te menge pemuhat, ne idsivey para kedì; ragkes en is langun he vevesukà diyà te Kidron he zal-ug diyà te edsilaan, pehendiyà te Pultahan te menge Kudà diyà te zizaya. Kenè en egkeuman egkezeeti heini he inged.”
JER 32:1 Duen migkaǥi te Nengazen diyà te ki Jeremias hein ikesepulù he tuig te kedhadì ni Zedekia ziyà te Juda. He iyan daan haazà ike-18 he tuig te kedhadì ni Nebucadnezar ziyà te Babilonia.
JER 32:2 Dutun he timpu midliǥuyan te menge sundaru te Babilonia is Jerusalem, ne si Jeremias he ebpeneuven mibpirisu ziyà te ubpeey te menge vantey ziyà te turuǥan.
JER 32:3 Impepirisu sikandin ni Hadì Zedekia tenged te migkaǥi sikandin te, “Iyan heini migkaǥi te Nengazen: Ibeǥey ku heini he inged diyà te hadì te Babilonia, ne egkaaǥew zin heini.
JER 32:4 Kenà ebpekelikey si Hadì Zedekia te gehem te menge tig-Babilonia. Su siguradu he ibeǥey ku sikandin te hadì te Babilonia ne ebpeked-etuvang wey ebpekedlalag sikandan.
JER 32:5 Edumahan si Zedekia ziyà te Babilonia, ne kenà sikandin egkaawà diyà taman te egkesilutan ku sikandin. Minsan edsukul kew te menge tig-Babilonia ne kenè kew ǥihapun ebpekezaag. Iyan a, is Nengazen, is migkaǥi kayi.”
JER 32:6 Mid-uman pa megkaǥi si Jeremias te, “Migkeǥiyan a te Nengazen, ke sikandin te
JER 32:7 si Hanamel he anak ni Shalum te anggam nu, edhengkayi te kenikew is egkaǥi te, ‘Pemesaha nu is bevesukè ku ziyà te Anatot. Su iyan ka utew megeget he kezuzumahi ku, duen nu ketenged wey ketengdanan te kebpemasa kayi.’
JER 32:8 “Ne ǥeina te iyan heeyan migkaǥi te Nengazen, midhengkayi te kediey si Hanamel he id-aǥew ku, kayi te ubpeey te menge vantey. Ke sikandin te, ‘Deyzey ke ebpemesahan nu is bevesukè ku ziyà te Anatot he nesakup te tanà te tribu ni Benjamin. Duen nu ketenged wey ketengdanan te kedlekat wey ked-angken kayi, umbe pemesaha nu en heini para kenikew.’ ” Netuenan ku he iyan migkaǥi zutun is Nengazen,
JER 32:9 umbe mibpemasa ku haazà is bevesukà diyà te Anatot diyà te ki Hanamel te 17 he vuuk he pelata.
JER 32:10 Mibpirmahan ku wey midtetakan is pepilis te kebpemasa ku ziyà te etuvangan te menge tistiǥus. Ne midtimbang ku haazà is pelata ne imbayad ku ki Hanamel.
JER 32:11 Ne migkuwa ku sikan is pepilis he midtetakan wey is kupya zin he wazà tetaki, he zutun mekesurat is neuyunan dey te kebpemasa ku.
JER 32:12 Ne imbeǥey ku haazà diyà te ki Baruc he anak ni Neria wey apù ni Masea, diyà te etuvangan ni Hanamel he id-aǥew ku wey te menge tistiǥus he nemirma zutun te pepilis, wey ziyà te etuvangan te menge Judio he ebpemimpinuu zutun te ubpeey te menge vantey.
JER 32:13 “Ne ziyà te etuvangan dan migkeǥiyan ku si Baruc te,
JER 32:14 ‘Iyan heini migkaǥi te Nengazen he Mekeǥeǥehem, he Megbevayà te Israel: Uwita nu is pepilis he midtetakan wey is wazà tetaki, ne itaǥù nu heini ziyà te tivud su wey kenà mezeeti seled te meluǥayad he timpu.
JER 32:15 Su egkeuma is timpu he is menge etew ebpememase en maan te menge valey, menge vevesukà, wey menge pemuleey te paras kayi he lugar.’ ”
JER 32:16 Ne hein ingkeveǥey ku en haazà is pepilis diyà te ki Baruc he anak ni Neria, ne nengemuyù a te,
JER 32:17 “He Nengazen he MEGBEVAYÀ, midlimbag nu is kelibutan wey is langit pinaaǥi te zekelà he ǥehem nu. Wazà minsan hengkey he kenè nu egkehimu.
JER 32:18 Impeehè nu is kebmahala nu te linibu he menge etew, piru midsilutan nu is menge anak tenged te salà te menge ginikanan dan. Utew ka mekeǥeǥehem he Megbevayà. Iyan ngazan nu is Nengazen he Mekeǥeǥehem.
JER 32:19 Utew meupiya is menge pelanu nu wey egkein-inuwan is menge vaal nu. Egkeehè nu is langun he ebeelan te menge etew, ne ebelesan nu sikandan sumalà te vetasan dan wey menge vaal zan.
JER 32:20 Mibaal ka te menge singyal wey menge egkein-inuwan he menge vaal ziyà te Ehipto ne taman en guntaan is kebeeli nu zutun kayi te Israel wey ziyà te zuma he menge nasyun. Ne pinaaǥi kayi nehimu ka he velentuǥen taman en guntaan.
JER 32:21 Pinaaǥi te menge singyal wey menge egkein-inuwan he menge vaal nu, wey te ǥehem nu he ingkahandek te menge Ehiptohanen, impeǥawas nu ziyà te Ehipto is menge etew nu he Israilihanen.
JER 32:22 Imbeǥey nu kandan heini is meupiya wey selebpeten he tanà he insaad nu is kebeǥaya nu zuen diyà te menge kepuun dan.
JER 32:23 Naangken dan heini piru wazè dan medtuman te kesuǥuan nu. Wazè dan beeli is langun he ebpeveelan nu kandan. Umbe impaaǥi nu ziyà te kandan heini is kezeetan.
JER 32:24 Ne ǥuntaan midtambù te tanà is menge tig-Babilonia kayi te kilid te verengbeng te Jerusalem he egkeveyaan dan te kedseled dan kayi te inged su wey zan maaǥew heini. Ne tenged te tebek, bitil, wey zaru, egkaaǥew te menge tig-Babilonia heini is inged su iyan heeyan migkaǥi nu.
JER 32:25 Piru minsan pa te iyan heini, Nengazen he MEGBEVAYÀ, midsuǥù a kenikew te kebpemasa te vevesukà he ebeyazan heini te pelata ziyà te etuvangan te menge tistiǥus, Minsan pa te hapit en egkaaǥew te menge tig-Babilonia heini is inged.”
JER 32:26 Ne migkeǥiyan te Nengazen si Jeremias te,
JER 32:27 “Siak is Nengazen he Megbevayà te langun he menge etew. Duen be kenè ku egkehimu?
JER 32:28 Umbe, ibeǥey ku heini he inged diyà te menge tig-Babilonia wey ziyà te hadì dan he si Nebucadnezar, ne egkaaǥew zan heini.
JER 32:29 Edselezan dan heini he inged ne ebinsulan. Elin daan ebinsulan dan is menge valey he zutun te atep dan edtutungen is beyewà para ki Baal. Ne zutun daan edhalad dan te idhalad he menge inumen para te zuma he menge ed-ezapen he utew ku ingkeepes.
JER 32:30 “Puun pa zengan wazà duma he vaal te menge etew ziyà te Israel wey Juda, kekenà, pudu kebaal te salà. Midhimu zan he mepauk a pinaaǥi te menge vaal zan.
JER 32:31 Puun pa te kegketukud kayi he inged taman en guntaan, midhimu te menge meǥinged kayi he mepauk a. Umbe edezeetan ku heini.
JER 32:32 Midhimu te menge etew ziyà te Israel wey Juda he mepauk a tenged te mezaat he menge vaal zan. Pudu sikandan–is menge hadì dan wey menge upisyal zan, is menge memumuhat dan, is menge ebpeneuven, wey is langun he menge etew ziyà te Juda wey Jerusalem.
JER 32:33 Mid-iniyuǥan e zan minsan layun ku sikandan ebpenurùa. Kenè dan ebpemineg wey kenè dan egkesuat he ebpenuruen.
JER 32:34 Diyà te valey ku he mibpilì ku he zutun a ebeǥayi te zengeg, ne midremerikan dan heini pinaaǥi te kedsevuki zan te utew mezaat he menge ed-ezapen.
JER 32:35 Mibangun dan te menge simbahan he para ki Baal ziyà te Suǥud-suǥud he Ben Hinom, para ikepemuhat dan is menge anak dan diyà te ed-ezapen he si Molec. Ne wazè ku heini isuǥù kandan; wazè ku man ganì meisip he ebeelan dan heini is utew mezaat he menge vaal he nehimu he hinungdan te kebpekesalà te menge etew ziyà te Juda.
JER 32:36 “Jeremias, tutuu is migkaǥi nu he pinaaǥi te tebek, bitil, wey zaru egkezizalem heini he inged te ǥehem te hadì te Babilonia. Piru ǥuntaan siak, is Nengazen he Megbevayà te Israel, egkaǥi a te,
JER 32:37 edtiǥumen ku is menge etew ku puun te langun he lugar he zutun ku sikandan ipeyapat tenged te utew ku kegkepeuki kandan. Ed-umanan ku sikandan ed-uwita kayi he lugar ne ebpekepengungubpaan dan he melinawen.
JER 32:38 Egkehimu sikandan he menge etew ku ne egkehimu a he Megbevayè dan.
JER 32:39 Edhimuwen he mesevaha is ketuyuan dan te kebpengungubpaan, su wey zan layun medtahud kediey, ne para heini te keupiyaanan dan wey keupiyaanan te menge kevuwazan dan.
JER 32:40 Ebpekid-uyun a kandan te wazà pidtemanan, idsaad ku kandan he layun a ebaal te meupiya ziyà te kandan. Ebeǥayan ku sikandan te tinguhà te kedtahud kediey, su wey zan kenà med-awà kayi te kedì.
JER 32:41 Igkelipey ku is kebaal te meupiya ziyà te kandan, ne ebpuun diyà te tivuuk he ǥehinawa ku is kebpeubpaa ku kandan kayi he tanà.”
JER 32:42 Migkaǥi pa is Nengazen te, “Iring te impeseǥazan ku kayi he menge etew is dekelà he kezeetan, ibeǥey ku zaan kandan is menge keupiyaanan he insaad ku kandan.
JER 32:43 Duen egkagi he heini is tana utew en mekevulungbulung wey wazà duen ed-ubpà he etew etawa langgam, su imbeǥey ku en heini te menge tig-Babilonia. Piru minsan pa zutun, keuzemà duen ebpememasa te menge vevesukà kayi te tanà.
JER 32:44 “Uya, egkehitavù ded is kebeyazi te menge etew te pelata te menge vevesukà. Ebaal sikandan te kesebutan. Ebpirmahan, edtetakan is menge pepilis, ne edtistiǥusan. Egkeulaula heini ziyà te menge tanà ni Benjamin, wey ziyà te zezeisey he menge inged he nekeliǥuy te Jerusalem, malù dezekelà he menge inged diyà te Juda, wey te menge inged diyà te menge vuvungan, diyà te inged te menge mibuntud-buntud diyà te edsenlepan, wey ziyà te inged he Negev. Ibpelikù ku is menge etew ku wey ibpeuswag ku sikandan ibpeuman. Iyan a, is Nengazen, is migkaǥi kayi.”
JER 33:1 Hein diyè pa si Jeremias te mibpirisuwan kandin he ubpeey te menge vantey te turuǥan, migkaǥi is Nengazen diyà te kandin te ikezuwa.
JER 33:2 Iyan heini migkaǥi te Nengazen he midlimbag wey mibpelastar te kelibutan. Iyan sikandin mibpurma kayi, ne Nengazen is ngazan din:
JER 33:3 “Umawa a kenikew su edtevangan ku sikew. Ne ibpezayag ku ziyà te kenikew is egkengein-inuwan wey in-eles he wazè nu pa metueni.
JER 33:4 Iyan heini migkaǥi te Nengazen he Megbevayà te Israel vahin te menge valey kayi he inged wey te turuǥan te hadì he impenrundus niw, su wey niw mekuwa zutun is menge himan he ebeelan niw he pengalang te edsurung he menge kuntada niw,
JER 33:5 edsurung gihapun is menge tig-Babilonia ne ebpenuen dan heini te ebpemematey he ebpenhimetayan ku tenged te utew ku kegkepauk. Idselikwey ku heini he inged tenged te utew subra is kelelalung te menge etew kayi.
JER 33:6 “Piru egkeuma is timpu he ebpurungan ku heini he inged wey is menge meǥinged kayi. Ne ebpekepengungubpaan sikandan he meuswaǥen wey melinawen.
JER 33:7 Ibpelikù ku is menge tig-Israel wey menge tig-Juda ziyà te tanè dan, ne ed-umanan ku ebenguna is menge inged dan iring te nehuna he timpu.
JER 33:8 Edlumpiyuwan ku sikandan wey ebpeseyluwen te langun he menge salè dan kayi te kediey.
JER 33:9 Emun egkeuleule en heini, ne ebeǥey kedì te zengeg is inged he Jerusalem, ne egkelipey a wey edeliǥen a, ne is menge etew ziyà te menge nasyun kayi te kelibutan ebpengerkeren te kegkahandek dan emun egkezineg dan is meupiya he ebeelan ku keuzemà kayi he inged, ragkes is kebpeuswag wey kebeǥayi ku kayi te kelinew.”
JER 33:10 Mibpedayun megkaǥi is Nengazen te, “Migkaǥi kew te mekevulungbulung wey wazà menge etew wey menge langgam diyà te Juda wey Jerusalem. Piru ziyà te huziyan he timpu egkezineg en maan kayi he lugar
JER 33:11 is kedlipey wey keguǥusà. Egkezineg is kebpeeyuwà te beuǥu, wey is kedlipey te ebpemen-uwit te menge pemuhat diyà te valey te Nengazen he para te kebpeselamat. Egkaǥi zan te, ‘Ebpeselamat kiw te Nengazen he Mekeǥeǥehem, su meupiya sikandin. Wazà pidtemanan te ǥaǥew zin.’ Edlipey is menge etew su idlikù ku is meupiya he kebpekesavuk dan kayi he tanà iring te kebpekesavuk dan dengan. Iyan a, is Nengazen, is migkaǥi kayi.”
JER 33:12 Migkaǥi pa is Nengazen he Mekeǥeǥehem te, “Kayi te mekevulungbulung he tanà guntaan, ne wazè en duen menge etew wey menge langgam, iyan diyà te huziyan he timpu duen en maan menge penebtavà diyà te langun he menge inged kayi he zutun ed-uwita te menge vantey te menge kerehidu is menge kerehidu zan.
JER 33:13 Dutun ebmahabet en maan is menge uyaǥen dan diyà te menge inged he ziyà te menge vuvungan, diyà te menge mibuntud-buntud diyà te edsenlepan, diyà te Negev, diyà te menge tanà ni Benjamin, diyà te zezeisey he menge inged he nekeelingkus te Jerusalem, wey ziyà te menge inged diyà te Juda. Iyan a, is Nengazen, is migkaǥi kayi.”
JER 33:14 Migkaǥi pa is Nengazen te, “Egkeuma is timpu he edtumanen ku is meupiya he insaad ku te menge etew ziyà te Israel wey Juda.
JER 33:15 Dutun he timpu iyan ku ibpezumala is metazeng he hadì he kevuwazan ni David. Ne ebeelan din is metazeng wey hustu kayi te tivuuk he tanà.
JER 33:16 Dutun daan he timpu egkelibri is menge tig-Juda ne ebpengungubpaan he melinawen is menge tig-Jerusalem. Is Jerusalem egngezanan te, ‘Nengazen is Mibeǥey Kenitew te Ketazeng.’ ”
JER 33:17 Mibpedayun megkaǥi is Nengazen te, “Layun duen kevuwazan ni David he edhadì te menge etew te Israel.
JER 33:18 Wey layun daan duen menge memumuhat he menge kevuwazan ni Levi he ebpenilbi kedì wey ebpemuhat te menge pemuhat he edtutungen, menge pemuhat he para gasa, wey zuma pa he menge pemuhat.”
JER 33:19 Ne migkaǥi is Nengazen diyà te ki Jeremias,
JER 33:20 “Nekid-uyun a te maandew wey mezukilem he medlepew sikandan te hustu he timpu, ne heini he uyun kenè en egkahalin.
JER 33:21 Ne iring daan keniyan is kebpekid-uyun ku ki David he suluǥuen ku, he iyan is layun din duen kevuwazan he egkehimu he hadì. Ne iring din daan is menge memumuhat he kevuwazan ni Levi ebpenilbi ǥihapun sikandan kediey.
JER 33:22 Ibpemahabet ku is menge kevuwazan ni David he suluǥuen ku wey ni Levi he iring kahabet te menge vituen diyà te langit wey pantad diyà te veyvey te zaǥat he kenà egkevilang.”
JER 33:23 Migkaǥi pa is Nengazen diyà te ki Jeremias te,
JER 33:24 “Wazè nu ve mezineg is migkaǥi te menge etew mehitenged te menge etew ku? Migkaǥi sikandan te, ‘Inselikwey te Nengazen is dezuwa he ginhedian he mibpilì din.’ Umbe midsudì dan is menge etew ku ne wazè dan en heini isipa he sevaha he nasyun.
JER 33:25 Piru migkaǥi a te iring te kenà egkahalin is kebpekid-uyun ku te maandew wey mezukilem wey is belaud ku he para te minsan hengkey he linimbag ku diyà te langit wey tanà,
JER 33:26 kenà daan egkahalin is kebpekid-uyun ku te menge kevuwazan ni Jacob wey ki David he suluǥuen ku. Ebpilì a puun diyà te menge kevuwazan ni David te edhadì te menge kevuwazan ni Abraham, ki Isaac, wey ki Jacob. Egkehizuwan ku is menge etew ku ne idlikù ku sikandan diyà te tanè dan wey ziyà te meupiya he kebpekesavuk dan.”
JER 34:1 Midsurung ni Hadì Nebucadnezar he hadì te Babilonia is Jerusalem wey is menge inged diyà te peliǥuy kayi. Duma zin te nenurung is langun he menge sundaru zin ragkes is menge sundaru he ebpuun diyà te langun he menge ginhedian he nesakup din. Dutun he timpu migkaǥi is Nengazen he Mekeǥeǥehem, he Megbevayà te Israel, diyà te ki Jeremias te: “Hendiyè ka te ki Hadì Zedekia he hadì te Juda, ne keǥiyi nu te siak is Nengazen migkaǥi te: Ibeǥey ku heini he inged te hadì te Babilonia ne ebinsulan din heini.
JER 34:3 Ne kenè ka ebpekelikey kandin, su egkezekepan ka ne ibeǥey ka kandin. Ed-etuvang ka kandin su wey ke zin mehukumi, ne zutun ebihaǥen ka pehendiyà te Babilonia.
JER 34:4 Piru pemineǥa nu, Hadì Zedekia, heini is idsaad ku kenikew: Kenè ka ebpatey te tebek,
JER 34:5 kekenà, ebpatey ka he melinawen. Edtutung te veyewà is menge etew nu su ebeǥayan ke zan te zengeg iring te mibeelan dan hein inleveng is menge kepuun nu he nehuna kenikew he midhadì. Igkeseeng ke zan ne ke sikandan te, ‘Minatey en is hadì dey!’ Iyan a, is Nengazen, is migkaǥi kayi.”
JER 34:6 Ne midhendiyà si Jeremias te Jerusalem, ne migkaǥi zin haazà is langun diyà te ki Hadì Zedekia he hadì te Juda.
JER 34:7 Dutun he timpu midsurung te menge sundaru te hadì te Babilonia is Jerusalem, Lakish, wey Azeka. Iyan dà heini nesamà te menge vinerengbeng he menge inged diyà te Juda.
JER 34:8 Duen pa migkaǥi te Nengazen diyà te ki Jeremias hein timpu te kebpekid-uyun ni Hadì Zedekia te langun he menge etew ziyà te Jerusalem he ibpeengkezan din en te ed-uripen is menge uripen.
JER 34:9 Mibmandù si Zedekia he is minsan hentei he zuen din menge uripen he Hebriyuhanen, maama etawa vahi, kinahanglan he veǥayi zan sikandan te vayàbayà. Wazà Judio he ed-uripen te iring din he Judio.
JER 34:10 Ne mid-uyun kayi he kesebutan is langun he menge etew zutun ragkes en is menge upisyal, ne mibeǥayan dan te vayàbayà is menge uripen dan, maama man etawa vahi.
JER 34:11 Piru nahalin is isip dan ne mid-uman dan ded uripena is menge uripen dan he mibeǥayan dan en pezem te vayàbayà.
JER 34:12 Umbe, migkaǥi is Nengazen he Megbevayà te Israel, ziyà te ki Jeremias te, “Midhimu ku is kebpekid-uyun te menge kepuun niw hein impeǥawas ku sikandan diyà te Ehipto he zutun sikandan mengeuripen. Ke siak te,
JER 34:14 ‘Kada pitu he tuig kinahanglan he ebeǥayan niw te vayàbayà is duma niw he Hebriyuhanen he imbelegyà diyà te keniyu su wey niw meuripen. Emun ebpekepenilbi en sikandin diyà te keniyu te heenem he tuig, kinahanglan he ebeǥayan niw sikandin te vayàbayà.’ Piru wazà mebpezumazuma kedì is menge kepuun niw mehitenged kayi.
JER 34:15 Diyà te nenlavey he menge andew neisip-isip niw he kenà haazà hustu, ne mibeelan niw is hustu ziyà te etuvangan ku. Pudu kew mibpezumazuma he ebeǥayan niw te vayàbayà is menge uripen niw he zuma niw he Hebriyuhanen. Nekid-uyun kew pa man ganì kediey mehitenged kayi ziyà te valey ku he mibpili ku he zutun a ebeǥayi te zengeg.
JER 34:16 Piru, nahalin is isip niw ne wazà a keniyu tehuza. Mid-umanan niw uripena is menge uripen niw he impeǥawas niw en. Egkesuat pezem sikandan he mekeǥawas te kegkeuripen, piru mibpeǥes niw sikandan umana uripena.
JER 34:17 “Umbe siak, is Nengazen, migkaǥi a te geina te wazà a keniyu pezumdumahi su wazè niw veǥayi te vayàbayà is menge uripen niw he iring niw he Hebriyuhanen, ebeǥayan ku sikiyu te vayàbayà he ebpematey pinaaǥi te tebek, bitil, wey menge zaru. Tenged te egkeulaula keniyu egkelimezangan is langun he ginhedian kayi te kelibutan.
JER 34:18 Is menge upisyal ziyà te Juda wey Jerusalem, wey is menge upisyal ziyà te turuǥan, ragkes is menge memumuhat wey zuma pa he menge meǥinged, nekid-uyun kediey pinaaǥi te kebaas te nati he vaka he imped-atbang is kedsevuka zuen, ne mibayà sikandan diyà te pid-elangan kayi. Piru wazè dan tumana haazà is kebpekid-uyun dan kedì. Umbe ebeelan ku zaan diyà te kandan is mibeelan dan duen te nati he vaka.
JER 34:20 Ibeǥey ku sikandan diyà te menge kuntada zan he egkesuat he edhimatey kandan. Ne is menge lawa zan egkehimu he keenen te menge tagbis wey zumezaas he menge langgam.
JER 34:21 “Ibeǥey ku si Hadì Zedekia he hadì te Juda wey is menge upisyal zin diyà te menge kuntada zan he egkesuat he edhimatey kandan, he iyan is menge sundaru te hadì te Babilonia. Minsan mid-engked dan en he edsurung keniyu,
JER 34:22 edsuǥuen ku sikandan te ked-uman kedsurung diyà te inged niw. Edsurung dan kayi ne ed-eǥawen dan heini, ne ebinsulan dan. Edhimuwen ku he mekevulungbulung is menge inged diyà te Juda ne wazè en ed-ubpè kayi. Iyan a, is Nengazen, is migkaǥi kayi.”
JER 35:1 Hein iyan hadì diyà te Juda si Jehoyakim he anak ni Josia, migkaǥi is Nengazen diyà te ki Jeremias,
JER 35:2 “Hendiyè ka te pemilya te menge Rikabnen, ne keǥiyi nu sikandan he medhendiyè dan te sevaha zuen te menge ruǥu te valey ku, ne ipeinum nu sikandan te vinu.”
JER 35:3 Umbe, mibeyaan ku si Jaazania (anak sikandin te egngezanan daan te Jeremias, he anak ni Habazinia) wey is langun he menge suled din wey menge anak. Iyan sikandan tivuuk he pemilya te menge Rikabnen.
JER 35:4 Miduma ku sikandan diyà te valey te Nengazen, diyà te ruǥu te menge anak he maama ni Hanan he anak ni Igdalia te suluǥuen te Megbevayà. Heini he ruǥu avey te ruǥu te upisyal ne ziyà heini te zivavew te ruǥu ni Maasea he anak ni Shalum, he vantey te ǥemawan te valey te Nengazen.
JER 35:5 Ne midsavuk a te pitsil he midteǥuan te vinu wey menge tasa ziyà te etuvangan te menge Rikabnen ne migkeǥiyan ku sikandan he med-inum dan.
JER 35:6 Piru midtavak sikandan te, “Kenè key ed-inum te vinu. Is kepuun dey he si Jonadab he anak ni Recab mibmandù kenami wey te menge kevuwazan dey he kenè key iyan ed-inum te vinu.
JER 35:7 Wey heini pa is inmandù din kenami: ‘Kenè kew mebangun te menge valey wey kenè kew pemula minsan menge paras. Indawey zaan kenami is ked-angken keniyan he menge vutang. Kinahanglan he ziyè key zà ed-ubpà te tulda. Ne emun edtumanen dey heini, egkeuǥet is ked-ubpè dey zutun te tanà he ebpeveyaan dey.’
JER 35:8 Midtuman dey is langun he insuǥù kenami ni Jonadab. Sikami wey is menge esawa zey wey is menge anak dey wazà med-inum te vinu,
JER 35:9 wey wazè mebangun te menge valey he egkeubpaan, wey wazè key med-angken te menge pemuleey te paras wey menge vevesukà.
JER 35:10 Diyè key med-ubpà te menge tulda ne mibpurungan dey tumana is langun he insuǥù kenami ni Jonadab te kepuun dey.
JER 35:11 Piru hein midsurung ni Hadì Nebucadnezar he hadì te Babilonia heini is nasyun, nahandek key te menge sundaru te Babilonia wey Aram, umbe nekedisisyun key he edhengkayi key te Jerusalem umbe kayi key ǥuntaan med-ubpà.”
JER 35:12 Migkaǥi is Nengazen he Mekeǥeǥehem, he Megbevayà te Israel, diyà te ki Jeremias te, “Genat ka, ne keǥiyi nu is menge etew ziyà te Juda wey Jerusalem te: Maan is kenè kew ebpemineg wey edtuman te menge lalag ku?
JER 35:14 Si Jonadab he anak ni Recab mibmandù te menge kevuwazan din he kenè dan med-inum te vinu ne midtuman dan heini. Ne taman en guntaan wazè dan med-inum te vinu su midtuman dan is suǥù te kepuun dan. Piru sikiyu mulà wazà a keniyu pezumdumahi minsan edsubsublien ku en is kegkeǥiyi ku keniyu
JER 35:15 pinaaǥi te menge ebpeneuven he menge suluǥuen ku. Migkeǥiyan kew zan te, ‘Engkezi niw en is mezaat he menge kineiya niw, ne veǥuwa niw en is menge vetasan niw, ne kenè kew en azap wey penilbi te zuma he menge ed-ezapen. Ne pengungubpaan kew ziyà te tanà he imbeǥey ku keniyu wey te menge kepuun niw.’ Wazè kew iyan mebpezumazuma wey mebpemineg kedì.
JER 35:16 Is menge kevuwazan ni Jonadab he anak ni Recab midtuman te insuǥù kandan te kepuun dan. Piru sikiyu, wazè kew mulà mebpezumazuma kediey.
JER 35:17 Umbe, siak, is Nengazen he Megbevayà he Mekeǥeǥehem, he Megbevayà te Israel, migkaǥi te: Pemineg kew! Is menge etew ziyà te Juda wey Jerusalem, ibpaaǥi ku ziyà te keniyu is langun he kezeetan he migkaǥi ku he idezaat keniyu. Mibpekidlalag a keniyu piru wazà a keniyu pemineǥa; mid-umew ku sikiyu piru wazè kew medtavak.”
JER 35:18 Ne migkeǥiyan ni Jeremias is menge pemilya te menge Rikabnen te, “Iyan heini migkaǥi te Nengazen he Mekeǥeǥehem, he Megbevayà te Israel te: ‘Mid-ikul niw is langun he insuǥù te kepuun niw he si Jonadab.
JER 35:19 Umbe, edsaad a he si Jonadab he anak ni Recab, ne kenà egkeewaan te kevuwazan he ebpenilbi kedì. Iyan a, is Nengazen he Mekeǥeǥehem, he Megbevayà te Israel, is migkaǥi kayi.’ ”
JER 36:1 Hein ikeepat he tuig te kedhadì ni Jehoyakim he anak ni Josia diyà te Juda, migkaǥi is Nengazen diyà te ki Jeremias te,
JER 36:2 “Kuwa ka te linulun he suratà ne isurat nu is langun he migkaǥi ku kenikew vahin te Israel, Juda, wey langun he menge nasyun. Isurat nu is langun he migkaǥi ku puun te puunà te kebpekidlalag ku kenikew (hein si Josia pa is hadì diyà te Juda) taman en guntaan.
JER 36:3 Su kela ke mahalin is isip te menge etew ziyà te Juda emun egkezineg dan is menge kezeetan he mibpelenuwan ku te ebaal ziyà te kandan ne ed-engkezan dan is mezaat he menge vetasan dan. Emun egkeulaula heini, ebpeseyluwen ku sikandan te kelelalung dan wey menge salè dan.”
JER 36:4 Umbe, impetawag ni Jeremias si Baruc he anak ni Neria ne indikta zin kandin is langun he migkaǥi te Nengazen, ne insurat heini ni Baruc diyà te linulun he suratà.
JER 36:5 Migkeǥiyan ni Jeremias si Baruc te, “Imbandu kedì is kedhendiyà te valey te Nengazen.
JER 36:6 Umbe, iyan ke zà hendiyà te valey te Nengazen dutun te andew te kebpuasa. Edtiǥum dutun is menge etew ziyà te Juda he ebpuun diyà te menge inged dan, ne vesaha nu ziyà te kandan is menge lalag te Nengazen kayi te velesahan he indikta ku kenikew is kedsurata zuen.
JER 36:7 Su kela ke pinaaǥi kayi edangep sikandan diyà te Nengazen, ne ed-engkezan dan is mezaat he vetasan dan. Su mibpetizeenan en sikandan te Nengazen he edsilutan sikandan tenged te utew zin kegkepauk.”
JER 36:8 Umbe, mibasa ni Baruc is menge lalag te Nengazen diyà te valey te Nengazen sumalà te insuǥù kandin ni Jeremias.
JER 36:9 Neulaula heini hein andew te kebpuasa zuen te ikesiyam he vulan te ikelima he tuig te kedhadì ni Jehoyakim diyà te Juda, he anak ni Josia. Dutun midtiǥum diyà te valey te Nengazen is menge meǥinged diyà te Jerusalem wey ziyà te menge inged diyà te Juda.
JER 36:10 Ne zutun te ebpemineg is menge etew, mibasa ni Baruc is menge lalag ni Jeremias he ingkesurat diyà te linulun he velesahan. Mibeelan heini ni Baruc diyà te valey te Nengazen, diyà te ruǥu ni Gemaria he sikritaryu he anak ni Shafan. Heini is ruǥu ni Gemaria diyà te zivavew te lama zuen te valey te Nengazen he uvey te veyeey pehendiyà te migngezanan he Beǥu he Pultahan.
JER 36:11 Ne hein nezineg ni Micaya he anak ni Gemaria wey apù ni Shafan is menge lalag te Nengazen he mibasa ni Baruc,
JER 36:12 midhendiyà sikandin te turuǥan, diyà te ruǥu te sikritaryu he zutun edtiǥum is langun he menge upisyal. Dutun si Elishama he sikritaryu, si Delaya he anak ni Shemaya, si Elnatan he anak ni Acbor, si Gemaria he anak ni Shafan, si Zedekia he anak ni Hanania, wey is duma pa he menge upisyal.
JER 36:13 Midtudtul kandan ni Micaya is langun he nezineg din he mibasa ni Baruc diyà te menge etew.
JER 36:14 Ne zutun, midsuǥù te menge upisyal si Jehudi he anak ni Netania he apù ni Shelemia wey apù te vuel ni Cushi, te kedhendiyà te ki Baruc, ne mibpekeǥiyan dan te, “Uwita nu sikan is linulun he velesahan ne hengkayi ka te kenami.” Umbe midhendiyà si Baruc te kandan he uwiten din sikan is linulun he velesahan.
JER 36:15 Ne hein nekeume en si Baruc, migkaǥi haazà is menge upisyal te, “Pinuu ka ne vesaha nu kayi te kenami is ingkesurat keniyan te linulun he velesahan.” Umbe mibasa haazà ni Baruc diyà te kandan.
JER 36:16 Ne hein nezineg dan is langun dutun nekedsisirapà sikandan tenged te kegkehandek dan ne ke sikandan diyà te ki Baruc te, “Kinahanglan he edtudtulen tew heini ziyà te hadì.”
JER 36:17 Ne zutun migkeǥiyan dan si Baruc, “Keǥiyi key ke mibmenumenu nu heini te edsurat. Midiktahan ke ve ni Jeremias?”
JER 36:18 Midtavak si Baruc te, “Uya, indikta kedì ni Jeremias heini is langun, ne insurat ku heini kayi te velesahan.”
JER 36:19 Ne migkeǥiyan dutun te menge upisyal si Baruc te, “Eles kew en ki Jeremias ne kenè niw ipetueni te minsan hentei ke hendei kew.”
JER 36:20 Ne insavuk duen te menge upisyal sikan is linulun he velesahan diyà te ruǥu ni Elishama te sikritaryu, ne midhendiyè dan te hadì diyà te lewahan duen te turuǥan, ne midtudtul zan is langun.
JER 36:21 Ne midsuǥù dutun te hadì si Jehudi he kuwaa zin sikan is linulun he velesahan. Ne migkuwa haazà ni Jehudi diyà te ruǥu ni Elishama ne mibasa zin duen te hadì wey te langun he ebpemenhitindeg diyà te avey zin he menge upisyal.
JER 36:22 Timpu haazà te meǥenew ne sikan is hadì diyà te ruǥu he hizezengà, is edhidhizazang.
JER 36:23 Ne kada ebpekepasad si Jehudi he ebasa te heepat he linya, ne edtempezen duen te hadì te kutsilyu zin haazà he vahin ne idtimbag din duen te hapuy, taman te naamin metutung haazà is belesahan.
JER 36:24 Ne wazà mahandek haazà is hadì wey is langun he menge upisyal zin he nekezineg te menge lalag dutun te velesahan. Wazè dan ganì bindasa is kumbalè dan te kepaahà te kegkeseeng dan.
JER 36:25 Minsan midhangyù si Elnatan, si Delaya, wey si Gemaria zutun te hadì he kenè din tutunga sikan is belesahan, ne wazà mebpemineg haazà is hadì.
JER 36:26 Kekenà, midsugù dutun te hadì si Jerameel he anak din, si Seraya he anak ni Azriel, wey si Shelemia he anak ni Abdeel te kedakep ki Baruc he sikritaryu wey ki Jeremias he ebpeneuven. Piru in-eles sikandan te Nengazen.
JER 36:27 Ne hein kegketutunge en te hadì duen te linulun he velesahan he midsuratan te menge lalag he indikta ni Jeremias diyà te ki Baruc, migkeǥiyan te Nengazen si Jeremias te,
JER 36:28 “Kuwa ka te selakew en he linulun he velesahan ne iuman nu isurat sikan is langun he ingkesurat duen te nehuna he velesahan he midtutung ni Hadì Jehoyakim he hadì te Juda.
JER 36:29 Ne keǥiyi nu sikan is hadì te iyan heini migkaǥi ku, ‘Midtutung nu sikan is linulun he velesahan su nekaǥi zutun he edezeetan te hadì te Babilonia heini he tanà ne ebpenhimetayan din is menge etew wey menge uyaǥen.
JER 36:30 Umbe, iyan heini migkaǥi ku mehitenged kenikew, Hadì Jehoyakim he hadì te Juda: Wazè nu kevuwazan he egkahadì diyà te ginhedian ni David. Edhimetayan ka, ne idtimbag dà is lawa nu. Egkekagkag heini emun maandew ne egkezehemuǥan emun mezukilem.
JER 36:31 Edsilutan ku sikew wey is menge anak nu, ragkes en is menge upisyal nu tenged te kelelalung niw. Ibpeseǥazan ku keniyu wey te menge etew te Jerusalem wey Juda is langun he kezeetan he nekaǥi ku he idezaat keniyu, su geina te wazè kew mebpemineg kedì.’ ”
JER 36:32 Umbe, migkuwa si Jeremias te selakew en he linulun he velesahan ne imbeǥey zin haazà ki Baruc, ne insurat dutun ni Baruc is langun he indikta kandin ni Jeremias, iring te mibeelan dan duen te nehuna he linulun he velesahan he midtutung ni Hadì Jehoyakim he hadì te Juda. Piru zuen in-uman ni Jeremias kayi he ebpekeiring ded duen te nehuna he insurat.
JER 37:1 Midhimu ni Hadì Nebucadnezar he hadì te Babilonia si Zedekia he anak ni Josia he hadì te Juda he ilis ki Jehoyakin he anak ni Jehoyakim.
JER 37:2 Piru si Zedekia wey is menge upisyal zin, wey is menge meǥinged diyà te Juda, wazè dan daan mebpemineg te menge lalag te Nengazen he midtudtul ni Jeremias he ebpeneuven.
JER 37:3 Ne midsuǥù ni Hadì Zedekia si Jehucal he anak ni Shelemia wey is memumuhat he si Zefanias he anak ni Maasea he medhendiyà te ki Jeremias he ebpeneuven, ne hengyui zan sikandin he mebpengemuyù diyà te Nengazen he Megbevayè dan para kandan.
JER 37:4 Dutun he timpu wazè pa mepirisu si Jeremias, umbe wazè pa ebpekevayàbayà kandin minsan hendei sikandin ebpevayà.
JER 37:5 Dutun daan he timpu midsurung te menge tig-Babilonia is Jerusalem. Piru hein netuenan dan he ebeyaan sikandan te menge sundaru te hadì te Ehipto, mid-engkezan dan te edsurung is Jerusalem.
JER 37:6 Migkaǥi is Nengazen he Megbevayà te Israel ziyà te ki Jeremias te, “Keǥiyi nu si Hadì Zedekia he hadì te Juda he midsuǥù kenikew te ked-insà kayi te kedì ke hengkey is egkehitavù, ‘Ebpelinggumeen is menge sundaru te Ehipto te kedtavang keniyu, piru edlikù sikandan diyà te Ehipto.
JER 37:8 Ne edlikuan te menge tig-Babilonia heini he inged. Ed-eǥawen dan heini ne ebinsulan dan.”
JER 37:9 Migkaǥi pa is Nengazen te: Kenè niw limbungi is gehinawa niw te ked-isip he kenè kew en edlikuan te menge tig-Babilonia, su siguradu he edlikù dan.
JER 37:10 Minsan egkezaag niw pa is langun he menge sundaru he edsurung keniyu, ne iyan dà egkesamà kandan is menge teǥepalì he ziyà te menge tulda zan, edsurung gihapun sikandan kayi te inged, ne ebinsulan dan heini.’ ”
JER 37:11 Hein mibpekeziyù is menge sundaru te Babilonia puun te Jerusalem tenged te menge sundaru te hadì te Ehipto,
JER 37:12 migenat daan diyà te Jerusalem si Jeremias su edhendiyà te tanà ni Benjamin, su wey zin mekuwa is kandin he vahin duen te tanà te pemilya zin.
JER 37:13 Piru hein nekeuma sikandin diyà te migngezanan te Pultahan ni Benjamin, midakep sikandin te kepitan te menge vantey he si Iria he anak ni Shelemia he apù ni Hanania. Migkeǥiyan sikandin te, “Nekidsevaha ka te menge tig-Babilonia.”
JER 37:14 Midtavak si Jeremias te, “Kenà heeyan tutuu! Wazà a mebpekidsevaha te menge tig-Babilonia.” Iyan, kenà edtuu si Iria, kekenà, midakep din si Jeremias ne miduma zin diyà te menge upisyal.
JER 37:15 Utew nepauk is menge upisyal ki Jeremias. Impevuǥel zan wey mibpirisu zan diyà te valey ni Jonatan he sikritaryu. Su haazà he valey midhimu zan he pirisuwan.
JER 37:16 Inseled dan si Jeremias diyà te silda he ziyà te zizalem te tanà ne neuǥet sikandin dutun.
JER 37:17 Ne mibpeveyaan sikandin ni Hadì Zedekia ne impezuma zin diyà te turuǥan. Mid-insaan sikandin ni Zedekia te meelas. Ke sikandin te, “Duen be menge lalag nu he ebpuun diyà te Nengazen?” Ne midtavak si Jeremias te, “Uya, duen. Ibeǥey ka ziyà te hadì te Babilonia.”
JER 37:18 Ne mid-insaan ni Jeremias haazà is hadì te, “Hengkey ves is salà he neveelan ku ziyà te kenikew, ziyà te menge upisyal nu, wey ziyà te zuma he menge etew he iyan impepirisuwa nu kedì?
JER 37:19 Hendei en be sikan is midseriǥan niw he menge ebpeneuven he nenagnà he kenà edsurungen te hadì te Babilonia heini is inged?
JER 37:20 Mahal he Hadì, emun egkehimu ne pemineǥa a kenikew. Edhangyù a ziyà te kenikew he kenà ad kenikew ilikù diyà te valey ni Jonatan he sikritaryu su ebpatey a emun diyà a.”
JER 37:21 Umbe, mibmandù si Hadì Zedekia he ziyè dà ebpirisuwa si Jeremias te ubpeey te menge vantey te turuǥan. Mibmandù daan haazà is hadì he ebeǥayan si Jeremias te keenen he ebpuun diyà te menge panadiru zutun te inged andew-andew taman te zuen pe pan dutun te inged. Umbe mibpedayun is kegkepirisuwa ki Jeremias diyà te ubpeey te menge vantey.
JER 38:1 Nekezineg si Shefatia he anak ni Matan, si Gedalia he anak ni Pashur, si Jehucal he anak ni Shelemia, wey si Pashur he anak ni Malkia te migkaǥi ni Jeremias diyà te menge etew te, “Migkaǥi is Nengazen te
JER 38:2 is minsan hentei he kenà ed-awà kayi te inged ebpatey te tebek, bitil, wey zaru. Piru is minsan hentei he edsurindir ziyà te menge tig-Babilonia ne kenà ebpatey. Egkelibri sikandin ne egkeuyag-uyag.
JER 38:3 Migkaǥi zaan is Nengazen te siguradu he egkaaǥew heini he inged te menge tig-Babilonia ne edsekupen dan heini.”
JER 38:4 Umbe, migkeǥiyan dutun te menge upisyal sikan is hadì te, “Kinahanglan he edhimetayan heini he etew. Su id-awè din is kezasig te menge sundaru he nesamà kayi te inged, ragkes en is langun he menge etew kayi, tenged te mibpengaǥi zin diyà te kandan. Wazà sikandin medtinguhà te keupiyaanan te menge etew, kekenà, kezeetan dan.”
JER 38:5 Midtavak si Hadì Zedekia te, “Idsarig ku en sikandin keniyu. Iyan kew en metau kandin.”
JER 38:6 Umbe, migkuwa zan si Jeremias ne midteyuntun dan diyà te vudsi he punduwà te wahig diyà te ubpeey te menge vantey. Heini he vudsi he punduwà te wahig ne iyan teǥiǥaked si Malkia he anak te hadì. Wazè en kayi wahig piru zuen kayi vasak he ebpekerevur ki Jeremias.
JER 38:7 Piru hein nezineg ni Ebed Melec he tig-Etiopia he sevaha zuen te menge upisyal ziyà te turuǥan, he in-ahuk si Jeremias duen te vudsi he punduwà te wahig, midhendiyà sikandin te hadì he ziyà te turuǥan. Dutun he timpu ebpimpinuu sikan is hadì diyà te Pultahan he Benjamin. Migkeǥiyan din haazà is hadì te,
JER 38:9 “Mahal he Hadì, mezaat is mibeelan kayi he menge etew ziyà te ki Jeremias. Midteyuntun dan sikandin diyà te vudsi, ne ebpatey sikandin te kegkevitil, su hapit en egkaamin is keenen kayi te inged.”
JER 38:10 Ne zutun midsuǥù duen te hadì si Ebed Melec te, “Dumaha nu is 30 he menge etew puun dini ne vetuna niw si Jeremias puun dutun te teheb su wey kenà mebpatey.”
JER 38:11 Umbe, miduma ni Ebed Melec haazà he menge etew ne midhendiyè dan te budiga zuen te turuǥan. Ne nenguwa si Ebed Melec dutun te menge tuǥak ne inteyuntun dan heini duma te pisì diyà te ki Jeremias dutun te vudsi.
JER 38:12 Migkeǥiyan ni Ebed Melec si Jeremias te, “Ihanig nu te irek nu heeyan is menge tuǥak su para kenè ka mesekiti keniyan te pisì.” Ne mibeelan ni Jeremias haazà,
JER 38:13 ne miguyud dan sikandin su wey mekeǥawas dutun te vudsi. Ne hein nepasad haazà mibpedayun is kegkepirisuwa ki Jeremias diyà te ubpeey te menge vantey te turuǥan.
JER 38:14 Dutun impetawag ni Hadì Zedekia si Jeremias diyà te iketelu he ǥemawan te valey te Nengazen. Migkaǥi si Zedekia ziyà te ki Jeremias te, “Duen ku id-insà kenikew, ne iyan suat ku he keǥiya nu kayi te kediey is tutuu.”
JER 38:15 Migkaǥi si Jeremias diyà te ki Zedekia te, “Emun egkeǥiyen ku ziyà te kenikew is tutuu, ne ibpehimetayan a gihapun kenikew. Minsan edsembaǥan ku sikew, kenè ka ǥihapun ebpemineg kedì.”
JER 38:16 Piru meeles he nenangdù si Hadì Zedekia ziyà te ki Jeremias. Ke sikandin te, “Ebpenangdù a pinaaǥi te Nengazen he uuyag, he iyan mibeǥey kenitew te untung, he kenè ku sikew edhimetayan wey kenè ku sikew ibeǥey ziyà te menge etew he egkesuat he edhimatey kenikew.”
JER 38:17 Migkaǥi si Jeremias diyà te ki Zedekia te, “Iyan heini migkaǥi te Nengazen he Megbevayà he Mekeǥeǥehem, he Megbevayà te Israel: Emun edsurindir ka ziyà te menge upisyal te hadì te Babilonia, egkelibri nu is untung nu ne kenà heini ebinsulan is inged. Ne sikew wey is pemilya nu ne egkeuyag-uyag.
JER 38:18 Iyan, emun kenè ka edsurindir, ne ibeǥey heini he inged diyà te menge tig-Babilonia, ne ebinsulan dan heini ne kenè ka ebpekelikey.”
JER 38:19 Migkaǥi si Hadì Zedekia te, “Egkahandek a te menge Judio he nekidsevaha te menge tig-Babilonia. Kela ke iveǥey a te menge tig-Babilonia ziyà te kandan ne edresayen e zan.”
JER 38:20 Midtavak si Jeremias te, “Kenè ka ibeǥey ziyà te kandan emun ebpezumdumahan nu is Nengazen. Egkelibri is untung nu ne wazà egkehitavù kenikew.
JER 38:21 Iyan, emun kenè ka edsurindir ne iyan heini impezayag te Nengazen kayi te kedì he egkehitavù kenikew:
JER 38:22 Is langun he menge vahi he nesamà diyà te turuǥan nu ed-uwiten te menge upisyal te hadì te Babilonia. Heini he menge vahi, egkaǥi sikandan diyà te kenikew te, ‘Midtuntu ke zà te utew nu menge emiǥu. Guntaan te nekeleveng en diyà te basak is menge paa nu, ne mid-ewaan ke zan.’
JER 38:23 “Is langun he menge esawa nu wey menge anak nu ebihaǥen te menge tig-Babilonia. Sikew mismu ne kenè ka ebpekelikey kandan; ebihaǥen ka te hadì te Babilonia, ne ebinsulan dan heini he inged.”
JER 38:24 Ne zutun migkaǥi si Zedekia ziyà te ki Jeremias te, “Kenè nu tudtula is nevitiyeraan ta su wey ka kenà mebpatey.
JER 38:25 Kela ke metudtuli is menge upisyal he mibitiyara ki ne ed-insà sikandan diyà te kenikew te, ‘Hengkey is midhisgutan niw te hadì? Ne emun kenè nu idtug-an ne edhimetayan dey sikew!’
JER 38:26 Kegiyi nu sikandan te, ‘Mibpehizuhizu a te hadì he kenà ad ilikù diyà te valey ni Jonatan su ebpatey a zutun.’ ”
JER 38:27 Ne midhendiyà iyan is menge upisyal te ki Jeremias ne mid-insaan dan sikandin. Ne midtavak din sikandan duen te ibpetavak te hadì kandin. Umbe wazè dan en medsigudu medsusi. Wazà nekezineg te nevitiyeraan ni Jeremias wey haazà is hadì.
JER 38:28 Mibpedayun is kegkepirisuwa ki Jeremias diyà te ubpeey te menge vantey te turuǥan taman te andew te kegkeeǥawa te Jerusalem.
JER 39:1 Hein ikesepulù he vulan duen te ikesiyam he tuig te kedhadì ni Zedekia ziyà te Juda, nenurung si Hadì Nebucadnezar he hadì te Babilonia wey is langun he menge sundaru zin diyà te Jerusalem.
JER 39:2 Ne hein ikeepat he vulan duen te ike-11 he tuig te kedhadì ni Zedekia, nevengkag en te menge tig-Babilonia sikan is berengbeng te inged.
JER 39:3 Ne hein neselezan dan en is Jerusalem, is langun he menge upisyal te hadì te Babilonia mibpinuu ziyà te Teliwazà he Pultahan te kebpaahà he naaǥew zan en haazà is inged. Iyan sikandan ensi Nergal Sharezer he tig-Samgar, si Nebo Sarsekim he sevaha he pengulu he upisyal, wey is sevaha pa he Nergal Sharezer he sevaha zaan he lavew he upisyal, wey is duma pa he menge upisyal te hadì te Babilonia.
JER 39:4 Ne hein naahà heini ni Hadì Zedekia wey te langun he menge sundaru zin, mibpelaǥuy sikandan. Mezukilem is ked-awè dan dutun te inged, ne ziyè dan mebayà te pemuleey te hadì; migawas dan he zuen mebayà te pultahan he nekepetug-elang te zezuwa he verengbeng, ne midhendiyè dan te Araba.
JER 39:5 Piru midal-as sikandan te menge sundaru te Babilonia, ne ziyè dan mesaut te menge suǥud diyà te Jerico. Midakep dan si Zedekia ne mid-uwit dan diyà te ki Hadì Nebucadnezar ziyà te Ribla he sakup te Hamat, ne zutun midhukuman sikandin ni Hadì Nebucadnezar.
JER 39:6 Diyà te Ribla, midhimetayan te hadì te Babilonia is menge anak he maama ni Zedekia ziyà mismu te etuvangan ni Zedekia. Midhimetayan daan is langun he menge upisyal te Juda.
JER 39:7 Impeluǥit dutun te hadì is menge mata ni Zedekia ne migkedinahan sikandin ne mid-uwit diyà te Babilonia.
JER 39:8 Ne elin daan nehitavù is, mibinsulan te menge tig-Babilonia is menge valey ziyà te Jerusalem ragkes en is turuǥan te hadì, ne mibpemengkag dan is menge verengbeng.
JER 39:9 Mibpenduma ni Nebuzaradan he pengulu te menge vantey is menge etew he nesamà dutun te inged pehendiyà te Babilonia, ragkes en sikan is nekidsevaha kandin.
JER 39:10 Piru intaǥak ni Nebuzaradan diyà te Juda is nepipira he pubri he menge etew he wazè dan menge tanà, ne mibeǥayan dan te menge pemuleey te paras wey menge vevesukà dutun he andew.
JER 39:11 Dutun, mibmenduan ni Hadì Nebucadnezar he hadì te Babilonia si Nebuzaradan he pengulu te menge vantey te mehitenged ki Jeremias. Ke sikandin te,
JER 39:12 “Etura niw si Jeremias, ne kenè niw menuwa. Iveǥey niw kandin ke hengkey is ebuyuen din.”
JER 39:13 Ne midtuman heini ni Nebuzaradan he pengulu te menge vantey, ni Nebuzaradan he pengulu he upisyal, ni Nergal Sharezer he sevaha zaan he metikang he upisyal, wey te zuma pa he menge upisyal te hadì te Babilonia.
JER 39:14 Impekuwa zan si Jeremias puun duen te ubpeey te menge vantey ne insarig dan ki Gedalia he anak ni Ahikam wey apù ni Shafan, he iyan miduma kandin wey mekeulì diyà te valey zin. Umbe mibpedayun is ked-ubpà ni Jeremias diyà te Juda duma te zuma he menge emurè din te inged.
JER 39:15 Hein mibpirisu pa si Jeremias diyà te ubpeey te menge vantey te turuǥan, migkaǥi is Nengazen diyà te kandin te:
JER 39:16 “Hendiyè ka te ki Ebed Melec he tig-Etiopia ne keǥiyi nu sikandin he siak, is Nengazen he Mekeǥeǥehem, he Megbevayà te Israel, migkaǥi te, ‘Edtumanen ku en is migkaǥi ku he ebpekesuǥat kayi he inged. Ibpaaǥi ku is kezeetan ne kenà keupiyaanan. Ne egkeehè nu is kegkehitevua kayi.
JER 39:17 Piru edlibriyen ku sikew zutun he timpu. Kenè ku sikew ibeǥey ziyà te menge etew he igkahandek nu.
JER 39:18 Edlibriyen ku sikew. Kenè ka ebpatey te tebek, su midsarig ka kedì. Iyan a, is Nengazen, is migkaǥi kayi.’ ”
JER 40:1 Duen migkaǥi te Nengazen diyà te ki Jeremias hein impaawè en sikandin ni Nebuzaradan he pengulu te menge vantey diyà te Rama. Migkedinahan dutun si Jeremias duma te zuma he menge vihag he menge tig-Jerusalem wey menge tig-Juda he ebpendumahan diyà te Babilonia.
JER 40:2 Hein naahà ni Nebuzaradan si Jeremias, migkeǥiyan din si Jeremias te, “Is Nengazen he Megbevayè nu migkaǥi he edezeetan din is Jerusalem.
JER 40:3 Ne ǥuntaan nehitavù en heini; mibeelan iyan te Megbevayà is migkaǥi zin. Nehitavù heini is langun su ǥeina te mibaal kew te salà diyà te Nengazen, ne wazè kew mebpezumazuma kandin.
JER 40:4 Piru ǥuntaan, ebengkasen ku is ingkedina kenikew ne ibpaawè ku sikew. Emun egkesuat ka, ne zuma ka kedì diyà te Babilonia su ed-etimanen ku sikew. Piru emun kenè ka, ne kenà heini ibmezaat te gehinawa ku. Ahàa nu is tivuuk he lugar; ne vayàbayà ke en ke hendei ka ebpevayà.
JER 40:5 Emun kayi ke zà, ne likù ka ziyà te ki Gedalia he anak ni Ahikam wey apù ni Shafan. Midhimu sikandin te hadì te Babilonia he perezumala te menge inged kayi te Juda. Ubpè ka zuma kandin wey te zuma he menge etew, etewa minsan hendei he zutun ka egkesuat.” Ne mibeǥayan sikandin ni Nebuzaradan te menge keenen wey gasa ne impeǥenat din.
JER 40:6 Umbe, midhendiyà si Jeremias te ki Gedalia ziyà te Mizpa, ne mid-ubpà sikandin dutun duma te menge etew he nesamà diyà te Juda.
JER 40:7 Duen nepipira he menge upisyal wey menge sundaru te Juda he ziyà te menge unayan he wazà medsurindir te Babilonia. Netudtulan sikandan he midhimu te hadì te Babilonia si Gedalia he gubirnedur te Juda ne iyan sikandin midumala te pubri he menge etew, he wazà bihaǥa ziyà te Babilonia.
JER 40:8 Umbe, midhendiyè dan te ki Gedalia ziyà te Mizpa. Heini he menge upisyal iyan ensi Ishmael he anak ni Netania, si Johanan wey si Jonatan he anak ni Karea, si Seraya he anak ni Tanhumet, is menge anak he maama ni Efai he tig-Netofa, wey si Jaazania he anak te tig-Maaca. Miduma zaan kandan is menge sakup dan.
JER 40:9 Mibpeseriǥan sikandan ni Gedalia wey is menge sakup dan he kenà ereg he igkahandek dan is kebpesakup dan te menge tig-Babilonia. Migkeǥiyan din sikandan te, “Ubpè kew zà kayi ne silbiyi niw is hadì te Babilonia, ne wazà mezaat he egkehitavù keniyu.
JER 40:10 Siak, kenà a ed-awà kayi te Mizpa he beǥelawa niw ziyà te menge tig-Babilonia emun ebpekeuma zan kayi te kenitew. Ubpè kew ziyà te menge lugar he zutun kew egkesuat. Ebpekepenguwa kew te menge paras, menge ulibu, wey zuma pa he menge prutas, ne itaǥù niw heini ziyà te menge teleǥuey niw.”
JER 40:11 Nezineg daan te menge Judio he nemelaǥuy ziyà te Moab, Ammon, Edom, wey zuma pa he menge nasyun he intuǥut ni Hadì Nebucadnezar he zuen egketaǥak he menge etew ziyà te Juda ne iyan midhimu si Gedalia he anak ni Ahikam wey apù ni Shafan he pengulu kayi he menge etew.
JER 40:12 Umbe, nemenlikù sikandan is langun diyà te Juda is ebpemuun diyà te nekedseselekawà he menge lugar he zutun dan mebpevayà, ne midhendiyè dan te ki Gedalia ziyà te Mizpa. Ne nenguwa zan te utew mahabet he menge paras wey zuma pa he menge prutas.
JER 40:13 Ne zutun si Jonatan he anak ni Karea wey is duma pa he menge upisyal te menge sundaru he wazà medsurindir te Babilonia, midhendiyà te ki Gedalia ziyà te Mizpa
JER 40:14 ne ke sikandan te, “Wazè nu ve metueni he si Hadì Baalis he hadì te Ammon midsuǥù din si Ishmael he anak ni Netania te kedhimatey kenikew?” Piru wazà medtuu si Gedalia kandan.
JER 40:15 Ne hein neipus haazà, nekidhinguma si Johanan ki Gedalia te meeles ne ke sikandin te, “Edhimetayan ku si Ishmael te meeles. Su kenà meupiya ke ebey-anan dà sikandin is edhimatey kenikew. Su egkehimu heini he hinungdan te kebpekepeyapat wey kegkengetazin te menge Judio he nesamà kayi te Juda he midumala nu.”
JER 40:16 Piru migkaǥi si Gedalia ziyà te ki Johanan te, “Kenè nu heeyan beeli. Kenà tutuu is migkaǥi nu vahin ki Ishmael.”
JER 41:1 Heini si Ishmael anak ni Netania wey apù ni Elishama. Nesakup sikandin te lavew he pemilya ne sevaha sikandin duen te menge upisyal te hadì dutun te nehuna he timpu. Ne hein ikepitu he vulan dutun he tuig, midhendiyà si Ishmael te ki Gedalia diyà te Mizpa duma te sepulù he etew. Ne zutun te egkaan sikandan,
JER 41:2 midhitindeg si Ishmael wey sikan is sepulù he etew, ne midhimetayan dan si Gedalia pinaaǥi te ispada. Umbe mibpatey sikan is midhimu te hadì te Babilonia he gubirnedur ziyà te Juda.
JER 41:3 Midhimetayan daan eni Ishmael is langun he upisyal te menge Judio ziyà te Mizpa, ragkes is menge sundaru he menge tig-Babilonia.
JER 41:4 Ne kegkemeselem dutun te wazè pa netau te kedhimetayi ki Gedalia,
JER 41:5 duen 80 he menge etew he edhendiyà te Mizpa he ebpuun diyà te Shekem, Shilo, wey Samaria. Migkiskisan dan is menge sumpè dan, mibindasbindas dan is menge visti zan, wey mibpemelian dan is menge lawa zan tenged te kedlelaw zan. Duen uwiten dan he menge pemuhat he para gasa wey veyewà he edtutungen dan diyà te valey te Nengazen.
JER 41:6 Midsinuǥung sikandan ni Ishmael he ebpuun te Mizpa is uvag kun edsineǥew. Migkaǥi si Ishmael te, “Hendini kew, ahàa niw is nehitavù ki Gedalia.”
JER 41:7 Ne hein nekeuma zan diyà te inged, is duma kandan mibpenhimetayan ni Ishmael wey zuen te menge zuma zin. Ne kegkeipus dutun, impen-ulug dan is nemematey ziyà te vudsi he punduwà te wahig.
JER 41:8 Is sepulù kandan wazà mulà penhimetayi su migkeǥiyan dan si Ishmael te, “Kenè key himetayi! Ibeǥey zey kenikew is menge trigu zey, barli, lana, wey teneb he nekeeles diyà te vevesukà.”
JER 41:9 Is budsi he mibpen-uluǥan ni Ishmael te nemematey he mibpenhimetayan din duma te lawa ni Gedalia, gaked ni Hadì Asa he impekalut din hein midsurung sikandan ni Hadì Baasha he hadì te Israel. Heini he vudsi mibpenù ni Ishmael te nemematey.
JER 41:10 Mibihag ni Ishmael is nesamà he menge etew ziyà te Mizpa–is menge anak he vahi ni hadì Zedekia wey is menge etew he insarig ni Nebuzaradan ki Gedalia wey zin meetiman. Ne midlikù si Ishmael ziyà te Ammon duma te menge vihag din.
JER 41:11 Ne nezineg ni Johanan he anak ni Karea wey zuen te zuma zin he menge upisyal te menge sundaru is kebpenhimatey ni Ishmael.
JER 41:12 Umbe, midtiǥum dan is langun he menge sakup dan ne migenat dan su ebpekidtebek dan ki Ishmael. Neseutan dan sikandin diyà te zekelà he peneng he ziyà te Gibeon.
JER 41:13 Ne hein naahà duen te menge vihag ni Ishmael si Johanan wey is duma zin he menge upisyal, nelipey sikandan.
JER 41:14 Sikan is langun he mibihag ni Ishmael puun te Mizpa pudu mibpelelaǥuy pehendiyà te ki Johanan.
JER 41:15 Piru si Ishmael wey is walu he menge sakup din mibpelaǥuy pehendiyà te Amon.
JER 41:16 Ne zutun midtiǥum ni Johanan wey zuen te zuma zin he menge upisyal is langun he mibihag ni Ishmael puun te Mizpa hein nepatey zin en si Gedalia he anak ni Ahikam. Ne puun diyà te Gibeon,
JER 41:17 midhendiyà sikandan te Gerut Kimhan he uvey te Betlehem, ne zutun nengandam sikandan te kedhendiyà te Ehipto.
JER 41:18 Su nahandek dan te menge tig-Babilonia tenged te kedhimetayi ni Ishmael ki Gedalia he iyan midhimu te hadì te Babilonia he gubirnedur te Juda.
JER 42:1 Ne, mid-uvey ziyà te ki Jeremias si Johanan he anak ni Karea, si Jezaria he anak ni Hoshaya, wey is menge zuma zin he upisyal te menge sundaru, ragkes is langun he menge etew zutun puun te kinemevevaan pehendiyà te kinetikangan is ked-etew zin.
JER 42:2 Migkaǥi zan diyà te ki Jeremias te, “Edhangyù key ziyà te kenikew he pengemuyù ka ziyà te Nengazen he Megbevayè nu para kenami te nesamà. Neehè nu he mezakel key zengan, iyan, guntaan deisey key zà.
JER 42:3 Pengemuyù ka ziyà te Nengazen he Megbevayè nu he ipezayag din kenami ke hendei key ebpevayà wey ke hengkey is ereg he ebeelan dey.”
JER 42:4 Midtavak si Jeremias te, “Uya, ibpengemuyù ku ziyà te Nengazen he Megbevayè niw heeyan is hangyù niw, ne egkeǥiyen ku ziyà te keniyu ke hengkey is egkeǥiyen din. Wazè ku id-eles diyà te keniyu.”
JER 42:5 Ne migkeǥiyan dan si Jeremias te, “Berakat he is Nengazen he Megbevayè nu mehimu he tutuu wey egkeseriǥan he tistiǥus kuntra kenami emun kenè dey edtumanen is langun he egkeǥiyen din pinaaǥi kenikew.
JER 42:6 Mesuati zey heini se kenà, ne ebpezumdumahan dey is Nengazen he Megbevayè dey, su wey mebmeupiya is langun para kenami.”
JER 42:7 Kedlavey te sepulù he andew, nekidlalag is Nengazen ki Jeremias.
JER 42:8 Umbe, impetiǥum ni Jeremias ensi Johanan duma te langun he menge zuma zin he menge upisyal te menge sundaru, ragkes en is langun he menge etew zutun puun te kinemevevaan pehendiyà te kinetikangan is ked-etew zin.
JER 42:9 Migkaǥi si Jeremias diyà te kandan te, “Midhengyuan a keniyu he mebpekidlalag a te Nengazen he Megbevayà te Israel, ne iyan heini tavak din:
JER 42:10 Emun kenè kew ed-awà kayi he tanà ed-enawen ku sikiyu wey edlig-enan, ne kenè ku sikiyu edezeetan. Su ingkeseeng ku is kezeetan he impeseǥazan ku keniyu.
JER 42:11 Kenè kew en egkahandek te hadì te Babilonia su zuma a keniyu ne edlibriyen ku sikiyu emun edezeetan kew zin.
JER 42:12 Egkehizuwan ku sikiyu. Ebpengelinteuwan ku he mehizuwi kew zin, su para tuguti kew zin he kenè kew maawà kayi te tanè niw.”
JER 42:13 “Iyan, emun kenè niw edtumanen heini is nekaǥi te Nengazen he Megbevayè niw su egkaǥi kew te, ‘Ed-awè key kayi he tanà.
JER 42:14 Edhendiyè key te Ehipto ne ziyè key ed-ubpà su wazà diyà tebek wey vitil.’
JER 42:15 Iyan heini idtavak keniyu te Nengazen he Mekeǥeǥehem he Megbevayà te Israel: ‘Sikiyu is nesamà he menge etew te Juda, emun disididu kew he ziyè ed-ubpà te Ehipto,
JER 42:16 is tebek wey vitil he igkahandek niw edtundug keniyu, ne ebpematey kew ziyà.
JER 42:17 Uya, is langun he egkesuat he ed-ubpà diyà te Ehipto ebpatey te tebek, bitil, wey zaru. Wazà minsan hentei kandan he egkelibri etawa ebpekelingkawas te kezeetan he ibpeseǥazan ku kandan.’
JER 42:18 “Migkaǥi pa is Nengazen he Mekeǥeǥehem, he Megbevayà te Israel te, ‘Iring te impeseǥazan ku te menge etew ziyà te Jerusalem is rimeǥas te utew ku kegkepauk, ibpeseǥazan ku zaan heini keniyu emun edhendiyè kew te Ehipto. Edrewakan kew wey egkelimezangan is menge etew tenged keniyu. Ed-un-undahan kew zan wey edsudien, ne kenè kew en ebpekelikù diyà te tanè niw.’
JER 42:19 “Sikiyu is nesamà he menge etew te Juda, migkeǥiyan kew te Nengazen he kenè kew iyan medhendiyà te Ehipto. Purungi niw tentenuzi heini is impetizaan ku keniyu ǥuntaan.
JER 42:20 Kenè iyan meupiya heini is ulaula niw! Midhengyuan a keniyu he medangep a ziyà te Nengazen para keniyu, ne migkaǥi kew pa he ebeelan niw is langun he egkeǥiyen din diyà te keniyu.
JER 42:21 Ne ǥuntaan migkaǥi ku en is langun he migkaǥi te Nengazen he Megbevayè niw, piru wazè niw ǥihapun heini tumana.
JER 42:22 Umbe, egkeǥiyen ku keniyu he siguradu he ebpematey kew te tebek, bitil, wey zaru diyà te Ehipto, he iyan egkesuatan niw te ed-ubpa.”
JER 43:1 Ne hein neipus ni Jeremias te egkaǥi is langun he migkaǥi te Nengazen he Megbevayè dan mehitenged kandan,
JER 43:2 migkeǥiyan sikandin ni Azaria he anak ni Hoshaya, ni Johanan he anak ni Karea, wey te zuma pa he gelbuwen he menge etew te, “Midtarùtarù ka! Is Nengazen he Megbevayè tew wazà medsuǥù kenikew te kegkaǥi kenami te kenè key medhendiyà te Ehipto te ked-ubpà diyà.
JER 43:3 Si Baruc he anak ni Neria migkeǥiyan ke zin he iveǥey key kenikew ziyà te menge tig-Babilonia, para penhimetayi key zan etawa vihaǥa key zan diyà te Babilonia.”
JER 43:4 Tenged kayi, si Johanan wey is duma zin he menge upisyal te menge sundaru, wey is langun he menge etew zutun, wazà medtuman te suǥù te Nengazen he kenè dan med-awà diyà te Juda.
JER 43:5 Kekenà, miduma ni Johanan wey zuen te zuma zin he menge upisyal te menge sundaru is menge etew pehendiyà te Ehipto. Iyan heini sikan is menge etew he nemenlikù he ebpemuun diyà te nekedseselekawà he menge nasyun he zutun sikandan mebpevayà.
JER 43:6 Ragkes en kayi is menge maama, menge vahi, menge vatà, wey sikan is menge anak he vahi ni Hadì Zedekia he insarig ni Nebuzaradan he pengulu te menge vantey ziyà te ki Gedalia he anak ni Ahikam wey apù ni Shafan. Miduma zan daan is ebpeneuven he si Jeremias wey si Baruc he anak ni Neria.
JER 43:7 Wazè dan pezumdumahi is Nengazen. Ne midhendiyè dan te Ehipto, ne nekeuma zan diyà te inged he Tapanhes.
JER 43:8 Diyà te Tapanhes, migkaǥi is Nengazen diyà te ki Jeremias te,
JER 43:9 “Diyà te etuvangan te menge etew te Juda, kuwa ka te zekelà he menge vatu ne ileveng nu ziyà te tanà, diyà te teliwazà te veyeey pehendiyà te turuǥan te Faraon te Tapanhes.
JER 43:10 Ne zutun, keǥiyi nu sikandan he siak is Nengazen he Mekeǥeǥehem, he Megbevayà te Israel migkaǥi te, ‘Edsuǥuen ku pehengkayi is suluǥuen ku he si Hadì Nebucadnezar he hadì te Babilonia, ne ibpelastar ku is pinuuwè din te kedhadì kayi te menge vatu he impeleveng ku ne ibpelastar zin is tulda zin he tulda te hadì diyà te zivavew kayi.
JER 43:11 Edsurungen din is Ehipto ne ebpematey is imbanglis kandan is kebpatey pinaaǥi te kezeetan, ne ebihaǥen is imbanglis kandan is ebihaǥen, wey ebpematey pinaaǥi te espada is imbanglis kandan is kebpatey pinaaǥi te tebek.
JER 43:12 Ebinsulan din is menge simbahan he para te zuma he menge ed-ezapen diyà te Ehipto, ne egkengevinsulan is menge ed-ezapen. Ne ebihaǥen din is menge etew pehendiyà te Babilonia. Edlumpiyuwan din is tanà te Ehipto te menge etew iring te kedlumpiyuwi te perevantey te kerehidu te kumbalè din he tumahan. Ne ed-awà si Nebucadnezar he kenà egkemenu.
JER 43:13 Edrupeten din is menge segradu he tukud diyà te Betshemes he diyà te tanà he Ehipto, ne ebinsulan din is menge simbahan he para te zuma he menge ed-ezapen diyà te Ehipto.’ ”
JER 44:1 Migkeǥiyan te Nengazen is menge Israilihanen diyà te Ehipto he ziyà med-ubpà te zizaya he vahin te Ehipto he iyan is menge inged diyà te Migdol, Tapanhes, wey Memfis, ragkes daan is diyà te zivavà he vahin te Ehipto.
JER 44:2 Iyan heini migkaǥi te Nengazen he Mekeǥeǥehem, he Megbevayà te Israel: “Neehè niw is dekelà he kezeetan he impeseǥazan ku ziyà te Jerusalem wey ziyà te langun he menge inged diyà te Juda. Nengevengkag en heini ne wazè en duen ed-ubpà
JER 44:3 tenged te mezaat he menge vaal te menge meǥinged duen. Midhimu zan he mepauk a pinaaǥi te kedtutungi zan te veyewà wey ked-ezapa zan te menge ed-ezapen he wazè dan duen hanew wey te menge kepuun dan.
JER 44:4 Layun a edsuǥù diyà te kandan te menge ebpeneuven he menge suluǥuen ku te kegkaǥi ziyà te kandan he kenè dan beeli heini is utew mezaat he vaal he igkeepes ku,
JER 44:5 piru wazè dan pemineǥa wey pezumdumahi is menge ebpeneuven. Wazè dan engkezi is kelelalung dan wey is kedtutung dan te veyewà para te zuma he menge ed-ezapen.
JER 44:6 Umbe, impeǥezaman ku kandan is beǥas te utew ku kegkepauk. Henduen be heini te hapuy he mid-epur te menge inged diyà te Juda wey Jerusalem, ne nehimu heini he mekevulungbulung he menge lugar taman en guntaan.
JER 44:7 “Umbe siak, is Nengazen he Megbevayà he Mekeǥeǥehem, he Megbevayà te Israel mid-insà te: Maan is midezeetan niw is keugelingen niw? Egkesuat kew ve he maamin is menge etew te Juda–is menge maama, is menge vahi, is menge vatà, wey is menge edsusu pa?
JER 44:8 Maan is midhimu niw he mepauk a pinaaǥi te kebaal niw te menge ed-ezapen? Edtutung kew pa te veyewà para kayi zini te Ehipto he iyan ed-ubpaan niw guntaan. Pinaaǥi kayi midezeetan niw is keugelingen niw wey midhimu niw he telemayen wey mekeeled-eled diyà te etuvangan te menge etew ziyà te langun he nasyun kayi te kelibutan.
JER 44:9 Nelipatan niw en be is kelelalung te menge kepuun niw wey te menge hadì wey menge rayna te Juda, wey is mezaat he menge vaal niw wey te menge esawa niw hein diyè kew pa te Juda wey Jerusalem?
JER 44:10 Taman en guntaan is kebpelavew niw wey is kenè niw kedtehuza kedì. Wazè kew zaan medtuman te kesuǥuan ku wey te menge sulunuzen he ibpetuman ku keniyu wey te menge kepuun niw.
JER 44:11 “Umbe siak, is Nengazen he Mekeǥeǥehem, he Megbevayà te Israel, andam e en he edezaat keniyu wey te tivuuk he tig-Juda.
JER 44:12 Sikiyu is menge tig-Juda he nesamà he uuyag he migaanggaan medhengkayi su wey mekeubpà kayi te Ehipto. Ebpatey kew is langun puun te kinemevevaan pehendiyà te kinetikangan is ked-etew zin. Uya, ebpematey kew kayi pinaaǥi te tebek wey vitil kayi te Ehipto. Edrewakan kew wey egkelimezangan is menge etew tenged keniyu. Ed-un-undahan kew zan wey edsudien.
JER 44:13 Ebeelan ku ziyà te keniyu kayi te Ehipto is iring te mibeelan ku ziyà te Jerusalem. Edsilutan ku zaan sikiyu pinaaǥi te tebek, bitil, wey zaru.
JER 44:14 Ebpematey kew is langun he nengesamà he uuyag he menge tig-Juda he mid-ubpà diyà te Ehipto. Kenè kew en ebpekelikù diyà te Juda, he egkesuat kew pezem edlikù su ziyà kew ed-ubpà. Wazà ebpekelikù keniyu he egkelibri gawas te egkepipira he ebpekepelaǥuy.”
JER 44:15 Utew mahabet is menge Judio he netiǥum te kebpemineg ki Jeremias. Heini sikandan nemen-ubpà diyà te zizaya wey zivavà he vahin te Ehipto. Is langun he menge maama he nesayud he is menge esawa zan midtutung te veyewà para te zuma he menge ed-ezapen, wey is langun he menge vahi zutun, migkaǥi ziyà te ki Jeremias te,
JER 44:16 “Kenè key edtuu te migkaǥi nu pinaaǥi te ngazan te Nengazen!
JER 44:17 Ebeelan dey is langun he egkesuatan dey te ebaal: is kedtutung te veyewà he para te ed-ezapen dey he ‘Rayna te Langit’ wey is kedhalad diyà te kandin te pemuhat he inumen iring te mibeelan dey ziyà te menge inged diyà te Juda wey ziyà te menge zalan te Jerusalem. Ne iyan daan heini mibeelan te menge kepuun dey wey menge hadì dey wey menge upisyal. Dutun he timpu meupiya man is kebpekesavuk dey; dekelà is keenen dey wey wazà mezaat he nehitavù kenami.
JER 44:18 Piru hein mid-engked key he edtutung te veyewà he para te Rayna te Langit wey wazè key en medhalad te pemuhat he inumen diyà te kandin, naawà hinuun diyà te kenami is langun, ne ebpematey key en nasì te tebek wey bitil.”
JER 44:19 Migkaǥi zaan is menge vahi te, “Kada timpu te kedtutung dey te veyewà he para te Rayna te Langit wey ke edhalad key te pemuhat he inumen para kandin, wey ke edhilutù key te supas para kandin he in-iring te zagwey zin, egketuenan heini te menge esawa zey.”
JER 44:20 Migkeǥiyan ni Jeremias sikandan is langun he menge maama wey menge vahi he midtavak kandin,
JER 44:21 “Egkeisip niw ve he wazà metueni te Nengazen is kedtutung niw te veyewà wey is kedtutung te veyewà te menge kepuun niw, menge hadì wey menge upisyal wey menge etew ziyà te menge inged diyà te Juda wey ziyà te menge zalan te Jerusalem?
JER 44:22 Hein kenè en egkaantus te Nengazen is kelelalung wey utew mezaat he menge vaal niw, midhimu zin is tanè niw he telemayen wey mekevulungbulung, he wazè en duen ed-ubpà, he iyan is nehitavù en guntaan.
JER 44:23 Nehitavù heini he kezeetan diyà te keniyu su midtutung kew te veyewà wey mibaal kew te salà diyà te Nengazen. Wazè kew medtuman te kesuǥuan din wey wazè kew medsunud te menge sulunuzen wey menge penurù.”
JER 44:24 Mid-umanan pa keǥiyi ni Jeremias is langun he menge etew zutun, ragkes is menge vahi te, “Sikiyu is menge etew ziyà te Juda he kayi ed-ubpà te Ehipto, pemineǥa niw is lalag te Nengazen.
JER 44:25 Iyan heini migkaǥi te Nengazen he Mekeǥeǥehem, he Megbevayà te Israel: ‘Midtuman niw wey te menge esawa niw is impenaad niw he kedtutung te veyewà wey kedhalad te pemuhat he inumen he para te Rayna te Langit. Sigi en, leusa niw en is baal niw. Tumana niw is impenaad niw.
JER 44:26 Piru pemineǥa niw is menge lalag ku, ziyà te keniyu te menge etew ziyà te Juda he kayi med-ubpà te Ehipto. Impenangdù ku ziyà te ǥehinawa ku he wazè en keniyu ebpekeǥamit te mekeǥeǥehem he ngazan ku. Kenè ku en idtuǥut ke egemiten niw is ngazan ku te kebpenangdù niw te iring kayi: “Ebpenangdù a pinaaǥi te ngazan te uuyag he Nengazen he MEGBEVAYÀ.”
JER 44:27 Su kenè ku sikiyu ebeǥayan te keupiyaanan pinaaǥi te ked-ipata ku keniyu, kekenà, edsilutan ku sikiyu. Ebpematey kew kayi te Ehipto pinaaǥi te tebek etawa vitil taman te wazè en egkesamà keniyu.
JER 44:28 Emun duen egkesamà he kenà ebpatey te tebek he ebpekeulì diyà te Juda, ne zeisey zà utew. Ne egkesayud is nesamà he menge etew diyà te Juda he nemen-ubpà diyà te Ehipto ke hentei ki lalag is egketuman, iyan be is kedì etawa iyan is kandan.
JER 44:29 Iyan heini tuus he edsilutan ku sikiyu kayi he lugar, su wey egketuenan niw he egketuman en is kezeetan he migkaǥi ku he idezaat keniyu pinaaǥi kayi:
JER 44:30 Ibeǥey ku si Faraon Hofra he hadì te Ehipto te menge kuntada zin he egkesuat he edhimatey kandin, iring te kebeǥaya ku ki Hadì Zedekia he hadì te Juda ziyà te kuntada zin he si Hadì Nebucadnezar he hadì te Babilonia he egkesuat he edhimatey kandin.’ ”
JER 45:1 Hein ikeepat he tuig te kedhadì ni Jehoyakim diyà te Juda he anak ni Josia, insurat ni Baruc is indikta kandin ni Jeremias.
JER 45:2 Migkaǥi si Jeremias te, “Baruc, iyan heini migkaǥi te Nengazen he Megbevayà te Israel ziyà te kenikew:
JER 45:3 Migkaǥi ka te, ‘Mekehizuhizu a su mid-umanan te Nengazen is menge igkerasey ku. Neveley e en te kedag-es, wey wazè ku en kebpekehimeley.’
JER 45:4 “Baruc, migkaǥi pa is Nengazen te, ‘Ebengkaǥen ku is nasyun he mibangun ku. Ebezuten ku is impemula ku. Ebeelan ku heini ziyà te tivuuk he tanà.
JER 45:5 Edtinguhè ke pe be te zekelà he menge vutang? Kenè en kinahanglan, su ibpesaǥad ku te kezeetan is langun he menge etew, piru edlibriyen ku mulà sikew te kemetayen minsan hendei ka ebpevayà. Iyan a, is Nengazen, is migkaǥi kayi.’ ”
JER 46:1 Iyan heini migkaǥi te Nengazen diyà te ki Jeremias mehitenged te menge nasyun:
JER 46:2 Is Lalag Mehitenged te Ehipto: Iyan heini menge lalag he ebpekesuǥat diyà te menge sundaru ni Faraon Neco he hadì te Ehipto. Nezaag heini sikandan ni Hadì Nebucadnezar he hadì te Babilonia, diyà te Carkemish uvey te Wahig he Eufrates, hein ikeepat he tuig te kedhadì ni Jehoyakim, he anak ni Josia he hadì te Juda:
JER 46:3 “Iandam niw is menge kelasag niw, dekelè man etawa zeisey, ne ǥenat kew pehendiyà te tebek!
JER 46:4 Iandam niw zaan is menge kudè niw ne untuzi niw en! Ikekalù niw is menge hilmit niw, kemengaa niw is menge vangkew niw, ne iseluub niw is menge limbutung niw.
JER 46:5 Piru hengkey heini is neehè ku? ed-insà is Nengazen. Nahandek kew ne mid-endud kew. Nezaag kew, ne migaan-gaan kew mebpelaǥuy is kenè en ebpenlilingey tenged te kegkahandek niw.
JER 46:6 Elistu kew wey meǥaan he ebpelelaǥuy, piru kenè kew ǥihapun ebpekelikey. Egkengezeetan kew ziyà te zapit te zizaya he uvey te Wahig he Eufrates.
JER 46:7 “Hengkey heini he nasyun is nehimu he mekeǥeǥehem, iring te Wahig he Nilo he ebpekelapew ziyà te pangpang?
JER 46:8 Is Ehipto nehimu he mekeǥeǥehem. Iring te Wahig he Nilo he nekelapew ziyà te menge pangpang duen. Migkaǥi is Ehipto te, ‘Edekelà a he iring te midalem he Wahig te Nilo; edlepayan ku is tivuuk he kelibutan. Edezeetan ku is menge inged wey is menge etew zuen.’
JER 46:9 “Sigi en, menge tig-Ehipto, ipepelelaǥuy niw en is menge kudè niw wey menge kerwahi! Surung kew en ragkes is langun he kezapig niw he ebpemuun diyà te Etiopia, Libya, wey Lydia, he menge mahagtì he egamit te kelasag wey panà.
JER 46:10 Piru iyan ebpekezaag is Nengazen he MEGBEVAYÀ he Mekeǥeǥehem kayi he tebek. Kayi he timpu ebpenimales sikandin te menge kuntada zin. Is ispada zin egkeiring te egkevitil he langgam he ed-emeluk kandan wey edhiǥup te lengesa zan taman te egkahantey wey egkeperahan. Egkehimu sikandan he pemuhat diyà te Nengazen he MEGBEVAYÀ he Mekeǥeǥehem diyà te tanà he zapit te zizaya, he uvey te Wahig he Eufrates.
JER 46:11 “Sikiyu is menge etew ziyà te Ehipto, minsan edhendiyè kew pa te Gilead su ebpenguwa kew te vawì, ne kenà ebpulus is langun he vawì niw su kenà ebpekeulì keniyu.
JER 46:12 Egketuenan te menge etew ziyà te menge nasyun kayi te tivuuk he kelibutan is keelezan niw wey kebpekesineǥew niw. Su ebpekedrurumbag is menge sundaru niw he egkengepiley.”
JER 46:13 Iyan heini migkaǥi te Nengazen diyà te ki Jeremias he mehitenged te kedsurung ni Hadì Nebucadnezar he hadì te Babilonia ziyà te Ehipto:
JER 46:14 “Jeremias, tudtula nu heini ziyà te Ehipto, Migdol, Memfis, wey Tapanhes: Pengandam kew su naandam en is ispada he idezaat keniyu.
JER 46:15 Maan is mid-endud is memevurut he menge sundaru niw? Mid-endud dan su midsegseg dan te Nengazen.
JER 46:16 Ebpekedrurumbag is menge sundaru niw he egkengepiley. Egkaǥi sikandan te, ‘Ed-enew kiw, ne ed-ulì kiw ziyà te menge zuma tew, ziyà te tanà he mid-enakan kenitew. Su wey kiw kenà mepatey te menge kuntada tew.’
JER 46:17 Ne emun diyè dan en, ke sikandan te, ‘Is Faraon he hadì te Ehipto tekew en melambù is menge lalag din, piru ibpelavey zin is kebpekepebur zin.’
JER 46:18 “Siak, is uuyag he Hadì he Nengazen he Mekeǥeǥehem, ebpenangdù a he iring te lavew he metikang is Buntud te Tabor te zuma he menge vuntud, ne is buntud he Carmel ebpekehinungew te zaǥat, iring daan keniyan is gehem te edsurung te Ehipto.
JER 46:19 Sikiyu is menge meǥinged diyà te Ehipto, tinesa niw en is ed-uwiten niw su ebihaǥen kew en. Egkezeetan is Memfis ne egkehimu heini he mekevulungbulung ne wazè en ed-ubpà kayi.
JER 46:20 Is Ehipto egkeiring te zumeraǥa he vaka, piru zuen menge zezeizey he keranapranap he edsurung kayi he ebpuun diyà te zizaya.
JER 46:21 Minsan is menge sundaru he sinuhulan din he henduen be te nati he menge vaka he nepurung meelimahi, kenà ebpekesukul te tebek; ebpemen-endud ne ebpemelaǥuy sikandan. Egkehitavù heini su timpu en te kedsiluti wey kedezeeti te menge tig-Ehipto.
JER 46:22 Ebpemelaǥuy is menge tig-Ehipto, egkeiring sikandan te uled he ebpemunsuwit dutun te edula heini. Edsurung is menge kuntada zin he ed-uwit te menge wasey iring te ebpemiley te kayu.
JER 46:23 Minsan iring kezakel te menge kayu te mekepal he ketelunan is menge tig-Ehipto, egkezaag gihapun sikandan su is menge kuntada zan iring kezakel te terapan he kenà egkevilang.
JER 46:24 Egkepeel-elezan iyan is menge tig-Ehipto. Ibeǥey sikandan diyà te menge etew he ebpuun diyà te zizaya.”
JER 46:25 Mibpedayun megkaǥi is Nengazen he Mekeǥeǥehem, he Megbevayà te Israel te, “Edsilutan ku en si Amon, is ed-ezapen diyà te Tebes, wey is duma pa he menge ed-ezapen diyà te Ehipto. Edsilutan ku zaan is hadì te Ehipto wey is menge pengulu zin, ragkes is menge midsarig kandin.
JER 46:26 Ibeǥey ku sikandan diyà te egkesuat he edhimatey kandan he iyan si Hadì Nebucadnezar wey is menge upisyal zin. Piru ziyà te huziyan he timpu ebpeumanan ku zed ebpeubpai is Ehipto iring te zengan. Iyan a, is Nengazen, is migkaǥi kayi.
JER 46:27 “Piru sikiyu is menge Israilihanen he menge kevuwazan te suluǥuen ku he si Jacob, kenè kew luyahi wey mahandek su edlibriyen ku sikiyu puun diyà te meziyù he lugar he zutun kew vihaǥa. Ed-uman kew ebpengungubpaan he melinawen wey wazà kezeetan, ne wazè en ebpelihandek keniyu.
JER 46:28 Umbe, kenè kew en egkahandek, is menge kevuwazan te suluǥuen ku he si Jacob, su zuma a keniyu. Ebpurungan ku edezeeti is langun he menge nasyun he zutun ku sikiyu ipeyapat, piru kenè ku mulà sikiyu ebpurungan edezeeti. Ebmensuwen ku sikiyu, sumalà is ereg keniyu. Kenà egkehimu he kenè ku sikiyu edsilutan. Iyan a, is Nengazen, is migkaǥi kayi.”
JER 47:1 Iyan heini migkaǥi te Nengazen diyà te ki Jeremias he ebpeneuvan mehitenged te Filistia hein wazè pa surunga te hadì te Ehipto is Gaza:
JER 47:2 “Duen menge etew ziyà te nasyun diyà te zizaya he edsurung he egkeiring te zalem he edlapey ziyà te tivuuk he tanà. Edezeetan kayi he menge etew is langun he menge inged wey is menge meǥinged dutun. Ebpekekulahì is menge etew tenged te kegkahandek dan wey ebpemekeerang sikandan te kenà alang-alang.
JER 47:3 Egkezineg dan is keǥurub te menge kerwahi wey dabekdabek te menge kudà. Is menge amey kenè dan en edlilingayen te edtavang is menge anak dan. Edluyahan sikandan.
JER 47:4 Su neume en is timpu he edezeetan is langun he menge Filistihanen duma te menge kezapig dan he ebpuun diyà te Tyre wey Sidon. Edezeetan te Nengazen is menge Filistihanen, is menge etew he ebpuun diyà te isla te Caftor.
JER 47:5 Is menge tig-Gaza ebpemevangul su ibpeehè dan is kedlalew zan, ne is menge tig-Ashkelon ebpereremek he egkengeseeng. Sikiyu is menge meǥinged diyà te menge suǥud, kenè bes egkeengked is kebpelii niw te lawa niw he tuus te kedlalew?
JER 47:6 Mid-insè kew ke keenu a ed-engked he edsilut keniyu pinaaǥi te ispada ku? Migkeǥiyan a keniyu te iǥumè ku en heini ne vey-ani ku en sikiyu.
JER 47:7 Piru ebpedayun pa is kebpekezezaat kayi te ispada ku su midsuǥù ku man heini te kedsurung diyà te Ashkelon wey te menge etew he ziyà ed-ubpà te veyvey te zaǥat.”
JER 48:1 Iyan heini migkaǥi te Nengazen he Mekeǥeǥehem, he Megbevayà te Israel, mehitenged te Moab: “Mekehizuhizu is menge tig-Nebo su edezeetan heini. Egkepeel-elezan wey ebihaǥen is menge tig-Kiriataim, ne egkengetempag is menge eputà dan he metikang he lugar.
JER 48:2 Kenè en edeliǥen is nasyun he Moab. Diyà te Heshbon, mibpelanu is menge kuntada te kedezaat te Moab. Ke sikandan te, ‘Agpas kew su edezeetan tew is Moab.’ Is inged he Madmen edsurungen te kuntada, ne egkehimu he mekevulungbulung.
JER 48:3 Pemineǥa niw is kulehian diyà te Horonaim tenged te zekelà he tebek wey kezeetan.
JER 48:4 Egkezeetan is Moab, ne ed-erang is menge vatà.
JER 48:5 Is menge meǥinged diyà te Moab ebpemenlelendag is edtekezeg diyà te Luhit wey ebpemenupang diyà te Horonaim. Uya, egkezineg is erang dan tenged te kezeetan.
JER 48:6 “Libriya niw is keugelingen niw! Pelaǥuy kew ziyà te sibsivayan.
JER 48:7 Sikiyu is menge tig-Moab, midsarig kew te ebilidad niw wey ketiǥeyunan niw. Umbe ebihaǥen kew, ragkes en is ledawan he ed-ezapen niw he si Kemosh wey is menge memumuhat para kayi wey is menge upisyal.
JER 48:8 “Ebpekeuma ziyà is ebpendezaat te kada inged, ne wazà inged he kenà egkezeetan. Egkezeetan daan is menge inged diyà te menge suǥud wey suǥud-suǥud diyà te vuvungan. Egkehitavù heini, su iyan a, is Nengazen, is migkaǥi kayi.
JER 48:9 Angin pezem ke zuen pakpak te menge meǥinged te Moab ne ebpekelayang dan pezem pehendiyà te meziyù, su egkengezeetan is menge inged kayi ne kenè en egkeubpaan.
JER 48:10 Edrewakan is etew he kenà edseǥipà te vuluhaten te Nengazen he kedezaat te Moab. Edrewakan is etew he kenà egamit te ispada te kedhimatey te menge tig-Moab.
JER 48:11 Dezeyaan is ked-ubpà diyà te Moab puun pa te nehuna he timpu. Wazè keenu mevihag is menge etew kayi. Neiring heini te vinu he wazà welenga etawa wazà ihalin diyà te selakew en he teleǥuey. Umbe wazà mahalin is taam din wey ngazeg din.
JER 48:12 “Piru egkeuma is timpu he edsuǥuen ku is kuntada te kedsurung te Moab. Ne zutun egkeiring is nasyun he Moab te vinu he mid-ulaan puun te midteǥuan duen ne edrunteken din daan heini.
JER 48:13 Ne zutun igkeeled te menge tig-Moab is ed-ezapen dan he si Kemosh iring te ingkeeled te menge Israilihanen is kenà tutuu he megbevayà he mid-azap dan diyà te Betel.
JER 48:14 Mibpahambug is menge tig-Moab he mevurut kun is menge sundaru zan he ebpekidtebek.
JER 48:15 Piru egkezeetan utew is menge tig-Moab wey is menge inged kayi. Ebpenhimetayan is kinemevurutan he menge vetan-en dan. Iyan a, is Nengazen he Mekeǥeǥehem he Hadì, is migkaǥi kayi.
JER 48:16 “Hapit en egkezeeti is Moab.
JER 48:17 Keseeng kew is langun he nasyun he kezapig te Moab, sikiyu is langun he nesayud te kegkevantug te Moab! Keseeng kew ne ke sikiyu te, ‘Netapus en is Moab! Netamped en is tuked din, kes tuked he simbulu te kegkemekeǥeǥehem din wey kegkeventuǥan.’
JER 48:18 “Sikiyu is menge meǥinged diyà te Dibon, pekevavè kew ne lumpeng kew ziyà te tanà. Su is edezaat te Moab edsurung daan diyà te keniyu; ebengkaǥen dan is menge inged niw he mibpeliǥuyan te verengbeng.
JER 48:19 Sikiyu is menge meǥinged diyà te Aroer, hitindeg kew ziyà te kilid te zalan, ne taǥad kew. Insai niw is ebpemelaǥuy ke hengkey is nehitavù.
JER 48:20 Ne edtavak dan te, ‘Nezeetan en is Moab, ne nepeel-elezan en is menge etew zuen. Umbe keseeng kew wey sineǥew kew. Kulehia niw is menge tig-Arnon he nezeetan en is Moab.’
JER 48:21 “Edsilutan daan is menge inged diyà te suǥud-suǥud diyà te vuvungan: is Holon, Jaza, Mefaat,
JER 48:22 Dibon, Nebo, Bet Diblataim,
JER 48:23 Kiriataim, Bet Gamul, Bet Meon,
JER 48:24 Keriot, wey Bozra. Egkeumahan en te silut is langun he ziyà te menge inged diyà te Moab, uvey man etawa meziyù.
JER 48:25 Naawè en is kegkemekeǥeǥehem te Moab ne meluya en heini ǥuntaan. Iyan a, is Nengazen, is migkaǥi kayi.
JER 48:26 “Lenguta is Moab, su nekidsukulà kediey. Egkelilid sikandin diyà te keugelingen din he utà ne egkehimu he egkeengitan.
JER 48:27 Sikiyu is menge meǥinged diyà te Moab, kenè be midsudì niw is Israel? Maan, nezekepan be heini he nenakew? Ne maan is ebpenggemen-gemen kew zà te kedsudì kayi?
JER 48:28 Awè kew en diyà te menge inged niw ne ziyè kew ubpà te vetuwen, he iring te menge merepatik he ed-impis diyà te pangpang.
JER 48:29 Utew kew menge gelbuwen. Netuenan ku ke sengemenu ketikang is galbu niw wey kegkemepelevawen.
JER 48:30 Siak is Nengazen, netuenan ku he utew kew menge hembugiru, piru wazè kayi pulus.
JER 48:31 Umbe, edsineǥawan ku is Moab wey menge tig-Kir Hareset.
JER 48:32 Edsineǥawan ku zaan is menge etew ziyà te Sibma, he lavew pa te kedsineǥawi ku te menge tig-Jazer. He Sibma, neiring ka te sengepuun he paras he nekeuma is menge subpang din diyà te Daǥat he Minatey ne taman en te Jazer. Piru ǥuntaan mid-amin penguwaa te ebpendezaat is menge veǥas nu.
JER 48:33 Kenè en egkezineg diyà te tanà te Moab is kedlipey wey keguǥusà diyà te vevesukà wey menge pemuleey te paras. Wazè en edtudà he vinu ziyà te keresà. Wazè en egkeres te paras he ed-uruhuy tenged te kegkelipey zin. Duen hinuun kulehian piru kenà kulehian tenged te kegkelipey.
JER 48:34 Is erang te menge tig-Heshbon taman en is kegkezineǥa zuen diyà te Eleale wey Jahaz. Is erang te menge tig-Zoar, taman en is kegkezineǥa zuen diyà te Horonaim wey Eglat Shelishiya. Su minsan is wahig he Nimrim nemezahan en.
JER 48:35 Ebpenhimetayan ku is menge tig-Moab he ebpememuhat diyà te menge simbahan diyà te Moab he ziyà te metikang he menge lugar wey edtutung te veyewà he para te zuma he menge ed-ezapen. Iyan a, is Nengazen, is migkaǥi kayi.
JER 48:36 “Umbe neseeng a tenged te Moab wey menge tig-Kir Hareset; neiring a te etew he ebpemulalà he ediyaga. Naawè en is ketiǥeyunan he naangken dan.
JER 48:37 Is kada sevaha kandan mibpaahà te kegkeseeng din pinaaǥi te kebpevangul, kegkiskis te sumpà, kebpemelìi te velad, wey kebivisti te saku.
JER 48:38 Nemen-erang is menge etew ziyà te atep te menge valey zan wey ziyà te menge pelasa, su midezeetan ku is Moab ne neiring heini te umuy he nerupet he wazè en seǥipaa.
JER 48:39 Nezeetan en is Moab! Pemineǥa is erang te menge meǥinged kayi. Utew egkepeel-elezi is Moab, ne edsudien heini ne igkelimezangi heini te langun he menge nasyun he nekeelingkus kayi he nekaahà te nehitavù.”
JER 48:40 Mibpedayun pa megkaǥi is Nengazen te, “Ehàa niw man! Is kuntada te menge tig-Moab neiring te kulaǥu he midlayang he edawi kandan.
JER 48:41 Egkaaǥew zan is menge inged wey menge kampu te Moab. Dutun he timpu egkulbaan is menge sundaru te Moab ne egkeiring te vahi he ebeliliten.
JER 48:42 Egkezeetan is nasyun he Moab tenged te mid-isip din is keugelingen din he lavew pa sikandin he gemhanan kenà is Nengazen.
JER 48:43 Kegkeherati, budsi, wey litag is egkepeveyaan te menge tig-Moab.
JER 48:44 Is minsan hentei kandan he ebpelaǥuy su egkahandek ne egkeulug diyà te vudsi. Ne is ebpekeǥawas puun te vudsi, ne egkelitag. Su edsilut a ziyà te Moab emun egkeume en is midtelaan ku he timpu. Iyan a, is Nengazen, is migkaǥi kayi.
JER 48:45 Is mekehizuhizu he ebpemekepelaǥuy egkesuat dan he ed-eles diyà te Heshbon. Piru heini is Heshbon he midhedian dengan ni Hadì Sihon egkiràkirà is hapuy zuen. Egkevinsulan is menge vuvungan he mid-elesan te menge tig-Moab he zengan, utew susuaten te kebpekidtebek.
JER 48:46 “Mekehizuhizu kew is menge tig-Moab! Nengezeetan kew is ed-azap te ed-ezapen he si Kemosh, ne mibihag is menge anak niw.
JER 48:47 Piru ziyà te huziyan he timpu, idlikù ku zed is meupiya he kebpekesavuk diyà te Moab. Iyan a, is Nengazen, is migkaǥi kayi.” Iyan heini menge lalag mehitenged te Moab.
JER 49:1 Iyan heini migkaǥi te Nengazen he mehitenged te menge Amunihanen: “Sikiyu is menge etew he ed-azap te ed-ezapen he si Molec, maan is mid-ubpaan niw is menge inged diyà te tanà ni Gad? Wazè be menge kevuwazan ni Israel he nekepengevilin kayi he tanà?
JER 49:2 Siak, is Nengazen, migkaǥi a te egkeuma is timpu he ibpesurung ku te menge kuntada niw is Raba. Ebengkaǥen dan heini is dekelà he inged niw ne ebinsulan dan is dezeisey he menge inged diyà te peliǥuy zin. Pinaaǥi kayi egkesegseg te menge Israilihanen is menge midsegseg kandan.
JER 49:3 “Ebpekesineǥew kew taman te egkehimu niw, is menge etew ziyà te Heshbon, su egkezeetan is Ai. Ebpekesineǥew kew zaan is menge meǥinged diyà te Raba! Ebivisti kew te saku is edlikù-likù ebpelelaǥuy ziyà te kilid te verengbeng te kebpaahà he edlalew kew. Su ebihaǥen is ed-ezapen niw he si Molec duma te menge memumuhat wey te menge upisyal zin.
JER 49:4 Sikiyu is menge meluiven, maan is impurung niw ipahambug is selebpeten he menge suǥud he tanè niw? Midsarig kew te ketiǥeyunan niw ne ke sikiyu te wazà ebpekehimu he edsurung keniyu.
JER 49:5 Edsuǥù a te menge kuntada niw he ebpuun diyà te menge nasyun diyà te peliǥuy keniyu he ebpelihandek keniyu. Edsegseǥen kew zan puun te tanè niw, ne wazà edumala keniyu te ebpemelaǥuy.
JER 49:6 Piru ziyà te huziyan he timpu, ne idlikù ku is meupiya he kebpekesavuk te menge Amunihanen. Iyan a, is Nengazen, is migkaǥi kayi.”
JER 49:7 Iyan heini migkaǥi te Nengazen he Mekeǥeǥehem bahin te Edom: “Hendei en is uluwanen diyà te Teman? Wazè en be nesamà he metau he edsambag?
JER 49:8 Sikiyu is nemen-ubpà diyà te Dedan, ebpemelaǥuy kew ne ed-eles kew ziyà te mezalem he menge surung. Su ebpeeǥiyan ku te kezeetan is menge kevuwazan ni Esau dutun te timpu te kedsiluti ku kandan.
JER 49:9 Kenè be is ebpenrupù te paras kenè din ed-eminen is menge veǥas kayi, kekenà, edsemaan din? Kenè be is tekawen kenè din ed-eminen te egkuwa is menge azen diyà te seled te valey, kekenà, iyan dà egkuwaan dan is kinahanglan he egkuwaan dan?
JER 49:10 Piru ed-eminen mulà egkuwaa is menge azen te menge kevuwazan ni Esau. Edluwisan ku is elesè dan, su wey kenà sikandan mekeeles. Ebpematey is menge anak dan, menge kezuzumahi zan, wey is menge siringan dan. Ne wazà egkesamà kandan.
JER 49:11 Piru itaǥak niw kayi te kediey is menge neilu keniyu su ed-eturen ku. Ne is nengevalu keniyu he menge vahi ne ebpekesarig kayi te kediey.”
JER 49:12 Mibpedayun pa megkaǥi is Nengazen te, “Is wazà mekesalà ne egkerasey man ganì, ne iyan kew pe be? Edsilutan ku iyan sikiyu!
JER 49:13 Nenangdù a ziyà te ǥehinawa ku he edezeetan ku is inged he Bozra. Egkehimu heini he mekeharatharat he ed-ahaan, edsudien heini, ne egemiten is ngazan din te kebpenrawak. Is langun he menge inged kayi kenè en egkepurungan te taman te taman.”
JER 49:14 Nezineg ku is tudtul he ebpuun diyà te Nengazen, he midsuǥù kun sikandin te menge menunudtulà pehendiyà te menge nasyun su wey zan metudtuli he mebpengandam dan para te tebek, wey edhinggaten din sikandan he medsurung dan diyà te nasyun he Edom.
JER 49:15 Su migkeǥiyan te Nengazen is menge tig-Edom te, “Pemineg kew! Edhimuwen ku sikiyu he edhuna pa he egkaayuayu te zuma he menge nasyun, ne utew mezaat is ked-isipa zan keniyu.
JER 49:16 Midlimbungan kew te galbu niw wey te kedtuu niw he egkahandek keniyu is duma he menge nasyun. Mibpahambug kew he ziyè kew ed-ubpà te vetuwen he metikang he lugar. Piru minsan idrepeng niw pa is ketikang te ubpeey niw te ketikang te impisà te kulaǥu, edezeetan ku ǥihapun sikiyu.”
JER 49:17 Migkaǥi pa is Nengazen te, “Igkahandek te menge etew is mezaat he kebpekesavuk te Edom. Is langun he edsaǥad kayi ne egkeinuinu ne henduen be te kenà ebpeketuu te egkehitavù kayi he nasyun.
JER 49:18 Iring te nezeetan is Sodom wey Gomora wey is menge inged diyà te peliǥuy kayi, egkezeetan daan is Edom. Ne wazè en ed-ubpà dutun. Iyan a, is Nengazen, is migkaǥi kayi
JER 49:19 Edtik-ew a edsurung diyà te Edom he iring a te erimaung he ebpuun te ketelunan diyà te Jordan he edhendiyà te menge kerehidu ziyà te penebtavà. Edsegseǥen ku sikandan ne iyan ku ibpezumala te Edom is etew he mibpilì ku. Hentei is iring kediey? Hentei is ebpeǥaruǥaru he edsukul kediey? Hentei is pengulu he ebpekigkuntada kedì?
