MAT 1:1 Uito ti IESUI potmu'e Mateu. Mi'i uimiwan me atimo­herep yne Aipo­typot Iesui etiat ui'akasa hap ko'i uimikuap hap ko'i are. Mesuwe sa'awy'i­wuaria ati'atu­set­pehik teran AIPOTYPOT IESUI e'ase'i'in set ko'i katu­pono IESUI ti aha'ase'i pot Aparãu Saipepiat Sese aikotã sa'awy'i TUPANA to'e aha'ase'i koro Aparãu me — Meiũran ti aru Emiariru kawiat Eiã'ỹi topyhu'at Wuat'i Ywania Porekuat Koro e Tupana sa'awy'i. I'ewyte Aipo­rekuat Iesui ti aipo­rekuat pot Tawi Saipepiat Sese topyhu'at aikotã sa'awy'i Tupana to'e — Meiũran ti aru Eiã'ỹi kaipywiat ra'yn topyhu'at Uimi­po'oro Wuat'i Porekuat Eporekuat no e Tupana morekuat Tawi pe Aipo­typot IESUI piat.
MAT 1:2 Pyno ati'atu­set­pehik teran mesuwe Aheha­kyera'at hat IESUI e'ase'i'in set ko'i. Sa'awy'i ti APARÃU imoherep tosai­pepiat ISAKI. Mi'i hawyi ISAKI imoherep tosai­pepiat IAKO. Mi'i hawyi IAKO imoherep tosai­pepiat IUTA iywyt'in nywo.
MAT 1:3 Mi'i hawyi IUTA imoherep tosai­pepiat PERE iywyt Seru wywo tehary'i Tamãu kaipyi. Mi'i hawyi PERE kaipyi tuwe­mo­herep ESEHŨ. Mi'i hawyi ESEHŨ imo­herep ARÃU.
MAT 1:4 Mi'i hawyi ARÃU imo­herep AMINÃTAPI. Mi'i hawyi AMINÃTAPI kaipyi tuwe­mo­herep NASŨ. Mi'i hawyi NASŨ imo­herep SARUMÃU.
MAT 1:5 Mi'i hawyi SARUMÃU kaipyi tuwe­mo­herep PUASI tehary'i Hapi kaipyi. Mi'i hawyi PUASI imoherep OPETI tehary'i Huti kaipyi. Mi'i hawyi OPETI kaipyi tuwe­mo­herep IESE.
MAT 1:6 Mi'i hawyi IESE imo­herep aipo­rekuat sa'awy'i­wuanuat TAWI. Mi'i hawyi morekuat koro TAWI kaipyi tuwe­mo­herep morekuat SARUMÃU tomima'at tomi'auka Uria ehary'i kaipyi.
MAT 1:7 Mi'i hawyi SARUMÃU kaipyi tuwe­mo­herep morekuat HUPUÃU. Mi'i hawyi HUPUÃU imoherep morekuat APIA. Mi'i hawyi APIA kaipyi tewe­mo­herep morekuat ASA.
MAT 1:8 Mi'i hawyi ASA imo­herep morekuat IOSAWA. Mi'i hawyi IOSAWA imo­herep morekuat IURÃU. Mi'i hawyi IURÃU imo­herep morekuat USIA.
MAT 1:9 Mi'i hawyi USIA imo­herep morekuat IUTÃU. Mi'i hawyi IUTÃU imoherep morekuat AKASI. Mi'i hawyi AKASI kaipyi tuwe­mo­herep morekuat ESEKIA.
MAT 1:10 Mi'i hawyi ESEKIA kaipyi tuwe­mo­herep morekuat MANASI. Mi'i hawyi MANASI imo­herep morekuat AMAŨ. Mi'i hawyi AMAŨ kaipyi tuwe­mo­herep morekuat IUSIA.
MAT 1:11 Mi'i hawyi IUSIA kaipyi tuwe­mo­herep morekuat IEKUNIA iywyt'in nywo. Morekuat IEKUNIA toĩne'en turan surara'in yi Papi­runia kaipyi tõ'ẽ tõ'ẽ kahato ai'ywania sa'awy'i­wuaria moma hamo. Mi'i hawyi i'atue­su­rara'in teropo'ok kahato i'atueyi pyi yi Papi­runia kape ta'atue­ropat hamo. Mi'i hawyi watu­kupte'en mot'i yi Papi­runia pe. Mi'i tote watu­we­potpap at ka'ap yi Papi­runia ywania emiit'in no watu­we­potpap yt kat sa'up mo i yi wato Papi­runia pe watu­we­potpap itote ahewa­nĩ­kaptia miky'esat ewy.
MAT 1:12 Mi'i hawyi yi wato Papi­runia pe mekewat aha'ase'i morekuat IEKUNIA kaipyi tuwe­mo­herep SARATIEU. Mi'i hawyi SARATIEU imo­herep SURUPAPEU.
MAT 1:13 Mi'i hawyi SURUPAPEU kaipyi tuwe­mo­herep APIUTI. Mi'i hawyi APIUTI imoherep ERIAKĨ. Mi'i hawyi ERIAKĨ imo­herep ASU.
MAT 1:14 Mi'i hawyi ASU imo­herep SATOKI. Mi'i hawyi SATOKI kaipyi tuwe­mo­herep AKĨ. Mi'i hawyi AKĨ imo­herep ERIUTI.
MAT 1:15 Mi'i hawyi ERIUTI kaipyi tuwe­mo­herep EREASA. Mi'i hawyi EREASA imo­herep MATÃ. Mi'i hawyi MATÃ imo­herep IAKO.
MAT 1:16 Mi'i hawyi IAKO imo­herep IUSE. IUSE ti mana MARIA e'aito wanuat toĩne'en. Mi'i hawyi mana MARIA kaipyi tuwe­mo­herep IESUI mekewat TUPANA MIPO'ORO WUAT'I YWANIA POREKUAT NUAT E HAP HET RAKAT.
MAT 1:17 Sa'awy'iwuat aha'ase'i pot APARÃU e'at kaipyi morekuat TAWI e'at kape 14 ok tuwe­mo­herep miit'in AIKA'IWAT IESUI e'yianmiaria ha'ase'i'in nuat. Mi'i hawyi morekuat TAWI e'at kaipyi yi Papi­runia pe wato­pyhu'at hap e'at kape 14 ok tuwe­mo­herep miit'in AIKA'IWAT IESUI e'yianmiaria ha'ase'i'in nuat.
MAT 1:18 Mi'i hawyi IESUI AIPOTYPOT ywã'ĩ hap etiat ahenoi teran sa'awy'i. Mesuwat miwan nug hat sese ti Mateu. Pyno tawa Nasare pe wẽtup ok IUSE e hap het rakat tikyi'at teran tehary'i wo yt karãpiat i ihainia wywo ieĩne'en hat mana MARIA e hap het rakat. Ma'ato mi'i yt to'opytyk i te turan imẽpyt a rakano topyhu'at mana MARIA ma'ato yt ihainia kaipyi i ma'ato TUPANA PÃ'ÃU kaipyi hupi'a.
MAT 1:19 Mi'i hawyi iky'esat hat IUSE tikuap ta'yn hupi'a MARIA hap hawyi tuwa­nẽtup ko'i ko'i kahato — Uima'at rasig Maria e. Wẽtup ok ihainia hupi'a nug hat pote yt naku i atat Maria uhehary'i wo katu­pono wuat'i wywo waire rakat Maria e tuwa­nẽtup hawe. Pyno waku atipo'oro mana Maria wẽtup hy kape mig'i wo e Iuse tuwa­nẽtup hawe katu­pono waku rakat Iuse pote yt toiky'esat i miit'in tikuap hupi'a hap katu­pono Iuteu ywania ti'auka yt he'aito i pytkai hupi'a rakaria pote. — Pyno waku atipo'oro Maria wẽtup tawa kape mig'i wo e tuwa­nẽtup hawe. Mi'i tã atunug mote aru miit'in yt ti'auka i Maria nu wo e tuwa­nẽtup hawe.
MAT 1:20 Ma'ato aikotã waku Maria po'oro wẽtup hy kapiat hap kape tuwa­nẽtup turan Tupana tipo'oro ra'yn tehay enoi hat Iuse kape atipy kaipyi. Mi'i hawyi to'e imu'etu — Iuse morekuat Tawi emiariru emiariru e yt erewa­nẽtup ko'i ko'i tei'o Maria ehary'i wuat upi'a hap ete e katu­pono hupi'a yt ihainia kaipywiat minug i e. Waku etat ehary'i wo hupi'a ra'yn pytkai Maria katu­pono yt toi'aparap hin i pytkai hupi'a ra'yn toĩne'en mesup e. Ta'i Tupana Pã'ãu Wakuat kaipyi toĩne'en imẽpyt e.
MAT 1:21 Pyno meiũran ti aru mana Maria timo­herep ihainia hit wakuat sese rakat e. Mi'i ti Tupana Mipo'oro tomohey haria minug sa'ag popywiat hep hanuat e. Mi'i pote waku ehet'ok o Maria Mẽpyt IESUI e katu­pono Iuteu pusu puo IESUI ti WO'OEHAKYERA'AT HAT i'atu'e.
MAT 1:22 Pywo pe ti tuwe­mo­herep ti aru Maria Mẽpyt aikotã sa'awy'i­wuaria Tupana ehay moherep haria te'ero'e hap ewy e.
MAT 1:23 Mio tã e ti Tupana sa'awy'i miit'in me. — Meiũran ti aru wẽtup ok hary­poria wakuat rakat pytkai yt karãpe i he'aito pytkai imẽpyt'a rakano ti aru topyhu'at yt uwe piat topytyk pytkai i e. Meiũran ti aru imẽpyt ihainia ti aru tuwe­mo­herep hawyi Tupana AIPY'ASETPIAT rakat eset i'atu'e Tope e yianmiat Tupana ehay enoi hat Isaia tomiwan 7.14 pe e. — Mi'i hap ewywuat toĩne'en mesup ehary'i wuat mana Maria ete e atipy kaipywiat sut hat Iuse pe.
MAT 1:24 Mi'i hawyi Iuse tuwe­hymut ra'yn hawyi tutunug na'yn Tupana potpo'oro piat tonãpin hap ewy. Tatat ra'yn Maria tehary'i wo ma'ato yt topytyk i.
MAT 1:25 Meiũran ti Maria Imẽpyt ra'yn hawyi to'opytyk. Imẽpyt hawyi Iuse tum na'yn Imẽpyt pe het IESUI e hap het rakat WO'OEHAKYERA'AT e topusu puo.
MAT 2:1 Aipo­typot Iesui ti tuwe­mo­herep ta'yn mesuwe mekewat tawa hit Perẽ yi Iuteu pe karãpeĩ Eroti toĩne'en morekuat no itotiat turan. Mi'i hap e'at pe waikiru etiat wemu'e haria tõ'ẽ tõ'ẽ ta'atue'yi Urienti kaipyi aikope pyi at tuwẽtem hap kaipyi.
MAT 2:2 Mi'i hawyi put'ok'i'atu'e tawa wato Ieru­sarẽi note hawyi — Aikope som hirakat Aipo­rekuat pakup nuat toĩne'en i'atu'e itotiaria pe. Aikope som tuwe­mo­herep Ei'ywania Iuteu ywania Potypot pakup ywã'ĩ hap i'atu'e. Katu­pono ha'awyte ra'yn uruta'a­kasa at wẽtem hap kaipyi hewai­kiru i'ywã'ĩ hap enoi hap uruta'a­kasa urue'yi tote i'atu'e. Mi'i pote mesup Aipo­rekuat Koro pakup mõtypot hamo urutõ'ẽ meikowo hewai­kiru upi urutõ'ẽ meikowo i'atu'e waikiru etiat wemu'e haria iwe'eg kahato rakaria tawa wato Ieru­sarẽi miaria pe.
MAT 2:3 I'atu'e hap morekuat Eroti tikuap hawyi token'ẽ kahato i'ewyte tawa Ieru­sarẽi miaria. Katu­pono te'eru­wa­nẽtup ko'i ko'i kahato Iuteu ywania Potypot ywã'ĩ hap etiat waikiru etiat wemu'e haria ta'atuẽtup hawyi. Kat pote mi'i tã e morekuat Eroti katu­pono waku uito yn morekuat koro wo mesuwat yi tote e.
MAT 2:4 Mi'i pote morekuat Eroti ti'atu­kaykay tuwe­wawi Tupana ehay miwan etiat kuap sese haria i'ewyte pa'i kororia toi'atu­kaykay hawyi apo'e i'atuepe — Mehĩ'in e aikope so tuwe­mo­herep irane Tupana Mipo'oro Wuat'i Porekuat Koro wuat sese e. Kat etawa pe kat etawa pe i'ywã'ĩ e.
MAT 2:5 — Ta'i tawa hit Perẽ me aru tuwe­mo­herep Mi'i Miit i'atu'e katu­pono sa'awy'i Tupana ehay moherep hat mio tã e miwan me yianmete i'atu'e.
MAT 2:6 — Ta'i ahetawa kurin moity'i ewei'e tawa Perẽ miaria yi Iuta ywaniaria e. Ma'ato yt eiwe­mõti tei'o ehetawa kurin mupi katu­pono ti aru meiũran etawa hit Perẽ po'og po'og miit'in mikuap mo topyhu'at yi Iuta ywaniaria yne tawa ko'i kai katu­pono ehetawa hit Perẽ me tuwe­mo­herep irane Isareu ywania Potypot Koro sese e ti sa'awy'i Tupana ehay moherep hat Mikeia tomiwan me 5.2 pe i'atu'e morekuat Eroti pe.
MAT 2:7 Tuwat i ra'yn inãpin haria hawyi morekuat Eroti ti'atu­kaykay i ra'yn at wẽtem hap kaipywiat õ'ẽ haria waikiru etiat wemu'e haria apoto'e mig'i wo i'atuepiat hamo toi'atu­kaykay i ra'yn — Karãpeĩ ewei'akasa sa'awy'i mekewat waikiru e i'atuepe. Karãpeĩ tuwe­mo­herep sa'awy'i ehowawi mekewat waikiru e.
MAT 2:8 Mi'i hawyi ta'atu­mo­herep morekuat Eroti pe yne i'atu'e hap. Waikiru wemo­herep hap e'at morekuat Eroti tikuap hawyi to'e waikiru etiat wemu'e haria pe — Waku eweiwat tawa hit Perẽ kape uhyt'i'in e. Mi'i tote o apo'ewei'e kahato Hirakat ete aikope aikope tuwe­mo­herep e. Mi'i hawyi eweipuẽti hawyi waku ewehenoi uhepe aikope toĩne'en Mi'i hat ete e. Pywo ti atikuap teran aikope toĩne'en Hirakat. Areto mono imõtypot hamo ipoityro hamo e so i'atuepe morekuat Eroti.
MAT 2:9 Mi'i hawyi waikiru kuap haria tuwat morekuat Eroti yaty­pepyi Hirakat kat hamo. Te'eru­wẽtem morekuat yat koro pyi hawyi te'era'a­kasa i ra'yn mu'ap upi mekewat waikiru sa'awy'iwuat at wẽtem hap kaipywiat. Mi'i hawyi ti toto i ra'yn waikiru i'atue'yianme te'en te'en Hirakat ieĩne'en hap kape ra'yn toto. Mi'i hawyi waikiru upi tuwat tawa wato Ieru­sarẽi pyi tawa hit Perẽ kape. Put'ok'e waikiru itote hawyi topyhu'at Hirakat ieĩne'en hap apy tote.
MAT 2:10 Te'era'a­kasa ra'yn mekewat waikiru mimo­herep hawyi i'atu­wepit kahato ra'yn waikiru kapiat te'era'a­kasa haria. Te'eru­wehum kahato waikiru kapiat ta'akasa hawyi.
MAT 2:11 Mi'i hawyi waikiru topyhu'at hirakat ieĩne'en hap apy tote ra'yn hawyi tuwehyt'ok i'yat pe hawyi te'era'a­kasa ra'yn Hirakat kape toty Maria wywo. Mi'i hawyi te'eru­we­pỹ'ã­tutuk ta'yn mekewat Hirakat mõtypot hamo. — Waku ta'atu'e hawyi ta'atu­mie­reto ko'i ta'atu'apok ta'yn hawyi imehit rakat Uru kawiat ta'atuium ne'en ne'i Hirakat pe iky'e hap. Mi'i hawyi ta'atuium ikamhig se rakat miwuk wo iky'e hap. Mi'i hawyi mohag hy Mira e hap ta'atuium Hirakat mõtypot haype.
MAT 2:12 Mi'i hawyi i'atu­mu'etu ti Tupana ti'atu­nãpin — Yt ewei'aipok tei'o morekuat Eroti puo henoi topiat hamo e seha'at haria õ'ẽ haria pe at wẽtem hap kaipy­wiaria pe to'e. Mi'i pote te'era'aipok ta'atue'yi kape wẽtup mu'ap upi. Yt ta'atu­henoi hin i ra'yn morekuat Eroti pe aikope Hirakat toĩne'en hap.
MAT 2:13 Mi'i hawyi Tupana mipo'oro atipy kaipywiat tuwe­mo­herep Iuse mu'etu hawyi to'e — Epoĩ'ãm no Iuse e. Etioto ro Hirakat wẽtup yi kape pya meiũpepyi mekewat yi Esitu kape ity wywo e. Eweipopy ro e katu­pono ti aru morekuat Eroti tikat ra'yn wyti aru Hirakat i'auka hamo ne'i e. Mi'i pote waku yi Esitu pe eweikupte'en mig'i wo e. Waku yne meikowo hawyi ti aru woro­nãpin ra'yn karãpe i era'aipok i meikowo te hap ahenoi pakup'i aru epe e atipy kaipywiat Iuse mu'etu to'e.
MAT 2:14 Mi'i hawyi Iuse ipoĩ'ãm na'yn wãtym muo hawyi meremo ra'yn Hirakat Iesui ity wywo tote­ropo'ok. Te'ero­popy ra'yn yi Esitu kape wãtym muo mig'i wo.
MAT 2:15 Mi'i hawyi morekuat Eroti ku'uro hap kape itote tukupte'en yi Esitu tote aikotã sa'awy'i Tupana to'e miwan me hap ewy — Meiũran ti aru Uha'yru atikaykay ti aru yi Esitu kaipyi e sa'awy'i wuat miwan me Oseia 11.1 pe.
MAT 2:16 Ma'ato morekuat Eroti tikuap ta'yn seha'at haria ipuẽti haria yt topuo i ra'yn i'atu'aipok hawyi ipy'ahak sese ra'yn topyhu'at — Yt naku i pãi e. Yt tõ'ẽ i ra'yn uipuo henoi uhepiat hamo waikiru kuap haria uimi­ky'esat ewy pãi e. Yt ta'atu­henoi hin i aikope mekewat Hirakat ieĩne'en hap e topy'ahak popuo. Mi'i hawyi morekuat Eroti ti'atu­po'oro kahato tesu­rara'in sem na'yn tawa hit Perẽi kape yne itotiaria hira­karia ipa'iat hit ko'i atu'uka hamo typy anu pyi i'ywã'ĩ rakaria atu'uka yne hamo Perẽi miaria i'ewyte hira­karia ipa'iat yt pya hin i Perẽi kai gupte'en haria typy anu pyi yi kape toi'atu'uka kary katu­pono typy anu ra'yn waikiru etiat wemu'e haria te'era'a­kasa waikiru kape. Mi'i hap ewy te toiky'esat hira­karia atu'uka hap typy anu i'ywã'ĩ rakaria pyi.
MAT 2:17 Toi'atu'uka yne itote aikotã Tupana ehay moherep hat Ieremia mienoi tomiwan miat sa'awy'i sese hap ewy.
MAT 2:18 — Tawa Perẽi pyi ti aru mekewat yi Hama pyi ti aru atikuap kahato ti aru i'atu­wo'okak'i kahato hap i'atuehay pirik kahato hap e. Ta'atu­saty'u kahato itote to'opytit'i kahato e. Mana Hakeu ywania tawa hit Perẽi miaria te'eruwak kahato ta'atu­mẽpyt'in ky'e hap upi. Te'eruwak at ka'ap hap atikuap uimu'etu e. Yt uwe i imoperup'i kuap katu­pono topap yne yne imẽpyt'in itote pote e ti Tupana ehay enoi hat Ieremia miwan pe 31.15 pe yianmete Perẽi miat e hira­karia atu'uka hamuat hap etiat.
MAT 2:19 Mi'i hawyi yi Esitu pe Iuse'in tukupte'en mot'i itote. Meiũran morekuat Eroti iku'uro hawyi Tupana tipo'oro temiit i ra'yn atipy kaipyi Iuse kape. Mi'i hawyi tuwe­mo­herep i ra'yn Iuse mu'etu te yi Esitu piat heĩne'en turan.
MAT 2:20 — Epoĩ'ãm no Iuse e. Etioto ro Hirakat ity wywo hawyi ewei'aipok i ro ehe'yi kape i Isareu ywania e'yi kape katu­pono ti koitywy Hirakat Iesui auka teran hat morekuat Eroti iku'uro ra'yn e atipy kaipywiat sut hat Iuse mu'etu.
MAT 2:21 Mi'i hawyi Iuse ipoĩ'ãm hawyi — To'iro wata'aipok ahetawa kape e ra'yn Hirakat pe ity pe. Mi'i hawyi te'era'aipok ta'atue'yi Isareu kape.
MAT 2:22 Put'okta'atu'e itote hawyi Iuse tikuap ta'yn morekuat Eroti sa'yru sa'ag Akeirau e hap het rakat topyhu'at to'ywot saipe pot heiam note aikope sa'awy'iwuat to'ywot ti'atu'uka hira­karia turanuat hap tote. Mi'i pote Iuse token'ẽ tuwe'yatnug itotiat hamo. Mi'i hawyi mio tã e Tupana imu'etu Iuse pe — Yt ereĩne'en nei'o meiũpe yi Iuteu pe e Tupana Iuse mu'etu to'e. Mi'i pote tuwat i ra'yn tetawa sa'awy'iwuat kape mekewat yi Karireia kape.
MAT 2:23 Mi'i hawyi tuwat tawa Nasare kape hawyi itote Iesui tuwe­motag aikotã Tupana miky'esat ewy katu­pono to'e yianmete tehay enoi hat wẽ pyi — Meiũran ti aru tawa Nasare piat ieĩne'en hat ati'airo Wuat'i Porekuat no e Tupana sa'awy'i miwan me e hap ewy Iesui toĩne'en Tawa Nasare pe.
MAT 3:1 Pyno Iesui toĩne'en ne totag hap tawa Nasare pe turan mekewat wo'oset'ok hat Iuwãu toto ra'yn yahig kape.
MAT 3:2 Mi'i tote tohenoi kahato ra'yn tewawiat õ'ẽ haria pe — Ewei'atoiat ro yne eiminug yt naku i hap ko'i e katu­pono ti yt pya i ra'yn Tupana tipo'oro meikowo Tomi'airo Aipo­rekuat Koro sese wuanuat e Iuwãu tewawiat õ'ẽ haria pe.
MAT 3:3 Sa'awy'iwuat sese ti Tupana ehay moherep hat Isaia henoi Iuwãu etiat yianmete. Mio tã e — Meiũran ti aru toĩne'en yahig wato tote eimu'e haty wuat hat sese e Isaia mekewat wo'oset'ok hat Iuwãu etiat. — Mio tã e aru mekewat yahig notiat ieĩne'en hat e — Ewehe­katup o katu­pono tut wyti aru Mekewat Tupana Mi'airo Wuat'i Porekuat nuat e. Aheha­kyera'at hanuat tut irane ahowawi e aru. Mi'i tupono eweimo­hãpyk to Tupana kape e aru mi'i miit. Eiminug yt naku i hap ko'i ewei'atoiat ro e aru. Waku yne hawyi ti aru Tupana tipo'oro ra'yn Mi'i Miit ehowawi e. Mi'i tupono eweimo­hãpyk o Tupana kape eiminug yt naku i hap ko'i. Yne ewei'atoiat hawyi tut irane ahowawi e aru yahig wato totiat aimu'e haty wuat hat e sa'awy'i Isaia tomiwan me 40.3 pe mekewat Iuwãu ieĩne'en hap etiat yianmete e tohenoi.
MAT 3:4 Mi'i e hap ewy put'ok'e aimu'e hat Iuwãu yahig note tesokpe i'atuhũ wato Kameru sap kawiat wywo. I'ewyte iwe'ok kytyt hap i'atuhũ pe kawiat. Mi'i hawyi imi'u ti pohit ko'i i'ewyte awi'a hy mi'i tutu'u itote.
MAT 3:5 Mi'i hawyi tawa wato Ieru­sarẽi miaria tuwat tuwat ahet'ok hat Iuwãu kape ihay kuap hamo. I'ewyte yi wato Iuteu ywania etawa piaria tuwat tuwat Iuwãu kape. I'ewyte wuat'i tawa hit upiaria Iũtãu hy popy etiaria gupte'en haria tuwat tuwat Iuwãu kape ihay kuap hamo tuwat ra'yn.
MAT 3:6 — Uito yt naku i nug hat ta'atu'e Tupana piat hamo tuwat. Mi'i tã ta'atu­henoi hawyi Iuwãu ti'atuset'ok ta'yn Iũtãu hy pe.
MAT 3:7 I'ewyte wo'omu'e haria meimuẽ wuaria Tupana mohey haria akag ko'i tuwat Iuwãu ewawi te'eru­weset'ok hamo. Irania'in — Aiku'uro hawyi watoĩne'en ne hap e haria. Irania'in — Aiku'uro hawyi yt kat i aheĩne'en pakup i hap e haria wy tuwat te'eru­weset'ok hamo wo'omu'e haria. Ma'ato mio tã e Iuwãu i'atuepe — Yt naku i woro­ho'oset'ok eipe e Iuwãu katu­pono eipe yt naku i nug haria wo te eweikupte'en e. Eipe ti moi ko'i ewywuat re haiwot rakaria e. Miit auka haria wo wyti eweikupte'en ne eipe e. Mi'i pote kan hamo eweĩ'ẽ meikowo eiweset'ok hamo yt naku i nug haria wo i te eweikupte'en ne turan e. Ta'i Tupana apiheg haria wo eweipyhu'at eipe.
MAT 3:8 Pyno ewei'atoiat ro yne eiminug sa'ag ko'i are. Mi'i hawyi waku nug haria wo eweikupte'en wuat'i akasa hamo. Mi'i hawyi waku woro­ho'oset'ok eipe e. Aikotã aimikoi wakuat hap aimo­wepit kahato hap ewy eweikupte'en no e. Eweipyhu'at ro Tupana mowepit haria wo eiminug waku hap wywo e. I'ewyte eweikupte'en no miit'in mowepit haria wo eiminug wakuap hap kaipywiat no e. Mio tã hap ewy ewetunug hawyi waku woro­ho'oset'ok eipe e Iuwãu wo'omu'e haria pe.
MAT 3:9 Yt naku i ewei'e eiwa­nẽtup hawe — Yt karãpe i Tupana uru'apiheg kuap katu­pono urue'ase'i'in Aparãu emiariru'in sese ti uruto. Ta'i uruto ti Iuteu ywania pote Tupana yt uru'apiheg kuap i hap yt ewei'e i ran o eiwa­nẽtup hawe katu­pono mio tã ei'e hap kaipyi Tupana tikuap ta'yn yt eiwe'eg i kahato hap ko'i katu­pono ahewaku hap yt tut i aha'ase'i'in kaipyi i yt ai'ywot'in kaipyi i wyti yt aity'in kaipyi i wyti ahewaku hap e. Ta'i Tupana tiky'esat pote tutunug kuap Aparãu emiariru piit ko'i meimuẽ wat nu ko'i kawiat. Yt niatpo hin i mio tã Tupana minug toiky'esat pote e Iuwãu wo'omu'e haria akag ko'i meimuẽ wuaria Iuteuria — Uruto po'og irania'in kai e haria pe.
MAT 3:10 Eiwe'eg wo o katu­pono mio Tupana toĩne'en waku pe ra'yn te'ywyhap wywo yt haat i rakaria yp pugha hamo hap ewy toĩne'en e. — Yt naku i eipe pote yt kan hamo i e. Mi'i pote aria mi'u wo yn waku eipe e Tupana e. Aria mi'u wo eweikupte'en aikotã torania aria'yp yt haat kahato i rakat miterek sok wuk wat ewy topyhu'at hap ewy eweikupte'en mesup e Iuwãu wo'omu'e haria pe. Mi'i hap ewywuat eipe katu­pono yt kat i eikai wakuap pote pãi e.
MAT 3:11 Uito woro­ho'oset'ok y'y wo — Urutoiat yne ra'yn uruminug sa'ag yt nakuat i hap ko'i ei'e pote woro­ho'oset'ok. Ma'ato yt naku i nug haria wo te eweikupte'en pote yt karãpe i aru woro­ho'oset'ok eipe pãi e Iuwãu wo'omu'e haria akag ko'i pe. Mi'i hawyi Iuwãu to'e torania õ'ẽ haria pe — Uimi­mu'eria e meiũran ti aru tut wẽtup ok Miit ahowawi Aimu'e kahato hat e. Ta'i Mi'i Miit ri uhaipepiat wen ma'ato Mi'i Miit ri po'og po'og wakuat uikawiat hat are. Ta'i Mi'i Miit ri po'og po'og uikawiat wakuat are e. Uiat uhewaku hap ti yt put'ok'e hin i hemiit ipysei hamo ipy sokpe pag hamo are. Uito ti woro­ho'oset'ok kuap y'y wo yn ma'ato uhaipepiat ti aru po'og na'yn inug uikai katu­pono Mi'i Miit ti aru eipyt'atnug kuap Tupana Pã'ãu Wakuat no hat e. Woro­ho'oset'ok kuap y'y wo uito ma'ato Mi'i Miit ehet'ok kuap Tupana Pã'ãu wo e. Mi'i Miit ri po'og uikai wakuat e. Y'y wo yn na'yn uito woro­ho'osei ma'ato Mi'i Miit ti aru imoma kuap yne yt naku i hap eipy'a pyi eiwa­nẽtup hawyi aikotã aria tiwuk kuap kat sa'ag ko'i rakat yt nakuat i ko'i hap ewy e. Pywo ti Mi'i Miit ti aru ehet'ok kuap kahato Tupana Pã'ãu wo e Iuwãu Iesui etiat.
MAT 3:12 Aikotã hã'ỹi watotok hawyi wati'a­po­pesap uhu hawyi hã'ỹi yn na'yn topyhu'at. Aikotã watopag hã'ỹi heiam me ma'ato i'ape yt kat hamo i ra'yn topyhu'at hawyi ahe'aria nug hamo yn waku i'ape. Mi'i hap ewy ti aru uhaipepiat Tupana Mipo'oro tikuap uwe tomohey haria uwe yt hap e. Ta'i toikuap ti aru towa­nuaria aikotã watikuap aimitok hã'ỹi wakuat hap ewy e. Towa­nuaria pe mio tã e aru — Ta'i uimohey haria ti eipe pote woro­ho'oset'ok e aru tomohey haria pe ma'ato irania'in tehay pun ne'i haria pe ti aru to'e — Aria mi'u wuat ko'i wyti eipe e aru tehay pun haria pe. Aikotã mi'apo­pesap uhu ko'i ewy ra'yn eipe e aru uhaipepiat sut hat e Iuwãu Iesui piat pe e.
MAT 3:13 Mi'i hawyi wẽtup e'at pe Iesui toto Iũtãu hy kape te'yi Karireia kaipyi Iuwãu piat toset'ok hamo toto.
MAT 3:14 Ma'ato put'ok'e itote hawyi Iuwãu to'e Iesui pe — Uika'iwat e eriot apo eset'ok uhetiat hamo e. Pyno yt naku i uito woroset'ok Uipo­typot ne'i En tupono. En ni po'og uikai e. Mi'i tupono ti po'og ni En waku uhet'ok En Ui'ywot e.
MAT 3:15 Mi'i hawyi Iesui to'e ma'ato Iuwãu me — Waku uhet'ok en mehĩ e katu­pono ti mi'i tã hap ti Tupana miky'esat ewy eminug uhet'ok epiat hap e. Mio tã e pote — Pyno woroset'ok Ui'akag e'e hap ewy e Iuwãu Iesui pe.
MAT 3:16 Mi'i hawyi toset'ok rokirẽ Iesui tuwẽtem y'y pyi turan Iuwãu teha'at atipy kape hawyi oken'ypy ewywuat atipy piat ta'akasa. Mi'i hawyi Tupana Pã'ãu ut hamuat hap pykasu ut hap ewy ta'akasa ra'yn. Mi'i ti ta'apyk ta'yn Iesui apy tote.
MAT 3:17 Mi'i turan toikuap sehay atipy kaipyi — Meiẽ ti Uha'yru sese uimiky'e kahato ti meiũ e. Uimo­wepit kahato hat Mi'i e Tupana Iesui etiat. Iuwãu tikuap Iesui set'ok hap tote sehay atipy kaipyi. Iesui weset'ok hap etiat ahenoi mesuwe uimiwan me Uito Mateu.
MAT 4:1 Mi'i hawyi Tupana Pã'ãu tioto Iesui yahig wato kape aikope yt uwe i ieĩne'en hap kape. Mi'i hawyi itote ahiag hã'ãg kahato Iesui 40 e'at turan tomi­ky'esat nug hamo toiky'esat.
MAT 4:2 Itote Iesui toĩne'en wẽtup ewaty. Yt kat i hin i tutu'u at ka'ap yahig wato tote. Itote yt kat i tutu'u at ka'ap wẽtup ewaty turan. Ta'i 40 e'at pe tuwe­mosy'at yn itote. 40 e'at hawyi hesy'at kahato toĩne'en itote mekewat yahig koro tote.
MAT 4:3 Mi'i hap ete iperup kahato sy'at pono. Mi'i turan put'ok'e ahiag itote hã'ãg sese hamo. Mi'i hawyi to'e Iesui pe — Mehĩ e pywo Tupana Sa'yru sese En mote etunug no emi'u wo man meikowat nu ko'i kawiat e Iesui pe.
MAT 4:4 Mi'i hawyi Iesui to'e ahiag me — Ma'ato yt atunug neran i rat e'e hap ewy e katu­pono sa'awy'i Tupana to'e — Mi'u hap kape yn miit'in te'eru­wa­nẽtup pote yt karãpe i ta'atu­puẽti ta'atuieĩne'en wuat'i e'at piat hamuat e katu­pono uhehay nug yne hap kaipyi yn ni miit'in tipuẽti kuap toieĩne'en hap sese e Tupana sa'awy'i miwan me e Iesui ahiag me.
MAT 4:5 Mi'i hawyi ahiag tioto Iesui tawa wato Ieru­sarẽi kape ra'yn hawyi totopag Iesui mekewat Tupana mõtypot yat koro po'og ywaiti kahato rakat tote. Mekewat sa'awy'iwuat Teute­ru­numiu 8.5 miwan miat ewy to'e ahiag me.
MAT 4:6 Mi'i hawyi ahiag to'e tope — Mehĩ e pywo ti Tupana Sa'yru sese En mote e'okhyt'at ro meiũpepyi yi kape katu­pono sa'awy'i ti Tupana to'e — Atipo'oro uhemiit atipy kaipyi epowyro hamuat e. Era'at hawyi yt ere'ahyk hin i yi tote meimuẽ wuat nu ko'i ete hamo e Tupana sa'awy'i miwan me Mehĩ e ahiag Iesui pe. Tawi wepy miwan 9.11 e hap ewy to'e Iesui pe.
MAT 4:7 Ma'ato Iesui tiwesat — Pywo mio tã e Tupana wen ma'ato i'ewyte wẽtup we to'e miwan me — Wãi yt uhã'ãg nei'o sio woro­po­wyro ipoity'i rakat nug hap ete sio yt e katu­pono yt woro­po­wyro kuap i ti sa'ag nug hap ete e Tupana i'ewyte miwan me e ahiag me. Mi'i sehay Teute­ru­numiu 6.16 pe tohenoi ahiag me.
MAT 4:8 Mi'i hawyi ahiag tioto Iesui yity'ok ywaiti rakat kape ra'yn. Mi'i hawyi itote pyi ahiag timo­herep tope wuat'i ywania mesuwat yi totiat. Mesuwat mytyp yne toimo­herep tope i'atue­tawa wato kahato ko'i ta'atu­po­re­kuaria ta'atu­we­painug hap ko'i ta'atuekat kahato hap ta'atu­kahu hap ko'i toimo­herep yne yne Iesui pe aikotã aikotã iwato hap ok tã.
MAT 4:9 Mi'i hawyi to'e — Mehĩ e pywo ti rat woronug En wuat'i ywania Porekuat no i'ewyte i'atuekat ko'i i'atue­tawa wato ko'i atum yne yne epe uimõ­typot En mote erepỹ'ã­tutuk uhowawiat pote e ahiag Iesui pe.
MAT 4:10 Ma'ato Iesui tiwesat — Mutoro meiũpepyi ahiag pya ui'yaty­pepyi e katu­pono sa'awy'i mio tã e ti Tupana miwan me — Uito yn waku eimi­mõ­typot no katu­pono Uito yn areĩne'en Tupana wo wẽtup yn e. Mi'i hawyi yt uwe i Tupana wo toĩne'en e Tupana sa'awy'i miwan me e. Mi'i pote — Mutoro ahiag pya uikai e Iesui ahiag me. Mi'i sehay Teute­ru­numiu 6.13 toĩne'en.
MAT 4:11 Mi'i hawyi ahiag toto ra'yn Iesui yaty­pepyi. Mi'i pytkai Tupana mipo'o­roria tõ'ẽ ra'yn atipy kaipyi Iesui powyro hamo.
MAT 4:12 Mi'i hawyi Iesui ta'aipok i ra'yn aikope miit'in tukupte'en hap kape mekewat yity'ok totepyi. Mi'i tote toikuap ta'yn Iuwãu wo'oset'ok hat more­kuaria tipyhik ta'yn wo'opyhik hawe. Toikuap hawyi toto ra'yn itote pyi tomotag hap kape tawa Nasare kape yi Karireia kape i ra'yn toto.
MAT 4:13 Put'okto'e itote hawyi toto tomotag hap tawa Nasare pyi tawa Kawana'ũ e hap kape yi Karireia ihyemyi'a kawianuat tawa ko'i kape toto yi Sãpurũ piaria kape yi Natari piaria kape toto.
MAT 4:14 Mi'i hawyi tawa Kawana'ũ tote Iesui toĩne'en yi Karireia pe i'atumu'e hamo aikotã sa'awy'i miwan me to'e hap ewy ra'yn.
MAT 4:15 Aikotã sa'awy'i Tupana ehay moherep hat Isaia to'e hap ewy — Ta'i yi Sẽpurũ piaria yi Natari piaria yi Karireia hyemyi'a ẽpe etiaria Iũtãu hy ẽpe piaria wẽtup ywania. Mi'iria ti uhehay yt ta'atukuap i pote tukupte'en kahato i'atu­minug sa'ag ko'i. Mi'i pote i'ypyryp wiat gupte'en haria ewy mi'iria. Iku'uro rakaria ewy yn tukupte'en mi'iria.
MAT 4:16 Ma'ato meiũran ti aru atipo'oro ra'yn Uha'yru i'atue­wawi i'atumu'e hamo. Uhehay wuat i'atumu'e hamo hawyi ti aru ta'atu'atoiat ra'yn ta'atu­minug sa'ag hap ko'i. Mi'i hawyi ta'atuieĩne'en hap sese ta'atu­puẽti ra'yn e. Ta'i atipo'oro irane Uha'yru ariãty ewywuat sese i'atuieĩne'en hap moẽtyhot hamuat. Mi'i hawyi uhehay kuap haria wo te'ero­pyhu'at wẽtup ywania pytkai e Isaia sa'awy'i miwan me 9.1 pe Iesui ut hamuat tohenoi.
MAT 4:17 Mi'i hawyi toto ra'yn Iesui yi Karireia piaria mu'e hamo — Eiwe­morem no yt nakuap i nug hap ko'i kaipyi e. Mi'i hawyi eweiwe­morem no Tupana kape katu­pono yt pya hin i Tupana topyhu'at Miit'in Porekuat no sese ra'yn e Iesui yi Karireia piaria pe. Mi'i hawyi Iesui ti'atumu'e kahato yne y'y hit i upiaria yi wato Karireia piaria.
MAT 4:18 Wẽtup e'at pe hawyi Iesui hewyry mekewat yi Karireia hyemyi'a ẽpe upi yi kyt upi. Mi'i hap tote Iesui teha'at typy ok kape mekewat mehĩ Simãu wẽtup het Peteru e hap i'ewyte iywyt Ãtere e hap kape teha'at. Mi'iria tukupte'en ta'atue'yara pe ihyemyi'a wato tote aikope ta'atue­suki wato wo haria i'atue­hapap kahato pira pytyk suki wato wat rakaria kape.
MAT 4:19 Mi'i hawyi Iesui iwẽpap'i i'atue­wawi — Uiwyria'in e to'iro uhupi e. Ahenoi mono miit'in pytyk Tupana wanuat hap aikotã pira ko'i pytyk ehepiat hap ewywuat re hamo e.
MAT 4:20 Mi'i hawyi ta'atu'atoiat ra'yn ta'atue­suki wato itote hawyi meremo tuwat Iesui upi.
MAT 4:21 Tuwat porap'i i ra'yn hawyi yi kyt upi Iesui teha'at Sepeteu sa'yru'in kape mehĩ Tiaku i'ewyte iywyt Iuwãu kape wesuki wato mog yara piat haria kape. Mi'i hawyi i'ewyte Iesui iwẽpap'i i'atue­wawi — To'iro uhupi mehĩ'in e.
MAT 4:22 Mi'i hawyi tuwat meremo hupi. Ta'atu'atoiat ra'yn ta'atue­suki pira pytyk hap ta'atue'yara pe hawyi ta'atu­henoi ta'atu'ywot sese hawyi tuwat ra'yn Iesui upi miit'in mu'e hamo.
MAT 4:23 Mi'i hawyi Iesui toto i itote pyi yi wato Karireia piaria mu'e hamo i ra'yn. Toi'atumu'e kahato sehay wakuat no wuat'i Tupana mõtypot yat pe toi'atumu'e. I'ewyte i'ahu rakaria toi'atu­moe­hãite kahato aikotã aikotã i'atu'ahu hap ok tã toi'atu­moe­hãite torania itote.
MAT 4:24 Mi'i hawyi miit'in yi Karireia piaria yi Siria piaria tikuap ta'yn Iesui misepap sese ko'i. Mi'i hawyi tõ'ẽ tõ'ẽ pya wuaria. Ta'atuerut kahato i'ahu rakaria torania hawyi Iesui ti'atu­moe­hãite kahato i'atu­tara heg nakaria mã'ãu sa'ag ko'i mimoeso'ok ko'i ipo kĩ'ã rakaria ipy kĩ'ã rakaria iku'uro ku'uro rakaria ta'atuerut howawi hawyi toi'atu­moe­hãite yne ra'yn.
MAT 4:25 Mi'i hawyi miit'in sem tuwat tuwat hupi aikopuo aikopuo hewyry hap upi yi Karireia kaipy­wiaria tawa wato Ieru­sarẽi kaipy­wiaria mekewat Iũtãu hy sakpuaria mekewat 10 etawa ko'i kaipy­wiaria tuwat hupi. I'ewyte yi Iuteu kaipy­wiaria tuwat tuwat Iesui upi miit'in typy'i kahato rakaria are uito Mateu.
MAT 5:1 Mi'i hawyi miit'in sem te'eru­wa'a­tunug Iesui kape. Mi'i hawyi teha'at i'atue­wawi hawyi ipot'am na'yn yity'ok tote hawyi ta'apyk itote yity'ok apypeke. Mi'i tote ipotmu'eria te'eru­wa'a­tunug i'apy­pueri wo.
MAT 5:2 Mi'i hawyi Iesui ti'atumu'e uwe uwe mesu­wa­rote Tupana mipoi­tyro wuat ko'i tohenoi.
MAT 5:3 Mio tã to'e — Uheka­tu­wyria uwe uwe Tupana pe to'e — Worokuap po'og neran wyti uito katu­pono ti yt worokuap hin i te yt uimi­ky'esat ok tã i te worokuap e topy'a pe mio tã e haria pe Tupana to'e — Pyno uimi­poi­tyro sese ko'i eipe katu­pono woro­ho'onug wyti aru eipe wuat'i ywania pore­kuaria wo mesu­wa­rote aikotã Uito areĩne'en Morekuat no atipy pe hap ewy e Tupana mio tã e haria pe e Iesui itotiaria pe.
MAT 5:4 Mi'i hawyi Iesui to'e i — Uiwyria'in e uwe uwe tuwak topy'a pe irania'in satek pote ho'opot pote mi'i haria pe ti Tupana to'e — Woro­ho'o­mo­wepit kahato eipe katu­pono karãpe ehehaky'e'i hap put'ok'e ehete mi'i hap atu'u yne uipy'a pe wy aikotã irania'in ehaky'e'i hap ewetu'u yne hap ewy e Tupana mi'iria pe e. Uhegyi'at hap ok tã wyti aru eweikupte'en e. Woro­ho'o'og­hytsat wyti aru eipe e Tupana mio tã e haria pe e.
MAT 5:5 Mi'i hawyi Iesui to'e i — Uipot­mu'eria e uwe uwe pywo pe to'e topy'a pe perup'i popuo — Pywo pe ti uito po'og yi kai irania'in kai e hap yt tuwe­mo­wato hap wywo i mio tã e haria pe Tupana to'e — Pywo pe ti uimi­poi­tyro sese eipe katu­pono mesuwat mytyp tote more­kuaria wo wyti aru woro­ho'onug eipe e. Mesuwat mytyp tote topyhu'at irane eipo pe e Tupana paa'e haria pe e Iesui yity'ok totiaria pe.
MAT 5:6 Mi'i hawyi to'e i — Uhupiaria e uwe uwe to'e Tupana pe — Areĩne'en neran hãpyk kahato e'ewy mi'i haria pe Tupana to'e — Uimi­poi­tyro ko'i kahato wyti aru eweikupte'en ui'ewywuat waku sese hamo woro­ho'onug eipe katu­pono eimi­ky'esat ewy woro­ho'o­mo­hãpyk eipe Ui'ewy e Tupana mio tã e haria pe e.
MAT 5:7 Mi'i hawyi po'og Iesui henoi — Uhaipe­piaria e uwe uwe ihaky'e'i rakaria powyro haria mi'i haria pe Tupana to'e — Pywo ti rat woro­ho'o­poi­tyro kahato aru eipe e. Uhegyi'at kahato hap topyhu'at aru ehete aikotã eiminug ewy e Tupana ihaky'e'i rakaria powyro haria pe e Iesui ta'apy­pueri haria pe.
MAT 5:8 Mi'i hawyi to'e i — Uimohey haria e uwe uwe topy'a pe tuwa­nẽtup hawe wakuat kape yn tuwa­nẽtup mi'i haria pe Tupana to'e — Pywo pe ti woro­ho'o­mo­wepit kahato aru eipe katu­pono uhowawiat akasa haria ewy eweikupte'en e Tupana ipy'a kahu rakaria iwanẽtup kahu rakaria pe e Iesui yity'ok totiaria pe.
MAT 5:9 Mi'i hawyi po'og Iesui henoi itotiaria pe — Uhemiit'in e uwe uwe wo'owese hap yn nug haria pe Tupana to'e — Pywo pe uimi­poi­tyro ko'i eipe katu­pono uha'yru'in uhaki'yt'in sese wo e wyti aru mi'iria pe wuat'i ehamo Tupana wo'owese hat yn nug haria pe e Iesui.
MAT 5:10 Mi'i hawyi Iesui to'e i — Uhupiaria e uwe uwe wakuap nug motiat miit'in wo'okyry'i hamo topyhu'at mi'i haria pe ti Tupana to'e — Pywo pe ti woro­ho'o­mo­wepit kahato katu­pono atum aru ehepe uhetama atipy piat e Tupana. Pywo pe ti woro­ho'o­mo­wepit kahato eipe katu­pono aikope Uito areĩne'en Morekuat no hap tote eheiam sese wo topyhu'at irane e Tupana wakuaria pe miit'in misaty'i saty'i ko'i pe e.
MAT 5:11 I'ewyte uwe uwe uhemiit'in sese wo miit'in mikyry'i hamo te'ero­pyhu'at miit'in misaty'i saty'i wo miit'in mimo­weuka'i mi'i uhemiit'in pote mi'i hat pe — Pywo pe ti woro­mo­wepit po'og ni wuat'i kai e Iesui temiit'in me.
MAT 5:12 — Ta'i mi'i tã hap ewy ta'atunug sa'awy'i­wuaria uhehay moherep haria ete e Tupana. Mi'i tupono i'atuehay sa'ag yt pywo pe i ehete uhemiit'in eipe pote eiwe­wepit ro eiwe­wehum no sa'ag ta'atunug ehetiat pytkai katu­pono meiũran ti aru Tupana mimõ­typot kahato haria wo eweikupte'en atipy pe are e. Ta'i atipy pe — Woro­mõ­typot kahato eipe e Tupana aru uimohey haria potiat miit'in mikyry'i hap ko'i wo eipe pote e Iesui. Uhehay mohey hat eipe pote i'atuehay sa'ag yt pywo pe i ehete pote eweimo­wepit ro eweiwehum no Tupana kape are katu­pono eha'up muat wyti iwato kahato toĩne'en atipy pe e Iesui. Sa'awy'i te pyi mesup te Tupana ehay moherep haria miit'in mikyry'i hap ko'i wo tukupte'en e. Mesup te i'ewyte miit'in yt i'atu­wese hin i ehete Tupana ehay moherep haria eipe pote are e. Uimohey haria yt paa'ewei'e hin i miit'in yt i'atu­wese i ehete turan are e. Po'og po'og eiwehum no Tupana kape po'og sa'awy'iwuat kai are e. Waku mi'i tã ewei'e — Waku kahato En Tupana katu­pono koitywy yt emohey haria i uimo­weuka'i kahato hap kaipyi atikuap ta'yn uito ti ehay moherep hat sese areĩne'en hap atikuap mesup waku ewei'e ro Tupana pe ehehay wepit hap wywo e Iesui temiit'in me.
MAT 5:13 Pywo ti rat uhemiit'in sese wo eipe pote uimo­herep haria eweikupte'en miit'in mu'e haria are e. Pywo pe uhehay kuap haria wo eipe pote uhehay moherep haria eweikupte'en miit'in py'asetpe are e. I'atuieĩne'en hap mowaku hanuaria ewy eweikupte'en are e. Ta'i ukyt ewywuat eipe aikotã mi'u mosẽ'ẽ hap ewywuaria wo eipe e. Mi'i hap ewy ti eweipyhu'at eipe miit'in py'asetpe e. Ma'ato karãpe ukyt yt hẽ'ẽ rakat i topyhu'at yt uwe i imosẽ'ẽ kuap mekewat e. Waku mipun wuano hawyi miit'in mi'akit akit no topyhu'at e. Yt naku i eweikupte'en ukyt nop takat ewy e. Pyno o hẽ'ẽ rakaria wo eweikupte'en e Iesui temiit'in me yity'ok tote.
MAT 5:14 Uimohey haria e eipe ti ariãty ewy ra'yn eweikupte'en mu'ap Tupana kapiat moherep miit'in miat hanuaria eipe aikotã ariãty wãtym muo mu'ap moẽtyhot haria ewywuaria eipe e. Ta'i aikotã yity'ok totiat tawa e'ariãty hẽtyhot kahato yi hot kape. Yt tuwemig kuap i mekewat yi hot piat tawa wãtym muat e. Aikope pyi aikope pyi heremo wãtym muo ariãty hẽtyhot pya kahato yity'ok totepyi pote e yt tuwemig kuap i mekewat tawa wãtym muo e. Mi'i hap ewy ariãty ewy kahato eipe miit'in py'asetpe uhemiit'in eipe pote uhehay moherep haria eipe pote e. Eiminug wakuap kaipyi miit'in eikuap meremo uimohey haria eipe hap ariãty ewywuat mu'ap Tupana kapiat moherep miit'in miat hanuaria eipe pote e.
MAT 5:15 Mi'i hap ewy ti eipe ariãty ewy eweikupte'en e. Wãtym mote miit'in topag ariãty ywaiti heiam sese pe ma'ato yt uwe i ariãty ipag neran yrysakag ywyt'okpype i e. Yt naku i ti mi'i tã watunug ma'ato waku heiam me yn waku aiũpe getap moẽtyhot hamo watopag waku. Mi'i hawyi ti yne ra'yn getap wiaria waku puo hewyry e.
MAT 5:16 Pyno ti ariãty hẽtyhot kahato hap ewy uimohey haria miit'in pu'ap Tupana kapiat moẽtyhot hamo eweikupte'en e. Atiky'esat yne eiminug wakuap ko'i heremo wuat'i akasa hamo i'ewyte Ai'ywot Tupana atipy piat mõtypot hamuat atiky'esat e Iesui temiit'in me yity'ok tote.
MAT 5:17 Uiwyria'in yt eiwa­nẽtup tei'o ariot mesuwat yi kape Tupana ehay Musei mimo­herep moma hamuat hap kape e. I'ewyte yt eiwa­nẽtup tei'o ariot mesuwat yi kape mekewat sa'awy'i­wuaria Tupana ehay enoi haria miwan monik hamuat hap kape katu­pono nimo te Tupana ehay moherep haria i'atuehay kahato yianmete uheĩne'en hap etiat ta'atu­henoi kahato are e. Kat i'atu'e kat i'atu'e hap ta'atu­mo­herep uhetiano hap e. I'atu'e hap uhetiano yne nug hamo ariot meikowo uiwyria'in e. Mi'i pote yt atimoma hin i sa'awy'i­wuaria Tupana ehay moherep haria Musei ewywuat katu­pono mi'iria uhetiat ta'atu­henoi kahato uhut hap owakai te e.
MAT 5:18 Katu­pono aikotã mesuwat yi at waty waikiru ko'i tukupte'en mot'i mi'iria i'ewyte Tupana ehay moherep haria nimuaria miwan ko'i te tukupte'en mot'i ma'ato po'og mot'i katu­pono wuat'i e'at piat Tupana ehay toĩne'en e. Pyno ti iwan hit ko'i Tupana ehay miwan etiat ko'i itig hap ko'i iwan hit hap ko'i Tupana ehay Musei miwan Tupana ehay moherep haria miwan topyhu'at aru wuat'i e'at pe. Yt karãpe i Tupana ehay miwan miat ikahuro aru e. Miwan miat yne Tupana e hap topyhu'at wuat'i e'at pe e. Yt sehay wẽtup i miwan miat ikahuro e Tupana. Pyno ti yt uwe i ipyhyp kuap Tupana e hap ko'i — Atunug aru e hap ko'i ta'i Tupana tunug kahato yne yne to'e hap ewywuat are e. — Atunug aru e miwan me pote tutunug aru to'e hap ewy e. Pywo tutunug aru to'e hap ewy are e. Pywo ti rat waikiru ko'i at ewaty yi ikahuro ma'ato Tupana ehay miwan miat torania topyhu'at aru wuat'i e'at pe e Iesui itotiaria pe miit'in sem me.
MAT 5:19 Mi'i tupono waku watunug yne kahato Tupana piat ainãpin hap ko'i miwan miat kurin kat iwato'in nakat are e katu­pono uwe uwe mekewat Tupana miky'esat miwan miat yt tutunug neran i Tupana piat ainãpin hap i'e hap yt tutunug i hawyi tohenoi henoi irania'in me — Yt naku i watunug Tupana piat ainãpin hap miwan miat ko'i ewy e hat ti aru yt uwe mimõ­typot no i ra'yn topyhu'at atipy pe e. Mi'i hat wyti aru miit'in mimohit sese wo topyhu'at atipy pe e. Ma'ato uwe uwe mekewat Tupana miky'esat ewy inug i'e hap miwan miat ewywuat mi'i hat tohenoi kahato irania'in me — Ta'i waku kahato watunug torania ainãpin Tupana piat hap ko'i miwan miat e hat wyti aru Tupana etama atipy piat pe po'og topyhu'at Tupana mimõ­typot no e Iesui yity'ok totiaria ta'apy­pueri haria pe.
MAT 5:20 Uipot­mu'eria e pywo pe ti eiwe'eg wo o ai'ywania wo'omu'e koro haria minug yt nakuat i hap ewywuat pupi e. Eiwe'eg wo o Tupana mõtypot yat piaria akag ko'i minug sa'ag ewywuat pupi e. I'ewyte eiwe'eg wo o Tupana ehay miwan saipepiat nug haria minug sa'ag ewywuat pupi e katu­pono yt po'og i eiwat i'atukai ehewaku hap pote ti aru yt karãpe i eiwehyt'ok aikope Tupana Morekuat no topyhu'at hap tote e topot­mu'eria pe.
MAT 5:21 Uiwyria'in e nimuat ainãpin haria ti Tupana ehay moherep haria hãpyk kahato aimu'e Tupana e hap ta'atuwan ma'ato ta'atuwan pytkai yt ta'atunug neran i. Mio tã e Tupana piat hap — Yt eti'auka tei'o miit e. Eti'auka miit pote waku surara po pe ereĩne'en ekuap hamo e. Pywo pe waku miit'in mi'auka wo ereĩne'en e Tupana sa'awy'i miwan me. Ma'ato eimu'e haria — Yt kan hamo i watunug Tupana piat mio tã e hap i'atu'e sa'ag e.
MAT 5:22 Uimohey haria koitywy po'og woro­ho'o­nãpin mi'i e hap ete e. Uwe uwe ipy'ahak at ka'ap topy'a pe wẽtup ok miit ete mi'i hat wyti miit auka hat ewywuano ra'yn topyhu'at e Tupana towa­nẽtup hawe e. I'ewyte uwe uwe to'e wẽtup ok pe topy'a pe — Yt kan hamo i en uiwa­nẽtup hawe e at ka'ap mi'i e hat pe — Woro'a­piheg aru e Tupana mi'i hat pe e. Ma'ato uwe uwe ipy'ahak sese wẽtup ok ete at ka'ap hawyi to'e — Motoro aria koro kape wuat'i pe yt kan hamo i en e topy'a pe at ka'ap mi'i e hat pe ti Tupana to'e — Woro'a­piheg aru aria koro wo e katu­pono mi'i e hat ewywuat wo'opot'auka hat sese wo ra'yn toĩne'en Tupana wanẽtup hawe e Iesui. Yt naku i aipy'a pe miit auka hat wato­pyhu'at Tupana ehamo are. Mi'i tã eweikupte'en mote Tupana mi'apiheg wo eweikupte'en e Iesui temiit'in me yity'ok tote.
MAT 5:23 Mi'i hawyi Iesui to'e i i'atuepe. — Karãpe etum neran Tupana pe emiium imõtypot hap ma'ato toĩne'en wẽtup ok miit ewanĩkap epy'ahak hap pote waku yt etum i emiium Tupana pe ma'ato waku etoiat ro emiium muat mekewat yparakai tote hawyi ereto ro ewanĩkap kape ti etunug ewy wo i ra'yn hamo e.
MAT 5:24 Mi'i hawyi — Uiwy ere atiky'esat kahato waure wo ereĩne'en uhepiat emõpy'ahak hap kai ere o e. Eiwo'o­wese hap toĩne'en i ra'yn iwywo hawyi waku era'aipok emiium muat sat hamo hawyi etum imiky'esat ewy. Waku pe ereĩne'en hawyi eiwo'o­wese hap etipuẽti i ra'yn hawyi o e Iesui temiit'in me.
MAT 5:25 Mi'i hawyi Iesui to'e i yity'ok totiaria pe — Uiwyria'in e karãpe wẽtup ok ewanĩkap tut surara'in wywo epyhik hamo morekuat wo'opyhik hawe pyno ewe'eg wo o mi'i hap e'at pe are e. Waku mu'ap upi etunug ni ipy'ahak takat ewy ok wo e. Waku meremo etunug mekewat ewanĩkap ewy ok wo i ra'yn mu'ap tote e ma'ato yt etimo­wese i yianmete pote yt naku i topyhu'at aru eete e katu­pono ewanĩkap aru eium morekuat pe yt naku i nug hat en sio waku rakat e hamo. — Yt naku i en e morekuat pote epag surara'in akag po pe ra'yn epyhik wo'opyhik hawiat wuat'i e'at pe hamo ra'yn e.
MAT 5:26 — Uimohey hat en mote ewe'eg wo o karãpe ewanĩkap ereto wo'opyhik hap kapiat turan e. Etikat kahato iwese hap mu'ap upi e. Yt pote wo'opyhik hawe ereĩne'en mot'i itote. Yt uwe i ikuap karania ewaty karania anu ereĩne'en epyhik hawe e. Mi'i hawyi ti epore­nõtem hap sa'up niatpo kahato ra'yn iwato kahato ra'yn toĩne'en e. Pyno ti po'og waku mu'ap upi ehã'ãg kahato ewy inug hamo ereto hat ewanĩkap e. Etunug o ewanĩkap merep ewy ok wo i ra'yn are ehepe uipot­po'o­roria e Iesui temiit'in me yity'ok tote.
MAT 5:27 — Uipot­mu'eria e watikuap ta'yn aikotã sa'awy'iwuat Tupana ehay enoi hat Musei to'e — Yt erepehik tei'o wẽtup wary ete wẽtup e'aito ete e. Ewary wywo yn o ewaire e'aito wywo yn o ewaire e hap e. Pywo kahato ainãpin Musei e.
MAT 5:28 Musei e hap mohag hat ri uito. Musei e hap ete woro­ho'o­nãpin eipe — Yt naku i kahato eraha'at kahato hary­poria kape ihainia kape erepehik teran hap wywo mekewat hary­poria wywo mekewat ihainia wywo epy'a pe ewanẽtup hawe. Mi'i tã etunug mote yt naku i kahato rakat no ereĩne'en Tupana wanẽtup hawe e.
MAT 5:29 Pyno eha wo eraha'at hary­poria kape ihainia kape mi'i hawyi ewanẽtup hawe ere'e — Arepehik teran mekewat hary­poria ete mekewat ihainia ete ere ewanẽtup hawe pote etihep o eha mehĩ'in mana'in katu­pono pywo ti rat eha ti e'aparap hap nug hap topyhu'at are e. Mi'i pote waku etihep eha hawyi etipun pya ekai are e. Pywo ti rat waku po'og kokawiat ihasik takano ereke atipy pe ma'ato typy kawiat eha wywo ereto aria kape are e.
MAT 5:30 I'ewyte epo kokawiat wo etima'at teran wẽtup ok hary­poria wẽtup ok ihainia sewaire hamo mi'i pote waku etitek epo kokawiat mi'i hawyi etipun mi'i pya ra'yn ekai are katu­pono po'og waku mesuwe ereĩne'en ipo tut rakat ipy tut rakat ihasik takat wo ereĩne'en mesuwe sio torania epo wywo eha wywo epy wywo ereke aria koro pe are aikope miit'in ho'opot kahato mi'i hap kape are e ti Iesui. Po'og waku ereke Tupana etama pe wẽtup epo wywo yn typy epo wywo ereke aria pe ho'opot hamo e Iesui miit'in sem me yity'ok tote.
MAT 5:31 Mi'i hawyi po'og Iesui to'e ta'apy­pueri haria pe — Pywo pe ti mehĩ'in mana'in sa'awy'i ti mio tã i'atu'e nagnia — Etoiat teran ehary'i e'aito mi'i pote waku etunug iwan me morekuat wywo e miwan me hawyi waku eiwo'o'atoiat i'atu'e sa'awy'i aha'ase'i'in mio tã i'atu'e.
MAT 5:32 Ma'ato Uito ti yt mio tã are'e hin i woro­ho'omu'e e ma'ato Uito ti mio tã are — Yt karamuo tei'o ehary'i etoiat e'aito etoiat are ra'yn woro­ho'omu'e e. Ma'ato etoiat ehary'i e'aito mi'i pote ti aru yt naku i kahato etunug Tupana wanẽtup hawe are ra'yn katu­pono etoiat ehary'i e'aito mi'i hawyi ti meiũran wẽtup ok wywo i ra'yn e'aito ehary'i. Mi'i hawyi ti typy e'aito ehary'i rakano ra'yn ereĩne'en Tupana wanẽtup hawe e. Pyno yt naku i ti mi'i tã are e Iesui. I'ewyte are'e mesuwe ma'ato ehary'i e'aito hewaire hewaire toĩne'en irania'in wywo rakano mote waku etoiat ehary'i e'aito are ma'ato mi'i e hap ete yn mesuwe are. Pyno Uito yt sa'awy'iwuat nagnia yt e hap ewy hin i woro­ho'omu'e. Mi'iria ti eimu'e — Waku etoiat ehary'i waku etoiat e'aito morekuat ehay miwan miat upi yt etiky'esat i po'og i pote i'atu'e sa'ag. Ma'ato Uito ti uiweupi ra'yn uhehay. Pyno yt karãpe i tei'o etoiat ehary'i e'aito are ra'yn e.
MAT 5:33 Watikuap ta'yn aikotã sa'awy'i nagnia ainãpin kahato — Etunug no mi'i tã aru — Atunug e'e hap Tupana set upi ewy i'atu'e hap. Pyno waku wato'e miit'in ehamo — Yt atunug aru i mio tã ui'e hap mi'i pote ti aru waku ra'yn Tupana uhaty'i haty'i waku wato'e wuat'i ehamo i'atu'e aha'ase'i'in ahepe miwan me.
MAT 5:34 Ma'ato Uito ti yt nagnia sa'awy'i­wuaria e hap yt ewy i ra'yn ahenoi ehepe e. Uito ti atiky'esat etunug yne e'e hap ewywuat. Waku ti watunug ai'e hap are e. Pywo pe yn ihay rakat.
MAT 5:35 — Atunug aru wato'e pote waku watunug ai'e hap ok tã e Iesui. Pyno yt naku i watu­we­pehik ai'e hap ete nagnia aimu'e hap ewy — Yt atunug aru i pote waku mesuwat mytyp ui'apiheg. Yt naku i watu­we­pehik ai'e hap ete — Atunug aru ai'e hap ete are. — Pyno waku ra'yn aru uimikoi ko'i uiko piat topap yne yt atunug aru i ui'e hap ewy ai'e hap yt naku i wato'e are katu­pono mesuwat mytyp ti Tupana pu'ap hap are katu­pono mesuwat aiko ko'i i'ewyte ahe'yi mesuwe yt aiwat hin i are. Ta'i Tupana wat ko'i wyti are e. Pyno yt naku i ti aheso hap wati­pehik Tupana set upi are — Yt atunug i pote waku tawa wato Ieru­sarẽi piaria ui'apiheg yt ere'e tei'o katu­pono tawa wato Ieru­sarẽi ti yt aiwat i Tupana wuanuat i'ewyte mekewat Tupana Mipo'oro Wuat'i Porekuat Porekuat nuat etawa ti Ieru­sarẽi topyhu'at pãi are e Iesui tuwepe.
MAT 5:36 — Ma'ato aheso pote aru waku ui'asap kytsig nakat topyhu'at yt etipehik tei'o — Atunug aru ai'e hap ete katu­pono yt uwe i ti inug kuap ai'asap ikytsig hap tuwa­nẽtup hawe are e. Yt uwe i inug kuap tuwa­nẽtup hawe to'apyig hap are.
MAT 5:37 Pyno waku atunug aru ai'e hap yn mi'i hawyi waku watunug ai'e hap ok tã are e Iesui. Ma'ato yt watunug neran i pote — Atunug aru yt wato'e i waku e. Mi'i pote ti aru pywuat sehay yn tuwẽtem aiwẽ pyi are katu­pono pywuat sese sehay yn atiky'esat uipot­mu'eria wẽ kaipyi are e. Ma'ato yt pywo piat i — Atunug aru ewei'e mi'i pote ti aru ta'i ahiag ehay upiat myhu'at haria wo eweipyhu'at are e Iesui topot­mu'eria pe yity'ok totiaria to'apy­pueri haria pe.
MAT 5:38 Ta'i watikuap kahato ti aikotã sa'awy'i nagnia ainãpin hap e. Mio tã i'atu'e miwan me — Karãpe wẽtup ok eha apok e'ahyk hawe mi'i pote waku era'apyk etiha'apok eha apok sa'up mo e. I'ewyte karãpe wẽtup ok eiãi pik ahyk hawe mi'i pote i'ewyte era'apyk etihãipik mi'i hat i'atu'e sa'awy'i nagnia ahepe ainãpin hap e. Ma'ato Uito yt mi'i tã are hin i ra'yn woro­ho'o­nãpin e. Pyno karãpe wẽtup ok ai'ahyk mi'i pote waku yt watu­wepyk hin i are e.
MAT 5:39 I'ewyte ewanĩkap eete tunug sa'ag mi'i hat i'ewyte wy yt erepyk tei'o are ti Uito woro­ho'omu'e yt sa'awy'iwuat nagnia yt wo'omu'e hap ewy i ra'yn e. I'ewyte epo sese kawiano wẽtup ok eowa pe ete e'ahyk mi'i pote yt erepyk tei'o ma'ato mio tã ere'e ro e'ahyk hat pe — Pyno waku kokai i ro uipo ran kai i'ewyte waku ui'ahyk mehĩ mana waku wato'e e.
MAT 5:40 Uito ti yt woro­nãpin hin i irania'in ewy. Mio tã yn are'e — Yt etipoepyk tei'o are aikotã aikotã sa'ag nug etiat hat are. Karãpe ewanĩkap ewa pe tek mi'i pote o kokai ere'e na'yn are. Karãpe ewanĩkap epohari teran ekat ete mi'i hawyi yt epy'ahak tei'o ewanĩkap ete are e. Mi'i hawyi waku ekat imiky'esat ewy etum po'og imiky'esat kai are e. Ewanĩkap tiky'esat e'yni pote etum. Esokpe toiky'esat pote etum. Ekamisa toiky'esat pote etum. Ma'ato waku po'og na'yn imiky'esat kai etum are. Toihep ekamisa hawyi waku i'ewyte esirara etum uimohey hap moherep hamo e Iesui.
MAT 5:41 I'ewyte karãpe ewanĩkap to'e — Etioto ro uhekare'en e my'ahaktu e mi'i hawyi waku perup'i puo — Ta'i mehĩ mana emiky'esat ewy atunug waku wato'e perup'i puo. Mi'i hawyi waku imiky'esat sakpuat ewetunug uimohey hap moherep ewanĩ­kaptia iky'e hap moherep hamo e Iesui.
MAT 5:42 — Karãpe wẽtup ok hẽtup ekare'en kat ko'i kat ko'i mi'i pote waku etum imiky'esat ewy are uimohey epiat hat moherep hamo are e. I'ewyte karãpe wẽtup ok tipuru ekat ko'i pote waku etipuru ekat tope uimohey epiat hap moherep hamo iky'e hap moherep hamo are'e e Iesui temiit'in me yity'ok tote.
MAT 5:43 Mi'i hawyi Iesui to'e i itotiaria pe — Mio tã e miwan me sa'awy'i­wuaria ainãpin hanuaria — Waku ti aiwyria'in sese yn wati'a­tuky'e kahato i'atu'e ma'ato ti waku ahewa­nĩ­kaptia ete haiwot takat ewy ipy'ahak takat ewy watoĩne'en i'atu'e sa'awy'iwuat ainãpin haria.
MAT 5:44 Ma'ato Uito wẽtup sehay wo woro­nãpin yt i'atu'e hap ewy i. Uito ti mio tã are woro­ho'o­nãpin e. Pyno ewei'atuky'e ro ewanĩ­kaptia are. Pyno waku ahaty'i haty'i haria upi wahẽtup Tupana pe — Eti'atu­poi­tyro o uhaty'i haty'i haria Papai waku wato'e are'e.
MAT 5:45 Mi'i tã watunug mote aru Ai'ywot atipy piat sa'yru'in saki'yt'in no wato­pyhu'at kahato katu­pono ti Ai'ywot atipy piat ti'atuky'e kahato tewa­nĩ­kaptia are e. Ta'i toimo­herep kahato i'atuky'e hap katu­pono toipo'oro i'aman at i'atu­mikoi moehãite hamo e. Ta'i toi'atu­poi­tyro yt toky'e hin i haria are. Ta'i Ai'ywot atipy piat ti'atuky'e kahato tewa­nĩ­kaptia torania e. Yt nakuat i nug haria ko kape toipo'oro i'aman at toky'e haria mikoi ko'i poityro hamo ma'ato i'ewyte yt toky'e haria i mikoi ko'i kape toipo'oro wy i'aman at i'atuky'e hap moherep hamo are e. Pyno to'o'ewy'ewy toi'atuky'e towyria'in tewa­nĩ­kaptia are e. Mi'i tã ewy ti Tupana toĩne'en e. Pyno waku Tupana ewy watunug. Ewetunug wakuap yne miit'in me Ai'ywot atipy piat minug ewy waku watunug are e. Mi'i tã watunug mote ti aru irania'in te'eraha'at ahepiat miit'in yne ky'e hap kape hawyi ti aru te'eru­wa­nẽtup hawyi — Ta'i Tupana sa'yru'in Tupana saki'yt'in mote ti meke tã ta'atuky'e miit'in i'atu'e wyti aru e Iesui.
MAT 5:46 Katu­pono ti mesu­wa­ro­tiaria yt Tupana mohey haria i tiky'e ta'atuky'e haria sese yn e. Ma'ato yt ta'atuky'e i haria ti yt ta'atuky'e i ra'yn e. Ma'ato mi'iria ewywuat eiky'e haria yn na'yn ewei'atuky'e miit'in mote ti aru mesu­wa­ro­tiaria ewy eweipyhu'at are e. Aiky'e haria yn wati­po­wyro pote yt Ai'ywot atipy piat yt ewy hin i wato­pyhu'at are e. Iwese rakaria wo watoĩne'en ahepiat iwese haria kape yn mote yt kat i ha'up wati­puẽti aru Ai'ywot atipy piat kaipyi are e. Ta'i marak'aria ti'atuky'e kuap ta'atuky'e haria ma'ato atiky'esat ewei'atuky'e kahato yt eiky'e hin i haria are.
MAT 5:47 I'ewyte ti waku wati'a­tu­wesat wuat'i miit'in are e. Yt naku i wati'a­tu­wesat aiwyria'in yn are katu­pono ti yne ti mesuwat yi tote ta'atu­wyria'in wesat kuap are. I'ewyte yt Tupana mohey haria i iwesat kuap ta'atu­wyria'in are. Pyno waku ti yne wati'a­tuky'e are e. — Pyno ereke uhyt mana mimi wato'e aiky'e haria pe yn mote mesu­wa­ro­tiaria ewywuat watoĩne'en katu­pono mi'iria ti ta'atu­wyria'in ta'atuky'e haria sese pe yn — Ereke ro era'apyk mehĩ mana aimi'u ra'yn i'atu'e ma'ato yt ta'atu­wesat i ta'atue­wa­nĩ­kaptia are. Ma'ato mi'i tã aito pote i'atu'e­wywuat wato­pyhu'at mesuwe yi tote irania'in yt Tupana mohey haria i ewywuat e. Yt naku i rat mi'i tã aito pote are e.
MAT 5:48 Pyno waku wato­pyhu'at hãpyk kahato rakaria wo aikotã Ai'ywot atipy piat waku rakat ewy waku watunug are e. Ai'ywot atipy piat Aiky'e kahato hano toĩne'en are e. Iwese kahato iperup'i kahato tewa­nĩ­kaptia ete towyria'in ete are e. Pyno waku Tupana ewywuat kahato wato­pyhu'at mesu­wa­ro­tiaria ky'e hap upi are e. Pyno toran na'yn mesup einãpin hap e Iesui ahepe tomohey haria pe mekewat yity'ok tote miit'in sem toi'atumu'e hap tote.
MAT 6:1 Pyno ti mi'i hawyi po'og Iesui to'e miit'in sem me yity'ok tote — Uiwyria'in e pyno yt naku i kahato watu­we­mõ­typot Tupana potpap watunug turan e. Yt naku i kahato miit'in ehamo miit'in miat aimõ­typot hamo wewo'i watunug Tupana potpap turan e. Pyno waku ti Tupana potpap watunug imõtypot hamo yn e. Pyno waku Tupana mõtypot hap yn aiwa­nẽtup hawe watunug imiky'esat ewy. Ma'ato aimõ­typot miit'in kaipywiat hap yn watikat pote yt kat i aimõ­typot hap sese wati­puẽti Ai'ywot atipy piat kaipywiat e. Pyno waku miit'in wati'a­tu­po­wyro kat ko'i kat ko'i hap ete ma'ato aiwa­nẽtup hawe yt aimõ­typot hamo i e. Waku Ai'ywot atipy piat mõtypot hamo aiwa­nẽtup hawe e.
MAT 6:2 Mi'i pote karãpe hatek takat put'ok'e ahowawi mi'i pote waku wati­po­wyro kahato ma'ato yt miit'in miat aimõ­typot hamo i waku wati­po­wyro e. Ma'ato Yt naku i aiwa­nẽtup hawe — Atipo­wyro mi'i miit wuat'i ehamo uimõ­typot kahato miit'in mesuwe hamo pãi yt naku i wato'e e. Yt naku i ahehay aiwa­nẽtup hawe aremo­wato wuat'i ehamo uiminug waku ko'i wo e. Yt naku i aito typy wanẽtup haria ewy watoĩne'en e. Kat pote mi'iria ti Tupana mõtypot yat pe tuwehyt'ok kahato Tupana mõtypot haria ewy te'eru­wa'a­tunug ma'ato yt pywo piat i katu­pono — Uimõ­typot mono ta'atu'e hap yn ta'atu­wa­nẽtup hawe e. Mi'iria ti to'owatka'i ti Tupana mõtypot hamuat tuwak hamo — To'iro to'iro Tupana mõtypot hamo i'atu'e i'atuehay ma'ato yt pywo pe i katu­pono i'atupy'a pe — Uruto ti po'og eikai Tupana mohey haria i'atu'e ta'atu­wa­nẽtup hawe yt kat i Tupana mõtypot sese hap i'atukai e. Ta'i mi'iria wyti getap upi upi oken upi upi Tupana mõtypot hap ta'atunug te'eru­wepe te'eru­wa­nẽtup hawe — Uruto po'og urumõ­typot urumohey ta'atu'e haype e. Mi'iria ti te'eru­wa­nẽtup hawe ti typy wanẽtup haria e. I'ewyte ti miit'in ehamo oken upi getap upi ti ta'atu'a­tumu'e Tupana ehay miit'in me haty wo ma'ato miit'in ehamo — Waku uimõ­typot miit'in ta'atu'e haype e. Pyno pywo pe ti are'e mi'i hap ewy ewetunug mote wyti aru yt kat i ti aru Tupana kaipywiat eimõ­typot hamuat e. Miit'in mimõ­typot ko'i yn eweikupte'en mesuwe wen ma'ato yt karãpe i aru Tupana mimõ­typot wo eweikupte'en e Iesui miit'in sem me yity'ok tote.
MAT 6:3 Mi'i hawyi po'og Iesui to'e itotiaria pe — Uiwyria'in waku kahato wati­po­wyro ihaky'e'i rakaria Tupana ehamo ikuap hamo e. Karãpe satek poria wati'a­tu­po­wyro waku watum i'atu­po­wyro hap mig'i wo are yt uwe i mikuap mo i ahepiat e. Waku Tupana kape yn aheha imõtypot hamuat. Waku ti yt wahenoi i aimiium mekewat ahepiat miit'in powyro hap wuat'i pe aiwe­mõ­typot hamo e.
MAT 6:4 Waku ti Tupana kapiat aiwa­tetup hap wywo yn wati'a­tu­po­wyro miit'in e. Yt naku i wahenoi henoi irania'in me kat kat hap watunug Tupana mõtypot hamuat e. Waku ti Tupana kapiat aiwa­nẽtup wywo yn wati­po­wyro ihaky'e'i rakaria e. Ai'ywot atipy piat ta'akasa kahato yne aiminug mig'i wuat ko'i e. Mi'i pote waku Tupana ehamo wati'a­tu­po­wyro irania'in e. Waku Tupana tuwehum ahepe hap yn watikat e. Waku aheha Tupana kape yn watunug waku irania'in powyro hap turan e. Waku wati'a­tu­po­wyro miit'in Tupana ehamo Tupana mõtypot hamo e Iesui ahepe.
MAT 6:5 — Uiwyria'in ahehay Tupana kapiat ahehay ikahu rakat irania'in ehamo aiwe­mõ­typot hamo uito po'og Tupana kapiat uhehay ikahu rakat e kuap takat eikai ai'e hap aiwa­nẽtup hawe yt naku i ahehay e. Yt naku i typy ahẽgu wywo ahehay Tupana kape miit'in miat aimõ­typot hamo aiwe­mõ­typot hamo e. Pywo ti rat irania'in mesuwat yi totiaria i'atuehay kahato Tupana mõtypot hawe miit'in me i'atuehay se Tupana kape ma'ato yt pywo pe i i'atuehay e. Aikope aikope miit'in te'eru­wa'a­tunug hap tote i'atuehay pot'i kahato Tupana kape — Waku uimõ­typot miit'in ta'atu'e haype. Pyno eiwe'eg wo o miit'in miat eimõ­typot hap pupi are katu­pono miit'in miat ne'i eimõ­typot hap eweiky'esat pote mi'i yn topyhu'at eha'up mo e. Mi'i hap kape eiwe­wa­nẽtup pote yt kat i i Tupana kaipywiat Tupana wehum ehetiat hap e.
MAT 6:6 Pyno waku karãpe ahehay teran Tupana wywo pote waku wateke aikope aikope miitin yt uwe i ikuap ehamo i waku ahehay Tupana kape mig'i wo yt heremo pyi i ahehay Ai'ywot yn ikuap ahehay e. Mi'i hawyi Tupana tikuap ahehay mig'i wuat aipy'a pe pote Tupana tuwehum kahato ahowawi hawyi tutum ahepe aimiẽtup e. Ta'i mig'i wo wahẽtup wen ma'ato meiũran tutum na'yn aimiẽtup hawyi heremo kahato topyhu'at Tupana miium ko'i wuat'i ehamo e Iesui.
MAT 6:7 Uiwyria'in karãpe miit'in py'asetpiat ahehay Tupana kapiat turan yt naku i wato'e aipy'a pe — Uhehay se Tupana kapiat pote mono miit'in mimõ­typot no ra'yn areĩne'en yt naku i wato'e e. Mi'i tã wato'e aiwa­nẽtup hawe pote typy ihay rakat ewy wato­pyhu'at e. Yt naku i typy ihay rakaria wo watoĩne'en katu­pono mi'iria Tupana kapiat ta'atuehay turan i'atuehay ywop kahato miit'in miat ta'atuehay ikahu kahato rakat hap kuap hamo i'atuehay. Yt naku i mi'iria ewy wato­pyhu'at Tupana wanẽtup hawe e. Ta'i tukupte'en miit'in mesu­wa­ro­tiaria ihay su'at at ka'ap haria i'atuehay kahato Tupana kape wẽtup sehay ahut ewy ta'atu­wẽpap kahato e. Yt atiky'esat i uimohey haria ahut ko'i ewywuat i'atu­misu'at su'at ko'i e. Waku aipy'a pyi ahehay Tupana wywo e.
MAT 6:8 Waku ahehay Tupana wywo wen ma'ato ti yt naku i hupi te i hupi te i wahu'at wahu'at sehay Tupana kape are katu­pono mio tã ehehay Tupana wywo pote irania'in yt uimohey i haria ewywuat eweikupte'en e. Pywo pe ti Ai'ywot atipy piat tikuap kahato aimiẽtup tewawiat wahẽtup hap e'yianmete toikuap ta'yn kat ko'i kat ko'i aimiẽtup ko'i toikuap. Toikuap sakpo aimi­ky'esat sese ko'i katu­pono hewaure ka'a kahato ahehay kape aiwa­nẽtup hap yt wahẽtup i te pytkai e.
MAT 6:9 Uimohey haria woro­ho'omu'e teran aikotã ahehay Tupana wywo hap ahenoi teran e Iesui. Waku pyno wato'e
MAT 6:10 Uru'ywot atipy piat uruiky'e kahato En e. Tupana pywo pe ti ikahu kahato eset Tupana. Eset ri po'og ikahu torania kai uruipuẽti e. Papai uruiky'esat kahato ereĩne'en wuat'i miit'in Akag Koro wo mesuwat yi tote miit'in py'asetpe aikotã ereĩne'en Wuat'i Potypot no atipy pe hap ewy hap uruiky'esat e. Papai uruiky'esat kahato torania miit'in emiky'esat ewywuat nug hanuaria wo tukupte'en aikotã atipy piaria tunug emiky'esat yn hap ko'i ewywuat hap uruiky'esat kahato mesuwe e.
MAT 6:11 Tupana urupoi o mesup e'at pe urumi'u wo urue'u'i wo e.
MAT 6:12 Tupana waure wo ereĩne'en ema'at hap ko'i kai aikotã uruto urutu­kupte'en waure wo uruma'at hap ko'i kai e.
MAT 6:13 Tupana uru'ykesat o pya kahato ahiag uruiã'ãg yt naku i nug hap kaipyi katu­pono urui'atoiat teran torania uruminug sa'ag hap ko'i e. Tupana En ni Wuat'i Potypot nuat wuat'i e'at pe e. Tupana En ni po'og esaika wuat'i kai e. Tupana En ni po'og po'og wuat'i mimõ­typot no wuat'i kai W A K U Pyno waku aipy'a pyi ahehay Tupana wywo. Yt naku i watu­wesu'at'i su'at'i ui'e hap ahut ewy e Iesui ahepe mekewat yity'ok tote.
MAT 6:14 — Pyno uiwyria'in po'og ahenoi teran miit'in miat aima'at hap waure wo hap etiat. Karãpeĩ eipe waure wo eweikupte'en eima'at irania'in miat hap ko'i kai mi'i hap ewy te Ai'ywot atipy piat waure wo ehepiat toma'at hap ko'i kai topyhu'at atipy pe e Iesui.
MAT 6:15 Ma'ato karãpe ewei'e — Yt karãpe i waure wo areĩne'en uhyt'i minug sa'ag ete mimi mana minug uima'at hap ko'i kai ewei'e pote i'ewyte yt karãpe i Ai'ywot atipy piat waure wo toĩne'en eiminug sa'ag ko'i hap kai e Iesui temiit'in me yity'ok tote.
MAT 6:16 Uiwyria'in karãpe mesuwe yt kat i watu'u ahehay Tupana wywo hap yn watunug neran mi'i hap e'at pe waku mig'i wo Tupana ehamo haype watu­we­mosy'at Tupana yn ikuap hamo e. Yt naku i wahenoi henoi irania'in me aiwe­mosy'at hap Tupana kapiat hap e. Ma'ato waku watu­we­mosy'at mig'i wo Tupana yn ikuap aiwe­mosy'at hap tewawiat ahehay teran hap e'at pe e. Yt naku i wati­mo­herep aiwe­mosy'at hap irania'in me aheha arot'i hamo ahowa arot'i hamo yt naku i wati­mo­herep — Aremosy'at kahato mesup katu­pono uhehay teran Tupana wywo at ka'ap ai'e hap. Yt naku i wati­mo­herep ahowa ete ahehay ete aiwe­mosy'at hap Tupana kapiat hap e. Ma'ato watunug mote typy ihay rakaria ewywuaria watu­kupte'en katu­pono mi'i haria timo­herep teran ta'atu­we­mosy'at hap wuat'i miit'in me. Te'eru­we­mõ­typot hap ta'atukat kahato ta'atu­we­mosy'at hap ko'i ma'ato yt naku i watu­we­mo­herep ahehay arot'i hamo ahowa arot'i hamo aiwe­mosy'at Tupana kapiat hap e. Yt naku i typy ihay rakaria ewy wato­pyhu'at e katu­pono typy ihay rakaria timo­herep teran ta'atu­we­mosy'at hap upi miit'in me ikuap hamo te'eru­we­mõ­typot hamo e. — Ta'i en waku kahato Tupana kapiat wemosy'at hat i'atu'e hap ky'ewi ta'atukat haype. Typy ihay rakaria tikat kahato miit'in wehum ta'atuetiat hap e. Miit'in wehum ta'atuetiat hap ta'atu­puẽti kahato mesuwe wen ma'ato mi'i hap yn topyhu'at i'atusa'up mo katu­pono yt kat i Tupana wehum i'atuetiat hap topyhu'at wuat'i e'at pe e.
MAT 6:17 Mi'i tupono ti po'og waku watu­we­mo­kahu yn Tupana kapiat aiwe­mosy'at hap e'at pe e. Waku watu­weo­wasei hawyi watu­we'apin hawyi watu­we­painug aikotã watunug wuat'i e'at pe hap ewy hawyi waku watu­we­mosy'at Tupana ehamo Tupana yn ikuap hamo e. Mi'i hap ewy ti waku aiwe­mosy'at Tupana kapiat hap watunug yt uwe i mikuap mo e.
MAT 6:18 Mi'i tã watunug mote ti yt uwe i ikuap aiwe­mosy'at Tupana kapiat hap yt heremuat i rakat e. Ai'ywot Tupana yn ikuap katu­pono ti Ai'ywot yne mig'i wuat minug ko'i ikuap yne e. Mi'i tupono ti mig'i wuat aiwe­mosy'at hap toikuap miit'in yt uwe i ikuap pytkai i. Mi'i hawyi Tupana tuwehum ahete hawyi tutum ahepe aimiẽtup sa'up ahepe wuat'i ehamo e Iesui ta'apy­pueri haria pe.
MAT 6:19 Uimohey haria yt naku i mesuwat yi tote yn ahekare'en e. Yt naku i ahekat mo wato hap kape yn watu­we­wa­nẽtup at ka'ap e. Mesu­wa­rotiat yn ahekare'en mote meiũran aru yt kat i topyhu'at atipy pe e katu­pono mesu­wa­rotiat ahekat yn tukupte'en mote meiũran tuwei­motyk yne ahekat katu­pono ahekat mesu­wa­rotiat yt tukupte'en mot'i hin i e. Uiwyria'in mesu­wa­rotiat yn ahekat pote meiũran sero'ok'e haria wano topyhu'at ahekat sio nupi'a mi'u wo ikahu rakat topyhu'at sio i'ytyk mi'u wo topyhu'at ahekare'en ko'i ikahu kahato sa'awy'i pytkai. Mesuwe yn wati'a­tunug ahekat pote yt kat i topyhu'at irane aru atipy pe e.
MAT 6:20 Uipot­mu'eria pywo ti po'og waku wati'a­tunug ahekat atipy pe katu­pono iheg me kahato toĩne'en itote wuat'i e'at pe e. Itote ti yt kat i ahekat wuat'i e'at piat u kuap haria are'e yt kat i nupi'a itote. Sero'ok'e haria yt uwe i itote e. Yt kat i i'ytyk hap atipy pe e. Mi'i pote waku watum ahekat Tupana pe mesu­wepyi aimiium ko'i upi e. Mi'i hawyi toĩne'en itote. Put'okwato'e itote hawyi ti aru tutum yne aimi­po'oro ahekat e.
MAT 6:21 Ahekare'en watopag yne atipy pe Tupana po pe pote ti aiwa­nẽtup hap sese i'ewyte toĩne'en at ka'ap Tupana kape atipy kape e. Ma'ato mesu­wa­rote yn ahekat wati'a­tunug pote i'ewyte aiwa­nẽtup hap mesu­wa­rote yn topyhu'at at ka'ap e Iesui tomi­mu'eria pe mekewat yity'ok totiaria pe miit'in typy'i rakaria ehamo.
MAT 6:22 — Uheka­tu­wyria e aheha wo yn ni wata'a­kasa kuap e. Mi'i tupono ti waku aheha­pytig kahato e. Aheha ihãite pote ti waku yne heremo yne mu'ap upi katu­pono ihot'ok puat hewyry rakaria ewywuaria wo watu­kupte'en e.
MAT 6:23 Ma'ato yt aheha­pytig i pote ti yt heremo kahato i kat ko'i kat ko'i ai'akasa hap ko'i yt heremo kahato i e. Mi'i e hap ewy ti yt eweimohey i pote aikotã i'ypyryp sese puo ehewyry hap ewy eweipyhu'at eiwa­nẽtup hawe e. Pywo ti rat eheha mimohey hap yt kat i Tupana akasa hap pote i'ypyryp sese puo ti rat eweikupte'en yt ihapytig i rakat ewy eiko­hye­wyry atipy kape yt Tupana mohey hap i eheha piat pote e Iesui itotiaria pe.
MAT 6:24 — Uhemiit'in pywo ti rat yt naku i kahato watunug typy ok ahetu­pana e. Yt naku i typy ok aika'iwat no are katu­pono typy ok aipo'oro motpap nug hamuat pote yt to'o'ewy hin i aipo'oro e. Mi'i hap ewy yt naku i typy ahetu­pana e. Ahete aika'iwat typy ok toĩne'en hawyi yt naku i kahato e. Pywo ti wẽtup ok yn aika'iwat pote mi'i hat watiky'e kahato. Ma'ato typy ok toĩne'en wẽtup ok watiky'e po'og hawyi wẽtup ok yt watiky'e hin i sio wẽtup ok miky'esat ewy watunug neran pote wẽtup ok miky'esat ewy yt watunug neran hin i e. Mi'i hawyi ai'akag'aia hap yn ahete typy ai'akag hawyi e. Yt naku i kahato typy aipo'oro hano e. Mi'i hap ewy kahato yt naku i kahato typy ahetu­pana hawyi e. Yt naku i watunug ahekat ne'i ahetu­pana wo e. Yt naku i kahato ahekare'en sok hap ky'ewi sese hap kape yn aipotpap hap. Ahekat ky'ewi yn toĩne'en aikai pote mi'i hawyi yt karãpe i Tupana sese watikuap e. Ahekat toĩne'en Tupana wo aheĩne'en turan mi'i pote yt karãpe i Tupana sese topyhu'at Ahetu­pana wo Aipo­typot no e. Yt wato­mohey kuap i typy ok ahetu­pana wo e. Mi'i tupono waku Tupana yn Aipo­typot Koro wo topyhu'at e. Mi'i hawyi waku Tupana miky'esat yn waku watunug e Iesui ahepe yity'ok toto.
MAT 6:25 Mi'i tupono yt naku i watu­wa­nẽtup ko'i ko'i — Aikope pyi aru aikope pyi aru aimi'u ahe'u'i ahesokpe ahesapo hy. Aikope pyi aru aikope pyi aru aheĩne'en hap ai'e hap kape yn yt naku i aiwa­nẽtup ko'i ko'i at ka'ap hap are katu­pono ti aiwepit hap sese aheĩne'en hap sese yt tut i aimi'u wato hap kaipyi e. Ta'i aiwepit hap sese yt tut i ahe'u'i kahato hap kaipyi ahesokpe kahu kahato hap kaipyi e.
MAT 6:26 — Pyno ti rat waku wateha'at weitaria ewawi i'atu­wepit hap kape katu­pono weitaria ti te'eru­wepy kahato katu­pono i'atu­wepit at ka'ap kahato yt karãpe i — Uiku'uro aru yt kat i uimi'u pote yt i'atu'e i. Waku atikoi hawyi atipirik kahato uimi'u pãi an yt pote uiku'uro uhesy'at hap upi yt i'atu'e i pytkai te'eru­wehum Tupana kape e. Yt kat i i'atue'u'i ahyt sok i'atue'y­pa­rakai tote i'atu'yat koro ko'i pe pytkai i'atu­wepit at ka'ap e. Te'eru­wehum kahato weitaria ko'i katu­pono Ai'ywot atipy piat ti'atupoi kahato torania weitaria wuat'i e'at pe toi'atue­ropat kahato weitaria e. Uiwyria'in e aito ti po'og po'og Tupana wanẽtup hawe weitaria kai are mi'i tupono kahu ahowawi po'og po'og Ai'ywot atipy piat tuwa­nẽtup weitaria ewawiat hap kai e. Ta'i po'og aito weitaria ko'i kai e. Mi'i pote waku wato­mohey Tupana ai'atupoi wuat'i e'at piat hap e. Waku wato­mohey weitaria ewy e.
MAT 6:27 Yt naku i ti watu­wa­nẽtup ko'i ko'i hap — Uiku'uro apuru sio apuru yt ai'e hap kape katu­pono mi'i yt aimoieĩne'en mot'i kuap i watu­wa­nẽtup at ka'ap — Uiku'uro apuru sio apuru yt ai'e hap kape pytkai e.
MAT 6:28 Yt naku i ti paawato'e — Aikope aikope som ahesokpe wati­puẽti aru ai'e hap kape yn watu­we­wa­nẽtup ko'i ko'i e. Po'og ni waku watu­wa­nẽtup ipohyt ko'i kape aikotã te'eru­we­painug hap ko'i kape e. Mohyt yt te'eru­wa­nẽtup ko'i ko'i hin i — Aikope pyi aru uhesokpe e hap kape yt i'atu'e hin i e. I'ewyte ipohyt yt tuwe­sokpe pi'ig hin i at ka'ap te'eru­we­painug hamuat e.
MAT 6:29 Pywo pe ti are'e ehepe sa'awy'i aha'ase'i mesu­wa­rote aipo­rekuat pot Sarumãu esokpe ti kahuria kahato imehit kawiat Uru kawiat. Ikahu sese hesokpe are ma'ato morekuat Sarumãu yt put'ok'e hin i ti mesu­wa­rotiat ipohyt ko'i ikahu hap ete e. Ta'i po'og ikahu ipohyt mesu­wa­ro­tiaria mekewat morekuat Sarumãu esokpe wakuat sese kai e. Pyno yt kan hamo i ahesokpe kape yn watu­wa­nẽtup ko'i ko'i e. Waku po'og wato­mohey Tupana piat aipainug hamuat hap waku wato­mohey e. Ta'i Tupana aipainug kuap kahato hat e. Tupana ti wuat'i painug kuap hat e. Eweha'at ro pohyt ikahu kahato rakaria ko'i kape katu­pono mi'iria yne Tupana mipainug ko'i tukupte'en e. Ta'i ga'apy ko'i pohyt tutunug ikahuria yne Tupana ti'atu­painug yne e. Mi'i hap ewy Tupana aipainug kuap katu­pono aito po'og waku Tupana wanẽtup hawe ipohyt ko'i kai e.
MAT 6:30 Ga'apy Tupana mipainug toĩne'en mesup e. Koitywy ga'apy ikahu sese toĩne'en ma'ato mũki'ite igag na'yn hawyi ahemyp okpy sa'aria wo iku'uro hawyi igag hawyi e. Ta'i Tupana ti'atu­painug kahato ga'apy ko'i are ma'ato meiũran igag hawyi ahe'aria wo topyhu'at e. Pyno Tupana ti'atu­painug kuap yne wuat'i i'anam ko'i e. Mi'i hap ewy ti waku Tupana wato­mohey aipainug kuap hat e. Kat hamo ten ahesokpe kape yn watu­wa­nẽtup at ka'ap yt Tupana mohey i ra'yn hap wywo e.
MAT 6:31 Pyno yt naku i yt watu­we­mo­po­hepap i yt ahesokpe i yt ahesapo i hap ete yt aimi'u i hap ete e.
MAT 6:32 Katu­pono mi'u kat hap kape sokpe kat hap kape yn te'eru­wa­nẽtup at ka'ap yt Tupana mohey haria i ra'yn e. Yt karãpe i Tupana kape i'atu­wa­nẽtup haype e. Pyno yt naku i mi'iria ewywuaria wato­pyhu'at are katu­pono ti Ai'ywot atipy piat ti'atukuap kahato yne yne kat ko'i kat ko'i aipo pe yt kat i aimi­ky'esat ko'i kape tuwe­wa­nẽtup kahato aika­wiano aipo­wyro hamo haype e.
MAT 6:33 Waku po'og ti watu­we­wa­nẽtup aipy'a pe at ka'ap aikotã aru aikotã aru waku po'og atunug Tupana Uipo­rekuat no hap kape e. Waku po'og ni watu­wa­nẽtup — Aikotã aru aikotã aru waku aterut miit'in Tupana kape Ta'atu­po­rekuat no ai'e hap kape po'og waku watu­wa­nẽtup at ka'ap aipy'a pe e Iesui. Pyno ti waku po'og watu­wa­nẽtup — Aikotã aru Tupana miky'esat ewy atunug pãi ai'e hap kape yn e. Mi'i tã ai'e hap kape aiwa­nẽtup pote ti Tupana tum aru ti ahepe mekewat wẽtup kat ko'i kat ko'i aimi­ky'esat ko'i mesu­wa­rotiat e. Tupana miky'esat kape po'og watu­wa­nẽtup pote mi'i hap kaipyi aimi­ky'esat ko'i tut Tupana kaipyi e.
MAT 6:34 I'ewyte yt naku i watu­wa­nẽtup mesup niatpo mũki'ite wat aipotpap hap ko'i kape yt naku i watu­we­wa­nẽtup at ka'ap e. Ma'ato mesuwat e'at piat niatpo hap kape yn waku watu­we­wa­nẽtup e. Pyno yt naku i mũki'ite wuat niatpo rakat watopag mesup e'at pe e. Mi'i tã watunug mote ti topyhu'at aimo'akag'aia hap e Iesui topotmu'e haria pe yity'ok tote. Mi'i hawyi uito ahenoi mesuwe uimiwan me uito Mateu
MAT 7:1 Mi'i hawyi po'og to'e Iesui temiit'in me yity'ok tote — I'ewyte ti e yt naku i wato'e aiwa­nẽtup hawe wẽtup ok pe — Yt kan hamo i en Tupana wanẽtup hawe yt naku i wato'e e. Mio tã wato'e sa'ag miit'in aipy'a pe pote ai'e hap ewy Tupana i'ewyte — Yt naku i en e aru ahepe mekewat e'at aru karãpe uwe waku sese uwe yt naku i sese to'e hap e'at pe e.
MAT 7:2 Pyno aikotã watu­wa­nẽtup sa'ag miit'in ete aipy'a pe — Yt naku i rakat mi'i miit wato'e pote mi'i ai'e hap ewy kahato aru te'eru­wa­nẽtup sa'ag ahete ta'atupy'a pe e. Yt iwese rakaria i aito pote i'ewyte yt iwese rakaria i ai'ewy miit'in tukupte'en ahowawi e. Yt ahegyi'at i pote i'ewyte ai'ewy irania'in tukupte'en ahowawi e. I'ewyte — Mi'i miit yt kan hamo i wato'e wẽtup ok pe aipy'a pe mi'i ai'e hap ewy te ti to'e aru ahepe mekewat ai'e hap ewy mekewat aimohit e. I'ewyte — Yt naku i en wato'e wẽtup ok miit pe aiwa­nẽtup hawe mi'i pote i'ewyte ti Tupana — Yt naku i en e aru ahepe ai'e hap ewy e.
MAT 7:3 Yt naku i ti watikat irania'in piat i'aparap hap ko'i yn e. Yt naku i wati­mohit irania'in ahehay wo aipy'a pe e. Ma'ato watikat aiwa­nẽtup hawe irania'in mi'aparap pote wato­pyhu'at aikotã yt ihapytig i rakat ewy aikotã — Meiẽwat eha pe ti toĩ wyti hu hit wato'e hap ewy ma'ato ti yt watikuap i aiwat aheha piat aria'yp pik iwato ewy toĩne'en e. Uiwyria'in kat poteĩ ewy ok eha pe etikat yt nakuat i hap e.
MAT 7:4 Kat poteĩ — Uhyt mana ere atihep teran nyti mekewat eha piat hu hit ere'e irania'in me hap ewy ma'ato yt etikuap kahato i ewy eha piat aria'yp wato toĩne'en ne eha pe. Mi'i hap ewy ereĩne'en irania'in i'aparap hap eti'atukat pote e.
MAT 7:5 Ma'ato mi'i tã ere'e pote yt hãpyk hin i ewanẽtup e. Mi'i pote ti typy ihay rakat ewy ereĩne'en e. Pyno waku ewat eha piat ri waku etihep aria'yp tek iwato rakat ewywuat eminug sa'ag ko'i hawyi ti aru pywuat ihapytig sese rakano sese ra'yn ereĩne'en e. Eiminug yt naku i ko'i ewetotiat yne pote ti ihapytig rakat ewy i ereĩne'en aru e. Ehapytig nakat ewy ereĩne'en hawyi waku etihep kuap ta'yn ewy ok eha piat hu hit ewywuat iminug sa'ag hit ko'i etihep kuap are yt pote yt aru e Iesui yity'ok totiaria pe.
MAT 7:6 Mi'i hawyi to'e i — Uimohey haria woro­ho'o­nãpin neran mesup ahewa­nĩ­kaptia ete e. Tukupte'en mesu­wa­rote miit'in Tupana ehay ete haiwot kahato rakaria e. Waku aiwe'eg wo o mi'iria pupi katu­pono aikotã awahuru ko'i ti'atu'uka teran ne'i aihũria ewy kahato mi'iria tukupte'en e. Pywo ti rat mesup ta'yn Tupana wanĩ­kaptia ko'i ai'auka teran katu­pono Tupana ehay moherep haria aito pote e. Ta'i aikotã hamaut ko'i ti'atu'akit reran ne'i aimikoi. Mi'i hap ewywuat kahato Tupana wanĩ­kaptia ai'akit reran ne'i e. Waku wahenoi wuat'i miit'in me Tupana ehay wakuat no are wen ma'ato waku aiwe'eg kahato wo o wahenoi mi'iria pe turan katu­pono ahewa­nĩ­kaptia mi'iria tukupte'en aikotã awahuru ewywuaria tukupte'en aihũria u haria ewy ahewa­nĩ­kaptia tukupte'en aipy'a­setpe e. Aikotã hamaut aikope hap ewywuaria ahewa­nĩ­kaptia tukupte'en aipy'a­setpe e. Mi'i pote waku aiwe'eg kahato wo o wahenoi mi'iria pe haype are aikotã yt naku i wati'a­tupoi awahu­ruria Tupana mõtypot yat mi'u wakuat ewywuat yt naku i hap ewy e. Ta'i awahu­ruria te'erenuk aimiium ete hawyi te'eru­we­morem ahowawi ahekatu'u hamo awahu­ruria e. Waku aiwe'eg kahato hap wywo wahenoi turan ai'auka teran ahewa­nĩ­kaptia e. Yt naku i ahewahi ikahu rakat wati­mo­herep hamaut uato ko'i haiwot rakaria ga'apy piaria pe katu­pono te'era'a­kasa hawyi ta'atu'akit akit ne'i hawyi yt kat hamo i ra'yn topyhu'at sa'awy'i ahewahi ikahu rakat. Mi'i hawyi ahowawi ai'akit hamo tõ'ẽ haiwot rakaria e. Mi'i hap ewy kahato waku aiwe'eg kahato wo o wahenoi Tupana ehay ahewa­nĩ­kaptia pe e Iesui yity'ok totiaria pe i'ewyte ahepe.
MAT 7:7 Mi'i hawyi po'og tohenoi — Uiwy ok ko'i uheinyt'in ko'i karãpe wahẽtup kahato Tupana kape aimi­ky'esat ko'i mi'i hawyi tutum ahepe yne yne aimiẽtup ko'i ma'ato tomi­ky'esat ewy e. Mi'i tupono waku watikat kahato aikope aikope toĩne'en imiium aimiẽtup ko'i e. Watikat kahato aimiẽtup Tupana piat ko'i pote ti aru wati'a­tu­puẽti Tupana mipo'oro ko'i e. watikat aimiẽtup ko'i pote ti aru wati­puẽti imipo'oro ko'i e. Ma'ato yt wati­puẽti i pote waku wahẽtup — Tupana wato'e ta'atu­pyhyp kahato urumiẽtup ewawiat hap emipo'oro waku wato'e. Eho'o'okenhyp'ok to mu'ap hawyi waku mesuwe toĩne'en waku wato'e Tupana pe. Mi'i pote ti toho'o'okenhyp'ok hawyi wati­puẽti aru aimiẽtup Tupana piat ok tã e.
MAT 7:8 Pywo pe ti hẽtup kahato haria wo watu­kupte'en pote Tupana miium porera'at haria wato­pyhu'at aru e. I'ewyte Tupana miium kat kahato haria aito pote wuat'i imiium puẽti haria wato­pyhu'at mesuwe e. I'ewyte — Ere'okenhyp'ok to Tupana e haria aito pote mu'ap puẽti haria wato­pyhu'at e Iesui itotiaria pe i'ewyte ahepe.
MAT 7:9 Uhemiit'in karãpe aimẽpyt hẽtup ahepe u'i pote watum u'i tope e. Yt watum i aimẽpyt pe yi kyt ne'i — Atiky'esat kahato u'i mamai papai e pote watum na'yn aha'yru ahaki'yt u'i e.
MAT 7:10 I'ewyte — Papai mamai atiky'esat pira pu'i epo piat e pote meremo watimõ'ẽ e. Yt uwe i moi ne'i hum tosa'yru tosaki'yt pe hesy'at pote e.
MAT 7:11 Mesu­wa­rotiat miit'in ti yt naku i nug haria wo tukupte'en wen ma'ato ti ta'atukuap wyti ta'atu­mẽpyt'in miat wakuap ium hamuat e. Ai'ywot atipy piat ti po'og po'og wakuat wuat'i mesu­wa­rotiat miit'in kai e. Mi'i tupono miit'in miẽtup wakuat tutum kuap kahato ti e. Wakuat aimiẽtup tepiat ko'i Ai'ywot Wakuat Atipy piat ti'atuium kahato ahape e Iesui yity'ok totiaria pe i'ewyte ahepe.
MAT 7:12 Sa'awy'iwuat Tupana ehay moherep haria piat ainãpin hap i'ewyte aha'ase'i Musei ainãpin hap wẽtup uhehay pe yn teke are e — Aikotã wati­ky'esat irania'in minug wakuap ahepe mi'i hap ewy waku watunug i'atuepe e Iesui temiit'in me yity'ok tote.
MAT 7:13 Pyno ti waku ti etikat kahato mekewat mu'ap ypy kurin kat atipy kapiat are katu­pono mekewat aria kapiat mu'ap ypy wyti heremo yne e Iesui. Ta'i mekewat aria kapiat mu'ap tote ti miit'in yne ikohye­wyry kahato pote mekewat mu'ap ihot kahato e.
MAT 7:14 Ma'ato mekewat atipy kapiat mu'ap ypy ti yt heremo i e. Eweikat kahato pote yn eweipuẽti are katu­pono mekewat mu'ap kurin kat upi ti niatpo kahato ehewyry e. Ma'ato mekewat upiat eipe pote ti put'ok'ewei'e wuat'i e'at piat eheĩne'en hap tote e. Katu­pono mekewat mu'ap yt hot i kahato pote ti yt typy'i hin i miit hewyry e Iesui yity'ok totiaria pe ahepe.
MAT 7:15 Mi'i hawyi to'e Iesui itotiaria pe — Uimi­mu'eria e ewe'eg wo o mekewat Tupana ehay moherep yt pywuat piat i haria wywo e. — Uruimohey kahato Tupana i'atu'e pytkai yt Tupana ehay ewy i ta'atu­mo­herep — Uruto ti Tupana hũria ei'ewywuat i'atu'e pytkai eiwe'eg wo o i'atuehay pupi yt uiat ewywuat i pupi e. Ta'i eima'at reran haype uimohey ehepiat hap moma teran haype i aikotã awahuru tu'u teran aihũria hap ewywuaria ti mi'iria tukupte'en eipy'a­setpe eimu'e hamo e.
MAT 7:16 I'atu­minug sa'ag ete ti aru mi'iria eweikuap e. Aikotã mekewat ahiag ẽpo yt hum i ti he rakat ahepe mi'u hap ewy mi'iria tukupte'en e. I'ewyte yt karãpe i wati­puẽti mekewat hu ẽpo ete he rakat ywa ewy e.
MAT 7:17 Pyno karãpeĩ aimikoi upi'a i'atue­hãite kahato hawyi meiũran i'atusat kahato hawyi hewo ra'yn i'ywa he kahato rakaria e. Ma'ato yt wenug i hat aimikoi haat sa'ag kahato yt he i i'ywa hap ewy e. Mi'i hap ewy kahato Tupana ehay wẽtup aimu'e haria tukupte'en e.
MAT 7:18 Ma'ato mekewat wenug kahato haat wyti yt karãmuo i haat sa'ag nakat ne'i e. Haat kahato yn topyhu'at e. Ma'ato yt ihãite i rakaria ywa ti yt mi'u wo hin i ra'yn topyhu'at. Mi'i ti yt watu'u kuap i ra'yn i'ywa haat sa'ag nakat ne'i e.
MAT 7:19 Pyno mi'i meiũran — Yt kat hamo i ra'yn meiẽwat i'ywa yt hẽ'ẽ kahato i rakat meiẽpe wato'e. Pyno waku ahe'aria wo ra'yn mi'i yp yt aipoi i pote wato'e hawyi wati'y­pytek yt naku i rakat e.
MAT 7:20 Ta'i watikuap kahato ti mikoi ypia i'ywa he hap upi sio wakuat ypia sio yt naku i rakat ypia hap watikuap kahato aito e. Mi'i hap ewy kahato te ti watikuap pywo piat Tupana ehay enoi haria sio aima'at haria ta'atu­minug wakuap upi sio ta'atu­minug yt naku i hap upi wati'a­tukuap mi'iria e.
MAT 7:21 Katu­pono ti i'atu kahato miit'in uhehay su'at kahato haria — Uika'iwat kahato En Uika'iwat kahato En i'atu'e uhepiat haria ma'ato yt pywo piat haria i mio tã i'atu'e ehepe aru ehekat ky'ewi eima'at haype e. Pywo ti mi'iria yt karãpe hin i te'eru­wehyt'ok aikope Tupana toĩne'en Morekuat no hap tote aru are katu­pono ti itote Ui'ywot miky'esat nug haria yn wyti te'eru­wehyt'ok e.
MAT 7:22 Ta'i mekewat wehyt'ok hap e'at pe ti aru typy'i itote — Ihot'ok Uika'iwat waku kahato En i'atu'e. Uika'iwat kahato En i'atu'e haria itote tukupte'en ma'ato yt uimikuap ko'i i yt Ui'ywot miky'esat nug haria pytkai mio tã i'atu'e — Ta'i uruto ti eset moherep kahato miit'in miat haria ti i'atu'e. Miit'in mu'e kahato haria urutu­kupte'en itote i'atu'e ti aru wehyt'ok hap e'at pe. — Uruka'iwat eset no ti mã'ãu sa'ag ko'i uru'atu­sopo kahato miit'in pywiat haria ti uruto i'atu'e ti aru wy. Ta'i i'ewyte karania wo i wyti urutunug wakuap yt uwe misepap ewywuat i wuat'i ehamo miit'in mowa­nẽtup kahato hamo itote urutu­kupte'en turan i'atu'e ti aru wy uhepe. Mi'i tupono ti waku Uruka'iwat urutu­wehyt'ok atipy pe i'atu'e aru. Waku ahewaku hap upi wato­pyhu'at atipy pe aikope Tupana toĩne'en Wuat'i Akag wo hap tote i'atu'e ti aru uhepe at. Uruto waku pote waku watu­wehyt'ok atipy pe i'atu'e aru uhepe e.
MAT 7:23 Ma'ato ti aru mi'iria pe are'e — U pãi uhyt mana yt karãpe hin i ti woro­ho'okuap eipe are'e ti aru i'atuepe. Eweiwat ro meiũpepyi pya ui'yaty­pepyi are ti aru mi'iria pe katu­pono yt nakuat i nug haria ti eipe are ti aru yt uikuap i sese haria pe e Iesui irane mekewat wehyt'ok e'at hap etiat.
MAT 7:24 Uiwyria'in pywo ti rat uwe uwe ikuap ui'e hap hawyi topyhu'at ui'e hap nug hat mi'i Tupana mimowe'eg kahato rakano topyhu'at e Iesui. Pywo ti rat uwe uwe uhehay nug hat mi'i hat topyhu'at aru aikotã iwe'eg kahato getap nug kuap kahato hat ewy wyti aru toĩne'en aikotã — Are pãi are an pyno sig waku atunug ui'yat meiũpe yi heg kahato tote e hat ewy toĩne'en aikotã — Yt naku i yẽpeke are'yatnug ywyku'i pe e hat ewy toĩne'en e.
MAT 7:25 Ta'i toĩne'en wy yẽpeke we'yatnug haria ywyku'i upiaria ma'ato karãpe put'ok'e i'aman ipopit kahato hawyi ti aru ywytu uato at ka'ap hawyi ihy wato meremo hawyi yẽpekiat yi kyt rotiat we'yatnug hat yat pe teke ra'yn y'y yẽpekiat getap we e. Mi'i turan wasere wato i ra'yn hawyi y'y ihyeput haty wo ra'yn hawyi meremo meiẽwat getap toihep. Mi'i hawyi yt kat i ra'yn topyhu'at itotiat e. Ma'ato mekewat yi heg notiat we'yatnug hat yat yt toihep hin i e katu­pono mekewat yi nu ewy iheg kahato rakat rotiat i'yat pote e katu­pono tuwa­nẽtup mo kahato tutunug getap pote e. Mi'i hat ewy ti te'ero­pyhu'at uhepiat ta'atu­nãpin hap nug haria e.
MAT 7:26 Ma'ato uwe uwe uhehay ta'atukuap hawyi — Ta'i yt atunug neran hin i uito pãi an e haria ti aru tukupte'en yt we'eg haria wo i e. Aikotã yt tuwe'eg wo hin i tuwe'yatnug yi kyt pe hat ewy. — Waku ra'yn ui'yat atunug yẽpeke e hat ewy yi og notiat e hat ewy e.
MAT 7:27 Aikotã i'aman kahato hawyi ihy wato meremo ra'yn y'y hawyi teke ra'yn i'yat pe toine'en y'y ẽpe ete pote. Mi'i pote meremo y'y tipugha kahato mekewat yat hawyi wasere teke kahato i'yat pe hawyi toi'ypyhep i'yat e. Ta'at ra'yn hawyi i'aporok'e ra'yn hawyi yt ikahu hin i ra'yn i'yat e. Mi'i hap ewy ti yt uimohey i haria te'ero­pyhu'at uhepiat ta'atu­nãpin hap yt nug i haria e Iesui miit'in sem me yity'ok totiaria pe.
MAT 7:28 Mio tã e pote itotiaria te'eru­wa­nẽtup kahato hawyi te'ero'e to'ope — Ta'i yt uwe i po'og meiẽwat Miit kawiat ainãpin kuap kahato hat i'atu'e Iesui piat pe katu­pono yt irania'in Tupana ehay wani wani e haria piat yt aimu'e hap yt ewy hin i tig Mi'i Miit aimu'e i'atu'e katu­pono irania'in ti aimu'e kat i'atu'e kat i'atu'e irania'in aimu'e hap ewy yn aimu'e i'atu'e.
MAT 7:29 Ma'ato Iesui ti tuweupi ra'yn aimu'e Morekuat Koro ewy i'atu'e. Pywo ti rat Iesui aimu'e aikotã Tupana wẽ ewy ihay i'atu'e to'ope yity'ok totiaria Iesui mienoi kuap haria.
MAT 8:1 Mi'i hawyi Iesui ipot'apyk i ra'yn yity'ok totepyi topot­mu'eria sem wywo.
MAT 8:2 Mi'i turan wẽtup ok Iesui owa kape tut hepihi pihi rakat. Mi'i ti tuwe­pỹ'ã­tutuk Iesui mõtypot hamo to'e hamo — Uhyt atiky'esat kahato uimoe­hãite epiat hap e Iesui pe.
MAT 8:3 Mi'i hawyi tuwe­ponug hepihi pihi rakat piit ete hawyi — Ta'i atiky'esat kahato ehãite hap e. Pyno woro­moe­hãite ra'yn mehĩ e hawyi meremo hepihi pihi tuwetyk yne ra'yn tokã'ã meremo ra'yn.
MAT 8:4 Mi'i hawyi Iesui to'e tomi­moe­hãite pe — Ereto ro pa'i ko'i kape hawyi etimo­herep to i'atuepe emoehãite epihi pihi mokã'ã hap e. Yt ehenoi henoi tei'o mu'ap upiaria pe emoehãite hap uhepiat ma'ato ereto hãpyk o pa'i ko'i kape hawyi — Pywo i'atu'e hawyi waku etum ehũ i'atumi'u wo are aikotã sa'awy'i aha'ase'i Musei aimu'e hap ewy e. Mi'i hap kaipyi ti aru yne itotiaria ikuap pywuat uhepiat emoehãite hap e.
MAT 8:5 Mi'i hawyi Iesui teke tawa Kawana'ũ me i ra'yn.
MAT 8:6 Mi'i turan put'ok'e surara akag sese tapy'yia Humanu ywania. Mi'i hawyi to'e Iesui pe — Uipo­wyro o uhyt e katu­pono uhemiit sese i'ahu kahato toĩne'en e. Mio ra'yn topyhu'at kahato te'yni pe ui'yat pe e. Yt naku i sakpo tuete Mehĩ e. Uhemiit uiwy ho'opot kahato Uhyt e. Ta'i yt tuwe­mokup kuap i ra'yn Uhyt e. Mi'i pote ti imoehãite hap atiky'esat kahato ekaipyi Mehĩ e.
MAT 8:7 Mi'i hawyi — Pyno areto eupi hawyi atimoe­hãite emiit itote e Iesui surara akag me. Mi'i hawyi surara akag to'e Iesui pe
MAT 8:8 — Yt naku i ereto ui'yat kape Uhyt kat pote uiat uhewaku hap yt put'ok'e i ui'yat piat ereke hamo Uhyt e. Waku po'og meiũpepyi yn etimoe­hãite uhemiit ehay wo e.
MAT 8:9 Katu­pono uito areĩne'en surara'in sem po'oro hat e. Ta'i uiat uhemiit sem kahato tukupte'en e. Ta'i i'ewyte ui'akag ko'i tukupte'en more­kuaria ko'i e. Atunug kuap kahato i'atu­mi­ky'esat wy e. I'ewyte atipo'oro kuap kahato mesu­wa­ro­tiaria uhemiit'in sem e. Ta'i surara'in me are'e — Eweiwat ro kuepuo are pote meremo tuwat kuepuo ui'e hap ewy e. I'ewyte irania'in me are'e pote — Eweĩ'ẽ ro meikowo uhowawi are pote meremo tõ'ẽ uhowawi uhepiat ta'atu­po'oro hap ok tã e. I'ewyte ti uhemiit'in sese ui'yat piat pe are pote — Etunug no mi'i tã ui'e pote ta'atunug na'yn meremo uhepiat topo'oro hap ok tã e. Mi'i hap ewy En meiũpepyi ehay wo — Ehãite ro ere ui'yat piat uhemiit i'ahu kahato rakat pe pote taren meremo ihãite ra'yn itote e'e hap ewy ehay po'oro hap ok tã e mekewat Humanu ywania esurara akag Iesui pe.
MAT 8:10 Mi'i to'e hawyi Iesui tikuap surara akag koro ehay hawyi tuwa­nẽtup kahato ihay kape hawyi toikuap kahato tomohey hap e. Mi'i hawyi tuwe­morem hawyi to'e toupiaria pe — Uhyt'i'in mana'in e aito ti Iuteuria aito ma'ato mesuwat meiũwat surara akag wẽtup ywania toĩne'en e. Eiperia uimohey ma'ato mesuwat Humanu ywania po'og po'og ti uimohey hat toĩne'en ai'ywania Isareu ywania kai e. Mi'i ti yt ai'ywania hin i wen e Humanu ywania ti mi'i wen ma'ato mi'i pytkai ti po'og uimohey ai'ywania kai e.
MAT 8:11 Mi'i pote eiwe'eg wo o ui'ywania uimohey hap wywo are katu­pono yt uimohey i ehepiat pote meiũran ti aru irania'in ywania mimohey kahato wo arepyhu'at mesuwe e. Pywo pe ti rat meiũran aru karãpe Tupana toĩne'en Wuat'i Porekuat no mi'i hap kape tõ'ẽ tõ'ẽ kahato irania'in ywania aikope pyi aikope pyi e. Mi'i hawyi ti aru mi'iria te'era'apyk aikope Tupana toĩne'en Morekuat eypa­rakai kawiano aikope ienuk hap tote e. Aikope aha'ase'i koro Aparãu apyk hap kawiano aikope aha'ase'i pot Isaki apyk hap kawiano aikope ai'ywania 12 ywania aha'ase'i Iako apyk hap kawiano ra'yn te'era'apyk wẽtup ywania uimohey rakaria e. Ta'i eiwe'eg wo o katu­pono ui'ywania eipe pytkai yt uimohey haria i kahato eipe pote e.
MAT 8:12 Mi'i pote ewe'eg wo o ui'ywania e katu­pono yt uimohey i haria wo eweikupte'en Tupana mipun ko'i ewywuaria eweikupte'en aru aikope i'ypyryp sese hap tote aikope kak'ewei'e kak'ewei'e hap tote aikope kyry'et kyry'et'ewei'e haty pono hap tote eipugha eipe uimohey sese hap pun haria eipe hawyi e. Ma'ato meiũwat surara ywania ewywuaria tukupte'en kahato aru atipy pe uimohey sese haria wo tukupte'en mote wẽtup ywania pytkai e. Mi'i pote ewe'eg wo o ui'ywania e Iesui.
MAT 8:13 Mi'i hawyi Iesui to'e i mekewat Humanu ywania surara akag me — Mehĩ e uimohey kahato hat en e. Pyno mio waku kahato era'aipok i ro e'yat kape katu­pono emiit i'ahu rakat ihãite i ra'yn topyhu'at mio ra'yn epiat uimohey hap ewy mehĩ e. Mio tã e hawyi toto surara akag to'yat kape hawyi toipuẽti itote temiit waku kahato ra'yn ihãite kahato ra'yn kat e Iesui yianmete tepiat hap ewy kahato ra'yn temiit toipuẽti to'yat pe.
MAT 8:14 Irokirẽ Iesui toto topotmu'e Peteru yat kape. Itote Iesui tipuẽti Peteru sakitu i'ahu kahato te'yni pe ipiit sakup kahato.
MAT 8:15 Mi'i hawyi toto ra'yn Peteru sakitu kape hawyi tuwe­ponug hakitu po ete hawyi meremo i'ahu hap ipiit sakup hap tokosap ta'yn. Mi'i hawyi ipoĩ'ãm na'yn ipotpap ta'yn i'atumi'u nug hap ete.
MAT 8:16 Mekewat ewãtym muo ta'atue­ropo'ok kahato i'ahu rakaria ahiag ipiit piat rakaria Iesui kape. Mi'i hawyi mi'iria kaipyi toi'atu­sopo kahato ra'yn ahiagnia wẽtup yn tehay wo i'ewyte toi'atu­moe­hãite ra'yn i'ahu rakaria torania ra'yn.
MAT 8:17 Mi'i hawyi toi'atu­moe­hãite kahato itotiaria aikotã sa'awy'iwuat Tupana ehay moherep hat Isaia to'e hap ewy — Ai'ahu hap ti aru toimoe­hãinte topiit ahyk hap mo e. Aipo kĩ'ã hap aipy kĩ'ã hap toimog yne yne ra'yn e. Ahaty'i haty'i hap totioto yne aru pya aikai e sa'awy'i Isaia miwan 53.4 pe e hap ewy.
MAT 8:18 Mi'i tã Iesui ti'atu­moe­hãite kahato pote tõ'ẽ tõ'ẽ kahato miit'in po'og po'og Iesui emig hamo. Mi'i pote meremo to'e topot­mu'eria pe — To'iro meremo ihyemyi'a sakpo uheka­tu­wyria katu­pono ui'akit kuap ne'i i'ahu rakaria. I'atu­moe­hãite hap ta'atu­ky'esat kahato pote uhemig neran haria i'ahu kahato rakaria sem ui'akit irane e.
MAT 8:19 Mi'i hawyi meremo tuwehyt'ok yara piat turan put'ok'e yẽpeke wẽtup ok miit Musei e hap miwan kuap kahato hat. Mi'i hawyi tuwẽ­powat Iesui kape — Wo'omu'e hat e uipap kahato eupi emiit no e. Areto teran aikopuo aikopuo ewyry hap upi e Iesui pe.
MAT 8:20 Ma'ato Iesui tiwesat — Pyno ereto teran uhupi pote waku ma'ato sa'awy'i erewa­nẽtup kahato katu­pono yt kat hin i ti ui'yat mesu­wa­rotiat toĩne'en e. Ereto uhupi pote yt kat i i getap sese ewano ewyry hap tote pãi e. Ta'i awahuru ko'i ti te'eroket ta'atuka'a puo i'ewyte weitaria te'eroket ta'atusok pe ma'ato uiat yt kat i ui'yat uiket hap sese pãi e. Miit'in Eyke'et Uito wen ma'ato yt i'yat rakat ewy i areĩne'en mesuwe uhewyry miit'in mu'e hamo turan e Iesui — Areĩne'en neran emiit no e hat pe.
MAT 8:21 Mi'i turan wẽtup ok ipotmu'e to'e Iesui pe — Pywo ti rat areto teran eupi Uika'iwat e ma'ato ui'ywot yatype te areĩne'en neran. Ui'ywot iku'uro hawyi isyp hawyi areto teran eupi e Iesui pe.
MAT 8:22 Ma'ato Iesui tiwesat — To'iro uhupi uipotmu'e wo e katu­pono tukupte'en nat yt Tupana yt mohey i haria itote e'ywot syp hanuaria uhyt e. Ereto uhupi e Iesui tope.
MAT 8:23 Mi'i hawyi ipotmu'eria te'eru­wehyt'ok ta'yn yara pe Iesui upi hawyi tuwat ra'yn ihyemyi'a wato sakpo.
MAT 8:24 Tuwat turan wasere wato tut. Mi'i hawyi ihywẽ'okmoĩ okmoĩ wato'in kahato hap yara pe teke teke kahato ma'ato mi'i pytkai Iesui toket ne'i yara pe.
MAT 8:25 Mi'i pote ipotmu'eria tokoka'at ihymut hamo — Uhyt wata'apy'at hamuat ra'yn Uhyt i'atu'e haty wo. Erehymut ro urueha­kyera'at ro En i'atu'e haty wo katu­pono watopap hamuat Uhyt i'atu'e.
MAT 8:26 Mi'i hawyi Iesui tuwe­hymut hawyi — Kat poteĩ eweiken'ẽ e Iesui. Yt uimohey i te apo eipe e. Mio tã e hawyi ipoĩ'ãm na'yn hawyi to'e haty wo ywytu uato pe — Wãi ne epo'inik to y'y epo'inik to ywytu e hawyi meremo y'y ihy nik ra'yn.
MAT 8:27 Mi'i hawyi mehit'i'atu'e kahato Iesui minug kape ipotmu'eria. Mi'i hawyi hemiit'in te'eru­wa­nẽtup kahato hawyi — Kat kawiat kahu meiũ Miit i'atu'e to'ope Iesui piat. — Uweĩ meiũ Miit katu­ponoĩ ywytu y'y toimo­perup'i kuap kahato tomi­ky'esat ewy i'atu'e to'ope.
MAT 8:28 Iesui timo­perup'i ywytu uato hawyi meremo put'ok'i'atu'e mekewat ihyemyi'a koro sakpo mekewat tawa Karata e hap tote wo'osyp hap wã tote. Tuwẽtem yara pyi hawyi mi'i tote ahiag emiit tut Iesui ewa kape wẽtup ok towy wywo mekewat mũ'ẽ ka'a kaipyi tõ'ẽ ipy'ahak kahato rakaria. Itotiaria tawa Karata piaria gupte'en haria te'eroken'ẽ kahato meimuẽ wuat ahiagnia pupi hewyry rakaria pupi. Mi'i pote yt karãpe i tuwat mekewat wo'osyp hap kapiat mu'ap upi.
MAT 8:29 Ma'ato Iesui put'ok'e itote hawyi meimuẽwat ahiagnia ko'i te'eroken'ẽ kahato Iesui pupi. Mi'i haype to'okak'i kahato haype ta'atuemiit wẽ pyi kak'i'atu'e — Kat hamo eriot uruewawi Tupana Sa'yru i'atu'e. Yt put'ok'e i te ti uruepiat ho'opot hamuat uru'apiheg hap e'at yt put'ok'e i te i'atu'e meiẽwat miit wẽ pyi.
MAT 8:30 I'ewyte itote tukupte'en hamaut asuwai ko'i sem te'erenuk hap tote.
MAT 8:31 Mi'i pote mi'i ko'i ahiagnia hẽtup kahato Iesui pe — Yt naku i i'atu'e uruhep ta'yn ti meiũwat miit pyi mi'i pote ti urutu­wehyt'ok teran meimuẽwat hamaut asuwai ko'i pe ra'yn i'atu'e.
MAT 8:32 Mi'i pote Iesui to'e — Eweiwat ro pyno meremo e pote meremo tuwenõ'ẽ hawyi tuwehyt'ok hamaut asuwai ko'i pe. Mi'i pote hamaut asuwai ko'i i'atueso'ok kahato ra'yn ahiagnia wehyt'ok hawyi. Mi'i pote hewo hewo ihyemyi'a wato pe yity'ok pyi hawyi ikohyeput'i ikohyeput'i hawyi te'ereã­py­hyka ãpy­hyka y'y pe hawyi topap yne hamaut asuwai ko'i mekewat ihyemyi'a koro y'y wato pe.
MAT 8:33 Mi'i pote hamaut asuwai apykok haria ikohyeput ra'yn tawa kape ta'atu­henoi yne mi'i tã hap ko'i tawa piaria pe aikotã Iesui ti'atu­sopo yne ahiagnia hap ko'i ta'atu­henoi. Aikotã ahiagnia ti'atu­moma ra'yn hamaut asuwai ko'i yne hap ta'atu­henoi kahato yne tawa piaria pe.
MAT 8:34 Mi'i hawyi itotiaria tuwat ra'yn te'eraha'at hamo. Mi'i hawyi mi'iria te'ero'e haty wo Iesui pe — Mehĩ ereto ro meiũpepyi wẽtup tawa kape Uhyt Mimi ta'atu­hẽtup haty wo te'eroken'ẽ haype. Yt ta'atu­ky'esat i Iesui pote toto ra'yn itote pyi are uito Mateu mesuwe uimiwan me.
MAT 9:1 Yi Karata piaria yt iky'esat i Iesui ta'atue­tawa piat pote teke i ra'yn yara pe hawyi ta'aipok i ra'yn temiit'in nywo ta'atue'yara puo ta'atu­sai­pepe ihyemyi'a koro sakpo i ra'yn ta'atue­tawa pakup Kawana'ũ kape i ra'yn te'era'aipok.
MAT 9:2 Put'ok'i'atu'e ta'atue­tawa pe hawyi itotiaria tuerut Iesui kape wẽtup ok miit ipiit iheg nakat yni pe. Mi'i hawyi toikuap ta'yn topiat tomohey haria hap hawyi to'e ipy'a heg nakat pe — Eremo­wepit ro uha'yru katu­pono mesup ti atimo­hãpyk yne ra'yn ti emi'aparap ko'i Tupana piat e. Mio wyti waure wo toĩne'en na'yn eminug sa'ag ko'i yne hap kai e. Ati'atu­mo­weityk yne ra'yn eminug sa'ag ko'i wyti e Iesui ipiit heg nakat pe.
MAT 9:3 Mi'i to'e Iesui turan ti tukupte'en wy itote Musei wo'onãpin hap kaipywiat wo'omu'e haria. Yt naku i kahato Iesui to'e mi'i tã — Ati'atu­mo­weityk eminug sa'ag ko'i e hap ewy i'atu'e yt naku i mio tã wato'e i'atu'e katu­pono watikuap ta'yn Tupana yn ni aheha­kyera'at kuap watunug yt naku i hawyi i'atu'e. Mi'i pote yt naku i Mi'i Miit meketã e hap e hamo i'atu'e te'eru­wa­nẽtup hawe.
MAT 9:4 Ma'ato mio tã i'atu­wa­nẽtup hap meremo Iesui tikuap ta'yn towa­nẽtup hap kaipyi hawyi to'e i'atuepe — Koitywy atimo­weityk yne emi'aparap Tupana piat are'e i'ahu rakat pe pote eiwa­nẽtup sa'ag apo uhowawi uhyt'i'in e. — Yt uwe i mio tã e hap inug kuap ewei'e eiwa­nẽtup hawe. — Tupana yn ni mio tã e hap inug kuap ewei'e ti. — Yt naku i mio tã ere'e pãi ewei'e ti uhete eiwa­nẽtup hawe e.
MAT 9:5 Emi'aparap atimo­weityk are'e tope pote — Yt naku i En ewei'e uhepe eipy'a pe ma'ato uhesaika kahato miit'in minug sa'ag moma hamo e.
MAT 9:6 Ta'i Miit'in Eyke'et kahato areĩne'en are wen ma'ato yt uimohey hin i te eipe e. Ta'i Tupana tum yne ra'yn tesaika hap wuat'i miit'in minug sa'ag mohãpyk hamo e. Atiky'esat kahato eweikuap uhesaika hap miit'in ehakyera'at hap e. Mi'i hap moherep hamo are'e yt hewyry kuap i rakat pe ipiit heg nakat pe — Epoĩ'ãm no uiwy hawyi meremo eti'okpoi ro e'yni hawyi ewyry ro e'yat kape ui'e hap ewy e Iesui yt hewyry kuap hin i rakat pe tesaika hap wuat'i miit'in minug sa'ag moma hap moherep hamo.
MAT 9:7 Mi'i to'e hawyi meremo ipy kĩ'ã rakat ipiit kĩ'ã rakat ihãite ra'yn hawyi meremo ipoĩ'ãm hawyi toto ra'yn to'yat kape wuat'i ehamo Iesui e hap ewy.
MAT 9:8 Mi'i pote itotiaria te'eraha'at kahato hawyi i'atu­wepit kahato ra'yn — Urutu­wehum kahato ewawi Tupana i'atu'e itotiaria. Waku kahato En Tupana katu­pono mesup ta'yn uruehamo etum na'yn esaika hap ewywuat meiũwat Miit Iesui pe i'atu'e irania'in itotiaria.
MAT 9:9 Mi'i hawyi ti Iesui toto ra'yn tetawa pakup Kawana'ũ pyi. Mi'i hawyi mu'ap upi teha'at uhowawi. Uito ti Mateu apyk pe sa'awy'i areĩne'en itote tawa Kawana'ũ kapiat mu'ap py'asetpe mekewat pyhyp hamuat surara'in wywo morekuat piat ha'up sat wuat'i miit'in mu'ap sa'up sat hanuat areĩne'en itote. Mi'i hawyi Iesui put'ok'e itote. Mi'i hawyi Iesui teha'at kahato uhowawi hawyi to'e uhepe — Mateu e atiky'esat kahato en uhemiit no e. Ereto ro uhupi mehĩ uhemiit no e uhepe. Mio tã to'e uhepe hawyi meremo uipoĩ'ãm na'yn hawyi areto ra'yn hupi.
MAT 9:10 Mi'i hawyi ti atioto ra'yn Iesui ui'yat tote kape imoenuk ui'yat piat hamo. Mi'i hap ti typy'i kahato yt naku i rakaria wuat'i pu'ap pyhyp haria uiwyria'in tõ'ẽ tõ'ẽ kahato ui'yat kape te'erenuk hamo uimi­kaykay ko'i. Mi'iria ti te'erenuk itote Iesui wywo i'ewyte Iesui potmu'eria wywo to'otokpe tokpe yt naku i rakaria wywo uruwywo.
MAT 9:11 Mi'i hawyi ai'ywania eko nug yne haria te'eraha'at kahato Iesui kape hawyi te'ero'e to'ope — Yt kan hamo i Mi'i Miit Iesui katu­pono tenuk kahato yt naku i rakaria wywo yt aheko etiat mienoi yt ewywuat i i'atu'e. Mi'i hawyi te'ero'e Iesui emiit'in me — Kat pote som yt nakuaria i wywo emu'e hat Iesui tenuk kahato yt aheko ewy i i'atu'e.
MAT 9:12 Ma'ato apo'i'atu'e temiit'in miat hap Iesui tikuap hawyi toi'atu­wesat — Pyno eweikuap teran apo kat pote arenuk teran yt nakuaria i py'asetpe yt eweimu'e hap yt ewy i e. Pyno ahenoi ehepe. Ta'i aikotã mohag nug haria i'ahu rakaria py'asetpe toĩne'en i'atu­moe­hãite hamo mi'i hap ewy kahato areĩne'en yt naku i nug haria py'asetpe Tupana moherep i'atuepiat hamuat e.
MAT 9:13 Wo'omu'e haria e eweikuap kahato yne aheko hit Iuteu ywania wãi'e hap ko'i ma'ato Tupana e hap koro sese ko'i waku eweimu'e ro e. Waku eweimu'e Tupana ehay moherep haria sa'awy'i­wuaria miwan ete aikotã Tupana to'e hap sese — Pywo ti rat yt atimorem kuap i eipe uhowawi — Uito po'og waku torania kai e haria ewei'e pote e Tupana sa'awy'i ehepiat e Iesui. — Yt atimo­hãpyk kuap i — Waku kahato ra'yn uito e haria e Tupana sa'awy'i ehepiat e. Mi'iria yt atikaykay kuap i uhemiit no e Tupana. Ma'ato irania'in — Tupana piat ati'aparap kahato uito e haria paa'e haria ati'atu­kaykay kuap kahato uhowawi i'atue­ha­kyera'at hamo e Tupana sa'awy'i miwan me yt naku i nug haria etiat e Iesui — Uruto po'og e haria pe. Mi'i hawyi to'e i i'atuepe — Pyno waku eiwemu'e i'ewyte mekewat Tupana e hap sa'awy'iwuat — Ati'atue­ha­kyera'at kuap uhepiat — Urueha­kyera'at ro e haria paa'e haria e. Ma'ato irania'in — Tupana mieha­kyera'at yn uruto urutu­kupte'en e haria yt ati'atue­ha­kyera'at kuap i e Tupana sa'awy'i e. — Uruto waku sese nug kahato e haria uruto po'og e haria yt ati'atue­ha­kyera'at kuap i e Tupana sa'awy'i miwan me e. Mi'i e hap Tupana wat kape waku eweiwa­nẽtup kahato e Iesui mekewat Iuteuria wo'omu'e haria pe to'ywania seko moherep haria pe ui'yat pe.
MAT 9:14 Iesui mio tã to'e turan put'ok'i'atu'e Iesui kape mekewat wo'oset'ok hat Iuwãu potmu'eria ko'i. Mi'i hawyi apo'i'atu'e Iesui pe — Mehĩ i'atu'e irania'in wo'omu'e haria aheko moherep haria te'ere­we­mosy'at kahato Tupana mõtypot hamo i'atu'e. I'ewyte uruto Iuwãu potmu'eria mi'iria ewy kahato urutu­we­mosy'at Tupana mõtypot hamo i'atu'e. Ta'i urutu­we­mosy'at kahato uruto Tupana mõtypot hamo ma'ato ewat epotmu'eria yt te'ere­we­mosy'at hin i uruto ewy i'atu'e. Kat pote mi'i tã eupiaria i'atu'e Iesui pe.
MAT 9:15 Mi'i hawyi Iesui ti'atu­wesat — Eweikuap kat pote pyno ahenoi ehepe. Pywo pe ti rat yt uwe i mesuwat yi tote tuwe­mosy'at wo'omo­wepit ienuk koro hap e'at pe turan mekewat wo'okyi'at hap e'at ienuk koro hap e'at pe yt uwe i tuwe­mosy'at teran i i'atu­mo­wepit hap e'at pote e. Mi'i ui'e hap ewy kahato uhemiit'in tukupte'en mesup areĩne'en i'atu­py'a­setpe pote e Iesui. Ta'i i'atu­wepit kahato mesup katu­pono areĩne'en i'atu­py'a­setpe aikotã uhehary'i kyi'at hap e'at piat ienuk koro hap nug hat ewy areĩne'en mesuwe i'atu­py'a­setpe aikotã uhemiit mowepit kahato hat ewy areĩne'en mesup aikotã iwary rakat ewywuat e. Mi'i pote te'erenuk kahato aikotã ienuk hap iwary pakup takat mõtypot hap ienuk hap ewy e. Mi'i pote te'erenuk kahato at ka'ap e. I'atu­wepit kahato areĩne'en i'atu­py'a­setpe pote mesuwe pote e. Ma'ato pywo ti rat meiũran ti aru uhewa­nĩ­kaptia uhereto saity ete pya uimi­mo­wepit ko'i kai e. Uhereto hap e'at pe ti aru yt kat hin i ta'atu'u teran aru uhemiit yt uwe i uito hawyi e. Ta'i yt i'atu­wepit hin i aru mekewat e'at turan katu­pono irania'in yt uimohey haria i ui'auka aru e. Mi'i hap e'at pe uhemiit sese te'ere­mosy'at kahato uipot­mu'eria e Iesui wo'oset'ok hat Iuwãu potmu'eria pe.
MAT 9:16 Mi'i hawyi to'e Iesui — Ui'ywania ahenoi teran ehepe aikotã uhehay pakup uheko pakup yt eheko pot'i yt ewywuat hin i hap ete e. I'ewyte ti uhehay ipakup i yt ai'ywania wãi'e hap ewy hin i e. Ta'i uhehay pakup ti topyhu'at aikotã ahesokpe pakup turan hap ewy kahato uhehay pakup e. Ui'ywania karãpe ahesokpe pot'i hiot'e rakat mi'i hawyi yt watomog neran i ra'yn sokpe ipakup mo are katu­pono watomog ahesokpe pot'i ahesokpe pakup wo pote mi'i hawyi karãpe wati­koho aimimog hap tote hawyi tuweityk ta'yn ahesokpe pakup mimog hawyi toihiot ra'yn ahesokpe pot'i e. Mi'i hawyi ahesokpe pot'i hiot'e iwato po'og na'yn sa'awy'iwuat kai topyhu'at e. Yt naku i e. Mi'i pote waku watomog ahesokpe pot'i sokpe pot'i kawiat wywo yn. Yt naku i watomog sokpe pot'i sokpe pakup'i wo e. Mi'i hap ewy kahato tig yt naku i watomog aheko pot'i uheko pakup'i wo are katu­pono yt to'osat hin i uhehay pakup'i sehay pot'i upi hap ewy kahato ui'ywania e.
MAT 9:17 I'ewyte ti uhehay pakup'i topyhu'at kahato aikotã sapo hy pakup ewy yt nem hin i te turan e. Ta'i ahetama pe ywa pakup hy ti waku watopag heiam i'ape pakup we yn watopag katu­pono ti i'ape pakup yn wyti iporok kuap hat i'ape pakup pote e. I'ape pakup we watopag pote waku i'ywa pakup hy watopag heiam me iporok kuap hamo e. Mi'i hawyi meiũran mahy wo topyhu'at e. Mi'i hap ewy watunug ahetama pe e. Yt naku i wen ma'ato watopag i'ywa hy pakup mekewat heiam i'ape pot'i kawiat pe ipe teneg nakat kawiat pe are katu­pono yt put'ok'e kuap i yt iporot kuap i pote e. Ma'ato watopag Uwa hy pakup Uwa hy eĩam teneg me pote yt naku i sese topyhu'at aru katu­pono mahy we'amut hawyi i'ape teneg me hawyi i'ape teneg i'apok'e e. Mi'i pote i'apok'e kahato heiam teneg e. Mi'i hawyi mekewat mahy Uwa hy wakuat yne yi tote tuwepun ne'i e. I'ewyte heiam i'ape teneg kawiat yt kan hamo i topyhu'at i'apok'e hawyi e. Yt kat pe kuap i ra'yn waheiam nug i'apok'e hawyi e. Yt kat i ahesapo hy i'ewyte ti yt kat i heiam e. Pywo ti rat mi'i ewy kahato uhehay pakup'i topyhu'at e aikotã kat kat ywa hy ipakup takat ewywuat topyhu'at mesuwe e. Ta'i uhehay pakup'i yt toĩne'en kuap i ahehay pot'i puo e. Yt wato­mohey kuap i wẽtup sehay yt uiat ewywuat i e. Wato­mohey teran mote aiwepyi sehay pot'i pote hawyi yt naku i topyhu'at aikotã ahesapo hy eiam teneg nakat pok'e hap ewywuat toĩne'en e. Uhehay pakup'i yt to'osat i ahehay pot'i wywo e. Yt to'o'ewy i pote yt naku i to'opuo tukupte'en e. Eweipag uhehay pakup'i wo'omu'e haria sehay pot'i puo pote meiũran yt naku i sese topyhu'at itote e. Ma'ato ehã'ãg mote uhehay pakup sehay pot'i puo wẽtup sehay nug hamo pote yt kat i sehay pywuat topyhu'at aru katu­pono uhehay pakup yt sat'e i kahato wẽtup sehay wywo tu'uka kahato e. Waku uhehay pakup watopag heiam pakup we e. Yt pote tu'uka to'ope hawyi sehay sa'ag ewywuat topyhu'at e Iesui sehay pot'i moherep haria pe mekewat uiat ui'yat pe. Uito Mateu.
MAT 9:18 Mio tã e Iesui turan wẽtup ok Iuteuria akag put'ok'e hawyi tuwe­pỹ'ã­tutuk Iesui mõtypot hamo hawyi to'e — Yt naku i uhete Mehĩ e. Mesup ta'yn uhaki'yt sese uimiky'e kahato iku'uro sese ra'yn ipyhu tek'e ra'yn Mehĩ e. Ma'ato ereto uhupi hawyi ereponug ipiit ete hawyi uhaki'yt tuwẽtem i ra'yn gu'uro pyi hap atikuap Uhyt e haty wo Iesui pe.
MAT 9:19 Mi'i hawyi — Pyno areto e Iesui hawyi toto ra'yn mekewat tu'isa upi ui'yat pyi. Mi'i hawyi ipotmu'eria tuwat hupi wy. I'ewyte typy'i kahato mu'ap upiaria seha'at reran howawiat hanuaria tuwat ahupi. Toĩne'en wy aipy'a­setpe wẽtup hary­poria.
MAT 9:20 Mi'i hary­poria ti i'ahu kahato. Huu wato kahato rakat toĩne'en. 12 anu ra'yn toho'opot at ka'ap mekewat tosuu wato hap. Mi'i hawyi toto Iesui upi tehãite Iesui esokpe mig hamo toto hap toiky'esat.
MAT 9:21 — Are an e atemig Iesui esokpe uipo wo mi'i hawyi waku i mono uhete e hary­poria tuwepe. Uimoe­hãite hap topyhu'at i ra'yn mono e huu wato rakat tuwa­nẽtup hawe toto hupiat haype.
MAT 9:22 Mi'i hawyi totemig na'yn hesokpe ete. Mi'i hawyi meremo temig hap Iesui tikuap topy'a pe hawyi tuwe­morem meremo uwe temig hat kat hamo. Toipuẽti temig hat hawyi to'e — Waku ra'yn mana eremo­wepit ro katu­pono uimohey hap epiat hap ti emoehãite hap topyhu'at e. Mi'i hawyi mekewat hary­poria tikuap meremo topiit piat huu wato tek'e hap. Tohãite hap toikuap ta'yn.
MAT 9:23 Iesui timoe­hãite mekewat hary­poria hawyi toto i mu'ap upi mekewat tu'isa wywo ra'yn. Mi'i hawyi put'ok'i'atu'e hawyi tuwehyt'ok tu'isa yat pe. Mi'i hawyi Iesui ta'akasa ra'yn itote pĩ'ã iku'uro potiat wo'okak'i haria ahyt tukupte'en itote i'ewyte akuara piat wepy haria pĩ'ã iku'uro potiat wepy haria tukupte'en tu'isa yat pe.
MAT 9:24 Mi'i hawyi Iesui to'e itotiaria pe — Eweiwat ro meiũpepyi eipe yne e katu­pono yt iku'uro i wyti tu'isa saki'yt are ma'ato toket ne'i rat e. Mio tã e hawyi to'okyry'i sa'ag kahato Iesui ete.
MAT 9:25 Mi'i hawyi Iesui ti'atu­sopo mi'iria torania tu'isa yat pyi. Toipo­renõ'ẽ ra'yn miit'in wo'okak'i haria hawyi toto ra'yn tu'isa upi haki'yt iku'uro rakat e'okipy kape. Mi'i hawyi pĩ'ã ok puk toimopoĩ'ãm ipo ete. Totat ipo hawyi pĩ'ã tuwe­hymut toku'uro sese hap pyi hawyi meremo ipoĩ'ãm na'yn ihãite i ra'yn.
MAT 9:26 Karãpe irania'in tikuap ta'yn haki'yt tuwẽtem sese gu'uro pywiat hap hawyi ta'atu­henoi henoi kahato wuat'i miit'in me Iesui minug wakuat yt uwe minug kuap ewywuat i. Mi'i hawyi yne tawa hit puo yne tawa wato puo meremo ra'yn miit'in yne tikuap iminug wakuap etiat. — Toimoieĩne'en kuap i'ok puk takaria i'atu'e to'ope.
MAT 9:27 Mi'i hawyi Iesui toto ra'yn mekewat tu'isa etawa pyi hawyi mu'ap upi typy ok yt ihapytig i sese rakaria tuwat hupi. Mi'i hawyi ta'atu­wẽ­powat kahato Iesui kape — Morekuat Koro Tawi saipepiat i'atu'e yt urueha­pytig hin i pote urumoe­hãite ro uruky'e hap ok tã i'atu'e haty wo Iesui pe.
MAT 9:28 Mi'i hawyi Iesui teke wẽtup yat pe ra'yn hawyi ti meimuẽ­wuaria yt ihapytig i rakaria i'ewyte tuwehyt'ok iwywuat pe. Mi'i hawyi apo'e Iesui i'atuepe — Eweimohey apo uhepiat eimoe­hãite kuap hap e. — Ta'i Mehĩ i'atu'e uruimohey kahato epiat urumoe­hãite kuap hap ehepap kahato hap i'atu'e Iesui pe.
MAT 9:29 Mi'i hawyi totemig i'atueha ko'i hawyi to'e — Pyno uimohey hap ok tã na'yn wyti topyhu'at eheha ete e.
MAT 9:30 Mi'i hawyi meremo i'atue­ha­pytig na'yn hawyi mehit i'atu'e kahato ra'yn. Mi'i hawyi Iesui i'atu­nãpin — Uhyt'i'in yt uwe pe tei'o ewehenoi uiminug eimoe­ha­pytig hap e haty wo tomi­moe­hãite ko'i pe.
MAT 9:31 Ma'ato yt tutunug i Iesui miky'esat ewy hawyi tuwat hawyi wuat'i puo — Iesui ti wuat'i sepap hat i'atu'e. Pywo ti rat urumoe­ha­pytig kahato hat Iesui i'atu'e wuat'i miit'in me — Yt eweihenoi tei'o e Iesui pytkai ta'atu­mo­herep. Mi'i pote miit'in wuat'i etawa piat — To'iro Iesui kape imisepap ko'i akasa hamo i'atu'e katu­pono Mi'i Miit Iesui yt uwe misepap ewywuat nug hat i i'atu'e. Pywo ti rat wakuap sese nug hat yt miit minug ewywuat i tutunug itote i'atu'e. To'iro pyno wateha'at hamo i'atu'e to'ope.
MAT 9:32 Mi'i hawyi Iesui toto ra'yn mekewat getap wyi topot­mu'eria wywo. Mi'i hawyi mu'ap upi ta'atuerut wẽtup ok miit yt ihay kuap hin i rakat ahiag ipiit piat rakat pote.
MAT 9:33 Mi'i hawyi Iesui tisopo ra'yn mekewat mã'ãu sa'ag hawyi ihay i ra'yn. Sa'awy'i yt ihay kuap takat i waku pe iwẽ piat. Mi'i hawyi itotiaria te'ere­wa­nẽtup kahato — Ta'i yt karãpe i ti wata'a­kasa meketã ewywuat ai'ywania Isareu ywania etama pe i'atu'e katu­pono Iesui ti'atu­sytpok kuap sese ahiagnia miit'in piit pyi i'atu'e. Waku kahato Mi'i Miit i'atu'e to'ope.
MAT 9:34 Ma'ato irania'in Iuteuria wãi'e hap seko sehay moherep haria te'ero'e to'ope — Iesui ahiagnia akag koro esaika hamo ti toi'atu­sopo ahiagnia i'atu'e miit'in me itote. Ahiagnia porekuat ehay pyi tohytpok ahiag ko'i i'atu'e sa'ag Iesui ete.
MAT 9:35 Mi'i hawyi Iesui toto wuat'i tawa kape wuat'i hy totiaria mu'e hamo tehay wawiat hamo. I'ewyte wuat'i Tupana mõtypot yat pe teke ra'yn i'atumu'e hamo. Toi'atumu'e kahato tehay wakuat no — Ewei'atoiat ro yne eiminug sa'ag hap ko'i Tupana kape morem hamuat are katu­pono yt pya hin i Tupana topyhu'at Aipo­typot no hap e'at pe e. I'ewyte toi'atu­moe­hãite kahato torania i'ahu rakaria aikotã aikotã ahu hap ewywuat toi'atu­moe­hãite torania tewyry hap upi.
MAT 9:36 Ta'i miit'in sem tõ'ẽ tõ'ẽ Iesui ewawi. Mi'iria kape teha'at kahato tepiat i'atuky'e kahato hap mywo — Are pãi e ati'atue­ha­kyera'at teran kahato wuat'i mi'iria e katu­pono mi'iria ti piku piku ko'i ho'owasat rakaria ewywuaria gupte'en haria uiwa­nẽtup hawe e. Ahaty'u kahato uipy'a pe mi'iria ekyi uhowawi are katu­pono aihũria yt i'atu'a­pykok hat i ewywuaria ti mi'iria tukupte'en uiwa­nẽtup hawe uipy'a pe e. Ta'i meimuẽ puaria ti aikotã aihũria iku'uro ku'uro rakaria ewy tukupte'en yt uwe i ta'atupoi hat pote e. Pywo pe uipy'a pe i'atu­haky'e'i kahato hap yn uhete katu­pono yt uwe i te i'atumu'e hat i'atu kahato rakaria pytkai e Iesui topot­mu'eria pe.
MAT 9:37 — Uipot­mu'eria miit'in typy'i kahato wyti yt wati'a­tumu'e i te mesuwat yi totiaria mi'iria i'ewyte waku aimi­mu'eria wo torania e. Uimohey haria e aimikoi haat kahato ra'yn i'ok kahato ra'yn hap ewywuaria tukupte'en yt aimimu'e i te ko'i e. Yt typy hin i i'atumu'e hanuaria tukupte'en e. Ta'i aikotã aimikoi haria yt put'ok'i'atu'e hin i aimi'u yne terek hamo hap ewy kahato miit'in mu'e haria yt put'ok'i'atu'e i te ti wuat'i mu'e uhehay wo mesu­wa­ro­tiaria e Iesui topot­mu'eria pe i'ewyte ahepe.
MAT 9:38 Mi'i pote uiwyria'in ehẽtup to haty wo mekewat mikoi wato Ka'iwat ewywuat pe — Tupana ewei'e — Etipo'oro ro ehay moherep haria wuat'i ywania mu'e hamo ewei'e ro Ai'ywot Tupana kape e. — Aikotã uruipo'oro motpap nug haria ahyt uruko wato kape urumikoi wato terek hamuat hap ewywuat ro eti'atu­po'oro emiit'in sem ehay moherep wuat'i ywania pe waku ewei'e o Tupana pe e Iesui topot­mu'eria pe i'ewyte ahepe. Iesui enoi hap ewy atiwan mesuwe uito Mateu.
MAT 10:1 Mi'i hawyi Iesui ti'atu­kaykay temiit'in 12 ok takaria tuwe­wawi. Mi'i hawyi Iesui tum i'atuepe tesaika hap ahiagnia sytpok hamuat wuat'i miit'in piit pywiat. Mi'i hawyi tutum i'atuepe tesaika hap wuat'i i'ahu rakat moehãite hamuat. Toimõ'ẽ kahato tesaika hap temiit'in 12 ok takaria pe tomi­sepap ok tã nug hamo miit'in mu'e hamo i'ahu rakaria moehãite hamo ahiag sytpok hamo hap tutum temiit 12 ok takaria pe.
MAT 10:2 Sa'awy'i tutum tesaika hap tomi­sepap nug hamo topotmu'e Simãu me tomiset'ok PETERU mekewat Nu e hawe rakat pe. Mi'i hawyi ÃTERE pe tutum tesaika hap mekewat Peteru ywyt pe tomi­sepap nug hamo. Mi'i hawyi topotmu'e TIAKU pe i'ewyte iywyt IUWÃU me uhyt Sepeteu sa'yru'in me tutum tesaika hap tomi­sepap nug hamo.
MAT 10:3 Mi'i hawyi topotmu'e WIRIPI pe tutum tesaika hap tomi­sepap ok tã nug hamo. Mi'i hawyi temiit PATORUMEU pe tutum tesaika hap wuat'i nug hamo. Mi'i hawyi tomi'airo TUME pe tutum tesaika hap wakuap nug hamo. Mi'i hawyi uhepe mu'ap pyhyp hat pe MATEU pe tutum tesaika hap tomi­sepap wakuat nug hamo. Mi'i hawyi tomi­po'oro TIAKU pe mehĩ Auweu sa'yru pe tutum tesaika hap towat ewywuat. Mi'i hawyi i'ewyte tomi'airo TATEU pe tutum tesaika hap tomi­sepap wakuap nug hamo.
MAT 10:4 Mi'i hawyi mekewat surara pe tetama apykok hat SIMÃU me tutum tesaika hap tomi­sepap ewywuat nug hamuat. Mi'i hawyi mekewat IUTA pe mekewat uhyt Ikarioti sa'yru pe Iesui tum tesaika hap mekewat Iuta toma'at hanuat ne'i wen ma'ato to'auka hamuat topyhu'at.
MAT 10:5 Toimõ'ẽ sese tesaika hap ahiagnia sopo hamo miit'in moehãite hamo hawyi toi'atu­po'oro topot­mu'eria tehay moherep hamo wuat'i tawa kape wuat'i miit'in me — Uipot­mu'eria e eipe ti uimi'ai­roria 12 ok takaria e. Koitywy woro­ho'o­po'oro ra'yn eipe uhehay wakuat moherep hamo ai'ywania Iuteu ywania kape e. Mesup atiky'esat eweimu'e ai'ywania yn e. Yt atiky'esat i te eweiwat irania'in ywania kape e. Ai'ywania kape yn waku mesup wati'a­tumu'e e. Irania'in pusu kuap haria kape yt eweiwat i mesup uhehay moherep hamo e. Yt naku i mesup eweiwat meimuẽwat yi Samaria ywania mu'e hamo e. Yt eiwehyt'ok tei'o i'atue­tawa pe i'atumu'e hamo mesup e.
MAT 10:6 Pyno ai'ywania tukupte'en aikotã aihũria ho'owasat rakaria ewywuaria e. Mi'i pote waku ai'ywania Iuteu ywania wati'a­tumu'e sa'awy'i e.
MAT 10:7 Put'ok'ewei'e hawyi mio tã ewei'e ro itotiaria pe — Pywo ti aru tut irane Tupana Mipo'oro Aipo­rekuat nuat mehĩ'in mana'in ewei'e o itotiaria pe e Iesui tomi­po'o­roria pe tuwetiat ihay.
MAT 10:8 Mi'i hawyi waku aimẽpuo aimẽpuo eiko­hye­wyry hap upi i'ahu rakaria o ewei'atu­moe­hãite uhesaika hap wo e. I'ewyte iku'uro rakaria ewei'atu­moieĩne'en o uhesaika wo e. I'ewyte hepihi pihi rakaria o ewei'atu­mokã'ã uhesaika hap wo e. I'atupã'ãu sa'ag ko'i ahiagnia ewei'atu­sopo yne i'atupiit piat ko'i uhesaika hap wo e. Ta'atusa'up nug neran ta'atu­moe­hãite hap ete pote o wãi'ewei'e o i'atuepe e katu­pono ti yt ha'up ete i ti atum na'yn uhesaika hap miit'in moehãite hamuat. Pyno mi'i hap ewy ti yt kat sa'up i ete ewei'atu­moe­hãite miit'in uimiium ehepiat yt kat sa'up i hap ewy e.
MAT 10:9 Waku ti yt kat i hin i sa'up ewetioto eiwywo are yt i'ape rakat i wyti yt i'yhop takat i wyti. Yt kat i mig'i wo ewetioto eheti­neiru e. Uiwyria'in yt atiky'esat i sẽtup'i sẽtup'i e haria wo eweikupte'en eimi­mu'eria py'asetpe e.
MAT 10:10 Waku yt kat i mu'ap sa'up i'ewyte eimi'u mu'ap upiat yt kat i ewetioto e. Waku wẽtup yn ehesokpe eipiit piat are i'ewyte wẽtup yn epy sokpe eipy piat yn waku ewetioto e. I'ewyte ehekare'en ko'i yt naku i ewetioto e. Eimi­po­wy­roria eipoi teran mote waku i'atu­wywo ewehenuk are katu­pono sa'awy'i Tupana to'e miwan ahepe — Ewetum no sa'up eipotpap nug haria pe e Tupana miwan me.
MAT 10:11 Mi'i pote put'ok'ewei'e wẽtup tawa pe i'atumu'e hamuat hawyi waku itote eweikat iwese rakaria eimimu'e kuap teran haria. Mi'i hawyi waku eweikupte'en i'atu'yat pe aikope aikope — Uhyt mimi waku uru'yat pe eweikupte'en e haria yat pe e. Mi'i tote waku eweikupte'en e. Yt eiwo'osat i tei'o getap upi getap upi meiẽwat tawa piat ko'i upi e. Waku sa'awy'i­tewuat eweikupte'en no — Uru'yat pe uhyt mimi waku meiũpe eweikupte'en e haria yat e. Mi'i tote eweikupte'en mekewat tawa piaria ewei'atumu'e turan e. Mi'i e hat yat pe yn eweikupte'en itote turan e. Pyno ewei'atumu'e yne mekewat tawa piaria hawyi waku eweinõ'ẽ mekewat i'yat pyi hawyi waku eweiwat wẽtup tawa kape e.
MAT 10:12 Mi'i hawyi wẽtup yat pe eiwehyt'ok hawyi waku ewehẽtup Tupana pe — Tupana ewei'e eti'atu­mo­wepit kahato yne ro mesuwat yat piaria ewei'e eiwehyt'ok mekewat yat pe turan e.
MAT 10:13 Mekewat yat piaria i'atu­wese kahato ehepiat ta'atumu'e hap ete pote ti aru Tupana ti'atu­mo­wepit kahato mekewat yat piaria eimiẽtup Tupana piat hap ewy ra'yn e. Ma'ato yt i'atu­wese i pote Tupana yt tum i i'atu­mo­wepit hap ei'e hap ewy. Ma'ato yt i'atu­wese i pote i'atu­wepit hap eimiẽtup Tupana kaipywiat ta'aipok meremo ehowawi e.
MAT 10:14 Ma'ato wẽtup tawa piaria torania yt ta'atu­wa­nẽtup teran i ehehay uhepiat kape pote waku eweiwat i ra'yn meiẽwat yt iwese rakat tawa pyi. Mi'i hawyi i'atue­hamo waku mekewat tawa okipy sawiu eweipikpik'ok eipy etiat itotiaria uimohey hap pun haria hap moherep hamo e.
MAT 10:15 Katu­pono Tupana tikuap ta'yn mi'iria uimohey hap pun haria hawyi yt iwẽpohep hin i i'atu'a­piheg haty wuat hap ete e. Karãpe Tupana tut wakuaria yt nakuaria i to'e hamuat hap e'at pe mi'iria pe ti aru po'og po'og haty wo to'e — Yt nakuaria i sese eipe e aru Tupana uhetiat eimienoi pun haria pe. Ta'i yt ipohep hin i ti aru i'atu'a­piheg haty wuat hap ete are aikotã sa'awy'i hap ewy. Sa'awy'i te ti Tupana timoma kahato mekewat tawa Sutuma piaria i'ewyte tawa Kumura piaria toi'atuwuk kahato aria wo i'atu­minug sa'ag hap upi e. Ta'i toi'atu'a­piheg kahato ti meimuẽwat tawa piaria aria wo e ma'ato mekewat tawa uhehay pun haria ti aru po'og po'og toi'atu'a­piheg wuat'i etawa puaria kai are po'og tawa Sutuma tawa Kumura wuk hap ko'i kai aru uimi­po'o­roria ehay pun haria pote e.
MAT 10:16 Uipot­po'oria eiwe'eg wo o karãpe ewei'atumu'e wẽtup tawa yt uhehay kuap i te haria katu­pono ti aikotã aihũria awahuru ko'i py'asetpe tukupte'en hap ewy ti aru eweikupte'en eipe e. Uiwyria'in woro­ho'o­po'oro miit'in mu'e hamo ma'ato o eiwe'eg wo katu­pono ipoity kahato ti itote uimohey hap pun haria haiwot rakaria awy'ato ko'i ewywuaria e. Eiwe'eg wo o uihũria ewei'atumu'e uhetiat turan. Waku pe iperup'i rakaria wo eweikupte'en ewei'atumu'e uhetiat turan aikotã pykasu tuwe'eg wo kahato toĩne'en hap ewy. I'ewyte aikotã mio yt iky'esat hin i to'auka hap ewy o eweikupte'en itote e.
MAT 10:17 Eiwe'eg wo o katu­pono tukupte'en ti aru itote eipyhyp teran haria e. Morekuat pupiat eipag neran nakaria surara pupiat eipag neran haria ei'apiheg ei'ahyk ahyk hanuaria e. Ai'ywania mu'e Tupana ehay wuat hap yat pe ti aru e ehaty'i haty'i ti aru eipetek petek popuo ti aru e. Mi'i pote eweikupte'en i'atu­py'a­setpe aikotã pykasu ko'i moi ko'i we'eg hap ewywuaria eweikupte'en e.
MAT 10:18 Meiũran ti aru ahewa­nĩ­kaptia ehereto ta'atu­po­re­kuaria kape uhemiit'in eipe pote. Mi'i hawyi ta'atu­ky'esat kahato eipag ta'atu­po­re­kuaria po pe ei'apiheg apiheg hap ei'ahyk ahyk hamo e. Itote ti aru apo'i'atu'e eiwehay aparap teran haype apo'i'atu'e ma'ato waku ewei'atumu'e mi'iria uhehay wakuat wo yn na'yn ai'ywania akag ko'i i'ewyte irania'in ywania akag ko'i uhehay kuap hamo e. Eweikupte'en aru itote uhetiat sehay moherep more­kuaria piat hamo. Mi'i pote o uiwẽ wywo o eweikupte'en itote e.
MAT 10:19 Karãpe ahewa­nĩ­kaptia ehereto more­kuaria kape turan o yt eiwe­wa­nẽtup ko'i ko'i tei'o — Kat ui'e hap kat ui'e hap ko'i kape kat are aru atiwesat morekuat pãi yt ewei'e tei'o eiwa­nẽtup hawe katu­pono ti aru mekewat e'at pe Tupana hum na'yn eiwa­nẽtup hawe ehepiat i'atu­wesat hamuat kat ewei'e kat ewei'e waku ewei'atu­wesat hamuat e.
MAT 10:20 Katu­pono ti aru mekewat e'at pe yt eiwat sehay hin i tuwẽtem eiwẽ pyi are ma'ato Ai'ywot atipy piat Pã'ãu kaipyi ti aru tuwẽtem eiwẽ pyi ehehay e.
MAT 10:21 I'ewyte ti aru mekewat e'at pe eheyke'et'in eheywyt'in eheinyt'in ti aru ehewa­nĩ­kaptia wo ti tukupte'en uhehay moherep haria eipe pote e. Mi'i hawyi ti aru ta'atukat kahato aikotã miat ei'atu'uka hamuat e. Ei'ywot eity eha'yru'in ehaki'yt'in ti aru ei'auka hamuat hap kat haria wo tukupte'en e'yat piaria e. Mi'i hawyi ti aru eimẽpyt'in i'ewyte ehewa­nĩ­kaptia wo sese ra'yn te'ero­pyhu'at wuat'i miit'in aru uhemiit'in no ra'yn eipe pote e. Eity'in ei'ywot'in i'ewyte ei'auka teran haria wo tukupte'en katu­pono yt eweipun i uimohey hap pote e.
MAT 10:22 Yt naku i kahato eipe i'atu'e aru ehete wuat'i miit'in uimohey haria eipe pote. Ma'ato uwe uwe uimohey te ta'atue­wa­nĩ­kaptia py'asetpe pytkai uimie­ha­kyera'at nuaria sese wo te'ero­pyhu'at e.
MAT 10:23 Uipot­po'o­roria karãpe wẽtup tawa piaria eimohan ei'atu'uka hamo mi'i hap e'at pe eweikat ro wẽtup tawa hawyi ewei'atumu'e mi'iria e. Waku yne tawa pe wahenoi yne e. Uheywyt'in uheinyt'in waku wahenoi yne ai'ywania tawa ko'i piaria e. Wahenoi yne ywania kahu hawyi ta'atukuap mesuwat uhehay wakuat eiwẽ pyi hawyi ti aru waku ra'yn ara'aipok atipy kaipyi ehowawi i ra'yn e.
MAT 10:24 Pyno ti aimu'e haria sese tukupte'en aimi­mõ­typot nuaria e. Ta'i aika'i­wuaria aimi­mõ­typot nuaria wo tukupte'en mi'iria ti po'og aikai wato'e e.
MAT 10:25 Pywo pe pywo pe uimohit pote i'ewyte ti aru eimohit e. Mekewat e'at aru karãpe eimohit kahato mesu­wa­rotiat uimohey haria eipe pote waku eiwa­tetup kahato uimohit hap kape hawyi mio tã ewei'e eiwa­nẽtup hawe — Pywo pe ti Aimu'e hat Iesui ewy watoĩne'en mesup miit'in mikyry'i hamo waku ewei'e. Uha'yru'in uhaki'yt'in mesu­wa­ro­tiaria uhet'ok sa'ag — Ahiag koro i'atu'e sa'ag uhepe. Pyno aikotã ehet'ok sa'ag kat som te'ero'e hap ewy aru ehete uimẽtpyt'in pote. Pyno ehepe — Ta'i ahiag koro mẽpyt'in sese ko'i eipe i'atu'e sa'ag aru ehete e.
MAT 10:26 Ma'ato yt eweiken'ẽ tei'o i'atumu'e uhehay wuat hamo i'atu­mi­kyry'i ehetiat pytkai are katu­pono Tupana tikuap kahato i'atu­mi­kyry'i hap yt pywo i rakat. Mi'i hawyi ti aru toimo­herep wuat'i miit'in me ehewaku kahato hap i'ewyte i'atu­heso hap. Mi'i pote yt eweiken'ẽ tei'o i'atumu'e uhetiat hamo i'atu­mi­kyry'i ehetiat pytkai are ehepe e Iesui.
MAT 10:27 Kat are kat are ehewaure ka'a pe mi'i e hamo yn na'yn o ewei'atumu'e itote ehewa­nĩ­kaptia eima'at reran turan e. Kat e hap som eweikuap yt uwe mikuap mo i ehewaure ka'a pe uhehay mi'i hap o eweimo­herep i'atumu'e hamuat meimuẽ­waria py'asetpe turan e. Eweikuap uhehay i'ypyryp we eweikupte'en turan ehenoi ro mi'i i'atuepe ihot'ok puo e.
MAT 10:28 Yt eweiken'ẽ tei'o uhehay moherep hamo ei'atu'uka teran haria pupi katu­pono mi'iria ti yt aimoma kuap i e. Aipiit yn ta'atu'auka kuap ma'ato aheĩne'en hap sese wuat'i e'at piat aipã'ãu aheha piat wuat'i e'at piat aipy'a piat wuat'i e'at piat aimoieĩne'en hap yt ta'atu­moma kuap hin i e. Mi'i pote yt eweiken'ẽ i mi'iria ei'auka pupi. Yt kat hamo i watoken'ẽ katu­pono yt ta'atu­po'oro kuap i miit'in ta'atu­ku'uro wuat'i e'at pe hap kape e. Pywo pe ti Tupana yn eipo'oro kuap eipiit i'ewyte eipã'ãu po'oro kuap aria wato kape aikope eipiit i'ewyte eipã'ãu sese iku'uro at ka'ap wuat'i e'at pe hap kape e Iesui temiit'in me.
MAT 10:29 Ahetama puo ti weita hit ko'i watikyi'at aimi'u wo e. Yt ha'up woity hin i watikyi'at weita hit e. Ta'i wẽtup ape hit po'og yi kai sa'up mo yn watikyi'at kuap ta'yn typy weita hit e. Yt ha'up woity hin i pãi weita hit ma'ato pywo pe ti Ai'ywot atipy piat haty'u kahato topy'a pe wẽtup weita iku'uro e. Pywo pe ti toikuap kahato aikope aikope wuat'i weita koi tukupte'en hap toikuap e. Wẽtup weita hit iku'uro hap toikuap topy'a pe katu­pono toi'atuky'e kahato haype re. Mi'i hap ewy te ti ma'ato po'og po'og toikuap aiku'uro hap katu­pono po'og aiky'e torania kai e.
MAT 10:30 Ta'i aikuap kahato ti Tupana e. Ai'asap ti torania toimo­rania yne yne ai'asap toikuap karania ai'asap hap toikuap kahato.
MAT 10:31 Mi'i tupono o yt eweiken'ẽ tei'o miit'in miat ei'auka hap pupi katu­pono eika­wiano hat toĩne'en Tupana e. Ta'i iwanẽtup hawe eweikupte'en po'og po'og weitaria kai e. Tupana tiky'e kahato weitaria ma'ato tuwa­nẽtup hawe eipe po'og po'og weitaria kai e.
MAT 10:32 Pywo pe ti uwe uwe to'e uhetiat irania'in py'asetpe — Atomohey kahato ti Iesui ti rat e. Mi'i Miit ri Uheha­kyera'at hat i'ewyte Uika'iwat koro e irania'in me mi'i e hat piat Uito i'ewyte wy are'e — Meiẽ miit ri Uimohey kahato hat Papai are'e wy Ui'ywot atipy piat pe mio tã e hat etiat e.
MAT 10:33 Ma'ato uwe uwe — Yt atomohey i Mi'i Miit katu­pono yt Uika'iwat i ti Mi'i e uhepiat pe irania'in me mi'i hat pe Uito i'ewyte — Yt uimohey hat i ti mi'i are yt uhemiit i ti mi'i miit are wy Ui'ywot atipy piat pe mio tã e hat etiat e.
MAT 10:34 Yt eweiwa­nẽtup tei'o ariot mesu­wa­rotiat miit'in wuat'i puat wo'owese hap nug hamo aiwa­nẽtup hawe e katu­pono yt wo'owese hap ewy hin i atunug mesuwat yi tote katu­pono ti aru irania'in wyti aru i'atu­py'ahak kahato ahete uimohey haria eipe pote. Ta'i kyse'yp wywo ai'auka hamuat hap ewy katu­pono Tupana emiit'in aito pote e. Mi'i hawyi yt kat i wo'owese hap ewy topyhu'at mesu­wa­rotiat uimohey haria ete wuat'i miit'in i'atu­py'ahak hawyi kyse'yp wywo aikat ai'auka hamo e Iesui.
MAT 10:35 Katu­pono ti aru meiũran eha'yru'in ehu'uka wyti aru uimohey haria eipe pote. I'ewyte ti aru meiũran ehaki'yt'in aru ehu'uka uimohey ehepiat hap upi e. I'ewyte ti aru eimẽpyt'in ehary'i'in i'atu­py'ahak kahato ehete uimohey haria eipe pote. Mi'i hawyi ti aru esa'yru ehary'i tu'uka tosa­kitu wywo uimohey hap upi.
MAT 10:36 Ei'yat piaria yt uimohey haria i i'ewyte i'atu­py'ahak aru ehete po'og torania kawiat po'og nakat e Iesui.
MAT 10:37 Mi'i pote uwe uwe toty to'ywot ky'e po'og uikai mi'i hawyi ui'atoiat katu­pono toiky'e po'og to'ywania po'og uikai mi'i haria ewaku hap ti yt put'ok'e i uhemiit nuat hamo e. I'ewyte uwe uwe tomẽpyt tosa'yru tosaki'yt ky'e po'og uiky'e hap kai mi'i hat ewaku hap yt put'ok'e i uhemiit'in nuat hamo e.
MAT 10:38 Mi'i hawyi ui'auka pytkai yt atoiat hin i imohey hap e haria yn ni waku uhemiit nuat hamo e. I'ewyte uwe uwe uhewaku hap ewywuat nug hat yn ni waku uhemiit nuat hamo e.
MAT 10:39 Ma'ato uwe uwe — Ta'i atunug aru uimi­ky'esat ko'i yn mi'i pote waku pe kahato areĩne'en e hat wyti aru yt iwepit hin i topyhu'at tutunug yne tomi­ky'esat ko'i pytkai. Ma'ato uwe uwe uimi­ky'esat yn nug hat ti aru topyhu'at iwepit hat sese e. Toipuẽti mesuwe wy topy'a piat tomo­wepit hap tutunug yne uimi­ky'esat ko'i hawyi e. Uimi­ky'esat nug haria yn wyti ieĩne'en kahato mesu­wa­rotiat hanuat wepit hap sese puẽti hamuat e Iesui temiit'in me.
MAT 10:40 Pywo ti uwe uwe — Ereke ro mehĩ mana e ehepe uhemiit'in eipe pote mi'i hat wyti uhepiat — Ereke ro Uhyt Mimi e hat ewy ra'yn topyhu'at e Iesui. I'ewyte uwe uwe — Ereke ro e uhepe mi'i hat Uipo'oro hat Tupana piat — Ereke ro e hat ewy ra'yn topyhu'at e Iesui.
MAT 10:41 Pywo ti uwe uwe Tupana mipo'oro tehay henoi hamuat pe tuwese popuat — Ereke ro Tupana mipo'oro e hat pote Tupana tum hamuat ha'up aikotã tomi­po'oro piat tutum hap ewy te tutum aru e. I'ewyte uwe uwe — Ereke ro mehĩ mana e mekewat waku rakat pe tuwese hap wywo mi'i hat pe ti Tupana tum aru mekewat waku rakat waku nug hat piat sa'up ok tã e.
MAT 10:42 I'ewyte yt eweiwaure tei'o uhemiit'in miit'in emiit'in ihaky'e'i rakaria powyro hap etiat katu­pono uwe uwe hum y'y ra'ak wẽtup ekui'a yn uhemiit pe po'og yt uwe i miky'e i rakat pe i'atuky'e hap wywo mi'i hat pe ti aru atum ha'up e Iesui temiit'in 12 ok takaria pe. Iesui mienoi hap ewy atiwan mesuwe uito Mateu.
MAT 11:1 Mi'i hawyi Iesui to'e temiit'in me — Pyno waku ra'yn eweikuap ta'yn einãpin hap aikotã aikotã atiky'esat ewei'atumu'e irania'in miit'in uhehay ete hap e. Pyno to'iro meiũpepyi aiweran hap kaipyi aikowo aikowo tawa hit ko'i upi i'atumu'e hamo e 12 ok takaria pe. Mi'i hawyi tuwat ra'yn yt pya wuaria i kape.
MAT 11:2 Mi'i hawyi ti mekewat wo'oset'ok hat Iuwãu tikuap ta'yn aikotã aikotã Iesui minug ipotpap hap ko'i topyhik pyi. Mi'i hawyi ti toi'atu­po'oro ra'yn temiit'in Iesui kape apo'i'atu'e hamo.
MAT 11:3 Mi'i hawyi toipo'oro temiit'in tehay wywo apo'i'atu'e hamo. — Urumu'e hat i'atu'e sa'awy'i ahet'ok hat Iuwãu tikuap teran En apo Tupana Mipo'oro Urueha­kyera'at hanuat ra'yn apo sio uruhe­katup te wẽtup ok imipo'oro e hap toikuap teran i'atu'e.
MAT 11:4 Mi'i hawyi Iesui ti'atu­wesat — Ewei'aipok to Iuwãu kape hawyi waku ewehenoi ro tope aikotã aikotã eimikuap uhehay wakuap ko'i tope i'ewyte uiminug ko'i aikotã aikotã ei'akasa hap ko'i ewehenoi ro tope e.
MAT 11:5 Mi'i hawyi ewehenoi ro tope aikotã yt hekat i rakaria ati'atumu'e Tupana ehay hap ewehenoi ro tope.
MAT 11:6 Mi'i hawyi i'ewyte wẽtup uhehay se eweitioto ro aiwy Iuwãu kape mio tã ewei'e tope — Uwe uwe uimohey pot'i kahato tepiat ho'opot pytkai mi'i hat ti aru uimo­wepit sese hanuat topyhu'at ewei'e ro Iuwãu me e Iesui Iuwãu potpo'o­roria pe.
MAT 11:7 Mi'i hawyi te'era'aipok i ra'yn Iuwãu potmu'eria. Mi'i hawyi Iesui ti'atumu'e itotiaria miit'in sem wo'oset'ok hat Iuwãu etiat — Sa'awy'i eweiwat kahato yahig kape aimu'e hat Iuwãu kapiat ei'akasa hamo e. Mi'i hawyi ti itote eweipuẽti ti Tupana ehay moherep kahato hat sese eimikat ewywuat kahato e. Iuwãu ti iheg miat kahato Tupana mohey hat yt kowo'i kowo'i wanẽtup hat yt akuara yp wasere potiat kowo'i kowo'i hap ewywuat hin i ti eweipuẽti Iuwãu itote e.
MAT 11:8 Irania'in miit'in esokpe kahuria yt hap ewy hin i ti Iuwãu topyhu'at katu­pono ti hesokpe kahu rakaria more­kuaria yat pe yn ni tukupte'en sokpe kahuria puo ma'ato mi'iria yt Iuwãu ewywuat hin i katu­pono yahig notiat hesokpe i'anam nakat puo Iuwãu toĩne'en e.
MAT 11:9 Pyno kan hamo eweiwat Iuwãu kapiat ei'akasa hamo mekewat yahig kape sa'awy'i. Ta'i Tupana ehay moherep hat ehay kuap hamo eweiwat waket'ok hat Iuwãu a'akasa hamo e.
MAT 11:10 Ta'i sa'awy'i mio tã e Tupana Tosa'yru pe miwan me — Uha'yru e meiũran ti aru woro­po'oro miit'in kape ma'ato ti atiky'esat sa'awy'i wẽtup ok ti toto e'yianme hap atiky'esat. Mi'i ti eto hap etiat enoi hamuat atipo'oro e Ui'ywot sa'awy'i uhepe Iuwãu etiat.
MAT 11:11 Mi'i hawyi mekewat e'at pe put'ok'e mesuwe Tupana e hap ewy are. Mi'i hawyi ahet'ok kahato y'y wuat hat put'ok'e ra'yn are. Waku kahato Iuwãu are. Po'og wakuat wuat'i sa'awy'iwuat Tupana ehay moherep haria kawiat hat are wen ma'ato ti aru meiũran tukupte'en Tupana ehay moherep haria ahyt mesuwat yi totiaria uimohey haria yn po'og waku rakaria Iuwãu kai are. Pyno pywo pe ti koran ti uwe uwe uimohey hano toĩne'en uhemiit no uimi­ky'esat nug hano mi'i hat po'og po'og iwato Tupana wanẽtup hawe mekewat Iuwãu kai are. Ta'i yne uimohey haria aru po'og Tupana mimõ­typot wo tukupte'en atipy pe ahet'ok hat Iuwãu kai are. Pywo ti rat yt iwato hin i uhemiit mesuwe uimohey haria py'asetpiat pytkai meiũran atipy pe hawyi po'og Tupana mimõ­typot no topyhu'at ahet'ok hat Iuwãu kai are e.
MAT 11:12 Ha'awyte i'ewyte mesup te i'atu kahato — Atiky'esat Tupana Uipo­rekuat no e haria wen ma'ato irania'in haiwot rakaria ti'atu­pyhyp teran Tupana Aipo­rekuat nuat hap are. Sa'awy'i Iuwãu mienoi ta'atu­pyhyp teran i'ewyte koitywy uimienoi ta'atu­pyhyp teran ma'ato mi'i pytkai yt aipyhyp kuap i katu­pono tuwehyt'ok kahato miit'in uhowawi wãi'i'atu'e pytkai. Ta'i tõ'ẽ kahato uhowawi miit'in sem Tupana nug ta'atu­po­rekuat no teran haria yt uwe i i'atu­pyhyp kuap i are e Iesui.
MAT 11:13 Yt uruto yn i uruhenoi mi'i hap ko'i katu­pono sa'awy'i­wuaria Tupana ehay enoi haria ti torania henoi — Meiũran aru Tupana tipo'oro Aipo­rekuat nuat ahowawi e hap ko'i ete ti ta'atu­henoi. I'ewyte mekewat Musei miwan me yne ihay mi'i hap ko'i ete sa'awy'i te mesup te Iuwãu aimu'e hap e'at pe te woro­ho'omu'e hap e'at pe are e.
MAT 11:14 I'ewyte mekewat sa'awy'iwuat Tupana ehay moherep hat Eria ti Iuwãu ewywuat kahato toĩne'en are. Sa'awy'iwuat Tupana ehay enoi haria ti — Ta'aipok wyti aru Eria ahowawi Tupana Mipo'oro Aipo­rekuat nuat ut hap moherep hamo. Aheha­kyera'at hat yianmete tut aru Eria i'atu'e miwan me are. Pywo ti rat Iuwãu etiat ta'atu­henoi are. Eria i'atu'e pytkai ma'ato Iuwãu etiat ta'atu­henoi yianmete are. Pyno mi'i e hap eweimohey kuap wote eweimohey ro are katu­pono Eria ewywuat kahato Iuwãu are e.
MAT 11:15 Pyno waku mio wuat sehay teke ehewaure ka'a pe are. Ehewaure toĩne'en pote waku eweiwa­nẽtup uhehay kape are e.
MAT 11:16 Mi'i ahenoi teran ehepe aikotã tukupte'en miit'in mesu­wa­ro­tiaria uhehay pun haria yt uimohey haria i are. Ta'i mi'i haria ti hira­karia wo'okyry haria ewywuaria tukupte'en wema­hara haria ewy mi'iria tukupte'en yt ipap i rakaria ewy are. — To'iro watu­we­ma­hara i'atu'e irania'in me.
MAT 11:17 To'iro ahehairu i'atu'e haria ewy. To'iro akuara piat wepy hawe ahehairu aikotã se'aito hap e'at piat wepit hap ewy ahehairu i'atu'e to'ope irania'in hira­karia pe ma'ato — Yt urupap i i'atu'e are. Mi'i hawyi irania'in hira­karia to'iro wo'osyp hap kape. Itote watunug akuara piat wepy hap aikotã wo'osyp hap e'at piat aiwak hap ewy i'atu'e irania'in hira­karia to'ope ma'ato — Yt atunug neran i i'atu'e are. Pyno mi'i haria ewy uimienoi pun haria mesu­wa­ro­tiaria tukupte'en are e.
MAT 11:18 Ta'i sa'awy'i ti Iuwãu put'ok'e mesuwe mesu­wa­ro­tiaria mu'e hamo. Mi'i hawyi tuwe­mosy'at kahato i'ewyte yt kat i imahy Uwa kawiat tutu'u. Mi'i hap pytkai — Ahiag wyti epiit pe I'atu'e Iuwãu me.
MAT 11:19 Mi'i hap ewy te Uito Eheyke'et Eikywyt put'ok'are mesuwe eimu'e hamo are. Mi'i hawyi ati'atumu'e kahato uiwepit popuo kahato are yt Iuwãu ewywuat hin i katu­pono Uito atu'u yne yne mi'u ko'i i'ewyte aremahy'u yt Iuwãu ewy hin i areĩne'en. Uheko wẽtup takat yt uimohey haria i py'asetpe ma'ato mi'i pytkai — Ta'i ienuk kahato rakat mahy u yn hat mi'i i'atu'e uhepiat yt uimohey haria i. Ta'i mu'ap pyhyp hap sa'up sat haria ahewa­nĩ­kaptia yt nakuaria i wy ok sese ne'i ti Mi'i Miit i'atu'e uhetiat are. Are pãi pyno ti uhehay pun haria mi'iria aikotã meimuẽ wuaria hira­karia te'eru­we­ma­hara hap e'at piat ewywuaria kahato uimienoi pun haria are. Iuwãu Uito ti yt uruwo'o'ewy hin i urueko ko'i ete ma'ato ti Tupana we'eg hap yn tuwẽtem uruwẽ pyi. Mi'i tupono we'eg haria tuwat kahato uruehay upi ma'ato irania'in ni uruehay pun haria ne'i te'ero­pyhu'at. Yt i'atuwe'eg hin i uruehay pun haria aikotã hira­karia yt urupap i e haria ewywuaria tukupte'en mesu­wa­ro­tiaria yt uimohey i haria e. Mi'iria — Yt urupopap hin i uruto e haria mi'iria. Yt kan hamo i ta'atupun Tupana ehay wakuat te'en ne'i uruwẽ piat are. Mi'i ewywuat mesu­wa­ro­tiaria yt uimohey i haria are e.
MAT 11:20 Mi'i pote Iesui tuwẽ­powat tehay pirik wo — Tawa Karireia piaria woro­ho'o­saty'i saty'i eipe katu­pono uhehay pun haria sese eipe. Aikopiat aikopiat uhewyry eimu'e hamuat uimi­sepap ko'i Tupana esaika wuat hap ko'i yt miit'in minug kuap i ko'i ati'atu­mo­herep kahato ehepe. Atunug kahato ra'yn ti eipy'a­setpe uhehay wakuap pywuat hap moherep hamuat wen ma'ato ewei'akasa yne mi'i ko'i pytkai uhehay pun haria wo eweikupte'en eipe. Yt naku i are. Yt uwe minug kuap ewywuat i ra'yn atunug ehehamo ma'ato ti yt ewei'atoiat teran hin i te eiminug sa'ag ko'i pãi are e.
MAT 11:21 Tupana misaty'i saty'i ko'i wuano eweipyhu'at are tawa Korasĩ piaria tawa Pesaita piaria are. Meiũran wyti aru eweiwak kahato are katu­pono ho'opot kahato hanuaria eweikupte'en are. Wakuap sese hap ko'i ra'yn atunug ehehamo miit'in moehãite hap miit'in ky'e hap ma'ato mi'i pytkai yt eiwe­morem neran hin i Tupana kape eiminug sa'ag ko'i kaipyi are. — Sa'awy'i Tupana tiwuk ta'yn meimuẽ wuat tawa Tiru piaria tawa Sitãu miaria ewei'e yt naku i nug haria mi'iria pote ewei'e eiwo'ope ma'ato eipe ti po'og yt nakuat i tawa Tiru piaria tawa Sitãu miaria kai are katu­pono Uito areĩne'en mi'i tote mekewat e'at pe hawyi mi'i turan ti uiminug hap ko'i atomo­herep itotiaria pe pote uimohey haria ra'yn mi'iria te'ero­pyhu'at mesup are. Sa'awy'i te'eraha'at kuap uiminug wakuat ko'i kape hawyi meremo te'eru­we­morem Tupana kape are. Sa'awy'i­wuaria te'eraha'at pote meremo ta'atupag sokpe i'anam nakat hawyi te'era'apyk ta'yn ywytup tote i'atu­minug sa'ag atoiat hap moherep hamo ta'atueko ewy. Ma'ato atimo­herep ehetawa piaria pe iwato kahato hap uimohey hamuat wen ma'ato mi'i pytkai uimohey hap pun haria eweikupte'en are. Are pãi mi'i pote ti rat po'og yt naku i nug haria eweikupte'en tawa Tiru piaria kai tawa Sitãu puaria kai are e.
MAT 11:22 Karãpe Tupana piat miit'in apiheg hap e'at put'ok'e ra'yn turan mi'i hap e'at pe ti aru po'og Tupana mi'apiheg ko'i wo eweipyhu'at tawa Korasĩ piaria tawa Sitãu ywania kai are e.
MAT 11:23 I'ewyte eipe tawa Kawana'ũ piaria — Wuat'i miit'in urukuap kahato haria ewei'e uruto iwato'in nakaria pote. Ta'i atipy piaria ewy uruwato pote ewei'e ma'ato yt hin i are. Eipe yt karãpe i put'ok'ewei'e atipy pe ma'ato Tupana mipugha wuat wyti eipe aria wato pe ti aru yt nakuaria i eipe pote. Sa'awy'i ti Tupana tiwuk ta'yn tawa Sitãu piaria yt nakuaria i pote. Pywo ti rat Uito areĩne'en itote mekewat e'at pe turan eiwa'a­kasa hap ko'i moherep hamo itotiaria pe mesup ta'yn uimohey haria wo tukupte'en katu­pono atimo­herep ta'yn uiminug wakuap sese hap ko'i sa'awy'i­wuaria tawa Sitãu piaria pe pote meremo ta'atu'atoiat ra'yn ta'atu­minug sa'ag hap ko'i are. Eipe ti ewei'akasa yne hawyi yt ewei'atoiat hin i eiminug sa'ag hap ko'i. Mi'i pote aria wato pe Tupana eipugha irane are katu­pono yt uimohey hin i eipe iwato kahato ra'yn atunug uimi­sepap eipy'a­setpe pytkai are. Nimo ti Tupana tiwuk ta'yn tawa Sutuma piaria yt naku i apiheg hap are ma'ato ti eipe po'og yt nakuaria i mi'iria kai are. Ta'i woro­ho'omu'e kahato ra'yn eipe ma'ato ti yt uimohey hin i are. Mi'i hap ok tã atunug sa'awy'i tawa Sutuma tawa Tiru pe pote itotiaria tukupte'en na'yn paa'e haria ta'atu­minug sa'ag ko'i etiat haria are.
MAT 11:24 Karãpe ti aru Tupana wo'o'apiheg hap e'at put'ok'e ra'yn mi'i hap e'at pe ti aru po'og eipe Tupana mi'apiheg wuanuaria wo eweikupte'en mekewat tawa Sutuma piaria kai mekewat tawa Tiru piaria kai are e Iesui tehay pun haria pe.
MAT 11:25 Mi'i hawyi Iesui to'e To'ywot pe Tupana pe — Ui'ywot e arehum kahato ra'yn ewawi Tupana. Yne atipy piaria ko'i Porekuat En i'ewyte mesu­wa­rotiat yi totiat Porekuat En are. Ta'i wuat'i Porekuat no ereĩne'en e. Waku kahato En Tupana katu­pono hira­karia ewywuaria — Yt uruikuap kahato i te En i'atu'e uhepe uimohey sese haria mi'iria e. Ma'ato irania'in — Uruikuap ta'yn po'og torania kai e haria. Uruto yn iwe'eg nakaria e haria pe yt atimo­herep hin i uwe uipo'oro hat e. Yt ta'atukuap hin i uwe hap En Ui'ywot Uipo'oro hat. Yt karãpe i mi'iria uimohey haria wo tukupte'en e.
MAT 11:26 Ta'i paa'e haria pe — Yt uruikuap kahato i te e haria pe etomo­herep ta'yn ti Uipo'oro hat ma'ato irania'in me — Uruto yn iwe'eg nakaria e haria pe yt etomo­herep teran i yt ekuap teran i yt emienoi ky'esat i haria pe are. Mi'iria ti yt karãpe i uhemiit no te'ero­pyhu'at e Iesui To'ywot pe.
MAT 11:27 Mi'i hawyi to'e i itotiaria pe — Mio Ui'ywot tum na'yn ni uhepe yne yne towanuat are. Uiwyria'in yt uwe i mesu­wa­ro­tiaria uikuap sese haria e. Ma'ato Ui'ywot yn ni uikuap sese hat. I'ewyte yt uwe i mesuwat yi totiaria Ui'ywot kuap sese haria e. Ma'ato Uito atikuap kahato Ui'ywot e. Ta'i Uito yn ikuap sese hat arepyhu'at are e Iesui itotiaria pe.
MAT 11:28 Mehĩ'in mana'in woro­ho'oky'e kahato torania eiperia pote eweĩ'ẽ ro uhowawi wuat'i miit'in e. Uwe uwe hatek takaria eweĩ'ẽ ro uhowawi e. Uwe uwe ho'opot hanuaria eweĩ'ẽ ro uhowawi e. Pywo pe ti uwe uwe tõ'ẽ uhowawi mi'i haria pe atum uiwepit hap ok tã e. Eweho'opot hap atu'u yne e. Ei'arot hap i'ewyte ahupit mekewat yt eimi­hupit kuap i hap e. Eiwe­mohy hap atum ehepe eweĩ'ẽ uhowawi pote e.
MAT 11:29 Uiwyria'in uheropat haria eweikupte'en pote po'og waku eweipuẽti mesuwat yi tote e. Pywo pe ti uwe uwe toto uhupi mi'i hat waku pe topyhu'at katu­pono uipotpap po'og waku torania kai e. Pywo uhe'yry­sakag ni yt ipotyi hin i yt sa'awy'iwuat yt ewywuat hin i e. Pyno eweĩ'ẽ ro uhowawi yne yne ehero hap wywo hawyi yt woro­ho'o­saty'i saty'i hin i ra'yn katu­pono uiwa­nẽtup hawe paa'e haria kahato eweipyhu'at e. Ehehaky'e'i hap atu'u kahato uipy'a pe e. I'ewyte uiperup'i kahato pote meremo eweipuẽti uikaipyi uimohey ehepiat hap e.
MAT 11:30 Uimiium eipotpap hamuat yt ipotyi hin nakat i sa'awy'iwuat ewy i katu­pono eipotpap uhowawi pote woro­ho'o­po­wyro kahato hupit hap ete are e Iesui wuat'i miit'in me.
MAT 12:1 Mi'i hawyi wẽtup e'at pe Iesui toto topot­mu'eria wywo awati ypia sakpo mekewat yt motpap i hap e'at pe. Mi'i hap tote hemiit'in ho'opik ta'yn awati ta'atuesy'at hap monik hamuat.
MAT 12:2 Ma'ato irania'in mekewat seko wuat wo'omu'e haria pote te'eraha'at kahato hawyi wãi'i'atu'e Iesui pe — Wãi'ere ro emiit'in me Uhyt i'atu'e katu­pono yt aheko ewy i ta'atu­ho'opik awati yt aipotpap i hap e'at pe i'atu'e. Yt naku i Mehĩ mi'i tã watunug mesuwat e'at pe. Yt naku i awati wati­pirik katu­pono Tupana mõtypot hap e'at ti koity'i e'at i'atu'e seko moherep haria Iesui pe.
MAT 12:3 Mi'i pote ma'ato Iesui — U pãi e yt karãpe i apo mekewat miwan miat eweimo­wẽpap are aikotã sa'awy'i aipo­rekuat Tawi tesy'at kahato tesu­rara'in wywo hap e.
MAT 12:4 Aikotã teke Tupana mõtypot yat pe hawyi mekewat Tupana mõtypot yat piat man ne'i ra'yn toimõ'ẽ tesu­rara'in me hawyi ta'atu'u ra'yn yt aheko yt ewy hin i mi'i morekuat Tawi tunug itote hap e. Ta'i pa'iria mi'u wuat ko'i yn waku rakat toimõ'ẽ tesu­rara'in me. Mi'i tã ti aipo­typot sa'awy'iwuat Tawi tunug e.
MAT 12:5 Yt karãpe i apo eiwemu'e mekewat Tupana ehay enoi hat Musei miwan ete aikotã yne Tupana mõtypot hap e'at pe pa'iria i'atu­potpap at ka'ap ne'i Tupana mõtypot yat apykok hap ete miit'in powyro hap ete ma'ato yt uwe i wãi'e i'atuepe. Ta'i pa'iria mi'iria wen ma'ato te'eru­we­potpap at yt aipotpap i hap e'at pe Tupana mõtypot hap yat apykok hamo pytkai yt uwe i wãi'e pa'iria pe e.
MAT 12:6 Mi'i hap ewy wyti urupotpap mesup pãi e. Pywo pe ti wẽtup ok toĩne'en na'yn eipy'a­setpe po'og po'og Tupana mõtypot hap topyhu'at mekewat to'yat nu kawiat kai e tuwepe seko moherep haria pe.
MAT 12:7 Kat pote ti eweikat kahato uruepiat aparap hap aheko ehay upi yt kat i urutunug sa'ag pytkai e. Yt naku i eipy'a pe eweikat at ka'ap irania'in miat i'aparap hap ko'i katu­pono nimo te ti mio tã e Tupana ahepe — Pywo pe ti yt uimo­wepit hin i ti eheko eiminug ko'i e. Yt uimo­wepit hin i ti eihũria wuk hap ko'i mekewat eimiium uimõ­typot hamuat hap ko'i are katu­pono uimo­wepit hap sese ti sehaky'e'i haria irania'in hatek takaria ihaky'e'i hap uimo­wepit sese hap e Tupana. Uimo­wepit sese hap ti eiwe­wy'inug irania'in yt miky'e i ko'i wo hap e. Mi'i ti uimo­wepit sese hap e. Atiky'esat ehehaky'e'i hap uimo­wepit hap e Tupana sa'awy'i miwan me e Iesui wãi'e haria pe. Mi'i e hap ewetunug hawyi yt urumohit teran i katu­pono eweikuap ta'yn yt kat i urutunug sa'ag e Iesui wãi'e yn hap nug haria pe.
MAT 12:8 Yt naku i ehemiit'in Uhyt ewei'e katu­pono ta'atu­ho'opik awati Tupana mõtypot e'at piat pote ewei'e ma'ato Uito waku kahato uhemiit'in are. I'ewyte meiũran aru karãpe kat som waku kat som yt naku i miit'in minug ahenoi Tupana pe mi'i hap e'at pe waku kahato mi'iria are Tupana pe. Tupana ui'airo Miit'in Eyke'et sese wo wuat'i e'at piano e. I'ewyte wuat'i e'at Ka'iwat wo uinug. Mi'i pote Tupana mõtypot e'at Ka'iwat areĩne'en i'ewyte. Mi'i pote kat som waku watunug kat som yt naku i watunug Tupana mõtypot hap e'at pe e hano i'ewyte Tupana uinug e Iesui wãi wãi'e haria pe.
MAT 12:9 Mio tã to'e hawyi Iesui toto towyria'in upi awati ypia sakpo ra'yn. Mi'i totepyi toto hawyi teke ra'yn Tupana ehay enoi hawe.
MAT 12:10 Mi'i pe toĩne'en ipo kĩ'ã rakat i'atu­wywuat pe. Mi'i hawyi irania'in itotiaria ima'at reran Iesui haype — Waku apo watu­we­potpap mesuwat e'at pe miit'in moehãite hap ete sio yt i'atu'e tope katu­pono ta'atukat yt naku i e hap haype.
MAT 12:11 Mi'i hawyi toi'atu­wesat — Waku apo mesup e'at pe watiõtem aihũ yi ka'a pyi i'okhyt'at rakat sio yt e. Ta'i aihũ Uweuria ta'at yi ka'a pe Tupana mõtypot hap e'at pe pote ti meremo watihep aihũ e. Atikuap ti Tupana mõtypot hap e'at ewetiõtem eihũ yi ka'a piat at hat e. Tupana mõtypot hap e'at piat at hat yi ka'a piat meremo eweihep yt eweipotpap i hap e'at pe yt eweiky'esat iku'uro hap pote e.
MAT 12:12 Mehĩ'in mana'in are kat som po'og Tupana wanẽtup hawe sio aihũria sio aito e. Ta'i watikuap ti aito po'og po'og Tupana miky'e aihũ ko'i kai e. Mi'i pote waku wati'a­tu­moe­hãite miit Tupana mõtypot hap e'at pe e Iesui toma'at reran haria pe.
MAT 12:13 Mi'i hawyi to'e ra'yn ipo kĩ'ã rakat pe — Uiwy e etitorok to e'yke uhowawi e. Mi'i hawyi meremo toitorok topo kĩ'ã hap wuat'i ehamo hawyi waku pe ra'yn topyhu'at kokawiat ewy te ihãite ra'yn.
MAT 12:14 Mi'i tã Iesui tunug Tupana mõtypot hap e'at yt ta'atueko ewy i pote seko etiat wo'omu'e haria tuwat itote pyi hawyi ta'atukat kahato aikotã waku Iesui auka hamuat.
MAT 12:15 Iesui tikuap ta'yn to'auka hamuat ta'atukat hap hawyi toto pya i'atue'ya­ty­pepyi wẽtup hy kape toto. Typy'i kahato tuwat Iesui upi. I'ewyte i'ahu rakaria tuwat upi. Mi'i pote mu'ap upi toi'atu­moe­hãite kahato miit'in i'ahu rakaria.
MAT 12:16 Toi'atu­moe­hãite torania hawyi to'e tomi­moe­hãite ko'i pe. — Yt ewehenoi henoi tei'o irania'in me eimoe­hãite uhepiat hap ko'i e.
MAT 12:17 Toi'atu­moe­hãite kahato i'ahu rakaria aikotã sa'awy'i Tupana ehay enoi hat Isaia to'e hap ewy.
MAT 12:18 Mio tã e Tupana — Meiũran ti aru atipo'oro Uhemiit sese ehowawi e. Pywo pe ti Uheropat kahato hat topyhu'at e. Uimiky'e kahato ti Mi'i Miit e. Uimo­wepit sese hat ti Uimi­po'oro e. Eweheha'at ro uimi­ky'esat nug hat kape e katu­pono Mi'i Miit ri Uipã'ãu eiam sese wo topyhu'at e. Mi'i Miit wyti aru imoherep uhepe uwe waku uwe yt hap e. Atimohey kahato Mi'i Miit katu­pono uiwa­nẽtup hap ewy yn tuwa­nẽtup e. Mi'i pote ihay upi ati'atue­ha­kyera'at reran wuat'i ywania yi totiaria. I'ewyte iwẽ pyi ati'atu'a­piheg irania'in yt imohey i haria wuat'i ywania yi totiaria e. Mi'i hawyi uwe uwe topyhu'at uimi'a­piheg wuaria wo uwe uimie­ha­kyera'at wuaria wo hap moherep hanuat Mi'i e. Mi'i Miit po wo ati'atu­po­hari ahiag po pyi imimoe­haky'e'i ko'i e.
MAT 12:19 Pywo pe Uimi­po'oro wyti aru perup'i puo kahato miit'in mu'e e. Yt tuwe­mo­wato hin i tehay wo miit'in me. Ma'ato ti topo­te­ha­kyera'at kahato e. Yt topot'uka hin i tehay wo miit'in ete. Yt ihay pirik hin i rakat paa'e kahato rakat topyhu'at e.
MAT 12:20 Miit'in yt uwe miky'eria i ky'e hat uhemiit e. I'ahu kahato rakaria hatek takaria ihaky'e'i rakaria aikotã akuara pok'e rakat watomog hawyi tuwepy ihay se i ra'yn hap ewy kahato toi'atumog miit'in yt tuwehum kuap i po'og nakaria ete. I'ewyte yt iwẽ po hep hin i uhehay hãpyk takat moherep hap ete e. Mi'i Miit ti'atu'akit aru wuat'i miit'in ma'at haria e. Mi'i hawyi miit'in pyhyp haria toi'atu­moma yne e Tupana.
MAT 12:21 Meiũran ti aru Mi'i Miit yn ni miit'in miekatup mo topyhu'at mesuwat yi tote e. Ta'i Mi'i Uimi­po'oro topyhu'at aru wuat'i ywania mimohey wo e Tupana yianmete Iesui etiat Isaia miwan me tohenoi.
MAT 12:22 Mi'i hawyi itotiaria terut Iesui kape ahiag ipiit piat rakat. Mi'i miit i'ewyte yt ihapytig i i'ewyte yt ihay kuap i. Yt toikuap i sehay katu­pono yt hewaure i rakat toĩne'en. Yt naku i kahato tuete. Mi'i hawyi meremo Iesui timo­ha­pytig. I'ewyte toimoehay i ra'yn mekewat miit. Mi'i hawyi ihay kuap i ra'yn ihapytig i ra'yn hewaure ka'a i ra'yn ipiit toikuap yne i ra'yn.
MAT 12:23 Mi'i hawyi miit'in sem itotiaria te'eraha'at kahato imoehãite hat kape hawyi te'ero'e to'ope — Iesui apo Tupana Mipo'oro Aipo­rekuat nuat mekewat sa'awy'iwuat aipo­typot Tawi saipepiat apo'i'atu'e to'ope. Ta'i morekuat Tawi ewywuat kahato ha'yru sese pote i'atu'e.
MAT 12:24 Mi'i e hap i'atu'a­kagnia tikuap ta'yn hawyi — Wãi nei'o i'atu'e. Mi'i Miit yt Tupana Mipo'oro hin i i'atu'e. Ahiag mipo'oro Mi'i i'atu'e. Ahiagnia porekuat saipepiat Iesui i'atu'e. Mekewat ahiagnia akag Peusepu saipepiat i'atu'e. Mi'i pote ahiagnia toi'atu­sytpok kuap katu­pono ti sa'awy'i ti ahiag tum ni tesaika hap tope. Mi'i pote toi'atu­po­rera'at kuap kahato mã'ãu sa'ag ko'i i'atu'e te'eru­wa­nẽtup hawe Iesui etiat.
MAT 12:25 Ma'ato i'atu­wa­nẽtup sa'ag hap Iesui tikuap ta'yn topy'a pe hawyi to'e i'atuepe — Pywo pe ti are'e ehepe ahiag koro yt ti'atu­sopo teran hin i ti topã'ãu sa'ag ko'i miit'in myi pãi katu­pono ahiag koro yt tu'uka teran hin i temiit'in ahiagnia ete are katu­pono to'ope to'ope tu'uka ahiag hawyi meiũran te'eru­we­moma ra'yn. Aikotã aikotã wẽtup setawa piaria to'o'auka to'o'auka hawyi meiũran yt uwe kuap i tukupte'en hap ewy ahiag mipo'o­roria e. Aikotã to'o'auka to'o'auka wẽtup getap wiaria to'ywot toty tomẽpyt'in nywo to'o'auka hap ewy meiũran to'o'atoiat ra'yn hawyi yt uwe i ra'yn itote tukupte'en hap ewy e.
MAT 12:26 Mi'i hap ewy kahato ti aru ahiag topyhu'at toi'atu­sopo topã'ãu ko'i temiit'in myi hawyi ti aru yt uwe i tukupte'en imipo'o­roria e. Atikuap kahato ra'yn eiwa­nẽtup hap e.
MAT 12:27 Ahiagnia morekuat ehay pyi toi'atu­sopo mã'ãu sa'ag miit'in myi ewei'e uhepe hap ma'ato yt mi'i tã hin i e. Eipe i'ewyte ewei'atumu'e kahato ti eipotmu'e mã'ãu sa'ag ko'i sytpok hap ete eipe ma'ato koitywy ati'atu­sopo kahato ahiagnia eimi­ky'esat ewy ma'ato wãi'ewei'e uhepe e. Kat poteĩ — Ahiagnia porekuat Peusepu ehay pyi ti toi'atu­sopo mã'ãu sa'ag ewei'e uhetiat e. Yt eiwe'eg hin i eipe e Iesui wo'omu'e haria akagnia pe seko moherep haria pe.
MAT 12:28 Eweikuap teran apo aikope pyi tut uhesaika hap ahiagnia sopo hamuat hap e. Pyno ahenoi aikope pyi uhesaika hap tut hap e. Ta'i Tupana Pã'ãu esaika hamo yn ti ati'atu­sopo mã'ãu sa'ag ko'i miit'in kaipyi e. Tutum yne ra'yn tesaika hap uhepe meimuẽwuat ko'i pore­nõtem hamuat e. Mi'i tupono ti koitywy Tupana topyhu'at ra'yn miit'in Porekuat no mesuwat yi tote katu­pono miit'in pore­kuaria ahiagnia urui'atu­po­re­nõtem mesup pote are katu­pono ati'atu'akit ne'i ra'yn ahiag i'ewyte ahiagnia pãi e Iesui wãi'e haria pe.
MAT 12:29 Yt uwe i mesuwe teke kuap ipy'ahak takat yat pe hekare'en etiat ipohari hamo are ma'ato toipo'i po'i haity wo hawyi teke kuap hesaika rakat yat pe hekare'en etiat ipohari hamo e. Mi'i hap ewy kahato ti atunug ahiag porekuat ete Uito e.
MAT 12:30 Mehĩ'in eiwe'eg wo o uihoiro hap pupi are katu­pono uwe uwe yt uhemiit i topyhu'at mi'i hat yt uika­wiano i topyhu'at e. I'ewyte uwe uwe yt ikaykay i miit'in uhowawi mi'i haria tukupte'en uhowawiat miit'in pyhyp hanuaria wo e. Eiwe'eg wo o uipun iũte'en hap pupi ui'ywania e. Yt pote Tupana ewanĩ­kaptia wo aru eweikupte'en e.
MAT 12:31 Eiwe'eg wo o Tupana Pã'ãu pun ehepiat hap pupi e. Pywo pe ti Tupana timo­hãpyk kuap kahato yne yne wyti ehehay sa'ag ko'i eiminug sa'ag ko'i toi'atu­mo­weityk kuap torania are ma'ato wẽtup ehehay sa'ag ni yt karãpe i toimo­hãpyk kuap i Tupana e. Karãpe Tupana Pã'ãu pywuat sese kaipyi ihay ehepe turan uhetiat eheha­kyera'at hat mi'i hawyi — Eso kahato ewei'e Tupana Pã'ãu me mi'i e hap wyti aru yt karãpe i Tupana timo­hãpyk kuap e Iesui.
MAT 12:32 I'ewyte kat ewei'e kat ewei'e sa'ag uimo­weuka'i hap Eheyke'et ete Eikywyt ete uhete mi'i hap ko'i sa'ag ti Tupana timo­hãpyk kuap te ma'ato uwe uwe Tupana Pã'ãu pywuat sese rakat ehay pe — Eso kahato rat e mi'i hat wyti aru yt karãmuo i ra'yn Tupana timo­hãpyk kuap wuat'i e'at piat ra'yn e Iesui — Ahiag ehay pyi eti'atu­sopo ahiagnia e haria pe.
MAT 12:33 Pywo pe ti aimikoi ypia yt ihãite i hawyi yt tuweium kuap i ahepe e. Ta'i aimikoi yt haat rakat i yt karãmuo i hum kuap tosaat ahepe mekewat aimikoi saat he kahato rakat pote watikuap ta'yn yt naku i rakat. Ma'ato tuweium kahato ahepe aimikoi ywa ko'i pote wakuat kahato yp hap watikuap e.
MAT 12:34 Mi'i hap ewy kahato ti eipe seko enoi haria ypia yt ipiit i rakat ewy yt haat i rakat ewy yt hewo i rakat ewy eipe e. Yt kat i ei'e hap he rakat toĩne'en eikai­pywiat are katu­pono ti eiwẽ pyi ti sehay haiug nakat miit'in mosaty'i saty'i hamuat sehay sa'ag yn tuwẽtem na'yn eiwa­nẽtup saiwot hap kaipyi. Yt naku i kahato aikotã moi wo'o'auka hat wanẽtup hap ewy ti eiwa­nẽtup hap pãi e.
MAT 12:35 Mi'i hap ewy kahato eipe aikotã ahekare'en i'apyp takat ewy eipe e. Karãpe miit'in terut ahowawi ikahu kahato rakat ta'atuium mi'i hawyi — Waku aito watum aimiium ikahu kahato rakat wy wato'e. Ma'ato yt naku i watum ahekat pot'i yt ikahu rakat i irania'in miium waku ha'up mo wato'e e. Mi'i tã watunug pote yt hegyi'at i rakaria i watoĩne'en wato'e aiwo'ope e. Mi'i hap ewy waku e hap tuwa­nẽtup hawe wyti waku e hap ete wanẽtup hat ti toĩne'en na'yn ma'ato uwe uwe i'atunug tuwepe sehay sa'ag tuwa­nẽtup hawe mi'i hat wyti yt naku i rakat nuat ti toĩne'en na'yn e. Pyno ti waku wati'a­tunug ahekat waku rakaria ewy aiwa­nẽtup hawe e. Mi'i hawyi wahenoi kuap irania'in me ahekat aiwa­nẽtup hap wakuat ko'i e wo'omu'e haria akagnia pe.
MAT 12:36 Eiwe'eg wo o ehehay ko'i ko'i Tupana Pã'ãu etiat uhetiat uhemiit'in etiat hap pupi are wyti ehepe katu­pono karãpe Tupana tut urumo­weuka'i haria apiheg hamo mi'i hap e'at pe — Kan hamo ten mi'i tã ewei'e eimi­kyry'i wo uhete uhemiit'in ete e aru ehepe e. Mi'i hawyi kat ewei'e aru Tupana pe ei'apiheg hap e'at pe e.
MAT 12:37 — Ta'i yt nakuaria i kahato eipe e Tupana ehepe tut turan. Ehehay sa'ag uhete wyti i'ewyte uimohey haria ete i'ewyte wy Tupana Pã'ãu wakuat ete pote yt naku i ewetunug e. Pywo ti ehehay sa'ag hap ete Tupana to'e aru — Woro­ho'okuap kahato pote mesup uimi'a­piheg nuaria wo eweipyhu'at eipe katu­pono Uha'yru ete eiwe­kyry'i kahato eipe e aru ehepe ma'ato irania'in me — Wakuaria kahato eipe katu­pono yi tote eweikupte'en turan ei'e hap kaipyi atikuap Uha'yru mõtypot haria wo eweikupte'en e aru Tupana uimohey haria pe e. — Woro­ho'okuap imohey haria eipe ehehay kaipyi eweikupte'en yi tote turan e aru Tupana uimõ­typot haria pe e Iesui yt to'oksat'i i haria pe.
MAT 12:38 Mi'i hawyi itotiaria wãi'e hap enoi haria te'ero'e Iesui pe — Etomo­herep to uruepe esaika hap atipy kaipywiat merep'e hap ewy yt miit'in mikuap i hap ko'i ewy i'atu'e. Mi'i tã etunug mote ti aru meremo ra'yn uruimohey En Tupana Mipo'oro ma'ato yt pote yt i'atu'e.
MAT 12:39 — U pãi e Iesui yt atunug neran i wyti iwato hap merep hap ewy miit'in uimohey hamuat are katu­pono yt naku i nug haria yt timohey kuap i ti mi'i pote — Tupana i'atu'e eremo­herep uhepe uimo'a­kasa iwato rakat kape atipy kaipyi mi'i hawyi woro­mohey En i'atu'e. Mi'iria wyti yt Tupana mohey i haria pote ra'yn mio tã i'atu'e. Ta'atu­ky'esat Tupana iã'ãkap ko'i ta'atu­mi­mohey ko'i wo heremo pote. Yt nakuaria i ra'yn nyti mi'i tã iky'esat e. Mesup ti eweiky'esat atunug iwato rakat uipo wo ehepiat kuap hamo ma'ato yt atunug neran hin i ehehay pyi e. Meiũran ti aru ma'ato atunug wẽtup iwato rakat uimohey ehepiat hamo. Iwato'in nakat atunug aru miit'in mowa­nẽtup kahato hamuat katu­pono mekewat e'at pe ti aru Uito Eheyke'et Eikywyt ti toĩne'en i hamuat tosyp hawyi mye'ym e'at yn toĩne'en tosyp hawe hawyi tuwẽtem i ra'yn gu'uro pyi e. Mi'i yn ni iwato sese rakat atimo­herep ei'akasa hamo uimohey hamo ehepiat e.
MAT 12:40 Aikotã mekewat sa'awy'iwuat Tupana ehay moherep hat Iuna toĩne'en pira wato ymyẽ pe mye'ym e'at mye'ym ewãtym mi'i hawyi tuwẽtem i ra'yn pira wato ymyẽ pyi. Mi'i hap ewy kahato ti aru arepyhu'at Uito yi pe hawyi arẽtem i ra'yn uisyp hawyi ase'i Iuna toĩne'en i hap ewy e. Mi'i yn atunug iwato hap aremo­herep ehepe Tupana Mipo'oro sese Uito hap mohey hamuat. Ma'ato mi'i yn ni aru atimo­herep ehepe yt miit'in minug kuap ko'i i uimohey hamuat ma'ato arẽtem gu'uro pyi pytkai yt uimohey i aru eipe hap atikuap ta'yn e.
MAT 12:41 Pyno toĩne'en koitywy wẽtup ok Iuna ewywuat eipy'a­setpe ewei'akasa hamo ma'ato ti Mi'i Miit ti po'og Tupana ehay moherep hat Iuna kawiat hat ma'ato yt uimohey i eipe e. Sa'awy'i te ti tawa wato Niniwe kape toto Iuna hawyi toimo­herep Tupana ehay i'atuepe. Mi'i hawyi paa'i'atu'e. Te'eru­we­morem kahato Tupana kape yt naku i nug hap kaipyi mekewat Iuna mienoi upi are ma'ato mesup ti wẽtup ok po'og Tupana ehay moherep hat aha'ase'i Iuna kawiat rakat toĩne'en eimu'e hat koro ehehamo ma'ato ahenoi henoi Tupana ehay ehepe pytkai yt eiwe­morem neran hin i eiminug sa'ag hap kaipyi Tupana kape e. Pyno eipe po'og yt nakuaria i mekewat tawa Niniwe piaria kai hamuat e. Karãpe Tupana tut uwe tomi'a­piheg wuaria enoi hamo mi'i hap e'at pe ti aru tawa Niniwe piaria pe — Waku rakaria eipe e aru Tupana i'atuepe. Ma'ato ehepe ti aru — Yt nakuaria i eipe katu­pono po'og po'og Iuna kawiat toĩne'en eipy'a­setpiat eimu'e hat Uimi­po'oro ma'ato uimi­po'oro ehay pun haria ne'i ti eipe e aru ehepe e Iesui wo'omu'e haria pe.
MAT 12:42 Sa'awy'i morekuat wato hary­poria kawiat tut pya pyi at wẽtem hap moran kaipyi tut aipo­typot sa'awy'iwuat we'eg hap kuap hamo tut e. Ma'ato koitywy ti wẽtup ok ti toĩne'en eipy'a­setpe po'og we'eg morekuat Sarumãu kawiat hat ma'ato iwe'eg hap pun haria ti eipe e Iesui tuweete. Mi'i pote ti aru — Yt naku i kahato eipe e aru Tuana ehepe katu­pono Uimi­po'oro po'og we'eg nakat ehay pun haria eipe e mi'i pote woro­ho'o'a­piheg kahato eipe e aru ehepe mekewat ei'apiheg hap e'at pe e Iesui tehay pun haria pe.
MAT 12:43 Mi'i hawyi po'og Iesui tohenoi ahiag ko'i etiat. Eiwe'eg wo o mã'ãu sa'ag mupi e katu­pono karãpe wẽtup mã'ãu sa'ag tuwẽtem wẽtup ok miit piit pyi mi'i hawyi kowo'i kowo'i hewyry kahato aikope aikope yahig upi aikope aikope ga'apy pe teiam kat hamo tuwe­mohy teran haype ma'ato yt toipuẽti i teiam itote hawyi ti aru tuwa­nẽtup i ra'yn tosaipe toĩne'en sa'awy'iwuat hap kape i e.
MAT 12:44 Mi'i hawyi ti ta'aipok teiam mot'i kape i ra'yn. Mi'i hawyi ti yt uwe i toipuẽti teiam mot'i pe hawyi waku te teiam mo topainug me toipuẽti hawyi toĩne'en i ra'yn temiit sa'awy'iwuat ahiag ipiit piat rakat e.
MAT 12:45 Mi'i hawyi — Pãi e waku kahato uheiam mo te i ra'yn mesuwat uhemiit e. Mi'i hawyi — To'iro ahiagnia e watu­wehyt'ok meiẽwuat miit pe uheiam mot'i pe e 7 ok takaria towyria'in me ahiagnia pe po'og sa'ag tokawiat mã'ãu ko'i pe. Mi'i hawyi ti tuwehyt'ok ta'yn mi'i miit pe hawyi po'og yt naku i rakano mekewat ipiit piat rakat sa'awy'iwuat kai. Sa'awy'i yt naku i tuwete ahiag ipiit pe toĩne'en mote. Ma'ato ahiag ta'aipok 7 wo hawyi po'og yt naku i mekewat miit ete sa'awy'iwuat kai e. Mi'i hap ewy ti aru eweipyhu'at eipe yt kat i Tupana Pã'ãu eweipag eipiit pe pote katu­pono mã'ãu sa'ag toto hawyi ta'aipok towyria'in wywo hawyi eipuẽti eipe waku pe te eiwe­painug turan waku te ei'yat toipuẽti ewehy­wytip we toipuẽti eipe. Mi'i hawyi mã'ãu sa'ag ko'i tuwehyt'ok eipiit pe yt uwe i itote pote. Mi'i hawyi ahiag sem eiam eweikupte'en yt uimohey i pote. Yt uwe i Tupana Pã'ãu eipiit piat pote meiũran po'og sa'ag na'yn eweikupte'en sa'awy'iwuat kai e Iesui itotiaria pe.
MAT 12:46 Mio tã e Iesui turan ity iywyt'in nywo yt pya i aikope toĩne'en hap kai hawyi te'eru­wẽ­powat — Uruehay teran ewywo Uimẽpyt Urueyke'et i'atu'e. Eriot ro uruewawi oken kape i'atu'e.
MAT 12:47 Mi'i hawyi toto wẽtup ok henoi hamo — Iuẽ ety eywyt'in ekaykay Mehĩ e. I'atuehay teran ewywo Uhyt e Iesui pe.
MAT 12:48 Mi'i pote Iesui to'e — U pãi are uwe uity uwe'in uheywyt'in uwe'in uheinyt'in e.
MAT 12:49 Eweha'at ro uipot­mu'eria meiũpiaria kape are katu­pono uwe uwe uhehay nug haria mi'iria tukupte'en ni uity'in no uheywyt'in no uheinyt'in no e.
MAT 12:50 Katu­pono ti uwe uwe Ui'ywot atipy piat miky'esat nug haria yn ni tukupte'en uity'in uheywyt'in uheinyt'in tukupte'en uiwa­nẽtup hawe e Iesui itotiaria pe iwanẽtup haria pe. Mi'i hap etiat atikuap kahato pote ahenoi mesuwe uimiwan me uito Mateu.
MAT 13:1 Mi'i hawyi mekewat getap wyi Iesui tuwẽtem na'yn hawyi toto i ra'yn yi Karireia hyemyi'a wato kape. Mi'i tote ta'apyk yi kyt rote yẽpeke.
MAT 13:2 Mi'i hawyi miit'in sem kahato tõ'ẽ tõ'ẽ howawi. Mi'i pote teke ra'yn yara wato pe itote pywiat yẽpe upiaria mu'e hamo. Typy'i kahato rakaria toi'atumu'e.
MAT 13:3 Toi'atumu'e kat ko'i kat ko'i ete hã'ãkap wuo. — Sa'awy'i so wẽtup ok toto toko kape hã'ỹi sytpok hamo e.
MAT 13:4 Mi'i hawyi so toko tote put'okto'e hawyi tohytpok hã'ỹi wakuaria so tohytpok toko pe e. Mi'i so ta'at yi wakuat rote e ma'ato go py'asetpuo mu'ap ẽpe upi hewo hewo irania'in hã'ỹi ko'i so. Mi'i ko'i so weitaria tu'u yne ne'i e.
MAT 13:5 Irania'in ni yi perup nu totiat ko'i tote hewo hewo e. Mi'i totiat so hẽtyt wen e.
MAT 13:6 Ma'ato meiũran at hakup hawyi ti iku'uro kat pote yt toto kuap i hapo yi piit kape nu totiat ne'i pote e. Mi'i pote meiũran itag na'yn hawyi meremo iku'uro e.
MAT 13:7 Ma'ato irania'in hã'ỹi ni hewo hewo te'en te'en i'anam me e. Mi'i ti i'ewyte hẽtyt wen ma'ato i'anam mywo to'o'ewy wewuat'i pote meiũran i'anam tohik ne'i ra'yn yt tuwenug i ra'yn e.
MAT 13:8 Ma'ato irania'in hã'ỹi yi wakuat rote go sese tote hewo hewo rakaria wyti i'atue­hãite kahato te'eru­wenug kahato e. Ta'i wẽtup yp kaipyi 100 iã'ỹi toipuẽti. Mi'i hawyi wẽtup yp kaipyi 70 iã'ỹi toipuẽti. Mi'i hawyi wẽtup yp kaipyi 30 iã'ỹi hap ewy yi wakuat rakat rotiat hewo rakat hã'ỹi ko'i e.
MAT 13:9 Mi'i tupono are'e ehepe ehewaure ka'a pote eweiwa­nẽtup kat ui'e kat ui'e hap kape uhehay iã'ãkap wuat kape eiwa­nẽtup o e.
MAT 13:10 Mi'i hawyi Iesui potmu'eria tõ'ẽ howawi — Uhyt i'atu'e kat hamoĩ sehay hã'ãkap wuat eti'atumu'e irania'in i'atu'e.
MAT 13:11 — Ta'i yt uimohey i haria ti ati'atumu'e hã'ãkap wuo yt heremo i ma'ato ehepe uimohey haria ti sehay wo herep wuo woro­ho'omu'e aikotã aru Tupana topyhu'at Miit'in Porekuat no mesuwe atipy piat ewy hap ete e.
MAT 13:12 Katu­pono uwe uwe uhehay ikuap teran mi'i hat pe ti aru po'og topyhu'at uhehay e. Ta'i uhehay ahyt kuap teran hat topyhu'at uhehay kuap sese hat e. Ma'ato irania'in yt uhehay kuap teran i haria ti aru yt kat i i ikuap aru uimienoi ko'i e. Uhehay kurin ta'atukuap ta'atusu'at hawyi tuwat hawyi meremo ta'atu­waure i ra'yn uhehay mi'i haria. Uhehay yt teke sese i i'atu­wa­nẽtup hawe pote e. Te'eru­we­wa­nẽtup ran haria ewy mi'iria. Ta'atu­wa­nẽtup hawe yt ta'atunug neran i uhehay pote yt teke sese i i'atu­wa­nẽtup hawe e.
MAT 13:13 Mi'iria te'eraha'at uhowawi wen ma'ato yt uikuap wytkai i e. I'ewyte uhehay teke i'atu­waure pe wen ma'ato yt ta'atukuap i kahato ta'atu­wa­nẽtup hawe kat are kat are sese hap yi sa'ag ewywuaria mi'iria pote e.
MAT 13:14 Aikotã sa'awy'i Tupana ehay enoi hat Isaia to'e miwan me hap ewy — Teke kahato uhehay i'atue­waure ka'a pe wen ma'ato yt put'ok'e i i'atu­wa­nẽtup hawe e Tupana Isaia miwan me 6.9 pe. I'ewyte uiminug wakuat ko'i kape te'eraha'at kahato ra'yn wen ma'ato yt ta'atukuap i uwe Uito hap e.
MAT 13:15 Katu­pono sehay pywuat Tupana piat yt he hin i i'atu'e te'eru­wa­nẽtup hawe ta'atupy'a pe. — Uruikuap ta'yn emienoi i'atu'e uhepe wen ma'ato yt ta'atunug i te. — Yt urumu'e po'og mekewat ete i'atu'e katu­pono uruikuap ta'yn yne urumu'e hap i'atu'e yt ta'atukuap hin i te pytkai. Yt ta'atukuap teran i pote mi'i tã i'atu'e at ka'ap e Tupana katu­pono ta'atusu'at su'at i teran uhehay ta'atuwẽ puo ma'ato te'eru­wa­nẽtup hawe wẽtup sehay kape ra'yn te'eru­wa­nẽtup e. Yt ui'e hap hin i i'atu­wa­nẽtup hawe. Yt naku i kahato rat mi'iria wanẽtup hap atipuẽti pãi e Tupana. Ta'i te'eraha'at ri uhehay kape miwan kape wen ma'ato ti te'eru­wa­nẽtup wẽtup kape ne'i e. Ma'ato pywo ta'atukuap teran uhehay pote ta'atukuap kuap e. I'ewyte pywo te'eraha'at teran mote ti te'era'a­kasa ra'yn e. Mi'i hawyi heremo yne i'atu­wa­nẽtup hawe uikuap hap topyhu'at e. Mi'i hawyi ti te'era'aipok uhowawi ta'atu­minug sa'ag hawyi paa'i'atu'e uhowawi hawyi uimohey haria wo te'ero­pyhu'at e. Uimi­moe­haĩ­teria wo ra'yn hawyi tukupte'en uimie­ha­kye­ra'aria wo ra'yn tukupte'en hawyi uhehay ta'atu­ky'esat ra'yn hawyi e Tupana sa'awy'i Isaia henoi e Iesui. — Pywo pe ti Isaia e hap ewy kahato tukupte'en yt uimohey i haria e. Mi'i pote ati'atumu'e mi'iria hã'ãkap wuo yt ta'atukuap teran i pote e. Ma'ato eipe uiwyria'in uimohey haria sese ati'atumu'e teran uhehay sese eweikuap teran haria pote e.
MAT 13:16 Mi'i tupono Tupana mimo­wepit ko'i wo eweikupte'en po'og torania miit'in kai katu­pono ui'akasa hap sese ko'i eipe i'ewyte uhehay sese kuap haria eipe e. Mi'i pote Tupana mipoi­tyro ko'i wo eweikupte'en kahato eipe e.
MAT 13:17 Uipot­mu'eria pywo pe ti sa'awy'i­wuaria Tupana ehay moherep haria ti te'era'a­kasa teran kahato ei'akasa hap ko'i kape e. I'atupap kahato uhowawi te'era'a­kasa hamo. Sa'awy'i­wuaria aikotã aru uhut hap moherep haria te'era'a­kasa ma'ato ta'atu­mu'etu wuat ewy te'era'a­kasa sa'awy'i­tewuat wakuaria te'era'a­kasa teran. I'ewyte ta'atukuap teran kahato uiwẽ piat eimikuap ko'i are ma'ato ti yt ta'atukuap kuap i ta'atukat pytkai e. Mi'i pote eheha ehewaure Tupana mipoi­tyro ko'i sese tukupte'en mesuwe e.
MAT 13:18 Uiwyria'in mio ahenoi ra'yn wyti ehepe kat are kat are hã'ỹi iã'ãkap wuat hap ko'i are katu­pono atiky'esat eweikuap uimienoi mikoi yp etiat sehay iã'ãkap wuat hap e Iesui topot­mu'eria pe.
MAT 13:19 Mekewat hã'ỹi sytpok hat wyti Tupana ehay sytpok hat ewy e. Mi'i hawyi mekewat go pu'ap ẽpe upiaria ti wẽtup ok wẽtup ok uhehay kapiat wanẽtup hat ewy e. Mi'iria ti ikuap sa'ag ne'i e. Mi'i pote mi'iria kaipyi ahiag tihep te'en te'en ne'i i'atupy'a pyi Tupana ehay e.
MAT 13:20 I'ewyte ti mekewat hã'ỹi nu totiat yi hit rotiat ti wẽtup ok ti wẽtup ok ti wanẽtup teran hat ewywuat ne'i e. Mi'i hawyi meremo waku kahato toipuẽti uhehay wen e.
MAT 13:21 Ma'ato yt teke i iwanẽtup hawe sese meimuẽwuat uimienoi ko'i yt i'atu­sapo wo i pote e. Mi'i turan ti irania'in ti'atu­saty'i saty'i ra'yn Tupana ehay mohey i'atuepiat hap. Mi'i pote ta'atu'atoiat ra'yn Tupana ehay e. Sa'awy'i te ti ta'atu­mohey kahato wen ma'ato mi'i turan ti irania'in to'okyry'i ra'yn mote te'eru­we­mõti ra'yn uimohey hap pupi e. Mi'i hawyi typy ehay ete te'eru­wa­nẽtup at ka'ap. Mi'i hawyi Tupana ehay kape yt te'eru­wa­nẽtup i ra'yn hawyi kat aru kat aru atunug kat aru atunug e hap kape yn na'yn te'eru­wa­nẽtup at ka'ap. Mi'i hawyi Tupana ehay kape yt te'eru­wa­nẽtup kuap i. I'ewyte — Uhekat iwato kahato hawyi uimo­wepit hap sese toĩne'en aru i'atu'e e.
MAT 13:22 Mi'i hawyi ta'atukat hap ky'ewi yn tukupte'en i'atu­wa­nẽtup hawe at ka'ap hawyi Tupana ehay yt tuwenug kuap i i'atupy'a pe. Hu ypia tohik ne'i ra'yn hap ewy topyhu'at i'atupy'a pe. I'anam kahato ga'apy piat ewy itote pote yt tuwenug hin i. Mi'i hap ewywuaria ti typy ehay ky'e kahato haria aimikoi i'anam miat ewywuat e.
MAT 13:23 Ma'ato mekewat yi wakuat rotiat ti wẽtup ok wẽtup ok hewaure kahato rakat ewy. Mi'i hat sat'e kahato ka'a wanẽtup hawe. Mi'i hawyi Tupana ehay toikuap kahato topy'a pe hawyi tutunug kahato ra'yn Tupana e hap ewy e. Mi'i ti yi wakuat rotiat at hat hã'ỹi ihãite kahato rakat ewywuat e. Mi'i ti wẽtup ok 100 wẽtup ok 60 wẽtup ok 30 iã'ỹi ewywuat ra'yn e Iesui topot­mu'eria pe.
MAT 13:24 Koitywy ahenoi teran ehepe wẽtup i uhehay aikotã Tupana topyhu'at miit'in Porekuat no mesu­wa­rotiat. Aikotã toĩne'en Morekuat atipy pe hap ewywuat e Iesui. Mio tã are'e Sa'awy'i so wẽtup ok toto toko kape hã'ỹi ko'i koi hamo hawyi toikoi at iã'ỹi waku aimi'u man wuat rakat iã'ỹi toikoi at itote e.
MAT 13:25 Ta'i man wuat waku rakat iã'ỹi tohytpok kahato ra'yn itote yi perup we. Waku pe itote hawyi ta'aipok i ra'yn to'yat kape e. Ma'ato wãtym muo iket kai wẽtup ok hewa­nĩkap toto iko kape imikoi py'asetpuat wẽtup kawiat iã'ỹi yt mi'u i rakat iã'ỹi koi man wuat waku rakat iã'ỹi ewywuat wen ma'ato nop takat toikoi ka'ap tewa­nĩkap ko moma hamo mikoi mo'anam hamo toikoi hã'ỹi ran man wuat ewywuat mikoi ka'iwat ket kai toikoi e.
MAT 13:26 Mi'i hawyi meiũran hẽtyt to'opype ra'yn man wuat waku rakat ypia to'opype ra'yn iã'ỹi ran ko'i wywo e.
MAT 13:27 Mi'i hawyi meiũran go ka'iwat ko eropat haria tuwat iko kape imikoi waku sio yt hap kuap hamo tuwat i'yat kaipyi. Te'era'a­kasa hawyi aikotã imikoi ypia pe to'opype ra'yn yt nakuat i iã'ỹi rakaria wywo iã'ỹi yt mi'u i rakat ta'atukuap hawyi te'era'aipok go ka'iwat kape henoi hamuat — Uruka'iwat i'atu'e sa'awy'i kue etikoi iã'ỹi wakuat yn eko pe i'atu'e. Pywo pote aikope pyi saĩke hẽtyt yt mi'i i yn i ra'yn i'atu'e. Uwe saĩke ikoi eko pe yt waku rakat iã'ỹi i i'atu'e.
MAT 13:28 — Ta'i ahewa­nĩ­kaptia mikoi ra'yn ti som e toi'atu­wesat. — Pyno waku wati­puruk ta'yn emikoi py'asetpiat ko'i ahewa­nĩ­kaptia mikoi i'atu'e.
MAT 13:29 Ma'ato — Yt eweipuruk tei'o e katu­pono eweipuruk pote ti ten mekewat uimikoi wakuat rakat ko'i ẽtyt turan ne'i ra'yn eweipuruk i'ewyte to'opype pype pote e. Waku ra'yn aru to'opype te'ere­motag e.
MAT 13:30 Pyno waku toywyt pe te'ere­motag e. Mi'i hawyi iterek hap e'at pe ra'yn aru ipotpap takaria pe are'e — Eweiterek to mekewat wanĩkap mikoi sa'ag yt man yt naku i mi'u rakat nug hap iã'ỹi ewywuat nop takat mi'i hawyi ewei'apeman kytyt sok hawyi eweiwuk to aria pe e. Mi'i tã ewetunug hawyi waku eweterut ro uimikoi sese torania meikowo ui'yat wato kape hawyi waku mesuwe e mikoi ka'iwat koro temiit'in me e Iesui. — Mi'i ui'e hap ewy kahato Tupana topyhu'at Morekuat nuat mesuwat yi tote aikotã toĩne'en Morekuat no atipy pe hap ewy e Iesui hyemyi'a ẽpe piaria pe miit'in sem me.
MAT 13:31 Mi'i hawyi wẽtup hã'ãkap i ra'yn Iesui tunug yi kyt upiaria mu'e hamo. — Pyno ahenoi teran ehepe wẽtup sehay aikotã Tupana toĩne'en aru mesuwe Morekuat no aikotã atipy pe hap ewy e. Ahetama pe toĩne'en mutata ypia aimikoi aimi'u apopyt kahato mi'i e.
MAT 13:32 Ma'ato watikoi iã'ỹi kurin kat hawyi hẽtyt hawyi meremo tuwe­motag hawyi i'yp po'og iwato irania'in aimikoi ko'i kai ma'ato hã'ỹi kurin kahato torania irania'in aimikoi iã'ỹi ko'i kai topyhu'at e. Tuwe­koran mowato kahato ra'yn e. Ikoran wato hawyi weitaria tõ'ẽ tõ'ẽ kahato te'eru­wesok nug ikoran miat upiat hamo e. Mi'i hap ewy ti aru Tupana topyhu'at Miit'in Porekuat no mesuwe aikotã atipy piat hap ewy e Iesui yara pyi yẽpe etiaria kape.
MAT 13:33 Pyno ahenoi i wẽtup uhehay ehepe aikotã aru Tupana topyhu'at Morekuat no mesuwe miit'in py'asetpe hap etiat i ra'yn e. Karãpe hary­poria'in tunug u'i ta'atu'apõi mekewat kurin kat mani pyre ipuk wywo mi'i hawyi tuwe­mo­wato ra'yn mani puk ipyre wywo hawyi. Sa'awy'i kurin kat tuwe­mo­wato ra'yn ipuk toi'apõi ipyre wywo hawyi. Mi'i hap ewy kahato Tupana topyhu'at Morekuat no mesuwat yi tote aikotã toĩne'en atipy pe hap ewy e Iesui hyemyi'a Karireia upiaria pe.
MAT 13:34 Sehay iã'ãkap wuo yn toi'atumu'e miit'in sem ko'i itote yt heremo i hap ewy toi'atumu'e teran typy'i rakaria.
MAT 13:35 Toi'atumu'e hã'ãkap aikotã sa'awy'i­wuaria Tupana ehay moherep haria mienoi hap ewy — Meiũran ti aru areto miit'in mu'e hã'ãkap wuat hamo e. Mi'i hap e'at pe ti aru uiwẽ pyi tuwẽtem hã'ãkap wuo yn yt uwe mikuap i te sehay pakup po'og ikahu rakat po'og hãpyk takat. Mi'i ti irania'in yt ikuap i te yt uwe mikuap i te e. Ta'i yi nug hawyi te yt uwe ikuap takano i ati'atumu'e miit'in hã'ãkap wuo e Tupana sa'awy'iwuat Tupana ehay moherep hat Tawi wepy hawe 78.2 pe.
MAT 13:36 Mi'i hawyi Iesui to'e itotiaria pe — Toran na'yn ui'e hap eimu'e hap e. Ewei'aipok to ehetawa ko'i kape e. Mi'i hawyi toto ra'yn ihyemyi'a totepyi wẽtup getap kape temiit'in nywo yn na'yn 12 ok takaria wywo. Mi'i hawyi put'okta'atu'e hawyi hemiit'in te'ero'e — Urumu'e hat i'atu'e yt uruikuap hin i ti emienoi hã'ãkap wuat i'atu'e. Ehenoi ro mi'i emienoi hã'ãkap wuat uruepe i'atu'e.
MAT 13:37 Mi'i pote toi'atu­wesat — Mekewat iã'ỹi wakuat koi hano ewy ti Uito Eheyke'et e.
MAT 13:38 Mekewat go ewy ti wuat'i ywania uhehay kapiat wanẽtup haria mesuwat yi wato totiaria e. Mekewat hã'ỹi wakuat man nug hamuat ewy ti Tupana mipo'oro ko'i wuat'i tama kapiaria ko'i uimohey haria — Waku watunug Tupana Aipo­typot no e haria are ma'ato mekewat hã'ỹi yt nakuat i yt mi'u hã'ỹi rakat i ahiag ehay moherep haria mekewat ahiag sa'yru'in saki'yt'in e.
MAT 13:39 Mekewat wanĩkap iã'ỹi wẽtup koi hat ti ahiag e. Mekewat iã'ỹi terek haria ti atipy kaipy­wiaria Tupana eropat haria atipy piaria e.
MAT 13:40 Ikahuro hap e'at pe ati'atu­po'oro atipy piaria yt uimohey i te haria miit'in atunug hamo ati'atu'a­piheg hamo. Aikotã wanĩkap mikoi ta'atu­sokwuk hap ewy atunug aru ahiag ehay mohey haria ete e. Mi'i tã ti aru aikotã iã'ỹi terek hap e'at piat ewy aru topyhu'at mekewat ikahuro hap e'at turan e. Iã'ỹi terek haria meimuẽwuat atipy kaipy­wiaria ewy te'ero­pyhu'at are ta'atu­po­rera'at ahiag mẽpyt'in wuat'i ywania etawa piaria e.
MAT 13:41 Uito ti Eheyke'et Eikywyt no areĩne'en mi'i tupono ti aru mekewat e'at pe ati'atu­po'oro atipy piaria yt naku i nug haria atunug yne hamo e. Pywo ti mekewat yi kahuro hap e'at pe — Ewete­ropo'ok to uhowawi wuat'i sa'ag nug haria ahiag upiaria are aru e.
MAT 13:42 Ewei'atunug no uhemiit'in ma'at haria are ti aru. Mi'i hawyi ewehytmoi ro mi'iria aria wato haiwot rakat pe are aru mesuwat yi kahuro turan. Mi'i hawyi ti aru to'okak'i kahato ti aru i'ewyte ti aru kyry'et kyry'et'i'atu'e haty kahato ta'atuetiat pote e. Aria sakup kahato pote kynkyn'i'atu'e ahiag mikoi ko'i ewywuaria e.
MAT 13:43 Ma'ato meimuẽwuat Tupana miky'esat nug haria pe ti aru — Eipe ti uimo­wepit haria wo eweikupte'en are aru. Eipe ti uimi­mõ­typot nuaria mesup are ti aru. Eipe ti iwato'in nakaria wo Tupana etama piaria are ti aru. Eiminug wakuap ko'i Tupana mõtypot hap ko'i Tupana mowepit hap topyhu'at wuat'i e'at pe. Aikotã ihot'ok hap aimo­wepit hap ewy eweikupte'en aru are Tupana miky'esat nug haria pe. Uiwyria'in ehewaure ka'a pote eipotpap to uhehay kuap hap ete e Iesui topot­mu'eria pe.
MAT 13:44 Pyno wẽtup i ahenoi sehay iã'ãkap ehepe are aikotã Tupana topyhu'at Morekuat no mesu­wa­rote aikotã toĩne'en atipy pe hap ewywuat e Iesui. Wẽtup ok so ipotpap wẽtup ok ko ete turan tepu­rure wo toipuẽti yi pe miit'in miãuka imehit kahato rakat. Hekat sok toipuẽti yi ywyt'okpype tepu­rure wo ipotpap turan e. Mi'i hawyi so — Pãi e ta'i atiky'esat kahato rat meiũwat uiano e topy'a pe. Mi'i hawyi so tohyp i yi piat tomi­puẽti hawyi toto ra'yn mekewat yi ka'iwat kape to'e hamo — Atikyi'at reran eko mehĩ e. Atum ni aru emiky'esat ok tã ha'up epe pãi e. Mi'i hawyi toikuap karania upi hawyi iwepit kahato hap wywo toto to'yat kape yne towanuat weneru hamo. Toiwe­neru toko to'yat tekare'en ko'i kat ko'i kat ko'i tomie­reko ko'i toiwe­neru yne yne ra'yn hawyi mi'i sa'up mo toikyi'at mekewat yi aikope toipuẽti yi pe mekewat hekat e. Mi'i hap ewy ti Tupana ti'atukyi'at aru mesu­wa­ro­tiaria temiit'in no hawyi yi Porekuat no i ra'yn topyhu'at e Iesui sehay iã'ãkap wuo.
MAT 13:45 Uiwyria'in e wẽtup uhehay hã'ãkap i ra'yn ahenoi teran ehepe aikotã aru Tupana topyhu'at Morekuat no mytyp tote aikotã atipy piat hap ewy e Iesui temiit'in me. Sa'awy'i so wẽtup ok karaiwa toto wahi ko'i kyi'at hamo e.
MAT 13:46 Mi'i hawyi so wahi wẽtup po'og ikahu sese rakat torania kai toipuẽti itote ikahu kahato rakat. — Meikowat wahi nu sa'up iwato kahato rakat kawiat e tuwa­nẽtup hawe. Imehit kahato rakat pãi e. Po'og po'og hekat rakaria wuat kai torania irania'in kai mi'i wahi ikahu e. Yt wẽtup i po'og hekat rakat wuat atipuẽti uito mesuwat wahi kahu hap ok tã e so. Mi'i hawyi so toiky'esat kahato topy'a pe hawyi so toiwe­neru yne tomie­reko to'yat te'yi tomikoi hawyi mi'i sa'up mo toikyi'at ra'yn mekewat wahi towanuat e. Pywo pe ti mi'i kyi'at hap ewy kahato Tupana tikyi'at aru wuat'i ywania towanuat hawyi topyhu'at Ka'iwat no aikotã toĩne'en atipy pe hap ewy e Iesui temiit'in me.
MAT 13:47 Mi'i hawyi — Uipot­mu'eria pyno wẽtup sehay iã'ãkap i atimo­herep ehepe aikotã Tupana topyhu'at miit'in Porekuat no hap e Iesui. Sa'awy'i so toto wẽtup ok pira pytyk hamo ihyemyi'a wato kape tesuki wato totioto. Mi'i hawyi so toipun na'yn tesuki wato y'y wato pe pira pytyk hamo e. Mi'i hawyi hesuki howapy kahato pira ko'i wo aikotã aikotã hap ko'i tukupte'en hesuki wato pe so e.
MAT 13:48 Mi'i hawyi totekyi yẽpe kape hawyi yi kyt rote ti ta'apyk hawyi toi'airo ra'yn meimuẽwuat pira wakuat ko'i hawyi toipat'ok pira ko'i waku aimi'u wo rakaria toi'atu­hytmoi te'yara pe ma'ato yt naku i rakaria toipugha ra'yn e.
MAT 13:49 Mio wuat uimienoi ewy ti aru topyhu'at mesuwe torania ra'yn hap e'at pe Tupana ti'atu­po'oro temiit'in atipy piaria wakuaria eropo'ok hamo i'ewyte yt nakuaria i eropo'ok hamo.
MAT 13:50 Mi'i hawyi ti aru yt nakuaria i ta'atu­pugha ra'yn ti aria haiwot rakat ieĩne'en hawe e. Mi'i pe ti aru yt naku i nug haria to'okak'i kahato haty pono aria pe i'ewyte to'okyry'et i kahato haty pono kynkyn'i'atu'e aru e Iesui.
MAT 13:51 Mi'i hawyi Iesui to'e temiit'in me — Eweikuap apo mio wuat uhehay hã'ãkap wuat e. Mi'i pote — Ta'i Urumu'e hat uruikuap som i'atu'e.
MAT 13:52 — Pywo eweikuap hawyi waku eweimõ'ẽ uhehay eimikuap irania'in me are katu­pono uwe uwe ikuap sa'awy'iwuat Tupana ehay hap i'ewyte ikuap te uhehay pakup i hã'ãkap wuat hap ko'i aikotã Tupana topyhu'at Miit'in Porekuat nuat hap etiat mi'i hat ti aru topyhu'at wuat'i sepap hanuat sehay wuat wo'omu'e hanuat topyhu'at e. Ta'i mi'i hat ti aru topyhu'at morekuat hekat rakat iwe'eg kahato hat ewywuat topyhu'at aikotã kare'en pakup mywo kare'en mot'i wywo toiwe­neru kuap hat ewy topyhu'at e Iesui topot­mu'eria pe.
MAT 13:53 Iesui henoi yne ra'yn mekewat hã'ãkap wuat tehay hawyi ta'aipok i ra'yn tomotag hap tawa Nasare kape.
MAT 13:54 Put'okto'e itote hawyi teke i ra'yn Tupana mõtypot hap getap we i ra'yn itotiaria mu'e hamo. Mi'i hawyi itotiaria te'eru­wa­nẽtup kahato ta'atumu'e hap kape hawyi — Koitywy ti tuwe'eg kahato ra'yn aimi­motag i'atu'e to'ope. Aikope saĩke toipuẽti tuwe'eg hap i'atu'e katu­pono koitywy toimo­herep kuap kahato topo wo yt miit'in misepap hin i ko'i ra'yn i'atu'e.
MAT 13:55 Ma'ato watikuap ta'yn sakpo Mi'i Miit aimi­motag i'atu'e. Ta'i mekewat pan'i pan'i'e hat sa'yru mekewat mana Maria mẽpyt i'atu'e. Ta'i watikuap kahato iywyt'in mehĩ Tiaku uhyt Iuse mehĩ Simãu uhyt Iuta i'atu'e. Ta'i i'atueyke'et sese Mi'i Miit i'atu'e.
MAT 13:56 I'ewyte inyt'in ni tukupte'en meiũpe i'atu'e to'ope.
MAT 13:57 Pyno aikope pyi som pyno iwe'eg kahato hap tut i'atu'e to'ope. Uwe saĩke imu'e iwe'eg hap ete i'atu'e sa'ag ta'atu­mohit reran haype. Mi'i pote — Ta'i yt uimohey hin i eipe uimotag haria e Iesui. Irania'in tama puaria ti ma'ato uimõ­typot kahato are ma'ato eipe yt ra'yn e. Ma'ato irania'in te'ero'e — En ni Tupana Mipo'oro tehay enoi hanuat i'atu'e irania'in tawa piaria ma'ato eipe uimotag haria sese ui'yat piaria sese uiwyria'in sese uhetawa sese puaria yt uimõ­typot hin i haria eweikupte'en e. Mi'i e hap ewy kahato uimi­po'o­roria uhehay moherep haria ma'ato ta'atu'y­wania sese ta'atu­motag haria yt timohey hin i uimi­po'o­roria e Tupana sa'awy'i miwan me. Mi'i hap ewy kahato topyhu'at mesuwe ahetama pe pãi e. Yt naku i mi'i tã mehĩ'in mana'in e.
MAT 13:58 Mi'i hawyi Iesui yt tunug kuap i tewaku hap miit'in yt minug kuap i ko'i ewy itote tawa Nasare pe katu­pono imotag haria yt imohey i kahato haria wo tukupte'en mote. Ta'i mi'i tã hap ewy itote. Mi'i hawyi uito Mateu atiwan mesuwe.
MAT 14:1 Mi'i hawyi ti yi Karireia piat morekuat Eroti tikuap ta'yn Iesui aikotã iminug wakuap etiat.
MAT 14:2 Mi'i hawyi Morekuat Eroti to'e tu'isaria pe — Koitywy toĩne'en uhetama pe wẽtup ok wuat'i nug kuap hat Iesui e hap het rakat e. Uwe sese Mi'i Miit hap atikuap ta'yn e. Ta'i mekewat uimi'a­kagtek wo'oset'ok hat Iuwãu wyti tuwẽtem gu'uro pyi e. Ta'i tuwẽtem gu'uro pywiat hawyi ti mio tutunug yt uwe misepap kuap takat i ra'yn e Eroti morekuat yi Karireia piat tu'isaria pe Iesui etiat.
MAT 14:3 Mio tã e katu­pono sa'awy'i mekewat morekuat Eroti ti'atu­po'oro tesu­rara'in Iuwãu pyhyp hamo. Mi'i hawyi ta'atupo'i po'i hawyi ti ta'atupag wo'opyhik hawe. Mi'i tã ti Eroti tunug sa'awy'i Iuwãu ete.
MAT 14:4 Toipyhik Iuwãu wo'opyhik hawe sa'awy'i katu­pono iwary sa'ag Erotia ipy'ahak kahato Iuwãu ete. — Wãi'e yt naku i kahato ewaire waire e pote. Yt naku i e'aito morekuat Eroti wywo katu­pono Eroti eyke'et Wiripi wywo ereĩne'en sa'awy'i e'aito wo e Iuwãu morekuat Eroti wary sa'ag mana Erotia pe pote. Mi'i to'e pote mana Eotia ipy'ahak Iuwãu ete. Mi'i pote haiwot topyhu'at hawyi toipyhyp teran ahet'ok hat Iuwãu wo'opyhik hawe — Tupana yt tiky'esat i etipo­hari eywyt Wiripi ehary'i ete e pote.
MAT 14:5 — Pyno waku ati'auka teran Iuwãu ma'ato yt ati'auka kuap i katu­pono typy'i kahato ra'yn Iuwãu mohey haria e. Ta'i Tupana mipo'oro aimu'e hamuat Iuwãu e haria ahyt Iuteuria tukupte'en mesuwe e. Aikotã me aru waku Iuwãu auka hap atipuẽti e tuwa­nẽtup hawe morekuat Eroti.
MAT 14:6 Mi'i hawyi wẽtup e'at pe morekuat Eroti tunug to'ywã'ĩ hap kapiat watetup hap. Mi'i pote tutunug ienuk wato hap tomõ­typot haypiat. Mi'i hap e'at pe morekuat Eroti tikaykay tehary'i wuat Erotia mẽpyt ihairu hamo. Mi'i ti makuptia ihairu miit'in typy'i ehamo. Ikahu mekewat pĩ'ã pote morekuat iwepit kahato teha'at hawyi.
MAT 14:7 Mi'i hawyi morekuat Eroti to'e pĩ'ã pe — Ehairu ikahu kahato pĩ'ã e mi'i pote e'e hap ewy atunug teran emiky'esat ok tã emiẽtup atum neran e pĩ'ã pe.
MAT 14:8 Mi'i hawyi pi'a to'e morekuat pe — Apuete e. Mi'i hawyi toto toty kape — Kat som waku ahẽtup morekuat pe to'e hamo. Mi'i hawyi — Pyno waku ehẽtup wo'oset'ok hat Iuwãu akag kui'a pe e ity Wiripi saki'yt pe.
MAT 14:9 Mio tã e hap morekuat tikuap hawyi tuwa­nẽtup ko'i ko'i ne'i ra'yn. Ma'ato — Atum aru emiẽtup ok tã e ra'yn sa'awy'i pĩ'ã pe torania towyria'in ehamo pote — Pyno atunug ui'e hap ewy emiky'esat ewy pãi e yn pĩ'ã pe.
MAT 14:10 Mi'i hawyi ti toipo'oro ra'yn tesu­rara'in wo'opyhik hap kape Iuwãu akag tek hamo.
MAT 14:11 Mi'i hawyi ta'atuerut warupy hit pe Iuwãu akag hawyi ta'atuium na'yn mekewat pĩ'ã makuptia ihairu rakat pe. Mi'i hawyi ti tutum na'yn Iuwãu akag toty pe.
MAT 14:12 Mi'i hawyi Iuwãu potmu'eria tikuap ta'yn ta'atumu'e hat Iuwãu ut'yp tek hap hawyi tõ'ẽ ra'yn hyp hamo. Ta'atusyp hawyi ti tuwat ra'yn Iesui kape henoi hamo ra'yn.
MAT 14:13 Mi'i hawyi Iesui tikuap ta'yn Iuwãu auka hap hawyi toto ra'yn yara puo mekewat hyemyi'a wato sakpo aikope yt uwe i hap kape tuweran. Mi'i hawyi miit'in tikuap ta'yn Iesui aikowuat toto hap hawyi tuwat tuwat typy'i ra'yn ta'atue­tawa pyi aikowuat ito hap kape yi upi.
MAT 14:14 Mi'i hawyi Iesui put'ok'e ra'yn yẽpe ete yara puo hawyi ta'akasa miit'in typy'i kahato takat haria. Mi'i hawyi toi'atuky'e ne'i ra'yn mi'iria hawyi toi'atu­moe­hãite yne i'ahu rakaria i'atue­haky'e'i kahato iha'at turan pote. Mi'i hawyi toi'atu­moe­hãite at itote.
MAT 14:15 Meiũran wãtym i ra'yn turan put'ok'i'atu'e ra'yn hemiit'in Iesui ete. Mi'i hawyi — Wãtym na'yn mesuwe ra'yn mote eti'atu­po'oro ro i'atue­tawa ko'i kape miit'in i'atu'e katu­pono wyti yt naku i yahig note watoĩne'en katu­pono yt kat i aimi'u meiũpe Mehĩ i'atu'e. Mi'i hawyi waku eti'atu­po'oro ro hesyat rakaria tawa hit ko'i upi getap ko'i kape aikowo aikowo te'eru­wemi'u kyi'at hamo i'atu'e.
MAT 14:16 Ma'ato Iesui — Yt rat pãi e. Yt ati'atu­po'oro teran hin i rat e. Ewei'atupoi ro hesy'at rakaria e Iesui.
MAT 14:17 — Ma'ato Mehĩ i'atu'e aikotã aru pyno urui'atupoi mi'iria katu­pono aimi'u yt iwato hin i 5 man typy pira yn toĩne'en aimi'u wuat i'atu'e.
MAT 14:18 Mi'i hawyi — Pyno eweterut ro mi'i mi'u hit ko'i uhowawi e.
MAT 14:19 Mi'i hawyi to'e miit'in sem me — Ewei'apyk to mopep hyp we e. Mi'i hawyi mekewat typy pira 5 man totat topo pe hawyi teha'at atipy kape hawyi to'e — Waku kahato En Tupana are. Urutu­wehum kahato emiium ete e. Mi'i hawyi mekewat 5 man toipat'ok kahato hawyi toimõ'ẽ topot­mu'eria pe hawyi mi'iria imõ'ẽ ra'yn miit'in sem me.
MAT 14:20 Mi'i hawyi te'erenuk kahato ra'yn miit'in sem hawyi i'atu'ok kahato ra'yn hawyi hemiit'in ti'atunug i'atumi'u ieĩpyt 12 e'yry­sakag ne te topyhu'at i'atumi'u so'o ko'i.
MAT 14:21 Toi'atumo'ok kahato 5000 rakaria ihainia'in i'ewyte i'atu kahato te hary­poria'in i'ewyte i'atu­mẽpyt'in. Yt ta'atukuap i yt ta'atu­mo­rania i hary­poria'in i'ewyte i'atu­mẽpyt'in yt ta'atukuap i karania tukupte'en itote ihainia'in ko'i yn ta'atu­mo­rania pote.
MAT 14:22 Mi'i hawyi to'e i Iesui towyria'in me — Eiwehyt'ok to ehe'yara pe hawyi eweiwat ro ihyemyi'a wato sakpo e. Uito aru ati'atu­po'oro miit'in sok i'atue­tawa ko'i kape hawyi areto ehowawi ehupi mehĩ'in e temiit'in me. Mi'i hawyi tuwat ra'yn.
MAT 14:23 Tuwat yne ra'yn hawyi ipot'am na'yn yity'ok kape. Mi'i tote tuweran hawyi ihay ra'yn Tupana wywo. Pyno wãtym'i ra'yn hawyi tehay kahu ra'yn hawyi tuweran toĩne'en yity'ok tote.
MAT 14:24 Mi'i totepyi heremo yne y'y emyi'a. Mi'i hawyi teha'at temiit'in kape ihyemyi'a py'asetpiat ikupte'en turan. Wasere poity'i temiit'in e'yara yowa etiat kape. Mi'i pote yt tuwat kuap i iha'at turan ihy wato kahato ra'yn itote ywytu haty wo kahato pote.
MAT 14:25 Mi'i pote waipaka ehay hap owakai toto ra'yn Iesui temiit'in kape yowa tote hewyry i'atue'yara kape y'y puo.
MAT 14:26 Mi'i hawyi hemiit'in te'era'a­kasa Iesui ut hap kape y'y wato totiat hewyry turan. Mi'i hawyi i'atu­wuwu kahato ra'yn hawyi i'atuehay haty wo — En apo miit ehag y'y totiat i'atu'e.
MAT 14:27 Ma'ato Iesui to'e — Uipot­mu'eria yt eweiken'ẽ tei'o uipupi katu­pono Uito rat mesuwe areĩne'en e. Pyno eiwepit ro e.
MAT 14:28 Mi'i pote Peteru iwẽpap'i — Uruka'iwat e pyno En pote uikaykay iro ewewawi uhewyry teran ewawi yowa tote e.
MAT 14:29 — Eriot ro e Iesui hawyi Peteru tuwẽtem na'yn yara pyi hawyi toto ra'yn y'y owa upi Iesui kape.
MAT 14:30 Ma'ato hewyry y'y owa upi turan teha'at ywytu kahato kape ywytu uato poity'i kape. Teha'at hawyi — Uheha­kyera'at ro En Uika'iwat e iwẽpap'i.
MAT 14:31 Mi'i hawyi meremo Iesui tokosap howawi hawyi totat ipo ete hawyi to'e — Kat poteĩ yt uimohey i Peteru e. Kat pote kahu uimohey ran yn en e.
MAT 14:32 Mi'i hawyi tuwehyt'ok yara pe hawyi ywytu meremo ipohep hawyi inik kahato ra'yn itote.
MAT 14:33 Mi'i hawyi 12 ok takaria yara piaria timõ­typot kahato ra'yn Iesui — En ni Tupana Sa'yru sese i'atu'e.
MAT 14:34 Mi'i hawyi tuwat ra'yn ihyemyi'a sakpo hawyi mekewat tawa Kene­sare e hap wã tote tuwehik.
MAT 14:35 Mi'i hawyi itotiaria ikuap ta'yn meremo Iesui put'ok'e hap. Mi'i hawyi meremo ta'atukuap Iesui uwe hap. Mi'i hawyi ta'atue­ropo'ok i'ahu rakaria kopepyi kopepyi howawi.
MAT 14:36 Mi'i hawyi ta'atu­hẽtup ta'atu­mierut ko'i i'ahu rakaria moehãite hap hesokpe emig hamo. Mi'i hawyi wuat'i i'ahu rakaria Iesui ti'atu­moe­hãite yne tesokpe emig haria are uito Mateu.
MAT 15:1 Mi'i turan itote Tupana ehay miwan miat wan pakup i haria i'ewyte Tupana ehay enoi haria tõ'ẽ tõ'ẽ tawa wato Ieru­sarẽi kaipyi apota'atu'e Iesui piat hamo.
MAT 15:2 — Kat poteĩ emiit'in yt te'eru­we­posei posei i yt aha'ase'i'in eko yt ewy i i'atu'e. Kat pote yt naku i aipo­pitpit wywo watenuk i'atu'e õ'ẽ haria Iesui pe.
MAT 15:3 Mi'i hawyi Iesui apo'e i'atuepe — Kat pote eipe ti Tupana eko yt ewetunug hin i e. Pywo pe ti Tupana ehay atoiat haria eipe katu­pono eimienoi ko'i yn ewetunug e. Kat pote Tupana eko yt ewetunug hin i e.
MAT 15:4 Sa'awy'i Tupana to'e tomiwan me — Eweimõ­typot ro ei'ywot eity e. Karãpe wẽtup ok tunug saty'i saty'i at to'ywot ete toty ete waku mi'auka wo mekewat miit topyhu'at e sa'awy'i­tewuat miwan me e.
MAT 15:5 Ma'ato ti yt mio tã hin i ewei'atumu'e miit'in e. Karãpe yt watimõ'ẽ neran i aity kape ai'ywot kape mi'i pote ti waku — Papai Mamai yt kat i hin i eipo­hapnug hap topyhu'at katu­pono Tupana kape atum yne ra'yn eipo­hapnug hap wato'e ewei'atumu'e sa'ag miit'in e Iesui nagnia ehay enoi haria pe.
MAT 15:6 Mi'i pote ti mesup aimẽpyt'in yt ti'atu­mõ­typot hin i ta'atu'ywot ta'atuty. Yt kat i i i'atu­mimõ'ẽ e. Mi'i hawyi i'atu­po­hapnug hap topyhu'at eipo pe e. Yt naku i kahato katu­pono mesup ti Tupana e hap ta'atu'atoiat kahato ra'yn hawyi eiwat eimienoi sa'ag ne'i ra'yn ta'atu­mohey e.
MAT 15:7 Ta'i mi'i pote eipe typy ehay rakaria ra'yn e Iesui. Nimo te ti ase'i Isaia henoi tomiwan me
MAT 15:8 — Eipe ti ehehay wo uimõ­typot ma'ato ti eiwa­nẽtup hawe ti pya kahato uikai e Tupana tomiwan me Esekieu 33.31 pe.
MAT 15:9 Yt kat hamo ti ehehay se uimõ­typot hap ete katu­pono uhehay atoiat haria eipe hawyi eimienoi sa'ag ko'i yn ewehenoi eipot­mu'eria pe e. — Urumienoi ti Tupana ewei'e ma'ato eheso kahato e ti Tupana ehepiat pe Isaia miwan me 29.13 pe e Iesui apo'e haria pe.
MAT 15:10 Mi'i hawyi itotiaria typy'i rakaria pe Iesui to'e — Eweĩ'ẽ ro uhowawi e. Woro­ho'omu'e teran eipe e. Waku eweiwa­nẽtup to ui'e hap kape ikuap hamo inug hamo e. Waku ehewaure ka'a kahato uhepiat einãpin hap kape e.
MAT 15:11 Uiwyria'in yt eweiwa­nẽtup tei'o eipy'a pe — Waku areĩne'en Tupana wanẽtup hawe. Mi'u hãpyk urueko ewy wakuat yn atu'u yt ewei'e tei'o eipy'a pe katu­pono aheko mi'u ete yt aimo­hãpyk kuap i Tupana wanẽtup hawe e. Uimi­mu'eria pywo pe ti Tupana teha'at kahato eipy'a piat eiwa­nẽtup hap kape. Eimi­ky'esat hap kape teha'at kahato. Mi'i hawyi ei'e hap kaipyi eikuap sio eipe waku sio yt hap yt naku i eipe hap e. Mi'u yt eimohun kuap i eiwa­nẽtup hawe are ma'ato eiwẽ pywiat ehehay eimohun kuap hap tuwẽtem eiwẽ pyi e Iesui to'ywania Iuteu ywania pe.
MAT 15:12 Mio tã to'e hawyi ipotmu'eria sese tõ'ẽ meremo Iesui kape henoi hamo — Mehĩ i'atu'e Tupana ai'airo temiit no aheko mi'u u hap etiat e haria i'atu­py'ahak kahato eete. Urumu'e hat ewe'eg wo o i'atu'e katu­pono yt naku i e'e hap iatu'e irania'in wo'omu'e haria to'ope katu­pono — Tupana miky'esat ewy mi'u u haria yn waku pe tukupte'en Tupana wanẽtup hawe i'atu'e mi'iria. Aheko mi'u ete aipu'ap Tupana kape i'atu'e wo'omu'e haria ipotmu'eria henoi Iesui pe.
MAT 15:13 Mi'i pote Iesui to'e — Pyno mi'iria mienoi ko'i yt Tupana mienoi ewy hin i e. Karãpe watikoi aiko hawyi wahe­katup kahato hẽtyt hap e. Hẽtyt hawyi aimo­wepit kahato hap aimikoi e. Ma'ato i'anam ne'i hẽtyt hap yt aimo­wepit kuap i yt aimikoi hin i pote meremo wati­puruk. Mi'i hap ewy irania'in wo'omu'e haria mimu'e ko'i yt Ai'ywot Tupana e hap ewy hin i ma'ato i'anam aiko piat ewy e.
MAT 15:14 Uipot­mu'eria eiwa­nẽtup ko'i ko'i i'atu­wesat hap kape e. I'atu'e hap miit'in mu'e hap yt kan hamo i katu­pono yt ta'atukuap i mu'ap Tupana kape e. Ta'i mi'iria tukupte'en yt ihapytig i rakaria ewy — Mesuwe mu'ap Tupana kape i'atu'e irania'in me yt ta'atukuap i mu'ap pytkai. Aikotã yt ihapytig i rakaria to'o'ykesat hap ewy tukupte'en mi'iria. Meiũran to'oykesat ereto yi hot pe hawyi i'atuewo yi ka'a pe e.
MAT 15:15 Mi'i hawyi Peteru to'e Iesui pe — Uimu'e hat yt uruikuap hin i te e'e hap mi'u ete e. Urumu'e i ro kat e'e hap sese etiat e.
MAT 15:16 Mi'i hawyi Iesui ti'atu­wesat — Uiwyria'in yt eweikuap i te ui'e hap eipe e. Ta'i irania'in mesu­wa­ro­tiaria ewywuaria te eipe katu­pono mi'iria yt uikuap i te haria e.
MAT 15:17 Yt eweikuap i te apo aikotã mi'u watohon hawyi aiymyẽ pe toto hawyi teke aime'en me hawyi ahepai'a hawyi toto i ra'yn aipiit pyi hap. Yt eweikuap i te apo aikotã mi'u yt teke kuap i aiwa­nẽtup hawe e.
MAT 15:18 Ma'ato ai'e aiwa­nẽtup hawiat meiũran tuwẽtem aiwẽ pyi ahehay wo ra'yn aiwa­nẽtup hap ok tã e. Pywo ti rat ei'e hap eipy'a piat eima'at hap topyhu'at katu­pono tuwẽtem eiwẽ pyi hawyi torania tikuap ta'yn eiwa­nẽtup hap e. Pywo pe ti ei'e hap eipy'a pywiat eimohun hap topyhu'at e Iesui.
MAT 15:19 Ta'i eiwe'eg wo o eipy'a piat eiwa­nẽtup hap e hap pupi are katu­pono mesu­wa­ro­tiaria te'eru­wa­nẽtup at ka'ap aikotã aikotã yt naku i nug hap kape — Waku ati'auka mekewat uhewa­nĩkap i'atu'e ta'atupy'a pe. Waku mi'i uhewaire wo i'atu'e ta'atupy'a pe. Waku atoiat uhe'aito uhehary'i hawyi wẽtup atat i'atu'e ta'atupy'a pe. Waku atero'ok mekewat uianuat i'atu'e ta'atupy'a pe. Waku atima'at mi'i miit uhehay yt pywo i rakano i'atu'e ta'atupy'a pe.
MAT 15:20 Mi'i ei'e hap ko'i eipy'a pywiat eima'at hap ko'i tukupte'en katu­pono ewei'e eipy'a pe hawyi meremo ewetunug ei'e hap ewy. Ei'e hap upi eweiwat hawyi yt naku i nug haria eweikupte'en e. — Mi'u watu'u aipo­pitpit hap wywo pote meremo yt naku i nug haria wo wato­pyhu'at i'atu'e irania'in wo'omu'e haria ma'ato yt pytkai i e. Aipo­pitpit hap yt teke kuap i aiwa­nẽtup hawe e. Aipo­pitpit hap yt ainug hin i sa'ag nug haria Tupana wanẽtup hawe e.
MAT 15:21 Mi'i hawyi Iesui toto ra'yn tetama pyi wẽtup tama piat tawa kape toto mekewat y'y wato sese yẽpe kape topot­mu'eria wywo. Put'okta'atu'e tawa Tiru pe hawyi tuwat tawa Sitãu kape.
MAT 15:22 Mi'i turan wẽtup hary­poria mekewat y'y wato ẽpe totiat ieĩne'en hat tut Iesui ewawi hawyi tuwẽ­powat Iesui kape — Uika'iwat ase'i Tawi emiariru En e. Pyno uipo­wyro hap atiky'esat katu­pono uhehaky'e'i kahato Mimi e. Uiky'e hap kaipyi uipo­wyro ro e. Eriot ro uhupi uimẽpyt hary­poria moehãite hamo e. Uimẽpyt hary­poria kawiat ahiag tisaty'i saty'i kahato e.
MAT 15:23 Ma'ato Iesui yt tiwesat hin i tuwe­wawi wẽpowat i rakat. Ma'ato hary­poria yt ipohep hin i tohẽtup po'og ne'i. Mi'i hawyi ipotmu'eria te'ero'e Iesui pe — Uhyt i'atu'e etipo'oro ro mekewat hary­poria pya meiũpepyi i'atu'e katu­pono aimo­sero kahato ihay pirik hap aimo­py'ahak kahato i'atu'e. Waku etipo'oro pya aikai i'atu'e.
MAT 15:24 Mi'i hawyi Iesui tiwesat — Mana Uito ariot yt e'ywania kape hin i e ma'ato uru'ywania sese mu'e hamo yn ariot mesup e. Ta'i ui'ywania tukupte'en aikotã aihũria ga'apy piat ho'owasat rakaria ewywuaria tukupte'en haria uru'ywania Isareu ywania e.
MAT 15:25 Mi'i hawyi ma'ato hary­poria put'ok'e howawi hawyi toimõ­typot kahato ra'yn Iesui hawyi to'e tope — Uipo­wyro En Mimi e. Wakuat kahato En Tawi emiariru En. Uipo­wyro ro Uika'iwat e. Etisopo ro ahiag uimẽpyt pyi e.
MAT 15:26 Mi'i pote Iesui tiwesat — Mana e yt naku i urumẽpyt'in wakuaria mi'u wakuat urutum awareria pe e. Mi'i hap ewy yt naku i wẽtup ywania powyro hamo areto mesup wẽtup ywania kape e.
MAT 15:27 Ma'ato hary­poria to'e Iesui pe — Pywo pe ti an Mimi e'e hap ma'ato kat ko'i kat ko'i ta'at yparakai kaipyi mi'u ku'i ieĩpyt eimẽpyt'in te'erenuk turan topyhu'at awareria mi'u wo Mimi e.
MAT 15:28 Mio tã e hawyi Iesui tiwesat — Mana uimohey hap epiat hap iwato kahato. Mi'i tupono emiky'esat ewy atunug na'yn e Iesui hary­poria pe. Iesui mio tã to'e hawyi hary­poria mẽpyt waku ra'yn. Iesui ehay wẽtem iwẽ pywiat turan hary­poria piat tomohey hap kaipyi ihãite ra'yn.
MAT 15:29 Mi'i hawyi toto tawa Tiru pyi tawa Sitãu myi hawyi toto ra'yn mekewat ihyemui'a Karireia hyẽpe upi tewyry hamo. Mi'i hawyi yity'ok upi put'ok'e hawyi ipot'am hawyi ta'apyk itote.
MAT 15:30 Tuwat Iesui upi typy'i rakaria. Mi'iria terut kahato i'ahu rakaria Iesui ewawi. Tõ'ẽ ipy kĩ'ã rakaria yt ihapytig i rakaria yt hewaure ka'a i rakaria i yt ihay i rakaria yt hewyry kuap i rakaria. Ipo tut i i'ewyte ipy tut i rakaria tõ'ẽ howawi. I'ewyte tõ'ẽ aikotã aikotã ahu wywuaria tõ'ẽ Iesui ewawi ta'atu­moe­hãite hap puẽti hamo. Ta'atupag i'ahu rakaria Iesui yatype hawyi toi'atu­moe­hãite torania ra'yn.
MAT 15:31 Irania'in itotiaria teha'at haria te'eru­wa­nẽtup kahato Iesui kape katu­pono yt hewaure i rakaria toi'atue­waure hot'ok ta'yn yt ihay kuap i rakaria toi'atu­moehay kuap ta'yn yt ihapytig i rakaria toi'atu­moe­ha­pytig na'yn I'ewyte ipiit yt ikahu i rakaria toi'atu­moe­kahu. Mi'i hawyi ta'atu­mõ­typot kahato Tupana — Uru'ywania Isareu eTupana i'atu'e waku kahato En i'atu'e.
MAT 15:32 Mi'i hawyi Iesui ti'atu­kaykay tuwe­wawi topot­mu'eria — Uiwyria'in e i'atu­haky'e'i kahato katu­pono mye'ym e'at ra'yn tukupte'en meiũpe uhehay kuap hamo miit'in sem e. Mi'i hawyi ta'atumi'u ta'atu'u yne ra'yn e. Mi'i pote koitywy yt naku i ati'atu­po'oro i'atue­tawa ko'i kape katu­pono ti pya kahato pyi tõ'ẽ mi'iria e. Ta'i tuwat hawyi ti ren te'eropap ne'i ra'yn yahig note sy'at pono e. Mi'i pote waku sa'awy'i wati'a­tupoi mi'iria e. I'atu'ok ta'yn hawyi waku te'era'aipok yahig wato sakpo ta'atue­tawa ko'i kape e Iesui temiit'in me.
MAT 15:33 Ma'ato — Mehĩ i'atu'e typy'i kahato ti hesy'at rakaria mesuwe i'atu'e. Aikope pyi aru pyno wati­puẽti i'atumi'u wuat meiũpe yahig wato pe i'atu'e.
MAT 15:34 — Yt kat i i apo aheman mesuwe e Iesui. Mi'i hawyi — Yt rat i'atu'e kurin kahato aimi'u pãi i'atu'e. Aheman 7 yn topyhu'at i'ewyte ahepira hit typy yn topyhu'at Mehĩ i'atu'e. Mio tã i'atu'e pytkai Iesui to'e miit'in sem me
MAT 15:35 — Pyno ewei'apyk to yi upi e.
MAT 15:36 Mi'i hawyi totat 7 man typy pira topo pe hawyi to'e to'ywot pe — Arehum ewawi Tupana. Waku kahato emiium e. Mi'i hawyi toi'atupat'ok hawyi tutum na'yn temiit'in me. Mi'i hawyi ipotmu'eria imõ'ẽ ra'yn typy'i rakaria pe.
MAT 15:37 Mi'i hawyi te'erenuk kahato ra'yn hawyi i'atu'ok kahato ra'yn. Mi'i hawyi hemiit'in ti'atunug i'atumi'u ieĩpyt hawyi 7 e'yry­sakag ne howapy te topyhu'at man pikpik ko'i pira pu'i ko'i.
MAT 15:38 Te'erenuk haria 4000 ihainia tukupte'en itote i'ewyte hary­poria'in i'atu­mẽpyt'in typy'i kahato yt i'atu­mi­mo­rania i ko'i te'erenuk wy.
MAT 15:39 Waku hawyi Iesui ti'atu­po'oro ra'yn i'atue­tawa ko'i kape. Mi'i hawyi teke ra'yn yara pe hawyi toto i ra'yn ihyemyi'a sakpo mekewat yi Matara e hap kape. Mi'i hap ti ara'akasa yne sa'awy'i uito Mateu. Mi'i hawyi mesuwat uimiwan atunug.
MAT 16:1 Mi'i hawyi itote wo'omu'e haria put'ok'i'atu'e Iesui iã'ãg hamo. Ta'atu­ky'esat i'aparap topiat hap haype. — Urumu'e hat i'atu'e etomo­herep to esaika hap atipy kaipywiat yt uwe minug kuap i rakat ok tã i'atu'e. Mi'i etunug hawyi mono meremo uruimohey Tupana Mipo'oro En hap i'atu'e Iesui pe.
MAT 16:2 Mi'i hawyi Iesui to'e i'atuepe — At min'e hap kape ewei'akasa hawyi — Pyno mũki'ite at kahu kahato irane ewei'e katu­pono at min'e turan atipy piat ihup kahato pote watikuap ewei'e.
MAT 16:3 I'ewyte at wẽtem hap kape eweha'at hawyi — Pyno meiũ i'aman aru ewei'e katu­pono at wẽtem hap ete hun moity i'ewyte ipy'ahak hap ewywuat topyhu'at atipy pe pote watikuap ewei'e. Ta'i i'aman aru hap yt i'aman i aru hap eweikuap kahato at mimo­herep hap ete ma'ato Tupana Mipo'oro wemo­herep hap ko'i yt eweikuap hin i eipe e. Atunug kahato ra'yn eipy'a­setpe Tupana miky'esat uipo'oro hap ko'i uwe Uito hap moherep hap ko'i ma'ato mi'i ewei'akasa yne hawyi ti yt uikuap i hin te eipe e.
MAT 16:4 Yt naku i kahato mesu­wa­ro­tiaria tukupte'en katu­pono yt Tupana mohey i haria kahato eipe e. — Etimo­herep to esaika hap atipy kaipywiat iwato'in nakat merep'e hap ewy hawyi emohey haria wo urutu­kupte'en ewei'e sa'ag uhepe e. Ma'ato yt atunug i aru iwato'in nakat ehepe ei'akasa hamuat uimohey ehepiat hamuat e. Ma'ato ti aru wẽtup iwato'in nakat ei'akasa hamo ehepiat uimohey hap yn atunug e. Ta'i meiũran ti aru arẽtem ni aru gu'uro pyi aikotã mekewat sa'awy'iwuat Tupana ehay moherep hat Iuna tuwẽtem mekewat pira wato rakat wẽ pyi mye'ym e'at hawyi hap ewy ti aru arẽtem gu'uro pyi e. Mi'i iwato rakat yn atunug aru uwe Uito hap moherep ehepiat hamo e. Mi'i hawyi ti Iesui toto wo'omu'e haria yaty­pepyi i'ewyte Tupana ehay iwan miat wan pakup i haria kaipyi.
MAT 16:5 Mi'i hawyi tuwat ra'yn temiit'in nywo ihyemyi'a wato sakpuat yara puo ma'ato hemiit'in tiwaure ta'atumi'u man.
MAT 16:6 Mi'i hawyi mu'ap upi toi'atu­nãpin na'yn temiit'in — Eiwe'eg wo o nagnia eko enoi haria wat ti mani ok pyre mopuk ewywuat pupi e nagnia ehay enoi haria Tupana ehay miwan miat wan pakup i haria wat e.
MAT 16:7 Mio tã e pote te'ero'e to'ope — Kat pote aheman wyti yt iwato i pote ti mio tã e. Aheman aimi'u wo wati­waure pote ti mio tã to'e i'atu'e.
MAT 16:8 Ma'ato Iesui tikuap i'atuehay to'opiat tuwa­nẽtup hawe hawyi to'e — Yt kat i aheman ewei'e apo eiwo'ope e. Pyno yt uimohey kuap i te eipe e.
MAT 16:9 Yt eweikuap i te apo uhesaika hap man nug hamuat hap e. Eweiwaure ra'yn apo aikotã ga'atpo 5 man wo ati'atupoi 5000 ihainia hap e. Eweiwaure ra'yn apo karania e'yry­sakag ne topyhu'at mi'i mi'u ieĩpyt hap itotiat e.
MAT 16:10 I'ewyte mi'i hawyi ati'atupoi sa'awy'i 7 man wo 4000 ihainia. Mi'i hap apo karania e'yry­sakag ne topyhu'at i'atumi'u ieĩpyt itotiat e.
MAT 16:11 Mi'i tupono mesup ti uhehay wyti aikotã nagnia ehay enoi haria i'ewyte wani wani e haria tukupte'en mani puk ewy hap ete ti uhehay e. Ta'i yt eimi­waure aheman yt ete i ti uhehay e. Pyno eiwe'eg wo o eiwa­nẽtup hap man puk hap pupi mekewat sehay wẽtup nagnia mienoi hap pupi e.
MAT 16:12 — Ta'i mio ti uruikuap ta'yn ehay Uhyt yt aheman ete i ehay hap ma'ato iã'ãkap wuo urumu'e wẽtup seko enoi hap pupi mekewat Tupana mõtypot yat piaria akag ko'i Tupana ehay miwan miat wan pakup haria wo'omu'e hap pupi ehay hap i'atu'e.
MAT 16:13 Mi'i hawyi Iesui toto tawa Sesaria kape wuat'i tawa hit upi toto morekuat Wiripi e'yi upi toto. Mi'i hawyi mu'ap upi tuwat hap tote Iesui apo'e temiit'in me — Uiwyria'in e uwe som pyno irania'in me Uito eheyke'et apo'e.
MAT 16:14 — Ta'i irania'in ni mekewat wo'oset'ok hat Iuwãu raso i'atu'e ti epe. Ma'ato irania'in ti ta'i mekewat sa'awy'iwuat Tupana ehay moherep hat Eria raso Ieremia raso i'atu'e epe. Ma'ato irania'in wẽtup ok sa'awy'iwuat Tupana ehay moherep hat ti ta'aipok i gu'uro pyi i'atu'e ti epe i'atu'e.
MAT 16:15 — Ma'ato apo uwe Uito ehepe e.
MAT 16:16 Mi'i hawyi Peteru tiwesat — En ni Tupana Mipo'oro Miit'in Ehakyera'at hanuat En e. En ni Tupana Sa'yru wuat'i e'at piat ieĩne'en hat Sa'yru ti En e Peteru.
MAT 16:17 — Hãpyk kahato ti en uiwesat Simãu Iuwãu sa'yru e. Pywo ti uiwesat en. Yt uwe miit'in mikuap ewy i uiwesat en e. Ta'i yt uwe i ti mio tã emu'e mesuwe ma'ato Ui'ywot atipy piat wyti henoi epe uwe Uito hap e.
MAT 16:18 Uimohey hat sese ti en e. Uimohey iheg miat hat en Peteru aikotã ai'yat nu kawiat iheg kahato hap ewy ti uimohey hap e. Mi'i hawyi ti aru en ewywuaria uimohey kahato haria wo yne ati'atunug aikotã wati'a­tunug nu ai'yat nug hamuat hap ewy. Uimohey haria en ewywuaria wo ati'atunug ui'yat Tupana mõtypot hamuaria e. Yt uwe i wyti aru imoma kuap uimohey haria katu­pono po'og hesaika gu'uro kawiat rakat atunug mi'iria e. Wanĩ­kaptia ti'atu'uka atu'uka pytkai tukupte'en ne uimohey haria mesuwe katu­pono yt ta'atu­moma kuap e.
MAT 16:19 Koitywy woronug en oken'ypy apykok hat ewywuat e. — Ereke ro aikope Tupana toĩne'en Morekuat no ere'e miit'in me pote tuwehyt'ok aru ma'ato irania'in me yt eiwehyt'ok tei'o ere'e pote yt tuwehyt'ok i aru e Iesui.
MAT 16:20 Mi'i hawyi toi'atu­nãpin — Uiwyria'in e yt ewehenoi tei'o mesup te irania'in me eimikuap Uito Tupana Mipo'oro Wuat'i Miit'in Porekuat nuat hap e.
MAT 16:21 Mekewat e'at pyi Iesui ti'atumu'e topot­mu'eria aikotã aru toieĩne'en mesu­wa­rote irane hap etiat tohenoi — Uipot­mu'eria e koitywy ahenoi teran ehepe heremo kahato aikotã aru ta'atunug mesuwe uhepe hap e. Areto ra'yn aru Ieru­sarẽi kape uipo'oro hap ewy areto. Mi'i tote ti aru nagnia pa'i kororia i'ewyte seko enoi haria uhaty'i haty'i kahato itote aho'opot kahato aru e. Ui'auka ra'yn aru itote ma'ato mye'ym e'at yn wyti aru uipiit topyhu'at ui'asyp hawe e. Mi'i hawyi ti aru arẽtem i gu'uro pyi hawyi areĩne'en ne i ra'yn Uito e.
MAT 16:22 Mio tã e pote Peteru tikaykay Iesui tuwe­wawi wãito'e hamo — Mehĩ yt karãpe i ti mi'i tã hap ta'atunug kuap eete pãi e. Pyno ti yt karãpe i ti aru e'auka hap e.
MAT 16:23 Ma'ato Iesui tuwe­morem na'yn Peteru saty'i saty'i hamo — Motoro ahiag e Peteru pe. Uipyhyp teran en Tupana miky'esat nug hap ete Satanai e. Uinãpin sa'ag ne'i yt Tupana piat yt uinãpin hap ewy hin i ma'ato ti miit'in wanẽtup hap kaipyi ne'i ti uinãpin en e Peteru pe.
MAT 16:24 Mi'i hawyi yne temiit'in me to'e — Uipot­mu'eria uhemiit no sese wo erepyhu'at teran pote etiwaure o yne emiky'esat nug hap ko'i e. — Ui'auka pote waku ui'auka ma'ato yt atoiat hin i aru imohey hap ewei'e o e. — Yt atoiat hin i Uika'iwat uiku'uro hap kape ewei'e o e.
MAT 16:25 — Uimi­ky'esat nug hap yn aru atunug ewei'e pote eheĩne'en hap sese mesuwat yi tote pun haria wo eweipyhu'at ma'ato uwe uwe — Uika'iwat miky'esat yn atunug neran ewei'e pote eheĩne'en hap sese puẽti hanuaria eweipyhu'at mesuwat yi tote i'ewyte atipy pe e Iesui.
MAT 16:26 Kan hamo ten eweipotpap at ka'ap wuat'i e'at pe yne yne mesu­wa­rote yi wato hap ok tã eweikyi'at hamo yt eweikupte'en i sese mesuwe hamuat pytkai i e. Kan hamo eweipun yne eheĩne'en hap eimi­ky'esat nug hap ete hawyi aikotã i aru ewei'aipok i emotag hap e'at kape. Eweipun na'yn eheĩne'en hap sese yne hawyi aikotã aru eweikyi'at i ra'yn e.
MAT 16:27 Meiũran ti aru ara'aipok te ra'yn meikowo Uito Eheyke'et Eikywyt. Ariot re ti ra'yn Ui'ywot mimõ­typot nuat ariot pãi hemiit'in atipy piaria py'asetpiat ariot e. Mi'i e'at pe ti aru atum ha'up uimi­ky'esat nug haria pe ikahu kahato aikotã i'atu­minug wakuap ok tã wyti aru atum ha'up iwato rakat e. Ma'ato irania'in me ti aru i'atu­minug sa'ag ok tã ne wyti aru atum ha'up i'atuepe yt nakuap i ok tã e. Yt eweiwaure tei'o mio wuat uhehay pãi e.
MAT 16:28 Pywo pe ti areĩne'en ti aru Morekuat no mesuwe e. Mi'i hawyi i'ewyte tukupte'en eipy'a­setpe wẽtup ok wẽtup ok Eheyke'et Morekuat nuat hap kapiat akasa haria ti aru eipy'a­setpe tukupte'en wy e. Pyno ti aru mi'iria te'era'a­kasa ta'atu­ku'uro hap e'yianmete e Iesui temiit'in me. Mio tã e. Mi'i hawyi uito Mateu atiwan mi'i hap etiat mesuwe.
MAT 17:1 Mi'i rokirẽ 6 e'at tokosap rokire totioto temiit Peteru Tiaku iywyt Iuwãu wywo yity'ok ywaiti kahato rakat kape aikope yt uwe i tukupte'en hap kape.
MAT 17:2 Mi'i hap tote te'eraha'at Iesui kape turan yt sa'awy'i­tewuat ewy i ra'yn toĩne'en katu­pono howa ti imehit kahato at mehit hap ewy i'ewyte hesokpe ikytsig kahato imehit hap ewy.
MAT 17:3 Mi'i hawyi ipotmu'eria mye'ym ok takaria te'era'a­kasa Iesui yatype typy ok mekewat Musei hawyi Eria meke­waria sa'awy'iwuat Tupana ehay moherep haria kape te'era'a­kasa. Mi'iria ti to'oehay Iesui wywo.
MAT 17:4 Mi'i hawyi Peteru tuwẽ­powat ra'yn — Urumu'e hat e waku kahato meiũpe watoĩne'en pãi e. Etiky'esat pote meremo atunug ehe'og mye'ym wẽtup ewano wẽtup Musei wano wẽtup Eria wano e haty wo.
MAT 17:5 Mio tã e turan put'ok'e ra'yn ywyhig imehit rakat i'atuete ywai kaipyi. Mi'i hawyi ywyhig og kaipyi sehay ta'atukuap — Uha'yru sese ti toĩne'en eipy'a­setpe uimiky'e kahato Mi'i e. Mi'i tupono eweiwa­nẽtup kahato ro ihay imienoi kape e Tupana.
MAT 17:6 Mi'i pote ywyhig mywiat sehay pupi ipotmu'eria hewo ra'yn yi tote ta'atuewa puo.
MAT 17:7 Mi'i hawyi Iesui teha'at i'atue­wawi hawyi toi'atuemig hawyi to'e — Wãi eweiken'ẽ tei'o e i'atuemig haype. Eipoĩ'ãm no e. Yt eweiken'ẽ te e.
MAT 17:8 Mi'i hawyi te'eraha'at yi totepyi hawyi Iesui yn na'yn heremo. Te'era'a­kasa Iesui yn na'yn. Mi'i yn toĩne'en ne itote.
MAT 17:9 Mi'i hawyi i'atu­pot'apyk i ra'yn yi hot kape yity'ok totepyi. Mi'i turan Iesui to'e mye'ym ok takaria pe — Yt ewehenoi tei'o irania'in me ei'akasa uhowawiat yity'ok totiat aikotã areĩne'en hap e. Uito Eheyke'et tuwẽtem i ra'yn gu'uro pyi hawyi ti waku ewehenoi mi'i tã hap irania'in me e.
MAT 17:10 Mi'i hawyi apo'i'atu'e tope — Kat poteĩ irania'in Musei ehay wuat aimu'e haria te'ero'e — Sa'awy'iwuat Tupana ehay enoi hat ti Eria ti ta'aipok i ra'yn Tupana Mipo'oro Miit'in Ehakyera'at hat ut hap moherep hamo tut i'atu'e.
MAT 17:11 Mi'i hawyi toi'atu­wesat — Ta'i pywo kahato ti mio tã i'atu'e hap ewy ti e. Katu­pono Eria ti tut ra'yn yianme Tupana Mipo'oro ut hamuat enoi hamo i'atu'e hap ewy e.
MAT 17:12 Pywo pe ti Eria put'ok'e e hap ti tokosap ta'yn uiwyria'in e. Ta'i ta'aipok kahu ra'yn ma'ato miit'in yt tikuap i ut hap hawyi to'okyry'i sa'ag kahato mi'i ete. Ta'atu­mi­kyry'i sa'ag hap ne'i e. Mi'i mikyry'i hap ewy te ti aru ta'atunug sa'ag uhete Eheyke'et ete e.
MAT 17:13 Ta'i uruikuap ta'yn koitywy kat e'e hap i'atu'e. Ta'i mekewat wo'oset'ok hat Iuwãu sa'awy'iwuat Tupana ehay moherep hat ti Eria ewywuat kahato ti ere'e hawe ti i'atu'e.
MAT 17:14 Mi'i hawyi Iesui ta'aipok i ra'yn Peteru Iuwãu Tiaku wywo miit'in typy'i rakaria kape. Mi'i hawyi wẽtup ok ihainia put'ok'e Iesui ewawi hawyi tuwe­pỹ'ã­tutuk haype to'e
MAT 17:15 — Uhyt e eraha'at uha'yru kape iky'e hap mywo ro katu­pono yt naku i kahato ahiag uha'yru ete e. Toku'uro ku'uro hawyi ti aria pe y'y pe tuereto ta'at e.
MAT 17:16 Sa'awy'i ti aterut epotmu'eria kape ma'ato ti mi'iria ti yt imoehãite kuap i e.
MAT 17:17 Mi'i hawyi Iesui to'e topot­mu'eria pe — Yt Tupana mohey haria hin i ti eipe pãi. Mi'i pote ti ewei'aparap kahato eipe e. Karãmuo ti aru put'ok'e uhepiat eimu'e hap Tupana mohey sese hap e. Woro­ho'omu'e ti imohey hamuat ete wen ma'ato ti yt eweimohey kuap hin i te e. Aikotã aru pyno ewei'atu­moe­hãite kuap miit'in areto ra'yn pytkai yt kat i ra'yn uimohey hap eikai hawyi e. Pyno eterut ro esa'yru e Iesui wepỹ'ã­tutuk hat pe.
MAT 17:18 Mi'i hawyi tohaty'i haty'i ahiag tehay wo — Erẽtem no ahiag kurum piit pyi e hawyi meremo ihapy hot'ok i ra'yn ahiag ipiit piat rakat. Meremo waku ra'yn tuete.
MAT 17:19 Mi'i hawyi waku hawyi ipotmu'eria te'eru­weran tuwat howawi — Kat pote som uruto yt uruihep kuap i ahiag kurum piit pyi i'atu'e ta'atumu'e hat pe.
MAT 17:20 Iesui henoi ra'yn — Tupana mohey hap eiwanuat yt iwato i te yt itag i te eweimohey Tupana pote yt eweimoe­hãite kuap i te eipe e. Tupana mohey hap eiwat itag pote iwato pote yne yne ewetunug kuap e. Aikotã aimikoi Mutara iã'ỹi ti yt iwato hin i wen ma'ato itag hawyi i'yp wato e. Mi'i hap ewy ti Tupana mohey hap ehepiat hap eikawiat kurin kaipyi itag hawyi yne ra'yn ewetunug kuap imohey hap wywo ewehẽtup wote e. Mesuwat yity'ok wato pe — Motoro mesu­wepyi ewei'e imohey hap wywo pote ta'i toto ra'yn eimiẽtup ewy e.
MAT 17:21 Ta'i uhyt'i'in ewehẽtup Tupana pe haty wo ahiag hep hamuat ehesy'at hap wywo mi'i hawyi tuwẽtem ahiag ma'ato yt pote yt e.
MAT 17:22 Mi'i hawyi hemiit'in yi Karireia piaria te'eru­wa'a­tunug yne ra'yn Iesui kape. Mi'i hawyi to'e i'atuepe — Uiwyria'in e mi'i hawyi irane Uito ti wanĩ­kaptia po pe areĩne'en Uito e.
MAT 17:23 Ta'i ta'atu'auka sese hamuat ti Eheyke'et Eikywyt hawyi ta'atusyp ipiit iku'uro hawyi ma'ato mye'ym e'at hawyi Tupana uihep i ra'yn gu'uro pyi Uito e. Ta'atukuap ihay hawyi i'atu'arot kahato ra'yn iwyria'in.
MAT 17:24 Mi'i hawyi Iesui toto temiit'in nywo tawa Kawana'ũ kape. Mi'i tote put'ok'e wẽtup ok Tupana mõtypot yat apykok hap sa'up sat hamo tut. Mi'i hawyi apo'e Peteru pe — Eika'iwat tum apo Tupana mõtypot yat apykok hap sa'up e.
MAT 17:25 — Ta'i tutum som e Peteru hawyi teke getap we apoto'e hamo ma'ato apo'e hap e'yianmete Iesui to'e — Simãu e mesuwat yi totiaria more­kuaria wyti miit'in kaipywiat ha'up sat kahato haria e. Uwe kaipyi som ta'atu­ky'esat ha'up sat hap are sio i'atu­mẽpyt'in kaipyi are sio irania'in kaipyi e. Kat som mi'i tã erewa­nẽtup e Simãu me.
MAT 17:26 Ta'i ta'atu­mẽpyt'in kaipyi ti yt kat i ta'atuhep e ma'ato irania'in kaipyi iwato kahato ta'atu­po­rera'at e Simãu hawyi Iesui to'e — Simãu e Ui'ywot yat apykok hap sa'up ta'atusat teran uikaipyi e.
MAT 17:27 Ta'i atum wyti aru e yt kat i uiwe­te­weru hap pytkai Ha'yru Uito pote ma'ato atum katu­pono yt atiky'esat i wyti yt hegyi'at i rakat i'atu'e uhepe e. Pyno waku watum i'atu­miẽtup e Simãu me. Mi'i pote ti etioto ro pina ihyemyi'a wato kape hawyi etekyi pira ro e. Mi'i tote ti aru etipuẽti pira e. Mi'i hawyi ti aru emiekyi sa'awy'iwuat wẽ pe etipuẽti ha'up muat i'ape rakat e. Mi'i i'ape rakat ti aru put'ok'e ra'yn Tupana mõtypot hap apykok hap sa'up mo aiwanuat e. Pyno etekyi pira hawyi etum i'ape iwẽ piat mekewat sa'up nug hamo e Iesui Peteru pe. Mio tã hap ewy to'e Peteru pe sa'awy'i. Mi'i hawyi uito Mateu uimiwan atunug mi'i etiat.
MAT 18:1 Mekewat e'at Iesui potmu'eria put'ok'i'atu'e Iesui ete apota'atu'e hamo — Uhyt i'atu'e uwe aru mekewat Tupana topyhu'at Morekuat no mesuwat yi tote turan mekewat e'at pe apuru uwe uwe topyhu'at urupy'a­setpe po'og miit'in akag no irania'in kai i'atu'e.
MAT 18:2 Mi'i hawyi Iesui tikaykay hirakat kurin kat tuwe­wawi hawyi hirakat pe to'e — Eremo'y'am no meiũpe uhemiit'in py'asetpe e.
MAT 18:3 Mi'i hawyi to'e temiit'in me — Miit'in akag wo eweikupte'en neran mote eweikupte'en meiũwat hirakat ewywuat e. Hira­karia waku kahato e. — Uito po'og yt to'e i hap ewywuaria waku ewei'e e.
MAT 18:4 Ewei'atoiat ro — Uito po'og irania'in kai ei'e hap ko'i hawyi — Irania'in po'og uikai ewei'e eiwa­nẽtup hawe hirakat ewy e. Mio tã e haria ewywuaria yn miit'in akag wo tukupte'en aru karãpe Tupana toĩne'en Wuat'i Potypot Koro wo i mesuwat yi wato hap ok tã hap e'at turan e.
MAT 18:5 I'ewyte uwe uwe uhetiano wẽtup ok mesuwat hirakat ewywuat pe to'e — Ta'i waku ereĩne'en ui'yat pe pĩ'ã kurum e hat topyhu'at mi'i e hat ewywuat uhepe to'e — Ta'i waku ereĩne'en ui'yat pe Uhyt Mimi e hat topyhu'at e.
MAT 18:6 Pyno eiwe'eg wo o uimohey haria piat uimohey hap moma hap pupi e. Katu­pono uwe uwe hirakat ma'at hat topyhu'at mi'i hat yt naku i sese rakano topyhu'at Tupana wanẽtup hawe pãi e. Uwe uwe uimohey hap hira­karia wanẽtup hawiat ihep mi'i hat ti Tupana mi'apiheg sese wuanuat topyhu'at e. Ta'i mi'i hat ti sakpo yt naku i hawe topyhu'at irane aikotã ihyemyi'a wato pe nu wato saity nug ete watoĩne'en hap ewy topyhu'at yt naku i pe aru uimohey haria hirakat ewywuat ma'at haria e.
MAT 18:7 Tukupte'en aru uimohey haria ma'at haria uimohey hap hep kuap haria e. Po'og po'og Tupana mi'atu'a­piheg ko'i wo aru mi'iria te'ero­pyhu'at wuat'i irania'in ko'i kai e.
MAT 18:8 Mi'i pote epo epy einug yt naku i pe pote wãi'ewei'e o eiminug yt naku i hap ete e. Ta'i po'og waku eweitek eipo eipy katu­pono po'og waku ipo ipy tut rakano eweikupte'en mesu­wa­rote te sio meiũran eweipyhu'at eipiit ikahu rakat wywo wuat'i e'at pe aria pe eheho'opot hawe e.
MAT 18:9 I'ewyte wãi'ewei'e eiwa'a­kasa sa'ag neran hap ete. Ta'i po'og waku eweihep eheha hawyi eweipun no pya eikai katu­pono po'og waku eheha i'apak'e wywo yn ehewyry mesu­wa­rote sio typy kawiat eheha wywo eweikupte'en wuat'i e'at piat aria ieĩne'en hat ho'opot hawe ne'i e.
MAT 18:10 Mi'i pote eiwe'eg wo o hira­karia ewywuat haria etiat eipy'ahak hap pupi katu­pono tukupte'en kahato atipy pe Tupana esurara'in ko'i hira­karia apykok haria tukupte'en yt pya hin i Ui'ywot atipy piat kai e.
MAT 18:11 Mi'i pote eiwe'eg wo o hira­karia ewywuat uimohey haria ma'at hap pupi. Katu­pono ho'owasat rakaria ehakyera'at hamo ariot e. Ta'i Uito ti ariot Eheyke'et miit'in ho'owasat rakaria puẽti hamo e.
MAT 18:12 Karãpeĩ aihũria 100 rakat tukupte'en ai'yatype hawyi ma'ato wẽtup ok aihũ ho'owasat ra'yn mi'i hawyi watikat kahato meremo ho'owasat rakat. Mi'i hawyi 99 rakaria i'atumi'u ete hawyi aihũ ho'owasat rakat kat hamo watuwat e.
MAT 18:13 Mi'i hawyi meiũran wati­puẽti i ra'yn aihũ hawyi — Pãi waku wato'e aimo­wepit kahato katu­pono ho'owasat rakat wati­puẽti i ra'yn pote. I'ewyte meimuẽwat 99 rakaria aimo­wepit kahato haria te ma'ato ho'owasat rakat puẽti hap po'og aimo­wepit e.
MAT 18:14 Mi'i hap ewy te ti Ai'ywot atipy piat yt tiky'esat hin i wẽtup hirakat ho'owasat hap e Iesui temiit'in me.
MAT 18:15 Uiwyria'in e karãpe wẽtup ok uimohey hat ti'aparap eete aikotã aikotã tutunug ema'at hap mi'i hawyi o ereto howawi iweran hawyi ehenoi ro tope aikotã toi'aparap epiat hap e. Ma'ato waku iweran turan ehenoi tope e. Yt naku i irania'in ikuap ehay itote e. Mi'i hawyi — Pywo pe ti woro­ho'o'a­parap ta'yn e pote epe hawyi — Pyno waure wo areĩne'en uima'at hap kai ere'e ro tope e. Mi'i hawyi eiwo'o­wese hap yn na'yn toĩne'en eiwo'ope e.
MAT 18:16 Ma'ato yt tuwa­nẽtup teran i ehay kape pote etioto ro typy ok sio mye'ym ok uimohey haria etioto ewywo ihay kuap hamo sio pywo sio yt kuap hamo e. Katu­pono sa'awy'i mio tã e Tupana — Yt naku i ti etimohey meremo wẽtup ok heso hap wẽtup ok miit ete yt etikuap i te pywo sio yt e hap pytkai e. Ma'ato to'o'ewy kahato ta'atu­henoi typy miit sio mye'ym miit wẽtup ok miit ete mi'i pote waku etimohey i'atuehay apo apo'ere hawyi e sa'awy'i miwan me e.
MAT 18:17 Ma'ato yt tuwa­nẽtup teran i eiwo'omye'ym ok takat piat tonãpin hap kape pote ewehenoi ro uimohey haria sok pe e. Ma'ato uimohey haria sok piano inãpin hap kape yt tuwa­nẽtup teran i hawyi waku ewei'e tope — Koitywy yt urumi­mohey ewywuat i pote wẽtup ywania ewywuat ereĩne'en. Meimuẽwat mu'ap pyhyp haria ewywuat ra'yn ereĩne'en uruwa­nẽtup hawe waku ewei'e tope e.
MAT 18:18 Karãpe — Waku mi'i tã watunug ewei'e eiwo'ope sio yt naku i mekewat watunug ewei'e eiwo'ope mi'i pote ei'e hap ewy Ui'ywot atipy piat to'e aru e Iesui.
MAT 18:19 Wẽtup uhehay ahenoi teran ehepe are. Karãpe mesuwat yi tote typy ok uimohey haria hẽtup to'o'ewy Ui'ywot atipy piat pe kat e kat e hap mi'i hawyi tutum aru i'atu­miẽtup ok tã to'o'ewy'ewy i'atu­miẽtup tutum e.
MAT 18:20 Pywo pe ti are'e aikope aikope uimohey haria typy ok sio mye'ym ok te'eru­wa'a­tunug uimõ­typot hamo mi'i hap tote ti aru Uito i'ewyte areĩne'en i'atu­py'a­setpe e Iesui temiit'in me.
MAT 18:21 Urumu'e hat e Peteru karãpe wẽtup ok emohey hat uima'at hawyi waure wo areĩne'en. Ma'ato mi'i hawyi uima'at i ra'yn mi'i pote karania wo waku atimo­hãpyk uima'at i hat sio 7 wo sio yt e.
MAT 18:22 Yt rat po'og po'og 7 wo hap kape ma'ato 490 wo hap kape etimo­hãpyk wẽtup ok piat ema'at hap ko'i upi e. Ta'i waure wo watoĩne'en at ka'ap e Iesui Peteru apo'e hawyi.
MAT 18:23 Pyno ahenoi teran ehepe hã'ãkap wuo aikotã Tupana topyhu'at miit'in Porekuat no mesuwe i'ewyte atipy pe hap ewy e. Sa'awy'i so wẽtup morekuat ti'atu­kaykay tuwe­wawi temiit'in. Toi'atukuap teran karan karan i'atu­we­te­weru hap haype.
MAT 18:24 Wẽtup ok wete­weru hap ti iwato kahato aikotã aipotpap aheĩne'en hap ok tã kapiat sa'up ewy iwato kahato aikotã yt watum kuap i hap ewy e.
MAT 18:25 Mi'i hawyi so yt toha'up nug kuap i ra'yn e. Mi'i pote morekuat to'e haty wo tesu­rara akag me. Etiwe­neru ro mesuwat wete­weru hat ihary'i wywo imẽpyt'in wywo yne hekat ko'i wywo hawyi eterut ro mekewat sa'up hawyi etum no uhepe iwete­weru hap sa'up nug hamuat e.
MAT 18:26 Ma'ato mi'i hawyi meremo wete­weru hat tuwe­pỹ'ã­tutuk morekuat ewa kape hawyi to'e — Atum yne wyti aru uiwe­te­weru hap epe uika'iwat e ehekatup porap'i pote atum wyti aru e haty wo.
MAT 18:27 Mi'i hawyi sig morekuat tiky'e kahato temiit hawyi — Pyno atiwaure ra'yn ewete­weru uhepiat hap e. Koitywy yt kat i po'og na'yn ewete­weru hap uikai e. Katu­pono atihep yne ra'yn e wete­weru hap uimiwan myi e.
MAT 18:28 Mi'i hawyi wete­weru hat toto ra'yn morekuat yaty­pepyi hawyi wẽtup ok temiit toipuẽti yt iwato hin i wete­weru hap wywo wẽtup e'at kapiat ipotpap hap ok tã yn iwete­weru hap e. Mi'i hawyi ma'ato totat ra'yn topo wo hut'yp ete hawyi to'e haty wo — Etum no ewete­weru hap uhepe e.
MAT 18:29 Mi'i hawyi hemiit yi tote tuwe­pỹ'ã­tutuk hawyi to'e — Mehĩ e ehekatup porap'i o hawyi atat aru yne uiwe­te­weru hap hawyi atum yne aru epe mehĩ e.
MAT 18:30 — Yt rat e woro­po'oro en mesup epyhik hap kape e ewete­weru hap upi e. Mi'i hawyi so tutum na'yn temiit surara'in me ipyhik hamo.
MAT 18:31 Mi'i pote irania'in morekuat emiit'in i'atu­py'ahak kahato tukupte'en hawyi — Yt naku i kahato tutunug temiit ete i'atu'e. Mi'i hawyi so tuwat ra'yn morekuat kape henoi hamo e.
MAT 18:32 Mi'i hawyi morekuat tikuap ta'yn hawyi toikaykay mekewat sa'awy'iwuat wete­weru wato kahato hat tuwe­wawi hawyi to'e — Yt naku i kahato ti en katu­pono sa'awy'i atiwaure yne ewete­weru hap iwato rakat ehẽtup uhepiat hap upi e.
MAT 18:33 Sa'awy'i ehaky'e'i uhepiat hap upi waure wo areĩne'en ewete­weru hap iwato kahato pytkai. Ma'ato mi'i hawyi en yt waure wo hin i ereĩne'en epiat wete­weru hin hat kai e. Waku ti waure wo ereĩne'en ewete­weru kurin kat etiat hat ete aikotã uito waure wo areĩne'en ewete­weru wato kahato hap ete hap ewy e temiit sa'ag kahato sa'awy'iwuat rakat pe.
MAT 18:34 Yt karãmuo i ra'yn uima'at epiat hap atimonik uipy'a pe e. Uimõ­py'ahak kahato yt waure wo i ereĩne'en irania'in miat ema'at hap etiat pote e. Mi'i hawyi ereĩne'en irane morekuat pyhik hawe mekewat ewete­weru uhepiat hap mohãpyk hamuat e. Waku itote erepotpap at ewete­weru hap sa'up ete e. waku ereĩne'en itote at ka'ap iheg me morekuat esurara'in sem po pe e ika'iwat temiit sa'ag me yt waure wo i toĩne'en irania'in miat toma'at hap etiat pote e.
MAT 18:35 Mi'i hawyi mio tã e ti ahepe Iesui wy. Yt naku i yt waure wo i eweikupte'en irania'in miat wete­weru hap kai e. Mi'i tã eweikupte'en hawyi Ui'ywot atipy piat mi'apiheg ko'i wo eweipyhu'at are yt waure wo i miit'in miat eima'at hap ete haria wo eweikupte'en mote e Iesui ahepe temiit'in me.
MAT 19:1 Toi'atumu'e kahu hawyi toto i ra'yn Iesui tetama Karireia pyi mekewat Iũtãu hy sakpo yi Iuteu kape toto.
MAT 19:2 Mi'i hawyi miit'in typy'i kahato tuwat hupi i'ewyte i'ahu rakaria. Mi'i haria ti Iesui ti'atu­moe­hãite kahato i'ahu rakaria itote.
MAT 19:3 Mi'i turan tõ'ẽ howawi nagnia ehay enoi haria ta'atuehay piat Iesui ti'aparap hap ta'atu­ky'esat haype. Mi'i hawyi ta'atuiã'ãg hap te'ero'e Iesui pe — Mehĩ urunãpin En sio waku apo uruwary wywo uruto'o'atoiat urumi­ky'esat ewy sio yt i'atu'e.
MAT 19:4 — U pãi e yt karãpe i apo nimuat sese miwan ete eiwemu'e apo'are aikotã mi'i pe sa'awy'i sese to'e — Ainug hap ihainia hawyi hary­poria wẽtup yn tutunug hap ete e. Wẽtup ipa'iat wẽtup iwary'i yn ni tutunug e miwan me.
MAT 19:5 Mi'i tupono tehary'i hawyi ihainia toiat to'ywot toty e hawyi toĩne'en tehary'i wywo yn. Mi'i hawyi toĩne'en tehary'i wywo hawyi wẽtup miit ewy yn na'yn topyhu'at wẽtup ihainia wẽtup hary­poria typy miit pytkai e Iesui.
MAT 19:6 To'okyi'at hawyi wẽtup miit yn na'yn ihainia hary­poria pytkai e. Katu­pono Tupana tunug mi'iria wẽtup miit ewywuat e. Mi'i tupono yt naku i ti Tupana mipehik watitek e Iesui nagnia ehay enoi haria pe
MAT 19:7 Mi'i pote apo'i'atu'e — Kat poteĩ pyno Musei to'e ahepe sa'awy'i — Yt eiwo'o­wese i ehary'i wywuat hawyi ti ewetunug no iwan me aikotã ehary'i wywuat yt eiwo'o­wese i hap hawyi waku eiwo'o'atoiat e Musei i'atu'e.
MAT 19:8 — Ta'i yt eiwo'oky'e kuap i pote mio tã e Musei ehepe toĩne'en turan ma'ato sa'awy'i sese ti ipa'iat iwary'i nug hap e'at pe yt kat hin i wo'o'atoiat hap toĩne'en e.
MAT 19:9 Pywo pe ti uwe uwe he'aito kahato rakat atoiat hawyi toĩne'en wẽtup ok wywo mi'i miit ti'aparap kahato ra'yn Tupana wanẽtup hawe e Iesui Tupana ehay enoi haria pe.
MAT 19:10 Mi'i pote ipotmu'eria — Urumu'e hat i'atu'e pyno yt karãpe i waku uruto'o'atoiat uruehary'i pote po'og waku yt iwary rakanuat i urutu­kupte'en sio yt i'atu'e.
MAT 19:11 — Ma'ato tukupte'en iwary kahato rakaria i'ewyte tukupte'en yt iwary rakanuat i mesuwat yi tote e.
MAT 19:12 Tukupte'en wyti ihainia'in yt iwary rakat nuat i katu­pono ta'atu­hire pyi te ta'atu'ywã'ĩ pyi te yt i'atu'yp i rakaria e. I'ewyte ti tukupte'en wyti miit'in minug misa'ahep takat ewywuat ko'i e. I'ewyte yt yne i ma'ato tukupte'en tuereto — Uito yt atiky'esat i uiwary katu­pono po'og waku yt iwary rakanuat i areĩne'en Tupana potpap nug hamuat e haria e. Yt yne i wen ma'ato ho'okup mio tã e haria e. Mi'i tã ewei'e eiwa­nẽtup hawe pote waku mi'i tã eweikupte'en Tupana potpap nug hamo ma'ato yt pote yt e Iesui ipotmu'eria pe.
MAT 19:13 Mi'i hawyi miit'in te'eropo'ok teran hira­karia Iesui kape — Mehĩ i'atu'e ereponug no urumẽpyt'in ete hawyi ehẽtup to Tupana pe urumẽpyt'in poityro hap i'atu'e. Mi'i hawyi ma'ato ipotmu'eria ti'atu­pyhyp kahato hira­karia howawi — Wãi'i'atu'e.
MAT 19:14 — Yt ewei'atu­pyhyp tei'o hira­karia uhowawi pãi e Iesui ipotmu'eria pe. Tupana tiky'esat kahato temiit'in no hira­karia e. Tero tõ'ẽ uhowawi e. Katu­pono karãpe Tupana topyhu'at Morekuat no mesuwe mi'i hap e'at pe hira­karia ewywuat yn wakuat nuaria toi'airo temiit'in akag ko'i wo e Iesui temiit'in me.
MAT 19:15 Mi'i hawyi tuwe­ponug hira­karia ete hawyi toi'atue­waku yne ra'yn topo wo hawyi tuwat i ra'yn Iesui'in itote pyi.
MAT 19:16 Mi'i turan wẽtup ok kurum put'ok'e hawyi to'e Iesui pe — Wo'omu'e hat waku sese ti En e. Uimu'e ro aikotã aikotã atipuẽti uheĩne'en wuat'i e'at piat hap sa'up e. Mi'i pote ariot ewawi uimu'e hamuat e katu­pono wakuat sese ti En Uhyt e.
MAT 19:17 — Tupana yn ni wakuat sese kurum e Iesui wuat'i e'at piat heĩne'en hap ky'esat hat pe. Uito ti wakuat sese ere'e apo uhepiat e. Pyno etunug no yne Tupana miky'esat miwan miat ko'i hawyi waku pe ereĩne'en e Iesui kurum me.
MAT 19:18 — Pyno etimo­herep to uhepe Uhyt kat imiky'esat ko'i waku atunug e. — Ta'i yt erepot'auka tei'o are yt ewary wary tei'o are yt sero'ok'ere tei'o are yt etoma'at tei'o wẽtup ehay wo e.
MAT 19:19 Etomõ­typot ro e'ywot ety e eti'atuky'e ro irania'in aikotã eweiky'e hap ok tã hap ewy e. Etunug mi'i tã mote waku pe ereĩne'en e Iesui kurum me.
MAT 19:20 — Ma'ato Uhyt e uihire pyi te ti rat mio tã e'e hap miwan miat atunug yne e. Kat e hap pyno mi'i hawyi waku atunug uheĩne'en wuat'i e'at piat hamuat puẽti hamo e.
MAT 19:21 — Ta'i wẽtup mo etunug hawyi hekat rakat sese wo ereĩne'en aru atipy pe atum kurum e. Pyno etum yne ekare'en ahyt yne hatek takaria pe hawyi era'aipok uhowawi ereto uhupi uhemiit no hamo kurum e Iesui wuat'i e'at piat ky'esat hat pe.
MAT 19:22 Mio tã e hap toikuap hawyi ti tohaty'u ra'yn topy'a pe hawyi toto ra'yn katu­pono yt toimõ'ẽ teran i tekare'en sok yt hekat i rakaria pe haype.
MAT 19:23 Mi'i hawyi Iesui to'e topot­mu'eria pe — Are pãi niatpo sese ti rat wekare'en ky'e haria tuwehyt'ok atipy pe aikope Tupana toĩne'en Morekuat no hawe e.
MAT 19:24 Pywo ti niatpo kahato aikotã aihũ iwato rakat Kameru teke teran awi ehapo ka'a puo hap ewy niatpo hap ewy e. Mi'i hap ewy ti ma'ato po'og po'og niatpo hekat rakaria te'eru­wehyt'ok Tupana etama pe e.
MAT 19:25 Mio tã e hawyi ipotmu'eria te'eru­wa­nẽtup kahato — Pyno niatpo kahato Tupana etama pe uruwehyt'ok uruekat pote i'atu'e. Niatpo kahato urueha­kyera'at hap Mehĩ i'atu'e.
MAT 19:26 Mi'i pote teha'at kahato topot­mu'eria kape hawyi to'e — Yt uwe i tuwe­ha­kyera'at kuap e. Tupana yn ni miit'in ehakyera'at kuap hat e. Katu­pono mi'i yn nyti po'og hat toĩne'en e. Tupana tunug kuap yne yne. Yt kat i hin i ti niatpo tutunug towa­nẽtup hawe e.
MAT 19:27 Mi'i hawyi Peteru to'e — Urumu'e hat e sa'awy'i uru'atoiat yne ra'yn uruekat eupiat urutuwat hamo e. Pyno kat aru ha'up etum uruepe e.
MAT 19:28 Mi'i pote Iesui tiwesat — Karãpe yi ipakup turan karãpe Uito Eheyke'et ara'apyk Morekuat e'amyap tote wuat'i miit'in miat uimõ­typot hamo mi'i turan ti aru pywo eweikupte'en ui'yatype 12 morekuat e'amyap tote uiwywo e ai'ywania Isareu ywania tok puo wẽtup ywania wẽtup ywania morekuat no eweikupte'en aru uwe yt naku i uwe waku hap e hamo eweikupte'en aru e.
MAT 19:29 Pywo ti rat uwe uwe uhehay upi uhupiat toto haype i'atoiat to'yat towywyt'in tokywyt'in toinyt'in tosaki'yt'in to'ywot'in toty'in tomẽpyt'in toko ko'i tomikoi uimi­ky'esat nug hamo mi'i hat ti aru po'og ipuẽti meimuẽwat tomi'atoiat ko'i kai sa'awy'iwuat kai. Po'og po'og ipuẽti meimuẽwat tomi'atoiat ko'i kai. Tomi'atoiat wẽtup kaipyi toipuẽti 100 na'yn mesuwe i'ewyte ti aru toipuẽti wuat'i e'at piat toĩne'en hamuat e.
MAT 19:30 I'ewyte ti aru mesup te wuat'i uimohey haria — Uito po'og e haria uimohey haria po'og kurin nakaria wo te'ero­pyhu'at atipy pe ma'ato uhemiit wuat'i miit'in eropat haria wo mesup we mi'i haria miit'in akag wo tukupte'en aru atipy pe e Iesui Peteru'in temiit'in me. Uito Mateu uimiwan mesuwe
MAT 20:1 Mi'i hawyi Iesui to'e temiit'in me — Koitywy wẽtup hã'ãkap ahenoi teran ehepe aikotã Tupana topyhu'at wuat'i miit'in Porekuat no mesuwe aikotã toĩne'en atipy pe hap ewy e. Sa'awy'i so toto wẽtup ok hekat rakat hunete to'yat pyi teropat haria kaykay hamo motpap nug hamuat hamo toko piat Uwa ypia etiat i'atu­potpap hamo e.
MAT 20:2 — Eipotpap at pote ti atum wẽtup e'at sa'up ehepe e. Mi'i pote — Hẽ i'atu'e. Mi'i hawyi toi'atu­po'oro tomikoi ypia kape.
MAT 20:3 Meiũran mikoi ka'iwat ihot'ok po'og hawyi toto aikope miit'in tikyi'at wuat'i hap kape. Mi'i turan itote toi'atu­puẽti yt kat nug i haria motpap ekatup haria.
MAT 20:4 Mi'iria pe to'e — Eweiwat ro uiko kape hawyi meiũran aru atum ha'up wakuat ehepe e. — Ta'i i'atu'e hawyi tuwat ra'yn iko kape.
MAT 20:5 Atpo­sake rokirẽ i'ewyte toi'atu­puẽti po'og miit'in mu'ap upi hawyi i'ewyte toi'atu­po'oro toko kape i'atu­potpap hamo waku i'atu'e pote.
MAT 20:6 Mi'i hawyi porap wãtym i turan po'og toi'atu­puẽti toto hap upi yt ipotpap i rakaria. Mi'i hawyi mi'iria pe — Kat poteĩ yt eipotpap hin i e yt kat i apo eiminug motpap e.
MAT 20:7 — Yt uwe i rat urupo'oro motpap nug hamo i'atu'e tope. — Pyno moro­ho'o­po'oro eipe uheUwa ypia kape e. Mi'i rẽ ti aru atum ha'up wakuat ehepe e. Mio tã e hawyi tuwat imikoi ypia kape.
MAT 20:8 Mi'i hawyi wãtym na'yn hawyi ipotpap takaria toi'atunug tuwe­wawi i'atu­potpap sa'up nug hamo. Mi'i hawyi temiit akag pe to'e — Pyno koitywy waku etum i'atu­potpap sa'up e. Sa'awy'i etum wat'ymuat ipotpap takaria pe mi'i rokirẽ etum sa'up ipotpap at rakaria pe e.
MAT 20:9 Mi'i hawyi toikaykay tuwe­wawi wat'ymuat ipotpap takaria. I'atu­potpap aparap yn wen ma'ato tutum wẽtup e'at sa'up i'atuepe e.
MAT 20:10 Meiũran put'ok'i'atu'e sa'awy'i­tewuat i'atu­mi­po'oro yne hune pywiat rẽ wuat'i ipotpap takaria. Mi'iria te'eru­wa­nẽtup te'eru­wepe — Ahepe ti aru po'og tutum katu­pono aito po'og aipotpap aipotpap at pote i'atu'e. Ma'ato tutum sa'up aikotã aikotã irania'in me tutum hap ok tã ne ne'i. Yt uwe pe i po'og iwato tutum ma'ato wẽtup e'at sa'up kapiat tutum wuat'i pe.
MAT 20:11 Mi'i pote ipotpap at rakaria i'atuehay sa'ag ne'i ra'yn mekewat Uwa ypia ka'iwat wakuat ete sa'up tutum ta'atuepiat hawyi e.
MAT 20:12 — Meimuẽ­waria pe etum uruwat sa'up ok tã ne kurin kahato i'atu­potpap pytkai i'atu'e. Uruto kue at at hakup kahato mesuwe urupotpap i'atu'e.
MAT 20:13 Mi'i pote go ka'iwat to'e mio tã e haria pe — Uiwyria'in yt kat i ti atunug sa'ag ehepe e. Yt ati'aparap hin i ti ehepe. Katu­pono sa'awy'i mio tã are — Atum aru ehepe wẽtup e'at sa'up e. Mi'i hap ewy ti atum na'yn ehepe.
MAT 20:14 Eipo pe ra'yn ehe'at sa'up e waku ra'yn e. Koitywy ti waku ra'yn ewei'aipok ei'yat kape. Katu­pono ehe'at sa'up toĩne'en eipo pe ui'e hap ewy atum e.
MAT 20:15 Ipotpap kurin nakaria pe atum ha'up i'ewyte ipotpap at rakaria pe atum ha'up to'o'ewy uimi­ky'esat ewy atum. Waku uhekat wywo atunug uimi­ky'esat ewy uhegyi'at hap ok tã e. Kat poteĩ yt eiwese i uiminug uhegyi'at hap ete e ipotpap at rakaria pe e.
MAT 20:16 Mi'i hap ewy ti aru Tupana tum ni aru temiit'in me sa'up wat'ymuaria pe tutum yianmiaria pe i'ewyte te. Ma'ato yianmiaria pe tutum wat'ymo hap ewy e Iesui hã'ãkap muo temiit'in me.
MAT 20:17 Mi'i hawyi Iesui toto i ra'yn tawa wato Ieru­sarẽi kape mu'ap wato upi. Tuwat turan toi'atu­kaykay topot­mu'eria mu'ap ẽpe kape miit'in tok pyi i'atumu'e hamo.
MAT 20:18 I'atu­weran turan hawyi to'e — Eiwa­nẽtup to uhehay kape e. Koitywy areto ra'yn tawa Ieru­sarẽi kape mehĩ'in e. Put'okwato'e itote hawyi ti aru Eheyke'et ta'atupag pa'i kororia wãi'e hap enoi haria po pe ra'yn ui'auka hamo ra'yn e.
MAT 20:19 Mi'i hawyi ti aru uhum wẽtup ywaniaria wanĩ­kaptia po pe i'atu­mi­kyry'i uhetiat hamo ui'ahyk ahyk hamo e. Mi'i hawyi ui'auka ti aru itotiaria aria'yp posak ete e. Mi'i hawyi uiku'uro sese itote ti aru e. Mye'ym e'at uisyp hawe uipiit topyhu'at. Ma'ato mi'i hawyi ti aru areĩne'en ne i ra'yn gu'uro pyi ma'ato e.
MAT 20:20 Mi'i turan put'ok'e wẽtup hary­poria Sepeteu ehary'i typy ok imẽpyt'in nywo Iesui ewawi. Pyno meke­waria tomẽpyt'in Iesui potmu'eria sese mi'iria. Pyno mana tuwe­pỹ'ã­tutuk hawyi to'e — Mimi e ahẽtup teran wyti epe uimi­ky'esat kahato e.
MAT 20:21 Karãpe Morekuat no erepyhu'at turan atiky'esat uimẽpyt'in epo sese kai epo ran kai hap atiky'esat kahato e.
MAT 20:22 Mi'i pote — Mana e yt etikuap i kahato kat som emiẽtup uhepe e. Mi'i hawyi to'e imẽpyt'in me Iuwãu Tiaku pe — Are pãi eiwe'y'u irane uhekui'a pyi sapo hy wo uhatek e. Eiwe'y'u kuap apo i'ewyte uhekui'a pyi sapo hy wo e. — Ta'i urute'y'u kuap Uruka'iwat i'atu'e. Urutuwe'y'u kuap ekui'a pyi i'atu'e.
MAT 20:23 Mi'i hawyi — Pywo ti uhemiit'in eiwe'y'u aru uhekui'a pyi sapo hy e. Uhatek hap ewywuat ewehã'ãg aru e. Ma'ato more­kuaria ewy uipo sese kai uiporan kai hamuat yt atum kuap i ehepe. Katu­pono Tupana yn ikuap uwe ui'yatypiat apyk hanuaria e. Tutum aru tomi'ai­roria pe tomi­ky'esat ewy e Iesui Iuwãu Tiaku pe.
MAT 20:24 Mio tã ta'atuẽtup pote irania'in hemiit'in i'atu­py'ahak typy ok ta'atu­wyria'in ete hawyi tu'uka ta'atuehay wo.
MAT 20:25 Mi'i turan Iesui ti'atu­kaykay i ra'yn tuwe­wawi — Uiwyria'in e mesu­wa­rote more­kuaria te'eru­wemiit'in po'oro po'oro kahato haty wo e. Toi'atu­saty'i saty'i kahato i'atu'e e. — Uruto ti po'og iwato'in nakaria wuat'i kai i'atu'e kahato e.
MAT 20:26 Ma'ato yt atiky'esat i kahato eipe mesu­wa­rotiat more­kuaria ewywuaria eweikupte'en eiwo'ope e. Mi'i pote uwe uwe topyhu'at teran uhemiit'in akag wo mi'i hat waku tuwenug semiit yne miit'in eropat hano topyhu'at e.
MAT 20:27 Uimohey haria wuat'i powyro kahato haria yn ni waku uhemiit'in akag wo tukupte'en Tupana wanẽtup hawe e.
MAT 20:28 Uito Eheyke'et wuat'i miit'in eropat hat kahato areĩne'en wuat'i miit'in powyro hat areĩne'en e. Uito Eipo­rekuat koro areĩne'en wen ma'ato yt irania'in more­kuaria ewywuat i wyti Uito e. Wuat'i eropat hamo ariot i'ewyte atum irane uheĩne'en hap sa'up miit'in kyi'at Tupana wanuat hamo e Iesui topot­mu'eria pe.
MAT 20:29 Mi'i hawyi tuwat ra'yn tawa Ieriko pyi. Mi'i turan miit'in sem kahato tuwat itote pyi Iesui upi.
MAT 20:30 Tuwat aparap i mekewat tawa pyi turan typy ok yt ihapytig i rakaria mu'ap ẽpe upi apyk pe tukupte'en. Mi'iria tikuap ta'yn Iesui ut hap hawyi te'eru­wẽ­powat Iesui kape — Eraha'at ro uruewawi Mehĩ uruky'e hap wywo i'atu'e. Uruehaky'e'i mẽti uruto Mehĩ i'atu'e. Urupo­wyro En Uhyt i'atu'e. Ta'i morekuat Tawi saipepiat ti En i'atu'e.
MAT 20:31 Mio tã i'atu'e pote meimẽ­puaria — Wãi ehehay pirik poity'i i'atu'e. Eiwẽ­pohep to i'atu'e ma'ato yt i'atu­wẽ­pohep hin i. Po'og ne'i te'eru­wẽ­powat — Urueha­kyera'at En Uruka'iwat Tawi Sa'yru En i'atu'e.
MAT 20:32 Mi'i hawyi Iesui topyhu'at itote hawyi tuwẽ­powat — Eweĩ'ẽ ro meikowo uhowawi uhyt'i'in e. Mio tã e pote tokoka'at ra'yn howawi hawyi to'e — Kat aru atunug eimi­ky'esat ehepe e.
MAT 20:33 Mi'i hawyi ta'atu­wesat — Uru'akasa pakup'i hap nug hap ti uruiky'esat etunug Mehĩ i'atu'e.
MAT 20:34 Mi'i hawyi Iesui ti'atuky'e kahato hawyi tuwe­ponug na'yn i'atueha ete hawyi meremo i'atue­ha­pytig te'era'a­kasa pakup'i i ra'yn. Mi'i hawyi tuwat ra'yn Iesui upi mu'ap upi heremo yne i'atueha ete pote waku kahato i'atu'e. Mi'i tã Iesui tunug sa'awy'i. Mi'i hawyi uito Mateu atiwan mesuwe.
MAT 21:1 Mi'i hap totepyi Iesui toto i ra'yn tawa wato Ieru­sarẽi kape towyria'in nywo. Put'okta'atu'e ra'yn tawa Pewake tote hawyi tuwat mekewat yity'ok kape Uriweira yp mikoi ypia e hap kape. Itote pyi Iesui tipo'oro typy ok temiit tawa hit kape.
MAT 21:2 — Uhyt'i'in e eweiwat ro mekewat tawa hit kape ai'akasa hap kape e. Put'ok'ewei'e itote turan ti aru eweipuẽti i'atuhũ Iumenta to'asaity nug me tomẽpyt wywo e. Mi'iria o ewei'asai­typok hawyi ewete­ropo'ok ra'yn uhowawi e.
MAT 21:3 Ma'ato — Kan hamo ewetioto uruhũ i'atu'e pote o — Ta'i Aika'iwat wyti ipuru porap'i eihũ ko'i ewei'e o mi'i pote meremo — Hẽto pyno eweitioto ro i'atu'e aru ehepe e. Mi'i hap ewy yne ti aru eweipuẽti itote e Iesui typy ok takaria tomi­po'o­roria pe.
MAT 21:4 Sa'awy'iwuat Tupana ehay enoi hat mio tã e tomiwan me Iesui etiat
MAT 21:5 — Tut wyti aru Aipo­typot sese aihũ Iumenta tote ahowawi ewei'e ro tawa Ieru­sarẽi miaria pe e. Yt morekuat ewy hin i tut ma'ato aihũ Iumenta mẽpyt hit tote e ti aikotã sa'awy'i­tewuat miwan me Isaia 62.11 pe Iesui etiat tohenoi.
MAT 21:6 Mi'i hawyi tuwat ra'yn ipotmu'eria typy ok hawyi aikotã tohenoi hap ewy ta'atunug.
MAT 21:7 Mi'i hawyi ta'atuerut ra'yn i'atuhũ Iumenta imẽpyt wywo Iesui kape. Mi'i hawyi ta'atue­sokpe ko'i ta'atu­po­rokpun Iumenta ok tote hawyi Iesui ta'am na'yn apyk pe i'ok tote.
MAT 21:8 Mi'i hawyi irania'in miit'in typy'i rakaria tipy­sapnug ta'atue­sokpe ko'i wo mu'ap tote. Irania'in iporokpun mu'ap upi aria'yp iãgã ko'i imõtypot hamo.
MAT 21:9 Mi'i hawyi typy'i rakaria wat'ymo i'ewyte yianmiaria i'atu­wepit kahato — Ereke ro ereke ro morekuat Tawi saipepiat i'atu'e ta'atuehay pirik wo. Waku kahato En atipy kaipywiat i'atu'e. Ta'i Tupana mimõ­typot kahato En i'atu'e. Katu­pono Tupana mõtypot hat En pote i'atu'e. Waku sese waku sese Tupana i'atu'e.
MAT 21:10 Mi'i hawyi put'ok'e Iesui tawa wato Ieru­sarẽi me hawyi itotiaria irania'in ikohyeput kohyeput'i kowo'i kowo'i — Uwe som Mi'i Miit i'atu'e to'ope.
MAT 21:11 — Ta'i Mi'i Miit ti mekewat Tupana ehay moherep hat yi Karireia tawa Nasare kaipywiat i'atu'e.
MAT 21:12 Mi'i hawyi Iesui teke ra'yn Tupana mõtypot yat koro pe hawyi toi'atu­sopo kahato kat ko'i kat ko'i weneru itotiaria hawyi toi'atu­pugha kahato mesa ko'i. Toi'atu'ã­pe'okpun yne tineiru pat'ok pat'ok hap mesa ko'i. I'ewyte pykasu weneru haria amyap ko'i toi'atuã­pe'okpun i'atue­py­kasu ko'i wywo ra'yn.