JER 49:20 Umbe, pemineǥa niw is mibpelenuwan ku te ebaal he idezaat te Edom, wey menge meǥinged diyà te Teman: Minsan is menge anak dan ne ebihaǥen, ne edezeetan daan is tanè dan tenged te mibeelan dan.
JER 49:21 Tenged te utew subra he kegkezeeti te Edom egkeenluwag is tanà, ne is erang dan ebpekeuma is kegkezineǥa zuen diyà te Daǥat he Meriǥà.
JER 49:22 Tengteng kew! Is kuntada henduen be te kulaǥu he edlayang su edawi te Bozra. Dutun he timpu egketeranta is menge sundaru te Edom he henduen be te vahi he ebeliliten.”
JER 49:23 Iyan heini menge lalag mehitenged te Damascus: “Netingkemed is menge tig-Hamat wey menge tig-Arpad te mezaat he tudtul he nezineg dan. Neliveǥan sikandan wey kenà ebpekehulenà is ked-isip-isip dan; neiring dan te ebpemaǥel he zaǥat.
JER 49:24 Midluyahan is menge tig-Damascus ne mibpelaǥuy zan tenged te kegkahandek dan. Migkulbaan dan wey neseeng dan, neiring dan te vahi he ebeliliten.
JER 49:25 Is inged he Damascus he nevantug wey melipayen is menge meǥinged duen, inselikwey en!
JER 49:26 Is menge vetan-en he menge maama kayi ebpematey ziyà te menge kersada ragkes en is menge sundaru kayi. Ebinsulan ku is berengbeng te Damascus wey is melig-en he menge vahin kayi he inged ni Hadì Ben Hadad. Iyan a, is Nengazen he Mekeǥeǥehem, is migkaǥi kayi.”
JER 49:28 Iyan heini migkaǥi te Nengazen mehitenged te Kedar wey te menge ginhedian diyà te Hazor he midsurung ni Hadì Nebucadnezar he hadì te Babilonia: “Pengandam kew ne surunga niw is Kedar! Dezeeti niw heini he menge etew is diyà te edsilaan.
JER 49:29 Ne eǥawa is menge tulda wey menge ayam dan. Kuwaa is menge vutang dan wey menge kemilyu zan. Edhabet sikandan ebpemensag te, ‘Midliǥuyan kiw te mekahandek-handek he menge kuntada tew.’
JER 49:30 “Sikiyu is menge tig-Hazor, gaanggaan kew pelaǥuy! Iyan is Nengazen, is migkaǥi he eles kew ziyà te menge surung. Mibpelanu te kedezaat keniyu si Hadì Nebucadnezar he hadì te Babilonia.
JER 49:31 Iyan a, is Nengazen, midsuǥù kandan he surunga zan is menge etew he ebpeeyehey zà he wazà igkeipeng. Is pultahan te inged dan wazè din lekeb etawa terangka, ne nengungubpaan dan he iyan dan dà.
JER 49:32 Is menge kemilyu zan wey is langun he menge uyaǥen dan ne egkehimu he keniyu. Ibpeyapat ku ziyà te minsan hendei heini is menge etew he mibpen-elutan is dapit te kendingen dan, ne ibpeseǥazan ku kandan is kezeetan he ebpuun diyà te minsan hendei.
JER 49:33 Egkehimu he mekevulungbulung is Hazor taman te taman ne wazè en etew he ed-ubpà dutun, kekenà, iyan dà is leew he menge asu.”
JER 49:34 Iyan heini migkaǥi te Nengazen diyà te ki Jeremias he ebpeneuven bahin te Elam, dutun te iyan pa kebpuun te kedhadì ni Zedekia ziyà te Juda.
JER 49:35 Migkaǥi is Nengazen he Mekeǥeǥehem te, “Ebpenhimetayan ku is menge mememanà diyà te Elam he memetau he menge sundaru zan.
JER 49:36 Edsurungen is Elam te menge kuntada he ebpemuun diyà te heepat he menge lugar kayi te kelibutan, ne ibpeyapat ku is menge meǥinged dutun diyà te minsan hendei. Ne ebihaǥen sikandan diyà te langun he menge nasyun kayi te kelibutan.
JER 49:37 Edezeetan ku sikandan diyà te etuvangan te menge kuntada zan he egkesuat he edhimatey kandan. Uya, edezeetan ku sikandan tenged te utew ku kegkepauk. Ibpesurung ku sikandan te menge kuntada zan taman te egkaamin sikandan is langun.
JER 49:38 Ibpelastar ku ziyà te Elam is pinuuwè ku te kedhadì, ne edhukuman ku sikandan ne edezeetan ku is hadì wey menge upisyal zutun.
JER 49:39 Piru ziyà te huziyan he timpu idlikù ku zed is meupiya he kebpekesavuk diyà te Elam. Iyan a, is Nengazen, is migkaǥi kayi.”
JER 50:1 Iyan heini migkaǥi te Nengazen diyà te ki Jeremias mehitenged te Babilonia wey te menge etew kayi:
JER 50:2 “Ipetueni nu ziyà te menge nasyun is tudtul! Ne ivayew is bendirà ne ipetueni te langun: ‘Egkezeetan is Babilonia! Egkerupet wey egkepeel-elezan is menge ed-ezapen kayi he si Bel wey si Marduk.’
JER 50:3 Su edsurungen is Babilonia te sevaha he nasyun he ebpuun te zizaya, ne egkehimu heini he mekevulungbulung ne wazè en ed-ubpà kayi, su ebpemelaǥuy en is menge etew kayi wey menge uyaǥen.”
JER 50:4 “Dutun he timpu is menge etew ziyà te Israel wey Juda edsineǥew is edangep kayi te kedì, te Nengazen he Megbevayè dan.
JER 50:5 Id-insè dan is beyeey pehendiyà te Jerusalem ne edhendiyè dan. Ne ebpekid-uyun dan kedì te uyun he wazà pidtemanan, ne kenè dan heini egkelipatan.
JER 50:6 “Is menge etew ku neiring te netazin he menge kerehidu. Mibey-anan sikandan te menge ebantey kandan he metazin diyà te menge vuntud wey menge vuvungan, ne kenè ne sikandan ebpeketuredu he ed-ulì.
JER 50:7 Edsurungen sikandan te ebpekaahà kandan. Egkaǥi is menge kuntada zan te, ‘Nekesalè dan diyà te Nengazen he iyan tutuu he eputè dan wey egkeperateng te menge kepuun dan, umbe wazè tew televaken emun edsurungen tew sikandan.’
JER 50:8 “Sikiyu is menge Israilihanen, awè kew puun te Babilonia! Ewai niw heeyan he nasyun! Huna kew awà!
JER 50:9 Su ibpesurung ku is Babilonia te menge sundaru he gurupu he ebpuun diyà te gemhanan he menge nasyun diyà te zizaya. Edsurung dan diyà te Babilonia ne egkaaǥew zan heini. Metau utew sikandan he menge mememanà ne kenà ebperis is kebpanè dan.
JER 50:10 Ed-eǥawen dan is menge azen diyà te Babilonia, ne egkuwaan dan is egkesuatan dan te egkuwa. Iyan a, is Nengazen, is migkaǥi kayi.
JER 50:11 “Sikiyu is menge etew ziyà te Babilonia mid-eǥawan niw te menge azen is menge etew he ǥaked ku. Midlipey kew wey miguǥusà he iring te mid-elimahan he dumeraǥa he vaka ziyà te penebtavà wey kudà he edherìhì.
JER 50:12 Piru ebpeel-elezan ku is tivuuk he meǥinged diyà te nasyun niw. Egkehimu heini utew mevavà te langun he nasyun, wey egkehimu heini he mekevulungbulung wey disirtu he nasyun.
JER 50:13 Tenged te pauk ku wazè en ebpekeubpà diyà te Babilonia ne egkehimu heini he mekevulungbulung he lugar. Is langun he edsaǥad kayi ne ebpekepenerektek dan tenged te langun he egkehitavù kayi he nasyun.
JER 50:14 “Sikiyu is menge mememanà, pelastar kew en diyà te peliǥuy te Babilonia. Ne iamin niw ipanà is menge vesut niw ziyà te kandin su nekesalà sikandin diyà te Nengazen.
JER 50:15 Kulahì kew en te egkezineg minsan hendei! Ahàa niw man! Midsurindir en is Babilonia! Nengerundus en is menge turi zin ne nengewaǥey en is menge verengbeng din. Ne penimales heini te Nengazen kandin. Umbe velesi niw sikandin ne veeli niw ziyà te kandin is mibeelan din diyà te zuma.
JER 50:16 Puawa niw ziyà te Babilonia is menge ebpememula wey menge ebpemenraǥun. Libriya niw mulà is menge vinihag te ispada te menge kuntada wey kenà mehimetayi, ne ipeulì sikandan diyà te kandan he menge lugar.
JER 50:17 “Is menge Israilihanen neiring te netazin he menge kerehidu he midal-as te menge erimaung. Hein aney, migkaan sikandan te hadì te Asiria, ne mid-ul-ulan is menge tulan dan te Babilonia.
JER 50:18 “Umbe siak, is Nengazen he Mekeǥeǥehem, he Megbevayà te Israel, migkaǥi a te, ‘Edsilutan ku is hadì te Babilonia iring te midsilutan ku is hadì te Asiria.
JER 50:19 Piru ibpelikù ku is menge Israilihanen diyà te nasyun dan. Ne egkeiring dan te menge kerehidu; egkaan sikandan te egkeraǥun dan puun te Carmel, te Bashan, wey ziyà te vuvungan te Efraim wey Gilead, ne egkeperahan sikandan.
JER 50:20 Dutun he timpu, egkehanew en is menge salà wey is menge kedsupak te nesamà he menge etew ziyà te Israel wey Juda, su ebpeseyluwen ku sikandan.’ ”
JER 50:21 Migkaǥi pa is Nengazen te, “Surunga niw is Merataim wey is Pekod. Penhimetayi niw is menge etew zutun ne purungi niw dezeeti. Beeli niw is langun he insuǥù ku keniyu.
JER 50:22 Egkezineg is kulehian diyà te tebek wey is keǥurub te kegkepurung kegkezeeti te tivuuk he tanà.
JER 50:23 Is Babilonia neiring te masu he edrupet te menge nasyun piru ǥuntaan nerupet en heini. Nahandek is langun he menge nasyun te nehitavù kayi!
JER 50:24 “Ne Babilonia, midlitaǥan ku sikew ne wazè ka meketukew he nelitaǥan ke en. Nezekepan ka su nekigkuntada ka kediey.
JER 50:25 Mibpuwasan ku is teleǥuey te menge gumaan ku ne impeǥawas ku is menge ǥumaan he egemiten ku zutun te kebpeǥazami ku te pauk ku. Siak, is Nengazen he MEGBEVAYÀ he Mekeǥeǥehem, duen ebeelan ku ziyà te kenikew, he Babilonia.
JER 50:26 “Sikiyu is menge kuntada te menge tig-Babilonia he ebpuun diyà te meziyù he lugar, surung kew ziyà te Babilonia! Puwasi niw is menge budiga kayi. Itambù niw is menge azen he egkaaǥew niw he iring te edtambù kew te trigu. Purungi niw dezeeti is menge tig-Babilonia ne kenè niw en semai.
JER 50:27 Penhimetayi niw is langun he menge sundaru zan. Lepaa niw he iring te menge turiti he vaka. Mekehizuhizu sikandan su neume en is timpu te kedsiluti kandan.
JER 50:28 “Pemineǥa niw is menge etew he nekepelaǥuy puun te Babilonia. Nenudtul zan diyà te Jerusalem ke mibmenumenu te Nengazen he Megbevayè tew is kebelesi zin te Babilonia tenged te mibeelan te menge tig-Babilonia ziyà te baley zin.
JER 50:29 “Ipesurung niw te menge mememanà is Babilonia! Peliǥuwi niw para wazà ebpekepelaǥuy. Belesi niw sikandin sumalà te mibeelan din. Beeli niw ziyà te kandin is mibeelan din diyà te zuma, su midsukulan din is Nengazen, kes Waǥas he Megbevayà te Israel.
JER 50:30 Umbe, ebpematey is menge vetan-en din he menge maama ziyà te menge zalan, ragkes en is langun he menge sundaru zin.
JER 50:31 “Siak, is Nengazen he MEGBEVAYÀ he Mekeǥeǥehem, migkaǥi a te, ‘Kuntada ku sikew he Babilonia he mepelevawen! Neume en is timpu te kedsiluti ku kenikew.
JER 50:32 Sikew is gelbuwen he nasyun utew ka egkezeeti, ne wazà ebpekeuǥup te ked-enew kenikew. Ebinsulan ku is dezekelà he menge inged nu wey is malù dezekelà diyà te peliǥuy kayi.’ ”
JER 50:33 Migkaǥi pa is Nengazen he Mekeǥeǥehem te, “Midaagdaag is menge etew ziyà te Israel wey Juda. Mibihag wey mibpurungan sikandan bentayi wey kenè en meveǥayi te vayàbayà.
JER 50:34 Piru gehemanen a, is Menluluwas dan; Nengazen he Mekeǥeǥehem is ngazan ku. Edlevanan ku sikandan wey meveǥayi te kelinew wey kebpekehimeley is kelibutan, piru egurigawen ku mulà is menge meǥinged diyà te Babilonia.
JER 50:35 “Siak, is Nengazen, migkaǥi a he ebpeǥezaman ku te menge etew ziyà te Babilonia is ispada te kezeetan, te menge upisyal zin, wey uluwanen he menge etew!
JER 50:36 Ibpeǥezaman daan heini te teruen he menge ebpeneuven, ne ebuneǥen sikandan. Wey ziyà daan te menge sundaru zan, ne egkengeheratan dan utew!
JER 50:37 Heini is ispada ibpeǥezaman daan te menge kudè din wey menge kerwahi, wey ziyà te langun he ebpuun te zuma he lugar he kezapig din. Ne edluyahan sikandan iring te vahi! Egkeulaula zaan heini ziyà te menge ketiǥeyunan din, ne ed-eǥawen heini.
JER 50:38 Ne egkemezahan is langun he menge wahig din. Su is Babilonia lugar he mahabet is menge ed-ezapen duen ne netazin is isip te menge etew kayi te mekeharatharat he menge ed-ezapen.
JER 50:39 “Ed-ubpaan dà is Babilonia te leew he menge langgam, dumezaas he menge langgam he henduen be te menge asu wey te menge ekang. Ne kenè en ed-uman ed-ubpà is menge etew zutun taman te taman.
JER 50:40 Iring te midezeetan ku zengan is Sodom wey Gomora, wey is menge inged diyà te peliǥuy kayi, edezeetan ku zaan is Babilonia. Wazè en ed-ubpà dutun. Iyan a, is Nengazen, is migkaǥi kayi.
JER 50:41 “Tengteng kew! Duen menge sundaru he ebpekeuma he ebpemuun diyà te tanà he zizaya. Sevaha he mekeǥeǥehem he nasyun ne mahabet he menge hadì he ebpuun diyà te meziyù he lugar is nengandam te kebpekidtebek te Babilonia.
JER 50:42 Neǥumeenan sikandan te menge panà wey menge vangkew. Mesipala sikandan ne wazè dan hizu. Emun ed-untud sikandan te menge kudè dan ne iring is keǥurub dan te keǥurub te dezekelà he menge vaǥel ziyà te zaǥat. Ebpekeuma sikandan is andam en he edsurung keniyu te menge meǥinged diyà te Babilonia.
JER 50:43 Egkezineg heini te hadì te Babilonia ne egkeewaan sikandin te zesen. Handek wey kesakit te gehinawa is egkeǥezam din egkeiring is kegkerasey zin te kegkerasey te vahi he ebeliliten.
JER 50:44 “Edtik-ew a edsurung diyà te Babilonia he iring a te erimaung he ebpuun te ketelunan diyà te Jordan he edhendiyà te menge kerehidu ziyà te penebtavà. Edsegseǥen ku sikandan ne iyan ku ibpezumala te Babilonia is etew he mibpilì ku. Hentei is iring kediey? Hentei is ebpeǥaruǥaru he edsukul kediey? Hentei is pengulu he ebpekigkuntada kedì?
JER 50:45 Umbe, pemineǥa niw is mibpelenuwan ku te ebaal he idezaat te Babilonia. Minsan is menge anak dan ne ebihaǥen, ne is menge tanè dan edezeetan tenged te mezaat he mibeelan dan.
JER 50:46 Tenged te utew subra he kegkezeeti te Babilonia egkeenluwag is tanà, ne is erang dan ebpekeuma is kegkezineǥa zuen diyà te zuma he menge nasyun.”
JER 51:1 Elin heini migkaǥi te Nengazen bahin te Babilonia: “Ibpesurung ku te ebpendezaat is Babilonia.
JER 51:2 Edsuǥuen ku is menge lumelengyawà te kedsurung wey kedezaat te Babilonia su wey mehimu heini he iring te ukap he idlayap te keramag. Edsurungen dan is Babilonia ziyà te minsan hendei zutun te timpu te kezeetan.
JER 51:3 Kenè dan en ebeǥayan te timpu is menge mememanà diyà te Babilonia te kegamit te menge panè dan wey menge kelasag dan. Ne wazà edsemaan dan he vetan-en he maama. Ebpurungan dan edezeeti is menge sundaru ziyà te Babilonia.
JER 51:4 Egkengepelian sikandan wey ebpekepeyapat is menge lawa zan diyà te menge zalan.
JER 51:5 Su siak, is Nengazen he MEGBEVAYÀ he Mekeǥeǥehem, wey Waǥas he Megbevayà te Israel, wazè ku iselikwey is Israel wey Juda minsan pa te nekeeneb kayi he tanà is kelelalung.
JER 51:6 “Sikiyu is menge tig-Juda wey tig-Israel, ewai niw is Babilonia su wey kew melibriyi! Kenè kew pekimatey tenged dà te salà te menge tig-Babilonia. Timpu en he ebelesan ku sikandan te ereg te mibeelan dan.
JER 51:7 Neiring is Babilonia te vulawan he tasa he migewezan ku he nepenù te vinu. Impeinum ku is menge etew ziyà te menge nasyun kayi te tivuuk he kelibutan, umbe nengelangut sikandan wey mibuneg.
JER 51:8 Egketik-ew egkezeeti is Babilonia! Egkeseeng kew tenged kayi! Bewii niw is menge palì din, su kela ke meulii pa.”
JER 51:9 Migkaǥi is menge Israilihanen he ed-ubpà diyà te, “Mibpeniguduwan dey te ebawì is Babilonia piru kenè en sikandin egkeulian. Hendiyè kiw en, ed-awà kiw en kayi ne ed-ulì kiw ziyà te kenitew he menge lugar. Su nekesungkul en te langit is menge salè din, umbe edsilutan en sikandin te Nengazen.
JER 51:10 Ibpenimales kiw te Nengazen! Gaanggaan kew su edhendiyè kiw te Jerusalem ne edtudtulen tew ziyà is mibeelan te Nengazen he Megbevayè tew.”
JER 51:11 Ebelesan te Nengazen is menge tig-Babilonia su midrundus dan is baley zin. Ibpezezeetan te Nengazen is hadì te Babilonia te hadì diyà te Media su iyan heini tuyù din. Migkeǥiyan te menge edumala sikandan te, “Kemengaa niw is menge panè niw wey iandam niw is menge kelasag niw.
JER 51:12 Ivayew niw is bendirà niw he tuus te kedsurung niw ziyà te Babilonia. Umani niw pa is menge vantey ne ipepelastar sikandan peliǥuy te inged! Ne ibpepurung ibpepengandam para te tebek su timpu en heini he ebeelan te Nengazen is pelanu zin te kedezaat te menge etew ziyà te Babilonia.”
JER 51:13 He Babilonia, utew ka mid-uzar te wahig wey mahabet is ketiǥeyunan nu. Piru neume en is kepengkusan nu; neume en is timpu te kegkezeeti nu.
JER 51:14 Nenangdù is Nengazen he Mekeǥeǥehem diyà te gehinawa zin, he ke sikandin te, “Ed-eneven ku te menge sundaru te menge kuntada nu he iring kezakel te terapan is tanè nu, ne egkulehien kew zan.”
JER 51:15 Midlimbag te Megbevayà is langit wey is kelibutan pinaaǥi te ǥehem din wey ketau zin.
JER 51:16 Pinaaǥi te kebmandù din, edreǥuuk is wahig diyà te langit. Iyan sikandin ebpeǥawas te menge kivel he ebpuun diyà te meziyù he vahin te kelibutan. Ibpekilat din ke ed-uzan, wey ibpepengeramag din te ebpuun diyà te midteǥuan din duen.
JER 51:17 Is menge ed-azap te zuma he menge ed-ezapen, menge paglung wey wazà menge ketau. Egkepeel-elezan dà is menge platiru tenged te menge vineelan dan he menge ed-ezapen, su kenà heini tutuu. Wazà kayi untung.
JER 51:18 Wazè kayi pulus wey telemayen heini. Emun timpu en te kedsilut ne egkezeetan sikandan is langun.
JER 51:19 Piru kenà mulà iring keniyan is Megbevayà ni Jacob. Iyan sikandin mibaal te langun, ragkes en is menge etew he migaked din. Nengazen he Mekeǥeǥehem is ngazan din.
JER 51:20 Migkaǥi is Nengazen te, “Babilonia, iyan ka masu ku wey ǥumaan ku te tebek. Pinaaǥi kenikew edezeetan ku is menge nasyun wey menge ginhedian,
JER 51:21 is menge kudà wey is ebpemen-untud duen, is menge kerwahi wey is menge ebpen-untud duen.
JER 51:22 Edezeetan ku zaan pinaaǥi kenikew is menge maama wey menge vahi, is menge meǥurang wey menge vatà, is menge kenakan wey menge raǥa.
JER 51:23 Ragkes is menge uyaǥen wey is menge ebantey zuen, is menge perevasuk wey menge vaka, is menge pengulu wey menge upisyal edezeetan ku pinaaǥi kenikew.
JER 51:24 “Sikiyu is menge etew ku, ibpeehè ku keniyu is kebelesi ku te Babilonia wey te menge meǥinged kayi he lugar, tenged te langun he mibeelan dan diyà te Jerusalem. Iyan a, is Nengazen, is migkaǥi kayi.
JER 51:25 “Kuntada ku sikew is Babilonia, sikew is migngezanan te Buntud he Ebpendezaat! Midezeetan nu is tivuuk he kelibutan. Egemiten ku is gehem ku te kebpuawa kenikew ne ebinsulan ku sikew.
JER 51:26 Wazè en batu he egkekuwa he ebpuun diyà te kenikew he egkeǥamit te kebpehitindeg te bilding. Egkehimu ka he mekevulungbulung taman te taman. Iyan a, is Nengazen, is migkaǥi kayi.”
JER 51:27 Ivayew niw is bendirà he tuus te kebpekidtebek! Ipezaǥing is menge vudyung diyà te menge nasyun! Ipepengandam niw sikandan para te kedsurung diyà te Babilonia. Suǥùa niw te kedsurung is menge sundaru ziyà te Ararat, Mini, wey Ashkenaz. Pilì kew te pengulu wey peuwit kew te menge kudà he iring kezakel te terapan.
JER 51:28 Ipepengandam niw te kedsurung diyà te Babilonia is menge hadì diyà te Media, duma te menge perezumala wey menge upisyal, wey is menge etew ziyà te langun he menge nasyun he nesakup dan.
JER 51:29 Iring te etew he egkerkeren wey ebpekeerumpasey te kegkesekiti is Babilonia, su ebeelan te Nengazen is pelanu zin he ebpekesuǥat te Babilonia, ne egkehimu heini he mekevulungbulung he lugar su zutun wazè en ed-ubpà.
JER 51:30 Ed-engked en he ebpekidtebek is menge sundaru te Babilonia ne ziyè dan dà te kampu zan. Neewaan dan en te zesen ne egkeiring dan te vahi he meluya. Nevinsulan is menge valey ziyà te Babilonia wey nengezeetan is menge terangka te pultahan te menge inged kayi.
JER 51:31 Ebpekedtutundug is menge menunudtulà te kegkaǥi ziyà te hadì te Babilonia he is tivuuk he inged din, naaǥew en.
JER 51:32 Naaǥew en is menge repasan diyà te wahig. Ne nengevinsulan is menge elesà, ne neteranta is menge sundaru.
JER 51:33 Migkaǥi is Nengazen he Mekeǥeǥehem, he Megbevayà te Israel te, “Is Babilonia iring te trigu he meǥaan en egkeuma is timpu te kedreǥuna kandin.”
JER 51:34 Migkaǥi is menge tig-Jerusalem te, “Si Hadì Nebucadnezar he hadì te Babilonia iring te deragun he mid-eveleng kenami. Midhantey zin is getek din te menge ketiǥeyunan dey. Mid-ewaan din is inged dey he wazè din midsamà neiring heini te umuy he wazè din taǥù. Midsegseg key zin ne nekedsusuwey key. Berakat he veeli zaan diyà te Babilonia is mibeelan dan diyà te kenami wey te menge anak dey. Berakat he sukuta ziyà te menge meǥinged diyà te Babilonia is subra he kebpesipelahi zan kenami.”
JER 51:36 Umbe, migkaǥi is Nengazen te, “Sikiyu is menge etew ziyà te Jerusalem, edlevanan ku sikiyu, wey ibpenimales ku sikiyu. Ebpemezahan ku is menge wahig wey is menge serebseb diyà te Babilonia.
JER 51:37 Egkevengkag heini he nasyun! Ed-engitan wey edtemayen heini he lugar, ne wazà ed-ubpè kayi gawas te leew he menge asu.
JER 51:38 Is menge tig-Babilonia edhiniǥer he iring te menge erimaung.
JER 51:39 Ne ǥeina te nevitil sikandan, ebpengemuran a para kandan. Edlenguten, edlipayen, wey ibpelipezeng ku sikandan he kenè en egkepukew.
JER 51:40 Ed-uwiten ku sikandan he iring te menge kerehidu wey menge kambing diyà te lepeey.
JER 51:41 Mekahandekhandek is kegkezeeti te Babilonia, kes nasyun he nezeliǥan kayi te tivuuk he kelibutan! Igkelimezangi te menge nasyun is egkehitavù kandin!
JER 51:42 Egkelapew te zezekelà wey edeǥurus he menge vaǥel is Babilonia.
JER 51:43 Egkehimu he mekevulungbulung is menge inged kayi; egkeiring heini te disirtu he memaza he wazè duen ed-ubpà wey minsan edsaǥad.
JER 51:44 Edsilutan ku si Bel is ed-ezapen diyà te Babilonia. Ibpeutè ku kandin is mibpen-eveleng din. Kenè en ebpekeuma is mahabet he menge etew he ebpuun diyà te menge nasyun he ed-azap kandin. Ne egkengetempag is berengbeng te Babilonia.
JER 51:45 “Sikiyu is menge etew ku, pekeziyù kew ziyà te Babilonia! Libriya niw is untung niw mintras wazè ku pa ipeǥezami kandan is pauk ku.
JER 51:46 Piru kenè kew mahandek wey luyahi emun ebpekeuma ziyà te keniyu is menge tudtul vahin te tebek. Su is menge tudtul vahin te kegira te menge hadì egketudtul kada tuig.
JER 51:47 Egkeuma is timpu he edsilutan ku is menge ed-ezapen diyà te Babilonia. Egkepurung egkeeled-eled is tivuuk he Babilonia, wey ebpemekesesavuk is ebpemematey he menge etew kayi.
JER 51:48 Ne ebpengulahì te kegkelipey is langit wey is kelibutan, wey is langun he netaǥù kayi, su edsurungen is Babilonia te menge ebpendezaat he ebpuun diyà te zizaya. Iyan a, is Nengazen, is migkaǥi kayi.”
JER 51:49 “Kinahanglan he edezeetan is Babilonia tenged te kebpenhimetayi zin te menge Israilihanen wey zuma pa he menge etew kayi te kelibutan.”
JER 51:50 “Sikiyu is nekelikey te kemetayen, awè kew en keniyan te Babilonia. Kenè kew en ubpà keniyan! Tentenuzi niw is Nengazen wey is Jerusalem minsan nekeziyù kew.
JER 51:51 Ke sikiyu te, ‘Neeled key. Mid-insultuwan key wey mibpeel-elezan geina te midremerikan is baley te Nengazen te kenà menge Israilihanen.’
JER 51:52 Piru egkeuma iyan is timpu he edsilutan ku is menge ed-ezapen diyà te Babilonia. Ne is dag-es te menge teǥepalì he menge tig-Babilonia, egkezineg diyà te tivuuk he nasyun dan.
JER 51:53 Minsan mekeuma pa ziyà te langit is berengbeng te Babilonia wey minsan utew pa heini melig-en, duen gihapun edsuǥuen ku te kedezaat kayi.
JER 51:54 Egkezineg is erang te kebpetavang te Babilonia tenged te kegkezeeti kayi.
JER 51:55 Edezeetan ku is Babilonia ne ebpekepereremek heini. Edsurung kayi is menge kuntada he henduen be te edeǥurus he menge vaǥel. Edsagkung is keǥurub te kedsurung dan.
JER 51:56 Ebpekeuma is edezaat te Babilonia ne ebihaǥen is menge sundaru zin, ne egkengevadtì is menge panè dan. Su siak, is Nengazen, iyan Megbevayà he edsilut te menge lalung. Idsilut ku ziyà te Babilonia is silut he ereg kayi.
JER 51:57 Edlenguten ku is menge upisyal te Babilonia, is menge uluwanen he menge etew, menge perezumala, menge peremandar, wey is menge sundaru zan. Ebpekelipezeng dan ne kenè dan en egkepukew. Iyan a, is Hadì, migkaǥi kayi. Nengazen he Mekeǥeǥehem is ngazan ku.”
JER 51:58 Migkaǥi pa is Nengazen he Mekeǥeǥehem te, “Ebengkaǥen is mekepal he verengbeng te Babilonia, ne ebinsulan is metikang he menge pultahan kayi. Is langun he menge hineǥuan te menge etew kayi egkehimu he wazè din pulus su egkevinsulan dà heini.”
JER 51:59 Iyan heini menge lalag he migkaǥi ni Jeremias diyà te ki Seraya te sevaha he lavew he upisyal ni Hadì Zedekia. Si Seraya anak ni Neria wey apù ni Masea. Heini he menge lalag migkaǥi ni Jeremias hein midhendiyà si Seraya te Babilonia duma ki Hadì Zedekia. Ikeepat haazà he tuig te kedhadì ni Zedekia ziyà te Juda.
JER 51:60 Insurat ni Jeremias diyà te linulun he velesahan is langun he kezeetan he edhimuwen diyà te Babilonia, wey is minsan hengkey he egkehitavù diyà te Babilonia.
JER 51:61 Iyan heini migkaǥi ni Jeremias diyà te ki Seraya, “Emun ebpekeuma ka ziyà te Babilonia, besaha nu ziyà te menge etew te mezaǥing he kebasa is ingkesurat kayi te velesahan.
JER 51:62 Ne pengemuyù ka, he ke sikew te, ‘He Nengazen, migkaǥi ka he edezeetan nu heini he lugar, su para kenà heini meubpai te etew wey minsan langgam, ne egkehimu heini he mekevulungbulung te wazà pidtemanan.’
JER 51:63 Ne emun egkepasad nu en te ebasa heini, ihiket nu ziyà te vatu ne itimbag nu ziyà te Wahig he Eufrates.
JER 51:64 Ne kaǥi ka te, ‘Iring keniyan is egkeulaula te Babilonia–idlegdang heini ne kenè en ebpekelepew tenged te kedezeeti kayi te Nengazen. Egkeǥerà is menge etew kayi.’ ” Kayi mepasad is menge lalag ni Jeremias.
JER 52:1 Mibpenuiǥen si Zedekia te 21 he tuig hein nehimu sikandin he hadì. Diyà sikandin med-ubpà te Jerusalem, ne midhadì sikandin seled te 11 he tuig. Is iney zin iyan si Hamutal he anak ni Jeremias he tig-Libna.
JER 52:2 Mezaat is ulaula zin diyà te etuvangan te Nengazen, iring te mibeelan ni Jehoyakim.
JER 52:3 Umbe, hein neuǥet impaawà te Nengazen diyà te lugar zan is menge tig-Jerusalem wey menge tig-Juda wey mekepekeziyù kandin. Neulaula heini ziyà te kandan tenged te kegkepeuki te Nengazen kandan. Ne nekidsukulà si Zedekia te hadì te Babilonia.
JER 52:4 Umbe, hein ikesiyam he tuig te kedhadì din, dutun te ikesepulù he andew te ikesepulù he vulan, nenurung si Hadì Nebucadnezar he hadì te Babilonia wey is langun he menge sundaru zin diyà te Jerusalem. Migkampu zan diyà te ǥawas te inged ne mibaal zan te menge turi-turi te peliǥuy kayi.
JER 52:5 Midliǥuyan dan haazà is inged taman te ike-11 he tuig te kedhadì ni Zedekia.
JER 52:6 Ne hein ikesiyam he andew te ikeepat he vulan dutun he tuig, utew mepait he vitil zutun te inged, ne wazè en egkekaan te menge etew.
JER 52:7 Dutun he timpu, duen kevahin duen te verengbeng he midrundus te menge tig-Babilonia, umbe nekeisip si Zedekia wey is langun he menge sundaru zin he ebpelaǥuy zan. Piru ǥeina te neliǥuyan te menge tig-Babilonia haazà is inged, ne midteǥazan dan is kebmezukilem. Diyè dan mebayà te pultahan, he ziyà te pid-elangan te zezuwa he verengbeng uvey te pemuleey te hadì. Mibpelaǥuy zan diyà te Araba,
JER 52:8 piru midal-as sikandan te menge sundaru te Babilonia, ne nesaut dan diyà te menge suǥud diyà te Jerico. Midsuwey ki Zedekia is langun he sundaru zin,
JER 52:9 ne nezekepan sikandin. Ne mid-uwit dan sikandin diyà te hadì te Babilonia he ziyà te Ribla, he sakup te tanà he Hamat, ne zutun sikandin hukumi.
JER 52:10 Diyà te Ribla, midhimetayan te hadì te Babilonia is menge anak he maama ni Zedekia ziyà mismu te etuvangan ni Zedekia. Midhimetayan daan is langun he menge upisyal te Juda.
JER 52:11 Impeluǥit dutun te hadì is menge mata ni Zedekia ne migkedinahan sikandin ne mid-uwit diyà te Babilonia. Ne ziyà sikandin pirisuwà taman te minatey.
JER 52:12 Ne hein ikesepulù he andew te ikelima he vulan dutun te ike-19 he tuig te kedhadì ni Nebucadnezar ziyà te Babilonia, midhendiyà te Jerusalem is peremandar te menge vantey te Babilonia he si Nebuzaradan.
JER 52:13 Mibinsulan din is baley te Nengazen, is turuǥan, is langun he menge valey ziyà te Jerusalem, wey is langun he impurtanti he menge bilding.
JER 52:14 Ne iyan sikandin midumala te menge sundaru te Babilonia te kebengkag duen te verengbeng he nekeliǥuy te Jerusalem.
JER 52:15 Ne mibihag din is nesamà he menge etew zutun te inged, ragkes is duma he kinepubriyan he menge etew wey is menge etew zutun he zumezapig te hadì te Babilonia.
JER 52:16 Piru intaǥak din is duma he utew pubri he menge etew su para maatur zan is pemuleey te paras wey zuma he menge vevesukà.
JER 52:17 Mibengkag te menge tig-Babilonia is menge azen diyà te valey te Nengazen he iyan is: brunsi he menge tukud, menge untuzà he para te kedhakut te wahig, wey is dekelà he teleǥuey te wahig he brunsi he migngezanan te Daǥat. Ne mid-uwit dan sikan is menge brunsi ziyà te Babilonia.
JER 52:18 Migkuwa zan daan is menge karà, menge pala, menge penamped te pebilu, menge yehung, menge tasa, wey is duma pa he menge gelemiten he brunsi zutun te Baley te Nengazen.
JER 52:19 Mibpenguwa zaan ni Nebuzaradan is menge visin, menge selevukà te vaǥa, menge yehung, menge diniyun, menge selevukà te sulù, menge tasa, menge yehung he egemiten te kebusbus te pemuhat he inumen, wey is duma pa he menge vulawan wey menge pelata he menge gelemiten.
JER 52:20 Dekelà, umbe hapit kenà egketimbang is menge brunsi he nekuwa zuen te zezuwa he tukud, duen te zekelà he teleǥuey te wahig he egngezanan te Daǥat, duen te 12 he mibpurma he vaka he mibpeuntuzan dutun, wey zuen te menge untuzà he para te kedhakut te wahig. Heini he menge azen mibpeveelan dengan ni Solomon he para zuen te valey te Nengazen.
JER 52:21 Is kelayat kayi te zezuwa he menge tukud ne 27 he ǥiek ne 18 he ǥiek is peliǥuy te kezekelè din. Budsi is diyà te teliwazà kayi, ne menge heepat he vaney is kekepal te brunsi kayi.
JER 52:22 Is keluǥayad te brunsi he in-ulu te kada tukud menge pitu wey tengà he ǥiek. Heini is menge in-ulu mideyzeyanan te henduen be te menge kedina he impedlambid ne midlituwan deyzeyani te mid-iring te menge prutas he pumigranata.
JER 52:23 Is kilid te kada tukud duen 96 he henduen be te menge prutas he pumigranata ne nenggatus is nekeliǥuy zuen te henduen be te menge kedina he impedlambid duen te in-ulu te tukud.
JER 52:24 Mibihag daan ni Nebuzaradan si Seraya he lavew he memumuhat, si Zefanias he ebpeketinundug is kegkelavew zin ki Seraya, wey is tetelu he perevantey te ǥemawan te valey te Nengazen.
JER 52:25 Ne heini pa is neturedu zin dutun te inged he mibihag din: is upisyal te menge sundaru ziyà te Juda, is pitu te perezumala te hadì, is peremandar te menge sundaru he ebpen-ahà te edsunderuwen, wey is 60 he menge meǥinged dutun.
JER 52:26 Miduma sikandan is langun ni Nebuzaradan diyà te hadì te Babilonia he ziyà te Ribla,
JER 52:27 he sakup te Hamat. Ne zutun impehimetayan sikandan duen te hadì. Umbe is menge etew ziyà te Juda nekepekeziyù diyà te tanè dan he menge vihag.
JER 52:28 Iyan heini kezakel te menge Israilihanen he mibihag ni Hadì Nebucadnezar: Hein ikepitu he tuig te kedhadì din, 3,023 he menge etew. Hein ike-18 he tuig te kedhadì din, 832 he menge etew. Hein ike-23 he tuig te kedhadì din, 745 he menge etew. (Si Nebuzaradan he peremandar te menge vantey te hadì is mibihag kandan.) 4,600 langun is menge etew he nevihag.
JER 52:31 Hein ike-37 he tuig te kegkevihag ni Hadì Jehoyakin he hadì te Juda, nehimu he hadì diyà te Babilonia si Evil Merodac. Ne impeǥawas din diyà te pirisuwan si Jehoyakin hein ike-25 he andew te ike-12 he vulan dutun he tuig.
JER 52:32 Mibpurungan din si Jehoyakin, ne impelavew zin te zuma he menge hadì he mibihag daan diyà te Babilonia.
JER 52:33 Umbe, wazè en mebivisti si Jehoyakin te visti te pinirisu, ne puun dutun dumè en sikandin duen te hadì emun egkaan dan.
JER 52:34 Ne kada andew ebeǥayan sikandin duen te hadì te Babilonia te menge kinahanglan din taman te timpu te kebpatey zin.
LAM 1:1 Utew mekevulungbulung is Jerusalem, he zengan mahabet is menge etew kayi. Dengan nevantug heini kayi te tivuuk he kelibutan, iyan, guntaan neiring en te valu he vahi. Dengan iyan heini edhuna he inged, piru ǥuntaan neiring en heini te uripen.
LAM 1:2 Neiring sikandin te vahi he egkeiinek te tivuuk he kezukileman; is menge luhè din ebpenudà diyà te enaping din. Wazà minsan sevaha zuen te menge mibmahal zin he midlangan kandin. Pudu midluib kandin is menge emiǥu zin, ne nehimu sikandan he menge kuntada zin.
LAM 1:3 Impaantus is Juda ne mibihag is menge etew kayi. Diyè en sikandan mekeubpà te zuma he menge nasyun he zutun mereǥen is kebpekesavuk dan. Edel-asen sikandan te menge kuntada zan ne wazè dan egkepeleǥuyan.
LAM 1:4 Is menge zalan pehendiyà te Jerusalem mekeseseeng, su wazè en edhendiyà te ked-azap dutun te netelaan he menge timpu te pista. Mekevulungbulung is langun he pultahan kayi. Edag-es is menge memumuhat kayi, ne is menge raǥa ebpemenlalew. Utew mekeseseeng is nehitavù te Jerusalem.
LAM 1:5 Is menge kuntada zin iyan en nengulu kandin, ne heini sikandan mibmeuswaǥen. Impaantus te Nengazen is Jerusalem tenged te mahabet he menge salè din. Is menge meǥinged kayi mibihag te menge kuntada zin.
LAM 1:6 Naawè en is kekempet te Jerusalem. Is menge pengulu kayi neiring te egkevitil he menge selazeng he ebpen-ahà te egketabtab piru wazè dan egkaahà. Edluyahan en sikandan dutun te ebpeleǥuyan dan is edal-as kandan.
LAM 1:7 Ne ǥuntaan te edlised is Jerusalem wey egketazintazin en, netenuzan din is langun he ketiǥeyunan din dengan. Hein neulug sikandin diyà te gehem te menge kuntada zin, ne wazà midtavang kandin. Midsudì wey mid-engitan sikandin te menge kuntada zin dutun te kegkezeeti zin.
LAM 1:8 Utew zekelà is salà te Jerusalem, umbe nehimu heini he meremerik. Is langun he mibeǥey kandin te zengeg dengan ne edsudì en kandin su neehè dan is kegkelevasi kandin. Edag-es sikandin ne midtembunan din is enaping din tenged te kegkeeled din.
LAM 1:9 Is keremerik din naahà te langun. Wazè din isipa zengan is egkehitavù kandin. Utew sikandin nezeeti, ne wazà midtavang kandin. Umbe migkaǥi sikandin te, “He Nengazen, seǥipaa nu is kegkerasey ku, su nezaag a te kuntada.”
LAM 1:10 Mibpenguwa te kuntada is langun he ketiǥeyunan din. Neehè din he midseled diyà te valey te Nengazen is kenà menge Israilihanen–heini he menge etew, kenà edtuǥutan te Nengazen te kedseled diyà te baley zin.
LAM 1:11 Is menge etew zin, edag-es dutun te kebpen-ehè dan te egkekaan dan. Inliwè dan te keenen is ketiǥeyunan dan su wey meuyag-uyag sikandan. Migkaǥi is Jerusalem te, “He Nengazen, seǥipaa a, su mibpeel-elezan a.”
LAM 1:12 Migkeǥiyan din is menge etew he sumeseǥazà te, “Kenè niw ve ebeliyen heini is nehitavù kedì? Ehè kew ke zuen be egkeehè niw he nerasey iring te kegkerasey ku. Heini he kemeresayan, insilut te Nengazen kayi te kedì dutun te timpu te utew zin kegkepauk.
LAM 1:13 Puun te langit imbulus din is hapuy he henduen be te neketutung te menge tulan ku. Midlitaǥan din is beyeey ku ne neutel a. Midhimu e zin he mekevulungbulung ne midsiguduwan e zin resaya.
LAM 1:14 Mid-amur-amur zin is menge salè ku ne iring te mibeelan din heini he hiket. Inhiket din kedì heini he iyan ingkeǥuyuza kedì diyà te kegkevihag. Iring a te mid-eyuǥuwan. Impemeluya a te Nengazen ne imbeǥey e zin diyà te menge kuntada ku he kenè ku egkegaga.
LAM 1:15 Inselikwey te Nengazen is langun he menge sundaru ku. Midtiǥum sikandin te menge sundaru he edezaat te menge etew ku he vetan-en he menge maama. Is menge meǥinged diyà te Juda, iring dà sikandan te menge paras he midtekutakan te Nengazen.
LAM 1:16 Ne tenged keniyan nemeniǥis is menge luhè ku te kedsineǥew ku. Ne wazà midlangan wey midlig-en kedì. Mekehizuhizu is menge meǥinged kayi su nezaag sikandan te menge kuntada zan.”
LAM 1:17 Mibuyù te tavang is Jerusalem, piru wazà midtavang kandin. Ketau te Nengazen he mehimu he kuntada te menge kevuwazan ni Jacob is menge nasyun diyà te peliǥuy zan. Ne is Jerusalem ed-isipen he meremerik te menge kuntada zan.
LAM 1:18 Migkaǥi is Jerusalem te, “Metazeng is Nengazen; piru wazè ku tumana is suǥù din. Sikiyu is langun he menge etew, pemineg kew, wey tengtengi niw is kegkerasey ku. Mibihag is menge vetan-en ku he menge vahi wey menge maama.
LAM 1:19 Mibuyù a te tavang diyà te menge zumezapig kedì piru midluivan e zan. Nemematey is menge memumuhat ku wey menge perezumala te inged dutun te ebpen-ahà sikandan te egkekaan dan su wey zan pezem meuyag-uyag.
LAM 1:20 “Nengazen, ahàa nu ke sengemenu kezekelà is kegkeseeng ku! Utew heini merasey he henduen be te egkevidtew en is gehinawa ku su geina te nehimu a he mesinupaken kenikew. Duen kebpemenhimatey ziyà te menge zalan ku, ne minsan diyà te seled te valey ne zuen ebpematey.
LAM 1:21 Nezineg te menge etew is kedag-es ku, piru wazà minsan sevaha he midlangan kedì. Nezineg te langun he menge kuntada ku heini is kegkerasey ku, ne ingkelipey zan heini is kedresaya nu kedì. Deyzey pezem ke egkeume en is andew he insaad nu he edsilutan nu sikandan, su wey zan daan meiring kedì.
LAM 1:22 Ahaà nu is mezaat he vaal zan, ne siluti nu sikandan iring te kedsiluti nu kedì tenged te langun he menge salè ku. Kenè en egkeengked is kebpekezag-es ku ne mesakit is gehinawa ku.”
LAM 2:1 Tenged te pauk te Nengazen midtembunan din te kerusirem is Zion. In-awè din is dengeg te dungganen he Israel he henduen be te intimbag din heini puun te langit pehendiyà te tanà. Tenged te kegkepauk din mibey-anan din minsan sikan is baley zin.
LAM 2:2 Wazè en sikandin mehizu hein midezeetan din is langun he menge valey te menge kevuwazan ni Jacob. Tenged te pauk din midwaǥey zin is binerengbeng he menge inged diyà te Juda. Impekevavè din wey mibpeel-elezan din heini he ginhedian wey is menge pengulu kayi.
LAM 2:3 Tenged te utew zin kegkepauk in-awè din is langun he ǥehem te Israel. Wazè din heini tevangi hein midsurung te kuntada. Iring sikandin te hapuy he mid-epur te menge kevuwazan ni Jacob wey is langun diyà te peliǥuy zan.
LAM 2:4 Henduen sikandin te kuntada he mibpesinaru te panè din diyà te menge etew zin. Mibpenhimetayan din is langun he utew mibmahal te menge etew zin. Impeseǥazan din te menge meǥinged diyà te Zion is dekelà he pauk din he henduen be te hapuy.
LAM 2:5 Midezeetan te Nengazen is Israel he iring sikandin te kuntada. Midwaǥey zin is binerengbeng he menge inged kayi te Israel is langun he melig-en he menge vahin kayi. Mid-umanan din pa is kegkeseeng wey sineǥawan diyà te Juda.
LAM 2:6 Midrundus din is baley zin he henduen dà te midrundus he lawig diyà te vevesukà. Ketau zin he melipati te menge etew ziyà te Jerusalem is midtelaan he menge pista wey is menge Andew te Kedhimeley. Tenged te utew zin kegkepauk inselikwey zin is menge hadì wey menge memumuhat.
LAM 2:7 Inselikwey te Nengazen is pemuhatà he zutun sikandin ebpemuhata wey is baley zin. Impewaǥey zin te menge kuntada is menge verengbeng diyà te melig-en he menge vahin te Jerusalem. Nemengulahì heini he menge kuntada ziyà te valey te Nengazen he henduen be te edsilibra zan te pista.
LAM 2:8 Meheǥet is tuyù te Nengazen te kebengkag duen te menge verengbeng he nekeliǥuy te Zion. Mibpurungan din pelenuwi is kebengkag kayi, ne mibeelan din heini. Umbe nengewaǥey is menge pengalang wey menge verengbeng.
LAM 2:9 Netembunan te tanà is menge pultahan te inged. Nengevengkag is menge terangka kayi, su mibpemadti heini te Nengazen. Mibihag is menge hadì wey is dungganen he menge etew te Jerusalem. In-engked en ipenurù is kesuǥuan. Wazè en menge lalag te menge ebpeneuven he ebpuun diyà te Nengazen.
LAM 2:10 Is menge edumala ziyà te Zion nememinuu ziyà te tanà he wazè dan en kekeǥiyen. Mibukbukan dan te eliyavuk is menge ulu zan wey mibivisti sikandan te saku su ibpetuusan dan is kedlalew zan. Ebpekezuzungul te kegkeeled is menge vetan-en he menge vahi ziyà te Jerusalem.
LAM 2:11 Nemenlevag en is menge mata ku tenged te kedtulung ku kedsineǥew. Utew mibmesakit is gehinawa ku. Henduen be te egketevì en is kumeng ku tenged te kegkezeeti te zuma ku he menge meǥinged. Egkengevidtawan diyà te menge zalan te inged is dezekelà en wey menge peririǥè pa he menge vatà.
LAM 2:12 Edluluǥib sikandan is ebuyù te keenen wey inumen diyà te menge iney zan. Egkengevidtawan sikandan diyà te menge zalan te inged iring te menge sundaru he teǥepalì. Ne ednaneynaney sikandan ebpematey is edsekepuwen te menge iney zan.
LAM 2:13 Sikiyu is menge meǥinged diyà te Jerusalem, hengkey is egkekaǥi ku ziyà te keniyu? Hengkey is egkehimu he ebpetug-iringan ku te kemeresayan niw? Is palì niw iring kezalem te zaǥat. Ne hentei is ebpekevawì keniyu?
LAM 2:14 Is menge lalag te ebpemeneuven diyà te keniyu ne kenà tutuu. Wazè din pulus ne ebpeketazin keniyu. Wazè dan ipahayag is menge salè niw he iyan pezem kenè niw igkevihag.
LAM 2:15 Is langun he sumeseǥazà diyà te keniyu ebpakpak, ebpemen-engit wey ebpemengelengkeleng te kedsudì dan kenikew. Ke sikandan te, “Iyan bes heini inged he migngezanan te ‘Kinekempetan’ wey ‘Ebpekelipey kayi te Tivuuk he Kelibutan?’ ”
LAM 2:16 Is langun he kuntada niw edsudì keniyu. Ebpemen-engit sikandan is ebpemekiǥet te menge ngipen dan he ke sikandan te, “Nezèdeetan tew en is Jerusalem! Iyan en heini sikan is andew he midteǥazan tew; ne ǥuntaan neehè tew en is kegketuman din!”
LAM 2:17 Mibeelan te Nengazen is mibpelenuwan din te ebaal. Midtuman din is nekaǥi zin dengan. Wazà sikandin mehizu is edezaat keniyu. Midlipey zin is menge kuntada niw tenged te kegkezeeti niw, ne intuǥut din he ikepahambug dan is kebpekegaga zan.
LAM 2:18 Menge meǥinged te Zion, umawa niw is Nengazen. Ipetudè niw is menge luhè niw iring te wahig he edtuda te maandew wey mezukilem. Kenè kew engked he edsineǥew.
LAM 2:19 Enew kew ke mezukilem ne buyù kew te tavang diyà te Nengazen. Ivuswang niw ziyà te kandin is langun he ziyà te gehinawa niw he iring te ebusbus kew te wahig. Ivayew niw is menge velad niw te kedhangyù para te untung te menge anak niw he egkengevidtawan diyà te menge zalan tenged te kegkevitil.
LAM 2:20 He Nengazen, tengtengi key kenikew. Is-isipa nu ke hentei key is impaantus nu te iring kayi. Tenged te utew kegkevitil, migkaan te menge iney is ed-elimahan dan he menge anak dan. Is menge memumuhat wey menge ebpeneuven mibpenhimetayan diyà te valey nu.
LAM 2:21 Nemekesesavuk diyà te menge zalan is nemematey he menge vatà wey menge meǥurang. Nemematey te tebek is menge vetan-en he menge maama wey menge vahi. Wazà nu en sikandan mehizuwi zutun te kebpenhimetayi nu kandan tenged te kegkepauk nu.
LAM 2:22 Mid-imbita nu is menge kuntada te kedsurung kayi te peliǥuy ku he henduen be te nengimbita ke zà te para te keemuran. Dutun te andew te kebpaahaa nu te pauk nu, wazà nekepelaǥuy etawa neuyag. Mibpenhimetayan te menge kuntada ku is menge anak ku he mid-elimahan ku wey impezekelà.
LAM 3:1 Sevaha a te nekesaǥad te kedsilut te Nengazen tenged te kegkepauk din.
LAM 3:2 Midsegseg e zin diyà te meziyù, ne impehipanew e zin diyà te merusirem ne kenà diyà te merayag.
LAM 3:3 Midsilutan e zin he wazè e zin en engkezi maandew wey mezukilem.
LAM 3:4 Impemeluya zin is tivuuk he lawa ku, ne mibadtì din is menge tulan ku.
LAM 3:5 Midsurung e zin ne utew subra is kegkeseeng ku wey kegkerasey ku.
LAM 3:6 Impeubpè e zin diyà te kerusireman iring duen te neuǥet en he minatey.
LAM 3:7 Impekedinahan e zin wey midliǥuy e zin te verengbeng su wey a kenà mekepelaǥuy.
LAM 3:8 Minsan ebuyù e pa te tavang ne kenè e zin ebpemineǥen.
LAM 3:9 Mid-elangan din te intambù he menge vatu is beyeey ku, ne impevulvulegkù din is ebeyaan ku.
LAM 3:10 Iring sikandin te bir etawa erimaung he mid-ayan su edawi kedì.
LAM 3:11 Miguyud e zin pehendiyà te meziyù te zalan, ne mibpengiitan e zin ne human e zin ewai.
LAM 3:12 Midhingat din is panè din ne impesinaru zin kayi te kedì.
LAM 3:13 Midpanè e zin ne midlembasan is pusung ku.
LAM 3:14 Nehimu a he egkeengitan te zuma ku he menge meǥinged. Edsudien e zan seled te tivuuk he andew pinaaǥi te kanta.
LAM 3:15 Pudu zà mepait he kemeresayan is imbeǥey zin kediey.
LAM 3:16 Nengesepù is menge ngipen ku su impesepèsepè din kedì is pantad, ne impevudseng e zin diyà te tanà.
LAM 3:17 In-awè din kayi te kedì is meupiya he kebpekesavuk, ne wazè ku en meseǥazi is keuswagan.
LAM 3:18 Naawè en is dengeg ku wey is langun he ebperetengen ku ziyà te Nengazen.
LAM 3:19 Emun ed-is-isipen ku is kemeresayan ku wey kegketazintazin ku ne utew heini maitpait he kebpekesavuk.
LAM 3:20 Emun layun ku heini ed-is-isipa ne egkaawà is kezasig ku.
LAM 3:21 Piru edlikù is perateng ku emun iyan ku egketenuzan
LAM 3:22 he is kebmahal wey hizu te Nengazen ne wazà pidtemanan. Umbe wazè kiw zed mepurung mezeeti.
LAM 3:23 Metinumanen iyan is Nengazen. Ibpeehè din is hizu zin kada andew.
LAM 3:24 Nekekaǥi a ziyà te ǥehinawa ku te, “Is Nengazen iyan utew zekelà kayi te kediey, umbe ebperateng a kandin.”
LAM 3:25 Ebpurungan te Nengazen is menge ebperateng wey edangep diyà te kandin.
LAM 3:26 Meupiya ke edtaǥad ki he mepelevayen te kedlibri te Nengazen kenita.
LAM 3:27 Meupiya para te sevaha he etew is kebpemansu zutun te vetan-en pa sikandin.
LAM 3:28 Emun ebmensuwen ki te Nengazen, kinahanglan he ebpinuu ki he sebsevaha ta ne ebpurung ki egngunùngunù.
LAM 3:29 Ibpekevavè ta is keugelingen ta ziyà te etuvangan te Nengazen ne kenè ta id-awà is perateng ta.
LAM 3:30 Emun duen edtabpi kenikew, ne itaan nu is enaping nu. Ne zewata nu is ked-insultuwi kenikew te menge kuntada nu.
LAM 3:31 Su is Nengazen ne kenà taman te taman is kedselikwaya zin kenitew.
LAM 3:32 Minsan ebeǥey sikandin te kelised, ibpeehè din gihapun is hizu zin tenged te kezekelà te kebmahal zin he wazà pidtemanan.
LAM 3:33 Su kenè din igkelipey is kebpaantus wey kedrasey kenitew.
LAM 3:34 Kenà egkesuat is Utew Lavew he Megbevayà emun edèdaaǥen is menge pirisu,
LAM 3:35 etawa kenà ebeliyen is ketenged te etew.
LAM 3:36 Kenà daan egkesuatan te Nengazen he edtuisen is hustu he kukuman diyà te hukmanan. Neehè din heini is langun.
LAM 3:37 Wazà minsan hengkey he egkehitavù he wazà ituǥut te Nengazen.
LAM 3:38 Kenè be is Utew Lavew he Megbevayà iyan ebayàbayà te kegkehitevua te mezaat etawa meupiya he hitavù?
LAM 3:39 Ne maan is edriklamu ki emun edsilutan ki tenged te menge salè ta?
LAM 3:40 Ereg he edsusiyen ta is betasan ta ne edlikù ki ziyà te Nengazen.
LAM 3:41 Ed-ebriyan ta is gehinawa ta ne ibayew ta is menge velad ta ziyà te Megbevayà diyà te langit he kesikita te,
LAM 3:42 “Nekesalà key wey nekidsukulà key kenikew, Nengazen, ne wazè key kenikew peseyluwa.
LAM 3:43 Nepauk ka ne midal-as key kenikew ne mibpenhimetayan key kenikew he wazè key en kenikew mehizuwi.
LAM 3:44 Midtambun ka te ǥapun, su wey nu kenà mezineg is pengemuyù dey.
LAM 3:45 Midhimu key kenikew he iring te vesura is ked-ahaa zuen te menge etew ziyà te zuma he menge nasyun.
LAM 3:46 Midsudì key te langun he menge kuntada zey.
LAM 3:47 Nekaantus key te kegkahandek, bangkit, kepirdiyan, wey kezeetan.”
LAM 3:48 Midtudà is menge luhè ku tenged te kegkezeeti te zuma ku he menge meǥinged.
LAM 3:49 Ebpedayun edtudà is luhè ku
LAM 3:50 taman te edseǥipaan kiw te Nengazen he ebpuun te langit.
LAM 3:51 Inmesakit te gehinawa ku is nehitavù te menge vahi ziyà te inged dey.
LAM 3:52 Neiring a te tagbis he midal-as te menge kuntada ku minsan wazè ku neveelan he salà diyà te kandan.
LAM 3:53 Tinguhè dan is kedhimatey kedì pinaaǥi te ked-uluǥa zan kedì diyà te vudsi wey kebpenulenga zan kedì te vatu.
LAM 3:54 Henduen be te egkelened a ziyà te wahig, ne kunaan ku ke ebpatey ad.
LAM 3:55 Puun te kinezizeleman te vudsi nengumew a kenikew, Nengazen.
LAM 3:56 Mibpemineg nu is kebpehizuhizu ku wey kebuyù ku te tavang.
LAM 3:57 Nekeuma ka hein mid-umew ku sikew, ne migkaǥi ka te kenà a mahandek.
LAM 3:58 Nengazen, midtevangan a kenikew te kasu ku ne midlibri nu is untung ku.
LAM 3:59 Neehè nu Nengazen, is mezaat he mibeelan te menge kuntada ku kayi te kediey, umbe beǥayi a te hustu he kukuman.
LAM 3:60 Netuenan nu ke sengemenu is kebelesi zan kedì wey is langun he pelanu zan he idezaat kedì.
LAM 3:61 He Nengazen, nezineg nu is ked-insultuwi zan kedì. Netuenan nu is langun he pelanu zan he idezaat kedì–
LAM 3:62 ebpelelaǥè dan wey ebpelanu zan te mezaat kayi te kedì seled te tivuuk he andew.
LAM 3:63 Ahàa nu sikandan! Edsudien e zan pinaaǥi te kanta, ebpinuu man sikandan etawa edhitindeg.
LAM 3:64 Siluti nu sikandan, Nengazen, sumalà te mibeelan dan.
LAM 3:65 Ipemezesen nu is gehinawa zan ne rewaki nu sikandan.
LAM 3:66 Del-asa nu sikandan wey dezeeti tenged te pauk nu su wey zan egkaawà kayi te kelibutan.
LAM 4:1 Is menge meǥinged diyà te Zion neiring te lunsey he vulawan he midheva etawa mahalen he menge vatu he nekepeyapat diyà te menge zalan. Iring sikandan dengan te utew mahal he vulawan, piru ǥuntaan neiring dà sikandan te menge diniyun he mibeelan dà te mendiziyun.
LAM 4:3 Minsan is leew he menge asu ebpesusu te menge anak dan, piru is menge etew ku mulà, ne ebey-anan dan is menge anak dan iring te tagbis he ustrits he ebey-anan dan dà is menge impis dan diyà te meinit he pantad te disirtu.
LAM 4:4 Tenged te kegkemezahi te dezeisey pa he menge anak dan ebpekezeket en diyà te pelak dan is menge zilè dan. Mibuyù is menge mezekdekelè en he menge vatà te keenen, piru wazà mibeǥey kandan.
LAM 4:5 Is menge etew he metaam dengan is keenen dan, ne ǥuntaan ebuyù dà te keenen te menge etew ziyà te zalan. Sikan is iyan en indekelè din is kesesepian, ne ǥuntaan ebpengarkar te keenen diyà te besurahan.
LAM 4:6 Is insilut diyà te zuma ku he menge meǥinged, ne subra pa te insilut diyà te menge tig-Sodom he midtik-ew zèdeeti te Megbevayà he wazà neketevang kandan.
LAM 4:7 Dengan, is menge pengulu te Jerusalem, meupiya is kedlelawa zan, melig-en, metilak is kedlulundis dan iring te ayis, meputì iring te gatas, wey dungganen iring te mahalen he menge vatu.
LAM 4:8 Piru ǥuntaan edhuna pa sikandan he meitem te vurit, ne kenè en sikandan egkekilala. Henduen be sikandan te menge tulan dà he netenges te lundis, wey henduen be te neǥangu he kayu.
LAM 4:9 Meupiya pa is iyan ibpatey zan is tebek kenà duen te iyan ibpatey zan is kegkevitil. Ednaneynaney sikandan ebpematey te vitil su wazè dan egkekaan.
LAM 4:10 Kebpekeuma te kezeetan diyà te zuma ku he menge meǥinged, minsan sikan is meelima he menge iney edhilutuen dan is keugelingen dan he menge anak su egkeenen dan tenged te utew zan kegkevitil.
LAM 4:11 Impeǥezaman te Nengazen is tivuuk he pauk din diyà te Zion. Umbe mibinsulan din heini, minsan is menge pundasyun kayi.
LAM 4:12 Kunaan te menge hadì te tivuuk he kelibutan wey is menge etew zan ke kenà ebpekeseled is menge kuntada ziyà te menge pultahan te Jerusalem.
LAM 4:13 Piru nehitavù heini tenged te menge salà te menge ebpeneuven kandan wey te menge memumuhat dan, he ebpenhimatey te menge etew he kenà ereg he edhimetayan.
LAM 4:14 Ne ǥuntaan, iring sikandan te menge lakap he ebpemenamsam diyà te menge zalan. Nezekiyan te lengesa is menge visti zan, umbe wazè en egkeluvus he egawed kandan.
LAM 4:15 Ebensaǥan sikandan te menge etew te, “Pekeziyù kew, su meremerik kew! Kenè key keniyu semsama.” Umbe mibpekeziyù sikandan ne minsan hendei zà he nasyun is nepeveyaan dan; piru wazà midawat kandan.
LAM 4:16 Iyan mismu is Nengazen mibpeyapat kandan; wazè en sikandan seǥipaa te Nengazen. Wazè en tehuza is menge memumuhat wey menge perezumala.
LAM 4:17 Ebmerusirem en is ked-ehè dey te kedtaǥad te tavang te kezapig dey he menge nasyun, piru wazà sikandan medtavang kenami. Ebantey key ziyà te menge turi zey te kebpekeuma te ebpuun diyà te nasyun he kenà daan ebpekelibri kenami.
LAM 4:18 Mibentayan te menge kuntada zey is menge langkad dey. Kenè key ebpekehipanew ziyà te menge zalan. Hapit en egkeuma is ketepusan dey. Egkevilang dà is menge andew zey.
LAM 4:19 Meǥaan pa te menderaǥit is menge kuntada zey he edal-as kenami. Edel-asen key zan taman te menge vuvungan. Ne minsan diyè key te sibsivayan ne zutun daan sikandan is edtaǥad he ed-etaki kenami.
LAM 4:20 Nezekepan dan is hadì dey he mibpilì te Nengazen, he iyan pezem midseriǥan dey he ebpengalang kenami te kedezaat te kuntada zey he menge nasyun.
LAM 4:21 Sigi, lipey kew wey medlipeylipey, sikiyu is menge etew ziyà te Edom he ebpemen-ubpà diyà te tanà he Uz. Piru ibpeinum daan keniyu is tasa he midteǥuan te silut te Nengazen, ne egkelangut kew wey egkelevasan.
LAM 4:22 Sikiyu is menge meǥinged diyà te Zion, egketapus en is kedsiluti keniyu. Hapit kew en ibpeulì te Nengazen puun te kegkevihag. Piru sikiyu is menge etew ziyà te Edom edsilutan kew te Nengazen tenged te menge salè niw ne ibpahayag din is kelelalung niw.
LAM 5:1 He Nengazen, is-isipa nu ke hengkey is nehitavù kenami. Ahàa nu is nepengkusan dey he kegkepeel-elezi kenami.
LAM 5:2 Is menge tanè dey wey is menge valey zey, migkuwa te menge lumelengyawà.
LAM 5:3 Nengeilu key, ne nengevalu is menge iney zey.
LAM 5:4 Kinahanglan pa he ebpemesahan dey is wahig he ed-inumen dey wey is kayu he idtavun dey.
LAM 5:5 Impeterebahu key he iring te menge uyaǥen he mid-eyuǥuwan. Ne kenè key en ibpehimeley.
LAM 5:6 Mibpesakup key te menge tig-Ehipto wey menge tig-Asiria su para lang mekekaan key.
LAM 5:7 Mibaal te salà is menge kepuun dey he nemematey en guntaan, ne iyan key nerasey tenged te salè dan.
LAM 5:8 Menge uripen is midumala kenami ne wazà ebpekepeǥawas kenami puun te ǥehem dan.
LAM 5:9 Dutun te kebpen-ehè dey te keenen nemiligru key te ermadu he menge etew ziyà te sibsivayan.
LAM 5:10 Edetengen key tenged te subra he kegkevitil, ne is menge lawa zey henduen be te keinit te rapug is keinit din.
LAM 5:11 Mibpenlayug is menge esawa zey wey menge anak dey he menge vahi ziyà te Zion wey is diyà te menge inged diyà te Juda.
LAM 5:12 Imbitey pinaaǥi te menge velad dan is menge pengulu zey, ne wazè en tehuza is menge meǥurang dey.
LAM 5:13 Is menge vetan-en dey he menge maama mibpeǥes ipepenggaling he henduen be te menge uripen, ne is menge vatà ebpemekeurambak en te kebpetianga kandan te meveǥat he menge kayu.
LAM 5:14 Is menge meǥurang wazè en mekepinuu ziyà te pultahan te inged te kebeǥey te sambag, ne is betan-en he menge maama wazè en meketukar te menge sunata.
LAM 5:15 Wazè dey en kelipey. Kenè key en ebpekesayew, kekenà, ebpekelalew key zà.
LAM 5:16 Naawè en is dengeg dey. Mekehizuhizu key su geina te nekesalà key.
LAM 5:17 Tenged kayi mibmesakit is gehinawa zey ne mibmerusirem is ked-ehè dey.
LAM 5:18 Su mekevulungbulung en is Buvungan he Zion, ne iyan dà edriǥuriǥu kayi is leew he menge asu.
LAM 5:19 He Nengazen, midhadì ka te wazà pidtemanan. Is kedhadì nu ebpedayun minsan keenu.
LAM 5:20 Maan is layun key kenikew edlipati? Maan is neuǥet en is kedselikwaya nu kenami?
LAM 5:21 He Nengazen, ipelikù key ziyà te kenikew ne edlikù key. Ilikù nu zini te kenami is meupiya he kebpekesavuk dey zutun te nehuna he timpu.
LAM 5:22 Subre en be is kegkepeuki nu kenami su maan is inselikwey key en kenikew?
EZE 1:1 Iyan a si Ezekiel, sevaha a he memumuhat ne anak a ni Buzi, wey sevaha a te menge mibihag pehendiyà te Babilonia. Duen andew he zutun diyà a te veyvey te Wahig he Kebar zuma te zuma he menge vinihag, ne neehè ku he nepuwasan is langit ne midumala a te ǥehem te Nengazen. Ne zutun duen impelewasan din kediey. Nehitavù heini hein ikelima he andew te ikeepat he vulan te ike-30 he tuig. Iyan heini timpu te ikelima he tuig te kegkevihaǥa ki Hadì Jehoyakin.
EZE 1:4 Dutun te kedtengteng ku, neehè ku is bagyu he ebpuun diyà te zizaya. Mekepal heini he kivel he egkezumahan te kenà egkeengked he kegkilat he edsiǥa he henduen be te ed-ilak-ilak he mital.
EZE 1:5 Ne ziyà te teliwazà kayi zuen heepat he uuyag he menge linimbag he henduen be te menge etew.
EZE 1:6 Piru is kada sevaha kandan duen din heepat he vuked wey heepat he pakpak. Metulid is menge vuvun dan, piru is menge paa zan he henduen be te menge paa te vaka ne ed-ilak-ilak heini he iring te impesinew he brunsi. Duen belad dan he velad te etew ziyà te zizalem te kada pakpak dan,
EZE 1:9 ne nekedtetemu is menge pakpak dan. Ne ebperedredseey sikandan he edlayang minsan hendei zan ebpevayà ne kenè dan en ebpenlililingey.
EZE 1:10 Ne iyan heini kegkeveeli te zagwey zan: diyà te sineruwan, dagwey te etew; diyà te egkekewanan, dagwey te erimaung; diyà te egkeǥivang, dagwey te tudu he vaka; diyà te iniyuǥan, dagwey te kulaǥu.
EZE 1:11 Is dezuwa he pakpak dan nevekar ne neketemu ziyà te pakpak te avey zan, ne is dezuwa pa he pakpak dan neketambun te lawa zan.
EZE 1:12 Ebpekedreredsà sikandan he edlayang minsan hendei zan ebpevayà ne kenè dan en ebpenlililingey. Ne ke hendei zan ed-uwita te Mulin-ulin ne zutun sikandan ebpevayà.
EZE 1:13 Is ked-ahaa ta kandan henduen be te egkeregreg he vaǥa, wey zuen ebpekepelelaǥuy he ebpekesuǥat te menge lawa zan he henduen be te sulù he utew epekesirang, ne egkilat puun dutun te sulù.
EZE 1:14 Heini is uuyag he menge linimbag edlikùlikù he henduen be te kilat.
EZE 1:15 Dutun te kedtengtengi ku kayi te heepat he uuyag he menge linimbag, duen neehè ku ziyà te zizalem dan he heepat he ligid, tigselimbaha kandan he ligid. Ne heini he menge ligid ne ziyà mekeuntud te tanà.
EZE 1:16 Iyan heini ked-ahaa ta wey kegkeveeli zuen te menge ligid: Ed-ilak-ilak heini iring te mahalen he vatu he krisulitu, ne neked-iiring is kegkeveeli kayi he henduen be te zezuwa he ligid he nekebelevaǥà
EZE 1:17 umbe ebpekehendiyà heini wey haazà is uuyag he menge linimbag te minsan hendei renged he kenè en kinahanglan he eberiyung.
EZE 1:18 Is pesiziveluyà te kada ligid ne melumpipì ne mekahandekhandek su neeneb te menge mata.
EZE 1:19 Ke hendei ebpevayà haazà is uuyag he menge linimbag ne zutun daan ebpevayà haazà is menge ligid, ne emun egkevitbit puun te tanà haazà is menge linimbag, egkevitvit daan sikan is menge ligid.
EZE 1:20 Is mulin-ulin duen te uuyag he menge linimbag, dutun metaǥù te menge ligid. Umbe ke hendei ebpevayà haazà is mulin-ulin ne zutun daan ebpevayà haazà is uuyag he menge linimbag wey kes menge ligid.
EZE 1:21 Ke hendei ebpevayà haazà is uuyag he menge linimbag, ne eduma zaan sikan is menge ligid, ne emun ebpundu sikandan, ne ebpundu zaan sikan is menge ligid. Ne emun egkevitbit sikandan puun te tanà, egkevitbit daan sikan is menge ligid, su is mulin-ulin dan, dutun man te menge ligid.
EZE 1:22 Ne ziyà te zivavew te menge ulu zutun te uuyag he menge linimbag duen henduen be te langit he kristal he ed-ilak-ilak, ne egkein-inuwan heini he edtengtengan.
EZE 1:23 Ne ziyà te zizalem kayi nevekar is dezuwa he pakpak te kada sevaha zuen te uuyag he menge linimbag, ne neketemu heini ziyà te pakpak te avey zin. Ne is dezuwa pa he pakpak dan neketambun te lawa zan.
EZE 1:24 Ne emun edlayang haazà is uuyag he menge linimbag, egkezineg ku is keǥurub te menge pakpak dan, he henduen be te selenuhug, wey zeǥurus te meseleg he wahig, wey iring te laǥeng te Mekeǥeǥehem he Megbevayà, wey henduen be te keǥurub te mahabet he menge sundaru. Ne emun ebpundu sikandan kenè dan ebekaren is menge pakpak dan.
EZE 1:25 Ne zutun te wazà mevekar is menge pakpak dan, duen laǥeng he ebpuun diyà te zivavew zuen te neketambun kandan.
EZE 1:26 Ne zuen dutun henduen be te pinuuwà te hadì he iyan mibeelan is menge vatu he sepiru, ne zuen mibpinuu kayi he henduen be te etew.
EZE 1:27 Puun te hawak din pehendiyà te zivavew, ne henduen sikandin te ed-ilak-ilak he mital he nevaǥa. Ne puun te hawak din pehendiyà te zizalem, ne henduen sikandin te edriyubriyub he hapuy, ne neliǥuy sikandin te kerayag he utew ebpekesirang.
EZE 1:28 Is kerayag diyà te peliǥuy zin iring te velugtu emun edtikdew is uzan. Iring dutun is mekeǥeǥehem he kebpekiduma te Nengazen. Ne te kegkahaa ku zutun midlangkeb a ne zuen nezineg ku he nekidlalag kedì.
EZE 2:1 Migkaǥi is laǥeng kayi te kedì te, “Sikew is etew, hitindeg ka su zuen ku egkeǥiyen kenikew.”
EZE 2:2 Dutun te kebpekidlalag din kedì, mibpurungan a ulini te Mulin-ulin ne impehitindeg e zin. Mibpemineg ku is laǥeng he ebpekidlalag kedì.
EZE 2:3 Ke sikandin te, “Sikew is etew, edsuǥuen ku sikew ziyà te menge etew te Israel, he iyan kes nasyun he mesinupaken kediey. Is menge kepuun dan midsupak kedì dengan, ne taman en guntaan is kedsupaka zan kediey.
EZE 2:4 Utew sikandan midtaman he mesinupaken. Iyan a, is Nengazen he MEGBEVAYÀ midsuǥù kenikew ziyà te kandan te kegkaǥi kandan te menge lalag ku he para kandan.
EZE 2:5 Mebpemineg dan etawa kenà su menge mesinupaken man sikandan, ne ereg he egketuenan dan he zuen ebpeneuven he zuma zan.
EZE 2:6 Ne sikew is etew, ne kenè ka mahandek. Kenè ka mahandek minsan mesakit is ebpengeǥiyen dan iring te zuǥi etawa kineǥatan te venayew. Kenè ka mahandek emun edhulgaan ke zan, su netuenan nu en he mesinupaken sikandan he menge etew.
EZE 2:7 Keǥiya nu is menge lalag ku ziyà te kandan, mebpemineg heini is menge mesinupaken etawa kenà.
EZE 2:8 “Piru sikew is etew, pemineǥa nu is egkeǥiyen ku ziyan te kenikew. Ne kenà a kenikew supaka iring kandan. Ginganga ka ne keena nu is ibeǥey ku kenikew.”
EZE 2:9 Ne neehè ku is belad he eduwal kedì te linulun he velesahan.
EZE 2:10 Mibekar zin heini ziyà te etuvangan ku, ne zuen surat kayi ziyà te pesiziveluyà, he menge lalag para te kedlalew wey kebpenhulùhulù.
EZE 3:1 Ne migkaǥi haazà is laǥeng kayi te kediey te, “Sikew is etew, keena nu heini is linulun he velesahan, ne ǥenat ka, ne keǥiyi nu is menge etew te Israel.”
EZE 3:2 Umbe, miginganga a, ne impekaan din kedì haazà is linulun he velesahan.
EZE 3:3 Migkeǥiyan e zin te, “Sigi, keena nu heeyan taman te egkahantey ka.” Ne hein migkaan ku haazà, ne iring heini keemis te teneb.
EZE 3:4 Ne migkeǥiyan e zin te, “Sikew is etew, genat kad pehendiyà te menge etew te Israel ne keǥiya nu is menge lalag ku ziyà te kandan.
EZE 3:5 Wazè ku sikew suǥua ziyà te menge etew he selakew is kineǥiyan dan wey mereǥen he edsevuten, kekenà, diyà te menge etew te Israel.
EZE 3:6 Su emun diyè ku sikew edsuǥua te menge etew he selakew is kandan he kineǥiyan he kenè nu egkesavut, ne kenà duwazuwa he ebpemineǥen ke zan.
EZE 3:7 Piru is menge etew te Israel, kenè dan ebpemineg kenikew, su kenè dan egkesuat he ebpemineg kedì. Pudu sikandan midtaman he mesinupaken wey kenà ebpezumazuma.
EZE 3:8 Piru edhimuwen ku he mezesen is kenikew he ǥehinawa iring kandan,
EZE 3:9 iring kezesen te lintikan he vatu. Umbe kenè nu sikandan ikahandek su netuenan nu man he menge mesinupaken sikandan.”
EZE 3:10 Mid-uman pa sikandin megkaǥi kayi te kedì te, “Sikew is etew, purung ka pemineg wey hemeni nu ziyà te ǥehinawa nu is langun he egkeǥiyen ku ziyan te kenikew.
EZE 3:11 Guntaan, hendiyè ka te menge emurè nu te inged he zuma nu te menge mibihag, ne keǥiya nu is lalag he ebpuun kayi te kedì, kes Nengazen he MEGBEVAYÀ. Beeli nu heini mebpemineg man sikandan etawa kenà.”
EZE 3:12 Ne imbayew a te Mulin-ulin, ne nezineg ku is edraǥeb he laǥeng he ebpuun diyà te egkeiniyuǥan ku he edhenduen te, “Ereg he edeliǥen is gehem te Nengazen he ziyà te langit!”
EZE 3:13 Ne nezineg ku zaan is daǥing te ebpekebevag-id he menge pakpak duen te uuyag he menge linimbag, wey nezineg ku zaan is edselenuhug he keǥurub duen te menge ligid diyà te avey zan.
EZE 3:14 Imbayew a te Mulin-ulin ne mid-uwit e zin pehendiyà te meziyù. Neǥezam ku kayi te ǥehinawa ku is kegkesekiti wey kegkeepes, piru mibeyveyaan a te Nengazen.
EZE 3:15 Nekeuma a ziyà te Tel Abib, he ziyà te kilid te Wahig he Kebar he zutun ed-ubpà is menge vihag. Ne ziyà a te kandan seled te pitu he andew ne utew mibmezaat is gehinawa ku tenged te nengeehè ku.
EZE 3:16 Kedlavey te pitu he andew, migkaǥi is Nengazen kayi te kedì te,
EZE 3:17 “Sikew is etew, midhimu ku sikew he perevantey te menge etew te Israel. Umbe emun duen egkezineg nu he petizaan he ebpuun kayi te kedì ne segugunè nu keǥiya ziyà te kandan.
EZE 3:18 Emun egkaǥi a ziyà te sevaha he etew he lalung he ebpatey sikandin, piru wazè nu sikandin petizeeni he engkezi zin is mezaat he vaal zin su wey kenè mebpatey, ne ebpatey haazà is lalung he etew tenged te salè din, ne edsukutan ku sikew tenged te kemetayen din.
EZE 3:19 Iyan, emun mibpetizeenan nu sikandin piru wazà gihapun med-engked te mezaat he vaal zin, ebpatey sikandin tenged te salè din, piru wazè nu televaken kayi te kediey.
EZE 3:20 Emun ed-engked he edtinazeng is metazeng he etew su ebaal te salà, ne emun ebey-anan ku en sikandin, ebpatey sikandin. Emun wazè nu sikandin petizeeni, ebpatey sikandin tenged te salè din, ne kenè ku en edtentenuzan is meupiya he menge vaal zin. Piru edsukutan ku sikew tenged te kemetayen din.
EZE 3:21 Iyan, emun mibpetizeenan nu sikandin he kenà mebaal te salà, ne mibpezumazuma kenikew, ne kenà sikandin ebpatey ne wazè nu televaken kayi te kedì.”
EZE 3:22 Kayi te kediey is gehem te Nengazen ne migkeǥiyan e zin te, “Genat ka, hendiyè ka te suǥud su zutun duen egkeǥiyen ku kenikew.”
EZE 3:23 Umbe, midhendiyà a te suǥud, ne neehè ku is kebpenganlag te Nengazen iring te neehè ku ziyà te veyvey te Wahig he Kebar, ne midluhud a.
EZE 3:24 Ne midumala a te Mulin-ulin ne impehitindeg e zin ne migkaǥi te, “Ulì ka ne lelekeb ka ziyà te valey nu!
EZE 3:25 Ne zutun ebekusen ka te pisì su para kenè ka mekepekiduma te menge zuma nu he meǥinged.
EZE 3:26 Ed-emawen ku sikew su wey nu kenà mepetizeeni heini is mesinupaken he menge etew.
EZE 3:27 Piru zutun te timpu he ebpekidlalag a kenikew, ne ebpekekaǥi ke en. Ne keǥiya nu kandan is menge lalag he migkaǥi te Nengazen he MEGBEVAYÀ. Ne ebpemineg is duma kandan ne is duma, kenà, su mesinupaken sikandan he menge etew.”
EZE 4:1 Migkeǥiyan a te Nengazen te, “Guntaan, sikew is etew, kuwa ka te brik, ne isavuk nu ziyà te etuvangan nu, ne druwinga nu zuen is inged he Jerusalem.
EZE 4:2 Ne himuwa nu heini he henduen be te edliǥuyan te menge kuntada. Ne sevuki nu heini te para te kedsurung: menge turi-turi, pemenehikà dutun te verengbeng, idtambù he menge tanà su para mepemenehiki is berengbeng, menge kayu he ibpenbengkag dutun te verengbeng. Ne pelinguti nu heini te menge kampu.
EZE 4:3 Ne kuwa ka te meluag he putew ne iyan heini iverengbeng nu ziyà te mid-elangan niw zuen te inged. Ne ed-etuvang ka zutun te inged is uvag edsurung kayi. Egkehimu heini he petizaan te menge etew te Israel he edsurungen sikandan te menge kuntada zan.
EZE 4:4 “Kegkepasad nu kayi, hizeǥè ka he edtengkilid dapit te givang nu. Simbulu heini he edtiangen nu is salà te menge etew te Israel. Tianga nu is salè dan seled te kahabet te menge andew te kedhizeǥè nu.
EZE 4:5 Is senga andew ebpesavut te senge-tuig. Umbe seled te 390 he andew is kedtianga nu te menge salè dan.
EZE 4:6 Ne kegkepasad dutun, tengkilid ka zapit te kewanan nu ne tianga nu zaan is salà te menge etew te Juda seled te 40 he andew; is senga andew ebpesavut gihapun te senge-tuig.
EZE 4:7 Ne umani nu sineruwi is Jerusalem ne tegnaa nu is mezaat he egkehitavù te Israel he wazà tambun te bekelawan nu.
EZE 4:8 Ebekusen ku sikew para kenè ka mekevelvelikid taman te egkepasad nu te ebpaahà is kedsurunga zuen te inged.
EZE 4:9 “Guntaan kuwa ka te trigu, barli, lisu he menge utanen, belatung, tikap, wey ispilta, ne ipedsesahug nu heini is langun diyà te sevaha he teleǥuey ne veeli nu he supas. Ne iyan heini keena nu seled te 390 he andew he edhizeǥè ka he edtengkilid dapit te ǥivang nu.
EZE 4:10 240 zà he gramu he supas is keena nu kada andew te egketendek he menge uras.
EZE 4:11 Ne tengè dà te litru he wahig is inuma nu kada andew te egketendek he menge uras.
EZE 4:12 Lutua nu is supas kada andew zutun te edtengteng is menge etew. Lutua nu heini iring te kedhilutù te supas he barli. Iyan nu itavun is egkeǥangu he tai te etew, ne keena nu is supas.
EZE 4:13 Su iring daan kayi is egkehitavù diyà te menge etew te Israel, egkaan sikandan diyà te menge lugar te ebpekevihag kandan te menge keenen he mid-isip he meremerik.”
EZE 4:14 Ne migkaǥi a te, “He Nengazen he MEGBEVAYÀ, netuenan nu he wazè ku remeriki is keugelingen ku puun te vatè e pa taman en guntaan. Wazà a keenu mekekaan te uyaǥen he minatey etawa midhimetayan te sengelelanggam. Wazè e zaan keenu mekekaan te langgam he mid-isip he meremerik.”
EZE 4:15 Midtavak is Nengazen te, “Emun iyan heeyan tai zà te vaka is itavun nu he ilis te tai te etew.”
EZE 4:16 Migkaǥi pa is Nengazen te, “Sikew is etew, egkeǥiyen ku kenikew he edhimuwen ku he zeisey zà is egkekaan diyà te Jerusalem. Edtekesen dà te menge meǥinged diyà te Jerusalem is keenen dan wey wahig he egkeinum dan tenged te egkaamuy-amuy zà heini. Egkaan sikandan wey ed-inum duma is kegkeliveg tenged te egkeamuy-amuy is egkekaan dan wey ed-inumen dan. Ebpetengtengtengè dan he egkengeheratan, ne egkenaneynaney sikandan ebpematey tenged te salè dan.”
EZE 5:1 Migkeǥiyan a te Nengazen te, “Sikew is etew, kuwa ka te meǥarang he ispada ne ǥemita nu heini he kiskis te ulu nu wey sumpè nu. Ne timbanga nu is bulvul nu wey sumpè nu ne vehina nu te tetelu he vahin.
EZE 5:2 Isavuk nu is egkehuna he vahin diyà te brik he midruwingan te Jerusalem, ne vinsuli nu heini ziyà te teliwazà te inged, emun egkepasad nu en te ebpaahà is kedliǥuyi zuen te inged. Isavuk nu is senge vahin diyà te peliǥuy te inged, ne penempeza nu heini zuen te ispada nu. Is bahin he egkesamà ne isimburè nu, su ibpeyapat ku is menge etew ku pinaaǥi te ispada.
EZE 5:3 Ne samè ka te zeisey he vulvul ne tengesa nu te visti nu.
EZE 5:4 Terini nu heini te egkepipira he vuuk ne vinsuli nu. Ne ebpuun kayi edelandap is hapuy ne egkevinsulan is tivuuk he Israel.
EZE 5:5 “Iyan a, is Nengazen he MEGBEVAYÀ, migkaǥi te iyan heeyan egkeulaula ziyà te Jerusalem, kes inged he midhimu ku he utew impurtanti he lugar kayi te kelibutan.
EZE 5:6 Piru midrapas din is menge suǥù ku, ne midsubra pa is kandin he kelelalung te kelelalung te zuma he menge nasyun diyà te peliǥuy zin. Inselikwey zin is menge suǥù ku wey menge sulunuzen.
EZE 5:7 Umbe siak, is Nengazen he MEGBEVAYÀ, migkaǥi te: Sikiyu is menge tig-Jerusalem, edhuna pa is keniyu he kelelalung te kelelalung te menge etew ziyà te menge nasyun he nekeliǥuy keniyu. Wazè niw zaan tumana is menge suǥù ku wey menge sulunuzen.
EZE 5:8 Umbe siak, is Nengazen he MEGBEVAYÀ, iyan a ebpekigkuntada keniyu. Edsilutan ku sikiyu te silut he egkaahà te menge etew ziyà te menge nasyun.
EZE 5:9 Tenged te utew mezaat he menge vaal niw, ebeelan ku keniyu is wazè ku pa keenu meveeli ne kenè ku en ed-umanan te ebaal.
EZE 5:10 Egkeenen te menge ǥinikanan is menge anak dan, ne egkeenen te menge anak is menge ǥinikanan dan. Edsilutan ku iyan sikiyu, ne is egkesamà keniyu ibpeyapat ku kayi te tivuuk he kelibutan.
EZE 5:11 Iyan a, kes uuyag he Nengazen he MEGBEVAYÀ, ebpenangdù a he edezeetan ku sikiyu duma is kenà kegkehizu su midremerikan niw is baley ku pinaaǥi te ked-azap niw te zuma he menge ed-ezapen wey kebaal niw te utew mezaat he menge vaal.
EZE 5:12 Ebehinen ku sikiyu te tetelu he vahin. Is egkehuna he vahin ebpematey keniyan te inged pinaaǥi te vitil wey menge zaru. Is ikezuwa he vahin ebpematey pinaaǥi te ispada ziyà te ǥawas keniyan te inged. Ne is iketelu he vahin ibpeyapat ku kayi te tivuuk he kelibutan ne ibpelaus ku is kedlisliseza ku kandan.
EZE 5:13 “Pinaaǥi keniyan igkevuswang ku is pauk ku kandan, ne igkepeǥezaman ku is rerangit ku para mevehew is utew ku kegkepauk.
EZE 5:14 Ebengkaǥen ku is inged niw ne ebpeel-elezan ku sikiyu ziyà te menge nasyun he nekeelingkus keniyu wey te menge sumeseǥàzà kayi te inged niw.
EZE 5:15 Ed-un-undahan kew, edsudien kew, wey igkelimezangi kew te menge etew ziyà te menge nasyun he nekeelingkus keniyu. Egkehimu kew he petizaan para kandan dutun te timpu te kedsiluti ku keniyu tenged te utew ku kegkepauk. Iyan a, is Nengazen, is migkaǥi kayi.
EZE 5:16 Ebpeeǥiyan ku sikiyu te vitil he iring te panà he edezaat keniyu. Ed-iseg-iseg is kepait dutun he vitil taman te wazè niw en egkekaan.
EZE 5:17 Gawas te vitil edsuǥuen ku zaan diyà te keniyu is dumezaas he menge langgam ne ebpenhimetayan dan is menge anak niw. Ebpematey kew zaan pinaaǥi te menge zaru wey tebek. Iyan a, is Nengazen, is migkaǥi kayi.”
EZE 6:1 Migkaǥi is Nengazen kayi te kedì te,
EZE 6:2 “Sikew is etew, sinaru ka ziyà te menge vuvungan te Israel ne rewaki nu heini:
EZE 6:3 He menge vuvungan te Israel, menge zal-ug wey menge suǥud, pemineǥa niw is egkeǥiyen te Nengazen he MEGBEVAYÀ: Ebpeeǥiyan ku sikiyu te tebek, ne ebpemengkaǥen ku is menge simbahan niw ziyà te metikang he menge lugar.
EZE 6:4 Egkengevengkag is menge pemuhatè niw ragkes en is menge pemuhatà he edtutungan te menge veyewà, ne ebpenhimetayan ku is menge meǥinged diyà te keniyu diyà te etuvangan te menge ed-ezapen niw.
EZE 6:5 Ibpelastar ku sikiyu is ebpematey he menge Israilihanen diyà te etuvangan te menge ed-ezapen niw ne ibpeyapat ku is menge tulan niw ziyà te ebpekeliǥuy te menge pemuhatè niw.
EZE 6:6 Is kada inged niw ne edezeetan. Egkengerupet is menge simbahan niw ziyà te metikang he menge lugar, menge ed-ezapen, menge pemuhatà, ragkes is menge pemuhatà he edtutungan te menge veyewà, wey is duma pa he iring kayi te menge vineelan niw.
EZE 6:7 Ebpematey is menge meǥinged kayi, ne egketuenan niw he iyan a Nengazen.
EZE 6:8 “Piru kenè ku sikiyu ed-eminen te edhimatey. Is duma keniyu ebpekepelaǥuy te tebek ne ebpekepeyapat dan diyà te zuma he menge nasyun
EZE 6:9 su egkengevihag sikandan. Dutun egketenuzan e zan, ne egkeseǥipè dan he mibeǥayan e zan bes te seeng tenged te kedluivi zan kedì su iyan dan impelavi is duma he menge ed-ezapen. Edumutan dan is keugelingen dan tenged te mezaat wey utew mahawag he menge vaal zan.
EZE 6:10 Ne egketuenan dan he iyan a Nengazen, ne tinutuuwà is kegkaǥi ku he ibpaaǥi ku ziyà te kandan heini he menge kezeetan.”
EZE 6:11 Ne migkaǥi is Nengazen he MEGBEVAYÀ kayi te kedì te, “Sumbaǥa nu is palad nu, padewpadew ka, ne pemensag ka te, ‘Hanu ve!’ te kebpaahaa nu te kegkeseeng wey kegkepauk nu te menge etew te Israel, tenged te langun he mezaat wey utew mahawag he menge ulaula zan. Iyan heini hinungdan te kebpematey zan pinaaǥi te tebek, bitil, wey zaru.
EZE 6:12 Is diyà te meziyù ebpatey te zaru. Is diyà te uvey ebpatey te tebek. Ne is egkesamà ebpatey te vitil. Pinaaǥi kayi igkevuswang ku is rerangit ku.
EZE 6:13 Ne egketuenan dan he iyan a Nengazen emun is ebpematey he zuma zan he meǥinged ebpekepeyapat en duma te menge ed-ezapen dan diyà te peliǥuy te menge pemuhatè dan, diyà te menge vuvungan, diyà te puntur te menge vuntud, diyà te sihung te zezekelà he menge kayu, wey ziyà te sihung te merapung he menge kayu he ulayan, he zutun dan ebpemuhata te veyewà is langun he menge ed-ezapen dan.
EZE 6:14 Edsilutan ku sikandan minsan hendei zan ed-ubpà, ne egkehimu he mekevulungbulung is tanè dan puun te sibsivayan diyà te zivavà pehendiyà te Dibla ziyà te zizaya, ne zutun egketuenan dan he iyan a Nengazen.”
EZE 7:1 Migkaǥi is Nengazen kayi te kedì te,
EZE 7:2 “Sikew is etew, iyan a is Nengazen he MEGBEVAYÀ migkaǥi ziyà te nasyun he Israel te, ‘Iyan en heini ketepusan te tivuuk he tanà te Israel.
EZE 7:3 Ketepusan niw en, su ibpeǥezaman ku en keniyu is pauk ku. Edhukuman ku sikiyu te sungkad te menge vaal niw. Ebelesan ku sikiyu te langun he utew memezaat he menge ulaula niw.
EZE 7:4 Kenè ku sikiyu egkehizuwan. Edsilutan ku sikiyu tenged te menge vaal niw wey te utew mahawag he menge ulaula niw, su wey niw metueni he iyan a Nengazen.’
EZE 7:5 “Iyan a, is Nengazen he MEGBEVAYÀ, migkaǥi te: Ebpekeuma is ebpekedtutundug he kezeetan.
EZE 7:6 Ne iyan en heini ketepusan! Egketapus kew en,
EZE 7:7 sikiyu is menge meǥinged diyà te tanà te Israel. Iyan en heini andew te kezeetan niw. Hapit en is timpu he egkengeteranta kew. Nepasad en is melipayen he menge andew niw ziyà te menge vuntud.
EZE 7:8 Kenè en egkeuǥet ne ibpeǥezaman ku en keniyu is utew ku kegkepauk. Edhukuman ku sikiyu sumalà te vineelan niw. Ebelesan ku sikiyu tenged te utew mezaat he menge vaal niw.
EZE 7:9 Kenè ku sikiyu egkehizuwan. Edsilutan ku sikiyu sumalà te vineelan niw wey te utew mezaat he menge ulaula niw. Ne zutun egketuenan niw he iyan a, is Nengazen midsilut keniyu.
EZE 7:10 “Guntaan hapit en is andew te kegkezeeti niw! Utew en subra is kezaat niw wey kebpelavew te menge etew.
EZE 7:11 Is utew zan kegkemesipala edlikù diyà te kandan he silut tenged te kelelalung dan. Wazà egkesamà kandan, ne egkahanew is langun he ketiǥeyunan dan.
EZE 7:12 Uya, hapit en is timpu te kedsilut. Kenè en ereg he egkelipey is ebpememasa tenged te nekahangyù dan, wey kenè en ereg he egkeseeng is ebpemelegyà tenged te neǥansi sikandan, su is pauk ku egkeǥezaman te langun.
EZE 7:13 Emun duen pa menge nigusyanti he egkesamà, kenè en sikandan ebpekelikù te nigusyu zan, su is nekaǥi ku he egkehitavù diyà te langun he menge etew te Israel egkehitavù iyan. Is minsan hentei he ebaal te mezaat kenà egkelibri is untung din.
EZE 7:14 Minsan ibpezaǥing dan pa is trumpita su wey mekepengandam is langun te kebpekidtebek, ne wazà eduma ziyà te edtebekan, su is langun ebpekesaǥad te pauk ku.
EZE 7:15 “Is menge etew ziyà te ǥawas te inged, ebpatey te tebek. Ne is kenà ed-awà diyà te inged ebpatey te zaru wey vitil.
EZE 7:16 Ne emun duen ebpekelingkawas te kemetayen he ebpekepelaǥuy ziyà te menge vuvungan, ebpekezag-es iring te merepatik, tenged te menge salè dan.
EZE 7:17 Edluyahan is menge velad dan wey menge vuel zan.
EZE 7:18 Ebivisti sikandan te saku wey egkiskisan dan is menge ulu zan te kebpaahà te kegkeseeng dan. Ne utew sikandan egkahandek wey egkeeled.
EZE 7:19 Ibpenimbag dan is menge pelata zan wey menge vulawan dan diyà te menge zalan he henduen be te meremerik he menge vutang. Kenà heini ebpekelibri kandan dutun te andew he ibpeehè ku is kegkepauk ku. Kenà heini ebpekahantey kandan su iyan heini hinungdan te kebaal zan te salà.
EZE 7:20 Impegalbu zan is mekempet he menge elahas dan, ne migamit dan heini wey zan mekavaal te ledawan te utew mezaat he menge ed-ezapen dan. Umbe edhimuwen ku is menge ketiǥeyunan dan he iring te meremerik he menge vutang para kandan.
EZE 7:21 Ibpaaǥew ku heini te lalung he menge etew he ziyà te zuma he lugar, ne edremerikan dan heini.
EZE 7:22 Ebpesegdanen ku en sikandan dutun te kedremeriki zan wey kebpenevana zan te menge azen dutun te lugar he utew ku mibmahal.
EZE 7:23 “Ibpevihag ku is menge etew ku su grabi is hinimetayà wey kesamuk diyà te nasyun dan.
EZE 7:24 Ibpaaǥew ku is menge valey zan te utew lalung he menge etew he ebpuun diyà te zuma he menge nasyun. Edtepusen ku is kebpegalbu te lavew he menge etew ziyà te kandan, ne ebpesegdanen ku en he remeriki is menge simbahan dan.
EZE 7:25 Egkeseǥazan dan is utew kegkahandek ne ebpen-ehè dan te kelinew piru kenè dan heini egketuredu.
EZE 7:26 Egkeumahan sikandan te ebpekedtutundug he kezeetan wey mezaat he menge tudtul. Ebpepenudtul zan pezem te menge ebpeneuven piru kenà sikandan egketudtulan. Kenè en ibpenurù te menge memumuhat is mehitenged te kesuǥuan, ne wazè en daan penurù he ebpuun diyà te menge pengulu.
EZE 7:27 Edlalew is hadì wey egkaawà is perateng din, ne egkerkeren is menge etew tenged te kegkahandek. Edsilutan ku sikandan sumalà te vineelan dan, ne ebeelan ku ziyà te kandan is mibeelan dan diyà te zuma. Ne egketuenan dan dutun he iyan a Nengazen.”
EZE 8:1 Hein ikelima he andew te ikeenem he vulan, dutun te ikeenem he tuig te kegkevihag dey, midumala a te Nengazen he MEGBEVAYÀ. Dutun ebpimpinuu a ziyà te valey ku he ebpekidlalag kedì is menge edumala te Juda.
EZE 8:2 Duen neehè ku he henduen be te etew. Puun te hawak din pehendiyà te zizalem ne henduen sikandin te hapuy, ne puun te hawak din pehendiyà te zivavew ne iring sikandin te ed-ilak-ilak he mital.
EZE 8:3 Ingkawè din is henduen be te velad din ne migewezan e zin diyà te vulvul. Mibitbit a te Mulin-ulin diyà te hewhewanan ne mid-uwit e zin diyà te Jerusalem, diyà te zizaya he pultahan dutun te seled te lama duen te valey te Nengazen he zutun is ledawan te sevaha he ed-ezapen he utew ingkepauk te Megbevayà.
EZE 8:4 Ne neehè ku zutun is mekeǥeǥehem he kebpenganlag te Megbevayà te Israel, he iring te neehè ku ziyà te suǥud.
EZE 8:5 Ne migkaǥi is Megbevayà kayi te kedì te, “Sikew is etew, tengteng ka ziyà te zapit te zizaya.” Umbe midtengteng a, ne neehè ku ziyà te avey te idselang pehendiyà te pemuhatà is ledawan te ed-ezapen he utew ingkepauk te Megbevayà.
EZE 8:6 Ne migkaǥi is Megbevayà kayi te kediey te, “Sikew is etew, neehè nu ve is mibeelan te menge etew te Israel? Neehè nu ve is utew mezaat he mibeelan dan para te kedsegseg kedì puun te valey ku? Piru zuen nu pa egkaahà he menge vaal he edhuna pa he utew mezaat keniyan.”
EZE 8:7 Ne mid-uwit e zin diyà te idselang te lama zuen te valey te Nengazen, ne kedtengteng ku, neehè ku is budsi te verengbeng.
EZE 8:8 Migkeǥiyan e zin te, “Sikew is etew, pekeluaǥa nu heeyan is budsi te verengbeng.” Ne mibeelan ku haazà, ne neehè ku is sevaha he idselang.
EZE 8:9 Ne migkaǥi en maan sikandin te, “Seled ka ne ahaa nu is utew mezaat he vaal he mibeelan dan.”
EZE 8:10 Umbe, midseled a ne neehè ku he sikan is berengbeng ne nezengkuuran te nekedseselekawà he menge ledawan te menge langgam he edula wey zuma pa he menge langgam he mid-isip he meremerik. Neehè ku zaan is langun he ed-ezapen te menge etew te Israel.
EZE 8:11 Ne ziyà te egkesineruwan kayi edhithitindeg is 70 he menge edumala te Israel, ne is sevaha kandan iyan si Jaazania he anak ni Shafan. Is kada sevaha kandan egawed te teleǥuey te veyewà, ne edlipuwak is mekepal he evel te veyewà.
EZE 8:12 Ne migkaǥi is Megbevayà kayi te kedì te, “Sikew is etew, neehè nu en be ke hengkey is ebeelan he meeles te menge edumala te Israel? Diyà is kada sevaha kandan te ruǥu te ed-ezapen din, su ke sikandan te, ‘Kenè kiw egkaahà te Nengazen; inselikwey zin en is Israel.’ ”
EZE 8:13 Migkaǥi en maan is Megbevayà te, “Ebpekeehè ke pa te edhuna pa keniyan he utew mezaat.”
EZE 8:14 Ne midume e zin diyà te zizaya he ǥemawan te valey te Nengazen, ne zutun neehè ku is menge vahi he ebpemimpinuu ne edsineǥawan dan is ed-ezapen dan he si Tamuz.
EZE 8:15 Migkaǥi is Megbevayà kayi te kedì te, “Sikew is etew, neehè nu ve heeyan? Ebpekeehè ke pa te lavew pa utew he mezaat keniyan he menge vaal.”
EZE 8:16 Ne mid-uwit e zin diyà te seled he lama duen te valey te Nengazen. Ne ziyà te ǥemawan te valey te Nengazen he ziyà te pid-elangan te varkun wey pemuhatà, duen 25 he menge etew. Ed-iniyug sikandan duen te valey te Nengazen he edsinaru ziyà te edsilaan su ed-ezapen dan is edsilà he andew.
EZE 8:17 Ne migkaǥi is Megbevayà kayi te kedì te, “Sikew is etew, neehè nu ve heeyan? Kunaan bes te menge etew te Juda ke kenà mezaat is kebaal keniyan te utew mezaat he menge vaal? Ne mibeǥayan dan pa te kesamuk is nasyun. Pinaaǥi kayi midhimu zan he utew a mepauk. Ahaa nu is kebpesipelahi zan kediey!
EZE 8:18 Umbe, ibpeǥezaman ku kandan is pauk ku. Kenè ku sikandan egkehizuwan. Minsan ikulahì dan pa te mezaǥing is kebuyù dan te tavang kayi te kediey, ne kenè ku sikandan ebpemineǥen.”
EZE 9:1 Ne nezineg ku is Megbevayà he nemensag te, “Egpas kew zini te Jerusalem, sikiyu is menge etew he edsilut te menge meǥinged kayi te inged, ne uwita niw is menge ǥumaan niw.”
EZE 9:2 Ne zutun duen heenem he etew he midseled diyà te zizaya he ǥemawan te valey te Nengazen ne is kada sevaha kandan duen din uwiten he ǥumaan. Duen etew he zuma zan he mibivisti te linu he midseluniket te teleǥuey te idsurat. Midhitindeg dan diyà te kilid te pemuhatà he brunsi.
EZE 9:3 Puun pa zengan sikan is gapun etawa regreg he tuus te mekeǥeǥehem he kebpekiduma te Megbevayà te menge Israilihanen ne egkaahà diyà te zivavew zuen te ledawan te menge kirubin he ziyà te seled duen te simbahan, piru kayi he timpu mid-awà heini zutun ne midhalin diyà te ǥemawan te valey te Nengazen. Ne mid-umew te Nengazen sikan is etew he mibivisti te linu he seseluniket te teleǥuey te idsurat,
EZE 9:4 ne migkeǥiyan din te, “Liǥuya is Jerusalem ne merkahi nu is buked duen te ingkeseeng dan is utew mezaat he menge vaal he mibeelan diyà te seled te inged.”
EZE 9:5 Ne nezineg ku is Megbevayà he migkeǥiyan din sikan is heenem he menge etew te, “Tunduǥa niw sikandin pehendiyà te inged ne penhimetayi niw is menge etew he wazà marka ziyà te vuked dan. Kenè niw sikandan kehizuwi.
EZE 9:6 Penhimetayi niw is menge meǥurang, menge vetan-en he menge maama wey menge vahi, menge iney, menge vatà, piru kenè niw kevuta is duen dan menge marka. Diyè kew puun te valey ku.” Umbe midhuna zan penhimetayi is menge pengulu he ziyà te egkesineruwan duen te valey te Nengazen.
EZE 9:7 Ne migkaǥi is Megbevayà diyà te kandan te, “Genat kew en. Remeriki niw heeyan is baley ku pinaaǥi te kedsavuk niw te menge minatey ziyà te lama.” Ne migenat dan ne mibpenhimetayan dan is menge etew zuen te tivuuk he inged.
EZE 9:8 Ne zutun te kebpenhimatey zan, netaǥak a is sebsevaha. Midlangkeb a is nengumew te Megbevayà, “He Nengazen he MEGBEVAYÀ, ed-eminen nu ve ebpenhimetayi is nengesamà kayi te Israel tenged te kegkepeuki nu te menge tig-Jerusalem?”
EZE 9:9 Midtavak sikandin kediey te, “Utew en subra is salà te menge etew te Israel wey Juda. Subre en is kebpehimhimetayà ne wazè en hustu he kukuman diyà te inged. Egkaǥi pa sikandan te kenà edtengteng is Nengazen kenitew, su inselikwey zin en is Israel!
EZE 9:10 Umbe kenè ku sikandan egkehizuwan; ebeelan ku ziyà te kandan is mibeelan dan diyà te zuma.”
EZE 9:11 Ne sikan is etew he mibivisti te linu wey midseseluniket te teleǥuey te idsurat, midlikù ne migkeǥiyan din is Nengazen te, “Netuman ku en is insuǥù nu kediey.”
EZE 10:1 Dutun te edtengteng a, duen neehè ku he henduen be te pinuuwà te kedhadì he vatu he sepiru ziyà te zivavew te tambun he kristal he ziyà te zivavew te ulu zuen te menge kirubin.
EZE 10:2 Migkeǥiyan te Nengazen sikan is etew he mibivisti te linu te, “Hendiyè ka te teliwazà keniyan te egketileng he menge ligid dizalem te menge kirubin, ne akup ka te menge vaǥa ne isimburè nu keniyan te inged.” Ne neehè ku he midseled sikandin.
EZE 10:3 Midhitindeg sikan is menge kirubin diyà te egkezivavà he kilid duen te valey te Nengazen hein midhendiyà sikan is etew, ne zuen gapun he mid-eneb duen te lama te valey te Nengazen.
EZE 10:4 Ne mid-awà is mekeǥeǥehem he kebpekiduma te Nengazen puun duen te menge kirubin ne midhalin diyà te ǥemawan te valey te Nengazen. Neeneb te ǥapun haazà is baley te Nengazen, ne mibmerayag sikan is lama te kerayag te mekeǥeǥehem he kebpekiduma te Nengazen.
EZE 10:5 Is rekubkub te menge pakpak duen te menge kirubin egkezineg minsan diyà te ǥawas duen te lama, iring heini te laǥeng te Mekeǥeǥehem he Megbevayà emun egkaǥi.
EZE 10:6 Hein midsuǥù te Nengazen sikan is etew he mibivisti te linu he megkuwa te vaǥa ziyà te teliwazà te menge egketileng he menge ligid he ziyà te zizalem te menge kirubin, midhendiyà sikandin ne midhitindeg diyà te avey te sevaha he ligid.
EZE 10:7 Ne is sevaha zuen te menge kirubin migkuwa te vaǥa zuen te hapuy ne induwal zin duen te etew he mibivisti te linu. Ne midawat duen te etew ne migawas.
EZE 10:8 Diyà te zizalem te menge pakpak dutun te kirubin duen egkeehè ta he henduen be te velad te etew.
EZE 10:9 Duen daan neehè ku he heepat he ligid, is sevaha ziyà te avey te kada kirubin. Ed-ilak-ilak heini iring te vatu he krisulitu,
EZE 10:10 ne neked-iring is kegkeveeli kayi. Is kada ligid ne zuen pa sevaha he ligid din he nekebelevaǥà,
EZE 10:11 umbe ebpekehendiyà heini wey haazà is menge kirubin te minsan hendei renged he kenè en kinahanglan he ebelikùkù etawa eberiyung.
EZE 10:12 Is tivuuk he lawa zutun te menge kirubin, ragkes en is peka zan, belad dan, pakpak dan neeneb te menge mata, ne iring din ded daan sikan is menge ligid.
EZE 10:13 Ne nezineg ku he migngezanan heini te, “egketileng he menge ligid.”
EZE 10:14 Is kada kirubin, duen din heepat he vuked. Is dagwey te egkehuna dagwey te kirubin, ne is dagwey te ikezuwa dagwey te etew, ne is dagwey te iketelu dagwey te erimaung, ne is ikeepat dagwey te kulaǥu.
EZE 10:15 Ne wazà meketanà diyà te tanà haazà is menge kirubin. Iyan heini sikandan kes uuyag he menge linimbag he neehè ku ziyà te Wahig he Kebar.
EZE 10:16 Ke hendei ebayà haazà is menge kirubin, ne zutun daan ebayà haazà is menge ligid, emun edlayang sikandan ebpekelapik daan haazà is menge ligid.
EZE 10:17 Emun ebpundu sikandan, ebpundu zaan haazà is menge ligid, ne emun ebpezivavew zan, ebpezivavew zaan haazà is menge ligid, su is mulin-ulin dan ne zutun te menge ligid.
EZE 10:18 Ne sikan is mekeǥeǥehem he kebpekiduma te Nengazen mid-awà duen te ǥemawan te valey te Nengazen ne midhalin diyà te zivavew zuen te menge kirubin.
EZE 10:19 Ne zutun te edtengteng a, midlayang haazà is menge kirubin, duma zuen te menge ligid. Ne midteren dan diyà te ǥemawan he zapit te edsilaan duen te valey te Nengazen, ne sikan is mekeǥeǥehem he kebpekiduma te Megbevayà te Israel ne ziyà te zivavew zan.
EZE 10:20 Iyan heini sikan is uuyag he menge linimbag he neehè ku ziyà te dizalem te Megbevayà te Israel hein diyà a te Wahig he Kebar. Ne netuenan ku he menge kirubin sikandan.
EZE 10:21 Is kada sevaha kandan, duen din heepat he vuked wey heepat he pakpak, ne ziyà te zizalem te menge pakpak dan duen henduen be te velad te etew.
EZE 10:22 Is paras dan iring te zagwey zuen te uuyag he menge linimbag he neehè ku ziyà te Wahig he Kebar. Is kada sevaha kandan edhipanew he kenè en ebpenlililingey.
EZE 11:1 Mibitbit a te Mulin-ulin ne mid-uwit e zin diyà te ǥemawan te valey te Nengazen he ebpekesinaru ziyà te edsilaan. Ne zutun te ǥemawan duen 25 he menge maama, he is dezuwa kandan iyan si Jaazania he anak ni Azur wey si Pelatia he anak ni Benaya, pengulu sikandan te menge etew.
EZE 11:2 Migkaǥi is Nengazen kayi te kedì te, “Sikew is etew, iyan heini sikandan mibpelanu te mezaat wey mibeǥey kayi te inged te kenà meupiya he sambag.
EZE 11:3 Ke sikandan te, ‘Meupiya heini he timpu te kebpehitindeg te menge valey. Wazà egkevut kenitew. Is inged tew iring te kuzen ne iring kiw te usa ziyà te seled din he kenà egkevinsulan.’
EZE 11:4 Umbe, sikew is etew, rewaki nu sikandan.”
EZE 11:5 Ne midumala a te Mulin-ulin te Nengazen ne migkeǥiyan e zin he keǥiya ku heini: “Iyan heini migkaǥi te Nengazen diyà te keniyu te menge etew te Israel, ‘Netuenan ku ke hengkey is egkeǥiyen niw wey ed-isipen niw.
EZE 11:6 Mahabet is mibpenhimetayan niw kayi he inged ne nekepeyapat dà diyà te menge zalan is nemematey.
EZE 11:7 Umbe siak, is Nengazen he MEGBEVAYÀ, egkeǥiyan ku sikiyu te: Tutuu he heini is inged iring te kuzen, piru sikan is nemematey he impeyapat niw kayi te inged ne iyan usa. Ne edsegseǥen ku sikiyu puun kayi te inged.
EZE 11:8 Egkahandek kew te tebek, piru ibpesurung ku sikiyu te menge kuntada niw. Iyan a, is Nengazen he MEGBEVAYÀ, is migkaǥi kayi.
EZE 11:9 Edsegseǥen ku sikiyu puun kayi he inged ne ibpevihag ku sikiyu te menge lumelengyawà ne ebpesilutan ku sikiyu kandan.
EZE 11:10 Ne ebpematey kew te tebek pehendiyè en te dulunà te Israel. Ne zutun egketuenan niw he iyan a Nengazen.
EZE 11:11 Heini he inged kenè en egkehimu he iring te kuzen para keniyu, ne kenè kew egkehimu he iring te usa ziyà te seled din. Su edsilutan ku sikiyu taman te zulunà te Israel.
EZE 11:12 Ne zutun egketuenan niw he iyan a Nengazen. Ebeelan ku heini su wazè kew medtuman te menge suǥù ku wey menge sulunuzen, iyan niw hinuun midtuman is menge sulunuzen te menge etew ziyà te zuma he menge nasyun.’ ”
EZE 11:13 Ne zutun te edtudtulen ku is menge lalag te Megbevayà, minatey si Pelatia he anak ni Benaya. Ne zutun midlangkeb a ne inhabet ku ivensag is lalag he edhenduen te, “He Nengazen he MEGBEVAYÀ, ed-eminen nu ve te ebpenhimatey is nesamà he menge Israilihanen?”
EZE 11:14 Migkaǥi is Nengazen kayi te kedì te,
EZE 11:15 “Sikew is etew, is menge etew he nesamà diyà te Jerusalem, iyan heini lalag dan mehitenged keniyu te menge zuma zan he nengevihag, ‘Meziyù dan en te Nengazen; ne heini he tanà, imbeǥey en kenitew te Nengazen he egkaangken tew.’
EZE 11:16 “Umbe keǥiyi nu is menge zuma nu he vinihag he siak, is Nengazen he MEGBEVAYÀ, migkaǥi a te, ‘Minsan impevihag ku sikiyu wey impeyapat ku ziyà te zuma he menge nasyun, ebpekiduma a ǥihapun keniyu keniyan he menge lugar.
EZE 11:17 Umbe siak, is Nengazen he MEGBEVAYÀ migkaǥi a he ed-umanan ku sikiyu edtiǥuma puun te menge nasyun he zutun kew mekepeyapat, ne id-uman ku ibeǥey keniyu is tanà he Israel.
EZE 11:18 Ne zutun te ked-ulì niw ziyà te keniyu he lugar, id-awè niw is langun he utew mezaat he menge ed-ezapen.
EZE 11:19 Ebeǥuwen ku is gehinawa niw wey isip niw. Id-awè ku is kebmesinupaken te gehinawa niw ne ebeǥayan ku sikiyu te ǥehinawa he mepezumdumahan kediey.
EZE 11:20 Edtumanen niw en is menge suǥù ku wey menge sulunuzen. Egkehimu kew he menge etew ku, ne egkehimu a he Megbevayè niw.
EZE 11:21 Piru sikan is edsimba te utew mezaat he menge ed-ezapen dan, edsilutan ku sumalà te bineelan dan. Iyan a, is Nengazen he MEGBEVAYÀ, is migkaǥi kayi.’ ”
EZE 11:22 Ne midlayang sikan is menge kirubin duma zuen te menge ligid diyà te avey zan, ne sikan is mekeǥeǥehem he kebpekiduma te Megbevayà te Israel midhendiyà te zivavew zan.
EZE 11:23 Ne nevitbit haazà is mekeǥeǥehem he kebpekiduma te Nengazen puun dutun te inged, ne mibpundu ziyà te vuvungan he zapit te edsilaan te inged.
EZE 11:24 Ne pinaaǥi te kebpelewasa kedì te Mulin-ulin te Megbevayà nelewasan ku he mibitbit e zin ne mid-uwit e zin diyà te menge vinihag diyà te Babilonia. Ne netapus is nengelewasan ku mehitenged te Jerusalem.
EZE 11:25 Ne midtudtulan ku is menge vinihag te langun he impaahà te Nengazen kedì.
EZE 12:1 Hein diyè e pa te Jerusalem, migkaǥi is Nengazen kayi te kedì te,
EZE 12:2 “Sikew is etew, nengungubpaan ka zuma te mesinupaken he menge etew. Duen dan menge mata piru kenè dan ebpekaahà, duen dan menge telinga piru kenè dan ebpekezineg, su menge mesinupaken sikandan he menge etew.
EZE 12:3 Umbe, sikew is etew, peehè ka he iring te vinihag ka. Penines ka te menge azen nu ne hendiyè ka te selakew en he lugar. Ne veeli nu heini zutun te andew te edtengtengan ke zan. Su kela ke pinaaǥi kayi egkeisip-isip dan he menge mesinupaken dan.
EZE 12:4 Dutun te maandew pa, tinesa nu is ed-uwiten nu para meehè dan. Ne kebmezukilem, dutun te edtengtengan ke zan, hipanew ka he iring te vinihag ka.
EZE 12:5 Busluwa nu is elavat te valey nu zutun te edtengtengan ke zan, ne zutun ka vayà he ed-uwit te uwiten nu.
EZE 12:6 Ne zutun te edtengteng sikandan, bevaa nu is uwiten nu ne ǥenat ka zutun te egkesakep en. Tembuni nu is buked nu su wey nu kenà maahà is tanà. Heini is ebeelan nu ebpezayag te sevaha he petizaan diyà te menge etew te Israel.”
EZE 12:7 Ne midtuman ku haazà is insuǥù din. Maandew pa ne nenines ad te uwiten ku, ne hein mezukilem en, mibuslu ku is elavat ku pinaaǥi te menge velad ku. Ne zutun te edtengteng sikandan, mibava ku is uwiten ku ne migenat a zutun te merusirem en.
EZE 12:8 Ne hein meselem en migkaǥi is Nengazen kayi te kedì te,
EZE 12:9 “Sikew is etew, emun ed-insà is mesinupaken he menge etew te Israel mehitenged te mibeelan nu,
EZE 12:10 keǥiyi nu sikandan he siak, is Nengazen he MEGBEVAYÀ duen menge lalag ku para te pengulu te Jerusalem wey te langun he menge etew te Israel.
EZE 12:11 Keǥiyi nu sikandan he sikan is mibeelan nu sevaha he petizaan diyà te kandan he egkevihag sikandan.
EZE 12:12 Minsan is pengulu zan, diyà ebpekevayà te vudsi te elavat he ebava te uwiten din is egenat dutun te merusirem he kezukileman. Edtembunan din is buked din su wey zin kenà maahà is tanà.
EZE 12:13 Edhingutelen ku sikandin ne ed-uwiten ku ziyà te Babilonia he tanà te menge Kaldiyanhen. Piru kenè din heini egkaahà, ne ebpatey sikandin dutun.
EZE 12:14 Ibpeyapat ku ziyà te minsan hendei is langun he menge etew zin, ragkes is menge suluǥuen din wey menge vantey zin, ne minsan hendei zan ebpevayà ebpehimetayan ku sikandan.
EZE 12:15 Ne emun igkepeyapat ku en sikandan diyà te menge nasyun, ne egketuenan dan human he iyan a Nengazen.
EZE 12:16 Piru edtuǥutan ku is egkepipira kandan he mekelingkawas te tebek, bitil, wey zaru su wey zan metudtul ziyà te menge nasyun he egkepeveyaan dan is utew mezaat he menge vaal zan. Ne zutun egketuenan dan he iyan a Nengazen.”
EZE 12:17 Migkaǥi pa is Nengazen kayi te kedì te,
EZE 12:18 “Sikew is etew, pekekerker ka tenged te kegkahandek dutun te egkaan ka wey ed-inum ka.
EZE 12:19 Ne keǥiyi nu is menge meǥinged diyà te Jerusalem wey te tivuuk he Israel he siak, is Nengazen he MEGBEVAYÀ, migkaǥi a he egkengeseeng sikandan wey ebpengerkeren tenged te kegkahandek dutun te egkaan sikandan wey ed-inum, su ed-eǥawen is menge azen diyà te nasyun dan tenged te kegkemesipala zan.
EZE 12:20 Edèdeetan is menge inged dan ne egkehimu heini he mekevulungbulung. Ne egketuenan dan dutun he iyan a kes Nengazen.”
EZE 12:21 Migkaǥi en maan is Nengazen kayi te kedì te,
EZE 12:22 “Sikew is etew, maan is duen erubasa ziyà te Israel he edhenduen te, ‘Mahabet en is midlavey he menge timpu, piru wazè man metuman is menge tagnà.’?
EZE 12:23 Keǥiyi nu sikandan he, iyan a, is Nengazen he MEGBEVAYÀ edtapus kayi he erubasa, ne kenè dan en heini egkeumanan egkehisguti ziyà te Israel. Keǥiya nu ziyà te kandan he hapit en egketuman is menge tagnà.
EZE 12:24 Su egkaawè en diyà te Israel is tarù he egkengelewasan wey menge tagnà he kenà tutuu.
EZE 12:25 Su emun iyan a, is Nengazen egkaǥi, ne segugunà heini egketuman. Egketuman en is migkaǥi ku he ebpekesuǥat diyà te keniyu te menge mesinupaken he menge etew. Egkehitavù heini ziyà te keniyu he timpu. Iyan a, is Nengazen he MEGBEVAYÀ, migkaǥi kayi.”
EZE 12:26 Ne migkaǥi is Nengazen kayi te kedì te,
EZE 12:27 “Sikew is etew, egkaǥi is menge etew te Israel te, ‘Is menge mibpelewasan din wey menge tagnè din ne egkeuǥet pa egkehitavù.’
EZE 12:28 Umbe, keǥiya nu heini ziyà te kandan: ‘Iyan a, is Nengazen he MEGBEVAYÀ, migkaǥi a te hapit en egketuman is migkaǥi ku. Uya, egkeulaula en heini.’ ”
EZE 13:1 Migkaǥi is Nengazen kayi te kedì te,
EZE 13:2 “Sikew is etew, rewaki nu is menge tarù he ebpeneuven kayi te Israel he ebpenagnà te binèbeelan dan dà. Keǥiyi nu sikandan he mebpemineg dan kayi te menge lalag ku:
EZE 13:3 Iyan a, is Nengazen he MEGBEVAYÀ, migkaǥi he mekehizuhizu is tulebung he menge ebpeneuven he ebaalvaal zà te menge tagnè dan he wazè dan nelewasan.
EZE 13:4 He Israel, is menge ebpeneuven diyà te keniyu iring te menge leew he asu he ziyà te nevengkag he menge inged.
EZE 13:5 Wazè dan petizeeni is menge etew. Iring heini te wazè dan purungi is neǥevà he verengbeng te Israel su para melig-en heini ke egkeuma is tebek dutun te andew te kedsilut te Nengazen.
EZE 13:6 Kenà tutuu is nelewasan dan ne tarù is menge tagnè dan. Kesikandan te ebpuun diyà te Nengazen is menge lalag dan, piru iyan tutuu is wazè ku sikandan suǥua. Ne ebperateng pa sikandan te kegketuman te mibpengaǥi zan.
EZE 13:7 Kenà tutuu is nelewasan dan ne tarù is menge tagnè dan. Kesikandan te iyan haazà migkaǥi ku piru wazè ku haazà mekaǥi.
EZE 13:8 “Umbe siak, is Nengazen he MEGBEVAYÀ migkaǥi a he edsupaken ku is tarù he menge tagnè dan wey kenà tutuu he menge nelewasan dan.
EZE 13:9 Edsilutan ku sikandan is menge ebpeneuven he kenà tutuu is nengelewasan dan wey tarù is menge tagnè dan. Kenà sikandan egkilelaan he zuma te menge etew ku, ne is menge ngazan dan kenà idsurat diyà te listahan te menge etew ziyà te Israel, ne kenà sikandan ebpekeseled diyà te tanà te Israel. Ne human niw egketuenan he iyan a Nengazen he MEGBEVAYÀ.
EZE 13:10 “Heini he menge ebpeneuven, midtazin dan is menge etew ku pinaaǥi te kegkaǥi he meupiya is kebpekesavuk te langun, piru iyan tutuu is kenà heini meupiya. Iring heini te mibangun is menge etew te kenà melig-en he verengbeng, ne mibpekeplaan dà heini te menge ebpeneuven te minasa he utew zà deisey he simintu is insahug duen.
EZE 13:11 Keǥiyi nu heeyan is mibpekapla he egkevengkag heeyan is berengbeng dan. Ed-enuzen heini te mereǥes he uzan, egkeuluǥan heini te menge giyew he iring te menge vatu ne egkeremaǥen heini te mevendes.
EZE 13:12 Ne emun egketempag en heini, ed-insà is menge etew ziyà te kandan te, ‘Hengkey is nehimu te impekaple niw?’
EZE 13:13 “Umbe siak, is Nengazen he MEGBEVAYÀ, egkaǥi a te: Tenged te utew ku kegkepauk, edtempaǥen ku is menge verengbeng pinaaǥi te mevendes he keramag, wey ked-uzan te zezekelà he menge ǥiyew, wey mereǥes he uzan.
EZE 13:14 Uya, edtempaǥen ku is berengbeng he mibpekeplaan te minasa he utew zà deisey he simintu is insahug duen. Edtempaǥen ku heini taman te egkaahà is pundasyun kayi. Ne emun egketempag en, egkeutunan kew ne egkeǥerè kew. Ne zutun egketuenan te langun he iyan a Nengazen.
EZE 13:15 Ebeelan ku keniyan te verengbeng wey ziyà te mibpekapla duen is rimeǥas te utew ku kegkepauk. Ne ibpehibelu ku he wazè en is berengbeng wey is mibpekaplà duen
EZE 13:16 he iyan is menge ebpeneuven diyà te Israel he midtagnà he meupiya is kebpekesavuk te menge etew ziyà te Jerusalem, minsan pa te iyan tutuu is kenà heini meupiya. Iyan a, is Nengazen he MEGBEVAYÀ, is migkaǥi kayi.
EZE 13:17 “Guntaan, sikew is etew, penagnè ka te ebpekesuǥat te menge vahi he nenagnà te binèbeelan dà.
EZE 13:18 Keǥiyi nu sikandan te iyan a is Nengazen he MEGBEVAYÀ migkaǥi te: Mekehizuhizu kew is menge vahi he mid-akal te menge etew ku, batà etawa meǥurang, pinaaǥi te menge hinepetan niw, he ibevekelew niw wey ibpikit niw ziyà te menge lembung niw. Egkesuat kew he meveyveyai niw is menge etew ku su wey niw sikandan mepenepii.
EZE 13:19 Mibpendezeisey a keniyu ziyà te etuvangan te menge etew ku tenged dà te nepipira he kemkem te barli wey nepipira he supas. Mibpenhimetayan niw is kenà ereg he edhimetayan, ne mibpesagdan niw he meuyag-uyag is ereg pezem he ebpatey.
EZE 13:20 “Umbe siak, is Nengazen he MEGBEVAYÀ, migkaǥi a he utew a supak te menge hinepetan niw he migamit niw te ked-akal te menge etew he iring te penuǥes he nekeutel kandan. Id-awè ku heini puun te menge vekelawan niw, ne ibpaawè ku is menge etew he neiring te tagbis he neutel niw.
EZE 13:21 Id-awè ku zaan is menge lembung niw, ne edlibriyen ku is menge etew ku puun te ǥehem niw, ne kenè niw en sikandan egkeuman egkebiktima. Ne zutun egketuenan niw he iyan a Nengazen.
EZE 13:22 “Naawà is kezasig te menge metazeng tenged te menge tarù niw, ne minsan siak wazà a mebeǥey kandan te seeng. Ne midasig niw is menge lalung he kenè dan ewai is kelelalung dan pinaaǥi te kedsaad niw kandan he egkelibri sikandan te kemetayen.
EZE 13:23 Umbe, kenè kew en ebpekelawas te tarù is ibpesavut din wey kenè kew en ebpekehimu he ebpenagnà. Edlibriyen ku is menge etew ku puun te ǥehem niw. Ne zutun egketuenan niw he iyan a Nengazen.”
EZE 14:1 Duen timpu he midhengkayi te kediey is menge pengulu te Israel, ne mibpinuu zan diyà te etuvangan ku su ebpeseysey zan te menge lalag he ebpuun te Nengazen.
EZE 14:2 Migkaǥi is Nengazen kayi te kedì te,
EZE 14:3 “Sikew is etew, heini he menge etew, utew zan mibmahal is menge ed-ezapen dan he kenà tutuu he megbevayà he iyan edsinumag kandan wey zan mekesalà, umbe kena a ebpeinsà kandan.
EZE 14:4 Guntaan, keǥiyi nu sikandan he siak, is Nengazen he MEGBEVAYÀ, migkaǥi a he is minsan hentei he Israilihanen he utew zin mibmahal is menge ed-ezapen din he iyan midsinumag kandin wey mekesalà, emun ebpenginginsà sikandin diyà te ebpeneuven ku mehitenged te menge lalag ku, ne siak is Nengazen, iyan a mismu edtavak kandin pinaaǥi te silut sumalà te kahabet te menge ed-ezapen din.
EZE 14:5 Ebeelan ku heini su wey medlikù kayi te kediey is langun he menge Israilihanen he nekepekeziyù kayi te kediey tenged te menge ed-ezapen dan.
EZE 14:6 “Umbe ǥuntaan, keǥiyi nu is menge Israilihanen he siak, is Nengazen he MEGBEVAYÀ, migkaǥi a te: Helina niw is isip niw ne iselikwey niw is menge ed-ezapen niw wey engkezi niw is langun he utew mezaat he menge vaal.
EZE 14:7 Is minsan hentei he Israilihanen etawa kenà Israilihanen he meǥinged te Israel, he ed-awà kayi te kedì su iyan din utew ebmahala is menge ed-ezapen din he iyan midsinumag kandin wey mekeselà, emun ebpenginginsà sikandin diyà te ebpeneuven ku mehitenged te menge lalag ku, ne siak, is Nengazen, iyan a mismu edtavak kandin pinaaǥi te silut.
EZE 14:8 Kenè ku ibeǥey is tuyù din ne edhimuwen ku sikandin he petizaan te menge etew, ne egkehimu sikandin he hilisgutan. Edsegseǥen ku sikandin puun te menge etew ku. Ne zutun egketuenan niw he iyan a Nengazen.
EZE 14:9 “Emun egkelimbungan is sevaha he ebpeneuven dutun te kedtagnè din, ne tenged heeyan te iyan a is Nengazen midlimbung kandin. Edsilutan ku sikandin ne edsegseǥen ku puun te menge etew ku he Israilihanen.
EZE 14:10 Pudu ku edsiluti is ebpeneuven wey is ebpenginginsà diyà te kandin mehitenged te menge lalag.
EZE 14:11 Ebeelan ku heini su wey kenà med-awà kayi te kedì is menge Israilihanen, ne kenè dan en edremerikan is keugelingen dan pinaaǥi te kebaal te salà. Egkehimu sikandan he menge etew ku, ne egkehimu a he Megbevayè dan. Iyan a, is Nengazen he MEGBEVAYÀ, is migkaǥi kayi.”
EZE 14:12 Migkaǥi is Nengazen kayi te kedì te,
EZE 14:13 “Sikew is etew, emun ebpekesalà kayi te kediey is menge etew ziyà te sevaha he nasyun pinaaǥi te kedluivi zan kediey, edsilutan ku sikandan, ne id-awè ku is ebpuunan te keenen dan. Ebpeeǥiyan ku sikandan te vitil su wey zan mebpematey duma te menge uyaǥen dan.
EZE 14:14 Minsan pa ke ziyà te kandan si Noe, si Daniel, wey si Job, ne iyan dà heini is tetelu egkelibri tenged te ketazeng dan. Iyan a, is Nengazen he MEGBEVAYÀ, is migkaǥi kayi.
EZE 14:15 “Ne emun edsuǥuen ku is dumezaas he menge langgam keniyan he nasyun su wey zan penhimetayi is menge meǥinged duen, ne egkehimu he mekevulungbulung heeyan he lugar ne wazè en ebayà duen tenged te kegkahandek dan te zumezaas he menge langgam.
EZE 14:16 Minsan pa ke ziyà te kandan si Noe, si Daniel, wey si Job, ne nenangdù a is uuyag he Nengazen he MEGBEVAYÀ, he kenè dan egkelibri is menge kevuwazan dan, kekenà, iyan dà sikandan egkelibri. Ne haazà is nasyun egkehimu he mekevulungbulung.
EZE 14:17 “Ne emun daan tebek is ibpaaǥi ku keniyan he nasyun su wey meǥerà is menge meǥinged kayi duma te menge uyaǥen dan,
EZE 14:18 ne minsan pa ke ziyà te kandan si Noe, si Daniel, wey si Job, ne nenangdù a is uuyag he Nengazen he MEGBEVAYÀ, he kenè dan egkelibri is menge kevuwazan dan, kekenà, iyan dà sikandan egkelibri.
EZE 14:19 “Ne emun daru is ibpaaǥi ku keniyan he nasyun su wey meǥerà is menge meǥinged kayi duma te menge uyaǥen dan,
EZE 14:20 ne minsan pa ke ziyà te kandan si Noe, si Daniel, wey si Job, ne nenangdù a is uuyag he Nengazen he MEGBEVAYÀ, he kenè dan egkelibri is menge kevuwazan dan, kekenà, iyan dà egkelibri zan is kandan he keugelingen tenged te ketazeng dan.
EZE 14:21 “Benar iyan, siak, is Nengazen he MEGBEVAYÀ migkaǥi he mekehizuhizu is menge tig-Jerusalem emun ebpeeǥiyan ku sikandan te heepat he meveǥat he menge silut he iyan is: tebek, bitil, dumezaas he menge langgam, wey menge zaru he edhimatey te menge meǥinged kayi wey te menge uyaǥen dan.
EZE 14:22 Piru zuen kandan egkesamà he uuyag, ne edumahan sikandan kayi te Babilonia ne idtampu keniyu su menge vihag daan sikandan. Egkeehè niw ke sengemenu kezaat is betasan dan wey menge ulaula zan ne egkaawà is kegkeseeng niw tenged te kedsilut ku ziyà te Jerusalem.
EZE 14:23 Uya, egkaawà is kegkeseeng niw emun egkeehè niw is betasan dan wey menge ulaula zan, ne egkesavut niw he zuen hinungdan te kedsilut ku ziyà te Jerusalem. Iyan a, is Nengazen he MEGBEVAYÀ, is migkaǥi kayi.”
EZE 15:1 Migkaǥi is Nengazen kayi te kedì te,
EZE 15:2 “Sikew is etew, hengkey he paaǥi is igkehimu te subpang te paras he lavew te minsan hengkey he subpang te kayu?
EZE 15:3 Egkehimu ve he ebeelan is subpang kayi he minsan hengkey he ǥelemiten? Egkehimu ve heini he ebeelan he selenggatà?
EZE 15:4 Kenà heini egkehimu! Egkehimu zà heini he idtavun, piru minsan pa ke igketavun heini meǥaan dà heini ed-ugmas.
EZE 15:5 Ne emun wazà kayi pulus dutun te wazè pa heini metutung ne lavew en he wazè din pulus emun egketutung en!
EZE 15:6 “Guntaan, siak, is Nengazen he MEGBEVAYÀ, egkaǥi a he is menge meǥinged diyà te Jerusalem, neiring te paras he midtuvù duma te menge kayu ziyà te ketelunan. Ne geina te pudu zan wazà pulus ne pudu ku ebinsuli.
EZE 15:7 Uya, edsilutan ku sikandan, minsan egkepeleǥuyan dan is hapuy, egkeepur ǥihapun sikandan te ikezuwa he hapuy. Ne zutun egketuenan dan he iyan a Nengazen.
EZE 15:8 Edhimuwen ku he mekevulungbulung he lugar is nasyun dan su midluivan e zan. Iyan a, is Nengazen he MEGBEVAYÀ, is migkaǥi kayi.”
EZE 16:1 Migkaǥi is Nengazen kayi te kedì te,
EZE 16:2 “Sikew is etew, petueni nu te Jerusalem is utew mezaat he menge vaal zin.
EZE 16:3 Keǥiyi nu sikandin he siak, is Nengazen he MEGBEVAYÀ, migkaǥi a ziyà te kandin te, ‘Sevaha ka he Canaanhen! Amorihanen is amey nu, ne Hitihanen is iney nu.
EZE 16:4 Ne hein in-anak ka wazà mid-elima kenikew. Wazà midtamped te pused nu, wazà midiǥù kenikew, etawa midhaplas kenikew te timus, wazà midek-en kenikew.
EZE 16:5 Wazà mibpesarig he ebaal kayi he menge vaal ziyà te kenikew; wazà nehizu kenikew. Intimbag ke zà hinuun diyà te vevesukà, ne ingkesilag ka puun pa te ked-enaka kenikew.
EZE 16:6 “ ‘Ne zutun te kedsaǥad ku, neehè ku sikew is midtunà te keugelingen nu he lengesa, ne migkeǥiyan ku sikew te egkeuyag ka.
EZE 16:7 Impezekelè ku sikew iring te pinemula ziyà te vevesukà. Midekelè ka he nehimu he mekempet he raǥa. Nepurma is menge susu nu wey mibmelayat is bulvul nu, piru lelevas ka ǥihapun.
EZE 16:8 “ ‘Ne hein mid-uman a medsaǥad, neehè ku he egkehimu ke en he ed-esewaan. Ne midtembunan ku sikew is lelevas te samput ku ne nenangdù a he ebmahalen ku sikew. Midhimu ku is kebpekid-uyun kenikew, ne naangken ku sikew. Iyan a, is Nengazen he MEGBEVAYÀ, migkaǥi kayi.
EZE 16:9 “ ‘Ne midlùluan ku is menge lengesa ziyà te lawa nu, wey midlenahan ku sikew.
EZE 16:10 Ne mibistiyan ku sikew te mahalen he visti he linu wey sida he binurdahan, ne impesesendalyas ku sikew te panit.
EZE 16:11 Mideyzeyanan ku sikew te menge elahas: menge rintì wey menge velieg.
EZE 16:12 Mideyzeyanan ku zaan te sising is izung nu, ne mid-eritisan ku sikew wey migkurunahan.
EZE 16:13 Impemekempet ku sikew pinaaǥi te pelata wey vulawan. Is bisti nu linu wey sida he binurdahan, ne meupiya he kelasi te herina is ebeelan he keenen nu, teneb, wey lana he ulibu. Utew ka mezagwey, ne henduen ka te rayna.
EZE 16:14 Nevantug ka ziyà te menge nasyun tenged te utew nu kekempet he imbeǥey ku kenikew. Iyan a, is Nengazen he MEGBEVAYÀ, is migkaǥi kayi.
EZE 16:15 “ ‘Piru midsarig ka te kempet nu, ne migamit nu he puhunan is bentuǥan nu zutun ke kebpelelevag nu. Imbeǥey nu is keugelingen nu ziyà te minsan hentei he maama he edsaǥad, ne mibpurungan ke zan pemulpulusi.
EZE 16:16 Migamit nu is duma he menge visti nu te kebpekekempeta te menge simbahan diyà te metikang he menge lugar, he zutun ka mebpelelevag. Kenà pezem heeyan ereg he egkehitavù.
EZE 16:17 Migamit nu zaan is menge pelata wey menge vulawan he menge elahas he imbeǥey ku kenikew te kebaal te menge ed-ezapen he maama ne mid-azap nu heini. Iring heini te nengumpadi ka!
EZE 16:18 Mibistiyan nu heini he menge ed-ezapen te menge visti nu he binurdahan, ne impemuhat nu ziyà te kandan is lana ku wey veyewà.
EZE 16:19 Mibpemuhat nu zaan sikandan te keenen he imbeǥey ku kenikew he ebpuun te meupiya he kelasi te herina, teneb, wey lana te ulibu. Impemuhat nu heini he pemuhat he mehemut. Uya, iyan heeyan nehitavù. Iyan a, is Nengazen he MEGBEVAYÀ, is migkaǥi kayi.
EZE 16:20 “ ‘Migkuwa nu zaan is menge anak nu he menge maama wey menge vahi he menge anak ta, ne impemuhat nu su wey mekaan te zuma he menge ed-ezapen. Kenè pe be ereg is kebpelelevag nu?
EZE 16:21 Mibpenhimetayan nu pa is menge anak ku ne impemuhat nu ziyà te menge ed-ezapen.
EZE 16:22 Dutun te kebaal nu te utew mezaat he menge vaal wey kebpelelevag nu wazè nu en tentenuzi ke mibmenumenu ku sikew te ed-elima hein betan-en ke pa, hein lelevas ka wey midtunè ka te keugelingen nu he lengesa.
EZE 16:23 “ ‘Iyan a, is Nengazen he MEGBEVAYÀ, migkaǥi te mekehizuhizu ka utew! Gawas te langun he mezaat he vaal nu,
EZE 16:24 mibpehitindeg ke pa te menge simbahan para te menge ed-ezapen nu ziyà te menge pelasa
EZE 16:25 wey ziyà te kada suyuk te menge zalan. Ne zutun midremerikan nu is kekempet nu, ne imbeǥey nu is keugelingen nu ziyà te minsan hentei he maama he edsaǥad. Kada andew ed-iseg is kebpelelevag nu.
EZE 16:26 Mibpelelevag ke pa ziyà te menge Ehiptohanen he siringan nu he utew zaan lebag. Utew ku ingkepauk is kenè nu ked-engked te kebpelelevag.
EZE 16:27 Umbe, midsilutan ku sikew wey impemeliǥet ku is tanè nu. Mibpeveyveyaan ku sikew te menge kuntada nu he menge Filistihanen, ne minsan sikandan, henduen be te neinuinu kenikew te mahawag he vetasan nu.
EZE 16:28 “ ‘Mibpelelevag ke zaan diyà te menge tig-Asiria su wazè ke pa meperahi. Ne hein nepasad haazà wazè ke pa iyan meperahi.
EZE 16:29 Mid-umanan nu pa is kebpelelevag nu su nekidrerepungen ka ziyà te Babilonia he lugar te menge nigusyanti, piru wazè ka ǥihapun meperahi.
EZE 16:30 “ ‘Siak, is Nengazen he MEGBEVAYÀ, migkaǥi a te utew ka meluya umbe nehimu nu heini he menge vaal. Iring ka te vahi he wazè din keelezan he ebelegyà te zengeg din.
EZE 16:31 Mibpehitindeg ka te menge simbahan diyà te menge suyuk te menge zalan wey menge pelasa he para te menge ed-ezapen nu. Tuwas pa he mezaat is baal nu te vaal te vahi he ebelegyà te zengeg dan su wazè ka mulà mebpevayad te nekidhilavet kenikew.
EZE 16:32 Mengungumpadi ka he vahi! Egkesuat ke pa he ebpekidhilavet te sengememaama kenà te esawa nu.
EZE 16:33 Is menge vahi he ebelegyà te zengeg dan ebpevayad mulà. Piru sikew, iyan ka hinuun mibeǥey te menge gasa ziyà te menge maama he kumpadi nu su wey sikandan mehinggat te ked-uvey ziyan te kenikew te kebpekidhilavet.
EZE 16:34 Nekeviza ka te zuma he menge vahi he ebelegyà te zengeg dan. Wazà edhinggat kenikew te kebpekidhilavet; iyan ka mismu ebpenginggat. Kenè ka edawat te vayad, su iyan ka hinuun ebayad.
EZE 16:35 “ ‘Umbe sikew is lebag, pemineǥa nu is menge lalag ku.
EZE 16:36 Siak, is Nengazen he MEGBEVAYÀ, migkaǥi a te: Impeehè nu is kegkelevasi nu ne mibpeveyveyaan nu is lawa nu te menge kumpadi nu su ǥeina te lebag ka. Mid-azap nu is utew mezaat he menge ed-ezapen nu, ne mibpenhimetayan nu is menge anak nu su impemuhat nu ziyà te kandan.
EZE 16:37 Tenged kayi te mibeelan nu, edtiǥumen ku is langun he menge kumpadi nu he igkelilingey nu, is mibmahal nu wey ragkes en is egkeepesan nu. Edtiǥumen ku sikandan su wey ke zan kuntedaha, ne edlevasan ku sikew ziyà te etuvangan dan su wey ke zan maahà is lelevas.
EZE 16:38 Edsilutan ku sikew tenged te kebpenapew nu wey kebpenhimatey nu. Ne tenged te utew ku kegkepauk edhimetayan ku sikew.
EZE 16:39 Ibeǥey ku sikew ziyà te menge kumpadi nu, ne edrundusen dan is menge simbahan he para te menge ed-ezapen nu. Edlevasan ke zan ne egkuwaan dan is mekempet he menge elahas nu, ne ed-ewaan ke zan he lelevas.
EZE 16:40 Ibpesurung ke zan te grupu te menge etew he iyan ebpenuleng kenikew te vatu wey edtadtad kenikew te ispada.
EZE 16:41 Ebinsulan dan is menge valey nu ne edsilutan ke zan diyà te etuvangan te mezakel he menge vahi. Ebpeengkezan ku kenikew is kebpelelevag nu wey is kebayad nu ziyà te menge kumpadi nu.
EZE 16:42 Ne egkevehew en is utew ku kegkepeuki kenikew, ne kenà ad egkepauk kenikew.
EZE 16:43 “ ‘Midlipatan nu ke mibmenumenu ku sikew te ed-atur hein betan-en ke pa, ne midhimu nu hinuun he mepauk a tenged te menge mibeelan nu, umbe iyan a, is Nengazen he MEGBEVAYÀ egkaǥi he edsilutan ku sikew te sungkad te menge vaal nu. Kenè be mibaal ka te utew mezaat he menge vaal he in-uman nu te mahawag ha menge vaal nu?
EZE 16:44 “ ‘Duen menge etew he egkaǥi kayi he erubasa ziyà te kenikew: “Ke hengkey is iney iyan daan kes anak.”
EZE 16:45 Iring ka iyan te iney nu he edsudì te esawa zin wey menge anak din. Wey iring ke zaan te menge suled nu he vahi he edsudì te menge esawa zan wey menge anak dan. Hitihanen is iney nu ne Amorihanen is amey nu.
EZE 16:46 Is kakey nu he vahi iyan is Samaria he ziyà ed-ubpà te zizaya duma te menge anak din he vahi. Is hazi nu he vahi iyan is Sodom, he ziyà ed-ubpà te zivavà duma te menge anak din he vahi.
EZE 16:47 Mid-iringan nu is menge vetasan dan wey is utew mezaat he menge vaal zan. Ne seled te mevavè dà he timpu midlavew is kenikew he kezaat te kandan he kezaat.
EZE 16:48 Siak, is uuyag he Nengazen he MEGBEVAYÀ, migkaǥi a te tutuu he is suled nu he Sodom wey is menge anak din he vahi, wazà mekevaal te iring te mibeelan nu wey te menge anak nu he vahi.
EZE 16:49 Is salà te suled nu he Sodom iyan is kebpelavew. Dekelà is keenen din wey is menge anak din he vahi wey meupiya is ked-ubpè din, piru wazè din tevangi is menge pubri.
EZE 16:50 Mepelevawen sikandan wey mibaal zan te utew mezaat he menge vaal kayi te etuvangan ku, umbe midezeetan ku sikandan hein neehè ku is mibeelan dan.
EZE 16:51 “ ‘Is Samaria wazà mekevaal te minsan ketengè dà te kenikew he neveelan he menge salà. Edhuna he mahabet is kenikew he mezaat he menge vaal, kenè te kandan, umbe zuen pa kandan he iketazeng kenè ka, tenged te langun he utew mezaat he menge mibeelan nu.
EZE 16:52 Ereg ka he egkeeled tenged te impeehè nu pinaaǥi te menge salè nu he edhuna ka he mezaat kenà te menge suled nu he vahi. Dewata nu is keelezan su iyan ke en mibpaahà he metazeng pa sikandan kenikew.
EZE 16:53 Piru egkeuma is timpu he ibpeuman ku ibpeuswag is Sodom wey is Samaria, ragkes is menge anak dan he menge vahi. Ne ibpeuman ku zaan sikew ibpeuswag,
EZE 16:54 ne ereg he igkeeled nu is langun he menge vaal nu su tenged te ked-uswag kayi te menge suled nu ebpekelepew he henduen be te edhuna pa heini is menge suled nu he meupiya kenè sikew
EZE 16:55 he iyan is Sodom wey Samaria. Heini sikandan ed-uman ed-uswag wey is menge anak dan he vahi ne iyan daan heini egkehitavù kenikew wey te menge anak nu he vahi.
EZE 16:56 Midsudì nu zengan is Sodom dutun te timpu te kegkemepelevawen nu
EZE 16:57 wey hein wazè pa mezayag is kezaat nu. Piru ǥuntaan iring ke en kandin su midsudì ka zaan te menge meǥinged diyà te Edom wey ziyà te nekeelingkus kayi he menge lugar, wey te menge meǥinged diyà te Filistia wey ziyà te menge lugar he nekeelingkus kenikew.
EZE 16:58 Egkaantus nu is silut tenged te mahawag wey utew mezaat he menge vaal nu. Iyan a, is Nengazen, is migkaǥi kayi.’ ”
EZE 16:59 Migkaǥi pa is Nengazen he MEGBEVAYÀ te, “Edsilutan ku sikew te ereg kenikew, su mibpekahagkap nu is pesarig ku pinaaǥi te kedsupaka nu te paaǥi ku te kebpekid-uyun.
EZE 16:60 Piru edtumanen ku is kebpekid-uyun ku kenikew hein betan-en ke pa, ne edhimu a te kebpekid-uyun ku kenikew he ebpedayun te wazà pidtemanan.
EZE 16:61 Ne egketenuzan nu ke hengkey is betasan nu zengan ne egkeeled ka, lavew en ke edhimuwen ku he menge anak nu is menge suled nu he vahi, he iyan is Samaria wey Sodom, minsan kenà heini ragkes te paaǥi ku te kebpekid-uyun kenikew.
EZE 16:62 Edlig-enan ku is kebpekid-uyun ku kenikew, ne egketuenan nu he iyan a Nengazen.
EZE 16:63 Egketenuzan nu is menge salè nu ne egkeeled ka, ne kenè ke en ebpekekaǥi tenged te utew nu kegkeeled emun ebpeseyluwen ku en sikew tenged te langun he mibeelan nu. Iyan a, is Nengazen he MEGBEVAYÀ, is migkaǥi kayi.”
EZE 17:1 Migkaǥi is Nengazen kayi te kedì te,
EZE 17:2 “Sikew is etew, keǥiya nu heini is sempità diyà te menge etew te Israel,
EZE 17:3 ne keǥiyi nu sikandan he iyan a, is Nengazen he MEGBEVAYÀ migkaǥi kayi: duen dekelà he kulaǥu he midlayang pehendiyà te Lebanon. Meluag is menge pakpak din wey merapung is bulvul zin he nekedseselekawà is barek. Ne midlatun heini ziyà te purù te kayu he sidru,
EZE 17:4 ne midtamped kayi is lumbey te kinepuruan he subpang. Mid-uwit din heini ziyà te lugar te menge nigusyanti ne impemula zin dutun.
EZE 17:5 “Ne hein nepasad migkuwa haazà is kulaǥu te lisu he ebpuun diyà te tanà he Israel ne impemula zin heini ziyà te egkeveluyan he tanà he kilid te wahig ne zutun utew meǥaan is kedtuvù din.
EZE 17:6 Midtuvù heini he mevavà he pinemula he ebpenguyabpat. Is menge subpang kayi nenguyabpat pehendutun te kulaǥu, ne mezalem is nesenevan te menge zalid din. Ne mibpurung mebpenubpang ne mibpeneringsing.
EZE 17:7 “Piru zuen nekeuma he selakew en he zekelà he kulaǥu. Meluag daan is menge pakpak din wey merapung is bulvul zin. Is menge zalid wey menge subpang duen te pinemula nenguyabpat pehendutun te kulaǥu su para mewehiǥi heini duen te kulaǥu te lavew pa te wahig duen te tanà he mibpemulaan kandin.
EZE 17:8 Midhimu heini zutun te pinemula minsan diyè en sikandin ikepemula te meupiya he tanà, he zuen duen dekelà he wahig he ebpekeveǥey kandin te meupiya he tuvù, wey ebpekepeveǥas, wey ebpekeveǥey kandin te kekempet.
EZE 17:9 “Ne ǥuntaan, siak, is Nengazen he MEGBEVAYÀ, ed-insà a te: Ebpekepedayun be heini te kedtuvù? Kenà! Ebezuten heini ne egkuwaan is menge veǥas din, ne ebey-anan en ke meǥangu. Melemu zà heini he ebezuten, kenè en egkinahanglan te mezesen he etew etawa mezakel he menge etew is kebazut kayi.
EZE 17:10 Minsan id-uman pa heini ibpemula ziyà te selakew en he lugar kenà gihapun heini edtuvù. Egkepurung heini egkeǥangu emun egkeremaǥen te meinit he keramag he ebpuun te edsilaan.”
EZE 17:11 Ne migkaǥi is Nengazen kayi te kedì te,
EZE 17:12 “Insai nu heini is mesinupaken he menge etew te Israel ke netuenan dan be is kehuluǥan duen te sempità. Keǥiyi nu sikandan te iyan heini kehuluǥan din: Midhendiyà is hadì te Babilonia te Jerusalem ne mibihag din is hadì kayi wey menge upisyal, ne miduma zin diyà te Babilonia.
EZE 17:13 Mibpilì sikandin te sevaha zuen te menge kevuwazan te hadì te Juda ne nekid-uyun sikandin kandin, ne impepenangdù din heini he mebpenilbi kandin. Mibihag din daan is lavew he menge etew ziyà te Juda
EZE 17:14 su para kenè en mekeuman mekeenew heini he ginhedian ne kenè en mekesukul kandin. Ebpekehimu zà he ebpedayun heini he ginhedian emun ebpedayun heini edtuman te neuyunan dan te Babilonia.
EZE 17:15 Piru midsukul is hadì te Juda te hadì te Babilonia pinaaǥi te kedsuǥù te menge etew pehendiyà te Ehipto te kedhangyù te menge kudà wey mahabet he menge sundaru. Edlampus be sikandin? Egkelikayan din be wey egkepeleǥuyan is silut kandin tenged te kedrapas din te neuyunan dan te hadì te Babilonia?
EZE 17:16 Kenà! Su siak, is uuyag he Nengazen he MEGBEVAYÀ, nenangdù a he heini is hadì te Juda, siguradu he ebpatey ziyà te Babilonia, su midrapas din is uyun he mibpenengduan din diyà te hadì te Babilonia he iyan ingkehimuwa kandin he hadì.
EZE 17:17 Kenà ebpekeuǥup kandin te kebpekidtebek is hadì te Ehipto wey is mahabet wey mekeǥeǥehem he menge sundaru zin emun edsurung en is menge tig-Babilonia te kebpenhimatey te mahabet.
EZE 17:18 Ne ǥeina te wazè din beliya is impenangdù din wey wazè din tumana is neuyunan, kenè sikandin ebpekelingkawas.
EZE 17:19 “Umbe siak, is uuyag he Nengazen he MEGBEVAYÀ, ebpenangdù a he edsilutan ku sikandin su midrapas din is kebpekid-uyun ku ne migamit din is ngazan ku te kebpenangdù din he edtumanen din heini.
EZE 17:20 Edhingutelen ku sikandin ne ed-uwiten ku ziyà te Babilonia, ne zutun edsilutan ku sikandin tenged te kedluib din kedì.
EZE 17:21 Ebpematey is ebpemelaǥuy he menge sundaru zin, ne is egkesamà ebpekepeyapat diyà te minsan hendei he lugar. Ne human niw egketuenan he iyan a, is Nengazen migkaǥi kayi.”
EZE 17:22 Mibpedayun megkaǥi is Nengazen he MEGBEVAYÀ te, “Egkuwa a te lumbey ziyà te kinepuruan te subpang te kayu he sidru ne ibpemula ku heini ziyà te puntur te metikang he vuntud diyà te Israel. Ebpenubpang heini ne ebpemeǥas, ne egkehimu he utew mekempet he sidru. Edsesalag dutun is langun he kelasi te menge tagbis ne ebpekehelung sikandan diyà te menge subpang kayi.
EZE 17:24 Ne egketuenan te langun he menge kayu kayi te tanà he iyan a is Nengazen edtamped te metawis he menge kayu wey ebpeketawis te mevavà he menge kayu. Iyan a zaan egangu te merapung he menge kayu wey ed-uman ebpetuvù te neǥangu he menge kayu. Iyan a, is Nengazen, midsaad kayi ne edtumanen ku heini.”
EZE 18:1 Migkaǥi is Nengazen kayi te kedì te,
EZE 18:2 “Hengkey is ibpesavut te kegkaǥi kayi he erubasa mehitenged te Israel: ‘Migkaan is amey te mepezes he paras, ne iyan nengingilu is menge anak din?’
EZE 18:3 “Siak, is Nengazen he MEGBEVAYÀ he uuyag, edsaad a he kenè niw en egkeuman egkeerubasa heeyan kayi te Israel.
EZE 18:4 Pemineǥa niw heini! Is langun he untung ne kedì–is untung te menge ǥinikanan wey is untung te menge vatà. Iyan dà ebpatey tenged te rimeǥas te salà sikan is etew he nekesalà.
EZE 18:5 Penenglitan duen etew he metazeng he mibaal te hustu he menge vaal.
EZE 18:6 Wazà sikandin med-azap te menge ed-ezapen kayi te Israel wey wazà megkaan te menge pemuhat he para kayi he menge ed-ezapen diyà te menge simbahan diyà te menge vuntud. Wazà sikandin mebpekidhilavet te esawa te zuma etawa bahi he midlengesahan.
EZE 18:7 Wazà sikandin mebpendaagdaag, wey in-ulì din is insandà te mid-utang diyà te kandin. Wazà sikandin mebpenakew, kekenà, impekaan din is egkengevitil wey mibeǥayan din te visti is menge wazà bisti.
EZE 18:8 Wazè din ipetuvù is impeutang din. Wazà sikandin mebaal te mezaat, wey wazè din midepiǥan diyà te kedhukum din.
EZE 18:9 Ebpurungan din edsunuza is menge sulunuzen wey menge suǥù ku. Metazeng heeyan he etew ne ebpedayun is kegkeuyag-uyag din. Iyan a, is Nengazen he MEGBEVAYÀ, is migkaǥi kayi.
EZE 18:10 “Piru penenglitan duen din anak he maama he mesipala wey kriminal etawa mibeelan din is minsan hengkey kayi he menge vaal
EZE 18:11 he wazà beeli te amey zin: Egkaan sikandin te menge pemuhat he para te menge ed-ezapen diyà te menge simbahan diyà te menge vuvungan, wey ebpekidhilavet te esawa te zuma.
EZE 18:12 Edèdaaǥen din is menge pubri wey is menge egkaayuayu. Tekawen sikandin, wey kenè din id-ulì is insandà te menge nekeutang diyà te kandin. Ed-azap sikandin te zuma he menge ed-ezapen, wey ebaal te utew mezaat he menge vaal.
EZE 18:13 Ebpeutang sikandin te ibpetuvù. Egkeuyag-uyag be sikandin? Kenà! Ebpatey heini he etew tenged kayi te langun he utew mezaat he menge vaal he mibeelan din. Iyan dà sikandin egkevasul tenged te kemetayen din.
EZE 18:14 “Ne penenglitan heini is lalung he etew zuen din anak he maama, ne minsan neehè din is langun he menge salà he mibeelan te amey zin, piru wazè din mulà heini iringi.
EZE 18:15 Wazà sikandin med-azap te menge ed-ezapen kayi te Israel wey wazà megkaan te menge pemuhat he para kayi he menge ed-ezapen diyà te menge simbahan diyà te menge vuntud. Wazà sikandin mebpekidhilavet te esawa te zuma.
EZE 18:16 Kenà sikandin ebpendaagdaag, wey kenà sikandin ebpesandà te menge mid-utang diyà te kandin. Kenà sikandin ebpenakew, kekenà, ebpekaan sikandin te egkengevitil wey ebeǥayan din te visti is menge wazà bisti.
EZE 18:17 Kenà sikandin ebaal te mezaat, wey kenà sikandin ebuyù te tuvù te ed-utang diyà te kandin. Edtumanen din is menge suǥù ku wey menge sulunuzen. Heini he etew kenà ebpatey tenged te salà te amey zin, kekenà, ebpedayun is kegkeuyag-uyag din.
EZE 18:18 Piru is amey zin, ebpatey mulà tenged te salè din su nenlimbung sikandin, nenakew wey mibaal te mezaat diyà te menge zuma zin he meǥinged.
EZE 18:19 “Piru ed-insè kew te, ‘Maan is kenà ereg he edsilutan is anak tenged te salà te amey zin?’ Emun is anak ebaal te metazeng wey hustu, wey ebpurungan din edsunuza is menge sulunuzen, ebpedayun is kegkeuyag-uyag din.
EZE 18:20 Iyan dà ebpatey tenged te rimeǥas te salà is nekesalà. Is anak kenà ereg he edsilutan tenged te salà te amey zin, iring din daan is amey su kenà ereg he edsilutan tenged te salà te anak din. Is keupiyaanan tenged te ketazeng egkeraǥun te metazeng, is silut tenged te kelelalung egkeraǥun te lalung.
EZE 18:21 “Iyan, emun ed-engkezan te lalung he etew is langun he salà he neveelan din, ne edtuman te sulunuzen wey ebaal te hustu wey metazeng, kenà sikandin ebpatey, kekenà, egkeuyag-uyag sikandin.
EZE 18:22 Kenà en sikandin edsukutan tenged te langun he menge salà he nehimu zin te nehuna he timpu, tenged te mibeelan din he metazeng ebpedayun is kegkeuyag-uyag din.
EZE 18:23 Siak, is Nengazen he MEGBEVAYÀ, kenà a egkelipey emun ebpatey is lalung he etew. Egkelipey a emun ed-engked sikandin te mezaat he ulaula wey ebpedayun he egkeuyag-uyag.
EZE 18:24 “Piru emun ed-engked he edtinazeng is etew he metazeng ne ebpengungubpaan duma is kebaal te salà wey kebaal te utew mezaat he menge vaal he ebeelan te lalung he menge etew, ebpedayun be is kegkeuyag-uyag din? Kenà! Su edlipatan is langun he metazeng he menge vaal zin. Ne tenged te kedluib din kedì wey te menge salà he neveelan din, ebpatey sikandin.
EZE 18:25 “Ne sikiyu mulà, iyan niw egkeǥiyen is, ‘Kenà metazeng is menge paaǥi te Nengazen.’ Pemineg kew is menge etew te Israel: Iyan be kenà metazeng is kediey he menge paaǥi etawa iyan is keniyu?
EZE 18:26 Emun is etew he metazeng ed-engked he edtinazeng su ebaal te salà, ebpatey sikandin tenged keniyan.
EZE 18:27 Piru is lalung he etew he ed-engked he edlalunglalung su ebaal te metazeng wey hustu, egkelibri zin is untung din.
EZE 18:28 Kenà sikandin ebpatey su mid-iniyuǥan din man is langun he salè din.
EZE 18:29 Ne egkaǥi kew pa is menge etew te Israel te, ‘Kenà metazeng is paaǥi te Nengazen.’ He menge etew te Israel, iyan be kenà metazeng is paaǥi ku etawa iyan is keniyu?
EZE 18:30 “Umbe egkeǥiyan ku sikiyu is menge etew te Israel, te siak, is Nengazen he MEGBEVAYÀ iyan a edhukum te kada sevaha keniyu sumalà te menge vaal niw. Guntaan sendit kew ne iniyuǥi niw is menge salè niw su wey kew kenà mezeeti.
EZE 18:31 Engkezi niw en is kebaal niw te salà ne beǥuwa niw en is kebpengungubpaan niw su kenè kew ereg he ebpatey is menge etew te Israel.
EZE 18:32 Su kenà a egkelipey emun duen ebpatey. Umbe engkezi niw en is mezaat he ulaula su wey mebpedayun is kegkeuyag-uyag niw. Iyan a, is Nengazen he MEGBEVAYÀ, is migkaǥi kayi.”
EZE 19:1 Migkaǥi is Nengazen kayi te kediey te, “Kentaha nu heini is kanta para te kebpenhulùhulù mehitenged te menge pengulu te Israel:
EZE 19:2 “Is iney nu neiring te sevaha he erimaung he mid-elimahan din is menge anak din he zuma zin is duma he menge erimaung.
EZE 19:3 Mid-elimahan din is sevaha te menge anak din ne nehimu heini he mezesen he erimaung. Metau heini he ebpendawi, ne nengaan heini te etew.
EZE 19:4 Ne hein netuenan heini te menge meǥinged diyà te zuma he menge nasyun midhingutel zan heini ne mid-uwit dan diyà te Ehipto he kinedinahan.
EZE 19:5 “Ne hein netuenan duen te iney zin he erimaung he wazà metuman is pelanu zin duen te anak din, mid-elimahan din is sevaha pa te menge anak din ne nehimu heini he mezesen he erimaung. Nekiduma heini te zuma he menge erimaung ne mibmetau he ebpendawi, ne nengaan heini te etew.
EZE 19:7 Midlempag din is menge melig-en he menge lugar te menge kuntada ne mibpemengkag din is menge inged dan. Nahandek is menge meǥinged te hiniǥeran din.
EZE 19:8 “Midsevaha is menge meǥinged diyà te menge nasyun te kegpekidtebek kandin, ne midliǥuyan dan sikandin. Midteenan dan te veteng ne neutel zan.
EZE 19:9 Migkew-itan dan ne intaǥù dan diyà te veleyanan, ne mid-uwit dan diyà te hadì te Babilonia. Midureng dan heini su wey kenè en mezineg diyà te menge vuvungan te Israel is kedhiniǥer zin.
EZE 19:10 “Is iney nu neiring daan te paras he impemula ziyà te kilid te wahig. Mahabet is menge subpang kayi wey menge veǥas din su ebpekesupsup man te wahig.
EZE 19:11 Melig-en is menge subpang kayi ne egkehimu he ebeelan he tuked te hadì. Utew mibmetikang haazà is paras, ne midlavew te zuma he merapung he menge pinemula. Egkaahà heini tenged te ketikang din wey kerapung te menge subpang din.
EZE 19:12 Piru mibazut heini te egkeepes duen, ne intimbag din diyà te tanà. Ne nengepis is menge veǥas din tenged te meinit he keramag he ebpuun diyà te edsilaan. Neǥangu is melig-en he menge subpang din ne segugunà heini mibinsuli.
EZE 19:13 Ne zutun impasek heini iuman diyà te sibsivayan, diyà te lugar he memaza he wazà duen wahig.
EZE 19:14 Netutung is sevaha he subpang kayi ne midelandap diyà te zuma he menge subpang ne netutung is menge veǥas din. Umbe wazè en nesamà he melig-en he subpang din he egkehimu he ebeelan he tuked te hadì. “Heini he kebpenhulùhulù ereg he egkentahan kayi he timpu.”
EZE 20:1 Hein ikesepulù he andew te ikelima he vulan, te ikepitu he tuig te kegkevihag dey, duen nepipira he menge pengulu te Israel he midhengkayi te kedì ne mibpinuu ziyà te etuvangan ku su ebpetudtul zan te menge lalag he ebpuun diyà te Nengazen.
EZE 20:2 Migkaǥi is Nengazen kayi te kedì te,
EZE 20:3 “Sikew is etew, keǥiyi nu heeyan is menge pengulu te Israel, he siak, is Nengazen he MEGBEVAYÀ, migkaǥi a te, ‘Midhengkayi kew ve te kebpetudtul kediey te menge lalag ku? Siak, is Nengazen he MEGBEVAYÀ he uuyag, ebpenangdù a he kenè ku edtudtulen is menge lalag ku ziyà te keniyu.’
EZE 20:4 “Sikew is etew, hukumi nu sikandan. Ipetentenuzi nu kandan is utew mezaat he menge vaal he mibeelan te menge kepuun dan.
EZE 20:5 Keǥiyi nu sikandan he siak, is Nengazen he MEGBEVAYÀ, migkaǥi a te, ‘Hein mibpilì ku is Israel he menge kevuwazan ni Jacob, ne mibpekilala a kandan diyà te Ehipto, nenangdù a ziyà te kandan. Ke siak te, “Iyan a Nengazen he Megbevayè niw.”
EZE 20:6 Ne zutun daan he timpu nenangdù a he ibpeǥawas ku sikandan puun te Ehipto ne ed-uwiten ku sikandan diyà te tanà he mibpilì ku para kandan–meupiya wey selebpeten he tanà, kineupiyahan te langun he tanà.
EZE 20:7 Ne migkeǥiyan ku sikandan te, “Iselikwey niw en is utew mezaat he menge ed-ezapen niw. Kenè niw remeriki is keugelingen niw pinaaǥi te ked-azap te menge ed-ezapen diyà te Ehipto, su iyan a, is Nengazen Megbevayè niw.”
EZE 20:8 “ ‘Piru midsupak e zan, ne wazè dan mebpemineg. Wazè dan iselikwey is utew mezaat he menge ed-ezapen diyà te Ehipto. Umbe migkaǥi a te ibpeǥezaman ku kandan is pauk ku zutun te ziyà sikandan te Ehipto.
EZE 20:9 Piru wazè ku heini himuwa, su midlevanan ku is dengeg ku su wey a kenà mependezeisey te menge etew ziyà te menge nasyun he nekeelingkus te Israel su netuenan dan he impahayag ku ziyà te menge Israilihanen he ibpeǥawas ku sikandan puun te Ehipto.
EZE 20:10 Umbe, impeǥawas ku sikandan puun te Ehipto ne mid-uwit ku ziyà te sibsivayan.
EZE 20:11 Ne zutun imbeǥey ku kandan is menge suǥù ku wey menge sulunuzen he ereg he edtumanen dan para mebpedayun is kegkeuyag-uyag dan.
EZE 20:12 Impetuman ku zaan kandan is Andew te Kedhimeley he tuus te paaǥi te kedepitè dey. Ebpetanudtanud heini kandan he iyan a, is Nengazen mibpilì kandan wey zan mehimu he menge etew ku.
EZE 20:13 “ ‘Piru midsupak gihapun kediey is menge etew te Israel te ziyè dan te sibsivayan. Wazè dan tumana is menge suǥù ku wey menge sulunuzen, he iyan pezem ibpekepedayun te kegkeuyag-uyag dan is kedtumana zan kayi. Wazè dan daan isipa he segradu is Andew te Kedhimeley he impetuman ku kandan. Umbe migkaǥi a te ibpeǥezaman ku kandan is pauk ku su para mepurung sikandan mezeeti ziyà te sibsivayan.
EZE 20:14 Piru wazè ku heini leusa te ebaal su egkepeel-elezan a ziyà te menge nasyun he zutun netuenan he impeǥawas ku is menge Israilihanen puun te Ehipto.
EZE 20:15 Piru nenangdù a ziyà te kandan dutun te sibsivayan he kenè ku sikandan ed-uwiten diyà te tanà he imbeǥey ku kandan, kes tanà he meupiya wey selebpeten, kes kineupiyahan te langun he tanà.
EZE 20:16 Impenangdù ku heini ziyà te kandan su geina te wazè dan tumana is menge suǥù ku wey menge sulunuzen, wey wazè dan isipa he segradu is Andew te Kedhimeley he impetuman ku kandan. Impelavi zan is ked-azap te zuma he menge ed-ezapen dan.
EZE 20:17 “ ‘Piru minsan pa te iyan heini mibeelan dan, nehizuwan ku ǥihapun sikandan, ne wazè ku sikandan purungi zèdeeti ziyà te sibsivayan.
EZE 20:18 Dutun te sibsivayan migkeǥiyan ku is menge anak dan te, “Kenè niw iringi is menge sulunuzen wey menge mibeelan te menge ginikanan niw, ne kenè niw remeriki is keugelingen niw pinaaǥi te ked-azap te zuma he menge ed-ezapen.
EZE 20:19 Iyan a is Nengazen Megbevayè niw. Purungi niw tumana is menge suǥù ku wey menge sulunuzen.
EZE 20:20 Isipa niw he segradu is Andew te Kedhimeley su tuus heini te paaǥi te kedepitè tew, ne ebpetanudtanud heini keniyu he iyan a is Nengazen Megbevayè niw.”
EZE 20:21 “ ‘Piru minsan is menge anak dan midsupak daan kedì. Wazè dan purungi tumana is menge suǥù ku wey menge sulunuzen, he iyan pezem ibpekepedayun te kegkeuyag-uyag dan is kedtumana kayi. Ne wazè dan daan isipa he segradu is Andew te Kedhimeley he impetuman ku kandan. Umbe migkaǥi a he ibpeǥezaman ku kandan dutun te sibsivayan is utew ku kegkepauk.
EZE 20:22 Piru wazè ku heini leusa te ebaal su egkepeel-elezan a ziyà te menge nasyun he zutun netuenan he impeǥawas ku is menge Israilihanen puun te Ehipto.
EZE 20:23 Piru zutun te sibsivayan nenangdù a ziyà te kandan he ibpeyapat ku sikandan diyà te nekedseselekawà he menge nasyun,
EZE 20:24 su wazè dan tumana is menge suǥù ku wey menge sulunuzen, wey wazè dan isipa he segradu is Andew te Kedhimeley he impetuman ku kandan. Iyan dan hinuun impelavi is ked-azap te menge ed-ezapen te menge kepuun dan.
EZE 20:25 Umbe, mibey-anan ku en sikandan he ebpedayun edtuman te menge suǥù wey menge sulunuzen he kenà meupiya wey kenà ebpekeveǥey kandan te meluǥayad he untung.
EZE 20:26 Mibey-anan ku en daan sikandan duen te kedremeriki zan te keugelingen dan pinaaǥi te kebpemuhata zan te zuma he menge ed-ezapen ragkes en is kebpemuhat dan he iyan dan ibpemuhat is kinekekayan he anak dan he maama. Intuǥut ku heini kandan su wey zan mahandek ne egketuenan dan he iyan a Nengazen.’
EZE 20:27 “Umbe, sikew is etew, keǥiyi nu is menge Israilihanen, he siak, is Nengazen he MEGBEVAYÀ, migkaǥi a te: ‘Is menge kepuun niw mibpedayun is kebpendezeisaya zan wey kedluivi zan kedì.
EZE 20:28 Su hein mid-uwit ku sikandan diyà te tanà he insaad ku he ibeǥey ziyà te kandan, mibpemuhat dan te menge pemuhat, menge veyewà, wey menge inumen diyà te metikang he menge lugar wey ziyà te merapung he menge kayu he egkeehè dan. Umbe utew ku sikandan nepeuki.
EZE 20:29 Mid-insaan ku sikandan te, “Hengkey ves heeyan is metikang he lugar he layun kew ebpehendutun?” ’ (Taman en guntaan is igngazan dan keniyan he lugar ‘simbahan diyà te metikang he lugar’.)
EZE 20:30 “Ne ǥuntaan, keǥiyi nu is menge etew te Israel te siak, is Nengazen he MEGBEVAYÀ, migkaǥi a te, ‘Edremerikan niw ve zaan is keugelingen niw iring te mibeelan te menge kepuun niw, wey ed-azap kew ve zaan te utew mezaat he menge ed-ezapen?
EZE 20:31 Minsan ganì guntaan midremerikan niw en is keugelingen niw pinaaǥi te kebpemuhat diyà te zuma he menge ed-ezapen ragkes en is kebpemuhata niw te menge anak niw he maama pinaaǥi te kedtevuna niw zuen diyà te hapuy. Umbe pemineg kew is menge etew te Israel, siak, is Nengazen he MEGBEVAYÀ he uuyag, he kenà ebpenudtul te menge lalag diyan te keniyu minsan edhangyù kew pa.
EZE 20:32 “ ‘Kenà egkehitavù is egkeisip niw he egkeiring kew te zuma he menge nasyun he is menge etew zuen ed-azap te menge ed-ezapen he ledawan he vatu wey kayu.
EZE 20:33 Siak, is Nengazen he MEGBEVAYÀ he uuyag, ebpenangdù a he edhedian ku sikiyu pinaaǥi te zekelà he ǥehem ku wey pauk ku.
EZE 20:34 Uya, tenged te zekelà he gehem ku wey pauk ku, id-awè ku sikiyu ziyà te nekedseselekawà he menge nasyun he zutun kew mekepeyapat,
EZE 20:35 ne ed-uwiten ku sikiyu ziyà te sibsivayan he ǥaked te menge etew ziyà te menge nasyun. Ne zutun ed-etuvangen ku sikiyu wey edhukuman.
EZE 20:36 Uya, edhukuman ku sikiyu iring te midhukuman ku is menge kepuun niw ziyà te sibsivayan te Ehipto. Iyan a, is Nengazen he MEGBEVAYÀ, is migkaǥi kayi.
EZE 20:37 Idsivey ku is menge lalung keniyu, ne edlig-enan ku is paaǥi ku te kebpekidepità keniyu.
EZE 20:38 Idtapid ku puun keniyu is menge midsupak kedì. Minsan ibpeǥawas ku sikandan puun te nasyun he mibihag kandan, piru kenè dan gihapun ebpekeseled diyà te tanà he Israel. Ne zutun egketuenan niw he iyan a Nengazen.’ ”
EZE 20:39 Migkeǥiyan daan te Nengazen he MEGBEVAYÀ is menge etew te Israel te, “Sigi, pedayun kew en he ebpenilbi te zuma he menge ed-ezapen niw emun kenè kew egkesuat he ebpezumazuma kediey. Piru egkeuma is timpu he kenà ad keniyu egkepeelimungawan pinaaǥi te kebpemuhat niw ziyà te menge ed-ezapen niw.
EZE 20:40 Su ebpekepenilbi kediey is langun he menge etew te Israel ziyà te segradu he vuvungan ku, he iyan kes metikang he vuvungan diyà te Israel. Dutun edewaten ku sikiyu wey ibpepemuhat ku te nekedseselekawà he menge pemuhat wey te ispisyal he menge gasa.
EZE 20:41 Emun egkekuwa ku en sikiyu puun diyà te nekedseselekawà menge nasyun he zutun kew mekepeyapat, edewaten ku sikiyu he iring te pemuhat he veyewà he mehemut. Pinaaǥi kayi te ebeelan ku ziyà te keniyu igkepeehè ku ziyà te keniyu is kegkewaǥas ku egkaahà heini te menge zuma he nasyun.
EZE 20:42 Ne emun egkeuwit ku en sikiyu ziyà te tanà te Israel he insaad ku ziyà te menge kepuun niw, egketuenan niw he iyan a Nengazen.
EZE 20:43 Ne zutun egketenuzan niw is menge vaal niw he nekeremerik keniyu, ne egkesilag kew te keugelingen niw tenged te langun he mezaat he mibeelan niw.
EZE 20:44 He menge etew te Israel, egketuenan niw he iyan a Nengazen, emun ebpurungan ku sikiyu para te zengeg ku minsan mezaat wey meremerik is menge vaal niw. Iyan a, is Nengazen he MEGBEVAYÀ, is migkaǥi kayi.”
EZE 20:45 Migkaǥi is Nengazen kayi te kedì te,
EZE 20:46 “Sikew is etew, sinaru ka ziyà te zivavà, kaǥi ka te ebpekesuǥat keniyan te ketelunan.
EZE 20:47 Keǥiyi nu heeyan he lugar he siak, is Nengazen he MEGBEVAYÀ, edretem a te hapuy he ebpekevinsul te menge kayu keniyan, neǥangu etawa wazà. Kenà egkeevukan heini is edriyubriyub he hapuy. Egkevinsulan kayi is langun puun te zivavà pehendiyà te zizaya.
EZE 20:48 Egkaahà te langun he iyan a, is Nengazen, midretem kayi, ne kenà heini egkeevukan.”
EZE 20:49 Ne migkaǥi a te, “He Nengazen he MEGBEVAYÀ, egkaǥi is menge etew te sempitè dà is ebpengeǥiyen ku.”
EZE 21:1 Migkaǥi is Nengazen kayi te kedì te,
EZE 21:2 “Sikew is etew, sinaru ka ziyà te Jerusalem ne kaǥi ka te ebpekesuǥat te Israel wey te menge simbahan kayi.
EZE 21:3 Keǥiyi nu sikandan he siak, is Nengazen he MEGBEVAYÀ, migkaǥi a te, ‘Ebpekigkuntada a keniyu! Edhulevuten ku is ispada ku ne ebpenhimetayan ku sikiyu is langun, meupiya man etawa lalung he etew.
EZE 21:4 Uya, ebpenhimetayan ku sikiyu is langun te ispada ku puun te zivavà taman te zizaya.
EZE 21:5 Ne egketuenan te langun he iyan a Nengazen. Midhulavut ku en is ispada ku, ne kenè ku heini igumà taman te kenè pa egkepasad is buluhaten din.’
EZE 21:6 “Umbe, sikew is etew, ipezineg nu kandan is dag-es nu tenged te kegkeseeng nu wey kesakit te ǥehinawa nu.
EZE 21:7 Emun ed-insà sikandan ke maan is midag-es ka, keǥiyi nu sikandan he tenged te tudtul he ebpekepekerker, ebpekepeluya, ebpekepahandek, wey ebpekelipung kandan. Egkehitavù heini te kenà egkeuǥet. Iyan a, is Nengazen he MEGBEVAYÀ, is migkaǥi kayi.”
EZE 21:8 Migkaǥi pa is Nengazen kayi te kedì te,
EZE 21:9 “Keǥiya nu is ibpetuenan ku te menge etew. Keǥiyi nu sikandan te siak, is Nengazen, migkaǥi a te, ‘Mibpurungan ku kemengaa is ispada ku he idhimatey ku keniyu. Utew ku heini impesinew su wey megkindab heini iring te kilat. Ne ǥuntaan edlipey kew pe be? Ed-un-undahan niw pe be is kebmansu ku keniyu?
EZE 21:11 Mibpurungan ku kemengaa is ispada ku wey impesinew ku, ne andam en heini he egemiten te kebpenhimatey.’
EZE 21:12 “Sikew is etew, sineǥew ka ne tempelinga nu is kumeng nu tenged te kegkeseeng su heeyan he ispada ebpekepatey te menge etew ku he Israilihanen wey te menge pengulu zan.
EZE 21:13 Sevaha heini he penggezam te menge etew ku. Kenè dan isipa he kenè ku edleusen is kebmensuwa ku kandan he và dan dà edwelwelia. Iyan a, is Nengazen he MEGBEVAYÀ, is migkaǥi kayi.
EZE 21:14 Umbe, sikew is etew, keǥiya nu is menge lalag ku. Sumbaǥa nu is palad nu he tuus te kegkepauk nu, ne kuwa ka te ispada ne itibas nu heini te kezezuwa etawa ketetelu he simbulu he mahabet kandan is ebpematey te tebek.
EZE 21:15 Ebpengerkeren sikandan tenged te kegkahandek ne mahabet is ebpematey kandan. Insavuk ku en is ispada ziyà te menge pultahan te menge inged dan te kedhimatey kandan. Egkindab heini iring te kilat ne andam en he idhimatey.
EZE 21:16 He ispada, pemenibas ka ziyà te egkeǥivang wey egkekewanan. Pemenibas ka minsan hendei.
EZE 21:17 Edsumbaǥen ku zaan is palad ku he tuus te kegkepauk ku, ne egkaawà is pauk ku. Iyan a, is Nengazen, is migkaǥi kayi.”
EZE 21:18 Migkaǥi is Nengazen kayi te kedì te,
EZE 21:19 “Sikew is etew, baal ka te mapa ne merkahi nu te zezuwa he kersada he egkehimu he ebeyaan te hadì te Babilonia he ed-uwit te ispada. Heini is dezuwa he kersada ne ebpuun diyà te Babilonia. Sevuki nu te tuus is diyà te lembaǥan dutun te zezuwa he zalan para metueni ke hendei ebpevayà heeyan is dezuwa he zalan.
EZE 21:20 Is sevaha he zalan ebpehendiyà te Raba, he kepital te Amon, ne is sevaha pa, ne ibpehendiyà te Jerusalem he neliǥuy te verengbeng, he kepital te Juda.
EZE 21:21 Su is hadì te Babilonia edhitindeg diyà te lembaǥan keniyan te zezuwa he kersada ne ibarè din ke hendei zutun te zezuwa is ed-ikulen din pinaaǥi te kedhubus te vesut te panà, wey kedsusi te atey te uyaǥen he impemuhat, wey ked-insà diyà te menge ed-ezapen.
EZE 21:22 Is egkehubus din he vesut te panà iyan is mibmerkahan te Jerusalem. Ne edhabet sikandin ebpemensag he edsurungen dan en is Jerusalem ne egeraan dan is meǥinged kayi. Ebpesevukan din is pultahan te Jerusalem te zezekelà he menge kayu he ibengkag. Ebaal sikandin te turi-turi wey edtambù te tanà diyà te kilid duen te verengbeng duen te inged su para mepemenehiki heini.
EZE 21:23 Kenà ebpeketuu is menge tig-Jerusalem he egkehitavù heini ziyà te kandan su zuen neuyunan dan te menge tig-Babilonia. Piru is hadì te Babilonia ebpetanudtanud kandan te menge salè dan, ne ebihaǥen din sikandan.
EZE 21:24 “Umbe siak, is Nengazen he MEGBEVAYÀ, migkaǥi a te: Nezayag en is menge salè niw, impeehè niw ke sengemenu is kebmesinupaken niw wey kegkemekesesalè niw. Ne ǥeina te mibeelan niw heini ibpevihag ku sikiyu.
EZE 21:25 “Sikew, is lalung wey mekesesalà he pengulu te Israel. Neume en is timpu te kedsiluti kenikew!
EZE 21:26 Siak, is Nengazen he MEGBEVAYÀ migkaǥi a te: Puwasa nu is tengkulu nu wey kuruna nu, su egkahalin en is egkeulaula. Is deisey is pid-etawan din iyan en egkehimu he gemhanan, ne is gemhanan iyan en egkehimu he zeisey is pid-etawan din.
EZE 21:27 Edezeetan ku is Jerusalem! Ne kenè en heini egkeuman egketukud taman te kebpekelepew te pinilì ku he iyan edhukum kayi he inged; su insarig ku heini kandin.
EZE 21:28 “Ne sikew is etew, keǥiyi nu is menge Amunihanen he edsudì te Israel he siak, is Nengazen he MEGBEVAYÀ, migkeǥiyan ku sikandan te: Andam en is ispada he ibpenhimatey. Utew heini impesinew su wey mebpengindab iring te kilat.
EZE 21:29 Kenà tutuu is menge nelewasan wey menge tagnà he nezawat niw mehitenged te ispada. Iyan tutuu is, andam en is ispada te kedtamped te menge lieg te lalung he menge etew. Neume en is timpu te kedsiluti kandan.
EZE 21:30 Igumè ku ve heini is ispada? Kenà! Edsilutan ku sikiyu keniyan mismu te nasyun niw, he mid-enakan keniyu.
EZE 21:31 Ebpeǥezaman ku keniyu is utew ku kegkepauk, ne ibeǥey ku sikiyu ziyà te mesipala he menge etew, he nelayam he ebpenhimatey.
EZE 21:32 Egkehimu kew he tavun, ne edtudà is lengesa niw keniyan te tanè niw. Ne kenè kew en egketenuzan. Iyan a, is Nengazen, is migkaǥi kayi.”
EZE 22:1 Migkaǥi is Nengazen kayi te kedì te,
EZE 22:2 “Sikew is etew, andam ke en be he edhukum te Jerusalem? Andam ke en be te kedhukum kayi te inged te menge kriminal? Petueni nu kandin is utew mezaat he menge vaal zin.
EZE 22:3 Keǥiyi nu heini is inged he siak, is Nengazen he MEGBEVAYÀ, migkaǥi a te: He inged te menge kriminal, ebpekeuma ziyà te kenikew is limas. Midremerikan nu is keugelingen nu pinaaǥi te kebaal te menge ed-ezapen.
EZE 22:4 Nekesalè ka pinaaǥi te kebpenhimatey nu wey kedremeriki nu te keugelingen nu pinaaǥi te kebaal nu te menge ed-ezapen. Neume en is ketepusan nu. Umbe ed-engitan ka wey ed-un-undahan te menge nasyun.
EZE 22:5 Sikew is inged, nevantug ka te kelelalung wey kesamuk, edsudien ka te menge nasyun he ziyà te uvey wey meziyù.
EZE 22:6 Ahaa nu is menge pengulu te Israel he ed-ubpà diyà te kenikew, migamit dan is gehem dan wey zan mekepenhimatey.
EZE 22:7 Keniyan te lugar nu wazè en tehuza is menge ǥinikanan. Is kenà menge Israilihanen he ed-ubpà diyà te kenikew ebpenepian, ne edèdaaǥen is menge ilu wey menge valu.
EZE 22:8 Mibey-anan nu is segradu he menge azen ku ne wazè nu isipa he segradu is Andew te Kedhimeley he ibpetuman ku.
EZE 22:9 Duen menge etew ziyan te kenikew he mid-uluǥan dan te kewusa is duma su wey ikepehimetayi. Diyà te menge simbahan diyà te menge vuvungan duen daan duma he migkaan te menge pemuhat he impemuhat diyà te zuma he menge ed-ezapen wey zutun utew mahawag is menge vaal zan.
EZE 22:10 Duen daan menge etew ziyan he nekidhilavet te esawa te amey zan etawa bahi he edlengesahan.
EZE 22:11 Duen daan mibpekidhilavet te esawa te zuma, etawa te ambey zin, etawa etevey zin.
EZE 22:12 Is duma mibpesuhul te kedhimatey te etew, is duma mibpeutang te utew zekelà is tuvù din, wey is duma midsepian tenged te kedlimbungi zin te zuma he etew. Nelipatan e zan en. Iyan a, is Nengazen he MEGBEVAYÀ, is migkaǥi kayi.
EZE 22:13 “Menge tig-Jerusalem, edsumbaǥen ku is palad ku he tuus te utew ku kegkepauk tenged te kebpenapì niw wey kebpenhimatey.
EZE 22:14 Duen niw vuwa kevurut wey kelig-en dutun te timpu te kedsiluti ku keniyu? Wazà, su iyan a, is Nengazen migkaǥi te, edsilutan ku sikiyu, ne ebeelan ku iyan heini.
EZE 22:15 Ibpeyapat ku sikiyu ziyà te nekedseselekawà he menge nasyun, ne ibpeengked ku sikiyu te kebaal te nekeremerik keniyu.
EZE 22:16 Egkepeel-elezan kew ziyà te zuma he menge nasyun, ne zutun egketuenan niw he iyan a Nengazen.”
EZE 22:17 Migkeǥiyan ad maan te Nengazen te,
EZE 22:18 “Sikew is etew, is menge etew te Israel nehimu he wazè dan pulus para kediey. Iring sikandan te tangis te brunsi, lata, putew, etawa timeǥà he netaǥak diyà te tunawà he midlunsayan te pelata.
EZE 22:19 Umbe siak, is Nengazen he MEGBEVAYÀ, migkaǥi a te, ‘Geina te wazè niw pulus su iring kew te tangis, ne edtiǥumen ku sikiyu ziyà te Jerusalem.
EZE 22:20 Iring a te etew he ed-amur-amur te pelata, te brunsi, putew, timeǥà wey lata ziyà te edriyubriyub he edtunawan duen. Uya, ed-em-emuren ku sikiyu ziyà te Jerusalem tenged te kegkepeuki ku keniyu, ne zutun edsilutan ku sikiyu he iring te mital he edtunawen.
EZE 22:22 Iring te lata he edtunawen diyà te tunawà, edtunawen ku zaan sikiyu ziyà te Jerusalem, ne egketuenan niw he iyan a is Nengazen, mibpeǥezam keniyu te pauk ku.’ ”
EZE 22:23 Migkaǥi en maan is Nengazen kayi te kedì te,
EZE 22:24 “Sikew is etew, keǥiyi nu is menge Israilihanen he ǥeina te kenè dan egkesuat he edlumpiyuwan ku ne kenè ku en sikandan egkehizuwan dutun te andew te kebpeǥezama ku kandan te pauk ku.
EZE 22:25 Is menge pengulu zan mibpelanu te mezaat. Iring sikandan te edhiniǥer he erimaung he ebpenhimatey te menge etew. Ebpenguwa zan te menge ketiǥeyunan wey mahalen he menge azen. Mahabet is egkevalu tenged te kebpenhimatey zan.
EZE 22:26 Is menge memumuhat dan wazà medtuman te kesuǥuan ku, ne midremerikan dan is segradu he menge azen ku. Imped-iring dan dà is segradu wey kenè segradu, is lumpiyu wey meremerik, ne wazè dan tumana is menge ibpetuman ku emun Andew te Kedhimeley. Umbe nekekaǥi a te pinaaǥi keniyan wazè e zan tehuza.
EZE 22:27 Is menge upisyal zan iring te zumezaas he menge asu he ebpitaspitas te egkezawi zan. Edhimatey zan para zà mekeselapì sikandan.
EZE 22:28 Is menge ebpeneuven diyà te kandan edtembunan dan is menge salè dan pinaaǥi te uvag kebpekelawas dan wey menge tagnè dan he vinèbeelan dan dà. Egkeǥiyen dan he iyan kun haazà migkaǥi te Nengazen he MEGBEVAYÀ minsan pa te iyan tutuu is wazà haazà keǥiya te Nengazen.
EZE 22:29 Umbe, nenlimbung wey nenakew is menge etew. Edèdaaǥen dan is menge pubri wey menge egkaayuayu, wey is kenà menge Israilihanen he zuma zan he meǥinged. Wazè dan heini veǥayi te hustu he kukuman.
EZE 22:30 “Nengahà a te etew he ebpekelavan te inged su egkehimu he zatù diyà te pid-elangan ku wey menge etew su wey ku kenà mevengkag heini is inged. Piru wazà a meketuredu.
EZE 22:31 Umbe, ebpeǥezaman ku kandan is utew ku kegkepauk. Edezeetan ku sikandan tenged te mibeelan dan. Iyan a, is Nengazen he MEGBEVAYÀ, is migkaǥi kayi.”
EZE 23:1 Migkaǥi is Nengazen kayi te kedì te,
EZE 23:2 “Sikew is etew, dengan duen telesuled he vahi,
EZE 23:3 hein betan-en dan pa, mibelegyè dan te zengeg dan diyà te Ehipto. Wazè dan en beliya is menge maama he ebpemuluspulus te lawa zan.
EZE 23:4 Is ngazan te kakey si Ohola, ne is hazi iyan si Oholiba. Mid-esawa ku sikandan is dezuwa ne mid-anak key. Si Ohola iyan is Samaria, ne si Oholiba iyan is Jerusalem.
EZE 23:5 “Minsan esawa ku en si Ohola, mibpedayun gihapun sikandin mebelegyà te zengeg din, ne edteltelukunan din en is menge kumpadi zin he menge tig-Asiria he siringan din.
EZE 23:6 Mezagwey sikandan wey vetan-en he menge maama. Menge kepitan sikandan wey menge peremandar he nekeyuyunipurmi te meitem is kaavuavu zin ne metau sikandan he pereuntud te kudà.
EZE 23:7 Mibpehilavet si Ohola te langun he menge upisyal ziyà te Asiria, ne midremerikan din is keugelingen din pinaaǥi te ked-azap te menge ed-ezapen te menge tig-Asiria.
EZE 23:8 Wazà sikandin med-engked he ebelegyà te zengeg din, puun pa te timpu he ziyè pa sikandin te Ehipto. Su hein betan-en pa sikandin mibpehilavet en sikandin te menge maama he nemuluspulus te lawa zin he sikan pa mekeremaǥi.
EZE 23:9 “Umbe, imbeǥey ku sikandin te menge kumpadi zin he menge tig-Asiria he midtelukunan din.
EZE 23:10 Midlevasan dan sikandin, migkuwa zan is menge anak din, ne midhimetayan dan sikandin pinaaǥi te ispada. Tenged te nehitavù he kedsiluti kandin nehimu sikandin he ed-ituken te menge vahi.
EZE 23:11 “Minsan pa te naahà ni Oholiba is nehitavù te suled din, mibpedayun gihapun sikandin mebelegyà te zengeg din, ne midlavew pa is kandin he kezaat te kezaat duen te suled din.
EZE 23:12 Edteltelukun daan sikandin te menge tig-Asiria he menge mezagwey wey menge vetan-en he menge maama. Heini sikandan menge kepitan wey menge peremandar he nekeyuyunipurmi wey memetau he pereuntud te kudà.
EZE 23:13 Neehè ku he iring ded sikandin duen te suled din, midekiyan din daan is keugelingen din.
EZE 23:14 “Ne mid-iseg pa is kebpelelevag ni Oholiba. Neeriǥan sikandin te menge kekerwahi he menge upisyal te menge tig-Babilonia hein neehè din diyà te elavat is menge litratu zan. Heini he menge upisyal nekeyuyunipurmi te meriǥà. Duen dan menge vakes wey menge tengkulu.
EZE 23:16 Umbe, impehendiyè din te Babilonia is menge menunudtulà te ked-imbita kayi he menge upisyal te kedhendiyà te kandin.
EZE 23:17 Umbe, midhendiyà te kandin haazà is menge upisyal ne nekidhilavet dan kandin. Pinaaǥi keniyan midekiyan dan sikandin. Piru hein neuǥet nepezaan ded sikandin kandan.
EZE 23:18 “Nepeukan ku si Oholiba ne mid-iniyuǥan ku en iring te mibeelan ku ziyà te suled din su utew keladu he mibpedayun sikandin mebpelelevag.
EZE 23:19 Piru minsan pa te iyan haazà, nasì en med-iseg is kebpelelevag din, mibpedayun sikandin te kebelegyà te zengeg din iring te mibeelan din diyà te Ehipto hein betan-en pa sikandin.
EZE 23:20 Mibpenelukunan din is menge kumpadi zin he iring kezekelà is sudiyà dan te sudiyà te asnu wey iring te egawas diyà te kudà is egawas duen.
EZE 23:21 Umbe, sikew Oholiba midlikuan nu is mezaat he menge vaal nu, he mibeelan nu zengan diyà te Ehipto hein betan-en ke pa. He zutun mibpemulpulusan te menge maama is lawa nu.
EZE 23:22 “Umbe siak, is Nengazen he MEGBEVAYÀ, egkeǥiyan ku sikew Oholiba te ibpesurung ku sikew te menge kumpadi nu he mid-iniyuǥan nu en hein nepezaan ke en kandan.
EZE 23:23 Heini sikandan iyan is menge tig-Babilonia wey menge tig-Caldea he ebpuun diyà te Pekod, Shoa, Koa, wey menge tig-Asiria. Heini he menge tig-Asiria menge mezagwey wey menge vetan-en he menge maama. Is duma kandan menge kepitan, menge peremandar, menge upisyal te ebpemen-untud te kerwahi wey zuma pa he lavew he menge upisyal. Ne nemen-untud sikandan te kudà.
EZE 23:24 Edsurung heini kenikew he ebpuun diyà te zizaya duma te mahabet he menge sundaru, menge kudà, wey menge kerwahi. Duen dan menge kelasag wey menge hilmit, ne edliǥuyan ke zan. Ibeǥey ku sikew kandan, ne edsilutan ke zan sumalà te egkesuatan dan he idsilut.
EZE 23:25 Tenged te utew ku kegkepeuki kenikew, ebpesilutan ku sikew kandan. Ne tenged te pauk dan edtinglasen dan is izung nu wey telinga nu. Ebihaǥen dan is menge anak nu, ne is egkesamà diyà te kenikew ebpenhimetayan dan te ispada etawa ebinsulan dan.
EZE 23:26 Edlevasan ke zan ne egkuwaan dan is menge elahas nu.
EZE 23:27 Ne egkeengked en is mezaat he vaal nu he iyan is kebelegyè nu te zengeg nu, he ziyè nu zà puuni te Ehipto. Kenè nu en heeyan egketenuzan, ne egkelipatan nu en is Ehipto.
EZE 23:28 Su iyan a, is Nengazen he MEGBEVAYÀ migkaǥi he ibeǥey ku sikew ziyà te menge etew he midumutan nu, he iyan sikan is midsuwayan nu hein nepezaan ke en kandan.
EZE 23:29 Tenged te pauk dan edsilutan ke zan, ne egkuwaan dan is langun he hineǥuan nu. Ed-ewaan ke zan is lelevas, ne egkezayag is mekeeled-eled he kebpekesavuk nu tenged te mahawag he vaal nu he iyan is kebelegyè nu te zengeg nu.
EZE 23:30 Egkehitavù heini kenikew su mibpehilavet ka te menge etew ziyà te selakew en he nasyun wey midremerikan nu is keugelingen nu pinaaǥi te ked-azap te zuma he menge ed-ezapen.
EZE 23:31 Mid-iringan nu is mibeelan te suled nu he vahi, umbe edsilutan ku zaan sikew iring te kedsiluti ku kandin.
EZE 23:32 “Uya, iyan is Nengazen he MEGBEVAYÀ, migkaǥi te, ‘Edsilutan ku sikew iring te kedsiluti ku te suled nu he vahi. Is silut ku, ne iring te inumen he ziyà te tasa he zekelà wey mezalem. Emun egkeinum nu en is nekepenù kayi te tasa he iyan is pauk ku, ed-un-undahan ka wey ed-engitan.
EZE 23:33 Egkelangut ka wey egkeseeng, su heini he tasa nepenù te handek wey kezeetan. Iyan heini tasa te ked-antus he neinuman te suled nu he iyan is Samaria.
EZE 23:34 Ed-eminen nu zaan ed-inuma is taǥù kayi, ne zutun edrupeten nu heini is tasa, ne edtempelingen nu is kumeng nu tenged te kegkeseeng nu. Iyan a, is Nengazen he MEGBEVAYÀ, is migkaǥi kayi.
EZE 23:35 Ne ǥeina te midlipatan a kenikew wey mid-iniyuǥan, ne siak is Nengazen he MEGBEVAYÀ, egkaǥi a he egkerasey ka tenged te mahawag he vaal he iyan is kebelegyè nu te zengeg nu.’ ”
EZE 23:36 Mid-uman megkaǥi is Nengazen kayi te kedì te, “Sikew is etew, hukumi nu si Ohola wey si Oholiba. Keǥiya nu kandan is utew mezaat he menge vaal zan.
EZE 23:37 Nekepenapew zan wey nekepatey pinaaǥi te ked-azap te zuma he menge ed-ezapen, is menge anak dan he inhalad dan kayi te kediey zutun te kegkeetew kayi, impekaan dan te menge ed-ezapen pinaaǥi te kebpemuhata zan duen.
EZE 23:38 Ne mibpendezeisey zan daan is baley ku wey is Andew te Kedhimeley he ibpetuman ku kandan. Su zutun te andew te kebpemuhata zan te menge anak dan diyà te zuma he menge ed-ezapen dan, midseled dan diyà te valey ku, ne timpu haazà te Andew te Kedhimeley.
EZE 23:40 Mibpaangey pa ganì sikandan te menge maama he ebpemuun diyà te meziyù he menge lugar. Ne kebpekeuma kayi te menge maama, nemeziǥù dan wey mibpeguwapa, wey mid-eelahas sikandan.
EZE 23:41 Ne heini, si Ohola wey si Oholiba, mibpinuu zan diyà te mekempet he katri, ne ziyà te egkesineruwan kayi zuen lemisahan he midsevukan dan te veyewà wey lana he ibpemuhat dan kun kediey.
EZE 23:42 Egkezineg puun te ruǥu zan is keǥurub te egkengelangut wey kedlipeylipey te menge etew, he ebpemuun diyà te sibsivayan. Midrintian wey migkurunahan sikandan kayi te menge etew.
EZE 23:43 Ne migkaǥi a ziyà te ǥehinawa ku te, ‘Ebey-anan en sikandan dutun te kebpenigudu zan kebpekidhilavet keniyan te menge vahi he neǥurang en te kebelegyà te zengeg dan.’
EZE 23:44 Ne ebeelan dan iyan heini. Nekidhilavet sikandan ki Ohola wey ki Oholiba, he iyan kes dezuwa he meremerik he vahi he ebelegyà te zengeg dan.
EZE 23:45 Piru edsilutan sikandan te menge etew he metazeng te silut he ereg kandan te menge menenapew wey teremunù.
EZE 23:46 “Iyan a, is Nengazen he MEGBEVAYÀ, edsuǥù a te menge etew te kedsurung kandan. Ne igkeherati zan heini he menge etew, ed-eǥawen kayi is menge azen dan,
EZE 23:47 ebpenuleng heini kandan te vatu wey edhimatey kandan pinaaǥi te ispada. Ebpenhimetayan daan is menge anak dan wey ebinsulan is menge valey zan.
EZE 23:48 Pinaaǥi kayi edhimesazen ku is mahawag he vaal kayi he nasyun. Ne egkehimu zaan heini he petizaan te langun he menge vahi he kenè bes ereg he ed-iringan is mibeelan dan.
EZE 23:49 Sikiyu is dezuwa he telesuled, igkerasey niw utew is silut tenged te keremerik te vaal niw, wey ked-azap niw te zuma he menge ed-ezapen. Ne zutun egketuenan niw he iyan a Nengazen he MEGBEVAYÀ.”
EZE 24:1 Hein ikesepulù he andew te ikesepulù he vulan, dutun te ikesiyam he tuig te kegkevihaǥa kenami, migkaǥi is Nengazen kayi te kedì te,
EZE 24:2 “Sikew is etew, isurat nu is pitsa kayi he andew, su kayi he andew ebpuun en edsurung diyà te Jerusalem is hadì te Babilonia.
EZE 24:3 Ne tudtula nu heini he sempità diyà te menge etew te Israel he menge mesinupaken, ne ipetueni nu kandan he iyan a, is Nengazen he MEGBEVAYÀ, migkaǥi kayi: “Diken ka te kitang ne teǥui nu te wahig.
EZE 24:4 Ilunud nu zutun is meupiya he vahin te usa, menge pemenayen wey menge vuvun. Iragkes nu zaan is menge tulan.
EZE 24:5 Iyan nu zà gemita is usa he ebpuun diyà te kineupiyahan he kerehidu. Tevuni nu is kitang ne leuyaha nu haazà is usa wey is menge tulan.
EZE 24:6 Su iyan a is Nengazen he MEGBEVAYÀ migkaǥi te: Mekehizuhizu is inged he Jerusalem he teremunù is menge meǥinged duen. Iring heini te tengisen he kitang he wazà melumpiyuwi. Ne tigseselimbahaa nu te egkuwa is taǥù kayi ne kenè nu erama.
EZE 24:7 Su is kebpenhimatey zin nekeleduwan te langun. Is lengesa te mibpenhimetayan din mibey-anan din dà diyà te menge vatu he egkaahà te langun. Wazè din ganì heini vunbuni te tanà.
EZE 24:8 Neehè ku heini he lengesa ne mibey-anan ku heini zutun te menge vatu he maahà te langun, ne henduen be te ebpengulahì heini is edhangyù he iyan a mebales.”
EZE 24:9 “Umbe iyan a, is Nengazen he MEGBEVAYÀ migkaǥi te: ‘Mekehizuhizu is inged he Jerusalem he teremunù is menge meǥinged duen! Iyan a mismu edtambù te mezakel he idtavun te kebinsuli zuen.
EZE 24:10 Sigi, umani niw pa is idtavun, ne retemi niw te hapuy. Peneketi niw wey leuyaha is usa taman egketutungan is menge tulan.
EZE 24:11 Ne iziken nu is kitang he wazè din en taǥù diyà te vaǥa taman te egkevaǥa zaan heini. Paaǥi heini te kedlumpiyuwi zuen te kitang ne egketutung is tangis din.
EZE 24:12 Piru minsan ebmenmenuwen nu pa haazà is tangis, ne kenà heini egkaawà pinaaǥi te hapuy.
EZE 24:13 “ ‘He Jerusalem, is mahawag he vaal nu iyan nekeremerik kenikew. Neninguhà a te kedlumpiyu kenikew, piru wazè ka mebpelumpiyu. Umbe kenà egkaawà is keremerik nu taman te kanà egkaawà is kegkepeuki ku kenikew.
EZE 24:14 Iyan a is Nengazen migkaǥi he neume en is timpu he iyan ad edwaleng te kedsilut, ne wazà ebpekeeǥen kediey. Kenè ku sikiyu egkehizuwan, ne kenè en egkahalin is isip ku. Edhukuman kew tenged te vetasan niw wey menge vaal niw. Iyan a, is Nengazen he MEGBEVAYÀ, is migkaǥi kayi.’ ”
EZE 24:15 Migkaǥi is Nengazen kayi te kedì te,
EZE 24:16 “Sikew is etew, sengekebperè dà ne edtik-awan ku egkuwaa is bahi he utew nu mibmahal. Piru kenè nu sikandin sineǥawi ne kenè ka seengseeng para kandin.
EZE 24:17 Diyè nu zà te ǥehinawa nu izag-es is kesakit kayi. Kenè ka lalew. Kenè nu puwasa is tengkulu nu wey kenè nu pul-uta is sandalyas nu, wey kenè nu tembuni is buked nu te kebpaahà he neseeng ka. Kenè ka zaan kaan te menge keenen he para te edlalew he mibpetayan.”
EZE 24:18 Ne hein meselem en migkaǥi ku haazà diyà te menge etew, ne kegkezukilem dutun minatey is esawa ku. Ne hein meselem en maan midtuman ku is insuǥù kedì.
EZE 24:19 Ne mid-insà is menge etew kayi te kedì te, “Hengkey is ibpesavut nu keniyan te mibeelan nu?”
EZE 24:20 Midtavak ku sikandan te, “Migkaǥi is Nengazen he MEGBEVAYÀ kayi te kedì he keǥiya ku heini ziyà te menge etew te Israel: Andam ad he ebpendezeisey zuen te valey ku he dengepè niw, ebentuǥen niw, mahal niw, wey kelipey niw. Ebpematey te tebek is menge anak niw he nesamà diyà te Jerusalem.
EZE 24:22 Ne ebeelan niw is mibeelan ni Ezekiel. Kenè niw tembuni is buked niw, ne kenè kew egkaan te keenen he para te edlalew he mibpetayan.
EZE 24:23 Kenè niw zaan ebpuwasen is tengkulu niw wey kenè niw ebpul-uten is sandalyas niw. Kenè kew edsineǥew wey edseengseeng. Edluyahan kew tenged te menge salè niw, ne pesizag-es kew zà.
EZE 24:24 Is nehitavù ki Ezekiel egkehimu he petug-iringan niw. Is mibeelan din iyan daan ebeelan niw. Ne emun egkehitavù en heeyan ne egketuenan niw he iyan a Nengazen he MEGBEVAYÀ.”
EZE 24:25 Mibpedayun megkaǥi is Nengazen te, “Sikew is etew, emun timpu en te kedrundusa ku zuen te valey ku, he eputè dan, he ebentuǥen dan, utew zan mahal, wey kelipey zan, ne emun ebpenhimetayan ku he is menge anak dan,
EZE 24:26 duen sevaha he etew he ebpekepelaǥuy puun te Jerusalem ne edtudtulen din heini kenikew.
EZE 24:27 Dutun he timpu ebpekekaǥi ke en maan ne ebpekesineǥew kew is dezuwa. Egkehimu ka he petizaan diyà te menge etew, ne egketuenan dan he iyan a Nengazen.”
EZE 25:1 Migkaǥi is Nengazen kayi te kedì te,
EZE 25:2 “Sikew is etew, sinaru ka ziyà te Ammon ne keǥiya nu is menge lalag he ebpekesuǥat kayi he lugar.
EZE 25:3 Keǥiyi nu is menge meǥinged keniyan he mebpemineg dan kedì, su iyan a, is Nengazen he MEGBEVAYÀ migkaǥi te, ‘Tenged te ingkelipey niw is kegkerundus duen te simbahan he valey ku wey is kegkezeeti te Israel, wey kegkevihag te menge etew ziyà te Juda,
EZE 25:4 ibpesakup ku sikiyu te menge etew ziyà te edsilaan, ne ed-engkenen kew zan. Egkampu sikandan diyà te keniyu, ne egkeenen dan is menge prutas niw wey ed-inumen dan is gatas niw.