MAT 21:13 Mi'i waku hawyi Iesui to'e haty wo i'atuepe — Mio tã to'e Tupana sa'awy'i miwan me — Ui'yat wyti meiũ e. Mi'i ti atiky'esat wuat'i ywania ehay uhowawiat at hamuat e ti Tupana miwan me e. Ma'ato mesup ti Tupana mõtypot yat koro topyhu'at sero'oke haria yat koro wo ne'i rat e. Yt naku i nug haria kahato eipe e.
MAT 21:14 Toi'atu­sopo Tupana mõtypot yat pyi hawyi yt ihapytig i rakaria yt ipoĩ'ãm kuap i rakaria tõ'ẽ tõ'ẽ howawi hawyi toi'atu­moe­hãite ra'yn ihaky'e'i rakaria itote.
MAT 21:15 Mi'i pote pa'i kororia Wãi'e hap enoi haria te'eraha'at kahato iminug wakuap kape. I'ewyte ta'atukuap hira­karia piat — Waku kahato En morekuat Tawi saipepiat kahato En i'atu'e hap. Mi'i pote i'atu­saiwot kahato ra'yn pa'i koro ko'i
MAT 21:16 — Yt etikuap i apo hira­karia kat i'atu'e kat i'atu'e ewawiat hap i'atu'e Iesui pe. Yt naku i hira­karia emõtypot morekuat ewy i'atu'e. Mi'i hawyi toi'atu­wesat — Ta'i atikuap kahato hira­karia ehay uhepiat ko'i e. Yt eweimu'e i te apo Tupana miwan me sa'awy'iwuat ete aikotã to'e — Hira­karia hit ko'i yn uimõ­typot kuap haria sese e Tupana mõtypot hap ete e. Ta'i mi sym haria hira­karia yn uimõ­typot kuap po'og irania'in torania kai e Tupana sa'awy'i. Mi'i pote yt kat hamo i wãi'are i'atuepe.
MAT 21:17 Mio tã to'e hawyi toto ra'yn tawa Ieru­sarẽi myi tawa hit Petania kape. Mi'i hawyi toket itote.
MAT 21:18 Itote pyi mũki'ite hunete ta'aipok i ra'yn tawa wato Ieru­sarẽi kape i ra'yn. Mi'i turan mu'ap upi Iesui hesy'at kahato ra'yn.
MAT 21:19 Mi'i turan ta'akasa Wiku yp mu'ap ẽpe upi hawyi toto haat ky'ewi ma'ato i'yhop yn toipuẽti hesy'at kahato turan. Mi'i pote to'e Wiku yp we — Yt naku i rat en e. Pyno koitywy ti aru yt sake i ra'yn esaat e. Mio tã e hap hawyi meremo i'yp gag na'yn.
MAT 21:20 Mi'i hap kape ipotmu'eria te'eraha'at hawyi iku'uro ra'yn pote. Mi'i hawyi te'ero'e — Urumu'e hat i'atu'e aikotã emisaty'i saty'i iku'uro ra'yn i'atu'e.
MAT 21:21 — Uiwyria'in e eweimohey ro Tupana haty wo yt kat i eweimohey sa'ag ne'i wywo mi'i tã uiminug ewywuat ewetunug kuap hamo e. Ma'ato po'og iwato uiminug kai ewetunug kuap e. Ta'i uwe uwe meiũwat yity'ok pe to'e — Ereto ro meiũpepyi y'y wato kape hawyi min'ere ro y'y pe ewei'e Tupana mohey hap yn nywo mi'i pote ti aru toto ra'yn meremo ei'e hap ewy imohey hap ewy e.
MAT 21:22 Mi'i tupono kat ere ehẽtup Tupana kape imohey sese hap wywo mi'i e'e hap ewy kahato ti aru topyhu'at e Iesui.
MAT 21:23 Mi'i hawyi put'ok'e i ra'yn Iesui Tupana mõtypot hap yat koro pe hawyi toi'atumu'e i ra'yn. Mi'i turan tõ'ẽ tõ'ẽ pa'i akag ko'i Iuteu ywania akag ko'i apo'i'atu'e hamo — Uwe epo'oro ga'atpuat weneru weneru i haria sopo hamuat i'atu'e.
MAT 21:24 — Pyno apo'are ehepe ewehenoi mono mi'i pote Uito i'ewyte ahenoi uwe uipo'oro hap e.
MAT 21:25 Uweĩ pyno Iuwãu po'oro hat wo'oset'ok hamuat hat sio Tupana ipo'oro sio miit'in ipo'oro haria e. Mi'i pote te'eru­wa­nẽtup to'o'ewawi — Ta'i Tupana mipo'oro Iuwãu ai'e pote aru kat poteĩ pyno yt eweimohey i e aru ahepe i'atu'e.
MAT 21:26 Ma'ato miit'in mipo'oro ti Iuwãu ai'e pote ti aru miit'in i'atu­py'ahak kahato ahete katu­pono irania'in Iuwãu ti Tupana mipo'oro e haria tukupte'en i'atu'e.
MAT 21:27 Mi'i hawyi — U pãi Uhyt yt uruikuap i sese wyti uwe mipo'oro Iuwãu i'atu'e. — Pyno yt uiwesat i pote Uito i'ewyte yt woro­ho'o­wesat kuap i ehepe uwe ehay pyi meikotã atunug hap e.
MAT 21:28 Mi'i hawyi waku eweiwa­nẽtup o uimienoi kape e. Sa'awy'i so wẽtup ok miit typy ok ha'yru rakat toĩne'en. Mi'i hawyi wẽtup e'at pe so to'e tosa'yru yianme — Uha'yru e atiky'esat wyti koitywy epotpap uimikoi ypia pe e.
MAT 21:29 Ma'ato so — Yt uipopap i rat papai e. Ma'ato meiũran tuwa­nẽtup hawyi paa'e to'ywot ehay pun hap ete. Mi'i pote yt uipotpap i rat to'e pytkai toto ra'yn to'ywot mikoi ypia kape.
MAT 21:30 Mi'i hawyi so iywyt pe — Uha'yru e atiky'esat wyti koitywy epotpap uimikoi ypia pe e. Mi'i hawyi — Ta'i papai areto meremo e ma'ato yt toto hin i mio tã to'e pytkai e.
MAT 21:31 Mi'i pote apo'are ehepe uwe uwe som pyno to'ywot miky'esat nug hat sio wat'yp sio yian e Iesui Tupana mõtypot yat piaria akag ko'i pe. Mi'i hawyi ta'atu­wesat — Ta'i yian yn inug to'ywot miky'esat i'atu'e. — Pywo ti rat mi'i tã ti rat e Iesui. Eipe ti mekewat sa'yru wat'yp ewy kahato eipe — Urutuwat emiky'esat nug hamo Papai ewei'e Tupana pe ma'ato yt. Mi'i hawyi irania'in hary­poria yt iwe'eg i sese rakaria i'ewyte ahewa­nĩ­kaptia emiit'in aipo­hari haria — Yt urutuwat i Papai emiky'esat nug hamo i'atu'e Tupana pe. Ma'ato te'eru­wa­nẽtup hawyi paa'i'atu'e hawyi meiũran Tupana ehay pun hap ete. Mi'i rẽ koitywy tuwehyt'ok kahato Tupana etama pe eheiam me e Iesui pa'i akag ko'i pe miit'in to'ywania akag ko'i pe.
MAT 21:32 Ahet'ok Iuwãu put'okto'e hawyi aimu'e kahato Tupana kapiat mu'ap upi e. Mi'i hawyi ti yt nakuaria i — Pywo i'atu'e ra'yn hawyi tuwat kahato Tupana kape e. Ma'ato eiperia ti yt eweiwat hin i Tupana kape Iuwãu miat enoi hap upi e. Ma'ato irania'in meimuẽwat hary­poria'in yt iwe'eg i rakaria paa'i'atu'e i'ewyte mekewat ahewa­nĩ­kaptia sa'up porera'at haria paa'i'atu'e. Mi'i haria ko'i ewei'akasa yne ra'yn pytkai yt paa'ewei'e hin i eipy'a pe. Katu­pono mekewat sa'yru wat'yp ewywuat eweikupte'en eipe yt eweihay pywo hin i eipe Ei'ywot ehay e Iesui pa'i koro akag ko'i pe.
MAT 21:33 Mi'i hawyi — Pyno wẽtup sehay ahenoi ehepe hã'ãkap wuat e pa'i kororia pe to'ywania akag ko'i pe. Sa'awy'i so toĩne'en wẽtup ok miit yi wato ka'iwat e. Mi'i hawyi so ihay ra'yn Uwa ypia nug hap ete e. Mi'i hawyi so toikoi hawyi toipyhyp yne ra'yn hero'ok haria pupi hawyi tutunug nu ka'a Uwa tok hamo Uwa hy sapo nug hamo e. Mi'i hawyi so i'ypia py'asetpe so surara yat ywaiti rakat tutunug surara teha'at mikoi ero'ok haria wãi'e hamo. Mi'i so iwato kahato i'ypia e. Hãpyk yne hawyi so toipuru to'ywania pe Uwa ypia i'apykok kuap haria pe hawyi so toto ra'yn i'ypia wato ka'iwat wẽtup setama kape ra'yn toto ma'ato teuwa ypia waku hap e'at pe toiky'esat toha'up nug e.
MAT 21:34 Mi'i pote heuwa ypia saat hap e'at put'ok'e ra'yn hawyi toi'atu­po'oro temiit'in tomikoi ypia apykok haria kape tomikoi sa'up pat'ok sat hamo e.
MAT 21:35 Ma'ato so i'apykok haria yt ho'oium neran hin i ra'yn. Ipuruk haria yt ho'oium i ra'yn ta'atu­mipo'ok ko'i e. Mi'i hawyi so ta'atu­pytyk ne'i imipo'o­roria hawyi wẽtup ok ti ta'atu'ahyk ahyk ne'i wẽtup ok ta'atu'auka wẽtup ok kape ti nu wo mak mak'i'atu'e.
MAT 21:36 Mi'i hawyi po'og toi'atu­po'oro temiit sa'up sat hamo ma'ato so i'ewyte ta'atunug i'atuete e.
MAT 21:37 — Pyno koitywy atipo'oro uha'yru sese e. Uha'yru sese tupono ti aru ta'atu­mõ­typot rat pãi e so tuwa­nẽtup hawe e.
MAT 21:38 Mi'i hawyi so put'ok'e ra'yn wat'ymuat hawyi yi wato imipuru apykok haria te'eraha'at howawi hawyi te'ero'e to'ope — Meiẽ ra'yn ti tut ra'yn yi ka'iwat saipepiat i'atu'e. Pyno waku wati'auka meiẽwat ha'yru mi'i hawyi meiũran iku'uro ra'yn i'ywot hawyi aipo pe ra'yn imikoi ypia i'atu'e to'ope.
MAT 21:39 Mio tã i'atu'e turan put'ok'e ha'yru hawyi ta'atu­pytyk hawyi ta'atu­pugha i'ywot e'yi ekuekai hawyi ta'atu'auka ra'yn ha'yru imipo'oro e Iesui tuwepiat pa'i koro akag ko'i pe.
MAT 21:40 Pyno apo'are ehepe aikotã aru ika'iwat tunug meimuẽwat tosa'yru auka haria ete ta'aipok i ra'yn tomikoi ypia kape hawyi e.
MAT 21:41 Mi'i pote pa'i kororia tiwesat — Ta'i tut hawyi ti aru toi'atu'uka kahato ti aru meimuẽwat yt naku i nug haria i'atu'e. Ta'i mi'i hawyi ti rat wẽtup ywania pe haat hap e'at piat ha'up ium kuap haria pe aru tutum i te'yi tomikoi ypia i'atu'e.
MAT 21:42 — Ta'i pywo kahato ti uiwesat. Ehepiat e hap ewy ti aru topyhu'at ehete are aikotã sa'awy'i Tupana to'e hap ewy — Nu po'og waku rakat ui'yat nug hamuat ta'atu­pugha ra'yn — Yt naku i ta'atu'e haype. Mi'i pote Mi'i Nu i'atu­mi­pugha wo ti aru aha'awynug ui'yat po'og ikahu sese rakat e Tupana. Yt karãmuo i apo eiwemu'e mi'i e hap miwan me Isaia 28.16 pe e.
MAT 21:43 Mi'i e hap ewy kahato ti aru topyhu'at mesuwe katu­pono Tupana tihep ta'yn eipo pyi tetama atipy piat ewywuat. Mi'i hawyi ti aru tutum wẽtup ywania pe ra'yn tomikoi ypia sa'up ium kuap haria pe i ra'yn tutum e.
MAT 21:44 Uwe uwe ta'at ti mekewat Nu miit'in mipun ete mi'iria ti aru wepik pik sese haria wo te'ero­pyhu'at. Ma'ato uwe uwe mekewat Nu tote ta'at hap aru mesuwat Nu mi'i haria ti aru iku'i ku'i wo te'ero­pyhu'at e.
MAT 21:45 Mio tã e pote pa'i kororia — Yt naku i ihay i'atu'e. Katu­pono ahete aimohit hamo mio hã'ãkap tohenoi i'atu'e.
MAT 21:46 Mi'i pote ta'atu­pyhyp teran Iesui wen ma'ato typy'i kahato miit'in Iesui apypueri wo tukupte'en pote te'eroken'ẽ ne'i ipyhyp hamo — Iesui ti Tupana ehay moherep hat sese toĩne'en i'atu'e i'apy­pueri haria pote te'eroken'ẽ mi'iria mõpy'ahak hap pupi. Uito Mateu atunug uimiwan mesuwe are.
MAT 22:1 Mi'i hawyi wẽtup hã'ãkap wuo Iesui ti'atumu'e itotiaria — Pyno ti ran ahenoi teran ehepe aikotã Tupana aikaykay temiit no hap e.
MAT 22:2 Pyno wẽtup e'at pe so wẽtup ok morekuat koro to'e te'eropat haria pe — Atunug neran ienuk hap iwato kahato uha'yru mõtypot hamo katu­pono uha'yru ihary'i hap e'at put'ok'e ra'yn e.
MAT 22:3 Pyno woro­ho'o­po'oro uhetama kape itotiaria tu'isa'in nãpin hamo i'ewyte ti hekat rakaria atukaykay hamo uha'yru sese ehary'i hap e'at pe mõtypot hamo e. Mi'i hamo atunug neran ienuk iwato hap haype e temiit me. Tohenoi hawyi tuwat ra'yn hemiit'in i'atu­nãpin hamo. Ma'ato so imikaykay ko'i yt tuwat teran i.
MAT 22:4 Mi'i pote so irania'in te'eropat haria toi'atu­po'oro i'atu­nãpin hamo. Waku yne ra'yn wyti aimi'u ewei'e ro i'atuepe. Ikahu kahato ti ienuk hap tutunug ewei'e o e. Uihũria wewato ahup ko'i ikap takaria iwyp ta'yn imẽpyt hin ni ikã'ã ko'i wo ra'yn ewei'e o e. Mi'i pote meremo soke eweiwat ewei'e o i'atuepe katu­pono waku ra'yn ahenuk hamo ewei'e o e. Uha'yru ehary'i hap nug turanuat imõtypot hap ti put'ok'e ra'yn ewei'e ro i'atuepe e.
MAT 22:5 Mio tã e hawyi tuwat ma'ato i'ewyte yt urutuwat kuap i i'atu'e ne'i. Irania'in to'okyry'i ne'i imipo'o­roria ete. Irania'in ta'atu­potpap nug hamo tuwat. Wẽtup ok toto toko kape wẽtup ok kyi'at to'e hamo ne'i toto.
MAT 22:6 Ma'ato irania'in tawa piaria to'okyry'i imipo'o­roria ete. Wẽtup ok wẽtup ok ta'atu'auka ra'yn imipo'oro.
MAT 22:7 Mi'i hap morekuat koro tikuap hawyi ipy'ahak ta'yn. Mi'i hawyi toi'atu­po'oro tesu­rara'in ahyt topot­po'o­roria etiat mikyry'i haria atu'uka hamo. Mi'i hawyi surara'in tiwuk ta'yn i'atue­tawa e.
MAT 22:8 Mi'i hawyi to'e ti tomi'a­tu­po'o­roria pe — Ta'i waku ra'yn ti aimi'u e ma'ato sa'awy'i­wuaria uimi'a­tu­kaykay ko'i yt nakuaria i e. I'atue­waku hap ti yt put'ok'e i uha'yru wywuat te'erenuk hamo e.
MAT 22:9 Mi'i tupono eweiwat yne tawa hit ko'i upi e. Mi'iria o ewei'atu­kaykay yne meikowo uha'yru wary hap e'at kape e.
MAT 22:10 Mi'i hawyi tuwat yne mu'ap upiat tawa hit ko'i kape wuat'i miit'in i'atu­kaykay hamo. Ta'atu­kaykay wakuaria i'ewyte yt nakuaria i ko'i. Howapy kahato morekuat ienuk hap eiam getap koro miit'in wo yt to'o'ewy ewywuaria i wo. Put'ok'i'atu'e turan morekuat ekamisa ewywuat tomosat pe yne imiium yne õ'ẽ haria pianuat ko'i. Mi'i hawyi to'o'ewy'ewy ikahuria tukupte'en i'atu­painug hap to'o'ewy'ewy ikahuria i'atue­ka­misa ko'i e.
MAT 22:11 Meiũran morekuat koro tut i'atu­wywo hawyi toipuẽti wẽtup ok i'atu­py'a­setpe — Uito yt atiky'esat i morekuat esokpe ewywuat e hano katu­pono uiat waku po'og e hat.
MAT 22:12 Mi'i pote morekuat to'e mi'i e hat pe — Mehĩ kat poteĩ yt etiky'esat i uimiium sokpe pakup ikahu rakat e. Mi'i pote yt toiwesat kuap i tuwe­mõti haype yt kat e kuap i ra'yn.
MAT 22:13 Mi'i hawyi morekuat ti'atu­kaykay tesu­rara'in — Eweipopo'i ro meiẽwat miit uhesokpe pun hat ipo ete ipy ete e. Mi'i hawyi ewetioto ro meiũpepyi hawyi eweipun no i'ypyryp wato hawe e aikope kyry'et kyry'et'i'atu'e hap kape ta'atuwak popuat hap kape e.
MAT 22:14 Mi'i hap ewy ti Tupana eikaykay temiit no. Toi'atu­kaykay miit'in wuat'i ywania kawiat Tosa'yru mõtypot hap kapiat hap ewy ma'ato sa'awy'i­wuaria imikaykay ko'i ui'ywania yt tuwat teran i mote irania'in ywania ko'i tokoka'at e Iesui to'ywania pe Iuteuria pe.
MAT 22:15 Mi'i hawyi wo'omu'e haria yt i'atu­wese i Iesui ete — Tupana ti'atu­kaykay wyti aru irania'in ywania e Iesui pote. Mi'i hawyi tuwat ra'yn Iesui yaty­pepyi hawyi te'eru­wa'a­tunug i'atu'akag koro ko'i Iesui ma'at hap etiat to'oehay hamo. Mi'i hawyi ta'atuehay ehay kat ehay wo kat ehay wo waku Iesui ehay aparap ta'atu'auka teran haype.
MAT 22:16 Mi'i hawyi ta'atu­po'oro ta'atuemiit'in morekuat Eroti emiit'in wywo Iesui ma'at teran haype. Mi'i hawyi te'ero'e — Urumu'e hat ta'i uruikuap ta'yn wyti ehay hãpyk hap i'atu'e. Ta'i eti'atumu'e hãpyk kahato ti miit'in Tupana miky'esat ewy i'atu'e. I'ewyte ti yt ereken'ẽ hin i miit'in mupi i'atu'e. I'ewyte uruikuap ti aikotã miit'in eti'atu­mõ­typot to'o'ewy'ewy i'atu'e iwato'in nakaria i'ewyte kurin nakaria i'atu'e hap uruikuap ta'yn uruto i'atu'e.
MAT 22:17 Mi'i tupono etomo­herep to ewanẽtup hap uruepe sio waku apo i'atu­po­rekuat Sesa pe waha'upnug i'atu'e sio yt tomi­ky'esat ewy imiẽtup ahepiat i'atu'e.
MAT 22:18 Ma'ato mio tã i'atu'e i'atuehay hap Iesui tikuap tuwa­nẽtup hawe toma'at hamuat hap etiat toikuap. Mi'i hawyi toi'atu­wesat — Typy ihay rakaria sese ti eipe katu­pono uima'at reran ne'i are uhã'ãg neran haype hap atikuap ta'yn e.
MAT 22:19 Pyno eweimo­herep to uhepe i'ape rakat i'atue­ti­neiru e. Ta'atuium hawyi Iesui to'e
MAT 22:20 — Uwe iã'ãkap meiũ i'ape tote toĩne'en e.
MAT 22:21 Mi'i pote — Ta'i morekuat wato Sesa iã'ãkap i'atu'e. — Pyno iwat hã'ãkap wywuat pywuat tupono tope ro ewetum are ma'ato Tupana wanuat waku ewetum no Tupana pe e.
MAT 22:22 Mio tã ihay ta'atukuap ta'yn hawyi i'atu­perup kahato ra'yn te'eru­wa­nẽtup kahato iwe'eg hap ete. Mi'i hawyi tuwat ima'at reran haria.
MAT 22:23 Mi'i hawyi meimuẽ­waria miit'in iku'uro hawyi yt te'eru­we­hymut hin i e haria te'ero'e Iesui pe
MAT 22:24 — Urumu'e hat sa'awy'i Musei to'e uruepe — Karãpe eiwy'ok eheyke'et iku'uro yt imẽpyt i te turan mi'i pote waku hehiwu iywyt po pe i ra'yn topyhu'at iku'uro rakat mẽpyt nug hamo e Musei sa'awy'i i'atu'e. Mio tã e tupono ti uruhenoi teran epe wẽtup sehay uhyt i'atu'e.
MAT 22:25 Pyno sa'awy'i so ihainia so ha'yru'in sok 7 ok takaria. Mi'iria so i'atueyke'et ihary'i ra'yn ma'ato so yt tomẽpyt i te turan iku'uro ra'yn i'atueyke'et.
MAT 22:26 Mi'i hawyi so iywyt wywo i ra'yn imi'atoiat hehiwu i'atu'e. Mi'i so i'ewyte iku'uro ra'yn yt tomẽpyt i te turan. Mi'i tã me so wẽtup i wẽtup i wywo toĩne'en sake so topap yne.
MAT 22:27 Mi'i hawyi yt uwe i imẽpyt rokirẽ iku'uro ra'yn hary­poria i'atu'e.
MAT 22:28 Mi'i tupono karãpe tuwenõ'ẽ gu'uro pyi hawyi apuru uwe wary wo meiẽ hary­poria i'atu'e 7 ok he'aito rakat ieĩne'en hat i'atu'e.
MAT 22:29 Pyno eipe ewei'aparap kahato e Iesui i'atuepe. Yt eweikuap i Tupana ehay miwan miat pote e. Katu­pono yt eweikuap hin i Tupana hesaika hap yne nug kuap hamuat.
MAT 22:30 Pywo pe ti watu­wẽtem gu'uro pyi hawyi yt kat i ra'yn ahehary'i hamuat itote. Ma'ato ti watoĩne'en aikotã atipy pe yt iwary i rakaria ewy i ra'yn watu­kupte'en irane e. Mi'iria ti yt karãmuo i i'atu­hary'i e. Katu­pono Tupana emiit'in atipy piat ewywuat tukupte'en yt ihainia kaipywiat i yt hary­poria kaipywiat i ra'yn e. Mi'iria ti tuweu­piaria ra'yn e. Mi'i Iesui to'e miit'in iku'uro hawyi yt te'eru­we­hymut hin i ra'yn e haria pe
MAT 22:31 — Pyno ahenoi ehepe aikotã miit'in gu'uro pywiat wẽtem hap e. Yt karãmuo i apo eiwemu'e Tupana ehay miwan ete aikotã sa'awy'i Tupana to'e
MAT 22:32 — Uito ti Aparãu eTupana Isaki eTupana. Uito ti Iako eTupana e. Mi'i tupono pywo pe are'e ehepe Aparãu Isaki Iako tukupte'en ne e. Katu­pono Tupana ti yt map haria eTupana i. Ta'i ihãite rakaria eTupana yn e. Mi'i tupono mi'iria topap wen ma'ato i'atuieĩne'en pakup i hamuat toĩne'en na'yn e Iesui Tupana ehay miwan miat wan pakup i haria pe yt kat i ra'yn ti aiku'uro hawyi aheĩne'en hap e haria pe.
MAT 22:33 Mio tã e pote meimuẽwat miit'in typy'i rakaria te'eru­wa­nẽtup hawyi i'atu­perup ta'yn. — Pyno yt uwe i wyti aimu'e meiũwat ewywuat aimu'e po'og i'atu'e.
MAT 22:34 Mi'i hawyi pa'i akag koro ko'i tikuap ta'yn aikotã wani wani haria ehay akit Iesui piat hamuat ta'atukuap hawyi te'eru­wa'a­tunug — Aikotã som watunug meimẽwat miit ete ihay moma hamo i'atu'e te'eru­wa'a­tunug mi'i hamo.
MAT 22:35 I'ewyte i'atu­py'a­setpe toĩne'en wẽtup ok wo'onãpin kuap hat apo apoto'e Iesui piat hamo. Iesui wehay aparap hap ky'ewi.
MAT 22:36 Wẽtup ok — Wo'omu'e hat e kat e hap kat e hap som po'og iwato Tupana ainãpin hap wuat'i kai apo'e Iesui pe.
MAT 22:37 — Pyno ahenoi po'og hesaika rakat piat ainãpin hap e. Tomiwan kaipywiat hap ahenoi po'og hesaika rakat — Waku watiky'e kahato Aika'iwat Tupana yne aipy'a pe yne aiwa­nẽtup hawe yne aiwe'eg hawe e miwan me.
MAT 22:38 Mi'i ti po'og iwato Tupana wo'onãpin hap torania kai e.
MAT 22:39 Ma'ato wẽtup wo'onãpin hap porap i'ewywuat are mio tã e — Eweiky'e ro irania'in. Waku wati'a­tuky'e kahato irania'in aikotã aiweky'e hap ewy e miwan me.
MAT 22:40 Meimuẽwat typy rakat kaipyi ti watikuap yne ra'yn wo'onãpin hap. Mi'i hap watunug mi'i pote ti yne sa'awy'iwuat Tupana ehay enoi haria wo'onãpin hap ewy ra'yn watunug e Iesui wo'onãpin hat kuap hat pe mekewat wo'omu'e hat py'asetpiat.
MAT 22:41 Mi'i pote Iesui apo'e irania'in wa'atunug haria pe wo'omu'e haria pe
MAT 22:42 — Atikuap teran ti aikotã eweiwa­nẽtup mekewat Tupana Mipo'oro Aipo­rekuat hap etiat e. Mi'i tupono uiwesat ro eipe uwe Sa'yru Mi'i e. Mi'i hawyi te'ero'e — Ta'i morekuat Tawi sa'yru i'atu'e.
MAT 22:43 Mi'i hawyi Iesui to'e — Ma'ato ti sa'awy'i morekuat Tawi ti to'e — Uhetu­pana to'e Uika'iwat pe.
MAT 22:44 — Era'apyk o meiũpe uipo sese kai e ti. Ta'i meiũran ti aru epy ywyt'okpype yne atunug ewanĩ­kaptia e ti Tupana e morekuat Tawi Tupana Pã'ãu kaipyi wepy 110.1 pe e.
MAT 22:45 Morekuat Tawi sa'yru Tupana Mipo'oro Aipo­rekuat nuat ewei'e apo'are ma'ato yt mio tã e ti morekuat Tawi. — Uipo­rekuat Tupana Mipo'oro e ti pãi.
MAT 22:46 Mio tã e pote yt ta'atu­wesat kuap i ra'yn. Mio tã e ra'yn hawyi yt uwe kuap i ra'yn ta'atu­so'o­po'oro kuap i ima'at hamo. I'atu­wẽ­pohep yne ra'yn Iesui iã'ãg i iã'ãg i hap ete. Katu­pono yt kat i i'atu'e kuap i ra'yn ima'at reran haria are uito Mateu uimiwan me.
MAT 23:1 Mi'i hawyi Iesui to'e miit'in sem ko'i pe tomi'a­tu­mu'eria pe
MAT 23:2 — Uiwyria'in meimuẽwat Tupana ehay miwan miat kuap haria wo'omu'e haria te te'ero­pyhu'at Musei saipe­piaria wo aimu'e Musei ehay wuat haria. Mi'iria ti ainãpin kahato Musei wo'onãpin hap ko'i ete.
MAT 23:3 Mi'i tupono waku watunug o kat e kat e i'atu'e ainãpin hap Musei kaipywiat hap ewy e. Ma'ato o yt i'atueko ewy ne'i tei'o eweikupte'en e. Katu­pono i'atuwẽ pywiat mienoi ti hãpyk takat ma'ato i'atueko ti i'atupiit etiat ti yt hãpyk hin i e.
MAT 23:4 Katu­pono yrysakag ipotyi rakat ai'okpe tote hap ewy ta'atunug ma'ato ti aito yt wahupit kuap i ipotyi poity'i ai'akit hap ewy ne'i e. Ta'atupag wahupit hamo ma'ato mi'iria yt aipo­wyro hin i hupit hamo. Yt ta'atuiã'ãg ne wy hupit hap yt wẽtup puĩ'ã wo te wy aipo­wyro. Yt kat i hin i wyti aheha­kyera'at hap i'atuepe e Iesui itotiaria pe.
MAT 23:5 Ta'i mi'iria ti ikat miit'in upi wuat'i piat — En wyti waku kahato uhyt e hap ta'atu­ky'esat kahato. Miit'in ehamo yn wakuap nug hap ta'atu­mo­herep ta'atu­mõ­typot hamuat hap. Ta'atue­sokpe i'ywop takat kaipyi — Uito po'og i'atu'e urumohey mono i'atu'e haype. Mi'iria ti ikytyt Tupana ehay ta'atue­watu'e ete i'ewyte ta'atupo poran kai ete iwato'in nakat — Ewei'akasa ro uhowawi uito Tupana ehay kuap hat uito e hamo. I'ewyte ti ta'atuesai'a wato ẽpe ete ta'atuwan yne Tupana wo'onãpin hap — Uito po'og eikai Tupana kuap haria ta'atu'e hap.
MAT 23:6 Mi'iria ti iky'esat ienuk turan te'era'apyk po'og ta'atu'e hawe irania'in kai morekuat e'amyap ewywuat upi hap. I'ewyte Tupana mõtypot hawe aikotã morekuat eiam ewy ta'atu­ky'esat po'og irania'in kai enoi hamo hap yn ta'atu­ky'esat.
MAT 23:7 Mi'i hawyi ta'atue­wyry turan — Ihot'ok urumu'e hat koro i'atu'e irania'in hap ta'atu­ky'esat miit'in kaipyi. — Hẽ aimu'e sese hat tut ra'yn e hap ta'atu­ky'esat.
MAT 23:8 Mi'i pote yt ewetunug nei'o mi'i tã hap i'atu'ewy e Iesui temiit'in me. Katu­pono — Meiẽ aimu'e hat sese yt ewei'e tei'o eiwo'ope ne'i uiwyria'in. Katu­pono wẽtup ok yn ni toĩne'en eimu'e hat sese. Mi'i ti Uito ra'yn are. Waku eweipyhu'at eipe eiwo'o­wyria'in wo yn na'yn katu­pono wẽtup ywania yn aito.
MAT 23:9 Katu­pono wẽtup yn Ai'ywot waku ewei'e eiwo'ope. Mi'i ti ahetu­pana sese ewei'e o. Mi'i pote yt naku i ewei'e eimu'e hat pe — En uru'ywot sese yt ewei'e tei'o.
MAT 23:10 Pyno yt naku i wẽtup ok pe — En Tupana ewei'e uimohey haria eipe pote. Katu­pono Uito yn Eipo­rekuat sese areĩne'en.
MAT 23:11 Pyno uwe uwe toĩne'en eipy'a­setpe wo'opo­wyro hat po'og po'og eipo­wyro irania'in kai mi'i hat wy ti — Aipo­rekuat sese ewywuat ewei'e o e. Katu­pono po'og aheropat mi'i ewei'e e.
MAT 23:12 Ma'ato — Uito po'og eikai e hat ti aru Tupana mimohit hat topyhu'at. Irania'in ma'at wẽtup ok tuwe­mohit hat ti aru iwato rakat topyhu'at Tupana mimo­wato wo.
MAT 23:13 Mi'i hawyi Iesui to'e wo'omu'e haria pe — Ta'i heso rakaria ti eipe typy hẽku rakaria ti eipe are e Tupana ehay kuap ran haria pe. Yt eweiky'esat i ti miit'in tuwat aikope Tupana toĩne'en Morekuat no hap kape e. Ta'i ewei'atu­pyhyp kahato ti miit'in ipap Tupana etawa kapiat rakaria e. I'ewyte ti eipe yt eweiwat teran hin i. Mi'i pote ti irania'in yt tuwat i ei'ewy e. Yt naku i kahato. Yt nakuaria i eipe are.
MAT 23:14 — Ta'i Tupana ehay moherep haria akag ko'i uruto ewei'e eimi­mu'eria ko'i pe. Ta'i uruto yn Tupana e hap yne nug haria ewei'e wen ma'ato pywo ti rat are ehepe Tupana mi'apiheg sese ko'i eipe haria po'og po'og torania kai e. Katu­pono typy hẽku rakaria akag ko'i eipe e. Karãpeĩ ehehay Tupana kape miit'in ehamo ehay se kahato wen ma'ato yt pywo pe i. Ta'i yt Tupana kape hin i ehehay ma'ato eheso hap ewy ehehay e. Miit'in ehamo eipe po'og po'og Tupana emiit no torania kai ma'ato Tupana ehamo po'og yt nakuaria i torania kawiat eweikupte'en e. Katu­pono eimi­mu'eria nãpin hap waku wen ma'ato yt ewetunug hin i ei'e hap eimi­nãpin ewywuat e. Mi'i pote po'og po'og aria mi'u wo eweikupte'en aru torania kawiat e. Are pãi Tupana mõtypot e'at turan Tupana ehay ewei'atumu'e miit'in me ma'ato wãtym i turan hiwu ko'i ma'at'i ma'at'i haria wo eweikupte'en sa'ag e. Ta'i hiwu yat ero'ok haria akag ko'i eipe e.
MAT 23:15 Ta'i Tupana mi'apihag wuat'i e'at piaria ti eipe katu­pono typy hẽku rakaria wo'omu'e haria mienoi kuap haria heso rakaria eipe pote e. Yt eweiwat hin i eimienoi upi e. Ta'i eiko­hye­wyry kahato ti miit'in mu'e hamo. Ysakpo yi upi yne mu'ap upi eweikat kahato wẽtup miit wẽtup miit ehay upiat myhu'at hat wyti e. Eweipuẽti hawyi ei'ewy ra'yn ewetunug. Mi'i hawyi ma'ato topyhu'at po'og po'og na'yn sa'ag yianote wuat yt ehehay kuap i te turanuat kai e. Po'og po'og sa'awy'iwuat kai aria kape topyhu'at. Yt naku i kahato e Iesui typy sehay upi enoi haria pe.
MAT 23:16 Uruikuap atipy kapiat mu'ap ewei'e ti eipe wen ma'ato ti yt ihapytig i rakaria ewywuat eipe. Yt eweikuap hin i mu'ap e. — Uruikuap kahato mu'ap Tupana kapiat ewei'e eipot­mu'eria pe yt eweikuap hin i pytkai e. Aikotã yt ihapytig i rakaria yt tikuap hin i mu'ap aikope aikope hap ewy. Karãpeĩ wẽtup ok to'e ehepe — Pywo ti atunug aru ui'e hap ewy to'e hawyi — Eso rat ewei'e tope hawyi — Yt rat yt uheso i rat to'e hawyi — Pyno eso pote waku mio tã ere'e uruwepe — Yt atunug i aru ui'e hap pote waku yne uhekat atum ehowawi Tupana mõtypot yat ekat no waku ere'e miit'in me ta'atukat ky'ewi e Iesui Tupana mõtypot yat apykok haria pe. Eweimohit kahato yt hekat rakaria i'atu­powat'yp Tupana mõtypot yat piat pohari hamo e Iesui Tupana mõtypot yat hekat rakat imehit hap apykok haria pe. Eipy'a pe mio tã e haria eweipyhu'at mekewat mehit rakat mesuwe po'og waku topyhu'at Tupana mõtypot hap kai ewei'e eipy'a pe. Yt naku i kahato ewei'e e. Yt eiwe'eg hin i eipe. Katu­pono Tupana mõtypot yat po'og po'og wo Tupana wanẽtup hawe mekewat mehit rakat pen hap kai e. — Yt uheso i rat ewei'e uruehamo i'ewyte wuat'i miit'in ehamo waku ewei'e eimi­mu'eria pe. — Uheso pote waku uhekat yne iheg me mesuwe Tupana mõtypot yat piat uimi­moheg ko'i uipoi hamuat aru ui'ahu hawyi uhekat sese uhehiwu uimẽpyt'in poi hamuat uiku'uro hawyi waku mi'i uhekat topyhu'at pa'i ko'i wuanuat uheso pote waku ewei'e ro wuat'i miit'in ehamo ewei'e eimi­mu'eria pe i'atuekat yne i'atu­powat'yp i'atu'yi yne hap ky'ewi e. — Waku uipo pyi uhewat'yp eweihep yne yt atunug aru ui'e hap atunug aru e hap ewy hawyi waku ewei'e yne eimima'at ko'i pe e Iesui. Pywo pe are'e ehepe Tupana ehamo yn waku wato'e miit'in me — Atunug aru ui'e hap ewywuat e hap e. Pywo ti rat Tupana ehamo po'og waku wato'e aipy'a pyi atunug aru ai'e hap yt kat i aheso hap wywo e Iesui miit'in powat'yp ekat yne u teran haria pe.
MAT 23:17 Yt eiwe'eg hin i ei'e hap upi kat e hap kat e hap ete. Katu­pono Tupana mohey hap po'og po'og Tupana wanẽtup hawe to'yat piat yne ahekat imehit rakat kai.
MAT 23:18 I'ewyte mio tã ewei'e eimi­mu'eria pe — Karãpe wẽtup ok to'e ahepe — Atunug aru ui'e hap ewy mi'i pote waku wato'e tope — Pywo pote — Atunug aru e hap etunug no wuat'i miit'in ehamo Tupana mõtypot yat pe eimiium iwato hap wywo. Mi'i hawyi meremo wuat'i miit'in tikuap ta'yn pywo ewei'e hap — Atunug aru e hap ewei'e eimi­mu'eria pe e. Pyno yt naku i katu­pono po'og waku wato'e — Ui'e hap ewy atunug aru aipy'a pyi ahehay pywo kahato hap wywo Tupana ehamo po'og waku wato'e yt kat hin i aheso hap wywo e Iesui wo'omu'e haria miit'in ekat ky'esat haria pe.
MAT 23:19 Yt eheha­pytig hin i rakaria ewy kahato eipe Tupana wanẽtup hawe e Iesui wo'omu'e haria itotiaria pe. Kat som po'og waku watunug hap yt heremo hin i ti ehepe. Miit'in miium Tupana piat kape yn eheha ma'ato Tupana piat mõtypot hap kape yt kat i eheha e. Kat som po'og waku Tupana wanẽtup hawe tomõ­typot hap sio aimiium topiat e. Ta'i tomõ­typot hap po'og waku aimiium kai e. Aimiium Tupana ky'e hap upi yn Tupana mowepit hap e.
MAT 23:20 Mi'i pote karãpe wato'e Tupana pe — Pywo ti aru atunug ui'e hap mi'i pote atum epe uimiium mesuwe eiam yparakai tote mi'i e hap ti waku tutunug e. Ma'ato uwe uwe to'e Tupana pe — Mesuwat uimiium wywo atimoheg neran uhehay uimiium ko'i wato hap ewy mi'i e hap yt he i Tupana wanẽtup hawe. Katu­pono toiky'esat aimiium toky'e hap moherep hamuat hap e.
MAT 23:21 I'ewyte karãpe wato'e wuat'i ehamo — Atunug aru ui'e hap ewy pãi an mi'i pote mesuwe Tupana mõtypot yat ehamo are'e hap ewy atunug aru e hap atimoheg uhehay wato'e pote yt iwe'eg i rakat ewy watoĩne'en e. Katu­pono Tupana mõtypot yat yt ahehay kuap i rakat ma'ato Tupana sese ahehay kuap kahato rakat toĩne'en sio aheso ahehay wo sio yt hap toikuap tomõ­typot hap yat pe e.
MAT 23:22 Pywo ti rat karãpeĩ wato'e wuat'i ehamo — Pywo ti rat atunug aru ui'e hap ewy mi'i pote mesup wuat'i atipy piaria ehamo — Atunug aru pãi an are'e mi'i wato'e pote yt aiwe'eg i rakat ewy watoĩne'en. Katu­pono po'og waku aipy'a pyi ahehay pywuat wato'e pywo pe — Atunug aru ui'e hap hawyi waku watunug ma'ato yt watunug i aru e hap watikuap aipy'a pe mi'i pote po'og waku wato'e — Yt atunug i po'og waku — Atunug aru wato'e yt pywo pe i haype e. Katu­pono Tupana tikuap kahato aipy'a piat sio pywo wato'e sio yt e hap. Tupana ti wuat'i atipy piaria nug hat mi'i pote po'og waku ihamo watunug ahehay pywo kahato rakat e.
MAT 23:23 Ta'i eipe ti wo'omu'e haria wani wani'e haria Tupana kuasa haria typy hẽku rakaria ti eipe. — Ta'i watum kahato ti wuat'i Tupana kape e haria ti eipe. Eimi'u mosẽ'ẽ hap ko'i wyti eweipat'ok kahato Tupana wanuat i'ewyte ti muse i'ewyte ti eimi'u apopyt ti Tupana wanuat e. I'ewyte ti eipe mekewat eimiium kaipywiat kape ti eiwa­nẽtup kahato at ka'ap e. Mi'i hap ti waku wen ma'ato mi'i tã pote mekewat po'og iwato rakat aimu'e hap kai eweiwaure kahato e. I'ewyte mi'i pote aikotã aru eiminug ko'i Tupana tomo­herep waku hap sio yt naku i hap ei'e hap ti eweiwaure ra'yn e. I'ewyte aikotã Tupana iwese yt nakuaria i ete hap eweiwaure ra'yn e. Mi'i pote Tupana mohey hap kape yt eiwa­nẽtup hin i e. Eweiwaure yne ra'yn — Atunug aru ei'e Tupana piat hap ko'i e.
MAT 23:24 Ma'ato ti irania'in wo'onãpin hap kurin kat kape po'og ne'i eiwa­nẽtup e. Mi'i ti waku wen ma'ato ti waku yt eweiwaure i mekewat po'og wuat iwato rakat aimu'e hap ko'i e. Ta'i — Atomo­herep teran mu'ap ewei'e ma'ato ti yt eheha­pytig pytkai i e. I'ewyte aikotã mekewat win hin teke ehesapo hy pe mi'i hawyi eweihep meremo — Yt watohon kuap i ewei'e. Ma'ato mekewat aihũ iwato'in nakat kameru ewẽ pe teke hawyi meremo mi'i ewetohon e. Mi'i hap ewy ti eipe. Kurin kat ko'i kape yn eiwa­nẽtup kowo'i kowo'i. Ma'ato aimu'e hap iwato'in rakat kape po'og Tupana wanẽtup hawe yt eweiwa­nẽtup hin i e.
MAT 23:25 Eipe ti yt nakuaria i kahato eipe iwan miat Tupana ehay enoi haria wo'omu'e haria e. Katu­pono yt ewetunug i ti miit'in nãpin ehepiat hap eiwẽ piat e. I'ewyte aikotã kui'a eweikoho iwa pe ma'ato hã'ũmpype ipitpit hap sese. Eweipyi pyi kahato yne kui'a ko'i yne kat ko'i kat ko'i eiam ma'ato hã'ũmpype ipitpit kahato e. Mi'i hap ewy ti eiwa­nẽtup hawe. I'ewyte eipe eiwa pe waku kahato wy. Mi'i hap ewy ti eiwa pe eipainug hap waku kahato ma'ato ehã'ũmpype ti yt nakuap i yn topyhu'at e. — Atima'at irania'in ei'e hap ti eipitpit hamo e. Atiky'esat uiano irania'in ekat ei'e hap ti eimohun hap e. Yt eweiwãi kuap i ti eheko sa'ag ete eipe e.
MAT 23:26 Pyno yt eheha­pytig hin i e. Miit'in teha'at ehowawi hawyi ikahu rakaria ewy eweipyhu'at wen ma'ato eipy'a piat ipitpit kahato ra'yn topyhu'at. Ta'i kui'a hã'ũmpype ipitpit hap ewy topyhu'at ehowa ikahu wen. Waku sa'awy'i eipy'a eweikoho yt naku i nug hap ko'i moweityk hamo e. Mi'i hawyi eiminug hap ko'i i'ewyte waku ra'yn topyhu'at e.
MAT 23:27 Ahetama puo miit'in tipen wo'osyp hap ikytsig nakano ma'ato hã'ũmpype ti nem na'yn e. Iku'uro rakaria kag yn topyhu'at hã'ũmpype. Ipitpit kahato hap yn topyhu'at itote e.
MAT 23:28 Mi'i hap ewy ti eipe eiwa pe eika­huria kahato wakuaria ewy e. Ikahuria kahato mi'iria i'atu'e ehetiat pe e. Ma'ato ehã'ũmpype wyti typy ehay topyhu'at e. — Yt atunug neran i Tupana ehay e hap yn topyhu'at eikai e.
MAT 23:29 Ta'i ho'opot haria wo eweikupte'en aru e Iesui wãi'e haria pe wo'omu'e haria pe. I'ewyte ti sa'awy'i­wuaria wo'osyp hap ti ikahu kahato ewetunug Tupana ehay moherep sa'awy'iwuat haria wakuaria wo'osyp hap eweipen kahato ipainug hap imokahu hap.
MAT 23:30 Ta'i sa'awy'i­te­wuaria nagnia ai'ywania mi'atu'uka ko'i ti mi'iria ewei'e ti e. Ma'ato ti aito koran mi'iria tukupte'en pote — Yt wati'a­tu'uka i ra'yn ewei'e ti e.
MAT 23:31 — Ta'i ui'ywot'in mi'atu'uka ti mi'iria ma'ato uruto ti yt ra'yn ewei'e eiwo'ope. Mio tã ei'e hap kaipyi uruikuap eipe. Mi'i ei'e hap mipo'o­roria sa'awy'i­wuaria auka haria sa'yru'in ne eipe hap katu­pono — Uru'ywot'in atu'uka haria ei'e hap kaipyi uruikuap.
MAT 23:32 Pyno ti waku ra'yn eiwe­motag aikotã ei'ywot'in minug sa'ag ko'i ewy e. Katu­pono Tupana mipo'o­roria sa'awy'i­wuaria atu'uka haria saipe­piaria sese te eipe.
MAT 23:33 Moi satek mẽpyt'in ewywuaria ti eipe eweikupte'en ti e. Mi'i tupono ti eipe torania aria mi'u wo eweipyhu'at. Yt sake i wyti aru eiwenõ'ẽ kuap e Iesui.
MAT 23:34 — Meiũran aru ati'atu­po'oro ehowawi uhehay moherep haria we'eg haria Tupana ehay kuap haria. Ma'ato ti ipat'ok ti aru ewei'atu'uka ne'i e. Ipat'ok ti aria'yp posak ete ewei'auka e. Ipat'ok ti aru ewei'ahyk ahyk Ehetu­pana mõtypot hawe e. Ipat'ok ti aru ewei'atu­mohan mohan tawa ko'i kape i'atu'uka teran haype e miwan me.
MAT 23:35 Ta'i sa'awy'iwuat Tupana mi'atu­po'o­roria suu ti topyhu'at kahato ei'ywot'in po ete. Mi'i pote mesup eipe i'ewyte eweikupte'en aikotã sa'awy'ite Kaĩ'in ti'auka toywyt Apeu hap ewy e. Yne sa'awy'iwuat Tupana mi'atu­po'o­roria atu'uka haria te ti eipe e. Sa'awy'iwuat Tupana ehay enoi hat Sakaria mekewat Parakia sa'yru ewei'auka Tupana mõtypot koro wywuat aihũ wuk hawe ewei'auka torania ewei'auka eiperia. Pywo ti torania mi'iria suu topyhu'at eipo ete te e.
MAT 23:36 Mi'i pote Tupana mi'apiheg wuaria eweipyhu'at ei'ywot'in apiheg hap ahyt topyhu'at ehepe.
MAT 23:37 Ieru­sarẽi miaria Tupana mipo'o­roria atu'uka haria kahato ti eipe e. Ati'atu­po'oro kahato ti uhemiit'in eimu'e hamo ma'ato ti yne mi'iria ewei'atu'uka nu wo e Iesui. Mi'i rẽ Uito ti ra'yn meiũ i'atu­saipe kai areĩne'en Uito eipy'a­setpe i ra'yn. Aikotã waipaka ty tomẽpyt'in atukaykay tepiat i'atuky'e haype hap ewy ti Uito woro­ho'o­kaykay e. Eweĩ'ẽ ro uimẽpyt'in are'e ma'ato yt eweikoka'at reran i wyti uhowawi. Uipo­pesap ywyt'okpype ro eweikupte'en are ma'ato yt eweĩ'ẽ teran i e.
MAT 23:38 Mi'i tupono ti aru ei'yat ikahu rakat ko'i pyi eiwenõ'ẽ. Yt uwe i topyhu'at aru itote e.
MAT 23:39 Mio Uito i'ewyte arẽtem na'yn eipy'a­setpyi Ieru­sarẽi miaria. Mi'i hawyi ti aru yt karãmuo i ra'yn ewei'akasa uhowawi. Yt uwe i ra'yn — Ereke ro e haria uhepiat pote. Areĩne'en mot'i eikai ma'ato meiũran — Era'aipok i ro ereke mono ewei'e pote waku kahato ti En Tupana Mipo'oro sese ti En ewei'e uhepe pote ti aru ariot i ma'ato ehowawi i ra'yn e Iesui wo'omu'e haria pe. Uito Mateu atiwan yne mesuwe are.
MAT 24:1 Iesui tuwẽtem Tupana mõtypot yat pyi hawyi ipotmu'eria tõ'ẽ howawi te'ero'e hamo — Mehĩ uruimo­herep teran meiẽwat Tupana mõtypot yat nu kawiat iwato rakat i'atu'e.
MAT 24:2 — Ta'i iwato kahato ti nu kawiat to'otote tote rakat iwato'in nakaria e Iesui. Ma'ato ti are'e ehepe pywo pe ti meiũran ti aru to'otiat to'otiat rakaria yt wẽtup i topyhu'at e. Meiũran ti aru wanĩ­kaptia hytpok yne nu wato ko'i e.
MAT 24:3 Mi'i hawyi toto Uriweira ypia eyity'ok kape. Mi'i itote ta'apyk hawyi ipotmu'eria tõ'ẽ howawi 12 ok takaria. Mi'i hawyi apo'i'atu'e Iesui pe — Karãpe aru ta'atu­pugha meiẽwat Tupana mõtypot yat i'atu'e. Karãmuo aru put'ok'e e'aipok mesuwat yi kapiat hap e'at i'atu'e. Karãpe aru yi kahuro hap put'ok'e i'atu'e. Kat ko'i kat ko'i aru tuwe­mo­herep mesuwe put'ok'e hap e'yianmete i'atu'e.
MAT 24:4 — Pyno eiwe'eg wo o uiwyria'in katu­pono tõ'ẽ tõ'ẽ kahato ti aru eima'at reran haria e.
MAT 24:5 Uhet ero'ok hap kaipyi ti aru mio tã i'atu'e — Uito ti Tupana mipo'oro eipo­rekuat nuat i'atu'e.
MAT 24:6 He'at ete i ti aru aikotã aikotã ne'i eweikuap wuat'i kaipyi wo'o'auka hap wu'uka hap ti aru eweikuap yne tama kaipyi e. Pyno mekewat sehay eweikuap hawyi o yt eiwa­nẽtup tei'o gyt'ei'e hamuat hap kape ne'i e. Katu­pono pywo ti aru put'ok'e he'at mi'i tã hamuat hap e. Ta'i mi'i hap ti eipy'a­setpe eweikuap yne hamo e. Ma'ato ti aru yt he'at ete i te wyti e.
MAT 24:7 Mi'i turan ti aru wẽtup ok wẽtup ok more­kuaria emiit'in ti aru tu'uka tu'uka to'ope to'ope yi wato hap ok tã e. Mekewat e'at pe ti aru yt kat i hin i mi'u topyhu'at mesu­wa­rote e. I'ewyte ti aru yi tyry'e kahato mekewat e'at pe aikope aikope wẽtup tawa pe wẽtup tawa pe tyry'e e. Mi'i hawyi ti aru tõ'ẽ tõ'ẽ kahato wẽki'a sari nupi'a ape'i ko'i aiko u hamuat. Mi'i hawyi yt kat i mi'u topyhu'at e. Mi'i hawyi topap kahato miit'in sy'at pyno.
MAT 24:8 Mi'i hap ko'i ti aru pyno ha'awynug hap ta'yn wyti mi'i tã ta'atunug ta'yn e. Ma'ato ti yt ho'opot hap sese i te e.
MAT 24:9 Mi'i hawyi ti aru eima'at haria ehum na'yn ho'opot hamuat hawe ei'auka hamuat kape e. Mekewat e'at pe ti aru yne i'atu­py'ahak ehete. Yt i'atu­wese o ehete are katu­pono eipe uimohey haria pote e.
MAT 24:10 Ta'i mekewat e'at pe ti aru ipoity'i kahato sa'awy'iwuat uimohey haria ma'ato ti aru wemõti uipupiat haria e. Mi'i hawyi ti aru eiwo'o'atoiat atoiat wyti aru. Mekewat e'at pe eweikupte'en eiwo'ope are ma'ato ti yt yne i ti aru ma'ato e.
MAT 24:11 Mi'i hawyi ti aru wẽtup ok tuwe­mo­wato — Uito ti meiũ Tupana mipo'oro tehay enoi hanuat e ti aru aikowo aikowo tuwe­mo­wato ma'ato ti aru yt pywo pe ti aru e. I'atu kahato ti aru mio tã e haria e. I'ewyte ipotmu'eria ti aru i'atu kahato e.
MAT 24:12 Mi'i hawyi po'og na'yn yt naku i nug hap ko'i topyhu'at mesu­wa­rotiat. Mi'i tupono irania'in uimohey haria sa'awy'i uiky'e haria wo'owese haria wyti aru ira'ak takaria iperup takaria te'ero­pyhu'at. Yt ta'atu­ky'esat i po'og uiky'e hap kai. Katu­pono sa'ag nug hap yn ta'atu­ky'esat irane e. Mi'i hawyi ti aru yt uiky'e i i'ewyte yt irania'in ky'e i haria te'ero­pyhu'at e.
MAT 24:13 Ma'ato uwe yt ipun i uiky'e hap at ka'ap mekewat e'at kape mi'i haria ti aru te'ero­pyhu'at uimie­ha­kyera'at ko'i wuat e.
MAT 24:14 Mekewat e'at pe ti aru uhehay wakuat aikotã Tupana topyhu'at Morekuat no wuat'i miit'in muo yi wato hap ok tã tuwe­mo­herep eimi­mu'eria pe. Mi'i hap kaipyi ti aru yne ywania tikuap ta'yn uhetiat e. Mi'i hap ko'i toran na'yn hawyi ti aru he'at sese ra'yn put'ok'e e. Mi'i ti aru ikahuro hap e'at sese ra'yn e Iesui.
MAT 24:15 Aikotã sa'awy'iwuat Tupana ehay moherep hat Tanieu e hap ewy put'ok'e ra'yn mio tã e hap — Meiũran ti aru tuwe­mopoĩ'ãm Tupana mõtypot yat wato pe po'og yt nakuat i wuat'i kawiat rakat — Uito ti Tupana to'e hat e. Eweikuap to kat som Tupana ihay mesuwat iwan me e.
MAT 24:16 Mekewat yt nakuat i sese wemopoĩ'ãm hat ewei'akasa ra'yn hawyi o eiko­hyeput ra'yn yi Iuteu pyi yity'ok ko'i kape e.
MAT 24:17 Eihyha ra'yn o. Yt ewei'aipok i ra'yn o ei'yat kape ehekare'en sat hamo. Yt pya i ei'yat kai eweikupte'en wen ma'ato o yt era'aipok i ra'yn ei'yat kape. Eiko­hyeput yity'ok ko'i kape yn na'yn e.
MAT 24:18 Ta'i eipotpap eiko etiat ko'i turanuat pote o yt ewei'aipok i ra'yn ei'yat kape ehesokpe pag hamo e.
MAT 24:19 Ta'i mekewat e'at pe ti aru niatpo kahato imẽpyt rakat ete hupi'a rakat ete e.
MAT 24:20 Pyno o ewehẽtup Tupana pe — Yt etipo'oro tei'o uruepiat ho'opot hap e'at i'aman mot e'at pe waku ewehẽtup. I'ewyte yt etipo'oro tei'o uruepiat ho'opot hap e'at emõtypot hap e'at pe katu­pono yt uruko­hyeput kuap i mekewat e'at ewei'e o Tupana pe.
MAT 24:21 Mi'i hawyi ti aru po'og po'og topyhu'at ho'opot hap wuat'i e'at piat kai e. Ta'i mekewat e'at pe ti aru po'og satek hap e'at Tupana piat yi nug sa'awy'ite hap ok tã mesup ahe'at kape e. Ma'ato mekewat ho'opot hap e'at tokosap ta'yn hawyi ti aru yt kat i ira'yn i'ok tã nakat ho'opot hap e.
MAT 24:22 Pyno mekewat e'at pe ti aru iwato kahato hamuat ho'opot hap topyhu'at e. Mi'i hap ti aru Tupana timõ­pytu'u e. Ma'ato yt toimõ­pytu'u i mekewat pote ti topap yne miit'in e. Mi'i tupono ti tomiky'e tomi'ai­roria etiano yn toimõ­pytu'u e. Yt toiky'esat i tomohey haria topap hap haype e.
MAT 24:23 Ma'ato mekewat e'at tokosap ta'yn hawyi ti aru te'ero'e irania'in ehepe — Meiẽ put'ok'e ra'yn Tupana mipo'oro aipo­rekuat nuat i'atu'e ti aru ma'ato o yt ewei'atu­mohey tei'o eima'at hap e.
MAT 24:24 Ta'i — Eheso i rat ewei'e yn o are katu­pono Tupana mipo'oro eipo­rekuat nuat ra'yn uruto e haria ti aru te'eru­we­mo­herep e. I'ewyte — Tupana mipo'oro tehay enoi hamuat ko'i ti uruto ti i'atu'e yt pywo pe i e. Mi'iria ti aru ta'atu­mi­sepap iwato kahato inug wy miit'in miat ta'atuehay mohey hamuat e. Meremo ti aru iwato kahato atipy kaipywiat ewy e. Ma'ato mi'iria miit'in ma'at hamuat haria e. I'ewyte ti Tupana mi'airoria imohey sese haria ma'at reran haype e. Ma'ato ti aru porap ta'atuma'at ma'ato yt e.
MAT 24:25 Pyno eiwe'eg wo o mi'iria pupi katu­pono ahenoi ra'yn yianmete ra'yn i'atuetiat e.
MAT 24:26 Mio tã i'atu'e ti aru — Yahig kape iuẽpe ra'yn ti tuwe­mo­herep Tupana mipo'oro aipo­rekuat nuat i'atu'e ti aru ehepe pote yt eweiwat rei'o mi'iria eima'at teran haria upi are'e. — Ta'i toĩne'en ni iheg me pote eweiwat hawyi ti aru uruimo­herep ehowawi i'atu'e ti mi'iria e. — Pãi an yt uruho'o­mohey hin i ti ewei'e o are e Iesui temiit'in me.
MAT 24:27 Katu­pono Uito Eheyke'et sese ti aru ariot turan wuat'i miit'in ui'akasa hamuat ariot e. Mi'i ti aru aikotã merep'e hap ewy aremo­herep wuat'i puo e. Pyno aikotã wãtym muo merep'e hap ewy yn tuwe­mo­herep Eheyke'et e. Mi'i ti aru heremo yne at wẽtem hap totepyi yne at min'e hap kape e. Ta'i mi'i hap ewy ti aru ara'aipok e.
MAT 24:28 Aikotã i'okpuk kape Urupu ko'i tõ'ẽ tõ'ẽ hap ewy e.
MAT 24:29 Mi'i hawyi mekewat e'at tokosap ta'yn ho'opot hap hawyi ti aru at i'ypyryp ta'yn i'ewyte waty i'ypyryp ta'yn i'ewyte ti aru waikiru hewo hewo teiam myi e. I'ewyte atipy ti aru mi'i turan yt iheg i ra'yn huruk'e ra'yn e. Mi'i hap e'at turan ti aru tuwe­mo­herep ta'yn Uito Eheyke'et atipy kaipyi wuat'i te'era'a­kasa hamo e.
MAT 24:30 Mi'i hawyi yne ywania miit'in to'okak'i katu­pono Eheyke'et ut hap e'at pe ti heremo ywyhig muo meremo tut e. Yne ti aru te'era'a­kasa mi'i tesaika wuat hut hap kape e. Tomõ­typot hawiat hut hap e'at kape meremo tut e.
MAT 24:31 Mi'i hawyi ti aru temiit'in atipy piaria toi'atu­po'oro huhu'i'atu'e hamo e. Mi'i hawyi ti ta'atu'a­tunug tuwe­wawi tomi'ai­roria e. Ta'atu'a­tunug ni aru aikope pyi aikope pyi wasere tut hap kaipyi at wẽtem hap kaipyi at min'e hap kaipyi yne yne kaipyi ta'atu'a­tunug imi'airoria howawi yi sasat hap kaipyi aikope aikope miit'in tukupte'en hap kaipyi.
MAT 24:32 Pyno eweikuap ta'yn Wiku yp ete. Wiku i'yhop kyt hap kaipyi eweikuap ta'yn merep hamuat ra'yn haat hap e'at yt pya hin i ra'yn hap.
MAT 24:33 Mi'i hap ewy ti aru karãpe ewei'akasa yne ra'yn ui'e hap ko'i hawyi eweikuap ta'yn yt pya i ra'yn oken'ypy kapiat uhut hap e.
MAT 24:34 Mekewat e'at piat ieĩne'en haria te'era'a­kasa yne wyti aru ui'e hap ewy. Ta'atuieĩne'en ne turanuat yt ta'atu­ku'uro i te turanuat tote te'era'a­kasa.
MAT 24:35 Pyno waikiru at yi tuweityk yne ma'ato uiat uimienoi uhehay yt sake i tuweityk e Iesui.
MAT 24:36 Yt uwe i ti uhut hap kuap uhut hap e'at kat ewãtym uhut hap kuap hat yt uwe i pãi e. Ta'i Uito yt atikuap i wy. Yi totiaria atipy piaria i'ewyte yt uwe i ti ikuap e. Ma'ato wẽtup yn ikuap hat pãi. Ui'ywot atipy piat yn ikuap karãpe aru ara'aipok meikowo hap e'at e Iesui.
MAT 24:37 Sa'awy'i te aha'ase'i Nu'e e'at pe hap ewywuat tukupte'en aru miit'in uhut hap e'at pe turan e.
MAT 24:38 Mi'i hap e'at pe iwato kahato ienuk hap itote. Wuat'i ta'atu'u sapo mi'u to'okyi'at kyi'at itote e. Mi'i pytkai Nu'e teke ra'yn yara wato tominug me.
MAT 24:39 Iheg nakat pe hawyi meremo i'aman kahato ra'yn sa'awy'iwuat yt ewywuat i ra'yn. Ta'i mi'i ti yi ãpymin hamuat ra'yn i'aman wato. Mi'i hawyi yt kat i yi heremo rakat. Y'y yn na'yn topyhu'at yi tote hawyi topap topap kahato yne yi totiaria katu­pono yt ta'atu­mohey hin i ma'ato Nu'e'in yt topap i. Ta'i mekewat turanuat ewy te irane ti Eheyke'et ut hap e'at turan e.
MAT 24:40 Mi'i turan ti aru typy ok Tupana tipuẽti ta'atuko tote. Mi'iria ti aru wẽtup ok totioto hawyi wẽtup ok topyhu'at aru e.
MAT 24:41 I'ewyte ti aru hary­poria'in typy ok mani pe wat haria mi'iria toi'atu­puẽti. Mi'iria ti aru wẽtup ok totioto ma'ato wẽtup ok tuweran topyhu'at aru pãi e.
MAT 24:42 Mi'i tupono o eiwe'eg wo o katu­pono yt eweikuap i kat e'at put'ok'e Eheyke'et hap e. Seha'at uhut hap kapiat hap ewy o eweikupte'en e.
MAT 24:43 Pyno eweikuap o uhã'ãkap e. Sa'awy'i so toĩne'en hekat rakat to'yat ikahu rakat pe ma'ato meiũran wãtym muo put'ok'e sero'ok'e hat hawyi totero'ok yne hekare'en iket kai e. Ma'ato toikuap hut hap pote yt toket i e. Mi'i hap ewy ti are'e ehepe.
MAT 24:44 Mi'i tupono o eiwe'eg wo o uhut hap kape e. Katu­pono ti sero'ok'e hat ewy ti aru Eheyke'et tut e. Yt uwe mikuap mo i put'ok'e Eheyke'et aikotã sero'ok'e hanuat ewy put'ok'e hap ewy.
MAT 24:45 Uwe uwe som pyno topyhu'at uhemiit sese meiũpiat ipotpap pot'i rakat iwe'eg kahato hat. Pyno uwe ewywuat mi'i ahenoi teran. Mi'i ti toka'iwat aipok i hap ekatup hat — Tut ti aru uika'iwat e yn hat ewy — Mi'i pote waku ati'atupoi wuat'i e'at pe hemiit'in mi'u wo e. Waku i'atue­hãite yn put'ok'e turan e. I'ewyte waku pe yn i'yat hut turan toka'iwat ut hap e'at ekatup hat e.
MAT 24:46 Mi'i tã nug hat wyti aru iwepit kahato toka'iwat put'ok'e turan katu­pono wakuap nug turan ika'iwat tipuẽti tut turan.
MAT 24:47 Mi'i hat pe ti aru — Pyno woronug en yne uhekare'en ko'i apykok hamo e inug hat pe.
MAT 24:48 Ma'ato irania'in wyti aru — Ta'i yt tut i ra'yn i'atu'e. Mi'i turan ti aru put'ok'e e.
MAT 24:49 Mi'i haype ti aru ta'atu'ahyk ahyk ne'i ta'atu­ka'iwat emiit'in ko'i. Mi'i haype ti aru mi'i tã e haria te'eru­wemo'ok kahato hemiit'in mi'u wo mahy wo iwat hemiit'in hesy'at turan.
MAT 24:50 Mi'iria ti aru yt i'atuwe'eg wuat turan hin i put'ok'e e.
MAT 24:51 Mi'i hat ete put'ok'e hawyi haiwot kahato. Mi'i hawyi ti aru tutum surara'in me — Eweiku'iku'i ro meimẽwat yt we'eg i kahato hat e ti aru put'okto'e hawyi. Mi'i hawyi ti aru typy ihay rakaria eiam me ra'yn tohytmoi aikope miit'in te'eruwak kyry'et kyry'et'i'atu'e ta'atuiãi ete hap kape ra'yn aru toi'atu­hytmoi e Iesui. Mi'i tã hap ewy Iesui tohenoi sa'awy'i. Mi'i hawyi Uito Mateu atiwan mesuwe uimikuap ok tã.
MAT 25:1 Mi'i hawyi po'og Iesui henoi aikotã Tupana topyhu'at aru Aipo­rekuat nuat. — Mi'i hap ewy ti aru topyhu'at e Iesui aikotã ahetama puo hary­poria'in 10 ok yt se'aito i te rakaria tuwat ta'atue'a­riãty wywo wãtym muo ta'atuwy'ok e'aito wuat erut hamo e.
MAT 25:2 Ipat'ok 5 ok takaria hepap takaria katu­pono mi'iria i'atue'a­riãty ipyt'at kahato rakaria tuwat e.
MAT 25:3 Ma'ato irania'in 5 ok takaria e'ariãty ti yt ipyt'at rakaria i e.
MAT 25:4 Ta'i ipat'ok iwe'eg nakaria i'atue'a­riãty heiam howapy ta'atuerut ma'ato irania'in yt. Mi'i turan i'atuwy'ok he'aito wuat yt tut i te. Mi'i pote ti ta'atu­he­katup ta'yn wãtym ka'ap kape ta'atu­he­katup ta'atuwy'ok e'aito wuat.
MAT 25:5 Heniatpo poity'i ra'yn mote i'atuket'at ra'yn. Mi'i hawyi i'atuket ahy ahy ra'yn mu'ap ẽpe upi mekewat wãtym hake turanuat hekatup haria yne yt hut i te pote.
MAT 25:6 Mi'i turan wãtym hake turan miit'in te'eru­watka ta'atuehay pirik wo — Meipe ra'yn tut i'atu'e. Eweiwat ro he'aito wuat kape ehe'ariãty wywo ipu'ap moherep hamo i'atu'e. Mi'i hawyi eweterut ro ihary'i wuat kape i'atu'e.
MAT 25:7 Mi'i pote ti te'ere­hymut i'atupoĩ'ãm 10 ok takaria he'aito wuat ekatup haria. Mi'i hawyi ta'atunug hãpyk kahato yne ta'atue'a­riãty iun ko'i.
MAT 25:8 Ma'ato irania'in — Eweho'o­puru uruepe ehe'ariãty hy i'atu'e kat pote uruket kai sio hasep urue'ariãty hy kahuro pote i'atu'e.
MAT 25:9 U an yt ra'yn i'atu'e ma'ato uruho'oium urue'ariãty uruwat hy pote uruwat mu'ap upiat hamo yt put'ok'e i ra'yn i'atu'e. Eweiwat ro ihy weneru haria kape mi'i hawyi eweikyi'at ro eiwano ehe'ariãty hy wo i'atu'e 5 ok takaria ẽtup haria pe.
MAT 25:10 Mi'i hawyi tuwat ra'yn ariãty hy kyi'at hamo ma'ato mi'i pytkai ti irania'in tuwat ra'yn he'aito wywuat kape. Mi'i hawyi tuwehyt'ok ta'yn wo'okyi'at hap yat kape. Mi'i hawyi he'aito wuat he'okenhyp ta'yn.
MAT 25:11 Mi'i hawyi wãtym mot'i pe ra'yn put'ok'i'atu'e irania'in 5 ok takaria ariãty hy so'okyi'at hamuat aipok haria. Mi'i hawyi te'eru­wẽ­powat — Mimi mimi eho'okenhyp'ok to e'yat uruepe i'atu'e.
MAT 25:12 Ma'ato — Yt woro­ho'okuap i eipe mana'in e i'atue'a­riãty hy yt put'ok'e i rakaria pe.
MAT 25:13 Pyno mi'i hap ewy o eiwe'eg wo o eweikupte'en uhut hap ekatup haype. Katu­pono yt eweikuap i Eheyke'et ut hamuat kat e'at pe sio wãtym i sio atpo­sake sio wãtym hake e Iesui temiit'in me.
MAT 25:14 Mi'i hawyi wẽtup sehay iã'ãkap i ra'yn tohenoi. — Sa'awy'i so wẽtup ok miit toto teran pya wuat setama kape e. Ma'ato toto hap owakai toi'atu­kaykay tuwe­wawi yne temiit'in. Mi'i hawyi toi'atu­puru porap'i teti­neiru i'ewyte te tekat ko'i toho'oium i'atuepe toto hamuat haype.
MAT 25:15 Wẽtup ok pe tutum iheg nakaria Uru kawiat hekat kahato 5 saka howapy ra'yn tutum sa'awy'iwuat pe. Mi'i hawyi wẽtup ok pe ti tutum typy esaka Uru wywuat hap ko'i tutum. Wẽtup ok pe ti tutum wẽtup saka yn aikotã i'atuepiat hepap hap ok tã tutum tekat i'atuepe. Toiky'esat kahato po'og i'atuepiat imowato teti­neiru hap toiky'esat. Mi'i hawyi wẽtup tama kape ra'yn toto e.
MAT 25:16 Mi'i hawyi mekewat 5 saka wywuat myhu'at hat ti ipotpap kahato ra'yn aikotã aikotã tuwe'eg hap ewy tutunug. Mi'i ti toimo­wato kahato toka'iwat etineiru i'ok tã ne toiwy'inug. Mi'i hawyi 10 saka ra'yn topyhu'at.
MAT 25:17 Mi'i hawyi i'ewyte wẽtup ok typy saka rakat kaipyi toipuẽti 4 saka i'ok tã ne toimo­wato.
MAT 25:18 Ma'ato mekewat wẽtup esaka wywuat ti yt toto i topotpap hamo yt toimo­wato i toka'iwat miium ma'ato toi'asyp yi pe. Tote­rowyi ne'i miit'in mupi.
MAT 25:19 Mi'i turan i'atu­ka'iwat ti toto pot'i tewyry hamo. Ma'ato meiũran hawyi tut i ra'yn. Tewyry hap kaipyi put'okto'e hawyi temiit'in mye'ym ok takaria toi'atu­kaykay i ra'yn tuwe­wawi mekewat teti­neiru wywuat gupte'en haria.
MAT 25:20 Sa'awy'iwuat 5 saka sat hat ri put'ok'e hawyi to'e — Uhyt e po'og na'yn ti mekewat emiium 5 saka rakat kaipyi atipuẽti 10 ra'yn nyti uika'iwat e.
MAT 25:21 — Pyno waku kahato en. Ehepap kahato ti e. Yt uima'at hin i e. Pyno en wakuat kahato. Mi'i tupono meiũran ti aru po'og uhekare'en apykok hamo ra'yn woro­po­rokpun e. Mi'i tupono koitywy uhekare'en epo pe e. Katu­pono mio po'og na'yn woro­mohey en e. Pyno koitywy to'iro watunug emowepit hap. Katu­pono koitywy uheka­tuwy wo kahato ra'yn en e.
MAT 25:22 Mi'i hawyi wẽtup ok i typy saka rakat wywuat myhu'at hat put'ok'e hawyi to'e — Uika'iwat e sa'awy'i ti etum typy saka etineiru uhepe e. Pyno koitywy ti ma'ato po'og na'yn emiium typy saka rakat kaipyi katu­pono ti 4 saka ra'yn ti toĩne'en e.
MAT 25:23 Mi'i hat pe ika'iwat to'e — Pyno waku kahato en e. Pyno en motpap kahato rakat en e. Yt uima'at hin hat i e. Katu­pono uimi'atoiat epo piat etimo­wato kahato ra'yn. Pyno po'og na'yn typy saka kai iwato e. Mi'i tupono waku woronug en uhekare'en apykok hano ra'yn e. Koitywy to'iro watu­wehyt'ok aiwo'o­mo­wepit hamo. Katu­pono koitywy ti uheka­tuwy kahato wo ra'yn en e.
MAT 25:24 Mi'i hawyi wẽtup saka wywuat myhu'at hat i ra'yn put'ok'e. Mi'i hawyi to'e — Uika'iwat ta'i niatpo poity'i ti atipuẽti ewawiat uipotpap hap e. Katu­pono worokuap kahato en yt hegyi'at rakat i aikotã yt ewat i emikoi terek hat ewy ereĩne'en.
MAT 25:25 Pyno ti worokuap kahato ra'yn en e. Pyno ti areken'ẽ kahato ra'yn epupi e. Mi'i pote mekewat etineiru wẽtup esaka rakat ati'asyp yi pe sero'ok'e hat pupi e. Pyno ti ga'atpo ti atihep ta'yn etineiru uhyt e. Koitywy atum i epe emiium uhepiat hap ok tã.
MAT 25:26 Mi'i hawyi ipy'ahak ika'iwat mi'i hawyi to'e haty wo — Eperup kahato rat motpap pupi e. Ereken'ẽ kahato yt uhegyi'at i hap uheti­neiru mowato hamuat pupi e. — Mikoi terek hat hap niatpo poity'i e hat ne'i en ere uhepe. Uimikoi puruk hat ne'i en ere uhepe e.
MAT 25:27 Kat poteĩ uheti­neiru yt etipuru i irania'in me iwy'inug hamo e.
MAT 25:28 Mi'i hawyi irania'in temiit'in me — Pyno eweihep to mekewat yt we'eg i hat po pyi imisyp hawyi ewetum no mekewat 10 saka puẽti hat pe e.
MAT 25:29 Mi'i hap ewy ti aru Tupana tikuap topotpap nug haria sese e Iesui. Uwe uwe Tupana miium imowato mi'i hat ti aru topyhu'at Tupana ekat mõ'ẽ kahato rakat no. Hekat rakano ewy tapyhu'at katu­pono mi'i hat pe Tupana tum kuap po'og po'og tomi­mohey po pe. Ma'ato irania'in mekewat imiium yt mowato i haria po pyi ti aru tomiium toi'atu­po­hari yne. Mi'i hawyi yt kat i topyhu'at mio tã haria po pe e.
MAT 25:30 Waku pyno mekewat uimiium syp hat yt we'eg i hat etipugha ro i'ypyryp kape ui'yat pyi. Aikope i'atu­wo'okak'i hap kape aikope ta'atuiãi ete kyry'et kyry'et'i'atu'e hap kape e.
MAT 25:31 Meiũran ti aru put'ok'are Uito Eheyke'et Morekuat koro wuat mesuwat yi tote wo'omõ­typot kahato hawe wuat'i e'at piat kahato rakat hẽtyhot kahato hawe. Atipy piaria torania wakuaria wywo ariot e. Mi'i hawyi ti aru ara'apyk morekuat eiam note ra'yn e. Uheiam note wuat'i puat uimõ­typot hamo e.
MAT 25:32 Mi'i hawyi ti aru mi'i eiam kape ati'atu­kaykay ra'yn uhowawi torania ywania. Mi'iria ti aru aikotã aihũria to'opype pype areĩne'en hap ewy e.
MAT 25:33 Mi'i hawyi ti aru ati'airo ra'yn uiwaria sese ko'i kokai uipo sese kawiano ra'yn katu­pono mi'iria wakuaria ra'yn e. Ma'ato mekewat yt nakuaria i ti aru kowo uipo ran kai ra'yn ati'atunug e. Mi'i hawyi ti aru uipo ran kai aikotã hũria Kapi­ritu ko'i ewy tukupte'en ma'ato uipo sese kai ti aru meimuẽwat Uweuria ko'i ewywuat ra'yn e.
MAT 25:34 Mi'i hawyi itote uipo sese kawiat pe are'e — Eweĩ'ẽ ro meikowo Ui'ywot mi'atuky'e ko'i e. Atum neran ti Tupana etama ehepe e. Katu­pono yi nug hawyi te ti mekewat atum teran kahato ehepe e.
MAT 25:35 Katu­pono sa'awy'i uhesy'at kahato turan ti ewetum eimi'u uhepe e. I'ewyte are'y'utui kahato turan ewetum uhepe y'y uiwe'y'u hamo e. I'ewyte yt uikuap pytkai i ti — Ereke ro ereĩne'en mesuwe Uhyt Mimi ewei'e uhepe e.
MAT 25:36 I'ewyte yt uhesokpe hin turan i kue eweho'oium uhepe ehesokpe e. I'ewyte kue ui'ahu turan uipo­wyro eipe e. I'ewyte kue uipyhik piat areĩne'en turan eipe ehehay uiwywuat eweĩ'ẽ uhowawi e. Ta'i mio tã are ti aru uipo sese ko'i kawiat pe e.
MAT 25:37 Mio tã are'e pote uipo sese kawiaria te'ero'e — Karãpeĩ esy'at turan uruipuẽti hawyi uruipoi En i'atu'e ti aru. Karãpeĩ ere'y'u teran turan uruipuẽti hawyi uruho'oium epe Uhyt Mimi i'atu'e irane.
MAT 25:38 — Karãpeĩ ereke o uruto'e epe yt ekuap i pytkai sio yt hesokpe i rakano ereĩne'en turan uruho'oium sokpe epe i'atu'e uhepe.
MAT 25:39 I'ewyte urutuwat wo'opyhik hap kape turan wepyhik haria wywo ehay hamo i'atu­po­wyro hamo yt uruta'a­kasa hin i En i'atu'e irane uhepe uipo sese kawiaria.
MAT 25:40 Mi'i hawyi Uito i'atuPo­rekuat ti'atu­wesat — Yt uhepe i ma'ato uhemiit'in ihaky'e'i rakaria yt iwy rakaria i powyro haria ti eipe. Ma'ato i'ewyte uipo­wyro haria eipe yt eweikuap i pytkai are aru i'atuepe.
MAT 25:41 Ma'ato irania'in uipo ran kawiaria pe ti aru are'e — Eweiwat ro ui'yaty­pepyi Tupana mi'uhu ko'i wyti eipe. Eiwehyt'ok to aikope aria yt hasep i rakat pe Tupana minug ho'opot hamuat hap kape ahiag toĩne'en hap kape. Aikope atipy piaria haiwot rakaria tukupte'en hap kape are ti aru uipo ran kawiaria pe.
MAT 25:42 Katu­pono sa'awy'i areĩne'en eipy'a­setpiat turan uhesy'at kahato hap wywo areine'en ma'ato yt uipoi hin i eipe eimi'u wo e. Uiwe'y'utui kahato turan eipe yt uimõ'ẽ y'y hin i uhepe e.
MAT 25:43 I'ewyte yt uwe piat i uikuap turan — Ereke ro Mimi Uhyt yt ewei'e hin i uhepe. I'ewyte areĩne'en eitokpe yt uhesokpe hin wywo i. Mi'i turan yt ewetum hin i uhepe sokpe. Ui'ahu turan uipyhik piat turan yt eweĩ'ẽ hin i uimo­wepit hamo uipo­wyro hamo e.
MAT 25:44 Mi'i hawyi ti aru pyno apo'i'atu'e mi'iria uhepe — Karãpeĩ mi'i tã Mimi Uhyt i'atu'e. Karãpeĩ ereĩne'en uruwywo yt i'yat rakano i yt esokpe rakano i i'ahu rakano epyhik pe ereĩne'en rakano. Karãpeĩ yt kat i i uruipome'eg epe apo'i'atu'e aru uhepe.
MAT 25:45 Mi'i hawyi ti aru ati'atu­wesat — Ta'i ha'awyte ti uimohey haria yt i'atu'yat i eipy'a­setpiat turan wyti i'ewyte i'atu­pyhik piat turan i'atu­we'y'utui turan i'atuesy'at turan i'atu'ahu turan ha'awyte yt ewei'atu­po­wyro hin i mi'iria uimohey haria ihaky'e'i rakaria e. Mi'i hap e'at pe ti i'ewyte yt uipo­wyro hin i are aru uipo ran kawiaria pe.
MAT 25:46 Mio tã are hawyi ti mi'iria tuwehyt'ok ta'yn ho'opot at ka'ap hap kape. Irania'in waku nug uhepiat haria uhemiit pome'eg haria tuwehyt'ok aru wuat'i e'at piat ieĩne'en hap sese kape e Iesui ahepe topot­mu'eria pe Uriweira ypia yity'ok tote. Mi'i hawyi Uito Mateu atiwan mesuwe are.
MAT 26:1 Iesui ti'atumu'e yne ra'yn hawyi to'e topot­mu'eria pe
MAT 26:2 — Mũki'ite e'ihot'ok hawyi ai'ywa­niaria tuwat ra'yn yne ienuk hap nug hamo mekewat ahewa­nĩ­kaptia sa'awy'iwuat Esitu'in miaria po pywiat ho'opot hap kaipywiat ahenõ'ẽ hap kapiat watetup hap e'at ta'atunug irane hamo tuwat itote e. Pyno to'iro uhowawi e katu­pono Eheyke'et auka hamuat e'at put'ok'e ra'yn e. Uhewa­nĩ­kaptia po pe ui'auka aria'yp posak etiat hamuat e'at put'ok'e ra'yn e Iesui.
MAT 26:3 Mi'i turan pa'i ko'i te'eru­wa'a­tunug na'yn. Wẽtup ok pa'i po'og iwato rakat Ka'iwa e hap hat rakat yat pe te'eru­wa'a­tunug. Pyno yne yne tõ'ẽ tõ'ẽ pa'i kororia irania'in wywo.
MAT 26:4 Mi'i hap tote to'oehay to'ope to'ope aikotã Iesui waku ta'atu­pytyk hawyi ta'atu'auka yt uwe mikuap mo i ti e hap ete to'oehay to'oehay.
MAT 26:5 Yt naku i o som wato­pytyk ahenuk koro hap e'at pe i'atu'e. Yt naku i o som sehamo wato­pytyk i'atu'e katu­pono mi'i pote wo'o'auka hap ne'i topyhu'at miit'in sem e hap tote i'atu'e.
MAT 26:6 Mi'i hawyi Iesui put'ok'e tawa Petania pe temiit'in nywo. Mi'i hawyi tuwehyt'ok Simãu yat pe sa'awy'i­tewuat hepihi pihi rakat yat pe.
MAT 26:7 Itotiat i'atuenuk turan wẽtup ok hary­poria tut mohag hy ikap takat hekat rakat mohag hy wywo. Heiam nu Arapatu kawiat wywo ikahu kahato rakat i'ewyte ihy ikamhig se kahato rakat wywo. Mi'i hawyi put'okto'e hawyi toi'okpun yne Iesui asap ete henuk turan.
MAT 26:8 Mi'i tã hary­poria tunug pote hemiit'in yt i'atu­wese i hary­poria minug hap ete. Yt kan hamo i toi'okpun i'atu'e to'ope.
MAT 26:9 Waku po'og mi'i wati­we­neru hawyi watum ha'up yt hekat i rakaria pe i'atu'e. Yt kat hamo hin i wyti saĩke toi'okpun howoity rakat saĩke i'atu'e. Waku ti saĩke wati­we­neru mi'i hawyi ha'up iwato'in nakat watum yt hekat i rakaria pe i'atu'e to'ope hemiit'in.
MAT 26:10 Mio tã i'atu'e hap Iesui tikuap hawyi to'e i'atuepe — Yt eipy'ahak tei'o mana ete katu­pono wakuap ti uhepe tutunug e. Mi'i tupono eiwẽ­pohep to mi'i hap ete e. Katu­pono ti ikahu kahato ti iminug atipuẽti e.
MAT 26:11 Katu­pono yt hekat i rakaria i ti aru tukupte'en wuat'i e'at pe mesuwat yi tote eiwywo eimi­po­wyro ko'i wuat ma'ato Uito aru yt mot'i areĩne'en eipy'a­setpe e temiit'in me.
MAT 26:12 Aikotã ai'ywania tikã'ã iku'uro rakat mohag ikap takat wywo hap ewy ti meiũwat hary­poria tunug uhete uiku'uro hap e'yianmete e.
MAT 26:13 Mi'i tupono are'e pywo ti aru meiũran wuat'i yi wato hap ok tã aikotã hary­poria minug waku uhetiat hap ta'atu­henoi henoi e. Wuat'i ywania ti aru ikuap wakuap uhetiat iminug hap e.
MAT 26:14 Mi'i hawyi wẽtup hemiit 12 ok hap Iuta Ikarioti sa'yru toto ra'yn pa'i kororia kape.
MAT 26:15 Mi'i hawyi — Kat aru Iesui puẽti hap sa'up ewetum uhepe ahenoi ehepiat ipytyk hap pote e.
MAT 26:16 Mi'i hawyi Iuta pe ta'atuium 30 ape Iesui enoi hap sa'up mo. Mi'i hawyi Iuta tuwa­nẽtup aikotã waku tutunug ima'at hamuat hap ete. Toikat kahato aikotã miat ipytyk hamuat.
MAT 26:17 Mi'i turan howakai te wuat man teneg u hap ete irania'in hemiit'in apo'i'atu'e — Aikope som waku watunug meiũ aheman teneg u hap i'atu'e. Aikope aru watenuk i'atu'e.
MAT 26:18 Mi'i hawyi Iesui to'e — Pyno eweiwat ro tawa wato kape e. Put'ok'ei'e hawyi ti aru eweipuẽti wẽtup ok miit itote e. Mi'i pe ewehenoi — Uruka'iwat e'at ti put'ok'e ra'yn ti ewei'e ran o e. Uiku'uro hamuat e'at yt pya hin i ra'yn wyti e ti Aika'iwat ewei'e o e. Mi'i pote ti tenuk teran temiit'in nywo e'yat pe ewei'e o mekewat man u hamo getap ka'iwat pe e.
MAT 26:19 Mi'i hawyi tuwat ra'yn Iesui ehay wywo tuwat hawyi aikotã Iesui mienoi ewy yne ra'yn ta'atu­puẽti. Mi'i hawyi ta'atu­po­rokpun itote ienuk hap imiky'esat ewy ra'yn.
MAT 26:20 Mi'i hawyi wãtym i turan toto ra'yn Iesui temiit'in kape i'atu­wywo tenuk hamo. Mi'i hawyi te'era'apyk itote mekewat mesa ypyke.
MAT 26:21 Mi'i hawyi i'atuenuk turan Iesui to'e — Pywo pe ti are'e wẽtup ok ti meiũpe aiwywuat ui'auka kary hanuat hat e.
MAT 26:22 Mio tã e pote ipotmu'eria te'eru­wa­nẽtup kahato hawyi i'atunik kahato ra'yn haty kahato i'atuete mio tã e hap ihay. Mi'i hawyi apo'i'atu'e — Uito apo'e wẽtup ok i uito apo'e.
MAT 26:23 Mi'i hawyi Iesui to'e — Ta'i mekewat uiwywuat man puka mi'u moi miat hat wyti aru ui'auka kary hat e irania'in me Iuta etiat.
MAT 26:24 Ta'i tohenoi yne sa'awy'i miwan me aikotã Eheyke'et auka hamuat etiat hap e. Ma'ato ti mekewat uima'at hat Tupana ti'uhu kahato ti aru e. Ta'i Eheyke'et wyti miit'in mi'auka wo ra'yn topyhu'at aikotã sa'awy'iwuat e hap ewy. Ma'ato ima'at hat ti po'og yt naku i pe topyhu'at hamuat aru e. Ta'i po'og waku iku'uro toty ymyẽpe te uima'at rẽ e. Po'og waku yt karãpe i ra'yn toĩne'en e.
MAT 26:25 Mi'i hawyi tokosap ta'yn Iuta irania'in saipepe to'e hamo — Uito apo ema'at hanuat hat uiKa'iwat e. Mi'i hawyi Iesui tiwesat — Ta'i e'e hap ewy mehĩ e Iesui Iuta pe apo'e hawyi.
MAT 26:26 Mi'i hawyi Iesui tat man hawyi waku e Tupana pe hawyi toipikpik ta'yn. Mi'i hawyi tutum temiit'in me hawyi to'e — Ewetat ro mesuwat man mehĩ'in e. Eweitu'u ro mi'i ti uipiit e.
MAT 26:27 Mi'i hawyi totat ihy kui'a piat. Mi'i hawyi waku e Tupana pe. Mi'i hawyi toimõ'ẽ temiit'in me hawyi to'e i'atuepe — Eiwe'y'u ro e.
MAT 26:28 Mi'i ti uhuu at hap miit'in wehik Tupana etiat hamuat yn i'atu­minug sa'ag miwaure Tupana piat hamuat e.
MAT 26:29 Mi'i hawyi ti aru yt karãmuat i ra'yn aresa­pohy'u eiwywo mesuwe ma'ato meiũran aru karãpe Ui'ywot topyhu'at Morekuat nuat mi'i turan aresa­pohy'u eiwywo i ra'yn aru e.
MAT 26:30 Mi'i hawyi Te'eru­wepy hawyi tuwat ra'yn Uriweira ypia e'yity'ok kape.
MAT 26:31 Mi'i hawyi put'ok'i'atu'e itote hawyi to'e Iesui i'atuepe — Ta'i mesuwat ewãtym ni aru ui'atoiat yne eipe. Eiwesytpok aikowo aikowo aikotã miwan miat to'e hap ewy — Ati'ahyk hawyi iku'uro I'atu­ka'iwat hawyi ihũria tuwe­sytpok yne e hap ewy tuwat tuwat kowo'i kowo'i ihũria e miwan me. Mio tã e hap ewy ti aru mesup ewãtym ui'atoiat yne ra'yn eipe e.
MAT 26:32 Ma'ato areĩne'en i ra'yn gu'uro pyi hawyi ti aru woro­ho'o­puẽti i te ra'yn yi Karireia pe e. Ehe'yianmete areto. Mi'i hawyi ti itote ra'yn wato'o­puẽti aru e.
MAT 26:33 Mi'i pote Peteru to'e — Uito aru yt karãmuo hin i aremõti epupi e wen. Yt karãmuo hin i aru woro'atoiat En e Peteru.
MAT 26:34 Mi'i pote Iesui to'e — U pãi mesuwat ewãtym ti aru — Yt atikuap i ra'yn Iesui ere ra'yn mye'ym muat waipaka ehay e'yianmete — Yt atikuap i wyti uito ere ti aru.
MAT 26:35 — Ta'i yt hin i aru ma'ato ui'auka ti aru ewywo uito irania'in ma'ato ti aru yt woro'atoiat hin i aru e Peteru. I'ewyte irania'in hemiit'in Peteru ehay ewy te te'ero'e Iesui pe.
MAT 26:36 Mi'i hawyi put'okta'atu'e mikoi ypia Kese­mani e hap tote. Mi'i hawyi to'e topot­mu'eria pe — Ewei'apyk to meiũpe. Mi'i hawyi ti Uito kuepuo areĩne'en uhehay Tupana wywo turan e.
MAT 26:37 Mi'i hawyi totioto Peteru i'ewyte typy ok Sepeteu sa'yru'in totioto yt pya i irania'in kai. Itote hawyi tohaty u kahato topy'a pe. Tuwa­nẽtup ho'opot hap kape yn.
MAT 26:38 Itote iwanẽtup hap yt he hin i ra'yn. Itote i'arot yn toĩne'en. Mi'i hawyi to'e topot­mu'eria pe mye'ym ok takaria pe — Ta'i ahaty'u hap porap ui'auka e. Paa'ui'e hap wyti e. Mi'i tupono ewehẽtup are Tupana pe uipo­wyro hamuat hap e. Pyno uheka­tuwy wo ro eweikupte'en meiũpe e. Yt eweiket rei'o. Eweheha'at ro e Iesui mye'ym ok takaria pe.
MAT 26:39 Mi'i hawyi toto porap'i hawyi porog'e yi tote to'owapuo hawyi to'e — Ui'ywot e etat meikowat kui'a uipo pyi are ma'ato — Etu'u ro ere pote atu'u emiky'esat ewy e Iesui To'ywot pe.
MAT 26:40 Mi'i hawyi ta'aipok i ra'yn temiit'in mye'ym ok takaria kape. Mi'i hawyi toi'atu­puẽti i'atuket turan ne'i ra'yn. Mi'i hawyi to'e Peteru pe — Yt ehẽtup kuap i apo wẽtup eura i wyti uhupi e.
MAT 26:41 Ewe'eg wo o. Ehẽtup o Tupana kape — Urumoe­saika kahato uruiã'ãg hap pupi Uruka'iwat atoiat hap pupi ewei'e ro Tupana pe e. Ta'i atikuap ti eweiky'esat kahato Tupana miky'esat nug hap ma'ato ti yt put'ok'e i ehesaika hap inug hamo e Iesui topot­mu'eria mye'ym ok takaria pe.
MAT 26:42 Mi'i hawyi ta'aipok To'ywot kapiat tehay hamo hawyi to'e — Ui'ywot yt etihep kuap i pya uikai meikowat kui'a uipo pyi ho'opot hap e mi'i pote waku atu'u emiky'esat ewy e.
MAT 26:43 Mi'i hawyi ta'aipok i ra'yn temiit'in kape. Mi'i turan te'eroket i ra'yn. Yt mehit'i'atu'e kuap i sese yt te'eroket teran i pytkai.
MAT 26:44 Mi'i hawyi ta'aipok i ra'yn mye'ym mo ra'yn tehay Tupana kapiat hamo. Mi'i hawyi i'ewyte te tohẽtup.
MAT 26:45 Mi'i hawyi ta'aipok i temiit'in kape. Mi'i turan iwyria'in te'eroket i ra'yn. Mi'i hawyi to'e — Uiwyria'in pyno eweiket re apo'are. Put'ok'e ra'yn ti koitywy uima'at hat. Eheyke'et ti koitywy yt nakuaria i po pe ra'yn topyhu'at.
MAT 26:46 Ei'ãpe'ok'am no katu­pono ti uima'at hat ti tut ra'yn e temiit'in me.
MAT 26:47 Mio tã e turan Iuta put'ok'e ra'yn. Tõ'ẽ tõ'ẽ Iuta upi typy'i kahato aria'yp ãkun wywo kyse'yp ko'i wywo Iesui kape ipak pak hamo. Pa'i kororia nagnia akag ko'i tõ'ẽ tõ'ẽ Iuta wywo.
MAT 26:48 Katu­pono sa'awy'i ti Iuta ti'atumu'e mu'e surara'in yianmete — Put'ok'ui'e hawyi ti aru Iesui ra'yn ati'ãpysig e i'atuepe. Mi'i turan o eweto­pytyk ta'yn e.
MAT 26:49 Mi'i hawyi put'okto'e hawyi tokosap Iesui kape hawyi to'e — Wãtym Uimu'e hat e. Mi'i hawyi ti toi'ãpysig na'yn.
MAT 26:50 Mi'i pote Iesui — Kat hamoĩ eriot uiwy e. Mi'i pote hupiat õ'ẽ haria topytyk ta'yn.
MAT 26:51 Mi'i pote wẽtup ok ipotmu'e i'yatypiat hat tekyse'yp towope pyi totekyi hawyi wẽtup ok pa'i emiit toi'ahape hep ta'yn.
MAT 26:52 Mi'i pote Iesui to'e — Etopag i ro ekyse'yp ewope pe mehĩ e temiit Peteru pe. Katu­pono uwe uwe tuwepyk mi'i hat wyti miit'in mipoepyk wo hawyi iku'uro rakano topyhu'at e. Uwe uwe ti'auka miit mi'i miit miit'in mi'auka wo aru tapyhu'at.
MAT 26:53 Katu­pono atiky'esat pote ti yt niatpo hin i ahẽtup Ui'ywot kape atipy kaipyi uipo­wyro hamuat. Meremo tõ'ẽ uipo­wyro hamo po'og typy'i kahato wuat sakpuaria surara'in sem e.
MAT 26:54 Katu­pono sa'awy'ite ui'auka hamuat yn ta'atu­henoi miwan me. Mi'i pote yt ahẽtup kuap i atipy kape uipo­wyro hamuaria surara'in sem e.
MAT 26:55 Mi'i hawyi Iesui to'e õ'ẽ haria pe — Kat hamoĩ eweĩ'ẽ uhowawi kyse'yp ko'i wywo aria'yp ãkun ko'i wywo. Pyno sero'ok'e hat apo Uito. Mi'i pote apo eweĩ'ẽ uhowawi. Sa'awy'i te kue areĩne'en wuat'i e'at pe Tupana mõtypot yat pe eimu'e haype ma'ato kue eipe yt kat ewei'e hin i. Yt uipytyk i eipe pãi e.
MAT 26:56 Ma'ato apo koitywy eweikuap pyno katu­pono uipyhik ta'yn eipe mesup e. Pyno ahenoi ehepe. Ta'i sa'awy'i­te­wuaria Tupana ehay enoi haria henoi henoi meikotã hamuat hap yn. Mi'i hawyi aru i'atu'e ta'atu­miwan me mi'i hap ewy ra'yn meiũ e. Mi'i hawyi ti ipotmu'eria ikohyeput Iesui yaty­pepyi ta'atu'atoiat yne.
MAT 26:57 Mi'i hawyi ipytyk haria tioto ra'yn Iesui pa'i koro sese Ka'iwa e hap yat kape ra'yn. Aikope tukupte'en iwan miat Tupana ehay enoi haria kape nagnia ehay enoi haria te'eru­wa'a­tunug hap kape.
MAT 26:58 Meiũran Peteru toto ma'ato pya i'atukai yt heremo i ma'ato. Mi'i hawyi put'ok'e mekewat pa'i wato yat ete hawyi tokosap i'yat pyhyp hap surara e'oken'ypy kape. Mi'i hawyi ta'apyk itote pa'i kororia emiit'in ywytpe. Ta'akasa teran aikotã ta'atunug Iesui ete hap kape.
MAT 26:59 Mi'i hawyi itote pa'i kororia tikat kahato sehay sa'ag yne kaipyi nagnia wo'onãpin haria ko'i wywo. Kat pote yt pywo pe hin i ta'atu­kuasa sa'ag i'auka hamuat.
MAT 26:60 Ma'ato yt aikotã hin i ta'atu­puẽti sehay sa'ag Iesui etiat. Katu­pono ta'atu­henoi yt to'o'ewy'ewy i. Mi'i pote yt to'osat'i i'atu­wa­nẽtup hap ko'i. Mi'i turan ni ma'ato put'ok'i'atu'e typy ok henoi hanuaria hawyi te'ero'e
MAT 26:61 — Ta'i meiẽwat Miit wyti ihay uruehamo — Atipugha ti aru meiẽwat Tupana mõtypot yat e ti i'atu'e. Mi'i hawyi — Mye'ym e'at pe yn atimopoĩ'ãm i e i'atu'e.
MAT 26:62 Mio tã i'atu'e pote pa'i koro ipoĩ'ãm na'yn hawyi to'e Iesui pe — Yt eti'atu­wesat i apo mio tã i'atu'e pytkai e. Eti'atu­wesat ro e.
MAT 26:63 Ma'ato yt kat e hin i. Mi'i hawyi pa'i koro to'e i — Ehenoi ro Tupana kaipywiat En hap Miit'in Porekuat nuat eut hap sio apo yt Mi'i i En e.
MAT 26:64 Mi'i hawyi to'e Iesui pa'i koro pe — Ta'i mehĩ mio tã e'e hap ewy ti mehĩ e. Ta'i meiũran ti aru ewei'akasa miit'in Eyke'et Tupana po sese kai mekewat po'og hesaika rakat po sese kai apyk pe tut atipy kaipyi ywyhig me ewei'akasa ti aru. Ta'i mi'i hap ti aru ewei'akasa e Iesui pa'i koro pe.
MAT 26:65 Mio tã e pote pa'i koro tuwe­ka­misa wato hiot hawyi to'e i — Ta'i heso kahato ti Tupana ete tuwe­pehik pehik topy'ahak haype. Pyno koitywy watikuap kahato sese ra'yn heso hap. Ta'i tuwe­kuasa kahato ra'yn ti tehay wo. Ahehamo kahato ra'yn tuwema'at sese ra'yn. Pyno watikuap ta'yn koitywy. Toran na'yn ahehay e pa'i koro irania'in me.
MAT 26:66 Mio tã to'e hawyi apo'e irania'in me — Pyno aikotã wato'e aru koitywy meiũwat Miit ete e. Mi'i hawyi ta'atu­wesat — Ta'i mio tã e hat auka potiat ne'i waku i'atu'e.
MAT 26:67 Mi'i hawyi kuitu'i'atu'e Iesui owa ete. Ta'atu'ahyk ta'atupo'ok. Irania'in howa­petek ta'atu­popep mo.
MAT 26:68 — Pyno koitywy pywuat Tupana Mipo'oro En pote ehenoi ro uwe uwe piat ewapetek haria set ko'i i'atu'e.
MAT 26:69 Mi'i turan Peteru ta'apyk mekewat getap e'oki­pyke. Mi'i hawyi wẽtup ok makuptia pa'i koro eropat hat put'ok'e Peteru ete — An e worokuap kahato en. Iesui emiit en yi Karireia piat en e.
MAT 26:70 Mi'i pote Peteru tiwesat — U yt uito i rat e. Yt atikuap i ehay e.
MAT 26:71 Mi'i hawyi Peteru toto mekewat oken'ypy wato kawianuat og kape ra'yn. Tokosap mekewat hary­poria hit yaty­pepyi. Mi'i hawyi itote wẽtup ok i ra'yn i'atue­ropat hat re hary­poria kawiat to'e towyria'in me — Atikuap ti uito meiẽwat. Mekewat tawa Nasare piat turanuat Iesui wywuat ieĩne'en hat wyti e.
MAT 26:72 Mi'i hawyi Peteru to'e itotiaria pe — Yt rat e yt atikuap i ti uito Mi'i Miit e. pywo ti yt uheso i rat. Tupana tikuap kahato yt uheso i hap e Peteru.
MAT 26:73 Mi'i hawyi irania'in tokoka'at Peteru kape mi'i hawyi te'ero'e — Ta'i uruikuap ti en. En ni wyti wẽtup ok Iesui potmu'e ti rat katu­pono yi Karireia piaria ehay ewy ra'yn ehay i'atu'e.
MAT 26:74 Mio tã i'atu'e pote toiwesat sa'ag ne'i ra'yn — Yt atikuap i ti uito Mi'i Miit tupono. Yt atikuap i kahato rat Mi'i Miit. Uheso pote aru waku ra'yn Tupana ui'apiheg e. Ma'ato yt uheso i rat e turan waipaka ihay ra'yn.
MAT 26:75 Mi'i pote so hot'ok'e ra'yn Iesui ehay kape — Waipaka ehay e'yianmete ti aru — Yt atikuap i wyti Mi'i Miit ere ra'yn uhepiat pe mye'ym mo e Iesui hap kape iwatetup ta'yn. Mi'i hawyi tuwepik ta'yn itote pyi tuwak kahato ra'yn Peteru tominug sa'ag hap upi. Mi'i tã sa'awy'iwuat hap etiat atikuap. Mi'i hawyi atunug uimiwan mesuwe are uito Mateu.
MAT 27:1 Mi'i hawyi hunete te'eru­wa'a­tunug pa'i kororia nagnia ko'i wywo aikotã waku Iesui ta'atu'auka hap kat hamo torania tapy'yiaria akagnia ko'i wywo.
MAT 27:2 Mi'i hawyi ta'atupo'i po'i ra'yn Iesui haity wo. Mi'i hawyi ta'atue­reto ra'yn wanĩ­kaptia porekuat Piratu e hap kape. Mi'i turan Iuta tut ra'yn Iesui ma'at hat topo piat ha'up wywo.
MAT 27:3 Mi'i hawyi tuwa­nẽtup hawyi Iuta to'e pa'i kororia pe — Ahaty'u uipy'a pe ra'yn uiminug sa'ag Uika'iwat etiat hap pãi e i'atuepe. Ewetat ro mesuwat sa'up sa'ag uipo pyi e.
MAT 27:4 Ta'i ati'aparap kahato ti uito. Atum Uika'iwat ehepe pote yt kat upiat hin i i'aparap hat i atiwe­neru ehepe e. Mi'i hawyi ta'atu­wesat Iuta — Pyno koitywy yt urutu­wa­nẽtup teran hin i ra'yn ti eminug kape i'atu'e. Eminug sa'ag epe topyhu'at uhyt i'atu'e. Kat etunug ti aru ewanuat ra'yn uhyt i'atu'e.
MAT 27:5 Mi'i hawyi Iuta tipo­rokpun na'yn mekewat sa'up 30 ape rakat Tupana mõtypot yat koro pe. Mi'i hawyi totoiat ha'up itote hawyi toto tuwe'auka hamo. Mi'i hawyi haity wywo tuwe'ut'yp kytyp ywaiti hawyi iku'uro.
MAT 27:6 Mi'i hawyi pa'i kororia te'ero'e — Aikotã som mesuwat miit suu sa'up ete watunug i'atu'e. Yt naku i watopag mi'i Tupana mõtypot yat piat heiam me i'atu'e.
MAT 27:7 Te'eru­wa­nẽtup hawyi te'ero'e — Pyno waku ti watikyi'at mekewat kamũti wuat mipuruk puruk yi ka'a. Mi'i hawyi waku itote watisyp iku'uro rakaria yt uwe mikuap i ko'i i'atu'e. Mi'i hawyi ta'atukyi'at mekewat 30 ape rakat sa'up mo.
MAT 27:8 Mi'i hawyi mi'i yi ta'atu­setnug — Mi'auka suu sa'up muat mikyi'at i'atu'e. Pyno mesup te mi'i set topyhu'at itote.
MAT 27:9 Pyno aikotã Tupana ehay enoi sa'awy'iwuat Ieremia to'e hap ewy — Meiũran ti aru ipiit sa'up ta'atukat karania upi i'auka hap sa'up ta'atukat hawyi 30 ape waku i'atu'e ti aru e.
MAT 27:10 Mi'i sa'up mo ti aru ta'atukyi'at kamũti wuat mihephep yi ka'a e Ieremia sa'awy'i miwan me hap etiat tohenoi.
MAT 27:11 Mi'i hawyi Iesui put'ok'e morekuat yat pe hawyi morekuat tikaykay tuwe­wawi apoto'e hamo — En apo Iuteuria ywania Porekuat sio yt e. Mi'i pote Iesui to'e — Mio wat ehay ewy uhyt e.
MAT 27:12 Mi'i hawyi morekuat pe te'ero'e pa'i kororia nagnia'in — Meiũ Miit yt naku i kahato rakat i'atu'e. Ma'ato Iesui yt i'atu­wesat hin i mio wuat i'atueso tepiat pytkai.
MAT 27:13 Mi'i hawyi morekuat to'e Iesui pe — Mio tã i'atu'e ti epe Uhyt ewanĩ­kaptia e. Yt naku i i'atu'e ti epiat pe Uhyt e. Kat ere kahu i ro pote eti'atu­wesat mio tã e epiat haria e.
MAT 27:14 Ma'ato Iesui ipo'inik ne'i. Yt kat e hin i toi'atu­wesat mio tã e haria. Mi'i hawyi morekuat tuwa­nẽtup kahato kat pote yt toi'atu­wesat i hap kape. Kat pote som — Yt atunug hin i mi'i tã yt e hin i pãi e morekuat tuwa­nẽtup hawe.
MAT 27:15 Pyno yne anu pe mekewat ienuk wato hap turan morekuat tipo­re­nõtem wẽtup ok wo'opyhik hawyi miit'in mowepit hamo ta'atu­mi­ky'esat ewy.
MAT 27:16 Mekewat e'at pe toĩne'en wo'opyhik hawe po'og yt nakuat i rakat Parapa e hap.
MAT 27:17 Mi'i hawyi morekuat ti'atu­kaykay miit'in hawyi to'e — Waku mesuwat anu atipo­renõ'ẽ wẽtup ok aimi­pyhik e. Uweĩ eweiky'esat e apo'e. Pyno waku apo atipo­re­nõtem mekewat Iesui sio ei'e hap eimiset'ok wuat'i po'og yt nakuat i Parapa e hap e.
MAT 27:18 Mi'i hawyi Piratu tikuap i'atu­we­moe­ha'y­wywi hap tuwa­nẽtup hawe Iuteuria akag yt tiky'esat i miit'in tuwat Iesui kape hap.
MAT 27:19 Mi'i hawyi Piratu ta'apyk te'amyap tote aikope more­kuaria to'e hap miit'in wakuat sio yt hap kuap hap tote. Mi'i turan ihary'i tuwehay po'oro te'aito kape — Yt etunug sa'ag nei'o mekewat Iesui e hap het rakat ete to'e hap. Ahaty'u kahato uimu'etu wuat mi'i hap e. Pyno uhe'aito epohep to merep Mi'i Miit ete e.
MAT 27:20 Mi'i hawyi pa'i kororia nagnia'in te'ero'e miit'in me — Pyno waku wati­putsit Parapa mi'i hawyi waku wati'auka Iesui ewei'e ro morekuat pe i'atu'e miit'in py'asetpe. — Mio tã ewei'e ro morekuat pe i'atu'e. Mi'i hawyi i'atuehay upi tuwat Piratu kape — Waku etiputsit Parapa hawyi waku eti'auka Iesui te'ero'e hamo.
MAT 27:21 Mi'i hawyi morekuat Piratu to'e i'atuepe — Pyno ewehenoi ro uwe waku atiputsit wo'opyhik hawiat e. Mi'i hawyi — Waku Parapa i'atu'e.
MAT 27:22 Mi'i hawyi to'e i — Aikotã are aru atunug mekewat Eipo­rekuat nuat Tupana Mipo'oro ete e. Mio tã e pote — Erehay po'oro ro i'auka aria'yp posak etiat hamo i'atu'e.
MAT 27:23 Mio tã i'atu'e pote — Kat hamo kat iminug sa'ag po'ypyi ten ati'auka e morekuat. Mi'i hawyi ta'atuehay pirik wo — Erehay po'oro ro epiat i'auka aria'yp posak etiat hap i'atu'e.
MAT 27:24 Mi'i hawyi Piratu tuwa­nẽtup hawe to'e — Tu'uka irane apo pãi e. Mi'i hawyi morekuat to'e temiit'in me — Eweherut y'y e uiwe­posei miit'in ehamuat hamo e. Ta'atu­herut hawyi tuwe­posei wuat'i miit'in ehamo. Tuwe­posei haype to'e — Areposei meiũ uipo meiũwat Miit wakuap auka hap suu yt atiky'esat i uipo ete pote e. Yt uito i i'auka hat to'e haype.
MAT 27:25 Mi'i hawyi te'ero'e — Yt eete i ti aru uhyt i'atu'e uruete urumẽpyt'in ete aru i'atu'e. Ta'i Iesui auka hap ti aru uruete uhyt i'atu'e. Uruete aha'yru'in ete uhyt i'atu'e Iuteuria.
MAT 27:26 Mi'i hawyi Parapa toiputsit wo'opyhik hawyi tutum i'atuepe. Mi'i hawyi toipo'oro tesu­rara'in Iesui pak pak hamo. Ta'atupak pak hawyi morekuat toiat ra'yn Iesui tesu­rara'in po pe i'auka hamo aria'yp posak etiat i'auka hamo.
MAT 27:27 Mi'i hawyi hesu­rara'in tioto morekuat koro yat pe. Mi'i hawyi ta'atu­kaykay yne morekuat esurara'in temiit'in sese Iesui kape.
MAT 27:28 Mi'i hawyi Iesui esokpe ta'atuhep yne hawyi morekuat esokpe wato ihup takat ipiit pe ta'atupag.
MAT 27:29 Mi'i hawyi ta'atupi'ig morekuat e'amãtap ewywuat morekuat painug hap ewy hehu rakat he'amãtap mo ma'ato ta'atu­mi­kyry'i hap ne'i mi'i tã ta'atunug. Ta'atupag Iesui akag me haty rakat. I'ewyte wy ta'atupag aria'yp ipo pe. Mi'i hawyi te'eru­we­pỹ'ã­tutuk ta'atu­mi­kyry'i haype. — Ereĩne'en mot'i ro mesuwat yi tote Urupo­rekuat no i'atu'e Iuteuria Porekuat no i'atu'e ta'atuehay mikyry'i haype.
MAT 27:30 Kuitu kuitu'i'atu'e Iesui ete. Mi'i hawyi ipo piat aria'yp ta'atusat hawyi ta'atu'ahyk ahyk mi'i wo i'akag ete.
MAT 27:31 Ta'atu­mi­kyry'i kahu ra'yn hawyi ta'atuhep i ra'yn ta'atu­mipag morekuat esokpe ihup takat. Mi'i hawyi ta'atupag iwat hesokpe sese i ra'yn. Mi'i hawyi itote pyi ta'atue­roto i'auka hamuat kape ra'yn.
MAT 27:32 Mi'i turan wẽtup ok miit ta'atu­puẽti mu'ap tote tawa Sireniu kaipywiat. Wẽtup ok Simãu e hap het rakat. Mi'i pe te'ero'e — Ehereto meiũwat Miit e'aria'yp posak i'atu'e tope.
MAT 27:33 Mi'i hawyi put'okta'atu'e yity'ok tote Iesui wywo yity'ok Miit Akag Kag ewywuat i'atu'e hap het rakat kape ta'atu'e­roto ma'ato i'atu­pusu puat Koukota e hap het rakat kape.
MAT 27:34 Mi'i hawyi itote ta'atuium sapo hy puo mohag haty monik hamuat hap nop takat. Toterep hawyi toikuap hawyi yt tutu'u i po'og neran.
MAT 27:35 Mi'i hawyi ta'atuhep hesokpe ko'i ipiit pyi. Mi'i hawyi ta'atu'ateg ipo ete ipy ete aria'yp posak ete. Hesokpe ta'atumõ'ẽ neran pote te'eru­we­ma­hara aikotã waku hesokpe ta'atumõ'ẽ hamuat hap. Aikotã sa'awy'ite Tupana ehay enoi haria henoi mi'i tã — Meiũran ti aru uhesokpe ta'atupat'ok pat'ok. Mi'i hawyi ti aru te'eru­we­ma­hara uwe topyhu'at uheka­misa wato wywuat hamuat kat hamo hap ete ti aru te'eru­we­ma­hara e sa'awy'i Tupana e hap ewy ta'atunug.
MAT 27:36 Mi'i hawyi apyk pyi surara'in yt ta'atu­ky'esat i irania'in ne'i ihep haype. Mi'i pote surara'in i'apykok kahato te'eraha'at kahato.
MAT 27:37 Mi'i hawyi ta'atu­miwan ta'atu­pehik Iesui apy tote aikotã yt nakuap i ko'i tutunug hap enoi hap — Meiũ ti Iesui Aipo­rekuat koro. Meiũ ti Iesui Iuteuria Porekuat koro e hap.
MAT 27:38 Mi'i hawyi i'ewyte ta'atu­pehik i'atu'aria'yp posak ete typy ok sero'ok'e haria wẽtup ok ipo ran kai wẽtup ok ipo sese kai tukupte'en ta'atu­pehik.
MAT 27:39 Mi'i hawyi hepiok haria i'atuehay mikyry'i kahato tokoka'at no.
MAT 27:40 — Ereha­kyera'at ro ereha­kyera'at ro meiẽpe pyi i'atu'e. — Tupana mõtypot yat atomoma hawyi atunug mye'ym e'at yn e hat meiẽ i'atu'e. Pywuat Tupana Sa'yru sese pote ti aru era'apyk to meiẽpe pyi ewewi aria'yp posak pyi i'atu'e.
MAT 27:41 I'ewyte pa'i kororia nagnia'in ehay enoi haria te'eru­we­moko'i moko'i howawi.
MAT 27:42 — Irania'in ti toi'atue­ha­kyera'at kuap i'atu'e ma'ato tuwewi ti yt tuwe­ha­kyera'at kuap hin i i'atu'e. Ma'ato irania'in te'ero'e — Pywuat e'apyk aria'yp posak tote­pywiat pote ti ran meremo pywo rasig Isareu ywaniaria Porekuat nuat wato'e i'atu'e.
MAT 27:43 Ta'i heso kahato ti — Tupana atimohey e ma'ato pywo imohey hat pote tut Tupana aria'yp posak pywiat ieha­kyera'at hamo i'atu'e ta'atuehay mikyry'i haype.
MAT 27:44 I'ewyte mipehik iywyt piat sero'ok'e haria te'ero'e ta'atuehay mikyry'i hap te wy.
MAT 27:45 Mi'i hawyi atpo­sake pyi i'ypyryp hap put'ok'e wãtym i kape.
MAT 27:46 Mi'i hawyi i'ypyryp we Iesui tuwatka haty wo wãtym i turan — Uhetu­pana Uhetu­pana kat poteĩ ui'atoiat En e. Ma'ato tuwat topusu puo — Erai erai irama sapa­tania e.
MAT 27:47 Mio tã e pote meimẽ­puaria te'ero'e — Meiẽ ti Eria sa'awy'iwuat Tupana ehay enoi hat ra'yn toikaykay topo­wyro hamo i'atu'e.
MAT 27:48 Mi'i hawyi aria'yp hit ẽpo ete ta'atupo'i amũkiusu'ap ewywuat hawyi ta'atu­puka ihy haiug nakat pe mi'i hawyi tutum turan waĩ'i'atu'e.
MAT 27:49 Waku wahe­katup mio apuru tut Eria ipowyro hamo sio yt i'atu'e.
MAT 27:50 Mi'i hawyi Iesui kak'e toku'uro haype hawyi ipyhu tek'e ra'yn hawyi iku'uro sese ra'yn. Tutum na'yn toieĩne'en hap.
MAT 27:51 Mi'i hawyi Tupana mõtypot yat e'okenhyp sokpe kawiat hiot'e ra'yn ywaiti pyi yi kape. I'ewyte wy yi ti huruk'e itote. I'ewyte wy nu wuat itotiat i'apok'e ra'yn nu.
MAT 27:52 I'ewyte wo'osyp hap i'ahot'e ra'yn yi tyry'e pote Iesui iku'uro turan. Mi'i hawyi tukupte'en i ra'yn gu'uro pywiat sa'awy'iwuat Tupana ehay moherep haria.
MAT 27:53 Mi'i hawyi mi'iria Iesui ewy tukupte'en i ra'yn gu'uro pywiat hawyi tuwat tuwat Tupana etawa Ieru­sarẽi kape te'eru­mo­herep itotiaria miit'in kapiat hamo.
MAT 27:54 Ma'ato sa'awy'i Iesui ku'uro hap tote surara'in ta'atu'akag wywo i'apykok miit'in mupi hamo. Te'era'a­kasa yne aikotã aikotã iku'uro hap kape yi tyry'e hap kape. Mi'i hawyi te'eroken'ẽ kahato hawyi te'ero'e — Ta'i meiũ ti Tupana Sa'yru sese ti i'atu'e.
MAT 27:55 Mi'i turan tukupte'en hary­poria'in iwywuat hewyry rakaria iku'uro hap kapiat akasa haria pya pywiat seha'at haria. Mi'iria ti sa'awy'i tõ'ẽ Iesui upi yi Karireia kaipyi Iesui powyro hewyry te turanuat mi'iria.
MAT 27:56 Itote toĩne'en mekewat yi Mata­rena kaipywiat Maria e hap het rakat. I'ewyte wẽtup ok Maria Sepeteu sa'yru'in ty toĩne'en i'atu­wywo.
MAT 27:57 Mi'i turan mekewat at min'e turan mekewat Iesui potmu'e hekat rakat put'ok'e Iuse mekewat tawa Arimateia kaipywiat tut. Mi'i hawyi itote morekuat Piratu kape toto to'e hamo.
MAT 27:58 — Ati'asyp irane ra'yn ti Iesui piit e Piratu pe. Pyno etum no uhepe e. Mi'i pote Piratu temiit'in surara'in me to'e — Ewetum soke ro meiẽwat ipiit meiũwat miit pe e.
MAT 27:59 Mi'i hawyi toto howawi hawyi toihep ta'yn meiẽwat aria'yp posak ete pyi Iesui piit hawyi toipo'i po'i sokpe pakup ikytsig nakano ipiit.
MAT 27:60 Mi'i hawyi totopag ipiit mekewat towat wo'osyp hap nu ka'a pe ipakup takat pe. Mi'i hawyi meiẽwat nu wato toi'ãpe'okpun i'apyhik hamo. Mi'i hawyi waku yne ra'yn iheg me ra'yn hawyi toto ra'yn.
MAT 27:61 Mi'i hap ti Maria'in te'era'a­kasa yne katu­pono mi'iria te'era'apyk yt pya i ipũ'ã kai.
MAT 27:62 Mi'i hawyi Seita­weira e'at pe e'ihot'ok pe te'eru­we'a­tunug pa'i kororia wo'omu'e haria morekuat Piratu wywo. Mi'i hawyi te'ero'e morekuat pe
MAT 27:63 — Mekewat ga'atpuat urumi'auka heso rakat toĩne'en ne turan mio tã e — Mye'ym e'at areĩne'en gu'uro pe hawyi ti aru areĩne'en i ra'yn e hat i'atu'e.
MAT 27:64 Mi'i hap uruikuap hawyi uruhenoi kahato teran epe i'atu'e. Pyno waku etimoheg kahato mekewat i'asyp hap tote surara'in wywo i'atu'e mye'ym e'at kape surara'in ti'apykok waku i'atu'e. Ma'ato yt kat i i'apykok haria pote meiũran wãtym muo tõ'ẽ ipotmu'eria hereto hamo ta'atu'e haype. Mi'i pote iwẽtem na'yn hawyi te'ero'e miit'in me — Meiẽ neke tuwẽtem na'yn gu'uro pyi i'atu'e. Ma'ato mi'i tã ra'yn ta'atunug hawyi ti rẽ po'og heso hap topyhu'at ahepe sa'awy'i wat heso hap kai i'atu'e.
MAT 27:65 — Pyno uimiium sa'awy'iwuat surara'in ko'i waku eti'atu­po'oro mekewat misyp apykok hamo e. Waku eweimoheg eimi­ky'esat ok tã e Piratu pa'i kororia pe.
MAT 27:66 Mi'i hawyi ta'atu'o­kenhyp iheg nakat nu wo mekewat yi mi'apokik wo ta'atu­pyhyp. Mi'i hawyi morekuat tunug toiã'ãkap mekewat yi mi'apokik ete. Mi'i hawyi to'e miwan me itote — Yt eweipikpik tei'o meiũwat e ma'ato eweipikpik pote ei'auka hap topyhu'at e. Mi'i hawyi i'ewyte surara ko'i toimõ­pyhu'at at ka'ap Iesui piit ero'ok haria pupi are uito Mateu.
MAT 28:1 Mi'i hawyi Sapatu e'at tokosap hawyi mũki'ite mytu'u e'at pe hunete ihot'ok pe turan tuwat Maria'in Iesui syp hap kapiat te'eraha'at hamo.
MAT 28:2 Mi'i hawyi put'ok'i'atu'e turan yi huruk'e kahato katu­pono Tupana mipo'oro atipy kaipywiat ra'yn put'ok'e nu wato kawiat he'okenhyp'ok hamo. Toimorem mekewat he'okenhyp hap hawyi ta'apyk he'okenhyp hap tote nu wato tote.
MAT 28:3 Imehit kahato hẽtyhot kahato aikotã merep'e hap ewy. Hesokpe ti ikytsig kahato nukara kytsig hap ewy.
MAT 28:4 Mi'i pote surara'in itotiaria te'eroken'ẽ kahato ipupi to'otyry'i kahato ipupi gen'ẽ pono. Mi'i hawyi hewo yi upi map haria ewy surara ko'i.
MAT 28:5 Mi'i pote to'e Tupana mipo'oro Maria'in me — Yt eweiken'ẽ tei'o e. Woro­ho'okuap eipe Iesui piit kat haria aria'yp posak etiat mi'auka kat haria ti eipe e.
MAT 28:6 Ma'ato yt uwe i ra'yn meiũpe topũ'ẽ pe e. Tuwẽtem na'yn gu'uro pyi Iesui aikotã yianmete tohenoi. Mi'i hap ewy ra'yn ti toĩne'en i ra'yn pãi e. Mi'i pote eweĩ'ẽ ro meikowo ipũ'ẽ kape eweha'at hamo pyno ta'atusyp Aika'iwat sa'awy'i hap kape e atipy kaipywiat sut hat mana'in me.
MAT 28:7 Mi'i hawyi tokoka'at hawyi te'eraha'at ra'yn. Mi'i hawyi to'e i i'atuepe — Koitywy eweiwat ro meremo ipotmu'eria piat henoi hamo. Iwẽtem i ra'yn gu'uro pywiat hap enoi i'atuepiat hamo. I'ewyte ewehenoi i'atuepe toto ra'yn tetama Karireia kape aikotã sa'awy'i to'e hap ewy — Areĩne'en i ra'yn hawyi ti aru areto yi Karireia kape i ra'yn. Mi'i tote ti aru wato'o­puẽti i ra'yn eiwywo to'e hap ewy ewei'e ro ipotmu'eria pe e atipy kaipywiat Tupana mipo'oro mana'in me.
MAT 28:8 Mio tã e hawyi tuwat ra'yn meremo Maria'in. Ikohyeput ra'yn te'eroken'ẽ popuo ma'ato i'ewyte ta'atu­wepit kahato wywo tuwat meremo ipotmu'eria piat henoi hamo.
MAT 28:9 Mi'i turan i'atu­ko­hyeput nuat iwat turan meremo Iesui ti'atu­puẽti mu'ap tote — Mana'in ariot i ra'yn e. — Mimi i'atu'e hawyi i'atu­porok'at ipy ete imõtypot hap wywo.
MAT 28:10 — Mana'in yt eweiken'ẽ tei'o e ma'ato eweiwat ro uiwyria'in eikywyt'in me henoi hamo — Waku ewei'aipok to ahe'yi Karireia kape i ra'yn ui'e hap ewy ewehenoi ro uhemiit'in me. Mi'i hawyi tuwat i ikohyeput i ra'yn ta'atu­henoi hamo.
MAT 28:11 Mi'i turan surara'in ikohyeput ra'yn tawa wato Ieru­sarẽi kape. Mi'i hawyi ta'atu­henoi ra'yn yne yne itote ta'atue­ro­kosap hap aikotã aikotã hap pa'i kororia pe.
MAT 28:12 Mi'i hawyi te'eru­wa'a­tunug na'yn pa'i kororia nagnia wo'onãpin haria wywo aikotã wato'e aru watunug ta'atu'e hamo. Mi'i hawyi surara'in me te'ero'e — Yt ewehenoi tei'o irania'in me mi'i tã hap. Ma'ato wẽtup sehay ewehenoi pote watum sa'up iwato'in nakat ehepe i'atu'e.
MAT 28:13 Waku mio tã ewei'e wen — Wãtym muo urutoket turan ipotmu'eria tero'ok ne'i Iesui piit ewei'e ro irania'in me pote sa'up iwato watum ehepe i'atu'e nagnia surara'in me.
MAT 28:14 Ma'ato morekuat tikuap hawyi ipy'ahak eiket hap ete pote ti aru watum aru ha'up iwato tope imoperup'i hamuat i'atu'e.
MAT 28:15 Mi'i hawyi waku i'atu'e surara'in hawyi ha'up ta'atusat ra'yn. Mi'i hawyi ti ta'atuma'at ra'yn miit'in — Ta'i ipotmu'eria tero'ok ti Iesui piit uruket kai i'atu'e torania pe mi'i tã i'atu'e. Mio tã e hap ti mesup te topyhu'at koran te mio tã i'atu'e Iuteuria to'ope.
MAT 28:16 Mi'i hawyi ti ipotmu'eria 11 ok takaria tuwat ra'yn yi Karireia kape mekewat sa'awy'iwuat yity'ok kape aikope sa'awy'i Iesui to'e — Meiũran ti aru waku eweĩ'ẽ i mesuwe uiwẽtem i ra'yn gu'uro pywiat hawyi e hap kape.
MAT 28:17 Mi'i hawyi put'okta'atu'e itote i ra'yn hawyi te'era'a­kasa i ra'yn Ta'atu­ka'iwat Iesui kape. Mi'i hawyi te'eru­wehum kahato ta'atu­mõ­typot kahato Iesui. Ta'atu­mohey kahato ma'ato wẽtup ok wẽtup ok imohey ran.
MAT 28:18 Mi'i hawyi Iesui tut i'atue­wawi hawyi i'atu­py'a­setpe toĩne'en heremo kahato. Mi'i hawyi to'e itotiaria pe — Koitywy Tupana uinug Wuat'i Miit'in Porekuat koro wo e. I'ewyte atipy piaria Porekuat koro wuat e. Koitywy Ui'ywot tum yne ra'yn tesaika hap yne uhepe e.
MAT 28:19 Mi'i pote koitywy woro­ho'o­po'oro eipe wuat'i ywania mu'e hamo e. Mi'i pote koitywy atimõ'ẽ ra'yn ehepe uhesaika hap uhemiit'in pakup nug uhepiat hamo e. Ewei'atumu'e ro mi'iria ui'e yne hap nug hamuat i'ewyte ewei'atuset'ok uimohey pakup i haria Ui'ywot set upi uhet upi Tupana Pã'ãu set upi ewei'atuset'ok e.
MAT 28:20 I'ewyte atiky'esat uhehay ehehay wo topyhu'at einãpin uhepiat hap ok tã e. Mi'i hawyi eimi­mu'eria uimohey haria atiky'esat uhehay nug haria wo te'ero­pyhu'at e. Atiky'esat mi'iria uhepiat ta'atu­nãpin hap nug haria wo tukupte'en at ka'ap takaria hap atiky'esat e. Mi'i tupono eweiwat ro irania'in ywania yne mu'e hamuat turan ti aru yt eiweran hin i eweiwat katu­pono Uito ti aru areto eiwywo aikope aikope eweiwat hap upi areto wy. Eipo­wyro hano areto wuat'i e'at pe ikahuro hap put'ok'e hap kape. Areĩne'en eiwywo wuat'i e'at pe e Iesui ahepe temiit'in me. Toran na'yn uimiwan Uito ti Iesui eropat hat sese mekewat 12 ok takat Mateu.
MAR 1:1 Mesup mienoi wakuat Aipo­typot Iesui etiat Tupana Sa'yru etiat aikotã sa'a­wy'i te Tupana to'e Tosa­'yru pe — Uha'yru e woro­po­'oro aru En miit'in ehakye­ra'at hamo e ma'ato sa'a­wy'i atipo­'oro teran wẽtup ok eut hap enoi hamo e.
MAR 1:2 Miit'in ekatup hawyi woro­po­'oro En i'atue­wawi i'atue­ha­kye­ra'at hamo e Tupana miwan me Marakia 3.1 pe.
MAR 1:3 Ma'ato sa'a­wy'i mekewat wẽtup ok eut hap henoi miit'in me — Tut irane wyti Tupana Mipo­'oro Miit'in Porekuat nuat e hat e. Mio tã wyti aru to'e epiat Uha'yru e. — Eweihy­wytip ipu'ap e aru eipy'a piat eiwa­nẽtup hawe. Mi'i hawyi toĩne'en mu'ap ewy ra'yn Tupana Mipo­'oro ehay mohey hamo e aru Uha'yru e Tupana. Ekatup hawyi woro­po­'oro En miit'in kape Uha'yru e. Waku hawyi ti aru ekatup ta'yn miit'in turan ti aru waku En ereto e Tupana Tosa­'yru pe. E'yianmiat uimi­po­'oro wyti aru henoi henoi haty wo miit'in me — Tut irane ti Miit'in Porekuat nuat e. Mi'i hawyi eweitoiat ro eiminug sa'ag ko'i eiwa­nẽtup sa'ag hap ko'i hawyi mu'ap ewy ra'yn toĩne'en Tupana Mipo­'oro Eheha­kye­ra'at hanuat mohey pote e'yianmiat henoi e Tupana Tosa­'yru pe. Waku hawyi ti aru ekatup ta'yn miit'in mi'i turan ti aru waku ereto En e Tupana Tosa­'yru pe sa'a­wy'i. Mi'i hawyi Tupana ehay moherep hat Isaia iwan Tupana e ihay Tosa­'yru piat hap Isaia 40.3 pe.
MAR 1:4 Mi'i turan ni Iuwãu tut ra'yn mekewat wo'o­set'ok hat Tupana to'e hap ewy. Mi'i hawyi yahig note tohenoi henoi kahato miit'in me — Eweiwaure ro eiminug yt naku i hap ko'i e. Mi'i hawyi ewei'aipok to Tupana ewawi e. Waku hawyi woro­ho­'o­set'ok e Iuwãu miit'in me.
MAR 1:5 Mi'i hawyi miit'in tawa Ieru­sarẽi kaipy­wiaria yi Iuteu kaipy­wiaria tõ'ẽ tõ'ẽ yahig kape Iuwãu mienoi kuap hamo. Mi'i hawyi ti õ'ẽ haria henoi ra'yn wuat'i aikotã ta'a­tunug yt naku i hap ko'i to'ope. Waku hawyi Iuwãu ti'a­tu­set'ok Iũtãu hy pe.
MAR 1:6 Mi'i hap Iuwãu esokpe ti ihũ Kameru sap kawiat. Imi'u wyti pohit i'ewyte awi'a hy imi'u wo. Iwe'ok kytyt hap ti mi'at pe kawiat.
MAR 1:7 Mi'i hawyi ti tohenoi henoi miit'in me — Meiũran ti aru tut wẽtup ok po'og po'og wakuat uikawiat rakat e. Uiat uhewaku hap yt put'ok'e i ipysei hamo ipy sokpe saity pok hamo e.
MAR 1:8 — Uito ti woro­ho­'o­set'ok y'y wo ma'ato mi'i ti aru Tupana Pã'ãu wakuat no ra'yn ehet'ok e Iuwãu miit'in me.
MAR 1:9 Mi'i hawyi wẽtup e'at pe tut ra'yn Iesui tawa Nasare kaipyi tomotag hap tama Karireia kaipyi Iuwãu kape toset'ok Iũtãu hy piat hamo tut.
MAR 1:10 Mi'i hawyi Iesui tuwẽtem y'y pyi hawyi teha'at ra'yn atipy kape. Mi'i hawyi ta'a­kasa ra'yn oken'ypy ewy ra'yn. Mi'i totepyi tut ra'yn Tupana Pã'ãu hawyi put'ok'e ra'yn pykasu ewywuat Iesui ete.
MAR 1:11 Mi'i hawyi sehay tut Iesui pe atipy kaipyi — Ta'i uimi­ky'e kahato En Uha'yru e. Mi'i tupono arehum kahato ete e.
MAR 1:12 Mi'i hawyi meremo Tupana Pã'ãu to'e Iesui pe — Ereto ro yahig koro kape mesu­wepyi Iũtãu hy sakpo Uha'yru e.
MAR 1:13 Mi'i hawyi toto Iesui Iuwãu pyi i'ewyte Iũtãu hy kaipyi yahig koro kape. Mi'i hawyi itote tuweran toĩne'en mi'at ko'i py'a­setpe 40 e'at toĩne'en itote. Mi'i turan ahiag hã'ãg kahato Iesui. Toiky­'esat Iesui tunug yt naku i hap ko'i. Mi'i hawyi Tupana mipo­'o­roria atipy kaipy­wiaria tõ'ẽ tõ'ẽ Iesui moesaika hamo.
MAR 1:14 Wẽtup e'at pe miit'in tipyhik wo'o­set'ok hat Iuwãu. Mi'i hawyi Iesui toto i ra'yn yi Karireia kape Tupana ehay wakuat enoi enoi hamo.
MAR 1:15 Mi'i hawyi to'e — Koitywy ti porap put'ok'e ra'yn Tupana Morekuat nuat ieĩne'en hamuat. Mi'i tupono eweitoiat ro eiminug yt naku i hap ko'i hawyi eweimohey ro Tupana ehay wakuat e Iesui tetama piaria pe.
MAR 1:16 Wẽtup e'at pe so hewyry Iesui yi Karireia hyemyi'a e'yi kyt upi. Mi'i turan ta'a­kasa pira pytyk haria kape uhyt Simãu iywyt Ãtere kape. Mi'i turan kowo'i kowo'i suki wato wo ta'a­tukat pira y'y pe.
MAR 1:17 Mi'i hawyi Iesui ti'a­tu­kaykay ra'yn — To'iro uhupi uhyt'i'in e. Mesup te ti pira pytyk haria wo eipe ma'ato meiũran ti aru ahenoi miit'in pytyk Tupana wanuat hap ehepe e Iesui Simãu i'ewyte Ãtere pe.
MAR 1:18 Mio tã e Iesui hawyi meremo ta'a­tu­'atoiat ta'a­tue­suki wato hawyi tuwat ra'yn Iesui upi.
MAR 1:19 Mi'i hawyi Iesui toto porap'i ywyku'i upi. Mi'i turan ta'a­kasa i Sepeteu sa'y­ru'in kape Tiaku Iuwãu kape wesuki wato mog yara piat haria kape.
MAR 1:20 Mi'i hawyi toi'a­tu­kaykay meremo mi'iria hawyi tuwat ra'yn hupi yara pyi ta'a­tu­'ywot wywuatpyi. Mi'i hawyi Sepeteu topy­hu'at temiit'in wywo yara pe.
MAR 1:21 Mi'i hawyi toto i ra'yn Iesui temiit'in wywo tawa Kawa­na'ũ kape. Tupana mõtypot hap e'at pe hawyi Iesui teke Tupana mõtypot yat pe itotiaria mu'e hamo.
MAR 1:22 Mi'i hawyi te'e­ru­we­wa­nẽtup kahato hawyi te'e­ro'e to'ope — Kat poteĩ Iesui aimu'e yt miwan enoi haria ewy i ra'yn i'atu'e. Mi'i ti morekuat ewy ra'yn wen i'atu'e.
MAR 1:23 Mi'i turan wo'o­mu'e hawe wẽtup ok toĩne'en ahiag ipiit piat rakat. Mi'i so to'e — Ta'i uruikuap ti En e. En ni mekewat Iesui tawa Nasare kaipywiat. En ni Tupana Sa'yru wakuat e tehay pirik wo.
MAR 1:24 Kat ere teran kahu uruete i'atu'e. Urutu­'uka hamo apo eriot i'atu'e.
MAR 1:25 Mi'i pote Iesui wãi'e haty wo — Epo'inik to ahiag e. Erẽtem no meiẽwat miit piit pyi e.
MAR 1:26 Mi'i pote meiẽwat miit ahiag tihuruk tuwẽtem tehay pirik wuat haype.
MAR 1:27 Mi'i pote irania'in te'e­ru­wa­nẽtup kahato hawyi apo'i­'a­tu'e to'ope — Uweĩ meiẽ wo'o­mu'e hat i'atu'e. Yt wata­'a­kasa i meiẽwat ewywuat tehay esaika wuat ahiag sopo hat i'atu'e.
MAR 1:28 Mi'i hawyi wuat'i pe ra'yn ta'a­tu­henoi henoi Iesui etiat hawyi irania'in yi Karireia piaria ikuap ta'yn Iesui piat wakuap nug hap etiat.
MAR 1:29 Mi'i hawyi ti Iesui tuwẽtem na'yn Tupana mõtypot yat pyi. Mi'i hawyi toto i ra'yn towy­ria'in Iuwãu Tiaku wywo temiit'in Ãtere Simãu yat kape.
MAR 1:30 Mi'i hawyi Simãu sakitu i'ahu rakat yni pe ta'a­tu­puẽti. Mi'i hawyi ti mekewat i'ahu hap ta'a­tu­henoi Iesui pe.
MAR 1:31 Mi'i hawyi toto ra'yn howawi. Put'ok­to'e hawyi toipo­pytyk ta'yn hawyi — Epoĩ'ãm no e hawyi i'ãpe­'ok'am na'yn waku ra'yn. Mi'i hawyi i'ahu kosap iwy Simãu sakitu. Tehãite meremo hawyi tote­ropat ra'yn Iesui'in.
MAR 1:32 Mi'i hawyi at min'e turan ta'a­tuerut Iesui kape wuat'i i'ahu rakaria wuat'i ahiag ipiit piat rakaria tawa wato Kawa­na'ũ kaipy­wiaria.
MAR 1:33 Mi'i hawyi ti yne tawa piaria te'e­ru­wa­'a­tunug oken'y­pyke. Mi'i hawyi ti toi'a­tu­moe­hãite kahato i'ahu rakaria.
MAR 1:34 I'ewyte ahiagnia toi'a­tu­sopo kahato miit'in piit pyi. Mi'i hawyi to'e i ahiagnia pe — Eipo­'inik to ahiagnia e. Yt ewehenoi tei'o uikuap ehepiat hap e i'atuepe.
MAR 1:35 Ihot'ok kai i toto ra'yn Iesui tuweran yahig kape. Mi'i hap tote to'oehay Tupana wywo.
MAR 1:36 Meiũran ti Simãu'in tuwat hupi ikat hamo.
MAR 1:37 Ta'a­tu­puẽti hawyi te'e­ro'e tope — Urumu'e hat i'atu'e mio ti ekat haria typy'i kahato Mehĩ i'atu'e. Pyno to'iro i wata­'aipok ekat haria kape i'atu'e.
MAR 1:38 Ma'ato toi'a­tu­wesat — To'iro irania'in tawa kape e. Wuat'i tawa pe ahenoi teran e. Yt wẽtup tawa pe yn i ahenoi teran e. Wuat'i piat henoi hamo ariot mesuwat yi kape e.
MAR 1:39 Mi'i hawyi toto i ra'yn Iesui yi Karireia piat Tupana mõtypot yat piaria enoi hamo ahiagnia sopo hamo miit'in kaipyi toto.
MAR 1:40 Wẽtup e'at pe Iesui ewyry hap tote hepihi pihi rakat tut Iesui kape. Mi'i hawyi tuwe­pỹ­'ã­tutuk haype to'e — Uhyt e uimoe­hãite teran mote uimoe­hãite o e.
MAR 1:41 Mi'i hawyi Iesui tiky'e hawyi tuwe­ponug hawyi to'e — Ta'i woro­ky'e kahato woro­moe­hãite teran uhyt e.
MAR 1:42 Mio tã e hawyi meremo ra'yn ipiit kahu ra'yn tuweityk ta'yn hepihi.
MAR 1:43 Mi'i hawyi Iesui tinãpin haty wo — Pyno uhyt waku ra'yn epe etiat e. Mi'i pote are'e epe ereto ro pa'i ko'i kape hawyi epiit kahu hap etomo­herep to i'atuepe e. Mi'i hawyi ti aru ta'a­tukuap ta'yn emoehãite hap e. Ma'ato irania'in me o yt etomo­herep tei'o emoehãite hap mu'ap upiaria pe e.
MAR 1:44 Katu­pono etomo­herep sa'a­wy'i pa'iria piat hap atiky­'esat e. Waku ehenoi i'atuepe aikotã aha'a­se'i Musei nimo ainãpin hap ewy ehenoi o emoehãite kuap miit'in miat hamo e.
MAR 1:45 Ma'ato yt Iesui miky­'esat ewy i tohenoi Iesui piat tomoe­hãite hap yne pe. Mi'i pote ti Iesui yt teke kuap i tawa pe katu­pono ti typy'i kahato akasa teran haria tõ'ẽ tõ'ẽ howawi wuat'i kaipyi. Mi'i pote yahig note toĩne'en yt teke kuap i tawa pe pote.
MAR 2:1 Meiũran Iesui ta'aipok i ra'yn tawa Kawa­na'ũ kape. Put'ok­to'e itotiat hawyi teke wẽtup netap we. Toĩne'en porap'i itotiat hap hawyi miit'in tikuap ta'yn aikope Iesui ieĩne'en hap.
MAR 2:2 Mi'i hawyi meremo tõ'ẽ tõ'ẽ i ra'yn howawi typy'i kahato ra'yn hawyi irania'in miit'in sem oken upi ne'i ra'yn yn tukup­te'en. Mi'i hawyi Iesui ti'a­tu­mu'e Tupana ehay wo õ'ẽ tewawiat haria.
MAR 2:3 Mi'i turan ta'a­tuerut Iesui kape yt ipoĩ'ãm kuap i rakat yni pe 4 ok herut haria. Ma'ato yt tuwe­hyt'ok kuap i Iesui ewawi sese kat pote typy'i poity'i netap wiat pote.
MAR 2:4 Mi'i pote te'e­ra'am na'yn netap ok tote hawyi ta'a­tu­'ahot ra'yn netap ok Iesui apy tote. Mi'i hawyi i'okhot'e hawuo ta'a­tu­mo­'apyk yt hewyry kuap i rakat yni pe.
MAR 2:5 Mi'i hawyi ta'a­kasa yne hawyi Iesui tikuap ta'yn tomohey i'atuepiat hap ko'i. Mi'i hawyi to'e i'ahu rakat pe — Koitywy ti yt naku i eminug sa'ag ko'i Tupana tihep yne ra'yn epy'a piat uiwy e.
MAR 2:6 Mi'i pote apyk puaria miwan enoi haria te'e­ru­wa­nẽtup hawe te'e­ro'e — Kat pote mio tã e Iesui i'atu'e te'e­ru­wa­nẽtup hawe.
MAR 2:7 Tupana yn ni yt nakuaria i aiminug hep kuap hat i'atu'e. Yt naku i mio tã e Iesui i'atu'e te'e­ru­wa­nẽtup hawe.
MAR 2:8 Ma'ato meremo Iesui tikuap topy'a pe i'atu­wa­nẽtup hap. Mi'i hawyi Iesui to'e i'atuepe — Kat poteĩ yt eweiky­'esat i ui'e i'ahu rakat piat hap e.
MAR 2:9 Kat are'e som pyno po'og yt niatpo i yt hewyry kuap i rakat pe sio apo koitywy ti yt nakuap i eminug atihep ta'yn are'e sio erepoĩ'ãm no hawyi eti'ok­po'i ro e'yni hawyi ereto ro e'yat kape are'e. Kat som pyno po'og yt niatpo i are'e yt ipoĩ'ãm kuap i rakat pe e Iesui miwan enoi haria pe.
MAR 2:10 Mi'i hawyi to'e i — Ta'i Miit'in Yke'et ti yt nakuap i hep kuap hat wuat'i yt naku i hep kuap hat wyti Uito e. Mi'i tupono atimo­herep mesup ehepe uhesaika hap yt nakuap i hep hamuat e.
MAR 2:11 Mi'i hawyi Iesui to'e i yt hewyry kuap i rakat pe — Epoĩ'ãm no hawyi eti'ok­po'i ro e'yni hawyi ereto ro e'yat kape e.
MAR 2:12 Mi'i hawyi meremo ra'yn i'ahu rakat ipoĩ'ãm hawyi toi'ok­po'i te'yni hawyi toto ra'yn wuat'i ehamo. Mi'i hawyi te'e­ra­ha'at kahato hawyi te'e­ru­wehum kahato Tupana ete. Mi'i hawyi te'e­ro'e to'ope — Aito yt karãpe i wata­'a­kasa meikotã i'atu'e ra'yn.
MAR 2:13 Mi'i hawyi toto ra'yn Iesui tawa pyi yi Karireia hyemyi'a hy ẽpe kape. Mi'i hawyi yi kyt upi tõ'ẽ tõ'ẽ miit'in typy'i kahato howawi. Mi'i hawyi tohenoi henoi i'atuepe.
MAR 2:14 Mi'i hawyi tewyry hap tote Iesui ta'a­kasa uhyt Irewi mekewat Auweu sa'yru apykpe ipotpap netap wiat rakat. Mi'i ipotpap mu'ap pyhyp hap ete. Wuat'i mu'ap kare'en ko'i toipyhyp. Toipo­re­ra'at sa'up to'y­wania kaipyi wanĩ­kaptia porekuat pe. Mi'i hawyi Iesui tuwẽ­powat howawi — To'iro uiwywo Irewi e. Mi'i hawyi ipoĩ'ãm na'yn hawyi toto Iesui upi.
MAR 2:15 Wẽtup e'at pe Iesui toto Irewi yat kape topot­mu­'eria wywo te'e­renuk hamo. Mi'i hap tote typy'i kahato Irewi wyria'in te'e­ru­wa­'a­tunug ienuk hap tote. I'ewyte Iesui wywo tukup­te'en yt nakuaria i sa'up pore­ra'at haria te'e­renuk hamo.
MAR 2:16 Mi'i hawyi irania'in nagnia ehay enoi haria te'e­ra­ha'at ienuk hap kape i'ewyte miwan enoi haria te'e­ra­ha'at. Mi'i hawyi apo'i­'a­tu'e Iesui potmu­'eria pe — Kat poteĩ eimu'e hat yt nakuaria i iwywo sa'up pore­ra'at haria wywo tenuk i'atu'e.
MAR 2:17 Mi'i e hap Iesui tikuap hawyi toi'a­tu­wesat — Uhyt'i'in yt eweikuap i apo aikotã ihãite rakaria yt tikat hin i mohag nug hat ma'ato irania'in i'ahu rakaria ti ikat kahato e. Mi'i hap ewy ti koitywy ariot yt nakuaria i era'aipok Tupana kapiat hamo e. Ma'ato — Uruto po'og waku e haria yt atera­'aipok kuap i Tupana kape e katu­pono yt uikat hin i — Uruto po'og i'atu'e pote.
MAR 2:18 Mi'i hawyi mekewat i'atu­we­mo­sy'at hap e'at pe miit'in te'e­ro'e Iesui pe — Wo'o­set'ok hat Iuwãu potmu­'eria koitywy te'e­ru­we­mo­sy'at kahato ra'yn i'atu'e. I'ewyte ti nagnia ehay enoi haria te'e­ru­we­mo­sy'at kahato ra'yn i'atu'e. Ma'ato ewat epotmu­'eria yt te'e­ru­we­mo­sy'at hin i i'atu'e. Kat poteĩ mi'i tã epotmu­'eria i'atu'e.
MAR 2:19 Mi'i hawyi Iesui ti'a­tu­wesat — Katu­pono uipot­mu­'eria i'atu­wepit kahato aikotã ienuk hap e'at piat se'aito hap e'at piat ienuk hap ewy uipot­mu­'eria tukup­te'en e. Ienuk hap e'at pe yt uwe i tuwe­mo­sy'at i'atu­wepit hap e'at pote e.
MAR 2:20 Ma'ato karãpe irania'in tioto se'aito pya to'o­'ya­ty­pepyi mi'i hawyi te'e­ru­we­mo­sy'at e Iesui wemo­sy'at haria pe.
MAR 2:21 — I'ewyte ti wẽtup sehay ahenoi teran ehepe e. Ahesokpe pot'i i'ewyte hiot'e pote yt naku i watomog sokpe pakup wo ne'i e. Katu­pono ti ahepiat imog hap tuwe­'atuk hawyi toihiot ne'i ra'yn ahesokpe pot'i e. Mi'i hawyi ahesokpe hiot'e rakat topy­hu'at po'og na'yn sa'ag e.
MAR 2:22 I'ewyte ahetama pe watopag Uwa hy heiam i'ape pakup we e. Ma'ato heiam i'ape pot'i pe iteneg moity'i pote yt naku i mi'i tã katu­pono ti henãpuk hawyi heiam i'ape teneg hawyi pok'e i ra'yn e. Pok'e hawyi yt kat i Uwa hy i'ewyte yt kat i heiam pok'e hawyi. Ma'ato i'ape pakup wote yt pok'e i torok'e pote. Mi'i ewywuat yt naku i uhehay pakup eweipag sehay pot'i puo e Iesui nagnia ehay enoi haria pe.
MAR 2:23 Mi'i hawyi yt i'atu­potpap i hap e'at pe Iesui tokosap ta'yn go sakpo awati ypia wywuat sakpo. Mi'i hawyi iwyria'in ho'opik ta'yn awati toko­ka'at no.
MAR 2:24 Mi'i hawyi ma'ato irania'in nagnia ehay enoi haria te'e­ra­ha'at kahato i'atu­potpap hap kape. Mi'i hawyi tõ'ẽ meremo hawyi wãita­'a­tu'e Iesui piat hamo — Yt naku i ti ta'a­tu­ho­'opik awati yt aipotpap i hap e'at pe. Yt naku i ti mi'i tã i'atu'e.
MAR 2:25 Ma'ato Iesui ti'a­tu­wesat — U pãi yt eweikuap i apo miwan me aikotã sa'a­wy'i Tupana miky'e morekuat Tawi teke Tupana mõtypot hawe tesy'at wywuat hawyi toimõ'ẽ mekewat Tupana mõtypot haria eman tesu­ra­ra'in me hap e.
MAR 2:26 Mi'i hawyi tutu'u tesu­ra­ra'in nywo pa'i wato mi'u wuat ne'i. Mi'i aikotã aipo­rekuat sa'a­wy­'iwuat Tawi tunug mekewat pa'i Apiata ieĩne'en hap e'at pe turan e. Mi'i tã hat pytkai — Waku kahato aipo­typot sa'a­wy­'iwuat Tawi ewei'e.
MAR 2:27 — Uhyt'i'in sa'a­wy'i Tupana tunug tomõ­typot hap e'at hawyi tutum miit'in me i'atu­mo­wepit hamo tomohey hamuat e. Mi'i pote mio he'at toĩne'en miit'in po pe aimo­wepit hamo e. Ma'ato yt naku i Tupana mõtypot e'at ne'i topy­hu'at ai'akag wo wãi'e hano e. Kat pote Tupana tum ahepe te'at aimo­wepit hamo e.
MAR 2:28 Tutum na'yn miit'in me te'at are mi'i pote Uito areĩne'en Tupana e'at Ka'iwat no i'ewyte areĩne'en Wuat'i Miit'in Yke'et no e Iesui nagnia wãi'e hap enoi haria pe.
MAR 3:1 Mi'i hawyi Tupana mõtypot hap e'at pe Iesui teke i Tupana ehay enoi hawe. Mi'i hawyi itotiaria wywo toĩne'en ipo kĩ'ã rakat.
MAR 3:2 Mi'i hawyi te'e­ru­wa­nẽtup — Iesui timoe­hãite apo ipo kĩ'ã rakat yt aipotpap i hap e'at pe. Mi'i hap ti yt naku i i'atu­wa­nẽtup hawe. Mi'i hawyi te'e­ra­ha'at kahato Iesui kape ikuasa te hamo.
MAR 3:3 Mi'i hawyi Iesui tikaykay tuwe­wawi ipo kag mot'i rakat — Uhyt'i eriot ro meikowo e. Epoĩ'ãm no meiũpe miit'in py'a­setpe e.
MAR 3:4 Mi'i hawyi to'e Iesui irania'in me — Koran wyti Tupana mõtypot hap e'at e. Mi'i pote apo'are ehepe waku som mesuwat e'at pe wakuap watunug sio apo yt naku i e. Waku apo mesup e'at pe watunug miit'in ky'e hap sio miit'in atu'uka hap watunug e. Mi'i hawyi ma'ato yt ta'a­tu­wesat i ra'yn Iesui. I'atunik ne'i ra'yn.
MAR 3:5 Mi'i pote Iesui ipy'ahak hawyi iha'at kahato i'atue­wawi i'atu­py'a heg nakaria kape yt ta'a­tu­ky'e i ipo kĩ'ã rakat pote. Mi'i hawyi to'e i ipo kĩ'ã rakat pe — Erepo­torok to uhyt e. Mi'i hawyi toitorok ta'yn hawyi ipo kokawiat ewy ra'yn.
MAR 3:6 Mi'i hawyi nagnia ehay enoi haria tuwat ra'yn Iesui kaipyi. Mi'i hawyi tuwat ra'yn morekuat Eroti esura­ra'in kape. Mi'i hawyi mi'iria wywo ta'a­tukat aikotã waku Iesui auka hamuat hap.
MAR 3:7 Mi'i hawyi Iesui toto ra'yn topot­mu­'eria wywo tawa Karireia hyemyi'a kape. Mi'i hap upi typy'i kahato miit'in tuwat hupi tawa Karireia kaipy­wiaria tawa Iuteu kaipy­wiaria
MAR 3:8 Tawa Ieru­sarẽi kaipy­wiaria yi Itumeia kaipy­wiaria Iũtãu hy sakpuaria tuwat hupi i'ewyte mekewat tawa ko'i pya pywiat Tiru kaipy­wiaria tawa Sitãu kaipy­wiaria tuwat tuwat Iesui upi.
MAR 3:9 Karãpe Iesui minug wakuap ta'a­tukuap ta'yn hawyi te'e­ru­wa­'a­tunug howawi wuat'i kaipy­wiaria.
MAR 3:10 Mi'i hawyi itote i'ahu rakaria typy'i kahato Iesui ti'a­tu­moe­hãite. Mi'i pote te'e­ru­wa­'a­tunug kahato howawi hemig hamo. Mi'i pote Iesui to'e towy­ria'in me — Eweterut ro yara uhowawi e. Katu­pono meiũpe uhemig neran haria typy'i kahato e. Ta'i ui'akit kuap ne'i ra'yn ti uhemig neran haria e.
MAR 3:11 Mi'i hawyi ahiag ipiit piat rakaria hewo yi tote. I'ewyte ahiagnia kak'i­'a­tu'e. Iesui kapiat te'e­ra­ha'at hawyi — Tupana Sa'yru ti En i'atu'e.
MAR 3:12 Mi'i pote Iesui wãi'e ahiagnia pe — Eipo­'inik to e. Yt ewehenoi tei'o eimikuap uwe Uito hap e Iesui ahiagnia pe.
MAR 3:13 Mi'i hap totepyi Iesui ta'am na'yn yity'ok tote. Mi'i totepyi toi'a­tu­kaykay tuwe­wawi tomi­'ai­roria 12 miit. Mi'i hawyi toko­ka'at howawi hawyi to'e topot­mu­'eria pe
MAR 3:14 — Uimi­'ai­roria eipe uiwywuat wuat'i e'at piat ieĩne'en haria eipe e.
MAR 3:15 Uimi­po­'o­roria ahiag sopo hanuaria ti eipe e.
MAR 3:16 Sa'a­wy'i toikaykay tuwe­wawi Simãu. Mi'i hawyi tutum het pakup Simãu me PETERU Nu e.
MAR 3:17 Mi'i hawyi toikaykay TIAKU Sepeteu sa'yru tuwe­wawi hawyi toikaykay Tiaku ywyt IUWÃU tuwe­wowi. Mi'i hawyi mi'iria pe Iesui tum i'atuset pakup Ipuehay rakaria e ma'ato Iesui pusu puo Puanesei e.
MAR 3:18 Mi'i hawyi toi'a­tu­kaykay tuwe­wawi temiit'in ÃTERE WIRIPI PATORUMEU. Mi'i hawyi toikaykay MATEU TUME tuwe­wawi. I'ewyte TIAKU Auweu sa'yru hawyi TATEU hawyi SIMÃU SERATI torania toi'a­tu­kaykay.
MAR 3:19 Torania toikaykay IUTA Ikarioti sa'yru. Mi'i ti meiũran ima'at hano topy­hu'at.
MAR 3:20 Mi'i hawyi Iesui ta'aipok i ra'yn yity'ok kaipyi netap kape towy­ria'in nywo. Mi'i hawyi miit'in te'e­ru­wa­'a­tunug kahato i ra'yn howawi typy'i kahato.
MAR 3:21 Mi'i pote yt aikotã kuap i te'e­renuk. Mi'i hap ti iywyt'in tikuap ta'yn hawyi te'e­ro'e to'ope — Meiẽ Aheyke'et Iesui wyti heso'ok ta'yn yt tenuk i pote i'atu'e to'ope. Mi'i hawyi tuwat ra'yn Ta'a­tuy­ke'et Iesui enõtem hamo. Waku watioto i ai'yat kape kat pote ti heso'ok ta'yn i'atu'e.
MAR 3:22 I'ewyte miwan enoi haria Ieru­sarẽi kaipy­wiaria to'oehay to'ope — Ta'i watikuap ta'yn Iesui hepap ahiagnia pore­nõtem miit'in mywiat hap i'atu'e. Ta'i ahiagnia porekuat aipusu puo Peusepu toĩne'en Iesui piit pe pote toi'a­tu­po­'oro kuap ahiagnia sa'ag i'atu'e to'ope.
MAR 3:23 Mi'i pote Iesui ti'a­tu­kaykay miit'in tuwe­wawi hawyi to'e i'atuepe — Uiwy­ria'in e ahenoi teran ehepe uhehay iã'ãkap wuo e. Are pãi kat hamo ten ahiag tuwe­sopo are e.
MAR 3:24 Yt aikotã kuap i wyti ren e. Katu­pono yt karãpe i tuwe­sopo kuap miit piit pyi ahiag e. Katu­pono karãpe wẽtup setama pe miit'in tu'uka tu'uka to'ope meiũran ti mekewat setama pe yt uwe i ra'yn topy­hu'at e. Kat pote to'o­'atoiat yne yne e yt kat i wo'o­wese hap itote pote e.
MAR 3:25 I'ewyte ti karãpe miit'in wẽtup yat pe tu'uka tu'uka to'ope meiũran ti yt uwe i ra'yn topy­hu'at mekewat yat pe to'o­'a­tu­'uka pote e.
MAR 3:26 Mi'i hap ewy kahato karãpe ahiag tuwe­'uka tuwete meiũran tuwe­moma hap yn topy­hu'at e. I'ewyte sero­'ok'e hat yt teke kuap i surara hesaika rakat yat pe heka­re'en ero'ok hamo e.
MAR 3:27 Ma'ato sa'a­wy'i toipo'i po'i hesaika rakat mi'i hawyi ti tote­ro'ok kuap heka­re'en e. Mi'i pote ti rat toipo­hari kuap ahiag e.
MAR 3:28 Pywo ti are'e ehepe yne ehehay yt nakuap i ko'i Tupana timo­hãpyk kuap ma'ato ehehay yt nakuat i Tupana Pã'ãu kapiat ti ihay uhepiat turan Tupana yt timo­hãpyk kuap i — Mi'i Miit Uha'yru sese e Tupana Pã'ãu ehepe turan — Eso kahato ewei'e tope hawyi Tupana yt tomo­hãpyk kuap i ra'yn e.
MAR 3:29 Mi'i e hat ti Tupana mi'a­piheg hano topy­hu'at wuat'i e'at pe. Katu­pono Tupana yt timo­hãpyk kuap i — Yt uimohey teran i e hat. Tupana Pã'ãu wakuat etiat — Eso kahato to'e hawyi ihay uhetiat turan. Mi'i e hat wuat'i e'at piat Tupana mi'a­piheg hanuat topy­hu'at e Iesui tomohey hap pun haria pe.
MAR 3:30 Iesui to'e mio tã e katu­pono Iesui ete sa'a­wy'i te'e­ro'e — Ahiag pã'ãu toĩne'en Iesui piit pe i'atu'e pote.
MAR 3:31 Mi'i turan put'ok­'i­'a­tu'e Iesui ywyt'in inyt'in ity wywo Ta'a­tuy­ke'et ereto tawa Nasare kapiat hamo. Mi'i hawyi typy'i kahato Iesui apypueri wo pote ity'in yt teke kuap i Iesui ewawi. Mi'i pote sehay ta'a­tu­po­'oro Iesui kaykay hamo oken kape ipotmu­'eria py'a­setpyi.
MAR 3:32 Mi'i hawyi Iesui apypueri haria henoi tope — Urumu'e hat ety eywyt'in einyt'in ekaykay oken kape i'atu'e.
MAR 3:33 Mi'i hawyi Iesui ti'a­tu­wesat — U e uweĩ uity e uweĩ uheywyt'in e uweĩ uheinyt'in e.
MAR 3:34 Mi'i hawyi teha'at ta'a­py­pueri haria kape tomohey haria kape hawyi to'e
MAR 3:35 — Meiũpe ti uity uheywyt'in uheinyt'in e. Katu­pono Tupana ehay pe pywo e haria wyti uheywyt'in uheinyt'in uity'in e. Ui'ywot miky­'esat nug haria eipe pote Uheywyt'in uheinyt'in uity'in wo eweipy­hu'at e Iesui ta'a­py­pueri haria pe i'ewyte ahepe.
MAR 4:1 Mi'i hawyi Iesui toto i ra'yn yi Karireia hyemyi'a e'yikyt'ok upi miit'in atumu'e hamo. Mi'i hap tote typy'i rakaria te'e­ru­wa­'a­tunug howawi. Mi'i hawyi Iesui teke yara pe. Mi'i hawyi ta'apyk yara pe yowa tote­pywiat miit'in atumu'e hamo. Mi'i pytkai miit'in yi kyt upi tukup­te'en.
MAR 4:2 Mi'i hawyi tohenoi henoi sehay iã'ãkap wuo i'atuepe.
MAR 4:3 — Eweiwa­nẽtup o e. Wẽtup e'at pe so hã'ỹi sytpok hat toto toko kape hã'ỹi sytpok hamo e.
MAR 4:4 Put'ok­to'e ra'yn go totiat hawyi tohytpok ta'yn hã'ỹi te'yi go pe ma'ato yt yne i hã'ỹi hewo go sese tote. Irania'in so hã'ỹi hewo go pu'ap upi. Mi'i ko'i ti weitaria tu'u ne'i e.
MAR 4:5 Ma'ato irania'in hã'ỹi ti hewo yi hit nu totiat rote.
MAR 4:6 Mi'i ti meremo hẽtyt ma'ato meiũran at hakup hawyi ti iku'uro ra'yn itotiat hapo yt toto kuap i yi piit kapiat pote e.
MAR 4:7 Mi'i hawyi so irania'in hã'ỹi hewo tuereto i'anam me e. Mi'i ko'i so hẽtyt wen ma'ato i'anam wywo to'o­'ewy ne'i. Mi'i pote meiũran i'anam tohik ne'i ra'yn hawyi yt tuwenug i ra'yn e.
MAR 4:8 Ma'ato irania'in hã'ỹi yi wakuat rote go sese tote hewo e. Mi'iria ti hẽtyt meremo hawyi ihãite kahato hawyi haat kahato e. Mi'i ko'i kaipyi toimo­rania haat karan karan iã'ỹi hawyi toipuẽti 30 iã'ỹi. Wẽtup sat kaipyi toipuẽti 60 ra'yn. Wẽtup kaipyi 100 ra'yn e.
MAR 4:9 Uhyt'i'in Mana'in ehewaure ka'a pote eweikuap to kat som are'e teran eimu'e hap uhehay iã'ãkap wuo hap e Iesui yẽpe upiaria pe.
MAR 4:10 Tuwat porap i ra'yn yne miit'in hawyi iwyria'in 12 ok takaria apo'i­'a­tu'e Iesui pe — Urumu'e hat kat ete som mesuwat hã'ỹi hã'ãkap wuo urumu'e i'atu'e.
MAR 4:11 Mi'i hawyi Iesui ti'a­tu­wesat — Ta'i uiwy­ria'in ahenoi teran ehepe wuat'i mikuap yt heremo i aikotã Tupana topy­hu'at irane Miit'in Porekuat no hap etiat e. Ma'ato irania'in me pya aikawiat haria pe yt uimohey teran i haria pe ahenoi teran sehay iã'ãkap wuo e.
MAR 4:12 Mi'i tupono uhehamo ma'ato yt ta'a­tukuap i kat are'e sese hap mi'iria e. Te'e­ra­'a­kasa yne ma'ato yt heremo i rakat e. Mi'i pote yt karãpe i te'e­ra­'aipok Tupana kape ta'a­tu­minug yt nakuap i pyi ta'a­tu­mo­hãpyk Tupana piat hamo e.
MAR 4:13 Koitywy kat poteĩ yt eweikuap i mesuwat mikoi iã'ãkap sehay e. Aikotã aru pyno eweikuap irania'in uimienoi iã'ãkap ewywuaria e topot­mu­'eria pe.
MAR 4:14 Pyno ahenoi ehepe eweikuap sese hamo e. Mekewat iã'ỹi sytpok hat ti Tupana ehay enoi moherep hat ewy e.
MAR 4:15 Mi'i hawyi mekewat go pu'ap ẽpe upiat ti wẽtup ok wẽtup ok wanẽtup haria ewy e. Mi'iria tote hawyi Tupana ehay hewo mikoi hã'ỹi ewy ma'ato ta'a­tukuap sa'ag hawyi meremo ahiag tihep te'en te'en i'atu­py'a pyi Tupana ehay e.
MAR 4:16 I'ewyte ti mekewat iã'ỹi hin nu totiat ti wẽtup ok wẽtup ok wanẽtup hat ewy e. Ta'a­tu­wa­nẽtup hawyi meremo waku kahato ta'a­tu­puẽti e.
MAR 4:17 Ma'ato yt i'atu­sopo i pote yt toĩne'en mot'i e. Meiũran irania'in miat ta'a­tu­sa­ty'i saty'i Tupana ehay mohey i'atu'e piat pote mi'i hawyi meremo ta'a­tu­'atoiat Tupana ehay e. Sa'a­wy'i i'atu­wepit kahato ma'ato irania'in to'o­ky­ry'i e i hawyi meremo ta'a­tu­waure ra'yn e.
MAR 4:18 I'ewyte ti mekewat hu ypia piat ewy toĩne'en e. Mi'iria ta'a­tu­wa­nẽtup Tupana ehay kape.
MAR 4:19 Ma'ato meiũran hawyi te'e­ru­wa­nẽtup ta'a­tu­potpap iwato hap kape ta'a­tue­ka­re'en iwato hap kape. Ta'a­tu­mi­ky­'esat wuat'i hap kape yn te'e­ru­wa­nẽtup.
MAR 4:20 Mi'i pote Tupana ehay yt tuwenug i e. Ma'ato mekewat yi wakuat upiat ti wẽtup ok wẽtup ok wanẽtup haria ewy e. Sa'a­wy'i ta'a­tu­wa­nẽtup Tupana ehay kapiat hawyi ta'a­tu­ky­'esat kahato. Mi'iria tuwenug na'yn e. Ta'i wẽtup ok 30 hap ewy wẽtup ok 60 hap ewy hawyi wẽtup ok 100 hap ewy ra'yn Tupana ehay tuwenug kahato ra'yn i'atuieĩ­ne'en hap tote e Iesui topot­mu­'eria pe.
MAR 4:21 Mi'i hawyi Iesui henoi wẽtup iã'ãkap sehay teka­tu­wy­ria'in me — Wãtym mote wyti miit'in topag ariãty ywaiti heiam note ta'a­tupag hẽtyhot hamo e. Ma'ato yt uwe i ariãty ipag neran yrysakag ywyt'ok­pype e. Ta'i yt uwe i tuwe­'a­riã­typag neran yparakai ywyt'ok­pype e. Yt naku i mi'i tã. Iwat heiam me yn waku ariãty e.
MAR 4:22 Katu­pono meiũran imierewyi tuwe­mo­herep e i'ewyte huwy piat meiũran heremo e.
MAR 4:23 Ehewaure ka'a pote eweikuap to uiwy­ria'in e Iesui tomohey haria pe.
MAR 4:24 Eweiwa­nẽtup to sehay kape e. Imõ'ẽ haria wyti aru po'og hereko e.
MAR 4:25 Meiũran po'og na'yn Tupana tum ehepe e. Ma'ato yt eweimõ'ẽ Tupana miium pote mekewat kurin kat toihep yne eipo pyi. Tupana piat einãpin hap eweimu'e irania'in me pote po'og tehay tutum ehepe e. Ma'ato yt eweimu'e irania'in me i Tupana piat einãpin hap ko'i pote ti aru toihep yne i ra'yn to'e hap eipy'a pyi eimikuap hit e. Mi'i hawyi po'og yt kat i sa'a­wy­'iwuat kai topy­hu'at eiwa­nẽtup hawe e Iesui.
MAR 4:26 — Ta'i mi'i tã ti Tupana topy­hu'at irane Miit'in Porekuat no aikotã hã'ỹi koi hat ewy ti aru e.
MAR 4:27 Sa'a­wy'i toikoi hawyi tuwewi hẽtyt ra'yn ma'ato ikoi hat toĩne'en to'yat pe mi'i turan hẽtyt e. Mi'i hawyi itag na'yn mi'i hawyi haat ra'yn ma'ato ikoi hat yt uwe i itote pytkai i'ewyte yt ta'a­kasa hin i aikotã itag hap kape pytkai e.
MAR 4:28 Ta'i mekewat at esaika hap upi mekewat iã'ỹi tuwe­moe­hãite tuwepyi e. Mekewat go koi hat toket turan hewyry turan hẽtyt ra'yn tuwe­motag na'yn haat ra'yn. Mi'i hawyi iko nug hat toto ra'yn ta'a­kasa hamo hawyi — Waku kahato e uimi'u ra'yn e yt uipotpap i pytkai tuwenug pãi e tuwepe e.
MAR 4:29 Waku yne hawyi toiterek kyse'yp wo e. Mi'i uhehay iã'ãkap ewy kahato Tupana tuwenug Morekuat no mesuwat yi tote e Iesui topot­mu­'eria pe apo'i­'a­tu'e hap wesat hamo.
MAR 4:30 Mi'i hawyi Iesui henoi po'og na'yn wẽtup iã'ãkap sehay towy­ria'in me — Are pãi aikotã Tupana topy­hu'at Miit'in Porekuat no. Mi'i hap ete ahenoi teran ehepe sehay iã'ãkap wuo e.
MAR 4:31 Ta'i aimikoi iã'ỹi kurin kat Mutata iã'ỹi ewy ti. Eweikoi yi pe hawyi hẽtyt hawyi meremo topy­hu'at itag i'yp e. Ywaiti ra'yn hawyi weitaria te'e­ru­we­soknug na'yn haga tote i'yhop og me.
MAR 4:32 Aikotã aimikoi yt kat iã'ỹi ok tã rakat i po'og kurin kat wen ma'ato meremo i'yp uato ra'yn e. Mi'i hap ewy ti Tupana topy­hu'at irane Miit'in Porekuat no e Iesui i'atuepe.
MAR 4:33 Miit'in me Iesui henoi henoi kahato sehay hã'ãkap wuo yn tohenoi yt i'atu­mikuap wuo i.
MAR 4:34 Ma'ato tuweran hawyi topot­mu­'eria sese pe tohenoi sese kat e kat e tohenoi hã'ãkap wuo hap.
MAR 4:35 At min'e turan Iesui to'e — To'iro ysakpo uhyt'i'in mesuwat yara puo e.
MAR 4:36 Mi'i hawyi ta'a­tu­hok­'iwat ra'yn yẽpeke typy'i rakaria. Mi'i hawyi ma'ato ipat'ok irania'in tuwat hupi hewat­'ymo yara ko'i puo.
MAR 4:37 Mi'i turan Iesui toket ne'i yara etu'a pe to'akag pysop tote. Iket kai ti ihyemyi'a wato py'a­setpiat turan ywytu kahato ra'yn ywytu uato kahato ra'yn. Mi'i hawyi y'y teke teke ra'yn i'atue­'yara pe.
MAR 4:38 Mi'i hawyi hemiit'in to'o­kak'i te'e­ra­'a­py'at irane ihy wato ta'a­tue­'yara piat pote. Mi'i hawyi meremo te'e­ru­wẽ­powat ta'a­tuehay pirik wo Iesui kape — Urumu'e hat erehymut ro i'atu'e. Yt uruky'e i apo En i'atu'e. Urutopap hamuat ra'yn wyti i'atu'e minwa­to'e Uhyt i'atu'e Iesui pe.
MAR 4:39 Mi'i hawyi Iesui ipoĩ'ãm na'yn hawyi to'e ywytu uato pe ihy esaika rakat pe — Epo'inik to y'y e epohep to wasere wato e. Mi'i hawyi meremo wasere ipohep hawyi y'y i'ewyte ipo'inik ta'yn. Mi'i hawyi ihy nik kahato ra'yn.
MAR 4:40 Mi'i hawyi to'e towy­ria'in me — Uhyt'i'in e kat poteĩ eweiken'ẽ uimohey haria eipe pytkai e.
MAR 4:41 Mi'i hawyi te'e­ro­ken'ẽ po'og ne'i hawyi apo'i­'a­tu'e to'ope — Yt uwe i mesuwat yi tote Mi'i Miit Iesui ewywuat i'atu'e. Ta'i ywytu y'y tunug kahato Aimu'e hat Iesui mipo­'oro ewy i'atu'e. Uwe pyno Iesui i'atu'e to'ope.
MAR 5:1 Mi'i hawyi Iesui hakpo temiit'in wywo yi Karireia hyemyi'a. Mi'i hawyi put'ok­'i­'a­tu'e yi Kata­renu wã tote te'e­ru­wehik ta'yn.
MAR 5:2 Mi'i hawyi Iesui tuwẽtem yara pyi yi kape. Mi'i hawyi meremo ahiagnia ipiit piat rakat wẽtup ok teput tuerut Iesui kapiat ta'a­kasa hamo.
MAR 5:3 Mi'i so nimo ra'yn toĩne'en wo'osyp hawe yt uwe i ipyhik kuap.
MAR 5:4 Ha'a­wyte ra'yn karania wo ne'i ra'yn ta'a­tu­pyhik wo'o­pyhik hawe wen ma'ato so toipirik ne'i topyhik hap ko'i. Ta'i kurenti wo ta'a­tu­pyhik ma'ato toitektek ne'i. Mi'i hawyi yt uwe i imope­rup'i hamo topy­hu'at.
MAR 5:5 Mi'i tã ti mekewat ahiagnia ipiit piat rakat wãtym muo ihot'ok puo miit syp hawe yity'ok tote toĩne'en. Kak'e kak'e yity'ok upi tuwe­witwit nu ko'i wo hawyi haty kahato ra'yn tuwete.
MAR 5:6 Mi'i turan so ta'a­kasa Iesui kape pya pyi hawyi so teput tuerut ra'yn. Mi'i hawyi put'ok'e Iesui ete hawyi tuwe­pỹ­'ã­tutuk howa kape.
MAR 5:7 Mi'i hawyi Iesui pe to'e tehay pirik wo — Kat som etunug neran uhete Iesui Tupana Sa'yru e.
MAR 5:8 Mi'i hawyi Iesui to'e ahiagnia pe — Eiwe­nõ'ẽ ro meiũwat miit piit pyi e. Mio tã hawyi toiwesat — Yt urusa­ty'i saty'i tei'o En i'atu'e.
MAR 5:9 Mi'i hawyi Iesui to'e mekewat miit piit piat ahiagnia pe — Kat eĩ pyno ehet e Iesui ahiagnia pe.
MAR 5:10 Mio tã e hawyi ta'a­tu­wesat — Isem e uruwat uruset Uhyt i'atu'e katu­pono uruty­py'i kahato uruto pote. Pyno yt urupo­'oro tei'o pya meiũpe pyi Uhyt i'atu'e mekewat miit ahiag ipiit piat rakat wẽ pyi.
MAR 5:11 Mi'i turan hamaut ko'i typy'i rakaria tukup­te'en mekewat yity'ok tote te'e­renuk hap tote.
MAR 5:12 Mi'i hawyi ahiagnia hẽtup Iesui pe — Meimuẽwat hamaut asuwai ko'i kape ro urupo­'oro i'atu'e. Mi'iria pe mono urutu­we­hyt'ok i'atu'e ra'yn.
MAR 5:13 Mi'i hawyi Iesui to'e — Eweiwat ro pono e. Mio tã e hawyi tuwe­nõ'ẽ ra'yn ahiagnia mekewat miit piit pyi hawyi tuwe­hyt'ok ta'yn hamaut asuwai ko'i 2000 rakaria piit pe ra'yn tuwe­hyt'ok. Mi'i hawyi hamaut ko'i ikohye­put'i kohye­put'i yity'ok totepyi hawyi tuwe­hyt'ok y'y pe hawyi topap yne ra'yn.
MAR 5:14 Mi'i hawyi hamaut sem apykok haria ikohyeput ra'yn yi Kata­renu etawa ko'i upi go ko'i upi irania'in miat henoi hamo. Mi'i hawyi so tuwat yne miit'in Iesui kapiat te'e­ra­'a­kasa hamo.
MAR 5:15 Mi'i hawyi te'e­ra­'a­kasa mekewat miit Iesui yatype apyk pe ra'yn waku i ra'yn tuwe­painug me ra'yn toĩne'en yt kat i ra'yn ahiagnia ipiit pe.
MAR 5:16 Mi'i hawyi ti te'e­ro­ken'ẽ Iesui pupi. Mi'i hawyi ti mekewat õ'ẽ haria pe akasa haria henoi yne ra'yn aikotã aikotã mekewat ahiag ipiit piat rakat etiat hamaut asuwai ko'i topap yne hap etiat.
MAR 5:17 Mi'i hawyi ta'a­tu­hẽtup hẽtup i Iesui pe — Uhyt Mimi i'atu'e motoro meiũwat uruetama pyi i'atu'e.
MAR 5:18 Mi'i hawyi Iesui teke yara pe turan mekewat sa'a­wy­'iwuat ahiagnia ipiit piat rakat imimoe­hãite tuwẽ­powat Iesui kape — Uipap kahato eupi Mehĩ e.
MAR 5:19 Ma'ato Iesui tiwesat — Yt wyti waku po'og ni era'aipok i ra'yn e'yat kape hawyi ehenoi henoi mesu­wa­ro­tiaria pe aikotã Uito Eka'iwat pakup eky'e hap aikotã enug waku hap ewyria'in miat hap ti atiky­'esat uha'yru e Iesui.
MAR 5:20 Mi'i hawyi ti toto ra'yn Iesui yaty­pepyi. Mi'i hawyi wuat'i 10 tawa puaria piat henoi henoi aikotã wakuap Iesui tunug tetiat hap. Mi'i hawyi ikuap haria te'e­ru­wa­nẽtup kahato — Waku kahato Iesui i'atu'e to'ope.
MAR 5:21 Mi'i hawyi Iesui toto i ra'yn temiit'in nywo yara puo yi Karireia hyemyi'a wato sakpo. Mi'i hawyi put'ok­'i­'a­tu'e hawyi miit'in tõ'ẽ tõ'ẽ howawi.
MAR 5:22 Mi'i hawyi miit'in sem ra'yn tukup­te'en yẽpeke. Mi'i hawyi Tupana mõtypot yat ka'iwat wẽtup ok Tupana mõtypot yat akag uhyt Iairu tut Iesui kape. Mi'i hawyi tuwe­pỹ­'ã­tutuk Iesui ewa kape.
MAR 5:23 Mi'i hawyi tohẽtup Iesui pe haty wo — Mehĩ e uhaki'yt hin iku'uro irane Uhyt e. Pyno to'iro meremo imoehãite hamo e. Ereponug itote hawyi mono ihãite hawyi uhaki'yt yt iku'uro i e.
MAR 5:24 Mi'i hawyi toto Iesui Iairu upi. Ma'ato mekewat typy'i rakaria tuwat yne hupi. Mi'i hawyi mu'ap upi ta'a­tu­py­huhik ne'i Iesui.
MAR 5:25 MI'i hawyi Iesui toto Tupana mõtypot yat akag uhyt Iairu upi miit'in sem tuwat hupi. Mi'i turan ti wẽtup ok hary­poria huu wato rakat toĩne'en i'atu­wywo. Mi'i wyti nimo kahato ra'yn i'ahu. Mi'i wyti 12 anu ra'yn toho­'opot mekewat to'ahu hap.
MAR 5:26 Mi'i so hewyry mohag nug haria upi. Tutum yne ra'yn teka­re'en mohag nug haria pe. Ma'ato yt naku i po'og po'og ne'i tuwete.
MAR 5:27 Mi'i turan Iesui etiat toikuap ta'yn.
MAR 5:28 Mi'i hawyi tuwa­nẽtup ta'yn — Pyno mesup aru areto ra'yn Mimi Iesui upi hesokpe emig hamo e. Mi'i atunug mote mono waku ra'yn uhete e. Mi'i hawyi ti toto ra'yn miit'in typy'i tok puo Iesui ewat'ymo. Mi'i hawyi totemig na'yn hesokpe ete.
MAR 5:29 Mi'i hawyi meremo waku tuwete hawyi mekewat hary­poria tikuap ta'yn tehãite hap. Toikuap tetiat yt tosuu wato i ra'yn hap.
MAR 5:30 Mi'i hawyi ma'ato meremo tuwewi Iesui tikuap tesaika wẽtem topiit pywiat miit'in moehãite hamuat hap ko'i. Mi'i pote tuwe­morem na'yn hawyi apo'e topy­huhik haria pe — Uwe kahu uhesokpe emig e.
MAR 5:31 Mio tã e pote ipotmu­'eria te'e­ro'e — Urumu'e hat meiũpe ti miit'in sem me watu­kup­te'en typy'i poity'i emig haria i'atu'e. Kat poteĩ — Uwe uhesokpe emig ere i'atu'e.
MAR 5:32 Ma'ato Iesui teha'at yne i'atuewa pe. Toikat temig hat uwe hap. Mi'i pote mekewat hary­poria token'ẽ kahato katu­pono toikuap ta'yn tomoe­hãite hap.
MAR 5:33 Mi'i hawyi tut i ra'yn hawyi tuwe­pỹ­'ã­tutuk howa kape tyry­to'e wywo hawyi tohenoi ra'yn Iesui piat tomoe­hãite hap.
MAR 5:34 Mi'i hawyi Iesui to'e — Uheinyt ewat uimohey hap emoehãite ra'yn e. Mi'i hawyi ti aru ehãite ra'yn e. Mi'i tupono ewepit ro era'aipok i ro e'yat kape e.
MAR 5:35 Mi'i turan Tupana mõtypot yat akag uhyt Iairu emiit'in tõ'ẽ ra'yn i'yat kaipyi. Mi'i hawyi ta'a­tu­henoi Iairu pe — Uruka­'iwat i'atu'e yt naku i kahato ra'yn. Yt kat hamo i ra'yn wyti Wo'o­mu'e hat etiky­'esat katu­pono ti esaki'yt wyti iku'uro sese ra'yn i'atu'e i'ywot Iairu pe.
MAR 5:36 Ma'ato Iesui tikuap hawyi to'e i'ywot pe — Yt ereken'ẽ tei'o e. Uimohey yn no en e.
MAR 5:37 Mi'i hawyi typy'i rakaria irania'in Iesui yt tiky­'esat i tuwat yne hap. Temiit'in yn Peteru Tiaku iywyt Iuwãu wywo yn toiky­'esat tuwat hap.
MAR 5:38 Mi'i hawyi tuwat ra'yn Iairu yat kape. Mi'i hawyi put'ok­'i­'a­tu'e tu'isa yat pe turan miit'in typy'i poity'i ta'a­tu­puẽti wak haria.
MAR 5:39 Te'e­ruwak ihay pirik kahato pĩ'ã hin iku'uro pote. Mi'i turan Iesui teke netap we hawyi to'e wak haria pe — Kat poteĩ eweiwak e. Kat poteĩ ehehay pirik e. Yt iku'uro i ti pĩ'ã ma'ato toket ne'i ti e. Mio tã e pote wak haria to'o­ky­ry'i Iesui ete. Mi'i pote wak haria Iesui ti'a­tu­sopo ra'yn i'yat pyi.
MAR 5:40 Mi'i hawyi toko­ka'at ity i'ywot Iuwãu Tiaku Peteru wywo yn na'yn iku'uro rakat kape.
MAR 5:41 Mi'i hawyi Iesui ti'y­kesat hawyi to'e iku'uro rakat pe — Pĩ'ã hin epoĩ'ãm no e.
MAR 5:42 Ma'ato towat topusu puo — Tarita kumi e. Mi'i hawyi meremo pĩ'ã hin 12 anu rakat ipoĩ'ãm na'yn hewyry i ra'yn. Mi'i pote te'e­ra­ha'at kahato te'e­ru­wa­nẽtup kahato ra'yn.
MAR 5:43 Mi'i hawyi Iesui ti'a­tu­nãpin — Pyno ewetopoi ro eimẽpyt e. Ma'ato o yt ewehenoi tei'o pĩ'ã hin ieĩne'en i hap irania'in me e i'atuepe.
MAR 6:1 Mi'i hawyi Iesui toto i ra'yn uhyt Iairu etawa kaipyi towy­ria'in wywo tomotag hap tawa hit Nasare kape.
MAR 6:2 Mi'i hawyi Tupana mõtypot hap e'at pe Iesui henoi henoi tetawa Nasare piaria pe Tupana mõtypot yat pe. Mi'i hawyi itotiaria te'e­ru­wa­nẽtup kahato. Mi'i hawyi te'e­ro'e to'ope — Yt sa'a­wy­'iwuat meiũpiat pan'i pan'i e hat i apo meiẽ i'atu'e. Yt mana Maria mẽpyt i apo Mi'i Miit i'atu'e. Yt Tiaku Iuse Iuta Simãu eyke'et i apo Mi'i Miit Iesui i'atu'e. I'ewyte iwat yt Iesui einyt'in i apo tukup­te'en meiũpe i'atu'e to'ope.
MAR 6:3 Uwe som pyno mekewat we'eg hap henoi Iesui pe i'atu'e. Hawytepyi ipatpap mesuwe tawa Nasare pe wuat'i aria'yp kawiat hap nug hanuat i'atu'e. Katu­pono som pono tohepap kahato wuat'i wakuap nug hanuat i'atu'e ra'yn. Uwe som mesuwat tesaika hap henoi tope Tupana ewywuat nug hamo i'atu'e to'ope. Mi'i hawyi yt ta'a­tu­mohey hin i Iesui haype. Mi'i pote Iesui yt timoherep kuap i wakuap Tupana mimoherep yt uwe tunug kuap i hap i'atuepe.
MAR 6:4 Kurin Kurin tutunug tesaika wo tawa Nasare pe. Wẽtup ok wẽtup ok yn toimoe­hãite topo wo i'ahu rakaria.
MAR 6:5 Ma'ato yt tomohey i haria pe yt tutunug kuap i aikotã aikotã e hap ko'i. Yt tomohey i haria kape tuwa­nẽtup kahato — Kat pote yt uimohey i uimotag haria e tuwepe.
MAR 6:6 Mi'i pote to'e i'atuepe — Irania'in setama puaria wyti imohey kahato Tupana ehay moherep hat e. Ma'ato iwat hetama puaria ti yt imohey i e. Iwat i'ywania sese ti i'ewyte yt imohey i e. I'yat piaria i'ewyte yt imohey i e Iesui tetawa Nasare piaria pe tomotag hanuaria pe yt tomohey i haria pe. Mio tã e hawyi toto ra'yn tomotag hap tawa Nasare pyi irania'in tawa hit ko'i kape henoi henoi ipuat hamo.
MAR 6:7 Mi'i turan Iesui tikaykay temiit'in tuwe­wawi. Mi'i hawyi tutum na'yn tesaika hap ahiag sopo hamuat towy­ria'in me 12 ok takaria pe. Mi'i hawyi toi'a­tu­nãpin — Uipot­mu­'eria e koitywy woro­ho­'o­po­'oro wuat'i tawa piaria mu'e hamo e.
MAR 6:8 Typy ok tuereto woro­ho­'o­po­'oro e. Pyno waku ti ewetioto eheka­re'en kurin kurin mu'ap upianuat e. Esokpe epiit etiat yn etioto e.
MAR 6:9 Waku epy sokpe epy etiat yn etioto are. Epo'yha wẽtup waku e. Waku yt kat i eimi'u mu'ap upianuat ewetioto e. Waku yt kat i ehesokpe eiam e. Waku yt kat i mu'ap sa'up ape ewetioto e. Waku sokpe eipiit piat yn ewetioto are.
MAR 6:10 Mi'i hawyi put'ok­'e­wei'e wẽtup tawa pe hawyi waku wuat'i e'at pe ti wẽtup getap we yn ewehenuk i'ewyte eweiket e.
MAR 6:11 Ma'ato tawa piaria yt i'atu­wese i ehete yt te'e­ru­wa­nẽtup teran i eimienoi uhetiat kape mi'i pote eweiwat i ra'yn i'atue­tawa pyi e. Eiwe­nõ'ẽ hamo waku meiẽwat tawa sawiu eipy etiat ko'i eiwe­py­pit­pit'ok kahato i'atue­hamo e. Mi'i tã ewetunug hawyi ti aru ta'a­tukuap ta'yn Tupana etiat yt ta'a­tu­wese i hap e Iesui topot­po­'o­roria 12 ok takaria pe. Mi'i hawyi tuwat ra'yn typy ok tuereto tawa ko'i upi Iesui yaty­pepyi ihay enoi hamo.
MAR 6:12 Put'ok­ta­'a­tu'e hawyi mio tã i'atu'e miit'in me — Koitywy ewei'atoiat ro yt nakuap i eiminug ko'i hawyi ewei'aipok to Tupana etiat kuap hamo i'atu'e miit'in me.
MAR 6:13 Mi'i hawyi i'ewyte ahiag ko'i ta'a­tu­'a­tu­sopo miit'in piit pyi. I'ewyte ikap takat wo ta'a­tupen i'ahu rakaria akag hawyi i'atue­hãite ra'yn. Miit'in te'e­ru­we­wa­nẽtup kahato uwe Iesui e hap ete.
MAR 6:14 Mi'i hawyi yne ra'yn ikuap Iesui etiat ipotmu­'eria 12 ok takaria wẽ pyi. Mi'i hawyi mio tã hap morekuat Eroti tikuap hawyi to'e tuwa­nẽtup hawe — Iuwãu ta'aipok ta'yn gu'uro pyi e. Iesui wyti wo'o­set'ok hat Iuwãu toĩne'en i ra'yn gu'uro pyi e. Mi'i tupono ti tote­reko hesaika hap e morekuat Eroti Iesui etiat.
MAR 6:15 Mi'i hawyi wẽtup ok wẽtup ok to'e — Iesui wyti Tupana ehay moherep nimuat hat i'atu'e. Ma'ato irania'in — Ta'i Tupana ehay moherep hat sa'a­wy­'iwuat Eria wyti Iesui i'atu'e.
MAR 6:16 Ma'ato morekuat Eroti to'e tuwe­wa­nẽtup hawe — Are pãi atikuap wyti uwe sese hap e. Ta'i Iuwãu uimi­'akag tek wyti e tuwe­wa­nẽtup. Ta'i toĩne'en i ra'yn gu'uro pyi e tuwa­nẽtup hawe morekuat Eroti Iesui etiat.
MAR 6:17 Mio tã to'e katu­pono sa'a­wy'i morekuat Eroti toywyt Wiripi ehary'i wywo mana Erotia e hap het rakat wywo toĩne'en.
MAR 6:18 Mi'i pote sa'a­wy'i te ahet'ok hat Iuwãu to'e morekuat pe — Wãi'e yt naku i ti ereĩne'en eywyt ehary'i wywo ne'i e tope. Mio tã e pote morekuat ti'a­tu­po­'oro tesu­ra­ra'in Iuwãu sat hamo ipo'i po'i hamo. Mi'i hawyi iheg me ta'a­tupag.
MAR 6:19 Mi'i hawyi morekuat ehary'i pakup Erotia yt iwese hin i Iuwãu ete. Toi'auka teran ma'ato yt toi'auka kuap i katu­pono Iuwãu pupi he'aito token'ẽ kahato.
MAR 6:20 Morekuat Eroti tikuap ta'yn Iuwãu wakuat kahato hap. Mi'i hawyi toika­wiano Iuwãu katu­pono morekuat tikuap teran Iuwãu ehay aikotã kahato hap. Toikuap hawyi ikenmu'e kahato tuwete.
MAR 6:21 Mi'i hawyi wẽtup e'at pe morekuat Eroti ywã'ĩ hap kapiat wa'a­tunug hap e'at pe tõ'ẽ tõ'ẽ hesu­ra­ra'in akagnia te'e­renuk hamo. Te'e­ru­wa­'a­tunug tu'i­saria yne yi Karireia kaipy­wiaria tõ'ẽ tõ'ẽ.
MAR 6:22 Mi'i hawyi i'atu­wa­'a­tunug hawe teke ihary'i hit Erotia mẽpyt ikahu rakat tehairu tuweran hamo. Mi'i hawyi tehairu waku ra'yn hawyi morekuat Eroti iwepit kahato ienuk haria wywo. Mi'i hawyi to'e pĩ'ã makuptia pe — Ehairu hap ikahu kahato pĩ'ã e.
MAR 6:23 Pyno ehẽtup to kat som etiky­'esat e. Mi'i hawyi kat emiẽtup atum epe ehẽtup pote e. Ta'i etiky­'esat pote uhe'yi ipat'ok atum epe pĩ'ã e morekuat ihairu rakat pe.
MAR 6:24 Mi'i hawyi pĩ'ã toto toty kape ihay kuap hamo hawyi to'e — Mamai e kat som waku ahẽtup morekuat pe e. Mi'i pote ity to'e e — U an e pyno ehẽtup to miit'in set'ok hat Iuwãu akag. Mi'i som yn waku e mana Erotia pĩ'ã pe.
MAR 6:25 Mi'i hawyi pĩ'ã ta'aipok meremo ra'yn morekuat piat henoi hamo. Put'ok­to'e hawyi pĩ'ã to'e — Pyno mesup uito atiky­'esat warupy hit piat Iuwãu akag e.
MAR 6:26 Mio tã e pote morekuat iperup ta'yn yt iwepit hin i ra'yn. Yt toi'auka teran i Iuwãu haype ma'ato sa'a­wy'i mio tã e pĩ'ã piat hap iwywuat ienuk haria tikuap ta'yn kat e hap.
MAR 6:27 Mi'i pote toipo­'oro ra'yn wẽtup ok surara Iuwãu auka hamo. Mi'i hawyi toto ra'yn wo'o­pyhik hap kape i'auka hamo.
MAR 6:28 Mi'i hawyi toterut warupy hit pe imiẽtup Iuwãu akag hawyi tutum na'yn pĩ'ã pe.
MAR 6:29 Mi'i hawyi pĩ'ã hum na'yn toty pe. Mi'i hawyi Iuwãu potmu­'eria tikuap ta'yn i'auka hap hawyi tõ'ẽ ra'yn hyp nu ka'a piat hamo.
MAR 6:30 Mi'i hawyi imipo­'o­roria 12 ok takaria te'e­ra­'aipok i ra'yn Iesui ewawi wo'o­pot­mu'e haria wuat'i tawa kaipyi. Mi'i hawyi ta'a­tu­henoi henoi Iesui pe aikotã ta'a­tu­minug ko'i i'ewyte ta'a­tu­mienoi wuat'i tawa puat ko'i.
MAR 6:31 Mi'i hawyi typy'i kahato õ'ẽ õ'ẽ haria tukup­te'en itote mi'i pote yt te'e­renuk kuap i ra'yn typy'i poity'i pote. Mi'i pote Iesui to'e topot­mu­'eria pe — To'iro wato aiweran aikope yt uwe i miit'in hap kape aiwe­mohy hamo e.
MAR 6:32 Mi'i hawyi typy'i rakaria kaipyi Iesui toto ra'yn temiit'in wywo yara puo ihyemyi'a sakpo.
MAR 6:33 Ma'ato irania'in tikuap ta'yn iwat hap hawyi yi upi wuat'i kaipyi miit'in te'e­ru­wa­'a­tunug aikowo Iesui toto hap kape.
MAR 6:34 Mi'i hawyi Iesui tuwehik hawyi tuwẽtem yara pyi. Mi'i turan yahig note yẽpeke toi'a­tu­puẽti miit'in typy'i kahato yt tuweran hin i. Mi'i hawyi ma'ato toi'a­tu­ky'e kahato katu­pono toi'a­tu­puẽti aikotã hũria Uweuria ko'i ewy aikotã yt ika'iwat rakaria i ewy toi'a­tu­puẽti. Mi'i hawyi Iesui ti'a­tu­mu'e.
MAR 6:35 Wãtym irane ra'yn hawyi Iesui potmu­'eria tõ'ẽ Iesui kape te'e­ro'e hamo — Wãtym irane ra'yn wyti Uhyt i'atu'e.
MAR 6:36 Yahig note ne'i ti watu­kup­te'en mi'i pote eti'a­tu­po­'oro i ro hesy'at rakaria i'atue­tawa ko'i kape i'atu'e. Waku netap ko'i kape tuwat mi'u kyi'at hamo i'atu'e.
MAR 6:37 Ma'ato Iesui ti'a­tu­wesat — Yt rat waku ewei'a­tupoi hesy'at rakaria e. Mi'i hawyi ta'a­tu­wesat — Aikotã etiky­'esat Mehĩ miit'in sem poi hap i'atu'e. Etiky­'esat man iwato wati­kyi'at miit'in mi'u wo i'atu'e. Katu­pono 200 e'at motpap sa'up yn put'ok'e i'atupoi hap sa'up mo i'atu'e.
MAR 6:38 Mi'i hawyi Iesui to'e temiit'in me — Karania a pyno aheman e. Ewei'a­kasa ro pyno e. Ta'a­tukuap hawyi ta'a­tu­henoi — 5 man typy pira yn Uhyt i'atu'e.
MAR 6:39 Mi'i hawyi Iesui to'e temiit'in me — Ewei'apyk to mopep hyp tote ewei'e ro miit'in me e.
MAR 6:40 Mi'i hawyi te'e­ra­'apyk ta'yn kowo 50 ok kowo 50 ok kowo 100 ok kowo 100 ok. 5000 rakaria yne mopep hyp tote.
MAR 6:41 Waku hawyi Iesui tat 5 man typy pira hit topo pe hawyi iha'at ywaipe hawyi to'e — Waku kahato En Tupana e. Urupoi kahato hat En e. Mi'i hawyi toipat'ok kahato mekewat 5 a man 2 pira hit rakat towy­ria'in me. Mi'i hawyi mi'iria imõ'ẽ irania'in me.
MAR 6:42 Toi'a­tu­mi­'u­mo­wato kahato ra'yn. Mi'i hawyi ti te'e­renuk kahato ra'yn hawyi i'atu'ok kahato ra'yn tukup­te'en.
MAR 6:43 Mi'i hawyi i'atu­mi'u ieĩpyt topy­hu'at re 12 eyry­sakag ne.
MAR 6:44 Mekewat e'at pe Iesui ti'a­tupoi 5000 ihainia 5 man wo yt miit minug kuap ewy hin i tutunug kuap Iesui.
MAR 6:45 Te'e­renuk waku hawyi Iesui ti'a­tu­po­'oro ra'yn temiit'in ihyemyi'a sakpo tawa Petsaita kape. Mi'i hawyi irania'in tomipoi ko'i i'ewyte toi'a­tu­po­'oro i'atue­tawa ko'i kape.
MAR 6:46 Toi'a­tu­sopo yne yne hawyi Iesui toto ra'yn yity'ok kape. Mi'i hap tote tuweran na'yn hawyi ihay Tupana wywo.
MAR 6:47 Wãtym irane hawyi teha'at ihyemyi'a kape towy­ria'in kape. Mi'i turan wasere kahato i'atuewa kapiat pote yt i'atu­hyha i iwyria'in iha'at turan.
MAR 6:48 Mi'i pote waipaka ehay hap owakai Iesui toto ra'yn temiit'in ewat'ymo yowa tote.
MAR 6:49 Ma'ato te'e­ra­'a­kasa Iesui kapiat hawyi to'o­kak'i — Kat kahu meke i'atu'e. Miit ehog keĩ i'atu'e.
MAR 6:50 Mi'i hawyi i'atu­wuwu kahato ra'yn. Mi'i hawyi Iesui to'e — Uiwy­ria'in Uito rat yt eweiken'ẽ tei'o e.
MAR 6:51 Mio tã to'e hawyi Iesui teke ra'yn yara pe temiit'in wywuat pe ra'yn. Teke hawyi meremo ywytu ipohep ta'yn. Mi'i pote te'e­ru­wa­nẽtup aikotã aikotã Iesui hewyry yowa tote hap kape.
MAR 6:52 Katu­pono sa'a­wy'i te'e­ra­'a­kasa Iesui minug ko'i 5 man etiat ma'ato yt ta'a­tukuap i uwe sese Iesui hap i'atu­py'a heg mote yt ta'a­tu­mohey kuap i.
MAR 6:53 Mi'i hawyi put'ok­'i­'a­tu'e tama Kene­sare wã tote i ra'yn.
MAR 6:54 Te'e­ru­wehik yẽpeke hawyi tuwẽtem na'yn yara pyi. Mi'i hawyi meremo yi Kene­sare piaria tikuap Iesui mi'i pote yni puo ta'a­tue­ro­po'ok i'ahu rakaria kope pyi kope pyi ra'yn howawi.
MAR 6:55 Mi'i hawyi ta'a­tu­hẽtup i'atu­moe­hãite hamuat hesokpe emig hamo. Mi'i hawyi tewyry hap upi toi'a­tu­moe­hãite kahato i'ahu rakaria i'atu­mierut ko'i. Mi'i turan yne mu'ap upi tukup­te'en i'ahu rakaria Iesui esokpe emig neran haria.
MAR 6:56 Tawa wato pu'ap upiaria tawa hit pu'ap upiaria go pu'ap upiaria tawa e'oken upiaria i'atue­tama pu'ap upiaria yne yne Iesui ti'a­tu­moe­hãite i'ahu rakaria tesokpe emig haria. I'ahu rakaria ta'a­tuerut kahato Iesui ewawi hawyi Iesui hewyry hap upi ta'a­tuemig hesokpe yne mu'ap upi hawyi yne yne temig haria toi'a­tu­moe­hãite tomohey hap ok tã.
MAR 7:1 Wẽtup e'at pe te'e­ru­wa­'a­tunug kahato Iesui kape nagnia ehay enoi haria i'ewyte miwan enoi haria tawa wato Ieru­sarẽi kaipy­wiaria wywo.
MAR 7:2 Mi'i hawyi ta'a­tuenuk hap tote te'e­ra­'a­kasa Iesui ekatu­wy­ria'in yt te'e­ru­we­posei i nagnia mienoi yt ewy i.
MAR 7:3 Mi'i hawyi te'e­ra­ha'at kahato katu­pono yne Iuteu ywania te'e­ru­we­posei yne te'e­renuk hamo. Kare'en kyi'at haria te'e­ruwei yne.
MAR 7:4 Yt te'e­ruwei i pote yt te'e­renuk kuap i. Ta'i niatpo kahato ti i'atu­we­pokuap hap. Katu­pono yne ta'a­tupyi wuat'i y'y eiam ko'i mi'u eiam ko'i wuat'i ta'a­tupyi te'e­renuk hamo. Aikotã nagnia inug sa'a­wy'i hap ewy ta'a­tunug.
MAR 7:5 Mi'i hap yn ta'a­tunug. Ma'ato irania'in Iesui mohey haria yt te'e­ru­we­pokuap i mi'i tã. Mi'i pote nagnia ehay enoi haria miwan enoi haria apo'i­'a­tu'e Iesui pe — Wo'o­mu'e hat kat poteĩ emimu­'eria yt te'e­ru­we­posei posei i urumu'e haria ewy i i'atu'e. Kat poteĩ yt ta'a­tunug i ainãpin sa'a­wy­'iwuat hap ko'i i'atu'e. Katu­pono ti aipo pitpit hap wywo yt naku i watu'u aimi'u yt naku i i'atu'e.
MAR 7:6 Mi'i pote Iesui ti'a­tu­wesat — Nimo te ti ase'i Isaia henoi tomiwan me ehetiat typy ihay rakat etiat. Mio tã e Isaia — Mi'i tã haria Tupana mõtypot ta'a­tuwẽ pywiat haria yn mi'iria ma'ato yt ta'a­tu­py'a pyi i ta'a­tu­mõ­typot Tupana e Isaia 29.13 pe.
MAR 7:7 Ta'i mi'iria ti Tupana mõtypot sa'ag ne'i katu­pono yt ta'a­tu­henoi Tupana ehay sese i ma'ato miit'in kaipywiat sehay yn ta'a­tu­henoi e ti Isaia henoi ehetiat e Iesui.
MAR 7:8 Mi'i hawyi po'og to'e — Ta'i Tupana ehay atoiat haria ti eipe katu­pono nagnia ehay yn ni topy­hu'at eipy'a pe i'ewyte ewehenoi miit'in e hap ko'i ma'ato Tupana e hap meremo eweiwaure are e.
MAR 7:9 Ta'i apuete ewei'e ti Tupana miky­'esat ko'i nug hawe hawyi eimi­ky­'esat yn ewetunug at ka'ap. Tupana ehay aikotã waku watunug e hap pun haria eipe wen ma'ato ei'e hap aikotã waku watunug e hap ewetunug kahato.
MAR 7:10 Nimo te ti Tupana tinãpin tehay moherep hat Musei — Waku ti eimẽ­pyt'in eimõ­typot hanuaria wo tukup­te'en are e. Waku ta'a­tuty ta'a­tu­'ywot ky'e kahato haria wo te'e­ro­py­hu'at e. Ma'ato yt kat i ta'a­tu­ty'in ta'a­tu­'y­wot'in mõtypot hap i'atuete pote ta'a­tu­sa­ty'i saty'i ta'a­tu­ty'in ta'a­tu­'y­wot'in. Waku mi'iria miit'in ti'a­tu­sa­ty'i saty'i nu wo ta'a­tu­ku­'uro hap kape e Tupana sa'a­wy'i Musei pe mekewat Esutu 20.12 piat pe.
MAR 7:11 Ma'ato eipe wẽtup sehay moherep haria e Iesui pa'iria pe nagnia pe. Yt mio tã ewei'e hin i katu­pono mio tã ewei'e — Waku Tupana pe yn eweium eipo hap nug hap ko'i ewei'e sa'ag aha'y­ru'in muo ahaki­'yt'in muo. Waku Tupana yn wati­mõ­typot yt kan hamo i wati­mõ­typot ai'y­wot'in ewei'e sa'ag. Waku watum aity ai'ywot sa'up Tupana pa'i pe ewei'e sa'ag e. Waku watum sa'up aipo hap nug hap ko'i ahepa'i pe uruepe Tupana wanuat ewei'e sa'ag yn eimu'e haria pe e Iesui.
MAR 7:12 Yt naku i ti eimienoi katu­pono koitywy yt kat i ra'yn miit'in po hap nug hap ta'a­tu­'ywot ta'a­tuty piat hap e. Yt ta'a­tu­mõ'ẽ hin i ta'a­tu­ty'in ta'a­tu­'y­wot'in me mesup e. Yt naku i are katu­pono mesup yt ta'a­tu­mõ­typot hin i ta'a­tu­ty'in ta'a­tu­'y­wot'in eimienoi sa'ag nagnia ehay upi pyi e. Mi'i pote mesup ta'a­tu­'y­wot'in me — Papai Mamai i'atu'e yt kat i ti koitywy topy­hu'at uikaipyi eipo­wyro hamuat hap i'atu'e katu­pono uimiium ehepiat eipo­wyro hamo atum yne ra'yn Tupana mõtypot yat piaria akag ko'i pe i'atu'e sa'ag eimienoi upi ma'ato yt Tupana e hap ewy hin i ei'e hap ko'i are.
MAR 7:13 Ta'i mi'i hap ko'i ewywuat ti rat sa'ag ne'i ewehenoi miit'in me ma'ato Tupana e hap yt eweimo­herep hin i yt naku i rat eipe are. Katu­pono Tupana ehay etiat eipohep takaria eipe. Mi'i pytkai — Uruehay ti Tupana ehay toĩne'en ewei'e sa'ag ne'i. Mi'i hap kaipyi ti Irania'in Tupana ehay sese yt ikuap hin i are e Iesui Iuteu ywania mu'e haria pe wẽtup miwan enoi haria pe.
MAR 7:14 Mi'i hawyi Iesui ti'a­tu­kaykay tuwe­wawi irania'in miit'in miat henoi hamo — Koitywy are'e teran ehepe aikope pyi som yt nakuap i tut e.
MAR 7:15 Pywo ti yt eimi'u kaipyi i ti i'ewyte yt eiposei eipysei hap eiwe­painug hap kaipyi i ti tut i'aparap ehepiat hap e.
MAR 7:16 Ma'ato miit'in minug yt nakuap i ti tuwẽtem i'atu­py'a pyi i'atu­wa­nẽtup sa'ag hap kaipyi e. Pyno ehewaure ka'a pote eiwa­nẽtup to mio wat ui'e hap kape e Iesui i'atuepe.
MAR 7:17 Mi'i hawyi Iesui toto temiit'in wywo miit'in typy'i rakaria py'a­setpyi hawyi teke wẽtup netap we. Mi'i hawyi meiũran hemiit'in apo'i­'a­tu'e Iesui pe — Kat ereĩ i'atuepe sehay hã'ãkap wuo ehenoi Mehĩ i'atu'e.
MAR 7:18 Mi'i hawyi Iesui ti'a­tu­wesat — Are pãi yt eweikuap i apo uhehay e. Irania'in ewy te ti apo eipe e. Pyno ahenoi i ehepe e. Yt miit'in mi'u kaipyi i ti tuwenug yt naku i hap e.
MAR 7:19 Pywo pe ti mi'u yt teke i aiwa­nẽtup hawe aipy'a piat ma'ato aimẽ'ẽn me yn teke kuap e. Mi'i hawyi tuwẽtem hawyi toto i ra'yn aipiit pyi e Iesui. Mio tã tupono ti waku yne mi'u aimi'u wo e Iesui.
MAR 7:20 Mi'i hawyi Iesui to'e — Uiwy­ria'in miit'in minug yt nakuat i tuwẽtem i'atu­py'a pyi ti e. Pywo pe ti miit'in py'a pyi tuwetẽm wanẽtup yt nakuat i hap e.
MAR 7:21 Tuwepyi tutunug yt nakuap i e. Wuat'i hary­po­ria'in nywo e hat sero­'ok'e hat miit auka hat wẽtup ok ti se'aito wywo uito e hat wẽtup ok ti seha­ry'i wywo uito e hat miit'in py'a pyi tuwẽtem
MAR 7:22 I'ewyte uiwano yn irania'in ekare'en e hat ati'a­tu­mo­weu­ka'i uito irania'in e hat atima'at sehay wo wẽtup ok e hat uito ti po'og uiwaku irania'in kai e hat ti Tupana ehay etiat weky­ry'i hat yt iwe'eg i rakat tuwepyi ta'a­tuehay ta'a­tu­py'a pywiat ta'a­tunug yt naku i e.
MAR 7:23 Pyno uiwy­ria'in eweikuap ta'yn som miit py'a pyi tuwẽtem wanẽtup hap yt naku i hap. Mi'i wo ti yt naku i tuwenug tuwe­mohun e Iesui temiit'in me.
MAR 7:24 Mi'i hawyi Iesui toto pya kahato tetama pyi wẽtup ywania etama kape i ra'yn wẽtup setama pya wuat kape. Mi'i hap tote put'ok'e ra'yn i'atue­tama Tiru piat hawyi iheg me ra'yn toĩne'en. Katu­pono yt toiky­'esat i miit'in miat tokuap hap. Ma'ato yt aikotã me kuap i tuwemig.
MAR 7:25 Mi'i hawyi wẽtup ok hary­poria tikuap Iesui etiat hawyi toikat ra'yn Iesui.
MAR 7:26 Kat pote tomẽpyt piit piat ahiag putsit hamo toikat Iesui. Mi'i hary­poria so yt Iesui ywania i ra'yn. Wẽtup setama pywiat mekewat yi Siru­we­nisia pywiat. Mi'i ti wẽtup ta'yn ipusu Kereku ehay puo ra'yn ihay. Mi'i hawyi toipuẽti Iesui hawyi tuwe­pỹ­'ã­tutuk howa kape hawyi to'e — Mimi e etihep o ten ahiag uimẽpyt piit piat e haty wo.
MAR 7:27 Mi'i hawyi Iesui tiwesat — Apuete mana e sa'a­wy'i ti atipoi teran ui'y­wania e katu­pono yt naku i hira­karia mi'u wo urutopoi awareria ne'i e.
MAR 7:28 Mi'i hawyi to'e Iesui pe hary­poria — Are an mi'i tã ti Mimi e ma'ato ti i'ewyte aware hit ko'i tu'u mi'u ku'i hewo rakat e'ywania mẽpyt'in tenuk turan e.
MAR 7:29 Mio tã e pote Iesui tiwesat — Hẽ ti waku kahato mana uiwesat en e. Pyno era'aipok i ro emẽpyt kape katu­pono koitywy ti yt kat i ra'yn ahiag emẽpyt piit pe are'e hap ewy e. Atisopo ra'yn wyti ahiag emẽpyt piit pyi mana e. Pyno koitywy waku ra'yn tuwete e. Yt kat i ra'yn som pyno ahiag emẽpyt piit pe mana e.
MAR 7:30 Mi'i hawyi ity ta'aipok ta'yn tomẽpyt kape. Put'ok'e to'yat pe hawyi toipuẽti ra'yn tomẽpyt yni pe waku pe i ra'yn. Tokosap ta'yn heso'ok hap. Mi'i hawyi ti ity tikuap ta'yn tomẽpyt piit pywiat ahiag wẽtem hap.
MAR 7:31 Mi'i hawyi toto Iesui tawa Tiru pyi yi Sitãu sakpo ra'yn. Mi'i hawyi ta'aipok i ra'yn hẽpype tetama sese kape i ra'yn. Mi'i hap upi toi'a­tu­mu'e tetama Karireia hyemyi'a piaria 10 tawa ko'i.
MAR 7:32 Mi'i hap tote ta'a­tuerut ra'yn Iesui kape wẽtup ok hewaure rakat yt ihay hãpyk kuap i rakat. Mi'i hawyi ta'a­tu­hẽtup Iesui pe imoehãite topo wuat hamo.
MAR 7:33 Mi'i hawyi Iesui tioto hewaure rakat miit'in tok pyi hawyi totemig na'yn hewaure ka'a ko'i hawyi kuitu'e ra'yn hawyi tohẽku pen tẽty hy wo.
MAR 7:34 Mi'i hawyi Iesui iha'at atipy kape hawyi kynkyn'e — Etimoe­waure ka'a i ro meiũwat miit Tupana e. Ma'ato towat topusu puo Iesui to'e tope — Ewata e.
MAR 7:35 Mi'i hawyi meremo hewaure ka'a i ra'yn ihay kuap wuat'i ewy ra'yn.
MAR 7:36 Mi'i hawyi Iesui wãi'e irania'in me haty wo — Yt ewehenoi tei'o uhepiat imoehãite hap irania'in me e wen ma'ato ta'a­tu­henoi henoi ra'yn wuat'i puo ra'yn yt Iesui miky­'esat ewy hin i ra'yn.
MAR 7:37 Mi'i hawyi ta'a­tukuap wuat'i puo ra'yn Iesui piat hewaure rakat moehãite hap hawyi te'e­ro'e to'ope — Waku kahato Iesui tunug i'atu'e. Hewaure rakaria wyti tutunug hewaure ka'a ko'i wo ra'yn i'atu'e. Yt ihay kuap i rakaria tutunug ihay kuap i ko'i wo ra'yn i'atu'e. Mi'i hawyi tuwat tuwat Iesui kape pya pyi.
MAR 8:1 Mi'i hawyi te'e­ru­wa­'a­tunug Iesui kape miit'in sok. Mi'i hawyi mye'ym e'at Iesui ti'a­tu­mu'e at ka'ap.
MAR 8:2 Mi'i hawyi temiit'in me to'e ra'yn — Uimi­mu­'eria meiũpiaria ti mye'ym e'at pe ra'yn mye'ym wãtym na'yn uhupi hupi uhehay kuap hamo e. Mi'i pote ti yt kat i ra'yn topy­hu'at i'atu­mi'u wuat e. Mi'i pote i'atue­ha­ky­'e'i kahato uhepe mi'iria pãi e.
MAR 8:3 Koitywy ti yt naku i ra'yn te'e­ra­'aipok ta'a­tue­tawa ko'i kape katu­pono pya kahato ra'yn i'atue­tawa ko'i tukup­te'en e. Ta'i te'e­ropap ne'i ra'yn ni ren mu'ap upi yahig koro sakpo tuwat turan sy'at pono e. Yt naku i ra'yn ati'a­tu­po­re­ra­'aipok yt kat i i'atu­mi'u wywo i e Iesui.
MAR 8:4 Mi'i hawyi hemiit'in te'e­ro'e Iesui pe — Pywo mehĩ ma'ato aikotã waku wati­'a­tupoi mesuwe yahig wato tote i'atu'e. Yt kat i meiũpe man i'atupoi hamo i'atu'e Iesui pe.
MAR 8:5 Mi'i hawyi apo'e Iesui — Karania a kahu pyno man aiwat e. Mio tã e pote — Ta'i 7 man yn Uhyt i'atu'e.
MAR 8:6 — Pyno ewei'apyk to yi upi e Iesui torania miit'in me. Mi'i hawyi Iesui waku e Tupana pe — Uru'ywot atipy piat urutu­wehum ewawi urupoi hap upi e hawyi toipikpik kahato ra'yn mekewat 7 rakat man hawyi toimõ'ẽ kahato temiit'in me. Mi'i hawyi hemiit'in irania'in me imõ'ẽ ra'yn wy.
MAR 8:7 Mi'i hawyi i'ewyte pira hit ko'i totat hawyi waku e Tupana pe hawyi toipat'ok kahato hawyi tutum temiit'in me hawyi — Eweimõ'ẽ o irania'in me e.
MAR 8:8 Mi'i hawyi te'e­renuk kahato ra'yn hawyi i'atu'ok ta'yn 4000 miit.
MAR 8:9 Mi'i hawyi hemiit'in ti'a­tunug i'atu­mi'u ieĩpyt 7 e'yry­sakag ne topy­hu'at. Waku hawyi Iesui ti'a­tu­po­'oro ra'yn i'atue­tawa pya rakat ko'i kape.
MAR 8:10 Mi'i hawyi toto i ra'yn Iesui yara puo tama Tauma­nuta kape temiit'in wywo.
MAR 8:11 Put'ok­'i­'a­tu'e hawyi nagnia ehay enoi haria hã'ãg Iesui ta'a­tuehay wo — Heno pyno etomo­herep esaika hap atipy kaipywiat iwato rakat i'atu'e. Mi'i etunug mote ti aru uruikuap ta'yn Tupana Mipo­'oro En hap i'atu'e.
MAR 8:12 Mio tã i'atu'e pote Iesui haty'u kahato topy'a pe hawyi hen'ẽ poity'i hawyi to'e mio tã e haria pe — Kat poteĩ mesu­wiaria tiky­'esat kahato atimo­herep yt miit'in misepap ko'i ewywuat i uimohey hamo e. — Ta'i esaika hap etimo­herep uruepe hawyi uruimohey En i'atu'e. Mio tã e haria pe ti yt atomo­herep teran i uhesaika hap mio tã e haria pe e Iesui yt imohey i haria tewa­nĩ­kaptia pe.
MAR 8:13 Mi'i hawyi tohok­'iwat hawyi toto i ra'yn temiit'in wywo ihyemyi'a sakpo i ra'yn.
MAR 8:14 Ma'ato hemiit'in tiwaure ta'a­tu­mi'u man. Mi'i pote ta'a­tukat man yara pe mu'ap upi ma'ato wẽtup man yn ta'a­tu­puẽti.
MAR 8:15 Mi'i hawyi Iesui ti'a­tu­nãpin — Eiwe'eg wo o nagnia ehay enoi haria mani puk hap ewywuaria pupi e. I'ewyte morekuat Eroti mani puk hap ewywuat pupi e.
MAR 8:16 Mi'i hawyi te'e­ro'e to'ope — Kat poteĩ mio tã e ahepe sio aheman yt iwato i pote i'atu'e to'ope.
MAR 8:17 Mi'i hawyi Iesui tikuap hawyi to'e i'atuepe — Kat pote aheman yt iwato i ewei'e eiwo­'ope e. Yt eweikuap hin i te iwato kahato atunug man ga'atpo pytkai apo e. Eipy'a heg kahato te apo e.
MAR 8:18 Yt eheha pytig i te apo e. Yt ehewaure ka'a i te apo e.
MAR 8:19 Eweiwaure ra'yn apo aikotã sa'a­wy'i miit'in ati'a­tupoi 7 man wo yn 4000 rakaria hap e.
MAR 8:20 Mi'i kaipyi apo pyno karania e'yry­sakag ne topy­hu'at mi'u ieĩpyt e Iesui temiit'in me. — Ta'i 7 e'yry­sakag ne ti howapy topy­hu'at Uhyt i'atu'e. Mi'i hawyi Iesui to'e — I'ewyte ti sa'a­wy­'iwuat 5 man wo ati'a­tupoi 5000 rakaria. Mi'i kaipyi apo karania e'yry­sakag ne topy­hu'at mi'u ieĩpyt mekewat e'at piat wy e. — Ta'i 12 e'yry­sakag ne i'atu'e.
MAR 8:21 Mi'i hawyi Iesui to'e — Yt eweikuap i apo te aikotã atimo­wato kuap man hap pyno kat — Aheman yt iwato i ewei'e. Wẽtup man a yn toĩne'en aimi'u wo ewei'e e. Yt uimohey i te apo eipe e Iesui temiit'in me katu­pono po'og kurin ipo pe toĩne'en pote po'og iwato tutunug kuap.
MAR 8:22 Mi'i hawyi put'ok­'i­'a­tu'e ysakpo tawa Petsaita pe. Mi'i turan so ta'a­tuerut Iesui ewawi yt iha pytig i rakat — Etimoe­hãite epo wo meiũwat yt iha pytig i rakat i'atu'e.
MAR 8:23 Mi'i hawyi Iesui ti'y­kesat ereto ra'yn yt iha pytig i rakat tawa pyi. Mi'i hap tote iha pe kuitu'e ra'yn hawyi totemig topo wo.
MAR 8:24 Mi'i hawyi apo'e — Waku ra'yn apo eha uhyt e. Mi'i hawyi teha'at hawyi toiwesat — Hẽ porap waku Uhyt e ma'ato meimuẽwat miit'in hewyry rakaria wyti aria'yp ko'i ewy ne'i e.
MAR 8:25 Mi'i hawyi Iesui temig i topũ'ĩa wo iha hawyi waku ra'yn yne ta'a­kasa ra'yn. Mi'i hawyi Iesui to'e tope — Pyno waku ra'yn eete koitywy uhyt e.
MAR 8:26 Era'aipok to e'yat kape wẽtup mu'ap upi e. Yt erokosap tei'o wẽtup tawa puo emoehãite hap enoi hamo e Iesui tomi­moe­ha­pytig me.
MAR 8:27 Mi'i hawyi Iesui ipot'am towy­ria'in wywo yi Sesareia piat tawa Wiripi kape tawa ko'i upi toto temiit wywo. Mi'i hawyi mu'ap upi Iesui apo'e towy­ria'in me — Uwe som pono Uito irania'in wanẽtup hawe e.
MAR 8:28 Apo'e hawyi ta'a­tu­wesat — U pãi Tupana ehay moherep hat nimuat hat raso wo'o­set'ok hat Iuwãu raso Eria raso i'atu'e.
MAR 8:29 Mi'i hawyi to'e — Ma'ato apo uwe Uito eiwa­nẽtup hawe e. Mi'i pote mekewat Nu e hap het rakat mekewat Peteru tiwesat — Wo'oe­ha­kye­ra'at hat Tupana Mipo­'oro Urupo­rekuat nuat rat En Uhyt e.
MAR 8:30 Mi'i hawyi Iesui ti'a­tu­nãpin — Yt ewehenoi tei'o koitywy uikuap ehepiat hap irania'in me e temiit'in sese pe.
MAR 8:31 Pywo ti Uito Wuat'i Miit'in Eyke'et wen ma'ato mi'i pytkai nagnia yt uiky­'esat hin haria i e. Ta'i pa'i kororia miwan enoi haria i'ewyte uhehay pun haria ne'i e. Pywo ti Uito Eheyke'et ta'a­tu­'auka irane e. Aho'opot kahato ui'auka hap turan ma'ato ui'auka sa'ag hawyi uiku­'uro sese hawyi mye'ym e'at yn uisyp hawe areĩne'en hawyi Tupana uihep gu'uro po pyi Eheyke'et e Iesui towy­ria'in me.
MAR 8:32 Mio tã e pote Peteru tikaykay Iesui tuwe­wawi wãito'e hamo — Uhyt e yt naku i ti ehenoi e'auka hamuat hap e.
MAR 8:33 Ma'ato Iesui tuwe­morem topot­mu­'eria kape Peteru saty'i saty'i hamo hawyi to'e Peteru pe — Erepik to ahiag e. Uinãpin sa'ag ne'i yt Tupana uinãpin hap ewy i ra'yn ma'ato miit'in wo'o­nãpin hap ewy ne'i ra'yn uinãpin en e.
MAR 8:34 Mi'i hawyi Iesui ti'a­tu­kaykay tuwe­wawi irania'in mu'ap upiaria i'atu­mu'e hamo — Pywo ti rat eweiwat teran uhupiat pote eweitoiat ro eimi­ky­'esat ko'i yt Tupana miky­'esat ko'i hawyi eweiwat ro uhupi ehe'a­ria'yp posak wywo e.
MAR 8:35 Uwe uwe iku'uro uhehay wakuat enoi hap upi pote uiky'e haria wo topy­hu'at e. Mi'i haria ti aru wuat'i e'at piat ieĩne'en hap sese puẽti hanuaria e. Ma'ato irania'in mesuwat rotiat ieĩne'en hap yn ky'esat haria ti aru ieĩne'en hap sese pun hanuaria wo ho'o­wasat rakaria ne'i tukup­te'en e.
MAR 8:36 Kat hamo ten eweikyi'at yne yne mesuwat yi totiat eheĩne'en hap sese sa'up mo e.
MAR 8:37 Ma'ato mesu­wa­rotiat kyi'at hap kape yn eiwa­nẽtup at ka'ap hawyi aru aikotã eweikyi'at kuap wuat'i e'at piat ikahu sese rakat eheka­re'en Tupana wuat hap e. Mi'i hawyi eheĩne'en wuat'i e'at piat hap ko'i eimipun no topy­hu'at e. Mi'i hawyi uhehay wakuat kuap hap yt teke kuap i eiwa­nẽtup hawe e Iesui ahepe.
MAR 8:38 Mesu­wa­rotiat miit'in wyti yt uimohey i kahato haria mesu­wiaria e. Ta'i ta'a­tu­mi­ky­'esat ko'i yn ta'a­tunug neran e. Mi'i pote uwe uwe uhehay pupi tuwe­mõti yt uimohey haria i py'a­setpe mi'i haria pupi ti aru Uito i'ewyte aremõti wy mekewat e'at pe karãpe Uito Eheyke'et no ariot i ra'yn Morekuat no atipy piaria wywo Tupana wat hẽtyhot rakat pe imehit rakat piat turan. Mi'i hap e'at pe ti aru Uito Eheyke'et aremõti uipupiat wemõti haria pupi e Iesui mu'ap upiaria pe.
MAR 9:1 Wẽtup e'at pe Iesui to'e temiit'in me — Meiũran ti aru Tupana uimo­herep sese ehepe Uito Miit'in Porekuat nuat sese areĩne'en hap e. Ma'ato wẽtup ok wẽtup ok yn eipe meiũpe akasa uhowawiat haria eweipy­hu'at e. Ta'i eipe ti eiwa­'a­kasa ra'yn uhewaku hap ko'i e eiku­'uro hap e'yianmete are e. Yt yne i eipe ma'ato wẽtup ok wẽtup ok ti aru mi'i hap kapiat akasa hanuaria eweikup­te'en aru e Iesui Iuwãu Tiaku Peteru piat.
MAR 9:2 Mi'i hawyi 6 e'at itote toĩne'en hawyi Iesui toto i ra'yn yity'ok ywaiti kahato rakat kape towy­ria'in nywo mye'ym ok takaria wywo yn Peteru Tiaku Iuwãu wywo. Mi'i hawyi itote Iesui timo­herep ta'yn aikotã toĩne'en hap sese.
MAR 9:3 Mi'i turan Iesui esokpe imehit kahato ikytsig kahato po'og ikytsig mesu­wa­rotiat ko'i kai e.
MAR 9:4 Mi'i hawyi hemiit'in te'e­ra­'a­kasa typy ok Tupana ehay moherep haria sa'a­wy­'i­wuaria iwywo. Wẽtup ok Eria wẽtup ok Musei te'e­ra­'a­kasa. Mi'iria ti to'oehay Iesui wywo.
MAR 9:5 Mi'i hawyi Peteru to'e — Urumu'e hat e ta'i waku kahato meiũpe watoĩ­ne'en e. Etiky­'esat apuru urutunug ehe'og mye'ym e wẽtup ewano wẽtup Musei wano wẽtup Eria wano e Peteru Iesui pe.
MAR 9:6 Ma'ato ipoity'i tuete pono mio tã e ne'i. Ta'i token'ẽ pote. Yne ra'yn te'e­ro­ken'ẽ.
MAR 9:7 Mi'i hawyi ywyhig me ywaiti pyi sehay tut ra'yn — Uha'yru Uimi­ky'e kahato ti eipy­'a­setpe toĩne'en e. Mi'i tupono eweiwa­nẽtup to ihay kape are e Tupana ywaiti pyi.
MAR 9:8 Mio tã e hawyi Iesui yn na'yn heremo temiit'in yatype.
MAR 9:9 Mi'i hap totepyi tuwat popuo Iesui to'e towy­ria'in me mye'ym ok takaria pe — Yt ewehenoi tei'o aikotã Eimu'e hat ewei'a­kasa mesup yity'ok totiat hap irania'in me e. Ma'ato karãpe Uito Eheyke'et arẽtem gu'uro pyi hawyi ti aru waku ra'yn ewehenoi Eimu'e hat ewei'a­kasa mesup hap e.
MAR 9:10 Mi'i pote irania'in me yt ta'a­tu­henoi teran i. Ma'ato mio tã e Iesui pote te'e­ru­wa­nẽtup kahato — Kat pote mio tã e — Ara'aipok gu'uro pyi e i'atu'e te'e­re­wa­nẽtup hawyi.
MAR 9:11 Mi'i hawyi yity'ok tote­pywiat tuwat hap upi te'e­ro'e Iesui pe — Kat poteĩ sa'a­wy­'iwuat miwan enoi haria te'e­ro'e ahepe miwan me — Ta'i Tupana tipo­'oro ti aru wuat'i ehakye­ra'at hanuat ma'ato toipo­'oro aru Mi'i Miit e'yianme mekewat sa'a­wy­'iwuat tehay moherep hat Eria toipo­'oro Temiit ut hap moherep hamuat i'atu'e ahepe. Mio tã i'atu'e pote Iesui tiwesat — Ta'i Eria ti tut hamuat yianme uipu'ap mohãpyk hamo e. Ta'i tohenoi kahato Eria etiat miwan me. To'e hap ewy ti ra'yn e. I'ewyte ti tohenoi kahato Eheyke'et ku'uro hamuat hap etiat miwan me e.
MAR 9:12 I'ewyte tohenoi kahato aikotã ho'opot hamuat hap etiat aikotã i'atu­mi­ky­ry'i tuetiat hamuat etiat hap ko'i tohenoi miwan me wy e. Mi'i hap ewy ti tohenoi Eria ut hamuat hap etiat e.
MAR 9:13 Pywo ti Eria ti put'ok'e ra'yn ha'a­wyte ra'yn e hap ewy e. Ta'i Uimo­herep ta'yn miit'in me mi'i miit Tupana ehay moherep hat sa'a­wy­'iwuat Eria ewywuat e Iuwãu piat. Pywuat sese ti i'atu­mi­ky­ry'i kahato mi'i ete. Ta'a­tu­'auka ra'yn wyti aikotã sa'a­wy­'iwuat henoi hap ewy ti ra'yn e Iesui towy­ria'in mye'ym ok takaria pe mu'ap upi yity'ok totepyi.
MAR 9:14 Mi'i turan myhu'at haria irania'in hemiit'in tihep teran wẽtup ok kurum piit pyi ahiag pã'ãu ma'ato yt ta'a­tuhep kuap i. Mi'i pote itotiaria miwan enoi haria to'o­ky­ry'i kahato i'atuete. Mi'i turan Iesui put'ok'e i ra'yn i'atuete mye'ym ok takaria wywo.
MAR 9:15 Hemiit'in te'e­ra­'a­kasa Iesui kape hawyi pun'i­'a­tu'e howa kape irania'in typy'i rakaria wywo i'atu­wepit kahato ra'yn. Mi'i hawyi te'e­ru­wẽ­powat — Haika'at Uhyt haika'at Mimi i'atu'e.
MAR 9:16 Mi'i hawyi Iesui put'ok'e ra'yn i'atuete mye'ym ok takaria wywo hawyi Iesui apo'e i'atuepe — Kat eiwei'eĩ eiwo­'ope uhyt'i'in mana'in e.
MAR 9:17 Mi'i hawyi wẽtup ok typy'i tok pyi to'e — Wo'o­mu'e hat ga'atpo aterut uha'yru ahiag ipiit piat rakat ewawi wen ma'ato En yt uwe i e. Yt naku i kahato ahiag uha'yru ete Uhyt e. Ahiag teke hawyi yt ihay kuap i tuereto e.
MAR 9:18 Ta'i ta'at yi tote hawyi ti tuwe­'okhyt morem morem tuereto iwẽ enãpuk tyry'e kyry­'et­ky­ry'et e. Mi'i haype iku'uro porap i tuereto e hap. Yt naku i Uhyt e. Sa'a­wy'i epotmu­'eria pe ahẽtup ahiag putsithep hamuat hap wen ma'ato yt ta'a­tuhep kuap i e.
MAR 9:19 Mi'i hawyi Iesui to'e — Ta'i yt uimohey i haria miit'in mesuwat yi totiaria pote e. Karania e'at ti aru areĩne'en eiwywo eimu'e uimohey mono ui'e haype e. Karãmuo put'ok'e uimohey ehepiat hap woro­ho­'o­mu'e mot'i pytkai yt Tupano mohey i rakaria wo eweikup­te'en ne e. Pyno eterut ro meikowo uhowawi esa'yru ahiag ipiit piat rakat e Iesui ahiag ipiit piat rakat ywot pe.
MAR 9:20 Mi'i hawyi meremo ta'a­tuerut ra'yn howawi. Mi'i hawyi ta'a­kasa ra'yn Iesui ewa kape hawyi ahiag tipun hirakat yi tote hawyi toi'okhyt morem morem hawyi iwẽ enãpuk ta'yn.
MAR 9:21 Mi'i pote Iesui to'e i'ywot pe — Karãmuo kahu sa'a­wy'i meiko tã emẽpyt ete uhyt e. — Ta'i ihire pyi te mekewat ahiag toĩne'en ipiit pe Mehĩ e.
MAR 9:22 Aria pe kawiat re i ahiag tipun tuereto i'auka hamo e. Mi'i tusake ti y'y pe toi'auka teran tuereto i'auka hamo e. Yt naku i kahato mi'i tã uha'yru etiat hap uhete Uhyt e. Urueha­kye­ra'at ro En Uhyt e. Eithep kuap pote etihep to ahiag Uhyt e.
MAR 9:23 Mi'i hawyi Iesui tiwesat — Etihep kuap pote ere'e apo uhepe e. Kat pote mio tã ere. Yt uimohey i apo en. E'e hap kaipyi ti yt uimohey i kahato hap atikuap. Tupana mohey haria pe ti yt kat i niatpo e Iesui mio tã e pote.
MAR 9:24 Mi'i hawyi hirakat ywot to'e haty wo — Ta'i atimohey Tupana Uhyt ma'ato yt kahato i e. Pyno uipo­wyro po'og uhepiat Tupana mohey hamuat e tuwak popuo.
MAR 9:25 Mi'i turan typy'i ra'yn tõ'ẽ pote Iesui haty'i haty'i tehay wo ahiag — Erẽtem no ahiag sa'ag meiũwat hirakat piit pyi e. Yt naku i kahato en e. Miit'in pusu mõto hat en e. Miit'in ewaure ka'a pyhyp hat en e Iesui ahiag me. Yt karãmuo i ra'yn o era'aipok hirakat kape e.
MAR 9:26 Mi'i hawyi ahiag tuwẽtem na'yn kakto'e kakto'e popuo hawyi toihuruk huruk kurum tuwẽtem hawe. Mi'i hawyi kurum ta'at yi tote iku'uro rakat ewy ra'yn. Mi'i pote raso — Iku'uro ra'yn wyti i'atu'e ra'yn irania'in.
MAR 9:27 Ma'ato Iesui timo­poĩ'ãm na'yn topo wo hawyi ipoĩ'ãm waku i ra'yn tuete.
MAR 9:28 Mi'i hawyi toto i ra'yn Iesui wẽtup getap kape towy­ria'in nywo. Mi'i tote apo'i­'a­tu'e Iesui pe — Uhyt kat pote som yt uruihep kuap i mekewat ahiag uruto i'atu'e ra'yn.
MAR 9:29 Mi'i hawyi toi'a­tu­wesat — Ta'i uhyt'i'in mesuwat ewywuat ahiag niatpo kahato tuwẽtem e. Tupana yn na'yn ti mekewat ewywuat ihep kuap e. Ewehẽtup Tupana pe haty wo eiwe­mo­sy'at hap wywo ahiag hep hamuat mi'i pote yn ni tuwẽtem ma'ato iũte'en ewehẽtup pote yt karãpe i eweimõto kuap meremo mekewat ahiag ewywuat e Iesui temiit'in me.
MAR 9:30 Mi'i hap totepyi toto Iesui towy­ria'in wywo yi Karireia sakpo i ra'yn. Ma'ato yt tuwenoi i toto hamo irania'in me katu­pono temiit'in mu'e hamo ne'i tuweran toto.
MAR 9:31 Mi'i hawyi mu'ap upi toi'a­tu­mu'e mu'e kahato ra'yn towy­ria'in — Meiũran ti aru Uito Eheyke'et ta'a­tu­pyhik hawyi ui'auka ra'yn e. Mi'i hawyi ti aru ta'a­tusyp wo'o­pyhyp hawe e. Mi'i hawyi ti aru ta'a­tusyp hawyi mye'ym e'at yn iku'uro mekepe e. Mi'i hawyi ti aru ma'ato areĩne'en i ra'yn gu'uro pyi Uito Eheyke'et e.
MAR 9:32 Ma'ato mio tã e hap iwyria'in yt tikuap i ma'ato apo yt i'atu'e i katu­pono te'e­ro­ken'ẽ haype apo'i­'a­tu'e hap pupi.
MAR 9:33 Mi'i hawyi put'ok'e Iesui temiit'in wywo getap we hawyi apo'e temiit'in me — Mehĩ'in e kat ewei'eĩ eiwo­'ope ehehay mu'ap upi e.
MAR 9:34 Ma'ato yt ta'a­tu­wesat teran i katu­pono to'oehay moweu­ka'i ne'i — Uito ti wakuat no po'og eikai i'atu'e to'ope wen.
MAR 9:35 Mi'i hawyi ta'apyk ta'yn Iesui hawyi toi'a­tu­kaykay temiit'in 12 ok takaria hawyi tohenoi i'atuepe — Po'og nakano ereĩne'en neran mote ereĩne'en no wuat'i miit eropat hano wuat'i miit'in miat motpap nug hano. Mi'i hawyi po'og ereĩne'en Tupana wanẽtup hawe e Iesui temiit'in me i'ewyte ahepe.
MAR 9:36 Mi'i hawyi hirakat toipo­rokpun i'atu­py­'a­setpe hawyi toi'a­hi­'y­pysat hawyi to'e towy­ria'in me.
MAR 9:37 — Uwe uwe ti aru uhetiano wẽtup ok hirakat ky'e meikowat ewy e mi'i hat wyti uiky'e hano topy­hu'at e. I'ewyte uwe uwe uiky'e hat toĩne'en mi'i hat ti aru yt Uito yn i uiky'e ma'ato Uipo­'oro hat Tupana ky'e hano topy­hu'at wy e.
MAR 9:38 Mi'i hawyi iwy ok Iuwãu to'e — Wo'o­mu'e hat ga'atpo uruta­'a­kasa wẽtup ok ahiag sopo eset wuat hat e. Mi'i hawyi wãi'u­ru­to'e katu­pono yt aiwywuat hewyry rakat i pote e.
MAR 9:39 Mi'i hawyi Iesui tiwesat — Yt naku i wãiwa­to'e wẽtup ok pe uhet wuat ahiag sopo hat e katu­pono atiky­'esat mi'i ewywuat nug hap. Kat pote uhet wuat ahiag sopo haria yt te'e­ru­we­ky­ry'i kuap i uhet esaika hap ete e.
MAR 9:40 Mi'i pote uwe uwe uhehay etiat uhet etiat yt ipy'ahak i rakat mi'i hat aiwywuat hewyry rakat ewy toĩne'en e Iesui.
MAR 9:41 Ta'i uwe uwe ehepe hum y'y wẽtup ekui'a yn uhemiit'in eipe pote mi'i hat ti aru haipepiat ipuẽti ha'up Tupana piat e.
MAR 9:42 Uiwy­ria'in e ta'i yt naku i kahato wato­py­hu'at ihy pya pe nu wato aipiit ete saitynug wo katu­pono mi'i hap ewy hawyi aiku­'uro hap yn topy­hu'at. Mekewat nu ipotyi rakat aipiit ete pote yt wato'am kuap i ihy pya pyi hawyi. Ma'ato po'og yt naku i mi'i hap kai topy­hu'at aru hira­karia uimohey haria ma'at haria e.
MAR 9:43 Ma'ato eipo wo eweima'at hirakat pote waku eweitek eipo e. Katu­pono po'og waku eiwe­hyt'ok Tupana etawa pe wẽtup eipo wywo yn ma'ato typy eipo wywo eiwe­hyt'ok aria pe ne'i e.
MAR 9:44 Ta'i yt naku i ti eiwe­hyt'ok hamuat aikope aria yt hasep i hawe aikope ut yt topap i hawe e. I'ewyte eipy wo eweima'at hirakat wẽtup mu'ap upi mi'i ti waku eweitek eipy e.
MAR 9:45 Katu­pono po'og waku eiwe­hyt'ok Tupana etawa pe wẽtup eipy wywo yn ma'ato typy eipy wywo eiwe­hyt'ok aria pe ne'i e. Mi'i pote karãpe eipy ehewyry yt naku i nug hamuat po'og waku eweitek eipy eweiwat yt naku i nug hamuat kai are e Iesui ahepe.
MAR 9:46 Ta'i yt naku i ti eweikup­te'en hamuat aikope aria yt hasep i hawe aikope ut yt topap i hawe e.
MAR 9:47 I'ewyte eweima'at hirakat eheha wo mi'i eheha waku eweihep o are'e e.
MAR 9:48 Po'og waku wẽtup eheha wywo yn eiwe­hyt'ok aikope Tupana toĩne'en Morekuat no hawe. I'ewyte typy eheha wywo eiwe­hyt'ok aikope ut yt topap i rakat hap tote e Iesui tomohey haria hira­karia ma'at haria pe.
MAR 9:49 Mi'i hawyi Iesui to'e temiit'in me — Ta'i aria waku kahato aimi'u mokã'ã hamo e.
MAR 9:50 I'ewyte waku kahato ukyt yne mosẽ'ẽ hamo ma'ato ukyt yt hẽ'ẽ i rakanuat pote yt uwe i iky'esat e. Uhyt'i'in mi'i hap ewy o eweikup­te'en aria ewy ukyt hẽ'ẽ rakat ewy wuat'i mosẽ'ẽ hamo e. Hẽ'ẽ kahato rakaria ewy o eweikup­te'en eiwo­'ope e. Yt eiwu­'uka tei'o eiwo­'ope e Iesui temiit'in me e.
MAR 10:1 Mi'i hawyi Iesui toto i ra'yn yi Iuteu kape. Mi'i hawyi toto Iũtãu hy sakpo. Mi'i hap tote te'e­ru­wa­'a­tunug typy'i kahato howa kape. Mi'i hawyi tohenoi henoi i'atuepe tomi­ky­'esat ewy Tupana ehay.
MAR 10:2 Mi'i turan nagnia ehay enoi haria tõ'ẽ howa kape ima'at teran haype apo'i­'a­tu'e — Uhyt urunãpin En sio waku apo urueha­ry'i wywo uruto­'o­'atoiat wẽtup ok wywuat i ra'yn hamo i'atu'e Iesui pe.
MAR 10:3 Mi'i hawyi Iesui ti'a­tu­wesat — Kat eĩ pono nimuat aha'a­se'i Musei ainãpin mi'i hap yt eweikuap i apo'e.
MAR 10:4 Mi'i hawyi ta'a­tu­wesat — Nimo Musei to'e — Eiwo­'o­'atoiat teran pote ewetunug miwan popera tote yt eiwo­'o­wese i hap morekuat ehamo mi'i hawyi ti waku eiwo­'o­'atoiat e Musei sa'a­wy'i i'atu'e.
MAR 10:5 Ma'ato Iesui ti'a­tu­wesat — Eweikuap kat pote Musei einãpin mio tã e. Pyno ahenoi ehepe. Ta'i yt eiwo­'o­ky'e kuap i ti eipy'a heg mote. Mi'i pote ti Musei mio tã e miwan me e.
MAR 10:6 Ma'ato sa'a­wy'i sese ti yt mi'i tã hin i katu­pono sa'a­wy'i te ti Tupana tunug miit ipa'iat iwary'i e.
MAR 10:7 Mi'i tupono waku ihainia ti'atoiat to'ywot toty hawyi teha­ry'i wywo toĩne'en e.
MAR 10:8 Mi'i hawyi ihainia teha­ry'i wywo wẽtup piit ieĩne'en hap ewy ra'yn topy­hu'at e.
MAR 10:9 Mi'i tupono yt eweitek tei'o Tupana mipo'i wo'o­kyi'at hap e.
MAR 10:10 Getap wiat hawyi iwyria'in apo'i­'a­tu'e Iesui pe — Kat to'e hawe som mio tã i'atu'e.
MAR 10:11 Mi'i hawyi toi'a­tu­wesat — Uwe uwe teha­ry'i atoiat mi'i hawyi toĩne'en wẽtup ok wywo i ra'yn mi'i hat ti yt naku i inug teha­ry'i sa'a­wy'i pe Tupana wanẽtup hawe e.
MAR 10:12 I'ewyte ti uwe te'aito atoiat mi'i hawyi toĩne'en wẽtup ok wywo i ra'yn mi'i hat ti yt naku i inug te'aito sa'a­wy'i pe Tupana wanẽtup hawe e. Mi'i tã ti yt naku i kahato ewetunug uimohey haria eipe pote e Iesui.
MAR 10:13 Mi'i hawyi miit'in te'e­ro­po'ok teran hira­karia Iesui ewawi i'atue­waku topo wuat hamo. Ma'ato ipotmu­'eria ti'a­tu­pyhyp hira­karia howawi waĩ'i­'a­tu'e.
MAR 10:14 Mi'i pote ipy'ahak Iesui temiit'in ete hawyi to'e — Tero tõ'ẽ uhowawi hira­karia e. Yt eweipyhyp tei'o uhowawi hira­karia pãi e. Katu­pono karãpe Tupana topy­hu'at Wuat'i Ywania Miit'in Porekuat no mi'i hap e'at pe hemiit'in imohey haria hira­karia ewy ra'yn tukup­te'en hetama pe.
MAR 10:15 Pywo pe ti eweiwat teran aikope Tupana toĩne'en Morekuat no hap kape pote aikotã hira­karia tiky­'esat tuwe­hyt'ok ta'a­tuty ta'at­'ywot kapiat hap ewy o eweiky­'esat eiwe­hyt'ok hap ma'ato yt pote ti aru yt eiwe­hyt'ok hin i atipy pe e Iesui topot­mu­'eria pe.
MAR 10:16 Mi'i hawyi hira­karia toi'a­tu­'ok­hytsat hawyi topo wo toi'a­tue­waku.
MAR 10:17 Mi'i hap totepyi Iesui toto ra'yn. Mi'i turan wẽtup ok hekat rakat pun'e Iesui owawi mu'ap upi. Put'ok­to'e hawyi tuwe­pỹ­'ã­tutuk howa kape. Mi'i hawyi to'e — Wo'o­mu'e hat waku kahato En e. Mi'i pote uimu'e katu­pono atiky­'esat wyti areĩne'en wuat'i e'at piat hap e ma'ato yt atikuap i kahato kat som atunug waku ha'up mo e. En ni wakuat kahato e.
MAR 10:18 Mi'i hawyi Iesui to'e mekewat miit pe — Tupana yn ni wakuat e. Uito wakuat ere'e apo. Uito Tupana ewanẽtup hawe apo e.
MAR 10:19 Mi'i hawyi Iesui to'e tope — Etikuap apo Tupana wo'o­nãpin hap ko'i yt erepot­'auka tei'o e hap yt wẽtup ok wywo tei'o ehary'i e'aito e hap yt sero­'ok­'ere tei'o e hap yt eso tei'o e hap yt erepot­ma'at tei'o e hap etimõ­typot e'ywot ety e hap etikuap apo'e. Ta'i mio tã e hap etikuap e Iesui kurum iwasu hekat rakat pe.
MAR 10:20 Mi'i hawyi kurum iwasu tiwesat — Ta'i uihire pyi te ti yt ati'a­parap i mio tã e hap ete e.
MAR 10:21 Mi'i hawyi Iesui teha'at howawi iky'e kahato hap wywo hawyi to'e — Mehĩ wẽtup mo etunug hawyi waku ereĩne'en ne'en Tupana wywo e. Pyno motoro e'yat kape hawyi etimõ'ẽ yne ekare'en yt hekat i rakaria pe hawyi era'aipok uhowawi ereto uhupi hamo e. Mi'i pote ti aru ekare'en sese etipuẽti Tupana etama pe e.
MAR 10:22 Mio tã e Iesui pote paa'e ne'i ra'yn hawyi toto Iesui kaipyi yt iwepit i ra'yn katu­pono iwat heka­re'en iwato kahato pote yt toimõ'ẽ teran i.
MAR 10:23 Mi'i hawyi Iesui teha'at temiit'in kape hawyi to'e — Are pãi niatpo kahato ti rat weka­re'en ky'e haria tuwe­hyt'ok aikope Tupana toĩne'en Morekuat no hawe e.
MAR 10:24 Mi'i hawyi hemiit'in te'e­ru­we­wa­nẽtup kahato ihay kape mi'i hawyi Iesui to'e i — Ta'i niatpo kahato ti rat weka­re'en mohey hat teke aikope Tupana Morekuat no toĩne'en hawe e.
MAR 10:25 Ta'i niatpo kahato aikotã aihũ iwato rakat Kameru teke awi ehapo ka'a puo hap ewy e. Mi'i hap ewy ma'ato ti po'og niatpo tuwe­hyt'ok Tupana etama pe weka­re'en mohey haria e temiit'in me.
MAR 10:26 Mi'i hawyi hemiit'in gyt'i­'a­tu'e i ra'yn hawyi te'e­ro'e to'ope — Pyno yt uwe i hekat rakat pono teke kuap atipy pe i'atu'e. Mi'i hawyi apo'i­'a­tu'e Iesui pe — Yt uwe i aru pono hekat rakaria Tupana mi'a­tue­ha­kye­ra'at rakaria i'atu'e.
MAR 10:27 Mio tã i'atu'e pote Iesui teha'at i'atue­wawi hawyi to'e — Pywo ti rat yt uwe i tuwee­ha­kye­ra'at kuap tuwewi. Tupana yn ti'a­tue­ha­kye­ra'at kuap miit'in e.
MAR 10:28 Mi'i hawyi Peteru to'e ra'yn — Urumu'e hat sa'a­wy'i te ti uru'atoiat yne meimuẽwuat ko'i uruekat eupiat urutuwat hamo e Peteru Iesui pe.
MAR 10:29 Mi'i hawyi Iesui to'e — Atikuap eimi­'atoiat yne hap e. Ta'i pywo ti rat are'e ehepe uwe uwe uhehay moherep wẽtup ywania pe toto uiky'e haype hawyi i'atoiat to'yat towy­ria'in toty to'ywot tomẽ­pyt'in tomikoi ko'i mi'i hat po'og toipuẽti sa'a­wy­'iwuat wakuat tomi­'atoiat hap ko'i kai e.
MAR 10:30 Mi'i hawyi toipuẽti mesu­wa­rotiat ko'i kai po'og po'og na'yn sa'a­wy­'iwuat kai aikotã 100 hap ewy aru toipuẽti to'yat ko'i towy­ria'in toty'in tomẽ­pyt'in tomikoi ko'i sa'a­wy­'iwuat wẽtup takat tomi­'atoiat kai 100 hap ewy aru toi'a­tu­puẽti e. I'ewyte ti aru eweipuẽti miit'in miky­ry'i hap uhehay upi uhupi eweiwat pote e. I'ewyte mesu­wa­rotiat toku­'uro hap saipepiat toipuẽti hamuat toieĩne'en hap yt sakewuat ikahuro rakat i ra'yn e.
MAR 10:31 Mekewat e'at pe ti aru ipoity kahato sa'a­wy­'iwuat mesu­wa­ro­tiaria iwato rakaria te'e­ro­py­hu'at kurin rakaria wo yt miit'in mimõ­typot ko'i i wo e. Ma'ato sa'a­wy­'iwuat kurin nakaria paa'e haria ti aru te'e­ro­py­hu'at po'og iwato rakaria wo po'og mimõ­typot ko'i wo wuat'i miit'in kai atipy pe e Iesui temiit'in me.
MAR 10:32 Mi'i hawyi Iesui ipot'am towy­ria'in e'yianme tawa wato Ieru­sarẽi kape. Mi'i hawyi te'e­ro­ken'ẽ kahato ipotmu­'eria i'ewyte i'atu­wuwu kahato katu­pono — Ta'i itote tukup­te'en ai'auka teran haria i'atu'e to'ope. Mi'i pote toi'a­tu­kaykay tuwe­wawi temiit'in hawyi tohenoi i'atuepe aikotã aikotã tawa wato Ieru­sarẽi miaria tunug tuwetiat hamuat.
MAR 10:33 — Wato hamuat wyti tawa Ieru­sarẽi kape e. Put'ok­wa­to'e itote hawyi ti aru Uito Eheyke'et pa'i kororia miwan enoi haria uipag na'yn sura­ra'in po pe ra'yn e. Mi'i hawyi mi'iria ti aru uipo­'oro ra'yn ui'auka hamuat kape e hawyi ti aru irania'in ywania po pe uipag ui'auka hamo e. Mi'i hawyi te'e­rehay miky­ry'i kahato uhete.
MAR 10:34 I'ewyte kuitu­'i­'a­tu'e uhete e. Mi'i hawyi ti aru uipokpok ta'yn hawyi ti aru ui'auka ra'yn wen ma'ato ti aru mye'ym e'at yn areĩne'en gu'uro pe hawyi ti aru areĩne'en i ra'yn Uito Eheyke'et e Iesui mu'ap upi tawa Ieru­sarẽi kapiat tuwat hap upi.
MAR 10:35 Mi'i hawyi hemiit'in Iuwãu Tiaku Sepeteu sa'y­ru'in tuwat Iesui kape hawyi ta'a­tu­hẽtup tope — Urumu'e hat etum uruepe kat urumi­ky­'esat ok tã i'atu'e.
MAR 10:36 Mi'i hawyi to'e — Pyno kat som eweiky­'esat atum ehepe e.
MAR 10:37 Mi'i hawyi ta'a­tu­wesat — Pyno karãpe eropy­hu'at Wuat'i Miit'in Porekuat no mi'i turan ni aru uruiky­'esat uruta­'apyk po'og e'yatype etu'i­saria wo emimõ­typot ko'i irania'in kai i'atu'e.
MAR 10:38 Ma'ato Iesui ti'a­tu­wesat — U yt eweikuap i kahato kat som ewehẽtup uhepe hap e. Pyno uhekui'a pyi apo eiwe­'y­'ukuap e. Uhatek hap apo ewehã'ãg kuap e.
MAR 10:39 Mi'i hawyi ta'a­tu­wesat — Ta'i uruhepap kahato i'atu'e.
MAR 10:40 Mi'i hawyi Iesui to'e — Pywo eiwe­'y'u aru ti uhekui'a pyi i'ewyte ewehã'ãg irane uhatek hap e ma'ato eimiẽtup uhepiat ti yt atum kuap i ehepe katu­pono Tupana ti'airo yn na'yn ui'ya­typiat apyk hanuaria e Iesui Tiaku Iuwãu pe.
MAR 10:41 Mio tã i'atu'e ta'a­tu­hẽtup Iesui piat pote irania'in hemiit'in i'atu­py­'ahak Iuwãu Tiaku ete.
MAR 10:42 Mi'i hawyi Iesui ti'a­tu­kaykay i ra'yn tuwe­wawi hawyi to'e i'atuepe — Uheka­tu­wyria e eweikuap apo aikotã mesu­wa­rotiat more­kuaria te'e­ru­we­mo­wato kahato hap e. Ta'i ta'a­tu­po­'oro kahato ti ta'a­tue­miit'in sehay pirik wo e.
MAR 10:43 Ma'ato mesu­wa­ro­tiaria epore­kuaria ewy yt atiky­'esat hin i eweikup­te'en e. Ma'ato uwe wemo­wato teran hat wuat'i powyro hano atiky­'esat e.
MAR 10:44 Uwe topy­hu'at ei'akag wo teran mi'i hat waku topy­hu'at ehemiit no Eheyke'et ewy e. Katu­pono Uito Eheyke'et ariot mesuwat yi kape miit'in eropat hamo e. Ma'ato yt miit'in miat uheropat hamo i ariot mesuwe e.
MAR 10:45 Ta'i miit'in hep yt nakuap i pywiat hamo ariot ehowawi e. Ta'i uheĩne'en hap atum irane wuat'i miit'in kyi'at Tupana wanuat sa'up mo atum uhuu e Iesui topot­mu­'eria pe.
MAR 10:46 Mi'i hawyi Iesui put'ok'e i tawa Ieriko pe temiit'in nywo. Mi'i hawyi tuwe­nõ'ẽ mekewat tawa pyi miit'in tok puo. Mi'i hawyi tawa ekuekai mu'ap tote toĩne'en mehĩ Patimeu apyk pe. Mi'i ti yt iha pytig i. Wuat'i kaipywiat kat ẽtup hat toĩne'en. Mi'i ti Timeu sa'yru.
MAR 10:47 Mi'i hawyi toikuap ta'yn Iesui tawa Nasare piat ut hap hawyi tohẽtup haty wo Iesui pe — Morekuat Tawi Sa'yru uheha­kye­ra'at En e.
MAR 10:48 Ma'ato so irania'in — Wãi'i­'a­tu'e ehay pirik kahato. Epo'inik to i'atu'e. Ma'ato po'og ne'i haty wo iwẽpap'i tuwatka watka — Morekuat Tawi Sa'yru uheha­kye­ra'at En e Iesui pe.
MAR 10:49 Mi'i hawyi Iesui topy­hu'at hawyi to'e — Eweikaykay ro meikowo yt iha pytig i rakat e i'atuepe. Mi'i hawyi te'e­ro'e Patimeu pe — Iesui ekaykay ra'yn koitywy uhyt mimi i'atu'e. Pyno epoĩ'ãm no ereto ro ewepit ro i'atu'e.
MAR 10:50 Toikuap hawyi topysop toipun hawyi ipoĩ'ãm peso'e hawyi toto ra'yn Iesui kape.
MAR 10:51 Mi'i hawyi apo'e Iesui tope — Pyno kat aru emiky­'esat atunug epe e. Mi'i hawyi toiwesat — Wo'o­mu'e hat uheha pakup i nug hap atiky­'esat e.
MAR 10:52 Mi'i hawyi Iesui to'e tope — Pyno koitywy waku ra'yn eha ete katu­pono uimohey hap emoehãite ra'yn e. Mi'i hawyi meremo waku ra'yn tuete ta'a­kasa i ra'yn. Mi'i hawyi Patimeu toto mu'ap upi Iesui upi sa'a­wy­'iwuat yt iha pytig i rakat.
MAR 11:1 Mi'i hawyi Iesui toto i ra'yn tawa wato Ieru­sarẽi kape towy­ria'in wywo. Put'ok­to'e mekewat yity'ok Uriweira ypia yity'ok hap het rakat tote hawyi te'e­ra'am hawyi te'e­ro­py­hu'at mekewat yity'ok tote. Yt pya hin i ra'yn tawa wato Ieru­sarẽi kai tawa Pewake kai tawa Petania kai tukup­te'en itote.
MAR 11:2 Mi'i totepyi toi'a­tu­po­'oro typy ok temiit tawa Ieru­sarẽi kape — Eweiwat ro mekewat tawa kape hawyi put'ok­'e­wei'e hawyi aru ewei'a­kasa aru wẽtup i'atuhũ Iumentu mẽpyt ta'a­saity piat eweipuẽti aru e. Mekewat i'atuhũ Iumentu mẽpyt pakup takat toĩne'en katu­pono yt uwe i hewyry itotiat rakat te toĩne'en i'atuhũ e. Pyno mi'i hawyi o waku ewei'a­sai­typok hawyi o eweterut ra'yn i'atuhũ uhowawi katu­pono uhewyry teran mekewat Iumentu mẽpyt rote areto tawa wato Ieru­sarẽi kape teran e Iesui typy ok temiit'in me.
MAR 11:3 Mi'i hawyi to'e i tomi­po­'oro ko'i pe — Ta'a­tukuap teran aru — Kat hamoĩ ewetioto uruhũ i'atu'e hawyi waku ewei'e aru — Aika­'iwat wyti ipuru porap'i eihũ uhyt'i'in waku ewei'e o ika'i­waria pe e Iesui typy ok tomi­po­'o­roria pe.
MAR 11:4 Mi'i hawyi tuwat ra'yn hawyi mi'i Iesui e hap ewy ra'yn ta'a­tu­puẽti itote i'atuhũ Iumentu ta'a­saity pe mu'ap tote oken note.
MAR 11:5 Mi'i hawyi ta'a­tu­'a­sai­typok pote itotiaria apo'i­'a­tu'e — Kat hamoĩ ewetioto uruhũ i'atu'e.
MAR 11:6 Mi'i hawyi ta'a­tu­wesat — Aika­'iwat Iesui wyti ipuru meremo i'atu'e. Mi'i hawyi so — Pyno waku i'atu'e.
MAR 11:7 Mi'i hawyi ti tuwat ra'yn i'atuhũ wywo Iesui kape. Put'ok­'i­'a­tu'e hawyi ta'a­tu­po­rokpun i'ok tote ta'a­tue­sokpe ko'i i'atuhũ tote. Mi'i hawyi Iesui ta'am na'yn apyk pe mekewat Iumentu pakup ok tote.
MAR 11:8 Mi'i hawyi irania'in iporokpun ta'a­tue­sokpe yi upi. Ta'a­tu­terek i'yhop ko'i haga ko'i ga'a­koran ko'i hawyi ta'a­tu­po­rokpun howa kai ipu'ap mokahu hamo more­kuaria pu'ap ewy.
MAR 11:9 Mi'i hawyi yianmiaria wat'y­muaria te'e­rehum ta'a­tuehay wepit wywo — Ta'i waku kahato ti Tupana i'atu'e. Meiũwat Miit ti Tupana Mimõ­typot i'atu'e.
MAR 11:10 Meiũwat Miit ri Tupana Mipo­'oro Aipo­rekuat nuat aikotã morekuat Tawi ewywanuat i'atu'e. To'iro Tupana Mipo­'oro Morekuat Tawi Saipepiat sese mõtypot hamo i'atu'e mekewat mu'ap upiaria sem tuwat tuwat Iesui upi tawa wato Ieru­sarẽi kape turan.
MAR 11:11 Put'ok'e tawa wato Ieru­sarẽi me hawyi Iesui teke Tupana mõtypot hawe. Mi'i hawyi teha'at yne hawyi toto i tawa wato Ieru­sarẽi myi wãtym neran moity'i pote toto mekewat tawa hit Petania kape temiit'in 12 ok takaria wywo.
MAR 11:12 He'i­hot'ok pe tawa Petania kaipyi ta'aipok i ra'yn Ieru­sarẽi kape. Mi'i hap tote mu'ap upi Iesui hesy'at kahato ra'yn.
MAR 11:13 Mi'i hawyi ta'a­kasa Wiku yp kape pya wuat kape i'yhop kahuria rakat kape. Mi'i hawyi toto haat ky'ewi ma'ato yt kat i haat toipuẽti. I'yhop yn toipuẽti hesy'at turan. Yt haat rakat i.
MAR 11:14 Mi'i hawyi Iesui to'e Wiku yp we hawyi — Are pãi e pyno mi'i hawyi wyti aru yt sake i ra'yn esaat e. Yt uwe i ra'yn ti aru esaat'u e tesy'at hap wywo te. Mio tã e hap hemiit'in tikuap.
MAR 11:15 Mi'i hawyi Iesui toto temiit'in wywo i ra'yn Ieru­sarẽi kape. Put'ok­ta­'a­tu'e hawyi tuwe­hyt'ok i ra'yn Tupana mõtypot yat wato pe. Mi'i turan kare'en kyi'at haria wene­ru'i wene­ru'i e haria tukup­te'en itote typy'i kahato toipuẽti. Mi'i hawyi Iesui ti'a­tu­po­re­nõtem i ra'yn mi'iria Tupana mõtypot yat wato hawyi. Mi'i hawyi Iesui i'atue­ti­neiru pat'ok pat'ok hap mesa yparakai ko'i tohytpok yne. Mi'i hawyi pykasu weneru haria e'amyap ko'i tohytpok yne. Toi'a­tu­sopo yne i'atukat weneru haria.
MAR 11:16 Mi'i hawyi herut haria toi'a­tu­pyhyp ta'yn yt toiky­'esat i ra'yn Tupana mõtypot yat wato e'okipy sakpo toko­ka'at.
MAR 11:17 Mi'i hawyi mi'i haria toi'a­tu­nãpin haty wo — Yt eweikuap i apo aikotã Tupana to'e Isaia miwan me — Ui'yat rat ri atiky­'esat wuat'i ywania ehay uhowawiat hamuat e. Ma'ato ti Tupana mõtypot yat ewetunug sero­'ok'e haria yat no ne'i are e. Yt naku i kahato ewetunug are e Iesui Tupana mõtypot yat piaria kare'en weneru haria pe.
MAR 11:18 Mi'i tã na'yn tutnug mote miwan enoi haria pa'i akagnia tikat kahato ra'yn aikotã miat i'auka hamuat ma'ato te'e­ro­ken'ẽ Iesui pupi kat pote typy'i poity'i ihay upiaria pote.
MAR 11:19 Mi'i hawyi wãtym'i irane hawyi toto Iesui tawa Ieru­sarẽi myi temiit'in wywo.
MAR 11:20 Mi'i hawyi he'i­hot'ok pe hunete Iesui toto i ra'yn towy­ria'in nywo Ieru­sarẽi kape. Mi'i hawyi mu'ap upi iwyria'in te'e­ra­ha'at i mekewat Wiku yp kape. Mi'i turan i'yp gag na'yn hapo wywo ra'yn.
MAR 11:21 Mi'i hawyi ti Peteru to'e — Urumu'e hat mekewat Wiku yp iku'uro ra'yn emisa­ty'i saty'i e.
MAR 11:22 Mi'i hawyi Iesui ti'a­tu­nãpin — Ta'i eweimohey ro Tupana haty wo e.
MAR 11:23 Pywo pe ti are'e ehepe uwe uwe meiũwat yity'ok wato rakat ewywuat pe to'e — Ereto ro meiũpepyi y'y wato kape hawyi min'ere ro y'y wato pe imohey hap wywo yn mi'i pote ti aru topopy ra'yn meremo yity'ok y'y wato kape hawyi min'e imohey hap ok tã are e.
MAR 11:24 Mi'i tupono ti karãpeĩ eimi­ky­'esat ehẽtup Tupana pe imohey hap wywo ewei'e ro eipy'a pe — Tut aru tut aru pãi tut aru an uimiẽtup ewywuat ewei'e ro eipy'a pe e. Katu­pono imohey hap wywo ehẽtup Tupana pe pote eimiẽtup ewy tutunug ehepiat tomohey hap ok tã tutunug. Mi'i pote ti meremo aru eipo pe ra'yn eimi­ky­'esat toĩne'en Tupana miium emiẽtup hap ok tã.
MAR 11:25 Pyno Tupana kapiat ehehay hamo eweimo­hãpyk to eipy'a piat yt eiwo­'o­wese i hap ko'i mi'i pote ti aru Ei'ywot atipy piat timo­hãpyk yne eiminug yt nakuap i ko'i e.
MAR 11:26 Ma'ato yt waure wo i eweikup­te'en mote ti aru Ei'ywot atipy piat i'ewyte yt waure wo i toĩne'en eiminug sa'ag ko'i ete e Iesui temiit'in me Wiku yp gag na'yn hap tote apo'e haria pe.
MAR 11:27 Mi'i hawyi put'ok'e i ra'yn Iesui tawa wato Ieru­sarẽi me. Mi'i hawyi Tupana mõtypot hap yat puo hewyry. Mi'i hawyi pa'i akag ko'i seko miwan enoi haria i'ewyte nagnia tipuẽti Iesui itote.
MAR 11:28 Mi'i hawyi apo'i­'a­tu'e Iesui pe
MAR 11:29 — Uweĩ epo'oro ga'atpo meketã nug hamo Tupana mõtypot yat pyi uruemiit'in sopo hamo i'atu'e.
MAR 11:30 Mi'i hawyi Iesui ti'a­tu­wesat — Pyno ahenoi aru ehepe wen ma'ato sa'a­wy'i ewehenoi uhepe uwe ipo'oro Iuwãu wo'o­set'ok hamo sio Tupana sio miit'in e Iesui.
MAR 11:31 Mi'i hawyi ta'a­tukat Iesui wesat hamuat hap. Mi'i hawyi te'e­ru­wa­nẽtup — Kat wato'e som waku wati­wesat i'atu'e. Sio Tupana ti Iuwãu po'oro hat wato'e pote ti ren — Kat poteĩ pyno yt eweimohey i Iuwãu e aru ahepe.
MAR 11:32 Ma'ato miit'in mipo­'oro ti Iuwãu wato'e pote aru i'atu­py­'ahak ahete irania'in katu­pono irania'in Iuwãu mohey haria tukup­te'en i'atu'e to'ope.
MAR 11:33 Mi'i hawyi ta'a­tu­wesat Iesui — Uhyt yt uruikuap i sese uwe ehay pyi Iuwãu topot­set'ok i'atu'e. Mi'i pote Iesui ti'a­tu­wesat — Yt uiwesat i pote mi'i hawyi yt ahenoi i ehepe uwe ehay pyi ati'a­tu­sopo wene­ru'i wene­ru­'i'e haria pya Tupana mõtypot yat pyi hap e Iesui pa'i akag ko'i miwan enoi haria pe.
MAR 12:1 Mi'i hawyi Iesui henoi hã'ãkap wuo i'atuepe sehay — Wẽtup e'at pe so wẽtup ok miit tuwa­nẽtup Uwa ypia nug tepiat hap ete e. Mi'i hawyi toikoi hawyi toi'a­tu­pyhyp kurara wato pe hawyi tutunug nu ka'a wato Uwa hy sat hamuat e. Mi'i hawyi so i'ypia py'a­setpe tuwe­py­typnug ywaiti rakat surara eiam Uwa u haria pupi Uwa ero'ok haria pupi e.
MAR 12:2 Hãpyk yne hawyi ipotpap takaria po pe ra'yn toipuru. Mi'i hawyi so toto ra'yn tewyry hamo e. Meiũran haat hap e'at pe so toipo­'oro wẽtup ok temiit Uwa po'ok hamo e.
MAR 12:3 Mi'i hawyi put'ok'e ipotpo­'oro imikoi ypia pe ma'ato yt i'atu­wese i ra'yn imipo­'oro ete. Yt ta'atuium neran i ra'yn ta'a­tu­mi­po'ok e. Mi'i hawyi ta'a­tu­pytyk hawyi ta'a­tu­pokpok kahato ra'yn. Mi'i hawyi ta'a­tu­po­re­ra­'aipok yt kat nywo i ra'yn e.
MAR 12:4 Mi'i hawyi wẽtup ok temiit i ra'yn ika'iwat tipo­'oro ma'ato i'ewyte mi'i ipotpap takaria ti'ahyk ahyk i'akag ete e. Mi'i hawyi i'atu­mi­ky­ry'i wo ne'i ra'yn.
MAR 12:5 Mi'i hawyi wẽtup ok temiit i ra'yn toipo­'oro. Mi'i ti ta'a­tu­'auka ra'yn e. Mi'i hawyi irania'in i ra'yn toi'a­tu­po­'oro ma'ato i'ewyte te ta'a­tunug irania'in ta'a­tu­'ahyk ahyk irania'in ta'a­tu­'a­tu­'uka ne'i ra'yn e Iesui.
MAR 12:6 Mi'i hawyi Ha'yru yn na'yn topy­hu'at Imiky'e kahato. Mi'i ti ma'ato toipo­'oro — Ta'i Uha'yru sese tupono ti aru ta'a­tu­mõ­typot kahato ra'yn Mi'i Miit rat pãi e so tuwa­nẽtup hawe e.
MAR 12:7 Ma'ato ti yt hin i. Mi'i hawyi te'e­ro'e to'ope — To'iro wati­'auka I'ypia Ka'iwat Sa'yru i'atu'e. Katu­pono ti aru meiũran Mi'i ra'yn Ika'iwat Pakup mo i'atu'e. Wati­'auka hawyi mono aipo pe yne ra'yn topy­hu'at mesuwat mikoi ypia i'atu'e ne'i to'ope e Iesui tuwepiat.
MAR 12:8 Mi'i hawyi ta'a­tu­'auka ra'yn Ha'yru hawyi ta'a­tu­pugha ipiit mikoi i'ypia kaipyi e.
MAR 12:9 Mi'i hawyi Iesui to'e — Kat aru mi'i hawyi mikoi ypia Ka'iwat tunug Tosa­'yru auka haria ete e. Ta'i tut hawyi ti aru toi'a­tu­'uka mi'iria hawyi ti aru wẽtup ywania po pe i ra'yn toipuru te'yi e Iesui nagnia pe to'auka teran haria pe.
MAR 12:10 Mi'i hawyi Iesui to'e i'atuepe — Yt karãmuo i apo eiwe­mu'e miwan me aikotã Tupana to'e sa'a­wy­'iwuat hap ete — Meiũran aru Wẽtup ok Uimi­'airo i'apy­'yha ewywuat netap nug haria yt tiky­'esat i uimõ­typot yat nug hamo e Iesui. Ma'ato mi'i ti aru topy­hu'at netap akywyt yp mo ipo'og hesaika irania'in kai e.
MAR 12:11 Mi'i wyti Aipo­typot minug ikahu kahato rakat atipuẽti e. Mi'i wyti aru akywyt yp mo aha'a­wynug uimõ­typot yat sese ui'yat nug haria yt tiky­'esat i pytkai e ti miwan me e morekuat Tawi miwan 118.22 pe.
MAR 12:12 Mio tã e pote hewa­nĩ­kaptia te'e­ru­wa­nẽtup kahato hawyi te'e­ro'e — Ahete ti mio ihay yt wati­ky­'esat i Iesui pote i'atu'e. Mi'i pote ta'a­tu­pytyk teran Iesui ma'ato typy'i poity'i iwyria'in pote te'e­ro­ken'ẽ hawyi tuwat Iesui yaty­pepyi.
MAR 12:13 Mi'i hawyi meiũran morekuat Eroti emiit ta'a­tu­po­'oro Iesui kape nagnia ehay enoi haria Iesui ehay aparap ta'a­tuehay wuat hamo tuwat.
MAR 12:14 Mi'i hawyi apo'i­'a­tu'e — Wo'o­mu'e hat i'atu'e ta'i uruikuap En. Pywo ti ehenoi hãpyk yn Tupana kapiat pu'ap wuat'i miit'in me katu­pono yt uwe pupi i ereken'ẽ i'atu'e. Wẽtup ehay yn ehenoi wuat'i miit'in i'atu'e. Mi'i tupono urunãpin En. Waku apo aheti­neiru wati­pat'ok morekuat wato Sesa pe sio yt i'atu'e Iesui pe.
MAR 12:15 Ma'ato Iesui tikuap toiã'ãg ne'i hap morekuat mõpy­'ahak hap. Mi'i hawyi toi'a­tu­wesat — Kat poteĩ mio tã ewei'e sio apo uhã'ãg hap e. Eweterut ro uhepe tineiru i'ape rakat ara'a­kasa mono pyno e Iesui apo'e haria pe.
MAR 12:16 Mi'i hawyi ta'a­tu­'erut ra'yn hawyi Iesui apo'e i'atuepe — Uwe iã'ãkap kahu pyno meiũ tineiru ete toset wywo e. Mi'i hawyi ta'a­tu­wesat — Ta'i morekuat wato Sesa iã'ãkap ti i'atu'e.
MAR 12:17 Mi'i hawyi Iesui to'e — Pyno waku watum morekuat wato pe towanuat ko'i sa'up e. Ma'ato Tupana wanuat ko'i sa'up waku watum Tupana pe e. Mi'i hawyi mio tã e Iesui pote te'e­ro'e to'ope — Pywo ti rat ihay hãpyk kahato Iesui wyti i'atu'e. Ta'i tuwe'eg kahato ti ihay i'atu'e to'ope Iesui ewanĩ­kaptia.
MAR 12:18 Wẽtup e'at pe hawyi tõ'ẽ Iesui kape wo'o­mu'e haria. Mi'iria so miit'in mu'e aiku­'uro hawyi ti yt kat i ra'yn aheĩne'en pakup i hap e haria. Mi'iria so apo'i­'a­tu'e Iesui pe.
MAR 12:19 — Wo'o­mu'e hat nimo te Musei miwan ainãpin hap mio tã e — Karãpe eheyke'et iku'uro ma'ato yt kat i imẽpyt mi'i pote waku hehiwu iywyt ehary'i wo iku'uro rakat mẽpyt nug hamo e ti Musei mienoi nimuat Mekewat Musei miwan miat Teute­ru­numiu 25.5 pe i'atu'e.
MAR 12:20 Mi'i hawyi wẽtup e'at pe so iywyt sem nakaria toĩne'en. Mi'i hawyi so i'atuy­ke'et tipuẽti teha­ry'i ma'ato meiũran so iku'uro yt imẽpyt i te turan i'atu'e.
MAR 12:21 Mi'i hawyi so iywyt wywo i ra'yn hehiwu toĩne'en i'atu'e. Mi'i i'ewyte yt imẽpyt i te turan so iku'uro ra'yn i'atu'e.
MAR 12:22 Meiũran 7 ok takat topap yne ta'a­tue­hiwu yatype ma'ato yt wẽtup ok i imẽpyt topy­hu'at i'atu'e Iesui pe. Mi'i hawyi so iku'uro ra'yn i'atue­hiwu i'atu'e aiku­'uro hawyi yt kat i aheine'en hap e haria Iesui pe.
MAR 12:23 Mi'i hawyi apo'i­'a­tu'e Iesui pe — Atipy pe hawyi mekewat hiwu uwe te'aito wywo toĩne'en kat pote 7 he'aito toĩne'en mesuwe pote. Mi'i hawyi apuru uwe wary wo mekewat hary­poria katu­pono 7 ok he'aito i'atu'e Iesui pe.
MAR 12:24 Mi'i hawyi Iesui ti'a­tu­wesat — Ta'i ewei'a­parap kahato wyti katu­pono yt eweiwa­nẽtup hãpyk hin i wyti uhyt'i'in e katu­pono Tupana mienoi yt eweikuap i kahato i'ewyte Tupana esaika hap yt eweikuap i kahato e i'atuepe.
MAR 12:25 Karãpeĩ tuwe­nõ'ẽ gu'uro pyi miit'in mi'i hawyi ti aikotã Tupana emiit'in atipy piaria ewy te'e­ro­py­hu'at. Ma'ato yt he'aito rakaria i yt iwary rakaria wo i ra'yn tukup­te'en itote e.
MAR 12:26 Mi'i hawyi Iesui to'e — Eipe ti aiku­'uro hawyi ti yt kat i ra'yn aheĩne'en pakup i hap e haria e. Pyno ahenoi teran wẽtup sehay ehepe gu'uro pywiat aheĩne'en pakup i hap e. Yt karãmuo i apo eiwe­mu'e Musei miwan ete aikotã aria'yp wuk'e hat kaipyi to'e Tupana Musei pe — Uito ti Aparãu eTupana Isaki eTupana Iako eTupana Uito e Tupana Musei pe sa'a­wy'i e Esutu 3.6 pe.
MAR 12:27 Mi'i tupono are'e ehepe Tupana ti yt map haria eTupana i ti. Ta'i uhyt'i'in Tupana ti ieĩne'en haria eTupana yn hap watikuap e. Mi'i pote Aparãu Isaki Iako yt karãpiat i iku'uro raka­nuaria ma'ato wuat'i e'at piat ieĩne'en hanuaria mi'iria e Iesui yt kat i aheĩne'en hap aiku­'uro hawyi e haria pe.
MAR 12:28 Mi'i turan wẽtup ok miwan enoi hat tikuap yne Iesui wesat waku hap ko'i pote apo'e Iesui pe — Uhyt e kat e hap som ewanẽtup hawe irania'in kai po'og iwato Tupana wo'o­nãpin hap e.
MAR 12:29 Mi'i hawyi Iesui tiwesat — Pyno ahenoi po'og iwato rakat epe e. Mio tã e ti miwan me tohenoi Isareu ywania pe — Wẽtup Tupana yn ni toĩne'en e Aipo­typot no e.
MAR 12:30 Tupana ro eweiky'e kahato yne yne eipy'a pe yne yne eiwa­nẽtup hawe yne yne eiwe'eg hawe e ti e Musei tomiwan Teute­ru­mumia 6.5 pe e Iesui tope.
MAR 12:31 Mi'i hawyi wẽtup wo'o­nãpin hap toĩne'en porap i'ewywuat — Eti'a­tu­ky'e miit'in irania'in aikotã aikotã eweky'e hap ewy e Musei tomiwan Irewi­tiku 19.18 pe.
MAR 12:32 Yt kat i ti wẽtup po'og iwato wo'o­nãpin hap mesuwat kawiat rakat e Iesui tiwesat.
MAR 12:33 Mi'i hawyi mekewat miwan enoi hat Iesui pe to'e — Ta'i waku ti wati­ky'e Tupana yne yne aipy'a pe aiwa­nẽtup hawe aiwe'eg hawe e i'ewyte irania'in waku wati­'a­tu­ky'e aiwe­ky'e hap ewy e. Pywo pe ti mi'i po'og waku watunug ikamhig se wuk hamuat sio aihũ aimiium Tupana piat kai. Ta'i po'og waku wati­ky'e Tupana aipy'a pyi e Iesui pe.
MAR 12:34 Mi'i hawyi Iesui tipuẽti iwesat hamuat ikahu rakat sehay. Mi'i hawyi Iesui to'e tope — Ta'i porap yn na'yn ni en Tupana emiit no e Iesui miwan enoi hat pe. Mi'i hawyi yt ta'a­tu­hã'ãg po'og i Iesui ehay aparap ta'a­tuehay wuat hamo katu­pono iwesat hap pupi te'e­re­mõti ra'yn iwesat hap waku yne yne pote.
MAR 12:35 Mi'i hawyi to'e Iesui Tupana mõtypot yat piaria pe — Kat poteĩ einãpin haria mio tã i'atu'e ehepe — Wẽtup ok morekuat Tawi emiariru aru topy­hu'at Wuat'i Miit'in Porekuat no i'atu'e ehepe e.
MAR 12:36 Ma'ato nimo te Tupana Pã'ãu mikuap morekuat Tawi to'e — Tupana ti to'e Uhetu­pana pe — Era'apyk to uipo sese kai e. Mi'i hawyi ti aru ati'a­tu­'akit torania e'akit reran haria e. Mi'i hawyi ti aru yt kat i'atu'e i ra'yn ewanĩ­kaptia aru katu­pono atunik yne ra'yn e wyti Tupana uhepe e morekuat Tawi e Iesui.
MAR 12:37 — Kat poteĩ pyno Tawi emiariru yn topy­hu'at Wuat'i Porekuat no ewei'e ma'ato Tawi to'e — Tupana ti to'e Uhetu­pana pe e e Iesui. Mi'i hawyi mio tã e Iesui pote ti Tupana mõtypot hawiaria — Ta'i ihay se kahato ti Iesui i'atu'e ra'yn to'ope.
MAR 12:38 Mi'i hawyi Iesui to'e — Eiwe'eg wo o einãpin haria ran mupi e. Katu­pono sokpe kahuria puo teran ikohye­wyry miit'in ko'i upi e. Mi'i hawyi ta'a­tu­ky­'esat miit'in wẽpowat kahuria i'atu­'e­ka­re'en kyi'at hap upi e.
MAR 12:39 I'ewyte Tupana mõtypot hawe ienuk turan ta'atueiam nug po'og waku irania'in kawiat hap ta'a­tu­ky­'esat e.
MAR 12:40 Mi'i hawyi hiwuria ta'a­tu­ma'at ta'a­tu'yat ko'i kape ta'a­tue­ro'ok hamo e. Yt nakuaria i mi'iria pote meiũran aru po'og mi'iria Tupana ti'a­tu­mo­so­'opot irania'in kai e. Eiwe'eg wo o Tupana mõtypot yat piaria nãpin haria yt pywo i rakaria pupi e Iesui itotiaria pe.
MAR 12:41 Iesui henoi kahu ra'yn hawyi ta'apyk towy­ria'in nywo Tupana piat miium eiam yatype. Mi'i hawyi miit'in terut terut ta'a­tumiium Tupana pianuat ko'i. Mi'i hap kape Iesui iha'at. Mi'i turan hekat rakaria miium iwato ra'yn.
MAR 12:42 Mi'i turan wẽtup ok hiwu yt hekat i rakat i'atu­py­'a­setpe hum tomiium kurin typy ape hit rakat yn tutum.
MAR 12:43 Mi'i hawyi Iesui teha'at kahato hawyi teka­tu­wyria toi'a­tu­kaykay hawyi to'e i'atuepe — Eweha'at ro mekewat hary­poria hiwu kape e. Pywo pe ti are'e ehepe mekewat hiwu yt hekat i rakat miium po'og iwato Tupana pe hekat rakaria wat kai e.
MAR 12:44 Katu­pono hekat rakaria wyti hum Tupana pe ta'a­tue­ti­neiru eĩpyt yn ma'ato mekewat hiwu tuwe­mi­'u­kyi'at hamuat tutum yne yne Tupana pe e Iesui towy­ria'in me.
MAR 13:1 Mi'i hawyi Iesui toto meiẽwat Tupana mõtypot yat koro pyi. Mi'i hawyi wẽtup ok ipotmu'e tuwẽ­powat Iesui kape — Wo'o­mu'e hat e eraha'at ro meikowo e ikahu kahato rasig Tupana mõtypot hap yat nu wato kawiat e.
MAR 13:2 Mi'i pote Iesui tiwesat — Ta'i iwato kahato nu kawiat ikahu kahato e era'a­kasa ro e. Ma'ato meiũran ti aru yt wẽtup i ra'yn nu wato wo'o­totiat totiat rakat topy­hu'at e. Meiũran ti aru sura­ra'in ti'a­tu­'a­po­rok'e yne nu wato wuat Tupana mõtypot yat yt kat i topy­hu'at meiũpe e Iesui topot­mu'e haria pe.
MAR 13:3 Mi'i hawyi tuwat ra'yn Uriweira ypia yity'ok kape ra'yn. Mi'i hawyi te'e­ra­'apyk yity'ok apypeke ra'yn. Itote pyi heremo yne Tupana mõtypot yat nu wato kawiat ko'i. Mi'i hawyi ipotpo­'o­roria Peteru Iuwãu Tiaku Ãtere ta'a­tu­weran hawyi apo'i­'a­tu'e Iesui pe — Urumu'e hat karãmuo aru meiẽwat Tupana mõtypot yat i'atu­'a­po­rok'e i'atu'e.
MAR 13:4 I'ewyte aikotã aikotã aru uruta­'a­kasa yian Tupana mõtypot hap yat aporok'e hamo i'atu'e. Mi'i hap uruikuap teran mesup yianmete i'atu'e. Mi'i hawyi ti aru karãpe hut hamuat hap uruikuap ta'yn i'atu'e.
MAR 13:5 Mi'i hawyi Iesui ti'a­tu­wesat — Uiwy­ria'in eiwe'eg wo o katu­pono meiũran tut aru uhet ero'ok haria — Meiũ ra'yn Uito Iesui i'atu'e miit'in ma'at reran haype e.
MAR 13:6 Uito ti Tupana Mipo­'oro Miit'in Porekuat nuat ra'yn i'atu'e ti aru miit'in me yt pywo pe i te'e­ro­pot­ma'at ne'i ti aru wẽtup mu'ap upi e.
MAR 13:7 Mi'i hap upi ti aru toĩ wu'uka hap ko'i wuat'i setama puo i'ewyte ehetama puo irania'in etama puo wyti aru yne kaipyi wu'uka hap sehay eweikuap ma'ato o yt gyt'e­wei'e tei'o katu­pono ti aru yt ikahuro hap i te e.
MAR 13:8 I'ewyte ti aru wẽtup ywania wẽtup ywania wywo ti aru to'o­'a­tu­'uka atu'uka i'ewyte ti aru wẽtup setama wẽtup setama wywo to'o­'a­tu­'uka atu'uka yne mesuwat yi wato hap ok tã e. Mi'i hap ewy ti aru aikope aikope yi huruk huruk'e. Mi'i hawyi ti aru miit'in topap kahato yt kat i hin i mi'u pote e. Ma'ato meiũran ti aru po'og po'og haty wo rakat tut e.
MAR 13:9 Eiwa­nẽtup kahato o katu­pono wyti aru ehum wanĩ­kaptia po pe ra'yn eipe tu'i­saria po pe ra'yn eipe e. Mi'i hawyi ei'ahyk ahyk wyti aru Tupana mõtypot hawe e. Mi'i hawyi ti aru i'atu­po­rekuat po pe i'atue­tu­'isa po pe ra'yn eipe ehum uhetiat enoi i'atuepiat hamo e.
MAR 13:10 Mesuwat uhehay wakuap wyti aru wuat'i miit'in me yi wato ok tã tuwe­mo­herep ikahuro hap sese owakai te e.
MAR 13:11 Mi'i hawyi karãpe eipyhik ehehay kuap hamo mi'i pote o yt eweiken'ẽ tei'o mi'i hap e'at pe are — Kat som pono aru waku are'e atiwesat pãi an yt ewei'e tei'o eipy'a pe katu­pono ti aru mekewat e'at pe Tupana Pã'ãu ti aru eiwẽ pyi henoi e.
MAR 13:12 Mi'i hawyi ti aru to'o­kuasa to'o­'auka toyke'et toywyt toinyt toty to'ywot tomẽ­pyt'in nywo yne yne wywo to'ope to'ope to'o­kuasa to'o­'auka wyti aru e.
MAR 13:13 Katu­pono ti uimohey haria ti eipe mi'i pote ti aru wuat'i i'atu­py­'ahak ehete e. Ma'ato uwe uwe ta'a­tu­sa­ty'i saty'i pytkai yt uiwaure i wuat'i e'at pe mi'i hat ti aru Tupana mieha­kye­ra'at topy­hu'at wuat'i e'at pe e Iesui.
MAR 13:14 Iwan miat wo'o­mu'e hat uito ti Maku. Mesuwe atiwan uimiwan me Iesui e hap. Eweikuap to kat e som Iesui to'e meiũpe hap. Mio tã e Iesui — Ui'y­wania sa'awy'i Tupana ehay moherep hat ase'i Tanieu tiwan kahato ahaig mipo'oro wuat'i porekuat ran hap etiat. Mi'i pote are'e ehepe karãpe ti aru ewei'a­kasa mekewat miit po'og po'og yt nakuat i rakat ahiag sa'yru — UIto ti Tupana e hat yt teiam me i Tupana mõtypot yat wato pe wuat'i miit'in porekuat no hawyi o eiko­hyeput haty wo ra'yn mekewat miit uhet ere'ok sa'ag nakat pyi yity'ok ko'i kape hawyi eiwemig no yi ka'a ko'i pe mi'i hat pupi ahiag mote are'e e.
MAR 13:15 Eihyha wo ro eweinõ'ẽ. Yt ewei'aipok tei'o i ra'yn o ei'yat kape eheka­re'en sat hamo e.
MAR 13:16 Eipotpap turanuat put'ok'e pote o eiko­hyeput tawa Ieru­sarẽi myi o yity'ok kape yn na'yn. Yt ewei'aipok i ra'yn o ehesokpe pag hamo ei'yat kape e.
MAR 13:17 Mekewat e'at wyti aru yt naku i kahato mĩ u haria ete hupi'a rakaria ete e.
MAR 13:18 Ewehẽtup to Tupana pe — Yt etipo­'oro tei'o mekewat ho'opot hap e'at sese i'aman mot pe ewei'e ro e.
MAR 13:19 Mekewat e'at ti aru po'og satek hap e'at wuat'i e'at kai Tupana piat yi nug hawyi te mesup te ahe'at kape yt irania'in e'at piat ewy i ra'yn po'og na'yn yt naku i e.
MAR 13:20 Ta'i miit'in topap topap kahato mekewat e'at pe e. Mi'i tupono ti aru Tupana titek ta'yn mi'i hap e'at — Yt atiky­'esat po'og ho'opot hap e aru tomi­'ai­roria etiano e. Yt pote miit'in topap yne mesuwat yi totiaria e.
MAR 13:21 Mi'i hawyi ti aru miit'in te'e­ro'e ehepe — Ta'i miit'in Porekuat Aipo­typot Tupana Mipo­'oro wyti put'ok'e ra'yn i'atu'e ti aru. To'iro ewei'a­kasa pyno i'atu'e ti aru ehepe. Ma'ato ti aru yt eweimohey tei'o — Eheso ewei'e ro i'atuepe e.
MAR 13:22 Katu­pono ti aru i'atu kahato — Uito Tupana Mipo­'oro Eipo­rekuat nuat e haria ewywuat sa'ag ko'i te'e­ru­we­mo­herep mesuwat yi totiat kape e. Tupana ehay henoi sa'ag haria ne'i yt pywo pe i ma'ato te'e­ru­we­mõ­typot hanuaria e. Mi'iria ti aru aikotã aikotã imoherep ta'a­tue­saika hap iwato rakat i'atu­minug ko'i ti aru yt miit minug kuap i ewy ta'a­tunug Tupana mi'ai­roria sese ma'at reran haype e.
MAR 13:23 Ta'i yianmete ra'yn ni ahenoi ehepe yne mi'i ho'opot hap e'at aikotã aru hap etiat e. Mi'i tupono eimitum o ra'yn eweikup­te'en e.
MAR 13:24 Mi'i hawyi mekewat ho'opot hap e'at tokosap hawyi ti aru yt hẽtyhot i sese i ra'yn at i'ewyte waty i'ypyryp ra'yn e.
MAR 13:25 I'ewyte ti aru waikiru ko'i ta'atueiam myi hewo hewo hawyi ti aru huruk huruk'e atipy e.
MAR 13:26 Mi'i hawyi ti aru ariot i ra'yn Uito Eheyke'et Wuat'i Miit'in Yke'et Sese wo. Uhesaika kahato hawe ariot mesuwat yi kape uimõ­typot kahato hawe ariot aru e. Te'e­ra­'a­kasa kahato hamuat uhut hap ywyhig me wuat'i miit'in e.
MAR 13:27 Mi'i hawyi ti aru atipo­'oro Tupana potpo­'o­roria atipy piaria yne mesu­wa­rotiat uimi­'ai­roria uimohey haria atunug uhowawiat hamo mesuwat yi sasat kaipyi ta'a­tu­'a­tunug uhowawi e. At min'e hap kaipyi at wẽtem hap kaipyi at posak hap kaipyi yne kaipyi ta'a­tu­'a­tunug aru uhemiit'in sese e Iesui i'atuepe.
MAR 13:28 Mi'i hawyi Iesui to'e i temiit'in me — Pyno mesup ahenoi teran wẽtup sehay iã'ãkap ehepe e — Wiku yp i'yhop kyt ra'yn hawyi eweikuap ta'yn meremo i'aman mot ut hamuat e.
MAR 13:29 I'ewyte ti aru karãpe ta'a­tunug mesuwat uimienoi ewywuat mi'i hawyi ti aru eweikuap ta'yn meremo Uito Eheyke'et ut hamuat hap e.
MAR 13:30 Pywo pe ti ta'a­tunug ni aru yne mesuwat uimienoi ewy mi'i hawyi ti aru mesu­wa­ro­tiaria uimohey haria ahaipe­piaria wo ra'yn tukup­te'en yne aheĩne'en hawe e.
MAR 13:31 Ta'i at waikiru yi ti aru ikahuro yne ma'ato uimienoi ko'i yne yt sake i ikahuro e Iesui.
MAR 13:32 Yt uwe i mesu­wa­ro­tiaria ikuap karãmuo mekewat uhut hap e'at put'ok'e hap e. Yt atipy piaria i wyti ikuap yt Ha'yru i wyti ikuap. Ma'ato Ui'ywot atipy piat yn wyti ikuap e.
MAR 13:33 Mi'i tupono eiwa­tetup we o eweikup­te'en katu­pono yt uwe i ikuap karãpe mekewat e'at put'ok'e hap e Iesui temiit'in me.
MAR 13:34 Mi'i hap ewy uhut hap e'at piat e. Mi'i uhehay iã'ãkap ewy — Wẽtup e'at pe so wẽtup ok netap ka'iwat koro toto tewyry hamo e. Mi'i hawyi temiit'in sem toi'a­tu­kaykay tohenoi aikotã i'atu­potpap nuat ko'i mesuwiat tosaipe kawianuat turanuat hap ko'i henoi i'atuepiat hamo e. Mi'i hawyi to'e oken'ypy wato apykok hat pe — Ewatetup we o ereĩne'en karãmuo ui'aipok hap kape e. Put'ok­'are hawyi woro­kaykay hawyi waku ero'o­ken­hyp'ok uhowawi e.
MAR 13:35 Mi'i hawyi toto netap ka'iwat e. I'ewyte Uimohey haria eiwa­tetup we o eweikup­te'en katu­pono yt eweikuap hin i karãmuo Uito Ei'yat Ka'iwat put'ok'e aru hap sio hunete sio wãtym hake turan sio waipaka ehay turan yt uwe ikuap i kat e'at kat ewãtym ara'aipok i hap e.
MAR 13:36 Yt naku i eiket at Tupana motpap nug hap kai aru put'ok­'are i mi'i hap e'at pe e. Ta'i yt naku i eiwe­mõti hap put'ok'e Eika­'iwat ut turan e.
MAR 13:37 Meremo ti tut hamuat mi'i pote kat are'e ti ehepe are'e yne uhemiit'in me wuat'i uimohey aru haria pe ewatetup we o e Iesui ahepe mekewat mikoi Uriweira ypia e'yity'ok tote.
MAR 14:1 Typy e'at man teneg u hap e'at ko'i owakai te pa'i akag ko'i miwan enoi haria wywo te'e­ru­wa­'a­tunug tawa wato Ieru­sarẽi kape sa'a­wyiwuat Iuteu ywania ehakye­ra'at hap ta'a­tue­wa­nĩ­kaptia Esitu'in po pyi e'at kapiat watetup hamo te'e­ru­wa­'a­tunug kahato itote. Mi'i hawyi te'e­ro'e to'ope — Aikotã som pyno waku wati­pyhik hawyi wati­'auka Iesui yt uwe mikuap mo i i'atu'e.
MAR 14:2 Yt naku i wati­pyhik aheman teneg u hap e'at ko'i pe katu­pono wu'uka hap ne'i ra'yn topy­hu'at miit'in me i'atu kahato Iesui mohey haria pote i'atu'e.
MAR 14:3 Mi'i turan toĩne'en Iesui hepihi pihi rakat Simãu yat pe tawa Petania pe. Mi'i hawyi te'e­renuk turan wẽtup ok hary­poria tut Iesui owawi mohag hy Natu kawiat okpun Iesui esap ete hamo. Ha'up woity kahato rakat toterut. Mi'i hawyi toi'okpik heiam hekat rakat nu Arapatu kawiat hawyi toi'okpun Iesui esap ete.
MAR 14:4 Mi'i pote irania'in ienuk haria i'atu­py­'ahak kahato hary­poria ete hawyi te'e­ro'e to'ope — Ta'i ha'up woity kahato ti mekewat i'atu'e.
MAR 14:5 Yt naku i ti mohag hy moma yne hat hary­poria i'atu'e. Waku po'og ti toiwe­neru hawyi ti ha'up iwato yt hekat i rakaria pe toimõ'ẽ i'atu'e.
MAR 14:6 Ma'ato Iesui to'e — Kat poteĩ eweha­ty'i haty'i mesup hary­poria tero tutunug wakuap uhepe e.
MAR 14:7 Yt hekat i rakaria ti aru tukup­te'en wuat'i e'at pe eiwywo e. Karãpe ewetunug waku teran mi'iria pe mi'i pote waku eweimõ'ẽ ehekat mi'iria pe wuat'i e'at pe wen ma'ato Uito yt areĩne'en mot'i i eiwywo ewetunug waku uhepiat hamo e.
MAR 14:8 Ta'i mesuwat hary­poria ti'okpun howakai te ra'yn uipiit ete mohag hy uhyp hap e'yianmete e. Mi'i ti inug waku uhepe tomikuap ok tã e.
MAR 14:9 Mi'i pote pywo pe ti rat are'e ehepe aikope aikope ti aru mesuwat yi wato hap ok tã miit'in henoi Tupana ehay wakuat mi'i hap i'ewyte te ti aru mesuwat hary­poria minug wakuap uhepiat hap ta'a­tu­henoi wuat'i ywania pe yt waure­'i­'a­tu'e i hamo e Iesui i'atuepe — Yt naku i tutunug mekewat hary­poria e haria pe.
MAR 14:10 Mi'i hawyi sura­ra'in tikat kahato Iesui i'auka hamo ma'ato yt ta'a­tu­puẽti i. Mi'i hawyi wẽtup ok hemiit 12 ok hap toto pa'i wato ko'i kape Iesui enoi i'atupo piat hamo. Mi'i hawyi put'ok'e hawyi Iuta henoi. Mi'i pote i'atu­wepit kahato pa'iria akag ko'i — Ta'i urutum epe ha'up Iesui puẽti hamo i'atu'e tope.
MAR 14:11 Mi'i hawyi Iuta tikat at ka'ap aikotã waku sura­ra'in po piat hum hamuat hap.
MAR 14:12 Mi'i hawyi mekewat man teneg u hap e'at put'ok'e hawyi mekewat i'atuhũ Kuteiru mẽpyt auka hap e'at put'ok'e ra'yn hawyi hemiit'in apo'i­'a­tu'e Iesui pe — Aikopeĩ etiky­'esat koity urutunug aheman teneg u hap e'at mesuwat ewãtym Mehĩ i'atu'e Iesui pe.
MAR 14:13 Mi'i hawyi Iesui tipo­'oro typy ok temiit tawa Ieru­sarẽi kape ma'ato sa'a­wy'i toi'a­tu­nãpin aikotã som waku ta'a­tunug hap. Mio tã e typy ok pe — Pyno eweiwat ro eipe tawa kape e. Put'ok­'e­wei'e hawyi te ti aru eweipuẽti wẽtup ok ihainia kamũti piat y'y so'osat hat e. Mi'i ti aru tut ehowawi teka­mũti wywo e.
MAR 14:14 Mi'i upi o eweiwat hawyi ti aru teke wẽtup ok yat pe e. Mi'i hawyi o ewehenoi uhehay mekewat netap ka'iwat pe — Aiũwat okipy keĩ waku wo'o­mu'e hat temiit'in nywo teman teneg u wãtym muo mesup ewei'e o netap ka'iwat pe e.
MAR 14:15 — Mi'i pote ti aru netap ka'iwat tomo­herep ehepe okipy wato ywaiti rakat waku yne rakat ra'yn e. Mi'i pe o eweipo­rokpun yparakai mesa tote aimi'u ko'i e Iesui temiit typy ok takaria pe.
MAR 14:16 Mi'i hawyi tuwat ra'yn tawa kape. Mi'i hawyi ti aikotã aikotã Iesui henoi i'atuepe sa'a­wy'i hap ewy yne ra'yn ta'a­tu­puẽti. Mi'i hawyi put'ok­ta­'a­tu'e hawyi ta'a­tu­po­rokpun yparakai tote ta'a­tu­mi'u ko'i.
MAR 14:17 Mi'i hawyi ti wãtym i turan ni tut ra'yn Iesui temiit'in 12 ok takaria wywo.
MAR 14:18 Mi'i hawyi ta'a­tuenuk hap tote Iesui to'e temiit'in me — Pywo pe ti are'e wẽtup ok ti aipy­'a­setpe ahenuk tuwy uhenoi aru wanĩ­kaptia sura­ra'in po piat ui'auka hanuat e.
MAR 14:19 Mio tã e pote ti hemiit'in haty'u kahato ta'a­tu­py'a pe hawyi wẽtup ok tuereto apo'e Ta'a­tu­mu'e hat pe — Urumu'e hat uito apo ema'at hat apo'i­'a­tu'e tuereto.
MAR 14:20 Mi'i hawyi Iesui ti'a­tu­wesat — Eipe 12 ok hap wyti mekewat mĩkau u piat uiwywuat man pag hat kui'a piat wyti Eheyke'et ma'at hat toĩne'en e.
MAR 14:21 Ta'i Uito Eheyke'et wyti iku'uro irane aikotã sa'a­wy'i Tupana ehay enoi haria henoi hap ewy ti ra'yn e Iesui. Ma'ato ti aru yt naku i yn na'yn Eheyke'et ma'at hat topy­hu'at wuat'i e'at pe e. Ta'i waku po'og uima'at hat yt karãpe i sa'a­wy'i i'ywã'ĩ hap e'at piat toĩne'en e Iesui temiit Iuta piat.
MAR 14:22 Mi'i hawyi te'e­renuk hamo Iesui tat wẽtup a man hawyi waku e Tupana pe hawyi toipikpik hawyi toimõ'ẽ temiit'in me. Mi'i hawyi to'e i'atuepe — Ewetu'u ro man pikpik e. Mi'i ti uipiit e.
MAR 14:23 Mi'i hawyi ihy kui'a piat totat hawyi waku e Tupana pe hawyi toimõ'ẽ i'atuepe. Mi'i hawyi yne te'e­re­'y'u ihy wo.
MAR 14:24 Mi'i hawyi to'e Iesui — Mi'i ti uhuu at hap miit'in wo'o­wehik Tupana wywuat hamuat hap e.
MAR 14:25 Pywo ti are'e ehepe mi'i hawyi ti aru yt are'y'u i ra'yn sapo hy mesuwe eiwywo ma'ato karãpe Tupana toĩne'en Morekuat no mi'i hap e'at pe ti aru watu­we­'y'u i ra'yn e Iesui.
MAR 14:26 Mi'i hawyi te'e­ru­wepy Tupana pe hawyi tuwat Uriweira yp e'yity'ok kape i ra'yn.
MAR 14:27 Mi'i hawyi Iesui to'e towy­ria'in me — Eiwe­sytpok yne ti aru ui'ya­ty­pepyi mesup ewãtym e. Ta'i ui'atoiat yne eipe aikotã iwan me sa'a­wy'i tohenoi hap ewy ti aru — Ta'a­tu­ka­'iwat auka hawyi ihũ ko'i tuwe­sytpok yne e miwan me e Iesui towy­ria'in me.
MAR 14:28 Mi'i hawyi to'e — Ma'ato uimoieĩ­ne'en i hap hawyi ti aru areto ehe'yian me uimotag hap Karireia kape e. Mi'i hap tote ti aru wato­'o­puẽti i ra'yn e.
MAR 14:29 Mi'i hawyi Peteru to'e Iesui pe — Irania'in e'atoiat yne mesup ewãtym mote uito yt woro­'atoiat hin i e Peteru Iesui pe.
MAR 14:30 Ma'ato Iesui — Pywo pe ti mesup ewãtym na'yn ni aru waipaka ehay typuot hap owakai ti aru — Yt atikuap i Iesui ere'e irane irania'in me mye'ym mo e Iesui Peteru pe.
MAR 14:31 Mi'i hawyi tehay pirik wo Peteru wẽtup het Nu to'e — Yt nyti yt nyti e. Ui'auka irania'in ewywo pytkai yt woro­'atoiat i En e Peteru Iesui pe. I'ewyte irania'in hemiit'in Peteru ehay ewyte i'atu'e.
MAR 14:32 Mi'i hawyi toto Iesui towy­ria'in nywo mikoi ypia ikahu rakat Kese­mani e hap kape. Mi'i hawyi to'e towy­ria'in me — Ewei'apyk to meiũpe uhehay Tupana wywuat turan e.
MAR 14:33 Mi'i hawyi totioto Peteru Tiaku Iuwãu tuwe­wywo hap tote.
MAR 14:34 Toha­ty'u tuwa­nẽtup kahato hawyi to'e i'atuepe — Uiwy­ria'in Uito ti ahaty'u kahato ra'yn uipy'a pe e. Ta'i ipoity'i kahato ti uhete e. Yt uipy'a wasu i hap porap ui'auka e. Ewehe­ha'at ro wanĩ­kaptia pupi e Iesui hemiit'in mye'ym ok takaria pe.
MAR 14:35 Mi'i hawyi toto porap i hawyi parag'e towa puo tehay Tupana kapiat hamo. Mi'i hawyi to'e — Ui'ywot e etiky­'esat pote etihep o meiko­ranmuo uikaipyi e.
MAR 14:36 Ui'ywot wuat'i nug kuap hat En mi'i tupono etat teran uipo pyi meikowat kui'a mi'i pote etat ma'ato yt pote yt e.
MAR 14:37 Mi'i tã to'e kahu hawyi ta'aipok ta'yn towy­ria'in kape. Mi'i hawyi ta'a­kasa towy­ria'in kape mi'i turan ti te'e­roket ne'i ra'yn iwyria'in. Mi'i hawyi to'e Peteru pe — Uhyt Simãu ereket apo'e. Yt eraha'at porap'i apo uheka­wiano e.
MAR 14:38 Yt eweiket ne'i tei'o ma'ato ewehẽtup o Tupana pe koran ni yt ahiag eihã'ãg hawyi ewetunug yt naku i hap e. Ta'i ewetunug neran ni Tupana miky­'esat ewy eipy'a pe ehesaika kahato wen ma'ato ti eipiit wyti iperup kahato hap ewy toĩne'en e Iesui Pete­ru'in me.
MAR 14:39 Mi'i hawyi toto i ra'yn Iesui Tupana wywo tehay hamo — Papai e etiky­'esat pote etihep o uipo pyi meikowat kui'a ma'ato yt pote yt e.
MAR 14:40 Tehay kahu hawyi ta'aipok i ra'yn towy­ria'in kape. Mi'i turan ni te'e­roket i typy wo ra'yn yt mehit­'i­'a­tu'e kuap i ra'yn. Mi'i hawyi yt kat i'atu'e kuap i ra'yn te'e­ru­we­mõti i ra'yn haype.
MAR 14:41 Mi'i hawyi toto hawyi kat e sa'a­wy'i ihay mi'i e hap ewy te ihay hawyi ta'aipok hawyi toi'a­tu­puẽti i ra'yn i'atuket kai mye'ym mo. Mi'i hawyi to'e i'atuepe — Eweiket i ra'yn apo'e.
MAR 14:42 Pyno toran na'yn e. Koran na'yn ni yt nakuaria i po pe Uito Eheyke'et topy­hu'at e. Put'ok'e ra'yn uiku­'uro hap e'at e. Eweipoĩ'ãm no eweha'at ro meikowo ti uima'at hat tut ra'yn ui'auka haria wywo e.
MAR 14:43 Mio tã e turan wẽtup ok hemiit Iuta 12 ok hap tut. Mi'i wywo typy'i kahato ra'yn sura­ra'in tõ'ẽ tõ'ẽ Iesui pyhik hanuaria. Irania'in aria'yp ãkun ko'i wywo irania'in kyse'yp wywo tõ'ẽ tõ'ẽ. Pa'i koro miwan enoi haria nagnia mipo­'o­roria tõ'ẽ tõ'ẽ hemiit Iuta upi.
MAR 14:44 Sa'a­wy'i ma'ato Iuta henoi sura­ra'in me — Aiũwat uimi­'ã­pysin o eweto­pytyk to e katu­pono ti aru Iesui ra'yn Mi'i Miit e. Mi'i ti aru ewei'a­pykok kahato o hawyi ewetioto o e Iuta sa'a­wy'i sura­ra'in me.
MAR 14:45 Mi'i hawyi put'ok­to'e hawyi Iuta tokosap Iesui kape meremo hawyi — Uimu'e hat to'e hawyi toi'ã­pysin na'yn.
MAR 14:46 Mi'i hawyi sura­ra'in topytyk ta'yn Iesui.
MAR 14:47 Mi'i pote wẽtup ok Iesui emiit i'yatypiat iherep ta'yn towape pyi kyse'yp hawyi toi'a­ha­pehep ta'yn pa'i akag emiit.
MAR 14:48 Mi'i hawyi topyhik teran haria pe to'e Iesui — Sero­'ok'e hat Uito mi'i pote apo eweĩ'ẽ uipyhik hamo kyse'yp ko'i wywo aria'yp ãkun ko'i wywo e. Ha'a­wyte areĩne'en at eiwywo Tupana mõtypot yat pe wuat'i e'at pe eimu'e hamo ma'ato mekewat e'at pe yt uipytyk hin i eipe e.
MAR 14:49 Ma'ato mesup ti aikotã nimo tohenoi yianme miwan me uhetiat hap ewy ti ra'yn uipytyk eipe e topyhik haria pe.
MAR 14:50 Mi'i hawyi iwyria'in yne ti'atoiat ra'yn Iesui. Te'e­ru­we­sytpok yne ipytyk pote.
MAR 14:51 Mi'i hawyi ma'ato wẽtup kurum wasu toto Iesui upi tuwe­suwy puo yn.
MAR 14:52 Mi'i hap tote ta'a­tu­pytyk ta'yn mi'i kurum wasu hesokpe ete ma'ato totoiat tuwe­suwy hap i'atupo pe hawyi topopy kahato ra'yn yt kat i topiit piat sokpe wywo i teput.
MAR 14:53 Mi'i hawyi ta'a­tue­reto Iesui pa'i akag koro kape. Mi'i hawyi yne nagnia pa'i wato ko'i miwan enoi haria te'e­ru­wa­'a­tunug na'yn.
MAR 14:54 Mi'i hap kape toto Iesui upi Peteru ma'ato yt heremo i. Mi'i hawyi tokosap Iesui upi pa'i wato e'oken­'ypy kape. Mi'i hawyi ta'apyk sura­ra'in py'a­setpe aria kupyke tuwe­mõpe hamo.
MAR 14:55 Mi'i hawyi pa'i wato emiit'in tu'i­saria wywo ta'a­tukat Iesui kuasa te haria i'auka hamo — Ara'a­kasa Iesui yt naku i nug hap kape e haria ma'ato yt ta'a­tu­puẽti i.
MAR 14:56 Mi'i pote heso rakaria yn na'yn henoi ikuasa hap itote ma'ato yt i'ewy i ra'yn ta'a­tu­henoi sa'ag.
MAR 14:57 Mi'i hawyi ikuasa haria wẽtup ok wẽtup ok i'atu­poĩ'ãm ta'a­tuehay hamo — Ta'i ha'a­wyte Iesui to'e — Atipugha aru meiũpiat Tupana mõtypot yat miit'in minug ko'i e ti i'atu'e.
MAR 14:58 Mi'i hawyi wẽtup Tupana mõtypot yat atunug mye'ym e'at pe yn e. Mi'i hawyi Tupana yat atunug yt mo wuat i minug na'yn e ti Iesui i'atu'e.
MAR 14:59 Ma'ato yne i'atu'e hap ko'i yt to'o­'ewy i ta'a­tu­henoi. Mi'i hawyi ipoĩ'ãm na'yn pa'i akag koro apoto'e Iesui piat hamo — Ta'a­tu­henoi kahato eminug yt naku i hap ko'i ma'ato yt kat ere'e i e.
MAR 14:60 Eti'a­tu­wesat ro pywo apo ta'a­tu­henoi sio yt e.
MAR 14:61 Ma'ato ipo'inik ne'i ra'yn Iesui yt kat e i hawyi pa'i akag i ra'yn apo'e tope — En apo Tupana Mipo­'oro Miit'in Porekuat nuat sio yt e. En apo Tupana Wakuat Sese rakat Sa'yru e.
MAR 14:62 Mi'i hawyi ti Iesui tiwesat — Ta'i Uito Mi'i Miit e'e hap ewy e. Meiũran ti aru ewei'a­kasa Uito Miit'in Yke'et Tupana hesaika po'og nakat po sese kai apyk pe e. Ta'i ewei'a­kasa ti aru uhut turan atipy kaipyi ywyhig kytsig me e.
MAR 14:63 Mio tã e Iesui pote pa'i akag koro totat tesokpe hawyi toihiot ra'yn topy­'ahak hap Iesui ete moherep hamo irania'in me — Heso kahato Iesui e pa'i akag koro. Ihay sa'ag kahato Tupana ete — Ta'i Uito Tupana Mipo­'oro Wuat'i Ywania ehakye­ra'at hamo e hap yt naku i kahato. Pyno yt wati­ky­'esat i po'og miit'in ehay Iesui etiat meiũpe katu­pono iwẽ pyi yne ahehamo yt naku i mio tã sa'ag ihay e. Pyno aikotã ewetunug neran mesuwat Miit heso rakat ete e.
MAR 14:64 Mi'i hawyi irania'in tiwesat — Ta'i mio tã e hat auka potiat ne'i yn waku i'atu'e.
MAR 14:65 Mi'i hawyi irania'in kuitu­'i­'a­tu'e Iesui ete hawyi irania'in ihahik i'ahyk ahyk hamo hawyi te'e­ro'e — Etikuap yne pote uwe mio e'ahyk ahyk apo'i­'a­tu'e Iesui pe. I'ewyte sura­ra'in howa petek tuereto Iesui piit ete.
MAR 14:66 Mi'i turan Peteru toĩne'en oken note aria kupyke tuwe­mõpe turan ni wẽtup pa'i koro emiit hary­poria tut.
MAR 14:67 Mi'i ta'a­kasa Peteru kape aria kupyke hawyi teha'at hawyi to'e — Are an worokuap en tawa Nasare piat Iesui emiit keĩ en e.
MAR 14:68 Ma'ato Peteru to'e — U pãi yt atikuap i kat ere'e mana e. Mi'i hawyi Peteru toto kurara e'oken­'ypy wato kape. Ikosap turan wẽtup waipaka ihay.
MAR 14:69 Meiũran tut i ra'yn turan mekewat hary­poria pa'i wato eropat hat hawyi i'ewyte to'e Peteru yaty­piaria pe — Meiũ ti Iesui emiit e.
MAR 14:70 Ma'ato Peteru i'ewyte — Yt uito i rat e. Meiũran i'yaty­piaria i'ewyte te'e­ro'e — En nat wẽtup ok hemiit katu­pono tama Karireia kaipywiat en i'atu'e. Epusu Karireia pusu ewy kahato pote uruikuap en i'atu'e.
MAR 14:71 Ma'ato Peteru tiwesat — Yt uheso i ti. Uheso pote waku ra'yn Tupana uhaty'i haty'i e. Pywo rat yt atikuap i Mi'i Miit Iesui ti rat e Peteru.
MAR 14:72 Mio tã e hawyi ihay i ra'yn mekewat waipaka. Mi'i pote Peteru iwatetup Iesui ehay sa'a­wy­'iwuat kape — Waipaka ehay typuot hap owakai te — Yt atikuap i Mi'i Miit ere'e aru uhepiat mye'ym mo irania'in me e Iesui Peteru pe sa'a­wy'i. Mi'i Iesui e hap kape iwatetup Peteru teso hap kape hawyi tuwak kahato haty wo tuwe­mõti kahato haype.
MAR 15:1 Mi'i hawyi hunete at wẽtem hawyi meremo te'e­ru­wa­'a­tunug pa'i wato ko'i nagnia miwan enoi haria yne yne irania'in wo'o­nãpin sa'ag haria wywo i ra'yn te'e­ru­wa­'a­tunug. Mi'i hawyi to'ope to'oehay aikotã aikotã waku Iesui ete ta'a­tunug hap ko'i ete. Mi'i hawyi ta'a­tu­po'i po'i hawyi ta'a­tue­roto hawyi ta'atuium morekuat Piratu kape.
MAR 15:2 Mi'i hawyi morekuat apo apo'e Iesui pe — En apo Iuteu ywania Porekuat e. Mi'i hawyi Iesui tiwesat — Uito Iuteu Ywania Porekuat ere'e apo e.
MAR 15:3 Mi'i hawyi pa'i wato ko'i tikuasa kahato ra'yn Iesui.
MAR 15:4 Mi'i hawyi morekuat Piratu apo'e i Iesui pe — Ekuasa kahato mi'iria Uhyt e. Yt kat ere'e i apo eti'a­tu­wesat e.
MAR 15:5 Ma'ato yt kat e i po'og Iesui tiwesat. Mi'i pote morekuat tuwa­nẽtup kahato — Kat poteĩ yt uiwesat i e tuwa­nẽtup hawe.
MAR 15:6 Yne 12 ewaty e'at pe ienuk hap e'at pe morekuat tipo­re­nõtem wẽtup ok wo'o­pyhik hap wyi miit'in miky­'esat ewy.
MAR 15:7 Mekewat ewaty pe toĩne'en morekuat wo'o­pyhik hawe wẽtup ok yt naku i rakat Parapa e hap. Mi'i ti morekuat tipyhik sa'a­wy'i katu­pono wo'o­hoiro hap tote toi'auka wẽtup ok miit.
MAR 15:8 Mi'i hawyi te'e­ru­wa­'a­tunug morekuat kape miit'in kahato hawyi ta'a­tu­hẽtup — Morekuat etipo­re­nõtem i ro emipyhik wẽtup ok i'atu'e.
MAR 15:9 Mi'i hawyi Piratu tiwesat — Eweiky­'esat apo pyno atipo­re­nõtem ei'y­wania Porekuat Iesui hap e.
MAR 15:10 Mio tã e Piratu i'atuepe pa'i akag ko'i moweu­ka'i hamo katu­pono Piratu tikuap pa'i ko'i Iesui auka teran i'atu­py­'ahak kahato tuete miit'in miat iky'e pote i'atu­ha­'y­wywi pote.
MAR 15:11 Mi'i hawyi pa'i akag ko'i te'e­ro'e ta'a­tue­miit'in me — Yt etipo­re­nõtem nei'o Mi'i Miit Iesui ma'ato etipo­re­nõtem emipyhik Parapa ewei'e ro morekuat Piratu pe i'atu'e ta'a­tu­mi­mu­'eria ko'i pe.
MAR 15:12 Mi'i hawyi Piratu to'e — Kat aru pyno atunug Ei'y­wania Porekuat ete e.
MAR 15:13 Mi'i hawyi ta'a­tu­wesat ta'a­tuehay pirik wo — Ewei'auka ro ewei'auka ro aria'yp posak ete i'atu'e.
MAR 15:14 Mi'i pote Piratu apo'e — Kat poteĩ kat som tutunug yt naku i e. Mi'i hawyi te'e­ro'e i po'og haty wo — Ewei'auka ro aria'yp posak ete i'atu'e.
MAR 15:15 Mi'i hawyi mi'iria mowepit hamo morekuat Piratu tipo­re­nõtem Parapa wo'o­pyhyp hawyi. Mi'i hawyi toipo­'oro Iesui ipokpok hamo hawyi tutum tesu­ra­ra'in me aria'yp posak etiat ipehik hamo.
MAR 15:16 Mi'i hawyi sura­ra'in tioto Iesui aikope morekuat mipyhik haria saty'i saty'i hamuat hap kape. Mi'i tote hawyi hereto haria ti'a­tu­kaykay irania'in sura­ra'in ko'i Iesui moweu­ka'i hamo.
MAR 15:17 Mi'i hawyi ta'a­tupag Iesui ipiit pe sokpe hup'i morekuat ewy. Mi'i hawyi ta'a­tu­pi'ig morekuat e'amãtap ma'ato hu kawiat ne'i ma'ato. Mi'i hawyi ta'a­tupag i'akag me ta'a­tu­mi­ky­ry'i hap.
MAR 15:18 Mi'i hawyi te'e­ru­wẽ­powat ta'a­tu­mi­ky­ry'i hap — Wakuat wakuat En Urupo­rekuat i'atu'e sa'ag imohit hap ne'i ma'ato.
MAR 15:19 Mi'i hawyi te'e­ro­poityk pina wy'yp ko'i wo i'akag ete hawyi kuitu­'i­'a­tu'e tuwete hawyi te'e­ru­we­pỹ­'ã­tutuk ta'a­tu­mõ­typot yt pywo pe i hamo.
MAR 15:20 Ta'a­tu­mi­ky­ry'i kahu hawyi ta'a­tuhep i ra'yn ta'a­tu­mipag sokpe hup'i morekuat ewy hap hawyi ta'a­tupag iwat hesokpe sese i ra'yn. Mi'i hap totepyi ta'a­tue­reto aria'yp posak etiat i'auka hamo.
MAR 15:21 Mi'i hawyi mu'ap upi tut Simãu yi Sireneu kaipywiat mekewat Aresã­tere ywot Huwu ywot tut toko kaipyi. Mi'i hawyi tokosap hawyi sura­ra'in te'e­ro'e tope — Etipo­wyro ro Iesui he'a­ria'yp posak ereto hap ete i'atu'e mekewat Simãu me.
MAR 15:22 Mi'i hawyi ta'a­tue­roto Iesui I'akag Kag e hap e'yity'ok kape ma'ato Iesui pusu puo Koukuta e hap kape.
MAR 15:23 Put'ok­ta­'a­tu'e hawyi ta'atuium neran Iesui pe mohag Mira e hap Winu hy puo haty monik hamo ma'ato yt tutu'u i.
MAR 15:24 Mi'i hawyi ta'a­tuhep i ra'yn hesokpe hawyi te'e­ru­we­mo­hara ra'yn aikotã waku hesokpe ta'a­tu­pat'ok pat'ok hamo to'ope.
MAR 15:25 Mi'i hawyi ihot'ok po'og na'yn ta'a­tu­pehik ta'yn aria'yp posak ete.
MAR 15:26 Mi'i hawyi toĩne'en miwan kat pote Iesui auka hap enoi hap aria'yp posak tote. Mi'i ti henoi miit'in me — Mi'i Miit Iuteu Ywania Porekuat e.
MAR 15:27 I'ewyte typy ok iwywo ta'a­tu­pehik i'atue­'a­ria'yp posak ete sero­'ok'e haria miit'in atu'uka haria ipo ran kai ipo sese kai aikotã nimo ta'a­tu­henoi miwan me.
MAR 15:28 — Yt nakuaria i py'a­setpiat iku'uro pote Mi'i Miit i'ewyte yt naku i te'e­ru­wa­nẽtup hawe e Tupana ehay moherep hat Isaia tomiwan 53.12 pe.
MAR 15:29 Mi'i hawyi gosap haria te'e­ru­we­mõ­ko'i mõko'i howawi ta'a­tuehay miky­ry'i tuwete — Meiẽ Tupana mõtypot yat okhytpun hat hawyi mye'ym e'at piat yn inug pakup i hat i'atu'e.
MAR 15:30 — Ereha­kye­ra'at ro i'atu'e. Era'apyk to e'aria'yp posak pyi i'atu'e.
MAR 15:31 I'ewyte pa'i watoria miwan enoi haria to'o­ky­ry'i tuete — Ta'i irania'in ni toi'a­tue­ha­kye­ra'at kuap ma'ato tuwewi ti yt tuwe­ha­kye­ra'at kuap hin i i'atu'e.
MAR 15:32 Mi'i hawyi te'e­ro'e miky­ry'i hap wywo Iesui pe — Pyno En ni Tupana Mipo­'oro Aipo­rekuat no pote waku era'apyk to aria'yp posak kaipyi i'atu'e. Ta'i e'apyk hap aria'yp posak pyi uruta­'a­kasa pote ti aru uruimohey ra'yn En yt pote yt i'atu'e Iesui pe imoweu­ka'i haype. Mi'i hawyi i'yaty­piaria mipehik ko'i te'e­ro'e yt naku i tope irania'in ehay ewy.
MAR 15:33 Atpo­sake hawyi at min'e hap kape i'ypyryp kahato wãtym ewy ra'yn yne mesuwat yi tote topy­hu'at.
MAR 15:34 Mye'ym ura hawyi Iesui iwẽpap'i tehay pirik wo — Uhetu­pana Uhetu­pana kat pote ui'atoiat En e. Ma'ato topusu puo to'e — Erui Erui irama sapa­tani apo'e.
MAR 15:35 Mi'i hawyi seha'at haria te'e­ro'e — Meiẽ toikaykay sa'a­wy­'iwuat ase'i Eria topo­wyro hamuat i'atu'e.
MAR 15:36 Mi'i hawyi wẽtup ok teput amũkiusu ap ewywuat kape hawyi toipo'i pina wy'yp ãpo ete hawyi toipuk'a ihy haiũg nakat pe. Mi'i hawyi tutum Iesui pe ihy sym hamo. Mi'i hawyi to'e irania'in me — Apuete to'iro wate­ha'at sio Eria tut imo'apyk aria'yp posak pywiat hamo sio yt e.
MAR 15:37 Mi'i hawyi Iesui kak'e haty wo hawyi ipyhu tek'e ra'yn iku'uro sese ra'yn.
MAR 15:38 Mi'i hawyi Tupana mõtypot yat wato e'okenhyp wato sokpe i'anam kawiat miit'in pyhyp Tupana kapiat hap hiot'e ra'yn atipy kaipyi oken'ypy yi kape.
MAR 15:39 Mi'i hawyi surara akag Iesui owakaipyi ta'a­kasa yne aikotã Iesui iku'uro hap hawyi to'e — Pywo rasig Meiẽ Ihainia ti Tupana Sa'yru sese e.
MAR 15:40 Mi'i hawyi hary­poria tawa Ieru­sarẽi kaipy­wiaria te'e­ra­'a­kasa pya pyi Iesui auka hap kape. Mi'i haria py'a­setpe tukup­te'en mana Sarume mana Maria yi Mata­rena kaipywiat hawyi mana Maria Tiaku hit ty Iuse ty.
MAR 15:41 Mi'iria sa'a­wy'i Iesui ieĩne'en tama Karireia piat turan tuwat Iesui upi heropat hamo. Yt mi'iria yn i ma'ato i'atu hary­poria tõ'ẽ Iesui upi Ieru­sarẽi kape. Mi'i pote tukup­te'en itote mekewat e'at pe i'auka hamuat turan.
MAR 15:42 Tupana mõtypot hap e'at owakai te waku puo yne ra'yn ta'a­tunug neran motpap ko'i Iuteu ywania.
MAR 15:43 Mi'i pote wãtym'i turan pote Iuse tawa Arimateia kaipywiat ti'asyp teran na'yn Iesui piit meremo at min'e hap yianmete. — Iuse ti Iuteu ywania atunãpin hat akag waku sese rakat i'atu'e. Mi'i ti hekatup kahato karãmuo Morekuat no Tupana tut hap e'at. Mi'i ti toto morekuat Piratu kape Iesui piit ẽtup hamo hyp hamo. Morekuat pupi yt token'ẽ hin i.
MAR 15:44 Mi'i hawyi morekuat Piratu tuwa­nẽtup — Iku'uro ra'yn koitypuo yt pãi e tuwa­nẽtup hawe. Mi'i pote toikaykay tesu­rara akag hawyi apo'e tope — Iku'uro ra'yn apo Iesui sio yt e.
MAR 15:45 Mi'i hawyi toiwesat — Ta'i iku'uro sese ra'yn e. Mi'i pote morekuat tum na'yn Iuse pe ipiit.
MAR 15:46 Mi'i hawyi Iuse toto sokpe kyt'i kype kyi'at hamo. Mi'i hawyi toimo­'apyk Iesui piit aria'yp posak pyi. Mi'i hawyi tohuwy ipiit mekewat sokpe kype kyt'i wo. Mi'i hawyi totopag ipiit wo'osyp pakup we tominug sa'a­wy'i nu ka'a pe. Mi'i hawyi toho­'o­kenhyp ta'yn nu wato wo ra'yn.
MAR 15:47 Mana Maria yi Mata­rena piat mana Maria Iuse ty te'e­ra­'a­kasa yne Iesui syp hap aikopiat hyp hap.
MAR 16:1 Tupana mõtypot hap e'at kosap hawyi mana Maria yi Mata­rena kaipywiat mana Sarume hawyi mana Maria Tiaku ty tikyi'at mohag hy ikamhig se rakat Iesui piit pen hamo.
MAR 16:2 Mi'i hawyi hunete mytu'u e'at pe at wẽtem turan tuwat ra'yn Iesui syp hap kape.
MAR 16:3 Mi'i turan mu'ap upi te'e­ro'e to'ope — Uwe aru ho'o­'o­ken­hyp'ok ahepe i'atu'e. Nu wato ipotyi pote Iesui syp hap oken'ypy ete pote aikotã me aru watipen Iesui piit mohag hy wo i'atu'e.
MAR 16:4 Ma'ato te'e­ra­ha'at turan te'o­ken­hyp'ok pe ra'yn toĩne'en ika'a.
MAR 16:5 Mi'i hawyi tuwe­hyt'ok nu ka'a pe. Mi'i hawyi mo sese kai apyk pe te'e­ra­'a­kasa kurum iwasu ewywuat atipy kaipywiat ieĩne'en hat sokpe kyt'i i'ywop takat piat. Mi'i hawyi i'atu­perup ta'yn.
MAR 16:6 Mi'i hawyi to'e i'atuepe — Yt gyt'e­wei'e tei'o e. Atikuap kat pe eweĩ'ẽ. Iesui tawa Nasare piat kape eweĩ'ẽ e. Aria'yp posak etiat mi'auka kape eweĩ'ẽ meikowo e. Yt uwe i ra'yn Iesui meiũpe hyp hawe e. Katu­pono toĩne'en i ra'yn gu'uro pyi e. Ewei'a­kasa ro aikope ipag hap kape are e.
MAR 16:7 Mi'i pote ewei'aipok i ro iwyria'in miat henoi hamo i'ewyte Peteru kape hawyi ewehenoi Iesui ehay i'atuepe — Areto ti aru ahetama Karireia kape ehe'yianme e hap e. Mi'i tote ra'yn aru wato­'o­puẽti i kat are'e sa'a­wy'i e hap ewy e. Mi'i e hap ewehenoi ro e atipy piat hary­poria pe.
MAR 16:8 Mi'i hawyi hary­po­ria'in ikohyeput kahato Iesui potmu­'eria 11 ok takaria enoi hamo. Yt uwe pe i ta'a­tu­henoi mu'ap upi te'e­ro­ken'ẽ haype.
MAR 16:9 Mi'i hawyi mekewat mytu'u e'at pe Iesui wẽtem gu'uro pywiat hap e'at pe hunete Iesui tuwe­mo­herep Maria tawa Mata­rena piat kape tomiahiag sopo 7 ok takat pot'i kape.
MAR 16:10 Mi'i hawyi Maria ta'aipok iwyria'in kape henoi hamo. Mi'i hawyi paa'i­'a­tu'e te'e­ruwak toi'a­tu­puẽti.
MAR 16:11 Mi'i hawyi to'e i'atuepe — Ta'aipok i ra'yn ni Iesui gu'uro pyi Mimi'in e. Ara'a­kasa i ra'yn an uito e i'atuepe. Ma'ato mio tã e hap iwyria'in yt timohey i.
MAR 16:12 Mi'i hawyi typy ok hemiit tuwat wẽtup tawa kape. Mi'i hawyi mu'ap tote Iesui tuwe­mo­herep i'atue­wawi ma'ato yt ta'a­tukuap i sa'a­wy'i.
MAR 16:13 Ta'a­tukuap Iesui hawyi te'e­ra­'aipok irania'in miat henoi hamo. Ma'ato ta'a­tu­henoi hawyi i'ewyte yt ta'a­tu­mohey hin i.
MAR 16:14 Mi'i hawyi 11 ok takaria kape Iesui tuwe­mo­herep i'atuenuk turan. Mi'i hawyi toi'a­tu­sa­ty'i saty'i tehay wo — Kat poteĩ yt eweimohey i uheĩne'en pakup i hap kapiat akasa haria e. Eipy'a heg kahato rat e i'atuepe.
MAR 16:15 Mi'i hawyi to'e i — Uiwy­ria'in eweiwat ro yne mesuwat yi totiaria wuat'i ywania uhehay wakuat enoi hamo e.
MAR 16:16 Uwe uwe uimohey haria weset'ok haria ti aru uimie­ha­kye­ra'at nuaria te'e­ro­py­hu'at e Iesui. Ma'ato yt uimohey i haria ti aru wo'o­'a­piheg haria tukup­te'en wuat'i e'at pe e.
MAR 16:17 Mi'i hawyi uimohey haria tomo­herep miit'in me wakuap kahato. Mi'i tã ta'a­tunug ahiag ko'i miit'in miat ta'a­tu­sopo uhesaika wo. Musu pakup ko'i ta'a­tu­su'at.
MAR 16:18 Mi'i hawyi moi ok akit hanuaria tukup­te'en. Moi pytyk pytkai yt haty i uimohey haria ete e. I'ewyte gu'uro hy u pytkai yt haty i i'atuete e. Ta'i i'ahu rakaria ete te'e­ru­we­ponug hawyi waku ra'yn i'atuete e. Mi'i tã ti aru uimohey haria timo­herep miit'in me e Iesui topot­mu­'eria pe.
MAR 16:19 Mio tã e Aika­'iwat Iesui hawyi Tupana tioto Iesui atipy kape. Mi'i hawyi ta'apyk Tupana po sese kai tomi­mõ­typot po'og eiam note ra'yn ta'apyk ta'yn.
MAR 16:20 Mi'i hawyi hemiit'in tuwat ra'yn Iesui ehay enoi hamo wuat'i ywania mesuwat yi totiaria enoi hamuat. I'ewyte ti I'atu­ka­'iwat Pã'ãu ipotpap kahato i'atu­wywo tesaika wo wakuap nug hamo miit'in miat tomohey hamo. Toran na'yn uimiwan Uito ti Maku
LUK 1:1 Mesup mienoi wakuat ti Aipo­typot Iesui etiat. Uito ti ewy Iruka. Mesuwat uimiwan atipo­'oro ewawi uiwy Teowiru. Mesup ti atipo­'oro ewawi uimiwan Aimi­mohey Iesui etiat aikotã sa'a­wy'i toĩne'en Aipy­'a­setpiat hat enoi hamuat atipo­'oro uimiwan ewawi mehĩ Teowiru. Mi'i e hap typy'i rakaria tiwan na'yn aikotã saĩke tokosap Tupana Mipo­'oro Iesui ehat aipy­'a­setpiat toĩne'en turanuat hap ko'i. Mi'i hap ko'i ti ta'a­tuwan na'yn. Mi'i e hap ti wẽtup ok wẽtup ok tiwan na'yn ta'a­tupo wo. Mi'iria miwan toĩne'en uipo pe hawyi — Pyno waku i'atu­miwan kaipyi atiwan yne sehay Iesui etiat wẽtup yn uimiwan me are'e uipy'a pe hawyi mesup ewawi mehĩ Teowiru atipo­'oro ra'yn yne urumikuap wẽtup yn miwan me are.
LUK 1:2 Mi'i pote irania'in miwan Iesui etiat aremu'e kahato hawyi atikuap kahato Iesui minug ko'i i'ewyte Iesui e hap ko'i. Mi'i hawyi are'e — Pyno waku atiwan yne Iesui etiat wẽtup yn uimiwan me are. Pyno waku Iesui wywo hewyry rakaria wẽ pyi yn atiwan yne Iesui ete i'atu­mi­'a­kasa ko'i sese are. Waku atiwan yne Iesui e hap i'atu­mikuap ko'i are. Waku Iesui wywo hewyry rakaria yn uimu'e are'e uiwepe are. Waku Iesui kuap haria miwan kaipyi yn atiwan uimiwan are. Mi'i hawyi waku atipo­'oro uimiwan Iesui ky'e haria pe are.
LUK 1:3 Pyno ti uito i'ewyte atikuap yne yne aikotã aikotã Iesui etiat hap sa'a­wy­'i­wuaria iwywo hewyry rakaria mienoi ko'i. Mi'i hawyi atiwan mesuwat uimiwan i'atu­miwan ko'i ewat'ymo. Pyno waku.
LUK 1:4 Mi'i uimiwan Iesui etiat mesup atipo­'oro ra'yn ewawi uiwy sese Teowiru are. Pyno sa'a­wy'i ahenoi teran aikotã Iesui ywã'ĩ hap etiat aikotã sa'a­wy'i tuwe­mo­herep hap etiat.
LUK 1:5 Sa'a­wy'i ti Iesui ywania etama puo toĩne'en wẽtup ok Pa'i Sakaria e hap het rakat. Mi'i miit Pa'i koro wo turan hap e'at pe Iesui ywã'ĩ hap e'at put'ok'e. Pyno waku sa'a­wy'i uimiwan me ahenoi epe kurin pa'i Sakaria e hap ete. Pa'i Sakaria sa'a­wy'i pa'i koro wo toĩne'en Tupana mõtypot yat koro pe. I'ywot ti Pa'i koro Api'a e hap het rakat. Mi'i saipepiat ipotpap takat Pa'i Sakaria toĩne'en. Mi'i tupono pa'i Api'a emiariru ko'i tukup­te'en pa'i ko'i wo tawa wato Ieru­sarẽi me ma'ato haipepiat sese ti pa'i Sakaria toĩne'en. Mi'i pote Pa'i koro wo toĩne'en tawa wato Ieru­sarẽi me. Ma'ato Pa'i Sakaria yt ha'yru rakat i katu­pono ihary'i Isapeu yt karãpe i imẽpyt rakat toĩne'en. Pyno pa'i koro Sakaria e'ase'i koro sese Arãu toĩne'en mekewat Musei yket'et. Mi'i pote Sakaria pa'i koro sese toĩne'en. Sakaria ipotpap kahato pa'i wo ma'ato yt iwepit sese i katu­pono yt kat i tosai­pepiat nuat pote. I'ewyte mana Isapeu yt iwepit i. Ta'a­tu­ky­'esat kahato ta'a­tu­mẽpyt hap. Sakaria toĩne'en pa'i koro wo Eroti toĩne'en morekuat no turan.
LUK 1:6 Pa'i Saka­ria'in waku kahato rakaria wo tukup­te'en Tupana wanẽtup hawe. Ta'i Tupana miky­'esat yn nug haria yn mi'iria. Pa'i tunug kahato wuat'i e'at pe Tupana mienoi ewy.
LUK 1:7 Mekewat e'at pe turan ma'ato pa'i Sakaria saipe­pianuat yt kat i katu­pono i'atu­poro kahato ra'yn. I'ewyte heha­ry'i mana Isapeu pyhu'at hap tokosap woity'i ra'yn. Mana Isapeu ti topakup wyi te yt karãpe i imẽpyt.
LUK 1:8 Wẽtup e'at pe pa'i koro Sakaria toĩne'en Tupana mõtypot yat koro pe Tupana miky­'esat nug hamo to'ywot Api'a potpap ewy te tutunug.
LUK 1:9 To'y­wot'in Api'a'in potpap ewy te toĩne'en ipotpap kat pote to'ywot Api'a'in saipepiat sese toĩne'en. Pa'i Api'a'in mi'airo Sakaria pote i'atueko ewy te tutunug itote. Mi'i pote pa'i Sakaria teke Tupana eiam sese pe Tupana mõtypot hamuat ikamhig se rakat wuk hap yparakai tote. Mi'i tote toiwuk ikamhig se rakat Tupana mõtypot hamuat hap.
LUK 1:10 Mi'i wuk totiat turan okeny­pyke õ'ẽ haria typy'i kahato Tupana kapiat ihay raka­nuaria tukup­te'en.
LUK 1:11 Mi'i hawyi Tupana mõtypot yat e'oki­pyke atipy kaipywiat sut hat tuwe­mo­herep ta'yn pa'i Sakaria kape. Mekewat mohag wuk hamo ran kawiat rote tuwe­mo­herep.
LUK 1:12 Ma'ato pa'i Sakaria mekewat wemo­herep hat pupi token'ẽ kahato ne'i ta'a­kasa hawyi.
LUK 1:13 Mi'i pote atipy kaipywiat sut hat to'e pa'i Sakaria pe — Yt ereken'ẽ tei'o e katu­pono Tupana miium epiat sa'a­wy­'iwuat emiẽtup ta'yn emẽpyt ky'esat hap ta'yn e. Mi'i hawyi ehary'i ti imẽpyt irane ra'yn e. Esa'yru irane ra'yn wyti Tupana miium epiat e. Mi'i set wyti Iuwãu e hamuat waku ehet'ok iwemo­herep hawyi e.
LUK 1:14 Mi'i hawyi esa'yru wemo­herep hap e'at pe wyti aru ewepit kahato ra'yn e. I'ewyte ti aru yne irania'in i'atu­wepit kurum hit wemo­herep hap ete hap e'at pe e.
LUK 1:15 Mi'i ti aru Tupana wywuat myhu'at hanuat e. Esa'yru tuwe­mo­herep hawyi meremo howapy ra'yn Tupana Pã'ãu Wakuano e. Ta'i yne e'at pe toĩne'en hap ok tã howapy Tupana Pã'ãu Wakuano e.
LUK 1:16 Itag hawyi ti aru esa'yru ti'a­tu­morem wyti aru e'ase'i Isareu ywania Tupana kape e.
LUK 1:17 Esa'yru ti aru topy­hu'at Tupana ehay moherep hat akag wo e. Aikotã sa'a­wy­'iwuat mekewat Tupana ehay moherep hat Eria e hap het rakat ewywuat topy­hu'at esa'yru itag hawyi e. Aikotã Eria sa'a­wy'i hesaika kahato Tupana ehay enoi hap ete topy­hu'at mi'i hap ewy te aru esa'yru Iuwãu ete topy­hu'at e. Ta'i esa'yru ti aru miit'in sem mu'e hat koro wo topy­hu'at e. Ipotmu­'eria sem ni aru te'e­ro­py­hu'at wo'o­ky'e hanuaria e. Ta'i wo'o­wese hap sese toterut irane e'ase'i Isareu ywania kape e. Ta'i toi'a­tu­morem kahato ti aru miit'in Tupana kape tehay wo tomienoi wo e. Mi'i hap e'at pe ti aru esa'yru Iuwãu terut wo'o­wese hap sese e'ywania kape e. Mi'i piat ta'a­tu­mu'e hap kaipyi ti aru nagnia'in tukup­te'en wo'o­ky'e haria wo e. Mi'i hawyi hira­karia ti'a­tu­ky'e kahato ta'a­tu­'y­wot'in ta'a­tu­ty'in esa'yru piat ta'a­tu­mẽ­pyt'in mu'e hap kaipyi e. I'ewyte e'ywot'in ti'a­tu­ky'e kahato ta'a­tu­mẽ­pyt'in esa'yru piat ta'a­tu­'y­wot'in mu'e hap kaipyi e. Ta'i ta'a­tu­mu'e hap kaipyi wo'o­wese haria wo yn tukup­te'en i'yat piaria e. Mi'i hawyi ti aru Tupana yt miky­'esat i nug haria esa'yru ti'a­tu­mu'e hap kaipyi Tupana miky­'esat nug haria wo ra'yn tukup­te'en e. Waku puo i ra'yn tukup­te'en Tupana miky­'esat ewy ipotmu­'eria tunug turan ti aru tut esa'yru Mimo­herep mekewat Tupana Mipo­'oro Wuat'i Miit'in Porekuat Nuat e. Mekewat e'at pe meimuẽwat esa'yru mimu­'eria ko'i Tupana Mipo­'oro ekatup hanuaria wo ra'yn tukup­te'en. Mi'i ta'a­tue­katup turan ni aru put'ok'e I'atue­ha­kye­ra'at Hat sese esa'yru Mimo­herep e ti atipy kaipywiat sut hat pa'i koro Sakaria pe.
LUK 1:18 Mi'i to'e pote pa'i Sakaria tiwesat sa'ag atipy kaipywiat ehay pe — U pãi e aikotã apuru e'e hap atikuap sio pywo sio yt e. Kat som iwato kahato etomo­herep epo wo ehay sio pywuat sio yt moherep hamo e. Pywo e'e hap pote pywo are aru ma'ato yt pote yt e. Katu­pono uiporo kahato ra'yn i'ewyte uheha­ry'i mẽpyt hap e'at tokosap kahato ra'yn uhyt e. Iporo sese ra'yn uheha­ry'i mehĩ e.
LUK 1:19 Mio tã to'e Sakaria pote atipy kaipywiat Tupana e hap erut hat tiwesat haty wo — Uito ti atipy kaipywiat Tupana ehay erut hat koro e. Tupana ti uipo­'oro tehay enoi epiat hamo e. Uhet sese ti Kapireu e. Tupana e hap ewywuat yn moherep hat uito pãi e. Tupana yt karãpe i heso rakat are e. Uito areĩne'en Tupana wywuat sese hat e. Yne ti uhehay uimi­mo­herep epiat Tupana ehay esa'yru wanuat etiat pywo sese topy­hu'at aru katu­pono Tupana to'e mio tã uhepe pote e. Mi'i pote ti aru put'ok'e yne i'e hap ewy emowepit hamuat e.
LUK 1:20 Uhyt e kat pote som yt etimohey i Tupana e hap uimierut e. Yt naku i kahato e. Yt etimohey i Tupana e hap pote ti yt ehay kuap i aru uhyt e. I'ewyte ti aru ewaure ka'a pe yt teke kuap i sehay katu­pono Tupana ehay uimierut pytkai yt uimohey i pote e. Ma'ato eimẽpyt put'ok'e ui'e hap ewy era'a­kasa ra'yn esa'yru hawyi ewaure ka'a i ra'yn i'ewyte ehay kuap i ra'yn mehĩ e atipy kaipywiat sut hat pa'i koro Sakaria pe.
LUK 1:21 Mi'i turan oken'y­pyke gupte'en haria hekatup kahato pa'i Sakaria wẽtem hap. Mi'i pytkai yt tut i pot'i kahato hawyi te'e­ru­wa­nẽtup to'ope — Katu­ponoĩ koitywy heniatpo kahato toĩne'en mot'i Tupana mõtypot yat pe i'atu'e.
LUK 1:22 Mi'i hawyi pa'i Sakaria tuwẽtem hawyi put'ok'e oken'y­py­kiaria ete. Mi'i hawyi tohenoi teran to'e hap wen ma'ato yt ihay kuap i ra'yn. Yt ihay kuap i pote oken'y­py­kiaria te'e­ro'e to'ope — Pyno tomu­'etu wuat ewy ra'yn Tupana e'oki­pyke toĩne'en turan pote yt ihay kuap i i'atu'e te'e­ru­wa­nẽtup hawe. Mi'i hawyi Sakaria topo wo yn na'yn tohenoi teran tehay oken'y­py­kiaria pe.
LUK 1:23 Mi'i hawyi Tupana yat pe tuwe­potpap kahu hawyi pa'i Sakaria toto i ra'yn to'yat kape.
LUK 1:24 Put'ok'e i ra'yn pa'i Sakaria to'yat piat hawyi ti toĩne'en teha­ry'i wywo hawyi ihary'i hupi'a ra'yn Tupana e hap ewy. Mi'i hawyi iheg me toĩne'en 5 ewaty.
LUK 1:25 Mi'i turan mana Isapeu to'e — Waku kahato Tupana tunug uhepe e. Uiky'e kahato ra'yn Uhetu­pana e. Sa'a­wy'i aremõti kahato yt uimẽpyt i pote ma'ato mesup uhupi'a ra'yn toĩne'en mote yt aremõti kuap i ra'yn e. Sa'a­wy'i irania'in uimohit kahato yt uimẽpyt i pote e. Ma'ato uimẽpyt Tupana miium toĩne'en hawyi yt kat i i'atu'e kuap i aru e. Mi'i pote yt aremõti hin i katu­pono Tupana uiky'e kahato hawyi tutum na'yn uhepe uimẽpyt ra'yn to'e hap ewy e. Waku kahato Tupana e mana Isapeu.
LUK 1:26 Wẽtup e'at pe hawyi mana Isapeu 6 ewaty hupi'a toĩne'en turan Tupana tipo­'oro i ra'yn sa'a­wy­'iwuat atipy kaipywiat sut hat akag Kapireu wẽtup tama kape i ra'yn mekewat yi Karireia popykiat tawa hit Nasare kape i ra'yn toipo­'oro.
LUK 1:27 Itote wẽtup ok pe pĩ'ã makuptia Maria e hap het rakat kape tuwe­mo­herep atipy kaipywiat Kapireu. Pĩ'ã Maria ti yt he'aito rakat i te i'ewyte yt hewaire i te rakat toĩne'en. Toiky­'esat kahato ma'ato te'aito wo wẽtup ok Iuse e hap het rakat mekewat morekuat Tawi emiariru emiariru toiky­'esat. Mi'i tohe­katup turan atipy kaipywiat Kapireu tuwe­mo­herep tope.
LUK 1:28 Mi'i hawyi to'e tope — Mana Maria e eremo­wepit ro e katu­pono koitywy ti Tupana mipoi­tyro sese wo ereĩne'en e. Katu­pono tutum neran epe emẽpyt ihainia Wuat'i Miit'in Porekuat Nuat e. Mi'i pote ti aru po'og Tupana mipoi­tyro wo ereĩne'en torania hary­poria kai katu­pono Wuat'i Miit'in Potypot ty wo ereĩne'en aru pote e.
LUK 1:29 Mi'i hawyi Mana Maria teha'at kahato atipy kaipywiat kape hawyi tuwa­nẽtup kahato tewawiat sehay kape hawyi — Kat to'e hamuat ewy ran uhepe an e tuwa­nẽtup hawe.
LUK 1:30 Mi'i hawyi Kapireu to'e tope — Maria yt ereken'ẽ tei'o e katu­pono Tupana tuwehum kahato ewawi e.
LUK 1:31 Pyno emẽpyt irane wyti mana e. Emẽpyt ihainia ti tuwe­mo­herep irane Tupana miium epiat e. Wakuat kahato e'iunmỹ'ã piat Emẽpyt mana e. Emẽpyt tuwe­mo­herep hawyi waku ehet'ok Mi'i — Iesui ere'e e.
LUK 1:32 Mi'i hawyi En ni Tupana Po'og Torania Kawiat Sa'yru i'atu'e aru miit'in Emẽpyt Iesui pe e. I'ewyte — En ni Wuat'i Ywania Porekuat no i'atu'e Emẽpyt pe mana e. Emẽpyt ihainia pe Tupana tum aru Morekuat Tawi eiam e. Morekuat Tawi saipe­piano ti aru topy­hu'at Emẽpyt e atipy kaipywiat Kapireu Maria pe.
LUK 1:33 Mi'i hawyi ti aru e'ase'i pot Iako emiari­ru'in sem Porekuat no ra'yn Emẽpyt Iesui topy­hu'at wuat'i e'at pe e. Yt karãpe i aru Emẽpyt piat Wuat'i Porekuat no hap ikahuro e atipy kaipywiat sut hat Maria pe.
LUK 1:34 Mi'i hawyi Maria apo'e — Aikotã aru uhupi'a mimi katu­pono yt kat i te uhe'aito e.
LUK 1:35 Mi'i hawyi Tupana mipo­'oro Kapireu tiwesat ra'yn — Ta'i Tupana Pã'ãu tut ewawi e. Mi'i hawyi Ipã'ãu esaika howa eupi'a aru toĩne'en e. Mi'i pote Emẽpyt topy­hu'at ri Tupana Koro Sese Sa'yru e atipy pywiat Maria pe.
LUK 1:36 I'ewyte wyti e'api'i pa'i Sakaria ehary'i Isapeu e hap het rakat hupi'a ra'yn wy. Iporo sese rakat pytkai toupi'a wywo toĩne'en mesup to'yat pe e. Pywo pe wyti imẽpyt tuwe­mo­herep irane ra'yn e'api'i pot piat wy e. Sa'a­wy'i yt imẽpyt kahato rakat i e'api'i e. I'ewyte mesup ipo'oro sese rakano toĩne'en. Ma'ato mi'i hap pytkai toupi'a wywo toĩne'en mesup to'yat pe e. Pywo pe wyti imẽpyt tuwe­mo­herep irane ra'yn e'api'i pot piat e.
LUK 1:37 Ta'i hesaika kahato Ahetu­pana e. Ta'i Tupana ti wuat'i nug kuap hat e. Yt kat i wyti niatpo Tupana wanẽtup hawe katu­pono tutunug kuap yne yne ko'i e. Yt watunug kuap i pytkai Tupana inug kuap e Kapireu mana Maria pe.
LUK 1:38 Mi'i hawyi pĩ'ã Maria to'e Kapireu pe — Uito ti Tupana eropat hano areĩne'en e. Pyno waku atung to'e hap ewy e. Waku Tupana tum uhepe to'e hap ewy e Maria Kapireu pe. Mio tã e kahu hawyi Kapireu ta'aipok ta'yn atipy kape Mana Maria pyi.
LUK 1:39 Mi'i hawyi Maria tuwe­'a­ru­mary hawyi meremo toto te'a­pi'i Isapeu yat kape. Wẽtup yi mekewat yi Iuta e hap kape yity'ok hit puat mu'ap upi toto. Pya kahato toto.
LUK 1:40 Mi'i hawyi put'ok­to'e mana Maria pa'i Sakaria yat pe hawyi teke hawyi — Ihot'ok e te'a­pi'i mana Isapeu pe.
LUK 1:41 — Ihot'ok e hawyi mana Isapeu mẽpyt'a huruk'e i'ymyẽ pe.
LUK 1:42 Mi'i hawyi mana Isapeu howapy ra'yn Tupana Pã'ãu wo hawyi to'e mana Maria pe tehay pirik wo — Waku pe kahato Tupana tunug mesup katu­pono Tupana po'og hegyi'at epe irania'in mana'in kai e. Mesup ta'yn Tupana Sa'yru Sese toĩne'en e'ymyẽ pe e.
LUK 1:43 Tupana Mipo­'oro Aheha­kye­ra'at Hanuat ty wo ra'yn ereĩne'en mesup e. Mi'i pote ti uimo­wepit kahato E'iunmỹ'ã Piat e. Ereke hin waku ereĩne'en uru'yat pe e. En ne po'og uikai katu­pono Tupana Mipo­'oro Aipo­rekuat nuat ty wo ereĩne'en e.
LUK 1:44 Koitywy — Ihot'ok ere'e uhepe turan uimẽpyt tuwe­mũkup uhe'ymyẽ pe iwepit haype e. Katu­pono uimẽpyt uhunmỹ'ã piat tikuap ta'yn Emẽpyt Eiunmỹ'ã piat toĩne'en Topo­rekuat Koro wuat hap e. Mi'i pote tuwe­mũkup uipiit pe tuwehum kahato haype e mana Isapeu Mana Maria pe.
LUK 1:45 Sa'a­wy'i etomohey kahato Tupana e hap pote mesup waku pe kahato ereĩne'en e. Tupana e hap upi eupi'a ra'yn toĩne'en mesup e. Mi'i pote mesup Tupana mimo­wepit kahato wo ereĩne'en e he'a­pi'i Isapeu pĩ'ã Maria pe.
LUK 1:46 Mi'i hawyi mana Maria tuwehum kahato Tupana ete hawyi to'e — Woro­mõ­typot kahato uipy'a pyi Tupana e.
LUK 1:47 Uheha­kye­ra'at kahato hat En Tupana e. Uimo­wepit kahato hat En e.
LUK 1:48 Tupana miha­ky­'e'i kahato rakano. Miit emiit no areĩne'en pytkai uiky'e kahato En an e. Sa'a­wy'i ereha'at uhowawi uiky'e hap wywo e. Yt miit'in miky'e i uito pytkai uiky'e En e. Are an uito wuat'i miit eropat hanuat yn areĩne'en pytkai ui'airo e. Uito ti po'og yi kapiat nakano areĩne'en wuat'i miit emiit kai pytkai uiky'e kahato En e. Mi'i hawyi ui'airo Esa'yru eiam mo Urueha­kye­ra'at hat ty wo e. Ta'i uhewaku hap upi yt ui'airo i ma'ato uiky'e hap upi ui'airo e. Ta'i mi'i pote ti aru — Waku kahato En Tupana i'atu'e ewawi wuat'i ywania Uheha­kye­ra'at hat En mote.
LUK 1:49 Esaika kahato En Tupana e Maria. Waku sese En Tupana are katu­pono egyi'at hap kaipyi wakuap sese etunug uhete e. Mi'i hawyi uimẽpyt hap kaipyi wuat'i miit'in te'e­ro'e aru — Waku kahato Tupana i'atu'e epe e.
LUK 1:50 Pywo pe ti yne mesu­wa­rotiat gupte'en haria emõtypot haria wo tukup­te'en aru katu­pono Esa'yru mieha­kye­ra­'aria tukup­te'en aru pote e. sa'a­wy­'i­te­wuaria kora­nuaria i'ewyte meiũra­nuaria gupte'en haria yt wemo­herep i te haria ky'e kahato hano ereĩne'en mote e Maria Tupana pe.
LUK 1:51 Yt uwe i po'og hesaika rakat ekai Tupana e. Waku kahato En po'og po'og torania kai e. Ma'ato irania'in mesu­wa­ro­tiaria — Uruto po'og torania kai e haria mohit sese hanuat ereĩne'en Tupana e. Mi'i hawyi ti aru i'atu­minug sa'ag hap ko'i eti'a­tu­moma yne ra'yn e. I'ewyte i'atu­wa­nẽtup sa'ag hap eti'a­tu­mo­weityk yne ra'yn e.
LUK 1:52 I'ewyte wemo­wato haria etipuruk kahato i'atu­we­mo­wato hap kaipyi ma'ato mi'i pytkai miit emiit ko'i paa'e haria ewywuaria eti'a­tu­mo­wato kahato morekuat no mesuwe e mana Maria Tupana pe.
LUK 1:53 Are an Hegyi'at kahato rakano ereĩne'en hesy'at rakaria pe ihaky­'e'i rakaria pe. Mi'i hawyi mi'u wakuano eti'a­tupoi kahato mi'iria e ma'ato irania'in — Uruto po'og hekat rakaria e haria eti'a­tunug hesy'at kahato rakaria wo e.
LUK 1:54 Waku sese rakat En Tupana are katu­pono yt etiwaure hin e'e hap — Atunug aru e hap etunug yne e'e hap ok tã e. Sa'a­wy­'iwuat urue'a­se'i pot Isareu pe mio tã ere'e — Esaipepiat kawiano wyti aru ati'a­tue­ha­kye­ra'at wuat'i ywania ere hap ewy etunug mesup e. Mesup ta'yn e'e hap ewy eti'a­tu­po­wyro kahato uru'y­wania e'e hap urue'a­se'i pot Isareu piat ewy e urue'a­se'i emiariru emiariru uruto pote. Waku kahato En katu­pono e'e hap urue'a­se'i piat hap ewywuat mesup ta'yn etunug aikotã sa'a­wy'i e'e hap ewy — Atipo­'oro aru emiari­ru'in me I'atue­ha­kye­ra'at hanuat e'e hap ewy etunug na'yn mesup katu­pono etipo­'oro koran uruewawi Urueha­kye­ra'at hat e'e hap sa'a­wy­'iwuat ewy ehay uruky'e wywuat hap ewy e.
LUK 1:55 Aikotã urue'a­se­'i'in me — Atunug aru ui'e hap ewy etunug na'yn mesup aikotã sa'a­wy'i urue'a­se'i koro Aparãu me ere'e hap ewy — Ati'a­tu­poi­tyro aru torania Wẽtup Esaipepiat po wo e. Wẽtup Emiariru upi Eiã'ỹi upi aru ati'a­tu­mo­waku kahato imohey haria wuat'i ywania mesuwat yi totiaria e Tupana sa'a­wy'i urue'a­se'i Aparãu me e. Pyno waku kahato En Tupana katu­pono e'e hap ewy ra'yn put'ok'e mesup e. Are an Aparãu Emiariru Koro toĩne'en na'yn mesup uhunmỹ'ã pe e mana Maria Tupana pe.
LUK 1:56 Mi'i hawyi mana Maria topy­hu'at mye'ym ewaty te'a­pi'i Isapeu yat pe. Mi'i hawyi te'aipok i ra'yn to'yat kape tawa Nasare kape.
LUK 1:57 Wẽtup e'at hawyi mana Isapeu mẽpyt hap e'at put'ok'e ra'yn hawyi imẽpyt ra'yn ihainia tuwe­mo­herep ta'yn Tupana miium topiat to'e hap ewy.
LUK 1:58 Mi'i hawyi iwyria'in sese ko'i i'ewyte heka­tu­wy­ria'in tikuap ta'yn Tupana miium wakuat mana Isapeu piat hawyi te'e­ru­wehum kahato Tupana kape.
LUK 1:59 Mi'i hawyi mana Isapeu emẽpyt 8 e'at ra'yn hawyi tuwat tuwat ra'yn iwyria'in mana Isapeu yat kape hawyi — Pyno waku wati­kaykay pa'i meikowo emẽpyt emusin sokpe ãpy tek hamuat i'atu'e.
LUK 1:60 — Mi'i watunug hawyi waku watum het emẽpyt pe aheko ewy i'atu'e. Waku wahet'ok emẽpyt Sakaria e'aito set mõtypot hamo i'atu'e ma'ato mana Isapeu — Yt an e. Waku watum tope het Iuwãu e i'atuepe.
LUK 1:61 Mi'i hawyi te'e­ro'e mana Isapeu pe — Ahetama puo waku wahet'ok aimẽ­pyt'in aha'y­ru'in ai'y­wot'in set ewywuat sio aha'a­se­'i'in set ewywuat i'atu'e. Kat pote pyno — Uimẽpyt set ti waku Iuwãu ere'e uruepe i'atu'e. Ma'ato e'aito pa'i Sakaria e'ase­'i'in set Iuwãu e hap het rakat yt uwe i i'atu'e mana Isapeu pe.
LUK 1:62 Mi'i pote ta'a­tupo wo ta'a­tu­hẽtup pa'i Sakaria pe yt hewaure i pote — Kat som waku wahet'ok esa'yru uhyt i'atu'e hap kuap hamo.
LUK 1:63 Ma'ato pa'i Sakaria yt ihay kuap i. Mi'i hawyi pa'i Sakaria hẽtup miwan hug hap hawyi — Waku wahet'ok uha'yru Iuwãu e tomiwan me. Mi'i hawyi te'e­ru­wa­nẽtup kahato to'e miwan miat hap ete. — Aikotã toikuap ahehay mesuwe i'atu'e katu­pono yt toikuap i ahehay tewaure pote i'atu'e.
LUK 1:64 Ma'ato mi'i hawyi pa'i Sakaria tiwan het hawyi meremo ihay kuap i ra'yn itote hewaure ka'a i ra'yn. Mi'i hawyi toimõ­typot kahato ra'yn Tupana tehay wo sa'a­wy'i yt ihay kuap i rakat pa'i Sakaria.
LUK 1:65 Mi'i pote Sakaria yat piaria heka­tu­wy­ria'in te'e­re­wa­nẽtup kahato ha'yru Iuwãu wemo­herep hap kape. Mi'i hawyi tuwat ra'yn tawa piaria ko'i kape Iuwãu wemo­herep hap enoi hamo.
LUK 1:66 Meiũran irania'in yne tama Iuteu piaria ikuap ta'yn Sakaria sa'yru Iuwãu wemo­herep hap etiat hawyi te'e­ro'e to'ope — Kan no aru pa'i Sakaria sa'yru topy­hu'at i'atu'e. Uwe ewy aru mekewat Iuwãu topy­hu'at i'atu'e to'ope tawa piaria. Mi'i hawyi Iuwãu Tupana mipoi­tyro kahato wo topy­hu'at itote. Mi'i hawyi Tupana toĩne'en kahato Iuwãu kai hawyi waku pe kahato toĩne'en ipiit ete iwanẽtup hap ete.
LUK 1:67 Mi'i hawyi pa'i Sakaria ihay kahato itote Tupana Pã'ãu kaipyi tohenoi kahato yianmete tosa­'yru Iuwãu etiat Tupana e hap ewy tohenoi.
LUK 1:68 Mi'i ko'i tohenoi henoi yian note wuat sehay yne tosa­'yru pakup etiat aikotã aru hamuat ihay i'ewyte Aipo­typot Iesui etiat aikotã aru hamuat ihay yt iwemo­herep i te pytkai.
LUK 1:69 Mio tã to'e Pa'i Sakaria — Ta'i esaika kahato Tupana urueha­kye­ra'at hamo. Ta'i esaika hap po'og hĩpo po ehã'ãpe esaika hap kai uruewa­nĩ­kaptia moma hamo e. Ta'i morekuat Tawi saipepiat sese ti Emipo­'oro tuwe­mo­herep irane e.
LUK 1:70 Aikotã ere'e sa'a­wy'i te morekuat Tawi pe hap ewy — Meiũran wyti aru atum epe Emiariru Emiariru Kawiat Wẽtup ok Esaipepiat Wuat'i Miit'in ekyi Ehowawi Hanuat e hap ewy put'ok'e mesup ta'yn uruewawi e. Aikotã sa'a­wy­'i­tewuat ehay moherep haria pe ere'e hap ewy ra'yn mesup ta'yn etunug na'yn e. Aikotã ha'a­wy­te­pyite mesuwuat kape mi'i e'e hap ewywuat yne yne mesup etunug ra'yn uruky'e haype e pa'i Sakaria Tupana pe.
LUK 1:71 Mio tã ere'e sa'a­wy'i uruepe ehay moherep haria wẽ pyi — Pywo ti aru meiũran atipo­'oro Uhemiit sese ehewa­nĩ­kaptia po pywiat eipuruk hamo ere'e. Mi'i hawyi e'e hap ewywuat etunug mesup e.
LUK 1:72 — Yt atiwaure hin i ti sa'a­wy­'iwuat ui'e hap atunug aru ui'e hap ere'e. Uiwese hap wyti aru atimo­herep yne ra'yn ui'e hap ewy ere'e urue'yian miaria pe e. — Uhegyi'at hap uiwese hap atimo­herep wuat'i miit'in me aru ere'e sa'a­wy'i e. Mi'i e'e hap ewy koitywy etunug na'yn uruepe e.
LUK 1:73 I'ewyte sa'a­wy­'i­tewuat urue'a­se'i pot koro Aparãu miat e'e hap ewywuat re etunug na'yn aikotã ere'e sa'a­wy'i — Atunug irane e'e hap ewy etunug na'yn mesuwat e'at pe e. Yt etiwaure hin i e'e hap Tupana e. Aikotã ere'e urue'a­se'i pot Aparãu me — Ati'a­tu­moe­hãite aru wuat'i ywania mesuwat yi totiaria Esaipepiat po wo e'e hap ewy etunug na'yn mesup e. Wẽtup ok Emiariru emiariru minug kaipyi ti aru ati'a­tu­poi­tyro wuat'i imohey haria ere'e hap ewy etunug na'yn mesup e pa'i Sakaria Tupana pe itote wuat'i miit'in ehamo.
LUK 1:74 Mi'i hawyi pa'i Sakaria to'e ra'yn ta'a­py­pueri haria pe — Uiwy­ria'in e Tupana tiky­'esat kahato ahewa­nĩ­kaptia po pywiat ahenõtem hap e. Toiky­'esat kahato aheropat tepiat hap yn e. Yt toiky­'esat hin i wato­ken'ẽ ahewa­nĩ­kaptia pupiat hap e. Mi'i pote aipo­re­nõtem neran ahewa­nĩ­kaptia po pyi e.
LUK 1:75 Mi'i hawyi Tupana ainug neran hãpyk kahato rakaria wo aikotã tewaku hap ewy hap toiky­'esat e. Toiky­'esat yne e'at pe waku hap ewy watu­kup­te'en hap e pa'i Sakaria itotiaria pe tosa­'yru Iuwãu ywã'ĩ hap e'at pe.
LUK 1:76 Mi'i hawyi pa'i Sakaria to'e tosa­'yru Iuwãu me — Uha'yru e meiũran ni aru ereĩne'en Tupana kapiat mu'ap moherep hano e. Mi'i hap e'at pe mio tã ere'e miit'in sem me — Tut irane tut irane Tupana ahowawi Aipo­rekuat nuat ere'e aru e. Mi'i hawyi miit'in emienoi kape te'e­ru­wa­nẽtup kahato hap turan aru put'ok'e Emimo­herep e pa'i Sakaria tosa­'yru Iuwãu me Aheha­kye­ra'at hat Iesui etiat. Mi'i hawyi to'e i Iuwãu me — Pywo ti rat ehenoi henoi aru ai'y­wania pe aikotã waku ta'a­tu­puẽti ta'a­tue­ha­kye­ra'at hap Tupana piat hap e.
LUK 1:77 Uha'yru Iuwãu e ai'y­wania timohey e'e hap Emimo­herep hawyi ti aru waku pe kahato tukup­te'en are katu­pono ta'a­tu­mohey ehay hawyi Tupana waure wo toĩne'en aru ta'a­tu­minug sa'ag ko'i kai e. Mi'i hap ko'i ti aru ehenoi henoi ai'y­wania pe Tupana Mipo­'oro ut hap etiat yianmete e pa'i Sakaria tosa­'yru Iuwãu me. Mi'i hap e'at pe ti aru ehenoi aikotã waku ta'a­tu­puẽti ta'a­tue­ha­kye­ra'at Tupana piat hamuat hap e. Katu­pono ta'a­tu­mohey Emimo­herep hawyi Tupana waure wo toĩne'en i'atu­minug sa'ag ko'i kai e.
LUK 1:78 Ta'i Tupana yt ti'a­tu­po­petek teran hin i miit'in e. Tehay wo toi'a­tu­ky'e kahato miit'in e. Ta'i miit'in ho'o­wasat hap haty kahato tuete e. Mi'i hap kaipyi toipo­'oro Temiit sese Aheha­kye­ra'at hanuat e. Ta'i atipy kaipyi toipo­'oro ahekyi tuwe­wawiat hanuat e. Toiky­'esat wuat'i miit'in mesuwat yi totiaria tuwe­wawiat hap uha'yru e. Aikotã at ta'am hawyi toimoẽ­tyhot yne i'ypyryp hap mi'i hap ewy toimoẽ­tyhot teran tehay wo wuat'i ywania e.
LUK 1:79 Uha'yru Iuwãu e mesu­wa­ro­tiaria ti yt ihapytig hin i rakaria ewy kahato tukup­te'en aikotã i'ypyryp we ga'apy puat ho'o­wasat rakaria ewy miit'in tukup­te'en e. Aikotã miit'in misyp we tukup­te'en i'ypyryp we hap ewy mesu­wa­ro­tiaria tukup­te'en yt te'e­ra­'a­kasa kuap i Tupana kape pote e. Aikotã ho'o­wasat kahato rakaria ga'apy piaria yt ikuap i mu'ap ta'a­tu'yat kapiat hap ewy kahato miit'in mesu­wa­ro­tiaria tukup­te'en e. Yt ta'a­tu­puẽti hin i ta'a­tu­mo­wepit Tupana piat hap e. Ma'ato hẽtyhot hap put'ok'e hawyi ta'a­tukuap meremo mu'ap i ra'yn hawyi waku pe i ra'yn tukup­te'en e. Mi'i ui'e hap Emimo­herep Tupana Mipo­'oro aimoẽ­tyhot hamuat toĩne'en aru e. Uha'yru Iuwãu e mio tã ere'e aru emimu­'eria pe — Tut irane tut irane Aimoẽ­tyhot Kahato Hanuat hawyi waku pe aru watoĩ­ne'en ere'e ti aru e pa'i Sakaria tosa­'yru Iuwãu hire pe.
LUK 1:80 Mi'i hawyi ha'yru Iuwãu hit tuwe­motag itote pa'i Sakaria mana Isapeu yatype. Mi'i tote ipiit hesaika kahato toĩne'en ihãite kahato. Itote tuwe­moe­saika kahato Tupana kuap hap ete. Mi'i hawyi Tupana Pã'ãu Wakuat imu'e kahato itote. Iuwãu kurum iwasu turan hawyi toto ra'yn yahig wato sese kape. Mi'i tote tuwe­mu'e kahato Tupana e hap kuap hamo. Mekewat yahig koro tote Tupana mikuap ok tã tuwe­mu'e kahato katu­pono toiky­'esat tuwe­moe­saika kahato aikotã aru toimo­herep to'y­wania pe Tupana e hap ko'i hap ete.
LUK 2:1 Sa'a­wy'i toĩne'en mesuwat yi tote wẽtup ok morekuat akag kahato more­kuaria porekuat koro Sesa Aukutu e hap het rakat. Mi'i turan toiky­'esat kahato temiit'in yne yne atumo­rania hap. Mi'i hawyi toi'a­tu­po­'oro kahato tesu­ra­ra'in sem tomiwan wywo yne tetama ko'i kape temiit'in atuset pehik yne hamo — Atiky­'esat kahato yne yne uhemiit'in set ko'i miwan me e. Waku i'atuset ko'i ewei'a­tu­pehik yne are katu­pono ati'a­tu­mo­rania teran torania uhemiit'in sem ko'i uhetama wato piaria e ok tã katu­pono toiky­'esat yne miit'in kaipyi tekat ko'i i'atu­sa­'upsat hamuat. Mi'i hawyi toi'a­tu­po­'oro ra'yn tomiwan ko'i yne tetu­'i­saria pe tosu­ra­ra'in sem po pe.
LUK 2:2 Mi'i hap ewy ta'a­tunug mesuwat yi tote Tu'isa wato Sireniu e hap het rakat toĩne'en morekuat koro wuat mekewat yi wato Siria pe turan.
LUK 2:3 Mi'i hawyi mõtypot Sesa Aukutu etama puaria tuwat ra'yn ta'a­tue­tawa sese ko'i kape. Ta'a­tue­'a­se­'i'in etawa ko'i kape tuwat ta'a­tuset pehik hamo sa'up ium hamo morekuat koro Sesa Aukutu e hap ewy.
LUK 2:4 Mi'i e hap upi i'ewyte toto mehĩ Iuse yi Karireia popykiat tetawa Nasare kaipyi yi upi tawa hit Perẽi kape te'a­se'i morekuat Tawi ywã'ĩ hap kape mekewat yi Iuteu piat tawa hit Perẽi kape toto tuwe­set­pehik hamo. Toto tawa Perẽi kape katu­pono mehĩ Iuse ti toĩne'en mekewat sa'a­wy­'iwuat morekuat Tawi emiariru emiariru pote. Mi'i pote toto te'a­se'i Tawi etawa kape.
LUK 2:5 I'ewyte mana Maria toto mehĩ Iuse upi toupi'a wato kahato wywo toto. Ma'ato yt Iuse wat toupi'a wywo i toto ma'ato Tupana Pã'ãu Wakuat upi'a wywo toto. Yt pya hin i ra'yn put'ok­ta­'a­tu'e hamuat tawa hit Perẽi tote turan imẽpyt haty kahato ra'yn mana Maria.
LUK 2:6 Mi'i hawyi itote Tawa hit Perẽi me tukup­te'en hawyi put'ok'e he'at ra'yn hewãtym na'yn hawyi imẽpyt tuwe­mo­herep hap e'at put'ok'e meremo itote hawyi meremo ta'a­tukat kahato itote ta'a­tuket hap wen ma'ato yt aikope kuap i katu­pono yt uwe i Perẽi miaria — Waku eiwe­hyt'ok uru'yat pe e haria itote katu­pono i'atu kahato miit'in õ'ẽ haria itote pote.
LUK 2:7 Mi'i pote ta'a­tukat kahato ta'atueiam hawyi yt ta'a­tu­puẽti hawyi tuwe­hyt'ok wewato ahup yat pe hawyi mekewat hũria yat pe te'e­roket. Mi'i hawyi mekewat wãtym muo tuwe­mo­herep ta'yn Maria Mẽpyt sa'a­wy­'iwuat ihainia ra'yn. Tuwe­mo­herep hawyi sokpe wo tohuwy kahato ra'yn ta'a­tueko ewy ipiit mohãpyk sese nug hamo. Mi'i hawyi tawa hit Perẽi me te'e­ru­we­mo­sy'at ra'yn wẽtup ewaty.
LUK 2:8 Mekewat ewãtym muo Iesui tuwe­mo­herep turan tukup­te'en itote yt pya hin i tawa Perẽi kai yahig note ta'a­tuhũ Uweuria apykok haria. Mi'i tote te'e­roket ta'a­tu­hũria py'a­setpe katu­pono ta'a­tu­'a­pykok teran ta'a­tu­hũria awyato pupi.
LUK 2:9 Mi'i tote ti atipy kaipywiat sut hat tuwe­mo­herep wehũria apykok haria kape. Mi'i ti Tupana ẽtyhot hap wywo tuwe­mo­herep hawyi yne i'atuete hẽtyhot kahato. Mi'i pote Uweira ko'i apykok haria te'e­ro­ken'ẽ kahato hẽtyhot put'ok'e ta'a­tuetiat pote.
LUK 2:10 Mi'i hawyi atipy kaipywiat sut hat to'e wehũria apykok haria pe — Yt eweiken'ẽ tei'o uipupi e i'atuepe. Katu­pono wakuat sehay ahenoi teran ehepe eimo­wepit kahato hamo e. Ta'i yt ehepe yn i uhehay wakuat ma'ato wuat'i ywania mesuwat yi totiaria mowepit hap ahenoi e.
LUK 2:11 Waku kahato Tupana tunug mesup ehepe katu­pono mesuwat ewãtym Tupana tum Temiit sese Wuat'i Miit'in Ehakye­ra'at hanuat tuwe­mo­herep ta'yn e. Pywo ti rat tuwe­mo­herep ta'yn mesup ta'yn itote eha'a­se'i morekuat Tawi tawa Perẽi me Tupana Mipo­'oro Wuat'i Ywania Ehakye­ra'at Hanuat e. Mi'i sehay wakuat enoi hamuat Tupana uipo­'oro ehowawi e.
LUK 2:12 Pyno ahenoi teran ehepe aikotã waku eweipuẽti imẽpyt e hamuat hap. Pyno waku eweiwat tawa Perẽi kape hawyi waku eweikat eihũria yat mekewat eihũria poi hap. Mi'i tote wyti aru eweipuẽti ui'e hap ewywuat e i'atuepe. Mi'i tote sokpe wo tosuwy pe ra'yn ti aru eweipuẽti Tupana Sa'yru e. Ta'i eihũria mi'u upip tote toket itote ui'e hap ewy e. Mi'i ui'e hap ewy eweipuẽti hawyi ti aru eweikuap ta'yn pywo kahato ui'e hap e mekewat atipy kaipywiat sut hat wehũria apykok haria pe.
LUK 2:13 Mi'i to'e turan atipy kaipy­wiaria sem itote te'e­ru­we­mo­herep wy mekewat yahig note. Mi'i hawyi mekewat sa'a­wy­'iwuat wemo­herep hat wywo tukup­te'en Tupana mõtypot hamo.
LUK 2:14 — Wakuat wakuat wakuat En Tupana i'atu'e. Ywaiti Piat Ieĩne'en Hat Sese En i'atu'e. Uruimõ­typot kahato En katu­pono mesup ta'yn Miit'in Mowepit Hat Sese etum na'yn yi totiaria pe i'atu'e. Pyno Miit'in Wo'o­wese Hap Nug Hat topy­hu'at ra'yn mesuwat mytyp tote i'atu'e. Waku kahato katu­pono mesup ta'yn aru wo'o­ky'e haria wo tukup­te'en miit'in emohey haria i'atu'e. Emiky'e kahato ko'i miit'in mote i'atu'e Tupana emiit'in atipy kaipy­wiaria typy'i rakaria yahig note Tupana mõtypot hamo.
LUK 2:15 Mi'i hawyi atipy kaipy­wiaria te'e­ra­'aipok i ra'yn atipy kape hawyi hũria apykok haria te'e­ro'e to'ope — To'iro tawa hit Perẽi kape Tupana mienoi kapiat akasa hamo i'atu'e to'ope.
LUK 2:16 Mio tã ta'a­tu'e hawyi meremo tuwat ra'yn tawa Perẽi kape. Put'ok­ta­'a­tu'e itote hawyi ta'a­tukat kahato atipy piaria mienoi upi hirakat. Mi'i hawyi ta'a­tu­puẽti ra'yn Hirakat hũria yat pe hũria poi hap upip tote. I'ewyte uhyt Iuse mana Maria ta'a­tu­puẽti itote.
LUK 2:17 Te'e­ra­'a­kasa hawyi ta'a­tu­henoi ra'yn uhyt Iuse pe mana Maria pe atipy kaipywiat sut hat ehay yne Iesui etiat ta'a­tu­henoi.
LUK 2:18 Mi'i hawyi tuwat hawyi mu'ap upi ta'a­tu­henoi yne irania'in me tawa hit Perẽi miaria pe. Mi'i hawyi irania'in te'e­ru­wa­nẽtup kahato Uweria ko'i apykok haria mienoi kape.
LUK 2:19 Mi'i hawyi mana Maria tereko yne tomẽpyt wemo­herep hap etiat topy'a pe. Mi'i hawyi yne e'at pe tuwa­nẽtup kahato atipy piaria ehay tomẽpyt etiat hap kape.
LUK 2:20 Mi'i hawyi Uweuria apykok haria te'e­ra­'aipok i ra'yn ta'a­tu­hũria ko'i kape. Te'e­ra­'aipok turan te'e­ru­wehum kahato ra'yn Tupana kape — Wakuat kahato En i'atu'e katu­pono atipy kaipywiat sut hat mienoi ewywuat ra'yn uruta­'a­kasa i'atu'e Tupana pe.
LUK 2:21 Mi'i hawyi 8 e'at ra'yn toĩne'en hawyi Hirakat ta'a­tue­murui sokpe ãpy tek hawyi ta'a­tu­set'ok ta'yn — IESUI eset i'atu'e aikotã sa'a­wy­'iwuat atipy kaipywiat sut hat Kapireu mienoi mana Maria yt upi'a i te turan hap ewy ra'yn ta'a­tu­set'ok Imẽpyt — Iesui het i'atu'e.
LUK 2:22 Mi'i hawyi Iuse'in te'e­ru­we­mo­sy'at wẽtup ewaty hap kahu hawyi tuwat ra'yn tawa wato Ieru­serẽi kape Tupana mõtypot yat wato kape. Mi'i tote ta'a­tu­henoi Iesui Tupana pe — Uruikuap ta'yn ewanuat kahato Mesuwat Hirakat toĩne'en wuat'i e'at pe i'atu'e.
LUK 2:23 Mi'i hawyi ta'atuium Iesui Tupana pe itote aikotã sa'a­wy'i Tupana mienoi ase'i Musei miwan me e hap ewy — Waku etum esa'yru sa'a­wy­'iwuat Uhepe e hap ewy.
LUK 2:24 Mi'i hawyi ta'a­tu­henoi Iesui Tupana kape hawyi ta'atuium Tupana pe typy pykasu hit ko'i pa'i pe. Pa'i ti'a­tu­'auka pykasu hawyi toi'a­tuwuk itote Tupana mõtypot hamo aikotã Tupana to'e ase'i Musei miwan me sa'a­wy'i hap ewy — Waku etum typy pykasu hit sio typy pykasu wato uhepe uimõ­typot hamo esa'yru sa'a­wy­'iwuat tuwe­mo­herep hawyi e hap ewy ta'a­tunug itote.
LUK 2:25 Toĩne'en Ieru­sarẽi me wẽtup ok pa'i koro Simeãu e hap het rakat. Simeãu ni waku rakat toĩne'en Tupana mõtypot kahato hat mi'i. Mi'i i'ewyte hekatup kahato Isareu ywania Ehakye­ra'at Hat Isareu Ywania powyro hanuat katu­pono Simeãu kai toĩne'en kahato Tupana Pã'ãu.
LUK 2:26 Tupana Pã'ãu henoi ra'yn tope — Eku'uro hap owakai te ti aru era'a­kasa Uimi­po­'oro Ehakye­ra'at Hanuat e Tupana Pã'ãu Simeãu me.
LUK 2:27 Meiũran hawyi wẽtup e'at pe Tupana henoi i ra'yn Simeãu me — Ereto ro koran uimõ­typot yat kape e. Mi'i hawyi toto ra'yn Tupana Pã'ãu mienoi ewy. Pa'i Simeãu toto turan put'ok­'i­'a­tu'e Iuse'in Tupana mõtypot yat ete. Mi'i hawyi tuwe­hyt'ok ta'a­tueko ewywuat nug hamo.
LUK 2:28 Mi'i hawyi Simeãu i'ewyte teke itote hawyi totat ra'yn Iesui hit Maria po pyi hawyi tuwehum kahato Tupana kape.
LUK 2:29 Mi'i hawyi to'e — Woro­mõ­typot kahato En Tupana katu­pono uheha wo ara'a­kasa ra'yn Emipo­'oro Wuat'i Ywania Ehakye­ra'at Hanuat kape ara'a­kasa ra'yn e Tupana pe Iesui hit piat pe.
LUK 2:30 Uimo­wepit kahato Tupana katu­pono e'e hap ewy etunug na'yn mesup uiku­'uro hap e'yianmete e.
LUK 2:31 — Pyno waku ra'yn uiku­'uro hap mesup uimo­wepit hap wywo katu­pono mio atikuap ta'yn Emipo­'oro Uheha­kye­ra'at Hat toĩne'en mote e pa'i Simeãu Tupana pe.
LUK 2:32 Mi'i hawyi pa'i Simeãu to'e Maria pe — Mesuwat uipo piat Emẽpyt wyti aru topy­hu'at Wuat'i Ywania Piat Tupana Moherep Hano e. Aikotã ariãty timo­herep mu'ap ahepe wãtym muo hap ewy wyti aru Emẽpyt timo­herep mu'ap Tupana kapiat e. Ta'i Emẽpyt topy­hu'at Wuat'i Miit'in Pu'ap Tupana kapiat hat e. Emẽpyt Iesui wyti aru topy­hu'at Uru'y­wania Mimõ­typot kahato wo e pa'i Simeãu Iesui ty pe.
LUK 2:33 Mio tã to'e hawyi mehĩ Iuse mana Maria te'e­ru­wa­nẽtup kahato pa'i Simeãu ehay kape.
LUK 2:34 Mi'i hawyi Simeãu ti'a­tu­poi­tyro Iuse'in hawyi to'e mana Maria pe — Emẽpyt wyti aru Ai'y­wania Ehakye­ra'at Hano topy­hu'at ma'ato irania'in ai'y­wania yt timohey i Emẽpyt itag hawyi pote te'e­ru­we­ma'at kahato yt ta'a­tu­mohey i hawyi e. Mi'i hawyi Tupana mi'a­piheg wanuaria tukup­te'en e. Ma'ato irania'in ai'y­wania imohey kahato haria Tupana mimõ­typot kahato wanuaria tukup­te'en wuat'i e'at pe e. Mi'iria Tupana mimo­wepit kahato ko'iria tukup­te'en wuat'i e'at pe e pa'i Simeãu Iesui piat Maria pe.
LUK 2:35 Ta'i sa'ag kahato aru ta'a­tunug Emẽpyt ete itag hawyi e. Mi'i pote haty kahato topy­hu'at aru epy'a pe aikotã kyse aipy'a piat haty hap ewy topy­hu'at eete emẽpyt ta'a­tu­'auka hawyi e pa'i Simeãu Iesui ty pe.
LUK 2:36 Mi'i hawyi toĩne'en wy itote Tupana mõtypot yat pe wẽtup ok hiwu mana Ana e hap het rakat. Mi'i ti uhyt Wanueu saki'yt toĩne'en i'ewyte ase'i Ase ywania toĩne'en. Hiwu Ana tuwe­mo­sy'at kahato tuereto tehay teran Tupana wywuat turan.
LUK 2:37 Hiwu Ana ti Tupana ehay moherep hat kahato toĩne'en. Mi'i ti waku kahato rakat toĩne'en Tupana wanẽtup hawe. Tupana eropat kahato rakat toĩne'en itote. At ka'ap toimõ­typot kahato Tupana tehay wo. Waku pe toĩne'en mi'i hap ete. Ihay kahato Tupana wywo at ka'ap. Ihay Tupana wywo turan yt tenuk hin i hawyi yt tuwẽtem hin i Tupana mõtypot yat pyi. He'aito iku'uro hawyi toto Tupana mõtypot yat kape hawyi toĩne'en mot'i itote at ka'ap hap ewy 84 anu toĩne'en itote he'aito iku'uro hawyi. Hiwu pot 84 anu turan hiwu i'atu'e.
LUK 2:38 Mi'i turan Mana Ana put'ok'e pa'i Simeãu henoi Iesui piat mana Maria pe turan. Mi'i hawyi mana Ana ta'a­kasa imẽpyt Iesui kapiat hawyi tuwehum kahato wy Tupana kape — Waku kahato En Tupana e. Mesup ta'yn ara'a­kasa Emipo­'oro Urueha­kye­ra'at nuat e. Mi'i hawyi yne itotiaria Tupana yat piaria pe tohenoi Iesui etiat torania Tupana Mipo­'oro ekatup haria pe — Put'ok'e ra'yn wyti Aheha­kye­ra'at Hanuat sese uiwy­ria'in e. Tupana Mipo­'oro Aipo­rekuat nuat sese wyti put'ok'e ra'yn e mana Ana Iesui piat. Mi'i hawyi toto wuat'i piat henoi hamo tawa wato Ieru­sarẽi miaria Tupana Mipo­'oro ekatup haria piat henoi hamo. Mi'i hawyi tohenoi hirakat Iesui etiat — Put'ok'e ra'yn wyti Aheha­kye­ra'at hanuat sese uiwy­ria'in e hiwu Ana.
LUK 2:39 Mi'i hawyi Iuse'in tunug na'yn yne Tupana mienoi ewy hawyi te'e­ra­'aipok i ra'yn tawa wato Ieru­sarẽi kaipyi yi Karireia popykiat tawa hit Nasare kape tuwat sa'a­wy­'iwuat ta'a­tuieĩ­ne'en hap kape.
LUK 2:40 Mi'i tote Iesui tuwe­motag kahato tawa Nasare pe. Ihay kahato Tupana wywo itote. Tupana Pã'ãu wo tuwe­mo­we'eg kahato hawyi hesaika kahato rakano toĩne'en ipiit ete i'ewyte iwe'eg hap ete Tupana ehay ete. Yne e'at pe po'og po'og itag sa'a­wy­'iwuat kai. Mi'i hawyi Tupana tipoi­tyro sese Iesui iwemotag turan.
LUK 2:41 Mi'i hawyi wẽtup e'at pe tuwat ra'yn Iuse'in tawa wato Ieru­sarẽi kape man teneg u hamo. Te'e­ru­wa­'a­tunug itote ta'a­tue­'a­se­'i'in ehakye­ra'at ta'a­tue­wa­nĩ­kaptia po piat yi Esitu'in ywania po pywiat hap e'at kapiat te'e­ru­wa­nẽtup hay piat kape.
LUK 2:42 Mi'i hawyi kurum iwasu Iesui 12 anu ra'yn hawyi toto wy Iuse upi toty wywo tawa wato Ieru­sarẽi kape te'e­ru­wa­'a­tunug yne anu hap kape. Itote tukup­te'en 7 e'at.
LUK 2:43 Mi'i hawyi te'e­ru­wa­'a­tunug hap tokosap hawyi tuwat ra'yn Iuse'in ta'a­tu'yat kape ma'ato Iesui yt toto i tawa Ieru­sarẽi myi toty'in upi. Sa'a­wy'i yt ta'a­tukuap hin i Iesui topy­hu'at hap.
LUK 2:44 Ma'ato yt te'e­ra­'a­kasa i hawyi ta'a­tu­wy­ria'in tok pe rasom Iesui i'atu'e — Towy­ria'in upi tut wat'ymo i'atu'e to'ope wen ma'ato wãtym hawyi ta'a­tukat Kurum Iwasu Iesui iwyria'in upi ma'ato yt ta'a­tu­puẽti i.
LUK 2:45 Mi'i hawyi te'e­ra­'aipok i ra'yn tawa wato Ieru­sarẽi kape Iesui kat hamo.
LUK 2:46 Mye'ym e'at ta'a­tukat Iesui itote hawyi ta'a­tu­puẽti Tupana mõtypot yat pe. Isareu ywania wo'o­nãpin haria akag tok pe ta'a­tu­puẽti kurum iwasu Iesui. Mi'i tote Iesui tuwa­nẽtup kahato wo'o­nãpin haria akag ko'i ehay kape hawyi apo apo'e wo'o­nãpin haria akagnia kape. Mye'ym e'at turan ihay se kahato mi'iria kape.
LUK 2:47 Mi'i pote itotiaria wo'o­mu'e akag kororia te'e­ru­wa­nẽtup kahato Kurum Iwasu Iesui piat ta'a­tu­wesat kuap kahato hap kape. Mi'i hawyi te'e­ro'e to'ope — Ta'i iwe'eg kahato rasig Iesui i'atu'e.
LUK 2:48 Iuse'in ipuẽti Tupana mõtypot yat pe wo'o­nãpin haria py'a­setpe hawyi te'e­ru­wa­nẽtup kahato hawyi ity Maria to'e tope — Kat poteĩ meiũpe erepy­hu'at uimẽpyt e. Paa'u­ru­to'e kahato ekat haype kowo'i kowo'i uruikat en tawa wato pe e. Haty kahato uruwa­nẽtup hawe yt uruipuẽti i En hawyi e Iesui pe ity.
LUK 2:49 Mi'i hawyi Iesui tiwesat — Kat pote uikat kowo'i kowo'i e. Kat pote yt uikat i mesuwe Tupana mõtypot yat pe yn e. Yt eweikuap i apo aikotã areĩne'en neran Ui'ywot sese yat pe ipotpap nug hap ete e Iuse pe Maria pe.
LUK 2:50 Ma'ato yt ta'a­tukuap hin i Iesui e hap.
LUK 2:51 Mi'i hawyi Iesui ta'aipok i ra'yn to'ywot hit mana Maria wywo tawa Nasare kape i'atu­mi­ky­'esat ewywuat nug hamo. Mi'i hawyi ity yt waure'e hin i ra'yn Iesui e hap tawa Ieru­sarẽi miat hap. Tuwa­nẽtup kahato ihay kape — Kat pote yt uikat i Ui'ywot Sese yat upi Iesui e hap kape at ka'ap tuwa­nẽtup.
LUK 2:52 Mi'i hawyi tawa hit Nasare pe Iesui topy­hu'at mot'i. Tuwe­motag itote yne ete. Mi'i hawyi itote tuwe­piit­moe­saika hawyi tuwe­motag kahato po'og po'og yne e'at hap ewy. Iwe'eg kahato yne e'at pe po'og po'og totag hap ewy'ewy iwe'eg. Mi'i hap ewy miit'in mowepit hap ete tuwe­motag i'ewyte Tupana kuap hap ete tuwe­motag. Mi'i hap upi Tupana tuwehum kahato Iesui ete.
LUK 3:1 Pyno sa'a­wy'i mekewat morekuat Sesa toĩne'en morekuat koro hap e'at pe turan Tupana ihay ra'yn pa'i Sakaria sa'yru Iuwãu kape yahig wato sese tote. Mi'i hawyi Tupana tiwyro kahato Iuwãu wanẽtup hawe ihay. Mi'i turan morekuat Tiperiu Sesa e hap 15 anu toĩne'en morekuat koro wo yi wato Humanu ywania torania potypot no toĩne'en. Mi'i pote wẽtup e'at pe morekuat Sesa ti'a­tu­kaykay tuwe­wawi tetu­'i­saria hawyi toi'a­tu­mo­wato mi'iria. Mi'i hawyi to'e tu'isa Pũsiu Piratu pe — Waku ereĩne'en Iuteu ywania morekuat no yi Iuteu pe uhyt e. Mi'i hawyi to'e tu'isa Eroti pe — Waku ereĩne'en yi Karireia piaria porekuat no uhyt e. Mi'i hawyi i'ewyte toikaykay toywyt sese Wiripi tuwe­wawi hawyi to'e tope — Waku ereĩne'en yi Itureia piaria porekuat no mekewat Iuteu ywania irania'in kawiat porekuat no e. Ma'ato waku aru po'og atum yi epe uheywyt en tupono e. Waku wy yi wato Tacunite atum epe i'ewyte yi wato Irisania atum epe wy i'ewyte yi wato Apirene atum epe uheywyt Wiripi en mote e. Mi'i hap e'at pe Tupana ihay sa'a­wy'i Pa'i Sakaria sa'yru Iuwãu wywo mekewat yahig koro note.
LUK 3:2 I'ewyte mekewat e'at pe Iuteu ywania ti'a­tu­'airo typy pa'i ta'a­tue­pa'i koro wuat. Wẽtup pa'i Anai e hap wẽtup ok pa'i Ka'iwa e hap. Mi'i hawyi mi'iria ta'a­tunug pa'i koro wo Tupana mõtypot yat pe. Mi'i hap e'at pe Tupana ihay sa'a­wy­'iwuat ahet'ok hat Iuwãu wywo.
LUK 3:3 Pyno mi'iria tukup­te'en miit'in akag wuat turan Tupana ihay kahato pa'i Sakaria sa'yru Iuwãu yahig notiat ieĩne'en hat pe — Iuwãu e woro­'airo en uhehay enoi miit'in miat hamo e. Mi'i hawyi Iuwãu toto Tupana ehay moherep hamo Tupana e hap ewy. Mi'i hawyi ikohye­wyry kahato mekewat Iũtãu hy ẽpe upi. Mi'i hap upi ẽpe upiaria toi'a­tu­mu'e kahato Tupana ehay wo. Mio tã e — Ewei'aipok to Tupana kape e. Waku hawyi woro­ho­'o­set'ok eipe e. Ta'i eweitoiat ro eminug sa'ag ko'i hawyi Tupana waure wo toĩne'en eiminug sa'ag ko'i kai e.
LUK 3:4 Aikotã sa'a­wy­'i­tewuat Tupana ehay moherep hat Isaia timo­herep yne ahet'ok hat Iuwãu etiat tomiwan me hap ewy. Mio tã to'e — Tut wyti aru wẽtup ok tehay pirik wuat henoi henoi miit'in miat yahig notiat hat e Iuwãu etiat tomiwan me. Mi'i miit wyti aru mio tã e wuat'i tomi­mu­'eria pe — Eiwa­nẽtup hawiat mu'ap yt hãpyk i rakat ewy toĩne'en ipori'ok kahato rakat ewy e aru e. — Ma'ato mi'i kaipyi ewei'aipok to Tupana kape eiwa­nẽtup hap mohãpyk hamo hawyi mu'ap hãpyk hap ewy Tupana einug e aru mekewat Tupana mipo­'oro e. — Eweikup­te'en no Tupana wanẽtup hawe hãpyk takat hawyi eiwa­nẽtup hap mu'ap ikahu rakat ewy ra'yn topy­hu'at aru e aru Tupana mipo­'oro e Tupana Isaia miwan me.
LUK 3:5 Mio tã e Tupana sa'a­wy'i — Uimi­po­'oro Miit'in Ehakye­ra'at ut hap moherep hat wyti aru atipo­'oro e. Mi'i miit wyti aru mu'ap nug hat ewy topy­hu'at e Tupana miwan miat ahet'ok hat Iuwãu ete. Ta'i mi'i miit wyti aru mu'ap nug hat ewy topy­hu'at e. Mu'ap sa'ag ko'i mokahu hamuat tutunug e. Mu'ap i'anam kahato hyri kawiat toihy­wytip yne e. Mu'ap yity'ok ete ipoity rakat toimo­hãpyk e. Mi'i hawyi mu'ap sa'ag ko'i yi hot pe itym nakat toimo­kahu kahato e. Mi'i hawyi hãpyk yne mu'ap hawyi atipo­'oro Uhemiit Ho'o­wasat Rakaria Puẽti Hat e. Mi'i hawyi Uimi­po­'oro Uhemiit Sese mu'ap mohot hat toimo­herep kahato miit'in me tehay pirik wo — Tut irane tut irane Tupana Mipo­'oro Aheha­kye­ra'at hat e aru. Eiwe­mo­hãhyk to ipu'ap hawyi wyti aru tut ahepe e aru Uhemiit ut hap moherep hat e Tupana sa'a­wy'i.
LUK 3:6 Mi'i hawyi ti Uimi­po­'oro Wuat'i Ywania Ehakye­ra'at Hat akasa haria i'atu kahato tukup­te'en aru mesuwat yi wato hap ok tã e Tupana Isaia miwan 40.3 pe Tosa­'yru Iesui etiat.
LUK 3:7 Pyno Isaia e hap ewy kahato Iuwãu ti'a­tu­mu'e miit'in itote Iũtãu hy ẽpe upiaria. Mi'i hawyi tõ'ẽ kahato miit'in tuwe­wawi. Mi'i hawyi typy'i kahato miit'in put'ok­'i­'a­tu'e Iuwãu ete ta'a­tu­set'ok hap ky'esat haria. Mi'iria pe Iuwãu to'e — Moi mẽpyt ewywuat eipe e. Yt nakuaria i eipe e. Tupana piat ei'a­piheg hap yt eweiky­'esat i pote ewei'õ'ẽ Tupana kape imohey hamo hawyi woro­ho­'o­set'ok e. Ta'i Tupana piat ehet'ok hap eweiky­'esat pote eiwe­morem no Tupana kape e Iuwãu.
LUK 3:8 — Waku eiminug sa'ag ko'i hap ewei'a­tu­'atoiat yne yne e. Mi'i tã ewetunug hawyi irania'in ikuap ta'yn Tupana kapiat ei'aipok hap e. Ma'ato — Waku kahato uruto yt ewei'e tei'o e. — Uruto ti ase'i Aparãu emiariru ko'i pote wakuaria urutu­kup­te'en Tupana wanẽtup hawe yt ewei'e tei'o e. Ta'i aha'a­se'i minug wakuap ko'i yt put'ok'e i ahowawi aimo­waku Tupana wanẽtup hawe e. Ta'i aiwaku hap yt tut i ai'y­wã'ĩ hap kaipyi e. Ta'i Aparãu ewaku hap yt aheha­kye­ra'at kuap hin i e. Ta'i eipiit aha'a­se'i Aparãu piit ewywuat kahato toĩne'en ma'ato eiminug sa'ag ko'i yt Aparãu ewywuat hin i e. Ta'i Tupana tiky­'esat pote tutunug kuap mesuwat nu ko'i kawiat aipiit ko'i ewywuat e. Toiky­'esat pote Aparãu emiariru piit ko'i tutunug kuap mesuwat yi kawiat e. Ma'ato wakuaria imohey haria Aparãu ewywuaria yn waku Tupana wanẽtup hawe e Iuwãu.
LUK 3:9 — Eiwe'eg wo o e katu­pono Tupana mikoi ypia yt haat i rakat ewywuat eweikup­te'en. Aikotã aimikoi yt aipoi i hap ewywuat eipe. Pywo pe ti mesup ta'yn ehapo ete toĩne'en Tupana piat ei'a­piheg hap. Ywyhap ewywuat toĩne'en Tupana po pe eikai aikotã aimikoi yp yt haat i rakat ewywuat watitek ywyhap wo hap ewy eweikup­te'en mesup e. Pyno eiwe'eg wo o katu­pono ywyhap ewywuat toĩne'en Tupana po pe ehete aikotã aria'yp ko'i yt haat i rakaria ypugha hamo hat ewy toĩne'en eikai. Aikotã wati­'y­pugha hawyi wati­'a­tu­sokwuk ahe'aria wo mi'i hap ewy Tupana tunug ehepe sa'ag ewetunug mote e Iuwãu õ'ẽ haria pe.
LUK 3:10 Mi'i hawyi yahig kapiat howawiat õ'ẽ haria apo'i­'a­tu'e Iuwãu me — Yt naku i rat urutuwat aria wato kape i'atu'e. Yt naku i Tupana uru'a­piheg ko'i uruto­py­hu'at wuat'i e'at pe i'atu'e. Mi'i pote aikotã aru waku urutunug Tupana ehamo paa'u­ru­to'e hamo i'atu'e Iuwãu me.
LUK 3:11 Mi'i hawyi Iuwãu ti'a­tu­wesat — Pyno ehesokpe typy pote eweho'oium no yt hesokpe i rakaria pe e. I'ewyte eimi'u toĩ mote ewei'a­tu­moenuk to hesy'at rakaria e Iuwãu paa'e haria pe.
LUK 3:12 I'ewyte wo'o­pyhyp haria tukup­te'en itote weset'ok teran hanuaria. Mi'iria i'atu­potpap Iuteuria ewanĩ­kaptia Humanu ywania eporekuat sa'up sat hamo. Mi'iria wyti wuat'i kaipyi ta'a­tu­po­rekuat wuanuat ha'up pore­ra'at haria. Ma'ato po'og iwato ta'a­tusat ta'a­tu­po­rekuat miẽtup ko'i kai. Mi'i hawyi ipat'ok — Uruwano ra'yn i'atu'e haria. I'ewyte mi'iria apo'i­'a­tu'e Iuwãu me — Urumu'e hat aikotã aru waku urutunug Tupana mowepit hamo i'atu'e katu­pono Tupana piat uru'a­piheg hap yt uruiky­'esat i pote i'atu'e Iuwãu me.
LUK 3:13 Mi'i hawyi Iuwãu ti'a­tu­wesat more­kuaria sa'up sat haria pe — Yt ewei'a­tu­ma'at rei'o miit'in e. Eipo­rekuat miẽtup ok tã yn ewetat ro e Iuwãu mu'ap pyhyp haria pe.
LUK 3:14 Mi'i hawyi i'ewyte sura­ra'in weset'ok teran haria apo'i­'a­tu'e Iuwãu me — Mi'i hawyi uruto apuru aikotã urutunug Tupana mowepit hamo i'atu'e. Mi'i hawyi Iuwãu ti'a­tu­wesat — Yt ewepo­hari tei'o irania'in ekat eipy­'ahak popuo ne'i e. Yt eheso i tei'o miit'in minug ko'i ete e. — Waku rakat mi'i miit ewei'e ro waku rakat pe e. — Yt naku i rakat mi'i miit ewei'e ro yt naku i rakat pe e. Yt eheso i tei'o miit'in etiat eipo­rekuat pe e. Mi'i hawyi yt naku i ewei'e eipo­rekuat pe — Uhepiat uipotpap hap sa'up emiium yt iwato i yt ewei'e tei'o e Iuwãu sura­ra'in me.
LUK 3:15 Mi'i hawyi miit'in hekatup kahato Tupana Mipo­'oro Ta'a­tu­po­rekuat nuat. Mi'i pote te'e­ru­wa­nẽtup kahato Iuwãu kape — Pywo apo Iuwãu ni Tupana Mipo­'oro Aipo­rekuat nuat put'ok'e sio yt i'atu'e te'e­ru­wa­nẽtup hawe.
LUK 3:16 Ma'ato Iuwãu to'e i'atuepe — Uito ti yt Tupana Mipo­'oro Wuat'i Ywania Ehakye­ra'at hanuat i e. Ta'i uito y'y wuat wo'o­set'ok hat ne'i ma'ato Mi'i Miit wẽtup ok wyti aru po'og wakuat uikawiat ra'yn e. Uhewaku hap uiat yt put'ok'e hin i heropat hanuat e. Uhewaku hap yt put'ok'e i Tupana Mi'airo Wuat'i Miit'in Porekuat nuat py sokpe saity pok hamo e. Uito y'y wuat yn wo'o­set'ok hat ma'ato Tupana Mipo­'oro Koro ti aru topot­set'ok miit'in Tupana Pã'ãu wo ra'yn e. Ma'ato yt eweimohey i Imipo­'oro pote ehaty'i haty'i hap yn topy­hu'at Tupana kaipywiat e. Ta'i yt eweimohey i Tupana Mipo­'oro pote aria wo ehet'ok hap haty hap ewywuat tutunug e.
LUK 3:17 Mi'i Miit panene ewy ihay put'ok­to'e hawyi aikotã wati­'a­tu­'yky arui iã'ỹi sese puẽti hamuat hap ewy ti aru toi'yky miit'in wakuaria puẽti hamo e. Mi'i hawyi toi'a­tukat kahato temiit'in wakuaria aikotã watikat panene pe arui iã'ỹi wakuat hap ewy e. Tomohey haria toi'a­tukat watikat iã'ỹi wakuat ewy i'ewyte tomohey ran haria toi'a­tukat iã'ỹi ape ewy e. Wasere upi toikat panene pyi hap ewy toi'a­tu­pat'ok tomohey haria sese i'ewyte tomohey ran haria e. Yt nakuaria i ti aru i'ape ko'i ewywuaria mipugha wuat aria yt hasep i rakat pe mi'iria ti aru toi'a­tu­pugha aria wuat'i e'at piat pe e Iuwãu õ'ẽ haria pe.
LUK 3:18 Wakuat sehay iã'ãkap wuo Iuwãu ti'a­tu­nãpin Iũtãu hy ẽpe etiaria miit'in mowe'eg hamo.
LUK 3:19 I'ewyte morekuat Eroti minug yt naku i hap ko'i toimo­herep yne. — Ta'i morekuat Eroti tero'ok toywyt morekuat Wiripi ehary'i hawyi totioto ra'yn to'yat kape teha­ry'i e. Yt naku i kahato mi'i tã watunug mote e Iuwãu miit'in me.
LUK 3:20 Mi'i tã e Iuwãu morekuat ete pote morekuat Eroti tipyhik ta'yn ahet'ok hat Iuwãu wo'o­pyhik hawe. Toipyhyp Iuwãu hawyi — Yt naku i kahato morekuat Eroti i'atu'e miit'in. Iwato kahato morekuat Eroti minug sa'ag ko'i watikuap mesup i'atu'e.
LUK 3:21 Pyno Iuwãu topyhik hap owakai te Iuwãu ti'a­tu­set'ok kahato miit'in. I'ewyte wẽtup e'at pe Iesui tut ra'yn howawi toset'ok hamo. Toset'ok hawyi Iesui Tupana kape ihay. Mi'i turan oken'ypy ewy tuwe­mo­herep atipy kaipyi.
LUK 3:22 Mi'i hawyi atipy kaipyi Tupana Pã'ãu tut ra'yn pykasu ewy. Mi'i hawyi ta'apyk Iesui apy tote. Mi'i hawyi atipy kaipyi sehay put'ok'e Iesui etiat — Uha'yru Sese En e. Uimo­wepit kahato hat En Uha'yru En mote e. Arehum kahato epe Uha'yru Sese e Tupana Iesui pe.
LUK 3:23 Toset'ok hawyi Iesui ha'a­wynug na'yn topotpap hap 30 anu tuwe­motag hap ete. Mi'i hawyi Iesui ha'a­wynug To'ywot Tupana piat topo­'oro hap ko'i. Mi'i pote imimu­'eria miit'in te'e­ro'e — Ta'i watikuap ta'yn Iesui i'atu'e. Meiẽ ti ahetawa Nasare piat pani­pa­ni'e hat Iuse sa'yru i'atu'e. Iesui ywot Iuse mimotag hat topy­hu'at i'atu'e. Uito ti mesuwat miwan nug hat IRUKA. Pyno mesuwe ahenoi teran ehepe Iesui e'ase­'i'in sa'a­wy­'i­te­wuaria. Pyno Iesui ywot hit ewywuat IUSE Imotag hap topy­hu'at. Pyno Iesui e'ase'i Iuse ywot ERI e hap toĩne'en miwan me i'atu'e.
LUK 3:24 Mi'i hawyi Iesui e'ase'i Eri ywot MATATI e hap toĩne'en. Mi'i hawyi Matati ywot IREWI toĩne'en i'atu'e. Mi'i hawyi Irewi ywot MEUKI e hap. Mi'i pytkai Meuki ywot IANAI i'atu'e. Ianai e hap ywot IUSE POT i'atu'e.
LUK 3:25 Pyno Iuse pot ywot MATATIA i'atu'e. Mi'i hawyi Matatia ywot AMO i'atu'e. Mi'i hawyi Amo ywot NAŨ i'atu'e. Pyno Naũ ywot ESIRI i'atu'e. Esiri ywot NAKAI i'atu'e.
LUK 3:26 Mi'i hawyi Nakai ywot MAATE i'atu'e. Maate ywot MATATIA i'atu'e. Matatia ywot SEMEI i'atu'e. Semei ywot IUSEKI i'atu'e. Iuseki ywot IOTA i'atu'e.
LUK 3:27 Iota ywot IUANA i'atu'e. Iuana ywot IRESA i'atu'e. Iresa ywot SURUPAPEU i'a­tu'e. Suru­papeu ywot SARATIEU i'atu'e. Saratieu ywot NERI i'atu'e.
LUK 3:28 Mi'i hawyi Neri ywot MEUKI i'atu'e Meuki ywot ATI i'atu'e. Ati ywot KUSÃ i'atu'e. Kusã ywot EUMUTÃ i'atu'e. Eumutã ywot ET i'atu'e.
LUK 3:29 Mi'i hawyi Et ywot IUSUE i'atu'e. Iusue ywot ERIESE i'atu'e. Eriese ywot IURĨ i'atu'e. Iurĩ ywot MATATE i'atu'e. Matate ywot IREWI i'atu'e.
LUK 3:30 Irewi ywot SIMEÃU i'atu'e. Simeãu ywot IUTA POT i'atu'e. Mi'i hawyi Iuta pot ywot IUSE i'atu'e. Iuse ywot IUNA i'atu'e. Iuna ywot ERIAKĨ i'atu'e.
LUK 3:31 Eriakĩ ywot MEREA i'atu'e. Merea ywot MENA i'atu'e. Mena ywot MATATA i'atu'e. Matata ywot NATÃ i'atu'e. Mi'i hawyi Natã ywot aha'a­se'i Morekuat TAWI i'atu'e.
LUK 3:32 Mi'i uimiwan kaipyi watikuap ta'yn AIPOTYPOT IESUI Morekuat Tawi Emiariru Emiariru hap. Mi'i hawyi Morekuat Tawi ywot IESE i'atu'e. Iese ywot IUPETE i'atu'e. Iupete ywot PUASI i'atu'e. Puasi ywot SAMŨ i'atu'e. Samũ ywot NAASŨ i'atu'e.
LUK 3:33 Mi'i hawyi Naasũ ywot AMINATAPE i'atu'e. Amina­tape ywot ATIMĨ i'atu'e. Atimĩ ywot ARANI i'atu'e. Arani ywot IRŨ i'atu'e. Irũ ywot WARE i'atu'e. Mi'i hawyi Ware ywot ase'i pot IUTA i'atu'e.
LUK 3:34 Ase'i pot Iuta ywot IAKO i'atu'e. Iako ywot ISAKI i'atu'e. Isaki ywot aha'a­se'i koro APARÃU i'atu'e. Mi'i uimiwan kaipyi watikuap AIPOTYPOT IESUI aha'a­se'i koro Aparãu Emiariru Emiariru hap. Mi'i hawyi aha'a­se'i Aparãu ywot TARE i'atu'e. Tare ywot NAKU i'atu'e.
LUK 3:35 Mi'i hawyi Naku ywot SERUKI i'atu'e. Seruki ywot IRAKÃU i'atu'e. Irakãu ywot WAREKI i'atu'e. Wareki ywot EPET sa'yru. Mi'i hawyi Epet ywot SARE i'atu'e.
LUK 3:36 Mi'i hawyi Sare ywot KAINÃ i'atu'e. Kainã ywot AWASATE i'atu'e. Awasate ywot SẼ i'atu'e. Sẽ ywot wuat'i e'ase'i pot NU'E i'atu'e.
LUK 3:37 Nu'e ywot IRAMEKI i'atu'e. Irameki ywot METUSARA mekewat ieĩne'en mot'i kahato hat i'atu'e. Mi'i hawyi Metu­sara ywot INOKI i'atu'e. Inoki yt iku'uro i katu­pono Tupana tioto atipy kape mi'i miit. Mi'i hawyi Inoki ywot IARETE i'atu'e. Iarete ywot MAREREU i'atu'e. Mi'i hawyi Merereu ywot KAINÃ i'atu'e.
LUK 3:38 Kainã ywot ENU i'atu'e. Enu ywot SETE i'atu'e. Sete ywot ÃTÃU i'atu'e. Ãtãu ni Tupana minug mekewat miit sa'a­wy­'iwuat miit'in e'ase'i pot. Mesuwat miwan nug hat ti Iesui ehay moherep hat IRUKA. Pyno mesuwat uimiwan kaipyi watikuap yne ra'yn AHEHAKYERA'AT HAT IESUI e'ase'i e'ase'i pot Ãtãu emiariru emiariru emiariru hap ko'i Ãtãu kaipyi Iesui kape set ko'i watikuap yne ra'yn IESUI e'ase'i set ko'i. IESUI ywot sese ma'ato TUPANA. Waku ra'yn.
LUK 4:1 Toset'ok hap kahu hawyi Iesui toto tuweran na'yn miit'in kaipyi mekewat Iũtãu hy pyi. Tupana Pã'ãu yn na'yn Iesui piit pe. Ta'i yne Tupana Pã'ãu topy­hu'at kahato ipiit pe. Mi'i pote tutunug Tupana miky­'esat ko'i torania i'e hap ewy yn tutunug. Mi'i hawyi mu'ap upi Tupana Pã'ãu to'e tope — Uha'yru e atiky­'esat ereto yahig wato kape aikope yt uwe i miit'in toĩne'en hap kape e. Mi'i hawyi Iesui toto Tupana Pã'ãu miky­'esat ewy. Mi'i hawyi ahiag akag sese toto Iesui ma'at hamo. Toiky­'esat Iesui temiit no. Toiky­'esat Iesui tomi­ky­'esat nug hanuat.
LUK 4:2 Ta'i 40 e'at 40 ewãtym Iesui toĩne'en mekewat yahig wato tote. Yt kat i mi'u tutu'u. Itote yt tenuk i 40 e'at 40 wãtym. Mi'i hawyi hesy'at sakpo'e tuete itote. Mi'i hawyi yt hesaika i yt kat i mi'u tutu'u hawyi sese yt hesaika i.
LUK 4:3 Hesy'at kahato sese itote. Mi'i turan ahiag akag toto Iesui iã'ãg hamo. Toiky­'esat Iesui tunug hã'ãg hap. Toiky­'esat Iesui tomi­ky­'esat nug hat. Mi'i hawyi toto Iesui kape hawyi to'e tope — Pywuat Tupana Sa'yru En mote etomo­herep to uhepe esaika hap wuat'i nug kuap hap e. Etunug no emi'u wo man mesuwat nu kawiat Mehĩ e.
LUK 4:4 Ma'ato Iesui tiwesat — Yt atunug i rat e'e hap ewy ahiag e katu­pono sa'a­wy'i sese mio tã e Tupana Musei miwan Teute­ru­mumiu 8.3 pe — Yt naku i mi'u mesu­wa­rotiat yn eweikat at ka'ap eipiit mo'ok hamo e. Yt naku i mi'u kape yn eiwe­wa­nẽtup e. Mi'u kape yn eiwe­wa­nẽtup wote yt karãpe i eweikat eheĩne'en hap sese wuat'i e'at piat e Tupana Musei miwan me Teute­ru­numiu 8.3 pe e Iesui ahiag me.
LUK 4:5 Mi'i hawyi ahiag tioto Iesui yity'ok ywaiti kahato rakat kape hawyi itote pyi meremo toimo­herep Iesui kape more­kuaria etama mesuwat yi totiaria torania wuat'i etama i'atuekat ikahu rakat toimo­herep yne Iesui kape tomu­'etu hap ewy. Mi'i hawyi mi'i tote to'e Iesui pe.
LUK 4:6 — Eraha'at ro mesu­wa­rotiat ikahu kahato rakat ko'i kape Mehĩ katu­pono mesuwat yi totiat atum yne teran epe uhemiit no ereĩne'en mote e. Ta'i yne miit atum teran epe mesuwat ewa'a­kasa hap ko'i katu­pono uiat yne mesuwat yi tote torania e. Atum kuap yne mesu­wa­rotiat ekat wo epe uimi­ky­'esat ewywuat etunug yne hawyi e. Uimõ­typot hap etunug hawyi mesuwat ko'i iwato hap ok tã atum yne torania epe e. Mi'i hawyi wuat'i Miit'in Porekuat no ereĩne'en mesuwat yi wato ok tã e. Mi'i hawyi wuat'i ywania tukup­te'en ewano i'ewyte emõtypot haria mi'iria te'e­ro­py­hu'at e ahiag Iesui pe.
LUK 4:7 To'iro uhupi e. Ta'i uiat ko'i tukup­te'en meimuẽ­waria yi totiat yne e. Mi'i pote uimõ­typot En hawyi erepỹ­'ã­tutuk uhowawi mi'i pote aru atum yne ra'yn mesuwat yi totiaria epe Uhyt e ahiag Iesui pe.
LUK 4:8 Ma'ato Iesui tiwesat — Yt rat ahiag yt naku i arepỹ­'ã­tutuk ewawi katu­pono yt naku i woronug uhetu­pana wo ne'i katu­pono mio tã e Tupana Musei miwan me — Waku uhowawi yn eiwe­pỹ­'ã­tutuk e hawyi waku Uito yn eTupana wo areĩne'en e. Yt uwe i toĩne'en mi'i rẽ e Tupana nimo­pywiat Teute­ru­numiu 6.13 miwan me. Yt naku i pãi are'e — en tupana wo ahiag katu­pono Tupana yn Tupana wo topy­hu'at uimi­mõ­typot nuat Tupana yn aheropat hat e miwan me e Iesui ahiag me.
LUK 4:9 Mi'i hawyi ahiag tioto Iesui Ieru­sarẽi kape yity'ok totiat Tupana mõtypot yat koro ywaiti rakat tote toipag Iesui. Itote Tupana mõtypot yat piaria sem tukup­te'en mekewat okipy wato tote. Mi'i hawyi ahiag to'e Iesui pe — Pywo Tupana Sa'yru En mote e'oghyt'at ro meiũpepyi wuat'i miit'in ehamo hawyi waku erepopy hawyi wuat'i miit'in tikuap En Tupana Sa'yru sese hap e.
LUK 4:10 Waku e'oghyt'at meiũpepyi yi kape i'atue­hamo katu­pono sa'a­wy'i Tupana to'e morekuat Tawi wepy 91.11 pe — Uhemiit ta'at pote yt iku'uro i katu­pono meremo atipo­'oro wẽtup ok atipy kaipyi ta'at rakat okhyt'at hamo hawyi yt iku'uro hin i e ti ahepe nimo te miwan me Mehĩ e ahiag Iesui pe.
LUK 4:11 Mi'i hawyi — Pyno ehã'ãg no katu­pono atipy kaipy­wiaria meremo epytyk hawyi yt era'at i hamo e. Pyno erepopy ro mesu­wepyi wuat'i miit'in ehamo yi kape hawyi meremo ta'a­tukuap esaika hap e. Mi'i ehã'ãg hawyi yt erepik hin i yi tote e miwan me e ahiag Iesui pe.
LUK 4:12 Ma'ato Iesui tiwesat — Motoro ahiag pya kahato uikai yt atiky­'esat hin i e'e hap ewy atunug yt naku i ahã'ãg Tupana sio uiku­'uro sio yt hap ete katu­pono mio tã e i'ewyte Tupana miwan me — Yt naku i eiwe­kaipyi ewei'e — Yt uiwe'eg i pytkai uiminug sa'ag ete eweipehik uipo­wyro aru Tupana ei'e hap e. Yt naku i — Uipo­wyro aru ipoity'i pytkai ewei'e uhepe e Tupana miwan me e. Yt naku i uhã'ãg e Tupana sio eku'uro sio yt hap ete e Tupana ahepe nimo te Musei miwan Teute­ru­numiu 6.16 pe e Iesui ahiag me.
LUK 4:13 Mi'i hawyi ahiag ipohep ta'yn Iesui iã'ãg kahato hap ete pyi. Yt toima'at kuap i yt nakuap i nug hap ete ma'ato toto porap'i hap ewy ne'i katu­pono tut i tut i tereto karania wo Iesui iã'ãg iã'ãg hamo ma'ato Iesui po'og hesaika ahiag kai.
LUK 4:14 Mi'i hawyi Iesui ta'aipok i ra'yn tomotag hap kape yi Karireia kape. Tupana Pã'ãu piat tomoe­saika topyt­'atnug na'yn hap wywo ta'aipok. Mi'i hawyi waku kahato toimo­herep itote wuat'i miit'in mikuap kahato wo Iesui tuwe­motag hap itote hawyi ta'a­tu­henoi kahato to'ope to'ope — Iesui minug ko'i waku kahato yt uwe i minug ko'i ewy i'atu'e.
LUK 4:15 Mi'i hawyi tewyry hap upi yne Tupana mõtypot yat ko'i pe teke miit'in atumu'e hamo. Toi'a­tu­mu'e hawyi waku kahato i'atu'e imienoi ko'i pe.
LUK 4:16 Mi'i hawyi Tupana mõtypot hap e'at pe Iesui teke Tupana mõtypot hawe teko ewy Tupana mõtypot hamo. Mi'i hawyi Iesui ipoĩ'ãm na'yn miit'in py'a­setpe Tupana ehay moherep miwan miat hamo teko sa'a­wy­'iwuat ewy tomotag eko ewywuat.
LUK 4:17 Mi'i hawyi ta'atuium na'yn sa'a­wy­'i­tewuat Isaia miwan tope imimo­wẽpap hamo katu­pono sa'a­wy'i tetawa Nasare pe toimo­wẽpap Tupana ehay i'atuepe aikotã sa'a­wy'i kurum iwasu Iesui turan tomotag hap turan toimo­herep Tupana ehay miwan miat hap ewy. Mi'i hawyi totat Tupana ehay miwan miat hawyi toikat ra'yn miwan me aikowuat tomi­ky­'esat ewywuat. Mi'i hawyi toipuẽti ra'yn sehay tuwetiat hawyi toimo­wẽpap tomi­puẽti Tupana ehay tomo­herep hat Isaia e hap miwan miat hap ewy.
LUK 4:18 — Uiwy­ria'in e mesuwe mio tã e miwan me — Tupana Pã'ãu Wakuat toĩne'en kahato uhepe e. Ta'i Tupana ui'airo ra'yn tehay wakuat moherep hamo e. Ta'i Tupana ui'airo satek takaria ehakye­ra'at hamo yt hekat i rakaria mu'e yt kat sa'up i hamuat e. Yt kat etiat kuap i haria mowe'eg hamo ui'airo Tupana e. Mesup ta'yn Tupana uipo­'oro wanĩ­kaptia mipyhik piat ko'i pore­nõtem ta'a­tu­pyhik hap kaipywiat hamo e. I'ewyte ti yt iha pytig i rakaria moha­pytig hamo uipo­'oro e. Ta'i Tupana uipo­'oro ra'yn miit'in yt uwe miky'e i ko'i ky'e sese hamo e. Ta'i Tupana mio tã e uhepe — Atiky­'esat eti'a­tu­po­re­nõtem miit'in yne i'atu­wa­nĩ­kaptia po pywiat hamo e mesuwe miwan me e.
LUK 4:19 Tupana emiit'in ehakye­ra'at hap e'at enoi hamuat uipo­'oro e. Ta'i Tupana ihay mesuwe Isaia miwan me yianmete uhetiat e Iesui itotiaria Tupana mõtypot yat piaria pe.
LUK 4:20 Mio tã e Iesui timo­wẽpap kahu hawyi tutum i ra'yn mekewat Isaia miwan Tupana mõtypot yat piat eropat hat pe. Mi'i hawyi Iesui ta'apyk ta'yn hawyi itote i'atu­mu'e hamo. Mi'i hawyi itotiaria te'e­ra­ha'at kahato howawi kat e aru ihay e hap kuap hamo.
LUK 4:21 Mi'i hawyi Iesui henoi i'atuepe — Mesuwat e'at mesuwat miwan uimi­mo­wẽpap sa'a­wy­'iwuat Isaia mienoi yianme uhetiat toha­'a­wynug na'yn ehehamo ra'yn topy­hu'at ra'yn e Iesui tomotag haria pe.
LUK 4:22 Mi'i hawyi itotiaria — Waku kahato ihay i'atu'e. Ihay se kahato hap watikuap i'atu'e. Ma'ato kat pote iwe'eg kahato ra'yn i'atu'e. Uwe som imu'e iwe'eg hap ete katu­pono watikuap kahato Iesui ywot sese Iuse i'atu'e.
LUK 4:23 Ta'i i'ywot Iuse pan'i­pan­'i'e hat i'atu'e. Pyno uwe imu'e iwe'eg hamo i'atu'e. Mi'i hawyi Iesui to'e tomotag haria pe — Ta'i eweikuap teran uwe piat uimu'e hap e. Ta'i ewehenoi teran sehay pot'i kaipyi mekewat sehay miky­ry'i hap kaipyi — Paini i'ahu rakat eremoe­hãite ro uruehamo aikotã irania'in eti'a­tu­moe­hãite hap ewy ewei'e teran uhepe uimo­weu­ka'i hamo. — Eti'a­tu­moe­hãite kahato miit'in tawa Kawa­na'ũ piaria i'atu'e pyno waku mesuwe emotag hawe tawa Nasare pe i'ewyte eti'a­tu­moe­hãite urutoria ewei'e teran uhepe yt kat i uimohey hap eikai pytkai e Iesui.
LUK 4:24 Mi'i hawyi — Etimo­herep uruepe esaika hap wuat'i nug hamuat hawyi uruimohei En kurum ewei'e pote woro­ho­'o­wesat — Yt uimõ­typot hin i yt uimohey hin i eipe mesuwe uimotag hap etawa pe are'e. Pywo ti rat Tupana ehay moherep hat Uito pytkai uimotag hap totiaria yt uimohey hin i e. Aikotã to'e miwan me — Uimotag haria yt uimohey hin i e ma'ato irania'in kape atipo­'oro uhehay moherep hat pote ta'a­tu­mohey kahato ma'ato imotag hap tote yt hin i e hap ewy kahato eiperia mesup eweipy­hu'at e. Ma'ato atipo­'oro ui'e hap moherep hat wẽtup ywania kape pote itotiaria i'atue­waure ka'a kahato e. Ma'ato ta'aipok ta'yn tuwe­motag hap kape hap totiaria yt uwe i iky'esat e. Ma'ato irania'in tawa ko'i kape — Ereke Mehĩ i'atu'e — Ereke Mimi i'atu'e e Tupana miwan me e Iesui tehay pun haria pe. Mi'i hap ewy kahato mesuwe e Iesui tomotag haria pe. Yt uwe i mesuwe uimohey haria e Iesui tawa Nasare piaria pe.
LUK 4:25 Pyno ahenoi teran po'og uimohey hap pun hap ete e Iesui. Nimo sese te i'atu kahato hiwu ko'i tukup­te'en ai'y­wania Isareu ywania tukup­te'en mesuwe sa'a­wy'i ahe'yi tote e. Mi'i hawyi Tupana tipo­'oro temiit Eria e hap i'atue­wawi e. Mi'i hawyi Eria to'e i'atuepe — Mio tã e Tupana ehepe — Yt kat i hin i i'aman aru eimikoi ete hawyi yt kat i aru eimi'u e. Topap yne eimikoi yt kat i i'aman hawyi e. Mye'ym anu kape ti yt kat i i'aman e Tupana aha'a­se­'i'in me sa'a­wy'i Tupana mipo­'oro Eria wẽ pyi ma'ato yt ta'a­tu­mohey hin i. Ma'ato to'e hap ewy put'ok'e. Mi'i hawyi 6 ewaty yt kat i i'aman mote i'atu­mikoi ko'i topap yne hawyi i'atu­sy'at kahato mesuwat yi wato hap ok tã.
LUK 4:26 Mi'i hawyi Tupana tipo­'oro i tehay moherep hat Eria wẽtup ywania kape mekewat yi Sareta ywania etawa kape. Mi'i hawyi put'ok'e itote tawa hit Sitãu note uru'y­wania ewanĩ­kaptia etawa tote e. Mi'i hawyi itote hiwu wẽtup ywania yat pe toĩne'en porap Eria. Mekewat hiwu Tupana tipoi­tyro kahato e. Ma'ato Eria motag haria aha'a­se­'i'in yt timohey i Eria pote Tupana yt tipo­'oro hin i temiit Eria aha'a­se­'i'in hiwu ko'i kape e.
LUK 4:27 I'ewyte sa'a­wy­'iwuat Tupana ehay moherep hat Eriseu toĩne'en Tupana e hap moherep hat pywo sese hat mesuwe ahetawa pe e. Mi'i e'at pe tukup­te'en kahato itotiaria hepihi pihi rakaria heĩne'en turan ma'ato mi'iria Tupana mipo­'oro Eriseu yt ti'a­tu­moe­hãite kuap i kat pote yt ta'a­tu­mohey i pote e. Mi'i hap e'at pe wẽtup surara akag put'ok'e pya pyi Eriseu kape. Wẽtup ywania kaipyi tut. Wẽtup yi kaipyi tut mekewat hepihi pihi rakat Namã e hap het rakat e. Mekewat yi Siria kaipyi e. Mi'i hawyi toikat Tupana ehay moherep hat Eriseu tomoe­hãite hamuat hap ky'ewi. Mi'i ti Eriseu timoe­hãite meremo ra'yn Tupana esaika wo tomohey hap upi e. Yt ai'y­wania hin pytkai i toimoe­hãite e. Ma'ato ai'y­wania itote i'ahu rakaria ahyt tukup­te'en hepihi pihi rakaria e. Ma'ato mi'iria yt toi'a­tu­moe­hãite hin i katu­pono yt uwe i ahetama piaria imohey pote e Iesui tuwe­motag hap totiaria pe yt tomohey i haria pe. Mi'i hap ewy te Uito areĩne'en mesup eipy­'a­setpe e. Irania'in ywania po'og uimohey eikai e Iesui tomotag hanuaria pe mekewat tawa Nasare piaria pe.
LUK 4:28 Mi'i hawyi Iesui ehay kuap kuap haria Tupana mõtypot yat piaria i'atu­py­'ahak kahato ra'yn Iesui ete — Irania'in ywania po'og eikai Tupana mohey hap ete e Iesui hawyi.
LUK 4:29 Mi'i hawyi — To'iro wati­'auka Iesui i'atu'e. To'iro watipun Iesui yity'ok pyi yihot pe i'auka hamo i'atu'e. Mi'i hawyi ta'a­tu­hã'ãg i'auka hamo.
LUK 4:30 Ma'ato put'ok­ta­'a­tu'e yity'ok tote Iesui auka hamo i'okpun hamo ra'yn turan Iesui tuwe­morem i'atueowa kape hawyi yt heremo hin i topy­hu'at. Mi'i hawyi — Aikope toto Iesui i'atu'e. Yt watikuap i ra'yn aikowo toto hap i'atu'e katu­pono i'atu­py­'a­setpuo tokosap.
LUK 4:31 Mi'i hawyi Iesui toto wẽtup tawa kape ra'yn tawa Nasare tuwe­motag hap totepyi. Mi'i hawyi Iesui ta'aipok ta'yn yi Karireia popyke tawa hit Kawa­na'ũ kape. Itote Tupana mõtypot hap e'at turan teke Tupana mõtypot yat pe itotiaria mu'e hamo.
LUK 4:32 Itotiat Tupana yat piaria te'e­ru­wa­nẽtup kahato aikotã aikotã Iesui mienoi ko'i kape. — Iesui yt irania'in aimu'e haria ewy hin i i'atu'e katu­pono Morekuat Koro ewy aimu'e i'atu'e.
LUK 4:33 Mi'i turan toĩne'en Tupana yat pe wẽtup ok miit ahiag ipiit piat rakat. Mi'i hawyi ahiagnia ta'a­tuehay pirik wo te'e­ro'e Iesui pe mekewat miit wẽ pyi.
LUK 4:34 — Kat hamo som eriot uruewawi Iesui i'atu'e. Kan etiky­'esat urukaipyi i'atu'e. Ta'i uruikuap ta'yn uru'auka hamo eriot i'atu'e. Pywo ti rat uruikuap En. En ni Iesui tawa Nasare kaipywiat sut hat wakuat i'atu'e. En ni Tupana Mipo­'oro ahiag akit hamuat i'atu'e haty wo.
LUK 4:35 Mi'i hawyi Iesui wãi'e ahiagnia pe — Eipo­'inik to ahiag e. Erẽtem no meiẽwat miit piit pyi ahiag e. Mi'i hawyi ahiag tipun temiit i'atu­py­'a­setpe tuwẽtem ipiit hawe. Mi'i hawyi sa'a­wy­'iwuat miit ahiag ipiit piat rakat waku ra'yn ahiag ipun pytkai yt kat i haty ipiit ete.
LUK 4:36 Mi'i hawyi Iesui minug wakuat kape te'e­re­wa­nẽtup kahato hawyi te'e­ro'e to'ope — Aikotã som toi'a­tu­sopo kuap ahiagnia i'atu'e. Po'og ahiag kai Mi'i Miit hesaika i'atu'e. Yt aimu'e haria ewy hin i tutunug kuap. Toipo­'oro pote ahiag tuwẽtem meremo ihay pyi. Pywo pe ti po'og paini kai Iesui i'atu'e. Ta'i Tupana Mipo­'oro Aipo­rekuat nuat hesaika hap ewywuat nug hat toi'a­tu­po­re­nõtem ahiagnia meiũwat miit piit pyi i'atu'e. Tehay wo yn toi'a­tu­sopo kuap ahiagnia i'atu'e wanẽtup haria.
LUK 4:37 Mi'i hap ewy tutunug mote wuat'i puaria ikuap yne Iesui minug wakuap ko'i ahiag sopo tehay wuat hap.
LUK 4:38 Mi'i hawyi Iesui tuwẽtem Tupana yat pyi hawyi toto ra'yn topot­mu'e Nu Simãu Peteru yat kape. Mi'i tote Peteru sakitu i'ahu rakat toĩne'en. Ipiit hakup kahato. Mi'i hawyi ta'a­tu­hẽtup ta'yn Iesui pe — Etimoe­hãite o meiũwat uruwy Peteru sakitu i'ahu rakat Mehĩ i'atu'e Iesui pe.
LUK 4:39 Mi'i hawyi Iesui toto ra'yn Simãu sakitu ewawi. Mi'i hawyi wãi'e i'ahu hawe hawyi tokosap meremo ipiit sakup hap. Mi'i hawyi waku ra'yn. Tehãite meremo hawyi iãpe­'ok'am getap wiat topotpap hamo õ'ẽ haria eropat hamo.
LUK 4:40 Mi'i hawyi at min'e hawyi ta'a­tuerut kahato ta'a­tu­wy­ria'in i'ahu rakaria Iesui ewawi. Mi'i hawyi Iesui tuwe­ponug i'ahu rakaria ete hawyi toi'a­tu­moe­hãite yne. Tuwe­ponug hawyi waku yne ra'yn.
LUK 4:41 I'ewyte Iesui ti'a­tu­po­'oro yne ahiagnia miit'in piit pyi. Tuwe­nõ'ẽ turan i'atuehay pirik kahato — Ta'i En ni Tupana Sa'yru Iesui i'atu'e. Ma'ato Iesui wãi'e i'atuepe. Yt toiky­'esat i tomo­herep hap katu­pono ahiag tikuap Iesui Tupana Sa'yru hap. Mi'i pote — Wãi'e i'atuepe eipo­'inik to yt ewehenoi tei'o uwe Uito hap eweikuap hap ok tã e Iesui ahiagnia pe.
LUK 4:42 Ihot'ok kai i toto Iesui tuweran tawa Kawa­na'ũ pyi yt uwe i miit toĩne'en hap kape Tupana wywuat tehay kahato hamo. Mi'i hawyi miit'in tikat kahato Iesui. Ta'a­tu­puẽti hawyi — Ereĩne'en no uruwywo uruetawa pe Mehĩ i'atu'e. Eto hawyi yt uruiky­'esat hin i katu­pono i'atu kahato miit'in ekat haria i'atu'e miit'in sem Iesui pe.
LUK 4:43 Ma'ato Iesui ti'a­tu­wesat — Uiwy­ria'in ahenoi teran wuat'i tawa pe aikotã aikotã Tupana topy­hu'at Wuat'i Miit'in Porekuat no hap etiat e. Mi'i nug hamo Tupana uipo­'oro e. Mi'i tupono atunug neran uipo­'oro hap e. — Atiky­'esat yne ywania mu'e hap Tupana e hap ewy uipo­'oro pote Wuat'i mu'e hamo e.
LUK 4:44 Mi'i pote toto ra'yn tawa Kawa­na'ũ pyi yne y'y hit i upi yne yi Iuteu puo wuat'i miit'in mu'e hamo. Yne Tupana mõtypot yat ko'i kape toto. Mi'i hawyi teke yne Tupana mõtypot yat ko'i pe tohenoi Tupana toĩne'en Miit'in Porekuat hap.
LUK 5:1 Mi'i hawyi wẽtup e'at pe Iesui yi Kene­sare hyemyi'a hyẽpeke toĩne'en. Mi'i tote te'e­ru­wa­'a­tunug kahato miit'in typy'i rakaria Iesui ewawi Tupana ehay kapiat wanẽtup hanuaria.
LUK 5:2 Itote turan typy e'yara yẽpe piat ko'i pe Iesui ta'a­kasa pira pytyk haria kape. Ma'ato ika'i­waria yt uwe i yara ko'i pe katu­pono te'e­ru­we­suki wato koho hamo tuwe­nõ'ẽ ta'a­tue­'yara pyi ihyemyi'a hyẽpeke kape pira pytyk haria.
LUK 5:3 Mi'i hawyi typy'i kahato tomi­mu­'eria pote Iesui teke ra'yn wẽtup yara pe hawyi to'e yara ka'iwat Simãu Peteru pe — Mehĩ atipuru porap e'yara katu­pono mi'i totepyi ati'a­tu­mu'e teran miit'in sem ihyemyi'a hyẽpeke piaria hamo e Iesui Simãu me. Mi'i hawyi Iesui e hap ewy meremo Simãu tunug. Mi'i hawyi Iesui ta'apyk yara pe hawyi toi'a­tu­mu'e ra'yn miit'in mekewat yẽpe­ke­to­tiaria yara pyi.
LUK 5:4 Mi'i hawyi tehay kahu ra'yn hawyi to'e ra'yn Simãu me — Ereto i ro ihy pya kape e. Mi'i totepyi ewyria'in wywo waku eweipytyk pira ko'i waku ewetopag ehesuki y'y pe pira pytyk hamo e.
LUK 5:5 Ma'ato Simãu to'e — Uruka­'iwat e uruikat kahato ra'yn ka'ap mo pira suki wato wo wen ma'ato rat yt kat i hin i pira uruipytyk yt wẽtup i uruipytyk uruesuki wo e. Ma'ato etiky­'esat pote urutunug neran e'e hap ewy mi'i hawyi waku e'e hap ewy urutopag uruesuki y'y pe Mehĩ e Iesui pe.
LUK 5:6 Mi'i hawyi ta'a­tupag y'y pe ta'a­tue­suki wato hawyi ipyt'at kahato ra'yn pira wo. Mi'i hawyi pira sem ko'i tihiot i'atue­suki wato.
LUK 5:7 Mi'i pote ta'a­tu­kaykay ra'yn ta'a­tu­wy­ria'in wẽtup yara piaria ta'a­tu­po­wyro hamo. Mi'i hawyi ta'a­tu­hytmoi ta'a­tue­'yara ko'i pe pira sem hawyi porap te'e­ra­'a­py'at pira i'atu kahato pote.
LUK 5:8 Mi'i hawyi Simãu Peteru ta'a­kasa Iesui minug wakuat kapiat hawyi toikuap ta'yn Iesui minug yt uwe i minug kuap hap ok tã hawyi tuwe­pỹ­'ã­tutuk Iesui eowa kape to'e hamo — Mehĩ e ereto o pya kahato uikai kat pote yt nakuat i kahato rakat uito e tuwenoi ra'yn Iesui pe. — Ta'i uiat uhewaku hap ti yt put'ok'e hin i emiit no areĩne'en hamo e. Mesup worokuap En wuat'i nug kuap hat ereĩne'en hap e. Mi'i pote Wuat'i Ka'iwat no ereĩne'en e. Mi'i pote aremõti uiminug sa'ag ko'i ete e. Mi'i pote yt naku i areĩne'en emiit no e Peteru Iesui pe.
LUK 5:9 Mi'i hawyi Simãu tuwa­nẽtup kahato pira sem kape i'ewyte yne iwywuat wat haria yara piaria te'e­ru­wa­nẽtup kahato i'atu kahato pira ta'a­tu­pytyk pote.
LUK 5:10 I'ewyte Simãu ekatu­wyria seseria he'yara piaria ipowyro haria mehĩ Tiaku mehĩ Iuwãu mekewat uhyt Sepeteu sa'y­ru'in te'e­ru­wa­nẽtup kahato wy pira pytyk kahato hap kape. I'ewyte Simãu teha'at kahato hawyi Iesui to'e — Yt erewa­nẽtup tei'o po'og mi'i hap kape Simãu e katu­pono wyti aru mesuwat hawyi miit'in atupytyk Tupana wanuat hamo ra'yn ereĩne'en ni aru aikotã mesuwat pira pytyk suki wuat hap ewy e.
LUK 5:11 Mi'i hawyi te'e­ru­wehik ta'yn ihyemyi'a hyẽpeke hawyi ta'a­tu­'atoiat ta'a­tu­potpap hap pira pytyk hap Iesui upiat tuwat hamo.
LUK 5:12 Iesui toĩn'en wẽtup tawa pe turan tut ra'yn wẽtup ok miit hepihi pihi kahato rakat Iesui ewawi. Ipe ete hepihi yn yne ipiit ete. Mi'i ti tuwe­wahik yi tote porog me Iesui yatype hẽtup hamo — Mehĩ e uimoe­hãite teran mote atiky­'esat kahato uimo­waku hap.
LUK 5:13 Mi'i hawyi Iesui tuwe­ponug ipiit pe hawyi to'e — Ta'i woro­moe­hãite teran uhyt e. Mio tã e hawyi meremo ipe pakup we toĩne'en. Yt wẽtup hepihi pihi i toĩne'en ipiit ete tokã'ã ra'yn hepihi pihi hap ko'i.
LUK 5:14 Ipiit waku hawyi Iesui haty wo ra'yn to'e tope — Uhyt yt ehenoi tei'o irania'in me uhepiat emoehãite hap mesup ma'ato ereto ro meremo pa'i kape epiit kahu hap etiat moherep hamo aheko ewy e. I'ewyte etum no pa'i pe Tupana piat emoehãite hap sa'up aikotã sa'a­wy­'iwuat Musei aimu'e hap ewywuat e. Mi'i etunug hawyi pa'iria tikuap ta'yn epe moehãite hap e.
LUK 5:15 Mi'i hawyi irania'in po'og ikuap Iesui etiat hawyi tõ'ẽ tõ'ẽ miit'in typy'i kahato Iesui ehay kapiat te'e­ru­wa­nẽtup hamo. I'ewyte i'ahu rakaria ko'i tõ'ẽ ta'a­tu­moe­hãite Iesui piat kat hamo.
LUK 5:16 Mi'i pote Iesui toto tuereto yt uwe i miit hap kape Tupana wywuat tehay hamo.
LUK 5:17 Wẽtup e'at pe Iesui piat miit'in atumu'e hap tote tukup­te'en nagnia ehay enoi haria i'ewyte miwan enoi haria apyk puo tukup­te'en yi Karireia kaipy­wiaria yi Iuteu kaipy­wiaria tawa wato Ieru­sarẽi kaipy­wiaria tõ'ẽ mi'iria Iesui mienoi kuap hamo. Mekewat e'at pe toĩ kahato Iesui kai Tupana esaika hap i'ahu rakaria moehãite hamo.
LUK 5:18 Mi'i turan tõ'ẽ ihainia'in ko'i wẽtup ok yt ipoĩ'ãm kuap i rakat yni pe aria'yp ete he'yni pe ta'a­tuerut Iesui ewawi. Mi'i tote miit sem kahato puo ta'a­tue­ro­kosap i'ahu rakat Iesui kape.
LUK 5:19 Ma'ato yt aikopuo kuap i ta'a­tue­ro­kosap Iesui kape. Mi'i hawyi miit'in tok puo yt ta'a­tue­reke kuap i pote te'e­ra'am na'yn getap ok tote hawyi ta'a­tu­'oghot ra'yn mare itote ywaiti Iesui apy tote. Mi'i hawuo ta'a­tu­mo­'apyk Iesui yatype yt hewyry kuap i rakat. Miit'in tok puo Iesui ywytpe ta'a­tu­mo­'apyk.
LUK 5:20 Mi'i hawyi Iesui tikuap ta'yn i'atuepiat tomohey hap hawyi to'e yt ipoĩ'ãm kuap i rakat pe — Uiwy e koitywy o waure wo ra'yn eminug sa'ag ko'i kai areĩne'en e.
LUK 5:21 Mi'i hawyi itotiaria nagnia ehay enoi haria i'ewyte miwan enoi haria te'e­ro'e te'e­ru­wa­nẽtup hawe — Heiẽ yt naku i Iesui ihay sa'ag kahato Tupana ete i'atu'e katu­pono Tupana yn ni iwaure kuap aiminug yt naku i hap ko'i i'atu'e.
LUK 5:22 Ma'ato i'atu­wa­nẽtup hap ko'i Iesui tikuap yne ra'yn tuwa­nẽtup hawe. Mi'i pote to'e wanẽtup haria pe — Kat pote mio tã ewei'e eiwa­nẽtup hawe e.
LUK 5:23 Ta'i — Waure wo ra'yn ni eminug sa'ag ko'i kai areĩne'en mesup are'e ra'yn mesuwat miit pe e. Yt niatpo hin i — Waure wo are'e miit'in me e. Ma'ato po'og niatpo wato'e yt hewyry kuap i rakat pe — Epoĩ'ãm no hawyi ewyry ro wato'e niatpo kahato e.
LUK 5:24 Mi'i pote pono atimo­herep ehepe uhesaika hap miit'in mi'a­parap ko'i moweityk hamo e. Ta'i Uito ti Miit'in Eyke'et mi'i pote ti uhesaika hap put'ok'e wuat'i miit'in minug yt naku i hap ko'i moma hamuat e. Mi'i uhesaika hap moherep hamuat mesup uhehay wo atimoe­hãite meiũwat yt hewyry kuap i rakat yne ehehamo e. Mi'i hawyi eweikuap ta'yn uhehay wuat atihep kuap wy eiminug sa'ag ko'i hap e itotiaria pe. Mi'i hawyi to'e yt ipoĩ'ãm kuap i rakat pe — Epoĩ'ãm no mehĩ hawyi eti'ok­po'i ro e'yni hawyi ereto ro e'yat kape e.
LUK 5:25 Mio tã e hawyi meremo sa'a­wy­'iwuat i'ahu rakat ipoĩ'ãm hawyi toi'ok­po'i te'yni hawyi toto ra'yn to'yat kape tuwehum kahato Tupana kape toto turan.
LUK 5:26 Itotiaria te'e­ru­wa­nẽtup Iesui minug etiat hawyi te'e­ru­wehum kahato Tupana kape ma'ato te'e­ro­ken'ẽ hap wywo te'e­ro'e — Iesui yt uwe i ewy i'atu'e. Aikotã pyno tutunug wakuap mi'i hap ewy i'atu'e. Meiũwat ewywuat yt miit'in minug kuap ewy hin i i'atu'e. Yt karãpe i mi'i ewywuat kape wata­'a­kasa meikotã nug hap kape i'atu'e to'ope. Mi'i pote te'e­ro­ken'ẽ kahato Iesui pupi.
LUK 5:27 Mi'i hawyi toto i ra'yn Iesui mekewat tomi­moe­hãite yat pyi hawyi mu'ap upi teha'at kahato wẽtup miit kape. Ta'a­kasa wẽtup ok yt uwe miky­'esat i rakat kat pote mu'ap pyhyp hano toĩne'en sura­ra'in wanĩ­kaptia powyro rakat pote. More­kuaria wanĩ­kaptia wywo toi'a­tu­pyhyp yne mu'ap ko'i. Itote pyi toi'a­tu­ky­'esat wuat'i miit'in kaipyi mu'ap sa'up. Iwato kahato toi'a­tu­po­re­ra'at Iuteuria ewanĩ­kaptia porekuat wano. Mi'i hawyi ipat'ok towanuat totat sa'ag. Mi'i hawyi iha'at kahato Iesui howawi mehĩ Mateu Irewi e hap het rakat kape. Mi'i hawyi toto howawi hawyi to'e — Woro­ky­'esat en uhemiit no e. Pyno to'iro uhupi e Iesui Mateu pe.
LUK 5:28 Toikaykay hawyi meremo ipoĩ'ãm Iesui upiat toto hamo. Mi'i hawyi toi'a­tu­'atoiat yne yne tomisat ko'i sa'up iwato rakat yparakai tomi­'a­pykok tote. Yt toiky­'esat i po'og katu­pono toto teran Iesui upi pote e.
LUK 5:29 Mi'i hawyi Irewi Mateu toto ra'yn Iesui upi hemiit no. Mi'i hawyi Iesui mekewat Mateu Irewi tioto to'yat kape imoenuk hamo. Put'ok­to'e to'yat pe hawyi ienuk hap tutunug Iesui etiat tuwehum haype. Mi'i hawyi toi'a­tu­kaykay towy­ria'in to'e­wywuat sa'up pore­ra'at haria toi'a­tu­kaykay irania'in wywo. Mi'i hawyi yt naku i kahato rakaria py'a­setpe Iesui toĩne'en.
LUK 5:30 Mi'i hawyi nagnia ehay enoi haria i'ewyte miwan etiat wãi'e hap moherep haria te'e­ra­ha'at Iesui ienuk hap kape hawyi mi'iria i'atu­py­'ahak Iesui ete i'ewyte Iesui potmu­'eria ete. Mi'i pote te'e­ro'e — Kat poteĩ Eika­'iwat yt nakuaria i sa'up pore­ra'at haria wywo tenuk hamuat toto i'atu'e. Yt naku i yt nakuaria i wywo watenuk e miwan me i'atu'e.
LUK 5:31 Ma'ato Iesui ti'a­tu­wesat — Uhyt'i'in e yt eweikuap i apo aikotã ihãite rakaria yt ikat hin i mohag nug hat ta'a­tu­moe­hãite hamo e. Ma'ato irania'in i'ahu rakaria ihãite pik'e rakaria ikat kahato mohag nug hat ta'a­tu­mo­hãite pakup i hat ta'a­tu­mo­pakup i hat e. Uito areĩne'en mohag nug hat ewy. Mesu­wa­ro­tiaria ehakye­ra'at hamo Tupana uipo­'oro miit'in yt naku i nug haria moehãite hamo uipo­'oro e.
LUK 5:32 — Uito ti yt ariot i wakuaria mowaku pakup i hamo katu­pono — Uruto po'og waku tora­nia'in kai i'atu'e. Mi'i e haria yt uikat i — Uruto waku kahato Tupana wanẽtup hawe i'atu'e haria ewy e. Mi'i pote yt ati'a­tue­ha­kye­ra'at kuap i mi'iria ma'ato irania'in — Yt nakuaria i uruto e haria tikuap kahato ra'yn yt i'atue­waku i hap pote mi'iria ati'a­tue­ra­'aipok kuap Tupana kape e. Mi'iria mu'e hamo ariot e. Ma'ato — Uruto waku e haria yt ati'a­tue­ha­kye­ra'at kuap i e Iesui.
LUK 5:33 Mi'i hawyi mekewat — Uruto po'og e haria te'e­ro'e Iesui pe — Uhyt i'atu'e ahet'ok hat Iuwãu potmu­'eria i'ewyte nagnia ehay enoi haria te'e­ru­we­mo­sy'at kahato ta'a­tuehay Tupana kapiat moesaika hamo i'atu'e. Ma'ato ewat epotmu­'eria te'e­ru­wenuk yn i'atu'e. Yt te'e­ru­we­mo­sy'at hin i ta'a­tuehay Tupana kapiat moesaika hamo i'atu'e.
LUK 5:34 Mio tã te'e­ro'e hawyi Iesui ti'a­tu­wesat — Pyno ahenoi teran hã'ãkap wuo uhehay e. Karãpe toĩne'en ienuk wato hap e'at aiwo­'o­mo­wepit hap e'at turan he'aito pakup takat e'at mõtypot hap turan ihary'i pakup takat e'at mõtypot hap turan mekewat e'at pe yt uwe i tuwe­mo­sy'at teran i'atu­wepit teran hap yn te'e­renuk hap yn wo'o­kyi'at hap e'at piat pote se'aito hap e'at piat pote e. Ta'i i'atu­wepit kahato te'e­renuk turan e. Mi'i hap ewy kahato areĩne'en mekewat Se'aito Pakup ewy e. Uhemiit'in wywo areĩne'en turan i'atu­wepit kahato aikotã wo'o­kyi'at hap e'at piaria ewy are e. Pyno se'aito hap e'at pe i'atu­wy­ria'in i'atu­wepit kahato te'e­renuk turan e. Se'aito wywo tukup­te'en turan yt te'e­ru­we­mo­sy'at teran hin i e. Yt i'atu­'arot hin i tukup­te'en aikotã wo'o­kyi'at hap turanuat ienuk hap ewy e.
LUK 5:35 — Ma'ato meiũran ti aru Uito irania'in tioto ui'auka hamo mi'i hap e'at turan aikotã se'aito pya ta'a­tue­reto to'yat totepyi hap ewy irane areĩne'en e. Mi'i hap e'at pe ti aru i'atu­'arot sese hap topy­hu'at i'atuepe. Yt te'e­renuk hin i katu­pono i'atue­hat'at kahato uiky­'ewi haype e. Aikotã watihep se'aito ipakup te turan hap ewy hawyi iwary pakup i'arot toĩne'en hap ewy aru tukup­te'en ta'a­tu­'arot hap wywo e. Mi'i hap e'at pe yn te'e­ru­we­mo­sy'at kahato ra'yn e Iesui — Kat pote yt eremo­sy'at i uruto ewy e haria pe.
LUK 5:36 Mi'i hawyi wẽtup sehay iã'ãkap i Iesui henoi seko pot'i enoi haria pe. — Uiwy­ria'in mana'in eweikuap aikotã yt naku i watomog ahesokpe pot'i sokpe kype pakup wo e. Mi'i tã yt ikahu hin i watunug katu­pono wato­pi'ig sokpe pot'i hiot'e hap sokpe pakup wo hap yt ikahu hin i topy­hu'at e. Mi'i wati­koho hawyi sokpe pakup tihiot ne'i ra'yn totekyi kahato pote sokpe pot'i e. Mi'i hawyi sokpe pot'i hiot'e rakat po'og hiot'e sa'a­wy­'iwuat kai e. Ta'i mi'i ewy kahato ti uhehay wakuat pakup toĩne'en e. Ta'i yt watopag kuap i uhehay pakup sehay pot'i tote katu­pono yt to'o­'ewy hin i e. Ma'ato to'opuo to'opuo wahenoi uhehay sehay pot'i puo pote po'og topy­hu'at yt naku i e. Aikotã ahesokpe pot'i hiot'e sese hap ewy topy­hu'at e. I'ape pot'i hawyi iteneg kahato ra'yn e Iesui — Kat pote yt etunug yne i urueko ewy e haria pe.
LUK 5:37 Mi'i hawyi Iesui to'e miit'in akag ko'i yt tomohey i haria pe — Pyno wẽtup sehay iã'ãkap ahenoi i ehepe e. Uiwy­ria'in e yt naku i wato­mohey typy sehay yt to'o­'ewy i pytkai e. Yt naku i to'opuo to'opuo eweipag uhehay pywo sehay rakat sehay yt pywo rakat i wywo e. Pywo ti rat ahetama puo watopag Uwa ywa hy heiam pakup we yn e. Ta'i aheka­mũti i'ape pakup kawiat pe yn watopag e. Mi'i hawyi mekewat Uwa ywa hy tuwe­mõpuk itote e. Mi'i i'ape pakup we waku yt ipe teneg i pote e. Ta'i i'ape yt gag i te pote torok'e te'en te'en ne'i Uwa ywa hy pakup henãpuk ne'i hawyi e. Ma'ato ahetama puo watopag Uwa hy pakup yt ihyenãpuk i te turan heiam pot'i pe pote i'ape teneg nakat heiam me mi'i mye'ym e'at hawyi ihyenãpuk ta'yn turan ipe heiam teneg nakat ipot'i rakat yt torok'e i hawyi yt naku i katu­pono heiam pok'e hawyi Uwa hy yt kat i ra'yn toto yne yi tote e. Mi'i hawyi yt kat i topy­hu'at Uwa hy toto yne ra'yn mote e. I'ewyte heiam mot'i hiot'e wy hawyi yt naku i pe toĩne'en.
LUK 5:38 Mi'i pote ahetama puo watopag Uwa hy i'ape yt igag i te rakat pe e. Mi'i hawyi toĩne'en mot'i itote ahesapo wuat waku rakat e. Mi'i tã ti watunug ahetama puo mana'in uhyt'i'in e. Mi'i ui'e hap ewy kahato ti uhehay he kahato rakat ipakup e. Mi'i pote waku watopag ipakup we e. Yt teke kahato i sehay pot'i pe e Iesui typy sehay upiaria pe.
LUK 5:39 Ma'ato eipe — Po'og waku iporo rakat ewei'e hawyi yt eweiky­'esat i uhehay pakup e. Eipe eweikup­te'en mahy u haria ewy e. Mi'i u haria tiky­'esat kahato sapo hy pot'i ahetama pe te'e­ru­we­mo­pẽ'ã hamo e. — Watikuap ihy nem hap u hap i'atu'e. Mi'i po'og waku uruwa­nẽtup hawe i'atu'e. Yt kan hamo i sapo hy pakup uruwa­nẽtup hawe i'atu'e. Imopẽ'ã teran nakaria mio tã i'atu'e. Mi'i haria ewy kahato eweikup­te'en uhehay pakup yt ky'esat i pote — Yt kan hamo i ehay pakup ewei'e pote katu­pono urumikuap iporo rakat po'og he ewei'e e. Mi'i pote yt karãpe i eiwe­hekuap ipakup takat e. — Ipot'i rakat po'og waku ewei'e yn e Iesui tehay pun haria pe.
LUK 6:1 Mi'i hawyi yt i'atu­potpap i hap e'at pe Iesui awati ypia puo tokosap towy­ria'in nywo. Mi'i hap tote iwyria'in ho'opik ta'yn awati ta'a­tu­ko­ka'at no hawyi ta'a­tu'u ra'yn.
LUK 6:2 Mi'i pote nagnia ehay enoi haria te'e­ro'e i'atuepe — Kat poteĩ eweho­'opik awati yt aipotpap i hap e'at pe i'atu'e. Mi'i tã ti yt naku i aiwo­'o­nãpin hawe i'atu'e.
LUK 6:3 Mi'i tã ti i'atu'e pote Iesui to'e — Yt eweikuap i aikotã sa'a­wy­'ite morekuat Tawi tunug tesy'at hawyi e. I'ewyte towy­wuaria tesu­ra­ra'in i'atue­sy'at hawyi hap e.
LUK 6:4 Teke Tupana mõtypot hawe hawyi tutu'u mekewat man wakuat Tupana kapiat pa'i mi'u wuat yn mekewat man yt naku i miit re'en ne'i mi'u wo e miwan me wen ma'ato morekuat Tawi i'u hesy'at kahato hawyi. I'ewyte toimõ'ẽ mekewat man tesu­ra­ra'in me. Ma'ato miwan me waku pa'i mi'u wuat yn wo rakat man tutu'u tesu­ra­ra'in wywo. Yt naku i irania'in mi'u e miwan me wen.
LUK 6:5 Pyno Tupana tipo­'oro ra'yn ehowawi Wuat'i Miit'in Yke'et e hap het rakat e. Mi'i Miit toĩne'en Tupana Mipo­'oro Wuat'i Miit'in Akag wo e. Mi'i pote waku ahenoi ehepe uheywyt'in uheinyt'in kat som waku watunug kat som yt naku i watunug Tupana mõtypot hap e'at pe e Iesui tuwepiat.
LUK 6:6 Mi'i hawyi wẽtup yt motpap i hap e'at piat turan teke ra'yn Iesui Tupana mõtypot hawe miit'in atumu'e hamo. Mi'i hap tote wẽtup ok ipo sese kawiat ipo kag mot'i rakat toĩne'en.
LUK 6:7 Mi'i hawyi Miit'in mu'e haria itotiaria wãi'e hap miwan miat moherep haria te'e­ro'e to'ope — Waku wate­ha'at kahato Iesui kape sio ipotpap mesup yt aipotpap i hap e'at pe sio yt sio toimoe­hãite mekewat ipo kĩ'ã rakat sio yt i'atu'e to'ope. Ipotpap Iesui pote waku wato'e wuat'i ehamo — Yt naku i rakat meiẽ Iesui wato'e i'atu'e.
LUK 6:8 Ma'ato toma'at teran hap i'atu­wa­nẽtup hawiat Iesui tikuap ta'yn tuwe­kaipyi hawyi toikaykay ra'yn ipo kĩ'ã rakat tuwe­wawi wuat'i ehamo hawyi to'e — Uhyt eriot ro meikowo waku meiũpe y'am me ereĩne'en wuat'i miit'in py'a­setpe wuat'i miit'in ehamo e ipo kĩ'ã rakat pe. Ipoĩ'ãm na'yn hawyi hewyry miit'in py'a­setpuo.
LUK 6:9 Mi'i hawyi Iesui apo'e irania'in me — Kat som to'e miwan me Tupana mõtypot hap e'at ete e. Aikotã watunug mesuwat e'at pe sio wakuap watunug sio yt nakuap i watunug sio miit'in ky'e hap sio miit'in auka hap kat som to'e miwan me hap watunug e mi'i hap ete apo'e itotiaria pe.
LUK 6:10 Mi'i hawyi yt ta'a­tu­wesat kuap i. Mi'i hawyi Iesui teha'at kahato itotiaria ewawi mot'i hawyi to'e ipo kĩ'ã rakat pe — Uiwy e erepo­torok to meikowo e. Mi'i hawyi ipo kĩ'ã rakat tuwe­po­torok ta'yn hawyi waku ra'yn ipo.
LUK 6:11 Mi'i pote wãi'e hap enoi haria i'atu­py­'ahak kahato ra'yn Iesui ete. Mi'i hawyi te'e­ro'e to'ope — Aikotã aru wati­'akit wati­mohit mesuwat Iesui i'atu'e ta'a­tu­py­'ahak popuo.
LUK 6:12 Mi'i hawyi Iesui toto yity'ok kape Tupana wywuat to'oehay hamo. Mi'i hawyi wãtym ka'ap ihay Tupana wywo yity'ok tote.
LUK 6:13 Ihot'ok hawyi toi'a­tu­kaykay ra'yn temiit'in sem tuwe­wawi. Mi'iria kaipyi 12 ok takaria toi'a­tu­'airo topot­po­'o­roria 12 ok takaria wo.
LUK 6:14 Sa'a­wy'i Simãu toi'airo topot­po­'oro wo tehay moherep hamo. Mi'i hawyi het tutum pakup i PETERU e Simãu me het pakup ta'yn. Mi'i hawyi Peteru ywyt ÃTERE toi'airo tomi­po­'oro wo tehay moherep hamo. Mi'i hawyi TIAKU toi'airo temiit sese wo tehay moherep hamo. Mi'i hawyi IUWÃU toi'airo tomiit sese wo tehay moherep hamo. Mi'i hawyi WIRIPI toikaykay tuwe­wawi temiit sese wo tehay moherep hamo. Mi'i hawyi PATURUMEU toi'airo topot­mu'e sese wo tehay moherep hamo.
LUK 6:15 Mi'i hawyi MATEU toi'aro topot­mu'e sese wo tehay moherep hamo. Mi'i hawyi TUME toi'airo tomi­po­'oro sese wo tehay moherep hamo. Mi'i hawyi wẽtup ok TIAKU mekewat Auweu sa'yru toi'airo tomi­po­'oro wo tehay moherep hamo. I'ewyte wẽtup ok SIMÃU toi'airo topot­po­'oro wo tehay moherep hamo. Mekewat sa'a­wy­'iwuat surara powyro hat tetama piaria wanĩ­kaptia sytpok hamo rakat — Uhetama Kana'a po'og wakuat torania kai e hat.
LUK 6:16 Mi'i hawyi IUTA mekewat Tiaku sa'yru toi'airo temiit sese wo tehay moherep hamo. Mi'i hawyi wẽtup IUTA toi'airo temiit no tehay moherep hamo mekewat Ikarioti sa'yru. Mi'i miit yt naku i ma'ato Iesui ma'at hanuat ne'i topy­hu'at. Mi'i hawyi toran na'yn 12 ok takaria tehay moherep hanuaria wo toi'a­tu­'airo.
LUK 6:17 Iesui ti'a­tu­'airo 12 ok takaria temiit'in topot­po­'o­roria wo miit'in mu'e hamuat hawyi ipot'apyk yity'ok kaipyi yi hot kape tomi­'ai­roria wywo. Mi'i hawyi yt put'ok­to'e yi hot piat i te turan irania'in ipotmu­'eria sem tipuẽti Iesui mekewat yahig note. Mi'i hawyi mekewat yahig wato tote tukup­te'en Iesui kat haria aiko­pepyi aiko­pepyi tõ'ẽ. I'atu kahato miit'in itote toipuẽti yi Iuteu kaipy­wiaria tawa wato Ieru­sarẽi kaipy­wiaria i'ewyte y'y wato yẽpe etiat tawa Tiru kaipy­wiaria tawa Sitãu kaipy­wiaria toi'a­tu­puẽti itote.
LUK 6:18 I'atu kahato miit'in itote Iesui ekatup haria. Tõ'ẽ tõ'ẽ Iesui ehay kapiat te'e­ru­wa­nẽtup teran haype. I'ewyte i'ahu rakaria ta'a­tue­hãite hap ky'ewi haria tõ'ẽ kahato Iesui kape. I'ewyte tõ'ẽ kahato ahiag ipiit piat rakaria. Mi'i haria ahiag i'atu­mo­so­'opot ko'i ma'ato Iesui ti'a­tu­sopo yne ahiag i'atupiit pyi.
LUK 6:19 Mi'i hawyi yne Itotiaria te'e­ru­wehik teran Iesui ete katu­pono ta'a­tu­ky­'esat ta'a­tu­moe­hãite hap Iesui piat katu­pono Iesui hesaika kahato Tupana esaika hamo miit'in moehãite hamo. Mi'i pote ta'a­tu­ky­'esat kahato Iesui emig ta'a­tupo wuat hap yne i'ahu rakaria. Ta'a­tuemig hawyi meremo i'atue­hãite hap topy­hu'at.
LUK 6:20 Mi'i hawyi Iesui teha'at topot­mu­'eria kape hawyi toi'a­tu­ky'e kahato hawyi to'e — Tupana mipoi­tyro ko'i eipe uimohey haria yt hekat rakaria i eipe pytkai more­kuaria Tupana etama pe eweikup­te'en wuat'i e'at pe e. — Uheka­tu­wyria uwe uwe Tupana pe to'e — Yt uimi­ky­'esat ok tã i te worokuap e topy'a pe mio tã e haria pe Tupana to'e — Pyno uimi­poi­tyro sese ko'i eipe katu­pono woro­ho­'onug wyti aru eipe wuat'i ywania pore­kuaria wo mesu­wa­rote aikotã Uito areĩne'en Morekuat no atipy pe hap ewy e Tupana tepiat — Worokuap teran e haria uimohey haria.
LUK 6:21 Mi'i hawyi Iesui teha'at topot­mu­'eria kape hawyi toi'a­tu­ky'e kahato hawyi to'e — Tupana mipoi­tyro ko'i eipe uimohey haria hesy'at rakaria eweikup­te'en pytkai katu­pono uwe uwe to'e Tupana pe — Uhesy'at kahato ekuap hap ky'ewi aikotã hesy'at kahato rakaria tikat mi'u yn hap ewy — Worokat kahato En Tupana e haria pe — Aikotã ienuk kahato haria iwepit kahato haria ewy woro­ho­'onug eiperia i'ok kahato rakaria ewy e Tupana tokuap teran haria pe e. Mi'i hawyi Iesui teha'at topot­mu­'eria kape hawyi toi'a­tu­ky'e kahato hawyi to'e — Tupana mipoi­tyro ko'i eipe uimohey haria e. koitywy eweiwak eipy'a pe ma'ato mi'i hawyi Tupana mimo­wepit kahato rakaria eweikup­te'en wuat'i e'at pe e. Ta'i uwe uwe tuwak topy'a pe irania'in satek pote ho'opot pote mi'i haria pe ti Tupana to'e — Woro­ho­'o­mo­wepit kahato eipe katu­pono karãpe eheha­ky­'e'i hap put'ok'e ehete mi'i hap atu'u yne uipy'a pe wy aikotã irania'in ehaky­'e'i hap ewetu'u yne hap ewy e Tupana mi'iria pe e Iesui topot­mu­'eria pe ahepe.
LUK 6:22 Mi'i hawyi Iesui teha'at topot­mu­'eria kape hawyi toi'a­tu­ky'e kahato hawyi to'e — Tupana mipoi­tyro ko'i eipe uimohey haria miit'in miky­ry'i eweikup­te'en mesuwe pytkai e. Uwe uwe wakuap nug motiat miit'in wo'o­ky­ry'i hamo topy­hu'at mi'i haria pe ti Tupana to'e — Pywo pe ti woro­ho­'o­mo­wepit kahato katu­pono atum aru ehepe uhetama atipy piat e Tupana. Pywo pe ti woro­ho­'o­mo­wepit kahato eipe katu­pono aikope Uito areĩne'en Morekuat no hap tote hekat kahato rakaria wo eweikup­te'en wuat'i e'at pe e.
LUK 6:23 Mi'i hawyi Iesui teha'at topot­mu­'eria kape hawyi toi'a­tu­ky'e kahato hawyi to'e — Uwe uwe uhemiit sese wo miit'in miky­ry'i hamo te'e­ro­py­hu'at miit'in misa­ty'i saty'i wo miit'in mimo­weu­ka'i mi'i uhemiit pote mi'i hat pe — Pywo pe ti woro­mo­wepit po'og ni wuat'i kai e Iesui temiit'in me. — Ta'i mi'i tã hap ewy ta'a­tunug sa'a­wy­'i­wuaria uhehay moherep haria ete e Tupana. Mi'i tupono i'atuehay sa'ag yt pywo pe i ehete uhemiit'in eipe pote eiwe­mo­wepit ro eiwe­wehum hawyi waku peso­'e­wei'e iwepit sese rakat peso'e hap ewy katu­pono meiũran ti aru Tupana mimõ­typot kahato haria wo eweikup­te'en atipy pe are e. Ta'i atipy pe — Woro­mõ­typot kahato eipe e Tupana aru uimohey haria potiat miit'in miky­ry'i hap ko'i wo eipe pote e Iesui.
LUK 6:24 Mi'i hawyi Iesui teha'at yt tomohey haria i pe hawyi to'e tuwak popuo — Ho'o­wasat kahato rakaria eiperia katu­pono — Uruekat kahato hap kaipyi urumo­wepit hap toĩne'en e haria eipe e. Yt naku i pe eiwa­nẽtup hap katu­pono eweikat at ka'ap ewepit hap eheka­re'en sok mesu­wa­rote hap kaipyi e. Ta'i mesu­wa­rotiat ewepit kahato hap yn eweikat e. Pyno emiky­'esat ewy toĩne'en eipo pe aru hap ok tã ma'ato Tupana piat eimo­wepit hap yt eweikat hin i e. Pywo ti rat eimi­puẽti ok tã mesu­wa­rote yn toĩne'en irane eha'up mo ma'ato atipy piat eha'up yt kat i hin i irane eweipuẽti aru e mesu­wa­rotiat yn hekat rakaria pe.
LUK 6:25 Mi'i hawyi Iesui teha'at yt tomohey haria i pe hawyi to'e tuwak popuo — Ho'o­wasat kahato rakaria ewy eweikup­te'en mesu­wa­rotiat mi'u yn ewei'a­tukat pote e. — Uru'ok kahato mi'u wo ewei'e eiwo­'ope ma'ato yt ehesy'at hin i eipy'a pe Tupana kuap hap ky'ewi e. — Uru'ok kahato uruto ewei'e ma'ato meiũran aru ehesy'at kahato ra'yn wuat'i e'at pe e. Koitywy eiwepit kahato mesuwe wen ma'ato mi'i irẽ aru paa'e­wei'e ehesy'at sese wuat'i e'at pe hap kaipyi e. Yt naku i kahato aru topy­hu'at ehepe e. Eweiwak kahato wuat'i e'at pe ei'a­rot'i kahato hap aru put'ok'e e Iesui mesu­wa­rotiat mi'u yn kat haria pe.
LUK 6:26 Mi'i hawyi Iesui teha'at yt tomohey haria i pe hawyi to'e tuwak popuo — Yt naku i pe aru eweikup­te'en wuat'i e'at pe e. — Uruto po'og irania'in kai ewei'e yn eipy'a pe pote e. Eweikat kahato miit'in kaipyi — Waku po'og en i'atu'e hap. Eiwe­mõ­typot hap yn eweikat irania'in kaipyi e. Mi'i pote ti aru ihaky­'e'i kahato rakaria ewy eweikup­te'en wuat'i e'at pe yt kat i Tupana mõtypot hap eikai pote e. Sa'a­wy­'iwuat Tupana ehay yt pywo rakat i moherep haria heso rakaria ko'i ewy kahato eweikup­te'en are e. Ta'i sa'a­wy'i mi'iria pe — Waku kahato eipe po'og torania kai i'atu'e wen ma'ato — Yt nakuaria i kahato ti eipe e Tupana sa'a­wy'i mi'iria pe e Iesui. Mi'iria ewy kahato aru to'e ehepe are e Iesui — Uruto po'og irania'in kai e haria pe.
LUK 6:27 Mi'i hawyi Iesui to'e tomohey haria pe. — Uha'y­ru'in uhaki­'yt'in e eiwa­nẽtup to mesup uimienoi koro kape e. Eiwe­waure ka'a kahato ro mesuwat uimienoi koro kape e katu­pono atiky­'esat kahato ewetunug kahato mesuwat ui'e hap — Waku wati­'a­tu­ky'e yne yne ahewa­nĩ­kaptia ko'i e. Waku pe yn waku watu­kup­te'en yt nakuap i nug ahetiat haria wywo e. Waku watunug waku yn yt aiky'e i haria pe e. Waku wati­'a­tu­ky'e kahato yn na'yn yt aiky'e i haria e.
LUK 6:28 Uimohey haria e waku wati­'a­tue­waku yn na'yn ai'a­tu­sa­ty'i saty'i haria e. Mi'i hawyi waku aimo­so­'opot haria upi wahẽtup Tupana kape yn na'yn — Eti'a­tue­ha­kye­ra'at o uruewa­nĩ­kaptia yt aipo­wyro hin i haria waku wato'e Tupana pe e. I'ewyte waku wahẽtup kahato Tupana kaipyi aimo­weu­ka'i haria upi i'atu­poi­tynug ahiag pupiat hamo e.
LUK 6:29 Waku wati­'a­tu­ky'e aima'at haria yt naku i watu­'uka aiwu­'uka teran haria wywo e. Karãpeĩ ahewa­nĩkap ahowa­petek hawyi waku wato'e tope — Waku kokai i ro uhowa­petek uhyt mana waku wato'e ahowa­petek hat pe e. Karãpe ahewa­nĩkap aipo­hari ahe'yni ete waku watum ahesokpe ko'i tope ahewa­nĩkap ky'e hap moherep hamo are e.
LUK 6:30 I'ewyte karãpe wẽtup ok hẽtup kat ahekat kat ahekat ahepe mi'i hat pe waku watum imiky­'esat ewy e. I'ewyte karãpe ahewa­nĩ­kaptia ahero'ok ahekat ko'i mi'i hawyi yt naku i — Eterut i ro emiero'ok uhyt mana wato'e. Yt naku i aipo­hari ahekat etiat hat kaipyi wate­ra­'aipok e.
LUK 6:31 Uimohey haria waku watunug wakuap torania miit'in muo e. Ta'i uiwy­ria'in aikotã irania'in tunug waku hap ehepe aimi­ky­'esat ewy mi'i hap ewy o waku watunug waku hap irania'in me e. Ta'i aikotã wati­ky­'esat irania'in miat wakuap nug ahepiat hap ok tã waku watunug mi'i waku hap ewy i'atuepe e.
LUK 6:32 Uiwy­ria'in e mesu­wa­ro­tiaria tiky'e ta'a­tu­ky'e haria yn ma'ato are'e ehepe wẽtup sehay — Waku wati­'a­tu­ky'e yne miit'in sio aiky'e haria sio yt aiky'e i haria e.
LUK 6:33 Ma'ato aiky'e haria yn wati­'a­tu­ky'e pote watu­kup­te'en yt Tupana mohey i haria mesu­wa­ro­tiaria ewywuat haria ewy kahato watu­kup­te'en katu­pono mi'iria ti'a­tu­ky'e ta'a­tu­ky'e haria yn e. Mi'i haria mesu­wa­ro­tiaria ewy wato­py­hu'at iro yt po'og i mi'iria kai ahewaku hap e.
LUK 6:34 — Ta'i mesu­wa­ro­tiaria yt Tupana mohey haria i timõ'ẽ kahato ta'a­tuekat ta'a­tu­ky'e haria kape yn e. Yt Tupana mohey hin i haria pytkai ta'a­tu­ky'e kahato ta'a­tu­ky'e haria — Etipuru ekat uhyt mana mimi ta'a­tu­ky'e hat to'e pote meremo ta'a­tu­puru ta'a­tukat irania'in miẽtup hap katu­pono te'e­ru­wa­nẽtup — Pyno meũran aru uimõ'ẽ uimi­puru saipepiat po'og toterut i'atu'e te'e­ru­wa­nẽtup hawe. Pyno uimohey haria eipe pote yt atiky­'esat i eweimõ'ẽ irania'in miat turan eweipuru turan mi'iria wanẽtup hap ewywuat eiwa­nẽtup hap wywo e. Atiky­'esat mio tã wato'e aipy'a pe ahekat puru hap ete — Ta'aipok pote waku ma'ato yt ta'aipok i uimi­puru uimi­mõ'ẽ pote i'ewyte waku uhepe waku wato'e kahato aipy'a pe yt kat i ahekat ky'ewi hap wywo e Iesui ahepe.
LUK 6:35 Pyno waku kahato wati­mõ'ẽ ahekat ma'ato yt naku i wati­mõ'ẽ ahekat mesu­wa­ro­tiaria yt Tupana mohey i haria mimõ'ẽ hap ewy e. Waku wati­puru ahekat wuat'i miit'in me yt kat yt naku i aiwa­nẽtup hap wywo i e. Waku wati­puru ahekat wuat'i miit pe ta'a­tu­puru reran mote e. Yt naku i apowa­to'e — Eweterut apuru uimi­puru sio yt yt naku i wato'e. Waku wati­mõ'ẽ aikotã Tupana timõ'ẽ hap ewy are e. Ta'i aiky'e hap wywo yn toi'a­tu­mõ'ẽ ahowawi aiky'e hap wywo. I'aman tutum kahato wuat'i miit'in me i'atuko ko'i moehãite hap sio waku nug haria kape sio yt naku i nug haria kape sio tomohey hap upi sio yt tomohey i hap upi tutum i'aman i'atuko ko'i moehãite hap e. Ta'i Tupana ti'a­tu­ky'e tewa­nĩ­kaptia torania hawyi tutum at i'atuko moehãite hamo yt kat sa'up i wuat'i pe e. Pyno waku Ai'ywot Tupana ewywuat waku wati­mõ'ẽ ahekat are e. Ta'i waku watunug Tupana minug ewy e. Ta'i ahegyi'at kahato hap kaipyi wati­mõ'ẽ pote meiũran yt ta'a­tuerut i aimi­puru i'atuepiat saipepiat ma'ato Tupana yt tiwaure hin i aima'at hap mi'i hawyi ahekat saipepiat hum ahepe aimi­puru.
LUK 6:36 Uipot­mu­'eria eipe pote mio tã are'e ehepe — Ewei'a­tu­ky'e ro yne yne ehewa­nĩ­kaptia are e. Waku yn no ewetunug ehewa­nĩ­kaptia pe hãpyk takat yn i'atu­ky'e hap upi e. Ehekat ko'i kape yt eiwa­nẽtup at ka'ap tei'o — Kat ko'i kat ko'i aru uimi­puru saipepiat uhekat ta'atuium yt ewei'e tei'o eipy'a pe e. Yt eiwa­nẽtup tei'o eimi­puru porap hap kape are. Mi'i tã eweipuẽti eimi­puru saipepiat Tupana kaipyi po'og po'og eimi­puru kupitu kai e. Mi'i tã ui'e hap ewy ewetunug pote ti aru Tupana sa'y­ru'in Tupana saki­'yt'in eipe i'atu'e mi'iria ehepiat pe e. — Tupana mẽpyt'in eipe i'atu'e ehepiat pe e. Ta'i Ai'ywot atipy piat minug ewywuat nug haria eipe i'atu'e ehepiat katu­pono Tupana iwese kahato yt iwese kahato i rakaria ete hap ewy waku aito iwese kahato rakaria wo wato­py­hu'at wuat'i miit'in ete are e. Tupana tuwe­mo­sa­ty'i kahato topy'a pe tewa­nĩ­kaptia satek hap e'at pe e. Waku watu­we­mo­sa­ty'i ahewa­nĩkap satek hap e'at pe e. Waku wati­'a­tu­po­wyro mi'iria hatek hap upi e. Pyno waku Ai'ywot Koro miit'in ky'e hat ewy watoĩ­ne'en wuat'i miit'in ky'e hap wywo sio wakuaria sio miit yt nakuaria i are e. Wakuat yn ewetunug o wuat'i miit'in me Ai'ywot Koro minug hap ewywuat e Iesui uruepe ahepe topot­mu­'eria pe.
LUK 6:37 Mi'i hawyi po'og Iesui to'e ahepe — Uiwy­ria'in yt naku i wati­'a­tu­mohit miit'in — Mekewat miit yt kan hamo i yt naku i wato'e irania'in me are e. Yt naku i wato'e aiwa­nẽtup hawe — Uito po'og mi'i miit kai e. I'ewyte karãpe miit'in inug sa'ag ahetiat hawyi yt naku i wahenoi irania'in me iminug sa'ag ahetiat e. Miit'in minug sa'ag ahetiat wahenoi irania'in me wẽtup ok minug sa'ag ko'i pote ti aru Tupana i'ewyte henoi eiwat eiminug yt naku i hap ko'i wuat'i miit'in ehamo aru e. Ma'ato waku waure wo watoĩ­ne'en irania'in miat aima'at hap kai. Mi'i hap ete eweikup­te'en waure wo pote Tupana i'ewyte eiminug yt naku i hap ko'i kai waure wo toĩne'en are e Iesui ahepe.
LUK 6:38 Waku hegyi'at kahato rakaria wo watu­kup­te'en uheka­tu­wyria are. Wati­mõ'ẽ ahekat irania'in me pote ti aru i'ewyte Tupana timõ'ẽ kahato tekat ahowawi aikotã ahegyi'at hap ok tã tutum ahepe ma'ato ahegyi'at hap wywo watum kurin kurin irania'in me pote mi'i hap ok tã ne aru Tupana tum ahepe e. Ma'ato ahegyi'at hap iwato kahato watum mote Tupana i'ewyte hum iwato kahato ahepe e. I'ewyte aimiium kurin yt ahegyi'at i pote i'ewyte Tupana tum kurin ahepe ahegyi'at hap ok tã aru tutum ahowawi e. Waho'oium kurin pote Tupana ho'oium kurin ahowawi e Iesui.
LUK 6:39 Mi'i hawyi po'og Iesui henoi hã'ãkap wuo — Ta'i e ahetama puo yt ihapytig i rakaria ikat kahato ta'a­tu­po­re­reko hat e. Mi'i hawyi wẽtup ok tuereto yt ipuẽti i topo­re­reko hanuat hawyi to'o­'e­wywuat toipuẽti topo­re­reko hamo yt ihapytig i rakat re e. Mi'i hawyi hewo yi hot pe to'o­'ewy e. Mi'i hap ewy ti aimu'e haria yt Tupana kuap i rakaria pote aimu'e hap Tupana moherep hap yt heremo hin i katu­pono yt iha i rakaria ewy tukup­te'en. — Mi'i ti mu'ap Tupana kape i'atu'e pytkai yt mu'ap hin i. Mi'i pote i'atu­mi­mu­'eria i'ewyte ho'o­wasat rakaria ewy e. Yt toikuap i kahato mu'ap hawyi yt toimo­herep kuap i topot­mu­'eria pe yt ihapytig i rakaria ewywuaria pe e.
LUK 6:40 Ma'ato eiwe­mu'e kahato Eimu'e Hat mienoi ete uhehay ete hawyi Eimu'e Hat mikuap hap ok tã ewehenoi kuap are e. Ma'ato wo'o­mu'e hat yt ihapytig i rakat ewywuat pote i'ewyte wo'o­mu'e haria yt ihapytig i rakaria ewywuaria tukup­te'en ta'a­tu­mu'e kahato pytkai. Mi'i hawyi ta'a­tu­mu'e hat ewy hewo yi hot pe to'o­'ewy e. Pyno areĩne'en Eimu'e Haria Akag wo e Iesui. Atiky­'esat kahato yne eiperia ewetunug torania ui'e hap ok tã e. Ui'e hap ewy ewetunug pote Uito ewywuat eweikup­te'en miit'in mu'e hamo e. Yt naku i ewei'e eipy'a pe — Atikuap po'og Uimu'e hat Iesui kai mi'i pote waku wẽtup sehay ahenoi irania'in me uiwa­nẽtup hap ewy yt uimu'e hap sehay ewy yt naku i ewei'e. Uipot­mu­'eria sese eipe pote uimi­mu'e hap ewy kahato aru ewei'a­tu­mu'e e. Mi'i hawyi hãpyk sese uipo­'o­roria wo miit'in mu'e hamo eweikup­te'en e.
LUK 6:41 Tukup­te'en irania'in uimi­mu­'eria te'e­ra­ha'at kahato irania'in kape sio ta'a­tu­'a­parap sio yt hap kuap hamo e. I'atueha irania'in kape yn yt naku i kat hamo e. Yt te'e­ra­ha'at hin i ta'a­tu­minug ta'a­tuwat kape sio waku sio yt ta'a­tu­minug kuap hamo e. Mi'iria ta'a­tu­mohey teran irania'in yt naku i nug hap etiat haype e. Yt karãpe i paa'i­'a­tu'e ta'a­tu­minug sa'ag hap ko'i ete e. Yt eweikup­te'en nei'o mi'iria ewy e Iesui ahepe.
LUK 6:42 — Uito po'og irania'in kai e haria ewy eweikup­te'en mote yt ihapytig i rakaria ewy te eweikup­te'en katu­pono — Hehu iwato'in nakat eheha pe hap ewy toĩne'en aikotã hu yp toĩne'en eheha pe hap ewy e. — Atihep teran mekewat eha piat hu hit ewei'e ma'ato yt etunug kuap i kat pote hu yp ewywuat toĩne'en eha pe pote e. Pyno waku etihep hu yp eha pyi hawyi pote etihep kuap kurin nakat hu irania'in eha pyi e. Mi'i hap ewy eweikup­te'en eweikat irania'in minug sa'ag mote e. Waku ewei'e eipy'a pe — Atoiat teran uiminug sa'ag e. Ma'ato yt naku i ewei'e — Uito waku ma'ato irania'in yt naku i nug haria wo yt ewei'e tei'o e Iesui ahepe.
LUK 6:43 Mi'i hawyi Iesui to'e ahepe — Pyno uiwy­ria'in ahenoi teran ehepe wẽtup uhehay iã'ãkap e. Pyno aito wato­py­hu'at kat kat yp ewywuat watoĩ­ne'en iywa he rakat yp ewy e. Ta'i ai'ywa he rakat ewywuat aito pote iwese kahato rakaria ewy watoĩ­ne'en e. Ma'ato ai'ywa nop takat pote yt kan hamo watoĩ­ne'en miit'in ekyi Tupana kape are. Yt karãpe i ywa nop takat watikoi are. Ta'i watu'u he kahato rakat hawyi — Waku mesuwat iã'ỹi aimikoi wo wato'e e.
LUK 6:44 Pyno watikuap mikoi yp waku sio yt naku i hap i'ywa he sio nop hap ete. — He pote he yt pote yt wato'e. Ma'ato he nakat kape wata­'aipok aimi'u wuat hep hamo. Ma'ato nop takat kape yt karãpe i wata­'aipok aimi'u wuat hep hamo e. Ihep hawyi watu'u hap ky'ewi ma'ato nop takat pote yt karãpe i wata­'aipok i'u hamo e. Mi'i hap ewy kahato aiminug waku hap irania'in me te'e­ra­'aipok ahowawi aiwese hap upi ma'ato yt naku i nug hap ahehay pote yt te'e­ra­'aipok hin i ahowawi Tupana ehay kuap hamo e Iesui ahepe. Pyno watikuap mikoi yp waku sio yt naku i hap i'ywa he sio nop hap ete. I'ewyte Yt karãpe i wati­puẽti Wiku yp ywa he rakat ewywuat hu yp ete ne'i e. Ta'i ahetama Wiku yp ywa he rakat wati­puẽti Wiku yp ete yn e. Yt karãpe i wati­puẽti hu yp kape Wiku ywa he rakat e. Mi'i hap ewy yt karãpe i yt he i rakat kape watuwat Tupana ehay he rakat kat hamo are e Iesui ahepe.
LUK 6:45 Pyno uiwy­ria'in aito waku rakaria watu­kup­te'en mote mekewat Wiku yp he rakat ewy watu­kup­te'en e. Hewo hewo waku mug hap yn mote waku kahato rakat no watoĩ­ne'en. Iwese kahato rakaria wo watu­kup­te'en e. Pyno waku hap kape yn watu­wa­nẽtup aipy'a pe mi'i hawyi ahehay kaipyi tuwẽtem waku rakat yn e. Ma'ato yt naku i watu­wa­nẽtup pote yt naku i hap tuwẽtem ahehay kaipyi e. Pyno aiwa­nẽtup hap aipy'a piat toĩne'en ahekat hap ewy e. Waku rakat aiwa­nẽtup hap pote toĩne'en waku rakat ewy aheĩne'en hap e. Ma'ato yt pote yt naku i nug hano watoĩ­ne'en e Iesui ahepe. Pyno aiwa­nẽtup hap ahesokpe eiam ewy toĩne'en e. Pyno ahesokpe waku rakat watopag aheuru pe pote pyno waku rakat ahesokpe watihep kuap itotepyi are. Ma'ato yt naku i rakat ahesokpe watopag ahesokpe eiam me pote miit'in mipun ewywuat watihep aheuru pyi are e. Mi'i hap ewy kahato aipy'a pe watopag waku e hap pote waku e hap ewywuat tuwẽtem aru aiwẽ pyi e Iesui ahepe.
LUK 6:46 Uipot­mu­'eria kat pote som ewei'e uhepe — Urumu'e hat ekag koro En Mehĩ Urumu'e hat akag koro Mimi ewei'e uhepe at ka'ap ma'ato mi'i pytkai yt ewetunug hin i yne yne uhepiat einãpin hap ko'i e. Uruka­'iwat sese En ewei'e hawyi yt uimi­ky­'esat ewy hin i ewetunug pytkai e. Yt naku i eimi­ky­'esat ko'i yn ewetunug hawyi uimi­ky­'esat pun haria eweikup­te'en are e ahepe.
LUK 6:47 Pyno uwe uwe tut uhowawi mi'i hawyi uhehay toikuap tonãpin hap ko'i toikuap mi'i hawyi tutunug yne tonãpin hap uhepiat ok tã ewy mi'i hat topy­hu'at aikotã getap nug hat ikahu waku kahato rakat nug hat ewy are e.
LUK 6:48 Ta'i uipot­mu­'eria ewetunug uhepiat einãpin hap ewy pote eweikup­te'en aru iwe'eg kahato rakaria ewywuat aikotã getap iheg nakat nug hat ewy eweikup­te'en e. Ta'i sa'a­wy'i toikat kuru­su'yp iheg nakat to'yat eãkukag wo e. Mi'i hawyi toi'a­tutuk iãkukag yi pya pe hap ewy e. Mi'i yat toĩne'en iheg nakat kahato ikahu kahato hap ewy. I'yat iminug aikotã ai'yat yi heg note ewy iheg hap ewy. Mi'i turan ywytu uato kahato put'ok'e wen ma'ato tominug to'yat iheg kahato rakat yt ta'at hin i hawyi ywytu uato yt timoma kuap i katu­pono yi heg nakat tote yi pan me toĩne'en kahato pote yt ta'at hin i ywytu uato hap e'at pe e. Mi'i hap ewy kahato uimienoi ko'i nug haria tukup­te'en e Iesui ahepe.
LUK 6:49 Ma'ato uwe uwe tuwa­nẽtup uhehay kape tonãpin hap kape porap'i mi'i hawyi tuwa­nẽtup tuwepe — Yt atunug neran i Iesui piat uinãpin hap e mi'i e hat wanẽtup hat aikotã getap nug yt iheg miat i rakat ewy aikotã aria'yp nupi'a misekuap kahato wuat ne'i getap nug hat ewy. I'ewyte yt ika'a pya pe i toipan hat ewy e. Mi'i turan put'ok'e ywytu uato hawyi ywytu uato ti'y­pyhep hap ewy e. Mi'i hawyi i'yat yt kat i ta'at ra'yn hawyi e. Mi'i hap ewy topy­hu'at uhepiat tonãpin hap uhehay upi yt topy­hu'at i rakat e Iesui ahepe mekewat yity'ok totepyi.
LUK 7:1 Tohenoi yne ra'yn hawyi toto ra'yn Iesui tawa Kawa­na'ũ Kape.
LUK 7:2 Mi'i turan toĩne'en itote wẽtup ok sura­ra'in sem akag koro eropat hat. Mi'i miit surara akag koro miky'e kahato. Mi'i miit waku rakat i'ahu kahato. Iku'uro irane poity'i hap ewy.
LUK 7:3 Mi'i turan surara sem akag tikuap Iesui ieĩne'en hap tetawa Kawa­na'ũ piat. Mi'i hawyi toipo­'oro sehay meremo Iesui kape Iuteu ywania akagnia upi — Uheropat hat uimi­ky'e kahato iku'uro irane Uhyt mi'i pote meremo eriot uhowawi uheropat hat moehãite hamo e tohẽtup toipo­'oro tehay.
LUK 7:4 Mi'i hawyi nagnia put'ok­'i­'a­tu'e Iesui ete hawyi te'e­ro'e tope — Uhyt waku eriot urupo­'oro hat surara sem akag eropat hat moehãite hamo i'atu'e. I'ahu kahato hawyi epiat imoehãite hap surara akag tiky­'esat kahato i'atu'e. I'ewyte uruto wy uruiky­'esat etimoe­hãite surara akag emiit katu­pono ai'y­wania powyro kahato hat mekewat surara akag i'atu'e.
LUK 7:5 Ta'i mi'i surara akag ni ai'y­wania Iuteu ywania powyro kahato hat i'atu'e. Mi'i ti wẽtup ywania kaipywiat pytkai aiky'e kahato i'atu'e. Ga'atpo tutum sa'up iwato kahato Ahetu­pana mõtypot yat nug hamo i'atu'e Iesui pe.
LUK 7:6 Mi'i Iesui tikuap hawyi toto ra'yn nagnia wywo surara akag yat kape hemiit i'ahu rakat kape. Ma'ato tuwat turan surara koro yat kape turan surara koro tipo­'oro sehay Iesui ewawi towy­ria'in upi — Yt ereke tei'o ui'yat pe katu­pono uhewaku hap yt put'ok'e i ereke uhowawiat hamo katu­pono En ni po'og po'og Morekuat no uikai e Iesui pe.
LUK 7:7 Mesup atipo­'oro uhemiit ewawi uhehay moherep epiat hamo katu­pono yt areto kuap i ewawi uhewaku hap yt put'ok'e i uhehay ewawi hamo Mehĩ e. En po'og uikai pote e. Pyno waku ehay etipo­'oro uhemiit kape — Woro­moe­hãinte ere o itote hawyi uhemiit mesuwe emimoe­hãite meremo topy­hu'at hap atimohey ra'yn e surara koro tuwehay po'oro Iesui kape.
LUK 7:8 Uito ti areĩne'en surara akag wo e. Ta'i En ni uito ewy e. Ati'a­tu­po­'oro kuap kahato uhesu­rara sem ko'i aikope aikope uimi­ky­'esat ewy e. I'ewyte ui'akag ko'i more­kuaria po'og uikai uipo­'oro hap atikuap ta'yn e. I'ewyte 100 ok surara tukup­te'en uhemiit no mesuwe ui'yat pe e. Pyno wẽtup ok surara pe uhemiit pe — Ereto ro tu'uka hamo are hawyi meremo toto ui'e hap nug hamo e. Eriot i ro are'e pote meremo te tut uhowawi e. Etunug no are'e uheropat hat uhesu­rara pe hawyi meremo tutunug uimi­ky­'esat ewy e surara akag Iesui pe tehay po'oro. Pyno atikuap ta'yn En uito ewy ereĩne'en Uru'akag wo hap e. Pyno erehay­po­'oro meikowo e'e hap hawyi meremo uheropat hat uimi­ky'e i'ahu kahato rakat waku ra'yn topy­hu'at e'e hap ok tã e.
LUK 7:9 Iesui tikuap Surara akag ehay hawyi tuwa­nẽtup kahato ihay kape hawyi to'e tewat­'y­muaria õ'ẽ haria pe — Ta'i eiperia ui'y­wania ko'i Isareu ywania eweikup­te'en e. Eiperia eweikup­te'en na'yn uimohey kahato haria wen ma'ato ti mesup te ti yt atipuẽti i eipy­'a­setpe miit'in uimohey haria mesuwat surara akag piat uimohey hap ewywuat ko'i e. Yt ai'y­wania i wen ma'ato uimohey kahato e Iesui to'y­wania pe tewat­'y­muaria õ'ẽ haria pe.
LUK 7:10 Mi'i hawyi sura­ra'in akag ehay erut haria te'e­ra­'aipok i ra'yn surara akag yat kape. Put'ok­ta­'a­tu'e turan mekewat surara koro eropat hat imiky'e ihãite kahato ra'yn hap ta'a­tu­puẽti.
LUK 7:11 Mi'i hawyi Iesui toto ra'yn tawa Naĩ kape topot­mu­'eria wywo. I'ewyte miit'in typy'i kahato rakaria tuwat hupi.
LUK 7:12 Yt pya hin i tawa Naĩ pyhyp hap e'oken­'ypy wato kai turan toipuẽti wo'osyp hanuaria mu'ap upi wẽtup ok ihainia iku'uro rakat ta'a­tue­roto tawa pyi hyp hamo. Iku'uro rakat ty toĩne'en itote wẽtup ok takat imẽpyt iku'uro rakat wywo. Ity ti hiwu toĩne'en. Imẽpyt wẽtup yn nakat iku'uro pote yt kat i ra'yn ipowyro hamuat. Mekewat hiwu yatype tukup­te'en typy'i kahato tawa kaipy­wiaria iku'uro rakat hyp hanuaria. Iku'uro rakat ty upi tuwat mu'ap upi.
LUK 7:13 Mi'i hawyi Iesui teha'at ity kape hiwu ra'yn hap kape hawyi toto­mo­haty kahato topy'a pe hawyi toiky'e kahato hawyi to'e hiwu kape — Mana e yt erewak tei'o e.
LUK 7:14 Mio tã e Iesui hawyi toto ra'yn iku'uro rakat ewawi hawyi tuwe­ponug iku'uro rakat eiam note hereto turan. Mi'i hawyi meremo hereto haria te'e­ro­py­hu'at mu'ap tote. Mi'i hawyi to'e ra'yn iku'uro rakat pe — Kurum e'ãpe­'ok'am no e Iesui i'okpuk kape.
LUK 7:15 Mi'i hawyi iku'uro rakat tuwẽtem gu'uro pyi hawyi tuwe­'ã­pe­'ok'am hawyi ihay i ra'yn. Mi'i hawyi Iesui tioto ra'yn ity kape mekewat hiwu kape. Ihãite i ra'yn tuwẽtem na'yn toku­'uro sese hawyi.
LUK 7:16 Mi'i pote miit'in itotiaria te'e­ru­wa­nẽtup kahato hawyi i'atu­wepit kahato. Mi'i hawyi te'e­ru­wehum kahato Tupana kape — Waku kahato En Tupana i'atu'e i'atuehay wo. Mi'i turan te'e­ro'e — Wakuat kahato En Tupana wakuat kahato En Tupana. Mesup ta'yn Ehay Moherep Hat toĩne'en mesuwe urupy­'a­setpe i'atu'e. Put'ok'e Emiit Urueha­kye­ra'at Hanuat i'atu'e Iesui piat Tupana kape mekewat iku'uro rakat Iesui timoieĩ­ne'en i ra'yn hawyi.
LUK 7:17 Mi'i hawyi ta'a­tu­henoi kahato Iesui minug yt uwe i mesu­wa­ro­tiaria minug kuap ewywuat i'atu'e wuat'i tawa pe hawyi yne yi Iuteu piaria tikuap ta'yn — Iesui minug iwato hap. I'ewyte irania'in tawa puaria yi Iuteu hyẽpe upiaria ikuap yne ra'yn.
LUK 7:18 Mi'i hawyi ahet'ok hat Iuwãu potmu­'eria henoi ra'yn Iuwãu me Iesui minug wakuap yt uwe i mesu­wa­ro­tiaria minug kuap ewywuat ko'i etiat.
LUK 7:19 Mi'i hawyi Iuwãu tikuap hawyi toikaykay typy ok topot­mu­'eria tuwe­wawi topyhik hap kape hawyi to'e — Uhyt'i'in eweiwat ro Iesui kape apo'e­wei'e hamo e. Mio tã ewei'e o tope uhehay ewehenoi — En apo Urumie­katup Tupana Mipo­'oro Urueha­kye­ra'at Hanuat ra'yn sio apo waku wẽtup ok uruhe­katup ewei'e o Iesui pe e Iuwãu topot­po­'o­roria typy ok pe.
LUK 7:20 Mi'i hawyi Iuwãu mipo­'oro ko'i tuwat ra'yn Iesui kape. Put'ok­ta­'a­tu'e Iesui ete hawyi apo'i­'a­tu'e — Wo'o­mu'e hat i'atu'e Iuwãu wo'o­set'ok hat wyti urupo­'oro ewawi i'atu'e. Ahet'ok hat tikuap teran epiat towesat hap — En apo urumie­katup Tupana Mipo­'oro Wuat'i Porekuat nuat sio apo wẽtup ok te uruhe­katup urueha­kye­ra'at hamo i'atu'e Iuwãu potpo­'o­roria Iesui pe.
LUK 7:21 Mi'i hawyi put'ok­'i­'a­tu'e Iuwãu potpo­'o­roria turan Iesui ti'a­tu­moe­hãite kahato i'ahu rakaria. Wuat'i i'atu­'ahu rakaria toi'a­tu­moe­hãite. Mi'i hawyi Iuwãu mipo­'o­roria teha'at kahato Iesui minug wakuap hap ko'i kape. Ahiag ipiit piat rakaria toi'a­tu­sopo kahato. Yt iha pytig i rakaria toi'a­tu­moe­ha­pytig na'yn put'ok­'i­'a­tu'e turan.
LUK 7:22 Mi'i tutunug turan Iesui to'e apo'e haria pe — Pyno ewei'aipok i ro Iuwãu kape hawyi ewehenoi ro yne aikotã aikotã ei'a­kasa hap ko'i yne eimikuap ko'i ewehenoi tope e i'atuepe. Yt ihapytig i rakaria ti toi'a­tu­moe­ha­pytig na'yn ewei'e ro Iuwãu me e. Mi'i hawyi yt hewyry kuap i rakaria toi'a­tu­moe­wyry ta'yn ewei'e ro e. I'ewyte hepihi pihi rakaria toi'a­tu­mo­kã'ã ra'yn i'atue­pihi ewei'e ro e. Hewaure rakaria i'atue­waure hot'ok'e ra'yn ewei'e ro ahet'ok hat Iuwãu me e. I'ewyte ti iku'uro sese rakaria toi'a­tu­mo­hymut i ra'yn i'atu­ku­'uro sese hawyi ewei'e ro e. Mi'i hawyi yt hekat i rakaria toi'a­tu­mu'e kahato ra'yn Tupana ehay wakuano yt ha'up ete i ewei'e ro aiwy Iuwãu me e Iesui.
LUK 7:23 Mi'i hawyi wẽtup uhehay ewei'e ro Iuwãu me — Pywo ti rat waku kahato tukup­te'en uimohey kahato rakaria uhepiat pywo yn e haria — Woro­mohey uiku­'uro hap kape e haria i'atu­wepit kahato tukup­te'en ma'ato irania'in tuwe­mõti kahato uipupi yt naku i pe tukup­te'en ewei'e o aimu'e hat sa'a­wy­'iwuat Iuwãu me e Iesui apo'e haria pe Iuwãu potpo­'o­roria pe.
LUK 7:24 Mi'i hawyi Iuwãu potmu­'eria tuwat ta'a­tu­pot­po­'oro hat kape Iesui miwesat moherep hamo Iuwãu kape. Mi'i hawyi Iesui ti'a­tu­mu'e kahato itotiaria yne ta'a­tu­het'ok hat Iuwãu etiat — Sa'a­wy'i te kat hamo kahu eweiwat yahig kape e. Ta'i aimu'e hat wakuat Iuwãu ehay wakuat kuap hamo watuwat sa'a­wy'i yahig kape e Iesui. Ta'i Iuwãu aimu'e kahato Tupana ehay sese wo e. Upip wasera upi ta'at turan kowo'i kowo'i tuwat yt hãpyk hin i ta'at e. Aimu'e hat Iuwãu yt upip wasera upi ewywuat hin i e. Hãpyk kahato aimu'e e. Upip wasera upi yt tikuap i aikotã waku hawyi kowo'i kowo'i toto e. Ma'ato Iuwãu yt mi'i hap ewywuat hin i e.
LUK 7:25 Pyno apo kat som yahig note ewei'a­kasa sa'a­wy'i. Kat kapiat ei'a­kasa hamo som eweiwat Iuwãu ewawi e. Miit esokpe ikahuria rakat ewywuat kapiat apo ewei'a­kasa hamo eweiwat yahig kape sa'a­wy'i. Yt hesokpe ikahuria rakat hin i Iuwãu e. Ta'i hekat kahato rakaria esokpe ikahu kahato ma'ato Iuwãu esokpe aihũ Kameru sap kawiat. Hekat rakaria yt tukup­te'en i yahig note ma'ato more­kuaria yat pe yn tukup­te'en ikahuria puaria ma'ato Iuwãu yt mi'iria ewywuat hin i toĩne'en e.
LUK 7:26 — Pyno sa'a­wy'i kat som eweikat mekewat yahig note. Kan hamo ten eweiwat mekewat yahig at hakup hap kape sa'a­wy'i e. Ta'i Tupana ehay enoi hat koro akasa hamo eweiwat yahig kape sa'a­wy'i are. Pywo ti rat Tupana Mipo­'oro ut hap moherep hat kape eweiwat e. Mi'i hawyi eimikat eweipuẽti itote e. Iuwãu ni po'og wuat'i Tupana ehay moherep haria kai are. Tupana ehay moherep hat koro ahet'ok hat are e Iesui.
LUK 7:27 Ta'i waku kahato ahet'ok hat Iuwãu e Iesui. Sa'a­wy'i sese Tupana ehay enoi hat pot Isaia henoi kahato Iuwãu etiat e'yianmete tomiwan me. Uiwy­ria'in e mio tã to'e Tupana sa'a­wy'i sese Tosa­'yru pe. — Uha'yru e sa'a­wy'i e'yianme wẽtup ok miit atipo­'oro teran e'ut hap moherep hamuat wuat'i miit'in miat hamo e Tosa­'yru pe e. Mi'i hat yahig note aru toi'a­tu­mu'e kahato Uha'yru e'ut hap mohãpyk hanuat atipo­'oro e Tupana Isaia miwan me sa'a­wy'i Iuwãu etiat. Pyno mi'i ti Isaia e hap ewy eweipuẽti ra'yn yahig note e. Ta'i Tupana Sa'yru ut hap moherep e'yianmiat hat henoi tehay wuat hat ti eweipuẽti ra'yn ahet'ok hat Iuwãu e Iesui.
LUK 7:28 — Pyno are'e teran aikotã are'e sa'a­wy'i ehepe hap ewy e Iesui. Mio tã are'e sa'a­wy'i — Mesup yt uwe i miit'in muo mesu­wa­rotiat po'og Iuwãu kai. Iuwãu po'og po'og yne hary­poria mẽpyt kai e. Iuwãu po'og torania sa'a­wy­'iwuat Tupana ehay moherep haria kai e. Ma'ato pywo ti rat aikope aikope toĩne'en wẽtup uipot­po­'oro uhehay moherep hat mi'i miit ti po'og po'og Iuwãu kai toĩne'en Tupana wanẽtup hawe e. Ta'i ahet'ok hat Iuwãu wakuat kahato wen ma'ato yne Tupana miky­'esat nug haria uhehay moherep haria po'og ahet'ok hat Iuwãu kai e.
LUK 7:29 Sa'a­wy'i tuwat ra'yn miit'in Iuwãu kape Iuwãu ehay kapiat te'e­ru­wa­nẽtup hamo e. Wo'o­pyhyp haria miit'in ma'at haria ko'i tuwat e. Imienoi ta'a­tukuap hawyi — Pywo i'atu'e. Hãpyk kahato Tupana i'atu'e. Mi'i hawyi te'e­ra­'aipok ta'yn Tupana kape imiky­'esat nug hamo e. Mi'i hawyi ta'a­tuẽtup ta'yn Iuwãu miat ta'a­tu­set'ok hap katu­pono — Tupana mohey haria urutoria e hap moherep hamo miit'in ehamo.
LUK 7:30 Ma'ato irania'in nagnia ehay enoi haria i'ewyte miwan enoi haria yt Iuwãu mohey hin i e Iesui. Mi'iria ti yt inug neran i Tupana miky­'esat ewy e. Mi'i pote yt ta'a­tu­ky­'esat i Iuwãu piat ta'a­tu­set'ok hap e Iesui.
LUK 7:31 Are pãi yt naku i mi'iria katu­pono — Uruto po'og waku wuat'i miit'in kai i'atu'e ta'a­tu­py'a pe. Uruto po'og Iuwãu kai i'atu'e hawyi Iuwãu mimo­herep uhepiat sehay ta'a­tupun ne'i e Iesui Tupana mohey haria mu'e haria akag ko'i piat.
LUK 7:32 Pyno mesu­wa­ro­tiaria — Uruto po'og e haria yt uimohey i teran tukup­te'en aikotã hira­karia iha'y­wywi rakaria ewywuaria are e. Aikotã hira­karia te'e­ro'e to'ope — To'iro waku watu­wepy aiwo­'o­mo­wepit hamo i'atu'e to'o­ma­hara hap mywo ma'ato irania'in hira­karia — Yt naku i aiwo­'o­mo­wepit hap mesup i'atu'e. Yt urutuwat teran i aiwo­'o­ma­hara hap kape watu­wepy hap kape i'atu'e irania'in hira­karia pe e. Yt urutunug neran i wepy hap aiwepit hap upi i'atu'e. — Pyno waku aiwo­'o­hayka hap watunug miit'in syp haria ewywuat aiwo­'o­mi­ky­ry'i hap i'atu'e irania'in hira­karia pe wen ma'ato — Yt uruiky­'esat i aiwak hap ne'i aiwo­'o­mi­kyry hap ne'i i'atu'e to'ope to'ope hira­karia mi'i hap ewy kahato eweikup­te'en — Uruto po'og tora­nia'in kai e haria pe e Iesui. Yt ta'a­tu­ky­'esat i uimienoi i'ewyte yt ta'a­tu­ky­'esat i ahet'ok hat Iuwãu mienoi. Kat ko'i kat ko'i are'e hawyi — Yt uruimohey ehay i'atu'e uhepe. I'ewyte kat ko'i kat kat ko'i ahet'ok Iuwãu henoi — Yt uruimohey i ehay i'atu'e wy e.
LUK 7:33 Pyno eipe ti irania'in hira­karia ewywuaria eweipy­hu'at katu­pono sa'a­wy'i Iuwãu miit'in set'ok hat tuwe­mo­sy'at at ka'ap kahato eimi­ky­'esat ewy tutunug yne e. Mi'u i'ewyte yt tutu'u i tuwe­mo­sy'at Tupana wywo ihay hamuat eimi­ky­'esat ewy tutunug e. I'ewyte mahy mekewat Uwa hy pot'i kawiat yt tutu'u i. Ta'i Iuwãu eimi­ky­'esat ewy tenuk wen mi'i pytkai eiperia — Ahiag ipiit piat rakat Iuwãu ewei'e wuat'i miit'in me e. Yt naku i mio tã ei'e hap e Iesui tomohit haria pe.
LUK 7:34 Mi'i hawyi i'ewyte uimohit kahato eipe ehehay wo katu­pono atu'u yne mi'u i'ewyte Uwa hy atu'u e Iesui. — Yt naku En ewei'e uhepe. — Ta'i erenuk kahato yne mi'u ete ewei'e uhepe. I'ewyte En ni mahy u hat mekewat uwa hy pot'i u kahato hat ewei'e uhepe e. — En ni yt naku i katu­pono imopẽ'ã rakat ereĩne'en i'ewyte wuat'i mi'u u hat ereĩne'en yt uruto ewy i ewei'e sa'ag uhepe e Iesui tewa­nĩ­kaptia pe. Eiperia ti Iuwãu ehay wakuat pun haria i'ewyte uhehay wakuat kahato pun haria uruehay Tupana mipo­'oro sese wen. Yt naku i kahato ewetunug e Iesui to'y­wania pe — Uruto po'og ekai e haria pe. — En ni yt naku i ewei'e uhepe. En ni yt eremo­sy'at hin i hawyi erenuk yn at ka'ap imopẽ'ã rakat ewy rat ewei'e uhepe e. Ta'i En ni urupyhyp haria uruewa­nĩ­kaptia esura­ra'in ky'e hat ewei'e uhepe e. I'ewyte yne yt nakuaria i wy'ok wo ereĩne'en ewei'e uhepe e. Mi'i pote yt kat hamo i En ewei'e uhepe. Pywo pe ti yt uimohey haria uhehay pun haria eweikup­te'en katu­pono aikotã hira­karia i'atu­wo­'o­ky­ry'i hap potiat ewy eweipy­hu'at e Iesui tewa­nĩ­kaptia pe. Yt eweikuap i kat som eweiky­'esat. Iuwãu mienoi yt eweiky­'esat i pote i'ewyte uimienoi kape yt eweiwa­nẽtup hin i e.
LUK 7:35 Irania'in uimohey haria pe — Yt naku i nug haria eipe ewei'e ma'ato mi'i pytkai mi'iria Tupana ehay kapiat wanẽtup kahato haria. Eipe urumohit haria eweikup­te'en e. Eweha'at ro uimohey haria sese kape hawyi meremo eweikuap aru Tupana mienoi ky'esat kahato rakaria mi'iria tukup­te'en hap ma'ato eipe yt eweiky­'est hin i e. Eimienoi wãi'e hap ko'i ky'esat haria yn eipe are e Iesui to'y­wania yt tomohey hin i haria pe mekewat wãi'e hap moherep haria pe.
LUK 7:36 Mi'i hawyi wẽtup ok nagnia wãi'e hap moherep hat to'e Iesui pe — Uhyt to'iro uhupi e. Waku watuwat ui'yat kape enuk hamo e. Mi'i hawyi Iesui toto ra'yn i'yat kape tenuk hamo mekewat — Uruto po'og waku e haria sem wywo tenuk ta'yn hamo.
LUK 7:37 Mi'i hawyi toĩne'en itote mekewat tawa pe wẽtup ok hary­poria yt iwe'eg i rakat wuat'i ihainia'in wywo ieĩne'en hat. Mi'i toikuap ta'yn Iesui toĩne'en hap hawyi toto ra'yn nagnia wãi'e hap moherep hat yat kape. Mohag hy ikamhig se rakat heiam nu Arapatu kawiat ikahu rakat wywo sa'up iwato kahato rakat wywo toto.
LUK 7:38 Put'ok­to'e nagnia ehay wãi'e hap moherep hat yat pe hawyi toipuẽti Iesui porog me tupe tote tenuk yparakai yt itypore i rakat ete i'atueko ewy tenuk hamo. Mi'i hawyi mekewat hary­poria yt iwe'eg i rakat toto Iesui kape hawyi tuwe­pỹ­'ã­tutuk ipy yatypiat kape. Mi'i hawyi tuwak ta'yn haty kahato topy'a pe pote paa'e kahato tominug sa'ag ko'i po'ypyi. Mi'i hawyi hom'e teha hy Iesui py ok pe ete hawyi toitip ta'yn ta'asap mo teha hy ipy okpe ete. Mi'i hawyi toi'ã­pysig ipy hawyi mekewat nu wakuat mohag hy eiam toi'okpik hawyi mekewat mohag hy hekat rakat toi'okpun yne Iesui py okpe ete. Mi'i hawyi toitip ta'yn ta'asap mo mohag hy imõtypot haype iky'e kahato hap moherep hamo.
LUK 7:39 Mi'i hawyi mekewat getap ka'iwat wãi'e hap kuap hat ta'a­kasa hary­poria yt iwe'eg i rakat Iesui py ete hawyi mio tã to'e tuwepe tuwa­nẽtup hawe — Are pãi Iesui yt Tupana Mipo­'oro Tehay Moherep hat hin i e katu­pono yt toikuap i ra'yn meiẽ hary­poria hewaire hewaire kahato rakat e tuwepe tuwa­nẽtup hawe yt naku i e. Iesui Tupana Wanẽtup Kuap hat pote meremo toikuap mana yt kan hamo i rakat toĩne'en topysei hat hawyi toipo­'oro pya topiit pyi e. Ta'i yt naku i Iesui tunug itote katu­pono uruto Iuteu ywania Tupana wãi'e hap kuap haria hawyi yt uruiky­'esat hin i hary­poria yt iwe'eg i rakat uruehamo e tuwepe tuwa­nẽtup hawe mekewat pa'i Simãu.
LUK 7:40 Mi'i hawyi Iesui tikuap ta'yn tuwepe mekewat miit tuwa­nẽtup hap hawyi to'e tope — Pa'i Simãu e ahenoi teran wẽtup sehay epe e. Mi'i hawyi toiwesat — Waku Uhyt waku uimu'e e Iesui pe.
LUK 7:41 Mi'i hawyi Iesui to'e pa'i Simãu me sehay iã'ãkap wuo. Mio tã e — Sa'a­wy'i so wẽtup ok toĩne'en wete­weru hat. Iwato kahato sa'up toipuru morekuat po pyi iwato kahato aikotã topotpap wuat'i e'at kapiat ha'up takat ewy. Mi'i hawyi wẽtup ok i'ewyte ipuru morekuat po pyi kurin aikotã topotpap wẽtup ewaty kapiat yn ha'up takat ewy.
LUK 7:42 Mi'i hawyi so wete­weru haria yt ha'up nug kuap i ta'a­tu­we­te­weru hap morekuat pe katu­pono yt kat i ta'a­tu­we­te­weru hap sa'up wote. Mi'i pote ti mekewat morekuat tineiru puru hat to'e tepiat wete­weru iwato kahato hat pe — Pyno waure wo areĩne'en mekewat emipuru iwato rakat kai e so. — Mi'i hawyi to'e tepiat wete­weru yt ha'up wato i rakat pe wẽtup ewaty kapiat yn ha'up takat pe — Pyno waku mehĩ atiwaure ra'yn uhepiat ewete­weru hap kurin kat mehĩ e tope wy e morekuat e Iesui sehay iã'ãkap puo. Mi'i hawyi Iesui apo'e pa'i pe — Simãu e aiũwat som po'og morekuat ky'e tuwe­te­weru hap kawiat waure'e hat e. Sio mekewat tuwe­te­weru iwato rakat waure hap sio mekewat wete­weru kurin kat waure hap e Iesui Simãu me.
LUK 7:43 Mi'i hawyi Simãu tiwesat — Pyno arewa­nẽtup wete­weru wato hat po'og iky'e katu­pono iwat iwete­weru hap po'og iwato rakat toiwaure wẽtup ok kai pote e Simãu. Mi'i hawyi — Pywo kahato uhyt e Iesui Simãu me.
LUK 7:44 Mi'i hawyi Iesui tuwe­morem hary­poria topy yatypiat kape hawyi to'e pa'i Simãu me — Eraha'at ro mesuwat uipy yatpiat hary­poria kape uiky'e kahato hat kape katu­pono Tupana waure wo iwete­weru uato hap kai e ma'ato en meiũwat hary­poria yt ewy hin i ereĩne'en uhyt e. Mi'i ti uiky'e hap moherep kahato hat toĩne'en e ma'ato en areke e'yat pe wen ma'ato yt kat i y'y eiam ewy etum uhepe uipysei hamo ma'ato meiũwat hary­poria tehahy wo uipysei hawyi ta'asap mo uipy toimogag e.
LUK 7:45 Ma'ato yt ui'ã­pysig hin i en areke e'yat piat turan aheko ewy e. Ma'ato hary­poria ti tut hawyi uipy ãpysig e.
LUK 7:46 — Ta'i put'ok'e miit ai'yat pe hawyi wat'a­tu­'ã­pysig hawyi watopag mohag hy yt ha'up woity i rakano õ'ẽ haria asap ete aheko ewy e. Pyno en ni Simãu yt etipag hin i ui'asap mohag kap mo areke e'yat pe pytkai wen ma'ato mesuwat hary­poria uipysei hap ewy ha'up woity rakano mohag hy ikamhig se rakano uipypen hap ewy e.
LUK 7:47 Pywo pe ti meiũwat hary­poria uipy etiat pe — Yt we'eg hat hin i ere'e epy'a pe imohit hamo e. Iminug sa'ag iwato kahato ere'e mana pe e. — Ta'i wete­weru wato kahato hat ewy toĩne'en Tupana pe ere'e mana pe ma'ato koitywy iminug sa'ag ko'i Tupana tiwaure yne ra'yn e. Ta'i waure wo ra'yn iminug kai uiky'e kahato hat topy­hu'at pote e. Ma'ato wẽtup ok wete­weru yt iwato i hat minug sa'ag kurin nakat pote waure wo yt iwato i pote e. En ni mi'i hat ewy e. Mi'i pote uiky'e hap epiat yt iwato i e. Mi'i pote Tupana kyẽ hap epiat kurin topy­hu'at e Iesui Simãu me. Pyno en ereĩne'en aikotã uhehay iã'ãkap ewy aikotã mekewat wete­weru kurin kat hap ewy ereĩne'en uhehay iã'ãkap hap ewy e. Ma'ato meiũwat ui'ya­typiat hary­poria minug sa'ag wete­weru uato kahato hap etiat uhehay iã'ãkap ewy e. Mi'i hap ewy pote uiky'e kahato hat toĩne'en e. Ma'ato en ni yt uiky'e mi'i hary­poria ewy i e pa'i Simãu me. — Uiwe­te­weru hap epiat yt iwato hin i e hat ewy ere'e Tupana pe pote are e.
LUK 7:48 Mi'i hawyi Iesui to'e topysei hat pe mekewat hary­poria pe — Koitywy waku ereĩne'en Tupana wanẽtup hawe waku ra'yn mana e. Waure wo Tupana toĩne'en eminug sa'ag ko'i kai sa'a­wy­'iwuat yt naku i sese nug hat en rokirẽ e Iesui hary­poria pe sa'a­wy'i yt iwe'eg i rakat pe.
LUK 7:49 Mio tã e Iesui hawyi ienuk haria te'e­ro'e to'ope — Yt naku i mio tã wato'e katu­pono Tupana yn ni ihep kuap aiminug sa'ag ko'i i'atu'e. Pyno mio tã e Iesui yt naku i kahato wato'e i'atu'e to'ope.
LUK 7:50 Ma'ato Iesui to'e hary­poria pe — Waku ra'yn mana ewepit ro katu­pono uimohey ra'yn en mote waku pe ra'yn ereĩne'en koitywy Tupana wanẽtup hawe e. Waku era'aipok e'yat kape ewepit kahato hap wywo katu­pono koitywy Tupana mieha­kye­ra'at ereĩne'en e Iesui mekewat hary­poria topysei hat sa'a­wy­'iwuat 7 ok ahiagnia ipiit piat rakat mana Maria tawa Mata­rena piat e hap het rakat pe.
LUK 8:1 Mi'i hawyi Iesui toto yne tawa ko'i upi temiit'in 12 ok takaria wywo sehay wakuat enoi hamo. Aikotã Tupana topy­hu'at irane Wuat'i Ywania Porekuat no hap tomohey hawyi hap moherep hamo ra'yn yne tawa hit yne tawa wato'in ko'i upi.
LUK 8:2 Temiit'in sem ko'i wywo tuwat i'ewyte hary­po­ria'in tuwat hupi mi'u nug hamo. Wẽtup ok hary­poria Maria tawa Mata­rena piat e hap het rakat sa'a­wy­'iwuat 7 ok ahiagnia ipiit piat rakat Iesui tisopo ra'yn nakat.
LUK 8:3 Mi'i hawyi Iuana mekewat Kusa ehary'i toto hupi hemiit'in eropat hamo. He'aito ti mekewat Kusa morekuat Eroti yat pe toĩne'en. Yne motpap hap ko'i morekuat yat piat toĩne'en Kusa po pe. I'ewyte yne morekuat ekat topy­hu'at Iuana e'aito po pe. Mi'i hawyi mana Susana i'ewyte irania'in hary­poria Iesui potpo­'o­roria powyro haria te'e­ro­py­hu'at. Iesui potmu'e ko'i 70 ok takaria poi haria. Mi'i hawyi ta'a­tuekat kaipyi ta'a­tu­kyi'at kat ko'i kat ko'i Iesui powyro hamo.
LUK 8:4 Mi'i hawyi yne tawa kaipy­wiaria aiko­pepyi aiko­pepyi te'e­ru­wa­'a­tunug Iesui ewawi.
LUK 8:5 Mi'i hawyi mi'iria sem me Iesui henoi hã'ãkap wuo — Wẽtup e'at pe so hã'ỹi sytpok hat toto toko kape hã'ỹi sytpok hamo ma'ato yt yne i hewo go sese tote e. Irania'in hã'ỹi go pu'ap upi hewo e. Mi'i ti miit'in ikohye­wyry iko pu'ap tote hawyi ta'a­tu­'akit akit ne'i ra'yn hã'ỹi hawyi weitaria tu'u yne hã'ỹi ko'i hewo rakat mu'ap upiat e.
LUK 8:6 Irania'in hã'ỹi nu upi yi heg upi hewo e. Wẽtup tuereto hẽtyt ma'ato meiũran iku'uro yt kat i y'y yi kaipyi hã'ỹi nu totiat ne'i pote e.
LUK 8:7 Irania'in hã'ỹi i'anam me hu ypia pe hewo e. Mi'iria hẽtyt wen ma'ato i'anam wywo to'o­'ewy ne'i pote meiũran i'anam tohik ne'i ra'yn hawyi yt tuwenug i ra'yn e.
LUK 8:8 Irania'in yi wakuat upi hewo hewo heko go tote e. Mi'iria ti i'atue­hãite kahato hawyi wẽtup sat kaipyi 100 iã'ỹi tuwe­mo­herep e. Pyno ehewaure ka'a pote ewehẽtup kahato o mesuwat uhehay iã'ãkap puat uimienoi e Iesui miit'in sem me.
LUK 8:9 Mi'i hawyi ipotmu­'eria apo'i­'a­tu'e Iesui pe — Pyno kat e hap som ehenoi teran iã'ãkap wuo hã'ỹi koi hap ete i'atu'e.
LUK 8:10 Mi'i hawyi Iesui ti'a­tu­wesat — Ta'i uiwy­ria'in ahenoi teran ehepe wuat'i mikuap yt heremo i rakat i aikotã Tupana topy­hu'at irane Wuat'i Miit'in Porekuat no hap etiat e. Ma'ato irania'in me miit'in sem me hã'ãkap wuo ahenoi teran yt uikuap teran i haria mi'iria pote e. Te'e­ra­'a­kasa wen uipiit kape ma'ato uhehay kape yt hot'ok'e i i'atuete. Ta'a­tu­ky­'esat ta'a­tue­hãite hap ta'a­tupoi hap wen ma'ato Tupana ehay yt ta'a­tukuap teran hin i pytkai e temiit'in me.
LUK 8:11 — Pyno koitywy ahenoi i ehepe mesuwat iã'ỹi iã'ãkap etiat eweikuap sese hamo. Pyno uhehay iã'ãkap we Tupana ehay topy­hu'at mekewat iã'ỹi ewy e.
LUK 8:12 Mekewat mikoi iã'ỹi go pu'ap upiat ti hewo rakat iã'ỹi wẽtup ok wẽtup ok wanẽtup hat ewywuat e. Te'e­ru­wa­nẽtup ma'ato meremo ahiag put'ok'e i'atu­wa­nẽtup hap ete hawyi Tupana ehay mikoi iã'ỹi ewywuat toihep ta'yn i'atue­waure pyi. Yt toiky­'esat i ta'a­tukuap hawyi uimohey hap katu­pono ta'a­tu­mohey hawyi Tupana piat uimienoi hap ta'a­tue­ha­kye­ra'at hamuat ta'a­tukuap ta'yn e. Mi'i ahiag yt tiky­'esat i e.
LUK 8:13 Mi'i hawyi ti nu totiat hewo rakat ewywuat wẽtup ok wẽtup ok wanẽtup hat ewy e. Te'e­ru­wa­nẽtup hawyi waku kahato ta'a­tu­puẽti uimienoi e. Pywo kahato i'atu'e ma'ato mi'iria iã'ỹi yt hapo rakaria i ewywuaria ko'i tukup­te'en e. Mi'i pote yt toĩne'en mot'i i uhehay mohey hap ete e. Meiũran irania'in ti'a­tu­ky­ry'i i'atuepiat uimohey hap ete hawyi meremo ta'a­tu­waure ra'yn Tupana ehay uiwẽ pywiat e.
LUK 8:14 I'ewyte ti mekewat iã'ỹi i'anam miat hu ypia puat hewo rakat wẽtup ok wẽtup ok wanẽtup hat ewywuat e. Mi'iria te'e­ru­wa­nẽtup kahato uhehay wakuat kapiat hawyi ta'a­tu­mohey ran na'yn. Sa'a­wy'i inug neran Tupana miky­'esat ewywuat wen ma'ato ta'a­tu­potpap iwato hap kape ta'a­tue­ka­re'en iwato hap kape ta'a­tu­mi­ky­'esat wuat'i hap kape te'e­ru­wa­nẽtup yn hawyi sa'a­wy­'iwuat ta'a­tusat hap ewywuat uhehay toĩ wen ma'ato yt karãpe i waku sese ihãite hap ewy toĩne'en i'atu­py'a pe ma'ato i'akyt haria ewywuaria wo te'e­ro­py­hu'at yt haat i hap ewy i'atu­wa­nẽtup hap at ka'ap i'atu­monik poity'i ne'i ra'yn Tupana e hap uimienoi e. Mi'i hawyi ta'a­tu­mohey ran kahato hawyi waure wo te'e­ro­py­hu'at Tupana e hap ko'i kai e.
LUK 8:15 Ma'ato mekewat hã'ỹi yi wakuat upiat hewo rakaria wẽtup ok wẽtup ok wanẽtup hat ewywuat e. Mi'iria ti i'atu­py'a piat yi wakuat ewywuat pote te'e­ru­wa­nẽtup at ka'ap Tupana ehay kapiat hawyi yt ta'a­tu­waure hin i. Ta'a­tu­hytmõi ta'a­tu­py'a pe Tupana ehay hawyi ta'a­tunug na'yn Tupana miky­'esat ewy e. Mi'i pote mikoi haat kahato rakat ewywuat te'e­ro­py­hu'at te'e­ru­wenug kahato rakat ewy e Iesui.
LUK 8:16 Mi'i hawyi wẽtup iã'ãkap wuo Iesui henoi towy­ria'in me — Getap we wãtym hawyi yt uwe i ariãty hẽtyhot hap ipag neran kamũti pe mig'i wo e. I'ewyte yt ta'a­tupag i yni ywyt'ok­pype ne'i ma'ato ywaiti pe waku pe heiam note yn ta'a­tu­hupit teran e. Mi'i hawyi wehyt'ok haria meremo ta'a­tukuap hẽtyhot hap e.
LUK 8:17 Mi'i hap ewy kahato uimohey hap topy­hu'at e Iesui. Ta'i uimohey sese pote meiũran aru heremo yne miit'in me ehepiat topy­hu'at hap uimohey hap aikotã ariãty ywaiti piat ewy e. Niatpo kahato uimohey hap mig'i wo hap are aikotã ariãty wãtym muat mig'i wo hap ewy e. Miit'in py'a pe uimohey hap toĩne'en mote meiũran hot'ok'e kahato itote hawyi heremo kahato e.
LUK 8:18 Pyno eweiwa­nẽtup to uimienoi kape uhyt'i'in mana'in e Iesui. Eweiwa­nẽtup haty wo hawyi ta'i ehewaure kahato uhehay kape mot'i hawyi meremo aru eweikuap uimienoi mikoi saat kahato rakat ewy eweikup­te'en hawyi Tupana mienoi hẽtyhot kahato rakat powyro hamuat miit'in hap ewy eweikup­te'en e. I'ewyte po'og na'yn sa'a­wy­'iwuat kai eimikuap ko'i hap ahenoi ehepe. Ma'ato yt haty wo i pote waure wo eweikup­te'en uimienoi nug hap kai pote yt kat wywo i aru eweipy­hu'at e Iesui temiit'in me.
LUK 8:19 Mi'i turan Iesui ty put'ok'e Iesui ywyt'in wywo. Mi'i hawyi Iesui ewawi ta'a­tu­ky­'esat ma'ato yt tuwe­hyt'ok kuap i ipotmu­'eria i'atu kahato sakpo getap we Iesui yatype pote Maria yt teke kuap i tomẽpyt kape. Mi'i pote Maria tikaykay Tomẽpyt tuwe­wawi ipotmu­'eria py'a­setpyi.
LUK 8:20 Mi'i pote wẽtup ok to'e Iesui pe — Uhyt iuẽ ety put'ok'e oken'y­pyke hawyi eywyt'in nywo i'atuehay teran so ewywo e Iesui pe.
LUK 8:21 Mi'i hawyi Iesui to'e tomohey haria pe topot­mu­'eria pe — Uity sese ewywuaria eweikup­te'en eipe meiũpe e. Eipe ti uheywyt'in sese uheinyt'in sese ewywuat e. Pyno eipe meiũpe eweikup­te'en uimi­ky'e ko'i aikotã uity uheywyt'in uheinyt'in ko'i ewy katu­pono uwe uwe tuwa­nẽtup kahato uhehay kape uimienoi Tupana ehay kape hawyi tutunug uhehay ewy hawyi mi'i haria ti uity'in uheywyt'in uheinyt'in tukup­te'en uiwa­nẽtup hawe uipy'a pe e Iesui ahepe tomohey haria pe tomi­ky­'esat nug haria pe.
LUK 8:22 Wẽtup e'at pe Iesui to'e temiit'in me — To'iro yara puo hyemyi'a wato sakpo e. Mi'i hawyi toto ra'yn yara wato kape hawyi teke temiit'in wywo. Tuwe­hyt'ok hawyi to'e temiit'in me — To'iro uhyt'i'in ysakpo watuwat e. Mi'i hawyi tuwat ra'yn ysakpo.
LUK 8:23 Y'y py'a­setpiat turan Iesui toket kahato. Mi'i turan ywytu kahato put'ok'e y'y ete hyemyi'a wato py'a­setpiat ikupte'en turan. Mi'i hawyi ipoity'i kahato yara ete katu­pono y'y teke teke ra'yn i'atue­'yara pe — Yt naku i i'atu'e minwa­to'e hamuat i'atu'e ta'yn. Pãi i'atu'e to'ope ipoity'i kahato i'atu'e to'ope to'ope haty wo.
LUK 8:24 Mi'i hawyi te'e­ru­wẽ­powat Iesui kape — Uruka­'iwat Uruka­'iwat erehymut ro i'atu'e te'e­re­wẽ­powat. — Wato­'o­py'at irane ra'yn i'atu'e. — Y'y teke teke kahato ahe'yara pe i'atu'e. Ai'auka irane y'y i'atu'e. Mi'i hawyi Iesui tuwe­hymut hawyi — Wãi nei'o ywytu are e ywytu uato pe. — Epo'inik to y'y e ihy wato pe hawyi ipo'inik ta'yn y'y wato i'ewyte ywytu uato ipohep ta'yn. Ta'i meremo ipo'inik ta'yn Iesui ehay upi iwẽpowat hawyi.
LUK 8:25 Mi'i hawyi apo'e haty wo topot­mu­'eria pe — Uiwy­ria'in kat pote som yt uimohey kahato i e. Mi'i hawyi po'og te'e­ru­wa­nẽtup iminug ete hawyi te'e­ro'e to'ope — Uwe som pyno Meiũ Miit Iesui katu­pono yt miit ewy i tutunug kuap i'atu'e to'ope. Tupana ewy toimo­po­'inik kuap y'y wato ywytu uato hap tehay wo i'atu'e — Kat kawiat som pyno Iesui i'atu'e to'ope.
LUK 8:26 Mi'i hawyi meremo yi Kera­senu e'y sakpuat put'ok­'i­'a­tu'e hawyi tawa Kata­renu yẽpeke te'e­ru­wehik ta'yn.
LUK 8:27 Tuwẽtem yara wato pyi hawyi put'ok'e howawi wẽtup ok ahiagnia sem ipiit piat rakat. Tawa Kata­renu piat ieĩne'en hat mi'i ti yt toĩne'en kuap i towy­ria'in wywo tetawa pe katu­pono ipy'ahak kahato heso'ok sese ahiagnia tuete ipiit pe pote. Mi'i pote toĩne'en at ka'ap wo'osyp hawe yt tesokpe pe i.
LUK 8:28 Teha'at Iesui kape hawyi tehay pirik wo tuwe­wahik yi totiat hawyi iwẽpap'i tehay pirik wo — Worokuap En Tupana Ywaitiat Ieĩne'en hat Sa'yru En e. Kat aru etunug uhete e haty wo Iesui pe. Uhyt wãi urusa­ty'i saty'i tei'o e ahiagnia miit piit pyi.
LUK 8:29 Mio tã i'atu'e katu­pono Iesui ti'a­tu­sopo teran mekewat miit piit pyi ahiagnia pote. Sa'a­wy'i ahiagnia topytyk tuereto mekewat miit ipiit ete hawyi heso'ok sese hap tuete topy­hu'at. Irania'in ipo'i po'i teran ahiagnia ipiit piat rakat haity iheg nakat wo ipo ete ipy ete ma'ato ahiagnia tuete hawyi toiterek tuereto haity iheg nakat hawyi ahiag tioto yahig kape.
LUK 8:30 Mi'i tote Iesui to'e — Kat eĩ eset e tope. Mi'i hawyi — Isem uhet katu­pono sa'a­wy'i ahiag ko'i typy'i rakaria tuwe­hyt'ok uipiit pe pote hawyi miit'in uhet'ok Isem e.
LUK 8:31 Mi'i hawyi ahiag ko'i te'e­ro'e Iesui pe ta'a­tuemiit piit pyi — Uhyt i'atu'e yt urupo­'oro tei'o aria wato kape wuat'i e'at piat uruho­'opot hamo uruta'at ta'at hamo i'atu'e.
LUK 8:32 Ma'ato tukup­te'en itote hamaut ko'i pote — Pyno meimuẽwat hamaut ko'i piit pe urutu­we­hyt'ok teran i'atu'e Iesui pe. Mio tã i'atu'e hawyi Iesui — Eiwe­hyt'ok to hamaut ko'i pe ei'e hap ewy e ahiagnia pe.
LUK 8:33 Mi'i hawyi tuwe­nõ'ẽ ra'yn mekewat miit heso'ok rakat piit pyi hamaut ko'i kapiat tuwe­hyt'ok hamo. Mi'i hawyi hamaut ko'i ra'yn ikohyeput i kohyeput i yity'ok totepyi y'y wato kape hawyi hewo hewo ra'yn y'y wato pe topap yne ra'yn.
LUK 8:34 Mi'i hawyi hamaut apykok haria te'e­ra­'a­kasa hawyi meremo tuwat henoi hamo tawa ko'i kape. I'ewyte mu'ap upiat gupte'en haria pe ta'a­tu­henoi — Tapap ta'yn yne aihũ hamaut ko'i i'atu'e y'y wato pe uhyt'i'in mana'in i'atu'e yne miit'in me. Mekewat ahiag ko'i ipiit piat rakat waku ra'yn i'atu'e.
LUK 8:35 Pyno i'atuepiat henoi hawyi tõ'ẽ kahato Iesui kape. Put'ok­'i­'a­tu'e turan mekewat sa'a­wy­'iwuat ahiag ipiit piat rakat waku ra'yn ta'a­tu­puẽti. Sokpe pe ra'yn toĩne'en Iesui yatype. Te'e­ra­'a­kasa hawyi õ'ẽ haria te'e­ru­wa­nẽtup kahato.
LUK 8:36 Mi'i hawyi sa'a­wy­'iwuat akasa haria henoi yne aikotã aikotã Iesui timoe­hãite hap etiat õ'ẽ haria pe.
LUK 8:37 Mi'i tupono mekewat tawa Kata­renu kaipy­wiaria gyt'i­'a­tu'e Iesui pupi hawyi — Mehĩ ereto ro meiũpepyi i'atu'e Iesui pe. Yt uruiky­'esat i meiũpe ereĩne'en po'og i'atu'e. Mi'i pote Iesui teke i ra'yn yara pe hawyi ta'aipok y'y wato sakpo.
LUK 8:38 Teke turan sa'a­wy­'iwuat ahiag ipiit piat rakat — Uika­'iwat areto teran eupi katu­pono areĩne'en epotmu'e wato wo teran e Iesui pe.
LUK 8:39 Ma'ato Iesui — Yt uhyt waku po'og era'aipok e'yat kape tawa ko'i kape ipuo mono eremo­herep aikotã Tupana emoehãite hap ehenoi ewyria'in me hamo e. Mi'i hawyi Iesui henoi hawyi toto ra'yn wuat'i ipiat henoi hamo tetawa piaria pe toto. Mi'i tote yne tawa piaria pe aikotã Iesui tunug tetiat hap tohenoi kahato.
LUK 8:40 Mi'i hawyi Iesui tokosap i ra'yn ysakpo. Mi'i tote miit'in typy'i rakaria toi'a­tu­puẽti put'ok­to'e turan. I'atu­wepit kahato katu­pono ta'a­tu­he­katup Iesui ut hap.
LUK 8:41 Mi'i turan tut Iesui ewawi wẽtup ok Tupana mõtypot yat piaria akag Iairu e hap het rakat. Mi'i hawyi Iesui owa kape tuwe­pỹ­'ã­tutuk hawyi tuwe­wahik yi kape hawyi to'e Iesui pe — Mehĩ eriot ro uhupi ui'yat kape e.
LUK 8:42 — Mehĩ e uhaki'yt makuptia rakat 12 anu rakat iku'uro teran moity'i ra'yn e. Mio tã e hawyi Iesui — To'iro pyno Iairu pe. Iesui toto turan yne itotiaria miit'in sem tuwat hupi. Miit'in tohik kahato tuwat kahato hupi pote.
LUK 8:43 Toĩne'en i'atutok pe wẽtup ok hary­poria huu wato rakat 12 anu ra'yn toho­'opot. Toipun yne ra'yn tekat ko'i paini ko'i upi mohag nug haria ko'i upi tomoe­hãite hap ky'ewi wen ma'ato yt toipuẽti hin i tehãite hap.
LUK 8:44 Mi'i ti put'ok'e Iesui ape kai hesokpe emig neran haype. Mi'i hawyi totemig hesokpe hawyi meremo huu iponik ta'yn ihãite ra'yn.
LUK 8:45 Mi'i hawyi tesokpe emig hawyi Iesui apo'e — Uwe keĩ uhemig hat meikope e. Ma'ato õ'ẽ haria — Yt uruto i i'atu'e torania. Mi'i hawyi Peteru to'e Iesui pe — Uika­'iwat miit'in typy'i rakaria to'oran me meiũ watu­kup­te'en e. I'atu kahato emig emig haria mesuwe e. Kat poteĩ — Uweĩ uhemig hat meikope ere'e e.
LUK 8:46 Ma'ato Iesui to'e — Peteru e uhemig hat sese uimohey kahato hat toĩne'en meikope atikuap ta'yn. Uhesaika hap tuwẽtem uhemig hap kape uipiit pyi hap ete e. Mi'i uimi­moe­hãite topy­hu'at atikuap e.
LUK 8:47 Toikuap ta'yn hawyi hemig hat tyry­to'e popuo tut howawi. Mi'i hawyi tuwe­pỹ­'ã­tutuk Iesui ewawi. Mio tã e — Mimi mesup ta'yn mig'i wo woromig uimoe­hãite hap ky'ewi e. Woromig hawyi meremo epiat uimoe­hãite hap atipuẽti e Iesui pe wuat'i ehamo. Mi'i hawyi itotiaria Iesui upiaria ikuap ta'yn huu wato rakat tomoe­hãite ra'yn hap.
LUK 8:48 Mi'i hawyi Iesui to'e tomi­moe­hãite hat pe — Uhaki'yt pyno waku ra'yn en e. Uimohey hap kaipyi emoehãite hap topy­hu'at koitywy etipuẽti ra'yn e. Waku pyno era'aipok i ra'yn e'yat kape ewepit hap wywo e.
LUK 8:49 Mi'i turan Iesui piat henoi imoehãite hap turan put'ok'e wẽtup ok Iairu yat kaipyi. Mi'i to'e Iairu piat henoi hamo. — Uhyt e iku'uro sese ra'yn wyti esaki'yt e. Pyno yt kan hamo i wahenoi po'og Aimu'e hat Iesui pe e.
LUK 8:50 Katu­pono yt kat i aiku­'uro hawyi aheĩne'en i hap e Iairu yat kaipywiat sut hat. Mi'i hap Iesui tikuap hawyi to'e Iairu pe — Yt gyt'ere tei'o esaki'yt iku'uro hap pupi ma'ato etimohey yn na'yn Tupana hawyi waku pe esaki'yt e.
LUK 8:51 Mi'i hawyi Iesui put'ok'e Iairu yat ete hawyi Iesui to'e miit'in sem me — Yt atiky­'esat i miit'in typy'i poity'i iku'uro rakat yatype e. Waku Peteru Iuwãu Tiaku i'ewyte i'ywot ity yn atiky­'esat iku'uro yatype e.
LUK 8:52 Teke hawyi toipuẽti itote miit'in wak haria haki'yt iku'uro pote te'e­ruwak ta'a­tueko ewy sa'up ete. Mi'iria pe Iesui to'e — Yt eweiwak tei'o e eipo­'inik to e. Yt iku'uro i rat e. Toket ne'i wyti e.
LUK 8:53 Mi'i pote wak haria to'o­ky­ry'i ne'i Iesui ehay ete — Pywo ti rat iku'uro sese haki'yt i'atu'e. Era'a­kasa ro i'atu'e Iesui pe.
LUK 8:54 Iesui teke ra'yn iku'uro rakat kape iwywuat pe hawyi toipo­pytyk ta'yn hawyi tuwẽ­powat — Ere'ã­pe­'ok'am no pĩ'ã makuptia e.
LUK 8:55 Mi'i hawyi tuwẽ­powat haki'yt yt ipyhu i ra'yn nakat. Mi'i hawyi tuwẽtem gu'uro pyi hawyi tuwe­'ã­pe­'ok'am i ra'yn. Mi'i hawyi Iesui to'e ity pe — Mana etopoi ro emẽpyt e.
LUK 8:56 I'ywot'in te'e­ru­wehum kahato Iesui ete ma'ato mi'i hawyi Iesui to'e — Yt ewehenoi tei'o aikotã uiminug esaki'yt etiat ko'i irania'in me aikotã atomoieĩ­ne'en esaki'yt atiõtem gu'uro pyi hap ko'i e.
LUK 9:1 Iesui tuwẽtem Iairu yat pyi hawyi toi'a­tu­kaykay tuwe­wawi temiit'in sese 12 ok takaria. Mi'i hawyi to'e temiit'in sese pe — Uiwy­ria'in Mesup atum na'yn ehepe uhesaika hap ahiag sopo hamuat e. I'ewyte atum na'yn ehepe uhesaika hap i'ahu rakaria moehãite hamuat katu­pono mesup woro­ho­'o­po­'oro teran wuat'i tawa ko'i puat wuat'i miit'in mu'e uhehay wakuat nuat e.
LUK 9:2 Mi'i hawyi toi'a­tu­po­'oro temiit'in miit'in mu'e hamo aikotã waku miit'in tunug Tupana Ta'a­tu­po­typot Koro wo mesuwat yi tote hap enoi hamo. I'ewyte i'ahu rakaria moehãite hamo toi'a­tu­po­'oro.
LUK 9:3 — Uipot­po­'oro ko'i eipe e. Uhehay moherep hanuaria e. Mi'i pote atiky­'esat ewei'a­tu­mu'e miit'in uimi­ky­'esat ewy e. Pyno woro­ho­'o­mu'e aikotã atiky­'esat eweiwat hap owakai te e. Yt kat i tei'o eweitioto ehekat ko'i e. Eipo­'yha ti sero'ok ehat pupiat wyti aru yt ewetioto i e. Yt eheku­riwu i wyti yt eimi'u ko'i i wyti i yt eheti­neiru i wyti yt typy ehesokpe i wyti ewetioto tei'o e.
LUK 9:4 Put'ok­'e­wei'e wẽtup tawa pe hawyi eiky­'esat hat wẽtup ok to'yat pe pote eweikup­te'en o itote e. Waku wẽtup yat pe yn eweikup­te'en eimi­mu­'eria etawa pe e. Yt eiko­hye­wyry kohye­wyry tei'o irania'in yat ko'i upi mi'u kat hamo eimi­mu­'eria etawa ok tã e. Waku wẽtup ok e'yat pe — Ereĩne'en mesuwe mehĩ e haria e'yat pe yn o eweiket eipoi hap ok tã are e. Wẽtup getap we yn eweikup­te'en uhehay sytpok hamuat eweiwat eimi­mu­'eria etawa pe turan e.
LUK 9:5 Ma'ato mekewat tawa piaria yt uwe i i'atu­wese pote eweiwat i ra'yn o i'atue­tawa pyi e. Ma'ato eiwat hap owakai te o tawa sawiu eipy etiat eiwei­pit­pit'ok kahato — Tupana ehay pun haria eipe hap enoi i'atuepiat hamo e Iesui topot­po­'o­roria 12 ok takaria pe.
LUK 9:6 Mi'i hawyi tohenoi yne aikotã waku miit'in mu'e hawyi tuwat ra'yn Iesui e'yianme yne tawa ko'i upi. Mi'i hawyi ta'a­tu­henoi wuat'i tawa pe sehay wakuat Iesui etiat hawyi i'ahu rakaria tawa piaria ta'a­tu­moe­hãite kahato.
LUK 9:7 Mi'i hawyi tama Karireia piat morekuat Eroti tikuap ta'yn aikotã Iesui minug ko'i etiat hawyi tuwa­nẽtup kahato — Atikuap som uwe sese Iesui pãi e. Atikuap ti mekewat uimi­'auka Iuwãu wo'o­set'ok hat ra'yn tuwe­hymut i e tuwepe Iesui pe.
LUK 9:8 Ta'i Iesui wyti Iuwãu uimi­'auka tuwe­hymut i ra'yn gu'uro pyi sio tuwe­hymut gu'uro pyi mekewat sa'a­wy­'iwuat Tupana ehay moherep hat Eria sio yt e tuwa­nẽtup Iesui etiat sio yt mi'i miit i sio wẽtup ok Tupana ehay moherep hat tuwe­hymut i ra'yn e morekuat Eroti topy'a pe Iesui etiat. Mi'i pote morekuat Eroti tuwa­nẽtup kowo'i kowo'i.
LUK 9:9 — Pyno ui'a­kag'aia Iuwãu pãi e. Tuwẽtem gu'uro pyi e ma'ato Mi'i Iesui e hap het rakat uwe sese yt atikuap i pote e. Irania'in mienoi uhepiat pywo sio yt atikuap i e. Uwe kahato som atikuap teran mesup e. Mi'i hawyi morekuat Eroti teha'at teran kahato Iesui ewawi. Toiky­'esat kahato Iesui kapiat ta'a­kasa hap. Toiky­'esat ta'a­kasa Iesui minug yt miit'in eminug kuap i iwato rakat haype.
LUK 9:10 Mi'i hawyi Iesui potpo­'o­roria te'e­ra­'aipok i ra'yn tawa ko'i kaipyi ihay moherep haria. Mi'i hawyi ta'a­tu­henoi aikotã aikotã ipu'ap muat upi ta'a­tu­minug hap ko'i ta'a­tue­wyry hap upi ta'a­tu­henoi henoi yne yne Iesui pe. Ta'a­tu­henoi yne ra'yn hawyi Iesui te'e­re­po'ok i ra'yn temiit'in wẽtup tawa kape tawa Pesaita kape ta'a­tu­weran temiit'in nywo hap toiky­'esat.
LUK 9:11 Ma'ato miit'in typy'i rakaria tikuap hawyi aikope Iesui toto hap kape tuwat hewat­'ymo. Iesui tiky­'esat kahato tuweran pytkai iwese kahato toĩne'en õ'ẽ haria ete. — Waku uhyt'i'in mana'in e õ'ẽ haria pe. Eiwe­hyt'ok to e i'atuepe. Mi'i hawyi mi'iria toi'a­tu­mu'e kahato aikotã waku watunug Tupana Aipo­rekuat no hap ete. I'ewyte i'ahu rakaria toi'a­tu­moe­hãite kahato itote.
LUK 9:12 Mi'i hawyi porap wãtym i kape hemiit'in 12 ok takaria te'e­ro'e Iesui pe — Urumu'e hat eti'a­tu­po­'oro i ro miit'in sem tawa ko'i upi getap ko'i kape mi'u kyi'at hamo i'atuket hamo katu­pono yahig wato pe watu­kup­te'en mesuwe ne'i pote yt kat i getap i'atu'e Iesui pe.
LUK 9:13 Mio tã i'atu'e hawyi Iesui to'e — Ewei'a­tupoi ro hesy'at rakaria mio e ti temiit'in me. Mi'i hawyi — Mehĩ kurin kahato aimi'u mesuwe i'atu'e. Ta'i aimi'u 5 man typy pira yn wuat'i poi hamo i'atu'e. Sio apo etiky­'esat urutuwat tawa kape mi'u kyi'at po'og iwato hamo typy'i rakaria moenuk hamo i'atu'e.
LUK 9:14 Tukup­te'en itote miit'in sem kahato aikotã 5000 ihainia'in i'ewyte hary­po­ria'in hira­ka­ria'in tukup­te'en itote hesy'at rakaria ma'ato yt ta'a­tu­mo­rania yne i. Mi'i hawyi Iesui to'e ra'yn — Pyno ewei'apyk to yi upi kowo 50 kowo 50 ewei'e ro wa'a­tunug haria pe e Iesui temiit'in me.
LUK 9:15 Mi'i hawyi ta'a­tunug na'yn i'e hap ewy hawyi apyk puo tukup­te'en.
LUK 9:16 Mi'i hawyi Iesui tat ra'yn man a hit rakat typy pira hawyi teha'at atipy kape — Waku kahato emiium uruepiat urumi'u wuat Tupana e. Waku to'e Tupana pe hawyi tutum na'yn mekewat man 5 a hit typy pira temiit'in me itotiaria moenuk hamo.
LUK 9:17 Mi'i hawyi tuwe­mo­wato kahato itotiaria erenuk hap. Mi'i hawyi i'atu'ok ta'yn hawyi mi'u ieĩpyt 12 yrysakag me topy­hu'at. Wẽ sakpo i'atu­mi'u ieĩpyt topy­hu'at re.
LUK 9:18 Wẽtup e'at hawyi meiũran Iesui tuweran toĩne'en temiit'in nywo Tupana kapiat tehay hamo. Mi'i hawyi apo'e temiit'in me — Uwe som uito irania'in wanẽtup hawe e.
LUK 9:19 Mi'i hawyi ta'a­tu­wesat — En ni wo'o­set'ok hat Iuwãu tuwẽtem gu'uro pywiat hat i'atu'e irania'in epiat pe Uhyt i'atu'e. En ni erẽtem sa'a­wy­'iwuat Tupana ehay moherep hat Eria e hap i'atu'e irania'in epiat pe Uhyt i'atu'e. Yt Eria i pote wẽtup ok sa'a­wy­'i­tewuat Tupana ehay enoi hat tuwe­hymut i ra'yn gu'uro pyi i'atu'e irania'in etiat Uhyt i'atu'e.
LUK 9:20 Mi'i hawyi apo'e i ra'yn temiit'in me — Ma'ato ehepe apo uwe Uito eiwa­nẽtup hawe e. Uwe sese som Uito ehepe e temiit'in me. Mi'i hawyi Peteru tiwesat — En ni Tupana Mipo­'oro Urueha­kye­ra'at hanuat rat Mehĩ e. En ni Wuat'i Miit'in Porekuat Hanuat Uhyt e Iesui pe.
LUK 9:21 Mio tã e hawyi Iesui ti'a­tu­nãpin haty wo temiit'in — Pyno uiwy­ria'in e uikuap ehepiat hap yt ewehenoi tei'o irania'in me e temiit'in me.
LUK 9:22 Yt ewehenoi tei'o irania'in me Peteru to'e uhepiat hap ewy katu­pono uhehay pun hanuaria irania'in tukup­te'en mote e. Pywo ti aru aho'opot kahato aru e. Uito ti Wuat'i Miit'in Yke'et i'ewyte Wuat'i Miit'in Kywyt pytkai yt uimohey hin i e. Pywo ti rat aho'opot hap put'ok'e irane e. Yt uiky'e hin i mesu­wa­ro­tiaria nagnia i'ewyte pa'i watoria yt uiky­'esat hin i ta'a­tu­po­rekuat no hap e ta'a­tue­ha­kye­ra'at hap e. I'ewyte Tupana ehay miwan etiat henoi haria yt uiky­'esat hin i e. Ui'auka teran haype Uito Ta'a­tuey­ke'et Ta'a­tu­kywyt pytkai e. Uiku­'uro ma'ato mi'i hawyi ti aru ara'aipok i ra'yn gu'uro pyi hawyi areĩne'en ne e. Pywo mye'ym e'at uisyp uiku­'uro hawe areĩne'en hawyi e Iesui tuwetiat tohenoi temiit'in 12 ok takaria pe.
LUK 9:23 Mi'i hawyi irania'in itotiaria kape Iesui henoi — Eweiwat teran uhupi uipot­mu­'eria wo pote eweitoiat ro yne eimi­ky­'esat ko'i yt uimi­ky­'esat i ewywuat ko'i e. Mi'i hawyi haty wo o — Atunug neran Tupana miky­'esat ewywuat ei'e hap wywo eweiwat ro uhupi e. Ta'i eho'opot hap eweipuẽti irane eweiwat uhupi hawyi e. Yt eimi­ky­'esat ewy i ewetunug ma'ato Tupana minug neran hap ewywuat wywo o eweiwat e. I'ewyte irania'in yt eiky­'esat i haria i'atu­py­'ahak hamuat ehete e. Ehaty'i haty'i aru uhupiat eweiwat hawyi e. Ui'auka irane aria'yp posak ete e. Pyno waku eipe ui'ewy eweikup­te'en e. — Ui'auka pote ui'auka ma'ato yt atoiat hin i Uika­'iwat mohey hap ewei'e o eweikup­te'en neran uipot­mu­'eria wo pote e. Waku ahe'a­ria'yp posak etiat ewywuat ra'yn wywo aho'opot hap upi aiku­'uro hap kape watuwat wẽtup sok yn aito hawyi e. Uhemiit sese yt ui'atoiat i miit'in pupi e Iesui.
LUK 9:24 Uwe uwe iku'uro uipotpap we uhehay wakuat enoi hamo mi'iria wyti aru ta'a­tuieĩ­ne'en hap sese puẽti wuat'i e'at pe mesuwe i'ewyte atipy pe e. Ma'ato irania'in ta'a­tuieĩ­ne'en hap mesu­wa­rotiat kape yn wanẽtup haria ta'a­tuieĩ­ne'en hap sese pun haria howasat rakaria te'e­ro­py­hu'at e.
LUK 9:25 Pyno torania mesu­wa­rotiat kare'en eipo pe hawyi hekat rakaria eipe mesuwe ma'ato mi'i pytkai yt kat i ha'up eweipuẽti eheĩne'en sese wuat'i e'at piat sa'up mo e. Mi'i hap yt kat i topy­hu'at eipo pe katu­pono eweipun na'yn eheĩne'en sese mesuwuat uimi­ky­'esat nug hap hawyi eimi­ky­'esat nug hap mesuwe yn ewetunug pote e.
LUK 9:26 Uwe uwe mesu­wa­ro­tiaria uipupi tuwe­mõti uhehay pupi tuwe­mõti mi'i hawyi i'ewyte Uito aremõti wy mi'i haria pupi e. Ta'i mekewat e'at aru karãpeĩ Uito Eheyke'et Eikywyt ariot atipy kaipyi uhẽtyhot hap puo Ui'ywot esaika hap puo hap e'at mi'iria pupi aremõti e. Ta'i mekewat ikahu sese hawuo ariot atipy piaria wywo uhesaika kahato hap wywo e. Mi'i hap e'at pe turan aremõti aru wemõti uipupiat haria pupi e.
LUK 9:27 Yt eweiwaure tei'o mio wuat ui'e hap e. Pywo ti rat tukup­te'en meiũpe Tupana topy­hu'at Morekuat nuat hap kapiat akasa haria e. Aikotã Tupana topy­hu'at Morekuat hap kape te'e­ra­'a­kasa irane ta'a­tu­ku­'uro hap owakai e Iesui itotiaria pe temiit'in Peteru Iuwãu Tiaku piat pe mio tã e.
LUK 9:28 Mi'i hawyi 7 e'at hawyi Iesui tioto ra'yn topot­mu­'eria sese Peteru Iuwãu Tiaku tuwe­wywo yity'ok kape. Mi'i tote ihay To'ywot Tupana wywo.
LUK 9:29 Mi'i turan Iesui owa yt sa'a­wy­'iwuat ewy hin i hẽtyhot kahato i'ewyte hesokpe imehit kahato ikytsig kahato.
LUK 9:30 Mi'i hawyi meremo te'e­ru­we­mo­herep iwywo typy ok sa'a­wy­'iwuat Tupana ehay moherep haria atipy kaipyi. Wẽtup ok ase'i Musei wẽtup ok ase'i Eria.
LUK 9:31 Mi'iria atipy piat hẽtyhot hap ewywuat puo te'e­ru­we­mo­herep. Mi'i hawyi Musei Eria i'atuehay kahato Iesui wywo aikotã Iesui tunug irane Tupana miky­'esat etiat aikotã iku'uro irane Tawa Ieru­sarẽi me hap. Iku'uro hap aika­wiano hap ete e hap ete i'atuehay.
LUK 9:32 Mi'i turan Peteru Iuwãu Tiaku te'e­roket kahato itote ma'ato te'e­ru­we­hymut hawyi te'e­ra­'a­kasa ra'yn Iesui ẽtyhot hap. I'ewyte i'yaty­piaria sa'a­wy­'i­wuaria Tupana ehay moherep haria ase'i Musei ase'i Eria te'e­ra­'a­kasa ra'yn.
LUK 9:33 Mi'i hawyi Musei Eria Iesui yaty­pepyi tuwat turan Peteru to'e Iesui pe — Waku meiũpe wato­py­hu'at wuat'i e'at pe Mehĩ e. Pyno waku urutunug mesuwe wẽtup yat ase'i Musei mõtypot hamo wẽtup yat ase'i Eria mõtypot hamo hawyi wẽtup yat emõtypot hamo urutunug mesuwat yity'ok tote e Peteru Iesui pe ma'ato yt tepiat yt ikuap i popuo mio tã to'e katu­pono token'ẽ haype.
LUK 9:34 Mio tã e turan ywyhig put'ok'e Peteru Iuwãu Tiaku ete. Mi'i hawyi te'e­ro­ken'ẽ kahato.
LUK 9:35 Mi'i hawyi Tupana ehay ta'a­tukuap ta'yn ywyhig kaipyi — Mekepe eipy­'a­setpe ti Wẽtup ok Miit toĩne'en. Mi'i ti Uha'yru Uimi­'airo Wuat'i Miit'in Ehakye­ra'at hanuat e. Pyno eiwa­nẽtup to Uha'yru mienoi kape e Iesui piat pe I'ywot Tupana ehay put'ok'e atipy kaipyi.
LUK 9:36 Mio tã e hawyi Iesui tuweran toĩne'en Musei Eria te'e­ra­'aipok atipy kape hawyi. Mi'i hawyi Peteru Tiaku Iuwãu yt henoi hin i irania'in me ta'a­tu­'a­kasa hap ko'i ma'ato meiũran ta'a­tu­henoi ra'yn ta'a­tu­mikuap ko'i Iesui tehymut ra'yn gu'uro pywiat hawyi.
LUK 9:37 E'ihot'ok pe hawyi Iesui topot­mu­'eria wywo ipot'apyk yity'ok kaipyi yi hot kape. Mi'i turan put'ok­'i­'a­tu'e typy'i rakaria Iesui ete.
LUK 9:38 Mi'i hawyi wẽtup ok miit'in tok piat tikaykay ra'yn Iesui — Urumu'e hat eraha'at ro uha'yru wẽtup yn nakat kape e.
LUK 9:39 Ma'ato ahiag teke uha'yru piit pe hawyi tehay pirik wo ihay sa'ag hawyi ahiag tihuruk kahato uha'yru Uhyt e. Yt naku i kahato tuete hawyi iwẽnãpuk sa'ag kahato uimẽpyt e. Mi'i hawyi toha­ty'i haty'i hawyi iperup kahato toĩne'en mot'i tuete hawyi tuwẽtem porap i tuereto uimẽpyt piit pyi e. Mi'i hawyi meremo teke i ra'yn ipiit pe tuereto i'ahyk ahyk hamo e.
LUK 9:40 Emiit'in me ahiag hep hap ahẽtup wen ma'ato yt ta'a­tuhep kuap i e Iesui pe.
LUK 9:41 Mi'i hawyi Iesui to'e itotiaria pe — Are pãi eipe ti yt Tupana mohey hin i haria i'ewyte eiwa­nẽtup hap yt hãpyk hin i Tupana kape e. Areĩne'en mot'i ra'yn eiwywo eimu'e hamo wen ma'ato yt uimohey kahato i e. Mi'i hawyi to'e ahiag ipiit piat rakat e'ywot pe — Pyno eterut ro esa'yru uhowawi e.
LUK 9:42 Mi'i hawyi kurum tut Iesui ewawi turan ahiag tipun i yi tote hawyi toihuruk huruk kahato i'ewyte iwẽnãpuk. Ma'ato mi'i turan Iesui — Wãi'e ahiag me hawyi tuwẽtem hawyi ihãite. Waku hawyi Iesui tum ha'yru i'ywot pe.
LUK 9:43 Mi'i hawyi itotiaria te'e­ru­wa­nẽtup Tupana esaika hap iwato kahato Iesui mimo­herep hap kape.
LUK 9:44 Te'e­re­wa­nẽtup turan Iesui minug ko'i etiat turan Iesui henoi topot­mu­'eria pe — Yt eweiwaure tei'o mesuwat uimienoi e. Pywo ti rat Miit'in Eheyke'et kahato areĩne'en pytkai miit'in mima'at aru arepy­hu'at hawyi ui'auka teran haria po pe uhenoi.
LUK 9:45 Ma'ato yt ta'a­tukuap hin i kat to'e hawe mio tã e ma'ato hemiit'in apo yt i'atu'e teran i te'e­ro­ken'ẽ haype.
LUK 9:46 Mi'i hawyi Iesui potmu­'eria tu'uka to'ope ta'a­tuehay wo uwe kahu po'og tu'isa wo toĩne'en hap ete. Mi'i hawyi — Uito po'og eikai yn i'atu'e to'ope.
LUK 9:47 Mi'i hawyi Iesui tikuap ta'yn i'atu­wa­nẽtup hap hawyi toterut hirakat i'atue­wawi tuwe­wywo.
LUK 9:48 Mi'i hawyi to'e temiit'in me — Uwe uwe toĩne'en neran uhemiit'in akag wo waku mi'i miit topy­hu'at hira­karia powyro hat wo mẽpyt'in ky'e hat wo po'og torania kai e. Uwe uwe ti'a­tu­ky'e kahato hira­karia Uito ewy mi'i hat po'og uhemiit koro toĩne'en irania'in kai Tupana wanẽtup hawe e. Mi'i pote eweha'at ro meiũwat hirakat kape uwe uwe meiũwat hirakat ewywuat ky'e hat i'ewyte uiky'e hat sese e. Meiũwat hirakat ewywuat ky'e hat uiky'e hat toĩne'en mi'i hawyi mi'i hat waku ei'akag wo e. Pywo ti rat uwe uwe uiky'e hat toĩne'en mi'i hat piat Tupana to'e — Uiky'e kahato hat en e hira­karia ky'e hap upi e. Mi'i hat ti ei'akag wo toĩne'en Tupana wanẽtup hawe e. Pywo ti rat uwe uwe to'e hirakat yt i'ywot i yt ity i rakat pe — Ereke o ui'yat pe uimẽpyt no e hat pe — En po'og uhemiit e aru Tupana e Iesui. Meiũwat hirakat ewywuat ky'e kahato hat uimi­'airo ei'akag wo toĩne'en e. Uwe to'e hira­karia pe — To'iro watenuk hit e mi'i hat i'ewyte uhepe — To'iro watenuk e hat ewy toĩne'en e Iesui. Mi'i hat uiky'e hat i'ewyte uwe uwe uiky'e hat Ui'ywot Atipy piat ky'e hat toĩne'en e. Meiũwat hirakat ky'e hat ewywuat eipe pote uiky'e hat i'ewyte toĩne'en i'ewyte Uipo­'oro hat Tupana ky'e hano toĩne'en e. Uwe hirakat powyro hano toĩne'en mi'i ti po'og waku eimu'e hat akag e. Ta'i yt wemo­wato i hat po'og irania'in kai ei'akag wo e Tupana e Iesui ahepe temiit'in me.
LUK 9:49 Mi'i hawyi Iuwãu to'e Iesui pe. — Uruka­'iwat ga'atpo uruta­'a­kasa ra'yn wẽtup ok ahiag ko'i sopo hat e. Eset wo toi'a­tu­sopo kahato ahiag wen yt hewyry hin i ahupi hat. Mi'i pote — Wãi'u­ru­to'e tope katu­pono yt karãmuo i uruwywo hewyry rakat i pote e. Ta'i yt karãpe i mekewat miit eti'airo uruehamo emiit no pote — Yt naku i etunug Iesui motpap mesuwe yt uruwywo i ereto pote uruto'e tope e. Mi'i hawyi — Ma'ato uito ti eipe ewywuat kahato katu­pono uito i'ewyte Iesui mohey hat areĩne'en e uruepe. Mi'i hawyi — Wãi'u­ru­to'e i tope katu­pono toi'a­tu­sopo kahato ahiag itote ehay wo ma'ato yt hewyry i uruupi uruto'e tope i'atu'e Iesui pe topot­po­'o­roria.
LUK 9:50 Ma'ato Iesui tiwesat topot­po­'oro Iuwãu me i'ewyte irania'in topot­mu­'eria pe — Yt naku i wãi'e­wei'e wẽtup uhemiit yt hewyry i eiwywuat rakat pe e katu­pono ti aru tukup­te'en kahato uhemiit'in yt eimikuap ko'i i e. Mi'iria ti aru ma'ato howapy kahato uhesaika hap wywo eiperia ewywuat e. Mi'iria uimohey kahato haria tukup­te'en eiperia ewywuat uimohey kahato rakaria yt karãpe i eiwywo hewyry rakaria pytkai e. Mi'iria ti yt karãpe i uimohit ta'a­tuehay wuat haria katu­pono uhet wywo ta'a­tu­sopo ahiag e. Mi'i pote ti yt naku i irania'in uhemiit'in me — Wãi nei'o ewei'e yt eiwywuat hewyry rakaria i pytkai are e. Pyno po'og waku — Hẽ to uhyt mana ewei'e yne uhemiit'in waku nug haria pe e Iesui ahepe.
LUK 9:51 Iesui aipok hap atipy kapiat hamuat yt pya hin i mi'i pote Ieru­sarẽi kape yn toto teran to'auka aheka­wiano hap kape toto teran.
LUK 9:52 Toto Ieru­sarẽi kapiat tokosap mo teran tawa Samaria kape. Mi'i pote sa'a­wy'i toi'a­tu­po­'oro temiit'in te'yianme tawa kape ta'a­tuket hamuat heiam kat hamo.
LUK 9:53 Ma'ato toto tawa wato Ieru­sarẽi kapiat tokosap mo. Mi'i pote tawa Samaria piaria sakpo toto teran. Mi'i pote toi'a­tu­po­'oro temiit'in te'yianme tawa Samaria kape i'atu­mi'u kat hamo i'atuket hap kat hamo. Ma'ato tawa Samaria piaria yt tiky­'esat i katu­pono ta'a­tukuap ta'yn ta'a­tue­wa­nĩ­kaptia tawa Ieru­sarẽi piara kapiat tokosap mo toto Iesui hap. Ta'i Iuteu ywania Iesui pote yt ta'a­tu­ky­'esat i Iesui ut hap. Katu­pono tawa Samaria piaria gupte'en haria yt iky'esat hin i Iuteuria ko'i.
LUK 9:54 Tiaku Iuwãu mi'i tawa piaria e hap ta'a­tukuap hawyi apo'i­'a­tu'e Iesui pe — Uruka­'iwat waku apo aria uruikaykay atipy kaipyi yt eky'esat i haria tawa Samaria yawnia u hamo i'atu'e. Pyno waku eti'a­tu­moma yne mi'iria aria atipy kaipywiat wo i'atu'e Iesui pe.
LUK 9:55 Mi'i hawyi Iesui tuwe­morem wãito'e hamo — Yt rat yt eiwe'eg hin i e. Yt ariot i wyti miit'in auka hamo Uito e. Yt naku i eweikaykay aria atipy kaipyi miit auka hamo e. Miit'in ehakye­ra'at hamo ariot e.
LUK 9:56 Mi'i hawyi tuwat i ra'yn wẽtup tawa kape wẽtup mu'ap upi yi Samaria sakpo.
LUK 9:57 Mu'ap upi put'ok'e Iesui ewawi wẽtup ok tehay hamo — Mehĩ areto teran kahato eupi aikowo aikowo ewyry hap upi e. Uipap eupi emiit no areĩne'en neran e. Ehay moherep wuat'i ywania piat hamo atiky­'esat uito e.
LUK 9:58 Mi'i hawyi Iesui tiwesat — Pyno ereto teran pote waku sa'a­wy'i eto hap owakai etikuap niatpo kahato ereto uhupi hap e. Yt kat hin i ui'yat toĩne'en mesu­wa­rotiat e Iesui. Uito Miit'in Yke'et areĩne'en wen ma'ato yt kat i uhekat uimi'u mesuwe e. Ereto teran uhupi pote yi tote yn watoket yt kat i ai'yat pote e. Ta'i mesu­wa­rotiat awahuru ko'i tukup­te'en ta'a­tu­ka'a puo ma'ato Uito yt kat i uiket hap e. I'ewyte weitaria ta'a­tusok ko'i puat te'e­roket ma'ato Uito Wuat'i Miit'in Porekuat pytkai areket yahig me mu'ap upi yt kat i ui'yat i pote. Yt kat i uhekat mesu­wa­rote are'e epe e. Niatpo kahato uhemiit no hap waku miit'in tikuap tuwat uhupi teran haria e. Yt naku i eweiwat uhupi hawyi ui'atoiat niatpo kahato hap upi are e Iesui ahepe.
LUK 9:59 Mi'i hawyi Iesui tuwẽ­powat wẽtup ok kape — To'iro uhupi mehĩ e. Mi'i hawyi toiwesat Iesui — U pãi wen ma'ato sa'a­wy'i waku atipoi ui'ywot iku'uro hap kape mi'i hawyi isyp rokirẽ waku meremo areto eupi e.
LUK 9:60 Ma'ato Iesui to'e — Etipo­'oro iku'uro rakaria iku'uro rakat syp hamo uhyt e. Tukup­te'en ni iku'uro rakaria ewywuaria Tupana kape yt ihay i haria yt kuap i haria waku mi'iria po pe etoiat sa'up e'ywot poi e'ywot syp hamo uhyt e. Mi'i hawyi meremo ereto uhupi miit'in mu'e aikotã waku ta'a­tunug Tupana ta'a­tu­po­rekuat nuat enoi hamo e.
LUK 9:61 Mi'i hawyi wẽtup ok to'e Iesui pe — Ta'i areto teran eupi pãi Uhyt e ma'ato sa'a­wy'i ahẽtup teran ui'ywot uity pe sio waku sio yt hap e.
LUK 9:62 Mi'i pote Iesui to'e — Yt naku i wateput hap upi wate­ha'at at ka'ap ahewat­'ymo hap kape katu­pono mi'i tã watunug pote meremo wata'at e. Mi'i hap ewy kahato uwe uwe toto uhupi uhehay moherep hamo hawyi tewat­'ymo hap kape teha'at kahato hawyi toiky­'esat tomi­'atoiat ko'i hawyi ta'aipok i ra'yn sa'a­wy­'iwuat hap kape mi'i miit yt naku i topy'a pe uhemiit no. Mi'i miit yt naku i uhemiit no Tupana ehay moherep hamo aikotã waku watunug Tupana Aipo­typot no e hap moherep hamo e Iesui — Areto teran eupi wen e haria pe.
LUK 10:1 Wẽtup e'at Iesui Aika­'iwat ti'a­tu­'airo po'og 70 ok takaria topot­mu­'eria wo. Mi'iria typy ok tuereto toi'a­tu­po­'oro aikowo aikowo toto irane hap tawa kape te'yianme tawa ko'i upiat miit'in atumu'e yian notiat hamo.
LUK 10:2 Toi'a­tu­'airo topot­po­'o­roria hawyi toi'a­tu­nãpin i'atuwat hap eyianmete aitotã waku ta'a­tunug ipuo hap ete mio tã e — Woro­ho­'o­'airo eipe miit'in sem atumu'e hanuaria wo e. Miit'in haat rakaria ewywuaria Tupana wanuat nug hamuat e. Aikotã awati ewy kahato mi'iria tukup­te'en waku pe hamo e. Waku eweipuruk aimi'u wo e katupono awati sem ewywuat itote miit'in sem e. Yt eweipuruk kuap i hap ewy i'atu kahato awati ewy e. mi'i pote waku eiperia typy'i kahato ipuruk hamo e. Waku ewehẽtup ipuruk hamo Mikoi Ka'iwat Tupana pe — Etipo­'oro o meremo urupo­wyro hanuaria haat ko'i puruk hamuat ewei'e Ipuruk Hat Ka'iwat pe e. Waku wahẽtup Tupana pe aipo­wyro hap are. Mi'i hawyi temiit 70 ok takaria toi'a­tu­po­'oro tehay moherep hamo.
LUK 10:3 — Pyno eweiwat ro e ma'ato eiwe'eg wo o eimi­mu­'eria pupi are katu­pono irania'in itote ai'auka teran haype ne'i e. Ta'i woro­ho­'o­po­'oro ehewa­nĩ­kaptia py'a­setpiat eikup­te'en hamo aikotã aihũria tukup­te'en awahuru sem py'a­setpe hap ewy aru eweikup­te'en itote aikotã awyato ai'u teran haria ewywuaria itote tukup­te'en uhetiat ewei'a­tu­mu'e turan e topot­po­'o­roria 70 ok takaria pe.
LUK 10:4 Eiwat hap upi yt eweitioto tei'o ehekat ko'i i'ewyte mekewat sa'up eiam me yt kat i sa'up eweitioto o e. I'ewyte ehesokpe eiam yt eweitioto tei'o e. Wẽtup yn eipy piat eipy sokpe mi'i waku eretopag e. Mi'i hawyi yt eweikup­te'en mot'i i mu'ap upi irania'in wehay miky­ry'i hamo e. Ma'ato eweiwat ro hãpyk mekewat tawa ko'i kape eipo­'oro hap ko'i nug hamo i'atu­mu'e hamo are ehepe e Iesui.
LUK 10:5 Kat etawa kat etawa pe put'ok­'e­wei'e hawyi o wẽtup getap we yn eiwe­hyt'ok hawyi waku ewehẽtup Tupana pe — Eti'a­tue­ha­kye­ra'at kahato ro meiũwat getap wiaria hawyi eti'a­tu­moe­hãite yne miit'in meiũwat getap wiaria o ewei'e itote e.
LUK 10:6 Mi'i hawyi getap wiaria eimienoi ko'i Tupana mipoi­tyro ko'i tukup­te'en ei'e hap ewy e. Ta'a­tukuap teran ehay pote meremo ta'a­tukuap e. I'atu­wese ehete pote ei'e hap — Tupana eti'a­tue­ha­kye­ra'at meiũwat yat piaria o ei'e hap sa'a­wy'i eimiẽtup ewy Tupana tunug na'yn ei'e hap ewy wen ma'ato mekewat yat piaria yt i'atu­wese i uhehay kuap hamo pote hawyi wu'uka teran haype pote eimiẽtup — Tupana eti'a­tu­poi­tyro meiũwat yat piaria ei'e hap Tupana yt tum i ta'a­tu­mo­wepit hap eimiẽtup sa'a­wy­'iwuat ewy e.
LUK 10:7 — Mi'i hawyi wẽtup getap we yn eweikup­te'en eiky­'esat haria piat pe e. Eiwe­hyt'ok hawyi itote yn o eweikup­te'en e. Kat som ta'atuium ehepe eimi'u wo mi'i ti waku ewetu'u e. Yt eweiwe­mõti tei'o i'atumium ete yt kat sa'up i katu­pono eipe ti i'atu­mu'e haria pote eipoi eipotpap sa'up mo e. Ma'ato yt naku i eheha­mane'i yne getap ko'i upi sẽtup sẽtup eharia ewy e. Sa'a­wy­'iwuat eiwe­hyt'ok hawe yn eweikup­te'en hawyi itote yn eweinuk e.
LUK 10:8 Tawa piaria waku kahato eweipuẽti e haria pote ehu'u ro kat ko'i kat ko'i ta'a­tu­mierut eimi'u wuat.
LUK 10:9 Mi'i tote yne i'ahu rakaria waku eweimoe­hãite e. Waku kotã ewei'e itotiaria pe — Tupana topy­hu'at meiũ Porekuat no hap yt pya hin i eikai ewei'e iwese etawa piaria pe.
LUK 10:10 Ma'ato tawa piaria yt i'atu­wese i ehete pote waku eiwe­nõ'ẽ i'atue­tawa pyi hawyi mu'ap upi itote pyi eiwe­pit­pit'ok i'atue­tawa sawiu eipy etiat hep hamo hawyi ewei'e wuat'i tawa piaria ehamo — Pyno mehĩ'in mana'in Tupana ehay pun haria eipe ewei'e i'atuepe e. Pyno yt uruiky­'esat i ra'yn ehetawa sawiu urupy ete ewei'e o i'atue­wawi. Tupana ehay pun haria ra'yn eipe ewei'e itotiaria pe e. Mi'i hap ewetunug hawyi meiũwat tawa piaria tikuap ta'yn uimohey hap pun haria ne'i mi'iria i'ewyte Tupana tikuap ta'yn uimohey hap pun haria hap e Iesui topot­po­'o­roria pe 70 ok takaria pe.
LUK 10:11 Mio tã waku ewei'e itote — Pyno urumienoi Tupana Mipo­'oro Aheha­kye­ra'at hat etiat sehay yt eweiky­'esat i hawyi ehetawa sawiu urupy etiat yt uruiky­'esat i hawyi uruipit­pit'ok ewei'e o e. Mi'i tã urutunug ei'a­piheg irane hap enoi hamuat hap ewei'e o e. Koitywy Tupana ti'a­tu­'a­piheg aru yt eweiky­'esat i urumienoi pote ewei'e o e. Tupana topy­hu'at Miit'in Porekuat nuat hap yt pya hin i eikai toĩne'en ma'ato yt eweiky­'esat i pote ei'a­piheg hap yn topy­hu'at irane ewei'e o yt uiky­'esat i haria pe e.
LUK 10:12 Mi'i hawyi Iesui to'e wuat'i tawa ko'i puaria towa­nĩn­kaptia pe yt tomohey i haria pe — Arewak uipy'a pe ei'a­piheg hap ete e. Pywo ti rat are'e ehepe Tupana mi'a­piheg ko'i eweikup­te'en aru e. Karãpe put'ok'e aru mekewat uhe'at hawyi are'e Tupana pe uwe waku rakaria uwe yt naku i rakaria hap e'at pe ti aru ahenoi Tupana pe mio tã — Eipe ti uipot­po­'o­roria yt ky'esat i haria pote yt naku i pe eweikup­te'en po'og sa'a­wy­'i­tewuat tawa Sutuma piaria kai sa'a­wy­'iwuat uimiwuk kai are'e. Mi'iria yt naku i kahato rakaria ati'a­tu­moma ra'yn aria wo atipy kaipywiat no ma'ato eipe po'og yt naku i wo eweipy­hu'at tawa Sutuma piaria kai uhehay enoi haria yt eweiky­'esat i pote are aru ehehay uhetiat pun haria pe e Iesui topot­mu­'eria pe.
LUK 10:13 Mi'i hawyi po'og tohenoi tawa ko'i puaria yt tomohey haria i etiat — Ahenoi wyti Iuteuria kaipy­wiaria tawa Kurasĩ miaria gupte'en haria i'ewyte tawa Pesaita piaria apiheg hap etiat e. Yt naku i pe te'e­ro­py­hu'at irane e. Arewak uipy'a pe ei'a­piheg hap ete e. Te'e­ra­'a­kasa uiminug wakuap ko'i kape yt irania'in ewywuat i ma'ato mi'i pytkai yt uimohey teran hin i. Uito iwato kahato rakat hap upi i'atue­hamuat atunug kahato pytkai yt miit minug ewywuat i atunug ma'ato uimohit ne'i e Iesui.
LUK 10:14 Nimo kahato tawa Tiru piaria tawa Sĩtau piaria Tupana ti'a­tu­moma e. Tawa Sĩtau piaria tawa Tiru piaria topap yne itote e miwan me e. Mi'iria yt naku i sese rakaria tukup­te'en hap watikuap. Pywo ra'yn i'atu­minug sa'ag ko'i po'og iwato toĩne'en wuat'i sa'a­wy­'i­wuaria kai wen ma'ato uimohey pun hap mesu­wa­ro­tiaria tawa Kurasĩ piaria tawa Pesaita piaria po'og yt naku i nug haria Tawa Sĩtau tawa Tiru piaria yt naku i nug hap kai katu­pono uimohey hap pun haria mi'iria pote e. Ta'i ati'a­tu­mu'e kahato mi'iria Tupana ehay wakuat wo ma'ato yt uimohey i haria hap yn topy­hu'at yt kat i uimohey hap e. Are pãi arewak uipy'a pe ei'a­piheg hap Tupana piat hap aru hap pupi. Yt naku i kahato hawuo topy­hu'at aru tawa Kurasĩ tawa Pesaita piaria e. Sa'a­wy'i tawa Sĩtau piaria tawa Tiru piaria yt te'e­ra­'a­kasa hin i uiminug wakuat nug hap ko'i kape ma'ato te'e­ra­'a­kasa pote tawa Kurasĩ tawa Pisaita piaria ewy meremo te'e­ru­we­morem Tupana kape hap atikuap. Te'e­ra­'a­kasa hawyi meremo sokpe i'anam nakat ewywuat ta'a­tupag ta'a­tuepiit ete haty nug hamo paata­'a­tu'e Tupana kapiat hap moherep hamo are e. Mi'i hawyi yi tote te'e­ra­'apyk hawyi ywytup ko'i ta'a­tu­'akag me ta'a­tupag ta'a­tueko ewy ta'a­tu­minug sa'ag atoiat hap moherep hamo e. Ma'ato eipe ti tawa Kurasĩ piaria tawa Pesaita piaria yt naku i pe eweipy­hu'at po'og tawa Tiru piaria kai tawa Sĩtau piaria kai aru are katu­pono ewei'a­kasa uiminug wakuap ko'i i'ewyte uhehay Tupana etiat yn hap wen ma'ato yt ewei'a­tu­'atoiat teran hin i eiminug sa'ag hap ko'i e.
LUK 10:15 Mi'i hawyi Iesui — Arewak uipy'a pe ei'a­piheg hap Tupana piat hap pupi tawa Kawa­na'ũ piaria e. — Ta'i uruto po'og na'yn tora­nia'in kai uruto­py­hu'at e haria eipe wen ma'ato eiwe­ma'at ne'i mio tã ewei'e katu­pono ti aru eiku­'uro hap topy­hu'at irane hawyi yt uwe i te'e­ro­py­hu'at ehetawa pe aru eikuap haria tukup­te'en mesuwat yi tote katu­pono eipe yt uimohey i haria pote are e Iesui tawa Kawa­na'ũ piaria pe.
LUK 10:16 Mi'i hawyi to'e i ra'yn topot­po­'o­roria pe — Uwe eimienoi kapiat wanẽtup hat wyti aru i'ewyte uimienoi kapiat wanẽtup hanuat. Yt eiky­'esat i hat ti aru i'ewyte yt Uito i wyti uiky­'esat hat ra'yn e. Yt uiky­'esat hat i pote i'ewyte yt Uipo­'oro Hat Tupana ky'esat hat i e 70 ok takaria pe i'atu­po­'oro haype.
LUK 10:17 Mi'i hawyi 70 ok takaria Iesui ti'a­tu­po­'oro ra'yn tawa ko'i upiat tehay henoi hamo. Mi'i hawyi 70 ok takaria tuwat hawyi i'atu­ko­hye­wyry hap tawa ko'i upi miit'in mu'e hamo hawyi te'e­ra­'aipok i ra'yn Iesui kape i'atu­wepit kahato. Mi'i hawyi te'e­ro'e — Uruka­'iwat i'atu'e pywo wyti ahiag tuwat ra'yn esaika wuat urui'a­tu­sopo hawyi i'atu'e. Eset nywo urui'a­tu­sopo kuap kahato ahiagnia i'atu'e Iesui pe.
LUK 10:18 Mi'i hawyi Iesui to'e i ra'yn 70 ok takaria pe — Ta'i uimiium uhesaika hap po'og ahiag kai e. Sa'a­wy'i ahiag atipy pe toĩne'en Tupana yatype hemiit no wen ma'ato tuwe­mo­wato teran po'og Tupana kai hawyi Tupana tipun ahiag atipy kaipyi yi kape e. Mi'i hap Uito ara'a­kasa ahiag Tupana ti'ok­hytpun turan. Merep merep'e hap put'ok'e hap ewy ta'at atipy kaipyi yi kape ahiag e. I'ewyte eweiwat turan ara'a­kasa i ta'at i ra'yn ahiag hap ara'a­kasa uhehay ewei'a­tu­mu'e miit'in wuat'i tawa ko'i upi turan e Iesui topot­po­'o­roria 70 ok takaria pe.
LUK 10:19 Mi'i pote uimiium uhesaika hap ehepiat po'og hesaika ahewa­nĩkap sese ahiag kai. I'ewyte eiko­hye­wyry hap upi miit'in mu'e uhehay wo turan moi ok yt hesaika i ehete i'ewyte sapot yt haty kuap i eipiit ete e. Pywo pe ti yt kat i eipyhyp kuap eipe uhehay ehewyry hap upi uhehay moherep hamuat turan e Iesui temiit'in me.
LUK 10:20 Ga'atpo ra'yn atum ehepe uhesaika hap wuat'i nug kuap hamo e. Mi'i pote waku kahato ahesaika ewei'e eipy'a pe. Waku kahato ahesaika hap ahiag sopo hamo ewei'e eipy'a pe e. Mi'i pote eiwepit kahato mesup e. Pyno waku eiwe­mo­wepit uhesaika hap toĩne'en eipiit ete wuat'i nug hamo wen ma'ato po'og po'og waku ewei'e eipy'a pe — Uimo­wepit hap sese ti toĩne'en mesup katu­pono Tupana uheha­kye­ra'at ra'yn wuat'i e'at pe uimo­wepit hap sese po'og waku ewei'e eipy'a pe e. — Ta'i uhet sese toĩne'en miwan me atipy pe Tupana mieha­kye­ra'at areĩne'en pote uiwepit kahato mesup po'og uhesaika ahiag sopo miit'in moehãite hap kai po'og waku ewei'e eipy'a e. Mi'i Tupana piat eheha­kye­ra'at wuat'i e'at piat hap are waku katu­pono ehet ko'i toĩne'en atipy pe miwan me uwe Tupana mieha­kye­ra'at ko'i sese e hap miwan note e. Mi'i hap po'og waku toĩne'en wuat'i kai eimo­wepit hap e Iesui temiit'in me ahepe.
LUK 10:21 Mi'i hawyi Tupana Pã'ãu timo­wepit ra'yn Iesui hawyi to'e — Papai waku kahato ti En e. Atipy piat Morekuat nuat i'ewyte mesu­wa­rotiat Morekuat nuat. Waku kahato en Papai katu­pono emikuap ko'i yt heremo i rakat ko'i yt etimo­herep hin i — Uruikuap yne po'og torania kai ra'yn e haria pe ma'ato — Yt uruikuap i kahato te e haria pe hira­karia ewywuaria pe etimo­herep ta'yn ekuap hap uimi­mo­herep hap ko'i uhehay wakuat emiky­'esat ewy e Iesui To'ywot pe.
LUK 10:22 Mi'i hawyi Iesui to'e temiit'in me — Tupana tum na'yn uhepe towanuat ko'i apykok hamo tesaika hap e. Ta'i Ui'ywot yn ni uikuap hat sese e. Ui'ywot yn nyti Uito Tosa­'yru kuap hat sese e. I'ewyte Uito yn nyti Ui'ywot kuap hat e. Ha'yru yn nyti To'ywot kuap hat sese e. Ma'ato uwe uwe pe atimo­herep teran Ui'ywot kuap hamuat mi'iria ti aru Ui'ywot kuap haria te'e­ro­py­hu'at e.
LUK 10:23 Pyno uiwy­ria'in e i'atu kahato sa'a­wy­'i­wuaria Tupana ehay moherep haria te'e­ra­ha'at teran kahato uhowawi rakaria ma'ato yt te'e­ra­ha'at kuap i yt uhe'at i te pote e ma'ato eiperia ti eweha'at ra'yn uikuap haria sese ra'yn eipe. Mi'i pote ti are'e ehepe eheha ko'i yt uwe wuat ewy i tukup­te'en eheha wuat ewa'a­kasa uhowawiat haria eipe pote e. Eipe po'og Tupana mipoi­tyro ko'i torania kai are e Iesui topot­po­'o­roria 12 ok takaria pe.
LUK 10:24 Katu­pono sa'a­wy­'i­te­wuaria Tupana ehay enoi haria i'ewyte porekuat nuaria ko'i hekatup kahato mesuwat e'at piat e. Te'e­ra­'a­kasa teran ei'a­kasa hap ko'i kape ma'ato mesuwat e'at pe yt put'ok'e i te i'atu­kup­te'en hap e'at pe e.
LUK 10:25 Mi'i hawyi wẽtup ok miwan enoi hat apo'e Iesui pe — Urumu'e hat e aikotã som waku uheĩne'en hap sese puẽti hamo atunug e yt pywo pe i ma'ato toima'at reran haype ne'i apo'e.
LUK 10:26 Mi'i hawyi Iesui tiwesat — Etikuap apo aikotã Musei mienoi ko'i e.
LUK 10:27 — Ta'i atikuap e. — Etiky'e o Tupana yn epy'a pe e. Etiky'e yne ewanẽtup hawe. Etiky'e Tupana yne ewe'eg hawe e. I'ewyte eti'a­tu­ky'e irania'in yne ro eweky'e hap ewy e tomiwan me e miwan enoi hat Iesui apo'e hawyi.
LUK 10:28 — Pywo kahato uiwesat en uhyt e Iesui. Mi'i ko'i etunug hawyi eieĩne'en hap sese etipuẽti ra'yn e.
LUK 10:29 Mekewat miwan enoi hat — Uito po'og waku irania'in kai e hat toĩne'en pote yt toi'a­tu­ky'e hin i irania'in. Mi'i pote to'e Iesui pe — Uwe pyno waku atiky'e irania'in e.
LUK 10:30 Mi'i hawyi Iesui henoi sehay iã'ãkap tope uwe waku wati­ky'e hap enoi hamuat — Sa'a­wy'i so wẽtup ok Iuteu ywania kaipywiat toto ra'yn tawa Ieru­sarẽi kaipyi tawa Ieriko kape. Mi'i hawyi mu'ap upi tuwe­mo­herep sero'ok takaria. Mi'iria mu'ap upiat hat esokpe ta'a­tuhep yne hawyi ta'a­tu­'ahyk ahyk ne'i e. Porap ta'a­tu­'auka e i'ahyk ahyk hawe e. Mi'i hawyi ta'a­tu­'atoiat mu'ap tote e. I'ewyte ta'a­tue­roto yne heka­re'en e.
LUK 10:31 Ta'a­tu­'atoiat hawyi pa'i Iuteu kaipywiat toto ipuo e. Mi'i ta'a­kasa hawyi tokosap ne'i mi'ahyk ahyk ywytpuo e Iesui.
LUK 10:32 Mi'i hawyi Irewi ywania kaipywiat hat Tupana yat piat motpap nug hat tut e. Mi'i ti i'ewyte ipuẽti mekewat i'atu­mi­'ahyk ahyk ma'ato pa'i ewywuat kahato pote yt ta'a­kasa teran i iku'uro rakat hawyi tokosap ne'i i'ywytpuo e.
LUK 10:33 Mi'i hawyi meiũran put'ok'e wẽtup ywania mekewat yi Samaria kaipywiat e. Yt ai'y­wania Iuteuria ywania miky'e hin i Samaria ywania ma'ato mi'i pytkai mekewat yi Samaria kaipywiat teha'at kahato mekewat mi'ahyk ahyk kape hawyi toiky'e kahato topy'a pe.
LUK 10:34 Mi'i hawyi tuwe­po­hagnug mohag ikap takano i'ewyte mahy ewy wuano hawyi sokpe wo ra'yn toipo'i po'i. Tepiat ipohag nug waku hawyi mekewat yi Samaria kaipywiat hupit ra'yn tohũ ok tote mi'i hawyi getap kapiat totioto hamo. Miit'in ket howare pe hawyi heka­tuwy wo toĩne'en wãtym muo ka'ap i'apykok hamo e.
LUK 10:35 E'ihot'ok pe hawyi yi Samaria kaipywiat tum na'yn sa'up iwato kahato rakat getap ka'iwat pe mekewat sero'ok mi'ahyk ahyk poi hamo hawyi typy i'ape nu Uru kawiat tutum ha'up iwato kahato rakat hawyi tohenoi getap ka'iwat pe — Etiky'e ro meiũwat i'ahu rakat e. Mi'i hawyi ariot hawyi po'og atum epe iky'e hap sa'up mo e.
LUK 10:36 Tohenoi hawyi Iesui apo'e ra'yn Tupana ehay miwan miat enoi hat pe — Uwe kahu meiẽwat sero'ok takaria mi'ahyk ahyk ky'e hat e.
LUK 10:37 Mi'i hawyi miwan enoi hat tiwesat — Mekewat yi Samaria kaipywiat iwese rakat iky'e kahato hat e. Mi'i ti toto mi'ahyk ahyk kape ipohag nug hamo e. Mi'i hawyi Iesui to'e — Pyno ereto ro i'ewywuat nug hamo ewanĩ­kaptia ky'e hamo e mekewat — Uwe waku wati­ky'e irania'in apo'e hat pe.
LUK 10:38 Mi'i hawyi Iesui temiit'in wywo put'ok­'i­'a­tu'e wẽtup tawa pe. Mi'i tote hary­poria Mata ehap het rakat — Eiwe­hyt'ok o ui'yat pe Mimi e Iesui pe.
LUK 10:39 Mi'i hawyi te'e­ru­we­hyt'ok hawyi mana Mata kypy'yt Maria toĩne'en Iesui yatype imienoi kapiat tuwa­nẽtup hamo.
LUK 10:40 Ma'ato mana Mata ipotpap yn mi'u toi'a­tu­'anug kahato Iesui moenuk hamo. Ikypy'yt yt ipowyro i hawyi ipy'ahak ta'yn toky­py'yt ete hawyi to'e — Uipo­rekuat e uiky­py'yt Maria wyti yt uipo­wyro hin i e Iesui pe. Uiweran kahato uipotpap an e. Pyno etipo­'oro o uiky­py'yt Maria uipo­wyro hamo e.
LUK 10:41 Mi'i hawyi Iesui tiwesat — Uiwy Mata uiwy Mata e eminug ko'i kape yn erewa­nẽtup kahato e.
LUK 10:42 Waku wen ma'ato toĩne'en po'og waku hap uimi'u nug hap kai katu­pono Uito uiwy­wuaria uhehay kapiat wanẽtup haria waku wy uiwa­nẽtup hawe e. Uhehay kuap hap mana Maria ti'airo ra'yn e. Mi'i hawyi yt uwe i tihep kuap imiky­'esat uiwywuat hap e. Pywo kahato uikuap hap mana Maria piat wyti aru yt uwe i ihep kuap ui'ya­type tuwe­mu'e hap e Iesui mana Mata pe.
LUK 11:1 Wẽtup e'at pe Iesui toto tehay teran Tupana wywuat hamo. Mi'i hawyi ihay kahato To'ywot wywo hawyi wẽtup ok ipotmu'e hẽtup Iesui pe — Urupo­rekuat urumu'e ro En Tupana kapiat Tupana wywuat uruehay hamuat hap ete e. Aikotã ahet'ok hat Iuwãu ti'a­tu­mu'e topot­mu­'eria hap ewy e katu­pono uruiky­'esat En ewywuat uruehay Tupana wywuat hap e.
LUK 11:2 Mio tã tohẽtup hawyi Iesui henoi ra'yn — Pyno Uimohey haria yt atiky­'esat i ehehay Tupana kape ewehu­'at'i hu'at'i eiwẽ­pap'i wẽpap'i ahut ewy hap yt atiky­'esat i e. Atiky­'esat ti ehehay eipy'a pyi Tupana wywo hap e. Mi'i e hap eipy'a piat waku ewei'e ma'ato emiky­'esat ewy hap ehehay ewy hap atiky­'esat e. Sa'a­wy'i waku wato'e — Uru'ywot Atipy piat waku kahato En waku wato'e. Uruimõ­typot kahato En waku wato'e e. Uruiky­'esat emõtypot hap mesuwat yi tote wuat'i miit'in py'a­setpiat eset mowato hap uruiky­'esat kahato waku wato'e. Tupana ereĩne'en no mesuwat yi toto Wuat'i Miit'in Potypot no mi'i hap uruiky­'esat. Uruiky­'esat kahato mesu­wa­ro­tiaria wuat'i ywania tunug emiky­'esat ewywuat hap aikotã atipy piaria tunug emiky­'esat hap ok tã hap uruiky­'esat waku wato'e e.
LUK 11:3 Tupana mesuwat e'at uruihẽtup epe urue'u'i mesu­wa­rotiat urumi'u hap uruhẽtup epe waku wato'e e.
LUK 11:4 Urui'a­parap kahato ewawi Tupana mi'i pote uruhẽtup kahato ewawi waure wo ereĩne'en uruminug sa'ag ko'i ete hap waku ewei'e e. Tukup­te'en kahato uruma'at haria uruetiat i'aparap haria. Mi'i hap sa'ag ko'i ete waure wo teran urutu­kup­te'en haype aikotã En ereĩne'en waure wo eetiat uru'a­parap hap ko'i kai hap ewy katu­pono waure wo En ereĩne'en uruwe­te­weru epiat hap kai pote En ewywuat urutup­te'en neran waku ewei'e Tupana pe e. Mesuwat e'at pe i'atu kahato uruiã'ãg ahiag ehay wo yt naku i nug hamo mi'i pote urupo­re­roto uruiã'ãg hap sakpuo urukosap hamo katu­pono yt urutunug po'og teran i yt naku i nug hap waku ewei'e Tupana pe e Iesui topot­mu­'eria pe. Uiwy­ria'in waku mi'i e hap ok tã ewehẽtup turan Tupana kape ehehay Tupana wywo e ma'ato eipy'a pyi ehehay eimi­ky­'esat ewy yn waku. Yt atiky­'esat i ewehu­'at'i hu'at'i mesuwat uhehay e Iesui ahepe.
LUK 11:5 Mi'i hawyi Iesui to'e ahepe — Ai'ywot Tupana tum aru aimiẽtup ok tã ahepe e. Yt naku i aipohep Tupana piat aimiẽtup hap ko'i ete are e. Waku wahẽtup hẽtup i Tupana pe tutum ahepe hap kape e Iesui ahepe.
LUK 11:6 Ta'i mi'i hap ewy waku wahẽtup aikotã karãmuo put'ok'e ai'yat pe aiwy wãtym turan hesy'at kahato hap wywo hap ewy waku watipoi ma'ato aimi'u yt kat i pote waku watuwat aheka­tuwy yat kape hawyi waku wahẽtup aheka­tuwy yat piaria õ'ẽ haria poi hamo e. — Uhyt mana wato'e uruwy­ria'in tõ'ẽ iuẽpe uru'yat pe hawyi yt kat i urue'u'i turan i. Uruiky­'esat etipuru porap'i eikaipyi u'i uiwy­ria'in poi hamo hesy'at kahato pote waku mio tã wato'e.
LUK 11:7 — Ma'ato wãtym hake turan pote aiwesat to'yat pyi. — Watoket uhyt mana yt ehẽtup i ra'yn o u'i meikoran katu­pono wãtym na'yn katu­pono are'o­kenhyp ta'yn wyti urutoket ra'yn wyti e. Ta'i te'e­roket yne ra'yn wyti uimẽt­pyt'in ui'yat piaria. Pyno meiũpe urue'yni ko'i poity'i pote yt areto kuap i ra'yn ewawi emiẽtup ium epiat hamo e.
LUK 11:8 Ma'ato mi'i hawyi — Eherut ro uhyt mana katu­pono uruwy mu'ap upiat put'ok'e rokirẽ hesy'at kahato wato'e i wato'e i kahato hawyi i'ãpe­'ok'am hawyi u'i tutum ahepe yt toket kuap i hawyi wahẽtup mot'i hawyi mi'i tu sake ti aru tut ahowawi u'i ium hamo e.
LUK 11:9 Pyno Tupana kape waku ahehay mi'i uhã'ãkap ok tã ahehay turan ahẽtup hẽtup kahato mekewat u'i ky'esat hap ewy ui'e hap ewy e. Mi'i pote ti aru tutum ahepe watikat kahato Tupana kape pote wati­puẽti aru e. Teg teg wato'e Tupana e'oken­'ypy ete hawyi aru to'o­kenhyp to'o­ken­'ypy hawyi aru tutum kahato aimiẽtup ewy wyti aru ahowawi e.
LUK 11:10 Ta'i wahẽtup hẽtup mot'i hawyi Tupana tum aru ahepe are e. Watikat turan Tupana miium turan yt naku i aipohep aimiẽtup ete pyi mi'i pote wati­puẽti irane aimiẽtup ipo pyi e. Waku Uhyt Uhyt Uhyt Mimi Mimi Mimi wato'e pot'i hawyi to'o­ken­hyp'ok hap ewy wyti aru are e.
LUK 11:11 Uipot­mu­'eria Tupana hegyi'at kahato pote tutum teran kahato aimi­hẽtup ahepe pãi are e. Ta'i karãpe aimẽ­pyt'in hẽtup u'i pira ahepe ta'a­tu­he­sy'at hawyi mi'i pote watum i'atu­miẽtup ko'i ahepiat i'atu­ky'e aimẽ­pyt'in mote e. Yt karãpe i yi ne'i watum yi aimẽ­pyt'in me u'i ẽtup ahepiat hawyi e. I'ewyte pira kã'ã ta'a­tu­hẽtup ahepe pote watum pira e. Yt karãpe i watum i'atuepe moi ne'i katu­pono wati­'a­tu­ky'e kahato aimẽ­pyt'in ko'i pote e.
LUK 11:12 Pyno aimẽ­pyt'in waipaka upi'a ta'a­tu­hẽtup pote hupi'a watum e. Yt karãpe i ti watum aimẽpyt pe sapot hupi'a tohẽtup hawyi are ma'ato toĩ pote i'atu­miẽtup ewywuat watum aha'y­ru'in me ahaki­'yt'in me e.
LUK 11:13 Ei'y­wot'in eity'in ni eipoi kahato eimiẽtup ko'i ewywuat. Yt naku i nug haria eity'in ei'y­wot'in pytkai waku yn ta'a­tunug neran ehepe eiky'e haype e. Pyno Ai'ywot atipy piat Tupana ti yt karãpe i sa'ag nug hat e. Waku Kahato rakat toĩne'en Ai'ywot Tupana e. Mi'i tupono ti aimiẽtup kat ko'i tomi­ky­'esat ewy yn aimiẽtup tutum. Wahẽtup Ipã'ãu Wakuat miky­'esat ewywuat pote tutum e. Mesu­wa­ro­tiaria yt nakuaria i pytkai hum kuap wakuap yn. Ta'a­tu­mõ'ẽ kahato mi'u wakuat ko'i ta'a­tu­mẽ­pyt'in me. Mi'i hap ewy ti po'og Ai'ywot atipy piat timõ'ẽ kahato po'og po'og ahepuo wahẽtup kahato hawyi aito imẽpyt'in mote e Iesui ahepe.
LUK 11:14 Pyno wẽtup e'at pe Iesui ipotpap kahato miit'in moehãite hap ete. Mi'i hawyi itote toĩne'en yt ihay kuap i rakat ahiag topiit piat pote rakat. Mi'i ti Iesui tisopo ra'yn hawyi ihay kuap i ra'yn. Mi'i pote irania'in itotiaria te'e­ru­wehum kahato Tupana ete.
LUK 11:15 Ma'ato irania'in te'e­ro'e sa'ag Iesui ete itote — Ta'i ahiagnia akag esaika hamo mekewat ahiag potypot Peusepu aipusu puat hesaika hamo wyti Iesui ti'a­tu­sopo meiũwat miit piit piat ahiag i'atu'e sa'ag Iesui mohit hamo.
LUK 11:16 Irania'in itote — Uhyt Mimi i'atu'e etunug no emisepap yt miit'in minug kuap i hap ewywuat iwato rakat atipy kaipywiat Tupana kaipyi hap uruiky­'esat i'atu'e. Yt miit'in minug kuap i iwato rakat merep hap ewy etunug paini ewywuat mi'i hawyi meremo — En Uruetu­pana uruto'e i'atu'e sa'ag hã'ãg hap ne'i.
LUK 11:17 Ma'ato Iesui tikuap i'atu­wa­nẽtup hap sa'ag hawyi to'e — Wẽtup tama piaria tu'uka tu'uka kahato to'ope to'ope hawyi meiũran ti aru meiẽwat tama wo'o­ky'e hap esaika hap yt kat i ra'yn topy­hu'at itote e. I'ewyte getap wiaria tu'uka tu'uka to'ope to'ope hawyi meiũran yt kat i wo'o­wese hap topy­hu'at itote hawyi yt i'atu­potpap kuap i kat nug kat nug hap ete yt to'o­wesat i hawyi e.
LUK 11:18 Pyno — Ahiag koro Peusepu esaika hamo eti'a­tu­sopo ahiagnia ewei'e ti uhepe ma'ato ahiag akag emiit'in ko'i tu'uka tu'uka to'ope to'ope pote yt kat i to'o­wesat hap toĩne'en itote hawyi to'o­moma hap yn topy­hu'at itote irane e. Yt karãpe i ti tu'uka ahiag akag temiit'in ahiagnia wywo e. Ahiag akag yt to'o­sopo teran hin i ahiagnia wyti miit'in piit pyi ma'ato to'o­po­wyro to'o­ka­wiano hap yn ta'a­tu­ky­'esat e. Pyno yt eiwe'eg hin i are e. Kat pote som — En ahiag akag koro esaika hamo wyti eti'a­tu­sopo ahiagnia ewei'e katu­pono pywo ti rat ahiag koro yt ti'a­tu­sopo teran i temiit ahiagnia miit'in piit ko'i pyi uiminug ewy are e.
LUK 11:19 Pyno koitywy apo'e­wei'e eiwo­'ope — Kat esaika hamo som toi'a­tu­sopo ahiagnia e hap ete ewei'e uhepiat. Pyno ahenoi ehepe uwe esaika hamo ati'a­tu­sopo sopo ahiag ko'i sem hap miit'in piit pywiat hap e.
LUK 11:20 Pyno pywo ti rat Tupana esaika hamo ti rat ati'a­tu­sopo ahiagnia e. Ta'i Tupana po wo ati'a­tu­sopo ahiagnia are e. Tupana puĩ'ã wo ati'a­tu­pugha ahiagnia miit'in piit pyi are e Iesui. Mi'i pote ti Tupana topy­hu'at mesuwe Morekuat no i ra'yn e.
LUK 11:21 Pyno ahiag ni yt toĩne'en kuap i po'og morekuat no miit'in piit pe katu­pono karãpeĩ uhesaika hap topy­hu'at surara akag koro hesaika kahato rakat ewywuat ahiagnia esaika hap moma kahato hano ti areĩne'en Tupana esaika hap ti toĩne'en uhehay wo.
LUK 11:22 Mi'i pote karãpe wẽtup ok surara koro toĩne'en to'yat pe tesu­rara sem wywo to'yat apykok haype mi'i hawyi yt uwe i heka­re'en sero'ok kuap surara akag wo toĩne'en itote pote i'ewyte tesu­ra­ra'in sem tukup­te'en itote pote hesaika hap pupi sero'ok ko'i te'e­ro­ken'ẽ kahato are e.
LUK 11:23 Pywo pe ti uwe uwe yt uhupiat i hat uhewa­nĩ­kaptia wo te'e­ro­py­hu'at e. Yt uipo­wyro i miit'in atuekyi uhowawiat hamo pote miit'in sytpok uhowapyiat haria wo tukup­te'en are e. Ta'a­tu­sytpok ne'i uimohey hap kaipyi i'atuehay miky­ry'i uhetiat hap wywo pote yt uika­wiano hin i tukup­te'en are e. Mi'i hat ewywuat ereĩne'en pote uimohey haria sytpok haria wo eweikup­te'en uhewa­nĩ­kaptia sese wo eweikup­te'en are e.
LUK 11:24 Mi'i hawyi Iesui to'e ihay miky­ry'i tetiat haria pe — Eiperia aikotã ahiag ipiit piat rakat ewy eweikup­te'en e. Mi'i hawyi meiũran tuwẽtem na'yn mekewat ahiag mekewat miit piit pyi tuwepyi haype hawyi waku ra'yn toĩne'en hap ewy hawyi hewyry kahato yahig note teiam miit'in piit pakup kat hamo e. Ma'ato yt toipuẽti i tomi­ky­'esat ewywuat hawyi to'e tuwepe — Pyno ara'aipok irane sa'a­wy­'iwuat uheiam kape uimi­'atoiat miit piit kape e tuwepe hawyi mekewat miit piit sa'a­wy­'iwuat kape toto hawyi teke i ra'yn tomi­ky­'esat ewy e. Mi'i hap ewywuat eiperia e tehay pun haria pe. Mesup waku pe eweikup­te'en wen ma'ato meiũran ti ahiag hewyry kahato hawyi to'e tuwepe — Pyno ara'aipok i mesup sa'a­wy­'iwuat uheiam kape mi'i hawyi areke i mekewat sa'a­wy­'iwuat miit piit pe aikope areĩne'en sa'a­wy­'iwuat hap kape e tuwepe ahiag e.
LUK 11:25 Mi'i hawyi tut i ra'yn miit sa'a­wy­'i­tewuat toĩne'en hap kape. Mi'i turan toipuẽti i ipiit waku pe tuwe­painug turan ikahu toipuẽti yt kat i heso'ok hap toĩne'en itote. Pyno waku kahato toipuẽti mekewat miit aikotã ai'yat wahy­wytip rokire hap ewy toĩne'en mi'i miit piit aikotã ai'yat topen pakup i turan ikytsig kahato hap ewy e.
LUK 11:26 Mi'i hawyi ahiag sa'ag to'e towy­ria'in ahiagnia pe — To'iro watu­we­hyt'ok meiũwat miit piit pe e 7 ok takaria pe towy­ria'in ahiagnia sa'ag ko'i pe. Mi'i hawyi tuwe­hyt'ok ahiagnia 8 ok takaria e. Sa'a­wy'i wẽtup yn toĩne'en itote mekewat miit piit pe mi'i hawyi po'og po'og na'yn tukup­te'en kahato itote e. Mi'i hawyi mi'iria tukup­te'en at ka'ap mekewat miit piit pe. Mi'i pote po'og yt naku i sa'a­wy­'iwuat kai po'og heso'ok sa'a­wy­'iwuat kai toĩne'en hap ewy kahato mekewat miit e. Mi'i uhehay ewy kahato eiperia uhehay pun hanuaria e katu­pono yt uimohey teran i eipe yt kat i ahiag eipiit piat hawyi ati'a­tu­sytpok yne ahiagnia eipiit pyi hawyi e. Ma'ato yt uimohey i pote te'e­ra­'aipok i po'og na'yn ehowawi e Iesui tehay pun haria pe.
LUK 11:27 Mio tã to'e hawyi wẽtup ok hary­poria miit'in tok pyi to'e Iesui pe tehay pirik hap — Mimi e uiwa­nẽtup hawe waku kahato ety Maria toĩne'en e katu­pono ety wo toĩne'en epoi temi wuat hat pote emotãg hat pote e. Emoherep topiit pywiat hat pote waku kahato ety e Iesui pe.
LUK 11:28 Mio tã e hawyi Iesui tiwesat tope — Mana waku uity wen ma'ato po'og waku Tupana wanẽtup hawe uimienoi kapiat wanẽtup kahato haria po'og Tupana mipoi­tyro ko'i mi'iria tukup­te'en uipiit moherep hat uity kai e Iesui ahepiat pe tomohey haria piat pe.
LUK 11:29 Mi'i hawyi miit'in sem te'e­ru­wa­'a­tunug po'og typy'i kahato Iesui ewawi wanẽtup hanuaria. Mi'i hawyi to'e i'atuepe — Are pãi e eipe eweikup­te'en mesu­wa­rotiat miit'in ehay yt uimohey reran i haria eipe Iuteu ywania uimotag haria pytkai e. Uikat kahato haria wo eipe ma'ato eipoi hamuat eimoe­hãite hamuat hap yn eweikat uikai wen ma'ato yt uikat hin i uhehay kuap hamuat are e. Eweiky­'esat kahato ti ewei'a­kasa uiminug Tupana misepap ko'i kape miit'in moehãite hap ko'i kape kat ko'i kat ko'i hap yt uwe minug kuap i ewywuat uiminug ko'i kape e. Eiperia seha'at sese hanuat õ'ẽ haria ne'i eipe e. Mi'i pote ti rat pãi yt atomo­herep teran i eimi­ky­'esat ko'i eweha'at hamo katu­pono yt uimohey teran i haype eweha'at teran yn pote e. Mi'i pote wẽtup yn aru uimi­sepap iwato aru atimo­herep ehepe yt uwe i te inug nakat katu­pono uiku­'uro sese hawyi areĩne'en pakup i hap yn ti aru atomo­herep ehepe aikotã aikotã sa'a­wy­'iwuat Tupana ehay moherep hat Iona e hap het rakat ewy aru areĩne'en e.
LUK 11:30 Sa'a­wy­'iwuat Tupana ehay moherep hat Iona Tupana tipo­'oro tawa Niniwe kape yt naku i rakaria kape wẽtup ywania kape. Pyno apo'are — Kat pote Iona Pira wato hunmỹ'ã pe mye'ym e'at pe toĩne'en hap ete e. Pira wato hunmỹ'ã pe toĩne'en mye'ym e'at. Mi'i hawyi pira te'en ne'i yi Niniwe pe hawyi Iona tuwẽtem na'yn. Mi'i hap tawa Niniwe piaria tikuap ta'yn hawyi ta'a­tukuap pywo Iona ti Tupana mipo­'oro hap. Mye'ym e'at pe iku'uro pira hunmỹ'ã hawyi tuwẽtem e. Mi'i hap ewy aru atunug e. Uito ti Miit'in Yke'et Sese e Iesui mi'i hawyi arẽtem gu'uro pyi i ra'yn hawyi aremo­herep i aru ehowawi Iona ewy e. Mye'ym e'at hap ete uiku­'uro hawe yi hunmỹ'ã pe uisyp hawe arepy­hu'at mye'ym e'at hawyi arẽtem gu'uro pyi hawyi eweikuap aru pywo Uito Tupana Mipo­'oro Miit'in Ehakye­ra'at Hanuat hap are e Iesui.
LUK 11:31 Sa'a­wy'i sese wẽtup ywania porekuat hary­poria kawiat tut pya pyi at wẽtem hap moran kai tut morekuat pot Sarumãu we'eg hap kapiat tuwa­nẽtup hamo ihay se kuap hamo tut e. Meiũran ti aru karãpeĩ Tupana henoi uwe waku uwe yt naku i e hap e'at piat turan toĩne'en itote sa'a­wy­'iwuat morekuat hary­poria kawiat eiminug yt naku i hap enoi hanuat e katu­pono sa'a­wy'i pya pyi tut morekuat Sarumãu kapiat iwe'eg hap kapiat tuwa­nẽtup hamo ma'ato koitywy Uito areĩne'en eipy­'a­setpe po'og uiwe'eg ase'i morekuat Sarumãu kai ma'ato uhehay kape yt eweiwa­nẽtup teran hin i ra'yn eipe e. Mi'i pote mekewat wẽtup ywania po'og waku Tupana wanẽtup hawe eikai e. Mi'i pote mekewat e'at pe aru — Kat pote yt eweimohey i Tupana Mipo­'oro Sarumãu Saipepiat e aru ehepe mekewat morekuat hary­poria kawiat yi Sapa piat eiwe­mõti hamo e Iesui tehay pun haria pe.
LUK 11:32 I'ewyte meiũran ti aru mekewat Tupana uwe waku uwe yt naku i e hap enoi hamuat hap e'at pe ti aru tawa Niniwe piaria henoi — Eipe yt nakuaria i i'atu'e ehepiat katu­pono sa'a­wy'i mi'iria te'e­ru­wa­nẽtup Tupana ehay enoi hat Iona mienoi kapiat hawyi te'e­ra­'aipok kahato Tupana kape. Ma'ato eiperia yt ewei'aipok hin i Tupana kape Uito ti rat po'og Iona kai pytkai e. Ta'i eipy­'a­setpe areĩne'en wen ma'ato uimienoi kape yt eweiwa­nẽtup hin i e.
LUK 11:33 Mi'i hawyi po'og Iesui henoi — Yt uwe i mig'i wo hytmoi ariãty hot hap e. Yt ta'a­tupag hin i kamũti ka'a pe ma'ato ipytyp sese pe yn ta'a­tupag ariãty hot hamo e. Mi'i hawyi wehyt'ok haria te'e­ra­'a­kasa ra'yn hawyi teha'at kuap heremo hawyi e.
LUK 11:34 Yne heremo aheha pytig pote. Ihot'ok hawyi aheha ko'i wo wata­'a­kasa kuap yne ra'yn e. Mi'i pote eheha ko'i ariãty ewywuat eipiit piat moẽtyhot hamo e. Waku aheha ko'i pote waku kahato heremo kahato yne yne ma'ato yt aheha pytig i yt kat i heremo ahepe. Wati­ky­'esat mu'ap kuap hamo ma'ato aho'o­wasat hap ewy watoĩ­ne'en at toĩne'en pytkai are e. Eipy'a piat uimohey hap hawyi eheha wakuat ewywuat toĩne'en hawyi heremo kahato mu'ap Tupana kapiat hap ma'ato yt naku i ky'esat haria eipe pote ariãty yt nakuat i ewywuat eipy'a pe toĩne'en. Mi'i pote sa'ag hap yn eweikat are e. Mi'i hawyi eipiit puo i'ypyryp we sese topy­hu'at e.
LUK 11:35 Yt naku i hap nug neran haria eipe pote yt eheha pytig i rakaria ewywuat eweikup­te'en e. Mi'i pote i'ypyryp wiat gupte'en haria ewy eweikup­te'en kahato eipe hawyi eipiit puo eheĩne'en hap yt naku i pe topy­hu'at e. Mi'i pote Tupana kuap hap yt kat i eipy'a pe yt uimohey i eipe pote e.
LUK 11:36 Waku hap yn eweiky­'esat pote eheha ko'i ariãty wakuat ewywuat topy­hu'at e. Mi'i hawyi yt kat i i'ypyryp hap eipiit pe. Eheĩne'en hap ete hẽtyhot hap yn ehete e.
LUK 11:37 Iesui piat ta'a­tu­nãpin kahu turan put'ok'e Musei miwan enoi hat hawyi to'e — To'iro ui'yat kape watenuk hamo e. Mi'i hawyi Iesui toto ra'yn hupi i'yat kape. Put'ok­'i­'a­tu'e hawyi ta'apyk yparakai ypyke ma'ato yt tuwe­posei i tenuk hamo.
LUK 11:38 Mi'i pote Musei miwan enoi hat tuwa­nẽtup — Kat pote som yt tuwe­posei i Iesui aheko ewy e.
LUK 11:39 Mi'i hawyi Iesui to'e — Tupana miky­'esat ko'i toĩ yne miwan me wen mi'i hap ko'i eweiwaure hawyi wẽtup sehay ehenoi e. Eipe ti eheko wẽtup enoi kahato haria e. Eheko upi eiwe­piitsei sei kahato eiwe­posei kahato eikoho koho kahato hawyi — Waku kahato aito mesup Tupana wanẽtup hawe ewei'e eipy'a pe e. Ma'ato yt mi'i tã hin i are e. Eiperia ahekui'a ko'i ipitpit kahato hap ewywuat are e. Aikotã eiwe­kui­'a­koho kahato i'okpe ete ma'ato ehekui'a py'a yt eiwepyi hin i mi'i pote mi'u nem ipy'a pe toĩne'en hap ewy e. Eipo pe ete waku kahato yt ipitpit hin i ma'ato eiwa­nẽtup hawe ipitpit hap ewy toĩne'en e.
LUK 11:40 — Yt we'eg i kahato rakaria ti rat eipe e. — Pyno Tupana aipiit nug hat pote waku aipiit sei hap watunug at ka'ap imowepit hamo ewei'e eiwo­'ope e. Ma'ato pywo pe are'e ehepe aiwa­nẽtup hap aipy'a piat nug hat Tupana toĩne'en wy are e. Mi'i pote waku aipy'a piat aiwa­nẽtup hap sei hap watunug at ka'ap wy imowepit hamo are e. Ma'ato eipy'a ipitpit hap ywytip hap eweiwaure kahato ra'yn e. Eiwa­nẽtup hap eipy'a ko'i ipitpit kahato eiminug sa'ag ko'i wo e. Yt eiwe'eg hin i ti rat katu­pono eipiit painug hap yn ewetunug ma'ato eiwa­nẽtup hap eipy'a piat painug hap yt kat i Tupana wanẽtup hawe are e. Eipiit ko'i ikahu kahato yt ipitpit hin i wen ma'ato eipy'a ko'i yt ikahu hin i eiminug sa'ag ko'i wo e. Eipitpit kahato eiwa­nẽtup sa'ag ko'i wo e.
LUK 11:41 Ta'i eiwepyi kahato ehekui'a ko'i ok pe ete ma'ato yt eiwepyi hin i kat som nem toĩne'en ehekui'a ko'i pe hap e. Waku po'og aiwa­nẽtup hawe — Pyno waku ati'a­tu­mõ'ẽ uimi'u uheka­re'en yt hekat i rakaria pe hatek takaria pe mi'i hawyi Tupana mowepit hat areĩne'en e hap kape po'og waku watu­wa­nẽtup at ka'ap — Uiposei sio yt e hap kape yn watu­wa­nẽtup hap kai are e.
LUK 11:42 Mi'i hawyi po'og Iesui to'e — Urutunug uruposei hap pote po'og waku urutoria eikai e haria eipe e Iesui tewa­nĩ­kaptia pe mi'i pote eipe ti rat yt naku i po'og Tupana wanẽtup hawe e. — Ta'i wẽtup hyt u'i 10 hyt u'i kaipyi atum Tupana pe pote po'og waku uito irania'in kai ewei'e ne'i ma'ato Tupana — Yt naku i kahato eipe e. Eipe eimi'u apopyt hit kaipyi eweiho'oium Tupana pe hawyi — Waku po'og tora­nia'in kai urutu­kup­te'en ewei'e eiwo­'ope ne'i wen ma'ato Tupana ky'e hap ete i'ewyte miit'in ky'e hap ete waure wo kahato eweikup­te'en e. Waku watum Tupana aimiium wẽtup hyt 10 hyt ahe'u'i hap kaipyi ma'ato po'og waku watum aipiit yne Tope waku po'og wati­'a­tu­ky'e miit'in e Iesui.
LUK 11:43 — Ta'i eipe ti irania'in miat eimõ­typot hap yn eweiky­'esat haria eipe ma'ato Tupana piat eimõ­typot hap yt eweiky­'esat hin i haria eipe e. Tupana eimõ­typot hap yt eweikat hin i hawyi e. Tupana mõtypot yat pe ei'apyk hap po'og wakuat irania'in kawiat hap eweiky­'esat e. I'ewyte yne tawa pe mu'ap upi ehekat kyi'at hap tote miit'in wẽpowat kahato hap eimõ­typot hamuat hap yn eweikat at ka'ap ma'ato Tupana piat eimõ­typot hap yt eiwekat hin i e. Yt naku i are mesu­wa­ro­tiaria kaipywiat yn eimõ­typot hap toĩne'en hawyi yt kat i Tupana kaipywiat eimõ­typot hap toĩne'en e Iesui wo'o­mu'e haria pe.
LUK 11:44 Aiko­hye­wyry tuereto wo'osyp hap tote turan yt watikuap hin i aikope aikope iku'uro rakaria toĩne'en yi pe aimisyp ko'i sa'a­wy'i katu­pono yt heremo i te itote e. Mi'i hap ewy kahato eiperia e. Ta'i eipe ti wo'osyp hawiat hap gupte'en haria yt heremo i rakat ewywuat are e. Ta'i miit'in te'e­ru­wa­nẽtup eimienoi kape ma'ato ehehay kaipyi yt ta'a­tukuap hin i Tupana hawyi i'atu­mohun hap yn topy­hu'at eimienoi kaipyi e. Eimienoi iku'uro rakat nem nakat ewy e wẽtup sehay moherep haria pe yt Tupana e hap ewywuat moherep haria pe.
LUK 11:45 Pyno itote toĩne'en wẽtup ok miit uwe waku uwe yt naku i e morekuat piat hat. Mi'i hawyi to'e Iesui pe — Are pãi etimohit kahato urumu'e haria akag ko'i i'atu­minug sa'ag hap ete Uhyt e. Pyno kat som ere'e teran uruepe sio uruto waku sio yt sio uruto irania'in aimu'e haria akag ko'i ewy ewanẽtup hawe sio yt katu­pono uruto po'og morekuat ehay kuap haria tora­nia'in kai sio miit ti'a­parap morekuat ete sio yt e haria uruto pote e Iesui pe.
LUK 11:46 Mi'i pote Iesui tiwesat — Yt uheso i uhyt e. Eweikuap kahato miwan eiperia e. Kat som waku miit'in tunug kat som yt naku i hap e. Mi'i hawyi uruikuap po'og irania'in kai ewei'e. Mi'i hawyi miit'in airo haria eweikup­te'en miwan moherep hap kaipywiat haria wo eweikup­te'en e. — Wãi wãi'e­wei'e hap yn miit'in kape — Yt etunug nei'o ewei'e hap yn mi'i pote waku nug haria yt tunug kuap i wakuap katu­pono waku nug haria pyhyp haria eweikup­te'en morekuat e hap kaipyi e. Yt uheso hin i mehĩ eiperia ti eweikup­te'en aikotã ipotyi rakat ewy eiwo­'o­'apyk miit'in okpe tote haria ewy hawyi yt ta'a­tu­hupit kuap i ti ehehay ipotyi rakat are e. Eweipo­rokpun yt hekat i rakaria okpe tote morekuat ehay ipotyi rakat hawyi — Ewetunug o morekuat e hap ewy ewei'e ma'ato yt pote surara po pe uruipag eipe ehaty'i haty'i hamo ewei'e e. Morekuat ehay nug hap ete yt eweipo­wyro hin i hatek takaria e. I'ewyte yt ewetunug hin i ti morekuat piat einãpin hap ko'i eimi­mo­herep hap ko'i e hap ewywuat e. Mi'i pote typy ihay rakaria ewy eweikup­te'en are e. Pyno ti eimienoi aikotã aikotã ipotyi kahato rakat ewy — Ewetunug no ewetunug no ewei'e hap yn uruepiat ei'a­tu­nãpin hap ewy ewetunug o ewei'e ma'ato ti i'ewyte eipe yt ewetunug hin i ei'e hap ewy irania'in miat ei'e hap ewywuat e mi'i pote ti Tupana wanẽtup hawe yt nakuaria i sese eipe e. Mi'i pytkai yt eiwe­mõti hin i eha'a­se'i minug sa'ag ko'i ete katu­pono eha'a­se'in ko'i tukup­te'en ei'e­wy­wuaria ko'i e. Sa'a­wy­'i­wuaria ei'y­wot'in ti'a­tu­'uka kahato Tupana mipo­'oro ko'i e. Ta'a­tu­moma teran kahato Tupana ehay moherep haria ko'i e. Mi'i hap ewy te ti eiperia eweikup­te'en aha'a­se­'i'in sa'a­wy­'i­wuaria ewy te eweikup­te'en Tupana ehay moherep haria auka haria eperia are e Iesui more­kuaria wãi'e hap moherep haria pe.
LUK 11:47 Yt nakuaria i kahato eipe. Yt eiwe­mõti hin i eha'a­se­'i'in minug ko'i ete. Sa'a­wy'i ta'a­tu­'a­tu­'uka kahato Tupana ehay enoi haria Tupana mipo­'o­roria ko'i e.
LUK 11:48 Mi'i hawyi eipe ewei'a­tu­mo­kahu eha'a­se­'i'in mi'a­tu­'uka syp hap ko'i e Tupana mipo­'oro tehay moherep hamuat syp hap ko'i. Mesup ti ewei'a­tu­mõ­typot kahato eha'a­se­'i'in mi'a­tu­'uka ko'i wo'osyp hawiat i'atu'kag ko'i katu­pono eiwe­mõti kahato eipy'a pe eha'a­se­'i'in minug sa'ag ko'i ma'ato ei'y­wot'in ewy te eweikup­te'en katu­pono mesup te ti ewei'a­tu­'uka teran Uito i'ewyte yne Tupana mipo­'oro ko'i are e. Yt nakuaria i sese ti eipe — Uruto po'og torania kai ei'e pytkai e.
LUK 11:49 Ta'i aikotã aikotã tohenoi sa'a­wy'i miwan me ehetiat hap ewy mesup ewetunug e. Mio tã e ti sa'a­wy'i Tupana — Uhemiit'in irania'in ta'a­tu­'auka e. Irania'in ti ta'a­tu­sa­ty'i saty'i yne irania'in ta'a­tu­mohit mohit e Tupana ti miwan me ehepiat pe e Iesui to'auka teran haria pe.
LUK 11:50 Pyno ti koitywy ehepiat Tupana ihay mekewat miwan me sa'a­wy'i — Ta'i koitywy ei'y­wot'in mi'auka uimi­po­'oro ko'i suu ko'i yne yne eipo ete te topy­hu'at e. Ehepe yt heremo i ma'ato uheha pe ti tuwekuap uhemiit suu yn ni eipo ete e. I'ewyte ti mesup te ti eweikup­te'en uimi­po­'oro atu'uka rakaria e. Ta'i ei'y­wot'in ewywuaria eipe eweikup­te'en e. Ha'a­wynug hap tote­pyi­wiaria te wẽtup ywania yn mesup te eweikup­te'en. Yt uheso hin i uhyt'i'in. Tupana mi'a­piheg kahato ko'i aru eweikup­te'en wuat'i e'at pe e. Katu­pono eha'a­se'i'in minug upi ewetunug ne e. I'atu­sai­pe­piaria sese te ti eweikup­te'en e Iesui to'auka teran haria pe.
LUK 11:51 Sa'a­wy'i sese ti aha'a­se'i pot Atãu sa'yru Apeu eha'a­se'i Kãi ti'auka toywyt Tupana mohey sese hat Apeu. Toipun kahato toywyt suu yi tote. Mi'i hap ewy te Tupana mipo­'oro ko'i ewei'a­tu­'uka e Iesui to'auka teran haria pe. Sa'a­wy'i Tupana mipo­'oro ase'i Sakaria ei'y­wot'in mi'auka wo toĩne'en. Ipotpap kahato Tupana mõtypot hap etiat. Tupana mõtypot hap yat etiat turan toiwuk yne miit'in miium Tupana kapiat hawyi tuwẽtem Tupana ehamo turan ei'y­wot'in ti'auka ra'yn Tupana mõtypot yat pe e. Ta'i sa'a­wy­'iwuat Tupana mohey hat Apeu ta'a­tu­'auka i'ewyte Tupana mipo­'oro Sakaria ta'a­tu­'auka wy i'ewyte irania'in Tupana mipo­'oro ko'i ta'a­tu­'a­tu­'uka kahato ei'y­wot'in mi'auka ko'i tukup­te'en e. Pyno mesup te ti eiperia ei'y­wot'in ewywuat eweikup­te'en ne e Iesui to'auka haria pe.
LUK 11:52 Yt naku i wo kahato eipe miwan moherep haria ete are e. Eipe ti rat oken'ypy pyhyp haria ewywuaria Tupana mienoi ko'i ete are e. Eweikuap kahato Tupana ehay Musei mimo­herep po'og torania kai. Irania'in tikuap teran Tupana etiat ma'ato yt ewehenoi hin i irania'in me e. Tupana kuap teran haria mesuwe tukup­te'en ma'ato yt eweho­'o­ken­hyp'ok hin i iky'esat haria pe. Ta'i mu'ap Tupana kapiat eweikuap wen ma'ato yt eweiwat i mi'i upi i'ewyte yt ewehenoi hin i irania'in me e. yt ewehenoi hin i mu'ap Tupana kuap hamo i'ewyte yt eiwe­hyt'ok hin i wy mekewat oken'ypy puo hawyi seke teran haria pysokpun haria eweikup­te'en e Iesui — Uwe waku mi'a­piheg wo uwe'in yt e haria morekuat piat haria pe.
LUK 11:53 Mio tã Iesui to'e hawyi i'atu­py­'ahak sese Iesui ete nagnia ehay enoi haria i'ewyte miwan enoi haria i'atu­py­'ahak kahato mio tã e pote. Mi'i hawyi apo apo'i­'a­tu'e kahato at Iesui pe kat ehay kat ehay pirik kahato itote Iesui ete tu'uka teran haype. Ta'a­tu­ky­'esat sehay Iesui kaipyi iwema'at hap i'auka hamuat hap ta'a­tu­mõ­py­'ahak teran Iesui hap ma'ato yt toi'a­parap hin i towesat hap ete.
LUK 11:54 Mi'i hawyi yt ta'a­tu­waure hin i ta'a­tu­py­'ahak Iesui ete. I'aparap hap ta'a­tu­ky­'esat haype ta'a­tukat kahato. Ta'a­tu­ma'at hap yn ta'a­tu­ky­'esat. Mi'i pote mig'i wo teran Iesui ta'a­tusat i'ypyryp wyi aikotã wamiri ewy tukup­te'en Iesui pytyp teran hap ete i'aparap hap ta'a­tukat kahato ihay kaipyi ma'ato ti yt ta'a­tu­puẽti i hawyi ta'a­tu­henoi teran sura­ra'in miat i'auka Iesui i'aparap hap ta'a­tukat hawyi ma'ato yt ta'a­tunug kuap i katu­pono Iesui waku yn ihay waku yn tutunug mote.
LUK 12:1 Mi'i hawyi miit'in sem kahato te'e­ru­wa­'a­tunug Iesui ewawi ta'a­tu­moe­hãite hap ta'a­tu­ky­'esat kahato. Mi'i pote to'o­pykit pykit ne'i i'atu kahato hemig neran haria. Mi'i hawyi Iesui to'e temiit'in me — Eiwe'eg wo'o Tupana ehay ran enoi haria pupi e. Mi'iria typy sehay enoi haria e. — Uruto po'og urikuap Tupana ehay torania kai i'atu'e. Mi'i hawyi — Waku kahato eipe i'atu'e ta'a­tu­pot­mu­'eria pe ma'ato — Yt nakuaria i eipe e Tupana i'atue­mi­mu­'eria pe pytkai e. Ta'a­tu­su'at kahato Tupana wenãpin miwan miat wen ma'ato yt ta'a­tunug hin i aikotã Tupana to'e hap ewy. — Waku kahato uruto i'atu'e miit'in me hawyi — Pywo ti rat waku kahato eipe e irania'in mi'iria pe ma'ato — Yt naku i kahato eipe e i Tupana mi'iria pe katu­pono Tupana piat ainãpin hap ta'a­tu­su'at kahato pytkai yt naku i kahato ta'a­tunug mig'i wo. Sehay ikahu kahato rakano ta'a­tu­henoi wen ma'ato i'atu­minug ko'i yt naku i kahato e. Typy hẽku rakaria ewywuaria mi'iria yt ewetunug nei'o mi'iria ewywuat are. Ta'i manĩ puk ko'i ewywuat ne'i mi'i haria are e. Manĩ kurin kat ipyp takat watopag manĩ pakup we hawyi toimo­'okpuk ne'i ipakup takat e. Pyno eipe ti yt eiwe'eg i pote i'atu­minug sa'ag ko'i timo­wato ne'i aru yt naku i nug ehepiat hamo e. Pyno waku eiwe'eg wo i'atu­minug ko'i ewywuat nug hap pupi are e katu­pono mi'iria ti manĩ puk ewy meiũran ti eipe ei'e­wyte eweikup­te'en mi'iria ewy e.
LUK 12:2 I'ewyte yne huwy piat ewywuat i'atu­minug ko'i mig'i wo i'atu­mi­'a­pyhik ko'i meiũran aru Tupana ti'a­tu­mo­herep wuat'i ehamo e. Meiũran ti aru heremo kahato i'atu­minug sa'ag mig'i wo topy­hu'at wuat'i mikuap mo are e.
LUK 12:3 Kat ewei'e som i'ypyryp we meiũran ti aru Tupana timo­herep wuat'i miit'in ehamo sio waku sio yt hap are e. Aikotã wati­mo­herep ahehay ywaiti hap totepyi aheypa­rakai ywaiti hap kaipyi hap ewy toimo­herep aru wuat'i miit'in minug sa'ag wuat'i miit'in minug wakuap tehay wo wuat'i miit'in ehamo wuat'i miit'in ikuap hamuat e. Aikotã more­kuaria mipo­'oro sehay ewywuat Tupana timo­herep wuat'i ehamo i'atu­minug sa'ag sio i'atminug wakuap e Iesui.
LUK 12:4 Uiwy­ria'in miit'in miat ei'auka hap pupi yt eweiken'ẽ tei'o katu­pono eipiit auka hawyi yt kat i ra'yn po'og ta'a­tunug kuap ehete ei'auka hawyi.
LUK 12:5 Ma'ato Tupana pupi waku eweiken'ẽ kahato katu­pono Mi'i ti eipiit toi'auka kuap i'ewyte toipugha kuap eipe aria koro pe aikope eho'opot hap toĩne'en wuat'i e'at hawe e. Mi'i pote waku Tupana pupi eweimõ­typot kahato po'og po'og miit'in kai e.
LUK 12:6 Ma'ato Tupana aiky'e kahato e Iesui. Pywo kahato toi'a­tu­ky'e wuat'i miit'in. Miit'in yt uwe i miky'e ko'i toiky'e kahato e. Ta'i miit'in ky'e kahato hat Ui'ywot e. Po'og aiky'e irania'in aiky'e haria kai. Ta'i ahetama pe wati­we­neru ra'yn weitaria hit ko'i ha'up yt iwato hin i ha'up typy ape kurin nakaria put'ok'e 5 weita hit kyi'at hamo wato'e mesuwe yt ha'up kahato rakat i miit'in wanẽtup hawe weita hit aimi'u apopyt wato'e. Yt kan hamo i weitaria miit'in i'atu'e ma'ato Tupana py'a pe waku kahato yne tominug ko'i e. Ta'i toi'a­tu­ky'e kahato weitaria ko'i e. Yt toiwaure hin i weitaria apykok hamo e Iesui.
LUK 12:7 Yt eweiken'ẽ tei'o uiwy­ria'in katu­pono eipe ti po'og kahato weitaria kai eiky'e Tupana e. Pyno aikuap kahato Tupana aiky'e haype are e. Ta'i toikuap yne ahetiat e. Ta'i toi'a­tukuap kahato yne ahepiat. Aipiit yne ete toikuap. Karania karania ai'asap ko'i etiat toikuap yne. Wẽtup ai'asap ta'at yi tote hawyi toikuap are. Mi'i hap ewy aikuap Tupana e. Mi'i pote yt naku i wato­ken'ẽ miit'in pupi sio ai'auka sio yt hap pupi katu­pono ai'a­pykok kahato Ai'ywot atipy piat e Iesui ahepe.
LUK 12:8 Pywo are'e ehepe uwe uwe yt token'ẽ i uimohey hap moherep hamo ahewa­nĩ­kaptia ehamo ai'auka teran haria pe mi'i e hat piat — Uhemiit kahato mi'i miit are'e kahato atipy pe Ui'ywot pe e. Mi'i miit piat yt aremõti hin i e. Uito areĩene'en Eheyke'et Koro i'ewyte Eikywyt Koro wuat'i e'at pe uimohey hap eweimo­herep miit'in me — Ui'auka pote ui'auka ma'ato yt aremõti hin i Uimi­mohey moherep hamo e hat pe — Aimohey hat sese mekewat miit are Ui'ywot sese atipy piat pe e Iesui.
LUK 12:9 Ma'ato — Yt atimohey i ewei'e irania'in me uhepiat — Ui'auka aru atimo­herep Uheyke'et Wato Uikywyt Wato i'atuepe hawyi ui'auka hap pypi areken'ẽ ewei'e hawyi i'ewyte Uito ahenoi Ui'ywot Atipy piat i'ewyte yne Tupana yatypiat ieĩne'en haria itotiaria pe mio tã e hat etiat — Yt Uimohey kahato hat i mi'i miit are'e aru itotiaria pe e Iesui.
LUK 12:10 Pyno ehehay sa'ag uhetiat Eheyke'et Koro etiat Eikywyt Koro etiat i'ewyte sa'ag ewetunug uhete mi'i pe ehẽtup Tupana pe paa'e­wei'e hap wywo pote Tupana tiwaure kuap eiminug sa'ag ko'i uhetiat hap wen ma'ato wẽtup ei'e sa'ag hap Tupana yt tiwaure kuap i are. Karãpe Tupana Pã'ãu to'e ehepe — Eweimohey ro Uha'yru mi'i hawyi ewei'e Tupana Pã'ãu Wakuat pe — Eso ewei'e motoro yt atiky­'esat i e'e hap katu­pono ahiag mẽpyt ri Emimo­herep Iesui ewei'e sa'ag eipy'a pe Tupana Pã'ãu Wakuat pe pote Tupana yt karãpe i waure wo ei'e hap sa'ag eipy'a piat Topã'ãu miat ei'e hap etiat are e Iesui tuwepiat. Pyno eiwe'eg wo'o — Eso ei'e Tupana Pã'ãu miat eimu'e turanuat uhepiat hap pupi katu­pono pywuat sehay yn tohenoi uhetiat e Iesui — En ni ahiag mẽpyt e haria pe.
LUK 12:11 Uipot­mu­'eria meiũran ti aru ehero­po'ok te'e­ru­wa­'a­tunug hap kape Tupana mõtypot yat kape ta'a­tu­'a­kagnia py'a­setpiat — Mi'iria yt naku i kahato rakaria ta'a­tu'e hamo eima'at sehay wuat ei'auka hamo eheroto surara kape e.
LUK 12:12 Mi'i turan eheroto turan — Kat are'e aru ati'a­tu­wesat yt ewei'e i tei'o eipy'a pe eiwa­nẽtup hawe are katu­pono aikowat wakuat wyti aru i'atu­wesat hamuat Tupana Pã'ãu henoi ehepe aru itote ihay aru to'e hap ok tã ma'ato eiwẽ pyi ihay e Iesui temiit'in me.
LUK 12:13 Mi'i hawyi wẽtup ok miit'in tok pyi to'e Iesui pe — Urumu'e hat e ui'ywot wyti iku'uro ra'yn ma'ato ui'ywot ekare'en yt kat i tutum uhepe ma'ato uheyke'et pe tutum yne hawyi mesup uheyke'et yt ho'oium neran hin i uhepe ui'ywot powat'yp pãi — Uiano uiano are'e pytkai yt toipat'ok hin i e. Mi'i pote atiky­'esat kahato ehay ro — Eho'o­pat'ok to e'ywot ekat eywyt pe ere o uheyke'et pe e Iesui pe.
LUK 12:14 Mi'i hawyi Iesui tiwesat — Are pãi Uito wyti yt atimõ'ẽ teran i ei'ywot ekare'en ko'i ehepe uhyt e. Yt ariot i mesuwat yi kape irania'in ekat mõ'ẽ hamo e. Pywo ti rat ewe'eg wo o eheyke'et ekat ky'ewi hap pupi are'e epe uhyt e. Tupana yt uipo­'oro i mesuwe e'ywot ekare'en mõ'ẽ hamo pãi e.
LUK 12:15 Mio tã to'e hawyi tohenoi yne itotiaria pe — Eiwe'eg wo o meimuẽwat eheka­re'en iwato kahato ky'e kahato hap pupi e. Uhekat kahato teran eweiky­'esat ma'ato eheĩne'en hap sese yt eweikat hin i hawyi yt eweipuẽti i wyti aru ehekat wuat'i e'at piat hap e. Mesu­wa­rotiat eheka­re'en iwato kahato hap kaipyi yt eweipuẽti hin i eipy'a piat eimo­wepit hap sese hap e.
LUK 12:16 Mi'i hawyi hã'ãkap wuat tohenoi ahekat ky'ewi hap etiat. Mio tã to'e Iesui — Sa'a­wy'i so toĩne'en wẽtup ok iko iwato kahato rakat i'atu'e. Mi'i hawyi so toi'a­tukoi kahato yne te'yi koro tote hawyi so tuwenug kahato ra'yn manĩ itote i'atu'e.
LUK 12:17 Mi'i hawyi so tutunug kahato u'i hawyi i'atu kahato u'i hyt ahyt ko'i sem tutunug at ka'ap hawyi — Aikotã som waku atunug aru e katu­pono Uhe'u'i hyt ahyt kahato ra'yn e so topy'a pe. Ui'yat ko'i yne yt put'ok'e hin i uhe'u'i hyt ahyt ereko hamo e so. Pyno aikotã aru atunug aru e topy'a pe.
LUK 12:18 Mi'i hawyi to'e tuwepe — Pyno atikuap ta'yn aikotã waku uhe'u'i hyt ahyt sem atimoheg wuat'i e'at pe e. Pyno waku atunug kahato uhe'u'i hyt yat koro ko'i hawyi waku uheypa­rakai sem itote atunug uhe'u'i hyt ahyt sem ko'i ereko hamo e so tuwepe. Pyno waku ati'a­tu­pugha uhe'u'i yat pot ko'i hawyi po'og iwato ikahu rakaria ati'a­tunug kahato uhe'u'i hyt ahyt sem ereke hamo e so.
LUK 12:19 Mi'i hawyi ti aru uimo­wepit hap toĩne'en wuat'i e'at pe katu­pono yt karãpe i aru yt uimi'u i hap toĩne'en uikai e so tuwepe topy'a pe tuwa­nẽtup hawe e. Ta'i waku ra'yn waku ra'yn wuat'i e'at pe e. Uhe'u'i iwato sese sakpo ra'yn mesup waku pe ra'yn aru areĩne'en pãi e so. Ui'ok hap yn aru toĩne'en e. Mi'i pote uheĩne'en hap waku pe areĩne'en u'i hyt ahyt sem pote e so topy'a pe tuwehum kahato tuwe­wawi haype. Mesup ta'yn yne uimi­ky­'esat ok tã wuat'i e'at pe atikyi'at kuap e so u'i sa'up mo e so. Pyno waku uipohep ta'yn wyti aru uipotpap hap ko'i ete pyi hawyi uiwepit hap yn na'yn atikat hawyi arenuk at ka'ap uimie­reko iwato kahato e. Karania e'at kapiat ne'i mi'i ra'yn uheka­re'en e so topy'a pe e.
LUK 12:20 Mi'i hawyi Tupana to'e tope atipy kaipyi — Yt ewe'eg i kahato rasig e katu­pono mesup ewãtym wyti eku'uro hap toĩne'en are e u'i wo hekat rakat pe. Mi'i hawyi apuru uwe po pe ekare'en ko'i sem topy­hu'at e Tupana tekat iwato mohey hat pe e.
LUK 12:21 Mio tã e hã'ãkap wuo tohenoi hawyi to'e itotiaria pe tomi­mu­'eria pe — Mi'i ewywuat te'e­ro­py­hu'at mesu­wa­ro­tiaria ta'a­tue­ka­re'en etiat yn wehum haria e. Mi'iria yt hekat rakaria i Tupana wanẽtup hawe e. Te'e­ru­wa­nẽtup kahato ta'a­tue­ka­re'en ete hawyi i'atu­wa­nẽtup hawe yt put'ok'e i Tupana kapiat te'e­ru­wa­nẽtup hamo e Iesui itotiaria wa'a­tunug sok haria pe.
LUK 12:22 Mi'i hawyi Iesui henoi i ra'yn topot­mu­'eria pe — Uiwy­ria'in e yt naku i watu­wa­nẽtup yn aimi'u mesu­wa­rotiat kape e. Yt naku i aipiit piat ehesokpe ko'i kape yn watu­wa­nẽtup e.
LUK 12:23 Katu­pono aheĩne'en hap wuat'i e'at piat aimo­wepit hap wuat'i e'at piat yt tut i aimi'u iwato kahato hap kaipyi i'ewyte aipainug hap kaipyi aimo­wepit hap yt tut i e. Aiwepit sese hap yt tut i ahesokpe aipainug hap kaipyi are e. Ta'i aimi'u sese ahesokpe sese ti tut Tupana miium kaipyi are. Mi'i ti po'og waku watikat aimi'u ko'i kai ahesokpe ko'i kai are e.
LUK 12:24 Eiwe­ha'at ro weitaria ko'i kape e. Yt te'e­ru­we­mi'u koi kuap i wen ma'ato Tupana ti'a­tupoi kahato weitaria ko'i are e. I'ewyte yt kat i u'i hyt ko'i ta'a­tue­reko aito ewy ma'ato Tupana ti'a­tupoi kahato weitaria ko'i yne e'at pe ta'a­tu­he­wyry hap upi e. Pyno aito ti po'og po'og Tupana mi'a­tu­ky'e ko'i torania weitaria ko'i kai are mi'i pote aipoi kuap Tupana aikotã toipoi weitaria ko'i ewy e Iesui.
LUK 12:25 Ta'i pywo ti yt aity­pore i pote yt kan hamo i watu­wa­nẽtup ko'i ko'i katu­pono watu­wa­nẽtup ko'i ko'i haty wo pytkai aipiit moty­pore hap yt kat i toĩne'en e. I'ewyte — Pyno areĩne'en mot'i kahato mesuwat yi tote e hap kape watu­wa­nẽtup at ka'ap aimo­ken'ẽ hap wywo pytkai aiku­'uro hap e'at tut aru hawyi yt watoĩ­ne'en kuap i wẽtup e'at po'og watu­wa­nẽtup ko'i ko'i ahesaika hap wywo pytkai e.
LUK 12:26 Pyno aipiit moty­pore hap yt watunug kuap i aiwa­nẽtup ko'i ko'i hawuo hap ewy yt kan hamo i aiwa­nẽtup ko'i ko'i — Are pãi are an yt kat i uimi'u hawyi uiku­'uro uhesy'at hap upi pãi an aiwa­nẽtup aimo­ken'ẽ hap upi hap yt kan hamo i katu­pono yt aiwa­nẽtup ko'i ko'i hap kaipyi ti aimi'u ko'i toĩne'en e. Yt naku i paa'wa­to'e — Yt kat i uhesokpe hawyi uhatek hap sese toĩne'en hawyi uiku­'uro aru yt kat i uhesokpe hawyi e hap upi yt naku i watu­wa­nẽtup sa'ag aimogyt hap ewy e Iesui ahepe.
LUK 12:27 Uimohey haria e eiwe­ha'at ro ga'apy pohyt ko'i kape katu­pono tuwe­painug kahato ga'apy ko'i ikahu kahato sese e. Ta'i ga'apy yahig kape eiwe­ha'at ro katu­pono tuwe­painug kahato i hupi itote ipohyt ko'i wo ikahuria kahato rakaria mi'iria e. Ikahu kahato po'og po'og ikahu sa'ay­'iwuat ieĩne'en hat morekuat koro pot Sarumãu hekat rakat esokpe kahuria kahato rakat kai. Po'og po'og ikahu ga'apy piat pohyt ko'i morekuat Sarumãu esokpe ko'i kai e. Ga'apy piat pohyt ko'i yt wepotpap haria i i'ewyte yt te'e­ru­we­sokpe pi'ig kuap i haria tukup­te'en ma'ato i'atu­we­painug hap Tupana minug po'og ikahu ahesokpe kai are e.
LUK 12:28 Wuat'i e'at pe ga'apy piat ko'i Tupana minug sokpe puo e. Ga'apy watitek hawyi mũki­'ite ipohyt pap ta'yn aiko watunug hawyi e. Mi'i hawyi igag hawyi ahe'aria wo i'yp ko'i watunug e. Uimohey haria kat pote yt eweimohey i Tupana tikuap kahato ahesokpe nug hap aipainug hap e. Yt eweikuap i te apo aikotã aito po'og Tupana miky'e ko'i ga'apy pohyt ko'i kai hap e. Pywo kahato Tupana tum kuap ahepe ahesokpe e.
LUK 12:29 Mi'i tupono yt naku i watu­wa­nẽtup ko'i ko'i yt kat i Tupana mohey hap wywo — Yt kat i uimi'u pote uiku­'uro irane mũki­'ite aiwa­nẽtup aimo­ken'ẽ hap upi e. Yt naku i — Uhatek hawyi kat som aru atu'u rat kat som uimẽpyt mi'u wo aikope pyi aru uhesokpe e hap kape yn yt naku i watu­wa­nẽtup ko'i ko'i haty kahato aipy'a pe hap wywo yt kat i Tupana kapiat imohey hap wywo are e. Aikope pyi aru ahesapo hy pãi an yt naku i hawyi yt naku i aru e hap aimo­ken'ẽ hap wywo yt naku i watu­wa­nẽtup at ka'ap aimo­ken'ẽ hap ewywuat ko'i hap upi e.
LUK 12:30 Ta'i yt Tupana mohey haria i mekewat ko'i ko'i kape yn te'e­ru­wa­nẽtup at ka'ap te'e­ro­ken'ẽ hap wywo yt kat i Tupana mohey hap wywo ma'ato aito — Pywo pe wyti Tupana ti aimoieĩ­ne'en kahato kuap hat waku wato'e e.
LUK 12:31 Ta'i Tupana ti'a­tukuap kahato ahesy'at yt ahesokpe i hap e. Ta'i mesu­wa­rotiat irania'in ywania Yt Tupana kuap i haria ta'a­tu'ok hap ta'a­tu­sokpe hap ta'a­tu'yatnug hap kape yn te'e­ru­wa­nẽtup at ka'ap ma'ato yt atiky­'esat i eipe mi'iria ewy eweikup­te'en aikotã yt Tupana mohey i haria ewy e. Yt atiky­'esat eipe mi'iria ewy eweikup­te'en uiwy­ria'in ma'ato atiky­'esat eweikat kahato aikotã pote waku miit'in mu'e Tupana etiat hamuat hap kape e. Mi'i hap kape yn po'og waku watu­wa­nẽtup at ka'ap hap atiky­'esat e. Mi'i hap ti watunug mote wati­puẽti kahato irania'in aimi­ky­'esat ko'i Tupana po pyi mekewat ai'ok hap ai'yat ko'i ahesokpe hap ko'i wy e. Mi'i hawyi waku eweiwa­nẽtup aikotã Tupana topy­hu'at Wuat'i Ywania Porekuat nuat hap kape are e. Mi'i hap eweikat po'og mesu­wa­rotiat ko'i kai hawyi put'ok'e aru ehepe eipoi­tyro hap mesu­wa­rotiat hap ko'i eimoieĩ­ne'en hap ko'i eimi'u ei'yat eisapo hy ehe'yni eimikoi ehesokpe ko'i hawyi Tupana mipoi­tyro ko'i eweikup­te'en ipo pyi are e Iesui ahepe.
LUK 12:32 Mi'i hawyi Iesui to'e tomohey haria pe — Uihũria ko'i ewywuat no eipe are e. Yt typy'i kahato i eipe ma'ato yt eweiken'ẽ tei'o katu­pono Tupana einug neran more­kuaria wo karãpe Tupana topy­hu'at Wuat'i Miit'in Morekuat nuat hap e'at pe e.
LUK 12:33 Waku wati­we­neru aheka­re'en mi'i hawyi waku aheka­re'en sa'up kaipywiat waku waho'oium ahekat yt hekat i rakaria pe hatek takaria pe are e. Mi'i watunug hawyi aheka­re'en sese iwato kahato toĩne'en atipy pe wuat'i e'at pe e. Mi'i tote ahekat sese mohag hap toĩne'en aheiam yt karãpe i ipot'i rakat are e. Yt karãpe i ikahuro ahekat itote e. I'ewyte sero'ok eharia yt tuwe­hyt'ok kuap i itote yt uwe i itote aipo­hari rakaria are e. I'ewyte aheka­re'en u haria ko'i ape'i ko'i sari ko'i nupi'a ko'i wẽki'a ahekat u haria yt uwe i itote atipy pe e.
LUK 12:34 Aheka­re'en atipy pe pote i'ewyte eiwa­nẽtup hap aipy'a piat i'ewyte tukup­te'en itote ma'ato eheka­re'en mesu­wa­rotiat yn tukup­te'en pote i'ewyte eiky'e hap eiwa­nẽtup hap eipy'a piat toĩne'en wy mesu­wa­rotiat ko'i ete yn e. Watu­we­ha'at kahato aimi­ky'e ko'i ky'ewi hap kape are e. Pywo kahato aikope ahekat toĩne'en hap kape aiwe­wa­nẽtup hap i'ewyte toĩne'en kahato are e. Aimi­ky'e kape yn aheha toĩne'en aiwa­nẽtup hawe are e Iesui ahepe.
LUK 12:35 Mi'i hawyi wẽtup sehay Iesui henoi ahepe itote. Mio tã e — Waku wo'oe­ropat haria ewywuat wato­py­hu'at e. Mesu­wa­ro­tiaria tiky­'esat kahato ta'a­tue­ropat hap waku kahato rakat e. Waku Tupana eropat kahato haria watoĩ­ne'en are e. Ta'i ahetama pe karãpe more­kuaria tuwat ta'a­tue­tawa pyi ta'a­tu­'atoiat ta'a­tu'yat pe surara akag i'atu'yat piaria apykok hamo. — Ewe'eg wo o ui'yat apykok hap ete e tesu­rara akag me. Ara'aipok hawyi sa'up iwato atum epe mehĩ e more­kuaria ta'a­tu'yat piaria apykok haria pe. Mi'i hawyi tuwat wẽtup tama kape hawyi waku yne hawyi te'e­ra­'aipok ta'a­tu'yat kape ta'a­tu­mẽ­pyt'in kape. Mi'i hawyi waku itote yne ta'a­tu'yat piaria i'atu­wepit itote hawyi more­kuaria timõ­typot kahato ta'a­tu'yat piaria apykok haria. — Waku kahato ti rat en uhyt mana e to'yat apykok haria pe e. Pyno waku watu­kup­te'en Tupana yat piaria apykok hat ewy e. Waku surara akag ewywuat aheropat Aipo­typot Tupana e. Aikotã ipotpap takaria ariãty wywo wãtym muat ipotpap yat piaria poi hamo mohag ium hamo aria nug hamo haria ewywuat waku wahe­ropat Tupana mẽpyt'in e. Waku wate­ropat wãtym muo rakaria ewy haty pytkai yt watoket pytkai i waku wahe­ropat kahato Ai'akag emiit'in ta'a­tu­ky'e hap wywo are e. Aikotã hesaika rakat ipiit sakup wywo rakat ewy waku watu­we­potpap Tupana mẽpyt'in eropat hap upi e. Aikotã aheropat haria wãtym muo ta'a­tupag ariãty ai'yat pe mi'i hawyi yne heremo itote mi'i hap ewywuat waku watu­we­potpap e. Waku ahe'a­riãty imehit rakat ewy yt kat i i'ytyk hap mi'i ete hap ewy watu­we­potpap Tupana mẽpyt'in ky'e hap yn ahete e.
LUK 12:36 Ta'i ahetama puo more­kuaria eropat haria hekatup kahato morekuat ut hap at ka'ap ta'a­tu­he­katup katu­pono put'ok'e morekuat turan meremo ta'a­tu­ho­'o­'o­kenhyp teran haype e. Mi'i hawyi at ka'ap ta'a­tu­he­katup ta'a­tu­mo­rekuat ut hap e. Mi'i hawyi morekuat put'ok'e to'o­ken­'y­pyke hawyi meremo ta'a­tu­ho­'o­'o­ken­hyp'ok teran hawyi ta'a­tu­pysei aheko ewy waku hap ewy hawyi ta'a­tupoi hawyi ta'a­tu­mõ­typot kahato ta'a­tu­ky'e ta'a­tu­po­rekuat ta'a­tu­potpap hap ete e. Mi'i haria ewywuat waku watu­kup­te'en are e katu­pono tut irane Tupana akotã morekuat tut ho'o­kyi'at hap ienuk wato hap e'at kape hap ewy e. Mi'i hawyi wo'o­kyi'at hap enuk hap kapiat hut turan — Ariot ra'yn ewei'o­ken­hyp'ok to e haty wo to'yat koro ete hawyi meremo heropat haria tuwat hawyi — Ereke ereke Urupo­typot i'atu'e hawyi teke e.
LUK 12:37 Heropat haria yt te'e­roket hin i te'e­ro­py­hu'at ta'a­tu­ka­'iwat put'ok'e turan i'atu­wepit kahato yt te'e­roket i ma'ato ta'a­tukat ka'ap sio tut sio yt Ai'akag i'atu'e hap ete e. Mi'i hawyi put'ok'e hawyi i'atu­ka­'iwat koro piit ete ta'a­tue­sok­pepag hawyi — Era'apyk o mehĩ mimi i'atu'e ta'a­tu­'akag sese pote e. Ma'ato karãpe teropat haria yt naku i rakaria ket kai ne'i put'ok'e morekuat pote te'e­ru­we­mõti kahato. Mi'i hawyi oken'ypy ete ihay ta'a­tukuap ta'a­tuket turanuat pote te'e­ru­we­mõti kahato ma'ato heropat hap etiat ta'a­tu­potpap turanuat pote te'e­ru­wehum kahato ta'a­tue­tu­'isa ut hap ete e. Mi'i hap ewy waku watu­we­potpap e. Mi'i turan Aipo­typot put'ok'e pote yt mesu­wa­rotiat morekuat minug ewy hin i tutunug Tupana are e. — Uheropat ro uheropat ro i'atu'e haty wo mesu­wa­ro­tiaria more­kuaria e. Ma'ato Ai'akag Tupana put'ok'e hawyi — Woro­ho­'o­ky'e kahato e yn ahepe hawyi aheropat hat ewy topy­hu'at itote hawyi toihep tesokpe ikahu kahato rakat morekuat nuat esokpe mi'i te pag'e topiit etewuat eropat hat esokpe ewywuat mi'i hawyi to'e aru ahepe — Sa'a­wy'i uheropat kahato haria waku kahato rakaria eipe e ahepe. Mi'i pote koitywy areĩne'en eheropat hat eipotpap nug hat ewy areĩne'en e aru ahepe hawyi — Era'apyk to uheypa­rakai ete hawyi woro­ho­'opoi yne ehenuk hap koro ikahu kahato e aru Ahetu­'isa Koro Tupana ahepe. — Ta'i waku kahato eipe katu­pono yt eiket turanuat i put'ok­'are pote e.
LUK 12:38 Pyno waku wato­py­hu'at iwe'eg kahato rakaria ewy watu­we­potpap Aika­'iwat potpap nug hap ete uhyt'i'in mana'in e Iesui katu­pono yt eweikuap hin i karãmuo put'ok'e Ai'akag Koro hap sio ihot'ok puo sio wãtym'i sio wãtym hake sio atpo­sake turan hap yt eweikuap hin i e. Pyno waku pe kahato watoĩ­ne'en put'ok'e Ai'ywot Tupana yt watoket i te turan hap e Iesui temiit'in me ahepe.
LUK 12:39 Pyno waku wate­ropat kahato katu­pono yt pya hin i put'ok'e hamuat Wuat'i Potypot Nuat hap. Mi'i tupono waku wate­ropat kahato aikotã — Put'ok'e irane Ahetu­'isa e haria ewy. Waku wati­'a­ry­mary yne put'ok'e turan hap atiky­'esat e haria ewy katu­pono karãpe Aika­'iwat aipok hap kat e'at pe turan kat e'at pe turan hap yt watikuap hin i pote e. Ta'i tut wyti aru aikotã sero­'ok'e hap tut hap ewy yt uwe i ikuap hap ewy e. Mesu­wa­rote yt watikuap hin i karãpe put'ok'e sero­'ok'e hat katu­pono mig'i wo sero­'ok'e haria tõ'ẽ hap ewy. mi'i tupono waku aiwe'eg wo kahato sero­'ok'e hat hap pupi hap ewy katu­pono tuwe­hyt'ok ai'yat pe yt iheg i rakat pe meremo ahero'ok hamo aheka­re'en ko'i pohari hamo. Ma'ato aiwe'eg wuat pote yt ahero'ok kuap i mi'i hap ewy kahato. Waku watu­kup­te'en sura­ra'in ewywuat haria te'e­ra­ha'at at ka'ap takaria ewy mi'i pote karãpe Eika­'iwat put'ok'e aru hawyi meremo eweikuap uhut hap mekewat sura­ra'in ewywuat uhekatup pote are e.
LUK 12:40 Uito areĩne'en Wuat'i Miit'in Eyke'et wo Wuat'i Miit'in Kywyt wo mi'i pote ariot i te aru mesuwat yi kape are. Ma'ato mekewat uhut hap e'at pe yt uwe mikuap mo i ariot are. Mekewat uhut hap e'at yt i'atu hin i uhekatup haria tukup­te'en e. Mekewat e'at pe — Yt tut i ira'yn po'og Aika­'iwat i'atu'e haria ahyt tukup­te'en are. — Yt tut i po'og mesuwat yi kape Aika­'iwat e haria tukup­te'en hap e'at pe aru ariot aikotã sero­'ok'e hat ut hap ewy e Iesui ahepe tomohey haria pe.
LUK 12:41 Mi'i e hap tohenoi hawyi ipotmu'e Peteru apo'e Iesui pe — Uruka­'iwat e mekewat sehay iã'ãkap ehay uwe pe ehenoi e sio uruto epotmu­'eria piat mu'e hano sio yne miit'in mesuwat yi totiaria mu'e hamo ehenoi e.
LUK 12:42 Yt uruhe­katup i apuru eut hap kape sio irania'in yt emohey i haria kape mio tã ere e Peteru Iesui pe. Mi'i hawyi Iesui tiwesat — Pyno ahenoi uwe pe ahenoi mekewat uhehay iã'ãkap. Karãpe mekewat morekuat toto turan tesu­rara akag po pe iwe'eg kahato rakat po pe totoiat torania to'yat­piaria sem i'ewyte tomẽ­pyt'in hawyi — Eti'a­tu­'a­pykok o ui'yat piaria areto hap turan e tope. I'ewyte eti'a­tu­po­'oro miit'in mesuwe i'atupoi hamo i'atu­'a­pykok kahato hamo e tesu­rara akag me e. Mi'i surara akag ni uimohey haria apykok haria ewywuat kahato are'e uhehay iã'ãkap upi e. Mi'i pote ewe'eg wo uimohey haria apykok hap pupi are ehepe e. Ta'i uheropat haria sese pe mio tã are einãpin hamuat katu­pono atiky­'esat kahato eiperia aikotã morekuat eropat haria powyro kahato sese rakaria ewy hap atiky­'esat areto turan e.
LUK 12:43 Atiky­'esat kahato uhemiit apykok haria powyro kahato rakaria aikotã morekuat eropat haria hãpyk sese rakaria ewy hap e.
LUK 12:44 Mi'i tã ewywuat eweikup­te'en turan ariot pote woro­ho­'onug eipe more­kuaria wo uhetama pakup we. Uhekat yne yne eiwano topy­hu'at e. Pywo pe miit'in ky'e hap upi ewei'a­pykok uimohey haria pote — Pyno waku kahato en wuat'i uhemiit akag wo hap atiky­'esat are'e aru e. — Atikuap ta'yn uimohey haria poi hãpyk kahato hap kaipyi uimohey haria ky'e hap kaipyi woro­ho­'okuap eipe waku kahato rakaria wo eweikup­te'en uheropat haria akag wo ko'i are'e aru uimi­ky­'esat ewy uimohey haria powyro kahato rakaria pe e. Mi'iria ewywuat Tupana mimõ­typot sese ko'i tukup­te'en aru wuat'i e'at pe uhut hawyi e.
LUK 12:45 Ma'ato irania'in uheropat haria ma'at haria yt iwe'eg nakaria i mi'i haria pupi aremõti kahato uhut hap e'at pe e. Katu­pono — Aika­'iwat yt tut irane i ra'yn mi'i tupono waku yt naku i watu­wenug e haria e hamo ta'a­tu­ma'at uimohey haria. — Ta'i yt tut i som katu­pono toĩne'en mot'i itote iatu'e uhut hap ete. Pyno waku watu'u mahy aimo­pẽ'ã hamo yn waku i'atu'e sa'ag. Waku wati­'a­tu­'ahyk irania'in heropat haria i'atu'e. Waku watu­'uka hemiit'in ete uhyt'i'in mana'in ko'i ete i'atu'e aru. Waku mahy ete watu­wenuk i'atu'e katu­pono yt tut hamuat i ra'yn mesup wote toĩne'en mot'i itote. Waku aimo­pẽ'ã yn hap wywo waku watoĩ­ne'en i'atu'e ti aru uheropat haria akag ko'i yt iwe'eg i sese rakaria e.
LUK 12:46 Yt ta'a­tu­mohey hin i aru Ta'a­tu­ka­'iwat put'ok'e hamuat hap ma'ato mio tã ta'a­tu'e turan sese put'ok­'are i ra'yn are e. Karãpe put'ok­'are hawyi mekewat uhemiit'in ma'at haria ati'a­tu­'a­piheg apiheg kahato itote e. Mi'i hawyi — Yt naku i kahato eipe are'e aru i'atuepe hawyi — Motoro pya pya uikai hawyi eweikup­te'en aikope yt uimohey haria i tukup­te'en hap tote are'e aru uimohey apykok haria pe uimohey haria ma'at haria pe. Mi'i hawyi ati'a­tu'okpok kyse wo hawyi ati'a­tu­mo­ku'i i'atupiit ko'i uimohey haria apykok haria sa'ag nakaria e Iesui.