EZE 25:5 Edhimuwen ku he penebtavà te menge kemilyu is inged he Raba, ne is tivuuk he Ammon edhimuwen ku he himelayà te menge kerehidu. Ne zutun egketuenan niw he iyan a Nengazen.’
EZE 25:6 “Iyan a, is Nengazen he MEGBEVAYÀ migkaǥi te, ‘Geina te mibpelakpak kew wey midlinglingketew kew tenged te kegkelipey niw zutun te kedsudia niw te Israel,
EZE 25:7 edsilutan ku iyan sikiyu. Ibeǥey ku sikiyu ziyà te zuma he menge nasyun he ed-aǥew te menge azen niw. Ebpurungan ku sikiyu edèdeeti taman te wazè en egkesamà keniyu he egkehimu he nasyun. Ne egketuenan niw he iyan a Nengazen.’ ”
EZE 25:8 Migkaǥi is Nengazen he MEGBEVAYÀ te, “Is Moab he migngezanan daan te Seir, egkaǥi is menge meǥinged duen te iring dà daan is Juda te zuma he menge nasyun.
EZE 25:9 Umbe, iyan a metau he surunga is menge inged diyà te dulunà te Moab, ragkes en is lavew he menge inged dan iring te Bet Jeshimot, Baal Meon, wey Kiriataim–kes menge inged he ebentuǥen dan.
EZE 25:10 Ibpesakup ku sikandan te menge etew ziyà te edsilaan, ne ed-angken heini kandan iring te ked-engkena zan te menge tig-Ammon. Ne is kenà kegkilelaa te menge tig-Ammon he sevaha te menge nasyun, ne iyan daan egkehitavù diyà te Moab.
EZE 25:11 Edsilutan ku is Moab, ne egketuenan dan dutun he iyan a Nengazen.”
EZE 25:12 Migkaǥi is Nengazen he MEGBEVAYÀ te, “Nenimales is menge tig-Edom te menge tig-Juda, ne tenged kayi nekesalà is menge tig-Edom.
EZE 25:13 Umbe iyan a, is Nengazen he Megbevayà, migkaǥi te edsilut a ziyà te Edom ne ebpenhimetayan ku is menge etew kayi wey menge uyaǥen. Edhimuwen ku is Edom he mekevulungbulung he lugar puun te Teman taman te Dedan, ne ebpematey te tebek is menge meǥinged kayi.
EZE 25:14 Ebelesan ku is Edom pinaaǥi te menge etew ku he Israilihanen. Edsilutan dan is menge tig-Edom te sungkad te utew ku kegkepauk, ne egketuenan te menge tig-Edom is paaǥi te kebales ku. Iyan a, is Nengazen he MEGBEVAYÀ, is migkaǥi kayi.”
EZE 25:15 Migkaǥi is Nengazen he MEGBEVAYÀ te, “Mibpelanu is menge tig-Filistia te kebpekigkuntada te menge tig-Juda su egkesuat dan he ebales wey neuǥet en is kedumuti zan kayi he menge etew.
EZE 25:16 Umbe iyan a, is Nengazen he MEGBEVAYÀ, migkaǥi he edsilutan ku is menge Filistihanen. Ebpenhimetayan ku is menge tig-Keret wey is duma pa he menge ebpemen-ubpà diyà te veyvey te zaǥat.
EZE 25:17 Tenged te pauk ku ebelesan ku sikandan wey edsilutan. Ne emun egkevelesan ku en sikandan, egketuenan dan he iyan a Nengazen.”
EZE 26:1 Dutun te nehuna he andew te vulan, dutun te ike-11 he tuig te kegkevihaǥa kenami, migkaǥi is Nengazen kayi te kedì te,
EZE 26:2 “Sikew is etew, midlipey is menge tig-Tyre tenged te kegkezeeti te Jerusalem. Ke sikandan te, ‘Nezeetan en is beyeey te menge nigusyanti. Kenitew en heini he timpu. Iyan kiw en maan ed-uswag.’
EZE 26:3 Umbe iyan a, is Nengazen he MEGBEVAYÀ, migkaǥi he egkuntrahan ku is menge tig-Tyre. Ibpesurung ku heini te mahabet he menge nasyun, he edasmag iring te menge vaǥel.
EZE 26:4 Ebengkaǥen dan is menge verengbeng te Tyre wey menge turi kayi. Egkeluten dan is tanà kayi taman te vatu zà is egkesamà.
EZE 26:5 Ne egkehimu zà heini he kegkaǥà te puket te menge mengingisdà. Iyan a, is Nengazen he MEGBEVAYÀ, is migkaǥi kayi. Ibeǥey ku is Tyre ziyà te zuma he menge nasyun he ed-aǥew te menge azen kayi,
EZE 26:6 ne is menge meǥinged diyà te menge inged kayi ebpenhimetayan pinaaǥi te ispada. Ne egketuenan dan he iyan a Nengazen.”
EZE 26:7 Mibpedayun megkaǥi is Nengazen he MEGBEVAYÀ te, “Sikiyu is menge tig-Tyre, ibpesurung ku sikiyu ki Hadì Nebucadnezar he hadì te Babilonia, he hadì te menge hadì. Edsurung sikandin is ebpuun diyà te zizaya duma te mahabet he menge sundaru, menge kerwahi, menge kudà, wey menge pereuntud te kudà.
EZE 26:8 Ibpepenhimetayan din is menge meǥinged diyà te menge inged niw pinaaǥi te ispada. Edsurung is menge sundaru zin he ed-uwit te menge turi-turi, wey menge kelasag, ne edtembuan dan te menge tanà is peliǥuy te menge verengbeng niw su para mepemenehiki heini.
EZE 26:9 Ibpevengkag din is menge verengbeng niw pinaaǥi te zezekelà he menge trusu ne ibperundus din is menge turi niw pinaaǥi te menge masu.
EZE 26:10 Egketembunan kew te eliyavuk tenged te menge kudè din he utew mahabet. Egketegker is menge verengbeng niw tenged te dabekdabek te menge kudè din wey menge kerwahi he edseled diyà te pultahan te nevengkag he inged niw.
EZE 26:11 Edtekutakan te menge kudè din is langun he menge zalan niw. Ibpeǥerè kew zin is menge meǥinged pinaaǥi te ispada, ne egkevengkag is melig-en he menge tukud niw.
EZE 26:12 Ed-eǥawen dan is menge ketiǥeyunan niw wey menge velegyè niw. Edrundusen dan is menge verengbeng niw wey mekempet he menge valey niw, ne idtimbag dan diyà te zaǥat is menge vatu, menge kayu, wey is langun he egkesamà te nengevengkag.
EZE 26:13 Pinaaǥi kayi ibpeengked ku sikiyu te kegkanta wey kedtukar te menge alpa niw.
EZE 26:14 Edhimuwen ku is lugar niw he sevaha he meluag he vatu he zutun igkagkag te menge mengingisdà is menge puket dan. Kenè en egkeuman egkevangun is inged niw. Iyan a, is Nengazen he MEGBEVAYÀ, is migkaǥi kayi.”
EZE 26:15 Migkeǥiyan pa te Nengazen he MEGBEVAYÀ is menge tig-Tyre, “Is menge ed-ubpà diyà te beyvey te zaǥat egkerkeren te kegkahandek dan emun egkezineg dan is kegkezeeti niw wey kebpematey, wey is dag-es te menge teǥepalì diyà te keniyu.
EZE 26:16 Is menge pengulu ziyà te menge lugar he veyvey te zaǥat edrenà puun te pinuuwà te lavew ne edluwasen dan is bisti te hadì wey is mekempet he pendizalem he visti zan. Ne ebpinuu sikandan diyà te tanà is egkerkeren tenged te nehitavù keniyu.
EZE 26:17 Ne edsineǥew sikandan he egkaǥi te: ‘Utew subra is kegkezeeti nu, sikew is nevantug he inged he ed-ubpaan te menge etew he iyan ibpeguyag dan is daǥat. Mekeǥeǥehem ka utew ziyà te menge zaǥat, ne egkehandek is menge etew he ed-ubpà diyà te veyvey te zaǥat.
EZE 26:18 Ne ǥuntaan egkerkeren te kegkahandek is menge ebpemen-ubpà diyà te veyvey te zaǥat tenged te kegkezeeti kayi te inged.’ ”
EZE 26:19 Migkaǥi pa is Nengazen he MEGBEVAYÀ te, “He Tyre, egkehimu ka he mekevulungbulung he inged, egkehimu ka he inged he wazà duen ed-ubpà. Edsepalen ku sikew te mezalem he wahig.
EZE 26:20 Edlenepen ku sikew ziyà te kinezizaleman. Kenè ke en ebpekelikù diyà te lugar he para te menge uuyag.
EZE 26:21 Edtepusen ku en sikew, ne mekahandekhandek is ketepusan nu. Egkahanew ke en, minsan ebpen-ahaan ka ne kenè ke en egkaahà. Iyan a, is Nengazen, is migkaǥi kayi.”
EZE 27:1 Migkaǥi is Nengazen kayi te kedì te,
EZE 27:2 “Sikew is etew, kanta ka te kentahan para te kebpenhulùhulù mehitenged te Tyre,
EZE 27:3 kes inged he dungguanan te menge varku wey sintru te nigusyu te menge meǥinged diyà te veyvey te zaǥat. Keǥiyi nu he iyan a, is Nengazen he MEGBEVAYÀ migkaǥi te, ‘He Tyre, mibpehivantug ka he utew ka mekempet.
EZE 27:4 Impemeluag nu is lugar nu ziyà te zaǥat. Mibpurung ka pekekempeta te menge mibangun kenikew.
EZE 27:5 Neiring ka te zekelà he varku he kayu he abitu he ebpuun diyà te Senir. Ne menge kayu he sidru he ebpuun diyà te Lebanon is palu nu.
EZE 27:6 Ne menge kayu he ulayan he ebpuun diyà te Bashan is menge vegsey nu. Ne menge kayu he sipris he ebpuun diyà te balet he Kitim is saag nu, ne mibpekeplaan heini te dayandayan he ungal te ilipanti.
EZE 27:7 Is layag nu binurdahan he linu he ebpuun te Ehipto. Ne henduen te bendirà is ked-ahaa kayi. Is terapal nu maavuavu is keitem din wey merudtem he ebpuun diyà te isla te Elisha.
EZE 27:8 Tig-Sidon wey tig-Arvad is menge perevegsey nu, ne iyan mismu is menge meǥinged diyà te kenikew menge terebahanti nu.
EZE 27:9 Ne menge metau he menge pandey he ebpuun diyà te Gebal is ebpurung te egkengezeetan diyà te kenikew. Ed-uvey kenikew is langun he menge terebahanti te zuma he menge untuzà ne ebpetiǥayun dan diyà te kenikew.
EZE 27:10 Ne menge tig-Persia, tig-Lydia, wey tig-Put is menge sundaru nu. Insanggat dan is menge kelasag dan wey menge hilmit dan diyà te elavat nu, ne nekeveǥey heini kenikew te zengeg.
EZE 27:11 Menge tig-Arvad wey menge tig-Helec is menge sundaru nu he ebantey ziyà te peliǥuy te menge verengbeng nu, ne menge tig-Gamad is ebantey te menge turi nu. Insanggat dan diyà te elavat nu is menge kelasag dan ne nekeveǥey heini kenikew te zekelà he zengeg.
EZE 27:12 “ ‘Mibpetiǥayun diyà te kenikew is Tarshish su mahabet is ketiǥeyunan nu. Midliwaan dan is menge velegyè nu te pelata, putew, lata, wey timeǥà.
EZE 27:13 Mibpetiǥayun daan diyà te kenikew is Grecia, Tubal, wey Meshec. Midliwaan dan is menge velegyè nu te menge uripen wey menge brunsi he mibeelan he menge gelemiten.
EZE 27:14 Ne is inliwà te menge tig-Bet Togarma te menge velegyè nu ne menge kudà he para te idterebahu wey para te tebek, wey menge mulà.
EZE 27:15 “ ‘Mibpetiǥayun daan diyà te kenikew is menge tig-Dedan, ne mahabet is menge sukì nu ziyà te menge lugar he ziyà te veyvey te zaǥat. Is imbayad dan kenikew menge ungal te ilipanti wey menge mezesen wey meitem he menge kayu.
EZE 27:16 “ ‘Mibpetiǥayun daan diyà te kenikew is Aram su mahabet is menge pruduktu nu. Is inliwè dan te menge velegyè nu menge ismiralda, menge manggad he merudtem, menge binurdahan, menge mahalen he linu, paǥang, wey menge rubi.
EZE 27:17 “ ‘Mibpetiǥayun daan diyà te kenikew is Juda wey Israel. Midliwaan dan is menge velegyè nu te trigu he ebpuun diyà te Minnit, higus, teneb, wey haplas.
EZE 27:18 “ ‘Mibpetiǥayun daan diyà te kenikew is tig-Damascus su mahabet is ketiǥeyunan nu wey menge pruduktu. Is inliwè dan te velegyè nu binu he ebpuun diyà te Helbon wey welin he ebpuun diyà te Zahar.
EZE 27:19 Is menge tig-Dan wey tig-Javan he ebpuun diyà te Uzal mibpetiǥayun daan diyà te kenikew. Is inliwè dan te menge velegyè nu, iyan is menge putew wey menge penaket.
EZE 27:20 “ ‘Is inliwà te menge tig-Dedan te menge velegyè nu iyan is menge manggad he ebeelan he valhen.
EZE 27:21 “ ‘Mibpetiǥayun daan diyà te kenikew is menge tig-Arabia wey is langun he pengulu ziyà te Kedar. Is inliwè dan te menge velegyè nu menge kerehidu wey menge kambing.
EZE 27:22 “ ‘Mibpetiǥayun daan diyà te kenikew is menge nigusyanti ziyà te Sheba wey Raama. Is imbayad dan te menge velegyè nu iyan is langun he kelasi te meupiya he menge penaket, mahalen he menge vatu, wey menge vulawan.
EZE 27:23 “ ‘Mibpetiǥayun daan diyà te kenikew is menge tig-Haran, tig-Cane, tig-Eden, wey is menge nigusyanti ziyà te Sheba, Ashur, wey Kilmad.
EZE 27:24 Is inliwè dan te menge velegyè nu iyan is mahalen he menge visti, menge manggad he maavuavu is keitem din, menge manggad he binurdahan, wey menge carpet wey nekedseselekawà is barek din he mibperibitiyan te nepurungan is kedtehia zuen.
EZE 27:25 “ ‘Sikew is inged he Tyre, is menge barku ziyà te Tarshish iyan egkarga te menge velegyè nu. Neiring ka te varku he nepenù te karga zutun te kedlayag din diyà te zaǥat.
EZE 27:26 Piru te ed-uwiten ka te menge perevegsey nu ziyà te lawed, ebengkaǥen ka te mevendes he keramag he ebpuun diyà te edsilaan.
EZE 27:27 Ne egkengelened is langun he mid-untud wey in-untud diyà te kenikew: menge ketiǥeyunan nu, menge velegyè nu, menge terebahanti nu, menge meriniru nu, menge pandey nu, menge nigusyanti wey is langun he menge sundaru nu. Egkengelened heini is langun dutun te andew he egkevengkag ka.
EZE 27:28 “ ‘Egkerkeren tenged te kegkahandek is menge meǥinged diyà te veyvey te zaǥat emun egkezineg dan is kebpetavang te menge terebahanti.
EZE 27:29 Ed-ewaan te menge perevegsey is menge untuzè dan ne ebpemenhitindeg dan diyà te veyvey duma te menge meriniru wey menge terebahanti,
EZE 27:30 ne edsineǥawan ke zan. Ebukbukan dan te eliyavuk is ulu zan ne edtelulid sikandan diyà te avu su ibpeehè dan is kedlalew zan.
EZE 27:31 Egkiskisan dan is ulu zan wey ebivisti sikandan te saku zutun te edsineǥew sikandan is egkeseeng.
EZE 27:32 Ne zutun te kedlalew zan ibpenhulùhulù dan heini: “He Tyre, wazè en ebpekerepeng te kegkezeeti kenikew pinaaǥi te kegkelened nu ziyà te lawed!
EZE 27:33 Midlayag ka is ed-uwit te menge velegyè nu, ne mahabet he menge etew is nelipey tenged te kezekelà te ketiǥeyunan nu. Midsepian is menge hadì kayi te kelibutan tenged te menge velegyè nu.
EZE 27:34 Piru ǥuntaan nevengkag ke en ne nekezuma te kegkelened nu ziyà te zizalem te zaǥat is menge velegyè nu wey is langun he menge terebahanti.
EZE 27:35 Ne utew ingkahandek te langun he menge meǥinged diyà te veyvey te zaǥat is nehitavù kenikew. Is menge hadì dan mibpengerker te kegkahandek, ne egketuusan heini ziyà te dagwey zan.
EZE 27:36 Henduen be te kenà ebpeketuu is menge nigusyanti ziyà te menge nasyun te nehitavù kenikew. Mekahandekhandek is ketepusan nu, ne egkahanew ka taman te taman.” ’ ”
EZE 28:1 Migkaǥi is Nengazen kayi te kedì te,
EZE 28:2 “Sikew is etew, keǥiyi nu is pengulu te Tyre he iyan a, is Nengazen he MEGBEVAYÀ migkaǥi te: Tenged te kebpelavew nu migkaǥi ka he sevaha ka he megbevayà he mibpinuu ziyà te pinuuwà te hadì he ziyà te teliwazà te zaǥat. Piru iyan benar is, minsan mid-isip nu he metau ka iring te megbevayà, ne kenè ka Megbevayà, kekenà, etew ke zà.
EZE 28:3 Egkeisip nu he edhuna ke pa he metau ki Daniel, ne wazà id-eles he kenè nu egketuenan.
EZE 28:4 Pinaaǥi te ketau nu wey keuluwanen midsepian ka wey neketiǥum ka te mahabet he menge vulawan wey pelata ziyà te teleǥuey nu te ketiǥeyunan nu.
EZE 28:5 Ne pinaaǥi zaan te ebilidad nu te kednigusyu, neumanan pa is ketiǥeyunan nu, ne tenged te ketiǥeyunan nu nehimu ka he mepelevawen.
EZE 28:6 Umbe, iyan a, is Nengazen he MEGBEVAYÀ migkaǥi te: Geina te mid-isip nu he metau ka iring te Megbevayà,
EZE 28:7 ibpesurung ku sikew te menge ebpuun diyà te zuma he lugar, he utew mesipala kenà te ebpemuun diyà te langun he menge nasyun. Edèdeetan dan is kekempet he naangken nu tenged te ketau nu, ne egkaawà is dengeg nu.
EZE 28:8 Mesakit he kemetayen is ibpatey nu, ne edlenezen ke zan diyà te kinezeleman te zaǥat.
EZE 28:9 Ne ed-ahaan ta ke ebpekekaǥi ke pa ǥihapun diyà te etuvangan te menge edhimatey kenikew te Megbevayè ka. Etew zà is ked-isipa zan kenikew ne kenà Megbevayà.
EZE 28:10 Iyan edhimatey kenikew is ebpuun diyà te sengelulugar en. Iring is kemetayen nu te kemetayen te etew he wazà medtuu kediey. Egkeula-ula iyan heini, su iyan a, is Nengazen he MEGBEVAYÀ, is migkaǥi kayi.”
EZE 28:11 Mid-uman megkaǥi is Nengazen kayi te kedì te,
EZE 28:12 “Sikew is etew, kanta ka te kentahan te kedlelawi te hadì te Tyre. Keǥiyi nu sikandin he iyan a, is Nengazen he MEGBEVAYÀ migkaǥi te: Dengan petug-iringan ka te wazè din kurang. Metau ka wey utew mekempet.
EZE 28:13 Diyè ke zengan te Eden, he pemuleey te Megbevayà. Mideyzeyanan ka te nekedseselekawà he kelasi te mahalen he menge vatu: rubi, tupasyu, ismiralda, krisulitu, uniks, haspi, sapiru, turkisu, wey biril. Mideyzeyanan ka zaan te vulawan he in-andam en dutun te andew te kedlimbaǥa kenikew.
EZE 28:14 Pinilì ku sikew he kirubin he mid-urdinahan ku he perevantey te segradu he vuntud ku. Midhipanew ka ziyà te pid-elangan te ed-ilak-ilak he menge vatu.
EZE 28:15 Wazà igkesawey kenikew puun te andew te kedlimbaǥa kenikew taman te mibaal ka te mezaat.
EZE 28:16 Is mahabet he petiǥayun nu nehimu he hinungdan te kegkemesipala nu, ne mibaal ka te salà. Umbe midsegseg ku sikew puun te segradu he vuntud ku; impaawè ku sikew is kirubin he perevantey puun te ed-ilak-ilak he menge vatu.
EZE 28:17 Nehimu ka he mepelevawen tenged te kekempet nu, ne migamit nu is ketau te tinulebung para mevantug ka. Umbe intimbag ku sikew ziyà te tanà, ne nehimu ka he edtengtengan te zuma he menge hadì.
EZE 28:18 Tenged te mahabet he menge salè nu wey kebpenlimbung nu ziyà te petiǥayun nu, mibpendezeisey nu is menge lugar he zutun ka ed-azap. Umbe ziyà te etuvangan te langun he edtengteng kenikew imperiyubriyub ku is hapuy ziyà te lugar nu ne nevinsulan ka. Nehimu ke zà he avu ziyà te tanà.
EZE 28:19 Is langun he menge etew ziyà te menge nasyun he nekekilala kenikew ingkahandek dan is nepengkusan nu. Mekahandekhandek is ketepusan nu, ne egkahanew ke en taman te taman.”
EZE 28:20 Migkaǥi is Nengazen kayi te kedì te,
EZE 28:21 “Sikew is etew, sinaru ka ziyà te Sidon ne keǥiya nu is menge lalag he ebpekesuǥat kayi.
EZE 28:22 Keǥiyi nu is Sidon he iyan a is Nengazen he MEGBEVAYÀ migkaǥi te: Migkuntada ku sikew is Sidon. Edeliǥen a te menge etew emun edsilutan ku en sikew, ne egketuenan dan he iyan a Nengazen, wey egkeehè dan is kegkewaǥas ku.
EZE 28:23 Ebpeeǥiyan ku sikew te limas he tenged dutun edalem is lengesa ziyà te menge zalan nu, utew mahabet is ebpematey he menge meǥinged diyà te kenikew. Ne zutun egketuenan dan he iyan a Nengazen.
EZE 28:24 “Dutun he timpu wazè en menge etew ziyà te menge nasyun he siringan te Israel he edsudì te menge Israilihanen he ebpekepesakit kandan he iring te medidis menge zuǥi. Ne egketuenan dan dutun he iyan a Nengazen he MEGBEVAYÀ.”
EZE 28:25 Migkaǥi zaan is Nengazen he MEGBEVAYÀ te, “Ed-umanan ku te edtiǥum is menge etew te Israel puun te menge nasyun he zutun sikandan mekepeyapat. Pinaaǥi kandan igkepetuusan ku ziyà te menge nasyun is kegkewaǥas ku. Dutun he timpu ebpekeubpè en is menge Israilihanen diyà te keugelingen dan he tanà, he iyan kes tanà he imbeǥey ku ziyà te suluǥuen ku he si Jacob.
EZE 28:26 Ebpekeubpè dan dutun he melinawen. Ebangun sikandan te menge valey wey ebpemula te menge paras. Wazè en edsamuk kandan emun edsilutan ku en is menge etew ziyà te langun he menge avey zan he nasyun he mid-undaunda kandan. Ne egketuenan dan he iyan a Nengazen he Megbevayè dan.”
EZE 29:1 Dutun te ike-12 he andew te ikesepulù he vulan, duen te ikesepulù he tuig te kegkevihag dey, migkaǥi is Nengazen kayi te kedì te,
EZE 29:2 “Sikew is etew, sinaru ka ziyà te Ehipto ne weliyi nu is Faraon he hadì te Ehipto te ebpekesuǥat kandin wey te langun he menge etew zin.
EZE 29:3 Keǥiyi nu sikandin he iyan a is Nengazen he MEGBEVAYÀ migkaǥi te: Kuntada ku sikew, Faraon he hadì te Ehipto. Neiring ka te zekelà he vuaya he ed-ubpà diyà te menge wahig diyan te Ehipto. Migkaǥi ka te kenikew is Wahig he Nilo, ne mibeelan nu heini para mismu kenikew.
EZE 29:4 Piru egkew-itan ku te menge vunuwit is bakè nu, ne igaun ku sikew puun te menge wahig nu duma te menge isdà he ebpemekepikit diyà te menge hun-ap nu.
EZE 29:5 Ne idtimbag ku sikew wey is menge isdà diyà te disirtu, ne ebpekesesavuk ka ziyà te tanà he wazà egkuwa wey edleveng kenikew. Ne ibpekaan ku sikew te zumezaas he menge langgam wey menge tagbis.
EZE 29:6 Ne egketuenan te langun he meǥinged te Ehipto he iyan a Nengazen. Su iring ke zà te meǥevù he tuked he midseriǥan te menge Israilihanen.
EZE 29:7 Dutun te kegewezi zan kenikew nevagbag ka, ne nepelian sikandan diyà te menge vekelawan. Ne hein midtelumbeǥat dan diyà te kenikew ne nevadtì ka ne nepiley zan ne nelepù is tulan te seǥang dan.
EZE 29:8 Umbe siak, is Nengazen he MEGBEVAYÀ, migkaǥi a he ibpesurung ku sikew te menge etew he edhimatey te menge etew nu wey menge uyaǥen dan.
EZE 29:9 Egkehimu he mekevulungbulung is Ehipto. Ne egketuenan niw he iyan a Nengazen. “Geina te migkaǥi ka he kenikew is Wahig he Nilo wey iyan ka mibaal kayi,
EZE 29:10 kuntada ku sikew wey is menge wahig nu. Edèdeetan ku is Ehipto ne egkehimu en heini he mekevulungbulung puun te Migdol pehendiyà te Aswan, taman te dulunà te Etiopia.
EZE 29:11 Wazè en etew wey langgam he ebayà kayi, ne wazè en ed-ubpà kayi seled te 40 he tuig.
EZE 29:12 Edhimuwen ku is Ehipto he utew mekevulungbulung kenà te zuma he menge nasyun. Seled te 40 he tuig, is menge inged kayi egkehimu he edhuna he mekevulungbulung te zuma he nevengkag he menge inged. Ne ibpeyapat ku is menge Ehiptohanen diyà te nekedseselekawà he menge nasyun.”
EZE 29:13 Piru migkaǥi zaan is Nengazen he MEGBEVAYÀ te, “Kedlavey te 40 he tuig, edtiǥumen ku is menge Ehiptohanen puun te menge nasyun he zutun sikandan mekepeyapat.
EZE 29:14 Idlikù ku sikandan diyà te Patros he divavà he vahin te Ehipto, he iyan kes tanà he mibpuunan dan. Ne zutun egkehimu zà sikandan he mevavà is kebpekesavuk din he ginhedian–
EZE 29:15 pinekemevavà heini te langun he menge ginhedian, ne kenè dan en ebpekeuman ebpekelavew te zuma he menge nasyun. Edhimuwen ku sikandan he meǥuyà utew he ginhedian, ne kenè en egkeuman egkezizalem te ǥehem din is duma he menge nasyun.
EZE 29:16 Ne kenè en ed-uman edsarig te Ehipto is menge etew te Israel. Is egkehitavù te Ehipto ebpekepetanudtanud te menge Israilihanen te menge salè dan, he iyan is kebuyù te tavang diyà te Ehipto. Ne egketuenan te menge Israilihanen he iyan a Nengazen he MEGBEVAYÀ.”
EZE 29:17 Hein nehuna he andew te nehuna he vulan, dutun te ike-27 he tuig te kegkevihaǥa kenami, migkaǥi is Nengazen kayi te kedì te,
EZE 29:18 “Sikew is etew, is menge sundaru ni Hadì Nebucadnezar he hadì te Babilonia mibpurung mebpekidtebek te menge sundaru te Tyre taman te nengeupew en sikandan wey mibpenlupangan en is menge pemenayen dan. Piru wazà nekuwa ni Nebucadnezar wey te menge sundaru zin diyà te menge tig-Tyre.
EZE 29:19 Umbe siak, is Nengazen he MEGBEVAYÀ, migkaǥi a he iyan ibeǥey ku is Ehipto ziyà te hadì te Babilonia he si Nebucadnezar. Egkaaǥew zin is langun he ketiǥeyunan diyà te Ehipto he iyan bayad diyà te menge sundaru zin.
EZE 29:20 Ibeǥey ku kandin is Ehipto he suhul te kedhaǥù din. Su para kediey is kedhimuwa zin kayi wey te menge sundaru zin. Iyan a, is Nengazen he MEGBEVAYÀ, is migkaǥi kayi.
EZE 29:21 “He Ezekiel, diyà te timpu te kegkeul-ulaha kayi, ed-umanan ku ed-enawa is Israel, ne egketuenan te menge Israilihanen he tutuu ves iyan is mibpengaǥi nu. Ne zutun egketuenan dan he iyan a Nengazen.”
EZE 30:1 Migkaǥi is Nengazen kayi te kedì te,
EZE 30:2 “Sikew is etew, tudtula nu heini is menge lalag ku he para te menge tig-Ehipto. Keǥiyi nu sikandan he siak, is Nengazen he MEGBEVAYÀ, migkaǥi a te: Sineǥew kew tenged te ebpekeuma ziyà te keniyu he kezeetan.
EZE 30:3 Su hapit en egkeuma haazà he andew, is andew te kedhukum te Nengazen. Egkikivel ne ebmerusirem haazà he andew para te menge nasyun.
EZE 30:4 Edsurungen is Ehipto, ne ebpekebmereǥen is menge tig-Etiopia. Mahabet is ebpematey ziyà te Ehipto, ne ebpenguwaan is menge ketiǥeyunan kayi he nasyun, ne ebengkaǥen heini.
EZE 30:5 Kayi he tebek, ebpematey is menge tig-Etiopia, tig-Put, tig-Lydia, tig-Arabia, tig-Libya, wey is diyà te zuma he menge nasyun he nekidsevaha te Ehipto.
EZE 30:6 Iyan a, is Nengazen he MEGBEVAYÀ migkaǥi he egkezeetan iyan is diyà te menge nasyun he nekidsevaha te Ehipto, ne egkaawà is gehem he impehivantug te menge Ehiptohanen. Egkeǥerà is meǥinged kayi puun te Migdol pehendiyà te Aswan.
EZE 30:7 Ne egkehimu he edlavew is kegkemekevulungbulung te Ehipto te zuma he mekevulungbulung he menge nasyun diyà te peliǥuy zin, is menge inged kayi, egkehimu he iring te nevengkag he menge inged diyà te peliǥuy zin su egkengevengkag daan.
EZE 30:8 Emun ebinsulan ku en is Ehipto wey ebpematey en is langun he nekidsevaha kayi, egketuenan te menge meǥinged kayi he iyan a Nengazen.
EZE 30:9 “Dutun he timpu, edsuǥù a te menge menunudtulà he ed-untud te menge untuzà he tenged kandan utew egkahandek is menge tig-Etiopia he ebpeeyehey zà. Egkeheratan sikandan dutun te timpu te kedèdeeti te Ehipto su siguradu egkeuma heeyan he timpu.”
EZE 30:10 Migkaǥi zaan is Nengazen he MEGBEVAYÀ te, “Egemiten ku si Hadì Nebucadnezar he hadì te Babilonia te kebpenhimatey te mahabet he menge etew ziyà te Ehipto.
EZE 30:11 Ibpezezeetan ku is Ehipto ki Nebucadnezar wey te menge sundaru zin he edlavew he mesipala kenà te zuma he mesipala he menge sundaru ziyà te menge nasyun, ne ebpekepeyapat is ebpematey ziyà te minsan hendei.
EZE 30:12 Ebpekemezahan ku is Wahig he Nilo, ne ibeǥey ku is Ehipto ziyà te lalung he menge etew. Edèdeetan ku is tivuuk he nasyun he Ehipto wey is langun he neseled kayi pinaaǥi te ebpemuun diyà te senge nenasyun. Iyan a, is Nengazen, is migkaǥi kayi.”
EZE 30:13 Migkaǥi pa is Nengazen he MEGBEVAYÀ te, “Edèdeetan ku zaan is menge ledawan te menge ed-ezapen diyà te Memfis. Wazè en ebpengulu te Ehipto ne ebpelihendeken ku is langun he meǥinged kayi.
EZE 30:14 Edhimuwen ku he mekevulungbulung is Patros, ebinsulan ku is Zoan, ne edsilut a ziyà te Tebes.
EZE 30:15 Ibpeǥezaman ku is kegkepauk ku ziyà te Pelusium, wey ziyà te melig-en he inged te Ehipto, ne ebpenhimetayan ku is mahabet he menge etew ziyà te Tebes.
EZE 30:16 Ebinsulan ku is Ehipto! Ebpekezag-es tenged te kegkesekiti is menge tig-Pelusium. Egkezeetan is Tebes, ne layun egkahandek is menge tig-Memfis.
EZE 30:17 Ebpematey te tebek is menge vetan-en he maama ziyà te Heliopolis wey ziyà te Bubastis, ne is egkesamà he uuyag kayi he menge inged ne ebihaǥen.
EZE 30:18 Emun edèdeetan ku en is gehem te Ehipto egkehimu heeyan he merusirem he andew para te menge tig-Tapanhes. Egkeawè en is impehivantug he ǥehem te Ehipto. Egkeselikuvungan is Ehipto te kivel, ne ebihaǥen is menge meǥinged diyà te menge inged kayi.
EZE 30:19 Iring keniyan is kedsilut ku ziyà te Ehipto, ne egketuenan dan he iyan a Nengazen.”
EZE 30:20 Ne hein ikepitu he andew te nehuna he vulan, dutun te ike-11 he tuig te kegkevihaǥa kenami, migkaǥi is Nengazen kayi te kedì te,
EZE 30:21 “Sikew is etew, midlepuan ku is bekelawan te Faraon he hadì te Ehipto. Ne wazà ebpekevawì kayi wey meulii su wey med-uman mebmezesen te kegawed te ispada.
EZE 30:22 Umbe, keǥiyi nu sikandin he siak, is Nengazen he MEGBEVAYÀ, migkaǥi a he kuntada ku sikandin. Edlepuan ku is dezuwa he vekelawan din, sikan is wazè pa melepui wey sikan is daan en he nelepuan, su wey zin melekai is ispada zin.
EZE 30:23 Ibpeyapat ku is menge Ehiptohanen diyà te nekedseselekawà he menge nasyun.
EZE 30:24 Edteǥuan ku te zesen is menge vekelawan te hadì te Babilonia ne ebpeǥewezan ku kandin is ispada ku. Piru edlepuen ku mulà is menge vekelawan te hadì te Ehipto, ne ebpekezag-es sikandin is pelien he edserupatey en diyà te etuvangan te hadì te Babilonia.
EZE 30:25 Edteǥuan ku te zesen is menge vekelawan te hadì te Babilonia. Piru is menge vekelawan te hadì te Ehipto egkeinutil mulà. Emun ibpeǥewezan ku en is ispada ku te hadì te Babilonia, wey egemiten din en heini te kedezaat te Ehipto, ne egketuenan te menge Ehiptohanen he iyan a Nengazen.
EZE 30:26 Ibpeyapat ku is menge Ehiptohanen diyà te nekedseselekawà he menge nasyun, ne egketuenan dan he iyan a Nengazen.”
EZE 31:1 Dutun te nehuna he andew te iketelu he vulan, duen te ike-11 he tuig te kegkevihaǥa kenami, migkaǥi is Nengazen kayi te kedì te,
EZE 31:2 “Sikew is etew, keǥiya nu heini ziyà te Faraon he hadì te Ehipto, wey te menge etew zin: “Hentei is egkepetug-iringan ku te kegkemekeǥeǥehem nu?
EZE 31:3 Ibpetug-iring ku sikew te Asiria, kes nasyun he iring te kayu he sidru ziyà te Lebanon. Sikew Faraon, iring kew zaan te kayu he sidru. Heini he kayu zuen din mekempet wey merapung he edrerepa he menge subpang, ne nelapew kayi is duma he merapung he menge kayu.
EZE 31:4 Nekeuǥup te kebmehinuvù kayi is wahig he ebpuun diyà te mezalem he serebseb. (Midtudà daan heini ziyà te zuma he menge kayu ziyà te ketelunan.)
EZE 31:5 Mibmetawis heini he kayu lavew te zuma he menge kayu ziyà te ketelunan. Midezekelà wey mibmerapung is menge subpang kayi tenged duen te zekelà he wahig.
EZE 31:6 Is langun he menge tagbis midsesalag diyà te menge subpang din, wey is langun he leew he menge langgam mid-anak diyà te puun din. Is menge etew ziyà te langun he gemhanan he menge nasyun midhelung kayi.
EZE 31:7 Mekempet heini he kayu ne memelayat is menge subpang din, su is menge zalid din midtiusek diyà te zizalem tenged te zekelà he wahig.
EZE 31:8 Minsan is menge kayu he sidru ziyà te pemuleey te Megbevayà ne kenà ebpekerepeng te kekempet kayi he kayu. Minsan is menge kayu he abitu wey platanu kenà ebpekerepeng te kekempet te subpang kayi he kayu.
EZE 31:9 Mibpekekempet ku heini he kayu is merapung is menge subpang din. Umbe nesina kandin is langun he menge kayu ziyà te pemuleey te Megbevayà.”
EZE 31:10 Umbe ǥuntaan, migkaǥi is Nengazen he MEGBEVAYÀ te, “Tenged te impemetikang kayi he kayu is keugelingen din wey kerapung te menge subpang din, wey tenged te kebpegalbu zin,
EZE 31:11 ibeǥey ku heini ziyà te nasyun he lavew he mekeǥeǥehem te zuma he menge nasyun he siguradu he edsilut kandin te sungkad te kelelalung din. Uya, idselikwey ku sikandin;
EZE 31:12 ebpilayen sikandin te kinemepesipelahan te langun he menge nasyun wey ebey-anan en. Ne ebpekepeyapat is egkengevadtì he menge subpang din diyà te menge vuvungan, menge suǥud, wey menge beyeey te wahig. Ed-awà diyà te kandin is menge etew ziyà te menge nasyun he midhelung diyà te kandin.
EZE 31:13 Edlatun is langun he menge tagbis diyà te lawa kayi he nepiley, ne ebpemen-untud is leew he menge langgam diyà te menge subpang kayi.
EZE 31:14 Umbe puun guntaan, wazè en kayu he edlavew is ketawis din wey kerapung din te zuma he menge kayu, minsan wehiǥen pa is netuvuan din. Su egkepatey is langun he kayu iring te etew he ebpatey ne ebpehendiyà heini te dizalem te tanà.”
EZE 31:15 Mibpedayun megkaǥi is Nengazen he MEGBEVAYÀ te, “Dutun te andew te ked-uwita kayi te kayu ziyà te lugar te menge minatey, edtembunan ku is mezalem he menge serebseb, ne tuus heini te kegkeseeng. Ne kenè en edtudà is wahig diyà te menge wahig, ne kenè en dekelà is wahig. Tenged kayi ebmerusirem is Lebanon ne egkeǥangu is langun he menge kayu ziyà te menge vevesukà.
EZE 31:16 Egkerkeren tenged te kegkahandek is menge etew ziyà te menge nasyun emun egkezineg dan en is guǥumangkul te kegkezeeti zutun te kayu, emun ed-uwiten en diyà te lugar te menge minatey duma te nemematey he menge etew. Ne is langun he menge kayu ziyà te Eden wey is langun he meupiya wey mekempet he menge kayu ziyà te Lebanon he nekepurung mekesupsup te wahig, edlipey zan diyà te zizalem te tanà.
EZE 31:17 Is menge etew ziyà te menge nasyun he midhelung diyà te kandin wey nekidsevaha kandin ne ebpekezuma zaan kandin diyà te lugar te menge minatey duma te nematey te tebek.
EZE 31:18 “Sikew is hadì te Ehipto, wazà kayu ziyà te Eden he ebpekerepeng te kekempet nu wey kegkemekeǥeǥehem nu. Piru id-ulug ka zaan diyà te zizalem te tanà duma te menge kayu ziyà te Eden. Dutun egkezuma nu is menge etew he nemematey te tebek he wazà medtuu te Megbevayà. “Iyan heini egkehitavù te hadì te Ehipto wey te menge etew zin. Iyan a, is Nengazen he MEGBEVAYÀ, is migkaǥi kayi.”
EZE 32:1 Dutun te nehuna he andew te ike-12 he vulan, dutun te ike-12 he tuig te kegkevihaǥa kenami, migkaǥi is Nengazen kayi te kedì te,
EZE 32:2 “Sikew is etew, penhulùhulù ka mehitenged te Faraon he hadì te Ehipto. Ne keǥiya nu heini ziyà te kandin: Mid-isip nu he iring ka te erimaung he ibpedleleyunè din dà te edhipanew is menge nasyun. Piru iyan benar is iring ke zà te vuaya he ed-en-enunung diyà te wahig nu. Edsimbeǥen nu te paa nu is wahig ne egkeleveg heini.
EZE 32:3 Guntaan, iyan heini egkeǥiyen te Nengazen he MEGBEVAYÀ diyà te kenikew: Edhingutelen ku sikew te puket ne ibpeǥaun ku sikew te mahabet he menge etew.
EZE 32:4 Idtimbag ku sikew ziyà te tanà ne ibpekaan ku sikew te menge tagbis wey te leew he menge langgam.
EZE 32:5 Ibpeyapat ku is menge sapù nu ziyà te menge vuvungan wey menge suǥud.
EZE 32:6 Ibpetudè ku is lengesa nu ziyà te tanà wey ziyà te menge vuntud wey veyeey te menge wahig.
EZE 32:7 Emun igkaawè ku en sikew, ed-elangan ku te ǥapun is langit, ne kenè en ebpekeveǥey te kerayag is menge vituen, wey is andew wey vulan.
EZE 32:8 Ibpemerusirem ku is langun he edsiǥa ziyà te langit. Umbe ebmerusirem is tivuuk he nasyun. Iyan a, is Nengazen he MEGBEVAYÀ, is migkaǥi kayi.
EZE 32:9 “Egkeǥiyaǥiya is menge etew ziyà te menge nasyun he wazè nu mekilala emun timpu en te kedèdeeti ku kenikew.
EZE 32:10 Ibpelihandek ku ziyà te mahabet he menge nasyun is egkehitavù kenikew, ne elin en egkerkeren te kegkahandek is menge hadì dan. Egkerkeren te kegkeherati is kada sevaha kandan emun idsiwer ku en is ispada ku ziyà te etuvangan dan dutun te timpu te kegkezeeti nu.
EZE 32:11 Siak, is Nengazen he MEGBEVAYÀ, egkaǥi a he kenè ebpekeuram kenikew is ispada te hadì te Babilonia.
EZE 32:12 Ibpeǥerè ku is ginsekupan nu pinaaǥi te ispada te mekeǥeǥehem he menge etew he kinemepesipelahan kenà te langun he menge etew ziyà te menge nasyun. Edèdeetan dan is langun he menge etew ziyà te Ehipto ragkes is menge vutang he impahambug dan.
EZE 32:13 Egeraan ku is langun he menge uyaǥen diyà te Ehipto he ebpemenabtab diyà te uvey te zekelà he wahig. Umbe wazè en etew wey uyaǥen he edleveg duen te wahig.
EZE 32:14 Ne ibpemetingew ku is wahig diyà te Ehipto, ne edtudà heini he henduen be te lana. Iyan a, is Nengazen he MEGBEVAYÀ, is migkaǥi kayi.
EZE 32:15 Dutun te timpu te kedhimuwa ku te Ehipto he mekevulungbulung, wey kedèdeeti ku te langun he netaǥù kayi ragkes is menge meǥinged, egketuenan dan he iyan a Nengazen.
EZE 32:16 “Iyan haazà penhulùhulù te menge meǥinged diyà te menge nasyun para te Ehipto wey te langun he menge meǥinged kayi. Iyan a, is Nengazen he MEGBEVAYÀ, is migkaǥi kayi.”
EZE 32:17 Ne te ike-15 he andew te iyan ded he vulan wey tuig, migkaǥi is Nengazen kayi te kedì te,
EZE 32:18 “Sikew is etew, ikeseeng nu is menge meǥinged diyà te Ehipto wey is menge meǥinged diyà te zuma he mekeǥeǥehem he menge nasyun. Su idtimbag ku sikandan diyà te zizalem te tanà duma zuen te nemematey en.
EZE 32:19 Keǥiyi nu sikandan te, ‘Edlavew kew ve te zuma? Idtimbag kew zaan diyà te zizalem duma te menge wazà medtuu te Megbevayà
EZE 32:20 he nemematey te tebek.’ Egkezeetan is menge Ehiptohanen su naandam en is ispada te menge kuntada he idhimatey kandan. Eguyuzen is Ehipto wey is menge etew kayi pehendiyà te kezeetan.
EZE 32:21 Diyà te lugar te menge minatey, igalewǥalew te mekeǥeǥehem he menge pengulu is tig-Ehipto wey is menge etew ziyà te menge nasyun he nekidsevaha kandan. Egkaǥi zan te, ‘Mibpenaug dan daan dini! Ne zuma zan en guntaan is menge wazà medtuu te Megbevayà he nemematey te tebek.’
EZE 32:22 “Dutun daan is hadì te Asiria he neliǥuy te leveng te menge sundaru zin he nemematey te tebek. Diyà is menge leveng dan te kinezizeleman diyà te zizalem. Heini he menge etew, igkikinehendekà dengan sikandan te menge etew he nemematey en te tebek.
EZE 32:24 “Dutun daan is hadì te Elam. Neliǥuy is leveng din te menge leveng te menge etew zin. Pudu sikandan minatey te tebek. Nenaug sikandan diyà te lugar te menge minatey duma zuen te zuma he wazà medtuu te Megbevayà. Hein uuyag dan pa igkikinehendekà sikandan te menge etew. Piru ǥuntaan nepeel-elezan sikandan duma zuen te nemematey.
EZE 32:25 Duen dutun lugar he para zuen te hadì te Elam duma te menge minatey te tebek. Neliǥuy is leveng din te menge leveng te menge etew zin. Mibpematey te tebek sikandan is langun he wazà medtuu te Megbevayà. Uya, igkikinehendekà sikandan te menge etew hein uuyag dan pa, piru ǥuntaan nepeel-elezan sikandan wey neketetayhad duma te nemematey te tebek.
EZE 32:26 “Dutun daan is hadì te Meshec wey hadì te Tubal. Neliǥuy is menge leveng dan te menge leveng te menge etew zan. Pudu sikandan wazà medtuu te Megbevayà, ne mibpematey sikandan te tebek. Igkikinehendekà sikandan hein uuyag dan pa.
EZE 32:27 Piru nemematey sikandan he wazà meveǥayi te dungganen he kedleveng iring te ventuǥan he menge etew he wazà medtuu te Megbevayà, te kedlevenga kandan diyà te ulunan dan is menge ispada zan ne ziyà te kumeng dan is kelasag dan. Heini he menge etew nemematey te tebek, su igkikinehendekè sikandan hein uuyag dan pa.
EZE 32:28 “Ne sikew is hadì te Ehipto, egkezeetan ka zaan wey ebpeketetayhad duma te menge wazà medtuu te Megbevayà he nemematey te tebek.
EZE 32:29 “Dutun daan te lugar te menge minatey is hadì te Edom wey is langun he menge upisyal zin. Gemhanan dengan sikandan, piru ǥuntaan neketetayhad dan duma te menge wazà medtuu te Megbevayà he nemematey te tebek.
EZE 32:30 “Dutun daan is langun he menge upisyal te menge lugar he zapit te dizaya wey is menge tig-Sidon. Su hein uuyag pa sikandan mibpelinandek dan daan is menge etew ziyà te kandan. Gemhanan daan sikandan dengan, piru guntaan nibpeel-elzan sikandan wey nemekererey-as diyà te lugar te menge minatey zuma te wazà medtuu te Megbevayà he nemematey te tebek.
EZE 32:31 Emun egkaahà te hadì te Ehipto ziyà te iveyaan heini is nemematey, egkelipey sikandin wey is menge sundaru zin su kenè bes iyan dà sikandan minatey te tebek.
EZE 32:32 Minsan ketau ku he ikahandek sikandan te menge etew hein uuyag dan pa, ebpatey zan wey ebpemeketetayhad duma te wazà medtuu kedì he nemematey te tebek. Iyan a, is Nengazen he MEGBEVAYÀ, is migkaǥi kayi.”
EZE 33:1 Migkaǥi is Nengazen kayi te kedì te,
EZE 33:2 “Sikew is etew, keǥiyi nu is duma nu he menge meǥinged he emun ibpesurung ku te menge kuntada is sevaha he lugar, is menge meǥinged keniyan he lugar kinahanglan he mebpilì te sevaha kandan he egkehimu he perevantey te inged dan.
EZE 33:3 Emun egkaahà dutun te vantey he ebpelingguma is menge kuntada, ipezaǥing din is trumpita he para te kebpetizaan te menge etew.
EZE 33:4 Is minsan hentei he ebpekezineg duen te trumpita piru kenè din edseǥipaan, ne ebpatey sikandin dutun te kedsurunga kandan, ne ziyà mismu igkevasul te kandin is kemetayen din.
EZE 33:5 Su ǥeina te hein nezineg din is trumpita ne wazà sikandin medseǥipà, umbe iyan dà sikandin egkevasul te kemetayen din. Su emun pezem midseǥipà sikandin ne egkelibri zin is keugelingen din.
EZE 33:6 Iyan, emun naahà duen te vantey is ebpelingguma he menge kuntada piru wazè din ipezaǥing is trumpita te kebpetizaan te menge etew, ne emun duen ebpatey kandan dutun te kedsurunga kandan, edsukuten ku zutun te vantey is kemetayen dan minsan iyan ibpatey zan is tenged te salè dan.”
EZE 33:7 Mibpedayun megkaǥi is Nengazen te, “Sikew is etew, mibpilì ku sikew he ed-elima te menge etew te Israel, umbe pemineǥa nu is egkeǥiyen ku, ne segugunè nu petizeeni is menge etew.
EZE 33:8 Emun egkeǥiyan ku is lalung he etew he siguradu he ebpatey sikandin tenged te salè din ne wazè nu sikandin keǥiyi he engkezi zin is mezaat he menge vaal zin, iyan ka edsukutan ku te kemetayen din. Iyan, emun migkeǥiyan nu haazà is lalung he etew he engkezi zin is mezaat he menge vaal zin, ne wazè din seǥipaa is migkaǥi nu, ebpatey sikandin tenged te salè din, piru wazè nu televaken dutun te kemetayen din.
EZE 33:10 “Sikew is etew, edriklamu is menge etew te Israel he kenè dan egkaantus is silut tenged te menge salè dan. Ebpengguyaan en sikandan ne henduen be te ebpatey zan en tenged kayi.
EZE 33:11 Ne ǥuntaan keǥiyi nu sikandan he siak, is Nengazen he MEGBEVAYÀ he uuyag, migkaǥi a he kenà a egkelipey emun duen ebpatey he lalung he etew. Iyan suat ku he engkezi zan is mezaat he menge vaal zan su wey zan meuyag-uyag. Umbe sikiyu is menge etew te Israel, engkezi niw en is mezaat he menge vaal niw. Maan is egkesuat kew he ebpatey?
EZE 33:12 “Ne ǥuntaan, sikew is etew, keǥiyi nu is duma nu he menge meǥinged he emun ebaal te salà is metazeng he etew, is meupiya he menge vaal zin dutun te nehuna he timpu ne kenà ebpekelibri kandin. Ne emun iyan ed-engked te mezaat he menge vaal zin is lalung he etew ne kenè en sikandin edsilutan tenged duen te nehuna he kelelalung din.
EZE 33:13 Emun egkaǥi a ziyà te metazeng he etew te siguradu he egkeuyag-uyag sikandin, piru kegketapus dutun ebaal sikandin te salà su edsarig he ebpekelibri kandin is nehuna he meupiya he menge vaal zin, heeyan he etew ebpatey tenged te salè din. Kenè ku en edtentenuzan is meupiya he menge vaal zin.
EZE 33:14 Ne emun egkeǥiyan ku is lalung he etew he siguradu he ebpatey sikandin, piru mibpezumdumahan din is sambag kandin ne mid-engkezan din is mezaat he menge vaal zin ne mibaal te hustu wey metazeng–
EZE 33:15 penenglitan, in-ulì din is insandà diyà te kandin etawa tinakew zin, wey midtuman din is menge sulunuzen he ebpekeveǥey te untung te wazà mebaal te mezaat, ne heeyan he etew siguradu he egkeuyag, ne kenà sikandin ebpatey.
EZE 33:16 Is minsan hengkey he salà he nehimu zin ne kenè en edtentenuzan is kedèdeeti kandin tenged dutun. Ne tenged te mibaal sikandin te hustu wey metazeng, siguradu he egkeuyag-uyag sikandin.
EZE 33:17 “Piru is menge zuma nu he meǥinged, Ezekiel, edriklamu he kenè kun hustu is paaǥi ku. Piru iyan kenà hustu is kandan he paaǥi.
EZE 33:18 Emun ed-engked he edtinazeng is metazeng he etew su ebaal en sikandin te mezaat. Ebpatey sikandin.
EZE 33:19 Ne emun is lalung ed-engked he ebaal te mezaat he menge vaal, ne ebaal en sikandin te hustu wey metazeng, egkeuyag-uyag sikandin.
EZE 33:20 Menge etew te Israel, migkaǥi kew he kenà hustu is paaǥi ku. Edhukuman ku is kada sevaha keniyu sumalà te menge vaal niw.”
EZE 33:21 Hein ikelima he andew te ikesepulù he vulan, dutun te ike-12 he tuig te kegkevihaǥa kenami, duen sevaha he etew he nekepelaǥuy puun te Jerusalem he midhendiyà te kedì, ne ke sikandin te, “Nezeetan en is inged he Jerusalem!”
EZE 33:22 Dutun te nehuna he kezukileman, te wazè pa mekeuma haazà is etew, midumala a te Nengazen ne nekeuman ad mekekaǥi. Umbe hein meselem he nekeuma haazà is etew, ne ebpekekaǥi ad.
EZE 33:23 Migkaǥi is Nengazen kayi te kedì te,
EZE 33:24 “Sikew is etew, is menge etew he ed-ubpà diyà te nevengkag he menge inged diyà te Israel egkaǥi te, ‘Sebsevaha zà si Abraham, ne imbeǥey ziyà te kandin is tivuuk ha tanà. Ne mahabet kiw mulà, umbe siguradu he egkaangken tew ǥihapun heeyan he tanà.’
EZE 33:25 Ne guntaan keǥiyi nu sikandan, he iyan a, is Nengazen he MEGBEVAYÀ migkaǥi te, ‘Egkeisip niw ve he egkaangken niw ǥihapun haazà is tanà minsan egkaan kew te usa he zuen din pa lengesa, wey ed-azap kew te zuma he menge ed-ezapen niw, wey ebpenhimatey kew te etew?
EZE 33:26 Edsarig kew te ispada niw, ebaal kew te utew mezaat he menge vaal, wey mengungumpadi kew. Ne egkeisip niw ǥihapun is ked-angken duen te tanà?
EZE 33:27 Iyan a, is uuyag he Nengazen he MEGBEVAYÀ, nenangdù he siguradu he ebpemematey te tebek sikan is nengesamà he uuyag duen te nerundus he inged. Is menge nengesamà he uuyag diyà te menge vevesukà edewiyen te zumezaas he menge langgam, ne is duma kandan he ziyà te menge elesà wey menge surung ebpematey te zaru.
EZE 33:28 Edhimuwen ku he mekevulungbulung he tanà is Israel, ne id-awè ku is kebpehivantug te menge etew kayi mehitenged te egkehimu zan. Minsan is menge vuvungan kayi egkehimu he mekevulungbulung, ne wazè en ebayà dutun.
EZE 33:29 Emun ebengkaǥen ku en wey edhimuwen he mekevulungbulung heeyan is tanà tenged te langun he utew mezaat he menge vaal te menge etew kayi, egketuenan dan he iyan a Nengazen.’ ”
EZE 33:30 Migkaǥi is Nengazen kayi te kedì te, “Sikew is etew, is duma nu he menge meǥinged edhisgut mehitenged kenikew emun egketiǥum sikandan diyà te uvey te verengbeng te inged etawa ǥemawan te menge valey zan. Ebpelelelaǥà sikandan is egkaǥi te, ‘Hendini kew su ebpemineg kiw ki Ezekiel ke hengkey is ibpakaǥi kandin te Nengazen!’
EZE 33:31 Umbe, ed-uvey is menge etew ku ziyà te kenikew iring duen te layun dan ebeeli, ebpinuu zan diyà te etuvangan nu he henduen be te tutuu he ebpemineg dan kenikew, piru iyan benar is wazè dan tumana is mibpengaǥi nu. Netuleng dan dà te kegkaǥi he mahal e zan, piru iyan diyà te ǥehinawa zan is dekelà he kadar te selapì.
EZE 33:32 Diyè te kandan, iring ke zà te perekanta he zuen din meupiya he laǥeng he egkanta te kentahan para te kebmahal wey sevaha ka he metau he edtukar te instrumintu. Mibpemineg dan dà is menge lalag nu piru wazè dan heini tumana.
EZE 33:33 Ne emun egkehitavù en heini is silut kandan he siguradu he egkehitavù, egketuenan dan he zuen bes iyan ebpeneuven he zuma zan.”
EZE 34:1 Migkaǥi is Nengazen kayi te kedì te,
EZE 34:2 “Sikew is etew, kaǥi ka te ebpekesuǥat te menge perevantey te Israel. Keǥiyi nu sikandan he iyan a, is Nengazen he MEGBEVAYÀ migkaǥi te: Mekehizuhizu kew is menge perevantey te Israel. Keugelingen niw zà is ed-eturen niw! Kenè be is menge perevantey kinahanglan he ed-eturen din is menge kerehidu?
EZE 34:3 Ed-inumen niw is gatas dan, ebeelan niw he visti is bulvul zan, ne edlapaan niw is utew melambù kandan, piru wazè niw sikandan etura.
EZE 34:4 Wazè niw elimahi para mebmezesen is menge meluya kandan. Wazè niw tembari is menge nezeruwan, wazè niw vukusi is palì dan. Wazè niw pen-ahaa is menge netazintazin wey netazin. Kekenà, mibpurung niw sikandan ruuǥa.
EZE 34:5 Ne ǥeina te wazà ebantey kandan, nekepeyapat sikandan ne mibpendawi te zumezaas he menge langgam.
EZE 34:6 Netazintazin is menge kerehidu ku ziyà te menge vuntud wey menge vuvungan. Nekepeyapat sikandan kayi te tivuuk he kelibutan, ne wazè en iyan nen-ahà kandan.
EZE 34:7 “Umbe, sikiyu is menge perevantey, pemineǥa niw is egkeǥiyen ku.
EZE 34:8 Iyan a, Nengazen he MEGBEVAYÀ he uuyag, ebpenangdù a he edsilutan ku sikiyu su wazè niw elimahi is menge kerehidu ku, umbe midsurung wey mibpendawi sikandan te zumezaas he menge langgam. Wazè niw sikandan pen-ahaa, kekenà, iyan niw zà ed-eturen is keugelingen niw.
EZE 34:9 Umbe, sikiyu is menge perevantey, pemineǥa niw is egkeǥiyen ku.
EZE 34:10 Iyan a, is Nengazen he MEGBEVAYÀ, migkaǥi he kuntada ku sikiyu, wey edsukutan ku sikiyu tenged te nehitavù te menge kerehidu ku. Kenè ku en sikiyu ibpaatur te menge kerehidu, su iyan niw zà ed-eturen is keniyu he keugelingen. Edlibriyen ku is menge kerehidu ku ziyà te keniyu, ne kenè niw en sikandan egkekaan.
EZE 34:11 “Iyan a, is Nengazen he MEGBEVAYÀ, migkaǥi he iyan a mismu ebpen-ahà te menge kerehidu ku wey ed-atur kandan.
EZE 34:12 Iring te ebpen-ahaan te pereelima is menge kerehidu zin he ebpekedsusuwey, ebpen-ahaan ku zaan is menge kerehidu ku. Edlibriyen ku sikandan puun te langun he menge lugar he zutun sikandan mekedsusuwey hein timpu te kesamuk.
EZE 34:13 Egkuwaan ku sikandan puun te nekedseselekawà he menge nasyun, ne ed-uwiten ku ziyà te keugelingen dan he tanà. Ibpepenabtab ku sikandan diyà te menge vuvungan te Israel, diyà te kilid te menge wahig, wey ziyà te langun he lugar he ed-ubpaan te menge etew.
EZE 34:14 Uya, ibpepenabtab ku sikandan te meilem he penebtavà diyà te menge vuvungan te Israel. Dutun edleku sikandan is ebpenabtab.
EZE 34:15 Iyan a mismu, is Nengazen he MEGBEVAYÀ ed-atur te menge kerehidu ku, ne ibpehimeley ku sikandan.
EZE 34:16 Ebpen-ahaan ku sikan is nengetazin wey nengetazintazin. Ebukusan ku is menge pelien wey edlig-enan ku is memeluya. Piru edèdeetan ku is memelambù wey memeupiya is kedlelawa. Ebeelan ku ziyà te kandan ke hengkey is hustu he kukuman.
EZE 34:17 “Sikiyu is menge etew te Israel he menge kerehidu ku, iyan a, is Nengazen he MEGBEVAYÀ, migkaǥi ziyà te keniyu he edhukuman ku sikiyu. Ibpedtepizè ku is meupiya wey mezaat, is menge kerehidu wey menge kambing.
EZE 34:18 Is duma keniyu kenè pa kuntintu te kebpenabtab diyà te meupiya he penebtavà; edtekutakan niw pa is duma he menge penebtavà. Is duma kenè pa kuntintu te ked-inum diyà te metingew he wahig; edleveǥen dan pa is duma he wahig.
EZE 34:19 Ebpengamuy-amuy ve ebpenabtab is menge kerehidu ku ziyà te midtekutakatan he penebtavà? Ed-inum be sikandan te midleveg niw he wahig?
EZE 34:20 “Umbe siak, is Nengazen he MEGBEVAYÀ, migkaǥi a ziyà te keniyu he iyan a mismu ebpedsivey te melambù wey meǥasà he menge kerehidu.
EZE 34:21 Su sikiyu is menge melambù, eduǥehungen niw zà wey edsungayen is meluya he menge kerehidu taman te ebpekepekeziyù sikandan.
EZE 34:22 Edlibriyen ku is menge kerehidu ku ne kenè en sikandan egkeumanan egkeebusari. Ibpedsivey ku is menge meupiya wey menge mezaat.
EZE 34:23 Ebeǥayan ku sikandan te sevaha he tig-elima he kevuwazan te suluǥuen ku he si David. Iyan sikandin ed-atur wey egkehimu he ed-elima.
EZE 34:24 Ne siak, is Nengazen, egkehimu a he Megbevayè dan, ne sikan is kevuwazan te suluǥuen ku he si David egkehimu he pengulu zan. Iyan a, is Nengazen, is migkaǥi kayi.
EZE 34:25 “Ebaal a te kebpekid-uyun kandan he ebpekeveǥey te meupiya te ked-ubpè dan. Egsegseǥen ku is dumezaas he menge langgam puun te tanè dan su wey mekeubpà sikandan diyà te sibsivayan ne ebpekelipezeng dan diyà te ketelunan he wazà ebpekekaid kandan.
EZE 34:26 Edtuvazan ku sikandan wey is menge lugar peliǥuy te segradu he vuntud ku. Edtuvazan ku sikandan pinaaǥi te kebpeuzani ku kandan dutun te hustu he timpu.
EZE 34:27 Ebpemeǥas is menge kayu zan wey is duma pa he menge pinemula zan. Ne ebpengungubpaan sikandan he wazà ebpekekaid kandan. Egketuenan dan he iyan a Nengazen emun edlibriyen ku en sikandan puun te ǥehem te mid-uripen kandan.
EZE 34:28 Kenè en sikandan edsurungen wey ed-eǥawan te menge azen te menge etew ziyà te zuma he menge nasyun he iring te zumezaas he menge langgam. Ebpengungubpaan sikandan he wazà ebpekekaid kandan wey wazè dan igkahandek.
EZE 34:29 Ebeǥayan ku sikandan te tanà he egkevantug te kegkeselebpeten din su wey zan kenè en bitila wey sudia te menge etew ziyà te zuma he menge nasyun.
EZE 34:30 Ne egketuenan dan he iyan a, is Nengazen he Megbevayè dan mibpekiduma kandan, ne sikandan is menge etew te Israel, menge etew ku. Iyan a, is Nengazen he MEGBEVAYÀ, is migkaǥi kayi.
EZE 34:31 “Iyan kew menge kerehidu ku ziyà te pepenebtavè ku. Iyan kew menge etew ku, ne iyan a Megbevayè niw. Iyan a, is Nengazen he MEGBEVAYÀ, is migkaǥi kayi.”
EZE 35:1 Migkaǥi is Nengazen kayi te kedì te,
EZE 35:2 “Sikew is etew, sinaru ka ziyà te Buntud he Seir, ne kaǥi ka te ebpekesuǥat te menge meǥinged keniyan.
EZE 35:3 Keǥiyi nu sikandan, he iyan a, is Nengazen he MEGBEVAYÀ migkaǥi te kuntada ku sikiyu is menge meǥinged diyà te Buntud he Seir. Edsilutan ku sikiyu ne egkehimu he mekevulungbulung is lugar niw.
EZE 35:4 Ebengkaǥen ku is menge inged niw ne egkehimu heini he mekevulungbulung. Ne zutun egketuenan niw he iyan a Nengazen.
EZE 35:5 Neuǥet en is kedumuti niw te menge tig-Israel, ne midsurung niw sikandan dutun te timpu te kelised dan, su timpu haazà te kedsiluti kandan tenged te menge salè dan.
EZE 35:6 Umbe siak, is Nengazen he MEGBEVAYÀ he uuyag, ebpenangdù a he ibpepenhimetayan ku sikiyu minsan hendei kew ebpevayà. Uya, edel-asen kew te ebpenhimatey, su wazè niw isipa he mezaat is kedhimatey.
EZE 35:7 Edhimuwen ku he mekevulungbulung is Buntud he Seir, ne ebpenhimetayan ku is langun he sumeseǥazà dutun.
EZE 35:8 Is ebpematey keniyu te tebek ebpekepeyapat diyà te menge vuntud, diyà te menge vuvungan, diyà te menge suǥud, wey ziyà te kilid te menge wahig. Edhimuwen ku is lugar niw he mekevulungbulung taman te taman. Wazè en ed-ubpà diyà te menge inged niw. Ne zutun egketuenan niw he iyan a Nengazen.
EZE 35:10 “Migkaǥi kew he egkaangken niw is Juda wey Israel, ne ed-engkenen niw heini minsan siak, is Nengazen, ebpekiduma kandan.
EZE 35:11 Umbe siak, is Nengazen he MEGBEVAYÀ he uuyag, nenangdù a he ebelesan ku sikiyu tenged te pauk niw, kesina niw, wey rerangit niw he impeehè niw te menge etew ku. Ne egketuenan dan he iyan a Nengazen dutun te kedsiluti ku en keniyu.
EZE 35:12 Ne pinaaǥi zaan keniyan ekgetuenan niw he iyan a Nengazen, ne nezineg ku is langun he kedsudia niw te menge vuvungan te Israel. Su ke sikiyu te, ‘Nezeetan heini ne neveǥayan kiw te meupiya he timpu te ked-aǥew kayi.’
EZE 35:13 Mibpahambug kew zaan wey minsan hengkey zà is ebpengeǥiyen niw he ebpekesuǥat kediey, ne nezineg ku heini.
EZE 35:14 “Umbe siak, is Nengazen he MEGBEVAYÀ, migkaǥi a he emun edhimuwen ku en he mekevulungbulung is lugar niw egkelipey is menge etew kayi te tivuuk he kelibutan,
EZE 35:15 su geina te ingkelipey niw hein nehimu he mekevulungbulung is tanà he mibpepengevilin te menge Israilihanen. Umbe iyan daan heeyan egkehitavù keniyu; egkehimu he mekevulungbulung is Buntud he Seir wey is tivuuk he Edom. Ne zutun egketuenan niw he iyan a Nengazen.”
EZE 36:1 Migkaǥi is Nengazen te, “Sikew is etew, keǥiyi nu is menge vuvungan te Israel te, ‘He menge vuvungan te Israel, pemineǥa nu is menge lalag te Nengazen.
EZE 36:2 Iyan heini migkaǥi te Nengazen he MEGBEVAYÀ: migkaǥi is menge kuntada niw he egkaangken dan en is menge vuvungan niw.’
EZE 36:3 “Umbe, sikew is etew, keǥiyi nu is menge vuntud te Israel he siak, is Nengazen he MEGBEVAYÀ, migkaǥi a te, ‘Midsurung kew te menge nasyun he diyà te minsan hendei renged, ne ǥuntaan gaked kew zan en. Midsudì kew zan wey mibpeel-elezan.
EZE 36:4 Umbe, sikiyu is menge vuvungan, menge zal-ug, menge suǥud, menge lugar he nengevengkag, pemineǥa niw is egkeǥiyen ku. Siak, is Nengazen he MEGBEVAYÀ, migkaǥi a he utew ku egkepeuki heeyan he menge nasyun lavew en is Edom, su mid-aǥew zan is tanè ku zuma te utew kegkelipey wey kedsudì, su egkesuat dan he maangken dan is menge penebtavà kayi.’
EZE 36:6 “Umbe, sikew is etew, keǥiyi nu is tanà he Israel. Keǥiyi nu is menge vuvungan, menge zal-ug, menge suǥud, he iyan a, is Nengazen he MEGBEVAYÀ migkaǥi te, ‘Naantus niw is kebpeel-elezi keniyu te nekepeliǥuy he menge nasyun. Umbe tenged te utew ku kegkepauk, ne siak, is Nengazen he MEGBEVAYÀ ebpenangdù he egkepeel-elezan daan heeyan he menge nasyun.
EZE 36:8 Piru sikiyu is menge vuvungan te Israel, edtuvù diyà te keniyu is menge kayu, ne ebpemeǥas heini para te menge etew ku he Israilihanen, su hapit dan en ed-ulì.
EZE 36:9 Pemineg kew! Ed-etimanen ku sikiyu. Ed-ereduwen ku is tanè niw ne ebpemulaan ku.
EZE 36:10 Ibpemezakel ku is menge meǥinged kayi he iyan is tivuuk he menge etew te Israel. Ed-umanan ku ebenguna is nezeetan he menge inged niw, ne ed-ubpaan heini te menge etew ku.
EZE 36:11 Ibpemahabet ku is menge etew wey menge uyaǥen diyà te keniyu. Ebpeumanan ku sikiyu ebpeubpai te menge etew iring te zengan, ne ibpeuswag ku sikiyu te lavew pa te zengan. Ne egketuenan niw he iyan a Nengazen.
EZE 36:12 Idlikù ku ziyà te keniyu is menge etew ku he Israilihanen. Ed-engkenen kew zan ne kenè niw en id-uman ibpen-awà is menge anak dan.’ ”
EZE 36:13 Mibpedayun megkaǥi is Nengazen he MEGBEVAYÀ te, “Migkaǥi is menge etew ziyà te keniyu te ebpenhimetayan niw is menge meǥinged diyà te keniyu, ne ibpen-awè niw is menge vatà diyà te nasyun niw.
EZE 36:14 Piru puun guntaan kenè niw en ebpenhimetayan is menge meǥinged diyà te keniyu. Ne kenè niw en daan ibpen-awà is menge vatà diyà te nasyun niw. Iyan a, is Nengazen he MEGBEVAYÀ, is migkaǥi kayi.
EZE 36:15 Kenè ku en idtuǥut he sudia kew wey peel-elezi te zuma he menge nasyun. Wey kenè ku en idtuǥut he mezeeti is nasyun niw. Iyan a, is Nengazen he MEGBEVAYÀ, is migkaǥi kayi.”
EZE 36:16 Migkeǥiyan e pa te Nengazen te,
EZE 36:17 “Sikew is etew, hein ed-ubpè pa is menge Israilihanen diyà te tanè dan, midremerikan dan heini pinaaǥi te mezaat he menge vaal zan. Is baal zan iring keremerik te vahi he midlengesahan.
EZE 36:18 Umbe, mibpeǥezaman ku kandan is pauk ku tenged te kebpenhimatey zan keniyan te tanà he Israel, wey tenged te ked-azap dan te zuma he menge ed-ezapen he nekeremerik kayi he tanà.
EZE 36:19 Impeyapat ku sikandan diyà te zuma he menge nasyun. Mibeelan ku ziyà te kandan is ereg he ibales te menge vetasan dan wey menge ulaula zan.
EZE 36:20 Minsan hendei he nasyun is egkepeveyaan dan, egkependezeisey zan is waǥas he ngazan ku. Su egkaǥi is menge etew te, ‘Menge etew sikandan te Nengazen, piru midsegseg din sikandan puun te tanè dan.’
EZE 36:21 Ingkeseeng ku is kebpendezeisaya te menge etew te Israel te waǥas he ngazan ku ziyà te minsan hendei he nasyun he egkeveyaan dan.
EZE 36:22 Umbe, keǥiyi nu is menge etew te Israel he siak, is Nengazen he MEGBEVAYÀ migkaǥi te: He menge etew te Israel, ibpelikù ku sikiyu ziyà te tanè niw kenà tenged te engayan kew he edawat kayi. Ebeelan ku heini tenged te waǥas he ngazan ku he ebpendezeisayen niw ziyà te minsan hendei he nasyun he egkeveyaan niw.
EZE 36:23 Iyan a, is Nengazen he MEGBEVAYÀ, migkaǥi te ibpeehè ku ke sengemenu is kegkewaǥas te zengeg te ngazan ku ziyà te menge nasyun he zutun niw pendezeisaya heini. Ne egketuenan te menge etew keniyan he menge nasyun he iyan a Nengazen emun igkepeehè ku en kandan is kegkewaǥas ku pinaaǥi te ebeelan ku ziyà te keniyu.
EZE 36:24 Su egkuwaan ku sikiyu puun diyà te nekedseselekawà he menge nasyun ne ed-uwiten ku sikiyu ziyà te keugelingen niw he tanà.
EZE 36:25 Ed-itisan ku sikiyu te lumpiyu he wahig para maawà diyà te keniyu is langun he meremerik, ne kenè kew en ed-uman ed-azap te zuma he menge ed-ezapen.
EZE 36:26 Ebeǥayan ku sikiyu te veǥu he ǥehinawa wey beǥu he mulin-ulin. Is mesinupaken he ǥehinawa niw edhimuwen ku he metinumanen he ǥehinawa.
EZE 36:27 Ebeǥayan ku zaan sikiyu te kediey he Mulin-ulin su wey niw mepurung mesunud is menge suǥù ku wey menge sulunuzen.
EZE 36:28 Ed-ubpè kew ziyà te tanà he ibeǥey ku te menge kepuun niw. Egkehimu kew he menge etew ku, ne egkehimu a he Megbevayè niw.
EZE 36:29 Edlumpiyuwan ku sikiyu te langun he keremerik niw. Ebeǥayan ku sikiyu te zekelà he trigu ne kenè kew en ebitilen.
EZE 36:30 Ibpeveǥas ku te mahabet is menge kayu niw wey ibpezekelè ku is menge abut niw, su wey kew kenè en mepeel-elezi ziyà te zuma he menge nasyun tenged te kebitila niw.
EZE 36:31 Ne egketenuzan niw is mezaat he menge ulaula wey menge vaal niw, ne igkelimezangi niw is keugelingen niw tenged te menge salè niw wey utew mezaat he menge vaal niw.
EZE 36:32 Piru egkesuatan ku he metueni niw te menge etew te Israel he ebeelan ku heini kenà tenged keniyu. Umbe ereg he igkeeled niw is menge ulaula niw. Iyan a, is Nengazen he MEGBEVAYÀ, is migkaǥi kayi.”
EZE 36:33 Mibpedayun megkaǥi is Nengazen he MEGBEVAYÀ te, “Emun egkelumpiyuwan ku en sikiyu te langun he menge salè niw, ibpeuman ku sikiyu ibpeubpà diyà te menge inged niw, ne ebengunen ku is nezeetan he menge lugar.
EZE 36:34 Ne sikan is tanà he mekevulungbulung dengan, ne ed-ereduwen en, ne is langun he ebpekaahà kayi,
EZE 36:35 egkaǥi te, ‘Is tanà he wazè din pulus dengan, neiring en te pemuleey he Eden. Is menge inged he nengevengkag wey nengehimu he mekevulungbulung dengan ne zuen din en menge verengbeng wey ed-ubpaan en!’
EZE 36:36 Ne is menge etew ziyà te egkesamà he menge nasyun diyà te peliǥuy niw egketuenan dan he iyan a, is Nengazen mibangun te nengevengkag wey nemula ziyà te menge tanà he nengehimu he mekevulungbulung. Iyan a, is Nengazen, is migkaǥi kayi, ne ebeelan ku heini.”
EZE 36:37 Mibpedayun megkaǥi is Nengazen he MEGBEVAYÀ te, “Ed-umanan ku ebpemineǥa is kebpehizuhizu te menge etew te Israel, ne iyan ebeelan ku ziyà te kandan is: Edhimuwen ku sikandan he iring kahabet te menge kerehidu he ibpemuhat diyà te Jerusalem emun timpu te pista. Umbe is nengevengkag he menge inged egkeuman egkepenù te mahabet he menge etew. Ne egketuenan dan he iyan a Nengazen.”
EZE 37:1 Ne midumala a te Nengazen ne mid-uwit a te Mulin-ulin din diyà te teliwazà te suǥud he zuen duen mahabet he menge tulan te etew.
EZE 37:2 Inriǥuriǥu a te Nengazen dutun, ne neehè ku is utew mahabet he menge tulan he nekepeyapat dutun te suǥud ne nepurung en heini meǥangu.
EZE 37:3 Mid-insà is Nengazen kayi te kedì te, “Sikew is etew, egkeuyag pe be heini is menge tulan?” Midtavak a te, “He Nengazen he MEGBEVAYÀ, iyan ke zà netau keniyan.”
EZE 37:4 Mid-uman sikandin megkaǥi kayi te kedì te, “Keǥiyi nu heeyan is memaza he menge tulan he mebpemineg dan te egkeǥiyen ku.
EZE 37:5 Su siak, is Nengazen he MEGBEVAYÀ, egkeǥiyan ku sikandan te, ‘Ebeǥayan ku sikiyu te ǥehinawa ne egkeuyag kew.
EZE 37:6 Ebeǥayan ku sikiyu te menge uǥat wey menge sapù, ne edtengesen ku sikiyu te lundis. Ebeǥayan ku sikiyu te ǥehinawa ne egkeuyag kew. Ne egketuenan niw he iyan a Nengazen.’ ”
EZE 37:7 Umbe, midtuman ku haazà is inmandù kedì. Ne hein migkaǥi ad, nekezineg a te leletekà, ne nekedsusuur sikan is menge tulan.
EZE 37:8 Ne zutun te kedtengteng ku zuen en kayi menge uǥat wey menge sapù, ne netenges en heini te lundis, piru wazè pa sikandan megeǥehinawa.
EZE 37:9 Migkaǥi is Nengazen kayi te kedì te, “Sikew is etew, keǥiyi nu is keramag he siak, is Nengazen he MEGBEVAYÀ, migkaǥi a te, ‘He keramag, pengeramag kew puun diyà te heepat he ebpuunan, ne hiyupi niw heeyan is menge minatey su wey meuyag sikandan.’ ”
EZE 37:10 Ne midtuman ku haazà is inmandù din kedì, ne nengeuyag haazà is menge minatey. Ne nemenhitindeg sikandan he iring kahabet te sengebetalyun he menge sundaru.
EZE 37:11 Migkaǥi en maan is Nengazen kayi te kedì te, “Sikew is etew, heeyan is menge tulan iyan ibpaalung din is tivuuk he menge etew te Israel. Migkaǥi sikandan te, ‘Neǥangu en is menge tulan dey, ne kenè key en ebpekeperateng, henduen be te minatey key en.’
EZE 37:12 Umbe keǥiyi nu sikandan he siak, is Nengazen he MEGBEVAYÀ, migkaǥi a te, ‘He menge etew ku, ed-ebriyan ku is menge leveng niw ne ebenhawen ku sikiyu, ne idlikù ku ziyà te tanà he Israel.
EZE 37:13 Ne egketuenan niw te menge etew ku, he iyan a Nengazen emun ed-ebriyan ku en is menge leveng niw wey ebenhawen ku sikiyu.
EZE 37:14 Ibeǥey ku keniyu is Mulin-ulin ku ne egkeuyag kew, ne ibpeubpè ku sikiyu ziyà te keugelingen niw he tanà. Ne egketuenan niw he iyan a is Nengazen midtuman te migkaǥi ku. Iyan a, is Nengazen, is migkaǥi kayi.’ ”
EZE 37:15 Migkaǥi is Nengazen kayi te kedì te,
EZE 37:16 “Sikew is etew, kuwa ka te tinevì ne surati nu heini te, ‘Is ginhedian te Juda.’ Ne uman ke pa kuwa te sevaha pa he tinevì ne surati nu heini te, ‘Ginhedian te Israel.’
EZE 37:17 Ne ipedsumpul nu haazà is dezuwa he tinevì wey mehimu he sevaha zà diyà te velad nu.
EZE 37:18 Emun ed-insaan ka te zuma nu he menge meǥinged ke hengkey is ibpesavut dutun.
EZE 37:19 Ne keǥiyi nu sikandan te, ‘Iyan heini migkaǥi te Nengazen he MEGBEVAYÀ: Ibpedsumpul ku is tinevì he ebpaalung te Israel wey is tinevì he ebpaalung te Juda, ne egkehimu heini he sevaha zà diyà te velad ku.’
EZE 37:20 “Ne ǥewezi nu haazà is tinevì he midsuratan nu su wey maahà te menge etew,
EZE 37:21 ne keǥiyi nu sikandan te, ‘Iyan heini migkaǥi te Nengazen he MEGBEVAYÀ: Egkuwaan ku is menge Israilihanen puun te langun he menge nasyun he zutun sikandan mekepeyapat, ne ed-umanan ku sikandan ed-uwita ziyà te keugelingen dan he tanà.
EZE 37:22 Ne edhimuwen ku zà sikandan he sevaha he nasyun diyà te tanà he Israel. Sevaha zà he hadì is edhadì kandan, ne kenè dan en egkeuman egkevahin diyà te zezuwa he nasyun etawa dezuwa he ginhedian.
EZE 37:23 Kenè dan en ed-umanan edremeriki is keugelingen dan pinaaǥi te ked-azap te mezaat he menge ed-ezapen dan, wey kebaal te minsan hengkey he salà, su edlibriyen ku sikandan te langun he menge salè dan, ne edlumpiyuwan ku sikandan. Egkehimu sikandan he menge etew ku ne egkehimu a he Megbevayè dan.
EZE 37:24 Edhedian sikandan te kevuwazan te suluǥuen ku he si David, ne sevaha zà is ed-elima kandan. Ebpurungan dan edsunuza is menge suǥù ku wey menge sulunuzen.
EZE 37:25 Ed-ubpè dan diyà te tanà he imbeǥey ku te suluǥuen ku he si Jacob, he iyan kes tanà he mid-ubpaan te menge kepuun dan. Dutun dan wey is menge kevuwazan dan ebpekeubpà taman te taman, ne edhedian sikandan te kevuwazan te suluǥuen ku he si David te wazà pidtemanan.
EZE 37:26 Ne ebpekid-uyun a kandan he ebpekeubpà sikandan he meupiya is kebpekesavuk, ne heini he uyun ebpedayun te taman te taman. Ibpeubpè ku sikandan diyà te tanè dan, ne ibpemahabet ku sikandan, ne ebengunen ku ziyà te kandan is baley ku te wazà pidtemanan.
EZE 37:27 Ed-ubpà a he zuma zan. Egkehimu a he Megbevayè dan, ne egkehimu sikandan he menge etew ku.
EZE 37:28 Ne emun kenè en egkaawà haazà is baley ku te wazà pidtemanan, egketuenan te menge etew ziyà te menge nasyun he iyan a, is Nengazen, mibpilì te menge Israilihanen su wey mehimu he kediey.’ ”
EZE 38:1 Migkaǥi is Nengazen kayi te kedì te,
EZE 38:2 “Sikew is etew, kaǥi ka te ebpekesuǥat diyà te ki Gog he tig-Magog he pengulu te Meshec wey Tubal.
EZE 38:3 Keǥiyi nu sikandin he siak, is Nengazen he MEGBEVAYÀ, migkaǥi a te: He Gog, he pengulu te Meshec wey Tubal, egkuntedahan ku sikew.
EZE 38:4 Egkew-itan ku te vunuwit is bakè nu, ne eguyuzen ku sikew zuma te langun he menge sundaru nu. Ed-endamen ku para te tebek is menge kudè nu, wey egkeǥumeenan he pereuntud te kudà, wey is mahabet he menge sundaru he zuen dan dezekelà wey dezeisey he menge kelasag wey is langun he egkeǥumeenan te ispada.
EZE 38:5 Eduma ziyà te kandan is menge sundaru ziyà te Persia, Cush, wey Put, he zuen dan menge kelasag wey menge hilmit,
EZE 38:6 ragkes is diyà te Gomer wey Bet Togarma he ziyà te zizaya wey is langun he menge sundaru zan. Ebpemuun diyà te mahabet he menge nasyun is eduma kenikew.
EZE 38:7 “Layun nu endama is keugelingen nu wey is langun he menge sundaru nu ne penguluwi nu sikandan.
EZE 38:8 Dutun te ebpekeuma he menge andew ebmenduan ku sikiyu te kedsurung te Israel, he nekeenew en puun te kegkezeeti zuen he midtiǥum is menge meǥinged duen diyà te menge vuvungan te Israel he nehimu he mekevulungbulung seled te neuǥet he timpu. Nekelikù en is menge meǥinged kayi puun te menge nasyun ne melinawen en is ked-ubpè dan.
EZE 38:9 Sikew wey is menge sundaru nu, wey is menge zuma nu he ebpuun diyà te menge nasyun, edsurung kew ziyà te Israel he henduen be te vagyu, ne edliǥuyan niw heini he iring kew te ǥapun he edtambun kayi.”
EZE 38:10 Mibpedayun megkaǥi is Nengazen he MEGBEVAYÀ te, “Dutun he timpu ebpelanu ka te mezaat.
EZE 38:11 Egkaǥi ka te: Edsurung a ziyà te Israel he is menge inged duen wazà berengbenga, wazè dan pultahan, wey wazè dan trangka, he is menge meǥinged duen ed-ubpà he melinawen wey wazà igkahandek he kezeetan.
EZE 38:12 Ed-eǥawen ku is menge azen kayi te menge inged he nehimu zengan he mekevulungbulung, piru ǥuntaan neeneb en te menge etew he nemenlikù puun te zuma he menge nasyun. Mahabet is menge uyaǥen dan wey menge azen, ne migkilala zan is nasyun dan he iyan utew impurtanti he nasyun kayi te kelibutan.
EZE 38:13 “Egkaǥi ziyà te kenikew is menge etew ziyà te Sheba wey Dedan, wey is menge nigusyanti ziyà te menge inged diyà te Tarshish te, ‘Midtiǥum nu en be is menge sundaru nu su para ed-eǥawen en is menge pelata, menge vulawan, menge uyaǥen wey menge azen te menge Israilihanen?’ ”
EZE 38:14 “Umbe, sikew is etew, keǥiyi nu si Gog he siak, is Nengazen he MEGBEVAYÀ, migkaǥi a te, ‘Emun ebpengungubpaan en he melinawen is menge etew ku he Israilihanen, ne egketuenan nu heini.
EZE 38:15 Ne puun diyà te meziyù he lugar nu ziyà te zizaya, edsurungen nu sikandan, duma te mahabet wey mekeǥeǥehem he menge sundaru nu he ebpemen-untud te kudà.
EZE 38:16 Edsurungen nu is menge etew ku he Israilihanen he henduen kew te ǥapun he ebpeketambun te tanà. Uya, ibpesurung ku kenikew Gog, is nasyun ku te huziyan he timpu. Ne pinaaǥi te ebpeveelan ku kenikew, igkepeehè ku ziyà te menge nasyun is kegkewaǥas ku. Ne egketuenan dan he iyan a Nengazen.’ ”
EZE 38:17 Mibpedayun megkaǥi is Nengazen he MEGBEVAYÀ te, “Te nehuna he timpu impahayag ku pinaaǥi te ebpemeneuven diyà te Israel he menge suluǥuen ku, he ziyà te huziyan he menge andew duen edsurung diyà te Israel. Ne iyan ka ibpesavut ku he edsurung.
EZE 38:18 Piru zutun te timpu te kedsurung nu, Gog, is Israel, egkeregreg is pauk ku.
EZE 38:19 Tenged te utew ku kegkepauk, ibpenangdù ku he zutun he timpu edlinug te mezesen diyà te tanà he Israel.
EZE 38:20 Ne zutun is langun he menge etew wey is langun he menge langgam: is ebpemenhipanew, is ebpemenlayang, is ebpemenanap, wey is diyà ebpen-ubpà te wahig ebpengerkeren te kegkahandek diyà te etuvangan ku. Egkengetempag is menge vuvungan wey menge kelendiǥan, wey egkengevengkag is menge verengbeng.
EZE 38:21 Ibpehimetayan ku sikew, Gog, diyà te menge vuntud ku, ne ebpehimhimetayà is menge sundaru nu. Iyan a, is Nengazen he MEGBEVAYÀ, is migkaǥi kayi.
EZE 38:22 Edsilutan ku sikew wey is menge sundaru nu, wey is menge zuma nu he ebpemuun diyà te zuma he menge nasyun. Edsilutan ku sikiyu pinaaǥi te zaru wey ebpeun-unayè kew ebpehimhimetayà. Ibpetanè ku is mereǥes he uzan, wey ibpeuzan ku te ǥiyew he henduen be te menge vatu, wey egkeregreg he esupri.
EZE 38:23 Pinaaǥi kayi is kebpaahaa ku ziyà te langun he menge nasyun te kegkemekeǥeǥehem ku wey kegkewaǥas. Ne egketuenan dan he iyan a Nengazen.”
EZE 39:1 Migkaǥi is Nengazen kayi te kedì te, “Sikew is etew, kaǥi ka te ebpekesuǥat diyà te ki Gog. Keǥiyi nu sikandin he siak, is Nengazen he MEGBEVAYÀ, migkaǥi a te, ‘Kuntada ku sikew, Gog, is pengulu te Meshec wey Tubal.
EZE 39:2 Eguyuzen ku sikew puun te meziyù diyà te zizaya pehendiyà te menge vuvungan te Israel.
EZE 39:3 Ne ed-eǥawan ku sikew te ǥumaan,
EZE 39:4 ne egkezeetan ka ziyà te menge vuvungan te Israel ragkes is langun he menge sundaru nu wey is ebpemuun te menge nasyun he nekidsevaha kenikew. Ibpekaan ku sikiyu is ebpematey te nekedseselekawà he kelasi te zumezaas he menge tagbis, wey te mesipala he menge langgam.
EZE 39:5 Egkezeetan kew ziyà te menge vevesukà su iyan a, is Nengazen he MEGBEVAYÀ migkaǥi kayi.
EZE 39:6 Ebinsulan ku is Magog wey is duma zin he menge nasyun he uvey te zaǥat he is menge meǥinged duen nengungubpaan he melinawen. Ne egketuenan dan he iyan a Nengazen.
EZE 39:7 Ibpetuenan ku te menge etew ku he Israilihanen he waǥas is ngazan ku, ne kenè ku en idtuǥut he pendezeisaya pa heini. Ne egketuenan diyà te menge nasyun he iyan a Nengazen, is waǥas he Megbevayà te Israel.
EZE 39:8 Egkeuma heeyan he timpu ne egkehitavù is migkaǥi ku. Iyan a, is Nengazen he MEGBEVAYÀ, is migkaǥi kayi.
EZE 39:9 “ ‘Dutun he timpu, edtiǥumen te menge etew te Israel he ebpemen-ubpà diyà te zekelà he menge inged is menge himan niw te kebpekidtebek, is dezekelà wey zezeisey he menge kelasag, is menge panà, is menge lagkut he para te tebek, wey is menge vangkew, ne egemiten dan heini he tavun seled te pitu he tuig.
EZE 39:10 Kenè en kinahanglan he ebpengayu pa sikandan diyà te vevesukà wey ketelunan, su egkeǥamit dan en man he tavun is menge ǥumaan te kebpekidtebek. Umbe ed-eǥawan dan daan is menge nengaǥew kandan. Iyan a, is Nengazen he MEGBEVAYÀ, is migkaǥi kayi.
EZE 39:11 “ ‘Dutun he timpu idleveng ku ziyà te Israel si Gog wey is mahabet he menge etew zin; idleveng ku ziyà te Suǥud te Ebiyahi, diyà te edsilaan he uvey te Daǥat he Minatey. Ne kenè en haazà igkevayà su ebpekaalang haazà is dekelà he penlevengà te ebiyahi. Ne egngezanan en heini te Hamon Gog, he ke và dà egkegiya kes, “Suǥud-suǥud te Mahabet he menge Etew ni Gog.”
EZE 39:12 “ ‘Pitu he vulan is kedlevenga kandan te menge Israilihanen te kedlumpiyu zutun te tanà.
EZE 39:13 Is langun he menge meǥinged ed-uǥup te kedleveng. Ne heini he timpu kenà egkelipatan te menge Israilihanen, su pinaaǥi keniyan egkeveǥayan a te zengeg. Iyan a, is Nengazen he MEGBEVAYÀ, is migkaǥi kayi.
EZE 39:14 Emun egketapus en is pitu he vulan, duen menge etew he edsuǥuen te kedriǥuriǥu zutun te nasyun su wey zan mesusi ke zuen pe be minatey he wazà ikeleveng. Ne ibpeleveng dan heini su wey melumpiyuwi haazà is tanà.
EZE 39:15 Emun duen egkaahà te menge etew he tulan te etew, edsevukan dan heini te tuus su wey metueni zuen te menge etew he midsuǥù, ne igkeleveng dan heini ziyà te “Suǥud-suǥud te Mahabet he menge Etew ni Gog.”
EZE 39:16 (Duen daan dutun inged he egkengezanan keuzemà te “Mahabet he menge Etew.”) Pinaaǥi keniyan egkelumpiyuwan dan haazà is tanà.’ ”
EZE 39:17 Mibpedayun megkaǥi is Nengazen he MEGBEVAYÀ kayi te kediey te, “Sikew is etew, keǥiyi nu is langun he kelasi te menge tagbis wey zumezaas he menge langgam diyà te peliǥuy he medtiǥum dan diyà te menge vuvungan te Israel, su wey zan mekekaan te zekelà he ǥastu te pemuhat he in-andam ku kandan. Dutun egkaan sikandan te sapù wey ed-inum te lengesa te menge sundaru wey menge pengulu, he henduen dà te menge kerehidu, menge vaka, wey menge kambing he impelambù he ebpuun diyà te Bashan.
EZE 39:19 Kayi he ǥastu te ed-endamen ku para kandan, egkepezaharan sikandan te keenen wey inumen taman te egkengehantey wey egkengelangut sikandan. Ebpetakè dan egkaan te menge kudà, menge pereuntud te kudà, wey menge sundaru. Iyan a, is Nengazen he MEGBEVAYÀ, is migkaǥi kayi.
EZE 39:21 “Emun edsilutan ku en is menge etew ziyà te menge nasyun, ne egkeehè dan ke sengemenu is kegkemekeǥeǥehem ku.
EZE 39:22 Puun dutun he timpu, egketuenan te menge etew te Israel he iyan a is Nengazen Megbevayè dan,
EZE 39:23 egketuenan daan diyà te zuma he menge nasyun he mibihag is menge etew te Israel tenged te menge salè dan, su wazè dan mebpezumazuma kedì. Mibpesegdan ku sikandan he surunga wey penhimetayi te menge kuntada zan.
EZE 39:24 Mibeelan ku zà diyà te kandan is ereg he vales te mibeelan dan he meremerik wey mezaat.”
EZE 39:25 Mibpedayun pa megkaǥi is Nengazen he MEGBEVAYÀ te, “Piru ekgehizuwan ku en is menge Israilihanen, he menge kevuwazan ni Jacob, ne ibpeuman ku sikandan ibpeuswag, su wey meveǥayi te zengeg is waǥas he ngazan ku.
EZE 39:26 Egkelipatan dan en is keelezan dan wey kedluivi zan kedì, emun ebpengungubpaan en sikandan he melinawen wey wazà egkehendekan.
EZE 39:27 Ibpeehè ku ziyà te menge nasyun is kegkewaǥas ku pinaaǥi te kedhewia ku kandan puun diyà te menge nasyun te menge kuntada zan.
EZE 39:28 Ne egketuenan dan he iyan a Nengazen he Megbevayè dan. Su minsan impevihag ku sikandan pehendiyà te menge nasyun, piru ed-umanan ku sikandan edtiǥuma ziyà te keugelingen dan he tanà ne wazà minsan sevaha he egkesamà.
EZE 39:29 Kenè ku en sikandan ebpesegdanen su edsuǥuen ku ziyà te kandan is Mulin-ulin ku. Iyan a, is Nengazen he MEGBEVAYÀ, is migkaǥi kayi.”
EZE 40:1 Dutun te ikesepulù he andew te nehuna he vulan, dutun te ike-25 he tuig te kegkevihaǥa kenami–he iyan ike-14 he tuig te kegkezeeti te Jerusalem–midumala a te Nengazen, ne zuen mibpelewasan din kediey. Dutun te kebpekelawas ku, mid-uwit e zin diyà te utew metikang he vuvungan te Israel. Ne kebpantew ku ziyà te egkezivavà, duen neehè ku he menge bilding he henduen be te inged.
EZE 40:3 Ne mid-uwit a te Nengazen dutun, ne zuen neehè ku he etew he is ked-ahaa ta zuen, iring te ed-ilak-ilak he brunsi. Midhitindeg sikandin diyà te ǥemawan is egawed te zezuwa he sukud: is sevaha linu he hiket, ne is sevaha pa kayu.
EZE 40:4 Migkaǥi haazà is etew kayi te kedì te, “Sikew is etew, pemineg ka, ne purungi nu tengtengi is langun he ibpeehè ku kenikew su iyan heini hinungdan te ked-uwita kenikew kayi. Ne tudtula nu ziyà te menge etew te Israel is langun he egkengeehè nu.”
EZE 40:5 Neehè ku is baley te Nengazen he neliǥuy te verengbeng. Ne migkuwa zuen te etew is kayu he sukud din, he sepulù he ǥiek is kelayatan din, sumalà te upisyal he sukud, ne midsukud din kes berengbeng. Sepulù he ǥiek is ketikang kayi wey is kekepal zin.
EZE 40:6 Ne midhendiyà sikan is etew te veyeey zuen te valey te Nengazen he ebpekesinaru ziyà te edsilaan. Mibpemenahik sikandin diyà te heǥezan ne midsukud din is idselang kayi te veyeey, ne sepulù he ǥiek is kelayatan din.
EZE 40:7 Is diyà te kada kilid kayi te veyeey ne zuen dutun tetelu he ruǥu he zutun ebantey is menge vantey. Heini he menge ruǥu, sepulù he ǥiek he kwedradu, ne is kekepal te imberengbeng diyà te mid-elangan dan, walu he ǥiek. Is sunud kayi te menge ruǥu, ne zuen en maan dutun idselang pehendiyà te varkun he ebpekesinaru zuen te valey te Nengazen. Heini he idselang, sepulù he ǥiek is keleyatan din.
EZE 40:8 Ne midsukud daan dutun te etew haazà is barkun,
EZE 40:9 ne 14 he ǥiek is keleyatan kayi. Ne is nekedtimbang he verengbeng dutun te veyeey ne tetelu he ǥiek is kekepal zan.
EZE 40:10 Haazà is tetelu he menge ruǥu he zutun ebantey is menge vantey, neked-iiring is kezekelè dan, ne is menge verengbeng diyà te mid-elangan te kada sevaha he ruǥu, neked-iiring daan is kekepal.
EZE 40:11 Midsukud daan duen te etew is keluag duen te veyeey pehendiyà te lama zuen te valey te Nengazen, ne 22 he ǥiek is keluag din. Is keluag te ǥemawan kayi 17 zà he ǥiek.
EZE 40:12 Diyà te egkesineruwan te kada ruǥu he zutun ebantey is menge vantey, zuen berengbeng he 20 he vaney is ketikang din ne 20 he vaney is kekepal zin. Heini he menge ruǥu, tig sepulù he ǥiek kuwedradu.
EZE 40:13 Ne midsukud duen te etew is tivuuk he keluag te veyeey pehendiyà te lama zuen te valey te Nengazen, ne 42 heini he ǥiek. Is kedsukuza kayi, ne impepuun diyà te egkeiniyuǥan he verengbeng te ruǥu he zutun ebantey is menge vantey ne pehendiyà daan te egkeiniyuǥan te verengbeng te zivaluy zin he ruǥu.
EZE 40:14 Midsukud din is berengbeng puun te ǥemawan pehendiyà te varkun he ebpekesinaru te lama, ne 100 he ǥiek is keluǥayad kayi.
EZE 40:15 Is keluǥayad duen te veyeey puun te ǥemawan kayi pehendiyà te purù te varkun ne 85 he ǥiek.
EZE 40:16 Duen dezeisey he menge sulawà duen te verengbeng duen te menge ruǥu he zutun ebantey is menge vantey wey zuen te verengbeng he nekepetug-elang duen te menge ruǥu. Ne in-ukir zutun te menge verengbeng is menge palma.
EZE 40:17 Ne mid-uwit a zuen te etew ziyà te ǥawas he lama. Dutun duen ku naahà he 30 he menge ruǥu he nekezalandalan diyà te veyeey he simintadu he nekepeliǥuy zuen te lama.
EZE 40:18 Heini is egkezizalem he simintadu he veyeey, nekeuma ziyà te kilid duen te menge veyeey he ibpenhindiyà te seled te lama. Is keluag dutun te simintadu he veyeey ne repeng te keluǥayad duen te menge beyeey.
EZE 40:19 Ne midsukud duen te etew is keziyù puun te veyeey he ibpendendiyà te seled duen te lama ziyà te gawas taman te veyeey he ibpehendiyà te lama he ziyà te seled, ne 170 he ǥiek is keziyù kayi.
EZE 40:20 Ne midsukud duen te etew is keluǥayad wey keluag duen te veyeey he ebpekesinaru ziyà te zizaya. Heini he veyeey ibpehendiyà te ǥawas he lama.
EZE 40:21 Ne is kada kilid duen te veyeey ne zuen duen tetelu he menge ruǥu he zutun ebantey is menge vantey. Is kezekelà kayi he menge ruǥu wey sikan is menge verengbeng he nekepetug-elang kayi, ragkes is barkun kayi, iring te sukud duen te veyeey he ziyà te edsilaan. Is keluǥayad duen te veyeey ziyà te zizaya 85 he ǥiek ne is keluag din 42 wey tengà he ǥiek.
EZE 40:22 Is menge sulawà kayi, is barkun, wey is in-ukir he menge palma ne iring daan te veyeey he ziyà te edsilaan. Pitu he ang-ang is heǥezan pehendutun te veyeey, ne zuen barkun diyà te purù kayi.
EZE 40:23 Is diyà te seled he lama he ebpekesinaru ziyà te zapit te zizaya iring te veyeey he zapit te edsilaan. Midsukud daan duen te etew is kebpekediyuey zuen te zezuwa he veyeey, ne 170 heini he ǥiek.
EZE 40:24 Ne miduma a zuen te etew ziyà te zivavà, ne zutun duen ku naahà he veyeey. Midsukud din is barkun wey is menge verengbeng diyà te seled kayi, ne iring ded is sukud kayi te sukud duen te zuma.
EZE 40:25 Duen daan menge sulawà diyà te peliǥuy zuen te veyeey wey is barkun iring duen te zuma. Is keluǥayad dutun te veyeey, 85 he ǥiek ne is keluag din 42 wey tengà he ǥiek.
EZE 40:26 Pitu he ang-ang is heǥezan kayi he ibpehendutun te veyeey wey duen barkun diyà te purù kayi. Is menge verengbeng diyà te kilid dutun te veyeey zuen duen dayandayan he in-ukir he menge palma.
EZE 40:27 Duen daan beyeey ziyà te seled he lama, he ebpekesinaru ziyà te zivavà. Midsukud duen te etew is keziyù puun kayi he veyeey pehendiyà te veyeey he ziyà te ǥawas he zapit te zivavà, ne 170 he ǥiek.
EZE 40:28 Ne miduma a zuen te etew ziyà te seled he lama ne zuen key mebayà te veyeey ziyà te zivavà. Ne midsukud din is beyeey zutun, ne iring ded is kezekelà duen te zuma.
EZE 40:29 Duen daan kayi menge ruǥu, he zutun ebantey is menge vantey. Is kezekelà kayi he menge ruǥu wey is menge verengbeng diyà te pid-elangan kayi, wey ragkes is barkun kayi, iring daan kezekelà te zuma. Duen daan menge sulawà diyà te peliǥuy zutun te veyeey wey ziyà te varkun. Is keluǥayad dutun te veyeey 85, he ǥiek ne is keluag din 42 wey tengà he ǥiek.
EZE 40:30 (Is menge barkun kayi he menge veyeey he ebpekeliǥuy zuen te seled he lama ne walu he ǥiek is keluǥayad din ne 42 wey tengà he ǥiek is keluag din.)
EZE 40:31 Is barkun te veyeey ziyà te zivavà, ebpekesinaru ziyà te ǥawas he lama, ne in-ukir ziyà te nekedtimbang he verengbeng kayi is menge palma. Walu he ang-ang is heǥezan he ibpehengkayi te veyeey.
EZE 40:32 Ne mid-umanan a zumaha zuen te etew ziyà te seled he lama. Diyè key mebayà te veyeey he zapit te edsilaan. Midsukud din is beyeey ne iring ded is kezekelè din te kezekelà duen te zuma.
EZE 40:33 Duen daan kayi menge ruǥu, he zutun ebantey is menge vantey. Is kezekelà kayi he menge ruǥu wey is menge verengbeng diyà te pid-elangan kayi, wey ragkes is barkun kayi, iring daan kezekelà te zuma. Duen daan menge sulawà diyà te peliǥuy zutun te veyeey wey ziyà te varkun. Is keluǥayad dutun te veyeey 85 he ǥiek ne is keluag din 42 wey tengà he ǥiek.
EZE 40:34 Is barkun kayi, ziyà ebpekesinaru te ǥawas he lama, ne zuen kayi zayandayan he menge palma he in-ukir zuen te nekedtimbang he verengbeng ne zuen walu he ang-ang te heǥezan kayi he ibpehengkayi te veyeey.
EZE 40:35 Ne miduma a zuen te etew ziyà te veyeey he zapit te edsilaan. Midsukud din heini he veyeey ne iring ded heini kezekelà duen te zuma.
EZE 40:36 Duen daan kayi menge ruǥu he zutun ebantey is menge vantey. Is kezekalà kayi he menge ruǥu wey is menge verengbeng diyà te pid-elangan dan, wey ragkes is menge barkun kayi, ne iring ded is kezekelè din duen te zuma. Duen daan menge sulawà diyà te peliǥuy zutun te veyeey. Is keluǥayad dutun te veyeey ne 85 he ǥiek ne is keluag din 42 wey tengà he ǥiek.
EZE 40:37 Is barkun kayi, ziyà ebpekesinaru te ǥawas he lama, ne zuen kayi zayandayan he menge palma he in-ukir zuen te nekedtimbang he verengbeng. Walu he ang-ang is heǥezan he ibpehengkayi te veyeey.