LUK 12:47 Pywo pe are'e heropat hat ikuap kahato kat ko'i kat ko'i Toka­'iwat Tupana miky­'esat ko'i wen ma'ato yt tutunug i pote mi'i hat wyti Ika'iwat tipokpok kahato aru ta'aipok hawyi are e.
LUK 12:48 Ma'ato uheropat hat yt ikuap i kahato kat som Toka­'iwat miky­'esat hawyi mi'i hap yt inug i mi'i hat i'ewyte Ika'iwat ti'pokpok aru ma'ato yt kahato i aikotã toipokpok teropat hat ikuap kahato pytkai yt tutunug i Toka­'iwat miky­'esat hap ewy katu­pono yt tuwepyi i toi'a­parap e. Ma'ato waku watu­kup­te'en heropat waku rakaria yne Aika­'iwat miky­'esat ko'i aimikuap ok tã nug haria e. Mi'i hap ewy Aika­'iwat tiky­'esat kahato e. Pyno karãpe wẽtup ok pe ika'iwat tum iwato kahato teropat hap mi'i hat kaipyi ti toiky­'esat iwato hap po'og mi'i teropat hat pote e. Pyno po'og po'og Tupana timo­herep ahepe tomi­ky­'esat watunug hap ko'i tomi­'ai­roria aito pote. Pyno waku watunug tomi­ky­'esat tomi­mo­herep ahepe aimohey haype pote. Waku watunug imiky­'esat hap ok tã tomo­wepit hap e. Ma'ato yt watunug i to'e ahepe hap ewy pote po'og wati­'a­parap irania'in kai katu­pono watikuap imiky­'esat pytkai yt watunug i hawyi pote are e. Watunug imiky­'esat hawyi tuwehum kahato ahowawi hawyi po'og toimo­herep ahepe tomi­ky­'esat ko'i ma'ato yt pote yt aimohey kuap i e Iesui temiit'in me ahepe.
LUK 12:49 Mi'i hawyi Iesui to'e ahepe — Pyno ahenoi teran ehepe uhetiat e. Uito ti aria ewywuat yt naku i nug hap yne mesuwat yi tote wuk hamo e. Aikotã aria wy Uito aikotã watiwuk aiko hap ewy wẽtup aria aipo piat hap kaipyi watiwuk yne e. Sa'a­wy'i yt iwato hin i aria itote ma'ato watopag aria itote hawyi tutu'u yne. Iwato kahato aria itote hawyi wuk wuk'e itote hawyi ikahu hawyi yt kat i moi yt kat i i'anam yt kat i sa'ag tutu'u kahato hawyi waku pe amikoi ko'i hamo e. Uito ti mekewat aria ewywuat areĩne'en mesuwat yi tote wuat'i sa'ag miit'in wanẽtup hawe wuk hamo e. Aria ewywuat ti Uito ma'ato uiko yt atiwuk i te ma'ato atiwuk teran haype e.
LUK 12:50 Katu­pono aho'opot hap aria'yp posak etiat yt i te wen ma'ato mi'i kape arewa­nẽtup kahato e. Sa'a­wy'i ahet'ok hat Iuwãu uhet'ok ta'yn y'y wo ma'ato wẽtup ok uhet'ok hap toĩne'en ne mi'i ti aria ewywuat uimo­so­'opot hap sese are.
LUK 12:51 Uimohey haria yt naku i aru topy­hu'at ahete pãi e. Pywo ti rat yt ariot i mesu­wa­rotiat kape wo'o­wese hap erut hamo ma'ato ariot hawyi wo'o­tu­'uka kahato hap yn sehay topy­hu'at e. Uhehay pun haria ti'a­tu­'a­tu­'uka teran haype uhehay mohey haria ete e. — Yt pywo pe ihay i'atu'e yn uhehay ete eimi­mo­herep ete hawyi yt i'atu­wese kahato ehete uhehay moherep haria eipe pote e. Pyno yt eweiwa­nẽtup tei'o eipy'a pe meiũran aru yne mesu­wa­rote wo'o­wese haria tukup­te'en hap kape e. Yt eiwa­nẽtup tei'o miit'in i'atu­wese kahato hap uhehay kape eipy'a pe are e. Yt karãpe i aru yne miit wo'o­wese haria tukup­te'en katu­pono po'og i'atu­py­'ahak aru uhehay moherep haria ete ahewa­nĩ­kaptia are e. Aikotã surara sese tipat'ok kuap miit piit kyse'yp wo hap ewy mi'i hap ewy uhehay ti'a­tu­pat'ok miit'in wẽtup kai uimohey haria hawyi wẽtup kai yt uimohey haria i e. Pyno miit'in wo'o­pat'ok hat ewy areĩne'en e. Wẽtup kai uhehay upiaria tukup­te'en hawyi wẽtup kai yt i'atupap i uhehay upiaria e.
LUK 12:52 Mi'i hawyi ti aru 5 ok wẽtup yat piaria gupte'en haria meiũran aru yt to'o­wese hin i to'o­pat'ok uimohey hawyi are e. Mi'i hawyi to'o­pat'ok pat'ok haria wo tukup­te'en wẽtup yat pe e. Uimohey haria iwese kahato pytkai irania'in mekewat yat piaria yt i'atu­wese hin i itote wẽtup ywania pytkai e. Typy ok mye'ym ok ete sio mye'ym ok typy ok ete uimohey haria ete ipat'ok hawyi — Wãi'ia­tu'e irania'in uimohey haria mohit hamo aru e.
LUK 12:53 Mi'i turan miit'in tu'uka teran ehete uimohey haria eipe hawyi e. Ta'i ei'y­wot'in yt i'atu­wese hin i ehete uimohey haria eipe hawyi e. Eha'y­ru'in ehaki­'yt'in i'ewyte yt i'atu­wese hin i ehete uimohey eipe hawyi eimẽ­pyt'in pytkai are e. I'ewyte eity ipy'ahak ehete topy­hu'at uimohey hawyi eipe tomẽ­pyt'in eipe pytkai e. I'ewyte eimẽ­pyt'in yt i'atu­wese i ehepe uimohey hawyi ta'a­tu­ty'in ta'a­tu­'y­wot'in eipe pytkai are e. Ehaki­tu'in i'ewyte yt i'atu­wese i ehete ta'a­tu­mi­mo­ha­py'ap ko'i pytkai eipe e. Mi'i hawyi getap ka'iwat yt iwese hin i tosa­'yru ete tosa­ki'yt ete tosa­'yru tosa­ki'yt uimohey hano ra'yn mote e. Ta'i ariot pote miit'in to'o­pat'ok kahato wyti aru uimohey haria ete yt i'atu­wese hin i irania'in mesu­wa­ro­tiaria eipe eiwese kahato pytkai e. Yt kat i aru wo'o­wese hap sese mesuwe aru are e Iesui ahepe tomohey haria pe.
LUK 12:54 Mi'i hawyi po'og Iesui tohenoi miit'in sem itotiaria pe — Uheka­tu­wy­ria'in e mesu­wa­ro­tiaria tikuap kahato i'aman ut irane hap te'e­ra­ha'at at hun kape — Meiẽ i'aman hamuat i'atu'e. At wẽtem hap kaipyi i'aman tut i'atu'e mi'i hawyi i'atu'e hap ewy i'aman tut kahato. — Meiũpe ywyhig at ẽtyhot hap aũka hap ko'i mi'i pote i'aman irane i'atu'e ahetama pe hawyi i'atu'e hap ewy i'aman na'yn tut e.
LUK 12:55 Ta'i kahato atipy ihyryp'i kahato hap mi'i pote mesu­wiaria iũe e'at hakup irane mesup i'atu'e hawyi i'atu'e hap ewy put'ok'e e'at kahu hap e.
LUK 12:56 Mesu­wa­ro­tiaria tikuap kahato i'aman ut hap sio yt hap te'e­ra­ha'at atipy kape hawyi ta'a­tukuap ma'ato mesu­wa­ro­tiaria ta'a­tuieĩ­ne'en wuat'i e'at piat hap kape yt te'e­ru­wa­nẽtup teran hin i e. Ta'i mi'iria tikuap aikotã aru i'aman sio at waku hap ma'ato uwe Uito hap yt ta'a­tukuap hin i. Ta'a­tukuap uhehay ko'i kape ta'a­tu­wa­nẽtup pytkai yt uikuap i te uwe sese Uito e. Te'e­ra­'a­kasa kahato uiminug yt miit'in eminug kuap i iwato rakat ko'i kape pytkai yt uikuap i te uwe Uito e hap kape yt te'e­ru­wa­nẽtup teren hin i te'e­ra­ha'at kahato uhowawi yt uimohey i te rakaria mesu­wa­ro­tiaria e. Yt ihapytig i rakaria Tupana kape yt kat i i'atueha rakaria ewywuaria pote e Iesui miit'in sem itotiaria pe.
LUK 12:57 Mi'i hawyi po'og to'e Iesui itotiaria pe — Kat poteĩ yt eiwa­nẽtup teran i uwe Uito sese e hap kape e. Kat pote yt eiwa­nẽtup sio Uito waku sio yt hap kape e. Eiwo­'okuap uwe waku uwe yt hap kape meremo eiwo­'okuap yne eiwo­'o­mohey hap ete uwe waku uwe yt naku i wato­mohey ma'ato uhetiat uimohey hap kape yt eiwe­wa­nẽtup teran hin i wuat'i atunug waku ehehamo pytkai are.
LUK 12:58 Uimohey haria wẽtup sehay ahenoi teran ehepe — Karãpe ehewa­nĩ­kaptia aheroto sura­ra'in po pe Morekuat kape ai'auka hamo ai'pyhik hamo waku watikat kahato aiwe­nõ'ẽ i aiwa­nĩ­kaptia popywiat hamuat are e. Mi'i hap e'at pe ai'auka teran pote waku watoĩ­ne'en iwe'eg kahato rakano i'atu­py­'a­setpe mi'i hawyi mu'ap upi waku watikat kahato mu'ap aiwe­to­popy ahewa­nĩ­kaptia po pywiat hap are. Yt naku i watuwat morekuat koro kape ai'auka teran haria upi katu­pono itote meremo ahum morekuat koro pe hawyi morekuat — Yt naku i en e hawyi ahum tesu­ra­ra'in akag pe hawyi surara akag aipag iheg me kat aiwo­'o­pyhik hawe e.
LUK 12:59 Mi'i hawyi wo'o­pyhik hawe watu­kup­te'en at ka'ap hawyi aikotã aru watu­we­nõ'ẽ mekewat wo'o­pyhik hap sa'ag myi e. Ta'i itote yt uwe i tuwẽtem kuap i e. Mi'i tote waho­'opot kahato mekewat sa'up iwato ium hamo hawyi ai'yat toiwe­neru aiko ko'i aimikoi ko'i aimẽ­pyt'in ko'i totat temiit'in nuat aheha­ry'i totat towanuat ahemiit'in torania toipo­'oro topotpap nug hamo hawyi ahekat ko'i toi'a­tu­we­neru yne sa'up sat hamo. Mi'i hawyi yne aiwanuat morekuat nuat hawyi watu­we­nõ'ẽ aipyhik hap kaipywiat hawyi — Waku ra'yn motoro pya mesu­wepyi e ahepe sio meremo woro­'auka en aru e ahepe. Mi'i tupono waku po'og ahewa­nĩ­kaptia meremo watunug aiwy­ria'in sese wo mu'ap upi eheroto sura­ra'in miat morekuat kape turan are e Iesui temiit'in me ahepe.
LUK 13:1 Iesui ti'a­tu­mu'e itotiaria turan irania'in itotiaria te'e­ro'e Iesui pe — Mehĩ i'atu'e wanĩ­kaptia mipo­'oro aipo­rekuat nuat mekewat Piratu e hap het rakat yt naku i kahato tutunug katu­pono ga'atpo ti ahetama Kari­reira piaria morekuat Piratu timoma kahato i'atu'e. Morekuat totat ahemiit'in hawyi toiwuk Tupana mõtypot yat pe i'atu'e. Mi'i hawyi totopag mekewat i'atusuu at hap Tupana mõtypot yat piat yparakai tote mekewat aihũria suu wuk hap eypa­rakai tote aihũ watum hawyi watiwuk Tupana mõtypot hamuat hap tote i'atu'e Iesui pe.
LUK 13:2 Mi'i hawyi Iesui to'e i'atuepe — Pyno uruto po'og morekuat Piratu mi'a­tu­'uka ko'i kai ewei'e. Yt karãpe i urutunug sa'ag imi'a­tu­'uka ko'i minug ewywuat ewei'e. Mi'i pote Tupana mi'a­piheg ko'i wuaria tukup­te'en mi'iria ai'y­wania ewei'e eiwo­'ope e Iesui.
LUK 13:3 Ma'ato pywo pe ti are'e ehepe eiperia ti wy i'ewyte yt nakuaria i kahato eweikup­te'en are. Ga'atpo ei'y­wa­niaria morekuat Piratu ti'a­tu­'uka kahato yi Kari­reira piaria. Yt naku hin i ti ipap hap ewei'e. Yt ikahu hin i i'atu­ku­'uro hap ewei'e e. Mi'i hap ewy ti aru eweipap yt uimohey i eipe pote e. Ma'ato wuat'i e'at pe ti aru ho'opot hap eiwanuat topy­hu'at eiwano e. Ma'ato yt paa'e­wei'e i yt uimohey i hap ete pote yt naku i pe wuat'i e'at pe eweikup­te'en po'og yt naku i morekuat Piratu mi'auka ko'i ho'opot hap kai are.
LUK 13:4 Ta'i sa'a­wy'i sese 18 surara topap yne ta'a­tu'yat nu kawiat ywaiti rakat ta'at i'atuepiit ete hawyi yt naku i ewei'e. Mi'i hawyi sura­ra'in gupte'en haria topap yne nu yat ta'at i'atuete hawyi. I'atu­ku­'uro hap yt ikahu hin i ewei'e. Mi'i pote ewei'e eiwo­'ope — Eweikuap kat pote mekewat 18 surara topap nu mi'a­tu­'uka ko'i ewei'e. Ta'i sura­ra'in yt naku i nug kahato haria pote ti Tupana ti'a­tu­'a­piheg sese mi'iria ewei'e eiwo­'ope. Ta'i po'og tawa Ieru­sarẽi miaria kai yt naku i nug haria mi'iria pote Tupana ti'a­tu­moma yne ewei'e eiwo­'ope.
LUK 13:5 Ma'ato pywo pe are'e ehepe meiũran ti aru eipe po'og eweipap mi'iria kai po'og yt naku i are'e. Eiku­'uro hap po'og yt ikahu i mi'iria ku'uro hap kai. Katu­pono wuat'i e'at piat eiku­'uro hap topy­hu'at yt ikahu hin i. Ma'ato paa'e­wei'e yt uimohey i hap ete hawyi mi'i hawyi uimohey haria wo eweikup­te'en hawyi waku puo eweikup­te'en wuat'i e'at pe e Iesui tomohey hap pun haria pe.
LUK 13:6 Mi'i hawyi Iesui henoi hã'ãkap wo i'atuepe. — Wẽtup ok so toto tomikoi ypia wato hap kape e. Sa'a­wy'i warana ypia py'a­setpe Wiku yp toĩne'en itote hawyi toto mekewat tomikoi Wiku yp kape hawyi toho­'okat Wiku saat toho­'ohep hamo. Ma'ato put'ok­to'e hawyi so ma'ato i'yhop yn toĩne'en itote ihãite kahato. Ma'ato yt kat i haat ipoi hamo. Yt wẽtup i haat toipuẽti tomi'u wo.
LUK 13:7 Mi'i hawyi toikaykay tuwe­wawi teropat hat tomikoi ypia apykok hat — Uhyt e ga'atpuat ga'atpuat e'at ariot sa'a­wy'i meiũwat yp kape uipoi hap kat hamo ma'ato yt kat i atipuẽti te e so. Mi'i hawyi ga'atpo e'at i'ewyte haat hap e'at ra'yn turan ariot i ma'ato i'ewyte i'yhop yn ne atipuẽti yt uipoi hin i uhesy'at hawyi. Koran ariot i hawyi he'at ra'yn ma'ato ara'a­kasa hawyi yt uipoi hin i hat mesuwat uimikoi Wiku yp e. Pyno uhyt eti'yppun no meiũwat yp ywyhop mo e. Kat pote uhe'yi u hat toĩne'en ma'ato yt uipoi hat i e. Mi'i hawyi waku wẽtup i watikoi mesuwat yi aikope toĩne'en mesup Wiku yp hap tote e.
LUK 13:8 Mio tã e pote — Yt uhyt e mikoi ypia apykok hat. Yt rat uika­'iwat yt naku i rat wati­'yppun e. Waku watum yi hun kahato tope 12 ewaty pe te sio haat hamuat sio yt ti ra'yn hap kuap hamo e. Mi'i hawyi waku watipoi kahato aimipun ko'i wo e. Waku ahywytip kahato i'anam ko'i mi'i hawyi weita iun a'ẽpo ko'i waku wati­puruk kahato haga etiat e. Mi'i hawyi arewa­nẽtup irokirẽ wat 12 ewaty hawyi haat aru ma'ato yt haat pote waku wati­pugha e.
LUK 13:9 Pyno 12 ewaty hawyi waku mehĩ era'aipok eraha'at sio wakuat sio yt hap kuap hamo e. Ma'ato mi'i turan yt haat i te ra'yn pote waku eti'yppun uhyt e. Mi'i mikoi Wiku yp ewy kahato ti eweikup­te'en eipe e Iesui. Wẽtup 12 ewaty hawyi ete sio haat rakat ewy sio yt hap ewy eweikup­te'en. Ma'ato yt i te ti pote Tupana mi'yppun wo eweikup­te'en e Iesui to'y­wania pe yt tomohey i te haria pe.
LUK 13:10 Mi'i hawyi Iesui toĩne'en i ra'yn wẽtup Tupana mõtypot yat pe i ra'yn miit'in mu'e hamo.
LUK 13:11 Mi'i tote toĩne'en wẽtup ok hary­poria ahiag ipiit piat rakat itote. I'ahu kahato 18 anu ra'yn. Toho­'opot kahato katu­pono ahiag mimo­'ahu toĩne'en. I'ok tũ'ã kahato hap wywo toho­'opot ahiag minug.
LUK 13:12 Iesui teha'at mi'i hary­poria kape hawyi toikaykay tuwe­wawi. Mi'i hawyi to'e tope — Mana atipok ta'yn epo'i po'i hap ahiag minug e. Pyno mana e e'ahu hap epo'i po'i hap ewy kahato. Pyno mi'i hap ewywuat epo'i po'i hap atiporop ta'yn e.
LUK 13:13 Mi'i hawyi tuwe­ponug hawyi i'ok tũ'ã hap meremo tokosap ta'yn. Waku hawyi hary­poria to'e tehay wepit kahato hap wywo — Waku kahato En Tupana e.
LUK 13:14 Ma'ato Tupana mõtypot yat apykok hat ipy'ahak kahato Iesui ete katu­pono Iesui timo­hãite mekewat hary­poria yt topotpap i hap e'at pe pote. Mi'i pote to'e tomi­mu­'eria pe — Toĩne'en wyti 6 e'at aipotpap nug hamuat e. Pyno waku 6 e'at aiwe­potpap hap turan watikat aimoe­hãite hap ma'ato mesup e'at pe yt naku i kahato watikat amoehãite hap e. Mi'i hawyi Iesui tiwesat — Mehĩ e yt ewe'eg hin i aikotã typy ehay rakat ewy ereĩne'en katu­pono etipotpap kahato tuereto mesuwat e'at pe ehũ wewato ahup ta'at yi ka'a pe pote meremo etiõtem hap atikuap e.
LUK 13:15 Mi'i hawyi Iesui tiwesat — Typy hẽku rakat ne'i wyti en e. Yne e'at pe ewete­re­po'ok ewetioto eihũria i'atu­moe­'y'u hap kape. Yne e'at pe ewete­re­po'ok y'y kape eihũria e Iesui Tupana mõtypot yat apykok hat pe.
LUK 13:16 Pyno mesuwat hary­poria aha'a­se'i Aparãu emiariru toĩne'en wen ma'ato 18 anu turan ahiag mipo'i wo toĩne'en aikotã ehũ saity ete hap ewy are. Kat poteĩ pyno yt eweiky­'esat i Aparãu emiariru moehãite hap e. Kat poteĩ — Wãi'ere mesuwat mana erepo'ok hap ete yt naku i yt aipotpap i hap e'at pe e Iesui.
LUK 13:17 Mio tã e Iesui hawyi wanĩ­kaptia paa'i­'a­tu'e. Ma'ato irania'in itotiaria te'e­ru­wehum kahato Tupana pe Iesui minug wakuap ko'i ete.
LUK 13:18 Mi'i hawyi po'og Iesui henoi teran iã'ãkap wuo ma'ato sa'a­wy'i apo'e i'atuepe — Aikotã som Tupana topy­hu'at Miit'in Porekuat no hap ete apo'e.
LUK 13:19 — Pyno ahetama pe toĩne'en iã'ỹi kurin kahato rakat aimi'u mosẽ'ẽ hap Mutata iã'ỹi wato'e. Mi'i ti kurin kahato wen ma'ato wẽtup ok tikoi toko pe hawyi hẽtyt hawyi meiũran i'yp ywaiti kahato ra'yn aria'yp sese ewy wo ra'yn toĩne'en. Mi'i hawyi i'yp haĩkupy pe weitaria te'e­ru­we­soknug na'yn i'yhop ko'i og muo. Mi'i hap ewy ti Tupana topy­hu'at Morekuat no mesuwat yi tote Mutata iã'ỹi mikoi hap ewy e Iesui tomi­mu­'eria pe.
LUK 13:20 Mi'i hawyi Iesui apo'e i ra'yn — Aikotã wyti aru so Tupana topy­hu'at Miit'in porekuat no e hawyi sehay iã'ãkap wuo toi'a­tu­mu'e i ra'yn.
LUK 13:21 — Pyno uhyt'i'in aikotã u'i nug hap ewy kahato ti aru Tupana topy­hu'at Morekuat no mesu­wa­ro­tiaria pe e. Aikotã watopag manĩ puk ipyre kape. Mi'i hawyi wati­'a­pokik manĩ puk ipyre wywo. Mi'i hawyi wati­'ahik hawyi watoiat hawyi meiũran i'apo­perup hawyi wati­karay mi'i hawyi aimi'u wo ra'yn he kahato ra'yn. Mi'i hap ewy ti aru Tupana teke aipy'a pe tehay wo e. Kurin nakat ewy i'apopyt ewy ihay pytkai hawyi ihay tuwe­mo­wato aiwa­nẽtup hawe hawyi meiũran u'i he hap ewy wato­py­hu'at e Iesui itote mu'ap upi tawa wato Ieru­sarẽi kape toto turan.
LUK 13:22 Mi'i hawyi Iesui ti'a­tu­mu'e kahato yne tawa hit piaria Tupana ehay wo. Mi'i hawyi tawa wato Ieru­sarẽi kapiat epu'ap upiaria toi'a­tu­mu'e kahato Tupana ehay wo.
LUK 13:23 Mi'i hawyi mu'ap upi wẽtup ok apo'e Iesui pe — Urupo­rekuat e karania apuru pyno te'e­ro­py­hu'at Tupana mieha­kye­ra'at ko'i wo atipy pe e sio apuru typy'i kahato miit sio apuru yt typy'i i apo'e Iesui pe. Mi'i hawyi Iesui tiwesat.
LUK 13:24 Waku ewei'e eipy'a pe — Uito areke teran pãi areke teran an mekewat oken'ypy yt iwato i rakat ewywuat pe areha­kye­ra'at hap puẽti hamo waku ewei'e at ka'ap eipy'a pe are. Yt naku i — Waku mũki­'ite areke ewei'e hap ewy ewei'e are. Katu­pono meiũran ti aru i'atu kahato tuwe­hyt'ok teran atipy pe aikope Tupana toĩne'en Morekuat no hap kape wen ma'ato mi'iria yt tuwe­hyt'ok kuap i katu­pono wehyt'ok hap mot'i poity'i rakaria — Mũki­'ite waku areke sa'a­wy'i i'atu'e pote e haria pote e. Yt kat i typy oken'ypy atipy kape. Eweikat ro mekewat wẽtup yn oken'ypy Ui'ywot kape hap e Iesui tuwepiat.
LUK 13:25 Mi'i hap e'at pe aru — Ere'o­ken­hyp'ok to Mimi ere'o­ken­hyp'ok to Uhyt i'atu'e mot'i kahato uhowawi wen — U pãi yt woro­ho­'okuap kahato i eipe aikope pyi eweiõ'ẽ are'e i'atuepe aru. Ui'yat ri iheg me ra'yn are'e aru. Iheg me sese ra'yn ni oken'ypy are'e aru — Ere'o­ken­hyp'ok o ewei'e mot'i uhepe hawyi e. Waku mesup ereke uhyt'i'in mana'in are e Iesui.
LUK 13:26 Mi'i tote aru oken'ypke te'e­rewak kahato. — Sa'a­wy'i urutenuk kahato ewywo Mimi. Urutu­we­sa­po'u kahato kue ewywo Mehĩ i'atu'e uhepe. Ehay ete ti urutu­we­mu'e kahato wuat'i puo mu'ap upi i'atu'e aru uhepe.
LUK 13:27 Mi'i hawyi ati'a­tu­wesat — Pywo pe ti rat are'e ehepe sa'a­wy'i yt uimohey i pote yt woro­ho­'okuap hin i eipe are'e aru. Yt atikuap hin i aikope pywiat eweiõ'ẽ hap are'e aru. Eweiwat ro ui'ya­ty­pepyi pãi katu­pono yt nakuap i nug haria ti eipe are'e aru yt tuwe­hyt'ok i haria pe e Iesui.
LUK 13:28 Mi'i hawyi te'e­ruwak popuo te'e­ra­'aipok haty turanuat hap ewy i'atu­wa­nẽtup hawe i'atu­py'a pe kyry'et kyry'et ta'atuiãi ete haty kahato i'atupiit ete pote. Katu­pono sa'a­wy'i Aparãu yt pya hin i i'atukai toĩne'en meiẽwat getap we toĩne'en. I'ewyte Isaki i'ewyte Iako i'ewyte sa'a­wy­'i­wuaria Tupana ehay moherep tukup­te'en kahato itote Tupana yat pe ienuk hap ikahu kahato hap tote. Mi'i haria ewy aru eweikup­te'en mekewat wo'o­kak'i haria ewy yt eiwe­hyt'ok teran i mesup yn mote. Meiũran aru Tupana oken'ypy sakpo eweikup­te'en ho'opot hap tote yn. Yt eweikup­te'en hin i aru uiwywo atipy pe are — Mũki­'ite waku wato­mohey ewei'e mesup pote e.
LUK 13:29 Ma'ato tuwe­hyt'ok kahato irania'in ywania. Mi'i haria ti tuwe­hyt'ok aikope Tupana toĩne'en Morekuat no hap tote yt ai'y­wania sese hin i pytkai. Tõ'ẽ tõ'ẽ kahato aikope pyi at tuwẽtem hap kaipyi aikope at min'e hap kape hawyi at posak kaipyi tõ'ẽ Tupana wywuat tukup­te'en hamo. Mi'i hawyi mi'iria paa'e haria pe — Eiwe­hyt'ok to are'e mi'iria pe ma'ato ehepe ti aru — Eiwe­hyt'ok to yt are hin i e. Uhehamo eweikup­te'en mesup uhehay sio waku sio yt hap kape ehewaure toĩne'en pytkai mekewat e'at wyti aru — Yt woro­ho­'okuap i eipe are'e aru Tupana ehamo ehepiat yt uimohey i haria te eipe pote e Iesui yt tomohey i te haria pe.
LUK 13:30 Ui'y­wania e eipe ti Tupana ehay kuap yianmiat haria eweikup­te'en ma'ato o irania'in ywania ehewot­'yptia rakaria wyti aru tuwe­hyt'ok ehe'yianme atipy pe wẽtup ywania pytkai katu­pono uimohey haria tukup­te'en mi'iria aru are ma'ato eipe uhepiat sehay yianmiat kape eweikuap kahato pytkai yt eiwe­hyt'ok teran i mesup oken'y­pyke atipy kape e. Mi'i pote irania'in tuwe­hyt'ok kakato aru ma'ato eipe yt eweiky­'esat i pote i'atu­wat­'ymo eiwe­hyt'ok aru are e Iesui to'y­wania Iuteuria pe.
LUK 13:31 Mi'i hawyi Tupana ehay enoi haria put'ok­'i­'a­tu'e Iesui yatype te'e­ro'e hamo — Erẽtem no meremo meiũpepyi i'atu'e katu­pono morekuat Eroti wyti e'auka teran moity'i ra'yn Uhyt i'atu'e Iesui pe.
LUK 13:32 Mi'i hawyi Iesui ti'a­tu­wesat — Morekuat Eroti ti awahuru ewywuat uiwa­nẽtup hawe katu­pono wo'o­'auka teran hat mi'i miit are'e. Mi'i hawyi eweiwat ro Eroti kape hawyi ehenoi ui'e hap tope — Uito ti meiũ ahiagnia atusopo kahato hat ra'yn i'ewyte ati'a­tu­moe­hãite kahato i'ahu rakaria mũki­'ite ti aru i'ewyte atunug atunug wakuat uipot­moe­hãite hap ko'i uhewyry hap upi e. Mi'i hawyi mũki­'ite e'ihot'ok hawyi ti aru waku yne ra'yn uiminug ko'i mi'i hawyi waku yne hawyi areto e.
LUK 13:33 Mesup e'at pe uipotpap teran miit'in moehãite hap ete hawyi mũki­'ite i'ewyte uipotpap teran hawyi mũki­'ite e'ihot'ok hawyi toran na'yn uipotpap hap mesuwe katu­pono ui'auka hap e'at aru put'ok'e ra'yn are. Ma'ato mesup e'at pe waku te arepotpap waku uhewyry mesuwe i'ewyte mũki­'ite waku ti wy. Ma'ato e'ihot'ok toran na'yn uipotpap hap toran na'yn. Katu­pono ui'auka hap e'at yt pya hin i ra'yn waku ewei'e mekewat Eroti pe awahuru ewywuat pe. Mi'i hawyi i'ewyte wẽtup ewehenoi tope — Yne sa'a­wy­'iwuat Tupana ehay moherep haria topap kahato tawa Ieru­sarẽi me i'ewyte Uito Tupana Mipo­'oro Tehay Moherep Hanuat yt naku i pyno wẽtup tawa pe ui'auka hap e. I'ewtye Uito atiky­'esat sa'a­wy­'iwuat Tupana mipo­'oro ko'i atu'uka hap tote te uiku­'uro hap uhyt ewei'e o miowat ui'e hap ewehenoi mekewat awahuru pe e.
LUK 13:34 Mi'i hawyi Iesui tuwak to'y­wania ky'ewi tomohey hap pun haria pote. — Tawa Ieru­sarẽi miaria e yt eweiwe'eg hin i eiperia katu­pono Tupana mipo­'o­roria auka haria eipe e. Ihay moherep haria ewei'a­tu­'uka ha'a­wyte nu ko'i wo e. Ewei'a­tu­'akit kahato i ti Tupana mipo­'oro ko'i e. Mi'i hap ewy Uito wy woro­ho­'o­ky'e eipe pytkai — Eweiõ'ẽ ro eweiõ'ẽ ro uhowawi are yn pytkai akotã waipaka ty ti'a­tu­kaykay tomẽ­pyt'in ko'i hap ewy woro­ho­'o­kaykay kahato eipe — Eweiõ'ẽ ro eweiõ'ẽ ro uhowawi are kahato waipaka wary'i imẽpyt rakat ewy ma'ato ti — Yt yt yt ewei'e uhepe piku piku ko'i ewy. Uipo­pesap ywyt'ok­pype are waipaka ewy ma'ato — Yt rat ewei'e uhepe e Iesui tawa wato Ieru­sarẽi piaria pe tuwak turan.
LUK 13:35 Are pãi mi'i hawyi ti aru eiweran eweipy­hu'at areto hawyi. Yt ewei'a­kasa hin i uhowawi aru ma'ato meiũran ti aru esaipe­piaria ai'y­wania Iuteuria — Waku kahato Tupana Mipo­'oro Sese Aheha­kye­ra'at hat i'atu'e aru uhetiat pe hawyi mi'i hap e'at pe aru ara'aipok ehowawi i ra'yn e Iesui tuwak hawuo. Ma'ato mesup yt uimohey hin i eipe pote eweikup­te'en aru aikotã ai'yat ikahu rakat yt uwe i miit wywo rakat ewy i'anam kahato ga'apy mihik pe tawa Ieru­sarẽi toĩne'en mot'i are. Mi'i hawyi ei'yat mesuwe yt kat i eipe yt uwe i hawyi are. Ma'ato meiũran ti aru — Mi'i Miit waku kahato Aipo­rekuat no ewei'e uhepiat hawyi mekewat e'at pe irania'in ewy waku puo eweikup­te'en Tupana ywania wo i ra'yn ma'ato mesup te yt e Iesui to'y­wania pe yt tomohey teran i te haria pe.
LUK 14:1 Mi'i hawyi yt i'atu­potpap i hap e'at pe put'ok'e itote Tupana mõtypot yat pyi wẽtup getap kape Iesui toto Tupana mõtypot yat piaria apykok hat yat kape toto. Itote i'atu kahato nagnia ehay enoi haria. Itote Iesui ta'apyk tenuk i'atu­'akag wywo hamo. Mi'i hap kape te'e­ra­ha'at kahato Iesui kape. Ta'a­tu­ky­'esat kahato Iesui ti'a­parap hap sio Iesui ipotpap yt i'atu­potpap i hap e'at miit'in moehãite hap ete sio yt i'atu'e.
LUK 14:2 Katu­pono itote ti toĩne'en ihainia i'ahu kahato rakat ipiit puk takat. Mi'i pote te'e­ra­ha'at kahato sio apuru Iesui timoe­hãite sio yt aipotpap i hap e'at pe ta'a­tue­ro­mõ­pusu teran haype.
LUK 14:3 Mi'i hap Iesui tikuap tuwe­kaipyi mi'i hawyi to'e — Eiperia ti eweikuap kahato wãi'e hap ko'i yt naku i mesup e'at pe mio tã watunug hap ko'i. Ta'i ahe'a­se'i Musei wãi'e hap ko'i kuap kahato haria eipe pote apo'are teran ehepe — Waku apo miit'in moehãite hap watunug Tupana mõtypot e'at pe sio yt e. Uiwesat ro e Iesui wo'o­mu'e haria akag me.
LUK 14:4 Ma'ato yt ta'a­tu­wesat teran i katu­pono i'atu­py­'ahak Iesui ete. Mi'i hawyi Iesui tipo­pytyk ipiit puk takat ipo ete. Mi'i hawyi tuwe­ponug ipiit puk takat ete pote meremo ipiit ihãite i ra'yn topy­hu'at. Mi'i hawyi ipohep ipiit ete pyi — Pyno waku ra'yn eete mehĩ e. Waku ereto i ro e'yat kape e.
LUK 14:5 Toto hawyi Iesui tuwe­morem itotiaria ewawi — Eiperia eipotpap kahato yt motpap i hap e'at pe e. Woro­ho­'okuap eipe. Eihũ wewato ahup ta'at yi ka'a pe y'y pe hap enõtem hap ete eipotpap mi'i hap e'at pe pywo are sio yt. Ta'i pywo ti are e mi'i tã ti ewetunug yt naku i aipotpap e hap e'at pe. Mi'i pytkai kan hamo uimohit teran mesuwat e'at piat miit moehãite hap upi e.
LUK 14:6 Mi'i hawyi yt ta'a­tu­wesat kuap i kahato Iesui.
LUK 14:7 Mi'i hawyi toi'a­tu­mu'e i tehay iã'ãkap wo Iesui katu­pono toikuap itotiaria te'e­ru­we­mo­wato hap pote. Ta'a­tu­ky­'esat morekuat e'ypa­rakai totiat ta'a­tu­'apyk ienuk hap e'at turan — Uito po'og torania kai ta'a­tu'e hap moherep teran haype i'ewyte ta'a­tue­sokpe ikahu kahato hap ete ta'a­tu­'apyk hap tote. Morekuat e'okipy tote te'e­renuk teran. Yt te'e­renuk teran i irania'in miit'in emiit wywo.
LUK 14:8 Mi'iria pe Iesui to'e — Uhyt'i'in mana'in karãpeĩ more­kuaria eikaykay ienuk hap kape turan o yt eiwo­'o­'apyk tei'o iwato'in nakaria e'amyap tote eiwe­mo­wato haype hap e. Pyno po'og waku paa'e haria wo yn itote eweikup­te'en. Ma'ato ewei'apyk more­kuaria ewy turanuat put'ok'e wẽtup ok po'og iwato rakat eikawiat hat.
LUK 14:9 Mi'i hawyi aru ienuk hap ka'iwat to'e aru ehepe — Apuete uhyt mana etum no e'amyap meiũwat uiwy pe e aru. Mi'i hawyi era'apyk kuepe e aru. Mi'i pote aru eiwe­mõti hap kahato topy­hu'at ehete e. Mi'i hawyi ienuk hap e'at pe eremõti kahato yi tote apyk pe era'apyk hawyi e.
LUK 14:10 Mi'i pote woro­ho­'o­nãpin teran uhyt'i'in mana'in. Karãpe aikaykay ienuk hap kape turan waku wata­'apyk yt uwe mikuap i yatype. Mi'i pote aru ienuk ka'iwat tut ahowawi hawyi — Po'og waku morekuat amyap tote ro era'apyk mana uhyt e aru ahepe. Mi'i hawyi aiwe­mõ­typot hap itote topy­hu'at. I'ewyte aru itotiaria aikuap ta'yn more­kuaria mimõ­typot no watoĩ­ne'en hap are.
LUK 14:11 Katu­pono mio tã e ehowawi AheTupana — Wemo­wato haria mohit hano areĩne'en e. Ma'ato wemohit haria mõtypot hano areĩne'en e.
LUK 14:12 Mi'i hawyi tuwe­morem hawyi Iesui to'e i ienuk ka'i­waria pe — Uhyt'i'in mana'in e karãpe ienuk hap iwato rakat watunug teran yt naku i wati­'a­tu­kaykay ienuk hap kape aika­tu­wyria aiwy­ria'in iwato'in nakaria are. Po'og waku watu­wẽka ienuk kape yt uwe mikuap i ko'i hesy'at rakaria hatek takaria katu­pono mi'i haria yt aikaykay kuap i aru ta'a­tuenuk hap kape yt hekat rakaria i pote. Ma'ato aiwy­ria'in hekat rakaria yn wati­'a­tu­kaykay pote meiũran i'ewyte aikaykay ta'a­tuenuk wato hap kape. Yt naku i — Waku atikaykay uiwy­ria'in hekat rakaria ui'yat kape ienuk hamo katu­pono ati'a­tupoi hawyi i'ewyte wyti aru uikaykay i'atu'yat kape i'atu­mi'u u hamo yt naku i wato'e aiwa­nẽtup hawe wati­'a­tu­kaykay miit'in ehenuk hap kape turan.
LUK 14:13 Po'og waku wato'e aiwa­nẽtup hawe — Waku po'og ati'a­tu­kaykay ui'yat kape tenuk hamo hatek sese rakaria ipiit sa'ag nakaria ipy sa'ag nakaria po'og waku wato'e. Waku yt ihapytig i rakaria yt miit'in miky'e ko'i i ati'a­tu­kaykay ui'yat kape ienuk hamo po'og waku wato'e are.
LUK 14:14 Pyno mi'i tã watunug hawyi Tupana meremo tikuap ahegyi'at hap hawyi wy ti aru meremo aru Tupana aikaykay tomi­mõ­typot ko'i wo wato­py­hu'at aipoi hamo toenuk wato hap kape e. Katu­pono hatek takaria ky'e haria wo watoĩ­ne'en Tupana ewywuat pote. Mi'i hawyi eweinõ'ẽ eiku­'uro hap pyi mi'i hawyi aru ta'aipok kahato ehowawi mekewat mi'u eimiium hap satek takaria piat enuk wato nug hap sa'up Tupana po pyi atipy pe e Iesui.
LUK 14:15 Mi'i hawyi wẽtup ok miit itote ihay kahato Iesui kape tenuk hap yparakai totepyi — Ikahu kahato tig ehay e. Urumu'e kahato En. Pywo aru meiũran meimuẽwat ienuk haria i'atu­wepit kahato Tupana yparakai henuk hap tote e. Ta'i Tupana put'ok'e Morekuat no hap e'at pe ienuk hap aimo­wepit kahato hap aru toĩne'en e.
LUK 14:16 Mi'i hawyi Iesui tiwesat — Pywo ti rat mehĩ wen ma'ato ti mesup ta'yn Tupana ti'a­tu­kaykay tenuk wato hap kape ma'ato mi'i pytkai miit'in yt tuwat teran i e. Pyno ahenoi ehepe mi'i iã'ãkap wuo. Wẽtup e'at pe so hekat kahato rakat ti'a­tu­kaykay kahato tominug ienuk hap iwato kahato rakat kape. Katu­pono Mi'i Miit miit'in Potypot nuat ieĩne'en hat.
LUK 14:17 Mi'i hawyi tuwehay po'oro kahato miit'in typy'i rakaria kape — Eweiõ'ẽ ro eweiõ'ẽ ro waku ra'yn aimi'u ikã'ã ra'yn iwato kahato rakat waku ra'yn eweiõ'ẽ mesuwe katu­pono yparakai tote ra'yn aimi'u wuat aimo­wepit hap e. I'ewyte ahesapo hy waku ra'yn wy e. U'i he kahato rakat toĩne'en e. Pyno eweiõ'ẽ ro e. Waku ra'yn eweiõ'ẽ ro uiwy­ria'in e. Pyno waku ewei'e ro irania'in me uiwy­ria'in me e te'e­ropat haria tehay enoi haria pe e. Mi'i hawyi tuwat. — Aimi'u ra'yn i'atu'e.
LUK 14:18 Ma'ato — Apu i ete i'atu'e. Yt naku i te mesup areto e. Etikuap kat pote yt uipo­hepap i te mesup katu­pono atipuẽti ra'yn mesup yi wakuat uiweko nug hamuat e. Katu­pono mesup ta'yn ti areto hamuat mekewat yi hun kapiat ui'a­kasa uiweko nug hamuat hap kape e. Mi'i tote ti ikahu kahato. Pyno waku ere'e morekuat pe — Yt areto kuap enuk hap ikahu rakat kape e morekuat potpo­'oro pe.
LUK 14:19 Mi'i hawyi wẽtup ok pe i — To'iro morekuat enuk hap kape mehĩ e. Waku ra'yn e. Ikahu kahato tig itote e. Mi'i pote — Waku mehĩ e wen ma'ato ti mesup te yt areto kuap i e yt uipo­hepap i te mesup. Etikuap kat pote. Na'atpo atikyi'at 5 wewato ahup mi'i pote mesup areto ui'a­kasa hamo waku sio uimi­kyi'at ko'i sio yt hap kuap hamo. Sio i'atue­saika uhe'yara ekyi yi totiat hamo sio yt. Mi'i hap ko'i ete ti yt uipo­hepap i e. Pyno mi'i pote ere'e o morekuat pe — Areto teran wen waku kahato hap kape ma'ato yt areto kuap i. Pyno waure wo o morekuat toĩne'en uikai mehĩ e.
LUK 14:20 Mi'i hawyi wẽtup ok morekuat wy ok yat pe teke hawyi — Aim'u ra'yn mehĩ e. Ikahu kahato tig morekuat yat pe e. Iwato kahato tig ahenuk hap e. Pyno to'iro mehĩ e. Mi'i hawyi toiwesat — Pyno waku areto teran ni ma'ato ti yt uipo­hepap i te koitywy morekuat enuk hap kape e. Etikuap kat pote e. Ga'atpo atipuẽti uheha­ry'i ikahu rakat mi'i pote areĩne'en mesup iwywo e. Pyno waku ere'e morekuat pe — Waure wo soke ereĩne'en ere morekuat pe kat pote ti yt uipo­hepap i te. Mesup uheha­ry'i mowepit hap ete areĩne'en e. Mi'i hap ete areĩne'en mesup e.
LUK 14:21 Mi'i hawyi heropat haria te'e­ra­'aipok i ra'yn morekuat kape — Yt tõ'ẽ i wyti ewyria'in uhyt te'e­ro'e hamo. Mi'i hawyi toikuap yne ra'yn i'atu'e hap — Yt uipo­hepap i te mesup e haria yn aimi­kaykay ko'i i'atu'e hawyi morekuat ipy'ahak kahato i'atuete hawyi to'e tomi­po­'o­roria pe — Pyno eweiwat i ro wuat'i mu'ap wato upi wuat'i mu'ap hit ko'i upi. Mi'i hap upi ewei'a­tu­kaykay wuat'i haky­'e'i rakaria hatek takaria uhenuk hap kape e. Waku ewei'a­tu­kaykay yne tawa wato piaria yt hekat rakaria i yt ipy kahato rakaria i yt ipo kahato rakaria i yt ihapytig i rakaria yt hewyry kuap i rakaria ipiit sa'ag sa'ag nakaria yt uwe miky'e i ko'i mi'iria meikowo henuk hap kape ewei'a­tu­kaykay ro e morekuat teropat haria pe.
LUK 14:22 Mi'i hawyi tuwat hawyi ta'a­tu­'a­tu­kaykay yne miit'in yt iwato'in nakaria i yt uwe miky'e i ko'i morekuat enuk wato hap kape. Mi'iria tõ'ẽ tõ'ẽ kahato howawi. Mi'i hap kaipyi te'e­ra­'aipok i ra'yn ihay moherep haria morekuat kape. — Urutunug na'yn ni emiky­'esat ewy mehĩ i'atu'e. Mi'i hawyi tõ'ẽ emikaykay ko'i i'atu'e. Typy'i kahato ti wen enuk hap tote tukup­te'en mesup ma'ato mi'i pytkai emi'u iwato kahato pote yt ta'a­tu'u kuap i yne i'atu'e.
LUK 14:23 Mi'i pote morekuat to'e — Are pãi e pyno waku eweiwat i ro yne y'y hit i ko'i upiat gupte'en haria kape e. Yne tawa hit tawa hit ko'i kape ga'apy piaria kape e. Mi'iria eti'a­tu­kaykay meikowo hamo e. Katu­pono ti atiky­'esat ui'yat pyt'at nug yne miit'in miat hap e. Atiky­'esat nyti hik'e miit'in no ui'yat hap e.
LUK 14:24 Sa'a­wy­'i­wuaria uimi­kaykay ko'iria uimõ­py­'ahak kahato uiwy­ria'in sese mi'iria ui'y­wania pytkai yt tõ'ẽ i. Pywo pe ti rat are'e pyno yt karãpe i aru mi'iria te'e­renuk uimi'u wakuat rakat ete. Yt ta'a­tukuap i aru he hap. Yt wẽtup ok i ra'yn ti teke kuap irane uhenuk hawe uimi­kaykay sa'a­wy­'i­wuaria ko'i e morekuat topot­po­'o­roria tehay enoi haria pe. Mi'i hap ewy ti miit'in tukup­te'en mesup e Iesui. Tupana ti'a­tu­kaykay kahato koran te tenuk wato kahato hap kape e Iesui yt tehay mohey i haria pe.
LUK 14:25 Mi'i hawyi Iesui toto i ra'yn hawyi typy'i rakaria miit'in tuwat tuwat ra'yn hupi. Mi'i hawyi tuwe­sai­pe'ok toupiat õ'ẽ haria mu'e hamo.
LUK 14:26 Eweipy­hu'at teran uipot­po­'o­roria uhemiit sese wo mi'i pote woro­ho­'o­ky­'esat kahato. Mi'i pote ahenoi aikotã aikotã eweikup­te'en uhemiit sese wo hap uimi­ky­'esat ewywuat nug hap e. Uhupi ereto hap etiky­'esat pote eweitoiat yne eimi­ky­'esat e. Mi'i hawyi po'og uiky'e eiwat e'ywot kai ety kai ehary'i kai ehe'aito kai eimẽ­pyt'in kai eheyke'et kai eheywyt kai ehesa­ki'yt kai eiky­py'yt kai eheinyt kai i'ewyte eiwe­ky'e hap kai uiky'e uimi­ky­'esat nug hap po'og eimi­ky­'esat ko'i nug hap kai. Mi'i hawyi ewei'e — Uiku­'uro pote uiku­'uro ma'ato areto eupi ewei'e uhepe mi'i hawyi mi'i hap yn waku uhemiit no.
LUK 14:27 Ma'ato eweiken'ẽ eiku­'uro hap pupi pote mi'i pote aria'yp posak ete eiku­'uro hap ui'ewy e hap yt eweiky­'esat i. Mi'i hawyi yt eweiwat kuap i uhupi uhemiit'in sese wo uipot­po­'o­roria wo e.
LUK 14:28 Pyno ahenoi hã'ãkap wo aikotã waku hap. Pyno so wẽtup ok surara akag tunug neran ywaiti rakat to'yat. Tu'uka teran itote pywiat hap mory'a wywuat hap. Mi'i hawyi tutunug hap e'yianme ti ipotpap kahato miwan ete karania upi mi'i hap nug hamuat hap ete karania e'at temiit'in poi hamuat hap ete karania upi nu wato kyi'at hap ete karania upi ha'up nug hap ete sio tekat put'ok'e inug hamo sio yt hap kuap hamo.
LUK 14:29 Mi'i hawyi tuwepe to'e — Pyno uiwe'eg wo mesuwat nug hap ete e. Yt naku i atunug wẽtup ipat'ok yn e. Waku atunug yne e. Ma'ato aha'a­wynug hap yn mote mi'i hawyi uhekat yt put'ok'e i ra'yn hawyi miit'in miky­ry'i areĩne'en aru e. Pyno yt atiky­'esat i mi'i tã pote waku atikuap sa'a­wy'i sio uhekat put'ok'e ui'yat ywaiti nug hamo e tuwepe.
LUK 14:30 Pyno waku atunug yne kahato mi'i pote yn miit'in mimõ­typot no areĩne'en kuap e. Katu­pono atimo­waku yne kahato ma'ato yt pote ten to'o­ky­ry'i kahato uiminug ipat'ok hap ete e. Pyno mi'i iã'ãkap ewy kahato eweikup­te'en uhemiit no teran eweikup­te'en mote. Waku eweiwekuap ti sio pyt'ok­'e­wei'e inug hamo hap ete sio yt hap kuap hamo. Mi'i hawyi waku eweiwat uhupi e Iesui itotiaria pe — Urutuwat teran ehupi e haria pe.
LUK 14:31 Pyno wẽtup iã'ãkap i ahenoi ehepe e. Pyno sa'a­wy'i so wẽtup tawa porekuat to'e tuwepe — Pyno atimoma teran irania'in ywania uhewa­nĩ­kaptia uhesu­ra­ra'in wywo e tuwepe tuwa­nẽtup so e Iesui. Mi'i hawyi ma'ato yt atikuap i uhesu­ra­ra'in imoma hamo sio put'ok'e sio yt e so. Katu­pono uhesu­ra­ra'in sok 10000 surara yn ma'ato uhesu­ra­ra'in kai ma'ato uhewa­nĩ­kat­ptia esura­ra'in 20000 hap ewy tukup­te'en e. Mi'i hawyi morekuat ti'a­tu­kaykay tuwe­wawi tonãpin hat surara akag iwe'eg kahato rakat — Waku apo watuwat uhesu­ra­ra'in nywo uhewa­nĩ­kaptia moma hamo e sio apo yt e.
LUK 14:32 Katu­pono ti uhewa­nĩ­kaptia tõ'ẽ kahato ahetawa moma hamo 20000 sura­ra'in wywo ma'ato aiwat ahesu­ra­ra'in 10000 surara yn tukup­te'en e. Mi'i pote atikuap teran waku watuwat sio yt hap e. Ma'ato yt naku i ewei'e pote woro­ho­'o­po­'oro eipe uhehay wywo i'atue­wawi i'atu­po­re­kuaria kape e. Mi'i hawyi waku watum ahekat aiwo­'o­wese hap nug hamuat e so mekewat morekat tesu­rara akag me e Iesui tehay iã'ãkap hawe itotiat — Urutuwat teran ehupi e haria pe.
LUK 14:33 Pyno mesuwat uhehay iã'ãkap wuo ahenoi teran ehepe aikotã waku eweiwat uhupi hap uhemiit'in sese wanuat hap. Pyno waku mi'i hap ewy he'yian­mete eiwe­wa­nẽtup niatpo kahato eito uhupiat hap ete e. Katu­pono pywo ti uwe uwe uhupi toto uwe uwe toto teran uhupi waku mi'i hat tuwa­nẽtup kahato — Atunug aru uika­'iwat miky­'esat ewy yn e. Pyno mi'i hawyi uiat uimi­ky­'esat atiwaure yne uiminug neran hap ko'i hawyi waku ewei'e eweiwat teran uipot­po­'o­roria waku ma'ato yt mio tã ewei'e i eiwat teran uhupiat hap ete pote yt karãpe i waku eweikup­te'en uhemiit no uipotpap nug hamo e Iesui areto teran ehupi e haria pe.
LUK 14:34 Mi'i hawyi Iesui to'e temiit'in me — Ewetum no ehewaure ka'a uhepe uiwy­ria'in e katu­pono uhehay pywo kahato pe are'e ehepe e. Yt uheso i rat eiperia aikotã ukyt ewy eweikup­te'en uipot­po­'o­roria sese eweikup­te'en hawyi e. Ukyt waku kahato aimi'u apopyt no. Mi'i hawyi hẽ'ẽ kahato waku kahato aimi'u mosẽ'ẽ hamo ukyt waku kahato e. Ma'ato toĩne'en ukyt yt he rakat i mesu­wa­rote uhemiit yt kan hamo i ewywuat katu­pono ukyt nop takat ewywuano tukup­te'en hawyi yt hẽ'ẽ hin i pote yt he i hap ewywuat hawyi yt kat hamo i e.
LUK 14:35 Ukyt yt hẽ'ẽ i rakat ti yt kat hamo i e. Yt naku i wy aimikoi ete katu­pono aimikoi auka hap topy­hu'at e. Pyno ukyt nop takat yt kat hamo i mi'i pote miit'in mipugha mu'ap tote ahetama pe hawyi miit'in mi'akit akit no toĩne'en mu'ap tote e. Mi'i hap ewy uhemiit yt he kahato rakat i ewy e. Pyno eiwa­nẽtup o uhehay mio wuat kape uiwy­ria'in e. Ehewaure ka'a apypok kahato uhehay kape e Iesui toupiat wat haria pe mu'ap upi.
LUK 15:1 Wẽtup e'at pe put'ok­'i­'a­tu'e kahato Iesui ete yt nakuaria i sese ko'i. Ta'a­tukuap teran ihay haype. Irania'in tukup­te'en itote sero­'ok'e haria ewywuat katu­pono mi'iria mu'ap pyhyp haria. Mi'iria ti wuat'i kaipyi ta'a­tu­ky­'esat sa'up ikoka'at hap hawyi. Mi'i sa'up ta'atuium more­kuaria pe Iuteu ywania ewanĩ­kaptia pe ma'ato yt ta'atuium i yne sa'up katu­pono sa'up po'og more­kuaria miky­'esat hap ok tã ta'a­tusat miit'in kaipyi hawyi ta'a­tu­pat'ok hawyi sa'up iwato ta'a­tu­te­ro'ok ta'a­tue­wanuat. Mi'i pote yt uwe miky­'esat i ko'i mi'iria tukup­te'en.
LUK 15:2 Mi'iria Iesui ti'a­tu­mu'e kahato Tupana ete. Mi'i hawyi Tupana mõtypot yat akag ko'i put'ok­'i­'a­tu'e itote hawyi te'e­ro'e — Kat poteĩ Iesui ihay yt nakuaria i wywo i'atu'e. Yt naku i ti mi'i tã watunug i'atu'e. I'ewyte Tupana ehay wan haria put'ok­'i­'a­tu'e itote wy. Mi'i hawyi ta'a­tu­mohit kahato Iesui — Kat poteĩ Iesui tenuk yt nakuat i sese wywo i'atu'e. Yt Tupana miky­'esat ewy i Iesui tunug i'atu'e to'ope.
LUK 15:3 Mi'i hawyi Iesui tuwe­morem Tupana mõtypot yat apykok haria akag ko'i kape hawyi to'e i'atuepe — Uhyt'i'in e woro­ho­'o­mu'e teran sehay hã'ãkap wuo kat poteĩ Tupana ti'a­tu­ky'e kahato yt nakuaria i hap ete.
LUK 15:4 Pyno so wẽtup ok toĩne'en tohũ 100 Uweuria rakat apykok hat e. Mi'i hat so wẽtup e'at pe toi'a­tu­mo­rania kahato tohũria hawyi toipuẽti 99 yn tohũria itote hawyi to'e — Are pãi wẽtup uihũ sig ho'o­wasat pãi e. Mi'i hawyi so aikotã som atipuẽti aru uihũ howasat rakat ehakye­ra'at hamo e. Mi'i hawyi so tohok­'iwat 99 rakat i'atuenuk hap tote. Mi'i rokirẽ toto tohũ ho'o­wasat rakat kat hamo. Mi'i hawyi so ho'o­wasat rakat kat hap ete yt ipohep hin i e.
LUK 15:5 Mi'i tusoke ti toipuẽti ra'yn tohũ ho'o­wasat hap tote. Mi'i hawyi totat hawyi tohupit hawyi toterut i ra'yn to'yat kape e. Mi'i hat so mi'i hawyi iwepit kahato tohũ wẽtup ok takat puẽti hap ete wẽtup yn ho'o­wasat rakat puẽti hap ete 99 ihũria yt ho'o­wasat rakaria i pytkai e.
LUK 15:6 Mi'i hawyi put'ok­to'e to'yat piat hawyi towy­ria'in toi'a­tu­kaykay tuwe­wawi tuwepit haypiat i'atupoi hamo hawyi to'e i'atuepe — Koitywy uiwepit hap e'at pe katu­pono uihũ ho'o­wasat rakat atipuẽti i ra'yn e. Pyno to'iro watenuk to'iro wate­sa­po'u pyno waku aiwepit mi'i hap ete e teka­tu­wyria pe e Iesui henoi hã'ãkap wuo itote.
LUK 15:7 Mi'i hawyi tomohey haria pe Iesui to'e — Ta'i karãpe aihũ wati­puẽti ho'o­wasat rakat aimo­wepit kahato hap toĩne'en e. Mi'i hap ewy kahato ti Tupana toĩne'en wẽtup ok miit ho'o­wasat rakat toipuẽti hawyi tuwe­mo­wepit kahato e. Pyno toiky­'esat kahato ti yt nakuaria i aipok tewawiat hap e. Toiky­'esat kahato miit'in waure wo toĩne'en neran ta'a­tu­minug sa'ag ko'i hap etiat hap e. Karãpe ho'o­wasat rakat wẽtup ok toipuẽti hawyi atipy piaria i'atu­wepit kahato Tupana wywo e. Ienuk hap iwato kahato ta'a­tunug hap ewy e. Mekewat sa'a­wy­'iwuat po'og yt nakuat i wemorem na'yn Tupana ewawiat hap imowepit kahato e. I'ewyte tukup­te'en 99 rakaria ewywuaria mi'iria ti — Uruto wakuaria e haria ewywuaria tukup­te'en — Yt karãpe i uruto ho'o­wasat rakaria wo e haria. Uruto hãpyk sese rakaria i'atu'e. Mi'i hap ewywuaria tukup­te'en 99 rakaria ewy uhehay iã'ãkap hawuo e. Tupana ti'a­tu­ky­'esat kahato yne tohũria ma'ato wẽtup ok ho'o­wasat ra'yn hawyi toikat kahato mi'i hat e. Yt waure hin i ho'o­wasat hap ete e. Mi'i hat puẽti hap hawyi po'og iwepit irania'in kai e Iesui — Kat pote pãi eti'a­tu­mu'e yt nakuat i rakaria ehay uhyt e haria pe.
LUK 15:8 Mi'i hawyi wẽtup i ahenoi teran hã'ãkap wuo e Iesui. Ahetama pe ti ihainia'in tum hary­po­ria'in me — Woro­ky­'esat en uheha­ry'i wo pote atum epe mesuwat wahi 10 a imehit rakat Uru kawiat atum na'yn ha'up ekyi'at hamuat e hap moherep hamo hap ewy ta'a­tunug ahetama pe e. Mi'i hap ewywuat wẽtup a ta'at hewahi pyi hawyi toikat kahato hary­poria ahetama piat hawyi wãtym'i turan mote meremo te'aria uhu mi'i hawyi toikat to'yat pe. Yt toipuẽti i hawyi tohy­wytip to'yat hawyi yi perup we toikat kahato mekewat i'a mehit rakat at hat te'aito wuat miium tesa'up wote howoity kahato rakat wahi i'a mehit rakat e.
LUK 15:9 Mi'i hawyi toipuẽti ra'yn hawyi hary­poria iwepit kahato torania i ra'yn 10 a rakat hawyi e. Mi'i hawyi toi'a­tu­kaykay ra'yn towy­ria'in hary­po­ria'in tuwe­wawi mi'iria pe — To'iro watenuk wate­sa­po'u e katu­pono mesup e'at uiwepit hap sese toĩne'en katu­pono sa'a­wy­'iwuat uhe'aito miium uheha­ry'i wuat e hap 10 a rakat wẽtup atipun nakat atipuẽti hawyi e.
LUK 15:10 Mi'i hawyi to'e i itotiaria — Uruto po'og e haria pe. — Ta'i yt uheso hin i ti uhyt'i'in mana'in e. Aikotã hary­poria tipuẽti tewahi tomipun hawyi tuwehum iwepit kahato hap ewy ti Tupana ho'o­wasat rakat aipok towawiat hap ete tuwehum kahato e. Toi'a­tu­kaykay atipy piaria hawyi — To'iro aiwepit e katu­pono wẽtup ok miit ta'aipok uhowawi ho'o­wasat rakat itote e yt naku i sese nug haria mi'iria pytkai e. Mi'i hap ewy ti areĩne'en yt nakuaria i mu'e hamo yt eimi­ky­'esat ewy i pytkai e. Katu­pono Tupana tiky­'esat mi'iria aipok tuwe­wawiat hap pote e Iesui.
LUK 15:11 Mi'i hawyi Iesui to'e — Pyno wẽtup iã'ãkap i ahenoi Tupana tiky­'esat kahato yt naku i nug haria aipok hap tuwe­wawiat hap ete. Sa'a­wy'i so wẽtup ok ihainia typy ok ha'yru rakat toĩne'en. Mi'i i'atu­'ywot waku kahato rakat.
LUK 15:12 Mi'i hat so wẽtup ok ha'yru wat'yp'i to'e to'ywot pe — Papai yt atiky­'esat i epowat'yp eku'uro turan hawyi e ma'ato mesup ta'yn atiky­'esat e. Pyno etipat'ok o kat ko'i kat ko'i uhepe epowat'yp uiat e katu­pono uhewyry teran wyti Papai e. Mi'i pote toimõ'ẽ ra'yn tekat ko'i toku­'uro hap owakai e. Mi'i hawyi so wẽtup e'at hawyi — Pyno areto ra'yn Papai e so.
LUK 15:13 Mi'i hawyi to'ywot miium tohytmoi yne to'yara wato pe hawyi toto e. Iwato kahato totioto to'ywot ekat hawyi toto pya wẽtup tawa kape wẽtup y'y kape e. Mi'i hap tote toiwe­neru kat ko'i kat ko'i hawyi toikyi'at mahy ko'i hawyi tema­hy'u hary­po­ria'in toi'a­tu­kaykay kahato tuwe­wawi. Hairu hap yn tutunug at ka'ap itote to'ywot ekare'en sa'up mo tenuk kahato itote e. Towy­ria'in kyi'at hamo toipugha kahato to'ywot ekat yt tuwe'eg hin i haype toipugha topiit miky­'esat yt naku i nug hap upi e Iesui.
LUK 15:14 Mi'i hap tote tehairu at ka'ap pote to'ywot miium iwato rakat tekat toimo­weityk yne e. Mi'i hap e'at pe ti sy'at kahato hap ta'yn put'ok'e tuete hawyi yt kat i ra'yn mi'u kyi'at hamuat ha'up ipo pe e. Mi'i turan yt i'aman hin i yne mekewat tawa ko ete yi wato hap ok tã e. Mi'i hawyi i'atu­mikoi yt tuwenug kuap i hawyi yne yne i'atue­sy'at e.
LUK 15:15 Mi'i hawyi tesy'at sese ra'yn hawyi toho­'okat topoi hanuat. Toiky­'esat topotpap hap mi'u hit sa'up mo. Mi'i hawyi wẽtup ok yat kape toto mi'i hat pe to'e — Arepotpap teran eupi uhyt e. Mi'i hawyi — Pyno waku uhehamaut asuwai ko'i eti'a­tupoi at at e tope. Mi'i hawyi toto hamaut asuwai ko'i apykok hamo e.
LUK 15:16 Mi'i tote hamaut asuwai py'a­setpiat toĩne'en turan hesy'at sese hap put'ok'e tuete hawyi ti to'e tuwepe — Pyno waku ahu'u hamaut asuwai mi'u ape kumana ape e. Mio tã tuwa­nẽtup hawe put'ok'e hamaut asuwai ka'iwat hawyi to'e — Yt etu'u tei'o ma'ato uihũria mi'u e.
LUK 15:17 Mi'i hawyi hesy'at sese hap tuete hawyi ti tuwe­wa­nẽtup kahato topy'a pe — Yt uiwe'eg hin i pãi e katu­pono areĩne'en hesy'at sese ma'ato yne ui'ywot eropat haria te'e­renuk at ka'ap kahato ui'ywot yat pe yne e'at pe mi'u pu'i sakpo'e tukup­te'en itote e. Mi'i hawyi ikap takaria wo ui'ywot eropat haria tukup­te'en ma'ato uito uikag mot'i rakat areĩne'en. U'i he rakat hẽ'ẽ rakat ete te'e­renuk at ka'ap ma'ato atu'u teran hamaut mi'u kumana ape ma'ato — Yt etu'u tei'o uhehamaut mi'i i'atu'e uhepe. Yt naku pe i areĩne'en mesuwe e tuwepe.
LUK 15:18 Pyno yt uiwe'eg hin i areĩne'en meiũpe pãi e. Pyno waku ara'aipok i ui'ywot yat kape hawyi — Papai are'e aru tope woro­ma'at kahato en uiminug sa'ag wo i'ewyte ti Tupana ma'at hano areĩne'en are aru tope e. Katu­pono ti ihamo ti atunug yt naku i hap are aru ui'ywot pe ui'aipok hawyi e.
LUK 15:19 Pyno Papai uhewaku hap yt put'ok'e i te ra'yn esa'yru wat uheĩne'en hamo are aru Papai pe e. Mi'i tupono waku eropat hano ra'yn uinug Papai are aru e. Pyno mi'i hawyi — Uha'yru yt ere'e tei'o po'og uhepe ma'ato uheropat hat en ere'e ro aru uhepe papai are'e aru e topy'a pe tuwa­nẽtup hamaut asuwai py'a­setpiat toĩne'en hap e'at pe.
LUK 15:20 Mi'i hawyi ti paa'e sese ra'yn itote tuwak popuo hawyi topoĩ'ãm hawyi meremo toto ra'yn to'ywot kape. Mi'i turan i'ywot ta'a­kasa pya howawi mu'ap upiat hut turan. Mi'i pote i'ywot haty'u kahato topy'a pe tosa­'yru toiky­'esat kahato topy'a pe hawyi so i'ywot pun'e howa kape hawyi iporok'at tosa­'yru ete hawyi toi'ã­pysig tosa­'yru e.
LUK 15:21 Mi'i pote ha'yru to'e to'ywot pe — Papai yt uiwe'eg hin i e. Ekat atipun yne ra'yn uiminug sa'ag hap ete e. Yt naku i sese atunug Tupana ehamo wẽtup hy tote e. mi'i pote i'ewyte epe yt naku i atunug e. Mi'i pote yt put'ok­'are i ra'yn emẽpyt wuat uheĩne'en hamo ui'ywot e. Pyno koitywy waku areĩne'en eropat hano yn na'yn e.
LUK 15:22 Ma'ato ti i'ywot to'e — Yt nyti yt nyti uha'yru wo kahato ereĩne'en ne e. Mi'i hawyi kaykay'e teropat haria tehay pirik wo — Merep to eweterut ro uha'yru esokpe wuat ikahu rakat hawyi ewetopag ipiit pe. Mi'i hawyi i'ewyte ipy sokpe eweterut ro e. I'ewyte eterut ro muĩ'ãpiat hekat rakat hawyi ewetopag ipuĩ'ã pe e.
LUK 15:23 Mi'i hawyi to'e i tomi'u nug haria pe — Eweterut ro wẽtup wewato ahup mẽpyt aimi'u wo ikap takat e. Mi'i hawyi ewei'auka hawyi ewetey hawyi waku watenuk kahato e. Mi'i hawyi waku aiwepit hap sese watunug meiũpe e teropat haria pe.
LUK 15:24 Uha'yru sa'a­wy'i ho'o­wasat rakat toĩne'en iku'uro rakat ewy ma'ato mesup uimi­puẽti toĩne'en i. Sa'a­wy'i pya pyi aikai toĩne'en ma'ato ti mesup mi'i kaipyi tuwẽtem na'yn gu'uro pyi hap ewy toĩne'en e. Sa'a­wy'i ti ho'o­wasat kahato rakat ewy uha'yru toĩne'en ma'ato ti mesup uipuẽti i ra'yn e. Mi'i hap uimo­wepit kahato. Mi'i pote waku mesup aiwepit kahato hap watunug ahenuk hap iwato e. Mi'i hawyi ti te'e­renuk kahato ra'yn itote ha'yru mõtypot hamo.
LUK 15:25 Mi'i turan ti iyke'et put'ok'e toko pyi temiit'in nywo ta'aipok topotpap hap toko kaipyi hawyi yt pya hin i turan i'yat kai turan toikuap pypy'e hap toywyt ho'o­wasat sa'a­wy­'iwuat rakat mõtypot hap ienuk hap toikuap.
LUK 15:26 Toikuap toywyt mõtypot hap to'ywot piat hawyi ti ipy'ahak kahato hawyi yt teke teran hin i ienuk hawe. Mi'i hawyi toi'a­tu­kaykay to'ywot emiit'in tuwe­wawi apoto'e hamo — Kat poteĩ i'atu­wepit meikope e.
LUK 15:27 Mi'i hawyi ta'a­tu­wesat — Mehĩ mimi i'atu'e eywyt mesup tut i'atu'e. Yt iku'uro hin i ti yt ai'ywot wanẽtup hap ewy hin i. Mi'i pote ai'ywot iwepit kahato hawyi mesup ai'ywot tiky­'esat mesup aiwo­'o­mo­wepit hap i'atu'e. Waku kahato ra'yn hap upi ti ei'ywot ti'auka tohũ mẽpyt ikap takat aimi'u aiwepit haypiat wuat i'atu'e. Ikã'ã ra'yn mimi uhyt i'atu'e pyno ereke ro mehĩ i'atu'e.
LUK 15:28 Toywyt yt naku i nug hat aipok hap toikuap hawyi po'og ipy'ahak iyke'et hawyi yt teke teran hin i ra'yn to'ywot yat pe. Mi'i hap toikuap hawyi i'ywot toto ra'yn howawi to'yat pyi ikaykay hamo — Ereke ro uha'yru e. Waku aimo­wepit yne aito mesup uha'yru e. Katu­pono eywyt ho'o­wasat rakat wyti wati­puẽti i ra'yn mesup e tosa­'yru yianme.
LUK 15:29 Ma'ato — Yt rat Papai e. Yt karãpe i ti uimo­wepit hamo eti'auka ehũ ikap takat e. Arepotpap at at ka'ap ka'ap eimi­ky­'esat nug hap etiat pytkai ma'ato ti yt karãpe i uiat uimõ­typot hap etunug Papai e. Emiky­'esat ewy kahato atunug pytkai ma'ato ti yt waipaka i te wyti uiwy­ria'in wywuat uimo­wepit haypiat mi'u wo eti'auka e.
LUK 15:30 Ma'ato ti mekewat uheywyt ekare'en sem pun hat esa'yru aipok hap pote ienuk wato hap etunug imõtypot hamuat etunug yt karãpe i emiky­'esat tutunug epiat pytkai e. Yt naku i mi'i hap Papai e. Ekat sa'up kaipyi ti hary­po­ria'in yt iwe'eg i rakaria toi'a­tu­kyi'at kahato e. Mi'i rokirẽ ta'aipok hawyi aihũ po'og he rakat eti'auka ma'ato imowepit hamo po'og he waipaka kawiat rakat eti'auka imowepit hamo wewato ahup ikap takat eti'auka imowepit hamo. Yt naku i Papai e.
LUK 15:31 Mi'i hawyi to'e i'ywot tosa­'yru yianmiat pe — Uha'yru e yt mio tã ere'e tei'o e. Atikuap ewat ewaku hap mi'i pote ti uipo­wat'yp epo pe yne ui'yat uihũria uiko ko'i ui'yat ko'i torania meimuẽwat epo puo toĩne'en uipo­wat'yp e. Atikuap ereĩne'en uiwywo wuat'i e'at pe hap e. Uhekat ko'i yne emiky­'esat ok tã toĩne'en ewano uipo­wat'yp e.
LUK 15:32 Mi'i pytkai ti mesup yt naku i ereĩne'en ipy'ahak eywyt ete are. Ereke ro uha'yru waku watu­mo­wepit mesuwat wãtym ka'ap katu­pono eywyt sa'a­wy'i iku'uro rakat ewy toĩne'en aiwa­nẽtup hawe ma'ato meiũ tut i ra'yn sa'a­wy'i ho'o­wasat kahato ma'ato mesup ti aipuẽti ra'yn e iyke'et pe tosa­'yru po'og nag nakat pe. Pyno ti ui'e hap ewy kahato ti e Iesui itotiaria pe. Katu­pono Tupana tuwe­mo­wepit kahato karãpe yt naku i nug haria ti'atoiat ra'yn ta'a­tu­minug yt naku i hap ko'i hawyi te'e­ra­'aipok Ta'a­tu­'ywot Tupana kape mekewat ha'yru ho'o­wasat rakat ewy e Iesui — Uruto po'og irania'in kai e haria pe.
LUK 16:1 Mi'i hawyi Iesui henoi hã'ãkap wuo topot­mu­'eria pe wuat'i nagnia ehay enoi haria py'a­setpe. — Sa'a­wy­'iwuat ieĩne'en hat so hekat kahato rakat toĩne'en i'atu'e so e. Mi'i hawyi so toikat kahato topotpap nug hap akag wuat hawyi to'e — Pyno waku ereĩne'en ui'e hap nug hap akag wo e. Atiky­'esat etimo­wato uheka­re'en e so. Waku etipo­re­ra'at yne uhepiat wete­weru haria kaipyi uhekat e. Mi'i hawyi ti ipotpap ta'yn hekat rakat ekare'en mowato hap ete. Ma'ato so wẽtup e'at pe tõ'ẽ kahato miit'in hekat rakat kape — Esaipepiat ti epotpap nug hat ti yt naku i sese yt hãpyk i sese ta'a­tu'e hamo e. Toi'a­tu­mona toi'a­tue­ro'ok atuero'ok ti ekare'en i'atu'e.
LUK 16:2 Mio tã i'atu'e hap tepiat hawyi toikaykay temiit teka­re'en apykok hat tuwe­wawi apoto'e hamo — Uhyt e irania'in uhemiit'in henoi kahato ti uhepe eminug uima'at hap ko'i etiat e ma'ato yt atikuap i sio pywo sio yt e. Mi'i pote etimo­herep aikotã aikotã eminug epopera piat hap ko'i uhyt e. Atiky­'esat yne mesup miwan miat yne e ma'ato waku pytkai pote waku ma'ato pywo pote yt kan hamo i ereĩne'en po'og uipotpap nug hamuat e. Yt woro­ky­'esat po'og i en uhemiit akag wo e.
LUK 16:3 — Pyno waku etimo­herep emiwan yne aikotã hãpyk uinug hap. Mi'i hawyi toto toka­'iwat to'akag ma'at hat mi'i hawyi to'e tuwepe — Are pãi aikotã aru atunug e katu­pono toikuap aru uimiwan ko'i kaipyi toma'at uhepiat hap e. Mi'i hawyi aru yt kat i ra'yn uipotpap hamuat toĩne'en hawyi uheha­ky­'e'i aru arepy­hu'at e. Mesup te waku ma'ato meiũran yt naku i e. Uhesaika hap yt put'ok'e i te uiweko nug hamo e i'ewyte yt areĩne'en neran sẽtup sẽtup e hano e tuwepe tuwa­nẽtup hawyi.
LUK 16:4 Aikotã aru atunug pãi e tuwepe. Pyno atikuap koitywy waku mesup ta'yn atunug uiwy­ria'in wo kahato uiwy­ria'in uika­'iwat piat uika­'iwat ewete­weru haria e. Pyno waku ati'a­tu­kaykay mi'i haria uhowawi hawyi waku atipat'ok i'atu­we­te­weru hap e i'atu­mo­wepit hamo e. Katu­pono areĩne'en ne mesup uika­'iwat emiit no te e. Katu­pono mũki­'ite uika­'iwat yt uiky­'esat i po'og na'yn e. Mi'i hawyi ma'ato waku uika­'iwat hekat rakat piat wete­weru haria yat pe areĩne'en e.
LUK 16:5 Mi'i hawyi ika'iwat hekat rakat piat wete­weru haria toi'a­tu­kaykay tuwe­wawi. Mi'i hawyi to'e wẽtup ok pe — Karania upi kẽi ewete­weru uika­'iwat piat hap mehĩ e.
LUK 16:6 — Ta'i iwato kahato tig uhyt e aikotã 100 kamũti howapy kahato hap ewy Uriweira kap muat rakat ewy uhyt e. Mi'i hawyi toiwesat — Pyno ti waku wati­pat'ok hawyi waku 50 kamũti ikap yn uhyt e. Mio tã e pote wete­weru hat iwepit kahato tuwehum kahato. Mi'i hawyi miwan miat toiwan 50 yn iwete­weru hap e. Mi'i hawyi ta'a­tuset pehik mekewat miwan me hawyi toto.
LUK 16:7 Mi'i hawyi wẽtup ok i toikaykay wete­weru hat — Karania upi kẽi uika­'iwat piat ewete­weru hap uhyt e. — Ta'i iwato kahato e. 100 hyt u'i kapiat hap ewy uhyt e. Mi'i hawyi hekat rakat emiit akag tiwesat — Pyno waku wati­pat'ok ewete­weru hap hawyi waku etum 50 hyt yn e. Mio tã e pote wete­weru hat iwepit tuwehum kahato. Mi'i hawyi mekewat miwan me ta'a­tupag iwete­weru hap pakup 50 hyt kapiat yn iwete­weru hap mesup e hap. Mi'i te weset pehik i'atu'e. Mi'i tã ti tutunug at at toka­'iwat hekat rakat ma'at hat hemiit.
LUK 16:8 Mi'i hawyi wẽtup ewaty hap ete ika'iwat tikaykay tuwe­wawi hawyi toka­'iwat to'e temiit akag me — Are pãi pyno koitywy yne uiwe­te­weru haria ewyria'in no tukup­te'en uima'at kahato hap upi ewyria'in sem etunug hawyi e. Pyno erewy­'inug kahato uheka­re'en kaipyi e. Yt ikahu hin i eminug uhepiat hap atikuap ta'yn e. Pyno worokuap ta'yn ewe'eg kahato sa'ag nug hap etiat hap e so e Iesui sehay iã'ãkap wuo topot­mu­'eria pe. Mi'i hawyi to'e i Iesui i'atuepe — Ta'i uhyt'i'in mana'in mesu­wa­ro­tiaria i'atu­we'eg kahato sa'ag nug kahato hap ete sa'ag nug hap kuap kahato hap ete. Ma'ato Tupana mohey haria yt i'atu­we'eg hin i Tupana potpap nug kahato hap ete e. Ma'ato mesu­wa­ro­tiaria po'og i'atukai te'e­ru­we'eg e. I'ypy­rypwiat ikohye­wyry rakaria ewy mesu­wa­ro­tiaria sa'ag nug hap yn ta'a­tukuap kahato e. Mi'i haria ewy woro­ho­'o­ky­'esat eipe ma'ato wakuap nug hap kuap hap ete i'ewyte hẽtyhot puat wakuap nug hap ete e. Waku pyno eiwe­mo­we'eg kahato Tupana miky­'esat minug kuap hap ete e.
LUK 16:9 Katu­pono mesu­wa­ro­tiaria miit'in tikat kahato to'o­po­wyro wo'o­ma'at hap etiat hap ta'a­tu­ka­'iwat hekat rakat ma'at hap kaipyi ta'a­tunug ta'a­tu­wy­ria'in mesu­wa­rote e. Uiwy­ria'in waku atiky­'esat kahato ewetunug uhekat kaipyi Tupana wyria'in wuat ko'i e. Mi'i hawyi mi'iria tukup­te'en wuat'i e'at pe atipy pe e. Waku wati­'a­tuekyi kahato miit'in hekat kaipyi miit'in Tupana wano e.
LUK 16:10 Pyno uiwy­ria'in waku watunug yne aiwe'eg hap ok tã Tupana miky­'esat yne ete sio motpap wato nug hap kaipyi sio kurin motpap hap nug hap kaipyi waku wati­mõ­typot kahato Tupana aiminug ko'i hap ete e. Karãpe aheso hap kurin mi'i pote i'ewyte aheso hap iwato hap watunug kuap pote Tupana yt aimohey kuap i pywo sehay nug hamo e. Ma'ato hãpyk kahato aiminug kurin yn mytkai mi'i pote meiũran iwato rakat nug hamo Tupana aimohey kahato e. Ma'ato yt hãpyk i kurin kat aiminug kaipyi pote i'ewyte yt aimohey hin i iwato rakat nug hamo e.
LUK 16:11 Uiwy­ria'in eiwe'eg wo o ehekat mõ'ẽ hap ete. Waku hãpyk kahato eweimõ'ẽ Tupana miium ehepiat ko'i e. Ehegyi'at hãpyk kahato hap kaipyi ti aru Tupana eikuap hãpyk sio yt sio ehekat iwato sio kurin hap e. Ma'ato hãpyk kahato ehekat mõ'ẽ hap ta'a­kasa toikuap hawyi meiũran po'og tekat toimõ'ẽ kahato ehowawi eimohey hap toikuap hawyi eimohey hap upi e Iesui. Yt kat i i toma'at hap toikuap eikai hawyi po'og tutum ehepe teka­re'en hawyi i'ewyte wuat'i e'at piat kare'en tutum ehepe wy e.
LUK 16:12 Uiwy­ria'in eiwe'eg wo o irania'in ekat eipo piat hawyi e. Yt eti'a­tu­ma'at rei'o i'atu­mi­puru ta'a­tuekat ete e. Ma'ato miit'in ekat etima'at epo pe toĩne'en mote meiũran yt kat i Tupana tum tekat ehepe yt eimohey i pote e. Mi'i hawyi yt karãpe i hekat rakano eweikup­te'en yt karãpe i Tupana mipoi­tyro wo eweikup­te'en e Iesui.
LUK 16:13 Uiwy­ria'in eiwe'eg wo o eheka­re'en ko'i wywo eweikup­te'en e. Pyno wẽtup sehay i ahenoi teran ehepe e. Yt naku i kahato typy eika­'iwat e. Niatpo kahato ti pyno typy ok aika­'iwat pote e. Typy aika­'iwat hap kaipyi wẽtup aika­'iwat no wẽtup ahewa­nĩkap mo wẽtup aiwy ok sese wẽtup ahewa­nĩkap sese topy­hu'at e. Katu­pono yt watunug kuap i typy ok miky­'esat i ko'i e. Wẽtup ok aipo­'oro — Etunug no mi'i pytkai wẽtup ok — Yt e. Yt wate­ropat kuap i typy ok ahetu­'isa ko'i aipo­'oro haria e. Mi'i hap ewy kahato yt watunug kuap i typy Ahetu­pana wo e. Yt naku i watunug ahekat ne'i ahetu­pana wo katu­pono mi'i watunug hawyi ti Tupana sese yt watunug kuap i Ahetu­pana wo ahekat mowato hap kape yn aiwa­nẽtup hap hawyi e. Mi'i hawyi Tupana yt aipo­'oro kuap i towat nug hamo ma'ato ahekat ky'esat hap kape yn aipo­'oro. Mi'i tã ne'i pote ti typy ahetu­pana rakano watoĩ­ne'en.
LUK 16:14 Mio tã e pote itotiaria weka­re'en ky'e haria tero­mõ­pusu kahato Iesui Tupana ehay Musei mienoi kaipywiat enoi haria — Yt ewe'eg hin i ti Mehĩ i'atu'e. Waku kahato ti ahekat iwato i'atu'e.
LUK 16:15 Mi'i pote Iesui ti'a­tu­wesat — Miit'in seha'at turan ti wakuaria sese eipe eweikup­te'en e. Yne eiminug ko'i ewetunug eimõ­typot hamuat hap miit'in ehamo e. Yt karãpe i ewetunug Tupana mõtypot hap eipy'a pe e. Eiwa­nẽtup hap ti Tupana tikuap kahato e. Toikuap kahato ti eipy'a piat eiwe­mõ­typot hap yn nug neran hap eiwa­nẽtup hap e. Mi'i hap upi mesu­wa­ro­tiaria te'e­ru­wehum kahato ehete e. Ma'ato Tupana eha'at turan ti yt naku i sese nug haria kahato eipe e.
LUK 16:16 Koitywy irania'in tiky­'esat kahato tuwe­hyt'ok Tupana etama piat hap e. Ta'a­tu­ky­'esat kahato Tupana ta'a­tu­po­rekuat no hap e. Mi'i haria pyhyp haria kahato ti eipe e. Ewei'a­tu­mu'e kahato Musei miwan i'ewyte Tupana ehay enoi haria miwan kaipyi i'ewyte koran wuat het'ok hat Iuwãu ut hap kape mi'iria ma'ato wẽtup sehay yn henoi Tupana ut Wuat'i Porekuat nuat hap ete yn i'atuehay e.
LUK 16:17 Yne yne ti topy­hu'at aru i'atu'e hap ewy e. Yne i'atu­miwan hit ko'i aikotã aikotã aru hap ko'i topy­hu'at yne e. Yt wẽtup i i'atu­miwan kaipyi i'atueso hap — Tut ti aru tut ti aru i'atu'e hap yne e. Pyno yt karãpe i mi'i hap i'atu­miwan ikahuro aru e. Niatpo kahato ti aru i'atu­miwan hit tuwe­moma po'og niatpo at ikahuro hap kai e. Po'og niatpo waikiru ko'i yne ikahuro hap kai e. Katu­pono mi'i i'atu­miwan hit toĩne'en wuat'i e'at pe e.
LUK 16:18 Sa'a­wy'i Musei to'e ainãpin hamuat — Yt etoiat tei'o ehary'i e. Etoiat hawyi yt naku i wẽtup ok etat e. Ma'ato wẽtup ok i etat hawyi yt naku i nug hano ereĩne'en e. Aikotã hewaire hewaire rakano ewy ereĩne'en Tupana wanẽtup hawe e. Yt eimi­ky­'esat ewy hin i einãpin hap ehepe e. Yt etat rei'o hary­poria sa'a­wy­'iwuat he'aito mi'atoiat e. Ma'ato etat pote hewaire hewaire rakat ereĩne'en Tupana wanẽtup hawe e Musei sa'a­wy'i ahepe. Mi'i e hap miwan yt eweiky­'esat hin i ma'ato toĩne'en ne wuat'i e'at pe eweiky­'esat sio yt e.
LUK 16:19 Mi'i hawyi wẽtup sehay Iesui henoi i'atuepe. — Toĩne'en hekat rakat e. Mi'i hesokpe ikahu kahato e. Wuat'i e'at pe yne imiky­'esat ko'i toĩne'en e. Ienuk hap tutunug kahato e. Yne miit'in itotiaria ikuap mi'i hap ete e.
LUK 16:20 Toĩne'en wy itote wẽtup ok yt hekat i rakat i'ahu kahato rakat hepihi pihi rakat Irasaru e hap het rakat e. Mi'i ti wuat'i e'at pe iwyria'in terut hawyi ta'a­tu­'atoiat hekat rakat e'oken­'y­pyke kat ẽtup ẽtup hamo e.
LUK 16:21 Mipun mi'u ieĩpyt ko'i so'oẽtup hamo hekat rakat mi'u iwato kahato mipun kaipyi ma'ato yt toho'oium i yt hegyi'at hin i hekat rakat pote. Mi'i tusake sy'at pono iku'uro ra'yn. Mi'i hawyi ti toto ra'yn atipy kape e.
LUK 16:22 Meiũran Irasaru iku'uro ra'yn hawyi atipy piaria tioto wakuaria ienuk ieĩne'en hap kape ha'a­se'i Aparãu e'yatypiat heĩne'en hamo e. Mi'i hawyi hekat rakat iku'uro hawyi ta'a­tusyp ta'yn e.
LUK 16:23 Ma'ato aria kape toto ho'opot hap aria wato pe toĩne'en e. Mi'i hawyi ho'opot hap kaipyi hekat rakat teha'at ywaipe hawyi ta'a­kasa ra'yn Irasaru ase'i Aparãu e'yatype ra'yn toĩne'en.
LUK 16:24 Mi'i hawyi tuwẽ­powat — Ase'i e etipo­'oro ro meikowo uhowawi Irasaru y'y wywo e. Waku topuĩ'ã etiat y'y wo uhẽku pen e. Aho'opot kahato ra'yn mesup uito aria pe e.
LUK 16:25 Yt kat i i y'y uiwe­'y'u hamo e. Mio tã e pote Aparãu tiwesat — Uha'yru e etiwaure ra'yn apo eieĩne'en ne turan aikotã ereĩne'en sa'a­wy'i hap waku kahato yne emiky­'esat ko'i wywo ma'ato Irasaru ieĩne'en yi totiat turan ho'opot hap yn toĩne'en tuete ihaky­'e'i e.
LUK 16:26 Pyno meiũ wyti waku pe ra'yn toĩne'en Irasaru ma'ato en wyti ho'opot hawe yn meiẽ ereĩne'en e.
LUK 16:27 Yt uwe i mesu­wiaria tokosap kuap ewawi i'ewyte yt uwe i ewywuaria tokosap kuap uruewawi e. Katu­pono toĩne'en yi hot iwato rakat yt kat i wyti meiũpepyi mu'ap ho'opot hap kape e Aparãu hekat rakat pe.
LUK 16:28 Mi'i hawyi hekat rakat to'e i ra'yn Aparãu me — Pyno etipo­'oro ro Irasaru ui'ywot yat kape uheywyt'in 5 ok takaria piat henoi hamo e. Katu­pono yt atiky­'esat i ra'yn wyti mi'iria tõ'ẽ meiũpe uhepiat ho'opot hap kape uiwy­ria'in e.
LUK 16:29 Ma'ato Aparãu tiwesat — Uha'yru e tukup­te'en kahato eywyt'in nãpin hanuaria itote. Waku te'e­ru­wa­nẽtup Musei potnãpin hap ko'i kape i'ewyte Tupana ehay enoi haria mienoi kape e.
LUK 16:30 Mi'i hawyi hekat rakat — Yt rat e ma'ato wẽtup ok wẽtem gu'uro pywiat hat henoi i'atuepe pote taren yt tõ'ẽ i meiũpe uhepiat ho'opot hap kape ta'a­tuepiat ho'opot hamuat hap kape hawyi te'e­ru­we­morem Tupana kape ta'a­tu­minug sa'ag kaipyi pote e. Meremo ta'a­tu­minug sa'ag ta'a­tu­'atoiat hawyi Tupana ta'a­tu­mohey mi'i hawyi yt tõ'ẽ kuap i mesuwe ta'a­tuepiat ho'opot hamuat hap kape e.
LUK 16:31 Mi'i hawyi Aparãu to'e i ra'yn — Pyno yt atipo­'oro Irasaru i'atue­wawi katu­pono yt te'e­ru­wa­nẽtup i Musei mienoi kape yt te'e­ru­wa­nẽtup i Tupana ehay moherep haria kape pyno ti i'ewyte yt gu'uro kaipywiat wẽtem hat Irasaru toto henoi hamo pote i wyti teran te'e­ru­wa­nẽtup e Aparãu aria piat ieĩne'en hat pe e Iesui hekat rakat pe.
LUK 17:1 Wẽtup e'at pe hawyi Iesui to'e temiit'in me — Mesu­wa­rotiat eikup­te'en turan wyti aru ehã'ãg haria sem put'ok­'i­'a­tu'e ehete hawyi ta'a­tu­ky­'esat aru ehepiat uimohey hap hep hamuat yt naku i nug hamo e. Yt waku pe hin i aru mi'iria tukup­te'en aru katu­pono po'og Tupana mi'a­piheg ko'i wo tukup­te'en wuat'i e'at pe aru are e.
LUK 17:2 Yt waku pe hin i mi'iria tukup­te'en aru aikotã wuat'i e'at piat y'y wato pe nu wato ete saity ete min'i­'a­tu'e yt ahen'i­'a­tu'e kuap i hap ewy ta'a­tu­ho­'opot aru eima'at reran haria uimohey hap ehepiat hep teran haria e. Mi'i hap ewy kahato ti uhemiit'in hira­karia iã'ãg iã'ãg i haria ete e. Tupana mi'a­piheg ko'i aru tukup­te'en aikotã y'y wato piat ahaity ete nu wato ãpe'ok etiat Mi'i hap ewy kahato ti hira­karia ma'at sa'ag nug hamuat haria ete Tupana mi'a­piheg ko'i aru tukup­te'en wuat'i e'at pe ho'opot kahato rakaria wo te'e­ro­py­hu'at. Yt naku i sese eweihep uimohey hap hirakat py'a pyi are.
LUK 17:3 Ewe'eg wo eima'at reran haria pupi e. Karãpe wẽtup ok ahã'ãg yt naku i nug hamo mi'i hawyi — Yt naku i mio tã watunug mehĩ mana waku wato'e aima'at reran hat are ma'ato — Yt uiwepyi i mehĩ mana to'e ahepe — Pyno waure wo areĩne'en uima'at hap kai mehĩ mana waku wato'e tope.
LUK 17:4 Yt naku i ipy'ahak aima'at haria etiat rakaria wo wato­py­hu'at e. Waku wati­'a­tu­wesat aima'at haria pytkai e. Waku he'i­hot'ok he'i­hot'ok pe i — Yt uiwepyi i e — Yt uiwepyi i e 7 wo to'e i to'e i ahepe pote waku — Uito waure wo areĩne'en wato'e i wato'e i 7 wo are.
LUK 17:5 Mi'i hawyi 12 ok takaria ipotmu­'eria tõ'ẽ Iesui ewawi hawyi te'e­ro'e Iesui pe — Uruka­'iwat uruimohey kahato po'og neran Tupana wuat'i nug hamo ete. Pyno etimo­wato o uruepiat imohey hap i'atu'e Iesui pe.
LUK 17:6 Mi'i tã i'atu'e pote Iesui ti'a­tu­wesat — Uiwy­ria'in wato­mohey Tupana pote tutunug yne aimiẽtup e. Yt uheso hin i eimi­mohey yt iwato hin i pytkai ehã'ãg no imohey hawyi tutum eimi­mohey ok tã e. Ga'apy pe ti toĩne'en aria'yp koro ko'i po'og torania kai ma'ato iã'ỹi kurin kahato hap ok tã yt heremo hin i hap ewy wasere upi topopy rakaria iã'ỹi tuwe­mo­herep mekewat aria'yp koro ko'i e. Waku mi'i iã'ỹi ewy eweimohey Tupana. Aimi­mohey watikoi hawyi iwato topy­hu'at aru kurin kahato sa'a­wy'i pytkai katu­pono Tupana ti aimiẽtup nug hat pote e. Tupana mohey hap wywo ewei'e Wasere yp pe — Motoro ga'apy pyi hawyi erekoi ro ihyemui'a wato tote wato'e hawyi Tupana mohey hap wywo pote meremo tutunug ai'e hap ewy e. Mi'i hawyi Wasere yp toto meremo hawyi ihyemui'a wato py'a­setpe tuwekoi itote hap ewy eweimohey Tupana hawyi are. Ta'i yt aiminug kuap i ko'i Tupana tunug kuap meremo e Iesui ahepe.
LUK 17:7 Mi'i hawyi wẽtup sehay i tohenoi — Karãpe wata­'aipok i ai'yat kape ahesy'at kahato hap wywo hawyi meremo wato'e aheropat haria pe — Arewei hawyi meremo uipoi ro hawyi meremo uhe'yni ãti ro. Arenuk kahuro hawyi waku areket uhero pote wato'e aheropat haria ai'yat piaria ahetama pe more­kuaria watoĩ­ne'en pote. Yt karãpe i wato'e aheropat hat pe — Mesup atunug eimi'u hawyi waku erewei hawyi woro­ho­'opoi yt wato'e i aheropat haria pe e.
LUK 17:8 Mio tã wato'e — Ewetunug no uimi'u hawyi arenuk teran wato'e aheropat haria pe. — Aresa­po­hy'u hawyi areket hawyi waku wato'e ahetama pe more­kuaria aito pote. Uheropat hap kahu hawyi waku eweinuk eweiket wato'e.
LUK 17:9 Yt karãpe i more­kuaria koro ko'i te'e­ro'e ta'a­tue­ropat haria pe — Eiperia po'og uikai uheropat kahato haria eiperia pote yt i'atu'e i katu­pono morekuat ekat kaipyi tukup­te'en mote. Ta'i morekuat mi'u kaipyi te'e­renuk te'e­ro­sa­po'u. Morekuat sokpe kaipyi te'e­ru­we­painug. Ta'i morekuat sa'up ete i'atu­potpap pote — Waku kahato eipe yt i'atu'e i more­kuaria ta'a­tu­potpap nug haria pe ahetama pe e Iesui.
LUK 17:10 Pyno waku kahato wato­py­hu'at Tupana eropat kahato haria wo are. Waku Tupana miky­'esat ewywuat yn watunug are. Waku watu­we­potpap kahato imiky'sat nug hap ete aikotã morekuat eropat haria akag ko'i ewy. Yt naku i wato'e Tupana pe — Yt ewese hin i kat pote yt karãpe i uheropat yt karãpe i uimi­ky­'esat ewy etunug i'ewyte yt karãpe i uipoi yt naku i wato'e Tupana pe. Po'og waku wato'e Tupana pe — Arehum ewawi pote eropat hano areĩne'en waku wato'e Tupana pe. — Atunug neran po'og hãpyk emiky­'esat ko'i katu­pono yt naku i te areĩne'en emiky­'esat nug hap ete waku wato'e Tupana pe e Iesui temiit'in me.
LUK 17:11 Mi'i hawyi Iesui toto hãpyk kahato yi Karireia yi Samaria sakpo tawa wato Ieru­sarẽi kape.
LUK 17:12 Mi'i hawyi mu'ap upi Iesui toto wẽtup tawa hit kapiat turan 10 ok takaria hepihi pihi rakaria tõ'ẽ howawi. Ta'a­tu­'ahu pote yt tukup­te'en kuap i irania'in wywo.
LUK 17:13 I'atupe nem mote pya Iesui kai te'e­ro­py­hu'at hawyi te'e­ro­wẽ­powat haty wo — Uru'akag eraha'at ro uruewawi hawyi urueha­kye­ra'at i'atu'e.
LUK 17:14 Mi'i hawyi Iesui ta'a­kasa i'atue­wawiat hawyi toikuap i'atuehay hawyi to'e i'atuepe — Eweiwat ro pa'i ko'i kape eipiit moherep i'atuepiat hamo ehehãite hap moherep hamo e i'atuepe. Tohenoi hawyi hepihi pihi rakaria tuwat ra'yn pa'i ko'i kape yt ta'a­tue­hãite hin mywo i te tuwat ma'ato mu'ap upiat tuwat hap tote i'atue­hãite ra'yn ta'a­tue­he­pihi kã'ã ra'yn i'atupe kahuria ra'yn.
LUK 17:15 Mi'i hawyi wẽtup ok ta'aipok Iesui kape hawyi to'e tehay pirik wo — Waku kahato Tupana pe katu­pono mesup ta'yn uimoe­hãite i ra'yn e.
LUK 17:16 Put'ok­to'e Iesui ete hawyi porog myi ihay — Waku kahato uhete etunug Uika­'iwat e. Uimoe­hãite ra'yn En e Iesui pe. Mi'i miit aipok hat yt Iesui ywania kaipywiat hat i ma'ato yi Samaria ywania kaipywiat sut hat. Samaria ywania yt ta'a­tu­ky'e hin i Iesui ywania pytkai meiũwat Iesui mimoe­hãite tuwe­pỹ­'ã­tutuk — Waku kahato En e hamo.
LUK 17:17 Mi'i hawyi mekewat Iesui mimoe­hãite yi Samaria kaipy­wiaria Iesui py ywytpe hawyi Iesui to'e tope — Pyno 10 ok takaria ati'a­tu­moe­hãite mesup ma'ato en yn era'aipok uhowawi epihi kã'ã moherep hamo — Waku e hamo e.
LUK 17:18 — Aikope pyno irania'in 9 ok takaria uimi­moe­hãite ko'i aikope tuwat mi'iria kat poteĩ yt tõ'ẽ i uhowawi — Waku ta'a­tu'e uhepiat hamo e.
LUK 17:19 Mi'i hawyi to'e — Waku era'aipok e'yat kape mehĩ e. Mesup waku pe ereĩne'en i ra'yn katu­pono uimohey hawyi emoehãite hap toĩne'en mesup e Iesui tomi­mo­hãite pe.
LUK 17:20 Mi'i hawyi tõ'ẽ miit'in Iesui ma'at reran hanuaria meimuẽwat Tupana ehay miwan etiat kuap kahato rakaria. Mi'i hawyi — Mehĩ i'atu'e uruikuap teran ehay i'atu'e. Karãpe aru put'ok'e mesuwat yi tote Tupana Aipo­rekuat nuat hap i'atu'e. Aikope aru pyno tuwe­mo­herep Aipo­typot no Tuapana i'atu'e. Mi'i hawyi Iesui ti'a­tu­wesat — Pywo ti rat yt heremo i hap ewy Tupana topy­hu'at yi Porekuat no tuwe­mo­herep mesu­wa­ro­tiaria pe e.
LUK 17:21 Yt uwe i ikuap are e. Yt naku i ewei'e — Meiẽ Tupana toĩne'en aipo­rekuat nuat. Yt naku i ewei'e — Ewei'a­kasa ro iuẽpe toĩne'en na'yn Tupana aipo­rekuat nuat yt naku i mio tã ewei'e katu­pono yt heremo i tuwe­mohep Eipo­rekuat nuat e i'atuepe. Ta'i eipy­'a­setpe yt heremo i hap ewy tuwe­mo­herep Tupana Eipo­rekuat nuat mesup ma'ato yt heremo hin i ehepe e tuwepe.
LUK 17:22 Mi'i hawyi Iesui to'e topot­mu­'eria pe tomohey haria pe — Uiwy­ria'in e mesup ta'yn Tupana toĩne'en Eipo­rekuat nuat eipy­'a­setpe e. Mesup ta'yn Eheyke'et toĩne'en eiwywo heremo kahato hap ewy ma'ato yt mot'i i areĩne'en eiwywo e. Areto hawyi ti aru ehehat'at kahato — Waku kahato sa'a­wy'i karãpe Aheyke'et Aikywyt toĩne'en aiwywo hap ewei'e aru uhepiat e. Waku kahato nimuat Aiwy toĩne'en aiwywo hap e'at ewei'e aru uhepiat e. Ehehat'at kahato mekewat e'at hawyi — Wati­ky­'esat kahato wẽtup e'at po'og Aheyke'et wywo Aikywyt wywo i ra'yn hap wati­ky­'esat ewei'e aru uhepiat pe eiwo­'ope ma'ato mi'i hawyi ti aru yt uipuẽti hin eipe hawyi uhehat'at kahato are e Iesui.
LUK 17:23 Mi'i hap e'at pe aru irania'in te'e­ro'e ehepe eima'at hamo — Pywo ti rat ta'aipok ta'yn Aheyke'et Aikywyt kuepe ra'yn toĩne'en i ra'yn i'atueso ehepe. — Pyno to'iro Aheyke'et Aikywyt ewawi i'atu'e aru ehepe irania'in eima'at hamo ma'ato yt eweiwat rei'o mi'iria upi uikat hamo katu­pono yt pywo pe i mio tã i'atu'e ehepe ma'ato eima'at hamo mio tã i'atu'e ehepe aru e.
LUK 17:24 Katu­pono Uito Miit'in Eyke'et ut hap e'at pe turan merep e hap ewy ariot atipy kaipyi are e. Heremo sese hap ewy ariot atipy kaipyi are e. Wuat'i mikuap ewy uhẽtyhot kahato puo ariot Wuat'i Miit'in Potypot no ariot aru atipy kaipyi e Iesui tomohey haria sese pe.
LUK 17:25 Ma'ato koitywy mesu­wa­ro­tiaria yt uimohey haria i tukup­te'en e. Pywo ti rat koran te ti mesu­wa­ro­tiaria irania'in Eheyke'et Eikywyt pun haria te'e­ro­py­hu'at are e. Yt ta'a­tu­ky­'esat hin i uimohey hap pãi e. Aho'opot kahato irane ta'a­tu­mi­ky­ry'i hap upi e.
LUK 17:26 Pyno areto hawyi ara'aipok i mesuwe i ra'yn e. Sa'a­wy'i sese te mekewat i'aman at ka'ap 40 e'at piat hap turanuat mekewat aha'a­se'i pot Nu'e toĩne'en hap e'at piat turanuat yt uwe i aha'a­se'i pot Nu'e mohey hat toĩne'en e. Mi'i hap ewy kahato ti aru miit'in tukup­te'en wyti aru Eheyke'et ut hap e'at pe wyti aru are e.
LUK 17:27 Nu'e ieĩne'en hap e'at turan te'e­renuk hap ko'i kape yn ta'a­tu­wa­nẽtup mesuwat yi tote are e. Mahy u hap kape yn te'e­ru­we­wa­nẽtup at ka'ap e. Ta'i i'atu­wary wary kahato itote e. Wo'o­waire waire hap kape yn ta'a­tu­wa­nẽtup e. Yt te'e­ru­wa­nẽtup hin i mekewat Tupana ehay Nu'e mimo­herep kape i'aman koro tut irane e hap kape yt te'e­ru­wa­nẽtup teran hin i sa'a­wy'i e. Mi'i hawyi Nu'e teke ra'yn mekewat yara wato sese pe to'yat piaria wywo hawyi i'aman koro kahato ra'yn Tupana e hap ewy ra'yn hawyi y'y wato ta'am kahato yi tote hawyi y'y koro hap ewy yn toĩne'en yi tote hawyi yt imohey i haria y'y koro ti'a­tu­'a­tu­'uka kahato torania mesuwat yi totiaria e miwan me e. Mi'iria ewywuat aru tukup­te'en miit'in uhut hap e'at pe e Iesui.
LUK 17:28 Ta'i sa'a­wy'i sese Tupana to'e ase'i Iro pe — Eiwe­nõ'ẽ ro tawa wato Sutuma pyi katu­pono ati'a­tuwuk tawa Sutuma piaria i'atu­minug sa'ag upi e. Mekewat e'at pe Iro tuwẽtem turan mi'i hap e'at pe Tupana tiwuk ta'yn itotiaria e miwan me e. Mekewat e'at pe te'e­renuk at ka'ap hap ko'i kape yn te'e­ru­wa­nẽtup e. I'atu'yat nug hap kape yn te'e­ru­wa­nẽtup e. Ta'a­tueko nug hap kape yn ta'a­tu­wa­nẽtup e. Te'e­ru­we­sapo mahy u hap ko'i kape yn te'e­ru­wa­'a­tunug e. Wene­ru'i wene­ru'i hap ete wo'o­waire waire hap kape yn ta'a­tu­wa­nẽtup hawyi Iro tuwẽtem na'yn mekewat tawa pyi to'yat piaria hupi hawyi aria ra'yn hewo hewo itote atipy kaipyi hawyi yt te'e­ru­wa­nẽtup teran i Tupana e hap kapiaria wuk hamo e miwan me e. Mi'i hap ewy kahato ti aru mesu­wa­ro­tiaria tukup­te'en aru ara'aipok hap e'at pe.
LUK 17:29 Ma'ato mekewat e'at pe karãpe Iro'in tuwẽtem na'yn tawa sa'ag Sutuma pyi hawyi aria hewo hewo ra'yn atipy kaipyi nukara ewywuat ko'i Tupana minug. Mi'i haria tawa Sutuma piaria Tupana ehay pun haria aria mi'u wo yn tukup­te'en e.
LUK 17:30 Mi'i hap ewy kahato ti aru miit'in tukup­te'en Eheyke'et ut hap e'at pe hamuat turan acre e. Yt uwe i Tupana ehay kape te'e­ru­wa­nẽtup mekewat e'at pe e. Ta'a­tu­minug ko'i kape yn te'e­ru­wa­nẽtup e. Uhut hap kape yt te'e­ru­wa­nẽtup hin i mekewat e'at pe hawyi ariot e Iesui ahepe.
LUK 17:31 Mekewat uhut hap e'at pe eweinõ'ẽ ro tawa Ieru­sarẽi myi meremo are e. Ehe'yni toĩne'en ei'yat pe pote yt ewei'aipok i eheka­re'en ko'i sat hamo are e. Meremo eweinõ'ẽ ro tawa Ieru­sarẽi myi are e. Eiko totiat eweikup­te'en mote uhut turan mote yt ewei'aipok tei'o ei'yat kape ehekat sat hamo e.
LUK 17:32 Ase'i Iro ehary'i ta'aipok teran tawa Sutuma kape hawyi teha'at tawa Sutuma kape ta'aipok teran haype hawyi nu ukyt kawiat mana Iro ehary'i topy­hu'at itote e. Pyno yt ewei'aipok tei'o tawa Ieru­sarẽi kape Iro ehary'i ewy are katu­pono tuwe­nõ'ẽ tawa Sutuma pyi turan Tupana to'e Iro'in me — Yt eweiwe­ha'at tei'o tawa kape eweiwe­nõ'ẽ hawyi e ma'ato Iro ehary'i teha'at i ra'yn tosaipe hawyi ipiit nu ykyt kawiat topy­hu'at iha'at turan hawyi e. Toiky'e kahato toieĩne'en hap Sutuma totiat pote e.
LUK 17:33 Pyno eheĩne'en hap mesu­wa­rotiat eweiky'e kahato ewei'a­pykok kahato pote yt put'ok­'e­wei'e i eheĩne'en hap eheha­kye­ra'at wuat'i e'at piat hamo are e. Ma'ato yt eweiky'e kahato i eheĩne'en hap mesu­wa­rotiat pote ma'ato Tupana miky­'esat ewywuat hap upiat eweiwa­nẽtup hawyi pywo pe ti eweipuẽti wyti aru eheĩne'en hap sese eheha­kye­ra'at hap hamuat e Iesui ahepe.
LUK 17:34 Mekewat wãtym me Eheyke'et Eikywyt ut hap e'at pe turan tukup­te'en aru typy ok te'e­roket ne'i wyti aru getap wiat to'o­kipy pe e. Mi'i hawyi wẽtup ok yt uwe i ra'yn Tupana tioto hawyi ma'ato wẽtup yt uimohey hat i pote Tupana toiat ra'yn itote e.
LUK 17:35 Mekewat e'at pe turan uhut hap e'at typy hary­poria wemi­'utok haria tukup­te'en irane hawyi wẽtup hary­poria yt uwe i wyti aru Tupana tioto hawyi ma'ato wẽtup ok totoiat ra'yn itote yt uimohey hat i pote e.
LUK 17:36 I'ewyte wyti aru typy ihainia ta'a­tuko tote tukup­te'en wẽtup ok wyti aru yt uwe i ra'yn Tupana tioto hawyi ma'ato wẽtup ok totoiat itote mekewat e'at pe e. Yt uimohey hat i wyti aru totoiat e Iesui ahepe.
LUK 17:37 Mi'i hawyi iwyria'in apo'i­'a­tu'e Iesui pe — Urupo­rekuat i'atu'e aikope aikope aru eriot eut hap e'at pe i'atu'e. Mi'i hawyi toi'a­tu­wesat — Pyno mekewat uhut hap e'at pe put'ok'e hawyi meremo eweikuap uhut hap are. Ta'i karãpe wat'a­kasa Uruwu ko'i te'e­re­popy hawyi meremo watikuap i'okpuk takat toĩne'en itote i'atu­mi'u wo te'e­ru­wa­'a­tunug kahato itote pote e. Ta'i yt niatpo hin i watikuap aikope toĩne'en hap. Mi'i hap ewywuat yt niatpo hin i eweikuap aikope ariot hap e Iesui topot­mu­'eria pe ahepe.
LUK 18:1 Mi'i hawyi po'og Iesui henoi tehay iã'ãkap wuo — Uiwy­ria'in e waku ahehay kahato Tupana kape e. Waku yt aipohep hin i ma'ato wahẽtup hẽtup hap pyi e. Tupana yt tum i aimiẽtup hawyi waku wahẽtup i e. Yt naku i ahehay yi kape yt hum i ahepe hawyi e. Pyno ahenoi teran uhehay hã'ãkap wuo aikotã waku wahenoi Tupana kapiat wahẽtup aimi­ky­'esat ko'i hap etiat e.
LUK 18:2 Pyno sa'a­wy'i so wẽtup tawa piat toĩne'en morekuat esurara akag koro i'atu'e. Mi'i miit topy­hu'at morekuat mu'e hat uwe waku uwe yt naku i e hanuat i'atu'e e. Mi'i miit ma'ato ti yt Tupana mohey hin i hat i'ewyte yt toi'a­tu­ky'e hin i miit'in i'atu'e so e.
LUK 18:3 I'ewyte hiwu toĩne'en wy mekewat tawa tote i'atu'e. Mi'i ti toto mekewat surara akag kape katu­pono toiky­'esat topo­wyro hap. Mi'i hawyi topo­wyro hap tohẽtup mekewat surara akag me — Uipo­wyro ro e katu­pono tukup­te'en kahato miit'in yt i'atu­wese rakaria uima'at kahato rakaria e tope. Pyno wãi'ere ro uhewa­nĩ­kaptia pe mimi e so. Mi'i hawyi eweimo­hãpyk o i'atu­minug sa'ag uhetiat hap e morekuat emiit akag me.
LUK 18:4 — Ma'ato so mekewat morekuat surara akag yt ipowyro teran hin i haype mekewat hiwu i'atu'e. Mi'i pote yt toiwesat i tohẽtup hawyi i'atu'e so. Mi'i hawyi yne e'at pe yne wãtym me toto i hẽtup hẽtup kahato hamo ma'ato yt kat i tutum ipowyro hap i'atu'e so. Mi'i hawyi wẽtup e'at pe — Are pãi e tuwepe mekewat surara akag hawyi so — Yt areken'ẽ i Tupana pupi e. I'ewyte irania'in mupi yt areken'ẽ hin i ma'ato mesuwat hiwu pupi areken'ẽ kahato katu­pono yt areket kuap i mekewat hiwu tut at ka'ap hẽtup hẽtup hamo pote e. Yt naku i uhete pote atum pãi imiky­'esat ewy hawyi yt tut i uhowawi e tuwepe i'atu'e so e.
LUK 18:5 Ta'i uimo­sero mosero kahato rat mekewat hary­poria hiwu tehay wo e so. Mi'i pote atipo­wyro hawyi yt tut i e so tuwepe. Wuat'i e'at pe tut wuat'i wãtym me tut pote atum imiky­'esat ewy hawyi yt tut i e so e Iesui tehay iã'ãkap wuo.
LUK 18:6 — Pyno eiwe­wa­nẽtup to mekewat hiwu miẽtup uhehay iã'ãkap kape e. eiwe­wa­nẽtup to mekewat surara akag ehay kape e.
LUK 18:7 — Pywo ti rat Tupana yt mekewat surara akag sa'ag ewy hin i katu­pono Tupana tiky'e kahato temiit'in yne hawyi tutunug neran yne aimiẽtup towawiat hap are e. Pywo ti rat toiky­'esat kahato ahẽtup hẽtup kahato hap sio ihot'ok puo sio wãtym muo hap e. Ta'i waku wahẽtup tope at ka'ap yt aipohep hin hẽtup hẽtup hap etepyi e. Ta'i meremo Tupana timo­hãpyk aru irania'in minug sa'ag ahetiat ko'i wahẽtup hawyi e temiit'in me.
LUK 18:8 Ta'i areĩne'en Eheyke'et Uito mi'i pote uhut hap e'at turan ati'a­tu­'a­piheg kahato irania'in minug sa'ag uimohey haria etiat e. Ta'i uimohey sese haria ihay kahato rakaria Tupana mohey hawuo are e. Mi'i ewywuat Ui'ywot mohey haria ati'a­tukat kahato e. Uhut hap e'at pe mi'iria ewywuat ati'a­tukat kahato sio toĩ sio yt hap e. Are pãi yt atikuap i te sio tukup­te'en aru Tupana wywo ihay rakaria uimohey sese haria mekewat uhut hap e'at pe hap yt atikuap i te e Iesui temiit'in me ahepe.
LUK 18:9 Mi'i hawyi wẽtup sehay iã'ãkap wuo Iesui henoi miit'in me katu­pono tukup­te'en itote — Uruto po'og wakuaria torania kai e haria yt irania'in atuky'e hin i haria.
LUK 18:10 Mi'i haria pe Iesui henoi — Sa'a­wy'i so typy ihainia'in tuwat ra'yn Tupana mõtypot hap yat kape ta'a­tuehay Tupana wywuat hamo e. Wẽtup ok Tupana ehay moherep hat mi'i — Po'og uito irania'in kai e tuwepe hat e. Mi'i hawyi so wẽtup ok yt naku i kahato rakat katu­pono ipotpap ahewa­nĩ­kaptia porekuat emiit no aheka­re'en pore­ra'at hamuat wuat'i mu'ap upi hanuat mi'i e.
LUK 18:11 Mi'i hawyi so mekewat — Uito waku kahato rakat e hat put'ok'e Tupana mõtypot hawe hawyi teke aikope pa'i yn teke hawe pya kahato pyi irania'in yt naku i nug haria kai hawyi ihay se hap ewy Tupana kape — Waku sese kahato atunug e so uito po'og waku irania'in kai e so tuwepe tuwa­nẽtup hawe e. Arehum ewawi uiwaku hap upi e so. Uito yt irania'in ewy hin i i'atu­minug sa'ag hap ete e so. Uito waku kahato nug hat yn e so. Are pãi e uito ti yt miit'in ma'at hat ewy hin i e. Uito yt areĩne'en i wuat'i hary­poria wywo ehat i e. Waku kahato uito pãi e so. Tupana e so toĩne'en mesuwe e'yat pe wẽtup ok miit yt naku i sese nug hat e so. Mi'i miit ahewa­nĩ­kaptia esura­ra'in powyro hat hawyi aheka­re'en toipo­re­ra'at ahewa­nĩ­kaptia porekuat ekat no e so. Yt karãpe i ati'a­parap mi'i miit ewywuat e so tuwepe Tupana mõtypot yat pe e.
LUK 18:12 Ta'i waku kahato atunug yne ete e. Pywo ti rat typy e'at 7 e'at turan yt kat i hin i atu'u mi'u emõtypot hamuat haype e so. Waku kahato atunug katu­pono uhegyi'at kahato katu­pono uiko kaipyi uhekat kaipyi atimõ'ẽ 10 kaipyi wẽtup aterut ewawi Tupana hawyi 9 yn atioto ui'yat kape e. Iwato kahato ati'a­tu­mõ'ẽ uihũria kaipyi wẽtup 10 kaipyi atum e so Tupana pe e ma'ato mi'i tã to'e Tupana pe wuat'i miit'in tikuap tehay hamuat hap toiky­'esat e.
LUK 18:13 Mi'i hawyi mekewat yt naku i nug hat mekewat wanĩ­kaptia powyro hat wuat'i ekare'en pyhyp hat pya kahato irania'in waku nug haria kai toĩne'en oken'ypy ete. Yt teha'at hin i atipy kape Tupana ewawi tehay hamo ma'ato yi kape yn tehe'at hawyi tuwe­'ahyk ahyk tuwe­mõti Tupana wywo tehay hamuat haype. — Yt ui'a­piheg nei'o uiminug sa'ag upi e. Atikuap ta'yn uito yt naku i kahato rakano areĩne'en wen ma'ato uheha­kye­ra'at En hap atiky­'esat e Tupana pe paato'e haype e so e Iesui.
LUK 18:14 Pywo pe are'e ehepe mekewat paa'e tominug sa'ag ko'i ete mekewat — Atoiat teran uiminug yt naku i e hat yn ta'aipok to'yat kape waku pe Tupana wanẽtup hawe are katu­pono Tupana tiwaure yne iminug sa'ag ko'i pote ma'ato mekewat — Uito po'og po'og irania'in kai e hat ete Tupana yt tiwaure kuap i iminug yt naku i ko'i hap kai katu­pono — Uito yt atunug i yt naku i e hat toĩne'en mote e. Mi'i hat ewywuat kahato eweikup­te'en katu­pono — Uruto po'og waku torania kai e haria eweikup­te'en e Iesui tewa­nĩ­kaptia pe itotiaria pe. Pywo ti rat are'e ehepe uwe uwe tuwe­mo­wato topy'a pe tuwa­nẽtup hawe — Uito po'og waku irania'in kai e hap wywo mi'i hat wy ti aru Tupana mimohit kahato rakano topy­hu'at wuat'i e'at pe wen uwe uwe paa'e topy'a pe tuwa­nẽtup hawe tominug sa'ag hawyi — Uheha­kye­ra'at Tupana pe to'e hat mi'i hat toĩne'en Tupana mimõ­typot no toĩne'en wuat'i e'at pe are e Iesui wuat'i miit'in me.
LUK 18:15 Mi'i hawyi wẽtup e'at pe miit'in terut ta'a­tu­mẽ­pyt'in Iesui ewawi katu­pono ta'a­tu­ky­'esat kahato ta'a­tu­mẽ­pyt'in poityro hap Iesui po kaipywiat hap. Ta'a­tu­ky­'esat i'atue­waku Iesui piat hap. Mi'i hawyi tõ'ẽ howawi wen ma'ato Iesui emiit'in wãi'i­'a­tu'e hira­karia erut haria pe.
LUK 18:16 Ma'ato Iesui ihay pirik temiit'in me — Kat poteĩ ewei'a­tu­pyhyp hira­karia uhowawi haria e. Wãi nei'o are e katu­pono ati'a­tu­ky­'esat kahato hira­karia uhowawiat hap e. Yt ewei'a­tu­pyhyp tei'o hira­karia i'atuepap uhowawiat hap upi are e topy­'ahak hap wywo temiit'in me. Yt ewei'a­tu­pyhyp tei'o hira­karia katu­pono hira­karia timohey kahato Tupana are e. Ta'i hira­karia tuwe­hyt'ok teran kahato Tupana etama pe e. Tupana mohey kahato haria kahato ti hira­karia mi'i pote ti aru mi'iria ewywuat rakaria yn wyti aru tukup­te'en Tupana etama pe e. Mesuwe karãpe Tupana topy­hu'at Wuat'i Miit'in Porekuat no hap e'at pe turan mi'iria pe — Atum aru uhetama sese ehepe e. Atum aru mesuwat yi yne hira­karia ewywuat uimohey haria pe e Tupana e.
LUK 18:17 — Pywo pe ti eweiwat teran aikope Tupana toĩne'en morekuat no hap kape pote hira­karia tiky­'esat tuwe­hyt'ok hap ewy o eweiwat o are e. Ma'ato yt pote yt eweiwat kuap i e. Eweiwat ro Tupana mohey kahato hawuo hira­karia imohey kahato haria ewywuat pote ti aru put'ok­'e­wei'e aikope Tupana toĩne'en hap tote e Iesui topot­mu­'eria pe ta'a­tu­pyhyp hira­karia howawi turan.
LUK 18:18 Mi'i hawyi wẽtup ok Iuteuria ywania akag hekat kahato rakat apo'e Iesui pe — Uimu'e hat e waku kahato En e. Pyno uimu'e ro kat som waku atunug uheĩne'en wuat'i e'at piat hap kyi'at hamo e. Atiky­'esat kahato areĩne'en Tupana wywo wuat'i e'at pe e. Pyno kat som waku atunug mi'i hap puẽti hamo apo'e Iesui pe. — Waku sese kahato en e Iesui pe.
LUK 18:19 Mi'i hawyi Iesui to'e — Kat poteĩ — Waku sese kahato En ere'e uhepiat pe e. Tupana yn ni waku sese hap watikuap e. Uito apo areĩne'en Tupana wo ewanẽtup hawe e.
LUK 18:20 Pyno etikuap apo Tupana piat ainãpin hap ko'i e. Etikuap aikotã Tupana ainãpin Musei miwan miat apo. Mio tã e — Yt naku i wẽtup ok wywo wẽtup ok wywo ehary'i e'aito e miwan me e. Yt naku i eti'auka miit e miwan me e. Yt naku i sero­'ok­'ere e miwan me e. yt naku i eso e. Etimõ­typot ro e'ywot ety e miwan me e. Mio tã e hap ko'i etikuap apo'e mekewat hekat rakat pe mekewat miit akag me.
LUK 18:21 Mi'i hawyi toiwesat — Ta'i ati'a­tukuap yne mekewat Tupana piat ainãpin hap ko'i mehĩ e. Ta'i uihire pyi te ti atunug yne yne mio tã e hap ko'i e Iesui pe.
LUK 18:22 Mi'i hawyi Iesui to'e tope — Waku mehĩ wen ma'ato wẽtup mo yt etunug i te e. Mi'i hap etunug hawyi waku pe ereĩne'en Tupana wanẽtup hawe e. Pyno ereto ro e'yat kape hawyi ekat iwato kahato hap eti'a­tu­mõ'ẽ yne yt hekat i rakaria pe miit'in haky­'e'i rakaria pe satek takaria pe e. Eti'a­tu­mõ'ẽ yne hawyi waku era'aipok uhowawi uhemiit no uhupiat eto hamo e Iesui mekewat miit'in akag me mekewat hekat kahato rakat pe. Mio tã etunug pote etipuẽti ekare'en sese wuat'i e'at piat mesuwe karãpe Tupana toĩne'en mesuwe wuat'i porekuat nuat hap e'at pe e Iesui mekewat hekat kahato rakat pe.
LUK 18:23 Ma'ato mio tã e Iesui hawyi mekewat miit yi kape yn teha'at hawyi paa'e kahato katu­pono iwat heka­re'en iwato kahato hap toi'a­tu­ky'e kahato pote yt toimõ'ẽ teran i tekat sem hatek takaria pe yt hekat i rakaria pe pote.
LUK 18:24 Mi'i hawyi Iesui teha'at kahato mekewat hekat ky'e kahato hat ewawi hawyi toikuap ta'yn paa'e kahato hap hawyi toiky'e kahato hawyi to'e itotiaria pe — Are pãi e niatpo kahato ti rat weka­re'en ky'e kahato haria tuwe­hyt'ok aikope Tupana toĩne'en Morekuat no hawe are e Iesui.
LUK 18:25 Ta'i niatpo kahato yt hegyi'at i rakat teke atipy pe e. Niatpo kahato wateke atipy pe ahekat iwato wywo e. Niatpo kahato aikotã aihũ iwato kahato rakat mekewat Kameru e hap het rakat teke awi ehapo ka'a puo ma'ato sakpo niatpo sese ewy wekat iwato kahato ky'e kahato rakaria teke atipy pe e. Niatpo aihũ Kameru iwato kahato rakat teke awi ehapo sakpo po'og po'og niatpo tuwe­hyt'ok Tupana etama pe — Uhekat ti uhetu­pana wo toĩne'en e hat e Iesui.
LUK 18:26 Mio tã to'e hawyi wanẽtup haria itotiaria te'e­ro'e tope — Pyno yt uwe i teke kuap atipy pe hekat rakat i'atu'e to'ope.
LUK 18:27 Ma'ato Iesui to'e — Pywo miit'in yt uwe i teke kuap atipy pe e. Tupana yn tieha­kye­ra'at kuap miit'in e. Pywo pe ti rat miit'in yt tikyi'at kuap i ereke hap atipy pe e. Ma'ato Tupana yn miit'in ehakye­ra'at kuap e. Yt kat i niatpo Tupana wanẽtup hawe e. Miit'in yt minug kuap ko'i i yt niatpo hin i Tupana pe e. Tupana tieha­kye­ra'at kuap miit'in hekat rakaria pytkai e.
LUK 18:28 Mi'i hawyi Peteru to'e — Urumu'e hat uruto ti urui'atoiat ra'yn uru'yat ko'i urue'yara uruekat uruepotpap uruko eupiat tuwat hamo ehay moherep hamo e.
LUK 18:29 — Pywo kahato ti e'e hap Peteru e. Woro­ho­'okuap kahato eipe e. Atikuap aikotã sa'a­wy'i eweitoiat yne uhupiat tuwat hamo hap e. Waku kahato ti rat eipe e. Pywo ti rat uwe uwe eipe ewy uiky'e po'og po'og to'yat kai toty kai teha­ry'i kai toywyt'in kai tomẽ­pyt'in kai topotpap kai hawyi toto uhehay Tupana piat Aipo­rekuat nuat e hap moherep hamo mi'i hat eipe ewywuaria wyti aru waku pe tukup­te'en wuat'i e'at pe atipy pe e Iesui Peteru pe ahepe.
LUK 18:30 Kat ko'i kat ko'i eweitoiat uhehay sytpok hamo wuat'i ywania enoi hamuat mi'i ko'i eimi­'atoiat ko'i atum aru ehowawi i ra'yn mesuwe ma'ato po'og po'og atum eimi­'atoiat sa'a­wy­'iwuat ko'i kai e. Ta'i eimi­'atoiat ko'i saipepiat uimiium ko'i po'og po'og iwato po'og ikahu atum ehepe eweiwat uhupi hawyi i'ewyte eheĩne'en hap Tupana wywo wuat'i e'at piat hap ikahu kahato hap atum ehepe e Iesui ahepe topot­po­'o­roria pe.
LUK 18:31 Mi'i hawyi temiit'in Iesui tere­po'ok miit'in typy'i rakaria tokpyi enoi tepiat hamo. — Uheka­tu­wyria watuwat mesup tawa wato Ieru­sarẽi kape e. Itote ti aru ui'auka irane aikotã sa'a­wy­'i­tewuat Tupana ehay moherep haria miwan miat e hap ewywuat wyti ta'a­tunug sa'ag yne uhete Eheyke'et ete e.
LUK 18:32 Itote ahewa­nĩ­kaptia ywania esura­ra'in po pe ra'yn uipag ui'auka hamo itote irane e Iesui. Yt naku i ta'a­tunug uhete e. Mi'iria te'e­ru­weu­ka'i kahato uhete ta'a­tu­mi­ky­ry'i uhete hawyi kuitu kuitu­'i­'a­tu'e uipiit ete uimohit haype irane itote e. Uito Wuat'i Miit'in Eyke'et pytkai uipun aru itote are e. Yt uimõ­typot hin i itote e.
LUK 18:33 Uipak pak kahato itote hawyi aru ui'auka sa'ag ne'i aru ma'ato mi'i pytkai mye'ym e'at hawyi arẽtem aru uiku­'uro sese hap pyi e. Gu'uro pyi ara'aipok ehowawi i ra'yn. Ui'asyp pytkai arẽtem i ra'yn aru ui'asyp hap kaipyi e.
LUK 18:34 Tuwetiat tohenoi ma'ato hemiit'in yt ikuap hin i imienoi ko'i yt hot'ok'e i pote yt ta'a­tukuap kuap i i'e hap pote.
LUK 18:35 Mi'i hawyi Iesui toto temiit'in wywo tawa wato Ieru­sarẽi kape. Mi'i hawyi put'ok­'ia­tu'e tawa Ieriko ete. Mi'i tote toĩne'en apyk pe mu'ap ẽpeke ete yt iha pytig i rakat mu'ap tote. Itote pyi tohẽtup kahato miit'in miium ko'i teko ewy.
LUK 18:36 Miit'in typy'i rakaria õ'ẽ hap toikuap hawyi tohẽtup ta'yn — Kat hamo som miit'in typy'i rakaria tõ'ẽ e apo'e mu'ap upiaria pe yt iha pytig i hat.
LUK 18:37 Mi'i hawyi ta'a­tu­wesat — Ta'i Mekewat Miit tawa Nasare kaipywiat wyti tut meikowo mekewat Iesui e hap het rakat i'atu'e ta'a­tu­henoi yt iha rakat i pe.
LUK 18:38 Mi'i hawyi mekewat yt iha rakat i tikuap hawyi tuwẽ­powat Iesui kape tehay pirik wo — Uipo­wyro ro uipo­wyro ro Morekuat Tawi Emiariru uheha­kye­ra'at ro En e.
LUK 18:39 Ma'ato irania'in mu'ap upiaria — Wãi nei'o i'atu'e. Yt naku i ehay pirik hap i'atu'e. Epo'inik to i'atu'e wen ma'ato po'og ne'i tuwẽ­powat haty wo kahato hamo — Morekuat Tawi Emiariru uheha­kye­ra'at En e.
LUK 18:40 Mi'i hawyi Iesui topy­hu'at itote mu'ap tote hawyi to'e — Eweterut ro uhowawi iwẽpap'i kahato hat e mu'ap upiaria pe. Mi'i hawyi ta'a­tuerut mekewat sẽtup'e hat.
LUK 18:41 Put'ok'e Iesui yatype hawyi apo'e Iesui — Kat e hap etiky­'esat uipo pyi mehĩ apo'e tope. Mio tã e pote — Mehĩ e uimoe­ha­pytig i hap epiat hap atiky­'esat kahato pãi e Iesui pe.
LUK 18:42 — Pyno waku ra'yn emiky­'esat ewy atunug e Iesui. Pyno waku ra'yn ereĩne'en e. Mesup ta'yn atum epe emiẽtup ewywuat e. Era'a­kasa ro are katu­pono uimohey kahato hap emoehãite hap topy­hu'at e Iesui yt iha i rakat pe.
LUK 18:43 Mio tã to'e Iesui hawyi meremo iha i ra'yn meremo waku i ra'yn iha ete ihapytig hap waku hap wywo toĩne'en kahato. Ta'a­kasa kuap i ra'yn hawyi — Waku kahato En Tupana waku kahato En katu­pono waku i ra'yn uheha e itote tehay se kahato hap ewy tuwehum kahato Tupana kape. Mi'i hawyi mu'ap upi toto ra'yn Iesui upi tawa Ieriko kape iwepit kahato hap wywo toto — Waku kahato En waku kahato En yn to'e Tupana pe itote. I'ewyte irania'in Iesui minug wakuat kapiat akasa haria te'e­ru­wehum yn kahato Tupana ete itote mu'ap upi Iesui toto tawa Ieriko kape turan.
LUK 19:1 Mi'i hawyi Iesui teke ra'yn tawa Ieriko pe. Mi'i hawyi tawa Ieriko sakpo toto mekewat tawa pu'ap upi tuwat.
LUK 19:2 Mi'i tawa pe toĩne'en hekat kahato rakat Sakeu e hap het rakat itotiat. Mi'i miit ri yt naku i kahato rakat toĩne'en irania'in wanẽtup hawe katu­pono ipotpap Iuteu ywnia wanĩ­kaptia esura­ra'in powyro to'y­wania ekare'en pyhyp hamo. Toikat kahato miit'in kaipyi i'atuekat pat'ok hap wanĩ­kaptia porekuat sa'up mo. Wanĩ­kaptia porekuat powyro kahato rakano toĩne'en mote tuwe­mo­wato kahato teka­re'en ete tawa Ieriko tote.
LUK 19:3 Mi'i hawyi Sakeu ta'a­kasa teran kahato Iesui kape ma'ato yt itypore i sese rakat pote yt ta'a­kasa kuap i miit'in tok piat sakpo Iesui kape.
LUK 19:4 Mi'i pote pun'e irania'in e'yianme wẽtup aria'yp mu'ap upiat kape hawyi meremo ta'am haga tote ywaipe pyi teha'at kahato Iesui ewawi ta'a­kasa teran haype.
LUK 19:5 Put'ok'e Iesui aria'yp ypyke hawyi teha'at kahato ywaiti hawyi to'e — Uhyt Sakeu e era'apyk to uhowawi uhyt e. Mesuwat e'at pe at areĩne'en neran ewywo e'yat pe mehĩ e.
LUK 19:6 Mi'i hawyi meremo ta'apyk hawyi iwepit hap wywo — Hẽ to uhyt e. Waku kahato ereĩne'en ui'yat pe e Iesui pe.
LUK 19:7 Ma'ato irania'in tikuap Sakeu yat kapiat Iesui to hap hawyi te'e­ro'e to'ope — Yt naku i Iesui i'atu'e katu­pono ahewa­nĩkap yat kape toto i'atu'e to'ope yt nakuat i kahato rakat yat kape Iesui toto ra'yn yt Tupana miky­'esat ewy i tutunug i'atu'e ta'a­tu­py­'ahak hap wywo.
LUK 19:8 Mi'i hawyi Iesui toto mekewat mu'ap pyhyp hat upi mekewat Sakeu e hap het rakat upi i'yat kape. Put'ok­'i­'a­tu'e itote hawyi te'e­renuk hap upi mekewat Sakeu to'e Iesui pe — Uhyt e ipat'ok uhekat yne ti rat atimõ'ẽ mesup yt hekat i rakaria pe e. Pywo ti rat miit'in ekare'en pyhyp hap ko'i miit'in ma'at hap ko'i atum mesup i'atuepe e katu­pono atimo­hãpyk teran yne uiminug sa'ag ko'i uhero'ok hap ko'i atipo­re­ra­'aipok teran mesup uimisat ko'i yne mu'ap upiaria po pyi miit'in ekat ko'i e. Wẽtup ok hyt u'i atat uimi­po­hari po'og atum 4 hyt u'i atipo­re­ra­'aipok tuwe­wawi atum e. Atupo­hari hap ko'i yt naku i hap ewy atum yne i ra'yn uimi­ma'at ko'i pe e. Mekewat wẽtup hap ete uimi­po­hari ko'i ete atipo­re­ra­'aipok 4 hap ewywuat ipakup takat ko'i uimi­ma'at ko'i pe e. Pyno ati'a­tu­'atoiat teran uiminug sa'ag yne hawyi waku yn atunug neran mi'i hawyi e Iesui pe Sakeu.
LUK 19:9 Mi'i hawyi Iesui to'e irania'in me tawa Ieriko piaria pe — Uruto po'og waku irania'in kai e haria eipe e. Mesup ta'yn Tupana mieha­kye­ra'at no topy­hu'at Mehĩ Sakeu e. Mesup ta'yn ti rat Aha'a­se'i Aparãu emiariru sese toĩne'en mehĩ Sakeu katu­pono mesup ta'yn mehĩ Sakeu waku pe toĩne'en Tupana wanẽtup hawe e.
LUK 19:10 Mesup ta'yn Tupana mieha­kye­ra'at no topy­hu'at i'ewyte yne i'yat piaria waku pe toĩne'en e. Mi'i hawyi to'e mehĩ Sakeu pe — Pyno waku pe ra'yn mehĩ e mesup ta'yn Tupana mieha­kye­ra'at ereĩne'en wuat'i e'at pe e Iesui mehĩ Sakeu pe. Pywo ti Uito Eheyke'et ariot mesuwat mytyp kape ho'o­wasat rakaria kat hamo ariot e. Ta'i ho'o­wasat rakaria ehakye­ra'at hamo ariot miit'in kat hamo e. Ma'ato — Uruto po'og irania'in kai e haria yt atimo­waku kuap i katu­pono — Uruto waku ra'yn i'atu'e. Mi'i pote yt naku i rakaria wywo uhewyry i'atu­mu'e Tupana kuap hamo e Iesui tawa Ieriko piaria pe — Uruto po'og irania'in kai e haria pe.
LUK 19:11 Mi'i hawyi miit'in tuwat tuwat tawa wato Ieru­sarẽi kape. Mi'i hawyi i'atuehay kahato mu'ap upi — Pywo ti rat Tupana Mipo­'oro Aipo­rekuat nuat tut irane ahewa­nĩ­kaptia akit hamo hawyi waku pe watu­kup­te'en i ra'yn aikotã sa'a­wy­'iwuat hap e'at piat hap ewy i'atu'e to'ope mu'ap upi.
LUK 19:12 Mi'i hawyi yt pya i tawa wato Ieru­sarẽi kai turan Iesui ti'a­tu­mu'e mu'ap upiaria tehay iã'ãkap wuo — Sa'a­wy'i so wẽtup tu'isa waku rakat hekat kahato rakat wuat'i etama piaria mikuap toto ra'yn tetawa kaipyi morekuat koro kape. — Atiky­'esat wuat'i tu'i­saria akag wo uinug uruetama pe e hap wywo toto e so.
LUK 19:13 Ma'ato toto morekuat koro kapiat hap owakai toi'a­tu­kaykay ra'yn toeropat haria akag ko'i 10 ok takaria tuwe­wawi hawyi so — Areto ra'yn Morekuat koro kape hawyi atiky­'esat ui'airo temiit akag wo mesuwat ahetama piaria wuat'i tu'i­saria akag wo e so. Pyno areto turan atiky­'esat uhekat eipo pe areto turan imowato hamo e so. Pyno atimõ'ẽ uhekat eipo pe hawyi waku areto ma'ato Morekuat koro uinug wuat'i tu'i­saria akag wo ahetama piat hawyi tutum uhepe tomiwan uimo­wato hap hawyi meremo ara'aipok mesuwe hawyi atiky­'esat uimiium ehepiat mowato kahato hap e so temiit 10 ok takaria pe. Mi'i hawyi wẽtup ok pe tuereto tutum nu mehit kahato rakat tekat kahato hap hawyi — Pyno areto ra'yn mesup e. Mi'i hawyi areĩne'en morekuat koro yat pe mekewat tama koro pe hawyi mi'i turan ewei'a­tu­mo­wato kahato o uhekat mesuwe e so. Mi'i hawyi iwato toimõ'ẽ i'atuepe nu mehit rakat hawyi toto tetawa pyi.
LUK 19:14 Toto ra'yn tetama pyi turan hawyi so itotiaria tu'i­saria te'e­ru­wa­'a­tunug hawyi so meremo tuwat morekuat koro kape wẽtup mu'ap upi po'og meremo tuwat at ka'ap hap ewy. Mi'i hawyi so put'ok­'i­'a­tu'e mekewat tu'isa yianmete hawyi so — Morekuat i'atu'e tut wyti aru wẽtup ok miit uruetama pyi yne mikuap takat i'atu'e. Mi'i miit tiky­'esat kahato uruetu­'isa akag wo uruetama pe wen ma'ato yt uruiky­'esat i rat meiẽwat miit uruetu­'i­saria akag wo i'atu'e so. Yt naku i eti'airo mi'i miit wuat'i tu'i­saria akag wo uruetama pe i'atu'e so.
LUK 19:15 Pyno mekewat wuat'i miit'in miky­'esat hekat rakat etama puat gupte'en haria yt tiky'e hin i mekewat tu'isa e. Ma'ato mekewat morekuat eporekuat koro rakat tiky'e kahato hawyi — Woronug na'yn en uhemiit'in sem mesuwat yi totiaria porekuat no e tope. Mi'i hawyi ta'aipok ta'yn tetama kape morekuat koro mi'airo wo wuat'i miit'in porekuat no. Mi'i hawyi so itote hawyi toi'a­tu­kaykay ra'yn tuwe­wawi temiit 10 ok takaria teropat haria aikotã i'atu­potpap hap moherep hamo aikotã tomiium sa'awyi ta'a­tu­mo­wato hap kuap hamo.
LUK 19:16 Mi'i hawyi sa'a­wyiwuat put'ok'e hawyi to'e morekuat pakup we — Sa'awyi wẽtup eiam howapy nu mehit rakat hekat kahato rakat etum uhepe e. Koitywy 10 eiam howapy nu mehit rakat hekat kahato hap ewy aterut ewawi Uika­'iwat e.
LUK 19:17 Mi'i hawyi mekewat Tu'isa Wato pakup iwepit kahato hawyi toiwesat — Waku kahato etunug uhekat wywo areto hap turan e. Uhemiit kahato en uhyt e so. Waku rakat rasig en e. Pyno ewe'eg kahato uhekat wywo pote mesup woronug en uhemiit koro wo 10 uhetawa pe e temiit wakuat pe.
LUK 19:18 Mi'i hawyi wẽtup ok teke henoi hamo — Pyno sa'a­wy'i etoiat uipo pe wẽtup eiam nu mehit rakat hekat rakat e. Koitywy 5 eiam howapy atum epe uika­'iwat e.
LUK 19:19 Mi'i hawyi morekuat to'e mekewat temiit pe — Waku pyno etunug mehĩ e. Yt uima'at hin i pote mesup atum epe 5 tawa ko'i i'atu­po­'oro epiat hamo e. Waku ereĩne'en itote i'atue­tu­'isa akag wo e morekuat pakup temiit wakuat pe.
LUK 19:20 Mi'i hawyi wẽtup i teke towat etiat enoi hamo — Heno uika­'iwat meiũ ti emiium ok tã e. Sa'a­wyiwuat emiium ewywuat atum epe e. Uhesokpe ikahu rakat pe ati'a­pykok kahato mesuwat emiium hekat rakat e. Koitywy toĩne'en ne yne mesuwat sokpe pe emiium iwato hap ok tã.
LUK 19:21 Pywo areken'ẽ epupi pote waku pe kahato atunug iheg me mekewat nu imehit kahato ko'i e. Ati'a­pykok kahato katu­pono worokuap kahato en uhyt e. Atikuap wy ewe'eg kahato hap kaipyi yt ewat i pytkai eti'a­tu­po­re­ra'at ekat ko'i e. I'ewyte yt emikoi i pytkai eho'ohep kuap irania'in ko ko'i hap atikuap e. Ta'i uruikuap kahato en aikotã ereĩne'en iwe'eg kahato epotpap nug hap ete ekat mowato hap ete e. Mi'i pote emiium atisyp yi pe hawyi mesup atum yne i ra'yn epe e.
LUK 19:22 Mi'i hawyi ika'iwat to'e tope topy­'ahak popuo — Uhemiit sa'ag kahato wo ereĩne'en pãi are e. Yt naku i kahato etunug uhekat wywo e. Uipy­'ahak hap etikuap pytkai uhekat yt eti'a­tu­mo­wato hin i e. Yt uiat i pytkai atipo­re­ra'at ere'e uhepe. I'ewyte yt uimikoi pytkai i aho'ohep ta'yn ere'e uhepe.
LUK 19:23 Pyno ereken'ẽ uipupi hawyi kat pote kahu uhekat kahato hap yt etimo­wato i en wẽtup ok potpap nug hap kai e. Kat pote yt etipuru i wẽtup ok pe uhekat mowato hamo e temiit iperup takat pe.
LUK 19:24 Mi'i hawyi morekuat pakup to'e tesu­ra­ra'in me — Eweitat ro meiũwat uhekat uhemiit yt iwe'eg i rakat po pyi hawyi ewetum no ipo piat uimiium uhemiit wakuat pe hekat po'og mowato hamo e.
LUK 19:25 Mi'i hawyi hesu­ra­ra'in te'e­ro'e morekuat pakup we — Uruka­'iwat i'atu'e iwato kahato ra'yn ipo pe toĩne'en 10 eiam howapy ra'yn toĩne'en na'yn ipo pe kat pote pyno etum mo'og tope i'atu'e.
LUK 19:26 Mi'i hawyi morekuat pakup to'e tesu­ra­ra'in me — Pywo pe ti uhekat mowato hat pe po'og po'og atum aru sa'a­wy­'iwuat kai e. Ma'ato yt iwe'eg i rakat pe uhekat mohit hat pe mio tã are — Sa'a­wy­'iwuat iwato kahato atum epe ma'ato mesup yt kat i po'og atum epe e. Mi'i hawyi mekewat kurin epo piat ewanuat tuweityk ta'yn hawyi yt kat i topy­hu'at epo pe aru e morekuat pakup temiit yt iwe'eg i rakat pe tekat tomiium yt imowato i hat pe.
LUK 19:27 Mi'i hawyi meimuẽwat sa'a­wy­'i­wuaria morekuat pakup wanĩ­kaptia — Yt uruiky­'esat i mi'i miit urupo­rekuat nuat e haria toi'a­tu­po­'oro tesu­ra­ra'in here­po'ok tewawiat hamo. Ta'a­tuerut hawyi mio tã e i'atuepe — Pyno sa'aw'i yt uiky­'esat hin i uito eipo­rekuat no e. Mi'i hawyi ehehay sa'ag kahato uhetiat hap atikuap ta'yn e. Yt naku i kahato eipe uiwa­nẽtup hawe e. Mi'i hawyi to'e tesu­ra­ra'in me — Meremo meiũpe ra'yn uhowakai te ewei'a­tu­'uka ro mi'iria e so mekewat morekuat pakup itote e Iesui tehay iã'ãkap wuo. Tuwepiat ihay tehay pun haria pe — Yt naku i Iesui Aika­'iwat no e haria pe.
LUK 19:28 Mio tã e tohenoi hawyi Iesui toto i ra'yn mu'ap upi mekewat tawa wato Ieru­sarẽi kape temiit'in sem e'yianmete toto.
LUK 19:29 Put'ok'e mekewat mikoi ypia pe mekewat Uriweira ypia ko'i e'yity'ok totiat mekewat yi yt pya i tawa hit Pewake kai tawa hit Petania kai hawyi Iesui henoi typy ok temiit'in me.
LUK 19:30 Mio tã to'e — Eweiwat ro meiẽwat tawa hit kape hawyi put'ok­'e­wei'e itote hawyi eiwe­hyt'ok tawa hit pe turan aru i'atuhũ hit Iumenta mẽpyt eweipuẽti itote e. Mi'i i'atuhũ atiky­'esat mesuwe katu­pono i'ok pe tote uhewyry teran tawa wato Ieru­sarẽi kape e. Ma'ato yt uwe i te hewyry mekewat i'atuhũ hit okpe tote are e. Pyno ewei'a­sai­typok i'atuhũ hawyi meikowo eweterut uhowawi uihũ wo e.
LUK 19:31 Itotiaria tikuap teran aru kan hamo i'atuhũ asaity eweipok e pote waku ewei'a­tu­wesat mi'iria — Ta'i Aika­'iwat Iesui tiky­'esat wyti eihũ waku ewei'e apo'e haria pe e Iesui temiit'in typy ok takaria pe.
LUK 19:32 Tuwat ra'yn meimuẽwat tawa hit kape hawyi Iesui to'e hap ewywuat kahato ta'a­tu­puẽti put'ok­ta­'a­tu'e itote hawyi.
LUK 19:33 I'atuhũ ta'a­tu­'a­sai­typok turan put'ok­'i­'a­tu'e mekewat hũ ka'i­waria hawyi — Kan hamoĩ uruhũ ewei'a­sai­typok hamuat apota­'a­tu'e.
LUK 19:34 Mi'i hawyi Iesui emiit'in i'atu­wesat — Aika­'iwat Iesui tiky­'esat kahato ti eihũ i'atu'e Iesui mipo­'o­roria.
LUK 19:35 Mi'i hawyi — Pyno waku eweitioto ro i'atu'e. Mi'i hawyi ta'a­tu­'e­roto Iumentu hit Iesui kape. Puk'ok­'i­'a­tu'e Iesui kape hawyi ta'a­tu­po­rokpun na'yn ta'a­tue­sokpe ko'i mekewat hũ okpe tote hawyi ta'a­tu­mo­'apyk ta'yn Iesui ihũ hit okpe tote.
LUK 19:36 Mi'i hawyi mu'ap upiaria tipo­rokpun ta'a­tue­sokpe mu'ap tote Iesui to hap owakai ipu'ap ikahu rakat nug hamo morekuat ewywuat mu'ap nug hamo imõtypot haype ta'a­tunug.
LUK 19:37 Mi'i hawyi Iesui ipot'apyk mekewat yity'ok Uriweira ypia piat kaipyi tawa wato Ieru­sarẽi kape hawyi toto mekewat mu'ap miit'in minug upi toto tohũ hit tote apyk pe ipot'apyk.
LUK 19:38 Yt pya hin i tawa wato Ieru­sarẽi kai turan typy'i rakaria hupiaria sem — Waku kahato En Tupana i'atu'e. Waku kahato Emi'airo Urupo­rekuat nuat i'atu'e ta'a­tuehay pirik wo. Meiũwat Miit timo­herep kahato Tupana esaika hap yt uwe mesu­wa­rotiat minug ewy i tutunug uruehamo i'atu'e kahato itote. En Tupana Mipo­'oro sese i'atu'e katu­pono uruta­'a­kasa ra'yn eminug ko'i Emipo­'oro mimo­herep ko'i i'atu'e i'atu­wepit kahato haype. Mi'i pote urutu­wehum kahato ewawi Tupana i'atu'e.
LUK 19:39 Mi'i ta'a­tunug kahato itote hawyi wo'o­mu'e haria itotiaria te'e­ro'e Iesui pe — Wo'o­mu'e hat i'atu'e eti'a­tu­mo­po­'inik to epotmu­'eria i'atu'e.
LUK 19:40 Mi'i hawyi Iesui ti'a­tu­wesat — Pyno mi'iria i'atu­po­'inik uimõ­typot hap ete pote meremo aru mesuwat nu ko'i mu'ap upiat te'e­ru­wẽ­powat uimõ­typot hap — Tut ri tut ri Tupana Mipo­'oro Wuat'i Ywania Ehakye­ra'at Hanuat i'atu'e aru nu ko'i are e Iesui tewa­nĩ­kaptia pe.
LUK 19:41 Mi'i hawyi porap put'ok'e Ieru­sarẽi me hawyi Iesui teha'at tawa wato kape hawyi tuwak popuo to'e — Ieru­sarẽi miaria Ieru­sarẽi miaria ariot ra'yn ma'ato yt uikuap i eiperia e.
LUK 19:42 Mesup ta'yn aterut teran ehowawi wuat'i e'at piat eimo­wepit hap wen ma'ato yt heremo i pote yt eweikat i uimierut e tuwak popuo. Ta'i Tupana uipo­'oro eheha­kye­ra'at hamo hawyi eiwo­'o­wese hap wywo eweikup­te'en e ma'ato yt eweiky­'esat i pote mi'i hawyi uimienoi eiwo­'o­wese hap etiat yt heremo i ra'yn toĩne'en e. Mig'i wo ra'yn toĩne'en yt eweiky­'esat i hawyi e.
LUK 19:43 Uimohey hap pun haria eipe pote ti aru ehewa­nĩ­kaptia esura­ra'in sem tõ'ẽ tõ'ẽ kahato irane eimoma hamo are e. Put'ok­ta­'a­tu'e ehetawa wato ete hawyi yne mu'ap ta'a­tu­pyhyp ehetawa kapiat e. Mi'i hawyi eimi'u yt kat i toĩne'en aru e. Mi'i hawyi yt eiwe­nõ'ẽ kuap i ehetawa pyi.
LUK 19:44 — Mi'i hawyi ehetawa wato pe tuwe­hyt'ok kahato ehewa­nĩ­kaptia sura­ra'in sem wẽtup ywania eiwu­'uka hamuat eimoma yne hamuat aru e. Ta'a­tu­'a­tu­'uka torania ehetawa piaria mekewat e'at pe aru e. I'ewyte ehetawa piaria topap topap yne e. Ei'yat ko'i ta'a­tu­puruk yne wyti aru e. Yt wẽtup i nu ehetawa piat tukup­te'en aru ei'yat nug hap katu­pono itote ta'a­tu­pugha yi kape yne ei'yat ko'i e. Hewo hewo yne nu wato ko'i yi kape aru are e. Pywo ti rat eimoma hap yn topy­hu'at aru e. Tupana mi'a­piheg ko'i eweipy­hu'at aru kat pote Tupana Mipo­'oro Eheha­kye­ra'at hanuat mohey hap pun haria eipe pote e Iesui tuwak popuo ma'ato eipe ti yt eweikuap i Tupana heĩne'en eipy­'a­setpiat hap e tuwak popuo tetawa Ieru­sarẽi piaria pe.
LUK 19:45 Mi'i hawyi Iesui teke ra'yn tawa Ieru­sarẽi me hawyi Tupana mõtypot yat koro pe teke hawyi toi'a­tu­sopo kahato kare'en weneru wene­ru'i haria itote.
LUK 19:46 Mi'i hawyi to'e wuat'i weneru haria pe — Wãi nei'o e yt ewetunug ne Tupana mõtypot yat kat weneru kat weneru hap netap e. Sa'a­wy'i mio tã e Tupana tehay moherep haria miwan me — Ui'yat yi tote atiky­'esat wuat'i ywania uhowawiat uiwywuat i'atuehay hamuat hap atiky­'esat ui'yat e Tupana sa'a­wy'i Isaia miwan 56.7 pe. Ma'ato eipe ti sero­'ok'e haria yat no ewetunug na'yn e Iesui wuat'i kat weneru haria pe.
LUK 19:47 Mi'i hawyi mekewat e'at ko'i turan wuat'i e'at pe turan Iesui ti'a­tu­mu'e miit'in Tupana mõtypot yat koro piaria. Ma'ato pa'i akagnia miwan enoi haria i'ewyte tawa piaria akagnia i'auka teran kahato haype itote.
LUK 19:48 Mi'i hawyi hewa­nĩ­kaptia ti'a­tukat kahato aikotã waku Iesui auka hap ma'ato yne itotiaria i'atupap kahato Iesui ehay upi pote yt ta'a­tu­puẽti i mu'ap i'auka hamuat.
LUK 20:1 Wẽtup e'at pe Iesui toĩne'en Tupana mõtypot yat pe turan toi'a­tu­mu'e kahato itotiaria tehay wakuat Tupana etiat. Mi'i turan put'ok­'i­'a­tu'e howawi pa'i akag ko'i miwan ehay enoi haria wywo i'ewyte nagnia akag ko'i wywo.
LUK 20:2 Mi'i hawyi apo'i­'a­tu'e Iesui pe — kat pote ti rat eti'a­tu­sytpok miit'in ga'atpo Tupana mõtypot yat pyi i'atu'e. Yt naku i mi'i tã etunug yt uruehay upi i i'atu'e. Pyno uwe kahu epo'oro hat mi'i tã nug hamuat i'atu'e sio more­kuaria sio ewepyi mi'i sa'ag hap etunug i'atu'e.
LUK 20:3 Mi'i hawyi Iesui ti'a­tu­wesat — Pyno ahenoi aru ehepe uwe uipo­'oro Tupana mõtypot yat apykok hamo ma'ato sa'a­wy'i atiky­'esat uiwesat hap ehepiat e.
LUK 20:4 Pyno uiwesat ro — Uwe sese ahet'ok hat Iuwãu po'oro hat apo toĩne'en sio Tupana tipo­'oro Iuwãu sio miit'in tipo­'oro ahet'ok hap nug hamo apo'are e. Uiwesat ro mi'i hawyi woro­ho­'o­wesat wy uwe uipo­'oro Tupana mõtypot yat hywytip hamo e tewa­nĩ­kaptia pe.
LUK 20:5 Mi'i hawyi te'e­ro'e to'ope — Aikotã som waku wati­wesat Iesui katu­pono i'atu kahato mesuwe ahet'ok hat Iuwãu mõtypot kahato rakaria i'atu'e to'ope. Pyno — Tupana ipo'oro hat wato'e pote apo'e irane ahepe Iesui — Kat poteĩ pyno yt eweimohey i te urumi­mohey Iuwãu to'e aru ahepe i'atu'e to'ope.
LUK 20:6 Ma'ato — Tuwepyi tuwe­po­'oro Iuwãu wato'e mesuwe pote mesuwat irania'in sem Iuwãu ky'e haria meremo ai'auka wyti aru ta'a­tu­py­'ahak popuo i'atu'e. Katu­pono mi'iria — Tupana ehay moherep hat koro Iuwãu i'atu'e katu­pono ta'a­tu­mohey kahato te imienoi i'atu'e to'ope.
LUK 20:7 Mio tã i'atu'e to'ope hawyi ta'a­tu­wesat ra'yn Iesui apo'e hap — Yt uruikuap i kahato te uwe sese Iuwãu po'oro hat i'atu'e. Uwe ehay pyi Iuwãu tut miit'in set'ok hamo hap yt uruikuap kahato i te i'atu'e.
LUK 20:8 Mi'i hawyi Iesui ti'a­tu­wesat — Are pãi kat pote yt uiwesat i e. Pyno yt uiwesat i pote uito eipe ewywuat yt woro­ho­'o­wesat i rat uwe hay upi ati'a­tu­sytpok mesu­wepyi Tupana mõtypot yat piat yt naku i nug haria e Iesui pa'i kororia pe miwan ehay moherep haria pe nagnia akagnia pe. Mi'i hawyi yt kat i to'e i'atuepe Tupana Mipo­'oro Iesui.
LUK 20:9 Mi'i hawyi hã'ãkap wuo Iesui henoi Tupana mõtypot yat koro piaria pe tewa­nĩ­kaptia pe — Wẽtup e'at pe so wẽtup yi wato ka'iwat warana koi hat ti'a­tukoi kahato tewa­rana ypia koro yi wato hap ok tã toikoi. Waku ra'yn hawyi so toipuru tewa­rana ypia to'y­wania pe hawyi to'e — Waku eti'a­tu­'a­pykok uhe'yi e hawyi eweium no uhepe sa'up wuat'i ewaty pe warana eweiwe­neru hawyi e warana ypia ka'iwat hawyi toto ra'yn pya wẽtup tama kape hawyi toĩne'en mot'i itote e.
LUK 20:10 Meiũran mekewat warana ypia haat ra'yn hawyi mekewat warana ypia ka'iwat tipo­'oro temiit pya pyi mekewat warana ypia apykok haria pe towanuat warana sat hamo ho'ohep hap kaipyi. Ma'ato hemiit'in warana ypia apykok haria yt i'atu­wese hin i hawyi yt ho'oium i haype hawyi imipo­'o­roria pe ta'a­tuehay sa'ag hawyi ta'a­tu­pokpok hawyi ta'a­tu­po­'oro i ra'yn yt kat i hin i i'atupo pe wywo e.
LUK 20:11 Mi'i hawyi warana ypia ka'iwat wẽtup ok i ra'yn toipo­'oro ra'yn towa­rana ypia piat ipotpap takaria kape warana ko'i towanuat sa'up sat hamo i'atu­mi­po­'ok­su'at hamo ma'ato i'ewyte yt kat i ta'a­tu­ha­'upium tope ma'ato yt i'atu­wese hin i imipo­'oro ete hawyi ta'a­tu­pokpok imipo­'o­roria sa'a­wy­'i­wuaria ewy hawyi ta'a­tu­po­re­ra­'aipok yt kat i wywo i e.
LUK 20:12 Mi'i hawyi wẽtup ok temiit warana ypia ka'iwat tipo­'oro i ra'yn ma'ato mi'i miit mi'i hare ta'a­tu­'ahyk ahyk hawyi ta'a­tupun na'yn warana ypia pyi e.
LUK 20:13 Mi'i hawyi warana ypia ka'iwat tuwa­nẽtup — Aikotã waku atunug uimi­po­'o­roria pun haria ete e tuwepe hawyi to'e tuwepe — Pyno atikuap ta'yn aikotã waku atunug e tuwepe ta'i Uha'yru sese uimi­ky'e kahato atipo­'oro hawyi ti aru ta'a­tu­mõ­typot mi'i miit uimi­po­'oro katu­pono Uha'yru sese mi'i uimi­po­'oro pote e tuwa­nẽtup hawe.
LUK 20:14 Mi'i hawyi toipo­'oro ra'yn wen ma'ato tewa­rana ypia apykok haria te'e­ra­'a­kasa hawyi te'e­ro'e to'ope — To'iro waku wati­'auka mesuwat yi warana ypia koro ka'iwat sa'yru i'atu'e to'ope. Ta'i pãi wati­'auka ha'yru hawyi ti aru ha'yru ywot iku'uro hawyi yt kat i ipowat'yp hawyi mesuwat yi yne aiwanuat tukup­te'en hawyi hekat rakaria wo watoĩ­ne'en i'atu'e sa'ag. Pyno to'iro warana ypia koro ka'iwat pakup auka hamo hawyi iku'uro hawyi yne i'ywot ekat sem topy­hu'at aipo pe ra'yn i'atu'e te'e­ro'e to'ope.
LUK 20:15 Mi'i hawyi ta'a­tusat ha'yru hawyi ta'a­tu­pugha sa'ag ipiit i'ywot mikoi ypia pyi hawyi itote ta'a­tu­'auka sa'ag ne'i ha'yru e Iesui hã'ãkap wuo tuwepiat ihay tewa­nĩ­kaptia pe. Mi'i hawyi Iesui apo'e i'atuepe — Uiwesat ro kat pyno aru kat pyno aru ha'yru ywot tunug aru tomikoi ypia apykok haria sa'ag ete e.
LUK 20:16 Mi'i hawyi yt iwesat i. Mi'i pote Iesui to'e to'auka teran haria pe — Pyno ahenoi ehepe kat som tutunug mekewat Morekuat akag tosa­'yru auka haria ete e ta'i meremo tut tesu­ra­ra'in sem wywo hawyi toi'a­tu­'uka kahato Tosa­'yru auka haria hawyi tutum aru tewa­rana ypia e'yi wato wẽtup ywania po pe ra'yn hawyi toipag te'yi wato tomikoi warana ypia koro wẽtup ywania po pe i'apykok hamo e Iesui to'y­wania pe tehay pun haria pe. Mi'i hawyi itotiaria tikuap Iesui ehay iã'ãkap hawyi — Yt naku i kahato ehay ai'y­wania ete Uhyt i'atu'e Iesui pe.
LUK 20:17 Mi'i hawyi Iesui teha'at tewa­nĩ­kaptia ewawi hawyi to'e — Pyno topy­hu'at aru ui'e hap ewy aikotã Tupana to'e sa'a­wy'i tehay miwan miat puo ewy e. Mio tã to'e — Waku ewetunug uimõ­typot yat Mesuwat Nu ikahu rakat iheg nakat kawiat e Tupana tomi­'ai­roria pe to'yat nug haria pe wen ma'ato — Yt naku i kahato Mi'i Nu Tupana Mi'airo i'atu'e hawyi inug haria yt tiky­'esat i ma'ato — Mi'i Nu po'og hesaika tora­nia'in kai po'og ikahu uimõ­typot yat nug hamo e Tupana tomiwan me e Iesui tuwepiat. ma'ato mi'i pytkai eweipugha Tupana Mi'airo e Iesui tomohey hap pun haria pe.
LUK 20:18 Uwe uwe yt tiky­'esat i Mekewat Nu Tupana Mõtypot Yat Nug Hamuat mi'i miit ri yt iwe'eg hin i topy­hu'at e katu­pono mi'i hawyi Mekewat Nu Wato toipun turan to'akit hap tokag pik hap topy­hu'at e miwan me e. I'ewyte uwe uwe tipun Mekewat Nu hawyi ta'aipok tuwe­wawi hawyi mekewat miit Mekewat Nu miku'i wo topy­hu'at e. Ta'i e Mekewat Nu Koro tote eiwe­ta'at hawyi eipiit pok'e itote hawyi Mekewat Nu Koro mimo­ku'i wo eweikup­te'en aru wuat'i e'at pe e Iesui to'auka kat haria pe tuwepiat tehay iã'ãkap hawuo.
LUK 20:19 Mio tã to'e hawyi pa'i akag ko'i i'ewyte nagnia ehay enoi haria te'e­ro'e to'ope — Yt naku i Iesui ehay ahete i'atu'e to'ope. Pywo pe ti ahetiat tohenoi mekewat hã'ãkap wuo i'atu'e. Mi'i pote ta'a­tu­pytyk teran Iesui i'auka hamo ma'ato miit'in pupi te'e­ro­ken'ẽ i. Katu­pono irania'in Iesui mimu­'eria — Waku kahato aimu'e Iesui i'atu'e to'ope mi'i tupono yt ta'a­tu­pytyk kuap i. Watat Iesui hawyi ipotmu­'eria ai'auka rakaria wo tukup­te'en i'atu'e to'ope.
LUK 20:20 Ta'a­tukat kahato Iesui pytyk hamo wãtym muat hap yt heremo i hawuo. Ta'a­tu­ha'up nug ihainia'in me yt nakuaria i pe Iesui ma'at haria ta'a­tuehay wo. Mi'iria wakuaria ewywuaria tõ'ẽ ta'a­tuehay wuat Iesui ma'at hamo. I'atu­po­'oro haria ta'a­tupag neran Iesui ta'a­tu­po­rekuat nuat po pe i'auka hamo. Iesui ihay sa'ag hap morekuat ete hap ta'a­tukat hawyi.
LUK 20:21 Put'ok­'i­'a­tu'e hawyi ta'a­tu­ma'at reran ta'a­tuehay wo — Wo'o­mu'e hat koro i'atu'e hãpyk kahato emienoi miit'in me uruwa­nẽtup hawe i'atu'e. Uruikuap aikotã Tupana miky­'esat yn ewy etunug miit'in me i'atu'e. I'ewyte pywo pe yn uruwesat hap uruikuap i'atu'e. Ta'i yt ereken'ẽ hin i rasig miit'in pupi Tupana ehay etimo­herep wuat'i miit'in me turan i'atu'e Iesui pe. Ta'i uruikuap aikotã waku kahato ereĩne'en wuat'i miit'in ky'e hap ete sio more­kuaria sio aheropat haria i'atu'e. Uruikuap aikotã miit emiit powyro hano ereĩne'en i'ewyte miit akag ko'i powyro hano ereĩne'en wy i'atu'e Iesui pe.
LUK 20:22 Pyno ehenoi uruepe sio waku watum sa'up aipo­rekuat uruewa­nĩ­kaptia pe mekewat wẽtup ywania Humanu ywania porekuat wato Sesa e hap het rakat pe sio yt i'atu'e. Waku watum morekuat Sesa pe imiẽtup ewy sio yt apo'i­'a­tu'e Iesui pe ima'at hamo.
LUK 20:23 Mi'i hawyi meremo Iesui toma'at hap toikuap tuwepe hawyi to'e i'atuepe.
LUK 20:24 — Eweterut ro uhowawi mekewat sa'up wẽtup e'at piat aipotpap sa'up mekewat wẽtup imehit rakat kawiat e. Mi'i hawyi ta'atuium i'ape rakat Iesui pe hawyi apo'e i'atuepe — Pyno uwe miit akag iã'ãkap mesuwe miwan me uwe set toĩne'en meiũ sa'up i'ape tote e. Mi'i pote — Ta'i mekewat morekuat koro Sesa e hap iã'ãkap mekewat Sesa set itote toĩne'en miwan me i'atu'e ta'a­tu­wesat.
LUK 20:25 Pyno morekuat wato Sesa set toĩne'en itote pote Sesa wanuat toĩne'en are e. Mi'i pote morekuat Sesa wanuat tohẽtup i'ape ko'i pote ewetum no tope morekuat Sesa sa'up are e. I'ewyte Tupana miẽtup hap ok tã sa'up ewywuat ewetum no Tupana wanuat Tupana pe are e Iesui toma'at reran e haria pe apo'e haria pe.
LUK 20:26 Mi'i hawyi te'e­ru­we­mõti kahato Iesui pupi yt ta'a­tu­ma'at kuap i haype katu­pono Iesui po'og po'og iwe'eg nakat toma'at reran haria kai pote. Mi'i hawyi i'atu­pohep ta'yn miit'in sem ehamo Iesui apo'i­'a­tu'e hap. Mi'i hawyi yt kat i'atu'e kuap i itote miit'in ehamo ma'ato te'e­ru­wa­nẽtup kahato Iesui piat ta'a­tu­wesat hap kape.
LUK 20:27 Mi'i hawyi tõ'ẽ Iesui ewawi Tupana ehay miwan miat miit'in mu'e haria akag ko'i Satu­seuria e hap ko'i. Mi'iria ti — Aiku­'uro hawyi yt kat i ra'yn aheĩne'en pakup i hap e haria.
LUK 20:28 Tõ'ẽ hawyi apo'i­'a­tu'e Iesui pe — Wo'o­mu'e hat ahe'a­se'i Musei miwan me mio tã to'e ahepe — Eyke'et iku'uro hawyi ma'ato yt kat i te mẽpyt rakat pote waku iyke'et i hehiwu he'aito wo toĩne'en iywyt sa'yru nug hamo haki'yt nug hamo iku'uro yt kat i haipe­piaria pote e ti aha'a­se'i Musei tomiwan me i'atu'e.
LUK 20:29 — Pyno sa'a­wy'i so tukup­te'en so 6 ywyt'in ta'a­tuy­ke'et etawa pe. I'atuy­ke'et toĩne'en teha­ry'i wywo hawyi iku'uro yt kat hin i ha'yru haki'yt te turan iku'uro so.
LUK 20:30 Mi'i hawyi so iywyt po'og wuat yian nakat wywo ra'yn hehiwu ma'ato iywyt iku'uro wy yt kat i imẽpyt i te turan.
LUK 20:31 Mi'i hawyi so wẽtup ok iywyt wywo ra'yn hehiwu toĩne'en ma'ato i'ewyte yt imẽpyt i te turan iku'uro so. Mio tã hap ewy 6 ok takaria iywyt'in hehiwu wywo toĩne'en tuereto hawyi yne so topap hawyi ta'a­tue­hiwu yt kat i imẽpyt rakano te so.
LUK 20:32 Mi'i hawyi so i'ewyte i'atue­hiwu iku'uro i'atu'e yt imẽpyt i te turan iku'uro so i'atu'e Iesui pe.
LUK 20:33 Pyno uruikuap teran karãpeĩ tukup­te'en yne miit'in gu'uro pyi hawyi apuru uwe wary wo aru mekewat hiwu i'atu'e katu­pono 7 ok he'aito apo'i­'a­tu'e Iesui pe.
LUK 20:34 Mi'i hawyi Iesui ti'a­tu­wesat — Pywo pe ti mesu­wa­ro­tiaria wo'o­kyi'at hap ta'a­tunug ihainia'in hary­po­ria'in aikotã aikotã aheko ewy wen ma'ato atipy pe yt mi'i tã hin i e.
LUK 20:35 Ta'i miit'in tuwẽtem gu'uro pyi hawyi atipy piaria ewywuaria tukup­te'en wuat'i e'at pe yt kat i wo'o­kyi'at hap itote yt ta'a­tunug i wo'o­kyi'at hap itote are e.
LUK 20:36 Katu­pono atipy piaria ewywuaria wo te'e­ro­py­hu'at mi'iria tuwe­nõ'ẽ gu'uro pyi hawyi yt i'atu­ku­'uro i wuat'i e'at pe tukup­te'en Tupana mẽpyt'in sese wo are e.
LUK 20:37 I'ewyte aha'a­se'i Musei miwan kaipyi wati­mu'e hawyi watikuap aheĩne'en pakup i hap watu­wẽtem gu'uro pyi hap watikuap katu­pono mio tã to'e Musei tomiwan me — Ta'i mekewat aria'yp wuk'e hap kaipyi Tupana to'e uhepe — Uito ti ewat e'ase'i Aparãu eTupana e. Uito ti e'ase'i Isaki eTupana e uhepe. I'ewyte Uito ti ewat e'ase'i Iako eTupana e uhepe aria'yp wuk'e hap kaipyi e Musei tomiwan me mekewat e'at ihay Tupana wywo hap e'at pe turan e.
LUK 20:38 Mi'i tupono aha'a­se'i Musei miwan kaipyi watikuap aha'a­se'i Aparãu Isaki Ioko toĩne'en ne ta'a­tu­ku­'uro pytkai katu­pono Ahetu­pana ieĩne'en haria eTupana wo toĩne'en are. Yt naku i map haria eTupana Ahetu­pana toĩne'en wato'e e. Ta'i ieĩne'en haria eTupana katu­pono Musei mio tã e — Tupana ti gupte'en haria aha'a­se'i Aparãu Isaki Ioko eTupana toĩne'en Aparãu Isaki Ioko iku'uro rakaria tukup­te'en pytkai Musei toĩne'en mesuwat yi tote turan pytkai mio tã e.
LUK 20:39 Mi'i hawyi wẽtup ok miwan ehay enoi hat itote to'e Iesui pe — Wo'o­mu'e hat waku kahato uruwesat hap e.
LUK 20:40 Mi'i hawyi yt apo'i­'a­tu'e kuap i po'og na'yn Iesui pe miwan kuap kahato rakaria. Mi'i hawyi i'atu­ponik ta'yn — Are pãi i'atu'e ta'a­tu­wa­nẽtup hawe iwesat kuap kahato Iesui pote yt wati­'a­parap kuap i Mi'i ahehay wo i'atu'e. Ta'i Mi'i Miit po'og iwe'eg aikai i'atu'e Iesui piat ta'a­tu­wa­nẽtup hawe.
LUK 20:41 Mi'i hawyi Iesui to'e i Musei miwan kuap kahato rakaria pe yt apoto'e hap wesat kuap i rakaria pe — Wo'o­mu'e haria e kat pote ri rat ewei'e eimu'e haria pe — Tupana Mipo­'oro Aipo­rekuat nuat ri morekuat Tawi emiariru emiariru kaipywiat tuwe­mo­herep ewei'e ahepe e.
LUK 20:42 Katu­pono sa'a­wy'i sese aha'a­se'i pot morekuat Tawi to'e tomiwan me towepy hawe — Uipo­typot koro Tupana to'e Uipo­typot koro Tupana pe — Era'apyk o Uimi­mõ­typot no mesuwe uipo sese kai e.
LUK 20:43 Waku ereĩne'en mesuwe uikai hawyi ti aru atunug ewanĩ­kaptia yne epy ywyt'ok­pype e TUPANA UIKA'IWAT pe e aha'a­se'i morekuat Tawi towepy hawe e.
LUK 20:44 Pyno Tupana Mipo­'oro Aika­'iwat nuat toĩne'en pãi Tawi KA'IWAT KORO wo e. Kat pote pyno ewei'e — Morekuat Tawi emiariru emiariru topy­hu'at aru Tupana Mipo­'oro Aika­'iwat Koro wo yt Tawi e hap ewywuat e Iesui tuwepiat e yt tomohey i haria pe Iesui morekuat Tawi ka'iwat pote mio tã.
LUK 20:45 Mi'i hawyi itotiaria te'e­ru­wa­nẽtup kahato Iesui e hap kape turan Iesui to'e temiit'in me.
LUK 20:46 Uheka­tu­wyria e eiwe'eg wo o miit'in ehamo miit'in mikuap mo watunug waku aiwe­mõ­typot hamo aiwe­mo­wato hamo yt Tupana mõtypot hap ky'esat hap wywo are e. Katu­pono yt naku i wato­py­hu'at typy ehay moherep haria ewy are e. Mi'iria ti — Waku po'og uruto irania'in kai i'atu'e ta'a­tu­wa­nẽtup hawe e. — Waku po'og uruto eimu'e haria akag wo ewei'e uruepe i'atu'e ahepe. Mi'iria ta'a­tu­mõ­typot hap miit'in miat yn ta'a­tu­ky­'esat ta'a­tu­minug waku hap kaipyi miit'in ehamo miit'in mikuap mo. Yne waku hap ta'a­tunug wen ma'ato Tupana mõtypot hap kape yt te'e­ru­we­wa­nẽtup hin i e. More­kuaria wywo yn te'e­ra­'apyk teran haype Tupana mõtypot yat hawe ienuk hap iwato rakat hap tote — Eiwe­ha'at ro uruewawi e hap yn toĩne'en i'atu­py'a pe. Yt naku i mi'iria ewywuat watoĩ­ne'en e Iesui temiit'in me ahepe.
LUK 20:47 Mi'iria i'atu­wẽpap se kahato Tupana kape ma'ato yt pywo pe i e. I'atuehay i'ywop kahato ta'a­tunug Tupana kape miit'in ehamo miit'in mikuap mo — Uruto Tupana kuap kahato haria e hamo irania'in me ma'ato yt Tupana kape hin i i'atuehay are e. Yt eweimohey tei'o mi'iria katu­pono yt pywo pe i i'atuehay se ma'ato ahekat ky'ewi Tupana mohey haria tukup­te'en are e. Ta'i i'atuehay at Tupana kape miit'in ehamo miit'in mikuap mo. I'ywop kahato ta'a­tunug ta'a­tuehay Tupana kape wuat'i miit'in ehamo ma'ato yt pywo pe i e. Eiwe'eg wo o pyno mekewat typy sehay nug haria pupi are e Iesui ahepe.
LUK 21:1 Mi'i hawyi Iesui teha'at miit'in kape i'atumiium Tupana kapiat hap kape teha'at kahato hawyi ta'a­kasa ra'yn hekat rakaria miium hap kape. Iwato kahato ta'a­tupag heiam me Tupana mõtypot hamo.
LUK 21:2 I'ewyte ta'a­kasa wẽtup ok hiwu yt hekat rakat i itote hap kape ta'a­kasa. Mi'i hawyi hiwu tum na'yn tomiium kurin sese hap ewy tutum katu­pono typy kurin kat ape yn totopag mekewat yparakai tote Tupana kapiat imiium heiam ika'a pe totopag hap kape ta'a­kasa Iesui.
LUK 21:3 Mi'i hiwu kape teha'at hawyi Iesui to'e temit'in me — Eiwe­ha'at ro mekewat hiwu kape mekewat yt hekat i kahato rakat kape katu­pono mekewat hiwu tum iwato kahato Tupana pe e. Po'og po'og tutum Tupana pe irania'in hekat rakaria miium hap kai are pãi e.
LUK 21:4 Katu­pono irania'in hekat rakaria ta'a­tue­ka­re'en sem kaipyi heĩpyt hit yn ta'atuium Tupana pe ma'ato mekewat hiwu tum na'yn Tupana pe tomi'u yne sa'up are tutum na'yn yne tomoieĩ­ne'en sese hamuat sa'up Tupana pe mesup e. Mi'i pote are'e ehepe mekewat hiwu miium po'og Tupana mowepit hap topy­hu'at torania hekat rakaria miium kai katu­pono tutum yne yne tope pote are e Iesui topot­mu­'eria pe ahepe.
LUK 21:5 Mi'i hawyi Iesui potmu­'eria te'e­ra­ha'at kahato Tupana mõtypot yat ikahu kahato hap etiat hawyi te'e­ro'e to'ope — Pãi i'atu'e ikahu kahato mesuwat Tupana mõtypot yat i'atu'e to'ope. Iwato kahato tig mesu­wa­rotiat nu koro ko'i Tupana mõtypot yat i'atu­minug i'atu'e. Waku kahato mesuwe i'atu'e. Eiwe­ha'at ro mekewat miit'in miium ko'i Tupana kapiat hap kape i'atu'e to'ope. Ta'i ta'a­tu­mo­kahu kahato Tupana mõtypot hap yat mesuwe i'atu'e to'ope.
LUK 21:6 Mio tã i'atu'e hawyi Iesui to'e i'atuepe — Uhemiit'in e eiwe­ha'at ro meiũwat nu koro ko'i kape e. Ta'i mesu­wa­rotiat nu koro ko'i ikahu kahato pytkai iwato kahato pytkai hewo hewo wyti aru hawyi yt kat i aru wẽtup nu koro topy­hu'at mekewat e'at pe to'o­tote tote rakat are e.
LUK 21:7 Mi'i hawyi heka­tu­wyria apo'i­'a­tu'e Iesui pe — Urumu'e hat i'atu'e karãpe aru pãi mesuwat nu koro ko'i hewo hewo hap topy­hu'at i'atu'e. Aikotã aru pyno uruikuap mekewat e'at put'ok'e hap i'atu'e Iesui pe.
LUK 21:8 Mi'i hawyi Iesui ti'a­tu­wesat topot­po­'o­roria pe — Eiwe'eg wo o are katu­pono wyti aru uhet wywo uhet ero'ok haria put'ok­'i­'a­tu'e ehepe eima'at hamo are. — Uito Iesui ti rat i'atu'e wyti aru. Uito ti ariot ra'yn eipo­rekuat koro wuat i'atu'e aru. Tupana mipo­'oro uito wuat'i miit'in porekuat nuat i'atu'e aru õ'ẽ haria. — Ara'aipok ta'yn mana'in uhyt'i'in i'atu'e aru ehepe wen ma'ato yt eweiwa­nẽtup tei'o i'atueso rakaria kape are katu­pono eima'at hamo tõ'ẽ are. Yt pywo piat rakaria i mi'iria pote e. Ehekat ky'ewi eipiit ky'ewi tõ'ẽ aru — Uito Tupana mipo­'oro sese e haria e Iesui ahepe.
LUK 21:9 — Ta'i mekewat e'at pe wyti aru wu'uka hap ko'i kahato eweikuap yne mesu­wa­rotiat wu'uka hap etiat eweikuap aru e. Mi'i hawyi yt kat hin i wo'o­wese hap mesu­wa­rote hap ewywuat eweipuẽti aru are e. Yt ikahu hin i hap ewy miit'in to'o­'a­tu­'uka atu'uka kahato wyti aru hap kape eiwa­'a­kasa pytkai yt eweiken'ẽ mi'i pupi katu­pono po'og po'og sa'ag mi'i e'at kai turan put'ok'e mekewat ho'opot ho'opot hap e'at koro are e.
LUK 21:10 Mi'i hawyi wo'o­'a­tu­'uka atu'uka sakpo hap e'at wyti aru put'ok'e are e. Mi'i hawyi more­kuaria koro ko'i to'o­moma teran aru hawyi to'o­'a­tu­'uka atu'uka irania'in ywania epore­kuaria ko'i wywo e.
LUK 21:11 — I'ewyte wyti aru mekewat e'at yt naku i hap koro owakai mesuwat yi aipytyp huruk huruk'e kahato tyry'e tyry'e hap ewy hawyi yt kat hin i miit'in mi'u mesuwat yi tote toĩne'en are e. Mi'i hawyi wuat'i etama piaria hesy'at kahato rakaria wo tukup­te'en e. Mi'i hawyi miit'in saty'i saty'i hap yt ikahu hin i hap ewy te'e­ru­we­mo­herep aru mesu­wa­rote e Iesui. Ta'i yt naku i hap yn wyti aru miit'in ete ta'a­tu­puẽti are e. I'ewyte atipy wyti aru yt aimikuap ewy hin i topy­hu'at aru katu­pono ipoity kahato ui'e hap ewywuat hap kape ewei'a­kasa aru e. Ta'i atipy kaipyi ywaiti pyi hewo hewo kahato miit'in ete yt naku i hap ewywuat yt karãpe i ewei'a­kasa hap ewywuat e. Mi'i hap ko'i kape eiwe­ha'at turan waku eiwa­tetup mesuwat uimienoi kape e.
LUK 21:12 Ma'ato mekewat e'at pe wyti aru mesu­wa­ro­tiaria yt uimohey haria eipytyk kahato wyti aru ehaty'i haty'i hamo are e Iesui. Ta'i Tupana mõtypot hap yat kape eheroto eipe hawyi — Yt nakuaria i kahato mi'iria i'atu'e ehepiat uipot­po­'o­roria eipe pote are e. Mi'i hawyi wyti aru ta'a­tu­pyhik kahato eipe are e. Morekuat koro ko'i tu'i­saria ei'auka teran haria tukup­te'en uhemiit eipe pote are e.
LUK 21:13 — Ma'ato eheroto haria pe i'ewyte more­kuaria pe waku ehenoi uhehay wakuat i'atuepe eweikup­te'en i'atu­py­'a­setpe turan mekewat e'at. Ereĩne'en sura­ra'in po pe pytkai waku ewehenoi ewanĩ­kaptia pe sehay wakuat uhetiat e.
LUK 21:14 — Yt eweiwa­nẽtup tei'o sa'a­wy'i — Kat som waku aru are'e ui'auka teran haria pe i'atu­wesat hap ete are e.
LUK 21:15 Katu­pono mekewat e'at sa'ag me aru uito ti aru areĩne'en eiwywo kahato hawyi atopag eiwẽ pe uhehay i'atu­wesat hamuat are e. Ta'i aikotã waku kahato hap ahenoi ehepe e. Mi'i hawyi ehewa­nĩ­kaptia yt ta'a­tu­mohit kuap i ei'e hap hawyi paa'i­'a­tu'e uhehay wakuat eiwẽ pywiat pupi are e.
LUK 21:16 Pywo ti rat meiũran aru ei'y­wot'in eity'in yt uimohey i haria yt i'atu­wese hin i ehete uhehay upiaria eipe pote i'ewyte eheka­tu­wyria sese wyti aru eima'at hanuaria te'e­ro­py­hu'at uiky'e haria sese eipe pote are e. Mi'i hap e'at pe eika­tu­wyria sese ti'a­tu­kaykay sura­ra'in sem ei'auka hamo are e. Mi'i hawyi ta'a­tu­ho­'o­'a­tu­'uka kahato uhehay moherep haria mekewat e'at pe are e.
LUK 21:17 Yt uwe i eiky­'esat haria tukup­te'en mekewat e'at pe uikai eweikup­te'en eipe pote are e.
LUK 21:18 I'atu­py­'ahak kahato ehete uhemiit'in eipe pote are e. Ma'ato eimo­sa­ty'i saty'i pytkai wyti aru yt uwe i eihep kuap Tupana po pyi are e. Ehehay pywo sese uhetiat yt ta'a­tu­'akit kuap i are e. Ta'i yt wẽtup e hap ta'a­tu­moma kuap mekewat e'at pe uimi­'a­pykok ko'i eiperia pote e.
LUK 21:19 Uimohey ro haty wo po'og mekewat e'at pe are yt naku i kahato ahete pytkai are e. Yt eweipun nei'o uimohey hap miit'in ei'a­tu­'uka hap e'at pe are e. Waku uika­wiano eweikup­te'en ne wuat'i e'at pe e. Yt ui'atoiat i pote waku pe eweikup­te'en wuat'i e'at pe are e.
LUK 21:20 — Mekewat e'at pe karãpeĩ tukup­te'en sura­ra'in sem ahewa­nĩ­kaptia yt pya i ahetawa wato Ieru­sarẽi kaipywiat hawyi karãpe tuwe­hyt'ok teran ahetawa pe ai'a­tu­'uka hamo mi'i hap e'at pe meremo eweikuap ta'yn yt pya hin i ahetawa wato Ieru­sarẽi moma sese hap e'at hap eweikuap are e.
LUK 21:21 Tawa wato Ierusarẽi toĩne'en yi Iuteu py'a­setpe pote waku eiko­hyeput kahato pya kahato yi Iuteu kaipyi are e. Waku eiko­hyeput yity'ok ko'i kape eiwemig hamo are e. Ma'ato tawa Ieru­sarẽi miaria eipe pote meremo eiwe­nõ'ẽ ro pya pya tawa wato Ieru­sarẽi kaipyi hawyi meremo eiko­hyeput pya pya tawa pyi e. Mu'ap upi Ieru­sarẽi kapiat eweikup­te'en mote yt ewei'aipok tei'o tawa Ieru­sarẽi kape are e.
LUK 21:22 Katu­pono miit'in apiheg hap koro hap e'at sese topy­hu'at mekewat e'at pe aru are e. Ta'i sa'a­wy­'iwuat Tupana miwan ewywuat sa'ag hap ewywuat topy­hu'at aru mekewat e'at sa'ag hap e'at pe are e.
LUK 21:23 Mekewat e'at turan yt naku i kahato topy­hu'at aru hupi'a rakaria ete mana'in mẽpyt sat haria wywo ete are e. Katu­pono ho'opot hap yn topy­hu'at itote are e. Tupana piat miit'in apiheg hap put'ok'e ra'yn yne yi Iuteu piaria ete are e.
LUK 21:24 Mi'i hawyi wẽtup ywania ti'a­tu­'uka kahato yne Iuteu ywania kyse'yp mo ta'a­tu­'a­tu­'uka kahato are e. Irania'in ta'a­tue­roto ta'a­tue­tama kape ta'a­tu­potpap nug hamo hawyi irania'in ta'a­tu­pyhik ta'a­tu­wo­'o­pyhik hawe are e. Ta'i irania'in wẽtup ywania kaipy­wiaria ko'i ti'a­tu­moma irane Ieru­sarẽi miaria ma'ato mi'i hawyi wẽtup e'at pe aru Tupana — Wãi'e mi'iria pe toran na'yn e aru hawyi ta'a­tu­pohep ta'yn ai'y­wania moma hap hawyi ta'a­tu­'atoiat tawa Ieru­sarẽi are e. Mi'i hawyi yt ta'a­tue­wyry kuap i po'og tawa Ieru­sarẽi me are e.
LUK 21:25 At waty waikiru ko'i i'ewyte tohenoi wyti aru uhut hap e'at ta'a­tu­henoi are. Yt pya i ra'yn toran na'yn e hap e'at pe put'ok'e hap ta'a­tu­henoi aru are. At waty waikiru ko'i yt tukup­te'en i ta'atueiam me are e. Ta'i yt sa'a­wy­'iwuat ewy hin i at waty waikiru tukup­te'en are e. Mekewat e'at pe kowo i kowo i ta'a­tue­wyry mekewat e'at pe are. Ta'i mesuwat yi tote ywytu uato hap ewy kahato y'y tote yi tote po'og po'og sa'a­wy­'iwuat kai are e. Mi'i hawyi wasere sa'ag hap ewy toĩne'en e. Mi'i hawyi y'y wato hap wasere upiat ai'yat ypik hap pupi miit'in te'e­ro­ken'ẽ kahato pote i'atu­'a­kag'aia hawuo te'e­re­wa­nẽtup kahato at ka'ap hawyi — Yt naku i kahato mesuwe i'atu'e aru to'ope are e. Pywo pe ti yne hyemyi'a wato ko'i ete y'y ihyesaika kahato hap ewy topy­hu'at mekewat e'at pe aru e Iesui temiit'in me itote.
LUK 21:26 — Mi'i hawyi at waikiru waty kohye­wyry hap kapiat mesu­wa­ro­tiaria te'e­ra­'a­kasa hawyi gyt'i­'a­tu'e aru e. I'atu­perup i'atu­wuwu gen'ẽ pono e. Atipy piat i'atueiam ko'i huruk'e hawyi yt te'e­ro­py­hu'at kuap i sa'a­wy­'i­tewuat ewy e. Mi'i hawyi — Watopap yne irane aito i'atu'e to'ope te'e­ro­ken'ẽ haype are e.
LUK 21:27 — Mi'i hawyi tut ra'yn Uito Eheyke'et Eikywyt ywyhig muo uhesaika hawuo uimõ­typot hawe put'ok­'are ra'yn e Iesui.
LUK 21:28 — Pyno uimienoi hap ewy put'ok'e hawyi yt eweiken'ẽ tei'o ma'ato eiwepit ro katu­pono yt pya hin i eheha­kye­ra'at hap hamuat e'at toĩne'en are e Iesui ahepe temiit'in me.
LUK 21:29 Mi'i hawyi hã'ãkap wuo tohenoi i ra'yn. Mio tã e Iesui — Pyno eweikuap ta'yn aikotã ahetama pe aria'yp ko'i haat kahato ta'a­tue'at put'ok'e hawyi e.
LUK 21:30 Ahetama pe Wiku yp i'yhop kyt ewei'a­kasa hawyi i'aman mot e'at yt pya hin i wato'e mesuwe ahetama pe e.
LUK 21:31 Mi'i hap ewy karãpe ewei'a­kasa yne yne uimienoi ko'i ewy wyti aru tokosap yne hap — Waku ewei'e eipy'a pe tut irane Tupana Mi'airo Wuat'i Miit'in Porekuat nuat hap e'at waku ewei'e are e.
LUK 21:32 Pywo ti rat tut aru wuat'i ui'e hap ok tã ko'i are e. Mũki­'ite e'ihot'ok wyti aru uimohey haria mesuwat yi totiaria te'e­ra­ha'at aru yne ui'e hap kape hawyi te'e­ro'e to'ope aru — Aimu'e hat to'e hap ok tã topy­hu'at ra'yn mesuwat yi tote aikotã to'e hap ewy i'atu'e aru e. Yt uheso i tut wyti aru yne uimi­mo­herep ui'e hap ko'i ok tã e. Uimohey haria tukup­te'en aru mesuwat yi tote karãpe put'ok'e yne uimi­mo­herep aikotã aru ui'e hap ko'i e. Aimi­mu­'eria ehaipe­piaria uimohey haria yt karãpe i ikahuro mesuwat yi tote ma'ato te'e­ra­ha'at aru uimi­mo­herep uhehay aikotã aru hap akasa hamuat e Iesui tomohey sese haria pe ahepe.
LUK 21:33 Ta'i atipy ko'i waty at waikiru ko'i te'e­ru­weityk kahato aru yne yne i'ewyte mesuwat yi rotiat yne yne yt kat i aru toĩne'en katu­pono tuweityk aru yne yne ma'ato uimienoi ko'i yt karãpe i ikahuro aru are ma'ato toĩne'en wuat'i e'at pe uhehay e Iesui ahepe.
LUK 21:34 — Eiwe'eg wo o eiwa­nẽtup hawe are yt naku i kahato mesu­wa­rotiat eimi'u kape esapo hy u hap kape yn eweiwa­nẽtup are e. yt naku i ehenuk iwato kahato hap kape yn eiwe­mahy u hap kape yn eipy'a pe toĩne'en mekewat e'at put'ok'e turan are e. Yt naku i eiminug ko'i hap kape mesu­wa­rotiat kape yn eiwe­wa­nẽtup are. Mi'i wanẽtup hap ewy ereĩne'en mote karãpe mekewat e'at put'ok'e hawyi eiwe­mogyt mogyt ne'i aru Tupana pupi are e.
LUK 21:35 — Ta'i wuat'i miit'in mesu­wa­ro­tiaria te'e­ra­'a­kasa hamuat mekewat e'at pe hut turan ma'ato yt hekatup i haria pote mi'iria pyhik hap ewywuat put'ok'e irane e. Aikotã pay yt tikuap i mory'a toĩne'en mu'ap tote to'auka hamuat hap ewy kahato put'ok'e mekewat e'at yt naku i rakat yt Tupana mohey i te haria ete are e.
LUK 21:36 Pyno ewehẽtup to Tupana piat eimoe­saika hap ei'a­pykok hamuat mekewat ho'opot hap e'at put'ok'e ehete pote are e. Waku miat iwe'eg rakat ewy eweikup­te'en are e. Waku ewehẽtup o Tupana pe — Yt atoiat teran i uhepiat emohey hap waku ewei'e tope are. Mi'i hawyi put'ok­'e­wei'e wyti aru mekewat eho'opot hap e'at hawyi waku — Uipo­wyro ro mesuwat e'at sakpo areto hamuat ewei'e ro Tupana pe are e Iesui ahepe itote.
LUK 21:37 Mi'i hawyi wuat'i e'at pe Iesui ti'a­tu­mu'e kahato miit'in sem Tupana mõtypot yat koro pe.
LUK 21:38 Hunete wuat'i miit'in te'e­ru­wa­'a­tunug itote Tupana mõtypot yat koro pe Iesui mienoi kapiat te'e­ro­wa­nẽtup hamo. Ma'ato wãtym'i hawyi toto i ra'yn Iesui mekewat Uriweira ypia yity'ok kape. Mi'i tote toĩne'en wãtym muo ẽtup hamo.
LUK 22:1 Pyno wẽtup e'at pe put'ok'e mekewat man teneg u hap e'at karãpe Iuteuria te'e­ru­wa­'a­tunug kahato ta'a­tue­tawa koro Ieru­sarẽi kape man teneg u hamo — Mi'i man aimi'u sa'a­wy­'iwat ewywuat kahato ewy watoĩ­ne'en ahewa­nĩ­kaptia po pe turan e hap kuekatu hamo te'e­ru­wa­'a­tunug.
LUK 22:2 Mi'i hawyi itote pa'i kororia i'ewyte wãi'e hap enoi haria tikat kahato aikotã waku mig'i wo Iesui auka hamo hap ta'a­tukat tawa Ieru­sarẽi me wen ma'ato yt ta'a­tu­puẽti i katu­pono Iesui ky'e haria sem mupi te'e­ro­ken'ẽ kahato itote.
LUK 22:3 Mi'i turan ahiag teke ra'yn Iesui potmu'e Iuta e hap piit pe mekewat Ikarioti sa'yru piit pe teke mekewat Iesui potmu'e wẽtup ok 12 ok takat pe.
LUK 22:4 Ahiag teke hawyi Iuta piit pe hawyi toto ra'yn pa'i wato kororia kape i'ewyte sura­ra'in akag ko'i kape Tupana mõtypot yat apykok haria kape hawyi ihay kahato mi'iria wywo aikotã waku Iesui pytyk hamuat kat hamo.
LUK 22:5 Toi'a­tu­mo­wepit pa'i wato ko'i i'ewyte surara akag ko'i imienoi sa'ag wo hawyi ta'a­tu­ha'up nug neran sa'up iwato Iuta pe Iesui ma'at hap pe sa'up mo.
LUK 22:6 Ha'up totat hawyi toto ra'yn hawyi toikat kahato aikotã karãpeĩ waku Iesui moherep hamo i'auka teran haria po piat hum hamo irania'in yt mikuap mo i hap toikat.
LUK 22:7 Mi'i hawyi put'ok'e ra'yn mekewat man teneg u hap e'at tawa wato Ieru­sarẽi me. Mi'i turan Iesui ywania Iuteuria ywania i'auka ta'a­tuhũ Kuteiru mẽpyt i'atu­minug sa'ag sa'up mo Tupana mowepit hamo.
LUK 22:8 Mekewat man teneg u hap e'at owokai Iesui tipo­'oro typy ok temiit Peteru Iuwãu tawa Ieru­sarẽi kape to'e henoi hamo hawyi — Eweiwat ro tawa kape ienuk wato hap nug hamo.
LUK 22:9 Mi'i hawyi apo'i­'a­tu'e — Mehĩ aikope som waku watunug aimi'u itote i'atu'e Iesui pe.
LUK 22:10 Mi'i tupono toi'a­tu­wesat — Eweiwat tawa wato Ieru­sarẽi kape hawyi meremo itote eweipuẽti aru ihainia kamũti piat y'y sat hat itote are e. Mi'i hawyi hewat­'ymo eweiwat ro hawyi teke ra'yn wẽtup getap we.
LUK 22:11 Mi'i hawyi waku ewei'e ro getap ka'iwat pe — Urupo­'oro hat Iesui tuwehay po'oro ewawi uhyt katu­pono toikuap teran — Aiũwat mekewat okipy wato waku rakat Uito uhemiit'in wywo man teneg u hamuat ewei'e ro getap ka'iwat pe.
LUK 22:12 Mi'i ewei'e mekewat getap ka'iwat pe hawyi toimo­herep aru ehepe wẽtup okipy iwato rakat ywaiti rakat piat are e. Mi'i pe tukup­te'en yne aimi­ky­'esat mekewat ienuk hap nug hamuat aru are e. Waku mi'i okipy koro tote ewetunug aimi'u are e.
LUK 22:13 Mi'i hawyi tuwat Peteru Iuwãu Iesui mienoi ewy hawyi ta'a­tu­puẽti yne ra'yn Iesui e hap ewy hawyi itote ienuk hap iwato rakat ta'a­tunug itote Iesui miky­'esat ewy.
LUK 22:14 Mi'i hawyi wãtym'i turan hawyi Iesui toto wy mekewat okipy ywaiti kape hawyi put'ok'e itote hawyi Iesui ta'apyk ta'yn yparakai koro ete temiit 12 ok takaria wywo.
LUK 22:15 Mi'i hawyi to'e i'atuepe — Waku kahato mesuwe watenuk e. Ahekatup kahato ra'yn mesuwat ienuk hap u hamuat eiwywo uhepiat ho'opot hap owakai e.
LUK 22:16 Uiwy­ria'in e areto irane eikai hawyi yt arenuk i ira'yn ienuk hap man teneg u hap mesuwat yi tote i ra'yn are e. Ma'ato meiũran karãpe Tupana topy­hu'at Wuat'i Miit'in Porekuat Koro wanuat hap e'at pe hawyi atu'u i ra'yn eiwywo e Iesui. Ta'i wuat'i miit'in tikuap ta'yn hawyi Tupana topy­hu'at Wuat'i Miit'in Porekuat no hawyi ahu'u i ra'yn man teneg ienuk hap eiwywo e Iesui temiit'in me.
LUK 22:17 Mi'i tã to'e hawyi totat ra'yn mekewat kui'a piat sapo hy hawyi — Waku e Tupana pe. Mi'i hawyi tutum mekewat kui'a torania temiit'in me hawyi to'e i'atuepe — Waku eweimõ'ẽ ro mesuwat kui'a piat sapo hy eiwo­'ope e.
LUK 22:18 — Pywo pe ti Uito are'y'u meiũ hawyi yt are'y'u i sapo hy eiwywo i ra'yn ma'ato mekewat e'at karãpe Tupana toĩne'en Wuat'i Miit'in Porekuat nuat e'at put'ok'e hawyi are'y'u i ra'yn mesuwat ewywuat sapo hy eiwywo i ra'yn e temiit'in me.
LUK 22:19 Mi'i hawyi man teneg totat hawyi waku e Tupana pe hawyi toipik topo wo hawyi tutum na'yn topot­mu­'eria pe hawyi to'e — Mesuwat man uimipik uipiit ewy kahato toĩne'en katu­pono uipiit miit'in tipik kahato ui'auka turan e. Mi'i pote uipiit iã'ãkap kahato meikowat man e. Ta'i meikowat man ni uipiit e. Mi'i hap ewy topy­hu'at uipiit irane ui'auka turan e. Katu­pono uiku­'uro irane wuat'i miit'in kawiano e. Mi'i pote waku man u hat uiku­'uro hap kuekatu hap ewetunug aru e.
LUK 22:20 Te'e­renuk kahu hawyi sapo hy kui'a piat totat hawyi — Meikowat sapo hy uhuu ewywuat e. Ta'i uhuu at hap topy­hu'at aru mohag wo miit'in Tupana wywo wo'o­wese hap nug hamuat e. Uhuu ta'at yne irane miit'in ehakye­ra'at hamuat e.
LUK 22:21 Mi'i hawyi Iesui to'e — Ma'ato eiwe'eg wo o katu­pono wẽtup ok aipy­'a­setpiat mesuwat yparakai ete apyk piat uima'at hanuat toĩne'en na'yn e. Katu­pono ui'au­ka­kare sa'ag ne'i mi'i miit toĩne'en e.
LUK 22:22 Ta'i Uito ti Wuat'i Ywania Yke'et pote uiku­'uro irane miit'in yne kawiano Tupana miky­'esat ewywuat ma'ato yt naku i kahato topy­hu'at aru uima'at hat ete katu­pono Tupana mi'a­piheg sese mi'i miit topy­hu'at e Iesui temiit Iuta piat.
LUK 22:23 Mio tã to'e hawyi hemiit'in apo'i­'a­tu'e to'ope to'ope — Uweĩ aiwywo Aika­'iwat ma'at hanuat i'atu'e.
LUK 22:24 Mi'i hawyi Iesui potmu­'eria 12 ok takaria tu'uka to'ope yparakai ete to'oehay wo — Uito ti po'og Iesui potmu'e eikai torania kai i'atu'e sa'ag to'ope.
LUK 22:25 Mi'i hawyi Iesui to'e temiit'in me — Uiwy­ria'in e ahewa­nĩ­kaptia ywania pore­kuaria mio tã i'atu'e — Woro­ho­'o­ky'e kahato i'atu'e ahepe ma'ato i'atueso ne'i katu­pono marak'a ko'i ne'i mi'iria tupono e. Yt kat i aiky'e hap wywo aipo­'oro ta'a­tu­potpap nug hamo e. Pyno yt naku i mi'iria ewywuat ko'i eiperia are e. Yt atiky­'esat i e temiit'in me.
LUK 22:26 Ma'ato eipe ti yt mi'iria ewywuat no i eweikup­te'en e. Atiky­'esat kahato eiperia iwese kahato rakaria wo e. — En ni po'og uikai e haria wo atiky­'esat eipe e. — Waku uito ewat'ymo areto uhyt mana e haria wo atiky­'esat eipe e. — Woro­po­wyro teran e haria wo atiky­'esat eipe e. — Waku uipo­'oro uhyt mana e haria wo atiky­'esat eipe e. Atiky­'esat eweipy­hu'at irania'in powyro hanuaria e. Mi'i haria wo eweipy­hu'at pote mi'i hawyi po'og po'og irania'in kai Tupana wanẽtup hawe eweipy­hu'at e. I'ewyte miit akag wuat eipe pote heropat haria ewywuaria waku eweipy­hu'at eimiit'in powyro hanuaria hap atiky­'esat e Iesui temiit'in me tomohey haria yne pe.
LUK 22:27 Mesu­wa­ro­tiaria aipo­re­kuaria te'e­ru­wepyk hawyi ta'a­tu­kaykay ta'a­tue­ropat haria hawyi — Uipoi ro mesuwe meremo i'atu'e. Mi'i hawyi heropat haria meremo ta'a­tuerut morekuat kape imi'u ipupi te'e­ro­ken'ẽ hawyi. Ma'ato Uito yt mi'iria ewy hin i are. Yt atiky­'esat eiperia more­kuaria ewy ma'ato waku po'og miit'in poi hanuaria wo ewy hap atiky­'esat aikotã uito woro­ho­'opoi hap atiky­'esat eiperia katu­pono areĩne'en mesuwe miit'in eropat hano are miit'in poi hano areĩne'en e Iesui temiit'in me.
LUK 22:28 Mesu­wa­rote aho'opot kahato miit'in miky­ry'i wo hap upi ahenoi mi'iria pe turan wen ma'ato eipe yt ui'atoiat hin i uhã'ãg turan e. Waku kahato eiperia e Iesui topo­mu­'eria pe.
LUK 22:29 Sa'a­wy'i Ui'ywot Tupana tum uhepe wuat'i ywania uhemiit no. Koitywy Ui'ywot ewy atunug eiperia more­kuaria wo ui'e­wy­wuaria e. Ta'i Ui'ywot uinug na'yn Morekuat no mesu­wa­rote e. Mi'i hawyi eipe ti i'ewyte woro­ho­'onug more­kuaria wo ui'ewy e Iesui.
LUK 22:30 Pywo pe ti are'e ehepe aikope aikope areĩne'en morekuat no hap tote wyti aru uimi'u nug hap tote uiwywo ewei'apyk aru e. Ta'i more­kuaria wo uiwywo eweikup­te'en e. Ta'i uiwywo ewei'apyk uimi'u u hamo uhesapo hy u hamo itote uimõ­typot sese hap e'at e. I'ewyte ei'apyk hap ko'i sese iwato rakat tote ewei'apyk more­kuaria kororia wo 12 ai'y­wania Isareu ywania more­kuaria wo eweikup­te'en aru itote are e. Mi'i hawyi ta'a­tuerut ehowawi ai'y­wania uwe waku uwe yt naku i ewei'e hamo e Iesui temiit'in me 12 ok takaria pe.
LUK 22:31 Mi'i hawyi Iesui to'e Peteru pe — Simãu Simãu e mesup wãtym muo ahiag ehã'ãg kahato e. Ta'i ahiag tihep teran epiat uimohey hat uhyt i'ewyte irania'in uipot­mu­'eria yne toiky­'esat towano e. Pyno eiã'ãg hap iwato kahato tutunug neran ei'akit reran haype e. Aikotã arui ape wati­hu'i hu'i hap ewy tutunug hawyi arui ape toihep yne hawyi arui sese yn topy­hu'at panene pe i'ape wasere upi toto yne hap ewy uimohey hap yn topy­hu'at eikai aru Peteru e.
LUK 22:32 Pyno atikuap ahiag miky­'esat hawyi meremo ahẽtup kahato Ui'ywot pe emoesaika hamo — Tupana are yt atiky­'esat i Simãu tipun aimohey hap are kahato Ui'ywot pe ekawiano Peteru e. Mi'i hawyi karãpeĩ era'aipok uhowawi i ra'yn aru mi'i hawyi eti'a­tu­moe­saika o ewyria'in uimohey haria i'atuiã'ãg hap turan e Iesui Peteru pe.
LUK 22:33 Mi'i hawyi Simãu tiwesat Iesui — Uika­'iwat pywo ti rat areto ewywo wuat'i e'at pe eku'uro hap kape miit'in epyhik hap kape areto wy e. Ta'i areto ewywo e'auka hap kape Mehĩ e. Ta'i ui'auka teran irania'in mote — Waku ui'auka are'e aru i'atuepe ma'ato yt karãpe i moro­'atoiat En Uhyt Uiwy Iesui e Peteru.
LUK 22:34 Mi'i hawyi Iesui to'e Peteru pe — U uiwy Simãu mesuwat wãtym nuran aru — Yt atikuap i Mi'i Miit ere'e aru uhepiat mye'ym mo mekewat waipaka ehay e'yianmete e. Ta'i mye'ym mo aru — Yt atikuap i Mi'i Miit ere'e uhewa­nĩ­kaptia pe uhyt e Iesui Peteru pe.
LUK 22:35 Mi'i hawyi Iesui apo'e temiit'in me — Sa'a­wy'i woro­ho­'o­po­'oro eipe yt kat wywo i Tupana ehay moherep hamo e. — Yt ewetioto tei'o mu'ap sa'up ehupi are sa'a­wy'i ehepe e. Yt ewetioto tei'o eheku­riwu ehupi are sa'a­wy'i. Yt naku i typy ehesokpe ewetioto are sa'a­wy'i ehepe e. I'ewyte eipy piat eipy sokpe wywo yn waku eweiwat are sa'a­wy'i ehepe woro­ho­'o­po­'oro uhehay moherep hamo turan e. Yt naku i ekyse'yp surara ewywuat are sa'a­wy'i ehepe e. Pyno apo'are ehepe — Kat som yt kat i eweipuẽti mekewat e'at pe e. Yt kat i eimi'u hap eweipuẽti sio yt e. Yt kat i ehesokpe hap eweipuẽti sio yt e Iesui temiit'in me. Mi'i hawyi ta'a­tu­wesat — Yt Uhyt waku kahato uruipuẽti yne urumi­ky­'esat ok tã toĩne'en urui'a­tu­mu'e miit'in itote turan hap uruipuẽti i'atu'e Iesui pe.
LUK 22:36 Mi'i hawyi Iesui to'e i temiit'in me — Pyno sa'a­wy'i yt ewetioto tei'o mu'ap sa'up are ma'ato koran wẽtup ui'e hap are'e ehepe e. Mio tã are — Toĩne'en eipo pe mu'ap sa'up pote ewetioto o yne ehupi are. Eheku­riwu ko'i howapy ekat wo tukup­te'en mote ewetioto yne ro ehupi are. I'ewyte eheky­se'yp surara wat ewywuat yt kat i eikai pote waku meremo ehesokpe wywo eweikyi'at ro eheky­se'yp sura­ra'in wat ewywuat are ehepe e Iesui.
LUK 22:37 Pywo pe ti sa'a­wy­'iwuat Tupana ehay moherep haria mio tã i'atu'e ta'a­tu­miwan me — Yt nakuaria i po pe wyti aru topy­hu'at Uipo­'oro Wuat'i Ehakye­ra'at hat e Tupana sa'a­wy'i miwan me e Iesui temiit'in me. Pyno koitywy sa'a­wy­'i­wuaria uhetiano ta'a­tuwan e. Mi'i pote koran na'yn areĩne'en yt nakuaria i po pe aikotã Tupana to'e hap ewy e. Katu­pono yne Tupana e hap uheteiat ewywuat aru topy­hu'at tomi­mo­herep miwan sa'a­wy­'iwuat e hap ok tã e.
LUK 22:38 Mio tã to'e hawyi ipotmu­'eria te'e­ro'e — Uruka­'iwat eraha'at kope urupo pe typy kyse'yp sura­ra'in wat ewywuat toĩne'en i'atu'e. Mi'i hawyi Iesui to'e — Pyno waku typy kyse'yp put'ok'e e.
LUK 22:39 Mi'i hawyi aikotã sa'a­wy­'i­tewuat ewy Iesui toto i ra'yn tawa wato Ieru­sarẽi pyi mekewat yity'ok Uriweira ypia ko'i kape temiit'in wywo.
LUK 22:40 Put'ok­ta­'a­tu'e yity'ok tote hawyi Iesui to'e temiit'in me — Uiky'e haria waku mesup wãtym ka'ap ewehẽtup kahato Tupana pe — Urumoe­saika ro Tupana esaika hamo emohey po'og hamo katu­pono mesup ta'yn ewanĩ­kaptia uruhep teran epo pyi emohey hap po pyi waku ewei'e ka'ap Tupana pe e Iesui temiit'in me.
LUK 22:41 Mi'i hawyi Iesui ta'am na'yn po'og yity'ok upi temiit'in myi yt pya i aikotã nu watipun hap ewy toto hawyi tuwe­pỹ­'ã­tutuk ihay To'ywot Atipy piat Tupana wywo.
LUK 22:42 — Ui'ywot atiky­'esat kahato emiky­'esat ewy yn atunug e. Etiky­'esat miit'in ho'opot hap wuat'i e'at piat atu'u yne hap pote atu'u e. Papai uhepiat ho'opot hap sapo hy kui'a piat ewy toĩne'en e. Yt atu'u teran i mekewat kui'a piat Papai katu­pono ui'auka hap toĩne'en mote wen ma'ato etiky­'esat atu'u pote atu'u mesup emiky­'esat ewy Papai e. Etihep teran mesuwat kui'a uipo pyi pote etihep to ma'ato yt etihep teran i mote atu'u yne e Iesui To'ywot Tupana pe.
LUK 22:43 Mi'i tohenoi hawyi tuwe­mo­herep howawi ra'yn wẽtup ok atipy kaipywiat sut hat Tupana mipo­'oro Iesui moesaika hamo.
LUK 22:44 Mi'i hawyi Iesui ihay kahato Tupana wywo. Mi'i hawyi tuwe­sa­ty'u kahato itote. Mi'i hawyi huu tuwẽtem ipiit pyi huu aikotã an hakup ewy homhom'e yi tote i'akag owa pe pyi.
LUK 22:45 Ihay kahato Tupana wywo hawyi ipoĩ'ãm na'yn hawyi ta'aipok temiit'in kape ma'ato i'atuket turan ne'i toi'a­tu­puẽti katu­pono yt i'atu­wepit hin i pote.
LUK 22:46 Mi'i hawyi to'e i'atuepe — Are pãi kat poteĩ eweiket ne'i mesup e. Eipoĩ'ãm no hawyi ewehẽtup to Tupana pe e. Yt pote ahiag mi'akit ko'i eweikup­te'en aru e.
LUK 22:47 Mio tã e turan sura­ra'in sem put'ok­'i­'a­tu'e miit'in typy'i kahato rakaria wywo. Mi'iria mu'ap moherep hat tut ra'yn wẽtup ok Iesui potmu'e sa'ag Iuta e hap. Mi'i tokosap Iesui ewawi imoherep sura­ra'in me hamo hawyi iporok'at Iesui i'ãpysig hamo.
LUK 22:48 Mi'i hawyi Iesui to'e — Uimo­herep teran sura­ra'in me ui'auka hamo pote ui'ã­pysig uiky'e hat ewy apo Iuta e.
LUK 22:49 Mi'i hawyi ipotmu­'eria ta'a­tukuap ta'yn Iesui ma'at hap hawyi te'e­ro'e — Uruka­'iwat koitywy apo waku urutat urueky­se'yp typy hawyi waku apo urutu­'uka sura­ra'in nywo ehakye­ra'at hamo i'atu'e.
LUK 22:50 Mi'i hawyi wẽtup ok Iesui potmu'e Peteru ti'a­ha­pehep ta'yn pa'i koro emiit teky­se'yp mo. Ipo sese kai toi'a­ha­pehep.
LUK 22:51 Ma'ato Iesui to'e Peteru pe — Wãi ne mehĩ yt naku i e hawyi tuwe­ponug na'yn pa'i koro emiit eahape tek hap ete hawyi meremo sat'e hawyi waku sa'a­wy'i ewywuat i ra'yn topy­hu'at.
LUK 22:52 Mi'i hawyi Iesui to'e pa'i kororia esura­ra'in akag ko'i pe nagnia pe to'auka teran haria pe — Kat pote uimohan mesuwe wãtym muo sero'ok takat mohan hap ewy e. Kat pote kyse'yp ko'i wywo aria'yp ko'i wywo uimohan e i'atuepe itote.
LUK 22:53 Sa'a­wy­'i­wuat'i e'at pe areĩne'en eiwywo Tupana mõtypot yat pe eimu'e hamo wen ma'ato mekewat e'at pe turan yt uhat hin i eipo wo ui'auka hamo e. Ma'ato ehe'at ra'yn toĩne'en katu­pono ui'auka teran i'ypyryp we aikotã ei'akag ahiag ewy cewe­tunug mesup uhete e sura­ra'in me.
LUK 22:54 Mi'i hawyi sura­ra'in ipytyk ta'yn Iesui hawyi ta'a­tue­roto ra'yn pa'i koro ko'i yat kape. Mi'i hawyi ipotmu'e Peteru toto wy hupi wen ma'ato pya Iesui kai toto.
LUK 22:55 Mi'i hawyi pa'i koro ko'i oken'ypy totiaria aria ta'a­tunug hawyi te'e­ra­'apyk aria ywytpe te'e­ru­we­mõpe hamo. I'ewyte Peteru ta'apyk i'atu­py­'a­setpe ira'ak pote.
LUK 22:56 Mi'i hawyi wẽtup pĩ'ã makup surara mi'u nug hat teha'at kahato ra'yn Peteru kape aria kupykiat iwemõpe turan mi'i hawyi to'e — Mimi e en ni mekewat sa'a­wy­'iwuat Iesui wywo hewyry rakat hap atikuap e are an worokuap kahato e Peteru pe.
LUK 22:57 Ma'ato Peteru to'e — Yt atikuap i uito Mi'i Miit Iesui e hap het rakat pãi e.
LUK 22:58 Mi'i hawyi meiũran wẽtup ok surara teha'at kahato Peteru ewawi hawyi to'e — Are pãi worokuap kahato en e. En ni wẽtup ok Iesui emiit sese e Peteru pe ma'ato toiwesat — Eso kahato yt atikuap i rat Mekewat Miit e.
LUK 22:59 Po'og wãtym hawyi wẽtup ok itote teha'at Peteru kape hawyi to'e — Pywo ti rat en ni ereĩne'en sa'a­wy'i mekewat aimi­pyhik Iesui wywo e. Worokuap ta'yn katu­pono epusu wẽtup tama pusu ewywuat mekewat yi Karireia hy pusu ewywuat aikope Iesui motag hap toĩne'en pusu ewywuat e.
LUK 22:60 Ma'ato Peteru tiwesat — U pãi e yt atikuap hin i rat emienoi Iesui etiat e. Mio tã e turan waipaka ihay — Akurẽ'ã e ra'yn e.
LUK 22:61 Mi'i hawyi Iesui tuwe­morem Peteru ewawi hawyi iha'at kahato howawi hawyi Peteru paa'e kahato katu­pono Iesui mienoi hot'ok'e ra'yn tuwa­nẽtup hawyi Iesui e hap sa'a­wy­'iwuat — Mesuwat ewãtym waipaka ehay owakai te mye'ym mo — Yt atikuap i Mi'i Miit ere'e aru uhepiat Peteru e hap kape tuwa­nẽtup hawyi paa'e.
LUK 22:62 Iwanẽtup Iesui ehay kape hawyi Peteru toto meremo itote pyi hawyi tuweran hawyi tuwak kahato katu­pono — Yt atikuap i Iesui to'e mye'ym mo pote tuwak haty wo tuwe­mõti kahato hap wywo.
LUK 22:63 Mi'i hawyi Iesui pytyk haria sura­ra'in ti'ahyk ahyk kahato ra'yn hawyi te'e­ru­we­ky­ry'i kahato ta'a­tu­mi­ky­ry'i wo Iesui ete.
LUK 22:64 Mi'i hawyi sokpe wo ta'a­tuo­wahik iha ko'i wywo hawyi — Etikuap yne Tupana ewywuat pote ehenoi ro uruepe e'ahyk ahyk haria set ko'i i'atu'e ne'i Iesui pe sura­ra'in sem.
LUK 22:65 I'ewyte ta'a­tu­mo­weu­ka'i kahato ta'a­tuehay sa'ag wo itote.
LUK 22:66 Mi'i hawyi hunete ihot'ok hawyi nagnia miwan enoi haria i'ewyte pa'i koro ko'i te'e­ru­wa­'a­tunug yne hawyi ta'a­tuerut Iesui i'atue­wawi apo'i­'a­tu'e hamo.
LUK 22:67 — En keĩ Tupana Mipo­'oro Wuat'i Miit'in Ehakye­ra'at hamuat sio yt i'atu'e. Ehenoi ro uruepe i'atu'e Iesui pe. Mi'i hawyi toiwesat — Ahenoi ehepe uwe Uito hap pote wyti aru yt uimohey hin i e.
LUK 22:68 Apo'are ehepe — Uito kẽi Tupana Mipo­'oro Miit'in Ehakye­ra'at hamuat are ehepe pote yt uiwesat hin i eipe e.
LUK 22:69 Mi'i hawyi Iesui tuwe­mo­herep tehay wo uwe sese toĩne'en hap mio tã e — Uito ara'apyk aru Tupana Koro po sese kai ara'apyk aru Wuat'i Miit'in Yke'et no e. Mi'i hap e'at pe Tupana Sese Po'og Po'og Hesaika Rakat Mimõ­typot sese wo ara'apyk atipy pe e Iesui tuwepiat.
LUK 22:70 Mio tã to'e hawyi apo'i­'a­tu'e Iesui pe — Pyno En nyti Tupana Sese Sa'yru Sese sio yt i'atu'e. Mi'i hawyi toi'a­tu­wesat — Ei'e hap ewy e.
LUK 22:71 Mi'i hawyi more­kuaria i'atu­py­'ahak kahato ra'yn Iesui ete hawyi te'e­ro'e to'ope — Heso kahato ra'yn i'atu'e. Towẽ piat — Uito Tupana Sa'yru Sese to'e sa'ag ne'i pote waku wati­'auka katu­pono towẽ pyi tehay wo tuwenug na'yn Tupana wo ra'yn i'atu'e. Yt kat hamo i wati­kaykay irania'in more­kuaria — Iesui yt naku i e hamo katu­pono watikuap ta'yn ihay pyi heso kahato hap i'atu'e more­kuaria.
LUK 23:1 Mi'i hawyi torania ra'yn te'e­ro­poĩ'ãm Iesui eroto hamo morekuat koro Piratu kape.
LUK 23:2 Mi'i hawyi ta'a­tu­kuasa teran haype Iesui Piratu pe. — Ta'i mesuwat miit yt naku i sese rakat pãi i'atu'e. Ga'atpo wati­puẽti Mi'i Miit miit'in ma'at hap ete i'atu'e. — Yt ewetum nei'o morekuat koro pe poha'up katu­pono Uito ti Morekuat sese wo areĩne'en e itote hap ete wati­puẽti i'atu'e Piratu pe ma'ato yt pywo pe i.
LUK 23:3 Mi'i hawyi morekuat Piratu apo'e Iesui pe — En apo e'ywania Iuteuria Porekuat e. Mi'i hawyi Iesui tiwesat — Mio tã apo e'e hap ewy ere'e uhyt e Iesui Piratu pe.
LUK 23:4 Mi'i hawyi Piratu to'e pa'i koro ko'i pe i'ewyte irania'in wa'a­tunug haria pe — Yt ati'auka teran i Iesui katu­pono yt kat i hin i toi'a­parap uiwa­nẽtup hawe e.
LUK 23:5 Mi'i hawyi po'og haty wo ta'a­tu­kuasa Iesui — Pywo ti rat Iesui ti'a­tu­mu'e kahato temiit'in yt naku i nug hamuat hap ete i'atu'e. Pywo pe ti wu'uka hap topy­hu'at Iuteu etama pe Iesui mienoi hap kaipyi i'atu'e. Ta'i sa'a­wy'i mekewat wẽtup e'yi Karireia pe toi'a­tu­mu'e itotiaria ehay pun hamo hawyi mio meiũpe hawyi — Waku watu­'uka morekuat ete tohenoi ra'yn mesuwe wuat'i emiit'in me i'atu'e sa'ag Iesui ete morekuat Piratu pe.
LUK 23:6 I'atu'e hap toikuap hawyi apo'e i'atuepe — Iesui apo yi Karireia piat e i'atuepe.
LUK 23:7 Ta'i yi Karireia piaria mimotag Iesui i'atu'e Piratu pe. Mi'i toikuap hawyi morekuat Eroti kape toipo­'oro Iesui katu­pono yi Karireia piaria porekuat no Eroti toĩne'en i'ewyte mekewat e'at pe morekuat Eroti toĩne'en tawa Ieru­sarẽi me. Mi'i pote yt niatpo hin i ipo'oro morekuat Eroti kapiat hamo.
LUK 23:8 Mi'i hawyi morekuat Eroti iwepit Iesui put'ok'e tewawiat hawyi katu­pono sehay Iesui etiat toikuap hawyi ta'a­kasa teran howawi. Iesui misepap kapiat ta'a­kasa teran haype.
LUK 23:9 Put'ok'e Iesui morekuat Eroti ewawi hawyi morekuat Eroti apo apo'e kahato ma'ato Iesui yt iwesat i.
LUK 23:10 I'ewyte tukup­te'en itote pa'i koro ko'i i'ewyte i'atu­nãpin hap enoi haria. Pyno morekuat Eroti apo'e apo'e mi'iria pe Iesui etiat hawyi ta'a­tu­kuasa kahato Iesui tope.
LUK 23:11 I'ewyte morekuat Eroti tesu­ra­ra'in wywo tikuasa kahato Iesui. Mi'i hawyi morekuat esokpe ikahu kahato hap ewywuat ta'a­tupag Iesui piit pe imohit hamo hawyi ta'a­tu­po­'oro i ra'yn morekuat Piratu kape.
LUK 23:12 Sa'a­wy'i te ti morekuat Piratu morekuat Eroti hewa­nĩ­kaptia wo ne'i ma'ato mekewat e'at pe Iesui kuasa hap e'at pe iwyria'in wo ra'yn tukup­te'en Piratu Eroti katu­pono wẽtup wanẽtup hawe ewywuat te'e­ro­py­hu'at Iesui ete.
LUK 23:13 Mi'i hawyi Piratu ti'a­tu­kaykay ra'yn pa'i koro ko'i i'ewyte nagnia ehay enoi haria yne wa'a­tunug haria toi'a­tu­kaykay howawi.
LUK 23:14 Mi'i hawyi morekuat Piratu to'e i'atuepe — Meiũ miit Iesui eimierut wo toĩne'en uhowawi ra'yn iminug yt naku i hap moherep hamuat e. — Miit'in ma'at hat Mi'i Miit Iesui ewei'e ra'yn uhepe ma'ato uito ti apo'are eipy­'a­setpe hawyi yt kat i hin atipuẽti eimienoi ewy e. Waku rakat Iesui are e.
LUK 23:15 Mi'i hawyi atipo­'oro Iesui morekuat Eroti ewawi waku sio yt kuap hamo e. Mi'i hawyi Eroti — Waku rakat mi'i e yt kat i i iminug kaipyi atipuẽti sa'ag kahato e. Yt naku i wati­'auka Mi'i Miit Iesui e uhepe e morekuat Eroti e uhepe e Piratu.
LUK 23:16 Pyno waku wati­pokpok haity hehu kahato rakat wywo hawyi waku atipo­re­nõtem na'yn Iesui e Piratu i'atuepe.
LUK 23:17 Mio tã to'e katu­pono yne anu pe ienuk hap iwato rakat e'at pe wẽtup ok sa'a­wy'i morekuat mipyhik ko'i Piratu tipo­re­nõtem na'yn tomi­pyhik wo'o­pyhyp hap pyi.
LUK 23:18 Ma'ato itotiaria pa'i kororia emiit'in i'atuehay kahato ta'a­tuehay pirik wo — Eti'auka ro eti'auka ro Iesui hawyi waku wẽtup ok mekewat aiwy Pasapa etipo­re­nõtem wo'o­pyhik hap wyi i'atu'e. — Waku miwan me etunug ehay — Waku wati­po­re­nõtem uhyt Parapa ipyhik hap wyi ere'e ro emiwan me i'atu'e.
LUK 23:19 Mekewat wo'o­pot­'auka hat Parapa sa'a­wy'i Piratu tipyhik katu­pono sa'a­wy'i Parapa tipo­'oro tesu­ra­ra'in tu'uka kahato Piratu sura­ra'in ete toiky­'esat Piratu etawa towanuat haype.
LUK 23:20 Ma'ato morekuat Piratu Iesui pore­nõtem hap toiky­'esat pote tuwẽ­põwat i ra'yn miit'in sem kape — Yt naku i wati­'auka Iesui katu­pono waku rakat Mi'i e.
LUK 23:21 Mi'i hawyi po'og haty wo te'e­ro'e i — Waku aria'yp posak ete wati­'auka Iesui i'atu'e ta'a­tuehay pirik wo.
LUK 23:22 Mi'i hawyi mye'ym wo Piratu to'e i'atuepe — Are pãi kat som Iesui tunug yt naku i i'auka hamo e. Yt kat i hin i atipuẽti sa'ag Mi'i Miit minug ko'i e. Yt naku i pyno wati­'auka Mi'i e. Pyno waku wati­pokpok hawyi waku wati­po­re­nõtem wo'o­pyhik hap pyi hawyi waku wati­pohep Mi'i Miit piit ete e morekuat Piratu Iesui auka teran haria pe.
LUK 23:23 Ma'ato wa'a­tunug haria yt i'atu­pohep hin i po'og i'atu'e — Yt naku i wati­po­re­nõtem Iesui i'atu'e ta'a­tuehay pirik wo. Waku wati­'auka aria'yp posak ete i'atu'e. Waku wati­pehik hawyi waku iku'uro i'atu'e at. Mio tã i'atu'e at hawyi morekuat Piratu yt tipo­re­nõtem kuap i Iesui.
LUK 23:24 Mi'i hawyi miit'in miky­'esat ewy tutunug na'yn. Toiwan na'yn — Waku wati­'auka Iesui e.
LUK 23:25 Mi'i hawyi mekewat wo'o­pot­'auka hat mekewat wu'uka hap nug hat Parapa e hap het rakat Piratu tipo­re­nõtem na'yn wo'o­pyhik hap pyi hawyi i'atu­mi­ky­'esat ewy ma'ato Iesui tutum tesu­ra­ra'in me i'auka hamo irania'in miky­'esat sa'ag ewywuat nug hamuat.
LUK 23:26 Mi'i hawyi aria'yp posak ipotyi rakat ta'a­tunug hawyi ta'a­tupag Iesui okpe tote. Ma'ato mu'ap upi ta'a­tu­puẽti ra'yn wẽtup tapaiũn'a Simãu e hap yi Sireneu kaipywiat hat. Mi'i ti go kaipyi tut tawa Ieru­sarẽi kape. Mi'i Simãu sura­ra'in ti'a­tu­pytyk hawyi i'okpe tote ta'a­tupag Iesui e'aria'yp posak hawyi Iesui ewat'ymo totioto.
LUK 23:27 Mi'i hawyi typy'i rakaria tuwat Iesui ewat'ymo hawyi toĩne'en miit'in tok puo hary­po­ria'in wak haria. Mi'iria Iesui ho'opot hap ta'a­tu­mo­haty kahato haype te'e­ruwak kahato.
LUK 23:28 Mi'i hawyi Iesui teha'at wak haria kape hawyi to'e — Mana'in Ieru­sarẽi miaria e yt eweiwak tei'o uhepiat ho'opot pote e. Ma'ato eiwat ehepiat ho'opot hap aru eimẽ­pyt'in ho'opot hawiat waku eweiwak e.
LUK 23:29 Pywo put'ok'e irane ehepiat ho'opot kahato hap sese e. Mekewat e'at pe turan aru ewei'e kahato — Waku po'og hary­po­ria'in yt kat i imẽpyt'in nakaria ewei'e aru e. Ta'i yt imẽpyt i rakaria pote po'og waku ewei'e. Waku po'og yt kat i aimẽ­pyt'in ahemĩ ete an ewei'e aru mekewat eho'opot sese hap e'at pe e.
LUK 23:30 Mekewat e'at pe ewei'e aru yity'ok ko'i pe — Eiwe­hyt'ok to uruewawi uru'auka hamuat ewei'e aru e. Mi'i hawyi yity'ok hit ko'i pe ewei'e aru — Urumig neran eika'a ko'i pe katu­pono uru'auka teran uruwa­nĩ­kaptia ewei'e aru e.
LUK 23:31 Pyno yt watiwuk kuap i aiko pe aria'yp iwato rakat yt igag i te rakat e. Pyno Uito aria'yp iwato rakat yt igag i te rakat aiko piat ewy e. Ma'ato eipe aria'yp ko'i igag kahato ko'i ewy eweikup­te'en e. Meremo aria sat'e aria'yp igag nakat ete are e. Ta'i Uito yt kat i atunug sa'ag po'ypyi ui'auka sa'ag ne'i aria'yp posak ete e. Pyno mio tã ewetunug mesup uhete yt kat i atunug sa'ag pytkai aikotã aru ta'a­tunug ehete ehewa­nĩ­kaptia aru eiminug sa'ag kahato hap po'ypyi e. Mesup aho'opot kahato aikotã aria pe ewy aho'opot yt kat i atunug sa'ag pytkai e. Pyno aikotã aru eho'opot eho'opot hap e'at put'ok'e aru hawyi e Iesui hary­poria wak haria pe topiat ho'opot hap turan.
LUK 23:32 Mi'i hawyi i'ewyte typy ok yt naku i sese nug haria miit'in pot'auka haria miit'in potse­ro'ok takaria ta'a­tue­roto yity'ok kape i'atu­'uka Iesui wywuat hamo.
LUK 23:33 Mi'i hawyi put'ok­'i­'a­tu'e itote mekewat yity'ok sa'ag note mekewat yity'ok nu kawiat miit akag kag ewywuat hap tote hawyi ta'a­tu­pehik ta'yn Iesui imuheg hap ko'i wo te'a­ria'yp posak ete. Mi'i hawyi ta'a­tu­poĩ'ãm ywaipe. Mi'i hawyi ta'a­tu­pehik wy mekewat typy ok yt naku i sese nug haria wy ta'a­tu­'a­ria'yp posak ko'i ete hawyi ta'a­tu­pot'am wẽtup ok Iesui po sese kai hawyi wẽtup ok ipo ran kai ta'a­tu­poĩ'ãm ta'a­tue­'a­ria'yp posak ko'i ete y'am me.
LUK 23:34 Mi'i hawyi Iesui to'e Tupana pe — Ui'ywot Ui'ywot waure wo ereĩne'en no uhewa­nĩ­kaptia minug sa'ag kai hap atiky­'esat katu­pono yt ta'a­tukuap i uwe sese uwe Uito Ta'a­tu'­mi­'auka e Tupana pe. Sa'a­wy'i ipehik hap owakai Iesui esokpe ta'a­tuhep ta'yn hawyi te'e­ru­we­ma­hara ra'yn hesokpe kyi'at hamo aikotã waku hesokpe ta'a­tu­pat'ok hamo.
LUK 23:35 Mi'i hawyi irania'in te'e­ra­ha'at at Iesui ewawi. Mi'i hawyi to'y­wania Iuteuria ywania i'atuehay sa'ag kahato Iesui ete — Hẽie yt pywo rakat hin i i'atu'e. Ta'i irania'in toi'a­tue­ha­kye­ra'at kuap wen ma'ato yt hesaika hin i tuwe­ha­kye­ra'at hamo i'atu'e. Mi'i hawyi i'atu'e Iesui pe — Pywo pe ti En Tupana Mipo­'oro Urupo­rekuat nuat pote waku ewewi ereha­kye­ra'at hawyi erehep to e'aria'yp posak pyi i'atu'e.
LUK 23:36 Sura­ra'in i'ewyte Iesui moweu­ka'i sa'ag haria tukup­te'en itote. Mi'i hawyi sura­ra'in hum sapo hy ewywuat ma'ato yt naku i rakat nop takat ne'i.
LUK 23:37 Mi'i hawyi — Pyno En ai'y­wania porekuat pote ereha­kye­ra'at ro i'atu'e tope sura­ra'in.
LUK 23:38 Mi'i hawyi Morekuat Piratu tiwan na'yn — MI'I MIIT RI IUTEU YWANIA POREKUAT KORO e tomiwan me hawyi toipehik Iesui akag apy tote aria'yp posak ete.
LUK 23:39 Mi'i hawyi mekewat wẽtup ok mekewat miit auka hat yt nakuat i tomo­weu­ka'i haype Iesui wẽtup aria'yp posak pyi — Pywo ti rat En nyti pywuat Tupana Mipo­'oro pote uruhep to mesu­wepyi hawyi urueha­kye­ra'at ro En i'ewyte ereha­kye­ra'at ro meiũpepyi aria'yp posak pyi e Iesui pe.
LUK 23:40 Mio tã to'e hawyi wẽtup ok Iesui po sese kawiat yt nakuat i mio tã to'e Iesui moweu­ka'i hat pe — Yt naku i mi'i tã ere Iesui pe e. Yt ereken'ẽ i apo Tupana pupi e. Pywo pe ti ai'a­piheg aiminug sa'ag po'ypyi mesuwat aria'yp posak ko'i ete e.
LUK 23:41 Ta'i aiminug sa'ag upi ai'auka ai'a­piheg hamuat wen ma'ato Iesui yt kat i hin i sa'ag tutunug pytkai toĩne'en to'a­piheg hawe iku'uro hamuat e.
LUK 23:42 Mi'i hawyi Iesui pe to'e — Mehĩ e yt uiwaure tei'o En karãpeĩ ereĩne'en Wuat'i Miit'in Potypot nuat turan e.
LUK 23:43 Mi'i hawyi Iesui tiwesat ra'yn — Pywo ti ahenoi epe mesup e'at pe ereĩne'en uiwywo uhetama sese pe e Iesui tomohey pakup takat pe mekewat sa'a­wy'i miit'in auka hat pe aria'yp posak pyi.
LUK 23:44 Mi'i hawyi atpo­sake put'ok'e hawyi wãtym kape put'ok'e mye'ym ura turan i'ypyryp kahato wãtym ewy mesuwat yi tote.
LUK 23:45 At yt hẽtyhot hin i mesuwat yi tote hawyi mekewat Tupana mõtypot yat e'oken­'ypy sokpe kawiat hiot'e kahato myasetpuo yi kape.
LUK 23:46 Mi'i hawyi aria'yp posak pyi Iesui to'e tehay pirik wo Tupana pe — Papai e epo pe ra'yn atoiat Uipã'ãu e. Mio tã to'e ipyhu tek ta'yn hawyi iku'uro ra'yn.
LUK 23:47 Mi'i hawyi wẽtup ok sura­ra'in akag ta'a­kasa yne hawyi tuwehum kahato Tupana pe — Pywo pe ti Meiũ Miit Iesui waku kahato rakat are e.
LUK 23:48 Mi'i hawyi irania'in seha'at haria ikuap ta'yn aikotã aikotã Iesui iku'uro waku hap ewy hawyi te'e­ra­'aipok ta'yn ta'a­tu'yat ko'i kape. Ma'ato i'atuwat turan te'e­re­po­ti'a petek petek kahato mu'ap upi — Paa'u­ru­to'e paa'u­ru­to'e e hamo Iuteuria eko ewy.
LUK 23:49 Mi'i hawyi Iesui wywuaria typy'i kahato rakaria yi wato Karireia pywiaria te'e­ra­ha'at kahato Iesui ku'uro hap kape pya pyi aria'yp posak ko'i kai tukup­te'en wen ma'ato itote pyi te'e­ru­we­ha'at yne aikotã Iesui ku'uro turan hap kape.
LUK 23:50 Toĩne'en itote wẽtup ok miit Iuse e hap het rakat tawa Arimateia kaipywiat.
LUK 23:51 Iuse ti waku kahato rakat. Mi'i ti miit'in mimõ­typot kahato — Tupana topy­hu'at irane Miit'in Porekuat nuat e hap ekatup hat Iuse. Sa'a­wy'i toĩne'en irania'in wo'o­nãpin haria py'a­setpe karãpe — Yt naku i kahato Iesui pote waku wati­'auka mi'i i'atu'e turan ma'ato Iuse — Yt naku i wati­'auka Mi'i Miit e itote.
LUK 23:52 Mi'i hawyi Iesui iku'uro hawyi Iuse toto morekuat Piratu kape hawyi tohẽtup — Etum no Iesui piit atisyp hamo e.
LUK 23:53 Mi'i hawyi morekuat Piratu — Waku e hawyi Iuse tihep ta'yn Iesui piit aria'yp posak pyi hawyi tohuwy ra'yn sokpe ikahu rakat ho'o­woity rakano. Mi'i hawyi totopag na'yn ipiit wo'osyp hawe nu wato ka'a pe aikope yt uwe i syp hawe nu ka'a miit'in minug pakup we totopag.
LUK 23:54 Toisyp ta'yn Iesui wãtym yt pya i turan. Mi'i turan watunug mi'u wãtym'i turan mũki­'ite wanuat Tupana mõtypot hap e'at piat mi'u wo yt kat i mi'u wati­'anug Tupana mõtypot e'at pe hap ewy. Mi'i wãtym'i turan Iuse topag na'yn Iesui piit iku'uro sese rakat mekewat nu ka'a wo'osyp hawe wãtym i turan.
LUK 23:55 I'ewyte hary­po­ria'in Iesui wywuaria yi Karireia kaipy­wiaria tuwat Iuse wywo Iesui syp hap kapiat te'e­ra­'a­kasa hamo.
LUK 23:56 Mi'i hawyi te'e­ra­'aipok ta'yn ta'a­tu'yat ko'i kape mohag ikamhig se rakat kyi'at hamo Iesui piit pen hamo. Mi'i hawyi meiũran ta'a­tue­roto hyp hap kape ipiit pen mohag wuat hamo Iuteuria eko ewy. Mi'i hawyi mũki­'ite wẽtup e'at te'e­ru­we­mohy at Tupana e hap miwan miat ewy Tupana mõtypot hamo.
LUK 24:1 Mi'i hawyi hunete mytu'u e'at pe hary­po­ria'in Iesui emiit'in tuwat Iesui syp hap kape. Mana Maria yi Mata­rena kaipywiat i'ewyte mana Iuana hawyi wẽtup ok mana Maria Iesui potmu'e Tiaku ty i'ewyte irania'in hary­po­ria'in sa'a­wy­'iwuat hewyry Iesui upiaria tuwat ra'yn isyp hap kape mohag hy ikamhig se kahato rakat wywo ipiit pen hamuat Iuteu ywania eko ewy.
LUK 24:2 Put'ok­'i­'a­tu'e hawyi mekewat nu ka'a hap ete isyp hap ete hawyi yt kat i te oken'ypy nu kawiat sa'a­wy'i ewy toĩne'en itote ma'ato tuwe­'o­ken­hyp'ok pe ra'yn ta'a­tu­puẽti Iesui syp hap. Mekewat nu wato tuwe­morem yi ka'a oken'ypy pyi topy­hu'at.
LUK 24:3 Mi'i hawyi Iesui emiit'in hary­poria kawiat tuwe­hyt'ok ta'yn wo'osyp hawe mekewat yi ka'a pe hawyi ma'ato Iesui piit yt ta'a­tu­puẽti hin i itote.
LUK 24:4 Mi'i hawyi te'e­ru­wa­nẽtup kahato ipiit weityk hap etiat turan te'e­ru­we­mo­herep ta'yn i'atu­py­'a­setpe typy ok ihainia atipy kaipywiat sut haria. I'atue­sokpe hẽtyhot kahato wywo te'e­ru­we­mo­herep ta'yn.
LUK 24:5 Mi'i hawyi hary­po­ria'in i'atu­pupi te'e­ro­ken'ẽ kahato hawyi yi kape ne'i hewo gen'ẽ pono. Mi'i hawyi wemo­herep haria atipy kaipy­wiaria te'e­ro'e i'atuepe — Kat pote ieĩne'en hat eweikat wo'osyp hawe map haria py'a­setpe apo'i­'a­tu'e Iesui piat.
LUK 24:6 Ta'i Iesui yt uwe i meiũpe katu­pono toĩne'en i ra'yn aikotã i'e hap ewy i'atu'e. Waure­'e­wei'e apo ra'yn kat som i'e ehepiat eweikup­te'en tawa Karireia pe turanuat aikotã Iesui to'e — Mye'ym e'at hawyi arẽtem gu'uro pyi e hap apo'i­'a­tu'e.
LUK 24:7 Ta'i mio tã i'e hap ewy topy­hu'at mesup i'atu'e. Mio tã to'e ehepe — Uito ti Ekywyt koro Uito e. Mi'i hawyi wyti aru irania'in yt nakuaria i ui'auka hamo arepy­hu'at aru e. Mi'i hawyi ta'a­tu­pehik ta'yn Uito aria'yp posak ete ui'auka hamo e. Mi'i hawyi uiku­'uro miit'in ekawiano ma'ato mye'ym e'at uiku­'uro sese hawyi areĩne'en i ra'yn gu'uro po pyi e ti ra'yn kue Iesui ehepe yi Karireia pe turan i'atu'e atipy kaipy­wiaria Iesui emiit'in hary­po­ria'in kawiat pe.
LUK 24:8 Mi'i hawyi hary­po­ria'in te'e­ru­we­wa­nẽtup sa'a­wy­'iwuat Iesui e hap kape hawyi tuwe­nõ'ẽ ra'yn isyp hap kaipyi.
LUK 24:9 Mi'i hawyi te'e­ra­'aipok Iesui potmu­'eria kape 11 ok takaria kape i'ewyte irania'in Iesui emiit'in me hawyi put'ok­'i­'a­tu'e hawyi te'e­ra­'a­kasa hap ta'a­tu­henoi — Iesui ti toĩne'en i ra'yn an tuwẽtem na'yn gu'uro pyi ti an i'atu'e.
LUK 24:10 — Pywo Iesui toĩne'en i'atu'e mana Maria yi Mata­rena kaipywiat i'ewyte mana Iuana hawyi wẽtup ok mana Maria Iesui potmu'e Tiaku ty i'ewyte irania'in hary­po­ria'in sa'a­wy­'iwuat haria Iesui syp hap akasa haria. Mi'iria ti te'e­ra­'aipok hawyi ta'a­tu­henoi yne ra'yn Iesui potmu­'eria pe — Aipo­typot toĩne'en i ra'yn i'atu'e.
LUK 24:11 Mi'i hawyi ipotmu­'eria pe hary­po­ria'in henoi yne yne atipy piaria e hap ko'i hawyi — Heso kahato mana'in i'atu'e hary­po­ria'in me. Yt ta'a­tu­mohey hin i.
LUK 24:12 Ma'ato Peteru tikuap hawyi meremo teput ra'yn Iesui syp hap kape teha'at hamo. Put'ok­to'e hawyi i'ywyt­'ok­pypuo teha'at. Teha'at hawyi Iesui suwy hap sokpe yn toipuẽti itote. Mi'i hawyi ta'aipok ta'yn to'yat kape ma'ato tuwa­nẽtup kahato ta'a­kasa hap ko'i etiat.
LUK 24:13 I'ewyte mekewat mytu'u e'at pe tuwat ra'yn typy ok Iesui potmu­'eria tawa hit Emau kape tawa wato Ieru­sarẽi kaipyi. Tawa hit Emau yt pya hin i Ieru­sarẽi pyi. Wãtym'i hap kaipyi wãtym hap kape hap ewy wahe­wyry mu'ap upi hap ewy ta'a­tu­he­wyry.
LUK 24:14 Mi'iria to'oehay kahato to'ope yne ta'a­tu­'a­kasa hap Iesui ku'uro hap ete ta'a­tuehay mu'ap upi.
LUK 24:15 Mi'i turan Iesui put'ok'e i'atu­wywo tewyry hamo.
LUK 24:16 Ma'ato yt ta'a­tukuap i uwe sese Iesui hap. Te'e­ra­'a­kasa ra'yn wen ma'ato yt ta'a­tukuap i sese uwe Iesui katu­pono Tupana tunug i'atueha yt hãpyk i.
LUK 24:17 Mi'i hawyi Iesui to'e i'atuepe — Kat ewei'e ehehay eiwo­'ope eiko­hye­wyry hap upi uhyt'i'in e. Mio tã apo'e hawyi te'e­ro­py­hu'at mu'ap tote yt kat i i'atuete ta'a­tu­wepit hap wywo.
LUK 24:18 Mi'i hawyi wẽtup ok ihainia mehĩ Keupa apo'e Iesui pe — En ni Ieru­sarẽi miat ieĩne'en porap i hat apo'e. Yt etikuap i te apo aikotã tokosap itote e'ihot'ok e. Yt ikuap hat apo en e.
LUK 24:19 Mio tã to'e hawyi Iesui apo'e — Aikotã som tokosap itote e. Mi'i hawyi toiwesat — Sa'ag kahato ta'a­tunug na'yn itote wẽtup ok ete mekewat Iesui ete mekewat tawa hit Nasare kaipywiat hat ete e. Ta'i Tupana ehay enoi hat kahato Mi'i Miit Iesui e. Pywo pe ti iminug ko'i iwato kahato tutunug yt uwe minug ewywuat i e. Waku kahato tutunug i'ewyte ihay se kahato rakat toĩne'en Mekewat Miit Iesui i'atu'e. Ta'i Mekewat Miit Wakuat kahato wo toĩne'en Tupana wanẽtup hawe i'ewyte miit'in wanẽtup hawe i'atu'e.
LUK 24:20 Miit'in powyro rakat pytkai ahepa'i koro ko'i i'ewyte ai'a­kagnia ima'at kahato rakaria wo tukup­te'en hawyi ta'a­tupag Iesui more­kuaria ahewa­nĩ­kaptia po pe ra'yn i'auka hamo e. — Ewei'auka ro Mi'i Miit i'atu'e. Mi'i hawyi i'atu­mi­ky­'esat ewy ta'a­tunug sa'ag ne'i Iesui ete i'atu'e. Mi'i hawyi ta'a­tue­su­ra­ra'in tipehik pereku wo aria'yp posak ete hawyi iku'uro ra'yn i'atu'e.
LUK 24:21 — Ta'i ai'y­wania Isareu ywania wanĩ­kaptia po pywiat ehakye­ra'at hat Mi'i Miit Iesui urutu­wa­nẽtup sa'a­wy'i ma'ato mio iku'uro ra'yn pote aikotã aru i'atu'e. Mi'i hawyi koitywy mye'ym e'at tokosap ta'yn iku'uro hawyi i'atu'e.
LUK 24:22 Irania'in hary­po­ria'in Iesui emiit'in uruwy­wuaria urumõgyt kahato katu­pono mesup ti hunete tuwat Iesui syp hap kape hawyi ta'a­tukat ipiit itote ipen hamuat wen ma'ato yt kat i ipiit ta'a­tu­puẽti itote.
LUK 24:23 Mi'i hawyi te'e­ra­'aipok uruewawi hawyi mio tã i'atu'e uruepe — Mesup ta'yn urumu­'etu hap ewy itote turan tuwe­mo­herep ta'yn atipy kaipy­wiaria uruewawi i'atu'e hary­po­ria'in te'e­ra­'aipok hawyi i'atu'e.
LUK 24:24 Mi'i hawyi irania'in uruto tuwat ra'yn hary­po­ria'in mienoi kuap hamo sio pywo sio yt kuap hamo. Mi'i hawyi Iesui syp hap te'e­ra­'a­kasa hary­po­ria'in mienoi ewywuat ta'a­tu­puẽti itote wen ma'ato Iesui piit sese yt ta'a­tu­puẽti hin i i'atu'e Iesui pe yt ikuap i te turan.
LUK 24:25 Mi'i hawyi Iesui to'e i'atuepe — Are pãi kat poteĩ yt eweimohey i te sa'a­wy­'iwuat Tupana ehay enoi haria miwan miat e hap ko'i apo'e.
LUK 24:26 Ta'i sa'a­wy­'i­wuaria Tupana ehay wan haria ta'a­tu­henoi kahato Mi'i Miit ete e. Mio tã i'atu'e sa'a­wy'i — Tupana Mipo­'oro Aheha­kye­ra'at toho­'opot kahato aru miit'in po wo hawyi miit'in mi'auka wo topy­hu'at hawyi tuwẽtem gu'uro pyi hawyi ta'aipok atipy kape i ra'yn e kahato sa'a­wy'i Tupana ehay moherep haria ta'a­tu­miwan me e. Mi'i Tupana e hap ewy toĩne'en mesup ta'yn. Tupana Mimoieĩ­ne'en toĩne'en mesup katu­pono Tupana Mimõ­typot no toĩne'en Mi'i Miit wuat'i e'at pe e.
LUK 24:27 Mi'i hawyi Tupana ehay moherep hat akag Musei tiwan kahato Tupana Mipo­'oro Wuat'i Miit'in Ehakye­ra'at hanuat ete e Iesui tuwepiat mu'ap tote.
LUK 24:28 Mi'i hawyi tuwat i tawa hit Emau kape hawyi yt pya i tawa hit Emau kai hawyi Iesui to'e i'atu'e pe — Pyno meiũran irane uhyt'i'in e.
LUK 24:29 Ma'ato — Yt Mehĩ eropy­hu'at ro mesuwe uruwywo katu­pono wãtym na'yn i'atu'e Iesui pe. Mi'i tupono topy­hu'at topot­mu­'eria wywo ma'ato yt ta'a­tukuap hin i te uwe hap.
LUK 24:30 Mi'i hawyi Iesui tenuk i'atu­wywo turan man teneg totat hawyi — Waku e Tupana pe hawyi toipik aikotã sa'a­wy­'iwuat ewy hawyi tutum na'yn i'atuepe.
LUK 24:31 Toipik mekewat man teneg topo wywo sa'a­wy'i ewy hawyi meremo ta'a­tukuap ta'yn uwe hap hawyi Tupana tomog na'yn yt i'atueha pytig i hap ewy hawyi meremo ta'a­tukuap Iesui itote hawyi tuweityk ta'yn i'atu­py­'a­setpyi Iesui.
LUK 24:32 Mi'i hawyi te'e­ro'e to'ope — Pywo pe ti rat Ai'akag Iesui tuwẽtem na'yn gu'uro pyi hawyi ihay ra'yn ikahu kahato aiwywo i'atu'e. Ta'i ihay aria ewy aipy'a pe toĩne'en mu'ap upi ihay aiwywo turan i'atu'e.
LUK 24:33 Mi'i hawyi meremo te'e­ra­'aipok ta'yn irania'in Iesui mohey haria kape tawa wato Ieru­sarẽi kapiaria enoi hamo. Put'ok­'i­'a­tu'e itote hawyi ta'a­tu­puẽti ra'yn mekewat 11 ok takaria irania'in ipotmu­'eria wywo.
LUK 24:34 Put'ok­'i­'a­tu'e hawyi — Pywo pe ti rat tuwẽtem na'yn Aika­'iwat Iesui katu­pono tuwe­mo­herep ta'yn mesup Simãu me i'ewyte uhepe e.
LUK 24:35 — Mesup ta'yn mu'ap upiat Iesui tuwe­mo­herep uruepe i'atu'e. Mi'i hawyi urutenuk hap turan toipik aheman aikotã Iesui tipik man sa'a­wy­'iwuat man imipik hap ewy hawyi uruikuap ta'yn uwe Iesui i'atu'e.
LUK 24:36 Mio tã ta'a­tu­henoi turan tuwe­mo­herep ta'yn Aika­'iwat Sese IESUI i'atu­py­'a­setpe. Mi'i hawyi to'e topot­mu­'eria pe — Tupana eimo­wepit uiwy­ria'in e.
LUK 24:37 Mi'i hawyi ma'ato — Miit ehog i'atu'e ta'a­tu­wa­nẽtup hawe te'e­ro­ken'ẽ kahato hawyi Iesui pupi.
LUK 24:38 Mi'i hawyi apo'e — Kat poteĩ eweiwa­nẽtup kahato kowo'i kowo'i eipy'a pe yt kat i eiwepit hap wywo e. Kat poteĩ tig yt eweimohey i te uheĩne'en gu'uro pyi hap e.
LUK 24:39 Pyno uimohey ro e. Eiwe­ponug no uipiit ete uipiit suk hap ko'i ete sio Uito sio yt kuap hamo e. Uito rat eweha'at ro yt miit ehog hin i Uito katu­pono uikag ko'i wywo uipiit pu'i wywo areĩne'en e topot­mu­'eria pe.
LUK 24:40 Mio tã to'e hawyi toimo­herep ta'yn topo suk hap ka'a ko'i topy suk hap ka'a ko'i hawyi — Uito ti rat uimohey ro eipe e.
LUK 24:41 Ma'ato niatpo kahato imohey hamuat ipotmu­'eria. Te'e­ru­wa­nẽtup kahato itote i'ewyte i'atu­wepit kahato ra'yn. Mi'i hawyi Iesui apo'e i'atuepe yt ta'a­tu­mohey i pote — Toĩne'en apo meiũpe eimi'u uiwy­ria'in e.
LUK 24:42 Mi'i hawyi pira iwyp takat ta'a­tu­puẽti hawyi ta'atuium na'yn Iesui pe.
LUK 24:43 Mi'i hawyi Iesui tu'u ra'yn topot­mu­'eria ehamo miit Uito hap moherep hamo.
LUK 24:44 Tutu'u hawyi po'og Iesui to'e temiit'in me — Sa'a­wy'i areĩne'en eipy­'a­setpiat turan ahenoi kahato ehepe aikotã aru topy­hu'at uhete hap. Mesup e'at pe ahenoi teran aha'a­se'i Musei miwan kaipyi Tupana ehay enoi haria miwan kaipyi yne uhetiat e. I'ewyte morekuat Tawi wepy hap miwan kaipyi uhetiat yne atimo­herep teran yne uhetiat e. Koitywy topy­hu'at ra'yn yne i'atu­mienoi yianmiat uhetiat hap ewy e.
LUK 24:45 Mi'i hawyi heremo yn na'yn i'atu­wa­nẽtup hawe Tupana ehay Iesui tunug. Mi'i hawyi ta'a­tukuap kahato ra'yn miwan sa'a­wy­'iwuat kai Iesui etiat hap hawyi heremo ra'yn i'atue­py'a pe yne Iesui ete.
LUK 24:46 Mi'i hawyi Iesui to'e i — Ta'i miwan sa'a­wy­'iwuat Tupana mimo­herep tohenoi kahato uhetiat aho'opot hap etiat uiku­'uro hawyi mye'ym e'at uiku­'uro ra'yn hawyi areĩne'en i hap e Tupana miwan me sa'a­wy­'iwuat pe e.
LUK 24:47 Ta'i yianme Tupana henoi kahato uhetiat tehay wan haria po wo aikotã aru ta'a­tu­henoi kahato tesaika hap wywo torania ywania pe aikotã waku miit'in te'e­ru­we­morem Tupana kape i'atu­minug sa'ag hap ko'i kaipyi uhet upi hap tohenoi miwan me e Iesui. Miit'in te'e­ru­we­morem Tupana kape uhet upi hawyi waure wo Tupana toĩne'en i'atu­minug sa'ag hap ko'i ete e kahato yne mekewat Tupana ehay miwan me. Waku tawa Ieru­sarẽi me toha­'a­wynug na'yn mesuwat sehay wakuat hawyi waku yne ywania kape ta'a­tu­henoi Uha'yru ete e Tupana miwan me e.
LUK 24:48 — Pyno eipe ti eweikuap ta'yn uheĩne'en gu'uro pyi hap uhowawi ewei'a­kasa hawyi e.
LUK 24:49 Pyno Tupana miky­'esat ewy atum ehepe Tupana Pã'ãu eimoe­saika hamuat e. Ma'ato waku meiũpe tawa Ieru­sarẽi me eweikup­te'en hawyi meiũran areto hawyi atum aru ehepe Tupana Pã'ãu eimoe­saika kahato uipotpap nug hamuat hap e. Pyno waku mesuwe tawa Ieru­sarẽi me eweikup­te'en Tupana Pã'ãu ut hap e'at ekatup hamuat e topot­mu­'eria pe Iesui.
LUK 24:50 Mi'i hawyi Iesui tioto ra'yn topot­mu­'eria tawa wato Ieru­sarẽi myi tawa hit Petania kape. Mi'i tote ipo ko'i ywaiti pe tutunug hawyi — Tupana etipo­wyro uimohey haria wuat'i e'at pe eti'a­tu­poi­tyro mi'iria ahẽtup e.
LUK 24:51 Mi'i to'e Tupana pe turan Iesui ta'am na'yn atipy kape.
LUK 24:52 Mi'i hawyi ta'a­tu­mõ­typot kahato itote Tupana hawyi te'e­ra­'aipok ta'yn tawa wato Ieru­sarẽi kape i'atu­wepit sakpo hap wywo.
LUK 24:53 Put'ok­'i­'a­tu'e hawyi te'e­ro­py­hu'at Tupana mõtypot yat hawe hawyi — Waku kahato En Tupana ta'a­tu'e itote at ka'ap. Mesup miwan Iesui etiat atunug mesuwe iky'e haria mowepit hamo. Toran na'yn uimiwan. Uhet IRUKA.
JOH 1:1 Uito Iuwãu ti ahenoi teran Aika­'iwat sa'a­wy'i ieĩne'en hap etiat. Sa'a­wy'i sese turan mesuwat wuat'i nug hap e'yianmete ti Aika­'iwat Iesui toĩne'en Tupana kai te. Sa'a­wy'i sese wuat'i owakai te Aika­'iwat set sa'a­wy'i Tupana Ehay Moherep Hat toĩne'en are. Ta'i yt tuwe­mo­herep i te miit no te turan Tupana Ehay Moherep Hat toĩne'en wuat'i e'at pe Tupana wywo. Tupana kai toĩne'en sa'a­wy'i i'ewyte Tupana wo toĩne'en mekewat Tupana Ehay Moherep Hat are. Yi yt kat i te turan toĩne'en Mekewat Tupana Ehay Moherep Hat Sese.
JOH 1:2 Mesuwat wuat'i nug hap e'yianmete mekepe te toĩne'en Tupana kai te Aika­'iwat.
JOH 1:3 Mi'i hawyi Tupana to'e tope — Uhehay­tuwy e waku etunug yne yne uiminug ko'i e. Waku etunug mytyp at waty waikiru ko'i e Tupana sa'a­wy'i sese tope. Mi'i hawyi tutunug yne yne mesuwe i'ewyte atipy pe. Yt kat kawiat i tutunug yne yne tehay wo yn at waikiru ko'i waty yi yne yne tutunug i'ewyte wuat'i yi piat ko'i atipy piat ko'i toi'a­tu­mo­herep yne yne tehay wo. — Eweikup­te'en no e hawyi tukup­te'en yne yne. Yne ieĩne'en hanuaria nug hat Tehay­tuwy toĩne'en. Mi'i Hat yn ni Wuat'i nug Hat. Mi'i hawyi yt uwe i wẽtup ok kat hap kat hap ko'i nug hat toĩne'en katu­pono Aika­'iwat ti'a­tu­mo­herep torania torania to'e hap ewy te'e­ru­we­mõ­py­hu'at yne yne.
JOH 1:4 Tehay­tuwy toĩne'en Wuat'i Moieĩne'en Hat. Ta'i Wuat'i Nug Hat ri Mi'i. Mi'i hawyi he'at put'ok'e hawyi tuwe­mo­herep Miit no. Aipy­'a­setpe hirakat nuat topy­hu'at. To'y­wã'ĩ ra'yn mesuwe miit kawiat aipu'i ra'yn Miit sese topy­hu'at mesuwe Tupana Ehay Moherep hat Tupana Ehaytuwy. Aipy­'a­setpiat Tupana moherep ahepe hanuat sese topy­hu'at mesuwe. Heremo kahato ariãty ewy topy­hu'at aipy­'a­setpe. Tuwe­mo­herep hawyi aikotã ariãty ewywuat Tupana tomo­herep miit'in me hanuat topy­hu'at Mi'i Miit.
JOH 1:5 Put'ok'e ra'yn mesuwe hawyi toimo­herep miit'in me mu'ap Tupana kapiat aikotã ariãty wãtym muo mu'ap moherep mu'ap ahepe hap ewy toimo­herep ahepe mu'ap Tupana kapiat Mekewat Miit sese are. Mi'i hawyi i'ypyryp hap yt hasep kuap i hin i he'a­riãty hot hap put'ok'e ra'yn hawyi. Aikotã wãtym muo hẽtyhot hap ewy yt naku i nug haria yt ti'akit kuap i Aika­'iwat Tupana ehay Moherep Hat. Mi'i Miit i'ypyryp hap moweityk hat topy­hu'at ma'ato i'ypyryp yt hasep kuap i he'a­riãty hot hap.
JOH 1:6 Nimo sakpo kahato turan Tupana to'e — Pywo ti rat atipo­'oro Uha'yru miit'in atueha­kye­ra'at hamo e ma'ato waku sa'a­wy'i atipo­'oro wẽtup ok Uha'yru e'yianmiat hut hamuat moherep hamo e sa'a­wy'i miwan me. Mi'i hawyi toipo­'oro mekewat ahet'ok hat Iuwãu miit'in atumu'e hamuat Aipo­rekuat Iesui ut hap etiat enoi hamo.
JOH 1:7 Mi'i hawyi Iuwãu henoi kahato — Tupana Mipo­'oro sese Aheha­kye­ra'at hanuat tut irane e yn miit'in me mesu­wa­ro­tiaria pe. Ta'i e Mi'i Miit tut hawyi ti toimo­herep ahepe mu'ap sese Tupana sese kape ikuap sese hamo tohenoi. Aikotã Mi'i Miit Ariãty Sese e hap het rakat timo­herep mu'ap ahepe i'ypyryp sese pe hap tohenoi Iuwãu mekewat wo'o­set'ok hat Tupana Mipo­'oro etiat e.
JOH 1:8 Iuwãu yt mekewat ariãty sese i are ma'ato mekewat Ariãty Sese e hap het rakat ut hap moherep hat mekewat Iuwãu wo'o­set'ok hat are.
JOH 1:9 Mi'i Miit topy­hu'at ariãty ewy. Mi'i Miit set ti Iesui. Mi'i Miit ti'a­tu­moẽ­tyhot kahato miit'in mesu­wa­ro­tiaria ha'a­wy­tepyi mesup te mũki­'ite te toimo­herep To'ywot. Mekewat Ariãty Sese rakat tuwe­mo­herep Miit no hawyi toimo­herep kahato ahepe Tupana Sese. Koitywy watikuap kahato Tupana etiat Iesui ieĩne'en hap kaipyi Iesui ehay kaipyi. Ariãty ewywuat kahato Iesui. Aimoẽ­tyhot kahato Tupana etiat aiwa­nẽtup hawe aipy'a piat yne yne aito mesuwat mytyp totiaria are.
JOH 1:10 Tutunug miit'in pytyp rokirẽ topy­hu'at i'atu­py­'a­setpe yi tote ma'ato — En ni yt urunug hat i i'atu'e ne'i.
JOH 1:11 Aika­'iwat tuwe­mo­herep sa'a­wy'i to'y­wania Iuteuria ywania ehakye­ra'at hamo ma'ato yt ta'a­tu­mohey i yt ta'a­tu­ky­'esat i Iesui Ta'a­tue­ha­kye­ra'at hat Ta'a­tu­po­rekuat no.
JOH 1:12 Ma'ato irania'in aitoria uwe uwe to'e topy'a pe — Woro­mohey kahato En Iesui. Ereke ro uipy'a pe e hat pe Tupana to'e — Pywo ti rat koitywy woronug en mesup uha'yru sese uhaki'yt sese e ahepe Iesui mohey haria pe.
JOH 1:13 Mi'i tã wato'e pote aipy'a pe hawyi Tupana topy­hu'at Ai'ywot Atipy piat. Tupana yn aimo­herep kuap tosa­'y­ru'in wo tosa­ki­'yt'in no. — Waku kahato eipe ti e ahepe. Eiperia ti uimẽ­pyt'in sese e Tupana ahepe Iesui toĩne'en aipy'a pe hawyi. Ai'ywot aity mesu­wa­ro­tiaria kaipyi yt watoĩ­ne'en kuap i Tupana mẽpyt'in no katu­pono Tupana yn aimo­herep kuap tomẽ­pyt'in no. Yt pu'i kaipywiat i ra'yn Tupana mẽpyt'in watoĩ­ne'en. Yt aiwepyi i wato­py­hu'at kuap Tupana mẽpyt'in no. Yt watu­we­mo­herep kuap i aiwe­kaipyi Tupana mẽpyt'in no katu­pono Tupana kaipywiat yn imẽpyt'in ko'i te'e­ru­we­mo­herep.
JOH 1:14 Tupana Ehay Moherep hat tuwe­'amak ta'yn hawyi Miit no ra'yn topy­hu'at aipiit ewywuat tuwe­mo­herep. Miit'in pu'i wo topy­hu'at aipy­'a­setpe mesuwe. Waku Kahato Rakat Miit Sese wo toĩne'en yi tote. Miit Kahato Waku Sese Rakano toĩne'en. Miit Pywuat Sese Rakat iwese kahato hamo ai'a­tu­ky'e. Tuwe­kaipyi ai'a­tu­ky'e torania sio aito waku sio yt. Hegyi'at kahato sese aiky'e haype tuwe­mo­herep mesuwe hawyi. Yt kat i i'aparap hano topy­hu'at ahehamo. Tupana Mõtypot hat Sese topy­hu'at mesuwe — Uha'yru wẽtup ok takat Mi'i Miit e Tupana ahepe. Mi'i Miit Ywot sese areĩne'en e Tupana Iesui piat pe.
JOH 1:15 Ha'a­wyte te ti Iuwãu mekewat wo'o­set'ok hat henoi henoi kahato uruepe ahepe Mekewat Miit etiat. Mio tã e miit'in me — Meipe ra'yn tut irane Uhewat­'ymo ma'ato Mi'i Miit ti toĩne'en uheĩne'en hap e'yianmete e ahepe. Mi'i pote Mekewat sut hat po'og po'og wakuat uikawiat.
JOH 1:16 Ta'i Mi'i Miit po'og kahato uikai katu­pono Wuat'i E'at piat Ieĩne'en hat Mi'i Miit toĩne'en mote. Meipepe ti rat tut irane Hegyi'at Kahato Rakat tuwe­kaipyi aiky'e hap e. Mi'i Miit ti hum ahepe tewaku hap yt ahewaku hap upi i e. Toimõ'ẽ irane aheha­kye­ra'at hap Tupana miium. Yt kat sa'up ete i tutum ahepe aheha­kye­ra'at hap Tupana miium yt ahewaku pytkai i e. Wuat'i Miit'in Ky'e hat uhewat­'ymo tut. Tuwe­kaipyi kahato aiky'e. Tuwe­kaipyi tewaku hap upi aiky'e yt kat sa'up i pytkai aiky'e. Po'og po'og to'o­to­te­tote aiky'e haype are uito Iuwãu Iesui piat pe.
JOH 1:17 Nimuat aha'a­se'i Musei henoi kahato wãi'e hap ahepuo ma'ato mesup koitywy ti Aipo­typot Tupana Mipo­'oro Sese Iesui henoi kahato ahepuo aiky'e hap Tupana piat pywuat sese hap sehay tohenoi — Pywo ti rat Tupana ti'a­tu­ky'e kahato miit'in haype tutum teran te'en ne'i tewa­nĩ­kaptia pe wuat'i e'at piat ieĩne'en hap e mekewat po'og aha'a­se'i Musei kawiat tutum ahepe.
JOH 1:18 Ta'i yt karamuo i ti miit'in te'e­ra­'a­kasa Tupana Sese kape. Ma'ato Tupana Sa'yru Sese ta'a­kasa kahato ra'yn Tupana Sese kape. Mi'i pote toikuap kahato Tupana moherep hap ahepuo katu­pono To'ywot yaty­pe­pywiat sut hat Mi'i Miit pote. Mi'i Miit Tupana Sese moherep kuap ahepe Ha'yru sese Mi'i Miit pote e Iuwãu mekewat wo'o­set'ok hat Iesui etiat sa'a­wy'i.
JOH 1:19 Wẽtup e'at pe hawyi mekewat Iuteu ywania akag ko'i tawa wato Ieru­sarẽi miaria gupte'en haria ti'a­tu­po­'oro pa'iria ase'i Irewi emiari­ru'in ko'i mekewat wo'o­set'ok hat Iuwãu kape apo'i­'a­tu'e hamo — Uwe sese kahato en uhyt i'atu'e. En apo Tupana Mipo­'oro Urupo­rekuat nuat sio yt i'atu'e.
JOH 1:20 Ma'ato toi'a­tu­wesat kahato heremo kahato — Uito ti yt Tupana Mipo­'oro Wuat'i Miit'in Ka'iwat nuat hin i e i'atuepe. — Yt uito i rat e.
JOH 1:21 Mi'i pote — Uweĩ sese pyno en sio apo sa'a­wy­'iwuat aha'a­se'i Tupana ehay moherep hat Eria put'ok'e i ra'yn atipy kaipyi apo pyno i'atu'e. — Yt mi'i i ti rat uito e. — Pyno en mekewat Tupana ehay enoi e'yianmiat hat urumie­katup sio yt i'atu'e. — Yt rat. Yt mi'i i ti rat uito e Iuwãu.
JOH 1:22 — Pyno ehenoi kahato ro uwe sese en hap katu­pono urupo­'oro haria tikuap teran kahato etiat uwe sese en hap i'atu'e. Eremo­herep to uruhenoi hãpyk mono urupo­'oro haria pe i'atu'e.
JOH 1:23 Mi'i hawyi toi'a­tu­wesat — Nimo te ti mio tã e aha'a­se'i Isaia tomiwan me 40.3 pe — Tut wyti aru wẽtup ok miit'in atumu'e yahig notiat hanuat e. Yahig notiat tehay pirik wuat wo'o­mu'e hat e. Aipo­rekuat Tupana Mipo­'oro ut hamuat moherep hanaut e hat e Isaia sa'a­wy'i miwan me e Iuwãu. Sa'a­wy'i Isaia ihay e'yianme uhetiat e mio tã e hap nug hat sese rat uito e Iuwãu pa'iria pe.
JOH 1:24 Mio tã e pote meimuẽwat Iuteuria akag ko'i mipo­'o­roria pa'i ko'i apo'i­'a­tu'e Iuwãu me
JOH 1:25 — Mehĩ i'atu'e pyno en yt Tupana Mipo­'oro wuat'i porekuat nuat pote kat pote pyno eti'a­tu­set'ok ai'y­wania y'y wo i'atu'e. Uito ere yt Eria i uito ere yt Tupana ehay moherep hat aimie­katup ne'i ti uito ere pyno kat tuponoĩ eti'a­tu­set'ok set'ok ai'y­wania y'y wo i'atu'e.
JOH 1:26 Mi'i hawyi Iuwãu ti'a­tu­wesat — Uito ti woro­ho­'o­set'ok y'y wo katu­pono atimo­herep teran ehepe tut irane Tupana Mipo­'oro aheha­kye­ra'at hamo e. Mi'i Miit toĩne'en mio eito­'oran me e. Ta'i Tupana Mipo­'oro toĩne'en mesup eipy­'a­setpe ma'ato uwe uwe Mi'i Miit sese yt eweikuap hin i te e.
JOH 1:27 Mi'i Miit ti uhewat­'ymuat tut irane ma'ato ti uhe'yianmiat hat sese Mi'i Miit toĩne'en wuat'i e'at pe e. Mi'i Miit waku sakpo e po'og waku kahato uikai e. Pywo ti rat uiwat po'og uhewaku hap yt put'ok'e hin i mekewat Miit eropat hamo e. Ahetama pe toĩne'en aipysei hanuaria aheropat hanuaria po'og torania kai miit'in miky­ry'i torania kai. Po'og yi kape torania aheropat hanuaria kai aipysei hanuaria e. Mi'iria ewywuat areĩne'en neran ma'ato Tupana Mipo­'oro Aipo­rekuat nuat emiit hit no wen ma'ato uhewaku hap yt put'ok'e i ipysei hamo ipy saity pok hamo e Iuwãu Iesui waku kahato hap moherep hamuat.
JOH 1:28 Mekewat e'at pe Iuwãu timo­herep kahato miit'in me tehay Aika­'iwat etiat yt pya hin i tawa Petania pyi Iũtãu hy sakpo aikope miit'in toi'a­tu­set'ok hap tote.
JOH 1:29 E'ihot'ok pe Iuwãu ta'a­kasa Iesui ut tewawiat hap. Mi'i hawyi to'e temiit'in me — Meipe ra'yn Tupana tum na'yn ahepe Tohũ e. Meiũran ti aru Meiẽwat Miit imoma yne miit'in minug sa'ag yt nakuap i hap ko'i e aikotã wati­'auka aihũria aiminug sa'ag moweityk hamuat mi'i ewywuat ti aru Tupana Hũ iku'uro aika­wiano e. Eweiwe­ha'at ro meipewat Miit kape katu­pono Mi'i Miit Tupana Hũ sese aheha­kye­ra'at hamo e Iuwãu Iesui ut tewawiat hap turan.
JOH 1:30 Pywo ti rat meipe Miit wyti uimienoi sa'a­wy­'iwuat ewywuat aikotã are'e — Uhewat­'ymo hamuat ti uhe'yianmiat tut ui'e hap ewywuat meipe Miit katu­pono uiwat ui'y­wã'ĩ hap e'yianme ti Mi'i Miit toĩne'en wuat'i e'at pe ma'ato uiat ui'y­wã'ĩ hap wat'ymo tuwe­mo­herep mesuwe i'ywã'ĩ hap e. Meipewat Miit po'og wakuat uikawiat are sa'a­wy'i e hap ewywuat koran tut ra'yn ahowawi e.
JOH 1:31 Ma'ato Uwe kahato hap Mi'i Miit sa'a­wy'i yt atikuap hin i e. Sa'a­wy'i mi'i yn ma'ato atikuap — Meiũran epotset'ok turan aru tuwe­mo­herep e'ywania ewawi Uimi­po­'oro Eipo­typot Tupana e hap yn ma'ato atikuap sa'a­wy'i. Mi'i pote woro­ho­'o­set'ok y'y wo e Iuwãu miit'in me Mi'i Miit moherep hamo tut uhowawi hap etiat e.
JOH 1:32 Wẽtup e'at pe Iuwãu ta'a­kasa Iesui kape hawyi to'e — Ha'a­wyte neke ara'a­kasa ra'yn uito Tupana Pã'ãu put'ok'e ra'yn meiẽwat Miit etiat atipy kaipywiat pykasu ewywuat tut e Iuwãu miit'in me.
JOH 1:33 Sa'a­wy'i yt atikuap i Mi'i Miit ma'ato uipo­'oro miit'in set'ok y'y wuat hat Tupana mio tã e uhepe — Meiũran tut aru ewawi miit'in set'ok Uipã'ãu wakuat nuat sese wuat hanuat e. Mi'i hawyi Uipã'ãu topy­hu'at aru ipiit ete hawyi etikuap Mi'i Miit Uimi­po­'oro ra'yn wuat'i miit'in ehakye­ra'at hamuat e Tupana ha'a­wyte uhepe e Iuwãu.
JOH 1:34 — Mi'i kape ti ara'a­kasa ra'yn mi'i tupono ahenoi hamuat ehepuo — Mi'i Miit ti Tupana Sa'yru sese ra'yn are e wo'o­set'ok hat Iuwãu ahepe.
JOH 1:35 Wẽtup e'at tokosap hawyi Iuwãu wo'o­set'ok hat toĩne'en i ra'yn Iutãu hy ẽpeke typy ok topot­mu­'eria wywo.
JOH 1:36 Mi'i hawyi ta'a­kasa i ra'yn Iesui ikosap turan hawyi to'e topot­mu­'eria typy ok pe — Meke i ra'yn tokosap Tupana Hũ e.
JOH 1:37 Hemiit'in tikuap ta'yn hawyi tuwat ra'yn Iesui upi.
JOH 1:38 Mi'i turan Iesui teha'at tosai­pepe toupiat õ'ẽ haria kape. Mi'i hawyi to'e i'atuepe — Kan eweikat uhyt'i'in e. — Wo'o­mu'e hat aikopeĩ ereĩne'en i'atu'e. Ma'ato ta'a­tu­pusu puo Irapi aikopeĩ ereĩne'en i'atu'e.
JOH 1:39 Mi'i hawyi Iesui ti'a­tu­wesat — Eweiwat uhupi hawyi atimo­herep mono aikope uheĩne'en hap ehepuo e Iesui. Mio tã e hawyi tuwat ra'yn Iesui upi aikope heĩne'en hap kape. Mi'i hawyi itote put'ok­'i­'a­tu'e wãtym'i turan. Mi'i hawyi itote tukup­te'en i'atue­wãtym na'yn Iuwãu potmu­'eria typy ok takaria.
JOH 1:40 Mi'i hawyi wẽtup ok Iuwãu potmu'e hat Ãtere ehap het rakat toĩne'en porap'i Iesui wywo hawyi toto ra'yn toyke'et Simãu Peteru kat hamo.
JOH 1:41 Toipuẽti hawyi to'e — Simãu e atipuẽti ra'yn wyti Tupana Mipo­'oro Aipo­rekuat nuat e ma'ato topusu puo — Atipuẽti ra'yn wyti Ahemesia e Simãu me.
JOH 1:42 Mi'i hawyi Ãtere tioto toyke'et Iesui kape hawyi Iesui to'e iyke'et pe — En ni Simãu Iuwãu sa'yru e ma'ato eset pakup atum epe mehĩ e. Koitywy ti aru Nu e ra'yn eset e Iesui. Ma'ato topusu puo Iuteuria ywania pusu puo Sewa eset e ma'ato Kereku pusu puo Peteru eset e.
JOH 1:43 Wẽtup e'at hawyi Iesui toto teran i ra'yn te'yi Karireia kape. Mi'i hawyi toto ra'yn.
JOH 1:44 Put'ok­to'e itotiat hawyi toipuẽti Wiripi tawa Pesaita kaipywiat mekewat Ãtere Peteru etawa kaipywiat. Mi'i hawyi Iesui to'e tope — To'iro uhupi e Wiripi pe hawyi toto ra'yn hupi.
JOH 1:45 Meiũran Wiripi toto towy ok Nata­na'eu kat hamo. Toipuẽti hawyi to'e — Are pãi koitywy atipuẽti ra'yn Tupana Mipo­'oro Aipo­rekuat nuat sese mekewat sa'a­wy­'iwuat Musei miwan miat mienoi ewy mekewat Tupana ehay nimuat e'yianmiat miwan miat mienoi ewy e. Mi'i Miit ti Iesui e hap het rakat mekewat mehĩ Iuse sa'yru e. Mi'i ti mekewat tawa Nasare kaipywiat sut hat e Wiripi towy ok Nata­na'eu pe.
JOH 1:46 Mio tã e hawyi Nata­na'eu to'e — U e eeso mehĩ e uiwa­nẽtup hawe yt uwe i rasom tawa Nasare piat waku rakat e Wiripi pe. Mi'i hawyi — To'iro pyno waku etikuap mono Iesui wakuat sio yt nakuat i hap kuap hamo e.
JOH 1:47 Ma'ato put'ok'e irane turan Iesui ti ta'a­kasa ra'yn Nata­na'eu kape hawyi to'e — Meiẽ meipe ti ra'yn ai'y­wania Isareu ywania sese hãpyk kahato rakat tut e.
JOH 1:48 Mi'i hawyi Nata­na'eu to'e Iesui pe — Aikotã tuponoĩ uikuap En Uhyt e. Mi'i pote Iesui tiwesat — Ha'a­wyte neke ewy Wiripi piat ekaykay hap e'yianmete mekewat Wiku yp ywyt'ok­pype ereĩne'en turan eweran turan tig ara'a­kasa ewawi Nata­na'eu e.
JOH 1:49 Mi'i pote Nata­na'eu to'e Iesui pe — Wo'o­mu'e hat En ni Tupana Sa'yru sese are. En ni Isareu ywania Porekuat koro e.
JOH 1:50 Mi'i hawyi Iesui tiwesat — Pyno meremo uimohey en mekewat Wiku yp ywyt'ok­pype ereĩne'en eweran turan ara'a­kasa ewawi ui'e hawyi yn uimohey ra'yn e. Pywo ti rat meiũran ti aru po'og po'og na'yn atimo­herep epe koran wuat kai e.
JOH 1:51 Sa'a­wy'i aha'a­se'i Iako pe Tupana timo­herep mu'ap yi totepyi atipy kape. Iako ta'a­kasa tomu­'etu atipy piaria mekewat mu'ap upi. Tuwat tuwat atipy piaria yi kaipyi atipy kape i'ewyte atipy kaipyi tõ'ẽ tõ'ẽ yi kape mekewat mu'ap upi hap kape ta'a­kasa aha'a­se'i. Mi'i mu'ap ewywuat sese areĩne'en mehĩ e. Meiũran era'a­kasa aru atipy te'o­ken­hyp'ok pe hawyi mi'i kape ti aru tuwat tuwat yi kaipyi Tupana potpo­'o­roria atipy piaria i'ewyte te'e­ra­'aipok aipok aipytyp kape e. Uito ti mekewat mu'ap atipy kape Uito Wuat'i Miit'in Yke'et sese kawiat mu'ap e. Mi'i hap kape era'a­kasa aru Nata­na'eu. Mi'i ui'e hap era'a­kasa hawyi po'og uimohey hap topy­hu'at mekewat — Ara'a­kasa en eweran turan Wiku yp og me ui'e hap kawiat e Iesui
JOH 2:1 Mye'ym e'at hawyi te'e­ru­wa­'a­tunug miit'in tawa Kana pe yi Karireia pe. Mi'i tote ta'a­tunug ienuk hap katu­pono typy ok wo'o­kyi'at hap e'at ta'a­tunug e'at itote. Iesui ty toĩne'en itote.
JOH 2:2 I'ewyte Iesui hemiit'in wywo ta'a­tu­wenka i'atu­wo­'o­kyi'at hap ienuk hap kape.
JOH 2:3 Mi'i turan ma'ato Uwa sapo hy ta'a­tu­mõ'ẽ yne ra'yn mi'i pote Iesui ty to'e — Yt kat i ra'yn wyti Uwa sapo hy meiũpe Uimẽpyt e.
JOH 2:4 Mi'i pote Iesui to'e — U mana kat som etiky­'esat atunug e. Koran te ti yt uipopap i te Tupana esaika hap moherep miit'in miat hamo e toty pe.
JOH 2:5 Mi'i hawyi ity to'e ienuk nug hat eropat haria pe — Kat e Uimẽpyt ehepe hap ewy ti aru ewetunug no eipo­'oro hap ok tã e.
JOH 2:6 Mi'i turan itote 6 kamũti wato nu kawiat ko'i tukup­te'en itote miit'in posei hamuat Iuteuria eko ewy. Wẽtup kamũti pe tukup­te'en 15 ekuiru'a piat y'y i'atu'e.
JOH 2:7 Mi'i hawyi Iesui to'e heropat haria pe — Ewei'a­tue­wo­pyro y'y wo kamũti ko'i e. Mio tã e hawyi ta'a­tu­pyt­'atnug yne ta'a­tue­wo­pyro ra'yn 6 kamũti.
JOH 2:8 Howapy yne hawyi Iesui to'e i'atuepe — Eweho­'osat ro koitywy kamũti piat kurin hawyi eweipo­me'eg no ienuk hap ka'iwat pe e. Mi'i hawyi ta'a­tue­reto mi'i kape.
JOH 2:9 Mi'i hawyi ienuk hap ka'iwat hã'ãg na'yn mekewat sapo hy yt y'y hin i ra'yn ma'ato Uwa sapo hy wo ra'yn topy­hu'at y'y. Ma'ato yt toikuap i aikope pywiat Uwa sapo hy wo hap ma'ato heropat haria yn ikuap. Mi'i hawyi ika'iwat tikaykay tuwe­wawi ihary'i rakat nuat.
JOH 2:10 Mi'i hawyi to'e tope — Mehĩ e sa'a­wy­'iwuat ienuk nug hawe ti uruimõ'ẽ miit'in me Uwa sapo hy he rakat e ma'ato wat'ymo ti i'atu'ok hawyi uruimõ'ẽ heĩpyt yt he rakat i ra'yn e ma'ato en wyti yt uru'ewy hin i kat pote wat'ymuat ra'yn po'og he rakat sa'a­wy­'iwuat kai etum uruepe Uwa sapo e. Ta'i he sese ti rat mesuwat sopo hy e iwary pakup takat pe.
JOH 2:11 Yt miit'in mikuap ok tã i Iesui ha'a­wynug itote Uwa sapo hy he rakat y'y kawiat 6 kamũti howapy toimo­herep y'y kawiat itote. Sa'a­wy'i yt totag i te turan yt karãpe i Iesui timo­herep tesaika hap iwato hap nug hamuat mekewat Tupana yn inug kuap minug ewy. Sa'a­wy'i toha­'a­wynug mi'i tã tawa Kana pe yi Karireia pe. Toimo­herep Tupana esaika hap topiit pywiat wakuap nug hamuat kuap hap itote. Uwa hy tutunug y'y kawiat te'e­ra­'a­kasa hawyi ti te'e­ro'e ra'yn — Pywo ti rat Iesui ti Tupana Mipo­'oro Aipo­rekuat nuat i'atu'e ipotmu­'eria.
JOH 2:12 Mi'i hawyi ti Iesui toto tawa Kana kaipyi tawa wato Kawa­na'ũ kape toty to'y­wyt'in sese tehay towy­ria'in wywuat hamo. Mi'i hawyi tukup­te'en porap'i itote.
JOH 2:13 Mi'i hawyi Iuteuria wa'a­tunug hap e'at put'ok'e irane i ra'yn mekewat te'e­ru­wa­nẽtup aikotã sa'a­wy'i Tupana ti'a­tuhep wanĩ­kaptia po pywiat hap e'at put'ok'e. Mi'i hawyi Iesui toto Tawa koro Ieru­sarẽi kape.
JOH 2:14 Put'ok'e hawyi Tupana mõtypot hap yat wato pe Iesui teke. Mi'i hawyi Tupana mõtypot yat e'okipy tote toi'a­tu­puẽti hũria wewato ahup weneru haria uweria ko'i weneru haria pykasu weneru haria sem toipuẽti i'ewyte toipuẽti tineiru pore­ra'at haria apyk puaria yparakai ypyke tukup­te'en toi'a­tu­puẽti.
JOH 2:15 Mi'i pote Iesui tunug haity kawiat i'atu­'a­piheg hamuat tutunug. Mi'i hawyi haity wo toi'a­tu­sytpok kahato Tupana mõtypot ehũria weneru haria. I'ewyte toi'a­tu­sytpok wewato ahup ko'i uweria ko'i toi'a­tu­sytpok Tupana mõtypot yat pyi. Mi'i hawyi wuat'i etama etineiru pat'ok pat'ok haria yparakai ko'i toi'a­tu­'ã­pe­'okpun na'yn tohytpok yne tineiru ko'i yi tote.
JOH 2:16 Mi'i hawyi Iesui to'e pykasu weneru haria puo — Ewei'a­tu­po­re­nõtem no ehepy­kasu ko'i Tupana mõtypot hap yat pyi e. Wãi yt ewetunug nei'o Ui'ywot mõtypot yat wene­ru'i wene­ru'i ehap yat no e. Moto ro mesu­wepyi e.
JOH 2:17 Toi'a­tu­sopo sopo yne hawyi hemiit'in te'e­ru­wa­nẽtup ta'yn aikotã sa'a­wy'i miwan me tohenoi hap kape — Atiky'e kahato emõtypot yat Tupana e. Emõtypot hap yn atiky­'esat ne'i e mi'i pote ti aru ui'auka teran ne'i e miwan me sa'a­wy'i sese Iesui hap kape Saumu 69.9 pe.
JOH 2:18 Mi'i hawyi Iuteuria akag ko'i apo'i­'a­tu'e — Uwe kahu epo'oro meke tã nug Tupana mõtypot yat piat hamo i'atu'e. Yt naku i meke tã ehap etunug pãi i'atu'e. Kat pote eti'a­tu­sytpok sytpok mesuwe i'atu'e. Tupana epo'oro mi'i tã nug hamo pote etomo­herep to koitywy eminug iwato rakat Tupana esaika hamo uruepiat emohey kuap hamo i'atu'e katu­pono merep hap ewy etimo­herep mesuwe hawyi uruikuap ta'yn Tupana sese epo'oro meke tã nug hamuat hap i'atu'e.
JOH 2:19 Mi'i hawyi toi'a­tu­wesat — Pyno waku iwato kahato atimo­herep ehepe e. Ewei'a­porok meiũwat Tupana yat wato pote ati'ã­pe­'ok'am i ra'yn mye'ym e'at pe yn atunug i ra'yn e Iesui Iuteuria akag ko'i pe.
JOH 2:20 — Eeso kahato i'atu'e kat pote sa'a­wy­'ite nagnia tunug niatpo kahato 46 anu pe ta'a­tunug meiũwat Tupana mõtypot yat wato i'atu'e. Aikotã ten pyno etunug kuap mye'ym e'at pe yn i'atu'e.
JOH 2:21 Ma'ato hã'ãkap wuo Iesui henoi i'atuepe. Mio tã e topiit etiat pe Tupana yat e. Ma'ato Iesui wyria'in i wyti mio tã e hap yt uwe i ikuap ma'ato meiũran Iesui iku'uro hawyi toĩne'en i ra'yn gu'uro pyi hawyi ta'a­tukuap ta'yn kat som to'e sese hã'ãkap wuo hap.
JOH 2:22 Mi'i hawyi ta'a­tu­mohey po'og Iesui ehay i'ewyte ta'a­tu­mohey po'og sa'a­wy­'iwuat Tupana e hap. — Pywo ti Tupana ihay kahato nimuat Iesui ete miwan me i'atu'e.
JOH 2:23 Mekewat ienuk wato turan Iesui ti'a­tu­moe­hãite kahato tawa Ieru­sarẽi miaria i'ahu rakaria. Mi'i pote typy'i kahato itotiaria tipywo ra'yn Iesui kat pote te'e­ra­'a­kasa ra'yn iwat iminug ko'i yt miit'in minug kuap ewy i ko'i kape. — Pywo Mi'i Miit Tupana Mipo­'oro Aipo­rekuat koro wo i'atu'e.
JOH 2:24 Ma'ato Iesui yt tipywo hin i tomohey i'atuepiat hap katu­pono toikuap ta'yn yt towat temiit'in sese i hap toikuap.
JOH 2:25 Yt uwe i henoi Iesui pe miit'in etiat wen ma'ato toikuap ta'yn miit'in wanẽtup hap ko'i tuwe­kaipyi. Toi'a­tukuap kahato miit'in haype. Toikuap tuwewi miit'in wanẽtup hap ko'i.
JOH 3:1 Toĩne'en tawa Ieru­sarẽi me wẽtup ok miit Niku­temu e hap het rakat. Mi'i ti Iuteuria ywania akag i'atu­nãpin koro hat. Wẽtup mo wãtym muo Niku­temu toto Iesui kape.
JOH 3:2 — Urumu'e hat e ewat eminug wakuap ko'i yt uwe misepap ewy i ra'yn e. Mi'i pote uruikuap Tupana epo'oro urumu'e hamo hap uruikuap mehĩ e. Mi'i pote uruikuap Tupana toĩne'en ewywo kahato Mehĩ e Iesui pe.
JOH 3:3 Ma'ato Iesui tiwesat — Pywo pe ti are'e epe uwe uwe i'ywã'ĩ pakup mi'i haria yn ni te'e­ro­py­hu'at Tupana miit no e. Pywo ti rat wemo­herep pakup i haria tukup­te'en aru atipy pe aikope Tupana toĩne'en Morekuat no hap tote are uhyt e.
JOH 3:4 Mi'i hawyi Niku­temu — Yt uwe kuap i ra'yn ten teke pakup i toty ymyẽ pe urumu'e hat e aikotã som pyno waku watu­we­mo­herep pakup i hap e.
JOH 3:5 — Mesuwat ui'e hap ti pywo pe are'e wemo­herep pakup i haria yn ni te'e­ro­py­hu'at kuap Tupana emiit no e. Tupana aikoho hawyi ti tutum Topã'ãu hawyi tomẽpyt no ainug e. Mi'i hap ewy yn ni te'e­ro­py­hu'at miit'in Tupana mẽpyt'in no e Iesui are.
JOH 3:6 — Ma'ato to'ywot kaipywiat wemo­herep hat ti miit yn na'yn topy­hu'at ma'ato Tupana pã'ãu kaipywiat wemo­herep hat ti Tupana mẽpyt ri ra'yn tuwe­mo­herep e.
JOH 3:7 Kat pote yt hot'ok'e i uimienoi e'ywã'ĩ pakup i ro ui'e hap e Iesui.
JOH 3:8 — Pyno ahenoi po'og epe aikotã miit'in wemo­herep pakup i hap ete e. Pyno mi'i tã aikotã ywytu hewyry tomi­ky­'esat ewy kahato hap ewy e. Ipu'ehay watikuap kahato wen ma'ato aikope pyi wasere tut hap yt uwe i ikuap i'ewyte ito hap yt uwe i ikuap. Mi'i hap ewy Tupana Pã'ãu tomo­herep pakup i miit'in tomi­ky­'esat ewy e. Yt heremo i Tupana Pã'ãu ywytu ewy ma'ato put'ok'e hawyi watikuap Tupana ra'yn Tupana sa'yru wo Tupana saki'yt no wato­py­hu'at e.
JOH 3:9 Mi'i hawyi Niku­temu to'e — Yt atikuap i te emienoi Uhyt e.
JOH 3:10 — Pãi are en ai'y­wania Isareu ywania mu'e hat koro kahato pytkai yt etikuap i mio wuat uimienoi epiat e Iesui.
JOH 3:11 — Pywo pe ti ahenoi epe mesuwat urumikuap ok tã e. I'ewyte uru'a­kasa hap ok tã ma'ato yt etimohey i urumienoi ko'i e.
JOH 3:12 Miit'in misepap sehay puo mesu­wa­rotiat ra'yn ahenoi epe ma'ato mi'i pytkai yt etikuap hin i ui'e hap aikotã aporu etikuap uimienoi Tupana misepap sehay puo atipy totiat ra'yn ahenoi epe pote e.
JOH 3:13 Yt uwe i mi'i rẽ toto atipy kape. Wẽtup ok yn toto atipy kape mi'i ti wuat'i miit'in yke'et e tuwepe. Yt uwe i mi'i rẽ toto atipy kape. Wẽtup ok yn toto Mi'i Miit'in Yke'et Mi'i ti atipy kaipywiat. Mi'i yn ni henoi kuap sese Tupana misepap sehay atipy kaipywiat e.
JOH 3:14 Sa'a­wy'i aha'a­se'i Musei timo­poĩ'ãm aria'yp posak ete moi iã'ãkap imehit rakat mohag wo. Mi'i tutunug yahig note moi tok pe moi mieka­tu'u ko'i moehãite hamo ipap tet pupi. Mi'i hap ewy ti aru uito miit'in yke'et ta'a­tu­mo­poĩ'ãm aria'yp posak ete e.
JOH 3:15 Mi'i hawyi meiẽwat i'atu­mi­mo­poĩ'ãm mohey haria wyti aru wuat'i e'at piat ieĩne'en hanuaria tukup­te'en e. Uimo­poĩ'ãm aru mekewat moi iã'ãkap ewy miit'in moieĩne'en hamuat e Iesui.
JOH 3:16 Katu­pono Tupana ti'a­tu­ky'e kahato miit'in haype tutum Tosa­'yru wẽtup ok takat i'atuepe e. Mi'i pote uwe uwe imohey mi'i haria wyti aru yt iku'uro sese i ma'ato wuat'i e'at pe ra'yn i'atue­hãite hap toĩne'en e Iesui.
JOH 3:17 Ta'i Tupana tipo­'oro Tosa­'yru miit'in ehakye­ra'at hanuat sese. Ta'i yt miit'in atuma­'at'i ma'at'i hamo i Tupana tipo­'oro Tosa­'yru e.
JOH 3:18 Uwe uwe Ha'yru mohey haria ti Tupana yt ti'a­tu­'a­piheg i ma'ato irania'in ti aru Tupana mi'a­tu­'a­piheg wuanuaria tukup­te'en mi'iria are. Mi'iria pe wyti aru mio tã e Tupana — Yt nakuaria i sese eipe e katu­pono Uha'yru uimiium pun haria eipe e.
JOH 3:19 — Atum kahu ra'yn Uha'yru ariãty ewy ehepe mekewat mu'ap uhowawiat moherep hamuat wen ma'ato yt eweiky­'esat i Uha'yru ariãty ewywuat e. Yt naku i eipe e katu­pono po'og i'ypyryp hap ne'i mi'i haype eweiky­'esat are katu­pono eiminug sa'ag hap nug hap po'og eweiky­'esat i'ypyryp wiat haype e. Mi'i pote i'ypyryp we yn eweikup­te'en e. Mi'i hap ete atikuap kahato uwe yt nakuaria i hap e Tupana.
JOH 3:20 Yt nakuat i nug haria i'atu­py­'ahak kahato ne'i ariãty ete. Ta'a­tu­ky­'esat pya kahato ta'a­tu­kawiat hẽtyhot hap katu­pono ta'a­tu­minug sa'ag ko'i moherep hap yt ta'a­tu­ky­'esat i haype e.
JOH 3:21 Ma'ato irania'in wakuap nug neran haria tõ'ẽ tõ'ẽ ariãty kape katu­pono ta'a­tu­ky­'esat ta'a­tu­minug wakuat ko'i Tupana esaika hap wywuat moherep hamo ta'a­tu­ky­'esat kahato e Iesui Niku­temu pe.
JOH 3:22 Meiũran hawyi toto Iesui yi Iuteu kape. Topot­mu­'eria wywo yn toto. Mi'i hawyi toĩne'en mot'i itote topot­mu­'eria wywo. Mi'i tote hemiit'in ti'a­tu­set'ok kahato miit'in y'y pe ma'ato yt Iesui i i'atu­set'ok ma'ato ipotmu­'eria ne'i i'atu­set'ok.
JOH 3:23 Mekewat e'at pe topyhik hap e'yianmete wo'o­set'ok hat Iuwãu ti'a­tu­set'ok miit'in tawa hit Enũ pe yt pya hin i tawa Sarẽi kai.
JOH 3:24 Toiky­'esat Enũ hy miit'in set'ok hamo ihy wato pote. Mi'i kape tõ'ẽ tõ'ẽ miit'in Iuwãu kape te'e­ru­we­set'ok y'y piat hamo.
JOH 3:25 Itote tu'uka tu'uka to'ope sehay wo Iuwãu potmu­'eria wẽtup ok Iuteu wywo aikotã aikotã som po'og hãpyk wati­'a­tu­set'ok miit'in ta'a­tu'e hap ete tu'uka sehay wo.
JOH 3:26 Mi'i hawyi tuwat Iuwãu kape te'e­ro'e hamo — Urumu'e hat i'atu'e mekewat ihainia Iutãu e'y sakpuat emimo­herep sa'a­wy­'iwuat wyti toĩne'en mio meiũpe yi Iuteu pe. Koitywy miit'in toi'a­tu­set'ok kahato ra'yn itote po'og aikai. Yt naku i mi'i tã uruto'e katu­pono koitywy wyti wuat'i miit'in tuwat kahato mi'i hat kape te'e­ru­we­set'ok hamo hawyi yt tõ'ẽ i po'og ahowawi i'atu'e Iuwãu me.
JOH 3:27 Mi'i hawyi Iuwãu ti'a­tu­wesat — Pyno po'og waku eweiwat Mi'i Miit upi po'og waku eweikup­te'en Mi'i Miit emiit'in no uhemiit'in e katu­pono Tupana tiky­'esat wuat'i miit'in Mi'i Miit wanuat sok hap e. Toiky­'esat kahato yne miit'in tuwat Mi'i Miit kape are e. Uito rat yt Tupana Mipo­'oro Eipo­rekuat nuat i rat e sa'a­wy'i ma'ato uito Tupana Mipo­'oro yianmiat Aipo­rekuat sese hut hamuat enoi hat ne'i uito are'e sa'a­wy'i ehepe hap ewy e Iuwãu.
JOH 3:28 Mi'i hat ne'i uito are e. Mi'i pote uiwepit kahato Mi'i Miit mõtypot hap ete e. Ta'i uiwepit aikotã uiwyok ehary'i wuanuat kat hat ewy ne'i uito e Iuwãu. Toterut ihary'i wuat towy ok kape hawyi towy'ok miky­'esat tohenoi ihary'i wuanuat pe. Toiky­'esat pote tut te'aito wuat kape.
JOH 3:29 Mi'i hawyi to'o­kyi'at ra'yn. Uito ti areĩne'en aikotã wewy ok ehary'i kat hat ewywuat areĩne'en e Iuwãu. Meiẽwat Miit topy­hu'at teha­ry'i uimi­puẽti wywo. Mi'i hawyi ihary'i pakup takat iwepit kahato e. Iwepit pote uito i'ewyte uiwepit ihary'i erut hat uito pote. Mi'i hap ewy uito uiwepit kahato katu­pono uipot­mu­'eria tuwat yne ra'yn Iesui kape are e. Mio aru ipotmu­'eria tukup­te'en uipot­mu­'eria ko'i. Ihary'i pakup ewywuat ipotmu­'eria are sehay iã'ãkap wuo e Iuwãu wo'o­set'ok hat.
JOH 3:30 Mi'i Miit wyti po'og po'og wakuat uikawiat hat e.
JOH 3:31 Mi'i Miit atipy kaipywiat po'og wakuat wuat'i kawiat hat are. Yi totiaria ti ta'a­tu­mikuap ok tã yn henoi kuap ma'ato atipy kaipywiat sut hat mienoi po'og iwato yi totiaria mienoi kai are e.
JOH 3:32 Atipy kaipywiat ta'a­kasa hap tohenoi tomikuap ok tã tohenoi ma'ato Mi'i Miit yt uwe i imohey e Iesui piat.
JOH 3:33 Ma'ato wato­mohey atipy kaipywiat mienoi hawyi ti watikuap ti meremo pywuat sese e Tupana wato'e hap e.
JOH 3:34 Tupana Mipo­'oro atipy kaipywiat wyti henoi hãpyk yne kahato topo­'oro hat ehay upi katu­pono tutum yne Topã'ãu tehay enoi hanuat pe e.
JOH 3:35 Ta'i Tupana tiky'e kahato ti Tosa­'yru mi'i tupono tutum yne ipo pe e.
JOH 3:36 Pyno ti wato­mohey pote yn wuat'i e'at pe ra'yn ahehãite ma'ato yt wati­hay­mohey i Ha'yru pote ti yt karãpe i watoĩ­ne'en ahehãite hap ma'ato watu­kup­te'en Tupana mi'a­piheg ko'i wo e wo'o­set'ok hat Iuwãu topot­mu­'eria pe.
JOH 4:1 Yi Iuteu piat toĩne'en hap e'at pe Iesui ti'a­tu­set'ok kahato miit'in topot­mu­'eria po wo kat pote yt tohet'ok i topo wo.
JOH 4:2 — Po'og po'og iwat ipotmu­'eria Iuwãu potmu­'eria kai po'og po'og miit'in toi'a­tu­set'ok Iuwãu kai i'atu'e nagnia ehay enoi haria.
JOH 4:3 Mio tã i'atu'e hawyi Iesui toto ra'yn Iuteu e'yi pyi.
JOH 4:4 Mi'i hawyi Iesui toto te'yi Karireia kape yi Samaria puo toto. Yt toto i mekewat wẽtup mu'ap upi katu­pono toto teran yi Samaria puo.
JOH 4:5 Mi'i hawyi toto tawa Sikat kape yi Samaria puo. Itote nimo kahato ra'yn aha'a­se'i Iako toĩne'en. Sa'a­wy'i te'yi tutum na'yn tosa­'yru Iuse pe. Mi'i tote ti ase'i tunug y'y yi pan me. Mi'i hap kape Iesui toto.
JOH 4:6 Atpo­sake turan put'ok'e mekewat yi ka'a ẽpeke hawyi Iesui ta'apyk yi ka'a pyhyp hap ẽpeke. Tuwe­mohy ra'yn mu'ap hake topy­sero ra'yn pote.
JOH 4:7 Itote pyi ma'ato ipotmu­'eria ra'yn tuwat tawa Sikat kape mi'u so'o­kyi'at hamo.
JOH 4:8 Mi'i pytkai wẽtup ok hary­poria tut ra'yn y'y so'osat hamo. Put'ok'e tipytpe hawyi Iesui to'e tope. — Eherut ro uhepe y'y mana e.
JOH 4:9 Mi'i pote toiwesat — En ni Iuteu ywania ma'ato uito ti Samaria ywania ne'i e. Kat poteĩ ehay uiwywo mimi yt eheko ewy i e. Kat pote uipo pyi etiky­'esat y'y mimi e katu­pono Iuteuria ywania yt to'oehay teran i yi Samaria ywania wywo e.
JOH 4:10 Mi'i hawyi toiwesat — Yt etikuap i kahato mana uwe y'y ẽtup epe e. Yt etikuap i kahato kat som Tupana tum neran epe mana e. Etikuap pote meremo ehẽtup uhepe y'y sese wo'o­moieĩ­ne'en hap emoieĩne'en hamuat wuat'i e'at piat hamuat e.
JOH 4:11 Mio tã e hawyi toiwesat — Yt kat i kahu ekuiru'a saity etiat y'y sat hamuat e katu­pono meiũwat pyi pya poity'i yi pe y'y e. Aikotã aru pyno etum uhepe y'y uimoieĩ­ne'en hamuat e.
JOH 4:12 Nimo kahato urue'a­se'i Iako ti hum uruepe mesuwat yi ka'a piat y'y sat hap e. Sa'a­wy'i ti Iako mẽpyt'in te'e­ru­we­'y'u mesuwat yi ka'a piat y'y wo. I'ewyte iwat ihũria te'e­re­'y'u meiũpe i'ewyte urue'a­se'i Iako te'y'u meiũpe mimi e. En apo pyno po'og wakuat y'y moherep hat urue'a­se'i Iako kai mimi e.
JOH 4:13 Mio tã e hawyi toiwesat — Uwe uwe te'y'u meiũwat pe meiũran te'y­'utui i ra'yn.
JOH 4:14 Ma'ato uwe uwe mekewat uimiium y'y wo te'e­re­'y'u mi'i haria ti aru yt karãmuo i ra'yn te'e­re­'y­'utui i e katu­pono uimiium y'y toĩne'en emoieĩne'en hamuat wuat'i e'at piat ihãite rakat ra'yn. Uimiium y'y yrasa sese ewy ra'yn tuwẽtem y'y epy'a pyi mana e.
JOH 4:15 — Pyno mimi etum no uhepe ewat e'y'y e. Mi'i rokirẽ mono yt karãmuo i ra'yn are'y­'utui hawyi yt karãmuo i ra'yn ariot meiũpe y'y so'osat hamo e.
JOH 4:16 Mio tã e hawyi Iesui timo­herep ta'yn hary­poria pe iminug sa'ag ko'i. Mi'i pote to'e tope — Pyno eterut ro e'aito uhowawi mana e.
JOH 4:17 — U an mimi yt uhe'aito i rat e. Mio tã e ne'i toiwesat pote to'e — Pywo pe ti mio tã ere mana katu­pono yt e'aito kahato i.
JOH 4:18 Mio ti wẽtup ok e'aito wywo i ra'yn ereĩne'en. Ha'a­wyte ti e'aito wo 5 ok wẽtup ok wẽtup ok tuereto wo mi'iria eti'a­tu­'atoiat yne. Yt naku i mi'i tã mana e. Mio tã e Iesui tomo­herep hary­poria pe yt iwe'eg i hap kuap haype.
JOH 4:19 Mi'i pote toiwesat — Are an Mimi En ni Tupana mikuap yn moherep hat e.
JOH 4:20 Sa'a­wy'i uru'y­wot'in tomõ­typot Tupana mesuwat e'yity'ok totepyi Mimi ma'ato eiperia Iuteuria tawa Ieru­sarẽi me yn waku wato­mõ­typot Tupana e haria eipe e.
JOH 4:21 Mi'i hawyi to'e — Etimohey ro ui'e hap mana e. Meiũran ti aru yt eweiwat i ra'yn meiũwat yity'ok kape. Yt uwe i tuwat aru Tupana mõtypot tawa Ieru­sarẽi kape Tupana mõtypot hamo katu­pono wẽtup e'at pe ti aru miit'in pywiat yt sa'a­wy­'iwuat ewy i ra'yn timõ­typot haty wo Tupana sese aikope aikope hap upi.
JOH 4:22 Ei'y­wania yt ikuap i kahato Tupana mõtypot hap are. Uwe Tupana sese hap yt eweikuap hin i are. Ma'ato uruto uruikuap kahato Tupana katu­pono Iuteuria ywania kaipyi tut ra'yn miit'in ehakye­ra'at hat e.
JOH 4:23 Mesup ti aru tut ra'yn Tupana mõtypot hap yt mesuwat ewywuat i ra'yn katu­pono Tupana mõtypot haria sese ta'a­tu­py'a pywiat ta'a­tu­wa­nẽtup hap kaipywiat ra'yn imõtypot hãpyk kahato haria ra'yn tukup­te'en Tupana miky­'esat ewy e.
JOH 4:24 Tupana toĩne'en Ipã'ãu yn yt heremo i mi'i tupono toiky­'esat tomõ­typot hap yt heremo i. Aiwa­nẽtup we yn pywo sese e hap kaipywiat aipy'a pywiat mio toiky­'esat tomõ­typot hap mana e.
JOH 4:25 — Are an atikuap teran meiũran ti aru Tupana tipo­'oro temiit Aipo­rekuat nuat aimu'e yne hamuat mekewat Wuat'i Miit'in Porekuat e hap het rakat e.
JOH 4:26 — Yt meiũran i ra'yn ti aru mana katu­pono tut kahu ra'yn. Uito ra'yn meiũ hemiit mana e Iesui.
JOH 4:27 Mi'i turan ipotmu­'eria put'ok­'i­'a­tu'e mi'u kyi'at hawyi. Mi'i hawyi te'e­ra­'a­kasa Iesui ihay hary­poria wywo. Mi'i hawyi te'e­ru­wa­nẽtup kahato — Kat poteĩ Iesui ihay hary­poria wywo i'atu'e. Irania'in wo'o­mu'e haria yt i'atuehay teran i hary­poria wywo ahetama puo i'atu'e te'e­ru­wa­nẽtup hawe.
JOH 4:28 Mi'i hawyi mana toiat tekui­ru'a mekewat y'y sat hap itote hawyi toto meremo tetawa Sikat kape.
JOH 4:29 Put'ok­to'e hawyi to'e itotiaria pe — To'iro woro­ho­'o­mo­'a­kasa wẽtup ok miit iuẽpiat kape yne uiminug sa'ag toimo­herep ta'yn yt uwe i piat henoi pytkai e. Tupana Mipo­'oro Aipo­rekuat nuat apo Mi'i Miit e i'atuepe.
JOH 4:30 Mi'i hawyi tuwat tuwat hary­poria upi tawa pyi te'e­ra­'a­kasa Iesui kapiat hamo.
JOH 4:31 Mi'i turan Iesui emiit'in te'e­ro'e Iesui pe — Urumu'e hat waku ra'yn aimi'u. Erenuk to i'atu'e.
JOH 4:32 Ma'ato toi'a­tu­wesat — Waku ra'yn e ui'ok ta'yn e. Toĩ uimi'u yt eimikuap i ma'ato e.
JOH 4:33 Mi'i pote to'ope apo'i­'a­tu'e — Toĩ apo wẽtup ok imi'u erut hat meiko pe tawa pe ahewyry turan i'atu'e.
JOH 4:34 Mi'i pote Iesui to'e. — Uiwy­ria'in e aikotã mi'u wo ai'ok hawyi aimo­wepit kahato mi'i hap ewy uipo­'oro hat miky­'esat nug uhepiat hap uimo­wepit kahato atu'u hawyi e.
JOH 4:35 Uiwy­ria'in mio tã ewei'e eiwo­'ope. Meiũran 4 ewaty hawyi ti aru aimikoi waku ra'yn haat ra'yn ewei'e eiwo­'ope e. Uito ti ma'ato are'e ehepe ewei'a­kasa ro aiko kape are ewei'a­kasa ro Samaria ywania kape e.
JOH 4:36 Mio ti haat ra'yn waku ra'yn eweiterek to are ra'yn ehepe e. Wẽtup ok ikoi hat wẽtup ok iterek hat e miwan me hap ewy are ehepe. Uwe ipotpap ikoi hap ete uwe ipotpap iterek hap ete mi'i hat tipuẽti aru tosa'up e.
JOH 4:37 Pywo ti Tupana ehay sytpok haria imipo­'o­roria tipuẽti aru ha'up e. Iterek tipyt saipepe ti aru typy'i ra'yn miit'in wuat'i e'at piat ieĩne'en hanuaria ra'yn tukup­te'en mekewat e'at pe e. I'atu­wepit kahato ikoi haria iterek haria e.
JOH 4:38 Mi'i tã woro­ho­'o­po­'oro mikoi terek hamo ra'yn aikope ha'a­wy­te­wuaria ei'yian­miaria ikoi hap kape hap ewy woro­ho­'o­po­'oro e. Aikope Tupana ehay moherep haria i'atu­potpap sa'a­wy'i hap kape woro­ho­'o­po­'oro e. Ta'i haat ra'yn wyti ikoi hawuo mio uipot­mu­'eria e. Ewei'a­kasa ro e.
JOH 4:39 Mi'i to'e turan tõ'ẽ kahato tuwe­wawi typy'i ra'yn yi Samaria piaria Iesui mohey haria wo te'e­ro­py­hu'at mekewat hary­poria ehay upi. — Tupana Mipo­'oro Aipo­rekuat nuat apo iuẽpiat Miit katu­pono yne uiminug sa'ag moherep yt uwe i piat henoi pytkai hat mi'i e hap upi.
JOH 4:40 Put'ok­ta­'a­tu'e hawyi te'e­ro'e Iesui pe — Waku ereĩne'en uruetawa pe mehĩ i'atu'e. Mio tã i'atu'e pote ti typy e'at toĩne'en i'atue­tawa pe.
JOH 4:41 Mi'i hawyi toi'a­tu­mu'e ra'yn itotiaria. Mi'i hawyi itotiaria typy'i ra'yn Iesui mohey haria te'e­ro­py­hu'at.
JOH 4:42 Mi'i hawyi te'e­ro'e — Mana i'atu'e sa'a­wy­'ite ti ehenoi uruepe hawyi uruimohey ra'yn ma'ato mio Iesui uruikuap ta'yn ihay. Uruwa­nẽtup hawe toĩne'en na'yn. Mi'i tupono — Mi'i ti rat mesuwat yi totiat wo'oe­ha­kye­ra'at hat uruto'e. Koitywy uruikuap ta'yn uruimohey ra'yn po'og sa'a­wy­'iwuat — Ai'ywot Tupana Mipo­'oro Aika­'iwat nuat e'e hap ewy mana i'atu'e.
JOH 4:43 Toĩne'en Iesui yi Samaria pe typy e'at hawyi toto ra'yn tomotag hap yi Karireia kape.
JOH 4:44 Mu'ap upi Iesui to'e topot­mu­'eria pe — Ara'aipok hamuat uimotag hap kape tawa Nasare kape e. Pywo pe are'e ehepe Tupana ehay moherep hat wyti imotag haria yt timõ­typot i yt ta'a­tu­mohey i yt ta'a­tu­'ok­sat'i i e Iesui.
JOH 4:45 Put'ok'e Iesui yi Karireia pe hawyi itotiaria i'atu­wese tuete kat pote te'e­ra­'a­kasa ra'yn imisepap ko'i tuwat hupiat tawa Ieru­sarẽi kapiat hawyi ienuk hap koro e'at pe.
JOH 4:46 Mi'i hawyi Iesui toto tawa Kana kape yi Karireia piat aikope Uwa hy nug y'y kawiat hap kape toto. Yt pya i tawa Kana kai toĩne'en wẽtup tawa Kawa­na'ũ e hap. Itotiat tawa ka'iwat sa'yru ti i'ahu kahato rakat.
JOH 4:47 Karãpeĩ mi'i turan i'ywot tikuap ta'yn Iesui put'ok'e tawa Kana pe hap mi'i hawyi toto meremo hẽtup hamo — Uha'yru moehãite epiat hap ti atiky­'esat e. I'ahu kahato iku'uro hamuat uha'yru uhyt e. Mi'i pote more­reto teran uhetawa Kawa­na'ũ kape imoehãite hamo e.
JOH 4:48 Mi'i pote Iesui tiwesat — Are pãi yt ewei'a­kasa i uiminug wakuap ko'i kapiat pote rasom yt uimohey hin i eipe e.
JOH 4:49 Ma'ato i'ahu rakat ywot to'e — Merep to mehĩ. Iku'uro irane uha'yru e.
JOH 4:50 Ma'ato Iesui tiwesat — Yt iku'uro i esa'yru uhyt. Ihãite ra'yn emẽpyt e. Pyno era'aipok i ro e'yat kape katu­pono waku ra'yn e Iesui. Mi'i hawyi imohey hap wywo toto tosa­'yru kape.
JOH 4:51 Mi'i hawyi mu'ap tote hemiit'in tõ'ẽ heowa kape — Uruka­'iwat i'atu'e ihãite ra'yn ti esa'yru uhyt i'atu'e.
JOH 4:52 Mi'i hawyi apo'e — Kat e'at kahu uha'yru ihãite e. — Ga'atpo atpo­sake pyi ti ipiit sakup nik tokosap ta'yn meremo ihãite ra'yn i'atu'e.
JOH 4:53 Mi'i hawyi iwatetup ta'yn Iesui atpo­sake pyi to'e hap kape — Ihãite i ra'yn ti esa'yru e hap kape. Mi'i hawyi i'ywot timohey ra'yn Iesui. Torania ra'yn itotiaria imohey i'yat piaria ta'a­tukuap hawyi.
JOH 4:54 Mi'i tomi­sepap tutunug na'yn yi Karireia pe ta'aipok yi Iuteu kaipywiat hawyi. Typuo ra'yn wakuap tutunug iwato rakat tomi­sepap yi Karireia piaria ete. Sa'a­wy'i tutunug sapo hy y'y kawiat. Mi'i hawyi toimoe­hãite pya pyi ha'yru iku'uro irane rakat.
JOH 5:1 Mi'i hawyi yi Karireia kaipyi Iesui toto tawa Ieru­sarẽi kape i ra'yn ienuk hap koro kape toto.
JOH 5:2 Mi'i hawyi Ieru­sarẽi me toĩne'en yt pya i oken'ypy kai y'y eiam iwato rakat Peteta e hap het rakat. Mi'i tote y'yẽpe ete 5 og toĩne'en. Mi'i ti yt pya i aikope i'atuhũ uweria ko'i e'oken­'ypy kai aikope tuwe­hyt'ok i'atu­hũria Ieru­sarẽi me hap.
JOH 5:3 Mi'i tote i'atue'og me tukup­te'en i'ahu rakaria typy'i kahato y'y eiam ẽpeke. Yt ihapytig i rakaria yt ipoĩ'ãm kuap i rakaria ipy kĩ'ã rakaria ti tukup­te'en.
JOH 5:4 Mi'i tote ti ta'a­tue­katup y'y mum'ok mum'ok e hap katu­pono atipy kaipywiat Tupana mipo­'oro put'ok'e tuereto ihypykoĩ hanuat. Mi'i hawyi ihy pykoĩ turan mohag wo topy­hu'at y'y. Sa'a­wy­'iwuat wyti mekewat y'y piat seke hat topy­hu'at ihãite ra'yn i'atu'e.
JOH 5:5 Toĩne'en itote wẽtup ok i'ahu rakat nimo kahato 38 i'aman mot piat turan ra'yn i'ahu atug me tetupe tote toĩne'en.
JOH 5:6 Mi'i Iesui ta'a­kasa hawyi toikuap nimo ra'yn i'ahu hap. Mi'i hawyi to'e tope — Ehãite hap apo etiky­'esat uhyt e.
JOH 5:7 — Ta'i e ma'ato yt uwe i ui'y­kesat uipo­wyro y'y piat uipag hamo uhyt e. Tut tuereto y'y hypykoĩ hat wen ma'ato yt areke kuap i katu­pono irania'in — Wãi'i­'a­tu'e uhepe hawyi tuwe­hyt'ok wehyt'ok y'y pe uhe'yianme pote. Yt uwe i ui'y­kesat y'y piat uipag hamo. Mi'i pote yt areke kuap i e.
JOH 5:8 Mio tã e hawyi to'e Iesui — E'ãpe­'ok'am no mehĩ e. Etat ro etupe hawyi ewyry ro e.
JOH 5:9 Mio tã to'e hawyi meremo waku. Ipoĩ'ãm na'yn hawyi totat tetupe hawyi toto ra'yn ihãite ra'yn Iesui ehay pyi.
JOH 5:10 Mi'i hawyi mu'ap upi Iuteuria akag ko'i te'e­ro'e imimoe­hãite pe — Koity'i e'at Tupana mõtypot hap e'at pe ne'i uhyt i'atu'e. Yt etioto tei'o etupe mesup e'at pe ne'i katu­pono iwan miat ainãpin hap wyti wãi'e kahato meke tã hat ete i'atu'e.
JOH 5:11 — Ma'ato uimoe­hãite hat to'e uhepe — Etioto ro etupe hawyi ehewyry ro e uhepe e.
JOH 5:12 — Uwe kahu pyno mio tã e epe i'atu'e.
JOH 5:13 — U e yt atikuap i uwe uimoe­hãite uhyt'i'in e katu­pono miit'in typy'i tok puo toto pote yt ahẽtup kuap i kat eĩ eset ui'e hap e.
JOH 5:14 Meiũran tomi­moe­hãite Iesui tipuẽti Tupana mõtypot yat pe i ra'yn. Mi'i hawyi to'e tope — Ewe'eg wo uhyt sa'a­wy­'iwuat eminug sa'ag. Yt etunug i ra'yn ma'ato etunug ne pote ti aru meiũran po'og sa'ag topy­hu'at ekai e'ahu sa'a­wy­'iwuat kai e.
JOH 5:15 Mi'i hawyi toto ra'yn Iuteuria akag ko'i kape henoi hamuat — Uimoe­hãite hat Iesui e i'atuepe.
JOH 5:16 Mi'i pote Iesui ta'a­tu­sa­ty­'i­sa­ty'i katu­pono Tupana mõtypot e'at pe toimoe­hãite ra'yn.
JOH 5:17 Ma'ato Iesui to'e Iuteuria akagnia pe — Ui'ywot ipotpap kahato te ti wakuap nug hamo Uito i'ewyte uipotpap kahato wakuap nug hamo wuat'i e'at pe e Iesui.
JOH 5:18 Mi'i tã e pote Iuteuria ti'auka teran ne'i Iesui katu­pono ipotpap Tupana mõtypot e'at pe i'ewyte to'e Tupana Ui'ywot e tuwenug Tupana ewy te pote.
JOH 5:19 Mi'i hawyi to'e Iuteuria akagnia pe — Pywo pe yt kat i tuwe­py­'apyi Ha'yru tunug. To'ywot minug ewywuat yn ni tutunug. Teha'at To'ywot minug ewawiat hawyi tutunug i'ewywuat e.
JOH 5:20 I'ywot tiky'e Tosa­'yru mi'i pote toimo­herep tope yne tominug ko'i e. Meiũran ti aru po'og toimo­herep mesuwat kai eimo­wa­nẽtup hamo e.
JOH 5:21 I'ywot ti'a­tu­moieĩ­ne'en pakup i mam haria. Mi'i hap ewy ti Ha'yru ti'a­tu­moieĩ­ne'en tomi­'ai­roria ko'i e.
JOH 5:22 I'ywot wyti aru yt henoi i uwe uwe imi'a­piheg wuat ma'ato henoi hat topy­hu'at Ha'yru kai uwe uwe i'apiheg haria henoi hamuat e.
JOH 5:23 Mi'i hap nug hamuat tutum yne Tosa­'yru pe katu­pono toiky­'esat Tosa­'yru mõtypot hap tomõ­typot hap ewy toiky­'esat e. Uwe uwe Ha'yru yt mõtypot i ipo'oro hat I'ywot yt mõtypot i hat topy­hu'at.
JOH 5:24 Pywo pe ti are'e ehepe uwe uwe uhehay ẽtup hat ti aru uipo­'oro hat mohey hat mi'i hat ti aru topy­hu'at wuat'i e'at pe yt karãpe i imi'a­piheg wo topy­hu'at. Iku'uro hap tokosap ta'yn hawyi heĩne'en hap yn topy­hu'at wuat'i e'at piat ikai e.
JOH 5:25 Pywo pe ti are'e ehepe tut ti aru koitywy put'ok'e ra'yn he'at karãpeĩ iku'uro rakat ewy Tupana kapiat hat ikuap ta'a­tu­kaykay Tupana Sa'yru piat hap ihay kuap haria i'atue­hãite ra'yn wuat'i e'at pe e Iesui.
JOH 5:26 I'ywot toĩne'en tuwe­kaipyi yt uwe i inug. Mi'i hap ewy tutum Tosa­'yru pe tuwe­kai­pywiat toĩne'en hap e.
JOH 5:27 Tupana to'e Tosa­'yru pe — En wyti Miit'in Yke'et miit sese eropy­hu'at mi'i tupono waku ere'e uwe waku uwe yt uwe topy­hu'at wo'o­'a­piheg haria wo uwe yt hap miit'in me e Tupana Tosa­'yru pe.
JOH 5:28 Pyno eiwa­nẽtup kahato uimienoi pakup kape pote meiũran ti aru po'og iwato ahenoi ehepe e Iuteuria pe. Tut wyti aru mekewat e'at pe ti aru yne misyp ko'i map haria ikuap ta'yn Ha'yru ehay hawyi te'e­ru­we­nõ'ẽ ra'yn ta'a­tusyp hawyi e.
JOH 5:29 Wakuaria te'e­ru­we­nõ'ẽ ta'a­tuieĩ­ne'en wuat'i e'at piat hap kape e ma'ato yt nakuaria i ti aru te'e­ru­we­nõ'ẽ ho'opot hap kape e.
JOH 5:30 Uito ti yt arepot­'airo hin i uiwe­py'a pyi uwe uwe wo'o­'a­piheg hanuat hap ete ma'ato yt nakuat i e Tupana pote Uito i'ewyte yt nakuat i are wy ma'ato wakuat e Tupana pote Uito wakuat are te wy mi'i hat pe e Iesui.
JOH 5:31 Uiwewi ahenoi uiwewi uwe Uito hap ete pote heso kahato rakat areĩne'en.
JOH 5:32 Mi'i pote toĩne'en wẽtup ok uwe Uito hap enoi hanuat mi'i ti ahet'ok hat Iuwãu. Mi'i ti henoi hãpyk kahato uhetiat uwe Uito kahato hap ete e.
JOH 5:33 Sa'a­wy'i te wyti eweipo­'oro ehemiit'in Iuwãu kape uwe Uito hap kuap hamo. Mi'i hawyi toi'a­tu­wesat pywo piat hãpyk ta'yn uwe Uito hap ete.
JOH 5:34 Kat e Iuwãu uhetiat tohenoi uikuap ehepiat hamo eheha­kye­ra'at hat Uito hat are ma'ato kat e uhetiat tohenoi hap atikuap uipy'a pe yt Iuwãu kaipyi i arekuap uwe Uito hap e.
JOH 5:35 Ta'i sa'a­wy'i Iuwãu mienoi uhetiat ariãty ewy hẽtyhot yne e. Ha'a­wyte ran eweikup­te'en Iuwãu ehay upi ihay se kahato ewei'e sa'a­wy'i.
JOH 5:36 Pyno Iuwãu mienoi kaipyi eweikuap sa'a­wy'i uwe Uito hap ma'ato mesup po'og na'yn eweikuap katu­pono uiminug iwato hap kaipyi Ui'ywot miky­'esat nug hap kaipyi eweikuap ta'yn Uito Ui'ywot mipo­'oro hap Iuwãu mienoi ewy ra'yn.
JOH 5:37 I'ewyte Ui'ywot uhenoi ra'yn ma'ato yt eweikuap i ihay. Katu­pono uipo­'oro hat yt karãpe i ewei'a­kasa howa kape e.
JOH 5:38 Mi'i pote yt kat i eipy'a pe Ui'ywot mienoi katu­pono yt eweimohey i imipo­'oro Uito e Iuteuria pe.
JOH 5:39 Eiwe­mu'e kahato Tupana mipo­'oro iwan ete eipe — Miwan ni aheha­kye­ra'at kuap ewei'e eiwo­'ope e.
JOH 5:40 Pywo ti yt eweikuap i uhetiat miwan henoi kahato mi'i pytkai ti eipe yt eweiwat teran i uhowawi eheĩne'en hap sese sat hamo.
JOH 5:41 Uito yt atikat i miit'in miat waku kahato En e hap.
JOH 5:42 Eipe woro­ho­'okuap kahato. Atikuap ta'yn yt kat i Tupana ky'e hap eipy'a pe e.
JOH 5:43 Ariot ti Ui'ywot ehay pyi ma'ato yt eiwese i uhete ma'ato meiũran ti aru tuwehay pyi wẽtup ok i ra'yn tut — Uito eipo­rekuat Tupana mipo­'oro. Mi'i ete ti aru eiwese ra'yn e.
JOH 5:44 Kat pote yt karãmuo i uimohey teran eipe. Eweiky­'esat kahato miit'in miat waku kahato eipe i'atu'e hap ma'ato Tupana piat waku kahato eipe e hap yt eweiky­'esat i yt eweikuap i pote e. Pyno yt karãmuat i uimohey hanuaria eipe e.
JOH 5:45 Watunug Musei wãi'e hap ko'i hawyi watu­we­ha­kye­ra'at kuap ewei'e ma'ato meiũran aru Musei yt iwese hin i ehete katu­pono einãpin hap tomiwan miat yt hap ewy i ewetunug mote Tupana pe tohenoi aru — Meimuẽ­wuaria tig yt naku i nug haria i e aru ehepiat e Iesui Musei yn aheha­kye­ra'at kuap haria pe. Mi'i hawyi to'e Iesui mi'iria pe — Yt eiwa­nẽtup tei'o uito are'e aru Ui'ywot pe mi'iria yt naku i nug haria are ehepiat katu­pono mekewat e'at pe aru Musei tuwe­mo­herep Tupana pe — Yt naku i nug haria mi'iria e aru ehetiat Tupana pe are e Iesui Musei e hap nug hawyi watu­we­ha­kye­re'at haria pe.
JOH 5:46 Musei miwan eweimohey pote ti aru uimohey haria wo eweipy­hu'at mesup katu­pono Musei henoi kahato yianme uhetiat iwan me e Iesui.
JOH 5:47 Yt eweimohey i Musei mienoi miwan me uhetiat pote aikotã aru uimohey eipe e Iesui Iuteuria akag ko'i pe.
JOH 6:1 Mio tã to'e kahu hawyi toto ra'yn Iesui yi Karireia hyemyi'a sakpo mekewat ihyemyi'a Tipe­riati e hap het rakat sakpo.
JOH 6:2 Mi'i hawyi hewat­'ymo miit'in tuwat typy'i kahato katu­pono te'e­ra­ha'at teran imisepap wo'o­moe­hãite hap kape.
JOH 6:3 Mi'i totepyi Iesui ipot'am yity'ok kape. Put'ok'e yity'ok tote hawyi ta'apyk itote topot­mu­'eria wywo.
JOH 6:4 Porap put'ok'e mekewat ienuk koro hap e'at yt pya i ra'yn turan. Mi'i ienuk hap e'at pe Iuteuria hekatup aikotã sa'a­wy'i Esitu e'yi kaipywiat wanĩ­kaptia po pywiat Tupana ti'a­tue­ha­kye­ra'at irania'in hap e'at pe ta'a­tu­he­katup.
JOH 6:5 Mi'i hawyi yity'ok totepyi Iesui ta'a­kasa miit'in typy'i kahato õ'ẽ haria kape. Mi'i hawyi apo'e topot­mu'e Wiripi pe — Aikope pyi aru iwato mi'u wati­puẽti typy'i rakaria mi'u wo e.
JOH 6:6 Mio tã e Wiripi iã'ãg hamo katu­pono mi'i ikuap aikope pyi mi'u toipuẽti kuap miit'in poi hamuat hap.
JOH 6:7 Mi'i hawyi Wiripi tiwesat — Are pãi iwato kahato ti i'atu­mi'u sa'up uhyt e. Toĩne'en aipo pe pote 200 e'at motpap kapiat ma'ato mi'i pytkai yt put'ok'e hin i i'atu­mi'u sa'up nug hamo e Wiripi.
JOH 6:8 Mi'i hawyi Simãu Peteru ywyt Ãtere ipotmu'e to'e Iesui pe
JOH 6:9 — Meiũwat kurum po pe 5 a yn man Sewata iã'ỹi kawiat i'ewyte typy pira hit yn Uhyt ma'ato yt put'ok'e hin i typy'i rakaria poi hamo e.
JOH 6:10 Mi'i hawyi Iesui to'e topot­mu­'eria pe — Ewei'apyk to meimuẽ puo ewei'e ro miit'in me e. Mi'i hawyi te'e­ra­'apyk mopep hyp we mopep tok kahato itote pote. 5000 ihainia itote te'e­ra­'apyk.
JOH 6:11 Mi'i hawyi Iesui tat man hawyi waku e Tupana pe hawyi toipat'ok pat'ok topot­mu­'eria pe mekewat man toimo­wato kahato. Mi'i hawyi ipotmu­'eria tum miit'in sem me apyk haria pe. Mi'i hawyi i'ewyte pira hit typy rakat toipat'ok pat'ok i'atu­mi'u wo.
JOH 6:12 Mi'i hawyi te'e­renuk kahato i'atu'ok kahato. Mi'i hawyi to'e Iesui temiit'in me — Eweikat ro i'atu­mi'u ieĩpyt uhyt'i'in e. Yt naku i mi'u wato­mo­satek e.
JOH 6:13 Mi'i hawyi ta'a­tuwo 12 e'yry­sakag me topy­hu'at heĩpyt miit'in mi'u ieĩpyt 5 man yn typy pira hit kaipyi.
JOH 6:14 Mi'i pote Iesui minug wakuap kapiat akasa haria te'e­ro'e to'ope — Pywo pe ti aimie­katup Mi'i Miit i'atu'e. Mi'i Miit ti Tupana Mipo­'oro tehay moherep ahepiat hanuat i'atu'e. To'iro pyno watunug meremo Mi'i Miit Aipo­rekuat no i'atu'e to'ope.
JOH 6:15 Ma'ato i'atu­wa­nẽtup hap Iesui tikuap ta'yn topy'a pe — Uinug irane ta'a­tu­po­rekuat no mi'u ky'ewi yt uimi­ky­'esat ewy i e tuwepe. Mi'i tã ne'i toikuap hawyi meremo toto ra'yn i'atu­py­'a­setpyi yity'ok kape. Tuweran ne'i toto ra'yn yt toiky­'esat i tuwepag i'atupo pe i'atu­po­rekuat no haype.
JOH 6:16 Wãtym'i hawyi ipotmu­'eria tuwat ra'yn ihyemyi'a kape.
JOH 6:17 Mi'i hawyi tuwe­hyt'ok yara pe hawyi tuwat ysakpo teran tawa Kawa­na'ũ kape ma'ato yt uwe i Iesui i'atu­py­'a­setpe.
JOH 6:18 Mi'i hawyi ywytu uato put'ok'e ihyemyi'a tote. Mi'i hawyi ihy we'okmoĩ wato'in kahato.
JOH 6:19 Ihyemyi'a py'a­setpiat turan te'e­ra­'a­kasa ra'yn Iesui kape. Tut ra'yn i'atuupi yawa tote hewyry. Te'e­ra­'a­kasa hawyi te'e­ro­ken'ẽ kahato.
JOH 6:20 Iesui to'e i'atuepe. — Uito rat yt eweiken'ẽ tei'o e.
JOH 6:21 Ta'a­tuehay kuap hawyi ereke uhyt i'atu'e. Mio tã i'atu'e hawyi Iesui teke ra'yn yara pe. Mi'i hawyi put'ok­'i­'a­tu'e aikopuo tuwat hap tote merep hap ewy Tupana inug.
JOH 6:22 He'i­hot'ok pe ihyemyi'a sakpuaria imi'atoiat ko'i tikat ra'yn Iesui — Aikowo som toto Iesui i'atu'e. Ga'atpo ti wẽtup yara yn toĩne'en mesuwe. Mi'i puo ra'yn tuwat Iesui potmu­'eria ma'ato Iesui yt toto i i'atu'e. Aikowo som pyno toto i'atu'e.