EZE 40:38 Ne zuen ku naahà he ruǥu he zuen din gemawan, he avey te varkun te veyeey he zapit te zizaya. Dutun edlùlùi is menge pemuhat he edtutungen.
EZE 40:39 Is kada kilid dutun te varkun duen dutun dezuwa he lemisahan he zutun edlepaa is menge uyaǥen he pemuhat he edtutungen, pemuhat he idlumpiyu, wey pemuhat he vayad te salà.
EZE 40:40 Duen pa zezuwa he lemisahan diyà te kada kilid duen te heǥezan he ibpehendiyà te veyeey he zapit te edsilaan.
EZE 40:41 Umbe, walu pudu he lemisahan is lepeey te menge pemuhat; heepat is diyà te varkun ne heepat daan is diyà te kilid duen te veyeey.
EZE 40:42 Duen daan dutun heepat he lemisahan he iyan mibeelan is binesbasan he vatu, he zutun idsavuk is menge gelemiten para te kedlapà te menge pemuhat he edtutungen wey zuma pa he menge pemuhat. Heini he menge lemisahan 30 he vaney kuwedradu ne 20 he vaney is ketikang din.
EZE 40:43 Ne ziyà te peliǥuy he verengbeng duen te varkun ne zuen selenggatà he tetelu he vaney is kelayat din. Ne neehè ku ziyà te menge lemisahan is menge usa he ibpemuhat.
EZE 40:44 Duen dezuwa he ruǥu zuen te lama ziyà te seled. Is sevaha ziyà te kilid duen te veyeey he zapit te zizaya he ebpekesinaru ziyà te zivavà, ne is sevaha ziyà te kilid duen te veyeey he zapit te zivavà ne ebpekesinaru heini ziyà te zizaya.
EZE 40:45 Migkaǥi sikan is etew kayi te kedì te, “Is ruǥu he nekesinaru ziyà te zivavà ne para te menge memumuhat he edumala ziyà te valey te Nengazen.
EZE 40:46 Ne is ruǥu he ebpekesinaru ziyà te zizaya ne para te menge memumuhat he edumala te pemuhatà. Heini sikandan menge kevuwazan ni Zadok, ne iyan dà sikandan kevuwazan ni Levi he midtuǥutan te ked-uvey ziyà te etuvangan te Nengazen te ebpenilbi kandin.
EZE 40:47 Ne zutun midsukud duen te etew sikan is lama ziyà te seled, ne 170 he ǥiek he kuwedradu. Is pemuhatà ne ziyà te egkesineruwan duen te valey te Nengazen.”
EZE 40:48 Ne miduma a zuen te etew ziyà te varkun duen te valey te Nengazen. Ne midsukud din is nekedtimbang he verengbeng ne walu he ǥiek is keluag din ne lelima he ǥiek is kekepal zin. Is keluǥayad te veyeey ziyà te varkun, ne 24 he ǥiek.
EZE 40:49 Ne is barkun 34 he ǥiek is keluǥayad din ne 20 he ǥiek is keluag din. Ne sepulù he ang-ang is heǥezan he ibpehedutun te varkun, ne zuen tukud diyà te kada kilid kayi.
EZE 41:1 Ne miduma a zuen te etew ziyà te Segradu he Lugar zuen te valey te Nengazen. Ne midsukud din is nekedtimbang he verengbeng te veyeey zutun te Segradu he Lugar, ne is kada verengbeng sepulù he ǥiek is keluǥayad din.
EZE 41:2 Ne walu he ǥiek is kekepal zin. Is keluag dutun te veyeey 17 he ǥiek. Midsukud din daan sikan is Segradu he Lugar, ne 68 he ǥiek is keluǥayad din ne 34 he ǥiek is keluag din.
EZE 41:3 Ne midseled sikan is etew ziyà te Utew Segradu he Lugar. Midsukud din is nekedtimbang he verengbeng te veyeey zuen te Utew Segradu he Lugar, ne is kada verengbeng 12 he ǥiek is keluag din ne tetelu he ǥiek is kekepal zin. Ne is keluǥayad te veyeey zutun ne sepulù he ǥiek.
EZE 41:4 Midsukud din sikan is Utew Segradu he Lugar, ne 34 he ǥiek kuwedradu. Ne migkaǥi haazà is etew kayi te kedì te, “Iyan heini Utew Segradu he Lugar.”
EZE 41:5 Ne midsukud duen te etew is berengbeng duen te valey te Nengazen, ne sepulù he ǥiek is kekepal kayi. Kayi te verengbeng duen nekelinya he menge ruǥu he pitu he ǥiek is keluǥayad din.
EZE 41:6 Heini he menge ruǥu tetelu he endana, ne is kada endana 30 he ruǥu. Is berengbeng duen te valey te Nengazen, nekeiseg-iseg is kenipis din diyà te kada endana su wey mekeuntud is menge ruǥu zutun te verengbeng he kenè en kinahanglan is menge sintas.
EZE 41:7 Heini he menge ruǥu is nekeliǥuy zuen te valey te Nengazen, nekeiseg-iseg is keluag dan puun te egkehuna he endana pehendiyà te iketelu he endana. Duen kayi heǥezan he ebpuun te egkehuna he endana pehendiyà te ikezuwa he endana taman te iketelu he endana.
EZE 41:8 Neehè ku he haazà is baley te Nengazen nevangun diyà te metikang he lugar he sepulù he ǥiek is ketikang din, ne iyan heini nehimu he pundasyun duen te menge ruǥu ziyà te kilid.
EZE 41:9 Is diyà te ǥawas he verengbeng duen te menge ruǥu ne walu he ǥiek is kekepal zin. Duen bekanti he lugar ziyà te teliwazà kayi te menge ruǥu
EZE 41:10 wey ziyà te sevaha pa he vilding he pudu zaan ruǥu. Is keluag kayi te vekanti he lugar 34 he ǥiek, ne nekeliǥuy heini zuen te valey te Nengazen.
EZE 41:11 Duen dezuwa he ǥemawan he para te kedseled dutun te valey te Nengazen. Heini he menge ǥemawan, ebpekesinaru zuen te vekanti he lugar; is sevaha, ne ziyà dapit te edsilaan ne is sevaha, ziyà dapit te zivavà. Diyà te avey zuen te bekanti he lugar zuen beyeey he is keluǥayad din, walu he ǥiek peliǥuy.
EZE 41:12 Duen neehè ku he sevaha he vilding he ebpekesinaru zuen te seled he lama zuen te valey te Nengazen. Is keluag kayi, 118 he ǥiek ne is keluǥayad din 150 he ǥiek. Ne is kekepal te verengbeng kayi, walu he ǥiek.
EZE 41:13 Ne midsukud duen te etew sikan is baley te Nengazen, ne 170 he ǥiek is keluǥayad kayi. Is keziyù puun te egkeiniyuǥan duen te valey te Nengazen pehendiyà te zivaluy he verengbeng duen te bilding he zapit te edsenlepan, 170 he ǥiek.
EZE 41:14 Is keluǥayad te seled he lama he zapit te edsilaan, he egkesineruwan duen te valey te Nengazen, ne 170 zaan he ǥiek.
EZE 41:15 Ne midsukud daan duen te etew is keluǥayad duen te bilding he zapit te zivavà, he ebpekesinaru zuen te seled he lama he egkeiniyuǥan te valey te Nengazen, ragkes is menge verengbeng kayi ziyà te kada kilid, ne 170 zaan he ǥiek. Is Segradu he Lugar, is Utew Segradu he Lugar, wey is barkun te valey te Nengazen,
EZE 41:16 ne mibpekeplaan te tabla, ragkes is peliǥuy zuen te zezeisey he menge sulawà. Is tetelu he ruǥu ziyà te pesiziveluyà he kilid te veyeey, mibpekeplaan daan te tabla puun te saag pehendiyà te sulawà. Heini he menge sulawà egkehimu he edlekevan.
EZE 41:17 Is elavat he ziyà te zivavew zuen te ǥemawan he para te kedseled duen te Utew Segradu he Lugar, mibpekeplaan daan te tabla. Is tivuuk he elavat diyà te seled te valey te Nengazen,
EZE 41:18 ne mideyzeyanan te menge palma wey te menge kirubin he zezuwa is dagwey.
EZE 41:19 Is sevaha he zagwey zutun te kirubin, ne zagwey te etew, ne edsinaru heini te palma. Ne is sevaha pa he zagwey zutun te kirubin, ne zagwey te erimaung ne edsinaru heini ziyà te palma he ziyà te zivaluy. Heini he menge zayandayan, in-ukir zuen te tivuuk he elavat duen te valey te Nengazen
EZE 41:20 puun te saag taman te zivavew, ragkes en is dapit te ǥawas he elavat duen te Segradu he Lugar.
EZE 41:21 Kuwadradu is menge marku zuen te ǥemawan duen te Segradu he Lugar. He ziyà ebpekesinaru te Utew Segradu he Lugar he zuen duen henduen be te
EZE 41:22 pemuhatà he kayu he tetelu he ǥiek kuwedradu wey lelima he ǥiek is ketikang din. Is menge suyuk kayi, pundasyun, wey menge kilid pudu kayu. Ne migkaǥi sikan is etew kayi te kedì te, “Iyan heini lemisahan diyà te etuvangan te Nengazen.”
EZE 41:23 Sikan is Segradu he Lugar wey is Utew Segradu he Lugar, ne tig-dezuwa is lekeb.
EZE 41:24 Is kada lekeb, dezuwa he vahin ne egkehimu he edlumlumpien.
EZE 41:25 Is menge lekeb te Segradu he Lugar mideyzeyanan te menge kirubin wey menge palma he in-ukir iring te ziyà te menge elavat. Ne is barkun kayi ne mid-etepan te kayu.
EZE 41:26 Is diyà te kada kilid te varkun duen kayi dezeisey he menge sulawà he mideyzeyanan te menge palma is avey kayi. Is menge ruǥu ziyà te nekeliǥuy zuen te valey te Nengazen mid-etepan daan.
EZE 42:1 Ne miduma a zuen te etew ziyà te ǥawas he lama zuen te valey te Nengazen. Ne ziyè key mebayà te veyeey he zapit te edsilaan. Ne zutun impeehè din kedì is menge ruǥu he zapit te edsilaan duen te seled he lama wey te bilding diyà te zapit te edsenlepan.
EZE 42:2 Heini he menge ruǥu is ebpekesinaru ziyà te zizaya, 170 he ǥiek is keluǥayad ne 85 he ǥiek is keluag.
EZE 42:3 Heini he menge ruǥu, 34 he ǥiek is kebpekediyù dan duen te valey te Nengazen, ne ebpekesinaru heini zuen te simintadu he veyeey ziyà te gawas he lama. Heini he menge ruǥu, tetelu he endana
EZE 42:4 Ne ziyà te egkesineruwan kayi ne zuen beyeey he 17 he ǥiek is keluag din ne 170 he ǥiek is keluǥayad din. Is menge ǥemawan dutun te menge ruǥu, ne ebpekesinaru ziyà te zizaya.
EZE 42:5 Is menge ruǥu ziyà te iketelu he endana, ne meliǥet duen te ziyà te ikezuwa he endana, ne is menge ruǥu ziyà te ikezuwa he endana ne meliǥet duen te ziyà te egkehuna he endana, su egkinahanglan te veyeey is diyà te zivavew he endana.
EZE 42:6 Heini is tetelu he endana, ne wazè din menge tukud, kenà iring te menge bilding duen te menge lama. Ne geina te neked-uuntuzè dà heini, ne neriyus is kengezekelà te ruǥu.
EZE 42:7 Heini he vilding, nekesivey zuen te ǥawas he lama pinaaǥi te verengbeng he 85 he ǥiek is keluǥayad din.
EZE 42:8 Su emun wazà heini is berengbeng, is ketengà te bilding he 85 he ǥiek, egkaahà ke ziyè ki te ǥawas he lama. Is tivuuk he keluǥayad duen te bilding he 170 he ǥiek, egkaahà ke ziyè ki te valey te Nengazen.
EZE 42:9 Duen beyeey he para idseled diyà te zizalem he endana zutun he vilding he ebpuun te ǥawas he lama he zapit te edsilaan.
EZE 42:10 Duen daan menge ruǥu ziyà te egkezivavà he verengbeng duen te seled he lama. Heini he menge ruǥu is avey zuen te seled he lama uvey zaan duen te bilding he zapit te edsenlepan.
EZE 42:11 Duen daan beyeey ziyà te egkesineruwan kayi he menge ruǥu, iring te menge ruǥu he ziyà te zapit te zizaya. Is keluǥayad wey keluag kayi he menge ruǥu, ne neked-iring, ragkes en is menge veyeey kayi wey is sukud kayi. Is menge ǥemawan duen te menge ruǥu he zapit te zizaya
EZE 42:12 ne iring daan te menge ǥemawan duen te menge ruǥu he zapit te zivavà. Duen gemawan diyà te egkezungguan duen te veyeey he para te kedseled dutun te bilding. Duen berengbeng kayi te veyeey he para te edseled he ebpuun te dapit te edsilaan.
EZE 42:13 Migkaǥi sikan is etew kayi te kedì te, “Heini he menge ruǥu is dapit te zivavà wey zizaya he ebpekesinaru te lama kayi te valey te Nengazen, ne segradu heini he menge ruǥu. Su is menge memumuhat he ebpemuhat diyà te Nengazen ne kayi zan egkeena is utew segradu he menge pemuhat. Egemiten dan daan heini he menge ruǥu he para selevukà te menge pemuhat he para gasa, menge pemuhat he para idlumpiyu, wey menge pemuhat he vayad te salà. Su segradu heini he menge ruǥu.
EZE 42:14 Emun egawas en is menge memumuhat puun kayi te segradu he menge ruǥu, kinahanglan he kenè dan dèpa mediritsu megawas pehendiyà te ǥawas te lama. Kinahanglan he edluwasen dan dèpa is menge visti he imbivisti zan dutun te kebpemuhat dan, su segradu heini he menge visti. Kinahanglan he ed-ilis dèpa sikandan te selakew en he visti te kenè pa sikandan edhendiyà te vahin duen te simbahan he para te menge etew.”
EZE 42:15 Hein nepasad duen te etew te edsukud sikan is baley te Nengazen, ne midume e zin diyà te ǥawas. Diyè key mebayà te veyeey he zapit te edsilaan, ne midsukud din is tivuuk he keluag duen te valey te Nengazen. Midsukud din duen te kayu he sukud din is bahin dutun he ziyà mezapit te edsilaan, ne 850 he ǥiek is keleyatan kayi.
EZE 42:17 Ne midsukud din daan is bahin he ziyà te zizaya, divavà, wey edsenlepan, ne neked-iring is keleyatan kayi he pudu 850 he ǥiek.
EZE 42:20 Umbe, kuwedradu haazà is baley te Nengazen, ne neliǥuy heini te verengbeng he mibpedsivey zuen te Segradu he Lugar wey urdinaryu he lugar.
EZE 43:1 Ne hein nepasad haazà miduma ad maan duen te etew ziyà te veyeey he zapit te edsilaan.
EZE 43:2 Ne zutun neehè ku is mekeǥeǥehem he kebpekiduma te Megbevayà te Israel he ebpekeuma is ebpuun diyà te edsilaan. Is keǥurub te kebpekeuma zin iring te deǥurus te meseleg he wahig, ne mid-anlag is tanà tenged te mekeǥeǥehem he kebpekiduma zin.
EZE 43:3 Ne heini is nelewasan ku, ne iring te nelewasan ku hein midezeetan te Megbevayà is inged he Jerusalem, wey iring daan heini zuen te nelewasan ku ziyà te veyvey te Wahig he Kebar. Ne kegkaahaa ku zutun midlangkeb a ziyà te tanà.
EZE 43:4 Ne midseled haazà is mekeǥeǥehem he kebpekiduma te Nengazen diyà te valey te Nengazen, ne ziyà haazà mebayà te veyeey he zapit te edsilaan.
EZE 43:5 Impeenew a te Mulin-ulin ne mid-uwit e zin diyà te seled he lama. Ne zutun neehè ku he nepenù haazà is baley te Nengazen te mekeǥeǥehem he kebpekiduma zin.
EZE 43:6 Ne zutun te edhithitindeg sikan is etew ziyà te avey ku, ne zuen nezineg ku he laǥeng he ebpuun dutun te valey te Nengazen
EZE 43:7 he migkaǥi kayi te kedì te, “Sikew is etew, iyan heini pinuuwè ku te kedhadì wey untuzà te menge paa ku. Kayi a ed-ubpà duma te menge Israilihanen te wazà pidtemanan. Ne kenè en ed-umanan ebpendezeisaya te menge Israilihanen wey te menge hadì dan is waǥas he ngazan ku pinaaǥi te ked-azap dan te zuma he menge ed-ezapen etawa ked-azap te menge munyumintu te menge hadì dan he nemematey en.
EZE 43:8 Dengan mibaal sikandan te pemuhatà he para te zuma he menge ed-ezapen diyà te avey te pemuhatà he para kediey he verengbeng dà is nekepetug-elang. Midremerikan dan is waǥas he ngazan ku pinaaǥi keniyan te utew mezaat he menge vaal zan. Umbe tenged te pauk ku midezeetan ku sikandan.
EZE 43:9 Ne ǥuntaan kinahanglan he ed-engked en sikandan he ed-azap te zuma he menge ed-ezapen wey te menge munyumintu te menge hadì dan he nemematey en, ne ed-ubpà a zuma kandan te wazà pidtemanan.”
EZE 43:10 Midlaus megkaǥi haazà is laǥeng te, “Sikew is etew, keǥiya nu ziyà te menge etew te Israel sikan is baley te Nengazen he impeehè ku kenikew. Tudtula nu kandan is kegkeveeli kayi su wey zan meeled tenged te menge salè dan.
EZE 43:11 Emun egkeeled dan en tenged te langun he menge vaal zan ne petueni nu kandan is kebpurmaha kayi, ragkes is menge veyeey kayi wey menge ǥemawan, wey is kinetivuukan he purma zin. Isurat nu is menge paaǥi te kedterebehuwa kayi zutun te edtengteng sikandan su wey zan mepurung mesunud heini.
EZE 43:12 Iyan heini edhuna he menge kesuǥuan dutun te valey te Nengazen: Kinahanglan he segradu is langun he lugar ziyà te zivavew te vuvungan he ebpekeliǥuy te nehitindeǥan te valey te Nengazen.
EZE 43:13 “Iyan heini sukud te pemuhatà sumalà te upisyal he sukud. Diyà te peliǥuy te pundasyun te pemuhatà duen mid-iring te kanal he 20 he vaney is kezalem din ne 20 zaan he vaney is keluag din, ne zuen senipa ziyà te peliǥuy he menge heenem he vaney is keluag din.
EZE 43:14 Ne tetelu he vahin haazà is pemuhatà. Is kinezizeleman he vahin 27 he ǥiek kuwedradu, is keluag din, ne tetelu he ǥiek is ketikang din. Is teliwazà he vahin 24 he ǥiek kuwedradu is keluag din, ne menge sepulù wey pitu he ǥiek is ketikang din. Duen mid-iring te kanal ziyà te peliǥuy kayi he sepulù he ǥiek is keluag din ne zuen din senipa ziyà te peliǥuy he sepulù he vaney is keluag din. Is divavew he vahin menge 20 he ǥiek kuwedradu, ne menge pitu he ǥiek is ketikang din, ne kayi edtutunga is menge pemuhat. Duen diyà te heepat he suyuk kayi he henduen be te sungey. Ne zuen kayi heǥezan diyà te vahin kayi he zapit te edsilaan.”
EZE 43:18 Migkaǥi pa haazà is laǥeng kayi te kedì te, “Sikew is etew, iyan heini migkaǥi te Nengazen he MEGBEVAYÀ: Emun egkepasad en haazà is pemuhatà, ne ibpehinungud haazà pinaaǥi te kebpemuhat te menge pemuhat he edtutungen wey kebpirik te lengesa te menge uyaǥen he ibpemuhat. Iyan heini menge sulunuzen he para zutun he andew.
EZE 43:19 Is menge memumuhat he ebpenilbi kedì, he ebpuun te tribu ni Levi he menge kevuwazan ni Zadok, ebeǥayan te turiti he vaka he ibpemuhat dan he pemuhat he para idlumpiyu.
EZE 43:20 Kuwa ka te lengesa he ebpuun kayi ne ipalis nu zuen te heepat he sungeysungey ziyà te menge suyuk duen te pemuhatà wey ziyà te menge suyuk te ikezuwa he huntù duen te pemuhatà wey ziyà te senipa zin. Pinaaǥi kayi egkelumpiyuwan haazà is pemuhatà.
EZE 43:21 Ne kuwaa nu sikan is turiti he vaka he pemuhat he para idlumpiyu, ne tutunga nu heini ziyà te tutungà he ziyà te ǥawas te valey te Nengazen.
EZE 43:22 Dutun te ikezuwa he andew ne pemuhat ka te meemahan he kambing he wazè din sazir he pemuhat he idlumpiyu zuen te pemuhatà, iring te mibeelan nu zuen te turiti he vaka.
EZE 43:23 Kegkepasad kayi, ne kuwa ka te sevaha he turiti he vaka wey sevaha he kerehidu he pudu wazè dan sazir,
EZE 43:24 ne ipemuhat nu heini ziyà te etuvangan te Nengazen. Ebpirikan heini te menge memumuhat te timus ne ibpemuhat dan heini he pemuhat he edtutungen.
EZE 43:25 “Kada andew seled te sengesimana, pemuhat ka te sevaha he meemahan he kambing, sevaha he turiti he vaka, wey sevaha he kerehidu he pudu wazè dan sazir he pemuhat he para idlumpiyu.
EZE 43:26 Pinaaǥi kayi egkelumpiyuwan haazà is pemuhatà ne egkehimu en he egemiten.
EZE 43:27 Ne kegkepasad kayi, zutun te ikewalu he andew, ebpemuhat en dutun te pemuhatà is menge memumuhat te menge pemuhat niw he edtutungen wey menge pemuhat he para te meupiya he kedepità. Ne edewaten ku sikiyu. Iyan a, is Nengazen he MEGBEVAYÀ, is migkaǥi kayi.”
EZE 44:1 Miduma a umana zuen te etew ziyà te ǥawas he veyeey zuen te valey te Nengazen, he ebpekesinaru ziyà te edsilaan, piru siradu heini.
EZE 44:2 Migkaǥi is Nengazen kayi te kedì te, “Heini he veyeey kinahanglan he layun siradu. Kenà heini ebpuwasan su para wazà ebpekevayà kayi, su siak is Nengazen he Megbevayà te Israel, kayi a mebayà.
EZE 44:3 Iyan dà is pengulu te Israel egkehimu he ebpinuu kayi he veyeey para te kegkaan te impemuhat kayi te kedì, piru kinahanglan he ziyà sikandin ebayà te varkun te veyeey emun edseled, ne zutun ded daan sikandin mebayà emun egawas en.”
EZE 44:4 Ne miduma a zuen te etew ziyà te egkesinaruwan duen te valey te Nengazen. Ne ziyè key mebayà te veyeey he zapit te zizaya. Ne zutun neehè ku is mekeǥeǥehem he kebpekiduma te Nengazen he nekeeneb dutun te valey zin, ne segugunà a midlangkeb.
EZE 44:5 Migkaǥi pa is Nengazen kayi te kedì te, “Sikew is etew, timan-i nu wey purungi nu pemineǥa is egkeǥiyen ku ziyà te kenikew mehitenged te langun he sulunuzen bahin te valey ku. Kinahanglan he egketuenan nu ke hentei is ereg he edseled duen te valey ku wey is kenà ereg he edseled kayi.
EZE 44:6 Keǥiyi nu is mesinupaken he menge etew te Israel, he iyan a is Nengazen he MEGBEVAYÀ migkaǥi te, ‘He menge etew te Israel, engkezi niw en is langun he utew mezaat he menge vaal niw.
EZE 44:7 Impeseled niw ziyà te valey ku is kenà menge Israilihanen he wazà medtuu te Megbevayà. Pinaaǥi kayi midremerikan niw is baley ku zutun te kebpemuhat niw te keenen, tavà te uyaǥen, wey lengesa. Gawas te utew mezaat he menge vaal niw midrapas niw pa is paaǥi ku te kebpekidepità keniyu.
EZE 44:8 Iyan kew man pezem ereg he edumala te segradu he menge azen ku ziyà te valey ku, ne selakew is impezumala niw.
EZE 44:9 Umbe siak is Nengazen he MEGBEVAYÀ, iyan egkeǥiyen ku is: is menge etew he kenà Israilihanen, kenè ku idtugut he mekeseled sikandan diyà te valey ku, minsan is kenà menge Israilihanen he mid-ubpà duma keniyu.’
EZE 44:10 “Mehitenged te menge kevuwazan ni Levi he mid-awà kayi te kedì su mibpekiduma te zuma he menge Israilihanen te ked-azap te menge ed-ezapen dan, ebpekaantus sikandan tenged te menge salè dan.
EZE 44:11 Egkehimu he ebpenilbi sikandan diyà te valey ku pinaaǥi te kebantey te ǥemawan wey kedlapà te menge pemuhat he edtutungen wey zuma pa he menge ibpemuhat te menge etew. Wey egkehimu ke ebpenilbi sikandan te menge etew ziyà te valey ku.
EZE 44:12 Ne geina te nenilbi sikandan te menge etew te kebpenilbi he para te zuma he menge ed-ezapen dan, ne tenged kayi nekevaal te salà is menge etew te Israel, ibpenangdù ku he ebpekaantus dan tenged te salè dan. Iyan a, is Nengazen he MEGBEVAYÀ, is migkaǥi kayi.
EZE 44:13 Puun guntaan ne kenè ku en sikandan edtuǥutan te kebpenilbi kediey pinaaǥi te kegkememumuhat dan. Kenà daan sikandan ebpekesamsam te segradu he menge azen ku etawa segradu he menge pemuhat para kedì. Kinahanglan he ebpekaantus dan te kegkeeled tenged te menge vaal zan.
EZE 44:14 Edhimuwen ku zà sikandan he menge umuuǥup te langun he menge vuluhaten diyà te valey ku.
EZE 44:15 “Piru is menge memumuhat he ebpuun diyà te tribu ni Levi he menge kevuwazan ni Zadok he metinumanen he nenilbi kedì diyà te valey ku hein mid-awà kayi te kedì is menge Israilihanen, nenilbi zan mulà kedì. Iyan sikandan egkehimu he ebpemuhat kedì te tavà wey lengesa te uyaǥen. Iyan a, is Nengazen he MEGBEVAYÀ, is migkaǥi kayi.
EZE 44:16 Iyan dà sikandan ebpekeseled diyà te valey ku wey ebpekeuvey ziyà te pemuhatà he para kediey te kebpenilbi kedì. Iyan dà sikandan ebpekevaal te ebpeveelan ku ziyà te valey ku.
EZE 44:17 Emun edseled sikandan diyà te veyeey pehendiyà te seled he lama zuen te valey ku, kinahanglan he ebivisti sikandan te linu. Kenà sikandan mebivisti te welin emun ebaal sikandan te vuluhaten diyà te seled he lama etawa ziyà te seled te valey ku.
EZE 44:18 Kinahanglan he edtetengkulu sikandan te linu wey edsun-ud te pendizalem he visti he linu ǥihapun. Kenà sikandan medsun-ud te minsan hengkey he ebpekeperimuseng kandan.
EZE 44:19 Emun egawas sikandan diyà te ǥawas he lama he zutun is menge etew, kinahanglan he edluwasen dan dèpa is menge visti he migamit dan dutun te kebpenilbi zan ne idsavuk dan diyà te segradu he menge ruǥu, ne mebivisti zà sikandan te urdinaryu. Pinaaǥi kayi kenà ebpekezezaat te menge etew is kegkesegradu zuen te menge visti zan.
EZE 44:20 “Kinahanglan he kenà sikandan mebpevangul wey mebpemelayat te vulvul, kekenà, layun dan dà heini peeluti.
EZE 44:21 Kinahanglan daan he kenà sikandan med-inum te vinu emun edseled en sikandan duen te seled he lama.
EZE 44:22 Kenà daan egkehimu ke ebpengesawa sikandan te valu etawa vahi he midsuwayan te esawa zin. Is egkehimu he ed-esewaan dan, iyan dà is bahi he wazè pa mekeremaǥi he ebpuun diyà te kevuwazan te menge Israilihanen etawa nevalu he menge esawa te menge memumuhat.
EZE 44:23 Kinahanglan he ebpenuruen dan is menge etew ku ke hengkey is segradu wey ke hengkey is kenà segradu, ke hengkey is lumpiyu wey meremerik.
EZE 44:24 Emun duen egkesemberewaanan, iyan is menge memumuhat edhitindeg he menge menhuhukum ne iveǥey zan is kukuman he ibpesikad diyà te kesuǥuan ku. Kinahanglan he edtumanen dan is menge suǥù ku wey menge sulunuzen bahin te menge pista he ibpetuman ku; kinahanglan he ed-isipen dan he segradu he andew is Andew te Kedhimeley.
EZE 44:25 Is memumuhat kinahanglan he kenè din remeriki is keugelingen din pinaaǥi te ked-uvey te minatey gawas ke is minatey amey zin etawa iney zin, etawa suled din he maama, etawa etevey zin he wazè din pa esawa.
EZE 44:26 Emun ebpekesamsam dan te minatey, kinahanglan he mebpekelumpiyu sikandan wey medtaǥad dan te pitu he andew,
EZE 44:27 ne emun edseled en sikandan diyà te seled he lama zuen te valey ku te kebpenilbi zutun, ne kinahanglan he ebpemuhat dèpa sikandan te pemuhat he idlumpiyu para te keugelingen dan. Iyan is Nengazen he MEGBEVAYÀ, migkaǥi kayi.”
EZE 44:28 Mibpedayun megkaǥi is Nengazen te, “Wazà tanà he egkepengevilin te menge memumuhat te Israel, su iyan a mismu ebeǥey te menge kinahanglan dan.
EZE 44:29 Is keenen dan ne ziyà ebpuun te menge pemuhat he para gasa, menge pemuhat he para idlumpiyu, wey menge pemuhat he vayad te salà. Ne is menge azen he mibpeveyveyaan en kedì ne egkehimu zaan he kandan.
EZE 44:30 Is kineupiyahan te egkehuna he menge sebpet niw wey is ispisyal he menge gasa kayi te kedì, diyà daan ebpekepevayà te menge memumuhat. Beǥayi niw zaan te kineupiyahan he herina niw is menge memumuhat, su wey metuvazi is pemilya niw.
EZE 44:31 Kinahanglan he kenà egkaan is menge memumuhat te minsan hengkey he tagbis etawa uyaǥen he minatey etawa midhimetayan te zuma he langgam.”
EZE 45:1 Migkaǥi pa is Nengazen te, “Emun ebehinen niw en is tanà diyà te kada tribu te Israel, sivayi a keniyu te kedì he vahin he ispisyal he gasa he is keleyatan din 12 he kilumitru ne sepulù he kilumitru is keluaǥan din. Heini he tanà ed-isipen he segradu.
EZE 45:2 Sivey kew kayi he tanà te 875 he ǥiek kuwedradu, he ebpehitindeǥan te valey ku, is peliǥuy kayi te valey ku edhimuwen he bekanti is 87 he ǥiek is keluag din.
EZE 45:3 Is ketengà te tanà he para kediey, ne 12 he kilumitru is keleyatan din ne lelima he kilumitru is keluaǥan din, idsivey heini he para te menge memumuhat he ebpenilbi kediey ziyà te valey ku. Ebengunan heini te menge valey zan wey te valey ku he iyan kes Utew Segradu he Lugar.
EZE 45:5 Is ketengà kayi he tanà ne 12 he kilumitru is keleyatan din ne lelima he kilumitru is keluaǥan din gaked te menge Levihanen he umuuǥup te menge memumuhat diyà te valey ku. Ed-engkenen dan heini su para zuen dan menge inged he egkeubpaan.
EZE 45:6 “Ne ziyà te avey te tanà he para kediey, sivey kew te tanà he 12 he kilumitru is keleyatan din ne zezuwa wey tengà he kilumitru is keluaǥan din. Ebeelan heini he inged he zutun egkehimu he ebpekeubpà is minsan hentei he Israilihanen.
EZE 45:7 Edsivayan daan te zezuwa he vahin te tanà is pengulu te Israel. Is senge vahin, diyà ibpepuun te zapit te edsenlepan he zulunà duen te tanà he para kediey wey te tanà he ebeelan he inged pehendiyà te Zaǥat he Mediteraneo, ne is senge vahin pa ibpepuun diyà te zapit te edsilaan he zulunà pehendiyà te Wahig he Jordan. Is dulunà kayi zapit te edsilaan wey edsenlepan ne repeng te zulunà te tanà he mibahin te menge tribu te Israel.
EZE 45:8 Heini he tanà, iyan egkehimu he vahin te pengulu te Israel. “Kenè en maan luplupiǥa te menge pengulu ku is menge etew ku. Tuǥuti zan is menge etew te Israel te ked-angken te tanà he imbahin kandan te kada tribu zan.
EZE 45:9 Su iyan a is Nengazen he MEGBEVAYÀ, migkaǥi: Sikiyu is menge pengulu te Israel, subre en is mibeelan niw! Engkezi niw en is kebpenggulpi niw wey kebpendaagdaag, ne veeli niw is metazeng wey hustu. Kenè niw en eǥawi te tanà is menge etew ku.
EZE 45:10 Gemita niw is hustu he timbangan, tekesà, etawa sukuzà.
EZE 45:11 Is ‘homer’ iyan ereg he ebesiyan te kedtakes te kezakel. Is senge ‘homer’ sepulù he ‘ipa’ etawa sepulù he ‘bat’.
EZE 45:12 Is ‘shekel’ iyan ereg he ebesiyan te kedsukud te keveǥat. Is senge ‘shekel’ 20 he ‘giras’ wey 60 he ‘shekel’ ne senge ‘mina’.
EZE 45:13 “Iyan heini menge pemuhat he ereg he ibeǥey niw ziyà te menge pengulu te Israel: Ike-60 he vahin te sebpet niw he trigu wey barli, ike-100 he vahin te lana niw he ulibu (Is ebesiyan te kedtekesa kayi iyan is ‘bat’ is sepulù he ‘bat’ senge ‘homer’ etawa senge ‘cor’,)
EZE 45:15 wey sevaha he kerehidu ziyà te kada 200 he ebpuun diyà te menge uyaǥen niw. Menge pemuhat heini he gasa, menge pemuhat he edtutungen, wey menge pemuhat he para te meupiya he kedepità su wey kew mevelukasi tenged te menge salè niw. Iyan a, is Nengazen he MEGBEVAYÀ, is migkaǥi kayi.
EZE 45:16 Is langun he menge Israilihanen med-uwit keniyan he menge pemuhat su wey meǥamit te pengulu te Israel.
EZE 45:17 Ketengdanan te pengulu is kebeǥey te menge pemuhat he edtutungen, pemuhat he para gasa, pemuhat he inumen, pemuhat he para idlumpiyu, wey pemuhat he para te meupiya he kedepità dutun te timpu te menge pista iring te Pista te Kebpuun te Hayag, menge Andew te Kedhimeley, wey zuma pa he menge pista he edsilibrahan te menge Israilihanen. Ibpemuhat heini he menge pemuhat su wey mevelukasi is menge Israilihanen tenged te menge salè dan.”
EZE 45:18 Migkaǥi pa is Nengazen he MEGBEVAYÀ te, “Te egkehuna he andew te egkehuna he vulan pemuhat kew te turiti he vaka he wazè din sazir su wey melumpiyuwi is baley ku.
EZE 45:19 Ne egkuwa is memumuhat te lengesa kayi he pemuhat he para idlumpiyu ne ebpelisan din is marku te ǥemawan te valey ku, is heepat he suyuk duen te pemuhatà, wey marku te pultahan duen te seled he lama.
EZE 45:20 Iyan ded heini veeli niw zutun te ikepitu he andew te iyan ded gihapun he vulan he para te minsan hentei he nekesalà he wazè din tivevaa etawa nekesalà he wazè din metueni. Pinaaǥi kayi egkelumpiyuwan is baley ku.
EZE 45:21 “Dutun te ike-14 he andew te egkehuna he vulan, silibraha niw is Pista te Kedlavey te Belinsuǥuen. Silibraha niw heini seled te pitu he andew, ne kaan kew zà te supas he wazè din tapey.
EZE 45:22 Dutun te egkehuna he andew te kedsilibra niw, mebpemuhat is pengulu te turiti he vaka te pemuhat he para idlumpiyu kandan wey te langun he menge Israilihanen.
EZE 45:23 Kada andew seled te pitu he andew zutun te kedsilibra niw, ne mebpemuhat kayi te kedì is pengulu te pitu he turiti he vaka wey pitu he meemahan he kerehidu he wazè din sazir he pemuhat he edtutungen. Mebpemuhat daan sikandin te sevaha he meemahan he kambing he pemuhat he para idlumpiyu.
EZE 45:24 Is kada turiti he vaka wey kada meemahan he kerehidu he ibpemuhat, duen idlapik kayi he pemuhat he gasa, he menge liwazà te saku he herina is kezekelè din wey sengegelun he lana te ulibu.
EZE 45:25 Mebpemuhat daan is pengulu zutun te Pista te Kebaal te menge Lawig, he ebpuunan te ike-15 he andew te ikepitu he vulan. Ne seled daan te pitu he andew, ebpemuhat is pengulu te iring ded te menge pemuhat he ibpemuhat din emun Pista te Kedlavey te Belinsuǥuen: menge pemuhat he para idlumpiyu, menge pemuhat he edtutungen, menge pemuhat he para gasa, wey lana.”
EZE 46:1 Migkaǥi pa is Nengazen he MEGBEVAYÀ te, “Is beyeey pehendiyà te seled he lama he ebpekesinaru ziyà te edsilaan, kinahanglan he siradu seled te heenem he andew he iyan timpu te kedterebahu, piru ed-ebriyan heini emun Andew te Kedhimeley wey emun Pista te Kebpuun te Hayag.
EZE 46:2 Is pengulu ziyà ebayà te veyeey he ebpekesinaru ziyà te edsilaan, ne edhitindeg sikandin diyà te avey zuen te pultahan dutun te ebpemuhat is menge memumuhat te pemuhat he edtutungen wey te pemuhat din he para te meupiya he kedepità. Dutun te pultahan ed-azap is pengulu ne kegkepasad kayi egawas sikandin, piru haazà is pultahan kenà edlekevan te taman te mezukilem.
EZE 46:3 Kada Andew te Kedhimeley wey kada Pista te Kebpuun te Hayag, is menge etew te Israel, ne med-azap daan kedì dutun te egkesineruwan te ǥemawan.
EZE 46:4 Kada Andew te Kedhimeley, mebpemuhat is Pengulu kayi te kedì te sevaha he meǥurang en he kerehidu he meemahan wey heenem he nati he kerehidu he wazè din sazir he ibpemuhat he edtutungen.
EZE 46:5 Is pemuhat he para gasa he idlapik duen te meǥurang en he kerehidu, ne liwazà te saku he herina, piru sumalè en is egkeusatan duen te pengulu he kezekelà te herina he idlapik din duen te kada nati he kerehidu. Is kada liwazà te saku he herina he idlapik din duen te menge pemuhat he kerehidu, mebpemuhat daan sikandin te sengegelun he lana te ulibu.
EZE 46:6 “Kada Pista te Kebpuun te Hayag mebpemuhat is pengulu: sevaha he turiti he vaka, sevaha he meǥurang en he kerehidu, wey heenem he nati he kerehidu he meemahan he pudu wazè dan sazir.
EZE 46:7 Is pemuhat he para gasa he idlapik duen te pengulu ziyà te turiti he vaka wey ziyà te meemahan he kerehidu he meǥurang en ne tig liwazà te saku he herina, piru sumalè en is egkesuatan din he kezekelà te herina he idlapik din diyà te kada nati he kerehidu. Te kada tengà te saku he herina he idlapik din te menge pemuhat he uyaǥen, mebpemuhat daan sikandan te sengegelun he lana ha ulibu.
EZE 46:8 Emun edseled is pengulu su ebpemuhat, kinahanglan he ziyà sikandin ebayà te varkun te veyeey, ne zutun daan sikandin megawas.
EZE 46:9 “Emun ed-ezapen a ziyà he valey ku te menge etew te Israel zutun te timpu te menge pista, is edseled he ziyà ebayà te veyeey he zapit te zizaya kinahanglan he ziyà mebayà te veyeey he zapit te zivavà emun egawas en, ne is edseled diyà te zivavà kinahanglan he ziyà egawas te zizaya. Wazà medseled wey megawas he zutun ded ebayà te imbayè din te kedseled din, kinahanglan he ziyà sikandin mebayà te zivaluy emun diyà sikandin mebayà te zivaluy zutun te kedseled din.
EZE 46:10 Edredsà kandan is pengulu te kedseled wey kegawas.
EZE 46:11 “Dutun te timpu te nekedseselekawà he menge pista, is pemuhat he para gasa he idlapik te turiti he vaka wey te meǥurang he kerehidu, tig liwazà te saku he herina piru sumalè en is egkesuatan duen te ebpemuhat ke sengemenu kezekelà is idlapik din he herina ziyà te kada nati he kerehidu. Is kada liwazà te saku he herina he idlapik din te pemuhat he uyaǥen, lepiki zin te sengegelun he lana te ulibu.
EZE 46:12 Emun ebpemuhat is pengulu te pemuhat he edtutungen etawa pemuhat he para te meupiya he kedepità he keugelingen he suat is kebpemuhata zuen, ebpuwasan para kandin is beyeey he ebpekesinaru ziyà te edsilaan, ne ebpemuhat sikandin te menge pemuhat he iring te kebpemuhat din emun Andew te Kedhimeley. Ne emun ebpekeǥawas en sikandin edlekevan en haazà is pultahan.
EZE 46:13 “Kada meselem, kinahanglan he zuen ibpemuhat kayi te kedì he kerehidu he menge senge-tuig is keǥurang din he wazè din sazir he pemuhat he edtutungen.
EZE 46:14 Idlapik kayi te kerehidu is pemuhat he para gasa he heepat he kilu he herina, wey senge litru he lana te ulibu he para idsahug te herina. Heini he sulunuzen is mehitenged te pemuhat he para gasa kinahanglan he edtumanen taman te taman.
EZE 46:15 Umbe kada meselem, kinahanglan he zuen ibpemuhat kayi te kedì he kerehidu, herina, wey lana te ulibu he andew-andew he pemuhat he edtutungen.”
EZE 46:16 Mibpedayun pa megkaǥi is Nengazen he MEGBEVAYÀ te, “Emun ebeǥey ziyà te sevaha te menge anak din is pengulu, te tanà he ebpuun diyà te nepengevilin din, heeyan he tanà iyan dà ebpekaangken duen is menge kevuwazan din taman te taman.
EZE 46:17 Piru emun diyè din ibeǥey heini te sevaha te menge suluǥuen din, egkaangken heini zutun te suluǥuen taman dà te midtail he Tuig te Kebeǥey te Bayàbayà wey Ked-ulì. Dutun he tuig id-ulì din haazà is tanà diyà te pengulu. Iyan dà is menge anak te pengulu egkehimu he ebpekaangken te tanè din taman te taman.
EZE 46:18 Is pengulu, kinahanglan he kenè din penguwaa is tanà te menge etew. Emun ebeǥey sikandin te tanà diyà te menge anak din, kinahanglan he kandin dà he tanà is iveǥey zin, su wey kenà mewezai te tanà is menge etew ku.”
EZE 46:19 Hein nepasad haazà miduma a zuen te etew ziyà te segradu he ruǥu te menge memumuhat he ebpekesinaru ziyà te zivavà. Diyè key mebayà te pultahan he kilid te veyeey. Dutun impeehè din kedì is sevaha he lugar he zapit te edsenlepan dutun he menge ruǥu.
EZE 46:20 Migkeǥiyan e zin te, “Kayi he lugar edlutù is menge memumuhat te pemuhat he vayad te salà, pemuhat he para idlumpiyu, wey pemuhat he para gasa. Kayi zan heini edlutua su wey zan melikayi is ked-uwita zuen te menge pemuhat diyà te ǥawas he lama. Pinaaǥi kayi kenà ebpekezezaat te menge etew is kegkesegradu zuen te menge pemuhat.”
EZE 46:21 Ne midume e zin diyà te ǥawas he lama, ne impeehè din kedì is heepat he suyuk kayi. Diyà te kada suyuk duen ku naahà he zeisey he lama he 68 he ǥiek is keleyatan din ne 50 he ǥiek is keluaǥan din. Neked-iiring is kezekelà kayi he menge lama.
EZE 46:23 Is kada sevaha kayi, neliǥuy te mevavà he verengbeng he menge vatu ne ziyà te kilid dutun te verengbeng he zuen duen tetevunà.
EZE 46:24 Ne migkaǥi haazà is etew kayi te kedì te, “Iyan heini avu he kayi edlutua te menge ebpemenilbi ziyà te valey te Nengazen is menge pemuhat te menge etew.”
EZE 47:1 Ne miduma a zuen te etew pelikù diyà te ǥemawan te valey te Nengazen, ne zutun duen neehè ku he wahig he edtudà pehendiyà te edsilaan he ebpuun diyà te zizalem te ǥemawan te valey te Nengazen. (Is baley te Nengazen, nekesinaru ziyà te edsilaan.) Mibelikùkù haazà is wahig diyà te zapit te egkekewanan he kilid te pemuhatà, dapit te zivavà kayi.
EZE 47:2 Ne miduma a zuen te etew ziyà te ǥawas duen te valey te Nengazen. Diyè key mebayà te veyeey he zapit te zizaya. Ne inliǥuy e zin diyà te ǥawas pehendiyà te veyeey he zapit te edsilaan. Dutun neehè ku is wahig he edtudà he ebpuun diyà te zapit te zizaya zuen te veyeey.
EZE 47:3 Midhipanew key zuen te etew pehendiyà te edsilaan he veyvey te wahig, ne edsigudu en sikandin edsukud. Ne hein 1,700 en he ǥiek is keziyù te nehipenawan dey, ne imperapas e zin te wahig he taman pa te lenglenguan te menge paa ku.
EZE 47:4 Midlaus en maan medsukud sikan is etew te 1,700 he ǥiek ne impeuman e zin iperapas diyà te renged te netemanan din ne taman te vuel ku haazà. Ne midsukud pa sikandin te 1,700 he ǥiek ne impeuman e zin iperapas diyà te wahig he renged te netemanan din ne taman te hawak ku.
EZE 47:5 Ne midlaus pa mesukud te selakew en he 1,700 he ǥiek, ne kenè ku en egketegkad is wahig he renged din su utew en mezalem. Kinahanglan en heini he ed-emperasen.
EZE 47:6 Migkeǥiyan a zuen te etew te, “Sikew is etew, purungi nu timan-i is neehè nu.” Ne midume e zin te kedlikù he ziyè key mebayà te kilid duen te wahig.
EZE 47:7 Ne zutun te kebayè dey zutun ne zuen ku naahà he mezakel he menge kayu ziyà te pesikilizà te pangpang.
EZE 47:8 Ne migkaǥi sikandin kayi te kedì te, “Heini he wahig edtudà pehendiyà te tanà diyà te edsilaan petupang diyà te Araba pehendiyà te Daǥat he Minatey. Ne ebmeupiyè en is taam te Daǥat he Minatey, ne kenè en mepait.
EZE 47:9 Minsan hendei is egketudaan kayi zuen duen mahabet he menge isdà wey zuma pa he uuyag he menge linimbag diyà te wahig, su ibpemeupiya kayi is taam te timusen he wahig.
EZE 47:10 Mahabet is ebpengisda diyà te Daǥat he Minatey he ebpemuun diyà te En Gedi pehendiyè en te En Eglaim. Is beyvey egkeeneb te puket he igkagkag. Egkeiring te Zaǥat he Mediteraneo is Daǥat he Minatey su ebmahabet kayi is nekedseselekawà he menge isdà.
EZE 47:11 Piru is menge wahig diyà te peliǥuy kayi ne kenà egkaawà is timus duen su para zuen egkekuwaan te timus te menge etew.
EZE 47:12 Edtuvù diyà te pesikilizà duen te wahig he edtudà is nekedseselekawà he menge kayu he ebpemeǥas. Kenà egkeǥangu is menge zahun dan wey kenà egkaamin is menge veǥas dan. Ebpemeǥas heini kada vulan su edtudaan man duen te wahig he ebpuun diyà te valey te Nengazen. Egkekaan is menge veǥas dan ne igkevawi is menge zahun dan.”
EZE 47:13 Migkaǥi is Nengazen he MEGBEVAYÀ te, “Iyan heini menge zulunà te tanà he ebehinen niw ziyà te 12 he menge tribu te Israel he egkepengevilin dan. Beǥayi niw te zezuwa he vahin is tribu ni Jose.
EZE 47:14 Kinahanglan he ped-iiringa niw te ebahin is tanà, su nenangdù a ziyà te menge kepuun niw he ibeǥey ku heini kandan ne egkehimu heini he kevilin niw.
EZE 47:15 Iyan heini menge zulunà: “Is dulunà diyà te zizaya, ebpuun diyà te Zaǥat he Mediteraneo pehendiyà te Hetlon, pehendiyà te Lebo Hamat, pehendiyà te Zedad,
EZE 47:16 pehendiyà te Berota, pehendiyà te Sibraim he ziyà te dulunà te Damascus wey Hamat, taman te Hazer Haticon he ziyà te zulunà te Hauran.
EZE 47:17 Umbe, is dulunà diyà te zizaya ebpuun diyà te Zaǥat he Mediteraneo taman te Hazar Enan, he ziyà te zulunà te Damascus wey Hamat he ziyà te zizaya. Iyan heini dulunà diyà te zizaya.
EZE 47:18 “Is dulunà diyà te zapit te edsilaan ebpuun diyà te zulunà te Hauran wey Damascus pehendiyà te Wahig he Jordan he iyan mibpedsivey te tanà he Gilead wey tanà he Israel pehendiyà te Daǥat he Minatey taman te Tamar. Iyan heini zulunà diyà te edsilaan.
EZE 47:19 “Is dulunà diyà te zivavà ebpuun diyà te Tamar pehendiyà te serebseb te Meriba Kadesh edlaus diyà te zal-ug te Ehipto taman te Zaǥat he Mediteraneo. Iyan heini zulunà diyà te zivavà.
EZE 47:20 “Is dulunà diyà te edsenlepan iyan mismu is Daǥat he Mediteraneo taman diyà te lugar he atbang te Lebo Hamat. Iyan heini zulunà diyà te edsenlepan.
EZE 47:21 “Behina niw heini is tanà diyà te kada tribu niw.
EZE 47:22 Kevilin niw heini wey te kenà menge Israilihanen he mid-ubpà duma keniyu he neetew ziyà te Israel is menge anak dan. Isipa niw sikandan he menge Israilihanen iring keniyu, ne vehini niw zaan sikandan te kevilin he tanà te tribu te Israel.
EZE 47:23 Ke hentei ki tribu is mid-emuran dan, ne zutun daan sikandan ebeǥayi te tanà he kandan he vahin. Iyan a, is Nengazen he MEGBEVAYÀ, is migkaǥi kayi.”
EZE 48:1 Iyan heini lista te menge tribu te Israel wey is menge tanà he egkaangken dan: Is tanà te tribu ni Dan ne ziyà te zizaya. Is dulunà kayi ebpuun diyà te Hetlon pehendiyà te Lebo Hamat taman te Hazar Enan he ziyà te zulunà te Damascus wey Hamat diyà te zizaya. Is keluag te tanà te tribu ni Dan, ebpuun diyà te edsilaan taman te zapit te edsenlepan te Israel.
EZE 48:2 Is tanà te tribu ni Asher ne ziyà te zivavà he vahin te tanà te tribu ni Dan, ne is keluag kayi, ebpuun diyà te edsilaan taman te zapit te edsenlepan te Israel.
EZE 48:3 Is tanà te tribu ni Naftali ne ziyà te zizaya he vahin te tanà te tribu ni Asher, ne is keluag kayi, ebpuun daan diyà te edsilaan taman te zapit te edsenlepan te Israel.
EZE 48:4 Is tanà te tribu ni Manase ne ziyà te zivavà he vahin te tanà te tribu ni Naftali, ne is keluag kayi, ebpuun daan diyà te edsilaan taman te zapit te edsenlepan te Israel.
EZE 48:5 Is edsunud pa he menge tanà iyan is gaked te tribu ni Efraim, ni Reuben, wey ni Juda, he is menge keluag kayi ebpuun daan te edsilaan taman te zapit te edsenlepan te Israel.
EZE 48:8 Is tanà he ziyà te zizaya te Juda, iveǥey niw ziyà te Nengazen he ispisyal he gasa. 12 he kilumitru is keleyatan kayi, ne is keluag kayi, ebpuun daan diyà te edsilaan taman te zapit te edsenlepan te Israel iring te ǥaked te zuma he menge tribu te Israel. Is baley te Nengazen ne edtukuzen diyà te teliwazà kayi he tanà.
EZE 48:9 Mehitenged duen te tanà he ibeǥey niw ziyà te Nengazen he ebengunan te valey zin, ne 12 he kilumitru is keleyatan din ne lelima he kilumitru is keluaǥan din.
EZE 48:10 Is ketengà kayi he tanà ne para te menge memumuhat. Is keleyatan kayi puun te edsilaan pehendiyà te edsenlepan ne 12 he kilumitru, ne is keluaǥan kayi he puun te zizaya pehendiyà te zivavà, ne lelima he kilumitru. Ne ziyà te teliwazà kayi ne zutun is baley te Nengazen.
EZE 48:11 Heini he tanà, ne para te pinilì he menge memumuhat, he iyan is menge kevuwazan ni Zadok. Metinumanen sikandan he nenilbi kedì wey wazà med-awà kayi te kedì. Kenà iring te mibeelan te zuma he menge kevuwazan ni Levi he miduma te menge Israilihanen te ked-awà kayi te kedì.
EZE 48:12 Heini he tanà, ne ispisyal he gasa para te menge memumuhat, ne iyan heini utew segradu he tanà. Ne ziyà te avey kayi iyan is tanà he para te zuma he menge kevuwazan ni Levi. Heini is tanà, ne 12 he kilumitru is keleyatan din ne lelima he kilumitru is keluaǥan din.
EZE 48:14 Kinahanglan he kenè dan ivelegyà etawa iliwà is minsan deisey zà he vahin kayi, su iyan heini utew meupiya he tanà wey segradu heini para te Nengazen.
EZE 48:15 Is egkesamà he tanà he zuen din keleyatan he 12 he kilumitru wey keluaǥan he dezuwa wey tengà he kilumitru, ne para heini mulà te kezekelan. Egkehimu heini he ed-ubpaan te menge etew wey ebpepenebtavan te menge uyaǥen dan. Ne ziyà te teliwazà kayi, ne zutun is inged
EZE 48:16 he zuen din keluag he zezuwa he kilumitru kuwedradu.
EZE 48:17 Neliǥuy heini te mehiǥawan he lugar he tig-125 he mitrus kuwedradu.
EZE 48:18 Diyà te ǥawas te inged duen bevesukà he zuen din keleyatan he lelima he kilumitru pehendiyà te edsilaan wey lelima zaan he kilumitru pehendiyà te edsenlepan. Diyà heini te zulunà te segradu he tanà. Is menge abut kayi he tanà ne para te keenen te edterebahu ziyà te inged.
EZE 48:19 Is minsan hentei he edterebahu ziyà te inged he ebpuun diyà te nekedseselekawà he tribu te Israel egkehimu he ebasuk kayi he tanà.
EZE 48:20 Umbe, is tivuuk he tanà he ibeǥey niw ziyà te Nengazen he ispisyal he gasa, ragkes en is segradu he tanà wey sikan is inged, 12 he kilumitru kuwedradu.
EZE 48:21 Is egkesamà he menge tanà, diyà te edsilaan wey edsenlepan duen te segradu he tanà wey zuen te inged, ne gaked te pengulu. Is keluag kayi he tanà 12 he kilumitru ne nekeuma heini ziyà te zulunà te Israel ziyà te edsilaan wey edsenlepan. Umbe is diyà te teliwazà te tanà he para te pengulu iyan is segradu he tanè ku, is baley ku, is tanà te menge kevuwazan ni Levi, wey is inged. Is tanà he para te pengulu ziyà te mid-elangan te tanà he para te tribu ni Juda wey te tanà he para te tribu ni Benjamin.
EZE 48:23 Iyan heini menge tanà he egkaangken te wazè pa mevehini he menge tribu: Is tanà te tribu ni Benjamin ne ziyà te egkezivavà te tanà te pengulu, ne is keluag kayi puun te edsilaan taman te edsenlepan te Israel.
EZE 48:24 Is tanà te tribu ni Simeon, ne ziyà te egkezivavà te tanà te tribu ni Benjamin, is keluag kayi, ebpuun daan te edsilaan taman te edsenlepan te Israel.
EZE 48:25 Is edsunud he menge tanà, ne iyan is gaked te tribu ni Isachar, ni Zebulun, wey ni Gad, he is keluag dan, ebpuun daan te edsilaan taman te edsenlepan te Israel.
EZE 48:28 Is divavà he zulunà te tanà te tribu ni Gad, ebpekeikul te Tamar pehendiyà te menge serebseb te Meriba Kadesh edlaus diyà te zal-ug te Ehipto taman te Zaǥat he Mediteraneo.
EZE 48:29 Iyan heini menge tanà he egkezawat te menge tribu te Israel he egkepengevilin dan. Iyan a, is Nengazen he MEGBEVAYÀ, is migkaǥi kayi.
EZE 48:30 Is heepat he verengbeng he nekeliǥuy te inged he Jerusalem, duen din tigtetelu he pultahan. Is menge pultahan diyà te zizaya he verengbeng, ne egngezanan te Reuben, Juda, wey Levi. Is menge pultahan diyà te zapit te edsilaan he verengbeng, egngezanan te Jose, Benjamin, wey Dan. Is menge pultahan diyà te zivavà he verengbeng, egngezanan te Simeon, Isachar, wey Zebulun. Ne is menge pultahan diyà te zapit te edsenlepan, egngezanan te Gad, Asher, wey Naftali. Is kada verengbeng, 2,250 he mitrus is keluǥayad din.
EZE 48:35 Umbe is tivuuk he keleyatan duen te verengbeng, ne 9,000 he mitrus, ne puun dutun he timpu haazà is inged egngezanan he “Keniyan is Nengazen!”
DAN 1:1 Hein iketelu he tuig te kedhadì ni Jehoyakim diyà te Juda, midsurung ni Hadì Nebucadnezar he hadì te Babilonia wey te menge sundaru zin is Jerusalem.
DAN 1:2 Mibihag din si Hadì Jehoyakim su iyan heeyan egkesuatan te Nengazen he mehitavu. Mibpenguwa zin is duma he menge azen diyà te valey te Megbevayà ne mid-uwit din diyà te Babilonia. Ne intaǥù din haazà diyà te teleǥuey te ketiǥeyunan diyà te valey he ed-ezapan te kandin he ed-ezapen.
DAN 1:3 Ne zutun, midsuǥù ni Nebucadnezar si Ashpenaz he pengulu te menge upisyal zin he mebpilì te egkepipira he menge vetan-en duen te menge vihag he menge Israilihanen. Heini he menge vetan-en kinahanglan he ebpuun diyà te lavew wey meupiya is dengeg he menge pemilya.
DAN 1:4 Heini sikandan, kinahanglan he menge mezagwey, meupiya is kedlelawa, memetau, elistu, wey melumu he ebpenuruen su para zait sikandan he ebpenilbi te hadì. Midsuǥù din daan si Ashpenaz he penurua zin sikandan te kineǥiyan wey belesahan te tig-Babilonia.
DAN 1:5 Ne insuǥù pa zutun te hadì he ebeǥayan sikandan kada andew te keenen din wey vinu. Ne emun egketapus en is tetelu he tuig, ne ebpenilbi en sikandan kandin.
DAN 1:6 Ne zuma zuen te nengepilì he ebpuun diyà te tribu ni Juda iyan ensi Daniel, Hanania, Mishael, wey si Azaria.
DAN 1:7 Ne mid-ilisan ni Ashpenaz is menge ngazan dan. Si Daniel ne iyan si Belteshazar, si Hanania iyan si Shadrac, si Mishael iyan si Meshac, ne si Azaria iyan si Abednego.
DAN 1:8 Piru midisisyun si Daniel he kenà sikandin egkaan te keenen te hadì wey kenà ed-inum te inumen te hadì, su para kenà sikandin meremeriki. Umbe midhangyù sikandin diyà te ki Ashpenaz he emun egkehimu ne kenà sikandin ipekaan dutun.
DAN 1:9 Ketau te Megbevayà he meupiya is isip ni Ashpenaz ki Daniel su para medtuǥut sikandin te hangyù din.
DAN 1:10 Piru migkaǥi si Ashpenaz diyà te kandin te, “Egkahandek a zuen te hadì. Su iyan sikandin migkaǥi ke hengkey is ibpekaan wey ibpeinum keniyu, ne emun egkeehè din he kenà mulà meupiya is keniyu he kedlelawa ne kela ke pehimetayi e zin.”
DAN 1:11 Ne migkeǥiyan ni Daniel is bantey he impeelima ni Ashpenaz kandin wey engki Hanania, Mishael, wey ki Azaria te,
DAN 1:12 “Gezami key pinaaǥi te kebeǥayi zà kenami te lumbey he egkekaan dey wey wahig he egkeinum dey seled te sepulù he andew,
DAN 1:13 ne ihindeg key zuen te zuma he menge vetan-en he iyan keenen dan is keenen te hadì. Ne ke hengkey is egkeehè nu he rimeǥas, ne iyan ke en metau ke hengkey is ebeelan nu kenami.”
DAN 1:14 Ne mibpezumazuma haazà is bantey he impeelima kandan ne migezaman din sikandan seled te sepulù he andew.
DAN 1:15 Ne kegkepasad te sepulù he andew, naahà he meupiya pa is kandan he kedlelawa kenà te zuma he menge vetan-en he keenen duen te hadì is kandan he keenen.
DAN 1:16 Umbe, impelaus en duen te vantey is kebpekeena kandan te lumbey ne wazè en leusa is kebpekeena kandan te keenen te hadì wey is kebpeinuma kandan te inumen din.
DAN 1:17 Mibeǥayan te Megbevayà heini is heepat he vetan-en te ketau lavew en diyà te nekedseselekawà he menge velesahan wey menge ketudluanan. Ne gawas kayi mibeǥayan din si Daniel te ketau wey zin ikeseysey is kehuluǥan te menge egkengelewasan wey menge teǥeinep.
DAN 1:18 Ne kegkepasad te tetelu he tuig he iyan insuǥù ni Hadì Nebucadnezar, ne mid-uwit sikandan ni Ashpenaz dutun te hadì.
DAN 1:19 Ne mibpekidlalag kandan haazà is hadì, ne naahà dutun te hadì he langun kandan te menge vetan-en ne wazà ebpekeiring engki Daniel, Hanania, Mishael, wey Azaria. Umbe iyan sikandan mibpilì he ebpenilbi kandin.
DAN 1:20 Dutun te langun he in-insà te hadì diyà te kandan, netuenan din he sepulù he takep is kedlavew te ketau zan te ketau te menge selemengkiru wey menge veyilan seled te tivuuk he ginhedian din.
DAN 1:21 Mibpedayun mebpenilbi si Daniel ki Nebucadnezar taman te nehuna he tuig te kedhadì ni Cyrus.
DAN 2:1 Dutun te ikezuwa he tuig te kedhadì ni Nebucadnezar, kepipira sikandin meketeǥeinep. Nekepeliveg kandin haazà is menge teǥeinep din, umbe kenà sikandin ebpekelipezeng.
DAN 2:2 Impetawag din is menge sakup din he menge selemengkiru, menge keteuwanen, menge veyilan, menge menenagnà, su wey zan ikeseysey is kehuluǥan duen te teǥeinep din.
DAN 2:3 Ne te kebpekeuma zan migkaǥi haazà is hadì diyà te kandan te, “Neketeǥeinep a ne utew nekepeliveg kedì heini, umbe impetawag ku sikiyu su egkesuat a he metueni ku ke hengkey is kehuluǥan kayi he teǥeinep.”
DAN 2:4 Ne midtavak duen te menge menenagnà haazà is hadì te kineǥiyan he Aramico te, “Mebmeluǥayad is untung nu, Mahal he Hadì! Tudtula nu ziyà te kenami te menge suluǥuen nu is teǥeinep nu, ne idseysey zey ziyà te kenikew is kehuluǥan din.”
DAN 2:5 Piru egkesuatan dutun te hadì he egezaman din sikandan, umbe ke sikandin te, “Nekedisisyun a he emun kenè niw egketagna sikan is teǥeinep ku wey is kehuluǥan din, ibpepemisang ku is menge lawa niw wey ibperundus ku is menge valey niw.
DAN 2:6 Piru emun egketagnè niw sikan is teǥeinep ku wey igkeseysey niw is kehuluǥan kayi, ebeǥayan ku sikiyu te meupiya he menge gasa wey zengeg. Na, tegnaa niw en wey iseysey is kehuluǥan din.”
DAN 2:7 Mid-uman sikandan medtavak te, “Mahal he Hadì, keǥiya nu kenami is teǥeinep nu ne idseysey zey ziyà te kenikew is kehuluǥan din.”
DAN 2:8 Migkaǥi haazà is hadì te, “Netuenan ku he edlanganlangan kew su netuenan niw he siguradu edtumanen ku is migkaǥi ku keniyu,
DAN 2:9 he emun kenè niw egketagnà wey egkeseysey sikan is teǥeinep ku, ne idsilut ku ziyà te keniyu sikan is nekaǥi ku. Neuyun kew he edterteruan a keniyu su edtinguhè kew he mahalin is isip ku. Keǥiya niw en ke hengkey is teǥeinep ku su wey a meketuu he egketuenan niw te edseysey is kehuluǥan kayi.”
DAN 2:10 Midtavak dan haazà is hadì te, “Wazà etew kayi te tivuuk he kelibutan he ebpekehimu keniyan te mibuyù nu. Wey wazà daan hadì, minsan utew pa sikandin mekeǥeǥehem, he nekesuǥù te menge selemengkiru, menge veyilan, etawa menge menenagnà te kebaal te iring keniyan.
DAN 2:11 Utew mereǥen is ebpeveelan nu kenami, Mahal he Hadì. Menge ed-ezapen dà is ebpekehimu keniyan, piru wazè man sikandan med-amur te menge etew.”
DAN 2:12 Tenged dutun te tavak dan, utew nepauk sikan is hadì. Ne mibmandar sikandin he penhimetayi is langun he uluwanen he menge etew ziyà te Babilonia.
DAN 2:13 Hein kedsuǥua zutun te midsuǥù he ebpenhimetayan is menge uluwanen, duen nen-ahà ki Daniel wey zuen te menge zuma zin su wey mehimetayi zaan sikandan.
DAN 2:14 Ne zutun, mid-uvey si Daniel ziyà te ki Arioc he kepitan te menge vantey zuen te hadì. Heini si Arioc iyan midsuǥù duen te hadì te kebpenhimatey te menge uluwanen he menge etew ziyà te Babilonia. Ne mevinentayen si Daniel he mid-insà diyà te kandin ke hengkey is hinungdan kayi te utew meveǥat he suǥù te hadì. Umbe midtudtul ni Arioc diyà te kandin is nehitavù.
DAN 2:16 Ne kegkezineg dutun ni Daniel, midhendiyà sikandin te hadì ne midhangyù he veǥayi sikandin te timpu para ikeseysey zin is kehuluǥan duen te teǥeinep te hadì.
DAN 2:17 Ne mibpezumazuma haazà is hadì, umbe mid-ulì si Daniel ne midtudtulan din sikan is menge zuma zin he si Hanania, si Mishael, wey si Azaria vahin te neulaula.
DAN 2:18 Migkeǥiyan sikandan ni Daniel he mebpengemuyù dan su para mehizuwi sikandan te Megbevayà diyà te langit ne metueni zan is kehuluǥan duen te teǥeinep te hadì, su para kenà sikandan mehimetayi duma te zuma he uluwanen he menge etew ziyà te Babilonia.
DAN 2:19 Dutun he kezukileman impezayag te Megbevayà diyà te ki Daniel sikan is teǥeinep duen te hadì wey is kehuluǥan din pinaaǥi te kebpekelawas. Ne midalig ni Daniel is Megbevayà diyà te langit.
DAN 2:20 Ke sikandin te, “Is Megbevayà metau wey mekeǥeǥehem; edeliǥen tew sikandin te wazà pidtemanan.
DAN 2:21 Iyan sikandin ebpedliliwà te egkengehitavù diyà te menge timpu. Iyan sikandin ebayàbayà ke hentei is egkahadì wey ke hentei is egkaawà te kedhadì. Iyan sikandin mibeǥey te ketau ziyà te uluwanen.
DAN 2:22 Ibpezayag din is mezalem wey ebpemekeeles. Diyà te kandin is kerayag, ne egketuenan din ke hengkey is diyà te merusirem.
DAN 2:23 Umbe, edeliǥen ku wey ebpeselamatan ku sikew, is Megbevayà te menge kepuun ku. Iyan ka mibeǥey kedì te ketau wey kebpekehimu. Ne imbeǥey nu kenami is mibuyù dey ziyà te kenikew pinaaǥi te kebpezeyaǥa nu kenami zuen te teǥeinep te hadì.”
DAN 2:24 Ne zutun midlikù si Daniel ziyà te ki Arioc he iyan kes midseriǥan duen te hadì te kebpenhimatey te uluwanen he menge etew ziyà te Babilonia. Migkaǥi si Daniel ziyà te kandin te, “Kenè nu zep-a penhimetayi is uluwanen he menge etew, kekenà, dumahi a zep-a kenikew ziyà te hadì su idseysey ku ziyà te kandin is kehuluǥan duen te teǥeinep din.”
DAN 2:25 Umbe, migègaanan dumaha ni Arioc si Daniel ziyà te hadì. Migkaǥi si Arioc te, “Mahal he Hadì, duen neehè ku he vinihag puun te Juda he ebpekeseysey ke hengkey is kehuluǥan duen te teǥeinep nu.”
DAN 2:26 Mid-insaan dutun te hadì si Daniel he migngezanan daan te Belteshazar, “Egkekaǥi nu ve kediey ke hengkey is teǥeinep ku wey igkeseysey nu ve is kehuluǥan din?”
DAN 2:27 Midtavak si Daniel te, “Mahal he Hadì, wazà minsan hentei he uluwanen, menge veyilan, selemengkiru, etawa metau he ebpeǥingkuris he ebpekeseysey te teǥeinep nu.
DAN 2:28 Piru zuen Megbevayà diyà te langit he ebpezayag te menge nekeeles he ketutuanan. Mahal he Hadì, pinaaǥi te teǥeinep nu, ibpetuenan te Megbevayà kenikew ke hengkey is huziyan he egkehitavù. Guntaan, idseysey ku kenikew is nelewasan nu pinaaǥi te teǥeinep nu.
DAN 2:29 “Mahal he Hadì, sikan is teǥeinep nu, mehitenged heini te huziyan he egkehitavù, ne ibpetuenan heeyan kenikew te Megbevayà he ebpezayag te menge nekeeles he ketutuanan.
DAN 2:30 Ne sikan is teǥeinep, impezayag te Megbevayà kayi te kedì, kenà tenged te edhuna a he metau te zuma he menge etew, kekenà, para mesavut nu ke hengkey is kehuluǥan te neseled diyà te isip nu pinaaǥi te kedseysey ku.
DAN 2:31 “Is teǥeinep nu ne iyan heini: Duen dekelà he ledawan he neehè nu he nekehitindeg diyà te etuvangan nu. Utew heini ed-ilak-ilak wey mekahandekhandek heini he ed-ahaan.
DAN 2:32 Is ulu kayi, ne pudu vulawan ne pelata is kumeng din wey menge velad din, ne puun te getek pehendiyà te menge vuvun din ne brunsi.
DAN 2:33 Ne putew is menge lisen din, ne is menge paa zin putew wey brik.
DAN 2:34 Ne zutun te kedtengtengi nu zuen te ledawan, duen sevaha he vatu he midtipak, piru kenà etew is midtipak duen. Ne nekezakdak heini he vatu zuen te putew wey brik he menge paa zuen te ledawan, ne nevekvek haazà is menge paa zin.
DAN 2:35 Ne nelaus en mevekbek haazà is tivuuk he ledawan he putew, brik, brunsi, pelata, wey vulawan. Ne neiring heini te ukap te ginunas he ibpenlayap te keramag diyà te minsan hendei. Piru haazà is batu he nekevekbek duen te paa te ledawan, midekelà ne nehimu he vuntud he nekeeneb te tivuuk he kelibutan.
DAN 2:36 “Ne iyan heeyan sikan is teǥeinep nu, ne iyan heini kehuluǥan din:
DAN 2:37 Mahal he Hadì, iyan ka hadì te menge hadì. Iyan midhimu kenikew he hadì is Megbevayà diyà te langit, ne mibeǥayan ke zin te ǥehem, desen, wey zengeg.
DAN 2:38 Mibpeveyveyaan din kenikew is menge etew, menge langgam, menge tagbis, diyà te minsan hendei. Ne iyan ka impetug-iring duen te vulawan he ulu zuen te ledawan.
DAN 2:39 “Is ebpekesunud te kenikew he ginhedian ne meluya te kenikew he ginhedian. Is iketelu he ginhedian ne iyan is impetug-iring te brunsi he kevahin dutun te ledawan, ne egkezizalem te ǥehem kayi he ginhedian is tivuuk he kelibutan.
DAN 2:40 Is ebpeketinundug, iyan is ikeepat he ginhedian he iring te putew. Is putew ebpekevekvek te langun, ne heini he ginhedian, ebpekevekvek te zuma he menge ginhedian.
DAN 2:41 Ne ǥeina te is menge paa zutun te ledawan putew wey brik, ne heini he ginhedian egkevahin. Piru ebpedayun is kelig-en kayi, su neehè nu man he nesahug te putew is menge paa zutun te ledawan.
DAN 2:42 Is putew wey brik he menge tezù te paa, ebpesavut he zuen bahin dutun te ginhedian he melig-en, ne zuen daan bahin he melemu egkezeeti.
DAN 2:43 Is kebpekedsahug duen te putew wey brik, ebpesavut he edsevaha is menge pengulu kayi he ginhedian pinaaǥi te kebpees-eseweey. Piru kenà egkeuǥet is kegkesevaha zan, su iring heini iyan te putew wey brik he kenà egkehimu he ibpedsahug.
DAN 2:44 “Dutun te timpu te kedhadì kayi te menge pengulu, edtukud is Megbevayà diyà te langit te sevaha he ginhedian he kenà egkezeetan te minsan keenu. Ne kenà heini egkezaag te zuma he ginhedian, su edèdeetan din pa ganì is langun he ginhedian ne ebpedayun heini he ginhedian taman te taman.
DAN 2:45 Iring duen te neehè nu he vatu he midtipak puun te vuntud (piru kenà etew is midtipak duen) he nekevekbek duen te ledawan he putew, brunsi, brik, pelata, wey vulawan. “Mahal he Hadì, mibpezayag is mekeǥeǥehem he Megbevayà diyà te kenikew ke hengkey is huziyan he egkehitavù. Ne iyan heeyan kes teǥeinep nu wey kehuluǥan din. Ne tutuu heini is langun he migkaǥi ku.”
DAN 2:46 Ne segugunà midluhud si Hadì Nebucadnezar te kebeǥey te zengeg ki Daniel. Ne kegkepasad dutun ne mibmandar sikandin te kebpemuhat wey kedtutung te veyewà diyà te etuvangan ni Daniel.
DAN 2:47 Migkaǥi sikandin diyà te ki Daniel te, “Tenged te kedtudtula nu zuen te teǥeinep ku wey kedseysaya nu te kehuluǥan din, ne tutuu iyan he is Megbevayà he ed-ezapen nu ne lavew he mekeǥeǥehem te langun he ebpen-ezapen te menge etew. Iyan sikandin ereg he egkilelaan he Egalen te menge hadì. Ne iyan dà sikandin ebpekepezayag te nekeeles he menge ketutuanan.”
DAN 2:48 Ne zutun mibeǥayan duen te hadì si Daniel te mahabet wey mekempet he menge gasa. Wey mibeǥayan din daan sikandin te metikang he ketengdanan su iyan din impezumala te tivuuk he prubinsya te Babilonia wey impepenguluwan kandin is langun he uluwanen he etew zutun.
DAN 2:49 Midhangyù ni Daniel zuen te hadì he himuwa zin si Shadrac, si Meshac, wey si Abednego he menge timbang din te kedumala te prubinsya he Babilonia. Ne midtuǥut haazà is hadì. Ne si Daniel wazà mulà med-awà diyà te turuǥan te hadì.
DAN 3:1 Dutun he timpu, mibpevaal si Nebucadnezar te ledawan he vulawan. Is ketikang din 90 he ǥiek ne 9 he ǥiek is keluag din. Ne hein nepasad en haazà, impehitindeg din diyà te suǥud diyà te Dura diyà te prubinsya he Babilonia.
DAN 3:2 Ne kegkepasad dutun impetawag ni Hadì Nebucadnezar is menge gubirnedur, menge mayur, menge kunsiyal, menge megsesambag, menge trisuriru, menge meghuhukum, menge pengulu, wey zuma pa he menge upisyal ziyà te menge prubinsya su wey zan meketelavuk te kebpehinunguza zuen te ledawan. Ne hein diyè dan en ebpemenhitindeg te etuvangan duen te ledawan,
DAN 3:4 ingkulahì te menunudtulà is lalag he edhenduen te, “Sikiyu is ebpemuun diyà te nekedseselekawà he menge nasyun, menge kepuun, wey menge kineǥiyan,
DAN 3:5 emun egkezineg niw is daǥing te vudyung, pulalà, kutiyapì, alpa, wey zuma pa he menge instrumintu, ne zutun luhud kew he ed-azap duen te ledawan he vulawan he impehitindeg ni Hadì Nebucadnezar.
DAN 3:6 Is minsan hentei he kenà ed-azap, idtimbag diyà te egkiràkirà he rapug.”
DAN 3:7 Umbe, kegkezineǥa zan te zaǥing te menge instrumintu ne midluhud dan is ed-azap duen te ledawan.
DAN 3:8 Dutun he timpu, duen nepipira he menge tig-Babilonia he mid-uvey zuen te hadì ne insumbung dan is menge Judio.
DAN 3:9 Kesikandan diyà te ki Hadì Nebucadnezar te, “Mebmeluǥuyad is untung nu, Mahal he Hadì!
DAN 3:10 Kenè be mibmandù ka he is minsan hentei he ebpekezineg te zaǥing te menge instrumintu kinahanglan he medluhud te ked-azap duen te ledawan he vulawan,
DAN 3:11 ne sikan is kenà ed-azap ne idtimbag diyà te egkiràkirà he rapug?
DAN 3:12 Piru wazà medtuman te suǥù nu is menge Judio he si Shadrac, si Meshac, wey si Abednego he impezumala nu te prubinsya he Babilonia. Wazè dan mebpenilbi te menge ed-ezapen nu, wey wazè dan ezapa sikan is ledawan he vulawan he impehitindeg nu.”
DAN 3:13 Kegkezineǥa zà dutun duen te hadì ne utew sikandin nepauk. Ne impetawag din ensi Shadrac, Meshac, wey Abednego.
DAN 3:14 Ne kebpekeuma zan mid-insaan sikandan duen te hadì te, “Tutuu ve he wazè kew mebpenilbi te menge ed-ezapen ku wey wazà kew med-azap duen te ledawan he vulawan he impehitindeg ku?
DAN 3:15 Guntaan ebmenduan ku sikiyu te ked-azap duen te ledawan emun egkezineg niw is daǥing te menge instrumintu. Su emun kenè kew ed-azap; segugunè ku sikiyu ibpetimbag duen te egkiràkirà he rapug. Ed-ahaan ta ke zuen be ed-ezapen he ebpekelibri keniyu.”
DAN 3:16 Ne midtavak sikandan is tetelu te, “Mahal he Hadì, wazè dey egkekaǥi mehitenged keniyan.
DAN 3:17 Emun iyan heeyan egkehitavù ne edlibriyen key te Megbevayà he edsilbiyan dey keniyan te egkiràkirà he rapug. Edlibriyen key zin para kenè key kenikew mekeizi.
DAN 3:18 Piru emun kenè key zin edlibriyen, egkesuat key he metueni nu he kenè key iyan ebpenilbi te menge ed-ezapen nu wey kenè key ed-azap duen te ledawan he vulawan he impehitindeg nu.”
DAN 3:19 Ne tenged dutun te tavak dan ne utew sikandan nepeuki zuen te hadì, ne egketuusan ta heini ziyà te zagwey zin. Umbe mibmandu sikandin he ibpeiseg pa is keinit duen te rapug te pitu he takep.
DAN 3:20 Ne midsuǥù din is kinemezesenan duen te menge sundaru zin he vekusa zan ensi Shadrac, Meshac wey Abednego, ne itimbag dan diyà te egkiràkirà he rapug.
DAN 3:21 Umbe, mibakus sikandan ne intimbag duen te rapug he zuen pa menge visti zan.
DAN 3:22 Ne ǥeina te mibmandu sikan is hadì he utew ibpemeinit sikan is rapug, ne nemematey haazà is menge sundaru he midtimbag kandan tenged te keinit te sengew te hapuy.
DAN 3:23 Ne haazà is tetelu he menge mibpemakus ne zutun meketanà te egkiràkirà he rapug.
DAN 3:24 Ne zutun te kedtengteng ni Hadì Nebucadnezar, nekeserivantu sikandin te utew zin kegkeinuinu. Nekeinsà sikandin duen te menge upisyal zin te, “Kenè be tetelu zà he etew is mibakus tew he intimbag keniyan te hapuy?” Midtavak dan te, “Uya, Mahal he Hadì.”
DAN 3:25 Ne migkaǥi haazà is hadì te, “Ahàa niw man! Heepat is neehè ku he edhiphipanew keniyan te hapuy. Kenè en sikandan binakus ne wazà sikandan memenu. Is sevaha kandan henduen be te ed-ezapen.”
DAN 3:26 Umbe, mid-uvey si Nebucadnezar ziyà te pultahan duen te egkiràkirà he rapug is nengumew te, “Shadrac, Meshac, wey Abednego he menge suluǥuen te Utew Lavew he Megbevayà, gawas kew keniyan!” Ne migawas sikandan is tetelu.
DAN 3:27 Ne zutun mid-amur-amur ziyà te kandan is menge gubirnedur, menge mayur, menge kunsiyal, wey zuma pa he menge upisyal te hadì. Ne neehè dan he wazà sikandan memenu te hapuy. Minsan is bulvul zan wey kumbalè dan ne wazà metutung, ne minsan is ngazeg te evel ziyà te kandan ne wazà.
DAN 3:28 Ne tenged dutun migkaǥi haazà is hadì te, “Edeliǥen is Megbevayà eni Shadrac, Meshac, wey Abednego. Midsuǥù din is belinsuǥuen din te kedlibri kandan te menge suluǥuen din he midsarig diyà te kandin. Heini sikandan wazà medsunud te suǥù ku te ked-azap duen te ledawan, kekenà, midtumù dan he idtimbag sikandan diyà te hapuy su para kenà sikandan mekaazap te minsan hentei he ed-ezapen he kenà iyan is kandan he Megbevayà.
DAN 3:29 Umbe, ebmandù a he is minsan hentei he etew ziyà te minsan hendei he nasyun, minsan hengkey he kelasi te etew, minsan hengkey he kineǥiyan he emun duen egkaǥi te lalag he ebpekekuntada te Megbevayà eni Shadrac, Meshac, wey Abednego ne ebpemisangen wey edrundusen is baley zin. Su wazè en duma he Megbevayà he ebpekehimu he edlibri te iring kayi he paaǥi.”
DAN 3:30 Ne mibeǥayan dutun te hadì ensi Shadrac, Meshac, wey Abednego te edhuna he metikang duen te nehuna he ketengdanan dan dutun te prubinsya he Babilonia.
DAN 4:1 Midsurat si Hadì Nebucadnezar te pahayag he para te langun he nekedseselekawà he menge nasyun, menge kepuun, wey menge kineǥiyan kayi te kelibutan. Ne iyan heini ingkesurat: “Berakat he mebmeupiya is kebpekesavuk niw.
DAN 4:2 “Egkesuatan ku te edtudtul ziyà te keniyu is menge singyal wey menge egkein-inuwan he menge vaal he mibeelan te Utew Lavew he Megbevayà kayi te kediey.
DAN 4:3 Utew igkeinuinu wey utew mekeǥeǥehem is egkengein-inuwan he impaahà te Megbevayà! Is kedhadì din ne wazà pidtemanan.
DAN 4:4 “Emun bahin te kebpekesavuk ku kayi te turuǥan, ne meupiya wey meuswaǥen a.
DAN 4:5 Piru zuen ku teǥeinep he ingkahandek ku wey ingkesemuki ku.
DAN 4:6 Umbe, mibmandù a he zumaha kayi te kediey is langun he memetau kayi te Babilonia su para meseysey zan kayi te kedì is kehuluǥan kayi te teǥeinep ku.
DAN 4:7 Kebpekeuma te menge selemengkiru, menge veyilan, menge menenagnà, wey menge mengingingkuris, ne midtudtul ku ziyà te kandan is teǥeinep ku, piru kenè dan igkeseysey kayi te kedì is kehuluǥan din.
DAN 4:8 “Dutun te huziyan he timpu, midhendiyà si Daniel te kedì. (Migngezanan sikandin te Belteshazar he iyan ngazan te ed-ezapen ku. Ne ziyà te kandin is mulin-ulin te waǥas he menge ed-ezapen.) Midtudtul ku kandin is teǥeinep ku.
DAN 4:9 Ke siak te, ‘Belteshazar, he pengulu te menge selemengkiru, netuenan ku he is mulin-ulin te menge ed-ezapen, ne ziyà te kenikew, ne melemu nu zà egketueni is nekeeles he menge ketutuanan. Iseysey nu kediey is kehuluǥan te menge nelewasan ku ziyà te teǥeinep ku.
DAN 4:10 Iyan heini nelewasan ku hein midlipezeng a: Neehè ku is utew metawis he kayu ziyà te teliwazà te kelibutan.
DAN 4:11 Ne mid-iseg pa heini medekelà wey mebmetawis taman te nekeuma ziyà te langit ne egkaahà heini te tivuuk he menusiyà.
DAN 4:12 Mekempet is menge zahun din wey mahabet is menge veǥas din ne minsan egkaan kayi is langun ne ereg heini. Midhelung kayi is menge langgam wey midsesalag is tagbis diyà te menge subpang din. Ne zutun egkuwa is langun he linimbag te egkekaan dan.’
DAN 4:13 “Ne neehè ku zaan is sevaha he velinsuǥuen he nenaug he ebpuun te langit.
DAN 4:14 Ne ingkulahì din is lalag he edhenduen te, ‘Pilaya niw heeyan is kayu ne penempeza niw is menge subpang din. Pen-ewaa niw is menge zahun din wey ipenimbag niw is menge veǥas din. Buǥawa niw is menge langgam he nemenhelung duen wey is menge tagbis he nenesalag diyà te menge subpang din.
DAN 4:15 Piru vey-ani niw en is tued din diyà te vevesukà he nevedbed te putew wey brunsi.’ “Is etew he impetug-iring duen te kayu, ne layun egkahames te zehemug ne ebpenabtab sikandin te sagbet duma te menge langgam.
DAN 4:16 Ne seled te pitu he tuig ne egkaawà diyà te kandin is isip te etew, ne is isip din egkehimu he isip te langgam.
DAN 4:17 Iyan heini hukum he migkaǥi te menge velinsuǥuen su para metueni te langun he is Utew Lavew he Megbevayà, duen din gehem diyà te menge ginhedian te menge etew. Ne egkehimu ke edhimuwen din sikandan he sakup te minsan hentei he egkesuatan din he mehimu he egalen, minsan pa ke haazà is etew iyan en kineminusan te langun he menge etew.
DAN 4:18 “Ne iyan haazà, Belteshazar teǥeinep ku. Umbe, siak si Hadì Nebucadnezar, egkeǥiyen ku kenikew te, ‘Iseysey nu kedì is kehuluǥan kayi su wazà minsan sevaha zuen te menge uluwanen kayi te ginhedian ku he ebpekeseysey te kehuluǥan kayi. Piru igkeseysey nu mulà heini su ziyà te kenikew is mulin-ulin te waǥas he menge ed-ezapen.’ ”
DAN 4:19 Neipeng wey nahandek si Daniel (he egngenazan daan te Belteshazar) te kegkezineǥa zin dutun te lalag te hadì. Umbe migkeǥiyan sikandin dutun te hadì te, “Belteshazar, kenè ka meipeng tenged te teǥeinep ku wey kehuluǥan din.” Ne midtavak si Belteshazar te, “Mahal he Hadì, meupiya pezem ke is teǥeinep nu wey is kehuluǥen din, ne ziyà egkehitavù te menge kuntada nu ne kenà diyà te kenikew.
DAN 4:20 Is kayu he neehè nu he midekelà wey mibmelayat he nekesungkul ziyà te langit, egkaahà haazà diyà te minsan hendei kayi te kelibutan.
DAN 4:21 Mekempet is menge zahun din wey mezakel is menge veǥas din ne egkekeenan duen is langun. Midhelung dutun is menge langgam wey midseselaǥan te menge tagbis is menge subpang din.
DAN 4:22 Mahal he Hadì, iyan ka haazà is kayu. Su nehimu ka he mekeǥeǥehem ne iring te nekeume en diyà te langit is kegkemekeǥeǥehem nu, ne is kedhadì nu nekeuma ziyà te minsan hendei kayi te kelibutan.”
DAN 4:23 Ne mibpedayun megkaǥi si Daniel te, “Ne elin neehè nu, Mahal he Hadì, is sevaha he velinsuǥuen he mibpenaug he ebpuun te langit he ingkulahì din is lalag he edhenduen te, ‘Pilaya niw heeyan is kayu piru vey-ani niw en is tued din diyà te vevesukà he nevedbed te putew wey brunsi. Ne is etew he impetug-iring kayi he kayu ne layun egkahames te zehemug wey ebpenabtab duma te menge leew he langgam seled te pitu he tuig.’
DAN 4:24 “Mahal he Hadì, iyan heini kes kehuluǥan te neehè nu he ibpesavut te Utew Lavew he Megbevayà is egkehitavù diyà te kenikew:
DAN 4:25 Edsegseǥen ka pehendiyà te meziyù te menge etew ne ed-amur ka te leew he menge langgam. Ne egkeiring ka te vaka su ebpenabtab ka te sagbet wey layun ka egkahames te zehemug. Ne kegketapus te pitu he tuig, ne egkilelaan nu he is Utew Lavew he Megbevayà, duen din gehem diyà te menge ginhedian te menge etew ne egkehimu ke edhimuwen din sikandan he sakup te minsan hentei he egkesuatan din he mehimu he egalen dan.
DAN 4:26 Ne vahin duen te migkaǥi te velinsuǥuen he ebey-anan is tued, ebpesavut haazà he idlikù diyà te kenikew is ginhedian nu emun egkilelaan nu he iyan is Megbevayà edhadì te langun.
DAN 4:27 Umbe, deyzey ke edewaten nu is sambag ku kenikew, Mahal he Hadì: Engked ka he ebaal te salà ne metazeng is beeli nu wey kehizuwi nu is menge pubri. Emun ebeelan nu heeyan ne kela ke ebmeuswaǥen ka ǥihapun.”
DAN 4:28 Is langun kayi neulaula ziyà te ki Hadì Nebucadnezar.
DAN 4:29 Su kedlavey te senge-tuig puun te kedseysaya ni Daniel te kehuluǥan duen te teǥeinep, ne iyan heini nehitavù: Edhihipanew si Hadì Nebucadnezar ziyà te patag he atep te turuǥan din diyà te Babilonia
DAN 4:30 ke sikandin te, “Utew mekeǥeǥehem is Babilonia he midhimu ku he lavew he inged pinaaǥi te kediey he sigudu wey para te ventuǥan ku.”
DAN 4:31 Ne te wazè pa sikandin mekepasad he egkaǥi, duen laǥeng he ebpuun diyà te langit he edhenduen te, “Hadì Nebucadnezar, pemineǥa nu heini: Midhawì en diyà te kenikew is keǥehem nu te kedhadì.
DAN 4:32 Edsegseǥen ka pehendiyà te meziyù te menge etew ne ed-amur ka te leew he menge langgam. Ne egkeiring ka te vaka su ebpenabtab ka te sagbet. Ne kegketapus te pitu he tuig, egkilelaan nu he is Utew Lavew he Megbevayà, duen din gehem diyà te menge ginhedian te menge etew ne egkehimu ke edhimuwen din sikandan he sakup te minsan hentei he egkesuatan din he mehimu he egalen dan.”
DAN 4:33 Ne segugunà, heini neulaula ziyà te ki Nebucadnezar. Midsegseg sikandin pehendiyà te meziyù te menge etew ne nenabtab sikandin te sagbet iring te vaka. Ne layun sikandin egkahames te zehemug, wey mibmelayat is bulvul zin he iring en te vulvul te kulaǥu ne is sulu zin iring te sulu te tagbis.
DAN 4:34 “Ne kegketapus te pitu he tuig, ne siak, si Nebucadnezar, midangep a ziyà te Megbevayà, ne zutun midlikù is meupiya he ked-isip-isip ku. Umbe midalig ku wey mibeǥayan ku te zengeg is Utew Lavew he Megbevayà he uuyag te wazà pidtemanan. Migkaǥi a te, ‘Is kedhadì din ne wazà pidtemanan.
DAN 4:35 Kenè en ebpekesusuluwan is menge etew kayi te kelibutan emun idhindeg kandin. Ebeelan din is egkesuatan din diyà te menge velinsuǥuen diyà te langit wey ziyà te menge etew kayi te tanà. Wazà ebpekeeǥen wey ebpekevelavag kandin.’
DAN 4:36 “Ne hein midlikù en kayi te kediey is meupiya he ked-isip-isip ne inlikù daan kayi te kediey is dengeg wey ventuǥan te hadì. Midawat e en maan duen te menge upisyal ku wey menge megsesambag ku, ne edhunè a pa he mekeǥeǥehem kenà duen te nehuna he kedhadì ku.
DAN 4:37 Umbe, ǥuntaan edeliǥen ku wey ebeǥayan ku te zengeg is hadì diyà te langit, su hustu wey metazeng is langun he menge vaal zin ne ibpekevavè din is minsan hentei he ebpelavew.”
DAN 5:1 Hein si Belshazar is hadì diyà te Babilonia, midhimu sikandin te zekelà he keemuran he para te nengkelibu he lavew he menge etew zin. Ne hein ed-iinum sikandan te vinu, impekuwa ni Belshazar is bulawan wey pelata he inumà he nekuwa te amey zin he si Nebucadnezar ziyà te valey te Megbevayà diyà te Jerusalem. Impekuwa zin heini su para te ed-inuman dan duma te menge meǥeliyug din he memetikang is ked-etew, menge esawa zin he lavew, wey is menge esawa zin he kenè lavew. Umbe hein mid-uwit en diyà te kandin haazà is menge inumà ne iyan heini mid-inuman dan.
DAN 5:4 Ne zutun te ked-iinum dan te vinu, midalig dan is menge ledawan he ed-ezapen he vulawan, pelata, brunsi, putew, kayu, wey vatu.
DAN 5:5 Dutun he timpu, nekaahà haazà is hadì te velad he edsurat diyà te elavat duen te turuǥan he nekeuvey te sulù.
DAN 5:6 Ne tenged dutun mibpengerker wey mibmemeluntak haazà is hadì te kegkahandek din.
DAN 5:7 Umbe, nekepengulahì sikandin is edsuǥù he umawa is uluwanen he menge etew ziyà te Babilonia: is menge selemengkiru, menge menenagnà, wey menge mengingingkuris. Ne kebpekeuma zan, migkaǥi sikandin diyà te kandan te, “Is minsan hentei he ebpekevasa te nekesurat keniyan te elavat wey ebpekeseysey te kehuluǥan din, ne ebpevistiyan ku te visti te hadì wey ebpevelieǥan ku te vulawan. Ne egkehimu sikandin he iketelu te kinelevawan he menge upisyal te ginhedian ku.”
DAN 5:8 Ne mid-uvey haazà is uluwanen he menge etew su ebesahan dan haazà is nekesurat duen te elavat. Iyan, kenè dan egkevasa wey egkeseysey is kehuluǥan dutun, dutun te hadì.
DAN 5:9 Umbe, mid-iseg is kegkeherati wey kebmemeluntak ni Hadì Belshazar. Ne neliveg daan haazà is lavew he menge etew zin.
DAN 5:10 Ne zutun te nezineg duen te rayna is keǥurub dan, ne mid-uvey sikandin diyà te kandan is egkaǥi te, “Mebmeluǥuyad is untung nu, Mahal he Hadì! Kenè ka mahandek wey meipeng,
DAN 5:11 su zuen sevaha he etew kayi te ginhedian nu he ziyà te kandin is mulin-ulin te waǥas he menge ed-ezapen. Te timpu te kedhadì te amey nu he si Hadì Nebucadnezar, impaahà kayi he etew is ketau zin he iring te ketau te menge ed-ezapen. Midhimu sikandin te amey nu he pengulu te menge selemengkiru, menge veyilan, menge menenagnà, wey menge mengingingkuris.
DAN 5:12 Iyan sikandin si Daniel he migngezanan te amey nu ki Belteshazar. Duen din nekeviza he ebilidad wey ketau. Metau sikandin he edseysey te kehuluǥan te menge teǥeinep, edtagnà te ereg he edtegnaan, wey edsulbar te prublima he mereǥen he edsulbaren. Umbe, ipetawag nu sikandin ne ipeseysey nu kandin is kehuluǥan te nekesurat keniyan te elavat.
DAN 5:13 Umbe, impetawag si Daniel. Ne hein nekeume en sikandin, migkaǥi haazà is hadì te, “Iyan ke ve si Daniel he sevaha zuen te menge vihag he Judio he mid-uwit kayi te amey ku puun te Juda?
DAN 5:14 Netudtulan a he ziyà te kenikew is mulin-ulin te menge ed-ezapen ne zuen nu nekeviza he abilidad wey ketau.
DAN 5:15 Impetawag ku is menge uluwanen, ragkes en is menge veyilan su ibpevasa ku wey ibpeseysey ku kandan is kehuluǥan te nekesurat keniyan te elavat, iyan, kenè dan egketuenan.
DAN 5:16 Piru netudtulan a he metau ka mulà he edseysey te kehuluǥan, wey metau ka he edsulbar te mereǥen he menge prublima. Guntaan, emun egkevasa nu wey egkeseysey nu is kehuluǥan keniyan te nekesurat, ebpevistiyan ku sikew te visti te hadì wey ebpevelieǥan ku sikew te vulawan. Ne edhimuwen ku pa sikew he iketelu zuen te kinelevawan he menge upisyal kayi te ginhedian ku.”
DAN 5:17 Midtavak si Daniel te, “Wazà a medtinguhà keniyan he menge gasa, Mahal he Hadì, egkehimu ke ziyè nu ibeǥey te zuma. Piru ebesahan ku ǥihapun kenikew is ingkesurat keniyan te elavat wey idseysey ku is kehuluǥan din.
DAN 5:18 “Mahal he Hadì, ketau te Utew Lavew he Megbevayà is kegkehimu he hadì te amey nu he si Nebucadnezar. Nehimu sikandin he mekeǥeǥehem wey mibeǥayan te menge etew te zengeg.
DAN 5:19 Ne tenged te gehem he imbeǥey kandin te Megbevayà, igkikinehendekà sikandin te menge etew ziyà te nekedseselekawà he menge nasyun, menge kepuun, wey menge kineǥiyan. Egkehimu zin te edhimatey is minsan hentei he egkesuatan din te edhimatey. Ne egkehimu zin daan he kenà mehimetayi is minsan hentei he egkesuatan din he kenà mehimetayi. Igkepeketikang din is ketengdanan te etew he egkesuatan din te ebpeketikang; ne ibpekemevavè din is ketengdanan te etew he egkesuatan din te ebpekevavà.
DAN 5:20 Piru geina te mebpagalbu wey mibpelavew sikandin, impaawà sikandin te kegkahadì
DAN 5:21 ne midsegseg sikandin pehendiyà te meziyù te menge etew. Ne nehimu is isip din he iring te isip te langgam. Mid-ubpà sikandin duma te leew he menge asnu ne nenabtab sikandin te sagbet iring te vaka. Wey layun egkahames is lawa zin te zehemug. Iyan haazà kebpekesavuk din taman te migkilala zin he is Utew Lavew he Megbevayà, duen din keǥehem diyà te menge ginhedian te menge etew ne egkehimu ke edhimuwen din sikandan he sakup te minsan hentei he egkesuatan din he mehimu he egalen dan.
DAN 5:22 “Ne sikew, Hadì Belshazar is anak din, minsan pa te netuenan nu heini is langun, ne mibpelavew ka gihapun,
DAN 5:23 mid-isip nu he lavew ka te Nengazen diyà te langit. Impekuwa nu is menge inumà he puun diyà te valey te Megbevayà ne mid-inuman nu heini zuma te menge meǥeliyug nu he memetikang is ked-etew, menge esawa nu he lavew, wey is menge esawa nu he kenè lavew. Ne liyu keniyan, mid-azap nu is menge ledawan he ed-ezapen he pelata, bulawan, brunsi, putew, kayu, wey vatu–menge ed-ezapen he kenà ebpekaahà, kenà ebpekezineg, wey kenà ebpekesavut. Piru wazè nu mulà deliǥa is Megbevayà he iyan migawed te untung nu wey iyan ebayàbayà ke hengkey is egketemanan nu.
DAN 5:24 Umbe kandin he ketau heeyan is belad para ikesurat din heini he menge lalag: “Mini, Mini, Tekel, Parsin.
DAN 5:26 Ne iyan heini kehuluǥan dan: Is Mini, iyan kehuluǥan din is mibilang en te Megbevayà is nesamà he menge andew te kedhadì nu, su edtepusen din en heini.
DAN 5:27 Is Tekel, iyan kehuluǥan din is midtimbang ka te Megbevayà ne netuenan din he kurang ka.
DAN 5:28 Is Parsin, iyan kehuluǥan din is egkevahin is ginhedian nu ne imbeǥey ziyà te Media wey Persia.”
DAN 5:29 Ne kebpekepasad ni Daniel te kegkaǥi, ne mibmandù si Belshazar he vistiyi si Daniel te visti te hadì wey velieǥi te velieg he vulawan. Ne midhimu si Daniel he iketelu te kinelevawan he menge upisyal te ginhedian diyà te Babilonia.
DAN 5:30 Dutun dà he kezukileman, midhimetayan si Belshazar is hadì te menge tig-Babilonia.
DAN 5:31 Is mid-ilis kandin te kedhadì ne iyan si Darius he Midianhen, he 62 he tuig is keǥurang din dutun he timpu.
DAN 6:1 Dutun, mibpilì si Hadì Darius te 120 he gubirnedur he para edumala te tivuuk he ginhedian din.
DAN 6:2 Heini he menge gubirnedur, ne iyan edlitu edumala kandan is tetelu he administradur, ne is sevaha kandan ne iyan si Daniel. Mibeelan heini su para kenà mereǥeni haazà is hadì te kedumala.
DAN 6:3 Ne si Daniel, iyan edhuna kandan te langun su geina te nekeviza is kandin he ebilidad, umbe mibpelanu sikan is hadì he ibpezumala zin si Daniel te tivuuk he ginhedian din.
DAN 6:4 Ne tenged dutun nesina sikan is dezuwa he zuma zin he menge administradur wey is menge gubirnedur ne mibpekeventayan dan si Daniel su wey zan maahà is sayep din te kedumala zin su wey zan sikandin ikesumbung. Piru wazà egkeehè dan he sayep su egkeseriǥan si Daniel ne meupiya is kedumala zin.
DAN 6:5 Umbe, migkaǥi sikandin te, “Wazà sayep din he tenged dutun egkehimu he idsumbung tew sikandin, gawas ke iyan tew edhimuwen he sayep din is kedsunud din te kesuǥuan te Megbevayè din.”
DAN 6:6 Umbe, midhendiyà sikandan te hadì he ke sikandan te, “Mebmeluǥayad is untung nu, Mahal he Hadì!
DAN 6:7 Sikami is menge administradur, menge mayur, menge gubirnedur, menge sumesambag, wey zuma he menge upisyal te ginhedian nu, neuyun key he edhengyuan dey sikew he vaal ka te velaud, he seled te 30 he andew kinahanglan he wazà minsan hentei he ebpengemuyù diyà te minsan hentei he ed-ezapen etawa etew, kekenà, diyè dà te kenikew. Ne utew kinahanglan he edtumanen heini, su is minsan hentei he kenà kayi edtuman he suǥù ne idtimbag diyà te vudsi he zuen duen menge erimaung.
DAN 6:8 Umbe, Mahal he Hadì, ibpetuman heini he suǥù. Ipesurat nu en heini ne segugunè nu pirmahi su para kenè en mahalin wey kenè en meveyveyani; iiring nu te kesuǥuan te ginhedian te Media wey Persia he kinahanglan utew he edtumanen.”
DAN 6:9 Ne mid-uyun dutun si Hadì Darius, umbe mibpirmahan din haazà he kesuǥuan.
DAN 6:10 Ne hein netuenan ni Daniel he mibpirma haazà is hadì, ne mid-ulì sikandin. Ne ziyà te zivavew he ruǥu te valey ni Daniel ne zuen dutun menge sulawà he ebpekesinaru ziyà te Jerusalem. Ne zutun sikandin renged is edluhud wey ebpengemuyù diyà te Megbevayè din te ketetelu kada andew, su iyan haazà layun din ebeeli.
DAN 6:11 Iyan, mibenteyanan sikandin duen te menge upisyal he ebpekigkuntada kandin, ne neehè dan sikandin is ed-ampù wey ebuyù te tavang diyà te Megbevayè din.
DAN 6:12 Umbe, midhendiyà sikandan te hadì su edtudtulen dan is kedsupak ni Daniel zuen te kesuǥuan. Migkeǥiyan dan haazà is hadì te, “Mahal he Hadì, kenè be mibpirma ka te velaud he seled te 30 he andew kinahanglan he wazà ed-ampù diyà te minsan hentei he ed-ezapen etawa etew, kekenà, diyè dà te kenikew? Ne minsan hentei is edsupak dutun, ne id-ulug diyà te vudsi he zuen duen menge erimaung?” Ne midtavak haazà is hadì te, “Benar heeyan, ne sumalà is kesuǥuan kayi te ginhedian tew he Media wey Persia, ne kenè en heeyan egkehimu he edhelinen etawa ed-ewaan.”
DAN 6:13 Ne migkeǥiyan dan haazà is hadì te, “Si Daniel he sevaha zuen te menge vihag puun te Juda, wazà medtuman te suǥù nu. Ed-ampù sikandin diyà te Megbevayè din te ketetelu kada andew.”
DAN 6:14 Ne utew ingkeseeng dutun te hadì is kegkezineǥa zin kayi. Ne egkesuatan din te edtavang si Daniel. Umbe nehepunan is kebpen-ehè din te paaǥi para melibri si Daniel.
DAN 6:15 Ne mid-uman medtiǥum sikan is menge upisyal te hadì, ne ke sikandan te, “Mahal he Hadì, netuenan nu, he sumalà te kesuǥuan kayi te ginhedian tew he Media wey Persia, is belaud he edhimuwen te hadì ne kenè en egkehimu he edhelinen.”
DAN 6:16 Umbe, impezakep dutun te hadì si Daniel ne impeulug din diyà te vudsi he zuen duen menge erimaung. Migkaǥi haazà is hadì diyà te ki Daniel te, “Berakat he libriya ka te Megbevayè nu he kenè nu ed-engkezan te edsilbi.”
DAN 6:17 Ne zutun midtengevan te zekelà he vatu sikan is budsi he mid-uluǥan ki Daniel, ne inmarka te hadì is sising din duen te vatu wey is menge sising te lavew he menge etew zin su para wazà ebpuwas kayi.
DAN 6:18 Ne mid-ulì si Hadì Darius diyà te turuǥan din. Wazà sikandin megkaan dutun he kezukileman wey wazè en sikandin mebpehimu te kelingawan he iyan pezem neleyaman din. Ne wazà sikandin mekelipezeng.
DAN 6:19 Ne kegkepawà, utew pa meselem migaanggaan en sikan is hadì medhendutun te vudsi he zuen duen menge erimaung.
DAN 6:20 Ne kebpekeuma zin, ebpenliliǥayan sikandin is ebpengumew he ke sikandin te, “Daniel, suluǥuen ka te uuyag he Megbevayà, wazè be mekekaid kenikew is menge erimaung tenged te kedlibriya kenikew te Megbevayè nu he kenè nu ed-engkezan te edsilbi?”
DAN 6:21 Ne midtavak si Daniel te, “Mebmeluǥayad is untung nu, Mahal he Hadì!
DAN 6:22 Wazà a menuwa te menge erimaung su midsuǥù te Megbevayè ku is menge velinsuǥuen din, ne midsabpeng dan is bèbà te menge erimaung. Mibeelan heini te Megbevayà su netuenan din he lumpiyu a wey wazà mezaat he neveelan ku ziyà te kenikew.”
DAN 6:23 Ne kegkezineǥa zutun duen te hadì, utew sikandin nelipey ne zuen midsuǥù din te kegkuwa ki Daniel zutun te vudsi. Ne hein nekeǥawas en si Daniel ne wazà minsan deisey he palì etawa rudrud he neehè dan diyà te lawa zin, su geina te midsarig sikandin te Megbevayà.
DAN 6:24 Ne zutun mibmandù haazà is hadì, he is langun he midsumbung ki Daniel ne id-ulug dutun te vudsi he zuen duen menge erimaung ragkes is menge esawa zan wey menge anak dan. Ne hein in-ulug en sikandan, ne wazè pe ganì sikandan meketanà ne midlingketawan en duen te menge erimaung ne mibpitaspitas duen te menge erimaung sikandan.
DAN 6:25 Ne mibpesuratan ni Hadì Darius is langun he menge etew ziyà te nekedseselekawà he menge nasyun, menge kepuun, wey menge kineǥiyan kayi te kelibutan. Ne iyan heini insurat din: “Berakat he meupiya is kebpekesavuk niw.
DAN 6:26 “Ebmandù a, he is langun he menge etew he sakup te ginhedian ku, kehendeki zan wey tehuza zan is Megbevayà ni Daniel. Su iyan sikandin uuyag he Megbevayà ne wazà pidtemanan te untung din. Ebpedayun is kedhadì din te minsan keenu. Ne wazà ebpekezezaat kayi.
DAN 6:27 Edlibri sikandin wey ebaal te menge singyal wey menge egkein-inuwan he menge vaal ziyà te langit wey kayi te tanà. Midlibri zin si Daniel te kegkaid te menge erimaung.”
DAN 6:28 Mibmeuswaǥen si Daniel zutun te kedhadì ni Darius wey ni Cyrus he Pirsyahanen.
DAN 7:1 Duen te nehuna he tuig te kedhadì ni Belshazar ziyà te Babilonia, duen nelewasan ni Daniel ziyà te teǥeinep din. Iyan heini teǥeinep din he insurat din:
DAN 7:2 Sengekezukileman, nelewasan ku is meluag he zaǥat he egkeremaǥen te mevandes he keramag he nekedseselekawà is ebpuunan din.
DAN 7:3 Ne midlepew zutun te wahig is heepat he menge langgam he nekedseselekawà is dagwey zan.
DAN 7:4 Is nehuna he langgam, ne henduen be te erimaung, piru zuen din pakpak he pakpak te kulaǥu. Ne zutun te kedtengteng ku, midtamped is pakpak din. Ne impehitindeg sikandin iring te etew ne mibeǥayan te isip he iring te isip te etew.
DAN 7:5 Is ikezuwa he langgam ne henduen be te bir. Midhitindeg heini pinaaǥi te huziyanan he menge paa zin, ne ebangà heini te tetelu he ǥusuk he nekepetug-elang diyà te menge ngipen din, ne zuen lalag he edhenduen te, “Hala! Purung ka pekahantey te usa.”
DAN 7:6 Ne neehè ku is iketelu he langgam he henduen be te liyupardu. Duen heepat he pakpak din diyà te peka zin he iring te pakpak te tagbis wey heepat is ulu zin. Ne mibeǥayan sikandin te keǥehem te kedumala.
DAN 7:7 Dutun daan he kezukileman, nelewasan ku is ikeepat he langgam. Mekahandekhandek heini he ed-ahaan wey utew mezesen. Duen dezekelà is menge ngipen din he putew. Egkeǥaten din wey egkeenen din is egkekeizan din, ne emun duen din samà edrunteken din heini. Nekeviza sikandin duen te tetelu he menge langgam, wey zuen sepulù he sungey zin.
DAN 7:8 Ne zutun te kedtengtengi ku zuen te menge sungey, neehè ku he zuen neketik-ew meketuvù he zeisek he sungey ne nerupù din sikan is tetelu he menge sungey. Heini he sungey, duen din mata he henduen be te mata te etew wey zuen din bèbà he ebpegalbu.
DAN 7:9 Ne neehè ku he zuen impemelastar he menge pinuuwà te edhadì, ne is Megbevayà he uuyag puun pa te nehuna, mibpinuu ziyà te kandin he pinuuwà te kedhadì. Ebpengenamag is bisti zin wey vulvul zin te keputi. Edriyubriyub is pinuuwè din he zuen din menge ligid.
DAN 7:10 Puun diyà te etuvangan din duen hapuy he edtudà. Edliblibuwen is kahabet te menge velinsuǥuen he ebpenilbi kandin. Andam en sikandin he edhukum, umbe, mibekar en is menge libru he ebpesikazan din te kedhukum din.
DAN 7:11 Edsigudu ad edtengteng hein ebpehambug sikan is sungey taman te neehè ku he midhimetayan sikan is ikeepat he langgam. Ne intimbag haazà diyà te hapuy ne netutung is lawa zin.
DAN 7:12 Ne sikan is nesamà he tetelu he langgam midhawì diyà te kandan is keǥehem dan piru intuǥut kandan is kegkeuyag-uyag seled te mevavà he timpu.
DAN 7:13 Ne zutun neehè ku zaan is henduen be te etew he neliǥuyan te ǥapun. Mid-uvey sikandin diyà te Megbevayà he uuyag puun pa te nehuna.
DAN 7:14 Mibeǥayan sikandin te zengeg wey keǥehem te kedhadì, ne ebpenilbi kandin is langun he menge etew ziyà te nekedseselekawà he menge nasyun, menge kepuun, wey menge kineǥiyan. Ne ebpedayun is kedhadì din te wazà pidtemanan ne wazà ebpekezezaat kayi.
DAN 7:15 Ne nesemukan a he ed-isip-isip dutun te neehè ku.
DAN 7:16 Umbe, mid-uvey a ziyà te sevaha te ebpemenhitindeg dutun ne mid-insaan ku ke hengkey is kehuluǥan duen te neehè ku.
DAN 7:17 Ne ke sikandin te, “Sikan is heepat he langgam iyan kehuluǥan dan is heepat he hadì he edhadì kayi te kelibutan.
DAN 7:18 Piru iyan ebeǥayan te utew Lavew he Megbevayà te keǥehem te kedhadì he ebpedayun te wazà pidtemanan, is menge etew he midhimu zin he waǥas.”
DAN 7:19 Ne mid-insaan ku pa sikandin ke hengkey is kehuluǥan duen te ikeepat he langgam he nekeviza zuen te tetelu he langgam. Mekahandekhandek haazà he ed-ahaan, wey putew is menge ngipen din ne brunsi is menge sulu zin. Ne egkeǥaten din wey egkeenen din is egkekeizan din, ne emun duen din pa egkesamà ne edrunteken din.
DAN 7:20 Ne mid-insaan ku zaan sikandin ke hengkey is kehuluǥan duen te sepulù he sungey zuen te ikeepat he langgam wey sikan is sevaha he sungey he midlepew he nekerupù duen te tetelu he sungey. Heini he sungey, zuen din menge mata wey vèbà ne ebpegalbu. Ne emun ed-ahaan ta, ne edhuna haazà he mekeǥeǥehem duen te zuma he menge sungey.
DAN 7:21 Neehè ku heini he sungey he mibpekidtebek te menge ǥaked te Megbevayà, ne nekezaag sikandin.
DAN 7:22 Ne nekeuma sikan is uuyag puun pa te puunà, he iyan kes Utew Lavew he Megbevayà, ne midhukum sikandin pebur te menge etew he ǥaked din. Ne neuma is timpu te kedhadì te menge ǥaked te Megbevayà.
DAN 7:23 Ne iyan heini inseysey zin kayi te kedì: Is ikeepat he langgam, iyan is ikeepat he ginhedian kayi te kelibutan he nekeviza te zuma he menge ginhedian. Edsurungen din wey edèdeetan din is menge etew kayi te tivuuk he kelibutan.
DAN 7:24 Is sepulù he sungey, iyan is sepulù he hadì he edhadì dutun te ikeepet he ginhedian. Ne ebpekeilis kandan is sevaha he hadì he nekeviza kandan, ne egkezaag din sikan is tetelu he hadì.
DAN 7:25 Ebpengaǥi sikandin te menge lalag he idsupak din te Utew Lavew he Megbevayà, ne ebpurungan din edlisliseza is menge etew he ǥaked te Megbevayà. Ebpeninguhà sikandin he mahalin is menge pista zan wey Kesuǥuan dan. Ne idtuǥut kandin he mesakup din is menge etew he ǥaked te Megbevayà seled te tetelu he tuig wey tengà.
DAN 7:26 Piru emun egketapus en haazà, edhukuman sikandin, ne id-awa diyà te kandin is gehem din, ne wazè en kurang te kedèdeeti kandin.
DAN 7:27 Ne zutun ibeǥey ziyà te menge etew he ǥaked te Utew Lavew he Megbevayà is kedumala wey keǥehem diyà te menge ginhedian kayi te tivuuk he kelibutan. Ne edhadì sikandan te wazà pidtemanan, is langun he menge ginhedian ebpenilbi wey ebpezumazuma kandin.
DAN 7:28 “Iyan heeyan teǥeinep ku. Ingkeherati ku heini ne mibmemeluntak a te kegkulbai ku. Iyan, wazà ku heini tudtula ziyà te minsan hentei.”
DAN 8:1 Duen te iketelu he tuig te kedhadì ni Belshazar, duen en maan nelewasan ku.
DAN 8:2 Dutun te kebpekelawas ku neehè ku he edhitindeg a ziyà te kilid te Wahig he Ulai he ziyà te miberengbeng he inged he iyan is Susa he ziyà te prubinsya he Elam.
DAN 8:3 Ne zutun duen neehè ku he meemahan he kerehidu he edhithitindeg diyà te veyvey zutun te wahig. Duen din dezuwa he sungey he memelayat. Piru hein netegteǥaad nekedtimpa haazà su mid-iseg mebmelayat is sevaha.
DAN 8:4 Neehè ku he ebpemenungey haazà is kerehidu ziyà te minsan hendei he lugar. Ne wazà duma he langgam he ebpekepeengked kandin. Ne wazà ebpekelikey kandin. Umbe ebeelan din en ke hengkey is egkesuatan din te ebaal ne nehimu haazà he mekeǥeǥehem.
DAN 8:5 Ne zutun te kedtengtengi ku kayi ne netekewtekew a te zuen nekeuma he kambing he ebpuun diyà te edsenlepan. Midhipanew zin is kelibutan he kenà ebpeketanà is menge paa zin diyà te tanà tenged te keǥaan din. Duen nekeviza he sungey zin su ziyà te pid-elangan te menge mata zin.
DAN 8:6 Ne mibeyaan din sikan is meemahan he kerehidu he edhithitindeg diyà te veyvey zuen te wahig, he zuen din dezuwa he sungey, ne migamit din is taman te egkehimu zin te kedtebeka zin kayi.
DAN 8:7 Tenged te utew zin kegkepauk, wazè din engkezi te edtebek haazà is kerehidu taman te nengerupù sikan is dezuwa he sungey zin. Ne zutun kenè en ebpekesukul haazà is kerehidu. Nepiley haazà ne midtekutakan duen te kambing. Ne wazà neketavang kandin.
DAN 8:8 Ne mid-iseg pa is kegkemekeǥeǥehem duen te kambing. Ne hein utew en sikandin mekeǥeǥehem, nerupù sikan is sungey zin. Piru midtuvuan haazà is nerupuan te heepat he nekeviza he menge sungey he ebpeketezù diyà te nekedseselekawà he vahin te kelibutan.
DAN 8:9 Is sevaha zuen te heepat he sungey, midsubpang te zeisey he sungey. Heini he sungey nehimu he mekeǥeǥehem diyà te zivavà, wey ziyà te edsilaan, wey minsan diyà te mekempet he tanè he Israel.
DAN 8:10 Minsan diyà te langit nekeuma is kegkemekeǥeǥehem din ne mibpen-ulug din is duma he menge linimbag diyà te langit wey is menge vituen, ne midtekutakan din heini.
DAN 8:11 Mid-isip din he lavew sikandin he mekeǥeǥehem te Pengulu te menge linimbag diyà te langit. Impeengked din is andew-andew he kebpemuhat diyà te valey te Megbevayà, ne midèdeetan din is baley te Megbevayà.
DAN 8:12 Minsan pa te iyan heini kerepasan din, intuǥut he mezizalem te gehem din is menge linimbag diyà te langit wey is andew-andew he kebpemuhat. Bali wazà diyà te kandin is tutuu, ne mibmelempusen sikandin diyà te menge vaal zin.
DAN 8:13 Ne zutun nezineg ku is dezuwa he velinsuǥuen he ebpelelaǥà. Mid-insaan te sevaha he velinsuǥuen haazà is duma zin te, “Sengemenu keluǥayad is kegkeul-ulaha zuen te impelewasan he iyan: is kebpeengkezi te andew-andew he kebpemuhat, is kebeǥaya zuen te valey te Megbevayà, wey is kedtekutaki te menge linimbag diyà te langit?”
DAN 8:14 Ne midtavak kandin haazà is sevaha he velinsuǥuen te, “Egkeulaula heini seled te 2,300 he meselem wey mahapun ne emun egkeipus, edlumpiyuwan sikan is baley te Nengazen.”
DAN 8:15 Ne zutun te kedtengtengi ku zuen te mibpelewasan kedì wey ked-isip-isip ku ke hengkey is kehuluǥan din, netekewtekew a te zuen midhitindeg diyà te etuvangan ku he henduen be te etew.
DAN 8:16 Ne nekezineg a te laǥeng te etew he ebpuun te Wahig he Ulai he edhenduen te, “Gabriel, iseysey nu ziyà te kandin is kehuluǥan duen te nelewasan din.”
DAN 8:17 Ne hein mid-uvey kayi te kedì si Gabriel, midluhud a tenged te kegkahandek ku. Piru migkaǥi sikandin te, “Sikew is etew, kinahanglan he egkesavut nu sikan is nelewasan nu, he mehitenged te huziyan he timpu.”
DAN 8:18 Ne zutun te kebpekidlalag din kedì, neewaan a te tanud is edlangkeb diyà te tanà. Piru migewezan e zin wey impeenew.
DAN 8:19 Ke sikandin te, “Egkeǥiyan ku sikew ke hengkey is egkehitavù te huziyan he timpu emun edsilut en is Megbevayà tenged te pauk din. Iyan ibpaalung te neehè nu, is egkehitavù te huziyan he timpu.
DAN 8:20 Sikan is kerehidu he zezuwa is sungey zin, ne iyan ibpaalung dutun is menge ginhedian te Media wey Persia.
DAN 8:21 Sikan is kambing, iyan ibpaalung dutun is ginhedian te Grecia, ne sikan is dekelà he sungey ziyà te pid-elangan te menge mata zin, ebpaalung te nehuna he hadì.
DAN 8:22 Sikan is heepat he sungey he midlepew hein nerupù sikan is nehuna he sungey, ebpaalung te heepat he ginhedian te Grecia he egkevahinbahin. Piru is menge hadì dan, kenà ebpekeiring is kegkemekeǥeǥehem dan duen te nehuna kandan he hadì hein wazè pa mevahin haazà he ginhedian.
DAN 8:23 “Diyà te huziyan he menge andew te kedhadì kayi he menge hadì, dutun te timpu he utew en dekelà is salè dan, ne edhadì is sevaha he mesipala wey limbungan he hadì.
DAN 8:24 Egkehimu sikandin he mekeǥeǥehem, piru kenà ebpekerepeng te kegkemekeǥeǥehem duen te hadì he nehuna kandin hein wazè pa mevahin haazà he ginhedian. Egkeinuinu is menge etew te edhimuwen din he kebpendezaat, ne melempusen sikandin diyà te minsan hengkey he ebeelan din. Edèdeetan din is mekeǥeǥehem he menge etew wey is pinilì he menge etew te Megbevayà.
DAN 8:25 Tenged te ebilidad din egkehimu sikandin he melempusen te kebpenlimbung din. Ebpegalbu sikandin, ne mahabet he menge etew is ebpenhimetayan din he kenè din en ebpetizeenan. Edsukulan din minsan is Pengulu te menge pengulu. Piru ziyà te huziyan he timpu edezeetan sikandin, kenà pinaaǥi te ǥehem te etew, kekenà, pinaaǥi te gehem te Megbevayà.
DAN 8:26 “Daniel, tutuu is migkaǥi ku kenikew he mehitenged te kebpeengkezi te meselem wey mahapun he kebpemuhat. Piru kenè nu en dèpa tudtula heini su egkeuǥet pa egkehitavù.”
DAN 8:27 Ne kegkepasad kayi, siak si Daniel, midluyahan a wey nezeruwan a te nepipira he andew. Ne kegkeulii kedì, midlikuan ku te edterebahu is insarig kedì te hadì. Piru kemulu a egkeliveǥi zuen te nelewasan ku. Mereǥen heini he edsevutan.
DAN 9:1 Si Darius he Midianhen he anak ni Ahasuerus, iyan hadì dutun he timpu ziyà te tivuuk he Babilonia. Te nehuna he tuig te kedhadì din, netuenan ku ziyà te insurat he lalag te Megbevayà he kenà egkevangun is nevengkag he inged he Jerusalem seled te 70 he tuig, su iyan heini nekaǥi te Nengazen diyà te mibpenaub din he si Jeremias.
DAN 9:3 Ne tenged dutun midangep a ziyà te Nengazen he Megbevayà pinaaǥi te ked-ampù. Mibpuasa a, mibivisti a te saku, wey mibukbukan ku te avu is ulu ku tenged te kegkeseeng ku.
DAN 9:4 Ne iyan heini migkaǥi ku zutun te ked-ampù ku ziyà te Nengazen he Megbevayè ku wey kedtug-an ku te menge salè ku wey menge salà te menge Israilihanen: “Nengazen, mekeǥeǥehem ka wey egkein-inuwan he Megbevayà. Metinumanen ka, ne edtumanen nu is penaad nu he ebmahalen nu is ebmahal kenikew wey edtuman te menge suǥù nu.
DAN 9:5 Nekesalè key ziyà te kenikew. Mibaal key te mezaat wey mid-engkezan dey is menge suǥù nu wey menge sulunuzen he ibpesunud nu.
DAN 9:6 Wazè key mibpemineg te menge suluǥuen nu he mibpenaub nu he iyan midsuǥù nu te kebpekidlalag te menge hadì dey, menge pengulu zey, menge kepuun dey, wey te langun he menge etew te Israel.
DAN 9:7 “Metazeng ka, Nengazen, iyan, sikami mulà mekeeled-eled is menge vaal zey minsan guntaan. Tutuu heini ziyà te langun he menge meǥinged diyà te Juda wey Jerusalem, wey ziyà te langun he menge Israilihanen he impedsusuwey nu ziyà te uvey wey meziyù he menge lugar tenged te kedsupak dan kenikew.
DAN 9:8 Mekeeled-eled key, Nengazen, ragkes en is menge hadì dey, menge pengulu zey, wey menge kepuun dey, tenged te nekesalè key ziyà te kenikew.
DAN 9:9 Piru hihizuwen ka ǥihapun wey mepineseyluwen minsan pa te nesupak dey sikew.
DAN 9:10 Wazè dey metuman is egkesuatan nu su ǥeina te wazè dey sunuza is menge suǥù he imbeǥey nu kenami pinaaǥi te menge suluǥuen nu he ebpemeneuven nu.
DAN 9:11 Midsupak is langun he menge Israilihanen te menge suǥù nu; kenè dan egkesuat he edtuman te menge lalag nu. Ne tenged te kebaal zey te salà, neseǥazan dey is rawak he ingkesurat diyà te Kesuǥuan ni Moises te suluǥuen nu.
DAN 9:12 Midtuman nu is kezeetan he impetizaan nu kenami wey te menge pengulu zey he iyan is ebpurungan key kenikew edsiluti. Umbe wazè pa nehitavù kayi te kelibutan he iring te mezaat he nehitavù diyà te Jerusalem.
DAN 9:13 Nehitavù diyà te kenami heini he silut sumalà is ingkesurat diyà te Kesuǥuan ni Moises. Piru Nengazen he Megbevayè dey, minsan pa te iyan heini nehitavù kenami wazè key ǥihapun medtinguha te kebpenunuat kenikew pinaaǥi te ked-iniyug te menge salè dey wey kegkilala te tutuu.
DAN 9:14 Andam ka he edsilut kenami; ne mibeelan nu en heini tenged te egkezumahan te hustu he kukuman is langun he ebeelan nu, piru wazè key ǥihapun mebpezumazuma kenikew.
DAN 9:15 “He Nengazen he Megbevayè dey, impeehè nu is gehem nu pinaaǥi te kegeuza nu te menge etew nu puun te Ehipto, ne nevantug ka tenged kayi taman en guntaan. Piru mibaal key te salà wey kelelalung.
DAN 9:16 Umbe, Nengazen, tenged dà te kenikew he keupiya, edhangyù a ziyà te kenikew he iawè nu en is pauk nu te menge meǥinged diyà te Jerusalem te inged nu he segradu he vuvungan. Tenged te menge salè dey wey menge salà te menge kepuun dey, mibpeel-elezan key wey is menge tig-Jerusalem te menge etew he nekeelingkus kenami.
DAN 9:17 “Umbe, Megbevayè ku, pemineǥa nu is hangyù ku wey pengemuyù ku. Para meveǥayi ka te zengeg, Nengazen, umana nu venguna is baley nu he nerundus he mibey-anan en.
DAN 9:18 He Megbevayà, pemineǥa a kenikew. Su utew mekehizuhizu is kebpekesavuk dey wey nevengkag is inged nu he zutun egkilelaa is kegkemegbevayè nu. Wazè key medhangyù diyà te kenikew tenged te ketazeng dey, kekenà, tenged te netuenan dey he utew ka hihizuwen.
DAN 9:19 Pemineǥa key, Nengazen, wey peseyluwa key. Segugunà key tevangi para meveǥayi ka te zengeg, su migkilala ka he Megbevayà diyà te inged nu wey menge etew nu.”
DAN 9:20 Mibpedayun a is ebpengemuyù wey edtug-an te menge salè ku wey menge salà te menge zuma ku he menge Israilihanen. Midhengyuan ku is Nengazen he Megbevayè ku para te segradu he vuvungan din.
DAN 9:21 Ne zutun te ked-ampù ku, meǥaan he midlayang pehendiyà te kedì si Gabriel is nehune en he mibpelawas kedì. Uras haazà te mahapun he kebpemuhat.
DAN 9:22 Impesavut e zin, ke sikandin te, “Daniel, midhendini a su ibpesavut ku kenikew is tagnà.
DAN 9:23 Su kebpuun nu zà ked-ampù ne zuen en impahayag te Megbevayà, ne midhendini a su egkeǥiyen ku kenikew haazà, su utew ka mibmahal te Megbevayà. Umbe pemineǥa nu wey sevuta nu is idseysey ku ziyà te kenikew:
DAN 9:24 “Midtelaan en te Megbevayà is 490 he tuig he para zuen te segradu he inged wey te menge zuma nu, su zutun he timpu egkeengked is kebpekidsukulè dan te Megbevayà, ne egkevelukasan sikandan te kegkeuripena kandan te salà, ne ebpeketezengen sikandan te Megbevayà te ketazeng he ebpedayun taman te taman, su para metuman sikan is nelewasan wey kes netagnà, wey para ikeuman ikepehinungud diyà te Megbevayà is baley zin.
DAN 9:25 “Kinahanglan he egketuenan nu wey egkesavut nu he puun te timpu te kebmandù ku he ed-umanan ebenguna is Jerusalem taman te kebpekeuma te pengulu he pinilì te Megbevayà, ne edlavey is 49 he tuig. Ne seled te 434 he tuig ed-umanan ebenguna is Jerusalem he zuen din menge pelasa wey pengalang. Ne timpu haazà te kesamuk.
DAN 9:26 Ne kegkepasad te 434 he tuig edhimetayan is pengulu he pinilì te Megbevayà he wazà edtavang kandin. Ne ebpekeuma is sevaha he hadì ne edezeetan te menge etew zin haazà is inged wey is baley te Nengazen. Ne ebpedayun is kezeetan wey kebpetebtebekà taman te ketepusan su imbanglis te Megbevayà is kegkeul-ulaha kayi. Henduen be te zalem is kegkeuma te ketepusan he menge andew.
DAN 9:27 Haazà is hadì, edhimu te melig-en he kesebutan diyà te mahabet he menge etew he egketapus te pitu he tuig. Piru kedlavey te tetelu he tuig wey tengà, ebpeengkezan din is kebpemuhat ne idsavuk din diyà te valey te Nengazen is utew mezaat he vutang he egkehimu he hinungdan te kebey-ani zutun te valey te Nengazen. Ne kenà heini egkaawà dutun taman te kemulu pa haazà is hadì su iyan heini imbanglis te Megbevayà.”
DAN 10:1 Dutun te iketelu he tuig te kedhadì ni Cyrus diyà te Persia, duen impetuenan ki Daniel te migngezanan daan ki Belteshazar. Tutuu is impetuenan kandin, ne mehitenged heini te zekelà he tebek ne impelewasan heini kandin wey zin mesavut.
DAN 10:2 Ne iyan heini neulaula sumalà te inseysey ni Daniel: Dutun he timpu tetelu he simana is kedlalew ku.
DAN 10:3 Wazà a megkaan te metaam he menge keenen etawa usa, wazà a med-inum te vinu, wey wazà ku pehemuti is lawa ku taman te netapus is tetelu he simana.
DAN 10:4 Dutun te ike-24 he andew te nehuna he vulan, diyà a edhithitindeg te kilid te zekelà he Wahig he Tigris.
DAN 10:5 Ne zutun duen neehè ku he henduen be te etew he mibivisti te linu, ne nekeliǥuy ziyà te hawak din is bakes he vulawan.
DAN 10:6 Ne henduen be te mahalen he vatu is lawa zin su ed-ilak-ilak. Ne henduen be te kilat is dagwey zin su egkindab, ne iring te sulù is mata zin su edsiǥa. Is menge velad din wey menge paa zin ne ed-ilak-ilak he henduen be te midlimbasan he brunsi, ne mezaǥing is laǥeng din he henduen be te keǥurub te mahabet he etew.
DAN 10:7 Iyan e zà nekaahà dutun. Is menge zuma ku ne wazè dan haazà maahà, piru migkulbaan sikandan ne nemen-eles dan tenged te kegkahandek dan.
DAN 10:8 Umbe, iyan e zà nesamà he ed-ahà dutun te egkein-inuwan he impaahà. Mibmemeluntak a wey midluyahan.
DAN 10:9 Ne nezineg ku he migkaǥi haazà is etew. Ne zutun te kegkaǥi zin, ne neewaan a te tanud ne nepiley a ziyà te tanà.
DAN 10:10 Migewezan e zin ne mid-enew e zin is egkerkeren is menge vuel wey menge velad ku.
DAN 10:11 Ke sikandin te, “Daniel, mibmahal ka te Megbevayà. Hitindeg ka ne purung ka pemineg te egkeǥiyen ku ziyà te kenikew, su midsuǥù a te Megbevayà kayi te kenikew.” Ne kegkekeǥiya zin dutun ne midhitindeg a is egkerkeren.
DAN 10:12 Ne migkaǥi sikandin te, “Daniel, kenè ka mahandek. Su zuen dà te nehuna he andew te kedhangyù nu he mesavut nu is menge impelewasan kenikew, ne midtavak en te Megbevayà is hangyù nu su wazè ka mebpelavew ziyà te etuvangan din. Umbe midhengkayi a su is kedhengkayi ku iyan paaǥi te kebeǥaya zuen te midhangyù nu.
DAN 10:13 Ne wazà a mekesayu mekeuma zini su mid-alang kedì is mulin-ulin he iyan pengulu te ginhedian he Persia seled te 21 he andew. Meupiya ganì su midtevangan a ni Miguel he sevaha zuen te menge pengulu te menge velinsuǥuen, su sebsevaha ku zà is nekidtebek duen te pengulu te Persia.
DAN 10:14 Ne ǥuntaan, kayi a su wey ku ikepesavut kenikew ke hengkey is egkehitavù te zuma nu he menge Israilihanen te huziyan he timpu, su is kenikew he naahà mehitenged te egkehitavù te huziyan he timpu.”
DAN 10:15 Ne kegkeǥiya zin dutun, midluhud a, ne kenà a ebpekekaǥi.
DAN 10:16 Ne, heini is henduen be te etew, migkevit din is bivig ku ne human a mekekaǥi. Migkeǥiyan ku haazà is edhithitindeg diyà te etuvangan ku te, “Datù, selakew is keǥezamgezam ku wey edluyahan a tenged duen te nelewasan ku.
DAN 10:17 Ebmenumenu a he ebpekidlalag kenikew te wazè ku en desen wey hapit e en kenà ebpekeǥehinawa?”
DAN 10:18 Umbe, mid-umanan a zin kevita ne midlikù is desen ku.
DAN 10:19 Migkaǥi sikandin kayi te kedì te, “Sikew is mibmahal te Megbevayà, kenè ka mahandek wey meipeng. Pekezesen ka.” Ne kegkekeǥiya zin dutun kayi te kedì ne mibmezesen a. Ne zutun migkaǥi a te, “Datù, ipelaus nu en is menge lalag nu su midteǥuan ad kenikew te zesen.”
DAN 10:20 Ne midtavak sikandin te, “Kinahanglan he edlikù a te kebpekidtebek duen te pengulu te Persia. Kegenat ku puun te kebpekidtebek ku, ne ebpekeume en daan is pengulu te Grecia he elin ebpekidtebek kedì. Piru netuenan nu ve ke maan is midhengkayi a te kenikew?
DAN 10:21 Midhengkayi a su wey ku ikeseysey ziyà te kenikew is ingkesurat diyà te Libru he Midsuratan te Tutuu. Dutun te kebpekidtebek ku, ne wazà duma he nekeuǥup kedì, kekenà, iyan dà si Micael he pengulu te Israel.
DAN 11:1 “Duen te nehuna he tuig te kedhadì ni Darius te Midianhen, iyan a midtavang wey midlavan ki Micael.
DAN 11:2 “Guntaan, idseysey ku en diyà te kenikew is tutuu: Duen tetelu pa he hadì he edhadì te Persia. Ne zuen ikeepat he hadì he ebpeketinundug kandan te tetelu ne edhuna pa heini he sepian kandan, ne pinaaǥi te ketiǥeyunan din, egkehimu sikandin he mekeǥeǥehem, ne edhinggaten din is duma he menge ginhedian te kebpekidtebek te ginhedian te Grecia.
DAN 11:3 Ne zuen selakew en he egkehimu he mekeǥeǥehem he hadì. Ne mahabet he menge nasyun is edsekupen din, ne ebeelan din is egkesuatan din te ebaal.
DAN 11:4 Ne emun egkehimu en sikandin he utew mekeǥeǥehem, egkevengkag is ginhedian din ne egkeheepat he vahin kayi te kelibutan, piru kenè din menge kevuwazan is ebpemekahadì dutun. Is ebpekeilis kandin he menge hadì ne kenà ebpekeiring is kandan he kedumala te kandin he kedumala. Edhewien diyà te kandin is ginhedian din, ne ibeǥey ziyà te zuma, ne kenà diyà ibeǥey te menge kevuwazan din.
DAN 11:5 “Is hadì diyà te zivavà egkehimu he mekeǥeǥehem. Piru egkelevawan sikandin te sevaha zuen te menge upisyal zin. Ne te huziyan he timpu ne egkehimu haazà is upisyal he hadì he mekeǥeǥehem is ginhedian din.
DAN 11:6 Ne kedlavey te egkepipira he tuig, egkesevaha is ginhedian diyà te zizaya wey is ginhedian diyà te zivavà. Su ibpeesawa te hadì diyà te zivavà is anak din he vahi te hadì diyà te zizaya. Piru kenà egkeuǥet is gehem duen te vahi wey is gehem duen te hadì diyà te zizaya. Su zutun he timpu edhimetayan haazà is bahi ragkes is esawa zin wey is anak dan wey is menge suluǥuen dan.
DAN 11:7 “Dutun te huziyan he timpu, is suled duen te vahi, egkehimu he hadì diyà te zivavà he ginhedian. Iyan sikandin ebpekeliwan te amey zin. Edsurungen din is menge sundaru te hadì diyà te zizaya ne edselezan din is binerengbeng he inged duen te hadì. Ebpekidtebek sikandin kandan ne ebpekezaag sikandin.
DAN 11:8 Ed-uwiten din diyà te Ehipto sikan is menge ledawan te menge ed-ezapen dan wey is mahalen he menge azen he vulawan wey pelata. Ne seled te egkepipira he tuig, kenè en sikandin ebpekidtebek te hadì diyà te zizaya.
DAN 11:9 Piru te huziyan he timpu edsurungen sikandin te hadì diyà te zizaya, piru egkezaag haazà is hadì diyà te zizaya ne ebpekepeuulì diyà te kandin he lugar.
DAN 11:10 “Edtiǥum te mahabet he menge sundaru is menge anak duen te hadì diyà te zizaya su wey maandam is kebpekidtebek dan. Ne edsurung heini sikandan he henduen be te zalem he kenà egkepeneng. Edsurungen dan minsan is binerengbeng he inged te hadì diyà te zivavà.
DAN 11:11 Ne tenged te pauk te hadì diyà te zivavà, ne ebpekidtebek sikandin te hadì diyà te zizaya, ne egkezaag din is mahabet he menge sundaru kayi te hadì te zizaya.
DAN 11:12 Ne tenged te kebpekezaag din, ebpegalbu sikandin wey mahabet is ebpenhimetayan din, piru kenà ebpedayun is kegkemezeeǥen din.
DAN 11:13 Su ed-uman edtiǥum sikan is hadì diyà te zizaya te tuwas pa he mahabet he menge sundaru zuen te nehuna. Ne kedlavey te egkepipira he tuig ed-uman sikandin edsurung duma te mahabet wey egkeǥumeenan he menge sundaru.
DAN 11:14 “Dutun he timpu mahabet is ebpekigkuntada te hadì diyà te zivavà. Elin en ebpekigkuntada kandin is duma nu he menge Israilihanen he memesipala. Ebeelan dan heini su wey metuman sikan is impelewasan kenikew, piru egkezaag dan.
DAN 11:15 Ne edsurungen te hadì diyà te zizaya is binerengbeng he inged te ginhedian diyà te zivavà. Edliǥuyan dan heini ne edselezan dan. Wazè en egkehimu te menge sundaru te ginhedian diyà te zivavà minsan sikan is egkengeseriǥan he menge sundaru zan, su kenè dan egkehimu te edaag haazà is menge kuntada zan.
DAN 11:16 Umbe, ebeelan en duen te hadì diyà te zizaya is minsan hengkey he egkesuatan din te ebaal, ne wazè en ebpekezawey kandin. Edsekupen din is menge meǥinged diyà te mekempet he tanè he Israel ne ebpepurung sikandan ebpezizalem te ǥehem din.
DAN 11:17 Meheǥet is tinguhà duen te hadì diyà te zizaya te kebpekidtebek te ginhedian diyà te zivavà taman te egkehimu zan. Piru ebpekidsevaha zèpa sikandin te hadì diyà te zivavà pinaaǥi te kebpeesewaa zin te anak din he vahi zuen te hadì su wey zin mezèdeeti is ginhedian diyà te zivavà pinaaǥi zuen te anak din. Piru kenà egkesuat haazà is bahi ke egkekuntada zin is ginhedian diyà te zivavà ne kenè sikandin edlavan te amey zin.
DAN 11:18 Umbe, iyan dà dèpa edsurungen duen te hadì diyà te zizaya is menge meǥinged diyà te menge inged he uvey te zaǥat, ne mahabet kandan is edsekupen din. Ne ibpeengked te sevaha he pengulu is baal zuen te hadì he iyan is kebpeel-elezi zin te zuma, ne edhimuwen din he iyan egkepeel-elezan haazà is hadì.
DAN 11:19 Umbe, ed-ulì haazà is hadì diyà te vinerengbeng he menge inged diyà te nasyun din. Piru egkepatey sikandin, ne iyan haazà ketepusan din.
DAN 11:20 “Is ebpekeilis kandin he hadì, edsuǥuen duen te menge upisyal zin he peǥesa zan is menge etew te kebayad te vuhis su para meumani is ketiǥeyunan te ginhedian din. Piru kenè egkeuǥet ne ebpatey heini he hadì, piru kenà tenged te tebek etawa zuen nepauk kandin.
DAN 11:21 “Is hadì he ebpekeilis kandin ne sevaha he etew he telemayen, he kenà diyà ebpuun te pemilya he ebpuunan te egkengehimu he hadì. Kenà ebpeebuten te menge etew, he egkaaǥew zin is kedhadì dutun te ginhedian pinaaǥi te limbung.
DAN 11:22 Mahabet he menge sundaru he menge kuntada zin is ebpendezeetan din, wey ebpenhimetayan din ragkes en is lavew he memumuhat.
DAN 11:23 Ebpekidsevaha kandin is duma he menge nasyun, piru te huziyan he timpu edlimbungan din sikandan. Egkehimu sikandin he mekeǥeǥehem minsan deisey zà is ginhedian din.
DAN 11:24 Kunaan te menge etew, he kenà sikandin ebpekehimu he edsurung te meuswaǥen he lugar ziyà te sevaha he prubinsya. Ebeelan din is wazà meveeli zengan te menge kepuun din. Ebehinen din diyà te menge sumusunud kandin is menge azen he egkaaǥew zin pinaaǥi te tebek. Ebpelanu sikandin edsurung te vinerengbeng he menge inged, piru seled dà te mevavà he timpu.
DAN 11:25 “Duma te mahabet he menge sundaru zin, ebpekevurut sikandin he ebpekidtebek te hadì diyà te zivavà. Piru ebpekidtebek kandin is hadì diyà te zivavà he mahabet is menge sundaru zin he menge neǥumeenan. Ne egkelimbungan haazà is hadì te zivavà umbe egkezaag sikandin.
DAN 11:26 Menge etew zin dà is edezaat kandin. Umbe egkezaag is menge sundaru zin ne mahabet kandan is ebpemematey.
DAN 11:27 “Ne kegkepasad dutun ne uvag ebpepurungà heini is dezuwa he hadì piru pudu zan teruen, pudu zan ed-isip te paaǥi te kedlimbungi te sevaha kandan. Piru wazà edlampus kandan dutun te ebpekedsuvar he tuyù dan. Ne ebpedayun is kebpekidtebek dan su wazè pa meuma is netelaan te Nengazen he timpu te ketepusan.
DAN 11:28 Ne ed-ulì diyà te kandin he inged haazà is hadì diyà te zizaya he ed-uwit te mahabet he menge azen he netavan din pinaaǥi te kebpekidtebek. Ne zutun ebpeǥintuluyen din te edezaat is menge etew te Megbevayà wey is tinuuwan dan, ne human edlaus ed-ulì.
DAN 11:29 “Ne tenged te zaan he imbanglis, ed-umanan din edsurunga is ginhedian diyà te zivavà, piru is egkehitavù dutun ne kenè en iring te nehitavù duen te nehuna he kedsurung din.
DAN 11:30 Su edsurungen sikandin te menge varku he ebpemuun diyà te edsenlepan. Ne tenged te kegkahandek din, ebpekepelaǥuy wey ebpekepeuulì sikandin. Ne iyan din ebpemurengetan is menge etew te Megbevayà wey is tinuuwan dan, piru meupiya mulà is kebpekid-uyun din diyà te kenà edawat te tinuuwan dan.
DAN 11:31 “Edsuǥuen duen te hadì diyà te zizaya is menge sundaru zin he remeriki zan sikan is binerengbeng he baley te Nengazen. Ibpeengkezan dan te ebaal is andew-andew he kebpemuhat, ne idsavuk dan dutun is utew mezaat he iyan egkehimu he hinungdan te kebey-ani zutun te valey te Nengazen.
DAN 11:32 Edigdiǥen din is wazà medtuu te tinuuwan te menge etew te Megbevayà su para remeriki zan haazà is baley. Piru ebpekevurut he edsupak kandin is menge etew he nekekilala te Megbevayà.
DAN 11:33 “Is menge etew he nekesavut te tutuu, ebpenuruen dan is mahabet he menge etew, piru ebpesipelahan sikandan seled te egkepipira he andew. Is duma kandan ebpenhimetayan pinaaǥi te ispada etawa hapuy, ne is duma pa ebihaǥen etawa ed-eǥawen is menge azen dan.
DAN 11:34 Keniyan te kebpesipelahi kandan, deisey zà is edtavang kandan, piru mahabet is kenà tinutuuwà is kebpekiduma zan kandan.
DAN 11:35 Ebpesipelahan is duma he nekesavut te tutuu su para mehimu sikandan he lunsey wey egkelumpiyuwan sikandan taman te kegkeuma te ketepusan, he egkeuma emun egketuman en is timpu he netelaan.
DAN 11:36 “Ebeelan duen te hadì diyà te zizaya is minsan hengkey he egkesuatan din te ebaal. Ed-isipen din he iyan sikandin lavew te langun he ebpen-ezapen, ne edsumpeliten din is Megbevayà he iyan lavew te langun he ebpen-ezapen. Ebmelempusen sikandin taman dà te timpu te kebpezayaǥa te Megbevayà te pauk din, ne egkeulaula heini su kinahanglan he egkengehitavù is imbanglis te Megbevayà is kegkeul-ulaha zuen.
DAN 11:37 Kenè din egkilelaan is menge ed-ezapen te menge kepuun din etawa menge ed-ezapen he mibmahal te menge vahi. Su iyan isip din he iyan sikandin lavew kandan te langun. Wazà duma he ed-ezapen he ebeǥayan din te zengeg, kekenà, iyan dà is ed-ezapen he ebpengelintau para meselezi te edsurung is binerengbeng he menge inged. Ebeǥayan din heini te zengeg minsan pa ke wazà heini metueni te menge kepuun din. Edhalad sikandin kayi te vulawan, pelata, mahalen he menge vatu, wey zuma pa he mahalen he menge gasa.
DAN 11:39 Edsurungen din is linig-enan he menge inged su ebpetavang sikandin kayi he ed-ezapen te wazà metueni te menge kepuun din. Ebeǥayan din te zengeg is menge etew he meupiya is kebpekid-uyun dan kandin pinaaǥi te kebpezumelaha zin kandan te mezakel he menge etew. Wey ebeǥayan din sikandan te tanà he ibales din kandan.
DAN 11:40 “Emun egkeume en is ketepusan, ebpekidtebek is hadì diyà te zivavà te hadì diyà te zizaya. Piru edtebeken sikandin duen te hadì diyà te zizaya duma is ebpemen-untud te kerwahi wey pereuntud te kudà wey te mahabet he menge varku. Heini sikandin, iring te zalem he edsurung te menge nasyun, ne ebpendezeetan din sikandan.
DAN 11:41 Ragkes te edsurungen din is menge etew ziyà te mekempet he tanà he Israel, ne mahabet he menge etew is egkepatey. Piru kenè din egkezaag is Edom, is Moab, wey is menge pengulu te menge Amunihanen.
DAN 11:42 Mahabet he menge nasyun is edsurungen din, sevehe en is Ehipto.
DAN 11:43 Egkaangken din is menge vulawan, menge pelata, wey is langun he azen diyà te Ehipto. Ragkes te edsekupen din is Libya wey Etiopia.
DAN 11:44 Piru zuen menge tudtul he ebpuun diyà te edsilaan wey te zizaya he ebpekepekulbà kandin. Umbe egkezumahan te zekelà he pauk is kebpekidtebek din, ne mahabet he menge etew is ebpenhimetayan din.
DAN 11:45 Ebangun sikandin te tulda zin te hadì diyà te mid-elangan te zaǥat wey te mekempet wey segradu he vuvungan. Piru te huziyan he timpu egkepatey sikandin he wazà ebpeketavang kandin.”
DAN 12:1 Ne migkaǥi pa sikan is henduen be te etew te, “Dutun he timpu, ebpeseǥazan ni Micael te menge etew is silut su insuǥù heini kandin te Megbevayà. Si Micael iyan sikan is lavew he pengulu he edlavan te menge zuma nu he menge Israilihanen. Utew mereǥen is kebpekesavuk te menge etew zutun he timpu, ne heeyan he kemeresayan wazè pa keenu mehitavù puun te kegkepuun kegketukud te menge nasyun. Piru edlibriyen puun keniyan te kemeresayan is menge zuma nu he menge Israilihanen he nekesurat is menge ngazan dan diyà te libru he midlistahan te menge etew he zuen dan untung he wazà pidtemanan.
DAN 12:2 Ebenhawen is mahabet he nemematey. Is duma kandan ebpekaangken te untung he wazà pidtemanan, piru is duma edrewakan wey ebpeel-elezan te wazà pidtemanan.
DAN 12:3 Sikan is nemekesavut te tutuu wey nenurù te menge etew mehitenged te kedtinazeng ne egkeiring te menge vituen diyà te langit su edsiǥa te wazà pidtemanan.
DAN 12:4 Piru sikew, Daniel, isira nu zà dèpa heini is libru, wey kenè nu en dèpa tudtula is menge lalag kayi taman te egkeuma is ketepusan. Dutun te kenè pa heini ibpahayag ne mezakel is egkesuat he mesavut dan is egkengehitavù.”
DAN 12:5 Hein nekepasad sikandin he egkaǥi, duen ku pa naahà he dezuwa he etew he ebpemenhithitindeg diyà te pesikilizà duen te wahig.
DAN 12:6 Ne mid-insaan te sevaha kandan is etew he mibivisti te linu he edhithitindeg he ed-untud diyà te zivavew zutun te wahig te, “Sengemenu keluǥayad human egketapus heini is mekehandekhandek he menge hitavù?” Ne imbayew zutun te etew he mibivisti te linu is dezuwa he menge velad din ne nezineg ku sikandin he ebpetistiǥusan din te Megbevayà he uuyag te wazà pidtemanan is menge lalag din. Ke sikandin te, “Egketapus heeyan emun edlavey en is tetelu he tuig wey tengà, ke egkepasad en is kebpeentusa te menge etew te Megbevayà.”
DAN 12:8 Wazè ku mesavut haazà is tavak din. Umbe migkaǥi a ziyà te kandin te, “Datù, hengkey is egkehimu he rimeǥas keniyan he menge hitavù?”
DAN 12:9 Ne midtavak sikandin te, “Daniel, taǥad ke zà, su is tavak te insè nu ne id-eles pa heini ne kenà ereg he edtudtulen taman te kegkeuma te ketepusan.
DAN 12:10 Mezakel is nekesavut te tutuu he edlumpiyuwan sikandan, ne egkesavut dan is mibpengaǥi ku. Piru is menge lalung ebpedayun te kebaal te kelelalung, ne kenè dan egkesavut is mibpengaǥi ku.
DAN 12:11 “Edlavey is 1,290 he andew puun te timpu te kebpeengkeza te andew-andew he kebpemuhat wey kedsevuka te utew mezaat he vutang he egkehimu he hinungdan te kebey-ani zutun te valey te Nengazen taman te kegkeuma te ketepusan.
DAN 12:12 Utew zeyzey is edtaǥad wey kemulu pa taman te kedlavey te 1,335 he andew.
DAN 12:13 “Ne sikew Daniel, leusa nu is menge vaal nu. Ebpatey ka piru ebenhawen ka te ketepusan he menge andew su para mezawat nu is bales te menge vaal nu he inteǥana para kenikew.”
HOS 1:1 Heini he menge lalag impahayag te Nengazen diyà te ki Hoseas he anak ni Beeri dutun te timpu te kedhadì ni Uzia ziyà te Juda, pehendiyà te ki Jotam, ki Ahaz, wey ki Hezekia, ne timpu zaan haazà te kedhadì ni Jeroboam diyà te Israel he anak ni Joash.
HOS 1:2 Is nehuna he migkaǥi te Nengazen diyà te ki Hoseas ne iyan heini: “Pengesawa ka te vahi he mengungumpadi, ne is menge anak niw ed-isipen he menge anak dutun te vahi he mengungumpadi. Su ebpaahà heini he is menge etew ku, iring te nengumpadi sikandan pinaaǥi te kedselikwaya zan te Nengazen wey ked-azap dan te zuma he menge ed-ezapen.”
HOS 1:3 Umbe, mid-esawa ni Hoseas si Gomer he anak ni Diblaim. Ne mibmeǥingey si Gomer. Ne hein in-anak en is anak dan he maama,
HOS 1:4 migkeǥiyan te Nengazen si Hoseas te, “Ngezani nu heeyan is batà te Jezreel, su kenè en egkeuǥet ne edsilutan ku is hadì te Israel tenged te kebpenhimatey te kepuun din he si Jehu ziyà te inged he Jezreel. Id-awè ku is ginhedian te Israel.
HOS 1:5 Dutun he timpu ebpengelinteuwan ku he mezaag is menge sundaru te Israel ziyà te Suǥud te Jezreel.”
HOS 1:6 Mid-uman mebmeǥingey si Gomer ne mid-anak te vahi. Ne migkaǥi is Nengazen diyà te ki Hoseas te, “Ngezani nu heeyan is batà te Lo Ruhama, he ke và dà egkegiya, ‘Wazà Mehizuwi,’ su kenè ku en egkehizuwan wey ebpeseyluwen is menge etew te Israel.
HOS 1:7 Piru egkehizuwan ku mulà is menge etew te Juda. Iyan a, is Nengazen he Megbevayè dan, edlibri kandan pinaaǥi te ǥehem ku ne kenà pinaaǥi te kebpekidtebek he egemiten is panà, ispada, menge kudà etawa pereuntud te kudà.”
HOS 1:8 Ne hein midlutas en ni Gomer sikan is anak din he si Lo Ruhama, mid-uman sikandin mebmeǥingey ne mid-anak te maama.
HOS 1:9 Migkaǥi is Nengazen diyà te ki Hoseas te, “Ngezani nu heeyan is batà te Lo Ami, he ke và dà egkegiya, ‘Kenà menge Etew ku,’ su is menge etew te Israel, ne kenè ku menge etew ne kenè e zan Megbevayà.
HOS 1:10 Piru egkeuma is timpu he egkehizuwan ku sikandan wey edtuvazan ku; egkeiring sikandan kahabet te pantad diyà te veyvey te zaǥat he kenà egkesukud wey egkevilang. Guntaan egngezanan sikandan he ‘Kenà kediey he menge etew,’ piru ziyà te huziyan he timpu egngezanan sikandan te, ‘Menge anak te uuyag he Megbevayà.’
HOS 1:11 Egkeuman egkesevaha is menge etew te Israel wey Juda, ne ebpilì dan te sevaha he pengulu. Ed-uman dan ed-uswag dutun te tanè dan. Ne utew heeyan melipayen he timpu para te inged he Jezreel.
HOS 2:1 “Umbe tewaǥa niw is iring niw he menge Israilihanen te menge ‘Etew Ku’ wey ‘Ingkehizu Ku.’ ”
HOS 2:2 “Menge anak, dewaya niw is iney niw minsan kenè ku en sikandin esawa, wey kenè e zin en esawa. Dewaya niw sikandin he engkezi zin is kebpengumpadi.
HOS 2:3 Emun kenà sikandin ed-engked ne edluwasan ku sikandin ne egkelevasan iring hein in-anak sikandin. Edhimuwen ku sikandin he iring te sibsivayan etawa disirtu, ne ebpatey sikandin te kegkemezahi.
HOS 2:4 Ne sikiyu is menge anak din, ne kenè ku egkehizuwan, su menge anak kew te vahi he mengungumpadi. Mekeeled-eled is mibeelan te iney niw he mid-anak keniyu. Migkaǥi pa sikandin te, ‘Edtelukunan ku is menge kumpadi ku he iyan mibeǥey kedì te keenen, wahig, menge manggad he welin wey linu, lana, wey vinu.’
HOS 2:6 “Umbe edurengen ku sikandin te zuǥiyen he zezeisey he kayu su para kenà sikandin mekeǥawas.
HOS 2:7 Edel-asen din is menge kumpadi zin piru kenè din sikandan egkesaut. Ebpen-ahaan din sikandan piru kenè din sikandan egketuredu. Ne egkaǥi sikandin te, ‘Edlikù ad nasì diyà te nehuna he esawa ku, su meupiya pa is kebpekesavuk ku zutun te nehuna kenà te ǥuntaan.’
HOS 2:8 “Wazè din isipa he iyan a mibeǥey kandin te trigu, binu, lana, wey mahabet he menge pelata wey vulawan he mibeelan dan he ledawan ni Baal.
HOS 2:9 Umbe, zutun te tiraǥun edhewien ku is menge trigu wey vinu he imbeǥey ku. Wey edhewien ku zaan is menge manggad he welin wey linu he imbeǥey ku para idtambun te kegkelevasi zin.
HOS 2:10 Ne ǥuntaan edlevasan ku sikandin diyà te etuvangan te menge kumpadi zin, su wazà ebpekelibri kandin puun te gehem ku.
HOS 2:11 Ibpeengkezan ku en is langun he ispisyal he menge timpu te ked-azap he edsilibrahan din kada tuig, kada vulan, wey kada simana.
HOS 2:12 Edezeetan ku is menge pinemula zin he paras wey menge kayu he higus he egkeǥiyen din he imbayad kandin te menge kumpadi zin. Ebpetuvuan ku is menge pemuleey zin te merisen he menge kayu, ne is menge veǥas kayi egkeenen te leew he menge langgam.
HOS 2:13 Edsilutan ku sikandin su zuen menge timpu he midtutung sikandin te veyewà diyà te ledawan ni Baal. Inseluub din is menge elahas din ne midal-as din is menge kumpadi zin, ne siak mulà, ne midlipatan e zin en. Iyan a, is Nengazen, is migkaǥi kayi.
HOS 2:14 “Piru ǥuntaan edumahan ku sikandin diyà te sibsivayan ne ed-umanan ku ed-emurala taman te ed-uya sikandin.
HOS 2:15 Ne ked-awè dey zutun ne idlikù ku ziyà te kandin is menge pemuleey zin te paras, ne edhimuwen ku is Suǥud he Acor he veyeey he ebpetanudtanud te meupiya he egkeperateng. Edtevaken e zin iring te mibeelan din hein betan-en pa sikandin dutun te kebpuun din diyà te Ehipto.”
HOS 2:16 Migkeǥiyan te Nengazen is menge Israilihanen te, “Dutun he timpu te kedlikù niw kayi te kedì, egngezanan a keniyu te esawa niw, ne kenà ad keniyu egngezanan he egalen niw.
HOS 2:17 Ne kenè ku en keniyu ibpepengumew-umew is menge ngazan ni Baal.
HOS 2:18 Dutun he timpu ebaal a te kesebutan diyà te langun he menge langgam he kenè kew zan menuwa. Id-awè ku ziyà te tanà he Israel is menge ǥumaan te kebpekidtebek iring te panà wey ispada. Ne ǥeina te wazè en tebek, ne ebpekelipezeng kew he wazè niw igkahandek he kezeetan.
HOS 2:19 “Ed-isipen ku sikiyu he esawa ku taman te taman. Ebeelan ku ziyà te keniyu is metazeng wey hustu. Ebmahalen ku sikiyu wey egkehizuwan,
HOS 2:20 ne egkehimu a he metinumanen diyà te keniyu. Umbe egkilelaan a keniyu he Nengazen.
HOS 2:21 Siak, is Nengazen, migkaǥi a he zutun he andew edtevaken ku is menge pengemuyù niw. Ibpeuzan ku su wey medtuvù diyà te tanà
HOS 2:22 is menge trigu, paras, wey ulibu para keniyu te migngezanan te Jezreel.
HOS 2:23 Ibpeubpè ku sikiyu ziyà te tanè niw su menge etew ku sikiyu. Ne sikiyu is migngezanan he Lo Ruhama he ke và dà egkegiya, ‘Wazà Mehizuwi,’ ibpeehè ku is hizu ku keniyu. Ne sikiyu zaan is migngezanan te Lo Ami he ke và dà egkegiya, ‘Kenà menge Etew ku,’ edtewaǥen ku he menge etew ku, ne egkaǥi kew te iyan a Megbevayè niw.”
HOS 3:1 Migkaǥi is Nengazen kayi te kedì te, “Iuman nu ipaahà is kebmahala nu te esawa nu minsan pa te nengumpadi sikandin. Mahala nu sikandin iring te kebmahala ku te menge etew te Israel minsan pa mid-azap sikandan te zuma he menge ed-ezapen pinaaǥi te kebpemuhat te menge supas he zuen duen menge pasas.”
HOS 3:2 Umbe, mibpemasa ku is esawa ku te 15 he pelata wey heepat he saku he barli.
HOS 3:3 Ne migkeǥiyan ku sikandin te, “Ubpè ka zuma kediey seled te meluǥayad he timpu. Ne kenè ke en pekidhulid te sengememaama. Minsan pa te kenà a zep-a ebpekidhulid kenikew.”
HOS 3:4 Su ebpesavut heini he seled te meluǥayad he timpu is kebpengungubpaan te menge etew te Israel he wazè dan hadì, upisyal, pemuhat, tedeman he vatu, wazà ipud he egemiten te kebpenagnà, wey menge ed-ezapen.
HOS 3:5 Piru ziyà te huziyan, he edtelinguma he menge andew, edlikù dan edangep diyà te Nengazen he Megbevayè dan wey ziyà te hadì dan he kevuwazan ni David. Ed-uvey zan diyà te Nengazen duma is kedtahud tenged te ketulanged din.
HOS 4:1 Sikiyu is menge Israilihanen he meǥinged diyà te tanà he Israel, pemineǥa niw is riklamu te Nengazen keniyu: “Wazè en etew ziyà te tanè niw he metinumanen, ebmahal, wey egkilala kediey,
HOS 4:2 kekenà, iyan mid-ulaula niw is kebpenrawak te zuma, kedtarùtarù, kebpenhimatey, kebpenakew, wey kebpengumpadi. Nekeeneb en heini, ne kenè en egkerintas is hinimetayà.
HOS 4:3 Tenged kayi mibmemaza is tanè niw ne ebpematey is langun he meǥinged duen, ragkes is langun he uyaǥen he edhipanew, edlayang, wey edlayewlayew.
HOS 4:4 “Kinahanglan he wazà medsumbung etawa mebasul ziyà te minsan hentei keniyu su iyan kew is menge memumuhat ereg he idsumbung.
HOS 4:5 Su sikiyu wey is menge ebpeneuven egkezeetan, maandew man etawa mezukilem. Wey edezeetan ku zaan is iney niw.
HOS 4:6 “Egkengezeetan is menge etew ku su ǥeina te kurang dan te keuluwanen mehitenged kediey. Su sikiyu mismu is menge memumuhat inselikwey niw is paaǥi te kegketau mehitenged kedì, umbe idselikwey ku en daan sikiyu is menge memumuhat ku. Midlipatan niw is Kesuǥuan ku, umbe edlipatan ku zaan is menge anak niw.
HOS 4:7 Dutun te kebmahabet niw te menge memumuhat, ne mibmahabet en daan is menge salè niw kayi te kedì. Umbe ed-el-elezen ku sikiyu pinaaǥi te impahambug niw.
HOS 4:8 Egkesuat kew he mekesalà is menge etew ku su wey kew mekekaan te pemuhat dan he para idlumpiyu.
HOS 4:9 Umbe, ǥuntaan te edsilutan ku is menge etew, ne edsilutan ku zaan sikiyu is menge memumuhat. Edsilutan ku sikiyu tenged te vetasan niw; ebelesan ku sikiyu tenged te menge vaal niw.
HOS 4:10 Tutuu he egkaan kew, piru kenè kew egkahantey. Ed-azap kew te menge ed-ezapen he midtuuwan niw he ebpekeveǥey te anak, piru kenè kew ebpekaanak su inselikwey a keniyu
HOS 4:11 su wey niw maazap is duma he menge ed-ezapen. “Menge etew ku, is beǥu wey is daan he vinu ebpekaawà te meupiya he ked-isip-isip.
HOS 4:12 Ebpesambag kew te menge ed-ezapen niw he kayu. Ne kunaan niw ke edtavak heini. Midtazin kew te mulin-ulin he iyan midtukù keniyu wey niw maazap is duma he menge ed-ezapen, umbe mid-iniyuǥan a keniyu, iring kew te vahi he nengumpadi.
HOS 4:13 Nemuhat kew ziyà te puntur te menge vuntud, diyà te sihung te metawis wey merapung he menge kayu, su meupiya heini he edhelungan. Umbe mibpehilavet is menge anak niw he raǥa ne is menge ambey niw nengumpadi zaan.
HOS 4:14 Piru kenè ku sikandan edsilutan tenged keniyan te mibeelan dan su sikiyu is menge maama nekidhilavet kew zaan te menge vahi he ebelegyà te zengeg dan diyà te simbahan, ne nemuhat kew pa zuma kandan te menge pemuhat he para te zuma he menge ed-ezapen. Ne ǥeina te sikiyu he menge etew, wazè niw kedsavut mehitenged te ketutuanan, ne edezeetan kew.
HOS 4:15 “Menge tig-Israel, minsan mid-iniyuǥan a keniyu he iring kew te vahi he nengumpadi, ne kenè niw uwit-uwita is menge tig-Juda. “Ne sikiyu is menge tig-Juda, kenè kew medhendiyà te Gilgal wey Bet Aven te ked-azap kediey etawa kebpenaad pinaaǥi te ngazan ku.
HOS 4:16 Su utew mesinupaken is menge tig-Israel, iring sikandan te simadun he dumeraǥa he vaka. Umbe kenè ku sikandan egkaatur iring te menge kerehidu he ibpepenabtab diyà te penebtavà.
HOS 4:17 Iyan en ingkaapal zan is ked-azap te zuma he menge ed-ezapen. Ne bey-ani en sikandan!
HOS 4:18 Emun ebpekepasad dan en he ed-inum, ebpenigudu en sikandan ebpekidhilavet. Is menge perezumala zan egkesuat he ebaal te mekeeled-eled he menge vaal.
HOS 4:19 Edezeetan sikandan he iring te idlayap te mevandes he keramag, ne egkepeel-elezan sikandan tenged te kebpemuhata zan te zuma he menge ed-ezapen.”
HOS 5:1 Migkaǥi pa is Nengazen te, “Pemineg kew, is menge etew te Israel, ragkes kew en is menge memumuhat wey menge sakup te pemilya te hadì, su heini he kedhukum ne para keniyu: Iring kew te penuǥes he nekeutel, su nezeetan tenged keniyu is menge etew ziyà te Mizpa wey Tabor.
HOS 5:2 Nekidsukulè kew kediey wey edtinguhè kew te kebpenhimatey, umbe ebmensuwen ku sikiyu is langun.
HOS 5:3 Netuenan ku is langun mehitenged keniyu te menge tig-Israel; wazà igkeeles niw kayi te kedì. Mid-azap kew te zuma he menge ed-ezapen, umbe neremerikan kew.
HOS 5:4 “Is mezaat he menge vaal niw iyan ed-eǥen keniyu wey kew kenà mekelikù kayi te kedì te Megbevayè niw. Su ziyà te gehinawa niw is mulin-ulin he edtukù keniyu te ked-azap te zuma he menge ed-ezapen, ne wazà a keniyu kilelaa he Nengazen.
HOS 5:5 Is kegkemepelevawen niw iyan ebpengintutuu he ereg kew he edsilutan. Ne tenged te menge salè niw ne egkezeetan kew is menge tig-Israel zuma te menge tig-Juda.
HOS 5:6 Edangep kew kayi te kedì pinaaǥi te kebpemuhat niw te menge kerehidu, kambing, wey vaka, piru kenè niw en egkeseǥazan is kebpekiduma ku keniyu su mid-iniyuǥan ku en sikiyu.
HOS 5:7 Siak is esawa niw, midluivan a keniyu te menge kevuwazan ni Israel, su ǥeina te kenà kediey is menge anak niw. Umbe ǥuntaan, edezeetan ku sikiyu wey is menge tanè niw seled dà te senge vulan.
HOS 5:8 “Ipezaǥing niw is menge vudyung wey menge trumpita su wey mekepengandam is menge etew ziyà te Gibea wey Rama! Ipezineg niw ziyà te Bet Aven is kulehian para te kebpekidtebek! Pengandam kew is menge etew te Benjamin!
HOS 5:9 Egkezeetan is Israel zutun te andew te kedsilut. Egkehitavù iyan is migkaǥi ku he ebpekesuǥat te menge tribu te Israel!
HOS 5:10 Is menge pengulu te Juda iring te menge etew he idhalin dan is menge simintu su mid-eǥawan dan te tanà is Israel. Umbe ibusbus ku ziyà te kandan is pauk ku he iring te zalem.
HOS 5:11 Edèdaaǥen is Israel wey midezeetan su ǥeina te midsilutan ku heini. Su mibpedayun heini medsunud te zuma he menge ed-ezapen.
HOS 5:12 Iring a te dezeizey he keranapranap he egketket te Israel wey Juda.
HOS 5:13 “Hein naahà te Israel wey Juda is kenà meupiya he kebpekesavuk dan, mibuyù te tavang is Israel ziyà te mekeǥeǥehem he hadì te Asiria. Piru kenà is Asiria ebpeketavang kandan.
HOS 5:14 Su edsurungen ku is Israel wey Juda he iring a te erimaung he ebpitaspitas te egkezawi zin. Iyan a mismu edezaat kandan. Ed-uwiten ku sikandan diyà te zuma he menge nasyun, ne wazà ebpekelibri kandan.
HOS 5:15 Ne kegkepasad dutun edlikù a ziyà te lugar ku, taman te ed-engkenen dan is menge salè dan. Ne edangep dan kayi te kedì tenged te kegkerasey zan.”
HOS 6:1 Mibitiyara is menge Israilihanen he ke sikandan te, “Kuwa kew en, su edlikù kiw en diyà te Nengazen. Iyan sikandin midezaat kenitew ne iyan daan sikandin edtavang kenitew.
HOS 6:2 Egkeiring kiw te minatey he segugunà ed-uyaǥen. Te kenà egkeuǥet ne ibpeenew kiw zin, ne ebpengungubpaan kiw ziyà te etuvangan din.
HOS 6:3 Ebpeninguhaan tew he mekilala tew is Nengazen. Siguradu he ebpekeuma sikandin iring te kedsilà te andew. Ebpekeuma sikandin iring te uzan he ebpekeveǥey te wahig diyà te tanà.”
HOS 6:4 Piru migkaǥi is Nengazen te, “Menge etew te Israel wey Juda, hengkey is ebeelan ku ziyà te keniyu? Is kebmahala niw kedì ne meǥaan dà egkaawà; iring dà heini te edsaǥad he virisbiris etawa zehemug emun meselem.
HOS 6:5 Umbe, ebpetizeenan ku sikiyu pinaaǥi te menge ebpeneuven ku he ebpemematey kew. Ibpezayag ku is kedhukum ku he iring kerayag te kilat.
HOS 6:6 Su kenè ku iyan egkesuatan is menge pemuhat niw, kekenà, iyan is kebmahala niw kedì. Igkesuat ku pa is kegkilelaa niw kedì kenà is kebpemuhat niw te menge pemuhat he edtutungen.
HOS 6:7 Iring ki Adan, wazè niw itetepi-an is paaǥi ku te kebpekid-uyun keniyu. Midluivan a keniyu keniyan te lugar niw.
HOS 6:8 Is inged he Gilead mid-ubpaan te lalung he menge etew ragkes en is menge teremunù.
HOS 6:9 Is menge memumuhat niw henduen be te grupu te menge tulisan he ebantey zà te egkebiktima zan. Ebpenhimatey sikandan diyà te zalan he ibpehendiyà te Shekem, wey zuen pa zuma he mekeeled-eled he menge vaal he mibeelan dan.
HOS 6:10 He menge tig-Israel, utew grabi is neehè ku ziyà te keniyu; ed-azap kew te zuma he menge ed-ezapen, umbe nehimu kew he meremerik.
HOS 6:11 Minsan sikiyu is menge tig-Juda netelaan en is kedsiluti keniyu. “Egkesuat a pezem he idlikù ku is meupiya he kebpekesavuk te menge etew ku.
HOS 7:1 Egkesuatan ku te ebawì is menge tig-Israel. Piru is egkeehè ku ziyà te kandan iyan is kelelalung dan. Ebpenlimbung sikandan, edseled dan diyà te menge valey is ebpenakew, wey ebpenulis dan diyà te menge zalan.
HOS 7:2 Ne kunaan dan ke egkelipatan ku is langun he kelelalung dan. Nevakus gihapun sikandan te menge salè dan ne neehè ku heini is langun.
HOS 7:3 Nelipey zan is menge hadì dan wey menge upisyal zan pinaaǥi te kelelalung wey kedtarùtarù dan.
HOS 7:4 Pudu sikandan meluiven; iring sikandan te meinit he evuwan he kenè en kinahanglan he edtevunan te ebaal te supas puun te kebmasa zin taman te kebpetuvùa zin dutun te minasa zin he herina he edlutuen din.
HOS 7:5 Dutun te menge keemuran te hadì dan, midlangut dan is menge upisyal zin. Ne minsan haazà is hadì nekid-inum dutun te ebusedur he menge upisyal zin.
HOS 7:6 Ne zutun te ed-uvey sikandan is edhimatey zuen te hadì wey te menge upisyal zin, iring te keinit te evuwan is kegkeregreg te pauk dan. Su zutun te edteǥazan dan pa is hustu he timpu te ked-etaki zan, tivuuk he kezukileman is kedtigkera zan te pauk dan, ne kegkemeselem neregreg heini iring te hapuy.
HOS 7:7 Pudu sikandan neregreg tenged te pauk dan he iring is keinit te evuwan, umbe mibpenhimetayan dan is menge perezumala zan. Pudu nezeeti is menge hadì dan, piru wazà minsan sevaha kandan he mibuyù te tavang kayi te kediey.
HOS 7:8 “Nekidsevaha is menge etew te Israel te menge etew ziyà te zuma he menge nasyun. Wazà egkepupulus diyà te kandan su iring sikandan te menipis he supas he midlutù he wazà mevelikid.
HOS 7:9 In-awà te menge etew ziyà te zuma he menge nasyun is ibpekegaga zan, piru wazè dan heini meseǥipà. Iring sikandan te meǥurang he ebmeputì en is bulvul zin piru wazè din meseǥipà he meǥaan en sikandin ebpatey.
HOS 7:10 Is kegkemepelevawen dan iyan ebpengintutuu he ereg sikandan he edsilutan. Piru minsan pa te kegkehitevua kayi te langun diyà te kandan, wazà gihapun sikandan medlikù wey medangep kayi te kedì te Megbevayè dan.
HOS 7:11 Iring sikandan te merepatik, he melemu zà he ed-ekalan wey wazè din emet. Mibuyù sikandan te tavang diyà te Ehipto wey Asiria.
HOS 7:12 Piru zutun te kedhengkeniyan dan he menge lugar edhingutelen ku sikandan iring te tagbis he ebpuketen he eguyuzen pehendiyà te zizalem. Edsilutan ku sikandan sumalà te migkaǥi ku en diyà te menge ketiǥuman dan.
HOS 7:13 Mekehizuhizu zan su mibpekeziyù dan kayi te kedì. Edezeetan ku sikandan su nekidsukulà sikandan kediey. Egkesuat a pezem he edlibri kandan piru tarù is migkaǥi zan mehitenged kediey.
HOS 7:14 Kenà tinutuuwà is ked-umawa zan kediey. Dutun te edsineǥew zan diyà te menge hizeǥaan dan is ebuyù diyà te zuma he menge ed-ezapen dan te trigu wey vinu, ebpelian dan is lawa zan. Mibpekeziyù sikandan kayi te kediey.
HOS 7:15 Mibmansu ku sikandan su wey zan mebmelig-en, piru mezaat gihapun is pelanu zan kayi te kedì.
HOS 7:16 Midangep dan diyà te wazè din pulus. Iring sikandan te nezeetan he panà he wazè din en pulus. Ebpatey te tebek is menge pengulu zan su wazè dan kedtahud emun egkaǥi zan. Tenged kayi ed-engitan sikandan te menge tig-Ehipto.
HOS 8:1 “Ipezaǥing niw is budyung su wey mekepengandam is menge etew ku su is Israel he mid-isip ku he ubpeey ku, edsurungen te menge kuntada he iring keǥaan te menderaǥit. Su wazè dan itetepi-an is paaǥi ku te kebpekid-uyun kandan wey midrapas dan is kesuǥuan ku.
HOS 8:2 Ebpengum-umawen e zan he ke sikandan te, ‘He Megbevayà te Israel, migkilala zey sikew.’
HOS 8:3 Piru inselikwey zan is meupiya, umbe edel-asen sikandan te menge kuntada zan.
HOS 8:4 Mibpilì dan te menge hadì wey menge upisyal he wazè ku pilìa. Mibeelan dan he menge ed-ezapen is menge pelata zan wey menge vulawan. Ne heini he menge ed-ezapen iyan mid-uwit te kezeetan diyà te kandan.
HOS 8:5 Inselikwey ku is ed-ezapen he vaka te menge tig-Samaria. Ne neregreg is pauk ku kandan. Keenu zan buwa ebpengungubpaan he lumpiyu?
HOS 8:6 Is ed-ezapen he vaka ziyà te Samaria mibeelan dà te platiru ziyà te Israel. Kenà heeyan Megbevayà! Siguradu he edrupeten heeyan.
HOS 8:7 “Iring sikandan te nemula te keramag ne ebpekeraǥun sikandan te eribpures. Iring dan daan te trigu he wazè din pungu he kenà ebpekeveǥey te keenen. Piru minsan ebpekeveǥey heini te keenen, ne iyan egkaan duen is menge lumelengyawà.
HOS 8:8 Is Israel henduen be te mid-emeluk te zuma he menge nasyun. Ne ǥuntaan te nekidsevaha en heini kandan ne neiring heini te ǥelemiten he wazè din pulus.
HOS 8:9 Neiring heini te meseǥila he asnu he sebsevaha zin is egketazintazin. Midhangyù sikandin te tavang diyà te Asiria; mibayad sikandin diyà te zuma he menge nasyun su ebpetavang.
HOS 8:10 Piru minsan mibpesakup is Israel te zuma he menge nasyun, ne edtiǥumen ku ǥuntaan is menge etew kayi ne edsilutan ku. Ne ebpuun en is kegkerasey zan tenged te kedluplupiǥa kandan te sevaha he hadì wey menge upisyal zin.
HOS 8:11 Tutuu iyan he mibaal sikandan te mahabet he menge pemuhatà he para te menge pemuhat he para idlumpiyu, piru heini he menge pemuhatà, nehimu en he lugar he zutun sikandan ebaal te salà.
HOS 8:12 Impesurat ku is mahabet he menge kesuǥuan he para kandan, piru mid-isip dan heini he para te zuma ne kenà para kandan.
HOS 8:13 Nemuhat sikandan kayi te kedì ne migkaan dan is usa te uyaǥen he ibpemuhat dan, piru wazè ku sikandan ikelipey. Ne ǥuntaan ed-isipen ku is kelelalung dan; edsilutan ku sikandin tenged te menge salè dan. Ne edlikù sikandan diyà te Ehipto.
HOS 8:14 Midlipatan te menge tig-Israel is midlimbag kandan. Sikandan wey is menge tig-Juda mibangun te menge turuǥan wey mahabet he menge inged he midliǥuy te verengbeng. Piru ebinsulan ku is menge inged dan wey is menge melig-en he menge vahin kayi.”
HOS 9:1 Migkaǥi si Hoseas te, “Sikiyu is menge tig-Israel, engkezi niw is kedlipeylipey niw he iring te ebeelan te menge etew ziyà te zuma he menge nasyun. Su mid-azap kew te zuma he menge ed-ezapen ne mibpekeziyuan niw is Megbevayè niw. Diyà te minsan hendei he gunasà te menge pungu ingkelipey niw is menge abut niw he mid-isip niw he imbayad diyà te keniyu te zuma he menge ed-ezapen tenged te ked-ezapa niw kandan.
HOS 9:2 Piru ziyà te huziyan he timpu egkaawà diyà te keniyu is menge trigu wey vinu.
HOS 9:3 Ed-awè kew kayi te Israel he tanà te Nengazen, ne edlikù kew ziyà te Ehipto. Is duma keniyu edhendiyà te Asiria, ne zutun egkaan kew te menge keenen he mid-isip niw he meremerik.
HOS 9:4 Kenè en idtuǥut keniyu is kebpemuhat te vinu ziyà te Nengazen. Is menge pemuhat niw kenà ebpekepenunuat kandin. Is minsan hentei he egkaan te pemuhat niw ne ed-isipen he meremerik, su iring dà haazà te kegkaan diyà te mibpetayan. Is keniyu he egkeenen para zà te keniyu; kenè man diyà te valey te Nengazen is mibpemuhatan kayi.
HOS 9:5 Ne ǥeina te kenà edewaten te Nengazen is menge pemuhat niw, ne hengkey is ebeelan niw emun egkeuma is ispisyal he menge timpu te menge ked-azap etawa menge pista he para te kebeǥey te zengeg diyà te Nengazen?
HOS 9:6 Minsan egkepeleǥuyan niw is kezeetan, edtiǥumen kew gihapun diyà te Ehipto ne idleveng kew ziyà te Memfis. Egketembuan dà te sagbet wey zuǥiyen he dezeisey he kayu is mahalen he menge gelemiten niw he pelata wey is menge tulda niw.
HOS 9:7 “Menge tig-Israel, neume en is timpu te kedsiluti keniyu, kes timpu he ebelesan kew tenged te menge mibeelan niw. Ne egketuenan niw he neume en heini. Ne iyan lalag niw mehitenged kedì is, ‘Tulebung heeyan he ebpeneuven! Engey heeyan is edumelahan te mulin-ulin!’ Iyan heeyan lalag niw mehitenged kedì su ǥeina te zekelè en is salè niw ne egkeepesan a keniyu.
HOS 9:8 Ne ǥeina te ebpeneuven a, ne ebpekiduma kedì is Megbevayà te kebantey keniyu te menge tig-Israel. Piru minsan hendei a ebpevayà ne egkesuatan a keniyu te edezaat; ne iring a te tagbis he egkesuatan niw te edhingutel. Egkeepesan a te menge etew ziyà te Israel, he mid-isip te Megbevayè ku he ubpeey zin.
HOS 9:9 Midtaman kew en he menge lalung, iring kew en duen te menge maama zengan diyà te Gibea. Edtentenuzan te Megbevayè is kelelalung niw; edsilutan kew zin tenged te menge salè niw.”
HOS 9:10 Migkaǥi is Nengazen te, “Menge tig-Israel, hein mibpilì ku is menge kepuun niw para mehimu he menge etew ku, ne utew a nelipey. Iring te etew he nelipey su nekaahà te midtuvù he paras diyà te disirtu etawa nekaahà te nehuna he veǥas te higus. Piru hein midhendiyè dan te Baal Peor, impehinungud dan is untung dan diyà te mekeeled-eled he ed-ezapen ne neiring sikandan kezaat dutun te ed-ezapen he mibmahal zan.
HOS 9:11 Menge tig-Israel, is kegkemekeǥeǥehem niw egkaawà iring te tagbis he edlayang. Kenà ebmeǥingey wey ebpekaanak is menge vahi niw.
HOS 9:12 Minsan ebpekaanak sikandan, ne egkuwaan ku is langun he anak dan ne ebpekelalew kew. Mekehizuhizu kew emun ed-ewaan ku en sikiyu.
HOS 9:13 “Is ked-ahaa ku zengan keniyu ne iring kew te kayu he palma he nekepemula ziyà te meupiya he tanà. Piru ǥuntaan ereg he edumahan niw is menge anak niw ziyà te tebek su wey meǥerà.”
HOS 9:14 Migkaǥi si Hoseas te, “Nengazen, iyan heini beeli nu ziyà te menge etew nu: Kenè nu ituǥut he mekaanak wey mekepesusu is menge vahi te menge anak dan.”
HOS 9:15 Migkaǥi is Nengazen te, “Is langun he kelelalung te menge etew ku mibpuun hein diyè dan te Gilgal. Ne zutun he lugar neepesan ku en sikandan. Ne tenged te kelelalung dan ibpaawè ku sikandan kayi te Israel he mid-isip ku he ubpeey ku. Ne kenè ku en sikandan ebmahalen; nekidsukulà kedì is langun he menge pengulu zan.
HOS 9:16 Iring sikandan te pinemula he neǥangu is dalid din, umbe wazà mekepemeǥas. Minsan ebpenganak sikandan, edhimetayan ku is pinelanggè dan he menge anak.”
HOS 9:17 Migkaǥi si Hoseas te, “Idselikwey te Megbevayè ku is menge tig-Israel su wazè dan mebpezumazuma kandin. Umbe minsan hendei he nasyun is egkepeveyaan dan.”
HOS 10:1 “Is menge tig-Israel, iring te pinemula he paras he merapung wey mahabet is menge veǥas din. Dutun te ked-uswag dan, mezakel he menge pemuhatà is mibeelan dan, ne mibpekekempet dan is tedeman he menge vatu he ed-ezapen dan.
HOS 10:2 Menge limbungan sikandan, ne ǥuntaan ereg sikandan he ebpekaantus tenged te menge salè dan. Ebengkaǥen te Nengazen is menge pemuhatè dan wey is tedeman he menge vatu.
HOS 10:3 Siguradu he ebpekekaǥi sikandan keuzemà: Wazè dey hadì su wazè key medtahud te Nengazen. Piru minsan duen dey pa hadì, wazà gihapun meupiya he egkehimu zin diyà te kenami.
HOS 10:4 Edtulung dà sikandan egkaǥi piru wazè dan egkehimu. Ebpenangdù dan te tarù wey ebpekid-uyun dan he kenè dan edtumanen. Umbe is kukuman, neiring en te edhilu he sagbet he midtuvù diyà te vevesukà.
HOS 10:5 “Egkahandek is menge meǥinged diyà te Samaria tenged te kegkaawà te menge ed-ezapen he vehiyan he menge vaka ziyà te Bet Aven. Sikandan wey is menge memumuhat dan he ingkelipey zan is kekempet kayi he menge ed-ezapen, ebpekelalew zan su egkuwaan heini ziyà te kandan
HOS 10:6 ne ed-uwiten diyà te Asiria su igasa ziyà te mekeǥeǥehem he hadì. Egkepeel-elezan is Israel tenged te kedsarig din te kayu he menge ed-ezapen.
HOS 10:7 Egkezeetan wey egkahanew is hadì din iring te zeisey he kayu he egkaanud te wahig.
HOS 10:8 Edrundusen is menge simbahan diyà te metikang he menge lugar ziyà te Aven, he iyan nehimu he hinungdan te kebpekesalà te menge tig-Israel. Ebmelayat is ebpenuvù he menge zuǥiyen ne ebpeketambun heini te menge pemuhatè dan. Ne egkeǥiyan dan is menge vuntud te, ‘Tempaǥi key wey vunbuni!’ ”
HOS 10:9 Migkaǥi is Nengazen te, “Sikiyu is menge etew te Israel mibpedayun kew mebaal te salà puun pa zutun te timpu te kebaal te salà te menge kepuun niw ziyà te Gibea. Wazè kew iyan meveǥu. Umbe sikiyu is menge kevuwazan te menge lalung ne edsurungen te Gibea?
HOS 10:10 Suat ku is kedsiluti ku keniyu. Egkesevaha is menge nasyun te kedsilut keniyu tenged te kedsigudu niw kebaal te salà.
HOS 10:11 Dengan ebpeeyehey kew zà; iring kew te zumeraǥa he vaka he nelayam he ibpeǥunas he ingkesuat din heini he terebahu. Piru ǥuntaan edlislisezen ku sikiyu is menge tig-Israel ragkes en is menge tig-Juda; egkeiring kew te zumeraǥa he vaka he ed-eyuǥuwan is tengel zin he wazè pa kubali, ne id-eradu.
HOS 10:12 Migkeǥiyan ku sikiyu te, ‘Ipemelemineg niw is gehinawa niw iring te tanà he mid-eradu. Pemula kew te ketazeng ne ebpekeraǥun kew te kebmahal. Su timpu en heini te kedangep niw kayi te kedì taman te ebpekeuma a ne ibpeseǥazan ku keniyu is kelibriyanan he iring te uzan.’
HOS 10:13 “Piru nemula kew te kelelalung, umbe ebpekeraǥun kew zaan te kelelalung. Midtarùtarù kew, ne beǥas heeyan te kelelalung niw. Ne ǥeina te midsarig kew te kebpekegaga niw, iring te kahabet te menge sundaru niw,
HOS 10:14 ne egkehitavù diyà te keniyu is tebek ne egkewaǥey is binerengbeng he menge inged niw. Ebeelan te menge kuntada niw is iring te mibeelan ni Shalman diyà te inged he Bet Arbel, iring te midruntek din is menge iney wey is menge anak dan.
HOS 10:15 Iyan daan heeyan egkehitavù keniyu te menge tig-Betel su utew en subra is kelelalung niw. Dutun te egkeriwaswas pa, ne ebpatey en is hadì te Israel.”
HOS 11:1 Migkaǥi is Nengazen te, “Hein iring pa te vatà is Israel, mibmahal ku sikandin. Mid-umew ku sikandin puun te Ehipto su anak ku sikandin.
HOS 11:2 Piru ǥuntaan, minsan edtulungan ku en sikandan ed-umawa is menge tig-Israel, ne nasì dan mebpekeziyù kayi te kedì. Nemuhat sikandan te menge pemuhat wey midtutung te menge veyewà diyà te menge ledawan ni Baal.
HOS 11:3 Iyan a mid-elima kandan he iring te mid-aǥak ku sikandan su wey zan mebmetau he edhipanew, piru wazè dan kilelaa he iyan a mid-elima kandan.
HOS 11:4 Migiyahan ku sikandan duma is ked-elima iring te ked-elima te etew te vaka zin. Iring te midtangtang ku is eyuǥu ziyà te tengel zan ne migkumpayan ku sikandan.
HOS 11:5 Ne ǥeina te kenè dan egkesuat he edlikù kayi te kedì, ne siguradu he ziyà sikandan ebpekelikù te Ehipto, ne tig-Asiria is edumala kandan.
HOS 11:6 Edsurungen te menge kuntada is menge inged dan ne edezeetan dan is menge terangka te menge pultahan kayi. Edezeetan te menge kuntada zan is menge pelanu zan.
HOS 11:7 Heini sikandan is menge etew ku, utew egkesuat he ebpekeziyù kayi te kedì. Umbe minsan medsevaha pa sikandan is ebpengumew-umew kedì, ne kenè ku sikandan edlibriyen.
HOS 11:8 “Sikiyu is menge tig-Israel, kenè ku egkehimu is kedselikwey wey kebey-ani keniyu. Kenè ku egkehimu is kebpurungi kedezeeti keniyu iring te mibeelan ku ziyà te inged he Adma wey Zeboyim. Utew ebmesakit is gehinawa ku emun ebeelan ku heini ziyà te keniyu. Nehizuwan ku sikiyu.
HOS 11:9 Kenè ku en ibpaahà is utew ku kegkepauk; kenè ku en edweǥayen is Israel, su Megbevayà a ne kena a etew. Iyan a kes Waǥas he Megbevayà he mibpekiduma keniyu, ne kenà a edhendiyà te keniyu is egkepauk.
HOS 11:10 “Edsunud kew kediey zutun te edhiniǥer a iring te erimaung. Siguradu he edhiniǥer a, ne ed-agpas kew ed-ulì puun te edsenlepan.
HOS 11:11 Meǥaan dà ne ebpekeuma kew en iring te menge tagbis he ebpuun diyà te Ehipto etawa iring te menge merepatik he ebpuun diyà te Asiria. Ibpeuman ku sikiyu ibpeubpà diyà te menge valey niw. Iyan a, is Nengazen, is migkaǥi kayi.”
HOS 11:12 Migkaǥi pa is Nengazen te, “Layun e zà edterterui wey edlelunga te menge tig-Israel. Ne is menge tig-Juda mibpedayun te kebpekeziyù kayi te kedì, te Megbevayà he waǥas wey metinumanen.
HOS 12:1 “Is menge tig-Israel midsarig te menge azen he wazè din pulus. Is edel-asen dan seled te tivuuk he andew ne iyan is menge azen he ebpekezezaat kandan. Mid-iseg is ketetarù dan wey kebpesipala. Mibpekid-uyun sikandan te menge tig-Asiria wey menge tig-Ehipto, umbe mid-uwit dan te lana ziyà te Ehipto he igasa zan.”
HOS 12:2 Migkaǥi si Hoseas te, “Duen riklamu te Nengazen diyà te tig-Juda he menge kevuwazan ni Jacob. Edsilutan din sikandan te sumalà te menge vetasan dan; ebelesan din sikandan te sumalà te menge vaal zan.
HOS 12:3 Hein diyè pa sikan is kepuun dan he si Jacob te ǥetek te iney zin, egkesuat en sikandin he ebpekidlavew te sereping din. Ne hein midekelè en sikandin, mibpekibuteng sikandin te Megbevayà
HOS 12:4 iring te kebpekibuteng din te velinsuǥuen, ne nekezaag sikandin. Midsineǥew sikandin hein ebuyù te penuvadtuvad dutun te velinsuǥuen. Neehè din is Megbevayà diyà te Betel, ne zutun nekidlalag kandin is Megbevayà.
HOS 12:5 Iyan sikandin kes Nengazen he Megbevayè he Mekeǥeǥehem; Nengazen is nevantug he ngazan din.
HOS 12:6 “Umbe sikiyu is menge kevuwazan ni Jacob, likù kew en diyà te Megbevayè niw, ne ipeehè niw is kebmahal wey hustu he kukuman. Ne pedayun kew sarig te Megbevayè niw.”
HOS 12:7 Migkaǥi is Nengazen te, “Susuaten te kedlimbung is menge nigusyanti niw; egamit sikandan te limbungan he timbangan.
HOS 12:8 Ebpahambug kew pa is menge tig-Israel he ke sikiyu te, ‘Neketiǥum key te ketiǥeyunan ne utew key en sepian. Ne wazà ebpekesumbung kenami he neketiǥum key te ketiǥeyunan pinaaǥi te mezaat he paaǥi, su salà is kebaal keniyan.’
HOS 12:9 Umbe siak, is Nengazen he Megbevayè niw he mibpeǥawas keniyu ziyà te Ehipto, ibpeuman ku sikiyu ibpeubpà diyà te menge lawig, iring te ebeelan niw emun timpu te Pista te Kebaal te menge Lawig.
HOS 12:10 “Nekidlalag a te menge ebpeneuven ne zuen mahabet he impelewasan ku kandan. Pinaaǥi kandan mibpetizeenan ku sikiyu he egkezeetan kew.
HOS 12:11 Piru minsan pa zutun, is menge etew ziyà te Gilead, menge lalung sikandan wey wazà menge pulus, ne is menge etew ziyà te Gilgal nemuhat te menge tudu he vaka ziyà te zuma he menge ed-ezapen. Siguradu he ebengkaǥen is menge pemuhatè dan ne egkeiring heini te intambù he menge vatu he mibpenguwa ziyà te tanà he mid-eradu.
HOS 12:12 “Mibpelaǥuy si Jacob pehendiyà te Aram, ne midterebahu sikandin te ked-atur te menge uyaǥen su wey zin meesawa is ed-esewaan din.
HOS 12:13 Pinaaǥi te ebpeneuven ku he si Moises, ibpeǥawas ku sikiyu is menge Israilihanen diyà te Ehipto wey mid-elimahan ku.
HOS 12:14 Piru midhimu niw he mepauk a is Nengazen niw tenged te kebpenhimatey niw, umbe edsilutan ku sikiyu. Ebelesan ku sikiyu te kedsumpelita niw kediey.
HOS 13:1 “Dengan, emun egkaǥi is tribu ni Efraim egkerkeren te kegkahandek is duma he menge tribu te Israel, ne edeliǥen dan heini. Piru nekesalà is menge etew kayi he tribu tenged te ked-azap dan ki Baal. Umbe nemematey sikandan.
HOS 13:2 Guntaan, sikiyu is migngezanan te Efraim, mibpedayun kew he ebaal te salà. Mibeelan niw he ledawan is menge pelata niw su ed-ezapen niw. Piru heini is langun, mibeelan dà te etew zà duen ne pinaaǥi zà heini te neisip din. Migkaǥi kew pa te ebpemuhat kew te etew kayi te menge ed-ezapen he vaka ne edhazek kew ziyà te kandan.
HOS 13:3 Umbe, egkahanew kew iring te edsaǥad he virisbiris etawa zehemug emun meselem, etawa iring te ukap diyà te ǥunasà he idlayap te keramag etawa evel he egawas diyà te peǥewasà duen.
HOS 13:4 “Iyan a kes Nengazen he Megbevayè niw he mibpeǥawas keniyu ziyà te Ehipto. Kinahanglan he wazè en duma he egkilelaan niw he Megbevayà wey Menluluwas, kekenà, iyan e zà.
HOS 13:5 Mid-elimahan ku sikiyu ziyà te disirtu he utew memaza he lugar.
HOS 13:6 Piru hein midtuvazan ku sikiyu ne mid-uswag kew, nehimu kew he mepelevawen ne midlipatan ad keniyu.
HOS 13:7 Umbe, edsurungen ku sikiyu wey edezeetan iring te ked-etaki wey kedezaat te zumezaas he langgam te edewiyen din, ed-iringan ku is ebeelan te erimaung etawa bir he ed-eǥawan te anak din. Ed-iringan ku is liyupardu su ed-eyanan ku sikiyu ziyà te menge zalan.
HOS 13:9 Edezeetan ku sikiyu is menge tig-Israel, su ǥeina te migkuntada a keniyu is iyan pezem edtavang keniyu.
HOS 13:10 Mibuyù kew te hadì wey menge upisyal su midsarig kew he iyan sikandan ebpeketavang keniyu. Umbe tenged te kegkepauk ku ne imbeǥey ku sikandan diyà te keniyu, ne tenged te kegkeepes ku in-awè ku sikandan diyà te keniyu. Na, hendei en be is hadì niw wey is menge pengulu ziyà te kada inged he edlibri keniyu?
HOS 13:12 Is menge salè niw ne kenè ku edlipatan, ibpeiring ku heeyan te menge surat he midtenges wey intaǥù.
HOS 13:13 “Duen niw en penahun he ebeǥuwen niw is kebpengungubpaan niw. Piru tenged te wazè niw kedsavut, wazè niw heini beliya. Iring kew te vatà he kenà egkesuat he egawas diyà te getek dutun te idlusad en pezem sikandin.
HOS 13:14 Edlibriyen ku ve sikiyu te kemetayen? Kenà! Egkeǥiyan ku pa ganì is kemetayen te, ‘He kemetayen, pekevisa ke en. Ne dezeeti nu en sikandan. Kenè ku sikiyu egkehizuwan.’
HOS 13:15 Minsan edhuna kew he meuswaǥen kenà te menge kezuzumahi niw, edezeetan ku sikiyu. Ibpaaǥi ku is meinit he keramag he ebpuun diyà te disirtu he zapit te edsilaan ne egkengemezahan is menge serebseb wey menge kalut niw. Ne ed-eǥawen is mahalen he menge azen niw.
HOS 13:16 Ereg he edsilutan is menge tig-Samaria tenged te kebpekidsukulè dan kediey te Megbevayè dan. Egkeǥerà sikandan tenged te tebek. Edrunteken is dezeisey he menge anak dan, ne edsirian is meǥingey he menge vahi kandan.”
HOS 14:1 Migkaǥi si Hoseas te, “He menge tig-Israel, likù kew ziyà te Nengazen he Megbevayè niw, su nezeetan kew tenged te menge salè niw.
HOS 14:2 Likù kew ziyà te Nengazen ne kaǥi kew ziyà te kandin te, ‘Nengazen, peseyluwa nu is langun he menge salè dey, ne zewata key kenikew tenged te keupiya nu, su wey key mekepemuhat kenikew te menge kedalig he ebpuun te menge vèbè dey.
HOS 14:3 Kenè key en ebuyù te tavang diyà te Asiria wey kenè key en edsarig te menge kudà he para te tebek. Kenè dey en egngezanan he Megbevayè dey is menge ed-ezapen he mibeelan dey. Su nehizuwan key kenikew is iring te menge ilu.’ ”
HOS 14:4 Migkaǥi is Nengazen te, “Ebewian ku is kegkemesinupaken te menge etew ku, ne ebmahalen ku sikandan te ebpuun te keugelingen he suat ku. Su naawè en is kegkepeuki ku kandan.
HOS 14:5 Edtuvazan ku is menge tig-Israel. Egkeiring a te zehemug he ebpekevinyag te menge pinemula. Ed-uswag sikandan iring te liryu he ebpemulak. Ebmelig-en sikandan iring te kayu he sidru ziyà te Lebanon he mezalem is nesenevan te zalid din.
HOS 14:6 Ebmahabet sikandan iring te subpang he ebpeneringsing. Egkehimu sikandan he dungganen iring te kayu he ulibu he mekempet, wey kayu he sidru ziyà te Lebanon he mehemut.
HOS 14:7 Ed-uman sikandan ebpengungubpaan duma is ked-ipata ku kandan. Ed-uswag sikandan iring te pungu he metiugkey, wey iring te paras he ebpengevukad. Ne egkevantug sikandan iring te vinu ziyà te Lebanon.
HOS 14:8 “Is menge tig-Israel, kenè dan en edangep diyà te zuma he menge ed-ezapen. Iyan a edtavak te menge kebpengemuyù niw wey ed-elima keniyu. Edipinsahan ku sikiyu. Iring a te kayu he sipris he merapung, he ebpekelambung. Iyan a ebpeuswag keniyu.”
HOS 14:9 Berakat he is duen din kedsavut keniyu metueni zin wey mesavut din is menge ingkesurat kayi. Utew hustu is menge paaǥi te Nengazen ne ed-ikulen heini te menge metazeng, piru igkeseligkat mulà heini te menge merepasen.
JOE 1:1 Iyan heini menge lalag te Nengazen he impezayag din diyà te ki Joel te anak ni Petuel.
JOE 1:2 Sikiyu is menge edumala te Juda wey is langun he meǥinged kayi, pemineǥa niw heini is egkeǥiyen ku ziyà te keniyu. Wazè pa nehitavù he iring kayi hein kaazen pa te menge kepuun niw wey kayi te keniyu en he timpu ǥuntaan.
JOE 1:3 Kinahanglan he edtudtulen heini ziyà te kada lapis te kevuwazan niw:
JOE 1:4 Duen ebpekedtitinundug he menge grupu te menge terapan he ebpendezaat. Is egkesamà he menge pinemula he kenà egkekaan duen te egkehuna he grupu ne egkeenen en maan te ebpeketinundug he grupu taman te egkaamin is menge pinemula.
JOE 1:5 Sikiyu is menge lelenguten, enew kew wey mebpurung medsineǥew! Su wazè niw en egkeinum; wazè en menge paras he egkeveelan he veǥu he vinu.
JOE 1:6 Su is tanà te Nengazen mid-etaki te mekahandekhandek he menge nasyun. Iring te terapan is menge sundaru zan su utew subra is kahabet dan. Meǥarang is menge ngipen dan iring te menge ngipen te erimaung.
JOE 1:7 Midezeetan dan is menge pinemula he paras te Nengazen wey is menge kayu zin he higus. Migketket dan is menge lekang kayi taman te mibmeputì is menge subpang.
JOE 1:8 Sineǥew kew iring te raǥa he mibivisti te saku te kebpaahà he ingkeseeng din is kebpatey te ebpengesawa kandin.
JOE 1:9 Su wazè en trigu wey vinu he igkepemuhat diyà te valey te Nengazen; umbe edlalew is menge memumuhat he ebpenilbi te Nengazen.
JOE 1:10 Egkengezeetan is menge pemuleey he henduen be te etew he edlalew. Egkengezeetan is menge trigu ne egkeǥangu is menge paras wey is menge kayu he ulibu.
JOE 1:11 Sikiyu is menge perevasuk, keseeng kew! Sikiyu is ed-atur te pemuleey te paras, habet kew sineǥew! Su wazè en menge abut diyà te menge vevesukà; wazè en menge trigu wey menge barli.
JOE 1:12 Egkeǥangu is menge pinemula he paras wey is langun he kayu ragkes en is menge higus, pumigranata, palma, wey mensanas. Benar iyan he egkaawà is kelipey te menge etew.
JOE 1:13 Sikiyu is menge memumuhat he ebpenilbi ziyà te pemuhatà he para te Megbevayè ku, bivisti kew te saku ne hendiyè kew te valey te Nengazen ne sineǥew kew seled te tivuuk he kezukileman. Su wazè en menge trigu wey menge vinu he igkepemuhat diyà te valey te Megbevayè niw.
JOE 1:14 Keǥiyi niw is menge edumala te Juda wey is langun he meǥinged kayi, he medtiǥum dan is langun diyà te valey te Nengazen he Megbevayè niw ne mebpuasa zan. Mebuyù dan te tavang diyà te Nengazen.
JOE 1:15 Egkeuvayan en is andew te kebpendezaat te Nengazen he Mekeǥeǥehem.
JOE 1:16 Neehè tew iyan ke nemenumenu is kegkeewai kenitew te keenen wey ke nemenumenu is kegkaawà te kedlipey ziyà te valey te Megbevayà.
JOE 1:17 Nemematey is menge venì diyà te tanà. Ne tenged te kegkezeeti te menge trigu, wazè en taǥù te menge budiga, umbe egkengerundus en heini.
JOE 1:18 Egurub is menge uyaǥen tenged te kegkevitil zan. Ed-engà is menge vaka su wazè dan en egketabtab, wey elin daan edlised is menge kerehidu.
JOE 1:19 Mid-ampù si Joel. Ke sikandin te, “Ed-umawen ku sikew, Nengazen, su nengeǥangu is menge penebtavà wey is langun he menge kayu ziyà te menge vevesukà he henduen be te nevinsulan.
JOE 1:20 Minsan is leew he menge langgam edtaǥad te penavang nu, su nemezahan en is dezekelà wey dezeisey he menge wahig, ne nengeǥangu is menge penebtavà he henduen be te nevinsulan.”
JOE 2:1 Ipezaǥing niw is budyung su wey mekepengandam is menge etew ziyà te Zion, he iyan kes segradu he vuntud te Nengazen. Sikiyu is langun he meǥinged diyà te Juda, egkerkeren kew tenged te kegkahandek, su egkeuvayan en is andew te kedsilut te Nengazen.
JOE 2:2 Merusirem wey ebpenggapun dutun he andew. Is mekahandekhandek he menge terapan he utew subra is kahabet dan ne ebpekeeneb diyà te menge vuvungan iring te kebpekeeneb te silà te andew emun egkepawè en. Wazè pa nehitavù he iring keniyan puun pa zengan, ne kenè en egkeuman egkehitavù is iring keniyan taman te taman.
JOE 2:3 Ebpekedtitinundug is ked-ataki te menge terapan he henduen be te hapuy. Hein wazè pa sikandan med-etaki, is tanà henduen be te iring te pemuleey he Eden, piru hein mid-etaki zan en heini, ne neiring heini te disirtu. Wazè en pinemula he wazè dan mezèdeeti.
JOE 2:4 Henduen sikandan te zagwey te kudà, ne ebpelelaǥuy sikandan iring te kudà he para te tebek.
JOE 2:5 Is keǥurub te kedlinglingketew zan diyà te menge vuvungan iring te keǥurub te ebpelelaǥuy he kerwahi wey iring te kerekatak te ebinsulan he reǥami. Iring sikandan te mekeǥeǥehem he menge sundaru he andam en he ebpekidtebek.
JOE 2:6 Is menge etew he ebpekaahà kandan egkahandek ne ebmemeluntak.
JOE 2:7 Ed-etaki sikandan he ebpemenahik diyà te menge verengbeng iring te menge sundaru. Edtandang sikandan is edhipanew ne kenè dan en ebpenuweysuwey ziyà te ibayà. Kenà sikandan ebpelislisiǥà; ne kenè dan idtetepi-an is menge ǥumaan he idsinuǥung kandan.
JOE 2:9 Edsurung dan diyà te inged he ebpemenahik diyà te verengbeng kayi. Ebpemenehikan dan is menge valey ne ziyè dan ebayà te menge sulawà he iring te menge tekawen.
JOE 2:10 Egkehuyung is kelibutan wey is langit dutun te kebpekeuma zan. Ebmerusirem is andew wey is bulan ne kenè en edsiǥa is menge vituen.
JOE 2:11 Ebmenduan te Nengazen heini is menge terapan he menge sundaru zin, ne edtumanen dan is menge suǥù din. Mekahandekhandek heini he menge terapan ne utew subra is kahabet dan. Mekehandekhandek utew haazà is andew te kedsilut te Nengazen; ne wazà ebpekeeguwanta kayi.
JOE 2:12 Migkaǥi is Nengazen he timpu en heini te kedlikù niw ziyà te kandin te kedlikù he meheǥet diyà te gehinawa niw, he egkezumahan te kebpuasa wey kedlalew duma is kedsineǥew.
JOE 2:13 Iniyuǥi niw is kelelalung te ked-iniyug he ebpuun diyà te gehinawa niw, ne kenà bà dà ibpaahà pinaaǥi te kebindasa niw te visti niw. Likù kew ziyà te Nengazen he Megbevayè niw, su hihizuwen sikandin wey iipengen. Mepinelenggaan sikandin wey kenà pepeuken. Andam sikandin he edhalin te isip din, ne kenè din en edleusen is kebpaaǥi zin te kezeetan.
JOE 2:14 Ne kela ke mahalin is isip te Nengazen he Megbevayè niw ne edtuvazan din is menge sebpet niw, su wey kew mekepemuhat en diyà te kandin te menge trigu wey vinu.
JOE 2:15 Ipezaǥing niw is budyung diyà te Zion he paaǥi te kebpetueni te menge etew he kinahanglan sikandan he edtiǥum para te kebpuasa.
JOE 2:16 Himuwa niw is tulumanen te kedlumpiyu ne tiǥum kew is langun, batà etawa meǥurang. Minsan is menge peririǥè pa ne uwita niw, ne medtampu zaan is beǥu he neked-esawa.
JOE 2:17 Is menge memumuhat he ebpenilbi te Nengazen, medsineǥew sikandan diyà te pid-elangan te pemuhatà wey varkun duen te valey te Nengazen, ne med-ampù dan te iring kayi: “Nengazen, kehizuwi nu is menge etew he ǥaked nu. Kenè nu ituǥut he ebpeel-elezan sikandan wey edsudien te menge etew ziyà te zuma he menge nasyun pinaaǥi te kegkaǥi te, ‘Hendei en be is Megbevayè niw?’ ”
JOE 2:18 Ingkeipeng te Nengazen is tanè din, wey nehizuwan din is menge etew zin.