JOH 6:23 Mi'i hawyi tõ'ẽ po'og yara puo aikope sa'a­wy'i Iesui ti'a­tupoi man wo hap kape. Aikope waku e Tupana pe hap kape tõ'ẽ tõ'ẽ tawa Tipe­riati kaipyi.
JOH 6:24 Ma'ato yt ta'a­tu­puẽti Iesui i'ewyte yt ta'a­tu­puẽti i ipotmu­'eria. Mi'i tupono tuwe­hyt'ok ta'a­tue­'yara ko'i piat i ra'yn hawyi tuwat ysakpo tawa Kawa­na'ũ kape ikat hamo.
JOH 6:25 Put'ok­'i­'a­tu'e ysakpo hawyi ta'a­tu­puẽti ta'a­tu­mikat hawyi apo'i­'a­tu'e Iesui pe — Kat puo eriot meikowo urumu'e hat i'atu'e.
JOH 6:26 Ma'ato Iesui ti'a­tu­wesat — Pãi e atikuap kat hamo uikat eipe e. Eimo'ok mi'u wuat hamo yn uikat eipe e. Ma'ato atunug uimi­sepap Tupana esaika hap upi uwe sese Uito hap moherep hamo ma'ato yt eweikat hin i uwe Uito sese hap kuap hamo. Man atimo­wato kahato eimo­'a­kasa hamo uwe sese Uito hap kuap hamo ma'ato man wuat eimo'ok hap yn eweikat. Ta'i man u hap upi yn uikat eipe. Iwato kahato uimi­sepap nug hap man ati'a­tunug ehehamo uwe Uito moherep hamo ehepe wen ma'ato yt uimohey hin i aremo­herep pytkai e.
JOH 6:27 Yt naku i eimo'ok mi'u wuat hap yn eweikat mesuwe e. Eweikat ro mi'u sese wuat'i e'at piat eimo'ok kuap sese hamuat eimoieĩ­ne'en hamuat are e. Miit'in Yke'et tum neran kahato mi'u eimoieĩ­ne'en wuat'i e'at piat hap e mi'i tupono eweikat ro e. Uito eheyke'et tum kahato ehepe man sese katu­pono Ui'ywot waku etum no i'atuepe i'atu­mi'u sese e ra'yn uhepe e Iesui.
JOH 6:28 Mi'i hawyi apo'i­'a­tu'e — Aikotã som pyno Tupana tiky­'esat urutunug i'atu'e.
JOH 6:29 Mi'i hawyi Iesui tiwesat — Tupana tiky­'esat kahato ti tomi­po­'oro mohey ehepiat hap e Iuteuria pe.
JOH 6:30 Mio tã e hawyi te'e­ro'e — Kat som pyno etunug irane iwato rakat Tupana minug ewywuat uru'a­kasa hamo ekuap hamo emohey hamo i'atu'e.
JOH 6:31 Sa'a­wy'i ti Ai'y­wania tu'u man yahig note i'atu'e aikotã miwan tohenoi Esutu 16.15 pe — Atipy kaipyi Musei tum man i'atu­mi'u wo e miwan me i'atu'e.
JOH 6:32 Mi'i hawyi Iesui ti'a­tu­wesat — Mekewat man atipy kaipywiat yt Musei miium i ma'ato Ui'ywot miium. Koran tutum i ehepe wẽtup man are. Mio Ui'ywot miium na'yn man sese emoieĩne'en wuat'i e'at pianuat tutum na'yn ehepe e tuwepe e.
JOH 6:33 Tupana wat man tut ra'yn atipy kaipyi. Tutum ne'en neran wuat'i miit'in moieĩne'en hamuat e.
JOH 6:34 Mi'i pote te'e­ro'e tope — Urupoi ro pyno mi'i man wo Uhyt wuat'i e'at pe i'atu'e.
JOH 6:35 Ma'ato Iesui ti'a­tu­wesat — Mi'i man ni Uito e. Uito rat mi'u miit'in moieĩne'en hanuat e. Uwe uwe uhowawiat sut hat uimohey hanuat ti aru yt karãpe i hesy'at yt karãpe i te'y­'utui e Iesui.
JOH 6:36 Ha'a­wyte are ehepe — Eipe uhowawiat seha'at haria ma'ato yt uimohey i eipe are e.
JOH 6:37 Ui'ywot miium uhepiaria wyti aru uhowawi tõ'ẽ miit'in. Mi'iria ti aru yt karãmuo i ra'yn ati'a­tu­'aro ui'ya­ty­pepyi.
JOH 6:38 Katu­pono Uito ti ariot atipy kaipyi Uipo­'oro hat miky­'esat yne nug hamo ariot e.
JOH 6:39 Uipo­'oro hat miky­'esat ahenoi ehepe katu­pono toiky­'esat yt wẽtup ok i imiium ho'o­wasat ui'ya­ty­pe­pywiat hap toiky­'esat. Toiky­'esat atum i'atuepe i'atuieĩ­ne'en pakup i hap ikahuro hap e'at piat hap e.
JOH 6:40 Mi'i hap Ui'ywot tiky­'esat — Uwe uwe ta'a­kasa Uha'yru kape hawyi imohey mi'i hat pe atum aru wuat'i e'at piat ieĩne'en hap e. Uwe uwe Uha'yru mohey mi'i haria ti aru Uha'yru ti'a­tu­mo­nõ'ẽ i'atu­'asyp hap kaipyi i'atuieĩ­ne'en pakup i hamo ikahuro hap e'at pe hap atiky­'esat e Ui'ywot wuat'i miit'in me mesup e Iesui.
JOH 6:41 Mio tã e hawyi ta'a­tue­ro­mõ­pusu Iesui — Uito man atipy kaipywiat e pote.
JOH 6:42 Mi'i haype te'e­ro'e to'ope — Ta'i watikuap kahato uwe en i'atu'e e'ywot uwe ety hap uruikuap i'atu'e. Ta'i Iuse sa'yru ti en i'atu'e. Katu­ponoĩ atipy kaipywiat Uito ere i'atu'e.
JOH 6:43 Mi'i hawyi Iesui ti'a­tu­wesat — Wãi uhero­mõ­pusu tei'o eipe e.
JOH 6:44 Uipo­'oro hat Ui'ywot sese yt ehekyi i uhowawi eipy'a pe pote yt eweikosap kuap i uhowawi e. Uwe uwe uhowawiat gosap haria ti aru atenõ'ẽ i'atu­'asyp hap kaipyi ikahuro hap e'at pe are e.
JOH 6:45 Sa'a­wy­'i­tewuat Tupana e hap moherep haria te'e­ro'e — Meiũran ti aru wuat'i puo Tupana ti'a­tu­mu'e miit'in i'atu'e miwan me e Iesui. Mi'i pote are'e uwe uwe ikuap Ui'ywot mienoi mi'i hat ti aru tut uhowawi e.
JOH 6:46 Yt uwe i ti mesuwat yi totiaria te'e­ra­'a­kasa Ui'ywot kape e. Mi'i rẽ wẽtup ok yn ni Tupana kapiat akasa hat. Mi'i Miit ti Tupana kaipywiat sut hat pote are e tuwepiat.
JOH 6:47 Pywo pe are'e ehepe uwe uwe uimohey hat ti aru toĩne'en wuat'i e'at pe ihãite ra'yn e.
JOH 6:48 Man ewy kahato Uito are uwe uwe uimohey mi'i hat ti uimi­moieĩ­ne'en hanuat topy­hu'at wuat'i e'at pe e Iesui.
JOH 6:49 Sa'a­wy'i aha'a­se­'i'in tu'u man yahig note ma'ato mio mi'i haria yne topap ta'yn yt uwe i ra'yn mekewuat man u haria e.
JOH 6:50 Ma'ato ti mekewat atipy kaipywiat man wyti yt mi'i man ewywuat i ra'yn katu­pono uwe uwe i'u hat yt karãmuo i ra'yn topap sese e.
JOH 6:51 Uito ti atipy kaipywiat man miit'in moieĩne'en hamuat e. Uwe uwe mi'i man i'u mi'i hat ti aru toĩne'en wuat'i e'at pe e. Mekewat uimiium man wyti uipiit e. Atum aru uipiit miit'in moieĩne'en hamuat e Iesui.
JOH 6:52 Mi'i hawyi Iuteuria tu'uka to'ope sehay wo kat to'e sese Iesui hap ete — Aikotã aru pyno mekewat miit tum ahepe topiit aimi'u wo i'atu'e to'ope.
JOH 6:53 Mi'i pote Iesui to'e — Pywo pe ti ewetu'u ro Miit'in Yke'et pu'i i'ewyte huu wo eiwe­'y'u ro ma'ato yt pote ti aru yt kat i eheĩne'en hap sese wuat'i e'at pianuat topy­hu'at are e.
JOH 6:54 Uwe uwe uipu'i i'u uwe uwe uhuu wo te'y'u mi'i haria yn ni aru ipuẽti tukup­te'en hap sese mi'i haria yn atiõtem i'atu­'asyp hap kaipyi e.
JOH 6:55 Uipu'i ti mi'u kahato e uhuu sapo hy kahato e.
JOH 6:56 Uwe uwe uipu'i uhuu u haria te'e­ro­py­hu'at uipy'a pe i'ewyte areĩne'en i'atu­py'a pe e.
JOH 6:57 Ui'ywot uipo­'oro hat toĩne'en tuwe­kaipyi i'ewyte Uito areĩne'en ikaipyi. Mi'i hap ewy uwe uinug tomi'u wo mi'i hat toĩne'en wuat'i e'at pe uikaipyi e Iesui.
JOH 6:58 Uipu'i ti man atipy kaipywiat e. Sa'a­wy­'ite man ai'y­wania tu'u mesuwat yt uimiium ewywuat man i.
JOH 6:59 Mi'i u haria aha'a­se­'i'in topap yne ra'yn ma'ato uwe uwe uimiium man u haria ti aru wuat'i e'at pe toĩne'en sese e Iesui tawa Kawa­na'ũ piat Tupana mõtypot yat piaria pe.
JOH 6:60 Mi'i pote Iesui potmu­'eria irania'in te'e­ro'e to'ope — Yt aimi­ky­'esat ewy hin i aimu'e Iesui i'atu'e. Kat pote — Atum aru uhuu uipu'i eimi'u wo e Iesui ahepe i'atu'e. Yt ihay se hin i puo aimu'e mesup.
JOH 6:61 Mi'i hawyi Iesui tikuap ta'yn temiit'in ehay sa'ag tetiat hap tuwa­nẽtup hawe. Mi'i haype to'e topot­mu­'eria pe — Kat pote — Watoiat ro imienoi ewei'e eipy'a pe e.
JOH 6:62 Yt uimohey i te apo eipe e. Pyno kat ewei'e aru mekewat meiũran Eheyke'et ta'am i ra'yn aikope toĩne'en sa'a­wy­'iwuat hap kapiat pote e. Mi'i turan aporu kat ewei'e uhetiat ui'atoiat hawyi e. Eimu'e hap uhetiat Tupana Pã'ãu e hap. Tupana Pã'ãu e hap yn eimoieĩ­ne'en kuap wuat'i e'at pe e.
JOH 6:63 Ta'i Tupana Pã'ãu ete uhehay yt uipu'i ete uhehay e. Uhehay Mã'ãu kaipywiat eimu'e hap. Mi'i yn eimoieĩ­ne'en hap wuat'i e'at pianuat e ma'ato yt uimohey i eipe e Iesui.
JOH 6:64 Yt uimohey yne i eipe e woro­ho­'okuap kahato eipe e temiit'in 70 ok pe katu­pono ha'a­wynug hawyi te toikuap uwe yt tomohey i hanuaria i'ewyte toikuap temiit toma'at sese hanuat.
JOH 6:65 Mi'i haype to'e i — Yt uimohey yne i eipe aikotã are'e — Ui'ywot yt ehekyi i uhowawi eipy'a pe pote yt eweikosap kuap i uhowawi e Iesui topot­mu­'eria ran me.
JOH 6:66 Mio tã e pote typy'i ra'yn ipotmu­'eria tuwat ra'yn Iesui upi pyi ta'a­tu­'atoiat ra'yn. Yt tuwat po'og neran i hupi.
JOH 6:67 Mi'i hawyi to'e temiit'in sese pe 12 ok takaria pe — Eipe apo i'ewyte ra'yn ui'atoiat reran irania'in ewy e.
JOH 6:68 Ma'ato Simãu Peteru tiwesat Iesui — Yt rat pãi e. Yt uwe i ra'yn e'e ewywuat Urupo­rekuat e. En yn ni urumu'e kuap hat e. Emienoi yn ni urumoieĩ­ne'en wuat'i e'at piat hamuat Uruka­'iwat e. Urui'atoiat En hawyi urui'atoiat sehay wuat'i e'at piat kuap hap e.
JOH 6:69 Koitywy uruimohey ra'yn En Urupo­rekuat nuat Tupana Mipo­'oro Tupana sese Sa'yru En e. Worokuap En na'yn Uhyt e. Uruikuap En na'yn urupy'a pe e Peteru Iesui pe.
JOH 6:70 Mi'i hawyi Iesui to'e — Uimi­'airo 12 ok takaria eipe ma'ato wẽtup ok eipy­'a­setpe ahiag kawiat e topot­mu'e Iuta etiat mekewat Simãu Ikarioti sa'yru etiat tohenoi.
JOH 6:71 Sa'a­wy'i Iesui ti'airo Iuta e hap het rakat topot­mu'e wo. Mi'i hawyi toĩne'en irania'in 12 ok takaria py'a­setpe ma'ato ihay typy rakat Iesui ma'at hanuat toĩne'en mi'i miit.
JOH 7:1 Mi'i hawyi Iesui hewyry ra'yn yi Karireia puo. Yt hewyry teran i yi Iuteu puo katu­pono yi Iuteu piaria i'auka teran.
JOH 7:2 Mekewat e'at pe tuwat ra'yn miit'in yne tawa kaipyi Ieru­sarẽi kape yi Iuteu kape tuwat tuwat ienuk hap wato nug hamo. Mi'i tote te'e­ru­we­'y­wy­pyi­'anug ienuk hamo.
JOH 7:3 Mi'i pote Iesui ywyt'in sese te'e­ro'e tope — Urueyke'et i'atu'e miit'in sem tukup­te'en tawa wato Ieru­sarẽi me mi'i pote erẽtem no meiũpepyi yi Karireia pyi hawyi ereto ro yi Iuteu kape i'atu'e. Mi'i hawyi itote eremo­herep epotmu­'eria kape emisepap ko'i etunug no itote wuat'i ehamo i'atu'e.
JOH 7:4 Yt naku i mig'i wo ne'i etunug emisepap ko'i ahetama hit puo. Waku po'og wuat'i ehamo wuat'i akasa hamo etimo­herep uwe En hap kuap hamo i'atu'e Iesui ty mẽpyt'in.
JOH 7:5 Iywyt'in ta'a­tu­we­ky­ry'i hap yt imohey i haype.
JOH 7:6 Mi'i hawyi toi'a­tu­wesat — Uheywyt'in e yt naku i mesup areto Ieru­sarẽi kape e. Mesup yt put'ok'e i te uhe'at mi'i tã nug hamo uheywyt'in e. Yt naku i mio areto Ieru­sarẽi kape e ma'ato waku eweiwat tawa Ieru­sarẽi kape yne e'at pe eimi­ky­'esat ewy e.
JOH 7:7 Ta'i miit'in yt uwe i ipy'ahak ehete e ma'ato uhete miit'in yt i'atu­wese kahato i katu­pono ahenoi henoi i'atuepe i'atu­minug sa'ag ko'i e. Mesuwat rotiat ko'i eiky'e haria ti ma'ato Uito yt uiky'e hin i e katu­pono yt haku i nug haria are'e i'atuepe pote.
JOH 7:8 Pyno waku eweiwat ro ienuk hap kape ma'ato Uito yt areto i te yt naku i koran areto uheywyt'in katu­pono yt uhe'at i pote e to'y­wyt'in me.
JOH 7:9 Mio tã e hawyi topy­hu'at yi Karireia pe Iesui ma'ato iywyt'in tuwat ienuk wato hap kape.
JOH 7:10 Tuwat yne hawyi meiũran i'ewyte toto Iesui yt uwe mikuap mo i toto.
JOH 7:11 Mi'i hawyi itote ienuk haria tikat at Iesui aikope toĩne'en hap ma'ato yt uwe i ipuẽti. Mi'i hawyi apoi'a­tu'e to'ope — Aikope som toĩne'en i'atu'e.
JOH 7:12 Mi'i haype te'e­ru­wa­nẽtup ko'i ko'i kahato tuete. Irania'in — Yt naku i Iesui i'atu'e aima'at reran tehay wo i'atu'e. Irania'in Iesui waku i'atu'e.
JOH 7:13 Ma'ato — Atimohey uito Iesui yt i'atu'e i wuat'i ehamo katu­pono i'atu­'a­kagnia pupi te'e­ro­ken'ẽ.
JOH 7:14 Ienuk hap posasat pe put'ok'e Iesui tawa Ieru­sarẽi me. Mi'i hawyi toto Tupana mõtypot yat wato kape. Mi'i tote toi'a­tu­mu'e kahato.
JOH 7:15 Mi'i pote Iuteuria te'e­ru­wa­nẽtup kahato — Iesui iwe'eg kahato i'atu'e. Toikuap kahato miwan yne yne Tupana e hap i'atu'e. Uwe saĩke imu'e wo'o­mu'e haria mikuap yne ko'i i'atu'e. Teke apo sa'a­wy'i aiwe­mu'e hawe i'atu'e katu­pono toikuap yne aimikuap ko'i i'atu'e.
JOH 7:16 Mio tã i'atu'e hawyi Iesui ti'a­tu­wesat — Uimienoi yt uiat i e. Tupana uipo­'oro hat uimu'e hat e.
JOH 7:17 Ewetunug no Tupana ehay upi imiky­'esat ewy ewetunug pote ti aru meremo eweikuap uimienoi meremo — Pywo rasig tohenoi Tupana ehay ewei'e. Yt tuwehay pyi hin i aimu'e ewei'e uhepe ewehã'ãg Tupana miky­'esat nug hawyi e Iesui.
JOH 7:18 Irania'in aimu'e haria ta'a­tu­ky­'esat kahato — Waku kahato en urumu'e hat e hap miit'in kaipyi ta'a­tu­ky­'esat ma'ato yt mi'i tã i Uito woro­ho­'o­mu'e katu­pono Tupana mõtypot hap yn uiwa­nẽtup hawe woro­ho­'o­mu'e. Tupana mõtypot reran hat ihay hãpyk kahato rakat yt heso hi rakat i e. Mi'i hat ewy areĩne'en. Mi'i kupitu woro­ho­'o­mu'e pote yt kat i sa'ag uiwa­nẽtup hawe. — Waku En e Tupana uhepe e.
JOH 7:19 Sa'a­wy'i ti aha'a­se'i Musei ainãpin tomiwan me ma'ato ti yt ewetunug i eipe imiky­'esat ewy. Mi'i pote ui'auka teran ne'i eipe e ma'ato wãi erepot­'auka i tei'o e Musei e Iesui.
JOH 7:20 Mio tã e hawyi te'e­ro'e — Eeso kahato yt uwe i e'auka teran hat i'atu'e. Ahiag ni epiit pe i'atu'e Iesui pe.
JOH 7:21 Ma'ato Iesui ti'a­tu­wesat — Ha'a­wyte ti atunug wẽtup wakuap yt motpap i hap e'at pe pote ti eipy­'ahak kahato uhete atimoe­hãite yt ipoĩ'ãm kuap i rakat Tupana mõtypot hap e'at pe pote e.
JOH 7:22 Ma'ato eipe i'ewyte eipotpap mekewat e'at pe e. Pywo ti rat eimẽpyt tuwe­mo­herep hawyi toĩne'en 8 e'at hawyi ewei'ahit sokpe tek ta'yn yne e'at pe aha'a­se'i Musei mienoi ewy e. Yt Musei mienoi yn i ma'ato sa'a­wy­'i­te­wuaria ai'y­wania ti mi'i tã te inug 8 e'at toĩne'en hawyi ta'a­tunug na'yn wuat'i e'at pe yt aipotpap i hap e'at pe sio yt ta'a­tunug mi'i tã ta'a­tu­sa­'yru toĩne'en 8 e'at hawyi ta'a­tu­potpap.
JOH 7:23 Are pãi mi'i pytkai ma'ato ti uhete yt eiwese i mekewat e'at piat sehãite hap nug uhepiat pote. Yt naku i eipy­'ahak uhete mekewat e'at piat wẽtup ok miit moehãite uhepiat pote e Iesui.
JOH 7:24 Ewei'ywyk kahato eiwa­nẽtup hap uhetiat e. Yt iũte'en nei'o uiwesat eipe e. Waku ti eiwa­nẽtup ete mi'i rokirẽ ewei'e hãpyk uhepe uwe Uito hap ete e. En yt naku i yt ewei'e tei'o uhepe iũte'en eipe e tewa­nĩ­kaptia pe.
JOH 7:25 Mi'i pote mekewat tawa Ieru­sarẽi miaria irania'in te'e­ro'e to'ope — Iesui ti Iuteuria akag mi'auka teran ma'ato ti topot­mu'e kahato te i'atu­py­'a­setpe i'atu'e.
JOH 7:26 Kat poteĩ ai'a­kagnia yt tipyhyp i i'atu'e. Mio apo ta'a­tu­mohey ra'yn Tupana Mipo­'oro Aipo­rekuat nuat Iesui i'atu'e ra'yn apo mio i'atu'e. Kat poteĩ yt ta'a­tuewãi i i'atu'e.
JOH 7:27 Ta'i yt uwe i raso ikuap aiũwat tawa aiũwat yi kaipywiat tut hamuat Tupana Mipo­'oro Aipo­rekuat nuat i'atu'e. Ta'i iũte'en ne'i hamuat wyti tuwe­mo­herep i'atu'e ma'ato mekewat Iesui ti watikuap kahato ra'yn aiũwat tawa pe tuwe­motag mi'i tupono ti Iesui ti yt Tupana Mipo­'oro i te i'atu'e.
JOH 7:28 Mi'i hawyi Iesui to'e haty wo — Uikuap eipe wen ma'ato yt uikuap hat i yt heremo kahato i e. Aikope pywiat Uito hap eweikuap sa'ag ne'i e. Yt uiwehay pyi i ti ariot ehowawi. Ta'i Pywuat hat sese wyti uipo­'oro ehowawi ma'ato Mi'i hat uipo­'oro hat yt eweikuap hin i are e.
JOH 7:29 Ma'ato Uito atikuap kahato Uipo­'oro hat katu­pono ikaipyi ariot e Iesui tehay pirik wo.
JOH 7:30 Mio tã e pote Iuteuria akagnia tipyhik teran na'yn ma'ato yt iku'uro hap e'at i te pote yt ta'a­pyhik kuap i te.
JOH 7:31 Ma'ato typy'i irania'in te'e­ro'e to'ope — Sio Tupana Mipo­'oro aheha­kye­ra'at hamuat meiẽ katu­pono Tupana misepap ewy ra'yn tutunug mesuwe i'atu'e. Mio tã ta'a­tu'e hawyi ta'a­tu­mohey ra'yn.
JOH 7:32 Mi'i hawyi Tupana mohey haria akag ko'i i'ewyte pa'i kororia tikuap ta'yn irania'in miat Iesui Tupana Mipo­'oro e hap. Mi'i pote ta'a­tu­po­'oro ipyhik hamo.
JOH 7:33 Mi'i hawyi Iesui to'e miit'in me — Areĩne'en porap'i yn na'yn eiwywo katu­pono areto irane ra'yn Uipo­'oro hat kape e.
JOH 7:34 Mi'i hawyi ti aru uikat eipe wen ma'ato ti aru yt uipuẽti i ra'yn eipe e. Aikowo Uito hap kape yt eweiwat kuap i e Iesui.
JOH 7:35 Mio tã e pote te'e­ro'e to'ope — Aikowo irane som pyno toto yt aimikuap mo i. Wẽtup ywania tawa ko'i kape topopy irane i'atu­mu'e hamo sio topopy irania'in ywania etawa piaria ai'y­wania mu'e hamo i'atu'e Iuteuria.
JOH 7:36 Kat to'e hawe — Uikat wyti aru eipe ma'ato ti aru yt uipuẽti i ra'yn eipe e i'ewyte — Yt eweiwat kuap i aikowo aikowo Uito hap kape e ahepe i'atu'e. Katu­pono som mio tã e i'atu'e to'ope.
JOH 7:37 Mi'i hawyi ienuk hap ywopope e'at ikahuro hamo mekewat po'og iwato hap e'at pe Iesui ipoĩ'ãm i'atu­py­'a­setpe hawyi haty wo to'e i'atuepe — Uwe uwe te'y­'utui mi'i haria eweiwat ro uhowawi eiwe­'y'u hamo e.
JOH 7:38 Pywo ti rat uimohey haria ti aru Tupana Pã'ãu eiam kahato te'e­ro­py­hu'at are mi'i hawyi ta'a­tukuap kahato Tupana are. Aikotã y'y tuwẽtem yrasa sese pyi at ka'ap miit'in te'y­'utui hap monik hamuat mi'i hap ewy topy­hu'at uimohey haria are aikotã to'e sa'a­wy'i — Uimohey haria py'a pyi aru tuwẽtem wẽtem wuat'i e'at piat y'y ewywuat i'atu­moieĩ­ne'en hamuat e miwan me.
JOH 7:39 Mekewat e'at pe yt kat i Tupana Pã'ãu miit'in py'a pe. Yt tutum i te pote Iesui ta'aipok atipy kape hawyi Tupana mimõ­typot no hawyi toimõ'ẽ Topã'ãu wakuat tomohey haria torania pe.
JOH 7:40 Mi'i hawyi itotiaria irania'in tikuap ta'yn Iesui e hap eweiwat ro uhowawi e hap hawyi te'e­ro'e to'ope — Pywo pe ti Mi'i Miit wyti aimie­katup Tupana Mipo­'oro aimu'e tehay wuat hamuat ra'yn i'atu'e.
JOH 7:41 Ma'ato irania'in — Mi'i Miit wyti Tupana Mipo­'oro Aipo­rekuat nuat i'atu'e. Ma'ato irania'in — Yt wyti i'atu'e katu­pono aimie­katup aipo­rekuat koro wyti aru yt yi Karireia kaipyi i tut i'atu'e.
JOH 7:42 Ta'i miwan me ti tohenoi mekewat yne miit'in porekuat nuat ete Tupana mipo­'oro ete i'atu'e. Morekuat Tawi emiariru tawa hit Perẽi miat i'ywã'ĩ rakat e i'atu'e. Morekuat Tawi etawa piat i'ywã'ĩ rakat e miwan me i'atu'e ma'ato mesuwat Iesui yi Karireia piat. Mi'i i'atu'e sa'ag katu­pono yt ta'a­tukuap i Iesui ywã'ĩ hap tawa Perẽi miat hap pote.
JOH 7:43 Mi'i pote i'atu­wa­nẽtup hap uwe sese Iesui hap ete yt ewy i. Mi'i pote yt to'o­wese i ra'yn to'ope.
JOH 7:44 Irania'in ipyhik teran Iesui ma'ato yt uwe i ipyhik kuap.
JOH 7:45 Mi'i hawyi sura­ra'in te'e­ra­'aipok i ra'yn pa'i kororia kape seko etiat wo'o­mu'e haria akag ko'i kape. Mi'i hawyi te'e­ro'e sura­ra'in me — Sa'a­wy'i woro­ho­'o­po­'oro eipe Iesui sat hamo i'atu'e kat pote pyno yt eweterut i i'atu'e.
JOH 7:46 Ma'ato sura­ra'in ti'a­tu­wesat — Mehĩ'in i'atu'e uruikuap Iesui ehay hawyi ikahu kahato uruipuẽti ihay mi'i hawyi yt uruipyhyp kuap i i'atu'e katu­pono Mi'i Miit po'og ikahu torania wo'o­mu'e haria kai ihay se rakat i'atu'e sura­ra'in. Mio tã i'atu'e sura­ra'in pote.
JOH 7:47 — Yt naku i kahato rat. Eipe apo i'ewyte imohey haria i'atu'e heso hap ete i'atu'e sura­ra'in me — Eweimohey ti ra'yn apo i'atu­'e­wyte i'atu'e.
JOH 7:48 Yt uwe i uruto Iesui mohey haria i'atu'e. Ta'i ei'a­kagnia einãpin haria yt wẽtup ok i imohey haria topy­hu'at i'atu'e.
JOH 7:49 Ma'ato irania'in ai'y­wania itotiaria yt ti'a­tukuap kahato i Musei wo'o­nãpin hap ko'i mi'i pote i'atupap Mi'i Miit upi ma'ato mi'iria ti topy­hu'at aru Tupana mi'a­piheg wuaria i'atu'e.
JOH 7:50 Mi'i hawyi ma'ato wẽtup ok i'atu­py­'a­setpe Niku­temu e hap het rakat to'e i'atuepe.
JOH 7:51 — Sa'a­wy'i mio tã e Tupana miwan me — Yt naku i iũte'en ewei'a­piheg wẽtup ok e. Yt naku i ewei'auka wẽtup ok yt iwat ihay kuap i pytkai e miwan me aiwo­'o­nãpin hawe e. Yt naku i eweimohit wẽtup ok yt eweikuap i pytkai waku sio yt e. Ma'ato eipe yt aiwo­'o­nãpin hap ewy i ewetunug neran Iesui ete e Niku­temu sa'a­wy­'iwuat wãtym wuano Iesui kapiat hat.
JOH 7:52 Mi'i pote Niku­temu pe te'e­ro'e — Pãi i'ewyte yi sa'ag Karireia piaria apo en Iesui ewy i'atu'e.
JOH 7:53 Mio tã te'e­ro'e hawyi yne itotiaria wa'a­tunug haria tuwat ra'yn i'atu'yat ko'i kape.
JOH 8:1 Ma'ato Iesui toto yity'ok kape Uriweira ypia ehap het rakat kape.
JOH 8:2 Itote pyi ihot'ok hawyi hunete ta'aipok i ra'yn Tupana mõtypot yat wato kape. Mi'i hawyi itotiaria te'e­ru­wa­'a­tunug Iesui kape. Mi'i hawyi ta'apyk hawyi Iesui ti'a­tu­mu'e i ra'yn itote.
JOH 8:3 Mi'i hawyi Musei miwan enoi haria i'ewyte Tupana mohey haria akag ko'i tõ'ẽ tõ'ẽ howawi. Ta'a­tuerut wẽtup ok hary­poria yt naku i sese rakat ta'a­tu­puẽti ihainia wywo yt te'aito wywo i. Mi'i hawyi miit'in typy'i rakaria py'a­setpe ta'a­tue­reke Iesui kape.
JOH 8:4 Mi'i hawyi wo'o­mu'e haria henoi Iesui pe — Wo'o­mu'e hat i'atu'e meiũwat hary­poria uruipuẽti wẽtup ok se'aito wywo yni pe i'atu'e.
JOH 8:5 Sa'a­wy'i urunãpin hap Musei to'e Teute­ru­numiu 22.22 pe — Uwe eweipuẽti wẽtup ok wẽtup ok e'aito wywo hawyi ewei'auka mi'iria nu wo mak mak wo e Musei i'atu'e. Mi'i pote uruikuap teran ekaipyi aikotã etiky­'esat urutunug meiũwat hary­poria ete yt we'eg hat i ete i'atu'e. Waku wati­'auka nu wo sio yt i'atu'e.
JOH 8:6 Mio tã i'atu'e Iesui ti'a­parap mono ta'a­tuerut. Mi'i hawyi ma'ato Iesui tuwe­'ymyk hawyi yi kyt ete yn topũ'ĩa wo wan'i­wan­'i'e.
JOH 8:7 Mi'i hawyi po'og apo'i­'a­tu'e Iesui pe. Mi'i hawyi Iesui tuwe­'ã­pe­'ok'am hawyi toi'a­tu­wesat ra'yn — Eipe yt karãpiat i'aparap hap nug haria pote mak mak'e­wei'e ro sa'a­wy'i nu wo i'auka hamo e.
JOH 8:8 Mi'i hawyi tuwe­'ymyk i ra'yn Iesui hawyi tutunug i ra'yn yi kyt ete iwan topũ'ĩa wo.
JOH 8:9 Mio tã e hawyi hary­poria erut haria i'auka teran haria tuwat i ra'yn Iesui kaipyi te'e­ru­we­mõti te kahato i'atu­minug sa'ag ko'i yt uwe i mikuap ko'i pote tuwat. Yianme nagnia sa'a­wy'i tuwat hawyi wat'ymo kurum iwasuria ra'yn tuwat. Tuwat yne hawyi topy­hu'at Iesui yn na'yn mekewat i'atu­mierut hary­poria yt iwe'eg i hat wywo.
JOH 8:10 Mi'i hawyi Iesui ipoĩ'ãm na'yn hawyi to'e hary­poria pe — Aikopeĩ eerut haria mana e. Yt wẽtup ok i apo e'auka teran hanuat topy­hu'at e.
JOH 8:11 Yt uwe i Mimi e. — Mana Uito i'ewyte yt woro­'a­piheg i yt woro­'auka teran i nu wo e. Koitywy waku era'aipok i ra'yn e'yat kape ma'ato etoiat ro eminug sa'ag e. Yt etunug i ra'yn yt ewe'eg i hap e hary­poria pe.
JOH 8:12 Mi'i hawyi Iesui ti'a­tu­mu'e Tupana mõtypot yat piaria — Uito ariãty ewy aikotã ariãty timo­herep mu'ap wãtym muo hap ewy Uito atimo­herep mu'ap Tupana kapiat. Areĩne'en ariãty hot ewy miit'in wanẽtup hawe i'atu­wa­nẽtup hap moẽtyhot hanuat areĩne'en Uito e. Uwe uwe toto uhupi mi'i hat wyti hewyry ariãty hot pe. Yt karãmuo i i'ypyryp wuo hewyry are e Iesui.
JOH 8:13 Mi'i pote irania'in akag ko'i te'e­ro'e Iesui pe — Pãi ehay kahato ewete eremo­wato teran — Uito po'og ere'e pote eeso kahato i'atu'e.
JOH 8:14 — Ta'i uhehay uiwete e Iesui ma'ato pywuat ahenoi uiwetiat katu­pono atikuap kahato aikope pyi ariot i'ewyte aikowo areto hamuat atikuap e. Eipe ti yt eweikuap hin i aikope pyi ariot aikowuat areto hamuat hap e Tupana mõtypot yat apykok haria pe.
JOH 8:15 Eipe yt naku i ewei'e irania'in me eiwa­nẽtup hap kaipyi ne'i ma'ato Uito yt mi'i tã atunug i irania'in me e.
JOH 8:16 Ma'ato — Yt naku i mi'iria are'e Tupana pe ehepiat pote pywo pe e ma'ato yt are'e i. Yt uiwa­nẽtup hap kaipyi i are'e uwe waku uwe yt naku i e hap mesup. Ta'i Ui'ywot Uipo­'oro hat wanẽtup hap kaipyi yn ni mi'i miit waku mi'i miit yt naku i e hap waku are'e. Ma'ato mesup uwe waku uwe yt are'e hin i ehepiat irania'in etiat mesup e Iesui uruto po'og e haria pe.
JOH 8:17 Iwan me ainãpin hawe mio tã e ahepe — Yt etimohey meremo i sehay yt naku i wẽtup ok ete e ma'ato typy ok to'o­'ewy kahato wẽtup ok ete aimu'e to'o­'ewy aiwesat wesat apo'wa­to'e hawyi te'e­ra­'a­kasa iminug pote pywo i'atu'e ma'ato yt pote yt e miwan me.
JOH 8:18 — Pyno Ui'ywot ti eimu'e ra'yn uhete i'ewyte Uito woro­ho­'o­mu'e uiwete. Uruwo­'o­'ewy kahato urui'a­tu­mu'e eipe wẽtup ehay yn mi'i pote pywo ewei'e ro e.
JOH 8:19 — Aikope som pyno e'ywot i'atu'e. — Pyno yt uikuap i eipe i'ewyte yt Ui'ywot i wyti eweikuap ma'ato uikuap eipe pote i'ewyte eweikuap ta'yn Ui'ywot e.
JOH 8:20 Mio tã e Iesui Tupana mõtypot hap yat piaria pe i'atumiium Tupana piat heiam yaty­pepyi. Ma'ato yt uwe i ipytyk kuap itote katu­pono yt put'ok'e i te iku'uro hap e'at pote.
JOH 8:21 Mi'i hawyi Iesui to'e i i'atuepe — Areto irane ra'yn wyti mesu­wepyi e. Areto hawyi ti aru uikat kahato eipe wen ma'ato yt uipuẽti i e. Eiminug sa'ag yt hep i te turan ti aru eweipap. Yt eweiwat kuap i wyti aru aikowuat areto hap kape e.
JOH 8:22 Mio tã e pote te'e­ro'e to'ope — Kat tuponoĩ — Yt eweiwat kuap i wyti aru aikowuat areto hap kape e Iesui ahepe sio apo tuwe­'auka irane haype i'atu'e.
JOH 8:23 Ma'ato Iesui to'e — Eipe ti mesuwat yi totiat miit'in wanẽtup hap ewy yn eiwa­nẽtup e eiwe­wawi yn eiwa­nẽtup. Yt eiwa­nẽtup i atipy kape e ma'ato Uito ti arewa­nẽtup kahato Tupana atipy piat wanẽtup hap ewy te e. Eipe ti ei'yat mesu­wa­rotiat kape yn mi'i pote eiwa­nẽtup mesuwe ma'ato Uito ti atipy piat i'yat rakat e.
JOH 8:24 Ha'a­wyte are'e ehepe — Eiminug sa'ag ko'i yt hep i te turan ti aru eweipap yt uimohey i pote are e Iesui nagnia pe.
JOH 8:25 — Uweĩ pyno en i'atu'e — Sa'a­wy'i pyi te ra'yn ahenoi ehepe uwe Uito hap e. Karania wo i eweiky­'esat ahenoi ehepe uwe Uito hap e Iesui.
JOH 8:26 Uipo­'oro hat Pywuat hat sese e. Mi'i ehay uhepiat pywo sese kahato e. Ihay yne ahenoi teran ehepe ma'ato yt naku i ewei'e uhepe. Atimo­herep teran ehepe eiminug sa'ag ko'i e. Ipoity kahato te ti atimo­herep teran ehepiat ui'e hap are wen ma'ato ehewaure ka'a pe yt teke kuap i uhehay e wo'o­nãpin haria pe.
JOH 8:27 Karãpe Iesui to'e Uipo­'oro hat yt ta'a­tukuap hin i uwe ete ihay. Yt ta'a­tukuap i ihay I'ywot etiat Tupana etiat.
JOH 8:28 Mi'i pote Iesui to'e — Ma'ato meiũran eweimo­poĩ'ãm eheyke'et aria'yp posak ete hap e'at pe ti aru eweikuap ta'yn uwe Uito e. I'ewyte ti aru eweikuap yt kat i atunug uiwehay pyi ma'ato Ui'ywot ehay yn ahenoi ehepiat hap e.
JOH 8:29 Uipo­'oro hat wuat'i e'at pe uiwywo toĩne'en i'ewyte Ui'ywot mowepit hap yn atunug e. Mi'i pote yt karãpe i ui'atoiat uiweran e Iesui.
JOH 8:30 Mi'i hawyi ti itote ipoity ra'yn Iesui e hap kuap haria te'e­ro­py­hu'at.
JOH 8:31 Mi'i hawyi Iesui to'e Iuteuria pe tomohey pakup'i haria pe — Ui'e hap ewetunug no mi'i pote uipot­mu­'eria sese wo ra'yn eipe ma'ato yt pote yt e.
JOH 8:32 Pywo ti aru ewetunug ui'e hap ko'i pote ti eweikuap ta'yn pywuat sese e. Mi'i hawyi eipyhik hawyi eiwe­nõ'ẽ kuap ta'yn eweipopy kuap ta'yn e.
JOH 8:33 Mi'i pote ta'a­tu­wesat — Yt kat hin i ti urupyhik hap Uhyt i'atu'e uruto Aparãu emiari­ru'in uruto. Yt karãpe i miit'in eropat haria urutu­kup­te'en yt karãpe i wo'o­pyhik hawe urutu­kup­te'en i'atu'e.
JOH 8:34 Ma'ato Iesui to'e i'atuepe — Pywo pe ti are'e ehepe yt nakuap i nug hap eheko pote yt eiwe­'a­putsit kuap i eheko sa'ag yt nakuat i pyi ma'ato eipyhik piat ewy eweikup­te'en eipe e.
JOH 8:35 Wo'oe­ropat haria tukup­te'en wuat'i yat puo ma'ato ha'yru toĩne'en to'ywot yat pe yn wuat'i e'at pe e. Sa'ag nug haria wo'oe­ropat haria ewy tukup­te'en.
JOH 8:36 Tupana Sa'yru yne ehakye­ra'at kuap eipyhik hap kaipyi eweimohey pote. Mi'i pote eweipopy kuap kahato. Eiwe­'a­putsit kuap kahato eiminug sa'ag po pyi e.
JOH 8:37 Uhehay yt teke hin i eipy'a pe eiwa­nẽtup hawe mi'i pote ti ui'auka teran eipe e. Pywo ti Aparãu emiari­ru'in ni eipe wen ma'ato ti eiminug ko'i ti rat yt aha'a­se'i Aparãu ewywuat hin i are katu­pono uiky'e hat ri aha'a­se'i Aparãu e Iesui. Eipe uimienoi pun haria ma'ato Aparãu uimohey kahato hat e.
JOH 8:38 Atunug kahato yne Ui'ywot miky'­wesat ewy ma'ato eiperia ewetunug yne ei'ywot mienoi ewy e. Pywo ti rat ahenoi Ui'ywot piat uimu'e yn ma'ato eiperia ei'ywot miky­'esat ewywuat yn ewetunug e Iesui.
JOH 8:39 Mi'i hawyi — Uruto ti Aha'a­se'i pot Aparãu emiariru emiariru ko'i sese uruto i'atu'e. — U pãi e Iesui mekewat wakuat Aparãu emiariru emiariru ko'i sese eipe pote meremo i'ewyte uimohey haria eweikup­te'en aikotã aha'a­se'i pot Aparãu waku sese nug hat ma'ato eiperia ui'auka teran yt Aha'a­se'i pot ewy hin i eipe e. Pyno wẽtup ti ei'ywot pot e Iesui.
JOH 8:40 Uito ti woro­ho­'o­mu'e Tupana e uhepiat hamo yn pywuat sese wo ma'ato ui'e hap wakuat pytkai ui'auka teran eipe e ma'ato uha'a­se'i Aparãu ti yt karãpe i mi'i tã inug neran e Iesui.
JOH 8:41 — Ui'auka teran eipe ei'ywot sese minug ewy ewetunug neran e. — Uruto ti uruikuap ti uru'ywot i'atu'e. Ta'i yt i'ywot wekuap re'ym rakaria i ti uruto i'atu'e. Wẽtup yn uru'ywot. Mi'i ti Uruetu­pana i'atu'e.
JOH 8:42 — Ta'i yt Tupana hin i ei'ywot are ma'ato pywo ei'ywot Tupana pote uiky'e haria eipe eweipy­hu'at katu­pono Tupana Mipo­'oro Uito e yt uiwewi i arepo­'oro e Iesui.
JOH 8:43 Sa'a­wy'i — Woro­po­'oro En e Tupana uhepe hawyi ariot ehowawi Tupana yaty­pepyi ariot e Iesui. Ahenoi ehepe ma'ato yt eweikuap i kahato uimienoi ko'i e. Eweikuap ehewaure ka'a pe ma'ato mi'i hawyi meremo eweipun uimienoi ehewaure ka'a pyi eiwa­nẽtup hawyi e.
JOH 8:44 Ei'ywot sese ti ahiag e mi'i pote ti ewetunug neran ei'ywot miky­'esat sa'ag ok tã e. Ha'a­wyte pyi ahiag ti'auka teran miit'in wo'o­pot­'auka hat mi'i pote yt wẽtup i hãpyk takat sehay pywuat iwat iwanẽtup hap toĩne'en e. Karãpe ahiag heso tuwe­kaipyi tutunug yt niatpo hin i katu­pono yne heso rakat ka'iwat ne'i ahiag topy­hu'at e. Ta'i heso rakaria ywot ti ahiag topy­hu'at e Iesui.
JOH 8:45 — Ahenoi ehepe hãpyk takat yn mote yt eweimohey hin i heso rakat mohey haria eipe pote e.
JOH 8:46 Uiminug yt nakuat i kue yt wẽtup i eweipuẽti pãi e. Woro­ho­'o­mu'e kahato ra'yn ni sehay pywuat no ma'ato ti uimienoi yt eweimohey hin i e.
JOH 8:47 Tupana sa'y­ru'in saki­'yt'in ta'a­tukuap kahato Tupana e hap e ma'ato eipe ti yt Tupana wanuaria i pote ti yt eweikuap i Tupana ehay e.
JOH 8:48 — Sa'a­wy­'i­tewuat uru'e hap ewy ti en i'atu'e. En ni wẽtup ywania yi sa'ag Samaria kaipywiat ti en i'atu'e. En ni ahiag ipiit piat rakat ti en uru'e hap ewy en i'atu'e Iesui pe.
JOH 8:49 — Yt kat i ti uikai ahiag katu­pono atomo­wato Ui'ywot pytkai yt karãpe i ahiag Ui'ywot mõtypot hat toĩne'en e. Eipe ti yt uimo­wato hin i e.
JOH 8:50 Yt atiky­'esat i uhepiat waku En ei'e hap katu­pono wẽtup uiky­'esat hat uimõ­typot hat toĩne'en e. Mi'i hat ti aru yt naku i ehepe e. Mi'i hat ti aru ehaty'i haty'i eipe kat pote uimohit kahato eipe e.
JOH 8:51 Pywo ti uwe uwe inug uimienoi ko'i mi'i hat ti aru yt iku'uro i e Iesui i'atuepe.
JOH 8:52 Mi'i hawyi Iuteu ywania akag ko'i te'e­ro'e Iesui pe — Koity'i wyti uruikuap ta'yn ahiag epiit piat hap katu­pono ase'i Aparãu waku sese pytkai iku'uro ra'yn i'ewyte sa'a­wy­'iwuat Tupana ehay moherep haria yne yne iku'uro ra'yn ma'ato ere'e — Uwe uwe uimienoi inug mi'i haria ti aru yt iku'uro sese i ere i'atu'e.
JOH 8:53 Ewat ewaku hap apo po'og aha'a­se'i koro Aparãu ewaku hap kai i'atu'e. Ma'ato Aparãu iku'uro ra'yn i'ewyte irania'in Tupana ehay moherep haria i'atu'e. Sa'a­wy­'i­wuaria topap yne ma'ato En — Uwe uimienoi nug haria wyti aru yt iku'uro sese i ere. Eremõ­typot kahato eremo­wato kahato pãi i'atu'e — Uito po'og Aparãu kawiat po'og sa'a­wy­'iwuat Tupana ehay moherep haria kawiat e hat ewywuat En i'atu'e Iesui pe.
JOH 8:54 Mi'i hawyi toi'a­tu­wesat — Uiwe­mo­wato hap yt atunug neran i uiwe­kaipyi katu­pono atunug pote meiũran yt kan hamo i uhehay eweipuẽti ma'ato uimo­wato kahato hat ti Ui'ywot e.
JOH 8:55 Mi'i hat pe Uruetu­pana En ewei'e ma'ato yt pywo pe i mio tã ewei'e kat pote yt eweikuap i pytkai e. Ma'ato Uito ti kue pãi atikuap kahato Tupana ma'ato yt atikuap i Tupana ui'e pote heso rakano Uito areĩne'en ei'ewy kat pote ikuap hat sese Uito imiky­'esat nug hat sese Uito e.
JOH 8:56 Sa'a­wy'i ti eha'a­se'i Aparãu ta'a­kasa teran kahato uhut hap miit'in kapiat hap are. Pyno mesup ti Aparãu ta'a­kasa ra'yn uhut hap hawyi iwepit kahato sese topy­hu'at ra'yn e Iesui.
JOH 8:57 — Heso kahato Uhyt i'atu'e. Ase'i Aparãu ti nimo kahato ra'yn iku'uro ma'ato ewat ieĩne'en hap emotag hap yt 50 anu hin i heĩne'en hap i'atu'e. Pyno ti Aparãu yt ta'a­kasa hin i kue ewawi pãi i'atu'e.
JOH 8:58 — Uito ti aha'a­se'i Aparãu ywã'ĩ hap e'yianmete wuat ieĩne'en hat e Iesui.
JOH 8:59 Mio tã e hawyi ta'a­tukat nu ko'i yi totiat mak mak hamo i'auka hamo ta'a­tu'e ma'ato Iesui tuwemig miit'in sem py'a­setpe ra'yn hawyi toto ra'yn Tupana mõtypot hap yat wato pyi.
JOH 9:1 Mi'i hawyi yt Iuteu ywania potpap i hap e'at pe toto Iesui mu'ap upi towy­ria'in wywo. Mi'i hawyi mu'ap tote toipuẽti wẽtup ok miit yt ihapytig i rakat wemo­herep toty kaipywiat yt kat kapiat i akasa hat.
JOH 9:2 Mi'i hawyi Iesui wyria'in apo'i­'a­tu'e Iesui pe — Urumu'e hat i'atu'e uwe piat i'aparap hap upi som Tupana ti'a­piheg yt ihapytig i rakat i'atu'e. I'ywot'in piat i'aparap hap upi toĩne'en yt ihapytig i sio tuwewiat i'aparap sese hap kaipyi Tupana mi'a­piheg wo topy­hu'at i'atu'e.
JOH 9:3 — Yt wyti uiwy­ria'in yt i'ywot'in minug sa'ag i upi ti i'ewyte yt iwat iminug sa'ag i upi wyti yt ihapytig i hap are ma'ato mi'i miit yt ihapytig i rakat toĩne'en katu­pono meiũran Tupana tomo­herep teran miit'in me tuwe­mõ­typot hap tuete toimoe­hãite hawyi are e. Mi'i pote mi'i miit yt ihapytig i rakat toĩne'en are e.
JOH 9:4 Uiwy­ria'in ihot'ok puo aipotpap kuap ma'ato wãtym put'ok'e hawyi yt kat i watunug kuap are e. Mi'i hap ewy waku atunug yne uipo­'oro hat miky­'esat ewy koitywy koran katu­pono meiũran ti aru yt kat i atunug kuap i. Meiũran aru i'ypyryp ewy topy­hu'at mesuwe hawyi yt kat i wakuat watunug kuap i i'ypyryp kahato hap ewy pote aru e.
JOH 9:5 Uheĩne'en hap mesu­wa­rote turan Uito ti miit'in moẽtyhot hap ewywuat areĩne'en miit'in mo'a­kasa hamo mu'ap Tupana kapiat moherep hamo e. Pywo ti rat uwe uwe hewyry uhẽtyhot puo mi'i toto kuap Tupana kape are e topot­mu­'eria pe.
JOH 9:6 Mi'i hawyi kuitu'e yi tote hawyi totat topo pe yi og tẽty hy wywo toi'a­pokik hawyi mi'i wo toipen yt kat kapiat akasa i hat ete.
JOH 9:7 Mi'i hawyi to'e yt ihapytig i rakat pe — Mehĩ e mowe­hasei ro mekewat y'y Sirue e hap wo'osei hawe e Tupana Mipo­'oro y'y e hap kape. Mi'i rẽ toto ra'yn tuwe­hasei hamo. Tuwe­hasei hawyi ta'aipok ihapytig nakano.
JOH 9:8 Mi'i hawyi tuwe­mo­herep to'ya­ty­piaria pe hawyi te'e­ro'e to'ope — Ihapytig apo sa'a­wy­'iwuat yt ihapytig i rakat apo'i­'a­tu'e sio wẽtup ok i'atu'e. Mekewat yt kat sa'up i miium ẽtup hat ra'yn apo meke sio yt i'atu'e to'ope.
JOH 9:9 Ta'i mi'i rasom i'atu'e irania'in. — U yt mi'i i rat i'atu'e irania'in. I'ewywuat ne'i rat ma'ato yt mi'i i i'atu'e.
JOH 9:10 Uito rat e. — Aikotã pyno era'a­kasa ra'yn apo mio uhyt mimi i'atu'e.
JOH 9:11 — Wẽtup ok Miit Iesui e hap het rakat wyti tomi­'a­pokik yi tẽty hy wywuano uhehapen hawyi ti to'e uhepe — Mowe­hasei ro y'y Sirue e hap wo'osei hawe e uhepe hawyi areto arehasei hamo. Mi'i hawyi ti mio ara'a­kasa ra'yn uheha ra'yn e i'atuepe.
JOH 9:12 — Aikope mio emo'a­kasa hat i'atu'e.
JOH 9:13 — U yt atikuap i aikope e.
JOH 9:14 Mi'i rẽ ta'a­tuerut iha pakup takat Tupana mohey haria akag ko'i kape katu­pono Iesui timoe­ha­pytig mi'i yt aipotpap i hap e'at pe pote.
JOH 9:15 Mi'i hawyi Tupana mohey haria akag ko'i apo'i­'a­tu'e — Aikotã me etipuẽti ehapytig hap mehĩ i'atu'e. — Ta'i toi'a­pokik yi og tẽty hy wywuat hawyi ti uhehapen hawyi arehasei hawyi ti mio uheha ra'yn ara'a­kasa kuap ta'yn e.
JOH 9:16 Yt naku i ti rat emoehãite hat yt Tupana kaipyi i tut i'atu'e katu­pono yt aipotpap i hap e'at pe ipotpap emoehãite hap ete i'atu'e. Ma'ato irania'in te'e­ro'e — Kat pote yt Tupana kaipywiat i Mi'i Miit ewei'e i'atu'e. Yt Tupana kaipywiat i Mi'i Miit pote aikotã som pyno wakuat sese tutunug kuap yt Tupana Mipo­'oro i Mi'i Miit pote i'atu'e irania'in. Uruikuap ta'yn yt naku i nug haria po wo Tupana yt ipotpap i i'atu'e. Mi'i hawyi yt to'o­'e­wy­'ewy i ra'yn te'e­ru­wa­nẽtup.
JOH 9:17 Mi'i hawyi apo'i­'a­tu'e ihapytig nakat pe — Aikotaĩ eĩ pyno erewa­nẽtup mekewat emoeha­pytig hat ete apo'i­'a­tu'e hawyi toi'a­tu­wesat — Ta'i Tupana ehay enoi hat wyti Mi'i e i'atuepe.
JOH 9:18 Mi'i hawyi Iuteu ywania akag ko'i yt timohey i sa'a­wy'i yt iha i rakano toĩne'en hap. Mi'i hawyi ta'a­tu­kaykay i'ywot'in apota­'a­tu'e hamo.
JOH 9:19 I'ywot'in put'ok­'i­'a­tu'e hawyi Iuteu ywania akag ko'i apo'i­'a­tu'e — Eimẽpyt apo meiũ i'atu'e. Pywo apo to'y­wã'ĩ pyi te yt kat i ta'a­kasa i'atu'e. Pywo pote aikotã mio ta'a­kasa i'atu'e i'ywot'in me.
JOH 9:20 — Mi'i hat ti rat urumẽpyt i'atu'e i'ywot'in. Pywo ti to'y­wã'ĩ pyi te ti yt kat i ta'a­kasa ma'ato mio uruto wyti yt uruikuap i aikotã me toipuẽti teha­pytig hap i'atu'e i'ewyte uwe imoeha­pytig hat yt uruikuap i i'atu'e.
JOH 9:21 — Pyno apo'e­wei'e ro tope. Itag na'yn tohenoi kuap som i'atu'e i'ywot'in apo'e haria pe.
JOH 9:22 Mio tã hap ewy te'e­ro'e katu­pono Iuteu ywania akag pupiat te'e­ro­ken'ẽ haype katu­pono Iuteu akag ko'i te'e­ro'e ra'yn to'ope — Uwe uwe Iesui Tupana Mipo­'oro Aipo­rekuat wuat e hat wati­pugha aru Tupana mõtypot yat wato pyi i'atu'e. Pywo pe Mi'i Miit aheha­kye­ra'at hat ewei'e pote yt naku i eiweke po'og Tupana mõtypot yat wato pe uruto'e i'atu'e ra'yn wuat'i miit'in me Iuteu akag ko'i.
JOH 9:23 Mi'i pote yt kat to'e i teran i i'atu­mẽpyt moehãite hap etiat. Mi'i pote — Itag na'yn tohenoi kuap tã som i'atu'e i'ywot'in Iuteu akag ko'i apo'e haria pe te'e­ro­ken'ẽ haype.
JOH 9:24 Mi'i hawyi ta'a­tu­kaykay i ra'yn mekewat Iesui mimoe­hãite iha pakup takat ta'a­tue­wawi te'e­ro'e hamo — Hãpyk to ehenoi uruepe Tupana mõtypot hap ehay wo i'atu'e yt eso tei'o i'atu'e. Uruikuap ti Mekewat Miit emoehãite hat yt nakuat i i'atu'e.
JOH 9:25 — U pãi yt atikuap i kahato koitypuo waku rakat Mi'i Miit koitypuo yt ma'ato wẽtup hap atikuap sa'a­wy'i yt kat i ara'a­kasa kuap ma'ato mesup ti ara'a­kasa yne ra'yn. Mi'i hap yn atikuap kahato are e.
JOH 9:26 — Aikotã eĩ pyno tutunug emo'a­kasa hamo apo'i­'a­tu'e i.
JOH 9:27 — Ahenoi henoi ra'yn ti ehehamo aikotã uipo­hagnug hap e. Kat poteĩ eweikuap kahato teran uiwẽ pyi uimoe­hãite hap e. Eweipy­hu'at teran apo hemiit'in wo haype e.
JOH 9:28 Mio tã e pote i'atu­py­'ahak kahato tuete — Yt naku i en i'atu'e. En wyti iwat hemiit ma'ato uruto ti ase'i Musei emiit'in na'yn i'atu'e.
JOH 9:29 Uruto ti uruikuap kahato ase'i Musei mienoi Tupana ehay i'atu'e ma'ato mekewat Miit Iesui uwe mipo­'oro aikope pyi tut hap ti yt uruikuap hin i i'atu'e.
JOH 9:30 Mi'i hawyi iha pakup takat tuwa­nẽtup kahato hawyi to'e — Kat pote aikope pyi tut hap yt eweikuap i te are e. Eiwa­nẽtup to mehĩ'in katu­pono Mi'i Miit uimo­'a­kasa ra'yn pãi e.
JOH 9:31 Ta'i watikuap ta'yn yt nakuaria i tomi­sepap ko'i po wo Tupana yt timo­herep i towaku nug hap ko'i tomi­sepap ko'i ma'ato tomõ­typot haria tehay nug haria po wo toimo­herep wakuap sese mesuwe e.
JOH 9:32 Yi nug hawyi te mesuwat etiat miit'in yt inug kuap i yt iha rakat moeha­pytig hap ma'ato mesup ti toĩ na'yn wo'o­moe­ha­pytig hap. Pyno Mi'i Miit ti Tupana kaipywiat e.
JOH 9:33 Yt Tupana kaipywiat i ti Mi'i Miit pote yt uheha nug kuap hin i e.
JOH 9:34 Mio tã e pote po'og i'atu­py­'ahak tuete — Ehire pyi te ti yt nakuat i ereĩne'en yt e'ywot wakuap i rakat en pãi i'atu'e. Miit yt iwe'eg i rakat en i'atu'e. Aikotã pyno urumu'e teran en yt nakuat i en pytkai i'atu'e. Mi'i hawyi ta'a­tu­po­re­nõtem haty wo Tupana mõtypot yat pyi mekewat iha pakup takat.
JOH 9:35 Ma'ato Iesui tikuap Tupana yat pywiat ipore­nõtem hap hawyi toikat ra'yn. Toipuẽti hawyi to'e tomi­moe­hãite pe — Etomohey apo mekewat Wuat'i Miit'in Yke'et mekewat Tupana Sa'yru e.
JOH 9:36 — Atimohey teran nat wen ma'ato yt atikuap i uwe Mi'i Miit e. Ehenoi uhepe uwe Mi'i Miit pote atomohey meremo Mehĩ e.
JOH 9:37 Mi'i hawyi Iesui to'e — Uito rat Mi'i Miit e. Mio ti Mi'i ra'yn ihay ewywo e. Koitywy era'a­kasa ra'yn uhowawi e Iesui iha pakup takat pe.
JOH 9:38 — Ta'i Uipo­rekuat woro­mohey kahato ra'yn ti koitywy e Iesui pe. Mi'i hawyi toimõ­typot kahato ra'yn toiky'e kahato ra'yn Iesui.
JOH 9:39 Mi'i hawyi Iesui to'e tope — Mesu­wa­rotiat yt watikuap i kahato Tupana e haria yt aheha­pytig i e haria moeha­pytig sese hamo ariot e ma'ato irania'in watikuap kahato Tupana e haria aheha­pytig kahato e haria moeha­py­sasep hamo ariot e.
JOH 9:40 Mi'i hawyi irania'in itotiaria Tupana mohey haria akag ko'i mio tã e Iesui hawyi apo'i­'a­tu'e tope — Pyno apo uruto yt ihapytig i rakaria ewywuat ne'i ewanẽtup hawe i'atu'e.
JOH 9:41 — Ta'i e Iesui yt watikuap i kahato Tupana ewei'e pote meremo ihapytig nakaria wo eweipy­hu'at katu­pono ehehãite hap eweiky­'esat kahato ikaipyi ma'ato mio watikuap sakpo'e Tupana ewei'e mi'i pote yt eimoe­ha­py­hot'ok kuap i ra'yn Tupana e Iesui wakuaria uruto e haria pe.
JOH 10:1 Mi'i hawyi Iesui ti'a­tu­mu'e kahato hã'ãkap wo — Pywo ti are'e ehepe sero­'ok'e hat ti aihũ Uweuria yat pe yt teke kuap i he'o­ken­'ypy sese puo ma'ato kokawiat i'ahot'e hawuo yn teke kuap sero­'ok'e hat e.
JOH 10:2 Ma'ato ika'iwat sese teke te'o­ken­'ypy sese puo e.
JOH 10:3 Karãpe aka'iwat tiky­'esat ra'yn hawyi tut tohũ yat e'oken­'ypy kape mi'i oken'ypy apykok hat tikuap yt sero­'ok'e hat i mi'i hawyi toho­'o­ken­hyp'ok e. Mi'i hawyi ika'iwat ti'a­tu­kaykay tuwat tohũria i'atuwat i'atuset upi e. Mi'i hawyi ihũria tikuap ta'a­tu­ka­'iwat ehay ihay ete. Mi'i hawyi toimo­herep mu'ap hãpyk kahato tohũ yat kaipyi e.
JOH 10:4 Toipo­re­nõ'ẽ yne hawyi ihũria ikohye­wyry ta'a­tu­ka­'iwat ewat'ymo kat pote ta'a­tukuap ta'a­tu­ka­'iwat ihay ete e.
JOH 10:5 Irania'in kaykay e hap yt ta'a­tukuap i e ma'ato irania'in kaykay e hap pupi te'e­ro­ken'ẽ Uweuria e Iesui wo'o­nãpin haria pe.
JOH 10:6 Ma'ato wanẽtup haria yt tikuap i kat e Iesui ihay sehay hã'ãkap wo pote to'e i ra'yn Iesui i'atuepe.
JOH 10:7 — Pywo pe ti Uito ti oken'ypy ewy uimohey haria pe e.
JOH 10:8 Irania'in ti uimohey haria kaykay e haria uihũria hero'ok haria ewy tukup­te'en e ma'ato uihũria yt tikuap i sero­'ok'e haria ehay ihay ete ta'a­tu­kaykay hap e.
JOH 10:9 Uito ti oken'ypy ewywuat mi'i tupono uwe uwe uimohey mi'i hat tipuẽti teha­kye­ra'at hap sese are aikotã aihũria apykok hat tuwe­'o­ken­hyp'ok mekewat hũria yat i'atu­po­re­nõtem hamo i'atupoi hamo. Mi'i hawyi wãtym i turan toi'a­tunug i ra'yn i'atu'yat pe e. Mi'i hap ewywuat uihũria uimohey haria apykok hat kahato areĩne'en e.
JOH 10:10 Ma'ato sero­'ok'e hat tut wyti hũria ko'i u hamo i'atu­'auka hamo hero'ok hamo tut e. Uito ti ariot ma'ato uimohey haria ieĩne'en hap ium hamo po'og po'og ikahu sa'a­wy­'i­tewuat kawiat ium hamo e.
JOH 10:11 Aikotã hũria ko'i ka'iwat wakuat kahato tohũria apykok waku kahato hap ewy Uito areĩne'en uimohey haria apykok hamo. Uito ati'a­tu­'a­pykok kahato uihũria i'atu­ky'e haype e. Yt areken'ẽ hin i ui'auka wanĩ­kaptia piat hap pupi e. Ui'auka pote ui'auka ma'ato yt ahok'iwat hin i wanĩ­kaptia po pe uihũria ui'auka pytkai e.
JOH 10:12 Ma'ato wẽtup ok hũria apykok hat ti token'ẽ wewuat'i awahuru ko'i pupi yt ika'iwat sese i pote yt towanuat sese i hũria pote e. Ha'up ky'ewiat yn ipotpap pote teput kahato awahuru ko'i õ'ẽ hap pupi — Ui'u aru awahuru ko'i e hawyi to'atoiat ra'yn toka­'i­wanuat hũria ko'i awahuru mi'u wo e.
JOH 10:13 Ipoity'i pote to'atoiat ra'yn toka­'iwat hũria hawyi awahuru ko'i ti'a­tu­'uka kahato ra'yn ta'a­tu­sytpok ta'yn ma'ato ha'up ky'esat hat potiat ipotpap takat pote yt iky'e sese ne'i toka­'iwat hũria mi'i pote ipoity'i hawyi teput kahato ne'i are e.
JOH 10:14 Ma'ato ti Uito hũria apykok hat wakuat sese ewy Uito aikotã Ui'ywot uikuap aikotã atikuap Ui'ywot mi'i hap ewy ti uihũria uimohey haria ati'a­tukuap Uito e.
JOH 10:15 Yt atoiat hin i uihũria uimohey haria awahuru ko'i ewywuat put'ok'e i'atuete pote yt areput hin i ma'ato ta'a­tue­ha­kye­ra'at kahato uimohey haria awahuru ewywuat wẽ pywiat hep hamuat e. Uiku­'uro pote uiku­'uro wen ma'ato yt atoiat hin i wẽtup ok uimohey hat e Iesui.
JOH 10:16 Yt torania i uihũria uimohey haria meiũwat ywania kaipyi pãi ma'ato i'ewyte ati'a­tu­kaykay aru uimohey hanuaria wẽtup ywania kaipyi e. Mi'iria aru wo'o­'e­wywuat tukup­te'en katu­pono uimohey haria wẽtup sok yn i'atu­'y­wania pytkai e. Mi'i hawyi wẽtup ok yn i'atu­'a­pykok hat topy­hu'at mekewat e'at pe mi'i ti Uito e.
JOH 10:17 Uiku­'uro hamuat wyti uimohey haria uihũria ehakye­ra'at hamo e. Mi'i tupono Ui'ywot uiky'e kahato e. Mi'i tã atunug hawyi uimoieĩ­ne'en i ra'yn Ui'ywot e.
JOH 10:18 Sa'a­wy'i to'e uhepe Ui'ywot — Atiky­'esat eku'uro Uha'yru e. Mi'i hawyi ereĩne'en i hap atiky­'esat e uhepe Ui'ywot e. Mi'i pote waku Papai are emiky­'esat ewy yn ni atiky­'esat are. Uiku­'uro hawyi areĩne'en kuap i uiwewi are. Uimi­ky­'esat ewy areĩne'en i kuap uiku­'uro hawyi Papai are'e sa'a­wy'i are e. Mi'i tupono uiky'e kahato Ui'ywot are e Iesui.
JOH 10:19 Mio tã e pote itotiaria Iuteu ywania akagnia tu'uka kahato ra'yn ta'a­tuehay wo
JOH 10:20 — Heso'ok ta'yn wyti Iesui i'atu'e katu­pono ahiag wyti tuete i'atu'e irania'in me. Kat poteĩ pyno eweikuap teran ipotmu'e hap i'atu'e miit'in me heso'ok ta'yn ahiag eiam Iesui pote i'atu'e.
JOH 10:21 Ma'ato irania'in — Yt wyti yt wyti i'atu'e ma'ato ahiag emiit pote ti yt ihay hãpyk i i'atu'e. Aikotã ten ahiag timoe­waku yt ihapytig i rakat Iesui ewy i'atu'e Iuteu ywania akagnia pe.
JOH 10:22 Meiũran hawyi Iesui toĩne'en Ieru­sarẽi me wẽtup e'at pe i'aman mot ewaty pe Iuteu ywania ta'a­tunug i ra'yn ienuk hap tawa Ieru­sarẽi me. Ta'a­tue­katup Tupana mõtypot hap yat sa'a­wy­'iwuat inug hap e'at itote.
JOH 10:23 Mi'i turan Iesui hewyry itote Tupana mõtypot yat iwato rakat pe morekuat sa'a­wy­'iwuat Sarumãu e'oken upi hewyry.
JOH 10:24 Mi'i turan Iuteu ywania akagnia te'e­ru­wa­'a­tunug i ra'yn Iesui kape apo'i­'a­tu'e hamo — Kat poteĩ yt heremo i ehay i'atu'e. Uruwesat ro uwe sese En i'atu'e katu­pono uruikuap teran ewẽ pyi Tupana Mipo­'oro Urupo­rekuat nuat apo En sio apo yt i'atu'e.
JOH 10:25 — Karania wo i ra'yn ahenoi ehepe uwe Uito hap ma'ato ti yt uimohey i eipe e Iesui. I'atu kahato ra'yn wakuap sese yt miit'in minug kuap ewywuat i atunug uipo wo ehehamo uwe Uito moherep hamo uwe Ui'ywot moherep hamo. Ui'ywot miky­'esat ewy atunug katu­pono mi'i ko'i wo atimo­herep kahato ra'yn ehepe uwe Uito hap e.
JOH 10:26 Ma'ato ti yt uimohey i eipe ti katu­pono yt uihũria i eipe pote e.
JOH 10:27 Uimohey haria ti inug kahato uimi­ky­'esat ewy aikotã aihũ ko'i uihũria Uweuria ko'i tunug aikotã ta'a­pykok hat miky­'esat ewy e. Uimohey haria kuap hat kahato Uito. I'ewyte ta'a­tunug kahato uimi­ky­'esat hap ewy e.
JOH 10:28 Ati'a­tu­moieĩ­ne'en i ra'yn uimohey haria e. Yt karãmuo i ra'yn ti aru i'atu­ka­huro sese e uiwywo yn na'yn te'e­ro­py­hu'at wuat'i e'at pe aru e. Mi'i hawyi ti aru yt uwe i ra'yn hero'ok kuap uipo pyi uimohey haria katu­pono ati'a­tu­'a­pykok kahato uihũria e Iesui ahepiat.
JOH 10:29 kat pote Ui'ywot po'og hesaika wuat'i kai e. I'ewyte Ui'ywot wyti uimohey haria apykok hat kahato toĩne'en e. Mi'i pote ti yt uwe i tihep kuap Ui'ywot po pyi uihũria e.
JOH 10:30 Ui'ywot Uito ti wẽtup ok yn e Iesui.
JOH 10:31 Mio tã e pote ta'a­tusat i ra'yn nu ko'i yi totiat Iesui auka mak mak wuat hamo.
JOH 10:32 Ma'ato Iesui to'e — Kat po'ypyi ui'auka teran nu wo e. — Ipoity kahato ra'yn tig atunug wakuat Ui'ywot miky­'esat ewywuat ehehamo e. Kat som ehehamo atunug sa'ag ne'i ui'auka teran ehepiat hamo e Iesui.
JOH 10:33 — Yt eminug wakuap ko'i po'ypyi i ti urui'auka teran En i'atu'e ma'ato e'e hap po'ypyi i'atu'e. En ni miit kawiat ne'i ma'ato ti ewewi erenug Tupana wo i'atu'e.
JOH 10:34 Mi'i hawyi Iesui to'e i'atuepe — Sa'a­wy'i ti einãpin hawe mio tã to'e miwan me — Eipe ti Tupana ko'i e Tupana e.
JOH 10:35 Pyno watikuap ta'yn kat e Tupana hãpyk yn tohenoi. Mi'i kaipyi watikuap ta'yn iwan me tohenoi ra'yn yne ihay pywo piat hap yn e. Eipe ti Tupana ko'i e ti Tupana sa'a­wy'i tomi­'ai­roria tehay enoi haria pe e.
JOH 10:36 I'ewyte Uito Ui'ywot ui'airo hawyi uipo­'oro miit'in kape ihay enoi hanuat. Mi'i hawyi are'e miit'in me — Uito ti Tupana Sa'yru i'atue­ha­kye­ra'at hamo are yn ma'ato mio tã are pote — Yt naku i kahato En ewei'e yt etimõ­typot i Tupana ewei'e uhepe.
JOH 10:37 Yt atunug i Ui'ywot misepap ewywuat pote rasom yt uimohey i eipe ma'ato atunug imisepap ewywuat pote waku uimohey haria wo eweikup­te'en e.
JOH 10:38 Ta'i atikuap yt uimohey i haria eipe ma'ato Ui'ywot misepap ewy uiminug kape waku ewei'a­kasa mi'i pote uiminug wakuap ko'i upi waku uimohey e. Uiminug wakuap eweimohey hawyi ti rẽ meremo eweikuap ta'yn eipy'a pe uiat uhesaika hap Ui'ywot hesaika hap ok tã ne e. Uimohey hawyi meremo eweikuap eipy'a pe Uito Ui'ywot wẽtup ok yn hap e Iesui.
JOH 10:39 Mi'i pote ta'a­tu­pyhik teran i ra'yn ma'ato tuwe­'a­puksit ne'i Iesui.
JOH 10:40 Mio tã e rokirẽ Iesui toto ra'yn topyhik teran haria kaipyi. Pya Iutãu hy sakpo sa'a­wy­'iwuat Iuwãu ieĩne'en miit'in i'atu­set'ok hap kape toto.
JOH 10:41 Mi'i turan miit'in tõ'ẽ tõ'ẽ howawi. Mi'i hawyi te'e­ro'e to'ope — Iuwãu ahet'ok hap yt kat i mowato hap ko'i toimo­herep ahepe Tupana kaipyi. Yt karãpe i Tupana yn misepap kuap hap ewywuat tutunug ahehamo wen ma'ato mekewat imienoi Iesui etiat pywuat kahato rakat tohenoi ahepe Iuwãu i'atu'e to'ope.
JOH 10:42 Mi'i hawyi itote typy'i ra'yn Iesui mohey haria pakuptia te'e­ro­py­hu'at Iutãu hy sakpo.
JOH 11:1 Mi'i hawyi Iesui miky'e kahato Irasaru e hap het rakat i'ahu kahato topy­hu'at tawa hit Petania pe. Mi'i ti toĩne'en itote toinyt'in Mata i'ewyte Maria wywo toĩne'en.
JOH 11:2 Mekewat Maria ti Iesui py ko'i toipen sa'a­wy'i mohag hy hekat rakat wywo hawyi toimogag ipy ko'i to'asap wywo. Mi'i Maria ekywyt ti i'ahu kahato toĩne'en.
JOH 11:3 Mi'i hawyi mana Mata i'ewyte mana Maria te'e­ru­we­hay­po­'oro Iesui kape — Mimi i'atu'e urukywyt emiky'e kahato rakat i'ahu kahato i'atu'e i'atuehay tehay po'oro.
JOH 11:4 Iesui tikuap ta'yn i'atu­we­hay­po­'oro hap hawyi to'e topot­mu­'eria pe — Aiwy Irasaru i'ahu kahato pãi e ma'ato yt iku'uro hamuat i wyti e. Ta'i meiũran aru aiwy Irasaru waku hawyi mi'i topy­hu'at Tupana mõtypot kahato hap i'ewyte Ha'yru mõtypot kahato hap e topot­mu­'eria pe.
JOH 11:5 Iesui ti'a­tu­ky'e kahato ti Mata i'ewyte Maria i'ewyte Irasaru.
JOH 11:6 Iesui mi'a­tu­ky­'eria kahato ti mi'iria ma'ato ti yt toto i i'ahu rakat kape. Typy e'at yt toto i.
JOH 11:7 Typy e'at tokosap hawyi to'e temiit'in me — Pyno to'iro tawa Petania yi Iuteu piat kape e.
JOH 11:8 Mi'i pote iwyria'in tiwesat — Urumu'e hat yt naku i ereto tama Iuteu kape katu­pono ga'atpo porap e'auka nu wo itote i'atu'e.
JOH 11:9 Mi'i pote Iesui ti'a­tu­wesat — Meiũ te ti yt ui'auka kuap i katu­pono uhe'at yt put'ok'e i te ui'auka hamuat e. Aiko­hye­wyry ihot'ok puat pote yt wata'at kuap i kat pote toĩne'en aimoẽ­tyhot hap at pote e.
JOH 11:10 Ma'ato wãtym na'yn hawyi i'ypyryp ta'yn ti hawyi yt aiko­hye­wyry kuap i kat pote meremo wata'at mu'ap upi yt kat i aimoẽ­tyhot hap aikai pote e. Mi'i hap ewy kahato areĩne'en mesuwe eipy­'a­setpe ariãty ewywuat eimoẽ­tyhot hap areĩne'en eipy­'a­setpe Uito uiwy­ria'in e.
JOH 11:11 Uiwy­ria'in e aiwy Irasaru ti toket ra'yn mi'i pote areto ra'yn mesup ihymut hamo e.
JOH 11:12 — Mehĩ i'atu'e waku ti i'ahu pote mohag iket hamo i'atu'e. Tuwe­mohy hawyi ti aru meiũran waku i ra'yn tuete i'atu'e.
JOH 11:13 Katu­pono iwyria'in te'e­ru­wa­nẽtup iket hap kape yn yt ta'a­tukuap i iku'uro sese e hap ete ihay.
JOH 11:14 Mi'i hawyi ti tohenoi ra'yn — Uiwy­ria'in e aiwy Irasaru ti iku'uro sese ra'yn e.
JOH 11:15 Mi'i pote to'iro iku'uro hap kape e. I'ahu turan yt areto teran i howawi e. Po'og waku areto mesup iku'uro sese rakat toĩne'en turan katu­pono uiminug kape ewei'a­kasa aru hawyi po'og po'og uimohey eipe e.
JOH 11:16 Mi'i hawyi to'e wẽtup ok hemiit ipat rakat Tume e hap — Pyno to'iro aito aiku­'uro iwywo e ipotmu­'eria pe.
JOH 11:17 Mi'i hawyi tuwat ra'yn. Put'ok­'i­'a­tu'e itote hawyi ta'a­tu­henoi ra'yn Iesui pe — Iku'uro ra'yn ewy Irasaru Uhyt i'atu'e. Ga'atpo 4 e'at ra'yn uruisyp ta'yn Mimi i'atu'e. Toĩne'en ihyp hawe 4 e'at ra'yn i'atu'e.
JOH 11:18 Pyno tawa hit Petania yt pya hin i toĩne'en tawa wato Ieru­sarẽi kai aikotã aiko kapiat pya hap ewy toĩne'en.
JOH 11:19 Mi'i pote tõ'ẽ tawa Ieru­sarẽi ikaipyi Iuteuria mana Maria mana Mata'in moesaika hamo mowepit hamo.
JOH 11:20 Mana Mata tikuap ta'yn Iesui ut hap hawyi toto meremo ra'yn howa kape ma'ato mana Maria yt toto i ma'ato to'yat pe topy­hu'at re.
JOH 11:21 Mi'i hawyi to'o­puẽti Iesui wywo hawyi to'e Iesui pe — Mimi e iku'uro ra'yn aiwy urukywyt e. Yt naku i katu­pono meiũpe ereĩne'en pote ti neke urukywyt yt iku'uro hin i Mimi e.
JOH 11:22 Ma'ato mi'i pytkai atikuap kat ehẽtup kat ehẽtup Tupana kape mi'i pote tutum merep emiẽtup ok tã hap atikuap e Mata.
JOH 11:23 — Pywo mana ekywyt Irasaru toĩne'en i ra'yn e.
JOH 11:24 — Pywo an Mimi atikuap mi'i e atikuap aikotã aiku­'uro hawyi aheĩne'en i hap toĩne'en aru e atikuap uikywyt ti aru tuwẽtem toku­'uro hap pyi mekewat ikahuro hap e'at pe tuwe­hymut i hamuat uikywyt aito irania'in ewy te e.
JOH 11:25 — Mana e Uito ti meiũ iku'uro rakaria moieĩne'en i hat sese e. Uwe uwe iku'uro uimohey hano turan mi'i miit meiũran aru toĩne'en i ra'yn wuat'i e'at pe erẽtem no are'e aru tope hawyi e.
JOH 11:26 I'ewyte uwe uwe uimohey hano topy­hu'at toĩne'en ne hap turan mi'i miit yt karãpe i topap sese hamuat aru ma'ato topy­hu'at wuat'i e'at pe e. Mana e etimohey apo mio tã ui'e hap e.
JOH 11:27 — Pywo ti an Mimi woro­mohey kahato e. En ni Urupo­rekuat nuat Tupana Mipo­'oro urumie­katup e woro­mohey kahato e. En ni Tupana Sa'yru sese Mimi e.
JOH 11:28 Mio tã mana Mata to'e hawyi ta'aipok i ra'yn to'yat kape. Mi'i hawyi toikaykay toky­py'yt Maria iweran turan tohenoi hamo — Tut ra'yn ti Aimu'e hat e. Mi'i ti ekaykay ra'yn Maria e.
JOH 11:29 Maria tikuap ta'yn Iesui ut hap hawyi meremo ipoĩ'ãm hawyi toto ra'yn Iesui kape.
JOH 11:30 Mi'i turan Iesui yt put'ok'e i te tawa Petania pe ma'ato toĩne'en mu'ap tote aiũpe Mata piat topuẽti hap tote.
JOH 11:31 Mi'i hawyi Iuteu ywania Maria'in mowepit teran haria to'yat pywiat Maria tome­remo hap kape te'e­ra­ha'at hawyi — Pyno toto ra'yn tokywyt Irasaru syp hap kape wyti i'atu'e. Toto ra'yn tuwak hamo i'atu'e te'e­ru­wa­nẽtup hawe. Mi'i pote tuwat hewat­'ymo.
JOH 11:32 Mi'i hawyi put'ok'e Maria Iesui etiat hawyi tuwe­pỹ­'ã­tutuk howawi hawyi to'e — Uika­'iwat meiũpe ereĩne'en pote yt iku'uro i uikywyt Mimi e.
JOH 11:33 Iesui ta'a­kasa Maria wak towy­ria'in wywuat hap kape hawyi toha­ty'u kahato topy'a pe — Aiwy iku'uro ta'a­tu­wa­nẽtup hawe pote e.
JOH 11:34 — Aikopeĩ ewetopag ewehyp aiwy e. — Uruka­'iwat i'atu'e to'iro pyno uruimo­herep epe aikope uruisyp aiwy Irasaru piit i'atu'e.
JOH 11:35 Mi'i hawyi Iesui tuwak ta'yn.
JOH 11:36 — Tuwak ta'yn Iesui i'atu'e koitywy watikuap ta'yn Irasaru ky'e kahato Iesui piat hap i'atu'e to'ope Iuteuria.
JOH 11:37 Ma'ato irania'in te'e­ro'e — Toiky'e pote kat pote yt tut i ga'atpo imoehãite hamo i'atu'e. Toimoe­hãite kuap kahato i'ahu rakaria yt ihapytig i rakaria kat poteĩ pyno yt tut i Irasaru moehãite hamo iku'uro hap e'yiãn me te i'atu'e.
JOH 11:38 Mi'i hawyi toha­ty'u kahato hap wywo put'ok'e aikope towy Irasaru ta'a­tupag nu ka'a pe hap kape. Mi'i hap tote sa'a­wy'i ti yi py hot'i piat nu ka'a pe ta'a­tusyp Irasaru hawyi ta'a­tu­'o­kenhyp nu wato wo.
JOH 11:39 Mi'i hawyi Iesui to'e — Eweho­'o­ken­hyp'ok to aiwy Irasaru e. Ma'ato inyt Mata to'e — Yt rei'o Mimi katu­pono nem na'yn ti som urukywyt kat pote 4 e'at ra'yn mekepe topy­hu'at. I'okpuk ta'yn e. Yt naku i waho­'o­ken­hyp'ok mesup e.
JOH 11:40 Ma'ato Iesui to'e — Mana Mata etiwaure ra'yn apo mu'ap upiat ui'e hap epiat e. Uimohey pote ti aru era'a­kasa Tupana minug wakuat sese mesup are'e hap etiwaure ra'yn apo'e.
JOH 11:41 Mio tã e hawyi ta'a­tue­ro'ok ta'yn nu kawiat he'o­kenhyp hap. Mi'i hawyi Iesui teha'at atipy kape.
JOH 11:42 Mi'i hawyi to'e — Ui'ywot e waku kahato En are e. Yne e'at pe etikuap ui'e hap Papai ma'ato irania'in meiũpiaria yt tikuap hin i uipo­'oro epiat hap. Mi'i tupono uhehay ewywo i'atue­hamo Uipo­'oro hat En hap ta'a­tukuap hamo Papai e. Arehum ewawi Ui'ywot Uipo­'oro hat e.
JOH 11:43 Mi'i hawyi Iesui to'e tehay pirik wo — Irasaru erẽtem no gu'uro pyi e.
JOH 11:44 Mio tã e pote tuwẽtem meremo gu'uro pyi Irasaru nu ka'a pyi topo­'i'­po'i hap tesokpe wywo topiit etiat topo etiat topy etiat to'akag etiat tosuwy hap sokpe wywo tuwẽtem. Mi'i hawyi Iesui to'e — Eweipo­'i­po'i hap porop to hewyry mono e. Mi'i hawyi Irasaru toĩne'en i itote waku pe ipiit tuwẽtem na'yn gu'uro pyi.
JOH 11:45 Mi'i hawyi irania'in Maria upiaria te'e­ra­'a­kasa ra'yn wakuap nug Iesui piat hap hawyi ta'a­tu­mohey ra'yn Iesui.
JOH 11:46 Ma'ato irania'in akasa haria Iesui ewanĩkap ko'i tuwat meremo ra'yn Iuteu akag ko'i piat enoi hamo aikotã Iesui timoieĩ­ne'en iku'uro sese rakat hap enoi hamo.
JOH 11:47 Ta'a­tukuap hawyi pa'i watoria ko'i i'atu­'akag ko'i meremo te'e­ru­wa­'a­tunug na'yn aikotã hap kuap hamo. Mi'i hawyi te'e­ro'e to'ope — Aikotã som waku watunug aru i'atu'e katu­pono yt miit mise­papnug kuap hap ewy i Iesui tunug wakuat wuat'i ehamo i'atu'e.
JOH 11:48 — Yt kat i watunug pote ti aru yt wati­pyhyp i Mi'i Miit pote ti aru meiũran typy'i kahato Iesui mohey haria tukup­te'en aru mesuwe i'atu'e. Mi'i hawyi — Pywo ti Iesui yn ni waku Aipo­rekuat nuat e haria yn na'yn te'e­ro­py­hu'at mesuwe irane i'atu'e. Mi'i pote ti aru aipo­re­kuaria Humanu ywania i'atu­py­'ahak kahato tukup­te'en ai'y­wania ete Iesui topy­hu'at ai'y­wania Porekuat no hawyi. Mi'i pote ti aru ta'a­tu­po­'oro ta'a­tue­su­ra­ra'in aimoma hamo Ahetu­pana yat pugha hamo i'atu'e to'ope. Mi'i hawyi ahetawa ikahu rakat ta'a­tu­pugha yne. Ai'y­wania ta'a­tu­'a­tu­'uka torania yne yne i'atu'e.
JOH 11:49 Toĩne'en wẽtup ok pa'i wato sese i'atu­py­'a­setpe Pa'i Ka'i­wasi e hap.
JOH 11:50 Mi'i ti to'e — Apuete uiwy­ria'in e yt eweikuap i apo aikotã po'og waku Tupana wanẽtup hawe wẽtup ok miit iku'uro ahetiano sio watopap yne yne ai'y­wania sio ta'a­tu­moma yne yne ai'y­wania e. Po'og po'og waku wati­'auka Mi'i Miit Iesui e. Iku'uro aika­wiano hawyi waku pe wato­py­hu'at e Iuteuria pe.
JOH 11:51 Pa'i Ka'i­wasi toĩne'en pa'i wato sese mekewat e'at pe itote mi'i pote Tupana ti ihay iwẽ pyi yt toikuap i pytkai. Iwẽ pyi Tupana tohenoi Tosa­'yru ku'uro Iuteu ywania etiano hap ete.
JOH 11:52 Ta'i ma'ato ti yt Iuteuria yn etiano i iku'uro ma'ato i'ewyte torania ywania ehakye­ra'at hamo wyti iku'uro. Mi'i hawyi tutunug yne ywania kaipywiat tomẽ­pyt'in no.
JOH 11:53 Mi'i hawyi mekewat e'at pe nagnia te'e­ru­wa­nẽtup at aikotã waku Iesui auka hamo.
JOH 11:54 Mi'i hawyi Iesui yt hewyry i ra'yn tama Iuteu pe ma'ato wẽtup yi kape toto towy­ria'in wywo mekewat yahig Ewarĩ e hap upi pya Iuteu ywania kai hewyry.
JOH 11:55 Meiũran put'ok'e i tawa Ieru­sarẽi miat Iuteuria enuk koro hap e'at pe. Mi'i turan tuwat kahato miit'in tawa Ieru­sarẽi kape waku pe yne nug hamuat mekewat ienuk hap e'at koro owakai te hamo tuwat aikotã ta'a­tueko ewy te'e­ruwei. Yne waku hawyi ta'a­tu­'auka ta'a­tu­hũria Tupana mõtypot hamo.
JOH 11:56 Mi'i turan tawa Ieru­sarẽi miaria tikat kahato Iesui itote aikope toĩne'en hap. Put'ok­'i­'a­tu'e Tupana mõtypot hap yat iwato rakat pe hawyi te'e­ro'e to'ope — Tut apo Iesui i'atu'e sio yt i'atu'e.
JOH 11:57 Mi'i hawyi pa'i koro ko'i i'ewyte Tupana mõtypot yat akag ko'i te'e­ro'e irania'in me — Eweikuap Iesui aikope toĩne'en pote ewehenoi uruepe i'atu'e katu­pono ta'a­tu­pytyk teran ipyhik hamo ta'a­tu­'auka teran haype.
JOH 12:1 6 e'at mekewat ienuk koro e'at owakai te mekewat sa'a­wy'i wanĩkap po pywiat hekatup hap e'at owakai te Iesui toto ra'yn tawa Petania kape towy'ok moieĩne'en i hap kape toto. Irasaru tomi­'ã­pe­'ok'am gu'uro pywiat yat kape toto temiit'in 12 ok takaria wywo toto.
JOH 12:2 Itote Irasa­ru'in tunug ienuk wato hap Iesui etiat tuwehum hap. Itote mana Mata tipo­wyro mi'u nug hap ete. Waku yne hawyi ta'a­tu­kaykay Iesui hawyi te'e­ra­'apyk ta'yn. Irasaru ta'apyk yparakai auri wo i'ewyte Iesui ywytpe.
JOH 12:3 Mi'i hawyi mana Maria tat topohag hy heiam ha'up woity kahato rakat totat mohag hy Naratu pohyt kawiat ha'up woity kahato rakat totat. Mi'i hawyi Iesui py ete toi'okpun yne mekewat mohag hy i'ewyte toimogag ipy to'asap mo. Mi'i hawyi ikamhig se kahato ra'yn i'yat waku kahato.
JOH 12:4 Mi'i hawyi ipotmu'e Iuta mekewat Simãu Ikarioti sa'yru Iesui ma'at hanuat to'e
JOH 12:5 — Yt kan hamo i eti'okpun mohag hy e. Kat poteĩ yt etiwe­neru i mekewat mohag hy hawyi ha'up woity rakat etat hamo hawyi atum ha'up yt hekat i rakaria pe e. Ta'i ha'up woity'i rakat ti meke 300 e'at motpap kapiat hap sa'up. Ha'up woity kahato rakat ti mekewat e mana pe.
JOH 12:6 Iuta tiky­'esat ha'up topo piat hap towano. Yt toiky'e hin i yt hekat i rakaria pytkai i katu­pono tote­ro'ok kahato 12 ok takaria wywuat tineiru heiam miat.
JOH 12:7 Ma'ato Iesui to'e — Iuta wãi mio tã ere te mana Maria pe are'e pãi katu­pono uiku­'uro hap owakai te aheko ewy mana uipen mohag hy wo uipiit ete e.
JOH 12:8 Areto irane ra'yn Uito mi'i hawyi yt kat i aru ma'ato etum kuap emiium ko'i uhepe e. Yt hekat i rakaria ti aru ma'ato tukup­te'en wuat'i e'at pe mesuwe eiwywo kat ium ehepiat hamo.
JOH 12:9 Mi'i hawyi Iuteuria tikuap ta'yn mekewat tawa Petania piat Iesui ieĩne'en hap. Mi'i pote typy'i te'e­ru­wa­'a­tunug Iesui kapiat te'e­ra­'a­kasa hamo i'ewyte Irasaru kapiat te'e­ra­'a­kasa hamo imi'ã­pe­'ok'am gu'uro pywiat hat kapiat hamo.
JOH 12:10 Mi'i hawyi Iesui mimoieĩ­ne'en Irasaru kapiat akasa haria timohey kahato ra'yn Iesui.
JOH 12:11 Mi'i pote pa'i kororia tikat aikotã waku Irasaru auka hamo i ra'yn ta'a­tukat.
JOH 12:12 Wẽtup e'at itote hawyi toto ra'yn Iesui tawa Ieru­sarẽi kape. Mi'i totiat turan ti ienuk wato hap nug haria tikuap ta'yn Iesui ut hap.
JOH 12:13 Mi'i hawyi typy'i ra'yn tuwat Iesui owawi. Mi'iria tuwat Pinawa yhop ta'a­tupo piat wywo Iesui kape. Mi'i wywo i'atuehay wepit kahato — Waku ti rat En. Waku ti rat En Uhyt Mimi i'atu'e. En ni Tupana Mipo­'oro ai'y­wania Porekuat i'atu'e. En ni Tupana Mipoi­tyro po'og waku torania kawiat hat ai'y­wania Porekuat nuat Isareu ywania Porekuat nuat i'atu'e. Waku ti rat En Uhyt Mimi i'atu'e haty wo Iesui pe.
JOH 12:14 Mi'i hawyi Iesui tipuẽti ihũ Iumetiu.
JOH 12:15 Mi'i tote ta'apyk aikotã sa'a­wy­'ite miwan me Sakaria 9.9 pe Tupana to'e hap ewy — Tawa Siãu piaria woro­ho­'oe­ha­kye­ra'at teran ehewa­nĩ­kaptia po pyi e. Yt eweiken'ẽ po'og tei'o tawa Ieru­sarẽi piaria katu­pono atipo­'oro irane Eipo­rekuat sese ehowawi eheha­kye­ra'at hamo e. Mi'i Miit ti aru atipo­'oro ehowawi apykpe eihũ Iumetiu mẽpyt rote tut irane e miwan me Tupana e hap.
JOH 12:16 Iesui emiit'in yt tikuap i kahato yianmiat aikotã aru Tupana e hap ko'i miwan miat Iesui etiat miwan miat ma'ato Iesui tuwẽtem gu'uro pyi hawyi i'atu­wa­tetup kahato Tupana e hap kape hawyi — Meiẽ i'atu'e Iesui tunug yne mesuwe aikotã aikotã Tupana to'e yianme miwan me e hap ewy kahato aikotã iwan miat Tupana e hap ewywuat Iesui tunug na'yn i'atu'e. Iesui ta'aipok atipy kape hawyi ta'a­tukuap aikotã iwan miat Tupana e hap ewywuat Iesui tunug ra'yn ta'a­tukuap ta'yn.
JOH 12:17 Mi'i hawyi Iesui wy Irasaru moieĩne'en pakup i hap kapiat akasa haria henoi henoi kahato ra'yn tawa Ieru­sarẽi miaria pe aikotã Iesui tihep Irasaru gu'uro pywiat hap ta'a­tu­henoi henoi aikotã Iesui tunug yt miit'in mikuap ewy i tomi­sepap ko'i ta'a­tu­mo­herep miit'in me itote.
JOH 12:18 Mi'i pote ti miit'in tõ'ẽ kahato Iesui kuap hamo.
JOH 12:19 Mi'i pote Iuteu wo'o­nãpin haria te'e­ro'e to'ope — Yt naku i katu­pono miit'in i'atupap kahato ra'yn Iesui upi i'atu'e. Yt naku i katu­pono ta'a­tunug neran Iesui I'atu­po­rekuat nuat i'atu'e. Wãiwa­to'e kahato pytkai ahepiat ta'a­tu­nãpin hap yt ta'a­tu­mohey hin i aiwat wãi'ai'e hap i'atu'e. Yt naku i tuwat tuwat Iesui upi i'atu'e to'ope.
JOH 12:20 Mi'i turan wẽtup ywania yi Karasia kaipy­wiaria put'ok­'i­'a­tu'e tawa Ieru­sarẽi me Tupana mõtypot hamo mekewat ienuk koro hap e'at pe.
JOH 12:21 Mi'i hawyi ta'a­tu­hẽtup Iesui emiit Wiripi pe — Uhyt uruehay teran Iesui wywo i'atu'e mekewat Wiripi pe yi Karasia kaipywiat tawa Petsaita kaipywiat.
JOH 12:22 Mi'i hawyi Wiripi toto Ãtere kape yi Keresia ehay enoi hamo wẽtup ywania miẽtup enoi hamo. Mi'i hawyi tuwat typy ok Iesui kape topot­mu­'eria.
JOH 12:23 Mi'i hawyi Iesui tikuap toky­'esat hap Keresia ywania piaria hap hawyi to'e — Uimõ­typot hap e'at yt pya hin i e. Miit'in Yke'et areĩne'en pytkai uiku­'uro hamuat ra'yn ma'ato uiku­'uro hawyi wyti aru uimõ­typot hap e'at put'ok'e e.
JOH 12:24 Pywo ti are'e kat iã'ỹi yt misyp i te pytkai yt iku'uro i ma'ato toĩne'en ma'ato wẽtup yn toĩne'en. Ma'ato iku'uro pote meiũran hẽtyt hawyi tuwe­motag hawyi haat kahato ra'yn are e.
JOH 12:25 Uwe uwe mesu­wa­rotiat ieĩne'en hap yn ky'esat haria ti aru yt ipuẽti i ra'yn toieĩne'en pakup i hap e. I'ewyte uwe uwe mesu­wa­rotiat toĩne'en hap kawiat waure'e hat wyti aru ipuẽti ipakup i toĩne'en hap yt karãmuo i ikahuro rakat e Iesui.
JOH 12:26 Eweiky­'esat uhemiit no pote ewetunug no uimi­ky­'esat ewy e. Aikope aikope areĩne'en mi'i hap upi i'ewyte uhaipe­piaria uhemiit'in tukup­te'en e. I'ewyte uwe uwe uheropat hat Mi'i pe Tupana to'e — Waku kahato en e Tupana wuat'i miit'in ehamo e.
JOH 12:27 Mi'i hawyi Iesui to'e Tupana pe — Ui'ywot e kat are'e kahu epe sio Papai eti'ywyk to uhepiat ho'opot hap uiku­'uro tet pupi are sio yt Papai e. Pyno yt naku i mi'i tã are'e epe kat pote uiku­'uro miit'in ehakye­ra'at hamo ariot mesuwat yi kape e. Ahaty'u kahato uiwa­nẽtup hawe kat e hap waku are'e epe Papai e.
JOH 12:28 Etomo­herep to ewaku hap wuat'i miit'in piat ekuap hamo eset kuap hamo e. Mi'i pote Tupana tiwesat — Uha'yru e pywo ti uhewaku hap atimo­herep ta'yn. Mi'i hawyi i'ewyte atimo­herep pakup i ra'yn miit'in me e Tupana haty wo atipy kaipyi.
JOH 12:29 Mio tã e hawyi miit'in typy'i rakaria mekewat atipy kaipywiat sehay kuap haria te'e­ro'e to'ope — Mio ti huru'e hap ewy ihay i'atu'e. Ma'ato irania'in — Atipy kaipywiat miit wyti mio ihay Iesui kape i'atu'e.
JOH 12:30 Ma'ato Iesui to'e. Yt uhepe yn wyti mio sehay tut ma'ato ehepiat ikuap hamuat wyti e. Tupana tiky­'esat kahato uimohey ehepiat hap are e.
JOH 12:31 Koitywy wyti put'ok'e ra'yn Tupana e'at uwe uwe uimohey haria sese uwe uwe yt haria moherep hamuat uwe waku uwe yt e hamuat e'at mesup e. Koitywy i'atu­po­rekuat mesu­wa­rotiat ahiag Tupana tisopo hamuat e'at put'ok'e ra'yn e.
JOH 12:32 Karãmuo miit'in uimo­'ã­pe­'ok'am aria'yp posak ete yi tote­pywiat mi'i turan ti aru ati'a­tuekyi yne ywania uhowawi uiwano ra'yn e.
JOH 12:33 Mio tã e toimo­herep to'auka hamuat temiit'in me.
JOH 12:34 Mi'i pote itotiaria — Uruyke'et kat pote — Uiku­'uro irane ere'e i'atu'e ma'ato urunãpin haria irania'in yt ewat ehay ewy i i'atu'e katu­pono — Tupana Mipo­'oro wyti aru yt ikahuro rakat i e miwan me i'atu'e uruepe. Miit'in Yke'et apo en sio yt i'atu'e. En Tupana Mipo­'oro Urupo­rekuat nuat sio yt i'atu'e. Kat pote — Uiku­'uro irane ere'e Mehĩ i'atu'e.
JOH 12:35 Mi'i hawyi Iesui ti'a­tu­wesat — Uito eimu'e hat wyti areĩne'en ariãty ewy mu'ap Tupana kapiat moherep hamuat. Ariãty ewy areĩne'en e ma'ato ui'auka irane hawyi porap ta'yn ti hasep ariãty eipy­'a­setpiat e. Meiũran ti aru yt ehewyry kuap i i'ypyryp we e. Mi'i pote waku mesup ti uimohey ro e.
JOH 12:36 Mio areĩne'en eipy­'a­setpe turan uimohey ro e. Eweikup­te'en no ariãty hot pe uhyt'i'in mana'in e. Ta'i uimohey hawyi ariãty ewywuat eweipy­hu'at eiwa­nẽtup hawe eipy'a pe katu­pono uimohey hawyi areĩne'en eiwywo mesup mũki­'ite wuat'i e'at pe areĩne'en eiwywo e. Mi'i hawyi eweipy­hu'at ariãty hot mẽpyt'in e Iesui. Mio tã to'e hawyi toto ra'yn yt tomohey i haria py'a­setpyi.
JOH 12:37 Iwato tomi­sepap tutunug i'atu­py­'a­setpe yt i'atu­mi­sepap yt ewy i tutunug wen ma'ato yt ta'a­tu­mohey hin i. Mi'i hawyi toto i'atu­'ya­ty­pepyi pya kahato aikope yt ta'a­tu­puẽti kuap i hap kape tuwemig Iesui.
JOH 12:38 Aikotã sa'a­wy'i Tupana ehay moherep hat Isaia to'e hap ewy — Tupana e ati'a­tu­mu'e kahato ehay wo ma'ato yt uhehay mohey hin i emimo­herep esaika hap yt ta'a­tu­mohey hin i ta'a­tukuap pytkai. Te'e­ra­'a­kasa ra'yn yne emisepap ko'i eminug ko'i kape pytkai yt ta'a­tu­mohey hin i Emipo­'oro e Isaia 53.1 pe nimo te Iesui e hap etiat.
JOH 12:39 Iuteu akagnia yt timohey teran i Iesui aikotã sa'a­wy'i Isaia mienoi ewy.
JOH 12:40 Mio tã e Isaia miwan me 6.10 pe Iesui etiat — Atimo­herep kahato esaika hap wen ma'ato yt te'e­ra­'a­kasa teran i e. Ati'a­tu­mu'e kahato ehay ikahu rakano wen ma'ato yt ta'a­tu­mohey hin i ehay uiwẽ piat Tupana e. Mi'i pote i'atu­minug sa'ag ko'i yt atipuruk kuap i ra'yn e.
JOH 12:41 Isaia nimo te ta'a­kasa yianmete Iesui ewaku hap kape tomu­'etu hawyi.
JOH 12:42 Ma'ato Iuteu akagnia Iesui mohey haria tukup­te'en itote wen ma'ato — Uito Iesui mohey hat yt i'atu'e i miit'in ehamo kat pote te'e­ro­ken'ẽ — Wahenoi imohey hap pote aipugha ne'i aiwo­'o­mu'e hap pyi i'atu'e. Mi'i pote Iesui mohey hat uito yt i'atu'e i te'e­ro­ken'ẽ kahato irania'in akag ko'i pupi pote.
JOH 12:43 Katu­pono miit'in kaipyi — Waku kahato en e hap ta'a­tu­ky­'esat kahato po'og po'og Tupana kaipywiat — Waku en e hap kai. Ta'a­tu­ky'e po'og miit'in ky'e hap Tupana ky'e hap kai.
JOH 12:44 Mi'i hawyi Iesui to'e tehay pirik wo i'atuepe — Uwe uwe uikuap haria mi'i haria yn uipo­'oro hat kuap haria pãi e.
JOH 12:45 Uwe uwe uimohey haria mi'i haria uipo­'oro hat mohey haria i'ewyte te'e­ro­py­hu'at ma'ato yt pote yt e.
JOH 12:46 Ta'i ariãty ewy uipo­'oro mesuwat yi totiaria moẽtyhot hamo e. Uwe uwe uimohey haria ti ariãty hot puo ikohye­wyry hawyi i'ypyryp we yt ikohye­wyry hin i katu­pono uimohey hat Tupana kuap hat topy­hu'at e.
JOH 12:47 Ati'a­tue­ha­kye­ra'at teran kahato mesuwat yi totiaria. Mi'i hamo yn ariot meikowo ma'ato tukup­te'en mesuwe uimienoi pun haria e. Ta'i uimienoi ta'a­tukuap hawyi — Yt atunug neran i i'atu'e e. Ma'ato yt aho'o­sa­ty'i saty'i teran i mi'iria katu­pono i'atue­ha­kye­ra'at hamo yn uipo­'oro e.
JOH 12:48 Koran te yt kat i are'e i'atuepe — Woro­ho­'o­'a­piheg aru yt are'e i uipun haria pe uimienoi pun haria pe. Koran te yt kat i are'e i'atuepe ma'ato meiũran aru karãpe ikahuro hap e'at pe ti aru mi'iria uipun haria uhehay pun haria pe Tupana to'e aru — Yt naku i eipe are woro­ho­'okuap eipe. Eheĩne'en hap e'at pe Uha'yru mohey ran haria eweikup­te'en mi'i pote woro­ho­'o­'a­piheg eipe wuat'i e'at pe e Tupana irane yt uimienoi pun haria pe e.
JOH 12:49 Uipo­'oro hat ehay moherep hat Uito. Yt ihay i uiwẽ pyi pote yt uhehay kuap i Uito e. Mio tã e Ui'ywot hap yn uhehay wo pãi.
JOH 12:50 Ikahu kahato Ui'ywot e hap atipuẽti katu­pono ihay upiaria wuat'i e'at piat ieĩne'en hanuaria te'e­ro­py­hu'at e. Mi'i pote i'e hap yn tuwẽtem uiwẽ pyi miit'in moieĩne'en wuat'i e'at piat e hap. Tupana — Ereĩne'en no wuat'i e'at pe to'e hawyi ereĩne'en aru waku pe to'e hap ewy aikotã ui'e hap mesup hap ewy e Iesui ienuk haria pe.
JOH 13:1 Mi'i totepyi ienuk koro e'at owakai te Iesui tikuap ta'yn topy'a pe ta'aipok To'ywot kapiat hamuat mesuwat yi tote­pywiat hamuat toikuap ta'yn. Iesui ti'a­tu­ky'e kahato temiit'in mesu­wa­ro­tiaria. Toi'a­tu­kaykay sa'a­wy'i mi'i hawyi toi'a­tu­mu'e kahato. Iesui toĩne'en mesuwat yi totiat turan toi'a­tu­ky'e kahato temiit'in hawyi toku­'uro hap kape i'ewyte toi'a­tu­ky'e.
JOH 13:2 Mi'i haype te'e­renuk hap tote Simãu Ikarioti sa'yru hemiit Iuta e hap piit pe ahiag teke ra'yn Iesui ma'at hamuat ra'yn.
JOH 13:3 Meiẽpe Iesui tikuap ta'yn Tupana esaika hap torania yne ra'yn topy­hu'at ipiit pe. Mi'i pote topy'a pe topo piat hap toikuap tuwewi Tupana kaipywiat tut hap i'ewyte Tupana kapiat toto hamuat toikuap topy'a pe itote.
JOH 13:4 Toikuap hawyi tenuk kahu hawyi Iesui ipoĩ'ãm na'yn mi'i hawyi tuwe­ka­misa wato hep hawyi tuwe­'ok­po'i wato wepotip hamo to'okhak puat.
JOH 13:5 Mi'i te so'o­sat'e y'y kui'a pe hawyi toi'a­tu­pysei ra'yn temiit'in. Waku hawyi toi'a­tu­py­mogag tomi­po'i to'okhak puat tomi­po'i wo.
JOH 13:6 Mi'i hawyi Peteru pysei hamo tokosap ma'ato Peteru to'e — Yt naku i uipysei En katu­pono Uika­'iwat ne'i En Mehĩ e.
JOH 13:7 Ma'ato Iesui tiwesat — Woro­pysei ra'yn Peteru e mio ma'ato yt etikuap te kan hamo woro­pysei e. Meiũran ti aru ma'ato etikuap ta'yn uhyt e.
JOH 13:8 Mi'i pote Peteru to'e — Yt karãpiat uipysei hat i En e haty wo. — Ma'ato yt woro­pysei i pote yt Eka'iwat no i po'og areĩne'en Uito e.
JOH 13:9 — Pyno Uika­'iwat yt uipy yn i ro etikoho ma'ato uipo uhowa etikoho ro wy e.
JOH 13:10 — Peteru e etikuap ta'yn aikotã wei kahu haria wyti te'e­ru­we­pysei yn na'yn put'ok­ta­'a­tu'e hawyi e. Tupana tipuruk yne eminug sa'ag ko'i hawyi ti ereĩne'en misei ewy e.
JOH 13:11 Ta'i misei rakaria ewy ra'yn yne eipe ma'ato wẽtup ok epy'a­setpiat ipitpit re rakat ewy yt misei i rakat ewy toĩne'en e Iesui Iuta piat katu­pono toma'at hamuat Iutai toikuap haype.
JOH 13:12 Toi'a­tu­pysei yne hawyi tuwe­ka­misa wato pag i ra'yn hawyi ta'aipok yparakai kape ta'apyk hamo. Mi'i hawyi to'e i'atuepe — Eweikuap apo kat pote woro­ho­'o­pysei e.
JOH 13:13 Pyno ahenoi — Urumu'e hat Urupo­rekuat no En ewei'e ti uhepe e. Ta'i Mi'i ti Uito are. Uito ti Eipo­typot Uito ti eimu'e hat e.
JOH 13:14 Ta'i Uito ti Eipo­rekuat sese Eimu'e hat sese Uito ma'ato ti woro­ho­'o­pysei semiit po'og yi kape hat ewy Uito e. Mi'i tupono aikotã Uito ewy waku eweikup­te'en wuat'i eropat hanuaria Uito ewy e.
JOH 13:15 Uiminug ehetiat ewy wo'oe­ropat haria ewy ro eweikup­te'en Uito ewy e.
JOH 13:16 Yt naku i wato'e aipy'a pe — Uito po'og irania'in kai mi'i pote waku irania'in uheropat at ka'ap yt naku i wato'e. Waku po'og wato­py­hu'at irania'in powyro haria irania'in eropat hanuaria ewy e. Uito Eika­'iwat wuat'i powyro hat areĩne'en e. Eipo­wyro hat areĩne'en eipysei hat Uito e. Mi'i pote waku eipe uhemiit'in ewy eweikup­te'en wuat'i miit eropat hamo e. I'ewyte — Yt uipopap i motpapnug hamo yt ewei'e tei'o katu­pono Eipo­'oro hat wuat'i miit powyro hat e. Uimi­po­'o­roria eipe mi'i pote waku ui'ewy ewehe­ropat miit'in e. Waku ui'ewy eweikup­te'en semiit ewy katu­pono uhaipe­piaria eipe uipot­mu­'eria eipe uhemiit eipe uimi­po­'oro ko'i eipe e. Eipysei hat Uito pytkai e yt naku i eiwe­mo­wato po'og uikai e. Waku yi kape eweikup­te'en ui'ewy e.
JOH 13:17 Uito ti Eika­'iwat ma'ato woro­ho­'o­pysei semiit ewy. Mi'i tupono eweikup­te'en no wo'oe­ropat haria ui'ewy e. Mi'i ewetunug pote Tupana mowepit kahato haria wo eweikup­te'en e Iesui i'atuepe.
JOH 13:18 Atikuap kahato ti uiky'e haria ma'ato wẽtup aipy­'a­setpiat uima'at hanuat. Mi'i miit aikotã sa'a­wy'i miwan me Saumu 41.9 pe Tupana to'e mio tã e — Uimi'u su'u haria py'a­setpe ti aru toĩne'en woro­ma'at mo e hat e. Mio tã e hap ewy wyti aru topy­hu'at mesup e.
JOH 13:19 Mio ahenoi kahato ehepe aikotã aikotã ta'a­tunug uhetiat hamuat i'ewyte ehetiat hamuat e. Mi'i hap put'ok'e ui'e hap ewy hawyi po'og na'yn uimohey eipe katu­pono yne ui'e hap ewy yne tuwe­mo­herep aru katu­pono pywuat sese ui'e hap e.
JOH 13:20 Pywo ti uwe uwe uimi­po­'o­roria pe — Ereke ro e hat i'ewyte uhepiat ereke ro e hat e Iesui. Mi'i hawyi i'ewyte uwe uwe uhepiat — Ereke ro e hat i'ewyte uipo­'oro hat piat ereke ro e hat e.
JOH 13:21 Mio tã to'e rokirẽ Iesui haty'u tuwa­nẽtup hawe hawyi toimo­herep tehay — Pywo ti aru wẽtup ok aiwywuat hat wyti aru uima'at hamuat hat e. Haty kahato uipy'a pe mi'i hap ete e temiit'in me.
JOH 13:22 Mio tã e ra'yn hawyi te'e­ra­ha'at to'oe­wawi — Uwe pe som mio tã e i'atu'e te'e­ru­wa­nẽtup.
JOH 13:23 Pyno wẽtup ok imiky'e kahato i'ywytpiat iwy tuwe­'a­kyt­'anug Iesui ãtiyp pyke.
JOH 13:24 Mi'i pote Peteru ipomeru Iesui etiat wepehik hat kape to'e hamo uhepe — Apo'ere kahu uwe som ema'at hanuat Mehĩ ere kahu e.
JOH 13:25 Mi'i hawyi Iesui etiat wepehik hat apo'e — Uwe som pyno ema'at hat Uhyt e.
JOH 13:26 Mio tã e hawyi Iesui tiwesat — Koran uima'at hat pe ti atipuk'a mi'u moĩ me man hawyi ti aru atum tope e. Mi'i atunug kahu hawyi meremo etikuap uwe uima'at hat e Iesui uhepe Iuwãu me. Mi'i hawyi Iesui tat man hawyi totopag imoĩ me hawyi tutum uhyt Iuta pe Simãu Ikarioti sa'yru pe tutum.
JOH 13:27 Mi'i totat man Iesui po pywiat turan ahiag potypot Satanai e hap het rakat teke ra'yn uhyt Iuta piit pe. Mi'i hawyi to'e Iesui tope — Pyno aikotã etunug neran hap etunug no meremo mehĩ e Iuta pe.
JOH 13:28 Ma'ato yparakai ywytpiat apyk haria yt ikuap hin i kat to'e hawe mio tã e hap e Iuta piat hap.
JOH 13:29 Ma'ato te'e­ru­wa­nẽtup Iuta po'oro ienuk hap mi'u kyi'at hamo mio tã e hap to'e Iuta pe sio toipo­'oro sa'up mõ'ẽ hamo toipo­'oro sa'up wywuat ihaky­'e'i rakaria piat imõ'ẽ hamo sio i'atu'e. Kat pote Iuta po pe tineiru eiam toĩne'en miit'in miium ko'i eiam apykok hat toĩne'en pote.
JOH 13:30 Mi'i hawyi Iuta tat kahu man Iesui po pyi hawyi meremo toto ra'yn Iesui ma'at hamo. Tuwẽtem hawyi wãtym na'yn i'ypyryp wuo toto.
JOH 13:31 Mi'i hawyi Iesui to'e Iuta saipekai — Pyno koitywy waku ra'yn katu­pono koitywy ti put'ok'e ra'yn Tupana mõtypot sese hap e'at e. Mesup ta'yn ti Uito Eheyke'et auka hap e'at put'ok'e ra'yn e ma'ato ti aru itote Tupana ewaku hap atimo­herep ta'yn wuat'i ehamo pãi e. Te'e­ra­'a­kasa hawyi — Waku kahato En Tupana i'atu'e aru i'ewyte — Waku kahato En i'atu'e aru uhepe e.
JOH 13:32 Uimi­mõ­typot kahato Tupana topy­hu'at uiku­'uro hap e'at pe. Atimõ­typot Ui'ywot hawyi uimõ­typot kahato. Mi'i tutum uhepe aru tomõ­typot hap ok tã. Tuwe­mõ­typot hap ok tã Ui'ywot tum aru uhepe. Atimõ­wato Ui'ywot wuat'i ehamo mesu­wepyi e. Ta'i wẽtup miit ewywuat yn uruto Ui'ywot Uito e. Meremo irane uimõ­typot wuat'i ehamo e Iesui.
JOH 13:33 Uimẽ­pyt'in areĩne'en porap yn ni eiwywo mesu­wa­rote e. Areto hawyi ma'ato uikat wyti aru mesuwe eipe ma'ato ti aru yt uipuẽti i kahato e. Ha'a­wyte wuat ui'e hap ewy ti — Yt eweiwat kuap i te Uito hap kape e. Sa'a­wy­'iwuat ui'e Iuteuria piat hap ewy mio are'e ehepe uimẽ­pyt'in e Iesui.
JOH 13:34 Einãpin pakup hap ahenoi ehepe eiwo­'o­ky'e uhemiit'in woro­ho­'o­ky'e hap ewy. Eiwo­'o­ky'e uhemiit'in woro­ho­'o­ky'e ky'e hap ewy e.
JOH 13:35 Mi'i tã ewetunug pote irania'in eikuap ta'yn eipe uhemiit'in sese hap e 11 ok takaria pe.
JOH 13:36 Mi'i hawyi ipotmu'e Simãu Peteru to'e Iesui pe — Aikowo aru pyno ereto Uruka­'iwat e. — Koran te ti yt ereto kuap i te uhupi Peteru are ma'ato meiũran ti aru uhupi ereto e.
JOH 13:37 — Uika­'iwat areto teran eupi e. Kat pote koran yt areto kuap i eupi mehĩ katu­pono yt karãmuo i ti aru woro­'atoiat e. Irania'in miat — Woro­'auka ti aru eto hupiat pote i'atu'e pytkai yt woro­'atoiat hin i e Peteru Iesui pe.
JOH 13:38 Mi'i hawyi Iesui tiwesat — Ui'auka pote ui'auka ma'ato yt woro­'atoiat hin i ere'e apo Peteru. E'auka irane pytkai yt woro­'atoiat i ere'e apo Peteru e. Pywo pe ti are'e epe mesup wãtym muo waipaka ehay owakai ti aru — Yt atikuap kahato i Mi'i Miit ere'e ti aru mye'ym mo uhepiat pe irania'in apo'e i'atu'e epe hawyi e Iesui Peteru pe.
JOH 14:1 — Uiwy­ria'in e Iesui areto irane eipy­'a­setpyi ma'ato yt ei'arot rei'o eipy'a pe eiwa­nẽtup hawe e katu­pono ara'aipok i ehowawi aru e. Eweimohey po'og yn o Tupana i'ewyte uimohey yn o e.
JOH 14:2 Pywo ti rat Ui'ywot etama pe ti tukup­te'en kahato ai'yat sese ko'i e yt uheso i rat. Ei'yat koro ko'i nug hamo areto irane e. Waku pe yne itote ei'yat ko'i hawyi ara'aipok ehowawi i ra'yn e. Ma'ato heso hap pote yt ahenoi i ehepe e. Uimohey ro e Iesui.
JOH 14:3 Ma'ato waku yne ei'yat ko'i itote hawyi ti aru ariot i ehowawi e. Mi'i hawyi ti aru aikope Uito areĩne'en mi'i hap tote ra'yn eweikup­te'en e. Eiwe­hyt'ok to uiwy­ria'in are'e aru ehepe uimohey haria Ui'ywot etama pe e aru.
JOH 14:4 Ta'i koitywy eweikuap ta'yn aikowuat Uito hap e i'ewyte uipu'ap eweikuap ta'yn e.
JOH 14:5 Ma'ato ipotmu'e Tume tiwesat — Yt uruikuap hin i Uhyt aikowuat eto hap e. Pyno aikotã som waku pyno uruikuap epu'ap Uhyt e.
JOH 14:6 Mi'i hawyi Iesui tiwesat — Uito yn wyti mu'ap Ui'ywot kapiat hat. Uito yn wyti mu'ap Ui'ywot moherep hãpyk hat e. Uito yn wyti mu'ap miit'in moieĩne'en Ui'ywot yat piat hat e. Uwe uwe uimohey mi'i hat yn wyti put'ok'e aru Ui'ywot kuap hamuat e Iesui Tume pe.
JOH 14:7 Uikuap haria ti i'ewyte Ui'ywot kuap haria te'e­ro­py­hu'at e. Pyno mio uikuap haria eipe mi'i pote Ui'ywot kuap haria eipe e. Ui'ywot kapiat akasa haria eipe e Iesui.
JOH 14:8 Mio tã e pote Wiripi to'e — Pyno etomo­herep to E'ywot uruepe Mehĩ e mi'i pote ti aru uruikuap uwe E'ywot hap e.
JOH 14:9 Mi'i pote Iesui Wiripi wesat — Kat pote yt uikuap i en uiwy Wiripi e katu­pono areĩne'en mot'i kahato ra'yn eipy­'a­setpe ma'ato apo yt uikuap i te en e. Uhowawiat akasa haria wyti Ui'ywot kapiat akasa haria tukup­te'en e. Kat pote — Etomo­herep to E'ywot uruepe ere'e e Iesui Wiripi pe.
JOH 14:10 Yt etimohey i apo Ui'ywot eiam sese ne'i Uito e. I'ewyte uheiam ne'i Ui'ywot e Uimienoi ehepiat ti yt uiat i ma'ato Ui'ywot wat ahenoi e. Ui'ywot yn wyti uipo­'oro kat ko'i kat ko'i nug hamo e.
JOH 14:11 Pywo pe ti Uito Ui'ywot eiam ne'i e. I'ewyte uheiam ne'i Ui'ywot ma'ato mio tã ui'e hap yt eweimohey i pote uimohey ro eipe uiminug wakuap ehehamuat upi e.
JOH 14:12 Ta'i pywo pe ti are'e uwe uwe uimohey hat wyti aru uiminug ko'i ewy inug e. Ui'ywot kape areto pytkai wyti aru uimohey haria po'og iwato inug uiminug ko'i kai e. — Areto ti aru Ui'ywot yatypiat uheĩne'en hamo eimiẽtup eimi­ky­'esat ko'i moherep hamo Ui'ywot pe e.
JOH 14:13 Itotiat turan kat ko'i kat ko'i ewehẽtup uhowawi uiat uimi­ky­'esat ok tã yn eweiky­'esat haype uimõ­typot hap eweikat pote mi'i pote ti aru ahẽtup Ui'ywot pe hawyi ti aru eimiẽtup uhepiat tutum ehepe e. Eimiẽtup tutum hawyi mi'i hap kaipyi ti aru wuat'i miit'in — Wakuat Tupana i'atu'e e.
JOH 14:14 Mi'i pote ti aru atum yne eimiẽtup ok tã uimi­ky­'esat ewy ehẽtup pote e Uhet mõtypot hamuat ehẽtup pote e Iesui topot­mu­'eria pe.
JOH 14:15 Mi'i hawyi po'og tohenoi — Uiky'e ehepiat pote ewetunug no einãpin uhepiat hap ko'i e.
JOH 14:16 Mi'i hawyi ahẽtup Ui'ywot pe hawyi ti aru toipo­'oro ra'yn ehepe wẽtup ok einãpin wuat'i e'at piat hanuat. Mi'i ti Tupana Pã'ãu wakuat sese hãpyk enoi hat sese mi'i e. Mi'i ti aru eipo­wyro hat Uito ewywuat eimo­wepit hat e. Yt karãpe i ei'atoiat hamuat ma'ato toinẽ'en wuat'i e'at pe eipy'a pe e.
JOH 14:17 Ahẽtup hawyi Tupana tum aru Topã'ãu pywuat e. Ma'ato Tupana yt ky'esat haria i ti yt ha'at teran i Ipã'ãu katu­pono yt heremo i pote yt ta'a­tukuap i. Ma'ato eipe ti eweikuap ta'yn katu­pono toĩne'en na'yn eipy­'a­setpe. Ma'ato mi'i hawyi ti aru eipy'a pe ra'yn topy­hu'at at ka'ap Tupana Pã'ãu wakuat e
JOH 14:18 Ma'ato Uito i'ewyte yt woro­ho­'o­'atoiat sese i katu­pono aipok no areto e. Ara'aipok i te ti aru ehowawi uimohey haria e. Uipã'ãu ma'ato toĩne'en eikai eipuo eipo­wyro hamo areto turan e Iesui.
JOH 14:19 Pywo ti rat yt pya i ra'yn wyti Tupana yt ky'esat haria i yt akasa i uhowawiat hamuat e. Ma'ato eipe akasa uhowawiat haria ti aru eweikup­te'en wuat'i e'at pe katu­pono areĩne'en ne eipy­'a­setpe e. Meiũran ti aru areĩne'en i ra'yn gu'uro pyi Uito e. Mi'i hap e'at pe woro­ho­'o­moieĩ­ne'en wuat'i e'at pe Uito areĩne'en i hap ewywuat hawyi e.
JOH 14:20 Karãpeĩ Tupana Pã'ãu wo ipyt'at eipiit mi'i hawyi ti aru eweikuap Ui'ywot eiam sese Uito i'ewyte eheiam Uito hap i'ewyte uheiam eipe hap eweikuap Tupana Pã'ãu toĩne'en ehehapiat hawyi e.
JOH 14:21 I'ewyte uwe uwe uhepiat tonãpin hap ko'i nug hat wyti aru uiky'e sese hat toĩne'en mi'i miit e. Uiky'e hat uhepiat tonãpin hap nug hat wyti aru Ui'ywot miky'e sese topy­hu'at i'ewyte uimi­ky'e kahato topy­hu'at e. Uimi­ky­'esat nug hat pe ti aru aremo­herep tope uwe Uito sese hap e Iesui 11 ok takaria pe.
JOH 14:22 Mi'i hawyi ipotmu'e Iuta ma'ato wẽtup ok Iuta yt Iuta mekewat Ikarioti sa'yru ma'ato ipotmu'e wẽtup Iuta to'e Iesui pe — Pyno uruepe yn apo eremo­herep uwe En hap Mehĩ e. Yt yne miit'in me apo eremo­herep teran Uhyt e.
JOH 14:23 Mio tã e pote Iesui tiwesat — Iuta pywo ti rat uwe uwe uiky'e uwe uwe uhehay nug hat toĩne'en ti aru mi'i hat pe ti aru Ui'ywot miky'e wo topy­hu'at e. Mi'i hat kape ti aru Ui'ywot wywo ariot hawyi mi'i hat pyt'atnug hamo urutu­kup­te'en e. Mi'i hat topy­hu'at uru'yat ewywuat e.
JOH 14:24 Pywo ti rat yt uiky'e sese i haria yt uhehay nug neran hin i haria te'e­ro­py­hu'at e. Yt tuwat teran hin i uhepiat i'atu­nãpin hap upi yt uiky'e sese i potiaria e Iesui. Uiwy­ria'in uimienoi ehepiat ko'i yt uiat uimienoi sese i ma'ato Ui'ywot Uipo­'oro hat mienoi sese uhepiat ko'i e. I'e hap yn ahenoi ehepe e.
JOH 14:25 Mio te ti eipy­'a­setpe areĩne'en eimu'e hanuat mesuwe e.
JOH 14:26 Ma'ato meiũran ti aru uhaipe kai Tupana tipo­'oro Uipã'ãu sese ehowawi einãpin hamuat eiwa­nẽtup hawe ieĩne'en hanuat e. Toipo­'oro Uipã'ãu ehowawi uhemiit sese eipe pote e. Put'ok'e hawyi ti aru yne eimi­waure uimienoi ehepiat ko'i ete eimo­wa­tetup ewanẽtup hãpyk hamo hat topy­hu'at eipuo Uipã'ãu e. Kat ui'e hap kat ui'e hap eimi­waure ko'i toi'a­tu­mo­herep i ra'yn eiwa­nẽtup hawe areto hawyi e.
JOH 14:27 Uiwy­ria'in areto ra'yn eipy­'a­setpyi are wen ma'ato yt eweiwa­nẽtup ko'i ko'i tei'o mi'i hap pupi e. Yt eweiken'ẽ tei'o e. Mesup ta'yn woro­ho­'onug Tupana mowepit hanuaria e. Yt eiwa­nẽtup ko'i ko'i hamo i e. Woro­ho­'o­mo­wepit kahato aru Uipã'ãu wo e Iesui. Irania'in yt uimohey i haria wyti yt eimo­wepit kuap i ma'ato Uito ti woro­ho­'o­mo­wepit kuap sese katu­pono uimo­wepit hap uipy'a piat atum na'yn ehepe e.
JOH 14:28 Areto irane eipy­'a­setpyi uhemiit'in ma'ato mi'i hawyi ti aru ariot re ehowawi ra'yn ehepe e. Uiky'e sese eipe pote waku ewei'e uhepe — Ereto teran mote waku etunug emiky­'esat ewy Mehĩ waku era'aipok E'ywot kape waku ewei'e uhepe uiky'e pote katu­pono uhehat'at kahato Ui'ywot ky'ewi e. Waku kahato ti rat Ui'ywot e. Uhehat'at kahato Ui'ywot akasa i hamo e katu­pono Ui'ywot po'og uikai e.
JOH 14:29 Areto ra'yn Ui'ywot kape aru hawyi ara'aipok ehowawi e. Mi'i e hap ahenoi ehepe yianme katu­pono ti aru karãpeĩ topy­hu'at ui'e hap ewywuat mi'i e'at pe ti aru — Pywo kahato rasig tohenoi ahepe ewei'e aru uhepiat ui'e hap mesup e hap ete e. Mi'i hawyi mekewat e'at pe po'og na'yn uimohey eipe ra'yn katu­pono atunug yne yne ui'e hap ewywuat pote e.
JOH 14:30 Koran te ti aru yt ati'a­tu­mu'e kuap i kahato eipe sa'a­wy­'iwuat eimu'e hap ok tã katu­pono tut aru yt uimohey haria i akag. Yt naku i nug haria potypot put'ok'e irane mesuwe uipyhyp teran haype e. Ta'i mi'i yt nakuat i ti uhã'ãg sese haype tut ahiag ma'ato yt kat hin i uipy'a piat uiwa­nẽtup hawiat ahiag miky­'esat ko'i are yt wẽtup sehay i ahiag wat uipy'a pe e.
JOH 14:31 Koitywy ti aru wuat'i miit'in na'yn ikuap kahato uhepiat Ui'ywot ky'e kahato hap e. I'ewyte Ui'ywot miky­'esat yn nug hat Uito hap ta'a­tukuap e. Uiku­'uro hap kape te'e­ra­ha'at hawyi ta'a­tu­wa­nẽtup hawe mi'i hawyi meremo ta'a­tukuap ta'yn uinãpin hap Ui'ywot mienoi ko'i yne yne nug hat areĩne'en hap ta'a­tukuap aru e. Mio tã tohenoi yne hawyi — Pyno waku ra'yn are to'iro pyno meiũpepyi uipot­mu­'eria e Iesui 12 ok takaria pe.
JOH 15:1 Mi'i hawyi mu'ap upi Iesui to'e — Uito ti mikoi yp ewy Ui'ywot wyti ikoi hat ewy e.
JOH 15:2 Mi'i hawyi eipe mikoi yp iaga ewy eweikup­te'en e. Haga yt haat i hawyi tohy­wytip i'ywyt­'okpy hawyi haga yt naku i rakat toiterek yt imosat i hat mi'i hawyi irania'in haga ko'i haat kahato i ra'yn e.
JOH 15:3 Mi'i hap ewy kahato einãpin uhepiat hap timo­hãpyk kuap kahato eiwa­nẽtup sa'ag hap e. Mi'i hawyi ehehãite eweikup­te'en eipy'a piat eiwa­nẽtup hap ko'i eiwo­'o­'e­wy­'ewy mikoi iãgã pitpit'ok hap ewy kahato einãpin uhepiat hap e.
JOH 15:4 Haga mitek ta'yn merep hap ewy hawyi igag. Mi'i hap ewy kahato eipe yt eweikup­te'en i uiwywo pote e. Eweikup­te'en no yt pya hin i uikai aikotã haga sat'e kahato rakat i'yp ete hap ewy waku mi'i tã uimohey eipe e. Haga yt haat'e kuap i pote watitek i'yp ete pyi e. Mi'i tupono waku haga ko'i sat'e kahato rakaria ewywuaria i'yp ete eweipy­hu'at e. Waku wepytyk kahato haria wo eweipy­hu'at. Mi'i pote mono erepytyk ehete e. Mi'i tã hap ewy pote haat'e kahato rakaria wo eweipy­hu'at. Iwese rakaria wo'o­ky'e haria wo eweikup­te'en e. Ta'i haga ko'i i'atu'yp esaika hap kaipyi tuwenug na'yn e. Eipe ti i'ewyte uhesaika hap kaipyi eiwenug kuap e. Eiweran pote yt eiwenug kuap i e.
JOH 15:5 Uito i'yp ewy eipe haga ewy. Eiwe­pytyk to uhete aikotã haga sat'e i'yp etiat to'ewy haga haat rakat ewy eweikup­te'en e. Ta'i eiwe­pytyk uhete pote yn haga haat rakat ewy eweikup­te'en ma'ato yt uhesaika hap wywo i pote yt kat i ewetunug kuap kahato wakuap e.
JOH 15:6 Aria'yp iaga mitek ta'yn hawyi igag meremo hawyi yt kan hamo i waku ra'yn aria wo yn na'yn. Mi'i hap ewy eipe yt eiwe­pytyk i uhetiat pote e yt kan hamo i eweikup­te'en e. Aikotã haga gag ewy eweikup­te'en. Miit'in ti'a­tunug haga gag hawyi ta'a­tuwuk. Mi'i hap ewy eipe yt uimohey i eipe pote.
JOH 15:7 Eiwe­pytyk uhete pote uimienoi ehepiat ewetunug pote Tupana tum ehepe eimiẽtup topiat tutum eimi­ky­'esat ewy uiwy sese eweikup­te'en pote e.
JOH 15:8 Karãpeĩ hewo hewo haga ete pyi he rakat pote miit'in tuwehum kahato e. Mi'i hap ewy waku kahato he rakaria ewy eweikup­te'en e. Mi'i pote ti aru i'atu­wepit kahato irania'in — Waku kahato Tupana i'atu'e haype wo'o­ky'e rakaria wo'o­wese haria wo eweikup­te'en pote aru e.
JOH 15:9 Aikotã aikotã Ui'ywot eiky'e hap ewy ti Uito woro­ho­'o­ky'e e. Yt eweipun nei'o uhepiat eiky'e hap e.
JOH 15:10 Uito atunug Ui'ywot miky­'esat ewy mi'i pote uiky'e kahato. Mi'i hap ewy uimi­ky­'esat ewetunug mote woro­ho­'o­ky'e kahato Uito wy e. Aikotã Uito Ui'ywot piat uinãpin hap atunug mi'i hawyi toĩne'en uruto­'o­ky'e hap e. Mi'i hap ewy eipe ewetunug uhepiat einãpin hap hawyi toĩne'en kahato aiwo­'o­ky'e hap e.
JOH 15:11 Eiwo­'o­mo­wepit hap yn ni atiky­'esat uiwy­ria'in e. Mi'i pote ha'a­wy­tepyi ti woro­ho­'o­nãpin kahato e. Atiky­'esat kahato eiwo­'o­mo­wepit hap sese uiat uiwepit hap ewy atiky­'esat eipy'a pe e. Mi'i pote woro­ho­'o­nãpin ha'a­wy­tepyi eimo­wepit hamuat uimi­nãpin nug hap e.
JOH 15:12 Uhepiat einãpin sese hap ahenoi i ehepe einãpin hap koro mio tã are'e i — Eiwo­'o­ky'e ro aikotã Uito woro­ho­'o­ky'e hap ewy are'e i e.
JOH 15:13 Pyno wẽtup ok aiwy poity'i tuete hawyi watuwat ra'yn ipowyro hamo aiwy ky'e kahato hat pote e. Mi'i hawyi ai'auka hap topy­hu'at wen ma'ato aiwy yt iku'uro i ieha­kye­ra'at hat wato­py­hu'at. Toĩne'en ne aiwy aiku­'uro ikawiano hawyi e. Mio tã hap ewy watunug mote aiwy ky'e sese hap ahepiat wati­mo­herep po'og po'og wuat'i ky'e hap kai e. Pyno mi'i tã hap ati'a­tu­ky'e eipe uiwy­ria'in e. Ta'i eiky'e uhepiat hap atomo­herep irane e.
JOH 15:14 Uiku­'uro irane eheha­kye­ra'at hamo e. Pywo ti rat ewetunug uimi­ky­'esat ewy pote uiwy­ria'in sese eweipy­hu'at uimi­ky'e kahato haria wo eweipy­hu'at.
JOH 15:15 Motpo­'o­roria yt ta'a­tukuap hin i kat ko'i kat ko'i ta'a­tu­ka­'iwat minug wuat e ma'ato eipe uiwy­ria'in me uheropat haria eipe yt are i. Ma'ato uiwy­ria'in sese eipe are mi'i pote ahenoi ehepe torania Ui'ywot e uhepiat hap ko'i. Pyno mio eipe yt uheropat haria i ma'ato uiwy­ria'in sese eipe katu­pono ahenoi kahato yne yne Ui'ywot e hap ehepe hawyi eweikuap ta'yn yne uiminug irane hap ko'i uiwy­ria'in eipe pote.
JOH 15:16 Ta'i uiwy­ria'in eipe ti yt ui'airo i ma'ato Eika­'iwat no ma'ato Uito woro­ho­'o­'airo eipe uhemiit no. Mi'i hawyi woro'­ho­'o­po­'oro uhehay moherep miit'in miat hamo i'ewyte wakuap sese nug hamo yt ikahuro i rakat motpap nug hamo woro­ho­'o­po­'oro uiwy­ria'in e. Mi'i turan kat ko'i kat ko'i eweiky­'esat hawyi ewehẽtup to Ui'ywot pe uimi­ky­'esat ewy hawyi tutum ehepe eimi­ky­'esat ok tã uhyt'i'in e. Atiky­'esat eimi­mu­'eria ehaipe­piaria i'ewyte uimohey heg nakaria ewy te'e­ro­py­hu'at. Atiky­'esat ehaipe­piaria uhemiit sese wo hap atiky­'esat e.
JOH 15:17 Mi'i pote atiky­'esat kahato eiwo­'o­ky'e kahato hap e. Eiwo­'o­ky'e ro eiwo­'ope e. Mio tã hap ewy eweikup­te'en uimi­ky­'esat nug hamuat e.
JOH 15:18 Mio wyti aru yt uimohey i haria i'atu­py­'ahak kahato ehete ma'ato karãpe mesu­wa­ro­tiaria tukup­te'en haiwot rakaria ehete uhemiit'in eipe pote waku eiwa­tetup aikotã sa'a­wy­'ite uhete i'ewyte i'atu­py­'ahak hap kape — Aika­'iwat ete i'atu­py­'ahak sa'a­wy­'i­tewuat ewy ewei'e yn o eiwo­'ope e.
JOH 15:19 Yt uimohey i haria eipe pote irania'in eiky'e haria tukup­te'en ma'ato uimohey haria eipe mi'i pote yt eiky'e hin i katu­pono yt uimohey i haria tok pyi woro­ho­'o­'airo uhemiit no hawyi yt i'atuwat i ra'yn eipe eweipy­hu'at e. Mi'i tupono yt i'atu­wese i ehete i'atu­py­'ahak ehete e.
JOH 15:20 Aikotã aikotã sa'a­wy­'ite ga'iwat eika­'iwat ete ta'a­tunug sa'ag pote hemiit'in ete i'ewyte ta'a­tunug sa'ag are ra'yn sa'a­wy'i ehepe. Yt waure­'e­wei'e tei'o mio tã ui'e hap kai e. I'ewyte hemiit'in ta'a­tu­sa­ty'i saty'i wy e. I'ewyte uhepiat ta'a­tu­nãpin hap ta'a­tunug mi'i pote ti aru i'ewyte i'atuepiat ta'a­tu­nãpin hap ta'a­tunug e.
JOH 15:21 Sa'ag sa'ag ta'a­tunug aru ehete uiwy­ria'in eipe pote uhet moherep haria eipe pote. I'ewyte yt ta'a­tukuap i uwe uipo­'oro hat pote. Mi'i pote yt naku i kahato ta'a­tunug aru ehete mehĩ'in e.
JOH 15:22 Yt ariot i mesu­wa­rote miit'in mu'e hamo pote yt ta'a­tu­'a­parap i uimohey hap. Ma'ato koitywy yt uimohey hin i mi'i pote — Eipe yt nakuaria wo i sese ra'yn e Tupana yt uimohey i haria pe. Mi'i hawyi yt kat i'atu'e kuap i ra'yn Tupana pe katu­pono pywo pe to'e e. Sa'a­wy'i — Yt uiwepyi i yt uruwepyi i i'atu'e Tupana pe ma'ato koitywy yt ta'a­tu­wesat kuap i Tupana pe — Kat pote Uha'yru pun haria eipe e i'atuepe hawyi.
JOH 15:23 Uwe uwe uhete ipy'ahak mi'i haria i'ewyte ti Ui'ywot etiat ipy'ahak takaria e.
JOH 15:24 Ma'ato yt ariot i mesu­wa­rote wakuap sese nug miit'in ehamuat hamo pote yt ta'a­tu­'a­parap sese i uimohey hap e. Ma'ato mio te'e­ra­'a­kasa ra'yn yne uimi­sepap wakuap sese ko'i po'og iwato torania kai ma'ato mi'i pytkai i'atu­py­'ahak uhete Ui'ywot etiat ewy e.
JOH 15:25 Aikotã nimuat — Yt kat pytkai i i'atu­py­'ahak uhete e iwan me. Mi'i e hap ewy miit'in i'atu­py­'ahak uhete mesup e.
JOH 15:26 Put'ok'e ui'e atipy pe hawyi ti aru are'e — Etipo­'oro ro uhemiit'in kape Epã'ãu Papai are. Mi'i hawyi ti aru toipo­'oro ehowawi Topã'ãu wakuat eipo­wyro hamo eimu'e sehay wuat hãpyk hamo uimo­herep ehepiat hamo toipo­'oro Topã'ãu sese e.
JOH 15:27 Ui'ywot Pã'ãu put'ok'e hawyi eimo­wepit hat topy­hu'at ei'a­rot'i hap monik hamuat tut. Mi'i hawyi ti aru ewehenoi miit'in me ra'yn uhetiat katu­pono Tupana Pã'ãu eiam eweikup­te'en pote. I'ewyte uimi­mu'e ko'i eweikuap kahato ra'yn pote i'ewyte uikuap kahato eipe ha'a­wy­te­pyite mesup te pote ewehenoi kahato aru miit'in me uhetiat e Iesui topot­mu­'eria pe.
JOH 16:1 Eiwe'eg wo o uimohey hap atoiat hap pupi are katu­pono yianmete ahenoi aikotã aikotã sa'ag ehetiat hamuat ahenoi yne yianmete ra'yn ehepe katu­pono karãpe put'ok'e hawyi mono yt eweipun i ra'yn uimohey ehepiat hap e.
JOH 16:2 Katu­pono ti aru meiũran eipugha Tupana mõtypot yat pyi e. Meiũran ti aru ei'a­tu­'uka hanuaria tukup­te'en. Mesuwat yi totiaria ti aru te'e­ro'e to'ope — To'iro waku wati­'a­tu­'uka Tupana mohey haria i'atu'e sa'ag ne'i e.
JOH 16:3 Mi'i tã ti aru ta'a­tunug ehete katu­pono yt uikuap i uwe sese Uito hap i'ewyte uwe Ui'ywot hap yt ta'a­tukuap i e.
JOH 16:4 Ma'ato ti ahenoi yne ra'yn mesup ehepe yianmete aikotã ta'a­tunug sa'ag hamuat ko'i e. Mi'i tupono mekewat put'ok'e ra'yn ehete hawyi ti aru eiwa­tetup yn na'yn mesuwat uimienoi kape e. Sa'a­wy'i te ti yt ahenoi i ehepiat ho'opot hamuat katu­pono sa'a­wy'i ti eipy­'a­setpe areĩne'en eika­wiano ei'a­pykok hamuat. Mi'i pote yt ahenoi i ma'ato mesup ti ahenoi ra'yn ehepe aikotã eheha­ky­'e'i hamuat ko'i e.
JOH 16:5 Mio wyti aru ma'ato areto uipo­'oro hat kape i ra'yn are ma'ato eipe yt apo'e­wei'e i uhepe — Aikowo aru pyno ereto Uhyt yt ewei'e i uhepe e.
JOH 16:6 Areto mot'i irane eitokpyi pote eweha­ty'u kahato uiky'e haype e.
JOH 16:7 Pywo pe ti are'e ehepe meiũpe yn areĩne'en pote ti yt tut i ti eipo­wyro pakup i hamuat Tupana Pã'ãu ma'ato areto meiũpepyi pote ti aru atipo­'oro kuap eipo­wyro pakup i hanuat e.
JOH 16:8 Mio tã e irane Tupana Pã'ãu wuat'i miit'in me — Eiperia torania Tupana piat i'aparap haria e ti aru put'ok­to'e hawyi. Tupana yn ni eimo­hãpyk kuap hat e ti aru wuat'i miit'in me. Ta'i yt nakuap nug haria ti aru Tupana ti'a­tu­sa­ty'i saty'i kahato hamuat e ti aru miit'in me Tupana Pã'ãu put'ok­to'e hawyi e Iesui.
JOH 16:9 — Tupana piat i'aparap haria eiperia e ti aru katu­pono yt uimohey haria i eweikup­te'en e ti aru Tupana Pã'ãu ehepiat e Iesui.
JOH 16:10 — Tupana yn ni eimo­hãpyk kuap hat e ti aru miit'in me — Pywo ti Ha'yru yn eimo­hãpyk kuap e ti aru kat pote toĩne'en To'ywot yatype atipy pe emiẽtup moherep hamuat eheha­kye­ra'at hamuat e ti aru. Ma'ato yt eweimohey i pote yt karãpe i eweha'at Ha'yru kape e ti aru Tupana Pã'ãu miit'in me e. — Areto ra'yn mi'i hawyi uimohey haria yn uipuẽti haria ma'ato irania'in yt karãpe i aru uipuẽti mesuwe. Yt karãpe i uhowawi te'e­ra­ha'at e Iesui.
JOH 16:11 — Tupana ti'a­tu­sa­ty'i aru eipo­typot ahiag wuat'i e'at pe e ti aru i'ewyte toi'a­tu­sa­ty'i saty'i iwywo Ha'yru mohey hap pun haria e ti aru Tupana Pã'ãu mesu­wa­ro­tiaria pe uhepiat e Iesui.
JOH 16:12 Po'og wyti ahenoi teran ehepe mesuwat etiat ma'ato ti eiwa­nẽtup hap yt put'ok'e i ikuap hamo e.
JOH 16:13 Meiũran ti aru tut Tupana Pã'ãu ehowawi pywuat sese sehay yne moherep hamo. Mi'i ti aru henoi yne yne pywuat sese etiat ehepe e. Tuwepyi yt ihay i. Ui'e hap yn ihay aru e. Tupana Pã'ãu timo­herep aru ehepe kat aru kat aru toĩne'en hap toi'a­tu­mo­herep ehepe Topã'ãu pywuat sese wo e.
JOH 16:14 Ta'i uimõ­typot kahato hat Tupana Pã'ãu katu­pono kat are tope hap yn tohenoi ehepe uiwy­ria'in e.
JOH 16:15 Wuat'i Ui'ywot wat ipo piat uianuat ra'yn tukup­te'en e. Mi'i tã ti ui'e hap ewy Tupana Pã'ãu tohenoi irane ehepe e Iesui topot­mu­'eria pe.
JOH 16:16 — Aipok go Ui'ywot kape areto hawyi meremo uipuẽti i eipe e.
JOH 16:17 Mi'i hawyi te'e­ro'e to'ope — Kat to'e hawe som — Aipok go areto Ui'ywot kape hawyi meremo uipuẽti i eipe e ahepe i'atu'e.
JOH 16:18 — Kat pote yt mot'i wo i aru Ui'ywot kape areto e i'atu'e. Kat to'e hawe som pyno aipok go areto e. Aikotã hamuat som tohenoi teran ahepe pãi i'atu'e to'ope.
JOH 16:19 Mi'i hawyi Iesui tikuap apo'i­'a­tu'e teran tepiat hap mi'i pote to'e — Uiwy­ria'in apo'e­wei'e teran apo aipok go Ui'ywot kape areto e hap ete. Pyno ahenoi ra'yn ehepe ehepiat ikuap hamo e.
JOH 16:20 Pywo pe ti are meiũran ti aru eiwo­'o­kak'i Uito yt uwe i pote ma'ato irania'in yt uimohey haria i ti aru i'atu­wepit ne'i ra'yn e. I'atu­mo­wepit hap ete ti aru eipe yt eimo­wepit hin i wyti aru e. Mi'i rẽ ti aru ma'ato meremo tokosap yt eiwepit i hap hawyi ti aru meremo eiwepit i ra'yn e.
JOH 16:21 Pywo pe ti are'e ehepe aikotã hary­poria imẽpyt haty turan yt iwepit hin i ra'yn topy'a pe ma'ato tuwe­mo­herep ta'yn imẽpyt hawyi meremo iwepit kahato katu­pono imẽpyt tuwe­mo­herep pote imẽpyt put'ok'e pote.
JOH 16:22 Mi'i hap ewy ti mesup areto ra'yn ei'ya­ty­pepyi mi'i pote yt eiwepit hin i ma'ato meiũran woro­ho­'o­puẽti i ra'yn hawyi ti aru ma'ato meremo ra'yn eiwepit hap tut aikotã aity iwepit ai'y­wã'ĩ hap e'at pe hap ewy e. Aremo­herep i ra'yn eipy­'a­setpe hawyi eimo­wepit sese hap topy­hu'at eiwepit sakpo hap ewy aikotã imẽpyt pakup hap ewy are. Areĩne'en i eiwywo hawyi eiwepit sese hap toĩne'en eipy'a pe iheg me toĩne'en yt uwe i ra'yn eiwepit hap porop kuap hat e.
JOH 16:23 — Koitywy ewehẽtup kahato uhepe eimi­ky­'esat ko'i ma'ato areto hawyi are yt ewehẽtup kuap i uhepe areto hawyi e. Ma'ato ti aru put'ok'e eipo­wyro pakup hat Tupana Pã'ãu. Mi'i hawyi waku ewehẽtup Ui'ywot pe eimi­ky­'esat ko'i — Tupana ewei'e o Esa'yru Iesui e hap het rakat mohey haria uruto ewei'e o. Mi'i hawyi uhet upi tutum ehepe kat ko'i kat ko'i eimiẽtup ok tã tutum ehepe uimi­ky­'esat nug wywuat pote e.
JOH 16:24 Ha'a­wyte pyi ti uhepe yn ewehẽtup eimi­ky­'esat ko'i ma'ato mi'i hawyi aru waku ewehẽtup Ui'ywot pe uhet wywo uimi­ky­'esat ewy. Mi'i hawyi Ui'ywot tum aru eimo­wepit sese hamuat e. Ewehẽtup mi'i tã hap ewy pote eweipuẽti ra'yn eimiẽtup eimo­wepit kahato hamuat e.
JOH 16:25 Sa'a­wy­'i­tepyi yne ahenoi ehepe uhehay hã'ãkap wuo ma'ato mi'i hawyi ti aru herep wuo yn na'yn ahenoi ehepe Ui'ywot etiat e.
JOH 16:26 Mekewat herep wuo yn ahenoi ehepiat hap e'at pe ti aru waku yn ewehẽtup Ui'ywot pe uhet upi eimiẽtup ko'i uimi­ky­'esat ko'i. Sa'a­wy'i Uito yn ahẽtup Ui'ywot pe eimiẽtup ko'i are ma'ato put'ok'e Tupana Pã'ãu ehetiat hap e'at pe ti aru yt Uito yn i ahẽtup eimi­ky­'esat ko'i katu­pono atiky­'esat i'ewyte ewehẽtup Ui'ywot kape e.
JOH 16:27 Waku kahato ewehẽtup tope katu­pono eiky'e kahato hat Ui'ywot e. Ta'i eiky'e kahato katu­pono Uiky'e haria eipe i'ewyte eweimohey kahato Tupana Mipo­'oro Uito hap Tupana kaipywiat sut hat Uito hap eweimohey kahato. Mi'i pote waku ewehẽtup hãpyk Ui'ywot ewawi e.
JOH 16:28 Pywo kahato Ui'ywot kaipywiat Uito ariot ra'yn miit'in kape. Mi'i rẽ ara'aipok i ra'yn Ui'ywot kape mesuwat yi totepyi e.
JOH 16:29 Mi'i hawyi hemiit'in te'e­ro'e Iesui pe — Uruka­'iwat mesup ta'yn uruikuap ta'yn ehay katu­pono ehenoi heremo ra'yn mio yt hã'ãkap wuo i ra'yn i'atu'e.
JOH 16:30 Koitywy ti uruimohey ra'yn En wuat'i kuap yne hat i'atu'e. Mi'i hawyi pyno yt apo'u­ru­to'e i ra'yn epe uwe En hap ete katu­pono mesup uruimohey ra'yn Tupana Mipo­'oro sese En hap i'atu'e.
JOH 16:31 Iesui to'e — Pywo apo uimohey eipe e.
JOH 16:32 Meikoran ti aru mesup ta'yn ui'atoiat yne eipe hawyi eiwe­sytpok yne ui'ya­ty­pepyi ei'yat ko'i kape. Mi'i hawyi uiweran ui'atoiat yne eipe hawyi. Ma'ato ti aru yt uiweran sese i katu­pono Ui'ywot yt ui'atoiat hin i e.
JOH 16:33 Mi'i hawyi Iesui to'e — Eimo­so­'opot kahato hanuaria yt uimohey haria i tukup­te'en aru ma'ato yt eweiken'ẽ tei'o i'atu­pupi katu­pono i'atu­pyhyp hat Uito areĩne'en i'atu­mo­perup i hat Uito mi'i pote eiwe­saika ro uhete e. Wuat'i kat ko'i kat ko'i ahenoi ra'yn ehepe eimoe­saika hamuat eimo­wepit hamuat. Eimo­wepit hap sese ma'ato Uito e. Yt eiwa­nẽtup o ko'i ko'i wo katu­pono ati'a­tu­'akit akit aru yne yne ahewa­nĩ­kaptia ko'i e. Ho'opot hap put'ok'e ehetiat turan yt paa'e­wei'e sese eipy'a pe eiwa­nẽtup hawe katu­pono yt karãpe i woro­ho­'o­'atoiat sese e Iesui topot­mu­'eria pe.
JOH 17:1 Mi'i tã to'e Iesui hawyi iha'at ywaipe mi'i hawyi to'e — Papai e uiku­'uro hamuat mesup ta'yn put'ok'e e. Woro­mõ­typot teran Papai uiku­'uro hawe. Atiky­'esat kahato miit'in piat — Wakuat kahato En Tupana i'atu'e hap atiky­'esat. Mi'i haype uimõ­typot mesuwe Ui'ywot e.
JOH 17:2 Papai uinug na'yn En Wuat'i Miit'in Potypot nuat katu­pono etiky­'esat kahato miit'in ehakye­ra'at hamuat uimiium emi'ai­roria pe hap etiky­'esat Papai. Waku kahato mesup yne emiium esaika hap topy­hu'at mesup uipiit pe e.
JOH 17:3 En yn ni Tupana sese are. I'ewyte wẽtup ok yn Emipo­'oro Esa'yru wuat'i Porekuat. Mi'i ti Uito Iesui Emipo­'oro Papai are. Ekuap sese haria Esa'yru kuap haria yn wuat'i e'at piat gupte'en sese hanuaria are e.
JOH 17:4 Ta'i ewat emõtypot hap yn ni miit'in me atomo­herep Ui'ywot are e. Atunug na'yn wyti yne uipo­'oro epiat hap emiky­'esat nug hap Papai are e.
JOH 17:5 Papai ara'aipok irane ewawi mesup are. Woro­ky'e kahato Papai wẽtup yn Aito. Pyno ewekaipyi uimõ­typot ro itote aikotã sa'a­wy­'ite yi nug hap e'yian notiat ewy uimõ­typot itote Papai are e.
JOH 17:6 Ta'i woro­mo­herep ta'yn yne emiium uimu­'eria ko'i pe are. Sa'a­wy'i te ewanuaria uhemiit tukup­te'en ma'ato mio emiium aiwa­nuaria wo ra'yn tukup­te'en mio ahehay upianuaria tukup­te'en ma'ato sa'a­wy'i mesu­wa­ro­tiaria ehay upiaria tukup­te'en are e.
JOH 17:7 Koitywy ta'a­tukuap ta'yn Uito Emipo­'oro ehay moherep yne hamuat hat are e.
JOH 17:8 Atimo­herep ta'yn yne emienoi uhepiat Papai are. Mi'i ta'a­tukuap yne ra'yn emienoi uiwẽ piat hawyi ta'a­tusat yne ra'yn ehay katu­pono ta'a­tukuap kahato ra'yn ekaipywiat Uito hap i'ewyte Uito Emipo­'oro hap ta'a­tu­mohey kahato ra'yn are e.
JOH 17:9 Papai ahẽtup emiium uhemiit'in ko'i powyro hamuat Papai katu­pono ewanuaria sese mi'iria pote eti'a­tu­poi­tyro mi'iria koitywy are. Atiky­'esat mi'iria wẽtup miit ewy yn uimohey hap ete. Yt ahẽtup i yt uimohey i haria powyro hap ma'ato ahemiit powyro hap ahẽtup epe Papai are e.
JOH 17:10 Papai torania wyti uimohey haria ewanuaria wo tukup­te'en are. Mi'i pote i'ewyte yne ewanuaria uiano tukup­te'en are. Aimohey haria waku nug haria tukup­te'en mesup mi'i pote uimõ­typot kahato irania'in — Waku pe tukup­te'en Iesui saipe­piaria i'atu'e. Mi'i pote — Waku sese i'atu­ka­'iwat i'atu'e uhepiat are e.
JOH 17:11 Papai yt uwe i ra'yn mesuwat yi tote e'ewywuat wakuat are. Papai ara'aipok irane ewawi ma'ato ti aru uimohey haria yn na'yn te'e­ro­py­hu'at mesu­wa­rote are. Papai En ni po'og hesaika torania kawiat hat are. Mi'i esaika hap etum na'yn uhepe. Koitywy En ewy uhesaika ra'yn. Ewawi areto hawyi yt uwe i Uito mesuwe ma'ato uhaipe­piaria uhemiit'in ti aru te'e­ro­py­hu'at mesuwe. Papai En ni hãpyk kahato rakat are. Eti'a­tu­moe­saika ro uhemiit'in aikotã e'ewy i'ewyte ui'ewy mi'iria tukup­te'en hãpyk hamo are. Atiky­'esat mi'iria tukup­te'en wẽtup miit ewy aikotã En Uito wẽtup miit ewy watoĩ­ne'en hap ewy are e.
JOH 17:12 Papai uheĩne'en i'atu­py­'a­setpiat turan esaika wo ati'a­tu­ka­wiano torania uhemiit'in. Yt wẽtup ok i uimohey hap waure'e hat wo topy­hu'at ma'ato mekewat ho'o­wasat rakat uimohey ran hat waure hat mi'i ti tonug hap ewy ti ra'yn uiwaure are. Aikotã sa'a­wy­'iwuat miwan henoi hap ewy ti ra'yn uiwaure to'uhu hap ewy tutunug mi'i tã. Ma'ato irania'in torania ati'a­tu­moheg kahato ehay wo are e.
JOH 17:13 Papai koitywy areto i ra'yn ewawi mi'i tupono meiũwat ui'e hap ahenoi kahato uimohey haria pe i'atu­mo­wepit hamuat. Atiky­'esat kahato uiwepit hap ewy topy­hu'at i'atu­py'a pe yt areĩne'en i mesu­wa­rote hawyi. I'atu­mo­wepit hap sese atiky­'esat Papai are e.
JOH 17:14 Ahenoi ra'yn ni eko uhemiit'in me Papai. Eko ewy ti ra'yn tukup­te'en i'ewyte ui'ewy te'e­ru­wa­nẽtup are. Mi'i pote yt imohey haria i yt i'atu­wese hin i ahete katu­pono yt i'atueko ewy hin i urutu­kup­te'en Papai are e.
JOH 17:15 Papai eti'a­tu­'ywyk o uhemiit'in yt aimohey i haria py'a­setpyi yt are i. Ahẽtup epe ma'ato o eti'a­tu­'ywyk o uimohey re'ym haria porekuat ahiag po pyi uhemiit'in are ahẽtup Papai. Atiky­'esat kahato mesu­wa­ro­tiaria py'a­setpe tukup­te'en aru ahemiit i'atu­mu'e ahetiano hanuaria wo Papai are ma'ato tukup­te'en yt nakuaria i py'a­setpe turan eti'a­tu­moe­saika ahemiit'in esaika hamo wãi'e hamo yt naku i nug haria iã'ãg hap pupi are e.
JOH 17:16 Katu­pono aheko yt mesu­wa­ro­tiaria eko ewy hin i ra'yn. I'ewyte ahemit­t'in aimohey haria yt irania'in wanẽtup haria ewywuat i tukup­te'en are e.
JOH 17:17 Pywo kahato ti urunãpin En Papai. Ta'i ehay pywuano ro uhemiit'in moty­py'i En emiky­'esat ewywuat nug hanuaria wo. Mi'i tã etunug mote ti aru emiit'in sese wo ra'yn te'e­ro­py­hu'at ai'e­wywuat tukup­te'en ahemiit'in are e.
JOH 17:18 Papai sa'a­wy'i uipo­'oro mesu­wa­ro­tiaria ehakye­ra'at hamo emiit nug hamuat uipo­'oro sa'a­wy'i. Koitywy En hap ewy ati'a­tu­po­'oro ahemiit'in wuat'i mesu­wa­ro­tiaria emiit nug hamuat aikotã uipo­'oro hap ewy are e.
JOH 17:19 Papai epo pe hamuat ra'yn areĩne'en uiku­'uro iatuepiat rẽ. Mi'i hawyi torania uhemiit epo tukup­te'en Papai are. Ui'ywot ewanuat yn areĩne'en emiky­'esat nug hamuat are. Uito ewywuaria hap atiky­'esat kahato uimi­mu­'eria ewanuat yn emiky­'esat nug hanuaria hap atiky­'esat. Mi'i pote ati'a­tu­mu'e kahato mi'iria ehay pywuanuat ete. Ehay pywuanuat no ati'a­tuekyi uipot­mu­'eria ehowawi emiit'in yn no are e.
JOH 17:20 Papai yt uhemiit meiũwuaria 11 ok takaria upi yn i ahẽtup epe ma'ato i'ewyte ti meiũran nuaria uimohey haria meiũwuaria haipe­piaria upi ahẽtup epe i'atuehay upiat aimohey hanuaria upi are. I'atu­sai­pe­piaria aimohey hanuaria upi ahẽtup i'ewyte are e.
JOH 17:21 Papai aikotã aiwa­nẽtup hap wẽtup yn hap ewy ahemiit'in wanẽtup hap ahẽtup ekaipyi are. Aikotã areĩne'en ekai i'ewyte ereĩne'en uikai mi'i hap ewy atiky­'esat aimi­mu­'eria tukup­te'en ahepe wẽtup miit hap ewy aito uruto hap ahẽtup Papai are. I'atu­wa­nẽtup hap aiwat ewy. Mi'i hawyi meremo mesu­wa­ro­tiaria yt aimohey haria i pywo i'atu'e. Meremo ta'a­tu­mohey Emipo­'oro wuat'i ehakye­ra'at hat Uito hap are e.
JOH 17:22 Papai sa'a­wy'i ere'e uhepe — Waku kahato En ui'ewy ere. Mi'i hap ewy koitywy are uhemiit'in me — Wakuaria kahato eipe ui'ewy are. Mi'i tã are i'atuepe katu­pono atiky­'esat mi'iria aiwo­'o­'e­wy­'ewy aiwa­nẽtup hap are e Iesui.
JOH 17:23 — Ui'ywot atiky­'esat En Uito ahemiit wẽtup miit ewy hap atiky­'esat are. Atiky­'esat ahemiit wakuat sese rakaria ahewaku hap ok tã hap atiky­'esat are. Aiwo­'o­'ewy kahato watoĩ­ne'en Papai En Uito ahemiit'in wywo wẽtup yn aiwa­nẽtup hap ko'i hap atiky­'esat are. Mi'i tupono mi'i aheka­tu­wyria sese ko'i ahehay enoi haria mesuwat yi totiat haria aru tukup­te'en are. Toi'a­tu­mu'e miit'in turan pywo sese ti i'atu'e irania'in Tupana Mipo­'oro Iesui aheha­kye­ra'at hamuat i'atu'e wanẽtup haria. Ta'i Tupana aiky'e kahato Tosa­'yru ky'e hap ewy aiky'e i'atu'e irania'in katu­pono hãpyk sese tukup­te'en ahemiit'in irania'in ehamo pote hap ahẽtup epe Ui'ywot are e.
JOH 17:24 Papai mesuwat yi nug hap e'yianmete uiky'e kahato En are. Ta'i sa'a­wy'i sese mesuwat yi yt etunug i te turan — Wakuat kahato En aiwo­'o­ky'e hap to'o­'ewy kahato ere uhepe Papai are. Atiky­'esat kahato uhemiit'in uimohey haria emiium ko'i tukup­te'en aru aiũpe aiũpe uheĩne'en sa'a­wy­'iwuat hap upi i are. Atiky­'esat uikahu hap kape te'e­ra­ha'at aru are. Atiky­'esat emiium uhewaku hap sese kuap hamo Papai are e.
JOH 17:25 Papai hãpyk kahato rakat sese En ma'ato emohey re'ym haria mesuwe uwe En hap yt ta'a­tukuap hin i. Ma'ato Uito ti worokuap kahato are i'ewyte uipo­'oro epiat hap mohey haria tikuap kahato En wy are e.
JOH 17:26 Ha'a­wyte pyi te mesup te woro­mo­herep uiwy­ria'in me are. I'ewyte ti aru woro­mo­herep i uwe En uhemiit'in me are katu­pono atiky­'esat kahato i'atu­wo­'o­ky'e hap aiwo­'o­ky'e hap ewy are. Mi'i haype woro­mo­herep ti aru i'atuepe katu­pono atiky­'esat aheka­tu­wyria wywo watu­kup­te'en wuat'i e'at pe Papai are. Eti'a­tu­ky'e ro uhaipe­piaria uimohey haria uiky'e hap ewy are aikotã — Woro­ky'e Uha'yru ere uhepe sa'a­wy'i. Mi'i e hap ewy ere'e uhaipe­piaria pe — Woro­ho­'o­ky'e uha'y­ru'in uhaki­'yt'in ere'e aru uimohey mot'i haria pe Ui'ywot are e kahato Iesui To'ywot pe.
JOH 18:1 Mio tã to'e To'ywot piat hawyi toto ra'yn Iesui y'y hit'i Seterũ hy sakpo toto. Mi'i hap tote teke mikoi ypia pe temiit'in wywo.
JOH 18:2 Ma'ato Iesui ma'at hat Iuta tikuap ta'yn mekewat mikoi ypia katu­pono sa'a­wy­'ite Iesui tiky­'esat te'e­ru­wa­'a­tunug temiit'in wywuat 12 ok takaria wywuat hap itote.
JOH 18:3 Mi'i kape Iuta tero­po'ok ta'yn sura­ra'in ko'i Iesui ieĩne'en hap kape tote­ro­po'ok i'ewyte Tupana mõtypot yat apykok haria tuwat hupi. Tote­ro­po'ok pa'i kororia ehay upi i'ewyte i'atu­'akag ko'i ehay upi tuwat typy'i. Ariãty pirik hot puo tuwat i'ewyte ariãty ko'i puo tuwat aria'yp ãkun ko'i wywo tu'uka hamo tuwat tuwat.
JOH 18:4 Mi'i hawyi put'ok­'i­'a­tu'e itote ma'ato Iesui tikuap ta'yn yianmete aikotã aikotã tutunug tetiat hamuat ko'i toikuap kahu ra'yn topy'a pe. Mi'i hawyi toto ra'yn Iuta miero­po'ok ko'i owa kape. Mi'i hawyi to'e — Uweĩ eweikat e i'atuepe.
JOH 18:5 Mi'i pote sura­ra'in tiwesat — Ta'i mekewat Iesui tawa Nasare piat wyti uruikat i'atu'e. Mi'i pote Iesui to'e — Uito rat Mi'i e.
JOH 18:6 Mio tã e pote hewo yi tote ta'a­tu­'ape wo hewo yi tote.
JOH 18:7 Mi'i rokirẽ Iesui to'e i — Uweĩ pyno eweikat e. — Iesui tawa Nasare piat rat uruikat i'atu'e i.
JOH 18:8 Mi'i pote — Uito rat Mi'i e i. — Uito uikat pote waku eipohep to uhemiit'in ete tuwat mono pyno e sura­ra'in me.
JOH 18:9 Sa'a­wy­'iwuat to'e hap ewy — Papai yt atiky­'esat i emiium uhepiat uhemiit'in yt wẽtup ok i ta'at uipo pyi to'e hap ewy tupono.
JOH 18:10 Mi'i tã ra'yn pote Simãu Peteru tihep teky­se'yp hawyi toi'atek pa'i koro emiit. Mi'i hawyi ipo sese kawiat i'ahape toihep ta'yn Mauku e hap het rakat toi'a­ha­pehep.
JOH 18:11 Mi'i hawyi Iesui to'e Peteru pe — Etopag i ro ekyse'yp heiam me Simãu e. Yt uika­wiano tei'o en kyse'yp mo katu­pono Ui'ywot tiky­'esat aho'opot hap e. Waku atu'u mekewat kui'a piat Ui'ywot miium pãi e.
JOH 18:12 Mi'i hawyi Iuta miero­po'ok ko'i topytyk Iesui hawyi surara ko'i tipo­'i­po'i Iesui saity wo ipopy tet pupi.
JOH 18:13 Mi'i hawyi ta'a­tue­roto Iesui pa'i koro Ka'i­wasi ehamũpot Anai kape. Sa'a­wy'i pa'i wato Ka'i­wasi mio tã e Iuteuria akag ko'i pe — Yt wati­'auka i Iesui pote miit'in porekuat no topy­hu'at e.
JOH 18:14 Mi'i pote ipy'ahak Humanu ywania kawiat aipo­rekuat koro hawyi toipo­'oro tesu­ra­ra'in ai'a­tu­'uka yne hamo watunug Iesui aipo­typot no pote e. Pyno po'og waku wati­'auka ra'yn meiẽwat miit Iesui sio Humanu ywania aiwa­nĩ­kaptia esurara'in miat ai'a­tu­'uka hap owakai te e pa'i koro Ka'i­wasi kape. Mi'i hawyi sura­ra'in ta'a­tue­roto ra'yn Iesui.
JOH 18:15 Mi'i hawyi toto Simãu Peteru Iesui saipeupi wẽtup ok Iesui potmu'e wywo uiwywo. Mi'i hawyi put'ok­'i­'a­tu'e pa'i koro yat ete. Mi'i hawyi wẽtup ok teke ra'yn pa'i wato kuap hat pote.
JOH 18:16 Ma'ato Peteru yt teke i. Toĩne'en kokawiat he'o­ken­'y­pyke ne'i. Mi'i hawyi mekewat pa'i wato kuap hat Iuwãu e het rakat toto e'oken­'ypy pyhyp hat pĩ'ã kape — Waku meiũwat miit teke ere ro sura­ra'in me to'e pĩ'ã piat hamo.
JOH 18:17 Mi'i turan mekewat pĩ'ã heke oken'y­pykiat to'e Peteru pe — Iesui potmu'e keĩ en e. Mio tã e hawyi Peteru tiwesat pĩ'ã — Yt mi'i i rat uito e.
JOH 18:18 Mi'i turan oken note pa'i wato eropat haria te'e­re­'a­ria­'uhu sura­ra'in wywo. Mi'i hawyi itote te'e­re­mõpe na'ak pote. Mi'i kape Peteru i'ewyte tuwe­mõpe i'atu­py­'a­setpe.
JOH 18:19 Mi'i turan pa'i wato ehamũpot Anai apo apo'e Iesui pe — Ehenoi ro uruepe aikotã ere epotmu­'eria wywo ereĩne'en i'atu­mu'e haype e.
JOH 18:20 Mi'i hawyi Iesui tiwesat — Uito ti herep wuo ati'a­tu­mu'e Tupana yat iwato rakat pe. I'ewyte kat pe ahenoi henoi kahato miit'in sem me aikope aikope te'e­ru­wa­'a­tunug hap tote Tupana mõtypot yat iwato rakat pe. I'ewyte kat e ahenoi henoi kahato miit'in sem me aikope aikope te'e­ru­wa­'a­tunug hap tote Tupana mõtypot yat hit ko'i pe e.
JOH 18:21 Pyno kat poteĩ apo apo'ere uhepe — Kat som eti'a­tu­mu'e miit'in me mesuwe ere e. Epiat ikuap teran pote uimi­mu'e ko'i ete pote apo'ere ro uhehay kuap haria pe katu­pono mi'iria tikuap kahato kat ui'e kat uimienoi ko'i e. Mi'iria pe ro apo'ere e. Kat ui'e hap kat uimienoi ko'i ta'a­tukuap yne e. Mi'i pote i'atuwẽ pywiat etikat ui'e hap e Iesui pa'i koro Anai pe
JOH 18:22 Mio tã e Iesui pote wẽtup ok surara ti'ahyk ta'yn Iesui howa ete topopep mo — Wãi ehay sa'ag nei'o pa'i koro ete e haty wo Iesui pe
JOH 18:23 Ma'ato Iesui tiwesat — Kat pote ui'ahyk e. Uhehay sa'ag mote ehenoi ro uhepe aikotã sa'ag ui'e hap wuat'i pe ma'ato pywuat uhehay ahenoi pote yt ui'ahyk tei'o en e Iesui surara pe. Mi'i hawyi yt kat e kuap i surara.
JOH 18:24 Mi'i hawyi pa'i koro Anai tipo­'oro Iesui ipo'i po'i pe wẽtup pa'i koro kape mekewat Ka'i­wasi e hap kape tomi­mo­ha­py'ap kape.
JOH 18:25 Mi'i turan Iesui potmu'e Peteru toĩne'en y'am me aria kupyke tuwe­mõpe. Mi'i hap tote irania'in apo'i­'a­tu'e apo'i­'a­tu'e Peteru pe — Uhyt mimi i'atu'e en apo wẽtup Iesui potmu'e sio yt i'atu'e. Ma'ato Peteru tiwesat — Yt rat e yt uito i rat yt Iesui emiit hin i uito e.
JOH 18:26 Mi'i hawyi pa'i koro eropat hat mekewat Peteru mi'a­ha­pehep wy'ok to'e Peteru pe — Uhyt e ara'a­kasa en mũki iwywo mikoi ypia piat turan e.
JOH 18:27 Mi'i hawyi Peteru to'e — U yt uito i rat e yt atikuap i Mi'i Miit e haty wo. Mio tã e sa'ag turan waipaka pa'iat ihay ra'yn Peteru miẽtup mo.
JOH 18:28 Mi'i hawyi hunete totioto Iesui topo'i po'i pe morekuat wato yat kape pa'i wato Ka'i­wasi yat pyi. Mi'i hawyi ma'ato Iuteu ywania yt tuwe­hyt'ok teran i Iesui upi morekuat yat pe katu­pono — Yt naku i wateke meiũwat getap we i'atu'e katu­pono yt aiwat ai'y­wania yat i i'atu'e. Wateke pote wati­'a­parap ta'yn aheko i'atu'e. Tupana yt tiky­'esat i watoĩ­ne'en wẽtup ywania yat pe i'atu'e. Yt toiky­'esat i watenuk irania'in ywania wywo Tupana mõtypot ienuk wato hap turan i'atu'e to'ope.
JOH 18:29 Mi'i pote morekuat Piratu tuwẽtem to'yat pyi i'atue­wawi. Mi'i hawyi to'e — Kat pote eweterut Meiẽwat Miit uhowawi e. Kat som sa'ag tutunug ehepe e.
JOH 18:30 Mi'i hawyi ta'a­tu­wesat — Meiũwat Miit yt nakuat i sese ti rat i'atu'e. Mi'i pote uruterut Mi'i Miit ewawi mehĩ i'atu'e. Waku Mi'i Miit pote yt karãpe i uruterut ewawi i'apiheg hamo mehĩ i'atu'e. Ma'ato pywo ti Miit Miit yt naku i sese rakat i'atu'e. Mi'i pote neke uruterut ewawi Mi'i Miit Iesui ewawi urupo­rekuat en mote i'atu'e Piratu pe.
JOH 18:31 Mi'i hawyi Morekuat Piratu to'e — Kat poteĩ uhowawi eweterut Mi'i Miit e. Ewetioto ro Mi'i Miit einãpin haria kape aikotã yt eheko ewy i hap kuap hamo e Piratu Iuteu ywania akag ko'i pe. Mio tã e Piratu hawyi te'e­ro'e — Ma'ato mehĩ yt ehay upi i pote yt uwe kuap i i'auka. Ehay upi yn waku urui'auka Mi'i Miit uruto'e ere'e sa'a­wy'i uruepe e hap ewy i'atu'e.
JOH 18:32 Aikotã yianmete Iesui tuwenoi toku­'uro hamuat aria'yp posak ete hap ewy ra'yn ti ta'a­tunug na'yn tuete itote.
JOH 18:33 Mi'i hawyi ta'a­tu­'atoiat hawyi teke i ra'yn to'yat pe morekuat Piratu. Mi'i hawyi Iesui toikaykay to'yat pe tuwe­wawi hawyi to'e — E'ywania Iuteuria Porekuat apo En e.
JOH 18:34 Mi'i pote Iesui tiwesat — Ewanẽtup hawe apo'ere sio etimohey sese i'atu­po­rekuat Uito hap sio irania'in henoi epe uikuap hamuat e Iesui morekuat pe.
JOH 18:35 Mi'i hawyi Piratu tiwesat — Uito ti yt ewat e'ywania Iuteu ewywuat hin i e. E'ywania pa'i koro ko'i eerut uhowawi ekuap hamo sio waku En sio yt naku i e hap kuap hamo e. Pyno kat som yt nakuap i etunug Uhyt e Piratu.
JOH 18:36 Mi'i hawyi Iesui tiwesat — Uito ti mesu­wa­rotiat more­kuaria yt ewywuat i are Uito yt miit'in po'o­ro­kary haty wuat hat i e. Ati'a­tu­po­'o­ro­kary uhemiit yt epo'oro hat morekuat Sesa yt ewy i Uito e. Morekuat kahato areĩne'en ma'ato yt mesu­wa­ro­tiaria ewy hin i e. Mesu­wa­rotiat morekuat Uito pote meremo uhemiit'in uhesu­ra­ra'in ati'a­tu­po­'oro uika­wiano hamo mesuwe. Mi'i hawyi meremo tu'uka uika­wiano haype e. Mi'i pote Iuteu ywania yt uipo­pytyk kuap i are. Ma'ato Uito yt mesu­wa­rotiat more­kuaria ewy hin i e Iesui.
JOH 18:37 Mi'i tã e pote Piratu to'e — En nasom pyno Miit'in Potypot Koro sio yt e. — Ta'i Mehĩ e'e hap ewy Morekuat nuat Tupana uipo­'oro mi'i hanuat areĩne'en mesuwe i'ewyte mi'i hamo aremo­herep mesuwat yi tote e. Pywuat sakpo sehay enoi hamo ariot miit'in mu'e hamo are mi'i pote pywuat sese sehay ky'esat haria tuwa­nẽtup kahato uhehay pywuat kape e Iesui.
JOH 18:38 Mi'i hawyi to'e Piratu Iesui pe — Yt kat i rasom pywuat sese mesu­wa­rote uiwa­nẽtup hawe e. Mio tã morekuat Piratu to'e hawyi tuwe­morem hawyi toto to'yat pyi Iuteu ywania akag ko'i kape tehay moherep hamo sio Iesui waku sio yt e hamo. Mi'i hawyi to'e Piratu itote — Mehĩ'in e mana'in e ahã'ãg na'yn Mekewat Miit Iesui e hap het rakat mi'i hawyi uiwa­nẽtup hawe waku kahato Mi'i Miit e. Yt kat i sa'ag nug hat Mi'i Miit e Piratu.
JOH 18:39 Ma'ato toĩne'en eiwat eiwe­pokuap hap mesuwat e'at piat hap ewy e. Ta'i yne ano pe mesuwat ienuk wato hap turan wẽtup ok eimi­pyhik eweipuksit eiwe­pokuap hap ewy e. Mi'i tupono apo'are ehepe — Eweiky­'esat apo atipo­re­nõtem Iesui e. Eweiky­'esat apo ei'y­wania Iuteu potypot atipuksit apo'e morekuat Piratu.
JOH 18:40 Mi'i hawyi te'e­ru­watka popuo — Yt nyti yt nyti. Waku po'og etipo­re­nõtem no mekewat miit Parapa i'atu'e. Waku etipo­re­nõtem Parapa ewo'o­pyhik hap pyi mehĩ i'atu'e. Mi'i hawyi eti'auka ro Mekewat Iesui i'atu'e haty wo. Mekewat Parapa hero'ok hat miit'in pot'auka hat pytkai — Etipo­re­nõtem no mekewat miit Parapa hawyi waku eti'auka Mekewat Iesui e hap het rakat i'atu'e sa'ag morekuat Piratu pe.
JOH 19:1 Mi'i hawyi Piratu to'e tesu­ra­ra'in me — Pyno eweipak pak haty wo meiũwat Miit Iesui haity hu rakat wywo e.
JOH 19:2 Mi'i hawyi sura­ra'in timõ­ko'i Iesui. Mi'i hawyi wẽtup ok tipi'ig morekuat esapeu ewywuat ma'ato hu wywo morekuat painug hap ewywuat. Mi'i ta'a­tupag sapeu hu kawiat i'akyt­'ape ta'a­tupag haty wo.
JOH 19:3 Mi'i hawyi morekuat esokpe hup'i ta'a­tue­sai'a nug ta'a­tu­mi­ky­ry'i hap — Wakuat wakuat Iuteu ywania eporekuat ta'a­tuehay miky­ry'i wo haype. Mi'i hawyi ta'a­tu­'ahyk ahyk Iesui ta'a­tupo wo haty wo.
JOH 19:4 Mi'i hawyi Piratu tioto to'yat pyi ipainug ihup takat nuat rẽ mekewat e'amãtap hu kawiat wywo haty rakat wywo — Eweha'at ro Mi'i Miit kape e. Pywo ti rat yt kat i iminug sa'ag atipuẽti e. Yt kat e i.
JOH 19:5 Mi'i hawyi Iesui tuwe­mo­herep itote morekuat esokpe sa'ag ipiit ete i'ewyte hu ipainug hap i'akag me tuwe­mo­herep i'atu­py­'a­setpe. Mi'i hawyi Piratu to'e — Eweha'at ro meiũwat Miit kape e.
JOH 19:6 Te'e­ra­ha'at hawyi te'e­ro'e haty wo — Wãi ne i'atu'e eti'auka ro eti'auka ro aria'yp posak ete i'atu'e pa'i kororia ta'a­tue­su­ra­ra'in akag nywo Piratu pe. — Eipo pe ra'yn atopag koitywy i'auka ehepiat hamo e katu­pono uiwa­nẽtup hawe yt kat pe i ti toi'a­parap i'auka hamo atipuẽti uito are e. Pyno ewei'auka teran pote ewei'auka ro aria'yp posak ete e ma'ato uito yt sake i atunug neran mi'i tã e Piratu.
JOH 19:7 Mi'i hawyi Iuteu akag ko'i tiwesat — Ma'ato uruwat urunãpin hap ete toĩne'en mi'i hap ete meiẽwat miit i'aparap kahato katu­pono tuwenoi Tupana Sa'yru Uito e. Mi'i pote etipo­'oro ro esura­ra'in i'auka hamo i'atu'e.
JOH 19:8 Karãpeĩ morekuat Piratu tikuap ta'yn Iesui e hap Uito Tupana Sa'yru e hap hawyi token'ẽ kahato ra'yn. Mi'i hawyi iperup ta'yn token'ẽ kahato Iesui auka hap nug hamuat.
JOH 19:9 Mi'i hawyi put'ok­to'e to'yat piat hawyi to'e i ra'yn Iesui pe — Aikope pyi pyno eriot Uhyt e Piratu ma'ato yt Iesui tiwesat hin i ra'yn.
JOH 19:10 Mi'i pote Piratu to'e — Yt uiwesat i apo Uhyt e. Yt etikuap i apo uikaipyi e'auka hap ta'a­tu­ky­'esat e. Ta'i Uhyt moro­puksit reran pote woro­puksit kuap ne'i e katu­pono uipo pe ne'i ereĩne'en En Uhyt e sio woro­'auka kary teran pote woro­'auka kuap e morekuat Piratu.
JOH 19:11 Ma'ato Iesui tiwesat — Tupana yt enug i urupo­rekuat no mesu­wa­rote pote yt aikotã kuap i ui'auka hamuat hap uhyt e ma'ato ui'auka pote i'aparap epiat hap iwato toĩne'en are ma'ato po'og iwato ekawiat haria i'aparap hap mekewat uherut ewawiat haria wat — Eti'auka ro e haria wat e.
JOH 19:12 Mio tã e hawyi Piratu tiky­'esat po'og Iesui puksit hap ma'ato Iuteu akag wãi'i­'a­tu'e — Yt etipo­re­nõtem nei'o Mi'i Miit i'atu'e ma'ato etipo­re­nõtem pote ti aru e'akag morekuat koro Sesa e hap ewanĩkap mo ra'yn Sesa mi'auka wo ra'yn ereĩne'en e eimiwan me i'atu'e Piratu pe.
JOH 19:13 Mi'i hawyi Piratu tioto Iesui he'y­wania Iuteuria akagnia kape waku sio yt i'atu'e hamo. Mi'i hawyi itote ta'apyk i'atu­py­'a­setpe morekuat e'amyap tote aikotã miit'in kuap waku sio yt e hap amyap tote akipy nu kawiat rote ta'apyk Iuteu pusu puat Akipy Kapata e hap tote ta'apyk.
JOH 19:14 Atpo­sake ra'yn turan ienuk koro hap e'at owakai te morekuat Piratu to'e haty wo — Meiũ ra'yn Eipo­rekuat koro wuat e Piratu Iesui ywania akag ko'i pe.
JOH 19:15 Ma'ato i'atuehay pirik wo te'e­ro'e — Yt wyti yt wyti. Yt urumi­ky­'esat i i'atu'e yt urupo­rekuat hin i i'atu'e. Ewei'auka ro ewei'auka ro aria'yp posak ete i'atu'e haty wo. Mi'i hawyi toi'a­tu­wesat — Ati'auka meiũwat pote ti aru yt kat i eipo­rekuat koro e. Mi'i hawyi ta'a­tu­wesat — Wẽtup ok yn ni aipo­rekuat koro mi'i wyti kuepe morekuat wato Sesa e hap i'atu'e Iuteu akag ko'i.
JOH 19:16 Mi'i hawyi Piratu to'e tesu­ra­ra'in me — Pyno eipo pe ra'yn Iesui i'auka ehepiat hamo e. Mi'i hawyi sura­ra'in tioto ra'yn Iesui i'auka hamo.
JOH 19:17 Mi'i hawyi tuwẽtem na'yn Iesui Piratu yat pyi te'a­ria'yp posak wywo. Mi'i hawyi totioto miit akag'akag e hap kape yity'ok Koukota e hap ipusu puo.
JOH 19:18 Mi'i hawyi meipepe ta'a­tu­pehik ta'a­tu­'apig Iesui na'yn pereku wato wo ipy ko'i i'ewyte ipo ko'i aria'yp posak ete. Typy ok iwywo ta'a­tu­pehik typy aria'yp posak ete wẽtup ok ipo ran kai wẽtup ok ipo sese kai. Mi'i hawyi ta'a­tu­mo­poĩ'ãm na'yn Iesui aria'yp posak wywo yi ka'a pan me ta'a­tupag. Mi'i hawyi y'am me Iesui topy­hu'at tomosat e hap ete toĩne'en.
JOH 19:19 Mi'i hawyi morekuat Piratu tipo­'oro towat tomiwan Iesui apy totiat hupit hamo. Mio tã to'e Piratu miwan me — Meiũ ti Iuteu ywania Potypot sese e tawa Nasare piat ti meiũ e.
JOH 19:20 Mekewat Iesui auka hap ti yt pya hin i tawa Ieru­sarẽi kai. Mi'i pote ipoity akasa Piratu miwan kapiat haria. Ta'a­tukuap kahato Piratu miwan katu­pono mye'ym pusu puo toiwan Iuteu ywania pusu puat hawyi Iratĩ ywania pusu puat hawyi Kereku ywania pusu puat Piratu tiwan to'e hap Iesui etiat aria'yp posak totiat.
JOH 19:21 Mi'i hawyi Iuteu epa'i koro ko'i te'e­ro'e Piratu pe — Yt etiwan nei'o meiũ ti Iuteu ywania Potypot sese e hap meipe pe i'atu'e ma'ato Mi'i Miit to'e Uito Iuteuria Porekuat e hap yn waku etiwan mehĩ i'atu'e.
JOH 19:22 Ma'ato Piratu ti'a­tu­wesat — Yt rat e. Yt atiwan i wẽtup e. Koitywy ti meipe pianuat ra'yn uimiwan topy­hu'at wuat'i e'at pe ui'e hap ewy pãi e.
JOH 19:23 Mi'i hawyi sura­ra'in 4 ok takaria tihep Iesui esokpe. Mi'i ta'a­tusat hawyi ta'a­tu­pat'ok ta'a­tu­ra­niawuat ma'ato hesokpe heka­misa wato yt aikotã kuap i ta'a­tu­ky­'esat yne pytkai ta'a­tusat ta'a­tu­ra­niawuat. Yt ta'a­tu­pat'ok kuap i yt ta'a­tuhiot kuap i katu­pono yt mipi'ig i pote wẽtup o so'o yn pote yt ta'a­tu­pat'ok kuap i.
JOH 19:24 Mi'i pote te'e­ro'e to'ope — Yt naku i ra'yn watihiot hiot heka­misa wato i'atu'e. Waku po'og watu­we­ma­hara yn na'yn uwe ika'iwat pakup puẽti hamo i'atu'e. Aikotã sa'a­wy'i miwan me Saumu 22.18 pe Tupana ehay moherep hat e hap ewy ta'a­tunug yianmete e hap ewy ta'a­tunug — Ta'a­tu­pat'ok pat'ok hamuat aru uhesokpe hawyi uheka­misa wato ete i'ewyte te'e­ru­we­ma­hara to'o­po­hari pohari hamuat e yianmete miwan me. Mi'i tã e hap ewy ti sura­ra'in tunug Iesui esokpe ete.
JOH 19:25 Mi'i hawyi yt pya hin i aria'yp posak kai Iesui ty Maria toĩne'en toky­py'yt wywo hawyi mekewat wẽtup ok Maria wywo uhyt Koropai wary wywo. Mi'i hawyi i'ewyte mekewat Maria yi Mata­rena kaipywiat itote tukup­te'en i'am me.
JOH 19:26 Mi'i hawyi Iesui teha'at ra'yn aria'yp posak totepyi toty kape i'ewyte topot­mu'e tomi­ky'e kape. Mi'i hawyi Iesui to'e toty pe aria'yp posak ete pyi — Mamai e meiẽwat uimi­mu'e yatype ro ereĩne'en koitywy e. Emẽpyt no ra'yn toĩne'en koitywy e.
JOH 19:27 Mi'i hawyi to'e uhepe topot­mu'e pe — Uiwy e meiẽwat uity epo pe ra'yn toĩne'en e. Mi'i hawyi atioto Iesui ty ui'yat kape hawyi ui'yat piat toĩne'en.
JOH 19:28 Mi'i hawyi Iesui tikuap ta'yn topy'a pe wuat'i Tupana miky­'esat ewywuat tepiat inug hap hawyi to'e miwan miat to'e hap ewy — Are'y­'utui kahato e aikotã yianme­tewuat Tupana e hap ewy.
JOH 19:29 Mi'i tote toĩne'en Uwa sapo hy haiũg nakat toĩne'en kui'a pe. Mi'i rẽ ta'a­tu­po'i pina wy'yp ãpy ete amũkiusu ap ewywuat ete. Mi'i rokirẽ ta'a­tu­puk'a kui'a pe Uwa hy haiũg nakat pe hawyi ta'a­tu­pehik Iesui wẽ ete.
JOH 19:30 Mi'i toihysym kui'a piat hawyi tutu'u hawyi to'e haty wo — Ui'ywot e atunug yne ra'yn uipo­'oro epiat hap e. Ikahu ra'yn miit'in ehakye­ra'at hap e. Waku ra'yn e hawyi ipuhu tek'e ra'yn iku'uro sese ra'yn. Tutum na'yn tehapiat Tupana pe.
JOH 19:31 Mi'i rokirẽ wãtym'i kape ta'a­tuhep teran na'yn meremo aria'yp posak ko'i pyi i'atupiit ko'i katu­pono ta'a­tusyp teran meremo katu­pono mũki­'ite ra'yn wemohy hap e'at ta'a­tu'e haype. — Yt naku i ti watu­we­potpap i'atusyp hap ete at min'e hawyi katu­pono wãtym'i turan put'ok'e Tupana mõtypot e'at i'atu'e. Mi'i pote Piratu pe te'e­ro'e — Etipo­'oro ro esura­ra'in mehĩ aria'yp posak piaria yt iku'uro i te rakaria kag'yp pik hamo katu­pono mi'i watunug pote meremo topap sese i'atusyp hamo i'atu'e Iuteuria akag ko'i.
JOH 19:32 Mi'i hawyi Piratu tipo­'oro ra'yn tesu­ra­ra'in i'atu­kag'yp pik hamo. Mi'i hawyi Iesui yaty­piaria kag'yp ta'a­tupik ta'yn.
JOH 19:33 Mi'i hawyi put'ok­'i­'a­tu'e Iesui kag'yp pik hamo ma'ato Iesui iku'uro sese ra'yn pote yt ta'a­tukag pik i ra'yn.
JOH 19:34 Ma'ato wẽtup surara toto Iesui sakupe suk muruku wato wuat hamo. Toisuk hawyi tuwẽtem huu y'y wywo.
JOH 19:35 Mi'i hap kape ara'a­kasa kahato uito iku'uro hap are. Pywo pe mi'i hap atiwan yne yt uheso hin i. Mi'i hap ti ahenoi teran ehepe Iesui mohey hanuaria wo eweikup­te'en hamo.
JOH 19:36 Yt sura­ra'in tipik i ti Iesui kag'yp uhehamo aikotã Tupana to'e sa'a­wy­'iwuat henoi hap ewy ti ra'yn — Yt wẽtup i ti aru ta'a­tupik ikag e hap ewy Numeru 9.12 pe.
JOH 19:37 I'ewyte surara tisuk Iesui uhehamo aikotã yianme Tupana to'e miwan me Sakaria 12.10 e hap ewy — Meiũran aru i'atuepiat isuk hap kape te'e­ra­ha'at kahato e miwan me hap ewy.
JOH 19:38 Mi'i hawyi Iesui ewy Iuse toto Piratu kape Iesui piit hẽtup hamo toto. Mi'i Iuse ti Iesui potmu'e wen ma'ato ti token'ẽ Iuteuria pupi imohey hap enoi hamo. Mi'i ti tawa Arimateia kaipywiat toto Piratu kape hawyi to'e — Morekuat e atihep teran wyti Iesui piit aria'yp posak pyi mehĩ e. Mi'i pote toiwesat — Hẽ to e etihep to e. Mi'i hawyi Iuse toto hawyi toimo­'ãpyk ta'yn Iesui piit aria'yp posak pyi.
JOH 19:39 Mi'i hawyi mekewat Niku­temu sa'a­wy­'iwuat toto wãtym wuat Iesui kapiat hat toto wy Iuse wywo. Put'ok­ta­'a­tu'e hawyi mohag hy ikap takat mira kawiat Niku­temu terut wẽtup hyt ikap. Mi'i hawyi ta'a­tupen towy Iuse wywo Iesui piit ete 40 Kiru rakat ta'a­tupen.
JOH 19:40 Mi'i hawyi mohag hy ko'i wywo ta'a­tu'ok po'i sokpe kyt'i hawyi ta'a­tu­po'i po'i aikotã Iuteuria ywania eko ewy i'atu­wo­'osyp turan wuat ewy ta'a­tunug Iesui piit ete mekewat mohag hy ikap takat mira kawiat wywo.
JOH 19:41 Mi'i hawyi yt pya hin i Iesui auka hap kai mikoi ypia toĩne'en. Mi'i py'a­setpe toĩne'en wo'osyp hap pakup nu ka'a pe yi py hot'i piat wo'osyp hap.
JOH 19:42 Yt pya i pote ta'a­tusyp teran mi'i pe Iesui piit katu­pono Tupana mõtypot e'at yt pya i ra'yn. Wãtym'i ra'yn pote mũki­'ite toĩne'en at min'e hawyi i'atu'e Iuteuria pote. Mi'i pote ta'a­tusyp teran Iesui meremo mikoi ypia puat wo'osyp pakup hawe yt pya i iku'uro hap kai pote.
JOH 20:1 Mi'i hawyi mye'ym e'at hawyi mytu'u e'at pe toto ra'yn mana Maria yi Mata­rena kaipywiat Iesui syp hap kape. I'ypyryp te turan at yt ihot'ok i te turan toto Iesui piit pen mohag hy wuat hamo. Mi'i hawyi put'ok'e hawyi teha'at kahato Iesui syp hap kape. Mi'i turan ta'a­kasa ra'yn te'o­ken­hyp'ok pe ra'yn toĩne'en.
JOH 20:2 Mi'i hawyi teput kahato ipotmu'e Simãu Nu piat henoi hamo i'ewyte uhenoi hamo mekewat wẽtup ok Iesui emiit iky'e hat piat henoi hamo. Mi'i hawyi to'e uruepe — Ta'a­tue­ro'ok ta'yn wyti Aika­'iwat Iesui hyp hap totepyi mimi'in e. Mi'i hawyi yt uruikuap i aikowo ta'a­tue­reto e uruepe tehay pirik wo.
JOH 20:3 Mi'i hawyi Peteru wẽtup ok ipotmu'e wywo tuwat toko­hyeput no hyp hap kape te'e­ra­'a­kasa hamo.
JOH 20:4 Mi'i hawyi put'ok­'u­ru­to'e itote ma'ato mekewat wẽtup ok ipotmu'e hat po'og ihyha Peteru kai. Mi'i pote put'ok­'are Nu e'yianmete uito Iuwãu. Mi'i hawyi arepỹ­'ã­tutuk Iesui pũ'ẽ kape teha'at hamo nu ka'a pe hepiok hamo.
JOH 20:5 Mi'i hawyi ara'a­kasa ipo'i po'i hap sokpe yn ma'ato yt areke i hyp hap nu ka'a pe.
JOH 20:6 Ma'ato mi'i hawyi Peteru put'ok'e wat'ymo ma'ato meremo Peteru teke nu ka'a pe teput no. Mi'i hawyi ta'a­kasa Iesui suwy hap sokpe.
JOH 20:7 Mi'i hawyi kokai ta'a­kasa i'akag suwy hap to'okmoĩ me.
JOH 20:8 Mi'i hawyi mekewat wẽtup ok po'og ihyha rakat uito areke Peteru owakai te Iesui syp hawe. Mi'i hawyi ara'a­kasa yne ra'yn mekewat sokpe hawyi — Tuwẽtem na'yn sig gu'uro pyi pãi are'e uipy'a pe are ara'a­kasa Iesui suwy hap kape hawyi. Heremo ra'yn uhepe tuwẽtem na'yn gu'uro pyi hap are katu­pono heiam yn sokpe ipueri pueri hap iheg me toĩne'en ma'ato Iesui piit yt ipuo i mi'i pote atimohey kahato itote are.
JOH 20:9 Sa'a­wy­'ite ti aikotã iwan me Iesui wẽtem gu'uro pywiat e hap etiat yt atikuap hin i te ma'ato mesup ara'a­kasa ra'yn. Koitywy hyp hawiat yt kat i hap hawyi atikuap sese ra'yn i'atu­mienoi sa'a­wy­'iwuat miwan miat ko'i aikotã Iesui tuwẽtem aru e hap ko'i atikuap sese ra'yn.
JOH 20:10 Mi'i hawyi uruta­'aipok i ra'yn getap kape.
JOH 20:11 Ma'ato mana Maria yi Mata­rena kaipywiat yt toto teran i ma'ato itote tuwak kahato hyp hap tote. Mi'i hawyi teha'at hyp hap ka'a puo.
JOH 20:12 Mi'i hawyi ta'a­kasa ra'yn atipy kaipywiat typy ok i'atue­sokpe ikytsig kahato apyk pe wẽtup ok i'akag kai wẽtup ok ipy kai aikope sa'a­wy'i Iesui piit toĩne'en hap tote ta'a­kasa.
JOH 20:13 Mi'i hawyi mi'iria te'e­ro'e mana Maria pe — Kat pote kahu erewak mana i'atu'e. — Yt uwe i tosyp hawe pote an arewak e. Ta'a­tue­ro'ok ta'yn sig an Uika­'iwat piit hawyi yt atikuap i aikope ta'a­tupag ipiit hap pote an arewak e.
JOH 20:14 Mi'i hawyi Maria tuwe­morem tosai­pepe hawyi ta'a­kasa Iesui y'am me ma'ato yt toikuap i uwe meiẽ.
JOH 20:15 Mi'i pote — Kat pote kahu erewak mana e uwe kahu etikat e. Mikoi ka'iwat sio e yn tuwa­nẽtup hawe mi'i hawyi to'e — Aikope kahu etioto mesuwiat piit mimi e. Ehenoi pote mono uhepiat hawyi atat i e.
JOH 20:16 Mi'i pote toiwesat — Maria e hawyi ihay ete aikotã to'e het hap ete toikuap uwe Iesui hawyi tuwe­morem meremo hawyi — Wo'o­mu'e hat e ma'ato topusu puo Hapuni e.
JOH 20:17 Mi'i hawyi Iesui to'e — Epohep o uipy ete mana katu­pono ara'aipok teran Ui'ywot kape e. Mi'i hawyi ma'ato mohenoi ro uhehay mio wyti koitywy are'am irane ra'yn Ui'ywot kape e. Mi'i pote mohenoi ro uhehay mio wyti Uipot­mu­'eria pe — Koitywy are'am irane ra'yn Ui'ywot kape Ai'ywot Tupana kape ere'e ro ui'e hap uheywyt'in me mana e.
JOH 20:18 Mi'i hawyi Maria yi Mata­rena kaipywiat toto ra'yn meremo ipotmu­'eria kape wakuap enoi hamo. — Waku kahato mimi'in katu­pono mio ra'yn ara'a­kasa ra'yn Aika­'iwat Iesui am hap e. Pywo pe ti tuwẽtem na'yn gu'uro pyi Iesui e. Mi'i hawyi tohenoi yne Iesui ehay tepiat.
JOH 20:19 Mi'i hawyi mekewat mytu'u ewãtym'i turan ipotmu­'eria te'e­ru­wa­'a­tunug iheg me Iuteuria akagnia pupiat te'e­ro­ken'ẽ haype. Mi'i hawyi put'ok'e ra'yn Iesui i'atu­py­'a­setpe. Mi'i hawyi to'e i'atuepe — Koitywy yt eweiken'ẽ tei'o. Eiwepit ro e.
JOH 20:20 Mio tã to'e hawyi toimo­herep toposuk hap ko'i hawyi to'ywy pe suk hap toimo­herep. Mi'i hawyi ta'a­tu­ka­'iwat kapiat te'e­ra­ha'at kahato hawyi i'atu­wepit kahato ra'yn.
JOH 20:21 Mi'i hawyi Iesui to'e — Uiwy­ria'in e mio ahẽtup ta'yn Tupana pe eiwo­'o­ky'e kahato hap mi'i pote wãi ei'arot re po'og e. Sa'a­wy'i te ti Ui'ywot uipo­'oro tehay wakuat moherep hamo miit'in me uipo­'oro. Mi'i hap ewy te koran woro­ho­'o­po­'oro eipe Uipo­'oro hat tehay wakuat moherep hamo wuat'i ywania pe e.
JOH 20:22 Mi'i hawyi Iesui ahen'ẽ haty wo i'atue­wawi hawyi to'e — Ereke ro urupy'a pe ewei'e ro Tupana Pã'ãu me e.
JOH 20:23 Karãpe Tupana Pã'ãu put'ok'e sese ehepe aru eipy'a topy­hu'at kahato Tupana eiam mo e. Mi'i tupono karãpe ewei'e Tupana pe eipy'a piat — Waure wo o ereĩne'en mi'i miit minug sa'ag epiat hap ko'i kai mi'i hawyi meremo waure wo Tupana topy­hu'at ei'e hap ewy e. Mi'i tã ewei'e hawyi waure wo i'ewyte toĩne'en Ui'ywot atipy piat i'aparap hap ko'i kai are ma'ato yt ewei'e i pote ti aru yt waure wo i toĩne'en are e.
JOH 20:24 Mekewat mytu'u e'at pyra­'ak'i turan Iesui tuwe­mo­herep ta'yn iheg miaria py'a­setpe hap e'at pe. Mi'i turan wẽtup ok ipotmu'e yt uwe i Tume e hap wẽtup het Titimu e hap itote.
JOH 20:25 Meiũran tut ra'yn Tume hawyi — Tuwẽtem na'yn gu'uro pyi Aipo­typot mehĩ i'atu'e. Pywo ti rat uruta­'a­kasa ra'yn i'atu'e. Toĩne'en pakup i Aika­'iwat i'atu'e. Ma'ato Tume ti'a­tu­wesat — Eheso kahato rat katu­pono yt toĩne'en hin i e. Isuk hap kape ara'a­kasa pote atimohey. Mi'i hawyi woro­ho­'o­'e­hay­mohey pãi ma'ato yt pote yt e. Arepũ­'ĩapag ipo suk hap ka'a pe hakupe suk hap ka'a pe pote yn pywo e. Ma'ato yt arepũ­'ĩapag i pote yt atomohey i toĩne'en i hap e Tume ipotmu­'eria pe.
JOH 20:26 Mi'i hawyi put'ok'e i ra'yn mytu'u e'at hawyi te'e­ru­wa­'a­tunug i ra'yn itote ma'ato mekewat e'at pe toĩne'en na'yn i'atu­py­'a­setpe Tume. Mi'i hawyi ta'a­tue­'o­kenhyp kahato mekewat ta'a­tu'yat pe hawyi tukup­te'en iheg me ta'a­tu­'auka hap pupi. Ma'ato iheg me pytkai meremo ti Iesui tuwe­mo­herep y'am me i'atu­to­'oran me. Mi'i hawyi to'e — Waku hap yn ahẽtup Tupana pe ehupi uiwy­ria'in e.
JOH 20:27 Eiwepit ro e. Uipot­mu'e Tume e erokosap to uhowawi are erepũ­'ĩapag no uiposuk hawe i'ewyte uhakupe suk hawe hawyi mono uikuap en sio Uito sio yt e. Mi'i hawyi uimohey ro en mehĩ e. Yt etipun nei'o uimohey epiat hap Tume e.
JOH 20:28 — Uika­'iwat e koitywy woro­mohey kahato ra'yn Uhetu­pana kahato ra'yn En e Tume.
JOH 20:29 — Tume era'a­kasa potiat uimohey hat en e ma'ato po'og uimohey hat yt akasa i uhowawiat haria po'og po'og uimohey haria ekawiat e katu­pono mi'iria uimohey haria tukup­te'en yt karãpe i uhowawiat akasa sese pytkawiat haria mi'iria e. Mi'iria ti aru po'og Tupana mowepit hanuaria torania kai e Iesui Tume pe.
JOH 20:30 Toĩne'en mesuwat yi tote turan Iesui tunug kahato tomi­sepap ko'i are. Pywo ti rat Tupana esaika hap wywuat wakuap kahato toimo­herep uruepe topot­mu­'eria piat akasa hamuat. Mesuwe yt atiwan kuap i torania towato hap ko'i e katu­pono mesuwat miwan me ipat'ok yn ahenoi kuap Iesui minug ko'i are.
JOH 20:31 Ma'ato kat ko'i kat ko'i atiwan mesuwat uimiwan me ahenoi kahato ra'yn haty wo uipy'a pyi katu­pono atiky­'esat kahato uimiwan kuap haria tukup­te'en aru Iesui mohey haria. Atiky­'esat kahato eweimohey Iesui ti Tupana Sa'yru sese hap i'ewyte atiky­'esat ewetunug Iesui Eipo­typot koro sese wuanuat hap atiky­'esat uimiwan etiat wemu'e haria. Eweimohey ro Iesui are uipy'a pyi. Pywo pe ti Iesui upiaria sese eweikup­te'en pote waku pe eweikup­te'en Tupana py'a pe i'ewyte wuat'i e'at piat eweikup­te'en mesuwe i'ewyte atipy pe are. Uito ipotmu'e imiky'e sese Iuwãu.
JOH 21:1 Mi'i hawyi Iesui tuwe­mo­herep uruewawi topot­mu­'eria kape i ra'yn ihyemyi'a wato ẽpe tote. Sa'a­wy'i tuwẽtem gu'uro pyi hawyi tuwe­mo­herep uruewawi urutenuk turan iheg me urutu­kup­te'en turan. Mi'i hawyi mytu'u e'at pe tuwe­mo­herep i uruewawi karãpe ipotmu'e Tume toĩne'en uruwywo turan tuwe­mo­herep i. Mi'i hawyi tuwe­mo­herep i ra'yn uruewawi mekewat ihyemyi'a wato yi Karireia py'a­setpiat yẽpe ete mekewat hyemyi'a Tipe­riati e hap het rakat yi kyt upi tuwe­mo­herep i uruewawi. Mi'i tã hap ewy tuwe­mo­herep uruewawi gu'uro pyi tuwẽtem hawyi.
JOH 21:2 Wẽtup ewãtym Simãu Nu to'e uruepe — To'iro i pira pe e uruepe. Mi'i hawyi Waku uruto'e. Urutu­kup­te'en itote Simãu Nu hawyi ipotmu'e Tume wẽtup set Titimu ipat rakat. Mi'i rẽ ipotmu'e Nata­na'eu tawa Kana tama Karireia kaipywiat. Mi'i hawyi Sepeteu sa'y­ru'in hawyi typy ok ipotmu­'eria Tiaku i'ewyte uito Iuwãu urutu­kup­te'en itote.
JOH 21:3 Mi'i turan Simãu Peteru to'e uruepe — Aho'o­pytyk ta'yn pira e hawyi — Urupap eupi uhyt uruto'e. Mi'i hawyi urutu­we­hyt'ok ta'yn yara pe. Mi'i hawyi pira uruho­'okat ka'ap uruesuki wato wo wen ma'ato yt uruepira hin i uruikat ka'ap pytkai.
JOH 21:4 Mi'i hawyi hunete wẽtup ok miit kape urute­ha'at yi kyt rote ma'ato yt uruikuap i uwe hap.
JOH 21:5 Mi'i hawyi tehay pirik wo tuwẽ­powat uruewawi — Uha'y­ru'in ehepira ra'yn apo'e. — Yt rat uruto'e yt wẽtup i pira uruipuẽti Uhyt uruto'e.
JOH 21:6 — Pyno eipo sese kai ro eweipag y'y pe ehesuki wato e. Mi'i kai wyti aru eweipuẽti ra'yn pira e tehay pirik wo. Mi'i hawyi uruimak y'y pe uruepo sese kai yara ywytpuo. Mi'i hawyi howapy kahato pira wo uruesuki wato. Mi'i hawyi urutiõtem neran na'yn uruesuki wato ma'ato pira i'atu poity'i pote yt uruiherep kuap i urue'yara kape.
JOH 21:7 Mi'i hawyi ipotmu'e imiky'e uito are'e Peteru pe — Aika­'iwat wyti koity'i iuẽpe yẽpe tote mehĩ are. Ui'e hap toikuap ta'yn hawyi tesokpe pag na'yn katu­pono yt tesokpe pe i ipotpap pote hawyi peso'e yara pyi y'y pe toto Iesui kapiat hamo. Yt pya i ma'ato yara pyi Iesui kape 200 iã'ãg hap ewy yẽpe kape.
JOH 21:8 Mi'i hawyi urutekyi uruesuki wato yẽpe kape i'atu kahato pira wywuat pote ipotyi kahato pote.
JOH 21:9 Mi'i hawyi urutu­wẽtem yara pywiat hawyi uruta­'a­kasa ra'yn pira kã'ã ko'i man ko'i aria sapypen me.
JOH 21:10 Mi'i hawyi Aika­'iwat to'e uruepe — Eherut ro eimi­pytyk pira ko'i uhepe e.
JOH 21:11 Mio tã e hawyi Simãu Peteru toto totekyi suki wato yẽpe kapiat hamo. Mi'i hawyi pira iwato'in nakaria toipuẽti itote ma'ato pira i'atu kahato pytkai hesuki pira yt tihiot hin i. Mi'i hawyi toimo­rania hawyi 153 pira iwato'in kahato rakaria toipuẽti.
JOH 21:12 Mi'i hawyi Iesui to'e uruepe — Aimi'u ra'yn e. To'iro watenuk e uruepe. Urutenuk turan — Uweĩ En yt uruto'e i Iesui pe katu­pono uruikuap kahato uruwa­nẽtup hawe Aika­'iwat Iesui toĩne'en itote pote.
JOH 21:13 Mi'i hawyi Iesui tat man hawyi toimõ'ẽ uruepe hawyi pira totat i'ewyte hawyi toimõ'ẽ.
JOH 21:14 Mi'i tã Iesui tuwe­mo­herep topot­mu­'eria kape mye'ym mo gu'uro pywiat tuwẽtem hawyi.
JOH 21:15 Te'e­renuk kahu rokirẽ to'e Iesui — Simãu Iuna sa'yru uiky'e po'og apo eti'a­tu­ky'e irania'in hap ko'i kai e. Uiky'e apo po'og etiky'e mesu­wa­rotiat hap ko'i kai e. — Ta'i Uika­'iwat etikuap ta'yn aikotã ewy sese ewy areĩne'en hap e. — Simãu uiky'e sese pote eti'a­tu­mu'e ro uimohey pakup haria aikotã aihũ ko'i apykok haria topoi tohũ mẽpyt'in hap ewy e.
JOH 21:16 Mi'i hawyi to'e i — Simãu Iuna sa'yru uiky'e sese apo en e. — Ta'i Uika­'iwat etikuap ta'yn aikotã ewy sese ewy areĩne'en hap e. — Pyno uiky'e sese pote Simãu eti'a­tu­mu'e ro uimohey hanuaria aikotã aihũ ko'i apykok haria topoi tohũria tomie­rohik ko'i hap ewy e.
JOH 21:17 Mi'i hawyi mye'ym mo Iesui to'e i — Simãu Iuna sa'yru uiwy sese apo en e. Uiwy apo en e Iesui pote Peteru haty'u hawyi toiwesat — Sakpo'e wyti ewy sese areĩne'en uito Uika­'iwat e. Wuat'i kuap hat ri En mi'i tupono ti etikuap ta'yn epy'a pe ekai areĩne'en aikotã ewy koro areĩne'en e. — Uiwy en pote etimu'e uimohey haria mehĩ aikotã watipoi aihũria mẽpyt hin ko'i ewy ahepiku piku ko'i ewy Simãu e.
JOH 21:18 Ahenoi teran wẽtup pywuat hap epe Peteru e. Sa'a­wy­'ite turan emiky­'esat ewy yn ereĩne'en e. Ta'i ewe'ok kytyt hap etopag hawyi ewyry aikowo aikowo emiky­'esat ewy yn etunug sa'a­wy'i e ma'ato meiũran ti aru epo'oro hawyi epo etitorok ewanĩ­kaptia pe hawyi epopo'i po'i ra'yn miit'in yt emiky­'esat ewy i. Mi'i hawyi ereto ra'yn aikowo aikowo yt epap i hap kape e Iesui Peteru pe.
JOH 21:19 Tohenoi yianme aikotã aru toimõ­typot Tupana toku­'uro turanuat hamuat. Mi'i hawyi to'e Iesui — Pyno to'iro i uhupi Peteru e.
JOH 21:20 Mi'i tã e pote Peteru iha'at kahato tesai­pepiat ipotmu'e kape mekewat ipotmu'e imiky'e kahato hat kape mekewat wepehik Iesui etiat hat kape mekewat uweĩ ema'at hat e Iesui piat hat kape teha'at kahato Nu. Mi'i hawyi apo'e Iesui pe.
JOH 21:21 — Kat aru ai'okpe kawiat emiit tunug mehĩ e uhepiat pe.
JOH 21:22 Mi'i hawyi toiwesat — Kat aru ai'okpe kawiat tunug yt ere'e tei'o Peteru ma'ato aikotã aru Uika­'iwat tomo­herep uhepe uiminug wuat pãi yn o Peteru po'og waku ere'e ewepe e. Kat kahu aru Tupana tiky­'esat atunug ere'e ro e. Atiky­'esat ahaipepiat toĩne'en mot'i mesu­wa­rote pote ta'i toĩne'en mot'i kuap karãmuo ui'aipok hap kape hap ewy atiky­'esat pote atunug kuap i e Iesui Peteru pe uhepiat.
JOH 21:23 Mio tã e Iesui pote irania'in Iesui mohey haria te'e­ro'e to'ope — Pyno ti sio yt iku'uro rakat nuat i meiẽwat ipotmu'e i'atu'e uhetiat ma'ato Iesui yt mio tã e pytkai i mio tã i'atu'e uhetiat.
JOH 21:24 Pywo pe ti mesuwat uimiwan uiminug sese yt uheso i are. Ta'i yne mesuwat uimienoi pywo sese rakat yn toĩne'en. Aikotã ara'a­kasa hap ewy atiwan aikotã atikuap hap ewy ti atiwan. Uruikuap kahato Iesui hãpyk sese hap are yne hap topy­hu'at aru to'e hap ewy katu­pono yt karãpe i wẽtup e hap ete i'aparap. Yt karãpe i uruma'at yt wẽtup mo i hap. Uruikuap sese ti Mi'i Miit. Aheha­kye­ra'at kuap kahato hat to'e hap ewy. Tupana Sa'yru sese Mi'i Miit are uruto'e wato'e pãi.
JOH 21:25 Ma'ato po'og po'og Iesui tunug mesuwat uimiwan kai are yt ahenoi kuap i yne. Iesui minug wakuat ko'i Iesui mienoi wakuat ko'i i'atu kahato toĩne'en ma'ato wahenoi henoi teran yne yne iminug hap ko'i pote mesuwat uimiwan me pote yt watunug kuap i kahato katu­pono i'atu kahato wyti imisepap ko'i ma'ato yne aitoria wahã'ãg iwan nug hamo mi'i pote meiũran howapy kahato mesuwat yi wato hap ok tã tukup­te'en. Sakpo mesuwat aipytyp tote mekewat aimiwan Iesui etiat to'o­to­te­tote tukup­te'en. Yi yne howapy hap ewy mesuwat yi topy­hu'at aimiwan eiam mo yn na'yn are'e koitywy mesuwe uimiwan Iesui etiat hap tote. Pyno toran na'yn mesup uimiwan. Uito ti Iesui miky'e po'og nakat are. Pyno waku Tupana pe. Uito Iesui miky'e Iuwãu
ACT 1:1 Pyno mesuwat waku uimiwan ewawiat mehĩ Teowiru atipo­'oro. Uito ti ewy Iruka. Ha'a­wyte atipo­'oro wẽtup uimiwan Iesui etiat ewawi mehĩ. Ha'a­wyte uimiwan me ahenoi epe yne Iesui minug sa'a­wy­'iwuat hap ko'i ete i'ewyte imienoi sa'a­wy­'iwuat ko'i hap ahenoi. Mekewat miwan ahet'ok Iesui etiat Iruka mienoi are.
ACT 1:2 Sa'a­wy'i Iesui ti'a­tu­'airo temiit'in sese hawyi to'e i'atuepe — Uiwy­ria'in e woro­ho­'o­po­'oro eipe uimo­herep wuat'i ywania piat hamo e.
ACT 1:3 Mi'i hawyi Iesui iku'uro ra'yn aika­wiano ma'ato ti toku­'uro pyi toĩne'en pakup i ra'yn. Mi'i hawyi tuwe­mo­herep i ra'yn temiit'in kape. 40 e'at kapiat tuwe­mo­herep i'atue­wawiat tuwẽtem gu'uro pywiat hawyi. Wẽtup ewaty hap ewy toi'a­tu­mu'e itote hawyi ta'a­tu­mohey sese ra'yn heĩne'en pakup i hap. Toi'a­tu­mu'e aikotã aru Tupana topy­hu'at Miit'in Porekuat no hap ete.
ACT 1:4 Wẽtup ewaty toi'a­tu­mu'e hawyi te'e­ru­wa­'a­tunug yne Iesui kape. Mi'i hawyi to'e temiit'in me — Uiwy­ria'in apuete meiũran ti aru Ui'ywot tipo­'oro Topã'ãu ehowawi e.
ACT 1:5 Aikotã sa'a­wy'i are'e ehepe hap ewy — Tupana ehet'ok kahato irane Topã'ãu wo uiwy­ria'in are'e sa'a­wy'i. Sa'a­wy'i sese Iuwãu ehet'ok y'y wo ma'ato mesup Tupana to'e uhepe — Uha'yru e wẽtup e'at pe aru yne esaipe­piaria ati'a­tu­set'ok Uipã'ãu Wakuat no e uhepe. Pyno mi'i to'e hap ewy irane einug eipe Topã'ãu Wakuat no uiwy­ria'in e. Mi'i pote waku ewehe­katup o meiũpe tawa Ieru­sarẽi me Tupana Pã'ãu Wakuat ut hap e'at e. Areto irane atipy kape hawyi Ui'ywot tipo­'oro meremo ehowawi Uipã'ãu Wakuat aikotã are'e sa'a­wy'i ehepe hap ewy e. Mi'i hawyi waku kahato eweikup­te'en eipiit yne puo Tupana Pã'ãu Wakuat topy­hu'at hawyi e Iesui temiit'in me.
ACT 1:6 Wẽtup e'at tokosap hawyi apo'i­'a­tu'e Iesui pe — Uruka­'iwat i'atu'e koitywy apo eti'a­tue­ha­kye­ra'at irane ra'yn ai'y­wania ahewa­nĩ­kaptia po pyi sio yt i'atu'e. Koitywy apo ai'y­wania pe etum i ra'yn ahe'yi sio yt i'atu'e.
ACT 1:7 Mi'i hawyi toi'a­tu­wesat — Uiwy­ria'in e Tupana yn ni ikuap kat e'at pe aru tutum ai'y­wania pe i'atue'yi Kanã'ã i ra'yn hap e. Tupana yn ni ikuap kat e'at pe tutum i ai'y­wania po pe hap i ra'yn e. Mi'i pote yt eipo pe kuap i e. Ta'i Ai'ywot yn ikuap karãpe ahewa­nĩ­kaptia po pywiat ai'y­wania e'yi hep hamuat e. Kat e'at pe kat ewaty pe hap Tupana yn ni ikuap e.
ACT 1:8 Ma'ato pywo tut irane Tupana Pã'ãu ehowawi eimoe­saika hamo e. Totopag Topã'ãu Wakuat ehepe hawyi ti aru Uimo­herep ta'yn eipe wuat'i miit'in me e. Sa'a­wy'i ti aru tawa Ieru­sarẽi miaria pe Uimo­herep ehehay wo e. Mi'i hawyi ti aru yi Iuteu piaria pe uimo­herep hawyi yi Samaria piaria pe Uimo­herep e. Mi'i hawyi yi wato hap ok tã wyti aru Uimo­herep eipe ehehay wo wuat'i ywania puo e Iesui topot­mu­'eria pe ahepe.
ACT 1:9 Mio tã to'e rokirẽ Iesui ta'am na'yn yity'ok pyi. Mi'i hawyi te'e­ra­ha'at turan teke ra'yn ywyhig me. Mi'i hawyi yt heremo i ra'yn Iesui.
ACT 1:10 Mi'i hawyi te'e­ra­ha'at re turan typy ok atipy kaipywiat put'ok'e i'atuete i'atue­sokpe ikytsig kahato rakaria.
ACT 1:11 Mi'iria te'e­ro'e Iesui saipe­piaria pe — Kat poteĩ eweha'at atipy kape eipe yi Karireia piaria i'atu'e katu­pono toto ra'yn Iesui atipy kape i'atu'e ma'ato aikotã toto hap ewy te ti aru ta'aipok i i'atu'e ipotpo­'o­roria pe ahepe.
ACT 1:12 Mi'i hawyi Ipotpo­'oria te'e­ra­'aipok i ra'yn Uriweira ypia pyi tawa wato Ieru­sarẽi kape yity'ok apype kaipyi te'e­ra­'aipok i. Yt pya pyi i te'e­ra­'aipok aikotã Iuteu ywania i'atue­wyry yt pya i Tupana mõtypot e'at turan hap ewy.
ACT 1:13 Mi'i hawyi put'ok­'i­'a­tu'e i ra'yn ipotpo­'o­roria mekewat okipy ywaiti rakat pe. Mi'i hawyi itote tukup­te'en i ra'yn aikope sa'a­wy'i Iesui wywo tukup­te'en hap tote. Itote tukup­te'en ipotpo­'o­roria PETERU IUWÃU hawyi TIAKU hawyi ÃTERE WIRIPI TUME PATORUMEU MATEU TIAKU mekewat Auweu sa'yru SIMÃU mekewat surara IUTA mekewat Tiaku ywyt. Mi'iria ipotmu­'eria sese tukup­te'en aikope sa'a­wy'i Iesui tenuk okipy ywaiti tote hap tote te'e­ro­py­hu'at 11 ok takaria.
ACT 1:14 Mi'i hawyi irania'in Iesui mohey haria i'ewyte hary­po­ria'in ko'i Iesui ty Maria tukup­te'en itote. Mi'i hawyi Iesui ywyt'in ity mẽpyt'in tukup­te'en itote torania. Mi'i hawyi at ka'ap i'atuehay Tupana kape mi'iria. To'o­'e­wy­'ewy ta'a­tu­hẽtup Tupana kape wẽtup wanẽtup hap ewy yn. Itote wẽtup ehay yn i'atu­wa­nẽtup hap Tupana kape.
ACT 1:15 Wẽtup e'at pe 120 ok takaria Iesui mohey haria tuwe­hyt'ok ywaiti pe. Mi'i hap tote Peteru ipoĩ'ãm i'atu­py­'a­setpe tehay i'atue­wawiat hamo.
ACT 1:16 Mio tã to'e i'atuepe — Uiwy­ria'in e sa'a­wy'i sese ti Tupana Pã'ãu henoi kahato Tosa­'yru Iesui etiat aha'a­se'i morekuat Tawi pe — Meiũran aru atipo­'oro esaipepiat Wuat'i Porekuat nuat e. I'ewyte Uimi­po­'oro ma'at hanuat aru toĩne'en wẽtup ok hemiit sese e Tupana sa'a­wy'i morekuat Tawi pe yiannote Aika­'iwat Iesui ma'at hanuat Iuta etiat tohenoi e Peteru. Mi'i hap ewy Iuta tima'at sa'ag Aipo­rekuat Iesui aikotã Tupana to'e aha'a­se'i Tawi pe hap ewy ra'yn e.
ACT 1:17 Ga'atpo Iuta wywo watoĩ­ne'en 12 ok te. Ta'i ipotpap kahato mi'i aiwywo e.
ACT 1:18 Ha'a­wyte Aika­'iwat ma'at hap sa'up wywo toikyi'at te'yi. Mi'i hawyi Iuta yt iwepit hin i tominug sa'ag hap ete hawyi tuwe­'auka ra'yn tuwe­'ut'yp kytyt pe. Mi'i hawyi ipiit ipuk kahato. Mi'i hawyi i'oghyt'at yi itote hap tote i'ok pok'e hawyi ime'en wẽtem e.
ACT 1:19 Mi'i hawyi ti Ieru­sarẽi miaria ikuap ta'yn Iuta iku'uro hap. Mi'i hawyi iku'uro hap tote ta'a­tu­set'ok — Suu sa'up muat mikyi'at yi i'atu'e ma'ato i'atu­pusu puo Akeutama i'atu'e.
ACT 1:20 Ta'i sa'a­wy­'iwuat mienoi morekuat Tawi pypy'e hap ewywuat — Ewei'atoiat ro iwat he'yi e i'ewyte ewei'atoiat i'yat e. Waku yt uwe i toĩne'en itote e. Mi'i hawyi mono waku wẽtup ok po pe ra'yn iwat motpap topy­hu'at e Tupana Tawi pe sa'a­wy'i Iuta piat pe Saumu 109.8 pe e.
ACT 1:21 Pyno uiwy­ria'in waku Iuta potpap wẽtup ok po pe watopag aikotã sa'a­wy'i Tupana to'e Tawi wẽ pywiat hap ewy e Peteru.
ACT 1:22 Waku ti watopag wẽtup miit wakuat po pe Iuta mipun motpap e Peteru. Waku wati­'airo wẽtup ok miit ha'a­wy­tewuat Iesui wywuat hewyry rakat e. Waku wati­'airo wẽtup ok yne Iesui minug ko'i kapiat akasa hat i'ewyte Iuwãu miat Iesui het'ok hawyi ta'am i ra'yn To'ywot kape hap kapiat akasa hat e. Waku wati­'airo wẽtup ok wakuat yne Iesui toku­'uro hawywiat toĩne'en pakup i hap kapiat akasa hat e Peteru Iesui potmu­'eria pe.
ACT 1:23 Mi'i hawyi ta'a­tukat hawyi ta'a­tu­puẽti typy ok Iesui potmu­'eria ha'a­wyte wuaria ikuap kahato haria ipotmu­'eria sese wẽtup ok Matia hawyi wẽtup ok Iuse. Typy ok ta'a­tu­puẽti Iuta saipepiat waku rakat. Iuse set wẽtup Para­sapa i'ewyte Iutu i'atu'e. — Pyno waku watikat uwe Tupana miky­'esat eywuat 12 ok takat sio mehĩ Matia sio mehĩ Iuse i'atu'e.
ACT 1:24 Mi'i hawyi ta'a­tu­hẽtup — Tupana i'atu'e ehenoi uruepe aiũ emiky­'esat ewywuat Iuta saipe­painuat i'atu'e. Katu­pono En yn miit'in py'a wanẽtup hap kuap hat. Mi'i pote En yn etikuap uwe waku rakat sio Matia sio Iuse i'atu'e.
ACT 1:25 Katu­pono yt uwe i Iuta potpap nug hat mesup i'atu'e. Toto ra'yn Iuta teiam aria wo'o­mo­so­'opot hap kape i'atu'e. Pyno waku eti'airo wẽtup ok Iuta saipe­painuat sio Iuse sio Matia i'atu'e Tupana pe.
ACT 1:26 Mi'i hawyi ti te'e­ru­we­ma­hara ra'yn aikotã Tupana tiky­'esat typy ok takaria kaipywiat kuap hamo. Mi'i hawyi i'atu­we­ma­hara hap henoi ra'yn Matia e. Mi'i hawyi — Ta'i Matia ti Tupana mi'airo i'atu'e to'ope. Mi'i hawyi ta'a­tupag 11 ok takaria kape mehĩ Matia hawyi 12 ok i ra'yn topy­hu'at ipotmu­'eria sese ra'yn tukup­te'en itote. Waku i ra'yn. Aikotã hap ewy ahenoi mesuwe uimiwan me uito Iruka.
ACT 2:1 Mi'i hawyi 50 e'at Iesui gu'uro pyi hap ete Iuteuria enuk wato hap e'at put'ok'e tawa Ieru­sarẽi me yahig wato sakpuat toko­ka'at hap e'at kapiat ta'a­tu­wa­tetup hamo. Ta'a­tueko wuat'i eanu piat hap ewy. Mi'i hap tote Iuteu ywania te'e­ru­wa­'a­tunug kahato kat e hap yi kat e hap tama kaipyi. I'ewyte Iesui mohey haria te'e­ru­wa­'a­tunug wy itote Iuteu ywania mi'iria pote.
ACT 2:2 Mi'i hap tote put'ok'e Iesui mohey haria ete muehay ewywuat. Ta'a­tukuap muehay wasere wato puehay ewy. Mi'i kaipyi i'atuehay wuat'i ywania kape. Teke i'atu­py­'a­setpe muehay hap ewy.
ACT 2:3 Mi'i hawyi irania'in te'e­ra­'a­kasa Iesui mohey haria apypeke ariãty ewy. Mi'i put'ok'e Iesui mohey haria apypeke atipy kaipyi ariãty ewywuat.
ACT 2:4 Mi'i ti Tupana Pã'ãu tuwehik Iesui mohey haria ete. Mi'i kaipyi kat pusu kat pusu puo i'atuehay kahato Tupana Pã'ãu kaipyi. Irania'in pusu ta'at­sepap ta'yn i'atuehay kuap ta'yn yt ta'a­tuwat ta'a­tu­pusu pytkai i kat pote Tupana Pã'ãu kaipyi pote ta'a­tukuap. Ta'i Tupana Pã'ãu ihay kahato i'atuwẽ pyi yt i'atu­mikuap wuat pytkai. Katu­pono Tupana ihay i'atue­wawi topusu puo.
ACT 2:5 Itote tawa Ieru­sarẽi me tukup­te'en kahato Iuteuria aikope pyi aikope pyi mesuwat yi wato hap ok tã te'e­ru­wa­'a­tunug Tupana mohey kahato haria.
ACT 2:6 Mi'iria py'a­setpe Iesui mohey haria i'atuehay. Mi'i kape õ'ẽ haria wuat'i pusu puat ihay rakaria te'e­ru­wa­nẽtup kahato — Aikotã tupono som ta'a­tukuap aimotag hap ahe'yi pusu yt karãpe i te'e­re­mu'e aiwywo pytkai i'atu'e. Mi'i hap kape te'e­ru­wa­'a­tunug kahato mi'i hap kuap hamo. — To'iro watu­wa­nẽtup i'atuehay kape i'atu'e.
ACT 2:7 Mi'i hawyi wa'a­tunug haria te'e­ra­ha'at kahato Iesui mohey haria kape. Mi'i hawyi te'e­re­wa­nẽtup kahato — Aikotã aikotã tupono ta'a­tukuap aipusu wẽtup tawa kaipy­wiaria pytkai i'atu'e. Aikotã aiwe­motag hap ahe'yi pusu ko'i ta'a­tukuap i'atu'e. Uruikuap ti meimuẽ­wuaria yt karãpe i ikohye­wyry ahe'yi puo i'atu'e. Yne meimuẽwat yi Karireia piaria wemotag haria ko'i i'atu'e.
ACT 2:8 Aikotã tupono som ta'a­tu­su'at kuap aipusu i'atu'e. Aikotã som ta'a­tu­sepap kahato aimotag hap pusu ai'e­wy­wuaria i'atu'e. Aikotã hap kaipyi som Iesui mohey haria meiũpiaria tikuap kahato yne yne aipusu ko'i i'atu'e to'ope.
ACT 2:9 Aikotã hap kaipyi som pyno aimotag hap ko'i yi Patui ywania pusu yi Metui ywania pusu yi Eramita ywania pusu yi Mesu­pu­tamia ywania pusu yi Iuteu ywania pusu yi Kapa­tusia ywania pusu yi Puntu ywania pusu yi Asia ywania pusu ko'i ta'a­tu­sepap i'atu'e.
ACT 2:10 Aikotã tupono som aimotag hap ko'i yi Wirisia pusu yi Pãwiria pusu yi Esitu ywania pusu ko'i yi Iripia pusu yi Sirene popy etiaria pusu ta'a­tukuap i'atu'e. Aikotã hap kaipyi ta'a­tukuap i'atu'e. I'ewyte aipusu Humanu pusu ta'a­tu­sepap i'atu'e.
ACT 2:11 Ta'i ta'a­tukuap kahato yi Kereta ywania pusu i'ewyte yi Arapia ywania pusu ta'a­tu­sepap. Aikotã ta'a­tukuap ai'y­wania Iuteu perania pusu. Aikotã tupono som mi'i tã i'atu'e. Katu­pono aito ti watikuap i'atu­mi­sepap ko'i aimo­herep hap pusu pote i'atu'e. Ta'i Tupana mõtypot hap ko'i ete i'atuehay kahato i'atu'e. Ta'i Tupana minug wakuap ko'i ete i'atuehay kahato i'atu'e.
ACT 2:12 Mi'i hawyi te'e­ru­wa­nẽtup po'og — Pyno aikotã ta'a­tunug i'atu'e te'e­ru­we­wa­nẽtup hawe hawyi te'e­ro'e to'ope — Aikotã som ta'a­tukuap aipusu yt te'e­ru­we­mu'e i aiwywo pytkai i i'atu'e to'ope.
ACT 2:13 Ma'ato irania'in to'o­ky­ry'i kahato itote — Ta'i mahy pyno wyti i'atu­we­pẽ'ã wyti. Mi'i pote i'atuehay sa'ag i'atu'e sa'ag kahato Iesui mohey haria ete.
ACT 2:14 Mi'i hawyi Peteru ipoĩ'ãm towy­riae'in 11 ok takaria py'a­setpe. Mi'i hawyi to'e tehay pirik wo ihay rakaria kape — Aito Iuteu ywania sese mi'i pote uhehay teran ehowawi tawa Ieru­sarẽi miaria torania eiperia e. Atiky­'esat kahato ti eweikuap ui'e hap e. Pyno ewetum no ewuare ka'a uhowawi ui'e hap uhehay kuap hamo e.
ACT 2:15 Yt mahy pyno i wyti woro­ho­'o­mu'e eiperia eipesu puo ui'y­wania katu­pono yt uwe i ahetama piaria at tuwẽtem turan temahy u ahetama pe e. Pyno ei'e mahy pono wyti e hap yt hin i e. Pywo ti rat urui'a­tu­mu'e eipe Tupana ehay kaipyi e. Urui'a­tu­mu'e eiperia uru'y­wania wuat'i etama kaipy­wiaria e Peteru tawa Ieru­sarẽi miaria pe.
ACT 2:16 Kat e kat e sa'a­wy­'iwuat Tupana ehay enoi hat Iueu mienoi 2.28-32 pe hap ewy koitywy topy­hu'at mesuwe e.
ACT 2:17 Mio tã e Tupana tehay moherep hat Iueu pe — Yt pya i ra'yn yi kahuro hamuat hap e'at kape ti aru Uito ahytmoi kahato wuat'i ywania pe Uipã'ãu e wuat'i miit'in miat pe. Eha'y­ru'in ehaki­'yt'in timo­herep kahato aru uhehay wuat'i ywania pe e. Mekewat e'at pe atum kahato aru Uipã'ãu kurum'in me hawyi wyti aru te'e­ra­'a­kasa ta'a­tu­mu­'etu wuat ewy Uipã'ãu mienoi ewywuat e. I'ewyte eha'a­se­'i'in me atum kahato aru Uipã'ãu hawyi ti aru ui'e hap ta'a­tu­mu­'etu wuat ewy ta'a­tu­mo­herep wuat'i ywania pe e.
ACT 2:18 I'ewyte ti aru ihainia'in hary­po­ria'in wuat'i uheropat haria pe atum kahato Uipã'ãu Wakuat mekewat e'at pe. Mi'i hawyi ti aru uhehay yianmiat hap ewy ta'a­tu­mo­herep wuat'i ywania pe e Tupana sa'a­wy'i tehay moherep hat Iueu miwan me e Peteru.
ACT 2:19 Mekewat e'at pe ti aru atipy pe atunug iwato kahato miit'in mowa­nẽtup hamuat miit'in miat uikuap hamuat wuat'i mo'a­kasa hamuat e Tupana. Mi'i hawyi ti aru suu at hap kape te'e­ra­ha'at e. Mi'i hawyi ti aru atimo­herep wuat'i ehamo aria ẽty i'ewyte ywyhig miit'in akasa hamuat itote e.
ACT 2:20 Mi'i hawyi ti aru yt heremo i ra'yn at i'ewyte yt heremo i waty e. Waty ti aru suu ewy ra'yn ihup topy­hu'at e. Mi'i hap saipe pe ti aru Uimi­po­'oro Wuat'i Porekuat nuat sese ra'yn put'ok'e teiam ikahu kahato rakat puo tut tomõ­typot hawe ra'yn put'ok'e. He'at ra'yn ikahu rakat e.
ACT 2:21 Mi'i tupono uwe uwe hẽtup uhepe Tupana pe — Uheha­kye­ra'at ro En e uhepe haria wyti aru ati'a­tue­ha­kye­ra'at kahato e Tupana sa'a­wy'i aha'a­se'i Iueu pe e Peteru Ieru­sarẽi miaria pe.
ACT 2:22 Mi'i hawyi Peteru to'e haty wo itotiaria pe — Uikuap to eipe uhyt'i'in mana'in eweikuap to uhehay ui'y­wania e. Mesup ta'yn Tupana tunug na'yn to'e hap ewy e. Pywo ti rat toipo­'oro ra'yn Temiit Iesui tawa Nasare piat Aipo­rekuat nuat e. Iesui ti Tupana Mipo­'oro aheha­kye­ra'at hamuat e. Pywo ti rat Tupana timo­herep ta'yn ahepe tomi­'airo sese mesup e. Tominug wakuap yt uwe minug ewywuat i Iesui timo­herep kahato ahepe. Iesui wakuat sese e Tupana wuat'i pe e. Mi'i Miit timo­herep Tupana esaika hap ahepe e. Yne tutunug ahehamo wuat'i ehamo e. Mi'i kape ewei'a­kasa ra'yn katu­pono ehehamo hewyry mesuwe e.
ACT 2:23 Tupana Mipo­'oro ewei'auka ra'yn aria'yp posak sa'ag ete yt kat i i sa'ag tutunug pytkai e. Yt naku i kahato ewetunug tope ma'ato Tupana tum na'yn Tosa­'yru ehepe i'auka hamo katu­pono i'auka hap toikuap yianmete e. Ta'i aria'yp posak ete ne'i ewei'auka Ha'yru. Yt nakuaria i ehay upi ewei'auka Imipo­'oro Aipo­rekuat nuat ma'ato iku'uro hawyi Tupana tihep i ra'yn gu'uro pyi. Totiõtem i ra'yn Iesui e Peteru Iuteuria pe.
ACT 2:24 Ta'i ui'e hap ewy Tupana tihep ta'yn gu'uro po pyi Uruka­'iwat. Toĩne'en i ra'yn uiwy­ria'in e. Yt ipohepap i gu'uro ete e. Yt gu'uro tipyhyp kuap i Urupo­typot e. Iesui po'og hesaika gu'uro kai pote meremo gu'uro ipohep Iesui ete pyi e.
ACT 2:25 Ha'a­wyte kahato morekuat Tawi to'e — Uipo­rekuat heremo kahato uipy'a pe e. Ta'i Mi'i toĩne'en uipo sese kai wuat'i e'at pe mi'i pote ti yt karãmuo i areken'ẽ e.
ACT 2:26 Mi'i tupono uiwepit yn uipy'a pe. I'ewyte uhehay wepit kahato rat katu­pono atomohey kahato Uipo­typot e. Yt karãmuo i ti aru Tupana ti'atoiat Uika­'iwat gu'uro hap eiam me e.
ACT 2:27 I'ewyte ti aru yt karãmuo i Uika­'iwat piit nem nakano topy­hu'at aru iku'uro hawyi e. Yt karãmuo i aru Uika­'iwat topy­hu'at aria wato ho'opot hap tote e Tawi sa'a­wy'i.
ACT 2:28 Uhewyry uheĩne'en ne turan Uika­'iwat timo­herep kahato uhepe topu'ap sese wuat'i e'at piat uheĩne'en hap kapiat mu'ap e. Mi'i tupono ti uiwepit yn kat pote e'yatype aru areĩne'en wuat'i e'at pe Tupana e Morekuat Tawi ha'a­wyte tomiwan me Saumu 16.8-11 pe e Peteru to'y­wania tawa Ieru­sarẽi miaria pe.
ACT 2:29 Uiwy­ria'in uhehay hãpyk teran eiwywo e. Aha'a­se'i Morekuat Tawi wyti iku'uro ra'yn pãi e. Nimo ra'yn ti ta'a­tusyp ta'yn meiũpe e. Mio ti toĩ na'yn iwat wo'osyp hap meiũpe tawa Ieru­sarẽi me e. Ta'i wata­'a­kasa ra'yn iwat wo'osyp hap kape aito katu­pono toĩne'en mesup meiũpe. Ikag ko'i tukup­te'en ne mesuwat wo'osyp hap tawa pe are uhyt'i'in mana'in e Peteru.
ACT 2:30 Aikotã aikotã Tupana mikuap ewy Tawi tiwan towepy hawuo — Tupana to'e uhepe sa'a­wy'i — Tawi e meiũran emiariru kaipywiat wyti aru atimo­herep esaipepiat Uimi­po­'oro Miit'in Potypot no sese e uhepe e Tawi yianmete Iesui piat pe.
ACT 2:31 — Ta'i esaipepiat Uimi­po­'oro iku'uro hawyi yt karãpe i ipiit nem nakat topy­hu'at e Tupana Tawi pe. Yt atoiat hin i aria pe Uimi­po­'oro ma'ato tuwẽtem aru gu'uro pyi Mi'i Miit e. Ipiit yt topy­hu'at i aru yi pe e. Iku'uro hawyi toĩne'en pakup i i aru e Tupana aha'a­se'i Tawi pe. Mi'i pote toiwan mi'i e hap ahepe Iesui ieĩne'en pakup i hap etiat e Peteru.
ACT 2:32 Mana'in Uhyt'i'in ga'atpo Tupana tomoieĩ­ne'en pakup i ra'yn Tomi­po­'oro Iesui e. Pywo ti rat ipiit wẽtem gu'uro pyi hap kape uruta­'a­kasa i ra'yn urutoria yne e. Pywo ti uruehamo Iesui tuwẽtem na'yn gu'uro pyi e. Ipiit sese kape uruta­'a­kasa uruto pãi.
ACT 2:33 Ta'i Tupana timo­wato kahato ti Tomi­po­'oro Iesui e. Mi'i pe tutum Topã'ãu Wakuat i'ewyte mesup ti Iesui tum Ipã'ãu uruepe aikotã ei'a­kasa hap ewy. Eimikuap hap ewy ti mio tutum Topã'ãu Wakuat uruepe e.
ACT 2:34 Mi'i hap ete Tawi to'e sa'a­wy'i kahato tuwepy hawe — Uipo­typot to'e Uika­'iwat pe — Ta'i woro­mo­wato kahato po'og torania kai e. Mi'i pote era'apyk to uipo sese kai Mehĩ katu­pono atimo­herep teran wuat'i pe Uimi­mõ­typot po'og torania kai En hap e.
ACT 2:35 Koran ti ati'a­tu­mo­pe­rup'i kahato yne yne ahewa­nĩ­kaptia e. Mi'i pote epy ywyt'ok­pype hap ewy ati'a­tu­'akit yne ahewa­nĩ­kaptia e. Mi'i turan waku era'apyk to meiũpe ui'ya­type Uimi­mõ­typot no uipo sese kawiano e Tupana Uika­'iwat pe e Tawi tomiwan me e Peteru. Ta'i yt tuwepiat i Tawi ihay tomiwan me Saumu 110.1 pe ma'ato Toka­'iwat etiat ihay e.
ACT 2:36 Uhyt'i'in Mana'in pywo pe ti ai'y­wania ti'auka ra'yn Tupana Mipo­'oro aria'yp posak ete e. Ma'ato eimi­'auka Tupana tipo­'oro Aipo­rekuat no. Mi'i hap toimo­herep ahepe mesup katu­pono toihep Mi'i Miit hyp hawyi e. Mi'i Miit ti Tupana Mi'airo te Wuat'i Porekuat nuat e Peteru to'y­wania pe.
ACT 2:37 Mio tã e Peteru hawyi paa'i­'a­tu'e kahato ra'yn. Ta'a­tu­ha­ty'u kahato ra'yn. Mi'i hawyi te'e­ro'e Pete­ru'in me — Yt naku i kahato urutunug Tupana Mipo­'oro ete i'atu'e. Kat som pyno waku urutunug Tupana mowepit hamuat i'atu'e haty wo 12 ok takaria pe.
ACT 2:38 Mi'i hawyi Peteru ti'a­tu­wesat — Eweipun no eiminug yt naku i hap ko'i hawyi eiwe­morem no Tupana kape hawyi eiwe­set'ok to Uruka­'iwat set upi e. Mi'i hawyi meremo Tupana tiporop yne eiminug sa'ag ko'i e.
ACT 2:39 Mi'i ewetunug mote ti aru Tupana tum na'yn Topã'ãu Wakuat ehepe aikotã sa'a­wy'i to'e hap ewy tutum na'yn tomi­ky­'esat ewy ehepe e. Mio Tupana hytmoi teran Topã'ãu Wakuat ehepe. Mio tã e hap wyti topy­hu'at ahepe i'ewyte ahemia­ri­ru'in me e. Ta'i yne imohey haria pe tutum neran Topã'ãu Wakuat wuat'i ywania pe aikope aikope tukup­te'en mesuwat mytyp tote hap ok tã tutum neran Topã'ãu hãpyk takat. Uwe uwe hẽtup mi'i hap ko'i pote tutum neran tomi­'ai­roria pe e.
ACT 2:40 Mi'i hawyi Peteru ihay kahato topy'a pyi itotiaria pe — Uru'y­wania woro­ho­'o­nãpin neran haty wo e. Tupana ti'a­tu­'a­piheg kahato aru Tomi­po­'oro Aipo­rekuat nuat auka haria e. Mi'iria ti aru ho'opot haria sese wo aru tukup­te'en wuat'i e'at pe e Tupana. Mi'i pote uiwy­ria'in eiwe'eg wo o Tupana ei'a­piheg sese hap pupi e. Irania'in i'auka haria tuwat kahato aru ta'a­tu­'a­piheg Tupana piat hap kape e. Yt eweiwat rei'o mi'iria upi e. Waku paa'e­wei'e Tupana kape hawyi ewei'aipok to Tupana kape eiminug sa'ag hap kaipyi e Peteru haty wo itotiaria pe.
ACT 2:41 Mi'i hawyi Peteru pe te'e­ro'e — Pywo kahato e'e hap mehĩ i'atu'e. Koitywy ti uruimohey ra'yn Iesui Tupana mi'airo urueha­kye­ra'at hanuat hap uhyt i'atu'e. Mekewat e'at pe 3000 miit Iesui mohey haria ipakup takaria te'e­ro­py­hu'at itote. Mi'i hawyi ipotmu­'eria ti'a­tu­set'ok kahato ra'yn y'y wo imohey pakup i haria.
ACT 2:42 Mi'i hawyi ipotmu­'eria ti'a­tu­nãpin at ka'ap ta'yn imohey pakup i haria yne Iesui e hap nug hamuat hap ete ta'a­tu­'a­tu­mu'e kahato. Mi'i hawyi te'e­ru­wa­'a­tunug kahato to'oehay hamo. Mi'i hawyi imohey haria ti'a­tu­mõ'ẽ kahato ta'a­tu­mi'u to'ope i'ewyte te'e­ru­wa­'a­tunug kahato Tupana wywo to'oehay hamo.
ACT 2:43 Mi'i hawyi Iesui potpo­'o­roria 12 ok takaria tunug kahato Tupana mimo­herep ko'i yt miit'in minug kuap i ko'i ewywuat ta'a­tu­mo­herep miit'in ehamo imohey hamuat. Iwato kahato ta'a­tu­mo­herep Tupana esaika hamo miit'in ehamo. Mi'i hawyi irania'in te'e­ru­wa­nẽtup kahato imohey haria mimo­herep wakuap ko'i kape hawyi yt kat i'atu'e kuap i.
ACT 2:44 Mi'i hawyi Iesui mohey haria wẽtup ehay yn na'yn te'e­ro­py­hu'at itote. Wẽtup miit ewy ta'a­tu­mohey. Mi'i hawyi Iesui mohey haria ti'a­tu­mõ'ẽ to'ope ta'a­tuekat ko'i.
ACT 2:45 Ta'a­tue'yi ta'a­tu­we­neru ra'yn hawyi ta'a­tu­mõ'ẽ yi sa'up to'ope aikotã waku hap ewy miit'in ehaky­'e'i hap ok tã hap ewy. Kat ko'i kat ko'i ta'a­tu­we­neru ra'yn hawyi i'ewyte ta'a­tu­mõ'ẽ ta'a­tuekat sa'up to'ope aikotã waku hap ewy miit'in ehaky­'e'i hap ok tã.
ACT 2:46 Yne e'at pe ra'yn Iesui mohey haria te'e­ru­wa­'a­tunug kahato Tupana mõtypot yat koro Ieru­sarẽi miat rote e. Wẽtup miit ewy kahato tukup­te'en itote. I'ewyte yne e'at pe ta'a­tunug kahato man pik pik hamuat tuwat tuereto to'o'yat kape. I'ewyte ta'a­tu­mi'u ta'a­tu­mõ'ẽ to'ope. Mi'i hawyi i'atu­wepit kahato tukup­te'en to'ope te'e­ru­wete to'o­wese kahato. I'atu­py'a wasu kahato itote.
ACT 2:47 Te'e­ru­wehum kahato haype Tupana kape at ka'ap. Mi'i pote irania'in Ieru­sarẽi miaria te'e­ru­wehum mi'iria kape — Ta'i Iesui mohey haria ti waku pe tukup­te'en i'atu'e. Ta'i mi'iria hegyi'at rakaria pãi i'atu'e. Mi'i pote ti Aipo­typot Iesui ti'a­tu­wy­'inug kahato yne e'at tomohey haria tomie­ha­kye­ra'at pakup i ko'i. Uito Iruka aikotã Tupana Pã'ãu put'ok'e Iesui potmu­'eria etiat hap atiwan mesuwe.
ACT 3:1 Wẽtup e'at pe wãtym'i turan Peteru Iuwãu tuwat Tupana mõtypot yat koro kape Tupana wywuat ta'a­tuehay hamo.
ACT 3:2 Mi'i hawyi itote ta'a­tu­puẽti wẽtup ok miit toty kaipywiat wemo­herep hat yt hewyry kuap i rakat. Mekewat ipy kĩ'ã kahato rakat toĩne'en Tupana mõtypot yat koro e'oken­'ypy kai mekewat Oken'ypy Kahu e hap het rakat tote toĩne'en yne e'at pe. Mi'i tote sẽtup sẽtup e hat sese wo topy­hu'at ha'a­wy­tepyi. Mekewat miit ipy yt ikahu hin i rakat ti. Ity'in terut yne e'at pe Tupana yat e'oken­'ypy kape. Itote wuat'i miit'in õ'ẽ haria kaipyi toiky­'esat yt kat sa'up i ta'atuium tepiat hap ko'i.
ACT 3:3 Mi'i hawyi Peteru Iuwãu tuwe­hyt'ok mekewat Tupana mõtypot yat pe turan mekewat ipy kĩ'ã rakat hẽtup ta'yn Peteru Iuwãu me — Mehĩ'in e eweho'oium no uhepe eheti­neiru e.
ACT 3:4 Mi'i hawyi te'e­ra­ha'at kahato yt hewyry kuap i rakat kape hawyi te'e­ro'e tope — Eraha'at ro uruewawi uhyt i'atu'e.
ACT 3:5 Mi'i hawyi teha'at i'atue­wawi i'atumiium tepiat hap ekatup haype katu­pono tohẽtup hawyi tuwa­nẽtup — Ta'a­tu­ho'oium aru uhepe e.
ACT 3:6 Ma'ato Peteru to'e hẽtup hat pe — Pywo ti rat yt kat i sese uruekat uhyt e. I'ewyte yt kat i urueti­neiru Uru kawiat Parata kawiat mehĩ e. Yt hekat rakaria hin i ti uruto wen ma'ato kat som toĩne'en uruwanuat rakat atum yne epe mehĩ e. Mi'i hawyi to'e ipy tyt i rakat pe — Tupana Mipo­'oro Aipo­rekuat nuat Iesui tawa Nasare piat wemotag hat set no woro­moe­hãite teran mesup mehĩ e. Mi'i tupono epoĩ'ãm no ewyry ro uhyt e ipy kĩ'ã sese rakat pe.
ACT 3:7 Mi'i hawyi Peteru timo­poĩ'ãm na'yn ipo sese ete. Mi'i hawyi meremo ipy waku ra'yn topy­hu'at hesaika kahato ipy.
ACT 3:8 Mi'i hawyi peso peso'e ra'yn. Mi'i hawyi teke ra'yn Tupana mõtypot yat koro pe Peteru Iuwãu wywo — Waku poity'i Tupana waku poity'i Tupana e tuwehum haype.
ACT 3:9 Mi'i hawyi itotiaria yne te'e­ra­'a­kasa peso peso'e hap waku Tupana e hap.
ACT 3:10 Mi'i hawyi te'e­ro'e to'ope — Ta'i watikuap uwe meke miit i'atu'e. Ta'i mi'i ti mekewat oken'ypy ikahu rakat rotiat sẽtup sẽtup hat wyti i'atu'e to'ope. Sa'a­wy'i ahepiat ahekat ẽtup hat ra'yn wyti meke toĩne'en i'atu'e to'ope. Aikotã som pyno mio hewyry kuap kahato i'atu'e. Iwato kahato ra'yn ni ipy mohãpyk hap i'atu'e to'ope. Aikotã som pyno mio waku pe i ra'yn hewyry i'atu'e te'e­ru­wa­nẽtup kahato haype.
ACT 3:11 Mi'i hawyi mekewat ipy pakup takat iporok'at Peteru Iuwãu py ete — Uiwepit kahato e uiwepit kahato e i'atuepe. Mi'i hap kape wuat'i kaipyi ra'yn te'e­ru­wa­'a­tunug kahato te'e­ra­ha'at hamo. Mi'i hawyi typy'i rakaria õ'ẽ haria tukup­te'en itote mekewat morekuat Sarumãu e'oken­'y­pyke. Mi'i hawyi te'e­ru­wa­nẽtup kahato mekewat Tupana mimoe­hãite kape.
ACT 3:12 Mi'i hawyi Peteru iha'at kahato tewawiat seha'at haria kape wanẽtup kahato haria kape hawyi to'e i'atuepe — Kat poteĩ ewehe­ha'at kahato uruewawi urumõ­typot kahato hap wywo e aikotã ten uruewaku hap kaipyi uruimoe­hãite mesuwat sa'a­wy­'iwuat ipy kĩ'ã rakat e. Yt naku i urumõ­typot mi'i miit moehãite hap ete katu­pono yt uruwat uruewaku hap kaipyi i ti imoehãite hap toĩne'en mesup e Peteru. Yt uruwat uruesaika hamo i mi'i miit topy­hu'at ipy kahu rakano e. Ta'i Ahetu­pana ti imoehãite meiẽwat miit e. Tomi­po­'oro Iesui mohey hap upi wyti toimoe­hãite meiũwat sa'a­wy­'iwuat ipy kĩ'ã rakat are uhyt'i'in mana'in e.
ACT 3:13 Aha'a­se­'i'in Aparãu Isaki Iako eTupana mimoe­hãite ti meiũwat miit e. Eweikuap apo kat pote Tupana timoe­hãite ipy kĩ'ã rakat ehehamo e. Pyno ahenoi ehepe. Toiky­'esat kahato temiit sese Iesui mõtypot hap haype wyti e. Ta'i Ahetu­pana tiky­'esat kahato ra'yn wyti eimi­kuasa te Iesui mõtypot hap e. Morekuat Piratu ti yt i'auka teran i wen ma'ato eipe ti eweiky­'esat i'auka hap — Yt naku i Iesui ewei'e morekuat pe itote sa'a­wy'i e. — Eti'auka ro pyno Iesui ewei'e kahato morekuat Piratu pe e.
ACT 3:14 — Wakuat sese Uito Tupana ewywuat e Iesui wen ma'ato mi'i pytkai — Yt kan hamo i Iesui ewei'e. Mi'i hawyi wo'o­'auka hat Parapa eweiky­'esat po'og Iesui kai. — Yt eti'auka tei'o Parapa ewei'e itote ma'ato mekewat po'og po'og wakuat wuat'i kawiat rakat Iesui pe ti — Eti'auka ro eti'auka ro Mi'i Miit ewei'e sa'ag Piratu pe e. — Yt naku i kahato wyti wati­'auka ra'yn Iesui e Piratu pytkai — Eti'auka ro eti'auka ro Mi'i Miit ewei'e ti ra'yn itote eipe. Yt naku i kahato eiminug sa'ag e Peteru.
ACT 3:15 Ta'i miit'in moieĩne'en wuat'i e'at piat hat auka haria sese eipe pãi ma'ato mi'i pytkai eimi­'auka Tupana tomoieĩ­ne'en i ra'yn e. Toihep i ra'yn wyti Tomi­'airo gu'uro pyi pãi. Mi'i hap ti uruikuap kahato ra'yn katu­pono heĩne'en pakup i hap kape uruta­'a­kasa mot'i kahato uruto e Peteru.
ACT 3:16 Koitywy wyti Tupana timoe­hãite ra'yn mesuwat sa'a­wy­'iwuat ipy kĩ'ã rakat katu­pono toiky­'esat Tomi­po­'oro Iesui set mõtypot hap mesuwe pote e. Iesui set kawiat mohag wo toimoe­hãite mi'i miit ehehamo katu­pono toiky­'esat kahato eipe yne Tosa­'yru mohey haria wo hap e. Uruimohey Iesui hawyi waku ra'yn topy­hu'at mesuwat sa'a­wy­'iwuat ipy kĩ'ã rakat. Mesup Tupana mimo­hãpyk wo ra'yn toĩne'en na'yn ehehamo mana'in uhyt'i'in e. Iesui set esaika hap wywo Tupana timoe­hãite mesuwat miit e.
ACT 3:17 Ta'i ui'y­wania atikuap kahato aikotã yt eiwe'eg i hap wywo ewei'auka Iesui nagnia ehay upi hap e.
ACT 3:18 Ha'a­wyte yianmete ra'yn Tupana ehay enoi haria henoi kahato aikotã aru aikotã aru wata­'a­kasa mesuwe hamuat hap e. Mi'i hap ewy wyti sa'a­wy­'ite yne Tupana ehay enoi haria henoi ti ra'yn yianmete Iesui mi'auka wuat hap etiat e. Mi'iria piat henoi kahato ra'yn Urupo­rekuat piat ho'opot hamuat e. Mi'i henoi hap ewy ti ewetunug na'yn mesup Tupana e hap ewy e.
ACT 3:19 Aikotã Tupana henoi yianmete hap ewy ti topy­hu'at mesup. Mi'i pote waku mio tã ewei'e ro Tupana pe — Koitywy paa'u­ru­to'e ewawi Tupana katu­pono yt naku i kahato urutunug Esa'yru ete ewei'e pote meremo waure wo topy­hu'at eiminug sa'ag ete e. Mi'i hawyi waku pe i ra'yn iwywo eweikup­te'en mehĩ'in mana'in e. Mi'i hawyi ti aru Tupana mimo­wepit ko'i wo i ra'yn wuat'i e'at pe eweikup­te'en katu­pono tutum ehepe Topã'ãu Wakuat eimoe­saika hamuat hap hawyi e. Ta'i eiwe­morem Tupana kape i ra'yn pote waku pe iwywo eweikup­te'en e Peteru.
ACT 3:20 Mi'i hawyi ti aru tuwe­kaipyi toipo­'oro i ra'yn ehowawi Iesui e. Sa'a­wy'i sese ra'yn Tupana ti'airo Mi'i Miit Eika­'iwat nuat e. Pyno eiwe­morem howawi hawyi ti aru toipo­'oro i ra'yn Tosa­'yru Pã'ãu ehowawi e.
ACT 3:21 Mio ti toĩne'en Iesui atipy pe e. Mio itote tohe­katup topo­'oro i meiko wuat hap e'at e. Mio tã i'atu'e Tupana ehay moherep haria sa'a­wy­'i­wuaria — Tut wyti aru wẽtup e'at pe aikotã Tupana tunug mesuwat yi sa'a­wy­'iwuat hap ewy tutunug i irane e miwan me e. Mi'i hap e'at wyti aru Tupana tunug mesuwat mytyp ikahu ipakup takat sa'a­wy­'iwuat ikahu hap ewy i'atu'e yianme Iesui toĩne'en Wuat'i Porekuat nuat hap kape i'atu­mu­'etu e Peteru.
ACT 3:22 Aikotã aha'a­se'i Musei henoi sa'a­wy'i Iesui etiat hap ewy. Mio tã e — Wẽtup e'at pe wyti aru Tupana tipo­'oro ehowawi wẽtup ok ui'e­wywuat kahato rakat e. Mi'i Miit ti Tupana Mi'airo sese Wuat'i Porekuat nuat e. Ta'i Mi'i Miit wyti aru toĩne'en eipy­'a­setpe Tupana Ehay Moherep sese hano aikotã ui'ewy ma'ato po'og uikai e Musei sa'a­wy'i tomiwan me. Mi'i Miit wyti aru ei'y­wania suu kawiat tuwe­mo­herep ui'ewy e. Put'ok'e eipy­'a­setpe hawyi eweikuap yne o imienoi e. Kat e kat e wyti aru ihay ehepe. Ewetunug no yne yne i'e hap ok tã e Musei.
ACT 3:23 Ma'ato uwe uwe Tupana Ehay Moherep hat sese ehay pun haria ti aru tukup­te'en Tupana mimo­weityk ko'i wo e. Ewetunug no yne imienoi ewywuat. Ma'ato yt ewetunug i pote yt Tupana ywania wo hin i eweikup­te'en aru e Musei sa'a­wy'i ahowawi e Peteru.
ACT 3:24 Ui'y­wania yne ti sa'a­wy­'i­wuaria Tupana ehay enoi haria mio tã i'atu'e yianme Iesui etiat aikotã Musei to'e hap ewy e Peteru. Wẽtup ehay yn i'atuehay e sa'a­wy­'iwuat Tupana ehay moherep haria e. Ta'i sa'a­wy­'iwuat aha'a­se'i Samueu i'ewyte ihay yianmete Iesui ete i'ewyte yne yne Samueu saipe­piaria Tupana ehay moherep haria wẽtup ehay yn i'atuehay e. Mesuwiat Aika­'iwat Iesui etiat yn i'atuehay yianme e.
ACT 3:25 Eiperia ti Tupana ehay moherep haria emiariru ko'i pãi e. Kat i'atu'e kat i'atu'e sa'a­wy'i Iesui etiat ta'a­tu­mo­herep ehepe e. Sa'a­wy'i aha'a­se­'i'in me Tupana ihay kahato aikotã aru tutunug hap ete ihay e. Aha'a­se­'i'in tiwan kahato i'e hap aimu'e hamo. Koitywy aipo pe ra'yn mesup Tupana e hap i'e hap ewy e. Aikotã sa'a­wy­'ite Tupana to'e aha'a­se'i pot Aparãu me hap ewy tutunug mesup ehehamo e. Sa'a­wy'i mio tã e Aparãu me — Uiwy meiũran aru wẽtup ok emiariru epu'i kaipywiat tuwe­mo­herep yi tote e. Mi'i Miit esaipepiat sese wo aru ati'a­tu­poi­tyro wuat'i ywania mesuwat yi wato hap ok tã e Tupana Aparãu me Iesui piat pe.
ACT 3:26 Pyno Tupana tunug na'yn mio tã to'e Aparãu miat hap are katu­pono mesup ta'yn toipo­'oro Temiit Iesui ai'y­wania kape aimo­wepit hamo aheha­kye­ra'at hamo aiminug yt nakuap i kaipywiat aipo­re­ra­'aipok hamo toipo­'oro Iesui e Peteru Tupana mõtypot yat koro totiaria pe. Mi'i hawyi uito Iruka uimiwan atunug Peteru mienoi etiat.
ACT 4:1 Itote mio tã e Peteru turan miit'in tok pe tõ'ẽ tõ'ẽ ipy'ahak takaria pa'iria Tupana mõtypot yat piaria akag ko'i wywo Peteru Iuwãu saty'i saty'i hamo. Ta'a­tukuap Pete­ru'in Iesui wẽtem gu'uro pywiat hap ta'a­tu­henoi miit'in me hawyi — Wãi'i­'a­tu'e Peteru Iuwãu me. Yt naku i ewehenoi miit'in me Iesui tuwẽtem gu'uro pyi hap i'atu'e katu­pono uruikuap ta'yn aiku­'uro hawyi ti yt karãpe i watoĩ­ne'en pakup i hap i'atu'e sa'ag.
ACT 4:2 Yt naku i ewei'a­tu­mu'e miit'in aikotã Iesui tuwẽtem gu'uro pyi hap ete i'atu'e. Wãi nei'o i'atu'e. Pyno yt naku i ewei'a­tu­mu'e miit'in i'atu'e.
ACT 4:3 Mi'i hawyi pa'iria ti'a­tu­pyhik Peteru Iuwãu wo'o­pyhik hawe. — Yt naku i kahato eipe i'atu'e. Yt naku i eweipot­mu'e i'atu'e. Wãtym na'yn mote yt naku i urui'a­piheg eipe mesup ma'ato pywo ti rat mũki­'ite put'ok'e hawyi urui'a­piheg kahato eipe morekuat tikuap ehehay sa'ag ko'i hap hawyi i'atu'e Peteru Iuwãu me.
ACT 4:4 Ma'ato Tupana mõtypot yat koro totiaria Peteru Iuwãu mimu­'eria timohey kahato i'atu­mienoi Iesui etiat. Mi'i hawyi ta'a­tu­mo­rania karania Iesui mohey pakup i haria tukup­te'en itote hap e. Mi'i hawyi ta'a­tu­puẽti itote porap 5000 ihainia imohey pakup i haria Peteru Iuwãu miekyi ko'i.
ACT 4:5 Mi'i hawyi mũki­'ite ihot'ok hawyi Peteru Iuwãu apiheg teran haria te'e­ru­wa­'a­tunug kahato pa'i koro Ieru­sarẽi miat yat pe. Mi'i tote i'atuehay kahato pa'iria wywo nagnia wywo Iuteu ywania wãi'e hap moherep kuap kahato haria wywo Peteru Iuwãu kuasa hap ete.
ACT 4:6 Mi'i hawyi pa'i koro Anai e hap put'ok'e tosa­'y­ru'in pa'i Ka'iwa pa'i Iuwãu pa'i Aresã­tere wywo. I'ewyte yne tosa­'y­ru'in wywo.
ACT 4:7 Mi'i hawyi Peteru Iuwãu ta'a­tue­nõtem wo'o­pyhik hap pyi hawyi ta'a­tu­hytmoi ta'a­tu­py­'a­setpe hawyi apo'i­'a­tu'e Peteru Iuwãu me — Uwe ehay pyi kahu ewetunug mi'i tã ga'atpo Tupana mõtypot yat koro pe i'atu'e. Uwe eipo­'oro mi'i tã nug hamo i'atu'e Peteru Iuwãu me.
ACT 4:8 Mi'i hawyi Tupana Pã'ãu put'ok'e kahato Peteru piit pe hawyi Tupana wẽ wo ihay kahato itote — Urupo­re­kuaria woro­ho­'o­wesat reran kahato e. Nagnia eweikuap to uhepiat eiwesat hap e. Eweikuap teran uwe ehay pyi mesuwat sa'a­wy­'iwuat ipy kĩ'ã rakat topy­hu'at ipy waku ra'yn hap e.
ACT 4:9 Pyno ahenoi ehepe uwe sese mesuwat sa'a­wy­'iwuat ipy kĩ'ã rakat moehãite hat.
ACT 4:10 Ta'i Iesui tawa Nasare piat mimoe­hãite wyti ipy pakup takat e. Ta'i Iesui ehay upi wyti uruimoe­hãite mekewat ipy kĩ'ã rakat ga'atpo e. Sa'a­wy'i Tupana tipo­'oro Temiit ahowawi Aipo­typot nuat wen ma'ato Imipo­'oro Wakuat ewei'auka ra'yn aria'yp posak sa'ag ete. Yt naku i kahato ewetunug ma'ato iku'uro hawyi Tupana tomoieĩ­ne'en pakup i gu'uro pyi e. Pywo ti rat toĩne'en i Iesui katu­pono mesup ta'yn toimoe­hãite meiũwat miit e. Eweha'at ro pyno imimoe­hãite kape katu­pono hewyry ra'yn ehehamo e.
ACT 4:11 Iesui ti Nu Wakuat kahato ewy e. Mi'i Nu wo Tupana tunug na'yn to'yat koro sese e. Pywo ti rat Nu iheg kahato rakat ewy kahato Iesui e. Mi'i waku ui'yat koro nug hamuat e Tupana sa'a­wy'i morekuat Tawi miwan me Saumu 118.22 pe e ehepe wen ma'ato mekewat Nu pun haria wo kahato eweikup­te'en mesup eiperia e. Yt naku i kahato e. Ma'ato Eimipun wo ti Tupana ha'a­wynug na'yn to'yat sese e.
ACT 4:12 Wẽtup miit yn ni aheha­kye­ra'at kuap hat e. Mi'i Miit set ti Iesui e. Yt uwe i mi'i rẽ mesu­wa­rotiat wuat'i Ehakye­ra'at kuap hat e. Iesui mohey hap upi yn ni aheha­kye­ra'at kuap Tupana e Peteru haty wo.
ACT 4:13 Mi'i hawyi more­kuaria itotiaria te'e­ro'e to'ope — Kat pote som aipupi yt te'e­ro­ken'ẽ hin i Peteru Iuwãu i'atu'e. Yt karãpe i ti mi'iria te'e­ru­pot­mu'e kahato wo'o­mu'e hap wato sese puo. Ai'ewy wen ma'ato mi'i pytkai i'atuehay kuap kahato rakaria ewy. Pira pytyk haria mi'iria miit'in eropat haria yn mi'iria ma'ato i'atuehay po'og ikahu wo'o­mu'e haria akag ko'i kai i'atu'e to'ope nagnia. Uwe pyno i'atu­mu'e mio tã e hap nug hamo i'atu'e to'ope. Te'e­ru­wa­nẽtup hawyi — Ta'i Iesui ti'a­tu­mu'e mi'iria ha'a­wy­tepyi tomikuap ko'i ete. Mi'i pote mesup Ta'a­tu­ka­'iwat Iesui ewy kahato ta'a­tunug i'atu'e to'ope.
ACT 4:14 Mi'i hawyi itotiaria te'e­ra­ha'at kahato ipy pakup takat y'am miat Iuwãu Peteru py'a­setpiat kape hawyi te'e­ru­wa­nẽtup kahato ta'a­tu­py'a pe hawyi yt kat i'atu'e kuap i — Wakuap yn ta'a­tunug mote aikotã wati­'a­tu­'a­piheg mi'iria i'atu'e ta'a­tu­wa­nẽtup hawe.
ACT 4:15 Mi'i hawyi ta'a­tu­po­'oro porap'i Peteru Iuwãu ta'a­tu­'ya­ty­pepyi hawyi te'e­ro'e to'ope — Aikotã aru watunug mi'iria wywo i'atu'e. Yt naku i wati­'a­tu­'a­piheg mi'iria katu­pono waku kahato ta'a­tunug mekewat ipy kĩ'ã rakat pe i'atu'e.
ACT 4:16 Ta'i heremo kahato ra'yn i'atu­minug wakuap i'atu'e. Yne tawa Ieru­sarẽi miaria ikuap ta'yn waku hap ipy kĩ'ã rakat moehãite hap mi'i pote yt naku i Peteru yt naku i Iuwãu yt wato'e kuap i miit'in me katu­pono yt miit'in minug kuap i hap ewy ta'a­tunug na'yn i'atu'e.
ACT 4:17 Pyno waku wãiwa­to'e i'atuepe — Yt ewehenoi tei'o miit'in me po'og mekewat Iesui etiat waku wato'e i'atuepe ma'ato ewehenoi wẽtup ok pe Iesui etiat pote ti aru urui'a­tu­sa­ty'i saty'i eipe waku wato'e i'atuepe i'atu'e. Yt naku i ti Iesui eweimo­herep miit'in me waku wato'e ro Iuwãu Peteru pe i'atu'e to'ope itotiaria miit'in akag ko'i pa'i kororia. Mi'i pote ti aru yt iwato i miit'in ikuap mekewat Iesui etiat i'atu'e to'ope.
ACT 4:18 Mi'i hawyi Peteru Iuwãu ta'a­tu­kaykay wãita­'a­tu'e hamo — Waku ra'yn toran na'yn wyti mio i'atu'e. Po'og o yt ewehenoi i ra'yn Iesui etiat irania'in me i'atu'e. Iwat het wyti mio yt ewei'e tei'o wẽtup ok pe i'atu'e.
ACT 4:19 Mi'i hawyi Peteru Iuwãu ti'a­tu­wesat — Kat som pyno po'og waku urutunug sio Tupana miky­'esat sio eiwat eimi­ky­'esat mehĩ'in i'atu'e.
ACT 4:20 Ma'ato ti uruta­'a­kasa ti ra'yn howawi pãi i'atu'e. Ta'i uruikuap ti ra'yn urumu'e hat i'atu'e. Mi'i tupono ti yt uruwẽ­pohep kuap i ti ra'yn Urumu'e hat moherep hap ete pyi i'atu'e Peteru Iuwãu wãi'e haria pe.
ACT 4:21 Ma'ato irania'in — Tupana wyti imowaku ipy kĩ'ã rakat i'atu'e. Mi'i pote ti nagnia yt ti'a­tu­'a­piheg kuap i ma'ato te'e­ro'e i'atuepe — Ewetunug ne pote ti aru urui'a­tu­'a­piheg na'yn eipe i'atu'e pa'i kororia.
ACT 4:22 — Ta'i Tupana ti waku kahato katu­pono 40 anu yt hewyry kuap i rakat mio waku ra'yn tutunug. Iwato poity'i ra'yn wakuap iminug i'atu'e irania'in.
ACT 4:23 Mi'i hawyi i'atu­wẽ­pohep ta'yn Peteru Iuwãu ete. Mi'i hawyi tuwat ra'yn ta'a­tu­wy­ria'in Iesui mohey haria kape. Itote ta'a­tu­henoi henoi ra'yn kat i'atu'e kat i'atu'e pa'i kororia ehay enoi haria nagnia ehay enoi haria ta'a­tuepiat hap — Yt ewehenoi po'og i ra'yn o miit'in me Iesui etiat i'atu'e uruepe i'atu'e — Ma'ato ewehenoi po'og ne mote ti aru urui'a­piheg sese ra'yn eipe i'atu'e uruepe Uhyt'i'in mana'in i'atu'e.
ACT 4:24 Mi'i ta'a­tukuap hawyi tuwat ra'yn Tupana kape ta'a­tuehay to'o­'e­wy­'ewy hamo — Tupana Uru'ywot Atipy piat i'atu'e. En ni wuat'i waikiru nug hat i'atu'e. Urupytyp nug hat sese En i'atu'e. Tupana En ni wuat'i puat y'y nug hat i'atu'e. Ta'i wuat'i piat yi nug hat En i'atu'e.
ACT 4:25 Ta'i sa'a­wy­'iwuat urue'a­se'i Tawi mienoi ewy ti mio ta'a­tunug sa'ag na'yn uruete Tupana i'atu'e. Emienoi Epã'ãu Wakuat kaipyi mio tã e Tawi epe sa'a­wy'i tuwepy hawuo i'atu'e — Kan hamo som kan hamo som i'atu­py­'ahak kahato wuat'i ywania ete Tupana e. Kat pote som to'o­nãpin sa'ag ne'i Emipo­'oro Urupo­rekuat nuat ete e Tawi sa'a­wy'i miwan me. Mesup ehay ewy kahato ta'a­tunug sa'ag kahato more­kuaria Emi'airo Iesui ete meiũpe Tupana i'atu'e.
ACT 4:26 Mesup miit'in akag ko'i pa'i akag ko'i yt tiky­'esat hin i wyti Emipo­'oro Iesui Ta'a­tu­po­rekuat nuat hap i'atu'e. Ta'i aiwy Tawi wepy ewawiat hap morekuat Tawi wepy 2.12 hawe ewywuat kahato ta'a­tunug mesup Tupana i'atu'e.
ACT 4:27 Katu­pono mesup ta'yn te'e­ru­wa­'a­tunug kahato meiũpe tawa Ieru­sarẽi me Emipo­'oro Iesui etiat sa'ag ta'a­tuehay hamo i'atu'e. Tupana i'atu'e mesup ta'yn more­kuaria te'e­ru­wa­'a­tunug to'o­nãpin sa'ag ne'i Emi'airo Urupo­rekuat nuat Iesui mohit hamo mesuwe i'atu'e. Uru'ywot mesup ta'yn mekewat morekuat Eroti i'ewyte morekuat Pũsui Piratu te'e­ru­wa­'a­tunug Isareu ywania irania'in ywania wywo to'o­nãpin sa'ag ne'i hamo i'atu'e. Koitywy tawa Ieru­sarẽi me ta'a­tukat at ka'ap aikotã aikotã waku eropat sese haria Iesui mohey haria yne moma hamo ta'a­tukat to'o­nãpin sa'ag hap tote Tupana i'atu'e.
ACT 4:28 Tupana i'atu'e uruikuap wen ma'ato yt kat i sa'ag ta'a­tunug kuap Esa'yru ete uruete wãi'ere pote i'atu'e. Pywo ti rat yne pore­kuaria mesu­wa­ro­tiaria epo piaria tukup­te'en hap uruikuap i'atu'e. Uruikuap ta'yn more­kuaria yne emi'airo tukup­te'en sio waku sio yt hap uruikuap i'atu'e. Tupana epo pe urutu­kup­te'en mi'i pote yt kat i sa'ag ta'a­tunug kuap uruete sio wãi'ere i'atuepe pote i'atu'e. Tupana etunug o emiky­'esat ewy more­kuaria po wo uruete emõtypot hamuat i'atu'e katu­pono uruikuap ta'yn more­kuaria tunug ehay etiano aikotã yianme emienoi i'atuepiat hap ewy yn ta'a­tunug kuap i'atu'e.
ACT 4:29 Koitywy mesuwe miit'in akag ko'i ai'akit reran kahato i'atu'e. Mi'i pote Tupana urumoe­saika kahato esaika hamo ehay Iesui etiat moherep torania miit'in miat hamo i'atu'e.
ACT 4:30 Mi'i hawyi — Tupana i'atu'e urumoe­saika o Iesui po wo miit'in moehãite kahato hamo aikotã Esa'yru Iesui tunug sa'a­wy­'iwuat ewy yt uwe miit misepap nug hap ewy i etunug o urupo wo miit'in mowa­nẽtup kahato hamo i'atu'e haty wo Peteru Iuwãu wywo Tupana kape.
ACT 4:31 Mio tã i'atu'e pote tyry'e kahato meiẽwat i'atu­wa­'a­tunug hap getap. Mi'i hawyi Tupana Pã'ãu Wakuat ti'a­tu­moe­saika kahato ra'yn itotiaria i'atu­miẽtup ewy. Mi'i kaipyi yt te'e­ro­ken'ẽ hin i ra'yn wanĩ­kaptia pupi. Mi'i hawyi Tupana ehay yn na'yn i'atuehay wo.
ACT 4:32 Mi'i hawyi Iesui mohey haria wo'o­ky'e kahato haria tukup­te'en itote aikotã wẽtup miit ewy kahato i'atu­py'a wasu hap. Ta'i wẽtup miit ewy yn i'atu­wa­nẽtup hap. Mi'i hawyi i'atue­gyi'at kahato rakaria wo tukup­te'en itote. Mi'i hawyi yt uwe i itote — Uianuat yn uhekat e hat topy­hu'at i'atu­py­'a­setpe katu­pono ta'a­tu­mõ'ẽ kahato to'ope kat ko'i kat ko'i i'atuekat e. — Ta'i aiwanuat topy­hu'at yne uhekat yne uruekat mesup i'atu'e to'ope katu­pono ta'a­tu­ky'e kahato sa'a­wy'i Iesui mohey haria itote.
ACT 4:33 Iesui ti tuwẽtem na'yn gu'uro pyi i'atu'e kahato Iesui potpo­'o­roria 12 ok takaria wuat'i miit'in me. Hesaika kahato i'atuehay Iesui ete topy­hu'at itote. Mi'i hawyi miit'in te'e­ru­wa­nẽtup kahato i'atuehay kape. Mi'i hawyi tuwepyi Tupana tuwehum kahato i'atuete.
ACT 4:34 Mi'i hawyi getap ka'i­waria yi ka'i­waria iweneru ra'yn ta'a­tu'yat ta'a­tue'yi.
ACT 4:35 Mi'i hawyi ta'a­tue'yi sa'up ti ta'atuium 12 ok takaria pe. Mi'i hawyi ta'a­tu­mõ'ẽ mekewat sa'up ihaky­'e'i rakaria pe. Mi'i hawyi yt wẽtup ok i i'atu­py­'a­setpe toĩne'en ihaky­'e'i rakat.
ACT 4:36 Mi'i hawyi wẽtup ok mehĩ Iuse yi Sipiri kaipywiat wyti te'yi sa'up hum yne ra'yn 12 ok takaria pe. Iuse ti aha'a­se'i sa'a­wy­'iwuat Irewi ywania ti.
ACT 4:37 Mi'i Iuse ta'a­tu'e hawe ti te'e­ru­wẽ­powat — Aipo­wyro hat i'atu'e ma'ato Iuteu ywania — Mehĩ Panãpe i'atu'e ta'a­tu­pusu puo. Pyno aikotã hap ewy ta'a­tunug. Mi'i hawyi atiwan mesuwe uito Iruka.
ACT 5:1 Mi'i hawyi wẽtup e'at pe Panãpe ewywuat Iesui mohey hat mehĩ Anania tiwe­neru ra'yn te'yi teha­ry'i Sawira wat wywo te.
ACT 5:2 Mi'i hawyi yi sa'up ta'a­tuewyi ipat'ok katu­pono yt ta'atuium yne teran i Tupana pe. Mi'i hawyi ma'ato — Urue'yi sa'up urutum yne Tupana pe waku wato'e 12 ok takaria pe i'atu'e to'ope. Mi'i hawyi toto Anania 12 ok takaria kape hawyi — Heno uhyt e meiko ra'yn urue'yi sa'up toran na'yn atum neran Tupana pe e ma'ato yt pywo pe i.
ACT 5:3 Mi'i hawyi Peteru to'e Anania pe — Kat pote som Tupana Pã'ãu Wakuat pe eso teran e. Ta'i ahiag ehay pyi wyti eso teran e. Ta'i ipat'ok yn wyti etum uipo pe ma'ato — Atum yne Tupana pe ere uruepe pytkai e.
ACT 5:4 Sa'a­wy­'ite ti toran epo pe mekewat yi toĩne'en e. I'ewyte koitywy etiwe­neru hawyi epo pe te mekewat yi sa'up topy­hu'at e. Kat poteĩ pyno — Atum yne ra'yn wyti meiko Tupana pe ere uruepe. Ta'i ipat'ok te ti topy­hu'at epo pe — Atum yne ere pytkai e. Yt naku i are e. Ta'i yt uhepe i wyti eso hap uhyt e ma'ato Tupana pe wyti eso hap e Peteru Anania pe.
ACT 5:5 Mio tã e hawyi ta'at ra'yn yi tote heso rakat hawyi ipyhu tek'e ra'yn. Mi'i kapiat akasa haria te'e­ro­ken'ẽ kahato ra'yn ipupi.
ACT 5:6 Mi'i hawyi itotiaria kurum iwasuria terut ra'yn sokpe kyt'i huwy hamuat hawyi ta'a­tu­suwy ipiit hawyi ta'a­tusyp ta'yn Anania.
ACT 5:7 Mi'i rokirẽ Anania piit ta'a­tusyp ta'yn. Mi'i turan mye'ym ora hap ewy tokosap hawyi ihary'i put'ok'e ra'yn Peteru ete. Yt toikuap hin i te te'aito ku'uro hap.
ACT 5:8 Mi'i hawyi Peteru to'e tope — Mana Sawira e toran ni ra'yn apo ehe'yi sa'up ewetum Tupana pe sio yt e. Pywo apo e'aito tum yne ti ra'yn ehe'yi sa'up mana sio yt e. Mi'i hawyi toiwesat — Pywo ti an mimi e tutum yne ti ra'yn urue'yi sa'up Tupana pe e mana Sawira Peteru pe.
ACT 5:9 Mi'i hawyi — Yt naku i e Peteru katu­ponoĩ eiwo­'o­'ewy eheso e. Kat poteĩ ewehã'ãg neran Uruka­'iwat Pã'ãu Wakuat eheso hamo e. Pyno eraha'at ro oken kape mana Sawira e katu­pono tõ'ẽ ra'yn e'aito syp kahu hawyi kurum'i wasuria ko'i e. Mana e mio ti ewat epiit iku'uro rakat i'ewyte ra'yn ta'a­tue­reto irane hyp hamo e'aito ewy e Peteru.
ACT 5:10 Mi'i hawyi meremo mana Sawira i'ewyte iku'uro itote hawyi ta'at ra'yn Peteru py yatype hawyi ipyhu tek'e ra'yn. Mi'i hawyi kurum iwasu ko'i te'e­ra­ha'at oken'y­pykiat turan — Iku'uro ra'yn wyti ihary'i i'atu'e. Mi'i hawyi ta'a­tue­reto ra'yn ipiit he'aito syp hap kape hyp hamo. Mi'i hawyi ta'a­tusyp he'aito ywyt puo.
ACT 5:11 Mi'i hawyi wa'a­tunug haria Iesui mohey haria te'e­ro­ken'ẽ kahato ra'yn typy ok heso rakaria iku'uro i'atue­hamo hawyi. I'ewyte irania'in ikuap hawyi te'e­ro­ken'ẽ kahato ta'a­tu­'auka Tupana piat hap pupi.
ACT 5:12 Mi'i hawyi 12 ok takaria po pe iwato kahato topy­hu'at Tupana esaika hap. Mi'i hawyi ta'a­tunug moity'i ra'yn iwato kahato Tupana ewy yt miit'in minug kuap i ko'i ta'a­tu­mo­herep miit'in py'a­setpe.
ACT 5:13 Yt irania'in minug kuap i ko'i ewywuat ra'yn ta'a­tunug Tupana po wo. Mi'i pote — Aikotã som mi'iria inug mi'i tã i'atu'e irania'in. Ta'i waku kahato ti Iesui mohey haria tunug i'atu'e irania'in to'ope wen ma'ato — Wato­ken'ẽ kahato i'atu­pupi i'atu'e. Arewa­nẽtup yt naku i watuwat mi'iria upi katu­pono sio watuwat i'atuupi hawyi mehĩ Anania ehary'i Sawira ewywuat wato­py­hu'at i'atu'e to'ope. Mi'i hawyi Iesui mohey haria te'e­ru­wa­'a­tunug kahato yne e'at pe morekuat Sarumãu e'oken note Tupana mõtypot yat koro pe.
ACT 5:14 I'ewyte iky'esat haria typy'i sese Iesui mohey hanuaria ipakup i ihainia'in hary­po­ria'in toko­ka'at Aika­'iwat Iesui kape. Mekewat e'at pe tuwe­hyt'ok kahato ra'yn imohey haria pakuptia i'atu­'ya­type.
ACT 5:15 Mi'i hawyi i'ahu rakaria ta'a­tue­'yni iãti wẽtup sok yn to'o­tote tote tukup­te'en mu'ap ẽpe upi — Peteru pã'ãu mono tokosap uruho­'opot poity'i pote urupohag nug hamo i'atu'e. Mi'i hawyi mono uruehãite i ra'yn i'atu'e i'ahu rakaria to'ope.
ACT 5:16 I'ewyte tawa Ieru­sarẽi popy etiaria tawa hit popy wuaria te'e­ru­wa­'a­tunug Ieru­sarẽi kape. Mi'i kape ta'a­tuerut i'ahu rakaria i'ewyte miit'in ahiag ipiit piat rakaria ta'a­tuerut. Mi'iria yne Tupana ti'a­tu­moe­hãite 12 ok takaria po wo.
ACT 5:17 Mi'i pote pa'i koro tomie­rohik ko'i wywo i'atue­ha­'y­wywi kahato ra'yn Iesui mohey haria ete. Mi'i hawyi i'atu­saiwot kahato ne'i ra'yn — Waku wati­'a­tu­moma yne Iesui mohey haria i'atu'e to'ope.
ACT 5:18 Mi'i pote ta'a­tu­pyhik ta'yn yne Iesui potpo­'o­roria 12 ok takaria yt nakuaria i pyhik hawe.
ACT 5:19 Ma'ato wãtym hake turan put'ok'e Tupana mipo­'oro atipy kaipywiat i'atu­'o­ken­hyp'ok hamuat. Mi'i upi tuwat iheg myi.
ACT 5:20 Mi'i hawyi itote to'e i'atuepe — Eweiwat ro Tupana mõtypot yat koro kape hawyi eweikup­te'en no wuat'i miit'in py'a­setpe hawyi ewehenoi henoi kahato ro — Iesui ti tuwẽtem i ra'yn gu'uro pyi ewei'e ro itote e. Iesui mohey hap yn ni mu'ap Tupana kapiat ewei'e i ro i'atuepe e. Iesui yn wyti aimoieĩ­ne'en wuat'i e'at piat kuap hat ewei'e ro itotiaria pe e atipy kaipywiat sut hat Iesui potpo­'o­roria pe.
ACT 5:21 Mi'i hawyi tuwat ra'yn 12 ok takaria hawyi te'e­ru­we­hyt'ok hunete Tupana mõtypot yat koro pe. Mi'i hawyi ta'a­tu­'a­tu­mu'e kahato i ra'yn itotiaria. Mi'i turan pa'i koro toto ra'yn towy­ria'in wywo more­kuaria yat koro kape. Mi'i hawyi toi'a­tu­kaykay ra'yn tuwe­wawi wo'o­nãpin haria temiit'in Isareu ywania etu'i­saria toi'a­tu­kaykay. Te'e­ru­wa­'a­tunug yne ra'yn hawyi ta'a­tu­po­'oro tesu­ra­ra'in 12 ok takaria pore­ra'at hamo wo'o­pyhyp hap kape.
ACT 5:22 Mi'i hawyi tuwat ra'yn sura­ra'in wen ma'ato yt uwe i ta'a­tu­puẽti Iesui potmu­'eria itote. Mi'i hawyi te'e­ra­'aipok i ra'yn henoi hamo.
ACT 5:23 — Ta'i okenhyp ko'i iheg me yne uruipuẽti i'atu'e i'ewyte sura­ra'in tukup­te'en yne oken'y­pyke i'atu'e. Ta'i okenhyp ko'i iheg me yne tukup­te'en i'atu'e. Mi'i hawyi uruho­'o­'o­ken­hyp'ok 12 ok takaria wywuat okipy wen ma'ato itote yt uwe hin i ra'yn uruipuẽti eimi­pyhik ko'i pãi i'atu'e.
ACT 5:24 Mi'i hawyi Tupana mõtypot yat koro ka'i­waria surara akag ko'i pa'i koro ko'i te'e­ru­wa­nẽtup kahato hawyi te'e­ro'e — Aikowo som te'e­ro­popy Iesui potmu­'eria ta'a­tu­pyhik hap pyi i'atu'e to'ope. Aikotã aru waku watunug mi'iria ete i'atu'e to'ope.
ACT 5:25 Mi'i turan put'ok'e wẽtup ok miit to'e hamo — Tu'i­saria e mio wyti eimi­pyhik ko'i Iesui potmu­'eria tukup­te'en Tupana mõtypot yat koro pe i ra'yn e. Mi'i tote ta'a­tu­'a­tu­mu'e kahato miit'in Ta'a­tu­ka­'iwat ete e more­kuaria pe.
ACT 5:26 Mio tã e hap ta'a­tukuap hawyi sura­ra'in sem tuwat i ra'yn i'atue­ro­po'ok hamo. Mi'i hawyi to'e sura­ra'in akag mu'ap upi temiit'in me — Eimitum mo o e yt ewei'a­tu­sa­ty'i saty'i tei'o mekewat Pauru e hap het rakat mesuwe miit'in sem ipotmu­'eria typy'i tok pe e kat pote meremo ti aru miit'in sem ai'a­tu­'uka nu wo e. Eiwe'eg wo o e. Mi'i hawyi sura­ra'in ti'a­tu­kaykay Iesui emiit'in.
ACT 5:27 Mi'i hawyi ta'a­tue­reto morekuat yat kape. Ta'a­tuerut hawyi ta'a­tupag wo'o­mu'e haria akag py'a­setpe i ra'yn.
ACT 5:28 Mi'i hawyi pa'i koro to'e — Kat pote som ewei'a­tu­mu'e wuat'i miit'in Iesui ete yt urumi­ky­'esat ewy i i'atu'e. Sa'a­wy'i ti — Yt ewehenoi i ran o Iesui etiat irania'in me uruto'e ra'yn ehepe wen ma'ato ti mio yne miit'in tawa Ieru­sarẽi miaria tikuap kahato mekewat Iesui etiat e. Ta'i Tupana Mipo­'oro Aipo­rekuat nuat auka haria ti pa'i ko'i ewei'e ti uruepe e pa'i koro. Yt naku i kahato eipe e.
ACT 5:29 Mi'i hawyi Peteru ti'a­tu­wesat — More­kuaria e waku kahato urutunug wuat'i eimi­ky­'esat ewy wen ma'ato karãpe eipe urupo­'oro yt Tupana miky­'esat ewywuat nug hamo i mi'i pote ti po'og waku urutunug Tupana miky­'esat ok tã wãi'e­wei'e pytkai e Peteru.
ACT 5:30 Aiwat aha'a­se­'i'in Etupana timoe­hãite i ra'yn eimi­'auka aria'yp posak etiat Iesui uhyt'i'in e.
ACT 5:31 Miit'in Potypot no Tupana tiky­'esat kahato Uruka­'iwat Iesui e. Mio tã e Tupana sa'a­wy'i — Mi'i Miit ti Uipo sese kawiat ieĩne'en hat e. Mi'i Miit ti wuat'i miit'in ehakye­ra'at hanuat e Tupana sa'a­wy'i miwan me e Peteru. Ta'i Iesui ti henoi ahepe mekewat mu'ap aiminug yt naku i hap kaipywiat aihep hamuat e. Mi'i Miit yn ni mu'ap Tupana kapiat hat e. Mi'i Miit yn ni ai'y­wania Isareu ywania wanẽtup sa'ag hap mohãpyk kuap hat e. Toiky­'esat yne ai'y­wania tomie­ha­kye­ra'at ko'i wuat hap e.
ACT 5:32 Yt uruto yn i ti mio tã uruto'e ma'ato Tupana Pã'ãu Wakuat i'ewyte mio tã e at ka'ap uru'e hap ewy te e Peteru. Mio wyti Tupana tum neran Topã'ãu Wakuat tomi­ky­'esat nug haria pe pãi e. Mi'i Miit etiat ri urumikuap uruimo­herep miit'in me ehepe uhyt'i'in e. Mi'i Miit yn aheha­kye­ra'at kuap hat e Peteru wo'o­nãpin haria akag ko'i pe.
ACT 5:33 Mio tã e Peteru hawyi wo'o­nãpin haria i'atu­py­'ahak kahato Iesui potpo­'o­roria ete. Mi'i hawyi — Waku watu­'uka mi'iria i'atu'e to'ope.
ACT 5:34 Mi'i hawyi itote toĩne'en pa'i kororia py'a­setpe wẽtup ok miit i'atu­nãpin hat akag koro. Mi'i miit po'og i'atu­mi­mõ­typot. Mi'i ti Musei wãi'e hap moherep hat. Mi'i miit set Kamarieu e hap het rakat. Mi'i hawyi ipoĩ'ãm na'yn i'atu­py­'a­setpe yne nãpin hamo — Uimi­mu­'eria e atiky­'esat ewei'a­tu­po­'oro porap'i meimuẽ­waria 12 ok takaria sura­ra'in upi wẽtup yat kape e.
ACT 5:35 Tuwat yne ipotmu­'eria hawyi to'e wo'o­mu'e hat Kamarieu itotiaria pe — Uipot­mu­'eria e eiwe'eg wo o e. Eiwa­nẽtup o kat aru pyno watunug Iesui mohey haria ete e.
ACT 5:36 Ha'a­wyte wẽtup surara Teuta tuwe­mo­wato meiũpe tawa Ieru­sarẽi me e. Mi'i hawyi 400 sura­ra'in tuwat hupi e. Mi'i turan ni iku'uro ra'yn Teuta ta'a­tu­'auka ra'yn e. Mi'i hawyi yt kat i ra'yn topy­hu'at iwat hemiit. Tuwat yne ra'yn iwat haipe­piaria e. Mesup yt uwe i mekewat Teuta emiit mesuwe e Kamarieu Isareu ywania pe.
ACT 5:37 I'ewyte ga'atpo tama Karireia piat uhyt Iuta e hap het rakat tuwe­mo­wato meiũpe e. Mi'i hawyi tuwat kahato miit'in hupi typy'i kahato hesu­ra­ra'in wo e. Mi'i hawyi mekewat wo'oset puruk hap e'at pe toi'a­tu­kaykay yne tesu­ra­ra'in tuwe­wawi hawyi ta'a­tu­'a­tu­'uka kahato mesuwe ma'ato mi'i turan iku'uro ra'yn Iuta hawyi te'e­ru­we­sytpok ta'yn Iuta saipe­piaria torania e Kamarieu.
ACT 5:38 Mi'i pote are'e mio ehepe waku ti aipohep ta'yn Iesui saipe­piaria ete e. Waku waure wo yn na'yn aito i'atukai e Kamarieu. I'atuwat i'atueko miit'in wanuat ne'i pote ti aru ikahuro ra'yn topy­hu'at e.
ACT 5:39 Ma'ato i'atuehay pywuat Tupana wanuat pote ti aru yt karãmuo i wati­moma kuap i'atuehay e. Pyno Tupana etiano watu­'uka pote imi'akit ko'i wo aru wato­py­hu'at uhyt'i'in e Kamarieu pa'i koro emiit'in me.
ACT 5:40 — Pywo kahato tig urunãpin mehĩ Kamarieu i'atu'e itotiaria. Mi'i tã ti aru epiat urunãpin hap ewy ti aru pyno urutunug uhyt i'atu'e pa'i koro kapiat wa'a­tunug haria. Mi'i hawyi ta'a­tu­kaykay 12 ok takaria te'e­ru­we­wawi. Mi'i hawyi ta'a­tu­'ahyk ahyk saity sa'ag wo Iesui potmu­'eria. Ta'a­tu­'a­piheg kahato hawyi wãi'i­'a­tu'e — Yt ewehenoi po'og i ra'yn o miit'in me Iesui etiat i'atu'e. Yt ewehenoi tei'o irania'in me Iesui etiat i'atu'e. Ma'ato po'og ewetunug mote po'og aru sa'ag urui'a­tu­'a­piheg eipe i'atu'e. Pyno waku eweiwat i ra'yn ei'yat ko'i kape i'atu'e 12 ok takaria pe.
ACT 5:41 Mi'i hawyi tuwat i ra'yn more­kuaria yat koro pyi. Tuwat hawyi i'atu­wẽ­pap'i kahato itote — Tupana i'atu'e urutu­wehum kahato ra'yn eete i'atu'e. Koitywy urumo­sa­ty'i saty'i sa'ag kahato itote Esa'yru mohey haria uruto pote i'atu'e. Ma'ato ti waku uruho­'opot Esa'yru Iesui set po'ypyi i'atu'e.
ACT 5:42 Mi'i hawyi ipotmu­'eria ti'a­tu­mu'e at ka'ap yne i'atu'yat puaria. I'ewyte ta'a­tu­'a­tu­mu'e Tupana mõtypot yat koro totiaria. Yt i'atu­wẽ­pohep hin i ma'ato — Iesui ti Tupana tipo­'oro Aipo­rekuat nuat i'atu'e ta'a­tuehay pirik wo. Iesui potmu­'eria mienoi hap ewy atiwan mesuwe uito Iruka.
ACT 6:1 Mi'i hawyi ipotmu­'eria timo­herep kahato miit'in me yne Iesui etiat. Mekewat e'at pe imohey pakup i haria te'e­ru­we­mo­ty­py'i kahato itote. Imohey pakup i haria typy pusu kuap haria tukup­te'en. Mi'iria yne Iuteuria ma'ato typy pusu kuap haria mi'iria tukup­te'en. Wẽtup ywania Kereku pusu kuap haria ma'ato wẽtup ywania Epereu pusu kuap haria. Mi'i hawyi wẽtup e'at pe Kereku pusu kuap haria te'e­ro'e to'ope — Kat pote Epereu pusu kuap haria po'og imõ'ẽ ta'a­tue­hi­wuria pe aito wuaria kai i'atu'e.
ACT 6:2 Mi'i hawyi 12 ok takaria tikuap mio tã i'atu'e hap hawyi ta'a­tu­'a­tu­kaykay ra'yn torania hawyi te'e­ro'e Iesui mohey haria typy'i rakaria pe — Ma'ato ti yt naku i urui'atoiat Tupana ehay hiwu ko'i piat mi'u mõ'ẽ hamo i'atu'e. Uruto ti yt urupot­put­'ok'e i typy motpap nug hamo i'atu'e. Yt urupot­put­'ok'e i Tupana ehay moherep at ka'ap hamo i'ewyte hiwu poi hamo at ka'ap i'atu'e. Niatpo kahato typy motpap nug hamo at ka'ap i'atu'e.
ACT 6:3 Mi'i tupono waku ewei'airo 7 ihainia wakuat rakat hiwu sese ko'i piat mi'u mõ'ẽ hamo i'atu'e. Waku ewei'airo iwe'eg kahato rakaria i'atu'e. Waku eweikat Iesui mohey sese haria inug hamo i'atu'e. Waku Tupana Pã'ãu Wakuat miky­'esat ewywuat nug kuap haria ewei'airo i'atu'e. Ewei'airo ro wakuaria miit'in mimõ­typot ko'i i'atu'e. Mi'iria ewywuat yn ni waku wati­po­'oro urupotpap nug hamo mi'u mõ'ẽ hiwu ko'i piat hamo i'atu'e 12 ok takaria Iesui mohey haria pe.
ACT 6:4 Ma'ato uruto wyti Tupana ehay mõ'ẽ haria wo yn ni urutu­kup­te'en aru at ka'ap uruto i'atu'e. I'ewyte Tupana wywo yn uruto uruehay teran at ka'ap i'atu'e.
ACT 6:5 Mi'i hawyi wu'uka haria te'e­ro'e — Pyno waku watunug ei'e hap ewy i'atu'e ta'a­tu­wesat 12 ok takaria pe. Mi'i hawyi ta'a­tu­'airo 7 ihainia. Sa'a­wy'i ta'a­tu­'airo mekewat Iesui mohey kahato hat mehĩ Etewãu katu­pono Tupana Pã'ãu Wakuat eiam kahato topy­hu'at mi'i miit. Ta'i Tupana miky­'esat ewy yn tutunug. Mi'i hawyi ta'a­tu­'airo wẽtup ok mekewat mehĩ Wiripi. Mi'i hawyi ta'a­tu­'airo mehĩ Pokuru i'ewyte mehĩ Nikanu. Mi'i hawyi mehĩ Timãu i'ewyte mehĩ Pamena ta'a­tu­'airo. Mi'i hawyi mekewat mehĩ Nikurau yt Iuteu ywania i mekewat tawa Antiokia piat ta'a­tu­'airo. Mi'i hawyi torania meimuẽwat 7 ok ta'yn tukup­te'en itote.
ACT 6:6 Mi'i hawyi ta'a­tu­mi­'ai­roria 7 ok takaria ta'a­tuerut 12 ok takaria kape. Mi'i hawyi te'e­ru­we­ponug na'yn hawyi — Tupana eti'a­tu­poi­tyro kahato mi'iria i'atu'e. Etum o meiko­rania pe esaika hap epotpap nug hamo i'atu'e 12 ok takaria.
ACT 6:7 Mi'i hawyi hãpyk kahato meimuẽwat 7 ok takaria timõ'ẽ mi'u hiwu sese ko'i pe. Mi'i pote Iesui potmu­'eria sese 12 ok takaria ti'a­tu­mu'e at ka'ap miit'in yne Iesui miky­'esat nug hap ete. Mi'i hawyi yne tawa Ieru­sarẽi miaria pe ta'a­tu­mõ'ẽ kahato Tupana ehay. Mi'i pote typy'i kahato ra'yn imohey pakup i haria itote tukup­te'en. I'ewyte i'atu kahato Iesui miky­'esat yn nug haria tukup­te'en itote. Mi'i turan pa'iria sem i'ewyte te'e­ro­py­hu'at Iesui mohey haria wo ra'yn itote.
ACT 6:8 Mi'i hawyi mekewat mehĩ Etewãu timo­herep kahato ra'yn miit'in me Tupana esaika hap — Ta'i Tupana miky'e kahato ti mi'i i'atu'e. Ta'i Tupana ti tuwehum kahato Etewãu ete i'atu'e to'ope itote. Tupana ti hum kahato tewaku hap hawyi toimo­herep kahato topo wo Tupana yn inug kuap hap ko'i. Yt miit minug kuap i ko'i tutunug Tupana esaika hamo.
ACT 6:9 Ma'ato meiũran irania'in Iuteu ywania pa'i ko'i Tupana yat kaipywiat õ'ẽ haria i'atu­py­'ahak kahato Etewãu ete Ta'i ta'a­tu­'akit reran ne'i ta'a­tuehay wo ma'ato yt ta'a­tu­'akit kuap i katu­pono mi'i Tupana Pã'ãu kaipyi ra'yn ihay. Mi'i pote Etewãu ehay ete i'atu­py­'ahak sese ra'yn wo'o­mu'e haria yi Sireniu pywiaria tawa Aresã­tere pywiaria yi Sirisia pywiaria yi Asia pywiaria i'atu­py­'ahak kahato Etewãu ete. — Ta'i uruto urutu­we­po­'oro i'atu'e. Yt uwe i urupo­'oro kuap haria i'atu'e. Ta'i miit'in mipo'i po'i saity porop haria ko'i uruto i'atu'e Etewãu me.
ACT 6:10 Mi'i hawyi ta'a­tunug Tupana mõtypot yat tawa Ieru­sarẽi me. Mi'i hawyi ta'a­tu­set'ok ta'a­tu'yat Miit'in pore­nõtem wanĩ­kaptia po pywiat hap yat i'atu'e. Mi'iria Etewãu ti'a­tu­wesat hãpyk kahato katu­pono Tupana Pã'ãu kaipyi ra'yn ihay. Iwe'eg kahato po'og po'og i'atu­we'eg hap kai. Mi'i pote yt ta'a­tu­wesat kuap i. Yt kat i'atu'e kuap i Etewãu me.
ACT 6:11 Yt ta'a­tu­wesat kuap i pote te'e­ro'e to'ope — Waku wati­po­'oro heso rakaria more­kuaria kape heso hap Etewãu etiat enoi hamo. Waku mio tã i'atu'e heso rakaria — Etewãu ni ihay sa'ag kahato Tupana ete e hamo i'atu'e. Tupana etiat weky­ry'i hat ne'i i'ewyte aha'a­se'i Musei ete ihay sa'ag kahato e hamo i'atu'e ipy'ahak takaria.
ACT 6:12 Mi'i hawyi tuwat ra'yn Etewãu etiat ta'a­tueso hamo. Mi'i hawyi nagnia tikuap ta'yn hawyi yt i'atu­wese hin i ra'yn Etewãu ete. Mi'i pote nagnia i'ewyte miwan enoi haria tuwat ra'yn sura­ra'in wywo. Mi'i hawyi haty wo ta'a­tu­pytyk Etewãu. Mi'i hawyi yi upi ta'a­tuekyi more­kuaria yat kape ihay kuap hamo pywo apo sio yt hap kuap hamo.
ACT 6:13 Mi'i hawyi henoi hanuaria i'atu­poĩ'ãm ta'a­tueso hap te'e­ro'e hamo — Meiũwat Etewãu ti aimo­weu­ka'i Tupana yat ete ai'y­wania nãpin hap ete i'atu'e.
ACT 6:14 Meiũwat Tupana yat wato ti Iesui tipuruk irane e wyti i'atu'e. Sa'a­wy­'iwuat aheko yne ainãpin Musei piat hap ti Iesui tawa Nasare piat timoma irane e ti Etewãu i'atu'e.
ACT 6:15 Mi'i hawyi itotiaria te'e­ra­ha'at Etewãu kape hawyi — Are pãi i'atu'e iwat howa ti hẽtyhot ra'yn atipy piat owa hẽtyhot hap ewy ra'yn i'atu'e to'ope typy'i rakaria. Mi'i tã hap ewy ta'a­tunug Etewãu ete wakuat pytkai. Mi'i tã etiat atiwan mesuwe uito Iruka.
ACT 7:1 Mi'i hawyi pa'i koro apo'e Etewãu me — Pyno apo mio tã i'atu'e hap pywo sio yt e.
ACT 7:2 Mi'i hawyi toiwesat — Eiwa­nẽtup to meikowo mehĩ'in e uha'a­se­'i'in ui'y­wania e waku sakpo e ti Ahetu­pana. Nimo ra'yn ti tuwe­mo­herep aha'a­se'i Aparãu me yi Mesu­pu­tamia pe.
ACT 7:3 Mi'i hawyi wẽtup e'at Tupana to'e — Aparãu e erẽtem no ewat e'yi pyi e'ywot'in yaty­pepyi e. Atimo­herep teran wyti epe wẽtup yi e Aparãu me e.
ACT 7:4 Mi'i hawyi totoiat ra'yn tetawa Kauteu hawyi toto pya tetawa pyi mekewat tawa Arã kape toto wẽtup yi kape toto. Mi'i hawyi toĩne'en tawa Arã me. To'ywot iku'uro hawyi Aparãu toto i ra'yn aikope aikope Tupana timo­herep mu'ap hap upi toto. Mi'i hawyi put'ok'e mesuwe aikope mio watoĩ­ne'en hap kape toto e Etewãu. Mesuwat ahe'yi tote hewyry mot'i hawyi Tupana to'e tope — Aparãu e mesuwat yi yne wyti aru atum epe uiwy e. Pywo ti mesuwat yi wato hap ok tã atum yne epe i'ewyte ewat emiariru emiari­ru'in wuat'i e'at piaria pe atum mesuwat e'yi e.
ACT 7:5 Mio tã e ti sa'a­wy'i Tupana aha'a­se'i Aparãu me yt wẽtup i imẽpyt sese te turan. — Atimo­ty­py'i kahato ti aru esa'y­ru'in e. Ta'i mesuwat yi yne atum mesup epe e yt kat i hin te Aparãu e'yi meiũpiat te turan e. Yt ipyãtap ok tã i te he'yi turan e Etewãu.
ACT 7:6 Mi'i hawyi Tupana to'e Aparãu kape — Emiari­ru'in wyti aru 400 e'at i'aman mot turan na'yn ikohye­wyry kahato wanĩ­kaptia e'yi tote e. Itote ti aru esaipe piaria ho'opot kahato. Motpap wyti aru ta'a­tunug yt kat sa'up i e. Ta'i ta'a­tu­ho­'opot kahato wanĩ­kaptia py'a­setpe e Tupana aha'a­se'i Aparãu me e.
ACT 7:7 Ma'ato emiariru ko'i atomoe­ha­ky­'e'i haria ti aru ati'a­tu­'a­piheg kahato e. Aikope aikope emiariru ko'i tukup­te'en wanĩ­kaptia po pe turan areĩne'en i'atu­ka­wiano kahato hamo e. Yne yne esaipe­piaria ewanĩ­kaptia ati'a­tu­'a­piheg kahato aru e Tupana. Mi'i hawyi ati'a­tu­po­re­nõ'ẽ ti aru wanĩ­kaptia po pyi. 400 e'at i'aman mot hap ete ati'a­tu­kaykay aru mi'iria meikowo mesuwat e'yi kape i ra'yn e. Mi'i hawyi ti aru tõ'ẽ tõ'ẽ kahato esaipe­piaria yne meikowo uimõ­typot hamo e Tupana sa'a­wy'i aha'a­se'i Aparãu me e Etewãu.
ACT 7:8 Mi'i pote atiky­'esat yt kat i emusin sokpe e. Atiky­'esat yne esaipe­piaria esa'y­ru'in emiari­ru'in to'o­'ewy wẽtup ywania yn e. Mi'i pote eremusin sokpe tek'e. I'ewyte etitek esa'yru Isaki emusin sokpe e. Mi'i tã eipiit eweimo­herep pote uwe'in esaipe­piaria hap tuwekuap yt kat i eimusin sokpe hap ete e. Mi'i hawyi ti aru uwe e'ywania sese kuap hap topy­hu'at e Tupana Aparãu me sa'a­wy'i sese e Etewãu. Mi'i hawyi Aparãu ha'yru ra'yn Isaki tuwe­mo­herep e. Mi'i hawyi 8 e'at toĩne'en tuwe­mo­herep hawyi Aparãu tosa­'yru ahit pe toihep kyse hit wo aikotã Tupana mienoi ewy e. Mi'i hawyi Isaki sa'yru ra'yn Iako ai'y­wania ywot pot tuwe­mo­herep 12 ok ha'yru rakat ra'yn topy­hu'at e Etewãu. Iako sa'y­ru'in 12 ok takaria saipe­piaria kaipyi ti mesup watoĩ­ne'en 12 ok ywania aito hap watikuap ta'yn e. Mi'i hawyi wẽtup Iako sa'yru ti Iuse e.
ACT 7:9 Sa'a­wy'i Iuse ete iyke­'et'in te'e­ru­we­moe­ha­'y­wywi kahato mi'i pote ta'a­tu­we­neru ra'yn tama Esitu piaria pe. Itote itotiaria toi'a­tue­ropat yt kat sa'up i ta'atuium pytkai. Mi'i hawyi itote Iuse tuweran toĩne'en ma'ato Tupana yt i'atoiat hin i Esitu pe e.
ACT 7:10 Tupana tika­wiano kahato Iuse ho'opot hawiat heĩne'en hap ete e. Itote toimo­we'eg kahato po'og Esitu ywania kai. Mi'i pote yi Esitu piat morekuat Warãu tiky'e kahato Iuse. Toiky­'esat kahato to'yat piaria torania akag wo hap hawyi yi Esitu piat tu'isa koro wo ra'yn totopag Iuse temiit'in po'og torania kai e. Tuwehum kahato morekuat Warãu Iuse ete e.
ACT 7:11 Mekewat e'at pe yt kat i hin i itote i'aman yi Esitu pe i'ewyte yi Kanã'ã pe yt kat i hin i mi'i pote y'y yt kat i. Yt naku i kahato itote katu­pono topap ta'yn yne mikoi i'ewyte i'atu­hũria mi'u. Mi'i hawyi ai'y­wania aha'a­se­'i'in ete yt naku i topy­hu'at. Meiũran u'i yne ikahuro ra'yn aha'a­se'i Iako sa'y­ru'in yat rote.
ACT 7:12 Mi'i hawyi aha'a­se'i Iako tikuap ta'yn u'i kahato yi Esitu pe e hap toikuap hawyi toi'a­tu­po­'oro ra'yn tosa­'y­ru'in Iuse eyke­'et'in u'i kyi'at hamo e.
ACT 7:13 Mi'i hawyi i'atu­mierut u'i yt kat i hawyi toi'a­tu­po­'oro i ra'yn po'og u'i kyi'at hamo. Mi'i hawyi put'ok­'i­'a­tu'e yi Esitu pe hawyi tuwe­hyt'ok morekuat wato emiit akag Iuse yat pe. Mi'i hawyi Iuse tuwe­mo­herep ta'yn toyke­'et'in kape — Uito ti eheywyt sese Iuse to'e hamo e. Mi'i hawyi Iuse tomo­herep toeyke­'et'in yi Esitu piat morekuat koro Warãu kape ikuap hamo e.
ACT 7:14 Waku yne hawyi toikaykay to'ywot Iako tuwe­wawi tama Esitu kape. Mi'i hawyi tuwat ra'yn itotiaria Iako wywo 75 miit tuwat ra'yn aha'a­se­'i'in nimuaria mẽpyt'in e Etewãu to'auka teran haria pe.
ACT 7:15 Pyno uhyt'i'in ipot'apyk ta'yn aha'a­se'i sa'a­wy­'iwuat Iako tama Kanã'ã pyi tama Esitu kape e. Ta'i watikuap aikotã Iako toĩne'en mot'i yi Esitu tote hawyi itote iku'uro ra'yn hap watikuap e. I'ewyte aha'a­se­'i'in nimuat Iako sa'y­ru'in 12 ok takaria wyti yne topap yi Esitu tote e.
ACT 7:16 Ma'ato mi'iria yt ta'a­tusyp hin i Esitu pe ma'ato ta'a­tusyp ta'yn yi Kanã'ã pe aikope sa'a­wy'i Aparãu syp hawe mekewat tawa Sikẽi e hap tote. Ta'a­tusyp yne ahe'yian­miaria aikope sa'a­wy'i Aparãu tikyi'at nu ka'a uhyt Emu sa'y­ru'in kai sa'up mo yi Kanã'ã pe e.
ACT 7:17 Mi'i hawyi aha'a­se­'i'in emiariru ko'i te'e­ru­we­ty­py'i kahato aito wuaria nimuaria yi Esitu tote. Mi'i hawyi ti te'e­ra­'aipok teran i ra'yn yi Kanã'ã kape aikotã sa'a­wy'i Tupana to'e Aparãu me hap ewy ra'yn e.
ACT 7:18 Meiũran wẽtup ok morekuat i ra'yn topy­hu'at yi Esitu pe morekuat pakup. Mi'i ti yt ikuap i ra'yn aha'a­se'i Iuse etiat e.
ACT 7:19 Ta'i tuweu­ka'i kahato ra'yn sa'a­wy­'iwuat aito wuaria ete — Yt naku i kahato typy'i eimẽ­pyt'in meiũpe e ai'y­wania pe e. Mi'i pote o eweipugha ra'yn eha'y­ru'in i'atu­'y­wã'ĩ turan i'atu­ku­'uro hamo e morekuat pakup aha'a­se'i Musei ywã'ĩ hap e'at pe e.
ACT 7:20 Mi'i hawyi Musei ywã'ĩ hap e'at topy­hu'at ma'ato te'e­ra­'a­kasa ikahu kahato ra'yn hap kape hawyi i'ywot ity tomotag na'yn iheg me mye'ym ewaty ta'a­tu'yat pe e.
ACT 7:21 Wẽtup e'at pe ta'a­tupag Musei hire urutu wato pe y'y hit owa tote. Ta'a­tu­mõto i'anam me aikope yt uwe i ipuẽti kuap hap tote ta'a­tupag e. Ma'ato morekuat koro saki'yt tipuẽti Musei tuwei turan tuwak tuerut e. Mi'i hawyi totat ra'yn Musei hawyi — Uimẽpyt ra'yn e. Mi'i hawyi morekuat koro saki'yt tomotag na'yn Musei tomẽpyt no ra'yn e.
ACT 7:22 Meiũran morekuat timo­we'eg kahato Musei. Toimu'e kahato tosai­pe­piano. Toi'a­tu­mu'e kahato aikotã Esitu ywania more­kuaria mikuap ko'i yne toi'a­tu­mu'e e. Mi'i hawyi Musei itag hawyi — Ta'i tohepap kahato morekuat ewy i'atu'e Esitu ywania Musei pe e.
ACT 7:23 Toikuap yne hãpyk hap hawyi 40 i'aman mot pe tokosap hawyi Musei to'e tuwepe — Are pãi uhewyry teran na'yn ui'y­wania kape uiwa­'a­kasa hamo. Isareu ywania kape ara'a­kasa teran e Musei e.
ACT 7:24 Mi'i hawyi ta'a­kasa tewyry hap upi Esitu ywania esurara kape wẽtup ok to'y­wania ahyk hat kape ta'a­kasa. Mi'i hawyi Musei ipy'ahak ta'yn hawyi Esitu ywania esurara toi'auka ra'yn towy'ok po'ypyi e.
ACT 7:25 — Ta'i ui'y­wania tikuap hawyi ti aru uiky'e ra'yn e tuwepe. Ta'i Tupana mipo­'oro ti en wanĩ­kaptia po piat hat wyti en i'atu'e wyti aru ui'y­wa­nia'in e tuwa­nẽtup hawe tuwepe Musei. Ma'ato yt pywo pe hin i katu­pono mi'i hawyi wẽtup e'at i ra'yn toto hawyi toipuẽti to'y­wania typy ok wu'uka haria e.
ACT 7:26 Mi'i hawyi tokosap i'atu­mo­perup i hamo — Uheywyt'in e wãi eiwu­'uka tei'o e katu­pono wẽtup ok yn aha'a­se'i kaipywiat aito wẽtup ywania yn eipe pote yt naku i eiwu­'uka eiwo­'ope e.
ACT 7:27 Mi'i hawyi mekewat wu'uka hap nug hat to'e Musei pe — Motoro meiũpepyi e katu­pono yt urupo­rekuat hin i en e. Uwe pyno epo'oro meikowo urunãpin hamo e Musei pe.
ACT 7:28 Ui'auka teran en e aikotã ga'atpo eti'auka morekuat esurara hap ewy apo'e Musei pe.
ACT 7:29 Mio tã e pote Musei token'ẽ ra'yn morekuat pupi hawyi topopy ra'yn pya yi Esitu pyi e Etewãu. Mi'i hawyi mekewat yahig wato tote Musei hewyry ra'yn 40 anu tohũria apykok hap upi hewyry.
ACT 7:30 Mi'i tote toipuẽti teha­ry'i e. Mi'i tote typy ok ha'yru ra'yn tuwe­mo­herep e. Wẽtup e'at pe Musei toto ra'yn yity'ok Sinai kape hawyi itote ta'a­kasa hu yp wuk hap.
ACT 7:31 Mi'i hawyi aria py'a­setpe atipy piat miit ewywuat tuwe­mo­herep e. Mi'i hawyi tokosap ikuap hamo.
ACT 7:32 Mi'i hawyi toikuap Tupana ehay itote — Uito ti ewat e'ase­'i'in eTupana e. Uito ti e'ase'i Aparãu Isaki Iako eTupana e Musei pe. Mi'i pote Musei iwuwu kahato hawyi yt ta'a­kasa po'og neran i howawi — Araha'at Tupana sese kape pote meremo uiku­'uro e tuwepe.
ACT 7:33 Mi'i hawyi Tupana to'e Musei pe — Etihep to epy sokpe uimõ­typot hamo katu­pono meiũpe uimõ­typot hap e'yi tote ewyry e.
ACT 7:34 Ariot atipy kaipyi ai'y­wania ehakye­ra'at wanĩ­kaptia po pywiat hamo e. Yt naku i kahato ta'a­tu­ho­'opot yi Esitu pe e. Ara'a­kasa ra'yn yne yi Esitu piaria kape e. I'atue­ha­ky­'e'i kahato yi Esitu pe hap kape ara'a­kasa e. I'atu­mi­ky­ry'i kahato itote i'atuete uhehamo e. Ta'i i'atu­wo­'o­kak'i hap atikuap hawyi ti ariot atipy kaipyi i'atue­ha­kye­ra'at hamo e Musei pe. Woro­po­'oro mesup yi Esitu kape uhemiit'in pore­ra'at wanĩ­kaptia po pywiat hamo e Ahetu­pana Musei pe e Etewãu.
ACT 7:35 Pyno tomi­'airo Musei Tupana tipo­'oro temiit'in ehakye­ra'at hamo e. Ta'i toipo­'oro Musei yi Esitu kape tehay atipy kaipywiat enoi hamo e. Yt ta'a­tu­ky­'esat hin i Musei ta'a­tu­po­rekuat nuat pytkai Tupana tipo­'oro mi'i miit ai'y­wania sa'a­wy­'i­wuaria ehakye­ra'at hamo e. Tupana ihay mekewat aria'yp wuk hap kaipyiat turan toipo­'oro Musei temiit'in powyro hamo. Put'ok'e itote yi Esitu pe hawyi temiit'in sese te'e­ro'e — Uwe kahu epo'oro urupo­rekuat no urunãpin hamo i'atu'e Musei pe. Meimuẽ­wuaria e haria kape Tupana tipo­'oro Musei e Etewãu.
ACT 7:36 Ta'i iwato kahato Tupana esaika hap Musei timo­herep yi Esitu pe e. Mi'i hawyi toi'a­tu­po­re­nõtem na'yn ai'y­wania sa'a­wy­'i­wuaria wanĩ­kaptia po pyi e. Mi'i hawyi Musei timo­herep Tupana esaika hap hyemui'a koro y'y hup e hap tote e. Ta'i tutunug mu'ap y'y py'a­setpuo ihyemui'a koro sakpo e. Mi'i hawyi tuwat ihyemui'a sakpo yi gag upi wanĩ­kaptia po pyi e. Mi'i hawyi yahig wato tote 40 anu toimõ­typot Tupana iwat hesaika hamo e. Itote tutunug yt miit'in minug kuap i ko'i wuat'i ehamo e.
ACT 7:37 Ta'i ai'y­wania mi'atoiat Musei sa'a­wy'i topy­hu'at Tupana mi'airo mi'i miit pytkai e Etewãu to'auka teran haria pe. Ta'i nimuat Musei henoi yiannote Isareu ywania pe — Ui'y­wania e meiũran wyti aru Tupana tomo­wato kahato tomi­po­'oro ui'e­wywuat eipo­rekuat koro wo e. Mi'i Miit uhaipepiat sese tuwe­mo­herep aru wẽtup ahemia­riru e sa'a­wy'i Musei e.
ACT 7:38 Sa'a­wy'i toi'a­tu­nãpin kahato ai'y­wania Isareu ywania mekewat yity'ok Sinai e hap tote aikotã atipy kaipywiat henoi tope hap ewy tohenoi ahepe sa'a­wy'i sehay wuat'i e'at piat tohenoi ai'y­wania pe e.
ACT 7:39 Ma'ato aha'a­se­'i'in yt i'atupap teran hin i Tupana mimo­herep sehay wuat'i e'at pianuat upi e. Ta'a­tupun ne'i hawyi te'e­ru­we­morem neran yi Esitu kape i ra'yn e.
ACT 7:40 Mi'i hawyi te'e­ro'e Musei ywyt Arãu me — Etunug no Ahetu­pana epo wo mehĩ aipu'ap moherep hanuat i'atu'e. Katu­pono aipu'ap moherep hat eyke'et Musei ti toto ra'yn yity'ok kape i'atu'e. Mi'i hawyi mio yt uruikuap i ra'yn aikope toĩne'en Musei hap sio iku'uro sio yt i'atu'e Arãu me e.
ACT 7:41 Mi'i hawyi aha'a­se­'i'in tunug wewato ahup hit iã'ãkap ta'a­tue­tu­pana wo e. Mi'i ete te'e­ru­wehum kahato i'ewyte ai'y­wot'in tomõ­typot ta'a­tupo wuat ta'a­tu­minug wewato ahup hit e. Mi'i hawyi ti ta'a­tu­'auka ra'yn ta'a­tuhũ imõtypot hamo e. Mi'i hawyi ta'atuium hã'ãkap we — Waku kahato en tupana ta'a­tu'e hap wewato pe ai'y­wot'in nimuaria e. Ikahu kahato ahetu­pana i'atu'e to'ope e.
ACT 7:42 Mi'i hawyi Tupana to'e — Pyno waku eweipy­hu'at ehetu­pana wẽtup kawiat wywo e Tupana. Mi'i hawyi ta'a­tu­mõ­typot tupana wo at waty waikiru ko'i e. — Uruetu­pana kahato en at waty waikiru i'atu'e sa'ag aha'a­se­'i'in e.
ACT 7:43 Yt naku i ta'a­tu­mõ­typot tupana wo Tupana minug ko'i aikotã Tupana to'e miwan me hap ewy — Yt uimõ­typot hin i eipe — Uruimõ­typot En ewei'e uhepiat pytkai e Tupana. — Uruhũria urui'auka emõtypot haype ewei'e uhepe wen ma'ato atikuap kahato eheso hap e. Yt uimohey haria hin i eipe e. Atikuap eiwa­nẽtup hap eipy'a piat at ka'ap ehewyry uimi­po­'oro Musei upiat turan mekewat yahig wato tote turan. Yt uhowawi hin i eipy'a ko'i ma'ato mekewat ehetu­pana Moroki kape yn eipy'a e. — Waikiru Irenwã waku kahato ahetu­pana wo ewei'e eiwo­'ope itote e. Tupa­naria iã'ãkap ko'i wyti ewetunug kahato itote ehetu­pana ewywuat ko'i e. Mi'iria yn eweimõ­typot at ka'ap itote. — Uruimõ­typot kahato Aparãu eTupana ewei'e kahato yt pywo pe pytkai i e Tupana sese. Pyno woro­ho­'o­po­'oro eipe pya kahato ehe'yi wakuat kai wẽtup ywania kape wẽtup tama kape. Ehewa­nĩ­kaptia esura­ra'in po pe eweikup­te'en aru pya kahato ehe'yi uimiium wakuat kaipyi hawyi e. Ehewa­nĩ­kaptia yt nakuaria i po pe wyti aru eweikup­te'en e. Mekewat yi Papi­runia e hap kape woro­ho­'o­po­'oro aru e. Mi'i tote ehewa­nĩ­kaptia yt nakuaria i eropat hamo woro­ho­'o­po­'oro aru e Tupana sa'a­wy'i miwan me ai'y­wania pe Amosi 5.25-27 pe e.
ACT 7:44 Pyno yahig koro puo nimuaria ai'y­wania ikohye­wyry kahato e. Mi'iria pe Musei to'e — Waku watunug no Tupana yat koro meiũpe aikotã Tupana mimo­herep kat kupitu kat kupitu hap ewy e. — Waku ipe kawiat i'ewyte sokpe kawiat ewetunug uimõ­typot yat e Tupana uhepe e Musei e. Sa'a­wy'i Tupana ihay kahato ai'y­wania pe tomõ­typot yat sokpe kawiat puo.
ACT 7:45 Mi'i hawyi karãpe tuwe­hyt'ok yi Kanã'ã pe turan mekewat e'at pe Tupana mõtypot yat ipe kawiat ta'a­tue­reto yi Kanã'ã kape e. Ma'ato aha'a­se'i Musei yt teke i yi Kanã'ã pe katu­pono iku'uro Iũtãu hy sakpo yity'ok tote e. Mi'i hawyi Tupana ti'asyp itote e. Mi'i hawyi Musei saipepiat Iusue upi ra'yn tuwe­hyt'ok kahato tawa Kanã'ã pe nimuaria ahe'yian­miaria e. Mi'i hawyi yi Kanã'ã pe ta'a­tu­puẽti wẽtup ywania ko'i ra'yn ahewa­nĩ­kaptia sese yt nakuaria i ma'ato mi'iria Tupana ti'a­tu­sopo yne ra'yn hawyi tutum yi Kanã'ã ai'y­wania pe e. Mi'i hawyi toĩne'en na'yn Tupana mõtypot yat ipe kawiat yi Kanã'ã tote e. Mi'i hawyi ai'y­wania te'e­ru­we­mo­ty­py'i kahato itote e. Mi'i hawyi mehĩ Tawi topy­hu'at morekuat koro wo itote e.
ACT 7:46 Morekuat Tawi ete Tupana tuwehum kahato ra'yn e. Mi'i hawyi wẽtup e'at pe morekuat Tawi to'e — Uha'a­se'i Iako eTupana e atunug neran meiũpe ahe'yi Kanã'ã tote emõtypot yat sese e.
ACT 7:47 Mi'i hawyi — Waku esa'yru inug e. Mi'i hawyi morekuat Tawi iku'uro hawyi ha'yru morekuat Sarumãu tunug na'yn Tupana yat koro itote e.
ACT 7:48 Ma'ato watikuap ta'yn aikotã Ahetu­pana yt toĩne'en kuap i aipo wuat aiminug to'yat pe e Etewãu.
ACT 7:49 Kat pote nimo Tupana to'e — Atiky­'esat pote waku yne waikiru ko'i tote ara'apyk hawyi mytyp yne tote waku uipy heiam topy­hu'at e. Uiwato kahato. Yt areĩne'en neran i miit'in minug ui'yat ko'i pe e. Ui'yat wato hap ok tã yt uwe i inug kuap are katu­pono areĩne'en atipy pe i'ewyte areĩne'en yi tote e.
ACT 7:50 Uiwat uiminug yne yne waikiru sem hawyi at yi waty i'ewyte yne ipuat ko'i ati'a­tunug yne. Pyno aikotã aru pyno eipe ewetunug uheiam yi tote e Tupana miwan me Isaia 66.1-2 pe e Etewãu to'auka teran haria pe.
ACT 7:51 Ui'y­wania e sa'a­wy­'i­tepyi aha'a­se­'i'in tu'uka kahato Tupana miky­'esat nug hap ete e. Koitywy mi'iria ewywuaria eweikup­te'en eiperia e. Ta'i aha'a­se­'i'in ewywuaria kahato eweikup­te'en e. Ta'i eipy'a heg kahato aikotã ai'y­wania sa'a­wy­'i­wuaria ewy sese eweikup­te'en e. Tupana Pã'ãu miky­'esat ko'i yt ewetunug hin i eiperia e. Ipy'ahak sese rakaria wo eweikup­te'en Tupana piat eiky'e hap ete e. Ta'i eweho­'o­'o­kenhyp kahato wyti ehewaure ka'a ko'i Tupana ehay kape e. Aikotã ai'y­wania nimuaria ewy kahato ti ewetunug yt naku i sa'ag kahato Tupana mipo­'oro ko'i ete e. Ta'i Tupana mipo­'o­roria yne auka haria ti eipe ei'y­wot'in pot ko'i ewy e.
ACT 7:52 Ta'i Tupana ehay moherep haria sa'a­wy­'i­wuaria yne henoi henoi kahato Hemiit Wakuat ut hamuat hap ma'ato mi'iria ete wyti aha'a­se­'i'in ti'a­tu­mi­ky­ry'i kahato hawyi ta'a­tu­'a­tu­'uka sa'ag ne'i e. Ta'i aha'a­se­'i'in ewywuaria eweikup­te'en katu­pono ga'atpo Tupana tipo­'oro Temiit Wakuat Aipo­rekuat nuat sese aikotã to'e hap ewy wen ma'ato Mi'i Miit Wakuat eweima'at sa'ag ne'i hawyi ti ewei'auka sa'ag ne'i aria'yp posak tote e Etewãu to'auka teran haria pe.
ACT 7:53 Ta'i i'ewyte Tupana mipo­'o­roria atipy kaipy­wiaria henoi hãpyk kahato Musei pe Tupana ehay Mi'i Miit etiat einãpin hamuat wen ma'ato yt eweimohey hin i i'atu­mi­mo­herep ko'i e. Atipy kaipy­wiaria ehay pun haria eipe e Etewãu to'auka teran haria pe.
ACT 7:54 Mi'i hawyi mio tã e pote i'atu­py­'ahak kahato ra'yn Etewãu ete kyry'et kyry­'et­'i­'a­tu'e.
ACT 7:55 Ma'ato Tupana Pã'ãu Wakuat no toĩne'en kahato Etewãu ete. Mi'i hawyi teha'at atipy kape Etewãu. Mi'i tote Tupana mimõ­typot hap ẽtyhot hap itote ta'a­kasa. Mi'i turan — Aheyke'et Iesui itote e.
ACT 7:56 Eweha'at ro Tupana po sese kawiat ipoĩ'ãm na'yn e. Are pãi ikahu kahato ikahu kahato e. Waku kahato itote. Ewehe­ha'at ro e Etewãu i'atuepe.
ACT 7:57 Mi'i hawyi — Wãi'i­'a­tu'e yt naku i e hat i'atu'e. Epo'inik to katu­pono yt uruikuap teran i po'og ehay i'atu'e ta'a­tuehay pirik wo. Mi'i haype meremo te'e­ru­we­waure ka'a hik ta'a­tupo wo. Mi'i hawyi torania itotiaria tuwat tuwat Etewãu ehay monik hamo.
ACT 7:58 Mi'i pote ta'a­tu­po­re­nõtem Etewãu tawa Ieru­sarẽi myi. Mi'i hawyi i'auka haria te'e­re­ka­misa hep ium ta'a­tu­'akag kurum iwasu Sauru po pe. Mi'i hawyi Sauru to'e tesu­ra­ra'in me — Ewei'auka ro Etewãu nu wo e haty wo.
ACT 7:59 Mi'i hawyi mak mak'e i'atu'e nu wo Etewãu auka hamo. Mi'i turan Etewãu ihay haty wo — Uika­'iwat Iesui epo pe ra'yn atum uipã'ãu e.
ACT 7:60 Mio tã to'e hawyi tuwe­pỹ­'ã­tutuk hawyi — Uika­'iwat eti'a­tu­ky'e yn na'yn o yne ui'auka haria e. Waure wo ereĩne'en ui'auka hap kai e haty wo hawyi ipyhu tek'e hawyi iku'uro ra'yn toket sese. Mi'i tã hap ewy ta'a­tu­'auka aiwy Etewãu hawyi atiwan mesuwe uimiwan me. Uito ti mekewat mohag nug hat Iruka.
ACT 8:1 Mekewat e'at turan kurum iwasu Sauru timoma teran yne Iesui mohey haria tawa Ieru­sarẽi totiaria. Toi'a­tu­sa­ty'i saty'i kahato Aika­'iwat emiit'in yne. Mi'i hawyi i'atue­ha­ky­'e'i kahato itote imohey haria. Mi'i pote te'e­ro­popy kahato pya tawa Ieru­sarẽi kaipyi Sauru piat ta'a­tu­'a­tu­'uka hap pupi. Mi'i hawyi te'e­ru­we­sytpok kahato aikope aikope waku hap kape kat etawa hit kape kat etawa wato kape tuwat tuwat. Irania'in tuwat yi Samaria kape ma'ato irania'in tuwat yi Iuteu kape. Ma'ato Iesui saipe­piaria 12 ok takaria yt te'e­ro­popy hin i tawa Ieru­sarẽi kaipyi.
ACT 8:2 Mi'i hawyi Iesui mohey haria koro ko'i tuwat ta'a­tuwy Etewãu piit syp hamo. Ta'a­tu­'asyp turan paa'i­'a­tu'e kahato iky'e haype. Ta'a­tusyp hawyi te'e­ruwak kahato itote iky'e kahato haria pote.
ACT 8:3 Mi'i hap e'at pe i'atu­'akag Sauru timoma kahato Iesui mohey haria tawa Ieru­sarẽi miaria. Mi'i pote yne i'atu'yat puo teke teke toi'a­tu­moma teran haype. Ihainia'in i'ewyte hary­po­ria'in toi'a­tu­he­rep'i herep'i yi upi hawyi toi'a­tu­pyhyp wo'o­pyhik hawe. Mi'i tet pupi irania'in Iesui mohey haria te'e­ru­we­sytpok kahato tawa Ieru­sarẽi kaipyi te'e­ru­we­nõ'ẽ.
ACT 8:4 Mi'i hawyi ma'ato kat etawa pe kat etama pe aikope aikope te'e­ro­py­hu'at hap tote ta'a­tu­'a­tu­sytpok kahato sehay wakuat yne Iesui etiat.
ACT 8:5 Mi'i hawyi mekewat 7 ok takat Wiripi toto yi Samaria kape. Mi'i hawyi itote topot­mu'e tehay wo — Iesui ti Tupana Mi'airo Aipo­rekuat nuat e.
ACT 8:6 Mi'i hawyi Wiripi po puo Tupana timo­herep kahato itotiaria pe tesaika hap. Iwato kahato toimo­herep wakuap ko'i yt miit minug kuap i hap ewy tutunug Wiripi po wo. Mi'i pote yi Samaria piaria te'e­ra­ha'at kahato i'ewyte te'e­ru­wa­nẽtup kahato hawyi — Uhyt mimi koitywy uruimohey ra'yn Iesui ti rat Tupana Sa'yru i'atu'e. Pywo ti rat emienoi Wiripi i'atu'e.
ACT 8:7 Mi'i pote Iesui ti'a­tu­sopo kahato ahiagnia yi Samaria ywania piit pyi Wiripi po wo. Toi'a­tu­sopo turan kak'i­'a­tu'e kak'i­'a­tu'e ahiagnia. Ikag mot'i rakaria toi'a­tu­moe­hãite kahato. Yt hewyry kuap i rakaria toi'a­tu­moe­wyry i ra'yn. Ipiit heg nakaria toi'a­tupiit mope­rup'i i ra'yn.
ACT 8:8 Mi'i pote yi Samaria totiaria — Waku sakpo waku sakpo En Tupana i'atu'e ta'a­tuehay wepit kahato popuo.
ACT 8:9 Waku kahato yi Samaria tote wen ma'ato toĩne'en itote wẽtup ok paini Simãu e hap het rakat. Mi'i ti tomikuap ewy inug topo wo yt pywo piat i. Toimo­herep kat ko'i kat ko'i miit'in atumo­pe­rup'i hap katu­pono toiky­'esat topo pe yne miit'in haype itotiaria tomohey hap toiky­'esat. Mi'i pote to'e — Pywo ti rat Tupana mipo­'oro ahepaini wuat e Simãu miit'in ma'at hamo.
ACT 8:10 — Uito ti po'og po'og torania kai e Simãu itotiaria pe. Mio tã to'e pote i'atupap kahato paini koro upi — Pywo ti rat paini Simãu ni Tupana misepap nug kuap hat sese i'atu'e tu'i­saria itotiaria.
ACT 8:11 Meremo topo wuat tominug ko'i wo paini ti'a­tu­mo­pe­rup'i yne tawa piaria yi Samaria piaria. Ma'ato topo wo meremo hap wywo toi'a­tu­ma'at kahato miit'in tominug yt pywo piat i hamo.
ACT 8:12 Mekewat e'at pe put'ok'e Wiripi itote yi Samaria tote Iesui moherep i'atuepiat hamo are. Mi'i hawyi tohenoi henoi aikotã miit'in tunug Ta'a­tu­po­rekuat no Tupana hap ko'i tohenoi — Ta'i Tupana tipo­'oro ra'yn wyti Aporekuat sese uiwy­ria'in e. Iesui ti Tupana Mi'airo Aheha­kye­ra'at hanuat e. Pyno — Woro­mohey En Iesui ewei'e ro hawyi atiky­'esat En Iesui Uipo­typot no ewei'e ro mesup uhyt'i'in mana'in e Wiripi yi Samaria totiaria pe. Mio tã e hawyi te'e­ru­wehik ta'yn Wiripi mienoi Iesui etiat ete. Mi'i hawyi ta'a­tu­mohey ra'yn Wiripi mienoi Iesui etiat. Waku mi'i hawyi toi'a­tu­set'ok ta'yn mi'iria itotiaria hary­po­ria'in ihainia'in y'y wo Iesui set upi. — Woro­ho­'o­set'ok Iesui mohey haria y'y wo e Wiripi i'atuepe.
ACT 8:13 Mi'i hawyi mekewat paini Simãu timohey ran hawyi tuwe­set'ok ta'yn mi'i y'y wo. Mi'i hawyi toto ra'yn Wiripi upi katu­pono toiky­'esat Wiripi esaika hap ewy — Atiky­'esat Wiripi esaika hap ewy e. Wiripi ewywuat areĩne'en hawyi mono paini koro wo areĩne'en aru Wiripi ewy e Simãu tuwepe. Mi'i hawyi ipap kahato Wiripi upi. Ta'a­kasa teran iminug ko'i yt miit'in minug ewywuat i hap ko'i kape. — Aikotã som tutunug e tuwa­nẽtup hawe paini.
ACT 8:14 Mi'i hawyi meiũran Iesui potmu­'eria 12 ok takaria tikuap ta'yn aikotã yi Samaria piaria Tupana ehay upi ra'yn te'e­ro­py­hu'at hap. Mi'i hawyi ta'a­tu­po­'oro ra'yn uhyt Peteru uhyt Iuwãu ikuap hamo.
ACT 8:15 Peteru Iuwãu put'ok­ta­'a­tu'e hawyi ta'a­tu­hẽtup Tupana kape Topã'ãu Wakuat ium Samaria ywania piat hamuat ta'a­tu­hẽtup.
ACT 8:16 Katu­pono sa'a­wy'i Wiripi ti'a­tu­set'ok y'y wo Iesui mohey haria itotiaria wen ma'ato Topã'ãu Wakuat Tupana yt tum i te mekewat ywania pe.
ACT 8:17 Mi'i pote Peteru Iuwãu te'e­ru­we­ponug Iesui mohey haria pakup i ko'i ete hawyi — Tupana i'atu'e etum no Epã'ãu Wakuat Esa'yru mohey pakup i haria pe i'atu'e. Mi'i hawyi ta'a­tusat ra'yn hawyi i'atukai kahato ra'yn Tupana Pã'ãu Wakuat.
ACT 8:18 Mi'i hawyi paini Simãu tikuap ta'yn hawyi — Are pãi atiky­'esat kahato Peteru Iuwãu esaika hap e. Pyno aru atikyi'at hawyi atum aru Ipã'ãu uhemiit'in me e tuwepe tuwa­nẽtup hawe. Mi'i hawyi to'e — Mehĩ Peteru e atiky­'esat etum uhepe esaika hap Mã'ãu ium kuap uhepiat hamuat e. Etum na'yn uhepe hawyi ti aru sa'up atum iwato kahato epe e.
ACT 8:19 Waku kahato areĩne'en e'ewy mehĩ katu­pono mi'i hawyi atum kuap Ipã'ãu uhepiat iky'esat haria pe e'ewy e paini. I'ewyte atiky­'esat ewat esaika hap Tupana ewywuat. Mi'i pote atum neran e'ewy Mã'ãu uimi­ky­'esat ewywuat nug haria pe. Pyno etum no uhepe esaika hap hawyi uito wy atum kahato ha'up epe e Peteru pe.
ACT 8:20 Ma'ato Peteru tiwesat — Uhyt e uiwa­nẽtup hawe ti aria koro wuat'i e'at piat hap kapiat en e. Esa'up uato hap yt kan hamo i Tupana miium kyi'at hamo e. Waku Tupana tipo­'oro esa'up uato aria koro kape ewywo e. Yt naku i rat erewa­nẽtup paini e katu­pono yne Tupana miium ko'i yt kat sa'up i yt uwe i ikyi'at kuap e. Yt naku i — Atikyi'at teran Tupana miium e.
ACT 8:21 Ewanẽtup hap ti yt Tupana kape hin i e. Yt ehepap hin i uruwywo epotpap hap e.
ACT 8:22 Pyno ehẽtup to po'og yn na'yn Uruka­'iwat pe — Atoiat yne teran uiminug sa'ag ko'i hawyi koitywy woro­mohey En yn uheha­kye­ra'at hamo ere ro Uruka­'iwat Iesui pe katu­pono ti mi'i yn ipotput­'ok'e emowa­nẽtup kahu hamo emowe'eg hap nug hamo paini e.
ACT 8:23 Mi'i yn emohãpyk kuap e. Yt ikahu hin i wyti ewanẽtup hap e. Yt ehay se hin i wyti mio tã ere e. Ahiag po pe sese wyti ereĩne'en e i'ewyte eminug yt naku i hap eko po pe wyti ereĩne'en ne en e Peteru paini Simãu me.
ACT 8:24 Mi'i hawyi paini paa'e kahato hawyi to'e haty wo Peteru pe — Ehẽtup to Tupana pe uheha­kye­ra'at hamo mehĩ e. Yt atiky­'esat kahato i e'e hap ewy topy­hu'at uhete Tupana kaipyi e paini Simãu Peteru pe.
ACT 8:25 Mi'i hawyi Peteru Iuwãu ti'a­tu­mu'e kahato itotiaria tawa Samaria totiaria yne Iesui mienoi nug hamuat hap ete. Mi'i hawyi te'e­ra­'aipok tawa Ieru­sarẽi kape ma'ato mu'ap upi ta'a­tu­henoi henoi yne ra'yn tawa Ieru­sarẽi kape mu'ap upiaria tawa hit upi ta'a­tuenoi yi Samaria piaria pe ta'a­tuenoi.
ACT 8:26 Mekewat e'at pe Tupana tipo­'oro temiit atipy kaipywiat Wiripi kape tehay enoi hamo. — Ereto ro meiũpepyi Wiripi e Tupana. Ereto ro yi Samaria pyi at posak pe mekewat yahig muat mu'ap upi tawa Ieru­sarẽi pywiat tawa Kasa kapiat upi e Tupana mipo­'oro Wiripi pe.
ACT 8:27 Mi'i hawyi toto ra'yn yahig koro kape Wiripi Tupana e hap ewy. Mi'i hawyi itote teha'at hawyi ta'a­kasa mekewat mu'ap upi yi Etiopia potypot hary­poria kawiat mana Kantasi emiit'in akag potpo­'oro kape. Mi'i ti yi totiat yara piat kape ta'a­kasa ta'aipok ta'yn tawa Ieru­sarẽi myi tetama Etiopia kape. Mi'i tote sa'a­wy­'ite Ieru­sarẽi kape toto hawyi toto­mõ­typot itote Tupana. Waku yne hawyi ta'aipok tetama kape i ra'yn. Mi'i miit topy­hu'at Etiopia piat hary­poria kawiat morekuat Kantasi ekare'en i'ewyte teti­neiru yne ipo piat hat. Morekuat Kantasi ekat yne apykok hanuat topy­hu'at.
ACT 8:28 Mi'i hawyi mekewat yara puo tuwe­mu'e at Tupana miwan ete. Isaia miwan ete tuwe­mu'e toimo­wẽpap apyk pe pytkai ihũ Kawaru ko'i he'yara heroto yi upi hetama Etiopia kape.
ACT 8:29 Mi'i howawiat Wiripi eha'at turan Tupana to'e — Ereto ro Wiripi. Ereput ro mekewat yara upi e.
ACT 8:30 Mio tã e hawyi pun'e ra'yn hupi Wiripi. Mi'i hawyi put'ok'e mekewat miit morekuat powyro hat ete. Mi'i turan mekewat miit tomo­wẽpap ta'yn Tupana ehay moherep hat Isaia miwan. Wiripi tikuap hawyi tuwẽ­powat — Etikuap apo kat e kat e tohenoi iwan me mehĩ e.
ACT 8:31 Mi'i pote toiwesat — Yt rat uhyt e. Yt uwe i rat uimu'e mi'i pote rat yt atikuap kuap i rat e ma'ato uimu'e pote ti ren meremo atikuap e. Mio tã to'e hawyi — Pyno ereke ro uhyt era'apyk to meiũpe ui'ya­type e.
ACT 8:32 Sa'a­wy­'iwuat Tupana mienoi Isaia piat ete tuwe­mu'e kahato. Mio tã e Isaia — Aikotã aihũ Uweuira toto to'auka hamo hawyi yt tu'uka hin i to'auka haria wywo e. Mi'i hap ewy wyti aru Uimi­po­'oro toto to'auka hamo e. I'ewyte aikotã aihũ mẽpyt yt ihay hin i wahap'ok hap e'at pe hap ewy ti aru Uimi­po­'oro yt wãi'e i toho­'opot hap e'at pe e.
ACT 8:33 I'ywania yt timõ­typot hin i Uimi­po­'oro hawyi yt kat hamo i ta'a­tu­'auka sa'ag e. Ta'a­tuwat ta'a­tu­minug yt ikahu i pote yt ta'a­tu­ky­'esat i henoi hap. Mi'i pote sa'ag kahato ta'a­tu­mohit e. Yt hãpyk hin i more­kuaria titek Uimi­po­'oro e. Yt naku i kahato aru i'auka haria te'e­ro­py­hu'at wuat'i e'at pe e Tupana e Isaia pe Isaia 53.7-8 kaipyi toimo­wẽpap.
ACT 8:34 Mi'i hawyi apo'e Wiripi pe — Pyno Isaia henoi tuwetiat apo sio wẽtup ok etiat tohenoi yianmete e.
ACT 8:35 Mi'i hawyi Wiripi tiwesat topy'a pyi — Ta'i yt tuwetiat i wyti tohenoi ma'ato Tupana Mipo­'oro Aheha­kye­ra'at hat Iesui etiat wyti Tupana ehay moherep hat Isaia henoi sa'a­wy'i ahepe yianme miwan me e Wiripi. Mi'i hawyi toimo­herep yne mekewat miwan me Iesui etiat mekewat morekuat emiit pe.
ACT 8:36 Mi'i hawyi put'ok­'i­'a­tu'e y'y ete. Mi'i hawyi Morekuat powyro hat to'e — Meiko y'y uhyt waku apo uhet'ok en meikowat y'y pe e Wiripi pe.
ACT 8:37 Mio tã e pote — Ta'i mehĩ e pywo etomohey Iesui toĩne'en Ehakye­ra'at hat epy'a pe pote ti waku woro­set'ok e. Mi'i hawyi toiwesat — Uhyt e pywo ti rat atomohey sakpo'e Iesui ti Aipo­rekuat nuat Tupana Mipo­'oro e. Mi'i Miit ti Tupana Sa'yru sese atomohey kahato mehĩ e Wiripi pe. — Pyno waku e Wiripi.
ACT 8:38 Mi'i hawyi morekuat emiit akag to'e temiit'in me — Ewemo­py­hu'at ro meremo uhe'yara mesuwe yẽpeke mu'ap tote e. Mi'i hawyi yara yi totiat pyi tuwe­nõ'ẽ y'y kape. Mi'i hawyi tuwe­hyt'ok y'y pe. Mi'i hawyi Wiripi het'ok ta'yn mi'i.
ACT 8:39 Mi'i hawyi tuwe­nõ'ẽ y'y pyi hawyi yt tuwekuap i ra'yn Wiripi katu­pono Tupana Pã'ãu tioto ra'yn meremo itote pyi hawyi yt uwe i ra'yn yahig note Wiripi. Mi'i hawyi morekuat emiit toto ra'yn tetama kape iwepit kahato ra'yn tuwehum kahato ra'yn Tupana ete.
ACT 8:40 Mi'i turan Wiripi tuwe­mo­herep i ra'yn tawa Asutu pe. Mi'i hawyi tawa Asutu piaria toi'a­tu­mu'e kahato Iesui ete. Mi'i hap totepyi toto i ra'yn Sesareia kape ma'ato toto turan yne tawa hit upi toi'a­tu­mu'e yne mu'ap upi tokosap mo. Mi'i hap atikuap hawyi atiwan mesuwe uito Iruka.
ACT 9:1 Mekewat e'at pe mekewat Sauru e hap het rakat toĩne'en Ieru­sarẽi me. Mi'i ti ipy'ahak kahato po'og Iesui mohey haria ete — Ati'a­tu­'uka yne Iesui emiit'in e Sauru topy'a pe. Ati'a­tu­moma torania eipe e haty wo ipotmu­'eria pe. Eimoma hap yn atiky­'esat e. Mi'i haype toto ra'yn pa'i koro kape Ieru­sarẽi miat kape.
ACT 9:2 Mi'i hawyi to'e pa'i koro pe — Uipo­'oro ro en tawa Tamaku kape katu­pono atiky­'esat kahato atikat teran mekewat wẽtup mu'ap mohey haria itotiaria e. Ta'i ihainia'in i'ewyte hary­po­ria'in imohey haria ati'a­tu­pytyk pytyk teran hawyi ti atero­po'ok teran meikowo ewawi Ieru­sarẽi kape i'atu­'a­piheg hamo e. Mi'i tupono ti emiwan atiky­'esat ekaipyi uipo­'oro epiat hap mi'i hap nug hamo mehĩ e Sauru pa'i koro pe. Mi'i hawyi tutum Sauru pe mekewat ipo'oro hap miwan etiat. Mio tã to'e — Tawa Tamaku piaria Iuteuria pa'i ko'i e ewetunug no yne Sauru miky­'esat ko'i ewy e miwan me.
ACT 9:3 Mi'i hawyi Sauru toto tawa Tamaku kape yi upi. Mi'i hawyi porap put'ok'e tawa Tamaku tote turan meremo put'ok'e Sauru ete ariãty hẽtyhot kahato rakat. Mi'i hawyi hẽtyhot py'a­setpe toĩne'en.
ACT 9:4 Mi'i pote Sauru ta'at yi tote hawyi toikuap sehay — Sauru Sauru e kat hamo ten uhaty'i haty'i en e.
ACT 9:5 Mi'i pote toiwesat — Uweĩ En Mehĩ e. Mi'i hawyi — Uito rat Emisa­ty'i saty'i sese Iesui e toiwesat.
ACT 9:6 — Sauru e epoĩ'ãm no hawyi ereto ro tawa Tamaku kape. Itote ti aru etikuap ta'yn aikotã waku etunug hamuat hap e Iesui.
ACT 9:7 Itote ti Sauru wyria'in ikuap ta'yn wy atipy kaipywiat sehay ma'ato ihay rakat yt te'e­ra­'a­kasa i. Mi'i pote yt kat i'atu'e kuap i ra'yn. Mi'i hawyi Sauru i'ãpe­'ok'am yi totepyi hawyi mehit'e wen ma'ato yt ta'a­kasa i ra'yn yt kat i heremo.
ACT 9:8 Mi'i hawyi ta'a­tu­ky­'esat eroto ra'yn mu'ap upi tawa Tamaku kape yt ihapytig i pote.
ACT 9:9 Itote mye'ym e'at yt kat i ta'a­kasa. Yt kat i tutu'u teran yt te'y'u i wyti Sauru.
ACT 9:10 Mi'i hawyi tawa Tamaku pe wẽtup ok Iesui emiit toĩne'en Anania e hap het rakat.
ACT 9:11 Mi'i pe imu'etu Iesui to'e — Anania ereĩne'en apo'e. Mi'i pote — Ta'i areĩne'en Uika­'iwat e. — Pyno epoĩ'ãm no katu­pono woro­po­'oro teran Iuta yat kape mekewat mu'ap hãpyk takat rotiat yat kape e. Put'ok­'ere Iuta yat piat hawyi ti aru etikat Sauru e hap het rakat tawa Tasu piat wemotag hat.
ACT 9:12 Katu­pono tohẽtup ta'yn mesup uhowawi e. Mio Sauru ta'a­kasa ra'yn tomu­'etu ewawi Anania e. Pyno ereke to'yat piat hamuat hap kape ta'a­kasa ra'yn tomu­'etu e. Epo wuat tomoe­ha­pytig hamuat hap toikuap ta'yn tomu­'etu e Anania pe.
ACT 9:13 Mi'i hawyi Anania tiwesat — Uika­'iwat e uruikuap kahato ti mekewat miit e. Ta'i yt naku i kahato ti mekewat Sauru e. Ta'i irania'in henoi kahato uhepe mekewat miit etiat — Mi'i miit wyti Iesui mohey haria tawa Ieru­sarẽi miaria mosa­ty'i saty'i hat sese wyti i'atu'e.
ACT 9:14 Mesup ta'yn wyti tut urupo'i po'i hamo Uhyt e. Ta'i pa'i kororia mipo­'oro ti Sauru urupyhik hanuat e Anania.
ACT 9:15 Mi'i hawyi Iesui to'e — Ta'i atikuap ta'yn wen ma'ato ereto ro Sauru kape katu­pono uipo piat ra'yn wyti mi'i. Uimi­'airo sese ra'yn mi'i e. Ta'i atipo­'oro wyti aru Sauru wuat'i ywania kape uhenoi hamo e. More­kuaria piat uimo­herep hamo wyti aru atipo­'oro Sauru e. Isareu ywania pe i'ewyte irania'in ywania pe ti aru atipo­'oro mi'i miit e.
ACT 9:16 Ma'ato ti aru uimo­herep turan aikope aikope toto hap tote toho­'opot kahato aru uhetiat uhehay enoi hap upi e. Yt tuwe­mõti hin i ti aru uhet moherep miit'in miat turan e. Mi'i pote ti aru toho­'opot kahato uimo­herep wuat'i ywania puo turan e. Ho'opot kahato hap wyti aru atomo­herep Sauru pe e Iesui Anania pe.
ACT 9:17 Mi'i hawyi toto ra'yn Anania Sauru kape Tupana piat topo­'oro hap ewy. Put'ok­to'e hawyi Anania tuwe­ponug hawyi to'e — Uiwy'ok Sauru e Aika­'iwat Koro Iesui uipo­'oro mesup emoehãite hamo e. Ga'atpo tuwe­mo­herep epe mu'ap upi e. Mi'i Miit uipo­'oro mesup katu­pono toiky­'esat kahato ehapytig sese hap i'ewyte tutum neran epe Topã'ãu Wakuat yn e Sauru pe Anania.
ACT 9:18 Mio tã e hawyi hewo ra'yn pira pe ewywuat Sauru eha pyi hawyi ihapytig i ra'yn hawyi i'ãpe­'ok'am na'yn hawyi Anania het'ok ta'yn y'y wo.
ACT 9:19 Mi'i hawyi ti Sauru tenuk i ra'yn. Waku hawyi hesaika i ra'yn. Mi'i hawyi Sauru toĩne'en mot'i Iesui mohey haria wywo tawa Tamaku pe.
ACT 9:20 Mi'i hawyi itote tohenoi kahato haty wo — Iesui ti Tupana Sa'yru sese e to'y­wania Iuteuria pe ta'a­tu­wo­'o­mu'e hawe Tupana mõtypot yat pe.
ACT 9:21 Mio tã e pote te'e­ro'e to'ope — Iesui mohey haria atu'uka hat ra'yn apo meiũ i'atu'e. Pa'i kororia mipo­'oro Iesui mohey haria po'i po'i hanuat apo meiũ miit i'atu'e i'ywania to'ope.
ACT 9:22 Ma'ato Sauru henoi po'og ne'i wakuap. Toi'a­tu­mo­pe­rup'i tehay wo tawa Tamaku piaria — Pywo pe ti Iesui ti Tupana Mipo­'oro Miit'in Porekuat nuat e.
ACT 9:23 Toi'a­tu­mu'e kahato at ka'ap pote — Wãi'i­'a­tu'e ma'ato toi'a­tu­mu'e te hawyi — To'iro wati­'auka Sauru i'atu'e. To'iro wati­mo­po­'inik ihay sa'ag i'atu'e to'ope Iuteuria.
ACT 9:24 Ma'ato Sauru tikuap ta'yn i'atu'e hap tetiat to'auka irane hap. Mi'i hawyi topopy teran tawa Tamaku pyi wen ma'ato sura­ra'in tipyhyp ta'yn mekewat oken'ypy wato i'auka hamo.
ACT 9:25 Ma'ato wãtym na'yn hawyi Iesui mohey haria tipo­wyro ra'yn iwẽtem hap ete yrysakag wato pe. Ta'a­tu­mo­'apyk ta'yn yi kape haity pe tawa ekurara ywaiti rakat sakpo ta'a­tue­nõtem na'yn Sauru yi kape.
ACT 9:26 Tawa sakpo hawyi topopy ra'yn Sauru tawa Ieru­sarẽi kape. Put'ok'e Sauru tawa Ieru­sarẽi note hawyi toto teran Iesui mohey haria wywo ma'ato yt te'e­ru­wehik teran hin i Sauru ete kat pote te'e­ro­ken'ẽ ipupi katu­pono yt ta'a­tu­mohey i te Iesui mohey hano toĩne'en hap pote.
ACT 9:27 Ma'ato mekewat mehĩ Panãpe tipo­wyro kahato Sauru. Mi'i hawyi motpo­'o­roria 12 ok takaria kape totioto Pauru imohey Iesui etiat hap enoi hamo. Mi'i hawyi Panãpe to'e i'atuepe — Aika­'iwat Iesui ti tuwe­mo­herep ta'yn Sauru pe tawa Tamaku kapiat mu'ap tote e Panãpe. Mi'i tote ti ta'a­kasa ra'yn Aipo­typot Iesui kape e. Mi'i hawyi ti ai'ewy ra'yn toimohey Iesui e. Pywo ti rat Iesui mohey hat sese wo mio Sauru e. Ta'i tohenoi kahato ra'yn Iesui tawa Tamaku piaria pe e Panãpe.
ACT 9:28 Mi'i hawyi motpo­'o­roria 12 ok takaria — Waku kahato i'atu'e. Mi'i hawyi Sauru topy­hu'at i'atu­wywo ra'yn. Mi'i hawyi hewyry kahato i'atu­wywo ra'yn tawa Ieru­sarẽi me. Karãpeĩ tuwat Ieru­sarẽi myi hawyi Sauru toto i'atu­wywo i'atue­wyry hap upi Iesui ehay moherep hamo.
ACT 9:29 Mi'i hawyi Sauru tomo­herep kahato ra'yn tehay wakuat Iesui etiat yne miit'in me. Yt uwe pupi i ra'yn token'ẽ — Tupana Mipo­'oro Aheha­kye­ra'at hat ti Iesui e torania pe Sauru. Mi'i hawyi itote Sauru henoi kahato itotiaria Kereku pusu kuap haria pe. I'ewyte yne Iesui etiat tohenoi at ka'ap kahato. Yt ipo hep hin i. Mi'i hawyi apo apo'i­'a­tu'e Sauru pe i'atu­mikuap ok tã niatpo sese sehay wen ma'ato waku pe yne toi'a­tu­wesat. Mi'i hawyi tu'uka kahato teran ta'a­tuehay wo. — Pyno waku wati­'auka mekewat Sauru i'atu'e to'ope.
ACT 9:30 Mi'i hawyi Iesui potmu­'eria tikuap ta'yn Sauru auka teran itotiaria piat hap. Mi'i hawyi Sauru ta'a­tue­reto ra'yn wẽtup tawa kape mekewat tawa Sesareia kape i ra'yn. Mi'i hawyi tawa Sesareia pyi ta'a­tu­po­'oro mehĩ Sauru y'y wato sakpo ra'yn tetawa Tasu e hap kape i ra'yn yara puo.
ACT 9:31 Mi'i hawyi Iesui mohey haria waku pe i ra'yn tukup­te'en tawa Ieru­sarẽi me katu­pono i'atu­sa­ty'i saty'i haria i'atu­'uka teran haria i'atu­pohep porap'i pote. Waku i'atu'e to'ope. Mi'i hawyi te'e­ru­we­moe­saika kahato ra'yn Iesui mohey hawe. I'atu­wepit ra'yn. Mi'i hawyi yt uwe pupi i te'e­ro­ken'ẽ.
ACT 9:32 Mekewat e'at pe Peteru hewyry i ra'yn yne tawa puo Iesui mohey haria pakup i rakaria Tupana mimo­wa­kuaria miit'in upi ikuap hamo. Meiũran put'ok­to'e tawa Irita pe. Mi'i tote toĩne'en Iesui mohey haria wywo.
ACT 9:33 Mi'i hawyi itote Peteru tipuẽti Eneia e hap het rakat 8 i'aman mot pe toĩne'en yni pe at ka'ap yt hewyry kuap i rakat pote.
ACT 9:34 Mi'i hawyi to'e Peteru tope — Mehĩ Eneia e Aipo­rekuat Iesui ti emopoĩ'ãm na'yn mehĩ e. Pyno epoĩ'ãm no uhyt hawyi eti'ok­po'i ro e'yni hawyi ewyry ro e Peteru tope. Mio tã e hawyi meremo ipoĩ'ãm.
ACT 9:35 Karãpeĩ tawa Irita piaria i'ewyte Tawa Saruna piaria te'e­ra­'a­kasa Iesui mimo­poĩ'ãm kape hawyi te'e­ru­we­morem kahato Aika­'iwat kape. Te'e­ruwat ra'yn ta'a­tue­tu­pa­naria kaipyi.
ACT 9:36 Mi'i hawyi tawa Iope pe wẽtup ok hary­poria Iesui miky­'esat nug hat toĩne'en. Mi'i ti mana Turaka e hap het rakat. Mi'i hary­poria inug waku kahato at ka'ap. Toi'a­tu­po­wyro kahato miit'in miwaure ko'i. Toi'a­tupoi hesy'at rakaria. Iwese kahato hap toimo­herep yne ihaky­'e'i rakaria pe. Toi'a­tu­po­wyro hatek takaria. Teka­re'en ahyt toimõ'ẽ yt hekat i rakaria pe. Wẽtup het Tapita i'atu'e Kereku pusu kuap haria.
ACT 9:37 Ma'ato mekewat e'at i'ahu kahato ra'yn hawyi mana Turaka iku'uro ra'yn. Mi'i hawyi wẽtup ok tei i'okpuk hawyi okipy ywaiti tote ta'a­tupag iku'uro rakat.
ACT 9:38 Mi'i hawyi Iesui potmu­'eria tawa Iope totiaria tikuap ta'yn Peteru ieĩne'en tawa Irita piat hap. Tawa Irita yt pya hin i tawa Iope kaipyi toĩne'en. Mi'i pote ipotmu­'eria tipo­'oro ihainia typy ok Peteru kape kat hamo meremo. Ta'a­tu­puẽti hawyi — To'iro tawa Iope kape meremo Peteru i'atu'e. Mi'i pote meremo toto ra'yn i'atu­wywo.
ACT 9:39 Mi'i hawyi put'ok'e ra'yn itote hawyi Peteru ta'a­tue­ra'am okipy ywaitiat kape. Itote hiwu ko'i te'e­ruwak kahato ta'a­tu­po­wyro hat mana Tapita iku'uro hap haty kahato i'atuete pote. Mi'i hawyi hiwu ko'i timo­herep Peteru pe iku'uro rakat minug sokpe ko'i mana Tapita miium i'atuepiat sa'a­wy­'iwuat ko'i — Mimi i'atu'e mi'i tã mana Tapita tum tominug sokpe uruepe sa'a­wy'i urueha­ky­'e'i pote i'atu'e ta'a­tuwak popuo.
ACT 9:40 Mi'i hawyi Peteru to'e i'atuepe — Mana'in pywo ti rat atikuap ta'yn e. Pyno uhehay teran Tupana wywo e. Pyno ui'atoiat mesuwe porap'i e. Tuwat hiwu ko'i itote pyi hawyi Peteru tuwe­pỹ­'ã­tutuk hawyi to'e — Iesui e etimoieĩ­ne'en i ro mana Tapita e. Mi'i hawyi tuwe­morem i'okpuk takat kape hawyi to'e — Mana Tapita epoĩ'ãm no gu'uro pyi e. Mi'i hawyi mehit'e ra'yn mana Tapita hawyi teha'at ra'yn Peteru kape. Mi'i hawyi mana Tapita tuwe­'ã­pe­'ok'am na'yn te'yni pyi.
ACT 9:41 Mi'i hawyi Peteru tat mana Tapita ipo ete hawyi toimo­poĩ'ãm na'yn he'yni pyi. Mi'i hawyi ta'am na'yn. Mi'i hawyi Peteru ti'a­tu­kaykay imohey haria itotiaria i'ewyte hiwu ko'i. Put'ok­'i­'a­tu'e hawyi toimo­herep mana Tapita i'atuepe.
ACT 9:42 Meiũran mekewat sehay yne Iope piaria tikuap Iesui piat mana Tapita moieĩne'en pakup i ra'yn hap hawyi ti ta'a­tu­mohey kahato ra'yn Aipo­typot Iesui.
ACT 9:43 Mi'i hawyi Peteru topy­hu'at pot'i tawa Iope pe towy'ok Simãu yat pe mekewat miat atukã'ã hat yat pe toĩne'en. Yne mesuwat atikuap hawyi atiwan mesuwe uito Iruka.
ACT 10:1 Mekewat e'at pe toĩne'en tawa Sesareia pe wẽtup ok sura­ra'in akag Kuneriu e hap het rakat. Typy'i kahato iwat hesu­ra­ra'in ko'i. Mekewat Itaria ywania esura­ra'in ko'i akag wo toĩne'en tawa Sesareia pe.
ACT 10:2 Surara koro Kuneriu ti waku hap nug kahato hat toĩne'en i'ewyte topy'a pywiat Tupana mohey hat sese toĩne'en. Yne i'yat piaria imẽpyt'in ihary'i Tupana mohey haria tukup­te'en itote. Surara Kuneriu timõ'ẽ kahato tekat ko'i Iuteu ywania ihaky­'e'i rakaria pe. Ihay kahato at ka'ap Tupana wywo topy'a pyi mi'i miit.
ACT 10:3 Wẽtup e'at pe surara Kuneriu topotpap kahu ra'yn hawyi wãtym'i kape ta'a­kasa ra'yn tomu­'etu Tupana mipo­'oro atipy kaipywiat hap kape. Mi'i hawyi atipy kaipywiat sut hat to'e — Surara Kuneriu ereĩne'en apo'e.
ACT 10:4 Mi'i pote Kuneriu gyt'e hawyi teha'at kahato ra'yn Tupana mipo­'oro atipy kaipywiat kape hawyi toiwesat — Areĩne'en meiũpe Uika­'iwat e. Kat e hap som Tupana tiky­'esat atunug hap e. Mi'i pote mekewat atipy kaipywiat tiwesat — Mehĩ e pywo ti rat ehay tewawiat hap kape ti Tupana tuwehum kahato e. I'ewyte emimõ'ẽ ihaky­'e'i rakaria powyro hap ko'i Tupana mowepit kahato hap topy­hu'at mehĩ e. Tuwehum kahato tomõ­typot hap eminug ko'i ete mehĩ e.
ACT 10:5 Mi'i tupono toiky­'esat etipo­'oro epotpo­'o­roria tawa Iope kape hap e. Mi'i totepyi toiky­'esat eti'a­tu­kaykay temiit'in Simãu Peteru ewawi mehĩ e.
ACT 10:6 Hemiit Peteru ti toĩne'en wẽtup ok Simãu yat pe y'y Ukyt Koro hy ẽpekiat ieĩne'en hat yat pe e. Miat pe mokã'ã nug hat yat pe toĩne'en mekewat y'y wato ẽpekiat tote e. Pyno etikaykay ro mekewat Peteru ewewawi mehĩ emu'e hamo katu­pono Tupana tiky­'esat etunug hap e atipy piat surara akag Kuneriu pe.
ACT 10:7 Mio tã to'e hawyi ta'aipok i ra'yn atipy kape. Mi'i hawyi surara akag Kuneriu tikaykay tuwe­wawi typy ok temiit'in sese i'ewyte temiit sese surara kawiat Tupana mohey kahato hat toikaykay.
ACT 10:8 Toi'a­tu­kaykay tuwe­wawi temiit'in sese mye'ym ok hawyi toimo­herep tomu­'etu wuat i'atuepe. Mi'i hawyi — Pyno mũki­'ite woro­ho­'o­po­'oro tawa Iope kape mekewat Peteru kat hamo e i'atuepe.
ACT 10:9 Ihot'ok hawyi tuwat ra'yn Peteru kat hamo. Atpo­sake porap turan put'ok­'i­'a­tu'e ra'yn mekewat y'y wato ẽpekiat yt pya hin i mekewat Simãu yat ete. Mi'i turan Peteru ta'am na'yn getap okipy ywaiti rakat rote Tupana wywuat tehay hamo e.
ACT 10:10 Mi'i tote hesy'at kahato Peteru tomi'u nug Simãu miat turan. Mi'i hawyi tomu­'etu wuat ewy ta'a­kasa. Mi'i turan teha'at atipy kape.
ACT 10:11 Mi'i hawyi ta'a­kasa ika'a atipy pe oken'ypy ewywuat. Mi'i puo mysop iwato rakat ikytsig nakat ewywuat ta'a­kasa ika'a pyi ta'apyk yi kape hap ta'a­kasa 4 haity i'apy etiat rakat ta'a­kasa.
ACT 10:12 Mi'i mysop kytsig muo Peteru ta'a­kasa kat ko'i kat ko'i mi'u pu'i ko'i yt naku i to'y­wania mi'u wuat rakat kape ta'a­kasa. Moi ko'i Uruwu ko'i ga'apy piat ipyt etiat hewyry rakat ko'i yt naku i Iuteuria mi'u wuat rakat ko'i kape ta'a­kasa tomu­'etu.
ACT 10:13 I'ewyte toikuap sehay atipy kaipyi — Peteru e epoĩ'ãm no hawyi eti'a­tu­'uka ro meimẽwat mi'u emi'u wo mehĩ e. Ehu'u ro uimiium emi'u wuat mi'u pu'i e.
ACT 10:14 Ma'ato Peteru tiwesat — Yt naku i rat mi'i ewywuat uimi'u pu'i Uika­'iwat e katu­pono meimẽwat ipu'i yt naku i aimi'u wo aito Iuteuria ywania pote Mehĩ e. Ta'i uimotag hap upi mesup te yt karãpe i mi'i tã meimẽwat mi'u pu'i ewywuat atu'u pãi Uhyt e. Yt naku i mi'i aimi'u wo e.
ACT 10:15 Mi'i hawyi toikuap pakup i sehay atipy kaipywiat — Wãi mio tã ere tei'o e katu­pono kat ko'i kat ko'i pu'i Tupana ti'a­tu­mo­waku kahato mi'i pote waku kahato yne aimi'u wo e.
ACT 10:16 Mye'ym mo ta'a­kasa tomu­'etu wuat ewywuat hawyi ta'aipok i ra'yn mekewat sokpe kawiat miat eiam.
ACT 10:17 Mi'i hawyi Peteru tuwa­nẽtup kahato — Kat e hap som Tupana to'e teran uimu­'etu e. Kat ko'i som toimo­herep teran uhepe e tuwepe tuwa­nẽtup kahato hawe. Mi'i turan surara Kuneriu mi'a­tu­po­'o­roria wẽtup ywania put'ok­'i­'a­tu'e ra'yn itote. Ma'ato mi'i ywania wywo yt karãpe i Iuteuria i'atuehay.
ACT 10:18 Mi'iria oken'y­pyke pyi te'e­ru­watka — Simãu Peteru toĩne'en apo meiũpe i'atu'e.
ACT 10:19 Mi'i turan Peteru tuwa­nẽtup tumu­'etu wuat kape hawyi Tupana Pã'ãu to'e tope
ACT 10:20 — Pyno ereto ro i'atue­wawi e. Yt ereken'ẽ tei'o i'atu­pupi katu­pono uimi­po­'o­roria yne meimuẽ­wuaria e Tupana Peteru pe.
ACT 10:21 Mi'i hawyi Peteru ta'apyk getap okipy ywaitiat kaipyi yi kape. Mi'i hawyi to'e i'atuepe — Uito ti meiũ eimikat e. Kat hamo uikat eipe e i'atuepe.
ACT 10:22 Mi'i hawyi ta'a­tu­wesat — Ta'i uruka­'iwat Kuneriu urupo­'oro ewawi uhyt i'atu'e. Uruka­'iwat ti 100 ok surara akag wo ieĩne'en hat urupo­'oro mehĩ i'atu'e. I'ewyte uru'akag ni Tupana mohey kahato hat toĩne'en i'atu'e. Toimõ­typot Etupana yn i'atu'e. Waku kahato urupo­'oro hat. Hãpyk yn nug wuat'i e'at piat hat uhyt i'atu'e. Yne e'ywania Iuteuria uruetawa totiaria ikuap uruka­'iwat Kuneriu ewaku hap i'atu'e. Ga'atpo ti Tupana Pã'ãu Wakuat ihay kahato uruka­'iwat pe — Etikaykay ro uhemiit Peteru e'yat kape enãpin hamo e uru'akag Kuneriu pe i'atu'e. Mi'i pote mesup ti urupo­'oro ewawi toiky­'esat ereto tewawiat hap mehĩ i'atu'e Peteru pe.
ACT 10:23 — Pyno meiũpe ro ehewãtym hawyi mũki­'ite waku watuwat eika­'iwat yat kape e. Pyno eiwe­hyt'ok to uhyt'i'in e Peteru meimuẽwat Itaria ywania pe. Ihot'ok hawyi toto ra'yn Peteru i'atuupi i'ewyte Iesui potmu­'eria tawa Iope piaria irania'in tuwat Peteru upi.
ACT 10:24 Wẽtup e'at pe tuwat hawyi put'ok­'i­'a­tu'e ra'yn tawa Sesareia pe. Mi'i tote mehĩ Kuneriu hekatup kahato ra'yn Peteru ihay kuap hamo. Mi'i pote toi'a­tunug yne kahato to'y­wot'in toty'in towy­ria'in toi'a­tu­kaykay Peteru ehay kuap hamo to'yat kape.
ACT 10:25 Mi'i hawyi Peteru put'ok'e Kuneriu yat e'oken­'y­pyke hawyi meremo Kuneriu tuwe­pỹ­'ã­tutuk howa kape tepiat Peteru mõtypot hamo ma'ato Peteru timo­poĩ'ãm ne'i.
ACT 10:26 Mi'i hawyi to'e — Wãi yt uimõ­typot tei'o Tupana ewy mehĩ kat pote uito miit kawiat e'ewywuat e.
ACT 10:27 Mi'i hawyi i'yat pe Peteru teke to'oehay to'oehay popuo. Mi'i hawyi put'ok­'i­'a­tu'e ra'yn okipy koro tote hawyi Peteru teha'at hawyi i'atu kahato miit'in tukup­te'en itote Itaria ywania.
ACT 10:28 Mi'i hawyi Peteru tuwẽ­powat i'atue­wawi — Uhyt'i'in mana'in e yt naku i wyti uruto Iuteu ywania irania'in ywania wywo to'oe­waku i'atu'e ti urueko enoi haria uruepe e. Ha'a­wy­tepyi mio tã i'atu'e uruepe urumu'e haria are wen ma'ato ga'atpo Tupana tomo­herep uhepe tehay sese mi'i hap ete. Mio tã to'e — Peteru e yt etimohit rei'o wẽtup ywania e. Yt naku i ei'y­wania yt ere tei'o irania'in ywania pe e uhepe e. Yt Tupana mi'ai­roria ei'y­wania yt ere tei'o wẽtup ywania pe e Tupana uhepe e.
ACT 10:29 Mi'i tupono ti ariot meremo ehowawi mesup eimi­ky­'esat ewy e. — Yt naku i areto ei'yat kape yt are'e hin i uikaykay haria pe e. Yt urueko ewy i pytkai ariot ra'yn mehĩ'in mana'in e. Ma'ato kat hamo uikaykay hap yt atikuap hin i te e. Pyno ewehenoi ro kan hamo uikaykay meikowo hap e Peteru surara Kuneriu ywania pe.
ACT 10:30 Mi'i hawyi Kuneriu tiwesat — Mehĩ Peteru e ga'atpuo re ga'atpo wãtym'i uhehay Tupana wywo meiũpe ui'yat pe turan ara'a­kasa wẽtup ok miit hesokpe mehit kahato rakat kape e.
ACT 10:31 Mi'i miit to'e uhepe atipy kaipyi — Kuneriu e Tupana tikuap kahato ra'yn ehay tewawiat hap e. Ta'i Tupana tikuap ta'yn ihaky­'e'i rakaria piat ekare'en mõ'ẽ hap mehĩ e.
ACT 10:32 Mi'i pote waku etipo­'oro emiit'in tawa Iope kape Tupana emiit Simãu Peteru kat hamo e. Mi'i miit toĩne'en wẽtup ok Simãu y'y wato hy ẽpekiat ieĩne'en hat miat pe mokã'ã hap nug hat yat pe e ti uhepe atipy kaipywiat e.
ACT 10:33 Mi'i hawyi meremo woro­kaykay uruewawi Tupana miky­'esat ewy e. Pywo ti rat waku kahato eriot hap mehĩ e. Mi'i pote ti urutu­wa­'a­tunug kahato meiũpe mesup ehay kuap hamo mehĩ e. I'ewyte ti uruikuap ta'yn Tupana toĩne'en meiũpe hap e. Mi'i pote ehenoi ro uruepe aikotã som yne yne imiky­'esat ewywuat hap e surara Kuneriu Peteru pe.
ACT 10:34 Mi'i hawyi Peteru to'e tehay wo — Mehĩ'in mana'in e mesup ti atikuap sese ra'yn Tupana wuat'i ywania ky'e hat koro toĩne'en hap e. Ta'i toi'a­tu­ky'e wuat'i miit'in pãi e. Sa'a­wy'i uruto Iuteu ywania Tupana miky'e ko'i tukup­te'en hap kape yn arewa­nẽtup e ma'ato koitywy atikuap ta'yn aikotã to'o­'e­wy­'ewy toi'a­tu­ky'e wuat'i pusu kuap haria topy'a pe uruky'e hap ok tã ne hap atikuap ta'yn e Peteru surara Kuneriu Itaria ywania pe.
ACT 10:35 Ta'i Tupana tuwehum kahato yne tama kaipy­wiaria tomohey haria ete. Wakuap nug haria ete tuwehum hap atikuap ta'yn e.
ACT 10:36 Mesup ta'yn Tupana tipo­'oro ra'yn uru'y­wania pe temiit Iesui wuat'i ywania ehakye­ra'at hanuat e Peteru. Koitywy ti Tupana Mipo­'oro topy­hu'at aipu'ap Tupana kapiat hat e. Mesup mio tã e Tupana wuat'i pe — Koitywy waku ra'yn eweiõ'ẽ uhowawi katu­pono Uha'yru Iesui tunug na'yn aiwo­'opiat wo'o­wese hap e. Ta'i mesup ti aiwo­'oe­waku hap tutunug na'yn e. Sa'a­wy­'ite ti uruepe Isareu ywania pe yn mio tã e ma'ato mesup wuat'i ywania pe mio tã e — Uhemiit Iesui ti atunug na'yn Wuat'i Pore­kuaria Porekuat no e Tupana wuat'i pusu kuap haria pe e Peteru.
ACT 10:37 Ta'i eweikuap ta'yn ni yne Iesui tawa Nasare piat ieĩne'en hat etiat e katu­pono sa'a­wy'i yne tawa Iuteu kaipy­wiaria henoi kahato ra'yn heĩne'en i hap ehepe e. Sa'a­wy'i ahet'ok hat Iuwãu het'ok Iesui. Mi'i hawyi Iesui ha'a­wynug na'yn topotpap hap uruetama Karireia pe e. Mi'i hap etiat yne eweikuap ta'yn e.
ACT 10:38 Mi'i tote sa'a­wy'i Tupana tum na'yn yne tesaika hap. — En ni Uimi­'airo miit'in yne Ehakye­ra'at hanuat e. Mi'i pote woro­moieĩ­ne'en Uipã'ãu Wakuat no e Tupana sa'a­wy'i Iesui tawa Nasare piat pe e. Mi'i hawyi hewyry kahato urumu'e hamo urumoe­hãite hamo uruwo­'oe­waku hamo wakuap yn nug hamo ahiagnia yne atusiu hamo katu­pono Tupana Pã'ãu Wakuat toĩne'en iwywo uhyt'i'in mana'in e Peteru.
ACT 10:39 Iesui tawa Nasare kaipywiat kape ti uruta­'a­kasa kahato ra'yn mana'in uhyt'i'in e. Pywo ti Mi'i Miit ehay yne ti uruikuap ta'yn yi Iuteu piaria etama pe tawa Ieru­sarẽi me hewyry hap upi e. Mi'i tote ti ta'a­tu­'auka sa'ag na'yn aria'yp posak ete Tupana emiit e. Yt naku i kahato ti ta'a­tunug Uruwy pe e.
ACT 10:40 Ma'ato miit'in mi'auka Tupana tomo­poĩ'ãm i ra'yn gu'uro pyi pãi e. Ta'i mye'ym e'at toĩne'en gu'uro piat hawyi tuwẽtem i ra'yn Ha'yru e. Ta'i heremo kahato pãi are katu­pono tuwẽtem gu'uro pyi hawyi ti ipiit sese kape ara'a­kasa yne uito e Peteru.
ACT 10:41 Mi'i Miit Iesui tuwe­mo­herep uruepe e. Uruta­'a­kasa ra'yn urutoria yne imi'airo ko'i sese. Ipiit sa'a­wy­'iwuat ihãite kahato i ra'yn e. Ma'ato ti irania'in yt imohey i haria pe yt tuwe­mo­herep i e. Mi'i pote yt yne i miit'in te'e­ra­'a­kasa Iesui tuwẽtem hawyi ma'ato uruto ipotmu­'eria sese uruta­'a­kasa kahato Iesui piit sese kape e. Urutenuk ta'yn iwywo pãi. Urutu­we­sa­po'u ra'yn iwywo toĩne'en i ra'yn hawyi pãi e Peteru.
ACT 10:42 Mana'in mehĩ'in mio tã e Tupana ahepe mesup — Koitywy atimo­py­hu'at Uha'yru wuat'i miit'in eropo'ok hanuat e. Uha'yru ewaku hap yn put'ok'e uwe waku uwe yt e hap enoi uhepiat hamo e. Uha'yru yn waku wuat'i ywania pat'ok pat'ok hamo sio uhemiit sese sio yt e hamo e. Katu­pono meiũran map haria i'ewyte ihãite rakaria te'e­ro­py­hu'at Uha'yru po puo irane uimohey haria sese sio yt hap enoi hamo e Tupana e Peteru. Koitywy Tupana urupo­'oro ehowawi mehĩ'in mana'in katu­pono toikuap teran eipe Tosa­'yru mohey haria wo sio yt hap. Mi'i haype Tupana urupo­'oro Tosa­'yru moherep uruehay wuat hamo ehowawi wẽtup ywania pe e Peteru.
ACT 10:43 Mi'i pote yne tomohey haria minug sa'ag ko'i toipuruk kuap ta'yn aikotã sa'a­wy­'i­wuaria Tupana ehay enoi haria mienoi ewy — Atipo­'oro aru Iesui Wuat'i Ywania Ehakye­ra'at hanuat i'atu'e hap ewy e Kune­riu'in me.
ACT 10:44 Mio tã e Peteru turan Tupana Pã'ãu Wakuat put'ok'e ra'yn ikuap haria pe.
ACT 10:45 Mi'i hawyi ipotmu­'eria Peteru wywo hewyry rakaria Iuteu ywania te'e­ru­wa­nẽtup kahato hawyi — Pywo ti rat Tupana tum na'yn Topã'ãu Wakuat surara Kuneriu ywania pe yt uru'y­wania hin i mi'iria pytkai i'atu'e te'e­ru­wa­nẽtup hawe.
ACT 10:46 Tupana Pã'ãu Wakuat teke hawyi i'atuehay wẽtup pusu puo. Wẽtup pusu puo ra'yn Tupana Pã'ãu Wakuat kaipyi i'atuehay itotiaria. Mi'i hawyi itotiaria timõ­typot kahato ra'yn Tupana.
ACT 10:47 Mi'i hawyi Peteru to'e to'y­wania Iuteuria pe — Ewei'a­kasa ro aikotã mesup Tupana tum na'yn Topã'ãu Wakuat Itaria ywania piat hap e aikotã tutum ahepe sa'a­wy­'iwuat hap ewy mehĩ'in mana'in e. Mi'i tupono apo waku wati­'a­tu­set'ok mi'iria y'y wo sio yt e Peteru to'y­wania pe. Mi'i hawyi — Waku i'atu'e.
ACT 10:48 Mi'i pote Peteru to'e surara Kune­riu'in me — Mesup ta'yn waku woro­ho­'o­set'ok Iesui set no uhyt'i'in mana'in e Peteru. Mi'i hawyi toi'a­tu­set'ok Iesui mohey haria. Mi'i hawyi i'atu'e Peteru pe — Eropy­hu'at ro meiũpe uruwywo mehĩ mimi i'atu'e. Mi'i hawyi Peteru toĩne'en porap'i itote wẽtup ywania wywo. Mi'i hap ewy Kune­riu'in te'e­ro­py­hu'at Iesui mohey haria wo. Atiwan yne mi'i tã etiat mesuwe uito Iruka.
ACT 11:1 Mi'i hawyi irania'in 12 ok takaria tikuap ta'yn aikotã wẽtup ywania timohey Tupana ehay Peteru wẽ pywiat hap. Mi'i hawyi meremo yne yi Iuteu piaria Iesui mohey haria — Pywo ti rat mesup ta'yn irania'in ywania — Uruimohey ehay Tupana i'atu'e ai'y­wania ewy i'atu'e to'ope.
ACT 11:2 Mi'i hawyi ta'aipok Peteru tawa Ieru­sarẽi kape yi Sesareia kaipyi hawyi irania'in Iesui mohey haria Iuteu ywaniaria sese i'atu­py­'ahak Peteru ete katu­pono toi'a­tu­mu'e ra'yn irania'in ywania pote.
ACT 11:3 Put'ok'e Peteru hawyi ta'a­tuewãi kahato — Kat pote som ewyry irania'in ywania wywo uhyt i'atu'e. I'ewyte kat hamo erenuk wẽtup ywania wywo uhyt i'atu'e Peteru pe.
ACT 11:4 Mi'i hawyi Peteru henoi kahato tewyry yne ra'yn hap i'atuepe.
ACT 11:5 Mio tã e toi'a­tu­wesat — Uhyt'i'in mana'in waku kahato Tupana katu­pono tawa Iope pe toimo­herep uhepe tehay. Ga'atpo areĩne'en tawa Iope piat turan areto uhehay Tupana wywuat hamo e. Mi'i hawyi itote herewe kahato ara'a­kasa uimu­'etu atipy kaipywiat sokpe iwato rakat kawiat heiam 4 haity hẽpe etiat rakat. Mi'i ta'apyk uhowawi atipy kaipyi saity ko'i upi. Mi'i hap kape ara'a­kasa uimu­'etu.
ACT 11:6 Mi'i hawyi araha'at hawyi ara'a­kasa mekewat mysop puo miat topyt wuat hewyry rakat ko'i. Mi'i ko'i yt naku i yne aimi'u wo aito Iuteu ywania pote. Mi'i hap ko'i kape ara'a­kasa. Araha'at hawyi itote moi ko'i i'ewyte weita ko'i hawyi uruwu ko'i yt naku i aimi'u wuat rakat ko'i kape ara'a­kasa.
ACT 11:7 Mi'i hawyi atikuap sehay — Peteru e epoĩ'ãm no hawyi eti'a­tu­'uka ro emi'u wo uimiium ko'i hawyi etu'u ro e.
ACT 11:8 Mi'i hawyi atiwesat — Uika­'iwat yt naku i atu'u mi'i ko'i are katu­pono yt naku i watu'u mi'i aito Iuteu ywania pote e. Yt atiky­'esat hin i mi'u pu'i meimuẽwat ko'i Uika­'iwat are itote uimu­'etu. Ta'i yt karãpe i mi'u pu'i yt naku i rakat mi'i atopag uiwẽ pe are uimu­'etu e Peteru.
ACT 11:9 Mi'i hawyi to'e i uhepe ywaiti pyi sehay — Waku emi'u wo e Tupana epe pote waku etu'u mehĩ e uhepe e. Yt mi'u i yt ere tei'o Tupana mimo­waku ko'i kape e katu­pono toi'a­tu­mo­waku ra'yn meimuẽwat ko'i e.
ACT 11:10 Mi'i ewywuat ti ara'a­kasa mye'ym mo herewe uimu­'etu hawyi te'e­ra­'aipok i ra'yn miat sa'ag ko'i yt ai'y­wania mi'u ewy hin i ko'i e.
ACT 11:11 Uimu­'etu tokosap hawyi meremo ara'a­kasa mye'ym ok miit kape oken'ypy tote put'ok­'i­'a­tu'e Simãu yat pe yi Sesareia kaipy­wiaria surara akag Kuneriu mi'a­tu­po­'oro ko'i uhowawi e.
ACT 11:12 Mi'i hawyi Tupana Pã'ãu to'e uhepe uipy'a pe — Ereto ro i'atu­wywo Peteru e. Yt ereken'ẽ tei'o i'atu­pupi e. Yt ere'e tei'o epy'a pe — Yt naku i areto wẽtup ywania wywo yt ere tei'o. Mi'i hawyi areto mekewat wẽtup ywania wywo. I'ewyte Iesui mohey haria itotiaria tipo­'oro 6 ok ai'y­wania uheywyt'in uhupi. Mi'i hawyi meiũran put'ok­'u­ru­to'e tawa Sesareia pe e Peteru.
ACT 11:13 Mi'i hawyi Kuneriu henoi ra'yn aikotã atipy kaipywiat henoi tepiat hap — Etikaykay ro tawa Iope piat Simãu Peteru e hap.
ACT 11:14 Mi'i ti aru henoi ehepe Eheha­kye­ra'at hat etiat i'ewyte emẽpyt'in me hawyi e'yat piaria pe tohenoi Eheha­kye­ra'at hanuat etiat e Kuneriu uhepe atipy kapywiat henoi tepiat hap etiat.
ACT 11:15 Mi'i hawyi itote ati'a­tu­mu'e surara Kuneriu ywania turan Tupana Pã'ãu put'ok'e kahato i'atue­wawi hawyi teke i'atupiit puo i'atu­py'a puo aikotã sa'a­wy'i ahowawi put'ok'e hap ewy aikotã sa'a­wy­'iwuat aito Iuteuria kapiat hap ewy put'ok'e to'ewy Tupana Pã'ãu meimuẽwat wẽtup ywania puo e.
ACT 11:16 Mi'i hawyi mi'i hap kape ara'a­kasa hawyi atikuap meremo Aika­'iwat Iesui mienoi sa'a­wy­'iwuat aikotã hap e mio tã e — Iuwãu ni ehet'ok y'y wo mesup e. Ma'ato meiũran wyti aru Tupana ra'yn ehet'ok Topã'ãu Wakuat no ra'yn e hap atikuap i ra'yn e Peteru.
ACT 11:17 Aikotã ai'y­wania pe Topã'ãu tutum hap ewy te ti mi'iria ywania pe tutum na'yn Topã'ãu Wakuat pãi e. Ta'a­tu­mohey ra'yn Aipo­rekuat Aika­'iwat Iesui hawyi tutum na'yn Topã'ãu i'atuepe e. Mi'i tupono ti yt naku i aipyhyp ne'i Tupana miium i'atuepiat e Peteru Iesui mohey haria Iuteu ywania pe.
ACT 11:18 Ta'a­tukuap ta'yn Peteru mienoi hawyi i'atu­po­'inik ta'yn. Mi'i hawyi te'e­ro'e — Waku kahato En Tupana i'atu'e katu­pono etum na'yn eieĩne'en hap wuat'i e'at piat wẽtup ywania pe i'atu'e. Yt uruepe yn i katu­pono wẽtup ywania i'ewyte eti'a­tu­morem na'yn yt naku i hap kaipyi i'atu'e Iuteu ywania Tupana pe.
ACT 11:19 Sa'a­wy'i mekewat Etewãu auka hap e'at pe mekewat Iesui mohey haria ho'opot kahato hap e'at sa'a­wy'i miit'in Iesui mohey haria te'e­ro­popy kahato ta'a­tu­'a­tu­'uka hap pupi. Tuwat tuwat kahato kat etawa kat etawa kape te'e­ru­we­sytpok kahato wuat'i tama kape. Irania'in tuwat yi ywypyi'a y'y wato py'a­setpiat Sipiri kape. Irania'in tuwat tawa Antiokia kape. Irania'in tuwat tama Wenisia kape. Put'ok­ta­'a­tu'e hawyi ta'a­tu­hytpok kahato sehay wakuat Iesui etiat aikope aikope tuwat tuwat hap upi wen ma'ato irania'in ywania itotiaria pe yt ta'a­tu­henoi hin i. Ta'a­tu­'y­wania Iuteu ywania pe yn ta'a­tu­henoi Iesui etiat — Yt naku i wati­'a­tu­mu'e irania'in ywania i'atu'e to'ope sa'a­wy'i pote e.
ACT 11:20 Ma'ato wẽtup e'at pe Iesui mohey haria tawa Sirene piaria i'ewyte yi a Sipiri totiaria tuwat kahato tawa Antiokia kape. Put'ok­'i­'a­tu'e hawyi ta'a­tu­henoi ra'yn Kereku pusu kuap haria pe — Iesui ti Tupana Mipo­'oro Aipo­rekuat nuat sese i'atu'e.
ACT 11:21 Mi'i hawyi Aika­'iwat Iesui ti'a­tu­po­wyro kahato tuwe­mo­herep hamuat hap ete. Mi'i tupono ti Kereku ywania pusu kuap haria te'e­ru­we­morem kahato ra'yn Aheha­kye­ra'at hat Iesui kape. Mi'i hawyi typy'i kahato ra'yn imohey pakup i haria wẽtup ywania Kereku pusu kuap haria tukup­te'en tawa Antiokia pe.
ACT 11:22 Mi'i hawyi Ieru­sarẽi miaria Iesui mohey haria tikuap ta'yn aikotã Kereku ywania i ra'yn Iesui mohey hap. Mi'i hawyi mehĩ Panãpe ta'a­tu­po­'oro tawa Antiokia kape.
ACT 11:23 Put'ok­to'e hawyi iwepit kahato topy­hu'at — Ta'i Tupana ti'a­tu­ky'e kahato mesuwat ywania aikotã toi'a­tu­ky'e uru'y­wania hap ewy kahato e Panãpe tuwepe — Ta'i tutum ne'en ne'i Topã'ãu mesuwat wẽtup ywania pe aikotã tutum uru'y­wania piat pe hap ewy te e to'y­wania Iuteu pe. Mi'i hawyi to'e Tupana pe haty wo — Waku kahato ti rat En Tupana e. Pywo ti rat yt uwe i po'og hegyi'at rakat ekai Tupana e Panãpe. Mi'i hawyi Panãpe topy­hu'at pot'i tawa Antiokia pe hawyi toi'a­tu­nãpin kahato Iesui mohey haria ipakup takaria — Mehĩ'in mana'in e eweimohey ro eiku­'uro hap kape Aipo­typot Iesui eipy'a pe e. Yt eiwe­mõti tei'o Aika­'iwat ehay pupi e Kereku pusu kuap haria pe.
ACT 11:24 Mi'i hawyi itotiaria i'atupap kahato Iesui upi. Katu­pono te'e­ra­'a­kasa ra'yn aikotã Tupana Pã'ãu toĩne'en kahato uhyt Panãpe ete hap e. Mi'i pote — Waku kahato rakat ti aiwy Panãpe i'atu'e. Ta'i toimohey kahato Iesui i'atu'e. Mi'i pote te'e­ru­wehik kahato Panãpe mienoi ete Iesui etiat. Ta'i tawa Antiokia piaria ahyt timohey Iesui itote.
ACT 11:25 Mi'i pote mehĩ Panãpe toto meremo ra'yn tawa Tasu kape towy Sauru kat hamo.
ACT 11:26 Toipuẽti hawyi totioto towy tawa Antiokia kape miit'in mu'e hamo iwywo. Mi'i hawyi itote wẽtup i'aman motpe tukup­te'en miit'in atumu'e Iesui etiat haype. Mi'i hawyi Iesui mohey pakup i haria te'e­ru­wa­'a­tunug kahato itote hawyi mehĩ Panãpe mehĩ Sauru ti'a­tu­nãpin kahato Iesui mienoi nug hamuat hap ete. Mi'i hawyi tawa Antiokia piaria Iesui mohey haria ti'a­tu­mu'e kahato irania'in itotiaria — Iesui ti Tupana Mipo­'oro sese Aipo­typot nuat i'atu'e. Mi'i pote — Ta'i Iesui mohey haria ti Ta'a­tu­ka­'iwat Iesui ewywuat kahato tukup­te'en i'atu'e tawa Antiokia piaria. Mi'i hawyi — Pyno waku wẽtup set wywo urui'a­tu­set'ok eipe i'atu'e. Pyno ehet pakup ti Tupana Mipo­'oro ko'i i'atu'e Iesui mohey haria pe.
ACT 11:27 Mi'i hawyi mekewat e'at pe tuwat tawa Antiokia kape tawa Ieru­sarẽi kaipyi Tupana ehay moherep haria.
ACT 11:28 Wẽtup ok Tupana ehay moherep hat ti mehĩ Akapu. Mi'i ti'a­tu­mu'e kahato itotiaria — Pywo ti rat meiũran irane ti yt kat i hin i hamuat i'aman yne mesuwat yi tote toĩne'en e. Mi'i hawyi ti aru mikoi ko'i topap kahato hawyi yt kat hin i eimi'u topy­hu'at aru e Tupana uhepe e Akapu. Mi'i hap ewy topy­hu'at kahato aikotã to'e hap ewy mekewat morekuat Kautiu topy­hu'at morekuat pakup mo hap e'at pe ikahuro ra'yn i'aman yne yi wato hap ok tã.
ACT 11:29 Mi'i pote Iesui potmu­'eria tawa Antiokia piaria te'e­ro'e to'ope — Yt naku i aiwy­ria'in Iesui mohey haria yi Iuteu totiaria topap yne yt kat i i'atu­mi'u pote i'atu'e. Pyno waku wati­'a­tunug kahato ahe'u'i i'ewyte aheka­re'en ko'i hawyi waku wati­mõ'ẽ ahekat Iesui mohey haria tawa Iuteu ywania ihaky­'e'i poity'i rakaria pe i'atu'e.
ACT 11:30 Mi'i hawyi ta'a­tu­'a­tunug na'yn ta'a­tuekat ta'a­tue­'u'i hawyi ta'a­tu­po­'oro ra'yn Ieru­sarẽi kape. — Mehĩ Panãpe mehĩ Sauru waku kahato eheroto mesuwat urumiium Iesui mohey haria Ieru­sarẽi miaria kape katu­pono eiperia ti uru'a­pykok haria sese i'atu'e. Mi'i hawyi ta'a­tu­'a­tu­po­'oro ra'yn mekewat ta'a­tumiium Iesui mohey haria akag ko'i kape tawa Ieru­sarẽi kape yara puo mehĩ Panãpe mehĩ Sauru upi. Mi'i hawyi ahenoi mesuwe uimiwan me uito Iruka.
ACT 12:1 Mi'i hawyi mekewat e'at pe morekuat Eroti tipo­'oro temiit'in sura­ra'in Iesui mohey haria akag ko'i pog towo­'o­pyhik hawe.
ACT 12:2 Mi'i hawyi tesu­ra­ra'in toi'a­tu­po­'oro wẽtup ok Iesui potmu'e auka hamo Iuwãu eyke'et Tiaku auka hamo. Ta'a­tu­puẽti hawyi ta'a­tu­'auka ra'yn kyse'yp mo.
ACT 12:3 Mi'i hawyi Iuteuria tikuap Tiaku auka hap hawyi te'e­ru­wehum morekuat ete ta'a­tu­mi­ky­'esat ewy kahato tutunug pote. Mi'i hawyi morekuat tipyhik ta'yn Peteru mekewat man teneg u hap e'at pe Iuteuria mowepit hamo. Totat hawyi toipun na'yn ipyhik hawe.
ACT 12:4 Mi'i hawyi 16 sura­ra'in toipo­rokpun i'apykok hamo. Yt toiky­'esat i Peteru tuwẽtem hap haype. — Ienuk hap ikahuro ra'yn hawyi ti aru aterut Peteru meiũpe miit'in tokpe miit'in miky­ry'i hamo e tuwa­nẽtup hawe morekuat.
ACT 12:5 Mi'i tupono po'og toimoheg Peteru ma'ato Iesui mohey haria Peteru wyria'in hẽtup haty wo Tupana pe ipowyro hamo.
ACT 12:6 — Pyno mũki­'ite waku Peteru tut uhowawi e morekuat Eroti tuwa­nẽtup hawe. Ma'ato iheg me Peteru toket ne'i sura­ra'in typy ok po pe kokai kokai haity ipo ete sura­ra'in po pe. I'ewyte sura­ra'in oken'ypy hik haria tukup­te'en.
ACT 12:7 Mi'i turan Tupana mipo­'oro atipy kaipywiat put'ok'e oken'y­pyke. Mi'i hawyi hẽtyhot ra'yn itote. Mi'i hawyi Peteru toipetek hawe toihymut — Epoĩ'ãm merep to uhyt e. Mi'i hawyi ipoĩ'ãm na'yn hawyi mekewat ipo etiat haity porop'e ra'yn.
ACT 12:8 Mi'i hawyi to'e i Peteru pe — Ewo'o­kytyt hap po'i ro erepy­sokpe pag no e. Mi'i hawyi meremo tuwe­py­sokpe pag. — Etopag no ekamisa wato e. Mi'i hawyi to'iro uhupi uhyt e.
ACT 12:9 Mi'i hawyi toto atipy piat ewat'ymo Peteru. Mi'i hawyi — Ta'i uimu­'etu apo pãi e sio herewe e. Ta'i uimu'e poity'i kahato apo pãi sio yt e.
ACT 12:10 Mi'i hawyi typy ok surara sakpo tokosap hawyi oken'ypy wato asu kawiat iheg nakat kape tuwat. Mi'i ti tuwewi ra'yn tuwe­'o­ken­hyp'ok. Mi'i hawyi tuwe­nõ'ẽ. Mi'i hawyi tawa puat rote henõtem hat meremo yt tuwekuap i ra'yn.
ACT 12:11 Mi'i hawyi tawa pu'ap tote tuweran hawyi Peteru ete hot'ok'e i ra'yn. Mi'i hawyi to'e tuwepe — Ta'i yt uimu­'etu hin i rasig pãi e. Koitywy wyti atikuap kahato ra'yn morekuat Eroti po pywiat Uika­'iwat piat uhenõtem hap pãi e. Ta'i mekewat atipy piat mipo­'oro wyti iheg nakat wo'o­pyhyp hap pyi uipo­re­nõtem na'yn e. Katu­pono toĩ ra'yn mu'ap Iuteu ywania piat ui'auka irane turan e Peteru tuwa­nẽtup hawe.
ACT 12:12 Hot'ok'e kahato hawyi toto ra'yn Iuwãu Maku ty yat kape ra'yn. Mi'i turan itotiaria te'e­ru­wa­'a­tunug kahato ta'a­tu­hẽtup ka'ap Peteru powyro Tupana piat hamo.
ACT 12:13 Mi'i turan Peteru kurara okenhyp toi'ahyk ahyk. Mi'i pote mio apo uwe i'atu'e hawyi toto i'atue­ropat hat mana Hote oken'ypy kape ikuap hamo.
ACT 12:14 Mi'i hawyi ihay ete toikuap. Mi'i hawyi ta'aipok meremo irania'in kape henoi hamo. Tuwehum moity'i haype yt toho­'o­oken­hyp'ok rokirẽ i ta'aipok.
ACT 12:15 Mi'i hawyi tohenoi — Peteru ra'yn iuẽ tut oken'y­pyke ra'yn e. Ma'ato — Heso i aimo­weu­ka'i rat i'atu'e. Mi'i hawyi mana Hote — Pywo rat yt uheso i rat e. — Yt Peteru i i'atu'e ma'ato iwat ipowyro hat atipy kaipywiat i'atu'e.
ACT 12:16 Ma'ato ipuehay i ra'yn okenhyp ete. Mi'i hawyi ta'a­tu­'o­ken­hyp'ok. Mi'i hawyi — Peteru ti sio i'atu'e ra'yn. Mi'i hawyi te'e­ru­wa­nẽtup kahato.
ACT 12:17 I'atuehay pirik pote topo wo — Eipo­'inik to e. Waku hawyi tohenoi i'atuepe aikotã me Toka­'iwat piat tenõtem iheg mywiat hap — Pyno mesuwat ewehenoi uiwy Tiaku uheywyt'in Iesui upiaria pe e. Mi'i hawyi toto ra'yn wẽtup tawa kape i ra'yn.
ACT 12:18 Mi'i pytkai he'i­hot'ok hawyi tu'uka ra'yn Peteru pyhik haria haipe kai to'ope — Aikope som Peteru ta'a­tu'e hawyi.
ACT 12:19 Mi'i turan Eroti tikuap Peteru yt uwe i ra'yn hap. Mi'i hawyi temiit'in toi'a­tu­po­'oro ikat hamo. Ma'ato yt toipuẽti i hawyi i'apykok haria toi'a­tu­kaykay. Mi'i hawyi toi'a­tu­'apo — Kat pote topopy hap kuap hamo. Mi'i hawyi Eroti ti'a­tu­'uka i'apykok haria sura­ra'in yne. Mi'i hawyi morekuat Eroti toto tama Iuteu pyi tawa Sesareia kape. Mi'i tote ra'yn topy­hu'at.
ACT 12:20 Mi'i hawyi Eroti haiwot kahato tawa Sitãu piaria ete. I'ewyte tawa Tiru piaria ete. Toipyhyp teran na'yn mu'ap kare'en erut i'atue­wawiat hap. Mi'i pote tõ'ẽ tõ'ẽ Eroti kape imowepit hamo. Mi'i hawyi morekuat emiit Paraitu e hap mekewat morekuat yat koro eropat hat kape tuwat sa'a­wy'i imowepit hamo. Paraitu waku e hawyi tuwat morekuat Eroti kape imoperup i hamo — Waku ti eti'a­tu­ky'e Tiru'in Sitãu'in i'atu'e katu­pono i'atu­mi'u ko'i tut morekuat Eroti po pyi.
ACT 12:21 Mi'i pote te'e­ru­wa­'a­tunug yne ra'yn tu'i­saria. Mi'i hawyi Eroti ta'a­tu­kaykay sehay wakuat nug hamo. Wo'o­wese hap ta'a­tu­ky­'esat ikaipyi. Mi'i hawyi tut ra'yn morekuat esokpe ikahu rakat puo. Mi'i hawyi ta'apyk i'atu­py­'a­setpe morekuat amyap tote.
ACT 12:22 Mi'i hawyi tutumig to'oehay wo itote. Mi'i waku hawyi — Ewat ehay wyti yt miit'in ehay ewy i ra'yn. Tupana ehay ewy ra'yn i'atu'e ta'a­tuehay wo. Mi'i hap po'og imiky­'esat ewy.
ACT 12:23 Wãi yt e hin i. Po'og tomohey hap yn toiky­'esat Tupana kai. Mi'i hawyi meremo atipy kaipywiat Tupana mipo­'oro ti'ahyk. Mi'i hawyi ipyhu tek'e ra'yn ut piat to'u pote.
ACT 12:24 Mi'i hawyi Iesui mohey haria ti'a­tu­mu'e kahato Tupana ehay wo. Mi'i hawyi tukup­te'en na'yn itote imohey pakup i haria.
ACT 12:25 Mi'i hawyi mehĩ Panãpe Sauru wywo ta'a­tu­mõ'ẽ yne ra'yn mekewat kare'en ihaky­'e'i rakaria pe Ieru­sarẽi me. Mi'i hawyi itote pyi ta'a­tuerut kurum iwasu Iuwãu Maku tawa Antiokia kape. Mi'i tã hap ewy are uito Iruka.
ACT 13:1 Mi'i hawyi tawa Antiokia pe tukup­te'en Iesui mohey haria. I'ewyte i'atu­mu'e haria Tupana ehay wuat ihay rakaria tukup­te'en. Wẽtup ok mehĩ Panãpe hawyi wẽtup ok Simeãu i'atu­wẽ­powat Tapaiũ'ã i'atu'e hap. Wẽtup Irusiu tawa Sirene kaipywiat. Wẽtup ok Mana'ẽ morekuat Eroti ty mẽpyt wat'yp'i hawyi wẽtup ok Pauru mekewat sa'a­wy'i Iesui mohey haria auka hat mi'i hawyi toran na'yn itotiaria atumu'e haria.
ACT 13:2 Mi'i hawyi wẽtup e'at pe yt kat i mi'u ta'a­tu­ky­'esat. Ta'a­tuehay Tupana wywuat hap yn ta'a­tu­ky­'esat. Mi'i hawyi mekewat e'at pe Tupana Pã'ãu wakuat to'e i'atuepe — Ewetum no uhepe Panãpe Pauru e. Ati'a­tu­po­'oro mono miit'in atumu'e hamo pya wuaria kape. Aikotã sa'a­wy'i ahenoi i'atuepe hap ewy te ti atiky­'esat mesup e Tupana Iesui mohey haria pe.
ACT 13:3 Mi'i hawyi yt kat i ta'a­tu'u hawyi te'e­re­ponug mehĩ Panãpe Pauru ete. Mi'i hawyi ta'a­tu­hẽtup Tupana kape i'atuwat hamo.
ACT 13:4 Mi'i hawyi Panãpe Pauru wywo tuwat ra'yn tawa Sereusia kape Tupana Pã'ãu miky­'esat ewy. Mi'i tote tuwe­hyt'ok yara wato pe ra'yn tawa Sipiri kape y'y to'oran miat yi kape. Ma'ato Iuwãu Maku mekewat Tupana ehay wan nug hat ta'a­tue­reto ta'a­tu­po­wyro hamo. Mi'i hawyi Sereusia tote tuwe­hyt'ok ta'yn yara wato pe tawa Sipiri kapiat tuwat hamo y'y to'oran miat yi kape.
ACT 13:5 Mi'i hawyi put'ok­'i­'a­tu'e tawa Sara­mina pe. Mi'i tote tuwat Tupana mõtypot yat kape Iuteuria wanuat Tupana ehay moherep hamo. I'ewyte Maku toĩne'en i'atu­po­wyro hamo.
ACT 13:6 Mi'i hawyi ikohye­wyry ra'yn yne tawa ko'i upi y'y to'oran miat yi sakpo tuwat yi upi. Mi'i hawyi put'ok­'i­'a­tu'e tawa Pawu pe. Itote ta'a­tu­puẽti wẽtup ok Iuteu Iesui ran e hap het rakat. Mi'i ti paini kahato i'atu'e. — Uito ti Tupana ehay enoi hat e hat ma'ato heso rakat. Toimo­herep kahato topo wo ma'ato yt pywo piat i. Erima i'atu'e te'e­ru­wẽ­powat. Paini sese i'atu'e.
ACT 13:7 Itotiat yi porekuat ti Sesiu Pauru e hap toĩne'en. Mi'i e paini ti Iesui ran e hap morekuat pohag nug hat. Itotiaria aipo­rekuat wyti tuwe'eg moity'i i'atu'e. Mi'i hawyi put'ok'e itote hawyi morekuat tikaykay — Atiky­'esat kahato ti atikuap Tupana ehay hap uhyt'i'in e Panãpe Pauru pe. Ma'ato paini to'e morekuat pe.
ACT 13:8 — Yt rei'o yt etikuap tei'o mekewat sehay Iesui etiat katu­pono yt toiky­'esat i morekuat tomohey Iesui hap e.
ACT 13:9 Mi'i hawyi Pauru teha'at howawi paini kape haty wo Tupana Pã'ãu esaika hap wywo. Mi'i hawyi to'e paini pe.
ACT 13:10 — En wyti miit'in atuma'at kahato hat e. Ahiag sa'yru ti en e. Eso kahato ti en yne wakuaria ewanĩkap ti en e. Karãpeĩ put'ok'e miit'in eti'a­tu­pyhyp kahato Tupana kapiat hamuat e.
ACT 13:11 Mi'i pote ti atipo­'oro Tupana po eha pysasep hamo e. Mio wyti aru yt era'a­kasa i at e Pauru paini pe. Mi'i hawyi meremo ihapytig sasep hap put'ok'e paini ete. Mi'i hawyi to'e — Iypyryp ta'yn uhete ui'y­kesat ro eipe e.
ACT 13:12 Mi'i pote morekuat ta'a­kasa hawyi tuwa­nẽtup kahato — Tupana mienoi rat hesaika kahato rat pãi e. Mi'i hawyi toimohey ra'yn Iesui.
ACT 13:13 Mi'i hawyi tuwat ra'yn Pauru towy­ria'in nywo tawa Pawu pyi yi Pãwiria kape yara wato puo. Mi'i hawyi put'ok­'i­'a­tu'e ra'yn tawa Peke pe. Mi'i hawyi put'ok­ta­'a­tu'e hawyi Iuwãu Maku tohok­'iwat ra'yn Ieru­sarẽi kape.
ACT 13:14 Mi'i hawyi Pauru i'ewyte Panãpe tuwat i ra'yn tawa Pisitia kape tawa Antiokia kape ikohye­wyry miit'in mu'e Iesui etiat hamo. Put'ok­ta­'a­tu'e hawyi Sapatu e'at pe tuwe­hyt'ok mekewat Iuteu ywania wo'o­mu'e hawe. Mi'i tote te'e­ra­'apyk Tupana mõtypot hamo.
ACT 13:15 Mi'i tote mekewat Tupana yat piat miit'in akag tomo­wẽpap Musei wo'o­nãpin yianmiat Tupana mienoi toimo­wẽpap. Mi'i hawyi toi'a­tu­kaykay Pauru'in — Uiwy­ria'in ewei'a­tu­po­'oro ro wẽtup ok eipy­'a­setpiat urumu'e Tupana ehay wuat hamo e Pauru'in me.
ACT 13:16 Mi'i hawyi Pauru ipoĩ'ãm hawyi topoha hawyi to'e — Ihot'ok ui'y­wania e. Pyno aito Isareu ywania Tupana mõtypot haria. Mi'i pote eweikuap to uimienoi Tupana ehay uhyt'i'in e. Aikotã Aha'a­se­'i'in tukup­te'en sa'a­wy­'i­wuaria hap ti ahenoi hamuat ehepe e.
ACT 13:17 Tupana sese ti'airo aha'a­se'i Isareu. Toi'airo hawyi ti toimo­wato hemia­riru aitoria e. Ta'i Tupana ti tuwehum kahato ai'y­wania ete e. Ta'i sa'a­wy­'ite ti Esitu'in po pe watu­kup­te'en ma'ato ti Tupana ahera­'aipok tesaika hamo wanĩ­kaptia po pyi uhyt'i'in e.
ACT 13:18 Mi'i hawyi 40 anu ti tukup­te'en ai'y­wania yahig wato tote tama Kanã'ã kape i'atu­ko­hye­wyry e Pauru.
ACT 13:19 Mi'i hawyi 7 ywania Tupana timoma hawyi tutum i'atue'yi Kanã'ã ahepe e.
ACT 13:20 Mi'i hawyi ti itote watu­kup­te'en mot'i kahato 450 anu itote. Mi'i hawyi Tupana tum ahepe temiit'in ainãpin hanuaria. Ta'i Tupana ehay moherep hat Samueu kape tukup­te'en ainãpin hanuaria Tupana miium e Pauru.
ACT 13:21 Mi'i hawyi aha'a­se­'i'in hẽtup Tupana pe ta'a­tu­po­rekuat nuat. Mi'i hawyi Kisi sa'yru Sa'uru tutum i'atuepe ase'i Pesamĩ emiariru mi'i. Mi'i hawyi 40 anu toĩne'en itote morekuat no e.
ACT 13:22 Mi'i hawyi Tupana tihep Sa'uru hawyi Tawi i ra'yn toimo­herep ai'y­wania porekuat no sa'a­wy'i. Mi'i hawyi Tupana to'e miit'in me Tawi etiat — Uimi­puẽti wakuat ti Iuse sa'yru Tawi e. Mi'i ti uimi­ky­'esat ewywuat nug hat e miit'in me. Mi'i ti uipy'a ewywuat e Tupana Tawi etiat.
ACT 13:23 Ta'i morekuat Tawi emiariru emiariru ti Tupana tomo­herep Isareu ywania pe Aheha­kye­ra'at hanuat e. Tawi kaipywiat wyti Iesui e Pauru. Aikotã yianme to'e Tupana mi'i hap ewy mesup tutunug e.
ACT 13:24 Sa'a­wy­'ite Iuwãu henoi ahepe — Ta'i ewei'atoiat ro yt nakuap i eiminug hap ko'i hawyi ewei'aipok to Tupana kape. Mi'i waku hawyi ti aru woro­ho­'o­set'ok e ahepe.
ACT 13:25 Mi'i hawyi ti Iuwãu mienoi upi te'e­ro­py­hu'at porap'i. Mi'i hawyi to'e — Uhyt'i'in uito ti yt eimie­katup i te katu­pono ti wẽtup ok tut irane uhaipe pe po'og wuat uikawiat waku rakat e. Pywo ti rat uhewaku hap yt put'ok'e hin i Mi'i Miit py sokpe saity pok hamo e. Mi'i ti eimie­katup e Iuwãu Wo'o­set'ok hat.
ACT 13:26 Mehĩ'in ta'i aito ti Aparãu emiari­ru'in e. I'ewyte ai'y­wania pe ran tukup­te'en meiũpe Tupana pupiat gen'ẽ haria. Ta'i ahepe ti Tupana tipo­'oro tehay aheha­kye­ra'at hamo e Pauru Tupana mõtypot yat piaria pe.
ACT 13:27 Ta'i tawa Ieru­sarẽi miaria akag ko'i i'ewyte yt ikuap i mekewat wakuat Miit. Ta'i yne Sapatu e'at pe ta'a­tu­mo­wẽpap yianmiat Iesui ieĩne'en hamuat hap etiat ma'ato yt ta'a­tu­mohey i put'ok'e hawyi. Yt ta'a­tukuap i Mi'i hawyi ta'a­tu­he­katup aikotã miat i'aparap hap i'auka hamo ma'ato yt toi'a­parap hin i e.
ACT 13:28 Mi'i hawyi morekuat Piratu po pe ra'yn ta'a­tupag i'auka hamo yt kat e hin i pytkai e.
ACT 13:29 Ta'a­tunug yne aikotã yianmiat mienoi ewy. Mi'i hawyi ta'a­tu­mo­'apyk ta'yn aria'yp posak ete pyi ipiit iku'uro hawyi. Mi'i hawyi ta'a­tusyp nu ka'a pe e.
ACT 13:30 Mi'i hawyi ti ma'ato Tupana tomo­herep pakup'i gu'uro pyi i'atu­misyp e.
ACT 13:31 Mi'i hawyi toĩne'en mot'i i ra'yn towy­ria'in Karireia piaria wywo Ieru­sarẽi me. Mi'iria ti mesup tukup­te'en Iesui ieĩne'en i hap enoi haria e Pauru.
ACT 13:32 Uruto ti i'ewyte henoi haria te e. Yt heso hin i ti Tupana sa'a­wy'i ai'y­wania pe. Aikotã sa'a­wy­'ite Tupana to'e mi'i hap ewy ti mesup tutunug na'yn e.
ACT 13:33 Sa'a­wy­'ite Tawi to'e tomiwan me tuwepy puo Tupana to'e — En ni Uha'yru sese e. Pyno woro­moieĩ­ne'en pakup i aru e Tupana Iesui etiat Tawi tuwepy hawe mekewat Saumu 2.7 pe. Pyno aikotã sa'a­wy'i to'e hap ewy ti mesup toimo­herep ta'yn Tosa­'yru pãi e Pauru itotiaria pe.
ACT 13:34 I'ewyte ti mekewat Tawi wepy hawe aikotã morekuat Tawi pe Tupana to'e hap ewy te ti mesup ti totiõtem i ra'yn gu'uro pyi Aipo­typot Iesui e. Ipiit yt nem i tuwẽtem na'yn gu'uro pyi e. Pyno ti aikotã Tupana to'e sa'a­wy'i Isaia 55.3 pe hap ewy ti ra'yn mesup tutunug e.
ACT 13:35 Pyno ti Iesui piit yt i'okpuk hin i are aikotã Tupana to'e Tawi wepy hawe miwan miat hap ewy — Yt karãpe i aru Uha'yru sese nem rakano ne'i topy­hu'at to'e hap ewy e Tawi wepy hawe Saumu 16.10 pe.
ACT 13:36 Yt morekuat Tawi etiat i mio tã e ma'ato Tupana ihay Tosa­'yru sese etiat mekewat morekuat Tawi saipepiat sese wuat etiat ihay are katu­pono mekewat aipo­rekuat sa'a­wy­'iwuat Tawi iku'uro ra'yn hawyi ta'a­tusyp i'ywot'in syp hawe hawyi ikag ko'i heremo te itote e. Tupana ihay wẽtup ok etiat Tosa­'yru Iesui etiat ihay yianmete e.
ACT 13:37 Mi'i Miit ti Tupana tihymut ra'yn gu'uro pyi e. Yt nem hin i ipiit e Pauru.
ACT 13:38 Uiwy­ria'in Musei wãi'e hap ti waku kahato wen ma'ato ti yt aimo­hãpyk kuap i Tupana wywo e.
ACT 13:39 Pywo pe ti rat are'e uiwy­ria'in mekewat Miit sese yt nem i rakat yn ni wyti aimo­hãpyk kuap Tupana wywo e. Imohey haria toi'a­tu­mo­hãpyk kuap tuwe­wawi e Pauru.
ACT 13:40 Sa'a­wy­'iwuat Tupana ehay enoi hat to'e mio tã e — Eiwe'eg wo yt uimohey i haria e. Eimitum mo o uhehay etiat weky­ry'i i haria e. Katu­pono yt uimohey i hap ti aru ei'a­tu­'uka e.
ACT 13:41 Katu­pono ti aru mekewat e'at pe uito atunug eipy­'a­setpe wakuap iwato kahato yt wẽtup ewywuat i iwato rakat atunug ma'ato ewei'a­kasa hawyi ti aru i'ewyte eweikuap hawyi ti aru ma'ato yt eweimohey i e Tupana sa'a­wy'i e. Ta'i yianmete ti Tupana henoi ehetiat ui'ywania Apakuki 1.5 pe tohenoi e Pauru Iuteuria pe.
ACT 13:42 Mi'i hawyi Pauru tuwẽtem Tupana mõtypot hap yat pyi towy­ria'in wywo. Mi'i hawyi irania'in itotiaria yt Iuteuria i te'e­ro'e — Uhyt i'atu'e wẽtup semana hawyi o era'aipok i ra'yn o urumu'e hamo meiũpe i'atu'e.
ACT 13:43 Tuwat yne ra'yn Tupana mõtypot yat pyi hawyi irania'in itotiaria Iuteuria i'ewyte yt Iuteuria i ko'i te'e­ru­wehik ta'yn uhyt Panãpe uhyt Pauru ete. Mi'i hawyi Pauru Panãpe ti'a­tu­nãpin mi'iria mu'ap upi — Eweiwat ro haty wo eiky'e hat Tupana upi i'atu'e. Yt ewei'atoiat re Tupana piat eiky'e hap i'atu'e.
ACT 13:44 Mi'i hawyi Sapatu e'at pe i ra'yn hawyi kahupyt i ra'yn tawa piaria te'e­ru­wa­'a­tunug i ra'yn. Ta'a­tukuap teran Tupana ehay i'atu­kaipyi haype.
ACT 13:45 Mi'i hawyi Iuteuria potnagnia te'e­ra­'a­kasa miit'in typy'i kahato Pauru upi. Mi'i pote i'atue­ha­'y­wywi tuete. Mi'i hawyi — Ta'i eheso kahato i'atu'e. Eti'a­tu­ma'at ne'i rat miit'in Tupana ete i'atu'e.
ACT 13:46 Ma'ato mi'i hawyi Pauru Panãpe wywo i'atuehay hesaika po'og miit'in kape. Yt te'e­ru­we­mõti hin i. Mi'i hawyi te'e­ro'e Iuteuria yt imohey i haria pe — Ta'i Tupana tum neran ni ieĩne'en hap yt ikahuro rakat i ma'ato imiium ni eweipun ne'i eipe i'atu'e. Pyno ti sa'a­wy'i uruhenoi teran ehepe e ma'ato yt eweimohey i mi'i pote ti wẽtup ywania pe ra'yn uruhenoi.
ACT 13:47 Katu­pono sa'a­wy'i Tupana to'e Tosa­'yru pe — Woronug En aikotã iypyryp wiat ariãty ewy e. Yne ywania akasa hamuat e. Yne mesuwat yi totiaria ehakye­ra'at hamo e Tupana Isaia 49.6 pe i'atu'e Pauru'in.
ACT 13:48 Mi'i pote irania'in yt Iuteuria i ra'yn i'atu­wepit kahato Tupana ehay ete. Mi'i hawyi te'e­ru­wehum kahato — Waku poity'i ehay Tupana i'atu'e. Mi'i hawyi tomi­'ai­roria pe tomohey haria pe yn na'yn Tupana tum toieĩne'en hap yt ikahuro rakat i.
ACT 13:49 Mi'i hawyi mi'iria ra'yn imõ'ẽ Ta'a­tu­ka­'iwat pakup'i mienoi wuat'i tawa piaria pe.
ACT 13:50 Mi'i hawyi Iuteuria potnagnia ti'a­tunug iwato'in nakaria hary­po­ria'in ihainia'in hawyi tu'i­saria ta'a­tu­'a­tu­kaykay. Mi'i hawyi te'e­ro'e mi'iria pe — Waku ti wati­'a­tu­sa­ty'i saty'i ra'yn Pauru'in i'atu'e. Mi'i hawyi Pauru Panãpe ta'a­tu­po­re­nõ'ẽ ra'yn ta'a­tue­tawa pyi.
ACT 13:51 Tuwe­nõ'ẽ hawyi Pauru Panãpe te'e­ru­we­py­pit­pit'ok kahato Tupana etiat yt iwese i rakaria piat ikuap hamo. Mi'i hawyi tuwat i ra'yn wẽtup tawa Ikuniu kape.
ACT 13:52 Ma'ato ipakuptia Iesui mohey haria te'e­ro­py­hu'at itote yt iwese i rakaria py'a­setpe tawa Antiokia pe. Mi'iria i'atu­wepit kahato itote Tupana Pã'ãu wywo. Mi'i hap etiat atiwan yne mesuwe uito Iruka.
ACT 14:1 Mi'i hawyi put'ok­'i­'a­tu'e tawa Ikuniu pe hawyi tuwe­hyt'ok Tupana mõtypot hawe. Mi'i hawyi itote Pauru'in ti'a­tu­mu'e kahato Tupana ehay wo. Mi'i hawyi Iuteuria tomohey kahato Tupana ehay. I'ewyte irania'in ywania yt Iuteuria i imohey ra'yn wy. Mi'i hawyi miit'in sok topy­hu'at Iesui mohey pakup i haria.
ACT 14:2 Ma'ato yt imohey haria i Iuteuria te'e­ro'e — To'iro wati­pugha Pauru'in i'atu'e. Yt naku i ti mi'iria i'atu'e. Yt eweimohey tei'o meimuẽ­waria i'atu'e yt Iuteuria i pe.
ACT 14:3 Ma'ato Tupana ti'a­tu­moe­saika po'og na'yn. Mi'i hawyi ta'a­tunug ta'a­tupo wo ra'yn wakuap miit'in wanẽtup hamo. Mi'i hawyi itote tukup­te'en mot'i ra'yn katu­pono ta'a­tu­mohey kahato ra'yn itote Tupana ehay. Mi'i hawyi Pauru Panãpe ti'a­tu­mu'e kahato Tupana wo'o­ky'e te'en ne'i tuwe­kai­pywiat hap ete.
ACT 14:4 Mi'i hawyi tawa Ikuniu piaria yt to'oksat i hin i katu­pono yt to'o­wa­nẽtup hap ewy i kahato. Ipat'ok Iesui mienoi upi ipat'ok Iuteuria mienoi upi.
ACT 14:5 — To'iro wati­'a­tu­ma'at sehay wo i'atu'e. Mi'i hawyi wati­'a­tu­'uka mak mak wo nu wo i'atu'e Iuteuria to'ope ta'a­tu­'akag ko'i wywo.
ACT 14:6 Mi'i hawyi Pauru Panãpe tikuap ta'yn ta'a­tu­'auka teran hap hawyi te'e­ro­popy ra'yn. Mi'i hawyi tuwat tawa Irikaunia kape. Mi'i hawyi itote ikohye­wyry tawa hit ko'i upi tawa Irita tawa Tepe upi i'atu­ko­hye­wyry.
ACT 14:7 Mi'i tote ta'a­tu­henoi kahato Tupana ehay.
ACT 14:8 Mi'i hawyi tawa Irita tote ta'a­tu­puẽti yt karãpe i hewyry rakat apyk pe. Toty kaipywiat wemo­herep hat ipy kĩ'ã rakat.
ACT 14:9 Mi'i tote Pauru henoi Iesui etiat turan mekewat yt hewyry kuap i rakat tikuap ihay. Mi'i hawyi Pauru iha'at howawi hawyi toikuap ta'yn tuwa­nẽtup hawe — Iesui mohey hap uimoe­hãite kuap e tuwa­nẽtup.
ACT 14:10 Mi'i hawyi Pauru to'e tehay wo — Epoĩ'ãm no uhyt e. Mi'i hawyi mekewat sa'a­wy­'iwuat yt hewyry kuap i rakat peso'e hawyi hewyry ra'yn.
ACT 14:11 Mi'i hawyi Ikuniu piaria te'e­ra­ha'at kahato ipy kĩ'ã rakat moehãite Pauru piat hap kape. Mi'i pote ta'a­tuehay pirik wo te'e­ro'e — Tupa­naria tupa­naria miit'in kawiat atipy kaipy­wiaria eipe i'atu'e Pauru Panãpe pe ta'a­tu­pusu puo.
ACT 14:12 Mi'i hawyi Panãpe tupana waikiru Iupite i'atu'e ma'ato Pauru tupana waikiru Mekuriu i'atu'e katu­pono — Aimu'e hat po'og Pauru mi'i i'atu'e.
ACT 14:13 Mi'i turan tawa oken'ypy kawiano toĩne'en tupana waikiru Iupite yat. Mi'i ka'iwat pa'i terut wewato ahup ko'i ipa'iat oken'ypy kape. Mi'i miit'in ti'auka teran tupana Pauru Panãpe mõtypot hamuat. Ipohyt kawiat hewahi rakat wewato ahup.
ACT 14:14 Mi'i ta'a­tukuap hawyi Pauru'in yt i'atu­wepit hin i ra'yn. Yt ta'a­tu­ky­'esat i ta'a­tu­mõ­typot hap. Mi'i pote te'e­ru­we­sokpe hiot ne'i ra'yn miit'in tok pe.
ACT 14:15 — Wãi urumõ­typot re Tupana eipe. Kan hamo ten urumõ­typot Tupana wo eipe i'atu'e. Katu­pono yt naku i miit'in me Tupana en ewei'e e Tupana i'atu'e. Wãi ne i'atu'e. Yt naku i tupa­naria eipe ewei'e uruepe. Ewei'atoiat ro meimuẽwat ehetu­pana ko'i hawyi ewei'aipok to Tupana sese kape mekewat wuat'i e'at piat ieĩne'en hat kape uhyt'i'in mana'in i'atu'e. Yt kan hamo i eweimohey ehetu­pa­naria katu­pono Tupana sese ti ainug hat y'y nug hat wuat'i y'y piaria nug hat e. Pyno Tupana sese kape ewei'aipok to hawyi eweipun no ehetu­pa­naria sa'ag ko'i i'atu'e Panãpe Pauru.
ACT 14:16 Sa'a­wy'i Tupana yt to'e i — Uito yn waku Ehetu­pana wo yt e i te ehepe wẽtup ywania eipe pote. Ma'ato mesup ti — Wãi'e ra'yn. Yt atiky­'esat i po'og ehetu­pana ko'i e. Yt atiky­'esat i po'og yt eiwe'eg i hap uhetiat mesup e Tupana ehepe.
ACT 14:17 Sa'a­wy­'ite ti yt watikuap i Tupana sese etiat ma'ato ti mesup wakuap tutum ne'en ne'i ahepe yt kat sa'up i. Koitywy yne ywania pe yne miit'in me tuwe­mo­herep teran. I'ewyte i'aman tutum yne pe. I'ewyte miit'in yne pe hewo iminug kaipyi wakuap. Mi'i tã ti Tupana yne tokuap ahepiat hamo e. Mi'i tã ti tutunug aimo­wepit hamo e Pauru'in tawa Irita piaria pe.
ACT 14:18 Porap ta'a­tu­'auka wewato ahup turan na'yn Pauru'in wãi'i­'a­tu'e haty wo. Mi'i pote yt ta'a­tu­'auka i ra'yn wewato ahup ko'i Pauru'in mõtypot Tupana ewywuat hamo.
ACT 14:19 Mi'i hawyi put'ok­'i­'a­tu'e Iuteuria Pauru ewanĩ­kaptia tawa Antiokia pyi tawa Ikuniu pyi tõ'ẽ. Mi'i hawyi ti itotiaria irania'in ta'a­tu­mo­'a­kag'aia ra'yn — Ewei'auka ro nu wo Pauru i'atu'e. Mi'i hawyi nu wo mak mak'i­'a­tu'e howawi i'auka hamo. Mi'i hawyi ta'a­tu­herep haity pe yi upi tawa pyi. — Iku'uro ra'yn koitywy Pauru i'atu'e te'e­ru­wa­nẽtup hawe.
ACT 14:20 Mi'i hawyi ipotpo­'o­roria te'e­ru­wa­'a­tunug Pauru piit kape. Mi'i hawyi ma'ato i'ãpe­'ok'am i ra'yn i'atu­py­'a­setpe. Mi'i hawyi ta'aipok i ra'yn to'auka hap tawa kape. He'i­hot'ok pe hawyi tuwat Panãpe wywo tawa Tepe kape.
ACT 14:21 Mi'i hawyi itote sehay wakuat ta'a­tu­henoi Iesui etiat. Mi'i hawyi ta'a­tu­'a­tu­nãpin at i'atuepiat ikuap kahato hamo. Mi'i hawyi itote pyi te'e­ra­'aipok i ra'yn tawa Irita kape tawa Ikuniu kape tawa Antiokia kape Iesui mohey haria pakup tiaria kape.
ACT 14:22 Mi'i hawyi Pauru'in ti'a­tu­nãpin kahato itotiaria ipakup tiaria i'atu­moe­saika hamo i'atuepiat imohey kahato hamo. Mio tã i'atu'e — Eiwe'eg wo o katu­pono meiũran ti eweho­'opot kahato mesuwe Tupana etama kapiat mu'ap upi i'atu'e imohey pakup i haria pe.
ACT 14:23 Mi'i hawyi itote Pauru'in ti'airo Iesui mohey haria nãpin hamuaria. Mi'i hawyi Panãpe Pauru yt kat i i'u at katu­pono hẽtup kahato Tupana kape — Tupana i'atu'e epo pe ra'yn ti meiũpiaria uruiky­'esat emohey haria ipakup takaria katu­pono urutuwat irane meiũpepyi i'atu'e ta'a­tu­hẽtup Tupana pe.
ACT 14:24 Mi'i hawyi tuwat yi Pisitia sakpo yi Pãwiria sakpo.
ACT 14:25 Mi'i hawyi put'ok­'i­'a­tu'e tawa Peke pe hawyi ta'a­tu­hytpok kahato ra'yn Iesui ehay itote. Mi'i hawyi tuwat hẽpype tawa Ataria kape.
ACT 14:26 Mi'i hawyi yara wato puo ra'yn tuwat tawa Antiokia kape ta'a­tu­mi­po­'o­roria kape. Te'e­ra­'aipok i ra'yn aikope sa'a­wy'i tuwat Iesui ehay sytpok hamo hap kape. Mi'i hap kape te'e­ra­'aipok i ra'yn. Ta'a­tu­potpap kahu ra'yn hawyi te'e­ra­'aipok i ra'yn. Aikope Panãpe Pauru powyro hamuat ta'a­tu­hẽtup Tupana pe hap kape i ra'yn te'e­ra­'aipok.
ACT 14:27 Put'ok­ta­'a­tu'e itotiat hawyi ta'a­tu­kaykay yne Iesui mohey haria. Mi'i hawyi aikotã Tupana tunug mu'ap upi i'atupo wo mi'i hap ewy yne ta'a­tu­mo­herep itotiaria pe — Koitywy ti Tupana tomo­herep ta'yn Iesui yt ai'y­wania pe yn i ra'yn i'atu'e Iuteuria pe. Ta'i mio ra'yn ti yt Iuteuria yn i ra'yn imoherep i'atu'e.
ACT 14:28 Mi'i hawyi itotiaria imohey haria wywo tukup­te'en mot'i ra'yn Panãpe Pauru. Aikope aikope tuwat Pauru'in miit'in mu'e hamuat hap etiat ahenoi mesuwe uimiwan me uito Iruka.
ACT 15:1 Mi'i hawyi ti Iuteuria tõ'ẽ tõ'ẽ ra'yn tawa Antiokia totiaria Iesui mohey haria mu'e hamo ra'yn — Ewetunug no Musei wo'o­nãpin hap yne pote ti aru Tupana eheha­kye­ra'at kuap ma'ato yt eiwe­murui ãpy sokpe tek hap pote ti aru yt eheha­kye­ra'at i i'atu'e.
ACT 15:2 Mi'i hawyi itote Pauru Panãpe tu'uka at kahato ta'a­tuehay wo. Mi'i hawyi yt to'o­wese hin i itotiaria to'ope. Mi'i hawyi te'e­ro'e to'ope — Pyno waku ti wati­'a­tu­po­'oro ra'yn Pauru Panãpe irania'in wywo Ieru­sarẽi kape sa'a­wy­'i­wuaria Iesui'in 12 ok takaria kape itotiat piat i'atuehay kuap hamo i'atu'e. Aikotã Musei eko aikotã watunug hap kuap hamo i'atu'e.
ACT 15:3 Mi'i hawyi Iesui mohey haria tawa Antiokia piaria ti'a­tu­po­'oro Pauru Panãpe Ieru­sarẽi kape irania'in nywo. Mi'i hawyi tuwat ra'yn tawa Antiokia pyi. Mi'i hawyi Iesui mohey haria pe yi Wenisia piaria pe yi Samaria piaria pe ta'a­tu­henoi aikotã irania'in yt Iuteu ywania i timohey ra'yn Iesui hap ko'i. Mi'i pote te'e­ru­wehum kahato Tupana ete itotiaria.
ACT 15:4 Mi'i hawyi put'ok­'i­'a­tu'e ra'yn Ieru­sarẽi me. Mi'i tote yiannote wuaria 12 ok takaria tukup­te'en. I'ewyte Iesui mohey haria akagnia tukup­te'en. Mi'iria te'e­ro'e — Pyno eiwe­hyt'ok to uhyt'i'in i'atu'e Pauru'in me. Mi'i hawyi Pauru'in tomo­herep i'atuepe aikotã Tupana tunug wuat'i tawa puaria piat hap ko'i.
ACT 15:5 Mi'i hawyi irania'in Iesui mohey haria wo'o­nãpin haria te'e­ro'e — Pyno waku eiwe­murui ãpy sokpe tek to wato'e i'atuepe. Waku yne Musei wãi'e hap ewetunug wato'e ro yt Iuteuria i pe i'atu'e.
ACT 15:6 Mi'i hawyi yne ta'a­tu­'a­tunug 12 ok takaria Iesui mohey haria akagnia wywo te'e­ru­wa­'a­tunug aikotã mekewat yt Iuteuria i nãpin hap kuap hamo.
ACT 15:7 Mi'i hawyi yt to'oehay sat i at hawyi mehĩ Peteru ipoĩ'ãm i'atu­py­'a­setpe i'atu­nãpin hamo — Uheywyt'in Iesui mohey haria e eipe ti eweikuap ta'yn aikotã sa'a­wy'i Tupana ui'airo yt Iuteu ywania i nãpin hamuat hap e. Uito yn ni sa'a­wy'i areto sehay wakuap enoi hamo yt ai'y­wania kape e. Uiwẽ pyi ti sa'a­wy'i ta'a­tu­mohey ha'a­wyte wuaria e Peteru.
ACT 15:8 Ta'i Tupana tikuap yne wyti miit'in wanẽtup ta'a­tu­py'a piat hap e. Yt aiwa­nẽtup hap yn i ti Tupana tikuap e. Ta'i tutum na'yn ti i'atuepe Topã'ãu Wakuat aikotã ahepe tutum hap ewy te ti e. Mi'i tã toimo­herep ta'yn ahepe tomohey i'atuepiat hap e Peteru.
ACT 15:9 Ta'i toimo­hãpyk yne wyti i'atu­wa­nẽtup sa'ag hap ko'i Tosa­'yru mohey ra'yn hawyi e.
ACT 15:10 Pyno kat hamoĩ mesup eweiky­'esat Musei eko yrysakag ipotyi ai'akag etiat hap ewywuat irania'in akag ete e. Pyno toimo­herep ta'yn ahepe irania'in ywania ai'ewy ra'yn toi'airo e Peteru. Aha'a­se­'i'in wyti yt hupit i mekewat seko e. I'ewyte aito yt wahupit i ra'yn. Kat hamoĩ pyno eweiky­'esat aheko Iesui mohey haria wẽtup ywania ipakuptia ok pe tote e. Yt naku i ti Tupana wahã'ãg e.
ACT 15:11 Ta'i Iesui yn nyti aheha­kye­ra'at e. I'ewyte irania'in ywania Ehakye­ra'at hat Iesui yn. Pyno aiwo­'o­'ewy kahato e. Ta'i Iesui mohey hap yn aheha­kye­ra'at kuap hap. Yt aiminug ko'i kaipyi i wyti aheha­kye­ra'at hap toĩne'en e Peteru.
ACT 15:12 Mi'i hawyi sehay wuat wu'uka haria atunik ta'yn. Yt kat i i'atu'e hin i ra'yn miit'in sok. Mi'i hawyi Panãpe Pauru timo­herep aikotã yt Iuteuria i timohey ra'yn Iesui hap ko'i aikotã Tupana tum tesaika hap wakuap nug hamuat hap mi'iria pe hap.
ACT 15:13 Mi'i hawyi te'e­ru­wa­nẽtup kahato ra'yn. Yt kat i'atu'e i ra'yn. Mi'i hawyi Tiaku ihay — Uhyt'i'in eweikuap to uimienoi e.
ACT 15:14 Pywo ti rat Simãu henoi aikotã mio Tupana Pã'ãu teke kuap wuat'i ywania Tosa­'yru mohey haria py'a pe e. Toiky­'esat yne ywania kaipywiat tomi­'airo tomohey haria e.
ACT 15:15 Mi'i hap ewy ra'yn wyti mesup topy­hu'at. Sa'a­wy­'iwuat Tupana e hap ewy e
ACT 15:16 — Mekewat e'at pe ti aru ara'aipok hawyi atunug pakup i morekuat Tawi yat at hat.
ACT 15:17 Mi'i kape ti aru tõ'ẽ tõ'ẽ miit'in yne ywania uikuap haria. Wuat'i ywania ti aru ati'a­tu­kaykay yne uhet kuap haria. Mi'i tã ti aru atunug e ti Tupana yianmete iwan me e Tiaku.
ACT 15:18 — Katu­pono Tupana tikuap aikotã mesup topy­hu'at hamuat hap yianmete e.
ACT 15:19 Yt naku i arewa­nẽtup turan wahenoi niatpo rakat seko ai'y­wania ewywuat irania'in ywania Iesui mohey haria pakuptia pe e Tiaku.
ACT 15:20 Pyno waku kahato wati­po­'oro sehay irania'in ywania kape. Mio tã wato'e waku wati­'a­tu­nãpin — Waure wo ro meimuẽwat ehetu­pana iã'ãkap ko'i ete pãi waku wato'e e. I'ewyte yt ewetu'u tei'o mi'u miit'in miium ta'a­tue­tu­pa­naria piat ne'i wato'e i'atuepe. I'ewyte wẽtup ok wẽtup ok wywo tei'o ewary e'aito wato'e. I'ewyte yt naku i huu ehesapo wo. Yt naku i ewetu'u ipu'i huu wywo waku wato'e i'atuepe e Tiaku.
ACT 15:21 Sa'a­wy­'ipyi te ti yne tawa puo tukup­te'en ne Musei eko enoi haria. Mesup te yne Sapatu e'at pe ti Musei mienoi ta'a­tu­mo­wẽpap toran e Tiaku.
ACT 15:22 Mi'i hawyi torania Iesui mohey haria te'e­ro'e to'ope 12 ok takaria wywo ta'a­tu­'a­kagnia wywo — Pyno waku aimi­'ai­roria wati­'a­tu­po­'oro uhyt Pauru uhyt Panãpe upi tawa Antiokia kape mi'i ai'e hap enoi irania'in miat hamo i'atu'e. Mi'i hawyi ta'a­tu­'airo uhyt Iuta Pasapa e hap het rakat hawyi uhyt Sira ta'a­tu­'airo miit'in wakauria ta'a­tu­py­'a­set­piaria.
ACT 15:23 Mi'i hawyi ta'a­tuwan popera pe i'atu­mie­reto wuat. Mio tã i'atu'e — Uruto ti Ieru­sarẽi miaria Iesui mohey haria torania 12 ok takaria mi'iria wywo uru'a­kagnia wywo Iesui mohey haria uruipo­'oro miwan me ehowawi kuekatu uru'e hap popera pe wẽtup ywania kape tawa Antiokia piaria kape yi Siria piaria kape yi Sirisia piaria kape uruipo­'oro miwan eweimoe­hãite ro kuekatu uru'e hap i'atu'e.
ACT 15:24 Ha'a­wyte wyti tuwat ehowawi yt uruwat urumi­po­'o­roria i uruto'e. Mi'iria ti eimo­'a­kag'aia hanuaria uruto'e. Mi'iria wyti uruikuap ta'yn mesup. Urupy­'a­setpyi ti wyti tuwat ma'ato ti yt uruwat urumi­po­'o­roria i pãi i'atu'e popera pe.
ACT 15:25 Ta'i waku kahato uruipo­'oro ehowawi meiũpepyi urumikuap sehay enoi hanuaria uruto'e. Ta'i aiwy­ria'in Panãpe Pauru upi waku kahato uruipo­'oro ehowawi pãi i'atu'e.
ACT 15:26 Ta'i uhyt Panãpe uhyt Pauru yt te'e­ro­ken'ẽ hin i ta'a­tu­'auka hap pupi. Mi'i tupono tuwat ra'yn Aipo­rekuat Aika­'iwat Iesui enoi miit'in miat hamo uruto'e pãi i'atu'e.
ACT 15:27 Pyno uruipo­'oro ehowawi mi'iria upi mehĩ Iuta hawyi Sira ehepiat henoi hamo.
ACT 15:28 Uruwy­ria'in Tupana Pã'ãu wyti urumu'e kahato kat e hap kat e hap ko'i enoi ehepiat hamuat hap ete i'atu'e. Yt toiky­'esat i wyti urueko ipotyi rakat ne'i uruhenoi ehepiat hap.
ACT 15:29 Mio tã e ti ma'ato toiky­'esat — Yt ewetu'u tei'o miit'in miium tupa­naria iã'ãkap ko'i piat e. Mi'i hap yt toiky­'esat i i'atu'e. I'ewyte yt toiky­'esat i wyti wẽtup ok wẽtup ok wywo se'aito hap i'ewyte wary hap. Hut'yp nik piat mi'at pu'i o yt etu'u tei'o. I'ewyte huu o yt etu'u tei'o e ti wy i'atu'e. Pyno urumienoi ewy ewetunug mote ti aru waku ra'yn uruwy­ria'in i'atu'e. Toran na'yn pyno uru'e hap mehĩ'in i'atu'e popera pe. Mi'i hawyi ta'atuium mekewat miwan ta'a­tu­mi­po­'o­roria pe.
ACT 15:30 Mi'i hawyi pyno waku eweiwat ro tawa Antiokia kape i'atu'e. Mi'i hawyi tuwat ra'yn. Put'ok­ta­'a­tu'e itote hawyi ta'a­tu­'a­tunug yne Iesui mohey haria. Mi'i hawyi ta'atuium mekewat mipo­'oro popera itotiaria pe.
ACT 15:31 Mi'i hawyi ta'a­tu­mo­wẽpap hawyi i'atu­wepit kahato ta'a­tu­nãpin hap ete.
ACT 15:32 Mi'i hawyi yianmiat Tupana ehay enoi haria uhyt Iuta uhyt Sira ti'a­tu­nãpin kahato Iesui mohey haria tawa Antiokia piaria ta'a­tu­'a­tu­moe­saika imohey hap ete.
ACT 15:33 Mi'i hawyi tukup­te'en mot'i itote hawyi te'e­ra­'aipok teran i ra'yn Ieru­sarẽi kape Iesui potpo­'o­roria kape i ra'yn. Mi'i hawyi — Hẽto i'atu'e. Uruipo­'oro teran ehupi uruekue­katu i'atu'e tawa Antiokia piaria.
ACT 15:34 Ma'ato Sira yt ipap i ra'yn tawa Antiokia pyi. Mi'i hawyi yt toto i.
ACT 15:35 Mi'i hawyi Pauru Panã­pe'in tukup­te'en mot'i tawa Antiokia piaria mu'e hamo. Ta'a­tu­ka­'iwat ehay enoi haype te'e­ro­py­hu'at Iesui mohey haria ahyt tok pe.
ACT 15:36 Tukup­te'en mot'i itote hawyi Pauru to'e Panãpe pe — Pyno waku apo uhyt wata­'aipok i ra'yn irania'in tawa ko'i kape e. Katu­pono ati'a­tuepiok teran aikotã tukup­te'en Iesui mohey haria pakup i ko'i aikope sa'a­wy'i wati­'a­tu­mu'e hap kape mehĩ e Pauru Panãpe pe.
ACT 15:37 — Pyno waku watioto Iuwãu Maku e Panãpe Pauru pe.
ACT 15:38 Ma'ato — Yt naku i uhyt watioto Iuwãu Maku katu­pono sa'a­wy'i mi'i ti ta'aipok ne'i ahupi pyi Tupana potpap wyi yi Pãwiria pyi e Pauru Panãpe pe.
ACT 15:39 Ma'ato yt to'o­wa­nẽtup hap ewy hin i ra'yn hawyi to'oehay tek hawyi to'o­'atoiat ra'yn. Mi'i hawyi uhyt Panãpe uhyt Iuwãu Maku wywo yn na'yn tuwat yara puo ta'a­tue'yi Sipiri kape.
ACT 15:40 Mi'i hawyi uhyt Pauru tiky­'esat uhyt Sira ra'yn teka­tuwy wo. Mi'i hawyi Iesui mohey haria hẽtup Tupana pe — Tupana i'atu'e eti'a­tu­po­wyro kahato aiwy Pauru aiwy Sira epotpap nug hamo i'atu'e. Eti'a­tu­ky'e ro yne mu'ap upi. Mi'i hap uruhẽtup epe waku i'atu'e. Mi'i hawyi Pauru toto uhyt Sira wywo Iesui mohey haria moesaika hamo wuat'i ywania kape.
ACT 15:41 Mi'i hawyi i'atue­wyry yi Siria puo hawyi yi Sirisia puo i'atue­wyry itotiaria Iesui mohey haria atumoe­saika Tupana ehay wuat hamo. Yne uimikuap atiwan mesuwe uito Iruka.
ACT 16:1 Mi'i hawyi Pauru'in put'ok­'i­'a­tu'e i tawa Tepe pe tawa Irita pe. Mi'i hawyi itote Pauru'in tipuẽti uhyt Timoteu. Ity ti Iesui mohey hat Iuteu ywania ma'ato i'ywot Kereku ywania.
ACT 16:2 Mi'i hawyi tawa Irita piaria tawa Ikuniu piaria Iesui mohey haria — Ta'i waku kahato ti rat Timoteu i'atu'e itotiaria.
ACT 16:3 Mi'i hawyi Pauru to'e Timoteu pe — To'iro uhupi kurum iwasu e. Ereto teran uhupi pote Iuteuria ewy ro ereĩne'en aikotã ety ewy ai'y­wania Iuteuria mu'e hamo are e. Mi'i hawyi ta'a­tue­murui sokpe tek Iuteuria eko ewy hawyi Timoteu topy­hu'at Iuteu wo toty ewy. Mi'i tã ti Pauru tiky­'esat Timoteu piit katu­pono toiky­'esat Iuteuria mimõ­typot no topy­hu'at Timoteu hap e. Katu­pono toikuap ta'yn itotiaria tikuap wẽtup ywania ne'i Timoteu ywot hap pote.
ACT 16:4 Mi'i hawyi Pauru Sira Timoteu wywo hewyry sa'a­wy­'iwuat tewyry hap ko'i upi. Mi'i tote ta'a­tu­henoi mekewat Ieru­sarẽi kaipywiat wo'o­nãpin hap miwan Iesui yn aheha­kye­ra'at kuap e hap miwan ta'a­tu­henoi. Mekewat kat i'atu'e kat i'atu'e 12 ok takaria e hap Iesui mohey haria akagnia e hap ta'a­tu­henoi itote.
ACT 16:5 Mi'i hawyi ta'a­tue­wyry hap upiaria Pauru'in ti'a­tu­moe­saika po'og na'yn Iesui mohey hap ete. Mi'i pote po'og na'yn i'atu­ty­py'i itote.
ACT 16:6 Mi'i hawyi yi Karata yi Wirisia upi Pauru'in i'atue­wyry. Mi'i hawyi yi Asia kape tuwat teran ma'ato Tupana Pã'ãu Wakuat to'e — Yt ewehenoi tei'o uhehay itote mesup mehĩ'in e.
ACT 16:7 Mi'i pote tuwat tawa Misia kape. Itote pyi tuwat teran yi Pitinia kape i ra'yn ma'ato Iesui Pã'ãu wãi'e i ra'yn.
ACT 16:8 Mi'i hawyi tawa Misia sakpo toko­ka'at ne'i. Mi'i hawyi tuwat teran yi Turate kape ma'ato — Wãi'e i Iesui Pã'ãu.
ACT 16:9 Mi'i hawyi — Aikope waku pyno watuwat e yn tuwa­nẽtup hawe. Mi'i hawyi Pauru ta'a­kasa tomu­'etu wãtym muo wẽtup ok yi Masẽ­tunia piat y'am miat kape. Mi'i hawyi toikuap ihay — Eriot ro meikowo urue'yi Masẽ­tunia kape urupo­wyro hamo mehĩ e toikaykay.
ACT 16:10 Mi'i hawyi tuwe­hymut ra'yn Pauru hawyi mio tã to'e — Meremo urutuwat teran kahato yi Masẽ­tunia kape. Mi'i haype ti uruikat kahato aikotã miat uruwat hamuat. Katu­pono Tupana urukaykay ra'yn i'atuo­wawi tehay wakuat enoi hamo hap uruikuap ta'yn e.
ACT 16:11 Mi'i hawyi meiũpepyi uito Iruka areto ra'yn Pauru'in wywo. Yara wato puo hãpyk pe urutuwat ra'yn wasere upi y'y wato yi hit Samu­tasia kape. Mi'i hawyi ihot'ok hawyi wẽtup tawa Neapuri kape urutuwat yi Masẽ­tunia sese kape.
ACT 16:12 Mi'i hawyi urutuwat tawa wato yi Masẽ­tunia wywuat tawa Wiripu kape. Mi'i hawyi urutu­we­hyt'ok tawa Wiripu pe Humanu ywania mu'e Iesui etiat hamo. Itote urutu­kup­te'en mot'i.
ACT 16:13 Mi'i hawyi Sapatu e'at pe urutuwat y'y hit i kape aikope Iuteu ywania i'atuehay Tupana kape hap kape. Mi'i hap kape urutuwat tawa pyi. Mi'i tote uruta­'apyk hawyi meiũran tõ'ẽ tõ'ẽ hary­po­ria'in. Mi'iria urui'a­tu­mu'e ra'yn.
ACT 16:14 Wẽtup ok i'atu­py­'a­setpe toĩne'en mana Iritia. Mana Iritia ti tawa Tiatira pywiat. Sokpe hup ikahu rakat weneru hat. Tupana mõtypot hat sese mi'i. Mi'i ipap kahato Pauru mienoi upi hawyi Tupana tomo­herep ta'yn mekewat sehay mana pe.
ACT 16:15 Mi'i hawyi mana Iritia timohey Iesui yne to'yat piaria wywo hawyi tuwe­set'ok y'y pe to'yat piaria torania wywo. Mi'i hawyi — Mimi'in e Pauru'in me koitywy ti atomohey kahato ra'yn Aika­'iwat atipy piat e. Mi'i tupono uimohey ehepiat pote eweikup­te'en no meiũpe ui'yat piaria yatype mimi'in e mana Iritia Pauru'in me. Ihay awãi hawyi uruto­py­hu'at i'yat pe.
ACT 16:16 Mi'i hawyi wẽtup e'at pe urutuwat i ra'yn aiũpe Tupana wywuat sehay hap kape mekewat y'y hit i kape. Mi'i hawyi mu'ap upi uruipuẽti pĩ'ã ahiag pã'ãu ipiit piat rakat e. Mi'i pĩ'ã mimo­herep ahiag kaipywiat wyti aikotã aikotã e hap ko'i ika'i­waria ha'up sat kahato.
ACT 16:17 Mi'i hawyi mekewat pĩ'ã toto Pauru'in upi. Mi'i hap tote mu'ap upi ihay haty wo irania'in me mu'ap upiaria pe — Mi'iria miit'in ni Tupana sese ywaitiat eropat haria sese e ahiag pã'ãu pĩ'ã wẽ pyi. Mi'iria wyti Tupana kapiat mu'ap moherep haria e mekewat pĩ'ã.
ACT 16:18 Mi'i e hap ewy ti yne e'at pe mio tã e ihay Pauru'in upi. Ihay po'og po'og moity'i pote Pauru yt tiky­'esat i po'og. Mi'i hawyi tuwe­morem howawi hawyi to'e — Uito ti morekuat Iesui mipo­'oro. Mi'i tupono are'e — Ereto ro meiũwat pĩ'ã piit pyi e ahiag pã'ãu me. Mio tã e hawyi tuwẽtem na'yn meremo ipiit pyi.
ACT 16:19 Mi'i pote pĩ'ã ka'i­waria te'e­ro'e — Pyno ihãite ra'yn pĩ'ã. Yt naku i yt kat i ra'yn ahiag pã'ãu pĩ'ã piit pe i'atu'e to'ope. Mi'i hawyi ta'a­tusat Pauru Sira. Mi'i hawyi iherep mo ta'a­tue­ro­po'ok yi upi more­kuaria kape wuat'i weneru hap kape.
ACT 16:20 Mi'i hawyi te'e­ro'e more­kuaria pe Pauru'in ete — Meimuẽ­wuaria Iuteuria yt naku i kahato i'atu'e. Pywo ti wu'uka hap nug haria sese mi'iria i'atu'e sa'ag. Aimo­weu­ka'i ahetawa etiat haria mi'iria i'atu'e.
ACT 16:21 Uruto wyti Huma­nu'in. Pyno ti yt naku i i'atuwat i'atueko watunug meiũpe uhyt'i'in i'atu'e. Ta'a­tu­henoi sa'ag ne'i ahepe i'atu'e sura­ra'in me.
ACT 16:22 Mi'i hawyi itotiaria i'atuehay pirik Pauru Sira ete. I'atu­py­'ahak kahato. Mi'i hawyi more­kuaria tuwat Pauru'in esokpe hiot hiot pun hamo. Mi'i hawyi te'e­ro'e — Pyno waku eweipoityk poityk to aria'yp mo i'atu'e ta'a­tue­su­ra­ra'in me.
ACT 16:23 Mi'i hawyi ta'a­tupak pak kahato ra'yn Pauru'in hawyi ta'a­tupag iheg me ra'yn wo'o­pyhyp hawe. Mi'i hawyi eti'a­tu­'a­pykok to i'atu'e ra'yn wo'o­pyhik hap ka'iwat pe.
ACT 16:24 Mi'i pote tohytmoi ra'yn iheg muo sese ra'yn oka'apy pe. Mi'i hawyi wo'o­pyhik hap aria'yp kawiat pe toi'a­tu­pyhik.
ACT 16:25 Mi'i hawyi wãtym hake turan Pauru Sira te'e­ru­wehum kahato hap wywo te'e­ru­wepy Tupana kape. Mi'i pote i'atu­pyhik haria itotiaria ikuap yne i'atu­wepy hap.
ACT 16:26 Mi'i hawyi meremo yi huruk huruk'e. Po'og na'yn hawyi mekewat wo'o­pyhik hap yi hewo hewo ra'yn. Mi'i hawyi i'ahot'e ra'yn. Tuwe­'o­ken­hyp'ok yne ra'yn mekewat wo'o­pyhik hap tuwewi. Mi'i hawyi i'atu­po'i po'i hap hewo hewo yne ra'yn itote.
ACT 16:27 Mi'i turan tuwe­hymut ra'yn wo'o­pyhik hat surara akag hawyi to'e tuwepe — Te'e­ru­we­'o­ken­hyp'ok ta'yn sig pãi e. Yt naku i kahato katu­pono uimi­pyhik ko'i tuwat tuwat yne ra'yn som e. Mi'i hawyi totat teky­se'yp tuwe­'auka teran haype — Yt naku i aru uhete katu­pono morekuat ikuap hawyi ui'a­piheg moty'i ui'auka meremo hamo uimi­pyhik ko'i te'e­ru­we­popy pote e.
ACT 16:28 Mi'i pote — Yt era'auka tei'o uhyt e Pauru tuwak popuo. Urutu­kup­te'en meiũpe torania uruto mehĩ e.
ACT 16:29 Mi'i hawyi — Eweterut ariãty uhowawi e wo'o­pyhik hap yat apykok hat temiit pe. Mi'i hawyi meremo teke hawyi toto Pauru Sira kape hawyi tuwe­pỹ­'ã­tutuk tyry­to'e popuo.
ACT 16:30 Mi'i hawyi tote­ro­po'ok ta'yn i'atu­pyhik hap kaipyi to'yat kape. Mi'i hawyi apo'e i'atuepe — Aikotã som waku atunug uheha­kye­ra'at hamo e.
ACT 16:31 — Pyno etomohey ro Iesui yn na'yn hawyi etunug Eka'iwat no Iesui mi'i pote yn ehakye­ra'at hap toĩne'en uhyt. I'ewyte e'yat piaria toi'a­tue­ha­kye­ra'at e wo'o­pyhik hat pe Pauru.
ACT 16:32 Mi'i hawyi Pauru'in henoi kahato Tupana ehay wo'o­pyhik hat yat piaria pe.
ACT 16:33 Mi'i hawyi wo'o­pyhik hat ti'a­tusei ra'yn i'atu­'ahyk ahyk hawywiat i'atusuu i'atupiit etiat. Mi'i hawyi huhy­wirip hap ko'i toikoho yne e. Mi'i tã tutunug hawyi Pauru'in het'ok ta'yn yne i'yat piaria wywo y'y wo.
ACT 16:34 Mi'i hawyi te'e­ra­'aipok ta'yn wo'o­pyhik hat yat kape. Mi'i hawyi ta'a­tu­'a­tu­moenuk ta'yn Pauru Sira. Mi'i hap tote te'e­ru­wehum kahato ra'yn Tupana ete katu­pono toimohey kahato Tupana to'yat piaria wywo.
ACT 16:35 Ihot'ok hawyi more­kuaria ti'a­tu­po­'oro ra'yn wo'o­pyhik hat kape ta'a­tue­miit'in — Waku ti tuwe­nõ'ẽ ra'yn ga'atpuat aimiahykahyk ko'i aimi­pyhik ko'i ta'a­tu'e haype ta'a­tu­'a­tu­po­'oro.
ACT 16:36 Mi'i hawyi wo'o­pyhik hat henoi ra'yn Pauru'in me — More­kuaria tipo­'oro ra'yn sehay uhyt'i'in e. Pyno waku mesup eweiwat i ra'yn uruetawa pyi e. Pyno waku ra'yn eweiwat i ro uiwy­ria'in e wo'o­pyhik hat.
ACT 16:37 Ma'ato Pauru to'e — Yt urupap i rat e. Uruto ti Humanu ywania'in eiperia ewywuaria e. Ga'atpo morekuat yt hẽtup hin i uruepe aikotã urueko ewy e. Kat poteĩ morekuat pyno uru'ahyk ahyk kahato e. Yt naku i ere'e ro more­kuaria pe e. Kat poteĩ pyno urupyhik mesuwe ga'atpo yt apo'ei'e rokirẽ i e Pauru. Mi'i hawyi mesup morekuat — Eweiwat ro uruetawa pyi yt uwe mikuap mo i e uruepe. Mi'i pote waku ti more­kuaria tõ'ẽ meiũpe uruenõtem hamuat e. Pyno ewehenoi ro uruehay more­kuaria pe e Pauru.
ACT 16:38 Mi'i hawyi toto ra'yn more­kuaria kape. Mi'i hawyi tohenoi ra'yn i'atuepe Pauru e hap. Ta'a­tukuap ta'yn Pauru'in Humanu ywania hawyi i'atu­wuwu kahato ra'yn more­kuaria katu­pono Humanu ywania yt naku i wati­'a­piheg e morekuat koro Sesa.
ACT 16:39 Mi'i hawyi more­kuaria tuwat Pauru'in kape i'atuhep wo'o­pyhik hap pywiat hamo ta'a­tu­wese kahato popuat Pauru'in puksit hamo — Uhyt'i'in waku ti eweiwat ra'yn ahetawa pyi i'atu'e more­kuaria Pauru'in me.
ACT 16:40 Mi'i hawyi tuwat mana Iritia yat kape ta'a­tu­pyhik hap kaipyi. Mi'i hawyi ta'a­tu­kaykay yne Iesui mohey haria ta'a­tue­wawi hawyi ta'a­tu­'a­tu­moe­saika Tupana ehay se wywo itotiaria. Mi'i hawyi tuwat ra'yn mekewat tawa Wiripu pyi. Mi'i tã hap ewy are uito Iruka.
ACT 17:1 Mi'i hawyi Pauru Sira tuwat ra'yn tawa Awipuri sakpo tawa Apurunia sakpo tuwat. Mi'i hawyi put'ok­'i­'a­tu'e tawa Tesa­ro­nika pe ra'yn. Itote toĩne'en Tupana mõtypot yat Iuteuria wat.
ACT 17:2 Mi'i pe Pauru teke towat teko ewy ra'yn nug hamuat. Mi'i tote miwan Tupana ehay kaipyi Pauru ti'a­tu­mu'e. Mi'i hawyi mye'ym Sapatu e'at to'o­wesat wesat Pauru wywo.
ACT 17:3 Mi'i hawyi Tupana etiat miwan mot'i kaipyi toi'a­tu­mu'e — Uiwy­ria'in e Tupana Mipo­'oro Aipo­rekuat nuat piat ho'opot hamuat hap tohenoi mesuwe miwan me e. I'ewyte ti tuwẽtem irane gu'uro pyi hamuat hap tohenoi meikowat miwan me. Eweikuap uwe mi'i tã hamuat e. Ta'i Iesui uimi­mo­herep ehepiat wyti mesuwe e. Tohenoi mi'i ti Aipo­rekuat no e Pauru Iuteuria pe.
ACT 17:4 Mi'i hawyi te'e­ru­wa­nẽtup hawyi — Pywo i'atu'e irania'in. Mi'i hawyi Pauru'in upiaria topy­hu'at Kereku ywania'in Tupana mõtypot haria ahyt. I'ewyte hary­po­ria'in we'eg haria ahyt topy­hu'at Iesui mohey haria wo ra'yn itote.
ACT 17:5 Ma'ato irania'in Iuteuria yt imohey i Iesui. Mi'i hawyi Pauru'in ete i'atue­ha­'y­wywi kahato. Mi'i hawyi ta'a­tukat mu'ap upiaria yt ipotpap i rakaria yt nakuaria i wu'uka hap nug hamo. Mi'i hawyi tuwat uhyt Iasũ yat kape. Miit'in typy'i kahato tuwat. Mi'iria yne tõ'ẽ tõ'ẽ tawa piaria Pauru'in kupte'en hap kape Pauru'in etiat ta'a­tu­hoiro hamo. Mi'i hawyi tuwe­hyt'ok haty wo Iasũ yat pe ma'ato Pauru'in yt uwe i ta'a­tu­puẽti.
ACT 17:6 Ma'ato Iasũ yn na'yn irania'in toywyt'in nywo ta'a­tu­'a­tu­puẽti. Mi'i hawyi Iasũ'in ta'a­tue­ro­po'ok iherep mo morekuat kape yi upi. Mi'i hawyi ta'a­tu­put'ok hawyi ta'a­tu­kuasa ta'a­tuehay wo — Yt naku i yt naku i mi'iria wo'o­mo­'a­kag'aia haria mi'iria i'atu'e. Mio ti tõ'ẽ ahetawa kape i'atu'e uhyt Iasũ yat pe i'atu'e.
ACT 17:7 Yt naku i mi'iria i'atu'e. Morekuat Sesa wo'o­nãpin hap yt ta'a­tunug i katu­pono wẽtup — Aipo­typot Iesui yn ni waku i'atu'e mi'iria ta'a­tuehay pirik wo Iasũ'in piat pe.
ACT 17:8 Mi'i hawyi more­kuaria itotiaria i'atu­py­'ahak kahato Pauru'in ete.
ACT 17:9 Mi'i hawyi iheg me ta'a­tupag. Mi'i hawyi meiũran tuwat yne hawyi ta'a­tu­kaykay Iasũ'in. Mi'i hawyi morekuat to'e — Pyno waku eweiwat ro i'atu'e Iasũ'in me.
ACT 17:10 Mi'i pote Iesui mohey haria ti'a­tu­po­wyro uhyt Pauru uhyt Sira i'atu­popy hamo tawa Tesa­ro­nika pyi. Mi'i hawyi tuwat tawa Pereia kape wãtym upi. Mi'i hawyi Pauru'in put'ok­'i­'a­tu'e hawyi te'e­ru­we­hyt'ok Iuteuria Etupana mõtypot yat pe.
ACT 17:11 Tawa Pereia totiaria ta'a­tu­'a­tu­puẽti po'og yt i'akag heg i rakaria tawa Tesa­ro­nika piaria kai. Mi'iria ti Tupana ehay wakuat iky'esat kahato. Mi'iria ti te'e­ru­we­mu'e kahato wuat'i e'at pe sa'a­wy­'iwuat mienoi ete. Tupana etiat ta'a­tukuap teran koitypuo pywo pe koitypuo yt Pauru'in henoi hap ta'a­tukuap teran.
ACT 17:12 Mi'i tupono ti itotiaria typy'i kahato Iesui mohey haria ipakuptia te'e­ro­py­hu'at Kereku ywania sok hary­po­ria'in wakuaria ihainia'in wakuaria te'e­ro­py­hu'at Iesui mohey haria itote.
ACT 17:13 Mi'i hawyi ti tawa Tesa­ro­nika piaria Iuteuria tikuap ta'yn aikowo Pauru'in wat hap. I'ewyte ta'a­tukuap ta'yn tawa Pereia pe aikotã toi'a­tu­mu'e itotiaria Tupana ehay wuat hap ta'a­tukuap. Mi'i hawyi tuwat ra'yn hupi Pauru etiat miit'in mõpy­'ahak hamo.
ACT 17:14 Mi'i hawyi Iuteuria ti'a­tu­mo­'a­kag'aia miit'in sok tawa Pereia pe. Mi'i hawyi Pauru ywyt'in Iesui mohey haria tipo­'oro ta'a­tuey­ke'et Pauru meremo y'y wato kape. Mi'i hawyi tuwat ra'yn Pauru wywo iwyria'in i'apykok hamo ma'ato Timoteu Sira topy­hu'at tawa Pereia pe.
ACT 17:15 Put'ok­'i­'a­tu'e Atena pe hawyi Pauru apykok haria te'e­ra­'aipok teran i ra'yn. Mi'i hawyi Pauru to'e i'atuepe — Pyno ewehenoi o uhehay uhyt'i'in Timoteu uhyt Sira pe e. Atiky­'esat tõ'ẽ merep meikowo hap o ewehenoi i'atuepe e Pauru. Mi'i hawyi te'e­ra­'aipok i ra'yn tawa Pereia kape Pauru ehay enoi hamo.
ACT 17:16 Mi'i hawyi itote tuweran na'yn Pauru toĩne'en towy­ria'in ekatup hamo. Mi'i turan itote Pauru ta'a­kasa tupa­naria iã'ãkap yn mu'ap upi hawyi toto mohaty kahato miit'in miat imohey sa'ag hap ko'i.
ACT 17:17 Mi'i hawyi ti yne e'at pe Pauru ti'a­tu­mu'e Iuteuria Kereku ywania wakuaria Tupana mõtypot yat pe. I'ewyte mu'ap upiaria pe tohenoi iky'esat haria pe.
ACT 17:18 Mi'i hawyi itotiaria wo'o­nãpin hat potmu­'eria toko­ka'at Pauru kape ihay kuap hamo. Mi'i hawyi te'e­ro'e to'ope mu'ap upi — To'iro ihay at ka'ap takat ehay kuap hamo i'atu'e. Ta'i mi'i ti wẽtup ywania kawiat tupa­naria moherep hat i'atu'e to'ope katu­pono Pauru henoi itote Iesui etiat aikotã gu'uro pyi tuwẽtem i hap etiat.
ACT 17:19 Mi'i hawyi Pauru ta'a­tu­'y­kesat eroto wo'oehay wo'oehay hap kape yity'ok Areopaku e hap kape. Itote ta'a­tue­reke Pauru ta'a­tu­py­'a­setpe hawyi te'e­ro'e tope — Uhyt pyno ehenoi ro koitywy aikotã aikotã hap sehay pakup uruepe i'atu'e.
ACT 17:20 Yt karãpe i uruikuap ehay ewywuat ihay rakat. Mi'i pote ti ehay ewy hap uruehay uruiky­'esat i'atu'e.
ACT 17:21 Katu­pono Atena piaria tikuap teran kahato yne kaipywiat sehay kat e kat e hap enoi hap ko'i i'atu'e. I'ewyte yne hewyry rakaria itotiaria tikat kahato sehay pakup itote.
ACT 17:22 Mi'i hawyi i'atu­py­'a­setpe ipoĩ'ãm na'yn Pauru mi'i hawyi to'e — Uhyt'i'in woro­ho­'okuap ta'yn aikotã eipe tupa­naria iã'ãkap ko'i ne'i wyti eweimõ­typot e Pauru Atena piaria pe.
ACT 17:23 Ta'i ga'atpo ti uhewyry ehetawa puo hap tote ti ara'a­kasa kahato ehetu­pa­naria iã'ãkap ko'i e. Wẽtup heiam me ti yt kat i tupana iã'ãkap itote atipuẽti ma'ato itote toĩne'en iwan yn — Yt uwe mikuap i Tupana eiam mesup e itote. — Yt ai'a­kasa hap i Tupana mõtypot hap eiam mesup e iwan me itote e Pauru. Yt eweikuap i ti mi'i eipe ma'ato ti eweimõ­typot mi'i e. Mi'i wyti mesup atomo­herep ehepe.
ACT 17:24 Ta'i mi'i Tupana sese ti aipytyp nug hat. Ta'i wuat'i mesu­wa­rote iminug ko'i toĩne'en e. Mi'i ti atipy piat yi totiat morekuat sese. Ta'i Tupana sese yt toĩne'en kuap i aipo wuat aiminug teiam me e.
ACT 17:25 Mi'i wyti wuat'i ereko hat. Ikai ti tukup yne sekat. Yt kat i wyti iwat iwete­weru hap ipo pe e. Ikaipyi ti watoĩ­ne'en. Ikaipyi ahehãite hap. Torania ikaipywiat ko'i e. Ta'i yt miit'in minug kaipyi i wyti Tupana toĩne'en e.
ACT 17:26 Wẽtup ok miit kaipywiat yn ni yne ywania tohytpok mesuwat yi totiaria tukup­te'en e. Ta'i sa'a­wy­'ite ti Tupana sese yne ywania ahyt eiam mesuwat yi totiat nug hat. Aikope aikope wuat'i ywa'nia e'yi toĩne'en hap Tupana tunug sa'awy'i tuwa­nẽtup hap kaipyi. Ikupte'en porap ne'i mesuwat yi totiat hamuat hap tutunug tuwa­nẽtup hawe nimo te e Pauru.
ACT 17:27 Mi'i tã tutunug tuwe­mo­herep teran miit'in kapiat haype. Toiky­'esat kahato ti miit'in miat tuwe­wowiat hap e. Toiky­'esat wuat'i ywania tikat mu'ap tuwe­wowiat hap e. Toiky­'esat topuẽti hap e. Yt pya hin i ti Tupana toĩne'en miit'in kai.
ACT 17:28 Ta'i Tupana sese kaipyi ti aheiam ahewyry hap aheĩne'en hap e. Aikotã sa'a­wy­'iwuat eimu'e haria pypy'e hap nug haria te'e­ro'e hap ewy — Tupana mẽpyt'in aito e hap ewy.
ACT 17:29 Kat poteĩ eiwa­nẽtup hawyi Uru kawiat Tupana toĩne'en ewei'e eiwa­nẽtup hap kaipyi ne'i. Aito ti meimẽ Tupana mẽpyt'in ko'i e. Aito ti Tupana iã'ãkap ko'i e. Yt Parata kawiat i ti Tupana. Yt nu kawiat i ti Tupana e. Yt mo wuat minug i ti Tupana e.
ACT 17:30 Sa'a­wy­'ite ti miit'in yt we'eg i sese tepiat haria pe Tupana sese yt kat e i te. Ma'ato mesup ti ewei'atoiat ro yt we'eg i hap ehetu­pa­naria e ra'yn yne miit'in me Tupana.
ACT 17:31 Mio ti Tupana wat miit'in airo hat toĩne'en na'yn hãpyk kahato. Mi'i ti aru meiũran miit'in airo Tupana wano sio yt e hat. Hãpyk kahato ti aru tohenoi Tupana pe e. Mi'i tã hamuat wyti watikuap ta'yn katu­pono gu'uro pywiat Tupana mihep ta'yn mi'i e Pauru Atena piaria pe.
ACT 17:32 Mio tã e hawyi irania'in to'o­ky­ry'i kahato Pauru ete. Gu'uro pywiat ieĩne'en i wat e hap ete. — Toran na'yn uhyt i'atu'e apuete. Ta'i uruikuap ti aru wẽtup e'at pe mio e'e hap etiat i'atu'e irania'in Pauru pe.
ACT 17:33 Mi'i hawyi Pauru toto ra'yn i'atu­py­'a­setpyi ma'ato wẽtup ok wẽtup ok tuwe­mu'e ra'yn Pauru wywo.
ACT 17:34 Mi'i hawyi wẽtup ok mehĩ Tiunisiu tawa Areopaku piat timohey ra'yn Iesui. I'ewyte wẽtup ok mana Tamari timohey ra'yn Iesui irania'in nywo. Mi'i tã hap etiat atiwan mesuwe uito Iruka.
ACT 18:1 Mi'i hawyi Pauru tuwẽtem na'yn tawa Atena pyi. Mi'i hawyi put'ok'e tawa Kurintiu pe ra'yn.
ACT 18:2 Mi'i hawyi itote toipuẽti wẽtup ok Iuteu uhyt Akira e hap het rakat tawa Puntu kaipywiat. Katu­pono mi'i kaipyi sa'a­wy'i yi Itaria kape toto Akira. Mekewat e'at pe ma'ato toĩne'en morekuat Kautiu itote. Mi'i morekuat ma'ato yt iwese i Iuteuria ete. Mi'i pote toi'a­tu­po­'oro ra'yn tetawa Huma pyi. Mi'i pote uhyt Akira teha­ry'i Pisira wywo tuwat ra'yn tawa Kurintiu kape.
ACT 18:3 Mi'i tote ipotpap sokpe kawiat getap nug hap ete. Mi'i hawyi Pauru ti'a­tu­puẽti itote ra'yn tomi­sepap nug hap ete. Mi'i hawyi topy­hu'at i'atu'yat pe ra'yn i'atu­po­wyro hamo. Mi'i turan i'atu­potpap kahato itote sokpe kawiat getap nug hap ete.
ACT 18:4 Ma'ato itote yne Sapatu e'at pe Pauru toto Tupana mõtypot yat kape to'y­wania atumu'e hamo. Toi'a­tu­po­re­ro­kosap teran tehay wo Kereku ywania Iuteu ywania Iesui kape.
ACT 18:5 Mi'i hawyi uhyt Sira uhyt Timoteu put'ok'e itote yi Masẽ­tunia kaipyi. Itote ta'a­tu­puẽti hawyi Pauru ihay kahato topy'a pyi — Iesui ti Tupana Mipo­'oro Aipo­rekuat nuat e.
ACT 18:6 Mi'i pote Pauru ete i'atu­hoiro kahato. Wãi wãi'i­'a­tu'e Iuteuria. Yt naku i urumu'e mi'i tã i'atu'e. Mi'i hawyi Pauru teka­misa wato hep hawyi toipe­huruk pehuruk i'atue­wawi. Mi'i hawyi to'e i'atuepe — Eiwepyi kahato ti eiwe­moe­wasat eipe. Pyno yt uhehay pyi i ra'yn wyti aria kape eweiwat e. Mi'i hawyi ti aru irania'in ywania kape ra'yn pyno areto i'atuepiat henoi hamo e Pauru Iuteuria pe.
ACT 18:7 Mi'i hawyi toto Pauru irania'in ywania mu'e hamo. Mi'i hawyi toto teka­tuwy uhyt Titu wẽtup set Iutu yat kape imu'e hamo. Katu­pono mi'i Tupana mohey hat toĩne'en. I'ewyte torania i'yat piaria tuwat kahato Tupana mõtypot yat mekewat Iuteu ywania wat kape.
ACT 18:8 Meiũran Tupana mõtypot yat ka'iwat uhyt Kiripu tomohey ra'yn Iesui yne to'yat piaria wywo. I'ewyte ipoity ra'yn tawa Kurintiu piaria imohey haria. Mi'i hawyi te'e­ru­we­set'ok yne ra'yn.
ACT 18:9 Mi'i hawyi wãtym muo imu'etu Pauru pe to'e Aika­'iwat — Yt ereken'ẽ tei'o miit'in mupi. Yt epo'inik tei'o. Eti'a­tu­mu'e o haty wo e.
ACT 18:10 Ta'i Uito areĩne'en ewywo. Yt uwe kuap i esaty'i saty'i mehĩ e katu­pono ti ipoity meiũwat tawa pe uimohey hanuaria e Iesui Pauru pe imu'etu.
ACT 18:11 Mi'i pote wẽtup anu hawyi 6 ewaty Pauru ti'a­tu­mu'e kahato tawa Kurintiu piaria Tupana ehay wo.
ACT 18:12 Mi'i hawyi itote toĩne'en wẽtup ok yi Akaia etu'isa Kariu e hap het rakat. Mi'i hawyi Iuteuria Pauru ete i'atu­py­'ahak i ra'yn. Mi'i hawyi ta'a­tue­reto ra'yn Kariu kape Pauru hã'ãg hamo.
ACT 18:13 — Meiũwat miit wyti wãi'ai'e hap yt ewy i inug kahato i'atu'e. Aiwat aheko yt ewy hin i toiky­'esat miit'in miat Tupana mõtypot hap i'atu'e Iuteuria Kariu pe Pauru piat pe.
ACT 18:14 Mi'i hawyi Pauru ihay teran ma'ato Kariu apuete e. Mi'i hawyi to'e Iuteuria pe Kariu — Miit'in yt nakuat i sese ko'i pyhyp hat ti uito e. Yt atiky­'esat hin i eweterut uhewowi — Mi'i miit yt hãpyk i uruwa­nẽtup hawe katu­pono urueko yt tutunug i kahato ewei'e hap het rakat e.
ACT 18:15 Eiperia eiwu­'uka kahato sehay po'ypyi set po'ypyi seko po'ypyi. Yt atikuap teran hin i wãi'ei'e hap ko'i e Iuteuria pe. Pyno koitywy eipo pe ra'yn eiwu­'uka sehay wuat hap e Kariu.
ACT 18:16 Mi'i hawyi toi'a­tu­po­re­nõ'ẽ ra'yn to'yat pyi.
ACT 18:17 Ma'ato tuwat turan itotiaria Kereku ywania topytyk Iuteu Tupana mõtypot yat ka'iwat uhyt Sotene. Mi'i hawyi Kariu ehamo ta'a­tu­'ahyk ahyk itote. Ma'ato Kariu yt wãi'e hin i i'atuepe.
ACT 18:18 Mi'i hawyi mekewat e'at pe toĩne'en mot'i Pauru toywyt'in Iesui mohey haria yatype. Mi'i hawyi Pauru tuwenoi i'atuepe hawyi toto ra'yn yara puo yi Siria kape. Ma'ato totioto toywyt Akira ihary'i Pisira wywo. Mi'i hawyi put'ok­'i­'a­tu'e tawa Sekeia pe. Mi'i hawyi itote Pauru to'e Tupana pe — Atunug wyti aru ui'e epiat hap Uika­'iwat e. Mi'i pote ati'a­teneg pywo ti aru atunug ui'e hap kuap epiat hamo e.
ACT 18:19 Mi'i hawyi tuwat i ra'yn tawa Ewesu kape. Mi'i hawyi itote Pauru ti'a­tu­mu'e Iuteuria Tupana mõtypot yat pe.
ACT 18:20 Mi'i hawyi itotiaria te'e­ro'e — Uruiky­'esat en ereĩne'en mot'i meiũpe urumu'e hamo i'atu'e. Ma'ato Pauru yt tiky­'esat i.
ACT 18:21 Mi'i hawyi to'e — Pyno are'e ehepe Tupana tiky­'esat pote ti aru ara'aipok te ehowawi uiwy­ria'in e Pauru. Mi'i hawyi tuwenoi mehĩ Akira mana Pisira pe irania'in me hawyi teke yara wato pe hawyi toto ra'yn tawa Ewesu pyi.
ACT 18:22 Mi'i hawyi toto i ra'yn tawa Sesareia kape i ra'yn. Mi'i hawyi put'ok­to'e hawyi tuwẽ­powat Iesui mohey haria kape. Mi'i hawyi toto i ra'yn tawa Antiokia kape yi upi. Mi'i hawyi itote toĩne'en mot'i porap'i hawyi toto i ra'yn.
ACT 18:23 Mi'i hawyi yi Karata puo yi Wirisia puo hewyry i ra'yn yne Iesui mohey haria atumoe­saika hamo.
ACT 18:24 Wẽtup e'at pe hawyi mehĩ Aporu put'ok'e tawa Ewesu pe Aresã­tiria piat i'ywã'ĩ rakat sa'a­wy­'i­tewuat Tupana etiat miwan kuap hat put'ok'e.
ACT 18:25 Mi'i hawyi ihay se kahato ihay itote iwanẽtup hap hesaika kahato. Mi'i ti Iuteu ywania. Topy'a pyi toi'a­tu­mu'e itote haty wo Iesui ete. Toikuap yne Iuwãu wo'o­set'ok hat piat miit'in set'ok hap ko'i ma'ato mi'i yn toikuap.
ACT 18:26 Mi'i hawyi wẽtup e'at pe Tupana mõtypot hawe toi'a­tu­mu'e haty wo. Itote mehĩ Akira mana Pisira tipuẽti. Mi'i hawyi ta'a­tue­reto ta'a­tu­wywo Tupana piat henoi po'og hãpyk hamo.
ACT 18:27 Mi'i hawyi Aporu toto teran yi Akaia kape pote Iesui mohey haria tawa Ewesu piaria tunug popera Aporu miereto wo yi Akaia piaria Iesui mohey haria kape. Mi'i tã wyti i'atu'e miwan me — Mehĩ'in ereke ro uhyt ewei'e o Aporu pe i'atu'e. Kat pote Aporu ti ai'e­wywuat Iesui mohey hat. Mi'i tupono waku ei'ya­type toĩne'en uruto'e i'atu'e mekewat miwan me. Mi'i hawyi Aporu toto Akaia kape tawa Kurintiu kape. Put'ok'e itote hawyi toi'a­tu­po­wyro kahato Tupana wehum hap kaipywiat Iesui mohey haria.
ACT 18:28 Toimo­herep kahato Iuteuria pe Tupana ehay sa'a­wy­'i­tewuat kaipyi aikotã aikotã Tupana tipo­'oro Iesui Miit'in Porekuat no hap etiat toimo­herep yne miit'in ehamo. Sa'a­wy'i to'o­'ewy e ma'ato tohenoi yne hawyi yt kat i'atu'e kuap i ra'yn. Mi'i tã mehĩ Aporu ti'a­tu­mu'e topy'a pyi. Mi'i hap ewy Aporu are mesuwe uimiwan me uito Iruka.
ACT 19:1 Uruwy Aporu ti'a­tu­mu'e kahato tawa Kurintiu piaria pe turan Pauru hewyry kahato yity'ok totiat mu'ap upi tawa Ewesu kape. Put'ok'e itote turan toi'a­tu­puẽti itotiaria imohey haria.
ACT 19:2 Mi'i hawyi apo'e i'atuepe — Eweimohey hawyi apo ewehe­waku ra'yn Tupana Pã'ãu Wakuat e ipotmu­'eria pe. Mi'i hawyi ta'a­tu­wesat — Yt uruikuap i ti Tupana Pã'ãu sio toĩne'en sio yt i'atu'e.
ACT 19:3 — Uwe set upi kahu pyno eipe eiwo­'o­set'ok e Pauru. — Ta'i Iuwãu mienoi ewy ti urutoria uhyt i'atu'e.
ACT 19:4 Mi'i hawyi Pauru to'e — Are pãi Iuwãu ti henoi mio tã e — Uhaipepe ti aru wẽtup ok Tupana Mipo­'oro Miit'in Porekuat nuat tut e Pauru. Mi'i ro — Eweimohey e ti Iuwãu. Mi'i tupono ewei'atoiat ro yt nakuap i ko'i eiminug hawyi woro­ho­'o­set'ok e ti Iuwãu miit'in me e. Mi'i ti Iesui ra'yn uhyt'i'in e Pauru.
ACT 19:5 Ta'a­tukuap hawyi ti Aipo­rekuat Iesui set upi i ra'yn to'o­set'ok.
ACT 19:6 Mi'i hawyi Pauru tuwe­ponug mi'i hawyi Tupana Pã'ãu wakuat put'ok'e ra'yn i'atuete. Mi'i hawyi ta'a­tu­mo­herep kahato Tupana ehay irania'in pusu puo.
ACT 19:7 Mi'iria ti 12 ok ihainia'in itote tukup­te'en.
ACT 19:8 Mi'i hawyi Pauru henoi miit'in me itote aikotã Tupana toĩne'en miit'in me hap itote. Aikotã Tupana toĩne'en Miit'in Porekuat no hap. Mye'ym ewaty ipypap i kahato mekewat Iuteuria wat Tupana yat kape. Toi'a­tu­mu'e haty wo toi'a­tuekyi miit'in Tupana etama kape.
ACT 19:9 Ma'ato irania'in itotiaria Pauru mienoi yt ta'a­tu­mõ­typot i. To'o­ky­ry'i kahato miit'in Iesui enoi hap ete. Yt ta'a­tu­mohey hin i. Mi'i pote Pauru hok'iwat ra'yn irania'in Iesui mohey haria wywo. Mi'i hawyi mehĩ Tiranu wo'o­mu'e hawe yne e'at pe Pauru ti'a­tu­mu'e.
ACT 19:10 Typy anu ra'yn Pauru ti'a­tu­mu'e Aipo­typot ehay ete. Mi'i tupono yne itotiaria Iuteuria ywania tikuap ta'yn i'ewyte Kereku ywania ikuap ta'yn wy e.
ACT 19:11 Mi'i hawyi miit'in te'e­ru­wa­nẽtup kahato katu­pono Pauru tunug yt kat kuap i topo wo wakuap ma'ato Tupana esaika hamo yn tutunug.
ACT 19:12 Mi'i hawyi i'ahu rakaria kape Pauru esokpe ta'a­tue­reto hawyi ta'a­tupag i'atupiit pe. Mi'i hawyi meremo ra'yn i'atu­'ahu kosap. I'ewyte ahiagnia pã'ãu wywuat haria toi'a­tu­po­re­nõtem na'yn miit'in myi.
ACT 19:13 Mi'i hawyi paini hu'at teran Iesui set ahiag sytpok hamo. Mi'iria Iuteuria uruto e haria ma'ato yt mi'i sese i.
ACT 19:14 Sewa sa'y­ru'in 7 ok takaria Iuteuria epa'i koro sa'y­ru'in mi'iria.
ACT 19:15 Mi'i hawyi mã'ãu sa'ag te'e­ru­wẽ­powat 7 ok takaria kape — Uruikuap ti emisu'at ko'i sehay i'atu'e. Iesui set Pauru set uruikuap i'atu'e ma'ato eipe yt uruikuap i pãi uweĩ eipe Uwe'in eipe pyno e ahiag miit piit pyi.
ACT 19:16 Mio tã ta'a­tu'e hawyi mã'ãu sa'ag ipiit piat rakat peso'e mekewat paini wato sa'y­ru'in kape. Mi'i hawyi ha'y­ru'in tu'uka mekewat miit wywo ma'ato po'og hesaika i'atukai. Mi'i hawyi te'e­ru­wehep ta'yn mekewat miit po pyi yt kat ta'a­tue­sokpe wywo i i'atupak pak hap yn na'yn i'atupiit ete.
ACT 19:17 Mi'i hawyi tawa Ewesu piaria Iuteuria Kere­kuria tikuap ta'yn hawyi i'atu­wuwu ra'yn Iesui set pupi. Yt to'o­ky­ry'i teran i po'og.
ACT 19:18 Mi'i pote typy'i poity'i te'e­ro­py­hu'at imohey haria itote tawa Ewesu pe. Mi'i hawyi wuat'i mikuap mo te'e­ro'e — Yt nakuat i nug kahato sa'a­wy­'iwuat hat uito aikotã aikotã sa'ag nug hap sepap hat sese ti uito i'atu'e. Ma'ato mesup ti atoiat ra'yn mekewat mu'ap sa'ag wẽtup i'atu'e to'ope. Mi'i tupono ti atiwuk ta'yn ehehamo paini miium popera sok i'atu'e to'ope.
ACT 19:19 Mi'i hawyi ta'a­tukat karania upi rakat paini miwan ko'i i'atu­miwuk ko'i. Mi'i hawyi ta'a­tu­puẽti sa'up iwato kahato 50 miu e'at i'atu­potpap mi'i tã kyi'at hamo i'atu'e. Ma'ato ta'a­tuwuk yne ra'yn.
ACT 19:20 Tupana sese yn waku Ahetu­pana wo i'atu'e. Mi'i ehay upi yn wato­py­hu'at teran i'atu'e.
ACT 19:21 Wẽtup e'at pe Pauru to'e topy'a pe — Pywo ti Tupana Pã'ãu tiky­'esat areto tawa Ieru­sarẽi kapiat hap yi Masẽ­tunia puo yi Akaia puo e. Mi'i rẽ Ieru­sarẽi kaipyi ti aru areto tawa Huma kape Tupana Pã'ãu miky­'esat ewy e tuwepe.
ACT 19:22 Mi'i hawyi Pauru tipo­'oro typy ok teka­tu­wyria yi Masẽ­tunia piaria kape. Wẽtup ok Timoteu wẽtup ok Eratu toipo­'oro ma'ato Pauru topy­hu'at porap'i tawa Ewesu pe.
ACT 19:23 Mekewat e'at pe tu'uka kahato tawa Ewesu piaria Iesui pu'ap upiaria ete.
ACT 19:24 Wẽtup ok itote tupa­naria iã'ãkap nug hat toĩne'en Temetiu e hap het rakat. Mi'i ti tupana mana Tiana yat nug hat. Mi'i ti tupa­naria eiam Parata kawiat nug hat koro i'atu'e. Mi'i nug hap kaipyi hemiit'in hekat rakaria wo te'e­ro­py­hu'at.
ACT 19:25 Mi'i hawyi toi'a­tu­kaykay tuwe­wawi topotpap tuwy­ria'in irania'in tupa­naria eiam nug haria. Iõ'ẽ hawyi to'e i'atuepe — Mehĩ'in e watikuap ta'yn koitywy aikotã wato­py­hu'at aito mesup hekat rakaria wo ra'yn hap e.
ACT 19:26 Ta'i aipo wuat aiminug kaipyi wyti ahekat ra'yn e. Mi'i hawyi ewei'a­kasa ra'yn Pauru potpap hap. Eweikuap ta'yn ihay aikotã tohenoi tawa Ewesu piaria pe i'ewyte wuat'i yi Asia wato hap ok tã hap. Mio tã e — Mo wuat minug tupa­naria wyti yt Tupana kahato i e hap eweikuap ta'yn e. Mi'i hawyi ti mesup ta'yn miit'in toiat kahato ahetu­pa­naria. — Waure­'i­'a­tu'e ra'yn e.
ACT 19:27 Mi'i hap ewy ti meiũran aiwat aipotpap yt kat i aru topy­hu'at pãi e. Yt naku i topy­hu'at aru katu­pono meiũran tupana mana Tiana yat pe yt uwe i imõtypot hanuaria pãi e. Yt kat i imõtypot hap hawyi yt naku i ahepe. Yi Asia piaria etupana mana Tiana i'ewyte yi wato ok tã miit'in timõ­typot kahato mana Tiana e Temetiu tupa­naria nug haria pe.
ACT 19:28 Mi'i e hap ta'a­tukuap hawyi i'atu­py­'ahak kahato Pauru ete Iesui mohey haria ete. Mi'i hawyi i'atuehay pirik kahato itote — Wakuat wakuat ti ahetu­pana mana Tiana tawa Ewesu wat i'atu'e haty wo.
ACT 19:29 Mi'i hawyi tõ'ẽ tõ'ẽ kahato miit'in. Mi'i hawyi topy­hu'at tawa Ewesu pe sehay sa'ag yn na'yn. Mi'i hawyi Pauru wyria'in mehĩ Kaiu mehĩ Aritaku yi Masẽ­tunia kaipy­wiaria ta'a­tu­pytyk. Mi'i hawyi ta'a­tue­reto yi upi ta'a­tu­wa­'a­tunug hap kape. Mi'i hawyi meremo tuwe­hyt'ok ta'yn mekewat yat wato pe.
ACT 19:30 Mi'i hawyi Pauru teke teran i'atu­we­'a­tunug yat pe miit'in sok nãpin hamo towy­ria'in Kaiu Aritaku powyro hamo. Teke teran ma'ato irania'in Iesui mohey haria yt tiky­'esat i.
ACT 19:31 I'ewyte tu'i­saria itotiaria Pauru kuap haria tipo­'oro sehay Pauru pe — Mehĩ i'atu'e yt naku i ereke i'atu­wa­'a­tunug hap yat wato pe i'atu'e. Yt uruiky­'esat i uruto i'atu'e tu'i­saria.
ACT 19:32 Mi'i hawyi itote i'atuehay pirik kahato. Ipat'ok wẽtup sehay etiano. Yt ta'a­tukuap i kahato itotiaria kat hamo kat hamo te'e­ru­wa­'a­tunug hap e.
ACT 19:33 Mi'i hawyi Iuteuria tiky­'esat uhyt Aresã­tere ihay itotiaria kape hamo. Mi'i hawyi ipoĩ'ãm i'atu­py­'a­setpe tehay hamo. Topoĩ'ãm haype topo wo toi'a­tu­mo­po­'inik teran ihay pirik takaria. Ma'ato yt ta'a­tu­ky­'esat i Aresã­tere ehay hap katu­pono Iuteu ywania ne'i mi'i.
ACT 19:34 Mi'i hawyi po'og na'yn i'atuehay pirik typy ora kape itote. Wẽtup ehay yn i'atuehay itote — Wakuat wakuat ahetawa Ewesu etupana mana Tiana i'atu'e ta'a­tuehay pirik wo.
ACT 19:35 Mi'i hawyi wẽtup ok popera piat sehay moheg hat tawa Ewesu piat ihay teran i'atuepe. Ta'a­tukuap ta'yn hawyi i'atu­po­'inik ta'yn. Mi'i hawyi ihay ra'yn — Uiwy­ria'in e tawa Ewesu piaria ti aito pãi e. Ta'i watikuap kahato wuat'i miit'in mesuwat yi totiaria aikotã Tupana wakuat hary­poria kawiat mana Tiana mõtypot haria aito hap.
ACT 19:36 Ta'i ta'a­tukuap kahato aikotã sa'a­wy'i ahemana Tiana ta'at waikiru kaipywiat hap e. Wuat'i miit'in mi'i hap kuap haria te'e­ro­py­hu'at mesuwe e. Kan hamo pyno mio tã ehehay pirik at mesuwe e. Eiwe'eg wo o eweikup­te'en e. Yt ewetunug nei'o mõpy­'ahak hap sehay e.
ACT 19:37 Ta'i meimuẽ­waria miit'in eimi­pyhyp ko'i ti yt kat i'atu'e i ahetu­pana Tiana ete. Yt karãmuo i wyti ta'a­tu­se­'e­ro'ok ahetu­pa­naria yat ko'i e.
ACT 19:38 Pyno mehĩ Temetiu woro­nãpin neran. Mi'i hawyi karãpeĩ wẽtup ok eimõ­py­'ahak hat toĩne'en meikope pote waku eweterut wo'o­nãpin hap getap kape mi'i hat e aikotã hamuat kuap tuereto hap kape e. Mi'i hawyi waku itote ewehenoi aikotã aikotã eiwa­nẽtup hap waku sio yt kuap hamo e.
ACT 19:39 Katu­pono wo'o­nãpin hap e'at toĩne'en mesuwat tawa pe. Mi'i pote mekewat e'at pe waku eweterut eiwe­wywo i'aparap hat e. Mi'i hawyi itote waku wati­'a­tu­nãpin mi'i miit'in pyhik hat akag wywo e.
ACT 19:40 Yt naku i mesup ewetunug mesuwe mi'iria ete. Eiwe'eg wo o eipot­pyhik hap pupi mehĩ'in e. Kat wato'e aru wo'o­pyhik hat ete. Yt kat wato'e kuap i aru wo'o­pyhik hat akag me mesuwat e'at piat hap ete e popera piat sehay moheg hat itotiaria pe.
ACT 19:41 Mio tã e i'atuepe hawyi — Waku eweiwat e. Mi'i hawyi i'atu­perup i ra'yn tuwat itote pyi. Aikotã hap atiwan mesuwe uito Iruka.
ACT 20:1 Pyno i'atu­po­'inik typy'i rakaria. Mi'i hawyi Pauru tikaykay Iesui potmu­'eria. Put'ok­'i­'a­tu'e hawyi toi'a­tu­'a­hi­'y­pysat. Waku yne ra'yn hawyi toi'a­tu­nãpin na'yn i'atu­moe­saika hamo. Mi'i hawyi toto yi Masẽ­tunia kape tawa Ewesu pyi.
ACT 20:2 Mi'i hawyi tawa ko'i sakpo toto wuat'i puat Tupana ehay enoi hamo. Mi'i hawyi toto yi Kereku kape.
ACT 20:3 Mi'i tote toĩne'en mye'ym ewaty. Mi'i hawyi ta'aipok teran i ra'yn yi Siria kape ma'ato teke irane yara wato piat turan Pauru tikuap Iuteuria ehay to'auka irane hap. Mi'i hawyi ta'aipok yi upi tawa Masẽ­tunia puo.
ACT 20:4 Tuwat Pauru wywo 7 ok miit yi Asia kape wẽtup set Sopa­turu uhyt Piru sa'yru tawa Pereia pywiat. Mi'i hawyi Aritaku mi'i hawyi Sikũtu tawa Tesa­ro­nika kaipy­wiaria. Mi'i hawyi Kaiu tawa Tepe piat. Mi'i hawyi Timoteu mi'i hawyi Tikiku i'ewyte Towimu Asia piaria tuwat.
ACT 20:5 Mi'iria uruekatup tawa Turate tote katu­pono tuwat urue'yianme.
ACT 20:6 Mekewat man teneg u hap e'at ko'i tokosap hawyi urutuwat i ra'yn tawa Wiripu pyi y'y upi. 5 e'at hawyi put'ok­'u­ru­to'e tawa Turate wã tote. Itote urutu­kup­te'en wẽtup semana.
ACT 20:7 Mytu'u e'at piat uruwe­'a­tunug man pik pik hap e'at pe turan Pauru ti'a­tu­mu'e ka'ap kahato Iesui mohey haria. Toto teran mũkite wẽtup tawa kape haype yt iwẽpohep tã i te.
ACT 20:8 Mi'i hawyi wãtym turan ariãty ipoity kahato meiẽwat okipy ywaiti rakat pe uruwa­'a­tunug hap tote.
ACT 20:9 Mi'i tote toĩne'en wẽtup ok kurum Eutiko e hap het rakat wanẽtup hat. Mi'i hawyi Pauru ehay pot'i pote kurum toket ne'i ra'yn. Mi'i hawyi ta'at ywaiti pyi apyk piat mye'ym okipy hap totepyi yi kape. Mi'i hawyi iku'uro sese ra'yn.
ACT 20:10 Pauru ta'apyk hawyi tuwe­pỹ­'ã­tutuk hawyi totat ra'yn kurum at hat iku'uro rakat topo pe hawyi to'e irania'in itotiaria pe — Wãi yt eweiwak tei'o. Yt iku'uro i rat e. Mio tã to'e hawyi kurum at hat waku i ra'yn.
ACT 20:11 Mi'i hawyi ta'am i hawyi toipik pik man hawyi ta'a­tu'u. Mi'i hawyi ihay ywop hawyi iwẽpohep ihot'ok pote ra'yn.
ACT 20:12 Mi'i hawyi iku'uro rakat toto wy irania'in wywo ta'a­tu'yat kape. Ihãite i ra'yn pote i'atu­wepit kahato itotiaria.
ACT 20:13 Mi'i hawyi Pauru toto yi upi tomi­ky­'esat ewy e ma'ato uruto urutuwat yara wato puo tawa Asu kape itotiat Pauru pag hamo.
ACT 20:14 Mi'i hawyi tawa Asu pe uruto­'o­puẽti i ra'yn. Mi'i hawyi Pauru teke yara wato pe hawyi urutuwat yi Miti­rene kape.
ACT 20:15 Itote pyi urutuwat i ra'yn. He'i­hot'ok pe uruto­ko­ka'at ywypyi'a Kiu e hap rãpe. Mi'i hawyi meiũran urutu­wehik tawa Samui pe. Mi'i hawyi uruto­py­hu'at tawa Tokiriu pe. He'i­hot'ok pe put'ok­'u­ru­to'e tawa Miretu tote.
ACT 20:16 Mi'i hawyi Pauru to'e uruepe — Wãi yt eiwehik tei'o tawa Ewesu tote e. Yt areĩne'en mot'i teran i yi Asia tote e. Atiky­'esat arokosap Ieru­sarẽi me ienuk man teneg u hap e'at pe e uruepe.
ACT 20:17 Mi'i hawyi tawa Miretu pyi toi'a­tu­kaykay tuwe­wawi Iesui mohey haria akag ko'i. Tawa Ewesu piaria toi'a­tu­kaykay.
ACT 20:18 Put'ok­ta­'a­tu'e hawyi Pauru to'e — Eweikuap te apo aikotã sa'a­wy'i ariot ehe'yi Asia turan wuat hap e. Ta'i eipy­'a­setpe wuat'i e'at pe areĩne'en meiũpe eiwywo e.
ACT 20:19 Eweikuap kahato ti mi'i pote aikotã uipotpap kahato Aika­'iwat miky­'esat motpap wiat hap perup'i puo uiwak popuo woro­ho­'o­mu'e hap e. Mi'i turan tut ra'yn uhã'ãg hap ko'i katu­pono Iuteuria ui'auka teran itote e.
ACT 20:20 Mi'i turan yt uiwẽ­pohep hin i henoi hap ko'i ete ma'ato ahenoi yne eimoe­saika hamuat hap e. Ahenoi yne uimikuap wakuap etiat ko'i. Wuat'i ehamo i'ewyte wuat'i getap we woro­ho­'o­mu'e e.
ACT 20:21 Ta'i eweikuap ta'yn aikotã ahenoi henoi Iuteuria ywania pe Kereku ywania piat hap e. Mio tã are — Ewei'atoiat ro yt nakuap i ko'i are. Eweimohey ro Iesui. Mi'i ti Eika­'iwat nuat are itote e Pauru.
ACT 20:22 Mesup ti uipo­'oro ra'yn Tupana Pã'ãu tawa Ieru­sarẽi kape e Pauru. Mi'i pote areto hamuat howawi ma'ato yt atikuap i aikotã aru arokosap itote hap.
ACT 20:23 Ma'ato mi'i tã e hap atikuap Tupana Pã'ãu Wakuat uimu'e — Ereto Ieru­sarẽi kape hap tote ti epyhik hamuat eho'opot hamuat yn topy­hu'at itote e uhepe wuat'i tawa puo e Pauru.
ACT 20:24 Ma'ato yt areken'ẽ hin i uiku­'uro hap pupi katu­pono atunug yne teran kat kat som motpap Aika­'iwat Iesui miium uhepiat uipo­'oro hap ko'i. Mi'i ti tutum sehay wakuap aiky'e Tupana piat hap uimienoi wuat. Mi'i pote ti atunug yne teran e Pauru.
ACT 20:25 Ta'i uimi­mu­'eria Tupana yn ni waku Aipo­rekuat no e hap ahenoi kahato ehepe.
ACT 20:26 Mio atikuap ta'yn mesup areto ra'yn hawyi aru ma'ato yt karãpe i ra'yn ewei'a­kasa uhowawi e.
ACT 20:27 Pywo pe ti koity'i e'at pe yt kat i miit'in suu uipo ete katu­pono yt karãmuo i uiwẽ­pohep Tupana ehay enoi hap ete. Ta'i ahenoi henoi yne kahato ra'yn Tupana wo'o­nãpin hap ehepuo e.
ACT 20:28 Pyno eiwe'eg wo o. Ewei'a­pykok Tupana hũria Tupana Pã'ãu miium eipo puat ko'i. Ewei'a­tupoi o Tupana hũria Iesui mikyi'at tosuu wuat ko'i ihay wo Tupana emiit'in e.
ACT 20:29 Katu­pono atikuap ta'yn uhaipe kai ti aru tõ'ẽ tõ'ẽ awahuru ko'i wo'o'u haria ehowawi e Pauru. Mi'iria ti aru yt iky'e hin i Tupana hũria e.
ACT 20:30 Ta'i eipy­'a­setpyi wyti aru te'e­ru­we­mo­herep heso rakaria wo'o­ma'at hanuaria te'e­ru­we­wawiat ehekyi hamo e. Mi'i hawyi ti aru tuwat irania'in eipy­'a­setpyi i'atu­mi­ma'at ko'i e.
ACT 20:31 Mi'i tupono eiwa­tetup o. Yt waure­'e­wei'e tei'o uhepiat eimu'e hap ete. Katu­pono mye'ym anu wãtym muo ihot'ok at puo woro­ho­'o­mu'e woro­ho­'o­nãpin uiwak popuo e Pauru tawa Ewesu kaipy­wiaria pe.
ACT 20:32 Uiwy­ria'in e koitywy areto ra'yn eipy­'a­setpyi. Ma'ato ti woro­ho­'o­'atoiat eipe Tupana po pe. Tupana ti eiky'e hap hum kahato ehepe. Tutum ahepe tehay wakuat aimoe­saika hamo aimo­hãpyk yt nakuap i kaipywiat hamo. Mi'i pote watoĩ­ne'en hemiit'in no irania'in imimoe­waku ko'i saipe­piaria wo mesup e Pauru tawa Ewesu piaria pe.
ACT 20:33 Yt karãpe i kue atiky­'esat eheti­neiru ehesokpe pãi e.
ACT 20:34 Pyno pywo eweikuap ta'yn aikotã uipo wo uipotpap hap e. Mi'i sa'up mo kue atikyi'at yne uheka­re'en ko'i uimi'u ko'i i'ewyte uheka­tu­wyria wano atum yne uipotpap kaipyi.
ACT 20:35 Atimo­herep kahato ehepe uipotpap hap aikotã waku watum yt kat i ereko haria pe aimie­reko ko'i hap e. Ta'i waku aiwa­tetup Aika­'iwat Iesui ehay kape aikotã sa'a­wy'i to'e hap kape — Aimiium wyti po'og aimo­wepit aimi­kyi'at ko'i kai e Iesui e Pauru.
ACT 20:36 Mio tã to'e hawyi tuwe­pỹ­'ã­tutuk Pauru i'atu­wywo. Mi'i hawyi ihay Tupana kape.
ACT 20:37 Mi'i hawyi te'e­ruwak yne kahato. Mi'i hawyi ta'a­tu­'a­hi­'y­pysat hawyi ta'a­tu­'ã­pytsin Pauru.
ACT 20:38 Ta'a­tu­mo­haty ihay — Yt ewei'a­kasa i ra'yn aru uhowawi e hap. Mi'i hawyi ito pote tuwat hupi yara wato kape. Mi'i hap etiat atikuap yne katu­pono areĩne'en itote are uito Iruka.
ACT 21:1 Mi'i hawyi urutu­wenoi yne ra'yn hawyi urutuwat i ra'yn yara wato puo. Mi'i hawyi hãpyk urutuwat tawa Kui kape. He'i­hot'ok pe urutuwat tawa Hutei kape. Itote pyi urutuwat yi Patara kape.
ACT 21:2 Mi'i hawyi uruipuẽti itote wẽtup yara wato yi Wenisia kapiat. Mi'i pe urutu­we­hyt'ok hawyi urutuwat ra'yn.
ACT 21:3 Mi'i turan uruta­'a­kasa ywypyi'a wato Sipiri e hap. Mi'i hawyi urutuwat moran kai yi Siria kape. Mi'i hawyi put'ok­'u­ru­to'e tawa Tiru tote. Mi'i tote ta'a­tue­nõtem yne ta'a­tue­ka­re'en.
ACT 21:4 Tawa Tiru tote uruipuẽti Iesui mohey haria hawyi urutu­kup­te'en itote 7 e'at. Mi'i hawyi itotiaria te'e­ro'e Pauru pe — Wãi yt ereto tei'o tawa Ieru­sarẽi kape mehĩ i'atu'e Tupana Pã'ãu mienoi puo.
ACT 21:5 Tokosap mekewat e'at ko'i hawyi urutuwat i ra'yn. Yne Iesui mohey haria tuwat yne uruwywo ihainia'in hary­po­ria'in hira­karia pya ra'yn tawa kai. Mi'i tote urutu­we­pỹ­'ã­tutuk yi kyt'ok tote. Mi'i hawyi itote uruehay Tupana wywo.
ACT 21:6 Urutu­wenoi uruwo­'ope hawyi urutu­we­hyt'ok i ra'yn yara wato pe. Mi'i hawyi te'e­ra­'aipok i ra'yn ta'a­tu'yat kape.
ACT 21:7 Mi'i pytkai urutuwat ra'yn tawa Putu­re­maita kape tawa Tiru pyi. Mi'i tote uruto­'o­puẽti ra'yn uruwy­ria'in Iesui mohey haria wywo. Itote urutu­kup­te'en wẽtup e'at i'atu­wywo.
ACT 21:8 He'i­hot'ok pe urutuwat i ra'yn tawa Sesareia kape. Put'ok­'u­ru­to'e itote hawyi urutuwat Tupana ehay sytpok hat Wiripi yat kape. Sa'a­wy­'iwuat 7 ok takaria Wiripi yat kape.
ACT 21:9 Mi'i hawyi Wiripi saki­'yt'in itote tukup­te'en 4 ok hary­poria makup­tiaria Tupana ehay moherep haria.
ACT 21:10 Mi'i tote urutu­kup­te'en turan put'ok'e yi Iuteu kaipywiat wẽtup ok miit Tupana ehay moherep hat Akapu e hap het rakat.
ACT 21:11 Tut uruewawi hawyi totat Pauru we'ok kytyt hap. Mi'i hawyi toikytyt topy ko'i topo ko'i Pauru we'ok kytyt hamo. Mi'i hawyi to'e Pauru pe — Meiko tã eĩ uhepe Tupana Pã'ãu henoi e. Meiko tã aru Iuteuria Ieru­sarẽi miaria ekytyt aru ereto tawa Ieru­sarẽi kape hawyi e. Mi'i hawyi ti aru ta'atuium na'yn irania'in ywania sura­ra'in me e Tupana ehay moherep hat Akapu Pauru pe.
ACT 21:12 Mi'i hawyi — Wãi yt ereto tei'o Ieru­sarẽi kape mehĩ uruto'e Pauru pe. I'ewyte itotiaria wãi'i­'a­tu'e.
ACT 21:13 Ma'ato Pauru uruwesat — Wãi yt eweiwak tei'o katu­pono haty ti uipy'a pe e. Tupana tiky­'esat uipyhik hap pote i'ewyte uito atiky­'esat e. Yt areken'ẽ i ui'auka hap pupi tawa Ieru­sarẽi note Uika­'iwat Iesui set mõtypot hap ete.
ACT 21:14 Mi'i pote uruto'e Pauru pe — Pyno yt eropy­hu'at teran i uruehay upi mi'i pote etunug no Aika­'iwat miky­'esat ewy mehĩ uruto'e.
ACT 21:15 Tokosap mekewat e'at ko'i Wiripi yat piat hawyi urutunug waku yne hawyi urutuwat ra'yn Ieru­sarẽi kape.
ACT 21:16 Mi'i hawyi mu'ap upi irania'in Iesui mohey haria tawa Sesareia pywiaria tuwat uruwywo Ieru­sarẽi kape. I'ewyte wẽtup miit Manasũ e hap het rakat tawa Sipiri piat yianmiat Iesui mohey hat tut i'atu­wywo wy e. Mi'i pote te'e­ro'e — Mi'i yat pe som waku wato­py­hu'at i'atu'e.
ACT 21:17 Put'ok­'u­ru­to'e Ieru­sarẽi note hawyi itotiaria Iesui mohey haria te'e­ro'e — Eiwe­hyt'ok to i'atu'e ta'a­tu­wepit popuo.
ACT 21:18 He'i­hot'ok pe Pauru toto uruwywo Tiaku owa kape. Mi'i rokirẽ itote te'e­ru­wa­'a­tunug yne Iesui mohey haria akagnia.
ACT 21:19 Mi'i hawyi waku kahato sig woro­ho­'o­puẽti mehĩ'in e. Mi'i hawyi Pauru henoi kahato aikotã Tupana tunug wakuap irania'in ywania yt Iuteuria i haky­'e­ra'at hap ete.
ACT 21:20 Pauru mienoi ta'a­tukuap hawyi — Waku kahato i'atu'e Tupana pe Tiaku'in. Mi'i hawyi te'e­ro'e Pauru pe — Uhyt i'atu'e mio wyti typy'i kahato Iesui mohey haria meiũpe Iuteuria ai'y­wania. Mi'iria ti imohey kahato Iuteuria eko.
ACT 21:21 Ma'ato mi'iria ti yt ikuap i kahato etiat kat ere eti'a­tu­mu'e Iuteuria ywania irania'in py'a­set­piaria hap. — Ewei'atoiat ro Musei einãpin hap ko'i e'e i'atu'e. Mi'i hawyi wãi yt ewehe­murui ãpytek tei'o esa'y­ru'in e'e hap ko'i i'atu'e. Wãi yt ereke tei'o Iuteuria eko pe e'e hap i'atu'e Pauru pe.
ACT 21:22 Aikotã aru pyno watunug katu­pono ta'a­tukuap ti aru put'ok'e e hap. Mi'i hawyi ti aru tõ'ẽ kahato enãpin hamo i'atu'e Pauru pe.
ACT 21:23 Pyno po'og waku etunug no urueko ewy uhyt i'atu'e. Katu­pono uruto wuaria py'a­setpe tukup­te'en 4 ok ihainia'in. Mi'iria ti aru inug ta'a­tu­py'a piat — Urutunug aru ta'a­tu'e Tupana piat hap.
ACT 21:24 Pyno erepuk­puk'ok kahato ro i'atu­wywo Iuteuria eko ewy. Mi'i hawyi waku etum mi'i hap sa'up i'atu'e. Mi'i hawyi ti aru waku era'a­teneg i'atu'e. Mi'i tã etunug mote ti aru meremo ekuap urueko nug hat en hap i'atu'e Pauru pe. Mi'i pote ti aru aheko ewy ra'yn Pauru tunug i'atu'e to'ope ta'a­tu­nãpin.
ACT 21:25 Ta'i uruhenoi ra'yn sa'a­wy'i irania'in ywania pe Iesui mohey haria pe. Yt ewetu'u tei'o yne tupa­naria iã'ãkap piat miium mi'u pu'i ko'i uruto'e. I'ewyte huu sapo wo yt naku i aimi'u wo uruto'e. I'ewyte mi'ut'yp nik piat mi'auka pu'i yt naku i watu'u uruto'e. I'ewyte ihainia iwary wary hary­poria he'aito he'aito yt naku i uruto'e. Mi'i hawyi irania'in Iuteuria eko waku eweiwaure uruto'e sa'a­wy'i urumiwan me irania'in ywania pe uhyt i'atu'e Ieru­sarẽi miaria.
ACT 21:26 Mi'i hawyi he'i­hot'ok pe Pauru toto 4 ok ihainia wywo. Mi'i hawyi te'e­ru­we­pit­pit'ok yne hawyi tuwe­hyt'ok ta'yn Tupana mõtypot hawe. Ta'a­tu­henoi teran kat e'at pe waku ta'atuium Tupana pe ta'a­tuhũ suu ta'a­tu­we­pit­pit'ok hap enoi hamo — 7 e'at aru urutunug uru'e hap ewy hap enoi hamo.
ACT 21:27 Put'ok'e irane ra'yn i'atu­pit­pit'ok hap e'at. Mi'i hawyi tõ'ẽ Iuteuria yi Asia kaipyi. Put'ok­'i­'a­tu'e hawyi te'e­ra­'a­kasa Pauru Tupana mõtypot hawe. Mi'i hawyi ta'a­tu­mo­'a­kag'aia Ieru­sarẽi miaria Pauru etiat i'atu­py­'ahak hamo. Mi'i hawyi ta'a­tu­pytyk ta'yn Pauru.
ACT 21:28 Mi'i hawyi te'e­ro'e ta'a­tuehay pirik wo — Sura­ra'in urupo­wyro ro eipe meiũwat miit pyhik hamo i'atu'e. Kat pote wuat'i puo yt naku i sehay enoi hat meiũ i'atu'e ta'a­tuehay pirik wo. Ta'i ai'y­wania ete aheko ete Tupana yat ete ihay sa'ag sa'ag hat wyti meiũ miit i'atu'e. Kereku ywania kawiat rei'o ti totopag Tupana mõtypot hawe. Mi'i pote toimohun kahato meiũwat seiam wakuat i'atu'e Pauru piat pe.
ACT 21:29 Sa'a­wy'i te'e­ra­'a­kasa uhyt Towimu tawa Ewesu kaipywiat Pauru wywo Ieru­sarẽi me. Mi'i hawyi te'e­ru­wa­nẽtup yt pywo pe i — Ta'i Pauru tioto ra'yn ti mekewat wẽtup ywania Tupana yat kape i'atu'e te'e­ru­wa­nẽtup yt pywo pe i.
ACT 21:30 Mi'i hawyi to'o­wenka wenka Ieru­sarẽi miaria yne hawyi ta'a­tu­pytyk Pauru hawyi ta'a­tu­herep yi upi hawyi ta'a­tu­'o­kenhyp ta'yn Tupana mõtypot hap yat.
ACT 21:31 Mi'i hawyi ta'a­tu­'auka teran na'yn ma'ato put'ok'e ra'yn i'auka teran hat sura­ra'in akag ete. Ta'i tu'uka irane ti yne Ieru­sarẽi miaria i'atu'e sura­ra'in me. Mi'i hawyi surara akag koro tero­po'ok tesu­ra­ra'in i'atu­'akag ko'i wywo.
ACT 21:32 Mi'i hawyi tuwe­hyt'ok meremo ipy'ahak takaria py'a­setpe. Sura­ra'in akag koro te'e­ra­'a­kasa hawyi meremo i'atu­pohep ta'yn Pauru pak pak haria.
ACT 21:33 Mi'i hawyi put'ok'e sura­ra'in akag koro hawyi tokosap Pauru kape. Mi'i hawyi to'e temiit'in me — Ewetat ro mesuwat miit e. Eweipo'i po'i ro typy saity iheg nakat wo e. Mi'i hawyi apo apo'e — Uwe keĩ e pyno meiũ e. Kat keĩ tutunug pyno e.
ACT 21:34 Mi'i hawyi irania'in typy'i rakaria haty wo yt to'o­'ewy i ta'a­tu­wesat. Mi'i pote surara akag koro yt tikuap i aikotã hamuat hap. Mi'i hawyi to'e temiit'in me — Ewetioto ro meiũwat ai'yat iheg nakat kape e Pauru piat pe.
ACT 21:35 Mi'i hawyi tuwat ra'yn hawyi put'ok­'i­'a­tu'e ra'yn. Mi'i hawyi sura­ra'in hupit ta'a­tu­'okpe tote Pauru miit'in py'ahak typy'i poity'i pote.
ACT 21:36 Mi'i hawyi miit'in typy'i rakaria tuwat hupi ta'a­tuehay pirik wywo — Ewei'auka ro ewei'auka ro i'atu'e.
ACT 21:37 Mi'i hawyi Pauru ta'a­tue­reto irane ra'yn sura­ra'in yat kape turan to'e i'atu­'akag koro pe — Uhehay teran ewywo uhyt e Pauru i'atu­pusu puo Kereku pusu puo. Mi'i hawyi surara akag koro to'e
ACT 21:38 — Etikuap apo pyno urupusu Kereku ehay e. En apo pyno yt Esitu piat i e. Nimuat miit'in mõpy­'ahak morekuat etiat hat i apo en. Yt 4000 wo'o­pot­'auka haria akag i apo en e Pauru pe ikoro.
ACT 21:39 Mi'i hawyi Pauru tiwesat — Uito rat Iuteu e tawa Tasu piat yi Sirisia piat. Ta'i tawa ypy wakuat piat uito e. Pyno uhehay teran kahato meimuẽ­waria miit'in typy'i rakaria kape e Pauru surara akag koro pe.
ACT 21:40 Mi'i hawyi — Waku uhyt e Pauru pe. Mi'i turan Pauru y'am me toĩne'en am hap tote. Mi'i hawyi Pauru henoi itotiaria pe. Aikotã mi'i totiat hap etiat atiwan mesuwe are uito Iruka.
ACT 22:1 Mi'i hawyi Pauru ihay haty wo to'y­wania Iuteuria pe topusu puo — Ui'y­wot'in uheywyt'in e mesup ahenoi teran uhetiat sehay ehepe e. Mi'i pote eweikuap to uhehay e to'auka teran haria pe.
ACT 22:2 Ta'a­tukuap ta'yn ihay ta'a­tu­pusu puo Epereu pusu puat hawyi po'og i'atu­po­'inik ta'yn po'og i'atue­waure ka'a. Mi'i hawyi to'e i Pauru miit'in sem me.
ACT 22:3 — Uito rat ei'ewy Iuteu ywania kawiat e. Ui'y­wã'ĩ wyti tawa Tasu pe yi Sirisia pe e. Ma'ato uitag meiũwat tawa Ieru­sarẽi me. Meiũpe wo'o­mu'e hat Kamarieu uimo­we'eg hat yatype areĩne'en. Mi'i hawyi yne wo'o­nãpin hap nimuat ko'i ai'y­wania ko'i wanuat wo uimu'e hãpyk kahato. Mi'i ko'i atunug na'yn haty wo Tupana ewawi aikotã ewetunug mesup hap ewy te atunug e.
ACT 22:4 Sa'a­wy'i uipotpap kahato mesuwat mimohey pakup moma hamo. Mi'i pote haty wo ati'a­tu­po'i po'i ihainia'in hary­po­ria'in mu'ap pakup mohey haria. Mi'iria ati'a­tu­mohan kahato. Areto ra'yn i'atu­pyhik pyhik hamo i'atu­'uka hamo e.
ACT 22:5 Uiminug ko'i pa'i koro tikuap yne. I'ewyte yne nagnia ikuap e. I'atu­kaipyi ti sa'a­wy'i atat popera hẽ to e hap ai'y­wania tawa Tamaku piaria kapiat nuat.
ACT 22:6 Mi'i hawyi areto tawa Tamaku kape e. Yt pya i ra'yn turan atpo­sake irane turan iũte'en atipy kaipyi hẽtyhot kahato ui'a­py­pueri wo e.
ACT 22:7 Mi'i pote ara'at yi tote. Itote atikuap ihay to'e uhepe — Sauru Sauru kat poteĩ uhaty'i haty'i en e.
ACT 22:8 Mi'i hawyi apo'are — Uweĩ en kat eĩ eset Uhyt are. Mi'i hawyi uiwesat — Uito ti meiũ Iesui tawa Nasare piat emisa­ty'i saty'i e.
ACT 22:9 Uiwywuat wat haria te'e­ra­'a­kasa hẽtyhot hap kape ma'ato yt ta'a­tukuap i ihay uiwywuat hap. Mi'i hawyi apo'are
ACT 22:10 — Kat aru atunug pyno Uika­'iwat are. Mi'i hawyi uiwesat — Pyno erepoĩ'ãm no hawyi ereto ro tawa Tamaku kape e. Itote ti aru wẽtup ok henoi epe kat ko'i kat ko'i uimi­ky­'esat ko'i eminug wuat e uhepe e Pauru.
ACT 22:11 Mi'i tote ti yt uheha­pytig i ra'yn ariãty hot hap poity'i hawyi. Mi'i hawyi ti ui'y­kesat eroto ra'yn Tamaku kape uiwywuat wat haria e.
ACT 22:12 Mi'i hawyi put'ok­'are e Pauru. Mi'i hawyi itotiat wẽtup ok uhyt Anania Tupana wo'o­nãpin hap nug hat toĩne'en itotiaria Iuteuria mimõ­typot kahato.
ACT 22:13 Wuat'i Iuteuria mimõ­typot mi'i put'ok'e uheĩne'en hap tote uhowakai hawyi to'e — Ehapytig i ro uheywyt Sauru e. Mio tã e hawyi meremo uheha­pytig i ra'yn hawyi araha'at ra'yn howawi e.
ACT 22:14 Mi'i hawyi to'e uhepe Anania — Aha'a­se­'i'in Etupana ti e'airo ra'yn tomi­ky­'esat kuap hamo. Toiky­'esat wyti era'a­kasa hãpyk takat miit kapiat hap e uhepe.
ACT 22:15 Toiky­'esat etikuap iwẽ pyi ihay e. Meiũran aru etimo­herep akasa hap ko'i emikuap ko'i wuat'i miit'in me hap uhyt e.
ACT 22:16 Koitywy kat poteĩ ereĩne'en mot'i mesuwe e. Epoĩ'ãm no hawyi ereset'ok to e. Ehẽtup to Eka'iwat pe — Uiminug sa'ag ko'i etikoho yne ro mehĩ ere ro e Anania uhepe.
ACT 22:17 Meiũran ara'aipok i ra'yn Ieru­sarẽi kape tawa Tamaku pyi. Mi'i hawyi Tupana mõtypot hap yat pe areĩne'en. Itote ara'a­kasa uimu­'etu.
ACT 22:18 Ara'a­kasa ihay uiwywuat rakat — Erẽtem no merep tawa Ieru­sarẽi myi katu­pono ti aru yt ta'a­tu­mohey i ehay uhetiat emienoi e uhepe.
ACT 22:19 Mi'i hawyi atiwesat — Ma'ato mehĩ ta'a­tukuap kahato uhetiat meiũpe aikotã sa'a­wy'i ati'a­tu­pyhik ati'a­tupak pak emohey haria wuat'i wo'o­mu'e hawiaria hap ta'a­tukuap ta'yn.
ACT 22:20 I'ewyte ta'a­tukuap ta'yn aikotã sa'a­wy'i ehay enoi hat Etewãu suu okpun turan uito itote hẽ to waku ewei'auka ro are hap ta'a­tukuap. Ta'i i'auka haria esokpe uipo pe toĩne'en itote ta'a­tu­'auka Etewãu turan. Mi'i hap ta'a­tukuap uhyt are Uika­'iwat pe e Pauru.
ACT 22:21 Ma'ato uiwesat — Motoro e katu­pono woro­po­'oro pya kahato yt Iuteuria i mu'e hamo e uhepe e Pauru Iuteuria pe.
ACT 22:22 Mio tã e pote i'atuehay pirik kahato Pauru ete. Katu­pono sehay yt Iuteuria i mu'e hamo e hap ete. Mi'i hawyi te'e­ro'e — Yt naku i ti mio tã e'e hap i'atu'e ta'a­tuehay pirik wo.
ACT 22:23 Mi'i hawyi ta'a­tue­ka­misa hep hawyi ta'a­tu­po­rokpun. Mi'i hawyi yi wo mak mak'i­'a­tu'e ywaipe. Ta'a­tu­py­'ahak Pauru etiat haype.
ACT 22:24 Mi'i pote sura­ra'in akag koro ti'a­tu­po­'oro temiit'in Pauru erut sura­ra'in yat koro kapiat hamo. Mi'i hawyi toi'a­tu­po­'oro temiit'in Pauru pak pak hamo. Toiky­'esat kat e Pauru topusu puo Iuteuria mõpy­'ahak hap toikuap hamo.
ACT 22:25 Mi'i hawyi ta'a­tu­po'i po'i Pauru saity mi'at pe kawiano. Mi'i turan Pauru apo'e wẽtup ok surara akag me — Waku apo som ui'ahyk ahyk yt morekuat sehay upi i katu­pono uito Humanu ywania pote yt naku i uipokpok Humanu ywania morekuat wywuat yt ahehay rokirẽ i te morekuat yt ehay pyi i te e Pauru surara akag me.
ACT 22:26 Tepiat ikuap hawyi toto henoi hamo sura­ra'in akag koro kape. Mi'i hawyi to'e — Mehĩ ewe'eg wo o katu­pono meiẽ ihainia ti sio Humanu e'ywania e.
ACT 22:27 Mi'i hawyi tut ra'yn ikoro apoto'e Pauru piat hamo — Pywo apo en Huma­nu'in e. Mi'i hawyi toiwesat — Ta'i mi'i ti rat uito e.
ACT 22:28 Mi'i hawyi ikoro to'e — Ta'i uito ti i'ewyte atikyi'at wyti Huma­nu'in set ha'up woity kahato e Pauru pe. Mi'i hawyi Pauru tiwesat — Uito ti Humanu ywania ui'ywot kaipywiat e. Uito yt atikyi'at i e katu­pono ui'ywot Humanu e.
ACT 22:29 Mi'i hap sura­ra'in tikuap hawyi te'e­ru­wepik meremo Pauru yaty­pepyi ipak pak teran haria. Mi'i hawyi ikoro token'ẽ kahato kat pote tehay pywiat Pauru po'i po'i pote. Yt naku i roso Huma­nu'in wati­po'i po'i i'atu'e.
ACT 22:30 He'i­hot'ok pe ikoro tikat kahato sehay kat pote Pauru Iuteuria ti'auka teran kahato hap. Mi'i hawyi toipo'i po'i hawyi toi'a­tu­wenka pa'i kororia wo'o­nãpin haria. Mi'i hawyi toterut kary Pauru. Mi'i hawyi toimo­herep i'atuepe. Mi'i hap aikotã ta'a­tunug Pauru ete atiwan mesuwe uito Iruka.
ACT 23:1 Mi'i hawyi Pauru iha'at kahato wo'o­nãpin haria kape. Mi'i hawyi to'e i'atuepe — Uheywyt'in e. Nimo pyi te meiũ te areĩne'en Tupana ehamo yt kat i atunug sa'ag uiwe­mõti hamo e.
ACT 23:2 Ma'ato pa'i koro Anania to'e — Eweiwẽ­petek to e Pauru yaty­piaria pe.
ACT 23:3 Mi'i hawyi Pauru to'e pa'i koro pe — Ta'i Tupana ti aru e'ahyk e. En wyti yi pype ikytsig nakat ewy. Meiẽpe ereĩne'en apyk pe uikuap hamo aikotã uito waku sio yt nakuat i hap kuap hamo e. Ma'ato iwan miat ainãpin hap kaipyi yn ni watikuap miit'in waku sio yt naku i hap ko'i uhyt e. Mio eweiwẽ­petek to ere yt aiwo­'o­nãpin hap ewy i ra'yn e Pauru pa'i koro Anania pe.
ACT 23:4 Mi'i hawyi Pauru yaty­piaria te'e­ro'e tope — Ehay sa'ag apo Tupana mi'airo ahepa'i koro ete i'atu'e.
ACT 23:5 Mi'i hawyi Pauru tiwesat — Yt atikuap i wyti pa'i koro meiũ hap uiwy­ria'in katu­pono miwan me — Yt ehay ko'i ko'i tei'o eipo­rekuat ete e ti ainãpin hawe e Pauru.
ACT 23:6 Mi'i hawyi Pauru tikuap ta'yn typy sehay mohey haria tukup­te'en itote hap — Aiku­'uro hawyi yt kat i aheĩne'en i hap e haria i'ewyte wo'o­nãpin haria — Ta'i aiku­'uro hawyi aheĩne'en hap sese wati­puẽti e haria tukup­te'en itote.
ACT 23:7 Mi'i pote to'e haty wo — Uheyke­'et'in uito ti wo'o­nãpin hat i'ewyte ui'ywot mi'i te e. Ta'i atomohey kahato aiku­'uro hawyi Tupana aimoieĩ­ne'en i hap. Mi'i atomohey pote yt naku i i'atu'e uhepe meiũpiaria e.
ACT 23:8 Mio tã e hawyi miit'in tuwe­pat'ok kahato itotiaria tu'uka sehay wuat hamo katu­pono ipat'ok te'e­ro'e — Yt kat i rat aiku­'uro rokirẽ wuat aheĩne'en i hamuat hap e haria. I'ewyte yt uwe i Tupana mipo­'o­roria atipy kaipy­wiaria e haria. Yt kat i rat ipã'ãu toĩne'en e haria. Ma'ato ipat'ok imohey kahato yne meimuẽwat mio wat ko'i. Ta'a­tu­henoi yne meimuẽwat ko'i yn.
ACT 23:9 Mi'i pote i'atuehay pirik kahato itotiaria. Mi'i hawyi i'atu­poĩ'ãm irania'in wan'i wan'i'e haria te'e­ro'e haty wo hamo. Mio tã i'atu'e — Yt kat e i ti meiũwat ihainia ti'a­parap uruwa­nẽtup turan i'atu'e. Pyno atipy kaipywiat sut hat apo ihay tope imienoi wuat i'atu'e sio ipã'ãu henoi tope yt watikuap i wen ma'ato hãpyk kahato ihay wati­puẽti i'atu'e wan'i wan'i'e haria.
ACT 23:10 Mi'i hawyi to'o­py­'ahak kahato ra'yn to'ope. Mi'i pote surara akag koro token'ẽ. Ta'a­tuhep hep irane sio Pauru to'etu. Mi'i hawyi toi'a­tu­po­'oro tesu­ra­ra'in Pauru ero'ok ipy'ahak takaria yatype pywiat hamo ipag sura­ra'in eiam iheg nakat piat hamo.
ACT 23:11 Mi'i hawyi mekewat ewãtym Aika­'iwat toĩne'en Pauru ywytpe y'am me. Mi'i hawyi to'e — Yt ereken'ẽ tei'o Pauru katu­pono woro­po­'oro hamuat tawa wato Huma piaria kape e. Aikotã Ieru­sarẽi miaria pe ehenoi uhetiat mi'i hap ewy atiky­'esat ehenoi tawa Huma piaria pe uhetiat e. Mi'i tupono eremo­wepit yn no e Pauru pe Aika­'iwat.
ACT 23:12 Ihot'ok turan ipat'ok Iuteuria te'e­ru­wa­'a­tunug i ra'yn Pauru auka hamuat kuap hamo. Mi'i hawyi te'e­ro'e to'ope — Pywo yt watenuk i i'ewyte yt y'y i wyti watu'u i'atu'e. Wati­'auka Pauru rokirẽ waku watenuk i ra'yn i'atu'e to'ope Pauru auka teran haria. Pywo wahenoi ra'yn Tupana pe — Urutunug aru uru'e hap ewy i'atu'e to'ope ta'i urui'auka irane Pauru i'atu'e. Yt urui'auka pote waku uru'auka Tupana i'atu'e Pauru auka neran haria Tupana pe.
ACT 23:13 Pauru auka teran haria 40 sakpo te'e­ru­wa­'a­tunug itote. — Pywo wati­'auka ra'yn aru e haria.
ACT 23:14 Mi'i pote mi'iria tuwat pa'i kororia kape nagnia kape. Mi'i hawyi te'e­ro'e — Urutunug aru uru'e hap sehay pywo sese uruto'e uruto­'ope. Yt kat i urutu'u hamuat Pauru auka re'ym ne uruto'e urupy'a pe i'atu'e.
ACT 23:15 Mi'i pote koitywy ewehenoi ro surara akag koro pe wo'o­nãpin haria pe — Uruehay teran Pauru wywo ewei'e ro uruepiat ikuap kahato hamo ewei'e ro i'atuepe. Mi'i pytkai ti aru uruto waku pe ra'yn urutu­kup­te'en mu'ap upi Pauru auka hamo i'atu'e pa'i kororia pe.
ACT 23:16 Ma'ato Pauru inyt mẽpyt tikuap yne Pauru auka hamuat hap i'atuehay ko'i. Mi'i hawyi toto sura­ra'in yat wato kape Pauru piat henoi hamo.
ACT 23:17 Mi'i toikuap hawyi Pauru tikaykay surara akag 100 hemiit rakat tuwe­wawi. Mi'i hawyi to'e — Mehĩ etioto ro meiũwat kurum eka'iwat koro kape katu­pono toĩ sehay imienoi wuat e Pauru surara akag me.
ACT 23:18 Mi'i hawyi totioto kurum surara akag koro kape. Mi'i hawyi to'e — Aimi­pyhik Pauru uikaykay hawyi uipo­'oro meiũwat kurum erut ewawiat hamo katu­pono tohenoi teran epe tomikuap sehay e.
ACT 23:19 Mi'i hawyi ikoro ti'y­kesat ipo ete ta'a­tu­weran hap kape. Mi'i hawyi apo'e — Kat e hap som ehenoi teran uhepe kurum e.
ACT 23:20 Mi'i hawyi toiwesat — Mũki­'ite ti aru Iuteuria akag ko'i te'e­ro'e epe — Etomo­herep Pauru wo'o­nãpin haria kape uruepiat ihay kuap kahato hamo i'atu'e ti aru e. Ma'ato ti yt pywo pe i katu­pono ta'a­tu­'auka teran haype ne'i e.
ACT 23:21 Mi'i pote o yt eropy­hu'at tei'o i'atuehay upi e. Kat pote 40 miit Pauru auka teran haria tukup­te'en mu'ap tote. Pywo pe — Yt watenuk i yt wate­'y'u i ti aru Pauru auka re'ym ne e haria ti tukup­te'en itote e. Pyno ti mio ehay yn Pauru moherep hamuat hap ta'a­tu­he­katup i'auka hamo e kurum ikoro pe.
ACT 23:22 Mi'i hawyi ikoro tiwesat — Kurum waku ereto ma'ato wãi yt ehenoi tei'o. Yt uwe pe tei'o ehenoi — Ta'i ahenoi ra'yn surara akag me yt ere tei'o e ikoro Pauru mimoe­ha­py'ap we.
ACT 23:23 Mi'i hawyi surara akag koro tikaykay typy ok tesu­ra­ra'in akag. Mi'i hawyi to'e i'atuepe — Atiky­'esat mesup wãtym hake turan waku pe eweikup­te'en 200 surara yi totiaria 70 surara aihũ kawaru totiaria irokirẽ 200 surara mory'a wato wywuaria. Mi'i hawyi waku eweiwat tawa Sesareia kape wãtym muo hap atiky­'esat e.
ACT 23:24 Mi'i pote waku ewetunug kahu aihũ kawaru ko'i Pauru ereto hamo. Atiky­'esat ewetioto mi'i miit morekuat Werisi kape tawa Sesareia kape e surara akag koro.
ACT 23:25 Mi'i hawyi mekewat surara akag tipo­'oro ra'yn tehay miwan ete.
ACT 23:26 Mio tã e surara akag — Uito ti surara akag koro uhyt Kautiu Irisia e hap het rakat e. Uito atipo­'oro miwan ewawi morekuat Werisi. Waku kahato en. Ehãite hap yn atiky­'esat mehĩ e tomiwan ete.
ACT 23:27 Meiũwat ihainia atipo­'oro ewawi mehĩ. Iuteuria tat hawyi ta'a­tu­'auka teran meremo pote e. Mi'i turan ma'ato ariot uhesu­ra­ra'in nywo katu­pono atikuap ta'yn mi'i ai'y­wania Humanu hawyi meremo i'atupo pyi atipo­wyro yt atiky­'esat i i'auka hap pote uhyt e.
ACT 23:28 Mi'i hawyi atikuap teran kat pote ta'a­tu­'auka teran mi'i miit hap. Mi'i pote atioto Iuteuria wo'o­nãpin haria kape mi'i hap kuap hãpyk hamo.
ACT 23:29 Kat pote atikuap ta'yn kat pote ta'a­tu­'auka teran hap. Ta'i Iuteuria eko ete yn toi'a­parap. Mi'i atikuap hawyi yt atiky­'esat i kat pote yt kat i sa'ag sese tutunug ikytyt hamo i'auka hamo e.
ACT 23:30 Mi'i hawyi atipo­'oro mi'i miit ewawi iũte'en ne'i e. Mi'i hawyi ti atikaykay teran i'auka teran haria Iuteuria hawyi ati'a­tu­po­'oro hamuat ewawi henoi hamo kat pote ta'a­tu­'auka teran hap enoi hamo e. Toran na'yn mehĩ e Kautiu Irisia e tomiwan me.
ACT 23:31 Wãtym muo sura­ra'in tioto Pauru tawa Ãti­pa­tire kape ta'a­tu­'akag koro miky­'esat ewy.
ACT 23:32 He'i­hot'ok pe te'e­ra­'aipok i ra'yn sura­ra'in yi upi hewyry rakaria ta'a­tu'yat kape ma'ato irania'in kawaru totiaria tuwat Pauru upi tawa Sesareia kape.
ACT 23:33 Put'ok­ta­'a­tu'e hawyi ta'atuium popera morekuat Werisi pe. I'ewyte ta'a­tu­mo­herep Pauru.
ACT 23:34 Popera mowẽpap hawyi apo'e morekuat — Aiko piat meiũ miit e i'atuepe. Mio tã e pote — Yi Sirisia kaipywiat i'atu'e. Mi'i toikuap hawyi to'e Pauru pe
ACT 23:35 — Pyno aru arewa­nẽtup ehay kape e'auka teran haria put'ok­'i­'a­tu'e turan e Werisi. Mi'i hawyi to'e temiit'in me — Waku eweipyhik meiũwat miit morekuat Eroti wo'o­nãpin hap yat pe e. Mi'i hap etiat atikuap kahato. Mi'i hawyi atiwan mesuwe uito Iruka.
ACT 24:1 Mi'i hawyi 5 e'at rokirẽ pa'i koro Anania put'ok'e nagnia wywo i'atuehay enoi hat Teturu wywo. Mi'i hawyi Teturu henoi morekuat Werisi pe Pauru etiat.
ACT 24:2 Ta'a­tu­kaykay Pauru hawyi Teturu ihay sa'ag kahato Pauru mohit hamo. Toimo­herep teran Pauru piat i'aparap hap itotiaria pe. Mio tã e — Morekuat Werisi e waku kahato en mehĩ e. Urupo­rekuat kahato en e mi'i pote urutu­kup­te'en waku pe kahato yne uru'y­wania wywo e. Ta'i epo pe urutu­kup­te'en mote po'og waku meiũpe torania tawa kai e.
ACT 24:3 Nimo pyi te uruikuap kahato yne tawa puo ewaku hap mehĩ e.
ACT 24:4 Ta'i urutu­wehum kahato ete e. Ma'ato yt woro­mo­sero teran i uhehay wo pote meremo atimo­herep uhehay epe epiat ikuap hamo mehĩ e.
ACT 24:5 Mi'i miit Pauru wyti uruikuap kahato yt naku i hap ete e. Ta'i sakpo e yt nakuat i mi'i miit Pauru e. Mi'i miit wuat'i Iuteuria wuat'i etawa puo Iuteuria toi'a­tu­mo­'a­kag'aia tehay wo e. Pywo ti rat aiwu­'uka hap nug hat mi'i miit Pauru ha'a­wy­tepyi e. Mekewat tawa Nasare piat yn waku Aipo­typot e hat ehay enoi haria akag wyti mi'i miit Pauru mehĩ e.
ACT 24:6 Ga'atpo uruipuẽti mi'i miit Tupana mõtypot yat koro pe hawyi itote sa'ag kahato tutunug tuwe­kaipyi e. Mi'i pote uruipytyk ta'yn hawyi urutioto teran wo'o­nãpin hap kape apo'u­ru'e hamo sio waku tutunug sio yt urueko ko'i ewy i hap kuap hamo e.
ACT 24:7 Ma'ato urutuwat turan tut ra'yn surara akag koro Irisia uruewawi e. Mi'i hawyi tesu­ra­ra'in sok esaika hamo toihep urupo pyi meiũwat miit Pauru e.
ACT 24:8 Mi'i pote mesup urutõ'ẽ ewawi — Pauru ti yt naku i kahato uru'e hamo mehĩ e Teturu morekuat Werisi pe.
ACT 24:9 Mi'i hawyi irania'in Iuteuria — Pywo ti rat to'e hap ewy te'e­ro'e. Ta'i yt naku hin i Pauru i'atu'e. Pywo kahato aiwy Teturu mienoi epiat mehĩ i'atu'e morekuat Werisi pe.
ACT 24:10 Mi'i hawyi morekuat Werisi ipo meru ra'yn Pauru kape waku ehay to'e hamo. Mi'i hawyi Pauru ihay ra'yn — Atikuap kahato etiat mehĩ katu­pono nimo pyi te urunãpin hano ereĩne'en. Mi'i pote waku kahato ahenoi ehamo uiwetiat e.
ACT 24:11 Pyno atiky­'esat etikuap aipok wo areto Ieru­sarẽi kape hap. Yt mot'i hin i areĩne'en itote. Pywo pe ti 12 e'at yn areĩne'en Tupana mõtypot yat koro pe e.
ACT 24:12 Apo'ere torania itotiaria pe pote meremo ta'a­tu­henoi epe aikotã perup'i puo areĩne'en itote hap e. Ta'i itote ti yt uwe i uipuẽti yt naku i nug hap ete e. Yt kat are'e hin i itote miit'in nywo uhehay e. Yt ati'a­tu­mo­'a­kag'aia hin i miit'in itote e. Waku pe areĩne'en itote. Yt miit'in wu'uka hamo i areĩne'en itote. I'ewyte yt tawa wato pe i wyti yt wo'o­mu'e hawe i wyti ati'a­tu­mo­'a­kag'aia pãi e.
ACT 24:13 Ma'ato uikuasa i'atuepiat hap yt ta'a­tu­moheg kuap i e.
ACT 24:14 Pywo piat hap wẽtup yn ta'a­tu­henoi uhetiat aikotã atimohey kahato mekewat tawa Nasare piat hap. Pywo kahato ta'a­tu­henoi uhetiat aikotã mekewat uimi­mohey yn waku mu'ap uru'y­wot'in Etupana kapiat hap. Mi'i ti atimohey kahato. Mi'i ete yn pywo i'atu'e e. Ta'i atomohey kahato yne urue'a­se­'i'in mienoi Iuteu ywania wanuat miwan uruwo­'o­nãpin hap Tupana ehay e. Atomohey kahato wuat'i nimuaria miwan e. Mi'i tã aru e hap Tupana ehay miwan miat atipywo yne mehĩ e Pauru morekuat Werisi pe wuat'i ehamo.
ACT 24:15 Atomohey kahato Tupana — Atunug aru e hap e. Ta'i atomohey kahato ahehãite te aiku­'uro rokirẽ wuat hap i'ewyte miit'in wakuaria yt nakuaria i i'ewyte te'e­ru­we­hymut re aru e hap atomohey kahato uito e Pauru. Ta'i i'ewyte meimuẽ­waria Iuteuria mimohey atimohey kahato mehĩ e.
ACT 24:16 Nimo pyi te mesup te yt ati'a­parap teran i uhepiat imohey hap ete kat pote yt aremõti hin i uipy'a pe miit'in mupi e. Ta'i Tupana tikuap pywo ui'e hap e.
ACT 24:17 Areĩne'en mot'i irania'in nywo hawyi ara'aipok tawa Ieru­sarẽi kape e. Mye'ym anu areĩne'en irania'in tama pe hawyi aterut urumiium wuat uru'y­wania kape Tupana pianuat e.
ACT 24:18 Mi'i turan irania'in Iuteuria yi Asia kaipy­wiaria uipuẽti Tupana mõtypot hamuat uiwe­pit­pit'ok hap turan e. Waku pe uipuẽti itote yt kat i my'ahak hap ete areĩne'en turan e.
ACT 24:19 Yt kat i sa'ag nug hap ete areĩne'en itote uipuẽti turan e. Ma'ato uipuẽti hawyi i'atu­py­'ahak kahato ra'yn uhete yt kat i atunug pytkai e. Mi'i pote koity'i mi'iria yt tõ'ẽ hin i meikowo mekewat sehay uhetiat enoi epiat hamo mehĩ e. Eraha'at ro e yt tõ'ẽ hin i mi'iria kat pote te'e­ru­we­mõti kahato mesup yt nakuaria i pote e.
ACT 24:20 Ma'ato yne meiũwat Iuteuria uhehay kuap haria ha'a­wy­tepyi te pãi e. Wuat'i ehamo ahenoi uimi­mohey ete pote e. Mi'i tupono waku te'e­ro'e epe kat ko'i kat ko'i som uiminug yt naku i hap ko'i ta'a­tukuap pote e. Ma'ato yt ta'a­tukuap i pote yt tõ'ẽ i ewawi mehĩ e. Mi'iria sa'a­wy'i tukup­te'en wo'o­nãpin hap tote uikuasa turan e.
ACT 24:21 Itote sa'a­wy'i are'e i'atuepe haty wo aiku­'uro rokirẽ watu­we­hymut i aru are uipy'a pyi mio tã are hawyi meremo i'atu­py­'ahak uhete hawyi ui'auka teran e. Mi'i uimi­mohey hap atomohey pote uherut mesup ewawi mehĩ katu­pono ui'auka teran atomohey kahato aiku­'uro hawyi watoĩ­ne'en i hap mehĩ e Pauru morekuat Werisi pe.
ACT 24:22 Mi'i hawyi morekuat Werisi to'e — Porap atikuap yne e'e hap Pauru e. Mi'i hawyi to'e irania'in me Pauru auka teran haria pe — Uiwy­ria'in put'ok'e uhesu­ra­ra'in akag Irisia hawyi iwywo atikuap kahato yne mesuwat etiat uhyt'i'in e i'atuepe katu­pono Werisi tikuap kahato ha'a­wy­tepyi Pauru mimohey etiat aikotã wẽtup yn mu'ap Tupana kapiat hap etiat. Mi'i pote yt tutum i Pauru i'atuepe.
ACT 24:23 Mi'i hawyi morekuat Werisi to'e wo'o­pyhyp hat surara akag me — Etioto ro meiũwat Pauru ipyhik hamo uhyt e. Waku kahato etunug tuete. Waku iwyria'in topiok hawyi ta'a­tupoi itote e morekuat Werisi.
ACT 24:24 He'i­hot'ok he'i­hot'ok tokosap rokirẽ morekuat Werisi tut teha­ry'i Tusira Iuteu ywania piat wywo Pauru ehay kuap hamo. Mi'i hawyi toikaykay Pauru tuwe­wawi katu­pono toikuap teran po'og Aipo­typot Iesui mohey hap etiat.
ACT 24:25 Mi'i hawyi itote Pauru henoi i'atuepe aikotã mi'iria Tupana wywuat i'atu­py­hu'at hãpyk hamuat hap i'ewyte aikotã waku wãiwa­to'e aiwa­nẽtup sa'ag hawe hap katu­pono meiũran aru Tupana tomo­herep uwe uwe temiit'in sese hap ko'i uwe uwe yt temiit'in i hap ete Pauru henoi kahato i'atuepe. Mi'i hawyi morekuat Werisi token'ẽ imienoi pupiat haype to'e — Apuete Pauru yt uipo­hepap i te rat e'e hap kuap hamo e. Mi'i pote meiũran aru woro­kaykay i ra'yn mi'i e'e hap kuap sese hamo e token'ẽ to'a­piheg aru Tupana piat hap pupi.
ACT 24:26 Ma'ato topy'a pe morekuat Werisi tohe­katup Pauru kaipyi ha'up nug hap — Pauru tum uhepe ha'up iwato hawyi atihep mi'i wo'o­pyhyp hap pyi e tuwepe haype. Mi'i pote toikaykay merep'i merep'i to'oehay iwywo hamo yne e'at pe sa'up iwato hap ky'ewi.
ACT 24:27 Typy anu tokosap rokirẽ morekuat Posiu Wetu e hap het rakat topy­hu'at morekuat Werisi saipe piano. Mi'i hawyi morekuat Werisi toto ra'yn ma'ato totoiat Pauru iheg me katu­pono toiky­'esat toky'e kahato Iuteuria piat hap po'og po'og toky'e Tupana piat hap kai. Mi'i hap etiat atiwan mesuwe uito Iruka.
ACT 25:1 Mye'ym e'at morekuat pakup Posiu Wetu toĩne'en morekuat no hawyi ipot'am tawa Ieru­sarẽi kape tawa Sesareia pyi.
ACT 25:2 Put'ok'e hawyi pa'i kororia Iuteuria akagnia henoi ra'yn morekuat Posiu Wetu pe aikotã aikotã Pauru mi'a­parap ko'i.
ACT 25:3 Mi'i hawyi ta'a­tu­hẽtup kahato morekuat Posiu Wetu pe — Mehĩ i'atu'e uruiky­'esat kahato Pauru meiũpe uruetawa Ieru­sarẽi me i ra'yn meremo i'atu'e morekuat pakup we katu­pono ta'a­tu­'auka teran Pauru mu'ap totiat haype.
ACT 25:4 Ma'ato morekuat Posiu Wetu ti'a­tu­wesat — Ma'ato Pauru iheg me kahato toĩne'en mesup uhetawa Sesareia pe e. Ma'ato meiũran wyti aru ara'aipok i uhetawa kape.
ACT 25:5 Mi'i hawyi waku ewei'a­tu­po­'oro ehetu­'i­saria uiwywo uhetawa Sesareia kape mekewat Pauru mi'a­parap ko'i moherep itotiat hamo mehĩ'in e. Pauru yt naku i pote ti aru waku wati­'a­piheg kahato itote uhetawa Sesareia pe e tawa Ieru­sarẽi miaria akag ko'i pe.
ACT 25:6 Mi'i hawyi morekuat Posiu Wetu toĩne'en tawa Ieru­sarẽi me 8 e'at sio 10 e'at saĩke hawyi toto i ra'yn tawa Sesareia kape. Mi'i hawyi he'i­hot'ok pe ta'apyk sehay hap tote morekuat eiam note aikope more­kuaria waku mi'i miit i'atu'e sio yt naku i mi'i miit i'atu'e hap tote ta'apyk morekuat Posiu Weitu. Mi'i hawyi to'e tesu­rara akag me — Pyno waku eterut uhowawi mekewat uimi­pyhyp Pauru e.
ACT 25:7 Put'ok'e Pauru itote hawyi meimuẽwat Iuteuria akag ko'i tawa Ieru­sarẽi kaipy­wiaria ti'a­py­pueri Pauru hawyi ta'a­tunug sehay sa'ag tuete ma'ato yt ta'a­tu­moheg kuap i Pauru kuasa hap.
ACT 25:8 Mi'i hawyi Pauru ta'am na'yn i'atu­py­'a­setpe hawyi ihay kahato tuwenoi i'atuepe — Yt kat hin i ti rat sa'ag atunug e. Yt pywo pe i uikuasa e. Yt kat i i atunug sa'ag ei'e hap ewy e. Yt karãpe i uhehay sa'ag atunug ui'y­wania Iuteuria wo'o­nãpin hap ete Tupana ainãpin hap ete i'ewyte yt karãpe i uhehay sa'ag atunug Tupana mõtypot yat koro ete i'ewyte wyti yt karãpe i wẽtup sehay sa'ag atunug wuat'i porekuat koro mesuwat yi totiat Sesa ete e. Pywo ti rat yt kat ete i uhehay ko'i ko'i uhyt'i'in ei'e hap ewy e Pauru haty wo tuwenoi.
ACT 25:9 Mi'i hawyi morekuat Posiu Wetu topy­hu'at teran Iuteuria upi. Toiky­'esat kahato itotiaria towy­ria'in wo hap toiky­'esat kahato tuwe­mo­wato hap i'atu­wa­nẽtup hawe. Mi'i haype to'e Pauru pe — Uhyt Pauru e en apo epot'am neran Ieru­sarẽi kape. Itote wyti aru are'e epe sio en waku sio en yt naku i hap ete e morekuat Wetu Pauru pe.
ACT 25:10 Ma'ato Pauru tiwesat — Yt areto teran i ra'yn Ieru­sarẽi kape mehĩ ma'ato wuat'i potypot koro Sesa po pe areĩne'en neran mi'i piat uikuap hamo sio uito waku sio yt e hamo mehĩ e. Pywo ti rat etikuap ta'yn yne uhetiat aikotã yt kat i uiminug sa'ag ui'y­wania Iuteuria ywania ete hap mi'i pote yt areto teran i tawa Ieru­sarẽi kape mi'iria upi ma'ato areto teran aipo­rekuat koro Sesa kape hawyi iwẽ pyi atiky­'esat sehay pywuat sio uito waku sio yt e hap.
ACT 25:11 Uito yt nakuat i pote waku ui'a­piheg ma'ato pywo ti rat yt kat i atunug sa'ag e. Pywo ti rat mekewat wãi'e hap iwato rakat ete ati'a­tu­'a­parap sa'ag mote pyno waku ui'auka uiminug sa'ag po'ypyi. Ma'ato yt atunug i pote yt naku i ui'auka e Pauru. Ma'ato yt pywuat i uikuasa hap ete yt naku i uhum Ieru­sarẽi miaria pe e. Mi'i pote koitywy uipopap kahato aipo­rekuat koro Sesa kape uikuap hamo waku sio yt e hamo e Pauru morekuat Wetu pe.
ACT 25:12 Mi'i hawyi morekuat Wetu ihay ra'yn tonãpin haria wywo temiit po'og ikuap takaria wywo hawyi toiwesat Pauru pe — Pyno ereto teran aipo­typot Sesa kape pote pyno waku woro­po­'oro Sesa kape to'e hap kuap hamo en waku sio yt e hamo e morekuat Posiu Wetu Pauru pe.
ACT 25:13 He'i­hot'ok he'i­hot'ok pe morekuat Eroti Akipa teha­ry'i Pere­nisi wywo put'ok­'i­'a­tu'e tawa Sesareia pe tawa Ieru­sarẽi myi to'oehay to'opiat Wetu wywuat hamo.
ACT 25:14 Tukup­te'en porap'i itotiat hawyi morekuat Wetu henoi ra'yn i'atuepe yne Pauru etiat — Uhe'yianmiat morekuat Werisi toto meiũpepyi turan totoiat uipo pe wẽtup ok miit tomi­pyhik e.
ACT 25:15 Mi'i hawyi areto tawa Ieru­sarẽi kapiat turan pa'i kororia nagnia wywo tõ'ẽ uhowawi Pauru kuasa hamo e.
ACT 25:16 Ta'a­tu­ky­'esat ui'e Pauru piat hap i'auka hamo hap e ma'ato ati'a­tu­wesat — Wãi ne yt mi'i tã i urutoria Huma­nu'in inug. Kat pote urueko ti mi'i tã hap ete urutunug sa'a­wy'i uruterut miit mi'a­piheg neran nakat ikuasa haria wywo morekuat kape i'atuehay kuap hamo pywo sio yt hap kuap hamo. Mi'i tã ti urutunug uruto. Mi'i hawyi waku i'atu­mi­kuasa henoi morekuat pe tewaku hap i'atue­hamo are Iuteuria pe tawa Ieru­sarẽi notiaria pe e.
ACT 25:17 Mi'i hawyi put'ok­'i­'a­tu'e to'o­wywo mi'i hawyi meremo he'i­hot'ok pe ara'apyk morekuat ehay nug hap tote hawyi are'e — Eweterut ro mekewat ihainia Pauru e.
ACT 25:18 Irokirẽ i'atu­poĩ'ãm Pauru etiat ihay rakaria hawyi yt kat i ta'a­tu­henoi iwato Pauru minug sa'ag uhepe ma'ato uimie­katup sehay yt te'e­ro'e hin i e.
ACT 25:19 Ma'ato Iuteuria wemohey hit hap etiat sehay ko'i i'atueko etiat sehay yn ta'a­tu­henoi uhepe. Mekewat miit Iesui e hap het rakat ku'uro hap etiat yn ta'a­tu­henoi itote ma'ato Pauru to'e — Iku'uro wen ma'ato iku'uro sese hawyi ihãite i ra'yn Iesui katu­pono tuwẽtem i ra'yn gu'uro pyi e i'atuepe e morekuat Wetu morekuat Eroti Akipa'in me.
ACT 25:20 Mi'i hawyi uhehay teran waku sio yt e hap enoi hamo pãi ma'ato yt kat are kuap i kat pote yt atikuap kahato i i'atueko hit ko'i e. Mi'i pote apo'are Pauru pe — Epap apo tawa Ieru­sarẽi kape itotiaria piat ikuap kahato hamo wakuat en koitypuo yt e hap kuap hamo e.
ACT 25:21 Ma'ato Pauru to'e uhepe — Yt uipap i tawa Ieru­sarẽi kape ma'ato areto teran aipo­rekuat koro Sesa kape katu­pono mi'i yn ni waku ikuap uhetiat e mi'i pote uipap kahato howawi e uhepe. Mi'i hawyi — Pyno waku e'e hap ewy are'e itote hawyi mesup meiũpe Pauru atimoheg na'yn e. Meiũran wyti atipo­'oro teran wuat'i porekuat koro kape ui'e Iuteuria piat hap ewy e morekuat Wetu.
ACT 25:22 Mi'i hawyi morekuat Akipa tiwesat — Uito i'ewyte arewa­nẽtup teran meiẽwat Pauru ehay kape meiũpe mehĩ e. Mi'i hawyi Wetu tiwesat — Pyno waku mehĩ e waku mũki­'ite aru pyno eweikuap mehĩ yne uimi­pyhik Pauru ehay e.
ACT 25:23 He'i­hot'ok pe hawyi tut ra'yn morekuat Akipa teha­ry'i Pere­nisi wywo morekuat Wetu yat wato kape mekewat miit'in wo'o­nãpin hap yat kape ta'a­tue­sokpe kahuria wywo tõ'ẽ. Te'e­ru­we­painug kahato more­kuaria ewy. Mi'i hawyi tuwe­hyt'ok wo'oehay hawe surara akagnia wywo. Wuat'i tawa Sesareia kaipy­wiaria tu'i­saria wywo tuwe­hyt'ok. Mi'i hawyi Wetu to'e tesu­rara koro pe — Eterut ro uhowawi uimi­pyhyp Pauru meikowo e. Mi'i hawyi toterut Pauru hawyi toipag wuat'i õ'ẽ haria py'a­setpe.
ACT 25:24 Mi'i hawyi Wetu to'e wuat'i ehamo — Morekuat Akipa uhehay teran ewywo i'ewyte meiũpiat gupte'en haria wywo e. Ewei'a­kasa ro meiũwat ihainia Pauru kape e. Ga'atpo Iuteuria — Waku eti'auka mi'i miit i'atu'e uhepe meiũpiaria Ieru­sarẽi kaipy­wiaria e.
ACT 25:25 — Ma'ato yt naku i are katu­pono yt kat i tutunug sa'ag sese i'auka hamo are. Mi'i are'e hawyi Pauru to'e uhepe i'atue­hamo — Uipap kahato aipo­rekuat koro Sesa kape uito waku uito sio yt naku i e hap kuap hamo e uhepe e.
ACT 25:26 Mi'i pote atipo­'oro aru are'e itote e Wetu. Pyno atipo­'oro aru e ma'ato mesup te ti meiũwat miit etiat yt kat e hap kuap i te atiwan Sesa kape e. Pyno uipo­wyro ro kat som waku atiwan miwan me e. Pyno apo ere'e ro Pauru pe e Wetu Akipa pe katu­pono yt kat i tutunug sa'ag morekuat Sesa wãi'e hap ete e.
ACT 25:27 Pyno waku watiwan aiwa­nẽtup hap morekuat Sesa kape kat som kat som wati­puẽti sa'ag Pauru minug hap ok tã e. Mi'i watunug hawyi waku pe areĩne'en Sesa wanẽtup hawe ahet yne wywo atipo­'oro miwan hawyi e. Ma'ato atipo­'oro uimi­pyhyp Pauru morekuat Sesa kape yt kan hamo i hawyi yt iwe'eg hin i rakano aru areĩne'en ui'akag wanẽtup hawe e morekuat Wetu morekuat Akipa'in me. Pauru minug sa'ag sio yt hap kat hap etiat atiwan mesuwe uito Iruka.
ACT 26:1 Mi'i hawyi morekuat Akipa to'e — Pauru e mesup ta'yn waku ehay ewetiat uruepe e. Waku en pote etimo­herep to ewaku hap uruepe e morekuat Akipa. Mi'i hawyi Pauru tuwe­mo­poĩ'ãm tehay hamo to'y­wania Iuteuria eko ewywuat. Mi'i pote itotiaria i'atu­po­'inik kahato.
ACT 26:2 Mi'i hawyi Pauru ihay ra'yn — Morekuat Akipa e waku kahato uruipuẽti en mehĩ katu­pono Iuteu ywania eko kuap kahato hat en. Ha'a­wy­tepyi uruikuap uruwa­nẽtup hap kuap kahato hat en hap e. Mi'i pote uhehay kuap kahato hano aru ereĩne'en e. Mi'i pote yt areken'ẽ hin i uhehay moherep epiat hamo uru'y­wania ky'e hat en mote e. Ui'y­wania Iuteu ywania i'atuehay ko'i ko'i kahato mesup uhete mehĩ ma'ato yt pywo pe i hap e.
ACT 26:3 Uimo­wepit ro en katu­pono etikuap po'og irania'in kai Iuteuria eko ko'i to'oehay awãi awãi hap ko'i e. Mi'i pote ehekatup kahato pyno uhehay mehĩ e katu­pono areĩne'en epo pe uheko kuap hamo sio uito waku rakat areĩne'en sio yt hap kuap hamo mehĩ e. Pyno ewetum no ehewaure ka'a ko'i uhepe mehĩ'in mana'in e.
ACT 26:4 Ta'i Ieru­sarẽi miaria Iuteu ywania uikuap kahato sa'a­wy­'ipyi ui'y­wã'ĩ pyi te uitag hap uheĩne'en hap ta'a­tukuap kahato torania tawa Ieru­sarẽi miaria e.
ACT 26:5 Sa'a­wy­'ipyi te mesup te uikuap kahato ui'y­wania Iuteuria e. Mi'i hap ta'a­tu­henoi teran mote ta'i ta'a­tu­henoi kuap kahato katu­pono uimotag haria mi'iria e. Ha'a­wy­tepyi areĩne'en po'og i'atueko kuap kahato hano torania kai areĩne'en e. Ta'i mi'i pote uinug sa'a­wy'i i'atueko yne moherep hat akag wo e. Ta'i uhet'ok itote sa'a­wy'i ui'y­wania wo'o­nãpin hat koro i'atu'e sa'a­wy'i e. Ui'y­wania tikuap kahato aikotã ha'a­wy­tepyi wuat'i e'at pe i'atueko yne yne atunug at ka'ap hap.
ACT 26:6 Morekuat Akipa etikuap apo aikotã uru'y­wania irania'in wo'o­nãpin haria timohey kahato aiku­'uro hawyi aipiit tuwẽtem i gu'uro pyi hap e. Ma'ato irania'in uru'y­wania aiku­'uro hawyi aika­huro sese ra'yn wuat'i e'at pe e hap ta'a­tu­mohey hap etikuap e. Pyno mi'iria yt i'atu­wese hin i uhete mehĩ katu­pono atimohey kahato aiku­'uro hawyi Tupana aimoieĩ­ne'en i aipiit wywo hap e. Ta'i atimohey yne uipy'a puo katu­pono sa'a­wy'i Tupana to'e uru'y­wania urue'a­se­'i'in me — Atimoieĩ­ne'en aru eipiit eiku­'uro hawyi e mesup te ahepe yne e.
ACT 26:7 Ta'i uru'y­wania Iuteuria 12 ywania urutu­kup­te'en are mi'iria timohey kahato Tupana e hap — Woro­ho­'o­moieĩ­ne'en aru e hap i'ewyte uito atimohey kahato Tupana piat — Atimo­pakup i aru eipiit e hap uru'y­wania ewy e. Mi'i pote ti rat irania'in — Urutoria yt imohey i haria — Wãi'i­'a­tu'e uhepe at ka'ap e. Ma'ato ati'a­tu­mu'e te pote irania'in Iuteuria uipun neran ui'auka teran ehay pyi e. Morekuat Akipa e mesup ta'yn koitywy ti put'ok'e ra'yn Tupana piat — Atunug aru e hap. Ga'atpo toihep ta'yn gu'uro pyi Tosa­'yru sese ipiit wywo e. Mi'i ui'e hap monik hamo ui'auka teran mesup eipo wo uiwy­ria'in e Pauru.
ACT 26:8 Kat poteĩ yt eweimohey i mekewat iku'uro rakaria yne aru Tupana ti'a­tu­hymut gu'uro pyi e hap. Kat pote yt imohey haria wo i eweikup­te'en eipe e. Kat poteĩ yt eweimohey i watoĩ­ne'en ne aiku­'uro hawyi e hap e katu­pono ainug hat Tupana aimoieĩ­ne'en kuap katu­pono toha­'a­wynug na'yn toihymut ra'yn Tosa­'yru to'e hap ewy e. Mi'i tupono eweimohey ro e.
ACT 26:9 Sa'a­wy­'ite ma'ato ei'ewy yt atimohey hin i e. Mekewat e'at pe ti yt uiwese hin i areĩne'en yne imohey haria ete e. Pywo ti rat sa'a­wy'i mekewat Iesui tawa Nasare kaipywiat ewanĩkap koro wo areĩne'en e. Mekewat e'at pe ati'a­tu­moma teran Iesui set mesuwat yi totepyi e. Mi'i haype ati'a­tu­mo­weityk teran yne yne imohey haria e. Yt naku i yn atunug Iesui ete sa'a­wy'i e.
ACT 26:10 Sa'a­wy'i tawa Ieru­sarẽi me ati'a­tu­'uka Iesui emiit yt naku i hap ewy atunug mi'iria ete e. Irania'in ati'a­tu­pyhyp wo'o­pyhyp hawe imohey haria wakuaria Tupana ewywuaria pytkai e. Mekewat e'at pe pa'i kororia — Waku wati­'a­tu­'uka mi'iria sio yt i'atu'e uhepe. Mi'i pote — To'iro wati­'a­tu­'uka are'e yn. Mi'i hawyi pa'i kororia mi'airo wo areĩne'en Iesui mohey haria moweityk tawa Ieru­sarẽi piat hamo e Pauru.
ACT 26:11 Karania wo wewua'i ati'a­tupak pak imohey haria wuat'i Iuteuria wat yat Tupana mõtypot yat pe e. Atiky­'esat kahato waure­'i­'a­tu'e mekewat i'atuepiat Iesui mohey hap ete hap e. Marak'a wo sese areĩne'en i'atuete. I'atuehay sa'ag Tupana etiat hap atiky­'esat kahato e. Sa'a­wy'i tawa irania'in ati'a­tu­pugha ati'a­tu­'a­piheg imohey haria e.
ACT 26:12 Mi'i hawyi areto tawa Tamaku kape imohey haria itotiaria atusa­ty'i saty'i hamo e. Uipo pe atioto miwan pa'i kororia kaipywiat uipo­'oro hap imohey haria yne apiheg hamuat hap e Pauru.
ACT 26:13 Mi'i hawyi ma'ato atpo­sake turan uito mu'ap upi turan ara'a­kasa ariãty hapyke kahato rakat kape po'og po'og at hapyke hap kai hap kape araha'at mehĩ e. Yt uheso hin i morekuat Akipa e katu­pono irania'in sura­ra'in uhupiaria tikuap yne mesuwat ui'e hap pywuat e hap katu­pono mi'iria i'ewyte te'e­ra­'a­kasa yne mekewat mu'ap upiat ariãty hapyke uhetiat hap kape e.
ACT 26:14 Mi'i ariãty put'ok'e kahato uhete hawyi ara'at kahato ra'yn yi kape hawyi atikuap sehay uity pusu puo mekewat uru'y­wania Epaiku pusu puo — Sauru Sauru e kat e hap upi kat e hap upi uimo­sa­ty'i saty'i kahato en mehĩ e. Karãpe wati­'a­tu­moe­wyry aihũria kawaru ko'i mory'a koro iãi wo hawyi tuwat meremo ma'ato aihũ yt toto teran i hawyi tu'uka to'opy wywo mekewat mory'a ete. Mi'i hawyi po'og po'og haty hap toipuẽti e. Mi'i e hap ewy ereĩne'en. Mi'i pote po'og haty ra'yn eete mehĩ e uhepe mekewat ariãty toĩne'en kahato uhete turan e.
ACT 26:15 Mi'i hawyi apo'are — Uweĩ En Uika­'iwat are.
ACT 26:16 Mi'i hawyi uiwesat — Uito ti Iesui emi'a­piheg apiheg e hawyi erepoĩ'ãm no Sauru e katu­pono woronug neran en uheropat hano e. Mesup woro­'airo en uhemiit no uhehay moherep hamo uimo­herep wuat'i ywania kapiat hamo woro­'airo mesup Sauru e uhepe. Atiky­'esat etimo­herep miit'in me ewa'a­kasa mesuwiat hap i'ewyte atiky­'esat etimo­herep miit'in me yne uhepiat emo'a­kasa mesuwiat hap mehĩ e uhepe e.
ACT 26:17 Waku e'ywania kape i'ewyte irania'in ywania kape woro­po­'oro ma'ato areĩne'en aru ewywo ewanĩ­kaptia po piat ereĩne'en turan. Epowyro hat areĩne'en aikope aikope ereto hap upi e uhepe.
ACT 26:18 Woro­po­'oro en wuat'i miit'in kape e. Mi'iria tukup­te'en aikotã yt ihapytig i rakaria ewy katu­pono yt karãpe i te'e­ra­'a­kasa te Tupana ta'a­tu­py'a pe yt ta'a­tu­mohey i pote. Mi'i pote woro­po­'oro en i'atu­moe­ha­pytig hamo mekewat i'ypy­rywiat hap kaipyi uhe'a­riãty hot kapiat i'atu­mo­'a­kasa hamo e. Mesu­wa­ro­tiaria yt uimohey i te haria yne ahiag po pywiaria tukup­te'en e. Mi'i pote woro­po­'oro en ahiag pohari hamo e. Mi'i hawyi ti aru uipo piaria wo ra'yn mi'iria tukup­te'en uhyt e uhepe itote e. Mi'i hawyi ti aru wakuaria uimẽ­pyt'in no ra'yn te'e­ro­py­hu'at e. Uimohey haria ti aru uha'y­ru'in uhaki­'yt'in sem ko'i my'a­setpe ahytmoi wuat'i e'at pe eti'a­tu­mu'e uhetiano hawyi e uhepe. Mi'i tã ti aru atunug uhyt e uhepe mekewat mu'ap upi tawa Tamaku kapiat uhewyry turan e Pauru.
ACT 26:19 Morekuat Akipa e mi'i hawyi uimiẽtup atipy kaipywiat sehay yt atiwaure hin i mehĩ e. Ta'i to'e uhepe e hap ewy atunug at ka'ap ha'a­wy­tepyi mesup te mi'i yn atunug mehĩ e. Ta'i atunug na'yn Tupana mimo­herep imiky­'esat ok tã e.
ACT 26:20 Mi'i hawyi areto ra'yn tawa Tamaku kape hawyi itote ati'a­tu­mu'e kahato itotiaria — Ewei'atoiat ro yne eiminug sa'ag ko'i hawyi ewei'aipok to Tupana kape hawyi ewetunug no eipy'a pyi wakuat miit'in me eimi­mohey moherep wuat'i piat hamo are yn tawa Ieru­sarẽi miaria pe. I'ewyte yi Iuteu totiaria i'ewyte aikope aikope irania'in ywania tukup­te'en hap totiaria ati'a­tu­mu'e Uruka­'iwat ete e.
ACT 26:21 Mi'i hap upi ga'atpo irania'in ui'y­wania Iuteuria tawa Ieru­sarẽi miaria i'atu­py­'ahak kahato uhete hawyi ta'a­tu­po­'oro sura­ra'in ui'auka hamo e.
ACT 26:22 Ma'ato Tupana uheha­kye­ra'at ra'yn porap ui'auka hap turan i'atupo pyi e. Ta'i uihep esura­ra'in i'atupo pyi e. Waku kahato rasig Tupana katu­pono mesup areĩne'en mesuwe ihay moherep hamo to'e hap ewy e. Wẽtup ehay yn ahenoi kahato ihaky­'e'i rakaria pe hekat rakaria pe. Wẽtup ehay yn ahenoi henoi mekewat sa'a­wy­'iwuat sehay Tupana mimo­herep yianmiaria ehay nimuaria ehay ewywuat Musei ehay ewywuat yn ahenoi henoi wuat'i pe i'ewyte ehepe e Pauru.
ACT 26:23 Aikotã yianme ta'a­tuenoi — Aipo­typot Tupana Mipo­'oro tut aru ho'opot hamo gu'uro pywiat wẽtem sa'a­wy­'iwuat hanuat i'atu'e hap ewy are'e yn e. Aikotã sa'a­wy'i Tupana ehay moherep haria ta'a­tu­henoi hap ewy aikotã Tupana Mipo­'oro topy­hu'at aru hẽtyhot rakat ewy Iuteu ywania pe i'ewyte irania'in ywania pe i'ypyryp hap hep hamo hap ta'a­tu­henoi yianme hap ewy yn uhehay e.
ACT 26:24 Sa'a­wy­'i­wuaria mienoi ewywuat yn ahenoi kahato te mesup morekuat Akipa e Pauru turan morekuat Wetu ihay tek ta'yn tehay pirik wo — Pauru eso'ok kahato ra'yn uhyt e. Ta'i eremoe­so'ok ta'yn eremu'e poity'i pote e Wetu.
ACT 26:25 Ma'ato Pauru tiwesat — Yt uheso'ok hin i pytkai i morekuat wakuat Wetu e. Ma'ato ti ahenoi ehepe pywuat sese sehay. Yt heso'ok takat ehay ewy i uhehay e.
ACT 26:26 Ta'i morekuat Akipa tikuap kahato pywuat ui'e hap yne katu­pono mi'i pote yt aremõti hin i uhehay pupi katu­pono yt mig'i wo hin i Iesui tuwẽtem gu'uro pyi e. I'atu kahato Iesui kapiat akasa haria Ieru­sarẽi me e. I'ewyte morekuat Akipa ti'a­tukuap kahato yne Mi'i Miit etiat are e Pauru morekuat Wetu pe.
ACT 26:27 Mi'i hawyi Pauru to'e — Morekuat Akipa etipywo apo Tupana ehay moherep haria sa'a­wy­'i­wuaria mienoi ko'i Mi'i Miit etiat e. Ta'i atikuap kahato uipy'a pe imohey hat ereĩne'en hap e Pauru.
ACT 26:28 Mi'i hawyi morekuat Akipa tiwesat — Pãi porap uinug Iesui mohey hano en e Pauru pe.
ACT 26:29 Mi'i hawyi Pauru tiwesat — Mi'i hap yn ahẽtup Tupana pe e. Atiky­'esat kahato yne eipe urupo­typot Iesui mohey haria ui'ewy hap yn ahẽtup at ka'ap Tupana pe. Waku pe kahato Tupana Mipo­'oro mohey sese haria eweikup­te'en ui'ewy hap pãi. Atiky­'esat uipy'a pe yne eipe ui'ewy hap e. Ma'ato yt atiky­'esat i eipe wo'o­pyhyp hawe uito ewy hap e. Toran na'yn ui'e hap mehĩ'in mana'in e Pauru.
ACT 26:30 Mi'i hawyi morekuat Wetu ipoĩ'ãm morekuat Akipa ehary'i Pere­nisi wywo hawyi yne itotiaria i'atu­poĩ'ãm hawyi tuwat yne ra'yn Pauru pyi.
ACT 26:31 More­kuaria tuweran hawyi — Pywo ti rat yt kat e i toi'a­parap i'atu'e to'ope. Yt naku i mi'i miit ewywuat wo'o­pyhik hawe i'atu'e to'ope. Yt kan hamo i wati­'auka mi'i miit Iuteu ywania miky­'esat ewy katu­pono yt toi'a­parap hin i i'atu'e more­kuaria to'ope Pauru piat pe.
ACT 26:32 Mi'i hawyi morekuat Akipa to'e morekuat Wetu pe — Meiẽwat emipyhyp Pauru waku pe toĩne'en uiwa­nẽtup hawe e. Pyno waku etihep mekewat wo'o­pyhyp hap wyi. Etiky­'esat pote waku ra'yn mipo'i pok wen ma'ato toto teran morekuat koro Sesa kape pote waku wati­po­'oro mi'i miit imiky­'esat ewy e morekuat Akipa morekuat Wetu pe. Mi'i hap etiat atiwan yne mesuwe uito Iruka.
ACT 27:1 Mi'i hawyi morekuat Wetu to'e tesu­rara koro Iuriu pe — Mehĩ e atipo­'oro teran uimi­pyhik Pauru i'ewyte irania'in uimi­pyhik ko'i aipo­typot koro Sesa kape ahetama Itaria kape e. Pyno etikaykay ro ahesu­ra­ra'in sem hawyi etum no Pauru i'ewyte irania'in i'atuepe hawyi eweipo­'oro ro mi'iria yne ahe'yara koro pe aipo­typot Sesa kape ahetama Itaria kape e.
ACT 27:2 Mi'i hawyi urutu­we­hyt'ok ta'yn yara wato tawa Ãta­mi­tinu kaipywiat pe. Mi'i hawyi urutuwat yi Asia hypopy upi. Mi'i hawyi urutu­we­'apun ihy pya kape. Uruwywo toto Aritaku yi Masẽ­tunia tawa Tesa­ro­nika kaipywiat.
ACT 27:3 He'i­hot'ok pe put'ok­'u­ru­to'e tawa Sitãu me. Mi'i hawyi surara koro Iuriu iwese kahato tomi­pyhik Pauru ete — Waku ereto ewyria'in yat kape e. Waku erenuk itote e Pauru pe.
ACT 27:4 Mi'i hawyi urutuwat i ra'yn yara koro puo tawa Sitãu myi ma'ato wasere yt urupo­wyro i kahato. Uruowa kape pote urutuwat yi hit y'y py'a­setpiat Sipiri kape wasere re'ym me yity'ok og muo urutuwat.
ACT 27:5 Yi hit Sipiri totepyi urutuwat y'y wato sakpo pya wuat yi Sirisia kape yi Pãwiria upi. Itote pyi put'ok­'u­ru­to'e tawa Mira yi Irisia tote.
ACT 27:6 Tawa Mira tote surara akag tipuẽti wẽtup yara wato tawa Aresã­tira kaipywiat yi Itaria kapiat. Toipuẽti hawyi urupag yara wato pe.
ACT 27:7 Mi'i hawyi urutuwat hepamo karania e'at ne'i urutuwat wasere owa kape yi hit y'y py'setpiat yi ywypyi'a Kereta kape. Mi'i hawyi porap put'ok­'u­ru­to'e yi a tawa Nitu ete ma'ato wasere wato poity'i pote urutuwat y'y sakpo wasere ywyt puo yi a y'y py'a­setpiat Kereta kape urutuwat ywypyi'a Saumuna sakpo. Yity'ok og muo urutuwat teran ma'ato niatpo kahato urutuwat.
ACT 27:8 Mi'i hawyi put'ok­'u­ru­to'e wẽtup wã note miset'ok wã wakuat e hap tote yt pya i tawa Iraseia pyi.
ACT 27:9 Mi'i hawyi wasere poity'i y'y ete pote aipo­hari kahato itote. I'aman mot hap e'at yt pya i pote wasere kahato toĩne'en y'y wato ete. Mi'i hawyi yt uruewyry kuap i at ka'ap.
ACT 27:10 Mi'i hawyi Pauru to'e yara wato piaria pe — Uhyt'i'in e atikuap ta'yn uipy'a pe yt naku i tut ahewyry hap ete. Waho­'opot kahato irane ti. Ta'i aipo­hari irane hap ti atikuap ta'yn. Ta'i yt naku i hamuat wyti aheka­re'en ko'i ete ahe'yara koro ete i'ewyte aheĩne'en hap ete tut hamuat e Pauru yara piaria pe.
ACT 27:11 Ma'ato surara akag timohey po'og yara wato ãpokiat irokirẽ yara ka'iwat ehay po'og Pauru ehay kai. Ma'ato Pauru ehay yt toto­mohey hin i Tupana e hap pytkai.
ACT 27:12 Mi'i pote — Mekewat wã tote yt naku i i'aman mot pe watu­kup­te'en mesuwe i'atu'e ta'a­tuehay wo. To'iro watuwat meiũpepyi i'atu'e porap yne. Mi'i pote waku wahã'ãg sio put'ok­wa­to'e yi Wenise tote sio yt i'atu'e. Itote waku kahato wato­kosap i'aman mot yi Kereta wã note i'atu'e. Kat pote mekewat wã kaipyi wata­'a­kasa at apyk hap kape aikope wasere yt tut i hap kape i'atu'e to'ope. Waikiru kawiat aria'yp posak iã'ãkap kape heremo pote itote waku ahe'yara wato eiam mo i'atu'e. Mi'i pote waku kahato katu­pono wasere yt i'auka kuap i ahe'yara itote i'atu'e torania yara koro akag ko'i to'ope. — Yt naku i rat watuwat mesu­wepyi mehĩ'in e Pauru pytkai — To'iro i'atu'e yn.
ACT 27:13 Mi'i hawyi wasere ran put'ok'e at posak kaipyi urue'yara koro ete hawyi — To'iro to'iro mesup ta'yn waku watuwat i'atu'e. Mi'i hawyi ta'a­tuhep y'y pyi yara wato asaity nug hap. Mi'i hawyi urutuwat i ra'yn ihypopy upi yt pya i po'og yi ywypyi'a Kereta kai.
ACT 27:14 Mi'i rokirẽ saĩke urutuwat hawyi wasere kahato i ra'yn put'ok'e uruowa ete ihyemyi'a koro kaipywiat tut urumogyt hap. Mi'i hawyi te'e­ro'e to'ope — Yt naku i kahato meiẽ wasere i'atu'e. Mi'i hawyi po'og na'yn put'ok'e haty wo hawyi ywytu uato ra'yn ikohyeput kahato uruewa ete mekewat at sakpo hap kaipyi waikiru wato ieĩne'en hap kaipyi tut.
ACT 27:15 Mi'i hawyi mekewat ywytu uato te'e­ropun haty wo urue'yara koro. Mi'i hawyi yt urutuwat kuap i wasere owa kape. Mi'i pote urupohep yara wato mohãpyk hap ete hawyi uruereto wasere yn na'yn.
ACT 27:16 Mi'i hawyi wẽtup yi ywypyi'a hit Karauta e hap het rakat og muo uruto­ko­ka'at. Niatpo kahato urutuwat wasere upi hawyi urutopag urue'yara hit urumiekyi saity upi urue'yara wato pe y'y pyi.
ACT 27:17 Mi'i hawyi uruimoheg urue'yara hit iheg me hawyi uruipo'i po'i yne urue'yara koro saity wato wo ipikpik hap pupi yne aria'yp moheg hamo. Mi'i hawyi uruihep wasere eiam uruekyi hap wasere upiat yara wato moewyry hap esokpe wato katu­pono uruto­ken'ẽ mekewat ywytu uato hesaika kahato rakat pupi. Koran ti itu yt put'ok­'u­ru­to'e i teran yi og me miit'in u hap yi perup y'y kawiat hap pupi. Mi'i hawyi meremo urutuwat wasere upi aikowo aikowo wasere miky­'esat ewy.
ACT 27:18 Mi'i hawyi at ka'ap wasere wato ti'auka auka y'y pe urue'yara koro. Mi'i hawyi he'i­hot'ok pe hawyi ipotyi kahato hawyi — Uruku­'uro hap yt pya hin i uruto'e uruto­'ope. — Pyno to'iro wati­pugha aheka­re'en yne y'y pe yara koro peho­ro'i hamo.
ACT 27:19 Mye'ym e'at hawyi uruipugha ra'yn y'y pe yara wato asaity ko'i uruipugha yne urupo wo ywytu uato ipoity'i pote.
ACT 27:20 Mi'i hawyi karania e'at ne'i ra'yn urutu­kup­te'en itote i'ypyryp we yt uruikuap hin i. Yt tuwekuap i at waikiru ko'i hun moity'i pote. Itote ywytu uato pote wasere uato kahato at ka'ap. Mi'i hawyi — Ta'i watopap watopap irane wyti i'atu'e to'ope itote. Yt uwe i meiũ aipo­wyro kuap hat i'atu'e yara wato apykok haria.
ACT 27:21 Karania e'at ne'i ra'yn itote yt kat i i'atu­mi'u yt te'e­renuk i e. Mi'i hawyi Pauru ipoĩ'ãm i'atu­py­'a­setpe hawyi to'e — Uhyt'i'in pywo pe ti are'e sa'a­wy'i ehepe — Yt eweiwat rei'o mesuwat wã pyi y'y koro kape are'e sa'a­wy'i einãpin hap are. Ma'ato uhehay upiat eweipy­hu'at sa'a­wy'i pote yt watuwat i sa'a­wy'i yi ywypyi'a Kereta pyi mesuwat ahepiat ho'opot hamuat kape ahekat ko'i pugha hamuat kape yt watuwat i e.
ACT 27:22 Ma'ato meiũ woro­ho­'o­nãpin i ra'yn. Pyno eiwepit ro katu­pono yt uwe i wyti eipe wuaria iku'uro irane e Tupana e. Pywo ti rat ahe'yara koro yn aru iku'uro e Pauru yianme.
ACT 27:23 Kat pote mũki meke atipy piat Tupana emiit put'ok'e tehay uhepiat hamo e. Pywo ti Tupana sese tipo­'oro uhowawi temiit sese atipy kaipyi katu­pono uito hemiit sese e.
ACT 27:24 Mũki Tupana mipo­'oro to'e uhepe — Yt ereken'ẽ tei'o Pauru katu­pono yt eku'uro hin i ti aru mesup katu­pono woro­po­'oro en morekuat koro Sesa mu'e hamo mehĩ e uhepe. Mi'i pote ti aru Tupana tieha­kye­ra'at yne ewywuaria mesuwat yara koro piaria e uhepe mũki Tupana mipo­'oro e.
ACT 27:25 Uiwy­ria'in uito atomohey kahato Tupana mienoi uhepiat aikotã Tupana to'e uhepe hap ewy wyti aru tutunug yne to'e hap ewy topy­hu'at aru e. Mi'i pote eiwe­mo­wepit ro katu­pono Tupana aheha­kye­ra'at yne ywytu uato po pyi mesup to'e hap ewy.
ACT 27:26 Pywo wyti aru put'ok­wa­to'e yne wẽtup yi emyi'a ete e. Mi'i tote wyti aru ahe'yara koro iku'uro sese ma'ato aito yt aiku­'uro hin i e hap yn atikuap ta'yn Tupana e hap ewy re e Pauru yianmete.
ACT 27:27 Mi'i hawyi 14 e'at turan wãtym muo ywytu uato popuo uruko­hye­wyry kahato mekewat yara koro puo mekewat hyemyi'a koro Atiatiku e hap het rakat puo ma'ato yt minwa­to'e hin i. Mi'i hawyi mekewat yara koro ka'i­waria tikuap ta'yn yt pya i yi kawiat watoĩ­ne'en hap.
ACT 27:28 Mi'i hawyi ta'a­tupun y'y hy pya hap iã'ãg hap y'y pe. mekewat nu saity etiat hap ihy pya sio yt kuap hamo. Mi'i hawyi hã'ãg hã'ãg turan toĩne'en ihy pya hap 20 iã'ãg hap yi kape. Tuwat po'og na'yn yianme hawyi ta'a­tuiã'ãg i ma'ato mi'i hawyi 15 iã'ãg hap yn na'yn ihy pya hap ta'a­tu­puẽti.
ACT 27:29 Mi'i hawyi te'e­ro­ken'ẽ kahato hawyi — Ta'i put'ok­wa­to'e aru meremo yẽpe enu wato ete i'atu'e haty wo. Tuwe­'auka ti aru urue'yara ta'a­tu­'etu. Mi'i pote ta'a­tupun ta'a­tue­'yara etu'a pyi i'asaity ipotyi rakat imopy­hu'at hap ko'i. Mi'i hawyi urue'yara topy­hu'at iheg me tosaity ko'i ete. Mi'i hawyi merep ta'yn ta'a­tu­ky­'esat kahato ihot'ok hap.
ACT 27:30 Mi'i hawyi yara koro ka'i­waria te'e­ro­popy teran yara koro pyi ta'a­tue­'yara hit puo yt uwe ehamo i. Mi'i pote ta'a­tu­mo­'apyk mekewat yara hit y'y pe. Mi'i hawyi te'e­ro'e — Pywo pe ti iãpo uruimoheg neran ipotyi rakat i'asaity nug hap ete yara koro i'atu'e. Ma'ato i'atueso ne'i te'e­ro­popy teran haype.
ACT 27:31 Mi'i hawyi Pauru to'e sura­ra'in akag me — Wãi nei'o yara ka'i­waria e. Ma'ato eweiwat mekewat yara hit pe pote ti aru eweipap yne yne ra'yn e Tupana uhepe e.
ACT 27:32 Mi'i pote sura­ra'in titek ta'yn yara hit asaity ko'i. Mi'i hawyi yara hit ta'at ra'yn yara koro pyi hawyi toto ra'yn y'y upi yt uwe wywo i.
ACT 27:33 Mi'i hawyi yt pya i ra'yn ihot'ok turan Pauru to'e i'atuepe — Mehĩ'in e to'iro watenuk e katu­pono koity'i 14 e'at ra'yn yt kat i ra'yn mi'u ewetu'u kat pote mu'ap upi ipoity'i pono yt ewehenuk teran i e.
ACT 27:34 Mi'i pote woro­ho­'o­nãpin ewehenuk to uheywyt'in are katu­pono mi'i ewetunug mote ehesaika i ra'yn e. Pywo ti rat — Yt uwe i eipe iku'uro meiũpe i'ewyte yt kat i ti aru haty ehete e Tupana uhepe ga'atpo e Pauru yara piaria pe.
ACT 27:35 Mi'i hawyi Pauru tat man topo pe hawyi to'e Tupana pe — Waku emiium Uru'ywot e hawyi toipat'ok pat'ok wuat'i ehamo hawyi tutu'u sa'a­wy'i wuat'i ehamo.
ACT 27:36 Mi'i hawyi i'atu­wepit kahato itotiaria hawyi i'ewyte te'e­renuk ta'yn Pauru wywo.
ACT 27:37 Mi'i hawyi ta'a­tu­mo­rania yne miit'in yara koro piaria hawyi ta'a­tu­puẽti itote 276 miit ipuo.
ACT 27:38 Mi'i hawyi i'atu'ok hawyi ta'a­tu­pugha yne yara pyt'at ko'i mi'u y'y pe ahe'yara wato ipoty'i kahato pote e.
ACT 27:39 Ihot'ok hawyi te'e­ra­'a­kasa yi kape yara wato pyi ma'ato yt ta'a­tukuap i uwe etama toĩne'en itote hap. Mi'i hawyi te'e­ra­'a­kasa wẽtup ihy ypy hit. Mi'i tote toĩne'en yi kyt. Mi'i hawyi te'e­ro'e to'ope — To'iro yi kyt kape ahe'yara koro ehakye­ra'at hamo i'atu'e. Waku apo itote wati­herep ahe'yara i'atu'e to'ope.
ACT 27:40 Mi'i hawyi ta'a­tutek ta'a­tue­'yara saity pytyk hap y'y piat hawyi ta'a­tu­ma'am sokpe wato aria'yp ete. Mi'i hawyi — To'iro wasere upi yi kyt kape i'atu'e. Mi'i hawyi wasere tomoe­saika tuetiat hawyi urutuwat yi kyt kape wasere wato upi.
ACT 27:41 Mi'i hawyi put'ok­'u­ru­to'e yara koro puo ihy esaika hap tote aikope y'y wo'o­puẽti hap tote. Itote hik'e kahato iheg me ra'yn nu wato ko'i tote topy­hu'at iãpo yt hyry'e i ra'yn. I'ywyt­'ok­pype ihy esaika tipikpik ta'yn yara koro hetu'a ete.
ACT 27:42 Mi'i hawyi sura­ra'in te'e­ro'e ta'a­tu­ka­'iwat pe — To'iro wati­'a­tu­'uka yne yne aimi­pyhik ko'i koran ti itu te'e­ro­popy te'e­ru­we­'yha wo ta'a­tu­'etu to'ope.
ACT 27:43 Ma'ato surara akag yt tiky­'esat i tomi­pyhik Pauru auka hap pote yt ewei'a­tu­'uka tei'o aimi­pyhik ko'i pãi e tesu­ra­ra'in me. Mi'i hawyi to'e uruepe — We'yha kuap haria peso­'e­wei'e ro y'y pe. Put'ok­'e­wei'e mono yẽpe ete e.
ACT 27:44 Ma'ato irania'in yt we'yha kuap i haria waku eweiwat ro aria'yp pemu'e hat tote e surara akag uruepe yara piaria pe. Mi'i hawyi urutuwat ra'yn yara wato pyi yẽpe kape aria'yp ko'i tote. Mi'i hawyi put'ok­'u­ru­to'e torania yẽpe ete yt wẽtup ok i iku'uro y'y pe. Tupana ti'a­tue­ha­kye­ra'at yne yne uruto to'e hap ewy. Pywo put'ok­'i­'a­tu'e yẽpe ete are uito Iruka. Mi'i hap etiat atiwan mesuwe.
ACT 28:1 Mi'i hawyi put'ok­'u­ru­to'e mekewat yẽpe ete yi kyt rote. — Waku kahato uruto'e yt wẽtup i aito iku'uro y'y wato pe waku kahato uruto'e. Mi'i hawyi tõ'ẽ miit'in uruewawi mekewat yi a etawa kaipy­wiaria hawyi — Kat eĩ eiwat ehe'yi a set uruto'e i'atuepe hawyi — Yi a Mauta urue'yi a set mesuwe i'atu'e.
ACT 28:2 Mi'i hawyi waku kahato uruipuẽti meimuẽ­wuaria yi ywypyi'a Mauta totiaria. I'atu­wese kahato itote urupo­wyro kahato. Meremo ta'a­tu­'uhu aria wato mekewat yi kyt yẽpeke hawyi — Eiwe­mõpe ro meikowo mehĩ'in i'atu'e uruepe katu­pono uruena'ak kahato y'y wato pyi urutu­wẽtem e. I'ewyte i'aman hewo kahato itote pote ira'ak kahato topy­hu'at. Mi'i pote itotiaria meremo aria wato ta'a­tunug uruwe­mõpe hamo. I'atu­wese kahato yi ywypyi'a Mauta wẽtup ywania uruto pytkai waku kahato uruipuẽti.
ACT 28:3 Mi'i hawyi Pauru toto aria kat hamo. Toterut wẽtup apeman aria hawyi toipo­rokpun yne aria wato pe turan wẽtup moi miit auka rakat tuwẽtem aria apeman ka'a pyi hawyi iporok'at Pauru po ete haty wo. Mi'i hawyi ipo ete iheg me kahato topy­hu'at.
ACT 28:4 Mi'i hawyi ywypyi'a totiaria mekewat Mauta piaria te'e­ra­'a­kasa moi Pauru po etiat hãi heg hap kape hawyi te'e­ro'e to'ope — Pywo ti ewy rat meiẽwat miit wo'o­pot­'auka hat toĩne'en i'atu'e. Yt iku'uro hin i y'y koro pe ma'ato mesup iminug sa'ag sa'a­wy­'iwuat tut howawi i'auka hamo i'atu'e.
ACT 28:5 Mi'i hawyi meremo Pauru tipun topo ete pyi mekewat moi aria wato pe hawyi yt haty i tuete ipo ete.
ACT 28:6 Mi'i hawyi itotiaria te'e­ra­ha'at kahato Pauru kape katu­pono ta'a­tue­katup ipuk aru hawyi aru iku'uro meremo hap mekewat moi yt naku i kahato rakat ta'a­tukuap pote ma'ato ta'a­tue­katup pot'i pytkai yt kat i haty Pauru ete. Mi'i pote wẽtup upi te'e­ru­wa­nẽtup — Pauru ti Tupana i'atu'e.
ACT 28:7 Mekewat e'at pe yt pya i yẽpe kai tukup­te'en itote go wato ko'i yi ywypyi'a akag Pupiriu e hap het rakat wat. — Waku kahato uruka­'iwat urupo­rekuat Pupiriu i'atu'e itotiaria ywypyi'a piaria. Ihot'ok hawyi urutuwat ra'yn morekuat Pupiriu yat wato kape. Put'ok­'u­ru­to'e itote hawyi meremo — Eiwe­hyt'ok to e uruepe. Mi'i hawyi Pupiriu wywo uruto­kosap mye'ym e'at. Urutu­kup­te'en waku kahato itote.
ACT 28:8 Mi'i hawyi uruipuẽti itote morekuat ywot i'ahu kahato itote i'okpy su kahato rakat ipiit sakup hap wywo. Mi'i hawyi Pauru toto ta'a­kasa hamo hawyi — Tupana e etimoe­hãite Pupiriu ywot hap ahẽtup epe e hawyi tuwe­po­po­rokpun i'ahu kahato rakat rote hawyi meremo ihãite i ra'yn.
ACT 28:9 Morekuat Pupiriu ywot moehãite hap irania'in tikuap hawyi tõ'ẽ tõ'ẽ Pauru kape i'ahu rakaria ywypyi'a piaria. Mi'i hawyi i'ewyte Tupana ti'a­tu­moe­hãite yne itotiaria Pauru po wo.
ACT 28:10 Mi'i hawyi itotiaria imõtypot kahato Pauru. Mi'i pote urutuwat hap e'at pe ta'a­tu­hytmoi kahato urue'yara pe urumie­reto mu'ap upiat urumi'u wuat kat ko'i kat ko'i urumi­ky­'esat ok tã.
ACT 28:11 Mye'ym ewaty urutu­kup­te'en ywypyi'a Mauta tote hawyi urutuwat i ra'yn wẽtup yara koro puo mekewat yara wato tawa wato Aresã­tira kaipywiat e'yara puo hei'aman mot ywypyi'a Mauta e hap totiat rakat puo. Mi'i yara wato set ti Tupana mẽpyt paat e hap het rakat. Mi'i puo urutuwat yi Mauta pyi.
ACT 28:12 Mi'i hawyi put'ok­'u­ru­to'e tawa wato Sira­kusa tote. Mi'i tote uruto­py­hu'at mye'ym e'at.
ACT 28:13 Mi'i hawyi urutuwat i yi ẽpeke pyi wẽtup tawa kape hawyi put'ok­'u­ru­to'e at upi mekewat tawa Iresiu tote. He'i­hot'ok pe wasere at posak pyi waikiru Kurusa iã'ãkap kaipyi tut ra'yn mi'i pote urutuwat i ra'yn wasere upi. Typy e'at hawyi meremo put'ok­'u­ru­to'e ra'yn tawa Puteuri tote.
ACT 28:14 Mi'i hawyi Tawa Puteuri totiaria Iesui mohey haria urui'a­tukat. Mi'i hawyi i'atu­wese kahato uruete — Eweipy­hu'at ro uruwywo uruywyt'in i'atu'e. Mi'i pote urutu­kup­te'en 7 e'at i'atu'yat rote. Mi'i hawyi urutuwat i ra'yn tawa Puteuri totepyi tawa koro Huma kape mekewat mu'ap yi upi.
ACT 28:15 Mi'i hawyi Iesui mohey haria tikuap ta'yn put'ok­'u­ru­to'e tawa Huma piat hap. Mi'i hawyi tõ'ẽ tõ'ẽ kahato uruewawi urukat hamo. Mi'i hawyi mekewat tawa hit Apiu e'oken note uruto­'o­puẽti mekewat mye'ym ok weneru i weneru i e hap het rakat rote. Mi'i hawyi Pauru ta'a­kasa Iesui mohey haria sem ewawiat hawyi — Waku e Tupana pe tuwehum kahato iwepit i ra'yn.
ACT 28:16 Tawa Huma piat put'ok­'u­ru­to'e hawyi surara akag to'e Pauru pe — Woro­'atoiat en uhesu­rara wywo Pauru e. Uimi­pyhik sese ereĩne'en ne ma'ato waku uhesu­rara wywo ereĩne'en wuat'i e'at pe aikope aikope emiky­'esat ewy e Pauru pe surara koro.
ACT 28:17 Mi'i hawyi Pauru toĩne'en Tawa koro Huma tote mye'ym e'at rokirẽ toi'a­tu­kaykay tuwe­wawi to'y­wania meimuẽwat Iuteuria akagnia toi'a­tu­kaykay tuwe­wawi tuwenoi hamo. Te'e­ru­wa­'a­tunug yne hawyi Pauru to'e i'atuepe — Ui'y­wania e yt kat no i ti atoma'at ai'y­wa­niaria tawa Ieru­sarẽi miaria pytkai uipyhik ta'yn itote ui'auka teran haype e. I'ewyte ai'y­wot'in eko ewy atunug torania uimotag hap ko'i mesup te e. Mi'i pytkai uipyhik pe ariot ehowawi tawa Ieru­sarẽi myi. Huma­nu'in esurara po pe areĩne'en ne e Pauru Iuteuria pe.
ACT 28:18 Iuteuria akagnia tawa Ieru­sarẽi miaria yt naku i i'atu'e uhepe — Ewei'auka ro Pauru i'atu'e Iuteuria akagnia Humanu ywania more­kuaria pe. Mi'i hawyi Humanu ywania pore­kuaria apo apo'i­'a­tu'e uhepe. Ta'a­tukat uiminug sa'ag ko'i itote wen ma'ato yt kat i sa'ag uhetiat ta'a­tu­puẽti ta'a­tu­'a­tukat kahato pytkai e Pauru.
ACT 28:19 Mi'i hawyi i'atu­pohep teran ma'ato wãi yt eipohep tei'o i'atu'e ai'y­wania Iuteuria Humanu pore­kuaria pe ui'auka teran haype. Mi'i pote — Areto teran pyno morekuat koro Sesa kape waku apo uito sio yt kuap hamo are yn itote. Mi'i hawyi more­kuaria uipo­'oro meikowo ta'a­tu­'akag Sesa kape ui'e hap ewy. Mi'i pote uhehay irane ikoro wywo e. Ma'ato uiwetiat yn ahenoi morekuat Sesa pe e. Yt kat are'e i aru sa'ag ehetiat ui'y­wania i'ewyte yt kat are'e i ai'y­wania tawa Ieru­sarẽi piaria etiat ikoro pe e Pauru.
ACT 28:20 Mi'i tupono moro­ho­'o­kaykay eipe meikowo mesup ui'y­wania ei'a­kasa hamo uhehay kuap hamo katu­pono ui'y­wania eipe pote e. Uiwy­ria'in ai'y­wania timohey kahato Tupana Mipo­'oro Aipo­rekuat nuat Aheha­kye­ra'at kuap hat e. Mi'i pote mesup aito wato­mohey kahato. I'ewyte Mi'i Miit yn uimie­katup katu­pono atimohey kahato Mi'i e. Mi'i aimi­mohey etiano mesup uipyhik hawe areĩne'en ehehamo e Pauru to'y­wania Iuteuria pe tawa koro Huma totiaria pe.
ACT 28:21 Mi'i hawyi ta'a­tu­wesat Pauru — Yt kat i miwan sa'ag ta'a­tu­po­'oro uruewawi yi Iuteu kaipyi uhyt i'atu'e. Yt uwe i tut i'ewyte meikowo etiat enoi sa'ag hamo i'atu'e.
ACT 28:22 Pyno uruiky­'esat ehenoi uruepe emikuap pakup i ko'i Mi'i Miit etiat katu­pono teke aru wuat'i ywania pe miit'in muo mekewat emimohey e. Mi'i pote irania'in — Yt naku i wato­mohey Mi'i Miit i'atu'e torania mekewat piat pe i'atu'e Pauru pe.
ACT 28:23 Mi'i hawyi Pauru ti'a­tu­wesat — Waku kahato woro­ho­'o­mu'e uimi­mohey ok tã e. Waku ewei'a­tu­kaykay ai'y­wania hawyi woro­ho­'o­mu'e Aimie­katup ete e. Mi'i hawyi — Pyno waku i'atu'e to'ope hawyi tuwat. Mi'i hawyi mekewat e'at put'ok'e hawyi tõ'ẽ tõ'ẽ kahato Pauru ywania sem i'yat sese kape. Mi'i hawyi hune pyi te wãtym'i kape Pauru yn ihay at to'y­wania pe. Toi'a­tu­mu'e kahato aikotã topy­hu'at Tupana Aipo­rekuat no hap ete. Toiky­'esat itotiaria — Pywo ti rat uruimohey Iesui Tupana Mipo­'oro sese aheha­kye­ra'at hanuat i'atu'e hap. Mi'i pote Musei miwan myi i'ewyte Tupana ehay moherep haria yianmiaria ehay pyi tohenoi yne Aipo­typot Iesui etiat.
ACT 28:24 Mi'i hawyi ipat'ok itotiaria timohey ra'yn Pauru ehay Iesui etiat ma'ato irania'in — Yt rat i'atu'e.
ACT 28:25 Mi'i hawyi itote sehay wo tu'uka hap topy­hu'at itote. Irania'in — Pywo ti rat Iesui ti Tupana Mipo­'oro Aimie­katup i'atu'e ma'ato irania'in — Yt pywo pe i rat aimu'e i'atu'e. Mi'i hawyi yt imohey i haria te'e­ru­wenoi Pauru pe — Urutuwat ra'yn mio i'atu'e haty wo.
ACT 28:26 Mi'i hawyi Pauru to'e — Pywo ti sa'a­wy­'ite Tupana Pã'ãu henoi kahato ai'y­wot'in me ehetiat e. Mio tã e Isaia pe — Woro­po­'oro en e'ywania Iuteuria mu'e hamo e. Mi'i hawyi ehenoi ro i'atuepe uhehay — Ehewaure ka'a tukup­te'en ma'ato uhehay yt teke kuap i ehewaure ka'a pe ere'e ro e'ywania pe e. Ta'i eweikuap uhehay wen ma'ato yt eweikuap kahato i katu­pono yt teke i eipy'a pe eiwa­nẽtup hawe pote ere'e ro e'ywania pe e. I'ewyte eheha pe toĩ yne yne heremo kahato wen ma'ato yt ewei'a­kasa i te katu­pono yt teke i te eipy'a pe eiwa­nẽtup hawe eiwa­'a­kasa hap ko'i. Kat pote yt uimohey sese i te pote ere'e ro e'ywania pe e.
ACT 28:27 — Eipy'a heg kahato ti ere'e ro i'atuepe. Ehewaure ka'a puo ewehẽtup at ka'ap wen ma'ato yt eweikuap hin i te katu­pono eipy'a pe yt ewei'a­kasa teran i pote e. Ta'i yt ewehẽtup teran hin i ehewaure ka'a puo uhehay. Mi'i pote yt ewetunug neran i eipy'a pe e. Mi'i pote ti yt kat i eimo­pakup i hap e. Mi'i pote ti yt woro­ho­'oe­ha­kye­ra'at kuap i e ti Tupana sa'a­wy'i ai'y­wot'in me ehetiat pe tehay moherep hat Isaia miwan me e Pauru Iesui pun haria pe.
ACT 28:28 Mi'i hawyi tuwat yt imohey i haria turan Pauru to'e — Eiwa­nẽtup to ui'e hap kape e. Tupana henoi ra'yn ehepe mesuwat sehay wakuat eheha­kye­ra'at hanuat etiat ma'ato yt ewetat i mi'i pote mio irania'in ywania yt Iuteu ywania i pe ra'yn Tupana henoi teran tehay wakuat eimipun e. Mi'iria ti aru haat ra'yn e. Pywo ti rat mi'iria wyti aru imohey haria sese wo ra'yn tukup­te'en e Pauru to'y­wania tehay pun haria pe.
ACT 28:29 Mio tã e hawyi tuwat tuwat ra'yn i'ywania Iuteuria Pauru yat pyi ma'ato tuwat turan tu'uka to'ope sehay wo.
ACT 28:30 Mi'i hawyi typy i'aman mot pe Pauru tokosap itote tawa koro Huma pe towat to'yat pe tomi­puru sa'up ete rakat pe toĩne'en surara piat topyhyp hawe. Itote toi'a­tu­mu'e kahato miit'in. — Waku eweihyt'ok Pauru kape e sura­ra'in wuat'i miit'in me. Mi'i hawyi itote toi'a­tu­ky'e yne topuẽti haria — Eiwe­hyt'ok to e yn torania tehay kuap teran haria pe towy­ria'in me.
ACT 28:31 Mi'i tote tohenoi kahato aikotã Tupana topy­hu'at Aipo­typot no wuat'i pe yt token'ẽ wywo hin i tohenoi. Yt uwe kuap i wãi'e Pauru pe. Itote toi'a­tu­mu'e mu'e at Aika­'iwat Iesui ete Tupana Mipo­'oro Aipo­rekuat nuat ete. Uito ti Iruka uimiwan waku ra'yn Toran are.
ROM 1:1 Humanu ywania kuekatu sese atipo­'oro ehowawi uimiwan me. Uito Pauru are. Uimiwan ni mesup sehay wakuat atipo­'oro ehowawi. Uito ti Tupana mipo­'oro sehay wakuat moherep wuat'i ywania puat hanuat. Iesui potmu'e sese ti uito. Uito ti Tupana mipo­'oro Iesui Aipo­rekuat moherep hanuat. Sa'a­wy'i te Tupana ui'airo hawyi mio tã e uhepe — Mehĩ Pauru e woro­po­'oro Uha'yru Iesui etiat sehay wakuat moherep wuat'i puat miit'in miat hamo e. Atiky­'esat sehay ewẽ pywiat Uha'yru etiat yn e uhepe.
ROM 1:2 Aikotã nimo te wuaria uhehay moherep haria pe atum hap ewy woronug e. Nimo te mio tã are'e ti ra'yn uhehay enoi haria pe — Meiũran ti aru atipo­'oro ehowawi Uimi­po­'oro Wuat'i Miit'in Ehakye­ra'at hat e. Mio tã e Tosa­'yru Iesui etiat pe e Tupana uhepe. Mesup ti miwan miat toĩne'en Uha'yru etiat ui'e hap ta'yn e Tupana uhepe.
ROM 1:3 Koitywy atunug na'yn ui'e hap ewy. Mi'i ti atipo­'oro ra'yn Uha'yru Iesui eipo­rekuat nuat e. Mi'i ti morekuat Tawi saipepiat sese e katu­pono Tawi emiariru emiariru sese Mi'i e Tupana uhepe.
ROM 1:4 Mi'i ti Uha'yru sese e Tupana uhepe. Ui'ewy hesaika rakat e. Uipã'ãu wakuat ok tã ne hesaika rakat e. Koitywy atimo­herep ta'yn ui'e hap e Tupana. Koitywy atimo­herep ta'yn nimuat ui'e hap e Tupana. Koitywy Mi'i moherep hap niatpo kahato ra'yn aikotã atiõtem gu'uro pyi Uha'yru e Tupana uhepe ha'a­wyte uikaykay tehay sytpok hamuat hap tote are.
ROM 1:5 Tosa­'yru mohey hawyi Tupana iwese kahato uhete. Mio tã e uhepe — Woronug en mehĩ uhemiit sese wo e. Atiky­'esat miit'in tukup­te'en torania Uha'yru mohey haria wo e. Atiky­'esat kahato Uha'yru ta'a­tunug Ta'a­tu­po­rekuat no hap. Mi'i haype woro­po­'oro en i'atu­mu'e hamuat e Tupana uhepe.
ROM 1:6 Pyno Humanu ywania uito ti Iesui potpo­'oro Pauru are. Tapy'yia Humanu ywania eipe atiky­'esat eipe ipotpo­'o­roria wo ui'e­wywuat. Mio tã e ra'yn ti Tupana ehepe mesup — Ewetunug no Uha'yru Eipo­rekuat no e ra'yn ehepe. Tupana Eiky'e kahato hat pote ei'a­tu­kaykay yne tuwe­wawi.
ROM 1:7 Mi'i hap atiwan mesuwat uimiwan ehowawi Humanu ywania. Mio tã are'e Tupana pe — Uru'ywot kahato En. Esa'yru ti Emipo­'oro sese Uruka­'iwat nuat. Mi'i pote ahẽtup eset upi Esa'yru set upi etum no tapy­'yiaria Humanu ywania pe egyi'at kahato hap are. Ereĩne'en no hegyi'at i'atuepiat rakano etum no ewese hap yt kat sa'up i tapy'yia Huma­nu'in me are. Etunug no mi'iria wo'o­wese haria wo aikotã Esa'yru ewese hap ewy are Tupana pe.
ROM 1:8 Ha'a­wyte atikuap eweimohey Iesui hawyi arehum kahato Tupana kape. Uimo­wepit kahato haria eipe katu­pono ewetunug na'yn Iesui Eipo­typot koro wo pote. Koitywy ti yne mesuwat yi totiaria tikuap kahato ra'yn eipe Iesui mohey haria ra'yn hap. Mi'i pote arehum kahato Tupana kape.
ROM 1:9 Yt uheso hin i are ma'ato Tupana tikuap yt uheso i hap. Ahẽtup at ka'ap Tupana kape eipo­wyro hamuat. Yt uheso i uiwy­ria'in. Ahẽtup at ka'ap Tupana kape eika­wiano. Pywo ti rat Tupana tikuap eweikup­te'en uiwa­nẽtup hawe at ka'ap hap. Pywo ti Tupana ui'airo tehay wakuat Tosa­'yru Iesui etiat moherep hano. Uipy'a pyi ti ateropat ehetiano at ka'ap. Ahẽtup at ka'ap Tupana kape eipo­wyro hamuat.
ROM 1:10 Ahẽtup Tupana kape turan mio tã are'e — Tupana atiky­'esat kahato uipo­'oro Huma­nu'in kapiat uhewyry hamo are. Tupana ewaku hap upi uipo­'oro ro En i'atu­mu'e hamo are. Tupana atiky­'esat kahato uhehay Huma­nu'in wywuat hap are mesup te ma'ato yt kat i mu'ap i'atue­wawi.
ROM 1:11 Atiky­'esat kahato meremo uipo­'oro Huma­nu'in kapiat uhewyry hamo. Tupana ewaku hap upi uipo­'oro o i'atu­mu'e hamo. Mi'i pote etunug o mu'ap i'atue­wawi katu­pono te'e­ra­'a­kasa uhowawiat hamo tapy'yia Humau'in kape uipap are'e Tupana pe. Atomõ'ẽ teran i'atuepe Epã'ãu miat i'atu­poi­tyro hap are. Ati'a­tu­moe­saika kary mi'iria Epã'ãu wo are'e wy. Etunug o mu'ap tapy'yia Huma­nu'in kapiat uito hamuat are Tupana pe.
ROM 1:12 Atiky­'esat Iesui mohey hap etiat uruwo­'o­moe­saika moesaika hap itote Tupana. Put'ok­'u­ru­to'e itotiat hawyi urutunug neran Humanu ywania ewanuaria wẽtup miit ewy Esa'yru mohey hap upi.
ROM 1:13 Sa'a­wy'i are'e Tupana pe — Areto teran tawa wato Huma kape katu­pono uheinyt'in uheywyt'in Esa'yru mohey haria kapiat ara'a­kasa hamo are. Ma'ato ahã'ãg hawyi toĩne'en uipyhyp pyhyp hap kat ko'i kat ko'i uikosap hamo. Uiwy­ria'in areto teran ehowawi. Mi'i hap o yt eweiwaure tei'o katu­pono woro­ho­'o­moe­saika teran eiperia Iesui mohey hap ete. Irania'in ywania aikopiat aikopiat kape areto kahu ra'yn mote areto teran ehowawi eikuap hamo. Ma'ato uipyhyp pyhyp kat ko'i kat ko'i ehowawiat uikosap hamo. Koitywy irania'in mi'iria te'e­ro­py­hu'at Iesui mohey haria itag nakaria wo ra'yn. Mi'i hap ewy atiky­'esat ehetama pe wy. Yt uheso hin i mi'i pote ahã'ãg i ahã'ãg i kahato ehowawi wen ma'ato yt put'ok­'are i te ehowawi eimotag.
ROM 1:14 Uipap kahato Iesui kapiat miit'in pore­ro­kosap hamo ma'ato yt atimo­herep i Iesui wuat'i ywania pe pote yt naku i nug hat arepy­hu'at Tupana pe. Mi'i pote yne ywania miit'in kape areto teran Iesui moherep hamo sio iwe'eg kahato rakaria kape sio yt. Yne ywania kape areto teran pote ehetama kape areto wy. Tawa wato piaria kape areto teran Iesui ehay moherep hamo i'ewyte yne tawa hit kape areto teran wy. Yne tapy­'yiaria kape areto wy sio haiwot rakaria kape sio iwese rakaria kape sio ga'apy puaria gupte'en haria sio tawa wato'in puaria kape areto wy. Iwan kuap kahato haria kape areto wy. Yt kat kuap i haria kape areto wy. Uipap kahato wuat'i miit ekyi Iesui kapiat hamo. Ta'i areĩne'en aikotã wete­weru hat ewy. — Etum no uhehay wuat'i miit'in me uhehay yt kuap i haria pe e Iesui uhepe pote atum neran wuat'i ywania pe wen ma'ato yt atum i pote wuat'i piat wete­weru hat ewywuat areĩne'en.
ROM 1:15 Mi'i pote uipap kahato ehowawi wy atum neran ei'y­wania pe Iesui etiat sehay pote. Toran kahato atimo­herep teran sehay wakuat ei'y­wania pe ehetawa wato Huma totiaria pe.
ROM 1:16 Mi'i pote rat yne uhesaika hap wywo ahã'ãg neran ehowawiat areto hamo wen. Katu­pono sehay wakuat Iesui etiat hesaika kahato rakat aikotã Tupana esaika hap ok tã ne. Aikotã purake ko'i esaika hap ewy Iesui etiat sehay. — Pywo ti rat uwe uwe timohey ra'yn Iesui mi'i hat Tupana mieha­kye­ra'at wo topy­hu'at sio wuat'i miit'in eropat haria sio wuat'i miit'in akagnia ko'i toi'a­tue­ha­kye­ra'at kuap torania Tosa­'yru mohey haria are'e ra'yn wuat'i ywania pe. Sa'a­wy'i waku Iuteu ywania kape wati­mo­herep Iesui etiat mi'i hawyi waku irania'in yt Iuteu i ywania kape wati­mo­herep Aipo­typot Iesui. Hesaika kahato mesuwat sehay Iesui etiat are. Iesui etiat sehay pupi ti yt aremõti hin i imoherep hamo.
ROM 1:17 Sa'a­wy'i Tupana to'e miwan me — Uimohey haria yn ni aru uimie­ha­kye­ra'at nuaria e. Mi'iria yn uimi­moieĩ­ne'en wuat'i e'at pianuaria e. Nimo pyi mesup te Tupana timoe­waku Tosa­'yru mohey haria yn. Pywo ti rat woro­ho­'onug eipe wakuap Ui'ewy uimohey hawyi e Tupana nimo te miwan me. Mesup te wy mio tã e — Uha'yru mohey haria yn ati'a­tu­moieĩ­ne'en wuat'i e'at pe e wuat'i ywania pe. Uiwy­ria'in pyno waku yne e'at watu­we­moheg ahepiat Iesui mohey hap ete. Imohey haria sese pe Tupana to'e — Uiwa­nẽtup hawe uipy'a pe eiperia yn wakuaria e.
ROM 1:18 Miit'in mesu­wa­ro­tiaria minug ko'i yt Tupana miky­'esat ewy hin i. Ta'i yt hãpyk hin i torania i'atu­minug ko'i e Tupana. Ta'a­tukuap hãpyk nug hap ta'a­tu­py'a pe wen ma'ato yt i'atu­popap i inug hamo e. Mi'i haype yt naku i nug hap yn ta'a­tunug neran e. Ta'a­tukuap yne pywuat ko'i nug hap ta'a­tu­py'a pe hepiat ta'a­tu­nãpin hap wen ma'ato yt ta'a­tunug hin i ui'e hap e Tupana wuat'i ywania pe. Yt ta'a­tu­mohey teran i ma'ato ta'a­tu­ky­'esat ta'a­tu­minug sa'ag yn neran haype e. Ta'a­tu­pyhyp at ka'ap uhehay pywuat sese moherep haria e. Mi'i haria yt uwe i uikuap teran haria mesu­wa­ro­tiaria yt uimohey i pote haria e Tupana wuat'i miit'in miat.
ROM 1:19 Mi'i pote miit'in minug yt nakuap i ete uhaiwot kahato areĩne'en e Tupana. Atimo­herep yne i'atuepe i'atu­'a­piheg hap i'atu­minug sa'ag etianuat atipy kaipyi wen ma'ato ta'a­tunug ne yt uimi­ky­'esat ewy i e. Ta'i yne e'at pe atimo­herep ta'yn i'atue­wawi uiwat uimi­ky­'esat ewy nug hap i'atu­py'a puo ma'ato yt ta'a­tunug i uimo­herep hap ta'a­tu­py'a piat hap ewy e. Yt te'e­ru­wewãi hin i uhehay wo. Aremo­herep at ka'ap miit'in me i'atu­wa­nẽtup hawe ma'ato uiwe­mo­herep hap ta'a­tupun ta'a­tu­py'a pyi. Mi'i pote yt ta'a­tukuap kuap i areĩne'en hap e Tupana. Areĩne'en miit'in wywo ma'ato yt uikuap i haria wo tukup­te'en e. — Tupana yt heremo i i'atu'e to'ope. — Ma'ato aremo­herep uiminug ikahu rakaria wo areĩne'en nat ui'e hap e. Te'e­ra­ha'at uiminug ko'i kape hawyi — Ta'i Tupana minug kaipyi watikuap toĩne'en Tupana hap yt i'atu'e i to'ope e. — Aremo­herep uiminug wo areĩne'en sese hap ma'ato uimi­mo­herep yt ta'a­tu­ky­'esat i ta'a­tu­wa­nẽtup hawe e Tupana sa'a­wy'i
ROM 1:20 Tupana minug yi at waty waikiru sem te'e­ra­'a­kasa yne pytkai — Pywo ti rat Tupana toĩne'en yt i'atu'e i te'e­ra­'a­kasa iminug yne pytkai. Yt naku i katu­pono Tupana tuwe­mo­herep kahato ra'yn tominug ko'i wo toieĩne'en hap miit'in muo. Tupana yt heremo i wen aheha pe ma'ato tuwe­mo­herep ta'yn ahepe tominug ko'i wo. Sa'a­wy'i Tupana tunug mesuwat yi hawyi i'ewyte mesu­wa­ro­tiaria ga'apy puat y'y puat miat ko'i. Mi'iria ko'i ti yt ihay kuap i rakaria tukup­te'en wen ma'ato ihay rakaria ewy — Ainug hat ri Tupana i'atu'e haria ewy. Pywo ti Ainug hat ri Tupana i'atu'e wuat'i miit'in me. Yt heremo i Tupana wen ma'ato toĩne'en kahato aikai. Ta'i hesaika sakpo'e Ainug hat i'atu'e hap ewy iminug ko'i yne ahepe. Wuat'i e'at piat — Ainug hat toĩne'en i'atu'e ahepe iminug ko'i. Yt uruwewi i urutu­wenug i'atu'e hap ewy ahepe Tupana minug ko'i wuat'i ywania pe. Mi'i hawyi miit'in te'e­ra­ha'at Tupana minug ko'i kape hawyi — Pywo Tupana ti wuat'i nug hat yt i'atu'e hin i heremo kahato pytkai. Te'e­ra­ha'at kahato hewakuap moherep hap kape pytkai — Aiwewi watu­wenug i'atu'e sa'ag ne'i to'ope.
ROM 1:21 Ta'i mesu­wa­ro­tiaria tikuap ta'yn Tupana toĩne'en iminug ko'i kaipyi ma'ato ta'a­tukuap toĩne'en pytkai yt ta'a­tu­mõ­typot hin i Tupana. Iwese kahato hegyi'at kahato i'atuepe pytkai — Waku kahato En Tupana yt i'atu'e hin i. Yt te'e­ru­wehum hin i Tupana miium ahepiat hap kape. Yt nakuat i wo yn te'e­ru­wa­nẽtup Tupana kape. Pywuat sehay Tupana etiat yt ta'a­tu­ky­'esat hin i mesu­wa­ro­tiaria miit'in. Yt karãpe i te'e­ru­wa­nẽtup teran Tupana kape. Yt kat i i'atu­wa­nẽtup hap Tupana etiat hap pote aikotã ho'o­wasat sese rakaria ewy tukup­te'en ta'a­tu­wa­nẽtup hawe. I'ypyryp kahato i'atu­wa­nẽtup hap mi'i pote wẽtup sehay kape yn ta'a­tu­wa­nẽtup. Yt kan hamuat i sehay rakat kape yn ta'a­tu­wa­nẽtup. Heso'ok takaria ewy tukup­te'en i'atu­wa­nẽtup hawe. Yt nakuaria i sese ta'a­tu­py'a pe. Yt i'atu­we'eg i sese rakaria ewy i'atu­wa­nẽtup hap.
ROM 1:22 Yt nakuaria sese pytkai — Ta'i uruto po'og uruwe'eg torania kawiat i'atu'e ta'a­tu­py'a pe. Ma'ato Tupana wanẽtup hawe yt i'atu­we'eg hin i haria wo te'e­ro­py­hu'at.
ROM 1:23 Tupana toĩne'en wuat'i e'at piat ieĩne'en hat pytkai mesu­wa­ro­tiaria yt timohey i mio tã e hap. Ta'i yt ta'a­tu­mõ­typot hin i Tupana Sese mekewat Wuat'i E'at Piat Ieĩne'en hat. Ma'ato ta'a­tu­ky­'esat po'og ta'a­tupo wuat ta'a­tu­minug tupa­naria sa'ag hit ko'i. Mi'i hawyi miit'in me — Eipe ti tupana i'atu'e sa'ag Tupana minug ko'i pe i'atu'e. Ta'a­tunug miit'in mesu­wa­ro­tiaria ta'a­tue­tu­pana wo. Mi'i hawyi miit'in iã'ãkap mo wuat minug ko'i kape te'e­ru­we­pỹ­'ã­tutuk — En ni tupana i'atu'e. Irania'in weitaria iã'ãkap ko'i kat kat kawiat mo wuat ta'a­tunug hawyi — Meimuẽ ni tupana sese i'atu'e sa'ag. Irania'in miat ko'i pira ko'i iakare ko'i iã'ãkap ko'i ta'a­tunug sa'ag ta'a­tue­tu­pana wo. Ta'a­tunug ta'a­tupo wo hawyi mi'iria kape te'e­ru­we­pỹ­'ã­tutuk — Mi'iria so tupana i'atu'e sa'ag. Moi ok kape i'ewyte i'atu­wẽ­pap'i at ka'ap ma'ato ta'a­tunug hat kape Tupana Koro kape mekewat Po'og Po'og Ikahu Torania Tominug Ko'i Kawiat Rakat kape yt kat i i'atu'e hap are. Te'e­ru­we­'ywyk kahato Tupana sese kaipyi ta'a­tukuap sa'a­wy'i pytkai. Nu'e sa'y­ru'in sa'a­wy­'iwuat yne aito pote.
ROM 1:24 Yt ta'a­tu­we'eg i hap tupa­naria yn ta'a­tu­ky­'esat pote Tupana to'e i'atuepe — Pyno ewetunug no yt eiwe'eg i hap at ka'ap eiku­'uro hap kape e. Ewetunug eimi­ky­'esat ok tã eiwepyi hap ok tã e Tupana tomohey hap pun haria pe. Mi'i hawyi po'og sa'ag nug haria wo te'e­ro­py­hu'at sa'a­wy­'iwuat kai. Mi'i hawyi yne ta'a­tu­py'a pywiat i'atu­minug sa'ag i'atu­mi­ky­'esat ko'i ta'a­tunug toran at ka'ap hawyi yt naku i nug haria sese wo te'e­ro­py­hu'at at ka'ap. Mi'i hawyi i'atueko yt naku i nug hap po pe te'e­ro­py­hu'at heso'ok takaria. Yt ta'a­tu­'atoiat kuap i ta'a­tueko ta'a­tu­hã'ãg mytkai. Yt naku i nug hap eropat at ka'ap haria te'e­ro­py­hu'at yt te'e­ru­wewãi kuap i hawyi. Mi'i tupono hewaire waire hap kahato to'ope to'ope ta'a­tunug hary­poria hary­poria wywo ihainia ihainia wywo hap ewy ta'a­tunug at ka'ap yt i'atu­we'eg i haria yne katu­pono sa'ag kahato ta'a­tunug ta'a­tupiit wywo. Yt miit ewy i te'e­ru­wewuk wuk ta'a­tupiit miky­'esat sa'ag upi. Ta'a­tu­mo­herep yt ta'a­tu­we'eg i hap ko'i to'ope to'ope. Mi'i hawyi te'e­ru­we­mõti at ka'ap hap topy­hu'at ta'a­tu­wa­nẽtup hawe i'atu­minug sa'ag hap kaipyi.
ROM 1:25 Sa'a­wy'i wuaria sehay Tupana etiat pywuat ta'a­tukuap ta'a­tu­wa­nẽtup hawe ma'ato mi'i hawyi heso rakaria wo tukup­te'en hawyi ta'a­tu­waure teran pywo sehay Tupana etiat. Katu­pono ta'a­tunug neran yt Tupana miky­'esat ewywuat i ko'i. Mi'i hawyi ta'a­tu­'atoiat Tupana hawyi Tupana minug ko'i kape — Eipe ti urunug hat i'atu'e. Waku watunug miit'in ahetu­pana wo i'atu'e to'ope. Mi'i hawyi heso'ok takaria sese ewy te'e­ro­py­hu'at. Mi'i hawyi ta'a­tunug ta'a­tue­tu­pa­naria ta'a­tupo wo. Mi'i hawyi te'e­ru­we­pỹ­'ã­tutuk tupa­naria iã'ãkap ran ko'i ta'a­tu­mõ­typot hamo. Mi'i hawyi Tupana minug ko'i pe — Urunug hat en i'atu'e ta'a­tupo minug ko'i pe. Ma'ato aito Iesui mohey haria — Tupana wato'e En ni Urunug hat sese wato'e. Pywo pe ti En ni po'og wuat torania kai wato'e ra'yn.
ROM 1:26 Ma'ato irania'in sa'ag kape yn i'atu­wa­nẽtup hap. Mi'i tã ta'a­tu­ky­'esat pote Tupana to'e i'atuepe — Pyno hẽto e. Eiwe­ma'at teran eiminug sa'ag ko'i wywo pote woro­ho­'o­'atoiat eipe eiminug yt naku i eheko eropat haria wo e. Mi'i hawyi te'e­ru­wepyi sewaire sewaire hap kape yn ta'a­tu­ky­'esat haype. Mi'i hap urumo­wepit kahato hap topy­hu'at aru i'atu'e. Ma'ato ta'a­tunug kahato hawyi i'atu­mõti hap yn topy­hu'at. Mi'i hawyi awareria ewy tukup­te'en to'ope. Meiũran hary­poria yt hary­poria ewy hin i te'e­ro­py­hu'at. Katu­pono hary­po­ria'in yt tiky­'esat po'og ihainia ta'a­tue­'aito wo ma'ato ta'a­tu­ky­'esat hary­po­ria'in ne ta'a­tue­'aito sa'ag wo ta'a­tu­ky­'esat.
ROM 1:27 I'ewyte ihainia'in ti'a­tu­ky­'esat towary wo ihainia'in yt ihainia sese ewy hin i te'e­ro­py­hu'at. Yt Tupana miky­'esat ewy hin i ta'a­tu­ky­'esat pote yt Tupana minug ewy hin i te'e­ro­py­hu'at. Mi'i hawyi hary­poria ti'a­tu­'atoiat ihainia'in hawyi hary­po­ria'in to'ope to'ope to'o­ky­'esat hap topy­hu'at i'ewyte ihainia'in ihainia'in wywo to'ope to'ope yt miit ewy i yt naku i hap eropat sese haria wo. Mi'i hap upi tukup­te'en Tupana mi'a­piheg wuanuaria wo. I'atu­minug sa'ag iwato hap ok tã toi'a­tu­mo­so­'opot.
ROM 1:28 Mi'iria pe wahenoi sehay wakuat Tupana etiat pote wãi'i­'a­tu'e ahepe katu­pono yt ta'a­tu­ky­'esat i. Mi'i sehay kape yt te'e­ru­wa­nẽtup teran i. Yt ta'a­tu­ky­'esat i'atue­waure ka'a pe i'atu­wa­nẽtup hawe — Yt kat i Tupana sese i'atu'e to'ope pote toĩne'en pytkai. Mi'i pote Tupana to'e mi'iria ewywuaria pe — Hẽto eiwe­wa­nẽtup eiminug sa'ag kape yn at ka'ap eimi­ky­'esat ewy e. Mi'i hawyi po'og yt ihainia ewy i yt hary­poria ewy i te'e­ro­py­hu'at ta'a­tu­py'a pe ta'a­tu­wa­nẽtup hawe ta'a­tu­minug. Yt naku i hap ko'i yn ne'i ta'a­tunug ta'a­tu­wepyi hap ewy. Te'e­ru­wepyi Tupana wanẽtup hap ikahu rakat kaipyi i'atue­ha­ma­na'i.
ROM 1:29 Aikotã aikotã sa'ag nug kuap haria tukup­te'en. Yt naku i nug hap ete yn te'e­ru­we­moe­hapap at ka'ap — Ta'i yt nakuap i waku i'atu'e ta'a­tu­py'a pe. Uiminug yt nakuap i yn uimo­wepit sese i'atu'e. Atiky­'esat irania'in ekat yne uiwanuat uhekat hamo i'atu'e ta'a­tu­wa­nẽtup hawe. I'atuehay miit'in mõti te hap yn i'ewyte seha­'y­wywi hap yn ta'a­tunug torania miit'in ete. — Uito po'og waku eikai i'atu'e wakuaria pe i'atue­ha­'y­wywi wywo. Miit'in pot'auka haria wo te'e­ru­we­py­hu'at. Mi'i hawyi wo'o­pot­ma'at haria te'e­ru­we­py­hu'at. Te'e­ru­wepyi i'atu­hoi­ro'i hoiro'i irania'in ete. Yt pywuat sehay i ta'a­tu­henoi irania'in ete mi'iria ma'at hamo irania'in he'i he'i wo.
ROM 1:30 To'oeowa pe i'atu­wese kahato ma'ato haipekai miit'in atumohit kahato hap yn i'atuehay. Yt ta'a­tu­ky'e hin i Tupana sese i'ewyte miit'in me — Yt kat hamo i eiperia i'atu'e yn ta'a­tu­py'a pe. Yt i'atu­wese i i'ewyte yt ta'a­tu­wesat i irania'in katu­pono — Uito rat po'og nakat eikai i'atu'e te'e­ru­we­wa­nẽtup hawe. Atunug kuap po'og eikai i'atu'e. Yt ta'a­tu­'y­wot'in ta'a­tu­ty'in miat wãi'e hap upi hin i te'e­ro­py­hu'at.
ROM 1:31 Te'e­ru­wepyi ta'a­tu­pehik ta'a­tuehay — Ta'i atunug aru ui'e hap i'atu'e ma'ato yt ta'a­tunug hamuat pytkai i. Miit'in ma'at hap kape yn te'e­ru­wa­nẽtup pote — Atunug aru are ti rat ui'e hap i'atu'e pytkai yt ta'a­tunug hin i aru ta'a­tu'e hap ko'i. Yt ta'a­tukuap teran i ta'a­tu­we'eg hap. Yt ta'a­tu­ky'e kuap i irania'in. Marak'a ko'i wo tukup­te'en. Yt kat i miit'in ehaky­'e'i hap i'atu­py'a pe.
ROM 1:32 Ta'a­tukuap Tupana wãi'e hap mekewat kat som waku watunug kat som yt naku i watunug e hap ko'i wen ma'ato yt ta'a­tunug hin i. Yt ta'a­tu­ky­'esat i haype. — Mi'i tã ewetunug mote woro­ho­'o­'a­piheg gu'uro hamo e Tupana. Mi'i ta'a­tukuap pytkai ta'a­tu­pugha yne Tupana piat ainãpin hap ko'i. I'ewyte to'o­mo­wehum kahato to'ope to'o­minug sa'ag ko'i ete — Urumo­wepit kahato haria eipe i'atu'e yt naku i nug haria pe. Mi'i hawyi wato'e — Ma'ato uito ti yt mi'iria ewywuat hin i areĩne'en katu­pono waku kahato uito wato'e pote ti waku aiwe'eg wo o uiwy­ria'in katu­pono yne aito mi'iria ewywuaria Tupana wanẽtup hawe are.
ROM 2:1 Pyno yt naku i wato'e — Uito waku yn nug hat pãi an ma'ato irania'in mesu­wa­ro­tiaria yt naku i nug kahato haria tukup­te'en wato'e aipy'a pe pote yt iwe'eg hin i rakaria wo watoĩ­ne'en Tupana wanẽtup hawe e. Katu­pono Tupana ti aikuap kahato. Tupana tikuap yne aiminug sa'ag ko'i yt heremo i rakaria ko'i e. I'ewyte aiwa­nẽtup hap ko'i yt ikahu rakat i toikuap. Mi'i pote — Miit'in irania'in ni sa'ag nug haria sese ma'ato uito waku nug hat areĩne'en yne uiminug hap ete wato'e pote aiwe­ma'at haria wo wato­py­hu'at. Katu­pono aitoria torania yt naku i nug haria Tupana wanẽtup hawe. Mi'i pote karãpe — Uito po'og irania'in kai ai'e pote yt iwe'eg i rakaria wo watoĩ­ne'en. Katu­pono — Yt kat i uimi­'a­parap hap Mehĩ Mimi yt wato'e kuap i Tupana kape. Ta'i Tupana tikuap yne aiwe­pywiat aiminug ko'i. Irania'in yt tikuap i yt hehamo i watunug yt naku i pytkai Tupana tikuap toikuap yne pote. Pywo ti rat toĩne'en kahato ai'a­parap hap. Mi'i pote yt naku i watikat irania'in miat i'aparap hap. Katu­pono aito wy yt naku i nug haria wo wato­py­hu'at Tupana wanẽtup hawe.
ROM 2:2 Ta'i Tupana tikuap yne aiminug ko'i sio waku sio yt toikuap. Tupana yn waku e ahepiat hanuat uwe waku uwe yt naku i e hamo uwe toi'a­piheg uwe yt e hamuat.
ROM 2:3 — Meimuẽ­waria yt naku i nug haria wato'e ma'ato wo'o­ku­pitu kahato i'aparap hap irania'in minug sa'ag ai'a­parap hap ko'i to'o­'e­wy­'ewy. — Wãi ne wato'e irania'in me i'atu­'a­parap hap ete i'atu­minug sa'ag hap toku­pitu watunug pytkai — Atunug yt naku i pytkai yt karãpe i aru Tupana ui'a­piheg wato'e. Mio tã wato'e pote aiwe­moeso haria watoĩ­ne'en katu­pono Tupana tikuap yne yt nakuap i ko'i uimi­mu­'eria.
ROM 2:4 — Tupana iwese kahato ahete pote waku watunug yt nakuap i mot'i uimi­ky­'esat ok tã katu­pono iwese te ahete yt naku i watunug mot'i pytkai ai'e hap wato'e pote yt aiwe'eg hin i aito. — Yt karãpe i aru ai'a­piheg aiminug yt naku i hap upi yt naku i wato'e aiwo­'ope are. Pywo ti rat Tupana iwese kahato te ahete aiky'e kahato haype. Yt meremo i ai'a­piheg teran aiminug yt nakuap i ete. Eweikuap kat pote yt ai'a­piheg meremo i katu­pono iwese kahato te toiky­'esat kahato watu­we­morem aiminug sa'ag kaipyi ai'a­piheg hap yianmete haype. Mi'i haype ti iwese mot'i te ahete. Toiky­'esat wati­'a­tu­'atoiat yne aiminug sa'ag ko'i. Mesup te yt ai'a­piheg i te ma'ato — Atiky­'esat ewei'atoiat yne eiminug sa'ag ko'i e ahepe. Ewei'aipok to uhowawi uimẽ­pyt'in e yn Tupana ahepe.
ROM 2:5 Yt naku i ti watunug aiwepyi Tupana yt miky­'esat i. Yt naku i aipy'a pyi watunug sa'ag nakat yn aiwepyi uiwy­ria'in are. Mi'i hap watunug te'en te'en hawyi aiminug sa'ag tuwe­'a­kytka mi'i hawyi ai'a­piheg i'ewyte tuwe­'a­kytka. Put'ok'e aru aiminug sa'ag hap ko'i moherep hap e'at hawyi aru Tupana timo­herep yne aiminug sa'ag ko'i aiminug yt Tupana miky­'esat ewy hap ko'i e. Mekewat e'at pe ti yt iwese hin i ra'yn aiminug sa'ag hap ko'i ete e. Marak'a ewy aru Tupana topy­hu'at aiminug sa'ag hap ko'i ete mekewat e'at pe e. Mekewat e'at pe yne heremo aiminug wuat'i ehamo sio waku sio yt toimo­herep.
ROM 2:6 Mekewat e'at pe aru Tupana tum na'yn tomõ­typot haria pe tomi­ky­'esat nug haria pe sa'up wakuat kahato. Ma'ato irania'in me yt naku i nug haria pe tutum na'yn sa'up yt naku i i'atu­minug sa'ag hap ok tã na'yn e miwan me.
ROM 2:7 Ta'i Tupana tum aru tomohey haria pe tomõ­typot haria pe tomi­ky­'esat nug hanuaria pe wuat'i e'at piat i'atuieĩ­ne'en hap sese tomẽ­pyt'in sa'up e. Mi'iria yt i'atu­pohep hin i Tupana mõtypot hap ete. Ta'a­tu­minug wakuap ko'i wo ta'a­tu­mõ­typot at ka'ap. Yt karãpe i i'atu­ku­'uro mi'iria ete e. Katu­pono tomõ­typot sa'up Tupana tum mi'iria pe wuat'i e'at piat i'atuieĩ­ne'en waku hap.
ROM 2:8 Ma'ato irania'in yt tomohey i haria pe aru tutum i'atu­'a­piheg wuat'i e'at piat katu­pono ta'a­tu­mi­ky­'esat yt naku i hap ewy yn ta'a­tu­'a­tunug at ka'ap. Yt ta'a­tunug hin i Tupana miky­'esat ewywuat ko'i pote Tupana mi'a­piheg ko'i te'e­ro­py­hu'at wuat'i e'at pe e. Tupana mõpy­'ahak teran hap yn ta'a­tunug mote Tupana mi'a­piheg ko'i wo te'e­ro­py­hu'at wuat'i e'at pe e. Yt naku i nug haria toran toi'a­tu­'a­piheg sio Iuteuria sio irania'in ywania toi'a­tu­moe­ha­ky­'e'i kahato wuat'i e'at pe.
ROM 2:9 Ta'i yt naku i ti yt nakuap i nug haria ete sio aito Iuteu ywania sio wẽtup ywania e. Yt nakuap i nug haria i'atu­wa­nẽtup hap mo'arot kahato tukup­te'en wuat'i e'at pe e. Iuteu ywania po'og ho'opot rakaria tukup­te'en aru irania'in kai katu­pono mi'iria ikuap Tupana ehay po'og torania ywania kai ha'a­wy­tepyi wen ma'ato yt ta'a­tunug i.
ROM 2:10 Ma'ato ti tukup­te'en Tupana mohey haria yne ywania kawiat. Mi'iria tukup­te'en to'y­wania py'a­setpe Tupana miky­'esat nug haria wakuat nug haria Iuteu ywania i'ewyte yt Iuteuria i are. Mi'iria Tupana mimõ­typot ko'i tukup­te'en. Mi'iria pe — Woro­ho­'onug eipe wuat'i miit'in mimõ­typot no wuat'i e'at pe e Tupana. Woro­ho­'onug eipe uimi­mo­wepit haria sese at ka'ap wuat'i e'at pe aru e Tupana wakuap nug haria pe Iuteu ywania kawiaria pe i'ewyte wakuap nug haria irania'in ywania kawiaria pe.
ROM 2:11 Tupana ti'a­tu­ky'e sakpo'e torania miit'in e. Ta'i aito yne ywania aiwo­'oe­wy­'ewy to'o­ku­pitu Tupana piat aiky'e hap e. Yt karãpe i Tupana to'e wẽtup ok ywania kawiat pe yn — Woro­ho­'o­ky'e eipe po'og uimi­ky'e irania'in kai.
ROM 2:12 Aparãu emiariru emiari­ru'in ko'i Iuteu ywania kawiaria ti tukup­te'en Tupana mienoi ko'i Musei miwan upi. Toi'a­tu­nãpin Iuteu ywania tomi­ky­'esat ko'i torania ywania e'yianmete. Nimo te kat som waku watunug kat som yt naku i watunug hap Tupana tiwan puretig nu kawiat rote hawyi tutum Musei ywania Iuteu ywania pe. Ma'ato ta'a­tukuap yne Tupana miky­'esat nu kawiat puretig miwan pytkai yt ta'a­tunug hin i. Mi'i pote — Ho'o­wasat rakaria ewywuat eweikup­te'en e Tupana Iuteu ywania pe mesup. Katu­pono eweikuap sakpo'e uimi­ky­'esat ko'i uimiwan ko'i ma'ato mi'i pytkai yt ewetunug hin i uhepiat einãpin hap e. Ma'ato mesu­wa­ro­tiaria irania'in ywania yt kat i uimiwan wo'o­nãpin hap Musei kaipywiat kuap haria tukup­te'en ma'ato yt ta'a­tukuap i uimiwan Musei piat hap pytkai ta'a­tunug yt naku i ta'a­tu­mikuap ok tã. Mi'i pote mio tã are'e yt uimiwan kuap i haria pe i'ewyte Iuteu ywania uimiwan kuap haria pe — Yt ewetunug i wakuap eimikuap hap ok tã ewy pote ho'o­wasat rakaria eweikup­te'en e.
ROM 2:13 Mi'i pote are'e yne miit'in me e Tupana — Wakuap nug haria uimi­ky­'esat nug haria eipe pote waku pe eweikup­te'en uipy'a pe e ahepe. Uiwy­ria'in waku watikuap yne Tupana piat ainãpin hap ko'i. Waku wati­wẽpap i imiwan ma'ato watikuap Tupana miwan Musei mimo­herep ko'i yne pytkai yt watunug i yne pote yt naku i nug haria wo wato­py­hu'at Tupana wanẽtup hawe are katu­pono mio tã e Tupana — Uimi­ky­'esat miwan miat ewywuat nug haria pe yn are'e aru — Eipe wakuaria are uimi­ky­'esat miwan miat ewywuat nug haria pe yn e.
ROM 2:14 Irania'in ywania yt Iuteu ywania i yt ikuap i kahato Tupana wãi'e hap Musei mienoi ko'i wen ma'ato yt ikuap i pytkai ta'a­tunug kahato Tupana miky­'esat ko'i te'e­ru­wepyi wakuat nug haria tukup­te'en mote. Tupana miwan miat puretig nu kawiat ewywuat ta'a­tunug yt ikuap i pytkai. Katu­pono i'atu­wa­nẽtup hawe Tupana wo'o­nãpin hap ewywuat toĩne'en aikotã Tupana miwan miat ewywuat toĩne'en i'atu­py'a pe. Ta'a­tukuap kahato kat som waku kat som yt naku i hap ta'a­tukuap. Katu­pono mi'i e hap topy­hu'at yne miit'in me Tupana piat ainãpin hap ewywuat aiwe­wa­nẽtup hawe. Mi'i tupono wemõti haria wo te'e­ro­py­hu'at ra'yn yt ta'a­tunug Tupana piat i'atu­wa­nẽtup nãpin hap ewy i pote.
ROM 2:15 Yt nakuat i nug hap tu'i­rãpe te'e­ru­we­mõti. Yt naku i ta'a­tunug neran hawyi — Are pãi are an meketã sig atunug hawyi yt naku i nug hat areĩne'en uipy'a pe i'atu'e te'e­ru­wa­nẽtup hawe. Yne e'at pe te'e­ru­wewãi yt naku i nug hap pupi wuat'i ywania yt ta'a­tukuap i te Tupana wo'o­nãpin hap miwan miat pytkai. — Atunug waku hawyi waku pe areĩne'en i'atu'e te'e­ru­we­kaipyi. Atunug yt naku i pote yt naku i nug hat areĩne'en i'atu'e at ka'ap te'e­ru­we­wa­nẽtup hawe. Sa'a­wy­'i­pyite ainug hap e'at pe turan Tupana tiwan miit'in py'a pe wanẽtup hawe tomi­ky­'esat ko'i kat som waku kat som yt naku i wanẽtup hap. Mi'i hap kaipyi watikuap Tupana wo'o­nãpin hap toĩne'en miit'in py'a pe hap yt ta'a­tukuap i te ta'a­tue­waure ka'a puo Tupana ehay wen ma'ato ta'a­tukuap kahato ta'a­tu­py'a pe te'e­ru­wewãi hap ko'i kat som waku kat som yt naku i watunug hap ko'i ta'a­tukuap kahato.
ROM 2:16 Uito ti Pauru Tupana ehay wakuat sese Iesui etiat moherep hat. Mio tã are'e wuat'i ywania pe — Uhyt'i'in mana'in Tupana tipo­'oro ra'yn ahowawi Aheha­kye­ra'at hat are. Toipo­'oro ra'yn Tosa­'yru Iesui Aipo­rekuat nuat. Eweimohey ro Iesui eipy'a pe eiwa­nẽtup hawe. Ewetunug no Iesui Eipo­rekuat no. Tupana tikuap kahato eiwa­nẽtup hap eipy'a piat. Put'ok'e aru uwe waku uwe yt e hap e'at. Mi'i e hap e'at pe Iesui ti'a­tu­mo­herep To'ywot Tupana pe uwe temiit'in sese uwe yt hap are. Toikuap kahato wuat'i miit'in wanẽtup hawiat ko'i mig'i wuat. Toikuap sese sio wẽtup ok tomohey hat sese toĩne'en sio yt hap toikuap sakpo are. Mi'i pote Iesui ehay pyi aru Tupana aheha­kye­ra'at wuat'i e'at pe sio ai'a­piheg wuat'i e'at pe. Uito Pauru mi'i tã are'e wuat'i ywania pe.
ROM 2:17 Mesuwe uimiwan me uhehay teran Aha'a­se'i Aparãu emiariru emiari­ru'in me. Ui'y­wania Iuteu ywania — Uruto ti Iuteu ywania sese wato'e irania'in ywania pe. Nimo te Tupana sese mohey haria uruto wato'e irania'in me. Ha'a­wy­tepyi Tupana uru'airo to'y­wania sese wo wato'e irania'in ywania pe aito Iuteu ywania Tupana sese mõtypot haria sese uruto wato'e. Nimo pyi te wuat'i ywania e'yianme uruimohey Tupana Koro wato'e irania'in me. Ta'i uruepe yn sa'a­wy'i Tupana tuwe­mo­herep wato'e. Uruepe yn tutum topo wuat miwan uruwo­'o­nãpin hap miwan miat wato'e irania'in ywania pe.
ROM 2:18 Urumikuap yne kat som Tupana tiky­'esat miit'in tunug hap wato'e wuat'i ywania pe. Uruikuap kahato Tupana miwan kaipyi kat som waku kat som yt naku i hap wato'e. Uruikuap kahato urupy'a pe kat e hap yt pywuat i hap katu­pono Tupana e hap miwan miat tutum uruepe wato'e irania'in me.
ROM 2:19 Ta'i uruto ti irania'in yt ikuap i te hanuaria mu'e sese haria wato'e irania'in ywania pe. Eiperia mu'ap upiaria yt ihapytig i rakaria ewywuaria eipe wato'e. Eiperia aikotã mu'ap i'ypyryp wiat yt kat i ariãty ipo piaria rakaria ewywuaria wato'e irania'in me. Uruto eimu'e sese hanuaria urutu­kup­te'en wato'e torania ywania'in me.
ROM 2:20 Irania'in ywania yt we'eg i te haria mowe'eg haria uruto wato'e yne Tupana wo'o­nãpin hawe. Tupana miwan yianmiat kuap haria uruto wato'e. Ta'i Tupana miky­'esat ko'i yne kuap haria uruto wato'e kat som waku kat som yt nakuat i hap kuap haria uruto wato'e yne irania'in ywania pe aikope aikope ahewyry hap tote.
ROM 2:21 Uito Pauru ui'ywot uity Iuteu ywania sese mi'i pote uito i'ewyte areĩne'en Iuteu. Mi'i pote atikuap pywo yne ai'e hap ui'y­wania ma'ato waku watu­we­mu'e wy ui'y­wania karãpe wati­'a­tu­mu'e irania'in waku ahewaure ka'a kahato i'atu­mu'e ahepiat hap kape. Kat pote yt watunug i aipot­mu'e hap ewywuat pote yt iwe'eg hin i rakaria ewywuaria wato­py­hu'at aimi­mu­'eria wanẽtup hawe. Pywo ti rat waku watunug aimienoi ok tã. — Yt sero­'ok­'e­wei'e tei'o wato'e irania'in me pote waku i'ewyte yt sero­'ok'e hat wo i wato­py­hu'at aipot­mi­nãpin hap ewy.
ROM 2:22 Yt ewary wary tei'o yt e'aito aito tei'o wato'e aimi­mu­'eria pe pote waku wy wato­py­hu'at i'ewy iwe'eg kahato rakaria wo. Waku yt kat i aiwary wary hap i'ewyte yt kat i ahe'aito e'aito hap are. Waku aiwe­nãpin hawe aimi­mu'e ewywuat. Ma'ato yt watunug i ahepiat miit'in nãpin hap ewy pote ai'e hap yt kan hamo i i'atu­wa­nẽtup hawe. — Yt naku i kahato iã'ãkap ko'i ahetu­pana wo wato'e torania ywania pe. Yt naku i aikai mo wat aiminug tupa­naria wato'e irania'in me. Ma'ato mi'i tã wati­'a­tu­mu'e pote waku wy wati­moma torania tupa­naria aikaipyi. Ha'a­wyte ai'y­wania timoma irania'in ywania tupa­naria imõtypot yat piat ko'i ma'ato mi'i ko'i ta'a­tu­we­neru yne tupa­naria itotiaria sa'up ky'ewi — Ewei'a­tu­moma ro tupa­naria yne e Tupana pytkai. Mi'i pote i'atu­mi­mu­'eria weky­ry'i wuanuaria te'e­ro­py­hu'at itote te. Yt naku i mi'i tã wati­'a­tu­mu'e irania'in turan.
ROM 2:23 — Urunãpin Tupana piat hap wakuat kahato wato'e ma'ato wãiwa­to'e pytkai yt watunug hin i ahepiat miit'in mu'e hap ewy mi'i pote irania'in to'o­ky­ry'i kahato Tupana sese ete aiminug sa'ag upi.
ROM 2:24 Aikotã nimo te Tupana to'e ai'y­wa­nia'in me hap ewy mio tã e miwan me — Uimi­'ai­roria eimi­mu­'eria irania'in ywaniaria to'o­ky­ry'i kahato uhehay ete katu­pono eiperia typy sehay nug haria ewywuaria eweikup­te'en. Yt ewetunug Tupana piat einãpin hap ewy hawyi eimi­mu­'eria miky­ry'i ko'i eweikut­p­te'en. — Ewetunug no yne Tupana piat ainãpin hamuat ewei'e irania'in me yt ewetunug hin i uhepiat einãpin hap pytkai e Tupana aha'a­se­'i'in me nimo te.
ROM 2:25 Uruto ti Iuteu ywania sese wato'e irania'in me. Mi'i hap moherep hamo uruesa­'y­ru'in emusin ãpy sokpe uruitek te'e­ru­we­mo­herep 8 e'at tokosap hawyi — Tupana urutum neran uruesa­'yru epe emiky­'esat nug hamo wato'e itote Tupana mõtypot yat pe. Mi'i hawyi Tupana wano topy­hu'at uruesa­'y­ru'in wato'e irania'in me. Ui'y­wania pywo pe ti are'e ehepe yt watunug i Tupana piat ainãpin hap pote yt kan hamo i aheko aha'y­ru'in emusin ãpy sokpe tek hap. Mi'i hamo imoherep Tupana pe watunug neran torania ainãpin ewywuat hap e. Ma'ato yt watunug i Tupana e hap pote yt kan hamo i aheko aiwe­musin ãpy sokpe tek hap — Uito Tupana ywania hap moherep hap are. Ta'i aikotã irania'in ywania ewywuaria wato­py­hu'at yt watunug i Tupana miky­'esat yne ewywuat hawyi.
ROM 2:26 Ma'ato irania'in yt Iuteuria i yt te'e­re­musin ãpy sokpe tek hin i aheko ewy pytkai Tupana miky­'esat nug haria tukup­te'en tuereto yt kat i i'atue­musin ãpy sokpe tek hat i pytkai. Mi'iria ti Tupana miky­'esat ewy nug haria pote te'e­ro­py­hu'at po'og ai'y­wania Iuteuria kai Tupana wanẽtup hawe — Ui'y­wania sese torania uimi­ky­'esat nug haria tukup­te'en e sio Iuteu sio yt e Tupana mesup e.
ROM 2:27 — Karãpe irania'in ywania tunug uimi­ky­'esat ewywuat mi'iria ti uhemiit'in sese tukup­te'en e Tupana sio Iuteu ywania sio wẽtup ywania sio i'atue­musin ãpy sokpe tek hap toĩne'en Iuteu ywania ewywuat sio yt e. Eiperia ti ui'y­wania Iuteuria ywania ewywuaria e Tupana i'atuepe. Yt eweikuap i te uimi­ky­'esat ko'i miwan miat pytkai uimi­ky­'esat nug haria eweikup­te'en mote e Tupana irania'in ywania pe yt ta'a­tu­'a­tukuap i te aha'a­se'i Musei piat ainãpin hap pytkai are. Uiwy­ria'in Iuteu ywania watikuap kahato aha'a­se'i Musei e hap ko'i ma'ato tukup­te'en kahato aitoria yt inug hin i rakaria. Mi'iria pe wyti aru Tupana to'e — Irania'in ywania po'og eikai katu­pono uimi­ky­'esat ko'i ta'a­tu­'a­tunug yne ta'a­tu­mikuap ok tã ma'ato eiperia yt ewetunug hin i eweikuap yne uimi­ky­'esat ko'i pytkai e. Mi'i pote irania'in ywania po'og waku eikai e Tupana aru ai'y­wania irania'in me yt imiky­'esat ewy nug haria pe.
ROM 2:28 Ui'y­wania watikuap mesup aikotã Tupana tikuap temiit'in sese hap. Toikuap kahato tomi­ky­'esat nug haria sio Iuteu ywania sio yt sio i'atue­musin ãpy sokpe tek hat toĩne'en sio yt e. Ta'i yt aipiit kaipyi i Tupana tikuap to'y­wania wo watoĩ­ne'en hap.
ROM 2:29 Ta'i Tupana ikuap kahato to'y­wania sese ko'i katu­pono sio toĩne'en ta'a­tu­py'a pe Topã'ãu Wakuat sio yt hap. Toikuap kahato sio waku pe tukup­te'en sio yt hap. Yt teha'at hin i wemusin ãpy sokpe tek hap toĩne'en sio yt hap kape ma'ato aiwa­nẽtup hap kape teha'at kahato hawyi aipy'a piat kape teha'at kahato hawyi toikuap yne ra'yn aipy'a piat sio waku sio yt. Mi'i hawyi to'e Topã'ãu miky­'esat nug haria pe — Eipe ui'y­wania sese e katu­pono Uipã'ãu miat einãpin hap ewy kahato ewetunug e. Mi'i pote eipe ui'y­wania sese eweikup­te'en e Tupana tomi­ky­'esat nug haria pe sio Iuteu ywania sio wẽtup ywania pe. — Waku kahato eipe e Tupana ahepe pote waku pe watoĩ­ne'en. Karãpe irania'in — Yt naku i kahato eipe i'atu'e ahepe wen ma'ato watikuap yt pywo pe i ra'yn i'atu'e hap katu­pono Tupana wanẽtup hawe waku pe watoĩ­ne'en mote. uito Pauru.
ROM 3:1 Eiperia Humanu ywania wen ma'ato uito Pauru Iuteu ywania areĩne'en. Waku kahato ui'y­wania are. Iuteu ywania waku kahato katu­pono sa'a­wy'i sese Tupana ti'airo urue'a­se'i pot Aparãu. Mi'i hawyi to'e tope — Ati'a­tu­poi­tyro kahato aru wuat'i miit'in mesuwat yi totiaria wẽtup esaipe­piaria emiariru emiariru wo e. Mi'i pote Iuteu ywania titek ta'a­tue­sa­'yru emusin sokpe ãpy ete — Uruto Tupana mi'ai­roria e hamo. Pyno waku apo ai'y­wania sio yt.
ROM 3:2 Pywo ti kẽi waku kahato topy­hu'at Iuteuria ywania. Uito Pauru ti Iuteu ywania sese are. Waku kahato Iuteu katu­pono yne ywania e'yianmete Tupana tum tehay uru'y­wania pe. Sa'a­wy'i tuwe­mo­herep sese urue'a­se­'i'in me. Sa'a­wy'i Tupana ihay kahato uru'y­wania miwan me katu­pono tuwe­mo­herep teran wuat'i ywania pe urumiwan wo.
ROM 3:3 Tutum tehay urue'a­se­'i'in sa'a­wy­'i­wuaria Tupana mohey kahato haria pe ma'ato i'atu­me­pyt'in i'atue­mia­ri­ru'in tiwaure kahato i'atu­mienoi Tupana ehay. Mi'i hawyi yt ta'a­tu­mohey i kahato Tupana. Mi'i pytkai yt karãpe i Tupana waure wo toĩne'en aru Iuteu ywania kai. Ta'i Tupana ti uru'y­wania ky'e sese hat wuat'i e'at pe. Ta'i Tupana mi'airo ywania pote urutu­kup­te'en ne. Uruto wuaria Iuteuria ti'atoiat kahato Tupana ha'a­wy­tepyi wen ma'ato yt karãpe i Tupana uru'atoiat katu­pono — Yt karãpe i woro­ho­'o­'atoiat esaipe­piaria e Tupana sa'a­wy'i Urue'a­se'i Aparãu me pote.
ROM 3:4 Tupana ti yt heso kuap i rakat pãi. Sa'a­wy'i — Ati'a­tu­poi­tyro aru emiariru emiari­ru'in e Tupana urue'a­se­'i'in me. Mi'i hap ete yt karãpe i Tupana heso. Tutunug yne to'e hap ewywuat. Urutoria Iuteu ywania heso kuap ma'ato Tupana yt karãmuat i heso kuap e. Aikotã morekuat Tawi pe to'e sa'a­wy'i hap ewy tutunug wuat'i e'at pe. Mio tã to'e — Tawi e atunug aru ui'e hap ewywuat wuat'i e'at pe e. Atunug esaipepiat Morekuat Koro wo wuat'i e'at pe e. E'ywania yt uimohey i pytkai aru atunug ui'e hap ewy e. Yt uwe i uipyhyp kuap ui'e hap nug hamuat ete e Tupana nimo morekuat Tawi pe hawyi toiwan towepy hap miwan me.
ROM 3:5 Pywo ti rat uru'y­wania Iuteuria yt timohey kahato i Tupana e hap — Atunug aru e hap pytkai Tupana tunug yne to'e hap ewy. Urui'atoiat Tupana pytkai yt uru'atoiat hin i. Mi'i hap kaipyi watikuap Tupana yn ni waku sese rakat yt uru'ewy hin i hap. Mi'i pote uruminug sa'ag hap topy­hu'at Tupana mõtypot ran hap ewywuat kat pote uruky'e sese te yt nakuat i uruto pytkai. — Eiky'e sese pote kat pote ei'a­piheg apiheg kahato i'atu'e sa'ag irania'in uruepe.
ROM 3:6 Eweikuap kat pote uru'a­piheg uruky'e haype aikotã ai'y­wot'in ai'a­piheg aihire te hap ewy Tupana uru'a­piheg uruky'e haype pote. Tupana ti hãpyk sakpo te mi'i pote toi'a­piheg kahato aru wuat'i yt naku i nug haria — Yt uru'a­piheg nei'o yt uru'a­piheg nei'o i'atu'e pytkai. Tupana uruminug sa'ag ni emõtypot hap topy­hu'at wuat'i e'at pe i'atu'e sa'ag. Ta'i aiminug sa'ag kaipyi miit'in tikuap kahato Tupana po'og waku aikawiat rakat i'atu'e sa'ag to'ope.
ROM 3:7 Aheso pote Tupana e hap po'og pywo topy­hu'at kat pote Tupana yt heso i rakat toĩne'en pytkai aito heso rakaria wo watoĩ­ne'en i'atu'e sa'ag to'ope. Mi'i pote aheso hap kaipyi Tupana waku hap po'og heremo topy­hu'at. Ta'i waku watunug yt naku i Tupana mõtypot hamuat i'atu'e sa'ag. Mi'i pote ti yt karãpe i ai'a­piheg aru aiminug sa'ag ko'i ete katu­pono imõtypot hap topy­hu'at aiminug sa'ag ko'i kaipyi i'atu'e ma'ato Tupana ti'a­tu­'a­piheg aru wuat'i e'at pe to'e hap ewy.
ROM 3:8 — To'iro wuat'i ywania waku ti wati­mõ­typot Tupana aiminug sa'ag wo i'atu'e sa'ag to'ope. Ta'i mi'i tã hap ti aimu'e hat Pauru tiky­'esat i'atu'e uimohit reran haype ne'i. Sa'a­wy'i ti mio tã e aimu'e hat sese Pauru ahepe i'atu'e to'ope yt pywo pe i. Mi'iria yne yne Tupana mi'a­tu­'a­piheg wuanuaria tukup­te'en wuat'i e'at pe. Tupana ti'a­tu­'a­piheg neran mi'i tã haria ewywuaria.
ROM 3:9 Iuteu ywania i'ewyte yne ywania te'e­ro­py­hu'at yt naku i nug haria to'o­'e­wy­'ewy katu­pono yne yne yt naku i nug haria Tupana wanẽtup hawe. Tupana piat urunãpin hap Musei miwan miat yt urutunug hin i te uru'y­wania. I'ewyte irania'in ywania ti'a­parap kahato ta'a­tu­'y­wania wãi'e hap ko'i ete. Mi'i pote aito torania i'aparap haria Tupana wanẽtup hawe e. Mi'i pote ti yt naku i uruto'e irania'in ywania pe — Uruto ti po'og nakat eikai katu­pono uruto waku ma'ato eipe yt nakuaria i yt uruto'e kuap i.
ROM 3:10 Katu­pono sa'a­wy'i Tupana to'e miwan me — Yt wẽtup ok i mesuwat yi tote wakuat yn nug hat atipuẽti e.
ROM 3:11 Yt wẽtup miit i uikuap teran sese hat atipuẽti nimo pyi mesup te e. Yt wẽtup ok i mesuwat yi tote atipuẽti uikat reran hat e Tupana.
ROM 3:12 Yt naku i kat pote yne miit'in ui'atoiat haria wo tukup­te'en e tuwepe. Yt kan hamo i tukup­te'en mi'i tã e. Yt uwe i mesuwat yi totiat atipuẽti waku sese nug hat e Tupana miwan me.
ROM 3:13 I'atuehay ko'i yt hãpyk hin i atipuẽti e. I'atueso hap yn i'atuwẽ pe miit'in ma'at hap yn atipuẽti e. I'atuẽku tote sehay nem hap ewywuat yn aikotã miit yt misyp i yi ka'a piat ewy nem kahato i'atuwẽ pe e. Sehay sa'ag yn tuwẽtem i'atuwẽ pyi miit'in kuasa hamuat e.
ROM 3:14 Aikotã moi iãi hy miit'in auka hap ewy i'atuehay miit'in auka hap ewy topy­hu'at e. I'atuehay aikotã mohag nop takat ewy e. I'atuehay sa'ag uhete i'ewyte irania'in ete e Tupana miwan me.
ROM 3:15 Miit'in auka sese haria wo te'e­ro­py­hu'at miit'in e. Aikotã miit'in ihyha kahato rakaria ewy te'e­ru­weput meremo irania'in atu'uka hamo hap ewy. Aikotã awyato tikat yty tomi'u wo ta'a­tukat miit'in i'auka hamo e.
ROM 3:16 Aikopuo aikopuo hap saipe upi i'atu­moe­ha­ky­'e'i ko'i i'atu­mi­satek nug ko'i tukup­te'en e.
ROM 3:17 Yt karãpe i irania'in mowepit hap ta'a­tunug mote yt ta'a­tukuap hin i i'atu­mo­wepit hap e.
ROM 3:18 Yt karãpe i uimõ­typot hap i'atu­wa­nẽtup hawe e Tupana. Uhepiat ta'a­tu­'a­piheg hap pupi yt te'e­ro­ken'ẽ hin i e Tupana sa'a­wy'i miwan me ahepiat. Mio tã e aito yt naku i nug haria moherep hamuat.