JOE 2:19 Ne midtavak din is ampù dan he ke sikandin diyà te kandan te, “Ebeǥayan ku sikiyu te menge trigu, beǥu he vinu, wey lana; ne egkeperahan kew. Ne kenè ku en idtuǥut he peel-elezi kew te menge etew ziyà te zuma he menge nasyun.
JOE 2:20 Ibpaawè ku is menge edsurung keniyu he ebpuun diyà te zizaya, ne edsegseǥen ku sikandan pehendiyà te disirtu. Is nehuna he grupu zan ne edsegseǥen ku pehendiyà te Daǥat he Minatey ne is egkehuziyan he grupu zan ne edsegseǥen ku pehendiyà te Zaǥat he Mediteraneo. Ne egkengemahù sikandan.” Utew egkein-inuwi is menge mibeelan te Nengazen.
JOE 2:21 Kenà ereg he egkahandek is menge meǥinged diyà te tanà he Juda, kekenà, ereg he egkelipey sikandan su utew egkein-inuwi is menge mibeelan te Nengazen.
JOE 2:22 Ne kenà daan ereg he egkahandek is menge langgam, su mibmeilem en is menge penebtavà wey nemeǥas en is menge kayu ragkes en is higus. Nemeǥas en daan is menge paras.
JOE 2:23 Sikiyu is menge etew ziyà te Zion, lipey kew tenged te mibeelan te Nengazen he Megbevayè niw. Su mibeǥayan kew zin te nehuna he uzan te kebpaahaa zin he metazeng sikandin. Mibeǥayan kew zin te nehuna he uzan wey te ebpekesunud he uzan iring ded duen te nehuna.
JOE 2:24 Egkepenù te menge trigu is menge gunasà wey edrepey is beǥu he vinu wey lana ziyà te menge teleǥuey kayi.
JOE 2:25 Su migkaǥi is Nengazen te, “Idlikù ku is nelaga ziyà te keniyu zutun te menge tuig he mid-etaki is menge pinemula niw te nekedtutundug he grupu te menge terapan. Iyan a midsuǥù dutun te mahabet he menge terapan he menge sundaru ku.
JOE 2:26 Ne ǥuntaan edekelè en is keenen niw ne egkengehantey kew. Ne tenged kayi, edeliǥen a keniyu is Megbevayè niw, he mibaal te egkein-inuwan he menge vaal diyà te keniyu. Ne kenè kew en egkepeel-elezan is menge etew ku minsan keenu.
JOE 2:27 Ne egketuenan niw he ziyà a te keniyu te menge tig-Israel, ne iyan e zà Nengazen he Megbevayè niw ne wazè en duma pa. Ne sikiyu is menge etew ku ne kenè kew en egkepeel-elezan minsan keenu.”
JOE 2:28 “Diyà te huziyan he timpu ibeǥey ku is Mulin-ulin ku ziyà te langun he kelasi te etew. Is menge anak niw he maama wey vahi ebpenudtulen dan is menge lalag ku. Is meǥurang keniyu he menge maama ibpeteǥeinep ku. Is menguhed keniyu he menge maama duen menge ibpelewasan ku kandan.
JOE 2:29 Dutun he menge andew, ibeǥey ku zaan is Mulin-ulin ku ziyà te menge suluǥuen he menge maama wey menge vahi.
JOE 2:30 Ebpaahà a te menge singyal diyà te langit wey tanà: duen egkaahà he lengesa, hapuy, wey mekepal he evel.
JOE 2:31 Ebmerusirem is andew, ne is bulan ebmeriǥà iring te lengesa. Kenà heini egkehitavù emun kenè pa egkeuma is mekahandekhandek he kedhukum te Nengazen.”
JOE 2:32 Piru is minsan hentei he edangep diyà te Nengazen ne egkelibri te silut he edtelinguma. Su sumalà is migkaǥi te Nengazen, duen menge Israilihanen he egkesamà diyà te Jerusalem he migngezanan he Buvungan he Zion. Heini sikandan mibpilì te Nengazen he egkengelibri.
JOE 3:1 Migkaǥi is Nengazen te, “Dutun te timpu te edlikù ku is meupiya he kebpekesavuk diyà te Juda wey Jerusalem,
JOE 3:2 edtiǥumen ku is menge etew ziyà te menge nasyun ne ibpetupang ku sikandan diyà te Suǥud ni Jehoshafat. Dutun edhukuman ku sikandan tenged te mibeelan dan diyà te menge Israilihanen, kes menge etew he ǥaked ku. Impeyapat dan diyà te zuma he menge nasyun is menge etew ku, ne mibahin dan is tanè ku.
JOE 3:3 Mibahin dan is menge etew ku pinaaǥi te ripa, ne imbelegyè dan he uripen is menge vatà he menge maama wey menge vahi, su ibayad dan is halin te inumen wey menge vahi he ebelegyà te zengeg dan.
JOE 3:4 “Sikiyu is menge etew ziyà te Tyre, Sidon, wey te langun he lugar ziyà te Filistia, hengkey heini is mibeelan niw he igkuntra niw kedì? Mibelesan e ve keniyu tenged te mibeelan ku. Emun mibelesan a keniyu, ne ebelesan ku zaan sikiyu tenged te mibeelan niw.
JOE 3:5 Su migkuwa niw is mahalen he menge ketiǥeyunan ku, ragkes en is menge pelata wey vulawan, ne mid-uwit niw heini ziyà te menge simbahan niw.
JOE 3:6 Mid-uripen niw is menge etew te Juda wey te Jerusalem ne imbelegyè niw ziyà te menge Gerisyahanen, su wey niw sikandan ikepekeziyù diyà te tanè dan.
JOE 3:7 Piru midtevangan ku sikandan he mekaawè dan diyà te menge lugar he mibelegyaan niw kandan, ne ebeelan ku ziyà te keniyu is mibeelan niw ziyà te kandan.
JOE 3:8 Ibelegyè ku is menge anak niw ziyà te menge etew te Juda, ne ibelegyè dan haazà diyà te menge tig-Saba, he ed-ubpà diyà te meziyù he lugar. Egkehitavù heini, su iyan a, is Nengazen, is migkaǥi kayi.”
JOE 3:9 Ibpetuanen heini ziyà te menge nasyun: Pengandam kew para te kebpekidtebek. Hinggata niw is menge sundaru niw te kedsurung.
JOE 3:10 Beeli niw he menge ispada is punta te menge eradu niw wey veeli niw he menge vangkew is para te menge igkamet niw. Minsan is menge meǥuyà ne kinahanglan he mebpekidtebek.
JOE 3:11 Hendini kew, uvey kew zini, sikiyu is menge etew ziyà te peliǥuy he menge nasyun. Ne tiǥum kew ziyà te Suǥud ni Jehoshafat. Nengazen, ipetupang nu en dutun is menge sundaru nu!
JOE 3:12 Migkaǥi is Nengazen te, “Kinahanglan he egkehinggat is menge etew ziyà te peliǥuy he menge nasyun te kedhendiyà te Suǥud ni Jehoshafat, su edhukuman ku sikandan dutun.
JOE 3:13 Iring sikandan te edreǥunen he ereg en he egeraven su nelutuan en, etawa iring te paras he ereg en he egkeresen su nepenù en te paras is keresà. Utew en sikandan midtaman he lalung; is menge salè dan iring te wahig te paras he midrepey ziyà te midteǥuan duen.”
JOE 3:14 Utew mahabet is menge etew he eguǥurub diyà te Suǥud te Kedhukum, su hapit en egkeuma is andew te kedsilut te Nengazen.
JOE 3:15 Ebmerusirem is andew wey is bulan, ne kenè en edsiǥa is menge vituen.
JOE 3:16 Eghiniǥer is Nengazen he ebpuun te Zion; edraǥeb is laǥeng din he ebpuun te Jerusalem. Ne tenged kayi egkehuyung is kelibutan wey is langit. Piru melig-en he eputà is Nengazen para te menge Israilihanen he menge etew zin.
JOE 3:17 Menge tig-Juda, egketuenan niw he iyan a, is Nengazen he Megbevayè niw, mid-ubpà a ziyà te Zion he segradu he vuvungan ku. Ne egkeuman en maan egkehimu he segradu is Jerusalem; kenè ne heini ed-umanan edsurunga te menge etew ziyà te zuma he menge nasyun.
JOE 3:18 Dutun he timpu ebewian ku sikiyu. Ed-uzaren kew te veǥu he vinu he ebpuun diyà te mezakel he menge paras diyà te menge vuvungan. Ed-uzaren kew zaan te ǥatas he ebpuun diyà te mezakel he menge vaka wey menge kambing he ebpemenabtab diyà te menge mibuntud-buntud. Kenà egkemezahan is menge wahig niw. Ne edtudà is serebseb he ebpuun diyà te valey te Nengazen ne egkewehiǥan din is menge zal-ug he zuen duen menge acacia.
JOE 3:19 “Is Ehipto egkehimu he mekevulungbulung, ne is Edom egkehimu he disirtu su midsurung dan is menge etew ziyà te Juda; mibpenhimetayan dan is kenà ereg he edhimetayan.
JOE 3:20 Piru is Juda wey Jerusalem, ed-ubpaan mulà taman te taman.
JOE 3:21 Ibpenimales ku is kebpenhimetayi te menge etew ku; edsilutan ku is mibaal kayi ziyà te kandan. Iyan a, is Nengazen, ed-ubpà diyà te Zion.”
AMO 1:1 Iyan heini menge lalag ni Amos he tig-Tekoa he perevantey te menge kerehidu. Heini he menge lalag, ne mehitenged te Israel. Impezayag heini te Megbevayà diyà te kandin hein dezuwa pa he tuig human egkehitavù is linug, hein timpu he si Uzia iyan hadì diyà te Juda ne si Jeroboam he anak ni Joash iyan hadì diyà te Israel.
AMO 1:2 Migkaǥi si Amos te, “Edhiniǥer is Nengazen he ebpuun te Zion; edraǥeb is laǥeng din puun te Jerusalem. Ne tenged kayi nengeǥangu is menge pepenebtavà te menge vantey te menge kerehidu ragkes en is menge pinemula ziyà te puntur te Buntud he Carmel.”
AMO 1:3 Iyan heini migkaǥi te Nengazen mehitenged te Siria: “Tenged te kedtulung kebaal te salà te menge tig-Damascus, edsilutan ku sikandan. Su midsurung dan is menge tig-Gilead he henduen be te midlepiǥis dan te putew.
AMO 1:4 Umbe, ebinsulan ku is turuǥan ni hadì Hazael wey is melig-en he menge vahin te Damascus he mibpeveelan te anak din he si Ben Hadad.
AMO 1:5 Ebengkaǥen ku is pultahan te Damascus wey edezeetan ku is menge pengulu ziyà te Suǥud te Aven wey Bet Eden. Ebihaǥen te menge tig-Kir is menge etew ziyà te Aram. Iyan a, is Nengazen, is migkaǥi kayi.”
AMO 1:6 Iyan heini migkaǥi te Nengazen mehitenged te Filistia: “Tenged te kedtulung kebaal te salà te menge tig-Gaza, edsilutan ku sikandan. Su zuen menge inged he mibihag dan is tivuuk he menge meǥinged dutun ne imbelegyà dan he menge uripen diyà te Edom.
AMO 1:7 Umbe, ebinsulan ku is menge verengbeng diyà te Gaza wey is melig-en he menge vahin kayi he inged.
AMO 1:8 Edezeetan ku is menge pengulu ziyà te Ashdod wey Ashkelon, ne edsilutan ku is menge tig-Ekron. Is menge Filistihanen he ebpekepelaǥuy te silut, ebpematey zaan. Iyan a, is Nengazen he Megbevayà migkaǥi kayi.”
AMO 1:9 Iyan heini migkaǥi te Nengazen mehitenged te Tyre: “Tenged te kedtulung kebaal te salà te menge tig-Tyre, edsilutan ku sikandan. Su is langun he meǥinged diyà te menge inged, imbelegyè dan he menge uripen diyà te Edom. Ne wazè dan tumana is neuyunan dan kayi te menge etew he emiǥu zan.
AMO 1:10 Umbe, ebinsulan ku is menge verengbeng te Tyre wey is melig-en he menge vahin kayi he inged.”
AMO 1:11 Iyan heini migkaǥi te Nengazen mehitenged te Edom: “Tenged te kedtulung kebaal te salà te menge tig-Edom, edsilutan ku sikandan. Su mibpendal-as dan is menge kezuzumahi zan he menge Israilihanen ne wazè dan en mehizuwi te ebpenhimatey. Is menge Israilihanen, kenè egkaawà is pauk kandan te menge tig Edom.
AMO 1:12 Umbe, ebinsulan ku is Teman wey is melig-en he menge vahin te Bozra.”
AMO 1:13 Iyan heini migkaǥi te Nengazen mehitenged te Ammon: “Tenged te kedtulung kebaal te salà te menge tig-Ammon, edsilutan ku sikandan. Su midsirian dan is memeǥingey he menge vahi ziyà te Gilead, su wey zan maangken heini he tanà.
AMO 1:14 Umbe, ebinsulan ku is menge verengbeng diyà te Raba wey is melig-en he menge vahin kayi he inged; dutun ebpengulahì te kulehian te kebpekidtebek is menge kuntada zan he edsurung kandan, he edselenuhug heini iring te vagyu.
AMO 1:15 Ne ebihaǥen is hadì diyà te Ammon ragkes is menge upisyal zin. Iyan a, is Nengazen, is migkaǥi kayi.”
AMO 2:1 Iyan heini migkaǥi te Nengazen mehitenged te Moab: “Tenged te kedtulung kebaal te salà te menge tig-Moab, edsilutan ku sikandan. Su mibinsulan dan is menge tulan te hadì te Edom taman te neigmuk heini.
AMO 2:2 Umbe, ebinsulan ku is Moab ragkes is melig-en he menge vahin te Keriot. Ebpematey is menge tig-Moab dutun te ebpengulahì wey ebpezaǥing te vudyung is menge kuntada zan he edsurung kandan.
AMO 2:3 Elin ebpatey is hadì dan wey is langun he menge upisyal zin. Iyan a, is Nengazen, is migkaǥi kayi.”
AMO 2:4 Iyan heini migkaǥi te Nengazen mehitenged te Juda: “Tenged te kedtulung kebaal te salà te menge tig-Juda, edsilutan ku sikandan. Su inselikwey zan is menge kesuǥuan ku wey wazè dan tumana is menge sulunuzen. Neketazin kandan is kebpenilbi zan te zuma he menge ed-ezapen he midsilbiyan daan te menge kepuun dan.
AMO 2:5 Umbe, ebinsulan ku is Juda ragkes is melig-en he menge vahin te Jerusalem.”
AMO 2:6 Iyan heini migkaǥi te Nengazen mehitenged te Israel: “Tenged te kedtulung kebaal te salà te menge tig-Israel, edsilutan ku sikandan. Su imbelegyè dan he menge uripen is menge etew he wazà mekesalà, tenged dà te utang dan. Mibeelan dan heini ziyà te menge pubri minsan nekeutang dà diyà te kandan te senge paris he sandalyas.
AMO 2:7 Edèdaaǥen dan is menge pubri wey wazè dan beǥayi te hustu he kukuman. Neulaula ziyà te kandan, he is amey wey is anak din he maama ebpekidhilavet te sevaha zà he vahi. Tenged kayi mibpendezeisey zan is waǥas he ngazan ku.
AMO 2:8 Edlipezeng dan diyà te lugar he zutun dan edsimba he bivisti te visti he insandà diyà te kandan te menge pubri. Ne ed-iinum dan diyà te valey ku te vinu he imbayad kandan te menge pubri te utang dan.
AMO 2:9 Piru siak, is mibeelan ku para kandan te menge tig-Israel, iyan heini: mibpendezeetan ku is menge Amorihanen, minsan pa te memelangkew heini he menge etew he henduen be te kayu he sidru wey melig-en iring te kayu he ulayan. Mibpendezeetan ku sikandan taman te wazà nesamà kandan.
AMO 2:10 Impeǥawas ku zaan is menge kepuun te menge tig-Israel ziyà te Ehipto, ne seled te 40 he tuig is kegiyahi ku kandan diyà te sibsivayan su wey zan maangken is tanà te menge Amorihanen.
AMO 2:11 Mibpilì ku pa ganì is duma he menge kevuwazan dan wey mehimu he menge ebpeneuven wey menge Nazareo. Kenè be tutuu heini menge tig-Israel?
AMO 2:12 Piru hengkey is mibeelan niw? Impeinum niw te vinu is menge Nazareo ne mibmenduen niw is menge ebpeneuven he kenè dan keǥiya is menge lalag ku.
AMO 2:13 Umbe, pemineǥa niw heini: Edhimuwen ku he meveǥati kew iring te kerumata he nepenù te sebpet.
AMO 2:14 Umbe, minsan is mezesen he ebpelelaǥuy keniyu, ne kenà ebpekepelaǥuy, is mezesen ebmeluya, ne is menge sundaru, kenè dan egkelibri is keugelingen dan.
AMO 2:15 Minsan is menge perepanà diyà te tebek, ne ebpekeendud. Is menge sundaru he meǥaan he ebpelelaǥuy ne kenà ebpekepelaǥuy, ne is menge pereuntud te kudà ne kenè dan egkelibri is keugelingen dan.
AMO 2:16 Dutun te andew te kedsiluti ku keniyu, minsan is kinemevurutan he menge sundaru, ebpekepelaǥuy he egkelevasan. Iyan a, is Nengazen, is migkaǥi kayi.”
AMO 3:1 “Sikiyu is menge tig-Israel, he is menge kepuun niw impeǥawas te Nengazen diyà te Ehipto, pemineǥa niw is menge lalag din he ebpekesuǥat keniyu:
AMO 3:2 Diyà te langun he menge nasyun kayi te tivuuk he kelibutan iyan kew zà mibpilì ku he mehimu he menge etew ku. Umbe edsilutan ku sikiyu tenged te langun he menge salè niw.”
AMO 3:3 Ebpezumehè be is dezuwa he etew te kedhipanew emun wazè dan mehuna meuyun?
AMO 3:4 Edhiniǥer ve is erimaung diyà te ketelunan emun wazè din edewiyen? Edhiniǥer ve sikandin diyà te elesè din emun wazè din nezawi?
AMO 3:5 Egketuǥesan be is tagbis emun wazà epani is penuǥes? Egkevekas be is penuǥes emun wazè din egkevekasan?
AMO 3:6 Kenè be egkerkeren te kegkahandek is menge etew emun edaǥing is menge vudyung te kebpesayud he zuen menge kuntada he edsurung? Emun egkeumahan te kezeetan is inged kenè be ketau te Nengazen is kebpekeuma zutun?
AMO 3:7 Benar iyan, wazà minsan hengkey he ebeelan te Nengazen he MEGBEVAYÀ emun wazè din ikehuna ikepezayag diyà te menge suluǥuen din he menge ebpeneuven.
AMO 3:8 Hentei man is kenà egkahandek emun edhiniǥer is erimaung? Hentei man is kenà ebpekekaǥi te menge lalag te Nengazen he MEGBEVAYÀ emun iyan en is Nengazen he MEGBEVAYÀ ebpekaǥi kandin?
AMO 3:9 Keǥiyi niw is menge pengulu he ed-ubpà diyà te melig-en he menge vahin te Ashdod wey is diyà te Ehipto he medtiǥum sikandan diyà te menge vuntud he nekeliǥuy te Samaria ne ahàa zan is kegubut kayi he inged wey is kedlisliseza te menge meǥinged kayi.
AMO 3:10 Su iyan heini kes migkaǥi te Nengazen he MEGBEVAYÀ he ebpekesuǥat te Samaria: “Kenè dan metau he edtinazeng, ne is melig-en he menge vahin te inged dan, nepenù te menge azen he tinakew wey tinavan. Umbe edsurungen sikandan te menge kuntada zan ne ebpemengkaǥen is menge pengalang dan. Egkuwaan te menge kuntada is menge azen diyà te melig-en he menge vahin te inged dan.”
AMO 3:12 Heini pa is migkaǥi te Nengazen: “Is egkekuwa te vantey te kerehidu zuen te uyaǥen he edeesan te erimaung egkehimu he iyan dà is dezuwa he vuvun etawa sevaha te telinga. Ne iring keniyan is egkehitavù keniyu te menge Israilihanen he menge meǥinged diyà te Samaria; is egkesamà keniyu, iyan dà is menge vahin te mekempet he menge hizeǥaan niw.”
AMO 3:13 Migkaǥi is Nengazen he MEGBEVAYÀ, kes Megbevayà he Mekeǥeǥehem, ke sikandin te, “Pemineǥa niw heini is egkeǥiyen ku ne tudtula niw ziyà te menge kevuwazan ni Jacob:
AMO 3:14 Dutun te andew te kedsiluti ku te menge tig-Israel tenged te menge salè dan, edweǥayen ku is menge pemuhatà diyà te Betel. Epungelen ku is menge sungeysungey te menge suyuk te pemuhatà ne egkengeulug heini ziyà te tanà.
AMO 3:15 Edrundusen ku is menge valey zan he para te timpu te meǥenew wey menge valey he para te timpu te meinit. Edrundusen ku zaan is mahalen he menge valey zan. Umbe mahabet is menge valey zan he egkengerundus. Iyan a, is Nengazen, is migkaǥi kayi.”
AMO 4:1 Sikiyu is dungganen he menge vahi ziyà te Samaria, iring kew te menge vaka ziyà te Bashan he mibpurungan elimahi. Edèdaaǥen niw wey mibpesipelahan is menge pubri, ne edsuǥuen niw pa is menge esawa niw he uwiti kew zan te inumen. Umbe pemineǥa niw heini is
AMO 4:2 migkaǥi te Nengazen he Megbevayà: “Tenged te kegkewaǥas ku ebpenangdù a he egkeuma is andew he ebihaǥen kew te menge kuntada niw ne egkeiring kew te pait he ebunuwiten.
AMO 4:3 Ibpeǥawas kew zan diyà te inged niw he ziyà ibpevayà te menge vudsi te verengbeng he nevengkag, ne edumahan kew zan diyà te lugar he Harmon. Iyan a, is Nengazen, is migkaǥi kayi.
AMO 4:4 “Sikiyu is menge Israilihanen, hendiyè kew te ed-ezapen niw ziyà te Betel wey Gilgal ne sigudu kew en baal te salà. Uwit kew te pemuhat niw kada meselem wey uwit kew te ikepulù niw kada tetelu he andew.
AMO 4:5 Tutung kew te supas he midtepayan he pemuhat niw te kebpeselamat kayi te kedì. Sigi, ipahambug niw heeyan ragkes is menge pemuhat niw he keugelingen he suat is kebpemuhata zuen, su iyan man heeyan egkesuatan niw. Iyan a, is Nengazen he MEGBEVAYÀ, migkaǥi kayi.
AMO 4:6 “Iyan a mibpaaǥi te vitil ziyà te langun he menge inged niw, piru wazè kew ǥihapun medlikù kayi te kedì. Iyan a, is Nengazen, is migkaǥi kayi.
AMO 4:7 “Iyan a mid-eǥen te uzan te tetelu he vulan human is tiraǥun. Mibpeuzanan ku is duma he menge inged piru is duma wazè ku peuzani. Mibpeuzanan ku is duma he menge pemuleey piru is duma mibmemaza.
AMO 4:8 Tenged te keluya egkesemsempirey kew en is ebpen-ahà te wahig puun te sevaha he inged pehendiyà te sevaha pa he inged, piru kenà ereg is egkekuwa niw piru wazè kew ǥihapun medlikù kayi te kedì. Iyan a, is Nengazen, is migkaǥi kayi.
AMO 4:9 “Kemahabet ku en dezeeti is menge pemuleey niw pinaaǥi te meinit he keramag wey menge erat. Mid-etaki te terapan is menge kayu niw he higus wey ulibu. Piru wazè kew ǥihapun medlikù kayi te kedì. Iyan a, is Nengazen, is migkaǥi kayi.
AMO 4:10 “Impaaǥi ku ziyà te keniyu is limas iring te impaaǥi ku zengan diyà te Ehipto. Mibpenhimetayan ku is menge vetan-en he menge maama niw pinaaǥi te tebek wey impaaǥew ku is menge kudè niw. Wey impaantus ku sikiyu te kemahù te nemematey ziyà te kampu niw. Piru wazè kew ǥihapun medlikù kayi te kedì. Iyan a, is Nengazen, is migkaǥi kayi.
AMO 4:11 “Midezeetan ku is duma keniyu iring te mibeelan ku ziyà te Sodom wey Gomora. Ne is duma keniyu he nekelingkawas neiring te kayu he midsekelew puun te hapuy. Piru wazè kew ǥihapun medlikù kayi te kedì. Iyan a, is Nengazen, is migkaǥi kayi.
AMO 4:12 “Umbe ed-umanan ku pa ebeeli heini he menge silut diyà te keniyu te menge tig-Israel. Ne ǥeina te ebeelan ku heini, pengandam kew te ked-etuvang kediey te Megbevayè niw.”
AMO 4:13 Is Megbevayà, iyan mibaal te menge vuvungan wey midlimbag te keramag, ne iyan daan sikandin edliwan te meselem te mezukilem. Impahayag din diyà te etew is menge pelanu zin, ne iyan sikandin ebayàbayà te tivuuk he kelibutan. Is ngazan din iyan is Nengazen he Megbevayà he Mekeǥeǥehem.
AMO 5:1 Menge etew te Israel, pemineǥa niw heini is mekeseseeng he kebpenhulùhulù mehitenged keniyu:
AMO 5:2 Is Israel he iring te vahi he wazè pa mekeremaǥi, nezeetan ne kenè en heini ebpekeuman ebpekeenew. Mibey-anan sikandin diyà te tanè din ne wazè en ebpeenew kandin.
AMO 5:3 Umbe, migkaǥi is Nengazen he MEGBEVAYÀ te, “Dutun te 1,000 he menge sundaru he edsuǥuen puun te sevaha he inged te Israel, 100 dà is egkesamà. Ne is edsuǥuen he 100 he menge sundaru, 10 dà is egkesamà.
AMO 5:4 Umbe, dangep kew kayi te kedì, is menge etew te Israel, su wey kew meuyag-uyag.
AMO 5:5 Kenè kew en hendiyà te Betel, te Gilgal, etawa te Beersheba te ked-azap. Su siguradu he ebihaǥen is menge etew ziyà te Gilgal, ne egkahanew is Betel.
AMO 5:6 Sikiyu is menge kevuwazan ni Jose, dangep kew kayi te kediey su wey kew meuyag-uyag. Su emun kenà, ne edsurungen ku sikiyu he iring a te hapuy. Umbe egkezeetan is Betel ne wazè en ebpekeeǥen kayi.
AMO 5:7 Ne mekehizuhizu kew! Is meupiya wey hustu he kukuman, midhimu niw he mezaat ne wazè niw veliya is metazeng.”
AMO 5:8 Is Megbevayà iyan midlimbag te menge grupu te menge vituen he migngezanan te Penikapan wey Belatic. Iyan sikandin mibpedliwà te merusirem wey merayag, wey maandew wey mezukilem. Iyan sikandin midtiǥum te wahig te zaǥat diyà te menge gapun ne ibpeuzan din heini ziyà te tanà. Is ngazan din iyan is Nengazen.
AMO 5:9 Kandin he ketau is kegketik-ew kegkezeeti te pengalang te inged, ne edweǥayen din is miberengbeng he inged.
AMO 5:10 Sikiyu is menge tig-Israel, egkepeukan niw is edhukum te hustu wey egkaǥi te tutuu ziyà te hukmanan.
AMO 5:11 Midaagdaag niw is menge pubri ne midteǥel niw he mebeǥey ziyà te keniyu te neraǥun dan. Umbe kenè niw en egkeubpaan is dezekelà he menge valey he mibangun niw, wey kenè kew en ebpekeinum te vinu he ebpuun diyà te impemula niw he menge paras.
AMO 5:12 Su netuenan ku ke sengemenu kahabet wey ke sengemenu kezekelà is menge salè niw. Edèdaaǥen niw is menge etew he wazà mekesalà ne mibpenepian niw pa. Wazè niw veǥayi te hustu he kukuman diyà te hukmanan is menge pubri.
AMO 5:13 Umbe, tenged te kezaat te ulaula te menge etew kayi he timpu, is menge etew he nekesavut te egkesuatan te Megbevayà ebpereremek en.
AMO 5:14 Guntaan, beeli niw is meupiya ne kenà is mezaat su wey kew meuyag-uyag ne ebpekiduma keniyu is Nengazen he Megbevayà he Mekeǥeǥehem sumalà is egkeǥiyen niw he zuma niw sikandin.
AMO 5:15 Senggilahi niw is mezaat ne veeli niw is meupiya, ne hukum kew te hustu ziyà te hukmanan. Su kela ke mehizuwi kew zed te Nengazen he Megbevayà he Mekeǥeǥehem is nengesamà keniyu te menge kevuwazan ni Jose.
AMO 5:16 Su iyan heini migkaǥi te Nengazen he Megbevayà he Mekeǥeǥehem: “Egkeuma is timpu he zuen ebpemenineǥew wey ebpemen-erang diyà te menge zalan niw wey menge pelasa. Is menge perevasuk ibpetawag su wey zan mesineǥawi is menge minatey zuma te menge etew he edsuhulan wey mekesineǥew.
AMO 5:17 Duen daan ebpemenineǥew ziyà te menge pemuleey niw te paras. Egkehitavù heini ziyà te keniyu su edsilutan ku sikiyu. Iyan a, is Nengazen, is migkaǥi kayi.”
AMO 5:18 Kehizu niw te edtaǥad te kegkeuma te andew te Nengazen. Kenè niw isipa he andew heeyan te kegkelibri niw, kekenà, andew heeyan te kedsiluti keniyu.
AMO 5:19 Egkeiring kew te etew he egkeisip din he nelibri en sikandin su nepeleǥuyan din en is erimaung, piru bir ves is egkesinuǥung din. Etawa egkeisip din he wazè en ebpekekaid kandin su ziyè en sikandin te seled te valey zin, piru ked-ulembè din diyà te elavat ne migkaǥat is belad din te uled.
AMO 5:20 Benar he is andew te Nengazen ebpekeuwit te silut ne kenà kelibriyanan; iring heini te merusirem he wazè en duen bulug deisey he kerayag.
AMO 5:21 “Egkeepesan ku is menge pista niw; wazè ku ikelipey is menge ketiǥuman niw.
AMO 5:22 Umbe, minsan uwiti e pa keniyu te nekedseselekawà he menge pemuhat, minsan iyan pa is kineupiyahan he pemuhat, kenè ku heeyan edewaten.
AMO 5:23 Engkezi niw en is meǥurub he menge kanta niw. Kenà a egkesuat he ebpemineg te sunata te menge alpa niw.
AMO 5:24 Piru ipeehè niw is hustu he kukuman ne veeli niw is metazeng; kenè niw heini engkezi iring te wahig he kenà ed-engked he edtudà.
AMO 5:25 “Sikiyu is menge etew te Israel, hein seled te 40 he tuig diyà te sibsivayan is menge kepuun niw, nemuhat be sikandan kayi te kedì? Wazà!
AMO 5:26 Ne ǥuntaan edtulungan niw ed-uwita si Sakut, kes ed-ezapen he mid-isip niw he hadì niw, wey si Kaywan, kes ed-ezapen niw he vituen. Mibeelan niw heini he menge ledawan su ed-ezapen niw.
AMO 5:27 Umbe, ibpevihag ku sikiyu ziyà te hunaan pa te Damascus.” Iyan heini migkaǥi te Nengazen he migngezanan te Megbevayà he Mekeǥeǥehem.
AMO 6:1 Kehizu niw te menge pengulu ziyà te Zion wey Samaria, he ebpeeyehey zà he wazà igkeipeng. Mid-isip niw is keugelingen niw he dungganen he menge etew ziyà te lavew he nasyun, ne iyan kew edengepan te menge meǥinged diyà te keniyu.
AMO 6:2 Egkeǥiyan niw is menge sakup niw te, “Ahaa niw is inged he Calne, wey is dekelà he inged he Hamat, wey is inged he Gat he sakup te Filistia. Hengkey, edhuna ve sikandan he mekeǥeǥehem te ginhedian te Juda wey Israel? Kenà. Edhuna ve he meluag is tanè dan te kenitew? Kenà daan.”
AMO 6:3 Kehizu niw su kunaan niw ke kenà egkeuma is andew te kedsiluti keniyu. Tenged te mezaat he vaal niw midhimu niw he meǥaan meuma heeyan is andew he utew ed-iseg is kebpendezaat.
AMO 6:4 Kehizu niw te edhidhizeǥè dà diyà te mahalen he menge katri niw, he ebpetakè en egkaan te usa te nati he kerehidu wey impelambù he nati he vaka.
AMO 6:5 Kehizu niw te ebaal te menge kanta zutun te edtukar kew te alpa wey susuaten he ebaal te sunata pinaaǥi te menge instrumintu iring ki David.
AMO 6:6 Kehizu niw te utew vuleǥuk te vinu wey egamit te mahalen he menge pehemut, piru wazà meseeng te edtelinguma he kezeetan te nasyun niw.
AMO 6:7 Ne sikiyu is menge pengulu, iyan kew egkehuna he ebihaǥen, ne egketapus en is menge pista niw wey kebpeeyehey.
AMO 6:8 Nenangdù is Nengazen he MEGBEVAYÀ, kes Megbevayà he Mekeǥeǥehem. Ke sikandin te, “Igkeepes ku is kebpelavew te menge kevuwazan ni Jacob, wey midrewakan ku is melig-en he menge vahin te inged dan. Umbe ibeǥey ku ziyà te menge kuntada is inged dan wey is langun he taǥù kayi.”
AMO 6:9 Emun duen sepulù he etew he egkesamà diyà te senge velayan ebpematey ǥihapun sikandan is langun.
AMO 6:10 Is ebpatey, egkuwaan te kezuzumahi zin su edtutungen din. Ne ed-insaan din is ed-eles diyà te seled te valey te, “Duen nu pe be zuma keniyan?” Ne emun edtavak te wazà, ne egkaǥi haazà is mid-insà te, “Kenè ke en kaǥikaǥi su kela ke mesempiti nu is ngazan te Nengazen ne egkesilutan ki.”
AMO 6:11 Benar iyan, emun iyan en ebmandù is Nengazen, edrunteken din is langun he menge valey, deisey se zekelà.
AMO 6:12 Ebpekepelelaǥuy ve is menge kudà diyà te vetuwen he kelendiǥan? Igkeeradu ve ziyà te zaǥat is baka? Simpri kenà. Piru is kukuman midhimu niw he ebpekezezaat te etew, ne is metazeng midhimu niw he mezaat.
AMO 6:13 Ingkelipey niw is kebpekezaag niw ziyà te inged he Lo Debar wey Karnaim, ne ke sikiyu te, “Nezaag tew sikandan pinaaǥi te keugelingen tew he zesen.”
AMO 6:14 Benar iyan, migkaǥi is Nengazen he Megbevayà he Mekeǥeǥehem te, “Sikiyu is menge etew te Israel, ibpesurung ku te menge etew ziyà te sevaha he nasyun. Edlislisezen kew zan ne edsekupen dan is lugar niw puun te Lebo Hamat taman te zal-ug diyà te Araba.”
AMO 7:1 Iyan heini impaahà te Nengazen he MEGBEVAYÀ kedì: Neehè ku he edtiǥum is Nengazen te utew mahabet he terapan dutun te ingkeveǥey en diyà te hadì is kandin he vahin puun te nehuna he neraǥun dutun te ebpuun en is ikezuwa he kedraǥun.
AMO 7:2 Ne zutun migkaan te terapan is langun he pinemula, ne wazè en nesamà. Ne zutun migkaǥi a te, “Nengazen he MEGBEVAYÀ, edhangyù a ziyà te kenikew he peseyluwa nu is menge kevuwazan ni Jacob. Egkemenumenu is kegkeuyag-uyag dan emun egkehitavù heeyan he silut? Meluya zan ne kenè dan ebpekegaga.”
AMO 7:3 Umbe, nahalin is isip te Nengazen ne ke sikandin te, “Is neehè nu ne kenè en egkehitavù.”
AMO 7:4 Heini pa is impaahà kedì te Nengazen he MEGBEVAYÀ: Neehè ku he ebpengandam is Nengazen he MEGBEVAYÀ te kedsilut te menge etew zin pinaaǥi te hapuy. Ne impememaza te hapuy is ebpuunan te wahig diyà te zizalem te tanà, ne midtutung kayi is langun he netaǥù te tanà he Israel.
AMO 7:5 Ne zutun migkaǥi a te, “Nengazen he MEGBEVAYÀ, edhangyù a ziyà te kenikew he kenè nu heeyan beeli. Egkemenumenu is kegkeuyag-uyag te menge kevuwazan ni Jacob emun egkehitavù heeyan? Meluya zan ne kenè dan ebpekegaga.”
AMO 7:6 Umbe, nahalin is isip te Nengazen ne ke sikandin te, “Is neehè nu kenè en egkehitavù.”
AMO 7:7 Heini pa is impaahà te Nengazen he MEGBEVAYÀ kediey: Neehè ku is Nengazen he edhithitindeg diyà te uvey te verengbeng ne zuen din egewezan he tuntun he migamit te kedsukuza zuen te verengbeng ke metandang be is kegkeveeli kayi etawa kenà.
AMO 7:8 Mid-insà is Nengazen kayi te kedì te, “Amos, hengkey is neehè nu?” Midtavak a te, “Tuntun is neehè ku.” Ne migkaǥi sikandin te, “Sumalà te kedtuntun ku ne kenà metandang is menge ulaula te menge etew ku he menge tig-Israel. Umbe ǥuntaan he timpu ne kenè ku en sikandan egkehizuwan.
AMO 7:9 Edrundusen ku is menge simbahan diyà te metikang he menge lugar he zutun ed-azap is menge tig-Israel he menge kevuwazan ni Isaac. Ne ibpesurung ku te menge kuntada is Israel, he ginhedian ni Hadì Jeroboam.”
AMO 7:10 Dutun he timpu, si Amazia he memumuhat diyà te Betel mibpeuwit te lalag diyà te ki Hadì Jeroboam he hadì te Israel. Ke sikandin te, “Mibpelanu si Amos te mezaat diyà te kenikew kayi mismu te Israel. Kenè en egkaantus te menge etew is menge mibpengaǥi zin.
AMO 7:11 Su iyan heini migkaǥi zin: ‘Ebpatey si Jeroboam pinaaǥi te tebek, ne siguradu he ebihaǥen is menge tig-Israel pehendiyà te zuma he nasyun.’ ”
AMO 7:12 Ne migkaǥi si Amazia ziyà te ki Amos te, “Sikew is ebpeneuven, ne awè ka kayi ne likù ka ziyà te Juda. Ne ziyè nu veeli is terebahu nu he igkeuyag nu he iyan is kebpeneuva kenikew.
AMO 7:13 Kenè nu en tudtula kayi te Betel is menge lalag te Megbevayà, su kayi is simbahan he ed-ezapan te hadì, he iyan simbahan kayi te ginhedian din.”
AMO 7:14 Midtavak ni Amos si Amazia te, “Kenà a zengan ebpeneuven wey kenà a sumusunud te ebpeneuven, kekenà, perevantey a te menge kerehidu wey tig-elima te menge kayu he sikemur.
AMO 7:15 Piru migkeǥiyan a te Nengazen he ewai ku is terebahu ku he kebantey te kerehidu ne tudtula ku is menge lalag din diyà te keniyu te menge tig-Israel he menge etew zin.
AMO 7:16 Ne ǥuntaan, sikew is migkaǥi he kenè ku tudtula is menge lalag te Megbevayà diyà te menge tig-Israel he menge kevuwazan ni Isaac, pemineǥa nu heini is migkaǥi te Nengazen he ebpekesuǥat kenikew: ‘Is esawa nu ebelegyà te zengeg din diyà te inged ne ebpatey te tebek is menge anak nu. Is menge tanè nu ebehinen te menge kuntada he ed-aǥew kayi, ne ebpatey ka ziyà te zuma he nasyun. Ne siguradu he ebihaǥen is menge tig-Israel ne edumahan diyà te zuma he nasyun.’ ”
AMO 8:1 Iyan heini impaahà te Nengazen he MEGBEVAYÀ kediey: Neehè ku is revan he zuen din taǥù he nelutuan he menge prutas.
AMO 8:2 Mid-insà is Nengazen kayi te kedì te, “Amos, hengkey is neehè nu?” Ne midtavak a te, “Sevaha he revan he zuen din taǥù he nelutuan he menge prutas.” Ne migkaǥi is Nengazen kayi te kedì te, “Neume en is ketepusan te menge etew ku he menge tig-Israel. Kenè ku en sikandan egkehizuwan.
AMO 8:3 Dutun he andew te kedsiluti kandan, is melipayen he kegkanta ziyà te valey ku egkehimu he sineǥawan su mahabet is ebpekepeyapat diyà te minsan hendei he ebpemematey. Ne zutun wazè en egkezineg he keǥurub. Iyan a, is Nengazen he Megbevayà, is migkaǥi kayi.”
AMO 8:4 Pemineǥa niw heini, sikiyu is edlislisezen dan is menge pubri wey edtinguhà te kedezaat kandan.
AMO 8:5 Ima niw ke metapus en is Pista te Kebpuun te Hayag etawa Andew te Kedhimeley su wey kew mekepemelegyè en te trigu ne wey kew mekepenlimbung pinaaǥi te kedsukud, kedtakes, wey kedtimbang niw.
AMO 8:6 Egaangaan kew ebelegyà te trigu he nesehuǥan te ukap, su wey kew mekepemasa te pubri he etew he mid-uripen su kenà ebpekevayad te utang din, minsan senge paris dà he sandalyas is utang din.
AMO 8:7 Umbe, nenangdù is Nengazen, kes Megbevayà he impahambug niw te menge kevuwazan ni Jacob, ke sikandin te, “Kenè ku edlipatan is langun he kelelalung he mibeelan niw.
AMO 8:8 Tenged kayi ibpelinug ku ziyà te tanè niw ne ebpemekesineǥew kew. Egkepurung egkeyunggat is tanè niw, he iring te kedlapey wey kegkemezahi te Wahig he Nilo ziyà te Ehipto.
AMO 8:9 Dutun he andew te kedsiluti ku keniyu, ibpesanlep ku is andew ziyà te udtuwan, umbe ebmerusirem minsan maandew pa. Iyan a, is Nengazen he Megbevayà, migkaǥi kayi.
AMO 8:10 Edhimuwen ku he sineǥawan is kedlipey niw emun timpu te pista, ne edhimuwen ku he hulùhulù is menge kegkanta niw. Ebpevistiyan ku sikiyu te saku wey edsuǥuen ku he mebpevangul su wey niw ikepaahà is kedlalew niw, iring te menge ǥinikanan he edsineǥew tenged te kebpatey te vudtung he anak dan. Piru edhuna pa he mesakit is ketepusan kayi he menge silut.”
AMO 8:11 Migkaǥi pa is Nengazen he MEGBEVAYÀ te, “Egkeuma is timpu he ibpaaǥi ku is bitil ziyà te tanè niw. Piru kenà heini vitil te keenen etawa kegkemezahi te wahig, kekenà, bitil heini wey kegkemezahi te kebpemineg te menge lalag ku.
AMO 8:12 Ebpekeziregdireg kew tenged te kegkeveley niw te kebpen-ahà te etew he ebpekepenudtul ziyà te keniyu te menge lalag ku, piru kenè niw egketuredu heini minsan hendei kew ebpevayà.
AMO 8:13 Dutun te andew te kedsiluti ku keniyu, minsan is kezegwayan he vetan-en he menge vahi niw wey vetan-en he menge maama niw, egkengevidtawan tenged te kegkemezahi.
AMO 8:14 Sikiyu is ebpenangdù pinaaǥi te ngazan te menge ed-ezapen diyà te Samaria, Dan, wey Beersheba, edezeetan kew ne kenè kew en ebpekeenew pa.”
AMO 9:1 Migkaǥi si Amos te, “Neehè ku is Nengazen he midhitindeg diyà te pemuhatà he ke sikandin te, ‘Pukpuka nu is in-ulu keniyan te menge tukud te valey ku su wey merundus is atep din ne wey merundusi is menge etew. Ne is kenà ebpatey kandan ne edhimetayan ku pinaaǥi te tebek. Wazà minsan sevaha kandan he ebpekelikey etawa ebpekepelaǥuy.
AMO 9:2 Minsan med-eles pa sikandan diyà te zizalem te tanà, he ziyà te lugar te menge minatey, egkuwaan ku sikandan dutun. Minsan mebpemenahik pa sikandan diyà te langit, eguyuzen ku sikandan pehendiyà te zizalem.
AMO 9:3 Minsan med-eles pa sikandan diyà te puntur te Buntud he Carmel, ebpen-ahaan ku sikandan dutun ne edekepen ku. Minsan med-eles pa sikandan diyà te zizalem te zaǥat, ne ibpehendutun ku is uled te kegkaǥat kandan.
AMO 9:4 Minsan bihaǥa pa sikandan te menge kuntada zan, ebpenhimetayan ku ǥihapun sikandan. Su utew a disididu te kedezaat kandan ne kenà kedtavang kandan.’ ”
AMO 9:5 Emun egkeviten te Nengazen he MEGBEVAYÀ he Mekeǥeǥehem is tanà, egkehuyung heini ne is langun he menge meǥinged kayi ne ebpemekesineǥew. Is kegkehuyung kayi iring te kedlapey wey kegkemezahi te Wahig he Nilo ziyà te Ehipto.
AMO 9:6 Iyan is Megbevayà mibaal te keugelingen din he ubpeey ziyà te langit. Su iyan sikandin mibaal te hewhewanan diyà te zivavew te tanà. Iyan sikandin midtiǥum te wahig te zaǥat diyà te menge ǥapun ne impeuzan din heini ziyà te tanà. Is ngazan din iyan is Nengazen.
AMO 9:7 Migkaǥi is Nengazen te, “Is ked-ahaa ku keniyu te menge tig-Israel ne iring dà te menge tig-Etiopia. Tutuu iyan he impeǥawas ku sikiyu ziyà te Ehipto, piru impeǥawas ku zaan is menge Filistihanen diyà te Caftor ne is menge Aramihanen impeǥawas ku ziyà te Kir.
AMO 9:8 Siak, is Nengazen he MEGBEVAYÀ, edtengteng a keniyu te mezaat he ginhedian. Ne edezeetan ku sikiyu taman te egkahanew kew kayi te kelibutan. Piru zuen egkesamà keniyu te menge kevuwazan ni Jacob. Iyan a, is Nengazen, is migkaǥi kayi.
AMO 9:9 Benar iyan, emun iyan a ebmandù, ne ed-eyaǥen ku sikiyu is menge etew te Israel duma te menge etew ziyà te langun he menge nasyun, iring te ked-ayag te trigu. Iring te kenà edlahus diyà te eyagan is nekesahug he menge vatu, ne kenà daan ebpekeliyu te silut is menge lalung keniyu, kekenà,
AMO 9:10 ebpatey te tebek sikandan is langun. Iyan heini sikandan kes egkaǥi he wazè kun mezaat he egkehitavù kandan.”
AMO 9:11 “Egkeuma is andew he ed-umanan ku ebenguna is ginhedian ni David he iring te lawig he nerundus. Su ebpurungan ku heini is nezeetan, ne ibpeuman ku ibpehitindeg iring duen te nehuna.
AMO 9:12 Edhimuwen ku heini su wey mesakup te menge Israilihanen is nesamà he tanà te Edom wey is duma pa he menge nasyun he nesakup dan dengan he mid-isip ku he kediey. Iyan a, is Nengazen, is migkaǥi kayi, ne ebeelan ku heini.”
AMO 9:13 Migkaǥi pa is Nengazen bahin te menge tig-Israel, “Egkeuma is timpu he utew sikandan ed-uzara, ne kenè pa egkepasad is kedreǥuna te menge abut dan ne egkeume en is timpu te ked-eradu. Ne is kegkeres dan te paras ne kenè pa egkepasad ne egkeume en is timpu te ked-uman kebpemula te paras. Emun ed-ahaan ta is utew mahabet he menge paras diyà te menge vuntud ne henduen be heini te edtudà he veǥu he vinu.
AMO 9:14 Ibpeulì ku is menge etew ku he menge tig-Israel ziyà te tanè dan puun te kegkevihaǥa kandan. Ed-umanan dan ebenguna is nevengkag he menge inged dan ne zutun sikandan ed-ubpà. Ebpemula zan te menge paras ne ed-inum dan te vinu kayi. Ebpemula zan diyà te menge pemuleey zan ne egkaan dan te menge veǥas kayi.
AMO 9:15 Ibpeuman ku sikandan ibpeubpà diyà te tanè dan, ne kenè dan en ibpeuman ibpaawà dutun te tanà he imbeǥey ku kandan.” Iyan heini migkaǥi te Nengazen he Megbevayè niw.
OBA 1:1 Iyan heini migkaǥi te Nengazen he MEGBEVAYÀ mehitenged te nasyun he Edom, he impezayag din diyà te ki Obadias. Sikitew is menge Israilihanen, nezineg tew is tudtul he ebpuun te Nengazen he zuen menge menunudtulà he midsuǥù din pehendiyà te menge nasyun su wey zan mehinggat heini he menge nasyun te kebpekidtebek te nasyun he Edom.
OBA 1:2 Su migkeǥiyan te Nengazen is menge tig-Edom te, “Pemineg kew! Edhimuwen ku sikiyu he egkaayuayu te zuma he menge nasyun, ne mezaat is ked-isipa zan keniyu.
OBA 1:3 Migkaǥi kew te wazà ebpekehimu he edsurung keniyu su geina te ziyè kew med-ubpà te vetuwen wey metikang he lugar. Piru heeyan is hambug niw iyan paaǥi te kedlimbungi niw te keugelingen niw.
OBA 1:4 Su minsan pa ke ibpeiring niw is ketikang te ed-ubpaan niw te ketikang te salag te banug, etawa ibpeuma niw ziyà te menge vituen, edezeetan ku ǥihapun sikiyu. Iyan a, is Nengazen, is migkaǥi kayi.
OBA 1:5 “Kenè be is menge tekawen, kenè dan ed-eminen te egkuwa is diyà te seled te valey, kekenà, iyan dà egkuwaan dan is egkinehenglanen dan? Kenè be is edraǥun te paras, kenè dan ed-eminen te ebpenrupù is beǥas kayi, kekenà, edsemaan dan? Piru sikiyu mulà, ed-eminen kew edezeeti te menge kuntada niw.
OBA 1:6 Ebpen-ahaan dan wey egkuwaan is menge ketiǥeyunan niw te menge kevuwazan ni Esau.
OBA 1:7 Edlimbungan kew te kezapig niw he menge nasyun. Heini is menge etew he ebpekid-emiǥu keniyu ne iyan ded daan edsurung keniyu, ne edsegseǥen kew zan puun te inged niw. Heini sikandan is egkaan duma keniyu ne iyan ded daan edhingutel keniyu he kenè niw egketukawan.
OBA 1:8 Iyan a, is Nengazen migkaǥi he zutun te kedsiluti ku keniyu, edezeetan ku is menge metau he menge etew ziyan te keniyu. Egkaawà is ketau ziyan te Edom he midtawag he Buvungan ni Esau.
OBA 1:9 Egkerkeren tenged te kegkahandek is menge sundaru niw he ziyà te inged he Teman, umbe pudu kew ebpatey is meǥinged diyà te Buvungan ni Esau.”
OBA 1:10 “Tenged te kebpesipelahi niw te menge kevuwazan ni Jacob, he menge kezuzumahi niw, ebpeel-elezan kew wey edezeetan kew te wazà pidtemanan.
OBA 1:11 Wazè kew medseǥipà hein timpu te kedsurunga te Jerusalem te ebpemuun diyà te zuma he menge nasyun. Mibey-anan niw en sikandan is ebpenguwa te menge azen diyà te Jerusalem wey ebahin kayi pinaaǥi te ripa. Iring kew zed te menge kuntada te menge Israilihanen.
OBA 1:12 Wazè kew pezem melipey zutun te timpu te kezeetan te menge etew ziyà te Juda he kezuzumahi niw. Wazè kew pezem medlipeylipey zutun te timpu te kegkezeeti kandan. Wey wazè kew pezem mebpegalbu zutun te kelised dan.
OBA 1:13 Wazè kew pezem medseled dutun te inged te menge etew ku zutun te kegkezeeti zan, he ebpenguwa te menge azen dan. Ne wazè kew pezem melipey zutun te timpu te kegkerasey zan.
OBA 1:14 Wazè kew pezem med-ayan diyà te menge lembaǥan is ebpemenhimatey te ebpemelaǥuy he ebpuun te Jerusalem. Ne wazè niw pezem ipalad sikandan diyà te menge kuntada zutun te timpu te kedlised dan.”
OBA 1:15 “Wazè niw pezem beeli haazà diyà te Jerusalem su egkeuvayan en is timpu te kedhukumi ku te menge nasyun. Ne ke hengkey is mibeelan niw ziyà te zuma ne iyan daan ebeelan diyà te keniyu. Is kebpekid-uyun niw te zuma ne iyan daan ibales keniyu.
OBA 1:16 Iring te midsilutan is menge etew ku ziyà te segradu he vuntud ku, ne edsiguduwan daan edsiluti is langun he menge nasyun. Ebpurungan ku sikandan edsiluti taman te egkengahanew sikandan.”
OBA 1:17 “Piru zuen egkesamà he menge Israilihanen diyà te Buvungan te Zion, ne egkeuman heini egkehimu he segradu he lugar. Ne egkeuman egkaangken te kevuwazan ni Jacob is menge tanà he kandan dengan.
OBA 1:18 Is menge kevuwazan ni Jacob wey ni Jose egkeiring te hapuy he edezaat te kevuwazan ni Esau, ne egkeiring sikandan te egkevinsulan he reǥami. Ne wazè egkesamà te menge kevuwazan ni Esau. Siguradu he egkehitavù heini su iyan a, is Nengazen, is migkaǥi kayi.
OBA 1:19 “Edsekupen te menge Israilihanen he tig-Negev is Buvungan ni Esau. Ne edsekupen te menge Israilihanen he menge meǥinged diyà te menge mibuntud-buntud diyà te edsenlepan is tanè te menge Filistihanen. Edsekupen te menge Israilihanen is Efraim wey Samaria. Ne edsekupen te menge kevuwazan ni Benjamin is Gilead.
OBA 1:20 Edsekupen te mezakel he menge Israilihanen he ebpuun te kegkevihaǥa kandan is tanà te menge Canaanhen taman te Zarefat. Ne edsekupen te menge tig-Jerusalem he ebpemuun te kegkevihaǥa kandan te Sefarad is menge inged diyà te Negev.
OBA 1:21 Edtekezeg is menge menluluwas te Israel ziyà te Buvungan he Zion, su edumelahan dan is menge etew he menge meǥinged diyà te Buvungan ni Esau. Ne siak, is Nengazen, iyan a edhadì.”
JON 1:1 Ne zuen timpu he zutun, migkeǥiyan te Nengazen si Jonas he anak ni Amitai. Ke sikandin te,
JON 1:2 “Segugunè ka hendiyà te zekelà he inged he Nineve, ne keǥiyi nu is menge etew zutun, he engkezi zan is mezaat he menge ulaula zan su sumalà is neehè ku, utew subra is kezaat te menge ulaula zan.”
JON 1:3 Piru wazà mebpezumazuma si Jonas su mibpeleǥuyan din is Nengazen pehendiyà te Tarshish. Midhendiyà sikandin te Jopa, ne zutun duen barku he edhendiyà te Tarshish. Mibayad sikandin te piliti, ne hein nekevayad en, mid-untud dutun te varku he ebpehendiyà te Tarshish su wey zin mepeleǥuyi is Nengazen.
JON 1:4 Ne hein dutun en te zaǥat, impepengeramag te Nengazen te utew mevandes, ne tenged te kevandes din henduen be te egkezeetan en haazà is barku.
JON 1:5 Ne tenged te utew nengahandek is menge terebahanti, ne is kada sevaha kandan mid-ampù diyà te kandin he menge ed-ezapen. Ne impenimbag dan en is menge karga zutun te varku su wey mebmahagkap. Ne si Jonas mulà, nehurep diyà te zizalem he vahin te varku.
JON 1:6 Ne midhendiyà te kandin is kepitan dutun te varku. Ke sikandin te, “Maan is iyan nu zà is kedlipezeng nu? Enew ka, wey medhangyù diyà te kenikew he ed-ezapen. Su kela ke mehizuwi kiw zin ne kenè kiw zed egkeǥerà.”
JON 1:7 Ne mibpelelelaǥà is menge terebahanti zutun te varku, ne iyan neuyunan dan he ibarè dan pinaaǥi te ripa ke hentei is edsilutan he iyan hinungdan he impepengeramag te utew mevandes. Ne zutun te kedripa zan iyan neripahan si Jonas.
JON 1:8 Ne zutun migkeǥiyan dan si Jonas te, “Maan is nehitavù heini is bagyu? Maan is kayi ka? Hendei ka ebpuun? Hengkey is ngazan te nasyun nu? Hengkey ka he kelasi te etew?”
JON 1:9 Ne ke si Jonas te, “Hebriyuhanen a ne iyan ed-ezapen ku is Nengazen, is Megbevayà diyà te langit he iyan midlimbag te zaǥat wey tanà.”
JON 1:10 Ne midtudtulan sikandan ni Jonas mehitenged te kenè din kebpezumdumahi te suǥù te Nengazen kandin. Ne tenged dutun utew zan nengahandek, ne ke sikandan te, “Kenà meupiya haazà is mid-ulaula nu.”
JON 1:11 Ne zutun mid-iseg en is kevandes te keramag, ne migkeǥiyan dan si Jonas te, “Hengkey is ed-ul-ulahan dey kenikew su wey meengked heini is utew zekelà he vaǥel su wey key kenà mekeizi?”
JON 1:12 Ne ke si Jonas te, “Itimbag a keniyu ziyà te zaǥat, ne egkeengked heini is mevandes he keramag, su tenged te salè ku ne neuwit-uwit kew.”
JON 1:13 Iyan, midhimu zan pa is taman te egkehimu zan. Midsigudu zan mebpemegsey su wey mekehendiyà te veyvey haazà is barku. Iyan, wazè dan nehimu su nasì en man medlavew is kevandes te keramag.
JON 1:14 Umbe, midhangyù dan diyà te Nengazen he ke sikandan te, “He Nengazen, kenè nu himuwa he mebpatey key tenged te kebpatey kayi te etew pinaaǥi te kedtimbaǥa zey kandin diyà te zaǥat. Kenè key kenikew siluti tenged te kegkehimetayi zey kandin, su heini is nehitavù, Nengazen, kenikew he ulaula su midhimu nu is egkesuatan nu.”
JON 1:15 Ne zutun mibitbit dan si Jonas ne intimbag dan diyà te zaǥat, ne segugunà mibmelinew is daǥat.
JON 1:16 Ne tenged kayi he hitavù, dekelà is kedtahud te menge etew te Nengazen. Umbe mibpemuhat dan sikandin wey zuen menge penaad dan diyà te kandin.
JON 1:17 Ne zuen utew zekelà he isdà he inteǥana te Nengazen su wey zin meeveleng si Jonas, ne ziyè si Jonas te ǥetek dutun te isdà seled te tetelu he andew wey tetelu he kezukileman.
JON 2:1 Ne zutun te ziyè si Jonas te ǥetek te isdà, mid-ampù sikandin diyà te Nengazen he Megbevayè din.
JON 2:2 Ke sikandin te, “Nengazen, edsempiten ku sikew tenged te kemereǥenan he neeǥiyan ku. Ne midineg a kenikew. Ne midtevangan a kenikew hein edserupatey ad.
JON 2:3 Ne ǥuntaan intimbag a kenikew kayi te mezalem, ne zini ad te zizalem te zaǥat. Ne nelened a wey netembunan a te zekelà he menge vaǥel he midhimu nu.
JON 2:4 Minsan pa te impekeziyù a puun kenikew, netuenan ku he ebpekehendiyà a ǥihapun te segradu he valey nu.
JON 2:5 Inteledted ad te wahig ne henduen te egkelened ad. Is ulu ku, nevukusan te sagbet diyà te zagat.
JON 2:6 Kunaan ku ke nepirisu ad diyà te kinezizeleman te wahig te wazà pidtemanan. Piru inggaun a kenikew puun te kinezizeleman, He Nengazen he Megbevayè ku.
JON 2:7 Ne hein edserupatey ad, netenuzan ku sikew. Ne zutun mid-ampù a, ne is ampù ku nezineg nu, su nekeuma ziyà te kenikew zutun te segradu he valey nu, ne midtavak nu haazà.
JON 2:8 Sikan is menge etew he iyan edsimbahan dan is duma he menge ed-ezapen, ne mid-engkezan dan is gaǥew nu kandan.
JON 2:9 Iyan, siak mulà, emun edlibriyen a kenikew ne ebpemuhaten ku sikew te kanta te kebpeselamat. Ne heini is impenaad ku, edtumanen ku. Sikew is Nengazen, iyan ka ebpekelibri!”
JON 2:10 Ne midsuǥù te Nengazen sikan is isdà he iutè din si Jonas diyà te veyvey, ne midtuman dutun te isdà haazà is insuǥù kandin.
JON 3:1 Ne migkeǥiyan en maan te Nengazen si Jonas te,
JON 3:2 “Hendiyè kad human te zekelà he inged he Nineve, ne isangyew nu sikan is migkaǥi ku ziyà te kenikew.”
JON 3:3 Ne human mebpezumazuma si Jonas, ne midhendiyà sikandin te Nineve. Ne is Nineve utew zekelà he inged; tetelu he andew is kedhipenawa zutun ne human ta egkepangkus.
JON 3:4 Ne mibpuun medseled si Jonas dutun te inged, ne zutun te kebpuun din senga andew is kedhipanew zin. Midweliyan din is menge etew ziyà te Nineve he ke sikandin te, “40 dà he andew is keluǥayad ne edlimasen kew en te Megbevayà sumalà is migkaǥi zin kayi te kediey!”
JON 3:5 Ne tenged dutun midtuu te Megbevayà is menge tig-Nineve. Mibpuasa sikandan, ne is langun kandan, dekelà se zeisey is pid-etawan din, ne mibivisti te saku wey mibpuasa he tuus te ed-engkezan dan en is mezaat he menge ulaula zan.
JON 3:6 Ne hein netudtulan is hadì dan dutun te inged, ne mid-awè sikandin diyà te pinuuwè din te kedhadì. In-awè din is samput din te kedhadì, ne mibivisti sikandin te saku wey ziyà sikandin mebpinuu te avu.
JON 3:7 Ne midhimu zutun te hadì is suǥù he edhenduen te, “Iyan suǥù te hadì wey te menge upisyal zin is: Kinahanglan he kenè dèpa megkaan wey med-inum is minsan hentei he nesakup dutun te ginhedian, wey kenè daan dèpa ibpekaan wey ibpeinum is langun he menge vaka, kerehidu, etawa kambing.
JON 3:8 Is langun kinahanglan he mebivisti te saku, wey kinahanglan daan he ebelhenan te saku is menge uyaǥen. Kinahanglan he med-ampù diyà te Megbevayà is uman sevaha te ked-ampù he utew hustu. Ne kinahanglan daan he engkezi te uman sevaha is mezaat he menge ulaula wey kebpendaagdaag.
JON 3:9 Su kela ke maawè ded is pauk te Megbevayà kenitew. Kela ke meilisi zed is pauk din te hizu ne kenè kiw zed egkengeǥerà.”
JON 3:10 Ne hein naahà te Megbevayà is mid-ulaula zan he iyan is ked-engkezi zan te mezaat he menge ulaula, nehizuwan din sikandan ne wazè din sikandan leusi te edlimas.
JON 4:1 Piru wazà mesuat si Jonas, kekenà, utew sikandin neepes.
JON 4:2 Ne mid-ampù sikandin diyà te Nengazen he ke sikandin te, “Nengazen, heini is kebpeseyluwa nu te menge tig-Nineve, ne zaan ku en he netueni zutun te aney he kedsuǥua nu kedì, umbe migaanggaan a mebpelaǥuy pehendiyà te Tarshish. Su netuenan ku he veliǥeǥawen ka wey hihizuwen he Megbevayà. Ne mepelevayen wey nepenù te hizu wey andam he kenà edlaus edsilut te menge etew he ed-iniyug te mezaat.
JON 4:3 Ne ǥuntaan, deyzey ke edhimetayan ad kenikew, su meupiya pa ke ebpatey a kenà te uuyag a.”
JON 4:4 Ne midtavak is Nengazen. Ke sikandin te, “Kenè ka engayan he egkepauk tenged kayi te mid-ulaula ku.”
JON 4:5 Ne zutun midhipanew si Jonas pehendiyà te zapit te edsilaan dutun te inged he Nineve. Ne hein nekeuma zutun, midlelawig sikandin, ne zutun sikandin mebpimpinuu is edhelung. Su ebpeseseǥazen din ke hengkey is egkeulaula zutun te inged.
JON 4:6 Ne mibpengelinteuwan te Nengazen he Megbevayà, he medtuvù dutun te uvey ni Jonas is tevayag he segugunà ebpenguyabpat su wey melembungi si Jonas. Ne haazà neketavang ki Jonas ne utew sikandin nelipey.
JON 4:7 Iyan, te egkeriwaswas dutun te sunud he andew, duen tetaru he impeketket te Nengazen dutun te tevayag su wey meǥangu haazà.
JON 4:8 Ne hein midsilè en is andew ne impepengeramag te Nengazen te meinit he keramag he ebpuun te edsilaan. Ne midluyahan si Jonas tenged te keinit te andew. Ne egkesuat en sikandin he ebpatey, ne ke sikandin te, “Meupiya pa ke ebpatey ad kenà te uuyag a.”
JON 4:9 Iyan, migkaǥi is Megbevayà diyà te ki Jonas te, “Dait be he igkepauk nu is kegkeǥangu keniyan te tevayag?” Ne midtavak si Jonas te, “Uya, dait iyan he egkepauk a. Umbe meupiya pa ke ebpatey ad nasì.”
JON 4:10 Ne migkaǥi is Nengazen te, “Heeyan is tevayag he midtuvù wey nenguyabpat seled te sengekezukileman dà, ne neǥangu te kegkesunud he andew ne wazà kenikew he vaal zutun, kenè ka iyan mibpetuvù duen, iyan, minsan pa zutun egkenuǥunan nu ǥihapun.
JON 4:11 Ne iyan e pa kenà mehizu te Nineve, keniyan te inged he zuen duen subra he 120,000 he menge etew he wazè dan hanew zuen te kesuǥuan ku, ne zuen pa mahabet he menge uyaǥen?”
MIC 1:1 Iyan heini menge lalag te Nengazen bahin te Samaria wey Jerusalem. Impahayag din heini ziyà te ki Micas he tig-Moreshet dutun te timpu te kedhadì ni Jotam diyà te Juda, ne neketinundug kandin te kedhadì si Ahaz, wey si Hezekia. Migkaǥi si Micas te,
MIC 1:2 “Purung kew pemineg, is langun he menge etew kayi te kelibutan! Su edtistiǥus kuntra keniyu is Nengazen he MEGBEVAYÀ puun te segradu he valey zin.”
MIC 1:3 Pemineg kew! Egawas is Nengazen puun te mid-ubpaan din. Ebulus sikandin ne egiek diyà te metikang he menge lugar kayi te kelibutan.
MIC 1:4 Egketunew is menge vuntud he egkeǥiekan din iring te kendilà he egketunew te hapuy, ne egkeǥadgad is menge suǥud he egkeǥiekan din iring te ebeyaan te wahig he edtudà diyà te kelendiǥan.
MIC 1:5 Egkehitavù heini is langun tenged te mibaal te salà is menge etew te Israel wey Juda. Is menge tig-Samaria, iyan midtukù te zuma he menge meǥinged diyà te Israel te kebaal te salà. Is menge tig-Jerusalem, iyan midtukù te zuma he menge meǥinged diyà te Juda te ked-azap te zuma he menge ed-ezapen.
MIC 1:6 Umbe, migkaǥi is Nengazen te, “Edezeetan ku is Samaria ne kenè en heini egkeubpaan, kekenà, ebpemulaan dà te paras. Edlilizen ku is menge vatu kayi pehendiyà te suǥud taman te ebpekelepew is menge pundasyun kayi.
MIC 1:7 Egkengerupet is langun he menge ledawan te menge ed-ezapen diyà te Samaria, ne egketutung is langun he imbayad te menge maama te kebpekidhilavet dan te menge vahi he ebelegyà te zengeg dan diyà te simbahan. Neketiǥum is menge tig-Samaria te menge ledawan pinaaǥi te kebeyazi te menge vahi he ebelegyà te zengeg dan diyà te simbahan. Umbe ǥuntaan, is menge kuntada zan, egkuwaan dan is menge pelata wey menge vulawan he impekaplà diyà te menge ledawan dutun su ibayad dan daan wey zan mekepekidhilavet te menge vahi ziyà te simbahan para te zuma he menge ed-ezapen diyà te kandan.”
MIC 1:8 Migkaǥi si Micas te, “Tenged te kegkezeeti te Samaria, ne edisineǥew a wey ebpenhulùhulù a. Edhipanew a he wazà apid te paa ku wey kenà a egkukumbalà su ibpeehè ku is kedlalew ku. Edtaul a iring te leew he asu wey ed-iringan ku is kegkaǥi te ekang.
MIC 1:9 Su is kegkezeeti te Samaria ne iring te palì he kenè en egkeulian, ne egkeulaula zaan heini ziyà te Juda. Ne ebpekeuma heini ziyà te Jerusalem kes kepital he inged te menge zuma ku he menge meǥinged.
MIC 1:10 “Sikiyu is menge tig-Juda, kenè niw tudtuli is menge kuntada tew he menge tig-Gat bahin te kezeetan he ebpekeuma ziyà te kenitew. Kenè niw ipaahà kandan he edsineǥew kew. Ne ipeehè niw mulà is kegkeseeng niw ziyà te Bet Leafra pinaaǥi te kedtelilid niw ziyà te tanà.
MIC 1:11 “Sikiyu is menge meǥinged diyà te Shafir, ebihaǥen kew ne edumahan he menge lelevas, umbe egkepeel-elezan kew. Is menge meǥinged diyà te Zaanan egkahandek en he egawas diyà te lugar zan te kedtavang keniyu. Is menge tig-Bet Ezel he edsineǥew tenged te kegkezeeti zan ne kenè daan ebpekelavan keniyu.
MIC 1:12 Benar iyan, is menge meǥinged diyà te Marot ebperateng te kegkeengked te tebek. Piru intuǥut pa ganì te Nengazen he mekeuvey is menge kuntada ziyà te pultahan te Jerusalem.
MIC 1:13 “Sikiyu is menge meǥinged diyà te Lakish, senggari niw te menge kerwahi is menge kudè niw ne pelaǥuy kew. Mid-iringan niw is salà te menge tig-Israel, ne tenged keniyu mibaal zaan te salà is menge tig-Zion.
MIC 1:14 “Ne ǥuntaan sikiyu is menge tig-Juda, pemazè kew en diyà te inged he Moreshet Gat su ebihaǥen en is menge etew kayi te menge kuntada. Ebihaǥen daan is menge meǥinged diyà te inged he Aczib, umbe wazà tavang he egkekuwa te menge hadì niw he ebperateng te tavang puun keniyan he inged.
MIC 1:15 “Sikiyu is menge meǥinged diyà te Maresha, edsuǥuen te Nengazen is menge kuntada niw pehendiyà te keniyu he ed-aǥew te inged niw. “Sikiyu is menge tig-Juda, is menge pengulu niw ed-eles diyà te surung he Adulam.
MIC 1:16 Is pelanggè niw he menge anak, egkuwaan diyà te keniyu ne ed-uwiten diyà te zuma he lugar, umbe idlalew niw is menge anak niw ne ibpeehè niw heini pinaaǥi te kegkiskisi niw te ulu niw iring te ulu te vanug.”
MIC 2:1 Kehizu niw te egkepurang he ebpelanu te mezaat. Ne kegkemeselem ebeelan niw is mezaat he pelanu niw su egkehimu niw is kebaal kayi.
MIC 2:2 Ed-eǥawen niw is menge vevesukà wey menge valey he egkesuatan niw. Edlimbungan niw is menge etew wey niw mekuwa is baley zan wey is tanà he kevilin dan.
MIC 2:3 Umbe, iyan heini migkaǥi te Nengazen diyà te keniyu, “Pemineg kew! Mibpelanu a he edezeetan ku sikiyu ne kenè kew ebpekelibri te keugelingen niw. Kenè kew en ebpekepahambug su zutun he timpu edezeetan ku sikiyu.
MIC 2:4 Dutun he andew edsudien kew te menge etew pinaaǥi te mekeseseeng he penhulùhulù he edhenduen te, ‘Mibpurungan key zezeeti! Migkuwa te Nengazen is tanè dey ne imbeǥey zin diyà te menge limbungan.’ ”
MIC 2:5 Umbe, wazè en menge kevuwazan niw he ebpekezawat te keniyu he vahin dutun te timpu keuzemà emun ebehinen te Nengazen is tanà he id-ulì diyà te kandan.
MIC 2:6 Iyan tavak niw kediey is: “Ereg kad; kenè key en kenikew weliyi te iring dutun su kenà egkehimu he egkepeel-elezan key.
MIC 2:7 Maan, mibpekezaat be te Nengazen is menge kevuwazan ni Jacob? Naamin en be is pelavey zin? Buluhaten din be is kebpendezaat?” Kenà heeyan egkehimu! Iyan heini tavak te Nengazen keniyu: “Angin pezem ke meupiya is mibeelan niw su siguradu he egkezawat niw is impenaad ku.
MIC 2:8 Piru iyan mibeelan niw is midsurung niw is pubri he menge etew ku he henduen be te menge kuntada niw. Egkeisip dan is, emun ed-ulì en sikandan diyà te lugar zan is nekidtebek ne wazè en egkevut kandan, piru heyan kew zed bes is ed-aǥew te samput dan.
MIC 2:9 Midsegseg niw is menge vahi zan diyà te menge valey he utew zan mibmahal. Ne migkuwa niw is menge tuvad he imbeǥey ku ziyà te menge anak dan ne kenè dan en heini egkekuwa minsan keenu.
MIC 2:10 Ne ǥuntaan awè kew kayi te Israel su heini he lugar kenè ne ebpekeveǥey keniyu te egkehimelayan, su midremerikan niw heini te menge salè niw. Egkezeetan heini he lugar ne kenè ne egkepulusan.
MIC 2:11 Is egkesuatan niw he megwewali iyan sikan is egkaǥi te wazè din pulus, limbungan, wey teruen, he iyan heini idwali zin: ‘Ed-uzaren kew te vinu wey zuma pa he inumen.’ ”
MIC 2:12 Migkaǥi is Nengazen te, “Sikiyu is menge etew te Israel wey Juda he nengesamà he uuyag, edtiǥumen ku sikiyu iring te menge kerehidu ziyà te tudil etawa iring te grupu te menge uyaǥen diyà te pepenebtavà. Egkeeneb is tanè niw te etew.
MIC 2:13 Ebpuwasan ku is pultahan te inged he zutun kew zumaha is mibihag, ne ebpenguluwan ku sikiyu te kegawas puun dutun. Iyan a kes Nengazen he hadì niw is ebpengulu keniyu.”
MIC 3:1 Migkaǥi si Micas te, “Sikiyu is menge pengulu te Israel wey Juda, pemineg kew! Kenè be iyan kew ereg he ebantey wey kenà maawà is hustu he kukuman?
MIC 3:2 Piru igkeepes niw is meupiya, ne mibmahal niw mulà is mezaat. Edèdaaǥen niw utew is duma ku he menge meǥinged; henduen be te mid-enisan niw sikandan, ne migkuwa niw is menge sapù dan diyà te menge tulan dan, ne mibpenggetad niw is menge tulan dan, ne mibpemisang niw is menge sapù dan, ne midhilutù niw wey migkaan.
MIC 3:4 Dutun te timpu te kedsiluti keniyu ebuyù kew te tavang diyà te Nengazen, piru kenè kew zin edtevangan; ed-iniyuǥan kew zin tenged te mezaat he menge vaal niw.
MIC 3:5 “Iyan heini migkaǥi te Nengazen mehitenged te menge ebpeneuven he nenazin te menge etew zin, he nenaad dan te meupiya he kebpekesavuk diyà te menge mibpekaan kandan, ne mibpahayag dan te kezeetan te menge wazà mebpekaan kandan:
MIC 3:6 Tenged te kedtezina niw te menge etew ku ne kenè kew en ebpekelawas, wey kenè kew en ebpekepenagnà. Henduen be te ziyè kew te utew merusirem he zutun wazè niw egkaahà.
MIC 3:7 Egkepeel-elezan kew utew is menge ebpeneuven wey menge menenagnà. Igkezilung niw is buked niw tenged te kegkeeled, su wazè niw en egkezawat he menge lalag he ebpuun te Megbevayà.
MIC 3:8 “Piru siak mulà, mibpurungan a ulini te Mulin-ulin te Nengazen he iyan mibeǥey kedì te ǥehem wey mekepedayun is hustu he kukuman pinaaǥi kedì ne wey a zaan mebmevurut te kegkaǥi ziyà te menge etew ziyà te Israel wey Juda he nekesalà sikandan.
MIC 3:9 “Sikiyu is menge pengulu te Israel wey Juda, pemineg kew! Igkeepes niw is metazeng he kukuman ne mibulegkù niw is hustu.
MIC 3:10 Mibangun niw is Zion he iyan kes inged he Jerusalem pinaaǥi te mezaat he paaǥi. Andam kew he edhimatey te etew basta mevangun heini.
MIC 3:11 Emun edhukum kew ebpeburan niw is ebeǥey te sipsip diyà te keniyu. Ne sikiyu is menge memumuhat, ebpenurù kew su ǥeina te ebeyazan kew. Ne sikiyu zaan is menge ebpeneuven, ebpenagnè kew tenged dà te selapì. Edsarig kew pa he edtevangan kew te Nengazen, su egkaǥi kew te, ‘Zuma zey is Nengazen. Umbe wazà mezaat he egkehitavù kenami.’
MIC 3:12 Umbe, tenged keniyu edezeetan is Zion he iyan is inged he Jerusalem. Egkeiring heini te mid-eradu he bevesukà, ne egkehimu heini he egketembuan te menge nengeǥevà. Ne egkehimu heini he ketelunan is buvungan he nevengunan te valey te Nengazen.”
MIC 4:1 Diyà te huziyan he menge andew, sikan is buvungan he nevengunan te valey te Nengazen egkehimu he lavew he impurtanti te langun he menge vuvungan. Ne ebpekeuma kayi he vuvungan is mahabet he menge etew he ebpemuun diyà te mahabet he menge nasyun.
MIC 4:2 Ke sikandan te, “Hendini kew en, su edtekezeg kiw ziyà te vuntud te Nengazen, diyà te valey te Megbevayà ni Jacob. Su ebpenuruen kiw zin te menge paaǥi zin su wey tew metuman heini.” Umbe, ed-ulì is menge etew he ebpuun diyà te Zion, he iyan is inged he Jerusalem, ne ed-uwiten dan is kesuǥuan te Nengazen.
MIC 4:3 Ne pinaaǥi te kesuǥuan din, edhusayen din is menge kebikilan te mahabet he menge nasyun, minsan sikan is gemhanan he menge nasyun diyà te meziyù. Umbe kenè ne ebpetebtebekà is menge etew ziyà te menge nasyun, wey kenè dan en mebpenurù te menge etew te para te kebpekidtebek. Ebeelan dan dà maan he punta te menge eradu is menge ispada zan, wey ebeelan dan dà he para te igkamet is menge vangkew zan.
MIC 4:4 Is kada etew ebpinuu ziyà te sihung te pinemula zin he paras wey kayu he higus he wazè din igkahandek. Egkehitavù iyan heini su iyan mismu is Nengazen he Mekeǥeǥehem migkaǥi kayi.
MIC 4:5 Piru minsan medsunud pa is duma he menge etew te menge ed-ezapen dan, ne sikami mulà edsunud key te Nengazen he Megbevayè dey taman te taman.
MIC 4:6 Migkaǥi is Nengazen te, “Keuzemà te huziyan he menge andew, edtiǥumen ku is menge etew ku he midsilutan ku, he iring te menge kerehidu he nengepiangan wey nekepeyapat. Edhimuwen ku he mekeǥeǥehem he nasyun is nesamà kandan. Ne edhedian ku sikandan diyà te Buvungan he Zion puun dutun he timpu ne taman en taman.
MIC 4:8 Is Zion he iring te metikang he ventayà te menge uyaǥen, egkeuman egkehimu he mekeǥeǥehem. Heini he inged, is migngezanan daan te Jerusalem, egkeuman egkehimu he edhuna te langun he menge inged diyà te Israel iring te nehuna he timpu.
MIC 4:9 “Ne ǥuntaan, maan is edag-es kew is menge meǥinged diyà te Zion he iring te vahi he ebeliliten? Duen niw pe man hadì ne wazè man mebpematey is menge sumesambag din. Sigi, belvelehey kew tenged te kegkesekiti iring te vahi he ebeliliten. Su kenè en egkeuǥet ne ebpekaawè kew ziyà te inged niw ne ziyè kew ebpekeubpà te menge vevesukà, ne zutun edumahan kew ziyà te Babilonia. Piru emun diyè kew en, edlibriyen ku sikiyu wey kew kenà mezezeeti te menge kuntada niw.
MIC 4:11 Guntaan mahabet he menge etew ziyà te menge nasyun is midtiǥum su ebpekidtebek dan keniyu. Ke sikandan te, ‘Ebpeel-elezan tew is menge tig-Zion! Ne zutun ed-ahaan tew is mekeeled-eled he kebpekesavuk dan.’
MIC 4:12 Piru heini he menge etew ziyà te menge nasyun, wazè dan metueni is isip ku. Wazè dan mesavut is pelanu ku, he midtiǥum ku sikandan su wey ku mesiluti iring te menge pungu he edtiǥumen su egunasen.
MIC 4:13 “Sikiyu is menge meǥinged diyà te Zion, genat kew en ne zèdeeti niw is menge kuntada niw he iring te egunas kew te menge pungu. Su edhimuwen ku sikiyu he iring te tudu he vaka he putew is menge sungey zin ne brunsi is menge sulu zin. Edrunteken niw is mahabet he menge etew ziyà te menge nasyun he midtiǥum te kebpekidtebek keniyu. Ne is menge ketiǥeyunan dan he nekuwa zan pinaaǥi te kebpesipala ne idhalad niw kayi te kedì te Nengazen he iyan ebayàbayà te tivuuk he kelibutan.”
MIC 5:1 Guntaan, sikiyu is menge tig-Jerusalem, endama niw is menge sundaru niw su midliǥuyan kew te menge kuntada niw. Edlegkuten dan te tuked is buked te pengulu te Israel.
MIC 5:2 Migkaǥi is Nengazen te, “Sikew, Betlehem Efrata, sevaha ka te kinezeisayan he inged diyà te Juda. Piru ziyà ebpuun te kenikew is etew he ebpenilbi kedì he pengulu te Israel, he is menge kepuun din nevantug dengan he menge etew.”
MIC 5:3 Ibeǥey te Nengazen is menge etew te Israel ziyà te menge kuntada zan, piru taman dà te ked-anak te vahi he ebeliliten te maama he ebpengulu te Israel.
MIC 5:4 Edumala heini he pengulu ne ed-elimahan din is menge etew te Israel he iring sikandin te perevantey te menge kerehidu. Edhimuwen din heini pinaaǥi te zesen wey gehem te Nengazen he Megbevayè din. Ne ebpengungubpaan is menge etew zin he wazè dan igkahandek su egkilelaan te menge etew te tivuuk he kelibutan is kegkemekeǥeǥehem din.
MIC 5:5 Ebeǥayan din te meupiya he kebpekesavuk is menge etew zin. Emun edsurung is menge tig-Asiria kayi te tanè tew wey edselezan dan is melig-en he menge vahin te inged tew, ebpekidtebek kiw kandan he ebpurungan ebpenguluwi te menge pengulu tew.
MIC 5:6 Edaaǥen dan wey egkezumala zan is Asiria he tanà ni Nimrod, pinaaǥi te menge ǥumaan dan. Umbe edlibriyen kiw zan emun edsurung is menge tig-Asiria kayi te tanè tew.
MIC 5:7 “Is egkesamà he menge Israilihanen, ebpekeuwit te keupiyaanan diyà te mahabet he menge nasyun. Egkeiring sikandan te mahames he keramag wey uzan he ibpaaǥi te Nengazen su wey meketuvù is menge pinemula. Edsarig dan diyà te Megbevayà ne kenà diyà te etew.
MIC 5:8 Piru ebpekeuwit daan sikandan te kezeetan diyà te menge nasyun. Egkeiring sikandan te mevurut he erimaung he ed-etaki te menge langgam diyà te ketelunan wey menge kerehidu ziyà te penebtavà. Su emun ed-etaki heini ne edlingketawan din is ebiktimahan din wey ebpengeǥaten din ne kenè ne heini ebpekelingkawas kandin.
MIC 5:9 Ebpekezaag is menge Israilihanen te menge kuntada zan. Edezeetan dan sikandan is langun.”
MIC 5:10 Migkaǥi is Nengazen te, “Ziyà te huziyan he menge andew, ebpehimetayan ku is menge kudè niw wey edweǥayen ku is menge kerwahi niw.
MIC 5:11 Edweǥayen ku is menge inged niw ragkes en is binerengbeng he menge inged.
MIC 5:12 Edezeetan ku is menge hinepetan niw ne egkaawà is menge veyilan niw.
MIC 5:13 Ne kenè kew en ebpekaazap te menge ledawan wey tedeman he menge vatu he mibeelan niw, su edrupeten ku heini,
MIC 5:14 ragkes is menge tukud he simbulu te vahi he ed-ezapen he si Ashera. Ne edezeetan ku heini is menge inged niw.
MIC 5:15 Tenged te utew ku kegkepauk, ebelesan ku is menge etew ziyà te menge nasyun he wazà mebpezumazuma kedì.”
MIC 6:1 Migkaǥi si Micas te, “Pemineǥa niw is egkeǥiyen te Nengazen diyà te keniyu te menge Israilihanen. Sigi en, keǥiya niw en is kasu niw; ipezineg niw te menge vuntud wey menge vuvungan is egkeǥiyen niw.
MIC 6:2 Ne sikiyu is menge vuntud wey melig-en he menge pundasyun te kelibutan, pemineǥa niw is riklamu te Nengazen mehitenged te menge Israilihanen he menge etew zin. Iyan heini riklamu zin:
MIC 6:3 “Sikiyu is menge etew ku, hengkey is sayep he neveelan ku ziyà te keniyu? Mibeley ku ve sikiyu? Tevaka a keniyu.
MIC 6:4 Impeǥawas ku pa ganì sikiyu ziyà te Ehipto he zutun kew uripena. Ne mibpilì ku si Moises, si Aaron, wey si Miriam te kebpengulu keniyu.
MIC 6:5 He menge etew ku, tentenuzi niw he midsuǥù ni Hadì Balak he hadì te Moab si Balaam he anak ni Beor te kedrawak keniyu piru penuvadtuvad keniyu is impekaǥi ku ki Balaam. Tentenuzi niw zaan ke mibmenumenu ku sikiyu te edtavang hein midhipanew kew puun te Shitim pehendiyà te Gilgal. Tentenuzi niw heini he menge hitavù su wey niw meisip-isip is kedlibriya ku keniyu.”
MIC 6:6 Mid-insà is sevaha zuen te menge Israilihanen te, “Hengkey is hustu he ibpemuhat ku ziyà te Nengazen, he Megbevayà diyà te langit, emun ed-ezapen ku sikandin? Ebpemuhat e ve te vaka he senge-tuig is keǥurang din he pemuhat he edtutungen?
MIC 6:7 Ebpekepenunuat e ve te Nengazen emun ebpemuhat a ziyà te kandin te linibu he menge kerehidu wey utew zekelà he lana? Kinahanglan be he ibpemuhat ku ziyà te kandin is kinekekayan he anak ku he vayad te menge salè ku?”
MIC 6:8 Midtavak si Micas te, “Mibpenurù kiw en te Nengazen ke hengkey is meupiya. Ne iyan heini egkesuatan din he tumana tew: Ebeelan tew ke hengkey is metazeng, ibpelavi tew is kegkehizu te zuma, wey edsunud kiw te Megbevayè tew duma is kenà kebpelavew.”
MIC 6:9 Pemineǥa niw is migkaǥi te Nengazen diyà te inged he Jerusalem, su is edtahud kandin iyan duen din hustu he ketau: “Sikiyu is menge sakup te tribu te Juda, tiǥum kew ziyà te inged he Jerusalem ne pemineg kew.
MIC 6:10 Mezaat kew he menge etew! Kenè ku egkelipatan is menge ketiǥeyunan he netiǥum niw pinaaǥi te mezaat he paaǥi. Migamit kew te kenà hustu he tekesà he iyan kes baal he midrewakan ku.
MIC 6:11 Kenà egkehimu ke ebey-anan ku zà sikiyu te kedlimbung niw pinaaǥi te timbangan.
MIC 6:12 Mesipala is menge sepian keniyu, ne menge teruen kew.
MIC 6:13 Umbe, tenged te menge salè niw mibpuunan ku en is kedsilut keniyu su wey kew mezeeti.
MIC 6:14 Benar he ebpekekaan kew, piru kenè kew egkahantey; layun kew ǥihapun egkevitil. Ederengdeng kew te menge abut niw, piru kenè niw heini egkepulusan, su ibpekuwa ku heini te menge kuntada niw emun timpu te tebek.
MIC 6:15 Umbe, ebpemula kew, piru kenè kew iyan ebpekeraǥun kayi. Ebpetiǥis kew te menge ulibu, piru kenè kew iyan ebpekepulus te lana kayi. Egkeres kew te menge paras, piru kenè kew iyan ebpekeinum te vinu kayi.
MIC 6:16 Egkehitavù heini keniyu su ǥeina te mid-iringan niw is mezaat he menge vaal, menge sulunuzen, wey menge sambag ni Hadì Omri wey te anak din he si Hadì Ahab. Umbe, edezeetan ku sikiyu, ne ed-un-undahan kew wey edsudien te menge etew ziyà te zuma he menge nasyun.”
MIC 7:1 Migkaǥi si Micas te, “Mekehizuhizu a! Iring a te etew he egkevitil he nengahà te rerawen he menge veǥas te paras etawa higus piru wazè din naahà.
MIC 7:2 Is ibpesavut ku iyan is, wazè en neehè ku he etew kayi te Israel he mepezumdumahan te Megbevayà. Wazè en nesamà he metazeng he etew. Is kada sevaha, edtaǥad te meupiya he timpu te kegkehimetayi zin te zuma zin he meǥinged, iring te etew he edtaǥad te kegkeutela zin te langgam he edhingutelen din.
MIC 7:3 Nelayam sikandan te kebaal te mezaat. Is menge pengulu wey menge meghuhukum ne edawat te sipsip. Ne ebpezumdumahan dan dà is egkesuatan te menge nekilala wey gehemanen he menge etew. Nesevaha sikandan te kebulegkù te hustu he kukuman.
MIC 7:4 Is kinemetezengan kandan ne iring dà te zuǥiyen he sagbet he wazè din pulus. Neume en is timpu he edsilutan te Megbevayà heini he menge etew sumalà te impetizaan din kandan pinaaǥi te menge ebpeneuven he iring te menge perevantey te turi. Umbe ǥuntaan egkengeliveǥan sikandan.
MIC 7:5 “Ne ǥuntaan te utew en mezaat is ulaula te menge etew, ne kenè kew en sarig te menge emiǥu niw, minsan is utew niw menge emiǥu. Ne pekeventayi niw is menge lalag niw minsan diyà te minahal niw he esawa.
MIC 7:6 Su kayi he timpu, is anak he maama ne kenà edtahud te amey zin, ne is anak he vahi ne edsukul te iney zin, ne is ambey edsukul te enuǥang din he vahi. Is kuntada te etew iyan mismu is sakup te keugelingen din he pemilya.
MIC 7:7 “Piru siak mulà, edsarig a te Nengazen he Megbevayè ku. Edteǥazan ku sikandin is edlibri kedì. Ne ebpemineǥen din is ked-ampù ku.”
MIC 7:8 Migkaǥi is menge Israilihanen te, “Kenà ereg he edsudì kenitew is menge kuntada tew. Su minsan nezeetan kiw ne ed-uman kiw ed-enew. Wey minsan diyè kiw te merusirem ne iyan is Nengazen kerayag tew.
MIC 7:9 Geina te nekesalè kiw ziyà te Nengazen, dait he ed-entusen tew is silut din kenitew taman te edlevanan kiw zin wey ebeǥayan te hustu he kukuman. Egkeehè tew is kedlibriya zin kenitew pinaaǥi te ked-uwit din te kerayag kayi te kenitew.
MIC 7:10 Egkaahà heini te menge kuntada tew ne egkepeel-elezan sikandan. Su hein aney ne edsudien kiw zan he ke sikandin te, ‘Hendei en is Nengazen he Megbevayè niw?’ Kenà egkeuǥet egkeehè tew is kegkezeeti zan. Egkeiring sikandan te vasak diyà te kersada he edtekutakan.”
MIC 7:11 Migkeǥiyan ni Micas is menge tig-Jerusalem te, “Egkeuma is timpu he ed-umanan niw ebenguna is menge verengbeng niw ne zutun he timpu ne ebmeluag pa is tanà he egkesakup niw.
MIC 7:12 Dutun daan he timpu edhendiyà te keniyu is menge etew he ebpuun diyà te Asiria wey ziyà te menge inged diyà te Ehipto, wey ziyà te menge lugar he ebpuun te Ehipto pehendiyà te wahig he Eufrates, wey is ebpuun diyà te meziyù he menge lugar.
MIC 7:13 Egkehimu he mekevulungbulung is menge nasyun kayi te kelibutan tenged te kegkezeeti te menge meǥinged kayi.”
MIC 7:14 Mid-ampù is menge Israilihanen diyà te Nengazen he ke sikandan te, “Ventayi key is menge etew nu he migaked nu, te iring te kebantey te perevantey te menge kerehidu. Is menge tanà diyà te peliǥuy zey ne zekelà is egketabtab duen, piru sikami nengungubpaan key kayi te sibsivayan he iyan key zà. Ipeuman nu ipemeluag is tanè dey taman te Bashan wey Gilead iring te nehuna he timpu.
MIC 7:15 Ipeehè key kenikew te menge egkein-inuwan iring te mibeelan nu zengan hein impeǥawas key kenikew puun diyà te Ehipto.
MIC 7:16 Ne emun egkaahà heini te menge etew ziyà te menge nasyun ne egkepeel-elezan dan minsan gemhanan sikandan. Ne kenè dan en edlalag wey ebpemineg te menge kedsudia kenami.
MIC 7:17 Edula zan diyà te tanà iring te uled tenged te kegkeeled dan. Egawas sikandan diyà te elesè dan is egkerkeren tenged te kegkahandek dan kenikew, te Nengazen he Megbevayè dey.
MIC 7:18 Wazè en duma he ed-ezapen he iring kenikew. Mibpesaylu nu is menge salà te nesamà he menge etew nu he menge ǥaked nu. Wazà mebpedayun taman te taman is kegkepauk nu su ingkelipey nu is kebmahala nu kenami.
MIC 7:19 Egkeumanan key kenikew egkehizuwi ne id-awè nu is langun he menge salè dey. Iring dà te edtekutakan nu heini ne idtimbag nu ziyà te kezeleman te zaǥat.
MIC 7:20 Ibpeehè nu kenami te menge kevuwazan ni Abraham wey ni Jacob is kebmetinumanen nu wey kebmahala nu kenami sumalà te impenaad nu ziyà te kandan dengan.”
NAH 1:1 Is menge lalag kayi he libru, ne mehitenged te Nineve. Impahayag heini te Nengazen diyà te ki Nahum he tig-Elkosh.
NAH 1:2 Kenà igkesuat te Nengazen he Megbevayà is ked-azap te menge etew te zuma he menge ed-ezapen. Nepeukan din is menge kuntada zin ne ebelesan din sikandan.
NAH 1:3 Kenè sikandin melemu he egkepauk, piru mekeǥeǥehem sikandin ne edsilutan din is nekesalà. Emun edsaǥad sikandin edselenuhug is keramag wey ebpemagyu. Is menge ǥapun henduen dà te eliyavuk diyà te menge paa zin.
NAH 1:4 Pinaaǥi te kebmandù din ne egkemezahan is menge zaǥat wey menge wahig, egkengeǥangu is menge pinemula ziyà te Bashan, diyà te Buntud he Carmel, wey ziyà te Lebanon.
NAH 1:5 Diyà te etuvangan din egkehuyung is kelibutan, ragkes is menge vuvungan, wey ragkes he egkerkeren is menge etew kayi te kelibutan.
NAH 1:6 Hentei is ebpekeeguwanta emun utew egkepauk is Nengazen? Emun duen din egkepeukan ne henduen be te edrepu sikandin te hapuy, ne ebpememeka is menge vatu ziyà te etuvangan din.
NAH 1:7 Meupiya is Nengazen; melig-en sikandin he eputà emun timpu te kelised, ne ed-elimahan din is edangep diyà te kandin.
NAH 1:8 Iring sikandin te meseleg he zalem su ed-eminen din edezeeti is menge kuntada zin. Edel-asen din is menge kuntada zin taman te egkengepatey zin sikandan.
NAH 1:9 Sikiyu is menge tig-Asiria, ke hengkey is mezaat he pelanu niw ziyà te menge etew te Nengazen, ne id-awà heeyan te Nengazen, ne kenè ne heeyan egkeuman-uman.
NAH 1:10 Iring kew te etew he nelangut he nesepinit diyà te zuǥiyen he zezeisey he kayu. Edezeetan kew iyan iring te ebinsulan he reǥami.
NAH 1:11 Is sevaha te menge pengulu niw ne mibpelanu te mezaat he idezaat din te menge etew te Nengazen. Mezaat is insambag din.
NAH 1:12 Iyan heini migkaǥi te Nengazen diyà te menge tig-Juda: “Minsan mahabet wey mezesen is kuntada niw he menge tig-Asiria, edezeetan ku sikandan taman te egkahanew sikandan. Minsan te midrasey ku sikiyu ne kenè ku en heini ed-umanan ebeeli.
NAH 1:13 Su ǥuntaan egeuzen ku en sikiyu puun te ǥehem te menge tig-Asiria.”
NAH 1:14 Iyan heini migkaǥi te Nengazen diyà te menge tig-Asiria: “Id-awè ku is menge kevuwazan niw wey edezeetan ku is ledawan he kayu etawa mital ziyà te simbahan he ed-ezapan niw te menge ed-ezapen niw. Ed-endamen ku en is menge edlevengan keniyu su kenè kew ereg he egkeuyag.”
NAH 1:15 Tengtengi niw is menge tig-Juda! Duen menge menunudtulà he ed-abley ziyà te menge vuvungan su edtudtulan kew zan te meupiya he tudtul he zuen en kelinew ziyà te lugar niw. Umbe silibraha niw en is menge pista niw ne tumana niw is menge penaad niw ziyà te Nengazen. Su is lalung he menge etew ziyà te nasyun he Asiria kenè en maan ebpekesurung keniyu, su ebpurungan ku sikandan edezeeti.
NAH 2:1 Sikiyu is menge tig-Nineve, midsurung kew en te menge kuntada niw he ebpeyapat keniyu. Umbe ventayi niw is menge verengbeng te menge inged niw wey ventayi niw is menge zalan. Tiǥuma niw is menge sundaru niw ne purung kew pengandam te kebpekidtebek.
NAH 2:2 Su minsan midezeetan niw is menge tig-Israel wey menge tig-Juda he henduen be te pinemula he paras he mibpendezeetan is menge subpang kayi, idlikù te Nengazen is kegkemeǥeǥehem te Israel.
NAH 2:3 Meriǥà is kelasag wey visti te menge sundaru he kuntada niw. Ne zutun te timpu te kedsurung dan, ed-ilak-ilak is menge mital ziyà te menge kerwahi zan ne edsikadsikad en is menge kudè dan.
NAH 2:4 Edseǥembet dà is menge kerwahi zan diyà te menge zalan, he edlikù-likù diyà te menge pelasa. Henduen heini te edsiǥa he sulù wey egkindab he kilat.
NAH 2:5 Ebmendaran te hadì is menge upisyal te menge sundaru. Ebpemekeurambak en sikandan te kegaanggaan dan te ked-uvey ziyà te menge verengbeng niw su wey zan iketaud is pengalang te menge sundaru he edrundus duen te verengbeng.
NAH 2:6 Egkevengkag is menge peneng te wahig ne egkaanud is turuǥan niw.
NAH 2:7 Ingkepahayag en he ebihaǥen kew ne edumahan diyà te zuma he lugar. Henduen be te egkuter he merepatik is sineǥawan te suluǥuen niw he menge vahi zutun te edtebpien dan is kumeng dan tenged te kedlalew zan.
NAH 2:8 Is menge etew he ebpemelaǥuy puun te Nineve ne henduen be te edtudà he wahig he ebpuun diyà te nevusuwangan he peneng. Is menge ebpemelaǥuy ibpelikù te menge zuma zan piru wazè en egkeluvus he edliku.
NAH 2:9 Pemineg kew is menge nenurung diyà te Nineve. Penguwaa niw is menge pelata wey vulawan kayi he inged su nepenù heini te ketiǥeyunan.
NAH 2:10 Egkezeetan, egkeǥevà, egkevengkag en is Nineve! Umbe egkulbaan en is menge meǥinged kayi; egkerkeren is tivuuk he lawa zan, egkerkeren is menge vuel zan, ne ebmemeluntak sikandan.
NAH 2:11 Is Nineve iring te surung he mid-ubpaan te senge paris he erimaung, wey menge anak dan. Kunaan dan ke wazà ebpekekaid kandan dutun te surung. Edhimetayan wey ebpitpitasen duen te meemahan he erimaung is egkezawi zin ne ibpemeǥey zin diyà te esawa zin wey menge anak dan. Ebpenuen din is surung din te sapù te egkezawi zin. Piru ǥuntaan, edezeetan en is Nineve.
NAH 2:13 Su migkaǥi is Nengazen he Mekeǥeǥehem te, “Pemineg kew is menge tig-Nineve! Kuntada ku sikiyu! Umbe ebinsulan ku is menge kerwahi niw ne ebpematey te tebek is menge sundaru niw. Ibpeengkezan ku en keniyu is kebpendezaat niw kayi te kelibutan. Kenè kew en ebpekesuǥù te menge menunudtulà pehendiyà te zuma he menge nasyun te kegkaǥi ziyà te kandan ke hengkey is egkesuatan niw he ibpetuman kandan.”
NAH 3:1 Mekerurunù is inged he Nineve, is inged te menge kriminal wey menge teruen. Mahabet is menge azen dan he tinavan dan, ne layun dan en duen ebiktimahan.
NAH 3:2 Edsurungen sikandan te kuntada zan. Egkezineg dan is letepes te idlagkut te menge kudà, is geǥerakar te ligid te menge kerwahi, is leletepak te paa te menge kudà, wey is daǥing te ebpekeundat-undat he menge kerwahi.
NAH 3:3 Egkeehè dan is edsurung he menge pereuntud te kudà, ed-ilak-ilak he menge ispada wey menge vangkew, wey utew mahabet he intambù he nemematey. Egkengeseligkat is menge sundaru te lawa te menge minatey.
NAH 3:4 Egkehitavù heini ziyà te Nineve su ǥeina te iring sikandin te vahi he layun en ebelegyà te zengeg din, meninintal wey menlelemey. Umbe egke-iniyat din is menge nasyun he mebpesakup kandin.
NAH 3:5 Guntaan, migkaǥi is Nengazen he Mekeǥeǥehem te, “Pemineg kew is menge tig-Nineve! Kuntada ku sikiyu! Umbe ebpeel-elezan ku sikiyu ziyà te zuma he menge nasyun. Iring te vahi he midlislisan he naahà is kegkelevasi zin.
NAH 3:6 Edrewakan ku sikiyu ne egkeiring kew te etew he midtimbaǥan te besura. Edtengteng keniyu is menge etew.
NAH 3:7 Ne edlikey is langun he ebpekaahà keniyu he ke sikandan te, ‘Newaǥey en is Nineve. Wazè en edsineǥew para kandin. Wazà edlangan kandin.’ ”
NAH 3:8 Edhuna ve he lavew is Nineve kenè te inged he Tebes he uvey te Wahig he Nilo? Heini he wahig, nehimu he pengalang te Tebes su nehimu heini he verengbeng he nekeliǥuy te Tebes.
NAH 3:9 Is Etiopia wey is tivuuk he Ehipto, iyan nehimu he zesen te Tebes, ne kunaan din ke ebpedayun heini taman te taman. Is Put wey is Libya, kezapig din heini he menge nasyun.
NAH 3:10 Piru minsan pa te iyan heeyan, mibihag is menge etew kayi ne miduma ziyà te zuma he lugar. Midruntek diyà te menge zalan is dezeisey pa he menge anak dan. Mibpengedinahan is dungganen he menge etew kayi ne mibahin pinaaǥi te ripa su ebpen-uripenen.
NAH 3:11 Iring kew zaan keniyan is menge tig-Nineve, egkeiring kew te egkelangut he kenè din egketuenan ke hengkey is egkehitavù kandin. Egkehandek kew te menge kuntada niw emun edsurungen kew zan en ne ebpen-ehè kew te egkeelesan niw he zutun kenè kew egkezekepan.
NAH 3:12 Is langun he vinerengbeng he menge inged niw egkeiring te kayu he higus he nelutuan en is nehuna he menge veǥas din; ne emun edhuyungen egkengeulug en ne egkehimu en he egkeenen.
NAH 3:13 Tengtengi niw man is menge sundaru niw–meluya he iring te menge vahi! Is menge trangka te pultahan te inged niw ne nengetutung en, umbe melemu zà heini he edselezan te menge kuntada niw.
NAH 3:14 Sigi, pengendami niw is kebpekeuma te menge kuntada niw. Sekezu kew su wey niw zuen meinum. Lig-eni niw pa is menge verengbeng he nekeliǥuy te inged niw; baal kew te menge brik ne purungi niw heini he menge verengbeng.
NAH 3:15 Piru keniyan mismu te lugar niw ebpemematey kew pinaaǥi te hapuy wey ispada, iring te menge pemuleey he mid-etaki te terapan. Mibmahabet kew iring te menge terapan!
NAH 3:16 Impemezakel niw is menge nigusyanti niw he henduen be te subra pa kezakel te menge vituen diyà te langit. Piru egkeiring sikandan te menge terapan he ed-eminen dan egkeena is menge pinemula ne segugunà dan edlayang.
NAH 3:17 Is menge vantey niw wey menge upisyal, ne henduen be te menge terapan su utew mahabet, ne ziyè edlatun te menge verengbeng emun meǥenew is timpu. Iyan, emun edsilè en is andew, ne edlayang sikandan ne wazà egketau ke hendei sikandan mebpevayà.
NAH 3:18 Sikew is hadì te Asiria, ebpemematey is menge pengulu nu. Ebpekepeyapat is menge etew nu ziyà te menge vuntud, ne wazè en ebpeketiǥum kandan.
NAH 3:19 Egkeiring ka te etew he teǥepalì he kenè en egkeulian is palì din. Is langun he ebpekezineg te tudtul mehitenged te kegkezeeti nu ebpakpak te kegkelipey, su is langun te sikandan ne layun nu ebpesipelahi.
HAB 1:1 Iyan heini menge lalag te ebpeneuven he si Habakuk he impahayag te Nengazen diyà te kandin.
HAB 1:2 Migkaǥi si Habakuk te, “He Nengazen, taman te keenu is kebuyù ku te tavang diyà te kenikew he zutun ebpemineg ke en human kedì? Keenu key kenikew edlibriya ziyà te menge etew he mibpesipala kenami?
HAB 1:3 Maan is impeehè nu pa kediey heini is kezeetan wey kegubut? Minsan hendei ne egkeehè ku is inhimetayà, kebpepespesipelahà, kedtebek, wey kebikilan.
HAB 1:4 Umbe, nehimu he wazè en pulus te kesuǥuan; wazè en ul-ulaha is hustu he kukuman su is menge etew he nekesalà, ne iyan ebpekezaag diyà te hukmanan ne kenà iyan is wazà mekesalà. Umbe nevulegkù en is hustu he kukuman.”
HAB 1:5 Midtavak is Megbevayà, “Purungi niw ahaa is egkehitavù diyà te menge nasyun ne egkeinuinu kew te egkeehè niw. Su zuen ebeelan ku ziyà te timpu niw he kenè niw egketuuwan minsan duen pa kayi edtudtul ziyà te keniyu.
HAB 1:6 Su edhimuwen ku he gemhanan is menge tig-Babilonia. Heini he menge etew, utew memesipala ne kenè ne egkesanggen he edsurung diyà te zuma he menge nasyun su wey zan maaǥew is menge lugar he kenà kandan.
HAB 1:7 Igkikinehendekà sikandan te menge etew. Ebeelan dan ke hengkey is egkesuatan dan ne wazà ebpekeeǥen kandan.
HAB 1:8 Is menge kudè dan, meǥaan pa te langgam he liyupardu wey mesipala pa te dumezaas he asu he ebpen-ahà te egkekaan din emun mezukilem. Ebpelelaǥuy heini puun te meziyù he menge lugar, he henduen be te edlayang he kulaǥu he andam he edagmang te edewiyen din.
HAB 1:9 Ebpekeuma is grupu te menge sundaru zan he andam he ebpesipala. Iring heini te mevandes he keramag he ebpuun diyà te edsilaan. Is menge vihag dan iring kahabet te pantad.
HAB 1:10 Bà dan dà edsudia is menge hadì wey menge pengulu. Ne và dan dà ed-engiti is kada vinerengbeng he inged, su ebpekeliyu zan kayi pinaaǥi te kedtambù te tanà diyà te kilid te verengbeng, ne zutun egkaaǥew zan haazà is inged.
HAB 1:11 Ne kegkepasad dutun ne egenat sikandan he henduen dà te keramag he midsaǥad. Heini sikandan, nekesalà, su wazà duma he migkilala zan he Megbevayà, kekenà, iyan dà is kebpekegaga zan.”
HAB 1:12 Migkaǥi si Habakuk te, “He Nengazen, Megbevayè ka puun te nehuna. Iyan ka waǥas he Megbevayè ku ne wazè nu kemetayen. He Nengazen he iring te endilungà he vatu, mibpilì nu is menge tig-Babilonia te kedsilut kenami.
HAB 1:13 Geina te metazeng ka, ne kenè nu egkaantus is kedtengteng te kelelalung wey kegubut. Piru maan is mibey-anan nu zà is meluiven he menge tig-Babilonia? Maan is intuǥut nu he mezèdeeti zan is menge etew he emun idhindeg kandan ne edhuna sikandan he lalung?
HAB 1:14 Midhimu nu is menge kuntada zan he iring te menge isdà he wazè dan pengulu he edlavan kandan.
HAB 1:15 Midlipeylipey is menge tig-Babilonia zutun te kebihaǥa zan te menge kuntada zan he henduen dà te menge isdà he midhingutel zan pinaaǥi te vunuwit etawa puket.
HAB 1:16 Ne tenged te mahabet is nevihag dan, midalig dan is keugelingen dan tenged te kebpekegaga zan; iring sikandan te mengingisdà he mibeǥayan din te zengeg is bunuwit din etawa puket din pinaaǥi te kedtutung te veyewà he pemuhat para kayi he menge azen. Su pinaaǥi te vunuwit din etawa puket din ne midsepian sikandin ne egkekaan din is metaam he menge keenen he egkesuatan din te egkaan.
HAB 1:17 Tenged kayi Nengazen, ebpedayun en be sikandan te wazà hizu he kebpemihag dan wey kebpendezaat diyà te menge nasyun?”
HAB 2:1 Migkaǥi si Habakuk te, “Ebpemenahik a ziyà te turi he ventayè ku, ne edteǥazan ku ke hengkey is egkeǥiyen te Nengazen kayi te kedì wey ke hengkey is idtavak din te riklamu ku.”
HAB 2:2 Iyan heini tavak te Nengazen ki Habakuk: “Isurat nu he keladu ziyà te suratà he vatu is ibpahayag ku ziyà te kenikew su para melemu heini he ebesahan.
HAB 2:3 Isurat nu zà heini zep-a su wazè pa meuma is midtelaan he timpu te kegkeul-ulaha kayi. Ne kenà ebperis is kegkeul-ulaha kayi te kena egkeuǥet. Emun henduen be te malù egkeuǥet ne teǥazi nu, su siguradu he egkehitavù heini he kenà egkeuǥet.
HAB 2:4 Iyan heini isurat nu: “Ahaa nu is menge mepelavawen! Lalung sikandan he menge etew. Piru is metazeng he menge etew ebpengungubpaan tenged te kedtuu zan.
HAB 2:5 Benar iyan, kenà egkeseriǥan is ketiǥeyunan. Ne sikan is mepelavawen he menge etew he zekelà is kadar zan te ketiǥeyunan, ne kenà mevented wey kenè dan egkekuntintu. Iring sikandan te kemetayen he kenà egkeperahan. Ne iyan heeyan imbihaǥa zan te menge etew ziyà te mahabet he menge nasyun.
HAB 2:6 Piru edsudien sikandan keniyan te menge etew ziyà te menge nasyun pinaaǥi te mesakit he menge lalag he edhenduen te, “ ‘Kehizu niw te ebpenguwa te menge azen he kenà keniyu, wey edtiǥum te ketiǥeyunan pinaaǥi te kebpenapì. Taman pa te keenu is ked-ul-ulaha niw keniyan?
HAB 2:7 Piru edtik-awan kew ebelesi te menge etew ziyà te menge nasyun he mibihag niw, ne tenged kandan egkerkeren kew te kegkahandek, ne iyan en maan sikandan ed-aǥew te menge azen niw.
HAB 2:8 Tenged te mahabet he menge nasyun is mid-eǥawan niw te menge azen, ne iyan kew en maan ed-eǥawan te menge etew he nesamà keniyan he menge nasyun. Egkehitavù heini keniyu tenged te kebpenhimatey niw te menge etew wey kebpendezeeti niw te menge tanè dan wey menge inged dan.
HAB 2:9 “ ‘Mekehizuhizu kew is mibpehitindeg te menge valey pinaaǥi te selapì he nekuwa niw te mezaat he paaǥi. Midlig-enan niw is menge valey niw su wey kew kenà memenu emun ebpekeuma is kezeetan.
HAB 2:10 Tenged te kebpenhimatey niw te mahabet he menge etew, edhimetayan kew zaan ne egkezeetan is dengeg niw.
HAB 2:11 Henduen be te edriklamu minsan is menge vatu ziyà te elavat wey is menge pepesanan te menge valey niw. Henduen be te ebpengulahì dan is edsumbung keniyu.
HAB 2:12 “ ‘Kehizu niw te mibangun te inged pinaaǥi te pesipala. Andam kew he edhimatey te etew vasta mevangun heini.
HAB 2:13 Piru heeyan is impevangun niw te menge etew he mibihag niw ne ebinsulan dà heeyan, umbe egkehimu he wazà pulus te midheǥuan dan. Midtelaan en heini te Nengazen he Mekeǥeǥehem.
HAB 2:14 Su is menge etew kayi te kelibutan, egkepenù te keuluwanen vahin te gehem te Nengazen, iring te zaǥat he nepenù te wahig.
HAB 2:15 “ ‘Mekehizuhizu kew su tenged te pauk niw mibpeel-elezan niw is menge etew ziyà te avey niw he menge nasyun. Henduen be te midlangut niw sikandan te vinu su wey maahà is kegkelevasi zan.
HAB 2:16 Ne ǥuntaan iyan kew en maan egkepeel-elezan he iyan pezem egkesuatan niw he veǥayi kew te zengeg, su edsilutan kew iyan te Nengazen. Iring te ibpeinum kew zin te vinu su wey kew melangut ne wey maahà is kegkelevasi niw su wey kew meeled-eled.
HAB 2:17 Mibpemiley niw is menge kayu ziyà te Lebanon, ne midhimetayan niw is menge langgam duen. Umbe edezeetan kew zaan ne egkerkeren kew te kegkahandek. Egkehitavù heini keniyu tenged te kebpenhimatey niw te menge etew wey kebpendezaat niw te menge tanè dan wey menge inged dan.
HAB 2:18 “ ‘Hengkey is pulus te zuma he menge ed-ezapen? Kayu zè man heeyan etawa mital he mibeelan te etew, ne kenè man heeyan ebpekekaǥi mehitenged te tutuu. Ne maan is midtuuwan heeyan te menge etew he mibaal zuen? Kenà ganì heeyan ebpekekaǥi.
HAB 2:19 Kehizu niw te egkaǥi ziyà te ledawan he kayu etawa vatu te, “Kepukew ke en ne tevangi key.” Kenè ganì heeyan ebpekepenurù keniyu. Minsan mibpekeplaan heeyan te vulawan wey pelata, piru kenà heeyan uuyag.
HAB 2:20 Piru is Nengazen mulà, ne ziyà sikandin te segradu he ubpeey zin he ziyà te langit. Umbe is langun he kayi te kelibutan ebpereremek diyà te etuvangan din.’ ”
HAB 3:1 Iyan heini ampù te ebpeneuven he si Habakuk:
HAB 3:2 “He Nengazen, nezineg ku is menge mibeelan nu, ne tenged kayi utew zekelà is kedtehuza ku kenikew. Ne ǥuntaan umani nu heini veeli kayi te kenami he timpu. Ne zutun te timpu te kebpaahaa nu te pauk nu ne kehizuwi key kenikew.
HAB 3:3 “Iyan ka kes Waǥas he Megbevayà he ebpekeuma he ebpuun te Teman wey te Buntud he Paran, ne is gehem nu egkaahà diyà te langit, ne tenged kayi edeliǥen ka te menge etew kayi te kelibutan.
HAB 3:4 Is kebpenganlag te kebpekeuma, nu ne iring te kebpenganlag te andew; edsiǥa is menge velad nu he zutun mekeeles is gehem nu.
HAB 3:5 Ed-uwit ka te kezeetan dutun te kebpekeuma nu.
HAB 3:6 Emun edhitindeg ka egkehuyung is kelibutan, ne emun edtengteng ka ne egkerkeren te kegkahandek is menge etew wey egkengetiplak is neuǥet en he menge vuntud. Is menge paaǥi nu ebpedayun te wazà pidtemanan.
HAB 3:7 Neehè ku he egkengeregdas is menge tulda te meǥinged diyà te Cushan wey Midian.
HAB 3:8 “Nengazen, iring ka te sundaru he ed-untud te kerwahi he ibpekezaag te tebek. Andam ke en he ebpanà. Piru hentei man is egkeepesan nu? Iyan be is menge wahig wey menge zaǥat? Kenà iyan is menge wahig wey is menge zagat, kekenà, iyan is menge etew he ebpemekigkuntada kenikew. Midtevì nu is tanà ne midtudà dutun is wahig.
HAB 3:10 Is menge vuntud henduen be te menge etew he egkerkeren emun egkeehè ke zan. Mid-uzan te mereǥes, mideǥurus is wahig diyà te zaǥat ne midekelà is menge vaǥel.
HAB 3:11 Mibpundu is andew wey is bulan tenged te hagyung te menge vesut te panè nu wey kesinew te ed-ilak-ilak he vangkew nu.
HAB 3:12 “Tenged te utew nu kegkepauk midhipenawan nu is kelibutan ne midtekutakan nu is menge nasyun,
HAB 3:13 su edlibriyen nu is pinilì nu he menge etew. Midhimetayan nu is pengulu te mezaat he ginhedian ne mibpurungan nu zezeeti is menge etew zin.
HAB 3:14 Midtiyuk nu is ulu te peremandar te menge sundaru zin ne iyan nu in-uney itiyuk is besut te panà dutun te peremandar. Mibeelan nu heini hein midsurung key zan he iring dan te vagyu su wey key zan ikepeyapat. Su kelipey zan is kedezaat kenami te mekehizuhizu, he nemen-eles tenged te kegkahandek.
HAB 3:15 Iring ka te sundaru he imperapas din diyà te zaǥat is kudè din te kedsewsew kayi.”
HAB 3:16 Migkaǥi si Habakuk te, “Hein nezineg ku is impahayag te Nengazen kayi te kedì, migkerker is tivuuk he lawa ku ragkes en is bivig ku tenged te kegkahandek ku. Midluyahan a ne migkerker is menge paa ku. Ne tenged kayi te impahayag te Nengazen, ne kenà a edarà is edtaǥad te timpu te kedsiluti zin te menge midsurung kenami.
HAB 3:17 Minsan kenè pa mebpemeǥas is kayu he higira, is paras, etawa kayu he ulibu, wey minsan wazà sebpet diyà te tanà, wey minsan mebpemematey pa is menge uyaǥen diyà te tudil,
HAB 3:18 egkelipey a gihapun su ǥeina te iyan midlibri kedì is Nengazen he Megbevayà.
HAB 3:19 Iyan sikandin mibeǥey kedì te zesen. Midlig-enan din is menge paa ku, in-iring din te paa te selazeng su wey ku metekezeg is metikang he menge lugar.”
ZEP 1:1 Iyan heini lalag te Nengazen diyà te ki Zefanias dutun te timpu he si Josia he anak ni Amon iyan hadì diyà te Juda. Si Zefanias anak ni Cushi, si Cushi anak ni Gedalia, si Gedalia anak ni Amaria, ne si Amaria anak ni Hezekia.
ZEP 1:2 Migkaǥi is Nengazen te, “Ebpurungan ku edezeeti is langun he ziyà te tanà–
ZEP 1:3 is menge etew, is menge langgam ragkes en is menge tagbis wey menge isdà. Id-awè ku is menge edtukù te menge etew wey zan mekesalà ragkes en is menge mekesesalà. Edezeetan ku is langun he etew ziyà te tanà. Iyan a, is Nengazen, is migkaǥi kayi.
ZEP 1:4 “Edsilutan ku is menge meǥinged diyà te Juda ragkes en is langun he menge meǥinged diyà te Jerusalem. Edezeetan ku is nengesamà he menge ed-azap te ed-ezapen he si Baal ragkes en is menge memumuhat he ebpenilbi kayi, su wey kenè en sikandan metenuzi.
ZEP 1:5 Edezeetan ku zaan is menge ebpemenahik diyà te atep te valey zan su ed-azap dan te andew, bulan, wey menge vituen. Edezeetan ku is menge ed-azap wey nenangdù he ebpenilbi kayi te kedì piru nenangdù daan he ebpenilbi ziyà te ed-ezapen he si Molec.
ZEP 1:6 Edezeetan ku is menge mid-iniyug kedì wey is menge wazà medangep kayi te kedì.
ZEP 1:7 “Pereremek kew kayi te etuvangan ku, su meǥaan en egkeuma is andew te kedsilut ku. In-andam ku en is menge etew he para ebpenhimetayan iring te uyaǥen he ibpemuhat. Insivey ku en is menge kuntada he mid-umew ku wey zan medsurung diyà te Juda.
ZEP 1:8 Dutun he andew, ebpenhimetayan ku is menge tig-Juda he iring te uyaǥen he ibpemuhat. Edsilutan ku is menge upisyal zan wey is menge anak te hadì, wey is langun he mid-iring te mezaat he menge vetasan te ziyà te menge lumelengyawà.
ZEP 1:9 Edsilutan ku zaan keniyan he andew is langun he midtampu te menge tulumanen te menge etew he wazà mekekilala kedì wey is menge mibpesipala wey nenlimbung su wey zan mepenù te menge azen is baley te egalen dan.”
ZEP 1:10 Migkaǥi is Nengazen te, “Zutun he andew egkezineg is kulehian te ebpekitavang diyà te pultahan he migngezanan te Pultahan te menge Isdà diyà te inged he Jerusalem wey is lendag diyà te veǥu he vahin kayi he inged. Egkezineg daan is dekelà he keǥurub te egkengerundus he menge valey ziyà te menge vuvungan.
ZEP 1:11 Edsineǥew kew is ebpemen-ubpà diyà te alug he vahin te inged he Jerusalem su ebpemematey is langun he menge nigusyanti niw.
ZEP 1:12 “Dutun he timpu ebpurungan ku edsusiya is menge tig-Jerusalem ne edsilutan ku is menge etew he ebpeeyehey zà he egkaǥi ziyà te gehinawa zan, ‘Wazà ebeelan te Nengazen he meupiya etawa mezaat.’
ZEP 1:13 Ed-eǥawen is menge azen dan ne ed-ewaan dan is menge valey zan. Kenà iyan sikandan ebpekeubpà diyà te menge valey he mibangun dan. Wey kenà iyan sikandan ebpekeinum te vinu he ebpuun diyà te menge pinemula zan he paras.”
ZEP 1:14 Meǥaan en egkeuma is mekahandekhandek he andew te kedsilut te Nengazen. Hapit en heini egkehitavù ne merasey heeyan he andew, su minsan is menge sundaru ebpekepengulahì te kebuyù te tavang.
ZEP 1:15 Keniyan he andew is kebpeǥezama te Megbevayà te pauk din. Andew haazà te kelised, kemeresayan, kezeetan, wey kepirdiyan. Merusirem wey ebpenggapun dutun he andew,
ZEP 1:16 ne egkezineg is daǥing te menge vudyung wey kulehian te menge sundaru zutun te edsurung dan diyà te vinerengbeng he menge inged wey ziyà te metikang he menge turi kayi.
ZEP 1:17 Migkaǥi is Nengazen te, “Ibpaaǥi ku heeyan he kemeresayan diyà te menge etew, ne edhipanew sikandan he henduen be te menge lakap, su ǥeina te nekesalè dan kayi te kedì. Egkeiring te wahig he edtudà is lengesa zan, ebpekepeyapat is menge lawa zan iring te menge tai.
ZEP 1:18 Kenà ebpekelibri kandan is menge pelata zan wey menge vulawan dutun te andew te kebpeǥezama ku te pauk ku he iring te hapuy he ebpekeepur te tivuuk he tanà. Edtik-awan ku edezeeti is langun he ed-ubpà kayi he tanà.”
ZEP 2:1 Migkeǥiyan ni Zefanias is menge tig-Juda te, “Sikiyu is wazè dan keelezan he menge etew kayi te nasyun, tiǥum kew wey iniyuǥi niw is menge mezaat
ZEP 2:2 te kenè pa egkeuma is midtelaan he timpu te kedsegseǥa keniyu ziyà te meziyù he iring kew te menge ukap he idlayap. Iniyuǥi niw is mezaat te kenè pa egkeuma is timpu te utew kegkepauk te Nengazen.
ZEP 2:3 Ne sikiyu is kenà mepelavawen he menge etew kayi te nasyun, he edsunud te menge suǥù te Nengazen, dangep kew ziyà te kandin. Ipedayun niw is kebaal niw te metazeng wey is kenè niw kebpelavew. Su kela ke kenè kew mulà mekeizi zutun he andew te kebpeǥezama te Nengazen te pauk din.”
ZEP 2:4 “Egkaawà is langun he menge meǥinged diyà te Gaza wey Ashkelon. Is menge meǥinged diyà te Ashdod edsegseǥen seled dà te liwazà te andew, ne is menge meǥinged diyà te Ekron edsegseǥen daan puun te inged dan.
ZEP 2:5 Mekehizuhizu kew is menge Filistihanen he ebpemen-ubpà diyà te veyvey te zaǥat. Iyan heini migkaǥi te Nengazen he ebpekesuǥat keniyu: ‘Sikiyu is menge Filistihanen diyà te Canaan, edezeetan ku sikiyu ne wazà egkesamà keniyu.’
ZEP 2:6 Umbe, is tanè niw he uvey te zaǥat egkehimu he pepenebtavà wey tudil te menge kerehidu.
ZEP 2:7 Is tanè niw ed-engkenen te egkesamà he menge etew te Juda. Dutun sikandan ebpemepenabtab te menge uyaǥen dan, ne emun mezukilem diyè dan edhizeǥà te menge valey ziyà te Ashkelon. Edtentenuzan sikandan te Nengazen he Megbevayè dan ne idlikù din is meupiya he kebpekesavuk dan.”
ZEP 2:8 Migkaǥi is Nengazen he Mekeǥeǥehem, he Megbevayà te Israel te, “Nezineg ku is kebpeeled-eled wey kedsudì te menge tig-Moab wey tig-Ammon te menge etew ku. Mibpahambug dan pa he egkehimu zan kun te ed-aǥew is tanà te menge etew ku. Umbe mibpenangdù a ziyà te gehinawa ku he edezeetan ku is Moab wey is Ammon iring te Sodom wey Gomora. Heini he menge tanà ne kenè en egkepulusan taman te taman. Ed-erikubmunan dà heini te zuǥiyen he menge sagbet wey egkeeneb te menge vudsi he zutun ebeeli is timus. Ed-eǥawen heini te egkesamà he menge etew ku ne egkuwaan dan is menge azen kayi.”
ZEP 2:10 Migkaǥi si Zefanias te, “Iyan heeyan bales te kebpelavew te menge tig-Moab wey menge tig-Ammon. Su mibpeel-elezan dan wey midsudì dan is menge etew te Nengazen he Mekeǥeǥehem.
ZEP 2:11 Utew sikandan ebpelihendeka te Nengazen su edezeetan din is langun he menge ed-ezapen kayi te kelibutan. Ne ed-azap kandin is menge etew ziyà te kada nasyun diyà te keugelingen dan he lugar.”
ZEP 2:12 Migkaǥi is Nengazen te, “Sikiyu zaan is menge tig-Etiopia, ibpehimetayan ku sikiyu pinaaǥi te tebek.
ZEP 2:13 “Edsilutan daan is menge tig-Asiria he ziyà te zizaya. Egkezeetan is Nineve wey egkeiring heini kemaza te disirtu.
ZEP 2:14 Keniyan ebpemenleku is menge vaka, menge kambing, wey is duma pa he nekedseselekawà he menge langgam. Edlatun is menge ekang diyà te nengezeetan he menge tukud, ne is kegkaǥi zan egkezineg diyà te menge sulawà. Egkengeelangan is menge veyeey ne egkengetangtang is menge kayu he sidru.
ZEP 2:15 Iyan heeyan egkehitavù diyà te inged he Nineve he mibpahambug is menge meǥinged duen he wazà ebpekekaid kandan, ne ke sikandan diyà te gehinawa zan te, ‘Wazè en duma he ebpekerepeng te kegkemekeǥeǥehem tew!’ Piru egkepurung heini egkezeeti he inged ne egkehimu zà heini he ubpeey te leew he menge langgam. Ne edsudien heini he inged te langun he sumeseǥazà kayi.”
ZEP 3:1 Migkaǥi si Zefanias te, “Mekehizuhizu is Jerusalem! Is menge meǥinged kayi nekidsukulà te Megbevayà wey mibaal te mezaat he menge vaal, ne is menge pengulu kayi midlisedlised dan is menge etew.
ZEP 3:2 Wazà minsan hentei he ebpezumdumahan dan, ne kenè dan egkesuat he edewayen. Wazè dan medsarig wey mebpetavang diyà te Nengazen he Megbevayè dan.
ZEP 3:3 Is menge upisyal zan henduen be te edhiniǥer he erimaung. Is menge pengulu zan henduen be te zumezaas he asu, ne ebpen-ahà te egkezeesan din emun mezukilem, ne haazà ne ed-eminen din te edaas ne wazà egkesamà ke meselem.
ZEP 3:4 Is menge ebpeneuven diyà te kandan ne menge teruen ne kenà egkeseriǥan. Midremerikan te menge memumuhat dan is baley te Nengazen wey midsupak dan is Kesuǥuan te Megbevayà.
ZEP 3:5 Piru zutun gihapun is Nengazen te inged dan. Mibeelan te Nengazen is hustu ne wazà sikandin mebaal te kenà hustu. Kada andew ibpeehè din ke hengkey is hustu, ne wazè din heini engkezi te ebaal. Piru heini is lalung he menge etew mibpedayun gihapun te kebaal te mezaat ne wazà sikandan meeled.
ZEP 3:6 “Guntaan migkaǥi is Nengazen te, ‘Midezeetan ku is menge nasyun; midwaǥey ku is menge inged dan ragkes is menge verengbeng wey menge turi kayi. Wazà nesamà he menge meǥinged dutun, umbe wazè en etew he egkaahà he edhiphipanew ziyà te menge zalan dan.
ZEP 3:7 Ne tenged kayi te mibeelan ku, iyan neisip ku is: siguradu he edtehuzen ad te menge etew ku ne edewaten dan en is kedsewaya ku kandan, su wey kenà mezeeti is inged dan sumalà te migkaǥi ku ziyà te kandan. Piru nasì en med-iseg is kebaal zan te salà.
ZEP 3:8 “ ‘Umbe, sikiyu is menge metinumanen he menge tig-Jerusalem, teǥazi niw zà is kebpeheyaǥa ku te salà te menge nasyun. Su midisisyun ad he edtiǥumen ku is menge etew ziyà te menge nasyun wey menge ginhedian su wey ku ikepeǥezami kandan is utew ku kegkepauk he iring te hapuy he ebpekeepur te tivuuk he kelibutan.
ZEP 3:9 Ne zutun ebeg-uwen ku is menge etew su wey zan pudu medangep kayi te kedì ne egkesevaha zan is ebpenilbi kedì.
ZEP 3:10 Is menge etew ku he nekepeyapat diyà te egkehunaan te menge wahig diyà te Etiopia ed-uwit kayi te kediey te menge pemuhat.
ZEP 3:11 “ ‘Dutun te andew te kedsilut ku, sikiyu is menge tig-Jerusalem kenè kew egkepeel-elezan tenged te langun he salà he mibeelan niw kayi te kedì. Su id-awè ku ziyà te keniyu is menge etew he menge teruen wey mepelevawen. Ne kenè kew en ed-uman ebpehambug diyà te segradu he vuntud ku.
ZEP 3:12 Edsemaan ku ziyà te Jerusalem is menge etew he pubri wey egkaayuayu, ne ebuyù dan te tavang kayi te kedì.
ZEP 3:13 Heini sikandan is egkesamà he menge Israilihanen ne kenà ebaal te mezaat; kenè dan edtarùtarù wey ebpenlimbung. Egkaan dan wey edlipezeng ne wazà ebpekepelihandek kandan.’ ”
ZEP 3:14 Migkaǥi si Zefanias te, “Sikiyu is menge meǥinged te Israel, ugyab kew! Sikiyu is menge meǥinged diyà te Zion, he iyan is inged he Jerusalem, kanta kew wey medlipey ziyà te tivuuk he gehinawa niw!
ZEP 3:15 Su kenè kew en edsilutan te Nengazen. Edsegseǥen din is menge kuntada niw. Duma niw is Nengazen, he Hadì te Israel, umbe wazè en igkahandek niw he kezeetan.
ZEP 3:16 “Dutun he andew egkaǥi is menge etew ziyà te keniyu te menge tig-Jerusalem, ‘Sikiyu is menge meǥinged diyà te Zion, kenè kew mahandek; kenè kew mebpenluyaluya.
ZEP 3:17 Su zuma niw is Nengazen he Megbevayè niw. Iring sikandin te mekeǥeǥehem he sundaru he edlibri keniyu. Igkelipey kew zin, ne pinaaǥi te kebmahala zin keniyu ebeg-uwen din is untung niw. Egkanta sikandin wey ed-ugyab te kegkelipey tenged keniyu,
ZEP 3:18 iring te etew he egkelipey emun andew te pista.’ “Migkaǥi is Nengazen te, ‘Id-awè ku is kemeresayan niw su wey kew kenà mepeel-elezi.
ZEP 3:19 Dutun he andew, edsilutan ku is langun he midlisedlised keniyu. Edlibriyen wey edtiǥumen ku sikiyu is iring te menge kerehidu he nengepiangan wey nekedsusuwey. Mibpeel-elezan kew zengan, piru ebeǥayan ku sikiyu te zengeg wey edhimuwen ku he mevantug kew kayi te tivuuk he kelibutan.
ZEP 3:20 Uya, edtiǥumen ku sikiyu zutun he timpu, ne ibpeulì ku sikiyu ziyà te tanè niw. Ebeǥayan ku sikiyu te zengeg wey edhimuwen ku he mevantug kew kayi te tivuuk he kelibutan. Egkeulaula heini zutun te timpu te kebpelikua ku te meupiya he kebpekesavuk niw, ne egkeehè niw mismu. Iyan, a is Nengazen, is migkaǥi kayi.’ ”
HAG 1:1 Dutun te nehuna he andew te ikeenem he vulan, dutun te ikezuwa he tuig te kedhadì ni Darius diyà te Persia, duen migkaǥi te Nengazen diyà te ki Zerubabel wey ki Josue pinaaǥi te ebpeneuven he si Haggai. Si Zerubabel he anak ni Shealtiel iyan gubirnedur ziyà te Juda, ne si Josue he anak ni Jehozadak iyan lavew he memumuhat.
HAG 1:2 Iyan heini migkaǥi te Nengazen he Mekeǥeǥehem pinaaǥi te ebpeneuven he si Haggai: “Migkaǥi kew te kenè pa heini timpu te ked-umana kebenguna zuen te valey ku.
HAG 1:4 Egenahan kew ve he ed-ubpà diyà te mekempet he menge valey he neregdas mulà is kediey he valey?
HAG 1:5 Is-isipa niw is nengehitavù keniyu.
HAG 1:6 Dekelà is impemula niw piru zeisey zà is neraǥun niw. Duen niw keenen, piru kenà heini ereg. Duen niw inumen, piru kurang heini. Duen niw visti, piru kenà heini utew ebpekaalang te meǥenew. Duen egkezawat niw he suwildu, piru meǥaan dà heini egkaamin.
HAG 1:7 Umbe, is-isipa niw is nengehitavù keniyu.
HAG 1:8 Guntaan, tekezeg kew ziyà te vuntud ne penguwa kew te menge kayu ne umana niw venguna is baley ku, su wey pinaaǥi kayi egkelipey a wey egkeveǥayan te zengeg. Iyan a, is Nengazen, is migkaǥi kayi.”
HAG 1:9 Migkaǥi pa is Nengazen he Mekeǥeǥehem te, “Dekelà is ebperetengen niw he sebpet piru zeisey zà is neraǥun niw. Ne zutun te ked-ulia niw kayi midezeetan ku heini. Mibeelan ku heini tenged te neregdas en is baley ku piru is kada sevaha keniyu mulà, ne egkevuhetanan te kedterebahu ziyà te kandin mismu he valey.
HAG 1:10 Umbe, tenged keniyu wazè en birisbiris ne kenè ne ebeǥey te sebpet is tanà.
HAG 1:11 Impememaza ku is tanà wey is menge vuntud. Umbe neipiktuwan is trigu, binu, lana, wey is duma pa he menge abut, ragkes en is menge etew, wey is menge uyaǥen dan, wey menge impemula zan.”
HAG 1:12 Mibpezumazuma te Nengazen si Zerubabel, si Josue, wey is langun he menge zuma zan he menge Israilihanen he nemen-ulì diyà te Israel puun te kegkevihaǥa kandan diyà te Babilonia. Su mibpemineg dan is migkaǥi te Nengazen he Megbevayè dan pinaaǥi te ebpeneuven he si Haggai he midsuǥù te Nengazen diyà te kandan. Ne pinaaǥi kayi midtahud dan is Nengazen.
HAG 1:13 Ne zutun, si Haggai, is perekaǥi te Nengazen, migkeǥiyan din is menge Israilihanen te, “Migkaǥi is Nengazen he zuma niw kun sikandin.”
HAG 1:14 Umbe, mibaghet te Nengazen si Zerubabel, si Josue, wey is langun he zuma zan he menge Israilihanen he nemen-ulì diyà te Israel, te kebangun duen te valey te Nengazen he Megbevayè dan he Mekeǥeǥehem.
HAG 1:15 Mibpuunan dan is kebangun hein ike-24 he andew te ikeenem he vulan, dutun te ikezuwa he tuig te kedhadì ni Darius.
HAG 2:1 Dutun te ike-21 he andew te sunud he vulan, midsuǥù te Nengazen is ebpeneuven din he si Haggai he keǥiya zin heini ziyà te ki Zerubabel, ki Josue, wey ziyà te zuma pa he menge Israilihanen he nemen-ulì diyà te Israel:
HAG 2:3 Ke sikandin te, “Hentei keniyu is nekaahà dengan te kekempet kayi te valey te Nengazen? Ne hengkey is ked-ehè niw kayi ǥuntaan emun idhindeg duen te nehuna? Siguradu he minus is ked-ehè niw kayi?
HAG 2:4 Piru mebpekelig-en kew! Terebehuwa niw is baley ku su eduma a keniyu, is Nengazen he Mekeǥeǥehem.
HAG 2:5 Iyan daan heini impenaad ku zengan diyà te menge kepuun niw hein migawas sikandan diyà te Ehipto. Ne ǥuntaan is Mulin-ulin ku, ne kemulu pa ziyà te keniyu, umbe kenè kew mahandek.
HAG 2:6 “Iyan a, is Nengazen he Mekeǥeǥehem, is migkaǥi he edhuyungen ku te kesevaha is langit wey is kelibutan, is tanà wey is daǥat.
HAG 2:7 Edhuyungen ku is langun he nasyun ne ed-uwiten dan kayi te valey ku is menge ketiǥeyunan dan, umbe egkepenù heini is baley ku te mahalen he menge azen.
HAG 2:8 Egkehimu heini su is menge pelata wey menge vulawan, ne kediey man.
HAG 2:9 Egkehimu he edhuna pa he mekempet heini is beǥu he valey te Nengazen kenà duen te nehuna. Ne ibeǥey ku is meupiya he kebpekesavuk kayi he lugar. Iyan a, is Nengazen he Mekeǥeǥehem, is migkaǥi kayi.”
HAG 2:10 Duen migkaǥi te Nengazen diyà te ki Haggai hein ike-24 he andew te ikesiyam he vulan, dutun te ikezuwa he tuig te kedhadì ni Darius.
HAG 2:11 Ke sikandin te, “Insai nu is menge memumuhat ke hengkey is migkaǥi ziyà te kesuǥuan bahin kayi.
HAG 2:12 Penenglitan, ed-uwit is sevaha he etew te usa he impemuhat diyà te Megbevayà he midtenges din te kumbalè din. Ne zutun nekezegkit haazà is bisti ziyà te supas, etawa linutù he keenen, binu, lana, etawa minsan hengkey he kelasi te keenen. Egkeipiktuwan be te kegkesegradu zutun te tinenges haazà he menge keenen?” Ne hein mid-insaan ni Haggai is menge memumuhat ne iyan tavak dan is, “Kenà.”
HAG 2:13 Ne mid-insà si Haggai te, “Ne emun iyan nekezegkit kayi he menge keenen is etew he mid-isip he meremerik su nekesamsam sikandin te minatey, egkehimu ve he meremerik heini he menge keenen?” Ne midtavak is menge memumuhat te, “Uya!”
HAG 2:14 Ne migkaǥi si Haggai te, “Iring daan keniyan is menge etew te Israel, migkaǥi is Nengazen. Geina te meremerik dan dengan tenged te salà, is minsan hengkey he ebeelan dan wey ibpemuhat dan diyà te pemuhatà, ne meremerik diyà te etuvangan te Nengazen.
HAG 2:15 Puun guntaan, is-isipa niw is kebpekesavuk niw hein wazè niw pa puuni is kebangun te valey ku.
HAG 2:16 Dutun te nehuna, emun edhendiyè kew te midtembuan te menge trigu he ebperateng kew he ebpekekuwa kew te 20 he takes, ne 10 dà he takes is egkekuwa niw. Ne emun edhendiyè kew te keresà te paras is ebperateng he ebpekekuwa te 50 he galun he vinu, ne 20 zà is egkekuwa niw.
HAG 2:17 Midèdeetan te Nengazen is menge pinemula niw pinaaǥi te meinit he keramag, erat, wey kebpeuzan te ǥiyew he henduen be te menge vatu, piru wazè kew gihapun medlikù diyà te kandin, migkaǥi is Nengazen.
HAG 2:18 Ike-24 guntaan he andew te ikesiyam he vulan, ne ǥuntaan nepasad sikan is pundasyun duen te valey te Nengazen. Ne peninimè kew en ke hengkey is egkehitavù puun guntaan.
HAG 2:19 Minsan wazè en nesamà he trigu, wey wazè en beǥas te paras wey menge kayu he higus, pumigranata, wey ulibu, ne puun guntaan edtuvazan kew te Nengazen.”
HAG 2:20 Mid-uman megkaǥi is Nengazen diyà te ki Haggai zutun mismu he andew.
HAG 2:21 Ke sikandin te, “Keǥiyi nu si Zerubabel he meǥaan ku en edhuyungen is langit wey is kelibutan.
HAG 2:22 Edèdeetan ku is menge ginhedian ne id-awè ku is gehem dan. Eberiudsungen ku is menge kerwahi zan wey is ebpemen-untud kayi. Ebpemematey is menge kudà ne ed-uuney ebpehimhimetayà is menge pereuntud kayi.
HAG 2:23 Keǥiyi nu zaan si Zerubabel he suluǥuen ku he edhimuwen ku sikandin he ibpezumala zutun he andew. Edumala sikandin pinaaǥi te keǥehem ku, su iyan sikandin pinilì ku. Iyan a, is Nengazen he Mekeǥeǥehem, is migkaǥi kayi.”
ZEC 1:1 Hein ikewalu he vulan te ikezuwa he tuig te kedhadì ni Darius diyà te Persia, duen migkaǥi te Nengazen diyà te ebpeneuven he si Zacarias. Heini si Zacarias, anak ni Berekia wey apù ni Ido.
ZEC 1:2 Is Nengazen he Mekeǥeǥehem, midsuǥù din si Zacarias he keǥiya zin heini ziyà te menge etew te Israel: “Nepeukan ku utew is menge kepuun niw. Ne ǥuntaan likù kew kayi te kediey ne edlikù a ziyà te keniyu.
ZEC 1:4 Kenè niw iringi is mibeelan te menge kepuun niw. Impekeǥiyan ku sikandan dengan te menge ebpeneuven he iniyuǥi zan en is mezaat he menge vaal zan, piru wazà sikandan medtuu. Wazà sikandan mebpezumazuma kedì.
ZEC 1:5 Is menge kepuun niw wey sikan is menge ebpeneuven ne nemematey en.
ZEC 1:6 Piru nehitavù diyà te menge kepuun niw is migkaǥi ku wey is menge petizaan he impekaǥi ku te menge suluǥuen ku he menge ebpemeneuven. Ne mid-iniyug te mezaat is menge kepuun niw he ke sikandan te, ‘Midsilutan kiw te Nengazen he Mekeǥeǥehem te ereg he vales te menge vaal tew, sumalà te pelanu zin.’ ”
ZEC 1:7 Siak, si Zacarias, duen migkaǥi te Nengazen kayi te kedì pinaaǥi te mibpelewasan din. Nehitavù heini hein mezukilem te ike-24 he andew te vulan he Shebat (he iyan ike-11 he vulan), hein ikezuwa he tuig te kedhadì ni Darius. Ne iyan heini pahayag ni Zacarias: Neehè ku is sevaha he etew he ed-untud te meriǥà he kudà. Mibpundu sikandin diyà te teliwazà te menge kayu he mirtu ziyà te suǥud. Diyà te egkehuziyanan din, duen menge etew he ebpemen-untud te meriǥà, iring te kaki, wey meputì he menge kudà.
ZEC 1:9 Mid-insà a ziyà te velinsuǥuen he mibpekidlalag kedì te, “Datù, hengkey is ibpesavut kayi?” Midtavak sikandin te, “Egkeǥiyen ku kenikew ke hengkey is ibpesavut kayi.”
ZEC 1:10 Ne sikan is etew he mibpundu ziyà te teliwazà te menge kayu he mirtu iyan midtavak kediey. Ke sikandin te, “Heeyan is menge pereuntud te kudà midsuǥù te Nengazen te ked-elingkus te tivuuk he kelibutan.”
ZEC 1:11 Ne migkaǥi sikan is menge pereuntud te kudà diyà te velinsuǥuen te Nengazen he mibpundu ziyà te teliwazà te menge kayu he mirtu te, “Neelingkus dey en is tivuuk he kelibutan ne neehè dey he melinawen heini.”
ZEC 1:12 Ne migkaǥi is belinsuǥuen te Nengazen te, “Nengazen he Mekeǥeǥehem, 70 en he tuig is kegkepeuki nu te menge tig-Jerusalem wey menge meǥinged diyà te zuma he menge inged diyà te Juda. Keenu nu pa edtepusa is kenè nu kegkehizuwi kandan?”
ZEC 1:13 Ne midtavak te Nengazen sikan is belinsuǥuen he mibpekidlalag kedì te meupiya wey ebpekelipey he menge lalag.
ZEC 1:14 Umbe, migkaǥi haazà is belinsuǥuen kayi te kedì te edtudtulen ku heini is migkaǥi te Nengazen he Mekeǥeǥehem: “Ingkeipeng ku is Jerusalem he migngezanan daan te Zion,
ZEC 1:15 piru utew ku nepeuki is menge meǥinged diyà te menge nasyun he ebpeeyehey zà. Dengan kenè ded utew zekelà is pauk ku kandan, piru mid-unduran dan heini.
ZEC 1:16 Umbe, edtevangan ku is menge tig-Jerusalem, ne ed-umanan ku ebenguna is Jerusalem ragkes en baley ku. Iyan a is Nengazen he Mekeǥeǥehem migkaǥi kayi.”
ZEC 1:17 Migkaǥi sikan is belinsuǥuen he tudtula ku zaan heini is migkaǥi te Nengazen he Mekeǥeǥehem: “Ed-uman ed-uswag is menge inged ku ziyà te Juda. Ne ed-umanan ku edlipaya is menge tig-Zion, he iyan is menge tig-Jerusalem, ne ed-umanan ku egkilelaa heini he pinilì ku he inged.”
ZEC 1:18 Ne neehè ku is heepat he sungey.
ZEC 1:19 Ne mid-insà a zuen te velinsuǥuen he nekidlalag kedì te, “Hengkey is ibpesavut kayi te menge sungey?” Midtavak e zin te, “Heini is menge sungey iyan is menge nasyun he mibpeyapat te menge etew te Israel wey Juda, ragkes en he impeyapat dan is menge etew te Jerusalem.”
ZEC 1:20 Ne zuen heepat he pandey he impaahà kedì te Nengazen.
ZEC 1:21 Mid-insà a te, “Hengkey is ebeelan dan?” Midtavak sikandin te, “Ebpelihendeken dan wey ebengkaǥen dan is menge sungey, he iyan kehuluǥan dan is menge nasyun, su iyan heini he menge nasyun kes mibpurung medezaat te Juda wey mibpeyapat te menge meǥinged kayi.”
ZEC 2:1 Ne neehè ku is sevaha he etew he zuen din migewezan he idsukud.
ZEC 2:2 Ne mid-insà a te, “Hendei ka ebpevayà?” Midtavak e zin te, “Diyà a te Jerusalem su edsukuzen ku ke sengemenu is keluaǥan din wey keleyatan din.”
ZEC 2:3 Ne migenat haazà is belinsuǥuen he nekidlalag kedì, ne midsinuǥung sikandin te selakew en he velinsuǥuen
ZEC 2:4 he migkaǥi ziyà te kandin te, “Egpas ka. Pelelaǥuy ka, ne keǥiyi nu haazà is betan-en he ed-uwit te sukud, he is Jerusalem egkehimu he inged he wazè din berengbeng su utew mahabet is menge meǥinged wey menge uyaǥen kayi.
ZEC 2:5 Su migkaǥi is Nengazen he iyan mismu sikandin egkehimu he verengbeng he hapuy he ebpekeliǥuy te inged he Jerusalem, ne iyan sikandin egkehimu he ǥehem kayi te inged.”
ZEC 2:6 Migkeǥiyan te Nengazen is menge Israilihanen te, “Impeyapat ku sikiyu ziyà te minsan hendei he vahin te kelibutan. Piru ǥuntaan pemelaǥuy kew, ragkes kew en is mibihag pehendiyà te Babilonia, ne likù kew ziyà te Jerusalem.”
ZEC 2:8 Hein nepasad is kegkaahaa ku zuen te menge nelewasan ku, midsugù a te Nengazen he megkaǥi a te ebpekesuǥat diyà te menge nasyun he nenurung keniyu wey nenguwa te menge azen niw. Su is minsan hentei he ebpesipala keniyu, ebpesipelahan din is utew mahal te Nengazen. Ne iyan heini kes migkaǥi te Nengazen he Mekeǥeǥehem he ebpekesuǥat diyà te menge nasyun:
ZEC 2:9 “Edsilutan ku iyan sikandan; edsurungen sikandan te menge uripen dan ne egkuwaan is menge azen dan.” Emun egkehitavù en heini egketuenan niw he iyan is Nengazen he Mekeǥeǥehem midsuǥù kedì, migkaǥi si Zacarias.
ZEC 2:10 Migkaǥi is Nengazen te, “Ugyab kew tenged te kegkelipey, sikiyu is menge tig-Jerusalem, su ebpekeuma a ne ed-ubpà a zuma keniyu. Ne zutun he timpu, mahabet he menge nasyun is ebpesakup kedì. Ne egkehimu sikandan he menge etew ku.” Emun ekgehitavu en heini, egketuenan niw he iyan is Nengazen he Mekeǥeǥehem midsuǥù kedì pehendiyà te keniyu.
ZEC 2:12 Ed-umanan ed-engkena te Nengazen is Juda he kandin he vahin te segradu he tanà te Israel. Ne ed-umanan din egkilelaa is Jerusalem he pinilì din he inged.
ZEC 2:13 Ebmelinawen is langun he menge etew ziyà te etuvangan te Nengazen, su ebpekeuma sikandin puun te segradu he ubpeey zin.
ZEC 3:1 Ne impaahà te Nengazen kedì is lavew he memumuhat he si Josue he edhithitindeg diyà te etuvangan te velinsuǥuen te Nengazen. Midhitindeg diyà te egkekewanan din si Setanas he edsumbung kandin.
ZEC 3:2 Piru migkeǥiyan duen te velinsuǥuen te Nengazen si Setanas te, “Sayep ka, Setanas, su is Jerusalem pinilì en te Nengazen. Su heini si Josue, midlibri zin puun te kegkevihag he iring te netutung he kayu he midsekelew zin puun te hapuy.”
ZEC 3:3 Meremerik is bisti ni Josue zutun te edhithitindeg sikandin diyà te etuvangan te velinsuǥuen.
ZEC 3:4 Umbe, migkaǥi haazà is belinsuǥuen diyà te zuma he menge velinsuǥuen he ebpemenhitindeg diyà te etuvangan ni Josue te, “Luwasa niw is meremerik he visti zin.” Ne migkeǥiyan din si Josue te, “In-awè ku en is menge salè nu. Ne ǥuntaan ebistiyan ku sikew te veǥu he visti.”
ZEC 3:5 Ne migkaǥi a te, “Suupi niw zaan te lumpiyu he tengkulu is ulu zin.” Umbe mibpesul-uvan dan sikandin te visti wey lumpiyu he tengkulu dutun te edhithitindeg is belinsuǥuen te Nengazen he ebantey.
ZEC 3:6 Ne migkeǥiyan duen te velinsuǥuen te Nengazen si Josue
ZEC 3:7 te migkaǥi te Nengazen he Mekeǥeǥehem: “Emun edsunud ka te menge paaǥi ku wey edtuman ka te ibpetuman ku, ebpekepengulu ka ziyà te valey ku wey ebpekezumala ka ziyà te lama kayi. Ne edtuǥutan ku sikew te ked-uvey ziyà te etuvangan ku iring kayi te menge velinsuǥuen he ebpemenhithitindeg kayi.
ZEC 3:8 Guntaan pemineg ka Josue he lavew he memumuhat: Sikew wey is duma nu he memumuhat, menge tuus kew te edtelinguma he menge hitavù. Su edsuǥuen ku is suluǥuen ku he migngezanan te Subpang.
ZEC 3:9 Josue, tengtengi nu is batu he insavuk ku ziyà te etuvangan nu, duen kayi pitu he mata. Ebpeukiran ku heini, ne id-awè ku is salà te menge etew te nasyun he Israel te senga andew zà.
ZEC 3:10 Dutun he timpu ed-ubpè kew he melinawen. Is kada sevaha keniyu, ebpengimbita te siringan din te kebpinuu ziyà te lempek te paras din wey kayu zin he higus. Iyan a, is Nengazen he Mekeǥeǥehem, is migkaǥi kayi.”
ZEC 4:1 Midlikù sikan is belinsuǥuen he nekidlalag kedì ne mibpukew e zin su henduen be te nekelipezeng a.
ZEC 4:2 Mid-insà sikandin kayi te kedì te, “Hengkey is neehè nu?” Midtavak a te, “Neehè ku is sevaha he vulawan he selevukà te sulù. Diyà te zivavew kayi zuen yehung he itisà te lana. Ne ziyà te peliǥuy zutun te yehung duen dutun pitu he sulù ne is kada sevaha zutun duen din pitu he tuvu he veyeey te lana.
ZEC 4:3 Duen dezuwa he kayu he ulibu ziyà te kilid kayi; is sevaha zutun ne ziyà dapit te egkekewanan ne is sevaha ziyà te egkeǥivang.”
ZEC 4:4 Mid-insaan ku sikan is belinsuǥuen he nekidlalag kedì te, “Datù, hengkey is ibpesavut kayi te pitu he sulù?”
ZEC 4:5 Midtavak te, “Wazè nu ve metueni ke hengkey is ibpesavut kayi?” Midtavak a te, “Wazà, datù.”
ZEC 4:6 Ne migkaǥi sikandin kayi te kedì te, “Kenè ku pa edtevaken is insè nu, ne pemineǥa nu heini is menge lalag te Nengazen he Mekeǥeǥehem diyà te ki Zerubabel: “Zerubabel, egkepasad nu is kebpehitindeg te valey te Nengazen kenè pinaaǥi te zesen wey egkehimu te etew, kekenà, pinaaǥi te Mulin-ulin he ibpetavang ku kenikew.
ZEC 4:7 Minsan iring pa kezekelà te vuntud is menge velavag he ed-etuvangen nu, ne egkepanhey heeyan. Egkepasad iyan is baley ku, ne zutun te kebpelestara te ketepusan he vatu he egkeǥamit kayi, igkulahì te menge etew is lalag te, ‘Nengazen, penubtuvazi nu heini!’ ”
ZEC 4:8 Umbe, pinaaǥi te velinsuǥuen, migkaǥi is Nengazen kayi te kedì
ZEC 4:9 he egkepasad is baley zin pinaaǥi te kedumala ni Zerubabel, iring te nehimu is ebpehitindeǥan kayi pinaaǥi ǥihapun te kandin he kedumala. Ne emun egkehitavù en heini, egketuenan niw he iyan midsuǥù kedì te kebpenudtul ziyà te keniyu is Nengazen he Mekeǥeǥehem.
ZEC 4:10 Duen menge etew he edsawey su ǥeina te zeisey pa is nehimu zuen te kebpehitindeǥa te valey te Nengazen. Piru edlipey zed sikandan emun egkeehè dan en he ibpelastar en ni Zerubabel zuen te valey te Nengazen is ketepusan he pinilì he vatu. Ne migkaǥi kayi te kedì sikan is belinsuǥuen te, “Iyan ibpesavut keniyan te pitu he sulù is menge mata te Nengazen he edtengteng diyà te tivuuk he kelibutan.”
ZEC 4:11 Ne mid-insaan ku haazà is belinsuǥuen te, “Hengkey is ibpesavut keniyan te zezuwa he kayu he ulibu he ziyà te egkekewanan wey egkeǥivang he lugar keniyan te impehitindeg he selevukà te sulù.
ZEC 4:12 Wey hengkey is ibpesavut keniyan te zezuwa he subpang te kayu he ulibu he ziyà te pesikilizà te zezuwa he vulawan he tuvu he ebpeveyaan te lana?”
ZEC 4:13 Midtavak sikandin te, “Wazè nu ve metueni ke hengkey is ibpesavut keniyan?” Midtavak a te, “Wazà, datù.”
ZEC 4:14 Umbe, migkaǥi sikandin te, “Iyan kehuluǥan keniyan is dezuwa he etew he mibpilì para mekepenilbi te Nengazen he ebayàbayà te tivuuk he kelibutan.”
ZEC 5:1 Midlilingey a ne neehè ku is sevaha he linulun he velesahan he midlayang.
ZEC 5:2 Mid-insà is belinsuǥuen kayi te kedì te, “Hengkey is neehè nu?” Midtavak a, “Neehè ku is linulun he velesahan he midlayang, he menge 30 he ǥiek is keleyat din ne menge 15 he ǥiek is keluag din.”
ZEC 5:3 Ne migkaǥi haazà is belinsuǥuen kayi te kedì te, “Nekesurat keniyan te velesahan is rawak he egkehitavù diyà te tivuuk he tanà te Israel. Nekaǥi ziyà te senge vahin he id-awà puun te Israel is langun he menge tekawen, ne nekaǥi ziyà te selakew en he vahin he id-awà daan is langun he ebpenangdù te tarù.
ZEC 5:4 Migkaǥi is Nengazen he Mekeǥeǥehem, ‘Ibpaaǥi ku heini he rawak ne edseled heini ziyà te valey te tekawen wey ziyà te valey te nenangdù te tarù he migamit din is ngazan ku. Ne kenà heini egkaawà diyà te kandan taman te egkepurung egkewaǥey is menge valey zan.’ ”
ZEC 5:5 Mid-uman mebpaahà sikan is belinsuǥuen he nekidlalag kedì, ne migkaǥi te, “Tengtengi nu ke hengkey heeyan is edhengkayi.”
ZEC 5:6 Mid-insà a te, “Hengkey heeyan?” Midtavak sikandin te, “Revan heeyan he para te idtakes. Iyan ibpaalung keniyan is menge salà te menge etew ziyà te tivuuk he tanà te Israel.”
ZEC 5:7 Heeyan is revan duen din tangeb he timeǥà. Ne hein mibpuwas haazà is tangeb, neehè ku he zuen bahi he ebpimpinuu ziyà te seled dutun te revan.
ZEC 5:8 Migkaǥi haazà is belinsuǥuen te, “Heini is bahi simbulu te kelelalung.” Ne intekenled din dutun te seled te revan sikan is bahi ne midtengevan din.
ZEC 5:9 Ne neehè ku is dezuwa he vahi he edlayang he utew meǥaan. Meluag is menge pakpak dan iring te pakpak te dugwak ne mibitbit dan diyà te zivavew sikan is revan.
ZEC 5:10 Ne mid-insà a zuen te velinsuǥuen he nekidlalag kedì te, “Hendei zan ed-uwita sikan is revan?”
ZEC 5:11 Midtavak sikandin te, “Ziyà te Babilonia he zutun ebengunen is simbahan he para kayi. Emun egkepasad en is simbahan, ne ibpelastar zutun heeyan is revan su para ed-ezapen.”
ZEC 6:1 Duen daan neehè ku he heepat he kerwahi he midlepew puun te pid-elangan te zezuwa he vuntud he brunsi.
ZEC 6:2 Is nehuna he kerwahi eguyuzen te meriǥà he menge kudà, is ikezuwa eguyuzen te meitem he menge kudà,
ZEC 6:3 is iketelu eguyuzen te meputì he menge kudà, ne is ikeepat eguyuzen te kevangan he menge kudà. Ne pudu mezesen haazà is menge kudà.
ZEC 6:4 Mid-insà a zuen te velinsuǥuen he nekidlalag kedì te, “Datù, hengkey is ibpesavut kayi te menge kerwahi?”
ZEC 6:5 Midtavak haazà is belinsuǥuen, “Iyan heeyan heepat he mulin-ulin diyà te langit he migawas puun te etuvangan te Nengazen te kedtuman te ebpeveelan kandan kayi te tivuuk he kelibutan.”
ZEC 6:6 Sikan is kerwahi he eguyuzen te meitem he menge kudà, midhendiyà te zizaya. Sikan is kerwahi he eguyuzen te meputì he menge kudà, midhendiyà te edsenlepan. Ne sikan is kerwahi he eguyuzen te kevangan he menge kudà, midhendiyà te zivavà.
ZEC 6:7 Heini is mezesen he menge kudà edsikadsikad en su egkesuat dan he ed-elingkus te tivuuk he kelibutan. Migkaǥi sikan is belinsuǥuen diyà te kandan te, “Sigi, elingkusa niw en is tivuuk he kelibutan.” Umbe mid-elingkus dan is tivuuk he kelibutan.
ZEC 6:8 Ne mibensag is Nengazen kayi te kedì te, “Tengtengi nu is menge kudà he ebpehendiyà te zizaya. Ibpehimeley zan is Mulin-ulin ku keniyan he lugar.”
ZEC 6:9 Migkaǥi is Nengazen kayi te kedì te,
ZEC 6:10 “Kuwaa nu is menge pelata wey menge vulawan he inggasa eni Heldai, Tobia, wey Jedaya. Ne hendiyè ka diritsu te valey ni Josia he anak ni Zefanias. Sikandan is heepat, nekelikù en puun te kegkevihaǥa kandan diyà te Babilonia.
ZEC 6:11 Ne peveeli nu he kuruna sikan is menge pelata wey menge vulawan. Ne ikuruna nu haazà diyà te ulu te lavew he memumuhat he si Josue he anak ni Jehozadak.
ZEC 6:12 Ne keǥiyi nu sikandin, he siak, is Nengazen he Mekeǥeǥehem, migkaǥi a te, ‘Is etew he migngezanan te Subpang ed-uswag is kebpekesavuk din ne iyan sikandin ebangun te valey ku. Ebeǥayan sikandin te zengeg pinaaǥi te kegkahadì din ne ebpengulu sikandin. Ne zuen memumuhat he edhitindeg diyà te avey te pinuuwè din te kedhadì ne egkeuyun sikandan is dezuwa.’
ZEC 6:14 Haaza is kuruna kenà id-awà diyà te valey ku su tedeman haazà ki Heldai, ki Tobia, ki Jedaya, wey ki Josia he menge anak ni Zefanias.”
ZEC 6:15 Is menge etew he ebpuun diyà te meziyù he menge lugar edhengkayi te Israel ne ed-uǥup dan ebangun te valey te Nengazen. Emun egkeulaula en heini, ne egketuenan niw he iyan is Nengazen he Mekeǥeǥehem midsuǥù kedì te kebpenudtul kayi ziyà te keniyu. Egkehitavù iyan heini emun ebpurungan niw ebpezumdumahi is Nengazen he Megbevayè niw.
ZEC 7:1 Duen migkaǥi te Nengazen diyà te ki Zacarias hein ikeepat he andew te vulan he Kislev (he iyan ikesiyam he vulan te tuig), dutun te ikeepat he tuig te kedhadì ni Darius.
ZEC 7:2 Nehitavù heini hein midsuǥù te menge etew he ziyà te Betel si Sharezer wey si Regem Melec, duma te menge etew zan.
ZEC 7:3 Su wey zan hengyui is menge memumuhat diyà te valey te Nengazen wey is menge ebpeneuven he insai zan is Nengazen ke kinahanglan pe be is kedseengseeng wey kebpuasa zan dutun te ikelima he vulan he paaǥi te kedtedemi te kegkerundus te valey te Nengazen, iring te layun dan ebeeli seled en te mahabet he menge tuig.
ZEC 7:4 Ne iyan heini migkaǥi te Nengazen he Mekeǥeǥehem diyà te ki Zacarias:
ZEC 7:5 “Keǥiyi nu is langun he menge etew te Israel ragkes en is menge memumuhat, he is kebpuasa zan wey kedseengseeng dan te kada ikelima wey ikepitu he vulan seled te kepituwan en he tuig wazè dan himuwa para kediey.
ZEC 7:6 Emun egkaan dan wey ed-inum, ne ebeelan dan heini para te keugelingen dan he kelipey.
ZEC 7:7 Iyan daan heini menge lalag he impekaǥi ku zengan te menge ebpeneuven, dutun te timpu he meuswaǥen pa is Jerusalem wey mahabet pa is menge etew kayi ragkes is menge inged diyà te peliǥuy zin, wey ragkes is Negev wey is menge mibuntud-buntud diyà te edsenlepan.”
ZEC 7:8 Migkaǥi en man is Nengazen diyà te ki Zacarias te,
ZEC 7:9 “Iyan heini migkaǥi ku ziyà te menge etew ku: ‘Iveǥey niw is metazeng he kukuman. Ipeehè niw is keupiya niw wey kebpekedhihizuwè niw.
ZEC 7:10 Kenè niw dèdaaǥa is menge valu he vahi, is menge ilu, is menge lumelengyawà, wey menge pubri. Kenè kew med-isip te mezaat diyà te minsan hentei keniyu.’
ZEC 7:11 “Piru wazè dan medseǥipà te migkaǥi ku. Mezesen is kedsupak dan wey kenè dan ebpemineg.
ZEC 7:12 Impemezesen dan is gehinawa zan iring te vatu, ne wazè dan mebpemineg te Kesuǥuan wey te menge lalag he impekaǥi te Mulin-ulin ku pinaaǥi te menge ebpeneuven dengan. Umbe siak, is Nengazen he Mekeǥeǥehem, utew a nepauk.
ZEC 7:13 Ne ǥeina te wazè dan mebpemineg te migkaǥi ku, ne kenà a zaan ebpemineg emun ed-umawen e zan.
ZEC 7:14 Iring a te eribpures he mibpeyapat kandan diyà te menge lugar he wazè dan keenu meveyai. Neewaan dan is meupiya he tanè dan, ne nehimu heini he mekevulungbulung.”
ZEC 8:1 Migkaǥi en maan is Nengazen he Mekeǥeǥehem diyà te ki Zacarias te, “Utew ku ingkeipeng is Jerusalem. Ne tenged te zekelà he ipeng ku kayi he inged, utew ku nepeuki is menge kuntada zin.
ZEC 8:3 Edlikù a ziyà te Zion, kes inged he Jerusalem, ne ed-ubpà a ziyà. Ne egngezanan is Jerusalem te Metinumanen he Inged wey egngezanan heini is buvungan ku te Buvungan he Segradu.
ZEC 8:4 Ed-uman en ebpememinuu ziyà te menge pelasa te Jerusalem is menge meǥurang he ebpenutuked en tenged te utew zan kegkeǥurang.
ZEC 8:5 Ne egkeeneb te eguǥusà he menge vatà is menge pelasa.”
ZEC 8:6 Migkaǥi pa is Nengazen he Mekeǥeǥehem, “Kela ke egkeisip te nesamà he menge etew ku he mereǥen en is kegkehitevua kayi, piru kayi te kedì kenà heini mereǥen.
ZEC 8:7 Edlibriyen ku is menge etew ku he mibihag pehendiyà te menge tanà diyà te edsilaan wey edsenlepan.
ZEC 8:8 Ed-umanan ku sikandan ed-uwita ziyà te Jerusalem ne ibpeubpè ku zutun. Ne egkehimu en maan sikandan he menge etew ku ne egkehimu a he Megbevayè dan he metinumanen wey metazeng.”
ZEC 8:9 Migkaǥi pa is Nengazen he Mekeǥeǥehem, “Heini he menge lalag migkaǥi zengan te menge ebpeneuven hein timpu te kebeeli te pundasyun te valey ku. Ne ǥuntaan te neuman niw heini mezineg, mebpekelig-en kew su wey niw mepasad is kebangun te valey ku.
ZEC 8:10 Hein wazè pa mepuuni is ked-umana kebenguna te valey ku, melised is kebpekesavuk niw ragkes is kepekesavuk te menge uyaǥen niw. Wazà meveyazi is menge etew he edterebahu wey menge uyaǥen he migamit te kedterebahu, wey mekulbà is kedhiphipanew ziyà te minsan hendei su midhimu ku he mekedtetebek is menge etew.
ZEC 8:11 Piru ǥuntaan, siak is Nengazen he Mekeǥeǥehem, egkaǥi a te kenè ku en heini ebeelan diyà te keniyu te nengesamà.
ZEC 8:12 Ke ebpemula kew ne zuen kelinew. Ebpemeǥas is menge paras, duen egkeraǥun diyà te tanà, ne zuen en dehemug. Heini is langun, ibeǥey ku ziyà te keniyu te egkengesama, ne egkaangken niw heini.
ZEC 8:13 Sikiyu is menge etew te Juda wey Israel, midrewakan kew te menge etew ziyà te zuma he menge nasyun. Piru edlibriyen ku sikiyu ne egkehimu kew he tuvad diyà te kandan. Umbe kenè kew mahandek, kekenà, pekelig-en kew.”
ZEC 8:14 Migkaǥi pa is Nengazen he Mekeǥeǥehem, “Hein midhimu te menge kepuun niw he mepauk a, nekehukum a he edsilutan ku sikandan wey kenè ku egkehizuwan.
ZEC 8:15 Piru ǥuntaan nekehukum a he ibpelaus ku is kebaal te meupiya ziyà te Jerusalem wey Juda. Umbe kenè kew mahandek.
ZEC 8:16 Iyan heini ereg he ebeelan niw: Keǥiya niw is tutuu ziyà te kada sevaha keniyu. Iveǥey niw is metazeng he kukuman diyà te menge hukmanan niw he para te keupiyaanan te langun.
ZEC 8:17 Kenè kew pelanu te mezaat diyà te iring niw he etew, wey kenè kew penangdù te tarù. Su igkeepes ku is langun kayi he menge vaal.”
ZEC 8:18 Migkaǥi en maan is Nengazen he Mekeǥeǥehem diyà te ki Zacarias te, “Is kebpuasa ziyà te ikeepat, ikelima, ikepitu, wey ikesepulù he menge vulan, egkehimu he melipayen he timpu para te menge etew te Juda. Umbe mahala niw is tutuu wey kelinew.
ZEC 8:20 Mahabet he menge etew he ebpemuun diyà te nekedseselekawà he menge inged is ebpemenhendiyà te Jerusalem.
ZEC 8:21 Is menge meǥinged diyà te sevaha he inged, ebpenginggat diyà te sevaha pa he inged he egkaǥi te, ‘Edhendiyè key te kedsimba wey kedhangyu te tuvad te Nengazen he Mekeǥeǥehem. Hendini kew en, duma kew kenami!’
ZEC 8:22 “Mahabet he menge etew he ebpemuun diyà te gehemanen he menge nasyun is edhendiyà te Jerusalem te kedsimba wey kedhangyù te tuvad.
ZEC 8:23 Dutun he timpu, sepulù he etew he ebpuun diyà te nekedseselekawà he menge nasyun wey kineǥiyan is edhendiyà te sevaha he Judio he egkaǥi te, ‘Ipezuma key kenikew, su nezineg dey he nekiduma keniyu is Megbevayà.’ ”
ZEC 9:1 Iyan heini menge lalag te Nengazen: Migkaǥi is Nengazen he edsilutan din is menge inged he Hadrac wey Damascus, su kinahanglan he edtengteng wey edangep diyà te Nengazen is langun he menge etew lavew en is menge tribu te Israel.
ZEC 9:2 Edsilutan daan te Nengazen is Hamat he sikbit he inged te Hadrac wey te Damascus, wey ziyà te menge inged he Tyre wey Sidon, minsan duen ebilidad te menge meǥinged kayi.
ZEC 9:3 Mibangun is menge meǥinged diyà te Tyre te verengbeng, wey midtambù sikandan te pelata wey vulawan he henduen dà te midtambù sikandan te tanà su utew heini zekelà.
ZEC 9:4 Piru egkuwaan te Nengazen is menge azen dan ne idtimbag din diyà te zaǥat. Ne egkevinsulan is tivuuk he inged dan.
ZEC 9:5 Egkaahà heini te menge meǥinged diyà te Ashkelon ne egkahandek sikandan. Utew egkesekiti is menge meǥinged diyà te Gaza, wey iring din ded daan is menge meǥinged diyà te Ekron su egkaawà is midseriǥan dan. Ebpatey is hadì diyà te Gaza, ne kenè en egkeubpaan is Ashkelon.
ZEC 9:6 Is Ashdod, ed-ubpaan te menge etew he nekedseselekawà is kepuun. Edezeetan te Nengazen is impehivantug te menge Filistihanen.
ZEC 9:7 Kenè en sikandan egkaan te usa he zuen din pa lengesa wey menge keenen he imbandu is kegkeena zuen. Is egkesamà kandan, ed-isipen te Megbevayè tew he menge etew zin, ne egkehimu en sikandan he zuma te menge etew te Juda. Is menge meǥinged diyà te Ekron, egkehimu he zuma te menge etew te Nengazen iring te menge Jebusihanen dengan.
ZEC 9:8 Ebpengelangan te Nengazen is baley zin su wey kenà mezezeeti te menge edsurung. Wazè en edaagdaag te menge etew zin, su ebentayan din sikandan.
ZEC 9:9 Migkaǥi is Nengazen te, “Ugyab kew tenged te kegkelipey is menge meǥinged diyà te Zion, he iyan is inged he Jerusalem, su ebpekeuma is hadì niw. Metazeng sikandin wey mezeeǥen. Kenà sikandin mepelevawen ne ebpekeuma he ed-untud te nati he asnu.
ZEC 9:10 Id-awè ku is kebpetebtebekà. Id-awè ku is para te tebek he menge kerwahi wey menge kudà te Israel wey Juda. Is menge panà he para te tebek ne ebedtien ku. Is ebpekeuma he hadì, egkaǥi ziyà te menge nasyun he engkezi zan en is kedtebek. Edhadì sikandin puun te sevaha he zaǥat taman te sevaha pa he zaǥat, wey puun te Wahig he Eufrates taman te kineziyuan he vahin te kelibutan.”
ZEC 9:11 Migkaǥi pa is Nengazen te, “Mehitenged keniyu te menge Israilihanen, ibpelingkawas ku is menge nevihag keniyu. Iring sikandan te etew he in-ulug diyà te kalut he wazà duen wahig. Ibpeǥawas ku sikandan tenged te kebpekid-uyun ku keniyu he midlig-enan pinaaǥi te lengesa.
ZEC 9:12 Sikiyu is menge nevihag he ebperateng he mekelingkawas, likù kew en diyà te melig-en he menge lugar. Ǥuntaan egkaǥi a ziyà te keniyu he idlikù diyà te keniyu he edtekepen is naawà diyà te keniyu.
ZEC 9:13 Egemiten ku is Juda wey Israel he iring te panà. Edhimuwen ku is menge etew ziyà te Zion he iring te ispada he idsiwer ku, ne edezeetan dan is menge etew ziyà te Grecia.”
ZEC 9:14 Ne ebpaahà is Nengazen diyà te zivavew zan. Ne egkivelat is besut te panè din iring te kilat. Ne ibpezaǥing te Nengazen he MEGBEVAYÀ is trumpita; ne ebpekeuma sikandin duma te vagyu he ebpuun diyà te zivavà.
ZEC 9:15 Ebpengelangan te Nengazen he Mekeǥeǥehem is menge etew zin. Bà dan dà edtekutaki is menge vatu he idlempawes kandan te menge kuntada zan. Egkaan dan wey ed-inum dan te kedsilibra te kezeeǥan dan. Ed-ugyab sikandan he henduen be te egkengelangut. Egkepenù is getek dan te inumen iring te yehung he egkepenù te lengesa he ibpirik diyà te purù te menge suyuk te pemuhata.
ZEC 9:16 Dutun he andew edlibriyen sikandan te Nengazen he Megbevayè dan he iring te menge kerehidu zin. Mekempet wey mezagwey sikandan he edtengtengan diyà te tanè dan. Iring sikandan te mahalen he menge vatu he ed-ilak-ilak diyà te kuruna. Is dekelà he sebpet dan ebpekeveǥey te zesen diyà te menge vetan-en dan.
ZEC 10:1 Buyù ka te uzan diyà te Nengazen dutun te timpu te kedtuvù te menge pinemula su iyan sikandin mibaal te kivel. Su iyan sikandin mibeǥey te uzan diyà te menge etew wey menge pinemula ziyà te menge vevesukà.
ZEC 10:2 Benar iyan, kenà ereg he edtuuwan is duma he menge ed-ezapen wey is menge menenagnà. Edseysey zan te sayep he kehuluǥan te menge teǥeinep. Wazà pulus te menge lalag dan he idasig. Umbe neiring is menge etew te Israel te menge kerehidu he nengetazintazin. Nerasey zan su wazè dan pengulu.
ZEC 10:3 Migkaǥi is Nengazen te, “Utew ku nepeuki is menge etew he nengulu te menge etew ku; edsilutan ku iyan sikandan. Ne edtentenuzan ku is menge kerehidu ku, he iyan is menge etew ziyà te Juda. Edhimuwen ku sikandan he iring te menge kudà he para te tebek he layun dà ebpekezaag.
ZEC 10:4 Ebpuun diyà te kandan is menge pengulu he iring te vatu he zutun ebpuuni is kedsukud, palpal te tulda, wey panà he para te tebek.
ZEC 10:5 Edsevaha is menge etew te Juda ne egkeiring sikandan te mezesen he menge sundaru he edaag te menge kuntada zan he henduen dà te vasak diyà te menge zalan he edtekutakan dan. Ebpekidtebek dan su ǥeina te siak is Nengazen, dume e zan. Ne edaaǥen dan is menge pereuntud te kudà.
ZEC 10:6 “Edlig-enan ku is menge etew te Juda ne edlibriyen ku is menge etew te Israel. Ibpelikù ku sikandan diyà te kandan he lugar su nehizuwan ku sikandan. Wey tenged te iyan a Nengazen he Megbevayè dan, edtevaken ku is menge ked-ampù dan. Umbe iring ded te wazè ku sikandan iselikwey.
ZEC 10:7 Is menge etew te Israel, egkeiring sikandan te mezesen he menge sundaru. Ebmelipayen sikandan he iring te etew he nekeinum te vinu. Egketenuzan te menge kevuwazan dan heini he kezeeǥan ne egkelipey zan tenged te mibeelan ku.
ZEC 10:8 Ed-umawen ku is menge etew ku ne edtiǥumen ku sikandan. Edlibriyen ku iyan sikandan, ne ebmahabet dan iring te zengan.
ZEC 10:9 Minsan impeyapat ku sikandan diyà te zuma he menge nasyun, egketenuzan e zan ded dutun. Ebpedayun is kegkeuyag-uyag dan ragkes is menge anak dan, ne ed-ulì sikandan diyà te kandan he lugar.
ZEC 10:10 Ibpeulì ku sikandan puun te Ehipto wey Asiria. Ne ibpeubpè ku sikandan diyà te ubpeey zan taman te Gilead wey Lebanon. Edsubra is kezakel zan taman te kenè dan en ed-ereg diyà te tanè dan.
ZEC 10:11 Edleyunen dan is ebpemaǥel he zaǥat piru ed-engked is menge vaǥel. Minsan is Wahig he Nilo ne egkemezahan. Is gelbuwen he Asiria ne ibpekevavà. Ne is gehem te Ehipto egkahanew.
ZEC 10:12 Edlig-enan ku is menge etew ku su ziyè dan man te kediey, ne edsunud dan kediey. Iyan heini migkaǥi ku te Nengazen.”
ZEC 11:1 Sikiyu is menge meǥinged diyà te Lebanon, puwasi niw is menge pultahan te menge inged niw su wey mekeseled is hapuy he ebpekevinsul te menge kayu niw he sidru. Egkengezeetan daan is menge kayu he sipris wey is menge kayu he ulayan diyà te Bashan.
ZEC 11:3 Ebpemenineǥew is menge perevantey te menge kerehidu su egkengezeetan is melambeg he menge penebtavà dan. Edhiniǥer is menge erimaung su egkengezeetan is menge ketelunan diyà te Jordan he ubpeey zan.
ZEC 11:4 Iyan heini migkaǥi te Nengazen he Megbevayè ku: “Etura nu is para te edlepaan he menge kerehidu.
ZEC 11:5 Is menge nemasa wey midlapà kayi ne wazà siluti. Is menge mibelegyà dutun, egkaǥi te, ‘Ereg he edeliǥen is Nengazen! Su sepian ad!’ Minsan is menge perevantey wazè dan ikehizu haazà is menge kerehidu.
ZEC 11:6 “Etura is menge etew ku su iyan a is Nengazen egkaǥi te kenè ku en egkehizuwan is menge etew kayi te kelibutan. Kedì he ketau is kegkesekupa te kada etew te iring din he etew wey te hadì din. Ne heini is dizalem te ǥehem dan is duma, kezeetan is ed-uwiten dan kayi te kelibutan, ne kenè ku edlibriyen is menge etew puun te ǥehem dan.”
ZEC 11:7 Umbe, mid-atur ku is menge kerehidu he para te edlepaan te ebpemelegyà te kerehidu. Migkuwa a te zezuwa he tuked; is sevaha, migngezanan ku te Keupiya ne is sevaha pa migngezanan ku te Kedsevaha.
ZEC 11:8 Naawà is pelavey ku zuen te tetelu he menge perevantey te menge kerehidu he nepeukan e zan. Umbe impaawè ku sikandan is langun seled dà te senge vulan.
ZEC 11:9 Ne migkeǥiyan ku is menge kerehidu te, “Kenà ad ed-atur keniyu. Belaǥad en ke ebpatey is hapit en ebpatey wey ke mezeeti is hapit en egkezeeti. Ne is egkengesamà, belaǥad en ke mebpekèkeenà is kada sevaha.”
ZEC 11:10 Ne migkuwa ku sikan is tuked he migngezanan te Keupiya ne mibadtì ku heini he tuus te kenè en edleusen te Nengazen is kebpekid-uyun din te langun he menge etew.
ZEC 11:11 Umbe, zutun he andew wazè en bali zutun he kebpekid-uyun. Is menge ebelegyà te menge kerehidu he midtengteng kedì, netuenan dan he zuen ibpesavut te Nengazen pinaaǥi kayi te mibeelan ku.
ZEC 11:12 Ne migkeǥiyan ku sikandan te, “Emun egkeisip niw he ereg a he edsuhulan, ne iveǥey niw kedì is suhul ku. Iyan, emun kenà a ereg, ne keniyu en heeyan.” Umbe, mibeyazan e zan te 30 he vuuk he pelata he suhul zan kedì.
ZEC 11:13 Migkaǥi is Nengazen kayi te kedì te, “Itaǥù nu heeyan is selapì duen te teleǥuey te selapì diyà te valey ku.” Umbe migkuwa ku haazà is 30 he vuuk he pelata, he mid-isip dan he ereg en he suhul kedì, ne intaǥù ku zuen te teleǥuey te selapì diyà te valey te Nengazen.
ZEC 11:14 Ne mibadtì ku sikan is ikezuwa he tuked he migngezanan te Kedsevaha he tuus te netamped en is meupiya he kedepità te Juda wey Israel.
ZEC 11:15 Mid-uman megkaǥi is Nengazen kayi te kedì te, “Peuvag-uvag ka he sevaha ka he wazè din pulus he perevantey te kerehidu.
ZEC 11:16 Su edsavuk a te pengulu ziyà te tanà te Israel he iring te perevantey te menge kerehidu he wazè din pulus: kenè din ebpen-ahaan is netazin etawa kenè din edtembaran is menge nepelian, wey kenè din ibpepenabtab is memeǥasà. Piru egkaan sikandin te usa te melambù he kerehidu ne minsan is sapù te sulu ne edwekaan din su edreǥinuten din en.
ZEC 11:17 Mekehizuhizu heeyan is wazè din pulus he perevantey te kerehidu he mid-ewaan din is menge kerehidu! Edtibasen te ispada is belad din wey edtiyuken is kewanan he mata zin, ne wazè en pulus te velad din ne kenè en ebpekaahà is kewanan he mata zin.”
ZEC 12:1 Iyan heini menge lalag te Nengazen mehitenged te Israel: “Iyan a Nengazen he mibaal te langit wey kelibutan, wey mibeǥey te untung diyà te etew.
ZEC 12:2 Edhimuwen ku is Jerusalem he iring te inumen he ebpekelangut te menge nasyun diyà te peliǥuy zin. Ne emun edsurungen dan en is Jerusalem, ne egkeragkes daan is duma he menge inged diyà te Juda.
ZEC 12:3 Dutun he andew edhimuwen ku is Jerusalem he iring te meveǥat he vatu. Ne is minsan hengkey he nasyun he ebitbit kayi ne egkesazir. Is langun he menge nasyun kayi te kelibutan edsevaha te kedsurung diyà te Jerusalem.
ZEC 12:4 Piru ebpelihendeken ku is langun he menge kudè dan wey edterenteduwen ku is menge pereuntud dan te kudà. Iyan a, is Nengazen, migkaǥi te ebentayan ku is menge etew te Juda, piru edlekapen ku is langun he menge kudà te menge nasyun.
ZEC 12:5 Ne egkaǥi is menge pengulu te Juda ziyà te gehinawa zan te, ‘Mezesen is menge etew te Jerusalem, su ǥeina te iyan Megbevayè dan is Nengazen he Mekeǥeǥehem.’
ZEC 12:6 “Dutun daan he andew edhimuwen ku is menge pengulu te Juda he iring te egkeregreg he vaǥa ziyà te rapug etawa vinagkes he seresag he mesiǥa. Edezeetan dan is menge nasyun diyà te peliǥuy zan. Ne kenè mulà egkemenu is menge etew ziyà te Jerusalem dutun te kandan he lugar.
ZEC 12:7 Ketau ku he ebpekehuna ebpekezaag is duma he menge inged diyà te Juda, su para kenà medlavew is dengeg te kevuwazan ni David wey menge meǥinged te Jerusalem te zengeg te zuma he menge inged diyà te Juda.
ZEC 12:8 Dutun he andew edlevanan te Nengazen is ebpemen-ubpà diyà te Jerusalem su para minsan is utew meluya kandan ne egkeiring ki David kezesen. Is menge kevuwazan ni David egkeiring te Megbevayà, iring te velinsuǥuen te Nengazen he ebpengulu kandan.
ZEC 12:9 Dutun he andew edezeetan ku is langun he menge nasyun he edsurung te Jerusalem.
ZEC 12:10 “Ebeǥayan ku is menge kevuwazan ni David wey is menge meǥinged diyà te Jerusalem te ǥehinawa he hihizuwen wey meinempuen. Edtengtengan e zan is midhimetayan dan, ne edsineǥew sikandan iring te ginikanan he midsineǥew tenged te kebpatey te vudtung he anak din etawa kinekekayan he anak din.
ZEC 12:11 Dutun he andew utew subra is kedruǥur ziyà te Jerusalem, iring is sineǥawan dan te kedsineǥawi ki Hadad Rimon diyà te suǥud te Megido.
ZEC 12:12 Edruǥur is kada pemilya ziyà te nasyun he Israel: is kevuwazan ni David, ni Natan, ni Levi, ni Semei, wey is duma pa he menge pemilya. Edsineǥew sikandan he ebpesivayà is menge maama wey menge vahi.”
ZEC 13:1 Migkaǥi pa is Nengazen he Mekeǥeǥehem te, “Dutun he andew ibpetudà is serebseb para te kevuwazan ni David wey te menge meǥinged diyà te Jerusalem, su edlumpiyuwan sikandan tenged te menge salè dan wey kegkeremeriki kandan. Id-awè ku is menge ed-ezapen diyà te tanà he Israel ne kenè en heini egketenuzan. Ibpaawè ku puun te Israel is menge etew he uvag kun ebpeneuven, wey is mezaat he menge mulin-ulin he edumala kandan.
ZEC 13:3 Ne emun duen pa uvag ebpeneuven, iyan mismu is amey zin wey iney zin egkaǥi ziyà te kandin he kinahanglan sikandin he edhimetayan, su tarù is migkaǥi zin ne egkeǥiyen din pa he ebpuun haazà diyà te Nengazen. Ne emun edsigudu pa sikandin ne iyan en mismu is amey zin wey iney zin ed-uney edhimatey kandin.
ZEC 13:4 Dutun he timpu igkeeled en te menge ebpeneuven is migkaǥi zan he nelewasan dan. Kenè en sikandan ebivisti te bulvulen he visti te ebpeneuven he iyan egemiten dan te kedlimbung.
ZEC 13:5 Egkaǥi en hinuun sikandan te, ‘Kenà a ebpeneuven. Perevasuk a, ne iyan heini terebahu ku puun pa te menguhed e pa.’
ZEC 13:6 Emun duen ed-insà kandan bahin te menge palì diyà te lawa zan, ne iyan heini tavak dan: ‘Nepelian a ziyà te valey te menge emiǥu ku.’ ”
ZEC 13:7 Migkaǥi is Nengazen he Mekeǥeǥehem te, “Endama is ispada! Himetayi is perevantey ku te menge kerehidu he suluǥuen ku. Himetayi sikandin su wey mekedsusuwey is menge kerehidu, is egkaayuayu he menge etew ku. Ne edsilutan ku sikandan.
ZEC 13:8 Ebehinen te tetelu he vahin is menge etew kayi te tivuuk he tanè he Israel. Ebpatey is dezuwa he vahin.
ZEC 13:9 Is egkesamà he iketelu he vahin, ne edlumpiyuwan ku he iring te pelata he edhimuwen he lunsey pinaaǥi te hapuy. Ne egezaman ku sikandan iring te kegezam te kegkelunsey te vulawan he pinaaǥi te hapuy. Ed-ampù dan kayi te kedì ne ebpemineǥen ku sikandan. Egkaǥi a te, ‘Menge etew ku sikandan,’ ne egkaǥi zaan sikandan te, ‘Is Nengazen iyan Megbevayè dey.’ ”
ZEC 14:1 Egkeuma is andew he edhukum is Nengazen. Ebevehinen te menge kuntada niw is menge azen niw te menge tig-Jerusalem he mid-aǥew zan, ne ebpeketetengteng kew.
ZEC 14:2 Su edtiǥumen te Nengazen is menge etew ziyà te langun he menge nasyun su wey zan mekepekidtebek diyà te Jerusalem. Ed-eǥawen dan heini he inged, egkuwaan dan is menge azen diyà te menge valey, ne edleyuǥen dan is menge vahi. Ed-uwiten dan diyà te zuma he lugar is ketengà te menge meǥinged keniyan he inged. Piru is duma, egkesamà keniyan te inged.
ZEC 14:3 Ne edtebeken te Nengazen haazà is menge etew ziyà te menge nasyun, iring te kebpekidtebek din dengan.
ZEC 14:4 Dutun he andew, edhitindeg sikandin diyà te Buvungan te menge Olibo, he ziyà te zapit te edsilaan te Jerusalem. Egketevì heini he vuvungan ne egkeliwazà puun te edsilaan pehendiyà te edsenlepan. Is liwazà dutun te vuvungan ne ebpekeendud pehendiyà te zizaya ne is sevaha pa he liwazà, ne ebpekeendud pehendiyà te divavà. Umbe egkehimu he meluag he suǥud is diyà te teliwazà kayi.
ZEC 14:5 Ne ebpemelaǥuy kew he ebayà kayi he suǥud, su taman man te Azel is egkeuma kayi. Ebpemelaǥuy kew iring te mibeelan te menge kepuun niw hein midlinug dutun te timpu ni Hadì Uzia he hadì te Juda. Ne ebpekeuma is Nengazen he Megbevayè ku duma te langun he menge velinsuǥuen din.
ZEC 14:6 Dutun he andew wazà meinit wey meǥenew.
ZEC 14:7 Nekeviza haazà he timpu su wazè mezukilem, kekenà, pudu zà maandew. Iyan dà is Nengazen netau ke keenu heini egkehitavù.
ZEC 14:8 Dutun he andew edtudà is utew meupiya he wahig puun te Jerusalem. Is ketengà kayi edtudà pehendiyà te Daǥat he Minatey ne is ketengà ne ebpehendiyà te Daǥat he Mediteraneo. Ebpedayun is kedtudà kayi ke ǥulavung wey tipenguzan.
ZEC 14:9 Iyan is Nengazen egkehimu he hadì te tivuuk he kelibutan. Iyan dà sikandin egkilelaan he Megbevayà ne wazè en duma.
ZEC 14:10 Egkehimu he suǥud is tivuuk he tanà puun te Geba ziyà te zizaya pehendiyà te Rimon diyà te zivavà te Jerusalem. Piru ebmetikang is Jerusalem diyà te nepelestaran din, ne ed-ubpaan heini puun te pultahan ni Benjamin pehendiyà te nepelestaran te Kezaan he Pultahan, ne pehendiyè en te Pultahan diyà te Suyuk; wey puun te Turi ni Hananel pehendiyà te keresà te paras te hadì. Kenè en ed-umanen edezeeti is Jerusalem, ne is menge meǥinged kayi ebpengungubpaan en he wazà ebpekezezaat kandan.
ZEC 14:12 Iyan heini kezeetan he ibpaaǥi te Nengazen diyà te langun he menge nasyun he nekidtebek diyà te Jerusalem: Megkeredak is menge lawa, mata, wey zilè dan minsan uuyag pa sikandan.
ZEC 14:13 Iring daan kayi he kezeetan is ed-aǥi ziyà te menge uyaǥen dan diyà te menge kampu zan ragkes en is menge kudà, menge mulà, menge kemilyu, wey menge asnu. Dutun he andew edterenteduwen te Nengazen heeyan he menge etew, ne is kada sevaha kandan ebpekidtebek te iring din he etew. Minsan is menge etew ziyà te zuma he menge inged diyà te Juda ne ebpekidtebek para te Jerusalem. Edtiǥumen dan is menge ketiǥeyunan te langun he menge nasyun diyà te peliǥuy zan: is utew mahabet he menge vulawan, menge pelata, wey menge visti.
ZEC 14:16 Is langun he egkesamà diyà te menge nasyun he nenurung te Jerusalem edtekezeg diyà te Jerusalem kada tuig su ed-ezapen dan is Nengazen he Mekeǥeǥehem he iyan hadì, wey edsilibra sikandan te Pista te Kebaal te menge Lawig.
ZEC 14:17 Is menge etew he kenà edhendiyà te Jerusalem te ked-azap te Nengazen he Mekeǥeǥehem he iyan hadì, kenà ebeǥayan te uzan.
ZEC 14:18 Is menge etew ziyà te Ehipto he kenà edhendiyà te Jerusalem, ebpeeǥiyan daan te Nengazen te kezeetan iring te ibpaaǥi zin diyà te menge nasyun he kenà edhendiyà te kedsilibra te Pista te Kebaal te menge Lawig.
ZEC 14:19 Iyan heeyan idsilut diyà te Ehipto wey ziyà te langun he menge nasyun emun kenè dan edhendiyà te Jerusalem te kedsilibra te Pista te Kebaal te menge Lawig.
ZEC 14:20 Dutun he andew te ked-ezapa te Nengazen te menge etew he ebpemuun diyà te menge nasyun, id-ukir ziyà te menge seriyew te menge kudà is menge lalag he edhenduen te, “Inteǥeley para te Nengazen.” Is menge kuzen diyà te valey te Nengazen egkehimu he iring is kegkesegradu zan te kegkesegradu zuen te yehung he ziyà te pemuhatà.
ZEC 14:21 Is kada kuzen diyà te Jerusalem wey te tivuuk he Juda egemiten te menge ebpemuhat he para edlutuan te menge pemuhat he para te Nengazen he Mekeǥeǥehem. Dutun he timpu wazè en menge nigusyanti ziyà te valey te Nengazen he Mekeǥeǥehem.
MAL 1:1 Iyan heini lalag te Nengazen para te menge tig-Israel pinaaǥi ki Malakias.
MAL 1:2 Migkaǥi is Nengazen te, “Mahal ku sikiyu. Piru mid-insè kew pa te, ‘Mibmenumenu key kenikew te ebmahal?’ Tentenuzi niw he minsan te telesuled en si Esau wey si Jacob, mahal ku si Jacob
MAL 1:3 piru si Esau mulà wazà. Midezeetan ku is menge vuvungan din, umbe nehimu en heini he ubpeey te menge leew he asu.
MAL 1:4 “Emun egkaǥi is menge Edomanhen he menge kevuwazan ni Esau te, ‘Minsan nezeetan en is ubpaan dey, ne ed-umanan dey heini ebenguna,’ iyan a, kes Nengazen he Mekeǥeǥehem, egkaǥi te, ‘Minsan ed-umanan dan ebenguna haazà is inged dan ne edrundusen ku zed gihapun. Egngezanan sikandan he “mezaat he nasyun” wey “menge etew he layun dà igkeepes te Nengazen.”
MAL 1:5 Egkeehè niw is kegkezeeti zan ne ebpekekaǥi kew te, “Mekeǥeǥehem iyan is Nengazen minsan diyà te ǥawas te Israel.” ’ ”
MAL 1:6 Migkaǥi is Nengazen he Mekeǥeǥehem diyà te menge memumuhat, “Is anak, edtahud te amey zin, ne is suluǥuen, edtahud te egalen din. Piru maan is wazà a keniyu tehuza is amey niw wey egalen niw? Mibpesipelahan e pa keniyu. Piru mid-insè kew pa, ‘Mibmenumenu zey sikew te ebpesipala?’
MAL 1:7 Mibpesipelahan a keniyu pinaaǥi te kebpemuhat niw te meremerik he menge ibpemuhat diyà te pemuhatè ku. Piru ed-insè kew pa te, ‘Mibmenumenu zey te edremerik is menge pemuhat dey?’ Midremerikan niw is impemuhat niw pinaaǥi te egkeǥiyen niw he wazà pulus dutun te pemuhatè ku.
MAL 1:8 Umbe, iyan impemuhat niw is menge uyaǥen he lakap, piang, etawa deruwanen. Kenà heeyan hustu! Gezami niw kun be beǥayi is gubirnedur niw te iring keniyan he kelasi te menge uyaǥen. Siguradu he kenà sikandin egkelipey keniyu wey kenè kew zin ebpaahaan te keupiya zin.” Iyan heini migkaǥi te Nengazen he Mekeǥeǥehem.
MAL 1:9 Migkaǥi si Malakias, “Guntaan, sikiyu is menge memumuhat, hengyua niw is Megbevayà he mehizuwi kiw zin. Piru heeyan he kelasi te menge pemuhat ne ibpemuhat niw kandin, siguradu he kenè kew zin ebpaahaan te keupiya zin. Iyan heini migkaǥi te Nengazen he Mekeǥeǥehem.”
MAL 1:10 Migkaǥi is Nengazen he Mekeǥeǥehem, “Deyzey pezem ke zuen sevaha keniyu te menge memumuhat he edlekeb te menge pultahan te valey ku, su wey kew kenè ne meketetavun diyà te pemuhatà he para kediey te hapuy he wazè din pulus. Kenè ku edewaten is menge ibpemuhat niw, su wazè ku sikiyu ikelipey.
MAL 1:11 Ebentuǥen a ziyà te menge nasyun puun te kedsilà te andew pehendiyà te kedsanlep kayi. Ebpemuhaten a te veyewà wey lunsey he menge pemuhat diyà te langun he lugar, su ebentuǥen a ziyà te menge nasyun. Iyan a, is Nengazen he Mekeǥeǥehem, is migkaǥi kayi.
MAL 1:12 Piru midsumpalit a mulà keniyu pinaaǥi te kegkaǥi he meremerik is pemuhatà he para kediey, ne wazà pulus te menge ibpemuhat kayi.
MAL 1:13 Ke sikiyu te neperahan kew he ebaal te ebpeveelan ku keniyu; iyan heini migkaǥi te Nengazen he Mekeǥeǥehem. Ne mid-uwit kew te nesazir, piang, etawa zuen din daru he menge uyaǥen he ibpemuhat niw kayi te kedì, ne kenè ku heeyan edewaten puun diyà te keniyu. Iyan heini migkaǥi te Nengazen.
MAL 1:14 Edrewakan ku is limbungan he iyan ibpemuhat din kayi te kedì is selewayen he uyaǥen minsan pa te zuen meupiya he uyaǥen din, he insaad din he ibpemuhat din kayi te kedì. Su utew a lavew he hadì, igkahandek a ziyà te menge nasyun, migkaǥi is Nengazen he Mekeǥeǥehem.”
MAL 2:1 Migkaǥi is Nengazen he Mekeǥeǥehem diyà te menge memumuhat, “Emun kenà a keniyu ebpemineǥen, wey kena a keniyu edtehuzen te ebpuun diyà te ǥehinawa niw, edrewakan ku sikiyu wey edrewakan ku is igkeuyag-uyag niw. Midrewakan ku en heini su wazà a keniyu veǥayi te zengeg.
MAL 2:3 “Tenged keniyu ebmensuwen ku is menge kevuwazan niw. Idapug ku keniyu is binusbus te menge ibpemuhat niw, ne idtimbag ku sikiyu zuma kayi.
MAL 2:4 Ne egketuenan niw he impaaǥi ku ziyà te keniyu heini he kebmansu su para mekepedayun is kebpekid-uyun ku ki Levi.
MAL 2:5 Iyan kebpekid-uyun ku ki Levi wey is menge kevuwazan din is: midsaazan ku sikandan te meupiya wey meluǥayad he untung, wey kelinew emun edtehuzen e zan. Ne midtahud e zan iyan.
MAL 2:6 Tutuu is menge penurù dan wey wazà sikandan medtarùtarù. Ne miduma sikandan kediey ziyà te kelinew wey ketazeng, ne mahabet is ingkepeengked dan te kebaal te salà.
MAL 2:7 “Kinahanglan he is memumuhat he ebpenurù te hustu he ketau, ne iyan sikandin egkeinsaan te menge etew ke hengkey is hustu he ed-ul-ulahan.
MAL 2:8 Piru sikiyu is menge memumuhat midsuwayan niw is hustu he zalan ne pinaaǥi te penurù niw mahabet is neseligkat; midsupak niw is kebpekid-uyun ku te kepuun niw he si Levi.
MAL 2:9 Umbe, mibpengelinteuwan ku he sudia kew wey mepeel-elezi ziyà te etuvangan te langun he menge etew, su wazè niw sunuza is menge paaǥi ku, kekenà, ebpekelepew ziyà te kebpenurua niw te kesuǥuan he zuen niw ibpelavi.”
MAL 2:10 Ne mid-uman megkaǥi si Malakias te, “Kenè be sevaha zà is Megbevayà ne iyan sikandin midlimbag kenitew? Ne maan is mibpendezeisey tew is kebpekid-uyun te Megbevayà diyà te menge kepuun tew pinaaǥi te kenà kebmetinumanen te kada sevaha kenitew?
MAL 2:11 “Kenà metinumanen is menge tig-Juda. Utew mezaat he vaal is mibeelan dan diyà te Israel wey Jerusalem. Mibpendezeisey te menge tig-Juda is baley te Nengazen he mahal zin wey mibpengesawa is menge maama kandan te menge vahi he ed-azap te zuma he ed-ezapen.
MAL 2:12 Is minsan hentei he etew he ebaal kayi, ne verakat he kenè ne sikandin iragkes te Nengazen diyà te menge kevuwazan ni Jacob, minsan med-uwit pa sikandin te menge pemuhat diyà te Nengazen he Mekeǥeǥehem.
MAL 2:13 “Duen pa mibeelan niw: Impetiǥis niw is menge luhè niw ziyà te pemuhatà he para te Nengazen. Midsineǥew kew wey midlelendag su wazè din seǥipaa wey zewata is menge pemuhat niw.
MAL 2:14 Ed-insè kew ke maan is wazè din seǥipaa is menge ibpemuhat niw. Tenged te iyan is Nengazen nenistiǥus he wazè niw tumana is penaad niw ziyà te esawa niw he impenangdù niw zutun te kebpengesawa niw hein menguhed kew pa. Midrapas niw is penangdù niw te esawa niw he mebmetinumanen kew kandan.
MAL 2:15 Kenè be sikiyu is teleesawa, midsevaha te Nengazen is lawa niw wey gehinawa niw? Geina te egkesuat sikandin he mekaanak kew te egkehimu he ǥaked din. Umbe mebpekevantey kew he kenè niw mesupak is penangdù niw zutun te ked-esewaa niw te esawa niw hein menguhed kew pa.
MAL 2:16 Su migkaǥi is Nengazen he Megbevayà te Israel, ‘Kenè ku igkesuat is kebpesuwayà te teleesawa. Emun edsuwayan te maama is esawa zin, egkeepesan din.’ “Umbe mebpekevantey kew he kenè niw mesupak is penangdù niw te esawa niw.”
MAL 2:17 Migkaǥi pa si Malakias te, “Neperahan en is Nengazen he ebpemineg te menge lalag niw. Ne ed-insè kew te, ‘Hengkey is mibeelan dey he iyan ingkeperahi te Nengazen te menge lalag dey?’ Migkaǥi kew te is langun he mibaal te mezaat ne meupiya is ked-ahaa kandan te Nengazen, ne nekepenunuat sikandan kandin. Migkaǥi kew pa te, ‘Hendei en buwa is Megbevayà he metazeng is kukuman din?’ ”
MAL 3:1 Pemineg kew te migkaǥi te Nengazen he Mekeǥeǥehem, “Edsuǥuen ku is menunudtulè ku te ked-andam te ibayè ku. Ne is Nengazen he ebperetengen niw segugunè dà he ebpekeuma zutun te valey zin. Ebpekeuma is ebpengenduyen niw he menunudtulà te kebpekid-uyun ku.”
MAL 3:2 Piru hentei vuwa is ebpekaantus dutun te andew te kebpekeuma zin? Hentei vuwa is ebpekehimu he ed-etuvang kandin emun ebpekelepew en? Su iring sikandin te hapuy he idlunsey te vulawan wey sabun he utew ebpekeimu te vuring.
MAL 3:3 Edhukum sikandin he iring te hapuy he edlunsey te pelata; edlunsayen din is menge Levihanen wey edlunsayen te pelata wey vulawan. Ne zutun ebpemuhaten dan en human is Nengazen te hustu he menge pemuhat.
MAL 3:4 Ne zutun, is menge pemuhat te menge etew ziyà te Juda wey Jerusalem, ne ebpekepenunuat en human te Nengazen, iring duen te nehuna he menge andew wey menge tuig.
MAL 3:5 Migkaǥi is Nengazen he Mekeǥeǥehem te, “Edhendiyà a te keniyu su edhukum a. Segugunè ku ibpetueni is menge salà te menge veyilan, menge mengungumpadi, menge ebpenistiǥus te tarù, menge egalen he ebpenlimbung, menge ebpemintahà te menge valu he vahi wey menge ilu, wey menge lumelengyawà, wey is menge wazè dan kedtahud kedì.”
MAL 3:6 Migkaǥi pa is Nengazen he Mekeǥeǥehem, “Siak, is Nengazen, kenà a egkahalin. Umbe wazè kew mepuew is menge kevuwazan ni Jacob.
MAL 3:7 Sikiyu is menge Israilihanen, ne puun pa te menge kepuun niw, midsuwayan niw en is menge suǥù ku ne wazè niw tumana. Guntaan, likù kew kayi te kediey, te Nengazen he Mekeǥeǥehem, ne edlikù a ziyà te keniyu. Piru ed-insè kew te, ‘Wazè dey man sikew ewai; ebmenumenu key te kedlikù diyan?’
MAL 3:8 Ed-insè kew zaan te, ‘Egkepenekawan be te etew is Megbevayà?’ Piru mibpenekawan a keniyu. Ne ed-insè kew te, ‘Hengkey is paaǥi te kebpenekawi zey kenikew?’ Pinaaǥi te kenè niw kebeǥaya te menge ikepulù niw wey menge halad niw.
MAL 3:9 Nesuǥat kew te rawak, is menge etew kayi te tivuuk he Israel su mibpenekawan a keniyu.
MAL 3:10 Guntaan, egkeǥiyan ku sikiyu he ǥezami a keniyu, is Nengazen he Mekeǥeǥehem. Uwita niw is tivuuk he ikepulù niw ziyà te budiga ziyà te valey ku su para zuen egkekaan dutun te valey ku. Emun ebeelan niw heini, ebpeuwitan ku sikiyu te uzan ne ebeǥayan ku sikiyu te ebpenubra he tuvad.
MAL 3:11 Kenè ku idtuǥut he dezeeti te ebpekezezaat te pinemula is menge pinemula niw, is menge paras niw ziyà te menge pemuleey niw ne kenà egkengerapi is beǥas dan, migkaǥi is Nengazen he Mekeǥeǥehem.
MAL 3:12 Ne is menge etew ziyà te langun he menge nasyun egngezanan kew zan te utew zeyzey su is tanè niw egkehimu man he dezeyaan is ked-ubpà duen, migkaǥi is Nengazen he Mekeǥeǥehem.”
MAL 3:13 Migkaǥi pa is Nengazen te, “Mezaat is menge lalag niw mehitenged kedì. Piru ed-insè kew te, ‘Hengkey is migkaǥi zey he mezaat mehitenged kenikew?’
MAL 3:14 Migkaǥi kew te, ‘Wazà pulus te kebpenilbi te Megbevayà. Hengkey is egkekuwa tew zutun te kedtuman tew te menge ibpeveelan din wey kebpaahà diyà te Nengazen he Mekeǥeǥehem he ingkeseeng tew is menge salè tew?’
MAL 3:15 Ke sikiyu zaan te, ‘Sumalà te neehè tew, iyan is menge mepelevawen nengezeyzey. Utew mid-uswag is mezaat is menge vaal zan, ne minsan sikan is midhinggat dan is Megbevayà he mepauk kandan pinaaǥi te mezaat he menge vaal zan ne wazà memenu.’ ”
MAL 3:16 Duen menge etew zutun he zuen dan kegkehandek te Nengazen. Hein nezineg dan heini is menge lalag, mibpelelelaǥè dan ne nemineg kandan is Nengazen, ne nezineg din sikandan. Ne ziyà te etuvangan din duen belesahan he midsuratan te mehitenged duen te zuen dan kegkehandek wey kedtahud te Nengazen.
MAL 3:17 Migkaǥi is Nengazen he Mekeǥeǥehem te, “Egkehimu sikandan he menge etew ku. Dutun te andew te kedhukum ku ne egkaangken ku en sikandan. Egkehizuwan ku sikandan, iring a te amey he egkehizu te anak din he nenilbi kandin.
MAL 3:18 Ne egkeuman niw en maan egkaahà is mibizahayan te metazeng wey lalung, is mibizahayan te ebpenilbi te Megbevayà wey kenà ebpenilbi kandin.”
MAL 4:1 Migkaǥi is Nengazen he Mekeǥeǥehem, “Siguradu iyan he egkehitavù is kegkeuma te andew te Nengazen he Mekeǥeǥehem. Ne iring is kegkehitevùa kayi te rapug he egkiràkirà. Is langun he mepelevawen wey menge lalung, ne egkeiring sikandan te ebinsulan he kayu he wazà egkesamà he subpang wey zalid.
MAL 4:2 Piru sikiyu mulà is edtahud kediey, is ketazeng iring te andew he edsilà diyà te keniyu he ebpekevawì te menge zaru niw. Ne egkeiring kew te nati he menge vaka he ebpemenlinglingketew is egawas diyà te tudil.
MAL 4:3 Edtekutakan niw is lalung he menge etew ne egkeiring dà sikandan te igmuk he ebpenggiekan niw zutun te andew te kedhimuwa ku he mehitavù heini, migkaǥi is Nengazen he Mekeǥeǥehem.
MAL 4:4 “Tentenuzi niw is Kesuǥuan te suluǥuen ku he si Moises. Haazà he menge suǥù wey menge sulunuzen, imbeǥey ku kandin diyà te Horeb he para te langun he menge etew te Israel.
MAL 4:5 “Piru te kenè pa egkeuma haazà is dekelà wey mekahandekhandek he andew te Nengazen, ibpehendiyè ku te keniyu is ebpeneuven he si Elias.
MAL 4:6 Edhimuwen din he mahala te menge ǥinikanan is menge anak dan wey mahala te menge anak is menge ǥinikanan dan, su wey ku kenà mezezeeti is menge tanè niw.”