ROM 3:19 Urutoria Iuteuria ywania tikuap kahato Tupana wo'o­nãpin sa'a­wy­'iwuat hap Musei mimo­herep kat som waku watunug kat som yt naku i watunug hap. Mi'i watikuap yne pytkai yt watunug i torania pote wati­'a­parap wãi'e hap ete — Ewetunug no e hap ete are. Mi'i pote yt uwe i mesuwat yi tote uruto — Yt karãpe i ati'a­parap Tupana wãi'e hap ete yt uruto'e kuap i. I'ewyte yne aito wuat'i puo mesuwat yi totiaria wato­py­hu'at Tupana mi'a­piheg wuanuaria wo. Pywo ti rat mekewat e'at pe aru — Eiperia yt naku i nug haria e aru Tupana ahepe torania pe. Mi'i to'e pote aru yt uwe i aitoria — U pãi u an yt karãpe i ati'a­parap emiky­'esat nug hap ete e haria itote kat pote toi'a­tu­mo­herep wuat'i ehamo aiminug sa'ag ko'i e. Mi'i pote yt wati­wesat kuap i aiwe­mõti hap toĩne'en mote e.
ROM 3:20 Yt uwe i tuwe­mo­hãpyk kuap Tupana wanẽtup hawe topiat ainãpin hap Musei mimo­herep miwan nug hap kaipywiat upi e. Ta'i yne aito wahã'ãg kahato Tupana piat ainãpin hap nug hamuat ete wen ma'ato aito yt uwe i inug yne ainãpin hap. Wati­'a­tu­'a­parap aparap Tupana piat ainãpin hap ete. Wati­'a­tu­mu'e kahato aimu'e hap Tupana piat kat som waku watunug kat som sa'ag hap ete wen ma'ato wati­'a­parap yn. Mi'i pote paawa­to'e aipy'a pe ahepiat yt watunug i pote — Yt naku i kahato uito wato'e aiwa­nẽtup hawe aiwepe. Mi'i pote ti — Uito yt naku i nug hat e hap yn watikuap Tupana piat ainãpin hap kaipyi.
ROM 3:21 Aikotã aru pyno wati­puẽti Tupana wywuat aiwo­'o­wese hap are. Pyno ahenoi ehepe. Mio tã e Tupana ahepe — Yt eiminug wakuap kaipyi i woro­ho­'onug eipe waku rakaria e Tupana miwan me. Ta'i uimohey hap kaipyi woro­ho­'oe­ha­kye­ra'at e. Uimohey hap eipy'a piat kuap hap kaipyi waku pe eweikup­te'en uipy'a pe uiwa­nẽtup hawe e Tupana miwan me. Atiky­'esat kahato ewetunug yne uhepiat einãpin hap ko'i ma'ato yt uwe i eiperia inug yne haria mi'i pote yt uwe i eiperia wakuat e. Eiminug waku hap ko'i upi yt eweipuẽti i mu'ap uhowawi e Tupana ahepe sa'a­wy'i tehay moherep haria miwan me.
ROM 3:22 — Ta'i Uha'yru Iesui mohey haria pe yn are'e — Eiperia ti waku kahato uiwa­nẽtup hawe uipy'a pe e Tupana. Uimi­po­'oro Miit'in Porekuat nuat mohey haria yn uimie­ha­kye­ra­'aria e. Mi'iria yn waku pe uiwa­nẽtup hawe sio Iuteu ywania eipe sio wẽtup ywania e aru Tosa­'yru mohey haria sese pe.
ROM 3:23 Katu­pono yne ywania yne miit'in yt naku i nug haria tukup­te'en. Katu­pono yne miit'in yt Uito ewy hin i i'atue­waku hap ete are e Tupana ahepiat.
ROM 3:24 Pywo kahato uiwy­ria'in Tupana ti po'og po'og waku ahewaku hap kai. Ta'i ahewaku hap yt Tupana ewaku hap ewy hin i. Mi'i pote ahewaku hap yt put'ok'e hin i Tupana ewaku hap ete e. Mi'i pote yne aitoria yt naku i nug haria watoĩ­ne'en Tupana wanẽtup hawe e. Mi'i pote mesup Tupana to'e ahepe — Uha'yru mohey haria pe yn atum i'atue­ha­kye­ra'at hap wuat'i e'at piat e Tupana mesup wuat'i pe. Uha'yru suu mikyi'at upi atum ne'en ne'i wuat'i e'at piat ieĩne'en hap e mesup ahepe. Uhegyi'at hap upi Uha'yru suu mikyi'at upi atum ne'en ne'i eimo­waku hap e mesup yne miit'in me e.
ROM 3:25 Eiky'e haype yt kat i eiminug wakuap pytkai woro­ho­'o­ky'e hawyi eheĩne'en hap wuat'i e'at piat hap atum ne'en ne'i ehepe Uha'yru Iesui suu mikyi'at upi e. Eipo­typot Iesui tikyi'at ra'yn eheĩne'en hap yt ikahuro rakat i pote waku eweitat uimiium e Tupana wuat'i miit'in me. Yt kat sa'up i rakat atum miit'in me Uha'yru Pã'ãu e Tupana mesup.
ROM 3:26 Mi'i uiminug kaipyi miit'in tikuap ta'yn Uito wakuat e Tupana. Sa'a­wy'i yt eweikuap i mesuwat mu'ap uhowawiat e ahepe. Mekewat e'at pe yt naku i yn ewetunug at ka'ap e. Ma'ato eiminug sa'ag sa'a­wy­'iwuat atiwaure torania ewetat ra'yn Uha'yru suu eipohag wo hawyi e Tupana mesup ahepe. Tupana ti hãpyk kahato rakat yt toiky­'esat hin i aiminug sa'ag. Ma'ato koran to'e wuat'i miit'in me — Eiwe'eg wo o eiminug sa'ag ete e. Uha'yru suu ti eikoho kuap e. Uha'yru suu ti eimo­hãpyk kuap e. Eweimohey ro mi'i Uha'yru e. Mi'i Miit ti eimo­hãpyk kuap e. Uha'yru mohey haria wo eweikup­te'en hawyi uikuap haria wo eweikup­te'en e. Mi'i hawyi eweikuap uhewaku hap e koran yne miit'in me e Tupana.
ROM 3:27 Pyno koran aito yt uwe i wato'e kuap — Tupana uito waku kahato kat pote atunug yne emiky­'esat ko'i ewy pote waku uheha­kye­ra'at uhewaku hap upi hat yt pywo pe i ahehay mio tã wato'e pote. Pyno kat e hap som waku pyno wato'e Tupana pe. Pyno mio tã e yn wato'e waku — Tupana atimohey kahato Esa'yru Iesui iku'uro uika­wiano uiminug sa'ag moma hamo uheha­kye­ra'at hamo wato'e waku. Mi'i e hap ewy Tupana yn miky­'esat ewywuat.
ROM 3:28 Kat pote Tupana tiky­'esat kahato ainug kahu Tosa­'yru mohey hap kaipywiat hap wuat'i aimo­hãpyk hap ma'ato — Uito ti atunug yne torania Tupana piat uinãpin hap pote waku pe Tupana wywo areĩne'en wato'e aiwa­nẽtup hawe pote aiwe­ma'at hap topy­hu'at kat pote aiminug wakuap ko'i yt put'ok'e hin i aheha­kye­ra'at hamo e. Mi'i mu'ap yt mu'ap i Tupana kape sio aito Iuteu ywania sio wẽtup ywania.
ROM 3:29 Pywo ti rat Tupana sese toĩne'en Iuteu ywania eTupana wo i'ewyte Tupana sese toĩne'en wy yne ywania eTupana wo. Tupana yt i'atu i are. Wẽtup Tupana yn ni toĩne'en are. Tupana sese yn toĩne'en wuat'i ywania nug hat. Karãpe Iuteu ywania timohey Tupana Sa'yru hawyi — Waku pe eweikup­te'en mesup uiwa­nẽtup hawe e Tupana ahepe.
ROM 3:30 I'ewyte karãpe irania'in ywania timohey Ha'yru hawyi pyno — Waku pe eweikup­te'en e Tupana. Pyno wẽtup Tupana yn toĩne'en Ai'ywot no sio aito Iuteu ywania kawiat sio aito irania'in ywania kawiat. Tupana Wato wẽtup yn toĩne'en. Mi'i ti Iuteu ywania nug hat i'ewyte irania'in ywania nug hat wẽtup Tupana wuat'i nug hat yn toĩne'en.
ROM 3:31 Karãpe wato­mohey Iesui hawyi yt naku i wato'e — Mesup ti uito Iesui mohey hat mi'i pote yt atiky­'esat i po'og Tupana piat uinãpin hap ko'i yt naku i wato'e. Po'og waku wato'e aiwo­'ope — Iesui mohey haria aito pote waku watunug yne yne Tupana miky­'esat ko'i ai'e hap waku wato'e aiwo­'ope are. Uito Pauru.
ROM 4:1 Pyno to'iro watu­wa­nẽtup sa'a­wy­'iwuat aha'a­se'i Aparãu kape. Aparãu ni uru'y­wania Iuteuria e'ase'i pot. Urue'a­se'i pot timohey kahato Tupana sese topy'a pe hawyi — Uiwy kahato en Aparãu e Tupana tope e miwan me.
ROM 4:2 Yt karãpe i Aparãu to'e — Ta'i waku kahato rakat uito pote Tupana uheha­kye­ra'at yt e hin i miit'in me. Ta'i yt tuwe­mõ­typot hin i Aparãu e. Ma'ato mio tã to'e sa'a­wy'i miwan me — Aparãu e uimohey pote waku pe ereĩne'en uiwa­nẽtup hawe e Tupana tope.
ROM 4:3 Pyno Aparãu timohey kahato Tupana hawyi Tupana mimo­hãpyk wo topy­hu'at aha'a­se'i.
ROM 4:4 Mesu­wa­ro­tiaria miit'in ipotpap takaria aheropat haria pe watum ha'up wẽtup e'at ipotpap hap watum. Wẽtup e'at ipotpap sa'up watum hawyi totat hawyi — Waku e uipotpap sa'up ta'yn toĩne'en e. Totat hawyi yt karãpe i to'e — Yt kat i uipotpap pytkai tutum ne'en ne'i uhepe tomiium yt kat sa'up i yt e i kat pote ipotpap at hap upi totat sa'up pote.
ROM 4:5 Ma'ato yt mi'i tã hin i Tupana piat aheha­kye­ra'at hap kat pote yt wati­kyi'at kuap i aipotpap wakuap mo Tupana piat aheha­kye­ra'at hap katu­pono ahewaku hap aipotpap at ka'ap hap sa'up yt put'ok'e i ikyi'at hamo e. Wati­mohey Iesui hawyi yn tutum ne'en ne'i ahepe yt naku i rakaria aito pytkai e. Tosa­'yru mohey haria pe Tupana to'e — Eiminug sa'ag ahyt kahato ma'ato eweimohey Uha'yru suu eipohag wo pote woro­ho­'oe­ha­kye­ra'at eipe Uha'yru piat ha'up nug hap upi e ahepe. Imohey pote uiwa­nẽtup hawe yt sa'ag nug haria ewy hin i eweikup­te'en e. Mio hãpyk kahato eipe uiwa­nẽtup hawe Uha'yru miium upi e Tupana ahepe Iesui mohey haria pe.
ROM 4:6 Morekuat Tawi henoi tomiwan me yianmete Aheha­kye­ra'at hat ete. Mio tã e — Waku kahato ti Tupana e katu­pono Uheha­kye­ra'at kahato hat atimohey hawyi e yt naku i nug hat uito pytkai — Waure wo areĩne'en eminug sa'ag kai e uhepe e Tawi. — Uimohey hat en hawyi waku puo ereĩne'en uiwa­nẽtup hawe e uhepe yt kat i uiminug wakuap pytkai. — Woroe­ha­kye­ra'at en Tawi uimohey hap upi e Tupana sa'a­wy'i uhepe e.
ROM 4:7 — Waku kahato En Tupana are. Mesup ti waure wo Tupana toĩne'en aiminug sa'ag ko'i kai e ahepe. Waku kahato wuat sakpo'e En Tupana wato'e. Waku sese En wato'e. Tupana ti'a­tu­mo­weityk yne wuat'i ai'e hap sa'ag ko'i kat ai'e kat ai'e tetiat hap toiwuare torania wato­mohey hawyi e. — Aimo­wehum kahato hat En Tupana e tomiwan me towepy puo.
ROM 4:8 — Tupana etikuap kahato yne uruminug sa'ag ko'i i'atu hap etiat. Tukup­te'en kahato yne yt naku i hap uruete e. Ma'ato mi'i sa'ag ko'i yne eti'a­tu­mõto ra'yn pya urukai uruimohey En hawyi e morekuat Tawi. Tupana waku kahato mesup urupy'a pe e katu­pono koitywy aiwo­'o­wese hap toĩne'en i etiwaure yne ra'yn uruminug sa'ag ko'i hawyi e. Waku kahato ti rat koitywy. Uruwehum kahato ewawi uruwepit hap mywo urupy'a perup i kahato hawuo e morekuat Tawi tomiwan me towepy hawe nimo te.
ROM 4:9 Pyno morekuat Tawi ihay aiwepit hap ete. Morekuat Tawi yt to'e hin i — Wemusin sokpe ãpy tek haria yn ni Tupana mimo­wepit rakaria tukup­te'en yt e i are. Pywo ti koitywy i'atu kahato Tupana mowepit haria tomohey haria yt te'e­re­musin ãpy tek hin pytkai i. Pywo ti koitywy i'atu kahato Tupana mowepit haria imohey haria yt te'e­re­musin sokpe ãpy tek hin i pytkai. Aikotã aha'a­se'i pot Aparãu to'e hap ewy mesup — Woro­mohey En Tupana e. Ati'a­tu­mohey kahato ra'yn yne e'e hap uhowawiat e. Ati'a­tu­mohey etunug aru e'e hap ewy hap e hawyi Tupana to'e Aparãu me — Uimohey en mote waku pe ereĩne'en uiwa­nẽtup hawe uipy'a pe mehĩ e ti Tupana aha'a­se'i koro Aparãu me.
ROM 4:10 Sa'a­wy'i sese yt kat i aha'a­se'i pot emusin ãpy sokpe tek hap i te turan Tupana to'e Aparãu me — Uimohey hat en mote uiwy kahato en e. Uimohey kahato en mote waku pe aru ereĩne'en e tope. Uiwa­nẽtup hawe hãpyk takano ereĩne'en uimohey en mote e mekewat uru'y­wa­nia'in miat hemusin ãpy sokpe tek hap e'yianmete.
ROM 4:11 Aha'a­se'i Aparãu toĩne'en Tupana mohey pot'i wo ra'yn hawyi tuwe­musin ãpy sokpe tek ta'yn i'ewyte tosa­'y­ru'in wat toitek kyse hit wo to'y­wania kuap hap uru'y­wania eko ewywuat uruto Tupana mohey haria e hamo toitek. Koitywy aha'a­se'i Aparãu toĩne'en yne Tupana mohey haria ypy ewywuat. Toimohey sa'a­wy'i ahe'yianme pote Aparãu topy­hu'at mesup Tupana sese mohey haria e'ase'i pot no ra'yn. Koitywy ahepe imohey haria pe aikotã sa'a­wy'i Aparãu me to'e hap ewy ra'yn — Uiwa­nẽtup hawe hãpyk takaria eipe e Tupana ahepe sio aito aimusin sokpe ãpy tek sio yt pytkai e ahepe Tupana mesup.
ROM 4:12 Uru'y­wania e'ase'i pot ti Aparãu topy­hu'at. Uruto ti meimuẽwat wemusin sokpe ãpy tek haria urueko ewywuat. Uruto ti Aparãu piit kawiaria. Ma'ato tukup­te'en urupy­'a­setpe yt Tupana mohey hin i haria. Mi'iria wemusin sokpe tek hap toĩne'en wen ma'ato mi'iria pe yt karãpe i Tupana to'e — Eipe waku kahato uimohey hat Aparãu ewywuat yt e i katu­pono mi'iria yt imohey i Aparãu ewywuat pote are. Aha'a­se'i Aparãu mimohey ewywuaria yn ni Aparãu saipe­piaria sese.
ROM 4:13 Sa'a­wy'i Tupana to'e Aparãu me — Meiũran aru atum yne mesu­wa­rotiat epe i'ewyte esa'y­ru'in me i'ewyte wuat'i ywania emiit no i'atu kahato waikiru sem i'atu hap ok tã atum epe Aparãu uimohey hat kahato en mote e. Mi'i hawyi Aparãu to'e — Tupana woro­mohey En e. Atimohey e'e hap ewy i'ewyte atimohey ra'yn etunug aru e'e hap ko'i e. Mi'i pote Tupana to'e tope — Aikotã yt karãpiat i i'aparap hat ewy ereĩne'en uiwa­nẽtup hawe mehĩ ui'e hap etimohey yn mote e Tupana nimo yt kat i te Musei piat ahewãi hap Tupana tum te turan Aparãu me yt kat i te Musei wo'o­nãpin hap te turan. Katu­pono Musei ti Aparãu emiariru emiariru kahato.
ROM 4:14 Ma'ato irania'in mesu­wa­ro­tiaria — Watunug yne Tupana wãi'e hap hawyi waku pe ra'yn watoĩ­ne'en Tupana wanẽtup hawe e haria heso rakaria tukup­te'en Tupana wanẽtup hawe. Pywo ti rat yt kat i Tupana mohey hap aikai pytkai watunug aha'a­se'i Musei mimo­herep Tupana e hap hawyi yt naku i te rat watoĩ­ne'en Tupana wanẽtup hawe. Kat pote yt uwe i aito Musei miwan miat nug yne haria. Yt karãpe i Tupana to'e — Ewetunug yne waĩ'ui'e Musei piat pote waku pe eweipy­hu'at uiwa­nẽtup hawe yt e i. Ma'ato mio tã e Tupana pote yt uwe i aito waku pe wato­py­hu'at Tupana wanẽtup hawe yt uwe i aito toran Tupana e hap nug haria pote. — Waku pe ereĩne'en uimohey hat en mote e Tupana. Yt karãpe i ma'ato Tupana to'e i Aparãu me — Etunug yne ui'e hap ko'i mi'i pote ti aru waku pe ereĩne'en uiwa­nẽtup hawe yt e hin i. I'ewyte mio tã yt e hin i ahepe. Ma'ato Tupana to'e irania'in e hap ewy pote — Etunug yne Musei wãi'e hap pote ne'i ti aru uiwa­nẽtup hawe waku pe ereĩne'en e pote yt uwe i aitoria waku pe watoĩ­ne'en Tupana wanẽtup hawe katu­pono aitoria i'aparap yne haria katu­pono yne aito wati­'a­parap i'e hap ete. Ma'ato mi'i pytkai yne aito Tupana mipoi­tyro ko'i watoĩ­ne'en katu­pono wato­mohey Tupana Aparãu ewywuat aito pote.
ROM 4:15 Ma'ato wato'e irania'in ewywuat — Watunug yne Tupana piat ainãpin hap hawyi waku pe watu­kup­te'en Tupana wanẽtup hawe Musei wo'o­nãpin hap nug yne pote. Eiwe'eg wo o Katu­pono mi'i e hap ko'i ete ewei'a­parap yn wẽtup e hap ete hawyi Tupana ipy'ahak eiminug sa'ag ete. Nimo te Musei e'at e'yianme ti yt kat i hin i Tupana piat — Yt etunug nei'o e hap sio — Etunug no e hap ko'i hap e'at pe yt uwe i i'aparap kuap Tupana piat ainãpin hap ete. Yt kat i Tupana piat ai'a­piheg hap mekewat e'at pe. Mekewat e'at yt wati­'a­parap kuap i wãi'e hap ete yt kat i pote. Ma'ato toimo­herep hawyi ti i'aparap haria wo wato­py­hu'at yt watunug i hawyi.
ROM 4:16 Ma'ato Tupana to'e Aparãu me — Uiwy e uimohey pote waku pe kahato ereĩne'en uiwa­nẽtup hawe e. Mi'i hap ewy te koitywy to'e ahepe — Eweimohey Uha'yru hawyi atum eheĩne'en wuat'i e'at piat hamuat e. Yt kat sa'up i ete atum ne'en ne'i Uha'yru mohey haria pe e. Uha'yru tum na'yn tosuu ha'up mo e Tupana ahepe mesup. Watat Ha'yru aipy'a pe hawyi wato­py­hu'at aha'a­se'i pot piat imohey hap ewywuaria. Mi'i pote yt to'e hin i ahepe Tupana — Ewetunug yne wãi'ui'e hap hawyi waku pe eweikup­te'en uiwa­nẽtup hawe yt to'e i ahepe ma'ato aikotã to'e Aparãu me mi'i hap ewy te to'e ahepe mesup — Uimohey haria pote woro­ho­'oe­ha­kye­ra'at e ahepe mesup.
ROM 4:17 Mio tã e Tupana Aparãu me miwan me nimo te — Woronug aru wuat'i ywania ywot pot no e. Wuat'i ywania e'ase'i koro wo ereĩne'en aru ui'e hap ewy e. Atunug waku yne esaipe­piaria uimohey haria e'ewy e Tupana Aparãu me nimo te. Mi'i hawyi toiwesat — Woro­mohey En pãi e. Atimohey yne e'e hap — Atunug aru e'e hap atimohey e Aparãu Tupana pe. Atimohey kahato uiku­'uro rokirẽ uimoieĩ­ne'en kuap hat En hap e Aparãu. Atimohey kahato etunug kuap yne yne yt kat kawiat i hap atimohey e.
ROM 4:18 Mi'i pote Tupana to'e Aparãu me — Ta'i emẽpyt'in sem ni aru atum kahato epe e. Esa'y­ru'in sem esaki­'yt'in sem ni aru atum epe e. I'atu kahato atum epe aikotã waikiru sem i'atu hap ewy aikotã yi kyt i'atu hap ewywuaria atum epe e. — Pyno woro­mohey po'og En e Aparãu Tupana pe. Ta'i atimohey — Atunug aru emẽpyt'in i'atu e'e hap ewywuat atimohey e Aparãu Tupana pe. Ipot'i ra'yn yt wẽtup imẽpyt i ra'yn turan mi'i tã e hap toimohey. Toimohey pote mesup ta'yn imẽpyt'in ko'i typy'i rakaria tukup­te'en kahato. Koitywy i'atu ywania Tupana mohey haria ywot pot topy­hu'at Tupana e hap ewy.
ROM 4:19 Sa'a­wy'i Aparãu iporo kahato hap wywo yt tosa­'yru i te pytkai toimohey te Tupana piat — Atunug aru e hap. Mi'i hawyi to'e — Uiporo sakpo pytkai tutunug aru to'e hap ewy e. Ta'i uipiit porap iku'uro pytkai tutunug aru to'e hap ewy e. Ta'i uheha­ry'i i'ewyte yt myhu'at hat i ra'yn pytkai aru tutum kuap tope hupi'a hap atimohey e. Tutum aru uha'yru sese uipiit poro kawiat pytkai e Aparãu tepiat imohey hap pote.
ROM 4:20 Imohey hap yt karamuo i tuwa­nẽtup hawe — Heso som Tupana yt e i ma'ato — Tupana to'e atunug aru pote tutum aru to'e hap ewy yn e topy'a pe. Mi'i hawyi po'og imohey hap ihaĩte tuete sa'a­wy'i kai hawyi meiũran tomohey hap kaipyi Tupana timoe­saika kahato. Mi'i hawyi Aparãu to'e — Tupana arehum kahato ewawi e. Woro­mõ­typot kahato katu­pono etum na'yn uhepe e'e hap ewy e.
ROM 4:21 Atikuap epiat hum hamuat uipy'a pe e. Atikuap etunug kuap yne niatpo rakat ko'i e. Atikuap epiat — Atunug yne aru e'e hap etunug yne hap e.
ROM 4:22 Mi'i pote Tupana iwepit kahato tomohey Aparãu piat hap ete. Mi'i hawyi Tupana to'e tope — Uiwy sese waku pe kahato ereĩne'en uipy'a pe uimohey kahato hat en mote e.
ROM 4:23 Ihãpyk kahato rakat ereĩne'en uhepe e Aparãu me. Ma'ato yt Aparãu me yn i mio tã e ma'ato yne tomohey haria pe ahepe — Yt kat i sa'ag atipuẽti ekai e tope i'ewyte ahepe tomohey haria pe.
ROM 4:24 Pyno waku nug hat ereĩne'en uipy'a pe e Tupana tope uimohey pote e miwan me. — Uimi­ky'e en e Aparãu me aimu'e hamo tomohey haria aito pote Tupana miky'e ko'i aito e hamo. Ta'i Tupana mimo­hãpyk ko'i aito e hamo mi'i e hamuat toĩne'en iwan me. Koitywy wato­mohey kahato Iesui Tupana timo­hymut i gu'uro pyi hap wato­mohey kahato. Wati­mohey kahato Tupana tum na'yn Tosa­'yru Aipo­typot Koro wuanuat e hap wato­mohey. Ta'i to'e hap ewywuat wato­mohey.
ROM 4:25 Ta'i wato­mohey kahato Tupana ti'a­piheg Tosa­'yru Iesui aiminug sa'ag upiano e hap wato­mohey. Wati­mohey Tupana timoieĩ­ne'en na'yn Tosa­'yru hap to'e hap ewy. Mi'i pote wato­mohey kahato wy Tupana aimoieĩ­ne'en i hamuat waku hap ete to'e hap ewy wato­mohey. Koitywy wato­mohey kahato Tupana ainug tomohey hap kaipywiat wakuaria wo aikotã Tupana — Atunug aru e hap ewy wato­mohey. Aparãu ewywuaria watoĩ­ne'en imohey hap saipe­piaria aito. Aparãu mẽpyt'in ko'i aito. Mi'i hap e'at pe Tupana to'e Aparãu me i'ewyte ahepe — Waku pe ereĩne'en uhepe uimohey hat en mote e ahepe. Uito Pauru.
ROM 5:1 Wati­mohey Iesui hawyi — Waku kahato eipe e Tupana ahepe. Mio tã e ahepe hawyi aiwepit kahato katu­pono aiwo­'o­wese hap kahato topy­hu'at Tupana wywo. Wati­mohey Ha'yru hawyi Aipo­rekuat no topy­hu'at hawyi watikuap kahato Tupana aiwywo hap e. Mi'i hawyi meremo wato'e tope — Egyi'at kahato Tupana katu­pono yt uruewaku i kahato ewawi sa'a­wy'i pytkai ewaku kahato uruepe uruto'e mesup epe. Yt nakuaria i uruto pytkai uruky'e uruto'e. Yt kat i wakuap uruminug pytkai uruky'e kahato En katu­pono ha'a­wy­tepyi uruky'e uruto'e. Ewanĩ­kaptia uruto te turan uruky'e kahato wato'e.
ROM 5:2 Mi'i pote — Woro­ho­'o­moieĩ­ne'en kahato eipe mesuwat yi tote e Tupana mesup ahepe. Mi'i pote — Uruimõ­typot kahato En Tupana uruto'e i'ewyte urumi­mõ­typot En uruto'e. Meiũran aru urutu­kup­te'en ewywo emõtypot hap e'at pe hap uruimohey kahato mi'i tã hamuat kape. Mi'i pote waku kahato En uruto'e emowepit hap mywo.
ROM 5:3 Mi'i pote put'ok'e ahatek hap hawyi watu­wehum yn ne Tupana kape. — Ereĩne'en waku kahato Tupana put'ok'e uruete niatpo hap pytkai. Mio tã ai'e pote watoĩ­ne'en mot'i i imohey sese haria wo. Karãpe watu­wehum mot'i Tupana ete ahatek hap e'at pe mi'i hawyi waku pe imohey hap katu­pono waha­ty'u kuap haria wo wato­py­hu'at. Mi'i hawyi wahepap imohey mot'i hap ete. Ahatek turan yt wati­waure hin i ra'yn Tupana mohey hap yt naku i ahete pytkai.
ROM 5:4 Karãpeĩ watu­wehum mot'i Tupana kape ho'opot hap put'ok'e pytkai mi'i pote Tupana i'ewyte tuwehum ahowawi are. Karãpe Tupana to'e ahepe — Atunug aru ui'e hap ewywuat mi'i hawyi — Pywo ti rat wato'e hawyi po'og po'og wato­mohey.
ROM 5:5 Karãpe wato'e — Pywo ti aru ta'i tutunug ni aru to'e hap ewy wato'e mi'i hawyi Ipã'ãu Wakuat topy­hu'at kahato ahepe tutum ahepe Topã'ãu. Mi'i hawyi aipy'a wepit kahato topy­hu'at katu­pono Ipã'ãu — Woro­ky'e en woro­ky'e en e hap yn topy­hu'at. Mi'i hawyi ahatek hap ne'i yt aimo­'arot kuap i ra'yn katu­pono wato­mohey te ahatek pytkai.
ROM 5:6 Sa'a­wy'i sese mekewat e'at wuat Tupana to'e — Atipo­'oro aru En Uha'yru miit'in Porekuat nuat e. Uha'yru e koitywy mesuwat e'at ati'airo eto hamuat yi kape katu­pono ho'o­wasat kahato miit'in tukup­te'en itote pote i'atu­minug sa'ag e'at yn mote e Tupana tosa­'yru pe. Mio tã e pote Aipo­typot Iesui toto. Mi'i hawyi aiminug sa'ag kaipywiat ai'a­piheg hap tutu'u yne aheiam mo.
ROM 5:7 Uiwy­ria'in niatpo kahato wẽtup ok ehakye­ra'at hamo aiku­'uro hamuat hap. — Waku rakat sese upi pote pyno ahã'ãg uiwy sese ehakye­ra'at y'y wato pyi wato'e ma'ato yt watipun teran hin i aheĩne'en hap wẽtup ok aiwa­nĩkap ehakye­ra'at hamo. Aiwy sese waku rakat pote sio wahã'ãg neran.
ROM 5:8 Ma'ato yt naku i nug haria ehakye­ra'at hamo ne'i Iesui iku'uro. Tewa­nĩ­kaptia etiano iku'uro hawyi watikuap ta'yn Tupana aiky'e kahato hap. Tupana tomo­herep ta'yn aiky'e hap Tosa­'yru ku'uro hap kaipyi.
ROM 5:9 Iesui suu aikoho hawyi toihep yne aiminug sa'ag. — Eipe wakuaria e Tupana Tosa­'yru suu wuat tomi­koho ko'i pe. Mi'i pote koitywy yt wato­ken'ẽ hin i ai'a­piheg hamuat Tupana hap ete. Mi'i hawyi Tupana yt ipy'ahak i ahete Tosa­'yru suu tomi­koho ko'i aito pote.
ROM 5:10 Sa'a­wy'i watunug Tupana ahewa­nĩkap mo ma'ato mi'i pytkai ainug towy­ria'in wo kahato katu­pono Ha'yru toku­'uro hamo ai'a­tu­pehik To'ywot kape — Koitywy yt ahewa­nĩkap mo i topy­hu'at ma'ato aiwy ok wo ra'yn. Koitywy Tupana wy kahato uito wato'e. Koitywy Tupana toĩne'en uipiit pe. Mi'i kaipyi watikuap ta'yn pywo ti aru areĩne'en wuat'i e'at pe ai'e hap katu­pono Iesui tuwẽtem gu'uro pyi hawyi uimi­moieĩ­ne'en hap topy­hu'at wato'e.
ROM 5:11 Mi'i pote — Watu­wehum kahato ewawi Tupana wato'e. Uruka­'iwat Iesui urunug na'yn ewy ok wo. Waku kahato uruipuẽti En wato'e katu­pono uruwy ok nug na'yn En wato'e.
ROM 5:12 Nimo te Ãtãu yt tunug i Tupana miky­'esat ewy mi'i hawyi wato­py­hu'at aha'a­se'i Ãtãu ewywuat katu­pono Ãtãu ewywuat watunug yt Tupana miky­'esat ewywuat i. Nimo te Tupana to'e Ãtãu me — Meke tã etunug sa'ag hawyi ti aru eku'uro hap topy­hu'at e Tupana Ãtãu me i'ewyte yne Ãtãu mẽpyt'in me. Mi'i hawyi yne aito Ãtãu ewywuat sa'ag nug haria wato­py­hu'at. Yne ywania ra'yn mi'i tã inug. Mi'i tupono yne miit'in iku'uro rakaria wo tukup­te'en. Watopap yne Tupana e hap ewy.
ROM 5:13 Ãtãu mẽpyt'in tukup­te'en mesuwat yi tote mot'i. Ta'a­tunug sa'ag kahato ma'ato yt ta'a­tukuap i ta'a­tu­minug sa'ag yt kat i te wãi'e hap Tupana kaipywiat pote ma'ato Musei tut ra'yn hawyi tohenoi ra'yn kat som Tupana tiky­'esat watunug kat som yt hap tohenoi ra'yn.
ROM 5:14 Wẽtup wãi'e hap yn Tupana tum Ãtãu me — Yt etu'u tei'o meiẽwat yp ywa e ma'ato mi'i pytkai tutu'u. Mi'i hawyi meiũran iku'uro Tupana e hap ewy ma'ato Ãtãu mẽpyt'in ko'i kai yt kat i Tupana wãi'e hap Ãtãu e'at kaipyi Musei e'at kape. Yt kat i Tupana wãi'e hap ma'ato mi'i pytkai Ãtãu'in sa'ag nug haria kahato tukup­te'en. Mi'i tã hap ta'yn watikuap katu­pono sa'a­wy­'i­wuaria Ãtãu'in iku'uro yne ra'yn sa'ag nug haria pote Tupana e hap ewy. Mi'i hawyi Tupana to'e — Pyno atipo­'oro Wẽtup Ok Ãtãu ewywuat ma'ato Mi'i Miit yt i'aparap hat i e.
ROM 5:15 Pyno Ãtãu wywo Iesui to'o­'ewy ma'ato yt to'o­'ewy hin i katu­pono yt i'aparap hat i. Mi'i hawyi mekewat sa'a­wy­'iwuat Ãtãu kaipyi wati­puẽti aiku­'uro hap katu­pono i'ewy wato­py­hu'at yt naku i nug haria wo. Aikotã Ãtãu iku'uro tominug sa'ag kaipyi hap ewy te aito. Ma'ato mekewat Wẽtup Ok Miit Tupana Sa'yru yt i'aparap hat hin i. Mi'i pote Ãtãu miium aiku­'uro hap ma'ato Mekewat Miit Tupana Mipo­'oro Aipo­rekuat nuat miium aheĩne'en wuat'i e'at piat ieĩne'en hap. Iku'uro hawyi Tupana wese hap topy­hu'at ahete ihaky­'e'i kahato aiky'e haype. Mi'i pote Tupana piat aiky'e hap po'og na'yn hewa­nĩ­kaptia aito pytkai. Mi'i pote toipo­'oro Ãtãu Ewywuat Wẽtup Ok Takat aheha­kye­ra'at hamo. Mi'i pote wẽtup ok miit Ãtãu kaipyi aiku­'uro hap i'ewyte Wẽtup Ok Miit Iesui kaipyi aheĩne'en hap.
ROM 5:16 Pyno ti Ãtãu minug Iesui minug wywo yt to'o­'ewy hin i katu­pono Ãtãu kaipyi yt nakuap i ypy. Ma'ato Iesui kaipyi Tupana miium aheĩne'en wuat'i e'at piat hap ypy. Ãtãu minug wẽtup muat kaipyi — Yt naku i en e Tupana ma'ato Iesui aheha­kye­ra'at hawyi aiminug sa'ag toimo­weityk yne hawyi — Waku kahato eiperia e Tupana ahepe Iesui mohey haria pe aiminug sa'ag i'atu kahato sa'a­wy'i pytkai. — Eheĩne'en waku hap yt eiwat ehewaku hap upi i woro­ho­'onug ma'ato Uha'yru ewaku hap upi waku pe eweikup­te'en e Tupana ahepe.
ROM 5:17 Ãtãu kaipyi aiku­'uro hap ma'ato Ha'yru kaipyi aheĩne'en hap. Yianmiat Ãtãu yt naku i nug hat hawyi mi'i kaipyi iku'uro. Mi'i hawyi aito wato­py­hu'at Ãtãu mẽpyt'in ko'i ai'ywot Ãtãu ewywuaria wato­py­hu'at yt naku i nug haria. Mi'i hawyi ho'o­wasat kahato rakaria wo wato­py­hu'at yt nakuaria i saipe­piaria aito pote. Kat pote wẽtup ok miit kaipyi aiku­'uro hap ypy topy­hu'at aiminug sa'ag iwato hap kaipyi Tupana to'e — Woro­ho­'o­'a­piheg e ma'ato mi'i hawyi Wẽtup Ok Miit put'ok'e mesuwe po'og Ãtãu kawiat Mi'i Miit wakuap nug hap ypy. Mi'i Miit po'og hesaika iminug wakuap Ãtãu minug yt nakuap i hap ko'i kai. Mi'i Miit ti Aipo­typot Iesui are. — Ereke ro wato'e Iesui pe hawyi Tupana tum aheĩne'en wuat'i e'at piat hap ahepe. Hegyi'at kahato ahepe topy­hu'at — Waku kahato eipe e tosa­'yru mohey haria pe. Woro­ho­'onug eipe more­kuaria ewywuat Uha'yru ewywuat Uimi­po­'oro Eipo­rekuat nuat mohey haria eipe pote e.
ROM 5:18 Pyno Ãtãu i'aparap hap kaipyi wato­py­hu'at aitoria yne i'aparap haria wo ra'yn katu­pono watunug Ãtãu ewywuat ma'ato Iesui minug wakuap kaipyi Tupana to'e ahepe — Yt kat i sa'ag eikai e. Yt woro­ho­'o­'a­piheg hin i e ma'ato atum ne'en ne'i ti wuat'i e'at piat eheĩne'en hap e.
ROM 5:19 Sa'a­wy'i sese ti aha'a­se'i pot Ãtãu yt topy­hu'at hin i Tupana ehay upi. Tuwepyi toi'a­parap. Mi'i hawyi imẽpyt'in hemia­ri­ru'in typy'i kahato i'ewywuat haria tukup­te'en i'atu­sai­pe­piaria pote ta'a­tu­'ywot ewy. Mi'i turan put'ok'e Wẽtup Ok Miit inug yne Tupana miky­'esat ok tã nakat. Mi'i Miit Ãtãu ewywuat ma'ato Tupana miky­'esat ewywuat nug hat. Mi'i pote koitywy Tupana to'e kuap Tosa­'yru mohey haria pe — Eipe waku kahato uipy'a pe e.
ROM 5:20 Mi'i hawyi nimuaria Tupana ehay moherep haria timo­herep kahato kat som Tupana tiky­'esat kat som yt hap. Mi'i hawyi po'og sa'ag nug haria wo te te'e­ro­py­hu'at sa'a­wy­'i­tewuat kai katu­pono i'atu kahato Tupana wãi'e hap put'ok'e hawyi i'aparap kahato hap topy­hu'at. Katu­pono yt watunug i pote mi'i kaipyi hot'ok'e ra'yn ahete yt nakuap i kahato aito hap. Mi'i pytkai aiky'e teran katu­pono Tupana aiky'e hap po'og hesaika aiminug sa'ag kai.
ROM 5:21 Mi'i hawyi yt naku i nug hap upi yn wato­py­hu'at. Yt watoiat kuap i aiminug sa'ag i'ewyte yt watoiat teran i. — Mi'i tã etunug mote eku'uro hap topy­hu'at e Tupana pytkai watunug te'en te'en ne'i pote. Mi'i hawyi aiminug sa'ag kaipyi ai'auka hap topy­hu'at. Ma'ato ai'a­piheg hap e'yianmete put'ok'e Aipo­typot Iesui mesuwe ai'a­piheg hap tutu'u yne toku­'uro hamo. Mi'i pote aimoieĩ­ne'en wuat'i e'at pe. Yt nakuaria i kahato aito pytkai Tupana aiky'e. Koitywy aiky'e pote wato­py­hu'at hemiit'in no imiky­'esat ewy watunug neran mesuwe. Imipo­'oro Iesui aimo­hãpyk hawyi yt Ãtãu wat i aito ma'ato Iesui wat watoĩ­ne'en wuat'i e'at pe. Pywo ti rat atiwan ewowi. Uito Pauru.
ROM 6:1 Yt naku i irania'in aimu'e — Pyno waku watunug sa'ag katu­pono Tupana aiky'e hap po'og iwato aiminug sa'ag hap kai i'atu'e sa'ag. Waku wahã'ãg sa'ag nug hap ete pote Tupana aiky'e po'og po'og i'atu'e.
ROM 6:2 Ma'ato sakpo'e yt pywo i pãi katu­pono aito Iesui mohey haria ra'yn. Mi'i pote ahã'ãg hap put'ok'e ahete sa'a­wy­'i­tewuat ewy pote waku yt watuwat i ahiag upi yt naku i nug hamo. Waku aikotã iku'uro rakat sehay yt kuap i hap ewy waku yt watikuap i ahã'ãg hap ete yt ahewaure ka'a i iku'uro rakat ewy. Mi'i pote yt watuwat kuap i aiminug sa'ag ahã'ãg hap nug hamuat upi.
ROM 6:3 Ahet'ok turan Iesui set topy­hu'at ahete. Mi'i hawyi Iesui set wywo wato­py­hu'at pote — Iesui mohey haria meimuẽ i'atu'e ahepe. Mi'i hawyi wẽtup miit ewy yn wato­py­hu'at Aipo­typot Iesui wywo. Mekewat minwa­to'e y'y pe ahet'ok turan hap tote wati­mo­herep Iesui syp hap iku'uro rakat ewy wato­py­hu'at iwywo.
ROM 6:4 Ahet'ok turan wati­mo­herep aisyp hap ewywuat Iesui wywo aikotã Iesui iku'uro hap ewy i'ewyte — Areĩne'en i ne e hap ewy wati­mo­herep aihep y'y pyi hawyi ahet'ok turan irania'in me. Aikotã Iesui tuwẽtem gu'uro pyi aikotã tesaika wywo Tupana tihep Aika­'iwat gu'uro pyi mi'i hap ewy Ai'ywot atipy piat tunug ahepe wato'e. Mi'i hawyi aheĩne'en pakup'i hap toĩne'en mesu­wa­rote wati­mo­herep aihep y'y pyi hawyi ahet'ok turan wato'e irania'in me. Aikotã Iesui ipakup takat ewy wato­py­hu'at hap ewy.
ROM 6:5 Pyno aito Iesui mohey haria pote wato­py­hu'at Iesui wywo wẽtup miit ewy yn. Ipiit aiwat aipiit ewy aipiit iã'ãkap ewy. Iku'uro turan aiku­'uro hap topy­hu'at hap ewy. Towẽtem gu'uro pyi hap aiwẽtem gu'uro pyi hap topy­hu'at.
ROM 6:6 Yt naku i ky'esat hap iwato kahato ahete. Mi'i hap ete yn ahehapap sa'a­wy­'ite. Ma'ato mi'i hap upi Aika­'iwat Iesui iku'uro aria'yp posak ete hawyi aiwe­pywiat yt naku i nug ky'esat hap topy­hu'at Iesui piit ku'uro hap wywo. Mi'i hawyi Iesui iku'uro hawyi aimi­ky­'esat sa'ag iku'uro iwywo. Koitywy watikuap aiwetiat yt naku i nug hap ky'esat hap tuweityk ta'yn.
ROM 6:7 Aiku­'uro hawyi mekewat aiminug sa'a­wy­'iwuat yt aimo­'a­kag'aia kuap i ra'yn sa'ag nug hap ete. Yt hot'ok'e i ra'yn yt hesaika i ra'yn.
ROM 6:8 Mi'i hap ewy kahato topy­hu'at ahete wato­mohey Iesui Aipo­rekuat nuat hawyi. Wẽtup miit yn wato­py­hu'at Aika­'iwat wywo. Iku'uro pote aimi­ky­'esat sa'ag iku'uro iwywo. Karãpe tuwẽtem gu'uro pyi i'ewyte watu­wẽtem iwywo hap ewy wakuap nug hamo. Koitywy watoĩ­ne'en ipakup takaria wo.
ROM 6:9 Pywo ti koitywy watikuap ta'yn Aika­'iwat tuwẽtem gu'uro pyi hap. Iku'uro hap tokosap ta'yn. Koitywy yt iku'uro kuap i ra'yn. Gu'uro yt ti'auka kuap i ra'yn. Yt hesaika i ra'yn gu'uro tuete.
ROM 6:10 Iku'uro wẽtup muat hawyi toran na'yn iku'uro. Wẽtup muat yn iku'uro miit'in minug sa'ag upi. Iku'uro hawyi sa'ag nug hap yt hã'ãg kuap i ra'yn. Tuwẽtem gu'uro pyi hawyi toĩne'en kahato Tupana mõtypot hap yn tuete.
ROM 6:11 Koitywy Aipo­typot Iesui emiit no watoĩ­ne'en mote wato­py­hu'at Iesui ewy. Waku watu­wa­nẽtup — Iesui ku'uro turan uiku­'uro iwywo waku wato'e. Mi'i pote uiminug sa'ag yne yt uhã'ãg kuap i katu­pono uiku­'uro iwywo wy uipiit miky­'esat sa'ag yt kat i koitywy waku wato'e. Iesui toĩne'en i gu'uro pyi hawyi uito areĩne'en i gu'uro pyi wy waku wato'e. Koitywy areĩne'en kahato iwywo waku wato'e. Tupana mõtypot hap wywo yn areĩne'en mesup wato'e katu­pono Iesui wywo wẽtup miit yn arepy­hu'at waku wato'e.
ROM 6:12 Sa'a­wy'i aipiit miky­'esat sa'ag nakat po pe wato­py­hu'at kahato. Mi'i hawyi aimi­ky­'esat sa'ag nug hap yn aika­'iwat no topy­hu'at. Aiwẽ pyi watunug sa'ag ma'ato mesup waku waĩwa­to'e sa'a­wy­'iwuat aimi­ky­'esat ete. Koitywy wẽtup miit ewywuat areĩne'en Tupana wywo waku wato'e.
ROM 6:13 Koitywy karãpe aipiit tiky­'esat sa'ag nug hap aikotã wati­ky­'esat sa'a­wy'i hap ewy waku watu­wewãi. Waku wãiwa­to'e aipiit miky­'esat sa'ag kape. Waku wãiwa­to'e aiwe­mi­ky­'esat sa'ag ete — Yt erenug nei'o sa'ag nug hano waku wato'e aipiit kape. Mi'i turan waku wato'e Tupana pe — Atum epe uhaga ko'i waku wato'e. Atiky­'esat yne uipiit ewanuat wo emiky­'esat ko'i nug hamo. Atiky­'esat uipiit ko'i ewaku hap nug hamo Tupana waku wato'e. Atiky­'esat uheko ko'i ipakup ta'yn Tupana aikotã miit iku'uro rakat tuwẽtem i gu'uro pyi hap ewy uipiit pakup atiky­'esat epotpap nug hamo Tupana wato'e waku.
ROM 6:14 Sa'a­wy'i watikuap Tupana piat ainãpin hap Musei mienoi kaipyi. Mi'i hawyi — Pyno atunug aru wato'e ma'ato yt watunug kuap i kat pote yt Iesui mieha­kye­ra'at ko'i i te aito pote. Mekewat e'at pe yt watikuap hin i Tupana aiky'e hap. Koitywy Tupana Pã'ãu esaika hap mywo watunug kuap ta'yn ainãpin Tupana piat hap. Pyno koitywy yt naku i wata­'aipok aipiit miky­'esat sa'ag eropat hamuat ipakup i rakaria wo i ra'yn watu­kup­te'en hawyi.
ROM 6:15 Koitywy yt naku i kahato rat pãi wato'e — Pyno koitywy Tupana uiky'e kahato sio waku atunug sio yt naku i wato'e. Waku watu­wewãi ra'yn. Tupana piat ainãpin hap iwan miat aiwanuat waku watunug Tupana esaika hap mywo. Waku watoiat aiminug sa'ag hap ko'i.
ROM 6:16 Waku koitywy watikuap ta'yn uwe po pe watoĩ­ne'en. Aimi­ky­'esat sa'ag aika­'iwat no watunug mote yt naku i nug hap aika­'iwat no topy­hu'at. Ma'ato yt aipohep kuap i aiminug sa'ag ete pote sa'ag aika­'iwat no topy­hu'at. Aiminug sa'ag yt watoiat kuap i hawyi meiũran ai'auka hano topy­hu'at. Ma'ato Tupana esaika hap mywo ainãpin topiat hap watunug pote meiũran aru — Waku kahato eipe e Tupana ahepe wuat'i ehamo.
ROM 6:17 Uiwy­ria'in tawa Humanu ywania sa'a­wy­'ite ra'yn tig ewetunug eimi­ky­'esat sa'ag ko'i yn yt eweimonik kuap i. Mi'i turan put'ok'e itote Tupana ehay hawyi ewei'ok­sat'i kahato Tupana ehay — Pywuat kahato mi'i ehay ewei'e. Koitywy wati­puẽti ra'yn Tupana piat ainãpin hap ewei'e. Mi'i hawyi ewetunug kahato Tupana ehay eipy'a pe. Mi'i pote arehum kahato Tupana kape.
ROM 6:18 Sa'a­wy'i eimi­ky­'esat sa'ag ko'i ei'a­hi­'ypy kytyt kahato aikotã miit mikytyt hap ewy eweipy­hu'at ma'ato mi'i hap ewywuat Tupana ti'a­saity tek ta'yn eiminug sa'ag haity ewywuat. Koitywy mi'i hap kaipyi eweipopy ra'yn wakuap nug hat emiit no ra'yn eweikup­te'en. Koitywy eisaity wakuap nug hamuat ra'yn topy­hu'at. Mi'i pote arehum kahato Tupana ete.
ROM 6:19 Eikytyt hap ete ahenoi hã'ãkap wuo katu­pono po'og yt niatpo i hã'ãkap wuo henoi hap kaipyi. Mi'i iã'ãkap ewy kahato sa'a­wy'i eweipy­hu'at eimi­ky­'esat sa'ag ko'i saity wo eikytyt hap ewy eiwa­nẽtup hap ipitpit rakat saity ewy topy­hu'at. Aikotã aihũ saity ete hap ewy saity ete watu­kup­te'en sa'a­wy'i miit'in ma'at hano kahato. Wakuap watunug typy wanẽtup hap mywo. Sa'a­wy'i miit'in ma'at hamo watunug wakuap. Mi'i saity ewy aikytyt hap ewy koitywy Tupana titek yne ra'yn mekewat saity ko'i ewywuat. Mi'i hawyi wato­popy ra'yn wakuap nug hamo. Koitywy Tupana ahã'ãg wakuap nug hamo ra'yn. Pyno waku watuwat mi'i upi. Waku watuwat ihay upi. Waku Tupana emiit no kahato wato­py­hu'at mesu­wa­rote wakuap nug hamo. Hewaku hap ewy waku watunug Tupana miky­'esat ok tã miit'in powyro hamuat ko'i. — Koitywy uipiit topy­hu'at epotpap wakuap nug hamo ra'yn waku wato'e Tupana pe.
ROM 6:20 Sa'a­wy'i wato­py­hu'at aimi­ky­'esat sa'ag nug haria wo yne. Mi'i ete yn watu­we­moe­hapap. Wakuap nug hap yt ahewãi kuap sa'ag nug hap ete. Yt teke i aiwa­nẽtup hawe hãpyk nug hap.
ROM 6:21 Sa'a­wy­'i­tewuat aiminug sa'ag watunug i ra'yn hawyi aiwe­mõti hap topy­hu'at. Mi'i ko'i he kahato wati­puẽti sa'a­wy'i ma'ato koitywy watikuap ta'yn ai'auka hamo topy­hu'at. Ai'a­piheg wuat'i e'at piat hap. Mi'i pote waku watoiat sese mi'i ko'i sa'a­wy­'iwuat.
ROM 6:22 Sa'a­wy'i aiminug sa'ag emiit no wato­py­hu'at. Mi'i hawyi koitywy wato­py­hu'at Tupana emiit no ra'yn. Koitywy Tupana po pe ra'yn wato­py­hu'at. Waku kahato po'og Tupana po pe wato­py­hu'at katu­pono aheĩne'en mesu­wa­rotiat hap Tupana mõtypot hap yn topy­hu'at. Mi'i hawyi aru toĩne'en aheĩne'en wuat'i e'at piat Tupana mõtypot hap.
ROM 6:23 Aiminug sa'ag kaipyi tut ha'up aiku­'uro hap ai'a­piheg hap wuat'i e'at piat. Tupana wat yt ha'up takat i tutum te'en ne'i wuat'i e'at piat aheĩne'en hamuat ahepe Aipo­typot Iesui mohey haria aito pote. Mesuwat miwan nug hat Pauru.
ROM 7:1 Uiwy­ria'in Iesui mohey haria pywo ti eweikuap urue'a­se'i Musei piat Tupana miium miwan yity'ok totiat kaipyi kat som waku watunug kat som yt naku i watunug hap puretig nu kawiat rotiat pyi. Mi'i miwan ni ainãpin kahato aheĩne'en turan aiminug kahato aikotã waku watunug aikotã yt naku i watunug hap ete. Mi'i hawyi waku watunug i'e hap ewy wato'e aiwo­'ope. Watoĩ­ne'en turan Musei piat Tupana miwan ainãpin hap aimu'e hat akag ewy topy­hu'at. Ma'ato aiku­'uro ra'yn hawyi yt kat i ainãpin puretig nu kawiat hap yt aimu'e hat i katu­pono aiku­'uro ra'yn mote.
ROM 7:2 Pyno ahenoi iã'ãkap ewywuat ehepe mehĩ'in mana'in Humanu ywania. Ehe'aito hawyi eiwary hawyi yt naku i etoiat e'aito ewary e Tupana tomiwan me. Ereĩne'en o iwywo eku'uro hap sio iku'uro hap kape e miwan me. Etoiat ehary'i sio etoiat e'aito pote yt naku i etunug e Tupana mekewat puretig nu kawiat rote. Ma'ato iku'uro hawyi waku wẽtup etat etiky­'esat re pote e miwan me.
ROM 7:3 Ma'ato e'aito toĩne'en ne turan ehary'i toĩne'en ne turan ewaire wẽtup ok wywo pote yt naku i rakano ereĩne'en e Tupana mekewat miwan me. Ma'ato e'aito iku'uro ehary'i iku'uro hawyi waku etat pakup i e'aito wo sio ehary'i wo yt he'aito i yt heha­ry'i i rakat e. Mi'i wywo waku ereĩne'en yt kat i yt naku i ewetunug Tupana wanẽtup hawiat e miwan me.
ROM 7:4 Pyno mi'i hap kaipyi ti ahenoi ehepe iã'ãkap wuo eipe Iesui mohey haria pe. Aito Iesui mohey haria mesup. Sa'a­wy'i watikuap kahato mekewat Musei wo'o­nãpin hap Iuteuria wãi'e hap ko'i. Waku kahato mi'i e hap ainãpin hamuat. — Mi'i e hap watunug yne hawyi aheha­kye­ra'at hap sa'up toĩne'en wato'e sa'a­wy'i aiwo­'ope. Mi'i hawyi watunug neran kahato ma'ato wahã'ãg kahato yne ahesaika hawe pytkai wati­'a­parap aparap mekewat Tupana piat ainãpin hap ete. Mi'i pote Iesui iku'uro aika­wiano aheiam muat. Iwywo i'ewyte aiku­'uro hap ewy toĩne'en. Tupana wãi'e hap waku wen ma'ato aito yt nakuaria i pote yt watunug kuap i. Sa'a­wy'i wahã'ãg kahato yne wãi'e hap nug hamuat. Mekewat wãi'e hap topy­hu'at aikotã ahe'aito aiwary ewy. Ma'ato aiku­'uro Aika­'iwat Iesui upi hawyi yt watoĩ­ne'en po'og i sa'a­wy­'iwuat po piat mekewat ahe'aito aheha­ry'i ewywuat hap. Iesui upi aiku­'uro ma'ato mesup Iesui wywo watu­wẽtem gu'uro pyi iwywo ipakup takaria Tupana mowepit hamuat hap nug hamo watu­wẽtem. Sa'a­wy'i ahe'aito aheha­ry'i wãi'e wãi'e yn ahepe ma'ato koitywy aiku­'uro ra'yn pote ahe'aito aheha­ry'i sa'a­wy­'iwuat Iuteuria eko ko'i yt wãi'e kuap i ahepe aiku­'uro ra'yn hap ewy pote. Mio yt aimu'e kuap i ahe'aito aheha­ry'i ewywuat. Mi'i iã'ãkap ewy wẽtup miit ewy yn na'yn wato­py­hu'at Iesui piit wywo. Iku'uro turan aiku­'uro hap wy topy­hu'at ma'ato Tupana tihep Iesui gu'uro pyi i'ewyte aito watu­wẽtem iwywo hap ewy. Koitywy ahe'aito aheha­ry'i Tupana Pã'ãu topy­hu'at hap ewy. Mi'i pote ahe'aito pakup ehay upi wato­py­hu'at. Koitywy watunug Tupana mowepit hap ko'i. Tupana Pã'ãu ni aimoe­saika imiky­'esat wakuap nug hamuat. Sa'a­wy'i wahã'ãg kahato puretig nu kawiat miwan nug hamuat wen aipiit yt hesaika kahato i inug hamuat. Ma'ato mesup ahe'aito aheha­ry'i pakup ewywuat Tupana Pã'ãu wywo ra'yn wato­py­hu'at wẽtup piit ewy. Mi'i pote ahesaika puretig pakup sehay nug hamuat are sehay iã'ãkap puo.
ROM 7:5 Sa'a­wy'i yt naku i nug haria wo kahato wato­py­hu'at at ka'ap yne minug ete. Aiwe­kaipyi miit ewy watunug sa'ag. Aiwe­mi­ky­'esat sa'ag nakat ewy yn watunug. Sa'ag yt nakuat i aito hap ewy watunug. Sa'a­wy­'iwuat miwan wãi'e ahepe aimu'e pytkai yt watunug i — Yt etunug nei'o mi'i hap e waku mi'i hap etunug e. Mi'i hawyi aiwe­pywiat aiwa­nẽtup hawe — Atunug aru wato'e wen ma'ato mi'i hawyi aipiit miky­'esat e hap upi watuwat mekewat — Hẽto e waku etunug epiit miky­'esat sa'ag hap ok tã e sa'a­wy'i ahiag ahepe. Mi'i hawyi aiwepyi watunug sa'ag Tupana ete. Watikuap pytkai ai'a­piheg hap topy­hu'at aru hap pytkai watunug aiminug sa'ag etiat hap kaipywiat. Aiku­'uro hap kape yn aipotpap sa'ag sa'up watum yne hap ewy.
ROM 7:6 Ma'ato koitywy wẽtup ok miit ewy yn wato­py­hu'at Iesui Pã'ãu wywo. Iku'uro pote aiku­'uro hap ewy topy­hu'at iwywo hap ewy. Mi'i pote ahe'aito sa'a­wy­'iwuat aheha­ry'i sa'a­wy­'iwuat mekewat Iuteuria eko ko'i sem yt ainãpin kuap i po'og iku'uro rakaria wato­py­hu'at pote hap ewy.
ROM 7:7 Ma'ato Tupana piat ainãpin hap Musei mimo­herep wakuap kahato topy­hu'at. Yt naku i wati­mohit Tupana piat ainãpin hap ete. Pywo pe ti Tupana wãi'e hap kaipyi watikuap yt naku i watunug sio sa'ag hap watunug i'e hap ewy pote. Mi'i hawyi watikuap aiminug sa'ag watipik ne'i ainãpin hap hawyi. Uimotag hap turan uito Pauru atiky­'esat kahato uipy'a pe irania'in ekat uiano hawyi atipuẽti ainãpin hap miwan me — Yt etiky­'esat rei'o irania'in ekat eha pe e. Mi'i e hap ete atikuap yt naku i nug hat areĩne'en hap.
ROM 7:8 Ma'ato yt watikuap i Tupana piat ainãpin hap Musei mimo­herep pote yt watikuap i aito i'aparap hat sio wakuap nug hat yt watikuap i. Aikotã sa'a­wy'i uito yt atikuap i mekewat — Yt etiky­'esat rei'o irania'in ekat eha wo e hap ma'ato atikuap hawyi — Pyno yt atunug i aru po'og are uipy'a pe ma'ato yt pytkai i katu­pono atunug po'og po'og ne'i. Irania'in ekat kape yn uheha teha'at. Uiwe­kai­pywiat atunug sa'ag po'og sa'a­wy­'iwuat kai.
ROM 7:9 Sa'a­wy'i uito sio waku kahato areĩne'en are'e mi'i turan put'ok'e Tupana e hap Musei mimo­herep uhete — Yt naku i etunug e. Mi'i hawyi atikuap Tupana wãi'e hap hawyi atunug ne sa'ag katu­pono uipiit miky­'esat sa'ag hap — Etunug no e. Mi'i hawyi yt naku i pe areĩne'en are uiwepe. Yt naku i nug hat uito are.
ROM 7:10 Ui'a­piheg aru uiminug sa'ag upi are. Uiku­'uro aru yn are'e uiwepe. Yt atikuap i aheĩne'en hap Tupana piat hap ewy. Yt atikuap i Tupana aiminug sa'ag pyhyp hamo sa'a­wy'i Tupana tunug na'yn wãi'e hap aimoieĩ­ne'en hamuat. Sa'a­wy'i Tupana tum kahato ainãpin hap aimoieĩ­ne'en mesu­wa­rotiat hamuat. Waku piat aheĩne'en hap tokuap hamuat tutum towãi'e hap.
ROM 7:11 Ma'ato uhowawi yt mi'i tã hin i katu­pono yt atunug i. Mi'i pote areĩne'en Tupana mi'a­piheg wuanuat kat pote Tupana to'e — Yt etunug i ui'e hap hawyi ti aru eku'uro e. Mi'i pote iku'uro rakanuat areĩne'en. Sa'a­wy'i are'e uiwepe — Are pãi pyno atunug aru yne Tupana piat uinãpin hap hawyi areĩne'en wuat'i e'at pe are. Mi'i hawyi uiwepe ahã'ãg kahato inug hap ete ma'ato ati'a­parap aparap yne inug hap ete. Mi'i hawyi — Pãi are ui'a­piheg aru Tupana ui'e hawyi.
ROM 7:12 Tupana ainãpin hap miwan miat Musei mimo­herep ikahu kahato hãpyk kahato wakuat kaipyi ainãpin hap pote hãpyk kahato ikahu kahato ainãpin hap. Hãpyk yn ainãpin hap atipuẽti. Waku kahato toĩne'en i'e hat ewy ti ra'yn hãpyk topy­hu'at.
ROM 7:13 Tupana piat uinãpin hap yt uima'at hin i. Yt karãmuo i aima'at kuap. Tupana ehay yt ai'auka hap i ma'ato Tupana ehay aparap hap nug hap ai'auka hap ai'a­piheg aru hap topy­hu'at. Tupana piat uinãpin hap waku kahato pytkai yt atunug hin i — Waku atunug aru are'e pytkai atunug sa'ag hawyi atikuap yt nakuat i uito hap. Mi'i hawyi Tupana piat uinãpin hap Musei mimo­herep tomo­herep kahato uimi­'a­parap ko'i. Are pãi uito rasig yt naku i rat pãi are. Tupana ui'a­piheg aru uiku­'uro hamo are yn sa'a­wy'i mekewat e'at pe.
ROM 7:14 Tupana Pã'ãu miat ainãpin Musei wẽ pywiat wakuat sese Tupana wanẽtup hap ewy. Mi'i ti waku ma'ato uito yt atunug i pote yt naku i rakat areĩne'en. Mi'i tã hawyi yt Tupana ewy hin i areĩne'en wakuap nug hap ete.
ROM 7:15 Atunug neran kahato wakuap nug hap ko'i ma'ato yt uimi­ky­'esat ewy i hawyi sa'ag nug hap tuwẽtem yn uipiit pyi. Mi'i hawyi uiminug sa'ag uimõti te hap topy­hu'at.
ROM 7:16 Mi'i hawyi atunug yt naku i turan uiwa­nẽtup hap — Wãi'e uhepe — Yt etunug Tupana miky­'esat ewy hin i e uiwa­nẽtup hap. Musei piat ainãpin hap yt ewy hin i uiwa­nẽtup hawyi — Yt etunug nei'o e hap ete yn Ati'a­parap.
ROM 7:17 Mi'i hawyi atunug sa'ag uiwa­nẽtup hap miky­'esat ewy kat pote uimi­ky­'esat sa'ag uipy'a piat po'og hesaika uiwewãi hap kai. Mi'i pote yt atoiat kuap i uheko sa'ag.
ROM 7:18 Miit sa'ag nug hat ewy areĩne'en uha'um me. Yt kat i wakuap itote. Atunug neran wakuap wen — Hẽto e uiwa­nẽtup hap ma'ato uipiit yt iky'esat i hawyi uimi­ky­'esat sa'ag uipy'a piat uipyhyp wakuap nug hamo.
ROM 7:19 Pyno ahã'ãg kahato wakuap nug hap ete ma'ato yt atunug kuap i. Mi'i hawyi yt naku i yn atunug wãi'e uiwa­nẽtup hap pytkai.
ROM 7:20 Mi'i hawyi typy miit ewy areĩne'en wẽtup ok yt naku i nug hat ewy wẽtup ok waku nug hat ewy. Mekewat yt naku i nug hat uipy'a piat po'og hesaika uikai.
ROM 7:21 Pyno typy sehay tu'uka uipiit pe. Wẽtup sehay — Etunug o wakuap e. Wẽtup sehay — Etunug no yt naku i e. Mi'i hawyi mekewat sehay sa'ag upi uipap tuereto hawyi mekewat Tupana miky­'esat ko'i yt atunug i. Yt naku i uito are.
ROM 7:22 Mekewat uito sese atiky­'esat kahato Tupana ehay e hat uipap kahato Tupana piat ainãpin hap upi.
ROM 7:23 Ma'ato toĩne'en wẽtup sehay uipiit pe — Wãi yt etunug nei'o Tupana miky­'esat e. Mi'i hawyi typy sehay tu'uka uipiit pe — Ereto ro Tupana ehay upi e uiwa­nẽtup hap. — Etunug no epiit miky­'esat e wẽtup sehay. Mi'i hawyi ati'airo uipiit miky­'esat ewy. Yt arẽtem kuap i uimi­ky­'esat sa'ag po pyi.
ROM 7:24 Yt naku i kahato yt uimo­wepit hin i. Are pãi uwe uwe aru uihep kuap mesuwat uheko sa'ag po pyi katu­pono uipiit miky­'esat sa'ag ko'i ui'auka hat ewy topy­hu'at. Uhekyi kahato ui'a­piheg hap kape.
ROM 7:25 Pyno wẽtup yn uheha­kye­ra'at kuap hat. Tupana Sa'yru yn uihep kuap uiminug sa'ag hap po pyi. Mi'i pote arehum kahato Tupana pe katu­pono yt Tupana esaika hap wywo i pote yt atunug kuap i Tupana miky­'esat ewy. Uiwa­nẽtup hap wywo — Waku etunug e ma'ato uipiit miky­'esat sa'ag esaika hap po'og uiwa­nẽtup waku hap nug neran hap kai. — Tupana sa'a­wy'i areĩne'en uimi­ky­'esat sa'ag nug hap po pe ma'ato mi'i hawyi Esa'yru uinug pakup hawyi mesup Epo pe areĩne'en. Waku kahato En Tupana katu­pono Esa'yru Pã'ãu wo uipyt­'atnug hawyi wẽtup sehay wakuat yn uipiit pe toĩne'en.
ROM 8:1 Watunug Iesui Ai'akag wo hawyi wẽtup miit ewy yn wato­py­hu'at iwywo katu­pono watoĩ­ne'en Iesui pe i'ewyte toĩne'en ahepe. Mi'i hawyi Tupana yt to'e hin i ahepe — En yt naku i e hap. Woro­ho­'o­'a­piheg yt e i ahepe.
ROM 8:2 Mi'i hawyi wẽtup sehay yn aipiit pe kat pote Tupana Pã'ãu wo aipyt­'atnug. Mi'i hawyi aipiit topy­hu'at Iesui piit ewy. Sa'a­wy'i te watuwat mekewat wẽtup sehay upi — Etunug no uimi­ky­'esat ewy e hawyi ahiag miky­'esat sa'ag watunug. Mi'i hawyi aiminug sa'ag ahekyi kahato aiku­'uro hap kape ho'opot hap kape ma'ato wato­mohey Iesui hawyi Tupana Pã'ãu put'ok'e ra'yn. Mi'i hawyi Tupana Pã'ãu aihep ta'yn aimi­ky­'esat sa'ag po pyi aiku­'uro hap wuat'i e'at piat po pyi.
ROM 8:3 Sa'a­wy'i Tupana ainãpin kahato Musei upi. — Mi'i tã waku etunug e. Mi'i tã yt naku i etunug e ma'ato mekewat e'at yt watunug kuap i imiky­'esat ko'i katu­pono aimi­ky­'esat sa'ag aipyhyp kahato inug hap ete. Mi'i hawyi Tupana piat ainãpin hap yt aimo­hãpyk kuap i yt watunug i pote. — Pyno atimo­hãpyk mi'iria e Tupana tuwepe. Mi'i to'e hawyi toipo­'oro Tosa­'yru sese. Put'ok'e hawyi ai'ewy ipiit Miit kahato Mi'i. Toi'a­parap kuap aito ewy wen ma'ato yt toi'a­parap hin i. Yt karãpe i tutunug sa'ag. Toi'akit kahato tomi­ky­'esat sa'ag nug hamuat — Yt atunug i e tuwepe. Miit'in miky­'esat sa'ag toi'akit yne. Miit no tuwenug hawyi ai'a­piheg hap tutu'u yne aria'yp posak ete.
ROM 8:4 Koitywy Topiit wakuat wo aimoe­saika. Tupana Pã'ãu wywo watuwat hawyi watunug Tupana miky­'esat ko'i ainãpin iwan miat hap ewy. Tupana Pã'ãu wo aipyt'at sese hawyi yt wati­ky­'esat hin i aimi­ky­'esat aiwe­kai­pywiat sehay.
ROM 8:5 Ma'ato watuwat aimi­ky­'esat sa'ag upi pote aimi­ky­'esat sa'ag yn watunug. Mi'i hawyi aiwa­nẽtup hap sa'ag ewywuat po pe wato­py­hu'at. Aheko yt naku i ewywuat sa'ag hap topy­hu'at ma'ato Tupana Pã'ãu eiam mo wato­py­hu'at pote mi'i hawyi watuwat Tupana Pã'ãu ehay upi. Mi'i hawyi Tupana wanẽtup hap ewy topy­hu'at aiwa­nẽtup hap. Mi'i hawyi watunug Tupana miky­'esat ewy.
ROM 8:6 Ma'ato watuwat aiwe­pywiat mekewat miit sa'ag wanẽtup hap ewywuat upi mi'i hawyi aiwa­nẽtup hap mesu­wa­rotiat ewy topy­hu'at. Mi'i hawyi yt naku i nug haria sese wato­py­hu'at hawyi aiku­'uro hap yn topy­hu'at. Ma'ato Tupana Pã'ãu toĩne'en aiwa­nẽtup hawuo hawyi wẽtup wanẽtup hap yn topy­hu'at ahete Tupana wat ewy. Mi'i hawyi yt kowo­'i­ko­wo'i hin i aiwa­nẽtup hap. Waku kahato aiwa­nẽtup hap topy­hu'at. Ihay se kahato aheĩne'en hap. He kahato rakat topy­hu'at Tupana Pã'ãu wo watu­wenug hawyi.
ROM 8:7 Karãpe wato­py­hu'at mesu­wa­ro­tiaria ewy aiwa­nẽtup hawe hawyi yt watunug hin i Tupana miky­'esat ko'i. Yt watunug hin i ainãpin miwan miat. Pyno watikuap Tupana ehay hawyi — Pyno atunug Tupana miky­'esat wato'e ma'ato yt watunug kuap i wahã'ãg pytkai katu­pono aimi­ky­'esat yn aiwa­nẽtup hawe yt Tupana miky­'esat hin i. Mi'i pote mesu­wa­rotiat miit ewy aimi­ky­'esat ko'i watunug hawyi yt naku i nug haria wo wato­py­hu'at. Watunug Tupana ahewa­nĩkap mo.
ROM 8:8 Watuwat aimi­ky­'esat sa'ag upi hawyi miit sa'ag ewywuat wato­py­hu'at mesu­wa­rote. Mi'i hawyi yt kat i aiminug ko'i topy­hu'at Tupana mowepit hamo.
ROM 8:9 Ma'ato aito yt mi'i tã hin i. Yt watuwat hin i aimi­ky­'esat sa'ag ky'esat hap nug hamo i'ewyte yt ahewaure ka'a hin i mekewat sehay kape. Wẽtup sehay upi ra'yn watuwat katu­pono Tupana Pã'ãu toĩne'en ahepe mio. Ma'ato uwe uwe yt Aipo­typot Iesui Pã'ãu yt eiam i mi'i hat ti yt Tupana emiit hin i katu­pono Tupana emiit no Iesui Pã'ãu eiam yn te'e­ro­py­hu'at.
ROM 8:10 Ma'ato Aipo­typot Iesui Pã'ãu wakuat wo aipyt'at pote aipiit miky­'esat sa'ag hap iku'uro rakat ewy topy­hu'at katu­pono aipã'ãu moieĩne'en wuat'i e'at piat hap toĩne'en ahete. Aipiit iku'uro aru irania'in ewy katu­pono sa'a­wy'i watunug neran sa'ag yn mote Tupana Pã'ãu wakuap aimoe­saika kahato ahã'ãg hap akit hamo Iesui mieha­kye­ra'at ko'i pote.
ROM 8:11 Sa'a­wy'i Tupana Pã'ãu timoieĩ­ne'en Iesui piit iku'uro hawyi. Ta'i Tupana Pã'ãu hesaika kahato miit'in moieĩne'en hamo. Mi'i ti toĩne'en ahepuo. Aipiit iku'uro hawyi Tupana Pã'ãu toĩne'en aimoieĩ­ne'en hamuat Iesui wat ewy. Pywo pe ti Iesui piit ewy Tupana Pã'ãu esaika hap toĩne'en aipiit moieĩne'en hamuat.
ROM 8:12 Uiwy­ria'in Iesui mohey haria yt kat hamo i koitywy watuwat sa'a­wy­'iwuat aimi­ky­'esat sa'ag ko'i kape katu­pono yt watoĩ­ne'en po'og i aimi­ky­'esat sa'ag po pe kat pote Iesui ãu po pe watoĩ­ne'en mesup. Areĩne'en Aipo­typot Aika­'iwat po pe hawyi yn waku are — Tupana arehum ewawi. Uihep ta'yn uimi­ky­'esat sa'ag po pyi.
ROM 8:13 Pyno aipiit miky­'esat sa'ag ky'esat hap kape yn watu­we­potpap pote ai'a­piheg hap yn topy­hu'at ahete aiku­'uro hap. Waku wato'e Tupana Pã'ãu me — Eti'akit ro uimi­ky­'esat sa'ag ky'esat hap wato'e Tupana Pã'ãu me. Mi'i hawyi Tupana Pã'ãu aimoieĩ­ne'en kahato.
ROM 8:14 Uwe uwe Tupana Pã'ãu piat topo­'oro hap upi topy­hu'at mi'i hat topy­hu'at Tupana saki­'yt'in Tupana sa'y­ru'in e.
ROM 8:15 Katu­pono Tupana tum na'yn Topã'ãu aiky'e haype. Yt aimogyt hamo i yt aimo­ken'ẽ hamo i katu­pono Tupana Pã'ãu iwese kahato. Ai'a­pykok hamo aimo­wepit hamo yn toiky­'esat. Tupana Pã'ãu aimo­herep Tupana sa'y­ru'in wo haki­'yt'in wo hawyi watuwak — Papai Papai wato'e Tupana pe. Ui'ywot kahato En wato'e Tupana pe.
ROM 8:16 Mi'i hawyi Tupana Pã'ãu aipã'ãu wywo wẽtup Pã'ãu ewy yn topy­hu'at — Tupana mẽpyt'in eipe e. Tupana Pã'ãu ahepe mi'i pote ai'ãu — Pywo e.
ROM 8:17 Pyno mesup Tupana mẽpyt'in ko'i aito pote Tupana mimõ­py­hu'at wuat'i e'at pe katu­pono Ai'ywot Tupana pote Iesui Aheyke'et pote aito iywyt'in inyt'in wẽtup sok yn aitoria pote. Tupana ekat yne aiwanuat ko'i imẽpyt'in aito pote. Aheyke'et mõtypot hap e'at pe aito i'ewyte aimõ­typot hap toĩne'en imohey haria aito pote. Aheyke'et Aikywyt ho'opot kahato aheha­kye­ra'at hamo mi'i pote waku kahato waho­'opot Aheyke'et Aikywyt ehay moherep hamo katu­pono wẽtup sok yn Tupana mipoi­tyro ko'i aito. Aheyke'et Aikywyt mõtypot hap e'at pe aimõ­typot iwywo hap topy­hu'at.
ROM 8:18 Aho'opot kahato mesuwe uito Pauru. Koitywy aho'opot hap e'at kahato. Koran ni miit'in mimo­so­'opot ko'i kahato watoĩ­ne'en ma'ato Iesui mõtypot hap e'at pe Tupana mimõ­typot no kahato wato­py­hu'at. Mekewat e'at pe aito i'ewyte Tupana mimõ­typot kahato wo wato­py­hu'at. Aimõ­typot Iesui wywo hap e'at pe aru po'og iwato mesup e'at piat waho­'opot mesu­wa­rotiat. Ta'i waku wato'e aho'opot kahato hawe — Koitywy aho'opot kahato Iesui wanĩkap po upi ma'ato typy sakpo are po'og Tupana mimõ­typot no areĩne'en wuati e'at piat aho'opot hap sa'up waku wato'e.
ROM 8:19 Yne Tupana minug ko'i hekatup haria wo te'e­ro­py­hu'at katu­pono ta'a­tukuap teran kahato uwe uwe Tupana sa'y­ru'in Tupana saki­'yt'in Tupana mimo­herep hap kuap hamo ta'a­tu­he­katup kahato.
ROM 8:20 Tupana minug ko'i mesu­wa­rotiat ikahu kahato ma'ato mesuwe toĩne'en hawyi iku'uro yne katu­pono ai'a­parap hawyi Tupana ti'a­tu­'uhu yne tominug i'atu­mo­so­'opot hamuat ipap hamuat aiminug sa'ag upi. Mi'i pote iku'uro rakaria wo tukup­te'en yne yt ta'a­tu­mi­ky­'esat ewy i. Wato­mohey Iesui hawyi — Wuat'i e'at piaria eweipy­hu'at aru e Tupana ahepe. Mi'i pote aheĩne'en hap ipakup i hap kape mesup wahe­katup kahato imohey hap wywo.
ROM 8:21 Gu'uro po pe watoĩ­ne'en yne aitoria map haria — Uipiit aru tuwe­mopyp e hap yn aiwa­nẽtup hawe. Yne mesuwat yi totiaria wemopyp hanuaria topap hawyi wato'e aiwa­nẽtup hawe. I'ewyte yne aihũria yne miat ko'i yne mikoi yne aiminug ko'i ikahuro rakano tukup­te'en wato'e. Wati­'a­parap sa'a­wy'i hawyi iku'uro rakaria wo watu­kup­te'en wato'e. Ma'ato mi'i pytkai wato­mohey kahato — Meiũran aru tut waku hap ahete i wato'e aipy'a pe. Tupana aru aihep mesuwat gu'uro po pyi wato'e. Waku pe aru watoĩ­ne'en wato'e irania'in Iesui mohey haria pe kat pote Tupana sa'y­ru'in Tupana saki­'yt'in aito pote ti aru waku sese puo watoĩ­ne'en wẽtup miit ewy yn watoĩ­ne'en Iesui piit ewywuat wato'e. Watu­wẽtem gu'uro po pyi hap e'at pe aru yne mesu­wa­rote ai'ewy topy­hu'at i ra'yn ga'apy yi y'y waku pe i ra'yn tukup­te'en wuat'i e'at pe ai'ewy wato'e aipy'a pe Tupana mohey hap wywo.
ROM 8:22 Nimo te mesup te yne Tupana minug ko'i — Waku pe watu­kup­te'en aru i'atu'e i'ewyte wato'e. Ma'ato koitywy waho­'opot kahato aheĩne'en hap ete mesu­wa­rote i'atu'e miat ko'i pira ko'i weita ko'i i'ewyte wato'e. Ta'i yne Tupana minug ko'i haty potiat kak'i­'a­tu'e kak'i­'a­tu'e hap ewy tukup­te'en mesuwe. Aikotã hirakat haty potiat ewy ahatek ahatek hap kahato topy­hu'at mesuwe.
ROM 8:23 Ho'opot haria sok Tupana minug ko'i mesu­wa­ro­tiaria. Sa'a­wy'i ainug hap e'at pe waku pe watoĩ­ne'en ma'ato mesup yne ra'yn ho'opot haria wo tukup­te'en e. Aito Iesui mohey haria ho'opot haria wo kahato watoĩ­ne'en Tupana tum na'yn ahepe Topã'ãu pytkai. Haty kahato hap ahete pote kynkyn­wa­to'e aipy'a pe — Uruiky­'esat kahato urupiit yt ikahuro rakat i wato'e Tupana pe. Urunug no esaki­'yt'in esa'y­ru'in sese wo wato'e. Waku pe urutu­kup­te'en teran yt kat i uru'arot hap wywo. Uruwe­mo­wepit hap yn mywo sese watoĩ­ne'en neran wato'e Tupana pe kynkyn­'ai'e hap wywo.
ROM 8:24 Mio tã wato'e Tupana pe — Uruimohey kahato e'e hap ewywuat wato'e. Yne yne nug hat ereĩne'en hap uruimohey wato'e. Wuat'i — Atunug aru e'e hap ko'i ewywuat hap uruimohey kahato wato'e. — Uimohey pote woro­ho­'oe­ha­kye­ra'at wuat'i e'at pe e'e hap ewywuat ti uruimohey wato'e. Ma'ato koitywy yt put'ok'e i te e'e hap ewywuat pytkai uruimohey te wato'e. Yt karãpe i uruta­'a­kasa Esa'yru urueha wywo te ma'ato uruimohey MI'I yn urueha­kye­ra'at kuap hat urupy'a pe wato'e Tupana pe. Yt uruta­'a­kasa i te Esa'yru wen urueha pe ma'ato mi'i pytkai uruimohey kahato tut aru e'e hap ewywuat Tupana wato'e. Mesup sehay toĩne'en urumi­mohey mekewat e'at pe aru uruta­'a­kasa e'e hap ewywuat heremo ra'yn e'e hap wato'e. Ma'ato yt naku i wato'e Tupana pe — Uruta­'a­kasa En urueha wo mi'i pote uruimohey En yt naku i wato'e. Uruta­'a­kasa Tupana kape aheha wo hawyi heremo ra'yn toĩne'en aheha pe. Heremo ra'yn toĩne'en aimi­mohey. Mi'i tupono wẽtup aimi­mohey ewywuat toĩne'en yt sa'a­wy­'iwuat aimi­mohey ewy hin i. Heremo ra'yn ahehamo Tupana pote yt wahe­katup kuap i po'og tut irane hap.
ROM 8:25 Ma'ato yt toĩne'en i ahehamo pote imohey hap wywo yn wahe­katup — Ariot i aru e hap ewy. Yt wati­waure hin i ahepiat imohey hap. Wahe­katup imohey hap wywo yt heremo i pytkai.
ROM 8:26 Karãpe ahehay Tupana kape turan yt watikuap hin i kat som waku wahẽtup kat som yt naku i wahẽtup katu­pono aiwe'eg hap yt put'ok'e kat som waku wato'e Tupana pe ahehay wo hap ete. Ma'ato mi'i turan Tupana Pã'ãu Wakuat put'ok'e ahete aipo­wyro hamo ahehay Tupana kape ai'e hap moherep hamo aiwẽ pyi hawyi aiwywo kahato toĩne'en Ipã'ãu ahehay tewawiat ete aipo­wyro kahato ahehay Tupana kapiat hamuat. Mi'i hawyi aipiit pyi aipy'a pyi aiwa­nẽtup hap pyi Ipã'ãu ihay kahato Tupana wywo aiwẽ pyi. Yt watikuap kuap i kat som waku wato'e hawyi Tupana Pã'ãu ihay aipy'a pyi aikotã kynkyn­wa­to'e hap ewy hawyi kat som waku Tupana miky­'esat ewy toimo­herep Tupana pe aiwẽ pyi.
ROM 8:27 Tupana yt ahehay se kape hin i iha'at ma'ato aipy'a kape aiwa­nẽtup hap kape iha'at kat wato'e som aipy'a pyi hap kape iha'at. Toikuap kahato Topã'ãu pusu aipiit pywiat hap. Topã'ãu wanẽtup hap kat som wato'e teran hap toikuap hawyi Ipã'ãu timo­herep aimiẽtup ko'i Ai'ywot pe. Tupana Pã'ãu ni ihay kuap Tupana wywo aimiẽtup moherep hamo. Toikuap kahato Tupana miky­'esat ko'i hawyi ahẽtup turan toimo­herep ahepe tomi­ky­'esat ewywuat ko'i pyi ihay tomi­ky­'esat ko'i aimi­ky­'esat ewy.
ROM 8:28 Wati­ky'e sese Tupana pote i'ewyte imiky­'esat nug haria wo watoĩ­ne'en. Mi'i pote Tupana ipotpap kahato aika­wiano. Pywo ti rat aikotã aikotã topy­hu'at ahete sio waku sio yt hap puo ipotpap kahato aika­wiano. Put'ok'e ahete aimo­wepit hap sio ahatek hap toĩne'en aika­wiano kahato Tupana. Aito Tupana toky'e haria i'ewyte imiky­'esat nug kahato haria wo pote ipotpap kahato aipo­wyro hamuat aipoi­tyro hamuat waku nug hamuat.
ROM 8:29 Yt aheĩne'en i te hap e'at turan Tupana aikuap ta'yn. Ta'i ainug hap e'at e'yianmete Tupana aikuap. — Ta'i mi'iria wyti aru Uha'yru mohey hanuaria tukup­te'en e tuwepe nimo te yt uwe i aito hap e'at pe. Uha'yru mohey haria wo aru ati'a­tunug Uha'yru ewywuaria Ta'a­tuey­ke'et ewywuaria Ta'a­tu­kywyt ewy atunug mi'iria Uha'yru wat'yp'i wo hap ati'a­tunug mi'iria e tuwepe nimo te yt uwe i aito hap e'at pe. Uha'yru mohey haria wyti aru ati'a­tu­'airo uhemiit'in sese wo e Tupana topy'a pe nimo te yt uwe i te toĩne'en mesu­wa­rote turan.
ROM 8:30 Pyno sa'a­wy'i sese Tupana ai'airo atipy pe. Mi'i hawyi put'ok­wa­to'e ai'y­wã'ĩ hap hawyi watoĩ­ne'en mesuwat yi tote hawyi wato­mohey Ha'yru hawyi Tupana aikaykay tuwe­wawi towa­nuaria sese wo. Mi'i hawyi — Waku kahato uipy'a pe uiwa­nẽtup hawe eweikup­te'en e ahepe. Pywo ti rat woro­ho­'onug eiperia uha'y­ru'in uhaki­'yt'in sese wo e. Karãpe put'ok'e uimõ­typot hap e'at sese mesu­wa­rote hap e'at pe uimi­mõ­typot haria wo aru eweikup­te'en e. Mekewat e'at pe aikotã miit'in uimõ­typot hap ewywuat miit'in mimõ­typot wo eweikup­te'en are e Tupana ahetiat yt kat i te aheĩne'en turan.
ROM 8:31 Waku kahato Tupana katu­pono aiky'e hap wywo tutunug yne aika­wiano hap. Nimo pyi mesup te i'ewyte mũki­'ite te aikai yn Tupana toĩne'en. Tupana toĩne'en aiwy kahato hawyi yt uwe i ahewa­nĩ­kaptia ai'akit kuap.
ROM 8:32 Tutum na'yn ahepe Tosa­'yru sese Tomi­ky'e po'og aheha­kye­ra'at hamo iku'uro aiky'e hap upi. Tupana hegyi'at kahato. Tosa­'yru po pyi mesup tutum neran ahepe yt kat sa'up i yne yne yt kat i te aipo piat rakat aheha­kye­ra'at tuwy.
ROM 8:33 Koitywy Tupana to'e ahetiat — Yt kat i sa'ag atipuẽti Uha'yru mohey haria kai uiwa­nẽtup hawe e katu­pono uimi­'ai­roria kahato mi'iria e Tupana. Yt kan hamo i irania'in te'e­ro'e uhepe — Yt naku i kahato Esa'yru mohey haria katu­pono mi'iria ti uimi­moe­waku ko'i sese e Tupana ahepiat.
ROM 8:34 Tupana mimoe­waku ko'i kahato aito pote yt uwe i to'e kuap ahepe — Tupana mi'a­piheg ko'i wo aru eweikup­te'en yt i'atu'e kuap i. Yt mi'i tã hin i aru e Tupana ahepiat. Tupana Mipo­'oro Wuat'i Miit'in Porekuat nuat iku'uro wuat'i miit'in apiheg hap ko'i u hamo. Iku'uro hawyi tuwẽtem gu'uro pyi miit'in moieĩne'en wuat'i e'at piat hamo. Mio ra'yn toĩne'en atipy pe apyk pe Tupana po ran kai imohey haria imimo­hãpyk haria moherep hamuat. Ta'i wato­mohey hawyi imimo­hãpyk haria wo watu­kup­te'en Tupana wanẽtup hawe. — Waku kahato uimohey haria ko'i e yn ahepe Tupana ahetiano irania'in me ahewa­nĩ­kaptia pe.
ROM 8:35 — Woro­ho­'o­ky'e kahato eipe e Aika­'iwat Iesui ahepe. Yt kat i hin i aihep kuap Aika­'iwat po pyi. Ahatek hap apo aihep kuap Aiky'e hat po pyi. Yt hin i wato'e are. Aho'opot hap apo aihep kuap Aipo­typot Iesui po pyi. Yt hin i wato'e. Miit'in miky­ry'i ahetiat hap pupi apo aihep kuap Ai'akag po pyi. Yt hin i wato'e. Ahesy'at hap apo pupi aihep kuap Tupana Mipo­'oro Aipo­rekuat nuat po pyi. Yt hin i wato'e are. Yt ahekat hin i hap apo aihep kuap Aiky'e hat po pyi. Yt hin i wato'e. Irania'in ai'auka teran haria pupi apo aihep kuap Aika­'iwat po pyi. Yt hin i wato'e. Aiku­'uro hap apo aihep kuap Aiky'e sese hat po pyi. Yt hin i wato'e.
ROM 8:36 Ta'i yt kat i aihep kuap Aika­'iwat Aiky'e hat po pyi wato'e katu­pono mio tã e morekuat Tawi tuwepy hawuo tomiwan me — Tupana uruho­'opot kahato mesuwe emohey haria uruto pote e. Emohey haria pote uru'auka teran haria typy'i kahato rakaria tukup­te'en mesuwe e. Yne e'at pe uru'auka teran at e. Tupana ienuk koro hap e'at pe urui'a­tu­'uka kahato uruhũria urumi'u wo. Mi'i hap ewywuat re uruwa­nĩ­kaptia urukat uru'a­tu­'uka hamo mesup mesuwe Mehĩ are e morekuat Tawi tuwepy hawe tomiwan me.
ROM 8:37 Pyno morekuat Tawi ewy kahato wato­py­hu'at mesu­wa­rote ho'opot haria ma'ato mi'i pytkai yt watoiat hin i Aiky'e hat Iesui are katu­pono Aika­'iwat ti aimoe­saika kahato ai'akit hap pupi. Mi'i hawyi Aiky'e hat Koro toĩne'en aiwywo at ka'ap wuat'i ai'akit hap akit hamuat. Mi'i pote ti watoĩ­ne'en Ahesu­rara Akag ewy. Aikotã surara po'og hesaika rakat torania kawiat ewywuat watoĩ­ne'en mesu­wa­rote yne yt naku i akit hamuat.
ROM 8:38 Pywo ti rat mesup ta'yn atikuap kahato ra'yn yt kat i hin i aihep kuap Aiky'e hat po pywiat. Aiku­'uro hawyi watoĩ­ne'en kahato te Aheka­tuwy po pe. Aheĩne'en sa'ag kahato mesu­wa­rotiat hap i'ewyte yt aihep kuap i Aiwy po pyi hap atikuap ta'yn. I'ewyte atipy piaria yt aipo­hari kuap i Ai'a­pykok hat aiky'e hap ete. Mi'i hawyi more­kuaria mesu­wa­ro­tiaria i'ewyte yt aipo­hari kuap i Aipo­typot Iesui po pyi. Pywo ti rat ahiag i'ewyte ahiagnia wy yt aihep kuap i Tupana po pyi katu­pono aiky'e wuat'i e'at pe. Ta'i ga'atpo te mesup te i'ewyte mũki­'ite watoĩ­ne'en ipo pe wuat'i e'at pe. Yt kat i hin i aipo­hari kuap aito Iesui mohey haria Aiky'e hat Koro po pyi.
ROM 8:39 Ta'i yt uwe hin i mesu­wa­ro­tiaria tipo­hari kuap aito Tupana po pyi. I'ewyte yt uwe hin i wy mesuwat yi ywyt'ok­py­piaria aihep kuap aito Aiky'e hat po pyi. Yt uwe hin i ga'apy puaria wy aipyhyp kuap Aiky'e kahato hat Tupana kape Tosa­'yru Aipo­typot Akag mohey haria aito pote e. Mesuwat miwan nug hat ri Pauru.
ROM 9:1 Uiwy­ria'in Iuteuria ywania uhehay teran eiwywo uimiwan me mesuwe. Eiperia ti uheinyt'in ko'i i'ewyte uheyke­'et'in ko'i are. Uito ti Pauru eheywyt eikywyt sese ewy areĩne'en katu­pono aha'a­se'i pot Aparãu mote.
ROM 9:2 Pywo pe ti woro­ho­'o­ky'e kahato eiperia ui'y­wania Iuteuria. Pywo ti rat woro­ho­'oekyi teran eiperia yne Tupana Mipo­'oro Aipo­typot Iesui kape uhepiat eimu'e hamo ma'ato yt uimohey i eipe. Haty kahato uipy'a piat wywo ahẽtup ehepe — Eweimohey ro Iesui eipy'a pe Iesui ti Tupana Mipo­'oro Aipo­rekuat nuat hap eweimohey ro are. Haty kahato uipy'a pe ui'y­wania katu­pono yt eweimohey i te Iesui. Pywo pe ti yt uheso hin i Tupana Pã'ãu uipy'a piat tikuap kahato yt uheso i hap woro­ho­'oekyi teran eipe torania Iesui kape uhepiat eiky'e hap wywo are. Atikuap yt uheso i hap. Karãpe arewa­nẽtup uity ui'ywot ywania Iuteuria kape hawyi arewak kahato uipy'a puo katu­pono haty kahato uhete hap toĩne'en uipy'a puo. Haty hap ewywuat toĩne'en at ka'ap uiwa­nẽtup hawe katu­pono ui'y­wania uha'a­se­'i'in ko'i uha'y­ru'in ko'i uhaki­'yt'in ko'i uity'in ko'i ui'y­wot'in ko'i yt Iesui mohey haria hin i wo tukup­te'en mote. Iuteuria atueha­kye­ra'at teran hap ahaty'u kahato uipy'a pe are. Yt uheso hin i. Tupana tikuap kahato yt uheso hin i hap.
ROM 9:3 Wẽtup e'at pe are'e Tupana pe — Pyno waku ui'a­piheg ui'y­wania ehakye­ra'at hamo are. Waku areĩne'en ekuasa hano hawyi waku uipo­'oro aria wato kape ui'a­piheg hano ui'y­wania ehakye­ra'at hamo are. Atiky­'esat kahato ui'y­wania tukup­te'en emieha­kye­ra'at ko'i Tupana are. Mi'i hap upi waku uihep Iesui po pyi ui'a­piheg hamuat ui'y­wania emieha­kye­ra'at wo tukup­te'en aru are'e sa'a­wy'i Tupana pe yt kat i uheso hap wywo.
ROM 9:4 Meiũpe uhehay teran eiwywo ui'y­wania Iuteuria etiat sehay. Sa'a­wy'i sese te mesup te ui'y­wania Iuteuria tukup­te'en kahato Tupana mi'airo sese ko'i e. Nimo te pyi ra'yn Tupana sa'y­ru'in ko'i ewywuat Tupana saki­'yt'in ko'i ewywuat wo tukup­te'en uru'y­wania. Mi'iria ti Tupana mimõ­typot kahato tukup­te'en. Mi'iria pe uru'y­wania puo sa'a­wy'i Tupana timo­herep tehay miwan miat yne i'ewyte tomõ­typot hap i'ewyte tẽtyhot hap. Mi'iria pe sa'a­wy'i — Woro­ho­'o­poi­tyro yne e'at e uru'y­wania pe urue'a­se­'i'in me. Sa'a­wy'i Tupana to'e — Woro­ho­'o­poi­tyro aru yne e'at pe aru ui'e hap ewy e. Atunug aru uimõ­typot yat koro eipy­'a­setpe e sa'a­wy'i uruepe. Ta'i sa'a­wy'i Tupana to'e — Atunug aru eipiit kawiat Uimi­po­'oro Wuat'i Porekuat nuat hat e urue'a­se­'i'in me. Urue'a­se­'i'in sa'a­wy'i Tupana wywo i'atuehay kahato rakaria.
ROM 9:5 Urue'a­se'i sese ti mekewat Aparãu e hap het rakat i'ewyte urue'a­se­'i'in ko'i ti mekewat ase'i Isaki i'ewyte mekewat ase'i Isareu e hap het rakat. Mi'iria ti sa'a­wy'i hewyry kahato Tupana wywuat rakaria. Pywo ti Tupana kuap haria akag ko'i uru'y­wania sa'a­wy'i tukup­te'en. Sa'a­wy'i irania'in ywania eiperia Humanu ywania ewywuaria yt tikuap hin i Tupana sese ma'ato mi'i hap e'at pe uru'y­wania tikuap sakpo Tupana sese. Uru'y­wania saipepiat sese Iesui tuwe­mo­herep. Urupiit ewywuat kahato Iesui tuwe­mo­herep. Ta'i uru'y­wania piit ewywuat kahato Iesui piit toĩne'en. Tupana Mipo­'oro Aipo­rekuat nuat ty ti Iuteu kawiat. Mi'i pote waku watu­wehum kahato Tupana ete — Tupana watu­wehum kahato ewawi katu­pono erepu'i nug hawyi ereĩne'en kahato aipy­'a­setpe Ai'akag wo. Wato­mõ­typot En ni wuat'i e'at pe. Waku ra'yn waku ra'yn waku wato'e Tupana pe.
ROM 9:6 Sa'a­wy'i Tupana to'e urue'a­se'i Aparãu ehary'i mana Sara pe — 9 ewaty put'ok'e hawyi ara'aipok i ewawi mana hawyi wyti aru emẽpyt ra'yn toĩne'en e Tupana tope hawyi hupi'a ra'yn ma'ato mana Sara iporo sese pytkai. Yt karãpe i Tupana ti'a­parap — Atunug aru ui'e hap ewy hap ete. Mi'i hawyi 9 ewaty hawyi ta'aipok hawyi mana Sara imẽpyt a ra'yn. Mekewat Aparãu sa'yru Isaki tuwe­mo­herep ta'yn itote imẽpyt ra'yn Tupana e hap ewywuat. Mi'i hawyi Tupana to'e — Isaki ti uimi­'airo sese e. Isaki saipe­piaria ti uhemiit'in sese tukup­te'en e. Isaki ywania wyti aru ui'y­wania mesuwat yi tote tukup­te'en aru wuat'i e'at pe e Tupana urue'a­se'i pot pe.
ROM 9:7 Ma'ato tukup­te'en kahato Aparãu sa'y­ru'in yt Isaki kaipywiat i. Mi'iria ti wẽtup ok Aparãu ehary'i kaipywiat tukup­te'en wy wẽtup ywania mekewat hary­poria Isitu ywania kawiat mana Sara eropat hat mẽpyt. Mi'iria ete Tupana to'e — Aparãu esaipepiat sese ti Sara mẽpyt Isaki e hap het rakat are e. Uiwa­nẽtup hawe Isaki yn esa'yru sese e. Mi'i emẽpyt kawiat wyti aru ati'a­tu­mo­herep emiariru sem ko'i e. Isaki sa'yru kawiat ati'a­tu­mo­herep e'ywania sese mesuwe mehĩ e Tupana sa'a­wy'i urue'a­se'i Aparãu me.
ROM 9:8 Mekewat ewary wẽtup ok Sara emiit kaipyi emẽpyt re wen ma'ato Isaki yn ni esa'yru sese uimi­'airo wat'yp sese yn ni are e Tupana. Ehary'i mana Sara iporo rakat kaipywiat yt myhu'at hat i ra'yn kaipywiat yn ni aru ewat'yp sese toĩne'en mehĩ e Tupana urue'a­se'i Aparãu me.
ROM 9:9 Mio tã e ti Tupana uruehary Sara pe — Mũki­'ite mũki­'ite 9 ewaty tokosap hawyi wyti aru toĩne'en emẽpyt epiit sese kaipywiat tuwe­mo­herep aru ui'e hap ewy e Tupana sa'a­wy'i mana Sara pe. Mi'i hawyi topy­hu'at i'e hap ewy ra'yn. Iporo sese pytkai yt imẽpyt i rakat pytkai mana Sara tomo­herep tomẽpyt Isaki Tupana e hap ewy ra'yn.
ROM 9:10 Mi'i hawyi Isaki totag na'yn hawyi totat teha­ry'i Hepeka e hap het rakat. Mi'i hawyi ihary'i hawyi hupi'a hawyi imẽpyt ra'yn typy ok ipat rakaria ha'y­ru'in tuwe­mo­herep mana Hepeka pyi.
ROM 9:11 Ma'ato sa'a­wy'i Isaki sa'y­ru'in wemo­herep hap e'yianmete Tupana to'e mana Hepeka pe — Emẽpyt ipat rakat sa'a­wy­'iwuat wẽtem yianmiat hat ti aru topy­hu'at eropat hanuat e Hepeka pe. Mi'i hawyi iyke'et topy­hu'at toywyt eropat hano Tupana e hap ewy imiky­'esat ewy tutunug. Mi'i hawyi imẽpyt Iako topy­hu'at Isaki saipepiat sese. — Ati'airo ipat ok wat'yp'i Iako e Tupana i'atu­'y­wã'ĩ hap e'yianmete.
ROM 9:12 Mi'i hap tohenoi i'atuty Hepeka pe yianmete Isaki sa'y­ru'in ipat rakaria minug etiat Iako yt kat i te wakuap nug kuap sio waku sio yt hap e'yianmete Tupana ti'airo. Yt hewaku hap upi i toi'airo Iako. Koitywy aito tuwepyi te Tupana ai'airo aikaykay tuwe­wawi hap.
ROM 9:13 Katu­pono i'atu­'y­wã'ĩ hap e'yianmete Tupana to'e — Uimi­ky'e kahato Iako uimi­'airo kahato e ma'ato iyke'et Esau piat — Yt uimi­ky'e i kahato e.
ROM 9:14 — Ta'i Tupana yt naku i i'atu'e irania'in. Yt hãpyk i kahato katu­pono toi'airo Iako hawyi yt toiky­'esat i Esau i'atu'e irania'in. Yt ahewaku hap upi i ai'airo pote yt naku i Tupana toĩne'en i'atu'e sa'ag irania'in Iako emiari­ru'in me uruepe.
ROM 9:15 Yt mi'i tã hin i ti rat uiwy­ria'in are katu­pono waku kahato Tupana toĩne'en. Nimo te Tupana to'e aha'a­se'i Musei pe — Areĩne'en iwese kahato rakat e. Mi'i pote ti ati'a­tue­ha­kye­ra'at kahato miit'in uipy'a pyi uimi­'airo ko'i e. Ati'a­tue­ha­kye­ra'at teran miit'in mote atiky'e kahato miit uimi­ky­'esat ok tã e. Ati'airo miit uhemiit no uimi­ky­'esat upi yt i'atue­waku hap upi i ati'airo uheropat hanuat e Tupana.
ROM 9:16 Wẽtup ok miit ihaky­'e'i uhepe rakat atekyi uhowawi uiwepyi sio waku rakat sio yt e. Uito ti Tupana pote atunug uimi­ky­'esat ewy e. Uito Tupana pote uiwepyi ati'a­tu­'airo miit'in uipy'a pyi uimi­ky­'esat ewy e Tupana sa'a­wy'i Musei pe. Mio tã e hap kaipyi watikuap ta'yn yt ahewaku hap upi i Tupana aiky'e hap ma'ato towese hap kaipyi aheha­kye­ra'at hap watikuap.
ROM 9:17 Sa'a­wy'i Tupana to'e morekuat yi Esitu piat Warau e hap het rakat pe — Uiwepyi woro­'airo morekuat no mesuwat yi tote e. Ereĩne'en morekuat yi Esitu pe hawyi eminug yt naku i hap ko'i kaipyi wuat'i miit'in mesu­wa­rote uhet kuap haria te'e­ro­py­hu'at. Katu­pono atimo­herep kahato irane uhesaika hap hawyi atipo­re­nõtem uhemiit'in Iuteu ywania epo pyi e Tupana morekuat Warau me temiit'in ewanĩkap sese pe.
ROM 9:18 Mi'i pote mesup te Tupana topy­hu'at iwese rakano tomi­ky­'esat ok tã ma'ato irania'in ipy'ahak takaria pe toi'a­tu­mõ­py­'ahak po'og ne'i tuwepyi tomi­ky­'esat ewy.
ROM 9:19 Mio tã i'atu'e irania'in — Tupana ti yt naku i katu­pono tomi­ky­'esat ewy mesu­wa­rote tutunug i'atu'e sa'ag. — Yt hãpyk hin i etunug Tupana i'atu'e irania'in ipy'a heg nakaria. Toi'a­tu­mõ­py­'ahak kahato po'og tehay wo tuweete i'atu'e. Pyno aikotã aru toi'a­tu­'a­piheg tomi­mõ­py­'ahak haria i'atu­minug sa'ag ete i'atu'e. Tupana tomi­ky­'esat ewy yn inug mote yt watu­wewãi kuap i Tupana kape. Yt wati­nãpin kuap i pote Tupana katu­pono tomi­ky­'esat ewywuat yn tutunug i'atu'e irania'in. Mi'iria pe are'e — Yt eweiwesat sa'ag nei'o Tupana are katu­pono aito yi ewywuat yi og ahemyp nug hap ewywuat aito are i'atuepe. Mi'i hawyi Tupana ainug ahemyp nug hat ewy.
ROM 9:20 Yt naku i wato'e Tupana kape — Kat pote uinug mi'i tã Uhyt Mimi wato'e tope. Yt naku i wato'e — Yt uimi­ky­'esat ewy hin i uinug wato'e Tupana pe are. Mio tã wato'e pote wato­py­hu'at aikotã yi og yt kan hamo i yt naku i ahemyp nug hamuat rakat ewy. — Yt uinug nei'o emiky­'esat ewy wato'e sa'ag. Uinug no Tupana uimi­ky­'esat ewy wato'e pote wato­py­hu'at yt ikahu hin i rakat yi og sa'ag myp nug hat po pe hap ewy. Myp tutunug hawyi yt kan hamo i topy­hu'at yi og sa'ag kawiat i pote pok'e meremo aria pe tosey hawyi. Mi'i hap ewy kahato aitoria aiwepyi aimi­ky­'esat yn wati­ky­'esat hawyi. Tupana po pe watoĩ­ne'en wen ma'ato yt aimo­kahu kuap i tomi­ky­'esat ewywuat.
ROM 9:21 Mi'i hap ewy kamũti nug hat po pe yi og wakuat hawyi tutunug tomi­ky­'esat ewywuat. — Koitywy atunug mesuwat yi og kawiat typy kamũti e tuwepe. Wẽtup kamũti atunug miit'in mipun eiam yt ikahu i rakat. Ma'ato wẽtup atunug kamũti ikahu kahato rakat ui'yat painug hamuat e tuwepe hawyi tutunug na'yn typy kamũti yi og kawiat tomi­ky­'esat ewy. Typy kamũti wẽtup yi og kaipyi yn tomi­ky­'esat ewy. Mi'i hap ewy ti Tupana tunug aito tomi­ky­'esat ewy.
ROM 9:22 Ta'i kamũti nug hat ewy Tupana ainug tomi­ky­'esat ewy. Yi og sa'ag mote kamũti nug hat ipy'ahak kahato yt tutunug kuap i kamũti yi og sa'ag mote. Mi'i hawyi — Yt kat hamo i mesuwat yi og to'e hawyi toipun pya to'yat pyi. Toi'apok ta'yn tominug kamũti. Mi'i hap ewy kahato Tupana miit'in ete tope­rup'i wywo ipotpap mi'iria wywo. Meiũran iperup'i pot'i hawyi ipy'ahak — Pyno woro­ho­'o­'a­piheg na'yn eipe e i'atuepe aikotã kamũti nug hat ewy yt aimo­hãpyk kuap i hawyi.
ROM 9:23 Ma'ato wẽtup yi og wakuat topy­hu'at kamũti nug hat po pe hawyi hepamo tutunug kamũti topotpap mo waku rakat wuat'i eiam mo ra'yn. Mi'i hap ewy Tupana ainug tomõ­typot hamo. Ainug hawyi miit'in te'e­ra­ha'at hawyi te'e­ru­wehum Tupana ete. — Tupana waku rakat i'atu'e iwese kahato mi'iria nug hap ete ihaky­'e'i kahato Tupana mi'iria ete i'atu'e. Tupana eiam kahato mi'iria tukup­te'en tuwe­pokuap kahato mi'iria nug hap ete i'atu'e.
ROM 9:24 Tupana mi'airo kahato aito. Tupana aikaykay tuwe­wawi aito Iuteuria ywania i'ewyte irania'in aito wẽtup ywania.
ROM 9:25 Sa'a­wy'i Tupana ehay moherep hat Useia henoi tomiwan me. Tupana ti to'e uhepe — Meiũran aru wẽtup ywania pe yt uhemiit'in sese i rakaria pe ahenoi — Eiperia ti mesup uhemiit'in sese eweikup­te'en e. Meiũran aru irania'in ywania yt uwe miky­'eria i kape — Uimi­ky­'eria kahato sese eiperia e Tupana e Useia miwan me.
ROM 9:26 Meiũran aru aikope aikope miit'in te'e­ro'e — Eiperia yt Tupana emiit'in hin i i'atu'e hap tote aru te'e­ro'e — Eiperia ti Wuat'i E'at Piat Ieĩne'en hat Tupana sese sa'y­ru'in saki­'yt'in i'atu'e aru e Useia nimuat Tupana ehay moherep hat tomiwan 1.10 2.23 pe.
ROM 9:27 Mi'i hawyi Isaia Tupana ehay moherep hat mio tã e haty wo — Aitoria ti Isareu ywania e. I'atu kahato aitoria aikotã yẽpe ete yi kyt i'atu hap ewy watoĩ­ne'en e. Typy'i kahato aito ma'ato kurin kurin Tupana mieha­kye­ra'at wuaria sese aipy­'a­setpe tukup­te'en e katu­pono i'atu­minug sa'ag yt nakuap i kahato tukup­te'en aikotã tawa Sutuma tawa Kumura yt naku i nug haria ewy e.
ROM 9:28 Pywo ti rat Tupana tunug to'e hap ewy aru ahete — Woro­ho­'o­'a­piheg kahato aru eiperia yt naku i nug haria merep'e hap ewy yn woro­ho­'o­moma sese aikotã nimo ati'a­tuwuk tawa Sutuma tawa Kumura hap ewy e Isareu ywania pe.
ROM 9:29 Ma'ato mesup yt atunug i te e. Katu­pono eipy­'a­setpe tukup­te'en uimi­'airo ko'i uimohey hat Aparãu ewywuaria e. Mi'iria ti yt ui'atoiat teran hin i haria e Tupana nimo Isaia tomiwan 10.22 pe uru'y­wania Iuteuria pe.
ROM 9:30 Pyno eweipo­me'eg no ehewaure uhowawi uhyt'i'in mana'in Humanu ywania are. Sa'a­wy'i uru'y­wania Iuteuria yn Tupana mi'ai­roria tukup­te'en wen ma'ato mesup irania'in ywania mesu­wa­ro­tiaria waku pe tukup­te'en ta'a­tu­mohey Ha'yru hawyi. Sa'a­wy'i yt ta'a­tukuap hin i mu'ap Tupana kapiat mi'iria i'ewyte yt ta'a­tukat hin i Tupana ma'ato mesup ta'a­tu­mohey Iesui hawyi waku pe tukup­te'en Tupana wywo.
ROM 9:31 Ma'ato Iuteuria Tupana mi'ai­roria sa'a­wy­'i­wuaria Tupana ywania sese tikat kahato mesup wẽtup mu'ap Tupana kapiat yt Iesui upi i. Ta'a­tu­ky­'esat kahato — Waku kahato eipe e hap Tupana wanẽtup hawiat hap. Mi'i hawyi mio tã i'atu'e — Pyno waku watunug kahato toran Tupana wãi'e hap ainãpin hap ko'i Musei mienoi ko'i hawyi waku pe watoĩ­ne'en Tupana py'a pe i'atu'e kahato to'ope. Mi'i hawyi ma'ato ta'a­tuiã'ãg inug hap ete at ka'ap hawyi yt kat i mu'ap ta'a­tu­puẽti Tupana kape yt ta'a­tukat i Iesui mohey hap upi hawyi.
ROM 9:32 Ta'a­tu­'a­parap kahato Tupana kapiat mu'ap ete kat pote ta'a­tu­wepyi ta'a­tu­minug wakuat upi ta'a­tukat ta'a­tu­we­moe­waku hap. Yt ta'a­tukat hin i Iesui mohey hap kaipywiat upi ta'a­tu­we­moe­waku hap. Mi'i pote — Watunug toran Tupana piat aiwo­'o­nãpin hap ko'i pote ti waku pe watoĩ­ne'en Tupana pe i'atu'e to'ope yt Tupana e hap ewy i. Mi'i hawyi Tupana Mipo­'oro Aheha­kye­ra'at hat Iesui topy­hu'at i'atu­py­'a­setpe pytkai yt ta'a­tusat i ta'a­tu­moieĩ­ne'en wuat'i e'at piat rakat sese. Mi'i hawyi Iesui topy­hu'at i'atu­py­'a­setpe aikotã mu'ap tote nu wo py yitytek hat ewy toĩne'en i'atuepe. Ta'a­tu­'a­parap Iesui ete aikotã Isaia sa'a­wy'i to'e miwan me hap ewy. Mio tã e Tupana ahepe — Eiwe'eg wo o Iuteuria tawa wato Ieru­sarẽi miaria yity'ok Siãu miaria are e. Waku mekewat Nu wato tote eweha­'a­wynug yn na'yn uimõ­typot yat koro e.
ROM 9:33 Waku uimi­'airo mekewat Nu Wato ikahu rakat tote eweha­'a­wynug uimõ­typot yat e. Ma'ato ta'a­tu­puẽti itote mekewat Nu hawyi — Yt kan hamo i Mi'i i'atu'e yt aimi­ky­'esat ewywuat hin i i'atu'e Tupana pe hawyi Tupana Sa'yru pun haria tukup­te'en ne Iuteu ywania. Mi'i hawyi i'atu­mipun topy­hu'at i'atu­pu'ap tote nu ewy. Mio karãpe Iuteu ywania ikohye­wyry itote hawyi hewo hewo kahato meiẽwat Nu Wato ete e aikotã wata'at nu ete aipu'ap upi wãtym muo turan hap ewy are. Mio tã Tupana to'e hap ewy — Uwe uwe mesuwat Nu ikahu kahato rakat ete ta'at mi'i haria te'e­ru­we­'auka hanuaria aru tukup­te'en e ma'ato uwe uwe mekewat Nu Wakuat rote tuwe'yat nug mi'i hat wuat'i e'at piat Tupana mowepit hat topy­hu'at aru e Isaia tomiwan 8.14 pe. Uito ti Pauru.
ROM 10:1 Uheywyt'in uheinyt'in Iesui mohey haria Yi Humanu totiaria ahẽtup haty wo at ka'ap Tupana kape — Tupana are eti'a­tue­ha­kye­ra'at ro ui'y­wania ui'e­wy­wuaria Iuteu ywania ahẽtup kahato uipy'a pyi. Etimo­herep to Esa'yru Iesui ui'y­wania pe. Eti'a­tunug no Iuteuria Emipo­'oro Urupo­rekuat nuat mohey kahato hanuaria wo ui'e­wywuat haria wo are'e yn Tupana pe haty uipy'a piat wywo.
ROM 10:2 Yt uheso hin i ui'y­wania Iuteuria tikuap teran kahato Tupana wen ma'ato yt ta'a­tukuap i te. — Tupana sese po'og uruimõ­typot irania'in kai i'atu'e ma'ato yt ta'a­tukuap i te Tupana ta'a­tu­py'a pe ta'a­tuwy ewywuat.
ROM 10:3 Ha'a­wyte yt ta'a­tu­mohey i Tupana kapiat mu'ap Iesui. Ta'a­tu­waure mu'ap Tupana kuap sese hamuat hawyi mesup ta'a­tukat re wẽtup mu'ap Tupana kapiat kuap hamo e. Tupana kapiat mu'ap pun haria ui'y­wania. — Yt wati­ky­'esat i En Urupo­rekuat nuat hap i'atu'e Tupana Mipo­'oro Iesui pe. Ta'a­tunug ta'a­tu­pu'ap ta'a­tu­wa­nẽtup hawe yt Tupana kapiat mu'ap ewywuat i. Mi'i hawyi waku kahato urupu'ap Tupana kapiat i'atu'e irania'in me ma'ato yt pywo pe i.
ROM 10:4 Katu­pono ha'a­wyte Tupana to'e — Atipo­'oro aru Uha'yru Eipo­rekuat no e. Uwe uwe imohey haria mi'i haria ti aru waku pe tukup­te'en uipy'a pe e nimo ui'y­wania pe wen ma'ato uru'y­wania Iuteuria yt imohey i hawyi — Ewetunug no yne yne urue'a­se'i Musei wãi'e hap hawyi waku pe eweikup­te'en Tupana wanẽtup hawe i'atu'e mesup wuat'i ywania pe. — Atimoma ra'yn mekewat mu'ap e Tupana yt uwe i inug kuap mote e. Mesup Uimi­po­'oro Eipo­rekuat nuat Iesui upi yn toĩne'en mu'ap uhowawiat e. Yt karãpe i ehewaku hap put'ok'e uimo­wepit hamo e Tupana mesup wuat'i miit'in me.
ROM 10:5 Pyno eweikuap teran mekewat mu'ap Musei mienoi Tupana kapiat hap pote waku eweikuap sese kat som Musei to'e. Mio tã e tomiwan me — Ereĩne'en neran hãpyk takat sese Tupana wanẽtup hawe pote ewetunug at ka'ap yne yne Tupana wãi'e hap Tupana etunug no e hap ko'i e. Yt ewei'a­parap hin i yne yne Tupana e hap ko'i ete hawyi eweikup­te'en wakuaria wo ma'ato wẽtup ete ewei'a­parap pote Tupana mi'a­piheg wo eweikup­te'en aru e Musei tomiwan me.
ROM 10:6 Ma'ato Tupana tikuap kahato yt uwe i mesuwat yi totiat toran tomi­ky­'esat ewywuat nug kuap haria tukup­te'en. Mi'i pote Tupana tunug mu'ap wẽtup takat tuwe­wawiat Tosa­'yru apiheg hap upi. Ta'i mekewat Wakuat Miit Iesui mohey hap kaipyi aimo­hãpyk kuap. Tomi­po­'oro Aipo­typot nuat mohey haria pe yn Tupana to'e — Eipe waku kahato atipuẽti mesup uipy'a pe e. Aikotã Tupana to'e sa'a­wy'i tehay moherep haria wẽ pyi hap ewy. Mio tã e wuat'i miit'in me — Yt pya hin i areĩne'en eikai e. Uimi­po­'oro Eipo­rekuat nuat i'ewyte yt pya hin i eikai e.
ROM 10:7 Uhehay i'ewyte yt pya i eikai e. Ta'i uhehay toĩne'en na'yn eiwẽ pe ehehẽku tote e. Ta'i uhehay toĩne'en na'yn eiwa­nẽtup hawe e ahepe. Yt naku i wato'e — Tupana Mipo­'oro toĩne'en pya kahato aikai iuẽpe atipy pe wato'e. Katu­pono yt pya hin i aikai Aheha­kye­ra'at hat. Yt naku i wato'e aipy'a pe — Waku watuwat atipy kape Iesui kape hawyi waku waterut meikowo Aipo­rekuat no yt naku i wato'e katu­pono toĩne'en kahato aipy­'a­setpe. Yt naku i wato'e — To'iro wa'asyp hap kape Tupana Mipo­'oro Aipo­rekuat nuat kat hamo sio toĩne'en itote sio yi ywyt'ok­pype toĩne'en sio waku wate­hymut sio yt naku i mi'i tã wato'e katu­pono Tupana Ehay toĩne'en mesup yt pya hin i aikai katu­pono aiwẽ pe toĩne'en kahato e. Imohey haria piit puo toĩne'en.
ROM 10:8 Ma'ato mi'i tã Tupana to'e ahepe mesup — Uhehay i'ewyte yt pya hin i eikai e. Ta'i uhehay toĩne'en na'yn eiwẽ pe ehẽku tote. Ta'i uhehay toĩne'en na'yn eipy'a pe eiwa­nẽtup hawe e ahepe. Mi'i tã ti ahenoi ehepiat hap. Ta'i Tupana ehay toĩne'en eipiit pe imohey haria eipe pote.
ROM 10:9 Katu­pono uwe uwe tuwe­mo­herep towẽ pyi irania'in me — Iesui ti Uika­'iwat sese e i'ewyte topy'a pe hawyi mio tã e — Iesui woro­mohey kahato ereĩne'en gu'uro pyi hap mi'i e hat Tupana mieha­kye­ra'at no topy­hu'at e.
ROM 10:10 Katu­pono karãpe aipy'a pe wato'e — Woro­mohey En Iesui e mi'i hat pe — Waku pe eweikup­te'en wuat'i e'at pe e Tupana ahepe. I'ewyte uwe uwe tuwe­mo­herep irania'in me towẽ pyi Iesui mohey hat sese uito i'ewyte Uika­'iwat kahato Iesui e hat pe Tupana to'e — Woroe­ha­kye­ra'at en wuat'i e'at pe e.
ROM 10:11 Aikotã miwan miat Tupana to'e sa'a­wy­'iwuat hap ewy — Uwe uwe to'e uhepe — Tupana woro­mohey En e hat ti aru yt karãpe i tuwe­mõti te uimohey hap ete e Tupana miwan me.
ROM 10:12 Tupana to'e wuat'i miit'in me sio aito Iuteuria ywania sio wẽtup ywania — Uwe uwe uimohey hat uimo­wepit hat sese toĩne'en sio Iuteu ywania sio wẽtup ywania e. Ta'i Kereku ywania sio ga'apy piat ywania uimohey haria uikaykay Uha'yru set upi pote uimie­ha­kye­ra'at nuaria tukup­te'en e Tupana yne ywania pe.
ROM 10:13 Aikotã miwan me Tupana to'e sa'a­wy'i hap ewy topy­hu'at mesup. — Uwe uwe e uhepe — Tupana uheha­kye­ra'at ro e mi'i e hat pe mio tã are'e — Mesup ta'yn woroe­ha­kye­ra'at en uhyt mana e.
ROM 10:14 Ma'ato yt karãpe i yt imohey i te hat hẽtup Iesui kape heha­kye­ra'at hamo. I'ewyte yt ikuap i te Iesui etiat yt uwe i henoi tope pote yt karãpe i hẽtup Tupana kape heha­kye­ra'at hamo katu­pono yt toikuap i te pote. I'ewyte yt kat i i Tupana ehay moherep hat itote pote yt ta'a­tuẽtup kuap i Tupana kape i'atue­ha­kye­ra'at hamo yt kat i i'atu­wo­'o­mu'e haria i pote.
ROM 10:15 I'ewyte yt wati­po­'oro i wẽtup ok i'atuepe Iesui ehay etiat i'atu­mu'e hamo pote yt karãpe i ta'a­tukuap katu­pono yt uwe i henoi i'atu­py­'a­setpe i'atu­mu'e hamo Tupana etiat pote yt ta'a­tu­mohey kuap i. Mi'i pote ti — Waku kahato uhehay wakuat moherep haria tukup­te'en e Tupana. Ikahu kahato i'atupy ko'i uiwa­nẽtup hawe katu­pono uhehay ereto hamuat i'atupy ko'i e Tupana. Aikotã Tupana to'e hap ewy — Karãpe wẽtup ok toto uhehay moherep hamo irania'in kape uiwa­nẽtup hawe mi'i miit wakuat kahato wo toĩne'en e. Ipy ko'i i'ewyte ikahuria ewy te'e­ro­py­hu'at uiwa­nẽtup hawe katu­pono i'atu­ko­hye­wyry kahato uhehay moherep hamo pote e.
ROM 10:16 Sa'a­wy'i Tupana ehay moherep hat Isaia to'e tomiwan me — Tupana e ati'a­tu­mu'e kahato mesu­wa­ro­tiaria ehay wo ma'ato yt ta'a­tu­mohey i te e. Ta'a­tukuap kahato aiwẽ pywiat pytkai yt ta'a­tu­pywo i ahehay etiat e Isaia sa'a­wy'i. Mi'i e hap kaipyi watikuap ta'yn i'atu kahato Tupana ehay wakuat kuap haria mesu­wa­ro­tiaria tukup­te'en ma'ato yt ta'a­tu­mohey teran i haria hap watikuap.
ROM 10:17 I'ewyte Tupana Mipo­'oro Aheha­kye­ra'at hamuat moherep hap kaipyi yn ni miit'in te'e­ro­py­hu'at Iesui mohey haria wo.
ROM 10:18 Ui'y­wania Iuteuria tikuap kahato mesuwat sehay wakuat aikotã morekuat Tawi to'e tuwepy hawe tomiwan me hap ewy — Ta'i ui'y­wania ti Tupana ehay kuap kahato haria e. Aikope aikope ta'a­tue­wyry mesuwat yi wato hap ok tã note aru ta'a­tu­mo­herep kahato Tupana ehay itotiaria pe e. Ui'y­wania Iuteuria tukup­te'en wuat'i etama pe Tupana ehay moherep hamo e tomiwan me.
ROM 10:19 Pyno uru'y­wania Iuteuria tikuap ta'yn sa'a­wy­'ite mesuwat sehay wakuat e. Mekewat urue'a­se'i pot Isareu emiariru ko'i ikuap kahato aikotã Musei to'e wuat'i e'yianmete hap ta'a­tukuap. Mio tã to'e Tupana uruepe Isareu emiariru ko'i pe — Meiũran aru wẽtup ywania tukup­te'en uimohey haria wo e. Mekewat e'at pe mi'iria yt nakuaria i ywania eiwa­nẽtup hawiat tukup­te'en pytkai uheropat kahato haria e. Uimie­ha­kye­ra'at ko'i wo tukup­te'en kahato mi'iria e. Mi'iria ete aru eha'y­wywi kahato e Tupana sa'a­wy'i uru'y­wania pe irania'in ywania yt iwe'eg nakaria i ewy te iro pote e. Ta'i mi'iria uimie­ha­kye­ra'at ko'i tukup­te'en irane ui'y­wania sese ewywuaria e. Mi'i atunug hawyi eweipy­hu'at ipy'ahak mi'i haria etiat rakaria wo uhehay i'atuehay wo pote e.
ROM 10:20 Musei iku'uro hawyi Tupana ehay moherep hat Isaia put'ok'e mekewat Musei ewy te ihay — Mio tã e Tupana uhepe e meiũran ti aru irania'in ywania yt uikat i haria uipuẽti ra'yn aikope aikope tukup­te'en yi wato hap ok tã e Tupana uhepe e. I'ewyte — Aremo­herep irania'in ywania pe — Yt karãpe i eremo­herep uruepe e haria pe e Tupana Isaia miwan me.
ROM 10:21 Ma'ato ui'y­wania Iuteuria kape mekewat Isareu emiariru ko'i pe mio tã e Tupana at ka'ap — Eweĩ'ẽ o uhowawi woro­ho­'o'ok­hytsat reran are at ka'ap Aparãu emiariru emiariru ko'i pe ma'ato — Yt yt yt i'atu'e uhowawi e. Yt uruiky­'esat i yt kat i emiky­'esat urutunug neran ewei'e uhepe Isareu ywania e Tupana sa'a­wy'i Isaia miwan me. Ta'i aikaykay kahato tuwe­wawi Tupana yt nakuaria aito pytkai. Uito Pauru.
ROM 11:1 Mi'i pote apo'are ehepe sio Tupana Iuteuria ky'e te sio yt sio toi'a­tu­pugha sio waure'e ra'yn Iuteuria ywania kai temiit'in kai sio yt i te are'e. Yt rat pãi toi'a­tu­ky'e kahato te mi'iria e. Uito ti mekewat Iuteuria ywania kaipywiat hat pote atikuap kahato uruky'e hap pãi. Atikuap kahato Tupana yt uruwaure hin i te hap. Uha'a­se'i pot ti mekewat Tupana mohey hat akag sese Aparãu are. Pywo ti rat uha'a­se'i Pesamĩ ti Aparãu emiariru toĩne'en sa'a­wy'i.
ROM 11:2 Yt karãpe i aru Tupana ti'atoiat temiit'in sese Iuteuria ywania e. Katu­pono toi'airo mi'iria to'y­wania wo wuat'i e'yianmete. Sa'a­wy'i Tupana ehay moherep hat Eria to'e Tupana pe tomiwan me — Uru'y­wania yt naku i kahato e. Ta'a­tunug sa'ag kahato yne emiky­'esat ko'i ete e.
ROM 11:3 Ta'a­tu­'uka kahato emipo­'oro ehay moherep hanuaria e. Yt naku i aikope aikope emiit'in tunug emõtypot hamuat aikope aikope ta'a­tuwuk ta'a­tu­hũria emõtypot hamo mi'iria kape tõ'ẽ kahato uru'y­wania wãita­'a­tu'e hamo e. Ta'a­tu­pugha emõtypot yat ko'i e. Ta'a­tu­'a­porok yne emõtypot yat e. Ta'a­tu­moma teran yne emiit emipo­'oro ko'i e. Pywo ti rat Tupana mesup ta'yn uikat kahato ui'auka hamo e tomiwan me. Uito yn ni emiit sese mesu­wa­rote areĩne'en Iuteuria py'a­setpe pote e Eria sa'a­wy'i Tupana pe.
ROM 11:4 Mi'i hawyi Tupana tiwesat — Eria e yt en yn i uimõ­typot hat itote katu­pono uhemiit'in sese uhehay moherep haria tukup­te'en ne 7000 miit itote uimõ­typot haria sok yt karãpiat i tupa­naria ne'i mõtypot haria mi'iria e. Yt ta'a­tu­mõ­typot hin i mekewat tupana iã'ãkap Paeu e hap het rakat. Yt en yn hin i uimõ­typot hat topy­hu'at itote e Tupana Eria pe.
ROM 11:5 Mi'i hap ewy Tupana to'e mesup Isareu ywania etiat uruepe yt i'atu i wen i'ewyte Iesui mohey haria ma'ato tukup­te'en ne Iuteuria ywania uimi­'ai­roria e Tupana uruepe katu­pono aho'oekyi ra'yn uhowawi mi'i ywania kaipyi ipat'ok hit ihaky­'e'i uhepiat rakaria katu­pono paa'are hawyi aho'oekyi heĩpyt uhowawi e Tupana.
ROM 11:6 Aho'o­'airo mi'iria uhepiat i'atu­ky'e hap ete katu­pono i'atue­ha­ky­'e'i uhepiat hap kaipyi atunug mi'iria uhemiit'in no e. Yt i'atu­minug wakuap upi hin i ati'a­tu­'airo mi'iria e. Uiwepyi ati'a­tu­'airo mi'iria uipy'a pyi e Tupana. Mi'i hap ewy koitywy Tupana ai'airo yt aiminug wakuap upi hin i ma'ato tuwepyi ai'airo haty wo aiky'e haype yt kat i i watunug wakuap pytkai aheha­ky­'e'i pote. Ma'ato wakuaria aito hawyi ahewaku hap upi aiky'e wato'e pote mi'i ti yt pywo pe i katu­pono watoĩ­ne'en tewa­nĩkap mo turan hap e'at pe aiky'e.
ROM 11:7 Pyno Aito Tupana mohey haria wato­py­hu'at aiky'e hap kaipyi hawyi Tupana mowa­kuaria watoĩ­ne'en. Koitywy aimikuap mu'ap Tupana kapiat Iuteuria ywania tikat kahato. Isareu ywania tiky­'esat kahato Tupana piat — Waku eipe e hap ma'ato mi'iria yt ipuẽti i katu­pono te'e­ru­wepyi ta'a­tunug Tupana kapiat yt mu'ap i. Mi'i pytkai Tupana to'e kahato i'atuepe — Uha'yru mohey hap upi ro uipuẽti e ma'ato yt i'atu'e Tupana ihay at ka'ap pytkai. Meiũran te'e­ru­we­wau­rehik ta'yn ma'ato kurin kurin ipuẽti ui'y­wania Iuteuria kawiat. Ta'i imi'ai­roria yn ipuẽti.
ROM 11:8 Aikotã to'e miwan me hap ewy — Yt yt i'atu'e hawyi — Pyno waku eweikup­te'en yt iwe'eg i rakaria wo waku eweikup­te'en ipy'a heg nakaria wo e. Pyno eweikup­te'en yt ikuap kuap takaria wo i e Tupana Iuteuria pe. Mi'i pote mesup e'at pe e — Iuteuria yt ikuap kuap i pywuat sehay Iesui ehay moherep haria henoi i'atue­hamo pytkai yt put'ok'e i i'atu­py'a pe. Tupana ehay miwan miat te'e­ra­'a­kasa hawyi teke i'atueha py pe ma'ato yt put'ok'e i i'atu­py'a pe.
ROM 11:9 Yt ta'a­tu­mohey teran i rakaria Iuteuria aikotã miwan me morekuat Tawi to'e hap ewy — Tupana uru'y­wania yt emohey teran i pote waku etunug iheg me i'atuenuk hap ewamiri kape hap ewy waku i'atuenuk hap topy­hu'at i'atu­'auka hap e. Waku i'atu­pu'ap tote ehewãhik yi ka'a i'atu'at hamo i'atu­minug sa'ag upi i'atu­'a­piheg hamo e Tawi.
ROM 11:10 Waku eti'a­tueha py sasep mi'iria yt emohey teran i haria pote e. Waku eti'a­tue­waure ka'a hik i'atu­wo­'o­kak'i hap pupi e. Waku myk puo yne mi'iria yt emohey teran hin i pote e morekuat Tawi Tupana pe tuwepy hawe.
ROM 11:11 Uru'y­wania Iuteuria i'aparap kahato Tupana kapiat mu'ap kuap hap ete aikotã miit ta'at yi hot pe hap ewy yt ihapytig i pote e. Ma'ato mi'i pytkai atu'a­parap pytkai Tupana yt ti'a­tu­waure hin i — Atomog aru mi'iria e. Yt karãpe i aru woro­ho­'o­'atoiat ui'atoiat eipe pytkai e. Yt eweiky­'esat i eheha­kye­ra'at uhepiat hap pote atum irania'in ywania yi totiaria pe. Mi'i atunug hawyi irania'in ywania etiat iha'y­wywi rakaria wo eweikup­te'en katu­pono uimie­ha­kye­ra'at ko'i wo tukup­te'en mi'iria uimẽ­pyt'in ko'i wo e Tupana Iuteuria pe.
ROM 11:12 Uru'y­wania Tupana piat ta'a­tu­poi­tyro hap pun haria ta'a­tu­'a­parap kahato Tupana imiium ta'a­tue­ha­kye­ra'at hamuat ete. Yt ta'a­tu­ky­'esat i hawyi ihaky­'e'i rakaria ewy tukup­te'en mesuwe. Katu­pono pya kahato Tupana kai tukup­te'en. Uru'y­wania mipun irania'in ywania ewy topy­hu'at. Mi'i hawyi koitywy irania'in ywania Tupana mipoi­tyro wo tukup­te'en aikotã Tupana Pã'ãu kuap haria wo. Ta'a­tu­mohey Tupana hawyi Tupana mihu­'i­hu'i ko'i wo tukup­te'en. Ma'ato meiũran aru Iuteuria ywania urutoria yne Iesui mohey haria wo urutu­kup­te'en aru imi'ai­roria ok tã aikotã irania'in ywania mesuwat yi tote wẽtup sok yn watu­kup­te'en hap ewy. Mi'i hap e'at pe Tupana mipoi­tyro ko'i yne miit'in. Mi'i pote mesuwat yi yne Tupana mipoi­tyro wo topy­hu'at. Waku kahato mi'i hap e'at topy­hu'at waku sakpo e.
ROM 11:13 Pyno koitywy uhehay teran eiwywo irania'in ywania yt uru'y­wania i yt Iuteuria i ko'i kape uhehay teran. Sa'a­wy'i Tupana uikaykay eimu'e hamo tehay moherep ehepiat hamo ui'airo Tupana. Yt Iuteuria i pe Tupana ehay moherep hat kahato uito ma'ato Tupana ehay moherep wẽtup ywania piat hat uito. Yt aremõti hin i mesuwat motpap nug hamo. Waku kahato atipuẽti ui'airo hap.
ROM 11:14 Yt atiwaure i uru'y­wania ma'ato ahã'ãg kahato i'atue­ha­kye­ra'at hap nug hamo. Ui'y­wania teha'at uiminug irania'in ywania mu'e hap kape hawyi atiky­'esat i'atue­sy'at rakaria ewy te'e­ro­py­hu'at i'atu­py'a piat Iesui mohey hap ky'ewi yt kat i Tupana poityro hap i'atukai pote. Ta'a­tukuap irania'in poityro hap hawyi atiky­'esat ta'a­tukat kahato Iuteuria poityro hap i'atue­ha­'y­wywi hap kaipyi. Mi'i hap atiky­'esat kahato.
ROM 11:15 Sa'a­wy'i — Yt uruiky­'esat i En Urupo­rekuat no i'atu'e Iesui pe. Mi'i pote Tupana tuwe­morem i'atue­wawi uru'y­wania pyi hawyi. — Pyno yt ta'a­tu­ky­'esat i En pote uruiky­'esat En Urupo­rekuat no i'atu'e irania'in ywania Iesui pe. Mi'i pote koitywy irania'in ywania tukup­te'en Tupana wy oktia wo kahato ma'ato meiũran aru uru'y­wania te'e­ru­we­morem i ra'yn — Uruiky­'esat En Urupo­rekuat no i'atu'e aru Iesui pe hawyi — Pyno uiwa­nuaria eipe e Tupana aru i'atuepe uiwa­nuaria i ra'yn eipe e. I'atupap i ra'yn Iesui upi uru'y­wania. Mekewat e'at pe aru wakuap kahato topy­hu'at mesu­wa­rote aikotã gu'uro pyi woro­he­nõtem hap waku kahato hap ewy e.
ROM 11:16 Pyno ahenoi teran iã'ãkap ewy uru'y­wania ete. Woro­ho'oium aimikoi mani Tupana kape pote aimiium kaipyi topy­hu'at Tupana wano u'i. Mi'i pote Aparãu topy­hu'at aimi­so'oium aimikoi aiko pywiat ewy. Mi'i hawyi Iuteuria topy­hu'at u'i mani kaipywiat ewy. Pyno wẽtup sehay iã'ãkap wuo ahenoi teran ehepe. Karãpe watikoi kat ypia i'yp watum Tupana kape pote mi'i hawyi haga ete topy­hu'at Tupana wat yne. I'yp hapo topy­hu'at Aparãu ewy miaria urue'yian­miaria uru'y­wania Iuteuria tukup­te'en haga ewy.
ROM 11:17 Uruetama puo toĩne'en Uriweira yp ko'i urumikoi wakuaria kahato i'ewyte toĩne'en Uriweira yp ga'apy piat nop sese rakaria Uriweira ran uruto'e. Mi'i yp ewywuat kahato eiperia Humanu ywania. Uruto Iuteuria mekewat Uriweira yp sese ewywuaria. Ha'a­wy­tepyi uruikuap Tupana sese ma'ato eiperia Humanu ywania yne tupa­naria mohey haria eipe. Sa'a­wy­'i­tewuat tupana iã'ãkap mohey haria mesuwat yi totiat yt Iuteuria i ko'i tukup­te'en aikotã mekewat Uriweira ran yp nop takat ewy ma'ato uruto Iuteuria yt iky'esat i Iesui Urupo­rekuat no hawyi Uriweira yp sese yp pik'e hap ewy yp tek hap ewy urutu­kup­te'en. Mi'i hawyi Tupana tipag irania'in ywania itote haga howapy piat ewy. Mi'i hawyi sat'e koitywy haat kahato irania'in ywania kat pote i'ypy Iuteuria ywania kaipyi haga ewy irania'in ywania.
ROM 11:18 Yt etimohit rei'o ehay wo Iuteuria ywania. Yt ereĩne'en nei'o haiwot i'atuetiat rakano katu­pono hatek hap ewy Uriweira yp tek hap ewy tukup­te'en. Yt ere'e tei'o — Uruwehay pyi urutu­wenug uruto po'og Iuteuria kai yt ewei'e tei'o. Mio tã ewei'e pote yt eiwe'eg hin i kat pote haga yt haat kuap i yt i'ypy'a ete i pote katu­pono yt tuwe­mosat kuap i yt i'ypy'a i pote. Yt naku i haga to'e i'ypy kape — Yt naku i en e mi'i hap ewy yt wato'e kuap i Iuteuria ywania pe — Yt kat hamo i eipe katu­pono mi'iria tukup­te'en hapo sese ewywuat i'ypy ewy ma'ato irania'in ga'apy piat Uriweira ypia nop takaria ewy.
ROM 11:19 Ma'ato irania'in te'e­ro'e — Toitek haga sa'ag nakat mi'i hawyi wati­pehik po'og waku rakat haga totopag itote i'atu'e sa'ag. Mi'i hap ewy urutu­kup­te'en. Toihep Iuteuria haga pot'i ewy hawyi uruto urupehik itote waku po'og nakaria uruto pote i'atu'e sa'ag yt pywo pe hin i i'atu'e irania'in.
ROM 11:20 Pywo ti toihep Iuteuria aikotã haga watihep hap ewy ma'ato yt i'atu­minug sa'ag myi i toihep ma'ato yt ta'a­tu­mohey i Tosa­'yru pote. Mi'i hawyi totopag eipe aikotã haga wati­pehik hap ewy Ha'yru mohey haria eipe pote. Yt naku i eiwa­nẽtup hawe — Uruto po'og Iuteuria kai ewei'e eiwa­nẽtup hawe. Waku po'og paa'e­wei'e — Tupana kat pote uru'airo ewanuat po'og waku wato'e. Ta'i Ha'yru mohey haria aito pote uru'airo waku wato'e yn kat pote yt ahewaku hap upi i aheha­kye­ra'at.
ROM 11:21 Ta'i yt tomohey po'og i hap upi toihep Iuteuria haga sese ikahu rakat pytkai toihep aikotã Uriweira yp haga sese rakat ewywuat. Pyno eipe Uriweira yp aga ran kahato ewywuat eweikup­te'en. Pyno Iuteuria ewy yt eweimohey po'og i pote eipe i'ewyte eihep.
ROM 11:22 Iwese kahato Tupana ma'ato towese pytkai ai'a­piheg kuap mekewat to'y­wania sese Iuteuria yt tomohey po'og i ra'yn hawyi toi'a­tuhep toi'a­tu­'a­piheg na'yn. Mi'i tupono eipe yt to'y­wania sese i Tosa­'yru mohey haria pote topy­hu'at iwese rakano ehete ma'ato meiũran eweipun iwese hap pote yt eweimohey i aikotã tutunug to'y­wania hap ewy aikotã haga watihep hap ewy te toihep eipe e.
ROM 11:23 Ma'ato meiũran aru to'y­wania Iuteuria Ha'yru mohey haria tukup­te'en mote mi'i hawyi tohytmoi i ra'yn mekewat aikotã tomihep hap tote te Iuteu ywania tomohey sese i ra'yn hawyi. Ta'i Tupana ti'a­tu­pehik kuap kahato Iuteu ywania i ra'yn to'yp etiat ne'i pote. Eipe yt Iuteuria hin i.
ROM 11:24 Eipe ti Huma­nu'in ko'i eipe wẽtup pusu kuap haria. Eipe eweikup­te'en aikotã Uriweira yp haiwot rakat ewywuat aikotã haga Uriweira ran ewy. Aikotã imihep haga hawyi totopag wẽtup yp tote tomihep saipe­piano hap ewywuat. Toihep eipe haga ran hawyi toipehik Uriweira yp sese wakuat ete ra'yn hap ewy mekewat Uriweira he rakat hewo kahato aimi'u wuat rakat ewy Iuteuria tukup­te'en. Niatpo kahato watopag wẽtup yp kaipyi haga hap wẽtup yp kape. Watunug kuap i ma'ato niatpo kahato. Yt niatpo hin i iwat haga te watopag hap tote wẽtup yp kaipywiat yn na'yn haga i'ewyte hapo pote yt niatpo i mi'i ewywuat eihep eipe hawyi totopag Iuteuria towat to'yp ete sese ra'yn hap ewy yt niatpo hin i totopag.
ROM 11:25 Koitywy ehepe irania'in ywania pe atimo­herep teran Tupana ehay ehepe yt uwe mikuap i te hap. Mi'i eweikuap hawyi yt ewei'e kuap i — Uruto po'og we'eg haria ywania Iuteuria kawiat e hap. Koitywy Iuteuria yt timohey kahato i Tupana Mipo­'oro Aipo­rekuat nuat Iesui i'atu­py'a heg kahato rakaria pote ma'ato meiũran aru paa'i­'a­tu'e hawyi ta'a­tu­ky­'esat kahato imohey hap. Koitywy yt ta'a­tu­ky­'esat i pote — Pyno ati'a­tue­ha­kye­ra'at irania'in ywania ta'a­tu­mohey kahato Uimi­po­'oro Iesui I'atu­po­rekuat nuat pote e Tupana. Meiũran aru yt uwe i eipe Tupana Mipo­'oro Aipo­rekuat nuat mohey haria hawyi yt uwe i po'og iky'esat hawyi mekewat e'at pe ti uimi­'ai­roria Iuteuria i'atupap i ra'yn imohey hap ete mi'i hap e'at pe yt niatpo hin i tuwe­hyt'ok Uha'yru mohey hawe e. Katu­pono mi'iria tukup­te'en Uriweira yp haga sese ko'i ewy e Tupana ahepe.
ROM 11:26 Ta'i Iuteu ywania aru topy­hu'at Iesui mohey haria aikotã sa'a­wy'i Tupana ehay moherep haria te'e­ro'e ta'a­tu­miwan me hap ewy topy­hu'at aru. Mio tã e Tupana — Meiũran aru atipo­'oro Iuteuria ehakye­ra'at hat sese e. Tuwẽtem aru tawa Ieru­sarẽi yity'ok Siãu tote pyi. Tuwe­mo­herep yity'ok Siãu tote hawyi toi'a­tuhep ta'yn yne i'atu­minug sa'ag ko'i Iuteuria wanuat. Yne i'atu­minug ko'i yt Tupana ewywuat ko'i i toimo­weityk yne. Mekewat ase'i Iako emiariru emiariru ko'i iminug sa'ag ko'i toipo­re­ra'at yne i'atue­ha­kye­ra'at hamuat e Tupana.
ROM 11:27 Atunug aru sehay i'atu­wywo waku ui'e hap aikotã are'e atunug aru ui'e hap ewy. Mekewat e'at ati'a­tu­mo­weityk yne i'atu­minug uhetiat i'atu­minug sa'ag ko'i hap mekewat e'at pe e Tupana temiit Ieremia miwan me 31.31 pe.
ROM 11:28 Koitywy Iuteuria tunug na'yn Tupana ta'a­tue­wa­nĩkap wo katu­pono ta'a­tupun ne'en ne'i yne mekewat sehay wakuat Iesui etiat. Mi'i pote yt ati'a­tue­ha­kye­ra'at kuap i mi'iria e Tupana mesup i'atuepe. Ma'ato yt eweiwaure tei'o Tupana Mipo­'oro Aipo­rekuat nuat mi'iria ewy. Koitywy tukup­te'en ne Tupana e hap sa'a­wy­'iwuat Aparãu Isaki Iako kapiat hap ewy. Mi'i pote to'y­wania towy­ria'in ne mi'iria tukup­te'en Tupana mi'ai­roria. Koitywy eweipy­hu'at ra'yn Tupana wy ko'i aikotã Iako kape hap ewy. Ma'ato to'y­wania iwyria'in ne mi'iria tukup­te'en ne.
ROM 11:29 Aikotã to'e sa'a­wy'i tomohey sa'a­wy'i haria pe mekewat Tupana ehay moherep haria sa'a­wy'i sese rakaria Aparãu Isaki hawyi ase'i Irau'in me — Meiũran aru atunug irania'in ywania torania uimẽ­pyt'in ko'i wo e. Mi'i hap ewy karãpe Tupana to'e — Meiũran aru atunug to'e mi'i pote tutunug. Yt uwe i wãi'e kuap Tupana kape. Uwe toiky­'esat topoi­tyro hap ewy Tupana mi'ai­roria te'e­ro­py­hu'at ra'yn. Mio tã e Tupana — Woro­ho­'o­poi­tyro uiwepyi e. Ati'a­tu­poi­tyro miit'in yne uimi­ky­'esat ewy e. Mi'i pote tutunug tuwe­mi­ky­'esat ewy. Yt uwe i wãi'e kuap Tupana kape.
ROM 11:30 Pyno eipe wẽtup ywania ko'i yt Iuteuria ywania i. Sa'a­wy'i yt kat i Tupana miky­'esat nug haria eipe ma'ato mesup Tupana mi'a­tu­ky'e kahato wo eweikup­te'en. Pyno yt woro­ho­'o­'a­piheg hin i e ehepe katu­pono uimohey haria mesup. Atum ne'en ne'i ehepe Iuteuria poityro hap ko'i katu­pono Iuteuria yt i'atupap i uimi­ky­'esat nug hap ete e Tupana mesup ehepe yt Iuteuria i pe.
ROM 11:31 Pyno koitywy Iuteuria yt te'e­ro­py­hu'at i Tupana kai ma'ato tut aru wẽtup e'at hawyi paa'i­'a­tu'e. Mi'i hap e'at pe tukup­te'en haky­'e'i ko'i ei'ewy tukup­te'en aru Iuteuria. Meiũran — Urueha­kye­ra'at Tupana i'atu'e haria ei'ewy te'e­ro­py­hu'at.
ROM 11:32 Pyno Tupana to'e wuat'i ywania pe — Eipe torania yt uimi­ky­'esat ko'i nug haria i e mi'i pote ho'o­wasat rakaria sese wo eweikup­te'en eiminug sa'ag py'a­setpe eweikup­te'en. Eheko sa'ag po pe eweikup­te'en iheg me hap ewy. Mi'i tã e Tupana pytkai — Meiũran wuare wo areĩne'en eiminug sa'ag ko'i kai e. Woro­ho­'o­ky'e haype Uha'yru mohey haria e wuat'i ywania pe.
ROM 11:33 Mi'i hawyi mio tã to'e sa'a­wy'i Tupana ehay moherep hat Isaia — Wakuat wakuat kahato tig Tupana. Wakuat sese kahato En. Urutu­wa­nẽtup kahato hawyi yt uruikuap hin i ekuap hap ko'i ewe'eg hap ko'i e. Kurin kurin uruikuap ewakuap sese hap kaipyi ewato hap sese hap ete e. Ewe'eg hap iwato kahato. Ekuap hap po'og wuat'i kai e. Yt uwe i uruto aikotã etunug hap ikuap kat pote etunug aikope aikope ewyry hap upi e. Kat som etunug yt uwe i uruto uruikuap yt uruikuap kuap i kahato e.
ROM 11:34 Aikotã to'e miwan me — Uwe uwe mesuwat yi tote Tupana kuap hat topy­hu'at e. Yt uwe i mesuwat yi tote Tupana nãpin kuap hat yt uwe i pãi e Isaia miwan me 40.13 pe.
ROM 11:35 Ta'i Tupana yt ahepiat wete­weru hat i. Yt watunug kuap i Tupana aimiium kaipywiat wete­weru hano.
ROM 11:36 Katu­pono aikope aikope toĩne'en kat ko'i kat ko'i sio heremo sio yt Tupana tunug yne mi'i yt kat kawiat i tutunug. Tuwe­kaipyi tutunug yne yne. I'ewyte yne mesuwat yi tote toĩne'en katu­pono Tupana imoieĩne'en pote. Tesaika hap kaipyi tutunug yne tomõ­typot hamuat yne yne iminug ko'i. Mi'i pote — Urutu­wehum kahato ewawi Tupana uruto'e. Waku kahato En waku kahato En uruto'e epe Tupana. Mio tã wato'e Tupana pe are uito Pauru.
ROM 12:1 Uheywyt'in uheyke­'et'in uheinyt'in yt ahewaku hin pytkai i Tupana aiky'e — Yt ati'a­tu­'a­piheg teran i mi'iria e tuwepe ahetiat pe. Tupana mi'a­tu­ky'e eipe pote ahẽtup ehepe uheyke­'et'in uheinyt'in Iesui mohey haria Tupana eiky'e pote ewetum no eipiit tope eweikup­te'en kahato imõtypot haria wo. Aikotã sa'a­wy­'i­wuaria ti'auka ta'a­tu­hũria Tupana mõtypot hamo hap ewy waku ewetum eipiit Tupana kape Tupana potpap nug hamo. Waku eheĩne'en hap imiky­'esat ewy imõtypot hap yn topy­hu'at. Waku eipiit pyi tuwẽtem sehay Tupana mõtypot hap yn Tupana ewaku hap ok tã aikotã waku watunug hap ewy. Aika­'iwat wakuat kahato pote waku wato­py­hu'at heropat sese haria wo.
ROM 12:2 Waku watum aipiit Tupana kape. Yt naku i watunug ne aikotã mesu­wa­rotiat Tupana yt kuap i haria wanẽtup sa'ag hap ewy ainãpin sa'ag ewywuat. Yt naku i watuwat i'atuehay upi kat ko'i kat ko'i sa'ag nug hamo. Waku po'og wato'e Tupana kape — Etihep uiwa­nẽtup hap wyi mesu­wa­rotiat sa'ag wanẽtup hap hawyi uiwa­nẽtup hap etimo­pakup i ewat ewywuat. Uipy'a pe ui'akag me uipiit pe uiwa­nẽtup hawe ereĩne'en Tupana uipyt'at nug hano. Mi'i hawyi ewanẽtup hap eiam mo areĩne'en neran. Mio tã ewei'e Tupana pe pote eweikuap kuap Tupana miky­'esat ko'i kat som tutunug neran hap nug hamo. Kat som imowepit hap kat som hãpyk sese imiky­'esat ewywuat hap mio tã ewei'e Tupana pe pote.
ROM 12:3 Pyno uito Pauru Tupana uipo­'oro einãpin hamo. Tupana hegyi'at kahato hawyi uinug eimu'e hano mi'i pote woro­ho­'o­nãpin eipe. Yt naku i aiwa­nẽtup hawe — Uito po'og torania kai ai'e hap kape. Waku — Uito en wato­'o­'ewy kahato wato'e. Katu­pono aito wẽtup ok po'og imohey wẽtup ok yt ma'ato wẽtup sok yn aito pytkai. Mi'i pote yt ere'e kuap i — Uito po'og eikai hap ete.
ROM 12:4 Aipiit ete i'atu kahato ahaga ma'ato aipiit wẽtup yn toĩne'en. Mi'i hawyi ahaga ko'i yt to'o­'ewy hin i aipiit miky­'esat motpap nug hap ete.
ROM 12:5 Mi'i hap ewy kahato Iesui mohey haria ko'i. I'atu kahato aitoria yt aiwo­'o­'ewy i ma'ato wẽtup piit ewywuat yn wato­py­hu'at. Iesui Tupana Mipo­'oro Aipo­rekuat nuat piit ewywuat wato­py­hu'at mesuwe aikotã aipiit ahaga wywo to'osat to'osat hap yt to'o­'ewy hin i pytkai. Mi'i hap ewy wato­'osat kahato Iesui mohey haria ko'i Iesui piit ewy wẽtup piit ewy watoĩ­ne'en.
ROM 12:6 Pyno wẽtup ok imohey hat pe Tupana tum tesaika hap topotpap nug hamuat ma'ato wẽtup ok pe wẽtup sepap hap tutum. Yt to'o­'ewy hin i tutum ahepe aimikuap ko'i aimi­sepap nug hap ko'i. Ma'ato Tupana tum yne mi'i ko'i ahepe tegyi'at pote haype. Tutum ne'en ne'i yt kat sa'up i. Wẽtup ok pe tutum tesaika hap tehay moherep hamuat. Tutum ahepe pote pyno waku wati­mo­herep ihay imohey hap mywo imohey hap ok tã.
ROM 12:7 Ma'ato tutum ahepe tesaika hap teropat hap miit'in powyro hamo pote waku watu­we­potpap kahato heropat nug hap ete. Ma'ato tutum ahepe miit'in mu'e kuap hap mi'i pote waku wati­'a­tu­mu'e miit'in hesaika hap wywo.
ROM 12:8 Ma'ato tutum ahepe tesaika hap miit'in mowepit hamuat miit'in arot'i potiat i'atuhep hamuat mi'i pote eti'a­tu­mo­wepit ro hatek takaria ho'opot haria. Ma'ato tutum ahepe tegyi'at hap miit'in powyro hamuat aimiium kaipyi pote waku wato­py­hu'at hegyi'at kahato mi'i hap wywo. Tupana ainug miit'in akag wo pote waku ahemiit'in ky'e hap wywo wati­po­wyro hãpyk takat ewy. Tupana ainug miit'in powyro hano pote waku watum kat ko'i kat ko'i satek takaria pe i'atu­ky'e hap wywo.
ROM 12:9 Karãpe wati­'a­tu­ky'e miit'in pote waku wati­'a­tu­ky'e kahato aipy'a pyi yt kat aheso hap wywo i. Waku wato­py­hu'at haiwot rakat ewy ma'ato yt miit'in ete i. Waku ahaiwot rakaria ewy wato­py­hu'at aiminug sa'ag hap ko'i ete. Ma'ato waku wati­ky­'esat kahato waku nug hap ko'i. Yne wakuat waku watat ma'ato yt naku i hap waku watipun.
ROM 12:10 Waku wo'o­ky'e haria wo watoĩ­ne'en aikotã wẽtup ywania to'o­ky'e kahato hap ewy. Aikotã aheinyt'in aheywyt'in aheyke­'et'in ai'y­wot'in aity'in to'o­ky'e kahato hap ewy aiwese hap wywo. Waku wato­'o­ky'e katu­pono Tupana Mipo­'oro mohey haria aito. Iesui eropat haria aito mi'i pote waku watikat kahato aikotã waku wato­'o­mõ­typot hamuat. Waku wato'e aiwa­nẽtup hawe — En ni waku. Mi'i ti waku wato'e.
ROM 12:11 Yt iperup takaria ewy i waku wato­py­hu'at. Waku watu­we­potpap at hakup wywo. Yt ereĩne'en nei'o sẽtup e hano. Aika­'iwat eropat hat sese wo waku watoĩ­ne'en. Waku aipy'a pyi Aika­'iwat mowepit hap yn aiwa­nẽtup hawe ipotpap nug hap ete.
ROM 12:12 Tupana tunug aru to'e hap ewy pãi an wato'e. Mio tã wato'e pote aimo­wepit hap topy­hu'at aikotã Tupana wepit hap ewy. Wati­mohey pote put'ok'e ahete ho'opot hap niatpo kahato hap. Mi'i hawyi waku watoĩ­ne'en mot'i aiperup i hap wywo. Waku wahe­katup tokosap aru hap — Yt watoiat hin i imohey hap ai'e hap wywo. Mi'i pytkai waku ahehay Tupana wywo at ka'ap aikope aikope ahewyry hap upi.
ROM 12:13 Waku hegyi'at rakaria wo watoĩ­ne'en ahekat wywo. Waku wati­mõ'ẽ ahekat irania'in me hatek takaria pe — Iesui mohey haria eweikup­te'en uruwywo ewei'e irania'in yt aimikuap i ko'i pe pytkai. Iesui mohey haria mi'iria pote waku mio tã wato'e õ'ẽ haria yt uwe mikuap i ko'i pe.
ROM 12:14 Karãpe wẽtup ok ihay sa'ag ahete pote waku wahẽtup Tupana ewawi — Tupana etipoi­tyro ro mesuwat uhewa­nĩkap uinug neran ne tewa­nĩkap wuat hat wato'e. Ta'i yt atiky­'esat i i'apiheg hap wato'e Tupana pe. Ma'ato yt naku i haiwot rakaria wo wato­py­hu'at ahaty'i haty'i haria ete. Yt naku i wate­ro­mo­pusu mi'iria yt naku i iminug upi. Yt naku i watu­we­poepyk aimo­sa­ty'i saty'i haria.
ROM 12:15 Karãpe wẽtup ok put'ok'e ahete iwepit kahato pote waku watu­we­mo­wepit iwywo. Ma'ato karãpe wẽtup ok put'ok'e ahete tuwak ta'a­rot'i hap wywo mi'i pote waku watu­we­mowak iwywo.
ROM 12:16 Yt naku i ipat'ok ete aiwese ipat'ok ete yt. Karãpe put'ok'e ahete motpap hap yt aimi­ky­'esat ewy i miit'in emiit minug hap ewy pote waku watunug aimi­sakup hap wywo i'atu­'akag wo wato­py­hu'at pytkai. — Uito po'og mote yt naku i uipotpap aikotã miit emiit ewy yt naku i wato'e.
ROM 12:17 Karãpe wẽtup ok tunug sa'ag kahato ehete yt eweipoepyk tei'o. Yt etunug nei'o mi'i hat ete aikotã tutunug sa'ag hap ewy te ma'ato etipoepyk waku puo wakuap mo. Waku watunug yne yne yt kat i miit'in ma'at hap aikai yt kat i aheso hap wywo. Mi'i hawyi miit'in tikuap ta'yn yt kat i ta'a­tu­ma'at hap aikai.
ROM 12:18 Waku wahã'ãg yne ahesaika hap ko'i wo miit'in iperup i kahato iwese kahato rakano irania'in yt i'atu­wese i rakaria wo tukup­te'en pytkai. Waku aito iwese rakano. Yt naku i watu­'uka irania'in wywo sehay wo ma'ato wo'o­ky'e hap yn waku watikat.
ROM 12:19 Yt naku i wati­poepyk uhetiat yt naku i nug haria. Uiwy­ria'in wẽtup ok aima'at pote yt naku i wato­py­hu'at aipy­'ahak. Po'og waku wahenoi Tupana kape mi'i pote Tupana ipy'ahak aika­wiano hamo katu­pono mio tã e Tupana miwan me — Ati'a­tu­ka­wiano yne eipe. Eipoepyk hat uito e Tupana miwan me.
ROM 12:20 Yt naku i watu­we­poepyk uiwy­ria'in. Tupana yt tiky­'esat i kat pote to'e miwan me — Ewanĩkap hesy'at pote ewei'a­tupoi o mi'iria e. I'atu­we­sa­po­'utui pote etum o sapo hy i'atuepe. Mi'i etunug pote tuwe­mõti topy­'ahak hap ete kat pote ewaku hap etunug pote aikotã na'ak hawywiat ahe'yni ywyt'ok­pype aria sapuẽ hap ewy. Mi'i hawyi imowepit hap topy­hu'at i'ewyte tuwe­mõti tominug sa'ag ehetiat hap pupi.
ROM 12:21 Karãpe yt naku i hap ahã'ãg kahato karãpe ahatek hap ai'akit teran pote yt naku i watoiat imohey hap. Waku watu­'uka kahato ai'akit hap akit hamo. Waku wati­'akit sa'ag wakuap nug hamo kat pote wakuap nug hap po'og hesaika sa'ag ko'i kai are uito Pauru.
ROM 13:1 Karãpe more­kuaria to'e ahepe — Etunug no wakuap e pote waku watunug i'e hap ewy Iesui mohey haria aito pote. Waku watuwat i'atuehay wakuap upi are katu­pono yne aika­'i­waria Tupana mipag ko'i. Yne tu'i­saria i'ewyte Tupana mi'airo ko'i tukup­te'en. Ta'i aheka­pitãu ko'i yne ai'akag ko'i more­kuaria ko'i ahetu­'i­saria aika­'i­waria Tupana mi'airo ko'i tukup­te'en ai'a­tu­'a­pykok hamo. — Ta'i uhehay kaipyi ti yne more­kuaria tukup­te'en atipy pe i'ewyte yi tote e Tupana ahepe.
ROM 13:2 Yt naku i watu­'uka more­kuaria ainãpin waku nug hap ete. Waku aiwe'eg wo o katu­pono yt naku i watu­'uka more­kuaria airo hat Tupana ete are. Watu­'uka mi'iria ainãpin waku hap ete pote Tupana mi'a­piheg wuanuaria wo wato­py­hu'at.
ROM 13:3 Ma'ato wakuap watunug ai'akag ko'i aipo­'oro hap ewy pote yt wato­ken'ẽ hin i more­kuaria sura­ra'in mupi are katu­pono waku pe watoĩ­ne'en kahato more­kuaria wanẽtup hawe. Mi'i hawyi karãpe put'ok'e surara ahowawi hawyi yt wato­ken'ẽ hin i ipupi ma'ato aiwy ok wo toĩne'en are. Ma'ato karãpe watunug sa'ag mi'i hawyi yt naku i nug haria wo watoĩ­ne'en more­kuaria wanẽtup hawe. Mi'i pote wato­ken'ẽ kahato more­kuaria pupi i'ewyte i'atue­su­ra­ra'in miat ai'a­piheg hap pupi wato­ken'ẽ. Pyno aito Iesui mohey haria pote yt karãpe i wato­ken'ẽ more­kuaria pupi.
ROM 13:4 Tupana mi'ai­roria ko'i ti aipo­rekuat tu'i­saria ai'akag ko'i pywo ti rat Tupana ti'a­tu­'airo yne mi'iria aipo­wyro hamuat yt naku i nug hap pupiat ai'a­pykok hanuaria toi'a­tu­'airo aika­'i­waria ma'ato watunug yt naku i hap ko'i pote waku wato­ken'ẽ kahato i'atu­pupi katu­pono ai'a­piheg kuap ta'a­tue­su­ra­ra'in po wo are. Pyno tu'i­saria more­kuaria Tupana eropat haria ewywuaria tukup­te'en kahato aipy­'a­setpe are. Mi'iria ti toi'a­tupag ai'a­piheg hamuat aiminug sa'ag etiat hamo.
ROM 13:5 Pyno yt nakuap i ahete yt watunug i more­kuaria tu'i­saria ehay pote. Watunug waku pote waku pe watoĩ­ne'en sura­ra'in nywo. Mi'i pote po'og waku i'atu­wese kahato hap toĩne'en are katu­pono waku watunug hawyi yt kat i aiwe­mõti hap topy­hu'at aipy'a pe aiwa­nẽtup hawe.
ROM 13:6 I'ewyte karãpe more­kuaria ti'a­tu­ky­'esat sa'up ta'a­tu­potpap hap upi mi'i pote waku watum i'atuepe i'atu­miẽtup katu­pono i'atu­potpap kahato ai'a­pykok hawe. Mi'iria i'atu­potpap kahato Tupana miky­'esat nug hamuat ahetama ahe'yi wanĩ­kaptia pyhyp hamo. Mi'iria tiky­'esat kahato aheĩne'en hap ikahu kahato hap. Yne minug hap ete aipo­wyro kahato ai'akag ko'i mesu­wa­ro­tiaria.
ROM 13:7 — Ewei'a­tu­mõ­typot ro pyno mi'iria tu'i­saria e Tupana ahepe. More­kuaria torania pe ehegyi'at ro ehekat wo e mesup ahepe Tupana. Eweha­'upnug o eiwe­te­weru hap i'atuepiat e. Ta'a­tu­ky­'esat ta'a­tu­po­wyro hap ta'a­tu­konug hamuat ete pote waku watu­we­potpap i'atuko nug hamuat e Tupana ahepe. Waku mi'i tã watunug mi'iria mõtypot hamo are. Waku more­kuaria pe tu'i­saria pe watum sa'up katu­pono mi'iria i'atu­potpap kahato Tupana miky­'esat ewy nug hamuat aipo­wyro hap ete. Waku ipotpap takaria wo watu­kup­te'en yne aito Iesui mohey haria aito pote.
ROM 13:8 Eiwe­te­weru hap meremo eweha­'upnug e. Yt naku i ti rat aito Iesui mohey haria watu­we­te­weru ne'i. Waku wẽtup yn aiwe­te­weru hap mesu­wa­rote are mi'i ti miit'in ky'e hap kawiat. Waku wahã'ãg kahato mi'i nug hamo yne miit'in ete. Mi'i hawyi waku yt kat i aiwe­te­weru hap. Waku wuat'i miit'in ky'e haria wato­py­hu'at. Mi'i yn waku aiwe­te­weru hap sese. Miit'in ky'e kahato haria wo watoĩ­ne'en pote wakuap yn na'yn watunug i'atuepe. Mi'i hawyi Tupana miky­'esat nug haria wo wato­py­hu'at miit'in ky'e haria aito pote. Yt karãpe i wati­'a­parap miwan miat wãi'e hap ko'i ete Musei mienoi ko'i ete kat pote wati­'a­tu­ky'e kahato irania'in miit'in mote yt karãpe i wati­ma'at mi'iria.
ROM 13:9 Kat pote sa'a­wy'i yity'ok tote Tupana tiwan nu tote puretig. Mi'i hawyi tutum aha'a­se'i Musei pe — Yt ereket rei'o wẽtup ok e'aito wywo wẽtup ok ehary'i wywo e. Yt eti'auka tei'o miit e. Yt etero'ok tei'o irania'in ekat e. Yt eheso tei'o irania'in minug hap ete i'atu­ma'at hamuat. Yt eti'a­tu­ky­'esat rei'o eha wo irania'in ekat irania'in emiit e. Yt ereĩne'en nei'o eha'y­wywi irania'in ekat ete e Tupana ainãpin tomiwan me nu tote. Mi'i e hap ko'i waku watunug yne yne are. I'ewyte wẽtup ainãpin hap po'og mi'iria kai toĩne'en are. — Ewei'a­tu­ky'e ro irania'in eiwe­ky'e hap ok tã e Tupana. Mi'i e hap watunug mote yne Tupana kaipywiat ainãpin hap tomiwan miat watunug na'yn.
ROM 13:10 Kat pote wati­'a­tu­ky'e irania'in aiwe­ky'e hap ok tã mote yt karãpe i wati­'a­tu­ma'at reran aimi­ky'e kahato haria. Yt karãpe i wo'o­ma'at haria wo wato­py­hu'at Tupana piat ainãpin hap koro — Ewei'a­tu­ky'e irania'in eiwe­ky'e hap ok tã e hap nug hawyi. Wo'o­pot­ky'e hat wo watoĩ­ne'en hawyi yne ainãpin hap Tupana miky­'esat ko'i nug haria wo watu­kup­te'en.
ROM 13:11 Uimi­mu­'eria tawa wato Huma piaria to'iro wati­'a­tu­ky'e miit'in. Yt naku i wo'o­ma'at haria wo wato­py­hu'at. Aheha­kye­ra'at hat Iesui tut hamuat. Yt watikuap i kat e'at put'ok'e ma'ato mi'i hap watikuap po'og yt pya i ga'atpo hap kai. Po'og po'og yt pya i Aika­'iwat ut hap sa'a­wy­'iwuat ahepiat yt imohey i te hap kai. Yt naku i get haria ewywuaria wo watu­kup­te'en hut turan. Pyno koran waku wahe­katup kahato hut hap.
ROM 13:12 Yt naku i nug haria tiky­'esat kahato wãtym muo yt naku i nug hamuat hap. Ta'a­tu­ky­'esat kahato ti i'ypyryp wiat sa'ag nug hap ma'ato aito yt mi'iria ewywuat i aito katu­pono aitoria wato­py­hu'at ihot'ok puo ieĩne'en haria ewy are. Waku nug haria tiky­'esat kahato waku nug hap yne ehamo hamuat Tupana mõtypot hamuat. Waku nug haria tiky­'esat kahato ihot'ok wuo wuat'i ehamo waku nug hamuat. Mesup ta'yn wãtym porap tokosap ta'yn uiwy­ria'in are. Mesup ta'yn ihot'ok porap put'ok'e. Uimi­mu­'eria Aika­'iwat ut hap yt pya i at wẽtem hap ewy ihot'ok hap.
ROM 13:13 Wuat'i ehamo e'at pe turan yt uwe i inug sa'ag. Aiminug wakuap wen yne heremo. Waku yt watu­we­mõti hin i aiminug waku hap upi. Waku wati­'atoiat yne yt naku i nug hap kat ko'i mekewat wãtym muat hairu sa'ag nug haria wo'o­pytyk pytyk hap ewywuat. Waku wati­'a­tu­'atoiat yne kat som mekewat mahy wemo­pẽ'ã hap aikotã wãtym muaria tunug hap ewywuat. Waku wati­'atoiat yne kat som mekewat aiwary wary ahe'aito he'aito hap. Waku miit'in hãpyk takaria ewywuaria wato­py­hu'at mesuwat yi tote are aikotã wakuap nug haria ewy. Waku wati­'atoiat yne kat som aiwu­'uka hap wo'o­'ahyk hap ko'i. Waku wati­'atoiat yne kat som mekewat wo'oe­ha­'y­wywi hap.
ROM 13:14 Mi'i pote waku wati­'auka aipiit miky­'esat sa'ag nug hap ko'i. Waku wẽtup ehay kape watum aiwa­nẽtup hap mekewat Aika­'iwat Iesui wanẽtup hap ewywuat. Yt naku i wati­po­wyro aipiit imiky­'esat sa'ag nug hamuat ete. Karãpe put'ok'e ahete aimi­ky­'esat sa'ag yt naku i nug neran hap hawyi waku meremo yt ahewaure i howawi. Aikotã watopag ahesokpe pakup aipiit pe aipainug hamuat hap ewywuat waku watopag Aipo­typot Aika­'iwat Iesui aipy'a pe aiwa­nẽtup hawe aipiit puo aimo­kahu sese hap aipainug sese hap are uito Pauru.
ROM 14:1 Karãpe put'ok'e wẽtup ok Iesui mohey pakup te hat yt itag i te Iesui mohey hap ete hawyi waku — Ereke ro mehĩ mana wato'e tope. Iesui mohey hat en mote waku ereĩne'en uruwywo Tupana mõtypot hamuat wuat'i e'at pe wato'e imohey pakup i hat pe are. Waku — Ereke ro wato'e imohey pakup i hat pe yt ihãite i imohey hap ete pytkai.
ROM 14:2 Yt naku i wati­mohit ne'i mi'i wẽtup ok miit yt ikuap kahato i te aimikuap Iesui etiat pytkai. Yt naku i watu­'uka sehay wo mi'u ete kat som waku watu'u kat som yt e hap ete katu­pono imohey pakup takaria tu'uka teran mi'u eko ete. Yt naku i watu­'uka imohey hap yt aiwo­'oeko ewy hap ete mekewat kat e'at waku wati­mõ­typot Tupana e hap ete. Mi'i pote yt naku i wati­mohit Iesui mohey pakup i hat. Po'og waku wati­ky'e kahato mi'iria.
ROM 14:3 Yt aiwo­'o­'ewy hin i mi'u eko ete katu­pono wẽtup ok Iesui mohey hat i'u yne mi'u ko'i hat ma'ato wẽtup ok yt ihaĩte i te Iesui mohey hap ete rakat — Wãi wãi'e ne'i mi'u ko'i ete. Mi'i hawyi mi'u u yne hat yt naku i to'e yt i'u yne i hat pe — Yt naku i kahato en mehĩ mana e yt etu'u yne i mi'u uru'ewy yt naku i mio tã wato'e imohey pakup hat pe. Katu­pono — Uha'yru mohey hat en mote waku ereĩne'en uipy'a pe e Tupana ahepe.
ROM 14:4 Yt naku i wati­mohit irania'in Iesui eropat haria i'atueko ete kat pote I'atu­ka­'iwat koro Iesui yn ikuap waku teropat hap sio yt hap katu­pono Ta'a­tu­ka­'iwat kaipyi yn ta'a­tu­ky­'esat — En ni waku rakat e hap. Uiwy­ria'in Aika­'iwat tikuap kahato aimoe­saika topotpap nug hamuat hap. Aipoi­tyro kuap kahato Aipo­typot koro topotpap nug hamo. Yne tomohey pakup i haria poityro kuap hat Iesui toĩne'en. I'ewyte yt naku i wato'e i'u yne hat pe — Yt naku i en katu­pono etu'u yne yt urueko ewy i wato'e. Yt naku i mio tã wato'e katu­pono Tupana to'e Tosa­'yru mohey haria pe — En ni waku kahato uiwa­nẽtup hawe e yne miit'in me sio mi'u tutu'u yne sio yt pytkai i.
ROM 14:5 Pyno irania'in Iesui mohey haria — Waku ti wati­mõ­typot Tupana yne e'at pe i'atu'e ma'ato irania'in Iesui mohey haria — Wẽtup e'at yn nat po'og waku wati­mõ­typot Tupana i'atu'e. Ta'i yt aiwo­'o­'ewy hin i kat e'at po'og waku hap ete. Pyno waku wato­mohey aipy'a pe yt heremo i kat som wato­mohey mi'i hap ete are. Waku watikuap aiwewi kat e'at waku kat e'at yt hap Tupana mõtypot hamuat are. Mi'i hawyi yt naku i wati­mohit irania'in mimohey.
ROM 14:6 Waku kahato wati­mõ­typot Tupana. Mi'i pote waku wato'e — Mesuwat e'at pe atimõ­typot teran Tupana wato'e. Yt aiwo­'o­'ewy hin i aimi'u eko ko'i wo Iesui mohey haria aito pytkai. Wẽtup ok to'e — Mesup atu'u mi'u Tupana mõtypot hamo e. Pyno waku mi'i ewy ewetu'u katu­pono eiwehum kahato mekewat mi'u ete Tupana kape pote waku ewetu'u. Ewetu'u hawyi — Waku kahato En Tupana katu­pono uipoi kahato hat en ewei'e. Ma'ato irania'in Iesui mohey haria — Yt urutu'u kuap i mekewat mi'u mana mehĩ i'atu'e katu­pono uruwa­nẽtup hawe Tupana yt tiky­'esat i urutu'u mekewat mi'u hap i'atu'e. Mi'i haria pe waku wato'e — Pyno waku yt ewetu'u i mekewat mi'u mana mehĩ katu­pono yt eiwehum kuap i mekewat mi'u ete Tupana kape wato'e. Mi'i pote yt naku i ewetu'u katu­pono waku wati­mõ­typot Tupana ahenuk turan. I'ewyte waku watu­we­mo­sy'at tuereto Tupana mõtypot hamo wato'e aiwo­'ope aheko mi'u u hap ko'i ete.
ROM 14:7 Yt naku i watoĩ­ne'en mesuwat yi tote aiwehay upi aimo­wepit hap yn nug hamo kat pote Aika­'iwat mowepit hap kape aiwy­ria'in mowepit kape yn waku watu­we­potpap are. Yt wato­'o­po­wyro i pote yt naku hin i watoĩ­ne'en mesuwat yi tote.
ROM 14:8 Uiwy­ria'in waku wato'e — Yt uiwepyi i uiwe­mo­wepit hamo areĩne'en neran mesuwat yi tote ma'ato Tupana mowepit hamuat i'ewyte miit'in mowepit hamuat areĩne'en neran mesuwe wato'e. I'ewyte uiku­'uro hap e'at pe atimõ­typot teran Tupana uiku­'uro hamo waku wato'e aiwo­'ope uimi­mu­'eria are. Mio tã wato'e pywo pe pote Tupana wanuaria sese watoĩ­ne'en.
ROM 14:9 Tupana tipo­'oro Tosa­'yru Aipo­rekuat nuat. Mi'i hawyi iku'uro hawyi tuwẽtem i gu'uro pyi. Aika­'iwat toku­'uro rẽ toikuap aiku­'uro hap mi'i pote irania'in Iesui mohey haria iku'uro rakaria Ka'iwat no topy­hu'at. I'ewyte Aika­'iwat no toĩne'en i toku­'uro hawyi mi'i pote watoĩ­ne'en iwywo katu­pono toĩne'en i pote tuwẽtem gu'uro pyi. Mesup Iesui toĩne'en wuat'i ieĩne'en haria Ka'iwat no. I'ewyte toĩne'en mesup wuat'i iku'uro rakaria Ka'iwat nuat. Mi'i pote aiku­'uro hap toikuap kahato mesup.
ROM 14:10 Mi'i pote yt naku i wato'e aiwo­'ope — Uiwa­nẽtup hawe mekewat miit yt kat hamuat i yt naku i wato'e mesuwe kat pote Tupana yn waku aipat'ok uwe waku uwe yt hap e hamuat are. Mekewat e'at pe wyti aru toiho­'o­mo­herep uwe tomohey sese haria. Yt naku i wato'e wẽtup ok Iesui mohey hat pe — Yt woro­ky­'esat i kahato en mana mehĩ wato'e. Yt naku i wati­mohit aiwa­nẽtup hawe irania'in Iesui mohey haria katu­pono Tupana yn aikuap sio waku sio yt hap. Mi'i yn to'e kuap. Meiũran wyti aru yne aito watoĩ­ne'en i'am me Tupana ehay ahepiat kuap hamuat sio waku rakat no watoĩ­ne'en aipy'a pe aiwa­nẽtup hawe sio yt naku i hap kuap hamo.
ROM 14:11 Ta'i mi'i tã to'e Tupana miwan me — Meiũran aru yne tuwe­pỹ­'ã­tutuk uhowawi e. Mekewat e'at pe yne te'e­ro'e aru — En yn ni Tupana i'atu'e te'e­ru­we­pỹ­'ã­tutuk popuo e. Yt uheso hin i e. Pywo ti rat ui'e hap ewy aru topy­hu'at e. Torania te'e­ru­we­pỹ­'ã­tutuk uhowawi ui'e hap ewy e. Yne yne miit'in aru mekewat e'at pe — En ni En yn ni Tupana i'atu'e aru uhepe e Tupana miwan me Isaia 45.23 pe.
ROM 14:12 Mi'i pote torania aito aru wahenoi Tupana pe yne yne ahetiat kat som watunug mesu­wa­rotiat aikotã watoĩ­ne'en mesu­wa­rote wato'e aru Tupana pe.
ROM 14:13 Mi'i pote waku watoiat mekewat aiwa­nẽtup hawiat — Mekewat miit yt naku i ai'e hap. Mi'i hawyi waku wẽtup sehay wato'e aiwa­nẽtup hawe — Yt aho'o­'a­parap teran i irania'in Iesui mohey haria ete e hap waku wato'e aipy'a pe. Waku wato'e aipy'a pe — Yt ati'a­parap teran i wẽtup ok Iesui mohey hap pun hamuat waku wato'e at ka'ap aipy'a pe uheka­tu­wyria.
ROM 14:14 Uito ti eiwy Pauru are. Uito eiperia wywo wẽtup piit ewy yn Iesui piit wo watoĩ­ne'en mesuwat yi tote. Uiwy­ria'in pywo pe ti uiwa­nẽtup hawe mi'u mesu­wa­rote Tupana minug wakuat yne toĩne'en mi'u wo are uipy'a pe uiwepe. Sa'a­wy'i yt atimohey i ma'ato koitywy atimohey kahato. Iesui e hap kaipyi atikuap hawyi. Ma'ato uiwy­ria'in — Yt naku i mekewat mi'u watu'u ewei'e eipy'a pe pote yt ewetu'u tei'o are kat pote ewetu'u hawyi eiwe­mõti hap topy­hu'at. Katu­pono — Atunug yt naku i mi'u atu'u pote ewei'e aru eipy'a pe. Mi'i pote yt ewetu'u tei'o eiwe­mõti popuo.
ROM 14:15 — Pyno waku watu'u yne wato'e pote waku aiwe'eg wo uwe pe mio tã wato'e katu­pono tukup­te'en irania'in Iesui mohey haria yt aiwa­nẽtup hap ewywuaria i kahato i'atueko mi'u etiat mi'i pote — Pãi an waku watu'u yne wato'e i'atue­hamo hawyi i'atu­mohey hap mohit haria wato­py­hu'at i'atu­wa­nẽtup hawe. Po'og waku wato'e — Mehĩ mana yt naku i watu­'uka aheko mi'u ete mi'i pote atu'u teran eimi­ky­'esat ewy mesuwe areĩne'en eiwywo turan waku wato'e. Mi'i hawyi waku watu­we­moe­sy'at i'atueko ewy itote. Tukup­te'en wy yt imohey i te haria. Mi'iria py'a­setpe watoĩ­ne'en turan waku wati­'a­tu­ky'e mi'iria i'atueko mi'u etiat ewywuat nug hap ete watoĩ­ne'en i'atu­wywo turan are. Yt naku i waho­'o­mõ­py­'ahak aimi'u u hap wywo irania'in are. Yt naku i aimi'u wo wati­mõ­py­'ahak irania'in seko wãi'e hap ete katu­pono mi'iria ehakye­ra'at hamo Iesui iku'uro wy. Ma'ato watenuk kahato i'atue­hamo — Yt ewetu'u tei'o mi'i mi'u i'atu'e hap ete pote yt karãpe i ta'a­tu­mohey Iesui hawyi mi'iria ma'at haria wato­py­hu'at katu­pono aimi'u wo wati­'a­tu­mõ­py­'ahak ne'i pote yt waho­'oekyi kuap i mi'iria Iesui kape.
ROM 14:16 Ma'ato irania'in waku watu'u yne i'atu'e. Waku wati­mõ­typot kahato Tupana aimi'u wywo i'atu'e. Waku watu­wehum kahato Tupana kape ahenuk turan i'atu'e. Mi'i hap waku wen ma'ato eiwe'eg wo o uwe pe mio tã ewei'e. Katu­pono kat som waku pe toĩne'en aiwa­nẽtup hawe irania'in me yt naku i topy­hu'at tuereto. Mi'i hawyi aiminug wakuap topy­hu'at yt nakuat i i'atuepe. Mi'i hawyi i'atu­wa­nẽtup hawe yt naku i nug haria wato­py­hu'at yt kat i watunug yt naku i aiwa­nẽtup hawe pytkai. Mi'i pote waku aiwe'eg wo kahato ahehay wywo aiminug wywo katu­pono mi'i hawyi yt i'atue­waure ka'a i ahowawi yt naku i aito i'atu­wa­nẽtup hawe hawyi.
ROM 14:17 Ma'ato pywo pe ti Tupana topy­hu'at Aheha­kye­ra'at hat yt aimi'u u hap kaipyi i yt ahesapo hy u hap kaipyi i. Tupana topy­hu'at Aipo­rekuat no Topã'ãu tutum ahepe hawyi. Ipã'ãu yn ainug kuap to'y­wania ko'i wo. Yt aheko mi'u etiat aheha­kye­ra'at hap. Yt aheko i aimo­hãpyk kuap. Tupana Pã'ãu yn aimo­wepit kuap. Aheko mi'u u hap ete yt aimo­wepit kuap i. Karãpe aiwa­nẽtup hap hewyry kahato kowo­'i­ko­wo'i hawyi Tupana Pã'ãu yn aimo­wepit kuap. Aheko mi'u ete e'at ete wati­'a­tunug yne hawyi yt kat i te aheha­kye­ra'at hap are. Tupana yn aheha­kye­ra'at kuap.
ROM 14:18 Pywo ti rat are'e ehepe — Karãpe wati­'a­tu­ky'e irania'in aipy'a pyi Tupana Pã'ãu mimo­wepit ko'i aito pote mi'i hawyi Tupana mowepit haria wo i'ewyte miit'in mowepit haria wo watu­kup­te'en mesu­wa­rote.
ROM 14:19 Mi'i pote waku watikat kahato mu'ap aiwo­'o­wese hap nug hamo. Waku wato­py­hu'at wo'o­wese haria wo. Waku watikat kahato mu'ap aiwo­'o­mo­poĩ'ãm hamuat are. Waku watikat mu'ap aiwo­'ope aiwo­'o­moe­saika Iesui ehay wo imohey po'og hamuat hap ete.
ROM 14:20 Pyno Tupana wanẽtup hawe waku watu'u yne mi'u ma'ato yt naku i Tupana wanẽtup hawe wato­py­hu'at wu'uka haria aheko mi'u u hap ete. Mi'i tã watunug mote wati­moma aiwo­'o­wese hap aiwo­'ope. Yt naku i watu­'uka ahehay wo aimi'u u hap aheko ete. Mi'i tã watunug mote Tupana hũria atu'uka haria wo watoĩ­ne'en hawyi Tupana potpap moma haria wo wato­py­hu'at. Po'og waku watikat kahato aiwo­'o­ky'e hap. Waku wato'e Tupana pe — Uipo­wyro o miit'in ekyi ewawiat hamo mehĩ uipo­wyro kahato o katu­pono yt ati'a­tu­sytpok teran i emohey haria uheko mi'u u hamo waku wato'e Tupana pe.
ROM 14:21 Pyno kat som kat som waku i'atu­wywuat aheĩne'en turan waku watunug. Waku watikuap irania'in eko ko'i hawyi waku iwe'eg nakaria wo watoĩ­ne'en. I'atu­mi'u hap ewy waku watu'u i'atue­hamo. Waku watu'u i'atu­mi'u ipu'i u hap ewy i'atu­wywo watoĩ­ne'en nuran. Yt naku i wati­'a­tu­'a­parap ne'i irania'in Iesui mohey haria yt i'atueko ewywuat i watunug hap kaipyi. — Wãi i'atu'e mahy u hap ete pote waku yt watu'u i. Mi'i pote waku — Yt naku i watu'u mekewat mi'u pu'i i'atu'e pote — Pyno waku wato'e. Yt naku i wati­'a­tu­'a­parap ne'i irania'in aiminug ko'i wo.
ROM 14:22 Waku watikuap kahato aipy'a pe kat som waku watunug kat som yt naku i watunug Tupana e hap mi'i hawyi waku watunug aimi­mohey ewy. Waku watikuap kat som wato­mohey mi'u ete sapo hy u ete e'at hap ete mi'i hawyi waku yt wahenoi i irania'in me mi'i hap ko'i kaipywiat imohey hap ete. Waku wahenoi Tupana kape yn kat som wato­mohey mi'i ete hap ma'ato aiwa­nẽtup hap to'e — Yt naku i mi'i tã etunug e pote yt etunug nei'o mekewat epy'a piat. Ma'ato watunug mekewat wãi'e aipy'a piat hap pote aiwe­mõti kahato hap topy­hu'at. Aipy'a piat haty hap toĩne'en — Yt naku i nug hat uito wato'e aiwepe.
ROM 14:23 Ma'ato irania'in aito Iesui mohey haria haty kahato topy­hu'at aipy'a pe watu'u kat ko'i kat ko'i hawyi. Watu­we­mõti ne'i aipy'a pe katu­pono aheko yt ewy i watunug mote. Mi'i pote yt watu­wehum kuap i Tupana kape watu'u turan yt imohey hap upi i watu'u pote. Mi'i pote waku watoiat mekewat aiminug sa'ag ko'i yne yt watu­wehum kuap i Tupana kape hap watunug nuran mote are. Yt Iesui mohey hap wywo i watunug aiminug ko'i hawyi wati­'a­parap Tupana pe yt wati­mõ­typot i Tupana aiminug wywo pote are uito Pauru.
ROM 15:1 Ma'ato yt wato­mohey kahato i seko ko'i pote waku wati­po­wyro irania'in yt aiwa­nẽtup hap ewywuaria i Iesui mohey pakup i haria. Waku wati­'a­tu­po­wyro mi'iria Iesui mohey hap etiat i'atu­moe­hãite hamo. Yt naku i watu­we­potpap aiwe­mo­wepit hap kape yn. Waku watu­we­potpap kahato irania'in Iesui mohey haria powyro hamuat hap ete. Waku Iesui mohey pakup i haria wati­'a­tu­ky'e kahato aiwese kahato hap wywo ta'a­tu­'a­parap kahato te pytkai.
ROM 15:2 Po'og waku irania'in Iesui mohey haria mowepit hano wato­py­hu'at. Waku watikat irania'in Iesui mohey haria waku piat hap are. Waku wati­'a­tu­motag neran Iesui mohey hap ete irania'in.
ROM 15:3 Yt karãpe i Ai'akag Iesui tuwe­mo­wepit hap kat hano toĩne'en. Ta'i Aika­'iwat Tupana mowepit hap ko'i yn toikat. Sa'a­wy'i mio tã e miwan me — Sa'a­wy'i to'o­ky­ry'i kahato eete Tupana hawyi uipo­'oro i'atue­ha­kye­ra'at hamo. Mesup i'atuehay sa'ag kahato topy­hu'at uhete e. Yne miit'in sehay sa'ag Tupana piat hap topy­hu'at uhete e Iesui e'yianmete miwan me Tawi wepy hawe 69.9 pe. Mi'i hap ewy waku po'og wati­'a­tu­mo­wepit irania'in watu­we­mo­wepit hap kai.
ROM 15:4 Uiwy­ria'in yne yne Tupana e hap miwan miat sa'a­wy­'iwuat toĩne'en aimu'e hamo. Pywo ti rat sa'a­wy­'iwuat miwan aimu'e kahato hap topy­hu'at ai'arot hap hep kahato hamuat. Mi'i e hap ko'i aimoe­saika kahato imohey hap ete. Watu­we­mu'e sa'a­wy­'iwuat miwan ete hawyi watikuap kahato yne Tupana e hap — Atunug aru e hap ko'i. Watikuap kat som tutunug aru hawyi wahe­katup kahato i'e hap ewywuat e'at put'ok'e hap. Mi'i hawyi aimo­wepit kahato hap topy­hu'at katu­pono watikuap waku kahato aru Tupana tunug aru ahepe to'e hap ewy watikuap miwan sa'a­wy­'iwuat kaipyi.
ROM 15:5 Uiwy­ria'in mi'i tã kahato ahẽtup Tupana pe ehowawi — Uru'ywot atipy piat En yn ni wuat'i uruwat uru'arot hap kaipywiat urumo­wepit hat. En yn ni urumoe­saika kuap hat yt karãpiat i ehay atoiat uruepiat hap ete. Urunug Esa'yru mohey haria wo pote wẽtup miit ewy yn uruwa­nẽtup hawe urupy'a pe hap ahẽtup epe. Tupana urunug no Esa'yru Urupo­rekuat saipe­piaria kahato wo hap ahẽtup ewawi are. Aikotã Esa'yru toĩne'en kahato mesuwe yi tote emõtypot kahato hano mi'i hap ewy urunug no Esa'yru ewywuat mesuwe hap ahẽtup ewawi Tupana.
ROM 15:6 Mi'i etunug mote wẽtup miit ewy uruimõ­typot En mesuwe Uru'ywot are. Waku wẽtup sehay yn tuwẽtem uruwẽ pyi Esa'yru Emipo­'oro Urupo­rekuat nuat Iesui ete are. Waku wẽtup miit ewy yn uruehay emõtypot hap are. Urumoe­saika Epã'ãu wo urupy'a pe hawyi emõtypot haria kahato urutu­kup­te'en uimiẽtup ewawiat are.
ROM 15:7 Sa'a­wy'i karãpe wato­mohey Aipo­typot Iesui hawyi meremo Tupana ainug towy­ria'in wo. Iwese kahato toĩne'en ahowawi. Mi'i ewywuat waku meremo watunug irania'in Iesui mohey haria aiwy­ria'in wo. Waku iwese kahato rakaria wo watoĩ­ne'en i'atu­wywo yt aiwo­'oeko i pytkai. Mi'i watunug mote meremo Tupana mõtypot kahato hap topy­hu'at mesu­wa­rote.
ROM 15:8 Sa'a­wy'i Tupana to'e urue'a­se'i pot Aparãu me — Meiũran aru yne ywania mesuwat yi totiaria ati'a­tu­poi­tyro e. Ta'i Wẽtup emiariru emiariru topy­hu'at aru Wuat'i Ywania Porekuat no e. Mi'i hawyi Iesui tuwe­mo­herep mesuwe Aparãu saipepiat sese Iuteuria py'a­setpe. Mi'i hawyi to'y­wania eropat kahato hat ewy topy­hu'at.
ROM 15:9 Ta'i Tupana yt heso hin i Aparãu me. Tutunug to'e hap ewy ma'ato yt Iuteuria kape yn i Iesui tuwe­mo­herep katu­pono irania'in ywania kape i'ewyte tuwe­mo­herep wy. Toiky­'esat yne ywania Tupana mõtypot hanuaria hap toiky­'esat. Toiky­'esat yne yne ywania tikuap To'ywot egyi'at hap. Aiwy Iesui tiky­'esat aikotã to'e miwan me sa'a­wy'i hap ewy — Ui'ywot e arehum aru uhẽku wo ewawi irania'in ywania py'a­setpyi e. Arepy aru ewawi Ui'ywot e. Mi'i hawyi irania'in ywania wẽ pyi eset kahu aru wemõ­typot haria wo te'e­ro­py­hu'at e Tupana Sa'yru sa'a­wy'i sese temiit morekuat Tawi wepy hawe miwan me 18.49 pe.
ROM 15:10 I'ewyte mio tã e miwan me — Wuat'i ywania eweimõ­typot ro Tupana imowepit kahato hap ehehay wywo e. Eweimõ­typot ro Tupana mekewat Iuteuria ywania wywo iwat i'ywania sese wywo e. Eiwe­mo­wepit ro Tupana kape ehehay wepit kahato hap wywo e morekuat Tawi towepy hawe miwan me ahepe Saumu 72 pe.
ROM 15:11 I'ewyte po'og to'e morekuat Tawi — Wuat'i ywania eweimõ­typot ro Ainug hat eipy'a pyi e. Mio tã ewei'e ro tope — Waku kahato sakpo'e En Urupo­typot Uruka­'iwat ewei'e ro Einug hat Tupana ewawi are'e yne miit'in sem mesuwat yi totiaria pe e morekuat Tawi towepy hawe tomiwan me Saumu 11.1 pe.
ROM 15:12 I'ewyte Tupana ehay moherep hat Isaia mio tã e wy — Meiũran aru wẽtup ok miit Tupana Mipo­'oro topy­hu'at mesu­wa­rote Wuat'i Ywania Porekuat no e. Mi'i Miit wyti aru morekuat Tawi ywot Iesi saipepiat sese toĩne'en aru e. Morekuat Tawi ywot Iesi toĩne'en aikotã aria'yp ypy pot'i ewy ma'ato Tupana Mipo­'oro aru toĩne'en aikotã mekewat aria'yp koro sese ga'apy piat ewy e. Mekewat i'ypy kyt tuweityk ta'yn hawyi i'ypy kyt hẽtyt heremo hawyi tuwe­mo­wato sese i'yp e. Mi'i hap ewy aru Tupana Mipo­'oro sese toĩne'en aru Wuat'i Ywania Porekuat nuat Miit toĩne'en e. Yt Iuteuria ywania Porekuat no yn toĩne'en ma'ato yne miit'in mesu­wa­ro­tiaria Porekuat no toĩne'en aru e ti sa'a­wy'i Tupana ehay moherep hat Isaia tomiwan me 11.9 pe.
ROM 15:13 — Tupana uito ti emipo­'oro Pauru atiky­'esat kahato eti'a­tu­po­wyro irania'in ywania kape ekuap hamuat hap ete. Koitywy i'atu­'arot pot'i wywo tukup­te'en. En yn waku i'atu­mo­wepit kuap hanuat. Esa'yru kape yn te'e­ru­wa­nẽtup ta'a­tu­he­katup haype are. Ui'ywot mekewat ewat wuat'i e'at piat wo'o­mo­wepit hap yn waku etum i'atuepe. Esa'yru mohey hap kaipyi etum no i'atuepe i'atu­wa­nẽtup sa'ag hap monik hap Esa'yru mohey hap kaipyi are. Papai etum o Epã'ãu Wakuat i'atuepe po'og po'og yne e'at pe. Etimoe­saika mi'iria Epã'ãu Wakuat kaipyi are. Epã'ãu Wakuat kaipyi atiky­'esat ta'a­tu­he­katup Esa'yru ut hap at ka'ap. Uru'ywot Tupana etimo­wepit kahato uheywyt'in uheinyt'in tawa wato Huma piaria.
ROM 15:14 Uiwa­nẽtup hawe waku kahato ti eiperia tawa Huma piaria. Uiwy­ria'in uheinyt'in kahato eiperia Iesui mohey haria eweikup­te'en mote Ai'ywot Tupana Wakuat eiam kahato eiperia. Ta'i Tupana kuap hamo eipyt'at eheho­wapy kahato mi'i pote woro­ho­'o­mohey kahato eipe. Waku eweikup­te'en eiwo­'o­mu'e mu'e hanuaria wo eimikuap Tupana etiat wo. Ta'i waku kahato woro­ho­'o­puẽti eiperia wuat'i miit'in mu'e hamuat.
ROM 15:15 Pyno uito Pauru mesuwat uimiwan ehowawiat. Uimiwan mesuwe yt i'perup takat i einãpin hamuat sese. Atiwan haty wo aikotã wati­'a­tu­nãpin aimẽ­pyt'in haty wo hap ewy woro­ho­'o­nãpin eipe mesuwe. Mi'i hap uimiwan atunug mesuwe. Waku pe atiwan katu­pono Tupana uipo­'oro irania'in ywania nãpin hamo. Tupana ui'airo mi'i hap inug hamuat. Yt uhewaku hap upi i ui'airo wen ma'ato uiky'e tepiat hap kaipyi yn mote.
ROM 15:16 Waku kahato atipuẽti Aipo­typot Iesui eropat hano. Waku atipuẽti mesuwat uipotpap irania'in mu'e hamuat Iesui ehay wakuat etiat. Sa'a­wy­'iwuat pa'iria ko'i iwuk miit'in hũria Tupana mowepit hamo. Mi'i hap ewy areĩne'en Iesui mi'airo pa'i sa'a­wy­'i­wuaria ewywuat. Pa'i ewy areĩne'en katu­pono atomo­herep kahato sehay wakuat Iesui etiat Tupana kaipywiat. Pa'i ewy atimo­herep kahato irania'in me Tupana e uhepiat hap ewy. Aikotã pa'i sa'a­wy­'i­wuaria ewy atum Tupana pe irania'in ywania mohãpyk hamo Iesui suu hap ewy. Mesup eiperia atum Tupana kape pa'i ewy. Eiperia Tupana mowepit kahato haria ewy eweikup­te'en katu­pono Iesui suu mikoho ko'i eiperia. Wuat'i ywania atum Tupana kape hawyi tuwehum kahato uimiium ete katu­pono Ipã'ãu Wakuat mimo­hãpyk ko'i irania'in tukup­te'en mesup. Iesui suu mimo­waku ko'i tukup­te'en irania'in ywania mesup. Mi'i pote pa'i ewy atum mi'iria Tupana pe hap ewy.
ROM 15:17 Uika­'iwat Iesui yn uheha­kye­ra'at hat. Mi'i yn ni Ui'akag sese. Wẽtup ok miit ewy yn iwywo urupotpap miit'in yne ywania ekyi Tupana kape hap. Mi'i pote ati'a­tuekyi kuap kahato irania'in ywania Tupana kape. Yt aremõti hin i mesuwat uipotpap ete Tupana eropat hap ete.
ROM 15:18 Uipo­typot no hap upi Iesui toĩne'en kahato uikai. Ipã'ãu ipotpap kahato uipo pyi irania'in ywania ekyi hamo Tupana kapiat hamo. Iesui Pã'ãu ihay kahato uiwẽ pyi tomikuap ko'i wo. I'ewyte Iesui misepap nug hap toimo­herep kahato uipiit pyi irania'in ywania pore­ro­kosap Tupana miky­'esat nug hamuat hamo.
ROM 15:19 Ipã'ãu uimoe­saika kahato irania'in ywania pore­ro­kosap tuwe­wawiat hamuat. Pywo ti rat yt uhesaika hap kaipyi ma'ato Ipã'ãu uimoe­saika kahato sepap nug hamo wuat'i ywania ehamo. Yt uwe i mikuap mesuwat yi totiat nug hamuat ko'i tutunug uipiit pyi Tupana Pã'ãu. Uimoe­saika kahato uhewyry tehay sytpok hamuat wuat'i tawa puat. Uipiit yt hesaika hin i pytkai uhewyry wuat'i yi totiat wuat'i tawa ko'i puat hamo wuat'i y'y upi hamuat atimo­herep kahato sehay wakuat Aheha­kye­ra'at hat Iesui etiat wuat'i miit'in me. Ta'i mekewat tawa wato Ieru­sarẽi kaipyi sa'a­wy'i areto yne yne tawa puo uhewyry ihay moherep hamo. Yne yne tawa kape areto te ihay wywo Ieru­sarẽi myi tawa Ieriko kape. Yne mu'ap upi ati'a­tu­mu'e torania miit'in Iesui ete Tupana Pã'ãu uimoe­saika hawuo.
ROM 15:20 Arepotpap kahato yne uhesaika hap ok tã mesuwat sehay wakuat Iesui etiat moherep hamo irania'in ywania puo torania puo aikope aikope Tupana Sa'yru Aipo­rekuat set Iesui yt ta'a­tukuap i te hap upi. Ta'i yt ati'a­tu­po­hari i Iesui mohey haria wẽtup ok ai'a­pykok hat po pyi are. Ati'a­tu­mu'e teran yt ikuap i te haria hawyi yt ati'a­tu­po­hari teran hin i irania'in i'atu­pot­mu­'eria ete.
ROM 15:21 Aikotã to'e miwan me sa'a­wy'i hap ewy — Yt karãpiat i ikuap i te haria aru meiũran ikuap yne. Yt karãpe i te tuwat irania'in i'atu­mu'e hamo pytkai meiũran te'e­ra­'a­kasa e. Yt karãpe i Tupana etiat kuap haria aru meiũran ikuap haria wo tukup­te'en e Isaia miwan me 52.15 pe sa'a­wy'i.
ROM 15:22 Uiwy­ria'in Humanu ywania nimo kahato ra'yn areto teran ehowawi. Ahã'ãg hawyi ahã'ãg i hap ewy ma'ato eweikuap ta'yn Iesui etiat pote yt areto kuap i katu­pono yt ikuap i te haria irania'in kape yn areto teran.
ROM 15:23 Ma'ato mesup areto ra'yn katu­pono atomo­herep yne ra'yn yne ywania pe yne tawa tote miit'in me yne sehay wakuat Iesui etiat yne hy upiat ra'yn mi'i rokirẽ koitywy waku areto ra'yn ehowawi eipe Huma­nu'in ara'a­kasa hamo. Uimi­ky­'esat sa'a­wy'i hap ewy mesup atunug na'yn.
ROM 15:24 Pyno ehetawa sakpo toĩne'en mekewat yi wato Epania. Areto teran itotiaria mu'e Iesui etiat hamo. Mi'i haype areto ehowawi ehetawa puo. Mi'i hap yn ahekatup. Pyno uikosap mo ma'ato areĩne'en teran eiwywo. Woro­ho­'okuap teran eipe pote areĩne'en porap i hamuat eipy­'a­setpe uimi­ky­'esat ewy. Waku kahato aru atipuẽti itote eiwywo. Atiky­'esat kahato eipe uipo­wyro mekewat yi wato Epania kapiat mu'ap sa'up nug hap ete.
ROM 15:25 Ma'ato mio koran areto tawa wato Ieru­sarẽi kape. Mi'i kahu rẽ ehowawi areto. Ma'ato sa'a­wy'i ati'a­tu­po­wyro teran Tupana sa'y­ru'in Tupana saki­'yt'in Ieru­sarẽi miaria katu­pono i'atu kahato itote Tupana mẽpyt'in ho'opot haria ihaky­'e'i kahato rakaria.
ROM 15:26 Mi'i pote Iesui mohey haria irania'in ywania aikope aikope te'e­ru­wa­'a­tunug hap tote tawa ko'i yi Mase­tunia piaria tawa yi Akaia piaria ti'a­tu­mõ'ẽ teran ta'a­tuekat ihaky­'e'i rakaria tawa wato Ieru­sarẽi miaria puo Iesui mohey haria tawa Ieru­sarẽi miaria powyro hamo.
ROM 15:27 Te'e­ru­we­py'a pyi mi'i tã ta'a­tunug — Waku wati­mõ'ẽ ahekat Ieru­sarẽi miaria pe i'atu'e te'e­ru­wehay pyi yt uhehay pyi i. Mi'i ta'a­tunug neran mote — Waku eweimõ'ẽ ihaky­'e'i rakaria Ieru­sarẽi miaria pe are. Ta'i ewetunug o are i'atuepe. Katu­pono ti sa'a­wy'i ta'a­tu­mõ'ẽ kahato Tupana ehay ahepe. Tupana ehay wywo eipoi­tyro hanuaria te'e­ro­py­hu'at i'ewyte yne Tupana miium ta'a­tu­poi­tyro hap kaipywiat ta'a­tu­mõ'ẽ ehepuo wẽtup ywania eipe pytkai ta'a­tunug. Mi'i pote koitywy waku eweimõ'ẽ ehekat Iesui mohey haria ihaky­'e'i rakaria pe are. Mi'i pote hẽto are'e i'atuepe tama Masẽ­tunia piaria pe tama Akaia piaria pe Iesui mohey haria.
ROM 15:28 Mi'i hawyi aikope aikope i'atu­wa­'a­tunug hap tote tuereto ta'a­tu­'a­tunug ta'a­tumiium ko'i mi'i hawyi ta'atuium uruepe — Etioto ro Ieru­sarẽi kape i'atu'e mi'i pote areto i'atumiium ko'i wywo. Put'ok­'are itote hawyi atimõ'ẽ yne ihaky­'e'i rakaria pe. Mi'i hawyi i'atumiium ok tã atum yne Iuteuria Iesui mohey haria itotiaria pe. Mi'i atimõ'ẽ yne hawyi atoiat yne itotiaria pe hawyi areto Ieru­sarẽi myi tawa Epania kape eitok puo eikuap hamo.
ROM 15:29 Put'ok­'are eipy­'a­setpiat hawyi atiky­'esat kahato Aika­'iwat Iesui aipoi­tyro kahato hap. Atikuap ta'yn uipy'a pe meiũran wuat'i ai'a­tu­poi­tyro itotiat hamuat tegyi'at hap wato hap ok tã hawyi waku kahato ra'yn.
ROM 15:30 Uiwy­ria'in tama Humanu piaria ahẽtup kahato ehupi uheinyt'in uheywyt'in ewehẽtup yne eipy'a pyi haty wo uipo­wyro hamuat Tupana pe — Etipo­wyro Pauru hewyry hap upi ewei'e o. Etimõ­typot Esa'yru Emipo­'oro Urupo­rekuat nuat Pauru ehay kaipyi Pauru minug kaipyi ewei'e o Tupana kape. Ta'i atikuap uiky'e Tupana Pã'ãu kaipywiat ehepiat hap mi'i pote ahẽtup ehepe ewehẽtup o Tupana kape uipo­wyro hap.
ROM 15:31 Uiky'e eipe pote ehẽtup o Tupana pe — Etipo­wyro kahato o Pauru katu­pono yt Iesui mohey haria i Iuteuria ti'auka teran haype. Mi'i tupono etika­wiano kahato i'atu­py­'a­setpiat turan toĩne'en ewei'e o Tupana pe. I'ewyte mekewat aimiium ereto hap ete etipo­wyro o Pauru Tupana. Eti'a­tu­po­wyro o Iesui mohey haria mekewat Pauru miium ta'a­tuepiat sat ta'a­tu­wehum wywuat hamuat ewei'e o Tupana pe yt ta'a­tusat i irania'in ywania te'e­ru­we­mõti ta'a­tumiium yt ky'esat i hap ete.
ROM 15:32 Mi'i eimiẽtup ok tã Tupana tunug yne ra'yn hawyi uimo­wepit hap topy­hu'at uhowapy mekewat Tupana wepy hap ewywuat. Mi'i hawyi areto ehowawi uimo­wepit Tupana piat hap wywo. Mi'i hawyi areĩne'en eiwywo hawyi po'og uiwepit aiwo­'o­ky'e aiwo­'o­wese hap itote pote.
ROM 15:33 Tupana ereĩne'en kahato o Huma­nu'in wywo Esa'yru mohey haria itotiaria powyro hamo ereĩne'en. Iwese rakaria wo yne o etunug mi'iria katu­pono En wo'o­wese hap hanuaria nug hat kahato. Etunug o mesuwat uimiẽtup ewy Tupana are'e mesuwe eika­wiano. Uito Pauru.
ROM 16:1 Atipo­'oro ehowawi wẽtup hary­poria Iesui mohey hat kahato. Mi'i ti aheinyt mana Wepi. Iwepit kahato mana Wepi wakuat kahato Iesui mohey hat sese. Mi'i ti ipotpap kahato tawa Sekeia totiaria Iesui mohey hap tote i'atu­wa­'a­tunug hap howare totiat hat. Mi'i atipo­'oro ehowawi meiũwat mana Wepi.
ROM 16:2 Aikotã Iesui kape — Ereke o eiwese hap wywo hap ewy o — Ereke ro ewei'e mana Wepi pe aikotã Tupana mẽpyt'in ewywuat eweikup­te'en pote eiwese tuete. Topo­wyro hap toiky­'esat eikaipyi mi'i o ewetunug tope imiky­'esat ok tã. Mana Wepi ti mesuwe uipo­wyro kahato i'ewyte uiwy kahato topy­hu'at i'ewyte toi'a­tu­po­wyro kahato mesuwiat Iesui mohey haria. I'atu kahato mesu­wa­ro­tiaria wy ok wo topy­hu'at mana Wepi. Wakuat kahato uipot­po­'oro mi'i.
ROM 16:3 Pyno kuekatu atipo­'oro mana Pisira he'aito Akira kape uipo­wyro Aipo­typot Iesui eropat hap etiat are.
ROM 16:4 Sa'a­wy'i sese mi'iria uipo­wyro kahato. Wẽtup e'at pe tõ'ẽ tõ'ẽ kahato miit'in ui'auka hamuat wen ma'ato uhyt Akira iwary Pisira uheha­kye­ra'at uhewa­nĩ­kaptia po pyi. — Uru'auka teran mote waku ma'ato yt naku i ewei'auka Pauru i'atu'e wanĩ­kaptia pe arepopy pytkai. Mi'i hap upi uheha­kye­ra'at uhyt Akira mana Pisira. Mi'i ete yne Iesui mohey haria yne ywania aimẽpuo aimẽpuo te'e­ru­wa­'a­tunug hap ok tã te'e­ru­wehum Tupana pe mehĩ Akira mana Pisira ete. Mi'iria kape atipo­'oro uhekue­katu.
ROM 16:5 I'ewyte atipo­'oro uhekue­katu Iesui mohey haria mehĩ Akira mana Pisira yat piaria wa'a­tunug haria kape. I'ewyte atipo­'oro uhekue­katu uhewakuap uiwy sese mekewat mehĩ Epenetu kape. I'atu kahato mio Iesui mohey haria tawa Asia pe yi Asia pe ma'ato uiwy Epenetu torania mi'iria e'yianmete topy­hu'at Iesui mohey hano tawa Asia piaria kai. Mi'i inug yianmete Iesui Topo­rekuat no.
ROM 16:6 Uhewaku hap atipo­'oro mekewat mana Maria pe eheropat hap ete ipotpap kahato rakat kuekatu atipo­'oro mi'iria pe mi'i pe.
ROM 16:7 Sa'a­wy'i toĩne'en typy ok ui'y­wania Iuteuria wo'o­pyhik hawe wẽtup ok Ãtu­niku wẽtup ok Iunia. Mi'iria Iesui mohey haria ahe'yianmiat haria kahato mi'iria Iesui potpo­'o­roria mikuap kahato ko'i. Mi'iria kape uhewaku hap kuekatu e hap atipo­'oro.
ROM 16:8 I'ewyte atipo­'oro kuekatu sese mekewat uiwy sese mekewat mehĩ Ãpiatu kape. Iesui urumo­wehik kahato wẽtup miit ewy yn uruto­py­hu'at. Uiwy kahato mi'i Iesui mohey hat pote.
ROM 16:9 Etum uhekue­katu mehĩ Upanu pe Aika­'iwat Iesui eropat uruwywuat hat kahato mi'i. Uhekue­katu sese atipo­'oro uiwy sese Etaki kape.
ROM 16:10 I'ewyte atipo­'oro kuekatu kahato aiwy Apere kape. Mi'i ti toku­'uro hap kapiat Aika­'iwat mohey hap — Yt atoiat i e hat. Sa'a­wy'i ta'a­tu­hã'ãg ihep imohey hap kaipywiat hap ma'ato yt ta'a­tuhep kuap i. Kuekatu mehĩ Aritũ­puru yat piaria kape ati'a­tue­waku.
ROM 16:11 Arehum kahato uhehay wo i'ewyte mehĩ Erotiãu kape mi'i ti Iuteu ywania ui'ewy. I'ewyte kuekatu atipo­'oro Nasisu kape i'ewyte ha'y­ru'in Iesui mohey haria kape.
ROM 16:12 Ati'a­tue­waku teran mehĩ Tiwena I'ewyte Tiwosa. Mi'iria aheropat kahato Aipo­typot potpap nug hap ete. Yt atiwaure i aiwy mana Pesĩte Aipo­typot potpap ahyt nug hat. Mi'i ti Aipo­typot eropat hat kahato.
ROM 16:13 Mi'i hawyi haika'at mehĩ Huwu kape sepap nug hap ewy Aika­'iwat potpap nug hap ete ipotpap i'ewyte ety kape atipo­'oro uiwy Huwu kuekatu. Waku kahato ety are. Uity ewywuat kahato mi'i topy­hu'at uipy'a pe are. Ta'i uipo­wyro kahato ety aikotã uity sese hap ewy uipo­wyro are.
ROM 16:14 — Tupana are etipoi­tyro uiwy­ria'in kuekatu atipo­'oro mehĩ Asikitu kape mehĩ Wẽkũte kape aiwy Ema kape mehĩ Patũpa kape mehĩ Eme kape i'ewyte yne Iesui mohey haria i'atu­wy­wuaria kape atipo­'oro yne kuekatu.
ROM 16:15 Yt atiwaure teran hin i uhekue­katu po'oro ewawiat hap mehĩ Wiro­ruku are. I'ewyte mana Iuria kape i'ewyte mehĩ Nereu kape i'ewyte inyt kape i'ewyte uhehay atipo­'oro ewawi uiwy Urĩpa kape i'ewyte yne i'atu­wywuat ieĩne'en haria Tupana Sa'yru emiit'in ko'i kape kuekatu atipo­'oro.
ROM 16:16 Karãpe put'ok'e wẽtup ok Iesui mohey hat sese ahowawi pote waku iwese kahato rakat howawiat hano wato­py­hu'at. Waku ahehay wese kahato iwywo waku. Waku wati­wesat — Waku aiwy­ria'in Iesui mohey haria sese. Ta'i waku wati­'a­hi­'y­pysat aimẽpuo aimẽpuo Iesui mohey haria te'e­ru­wa­'a­tunug hap kaipyi ta'a­tu­po­'oro ehowawi ta'a­tue­kue­katu eipe Humanu ywania kape mesu­wepyi.
ROM 16:17 Tukup­te'en Iesui mohey ran haria ma'ato mesuwat yi tote yt naku i rakaria katu­pono wo'oehay uka teran sehay wuat haria tukup­te'en. Ta'i mi'iria ta'a­tu­pat'ok pat'ok teran kahato aito hap ta'a­tu­ky­'esat kahato. Mi'iria aimo­'a­kag'aia ta'a­tuehay wuat hap ta'a­tuehay wo. Yt Iesui ky'e hap kaipyi i ma'ato wẽtup mohey hap kape wẽtup sehay kape aimo­'a­kag'aia teran. Typy mohey hap nug hamo yt Aimi­mohey Iesui ewy i ta'a­tu­mo­herep yt aimi­mohey sehay yt ewy i yt aimu'e hap sa'a­wy'i wuat Iesui potmu­'eria piat yt aimu'e hap ewy i aimu'e. Yt naku i. Uiwy­ria'in karãpe mi'iria ewywuaria put'ok­'i­'a­tu'e eipy­'a­setpe ehepiat Iesui mohey hap nug kowo­'i­ko­wo'i hanuaria eiwe'eg wo o mi'iria pupi. Mi'iria put'ok­'i­'a­tu'e turan waku eweikuap meremo i'atuepiat eima'at reran hap hawyi yt eweiwat i i'atuehay upi. — Urumu'e ro uhyt mana yt ewei'e tei'o i'atuepe. I'atuehay pupi eweiken'ẽ o. Uiwy­ria'in Iesui mohey haria eipe pyno woro­ho­'o­nãpin haty puo yt eweipo­me'eg tei'o ehewaure ka'a wo'o­pat'ok pat'ok Iesui mohey haria etiat i'atu­mo­'a­kag'aia hap kaipy­wiaria kape.
ROM 16:18 Katu­pono wo'o­pat'ok pat'ok haria yt Aika­'iwat Iesui eropat haria i hin i. Ta'i yt Aika­'iwat Iesui upiat hin i aimo­'a­kag'aia hamo. Ta'i mi'iria tõ'ẽ tõ'ẽ ahowawi katu­pono ta'a­tu­ky­'esat kahato aito ta'a­tue­miit'in no haype sa'ag nug hamuat ai'u hamo tõ'ẽ. Mi'i pote eiwe'eg wo o pyno i'atuehay sese kahato mi'iria wẽtup sehay ete aima'at ta'a­tuehay iwese rakat nuat hamo — Yt uwe i po'og ikahuria eipe kawiat haria i'atu'e ahepe ma'ato yt pywo pe i aima'at reran haype. I'atuehay upi mekewat hira­karia wanẽtup hap ewywuaria meremo tuwat kahato i'atuehay upi. Mi'i pote uipy'a pyi are'e — Eiwe'eg wo o eima'at tet pupi eipat'ok hamuaria ne'i pote ahekat ky'ewi aima'at haria mi'iria.
ROM 16:19 Ma'ato eiperia yt irania'in ekat ky'ewi i miit'in mu'e hanuaria mi'iria ewywuaria hin i. Ta'i aito sehay wakuat Iesui etiat yn aiwẽ ete. Ta'i yt kat i wẽtup sehay kowuat kowuat hap upiaria aito. Aito ti wẽtup mohey hap yn aikai Iesui mowepit hap yn aikai waku. Mi'i pote uimo­wepit kahato eipe. Eipe Iesui ehay upiaria Humanu ywania katu­pono yt miit'in piit ky'ewi eweimu'e Iesui hũria. Waku kahato. Pyno waku wato­py­hu'at waku nug hap sepap nug haria wo. Waku watikuap yn wakuat ko'i we'eg haria ewy. Ma'ato yt naku i wato­py­hu'at yt ikuap i hat ewy sio waku sio yt aikotã aimẽ­pyt'in yt ikuap i te haria ewy aikotã — Waku atunug yt naku i mig'i wo mesup e haria ewy yt naku i wato­py­hu'at i'atuehay upi. Waku watu­wewãi yt naku i nug hap ko'i ete Iesui esura­ra'in ewy waku.
ROM 16:20 Pyno Tupana aiwa­nẽtup kowo­'i­ko­wo'i hap monik kahato hat topy­hu'at aiwa­nẽtup hawe. Waku ahewaure kahato Tupana kape. Mi'i watunug mote aimo­wese kahato hap topy­hu'at aiwo­'ope. Waku aiwo­'o­ky'e hap upi watu­'uka te at ka'ap ahiag ete. Mi'i watunug mote meiũran yt pya hin i ra'yn hap e'at pe Tupana ti'akit sese ra'yn ahiag aipy wo toi'a­porok ahiag. Ta'i aipy wo aru toi'akit ahiag akag aikotã wati­'akit moi akag ewy e. — Uipo­typot Iesui ereĩne'en kahato ro emiit'in Humanu ywania wywo. Ereĩne'en hegyi'at kahato itotiaria piat hano. Ereĩne'en egyi'at i'atu­ky'e hap wywuat wywo hap ahẽtup epe Iesui pe ehepiat.
ROM 16:21 Uha'yru Timoteu ipotpap kahato uiwy wo mesuwe. Kuekatu toipo­'oro teran ehowawi — Aikotã sura­ra'in timõ­typot ta'a­tu­'akag hap ewy ta'a­tu­wehum hap wywo hap ewy arehum ehowawi e Timoteu ehepe. Tupana potpap nug haria mesuwe ui'y­wania Iuteuria kawiat ui'e­wy­wuaria — Woro­ho­'o­ky'e kahato eipe woro­ho­'o­mõ­typot eipe i'atu'e ehepiat. Aiwy Irusiu mio tã e mi'i hawyi mehĩ Iasãu i'ewyte mekewat aiwy Sosi­patu tipo­'oro teran mi'i e hap ehowawi.
ROM 16:22 Mesuwat uipot­po­'oro iwan nug hat topo wywuat hat uiwẽ pywiat aiwy uhyt Tesiu e hap het rakat i'ewyte toipo­'oro teran kuekatu e hap ehowawi. — Pyno uiwy­ria'in Tupana Mipo­'oro Eipo­rekuat nuat Iesui piat ei'a­tu­poi­tyro hap atipo­'oro ehowawi atiwan mesuwe uito Pauru e hap wan nug hat Tesiu uito toran are.
ROM 16:23 Uito Pauru mesup areĩne'en mehĩ Kaiu yat pe areket mesuwe. Iesui mohey haria te'e­ru­wa­'a­tunug mesuwe mehĩ Kaiu yat pe. Pyno uipo­wyro hat Kaiu i'ewyte toipo­'oro teran kuekatu e hap ehowawi. Wẽtup ok mehĩ Eratu tipo­'oro kuekatu ehowawi. Aiwy Eratu ti toĩne'en mesuwat tawa pe morekuat ekare'en apykok kuap hat miit'in miat imõ'ẽ kuap hat.
ROM 16:24 — Uika­'iwat Iesui eti'a­tu­ky'e kahato o emiit'in yi Humanu totiaria are'e mesuwe eti'a­tu­ky'e hap upi eti'a­tu­poi­tyro o mi'iria egyi'at hap ok tã are'e mesuwe Iesui pe.
ROM 16:25 Pyno to'iro wati­mõ­typot Tupana ahehay wo — Tupana En ni wakuat kahato waku wato'e. Ikahu kahato ewakuap uruto'e. Urumoe­hãite kuap kahato Esa'yru sese mohey hap ete uruto'e. Ehay wakuat Esa'yru etiat wo Urupo­rekuat etiat Emimo­herep ete urumoe­hãite kuap kahato urumotag kuap kahato Esa'yru mohey hap ete uruto'e. Nimo te Esa'yru yt put'ok'e i te mesuwat yi tote turan ehay moherep haria urue'a­se­'i'in timo­herep kahato yianmete Esa'yru Iesui etiat ta'a­tu­miwan me waku wato'e. Aikotã sehay mig'i wuat ewy ta'a­tu­mo­herep uruepe ma'ato yt heremo kahato i aikotã mesup e'at hap ewy uruto'e Epe Tupana. Esa'yru e'yianmete ta'a­tu­mo­herep yne Esa'yru ete yn uruto'e. Put'ok'e hawyi urumoe­hãite hanuat kahato. Mi'i miwan kaipyi Esa'yru mohey uruepiat hamo uruto'e. Urupo­wyro kahato emohey hap ete uruto'e.
ROM 16:26 Mekewat miwan pywuat sehay etiat yianmiat Tupana ehay moherep haria mienoi heremo kahato topy­hu'at wuat'i ywania mikuap mo kahato. Waku kahato En Tupana uruto'e. Ta'i Iesui etiat miwan ko'i Emipo­'oro Aipo­rekuat nuat etiat waku kahato uruto'e. Mi'i pote uruimo­herep Esa'yru etiat mesuwat sehay pywuat torania ywania pe mesuwat yi tote hap uruhẽtup ewawi Tupana. Uruiky­'esat kahato yne ywania Esa'yru mohey haria wo tukup­te'en hap uruto'e. I'ewyte uruiky­'esat yne mi'iria Esa'yru ehay upiaria wo tukup­te'en uruto'e ewawi Tupana.
ROM 16:27 En yn ni Tupana mi'i hawyi yt uwe i Tupana wo toĩne'en uruto'e. En yn ni wuat'i wuat'i kuap hat uruto'e. En yn ni yne yne we'eg hap eiam sese uruto'e. Uruimõ­typot kahato En katu­pono etipo­'oro Esa'yru Iesui uruewawi Uru'akag Sese wo uruto'e. Uruimõ­typot kahato En at ka'ap wuat'i e'at pe uruto'e. Waku kahato ti rat En pãi an uruto'e. Mi'i hap ewy waku wato'e Tupana pe. Waku. Waku ra'yn ui'e hap ehowawi Iesui mohey haria yi Humanu wanuat rotiaria. Uito ti Iesui potpo­'oro Pauru.
1CO 1:1 Uito ti Pauru are. Mesuwat uimiwan atipo­'oro ehowawi tawa Kurintiu piaria einãpin hamuat torania Iesui mohey haria nãpin hamuat. Uito ti Tupana mi'airo Tomi­po­'oro Wuat'i Porekuat Nuat Iesui moherep miit'in miat hanuat are. I'ewyte aiwy kahato Sotene po kaipyi tuut mesuwat miwan.
1CO 1:2 Pyno kuekatu uruipo­'oro ehowawi. Mi'i hawyi waku kahato woro­ho­'o­nãpin katu­pono Tupana mi'ai­roria temiit'in sese wuat sa'a­wy­'i­te­wuaria eipe. Ta'i Tupana wano eiperia wakuaria wo Tupana wywo eweipy­hu'at — Iesui Aipo­typot Aika­'iwat sese ewei'e pote. Yt eipe yn i ma'ato wuat'i miit'in mesu­wa­ro­tiaria mio tã e haria Tupana wanuaria wakuaria Tupana wywo te'e­ro­py­hu'at.
1CO 1:3 Pyno mio tã ahẽtup Tupana pe — Tupana etum o tawa Kurintiu piaria pe i'atu­poi­tyro hap yt kat sa'up i egyi'at hap kaipyi are. Etunug mi'iria o torania wo'o­wese haria wo are'e Aika­'iwat Aipo­typot Iesui kape Ai'ywot Atipy piat kape ahẽtup eika­wiano. Uito ti Pauru.
1CO 1:4 Wuat'i e'at pe arehum ewawi Tupana katu­pono etum na'yn tawa Kurintiu piaria pe i'atue­ha­kye­ra'at hap Uruka­'iwat Iesui mohey haria mi'iria pote are'e.
1CO 1:5 Ta'i Tupana aipoi­tynug kahato Iesui minug hap upi. Mi'i hawyi ti torania watikuap kahato kat ko'i kat ko'i Aipo­typot ok tã. Uhehay Tupana wat ewy topy­hu'at. Wẽtup piit ewy watoĩ­ne'en.
1CO 1:6 Watoĩ­ne'en mot'i Aika­'iwat wywo pote ihay i'ewyte toĩne'en mot'i aipy'a pe.
1CO 1:7 Mi'i pote wahe­katup Aipo­typot turan I'ywot aipoi­tyro kahato aipo­wyro kahato. Mi'i hawyi tuwe­mo­herep aru Aika­'iwat wato'e yn wuat'i ehamo. Aimoe­haĩte Iesui mohey hap ete.
1CO 1:8 Koitywy Aika­'iwat aimoheg kahato tehay wo. Yt watoiat kuap i ahepiat imohey hap wuat'i e'at pe pote. Mi'i tã ti tutunug mesuwat yi kahuro hap kape. Mi'i hawyi meremo ta'aipok i Aipo­typot Wuat'i Mimõ­typot no. Aika­'iwat Iesui put'ok'e hap e'at pe turan — Yt kat i sa'ag atipuẽti mi'iria ete e Iesui ahetiat.
1CO 1:9 Mi'i pote waku wato­mohey i'e hap torania aipy'a pe. Sa'a­wy'i to'e — Atiky­'esat eipe Uha'yru ekatu­wyria sese wo eweikup­te'en e. Ewetunug Mi'i Miit Uha'yru Eipo­typot no pote waku pe iwywo eweikup­te'en wuat'i e'at pe e ahepe. Mi'i hawyi waku wato­mohey kahato i'e hap ewy mesup te.
1CO 1:10 Uheywyt'in uheinyt'in pywo pe are'e ehepe Aipo­typot Aika­'iwat Iesui ehay moherep hat ti uito are. Mi'i tupono ahẽtup eiwo­'oehay upi eweikup­te'en. Mi'i pote — Pywo pywo ewei'e eiwo­'ope hawyi eiwo­'o­wehik kahato. Mi'i hawyi wẽtup wanẽtup hap wywo yn eweikup­te'en. Waku aiwo­'o­'ewy yn watoĩ­ne'en wẽtup miky­'esat upi yn hawyi sehay yt kat i aiwo­'o­sytpok hap toĩne'en aikai.
1CO 1:11 Ga'atpo tõ'ẽ mana Kure yat piaria hawyi mi'iria henoi uhepe aikotã eipy­'a­setpe tukup­te'en sehay wuat wu'uka haria etiat.
1CO 1:12 — Pyno itotiaria wẽtup wẽtup wanẽtup hap wywuaria i'atu'e. Yt to'o­'ewy hin i i'atu­wa­nẽtup hap ko'i. Mi'i pote wu'uka hap yn itote i'atu'e uhepe ehetiat. Pyno atikuap ta'yn eipy­'a­setpe tukup­te'en — Uito ti aimu'e hat Pauru upi e haria ma'ato irania'in — Uito aimu'e hat Aporu upiaria e haria. Mi'i hawyi irania'in — Uito aimu'e hat Peteru upi e haria tukup­te'en. Ma'ato irania'in — Uito aimu'e hat Iesui upiaria e haria i'atu'e ta'a­tu­henoi uhepe õ'ẽ haria. Mi'i tã hap kaipyi ti eiwu­'uka hap topy­hu'at.
1CO 1:13 Uiwy­ria'in karãpe watu­'uka aiwo­'ope mi'i hawyi wato­pat'ok pat'ok kahato hawyi aiwat i aiwat i yn watoĩ­ne'en karania heko rakaria ewy ne'i. Ma'ato Iesui piit yt mi'i ewywuat hin i are'e. Wẽtup piit ewywuat yn watoi­ne'en. Uito Pauru ma'ato uito yt uiku­'uro i aria'yp posak ete eheha­kye­ra'at hamo. I'ewyte ti ehet'ok hawyi yt uhet i ti topy­hu'at eikai ehete. Pywo yt uwe i ti eiperia uimi­set'ok ko'i.
1CO 1:14 Ta'i uito ti yt woro­ho­'o­set'ok i eiperia y'y pe. Toĩ ni ma'ato typy ok yn itote uimi­set'ok ko'i mekewat mehĩ Kiritu hawyi mehĩ Kaiu hawy­tewat uimi­set'ok ko'i ma'ato mi'iria yn ahet'ok hawyi irania'in eiperia — Uito ti Pauru upiat hat imiset'ok pote yt ewei'e kuap i katu­pono typy'ok yn ni itote uimi­set'ok.
1CO 1:15 Yt uwe i to'e kuap — Uito ti Pauru miset'ok mi'i pote po'og uito eikai e hat. I'ewyte yt uwe i to'e kuap — Eipe Pauru miset'ok toset wuat e hat.
1CO 1:16 I'ewyte uimi­'a­tu­set'ok ko'i tukup­te'en itote uhyt Etewana yat piaria yn ma'ato mi'i hawyi uimi­'a­tu­set'ok ko'i yt uwe i itote.
1CO 1:17 Pywo ti Aika­'iwat Iesui yt uipo­'oro i miit'in set'ok set'ok hamo ma'ato tehay wakuat moherep hamo yn uipo­'oro tehay wakuat enoi wuat'i puoria piat hamo yn e. Mi'i hawyi ati'a­tu­mu'e haty wo aikotã Aika­'iwat iku'uro aika­wiano hap aria'yp posak ete hap yn uhehay. Yt aremõ­typot teran i ma'ato ahenoi aikotã Aipo­rekuat nuat Tupana Mipo­'oro iku'uro aria'yp posak etiat hap yn ahenoi teran. Pyno ti yt miit'in miky­'esat ewy hin i ti atimo­herep katu­pono aremõ­typot uhehay se wywo hap hawyi yt hesaika hin i uhehay Tupana wanẽtup hawe.
1CO 1:18 Ta'i aria'yp posak etiat Iesui iku'uro ahetianuat enoi hap ti yt hee hin i mekewat ho'o­wasat rakaria pe — Yt ewe'eg hin i ti i'atu'e ne'i ahepe. Ma'ato aito Iesui miky­'eria pe ti hee kahato ra'yn katu­pono watikuap ta'yn hesaika kahato mekewat sehay hap.
1CO 1:19 Aikotã sa'a­wy'i yianmiaria Tupana ehay moherep haria te'e­ro'e hap ewy — Meiũran ti aru atimoma ra'yn eiwe'eg kahato hap — Uito po'og kuap hat wuat'i kawiat hap e. Atimo­weityk ti aru miit'in we'eg hap yt nakuat i ko'i e. Mi'i hawyi — Uito atikuap po'og e haria yt uwe i topy­hu'at e Tupana sa'a­wy'i tehay moherep hat Isaia miwan 29.14 piat pe.
1CO 1:20 Aikope aru tukup­te'en — Wuat'i etiat kuap haria uruto e haria e. Aikope aru tukup­te'en wuat'i sehay kuap haria. Aikope tukup­te'en mekewat irania'in akit ta'a­tuehay wuat haria. Ta'i yt aikope i ti aru katu­pono i'atuwat i'atu­we'eg hap Tupana ti'akit yne ra'yn. Mi'i hawyi miit'in we'eg hap topy­hu'at wuat'i mi'akit akit wo ra'yn.
1CO 1:21 Katu­pono sa'a­wy­'iwuat we'eg kahato haria ikuap teran Tupana ma'ato yt put'ok'e i i'atu­we'eg hap Tupana kuap hamuat hap. Katu­pono koitywy Tupana tiky­'esat kahato mekewat yt i'atu­we'eg i hap kaipywiat aria'yp posak etiat ne'i iku'uro rakat mohey haria eheha­kye­ra'at hamuat hap. Po'og Tupana iwe'eg miit'in kai Katu­pono Tupana miky­ry'i wo toĩne'en miit'in we'eg kahato hap e.
1CO 1:22 Mio tã i'atu'e Iuteu ywania — Etomo­herep to iwato kahato mesuwe uruepe Tupana esaika hap uruepiat emohey hamo mi'i pote ti aru uruimohey en i'atu'e wati­'a­tu­mo­herep Iesui i'atuepe turan. Ma'ato Kereku ywania mi'iria — Etimo­herep uruepe ehay iwe'eg kahato hawyi uruimohey Iesui etiat i'atu'e.
1CO 1:23 Ma'ato mi'iria pe — Iesui yn aheha­kye­ra'at kuap uruto'e. Iesui yn iku'uro aria'yp posak ete ahetiano e hap uruhenoi Iuteu ywania pe Kereku ywania pe yt ihay see hin i pytkai ta'a­tu­puẽti Iuteuria ywania. Mi'i hawyi ti Kereku ywania mi'iria mekewat sehay ti yt we'eg hin i hat ehay i'atu'e ahepe.
1CO 1:24 Ma'ato aito Tupana mi'ai­roria ete ti Iuteu ywania sio Kereku ywania ti mekewat sehay Iesui iku'uro aria'yp posok ete aiku­'uro hap u hamo hap hesaika kahato topy­hu'at aheha­kye­ra'at hamo. Ta'i wato­mohey mekewat sehay Iesui etiat hawyi aheha­kye­ra'at hap toĩne'en. Pywo ti rat Iesui ti Tupana esaika hap wywo iwe'eg hap wywo toi'a­tue­ha­kye­ra'at kuap wuat'i miit'in wato'e.
1CO 1:25 Katu­pono mekewat Tupana we'eg hap po'og iwe'eg torania aiwe'eg hap kai wato'e. Katu­pono Tupana tuwe­ky­ry'i pote po'og iwe'eg torania mesu­wiaria we'eg hap ko'i kai haype wato'e. Katu­pono Tupana perup'i hap ti po'og hesaika mesu­wa­rotiat hesaika rakaria kai wato'e yn ahehay.
1CO 1:26 Ta'i uheka­tu­wyria koitywy ti watikuap kahato aikotã Tupana ti'airo yt we'eg i haria temiit'in sese wo hap. Sa'a­wy'i ai'airo temiit no turan yt aiwe'eg hin i te turan ai'airo. I'ewyte yt typy'i hin i iwato'in nakaria toi'airo temiit no mesuwe. I'ewyte yt typy'i hin i hesaika rakaria toi'airo temiit no. Ma'ato mi'i pytkai ai'airo temiit no torania kaipyi.
1CO 1:27 Ma'ato toi'airo yt we'eg i haria temiit no typy'i kahato. Mi'i tã tutunug hawyi toi'a­tu­mohit kahato — Uito po'og we'eg hat e haria. I'ewyte ti Tupana ti'airo miit'in emiit temiit no typy'i kahato. Mi'iria kaipyi ti toimohit — Uito po'og torania kai e haria.
1CO 1:28 Ta'i ihaky­'e'i rakaria yt uwe miky'e i ko'i miit emiit ko'i yt iwato hin i rakaria yn ni toi'airo temiit sese wo. I'ewyte yt kat sehapap i hap ko'i wyti toi'airo temiit no. I'ewyte yt uwe mikuap i ko'i ti satek takaria toi'airo temiit no. Mi'i hawyi ti — Uruto po'og e haria yi kai ne'i ra'yn te'e­ro­py­hu'at katu­pono hemiit'in sese te'e­ru­wa­nẽtup kahato imienoi kape.
1CO 1:29 Eweikuap apo kat pote Tupana ti'aro temiit'in no paa'e haria. Pyno ahenoi teran ehepe. Tupana ti'a­tu­'aro temiit no miit hit ko'i katu­pono yt toiky­'esat aru atipy pe tuwe­mo­wato rakaria. Yt toiky­'esat itote — Uito po'og uhewaku torania kai pote Tupana ui'airo temiit no e haria. Yt toiky­'esat i itote — Uito po'og pote Tupana ui'airo sa'a­wy'i tehay moherep hamo e haria katu­pono mio tã e haria Tupana mõpy­'ahak haria tukup­te'en e.
1CO 1:30 Aito ti Aipo­typot Iesui mohey haria pote Tupana ainug Tosa­'yru wywo wẽtup miit ewy. Sa'a­wy'i yt aiwe'eg hin i pytkai mesup aiwe'eg kahato katu­pono Iesui amyãtym toĩne'en aipiit pakup we hawyi Iesui we'eg hawuo wahe­wyry mesup. Sa'a­wy'i yt ahehay kuap i Tupana wywo ma'ato mesep Iesui wẽ aipiit pe pote ahehay kuap kahato Tupana wywo. Koitywy watoĩ­ne'en Iesui piit ewy mesu­wa­rote. Mi'i pote wato­py­hu'at Tupana sa'y­ru'in ko'i Tupana saki­'yt'in ko'i mesuwe. Mi'i pote wato­py­hu'at Tupana ywania ewywuat mesuwe.
1CO 1:31 Yt naku i wato'e aiwepe pãi — Uito po'og Irania'in kai yt naku i wato'e aiwa­nẽtup hawe. Yt mi'i tã hin i are. Po'og waku wato'e — Tupana ti waku po'og uikai waku wato'e. Mi'i yn ni aipo­wyro kahato hat wato'e waku. Aikotã i'e hap ewy aru tutunug yne to'e hap waku wato'e aipe­rup'i hap wywo. Uito ti miit'in yt naku i rakat ma'ato Iesui mi'airo kahato. Uito ti Pauru.
1CO 2:1 Uiwy­ria'in tawa Kurintiu piaria ta'i mekewat e'at pe sa'a­wy­'ite areto ehowawi eimu'e hamo turan areĩne'en eipy­'a­setpe. Woro­ho­'o­mu'e kahato Tupana mimo­herep ok tã. Tupana miky­'esat ewy yn woro­ho­'o­mu'e yt uhehay niatpo hin i atunug eimu'e hap ete.
1CO 2:2 Mio tã are uiwepe — Mesuwe Iesui yn atimo­herep miit'in me hawyi irania'in ehay atiwaure yne. Aipo­typot ete yn aru uhehay are'e uipy'a pe. Aikotã Aika­wiano aria'yp posak ete iku'uro hap yn aru uhehay wo atimo­herep tawa Kurintiu piaria pe are'e uiwepe.
1CO 2:3 Sa'a­wy'i te areĩne'en eipy­'a­setpe turan uipiit yt hesaika hin i hawyi uityry popuo woro­ho­'o­mu'e paa'ui'e popuo woro­ho­'o­mu'e turan.
1CO 2:4 Yt ihay se hin i hap ewy woro­ho­'o­mu'e. Miit'in ehay see hap yt ewy i woro­ho­'o­mu'e ma'ato Tupana Pã'ãu esaika hap kaipyi woro­ho­'o­mu'e. Mi'i hap ewy pytkai ti Tupana Pã'ãu esaika hap topy­hu'at uhehay moesaika hamo. Mi'i pote mi'i hawyi — Pywo pywo ewei'e eipy'a pe uhehay tyry wywo pytkai.
1CO 2:5 Mi'i hawyi Iesui mohey haria eweikup­te'en Tupana esaika hap kaipyi. Yt eweipuẽti hin i eimohey Tupana piat hap miit'in i'atuehay we'eg hap kaipyi.
1CO 2:6 Ma'ato irania'in Iesui mohey haria wo topot­mu­'eria hawyi ati'a­tu­mu'e mi'iria uhehay wo — Iwe'eg kahato rakat i'atu'e uhetiat pe. Ma'ato uito yt mesu­wa­ro­tiaria we'eg hap kaipyi uhehay yt ahiag we'eg hap kaipyi i. Mesu­wa­ro­tiaria ti koitywy i'atu­we'eg kahato ma'ato yt i'atu­we'eg hin i Tupana wanẽtup hawe. Meiũran Tupana timoma yne aru i'atu­we'eg hap hawyi yt topy­hu'at hin i aru i'atukai.
1CO 2:7 Ma'ato uito ati'a­tu­mu'e Iesui mohey haria Tupana we'eg hamo yn. Yt miit'in mikuap kaipyi hin i ati'a­tu­mu'e ma'ato mekewat we'eg hap Tupana kaipywiat yn wo ati'a­tu­mu'e torania mi'iria. Ma'ato irania'in yt kuap i hap ewy mesuwat sehay uimi­mo­herep kat pote uhehay sehay yianmiat ewywyat aikotã sa'a­wy'i Tupana ai'airo mesuwat yi nug hap e'yianmete hap ewy.
1CO 2:8 Tupana po'og iwe'eg more­kuaria kai katu­pono more­kuaria we'eg hap yt put'ok'e i Tupana Mipo­'oro Aipo­rekuat nuat we'eg hap ete. Ma'ato te'e­ru­we'eg pote kat pote som ta'a­tu­'auka Aipo­typot aria'yp posak ete.
1CO 2:9 Aikotã Tupana to'e Sa'a­wy'i hap ewy — Mekewat uiky'e haria pe atum neran uiminug wakuat po'og ikahu torania miit'in akasa hap ko'i kai ikahu rakat e. Atum neran uhemiit'in me wakuat sese e. Yt teke i te i'atu­wa­nẽtup hawe ikahu hap e. Mi'i hap ti atum neran uiky'e haria pe e Tupana sa'a­wy'i Isaia miwan 64.4 pe.
1CO 2:10 Mi'i pote koitywy watikuap ta'yn mekewat ikahu rakat Tupana miium. Ma'ato aito yn watikuap. Ta'i Ipã'ãu ti ahepe imoherep ta'yn. Katu­pono Tupana Pã'ãu me heremo yne minug ko'i heremo yne ra'yn. I'ewyte mig'i wuat yt uwe mikuap i ko'i toikuap. I'ewyte toikuap yne kat hamuat kat hamuat Tupana Pã'ãu minug ko'i. Mi'i pote aimu'e torania ete tepiat ikuap hap ok tã.
1CO 2:11 Aipo­typot ti miit aipiit ewywuat sese e. Mi'i hawyi Mi'i Miit wanẽtup hap watikuap toĩne'en aipiit pe Iesui Pã'ãu pote. Mi'i pote watu­wekuap Iesui pã'ãu sese toĩne'en aipiit pe. Mi'i hap ewy Tupana wywo Tupana toĩne'en Ipã'ãu. Mi'i ti ikuap yne tuwetiat.
1CO 2:12 Koitywy toĩne'en na'yn Tupana Pã'ãu aipiit pe. Mi'i hawyi Tupana Mipo­'oro Iesui pe — Ereke ro wato'e hawyi teke ra'yn. Mi'i hawyi Ipã'ãu kaipyi watikuap yne Tupana Pã'ãu py'a piat ewy. Ma'ato irania'in mesu­wa­ro­tiaria kai wẽtup mã'ãu ne'i yt aiwat ewy hin i ra'yn.
1CO 2:13 Mi'iria ti wẽtup mã'ãu ahiag wanuat wanẽtup hap ewy tukup­te'en. Mi'i pote wẽtup sehay i'atuete wuat'i mikuap ewy mi'iria we'eg hap. Mi'i pote i'atuepe uruwe'eg kahato katu­pono Tupana Pã'ãu ti wẽtup sehay wo ra'yn aimu'e. Mi'i hawyi aiwẽ pyi wẽtup sehay ra'yn tuwẽtem sehay pywuat sese yn na'yn. Mi'i pote aimi­mu­'eria Tupana Pã'ãu eiam kahato wo tukup­te'en hawyi pywo i'atu'e ahehay pe.
1CO 2:14 Ma'ato irania'in yt Tupana Pã'ãu yt eiam i ko'i ti — Yt i'atu'e ne'i Tupana ehay pywuat aiwẽ piat ete katu­pono mi'iria yt kat kuap i Tupana miium Topã'ãu wakuat kaipywiat. — Yt kat hamo i ehay i'atu'e Tupana pe. Ta'i aimienoi Tupana Pã'ãu kaipywiat ete ti te'e­ru­we­ky­ry'i ne'i. Yt ta'a­tukuap i kahato Tupana miium ko'i ikahu rakat pytkai katu­pono Tupana Pã'ãu yt toĩne'en i i'atu­py'a pe ikuap hamuat.
1CO 2:15 Ma'ato aipiit pe toĩne'en Tupana Pã'ãu pote watikuap kahato waku sese rakat sehay pywo rakat i'ewyte yt naku i hap watikuap yne.
1CO 2:16 Katu­pono miit'in mesu­wa­ro­tiaria yt tikuap i kahato kat hamo Tupana tunug tomi­ky­'esat ko'i. Aikotã to'e iwan me hap ewy — Ta'i yt uwe i ti ikuap Aika­'iwat wanẽtup hap. Ta'i yt uwe i ti inãpin kuap e Isaia tomiwan me. Yt uwe i Tupana wanẽtup hap kuap hat toĩne'en e Isaia miwan 40.13 pe. Watikuap kahato mesup katu­pono Aika­'iwat Iesui wanẽtup hap aikai kahato toĩne'en mesup. Iesui wanẽtup hap toĩne'en aipy'a pe aiwa­nẽtup hawe hawyi Tupana mikuap ko'i toĩne'en wy aipy'a pe katu­pono Iesui To'ywot ewywuat wanẽtup hat toĩne'en aipã'ãu me aipy'a pe e. Tupana mipo­'oro sese Pauru uito are.
1CO 3:1 Uiwy­ria'in tawa Kurintiu piaria sa'a­wy'i Uito Pauru ahenoi teran Tupana ehay ehepe sa'a­wy'i uheĩne'en itote turan ma'ato tig mekewat e'at pe yt ahenoi kuap i Tupana Pã'ãu miky­'esat ewywuat hãpyk po'og nakat katu­pono eipe yt Iesui mohey haria yt ewy hin i te eiwa­nẽtup hap. Mesu­wa­rotiat wanẽtup hap ewy yn eipe eweikup­te'en katu­pono kurin kat ewy Iesui mohey hap toĩne'en eikai mekewat e'at pe.
1CO 3:2 Sa'a­wy'i eipe hirakat hit ewy eweikup­te'en mi hy yn u haria ewy aikotã hirakat yt tu'u kuap i te ipu'i kã'ã hap ewy eweikup­te'en Tupana ehay yt ewetunug yne kuap i te pote. Mi'i hawyi woro­ho­'o­mu'e pot'i teran Tupana mikuap eiky'e hap ok tã. Ma'ato ahenoi hawyi yt eweikuap kuap i. Ma'ato i'ewyte koitywy yt eweikuap i ui'e hap ko'i eimu'e hap.
1CO 3:3 Katu­pono eweikup­te'en mesu­wa­rotiat wanẽtup haria ewy yn. Eiwu­'uka wu'uka eiwo­'ope sehay hit no. Mi'i hawyi eha'y­wywi eweikup­te'en eiwo­'ope aikotã mesu­wa­ro­tiaria yt Iesui mohey i haria eko ewy eweikup­te'en.
1CO 3:4 Mio tã ewei'e eiwo­'ope — Uruto ti Pauru mohey haria ma'ato irania'in — Uruto ti aimu'e hat Aporu mohey haria ewei'e. Mi'i hawyi eiwu­'uka wu'uka at ka'ap mio tã ei'e eiwo­'opiat hamo. Yt naku i mi'i tã ewei'e katu­pono mi'i tã ne'i pote mesu­wa­ro­tiaria yt Iesui mohey i haria ewywuat eiwe­wa­nẽtup.
1CO 3:5 Ma'ato are'e ehepe — Uito ti Pauru Tupana yn eropat hat sese i'ewyte eimu'e hanuat are. Aporu i'ewyte Tupana yn eropat hat. Kat hamo pyno — Aimu'e hat Pauru mohey haria uruto ewei'e. Sa'a­wy'i woro­ho­'o­mu'e eipe mi'i hawyi Iesui mohey haria wo eweikup­te'en ui'ewy eweimohey pote are. Aika­'iwat emiit'in sese uruto urutunug urupo­'oro hap ok tã yn.
1CO 3:6 Uito areĩne'en hã'ỹi koi hat Tupana ehay wo ewy woro­ho­'o­mu'e mekewat e'at pe. Mi'i turan aimu'e hat Aporu put'ok'e itote eimu'e hamo hap ewy hawyi toihu'i hu'i uimikoi iã'ỹi hap ewy hawyi i'atutag na'yn Tupana esaika hap wywo.
1CO 3:7 Ma'ato Tupana yn ni aimotag kuap tomohey hamuat hap ete. Mi'i tupono waku Tupana yn wati­mõ­typot hã'ỹi nug hat i'ewyte i'yp moehaĩte hat. Yt naku i wati­mõ­typot ikoi hat ne'i are. I'ewyte yt naku i wati­mõ­typot ihu'i hu'i hat ne'i. Po'og waku imotag kuap hat wato­mohey haty wo.
1CO 3:8 Meiũran aru Tupana tum ahepe aipotpap hap sa'up. Tutum ahepe ha'up aikotã aipotpap hap ok tã aru. I'ewyte iwato aipotpap pote iwato tutum yt pote kurin tutum. Pyno tukup­te'en aitoria hã'ỹi koi haria ewy hawyi irania'in ihu'i hu'i haria ewy ma'ato sa'up ium hat sese Tupana.
1CO 3:9 Pyno aito Tupana eropat haria Aikotã wẽtup ok etiat motpap nug haria ewy aito.
1CO 3:10 Eipe Tupana mõtypot yat ewy eweikup­te'en. Uito Tupana mõtypot yat ãkukag mo'am hat ewy Uipo­'oro hat miky­'esat ewy are. Hãpyk kahato atunug wuat'i nug kuap hat ewy. Waku yne hawyi irania'in inug ipiit. I'ewyte irania'in i'ahik yi wo hap ewy. Mi'i hap ewy atunug ehepe are. Katu­pono Tupana to'e — Eiwe'eg wo o ewetunug ui'yat nug hap ete waku ui'e hap ewy ewetunug o e ahepe. Mi'i pote waku wati­'a­tu­mu'e miit'in hãpyk kahato ihay pywuat nuat yn.
1CO 3:11 Aika­'iwat Iesui i'apy­'yha ewywuat kahato. I'apy­'yha watopag yi pe ai'yat moheg hamuat hawyi ai'yat yt ta'at hin i. Mi'i hap ewy ti Aika­'iwat Iesui watopag ai'a­py­'yha wo hawyi watoĩ­ne'en wuat'i e'at pe. Yt karãpe i wata'at aria pe. Iesui yn Tupana Mi'airo Aheha­kye­ra'at hat. Yt naku i wato'e irania'in me — Yt Iesui yn i ti aheha­kye­ra'at hat ma'ato toĩne'en wẽtup ok aheha­kye­ra'at hat wato'e ne'i yt naku i wato'e.
1CO 3:12 Eimu'e haria ti ai'yat nug haria ewy tukup­te'en. Toĩne'en ai'yat nug kuap kahato haria ewy mi'iria ai'yat nug nu kawiat ewy iheg nakat nu Uru kawiat nu Parata kawiat getap nug haria ewywuat aimu'e hãpyk Tupana ehay sese etiat haria ewywuaria ma'ato irania'in aimu'e haria ai'yat nug haria yt iheg hin i nug hap ewy tutunug. Yt toĩne'en mot'i hin i i'atu­minug ko'i nupi'a mi'u wo hap ewy ta'a­tunug ai'yat ikaha wen ma'ato meremo yt ikahu i hap ewy topy­hu'at. Mi'iria ta'a­tunug ai'yat meremo upip kawiat hawyi ikahu wen wẽtup ewaty hawyi hat'e hap ewy topy­hu'at. Mi'iria ewywuat aimu'e ikahu kahato ma'ato ta'a­tu­wa­nẽtup hap kaipyi aimu'e yt Tupana ehay sese kaipyi hin i aimu'e hawyi wato­mohey i'atu­wa­nẽtup hawyi meremo waku ma'ato wẽtup ewaty hawyi ai'yat nem nakat hap ewy topy­hu'at hap ewy.
1CO 3:13 Karãpe put'ok'e Aiopo­typot Iesui hawyi toimo­herep aru wuat'i miit'in me i'atu­minug sio waku sio yt hap. Sio watunug iheg nakat sio yt e. Tohã'ãg yne aiminug ko'i mekewat e'at pe sio iheg nakat nu ewy sio aria'yp kawiat ne'i hap kuap hamo.
1CO 3:14 Waku watunug Tupana mõtypot yat iheg kahato rakano nu kawiat ewywuat. Mi'i hawyi aria put'ok'e itote hawyi aria yt tu'u kuap i. Mi'i hawyi Tupana tuwehum aiminug iheg nakat nuat to'yatnug mote.
1CO 3:15 Ma'ato aria tu'u ne'i hawyi yt kat hamo i topy­hu'at yt kat hamo i aipotpap. Watoĩ­ne'en aru Tupana mieha­kye­ra'at no wen ma'ato aipotpap sa'up aipo pe yt kat i katu­pono aiminug aria tu'u yne. Yt kat i topy­hu'at Tupana kapiat aipotpap hap watunug sa'ag ne'i pote.
1CO 3:16 Eweikuap apo Tupana Pã'ãu yat sese eipe hap sio yt. Ta'i Tupana yat sese ko'i ti eipe. Tupana Pã'ãu eiam torania imohey haria Iesui kaipywiat haria.
1CO 3:17 Ma'ato uwe uwe — Tupana yat moma teran e hat Tupana mimoma wo ne'i aru topy­hy'at. Katu­pono Tupana yat no yn waku aipiit topy­hu'at aikotã Tupana ewaku hap ewy yn waku wato­py­hu'at. Aito ti Tupana yat sese ewy watoĩ­ne'en.
1CO 3:18 Yt naku i watu­we­ma'at ne'i Tupana yat — Uito po'og irania'in kai e hap mo. Mi'i tã ne'i watunug mote miit'in irania'in yt kat kuap i haria ewy ne'i watu­wa­nẽtup. Waku watipun — Uito po'og e hap pya aikai. Paa'wa­to'e pote Tupana to'e ahepe — Eiwe'eg kahato rakaria eipe e ahepe miit'in miky­ry'i hamuat watoĩ­ne'en pytkai.
1CO 3:19 I'atu kahato mesuwat yi tote — Uito po'og uiwe'eg e haria ma'ato Tupana wanẽtup hawe yt kat i kuap haria ewy mi'iria — Uito uiwe'eg kahato i'atu'e pytkai. Miwan me mio tã to'e — Uito po'og uiwe'eg e haria te'e­ru­we­ma'at ne'i ta'a­tu­we'eg sa'ag hamo hawyi ta'a­tu­we'eg po'og hap suki ewywuat topy­hu'at ta'a­tu­'auka hamo pira ewy e Tupana sa'a­wy'i miwan me.
1CO 3:20 Mio tã e haria pe Tupana to'e — Uito po'og uiwe'eg irania'in kai ewei'e pytkai yt kat hamo i eiwe'eg hap e Tupana.
1CO 3:21 — Aito hekat rakaria ewy katu­pono Ai'ywot Tupana sakpo'e hekat rakat pote. Yt kat i ahekat mesu­we­pytkai hekat rakaria watoĩ­ne'en wuat'i e'at pe.
1CO 3:22 Yt naku i watu­we­mõ­typot — Uito po'og nakat e hap aiwa­nẽtup hawe. Yt naku i watu­wehum miit'in minug te'e­ru­we­kai­pywiat ete katu­pono torania aiwat aiminug wuat ko'i Tupana piat aipo­wyry hap. Uito Pauru ma'ato areĩne'en eimu'e eiwanuat hamo ra'yn. I'ewyte aimu'e hat Peteru aiwanuat re wy aimu'e hat Aporu aiwanuat aimu'e hap tutum. Katu­pono yne yne Tupana minug aipo­wyro hamuat toĩne'en. Tutum aipo­wyro aiku­'uro turanuat aipo­wyro hamo. Koran mũki­'ite wuat'i e'at pe aipo­wyro. Ta'i i'ewyte mesup i'ewyte mũki­'ite e'ihot'ok pe turan toĩne'en kahato aipo­wyro hano. Mi'i pote hekat rakaria sese ewywuat watoĩ­ne'en aito. Aito i'ewyte aiku­'uro wen i'ewyte mesup i'ewyte mũki­'ite i'ewyte e'ihot'ok hap ewy.
1CO 3:23 Katu­pono Aika­'iwat Iesui wanuat watoĩ­ne'en. Aika­'iwat Iesui toĩne'en Tupana wanuat. Mi'i pote yne aito Tupana wuanuat watu­kup­te'en. Uito Iesui emiit Pauru are.
1CO 4:1 Uiwy­ria'in uruto ti Tupana potpo­'o­roria pote waku ti eiwa­nẽtup urumienoi kape — Mi'iria wyti Aipo­typot eropat haria sese waku ewei'e. Mi'iria wyti yt aimikuap i Tupana etiat moherep haria waku ewei'e uruepiat pe.
1CO 4:2 Karãpe watu­we­potpap Aika­'iwat potpap nug hap ete turan waku kahato watunug i'e hap ewy. Waku watunug imiky­'esat ewy. Mi'i hawyi watoĩ­ne'en heropat kuap sese haria wo aito.
1CO 4:3 Irania'in eipy­'a­setpe tukup­te'en — Mi'i wakuat kahato i'atu'e uhepiat pe. Irania'in — Yt naku i i'atu'e uhepiat pe. Ma'ato ti uito yt atikat i miit'in kaipyi — En ni waku e hap katu­pono — En ni waku kahato e hap Tupana kaipyi atiky­'esat. Koitywy yt are'e i uiwepe uiwa­nẽtup hawe — Uito waku uito yt naku i yt are'e i uiwepe ma'ato atikat kahato Tupana piat uikuap hap — En waku e hap.
1CO 4:4 Karãpeĩ yt kat i uiwe­mõti hawe pytkai — Pyno waku kahato uito are'e uiwa­nẽtup hawe ma'ato Tupana yn ikuap sio uito waku sio yt hap. Sio atunug waku tope sio yt nakuap i atunug.
1CO 4:5 Karãpeĩ Aika­'iwat put'ok'e atipy kaipyi miit'in pat'ok pat'ok hamo hap e'at pe ti aru Tupana tomo­herep aru wuat'i pe aiwa­nẽtup sa'ag hap sio watunug waku tope sio yt hap sio tomõ­typot haria watoĩ­ne'en sio watu­we­mõ­typot ne'i sio miit'in mõtypot haria aito. Ta'i mekewat e'at pe watikuap ta'yn Tupana kaipyi — En ni waku e hap sio yt hap watikuap ta'yn mekewat e'at pe — Uito waku ai'e pytkai aito waku ai'e pytkai.
1CO 4:6 Mi'i hap ewy ti uruto uiwy­ria'in. Uito Pauru eimu'e hat i'ewyte Aporu toĩne'en itote eimu'e hat. Waku eiwa­nẽtup kahato urehay kape katu­pono wẽtup ehay yn uruto'e Iesui etiat yn uruimu'e eipe. Pyno atiky­'esat kahato uru'ewy eweikup­te'en wẽtup sehay yn moherep haria Iesui moherep haria uruto ewy uruhãiku ewywuat urupusu ewywuat waku eweikup­te'en hap atiky­'esat urupot­mu­'eria. Urumi­mu'e wẽtup ok yn uruto typy ok pytkai. Yt naku i ewei'e Uito Pauru mimu'e hawyi wẽtup ok — Uito yt Pauru upi i ma'ato uito Aporu upi uito pãi an yt naku i ewei'e katu­pono Aporu uito wẽtup miit ewy hawyi wẽtup sehay yn eimu'e Iesui Aimi­mõ­typot moherep hap yn uruehay. Yt naku i wati­mohit wẽtup ok aimu'e hat hawyi yt naku i watunug wẽtup ok aimu'e hat Tupana wo e.
1CO 4:7 Mi'i pote kat hamo wato'e irania'in me — Uito po'og ekai katu­pono Tupana tum ahepe tomi­sepap kuap nug kuap hap. Yt aiwewi i watikuap wuat'i nug hamuat ma'ato Tupana miium kaipyi wahepap ma'ato yt pote yt kat i aikai. Pyno kat hamo ten — Uito po'og waku eikai wato'e aipy'a pe.
1CO 4:8 Koitywy — Uruto po'og ewei'e katu­pono uruikuap yne ewei'e. Ta'i Miit'in mu'e haria akag wo urutu­kup­te'en ewei'e. Ikap kahato rakaria ewy urutu­kup­te'en mesup pote yt kan hamo i urupoi po'og Tupana ehay mesup uruikuap yne ra'yn mote ewei'e eipy'a pe yt iwe'eg i haria ewy. Pywo pote waku uimu'e waku Aporu mu'e haria wo eweikup­te'en ma'ato yt pywo hin i ewei'e eipy'a pe. Hira­karia ewy te eweikup­te'en eiwa­nẽtup hawe.
1CO 4:9 Uruto urutu­kup­te'en wuat'i mu'e hamo Tupana mipo­'oro sese ko'i uruto. Ma'ato mi'i pytkai eimi­mohit ko'i wo urutu­kup­te'en po'og yi kape wuat'i kai wuat'i miit'in wanẽtup hawe urutu­kup­te'en. Irania'in uru'auka teran urukuasa teran urumohit teran wuat'i ehamo miit'in ehamo i'ewyte atipy piaria ehamo urumohit turan.
1CO 4:10 Mi'i pytkai Aipo­typot Iesui moherep hap ete yt urupohep hin i miit'in te'e­ru­we­ky­ry'i teran uruete pytkai. Ma'ato ehete yt uwe i te'e­ru­we­ky­ry'i uruetiat ewy. Mi'i pote — Uruto po'og Aipo­typot emiit ewei'e. Uruwe'eg po'og irania'in kai ewei'e. Uruto imohey pakup kahato haria ewei'e. Ta'i uruwa­nẽtup hawe eipe ipakup kahato ko'i. Ma'ato uruto miit'in mimohit ko'i wo uruto­py­hu'at.
1CO 4:11 Koitywy hesy'at rakaria wo urutu­kup­te'en. Urute­'y'u kahato uruhe­wyry hap upi. Uruesokpe ko'i hiot hiot'e rakat. Miit'in mi'a­hy­kahyk ko'i uruto. Yt kat i i'yat rakaria uruto. Kowo'i kowo'i uruewyry yt urue'yni wywo i.
1CO 4:12 Urupotpap sa'up hap kaipyi urutenuk. Karãpe miit'in urumohit ta'a­tuehay wo haywi urui'a­tu­poi­tynug mi'iria uruehay wo. — Tupana etia­tu­mo­hãite no uruwa­nĩ­kaptia uruto'e at ka'ap. I'atue­haĩte hap urutum urusa­ty­'i­sa­ty'i kahato mi'iria pytkai.
1CO 4:13 Urutoĩ­ne'en mot'i Iesui mohey hap wywo uru'akit ta'a­tuehay wo kahato pytkai ma'ato uruto uruiwesat sehay iwese rakano yn. Mesu­wa­ro­tiaria mipun wuat uruto­py­hu'at. — Waku urumi­mohit haria wo eweikup­te'en i'atu'e uruepe. Mio tã i'atu'e uruepe Tupana mi'ai­roria sese uruto pytkai.
1CO 4:14 Ahenoi yne mesup ehepe uiwy­ria'in uimiwan me. Yt atiky­'esat i eiwe­mõti ne'i uimiwan ete uhehay ete ma'ato eimoe­haĩte eiwa­nẽtup hawe yn woro­ho­'o­nãpin. Aikotã wati­nãpin aimẽpyt iky'e haype hap ewy woro­ho­'o­nãpin mesuwe.
1CO 4:15 Katu­pono uito areĩne'en ei'ywot ewy katu­pono uiwẽ pyi eweikuap sa'a­wy'i Aipo­typot Iesui etiat. Mi'i hawyi eweimohey Iesui hawyi wuat'i e'at pe gupte'en haria uimienoi wakuat kaipyi Uimi­mo­herep kaipyi aikotã uimẽ­pyt'in ewy eweikup­te'en. Toĩne'en i'atu kahato eimu'e haria ei'a­pykok haria Tawa Kurintiu piaria wen ma'ato wẽtup yn ei'ywot hap ewy toĩne'en. Mi'i ti uito Pauru rat katu­pono wuat'i irania'in eimu'e haria yianme sehay wakuat ahenoi ehepe Iesui etiat.
1CO 4:16 Mi'i hawyi uipy'a pyi ahẽtup ehupi eweikup­te'en itote ui'ewy kahato hamuat hap Aika­'iwat Iesui mohey hamuat hap ete.
1CO 4:17 Atiky­'esat kahato eipe uito ewywuaria Iesui mohey haria. Mi'i pote atipo­'oro eimu'e hat ehowawi Uito ewywuat Timoteu. Mi'i ti uha'yru sese wo ewywuat toĩne'en uiwa­nẽtup hawe. Uiky'e kahato mi'i katu­pono yt karãpe i uima'at hano toĩne'en. Mi'i put'ok'e itote hawyi toimo­herep ehepe eimi­waure aikotã woro­ho­'o­mu'e sa'a­wy­'iwuat hap ko'i ete. Aikotã watoĩ­ne'en ipakup takaria ewy yn na'yn wẽtup piit ewy Aika­'iwat Iesui wywo hap ete. Aikope aikope miit'in tukup­te'en hap kape uruhenoi hawyi Iesui mohey haria wo uruepiat ta'a­tu­nãpin hap ewy ipakup takaria wo ra'yn tukup­te'en. Wẽtup miit ewy yn Iesui piit wywo tukup­te'en. Mi'i hap ete eimu'e hamo atipo­'oro uha'yru Timoteu.
1CO 4:18 Sa'a­wy'i urutuwat eipy­'a­setpyi hawyi i'atu kahato wemõ­typot haria tukup­te'en eipy­'a­setpe — Pauru yt ta'aipok i i'atu'e haypiat haria.
1CO 4:19 Ma'ato ara'aipok irane te Tupana tum mu'ap uhepe hawyi. Areĩne'en eipy­'a­setpe hawyi atikat eipy­'a­setpiat haria tukup­te'en. Mi'i hawyi atikuap irane uwe uwe eipy­'a­setpe Tupana mõtypot haria tukup­te'en.
1CO 4:20 Tupana toĩne'en Aipo­typot no yt aiwẽ kaipywiat i — Uipo­rekuat no En ereĩne'en Tupana yt e hap kaipyi i ma'ato aipy'a pyi watunug imiky­'esat ewy hap kaipyi Tupana toĩne'en kuap Aipo­typot no.
1CO 4:21 Waku areto eimo­pe­rup'i hamo sio ei'a­piheg hap mywo. Sio waku woro­ho­'o­mo­pe­rup'i eiky'e hap mywo uiwese hap wywo sio aikotã eweiky­'esat hap wywo areto ehewowi. Uito Pauru.
1CO 5:1 Koitywy ti wuat'i miit'in eikuap yt eiwe'eg i hap ete meũpiaria. Ta'i ta'a­tu­he­noi­henoi kahato ti aikotã aheĩne'en hary­poria wywuat ihainia'in wywuat hap ko'i. Yt Iesui mohey haria ewy hin i eweikup­te'en hap ta'a­tukuap ta'yn. Ma'ato eipe po'og sa'ag yt nakaria i mekewat yt Iesui mohey i haria kai. Katu­pono uruikuap eipy­'a­setpiat wẽtup ok to'ywot ehary'i pakup toty pakup wywo toket hap.
1CO 5:2 Mi'i hap ete ti yt tuwe­mõti hin i te ma'ato po'og ni uruto uruewaku to'e ne'i sa'ag. Mi'i hawyi eipe yt paa'e­wei'e hin i ma'ato — Waku mi'i tã watunug ewei'e sa'ag. Uiwy­ria'in waku waire waire nug haria ewei'a­tu­'ywyk eiwe­'a­tunug hap kaipyi.
1CO 5:3 Uipiit yt toĩne'en itote eipy­'a­setpe wen ma'ato areĩne'en eipy­'a­setpe uiwa­nẽtup hawe hap ewy mi'i pote woro­ho­'o­nãpin aikotã areĩne'en eipy­'a­setpiat turanuat hap ewy. Ta'i yt naku i kahato etunug ety hit ehary'i sa'ag wo mimi uhyt waku wato'e itote.
1CO 5:4 Mi'i pote waku eiwe­'a­tunug yne eipe hawyi waku eweikaykay mekewat miit yt iwe'eg i rakat ehewowi. Mi'i tote ti toĩne'en aru Aipo­typot Iesui eipy­'a­setpe i'ewyte uipã'ãu toĩne'en eiwywo. Mi'i hawyi waku mekewat to'ywot ehary'i wywuat get hat eweinãpin kahato — Pyno koitywy ahiag wanuat ereĩne'en waku wato'e tope. Mi'i hawyi mono etoiat ro eminug sa'ag ma'ato yt etoiat i ewaire waire hap pote iku'uro rakat no ereĩne'en waku wato'e tope.
1CO 5:5 Ma'ato — Yt atoiat i uiwaire hap to'e pote waku wato'e Iesui pe — Pyno waku mi'i miit piit ahiag mi'auka wo topy­hu'at ma'ato waku mi'i miit pã'ãu topy­hu'at epo pe Iesui wuat'i e'at pe aikope Tupana toĩne'en morekuat no hap tote waku wato'e.
1CO 5:6 Pyno yt eiwe­ky­ry'i tei'o mekewat miit minug sa'ag ete. Yt naku i kahato watu­wehum mi'i tã nug hat ete katu­pono mekewat miit topy­hu'at mani puk ewywuat eipy­'aset pe ma'ato eipe eweipy­hu'at ipyre ewy. Mi'i pote aikotã watopag ipyre mani puk pe hawyi toimorem yne mani puk hap ewy mi'i hap ewy waku eweihep o mekewat miit sa'ag eipy­'a­setpyi hawyi ti aru eweipy­hu'at miit wakuaria ewywuat. Yt naku i hap yt mig hin i haria eipe. Pyno sa'a­wy­'i­wuaria Iuteuria tuwe­nõ'ẽ ta'a­tue­wã­ni­kaptia yi Esitu'in po kaipywiat turan i'atu­mi'u man iteneg nakat yn i'atu­mi'u yt kat i nem nakat ewy.
1CO 5:7 Mi'i ti yt kat i imoperup hap i'apuk hap nem nakat. Mi'i yt ipyp takat i mekwat i'atueman. Mi'i hap ewy koitywy aiwat aheman yt kat i ipyp hit hap imonem kuap hat.
1CO 5:8 Pyno to'iro Iesui enuk hap kape yt kat i ipyp takat man aimi'u wywo hap ewy e. Pyno ti aimopyp hap ewywuat toĩne'en mekewat mani puk ewywuat mekewat aiwo­'o­ma­'at'i ma'at'i hap ewywuat toĩne'en. I'ewyte man teneg ewywuat toĩne'en mekewat aiwo­'o­ky'e hap ewywuat. Mi'i yn waku sa'a­wy'i aimi'u wo watu­wẽtem ye Esitu pyi turan yt kat i mani puk watioto kuap pote. Mi'i man Tupana ehay pywo rakat yt kat i aheso hap wywo hap ewy. Mi'i man ewywuat waku aimi'u wo katu­pono mekewat man puk aiwo­'o­mo­pitpit hap ewywuat aiwo­'o­tu­'uka hap ewywuat wato'e sa'a­wy'i. Waku po'og Tupana ehay sese wahenoi miit'in me yt kat i miit'in ehay heso hap wywo.
1CO 5:9 Sa'a­wy'i atipo­'oro uimiwan me einãpin hamuat — Yt naku i watunug aiwy ok sese wo Iesui mohey hat yt iwe'eg i sese rakat wuat'i ihainia wywuat ieĩne'en hat wuat'i hary­poria wywo.
1CO 5:10 Tukup­te'en aipy­'a­setpe mesuwat yi tote ma'ato i'atu kahato aiwy­ria'in yt Iesui mohey i haria yt naku i nug haria. Mi'iria tukup­te'en yne e'at aikope aikope watoĩ­ne'en hap tote ahewyry hap tote. Mi'iria minug ewywuat yt naku i watunug katu­pono mi'iria wuat'i hary­po­ria'in ihainia'in wywo ieĩne'en haria. Aheka­re'en sere'ak takaria tukup­te'en mi'iria. Ahekat ky'ewi yn aima'at ma'at ne'i mi'iria wuat'i e'at pe. Mi'iria wuat'i tupa­naria mo wuat minug mõtypot haria. Yt naku i watunug mi'iria ewywuat ma'ato waku wati­'a­tuekyi mi'iria Iesui mohey hap kape. Yt naku i watunug mi'iria ahewa­nĩ­kaptia wo ma'ato po'og waku wati­wesat mi'iria waku hap ewy. Ma'ato karãpe Iesui mohey hat watoĩ­ne'en hawyi yt naku i watunug ne aikotã mi'iria minug yt naku i hap ko'i ewywuat. Ma'ato mi'iria ewywuat watoĩ­ne'en yt naku i nug haria te waku — Iesui mohey haria mi'a­piheg wo wato­py­hu'at. Yt naku i watunug ne yt naku i nug hap sa'a­wy­'iwuat ewy Iesui mohey haria aito hawyi.
1CO 5:11 Ma'ato — Ewetoiat ro meimuẽwat ko'i katu­pono mi'i ewywuat watoiat pote watoĩ­ne'en mesuwat yi tote waku pe. Koitywy atipo­'oro ewawi wẽtup sehay. Toĩne'en eipy­'a­setpe yt nakuap i nug hat — Uito Iesui mohey hat e hat ma'ato wuat'i wywo toĩne'en hewaire rakat mi'i hat ewywuat yt eweiwesat wesat tei'o i'ewyte yt erenuk tei'o iwywo. I'ewyte toĩne'en Iesui mohey hat ma'ato tupana iã'ãkap kape toiwẽpap te toimohey te miit'in minug tupana to'i — Uito Iesui mohey hat wy to'e pytkai waku mi'i miit kai waure wo waku watu­kut­p­te'en.
1CO 5:12 I'ewyte Iesui mohey hat ma'ato miit'in mohit tehay wuat hat toĩne'en ne i'ewyte sero­'ok'e hat i'ewyte Iesui mohey hat ma'ato mahy kape toĩne'en imopẽ'ã rakat.
1CO 5:13 Mi'i hat waku wati­nãpin kahato aikotã sa'a­wy'i Tupana to'e miwan me — Eweihep to eipy­'a­setpiat yt naku i nug hat uimohey to'e pytkai e Tupana temiit'in me. Ma'ato irania'in mesu­wa­rotiat yt Iesui mohey i haria yt kat hamo i mi'iria wati­'a­tu­'a­piheg katu­pono Tupana yn mi'iria apiheg kuap hat. Ma'ato ti waku Iesui mohey haria yt naku i nug haria wati­'a­tu­nãpin hãpyk yn wati­'a­tu­'a­piheg mi'iria hap ewy waku e Tupana ahepe. Uito emu'e hat Pauru.
1CO 6:1 Karãpe toĩne'en aipy­'a­setpe wu'uka hap ne'i aiwo­'opiat irania'in Iesui mohey haria wywo. Mi'i hap e'at pe yt naku i kahato watioto mi'iria sura­ra'in yt imohey i haria kape. Po'og waku mi'iria wati­'a­tunug Tupana mõtypot yat kape Tupana mohey haria piat ikuap hamo sio waku sio yt hap kuap hamo.
1CO 6:2 Meiũran aru aito Iesui emiit'in no wato­py­hu'at wuat'i miit'in airo hamo sio wakuat sio yt e hamuaria. Mi'i tã watunug mote aru waku mesup ta'yn wy aiwo­'ope wo'ope wati­'airo sio wẽtup ok tunug yt naku i sio yt hap kuap hamo e.
1CO 6:3 Ta'i mekewat e'at pe aru Tupana ainug temiit atipy piaria airo hamo uwe waku uwe yt e hamo wahenoi kuap mekewat e'at pe Tupana pe. Mi'i tã watunug kuap pote aru waku mesuwe i'ewyte wati­'airo kat som waku kat som yt naku i. Waku wati­'airo aipy­'a­set­piaria uwe aiwo­'o­pat'ok hat hawyi waku wato­mo­hãpyk aiwu­'uka hap ne'i.
1CO 6:4 Yt naku i watu­'uka aiwo­'ope ma'ato toĩne'en aiwu­'uka hap pote yt naku i wati­kaykay sura­ra'in aiwu­'uka wu'uka hap monik hamo aiwo­'opiat aiwo­'oehay uka turan.
1CO 6:5 Ma'ato sura­ra'in wati­kaykay mesu­wa­rotiat aiwu­'uka wu'uka hap monik hamo mi'i tã pote waku watu­we­mõti mekewat yt aiwe'eg i hap ne'i pupi yt uwe i eipy­'a­setpe iwe'eg nakat eiwu­'uka hap moma hamo. Ma'ato Iesui mohey haria waku watikat aipy­'a­setpe wẽtup ok iwe'eg nakat aiwu­'uka hap moma hamo uwe waku uwe yt naku i e hamo.
1CO 6:6 Ma'ato wẽtup ok eiwy ok eheinyt'in ko'i ewetioto sura­ra'in kape yt imohey i haria kape uwe waku uwe yt e hamo pote yt eiwe'eg hin i eipe.
1CO 6:7 Ma'ato eiwo­'o­'a­tu­'uka hap kaipyi atikuap ta'yn yt ihãite i eiwo­'o­ky'e hap ete. Mi'i hap kaipyi atikuap eipe porap te haria hap. Yt naku i ewetioto ehemiit morekuat yt Iesui mohey hat kape. Karã pe Iesui mohey hat aima'at yt naku i watioto surara kape po'og waku ima'at hat no watu­kup­te'en. Po'og waku eweikup­te'en waku imiero'ok wo po'og morekuat wo'o­py­hik hawe eweikup­te'en.
1CO 6:8 Koitywy yt naku i wo'o­ma'at haria wo eweikup­te'en. Yt naku i wo'oe­ro'ok haria wo eweikup­te'en uhyt'i'in mana'in.
1CO 6:9 Yt uwe i aru wo'o­ma­'at'i ma'at'i hat toĩne'en aikope Tupana toĩne'en Morekuat nuat hap tote. Ewe'eg wo o eiwe­ma'at hap pupi katu­pono eweikup­te'en wuat'i hary­poria wywo wuat'i ihainia wywo pote yt karãpe i put'ok­'e­wei'e Tupana etawa pe. I'ewyte yt uwe i mo wuat minug tupa­naria mõtypot haria itote. Se'aito wywuat ieĩne'en hat seha­ry'i wywuat ieĩne'en hat yt uwe i aru itote. Hary­po­ria'in e'aito wo hary­poria te i'ewyte ihainia'in e'aito wo ihainia'in ne haria yt uwe i itote.
1CO 6:10 Sero­'ok'e haria yt uwe i itote. Yt hegyi'at i rakaria yt uwe i. I'ewyte yt uwe i aru wo'e­ro­mo­pusu hat miit'in mohit hat itote. Yt uwe i — Uiano yn mo e hat i'ewyte imopẽ'ã rakat.
1CO 6:11 Mi'i haria mi'i nug ewywuat haria sok aito sa'a­wy'i ma'ato koitywy Tupana timo­weityk aiminug sa'ag ko'i aheko yt naku i nug hap sa'a­wy­'iwuat. Mi'i hawyi ainug na'yn temiit sese wo. Koitywy yt kat i sa'ag Tupana tipuẽti aikai Aika­'iwat Iesui mieha­kye­ra'at ko'i aito pote. Aika­'iwat ainug na'yn Tupana wanuaria wo hawyi tutum Topã'ãu ahepe hawyi.
1CO 6:12 Tukup­te'en eipy­'a­setpe — Uito atunug uimi­ky­'esat ewy e haria. Uimi­ky­'esat ok tã yn atunug yne i'atu'e mi'iria. Pyno eiwe'eg wo o mio tã e haria pupi. I'atu kahato — Aimi­ky­'esat watunug hawyi waku topy­hu'at wen ma'ato mi'i kape yn watu­wa­nẽtup pote aimi­ky­'esat nug eropat haria yn wato­py­hu'at hawyi yt Tupana miky­'esat nug kuap haria hin i wato­py­hu'at.
1CO 6:13 I'ewyte irania'in eipy­'a­setpe — Uimi'u kat hap yn atunug neran at ka'ap yne e'at katu­pono mi'u yn aimo­wepit kuap hap e hat. Ma'ato eiwe'eg wo o mi'u mesu­wa­rotiat wywo yn ei'ok hap. Mi'u waku kahato wen ma'ato mi'u yn watikat pote aima'at hap toĩne'en katu­pono Tupana eropat hap yt watikat hin i. Meiũran aru Tupana timoma yne ahesy'at hap hawyi yt kan hamo i aimi'u kat hap. Yt eweikuap i kat hamo Tupana tunug aipiit apo. Ta'i toiky­'esat aito teropat hamo i'ewyte toiky­'esat aito toky'e haria. Toiky­'esat aipiit towanuat e. Yt toiky­'esat i aipiit watum yt iwe'eg i rakaria pe i'ewyte yt toiky­'esat watum aipiit mi'u kat hap yn kape. Uiwy­ria'in waku watu­wehum kahato Tupana kape aimi'u ete ma'ato yt naku i watunug mi'u ahetu­pana wo. Iesui Aika­'iwat aipoi kuap kahato. Waku iwywo watikat aimi'u. Yne Tupana tum teran ahepe aimo­wepit hamuat.
1CO 6:14 Tupana tihep Aika­'iwat Iesui gu'uro pyi. Mi'i hap ewy aito aihep gu'uro pyi tesaika hap wywo.
1CO 6:15 Karãpe wato­mohey Iesui hawyi wẽtup piit ewy aipiit Iesui piit wywo. Mi'i pote yt naku i watu­wehik hary­poria yt iwe'eg i rakat ete ihainia yt iwẽ'ẽg i rakat ete kat pote ti watoĩ­ne'en Iesui piit ewywuat pote.
1CO 6:16 Tupana yt tiky­'esat hin i watum aipiit waire nug hamuat mesuwe watoĩ­ne'en hap. Sa'a­wy'i Tupana to'e — Uwe tuwehik hary­poria ete hawyi wẽtup ok miit piit ewy topy­hu'at iwywo e. Mi'i pote yt naku i watu­wehik hary­poria ihainia yt iwe'eg i rakat ete. Katu­pono mi'i tã watunug hawyi wẽtup ok piit ewy ra'yn watoĩ­ne'en Iesui piit yt ewy i ra'yn. Mi'i hawyi yt iwe'eg i rakat piit ewy watoĩ­ne'en.
1CO 6:17 Wato­mohey Aika­'iwat imiky­'esat ok tã pote watoĩ­ne'en Ipã'ãu wywo i'ewyte aipã'ãu wẽtup mã'ãu ewywuat topy­hu'at iwat Ipã'ãu yn.
1CO 6:18 Watoĩ­ne'en yt iwe'eg i rakat pote o watoĩ­ne'en pya ikai katu­pono aipiit minug sa'ag ky'esat hap toĩne'en aika­'iwat no. Watu­wehik hary­poria yt aheha­ry'i ete mi'i hawyi aipiit iwywo wẽtup piit topy­hu'at hawyi heremo kahato yt Iesui piit ewy i aito.
1CO 6:19 Yt eweikuap i te aipiit Tupana mõtypot yat ewywuat toĩne'en hap. Tupana Pã'ãu eiam aito hap yt eweikuap i te Tupana toĩne'en aipiit pe hap.
1CO 6:20 Aipiit yt aiwanuat i katu­pono koitywy Tupana wanuat wato­py­hu'at toikyi'at ra'yn ha'up iwato kahato tutum toikyi'at aipiit hamo. Pyno Tupana wat aipiit pote waku watum aipiit Tupana mõtypot hamo. Tupana mõtypot yat sese wo watum aipiit waku. Uito einãpin hat miwan miat Pauru.
1CO 7:1 Ha'a­wyte eipe tawa Kurintiu piaria eweipo­'oro uhowawi miwan apo'ei'e hamo sio waku aheha­ry'i sio yt ei'e hap.
1CO 7:2 Ta'i waku kahato aheha­ry'i ma'ato wẽtup yn waku e. Mi'i hawyi waku watoĩ­ne'en ihary'i kahato rakano he'aito kahato rakano aheĩne'en yne hawe. Mi'i tã ewetunug mote waku kahato eweikup­te'en e. Mi'i tã ewetunug mote yt ehã'ãg kuap i ahiag yt eiwe'eg i hap nug hamo.
1CO 7:3 Waku ereket ehary'i sese wywo yn. Waku etum epiit ehary'i pe yn ehary'i piit miky­'esat ok tã. I'ewyte waku etum epiit e'aito pe e'aito piit miky­'esat ewy.
1CO 7:4 Waku to'e — Uipiit uheha­ry'i wat yn e. I'ewyte waku to'e — Uipiit uhe'aito wat yn e. Yt naku i to'e — Uipiit yt ewat i pote yt atum i po'og uipiit epe yt naku i to'e e.
1CO 7:5 Yt naku i ihary'i wãi'e ne'i te'aito piat iky'esat turan e. I'ewyte yt naku i wãi'e ne'i ihainia teha­ry'i piat iky'esat turan e. Ma'ato ehehay teran Tupana wywo pote waku eiwo­'o­pohep porap'i tuereto eiwo­'o­pytyk hap ete e. Eiwo­'o­pohep porap'i hawyi waku i ra'yn eiwo­'o­mo­wepit katu­pono ahiag aru ehã'ãg neran haype wẽtup hary­poria wẽtup ihainia ky'esat hap ete e.
1CO 7:6 Pyno koitywy ahenoi teran uiwa­nẽtup hap ewy ma'ato ahenoi hap yn yt woro­ho­'o­po­'oro hin i uhehay wo are.
1CO 7:7 Uito areĩne'en yt ihary'i rakat i. Uito Pauru Tupana miky­'esat ewy areĩne'en are. Mi'i hap atipuẽti waku kahato. Mi'i pote atiky­'esat irania'in ui'ewy yt ihary'i i rakat i ewy ta'a­tu­ky­'esat pote. Mi'i tã Tupana tiky­'esat uito wen toĩ irania'in yt ui'ewy hin i katu­pono mi'iria ihary'i kahato rakaria wo Tupana tiky­'esat.
1CO 7:8 Koitywy woro­ho­'o­nãpin neran yt ihary'i rakat i te yt he'aito rakat i te i'ewyte hiwu ko'i. Waku eweikup­te'en eiweran aikotã ui'ewy eweiki­'esat pote are'e. Po'og waku mi'i tã areĩne'en are'e uiwa­nẽtup hawe.
1CO 7:9 Ma'ato — Atiky­'esat kahato uheha­ry'i uhe'aito ewei'e eipy'a pe pote waku etat ro ewary e'aito emiky­'esat ewy ma'ato Iesui mohey hat yn waku etat e. Po'og waku etat ehary'i e'aito Iesui mohey hat epiit miky­'esat monik hamuat hap upi epiit miky­'esat haty hap mekewat kyt'ok epy'a piat hap kai.
1CO 7:10 Koitywy woro­ho­'o­nãpin he'aito rakaria iwary rakaria yt uito i wen ma'ato Tupana wo'o­nãpin hap ahenoi. Yt eweitoiat tei'o e'aito ehary'i e.
1CO 7:11 Ma'ato eweitoiat pote ereĩne'en o eweran kahato ra'yn yt he'aito i rakano yt ihary i rakano e. Mi'i hawyi etiky­'esat e'aito emi'atoiat pote etat i emi'atoiat. Yt naku i kahato weha­ry'i atoiat hat no eweikup­te'en uhyt'i'in e.
1CO 7:12 Karãpe ehary'i yt Iesui mohey hat wo i toĩne'en ma'ato o yt etoiat ne'i tei'o kat pote eky'esat hap toĩ ikai pote yt etoiat rei'o e. Yt naku i mi'i tã etunug e.
1CO 7:13 E'aito yt Iesui mohey hat i pytkai yt etoiat tei'o mi'i kat pote eky'esat hap toĩ ikai pote.
1CO 7:14 Wato­mohey Iesui hawyi yt naku i watoiat ahe'aito aheha­ry'i sa'a­wy­'iwuat yt Iesui mohey hat i pote. Waku wahẽtup kahato Tupana pe ahe'aito aheha­ry'i ehakye­ra'at hamo katu­pono ahe'aito aheha­ry'i toĩne'en yt pya hin i Tupana kai katu­pono Tupana Pã'ãu eiam kahato aito pote. Waku aiwywo toĩne'en Iesui mohey haria aito pote. Waku watoĩ­ne'en ahe'aito wywo aheha­ry'i wywo katu­pono wahenoi tuereto mi'iria pe Iesui mohey hap i'ewyte aimẽ­py'in ahaki­'yt'in aha'y­ru'in yt pya hin i Tupana ehay aiwẽ pywiat kai. Mi'i pote mi'iria yt pya hin i tomohey hawyi Tosa­'yru moherep haria aito pote.
1CO 7:15 Ma'ato ehary'i e'aito etoiat teran kahato yt imohey hat i pote yt he i tuete Iesui mohey epiat hap pote mi'i hawyi pyno waku ewei'e e'aito pe ehary'i pe etoiat teran me — Yt naku i ui'atoiat mimi mana yt atiky'esat i ma'ato ui'atoiat teran mote ui'atoiat ma'ato yt uimiky'esat ewy hin i ere'e o e. Katu­pono yt naku i watu­'uka yn yt aiwo­'o­'ewy i imohey hap ete e. Tupana yt tiky­'esat i aiwu­'uka ahe'aito wywo aheha­ry'i wywo hap ma'ato toiky­'esat kahato aiwo­'o­ky'e aiwo­'o­wese hap yn e.
1CO 7:16 Waku kahato watoĩ­ne'en aheha­ry'i wywo ahe'aito wywo hap. Ehary'i e'aito yt Iesui mohey hano i pytkai waku ereĩne'en ne o iwywo e. Yt naku i watoiat aheha­ry'i ahe'aito yt Iesui mohey hat i pote. Waku aiwo­'o­wese hap wywo aiwo­'o­ky'e hap wywo watekyi ahe'aito aheha­ry'i Iesui kape imohey hamuat. Pyno waku pe watu­kup­te'en aheha­ry'i ahe'aito wywo paa'ai'e hap wywo pote meiũran ti aru Iesui mohey haria wo te'e­ro­py­hu'at ahehay waku pe hawe. Iesui mohey haria sese watu­kup­te'en pote wati­ky'e kuap aheha­ry'i ahe'aito Iesui kape imohey hamuat. Mi'i hawyi aiwese hap kaipyi ahepiat Iesui kuap hap kaipyi wati­'a­tuekyi kuap aheha­ry'i ahe'aito Iesui mohey hap kape.
1CO 7:17 Mesup ti koitywy Tupana ai'airo Aika­'iwat emiit sese wo. Waku kahato watoĩ­ne'en. Ma'ato mi'i pytkai aikotã sa'a­wy'i watoĩ­ne'en hap ewy te. Sa'a­wy'i Iuteu ywania aito pote mesup te Iuteu ywania watoĩ­ne'en e. Sa'a­wy'i tapyi'a ywania watoĩ­ne'en i'ewyte mesup te tapy'yia wo watoĩ­ne'en. Sa'a­wy'i watoĩ­ne'en wẽtup ok eropat hano pote wato­mohey Iesui hawyi mi'i hap ewy te topy­hu'at re mesup koitywy heropat hat watoĩ­ne'en ne. Mi'i pote woro­ho­'o­nãpin neran eipe Iesui mohey haria pakup ko'i Tupana mi'airo pakup ko'i. — Eweimohey Iesui hawyi waku eweikup­te'en no aikotã watoĩ­ne'en wati­mohey iesui hap e'at pe ai'airo hap e'at pe hap ewy waku watu­kup­te'en ne.
1CO 7:18 Iuteu ywania ereĩne'en sa'a­wy'i pote ereĩne'en Iuteu ywania te. Yt naku i etoiat e'ywania etimohey Iesui hawyi Tupana ekaykay tuwe­wawiat hawyi. Wẽtup ywania ereĩne'en sa'a­wy'i pote pyno yt naku i ewei'e — Mesup uito Iesui mohey hat pote waku atoiat ui'y­wania i'ewyte i'atueko ko'i yt naku i kahato mio tã wato'e. Tupana aikaykay tuwe­wawiat hawyi waku watoĩ­ne'en aipiit ewy aipotpap hap ewy aikaykay hap e'at pe ewy waku.
1CO 7:19 Yt naku i watu­we­musin ãpy sokpe tek Iuteuria eko ewy ne'i wati­mohey Iesui hawyi e. Waku watoĩ­ne'en ai'y­wania ewy yn.
1CO 7:20 Wato­mohey Iesui hawyi waku watoĩ­ne'en ne aimiit kawiano sa'a­wy'i hap e'at kai e. Yt naku i watoiat ahe'yi aipotpap aiko ahe'aito aheha­ry'i wato­mohey hawyi. Waku watoĩ­ne'en ne aikotã Tupana aikaykay hap e'at pe hap ewy. Waku watu­kup­te'en ne aipotpap hap wywo. Miit'in emiit no watoĩ­ne'en pote waku watoĩ­ne'en ne miit'in emiit no te ma'ato po'og waku sa'a­wy'i kai. Yt naku i watoiat aika­'i­waria ahetu­'i­saria aiwy­ria'in ko'i Iesui wato­mohey hawyi.
1CO 7:21 Aika­'i­waria yt nakuaria i pytkai waku watoĩ­ne'en i'atu­wywo te i'atue­ropat hamuat. Yt kat i aika­'iwat pote pyno waku watoĩ­ne'en ne aiweran aipotpap nug hap ewywuat ma'ato waku yne miit'in emiit no hat ewy wato­py­hu'at yne miit'in powyro hat no. Aiwe­te­weru hap iwato pote iwato te topy­hu'at wato­mohey hawyi. Waku watikat aiwe­te­weru hap tum yne hamuat. Mi'i hawyi watum yne aiwe­te­weru hap mesu­wa­ro­tiaria pe hawyi Aika­'iwat Atipy piat eropat hano po'og no wato­py­hu'at.
1CO 7:22 Wuat'i eropat haria wo watoĩ­ne'en Aipo­typot Iesui aikaykay turan mi'i hawyi wuat'i eropat hat no watoĩ­ne'en ne ma'ato waku Iesui eropat hano wato­py­hu'at miit'in eropat hap upi. I'ewyte miit'in akag wo watoĩ­ne'en Iesui aikaykay turan hawyi waku miit'in akag wo re wato­py­hu'at ma'ato waku Iesui eropat hano te wato­py­hu'at miit'in akag aito pytkai.
1CO 7:23 Katu­pono Aikyi'at Iesui Tupana wano. Iwato kahato sa'up tutum aikyi'at temiit'in nuat hamo. Mi'i pote yt naku i wato­py­hu'at yt naku i nug hap eko sa'ag eropat haria wo ne'i e.
1CO 7:24 Uiwy­ria'in uheinyt'in yt naku i aheko waku rakat watoiat katu­pono sa'a­wy'i Tupana aikaykay tuwe­wawi turan ai'y­wania eko waku aheko waku i'atu kahato aiminug waku hap ewy. Yt naku i watoiat ai'y­wania eko wati­mohey Iesui hawyi. Mi'i pote waku watoĩ­ne'en ne aheko wakuap nug haria wo Iesui wati­mohey hawyi.
1CO 7:25 Woro­ho­'o­nãpin neran kurum iwasu ko'i i'ewyte pĩ'ã makuptia ko'i yt he'aito i te rakaria yt iwary i te rakaria. Yt ihary'i rakat i uito pote woro­'o­nãpin Tupana ehay uiwa­nẽtup hawiat ok tã ahenoi.
1CO 7:26 Mesuwat e'at pe miit'in aikat kahato ai'auka teran haype Iesui mohey haria aito pote. Niatpo kahato aheĩne'en hap. Mi'i pote are'e uiwa­nẽtup hap. Yt eweiky­'esat i ehary'i eiwary pote waku eweikup­te'en ui'ewy katu­pono irania'in i'atu­py­'ahak kahato ahete ahaty­'i­ha­ty'i kahato hatek takaria ewy iro pote aito. Mi'i pote niatpo kahato aheha­ry'i ahe'aito koitywy.
1CO 7:27 Ma'ato — Atiky­'esat kahato uhe'aito uhehary'i ewei'e pote pyno waku ehary'i etat kurum waku e'aito etat pĩ'ã are'e ma'ato yt ewei'e i pote waku yt etikat rei'o e'aito ehary'i hawyi waku uito ewy ereine'en are'e. Ewetat pote yt ewei'atoiat tei'o e'aito ehary'i ho'opot hap e'at pe katu­pono ahatek hap e'at mesup tawa Kurintiu piaria ai'auka teran haype pote.
1CO 7:28 Ma'ato epakup te ereĩne'en mote waku etikat ehary'i e'aito Tupana miky­'esat ewy. Ma'ato — Yt atikat teran i wẽtup ok uheha­ry'i sa'a­wy'i wuat uhe'aito sa'a­wy'i wuat uruho­'opot kahato e'at mesup pote ewei'e pote pyno waku pe eweikup­te'en Tupana wanẽtup hawe. Ma'ato etat ehary'i e'aito kurum iwasu makuptia en mote i'ewyte waku pe eweikup­te'en Tupana wanẽtup hawe e. Waku yne are. Mio miit'in ai'auka teran mote niatpo kahato ahe'aito aheha­ry'i watikat. Ma'ato etat pote waku ma'ato niatpo kahato aru etipuẽti eho'opot hap mesup e'at pe turan.
1CO 7:29 Uheinyt'in uiwy'ok ko'i yt pya hin i Aika­'iwat aipok hap. Yt watikuap i kat e'at pe hut hap ma'ato tuut irane hap watikuap. Waku wati­ky'e kahato ahe'aito aheha­ry'i ma'ato mi'i pytkai waku po'og watunug Tupana miky­'esat ewy ahe'aito aheha­ry'i miky­'esat ko'i kai. Waku wati­ky'e Tupana koran aikotã Iesui mohey haria yt he'aito i te rakat yt iwary i te rakat ewy.
1CO 7:30 Eiwe'eg wo o eheka­re'en wywo katu­pono yne mesu­wa­rotiat ahekat yt toĩne'en mot'i i. Karãpe watat ipakup takat aheka­re'en hawyi yt naku i wato'e aipy'a pe — Mio uito po'og irania'in kai katu­pono uhekat po'og ikahu irania'in kai yt naku i wato'e. Waku watu­wehum Tupana miium kape wen ma'ato yt naku i wato­mohey nei'o ahekat. Tupana kape yn waku watu­wehum ahekat aipo pe hawyi. Waku watunug Tupana miky­'esat ewy sio imiky­'esat aimi­ky­'esat sio yt sio imiky­'esat aimo­wepit sio yt. Waku watunug imiky­'esat sio watuwak sio yt katu­pono aiwak hap tokosap hawyi po'og aimo­wepit hap toĩne'en.
1CO 7:31 Yt naku i mesu­wa­rotiat kape yn watu­wa­nẽtup at ka'ap katu­pono tuweityk meremo aimo­wepit hap ahe'aito hap aiwary hap aimi­kyi'at ko'i aheka­re'en ko'i topap topap yne ma'ato aiminug Tupana kapiat toĩne'en mot'i rakat yn waku aiwa­nẽtup hap aimo­wepit hap. Yt tuweityk kuap takat i.
1CO 7:32 Iesui mohey haria yt he'aito rakaria i yt iwary rakaria i te'e­ru­wa­nẽtup at ka'ap ta'a­tu­ka­'iwat Iesui potpap nug hap kape ta'a­tu­ka­'iwat mowepit hap kape yn. Waku mi'iria ewy watoĩ­ne'en po'og po'og mesuwe.
1CO 7:33 Ma'ato iwary rakat tuwe­mo­wepit hap kape yn tuwa­nẽtup to'yat tomi'u tesokpe hap kape yn tuwa­nẽtup hawyi.
1CO 7:34 Karãpe tuwa­nẽtup teran Tupana potpap kape turan toĩne'en typy iwanẽtup hap Tupana mowepit hap i'ewyte teha­ry'i mowepit hap. Yt he'aito rakat i yt iwary rakat i Iesui mohey hat Toka­'iwat potpap hap kape yn tuwa­nẽtup. Toiky­'esat topiit Tupana wanuat yn. Toiky­'esat aiwa­nẽtup Tupana kapiat hap yn i'ewyte Tupana Pã'ãu miky­'esat yn toiky­'esat. Ma'ato he'aito kahato rakat iwary kahato rakat tuwa­nẽtup aikotã aikotã aru atimo­wepit uhe'aito uiwary to'e hap kape yn tuwa­nẽtup tomi'u kape to'yat kape tomẽ­pyt'in kape at ka'ap hap ewy tuwa­nẽtup.
1CO 7:35 Po'og waku ahe'aito kahato aheha­ry'i kahato hap. Woro­ho­'o­nãpin neran eipo­wyro hamo. Atiky­'esat kahato watunug Tupana miky­'esat ewy hap po'og torania miky­'esat nug hap kai. Mi'i pote mi'i hap ete sio ereĩne'en e'aito sio yt rakano sio ereĩne'en iwary rakano sio yt rakano atiky­'esat eipe atipy piat eropat haria sese yt kat i eipyhyp Aipo­typot potpap nug hap ete haria wo.
1CO 7:36 Pyno mesup woro­ho­'o­nãpin neran eipe. Ehaytuwy hary­poria ihainia kawiat eiwo­'o­ky­'esat pote waku etat ehary'i wo e'aito wo. Ma'ato — Aho'opot kahato mesup yt kat i ai'yat i yt kat i aiko i yt kat i aimi'u ewei'e eiwo­'ope pote — Waku po'og yt wato­'o­kyi'at i te katu­pono ho'opot hap e'at mesup katu­pono aito Iesui mohey haria pote miit'in miky­ry'i haria wo wato­py­hu'at. Pyno waku watoĩ­ne'en yt iwary i rakano yt he'aito rakano i mesup waku ewei'e eiwo­'ope. Mi'i hawyi waku eweikup­te'en yt iwary i rakat ewy yt he'aito i rakat ewy. Meiũran ma'ato eiwo­'o­kyi'at teran mote pyno waku eiwo­'o­kyi'at eiwo­'o­ko­ka'at e Tupana. Mi'i hawyi waku eweikup­te'en he'aito iwary rakano Iesui mohey haria eipe pote.
1CO 7:37 Pyno — Yt karãpe i uheha­ry'i e hat yt toiky­'esat i pote waku yt iwary i topy­hu'at e. Mi'i hat yt i'aparap i Tupana pe katu­pono toi'akit kuap topiit miky­'esat.
1CO 7:38 Waku aheha­ry'i ahe'aito. Waku watu­wehum Tupana pe ahe'aito aheha­ry'i miium hap ete. I'ewyte yt kat i ahe'aito pote yt kat i aheha­ry'i pote mi'i hap i'ewyte waku watu­wehum Tupana pe katu­pono uito ewy eweikup­te'en mote. Uiwa­nẽtup hawe po'og waku uito ewy katu­pono wahe­wyry kahato Tupana ehay moherep hamo. Uito ti Pauru.
1CO 7:39 Mana'in uhyt'i'in waku e'aito ehary'i wẽtup ok kahato yn iku'uro hap kape e. Ma'ato iku'uro hawyi yt uwe wano i ra'yn ereĩne'en neran mote waku ma'ato etiky­'esat ipakup hawyi waku etat wẽtup ok emiky­'esat Iesui mohey hat yt he'aito rakat i ewywuat Iesui mohey hat yn waku yt iwary rakat i yt he'aito rakat i waku etat e.
1CO 7:40 Ma'ato uiwa­nẽtup hawe waku po'og mana'in hiwu wo eweikup­te'en eweiky­'esat pote. Tupana Pã'ãu tuwa­nẽtup i'ewyte uiwa­nẽtup hap ewy hap yt atikuap i ma'ato mio tã are'e uiwa­nẽtup hawyi Tupana yt to'e i waku hiwu tukup­te'en hiwu wo yt e i te atikuap teran pytkai. Pyno uito ti eimu'e hat Pauru.
1CO 8:1 Mesup woro­ho­'o­nãpin neran tupa­naria iã'ãkap mõtypot hap mi'u ete mekewat wewato ahup auka tupa­naria iã'ãkap e'at piat ko'i ete. Pyno mesuwat uimienoi kuap haria ra'yn eipe ma'ato ti ahenoi pakup i teran ehepe ikuap i hamo. Pyno Uwe uwe to'e topy'a pe — Uito po'og atikuap tuwe­mo­wato teran tuwe­wa­nẽtup hawe ma'ato tuwe­ma'at haype katu­pono yt uwe i mimu'e wo topy­hu'at i'ewyte yt uwe i wy wo toĩne'en. Ma'ato uwe uwe to'e topy'a pe — Miit'in ky'e hat areĩne'en neran mi'i e hat Tupana mipo­wyro topy­hu'at hawyi yt aima'at kuap i rakat toĩne'en.
1CO 8:2 Mi'i tupono karãpe — Uito po'og atikuap e hat put'ok'e ahete hawyi yt aiwe'eg i hap topy­hu'at katu­pono mesuwat yi totiat yt uwe i topy­hu'at ikuap yne hat. Mi'i tupono waku wato­py­hu'at — Atikuap teran e haria wo — Uimu'e ro e haria wo.
1CO 8:3 Pyno Tupana kuap teran haria yn aru Tupana kuap haria te'e­ro­py­hu'at. I'ewyte Tupana ky'e haria yn ni aru Tupana kuap haria tukup­te'en e.
1CO 8:4 Mi'i tupono ahenoi pakup i ra'yn aikotã tupana iã'ãkap mõtypot haria mi'u etiat. Pyno koitywy watikuap ta'yn mesu­wa­rotiat mo wuat minug ko'i tupana ko'i yt Tupana sese hin i hap tukup­te'en ma'ato aria'yp nu yi kawiat yn tukup­te'en. Mi'i tupono ti koitywy watikuap ta'yn tupa­naria miit'in mo wuat minug ko'i yt kat hamo i tupana wo tukup­te'en katu­pono yt kat i ieĩne'en hap ipuo hap watikuap. Ma'ato wẽtup ok yn Tupana Sese toĩne'en. Mi'i ti atipy piat wuat'i e'at piat ieĩne'en hat. Pyno irania'in tupana mesu­watroiat yi kawiat nu kawiat hap ko'i yt Tupana hin i.
1CO 8:5 Uruetu­pa­naria at waty waikiru ko'i i'atu'e. Irania'in — Uruetu­pa­naria mesu­wa­rotiat gupte'en haria i'atu'e. I'atu kahato iã'ãkap ko'i pe — Uruetu­pa­naria uruka­'i­waria i'atu'e mesu­wa­ro­tiaria.
1CO 8:6 Ma'ato Tupana sese toĩne'en wẽtup yn Mi'i wato'e. Tupana ti Ainug hat Ai'ywot wato'e. Mi'i ti wuat'i nug hat wato'e. Mi'i yn Aimoieĩ­ne'en hat wẽtup yn Aipo­typot wato'e. Aika­'iwat ti Iesui e hap het rakat wato'e. Tupana tunug yne topo wo aimoieĩ­ne'en hap wato'e.
1CO 8:7 Yt aheso hin i wuat'i miit'in tikuap ai'e hap pywo rakat. Tukup­te'en aipy­'a­setpe Iesui mohey pakup haria. Mi'iria sa'a­wy'i ta'a­tu­mohey kahato tupa­naria miit minug ko'i. Mi'i pote mesup te ta'a­tu­wa­nẽtup hawe — Mekewat iã'ãkap uimi­mohey sa'a­wy­'iwuat wẽtup Tupana wo toĩne'en yt Tupana wo toĩne'en hin i pytkai. Katu­pono Tupana Sese yn toĩne'en Tupana wo. Mi'i hawyi mi'u pu'i ta'a­tu­kyi'at pote — Pyno etum apo mesuwat pu'i ehetu­pa­naria pe sio yt i'atu'e pu'i weneru haria pe. Ta'i Tupana iã'ãkap mõtypot hap yne mesuwat pu'i i'atu'e hawyi mekewat Iesui mohey haira — Pyno yt atiky­'esat i emiwe­neru hap ko'i i'atu'e. — Ta'i urumiium na'yn tupa­naria iã'ãkap pe i'atu'e pote te'e­ru­we­mõti kahato i'u hap ete Iesui mohey haria pakup pote — Yt atu'u i i'atu'e.
1CO 8:8 Ma'ato yt aimi'u kaipyi i aimohun hap topy­hu'at e Iesui. Yt watu'u i pote waku wato­py­hu'at Tupana wanẽtup hawe. Watu'u teran mote waku Tupana wanẽtup hawe. Tupana yt tuwehum i aheko mi'u u hap kape. Yt ai'a­piheg hin i sio watu'u sio yt. Watu­wehum Tupana kape aimi'u watu'u turan mote waku pe watoĩ­ne'en Tupana wanẽtup hawe.
1CO 8:9 Ewe'eg wo o karãpe etu'u tupa­naria miit minug ko'i mõtypot hap mi'u turan. Toĩne'en ekai Iesui mohey hat pakup — Yt etu'u tei'o tupa­naria mõtypot hamuat miium u hap ete i'atu'e pote pyno yt etu'u tei'o. Etu'u pote — Yt etu'u tei'o e haria te'e­ru­we­mõti etu'u hap turan Iesui mohey haria yt itag i te rakaria Iesui mohey hap ete pote. Mi'i hawyi i'aparap hat ereĩne'en i'atu­wa­nẽtup hawe.
1CO 8:10 Pywo watikuap ta'yn tukup­te'en kahato miit'in — Yt naku i etu'u mi'u pu'i tupa­naria mõtypot kapiat miium e haria ta'a­tu­mohey Iesui pytkai. Ta'a­tu­mohey te ta'a­tu­wa­nẽtup hawe tupa­naria tukup­te'en hap. Ma'ato aito watikuap Tupana wanẽtup hawe — Waku etu'u yne mi'u ko'i e ma'ato watu'u Iesui mohey hat pakup ehamo pote meiũran — Pyno waku wato­mohey tupa­naria i'ewyte i'atu'e ta'a­tu­wa­nẽtup hawe e. Mi'i hawyi teke tupa­naria mõtypot yat pe aikope toĩne'en mi'u iã'ãkap kapiat miium ko'i hap kape hawyi tutu'u itote yt iwe'eg i hat ewy katu­pono ta'a­kasa aito i'u hap ete ai'yat pe sa'a­wy'i pote.
1CO 8:11 Iesui mohey pakup hat yt hesaika i rakat tukup­te'en Iesui mohey hap ete mi'i pote yt naku i wati­ma'at mi'iria — Watu'u yne mi'u ai'e hap wywo katu­pono mi'iria yt kat i mi'u tupa­naria mõtypot mi'u u haria tukup­te'en katupno ta'a­tu­wa­nẽtup hawe tupa­naria Tupana wo tukup­te'en ne. Watikuap ta'yn yt kat i tupana ko'i mesu­wa­rotiat hap. Ma'ato aiwy­ria'in Iesui mohey pakup haria ta'a­tu­wa­nẽtup tupana nu kawiat ihaĩte rakaria tukup­te'en. Yt naku i pyno watu'u tupana ko'i mõtypot hap mi'i Iesui mohey pakup takaria ehamo katu­pono meremo ta'a­tu­'atoiat Iesui hawyi te'e­ra­'aipok i i'atuetu­pana ran ko'i kape mekewat mi'u ta'a­tu'u aito ewy hawyi e.
1CO 8:12 Aika­'iwat Iesui iku'uro mio tã e haria ehakye­ra'at hamo. Ma'ato watu'u yne hap kaipyi Iesui mohey haria pakup takaria te'e­ra­'aipok tupana iã'ãkap yat kape pote aiwy ma'at hat no watoĩ­ne'en i'ewyte Aika­'iwat Iesui ma'at hat no watoĩ­ne'en katu­pono yt nakuat i yt ta'a­tu­mohey kahato i te turan watu'u i'atu­py­'a­setpe mo wuat minug tupa­naria mõtypot hap mi'u katu­pono haty kahato mi'iria ete watu'u pote.
1CO 8:13 Pyno uito yt karãpe i atu'u mi'u pu'i mekewat uipot­ma'at hap pupi katu­pono yt atiky­'esat i uiwy'ok wẽtup ok Iesui mohey pakup hat ma'at hano areĩne'en. Yt atima'at reran i uheywyt uheinyt uheyke'et pote — Waku atoiat mi'u pu'i tupa­naria mõtypot hap areĩne'en i'atu­wywo turan are'e yn uipy'a pe. Uito ti Pauru eimu'e hat Iesui etiat.
1CO 9:1 Ta'i uito Pauru Tupana emiit sese imipo­'oro tehay moherep hamuat. Yt kat i uiwe­te­weru hap miit'in po pe pote areĩne'en Iesui emiit no yn. Yt uwe i uipyhyp kuap kat pote yt uwe po pe i areĩne'en. Yt uwe i to'e kuap uhepe — Etum uhepe mekewat ewete­weru hap hawyi waku ereto Tupana ehay moherep hamo yt ta'a­tu'e kuap i katu­pono yt kat i atipuru miit'in kaipyi pote. Aika­'iwat Iesui uinug tomi­po­'oro tehay moherep hamuat. Mekewat e'at pe ara'a­kasa Iesui uheha wo hawyi Aika­'iwat uipo­'oro ehowawi tehay moherep hamo. Mi'i hawyi Aika­'iwat mohey haria eweikup­te'en uhehay upi.
1CO 9:2 Mi'i hap kaipyi eweikuap Tupana uipo­'oro hap. Ma'ato irania'in yt ipywo i Tupana uipo­'oro hap ma'ato eipe eweipywo katu­pono uiwẽ pyi Aika­'iwat Iesui aimoieĩ­ne'en hat uhehay pyi einug ipakup takaria wo. Mesup koitywy eweikup­te'en Iesui mohey haria wẽtup miit ewy iwywo eweikup­te'en. Mi'i kaipyi eweimohey Tupana potpo­'oro wuat areĩne'en hap.
1CO 9:3 Tukup­te'en ma'ato — Pauru yt Tupana mipo­'oro ewy hin i i'atu'e. Yt mekewat 12 ok takaria ewy hin i i'atu'e to'ope ma'ato mi'iria atiwesat — Uito rat Tupana mipo­'oro sese are.
1CO 9:4 Areĩne'en Iesui potpo­'o­roria 12 ok takaria ewywuat uito are'e. Mi'i pote atiky­'esat pote waku atunug i'atu­minug ewywuat are. Atiky­'esat pote waku atipo­'oro uimi­mu­'eria uipoi hamo katu­pono Iesui potmu­'eria 12 ok takaria sa'up ta'a­tu­puẽti ta'a­tu­mi­mu­'eria miium kaipyi. Uito Pauru i'ewyte atiky­'esat mi'u eikai pote waku ahẽtup sa'up eipo pywiat eimu'e hamuat wen ma'ato — Atiky­'esat eimi­mu'e hap sa'up uipoi ro yt are'e hin i ehepe.
1CO 9:5 Aika­'iwat potmu'e Peteru ihary'i rakat toĩne'en i'ewyte Aika­'iwat Iesui ywyt Tiaku i'ewyte toĩne'en ihary'i. Mi'iria tuwat i'atu­'aito wywo i'atue­wyry hap upi Tupana ehay moherep hamo ma'ato uito yt kat i uheha­ry'i mi'iria ewy ma'ato atiky­'esat pote waku atat uheha­ry'i.
1CO 9:6 Aiwy Panape i'ewyte uito urupotpap kahato urupo wo aimi'u kyi'at hamo ahesokpe kyi'at hamo mi'i tã.
1CO 9:7 Sura­ra'in ni mesuwat yi tote tenuk kahato topo­'oro hat surara akag kaipyi. Toĩne'en i'atue­su­rara akag miium i'atue­sokpe i'atue­wyry hamuat. Yt i'atu­potpap hin i ta'a­tupo wo mekewat kyi'at hamo. Ma'ato uruto uruwewiat urupotpap kaipyi urutenuk hap toĩne'en. Go nug haria yt mi'i tã hin i katu­pono ta'a­tu­mikoi kaipyi te'e­renuk. Ta'a­tu­mikoi ypia kaipyi te'e­re­sapo u ra'yn. I'ewyte ta'a­tu­hũria emĩ hy kaipyi te'e­renuk. I'atu­potpap hap ti mi'iria poi hamo toĩne'en. Ma'ato uito i'ewyte Tupana ehay moherep hat Panãpe yt mi'iria ewy hin i urutu­kup­te'en.
1CO 9:8 Pyno ahenoi wẽtup ehepe Tupana ehay kaipyi.
1CO 9:9 Mio tã e Tupana sa'a­wy­'iwuat miwan me Musei wẽ pyi ihay — Yt naku i wati­kytyt aihũ wewato ahup ipotpap turan e. Yt naku i wati­wẽ­po'i po'i ne'i awati iã'ỹi akit akit turan e. Yt naku i mi'i turan wati­wẽ­po­'i­po'i ne'i. Waku tenuk awati eha'ok topy wuat turan topotpap popuo aihũ wewato ahup e Tupana Musei pe ainãpin hawe. Pyno Tupana tuwa­nẽtup kahato aihũ hesy'at hap kape.
1CO 9:10 Ma'ato topotpap nug haria topot­po­'o­roria poi hamuat ete uruesy'at pote uruipoi hap ete mio tã e Tupana. — Waku watipoi aihũria ta'a­tu­potpap nug hap popuo i'ewyte waku watipoi aipotpap nug haria e. I'ewyte aikotã ikoi hat ewy i'ewyte i'atunug hat ewy ta'a­tu­mikoi kaipyi te'e­renuk kahato. Mi'i hap ewy hut hap kape i'atu­potpap. Ta'a­tu­he­katup haype aikotã i'atag tomikoi hepamo hap ewy.
1CO 9:11 Karãpe watikoi mani hawyi waku watunug u'i aihe­mani i'ok hawyi. Mi'i hap ewy kahato waku aimikoi Tupana ehay kaipyi watenuk eimu'e hap Tupana ehay etiat sa'up kaipyi waku urutenuk hap ewy e. Niatpo kahato mani koi hap ma'ato itag hawyi u'i kahato wati­puẽti aipotpap sa'a­wy­'iwuat kai. Mi'i hap ewywuat kahato eimu'e hap Tupana ehay koi hap.
1CO 9:12 Irania'in eimu'e haria eweipoi kahato. Ma'ato — Yt karãpe i urupoi ro uruto'e ehepe. Eweikuap kat pote pyno ahenoi ehepe. Yt uruiky­'esat i ei'e hap eiwa­nẽtup hawe — Aimi'u ky'ewi ne'i aimu'e ahekat ky'ewi ne'i aimu'e sehay wakuat ete Pauru Panape ewei'e hap. Mi'i pote urupotpap at ka'ap urupo wo urusa'up puẽti hamo. Uruho­'opot kahato yat sokpe kawiat nug hap ete urumi'u kyi'at hamo yt uruiky­'esat i ei'okpe tote urutenuk haype pote.
1CO 9:13 Sa'a­wy­'i­wuaria Tupana mõtypot yat piaria pa'i ko'i te'e­renuk miit'in miium kaipyi i'atuhũ Tupana kapiat i'atu­miwuk kapiat ete. Te'e­renuk ta'a­tuhep ipu'i kã'ã mekewat nu kawiat aihũ wuk hap eiam kaipyi te'e­renuk hamo. Pa'i ko'i mi'i tã sa'a­wy'i ta'a­tu­puẽti ta'a­tu­mi'u.
1CO 9:14 Mi'i hap ewy Tupana ainãpin mesup — Eweipoi ro eimu'e haria e. Eweimõ'ẽ emi'u uhehay wakuat moherep haria pe uimi­ky­'esat ok tã e Tupana.
1CO 9:15 Ma'ato sa'a­wy'i eimu'e turan yt atikat i uipoi hamuat. Yt kat i sa'up atikat. Eimu'e hap sa'up yt atiky­'esat i te. Koitywy atunug mesuwat uimiwan yt kat i ahẽtup eikaipyi mesuwat uimiwan me. Yt atiky­'esat i sa'up eikaipyi eimu'e hap sa'up. Po'og waku uiku­'uro areĩne'en yt eimipoi i wywo te areĩne'en. Yt atiky­'esat i ekat. Yt kat i uheso hap uhehay ete. Eweimõ'ẽ uhepe pote koitywy yt atikat i te pãi.
1CO 9:16 Ati'a­tu­mu'e kahato miit'in Iesui etiat ma'ato yt uimi­mu­'eria ekat ky'ewi i ati'a­tu­mu'e mi'iria i'ewyte yt uimõ­typot hap ky'ewi i ati'a­tu­mu'e miit'in. Eweikuap apo kat pote ati'a­tu­mu'e miit'in Iesui ete hap. Pyno ahenoi ehepe Iesui uipo­'oro miit'in mu'e hamo mi'i pote ati'a­tu­mu'e wuat'i ywania Iesui uipo­'oro hap ewy. Iesui ehay ikahu rakat ete yt ati'a­tu­mu'e i miit'in mote Tupana mi'a­piheg wo areĩne'en aru.
1CO 9:17 I'ewyte yt arepo­'oro i Iesui ehay moherep hamo yt uimi­ky­'esat ewy hin i. Ma'ato uipo­'oro hat miky­'esat ewy woro­ho­'o­mu'e. Ma'ato arepo­'oro ne'i pote mi'i hawyi atiky­'esat sa'up eikaipyi. Ma'ato yt atiky­'esat i sa'up eikai katu­pono yt uipo­'oro i eipe. Ma'ato Tupana uipo­'oro yt uimi­ky­'esat ewy hin i ma'ato — Etunug o e Tupana uhepe pote waro­ho­'o­mu'e. Mi'i atunug mote uimohey Tupana inug hap ete.
1CO 9:18 Yt ha'up ky'ewi i woro­ho­'o­mu'e pãi. Uha'up sese ti ehepiat Tupana kuap hap. Yt eikat ky'ewi i ma'ato woro­ho­'o­mu'e. Yt ekat ky'ewi i atimo­herep ehepe Iesui etiat ikahu rakat sehay. Atiky­'esat ha'up eikai uipotpap sa'up Tupana ehay wakuat moherep hap sa'up pote waku ahẽtup Tupana wanẽtup hawe ma'ato yt ahẽtup i te mi'i hap ete.
1CO 9:19 Yt uwe i uikyi'at kuap sa'up mo are. Yt uwe i — Urumu'e ro urumi­ky­'esat ewywuat pote sa'up iwato urutum epe Pauru e haria. Uito ti Tupana mikyi'at uito are. Tupana po pyi yn arenuk teren. Yt kat i miit'in wanẽtup hap uikai ma'ato Tupana wanẽtup hap wywo yn woro­ho­'o­mu'e are. Yt kat i eikat ky'ewi hap wywo woro­ho­'o­mu'e. Uito areĩne'en wuat'i miit'in eropat hat katu­pono atekyi teran wuat'i miit'in Iesui kape pote.
1CO 9:20 Ati'a­tuekyi teran kahato uiwy­ria'in Iuteuria Iesui mohey hap hamo. Mi'i pote i'atu­py­'a­setpe areĩne'en Iuteu ywania wo — Uito ti Iuteu yn are'e i'atuepe. Mi'i hawyi i'atueko Iuteuria eko nug hat areĩne'en i'atu­py­'a­setpiat areĩne'en turan. I'ewyte karãpe areĩne'en Musei mienoi moherep haria py'a­setpe mi'i hawyi atimo­herep Iesui i'atuepe Musei miwan kaipyi. Musei ainãpin hap nug hat ewy areĩne'en mi'iria py'a­setpe i'atuekyi Iesui kape.
1CO 9:21 Karãpe irania'in ywania py'a­setpe areĩne'en mi'i hawyi irania'in ywania eko wakuat ewy atunug. Areĩne'en mi'iria ewywuat. Areĩne'en wẽtup ywania py'as­tpe pote yt atunug i ui'y­wania Iuteuria eko ewy ma'ato i'atueko wakuat yne rakat atunug. Mi'i hap atunug katu­pono mi'iria atiky­'esat kahato Iesui mohey haria torania hap. Mi'i hap yn atunug Iesui kapiat miit'in ekyi hamo.
1CO 9:22 Karãpeĩ areĩne'en Iesui mohey haria yt hesaika rakaria i te tokpe mi'i hawyi paa'e hat areĩne'en ei'ewy uito are'e i'atu­moe­saika imohey hap ete hamo. Mi'i kai aho'osat Iesui mohey hanuaria.
1CO 9:23 Ati'a­tu­mu'e kahato mi'iria Iesui ehay wakuat ete. I'atu­wy­ria'in wo areĩne'en i'atu­mu'e hamo. Mi'i hap ahenoi yne hawyi Tupana mipoi­tyro wo mi'iria tukup­te'en i'ewyte uito.
1CO 9:24 Ahetama puo tukup­te'en wo'oiã'ãg haria mesuwat seput hap ete uwe po'og ihyha hap kuap hamo. I'atu kahato teput to'o­'e­wy­'ewy ma'ato wẽtup yn po'og ihyha hat yn topy­hu'at morekuat miium sa'up sat hat no. Pyno waku watu­weput hãpyk kahato mekewat morekuat miium sa'upsat hamo.
1CO 9:25 Wo'o­'iã'ãg haria seput haria sa'a­wy'i ta'a­tu­piit­moe­saika kahato. Yne e'at pe teput at i'atu­hyha hamo. Mi'i hawyi wẽtup topy­hu'at po'og torania kai hawyi mi'i hat pe morekuat tum to'akag painug hap ewywuat — Mi'i seput hat po'og e hamo. Ahetama puo morekuat tum to'akag painug hap mohyt kawiat po'og seput kuap hat pe. Wẽtup e'at hawyi igag na'yn. Mi'i hap ewy Tupana tum aru ahepe aipainug hap ai'akag totiat ma'ato mi'i ti yt igag i rakat toĩne'en. Wuat'i e'at piat ikahu rakat sese.
1CO 9:26 Mi'i hap ewy waku wato­mohey hãpyk kahato Aipo­typot Iesui haty wo. Uito Pauru surara ewywuat ipiit heg nakat ewywuat mekwat wo'o­'a­hy­kahyk hat ewywuat hãpyk kahato uito. Atu'uka aikotã ikuap kahato hat hepap hat uka hap ewy yt arekyry popuo i atu'uka.
1CO 9:27 Ahetamã puo wato­'o­'iã'ãg wu'uka hap ete. Mi'i watunug at pote watu­we­moe­saika kahato aipiit. Yt miky­'esat ewy i haty hap ma'ato wati­mo­pokuat aipiit. Mi'i hat ewy areĩne'en uito. Ma'ato Tupana ehay moherep hap ete uipiit yt ipap i pytkai atunug. Karãpe wẽtup ok yi kai ne'i ra'yn watu­'uka hap ete mi'i hawyi tuwe­mõti. Ma'ato uito mi'i hat ewy yt areĩne'en neran i Tupana ehay moherep hap ete. Areĩne'en neran po'og hesaika rakat ewy. Mi'i hap ewy karãpe are'e irania'in me — To'iro waku Iesui upi watuwat are'e ma'ato mi'i pytkai yt areto i Iesui upi pote uito i'ewyte aremõti. Wãi'are uipiit miky­'esat sa'ag ete yt atiky­'esat i Uipo­'oro hat to'e uhepe aru — Sa'ag nug hat en e hap yt atiky­'est hin i aru Iesui e hap. Uito ti uipiit miky­'esat monik hat Pauru.
1CO 10:1 Ui'y­wania woro­ho­'o­mu'e teran i ra'yn aha'a­se­'i'in sa'a­wy­'iwuat ete. Sa'a­wy'i te turan aha'a­se'i Musei upi tuwat ai'y­wania wanĩ­kaptia po pyi. Mi'i hawyi Tupana ti'a­tu­pyhyp sura­ra'in i'atue­wa­nĩ­kaptia i'atu­mohan haria. Mi'i hawyi toipo­'oro ywyhig temiit'in apykok hamo y'ahig i'atue­wyry hap moherep hamo.
1CO 10:2 Mi'i hawyi tutunug mu'ap ihyemui'a wato sakpo ihyemui'a Hup e hap het rakat sakpo. Mi'i hawyi y'y wehy­'okmõi hap sakpo tuwat y'y py'a­setpuo Tupana pu'ap upi. Mi'i hawyi ywyhig mekewat wanĩ­kaptia pyhyp hap hewyry i'atuupi. Mi'i hawyi Tupana ti'a­tu­set'ok ta'yn eipe Musei upiaria e.
1CO 10:3 Mi'i hawyi tuwat yahig sakpo. I'atu­mi'u wuat man atipy piaria mi'u toĩne'en itote. Te'e­renuk kahato yne e'at Tupana miium man ete.
1CO 10:4 I'ewyte tutum tesaika hap wywo y'y wakuat nu wato kaipyi tuwẽtem ihy yne e'at pe. Koitywy watikuap ta'yn mekewat Nu wato Aika­'iwat Iesui iã'ãkap ewywuat.
1CO 10:5 Ma'ato yt naku i nug haria te'e­ro­py­hu'at yahig note e. Mi'i hawyi Tupana yt iwepit hin i mekewat i'atu­minug sa'ag ete hawyi te'e­ropap kahato yahig note kowo'i kowo'i moi mi'auka wo ahu mi'auka wo aria mi'auka wo.
1CO 10:6 Mi'i hawyi aito mesup mi'iria emiariru ko'i ewywuat pote yt kan hamo i watunug yt naku i kat pote Tupana ti'a­tu­'a­piheg mi'iria aha'a­se­'i'in aimo­we'eg hamuat i'atu­minug sa'ag ko'i atoiat hamo e.
1CO 10:7 Waku pyno wato­ken'ẽ kahato aha'a­se­'i'in etiat Tupa­naria mug hap pupi. Waku watoiat tupa­naria mõtypot hap katu­pono aha'a­se­'i'in timõ­typot kahato mi'i ko'i aikotã to'e miwan hap ewy. Ai'y­wania te'e­ra­'apyk mi'u u hamo sapo hy u hamo Tupana sa'ag wewato ahup iã'ãkap mõtypot hamo hawyi hairu nug hamo. Mi'i hawyi i'atu­poĩ'ãm ta'a­tue­tu­pa­naria mõtypot hamo e.
1CO 10:8 Mi'i hawyi hary­po­ria'in ihainia'in to'ope to'ope inug sa'ag. Ta'a­tunug sa'ag hawyi te'e­ropap kahato sakpo 23000 miit hewo hewo yi tote iku'uro rakaria yt naku i nug haria.
1CO 10:9 Mi'i hawyi yahig note ta'a­tu­mõ­py­'ahak teran Tupana ta'a­tu­minug sa'ag wo. Ta'a­tu­hã'ãg kahato Tupana. Mi'i hawyi moi ko'i ti'a­tu­'uka kahato mi'iria.
1CO 10:10 I'atuehay sa'ag kahato — Emiium ko'i man yt ikahu hin i i'atu'e Tupana pe. Mi'i pote Tupana tipo­'oro temiit atipy kaipyi i'atu­moma hamo. Put'ok'e hawyi topap kahato ai'y­wania sa'a­wy­'i­wuaria. Pyno waku aiwe'eg wo kahato waku watu­wehum imiium ete
1CO 10:11 Yne mesu­wa­rotiat ikahuro hamuat yt pya hin i ra'yn. Waku ahewyry iwe'eg nakaria ewy. Waku wato­ken'ẽ aha'a­se­'i'in minug sa'a­wy­'iwuat pupi katu­pono aimo­we'eg hamo Tupana tiwan aha'a­se­'i'in minug ko'i etiat.
1CO 10:12 Yt naku i wato'e aiwa­nẽtup hawe — Uhesaika kahato Tupana mohey hap ete pote yt karãpe i aru ati'a­parap Tupana pe yt naku i wato'e. Ewe'eg wo o mio tã ewei'e eipy'a pe pote katu­pono mi'i e haria meremo ta'a­tu­'a­parap ta'a­tuiã'ãg hap yt naku i nug hamo put'ok'e hawyi — Imohey kahato hat areinẽ'ẽn i'atu'e ta'a­tu­wa­nẽtup hawe pytkai.
1CO 10:13 Yne aito ahiag miiã'ãg ko'i aiwo­'o­'e­wy­'ewy. Ma'ato sa'a­wy'i Tupana to'e ahepe — Atipyhyp aru ehã'ãg hap pupi e. Mi'i pote yt karãpe sese i put'ok'e hã'ãg hap ehete po'og hesaika eikai katu­pono areĩne'en eiwywo eimoe­saika hamo ehã'ãg hap pupi e. Mi'i hawyi ehesaika kahato eweikup­te'en ehã'ãg hap sopo hamo e hawyi atum ehepe mu'ap haty'u wuat ipopywiat ewẽtem hamuat e Tupana.
1CO 10:14 Mi'i pote uiwy­ria'in sese eipe yt eweimõ­typot tei'o iã'ãkap ko'i.
1CO 10:15 Mi'i tã ewetunug mote we'eg haria wo eweikup­te'en. I'ewyte atikuap uhehay upiat haria eipe sio yt hap ete e.
1CO 10:16 Karãpe watu­we­'a­tunug watu'u sapo hy hamo kui'a piat i'ewyte man u hamo mi'i turan watu­wehum kahato Tupana kape katu­pono aipoi­tyro mi'i hap ete. Mi'i sapo hy Aika­'iwat Iesui suu iã'ãkap kahato. Mi'i watu'u hu iã'ãkap hawyi imohey hap wati­mo­herep kahato. Karãpe watipik mekewat man hawyi watu'u hawyi imohey haria wato­py­hu'at hap wati­mo­herep miit'in me i'ewyte wẽtup piit ewy watoĩ­ne'en hap wati­mo­herep.
1CO 10:17 I'atu kahato aito Iesui mohey haria ma'ato mi'i pytkai wẽtup piit ewy watoĩ­ne'en e. Mi'i hap ewy wẽtup a yn watipik pik man hawyi watenuk. Mi'i hawyi wẽtup a yn man watu'u Iesui pu'i pik'e hap moherep hap.
1CO 10:18 Uru'y­wania Isareu ywania tum kahato ta'a­tuhũ Tupana pe. Mi'i hawyi pa'iria tiwuk ta'a­tu­hũria i'atuwuk wuk hap heiam note. Iwyp kahato hawyi terenuk kahato ra'yn ta'a­tumiium kaipyi Tupana piat ta'a­tumiium pytkai.
1CO 10:19 Pyno ahenoi mekewat mi'u Isareu ywania miium ta'a­tue­tu­pa­naria imõtypot hap yt ihaĩte hin i. Mi'i pytkai ta'a­tu'u mi'u iku'uro rakat katu­pono iku'uro rakaria tupa­naria pote.
1CO 10:20 Ta'a­tuwuk ta'a­tu­hũria i'atuiã­'ãkap py'a­setpe ma'ato iã'ãkap ko'i i'atue­tu­pa­naria yt ta'a­kasa hin i. Pywo ti yt Tupana sese kape hin i i'atumiium ko'i ma'ato ahiagnia kape i'atu­miwuk ko'i. Mi'i hawyi ahiag wyria'in kahato tukup­te'en mi'iria. Yt naku i mi'i tã ewetunug eipe mi'iria eko ewy ne'i Iesui ekui'a sapo hy wo.
1CO 10:21 Mi'iria i'ewyte te'e­re­'y'u ahiagnia ehamo mekewat tupa­naria mõtypot hap yparakai totiat. Yt naku i watunug i'atu­minug ewy te katu­pono wẽtup sapo hy ra'yn aiwanuat. Aika­'iwat Iesui ekui'a pyi ra'yn watenuk huu at hap ewywuat watu'u waku rakat.
1CO 10:22 Ma'ato watu'u ahiagnia ekui'a pyi i'ewyte Aika­'iwat ekui'a pyi hawyi waku aiwe'eg wo katu­pono Aika­'iwat tiky­'esat aito towanuat hap yn. Ihay'y­wywi mi'i tã watunug pote. Waku aiwe'eg wo kahato katu­pono Aika­'iwat po'og hesaika aikai. Waku wato­ken'ẽ Aika­'iwat ai'a­piheg hap pupi uiwy­ria'in Tupana sa'a­ru'in saki­'yt'in aito pote.
1CO 10:23 Waku watunug yne aimi­ky­'esat ok tã i'atu'e to'ope irania'in Iesui mohey haria ta'a­tueso popuo. Mi'i pote are'e i'atuepe — Aimi­ky­'esat waku pote pyno waku watunug ma'ato aimi­ky­'esat yt naku i pote yt naku i watunug. Aimi­ky­'esat miit'in powyro hap pote waku watunug are'e i'atuepe.
1CO 10:24 Yt naku i aimi­ky­'esat yn watunug waku pytkai are'e i'atuepe. Waku po'og irania'in miky­'esat watunug aiwe­po­wyro hap kai.
1CO 10:25 Karãpe irania'in terut ahowawi mi'u pu'i waku watu'u yne imiium. Yt naku i wato'e — Eti'auka apo mesuwat ehũ iã'ãkap mõtypot hamo mehĩ mana sio yt wato'e ne'i.
1CO 10:26 Yt naku i mio tã ewei'e mi'u erut hat pe katu­pono Tupana tunug yne pu'i mesuwat aipytyp nug hap mywo te i'ewyte aihũria yne Tupana wanuat topy­hu'at.
1CO 10:27 Mi'i hawyi wẽtup ok yt imohey i hat to'e ahepe — To'iro ui'yat kape ahenuk hamo e hawyi waku ereto etiky­'esat pote. Ma'ato waku put'ok­'ere hawyi erenuk kahato imiium ok tã e. Yt ere'e tei'o tope — Etum na'yn apo meiũwat mi'u iã'ãkap mõtypot hamo uhyt mana yt apo'ere tei'o ma'ato etu'u yt kat i haty ewanẽtup hawiat wywo yn waku.
1CO 10:28 Ma'ato erenuk turan wẽtup ok to'e epe — Etikuap apo Tupana iã'ãkap mõtypot hamuat mi'u pu'i watu'u hap uhyt e pote — Yt atikuap hin i mi'i hap waku ewei'e i'atuepe. Mi'i hawyi — Pyno yt atu'u i po'og katu­pono yt naku i watu'u mi'i tã e hat ehamo ma'ato etu'u pote haty kahato topy­hu'at ewanẽtup hawe i'ewyte mekewat miit itotiaria pe i'aparap hat wo en eropy­hu'at ihamo etu'u pote.
1CO 10:29 Yt aiwo­'oewy hin i aimi'u u hap eko ete e. Ma'ato waku watu'u aiwa­nẽtup hawe wen ma'ato mekewat miit — Yt naku i watu'u e hat ehamo yt naku i watu'u. Ma'ato irania'in itotiaria Iesui mohey haria — Waku watu'u Tupana miium e haria tukup­te'en eipy­'a­setpe pote waku yne aimi'u wo watu­wehum kuap Tupana kape pote waku etu'u e Iesui Aika­'iwat ahepe. Pywo kahato mi'i tã wen ma'ato yt naku i — Yt naku i watu'u e hat ehamo katu­pono yt naku i watu­'uka ahehay wo irania'in Iesui mohey haria wywo — Waku watu'u yt naku i watu'u e hap ko'i etiat.
1CO 10:30 Watenuk turan waku wato'e Tupana pe — Urutu­wehum kahato epe Tupana emiium urumi'u wo waku wato'e Tupana pe. Mi'i hap ewy watunug mote yt naku i wato'e wẽtup ok — En yt naku i katu­pono etu'u mekewat mi'u yt naku i mio tã wato'e katu­pono tuwehum tenuk turan Tupana kape hap wywo tutu'u pote.
1CO 10:31 Pyno kat ko'i kat ko'i watunug waku watunug mi'i torania Tupana mõtypot hamo sio watenuk sio wate­'y'u sio watu­we­potpap Tupana mõtypot hap yn waku aiwa­nẽtup hawe. Ta'i kat ko'i kat ko'i watunug turan waku watu­wehum Tupana kape.
1CO 10:32 Waku aheĩne'en yt uwe ma'at hano i. Waku wato­py­hu'at yt Iuteu ywania aparap hano i. Yt naku i Iesui mohey hap auka hat wato­py­hu'at aiminug ko'i kaipyi. I'ewyte irania'in ywania aparap hano yt naku i wato­py­hu'at. Yt naku i watoĩ­ne'en Iesui mohey haria Tupana yat piaria ma'at hat ne'i.
1CO 10:33 Uito Pauru arewy­'inug neran yne uiminug wakuap mo yn.
1CO 11:1 Pyno waku eiwe­ha'at uhowawi ui'e­wywuat eweipy­hu'at katu­pono uito Aika­'iwat Iesui iã'ãkap kahato uito imiky­'esat ewy yn atunug neran are.
1CO 11:2 Pywo pe ti arehum kahato ehete uipot­mu­'eria katu­pono yt uiwaure hin i eipe uimienoi upi kahato eweikup­te'en. Ha'a­wyte woro­ho­'o­mu'e kahato Iesui moherep hap ete. Mi'i hawyi areto ra'yn ma'ato yt eweiwaure hin i uimiatoiat i'ewyte yt eweiwaure hin i eimu'e hap.
1CO 11:3 Pyno wẽtup ete woro­ho­mu'e teran. Atiky­'esat eweikuap Torania Ihainia'in akag no topy­hu'at Iesui Aipo­typot Po'og torania Kawiat. Mi'i hawyi hary­poria akag topy­hu'at he'aito. Mi'i hawyi Aipo­typot Iesui akag topy­hu'at Tupana.
1CO 11:4 Yt naku i ihainia aimu'e Tupana ehay etiat turan sio ihainia ihay Tupana wywo aiwo­'o­mu'e hawe yt naku i morekuat painug hap i'akag note katu­pono mi'i pote To'akag Iesui mõti te hap topy­hu'at.
1CO 11:5 Karãpe Tupana mõtypot yat pe wẽtup ok hary­poria aimu'e teran Tupana ehay wo waku totopag ta'akag note sokpe hit kawiat yt kat i — Uito po'og ihainia'in kai e hap toĩne'en mekewat hary­poria wanẽtup hawe e hap moherep hamo. Ma'ato tuwepyi aimu'e hary­poria yt kat i paa'e hap wywo pote ihainia'in mõti hap toĩne'en hawyi he'aito tuwe­mõti sese — Uheha­ry'i uimu'e hat toĩne'en mesup e hap tuwa­nẽtup hawe pote.
1CO 11:6 Ma'ato sokpe hit ta'akag note pote waku aimu'e. Mi'i pote waku hary­poria topag ta'akag tote te'og sokpe hit kawiat aimu'e Tupana ehay etiat turan sio ihay Tupana kape turan — Ihainia'in ywyt'ok­pype areĩne'en e hamo.
1CO 11:7 Tupana mõtypot kahato hat ihainia'in Tupana iã'ãkap sese ihainia hary­poria i'ewyte ma'ato ihainia mõtypot hat ihary'i.
1CO 11:8 Sa'a­wy'i Tupana tunug hary­poria ihainia kawiat mekewat e'at pe. Yt tutunug i ihainia hary­poria kawiat.
1CO 11:9 Sa'a­wy'i sese Tupana tunug ihainia hary­poria mu'e hamo.
1CO 11:10 Mi'i pote waku hary­po­ria'in tuwe­'akag suwy sokpe wo — Uito atimõ­typot uhe'aito to'e hamo wuat'i miit'in ehamo hamo. I'ewyte atipy piaria he'aito po'og ikai e hamo.
1CO 11:11 Karãpe wato­py­hu'at Iesui mohey haria wati­po­wyro kahato hary­poria. Yt wati­mohit i i'ewyte aiwo­'o­mõ­typot hap yn.
1CO 11:12 Pyno ti Tupana tunug hary­poria ihainia eturu­'okpy kawiat. Ma'ato i'ewyte pywo kahato torania ihainia'in tuwẽtem toty ymyẽ pyi. Ainug hat sese ma'ato Tupana sio aito hary­poria sio ihainia.
1CO 11:13 Pyno uiwesat eipe sio waku aheha­ry'i ihay Tupana kape Tupana mõtypot yat pe aiwa­'a­tunug hap tote yt kat i hin i i'akag me te'og wywo sio yt.
1CO 11:14 Ma'ato ihainia tunug to'asap hary­poria wat ewywuat pote mi'i hawyi aiwe­mõti hap topy­hu'at kat pote ihainia aito pote.
1CO 11:15 Ta'i yt naku i katu­pono watikuap yne aito yt uwe i aimu'e pytkai hary­poria i'asap ywop takat waku. Watikuap ta'yn hary­poria asap hesokpe ewywuat Tupana tunug sa'a­wy'i hary­poria painug hap ewywuat topy­hu'at.
1CO 11:16 Ma'ato uiwa­nẽtup hawe waku hary­poria topag ta'akag tote sokpe hit ta'a­tu­henoi ihainia'in Tupana ehay wo turan sio ta'a­tuehay Tupana kapiat turan. Yne Iesui mohey haria mi'i seko ewy toĩne'en ahetamã pe. I'ewyte uruto Iesui potmu­'eria sese 12 ok takaria wy wẽtup seko yn urutu­kup­te'en. Pyno waku aheko ewy watunug. — Yt naku i sokpe hit ai'akag toto ewei'e pote Iuteuria eko ewywuat urueko mohit haria wo eweikup­te'en katu­pono yne Tupana mõtypot yat piaria uruetama pe mi'i ewywuat nug haria tukup­te'en.
1CO 11:17 Pyno woro­ho­'o­nãpin teran uito Pauru. Waku kahato ti eipe tawa Kurintiu piaria ma'ato mesup ahenoi teran ehepe yt uimo­wepit i hap ko'i eiminug. Pyno eiwe­'a­tunug kahato o itote Tupana mõtypot hamo ma'ato yt hãpyk hin i eweimõ­typot Iesui. Mi'i hawyi mi'i kaipyi miit'in aparap hap topy­hu'at. Mi'i hawyi eiwe­'a­tunug hawe po'og wu'uka hap topy­hu'at itote. Kat pote som mi'i tã.
1CO 11:18 Ta'i irania'in henoi uhepe — Yt to'o­'ewy hin i itotiaria hawyi wu'uka hap yn topy­hu'at itote i'atu'e. Pyno eipe Iesui mohey haria pytkai eiwe­pat­'ok­pat'ok itotiat hap atikuap ta'yn. Yt atimohey i yne i'atuehay ko'i ehetiat ma'ato mi'i i'atu'e hap ehetiat hap atimohey.
1CO 11:19 — Waku wati­pat'ok pat'ok ewei'e sa'ag eiwo­'ope. Waku irania'in aimu'e hat Peteru upiaria. Waku irainia'in aimu'e Aporu upiaria. Waku irania'in aimu'e hat Pauru upiaria ewei'e sa'ag me'i eiwo­'ope. Mi'i tã watunug hawyi meremo watikuap uwe hãpyk uwe yt hãpyk i ewei'e sa'ag ma'ato mi'i tã ti yt Tupana miky­'esat ewy hin i.
1CO 11:20 — To'iro watenuk Aika­'iwat enuk hap man pikpik hap kape ewei'e. To'iro sapo hy u hamo Iesui kapiat kuekatu hamo waku wato'e ma'ato yt mi'i tã hin i ewetunug.
1CO 11:21 Yt Aipo­typot enuk hap ewy hin i ewetunug itote katu­pono yt iwe'eg nakaria ewy i ewehenuk yt eweimõ'ẽ hin i pote. Sa'a­wy­'i­wuaria tu'u yne mi'i hawyi irania'in hesy'at topy­hu'at. Mi'i hawyi irania'in te'e­ru­we­sapo hy u yne hawyi imopẽ'ã rakaria wo tukup­te'en.
1CO 11:22 Yt naku i mi'i tã. Ehesy'at pote waku yianmete ewetu'u mi'u ei'yat pe katu­pono irania'in yt hekat i rakaria yt terut kuap i mi'u ko'i. Mi'i hawyi yt hekat i rakaria pe yt kat i ewetum kuap. Mi'i hawyi te'e­ru­we­mõti kahato yt eiwe'eg hin i hap ete. Yt arehum hin i mi'i eminug ete pãi.
1CO 11:23 Pyno waku woro­ho­'o­mu'e i ra'yn Aika­'iwat aimu'e hap ete aikotã Aika­'iwat Iesui enuk hap ewy. Sa'a­wy'i Iesui ma'at hap wãtym turan totat man teneg e.
1CO 11:24 Mi'i hawyi waku e Tupana pe hawyi toipik pik man i'atue­hamo — Mesuwat man ui'ewy e katu­pono uipik irane eheha­kye­ra'at hamo e. Karãpe ewetu'u mesuwat man turan uhowawi waku eiwa­tetup aikotã uiku­'uro eika­wiano hap kape e.
1CO 11:25 Te'e­renuk kahu hawyi Iesui tat sapo hy kui'a piat. Mi'i hawyi to'e — Mesuwat sapo hy uhuu ewy e. Mi'i atum irane sa'up mo Tupana pe iwywuat miit'n wo'o­wese hap pakup i nug hamuat e.
1CO 11:26 Pyno karãpeĩ ewetu'u mesuwat man ewywuat i'ewyte eiwe­'y'u mesuwat sapo hy wo eweimo­herep wuat'i miit'in me uiku­'uro hap iã'ãkap ui'aipok hap kape e. Mi'i ewywuat ewetunug uiku­'uro hap moherep hamuat e Iesui ima'at hap e'at pe turan.
1CO 11:27 Waku hãpyk kahato wati­mõ­typot Aika­'iwat Iesui. Uwe uwe i'u i'ewyte te'y'u yt kat i imõtypot hap wywo mi'i hat Tupana mi'a­piheg wo topy­hu'at katu­pono Iesui piit etiat miky­ry'i hat mi'i.
1CO 11:28 Ma'ato waku Iesui enuk hap ewy ahenuk hamo. E'yianmete waku watu­wa­nẽtup kahato — Aipy'a pe sio waku pe watoĩ­ne'en Tupana wywo hap kape. Ma'ato waku pe watoĩ­ne'en Tupana wywo pote waku watu'u sapo hy i'ewyte man pikpik'e rakat Iesui ku'uro hap kape aiwa­nẽtup hamuat.
1CO 11:29 Ma'ato watu'u man pikpik i'ewyte mekewat sapo hy aiwe­ky­ry'i popuo ne'i mi'i pote Tupana mi'a­piheg wo watoĩ­ne'en. Aima'at hap topy­hu'at Aika­'iwat piit pun haria ne'i aito.
1CO 11:30 Mi'i pote i'atu kahato eipy­'a­set­piaria i'ahu rakaria wo ipiit perup takaria wo get rakaria wo tukup­te'en itote Iesui suu etiat weky­ry'i haria eweikup­te'en mote.
1CO 11:31 Pyno waku aiwe'eg wo waku po'og ahepiat. I'u hap e'yianmete waku wato'e Tupana pe — Waku atu'u sio yt wato'e. Mi'i tã watunug mote yt wato­py­hu'at i Tupana mi'a­piheg wo.
1CO 11:32 Ma'ato yt naku i wywo watu'u pote mi'i hawyi — Yt naku i eipe e aru Tupana ahepe ai'a­piheg hap wywo katu­pono yt toiky­'esat i aho'o­wasat hap irania'in mesuwat yi totiaria ewy.
1CO 11:33 Uiwy­ria'in tawa Kurintiu piaria karãpe eiwa­'a­tunug mekewat Aika­'iwat ienuk hap ewywuat u hamo turan eiwo­'oe­katup wo'oe­katup o tukup­te'en yne itote hawyi waku ewetu'u.
1CO 11:34 Ma'ato wẽtup ok toĩne'en eipy­'a­setpe uhesy'at kahato e hat mi'i hat pe — Waku mehĩ waku erenuk e'yat pe hawyi eriot meikowo ewei'e e'yianmete katu­pono yt naku i Tupana mi'a­piheg haria wo wato­py­hu'at. Ma'ato Iesui mõtypot hap upi wat'u man pikpik'e hap uwa hy iku'uro aika­wiano hap moherep hamo mi'i watunug mote Tupana mipoi­tyro ko'i wato­py­hu'at e. Mi'i pote mi'i hap ete yt ahenoi kuap i koitywy uimiwan me. I'atu kahato te yt ahenoi i ehepe ma'ato areto ehowawi hawyi ahenoi yne ehepe heĩpyt ko'i.
1CO 12:1 Sa'a­wy­'iwuat einãpin miwan miat hap ewywuat ko'i koitywy woro­ho­'o­nãpin pakup i tawa Kurintiu piaria. Mesup woro­ho­'o­mu'e teran Tupana Pã'ãu etiat aikotã tutum ahepe tesaika hap to'e­wywuat pytkai sepap nug hap etiat. Yt naku i watoĩ­ne'en yt ikuap i haria wo ne'i Tupana Pã'ãu miium etiat haria.
1CO 12:2 Ha'a­wyte tupa­naria mõtypot haria mo wuat minug yt ihay i rakat mõtypot haria yt ta'a­kasa kuap i rakaria mõtypot haria sa'a­wy'i eipe. Mi'i hap sa'ag kape yn sa'a­wy'i eiwa­nẽtup. Iã'ãkap upi ehewyry yt Tupana ywania ewy hin i eweikup­te'en.
1CO 12:3 Karãpe wato'e Iesui pe — En ni Uipo­typot Uika­'iwat wato'e pote Tupana Pã'ãu mimu'e wato­py­hu'at. Ma'ato wato'e — Iesui ti yt naku i wato'e pote yt kat i Tupana Pã'ãu aikai.
1CO 12:4 Pyno yt aiwo­'o­'ewy hin i wẽtup yn Tupana Pã'ãu aipy'a pe pytkai katu­pono Tupana Pã'ãu tum ahepe tesaika hap yt to'o­'e­wy­'ewy hin i toimõ'ẽ wuat'i nug hamuat wẽtup yn Tupana Pã'ãu toĩne'en pytkai.
1CO 12:5 Wẽtup yn Aipo­typot toĩne'en. Mi'i kape watu­we­potpap ma'ato aipotpap hap yt aiwo­'o­'e­wy­'ewy hin i.
1CO 12:6 Aipotpap hap ko'i yt to'o­'e­wy­'ewy i Tupana potpap nug hap. Ma'ato mi'i pytkai wẽtup yn aimi­sepap ko'i ium hat. Mi'i hat ti Tupana are.
1CO 12:7 Tupana Pã'ãu toĩne'en aipiit pe. Mi'i hawyi aiwo­'ope aiwo­'o­poi­tyro hap ahewaku hap toĩne'en.
1CO 12:8 Pyno Tupana Pã'ãu timo­herep wẽtup ok Iesui mohey hat piit pyi iwe'eg hamuat miit'in mu'e hat. Wẽtup ok imohey hat pe Tupana Pã'ãu timo­herep ikuap wuat'i miit'in mu'e kuap hamo.
1CO 12:9 Mi'i hawyi Tupana Pã'ãu timo­herep wẽtup ok imohey hat pe imohey kahato hap. Mi'i hawyi wẽtup ok pe tutum tesaika hap i'ahu rakat moehaĩte hamo.
1CO 12:10 Mi'i hawyi Tupana Pã'ãu tum tesaika hap wẽtup ok pe Tupana ewywuat yt uwe misepap i nug hamo. Wẽtup ok pe tutum tesaika hap Tupana wanẽtup hap moherep hamuat hawyi Tupana wẽ wo ra'yn toĩne'en hap. Mi'i hawyi wẽtup ok pe Tupana Pã'ãu tum tesaika hap wuat'i kuap hamuat pywo sio yt hap kuap hamuat sio Tupana Pã'ãu kaipyi ihay sio ahiag ihay wẽtup ok miit ete hap kuap hamo. I'ewyte tutum wẽtup ok miit pe tesaika hap wẽtup ywania pusu puat i'atu­mu'e hamuat yt toikuap pytkai i hap. Wẽtup ok pe tutum tesaika hap wẽtup ywania pusu moherep hamo aipusu puat imoherep hamo.
1CO 12:11 Tupana Pã'ãu wẽtup yn toĩne'en pytkai i'atu kahato tomi­sepap nug hap ko'i tukup­te'en. Tutum ahepe tomi­sepap nug kuap hap Topã'ãu kaipyi. Ma'ato yt ewy hin i toimõ'ẽ ahepe. Tomi­ky­'esat ewy tutum ahepe tomi­sepap nug kuap hap ko'i. Wẽtup ok aipy­'a­setpiat pe tutum wẽtup tomi­sepap nug kuap hap hawyi wẽtup aipy­'a­setpiat pe wẽtup tomi­sepap nug kuap hap tutum e. Yt to'o­'e­wy­'ewy hin i toi'a­tu­mõ'ẽ tomi­sepap nug kuap hap ahepe.
1CO 12:12 I'atu kahato aito Iesui mohey haria pytkai Tupana wanẽtup hawe wẽtup miit ewy yn watoĩ­ne'en aikotã aipiit wẽtup yn hap ewy. I'atu kahato ahaga ko'i. Yt to'o­'ewy hin i aipiit ete ma'ato mi'i pytkai wẽtup yn aipiit hap ewy ti Iesui piit toĩne'en.
1CO 12:13 Ipat'ok aito Iuteu ywania ipat'ok wẽtup ywania aito ipat'ok aito miit emiit ipat'ok miit akag ko'i ma'ato aito Iesui mohey haria pote Tupana Pã'ãu eiam aito. Mi'i pote Tupana Pã'ãu ahet'ok ta'yn — Iesui piit eipe e ra'yn ahepe.
1CO 12:14 Aipiit yt wẽtup iaga yn i ma'ato i'atu kahato iaga ko'i aipiit ete.
1CO 12:15 Mi'i tupono yt naku i to'e aipy aipo pe — Yt kan hamo i areĩne'en mesuwe yi ete waku po'og areĩne'en itote aipo wo en ewy ma'ato uiwy­ria'in yt naku i aipy topy­hu'at aipo wo yt naku i po'og areĩne'en mesuwe aipy wo. Waku arẽtem aipiit pyi e. Mio tã to'e ne'i pote tu'uka kahato tehay wo aipo ete ma'ato yt kan hamo i tu'uka katu­pono toĩne'en wuat'i e'at pe aipy wo Tupana inug aipy pote. Yt kan hamo i iha'y­wywi aipo hap ky'ewi katu­pono aipy wo Tupana inug. Waku aipy waku aipo waku aipiit powyro hamo.
1CO 12:16 Yt naku i ahewaure ka'a to'e aipiit pe. — Uito yt ekawiat i katu­pono yt eha ewy i miit'in mimõ­typot areĩne'en mote. Mi'i tupono waku yt areĩne'en i aipiit ete po'og e ne'i. Mio tã e ahewaure ka'a aipiit pe pote heso rakano topy­hu'at.
1CO 12:17 Aheha tuwenug aipiit kaipyi ne'i mi'i pote aikotã watikuap sehay. Mi'i hawyi ai'ãkuat yt toĩne'en i aipiit wo yt tuwe­pehik i pote aikotã aru watikuap ikamhig hap.
1CO 12:18 Mi'i pote Tupana yt ainug i wẽtup yn ahaga aipiit ma'ato i'atu kahato ahaga ainug wẽtup piit kaipyi yn pytkai. Pywo ti tomi­ky­'esat ewy ainug.
1CO 12:19 Ahaga wẽtup yn toĩne'en mote yt kat i aipiit.
1CO 12:20 I'atu kahato aipiit ete ahaga ko'i ma'ato mi'i pytkai wẽtup yn aipiit.
1CO 12:21 Mi'i tupono yt naku i aheha yt naku i e aipo kapiat ta'a­kasa hawyi — Yt kan hamo i aipo e. I'ewyte yt naku i ai'akag to'e aipy pe — En yt kan hamo i woro­ky­'esat e.
1CO 12:22 I'atu kahato ahaga yt hesaika rakaria i wen ma'ato to'o­'e­wy­'ewy ahaga hesaika rakaria to'o­po­wyro kuap kahato.
1CO 12:23 Ma'ato i'atu kahato ahaga aipiit pe yt wa'a­kasa i hap ko'i. Yt uwe i tuwehum i'atuete yt heremo i pote. Ma'ato mi'i pytkai aipo­wyro kahato mi'iria. Ma'ato i'ahu wẽtup aipy'a aime'en hap ewy hawyi wati­ky­'esat kahato mi'iria mog hap i'ewyte toĩ ahaga yt ikahu rakat i ma'ato ikahu aiwa­nẽtup hawe katu­pono aipo­wyro kahato hamo waku mi'iria.
1CO 12:24 Pyno aipiit ahaga ko'i Tupana minug yne tornia. Mi'i hawyi tuwehum yne tominug ko'i ete. Yt wẽtup ete i tuwehum po'og irania'in kai. Wẽtup wẽtup tutunug po'og yt ikahu hin i irania'in kai wen ma'ato mi'iria aipo­wyro hat ikahu rakat ok tã ne. Mi'iria ma'ato yt ikahu pytkai i po'og wati­po­wyro tuereto aimo­wepit pote.
1CO 12:25 Mi'i hawyi ahaga ko'i to'o­po­wyro at ka'ap. Yt naku i ahaga yt to'o­po­wyro i to'ope.
1CO 12:26 Karãpe wẽtup ahaga ete haty ra'yn hawyi torania aipiit ete ra'yn haty. I'ewyte karãpe ahaga wẽtup ok timõ­typot — Ikahu kahato eha e hap ewywuat hawyi 'i hawyi aipiit yne ra'yn iwepit.
1CO 12:27 Ma'ato ti hã'ãkap wuo ahenoi ahaga ko'i etiat Iesui piit etiat. Pyno aito Iesui piit aga ko'i ewy Iesui mohey haria aito pote.
1CO 12:28 Aito ti haga ko'i ewy wato­py­hu'at ma'ato ti Tupana timo­wo­'osat yne wẽtup piit ete yn torania aito Iesui mohey haria. Wẽtup ahaga Tupana tum tesaika hap tehay sytpok wẽtup ywania kapiat hat ewy. Mi'i hawyi Tupana tum wẽtup haga pe tesaika hap aikotã aikotã meiũran topy­hu'at hap moherep hamo Tupana yn wyti ikuap e hap moherep hamo e. Mi'i hawyi wẽtup ok pe tutum tesaika hap tehay wuat miit'in atumu'e hamo e. Mi'i hawyi wẽtup ok pe tutum tesaika hap yt uwe i miit'in misepap ewywuat nug hamuat e. Mi'i hawyi wẽtup ok pe tutum tesaika hap i'ahu rakaria moehaĩte hamo e. Mi'i hawyi wẽtup ok pe tutum tesaika hap wẽtup ywania i'atu­pusu puat miit'in atumu'e tehay etiat hamo e.
1CO 12:29 Yt yne i aito Tupana ehay sytpok yne ywania piat hanuaria. Yt torania pe i tutum tesaika hap iwato kahato aikotã aikotã hap moherep hamo e. I'ewyte yt yne pe i tutum tesaika hap miit'in atumu'e hamo e. I'ewyte yt yne pe i tutum tesaika hap yt uwe i misepap nug hamo e.
1CO 12:30 Yt yne i pe tutum tesaika hap i'ahu rakaria moehãite hamuat e. Yt yne pe i tutum tesaika hap wẽtup ywania pusu puat i'atu­mu'e hamo yt toikuap pytkai i e. I'ewyte wẽtup ok pe tutum tesaika hap wẽtup ywania pusu moherep hamo aipusu puat hamo e.
1CO 12:31 Pyno Tupana aimoe­saika wakuat kahato nug hamo. Waku kahato toimo­herep aipiit pyi tesaika hap nug hamo. Yt watikuap i pytkai waku kahato watunug Tupana mikuap hap toipag aipiit pe hawyi. Waku kahato watunug ma'ato wẽtup aimoe­saika hap Tupana piat po'og waku irania'in kai. Mi'i ti Tupana ehay moherep irania'in me hap po'og waku torania tomiium kai. Mi'i pote waku wahẽtup aipy'a pyi — Tupana uimu'e o ehay moherep emikuap ok tã irania'in me waku wato'e wuat'i aimi­ky­'esat hap wywo hawyi tutum ahepe tesaika hap tehay moherep hamo. Uito ti Tupana ehay moherep hat sese Pauru.
1CO 13:1 Yt wati­ky'e i miit'in pote yt kat hamo i aimi­sepap ko'i sio watikuap yne torania pusu mesu­wa­rotiat sio watikuap atipy piaria pusu yt kat i miit'in ky'e hap Tupana ky'e hap aikai pote aipusu ahehay topy­hu'at ipuehay ewy aimogyt hap ewy aikotã tamã­raka ehay ewy ihay pirik hap. Watikuap wuat'i ywania pusu ma'ato mi'i pytkai yt wati­'a­tu­ky'e i irania'in pote yt kat hamo i watikuap yne pytkai.
1CO 13:2 Watikuap kahato Tupana ehay moherep miit'in miat hamo ma'ato mi'i pytkai yt wati­ky'e i aimi­mu­'eria pote mi'i hawyi yt kat hamo i ahehay see hap topy­hu'at. Mi'i hawyi watikuap yne torania mikuap ok tã ma'ato yt miit'in ky'e hat i aito pote yt kan hamo i aimikuap ko'i. Ma'ato imohey hap iwato aikai pote aikotã wato'e yity'ok kape — Moto ro mesu­wepyi wato'e hawyi toto hap ewy. Mi'i tã wato­mohey pote ma'ato yt kat i aikai miit'in ky'e hap pote yt kat hamo i imohey hap iwato aikawiat.
1CO 13:3 I'ewyte hegyi'at kahato rakat watoĩ­ne'en hawyi watum yne ahekat miit'in me ma'ato yt wati­'a­tu­ky'e i miit'in mote yt kat hamo i aimi­mohey iwato hap — Yt pywo i rat i'atu'e ne'i ahepe. Mi'i hawyi watum aipiit yne Iesui ehay moherep hamo ma'ato yt kat i miit'in ky'e hat aito pote yt kan hamo i — Waku pyno uiwuk wato'e ai'auka teran haria pe Iesui mohey haria kahato aito pote ma'ato mi'i pytkai yt wati­ky'e i miit'in mote yt kat hamo i aiwuk hap Iesui moherep haria wuat'i ywania mu'e haria aito pytkai.
1CO 13:4 Pyno wati­ky'e sese miit'in mote mot'i wati­ky'e hawyi wuat'i e'at pe wati­ky'e. Yt Karãpe i watoiat i'atu­ky'e hap. Wati­'a­tu­ky'e sese miit'in mote watoĩ­ne'en iwese kahato rakano wuat'i e'at pe. Karãpeĩ aimi­ky'e topy­hu'at po'og aikai hawyi yt kat i ahehay­'y­wy'i hin i ma'ato watu­wehum katu­pono wati­ky­'esat aimi­ky'e mõtypot hap pote. Yt karãpe i — Uito po'og ekai wato'e aipy'a pe wati­'a­tu­ky'e sese miit'in mote. — Waku uito po'og eikai wuat'i mimõ­typot no yt wato'e i wati­ky'e sese miit'in mote.
1CO 13:5 Wati­'a­tu­ky'e sese miit'in pote waku i'atueko wakuat ewy watoĩ­ne'en. Yt karãpe i watoĩ­ne'en yt hegyi'at i rakano wati­'a­tu­ky'e sese miit'in mote. Yt karãpe i watoĩ­ne'en marak'a wo wati­ky'e sese miit'in mote meremo waure wo watoĩ­ne'en i'atu­minug sa'ag aima'at hap kai.
1CO 13:6 Wati­ky'e miit'in mote karãpe ta'a­tunug waku ahepe meremo aimo­wepit kahato hawyi — Waku uhyt mana wato'e. Karãpe ta'a­tu­'a­parap hawyi watuwak hap ewy topy­hu'at aipy'a pe wati­'a­tu­ky'e sese pote.
1CO 13:7 Wati­ky'e sese miit'in pote wati­'a­pykok kahato aimi­ky'e ko'i yt naku i hap pupi. Aimi­ky'e sese wato­mohey pot'i. Wati­ky'e miit'in mote — Woro­mohey en mehĩ mana wato'e. Atikuap waku pe etunug aru hap wato'e. Hepamo kahato aipy­'ahak hap i'atuete wati­'a­tu­ky'e sese pote.
1CO 13:8 Wati­'a­tu­ky'e sese miit'in pote mesup mũki­'ite wuat'i e'at pe wati­'a­tu­ky'e po'og po'og hap ewy. Tupana ihay tuereto aiwẽ pyi tehay wo wati­mo­herep kahato. Ma'ato meiũran Tupana ewywuat ra'yn watoĩ­ne'en atipy pe hawyi yt kat hamo i ihay aiwẽ pyi katu­pono aimu'e hat no toĩne'en atipy pe ihay ma'ato miit'in ky'e hap Tupana ky'e hap topy­hu'at itote wuat'i e'at pe. Mi'i pote mesup te Tupana tum ahepe tesaika hap wuat'i pusu kuap hamo. Ma'ato atipy pe torania itotiaria wuat'i ywania pusu kuap haria tukup­te'en ma'ato Tupana ky'e hap miit'in ky'e hap itote topy­hu'at wuat'i e'at pe.
1CO 13:9 Pyno koitywy Tupana tum ahepe towe'eg hap tehay kuap hamo to'e hap moherep hamo. Koitywy toĩne'en aikai ma'ato ipat'ok hit yn watikuap.
1CO 13:10 Pyno koitywy watikuap ipat'ok yn ma'ato meiũran wuat'i kuap hap tutum ahepe tomikuap ok tã. Koitywy wahepap kurin Tupana sepap nug hamo wen ma'ato atipy pe watunug kuap yne hap ewy.
1CO 13:11 Sa'a­wy'i watoĩ­ne'en hirakat ewy yne ahehay hirakat ehay ewy i'ewyte aiwa­nẽtup hap hirakat wanẽtup hap ewy i'ewyte aheĩne'en hap hirakat ewy. Aimikuap yt pywo rakat i hirakat mikuap ewywuat wati­wuare yne ra'yn. Yt kat hamo i watu­wa­nẽtup po'og hirakat wanẽtup hap ewy watoĩ­ne'en Yne Kuap Hat Tupana Kai hawyi.
1CO 13:12 Koitywy Tupana watikuap i'ypyryp we pyi hap ewy Tupana etiat ipat'ok hap ko'i yn. Ma'ato meiũran watoĩ­ne'en i hap tote ra'yn aiwo­'oewa pe ra'yn wato­'oe­ha'at. Mi'i hap e'at pe watikuap sese ra'yn yt watikuap i te hap ko'i. Ma'ato mesu­wa­rotiat watikuap Tupana aikotã aipã'ãu wata­'a­kasa y'y pe yt heremo i kahato hap ewy ne'i. Ma'ato meiũran aru Tupana piat aikuap hap ok tã watikuap Tupana.
1CO 13:13 Pyno mesu­wa­rotiat toĩne'en mye'ym nakat yn yt karãpe i ikahuro rakat. Wẽtup aiwo­'o­mohey hap wẽtup — Waku pe aru topy­hu'at e hap wẽtup aiwo­'o­ky'e hap. Mye'ym mi'iria wuat'i e'at piaria waku rakat. Wẽtup po'og torania kai mi'i ti aiwo­'o­ky'e sese hap. Pyno waku wato'e Tupana pe — Uinug o wo'o­ky'e hano waku wato'e. Mi'i hap Tupana wywuat miit'in nywuat aiwo­'o­pot­ky'e hap po'og hesaika torania kai are'e. Uito eky'e kahato hat Pauru.
1CO 14:1 Pyno waku wahẽtup torania aipy'a pyi — Uinug o Tupana wo'o­ky'e hano waku wato'e. Atiky­'esat kahato emisepap nug kuap hap ko'i ma'ato wẽtup atiky­'esat po'og torania kai. Atiky­'esat kahato etum o uhepe esaika hap ehay sese moherep hamo miit'in me waku wato'e.
1CO 14:2 Katu­pono karãpe ahehay Tupana wywo ipusu puo yt uwe i mesu­wa­rotiat aikuap yt miit'in pusu ewywuat i pote yt aiwa­nẽtup hap kaipyi i ahehay pote ma'ato Tupana wanẽtup hap ewy ahehay Tupana pusu ewy ahehay pote yt uwe i mesuwe ikuap.
1CO 14:3 Ma'ato karãpe Tupana tum ahepe tesaika hap topusu moherep hamo miit'in atunãpin hamo mi'i hawyi ahehay topy­hu'at miit'in powyro hamo. Aimi­mu­'eria i'atu­'arot ne'i potiat wati­'a­tu­mu'e Tupana Pã'ãu kaipyi hawyi Tupana mimo­wepit ko'i tukup­te'en. Ta'a­tu­mohey aimienoi aimi­mu­'eria haty'u pote mi'i hawyi i'atu­wepit kahato ra'yn.
1CO 14:4 Ma'ato karãpe ahehay Tupana wywo ipusu puo mi'i hawyi aiwe­po­wyro hap yn topy­hu'at aiweran ahehay pote. Ma'ato karãpe uwe uwe Tupana wẽ wo timo­herep Iesui hawyi yne Iesui mohey haria itote imimu­'eria powyro hat topy­hu'at mi'i.
1CO 14:5 Waku yne aito Tupana wywo ahehay Tupana pusu puo ma'ato po'og waku wati­mo­herep Tupana e hap ewywuat miit'in me mi'i hap po'og waku topy­hu'at ahehay Tupana pusu puo hap kai. Ma'ato toĩne'en wẽtup ok aipy­'a­setpe Tupana pusu moherep hat miit'in me pote waku ahehay Tupana kape ipusu puo. Sa'a­wy'i ahehay Tupana kape mekewat ipusu puo mi'i hawyi waku mekewat wẽtup ok Tupana pusu kuap hat imoherep irania'in me itotiaria pe kat e hap kat e hap ko'i wato'e hap ko'i.
1CO 14:6 Meiũran aru areto ehowawi uheywyt'in. Mi'i hawyi atimo­herep ehepe Tupana ehay Tupana yn ikuap ko'i. Tupana Pã'ãu kaipyi aru woro­ho­'o­mu'e woro­ho­'o­nãpin. Eipusu puo yn ahenoi ehepe. Yt kat hamo i Tupana pusu puo woro­ho­'o­mu'e.
1CO 14:7 Eity pusu puo eimikuap ok tã woro­ho­'o­mu'e. Yt areĩne'en neran i wepy hap yt hãpyk takat i ewy. Yt areĩne'en neran i akuara pyy hat yt ikuap i hat kahato hat ewy. Yt areĩne'en neran i kawakiũ yt pyy hat yt hepap kahato i hat ewy katu­pono mi'iria te'e­ru­wepyy hawyi yt watikuap i kat e tuwepyy hap. Ma'ato hepap hat ipy hawyi meremo ipy hap ete watikuap.
1CO 14:8 Surara akag tikaykay temiit'in ta'a­tue­wa­nĩ­kaptia wywuat tu'uka hamo huhu e hap wywo. Toi'a­tu­kaykay ma'ato huhu e hat yt hepap i hat pote surara ko'i yt tikuap i — Waku mesup watu­'uka yne ahesaika hap wywo sio yt i'atu'e ne'i.
1CO 14:9 Mi'i hap ewy kahato karãpe watu­we­'a­tunug Iesui mõtypot hamo hawyi wẽtup ok ihay yt uwe mikuap i pusu puo wẽtup ywania pusu puo sio atipy piaria pusu puo ihay ikahu wen ma'ato itotiaria yt ikuap hin i kat som to'e hap yt ta'a­tu­pusu puo i pote. Ahehay Tupana tikuap wen ma'ato itotiaria yt hawyi ahehay yt kat hamo i. Yt wẽtup sehay i topy­hu'at miit'in wanẽtup hawe ikuap hap.
1CO 14:10 I'atu kahato yt aipusu ewywuat i mesuwat yi tote yt aimikuap ko'i i. Ma'ato mekewat pusu ikuap haria ta'a­tuwat ta'a­tu­pusu pote ta'a­tukuap ta'yn kat e kat e hap.
1CO 14:11 Ma'ato yt watikuap i yt i'ywania i aito pote. Mi'i hawyi karaiwo ewy wato­py­hu'at yt ipusu kuap haria aito pote.
1CO 14:12 Pyno waku wahẽtup Tupana pe haty wo — Etum no uhepe esaika hap emisepap ewywuat nug hamuat waku wato'e Tupana Pã'ãu me. Mi'i ewetunug mote tutum ehepe hawyi waku Tupana misepap ewywuat hap wywo watu­we­potpap kahato. Waku watikat mu'ap aiwy­ria'in Iesui mohey haria i'atuepiat imohey hap moesaika hamo.
1CO 14:13 Karãpe ahehay Tupana kape ipusu puo yt watikuap i kat som wato'e hap mi'i pote waku wahẽtup Tupana pe — Etimo­herep uhepe ui'e hap Uhyt Mimi waku wato'e Tupana pe.
1CO 14:14 Karãpe ahehay Tupana wywo ipusu puo yt aiwa­nẽtup hap kaipyi i ahehay ma'ato aipy'a pyi ahehay tuwẽtem Tupana pã'ãu ihay hap ewy. Aipy'a ihay haty wo sese Tupana wywo pote ahehay pywo pe.
1CO 14:15 Pyno aikotã waku watunug ahenoi epe. Waku ahehay Tupana kape aipy'a pyi Tupana pusu puo waku ma'ato po'og waku ahehay Tupana kape aiwa­nẽtup hawyi aipusu puo. I'ewyte waku watu­wepy Tupana kape Tupana pusu puo ma'ato po'og waku watu­wepy Tupana kape aiwa­nẽtup hawyi aipusu puo.
1CO 14:16 Pyno watu­wehum Tupana kape Tupana pusu puo yt ikuap i haria py'a­setpe pote — Pywuat ehay mana mehĩ yt i'atu'e kuap i. Ahehay Tupana kapiat ipusu puo turan teke ta'a­tu­'e­waure ka'a pe wen ma'ato kat som wato'e yt ta'atukuap i. Mi'i hawyi yt te'e­ru­wehum kuap i yt ta'a­tu­'e­waku kuap i yt ta'a­tukuap i aimiẽtup ko'i pote. Yt ta'a­tukuap i aiwehum Tupana kapiat hap yt ta'a­tu­pusu puat i pote.
1CO 14:17 Tupana kapiat aiwehum hap ikahu sese pytkai watunug ipusu puo pote irania'in itotiaria yt kat hin i ikuap hap. Mi'i hawyi yt kat hamo i ahehay se Tupana kape mi'iria py'a­setpe. Yt i'atu­po­wyro hap hin i ahehay iro pote.
1CO 14:18 Uito Pauru arehum kahato Tupana kape katu­pono tutum uhepe tesaika hap topusu kuap hamuat. Mi'i hap ete atikuap po'og eipe torania kai katu­pono uito uhehay kuap Tupana pusu puo e.
1CO 14:19 Ma'ato karãpe watu­we­'a­tunug Tupana mõtypot hamo turan yt uhehay teran hin i mekewat atipy piat pusu puo ne'i wa'a­tunug haria py'a­setpe. Ma'ato aimikuap pusu puo yn uhehay teran. Po'og waku wati­'a­tu­mu'e kurin kurin irania'in i'atu­mikuap sehay puo 5 sehay yn hap ewy sio ahehay at ka'ap wẽtup 1000 sehay ewy yt uwe mikuap i pusu puo.
1CO 14:20 Pyno waku watoĩ­ne'en hira­karia ewy aikotã hira­karia yt ta'a­tukuap hin i sa'ag nug hap. Mi'i hap ewy waku wato­py­hu'at uheinyt'in uheywyt'in. Ma'ato yt naku i watu­wa­nẽtup hirakat ewy katu­pono yt te'e­ru­wa­nẽtup kuap kahato i te wakuat sehay enoi hap kape hap ewy ne'i.
1CO 14:21 Mio tã e Tupana sa'a­wy'i miwan me — Iuteuria e meiũran woro­ho­'o­mu'e eipe wẽtup ywania wẽ pyi yt eipusu kuap i haria wẽ pyi woro­ho­'o­mu'e ma'ato mi'i turan i'ewyte uhehay pun haria eweikup­te'en. Eiwe­waure hik ne'i aru eimu'e wẽtup ywania wẽ pywiat turan. Yt ta'a­tukuap i eipusu pytkai uhesaika hap wywo ta'a­tu­su'at eipusu pote e. Ma'ato mi'iria mienoi yt eweimohey i aru e Tupana sa'a­wy'i miwan me.
1CO 14:22 Mi'i hap ewy topy­hu'at mesup katu­pono Tupana tum tesaika hap ahepe yt imohey i haria mu'e hamo. Yt watikuap i i'atu­pusu pytkai i'atu­pusu puo Tupana ihay kahato aiwẽ pyi hawyi te'e­ru­wa­nẽtup kahato Tupana e hap aiwẽ pywiat hap kape hawyi te'e­ro'e — Tupana waku kahato i'atu'e katu­pono ihay ahepe wẽtup ywania wẽ pyi i'atu'e.
1CO 14:23 Ma'ato karãpe aito Iesui mohey haria watu­we­'a­tunug waku ahehay yne aimikuap pusu puo yn. Yt naku i ahehay itote Tupana kape atipy piaria pusu puo. Ma'ato mi'i tã watunug itote pote mi'i hawyi put'ok'e itote wẽtup ok yt Iesui mohey i hat i te yt aheko kuap i te hat mi'i hawyi — Are pãi are an i'atu'e ta'i mesu­wa­rotiat heso'ok takaria i'atu'e ne'i ta'a­tu­wa­nẽtup hawe katu­pono yt ta'a­tu­mikuap wuo i ahehay Tupana kapiat pote atipy piaria pusu puo pote.
1CO 14:24 Ma'ato Tupana ehay wati­mo­herep itote ai'y­wania pusu puo mi'i pote — Pywo i'atu'e yt Iesui mohey i te haria. Yt aiwa­nẽtup hap ewy i te hat pytkai — Pywo i'atu'e Tupana e hap aiwẽ pywiat kape. Mi'i hawyi — Pyno eweikuap kahato urupusu pote mesup uruikuap ta'yn iesui moherep hap eiwẽ pywiat pote uruimohey mi'i i'atu'e aru. Pywo ti rat uito areĩne'en yt naku i nug hat i'atu'e. Mio atikuap ta'yn Tupana ui'a­piheg ten uiminug yt naku i hap ete i'atu'e aru.
1CO 14:25 Mi'i hawyi tuwa­nẽtup ko'i ko'i yt naku i yt uwe mikuap ko'i i mig'i wuat Tupana timo­herep tope toikuap Tupana ehay topusu puo hawyi. Mi'i hawyi meremo tuwe­pỹ­'ã­tutuk Tupana sese ewawi hawyi to'e — Tupana pywo kahato ti ereĩne'en mesuwe emohey haria py'a­setpe i'atu'e aru Tupana pe ta'a­tu­pusu puo ahehay hawyi.
1CO 14:26 Uiwy­ria'in uheinyt'in koitywy woro­ho­'o­mu'e teran aikotã aikotã waku wati­mõ­typot Tupana aiwo­'o­'a­tunug hap ete. Waku ikahu kahato wati­mõ­typot Tupana. Waku pe yn waku ahehay itote. Waku watikat Tupana mohey hat wẽtup ok aimu'e kahato hat itotiat Tupana mõtypot wepy hap ete. Mi'i hawyi waku wẽtup ok aimu'e itote Tupana ehay miwan myi. Mi'i hawyi wẽtup ok itote ihay kahato Tupana wẽ ewy Tupana ainãpin hap sese moherep hamo Tupana to'e hap ewy. Mi'i hawyi waku wẽtup ok aimu'e Tupana pusu puo sio toĩne'en itote wẽtup ok atipy piaria pusu kuap hat imoherep ahepe aipusu puo kat e kat e hap ko'i ete. Mi'i pote aimoe­saika kahato Tupana mohey hap ete Tupana pusu puat. Atipy piaria pusu puo ihay rakat waku wẽtup ok yn hawyi waku wẽtup ok imoherep hat ihay iwywo kat to'e kat to'e e hap wuat'i pusu puo.
1CO 14:27 Ma'ato mi'i hawyi mi'iria aimu'e turan waku wẽtup ok aimu'e aipusu puo kat som to'e kat som to'e hap ete.
1CO 14:28 Ma'ato yt uwe i itote Tupana pusu moherep aipusu puat hat yt uwe i imoherep aipusu puat pote — Mehĩ Mana waku aipusu puo aimu'e mesup katu­pono atipy piaria pusu moherep haria yt uwe i mesuwe waku wato'e itote. Ma'ato waku ahehay Tupana pusu puo aiwa­nẽtup hawe ahehay Tupana kape. Waku wẽtup ok ihay Tupana pusu puo mi'i hawyi wẽtup ok henoi ahepe kat to'e hap ko'i. Mi'i hawyi wẽtup ok ihay hawyi wẽtup ok i tuereto.
1CO 14:29 Waku wahenoi irania'in me kat som kat som Tupana Pã'ãu to'e aiwa­nẽtup hawe aiwe­'a­tunug hawe. Waku wẽtup ok i ihay mi'i hawyi wẽtup ok i ihay. Mi'i hawyi ta'a­tu­mo­herep Tupana ehay torania. Mi'i pote waku ahewaure ka'a kahato Tupana ehay i'atu­mienoi kape. Waku wato'e aiwa­nẽtup hawe Tupana ehay sio yt waku wato'e aiwa­nẽtup hawe.
1CO 14:30 Karãpe Tupana ihay aiwẽ pyi tomi­mu­'eria pe mi'i hawyi waku wẽtup ok ipoĩ'ãm Tupana Pã'ãu e hap moherep hamo. Waku mehĩ wato'e. Mi'i hawyi wati­monik porap'i wẽtup ok ihay turan.
1CO 14:31 Waku yne aito Iesui mohey haria Tupana ehay moherep haria wo e. Yt naku i Tupana ehay wahenoi aiwo­'oetu etu ne'i. Waku wẽtup ok ti ihay mi'i hawyi waku wẽtup ok i ihay tuereto. Mi'i tã watunug mote we'a­tunug haria tikuap hãpyk Tupana ehay aiminug ko'i. Mi'i hawyi te'e­ro'e — Pywo ti rat pãi i'atu'e hap ewy. Mi'i hawyi i'atu­'arot hap yt kat i i'atu­wa­nẽtup hawe.
1CO 14:32 Mi'i hawyi to'e­ro'e — Tupana Pã'ãu kaipyi urumu'e pote urumo­wẽ'ẽg Tupana ehay wo. Uiwy­ria'in Karãpe Tupana ihay aiwẽ pyi mi'i hawyi yt ahiag ewy i ihay. Waku pe aiwa­nẽtup hap toĩne'en yt aheso'ok hap ewy hin i ma'ato ahehay aiwanuat ewy toĩne'en aiwa­nẽtup hawe. Ta'i watikuap Tupana to'e hap Iesui mõtypot hap hawyi wati­mo­herep miit'in me.
1CO 14:33 Ma'ato Tupana Pã'ãu toĩne'en aipy­'a­setpe hawyi Tupana mõtypot hap hãpyk kahato watunug. Mi'i hawyi wo'o­wese haria wo ra'yn Tupana Pã'ãu ainug.
1CO 14:34 Karãpe watu­we­'a­tunug Tupana mõtypot hamo yt naku i ahehay aiwo­'ope wo'ope aimu'e hat ainu'e turan. Waku watu­wa­nẽtup aimu'e hat ehay kape yn wẽtup wanẽtup hap yne aito hap ewy waku are. Aheha­ry'i yt ikuap i pote waku tohẽtup ahepe ta'aipok to'yat kapiat hawyi.
1CO 14:35 Yt naku i apo'e wo'o­mu'e hawe. Katu­pono waku Iuteuria eko ewy waku watunug itote. Mi'i tã Iuteuria ywania — Yt naku i hary­poria ai'a­pykok hat ai'akag wo i'atu'e. Mi'i hawyi waku yne Iesui mohey haria te'e­ro­py­hu'at mesuwat seko upi.
1CO 14:36 Pyno yt eikaipyi tuut Tupana ehay miwan miat ma'atu Iuteu ywania kaipyi yne Tupana ehay miwan miat tuut e. Katu­pono sa'a­wy'i eiperia tawa Kurintiu piaria yt kat i Tupana ehay eikai. Mi'i turan put'ok'e Tupana ehay ehete uiwẽ kaipywiat. Mi'i tupono yt eiwe­kaipyi i eweikuap Tupana ehay. I'ewyte yt ehepe yn i put'ok'e Tupana ehay uiwẽ kaipywiat. Katu­pono tukup­te'en kahato irania'in ywania Tupana ehay kuap haria ma'ato yt eimienoi hap kaipyi i pãi ta'a­tukuap are. Yt naku i pyno ewei'e — Tupana ehay moherep haria kahato uruto. Yt naku i ewei'e uruto po'og Tupana ehay kuap haria irania'in kai yt naku i mio tã ewei'e.
1CO 14:37 — Pyno uito ti Tupana ehay moherep haria koro ko'i ewei'e sa'ag. Ta'i Tupana tum na'yn uruepe tesaika hap tomi­sepap nug hamuat ewei'e. Po'og waku ewei'e eiwo­'ope — Aimu'e hat sese Pauru mimu­'eria aito waku ewei'e.
1CO 14:38 Ma'ato toĩne'en wẽtup ok eipy­'a­setpe — Ta'i Pauru yt imoherep kuap i Tupana ehay e hat. Mio tã e hat pote yt eweiwesat tei'o. Mio tã to'e hawyi yt ewetum nei'o ehewaure ka'a howawi.
1CO 14:39 Uiwy­ria'in waku wahẽtup yne aipy'a pyi — Tupana uinug o ewẽ wo ehay moherep miit'in miat hamo wato'e. I'ewyte waku wato'e Tupana pusu puat ihay teran nakat pe — Waku mana waku uhyt wato'e. Yt etipyhyp tei'o mi'iria.
1CO 14:40 Mi'i hawyi karãpe wati­'a­tunug watu­wa­'a­tunug Tupana mõtypot hamo hawyi waku hãpyk puo watunug. Wati­mõ­typot waku pe kahato imõtypot yat pe are uito Pauru
1CO 15:1 Uiwy­ria'in tawa Kurintiu piaria pyno mesup uito Pauru ahenoi teran po'og mekewat sa'a­wy­'iwuat uimienoi hãpyk takat sehay etiat. Sa'a­wy'i ui'e hap eweimohey haty wo hap ahenoi ira'yn teran ehepe. Ui'e hap sa'a­wy­'iwuat ewy yt atiky­'esat i eweiwaure katu­pono mi'i wato­mohey mot'i hawyi Iesui mohey haria sese wato­py­hu'at.
1CO 15:2 Pyno mio tã are woro­ho­'o­mu'e sa'a­wy­'iwuat sehay wakuat sese ahenoi. Mi'i eweimohey mot'i pote Tupana mieha­kye­ra'at ko'i eweikup­te'en ma'ato wato­mohey ran ne'i pote yt e.
1CO 15:3 Yt uiwe­kaipyi i sa'a­wy'i woro­ho­'o­mu'e ma'ato Tupana tum tesaika hap uhepe tehay wakuat moherep miit'in miat hamo pote sehay wakuat po'og torania kai atimo­herep ehepe Aipo­typot Iesui iku'uro aria'yp posak ete ai'a­piheg hap Tupana piat aiminug sa'ag ko'i etiat. Aimõti hap ko'i moma hamo iku'uro itote aika­wiano aikotã Tupana to'e sa'a­wy'i hap ewy aikotã miwan me to'e hap ewy iku'uro ra'yn.
1CO 15:4 Mi'i hawyi ta'a­tusyp ipiit mi'i hawyi itote mye'ym e'at tosyp hawe iku'uro sese hawyi mye'ym e'at hawyi Tupana tomoieĩ­ne'en i ra'yn gu'uro pyi Tosa­'yru aikotã Tupana to'e sa'a­wy'i hap ewy aikotã Isaia tiwan 53 piat to'e hap ewy.
1CO 15:5 Tuwe­mo­herep gu'uro pyi hawyi tuwe­mo­herep sa'a­wy'i temiit Peteru kape. Mi'i hawyi tuwe­mo­herep temiit'in 12 ok takaria kape topot­mu­'eria sese kape.
1CO 15:6 Mi'i hawyi meiũran Iesui tuwe­mo­herep i ra'yn miit'in sem kape temiit'in 500 ok takaria kape sa'a­wy'i hewyry iwywuat rakaria kape. Mi'iria te'e­ra­'a­kasa kahato ta'a­tukuap ihay. Koitywy ti mi'iria tukup­te'en ne aimu'e haria wẽtup ok wẽtup ok ma'ato iku'uro ra'yn iraina'in.
1CO 15:7 Mi'i hawyi ipotmu'e Tiaku ta'a­kasa hawyi yne ipotmu­'eria te'e­ra­'a­kasa pakup i ira'yn 11 ok takaria.
1CO 15:8 Meiũran aru tuwe­mo­herep uhowawi. Uito Pauru ara'a­kasa i ra'yn Iesui uheha wo. Uito aikotã aimẽpyt yt tuwe­mo­herep i te rakat ewy areĩne'en katu­pono ara'a­kasa uito irania'in Iesui potpo­'o­roria i'atue­wat­'ymo ma'ato ipotpo­'oro sese uito are. Hirakat no areĩne'en Iesui toĩne'en aipy­'a­setpe turan mote.
1CO 15:9 Ma'ato uhewaku hap yt put'ok'e hin i irania'in Iesui potmu­'eria kai katu­pono sa'a­wy'i Iesui mohey haria ti ati'a­tu­sa­ty'i saty'i ka'ato. Sa'awy'i ati'a­tu­moma kahato mi'iria. Sa'awy'i ati'a­tu­'uka mi'iria ma'ato mi'i pytkai Tupana uiky'e. Yt uhewaku hap upi hin i ui'airo topot­po­'oro wo. Sa'a­wy'i hewa­nĩkap nuat areĩne'en pytkai ui'airo topot­po­'oro wo are.
1CO 15:10 Hegyi'at kahato Tupana uhepe atikuap koitywy. Atikuap iwese hap hawyi yt atipun hin i uiky'e hap. Arepotpap po'og ipotpo­'o­roria irania'in kai aikotã uiky'e hap ok tã arepotpap uiky'e hap moherep hamo.
1CO 15:11 Mi'i hawyi uruimo­herep ehepe Tupana ehay Iesui etiat sio uito sio 12 ok takaria Tupana ehay yn Iesui etiat. Ta'i wẽtup sehay yn uruwẽ pyi tuwẽtem katu­pono uruto wẽtup sehay moherep haria yn uruimo­herep wote. Mi'i tupono Iesui mohey haria sok eipe mesup urupo­'oro hat mohey haria eipe pote.
1CO 15:12 Urumi­mo­herep sa'a­wy­'iwuat ehepiat wẽtup sehay yn aikotã Aipo­typot Iesui tuwẽtem gu'uro pywiat hap yn. Mi'i hawyi eweimohey Mi'i ra'yn. Ma'ato mesup toĩne'en eipy­'a­setpe — Aiku­'uro rokirẽ yt kat i aito. Yt karãpe i watoĩ­ne'en i e haria.
1CO 15:13 Ma'ato yt kat i miit'in ieĩne'en hap toku­'uro hawyi mi'i pote yt toĩne'en i toku­'uro hawyi Aika­'iwat Iesui katu­pono Aika­'iwat aipu'i kawiat sese toĩne'en MIIT SESE kawiat toine'en Iesui piit. Iku'uro hawyi toĩne'en i ra'yn gu'uro pyi.
1CO 15:14 Aika­'iwat yt tuwẽtem i gu'uro pyi pote yt kat hamo i wati­mu'e miit'in Iesui ete hawyi yt kat hamo i etimohey Iesui sio iku'uro te gu'uro pe te toĩne'en mote.
1CO 15:15 Ha'a­wyte urui'a­tu­mu'e eipe i'ewyte mesup te Aika­'iwat Iesui tuwẽtem gu'uro pyi uruto'e. Ma'ato mio tã yt wato'e i pote heso rakaria watoĩ­ne'en — Heso rakat e Tupana iro pote ahepe.
1CO 15:16 Tupana yt aihep i gu'uro pyi aiku­'uro hawyi pote yt toihep i sa'a­wy'i Aika­'iwat Iesui gu'uro pyi wy. Aika­'iwat yt ihaĩte i te pote heso hap wato­mohey hawyi yt kan hamo i wahe­katu aheĩne'en hap wuat'i e'at piat are. Ma'ato tuwẽtem gu'uro hawyi hap watikuap ta'yn i'ewyte aheĩne'en aiku­'uro hawyi hap watikuap.
1CO 15:17 Uiwy­ria'in ta'i Tupana yt timoieĩ­ne'en i Aika­'iwat gu'uro pyi pote te neke iku'uro te mio topy­hu'at. Mi'i hawyi Iesui toĩne'en pakup i hap mohey hamo yt kat i. Yt kat hamo i imohey hap. Aimo­'a­kag'aia hap yn topy­hu'at. Mi'i hawyi wato­py­hu'at ho'o­wasat rakaria ewywuat. Mi'i hawyi yne aiminug sa'ag topy­hu'at ahete te i'ewyte ai'a­piheg hap aru topy­hu'at ahete Iesui iku'uro te pote.
1CO 15:18 I'ewyte yne aiwy­ria'in iku'uro rakaria wo tukup­te'en ne nimuaria Iesui mohey haria. Yt kat i aheĩne'en i hap aiku­'uro hawyi pote yne aitoria ho'o­wasat rakaria watu­kup­te'en wuat'i e'at pe i'ewyte aiwy­ria'in iku'uro rakaria i'atu­wo­'osyp hawe te tukup­te'en ne. Mi'iria yt karãpe i tuwẽtem wo'osyp hap popyi yt kat i aheĩne'en i hap wote.
1CO 15:19 Uiwy­ria'in yt watoĩ­ne'en i aiku­'uro hawyi mi'i pote mesu­wa­rote yn watu­kup­te'en. Aiku­'uro hawyi yt kat i topy­hu'at aiwywo Iesui. Iku'uro te pote heso rakaria watoĩ­ne'en katu­pono wato'e miit'in me — Iesui toĩne'en ne wato'e.
1CO 15:20 Pywo ti rat Aika­'iwat yt nem rakano no hin i toĩne'en. Mio yt iku'uro i koran katu­pono Tupana timoieĩ­ne'en pakup i ra'yn Aika­'iwat. Toihep Tosa­'yru gu'uro pyi aimu'e hamo — Aikotã atihep Uha'yru mi'i hap ewy woro­ho­'ohep eipe gu'uro pyi e hamo toihep Tosa­'yru.
1CO 15:21 Sa'a­wy'i sese wuat'i miit'in aha'a­se'i Ãtãu kaipyi ta'a­tu­'a­parap Tupana pe mi'i pote iku'uro rakaria tukup­te'en. Mi'i hawyi yne aito Ãtãu ewy aiku­'uro hap toĩne'en aha'a­se'i ewywuat topy­hu'at i'aparap haria aito pote. Mi'i pote iku'uro rakaria yne aito. Mi'i hawyi wẽtup MIIT tuwe­mo­herep. Mi'i MIIT Iesui. Mi'i yt i'aparap hin i Tupana pe. Mi'i Tupana tihep gu'uro pyi. Mi'i hawyi koitywy imẽpyt'in ko'i wo aito i'ewyte watu­wẽtem gu'uro pyi imohey haria aito pote.
1CO 15:22 Yne miit'in te'e­ro­py­hu'at ta'a­tue­'a­se'i Ãtãu ewywuat to'o­'e­wy­'ewy yt naku i nug haria sok. Mi'i pote ti yne aito iku'uro rakaria. Mi'iria Ãtãu saipe­piaria to'o­'e­wy­'ewy. Karãpe wato­mohey Aika­'iwat Iesui hawyi Mi'i MIIT ewywuat wato­py­hu'at. Mi'i hawyi wẽtup miit ewy aito aikotã Tupana tihep Aika­'iwat Iesui gu'uro pyi hap ewy i'ewyte aihep aru aimoieĩ­ne'en aru Tupana.
1CO 15:23 Nimo te ti Aika­'iwat Iesui tuwẽtem gu'uro pyi wuat'i miit'in e'yianmete. Meiũran aito imohey haria hewat­'ymo watu­wẽtem iwywo e. Karãpe Iesui tuut turan watoĩ­ne'en hewat­'ymo.
1CO 15:24 Mi'i hawyi ikahuro hap put'ok'e ra'yn mekewat e'at pe Aika­'iwat tum aru torania temiit'in To'ywot Tupana pe. Mekewat e'at pe topy­hu'at wuat'i Porekuat no Iesui more­kuaria porekuat no topy­hu'at. Miit'in akag akag wo topy­hu'at. Imohey haria akag Akag wo topy­hu'at. Mi'i hawyi Iesui tum yne torania To'ywot pe mi'iria.
1CO 15:25 Koitywy Aika­'iwat Iesui topy­hu'at Wuat'i Porekuat no ra'yn ma'ato mi'i pytkai i'atu kahato miit'in — Yt atiky­'esat i Iesui Uipo­rekuat no e haria. Mi'iria ti i'atu­py­'ahak Iesui ete. Nimo more­kuaria ti'a­tu­'akit ta'a­tupy wo ta'a­tue­wa­nĩ­kaptia akag okpe tote wuat'i ehamo. Mi'i hawyi i'atu­mi­mohit wo te'e­ro­py­hu'at. Mi'i hap ewy ti aru Aipo­typot Iesui ti'a­tu­'akit ne'i — Yt uruiky­'esat i En Urupo­rekuat no e haria aru mekewat e'at pe.
1CO 15:26 Toi'a­tu­moma yne tewa­nĩ­kaptia hawyi hemiit'in yn topy­hu'at. Mi'i hawyi toimoma i'ewyte aiku­'uro hap. Gu'uro toimo­weityk yne ra'yn hawyi yt kat i ra'yn are.
1CO 15:27 Nimo Tupana to'e — Areĩne'en aru yne Porekuat no e. Areĩne'en aru torania sa'ag akit hano e sa'a­wy'i Tupana miwan me mekewat morekuat Tawi wepy hawe miwan 8.6 piat pe. Yt tuwete i ihay morekuat Tawi ma'ato Tupana Sa'yru ewanĩ­kaptia ete ihay. Mi'i hap ewy Tupana tunug mesup katu­pono tutunug na'yn Tosa­'yru Wuat'i Porekuat no.
1CO 15:28 Meiũran aru wuat'i wanĩ­kaptia okpe tote topy­hu'at. Mi'i hawyi wuat'i Porekuat no topy­hu'at hawyi yne toĩne'en yi kai. Mi'i hawyi tuwe­pỹ­'ã­tutuk To'ywot kape — Ui'ywot e aru En yn waku uru'akag wo e. Koitywy atum torania uhemiit epe e Iesui Tupana pe. Mi'i hawyi Tupana topy­hu'at wuat'i akag wo i ra'yn.
1CO 15:29 Uiwy­ria'in tawa Kurintiu piaria kat pote ewei'e — Yt kat i aiku­'uro hawyi aheĩne'en pakup i hap ewei'e. Yt eiwe'eg hin i mio tã ei'e pote katu­pono toĩne'en wẽtup eheko itote — Karãpe wẽtup ok mi'asyp miit toĩne'en ma'ato yt ta'a­tu­set'ok i te waku wahet'ok wẽtup ok iku'uro rakat kawiano ewi'e sa'ag ma'ato — Yt kat i aheĩne'en i hap ewei'e pote kat hamo ten eti'a­tu­set'ok miit'in iku'uro rakaria eheko ewy are'e.
1CO 15:30 Yt kat i aheĩne'en hap aiku­'uro hawyi pote kat hamo ten woho­'opot at ka'ap miit'in mu'e Iesui etiat hamo apo'are.
1CO 15:31 Yt karãpe i aiku­'uro hawyi watoĩ­ne'en mote yt kat hamo i uito ati'a­tu­mu'e at ka'ap wanĩ­kaptia ui'auka teran haria. Uiwy­ria'in pywo ti woro­ho­'o­ky'e eipe uimo­wepit haria eipe. Mesuwe uimohan haria tukup­te'en. Yt ta'a­tu­ky­'esat i uhehay Iesui etiat hap wote ui'auka teran. Ma'ato mi'i hap ahenoi teran ehepe katu­pono aito wẽtup miit ewy Iesui mohey haria aito pote woro­ho­'o­ky'e haype.
1CO 15:32 Meiũpiaria tawa Ewesu piaria haiwot rakaria te'e­ro­py­hu'at uhete. Ta'i aikotã awyato ko'i ewy haiwot rakaria uimienoi hap ete. Ma'ato mi'i pytkai ati'a­tu­mu'e te — Aiku­'uro hawyi watoĩ­ne'en i e hap ete. Ma'ato ati'a­tu­mu'e te mi'i hap ete wãi'i­'a­tu'e pytkai. Ui'auka pote ui'auka are ma'ato woro­ho­'o­mu'e te pywo ui'e hap pote. Ma'ato yt kat i aheĩne'en pakup i hap toĩne'en mote kan homo ten uho'opot mesup meiũpe tawa Ewesu pe are'e. Yt uiwe'eg hin i ei'e hap pywo pote. Tawa Kuritiu piaria woro­ho­'o­mu'e kahato pytkai yt uimohey hin i. — Yt kan hamo i woro­ho­'o­mu'e kuap katu­pono yt eiwe'eg hin i eiperia. — Yt watoĩ­ne'en i aiku­'uro hawei ewei'e yt pywo pe i eiwo­'ope itote. Kat pote tig mio tã ewei'e sa'ag are. Yt pywo pe i watoĩ­ne'en aiku­'uro hawyi yt kat i aheĩne'en hap toĩne'en aru pote po'og waku ienuk hap yn watunug at ka'ap mahy ete at ka'ap hawyi waku aisyp hawyi toran na'yn aheĩne'en hap.
1CO 15:33 — Aipap wuat'i e'at aiku­'uro hawyi i'atu'e irania'in eimu'e haria. Yt naku i i'atu'e ehepe eimu'e haria eima'at sehay wo katu­pono ta'a­tu­ky­'esat yt naku i nug haria eiperia eiĩa'ãg teran haype mi'iria. Ta'a­tu­ky­'esat eipe i'atu­'e­wy­wuaria hap. Eiwe'eg wo o mi'iria pupi. I'atuehay upi eweipy­hu'at hawyi i'atu­mi­ma'at ko'i eweikup­te'en aru.
1CO 15:34 Aikotã watoĩ­ne'en pya heso'ok takaria pupi hap ewy waku watoĩ­ne'en mi'iria pupi. Ewei'aipok to eiwe­mo­we'eg hamo. Ewetoiat ro sa'ag nug hap ko'i katu­pono i'atu kahato aria kapiat wat hanuaria tawa Kurintiu piaria katu­pono yt karãpe i ewei'a­tu­mu'e mi'iria Aipo­typot Iesui ete. Waku eiwe­mõti aria kapiat ehehay pyi tuwat hap pupi.
1CO 15:35 Ma'ato ewei'e — Aikotã aru iku'uro rakaria tuwẽtem gu'uro pyi. Aikotã aru i'atupiit pakup ewei'e.
1CO 15:36 Mio tã ewei'e pote yt ikuap sese i hat ewy eweikup­te'en. Yt eweikuap i te karãpe watikoi awati aiko pe meiũran aru aimikoi iã'ỹi tuweityk katu­pono hẽtyt ra'yn yi pyi pote.
1CO 15:37 Kat iã'ỹi watikoi sio awati sio wẽtup mi'i ti yt ipiit i te ma'ato hẽtyt hawyi ipiit itag na'yn. Mi'i ti ipiit sese.
1CO 15:38 Mi'i hap ewy ra'yn Tupana tum na'yn yne iã'ỹi pe tesaika hap hẽtyt hamo itag hamo. Yne wati­waure meremo aikopiat iã'ỹi tuweupi weupi.
1CO 15:39 Mi'i hap ewy aipiit yt miat piit ewy hin i yt weita piit ewy hin i yt pira piit ewy hin i. Mi'iria ipu'i kawiat ma'ato yt aipiit ewy hin i.
1CO 15:40 Mi'i hap ewy ti atipy piaria tukup­te'en. Ta'i mi'iria yt mesu­wa­ro­tiaria ko'i yt ewy hin i ra'yn. Ta'i atipy piaria wyti ikahu kahato i'ewyte mesu­wa­ro­tiaria ikahu wy ma'ato ti yt to'o­'e­wy­'ewy hin i.
1CO 15:41 At i'ewyte ikahu. Waty mi'i i'ewyte ikahu ma'ato ikahu hap yt at kahu hap ewy hin i. Waikiru ko'i i'ewyte ikahu wen ma'ato yt at waty ewy i ikahu hap ewy hin i. Ma'ato yne mi'iria ikahu kahato Tupana minug ko'i pote.
1CO 15:42 Mi'i hap ewy ti gu'uro pywiat aheĩne'en pakup i hap. Aipiit wyti aikotã hã'ỹi ewy. Ta'a­tusyp mi'i hawyi ti tuweityk ta'yn aimikoi awati iã'ỹi ewy ma'ato hẽtyt hap tuwẽtem hawyi yt sa'a­wy­'iwuat hã'ỹi ewy i. Mi'i hap ewy aipiit wẽtup ta'a­tusyp hawyi aipiit aimikoi ikahu kahato tuwẽtem gu'uro pyi. Tupana tum ne wuat'i e'at piat ieĩne'en hap aipiit pakup we e.
1CO 15:43 Ta'i aipiit aisyp turan yt ikahu hin i. Yt kat i ahesaika hap aiku­'uro hawyi. Ma'ato karãpe aheĩne'en hap ipakup i hawyi aipiit ikahu sese ra'yn topy­hu'at hesaika sese toĩne'en.
1CO 15:44 Aisyp hap e'at pe turan aipiit ipu'i yn toĩne'en ma'ato Tupana aimoieĩ­ne'en i hap e'at pe hawyi aipiit pakup toĩne'en Ipã'ãu minug. Mi'i ewywuat topy­hu'at toĩne'en aipiit ipu'i ikag kawiat ma'ato toĩne'en i'ewyte mekewat piit atipy piaria ewywuat yt aiwat ewy i Tupana Pã'ãu minug.
1CO 15:45 Katu­pono sa'a­wy'i Tupana tunug Ãtãu miit ihaĩte kahato rakat e ti miwan me. Ma'ato i'ewyte to'e miwan me — Put'ok'e aru Ãtãu Saipepiat e Iesui piat. Mi'i Miit po'og na'yn katu­pono aikotã Tupana toĩne'en hap ewy aimoieĩ­ne'en hap toĩne'en.
1CO 15:46 Sa'a­wy'i aipiit ipu'i kawiat ikag kawiat toĩne'en ma'ato watu­wẽtem gu'uro pyi hawyi aipiit Tupana Pã'ãu minug Iesui piit ewywuat toĩne'en.
1CO 15:47 Sa'a­wy­'iwuat Tupana tunug Ãtãu yi kawiat. Mekewat Ãtãu Saipepiat Iesui toĩne'en.
1CO 15:48 Mi'i hap ewy ti aito mesu­wa­rote watoĩ­ne'en aha'a­se'i Ãtau ewywuat pote ti aito mesu­wa­rotiat kape yn aiwa­nẽtup hap ma'ato mekewat wẽtup ok Miit Iesui Miit sese atipy Kaipywiat mẽpyt'in no watoĩ­ne'en mote atipy kapiat wanẽtup haria wo ra'yn aito.
1CO 15:49 Pyno ti Ãtãu iã'ãkap ko'i aito mesup watoĩ­ne'en ma'ato meiũran ti aru Atipy Kaipywiat Aika­'iwat Iesui iã'ãkap ko'i wato­py­hu'at e.
1CO 15:50 Pyno eiwe'eg wo o uheka­tu­wyria katu­pono aipiit mesu­wa­rotiat yt teke kuap i atipy pe katu­pono aipiit ipu'i kawiat huu kawiat iku'uro i'okpuk takat toine'en. Aikope Morekuat no Tupana toĩne'en hap tote yt uwe i iku'uro rakaria wo toĩne'en itote.
1CO 15:51 Pyno atomo­herep teran mio wuat uimiwan etiat Tupana ehay ehepe.
1CO 15:52 Iesui ut turan ni tukup­te'en ihaĩte rakaria ma'ato mekewat e'at pe ti aru aipiit pakup we Iesui piit ewywuat topy­hu'at meremo. Mekewat hap e'at pe merep hap ewy tut Iesui aikotã aheha mehit hap ewy meremo hap ewy e. Mi'i hawyi Tupana huhu'e — Ariot ra'yn e hamo. Mi'i hawyi huhu'e hap ihay pirik pya wo hawyi ti aru meimuẽwat map haria te'e­ru­we­nõ'ẽ ra'yn gu'uro pyi e. Ipaku we watoĩ­ne'en mekewat e'at pe. Aikotã Satere ut topopy kuap hap ewy mekewat e'at pe ikahu kahato watu­wẽtem aiwo­'osyp hawyi.
1CO 15:53 Ma'ato ti aru aipiit pakup hap yt iku'uro rakat nuat i ra'yn watu­we­nõ'ẽ. Mi'i hawyi aito yt iku'uro rakat i te rakaria i'ewyte aipiit topy­hu'at meremo ipakup sese.
1CO 15:54 Mekewat e'at pe aipiit meremo ipakup we toĩne'en. Mesup aipiit iku'uro rakat toĩne'en ma'ato mekewat e'at pe ieĩne'en hat watoi­ne'en aikotã Tupana to'e hap ewy topy­hu'at aru — Atimoma aru gu'uro hawyi yt karãpe i eiku­'uro hap toĩne'en e hap ewy.
1CO 15:55 Wato­ken'ẽ kahato aiku­'uro hap pupi mesup aikotã moi aheka­tu'u hap pupiat ewy wato­ken'ẽ. Ma'ato mekewat e'at pe Tupana aihep gu'uro pyi hawyi yt kat i aiken'ẽ hap toimoma ra'yn pote e.
1CO 15:56 Iku'uro rakaria aito katu­pono yt naku i nug haria aito wato­py­hu'at pote. Karãpe Tupana ainãpin hap ko'i yt watunug i mi'i hawyi watikuap yt naku i nug haria aito Tupana wanẽtup hawe wato­py­hu'at hap watikuap.
1CO 15:57 — Tupana urutu­wehum ewawi urupy'a pyi. Waku kahato En katu­pono etum na'yn Esa'yru uruepe Urupo­typot no waku kahato En. Mesup Esa'yru urumoe­saika wakuat nug hamo. Urutu­wehum ewawi wato'e Tupana pe.
1CO 15:58 Urumi­ky­'eria uheka­tu­wyria yt eweitoiat tei'o ehepiat Iesui mohey hap. Waku eweikup­te'en mot'i o iwywo e yne e'at pe. Po'og Tupana miky­'esat ewy ewetunug no katu­pono watikuap ta'yn aha'up iwato tutum aru aipotpap iwato hap ok tã. Watikuap ta'yn aiminug Tupana miky­'esat ewywuat hap wuat'i e'at piat topy­hu'at. Uito ti Pauru.
1CO 16:1 Pyno koitywy ahenoi teran aikotã waku wati­po­wyro Iesui emiit'in ko'i mekewat aimiium te'en ne'i rakat wywo aikotã sa'a­wy'i ahenoi tawa Karata piaria pe. Aikotã aikotã waku wati­mõ'ẽ ahekat hap ete eweikuap hawyi waku ewetunug.
1CO 16:2 Pyno o yne torania mytu'u e'at pe waku eiwa­nẽtup o ga'atpo 6 e'at eipotpap gosap hap kape aikotã aikotã Tupana eiky'e hap tutum hap kape aikotã eipo­wyro hap kape. Mi'i hawyi kat ko'i kat ko'i Tupana tum ehepe mekewat 6 e'at piat hawyi waku mi'i o eweipat'ok ehekat hawyi ewetum ne'en ne'i Tupana pe aikotã Tupana tum ne'en ne'i tegyi'at hap ewy. Aikotã aipoi­tynug kahato hap kaipywiat hap ewy waku watum. Mi'i hawyi etioto o emiium Tupana mõtypot yat kape hawyi etoiat emiium itote imõtypot hamuat. Torania eimiium eypa­rakai tote hawyi waku wati­po­'oro mi'i Iesui mohey haria satek takaria tawa Ieru­sarẽi piaria powyro hamo Iuteuria powyro hamo.
1CO 16:3 Pyno put'ok­'are i ra'yn itote hawyi ewei'airo eipy­'a­setpyi uwe mekewat eimiium ereto hanuat haria. Mi'i hawyi ti aru atunug iwan eimie­reto wuat eipe Iesui mohey haria sese kuap hamuat. Mi'i hawyi eweipo­'oro eimiium ne'en ne'i mekewat Ieru­sarẽi kapiano haria upi mesuwat uimiwan nywo.
1CO 16:4 Uipo­'oro teran eipe pote areto waku wy irania'in tuwat uhupi eweiky­'esat pote waku wy yt pote yt.
1CO 16:5 Pyno uhewyry teran yi Masẽ­tunia puo hawyi put'ok­'are ehetawa Kurintiu pe te.
1CO 16:6 Pyno i'aman mot e'at pe put'ok­'are pote areĩne'en mot'i i'aman mot pe itote tawa Kurintiu pe eiwywo. Mi'i hawyi waku uipo­wyro mu'ap sa'up ete mekewat uito hap sa'up ete.
1CO 16:7 Ta'i areĩne'en mot'i teran ni eiwywo itote.
1CO 16:8 Areĩne'en mesuwe tawa Ewesu pe. Karamuo put'ok'e mekewat e'at Esitu'in po pywiat watetup hap e'at pe atimõ­typot teran Tupana mesuwe haype. Waku hawyi areto ehowawi.
1CO 16:9 I'atu kahato uipyhyp teran haria mesuwe ma'ato yt uipyhyp kuap i katu­pono Tupana uipo­wyro kahato. Mi'i pote arepotpap kahato ipotpap nug hamuat ete. Waku kahato mi'i hap uhete.
1CO 16:10 Ma'ato tut uimẽpyt Timoteu ei'yat kape hawyi — Ereke ro ewei'e tope iky'e hap wywo aikotã uiky'e hap ewy te katu­pono ui'ewy kahato ipotpap Tupana potpap nug hap ete.
1CO 16:11 Yt eweimohit tei'o eimu'e hat Timoteu are. Eweimõ­typot o mi'i are. Mi'i hawyi karãpe toto teran i ra'yn uhowawi mi'i hap e'at pe o ewetum mu'ap sa'up tope hap atiky­'esat. I'ewyte karãpe toto teran wẽtup tawa kape tuereto i'atu­mu'e hamo turan o ewetum mu'ap sa'up tope hap atiky­'esat. Ahekatup Timoteu mesuwe irania'in wywo.
1CO 16:12 Atiky­'esat kahato aimu'e hat uhyt Aporu atipo­'oro eimu'e hamo — Waku ti ereto tawa Kurintiu piaria powyro hamo irania'in powyro hamo are'e wen tope ma'ato — Yt areto i te Katu­pono yt uipo­hepap i te mesup e uhepe ma'ato meiũran waku yne hawyi areto tawa Kurintiu piaria powyro hamo e uhepe. Uipotpap put'ok'e hap e'at pe waku pe yne mesuwe hawyi areto aru i'atue­wawi e Aporu uhepe.
1CO 16:13 Iesui ekuekatu kape o mehit ewei'e po'og po'og wuat'i e'at pe. Yt naku i waure wo watoĩ­ne'en aimi­mohey Iesui kai miit'in mimo­weu­ka'i wato­py­hu'at hawyi. Ma'ato yt naku i aiko­hyeput Tupana wanĩkap pupiat. Waku sura­ra'in hesaika kahato rakaria ewywuat watoĩ­ne'en Tupana potpap nug hap ete.
1CO 16:14 Pyno waku yne aiminug ko'i watunug miit'in ky'e hap wywo.
1CO 16:15 Pyno uiwy­ria'in waku eweiwat aimu'e hat Etewana ehay upi katu­pono mi'i ti ei'a­pykok kahato hat mesuwat Iesui mohey hap ete. Mi'i pote eweiwat ro mehĩ Etewana ehay upi eweipo­wyro o mi'i. Mi'i ti ei'y­wania kawiat mekewat Kereku ywania sese kawiat aimu'e hat Etewana.
1CO 16:16 Mi'i ti nimo pyi kahato Iesui mohey hat topy­hu'at. Mi'i turan ti mi'i yn toĩne'en Iesui mohey hano. Mi'i tupono waku watunug mehĩ Etewana yianme ei'a­pykok hat e'akag wo itote katu­pono mi'i ewywuaria Iesui emiit no wo'o­pot­ky'e kahato hat mi'i. I'ewyte yne to'yat piaria wywo te waku pãi. Mi'iria ewywuat waku ai'a­pykok hanuaria.
1CO 16:17 Ga'atpuat re put'ok­'i­'a­tu'e meiũpe emipo­'o­roria aiwy Etewana aiwy Wutu­natu i'ewyte aiwy Akaiku wywo. Mi'i pote arehum kahato i'atu­wywo katu­pono uipo­wyro kahato haria ti mi'iria Iesui potpap etiat haria mi'iria eipe yt uwe i uipo­wyro haria pytkai. Mi'iria aikotã eipe uipo­wyro hap ewy te meiũpe ehaipe kai uipo­wyro.
1CO 16:18 Ta'i mi'iria ti mohag ewy kahato uimo­wepit kahato haria. Ma'ato i'ewyte yt uipohag yn i ma'ato yne aipohag no tukup­te'en mi'iria. Ta'i aiwehum hap eiam kahato Etewana ywaniaria are. Waku wati­mõ­typot mi'iria i'ewyte torania yne mi'iria ewywuaria waku wati­mõ­typot. I'ewyte waku mi'i tã haria ewywuaria eweikat ei'a­pykok hamo.
1CO 16:19 Pyno meiũpe Iesui mohey haria yi Asia piaria te'e­ru­wehay po'oro kahato eiky'e hap wywo. I'ewyte mehĩ Akuira i'ewyte mana Pirika e hap ipo'oro te'e­ru­we­kue­katu sese ehowawi.
1CO 16:20 Ta'i aipoi­tynug ni Aika­'iwat Iesui i'atu'e katu­pono koitywy Tupana mõtypot hap toĩne'en na'yn i'atu'yat pe. Pyno ti uruwe­'a­tunug hap toĩne'en na'yn i'atu'yat pe. Pyno ti eheka­tu­wyria meiũpiaria ehowawi te'e­ru­wehay po'oro torania Iesui mohey haria.
1CO 16:21 Mi'i hawyi uito Pauru i'ewyte atipo­'oro uimiwan eiky'e uhepiat hap etiat ma'ato uipo wuat atipehik mesup uhet. PAURU uhet are hap atiwan. Kuekatu atipo­'oro ehowawi are atiwan na'yn ui'e hap.
1CO 16:22 Tut irane tut irane Aipo­typot Iesui waku wato'e. Eiwe'eg wo o katu­pono yt torania i iky'e haria.
1CO 16:23 Pyno ahẽtup Aika­'iwat Iesui kape uiwy­ria'in tawa Kurintiu piaria — Eti'a­tu­ky'e te'en ne'i o egyi'at hap kaipyi at ka'ap. Eti'a­tu­po­wyro mi'iria Iesui are'e.
1CO 16:24 Pyno ti pywo ti woro­ho­'o­ky'e kahato eipe torania eiperia kat pote eipe Iesui emiit'in sese ra'yn eweipy­hu'at pote woro­ho­'o­ky'e. Toran na'yn mesuwe uimiwan ehowawiat. Toran uimiwan mesuwe. Uito ti Iesui mipo­'oro tepiat sehay moherep hamo. Pauru ti uhet.
2CO 1:1 Uito ti Puaru are. Uiwy­ria'in Iesui mohey haria tawa Kurintiu piaria yi Akaia piaria. Eiperia ti Tupana mimo­waku ko'i ra'yn tewaku hap wuat ko'i. Uito ti Iesui potpo­'oro Pauru e hap het rakat are. Sa'a­wy'i Tupana to'e uhepe — Woro­'airo en Uha'yru moherep miit'in muat hamuat e. Koitywy atipo­'oro ehowawi uimiwan aikope aikope eiwa­'a­tunug Tupana mõtypot hamo are. I'ewyte toĩne'en meiũpe aheywyt aikywyt sese Timoteu are. Mi'i ti uipo­wyro mesuwat uhehay wan hap ete.
2CO 1:2 Mio tã are Tupana pe — Eti'a­tu­poi­tyro kahato o emohey haria Esa'yru mohey haria tawa Kurintiu piaria are. Ereĩne'en o egyi'at kahato rakat i'atuepiat hat wo. Etunug o mi'iria wo'o­wese haria wo. Tupana are En ni Uru'ywot sese are. Emipo­'oro Urupo­rekuat nuat ti Iesui Esa'yru set upi wyti ahẽtup.
2CO 1:3 Urutu­wehum ewawi Tupana. Waku kahato En Tupana katu­pono etipo­'oro ra'yn Iesui uruewawi. Koitywy emẽpyt'in sese uruto are. Waku kahato En Uru'ywot. Uruho­'opot turan uruka­wiano kahato hat En. Urueha­ky­'e'i kahato wuat'i e'at pe are.
2CO 1:4 Uruetu­pana are karãpe urusatek turan Uru'ywot kahato ereĩne'en haty hap etimonik kahato hamo. Uruho­'opot turan i'ewyte urunãpin uruky'e hap wywo. Waku kahato Tupana katu­pono karãpe uruwy­ria'in hatek hap put'ok'e mi'i turan urui'a­tu­nãpin kuap i'atu­ky'e hap wywo. Aikotã urunãpin ho'opot turan mi'i hap ewy urutunug aikotã urumo­wepit ehay wo hap ewy uruto'e ewawi Tupana are.
2CO 1:5 Aipo­typot Iesui tikuap kahato ho'opot hap ko'i po'og torania kai toikuap are. Uruto urutu­kup­te'en iwywo wẽtup miit ewy yn uruho­'opot kahato wy. Mi'i turan uruka­wiano kahato hat pote toikuap kahato ho'opot hap pote. Yt wẽtup i yt toikuap i. Torania toikuap kat pote tohã'ãg yne ra'yn. Mi'i pote toha­ty'u kuap yne aiky'e haype.
2CO 1:6 Koitywy mesu­wa­ro­tiaria urusa­ty'i saty'i kahato ra'yn mesuwe katu­pono uruhenoi ra'yn Iesui etiat wãi'i­'a­tu'e pytkai. Mi'i pote koitywy Tupana mieha­kye­ra'at ko'i wo eweikup­te'en. Uru'a­piheg kahato pote eipo­wyro haria wo urutu­kup­te'en mote are. Ma'ato urusa­ty'i saty'i hap kaipyi eipo­wyro haria urutu­kup­te'en.
2CO 1:7 Ma'ato urusa­ty'i saty'i turan Tupana uruka­wiano urusa­ty'i saty'i hap ok tã. Mi'i pote po'og hesaika rakaria wo uruto­py­hu'at eipo­wyro hamuat ehepiat ho'opot hap ete. Mi'i hawyi karãpe ehaty'i haty'i Iesui mohey haria eipe pote mi'i hawyi uruepiat ho'opot hap kape eiwa­tetup yn na'yn. Mi'i hawyi — Waku waho­'opot aimu'e haria ewy ewei'e eiwe­wawi. Mi'i hawyi wẽtup miit piit ewy yn ho'opot haria wo watoĩ­ne'en are. Mi'i pote watikuap yne ho'opot hap ko'i are. Mi'i hawyi wahupit kuap yne are. Mi'i hawyi yt uwe i aito imohey hap atoiat haria ahaty'i haty'i kahato pytkai.
2CO 1:8 Uiwy­ria'in tawa Kurintiu piaria wẽtup yn wyti aimi­mohey. Mi'i pote atimo­herep teran ehepe aikotã sa'a­wy'i waho­'opot ehe'yi Asia totiat hap. Atiky­'esat eweikuap mi'i hap ete. Katu­pono karãpe eweho­'opot turan mono erakue ewei'e yn na'yn. Ta'i uruho­'opot kahato itote aikotã ahak puat ipotyi rakat wahupit hap ewy yt wahupit kuap i. Mi'i hap ewy yt uruhupit kuap i po'og ehe'yi Asia tote uruho­'opot hap. — Ta'i aiku­'uro ra'yn keĩ mesup pãi uruto'e yn uruto­'ope itote.
2CO 1:9 Yi Asia piaria uru'auka irane mesup sio mũki­'ite uruto'e yn uruwa­nẽtup hawe itote. — Pyno yt watu­we­ha­kye­ra'at kuap i aiku­'uro hap po pyi uruto'e yn itote uruto­'ope. Ta'i Tupana yn keĩ aihep kuap ai'auka teran haria po pyi uruto'e itote uruwo­'ope. Tupana yn aihep kuap ai'auka hanuaria po pyi uruto'e sa'a­wy'i ehe'yi Asia tote urutuwat Iesui ehay moherep hamuat turan.
2CO 1:10 Ma'ato yt uru'auka kuap i ehetama piaria katu­pono Tupana urueha­kye­ra'at uruewa­nĩ­kaptia po pyi itote urumo­ha­ky­'e'i moha­ky­'e'i turan. I'ewyte urutu­we­ha­kye­ra'at uru'auka irane turan yne e'at pe.
2CO 1:11 Uiwy­ria'in tawa Kurintiu piaria ewehẽtup o Tupana kape urupo­wyro Iesui ehay moherep hamo. Mi'i tã ewetunug mote Tupana urupo­wyro emiẽtup ok tã. Mi'i hawyi waku pe urutu­kup­te'en urupoi­tyro emiẽtup ok tã hawyi aru eweikuap ta'yn Tupana piat urupoi­tyro hap. Mi'i hawyi eiwepit kahato hap topy­hu'at katu­pono Tupana tum na'yn eimiẽtup hap ok tã. — Etipoi­tyro Pauru'in ewei'e ro Tupana pe uruka­wiano.
2CO 1:12 Yt karãpe i urui'a­tu­ma'at eipe tawa Kurintiu piaria. Po'og hãpyk torania kai hap ewy urutu­kup­te'en eipy­'a­setpe. Tupana mõtypot hap yn urutunug itote. Yt uruwe'eg hap kaipyi i urupotpap ehehamo ma'ato Tupana urumo­we'eg hap kaipyi uruimõ­typot Tupana miit'in py'a­setpe. Yt uruhepap hap kaipyi i ma'ato Tupana tum uruepe tegyi'at hap tomi­sepap nug kuap hamo hawyi hesaika hap wywo uruimo­herep wakuat itote sa'a­wy'i. Mi'i pote uruminug ete Tupana urupo­wyro hap kaipyi uruimõ­typot Tupana itote sa'a­wy'i. Mi'i hawyi miit'in te'e­ru­wehum kahato Tupana kape. Yt uruewawi i ma'ato Tupana kape yn te'e­ru­wehum uruminug wakuat upi. Mi'i hawyi Tupana kape te'e­ru­wehum hawyi urumo­wepit kahato kat pote uruminug kaipyi Tupana mõtypot hamo urutu­kup­te'en mote.
2CO 1:13 I'ewyte yt eima'at hap i uruipo­'oro miwan ehowawi are. Urumiwan uruehay ewy ti ra'yn waku pe yn toĩne'en. Yt uruiwan i typy sehay ehowawi. Yt kat i ehekat ky'ewi uruipo­'oro urumiwan ehowawi hap. Ta'i heremo kahato urumiwan wuat'i mikuap kahato hap ewy. Yt kat i wẽtup sehay ipuo toĩne'en urumiwan me. Yt kat i eima'at hap urumiwan me toĩne'en. Mi'i pote heremo yne uimiwan are.
2CO 1:14 Koitywy urumohey ran are kat pote yt urukuap kahato i te pote. Mi'i pote urumohit tuereto ehehay wo. Atiky­'esat kahato urukuap sese hap. Waku watu­wekuap aiwo­'o­'e­wy­'ewy hawyi aiwo­'o­mo­wepit hap toĩne'en are. Karãpe mekewat e'at pe put'ok'e mekewat Aipo­typot Iesui toĩne'en mesu­wa­rote Morekuat Koro wo hap e'at pe uimo­wepit kahato haria eweipy­hu'at are. Katu­pono — Mi'iria uipot­mu­'eria sese uimiekyi ko'i tawa Kurintiu kaipy­wiaria are aru Iesui pe. Ta'i woro­ho­'o­mo­herep eipe Iesui kape hut hap e'at pe are. Mi'i hap e'at pe aru waku — Ta'i Pauru ti urumu'e hat sa'a­wy­'iwuat waku ewei'e mekewat e'at pe Aika­'iwat pe are. Mi'i hap ewy urutu­kup­te'en itote wo'o­mo­wepit hanuaria wo.
2CO 1:15 Sa'a­wy'i eipap kahato uhehay upi mi'i pote — Ara'aipok i ra'yn i'atu­mu'e hamo pãi are uipy'a pyi. Sa'a­wy'i — Areto i ra'yn tawa Kurintiu piaria kape are.
2CO 1:16 Mi'i hawyi areto i ra'yn yi Masẽ­tunia piaria kape. Mi'i kaipyi ariot i ra'yn tawa Kurintiu kape i are'e uiwepe sa'a­wy'i. Ati'a­tu­mu'e areto hamo i'ewyte i'atu­mo­wepit hamo areto i ra'yn tawa Kurintiu piaria kape. Mi'i hawyi are'e arewa­nẽtup — Waku urupo­wyro yi Iuteu ywania hatek takaria uruekat wywo are'e uiwepe. Waku Kurintiu piaria uipo­wyro mu'ap upi mekewat Iuteu kapiat uito hap sa'up ete tawa Kurintiu piaria pe are arewa­nẽtup hawe.
2CO 1:17 Mi'i ui'e hap ete ahenoi yne sa'a­wy'i ehepe uimiwan me uiwy­ria'in. — Areto ehowawi are uimiwan me. Ma'ato yt areto hin i ehowawi ui'e hap ewy hawyi — Kat pote som yt tut i ahowawi ewei'e eiwo­'ope. Aima'at i ma'at i teran haype ne'i ewei'e uhepiat pe. Pauru ti heso apo ahepe ewei'e eiwo­'ope are. Yt tutunug i to'e hap ewy apo'e­wei'e ewo'ope uhetiat.
2CO 1:18 Uiwy­ria'in yt naku i mio tã ewei'e ne'i kat pote uito atunug yne ui'e hap ewywuat ko'i uito are. Ta'i urutunug aru uru'e hap ewy katu­pono urutu­kup­te'en neran Tupana ewywuat pywuat rakaria uruto'e uruwo­'ope.
2CO 1:19 Sa'a­wy'i mehĩ Sira mehĩ Timoteu i'ewyte uito urutuwat ehowawi eimu'e hamo. Mi'i hawyi itote urui'a­tu­mu'e kahato aikotã Tupana tipo­'oro Tosa­'yru hap etiano. Tupana mõtypot haria wo yn urui'a­tu­mu'e eipe. Yt kat i urueso hap wywo urui'a­tu­mu'e eipe. Mi'i hap e'at pe urutunug aru uruto'e pote urutunug uru'e hap ewy. Yt typy sehay wywo hin i urui'a­tu­mu'e sa'a­wy'i eipe Iesui etiat uruhenoi ra'yn.
2CO 1:20 Sa'a­wy'i sese Tupana henoi yianmete miwan me yne Tosa­'yru etiat aikotã aru tutunug hap etiat tohenoi miwan me. Mi'i hawyi toipo­'oro ra'yn Tosa­'yru Aipo­rekuat nuat. Put'ok'e hawyi — Papai e atunug neran yne e'e hap ewywuat e. E'e hap ko'i yne atunug aru e. E'e hap ewywuat hap atunug neran e. Mi'i hawyi Iesui tunug yne To'ywot e hap — Atunug aru to'e hawyi tutunug yne. Mi'i pote karãpe uruto'e — Urutunug aru uruto'e hawyi urutunug uru'e hap ewy. Aikotã Aika­'iwat ewy Tupana miky­'esat ewy urutunug neran uru'e hap ewy. — Ta'i yt urutunug i aru mi'i tã uruto'e mi'i pote yt urutunug i uru'e hap ewy Tupana Sa'yru e hap ewy. Mi'i tã urutunug neran Tupana mõtypot hamo.
2CO 1:21 Koitywy Tupana ainug Tosa­'yru ewywuaria ahehay wuat. Tehay moherep hamo wẽtup piit ewy watoĩ­ne'en Ha'yru wywo. Katu­pono aito wato­mohey Aipo­typot Iesui. Tupana aimoe­saika Tosa­'yru Pã'ãu wo hawyi Ha'yru ewy wato­py­hu'at.
2CO 1:22 Aikotã watiwan ahet aheka­re'en ete ahet — Mesuwuat ri uiat e hap. Mi'i hap ewy wyti wato­mohey Ha'yru ra'yn hawyi Tupana tum Tosa­'yru Pã'ãu ahepe hawyi Ipã'ãu set topy­hu'at ahete. Mio tã e — Tupana wanuat mi'i miit e hamuat wuat'i miit'in me hap ewywuat. Yt karãpe i hawyi wẽtup ok wano mi'i hat topy­hu'at e hamo hap ewy.
2CO 1:23 Ta'i yt uheso i are. Tupana tikuap yt heso i rakat uito. — Tupana are etomo­herep yt uheso i hap are uiwy­ria'in Kurintiu piaria pe Tupana are. Sa'a­wy'i areto aru ehowawi wen ma'ato yt areto i. Eweikuap apo kat pote yt areto i pyno ahenoi ehepe. Aikotã ai'ywot yt ai'a­piheg teran i hap ewy ti areĩne'en pytkai yt areto i ei'a­piheg hamo.
2CO 1:24 Kat pote Eika­'iwat sese yt uruto i. Mi'i hawyi are'e uiwa­nẽtup hawe — Pyno yt kat hamo i areto are. Kat pote po'og waku eweikup­te'en Eika­'iwat sese po pe hawyi yt areto i ei'a­piheg hamo are Uito ti Pauru.
2CO 2:1 Uiwy­ria'in woro­ho­'o­ky'e kahato eipe. Mi'i pote yt areto i ehowawi ma'ato areto pote woro­ho­'o­mohit hawyi ei'arot hap topy­hu'at. Sa'a­wy'i areto ehowawi hawyi woro­ho­'o­mohit kahato eipe. Mi'i hawyi paa'e­wei'e kahato. Mi'i hawyi are'e uiwa­nẽtup hawe — Koitywy yt atunug neran i po'og are uiwepe.
2CO 2:2 Woro­ho­'o­mohit eipe hawyi uwe apo uimo­wepit haria. Woro­ho­'o­mohit hawyi paa'e­wei'e. Mi'i hawyi yt uwe i ra'yn uimo­wepit hanuaria mi'i rẽ. Mi'i hawyi yt naku i areto mesup katu­pono woro­ho­'o­mohit eipe hawyi woro­ho­'o­mo­'arot kahato eipe. Mi'i hawyi yt wo'o­mo­wepit haria wo i watoĩ­ne'en.
2CO 2:3 Mi'i pote atipo­'oro miwan ehowawi. Pyno eweimo­hãpyk eiminug sa'ag ko'i. Mi'i hawyi areto kuap ehowawi are uimiwan me. Katu­pono areto turan ewetunug sa'ag ne mi'i hawyi yt kat i uimo­wepit ehepiat hap. Mi'i pote atipo­'oro miwan ehowawi uhe'yian­mete katu­pono woro­ho­'o­mohey eipe. Atikuap ewetunug uhepiat einãpin hap ko'i hamuat. Pywo ti rat yt karãpe i uiwepit yt eiwepit i pote.
2CO 2:4 Mekewat uimiwan sa'a­wy­'iwuat pe woro­ho­'o­nãpin haty wo — Eiminug sa'ag eweitoiat ro. Arewak kahato popuo atiwan mi'i miwan ehowawi. Yt atiky­'esat i uimiwan me eimõ­py­'ahak hap katu­pono woro­ho­'o­ky'e kahato eipe po'og torania kai. Mi'i pote haty kahato upy'a pe i'ewyte uiwa­nẽtup hawe woro­ho­'o­nãpin eiminug sa'ag etiat turan.
2CO 2:5 Sa'a­wy­'iwuat urumiwan me woro­ho­'o­nãpin. Mekewat eipy­'a­setpiat Iesui mohey hat to'ywot ehary'i wywuat waire nug hat. Mi'i hawyi eiwe­mõti kahato toĩne'en eiwy ok eipy­'a­setpiat i'aparap turan wuat woro­ho­'o­nãpin mote. I'ewyte uito aremõti mi'i hap ete are. Ma'ato yt ei'ewy i pote yt uhehamo i pote mi'i pote yt woro­ho­'o­mohit teran i po'og mi'i hap ete ne'i. Ma'ato atunug po'og pote po'og ei'arot kat pote po'og woro­ho­'o­mohit pote.
2CO 2:6 Mi'i hawyi eiwe­mõti te kahato i'ewyte mi'i miit tuwe­mõti ti te. Pyno waku aipo hep ta'yn i'apiheg hap ete.
2CO 2:7 Pyno waku waure wo ra'yn watoĩ­ne'en. Pyno waku watunug aiwy sese wo ra'yn. Ma'ato yt pote meiũran i'arot sese hap topy­hu'at aikotã i'auka hap ewy.
2CO 2:8 Pyno ahẽtup uipy'a pe ehupi uiwy­ria'in ewei'e i ro tope — Uruiky'e kahato en uhyt mimi ewei'e i ro i'aparap hat pe kat pote totoiat ra'yn tominug sa'ag pote.
2CO 2:9 Sa'a­wy­'iwuat uimiwan me are'e — Ewei'a­piheg no eipy­'a­setpiat mekewat to'ywot ehary'i wywuat sa'ag nug hat. Mi'i tã are ehepe sa'a­wy'i ehã'ãg hamo sio uhehay upi eweikup­te'en sio yt hap kuap hamo.
2CO 2:10 Koitywy waku waure wo eweikup­te'en iminug sa'ag kai. Waure wo eweikup­te'en pote i'ewyte uito waure wo areĩne'en. Mi'i hawyi waku waure wo wato'e Aika­'iwat Iesui e. Mi'i hawyi i'ewyte Aika­'iwat toĩne'en waure wo ra'yn. Mi'i hawyi aiwo­'o­ky'e hap sese toĩne'en i ra'yn.
2CO 2:11 Waure wo watoĩ­ne'en hawyi aikotã wẽtup ok miit ewy yn aiwo­'ope watoĩ­ne'en. Mi'i hawyi ahiag yt aima'at kuap i. I'ewyte yt aipat'ok pat'ok kuap i kat pote ahiag inug neran aipat'ok pat'ok hap. Toiky­'esat kahato aiwo­'o­sytpok hap yn.
2CO 2:12 Sa'a­wy'i areto tawa Turati kape mekewat sehay wakuat moherep hamo. Aikotã Tupana tipo­'oro Tosa­'yru Eipo­rekuat nuat sehay wakuat moherep hamuat. Ta'i Ahiag uipyhyp teran wen ma'ato Tupana tunug mu'ap tehay wakuat moherep hamo. We'o­kenhyp hap ewy itote ma'ato Tupana ti'o­ken­hyp'ok ta'yn uhepe tehay enoi hamo.
2CO 2:13 Itote turan atikat kahato aheywyt Titu katu­pono atikuap teran iwẽ pyi aikotã aikotã eweikup­te'en hap ko'i. Atikat at ka'ap ma'ato yt atipuẽti i hawyi ui'arot kahato areĩne'en itote. — Kat pote yt tut i Titu are yn uiwepe. Mi'i hawyi are'e itotiaria pe — Pyno areto ra'yn yi Masẽ­tunia kape are mi'i hawyi areto ra'yn.
2CO 2:14 Koitywy are'e Tupana pe — Uhetu­pana arehum kahato ewawi are. Waku puo uruiky­'esat karãpe urutuwat aikowo aikowo Esa'yru moherep hamo are. Mi'i turan urupo­wyro kahato mi'i nug hamuat are. Miit'in uipyhyp pytkai arehum ewawi Tupana kat pote uinug surara ewy po'og uhewa­nĩkap ko'i kawiat hesaika rakano ehay wakuat moherep wuat'i miit'in piat hamo are. Wãi i'atu'e pytkai ta'a­tukuap ehay wakuat hawyi — Waku kahato mi'i iatu'e aikotã mohag ikamhig se rakat ewy ehay iatu'e are. — Waku kahato En Tupana are.
2CO 2:15 Pywo ti rat uiwy­ria'in Tupana mowepit hat sese Aika­'iwat Iesui. Mi'i hap ewy Tupana mowepit haria aito kat pote Iesui eiam wato­py­hu'at mesu­wa­rote. Aika­'iwat ikamhig sese rakat ewy toĩne'en aipiit pe hawyi yne ikuap ikamhig sese hap upi Tupana aikuap. I'ewyte irania'in yt imohey i te haria ho'o­wasat rakaria ikuap ikamhig se aipiit piat hap upi hap ewy.
2CO 2:16 Irania'in ahehay Iesui etiat ta'a­tukuap hawyi ma'ato yt ta'a­tu­mohey i mi'i pote — Yt naku i i'atu'e katu­pono ahehay ta'a­tukuap hawyi — Pywo i'atu'e te'e­ru­wepe — Uruku­'uro hawyi Tupana uru'a­piheg uruku­'uro hap kape i'atu'e te'e­ru­wepe. Mi'i pote uruehay yt ikamhig se i rakat ewy pãi. Yt ta'a­tu­mohey i pote iku'uro rakat nem hap ewy topy­hu'at uruehay upi are. Ma'ato irania'in imohey haria pe ahehay Iesui etiat hawyi — Waku kahato aikotã ikamhig se hap ewy topy­hu'at. Urutu­kup­te'en wuat'i e'at pe i'atu'e uruehay ta'a­tukuap hawyi are. Mi'i pote aiwat aiwe'eg hap yt pu'ok'e i irania'in mu'e Aika­'iwat etiat hamo yt ta'a­tu­ky­'esat i pote. Waku Tupana piat aimo­we'eg hap kaipyi yn wati­'a­tu­mu'e irania'in tawa ko'i.
2CO 2:17 Tukup­te'en Tupana ehay moherep haria ma'ato yt pywo pe i rakaria. Yt Tupana ky'e hap wywuat sese haria i aimu'e ma'ato ahekat ky'ewi ne'i — Mio tã e Tupana i'atu'e ma'ato yt mi'i tã e hin i pytkai ta'a­tu­'ywyk ne'i. Ma'ato ahehay mio tã wato'e — Tupana tipo­'oro ra'yn Tosa­'yru aheha­kye­ra'at hamo wato'e. Mi'i pote waku watunug Iesui Aipo­rekuat no wato'e aipy'a pyi wato'e. Uruka­'iwat mowepit hamo yn urui'a­tu­mu'e miit'in ko'i. Mesuwat miwan nug hat ri Pauru.
2CO 3:1 Tukup­te'en irania'in Iesui mohey haria mipo­'oro ko'i. Mi'iria po pe miwan ta'a­tue­reko ta'a­tu­po­'oro haria miium — Waku kahato mi'i miit urumi­po­'oro eimu'e hamo i'atu'e mekewat miwan note wen ma'ato uito ti yt irania'in mipo­'oro hin i katu­pono yt uwe mipo­'oro i uito are. Ma'ato uruto Tupana mipo­'oro eimu'e hamo i'atu'e katu­pono miwan ete — Uruto waku po'og waku eimu'e hamo e mesuwat miwan me i'atu'e ahepe. Eiwa­tetup o mesuwat miwan kape hawyi eweikuap uruto po'og eimu'e e hamuat hap i'atu'e ahepe. Ma'ato uito ti Pauru are. Tupana yn uipo­'oro ehowawi sa'a­wy'i. Yt karãpe i aterut wẽtup ywania kaipyi miwan — Po'og waku eimu'e hamo e hat irania'in miit'in minug ko'i. Ma'ato irania'in yt uru'ewy hin i.
2CO 3:2 Yt uiky­'esat i eikaipyi — Pauru'in Tupana mipo­'oro aimu'e hamo e hap. Eweikuap kat pote. Pyno ahenoi ehepe koitywy eweikup­te'en Iesui mohey haria uruepiat eimu'e hap kaipyi. Koitywy urukuap ta'yn Aika­'iwat ewy ra'yn uruto. Mi'i hawyi eipe wy Aika­'iwat ewywuat eweikup­te'en katu­pono uruimotag eipe hap ewy urui'a­tu­mu'e eipe. Mi'i hawyi karãpe te'e­ra­ha'at uruewawi mi'i hawyi ta'a­tukuap Tupana mipo­'oro ko'i sese uruto hap. Mi'i pote eipe miwan ewy eweikup­te'en — Pauru'in Tupana mipo­'oro e hamo. Ma'ato mesuwat miwan yt popera pe i ma'ato toĩne'en eipy'a pe eiwa­nẽtup hawe yne miit'in imowẽpap hap ewy. Mi'i hawyi mesuwat miwan ewywuat eiminug wakuat kapiat te'e­ra­ha'at hawyi eimoehay moehay hap ewy. Ta'i mi'iria Tupana mipo­'oro ko'i Pauru'in potmu­'eria mi'iria i'atu'e.
2CO 3:3 — Ta'i eipe waku urumu'e hamo miwan ewy eweikup­te'en i'atu'e. Aikotã miwan sa'a­wy­'iwuat timo­herep kahato yne Aipo­typot Iesui etiat. Mi'i hap ewy eweimo­herep miit'in me Tupana mipo­'oro Eipo­typot Iesui etiat. Yt aipo wuat minug popera etiat pyi i. Yt miwan nu etiat kawiat pyi i. Ma'ato wẽtup miwan ewywuat Tupana Pã'ãu kaipywiat miwan eiwa­nẽtup hap eipy'a pywiat kaipywiat wo. Mi'i hawyi wuat'i miit'in timo­wẽpap kuap. Katu­pono aiminug ko'i wakuat ihay Aipo­typot moherep hat ete yn. Katu­pono aiminug wakuat timo­herep kahato Iesui topy­hu'at Aika­'iwat no hap etiat miwan ewy.
2CO 3:4 Pyno pywo ti uruikuap kahato Tupana uru'airo tehay moherep hamuat. Tupana to'e uruepe — Eipe uimi­'airo uhehay moherep miit'in muat hamuat e.
2CO 3:5 Tupana mi'airo uruto tehay moherep hamuat. Mi'i pytkai yt karãpe i uruto'e — Uruto po'og Tupana uru'airo yt uruto'e i. I'ewyte — Uruto po'og imohey haria irania'in kai pote Tupana uru'airo hap yt uruto'e hin i. Yt mi'i tã ahehay hin i katu­pono uruesaika hap Tupana ehay moherep hamuat yt tut i uruesaika hap kaipyi. Ma'ato Tupana urumoe­saika tesaika hap kaipyi tomi­ky­'esat nug hamuat. Tupana Pã'ãu tum tesaika hap uruepe. Yt uruwe­kaipyi hin i tut uruesaika hap.
2CO 3:6 Tupana Pã'ãu wakuat yn aimo­we'eg kuap tehay wakuat moherep hamuat. Sa'a­wy­'iwuat sehay wãi'e hap ko'i Tupana henoi Iuteuria kape. Waku kahato mi'iria ma'ato yt aimo­hãpyk kuap i Tupana wanẽtup hawe. Katu­pono yt watunug kuap i yne mi'i ko'i. Ma'ato sehay pakup Iesui etiat wo Tupana Pã'ãu aimoieĩ­ne'en kuap. Irania'in iwẽpap kuap kahato Tupana ehay. Ma'ato yt ta'a­tu­hẽtup i Tupana Pã'ãu me — Uimu'e ro kat som ere'e mesuwe hap kuap hamo yt i'atu'e i. Te'e­ru­wa­nẽtup mesuwat miwan Tupana etiat — Atimo­wẽpap kuap hawyi aheha­kye­ra'at ra'yn i'atu'e yn. Tupana miwan etiat aheha­kye­ra'at kuap i'atu'e to'ope. Mi'i hawyi ta'a­tu­mo­wẽpap kahato ahut ewy yt ta'a­tukuap i ta'a­tu­py'a pe pytkai. Mi'i hawyi iku'uro rakat ewy tukup­te'en Tupana ehay ete. Kat pote sehay yn ta'a­tukuap pote. Ma'ato Tupana Pã'ãu wakuat yt aimu'e i mi'i hap ewy ne'i. Katu­pono Tupana Pã'ãu aimu'e aipy'a pe aiwa­nẽtup hawe aimu'e kahato tehay ete. Mi'i hawyi aimoieĩ­ne'en we'eg tehay wo miwan kaipyi.
2CO 3:7 Sa'a­wy'i Tupana tunug tehay nu ete sehay wakuat kahato. Mi'i hawyi ase'i Musei terut mekewat miwan Isareu ywania kape. Mi'i hawyi ase'i Musei ewa hẽtyhot kahato tut turan toterut mekewat miwan turan. Ma'ato yt hẽtyhot mot'i i howa wẽtup ewaty hap ewy yn. Sa'a­wy'i hẽtyhot kahato miit'in yt te'e­ra­ha'at kuap i. Mi'i hawyi yne e'at pe hẽtyhot yi kape te'en te'en. Sa'a­wy'i Tupana tum tomiwan miat Isareu ywania piat turan — Pyno mi'i miwan e hap ewetunug mote waku pe eweikup­te'en Tupana wanẽtup hawe i'atu'e. Mi'i hawyi — Urutunug aru i'atu'e. Ma'ato yt ta'a­tunug i hap yn topy­hu'at. — Pyno eipe Tupana mi'a­piheg ko'i wo eweikup­te'en e Musei.
2CO 3:8 Koitywy Tupana Pã'ãu to'e ehepe — Eweimohey Uha'yru pote woro­ho­'oe­ha­kye­ra'at e. Mi'i e hap po'og ikahu sa'a­wy­'iwuat nu totiat hap kai.
2CO 3:9 Sa'a­wy­'iwuat ainãpin hap ai'a­piheg hap topy­hu'at. Mi'i ko'i — Ewetunug e hap ko'i waku yne wen ma'ato yt aimo­hãpyk kuap i ainãpin hamo waku pytkai. Yt watunug i te hap hawyi ai'auka hap topy­hu'at. Ma'ato koitywy — Woro­ho­'o­mo­hãpyk eipe e Tupana. Atum ehepe Uipã'ãu ehepe po'og ikahu sa'a­wy­'iwuat kai e.
2CO 3:10 Sa'a­wy­'iwuat aimu'e hap ikahu ma'ato mesuwat aimu'e hap ipakup takat po'og ikahu sa'a­wy­'iwuat kai waku sese hap ewy. Yt kat i po'og wakuat ikai. Mi'i hawyi mekewat sa'a­wy­'iwuat ipot'i sehay wo'o­nãpin hap waku te wen ma'ato wati­ky­'esat po'og ipakup i mi'i pote po'og waku.
2CO 3:11 Ainãpin sa'a­wy­'iwuat hap Musei ewa hẽtyhot hap ewy topy­hu'at. Yne e'at pe yt hẽtyhot i yi kape te'en te'en hap ewy sa'a­wy­'iwuat. Ma'ato Tupana ehay pakup topy­hu'at yne e'at pe hẽtyhot po'og po'og kat pote Tupana ehay pakup pote.
2CO 3:12 Tupana ehay pakup Iesui etiat wato­mohey kahato katu­pono yt karãpe i yi kape po'og po'og ne'i. Mi'i pote wahenoi Tupana ehay yne miit'in me yt kat i aiwe­mõti popuo.
2CO 3:13 Sa'a­wy'i Musei tuwe­mõti kahato kat pote Tupana ẽtyhot hap howa etiat ikahuro po'og po'og yne e'at pe. Toto hap ete tuwe­mõti. Mi'i hawyi tuwewa suwy sokpe wo. Yt toiky­'esat i miit'in te'e­ra­ha'at hasep hepap mo ariãty hap kape. Mi'i hawyi Iuteuria Isareu ywania yt te'e­ra­'a­kasa i Tupana ẽtyhot hap howa etiat. Yt te'e­ra­'a­kasa kuap i hasep hap kape sokpe i'ãuka hap pote.
2CO 3:14 Mi'i hawyi Iuteuria ywania tukup­te'en mesup te. Ta'a­tu­mo­herep kahato Tupana ehay Musei miwan sa'a­wy­'iwuat ma'ato yt ta'a­tukuap pytkai i yt heremo i hap ewy pote. Katu­pono Musei tiwan Iesui etiat Tupana Mipo­'oro Aipo­rekuat nuat etiat hut hap e'yianmete. Iuteuria timohey Iesui hawyi heremo ta'a­tukuap uwe etiat Musei tiwan hap. Mesup te ma'ato yt ta'a­tu­mohey i te Iesui ra'yn hap.
2CO 3:15 Mi'i hawyi karãpe ta'a­tu­mo­wẽpap Musei miwan yt heremo hin i. Musei aimu'e hap watunug mote Tupana ahehaky'era'at kuap i'atu'e to'ope ma'ato mi'i e hap i'atue­sokpe ewy toĩne'en i'atuewa ete hap ewy. Yt i'atue­ha­pytig i hap ewy. Sokpe i'atuewa suwy hap ewy pote yt heremo i ahehaky'era'at hap Iesui mikyiat yt kat sa'up i hap. Iesui yn Musei minãpin yne nug hat pote mi'i yn ahehaky'era'at kuap hat.
2CO 3:16 Ma'ato mesup karãpe wẽtup ok Iuteu ywania tuwe­morem Tupana Mipo­'oro I'atu­po­rekuat nuat Iesui kape imohey hamo mi'i hat meremo uwe ete Musei tiwan hap toikuap ta'yn. Mi'i hawyi i'atuewa etiat sokpe ewywuat yt kat i hawyi heremo kahato i'atu­wa­nẽtup hawe.
2CO 3:17 Tupana Pã'ãu aimu'e kahato. Tomiwan ete toimo­herep kahato Tupana ahepe. Tomiwan myi toimo­herep kahato Tosa­'yru e hap. Mi'i hawyi yt uwe i aima'at kuap Tupana ehay ete. Sa'a­wy'i miwan yt watikuap kuap i kat pote yt kat i Tupana Pã'ãu aipiit pe pote. Koitywy heremo ahepe pote waku pe watoĩ­ne'en Tupana Pã'ãu toĩne'en ahepe hawyi.
2CO 3:18 Aito Iesui mohey haria Musei ewywuat kahato Tupana mõtypot hap hẽtyhot hap ma'ato yt iku'uro i ahowa ete Musei wat ewy. Katu­pono ahowa Tupana ewa y'y ewa ete hap ewy Tupana Pã'ãu aimoẽ­tyhot kahato wuat'i e'at pe. Yt hasep hin i Musei ewa ewy. Mi'i hawyi Tupana kahu hap ahepe topy­hu'at. Ipã'ãu heremo ahete Tupana Mipo­'oro Aika­'iwat nuat Pã'ãu heremo ahete. Pyno yne e'at po'og wakuat wato­py­hu'at hap ewy Tupana Pã'ãu hẽtyhot hap ete. Mi'i hawyi yne e'at wati­mo­herep po'og po'og Tupana Pã'ãu. Katu­pono Tupana ewywuat po'og po'og wato­py­hu'at yt kat i sokpe ahowa suwy hap ewy ma'ato Tupana i'ãuka yt kat i ahowa ete. Ikahu kahato Tupana Pã'ãu ahete are uimi­mu­'eria uito Pauru.
2CO 4:1 Mi'i pote wati­'a­tu­mu'e kahato wuat'i ywania sehay wakuat Iesui etiat. Katu­pono Tupana Pã'ãu hegyi'at hap kaipyi ai'airo towẽ wo. Yt ahewaku hap kaipyi i ai'airo mi'i nug hamo. Aheha­ky­'e'i pote aiky'e. Mi'i pote ai'airo tehay sytpok hamo. Mi'i pote yt karãpe i waure­wa­to'e ihay sytpok hap ete. Tupana Pã'ãu aimoe­saika mi'i nug hamo.
2CO 4:2 Irania'in ta'a­tu­henoi sa'ag Tupana ehay miit'in ma'at hamo ma'ato aito wati­mo­herep Tupana ehay aikotã to'e hap ewy. Yt wahenoi i aikotã irania'in miit'in ma'at haria ewywuaria henoi hap ewy. Tupana to'e hap ewy wato'e. Mi'i hawyi miit'in tikuap Tupana ehay pywo piat moherep haria aito hap i'ewyte Tupana aikuap. Mi'i hawyi yt aiwe­ma'at hap wywo i wahenoi pywo piat yn wahenoi pote.
2CO 4:3 Ma'ato yt wati­mo­herep Iesui etiat mu'ap Tupana kapiat pote yt ta'a­tukuap hin i. Mi'i hawyi aimi­mu­'eria yt ikuap takaria i wo tukup­te'en. Yt naku i yt wahenoi i katu­pono yt wahenoi i hawyi tuwat aria kape yt ta'a­tukuap i Tupana etiat pote.
2CO 4:4 Pyno yt imohey i haria mesu­wa­ro­tiaria ho'o­wasat rakaria wo te'e­ro­py­hu'at. Ahiag topy­hu'at i'atue­tu­pana wo. Mi'i hawyi karãpe wahenoi sehay wakuat aikotã Tupana tipo­'oro Tosa­'yru Aipo­rekuat no hap etiat i'ewyte karãpe wati­mo­herep yne Iesui etiat Tupana moherep hat sese etiat Tupana ewywuat rakat mi'i hap etiat wahenoi turan — Yt eweimohey tei'o mi'i. Yt eweimohey tei'o mi'i e ahiag i'atu­wa­nẽtup hawe yt toiky­'esat i mi'iria te'e­ro­py­hu'at Iesui haria pote. Ahiag i'atuewa hik hap ewy i'atuete yt toiky­'esat i Iesui kapiat i'atu­'a­kasa hap pote.
2CO 4:5 Yt watu­we­mõ­typot i ahehay wo miit'in miat wahenoi turan. — Eheropat haria uruto wato'e katu­pono Iesui emiit uruto pote wato'e. Mi'i hawyi Iesui yn Ai'akag wato'e. Mi'i yn Tupana tipo­'oro Aipo­rekuat no. Mi'i yn aimi­mõ­typot sese wato'e. — Eheropat haria yn waku wato'e wahenoi Iesui etiat turan.
2CO 4:6 Sa'a­wy'i sese i'ypyryp sese turan Tupana to'e — Ereĩne'en no hẽtyhot hap e. Mi'i hawyi toĩne'en na'yn hẽtyhot hap. Koitywy mi'i hap ewy tutunug aiwa­nẽtup hawe. Aipo­typot Iesui Tupana e'ariãty ewywuat toĩne'en. Karãpe wato­mohey Iesui hawyi Tupana heremo topy­hu'at aiwa­nẽtup hawe — Worokuap kahato En mesup Tupana wato'e. Esa'yru En wẽtup miit ewy yn wato'e. Koitywy watikuap ewaku hap wato'e.
2CO 4:7 Tupana Pã'ãu eiam kahato aito. Mi'i pote ahesaika kahato Tupana ehay moherep hamo. Pyno yt ahesaika hin i pytkai ahehay Iesui etiat hesaika kahato katu­pono aito heiam yi kawiat ewywuat wato­py­hu'at pytkai Tupana Pã'ãu aipyt'at nug kahato. Mi'i hawyi woity rakat mehit rakat ko'i kawiat ewywuat wato­py­hu'at. Mi'i hawyi meremo miit'in tikuap ahesaika hap toĩne'en Tupana Pã'ãu kaipyi hap yt aipiit yi kawiat kaipyi i.
2CO 4:8 Iesui ehay moherep haria aito pote miit'in miky­ry'i hamo watoĩ­ne'en aikope aikope ahewyry hap upi. Ma'ato mi'i pytkai yt ai'akit kuap i kat pote uruho­'opot aimoma teran ma'ato yt aimoma kuap i.
2CO 4:9 Ai'atoiat mesu­wa­ro­tiaria ai'akag wuaria kahato ma'ato yt waure wo hin i aiwa­nẽtup hawe imohey hap ete.
2CO 4:10 Ai'auka aru aikotã Aika­'iwat Iesui ta'a­tu­'auka hap ewy wato'e. Aikotã ta'a­tu­kuasa Iesui i'auka hamo hap ewy aimohan ai'auka hamo wato'e. Yt watikuap i aiku­'uro hap sio mesup mũki­'ite wato'e. Ma'ato mi'i pytkai yt watoiat hin i imohey hap wato'e. Ma'ato mi'i pytkai wahenoi ahewa­nĩ­kaptia pe aimi­mohey Iesui etiat. Mi'i pote — Pywo ti rat i'atu'e. Iesui tuwẽtem gu'uro pyi hap watikuap ta'yn i'atu'e. Pywo ti rat katu­pono heremo toĩne'en i'atupiit pe i'atu'e ahewa­nĩ­kaptia.
2CO 4:11 Ahehay Iesui etiat pote aipyhyp teran aikotã ai'auka hamo. Ta'a­tu­'auka Aika­'iwat. Mi'i hap ewy teran ahete ta'a­tunug neran. Mi'i turan wati­mo­herep yne Iesui toĩne'en hap ete.
2CO 4:12 Pyno ai'auka aru wato'e ma'ato aipotpap ta'yn wuat'i ywania mu'e hap ete. Mi'i hap ewy urutunug sa'a­wy'i eipy­'a­setpe. Mi'i pote Aika­'iwat mimoieĩ­ne'en ko'i wo eweikup­te'en mesup.
2CO 4:13 Sa'a­wy'i morekuat Tawi to'e — Woro­mohey sese En Tupana. Mi'i pote atimo­herep En wuat'i miit'in me uhehay wo. Yt atoiat kuap i uhepiat emohey hap e morekuat Tawi. Mi'i ewywuat kahato aito imohey hap ete. — Uruimohey sese En Tupana. Mi'i pote uruimo­herep En wuat'i miit'in me wato'e. Yt urutoiat kuap i En wato'e.
2CO 4:14 Ta'i koitywy watikuap kahato ra'yn Tupana tihep Aika­'iwat gu'uro pyi hap etiat. Mi'i hawyi toimoieĩ­ne'en i iku'uro hawyi. Mi'i hap watikuap kahato are. I'ewyte aito watikuap kahato meiũran aru Aika­'iwat Iesui aihep gu'uro pywiat aimoieĩ­ne'en wuat'i e'at piat hamo Tosa­'yru mohey haria aito pote. Aimoieĩ­ne'en hawyi aru aito ahereto To'ywot kape aikope toĩne'en hap kape. Mio tã e aru mi'i hawyi — Papai meimuẽ­waria uimohey sese haria e aru. Mi'i hawyi aru wẽtup miit ewy watoĩ­ne'en itote.
2CO 4:15 Sa'a­wy'i eipy­'a­setpe urutu­kup­te'en turan miit'in mimo­so­'opot ko'i wo uruto urui'a­tu­mu'e eipe Iesui etiat pote. Mi'i hawyi uruepiat ho'opot hap kaipyi eweikup­te'en pywo e haria wo typy'i ra'yn. Mi'i hap kaipyi koitywy miit'in po'og po'og Tupana kapiat wehum haria wo tukup­te'en. — Egyi'at kahato Tupana ewei'e. Yt uwe i e'ewy hegyi'at hap ewei'e. Uruimõ­typot wuat waku rakat. Uruhe­waku En ewei'e itote po'og po'og sa'a­wy'i kai. Koitywy Tupana topy­hu'at eimi­mõ­typot no ra'yn uruepiat ho'opot kahato eimu'e hamuat rokirẽ.
2CO 4:16 Karãpe uruta­'a­kasa ehepiat imohey hap kapiat hawyi uruto'e — Pyno waku po'og waho­'opot irania'in mu'e Iesui etiat hamo uruto'e. Ma'ato koitywy urupiit yt hesaika kahato i sa'a­wy­'iwuat ewy ma'ato mi'i pytkai po'og uruesaika sa'a­wy­'iwuat kai urupy'a pe uruwa­nẽtup hawe Tupana esaika hap po'og uruete sa'a­wy'i kai katu­pono Tupana Pã'ãu urumo­pakup kahato Iesui ehay moherep hamo wuat'i e'at pe. Mi'i pote yt urui'atoiat hin i sehay wakuat etiat miit'in mu'e hap.
2CO 4:17 Pyno irania'in Tupana ehay yt ky'esat i haria urusa­ty'i saty'i kahato urumo­so­'opot kahato mesuwe. Ma'ato aheĩne'en turan yn aimo­so­'opot kuap. Mi'i hawyi po'og yt kat i ta'a­tunug kuap ma'ato yt watoĩ­ne'en mot'i i mesu­wa­rote. Mi'i hawyi watoĩ­ne'en mot'i wuat'i e'at pe hap tote. Mi'i hawyi atipy pe aru wato'e — Ta'i waho­'opot kahato yi tote miit'in mu'e hamuat turan. Ma'ato koitywy waku aiwa­nẽtup hawe ahepiat ho'opot hap wato'e. Katu­pono ahepiat ho'opot hap kaipyi i'atu kahato Tupana mõtypot haria nug mesuwiat hamo wato'e aru atipy pe.
2CO 4:18 Pyno yt naku i watu­wa­nẽtup ahepiat ho'opot hap mesu­wa­rotiat kape koran wuat kape yn. Po'og waku watu­wa­nẽtup aimo­wepit hap atipy piat hap kape aikotã aru aimo­wepit wuat'i e'at pe hap kape. Ma'ato koitywy yt heremo i te mi'i. Katu­pono ahepiat ho'opot porap i hap heremo kahato koran aiwa­nẽtup hawe. Pyno po'og waku watu­wa­nẽtup ahepiat ho'opot hap e'yianmete aikotã aru hap kape. Ta'i yt pya hin i wyti aimo­wepit hamuat wuat'i e'at piat hap e'at wato'e. Ahepiat ho'opot porap'i hawyi tokosap aru pote meremo wato'e. Uimiwan Pauru are.
2CO 5:1 Pywo aipiit wyti aikotã og ape ewy. Katu­pono yt watoĩ­ne'en mot'i hin i mesu­wa­rote. Mi'i hawyi aipiit iku'uro aikotã og ape ewy. Ma'ato aipiit pakup Tupana timoeĩ­ne'en hawyi yt og ape ewy hin i. Katu­pono aipiit pakup topy­hu'at aikotã Tupana yat atipy piat yt karãpiat iku'uro rakat i.
2CO 5:2 Ma'ato mesuwe aipiit hero kahato haty kahato aipiit ete. — Tupana wato'e waho­'opot kahato aipiit ete haty kahato wato'e. Areto teran ewawi atipy kape wato'e. Atiky­'esat uipiit pakup wato'e Tupana pe mesuwe yi tote ho'opot popuo. Aipiit mesuwe aikotã sokpe pot'i ewy. Ma'ato aipiit pakup atipy piat aikotã ahesokpe pakup ewy. Mi'i hawyi wati­ky­'esat kahato aikotã ahesokpe pakup ewy.
2CO 5:3 Yt naku i yt kat i ahesokpe pot'i hiot'e hawyi yt kat haipepiat pakup i hap pote yt naku i are. Yt naku i miit'in py'a­setpe yt ahesokpe i hap ewy. Mi'i hap ewy ma'ato po'og sa'ag aiku­'uro hawyi yt kat i aipiit pakup i atipy piat hap yt naku i are.
2CO 5:4 Aipiit mesu­wa­rotiat kak'e kynkyn'e ne'i aipiit iku'uro rakat toĩne'en pote. Aipiit mesu­wa­rotiat tiky­'esat kahato ipakup we toĩne'en hap. Ta'i yne aito aipiit mesu­wa­rotiat iku'uro hap watikuap ta'yn. Yt wati­ky­'esat i pytkai iku'uro. Mi'i pote wahẽtup Tupana — Atiky­'esat kahato uipiit pakup we toĩne'en wuat'i e'at piat rakat wato'e. — Etunug no uipiit pakup ewat ewy wato'e Iesui pe. — Uipainug no wato'e. Aikotã uhesokpe pakup uiku­'uro hawyi etopag uipiit epiit ikahu hap ewy wato'e.
2CO 5:5 Pyno aito Iesui mohey haria pote Tupana to'e ahepe — Uha'yru mohey haria atum aru ehepe eipiit pakup eiku­'uro hawyi. Pywo ti rat yt uheso i rat e. Mi'i pote atimo­herep Uipã'ãu pywo ewei'e hamo eipiit pakup toĩne'en atipy pe hap kuap hamo e Tupana ahepe.
2CO 5:6 Pywo ti rat eipiit pakup toĩne'en Tupana Pã'ãu kawiat wato­mohey po'og po'og hap kaipyi are. Yt heremo i aipiit pakup ma'ato Tupana to'e pote — Pywo wato'e yn aimohey hap kaipyi. Aipiit wyti ai'yat mesu­wa­rotiat ewy. Aipiit pakup ai'yat pakup atipy piat ewy.
2CO 5:7 Watoĩ­ne'en mesu­wa­rotiat aipiit pe pote Tupana yt heremo i. Ma'ato imohey hap kaipyi yn wata­'a­kasa kuap.
2CO 5:8 Wato­mohey kahato mi'i pote wato'e — Pywo ti rat atiky­'esat kahato uipiit pakup hap. Katu­pono areĩne'en neran uipiit pakup wywo Tupana ehamo wato'e. Uito Pauru uiwa­nẽtup hawe po'og waku areĩne'en uipiit pakup wywo atipy pe mesuwat yi tote areĩne'en hap kai.
2CO 5:9 Watoĩ­ne'en neran Tupana wywo mi'i pote wato­we­potpap kahato aipiit wywo mesuwiat wywo mesu­wa­rote te haty wo Tupana e hap nug hap ete. Ta'i Tupana mowepit kahato haria wo watu­kup­te'en neran sio mesuwat yi totiat sio atipy pe. Mio tã e hap wati­ky­'esat.
2CO 5:10 Waku aiwe'eg wo kahato kat som watunug mesu­wa­rote aipiit wywo hap ete. Katu­pono meiũran aru Aipo­typot Iesui aikaykay yne tuwe­wawi ha'up ium hamo. Wẽtup ok tuereto toikaykay yne aito. Itote toimo­herep aiminug ko'i wuat'i pe. Aiminug wakuat ko'i i'ewyte aiminug yt naku i hap ko'i aiminug mesuwat totiat turan wuat ko'i. Mi'i hawyi to'e wẽtup ok wẽtup ok pe — En wakuat kahato e. Ma'ato wẽtup ok wẽtup ok pe — En yt naku i e. Mi'i pote waku aiwe'eg wo kahato aipiit wywo mesu­wa­rote.
2CO 5:11 Mi'i hap e'at pe Aipo­typot ti'a­tu­mo­herep yne aiminug ko'i sio waku sio yt hap ko'i. Mi'i pote waku wato­ken'ẽ kahato yt naku i nug hap pupi. Waku wato'e — Atimõ­typot reran Uika­'iwat uiminug wakuat wywo waku wato'e yn. Waku wati­'a­tuekyi kahato miit'in Aika­'iwat kape waku wato'e. Yt naku i i'atuekat ky'ewi ne'i wati­'a­tuekyi miit'in Iesui kape. I'ewyte yt naku i i'atu­ma'at reran haype ne'i wati­'a­tuekyi miit'in. Uruto mi'i hap ko'i eipiit ky'ewi hawyi ehekat ky'ewi ne'i hap yt karãpe i urui'a­tuekyi eipe. Mi'i hap Tupana tikuap pywo piat uruto'e hap i'ewyte eipe.
2CO 5:12 Yt karãpe i urui'a­tu­ma'at eipe. — Uruto po'og yt uruto'e hin i. Ta'i yt urutu­we­mo­wato teran i aikotã irania'in eimu'e haria ewy. Mi'iria ti te'e­ru­we­painug te'e­ru­we­mõ­typot hamo — Uimõ­typot mono ta'a­tu'e hawe ne'i. Ma'ato i'atu­wa­nẽtup hawe yt hãpyk hin i — Uruto po'og i'atu'e hap. Mi'iria eweikuap teran pote waku apo'e­wei'e sio waku apo'e­wei'e sio yt hap kuap hamo. — Urumu'e haria Pauru ewywuaria sio yt apo'e­wei'e. Mi'i hawyi eweikuap sio waku sio eima'at haria ne'i hap ko'i etiat.
2CO 5:13 — Pyno uruto po'og waku eimu'e hamo Pauru'in kai i'atu'e itote. Pauru'in yt ta'a­tukuap i kat e te'e­ropat mu'e hap ko'i heso'ok takaria pote i'atu'e. Ma'ato Tupana wanẽtup hawe yt urueso'ok hin i katu­pono imiky­'esat ewy urutunug. Ma'ato i'atu­wa­nẽtup hawe uwe uwe inug Tupana miky­'esat mi'i haria i'atu­wa­nẽtup hawe heso'ok takaria wo. Irania'in te'e­ro'e — Pauru'in i'atu­we'eg kahato miit'in ma'at hap ete i'atu'e. Mio tã i'atu'e yt ta'a­tukuap hin i kat hamo urupotpap kahato eipo­wyro hamo hap yt kat i eiky'e hap i'atuekai pote. Uruto uruiky'e kahato eipe mi'i pote urupotpap kahato eipo­wyro hamuat ete. Aikotã ywot ho'opot tomẽ­pyt'in powyro hamo hap ewy. Yt urutu­we­ky'e i eipo­wyro hamuat hap ete urupotpap kahato.
2CO 5:14 Pyno kat hamo urupotpap at ka'ap miit'in ekyi Iesui kapiat hamo. Pyno ahenoi kat pote hap. Iesui piat eiky'e sese hap totopag na'yn uruepe eiky'e kahato eipe urukaipyi. Mi'i hawyi wẽtup miit ewy uruto iwywo eiky'e hap ete. Yt woro­ho­'o­ky'e i pote haty kahato uruete. Pywo ti rat toi'a­tu­ky'e torania wuat'i ywania ko'i. Mi'i pote tutu'u yne wuat'i apiheg hap toku­'uro aria'yp posak etiat hawyi. Toikuap kahato yne miit'in Tupana mi'a­piheg ko'i wo aru tukup­te'en hap. Toikuap i'atu­'a­piheg hap hawyi iku'uro i'atueka­wiano.
2CO 5:15 Tutum sa'up yne Tupana pe aikyi'at hamo. Toha'up nug yne hawyi Tupana wanuaria wo watoĩ­ne'en. Koitywy I'ywot eropat haria watoĩ­ne'en. Kat pote aikyi'at ra'yn pote. Yt naku i watu­we­ropat ne'i. Waku po'og wate­ropat mekewat iku'uro aika­wiano rakat.
2CO 5:16 Pyno yt naku i aiwa­nẽtup hawe wato'e — Mi'i miit yt naku i mi'i miit waku wato'e yt watikuap i te sese sio waku sio yt i te pytkai. Mio tã wato'e sa'a­wy'i Aikawiat Iesui ete aiwa­nẽtup hawe. Koitywy watikuap ta'yn Aika­'iwat Iesui sese ra'yn hawyi watikuap sese Waku Sese rakat toĩne'en. Sa'a­wy'i — Yt kan hamo i Iesui wato'e yt kat i Iesui etiat watikuap pytkai ma'ato mesup yt naku i mi'i watunug. Mi'i hap ewy kahato yt naku i wato'e aipy'a pe wẽtup ok miit pe — Yt kan hamo i en mana mimi mehĩ yt watikuap i te mekewat aimi­mohit hat re e. Waku iminug upi watikuap waku sio yt e.
2CO 5:17 Watunug Iesui Aika­'iwat no hawyi watoĩ­ne'en iwywo wẽtup miit ewy yn watoĩ­ne'en. Mi'i hawyi ipakup takaria wo watoĩ­ne'en. Mi'i hawyi aheko sa'a­wy­'iwuat sa'ag ko'i wati­waure yne ra'yn. Mi'i hawyi aheko pakup ta'yn Aika­'iwat eko ewywuat ra'yn miit pakup watoĩ­ne'en pote.
2CO 5:18 Pyno yne yne ipakup ta'yn katu­pono Tupana aimo­pakup i ra'yn. Aiwo­'o­wy­'inug Tupana wywuat hat Aika­'iwat Iesui. Aika­'iwat ewywuat koitywy watoĩ­ne'en. Wato­'o­wy­'inug na'yn ahehay wo.
2CO 5:19 Pywo ti rat Aika­'iwat Iesui piit pe Tupana toĩne'en. Wuat'i miit'in wywuat tuwy­'inug hamuat toĩne'en Tosa­'yru piit pe. Tupana hewyry aipy­'a­setpe Tosa­'yru piit pe. Tomohey haria sese pap tet pupi ti iku'uro. Toi'a­tu­morem tewa­nĩ­kaptia towy­ria'in sese wo. Yt tote­reko i ra'yn wyti miit'in minug sa'ag topy'a pe. Tomo­weityk ta'yn wyti mekewat topy'a piat ko'i tosuu wo. Koitywy to'e ahepe — Ewehenoi ro miit'in me waure wo areĩne'en i'atu­minug sa'ag kai e. Waku te'e­ra­'aipok uhowawi e Aipo­typot e mesup ahepe.
2CO 5:20 Koitywy toĩne'en Wuat'i Porekuat Koro wo. Mi'i hawyi ainug topot­po­'oro wo morekuat hit ko'i wo wẽtup tawa kape wẽtup tawa kape tehay moherep hamo — Ewei'aipok to Tupana kape e hamo. Aika­'iwat Iesui toĩne'en atipy pe. Ma'ato uruto haipe­piaria ihay moherep haria uruto'e. Tupana urupo­'oro ehowawi eiky'e kahato haype. Woro­ho­'o­ky­'esat eipe uruwy­ria'in wo i ra'yn uruto'e. Eiwe­wy­'inug no Tupana wywo uruto'e.
2CO 5:21 Aika­'iwat Iesui yt karãpe i inug sa'ag wato'e. — Ta'i Uha'yru waku sakpo e Tupana. Ma'ato mi'i pytkai Tupana ti'a­piheg aiminug sa'ag upi. Aiminug sa'ag yne i'okpe tote toĩne'en kahato i'auka hap. Mi'i hawyi Iesui topy­hu'at yt naku i nug hat ewy aiminug sa'ag topiit tote hawyi. Yt towat tominug sa'ag hap upi Tupana ti'a­piheg Iesui ma'ato aiwat aiminug sa'ag upi toho­'opot kahato. Mi'i wato­mohey hawyi Tupana ainug wakuat sese rakaria Tosa­'yru suu aikoho hawyi. Tosa­'yru ewaku hap totopag ahepe. Waku pe watoĩ­ne'en Tupana wanẽtup hawe wato'e wuat'i ywania pe aikope aikope aipo­'oro hap upi Tosa­'yru haipe­piano. Uito Tupana mipo­'oro Tosa­'yru moherep hanuat Pauru.
2CO 6:1 Urutoria Iesui ehay moherep haria sese. Mi'i pote koitywy uruhẽtup kahato ehupi. Eipe i'ewyte uru'ewy te wẽtup piit ewy yn Tupana wywo. Watu­we­potpap kahato wuat'i ywania piat ikuap Ha'yru etiat hamo. Pyno Tupana eropat haria aito pote uruhẽtup ehupi urupy'a pyi kahato. Yt eweikup­te'en nei'o Tupana piat eiky'e hap ete ira'ak takaria wo ne'i. Tupana tum na'yn ehepe kat ko'i kat ko'i topotpap nug hamuat yt kat sa'up i. Yt naku i Tupana miium ahepiat ko'i wati­po­re­ro­kosap ne'i. Yt naku i watipun imiium ko'i.
2CO 6:2 Mio tã e sa'a­wy'i Tupana ahepe — Koran na'yn wyti woro­ho­'oe­ha­kye­ra'at teran e. Mesup e'at ra'yn atiky­'esat eheha­kye­ra'at e. Woro­ho­'okuap eipe ehepiat uikaykay hap e'yianmete e. Woro­ho­'o­'y­kesat eipe ehepiat ho'opot hap e'at pe e Tupana ahepe mesup ta'yn miwan me Isaia 49.8 pe.
2CO 6:3 Koitywy Aika­'iwat ehay moherep haria ra'yn aito. Mi'i pote waku aiwe'eg wo kahato watoĩ­ne'en. Kat pote karãpe wati­'a­parap pote miit'in te'e­ru­we­ky­ry'i kahato Aika­'iwat Iesui ete i'ewyte ahete. Mi'i hawyi yt uwe i tuwa­nẽtup teran ahehay kape.
2CO 6:4 Uruwy­ria'in waku kat ko'i kat ko'i watunug aiwe'eg wo kahato Tupana mowepit hap wywo — Meiẽ Tupana eropat hat sese i'atu'e hamo. Karãpe put'ok'e ahete ahatek hap aho'opot hap ko'i turan yt naku i iũte'en iũte'en aipy­'ahak miit'in ete i'ewyte Tupana ete. Waku wati­mo­herep Aipo­typot eropat haria sese hap mi'i hap e'at pe.
2CO 6:5 Karãpe ai'ahyk ahyk i'ewyte karãpe aipyhyp wo'o­pyhyp hawe i'ewyte karãpe miit'in sem ai'auka teran haria py'a­setpe watoĩ­ne'en i'ewyte karãpe ahero ahã'ãg hap wywo Tupana potpap nug kahato hap ete i'ewyte karãpe yt watoket i ka'ap Tupana potpap nug hap e'at pe wy i'ewyte karãpe yt kat i aimiium Tupana potpap nug turan mi'i ko'i ahete turan waku watu­we­pỹ­'ã­tutuk po'og yn na'yn. Mi'i hawyi miit'in tikuap ta'yn Aika­'iwat eropat haria sese aito hap.
2CO 6:6 I'ewyte karãpe yt kat i aiwa­nẽtup hawe yt naku i nug hap ete mi'i hawyi meiũran miit'in tikuap Tupana eropat haria sese aito hap. I'ewyte karãpe watikuap Tupana aiwy sese ewywuat mi'i hawyi — Tupana emiit kahato mi'i i'atu'e. I'ewyte karãpe miit'in tunug sa'ag ahete ma'ato yt wati­'a­tu­poepyk i mi'i hawyi — Pywo imohey hat sese i'atu'e ahepe. I'ewyte iwese rakaria wo watoĩ­ne'en hawyi — Meiẽ i'atu'e to'e hap ewy imohey sese hat i'atu'e. I'ewyte karãpe watunug Tupana Pã'ãu miky­'esat ewy hawyi i'ewyte karãpe wati­'a­tu­ky'e miit'in sese aipy'a pyi hawyi ta'a­tukuap pywuat Aipo­typot Iesui eropat haria sese aito hap.
2CO 6:7 I'ewyte karãpe wati­mo­herep aikotã Tupana e hap ewy hawyi ipotmu­'eria sese aito hap ta'a­tukuap ta'yn. I'ewyte karãpe Tupana aimoe­saika yt ahesaika pytkai i hawyi — Pywo rakat i'atu'e ahepe. I'ewyte karãpe waku pe watoĩ­ne'en Tupana wywo i'ewyte miit'in wywo mi'i hawyi aikotã surara hesaika rakat ewy watoĩ­ne'en. Surara typy ipo pe kyse'yp takat ewy. Wakuaria watoĩ­ne'en pote — Mi'iria Tupana surara wakuat sese i'atu'e ahepe.
2CO 6:8 Waku pe yn wati­ky­'esat Tupana potpap nug ahepiat imõtypot wywuat hamo. Ma'ato irania'in aimõ­typot kahato tuereto. Ma'ato irania'in yt aimõ­typot hin i. Ma'ato irania'in te'e­ru­we­ky­ry'i kahato ahete. Ma'ato irania'in yt — Waku i'atu'e kahato. Pywo piat wati­mo­herep turan irania'in — I'atueso atueso ne'i ta'a­tu­henoi i'atu'e ahepiat. Ma'ato sio waku i'atu'e sio yt naku i i'atu'e pytkai wati­'a­tu­mu'e kahato te Tupana ehay wakuat ete.
2CO 6:9 Ta'i irania'in yt aikuap teran hin i. Ma'ato Tupana aikuap kahato. Mi'i hawyi irania'in aikuap wen ma'ato ai'auka hamo aikuap. Ai'ahyk ahyk ai'a­piheg kahato aipiit suk suk kahato hamo aikuap. Mi'i hawyi iku'uro ra'yn i'atu'e. Ma'ato mi'i turan watu­we­hymut i ra'yn kat pote Tupana yt tiky­'esat i te aiku­'uro hap pote.
2CO 6:10 Aimo­so­'opot hap aimo­'arot kahato. Ma'ato mi'i pytkai watu­wehum kahato Tupana kape. Ma'ato i'atu­wa­nẽtup hawe yt kat hamo rakaria wo i watoĩ­ne'en. Ma'ato wahenoi Tupana ehay wakuat i'atuepe hawyi ta'a­tu­mohey hawyi ta'i Tupana mipoi­tyro ko'i wo tukup­te'en na'yn. Mi'i hawyi aikotã hekat rakaria ewy tukup­te'en. Yt kat i ahekat pytkai.
2CO 6:11 Uhyt'i'in mana'in tawa Kurintiu piaria uruiky'e kahato eipe. Torania eipe uruiky'e uruto'e. Yne uruwa­nẽtup hap uruimo­herep ehepe. Eiky'e hap yt karãpe i yi kape ne'i. Pywo ti rat uruiky'e kahato eipe.
2CO 6:12 Eipe ti urumẽ­pyt'in urui'a­tu­ky'e kahato aikotã ywot tiky'e tomẽ­pyt'in hap ewy.
2CO 6:13 Ma'ato eipe aikotã yt ta'a­tu­'ywot etiat i yt iwese i rakaria ewy. I'ewyte yt ta'a­tu­wesat i ta'a­tu­'ywot rakaria ewy eweikup­te'en. Urui'a­tu­ky'e kahato eipe uruto'e hawyi yt kat ewei'e i uruwesat. Urumẽ­pyt'in uruky'e pote ewehenoi ro uruepe.
2CO 6:14 Yt naku i watuwat yt naku i nug haria wy'inug hamo. Aikotã i'ypyryp wywo hẽtyhot hap wywo yt to'osat i hap ewy. Mi'i hap ewy yt naku i watoĩ­ne'en yt naku i nug haria wywo wẽtup miit ewy i'atu­minug sa'ag ete. Aikotã u'i mani­'ay­karay wywo to'o­pype mi'i hap ewy yt naku i wato­py­hu'at tupa­naria mõtypot haria wywo i'atue­tu­pa­naria mõtypot hamo. Aito Iesui mohey haria pote wẽtup miit ewy watoĩ­ne'en wakuat nug hap ete. Mi'i pote Tupana mimo­waku hanuaria yt to'osat kuap sese i yt naku i nug haria wywo yt to'o­'ewy hin i pote.
2CO 6:15 Aika­'iwat wywo ahiag wywo yt karãpe i to'o­wẽka ta'a­tu­potpap wẽtup ehay yn hamo. Mi'i hap ewy yt karãpe i aito Aika­'iwat mohey haria wato­'osat sese Aika­'iwat etiat miky­ry'i haria wywo. Yt karãpe i wẽtup miit ewy wato­py­hu'at i'atu­wywo.
2CO 6:16 Sa'a­wy'i mio tã e Tupana tomohey haria pe — Areĩne'en eiwywo uheiam eipe. Eiwywo uhewyry e. Ehetu­pana wo areĩne'en e. Uhemiit no eweikup­te'en e sa'a­wy'i miwan me. Mi'i pote Tupana yat ewy watoĩ­ne'en. Tupana toĩne'en aipiit pe pote wuat'i e'at piat ieĩne'en hat eiam aito. Yt mo wuat minug Tupana iã'ãkap eiam hin i aito. Yt karãpe i Tupana iwese tupa­naria wywo. Mi'i pote yt naku i Tupana aipiit piat watioto tupa­naria mõtypot yat kape i'atu­mõ­typot hamo e Tupana sa'a­wy'i miwan me Irewi­tiku 26.12 pe.
2CO 6:17 Mio tã e sa'a­wy'i Tupana tomohey haria pe — Ewei'atoiat ro tupa­naria e. Yt eweikup­te'en nei'o i'atu­wywo e. Eweikup­te'en pya i'atukai ro e. Yt eweiwat rei'o irania'in wywo i'atu­mõ­typot hamo e. Yt ewetemig nei'o mi'iria katu­pono yt naku i kahato mi'iria e Tupana. Uimi­ky­'esat ewetunug mote uimẽ­pyt'in wo eweikup­te'en e. I'ewyte eiwe­hyt'ok ui'yat pe e Tupana ahepe Isaia 52.11 pe.
2CO 6:18 Ei'ywot sese wo areĩne'en e. Mi'i hawyi eipe uha'y­ru'in uhaki­'yt'in wo e Tupana ahepe Esutu 4.22 pe.
2CO 7:1 Ei'ywot areĩne'en e Tupana ahepe. Woro­ho­'o­mu'e eipe uimẽ­pyt'in wo Ahetu­pana Koro e. Mi'i pote uimi­ky'e ko'i eweipy­hu'at e Tupana ahepe. Pyno waku watu­wehik kahato Tupana ete imẽpyt'in aito pote. Waku wati­mõ­typot kahato Ai'ywot Koro yt kat i aiminug sa'ag wywo. Waku wato­ken'ẽ ahepiat inug sa'ag hap pupi kat pote Tupana ehamo watoĩ­ne'en pote. Yt naku i watuwat aipiit miky­'esat sa'ag upi ne'i i'ewyte aiwa­nẽtup sa'ag hap upi ne'i. Yt naku i watu­wa­nẽtup po'og ahetu­pa­naria sa'a­wy­'iwuat kape ne'i. Waku wato'e Tupana pe — Uiminug sa'ag ko'i aikotã uipiit ipitpit sese hap ewy. Mi'i hap ewy uiwa­nẽtup hap ipitpit kahato. Uipitpit ok hap pote aremõti kahato uiminug sa'ag pupi waku wato'e Tupana pe.
2CO 7:2 Uiwy­ria'in tawa Kurintiu piaria yne e'at pe urui'a­tu­ky'e kahato po'og sa'a­wy'i kai. Mi'i pote uruky'e aikotã urui'a­tu­ky'e eipe hap ewy. Yt karãpe i urui'a­tu­ma'at eipe. I'ewyte yt karãpe i eipiit ky'ewi hawyi eheka­re'en ko'i ky'ewi ne'i urutu­kup­te'en eipy­'a­setpe. I'ewyte yt karãpe i urui'a­tu­po­hari eipe katu­pono eiky'e kahato haria uruto.
2CO 7:3 Ta'i urutu­wa­nẽtup yn ehowawi yt kat i eimohit hap ne'i uruwa­nẽtup hawe uruku­'uro eiky'e haype.
2CO 7:4 Uimo­wepit haria kahato eipe are. Uruimohey kahato eipe are. — Iesui mohey haria tawa Kurintiu piaria waku kahato rakaria uruto'e wuat'i miit'in me. Uruho­'opot kahato mesuwe ma'ato urutu­wa­nẽtup ehowawi hawyi urumo­wepit kahato eipe. Mi'i hawyi yt kat i uru'arot ne'i hap.
2CO 7:5 Sa'a­wy'i put'ok­'u­ru­to'e mesuwe yi Masẽ­tunia pe turan uruho­'opot kahato. Yt uruky'e hin i itote. I'atuehay sa'ag uruete yne tawa piaria. Uruto­ken'ẽ itote kat pote sio uru'auka sio yt hap urutu­wa­nẽtup pote. Irania'in tu'uka kahato uruete. Yt ikahu hin i uruwa­nẽtup hawe. Yt urutu­we­mohey kuap i. Mi'i hawyi yt uruiky­'esat i po'og yi kape sese uruto urutu­kup­te'en.
2CO 7:6 Ma'ato mi'i turan aimo­wepit hat Tupana tipo­'oro ra'yn urupo­wyro hat mehĩ Titu are. Put'ok'e hawyi urumo­wepit kahato.
2CO 7:7 Mi'i hawyi mehĩ Titu urumu'e kahato — Waku kahato mi'iria e ehetiat. Uipo­wyro kahato mi'iria e. Ta'a­tu­ky­'esat kahato Tupana ehay e ehetiat tohenoi. Ta'a­tukuap emiwan hawyi paa'i­'a­tu'e ta'a­tu­minug sa'ag ete e Titu uhepe. Uruiky'e kahato te Pauru i'atu'e uhepiat pe. Mi'i hawyi urumo­wepit kahato mio tã mehĩ Titu henoi ehetiat hawyi. Pyno typy urumo­wepit hap mehĩ Titu put'ok'e hawyi tohenoi waku kahato ehetiat hawyi.
2CO 7:8 Sa'a­wy­'iwuat uimiwan ehowawiat ei'a­piheg kahato hap eimo­'arot kahato hap paa'e­wei'e kahato hap. Mi'i turan are'e uiwepe — Yt naku i kahato uimiwan are. Po'og waku yt karãpe i atipo­'oro uimiwan are uiwepe. Ma'ato mio waku kahato atipuẽti uimiwan katu­pono ewei'aipok ta'yn Tupana kape paa'e­wei'e hap. Sa'a­wy­'iwuat einãpin hap ei'a­piheg hap yt he hin i eweipuẽti yt eimo­wepit hin i pote. Ma'ato koitywy eimo­wepit po'og po'og. Mi'i hawyi koitywy eweiwat ra'yn einãpin uhepiat hap upi. Pyno koitywy uimiwan sa'a­wy­'iwuat ehowawiat uimo­wepit kahato.
2CO 7:9 Waku kahato uimiwan sa'a­wy­'iwuat katu­pono mi'i kaipyi eiwe­morem kahato Tupana kape. Ma'ato sa'a­wy'i ti haty yn eweipuẽti. Mekewat uimiwan ei'a­piheg kahato hap ewy topy­hu'at. Mi'i hawyi paa'e­wei'e kahato eiminug sa'ag ete. Mi'i kaipyi wo'o­wese hap eweipuẽti Tupana wywo. Mi'i pote uimo­wepit hap ewy uimiwan sa'a­wy­'iwuat ehowawiat haty rakat pytkai.
2CO 7:10 Karãpe watu­we­mõti aiminug sa'ag ete Tupana ehamo i'ewyte karãpe paawa­to'e aiwa­nẽtup hap sa'ag ete mi'i hawyi wata­'aipok aiminug sa'ag myi Tupana kape. Mi'i hawyi aheha­kye­ra'at ra'yn. Watu­we­morem Tupana kape hawyi waku kahato ahete. Toiwaure ra'yn aiminug sa'ag ko'i. Mi'i hawyi aimo­wepit kahato hap yn topy­hu'at. Toiwaure yne aiminug sa'ag ko'i. Mi'i pote yt kat i po'og aimõti te hap topy­hu'at. Mi'i hawyi — Paa'wa­to'e hap tokosap ta'yn wato'e are. Mi'i hawyi — Waku kahato aheha­kye­ra'at hat wato'e. Ma'ato yt wata­'aipok i aiminug sa'ag kaipyi pote yt watu­we­mõti hin i e hamo. Mi'i pote yt karãpe i aheha­kye­ra'at hap toĩne'en. Ai'a­piheg hap wuat'i e'at piat yn topy­hu'at aiku­'uro sese hap. Mi'i hawyi mesuwe yi tote yt karãpe i wati­puẽti mekewat aimo­wepit hap. Tupana tiwaure aiminug sa'ag hawyi yt kat i haty hap ahete aimo­wa­nẽtup hawe aiminug sa'a­wy­'iwuat etiat. Ma'ato yt pote haty hap topy­hu'at aheĩne'en hap ok tã yt aimo­wepit hin i.
2CO 7:11 Pywo ti rat karãpe wati­'a­parap sese yt Tupana miky­'esat ewy i hawyi waha­ty'i aiwa­nẽtup hawe watu­we­mõti kahato itote. Mi'i hap Tupana tiky­'esat kahato. Mi'i hap ewy topy­hu'at ehete eiwe­mõti hap mekewat eipy­'a­setpiat hewaire waire rakat. Mi'i hap atimo­herep ehepe hawyi paa'e­wei'e kahato Tupana miky­'esat ewy. Mi'i hawyi eweikup­te'en ipy'ahak takaria wo iminug sa'ag ete. — Yt urumi­ky­'esat ewy i ewei'e tope. Uruto­ken'ẽ kahato eminug sa'ag pupi. Yt naku i ti rat ewei'e haty wo tope. Etoiat ro eminug sa'ag hawyi ereĩne'en no Tupana emiit sese wo. Mio tã ewei'e hawyi yne ikuap yt Tupana miky­'esat ewy i tutunug sa'ag hap. Koitywy miit'in tikuap yt mi'i tã nug haria i eipe hap. — Yt etunug po'og i ra'yn o typuo i ewei'e hawyi.
2CO 7:12 Eiweikuap kat pote uimiwan sa'a­wy'i atipo­'oro ehowawi einãpin haty wuat hap. Pyno ahenoi ehepe woro­ho­'o­ky'e kahato moherep hamuat. Yt uheso hin i are. Ta'i Tupana ehamo yt uheso hin i are. Pywo piat sese woro­ho­'o­ky'e eipe hap. Yt atipo­'oro i sa'a­wy'i mekewat miwan eipy­'a­setpiat i'aparap hap mohit hamo i'ewyte imima'at ko'i mohit hamo wy. Ma'ato ei'ywot ewy areĩne'en woro­ho­'o­nãpin perup i popuo eiky'e haype are.
2CO 7:13 Pyno sa'a­wy'i mehĩ Titu toto ehowawiat turan yt towepit hin i wywo toto. Ma'ato put'ok'e turan imowepit kahato haria wo eweikup­te'en. Mi'i hawyi koitywy i'ewyte uruto uruwepit kahato mehĩ Titu henoi yne aikotã aikotã eweikup­te'en hap etiat hawyi urumo­wepit haria eipe.
2CO 7:14 Sa'a­wy'i atipo­'oro mehĩ Titu ehowawiat turan are'e tope — Aika­'iwat mohey haria tawa Kurintiu piaria waku kahato rakaria are tope. Ta'aipok hawyi tohenoi ehetiat aikotã are'e hap ewy tohenoi. Mi'i hawyi pywo ti rat are. Ta'i pywo are ati'a­tu­mohey kahato mi'iria. Aikotã uruto'e sa'a­wy'i pywo e hap ewy. Kurintiu imohey haria waku kahato rakaria are Titu pe.
2CO 7:15 Koitywy mehĩ Titu eiky'e kahato hat po'og po'og sa'a­wy­'iwuat kai. Mi'i pote ehowawi yn iwanẽtup hap. — Ta'i mi'iria Tupana miky­'esat nug haria e yn uruepe ehepiat pe. Yt toiwaure kuap i ehowawiat tuwa­nẽtup hap. — Uimõ­typot kahato mi'iria e. Yt toimõto hin i tuwa­nẽtup hawe. Aikotã paa'e haria ewy eweikup­te'en itote — Ereke mehĩ ereke mimi ewei'e yn tope. — Hegyi'at kahato rakaria e yn uruepe ehepiat pe. Mi'i hawyi ehowawi yn tuwa­nẽtup kahato.
2CO 7:16 Pyno woro­ho­'o­mohey kahato eipe. Yt karãpiat i aru uima'at haria eweipy­hu'at. Ehewaku hap yn topy­hu'at uiwa­nẽtup hawe. Uito ti mesuwat miwan nug hat Pauru are.
2CO 8:1 Pyno koitywy ahenoi teran ehepe aikotã yi Masẽ­tunia piaria koitywy tukup­te'en Tupana mipoi­tyro ko'i wo tukup­te'en. Tegyi'at hap kaipyi toi'a­tu­ky'e mi'iria. Pywo wuat mi'iria Tupana ti'a­tu­poi­tynug po'og po'og ne'i. Sa'a­wy'i ta'a­tu­mohey hawyi itotiaria miit'in weuka'i kahato haria mi'iria. Ta'i ihaky­'e'i kahato rakaria wo te'e­ro­py­hu'at itote mi'iria. Aikotã yt i'atuekat hin i rakaria ewy tukup­te'en.
2CO 8:2 Ma'ato mi'i pytkai i'atu­wepit hap yn topy­hu'at. Mi'i pytkai ta'a­tu­mõ'ẽ ta'a­tuepiat ekat hit yne irania'in me. Po'og i'atue­gyi'at hekat rakaria kai ta'a­tu­mõ'ẽ yne pote. Katu­pono ta'a­tu­mõ'ẽ yne miit'in powyro hamo.
2CO 8:3 Te'e­ru­we­py'a pyi ta'atuium ne'en ne'i. Yne ta'atuium kuap hap ok tã ihaky­'e'i rakaria tawa Ieru­sarẽi miaria powyro hamo. Yt uheso i rat katu­pono i'atue­gyi'at sese mi'iria.
2CO 8:4 — Uruipo­wyro kahato teran Aika­'iwat mohey haria tawa Ieru­sarẽi miaria i'atu'e uhepe urui'a­tu­ky'e kahato mi'iria pote i'atu'e. Mi'i pote urumo­wepit kahato etioto urumiium ko'i hawyi i'atu'e yn uhepe typuo i typuo i. Sa'a­wy'i uruto'e uruwo­'ope — Pyno ta'atuium aru kurin ta'a­tumiium ok tã. Mi'i hawyi watioto tawa Ieru­sarẽi kape uruto'e uruwo­'ope. Ma'ato yt heĩpyt hin i ta'atuim po'og uruwa­nẽtup hap kai.
2CO 8:5 Katu­pono — Tupana i'atu'e urutum neran urupiit epe i'atu'e. Mi'i hawyi urupotpap hap kaipyi urutum neran yne ewawi. Mi'i hawyi urutum yne Pauru'in me imiereto tawa Ieru­sarẽi miaria kapiat hamo i'atu'e Tupana pe. Mi'i hawyi ta'a­tunug Tupana piat ta'a­tu'e hap ewy.
2CO 8:6 Sa'a­wy'i uruipo­'oro mehĩ Titu — To'iro wati­'a­tunug tawa Ieru­sarẽi miaria ihaky­'e'i rakaria powyro hamo e. Pyno uruikuap mekewat yi Masẽ­tunia piaria i'atue­gyi'at kahato hap ete hawyi uruto'e — Pyno waku wati­po­'oro i ra'yn mehĩ Titu imohey haria tawa Kurintiu piaria nãpin aikotã waku watum ihaky­'e'i rakaria pe hap etiat hamo uruto'e. Waku watunug imohey i haria yi Masẽ­tunia piaria ewy e hamo i'atue­gyi'at hap wywo uruto'e. Mi'i hawyi uruipo­'oro i ra'yn ehowawi.
2CO 8:7 Urui'a­tu­mohey kahato eipe uruwa­nẽtup hawe. Eweikuap kahato aikotã waku hãpyk nug hap ete. Howapy kahato imohey hap wywo eipe. Tupana Pã'ãu ihay hesaika kahato eikaipyi. Tupana kuap haria sese eipe. Yt eipohep hin i Tupana miky­'esat nug hap ete. I'ewyte weky'e hap ete eweikuap kahato. Ta'i yne mi'i hap ko'i ete po'og wakuaria wo eweikup­te'en. Pyno koitywy wahã'ãg sio eipe po'og hegyi'at rakaria sio yt hap kuap hamo.
2CO 8:8 Pyno — Ewetum no yt are'e i haty wo ehepe. Yt ewetum i pote yt naku i yt are'e kuap i ehepe. Eipy'a pyi ewetum ihaky­'e'i rakaria tawa Ieru­sarẽi miaria piat hap i'ewyte i'atu­ky'e kahato wywo hap uruiky­'esat. Mi'i hawyi Tupana tikuap ehegyi'at hap toky'e kahato hap. Waku wati­mo­herep imohey haria yi Masẽ­tunia ewy ehegyi'at hap.
2CO 8:9 Eipo­typot Iesui aiky'e kahato. Mi'i hap eweikuap ta'yn ma'ato ahenoi teran i ra'yn. Hegyi'at kahato Mi'i aikotã hekat sese rakat timõ'ẽ yne teka­re'en ihaky­'e'i rakaria pe hap ewy Aika­'iwat hegyi'at kahato. Sa'a­wy'i sese yne kare'en topy­hu'at ipo pe atipy pe. Mi'i hawyi ahowawi tut atipy kaipyi. Mi'i Miit ihaky­'e'i rakat topy­hu'at. Toimõ'ẽ yne tewaku hap ahowawi aiky'e haype. Mi'i hap ko'i watikuap ta'yn. Ma'ato waku wato­py­hu'at aikotã hegyi'at hap ewy uheka­tu­wyria are.
2CO 8:10 Ga'atpuat anu — Waku wati­'a­tunug hawyi wati­po­'oro ihaky­'e'i rakaria tawa Ieru­sarẽi miaria imohey haria kape ewei'e wuat'i Iesui mohey haria irania'in e'yianmete.
2CO 8:11 Pyno koitywy woro­ho­'o­nãpin eipe — Ewetunug no aikotã ewei'e hap ewy. Ewei'a­tunug o eimiium ko'i eimi­ky­'esat ewy. Ta'i eiwepit hap wywo wyti ewetum eimi­ky­'esat ok tã. Waku watum aimiium Tupana kapiat haty wo i'atu­ky'e hap wywo. Waku watum aipap hap wywo. Waku waho'oium ahekat ko'i aimi­ky­'esat ewy.
2CO 8:12 Pyno kat ko'i kat ko'i watum Tupana kape aipy'a pyi iky'e hap wywo mi'i hawyi ewepit kahato. Iwato sio yt hap kape yt tuwa­nẽtup i mi'i ko'i kape. Tupana tiky­'esat watum kuap hap ok tã tope. Yt toiky­'esat i watum yt watum kuap i hap ok tã.
2CO 8:13 Yt naku i watum yne ahekat ihaky­'e'i rakaria pe hawyi aito watoĩ­ne'en ihaky­'e'i rakaria wo ne'i hap. Waku po'og wati­mõ'ẽ i'atuepe hawyi yne aito ahekat topy­hu'at.
2CO 8:14 Pyno waku wati­mõ'ẽ ahekat i'atuepe katu­pono aiwat i'atu kahato pote ma'ato i'atuwat yt kat i i pote. Meiũran aru put'ok'e ehepiat ho'opot hap e'at. Mi'i hap e'at pe waku mi'iria aipo­wyro aikotã aito wati­mõ'ẽ sa'a­wy'i hap ewy.
2CO 8:15 Aikotã Tupana to'e sa'a­wy'i miwan me — Yt naku i yt hegyi'at rakaria wo i watoĩ­ne'en uiano yne e haria wo ne'i. Yne aito hegyi'at rakaria wo watoĩ­ne'en pote wati­mõ'ẽ aiwo­'ope. Mi'i hawyi aiwo­'o­'e­wy­'ewy hekat rakaria wo watoĩ­ne'en e Musei tomiwan Esutu 16.18 piat pe.
2CO 8:16 Uruwy­ria'in tawa Kurintiu piaria urui'a­tu­ky'e kahato eipe. Koitywy aiwy Titu eiky'e aikotã uruky'e hap ewy. Eipo­wyro hap yn iwanẽtup hawe. Tupana tunug na'yn Titu eiky'e kahato hano. Mi'i pote waku wahe­waku Tupana kape.
2CO 8:17 Wẽtup e'at pe wato'e mehĩ Titu pe — Waku era'aipok tawa Kurintiu kape uruto'e. — Areto teran ni rat e hawyi toto yt uruipo­'oro po'oro po'og pytkai i. Tuwe­py'a pyi toto. Ipap kahato pote po'og torania kai.
2CO 8:18 Mi'i hawyi wẽtup ok uruipo­'oro mehĩ Titu wywo. Mi'i ti aimu'e kuap kahato Tupana ehay wakuat etiat rakat. Wuat'i puat mikuap Iesui mohey haria mikuap kahato mi'i are. Mi'i pe ti — Wakuat kahato mi'i i'atu'e.
2CO 8:19 Ta'i torania Tupana mõtypot yat piaria mi'airo ti meiũwat miit mekewat aimiium ereto tawa Ieru­sarẽi kapiat hamuat. Mi'i hamuat i'atu­mi­'airo i'atumiium i'atue­gyi'at hap moherep hamuat ium hamuat. Mi'i urutum ihaky­'e'i rakaria imohey haria tawa Ieru­sarẽi miaria pe. Mi'i hawyi te'e­ru­wehum kahato Aika­'iwat Iesui kape. Mi'i hawyi i'atu­wepit kahato ta'a­tukuap ta'a­tu­ky'e kahato ehepiat hap hawyi.
2CO 8:20 Iwato kahato aimiium urutioto. Mi'i pote urutioto meiũwat miit eimi­'airo miium ko'i ereto hamo. Yt urutioto teran i katu­pono yt uruiky­'esat i kahato irania'in to'ope — Meiẽ Pauru iho'osat aimiium ko'i mu'ap upi tawa Ieru­sarẽi kapiat aimi­po­'oro ko'i e hap yt uruiky­'esat i. Mi'i pote eimi­'airo tioto are.
2CO 8:21 Hãpyk kahato yn areĩne'en neran wuat'i miit'in wanẽtup hawe i'ewyte Tupana wanẽtup hawe. Mi'i pote yt atioto teran i mesuwat wuat'i miium wato ko'i kat pote yt atiky­'esat i miit'in te'e­ru­wa­nẽtup sa'ag uhowawi sio toho­'osat sio yt i'atu'e hap ete.
2CO 8:22 Mi'i pote eimi­'airo po pe yne urutum hereto hamo. Eimi­'airo waku kahato uruipuẽti aiwy sese. Yt karãpe i topot­ma'at nimo pyi te aipo­wyro hat. Uruhã'ãg kahato yne ete ma'ato yt karãpe i uruma'at. — Areto teran tawa Kurintiu kape e. Ati'a­tu­mohey kahato mi'iria e imohey haria tawa Kurintiu piaria katu­pono ta'atuium aru po'og watu­wa­nẽtup hap ok tã e uruepe.
2CO 8:23 Uito hawyi mehĩ Titu aikotã wẽtup miit ewy yn urutu­kup­te'en eheropat hamo. Uiwy kahato mehĩ Titu are. Koitywy atipo­'oro mi'i irania'in wywo ehowawi. Tuwat yne hawyi areto. Mi'iria uhe'yianme tuwat. Waku ewei'a­tu­mohey mi'iria katu­pono Iesui mohey haria yne. Tupana mõtypot yat piaria mipo­'oro kat pote Aika­'iwat mõtypot haria sese i'atu­'airo. — Eiwe­hyt'ok ewei'e o i'atuepe aikotã eimikuap sese ko'i piat ewy are.
2CO 8:24 Ewei'a­tu­ky'e sese i'atu­mi­po­'oro ko'i pote — Imohey haria Kurintiu piaria iwese sese rakaria i'atu'e aru te'e­ra­'aipok ta'a­tue­tawa kape hawyi. — Waku imohey haria Kurintiu piaria i'atu'e Pauru'in e hap ewy aiky'e kahato haria mi'iria i'atu'e aru are. Pyno uito Pauru
2CO 9:1 Pyno koitywy yt kat hamo i — Waku kahato wati­'a­tu­mõ'ẽ ahekat ko'i imohey haria ihaky­'e'i rakaria tawa Ieru­sarẽi miaria pe yt kat hamo i are'e katu­pono ewetum neran.
2CO 9:2 — Ga'atpuat anu urupotpap kahato hum hamo ewei'e uhepe. Meremo urui'a­tunug urumiium muat ihaky­'e'i rakaria imohey haria tawa Ieru­sarẽi miaria pe ewei'e. Mio tã ei'e hap ahenoi wuat'i imohey haria pe yi Masẽ­tunia piaria pe. Mi'i hawyi te'e­ro'e — Pyno uruto wy urutum i'atu'e. Mi'i hawyi ta'atuim ta'a­tukuap eipe ewetum irane hap hawyi. — Tawa Kurintiu piaria yi Akaia piaria ewy watum i'atu'e to'ope.
2CO 9:3 Mi'i pote atipo­'oro mehĩ Titu'in uhe'yianme eimiium sio waku sio yt i te hap kuap hamo. Ma'ato areto yt ewei'a­tunug i te turan wuat pote wato­'o­mõti te hap topy­hu'at — Urutunug aru ei'e yt ewetunug i te pote.
2CO 9:4 Katu­pono areto aru yi Masẽ­tunia piaria wywo ma'ato — Urutunug aru ei'e hap yt ewetunug i turan yt naku i put'ok­'u­ru­to'e ehetawa pe eimiium sat hamo. Yt kat i pote yi Masẽ­tunia piaria to'o­ky­ry'i sese ta'a­tu­py'a pe. — Kat pote — Urutunug aru i'atu'e pytkai yt ta'a­tunug i i'atu'e.
2CO 9:5 Mi'i pote are'e mehĩ'in Titu'in me — Uhe'yian­mete eweiwat ro tawa Kurintiu kape are. Ewei'a­tu­nãpin mi'iria — Waku aiwepit wywo watum e hap ete waku watum aipy'a pyi imohey haria ihaky­'e'i rakaria tawa Ieru­sarẽi miaria pe e hamo. Pyno waku pe yne ra'yn aimiium ko'i ta'a­tue­reto hap e'yianmete tawa Ieru­sarẽi kapiat hamo waku ewei'e o tawa Kurintiu piaria pe are Titu'in me tawa Kurintiu piaria nãpin hamo. — Waku watum aipy'a pyi hap yn ewei'e o are mehĩ'in Titu'in me. — Yt naku i watum yt watum neran i pote waku ewei'e o are mehĩ'in Titu'in me.
2CO 9:6 Pyno ahenoi ehepe hã'ãkap wuat aikotã waku watum Tupana kape hap ete. Uwe uwe tikoi yt iwato i mi'i hat aikotã toikoi hap ok tã toipuẽti. Ma'ato uwe uwe tikoi iwato mi'i hat ipuẽti tepiat ikoi hap ok tã. Mi'i hap ewy karãpe watum Tupana kape yt ahegyi'at wywo i pote meiũran aru yt kat i wati­puẽti yt ahegyi'at i pote.
2CO 9:7 Uiwy­ria'in Tupana tiky'e kahato hegyi'at sese rakat. Topy'a pyi toiky­'esat kahato tutum Tupana kape hat. Yt toiky­'esat i watum tope yt watum neran i wywo watum hap. I'ewyte yt toiky­'esat i — Etum no ma'ato yt pote yt naku i pe ereĩne'en e wẽtup ok hap upi ne'i watum hap. Tupana tiky­'esat aiwehum kahato wywo watum aipy'a pyi hap tewawiat hap toiky­'esat. Toiky­'esat aimiium muat wati­'airo yianmete kat som watum hap ko'i.
2CO 9:8 Tupana hegyi'at sese ahepe. Tutum kuap ahepe po'og po'og watu­wa­nẽtup hap kai aipoi­tyro kuap kahato aiky'e haype. Yt ahewaku hap upi i tutum ne'en ne'i ma'ato aiky'e hap yn wywo. Mi'i pote karãpe watunug neran wakuap imiky­'esat turan aimoe­saika kahato inug hamuat po'og po'og watunug kuap kai. Tupana tikuap kahato ahepiat kat sepap hap kuap hamuat aimo­we'eg hamo. Tutum kuap po'og ahepiat hum hap tepiat hap kai.
2CO 9:9 Mi'i hap ete Tupana to'e miwan me — Eheha­ky­'e'i kahato uhepe. Yt woro­ho­'oe­waure hin i eipe ihaky­'e'i rakaria e. Atikuap haty ehete hap ko'i e. Woro­ho­'o­po­wyro eipe wuat'i e'at pe e morekuat Tawi wepy 112.9 pe. Mi'i hap kaipyi watikuap hegyi'at kahato hap.
2CO 9:10 Pywo ti rat aipoi kahato hat Tupana. Yne aimikoi nug hat sa'a­wy'i kat ko'i kat ko'i watikoi Tupana inug hap kaipyi. Mi'i pote yne mi'i tut Tupana po pyi. Tupana timo­wato yne aimikoi ko'i aiko moehaĩte hat. Tupana tikuap kahato aikotã mowato hap aito hegyi'at rakaria watoĩ­ne'en pote. Wati­mõ'ẽ hap ok tã tutum ahepe.
2CO 9:11 Tupana timo­wato kuap ahekat ko'i. Yne aiminug ko'i toipoi­tyro kuap watoĩ­ne'en hegyi'at ahekat ko'i wo pote. Wati­mõ'ẽ ihaky­'e'i rakaria pe pote Tupana kape te'e­ru­wehum ahegyi'at hap upi.
2CO 9:12 Pyno wati­po­'oro aimiium ihaky­'e'i rakaria imohey haria tawa Ieru­sarẽi miaria kape hawyi — Waku kahato En Tupana i'atu'e aru. Yt wesok i te haria hin i tawa Kurintiu piaria i'atu'e aru ihaky­'e'i rakaria powyro hamo. Koitywy uruikuap emohey haria tukup­te'en i'atumiium kaipyi. Koitywy waku ahete kat pote tokosap ta'yn aheha­ky­'e'i hap uruete Tupana i'atu'e haty wo torania wati­mõ'ẽ ahekat ko'i pote.
2CO 9:13 — Tupana i'atu'e Esa'yru ehay upiaria emohey haria tawa Kurintiu piaria i'atu'e aru. Emipo­'oro Aipo­rekuat nuat ehay wakuat nug haria mi'iria i'atu'e aru Tupana pe. Ta'a­tu­mõ'ẽ uruepe hãpyk kahato i'atu'e. Yt uwe pe i po'og to'o­ku­pitu kupitu kahato hegyi'at sese rakaria ewy i'atu'e aru Tupana pe.
2CO 9:14 — Tupana tawa Kurintiu piaria emohey haria ekaipyi tukup­te'en hegyi'at sese rakaria. Mi'i pote eti'a­tu­poi­tyro o mi'iria katu­pono koitywy uruiky'e kahato mi'iria. Etimo­herep i'atuepe aikotã urui'a­tu­ky'e mi'iria hap ko'i i'atu'e aru Tupana pe. Eimi­po­wyro ko'i tawa Kurintiu piaria i'atu'e.
2CO 9:15 — Tupana yt uwe i po'og hegyi'at ekai. Emiium iwato po'og torania kai uruto'e. Esa'yru wẽtup ok yn nakat etum pote Tupana urutu­wehum ewawi urupy'a pyi. Ma'ato yt karãpe i uruehay put'ok'e emiium Esa'yru etiat enoi yne hamo uruto'e. Pyno waku kahato En uruto'e are. Uruto ti Esa'yru mohey haria are. Pyno waku are uito Pauru.
2CO 10:1 Uito ti eimu'e hat sese sa'a­wy­'iwuat. Ha'a­wyte Tupana uipo­'oro ehowawi. Mi'i turan woro­ho­'o­nãpin perup'i puo aikotã Aika­'iwat Iesui ainãpin hap ewy aiky'e hap wywo. Sa'a­wy'i ihaky­'e'i haky­'e'i rakano uito areĩne'en eipy­'a­setpe turan po'og yi kape. Ma'ato koitywy areĩne'en pya eikai. Mi'i pote woro­ho­'o­nãpin uimiwan me haty wo uiwe­mõ­typot wywo.
2CO 10:2 Uimohit kahato irania'in eipy­'a­set­piaria. — Pauru yt Tupana mipo­'oro hin i ewei'e. Ahekat ko'i ky'ewi ne'i aimu'e ewei'e. Eheso sese rakaria eipe yt are'e teran i mi'iria pe i'atuewa pe. Mi'i pote miwan me yn are'e i'atuepe. Eiwe'eg wo o are. Mio tã ewei'e mot'i pote eheso are aru ehowa pe. Uiwy­ria'in tawa Kurintiu piaria ahẽtup ehupi uipy'a pyi haty wo yt uimohit rei'o ehehay wo.
2CO 10:3 Ta'i ei'e­wywuat re uito ipu'i rakat ikag nakat re. Ma'ato uhesaika hap yt tut i uipiit kaipyi. Tupana Pã'ãu kaipywiat rat ne'i wyti uhesaika hap toĩne'en. Mi'i kaipyi ne'i wyti uhesaika ahiag uka hamo.
2CO 10:4 Aito imohey haria watoĩ­ne'en aikotã surara ko'i ewy. Ma'ato aipo­ry'a ko'i tuweupiat ra'yn. Yt mesu­wa­rotiat wu'uka hap ewywuat i katu­pono po'og po'og hesaika i'atukai. Mi'i ko'i wywo Tupana aipo­wyro kahato mi'i ko'i yt naku i nug hat akit hamo. Aiminug sa'ag ko'i aikotã wanĩ­kaptia ewy topy­hu'at.
2CO 10:5 — Uito po'og irania'in kai e hat yt tuwa­nẽtup kuap kuap i Tupana kape. Mi'i hawyi Tupana topy­hu'at yt Tupana wo hin i. Aiwa­nẽtup sa'ag hap topy­hu'at Tupana ete. Ma'ato Tupana aimoe­saika mi'i wanẽtup sa'ag hap pun hamo. Mi'i hawyi Aika­'iwat Iesui yn toĩne'en aiwa­nẽtup hawe Aipo­rekuat no. Mi'i hawyi Aika­'iwat ehay yn aiwa­nẽtup hawe. I'ewyte aiwa­nẽtup hap aheha wywo Aika­'iwat timo­hãpyk kuap yne.
2CO 10:6 Ma'ato yt wati­ky­'esat i aimo­hãpyk hap pote mi'i hawyi Aika­'iwat Iesui ai'a­piheg katu­pono toikuap kahato aiwa­nẽtup hap ko'i. Toikuap kahato eipe Kurintiu piaria sio uimohit hap eiwa­nẽtup hap sio yt. Mi'i pote eiwe'eg wo o are.
2CO 10:7 Tukup­te'en aipy­'a­setpe — Uruto Aika­'iwat Iesui emiit sese e haria. Mi'iria pe uruto'e — Eipe Iesui emiit sese pote mi'i pote eweikuap meremo uruto ei'e­wy­wuaria te hap. Eiwe­ha'at ro urueko kape mi'i hawyi eweikuap uruto Aika­'iwat eropat haria sio sese hap.
2CO 10:8 Ha'a­wyte Tupana uru'airo uruepiat eimu'e hamo i'ewyte ei'a­pykok hamo. Yt aremõti hin i Tupana piat ui'airo hap ete are at ka'ap. Ma'ato tukup­te'en eipy­'a­setpe yt iky'esat i are'e — Tupana uru'airo ei'a­pykok hamo are hap. Ma'ato Tupana ti'airo uruto. Toikuap eiky'e hap yn uruto hap. Yt kat i eima'at hap urukai hap toikuap. Toikuap Tupana ehay etiat eimotag hap eimu'e tehay etiat hap. Mi'i pote uru'airo uruepiat ei'a­pykok hamo.
2CO 10:9 Uiwy­ria'in yt eweiken'ẽ uipupiat hamuat i pote mesuwat miwan atipo­'oro. Yt atipo­'oro mesuwat miwan ma'ato ehowawi miit'in mohit hamuat ne'i.
2CO 10:10 Irania'in eipy­'a­setpe yt uiky'e i haria — Pywo ti rat Pauru ai'a­piheg kahato tomiwan me i'atu'e. Eweikuap kat pote i'atu'e. Token'ẽ kahato aipy­'a­setpe to'e ahepiat hamo i'atu'e. Yt ipoity'i hin i i'ewyte yt ihay se hin i aimu'e turan i'atu'e.
2CO 10:11 Eiwe'eg wo o uwe uwe eipy­'a­setpiat to'e mio tã e urumohit haria. Uruto'e kuap ehowa pe aikotã urumiwan me hap ewy. Eiwa­tetup mi'i hap kape katu­pono urui'a­piheg kuap.
2CO 10:12 Tukup­te'en eipy­'a­setpe — Aito po'og irania'in kai i'atu'e to'ope haria. Ma'ato uruto yt i'atu­'e­wywuat hin i ko'i uruto'e. — Uruto po'og eikai i'atu'e te'e­ru­wa­nẽtup ahepiat pe. Mi'i tã wanẽtup haria yt i'atu­we'eg hin i katu­pono to'ope to'o­'a­kasa hap kaipyi te'e­ro'e — Uito po'og i'atu'e te'e­ru­wa­nẽtup hawe. Yt i'atu­we'eg hin i katu­pono yt te'e­ru­wa­nẽtup hin i sio i'atue­waku hap put'ok'e sio yt Aika­'iwat ewaku hap ok tã hap kape.
2CO 10:13 Uruto ei'a­pykok haria pytkai yt karãpe i uruto'e uruwa­nẽtup hawe — Uruto po'og eikai yt uruto'e i irania'in eipy­'a­set­piaria — Uruto po'og e haria ewy. Tupana uru'airo eheropat haria ewy yn. Yne uruewaku hap ko'i uruepiat sepap hap ko'i yt kat i tuwẽtem uruwe­kaipyi ne'i.
2CO 10:14 Sa'a­wy'i Tupana urupo­'oro ehowawi. Tomi­po­'oro Tosa­'yru Aipo­rekuat nuat ehay wakuat moherep hamo. Mi'i hawyi uruto'e ehowawi i'e hap ewy. Yt uruiwaure hin i eipe pytkai urutuwat wẽtup ywania kape.
2CO 10:15 Aikope aikope Tupana urupo­'oro mi'i hap kape yn urutuwat. Yt karãpe i uruipo­hari irania'in potmu'e ne'i urupot­mu'e wo. Irania'in te'e­ro'e ehepe — Eipe uruimu'e Pauru'in e'yianmete i'atu'e ehepe urupo­hari teran haype. — Eheso ewei'e o mi'iria pe. Ehehãite sese Iesui mohey hap ete hawyi — Pauru'in uru'a­pykok haria ewei'e. Mio tã ewei'e hawyi uruto yt kat hamo i ra'yn uruto'e i. Mi'i hawyi wẽtup ywania kape urutuwat yt ikuap i te haria kape.
2CO 10:16 Uiwy­ria'in tawa Kurintiu piaria i'atu kahato te irania'in ywania yt ta'a­tukuap i te Iesui etiaria. Mi'iria tukup­te'en ehe'yi ehetawa ekuekai po'og po'og pya wẽtup hy ete. Mi'i pote urutuwat teran yt ta'a­tukuap i te sehay wakuat Iesui etiat haria kape. Aikope yt uwe i te toto hap kape. Mi'i kape watuwat pote yt uwe i itote te'e­ro'e ahepe — Kat pote urumi­mu­'eria eweipo­hari teran ne'i yt i'atu'e kuap i ahepe watuwat yt ikuap i te haria kape hawyi.
2CO 10:17 Aikotã Tupana to'e miwan me hap ewy. — Karãpe woro­ho­'o­po­wyro kahato wakuat nug hap ete mi'i hawyi yt naku i ewei'e — Uito atunug uhesaika hap wywo uipo wo uito po'og kahato pote yt naku i mio tã ewei'e ne'i e. Po'og waku ewei'e — Tupana esaika hap wywo atunug waku ewei'e e miwan me.
2CO 10:18 Yt naku i wato'e — Uito po'og Tupana eropat hat sese pãi yt naku i wato'e. Po'og waku wahe­katup Tupana kaipyi — En uheropat hat sese e hap. Mi'i hap e'at pe yne ikuap Tupana wẽ kaipyi Tupana emiit sese hap. Mi'i hap e'at pe imimõ­typot no watoĩ­ne'en are uito eimu'e hat Pauru.
2CO 11:1 Pyno woro­ho­'o­kyry teran kurin mi'i pote eweiwa­nẽtup to aikotã yt uiwe'eg i hap kape heso'ok takat ewy.
2CO 11:2 Uiwy­ria'in tawa Kurintiu piaria areĩne'en ei'ywot ewy. Eipe eweikup­te'en uhaki'yt ewy yt karãpiat he'aito i te rakat ewy. Aika­'iwat Iesui toĩne'en aikotã uhaki'yt ehaytuwy ewy. Mi'i pote uheha­'y­wywi kahato ehete. Yt atiky­'esat i irania'in ne'i e'aito wo. Atiky­'esat Iesui yn e'aito wo. Ta'i uheha­'y­wywi kahato ehete aikotã Tupana iha'y­wywi hap ewy aikotã e'ywot ewy areĩne'en uhaki'yt are.
2CO 11:3 Sa'a­wy'i sese ahiag tima'at mana Ewa moi'ok wẽ pyi. Tehay wo totekyi Tupana kaipyi. Mi'i hap ewy hap pupi areken'ẽ kahato. Areken'ẽ kahato ahiag tihep eipe Aika­'iwat Iesui po pyi hap pupi. Aika­'iwat Iesui mohey hap yn aheha­kye­ra'at kuap. Mi'i pote wẽtup mohey hap yn toĩne'en Tupana kape.
2CO 11:4 Uimogyt kahato eipe katu­pono eweimohey yne miit'in mienoi ko'i. Put'ok'e wẽtup ok itote hawyi wẽtup Iesui etiat eimu'e yt uruepiat eimu'e hap ewy hin i. Mi'i hawyi — Pywo ewei'e kahato. E'e hap ewy ewei'e tope. Mi'i hawyi put'ok'e wẽtup i ra'yn hawyi to'e ehepe — Atum neran wẽtup pã'ãu ehepe. Mi'i hawyi — Waku mehĩ waku mimi ewei'e tope yt eiwe'eg hin i. Mi'i hawyi put'ok'e wẽtup ok wẽtup ehay enoi hat yt Aika­'iwat Iesui wakuat ewy hin i. Mi'i hawyi — Pywo ewei'e mi'i pote uimogyt sese eipe katu­pono — Pywo ewei'e yne eimu'e haria pe. Mi'i pote eiwe'eg wo o are ehepe.
2CO 11:5 — Tupana mipo­'oro sese uruto i'atu'e ehepe eimu'e hamo. Urupo­'oro uruto po'og Tupana mipo­'oro Pauru kai i'atu'e. I'atueso kahato ne'i katu­pono areĩne'en Iesui mi'airo sese ipotpo­'o­roria 12 ok takaria ewywuat areĩne'en are.
2CO 11:6 — Pauru ehay yt ikahu hin i i'atu'e. Ma'ato mi'iria pe Pywo are uhehay yt ikahu i eiwat ewy ma'ato uhehay hesaika kahato einãpin Tupana we'eg hap etiat hamo. Yne apo'ei'e hap atiwesat kuap yne. Mi'i hap uiwe'eg hap Tupana kaipyi eweikuap kahato ra'yn.
2CO 11:7 Ha'a­wy­tepyi te mesup te woro­ho­'o­mu'e eipe sehay wakuat Iesui etiat. Yt wẽtup mo i woro­ho­'o­mu'e ha'up ete. Mi'i hawyi — Pauru piat aimu'e hap yt kat hamo i atum ha'up kat pote yt ihay se i pote ewei'e. Ta'i uimohit kahato uhegyi'at hap ete. Yt kat hamo i aremohit eipy­'a­setpe. Po'og waku ha'up ete aru woro­ho­'o­mu'e mi'i hawyi uimõ­typot haria wo eweikup­te'en.
2CO 11:8 Ha'a­wyte woro­ho­'o­mu'e at ka'ap yt kat sa'up ete i ma'ato eweikuap uwe tum eimu'e hap sa'up. Pyno ahenoi ehepe. Irania'in Iesui mohey haria aikope aikope te'e­ru­wa­'a­tunug hap kaipyi mi'iria tipo­'oro uhowawi eimu'e hamuat sa'up. Areĩne'en sero'ok'e hat ewy katu­pono i'atuwat i'atu­sa'up kaipyi areĩne'en eipy­'a­setpe. Yt kat i ewetum uhepe.
2CO 11:9 Yt karãpe i areĩne'en neran ahẽtup hẽtup kat ko'i kat ko'i eikaipyi teran. Sa'a­wy'i areĩne'en eipy­'a­setpe turan uiwe­kaipyi arenuk. Mi'i hawyi uhesy'at eipy­'a­setpiat areĩne'en turan tõ'ẽ kahato imohey haria yi Masẽ­tunia piaria uhowawi kat ko'i kat ko'i ta'a­tumiium ko'i erut hamo. Mi'i kaipyi areĩne'en eipy­'a­setpe yt kat i ahẽtup ehepe. I'ewyte yt ahẽtup i aru ehepe.
2CO 11:10 Uiwa­nẽtup hawe — Waku kahato ati'a­tu­mu'e yt kat sa'up ete i. Mi'i pote yt kat i ahẽtup uimi­mu­'eria ko'i kaipyi. Yt areĩne'en i ei'okpe tote yi Asia pe areĩne'en eipy­'a­setpe turan. Yt uheso hin i karãpe are'e yt kat sa'up ete i woro­ho­'o­mu'e are ehepe. I'ewyte Aika­'iwat Iesui tikuap yt uheso i hap kat pote toĩne'en uipy'a pe.
2CO 11:11 Mi'i hawyi irania'in te'e­ro'e eipy­'a­setpe to'ope uruetiat. — Pauru yt aiky'e i mi'i pote yt toiky­'esat aikaipyi kat ko'i kat ko'i. Pywo ti rat Tupana tikuap woro­ho­'o­ky'e kahato uhepiat hap.
2CO 11:12 Eweikuap kat pote yt ahẽtup i eikai eimu'e hap sa'up. Pyno ahenoi ehepe. Tukup­te'en eipy­'a­setpe — Eimu'e haria Pauru ewy kahato i'atu'e ehepe ma'ato yt pywo pe i katu­pono ehekat ko'i ky'ewi yn eimu'e. Waku apo'e­wei'e i'atuepe — Eipe Pauru ewy ewei'e pytkai kat pote ewehẽtup ha'up urukaipyi ewei'e o i'atuepe. Mi'i hawyi yt eiwesat kuap i kat pote yt ui'ewy i pote. Mi'i pote yt karãpe i ahẽtup eikaipyi ha'up. Yt urusai­pe­piaria hin i mi'iria.
2CO 11:13 — Pyno Tupana mipo­'o­roria sese uruto i'atu'e ehepe ma'ato yt pywo pe i i'atu'e ehepe mi'i tã ma'ato eima'at reran haype. Ta'i te'e­ru­we­po­'oro ei'akag wo te'e­ro'e hamo — Ta'i 12 ok takaria ewywuat ko'i uruto i'atu'e. Aika­'iwat Iesui potmu­'eria ko'i uruto i'atu'e eima'at reran haype. Iesui urupo­'oro ehowawi i'atu'e ehepe yt pywo pe i i'atueso ne'i.
2CO 11:14 Nimo pyi te ahiag tima'at kuap miit'in. Tuwe­mo­herep miit'in me hẽtyhot hap ewy — Uito Tupana mipo­'oro tehay moherep ehepiat hamuat e yt pywo pe i. I'ewyte ahiag emiit ko'i aikotã ta'a­tu­ka­'iwat ewy tukup­te'en eipy­'a­setpe ui'e hap ewy.
2CO 11:15 Ahiag mẽpyt'in ko'i aikotã ta'a­tu­'ywot ewy tukup­te'en. Aima'at kuap to'ywot ewy. I'atuwẽ pyi — Uruto waku nug haria kahato i'atu'e. Ma'ato i'atu­minug yt i'atuehay ewy hin i tuwẽtem. Mi'i pote meremo yt watikuap i sio aima'at sio yt hap ma'ato meiũran watikuap. I'atu­'a­piheg hap e'at pe Tupana timo­herep wuat'i ehamo i'atu­minug sa'ag ko'i. Mi'i hap e'at pe i'atu­'a­piheg hap put'ok'e i'atu­minug sa'ag hap ok tã.
2CO 11:16 — Pauru ti yt iwe'eg i sese rakat i'atu'e. Uruto po'og i'atu'e. Are pãi yt karãpe i are'e — Uito po'og are. Ma'ato are'e teran pote are'e kuap. Pyno ipoity'i ete aremo­wato kuap are'e teran irania'in ewy pote ma'ato ahenoi hawyi yt uiwe'eg hin i hat ewy areĩne'en. Ma'ato i'ewyte are'e hawyi waure wo o eweikup­te'en ui'e hap ete yt iwe'eg i rakat areĩne'en pote.
2CO 11:17 Karãpe ahenoi uiminug wakuat ete yt uiwe'eg hin i katu­pono Tupana yt tiky­'esat i watu­we­mõ­typot hap.
2CO 11:18 Ma'ato eipy­'a­set­piaria eimu'e haria te'e­ru­we­mõ­typot yn ta'a­tuehay wywo — Uruto po'og torania kawiat Tupana mipo­'oro ko'i i'atu'e. Yt pywo hin i are — Uito po'og eikai. Yt uiwe'eg hin i mio tã are. Ma'ato i'atu'e hap ewy are'e yt iwe'eg i rakat ewy.
2CO 11:19 Uiwy­ria'in Kurintiu piaria — Aito po'og aiwe'eg kahato torania kai ewei'e eiwo­'ope. Mio tã ewei'e kat pote eweiky­'esat eima'at reran haria yt i'atu­we'eg i rakaria. Yt eiwe'eg hin i mi'i tã ewetunug mote.
2CO 11:20 — Eipotpap to uruemiit no yt kat sa'up ete i i'atu'e ehepe haty wo. Mi'i hawyi — Urutunug ei'e hap ewy mehĩ'in mimi'in ewei'e eima'at haria pe. Yt eiwe'eg hin i katu­pono ehekat ko'i yne ta'a­tusat. Ihaky­'e'i rakaria wo eweikup­te'en eimu'e hap sa'up mo ewetum yne hawyi. — Uruto po'og eikai i'atu'e hawyi — Pywo ewei'e ehowa petek turan eimohit hamo. Mi'i ta'a­tunug yne ehete pytkai eipe — Uru'a­pykok haria akag ewei'e. Urumu'e haria sese eipe ewei'e i'atuepe yt eiwe'eg hin i.
2CO 11:21 Uito yt mi'i tã hin i areĩne'en eipy­'a­setpe turan. Eimõ­typot hat areĩne'en. Woro­ho­'o­mõ'ẽ aikotã eiwy sese ewy. Mi'i pytkai uimohit uhehay ete. Yt karãpe i atunug kuap i'atu­minug ehetiat ewy. Uhesaika hap yt put'ok'e i mi'i sa'ag nug hamo. Yt te'e­ro­ken'ẽ hin i te'e­ru­we­mõ­typot hamo. Pyno ahã'ãg i'ewyte uhewaku hap moherep hamo.
2CO 11:22 — Uruto po'og i'atu'e. Uruikuap Iuteuria pusu i'atuehay pot'i i'atu'e. Uito po'og atikuap kat pote uipusu sese pote. — Ase'i Isareu emiari­ru'in sese uruto i'atu'e. Uito i'ewyte Isareu ywania te wy are. Urue'a­se'i sa'a­wy­'iwuat eimia­riru sese ko'i uruto i'atu'e. I'ewyte uito Aparãu saipepiat sese wy are.
2CO 11:23 — Uruto Aika­'iwat Iesui eropat haria sese i'atu'e. Ma'ato uito po'og i'atukai are. Mio tã pote yt iwe'eg i rakat mi'iria wemo­wato haria ewywuat areĩne'en. Yt uiwe'eg hin i ma'ato pywo pe are'e po'og Aika­'iwat emiit areĩne'en i'atukai. Uito po'og i'atukai uipotpap. Yt uwe i uhete put'ok'e Aika­'iwat potpap nug hap ete. Yt uiwe'eg hin i mio tã are ma'ato pywo pe are'e. More­kuaria uipyhyp po'og mi'iria kai uhehay Iesui etiat pyhyp teran haype. Yt atikuap karania wo ui'ahyk ahyk itote yt ta'a­tu­ky­'esat uhehay Iesui etiat pote. Ui'atoiat uiku­'uro turan karania wo.
2CO 11:24 Sa'a­wy'i areto Tupana ehay moherep hap upi turan uito ui'ahyk ahyk kahato Iuteuria yt mohey i haria 5 wo ui'ahyk ahyk. Pywo ti rat 39 wo ui'ape ete wo'o­'ahyk hap 9 haity sa'ag kahato rakano uiku­'uro hap kape. Mi'i hap ewy 5 tawa pe Iuteuria tunug uhete.
2CO 11:25 Haty kahato uhete ui'ahyk ahyk hap wia'yp mo. Mye'ym mo Huma­nu'in tunug uhete hawyi ui'atoiat. Wẽtup e'at pe uimak mak nu ko'i wo ui'auka hamo. Uhewyry y'y wato totiat yara wato puat turan mye'ym wo yara wato uito hap ywytu uato ti'a­pymin nu ete pik'e yne. Mi'i hawyi y'y wato pe areĩne'en wẽtup ewãtym i'ewyte wẽtup e'at y'y wato ihy pya kahato rakat pe.
2CO 11:26 Uhero kahato uhewyry kahato Tupana ehay moherep hamuat pote. Aho'opot kahato mu'ap upi y'y upi ihy esaika kahato pote. Sero'ok'e haria ui'auka teran yne uhewyry hap upi Aika­'iwat ehay moherep hamuat turan. I'ewyte ui'auka teran Iuteuria. I'ewyte irania'in ywania ui'auka teran. Tawa wato piaria uikat ui'auka hamo. Niatpo kahato uhewyry hap atipuẽti. Areken'ẽ kahato areto ga'apy koro kapiat turan sio uiku­'uro sio yt. Y'y wato uipo­ha­ra'i kahato areto sakpo turan. Mu'ap upi te'e­ro'e uhepe — Uruto Iesui mohey haria i'atu'e ma'ato yt pywo pe i uima'at reran ui'auka hamo ne'i.
2CO 11:27 Uhero kahato uhewyry kahato pote uhaty'i kahato. Karania ewãtym ne'i yt areket kuap i kat pote areken'ẽ kahato sio uiket kai ui'auka. I'ewyte uhesy'at kahato areĩne'en yt kat i mi'u pote. Are'y­'utui kahato ma'ato yt kat i y'y areto yahig wato ekuekai turan. Karania e'at yt kat i atu'u. Uhena'ak kahato wywo uhewyry yt kat i uhe'og yt kat i uhesokpe ko'i uimo­sakup hamo.
2CO 11:28 Pywo ti rat aho'opot kahato Iesui ehay sytpok hamuat hap upi. Ui'a­kag'aia kahato uhewyry hap upi. Arewa­nẽtup kahato irania'in imohey haria irania'in tawa piaria kape sio ta'a­tu­mohey te sio yt hap kape sio tu'uka to'ope sio yt sio i'atue­hãite sio yt hap ko'i kape yn arewa­nẽtup. Uhehat'at i'atu­ky­'ewi. Yne e'at yne i'atu­'a­pykok hano areĩne'en uiwa­nẽtup hawe uipy'a pe. Atiky­'esat i'atuehay Iesui mohey hap ete yn uiwa­nẽtup hap.
2CO 11:29 Karãpe wẽtup ok Iesui mohey hat i'aparap mi'i hawyi ahaty'u kahato uhete haty kahato. Areto teran ipowyro hera­'aipok Tupana kapiat hamo. Karãpe wẽtup ok Iesui mohey hat totoiat irania'in towy­ria'in imohey haria wẽtup ok i'atu­py­'a­setpiat ihay sa'ag tuete pote mi'i hawyi areto teran meremo wo'o­wese hap nug yt iwese rakat i wywuat hamo.
2CO 11:30 Ta'i — Uruto po'og Pauru kai i'atu'e eimu'e haria. Mi'iria yt ati'a­tu­wesat teran i wen ma'ato ati'a­tu­wesat. Wuat'i ete po'og areĩne'en i'atukai ma'ato uhehay yt iwe'eg i rakat ewy. Yt karãpe i ahenoi teran uhewaku hap mi'iria ewy. Po'og waku ahenoi miit'in me aikotã uhewaku hap yt put'ok'e hin i Aika­'iwat Iesui ewaku hap ete. Mi'i hap po'og waku ahenoi miit'in me. Waku yt heso'ok takat ewy i uhehay uito are.
2CO 11:31 — Tupana waku kahato En. Wuat'i e'at pe etikuap aikotã aho'opot Esa'yru ehay moherep hamuat. Etikuap yt uheso i mesuwat uimiwan me hap. Esa'yru Aika­'iwat i'ewyte ikuap yt uheso i hap.
2CO 11:32 Yt uheso i sa'a­wy'i areĩne'en tawa Tamaku pe turan. Toĩne'en itote morekuat Areta. Mi'i ti ipo'oro tesu­ra­ra'in ui'a­piheg hamo. Mi'i hawyi sura­ra'in tipyhyp yne tawa wato pyhyp hap yi pype ko'i uipyhyp hamo. Mi'i hawyi tawa ewato iheg me toĩne'en. Yt arẽtem kuap i.
2CO 11:33 Mi'i turan are'e — Ui'auka aru are. Ma'ato uiwy­ria'in uheha­kye­ra'at. Era'apyk meiũwat yrysakag wato pe i'atu'e. Mi'i hawyi ywaiti pyi uimo­'apyk tawa wato pyhyp hap ekuekai haity ete yi kape. Getap hit ywaiti piat kaipyi oken'ypy hit kaipyi yi kape. Mi'i hawyi morekuat Areta esura­ra'in yt uipuẽti hin i. Yt uheso i rat. Tupana tikuap yt uheso i hap. Mi'i hap kaipyi eweikuap yt uito eimu'e haria ewy i hap uito ti Pauru.
2CO 12:1 Uiwy­ria'in tawa Kurintiu piaria uiminug wakuat ko'i yt atimo­herep teran i ehepe ma'ato irania'in mi'i tã yn ta'a­tunug. Mi'i hawyi yt ahenoi uhepiat waku nug hap pote yt uimõ­typot hin i. Pyno ahenoi uhepiat waku nug hap pote yt uiwe'eg hin i. Eima'at haria eimu'e haria — Uruto po'og wuat'i kai i'atu'e katu­pono Tupana ehay kahato uruepe urumu­'etu i'atu'e. Ma'ato uito po'og are. Yt uiwe'eg hin i mio tã are'e ma'ato uheha wo ara'a­kasa kahato Aika­'iwat.
2CO 12:2 Sa'a­wy'i 14 anu e'yianmete uheha wo ara'a­kasa aikope Tupana toĩne'en hap kape. Wẽtup e'at pe uhehay Tupana wywo mesuwe. Mi'i turan put'ok'e kahato Aika­'iwat Pã'ãu uhete. Mi'i hawyi uhereto atipy kape waikiru ekuekai. Yt atikuap i sio uipiit wywo uhereto sio uipã'ãu yn ma'ato uhero­kosap atipy kape. Atikuap kahato mesuwat ui'e hap pywo kahato kat pote ara'a­kasa pote uheha wywo.
2CO 12:3 Pyno are'e i ra'yn yt atikuap sio uipiit wywo areto atipy kape sio yt. Mi'i hap Tupana yn ikuap.
2CO 12:4 Sa'a­wy'i areto ywyhig ekuekai. Mi'i hawyi waikiru sakpo Tupana Pã'ãu uhero­kosap Tupana eiam sese kape. Ikahu kahato itote aikotã Tupana mikoi ga'apy ewy itote. Atikuap sehay yt miit'in mikuap ok tã i sehay ikahu kahato. — Pyno ahenoi aru mesuwat sehay ikahu rakat miit'in yi totiaria pe are Tupana pe ma'ato uiwesat — I'atu­pusu yt put'ok'e i ikahu hap moherep hamo e uhepe.
2CO 12:5 Pyno ara'a­kasa yt uwe i te akasa hap kape. Mi'i hawyi uito po'og atikuap torania kai wen ma'ato — Uito po'og yt are'e i. Po'og waku are'e — Uhewaku hap yt put'ok'e hin i Uika­'iwat ewaku hap ete. Yt karãpe i uhewaku hap put'ok'e Uika­'iwat ewaku hap ete pãi. Ma'ato uhewaku hap uimõti re uiwa­nẽtup hawe.
2CO 12:6 Yt naku i are'e — Uito Iesui mohey po'og torania kawiat are. Pywo kahato uito are'e kuap ma'ato yt kat hamo i are'e mio tã are. Are'e mio tã pote yt uiwe'eg hin i. Mi'i pote karãpe are'e teran tuereto hawyi arewa­nẽtup hawyi yt naku i arewa­nẽtup. Yt uiwe'eg hin i are'e mio tã pote uiwa­nẽtup hawe. Yt naku i kahato miit'in uinug Tupana are uiwepe. Uhewaku hap waku miit'in te'e­ru­wa­nẽtup uhowawi uito ta'a­tu­'e­wywuat re hap are uiwepe. Waku uikuap aikotã uhewaku hap ok tã ma'ato yt naku i uinug po'og.
2CO 12:7 Uhewaku hap kai ara'a­kasa Tupana ieĩne'en hap hawyi Tupana to'e uhepe — Pyno era'a­kasa yne ra'yn mio mehĩ e. Areĩne'en kahato erenug po'og ewato hap kai tet pupi e uhepe. Areken'ẽ ere'e aru — Uito po'og irania'in kai kat pote ara'a­kasa ra'yn atipy sese uito ere'e aru e'e hap pupi e. Mi'i pote woro­mo­wa­tetup woro­mohit irania'in py'a­setpe. Atum aru epe epoha­ra'i hap aikotã e'ahu hap ewy haty kahato mi'i e Tupana uhepe. Mi'i hawyi Tupana e hap ewy put'ok'e uhete ahiag kaipyi ui'ahu hap uiwe­mo­wato hap monik hamuat.
2CO 12:8 Mi'i hawyi sat'e i'e hap uhete haty are. — Tupana haty kahato are. Etihep to uipiit pyi uimo­so­'opot hap are. Ma'ato — Yt e Tupana uhepe. Mi'i hawyi tokosap mot'i hawyi ahẽtup i ma'ato yt e te wy hawyi tokosap mio tã ne hawyi ahẽtup i ma'ato yt e te wy.
2CO 12:9 Mi'i hawyi to'e Tupana uhepe — Yt karãpe i atihep epiit piat e'ahu hap e. Yt karãpe i epiit hesaika i ra'yn ma'ato mi'i pytkai waku ereĩne'en. Ma'ato mi'i pytkai yt karãpe i woro­'atoiat en. Yt karãpe i yt woro­ky'e i ra'yn e. Karãpe irania'in te'e­ra­'a­kasa esaika hap kapiat hawyi te'e­ro'e — Yt topiit kaipyi i Pauru hesaika hap i'atu'e ma'ato Tupana imoesaika. Mi'i pote epiit yt hesaika i hap kaipyi uimõ­typot sese hap topy­hu'at e Tupana uhepe.
2CO 12:10 — Pyno atiky­'esat e'e hap Tupana are. Atiky'e emiky­'esat ewy. Waku kahato uipiit perup hap sio emõtypot hap topy­hu'at mi'i kaipyi. Ta'i waku Tupana uhesaika hap yt tut i uipiit kaipyi. Mi'i pote yt aremohey kuap i uipiit esaika hap ete. Mi'i hawyi aru po'og hesaika sa'a­wy­'iwuat kai rakano areĩne'en katu­pono Esa'yru emipo­'oro Urupo­rekuat nuat yn uimoe­saika tesaika sese hap wywo. Po'og po'og uhesaika sa'a­wy­'iwuat kai are Tupana pe. Mi'i hawyi koitywy uipiit yt uhesaika i hap uimo­wepit kahato kat pote mi'i pytkai po'og uhesaika sa'a­wy­'iwuat kai. Yt uipiit kaipyi i uhesaika hap ma'ato Aika­'iwat esaika hap kaipyi uhesaika. Karãpe put'ok'e miit'in miat uimohit hap i'ewyte uhatek hap put'ok'e turan po'og uimo­wepit hap atipuẽti. Karãpe yt imohey i haria uhaty'i haty'i i'ewyte karãpe yt kat i ikahu uhete Iesui mohey hano areĩne'en mote i'ewyte mi'i hap e'at pe uiwe­saika kahato te yt uhesaika hin i pytkai katu­pono uimoe­saika kahato mi'i hap e'at pe Aika­'iwat Iesui tesaika hap wywo. Mi'i pote uiwepit kahato.
2CO 12:11 Uiwy­ria'in tawa Kurintiu piaria yt uimõ­typot hin i Tupana miky­'esat ewy kat pote sa'a­wy'i Tupana ui'airo tehay wakuat moherep ehepiat hamo. Iesui potpo­'o­roria 12 ok takaria ewywuat sese areĩne'en. Mi'iria wakuat sese ewywuat areĩne'en Iesui potpo­'oro wo. Uito wakuat mi'iria ewywuat are. Yt uiwe'eg hin i are'e mio tã are ma'ato uimohit pote mio tã are.
2CO 12:12 Sa'a­wy'i areĩne'en eipy­'a­setpiat turan Tupana timo­herep kahato uipiit pyi tesaika hap. Toiky­'esat kahato eipe eweikuap uito imipo­'oro sese hap tehay sese moherep hamuat. Mi'i pote tutunug kahato uipiit pyi yt miit'in mikuap ko'i e. Ehehamo toimo­herep kahato kat ko'i kat ko'i sepap Tupana yn inug kuap hap ko'i miit'in mowa­nẽtup kahato hamo waku nug hap ko'i ete. Mi'i ko'i kapiat ewei'a­kasa hawyi ewei'e — Pauru ti Tupana mipo­'oro ahowawiat aimu'e tehay wakuat etiat hamo ewei'e eiwo­'ope. Karãpe ewei'a­kasa yt uhesaika hap kape i hawyi ewei'e uhepiat pe — Pywo ti rat Pauru Tupana mipo­'oro sese katu­pono toimo­herep Pauru piit pyi yt hesaika i pytkai ewei'e.
2CO 12:13 Uiwy­ria'in tawa Kurintiu piaria woro­ho­'o­ky'e kahato eipe aikotã ati'a­tu­ky'e irania'in Iesui mohey haria aikope aikope gupte'en haria hap ewy woro­ho­'o­po­wyro eipe. Yt uwe i po'og eiwo­'o­'e­wy­'ewy. Ma'ato irania'in tum ehepe ta'a­tumiium ko'i. Sa'a­wy'i ewetum kat ko'i kat ko'i ma'ato wãi'are ne'i. Yt areĩne'en neran i ei'okpe tote. Uhekat kaipyi arenuk hawyi eimõ­py­'ahak hano areĩne'en. Pyno yt uiwepyi i waure wo o eweikup­te'en uhepiat eimõ­py­'ahak hap kai.
2CO 12:14 Pyno areto i ra'yn ehowawi ehepiok hamo. Sa'a­wy'i areto typuo ra'yn koran wuat areto hawyi mye'ym mo ra'yn areto. Ma'ato put'ok­'are eipy­'a­setpe turan yt atiky­'esat i areĩne'en ei'okpe tote. arenuk uhekat kaipyi aikotã sa'a­wy'i are'e hap ewy. Eweikuap kat pote pyno ahenoi. Yt atiky­'esat hin i eheka­re'en ko'i. Ma'ato woro­ho­'o­ky­'esat eipe aikotã uha'y­ru'in uhaki­'yt'in hap ewy. Aikotã yt naku i wahẽtup aha'y­ru'in ahaki­'yt'in me mi'i kare'en ko'i. Mi'i hap ewy yt ahẽtup i ehepe. Waku po'og ei'y­wot'in i'ewyte tutum kare'en ko'i hap ewy.
2CO 12:15 Woro­ho­'o­ky'e kahato eipe aikotã uha'y­ru'in uhaki­'yt'in sese ewy woro­ho­'o­ky'e. Aikotã ei'ywot ewy areĩne'en pãi are. Ta'i uimi'at uiko kaipyi uimie­reko kaipyi woro­ho­'opoi hap ewy atunug itote. Ta'i areĩne'en eipy­'a­setpe eimu'e Iesui etiat haype yt kat sa'up i ete woro­ho­'o­mu'e katu­pono ei'ywot ewy areĩne'en. Uipoi ro yt are'e hin i katu­pono aikotã ai'y­wot'in yt karãpe i — Eweium no sa'up uhepe hawyi woro­ho­'opoi yt i'atu'e i. Uito ti ety ewy pote ati'a­tu­moma yne uhekat ehepe eipo­wyro hamo woro­ho­'o­ky'e kahato haype. Ma'ato mi'i pytkai yt uiky'e hin i eipe. Po'og po'og ne'i yi kape uiky'e hap woro­ky'e po'og po'og pytkai are. Ma'ato mi'i pytkai po'og po'og atum aru ehepe uimẽ­pyt'in eipe pote.
2CO 12:16 Yt areĩne'en neran hin i ei'okpe tote i'ewyte yt areĩne'en neran i eheka­re'en kaipyi ne'i. Irania'in eipy­'a­set­piaria te'e­ro'e uhepiat — Pauru yt sẽtup sẽtup e hat hin i i'atu'e. Ma'ato eiwe'eg wo o katu­pono eima'at kuap kahato. Towese hap wywo wyti einug teropat haria wo hawyi ehekat yne totat towano i'atu'e ehepe uhewa­nĩ­kaptia.
2CO 12:17 Mio tã i'atu'e i'atueso kahato ne'i uhepiat pe. Karania wo uhemiit atipo­'oro ehowawi yt wẽtup mo i eima'at eheka­re'en ky'ewi are. Mio tã e haria pe yt karãpe i atipo­'oro wẽtup ok uhemiit eheka­re'en ẽtup hamo.
2CO 12:18 Sa'a­wy'i atipo­'oro mehĩ Titu ehowawi wẽtup ok imohey hat wywo. Mi'i hawyi tuwat ra'yn eiky'e haype. Yt karãpe i mehĩ Titu ehekat toiky­'esat. Katu­pono mehĩ Titu hawyi uito urutu­kup­te'en wẽtup miit ewy yn urutu­kup­te'en wẽtup wanẽtup hap yn uruto. Uito woro­ho­'o­ky'e i'ewyte mehĩ Titu eiky'e aikotã woro­ho­'o­ky'e hap ewy te eiky'e. Uhaipepiat sese mi'i. Uheko ewy te i'ewyte mi'i yt karãpe i eima'at.
2CO 12:19 Yt karãpe i eipy­'a­setpe urutu­kup­te'en turan paa'u­ru­to'e — Wati­'a­tu­ma'at mi'iria yt uruto'e i. Yt urueso i rat i'ewyte Tupana tikuap yt urueso i hap. I'ewyte Aika­'iwat Iesui tikuap yt urueso i hap. Katu­pono yne uruminug ko'i eimoe­saika imohey hap etiat hamo. Mi'i pote yt urueso i.
2CO 12:20 Pyno areto i ra'yn wyti ehowawi aikotã itotiat hap kuap hamo. Areken'ẽ kahato put'ok­'ui'e turan eiwu­'uka hap pupi. Yt woro­ho­'o­puẽti teran i yt eiwo­'o­wese i turan ne'i. Ma'ato woro­ho­'o­puẽti eiwo­'oehay ewãi ewãi turan ne'i pote areken'ẽ kahato areĩne'en ei'a­piheg hano ne'i tet pupi. Yt naku i woro­ho­'o­puẽti eiwo­'oe­ha­'y­wywi ehekat ko'i etiat turan ne'i. I'ewyte eiwo­'ope eimo­py­'ahak turan ne'i yt naku i woro­ho­'o­puẽti yt eiwo­'o­wesat i eiwo­'ope turan ne'i. I'ewyte yt naku i eiwo­'oewa pe eiwo­'o­wese ma'ato eiwo­'o­'okpe wo ehehay sa'ag hap ete turan ne'i woro­ho­'o­puẽti hap. Yt naku i woro­ho­'o­puẽti eiwo­'o­weu­ka'i turan ne'i. I'ewyte eiwo­'o­hoiro hoiro turan ne'i. Areken'ẽ wu'uka hap etiat — Uito po'og eikai ei'e turan ne'i.
2CO 12:21 Uiwy­ria'in areken'ẽ te wyti uiwa­nẽtup hawe aikotã aru eweikup­te'en areto turan hap pupi. Yt woro­ho­'o­puẽti teran i ehewaire waire turan ne'i. Mi'i tã ewetunug put'ok­'are turan ne'i pote aremõti sese Tupana ehamo. — Tupana yt areto teran i. Yt ati'a­tu­puẽti teran i tawa Kurintiu piaria Esa'yru mohey haria i'atue­waire waire turan ne'i katu­pono uimõti te hap sese topy­hu'at. Mi'i hawyi arewak uiwy sese iku'uro hap ewy. Tupana atiky­'esat ta'a­tu­'atoiat yne to'opiit ky'esat hap ko'i yt naku i hap ko'i. Tupana yt atiky­'esat i areto emohey haria Kurintiu piaria kape uimohit hap yn itote turan uimõti te hap yn pote are Tupana pe. Uito ti Pauru are.
2CO 13:1 Uiwy­ria'in tawa Kurintiu piaria areto i ra'yn ehowawi ehepiok hamo. Sa'a­wy'i areto typuo ra'yn koran wuat areto hawyi mye'ym mo ra'yn areto. Sa'a­wy'i Tupana to'e miwan me — Yt naku i eiwe­mohit wẽtup ok okpe wo. Mi'i ti minug yt naku i ewei'e eiwo­'ope yt eweikuap i te sio tutunug pywo sio yt hap yt eiweikuap i te pytkai e. Yt eweimohey tei'o meremo wẽtup ok yn ta'a­kasa wẽtup ok minug sa'ag kapiat hat e. Ma'ato mye'ym ok te'e­ra­'a­kasa wẽtup ok minug sa'ag kapiat hawyi waku eweikaykay sa'a­wy'i wẽtup ok. Mi'i hawyi waku wẽtup ok eweikaykay. Mi'i hawyi wẽtup i ra'yn eweikaykay mi'iria henoi hamo. Mi'i hawyi ta'a­tu­henoi te'e­ra­'a­kasa hap i'ewyte ta'a­tukuap kahato pywo hap to'o­'e­wy­'ewy ta'a­tu­henoi pote waku eweimohey. Ma'ato yt to'o­'e­wy­'ewy i ta'a­tu­henoi pote yt naku i eweimohey e. Ma'ato yt eweipuẽti mye'ym ok pote waku eweimohey typy ok to'oehay ewy ta'a­tu­henoi pote e Tupana miwan me sa'a­wy­'ite.
2CO 13:2 Sa'a­wy'i akasa haria henoi uhepe iminug sa'ag ko'i areĩne'en eipy­'a­setpe turan. Mi'i hawyi ara'aipok hawyi ta'a­tu­henoi i ra'yn uhepe. Mi'i hawyi ta'a­tu­henoi uhepe typuo ra'yn. Meiũran aru ara'aipok i ra'yn ehowawi mi'i hawyi ta'a­tu­henoi uhepe mye'ym mo ra'yn iminug sa'ag ta'a­tu­henoi to'o­'e­wy­'ewy mi'i hawyi atimohey ra'yn. Mi'i hawyi woro­ho­'o­'a­piheg na'yn. Sa'a­wy'i eiwe'eg wo o are. Mi'i hawyi ara'aipok hawyi are'e i — Ewei'atoiat ro eiminug sa'ag ko'i koitywy. Woro­ho­'o­'a­piheg aru yt eweitoiat i pote are ehepe. Koitywy mye'ym mo ra'yn woro­ho­'oewãi. Yt areĩne'en i eipy­'a­setpe wen ma'ato eiwe'eg wo o woro­ho­'o­'a­piheg aru. Yt uipohep hin i ei'a­piheg hap ete haty ewei'e pytkai.
2CO 13:3 Toĩne'en eipy­'a­setpe — Yt uruikuap i Pauru sio Aipo­typot mipo­'oro sio yt watikuap i sio Iesui wẽ pyi sio yt. Eiwe'eg wo o katu­pono Aipo­typot wẽ wo kahato areĩne'en hesaika kahato. Aika­'iwat ei'a­piheg kuap. Ta'i ei'a­piheg haty wo uhehay kaipyi are'e hawyi.
2CO 13:4 Ta'a­tu­'auka Aika­'iwat turan yt kat i to'e paa'e ne'i. Yt toimo­herep hin i tesaika hap. Yt toi'a­tu­poepyk hin i. Yt kat i hesaika hap iku'uro turan ma'ato Tupana timoieĩ­ne'en i tesaika wo. Koitywy Tupana esaika hap yne eiam topy­hu'at. Sa'a­wy'i urutu­kup­te'en eipy­'a­setpe turan aikotã Aika­'iwat iku'uro turan yt hesaika hin i turanuat ewy wato­py­hu'at. Ma'ato meiũran uruta­'aipok ewawi hesaika rakaria ewy urutu­kup­te'en ma'ato Tupana esaika hap urupiit pe. Eiwe'eg wo o Tupana ei'a­piheg kuap kahato.
2CO 13:5 Waku ewei'e eipy'a pe sio — Uito Tupana Sa'yru mohey hat sese sio yt waku ewei'e. Waku watikuap kahato aipy'a pe sio Tupana sa'y­ru'in sese uito sio i'ewyte sio Tupana saki­'yt'in sese uito sio yt hap. Ma'ato yt eweikuap i te pote eiwe'eg wo o. Yt naku i wato­py­hu'at piku piku ko'i ewy ne'i yt i'ywot wekuap takaria i ewywuaria wo ne'i. — Uruikuap kahato Tupana Uru'ywot sese hap. Uruikuap Iesui mohey haria sese uruto hap.
2CO 13:6 Atiky­'esat kahato eweikuap uruto Tupana Sa'yru mipo­'oro ko'i sese hap. — Yt heso rakaria i waku ewei'e kuap uruetiat.
2CO 13:7 Tupana are — Etihep to tawa Kurintiu piaria i'atueko sa'ag myi i'atu­minug sa'ag po pyi are. Yt urutuwat teran i i'atue­wawi epiat i'atu­'a­piheg hap nug uruepiat hamo are. Yt uruimo­herep teran i esaika hap i'atu­'a­piheg hamo ne'i. Irania'in itote yt urumohey i emipo­'oro uruto hap. Etunug mi'iria ta'a­tu­mohey uruto emipo­'oro sese i'atu'e hamo. Yt naku i urui'a­tu­'a­piheg mi'iria esaika wo are Tupana pe mesuwe.
2CO 13:8 Uruto Tupana mi'airo sese tehay pywo piat moherep ehepiat hamo. Yt uheso i rat. Pywo rat uru'e hap. Ma'ato — Yt pywo rakat i rat ewei'e pote yt eweimohit kuap i urumienoi kat pote Tupana mipo­'oro ko'i sese uruto. Po'og waku ewei'e — Pywo kahato ei'e hap waku ewei'e. Pywo ewei'e hawyi po'og esaika hap topy­hu'at katu­pono pywo e haria sok wo watu­kup­te'en.
2CO 13:9 Uruiky­'esat kahato eweikup­te'en waku rakaria Tupana ewywuaria wo hap. Urumo­wepit kahato karãpe eweikup­te'en hesaika kahato rakaria wo imohey hap ete. Mi'i hawyi po'og urunãpin haria ewy. Mi'i hap e'at pe urumo­wepit kahato.
2CO 13:10 Atiky­'esat kahato ehehãite imohey hap ete put'ok­'ui'e turan. Hãpyk Tupana eko ewy hap atiky­'esat. Mi'i pote woro­ho­'o­nãpin miwan me yt areĩne'en i te eipy­'a­setpiat turan. Po'og waku uiwa­nẽtup hawe woro­ho­'o­nãpin miwan me aiwo­'o­'ewa piat hap kai. Kat pote ati'airo kuap ui'e hap. Mi'i hawyi yt kat i uhehay uimiwan me eimohit hap. Yt karãpe i woro­ho­'o­mohit teran eipe. Woro­ho­'o­motag yn neran Aika­'iwat mohey hap ete. Katu­pono sa'a­wy'i Tupana tum uhepe tesaika hap tomohey haria nãpin uhepiat hamo i'atu­moe­saika imoheg hap etiat hamo.
2CO 13:11 Uiwy­ria'in uheka­tu­wyria kuekatu atipo­'oro ehowawi. Toran na'yn uimiwan mesuwe. Waku pe eweikup­te'en. Yt kat i i'aparap ehepiat hap eheĩne'en hap ete hap wywo eweikup­te'en. Wẽtup ok miit ewywuat eweikup­te'en imohey hap ete. Eiwo­'o­mo­wepit ro eiwo­'o­po­wyro hap ete wo'o­wese hap ete. Mi'i ewy ewetunug pote eiwepit kahato katu­pono Tupana wuat'i ky'e hat toĩne'en eipy­'a­setpe eimo­wepit sese hamo.
2CO 13:12 — Pyno eiwe­hyt'ok to mehĩ'in mana'in ewei'e o imohey haria pe ewepit hap wywo. Aikotã Aika­'iwat ewy yne mesu­wa­ro­tiaria Aika­'iwat mohey haria ipo'oro kuekatu ehowawi.
2CO 13:13 — Uruka­'iwat sese Iesui eti'a­tu­ky'e kahato tawa Kurintiu piaria emohey haria. Yt i'atue­waku hap kaipyi ereĩne'en egyi'at i'atuepiat rakano ma'ato i'atu­ky'e haype. Tupana are waure wo ereĩne'en i'atu­minug sa'ag kai. Eti'a­tu­ky'e mi'iria yt kat upi i. Tupana Pã'ãu are ewy'inug tawa Kurintiu piaria Esa'yru mohey haria wywo. Etunug mi'iria aikotã wẽtup ok miit ewy yn ahẽtup Tupana. Waku are. Mio tã ewy yn ahẽtup Tupana pe ehepiat uiwy­ria'in Iesui mohey haria tawa Kurintiu piaria etiat. Toran na'yn ui'e hap miwan miat. Uito ti Tupana mipo­'oro sese Pauru.
GAL 1:1 Uito ti meiũ Pauru Tupana Mipo­'oro wuat'i miit'in mu'e hamuat ti uito are. Aipo­typot Iesui mipo­'oro sese uito are. I'ewyte Ai'ywot Tupana mihymut gu'uro pywiat Iesui mipo­'oro uito are. Yt karãpe i miit'in mesu­wa­ro­tiaria ui'airo Tupana mipo­'oro Aipo­rekuat nuat ehay moherep hamo. Yt miit'in mi'airo hin i uito. I'ewyte yt Iesui potpo­'o­roria mi'airo hin i uito ma'ato Tupana mipo­'oro uito are.
GAL 1:2 Mi'i tupono mesup atipo­'oro uimiwan uheywyt'in Iesui mohey haria tawa Karata piaria kape. Ma'ato yt uito yn i ma'ato torania meiũpiaria Iesui mohey haria ipo'oro mesuwat ta'a­tue­kue­katu ehowawi uruwy­ria'in are.
GAL 1:3 Koitywy mio tã are'e Tupana pe ehepiat — Ui'ywot pyno koitywy eti'a­tu­po­wyro ro tawa Karata piaria Esa'yru mohey haria are. Atiky­'esat kahato mi'iria egyi'at hap ok tã sese kuap haria hap atiky­'esat are. Atiky­'esat etimo­herep i'atuepe aikotã iwato hap i'atu­ky'e hap epiat hap atiky­'esat etimo­herep itotiaria pe ahẽtup. Tupana are eti'a­tunug itotiaria yt wanẽtup ko'i ko'i haria wo i are ma'ato wo'o­wese kahato rakaria wo eti'a­tunug mi'iria are. Mi'i tã are yn ahẽtup mesuwe Ai'ywot Tupana pe i'ewyte Aipo­typot Iesui pe ehepiat uiwy­ria'in.
GAL 1:4 Iesui tiky­'esat kahato ti miit'in ehakye­ra'at hap. Toiky­'esat kahato i'atu­minug sa'ag kaipywiat te'e­ra­'aipok hap. Mi'i hamo tuweium aria'yp posak ete To'ywot miky­'esat ewy. Mi'i hamo Tupana tum Tosa­'yru ai'a­piheg hap u hamo aiminug sa'ag ko'i hep hamo.
GAL 1:5 Mi'i tupono mesup — Waku kahato En Tupana wato'e at ka'ap mesup te mũki­'ite wuat'i e'at pe. Woro­mõ­typot kahato En Tupana waku wato'e mesup are.
GAL 1:6 Ta'i arewa­nẽtup kahato eiminug sa'ag ko'i kape. Kat hamo ten ewei'atoiat wakuap sehay Aika­'iwat Iesui kaipywiat hegyi'at kahato hap. Pywo apo eipohep ta'yn Aipo­typot aiky'e hat mohey hap ete wẽtup sehay sa'ag ky'ewi — To'iro watu­we­ha­kye­ra'at aiminug waku hap sa'up upi ewei'e apo. Ta'i mi'i e hap yt naku i wato'e katu­pono Iesui upi yn aheha­kye­ra'at kuap are. Ma'ato eipe wẽtup sehay upi ra'yn eweiwat yt sehay wakuat Iesui mienoi upi hin i sehay upi eweiwat are. Yt naku i pãi are.
GAL 1:7 — Ta'i po'og ipakup sehay aimi­mohey kahu ewei'e. Hẽ ewei'e ne'i ti mesup eiwo­'ope ma'ato yt hin i. Iesui mimo­herep yn ni sehay pakup sese toĩne'en are. Wẽtup yn ni toĩne'en sehay pakup sehay pywuat are mekewat sa'a­wy­'iwuat pywiat sese uimienoi ehowawiat hap yn sehay pakup Tupana wẽ pywiat. Mi'i yn sehay pywuat sese aheha­kye­ra'at kuap hap sehay are. Ipakup sehay i'atu'e irania'in ehepe ma'ato heso rakaria sok mi'iria are. Ta'i Iesui ehay pero'ok teran wẽtup sehay nem nakat kape teran ne'i mi'iria are. Yt Aipo­typot Iesui ete hin i i'atu­mienoi ma'ato i'atueko ko'i nug hap ete yn i'atuehay.
GAL 1:8 Ha'a­wyte Iesui etiat yn mekewat pywuat sese sehay etiat yn uruhenoi ehepe. Ahenoi ehepe mi'i ti sehay pakup wakuap sese rakat are. Yt naku i watoiat Iesui etiat aimu'e hap wẽtup sehay kapiat hamo are. Uito i'ewyte ma'ato mesup ahenoi wẽtup sehay yt sa'a­wy­'iwuat uimienoi yt ewy i pote waku Tupana uipo­'oro aria kape ne'i are. I'ewyte sio Wẽtup Ok put'ok'e atipy kaipyi — Uito Tupana mipo­'oro e hat pytkai wẽtup sehay toimo­herep yt Iesui mienoi yt sa'a­wy­'iwuat urumienoi ewywuat i pote — Tupana epo'oro aria kape waku ewei'e mekewat atipy piat uito e haria pe are. Katu­pono meiũran ti aru mesuwat yi tote tõ'ẽ atipy kaipywiat Tupana ehay moherep haria ewywuat ko'i ma'ato yt Iesui e hap yt ewywuat i moherep haria. Mi'i haria pe waku wato'e — Tupana yt miky'esat ewy i eimi'enoi waku ewe'eg wo katupono Tupana mi'apihag wo aru ereine'en yt Iesui e hap ewywuat etimoherep pote waku wato'e mi'iria pe. Yt naku i Tupana eipo­'oro aria kape waku wato'e wẽtup sehay wywuat õ'ẽ haria pe yt Iesui e hap ewywuat i haria pe. Pyno wyti waku Iesui ehay etiat aiwo­'o­mu'e hap yn po'og waku uiwy­ria'in i'atueso atueso hap ko'i kai are.
GAL 1:9 Pyno are'e i mi'i hap ehepe uwe uwe wẽtup sehay ne'i imoherep yt Iesui mienoi wakuat ewywuat i waku mi'i hat Tupana tipo­'oro aria wato kape sese wato'e. Waku mi'i miit topy­hu'at Tupana mikuasa wuat'i e'at pianuat are.
GAL 1:10 Ta'i yt ta'a­tu­ky­'esat i ahehay Iesui etiat pytkai waku mi'i etiat yn wahenoi po'og are. Waku ti Tupana mowepit hap yn watunug are. Mi'i hap yn uito po'og atiky­'esat are. Yt miit'in mowepit hap i ti atunug neran. Waku ti Tupana kaipywiat — En waku e hap po'og waku miit'in kaipywiat — Waku en e hap kai are. Ma'ato uito atunug miit'in wo mowepit hap yn mote ti rẽ irania'in yt karãmuo i uhaty'i haty'i. Pyno irania'in uhaty'i haty'i pytkai uito ti Aipo­typot sese mowepit reran kahato hat uito are. Yt atimo­wepit teran i miit'in Tupana e hap wywo. Po'og waku atimo­wepit Tupana are. Ma'ato miit'in miky­'esat ewywuat ne'i ahenoi pote Aika­'iwat miky­'esat ewy yt ahenoi kuap i are. — Urumu'e ro urumi­ky­'esat ewy e haria mowepit haria wo watu­kup­te'en pote yt Iesui eropat haria wo hin i watu­kup­te'en katu­pono yt wahenoi kuap i imiky­'esat wy.
GAL 1:11 Pyno ti atimoheg neran uhehay eiwa­nẽtup hawe uiwy­ria'in. Pywo ti mekewat sehay wakuat sese uimienoi sa'a­wy­'iwuat ehowawiat mi'i sehay yt miit'in wanẽtup hap kaipywiat i uimi­mo­herep ehepiat are.
GAL 1:12 Ta'i yt miit'in miium uhepiat i ti yt miit'in mienoi uhepiat i i'ewyte yt miit'in mimo­herep uhepiat i ma'ato mekewat Aipo­typot Iesui mimo­herep uhepiat ahenoi are. Yt atikuap hin turan i Iesui tomo­herep tehay wakuap sese uhepe towẽ pyi sese uimu'e are.
GAL 1:13 Ta'i eweikuap aikotã sa'a­wy'i yt atikuap hin i Iesui etiat. Eweikuap kahato uito aikotã wẽtup seko upiat myhu'at hat kahato areĩne'en sa'a­wy'i mesu­wa­rote. Mi'i Iuteu ywania eko wo uhowapy ra'yn nyti mi'i turan. Sa'a­wy'i te Iuteuria kaipyi atikuap Tupana ehay. Ta'i sa'a­wy'i uito Tupana emiit'in sese Iesui mohey haria moma teran hano areĩne'en. Ta'i eweikuap aikotã sa'a­wy'i Iesui potmu­'eria saty'i saty'i hat areĩne'en sa'ag po'og tora­nia'in kai hap eweikuap ta'yn. Yt nakuat i kahato uito. Sa'a­wy'i Iesui mohey haria atu'uka hat uito areĩne'en are. Ati'a­tu­'uka sa'ag mi'iria uito are.
GAL 1:14 Sa'a­wy'i uiwe­motag hamo te po'og irania'in ui'y­wania kai Iuteuria eko hit ko'i yne yne ati'a­tu­ky­'esat i'ewyte ati'a­tunug yne uito. Uiwe­motag tuwyria apy'i aremoe­hapap urue'a­se­'i'in eko ete yne e'at pe. Haty wo ati'a­tunug yne yne urueko ko'i po'og po'og torania kai.
GAL 1:15 Ma'ato wẽtup e'at pe Tupana tomi­ky­'esat ewy ui'airo temiit no hawyi uiky'e kahato tuwe­kaipyi tuwe­wawi. Yt kat i atunug wakuat pytkai i ui'airo ma'ato uiky'e haype. Uiky'e tewa­nĩkap muat uheĩne'en pytkai ui'airo topot­po­'oro wo. Mi'i hawyi to'e uhepe — Ta'i Pauru worokuap en ha'a­wyte ety ymyẽ piat re ereĩne'en turan worokuap. Mi'i turan woro­'airo uimi­po­'oro wo e Tupana uhepe. Uiky'e yt kan hamo i uikaykay tuwe­wawi tuwepyi hap ewy are. Mi'i hap eweikuap.
GAL 1:16 Mi'i hawyi sake wẽtup e'at pe Tupana tuwe­mo­herep Tosa­'yru sese Iesui uhowawi uipy'a pe. Atikuap Ha'yru hawyi to'e uhepe — Pauru woro­'airo en uhehay enoi miit'in yt Iuteu ywania piat hamo i e uhepe. Mi'i hawyi yt uwe pe i — Uimu'e ro are. Katu­pono sa'a­wy'i Tupana yn uimu'e hat toĩne'en. Yt wẽtup ok miit pe i are — Waku apo areĩne'en ehay sytpok hamo yt are hin i. Yt uwe pe i mio tã are.
GAL 1:17 I'ewyte Iesui e'yiannote wuaria motpo­'oria yt uimu'e hin i katu­pono yt areto i tawa Ieru­sarẽi kape. Ma'ato Iesui tuwe­mo­herep uhowawi hawyi mekewat e'at pe ti areto pya kahato uiweran hap kape mekewat yi wato yahig Arapia e hap kape areto. Ikaipyi ti ara'aipok tawa Tamaku kape i ra'yn.
GAL 1:18 Mi'i tote ti areĩne'en mot'i mye'ym i'aman motpe areĩne'en tawa Tamaku piaria py'a­setpe. Mi'i hawyi areto tawa wato Ieru­sarẽi kape Iesui potmu'e Peteru kapiat ui'a­kasa hamo. Itote areĩne'en 15 e'at iwywo ikuap hamo.
GAL 1:19 Mi'i tote ti Aika­'iwat Iesui ywyt sese wẽtup ok ara'a­kasa Tiaku e hap het rakat. Ma'ato mi'i hawyi yt uwe i ati'a­tukuap itote Iesui potpo­'o­roria torania. Peteru hawyi Tiaku atikuap hawyi mi'iria yatype are'i­ne'en 15 e'at hawyi areto e tawa Ieru­sarẽi pyi.
GAL 1:20 Uiwyia'in mi'iria ti yt uimu'e haria i are. Yt uheso hin i ma'ato ahenoi ehepe Tupana ehamo are'e — Tupana yn ui'airo topot­po­'oro wo. Yt Iesui potmu­'eria mi'airo i uito are. Yt uikuap hin i mi'iria sa'a­wy'i.
GAL 1:21 Areĩne'en tawa Ieru­sarẽi piat hawyi areto yi Siria kape hawyi yi Sirisia kape.
GAL 1:22 Mi'i turan mekewat e'at pe yi Iuteu piaria tama Ieru­sarẽi piaria Iesui mohey haria yt uikuap hin i katu­pono yt karãpe i uhewyry i'atue­wawi. Mi'i pote uhowa ete yt uikuap hin i.
GAL 1:23 Ma'ato itotiaria uikuap uhehay ete yn. Mi'i hawyi te'e­ro'e to'ope itote — Ta'i koitywy ti sa'a­wy­'iwuat ai'a­tu­sa­ty'i saty'i hat ra'yn meiũ Aika­'iwat Iesui powyro hamo ra'yn topy­hu'at i'atu'e to'ope uhepiat pe. Pyno ti koitywy yt aimoma teran hin i ra'yn katu­pono topot­mu'e kahato ra'yn Iesui mohey hap ete i'atu'e to'ope uhepiat pe.
GAL 1:24 Mi'i hawyi ti mi'iria te'e­ru­wehum kahato ra'yn Tupana ete — Waku kahato ti En Tupana i'atu'e itote uhepiat pe Tupana pe Iesui mohey haria yi Iuteu piaria mekewat tawa Ieru­sarẽi piaria te'e­ro'e.
GAL 2:1 Mi'i hawyi yi Siria yi Sirisia pe areĩne'en mot'i kahato. 14 i'aman mot hap ewy 14 anu hap ewy areĩne'en itote hawyi areto i tawa wato Ieru­sarẽi kape. Uiwy Panãpe wywo areto i'ewyte atioto uiwy uhyt Titu uiwywo.
GAL 2:2 Areto turan Tupana to'e uhepe — Pauru atiky­'esat ereto tawa Ieru­sarẽi kape mesup e uhepe pote areto i e hap ewy. Put'ok­'are ra'yn itote hawyi areto ra'yn Iesui potmu­'eria yianmiaria kape hawyi mi'iria pe ahenoi henoi kat e hap kat e hap ahenoi yne sehay wakuat Iesui etiat Tupana ehay kat e kat e hap ko'i ahenoi mesuwat yi tote irania'in me yt uru'y­wania i pe ui'e hap atimo­herep yne yne uhehay wakuat are'e itote. Iesui mohey haria akagnia puo yn ma'ato mig'i wo pyi ahenoi katu­pono ta'a­tukuap teran sio pywo uhehay sio wẽtup sehay ahenoi irania'in me sio Iesui etiat. I'atuehay ewywuat ahenoi hap sio yt ta'a­tukuap teran itote tawa Ieru­sarẽi piaria. Katu­pono uikuap hamo yn ahenoi wakuat sio yt hap moherep hamo. Aikotã ahenoi sehay wakuat yt Iuteuria i piat hap ewywuat e hap ahenoi itote i'atuepe. Ta'a­tu­ky­'esat kahato uimienoi pywo kahato i'atu­mienoi Iesui etiat hap ta'a­tu­ky­'esat. Ahenoi yne hawyi — Waku kahato ehenoi miit'in me Pauru i'atu'e aikotã miit ihyha rakat teput kuap kahato rakat ewywuat en i'atu'e uhepe. Uiwy­ria'in are mi'i hap ewy atiky­'esat Aipo­typot Iesui to'e uhepe aru — Waku rakat ewy ereput Pauru e hap atiky­'esat kahato. Yt naku i to'e uhepe — Yt kan hamo i emienoi miit'in me Pauru to'e hap yt atiky­'esat hin i are.
GAL 2:3 Mekewat e'at pe ahenoi ui'e hap irania'in miat hap e'at pe uiwy mehĩ Titu toĩne'en uiwywo itote Iesui potmu­'eria 12 ok takaria py'a­setpe. Wẽtup ywania Titu toĩne'en mekewat Kereku ywania yt Iuteu ywania i ma'ato. Mi'i ete yt kat i'atu'e hin i Iuteuria Iesui mohey haria akag ko'i — Yt naku i en e'ahit sokpe toĩne'en ne. Yt uru'y­wania ewy i e hap yt i'atu'e i. Yt naku i eko yt i'atu'e i. Waku uruto ewy etunug no i'ewyte yt i'atu'e i aiwy Titu pe. Waku kahato atipuẽti itote.
GAL 2:4 Ma'ato mi'i hawyi ahenoi kahu turan put'ok­'i­'a­tu'e itote wẽtup miit'in ko'i Iesui mohey ran haria heso heso rakaria henoi haria. Mi'i hawyi urupy­'a­setpe tukup­te'en mi'iria yt naku i e hap kat hanuaria ne'i. Yt uruikuap i i'õ'ẽ hap miit'in sem itote pote. Mi'i hawyi te'e­ra­ha'at kahato Titu kape urupy­'a­setpiat kape yt Iuteu ywania i hap kape. Mi'i hawyi — Wãi'i­'a­tu'e ta'a­tu­wa­nẽtup hawe yt i'atueko ewywuat i urutunug itote pote. Mi'i hawyi ta'a­tuehay wo ta'a­tu­ky­'esat kahato urutunug ta'a­tueko nug hap ewywuat katu­pono ta'a­tu­ky­'esat ta'a­tuehay upiat urutu­kup­te'en hap wẽtup sehay sa'ag upi — Uruto po'og waku Tupana wanẽtup hawe irania'in ywania Iesui mohey haria kai katu­pono Iuteu eko ewywuat urueko e hap upi hap ky'ewi.
GAL 2:5 Ma'ato ti mi'iria eko wãi'e hap upi yt urutuwat teran hin i pãi — Yt urueko ko'i nug hap kaipyi hin i aimoe­waku hap uruto'e itote mekewat miit'in ko'i pe. Iesui mohey hap kaipyi yn aimoe­waku hap tut e Tupana ahepe. Pywuat wakuat sehay Iesui kaipywiat upi yn urutuwat teran uruto'e i'atuepe. Katu­pono uruiky­'esat kahato Aika­'iwat Iesui minug upi aheha­kye­ra'at hap yt kat sa'up i rakat uruto'e itote. Tupana miium yn ni aimoe­waku uruto'e. Ta'i yt aheko nug hap upi i Iuteu eko nug hap upi aimoe­waku Tupana uruto'e yn itote. Ta'i yt urutuwat hin i Pete­ru'in ehay wẽtup upi. Iesui mohey haria akag ko'i pytkai yt pywo pe i i'atuehay uruto'e eika­wiano urumi­po­wyro ko'i eipe Karata ywania wẽtup eko nug hanuaria pote.
GAL 2:6 Ta'i mekewat e'at pe i'atu kahato miit'in akag ko'i Iesui mohey haria akag ko'i tawa wato Ieru­sarẽi miaria urui'a­tu­puẽti itote miit'in akag ko'i ahyt i'atu­mi­'ai­roria ko'i. Mi'iria ai'akag ko'i i'atu'e uruepe katu­pono mi'iria po'og wakuat irania'in kai i'atu'e uruepe ma'ato uiwa­nẽtup hawe Tupana yt ai'airo i aikahu hap upi aimikuap upi miit'in miky'e kahato aito e hap upi yt ai'airo i ma'ato tuwepyi ai'airo tomi­ky­'esat ewy. Ma'ato mi'iria te'e­ru­we­mo­wato kahato itote to'ope te'e­ru­wehay upi Pete­ru'in. Mi'i tote areĩne'en Titu wywo i'atu­py­'a­setpe wen ma'ato yt kat i urumu'e hat itote. Yt kat i'atu'e hin i uruepe. Mi'i hawyi — Uruiky­'esat eti'a­tu­mu'e irania'in ywania urueko nug hap yt i'atu'e i uhepe uruepe. — Pyno waku wẽtup sehay ehenoi ro yt Iuteuria i pe yt i'atu'e hin i uhepe i'ewyte Titu pe.
GAL 2:7 Ma'ato mi'i tã te'e­ro'e tawa Ieru­sarẽi miaria Iesui mohey haria akag ko'i to'ope uruetiat — Pywo waku ti uhyt Pauru topy­hu'at Tupana mi'airo yne irania'in ywania mu'e hamo meimuẽwat yt Iuteu ywania i mu'e hamuat waku i'atu'e to'ope uhepiat pe. Ma'ato waku uhyt Peteru ti uru'y­wania Iuteuria ywania mu'e hamuat topy­hu'at Tupana mi'airo i'atu'e to'ope itote torania Iesui emiit'in akag ko'i mekewat 12 ok takaria. Ma'ato — Waku eti'a­tu­mu'e irania'in ywania aheko ewy Pauru yt i'atu'e hin i uhepe itote yt i'atu'e i pãi.
GAL 2:8 Ta'i itotiaria tikuap kahato aikotã Tupana Pã'ãu toĩne'en kahato uhetiat hap irania'in ywania mu'e Iesui etiat hap ta'a­tukuap ma'ato i'ewyte ta'a­tukuap kahato aikotã Ipã'ãu toĩne'en kahato Peteru kai uru'y­wania Iuteu ywania mu'e Iesui etiat hamuat hap ta'a­tukuap kahato. Mi'i pote — Ta'i ai'y­wania Iesui mohey haria mu'e kahato hat sese Peteru i'atu'e ma'ato Pauru i'ewyte te Tupana Pã'ãu ipotpap kahato ipiit pyi irania'in ywania mu'e hamo Iesui mohey haria apykok hamo i'atu'e Ieru­sarẽi miaria imohey haria akag ko'i.
GAL 2:9 Itote Ieru­sarẽi me atikuap mye'ym ok miit po'og Iesui mohey haria akag ko'i mye'ym Tupana mõtypot yat apy'yha ewy iheg nakaria ewywuat ko'i mi'iria. Wẽtup ok mekewat Iesui ywyt sese aiwy mehĩ Tiaku wẽtup ok Iesui potmu'e sese aiwy mehĩ Peteru wẽtup ok Iesui potmu'e sese aiwy mehĩ Iuwãu. Mi'iria po'og miit'in mimõ­typot ko'i itote atikuap. Mi'iria tikuap kahato Tupana Pã'ãu mi'ai­roria kahato aiwy Panãpe i'ewyte uito hap irania'in ywania mu'e hamuat hap yt Iuteuria mu'e hamuat hap ta'a­tukuap. Ta'a­tukuap ta'yn hawyi te'e­ro'e mehĩ Panãpe pe i'ewyte uhepe — Koitywy ti pyno urui'a­tu­'airo eipe wẽtup eko rakaria mu'e hamo i'atu'e. Ma'ato aheko ewywuaria Iuteu ywania kape wemurui ãpy sokpe tek haria kape waku uruto urutuwat i'atu­mu'e hamo i'atu'e uhepe i'ewyte Panãpe pe. Mi'i hawyi te'e­ru­we­ponug i'atupo sese ko'i ui'akag note i'ewyte uhyt Panãpe akag note mi'i hawyi mio tã i'atu'e — Pyno Tupana eti'a­tu­po­'oro ro Panãpe i'ewyte Pauru wuat'i ywania mu'e hamo i'atu'e. Mi'iria ti i'ewyte urumi­'airo ko'i wuat'i ywania mu'e Esa'yru sese etiat hamo i'atu'e. Mi'i hawyi waku i'atu'e uruepe te'e­ru­wehum haype Tiaku Peteru Iuwãu.
GAL 2:10 Mi'i hawyi te'e­ro'e uruepe — Waku ewei'a­tu­mu'e Iesui ehay ete wuat'i ywania i'atu'e katu­pono mi'i nug kuap hap Tupana tum na'yn ehepe i'atu'e uruepe. Waku kahato i'atu'e. Ewei'a­tu­mu'e turan yt waure­'e­wei'e tei'o ihaky­'e'i rakaria poi mi'u wuat hap ete pyi i'atu'e uruepe. Ewei'a­tu­po­wyro ro meimuẽ­wuaria hatek takaria i'ewyte ewei'a­tu­mu'e mi'iria Iesui etiat turan i'atu'e uruepe itote tawa Ieru­sarẽi me. Mio tã i'atu'e uruepe hawyi — Ta'i uruwy­ria'in mi'i hap ewy yn urutunug teran ha'a­wy­tepyi mesup te ra'yn uruto'e haty wo urupy'a pyi Tiaku Peteru Iuwãu me uruto'e ainãpin hawyi.
GAL 2:11 Wẽtup e'at pe ma'ato ai'akag Peteru hewyry uruewawi tawa Atiokia kape mekewat wẽtup ywania Iesui mohey haria kapiat ta'a­kasa hamo toto. Mi'i tote mekewat e'at pe urutunug ienuk wato kahato hap. Waku kahato itote watenuk wẽtup miit ewy uruto irania'in ywania Peteru wywo waku yne. Ma'ato urutenuk turan put'ok'e itote uhyt Tiaku mipo­'o­roria Iuteu ywania sese tawa Ieru­sarẽi kaipywiat. Tuwe­mo­herep hawyi aiwy Peteru yt tenuk teran i po'og uruwywo yt Iuteuria i ywania ko'i aito pote. Toiky­'esat Tiaku mipo­'oro ko'i wywo yn tenuk hap to'y­wania wywo yn tenuk teran aikotã Iuteu ywania eko ewy tenuk itote. Ta'i Iuteu ywania yt te'e­renuk hin i wẽtup ywania wywo — Tupana yt tiky­'esat i watenuk yt naku i nug haria wywo i'atu'e to'ope ta'a­tueko ewy. Mi'i pote Peteru toto irania'in totepyi to'y­wania wywuat tenuk hamo. Yt Iesui ewy hin i tutunug itote. Mi'i tã ne'i tutunug hawyi meremo uipoĩ'ãm i'atu­py­'a­setpe Peteru ewãi hamo. — Ta'i yt uiwese i ra'yn eete Peteru are haty wo. Ta'i yt nakuap no i ewy etunug mesup are itote typy'i tok pe. Kat pote etoiat irania'in ywania Iesui mohey haria wẽtup ywania upi. — Uito po'og mi'iria kai Iuteu uito pote e'e hap sa'ag hap wywo are.
GAL 2:12 Kat poteĩ pyno yt erenuk teran i ra'yn yt Iuteuria i wẽtup ywania wywo. Kat pote Tiaku mipo­'o­roria wywo e'ywania Iuteuria wywo yn erenuk meiũpe are. Kat pote ereken'ẽ kahato Iuteuria ywania eko mõtypot haria pupi are. Yt naku i mi'i tã etunug Peteru are.
GAL 2:13 Mi'i tã are pote torania Iesui mohey haria ta'a­tu­'a­tunug typy sehay upiat ewy te'e­ru­wa­'a­tunug itote. Ipat'ok Peteru wywo ipat'ok uiwywo. I'ewyte aiwy Panãpe toto Peteru eko ewywuat ra'yn. I'ewyte torania irania'in Iuteuria tuwat Peteru enuk hap kape irania'in ywania enuk hap kaipyi. Yt naku i kahato topy­hu'at itote. Yt wo'o­wese hap ewy hin i ta'a­tunug itote.
GAL 2:14 Mi'i pote are'e ra'yn Peteru pe typy'i ehamo haty wo — Mehĩ Peteru kat pote yt ewyry i Iesui piat aimu'e hap ewy are. Kat hamoĩ etiky­'esat Iuteuria eko ewy meiũpe. En ni Iuteu ywania sese ma'ato koitywy erenuk kahato uruwywo yt Iuteu ywania i wywo yt Iuteu ywania eko ewy hin i erenuk meiũpe are. Ta'i koitywy erenuk kahato urupy­'a­setpe. Erenuk ta'yn mesup yne ehamo mehĩ are. En ni Iuteu ywania uito ewy wen Peteru ma'ato eko ti yt Iuteuria eko ewy hin i tuereto ereĩne'en are. Pyno kat poteĩ etiky­'esat irania'in meiũpiaria Iuteu eko ewy hap ewy mesup uhyt are Peteru pe. Kat poteĩ i'atu­'ewy ereĩne'en sa'a­wy'i ma'ato mesup te eti'a­tu­mo­'a­kag'aia mo'a­kag'aia kahato irania'in Iuteuria eko ete are. Iuteuria eko ewy sese yt eti'a­tunug hin i te are'e Peteru pe.
GAL 2:15 — Ta'i aito Iuteuria ywania ai'y­wã'ĩ kaipyi are. Aheko sa'a­wy­'iwuat kaipyi watikuap ai'y­wania ehay — Irania'in ywania ti yt naku i nug haria i'atu'e ai'y­wot'in aity'in ahepe.
GAL 2:16 Ma'ato koitywy watikuap ta'yn wẽtup eko mio tã e — Aheko nug hap kaipyi ne'i yt tut i aheha­kye­ra'at hap e hap watikuap. Ta'i yt Iuteuria i eko nug hap kaipyi hin i toĩne'en aheha­kye­ra'at hap e. Ta'i Tupana wanẽtup hawe ahewaku hap yt tut i ai'y­wania eko nug hap kaipyi ne'i hap watikuap mesup Iesui e hap ewy. Ta'i mekewat wãi'e hap watunug yne pytkai yt ahewaku kuap i e Tupana mesup are. Mesup Uha'yru Iesui mohey hap kaipyi yn ni woro­ho­'o­mo­hãpyk kuap e Tupana ahepe mesup are. Koitywy ti wato­mohey ra'yn Iesui Tupana Mipo­'oro Aipo­rekuat nuat aito imohey kahato haria are. Koitywy watikuap ta'yn yt uwe i tuwe­ha­kye­ra'at kuap teko waku nug hap kaipyi ne'i hap watikuap Peteru are. Watikuap ta'yn aikotã Aika­'iwat Iesui yn aheha­kye­ra'at kuap hat topy­hu'at hap watikuap Peteru are.
GAL 2:17 Koitywy watikuap wẽtup mu'ap yn toĩne'en Tupana kape. Mi'i yn toĩne'en Tupana kapiat are. Mi'i mu'ap ti Aiwy Iesui mohey hap ti are. Uwe uwe yt toto i hupi mi'i haria ti yt nakuat i nug hanuaria wo Tupana wanẽtup hawe tukup­te'en are. Mi'iria tunug kahato ta'a­tueko wakuap pytkai ho'o­wasat rakaria wo tukup­te'en Tupana pe sio Iuteu ywania sio wẽtup ywania are Peturu pe itote. Ta'i Aika­'iwat tut yt aipat'ok pat'ok hamo i tut are ma'ato aikotã hũria tukup­te'en to'o­pype pype hap ewy ainug hamuat tut are. Wẽtup ywania yn ainug hamo tut Iesui uiwy are'e Peteru pe itote.
GAL 2:18 Iesui mohey hap kaipyi yn ni aheha­kye­ra'at hap toĩne'en uhyt are. Waku kahato watunug yne Tupana piat ainãpin sa'a­wy­'iwuat hap ko'i wen ma'ato mi'i ko'i nug hamo yt watu­we­ha­kye­ra'at kuap i mehĩ are. Ma'ato wato­mohey aheko aheha­kye­ra'at kuap pote ho'o­wasat rakaria sese wo i ra'yn watoĩ­ne'en uhyt are.
GAL 2:19 Peteru etikuap apo kat pote yt watu­we­ha­kye­ra'at kuap i mekewat Tupana wo'o­nãpin hap nug yne hap kaipyi. Ta'i Tupana tiky­'esat kahato tepiat ainãpin hap nug hap yne yne hap toiky­'esat kahato ma'ato wahã'ãg pytkai wati­'a­parap kahato tuereto yne yne imiky­'esat nug hap ete yt wati­'a­parap teran hin i pytkai. — Waku atunug yne imiky­'esat wato'e wen ma'ato wati­'a­parap aparap imiky­'esat ewywuat nug hap ete. Mi'i pote yt watu­we­ha­kye­ra'at kuap i aiwe­kaipyi yne Tupana miky­'esat nug hap upi wahã'ãg kahato pytkai are. Ta'i wati­'a­parap aparap hawyi ho'o­wasat rakaria wo watu­kup­te'en aiwa­nẽtup hawe aipy'a pe are. Wati­'a­parap kahato tuereto imiky­'esat nug hap ete are'e sa'a­wy'i itote Iesui potmu'e Peteru pe wuat'i Iuteu ywania ehamo i'atu­py­'a­setpe mekewat ienuk hap e'at pe turan. Mi'i pote yt aheha­kye­ra'at kuap i mekewat wãi'e hap yt uwe i nug yne kuap pote are. Mi'i pote uheha yt mekewat wãi'e hap kape hin i uheha­kye­ra'at hap ky'ewi ma'ato Tupana Sa'yru kape yn uheha are Pete­ru'in me.
GAL 2:20 — Uito yt atunug i te emiky­'esat ewy ai'e hamo are. Tupana miky­'esat ewy atunug neran kahato wen ma'ato uhesaika hap yt toĩne'en i te uipiit pe inug hamuat wato'e hap watikuap are. Mi'i pote Iesui kape waku wato­kosap hesaika hap sat hamo are. Yt tuwe­mi­ky­'esat ewy i iku'uro aria'yp posak ete Iesui ma'ato Tupana miky­'esat ewy iku'uro aria'yp posak ete wato'e are. Mi'i hap ewy atunug neran wen. Koitywy uipyt'at teran kahato Iesui Pã'ãu wo. Mi'i pote koitywy uimi­ky­'esat ko'i hokpap yne ra'yn. Uika­'iwat Iesui miky­'esat ko'i nug hamo yn na'yn areĩne'en koitywy are. Mesup ti koitywy Tupana Sa'yru mohey hano yn areĩne'en. Koitywy wẽtup ok uiky'e hat mõtypot hamo yn na'yn areĩne'en wato'e.
GAL 2:21 Ta'i Tupana ti hegyi'at kahato ahepe tuwe­kaipyi aiky'e are. Ma'ato watu­we­kyi'at kuap aheha­kye­ra'at hap aheko nug hap sa'up mo pote yt kat hamo i Iesui iku'uro aria'yp posak ete aha'up mo aheha­kye­ra'at hamo are Pete­ru'in me tawa Atiokia pe ienuk hap e'at pe. Yt naku i so wato'e ne'i Tupana pe are. Ta'i yt naku i Tupana egyi'at hap Tupana wese hap pun haria wo wato­py­hu'at are itote yne pe.
GAL 3:1 Tawa Karata piaria Iesui mohey haria woro­ho­'o­nãpin neran eipe. Kat pote ewei'e mesup eiwo­'ope — To'iro watu­we­ha­kye­ra'at aiminug wakuat nug hap upi ewei'e. Yt iwe'eg hin i rakaria ewy apo eipe are. Uweĩ eimu'e mi'i tã itote are. Uweĩ eima'at mi'i e hap upi. Ha'a­wyte woro­ho­'o­mu'e kahato kat hamo Iesui iku'uro hap ete itote at ka'ap. Mi'i uimi­mo­herep uhehay sa'a­wy'i heremo kahato ehewaure ka'a pe. Mi'i hawyi Iesui mohey haria wo eweikup­te'en itote. Waku kahato mekewat e'at pe are. Mi'i hawyi Tupana tum na'yn ehepe Topã'ãu wakuat eweimohey Ha'yru hawyi.
GAL 3:2 Pyno woro­ho­'o­'apo mesup — Kat hap upi Tupana eipyt'at nug Topã'ãu wakuat no are sio to'y­wã'ĩ pywiat re wakuap nug haria eipe pote sio Tosa­'yru mohey uimienoi kaipywiat pote are. Ta'i eweikuap ta'yn Tosa­'yru mohey ra'yn hawyi eipyt'at nug Tupana Topã'ãu wo hap eweikuap are.
GAL 3:3 Pyno kat pote mesup wẽtup sehay upi eweiwat are. Ei'akag heg kahato apo. Sa'a­wy'i Tupana Pã'ãu kaipyi yn na'yn eweiky­'esat eimoe­saika hamuat. Pyno kat pote koitywy ehewaku hap moherep hap kaipyi eweiky­'esat eimoe­saika hamuat. Kat pote eweikyi'at teran Tupana miium ehewaku nug hap sa'up hap upi are. Yt iwe'eg i haria ewy kahato eipe are.
GAL 3:4 Sa'a­wy'i Iesui mohey haria eipe turan miit'in mimo­weu­ka'i ko'i wo yn eweikup­te'en Aparãu ewywuat ko'i wo ra'yn imohey hap kaipyi. Aikotã Aparãu mohãpyk hap ewy te ra'yn are.
GAL 3:5 Pywo tig Tupana tum Topã'ãu hawyi Topã'ãu wo aimoe­saika wakuap nug hamuat sio sehay wakuat Iesui etiat wati­mohey hawyi. Imohey hawuo watunug miatpo kahato hap ko'i yt miit'in minug kuap i ko'i.
GAL 3:6 Aikotã miwan me tohenoi Aparãu etiat — Toimohey ti pywuat sese e. Pywo ti imohey pywo piat hap kaipyi ti Tupana to'e — Hãpyk kahato en uhepe e Aparãu me.
GAL 3:7 Mi'i hap ewy ti pywo eweikuap ta'yn mekewat Aparãu Emiari­ruria imohey haria kahato wo sok ta'yn hap.
GAL 3:8 Mio tã e sa'a­wy­'iwuat miwan me tomohey hap kaipy­wiaria pe yn — Uimohey kahato hap ti einug wakuaria wo e hap wẽtup ywaniaria pe. Mio tã e hap tohenoi yianmete Aparãu me. Mio tã e Aparãu — Pywuat sehay ahenoi epe. Ekaipywiat ti aru Wuat'i Ywania Ehakye­ra'at hanuat tuwe­mo­herep aru e Tupana Aparãu me.
GAL 3:9 Pyno koitywy aitoria yne ywania Tupana mimo­hãpyk ko'i. Aikotã Aparãu mohãpyk hap ewy ra'yn tomohey pywo piat potiat ko'i.
GAL 3:10 Ma'ato uwe uwe to'e topy'a pe — Ta'i atunug yne kahato Tupana wo'o­nãpin hap ko'i mi'i pote Tupana mieha­kye­ra'at wuat areĩne'en e hat Tupana mi'a­piheg wo topy­hu'at. Katu­pono mio tã e Tupana sa'a­wy'i — Yt torania i ewetunug einãpin uhepiat hap ko'i pote uimi­'a­piheg wo eweikup­te'en e.
GAL 3:11 Uimohey kahato haria yn uimi­mo­hãpyk wuaria tukup­te'en. Mi'iria yn ni ui'ya­typiat gupte'en hanuaria e Tupana sa'a­wy'i. Mio tã e hap kaipyi watikuap ta'yn sa'a­wy­'iwuat Tupana wo'o­nãpin hap nug yne hap kaipyi yt aimo­hãpyk kuap i are.
GAL 3:12 Irania'in ti wẽtup wo'o­nãpin haria. Mi'iria ti — To'iro watuwat Tupana piat ainãpin hap ko'i nug yne aiwe­ha­kye­ra'at hamo i'atu'e. Mi'i nug hap upi watu­we­ha­kye­ra'at aito i'atu'e. Ma'ato mi'iria yt i'atu­we'eg hin i katu­pono Tupana to'e miwan me — Uimohey haria yn uimi­mo­hãpyk wuaria tukup­te'en e. Mi'iria yn ui'ya­typiat gupte'en hanuaria e Tupana sa'a­wy'i ahepe. Mi'i pote aiminug wakuap ko'i aheha­kye­ra'at hamo wato­mohey pote yt wato­mohey i aheha­kye­ra'at hamuat Iesui iku'uro hap. Mi'i pote Tupana to'e sa'a­wy'i — Ewei'a­parap wẽtup wo'o­nãpin uhepiat hap ete pote aru uimi­'a­piheg wo eweikup­te'en e. Ewetunug torania sese wuat'i e'at pe pote yn waku kahato ereĩne'en uiwa­nẽtup hawe e Tupana sa'a­wy'i. Ma'ato yt uwe i uimi­ky­'esat ewy kahato inug haria eweikup­te'en e Tupana ahepe.
GAL 3:13 Ta'i Tupana tikuap kahato aipy'a piat i'aparap hap ko'i. Mi'i kaipyi aria'yp posak kape Tupana tipo­'oro Tosa­'yru ai'a­piheg hap u hamo. Tosa­'yru suu wo toihep tokuasa hap pya ra'yn aikai. — Uwe aria'yp ete tomo­sat'e pe iku'uro mi'i uikuasa topy­hu'at e Tupana sa'a­wy'i miit'in me. Pyno koitywy Tupana py'ahak hap yt kat i ahete aika­wianuat iku'uro ra'yn aria'yp ete pote. Mi'i hawyi ikai toĩne'en na'yn iwese hap.
GAL 3:14 Sa'a­wy'i Aparãu Tupana timo­waku kahato mekewat tomohey kahato hap kaipyi tegyi'at hap kaipyi toipoi­tyro. Mi'i hap ewy koitywy aito i ra'yn watoĩ­ne'en wuat'i ywania Tupana mipoi­tyro ko'i ra'yn watu­kup­te'en. Mekewat tomi­poi­tyro sese tomi­po­'oro Aipo­typot Iesui piat aikyi'at hap wato­mohey hap kaipyi aimo­hãpyk kuap. Mio koitywy mio tã e Tupana — Koitywy atum Uha'yru mohey haria pe Uipã'ãu e. Yt kat sa'up mo i atum i'atuepe kat pote Uha'yru upiaria mi'iria pote e.
GAL 3:15 Uhyt'i'in mana'in karãpeĩ wato'e aiwo­'ope — Atunug aru ui'e hap epiat. I'ewyte waku en waku etunug kuap e'e hap uhepiat aiwo­'o­'e­wy­'ewy wato'e aiwo­'opiat hawyi waku yne ai'e aiwo­'opiat hap watunug. Yt naku i eipohep atunug aru ai'e aiwo­'opiat hap ete wato'e. I'ewyte yt naku i watunug wẽtup sehay wo atunug aru ai'e rokirẽ hawyi wato'e.
GAL 3:16 Mi'i hap ewy ti sa'a­wy'i Tupana to'e Aparãu me — Meiũran ti aru Wẽtup Ok Emiariru kaipyi atipoi­tynug yi totiaria torania. Yt uheso i aru atunug ui'e hap ewy e. Tepiat Tupana e hap Aparãu timohey kahato. Tupana yt to'e i — Emẽpyt'in kaipyi aru atipoi­tyro torania yi totiaria yt e i ma'ato — Wẽtup Ok Emiariru kaipyi atipoi­tyro wuat'i ywania e Iesui wuanuat etiat pe tohenoi. Aparãu Emiariru Emiariru piat pe yianmete Aipo­rekuat nuat tomi­po­'oro tohenoi mio tã e.
GAL 3:17 Pywo yt ipohep hin i atunug aru to'e hap kai ete. Pyno atunug aru to'e hap Tupana tunug na'yn. Pyno yt uwe i Tupana ewãi kuap — Atunug aru e hap ete ma'ato tutunug i'ewyte tomi­ky­'esat ewy tuwe­kai­pywiat aru to'e Aparãu miat hap tutunug na'yn. 430 anu hap ete tutum na'yn wo'o­nãpin hap ase'i Musei pe. Ma'ato yt tutunug kuap i sa'a­wy­'iwuat Aparãu miat — Atipoi­tyro aru Emiariru mohey haria i'atue­ha­kye­ra'at hamo e hap.
GAL 3:18 — Watunug Musei pywiat torania Tupana wo'o­nãpin hap pote aipoi­tyro hap aheha­kye­ra'at hap topy­hu'at ma'ato yt pywo pytkai i ewei'e are katu­pono 430 anu turan ase'i Musei e'yianmete toĩne'en kahu ra'yn Tupana aipoi­tyro hap. Sa'a­wy'i pyi te Tupana to'e Aparãu me — Wẽtup esa'yru kaipyi aru wuat'i atipoi­tyro e. Mi'i hap tutunug mesup.
GAL 3:19 Kat hamo som pyno tutum ahepe ainãpin hap ko'i. Pyno woro­ho­'o­wesat. Ta'i aiminug sa'ag moherep hamuat tutum ahepe. Mi'i hap ewy mesup tutum ahepe Aparãu Emiariru Iesui put'ok'e yianmete wuat hap — Atunug aru to'e hap. Yt tutunug i te turan Tupana ainãpin atipy kaipywiat tomi­po­'oro wẽ pyi. Mi'i e hap Musei tiwan ainãpin hamuat.
GAL 3:20 Ma'ato sa'a­wy'i Aparãu me tuwewi sese tohenoi towẽ kaipyi sese — Meiũran aru atipoi­tyro torania ywania esaipepiat emẽpyt kaipywiat no e tope tehay pywo piat nug hamo. Yt tomi­po­'oro wẽtup ok atipy piat wẽ pyi i mio tã e Aparãu me ma'ato tuweran toto tehay moherep hamo Tupana sese.
GAL 3:21 Tupana tinãpin kahato Musei sa'a­wy'i wẽtup aha'a­se'i tehay wo wen ma'ato yt Aparãu piat tehay moma hamo i ma'ato ahewaku hamo ihay Musei pe ma'ato aipyhyp aiminug sa'ag nug pupiat hamo yn yt wato­mohey i te pytkai. Mi'i pote pyno atunug aru Musei piat uinãpin hap hawyi waku pe areĩne'en Tupana wanẽtup hawe wato'e pote yt aimo­hãpyk kuap i Tupana katu­pono yt watunug yne i pote. Katu­pono yt put'ok­wa­to'e i torania nug hamo.
GAL 3:22 Ta'i sa'a­wy'i Tupana to'e tomiwan me — Yt naku hin i miit'in e. Yt uwe i kahato uimienoi kuap teran haria meikope e. Yt uwe i uiwe­nãpin hap uimiium nug yne haria itote e Tupana sa'a­wy'i miit'in me. Mi'i pote paawa­to'e Tupana mi'a­tu­'a­piheg wuaria aito wato'e haype. Mi'i hawyi pyno wẽtup mu'ap yn waku wato'e. Koitywy Aipo­typot Iesui mohey hap yn waku aheha­kye­ra'at hamo wato'e. Aikotã Aparãu me to'e — Atipoi­tyro aru wuat'i ywania mekewat ewat'ypmuat esaipepiat mohey sese haria e ahepe. Koitywy toĩne'en wato'e meimẽ. Koitywy imipoi­tyro ko'i ra'yn watu­kup­te'en. Katu­pono imipo­'oro Aipo­typot Iesui mohey haria ra'yn aito pote wato'e.
GAL 3:23 Sa'a­wy­'iwuat yt wato­mohey kuap i wahe­katup kahato karãmuo tomohey hap wen. Wahã'ãg hã'ãg kahato wãi'e Tupana hap nug yne hamo ma'ato yt watunug kuap i. Mi'i pote mipyhik ko'i ewy watu­kup­te'en Tupana mi'a­piheg ko'i wo iheg miat ko'i wo hap ewy.
GAL 3:24 Ahenoi hã'ãkap wuo mi'i e hap ete. Sa'a­wy'i Tupana ehay ainãpin hap ko'i tukup­te'en wo'o­mu'e sese hat ewy wãi wãi'e hamo. Mi'i hap e'at pe wahe­katup aimu'e pywuat sese hanuat Iesui e'yianmete wuat hamuat. Put'ok'e ra'yn Aheha­kye­ra'at hat Iesui hawyi Tupana aimo­hãpyk Tosa­'yru Iesui mohey hap upi.
GAL 3:25 Pyno mesup koitywy Tupana aimo­hãpyk Tosa­'yru mohey sese hap upi yn na'yn. Yt sa'a­wy­'i­tewuat ainãpin hap upi i ma'ato wato­mohey sese Iesui hawyi pywo ra'yn wato'e.
GAL 3:26 Tupana mẽpyt'in no watu­kup­te'en wẽtup miit pakup ewy Aika­'iwat Iesui mohey hap kaipyi wato'e.
GAL 3:27 Aito miit'in aiwo­'o­'ewy wẽtup miit yn watoĩ­ne'en. Wẽtup miit set wywo wato­py­hu'at Iesui mohey hat set wywo watoĩ­ne'en mio. Aiwe­set'ok hawyi aikotã Iesui ewy ra'yn watoĩ­ne'en.
GAL 3:28 Aito miit'in yt aiwo­'o­'ewy hin i watu­kup­te'en irania'in Iuteu ywania e hap ko'i irania'in yt Iuteu ywania i irania'in ihainia'in hary­po­ria'in irania'in ga'i­waria irania'in miit emiit'in. Ma'ato mi'i pytkai watoĩ­ne'en Iesui mohey hap kaipyi wẽtup piit ewywuaria yn imohey haria sok aito pote are.
GAL 3:29 — Atipoi­tyro aru Wẽtup Takat Emiariru e Tupana sa'a­wy'i yianmete Aparãu me. Koitywy Iesui topy­hu'at Aipo­rekuat no ra'yn. Mi'i hap kaipyi koitywy Tupana wanẽtup turan Aparãu Emiari­ru'in wo ra'yn wato­py­hu'at katu­pono Iesui toĩne'en aiwywo pote Tupana mi'a­tu­poi­tyro ko'i sok aito Tupana e Aparãu miat hap ewy topy­hu'at ahepe koitywy.
GAL 4:1 Pyno ahenoi po'og wẽtup i hã'ãkap wuo ehepe. Ahetama pe kue aihire te turan ai'ywot iku'uro pote ipowat'yp aiwanuat totoiat iheg me toĩne'en yt ta'atuium i te ahepe. Ma'ato airan hap put'ok'e ra'yn hawyi iheg myi ta'a­tue­nõtem na'yn mi'i te ium i'atu'e ahepe ai'ywot powat'yp iku'uro rakat miky­'esat miwan miat ai'ywot to'e hap ewy.
GAL 4:2 Ma'ato aiwe­motag hamo te yt kat i ipowat'yp aikai. Irania'in emiit no yn watu­kup­te'en pote ai'ywot powat'yp iwato toĩne'en pytkai. Mi'i tã ahetama pe watunug.
GAL 4:3 Karãpe atunug yne teran Tupana wo'o­nãpin hap uheha­kye­ra'at hamo ai'e pote watoĩ­ne'en aikotã wãi'e hat po pe. Aikotã aihire te turan ai'ywot iku'uro rakat powat'yp iheg me kahato toĩne'en rakat hap ewywuat watoĩ­ne'en mesuwe.
GAL 4:4 Put'ok'e ra'yn he'at tomi­ky­'esat ewy ra'yn topy­hu'at hawyi Tupana tipo­'oro Tosa­'yru hary­poria kaipywiat torania tehay wo'o­nãpin hap nug hamuat ra'yn. Put'ok­to'e hawyi yt wẽtup i To'ywot wo'o­nãpin hap toi'a­parap. Tutunug yne imiky­'esat ok tã.
GAL 4:5 Koitywy Iesui ainug To'ywot sa'y­ru'in To'ywot saki­'yt'in ko'i wo. Koitywy watunug neran ainãpin hap ok tã katu­pono imẽpyt'in pakup ko'i watoĩ­ne'en pote. Aikotã waku ehay uinãpin hap atunug wato'e at i at i Tupana kape.
GAL 4:6 Mi'i hawyi tutum Tosa­'yru Pã'ãu wakuat — Uimẽ­pyt'in wo eweikup­te'en to'e ahepiat hap. Put'ok'e hawyi Papai wato'e at ka'ap Tupana kape aipy'a pe.
GAL 4:7 Tupana yat eropat haria ewy nimo watoĩ­ne'en. Koitywy ha'y­ru'in haki­'yt'in no sese wo ainug na'yn. Koitywy Ai'ywot powat'yp yn na'yn aikai pãi ha'y­ru'in sese haki­'yt'in kahato wo aito.
GAL 4:8 Sa'a­wy'i yt eweikuap i Tupana sese pywuat turan eweikup­te'en Tupana ran ko'i mohey haria tupa­naria eropat haria eipe eweikup­te'en.
GAL 4:9 Ma'ato koitywy wyti Tupana sese kuap haria ra'yn eweikup­te'en. I'ewyte Tupana sese mikuap ko'i eipe are. Kat hamo ten pyno koran ewei'aipok teran mekewat sa'a­wy­'iwuat eipyhyp hap ewywuat kape sa'a­wy­'iwuat eipyhyp hat eika­'iwat kape. Ehetu­pana ran yt kat etiat i kuap haria kape.
GAL 4:10 Uimo­ken'ẽ kahato haria eipe tawa Karata piaria katu­pono — Watunug Iuteuria eko ko'i ewy yne pote watu­we­ha­kye­ra'at kuap e haria eipe. Iuteuria eko ko'i wati­'a­tu­mõ­typot hãpyk hawyi watu­we­ha­kye­ra'at kuap ewei'e. Waku kahato aimi­mõ­typot no Iuteuria e'at ko'i waty ko'i anu ko'i yne aiwe­ha­kye­ra'at hamo ewei'e.
GAL 4:11 Mi'i pote uimo­'a­kag'aia kahato haria eipe are mio tã ewei'e pote. Yt naku i rat pãi katu­pono eimu'e sa'a­wy­'i­tewuat Iesui etiat uhepiat hap eweiwaure kahato hap. Mi'i hawyi yt kat hamo i eimu'e sa'a­wy­'iwuat hap topy­hu'at ehepe.
GAL 4:12 Uito meimuẽwat seko ko'i uheha­kye­ra'at hap atiwaure yne rokirẽ ahẽtup kahato Iesui kape yn uheha­kye­ra'at hap. Mi'i hawyi atipuẽti Tupana Iesui mohey hap upi waku kahato. Pyno mesup atiky­'esat kahato eipe uito ewywuat. Yt eweimohey tei'o eheko nug hap mu'ap Tupana kuap hamuat katu­pono Iesui yn mu'ap Tupana kape are. Atiky­'esat kahato eipe ui'e­wywuat imohey haria hap atiky­'esat eweikup­te'en hamuat pãi. Iuteuria ywania mẽpyt sese uito meiũ pãi. Ui'ywot ti Iuteu sese pãi. Ui'y­wania eko ko'i ewy atunug kahato sa'a­wy'i uheha­kye­ra'at hap ky'ewi Tupana kuap hamo wen ma'ato yt atipuẽti i mi'i mu'ap atunug yne urueko ewywuat pytkai pãi. Mi'i hawyi Iesui Uheha­kye­ra'at hano topy­hu'at hawyi waku kahato Tupana topy­hu'at yt pya hin i uikai topy­hu'at. Pyno atiky­'esat eipe uhepiat Iesui mohey hap ewywuaria ro eweikup­te'en. Sa'a­wy'i areĩne'en eipy­'a­setpe turan eheko ewywuat atunug. Yt urueko ko'i i atunug uito Iuteu uito pytkai. Eipe ewy atunug itote. Pyno mesup ewetunug uito ewy eweikup­te'en yi Karata ywania. Waku eheko wakuat ewywuat ewetunug aikotã sa'a­wy'i atunug eipy­'a­setpe are. Ma'ato mio uheko Iuteu eko upi eweikat Tupana piat eheha­kye­ra'at hap aikotã uimotag hap e'at pe ewywuat ewetunug neran. Yt eiwe'eg hin i mio tã ewetunug pote. Sa'a­wy'i uimohey haria eweikup­te'en. Kat pote mesup uhehay mohit hanuaria eweikup­te'en.
GAL 4:13 Sa'a­wy'i ui'ahu kahato itote eipy­'a­setpe areĩne'en turan mi'i pote yt areto kuap i wẽtup tawa kape. Ui'ahu eipy­'a­setpe wywo woro­ho­'o­'o­mu'e.
GAL 4:14 Mi'i turan tig yt eweiwaure i uhehay. Yt karãpe i — Motoro ewei'e uhepe. Ui'ahu hap upi yt eiwe­ky­ry'i hin i. Waku kahato waku kahato ewei'e yn uimi­mu'e pe. — Ereke ro mehĩ ereke ro mimi ewei'e yn uhepe. Aikotã uito atipy kaipywiat sut hat ewy uinug Iesui put'ok'e turanuat ewy. — Ereke ro ewei'e hap ewy yn. Eimi­mõ­typot no kahato areĩne'en sa'a­wy'i itote.
GAL 4:15 Mi'i turan uhehay wo woro­ho­'o­mo­wepit kahato. Kat poteĩ koitywy yt iwepit rakaria wo i ra'yn eweikup­te'en. Sa'a­wy'i uheha ahu hap yt ikahu i pytkai uiky'e eipe. — Urutum neran urueha wakuat ewei'e uiky'e haype.
GAL 4:16 Ma'ato koitywy eweikup­te'en yt uiky'e i po'og haria ewy eweikup­te'en katu­pono yt uiwẽ pohep teran i eimu'e pywuat sehay wuat hap ete pyi pote. Mi'i pote ehewa­nĩkap ewy areĩne'en mesup.
GAL 4:17 Koitywy eimu'e haria wẽtup seko kaipyi eiky'e wen ma'ato eima'at reran haype. Woro­ho­'o­ky'e i'atu'e ma'ato ehero­po'ok uipo pywiat reran haype ne'i. Eiky­'esat ta'a­tu­ky'e ehepiat po'og uiky'e hap kawiat haria wo eweikup­te'en.
GAL 4:18 Atiky­'esat wuat'i e'at pe miit'in ei'a­tu­ky'e haria wo sio areĩne'en itote sio yt. Wuat'i miit'in eiky'e hap atiky­'esat aikotã uito woro­ho­'o­ky'e hap ewy are atiky­'esat wen ma'ato yt atiky­'esat i eiky'e ran hap ne'i eima'at sehay wo hap ne'i.
GAL 4:19 Uimẽ­pyt'in eipe pote haty kahato uhete. Woro­ho­'o­ky'e hap aikotã aity tuwe­mẽpyt turanuat hap ewy. Uhehat'at kahato eiky­'ewi are. Ei'a­tu­mu'e hap kaipywiat hãpyk takaria wo teran woro­ho­'onug aikotã Iesui hãpyk takat topy­hu'at hap ewywuaria wo teran haype. Atiky­'esat kahato Iesui i'ywã'ĩ eipy'a pe i hap. Mi'i pote Tupana kape ahẽtup haty wo — Etunug emẽpyt'in no mi'iria are Tupana pe. Haty kahato uipy'a pe aikotã aity ete haty imẽpyt wemo­herep hap e'at pe hap ewy ahẽtup eika­wiano. Eweimo­herep ta'yn hawyi waku ra'yn uhetiat. Haty hap tokosap ta'yn aikotã aity tehat'at tomẽpyt egyi'at turan hap ewy.
GAL 4:20 Uipopap kahato eimo­wa­nẽtup pyre'i uhepiat Tupana ehay wuat hamo. Mi'i pote areto teran ehowawi ma'ato yt aikotã kuap hin i areto wo'o­pyhik hawe areĩne'en mote.
GAL 4:21 Uhehat'at kahato sio ehehaĩte Iesui mohey hap ete sio yt hap kuap hamo aikotã aity ewy woro­ho­'o­ky'e.
GAL 4:22 Sa'a­wy'i te ti urue'a­se'i Aparãu toĩne'en typy ok sa'yru ywot no e miwan me. Wẽtup ha'yru ihary'i sese mana Sara kawiat ma'ato wẽtup ha'yru hemiit wẽtup ywania kawiat mana Ãka kawiat.
GAL 4:23 Temiit kawiat ha'yru ti topu'i kaipywiat wemo­herep.
GAL 4:24 Pyno ahenoi teran mi'i hap sehay iã'ãkap wuo ehepe Aparãu sa'y­ru'in etiat typy ok etiat ihary­'i'in typy ok hap kaipywiat hap. Pyno Aparãu ehary'i toĩne'en typy ok hap kaipywiat. Pyno Aparãu ehary'i toĩne'en typy ok aikotã typy ok kapiat Tupana ihay hap e. Tohenoi kahato tehay wo'o­nãpin hap Musei pe yity'ok Sinai e hap tote — Uwe uwe inug yne teran Tupana ehay wãi'e hap teha­kye­ra'at hamo haria ti tukup­te'en Aparãu sa'yru temiit kawiat ewy mana Ãka kawiat ewy.
GAL 4:25 Irania'in te'e­re­mohey sa'ag. — Atunug yne teran uheha­kye­ra'at hamuat i'atu'e. Mio tã e haria mana Ãka mẽpyt Isameu ewywuat wẽtup ok Aparãu ehary'i temiit kawiat ewywuat haria. Mio tã e haria tawa Ieru­sarẽi miaria. Uwe uwe toto mi'iria ehay upi mi'iria te'e­ro­py­hu'at — Atunug yne teran Tupana wo'o­nãpin hap e hap emiit no tukup­te'en.
GAL 4:26 Ma'ato toĩne'en wẽtup tawa Ieru­sarẽi ne. Mi'i tawa atipy kaipywiat sut hat mesuwiat ewywuat re wen. Mi'i pe watu­kup­te'en mio aitoria Aparãu ehary'i sese mẽpyt Isaki ewywuaria wẽtup sehay upiat gupte'en haria. Katu­pono Iesui mohey hap yn aheha­kye­ra'at e haria.
GAL 4:27 Sa'a­wy'i te ti Tupana to'e miwan me — Eiwe­mo­wepit ro yt karãpiat i imẽpyt rakaria e. Eiwe­mo­wepit ro yt karãpiat i hã'ãg mẽpyt saty hã'ãg haria katu­pono he'aito mi'atoiat ti aru po'og imẽpyt'in nakano topy­hu'at he'aito kahato rakat mẽpyt'in kai.
GAL 4:28 Mi'i tupono uiwy­ria'in aito ti watu­kup­te'en Tupana sa'y­ru'in wo Tupana saki­'yt'in no to'e Tupana Aparãu me hap ewy Isaki piat — Atum ti aru e hap ewy.
GAL 4:29 Mekewat ha'yru piit esaika hap kaipywiat wyti Isameu e hap het rakat tuwe­ky­ry'i kahato Tupana Pã'ãu esaika hap kaipywiat ete Isaki ete. Mi'i hap ewy kahato te koran topy­hu'at. Katu­pono miit esaika hap kaipy­wiaria to'o­ky­ry'i kahato te Tupana Pã'ãu esaika hap kaipywiat ete.
GAL 4:30 Sa'a­wy'i mana Sara to'e te'aito Aparãu me Tupana Pã'ãu kaipyi — Etipo­'oro ro ehary'i emiit kawiat imẽpyt wywo pya ai'ya­ty­pepyi katu­pono yt naku i ti aru e'yi epowat'yp ko'i topy­hu'at esa'yru ran po pe ne'i pote. Esa'yru sese po pe yn waku epowat'yp e'yi epoityro hap topy­hu'at e te'aito pe. Mi'i hawyi Aparãu tipo­'oro teha­ry'i ran imẽpyt wywo wẽtup hy kape.
GAL 4:31 Mi'i tupono uiwy­ria'in teropat hat kawiat Aparãu mẽpyt yt ewywuaria i ra'yn aito ma'ato pywo sese ihary'i sese kawiat imẽpyt ewywuaria aito are. Isaki saipepiat sese Iesui pãi mi'i upiaria aito are.
GAL 5:1 Koitywy Aika­'iwat Iesui tum na'yn ahepe tesaika hap wakuap ko'i nug yne hamuat. Mi'i tupono yt kat hamo i ra'yn wata­'aipok Iuteuria eko ko'i ewywuat nug yne aheha­kye­ra'at hap ky'ewi. Yt kat hamo i po'og watu­we­potpap ha'up nug howoity rakat kyi'at hamo hap ewy ne'i pãi. Ahesaika hap yt put'ok'e hin i waku nug hamo Iesui ewywuat hamo. Ma'ato Iesui Pã'ãu esaika hap aipiit pe pote yn waku nug hap ko'i tuwẽtem aipyt'at hap kaipyi.
GAL 5:2 Uito Pauru mi'i tupono ewetum no ehewaure ka'a uhepe. Uru'y­wania Iuteuria mio tã i'atu'e — Aiwe­'ahit ãpy sokpe tek hap kaipyi aheha­kye­ra'at i'atu'e sa'ag. Wati­mohey mi'i pote Iesui atoiat haria wo watoĩ­ne'en katu­pono Iesui yn aheha­kye­ra'at kuap. Iesui mohey hap kaipyi yn nyti Tupana aimoe­waku. Kat hamo pyno Iuteuria eko nug hap aimo­waku ewei'e.
GAL 5:3 — To'iro ihainia'in ahit sokpe ãpy tek hap watunug Iuteuria eko ewy watunug ewei'e. Mi'i watunug mote waku pe watoĩ­ne'en Tupana pe e haria wo ne'i eipe are. Uiwy­ria'in i'atu kahato Iuteuria eko mi'i ma'ato yt ewetunug yne hin i te. Yt eiminug i ko'i topy­hu'at re i'atu kahato te. Eiwe­'ahit ãpy sokpe tek hap ewetunug i'ewyte irania Iuteuria eko ewetunug neran. Ma'ato yt naku i wẽtup seko yn ewetunug are. Waku torania ewetunug are. Ma'ato yt uwe i mesuwat yi tote inug kuap torania. Mi'i pote seko nug hap ne'i yt aimo­hãpyk kuap hin i Tupana wanẽtup hawe.
GAL 5:4 Ma'ato eipe — Watunug yne meimuẽwat ko'i potiat ne'i Tupana aheha­kye­ra'at ewei'e wen mi'i pote pya kahato eweikup­te'en Aika­'iwat sese kai katu­pono sa'a­wy'i Iesui yn aheha­kye­ra'at kuap e haria ra'yn eipe. Imohey hap pun haria wo eweikup­te'en mio. Mi'i pote Tupana egyi'at hap pun haria wo eweikup­te'en.
GAL 5:5 Ma'ato uruto yt eiperia ewy hin i katu­pono uruto ti Iesui mohey hap kaipyi ti aheha­kye­ra'at kuap e haria uruto. Mi'i hap kaipyi yn uruimohey.
GAL 5:6 Ma'ato Aika­'iwat Iesui aheha­kye­ra'at teran haype Tupana yt tuwa­nẽtup hin i mekewat seko aiwe­musin ãpy sokpe tek hap kape ne'i. Ma'ato toieha­kye­ra'at kuap miit'in yne sio hemusin ãpy sokpe tek hap toĩ sio yt sio Iuteuria sio yt mi'iria i waku yne. Toimo­hãpyk kuap wuat'i ywania katu­pono kat seko kat seko kape ne'i yt iha'at hin i ma'ato teha'at tomohey hap sese kape yn. Toky'e ahepiat hap aikawiat toĩne'en sio yt wati­ky'e i hap kape yn ta'a­kasa.
GAL 5:7 Sa'a­wy'i imohey kahato haria eipe. Uwe uwe itote eima'at sa'ag sa'ag wẽtup mu'ap upi. Katu­pono koitywy eipe yt pywuat sehay upi hin i ra'yn eweikup­te'en sa'a­wy'i waku pe eweikup­te'en pytkai.
GAL 5:8 Tupana ti yt eima'at hat hin i pãi. Kat pote mesup eiwe­morem hamo eweimohan kahato Iuteuria eko katu­pono mi'i aipun hat ne'i ai'ahit ãpy sokpe hep hap. Mekewat Iuteuria eko yt aikaykay hãpyk hat eko ewy hin i yt imienoi ko'i ewy hin i.
GAL 5:9 Pyno aimi'u to'oran me toĩne'en nem nakat ipyp kurin kat. Mi'i hawyi aimi'u wakuat nem na'yn topy­hu'at toimonem tuwe­wawi. Mi'i hap ewy kahato toĩne'en aipy­'a­setpe wẽtup aimi­mohey yt pywuat i rakat. Meiũran aimi­mohey wakuat monem hat wywo wato­py­hu'at are.
GAL 5:10 Mi'i ewy wẽtup seko enoi hat toĩne'en eito­'oran me. Mi'i ti eiwa­nẽtup hap moeha­ma­na'i ra'yn. Yt atikuap i mi'i hat set Tupana ikuap. Mi'i tupono toĩne'en imi'a­piheg wo aru. Atikuap ti ma'ato meiũran ewei'aipok Iesui mohey hap mohan hamo. Meiũran uhepiat imohey hap ewy wẽtup sok yn aru aito Iesui wywo watoĩ­ne'en.
GAL 5:11 Uiwy­ria'in uito arepot­mu'e kahato Iesui ku'uro aria'yp posak etiat hap ete. Mi'i eweimohey pote toĩne'en eheĩne'en pakup i hap are. Ma'ato mi'i hap ete to'o­ky­ry'i kahato. Yt karãpe i arepot­mu'e wen — Eremusin ãpy sokpe tek eheha­kye­ra'at hamo pote waku yt karãpe i are'e ehepe. Mio tã ahenoi pote yt to'o­ky­ry'i hin i katu­pono Iuteuria ta'a­tu­mi­ky­'esat ewywuat pote.
GAL 5:12 Ahemusin sokpe ãpy tek hawyi aheha­kye­ra'at i'atu'e eimoe­ha­ma­na'i haria. Pyno waku mi'i haria te'e­ru­we­sa­'ahep yne hawyi aikai tukup­te'en pya mi'iria tuwe­sa­'ahep ta'a­tueko sese nug yne haria pote waku.
GAL 5:13 Uiwy­ria'in Tupana tum ahepe tesaika hap wakuap nug hamo aimi­ky­'esat ok tã nuat hamuat nug hamo. Ma'ato yt naku i — Uimi­ky­'esat ewywuat yn aru atunug wato'e ne'i pote yt naku i pãi are. Katu­pono ui'airo ra'yn tomi­ky­'esat nug hamuat tupono waku wato'e. Yt naku i aimi­ky­'esat yn watunug. Katu­pono towat tomi­ky­'esat nug hamo ai'airo aiwo­'o­po­wyro wo'o­ky'e hamuat etiat hap.
GAL 5:14 Mio tã e ti Tupana Musei miwan me — Ewei'a­tu­ky'e ro miit'in aikotã eweiky'e hap ok tã e. Mi'i tupono karãpe wato­'o­po­wyro aiwo­'o­ky'e hap ete pote Tupana miky­'esat nug haria wo aito wato­py­hu'at.
GAL 5:15 Ma'ato karãpe wati­kuasa irania'in wahenoi aiwẽ pyi aheso hap yt i'e hap ewy i wato­ma'at ne'i wẽtup ok pote aikotã miat haiwot rakaria ewywuat wato­py­hu'at. Miit'in u hat ewywuat watoĩ­ne'en. Eiwe'eg wo o mi'i tã nug hap pupi are.
GAL 5:16 Mi'i tupono uiwy­ria'in atiky­'esat Tupana Pã'ãu miky­'esat nug haria wo eweikup­te'en hap Tupana miky­'esat ewywuaria wo eweikup­te'en. Yt atiky­'esat i eiwa­nẽtup hap kaipywiat ne'i nug haria wo eweikup­te'en. Eimi­ky­'esat sese ne'i nug haria wo hap yt atiky­'esat i.
GAL 5:17 Mi'i turan aiwat aimi­ky­'esat ne'i yt Tupana miky­'esat ewy hin i. Aimi­ky­'esat po'og ne'i watunug mote yt watunug kuap i Tupana miky­'esat ewy.
GAL 5:18 Pyno Tupana Pã'ãu miky­'esat ewy ra'yn watunug hawyi atunug neran Musei mienoi uheha­kye­ra'at hamo yt wato'e kuap i.
GAL 5:19 Ma'ato mekewat aimi­ky­'esat ewy watunug neran mote yne hary­po­ria'in wywo watoĩ­ne'en ne'i. I'ewyte watu­wa­nẽtup sa'ag hap he ne'i. I'ewyte aiminug sa'ag yn watunug kuap.
GAL 5:20 Tupana sa'ag wati­mõ­typot kahato pote wato­pot­kuasa wanĩkap mo watoĩ­ne'en. Sehay uka uka hano watoĩ­ne'en. Iha'y­wywi rakano watoĩ­ne'en. Ipy'ahak takano watoĩ­ne'en. Eikai po'og uruto urutu­kup­te'en e haria wo wo'o­pat'ok pat'ok haria wo watoĩ­ne'en.
GAL 5:21 Yt wato­pot­'oksat i. Imopẽ'ã rakaria wo watoĩ­ne'en pote wo'oe­ro'ok wo'oe­ro'ok haria ewywuat gupte'en haria ewy watoĩ­ne'en. Mi'i pote eiwe'eg wo o katu­pono mi'i tã ne'i nug haria yt tuwe­hyt'ok kuap i Tupana Morekuat no topy­hu'at hap e'at pe yt tuwe­hyt'ok kuap i hetama pe.
GAL 5:22 Ma'ato Tupana Pã'ãu miky­'esat ewywuat watunug hawyi wo'o­ky'e haria wo watoĩ­ne'en. Wo'o­mo­wepit haria wo watoĩ­ne'en. Wo'okuap haria kahato wo watoĩ­ne'en. Miit perup'i wo watoĩ­ne'en. Wo'o­wese haria wo watoĩ­ne'en. Aiwo­'opiat ai'e hap nug haria wo watoĩ­ne'en.
GAL 5:23 Yt wemo­wato haria wo i watoĩ­ne'en. Wewãi kuap kahato haria wo wato­py­hu'at. Karãpe mi'i tã e hap ewy watunug hawyi yt kat i ahewãi Musei mienoi kaipywiat hap tuwẽtem aipiit pyi e. Mi'i pote iperup'i rakano watoĩ­ne'en e. Watu­we­nãpin kahu kahato pote mi'i hap yn tuwẽtem Tupana Pã'ãu kaipyi aipiit pyi. Mi'i tã e hap yne. Mi'i wãi'e hap mopo­'inik hap yt kat i toĩne'en e.
GAL 5:24 Pywo pe ti Aipo­rekuat Iesui po pe ra'yn wato­py­hu'at pote mekewat aiwa­nẽtup hap aimi­ky­'esat sa'ag ko'i topap yne ra'yn. Mi'i hawyi yt iheg muo hin i aiminug sa'ag ko'i tukup­te'en. Katu­pono Iesui wano ra'yn wato­py­hu'at pote.
GAL 5:25 Nimo yt imohey i te turan aimu'e kahato Tupana Pã'ãu Iesui mohey ahepiat hamo. Koitywy po'og na'yn Tupana Pã'ãu aimu'e Tupana miky­'esat ewywuat nug hamo.
GAL 5:26 To'iro wati­pywo koitywy aimu'e hap imiky­'esat nug hamo yt kat i aheha sio pywo sio yt ai'e hap pun ne'i wywo aiwo­'oehay sat hap ko'i wywo.
GAL 6:1 Uiwy­ria'in Karãpe wẽtup ok yt naku i i'aparap hap inug mi'i pote waku wẽtup ok toto Tupana Pã'ãu sehay wywo i'aparap hat nãpin perup'i wuat hamo. Mi'i hat wyti waku kahato inug ma'ato waku mi'i rokirẽ tuwe'eg wo ra'yn toĩne'en tepiat i'aparap hap pupi irania'in nãpin rokirẽ.
GAL 6:2 Meiũran wẽtup ok i i'aparap mi'i hawyi waku wati­po­wyro imoesaika hamo. Mi'i tã aiminug kaipyi ti Iesui e hap nug haria aito pote.
GAL 6:3 Ma'ato uwe — Uito yt arepot­po­wyro teran i po'og uiwato e hat yt kan hamo hin i atimohey uito Iesui e. Mio tã e hat tuwe­ma'at kahato ne'i.
GAL 6:4 Waku watu­wa­nẽtup kahato aiminug sio waku sio yt e hap kape. Waku pote aimo­wepit hap toĩne'en. Ma'ato uito po'og atunug ikahu ai'e hap ne'i ti aimo­wepit hap akit hamo topy­hu'at.
GAL 6:5 Waku aiwo­'o­'e­wy­'ewy ipotpap takaria wo watoĩ­ne'en.
GAL 6:6 Waku ti aiwo­'o­mu'e haria pe wati­mõ'ẽ ahekat.
GAL 6:7 Yt naku i watu­we­ma'at. Yt wati­ma'at kuap hin i Tupana. Kat iã'ỹi watikoi pote ti mi'i ti ra'yn imoẽtyt.
GAL 6:8 Mi'i hap ewy ti aimi­ky­'esat yn nug mote yt nakuaria i wo watu­kup­te'en Tupana pe. Mi'i turan na'yn aiku­'uro hawyi yt kat i aheĩne'en Tupana wywuat hap. Ma'ato Tupana Pã'ãu wo wepit hamo watoĩ­ne'en pote tutum tesaika hap aheĩne'en towywuat wuat'i e'at piat hamuat.
GAL 6:9 Yt naku i eipo sero ne'i wakuap nug hap ete katu­pono meiũran Tupana tum hamuat ipotpap kahato rakaria pe. Mi'i turan aiwat ahepe tutum wy aikotã ipirik kahu ra'yn hawyi aimo­wepit ra'yn hap ewy. Mi'i hap ewy ti Tupana tum wakuap nug hap etiat yt ipo sero i rakaria i pe ha'up tutum are.
GAL 6:10 Pyno ti waku watikat aikotã irania'in powyro hamuat. Waku ti yne watunug wakuap torania miit'in me. Ma'ato ti Iesui mohey haria ti waku po'og wati­'a­tu­po­wyro wakuap no. Uiwy­ria'in ewehe­ha'at ro uipo wuat uimiwan iwato'in kahato rakat kape.
GAL 6:11 Uimiwan mesuwe atunug uipo wo. Iwato kahato uimiwan katu­pono yt heremo kahato i yt uheha­pytig i pote.
GAL 6:12 Eimu'e haria ipakup takaria te'e­ru­we­mo­wato kahato itote — Uruto po'og wo'o­mu'e haria torania kai i'atu'e haria. Wemusin ãpy sokpe tek hap ti waku e haria aipiit etiat yn wo'o­mu'e haria mi'iria. Iro pote miit'in to'o­ky­ry'i kahato aimi­mohey aria'yp posak etiat aheha­kye­ra'at hamo e hap ete. Mi'i haype yt te'e­re­pot­mu'e i mi'i ete. Yt ta'a­tu­ky­'esat i miit'in wo'o­ky­ry'i ta'a­tuetiat hap haype.
GAL 6:13 Pyno Iuteuria wo'o­nãpin hap ewy watunug wemusin ãpy sokpe tek hap aheha­kye­ra'at i'atu'e yt ta'a­tu­henoi yne hin i Iuteuria eko pytkai. Ta'a­tu­ky­'esat ta'a­tu­mi­ky­'esat nug hanuaria wo yne eipe haype.
GAL 6:14 Ma'ato Iesui iku'uro ahetiano are pote yt i'atu­wese hin i. Yt ta'a­tu­ky'e i Iesui haype. Mi'iria yt iky'esat hin i uheĩne'en hap ewy tukup­te'en hap. I'ewyte uito yt atiky­'esat i i'atu­'e­wywuat areĩne'en hap wy katu­pono te'e­ru­we­mo­wato haype ne'i pote.
GAL 6:15 Mekewat hemusin ãpy sokpe sio yt rakaria kape sio Iuteuria eko nug yne haria sio yt hap kape te'e­ru­wa­nẽtup. Mi'i haria ti yt kat no i Iesui pe. Ma'ato ti tokai­pywiat miit ipakup sio yt hap kape yn ni iha'at Iesui. Imopakup hap toĩne'en sio yt hap kape yn teha'at. Yt kat i imopakup hap toipuẽti pote toimo­pakup i.
GAL 6:16 Mi'i hap yn ahẽtup Tupana pe — Erehay moeha­ky­'e'i ro Ui'ywot i'atue­ha­ky­'e'i hap etiano ipakup takaria upi inug hamo are. Etihep o i'atue­ha­ma­na'i hap are ehupiat pe. I'ewyte torania Tupana emiit'in etiano.
GAL 6:17 Yt atiky­'esat i po'og sehay aiwo­'o­'a­tu­'uka hap wemusin ãpy sokpe tek hap ete katu­pono ipoity kahato uipekyt pekyt uipiit ete. Uito Iesui emiit sese e hap moherep hap upi uipekyt pekyt. Uipe timo­herep kahato Iesui ewywuat areine'en uipekyt pekyt ui'auka teran haria tunug Iesui mohey hap moherep hap uipe.
GAL 6:18 Uiwy­ria'in mio tã are Aika­'iwat pe ehupi — Iesui egyi'at ro aiwy­ria'in Karata piaria pe are Aika­'iwat pe are ehupi. Uito Pauru pyno toran uimiwan.
EPH 1:1 Uiwy­ria'in tawa Ewesu piaria koitywy atipo­'oro uimiwan ehowawi. Mesuwat miwan nug hat ti uito Pauru. Eipe ti Tupana sa'y­ru'in Tupana saki­'yt'in koitywy eipe Aika­'iwat Iesui mohey pot'i haria ti eipe. Sa'a­wy'i Tupana ui'airo hawyi uinug tosa­'yru wo Aipo­typot Iesui potpo­'oro wo tomi­ky­'esat ewy ui'airo.
EPH 1:2 Pyno mio tã ahẽtup ehowawi Ai'ywot Tupana kaipyi i'ewyte Aika­'iwat Iesui kaipyi — Etum o ewese hap tawa Ewesu piaria pe emohey haria pe are i'ewyte eti'a­tu­poi­tyro kahato mi'iria are ahẽtup Tupana pe i'ewyte Iesui pe ehowawi uiwy­ria'in are.
EPH 1:3 Ta'i Aika­'iwat Iesui i'ewyte To'ywot Tupana ai'a­tu­poi­tyro poityro kahato ra'yn. — Waku kahato En wato'e Tupana pe i'ewyte Aika­'iwat Iesui pe wato'e — Waku kahato En Tupana wato'e aito Iesui mohey haria. Ta'i atipy kaipyi put'ok'e ahete aipoi­tyro kahato hap. Aheha­kye­ra'at hap tutum na'yn ahepe. Wuat'i e'at piat aimoieĩ­ne'en Tupana kapiat hap tutum ahepe towa­nuaria aito pote are.
EPH 1:4 Ta'i sa'a­wy'i mesuwat yi nug hap e'yianmete Tupana ai'airo Tosa­'yru emiit no. Ta'i ahe'yian­mete ai'airo temiit'in no are. Mi'i hawyi to'e — Uha'yru mohey haria wo aru mi'iria hap ati'a­tukuap e. Mi'i pote ti atunug aru hãpyk mi'iria ui'e­wy­wuaria wo ra'yn e. Yt kat i sa'ag nug haria wo ati'a­tunug mi'iria e. Pyno yt uwe i te aito turan ai'airo Tosa­'yru emiit no. Aiky'e haype yn ai'airo mesuwat yi yt kat i te hap e'at pe turan ai'airo.
EPH 1:5 Ta'i atunug aru Uha'yru mohey haria yne uha'y­ru'in uhaki­'yt'in no e. Atum aru Uha'yru i'atuepe I'atu­ka­'iwat no e ahetiat. Atunug aru mi'iria uimẽ­pyt'in no uimi­ky­'esat ewywuat uimo­wepit hamuat e Tupana ahowawi sa'a­wy'i yt uwe i te mesu­wa­rotiat turan.
EPH 1:6 Pyno to'iro watu­wehum Tupana kape — Egyi'at hap yt uwe ewywuat hin i waku wato'e. Po'og po'og torania kai ewese hap waku wato'e. Uruky'e hap moherep hamuat etum Esa'yru uruepe. Wẽtup yn Esa'yru pytkai etum ne'en ne'i uruepe yt kat sa'up mo i etum uruepe uruto'e waku wato'e. Mi'i ti Esa'yru Emiky'e kahato etum na'yn uruepe urueha­kye­ra'at hamuat. Waku kahato En Tupana uruto'e ewawi.
EPH 1:7 Ta'i Emipo­'oro Urupo­rekuat no iku'uro hawyi uruminug sa'ag po pyi urutu­wẽtem na'yn i'ewyte uruminug sa'ag ha'a­wy­tewuat eti'a­tu­waure waure ra'yn En. Waku kahato En. En ni po'og po'og torania kai hegyi'at rakat uruto'e ewawi Tupana uruto'e. Esa'yru suu ti urukyi'at ewanuat hap uruto'e.
EPH 1:8 Etum ne'en ne'i yne yne iwato kahato sakpo emiium etum yne yne. Waku kahato En uruto'e. Ewese kahato uruto yt uruwese i pytkai uruto'e. Ewe'eg hap ok tã egyi'at hap ok tã uruky'e hap uruto'e. Urutu­wehum kahato ewawi Tupana katu­pono koitywy etunug na'yn ere'e sa'a­wy­'iwuat hap emiky­'esat ok tã uruto'e ewawi.
EPH 1:9 Sa'a­wy'i emiky­'esat ewy ere'e ewepe — Atum aru Uha'yru pe wuat'i ywania ere. Atum ne'en ne'i aru Uha'yru wuat'i miit'in me I'atu­po­rekuat no. Uimo­wepit hap ewy atum aru ere'e sa'a­wy'i ewepe ewanẽtup hawe yt kat i miit'in te turan. Tupana uruikuap teran kat pote uruky'e kahato hap. Mi'i tã yt uruikuap hin i te wen ma'ato uruky'e hap mi'i uruikuap ta'yn. Waku kahato En uruto'e epe Tupana.
EPH 1:10 Mio tã e sa'a­wy'i Tupana — Put'ok'e uhe'at aru hawyi atunug sese ti Uha'yru wuat'i Porekuat no e tuwepe i'ewyte yne atipy piaria Porekuat no i'ewyte yne yi totiaria Porekuat no e tuwepe. Uha'yru suu wo ati'a­tu­mo­wehik sok torania yi totiaria atipy piaria uhowawi e. Mi'i hawyi wẽtup piit ewy yn na'yn wato­py­hu'at wuat'i uiminug ko'i uikai tukup­te'en e tuwepe Tupana wuat'i tominug ko'i pe tukup­te'en yianmete turan.
EPH 1:11 Yne tomi­ky­'esat ewy Tupana sa'a­wy'i ai'airo ra'yn tomi­ky­'esat ewy. Mi'i hawyi ainug tosa­ki­'yt'in no tosa­'y­ru'in no Aheyke'et Aikywyt Iesui ewywuat ainug wẽtup miit mẽpyt'in ko'i ewywuat ainug na'yn aito wati­mohey Iesui hawyi. Tomi­ky­'esat ewy tutum aru ahepe topo­wat'yp yne yne. Hekat kahato rakaria wo wato­py­hu'at wuat'i e'at pe aikotã to'e sa'a­wy­'iwuat hap ewy ra'yn tutum ahepe.
EPH 1:12 Pyno to'iro watu­wehum Tupana kape katu­pono aito ti irania'in e'yianmiat imohey haria irania'in e'yianmiat watunug Iesui Aipo­rekuat no. Waku kahato wato'e aiwo­'ope mi'i hap ete ma'ato meiũran aru i'atu kahato ahaipe­piaria Iesui mohey haria tukup­te'en kahato Tupana mõtypot wuat'i e'at piaria. Waku kahato are.
EPH 1:13 Pyno mesup ta'yn uru'e­wy­wuaria ra'yn Tupana ehay pywuat rakat Iesui etiat uruwẽ pyi hawyi mekewat sehay Eheha­kye­ra'at hat moherep hap topy­hu'at. Mi'i e hap etikuap hawyi Aika­'iwat Iesui mohey haria sok eweikup­te'en. Waku kahato are. Mi'i hawyi ti aru Tupana tum na'yn Topã'ãu ahepe to'e hap ewy tutum. Mi'i hawyi mesup — Mi'iria ti uianuaria e ehepe. Tutunug toset ehepe — Mi'iria wyti uiat e wuat'i miit'in me Tupana Pã'ãu.
EPH 1:14 Tupana tum na'yn Topã'ãu ahepe. Mi'i tutum mote mesup watikuap i'ewyte tutum aru ahepe kat e hap kat e hap — Atum aru uimẽ­pyt'in me e hap ko'i ewy. Tutum na'yn yne sa'up yne aiminug sa'ag hep hamuat Tosa­'yru suu. Mi'i pote watikuap ta'yn mesup yt kat i sa'ag toipuẽti aikai. Watoĩ­ne'en iwywo turan tuwehum ahowawi yt kat i aikai yt naku i pote yt kat i aipitpit hap. — Waku kahato En Tupana wato'e aru wuat'i e'at pe. Waku En waku En katu­pono uruhep ahiag po pywiat hat En uruto'e aru wuat'i e'at pe aru.
EPH 1:15 Ga'atpo atikuap ehetiat sehay — Koitywy tawa Ewesu piaria Aipo­typot Iesui mohey kahato haria tukup­te'en. Po'og imohey haria mio sa'a­wy­'iwuat kai i'atu'e uruepe. I'ewyte Tupana emiit'in ky'e kahato haria tukup­te'en mi'iria i'atu'e ehepiat pe.
EPH 1:16 Mio tã i'atu'e hap atikuap hawyi arehum kahato at ka'ap mesuwe — Uhetu­pana are waku kahato En katu­pono mesup tawa Ewesu piaria Esa'yru mohey kahato haria tukup­te'en na'yn mesup i'ewyte wo'o­ky'e haria tukup­te'en are at ka'ap Tupana pe.
EPH 1:17 — Uru'ywot koro En ni Urupo­typot Iesui eTupana are. Etum no Epã'ãu po'og tawa Ewesu piaria pe ekuap po'og po'og mono are'e Tupana pe. Uwe En sese hap kuap hamuat atiky­'esat. Epã'ãu kaipyi iwe'eg kahato rakaria wo tukup­te'en hap atiky­'esat are. Eti'a­tu­moẽ­tyhot ro i'atu­wa­nẽtup hap are. Etihep yt i'atue­ha­pytig i hap mi'i hawyi heremo i'atu­wa­nẽtup hawe etum Esa'yru mohey hap Tupana are.
EPH 1:18 Tupana are'e etum no Esa'yru mohey haria tapy'yia Ewesu piaria pe ewanẽtup hap kuap hamo hap are. Etum no i'atuepe ewanẽtup kuap hap kat hamo eti'a­tu­'airo mi'iria emiit'in no are. Etimo­herep to i'atuepe emiky­'esat ko'i nug neran hap ko'i are. Etimo­herep i'atuepe aikotã aru tukup­te'en atipy pe esa'y­ru'in wo esaki­'yt'in wo hap are. Etimo­herep i'atuepe kat som atipy pe are. Etimo­herep i'atuepe aikotã aru atipy pe emõtypot haria tukup­te'en hap are. Etimo­herep i'atuepe aikotã aru ewaku hap ewywuaria tukup­te'en hap are. Tupana ewaku hap ekahu hap ewato hap etimo­herep emiit'in me tawa Ewesu piaria pe are at ka'ap ehetiano uiwy­ria'in.
EPH 1:19 Tupana are'e etimo­herep emiit'in me esaika hap kuap hap are. Esaika hap iwato kahato uruewawi Esa'yru mohey haria pe aikotã karãpe sa'a­wy'i etihep Esa'yru gu'uro pyi hap ewy esaika hap. Tupana etimo­herep mi'i tã esaika hap Esa'yru mohey haria pe are.
EPH 1:20 Tupana esaika hap iwato kahato uruete are aikotã sa'a­wy'i etihep Uruka­'iwat gu'uro pyi hap ewy esaika are. Mi'i hawyi — Era'apyk o meiũpe uipo sese kai ere itote Esa'yru pe. Era'apyk to mesuwe atipy pe ere. Mi'i hawyi topy­hu'at e'e hap ewy esaika sese hap ewywuat topy­hu'at. Esaika kahato hap ewy etimo­herep uruepe Esa'yru mohey haria pe are Tupana pe at ka'ap.
EPH 1:21 Ai'akag Iesui topy­hu'at Wuat'i Akag wo. Toĩne'en ni Morekuat Koro wo are. Ai'akag wo toĩne'en ma'ato i'ewyte Wuat'i Akag wo atipy pe toĩne'en. More­kuaria Porekuat no topy­hu'at Iesui are. Tu'i­saria Porekuat no topy­hu'at. Surara Akag Koro wo topy­hu'at. Iesui set po'og Tupana mimõ­typot no wuat'i miit'in set kai. Po'og po'og wuat'i kai Aika­'iwat mesuwat i'ewyte wuat'i e'at pe.
EPH 1:22 Katu­pono Tupana tunug yne yne Iesui py ywyt'ok­pype. Aika­'iwat wuat'i okpe tote toĩne'en. Mi'i hawyi i'ewyte aito imohey haria Akag Koro wo topy­hu'at Iesui Tupana miky­'esat ewy.
EPH 1:23 Pyno yne aito Iesui mohey haria wato­py­hu'at Iesui wywo wẽtup piit ewy yn. Iwywo watoĩ­ne'en wẽtup ok miit ewy. Iesui piit no watoĩ­ne'en mesup mesuwat yi tote are. Atipy pe i'ewyte watoĩ­ne'en irania'in imohey haria wẽtup piit ewy yn watoĩ­ne'en aito. Imohey haria ipiit ewywuat wato­py­hu'at. Aikope Aikope Atipy pe mesuwat yi tote yne tote Aipo­typot Iesui toĩne'en Morekuat Koro wo.
EPH 2:1 Ha'a­wyte kahato yt uwe i eimu'e hat Iesui etiat turan yt Iesui mohey haria i eipe turan mi'i hap e'at pe yt eweikuap hin i Tupana etiat aikotã iku'uro rakaria yt tikuap hin i ahehay hap ewy mekewat e'at pe. Sa'a­wy'i yt eweikuap hin i Tupana ehay are.
EPH 2:2 Mi'i hawyi mekewat e'at pe yt ewetunug hin i yne yne Tupana wãi'e hap ko'i e hap. Sa'a­wy'i imohey hap e'yianmete ti ewetunug miit'in minug sa'ag ko'i yne yne mekewat e'at pe. Mekewat e'at pe wẽtup eika­'iwat toĩne'en mi'i ti ahiag. Mi'i heso rakat kape — Uruetu­pana en ewei'e ahiag me. Emiky­'esat ewy atunug neran ewei'e mekewat mã'ãu sa'ag me. Uruetu­pana uruetu­pana ewei'e at ka'ap mekewat yt nakuaria i nug haria porekuat kape mekewat ahiag me.
EPH 2:3 Pyno sa'a­wy'i yne aito wato­py­hu'at ahiag emiit no yt nakuaria i ewy. Sa'a­wy'i aimi­ky­'esat sa'ag he wati­puẽti. Mekewat e'at pe aiminug aipiit miky­'esat sa'ag ko'i kape yn po'og po'og ahepap wãi'e Tupana pytkai watunug sa'ag ne'i. — Mi'i tã ewetunug mote woro­ho­'o­'a­piheg ne'i eipe e Tupana ahepe pytkai watunug yne yne yt imiky­'esat i ko'i.
EPH 2:4 Ma'ato sa'ag watunug tuete pytkai aiky'e kahato te Tupana. Yt tuwepyk hin i katu­pono haty aiky'e hap tuete.
EPH 2:5 Towese hap kaipyi aheha­kye­ra'at Tupana. Aikotã iku'uro rakat yt ihay i hap ewy yt ahehay hin i Tupana kape mekewat e'at pe. Ta'i yt ahehay kuap i. Karãpe Tupana ihay ahowawi turan mekewat e'at pe yt wati­wesat kuap i kat pote iku'uro rakaria ewy watoĩ­ne'en Tupana ewawi pote. Ma'ato mi'i pytkai aiwy­'inug tuwe­wawi Aipo­typot Iesui ehay upi.
EPH 2:6 Mi'i hawyi aimoieĩ­ne'en Tosa­'yru suu wo. Mi'i hawyi Tupana ainug Aipo­typot Iesui emiit no wẽtup piit ewy watoĩ­ne'en iwywo. Mi'i hawyi karãpe Iesui tuwẽtem gu'uro pyi mi'i hap i'ewyte watu­wẽtem gu'uro pyi hap ewy wẽtup pu'i yn aito wato­mohey hawyi.
EPH 2:7 Mi'i hawyi Tupana to'e Tosa­'yru pe — Era'apyk to mesuwe uikai atipy pe wuat'i Porekuat no e Tosa­'yru pe. Mi'i tote hap ewy aito i'ewyte watoĩ­ne'en iwywo more­kuaria wo are. Mi'i hap ewy watoĩ­ne'en iwywo katu­pono aito wẽtup ok miit ewy iwywo. Pyno mesup toimo­herep ta'yn towese hap ahepe wuat'i e'at pe. Mi'i pote — Egyi'at kahato wato'e Tupana pe. Yt uwe i po'og ekai iwese rakat wato'e.
EPH 2:8 Ma'ato yt aiminug wakuap kaipyi hin i Tupana aheha­kye­ra'at. Ta'i yt hin i uiwy­ria'in. Ahewaku hap yt put'ok'e hin i Tupana wat hewaku hap ewy are. Aiky'e hap kaipyi towese hap kaipyi tutum aheha­kye­ra'at hap ahepe. Wati­mohey Iesui hawyi tutum ahepe wuat'i e'at piat aheĩne'en hap yt kat i watunug pytkai tutum. Pywo pe ti tuwe­kaipyi tutum wato­mohey Iesui hawyi are.
EPH 2:9 Pyno yt naku i wato'e — Uito ti wakuat pote Tupana uheha­kye­ra'at yt naku i wato'e katu­pono i'aparap haria watoĩ­ne'en Tupana wanẽtup hawe mi'i tupono yt watu­we­ha­kye­ra'at kuap i.
EPH 2:10 Sa'a­wy'i Tupana topo wo ainug. Koitywy Ha'yru mohey haria wato­py­hu'at wẽtup ywania ewy yn na'yn wato­py­hu'at. Ainug hap e'yianmete Tupana to'e — Meiũran aru atipo­wyro kahato uimi­ky­'esat nug neran haria e. Wakuaria sok ewy aru atunug mi'iria e sa'a­wy'i tuwepe.
EPH 2:11 Ma'ato ha'a­wyte eipe tawa Ewesu piaria yt kurin i eweikuap Tupana etiat katu­pono wẽtup ywania eipe. Sa'a­wy'i sese aha'a­se'i pot Aparãu emiari­ru'in yn Tupana ywania tukup­te'en mekewat e'at pe. Mekewat we'ahit sokpe tek haria mi'iria yn sa'a­wy'i Tupana ehay kuap haria tukup­te'en. Ma'ato eipe wẽtup ywania eweikup­te'en sa'a­wy'i yt Aparãu emiariru ko'i hin i eipe. Nimo urupusu puo uruhet'ok eipe ti yt we'ahit sokpe tek haria i uruto'e.
EPH 2:12 Katu­pono sa'a­wy­'ite eipe yt Tupana mohey haria ywania hin i eipe ma'ato wẽtup ywania eweikup­te'en. Mi'i hap e'at pe yt kat hin i eweikuap Tupana Mipo­'oro Aipo­rekuat etiat katu­pono sa'a­wy'i Tupana ti'airo Aparãu emiari­ru'in ko'i yn temiit'in no sa'a­wy'i. Yt ei'airo hin i sa'a­wy'i. — Aparãu emiariru emiariru ati'a­tu­poi­tyro e Tupana. Atunug esa'y­ru'in esaki­'yt'in ui'y­wania wo e. Ma'ato ehepe yt mio tã e hin i sa'a­wy'i. Yt kat i Tupana eipy'a pe sa'a­wy'i mi'i pote yt uwe i eipe — Areĩne'en aru wuat'i e'at pe e haria are.
EPH 2:13 Ma'ato mesup ti yt pya hin i ra'yn eweikup­te'en Tupana kai Tupana Sa'yru wuaria eipe pote. Sa'a­wy­'ite ti pya kahato eweikup­te'en Tupana kai ma'ato mesup Iesui suu eimo­wo­'osat kahato ra'yn Tupana ete.
EPH 2:14 Koran eipe yt pya hin i Tupana kai katu­pono Iesui tunug na'yn ni Tupana wywuat aiwo­'o­wese wese hap.
EPH 2:15 Aika­'iwat iku'uro aria'yp posak ete hawyi wo'o­wese hap tutunug ei'y­wania wywuat hamo i'ewyte uru'y­wania wywuat hamo.
EPH 2:16 Mi'i hawyi Ha'yru mohey haria wẽtup ywania ewy ra'yn wato­py­hu'at. Wẽtup piit ewy yn. Iesui mohey haria aito pote yt kat i po'og aiwo­'o­py­'ahak hap yt kat i aiwu­'uka hap aiwo­'ope. I'ewyte yt kat i po'og Tupana wywuat hap aiwu­'uka hap are.
EPH 2:17 Tupana tipo­'oro Tosa­'yru Aika­'iwat no. Put'ok­to'e hawyi ai'a­tu­mu'e kahato hamuat. Irania'in ywania pya kahato tukup­te'en Tupana kuap hap kai. Uru'y­wania Iuteu ywania po'og yt pya i ma'ato torania aito wẽtup sok yn sa'a­wy'i watu­kup­te'en pya kahato Tupana kai. Mi'i hap e'at pe Iesui timo­herep ahepe mu'ap To'ywot kapiat hap.
EPH 2:18 Mekewat mu'ap ti ahera­'aipok Tupana kapiat hap Aipo­typot Iesui kawiat katu­pono tutum na'yn Topã'ãu ahepe. Mi'i hawyi uruto Iuteuria i'ewyte eipe yt Iuteuria i Tupana Pã'ãu wẽtup takat eiam aito. Mi'i pote mesup waku watuwat Tupana kape uruto Iuteuria i'ewyte eipe wẽtup ywania waku wateke Ai'ywot Tupana ehamo mesup Iesui aimo­wo­'osat Tupana wywuat pote.
EPH 2:19 Sa'a­wy'i areto eimu'e hamuat hap e'at pe eipe yt Tupana mẽpyt'in hin i. Yt eweikuap hin i mekewat e'at pe Tupana sese yt kuap i haria eipe ma'ato mesup Tupana etawa piaria ewy ra'yn eweikup­te'en. Mio Tupana sa'y­ru'in no saki­'yt'in no ra'yn eweikup­te'en. Koran Tupana yat piaria wo ra'yn eweikup­te'en imẽpyt'in no eipe mesup.
EPH 2:20 Mio Tupana yat nug hat ewy watu­kup­te'en. Aikotã ai'yat watunug nu kawiat hawyi toĩne'en mot'i hap ewy. Mi'i hap ewy Tupana tunug to'yat mesup ma'ato miit'in kawiat. Toha­'a­wynug to'yat nug hap hamuat ewy toĩne'en mesup. Waku yne hawyi totopag Tosa­'yru mohey haria nu ewywuat to'yat iheg nakat pe hamuat are.
EPH 2:21 Ma'ato mekewat nu wato yne ai'y­wyt­'ok­pype aimoe­saika hap mi'i nu ewywuat ti Aika­'iwat Iesui. Mi'i hawyi wato­mohey Iesui hawyi ainug to'yat motag hamo. Mi'i hawyi meiũran Tupana yat ikahu rakano wato­py­hu'at hap ewy are.
EPH 2:22 Koitywy Tupana toĩne'en to'yat pe katu­pono Ipã'ãu toĩne'en aipy'a pe pote. Mi'i hawyi aito imohey haria yne yne aito wato­py­hu'at aiwo­'o­pype wẽtup yat ikahu rakat ewywuat Tupana eiam sese aitoria yne are.
EPH 3:1 Mesup ti uito Pauru wo'o­pyhik hawe areĩne'en katu­pono more­kuaria yt tiky­'esat i po'og miit'in mu'e uhepiat hap Iesui etiat hamo. Mi'i pote uipyhyp mesuwe wo'o­pyhik hawe. Yt ta'a­tu­ky­'esat i irania'in ywania ikuap Iesui hap. Mi'i pote uipyhik mesuwe wen ma'ato yt uipyhik kuap i meiũwat wo'o­pyhik hawe katu­pono mesuwe ahẽtup Tupana kape eipo­wyro hap at ka'ap. I'ewyte arepotpap kahato miwan nug hap ete mesuwe uimi­po­'oro einãpin hamuat hap ete.
EPH 3:2 Uiwa­nẽtup hawe Iesui mipyhyp areĩne'en toiky­'esat pote are. Waku kahato Tupana hegyi'at kahato. Uipo­wyro kahato mesuwe wo'o­pyhik sa'ag hawe topotpap nug hap ete.
EPH 3:3 Katu­pono mesuwe koitywy Tupana timo­herep kahato uhepe sa'a­wy­'iwuat yt uwe mikuap i sehay toimo­herep uhepe aikotã wẽtup ywania ipakup imohey haria tutunug hap. Ta'i ipakup takaria tutunug mesup wuat'i ywania kawiat. Aikotã to'y­wania pakup tutunug mesup hap toimo­herep mesuwe uipyhyp hawe uhepe. Waku kahato Tupana yt uwe i ipyhyp kuap are.
EPH 3:4 Mi'i ko'i atiwan mesup ehowawi yt iwato i wen uimiwan mesuwe ma'ato mesup uimiwan hit ete waku eiwe­mu'e kahato are at ka'ap. Mi'i hawyi eweikuap ui'ewy Tupana mienoi mig'i wuat sehay mi'i Aipo­typot ywania pakup etiat.
EPH 3:5 Sa'a­wy­'i­wuaria yt uwe i ikuap mesuwat sehay mig'i wuat Tupana — Atunug aru e hap. Tupana yn ikuap. I'ewyte ihay moherep haria sa'a­wy­'i­wuaria yt ikuap i ma'ato mesup Tupana Pã'ãu timo­herep ta'yn uruepe tehay moherep haria pe uruto Iesui potpo­'o­roria 12 ok takaria pe toimo­herep tehay mig'i wuat Topã'ãu wo.
EPH 3:6 Koran Tupana Pã'ãu to'e ahepe — Sa'a­wy'i irania'in ywania yt uikuap hin i ma'ato mesup atipo­'oro uhehay wakuat wuat'i ywania ewawi aikotã are'e sa'a­wy'i miwan me. Atunug aru e hap ewy mesup atunug na'yn e. Koran atunug na'yn Irania'in ywania Porekuat no ra'yn Uha'yru e. Mi'i imohey haria sok wẽtup piit ewywuat yn na'yn te'e­ro­py­hu'at aru e. Aikotã sa'a­wy'i atipoi­tyro Iuteu ywania ati'a­tu­poi­tyro mesup yne yne ywania aikotã are'e sa'a­wy'i ui'e hap ewy atunug mesup e Tupana uhepe. Sa'a­wy'i mig'i wo sese yt uwe mikuap mo i mesuwat ui'e hap are ma'ato koitywy atimo­herep mi'i ui'e hap yne miit'in me uimiwan kaipyi uhehay kaipyi e Tupana ahepe.
EPH 3:7 Uito Pauru sa'a­wy'i Aipo­typot Iesui uinug topot­po­'oro wo tehay sytpok hamo tehay moherep hamo miit'in me wuat'i ywania piat hamo uinug. Mi'i hap atunug kahato uito ma'ato yt uhesaika hap upi i katu­pono Ipã'ãu tum uhepe tesaika hap sehay wakuat moherep miit'in miat hamo.
EPH 3:8 Uhewaku hap yt put'ok'e hin i Aipo­typot eropat hamo are. Ta'i uito ti po'og kurin kano areĩne'en po'og yi kape torania Iesui mohey haria kai areĩne'en uito ma'ato mi'i pytkai Tupana ui'airo irania'in ywania mu'e hamo tehay ikahu rakat ete uhewaku hap yt put'ok'e hin i heropat hamo pytkai are. Yt naku i uito pytkai towese kahato hap mywo ui'airo katu­pono yt po'og hin i uito. Koitywy atimõ'ẽ kahato irania'in ywania pe. Tupana ekare'en mõ'ẽ hat ewywuat areĩne'en uito aikotã wuat'i e'at piat hekat rakat tomõ'ẽ hap ewy areĩne'en. Aika­'iwat Iesui ekat iwato kahato aikotã po'og po'og wuat'i kai toĩne'en po'og po'og Mi'i ekat mõ'ẽ hat ewy areĩne'en uito Pauru.
EPH 3:9 Sa'a­wy­'i­tewuat mig'i wuat Tupana mimo­herep aikotã toiky­'esat yne ywania towanuat hap toimo­herep mesup uiwẽ pyi. Tupana ti wuat'i wuat'i nug hat ma'ato kat hamo ainug sa'a­wy'i yt tohenoi i. Mi'i kape miit'in sa'a­wy­'iwuat te'e­ru­wa­nẽtup kahato ma'ato yt ta'a­tukuap kuap i. Ma'ato koitywy toimo­herep ta'yn mi'i e hap ahepe.
EPH 3:10 Koitywy koran mesuwat e'at pe Ai'akag Iesui timo­herep kahato towe'eg kahato hap mo ahepe i'ewyte yne atipy piaria pe. Koitywy atipy piaria Surara Akag wo toĩne'en Iesui i'ewyte Tupana etawa piaria atipy piaria tikuap ta'yn Tupana we'eg kahato hap ko'i katu­pono ahowawi Iesui mohey haria kape te'e­ra­ha'at kahato hawyi te'e­ro'e to'ope — Pywo ti Tupana iwe'eg po'og torania kai katu­pono yne ywania toi'a­tue­ha­kye­ra'at kuap i'atu'e.
EPH 3:11 Wuat'i e'yianmete Tupana tunug towe'eg hap upi yne tomi­ky­'esat upi. Mio tã e — Ati'a­tue­ha­kye­ra'at yne ywania yne miit'in e. Uimi­po­'oro I'atu­po­rekuat nuat po wo Uha'yru minug upi ati'a­tue­ha­kye­ra'at wuat'i ywania e Tupana sa'a­wy'i yt kat i te mesuwat yi turan yianmete mio tã e tuwepe mig'i wo. Mi'i hap toimo­herep ta'yn uhepe mesuwe uipyhik hawe.
EPH 3:12 Mi'i pote mesup yt wato­ken'ẽ hin i Tupana kapiat ahehay hamo. Yt kat i aiwe­mõti hap ahehay iwywuat hamo katu­pono koitywy Ha'yru upi imohey hap upi watuwat kahato Tupana kape aikotã wẽtup piit ewy yn watoĩ­ne'en Ha'yru wywo Aheyke'et Aikywyt wywo.
EPH 3:13 Uiwy­ria'in tawa Ewesu piaria more­kuaria uipyhik mesuwe iheg me mesup yt ta'a­tu­ky­'esat i woro­ho­'o­mu'e po'og hap wote. Uhaty'i haty'i kahato mesuwe. Aho'opot kahato wen ma'ato waku aho'opot eimu'e hap ete are. Pywo ti rat yt paa'e­wei'e tei'o are uipyhik ne'i hap upi kat pote meiũpe areĩne'en Ai'ywot atipy piat Tupana ehamo are.
EPH 3:14 Mi'i tã ahẽtup mesuwe at ka'ap — Uru'ywot atipy piat arepỹ­'ã­tutuk ewawi mesuwe katu­pono wuat'i ywania ehakye­ra'at kuap hat En are.
EPH 3:15 Wuat'i ywania mesuwat yi totiat nug hat En are i'ewyte yne ywania atipy piaria nug hat En are.
EPH 3:16 Wuat'i wuat'i mimõ­typot En are. Yt uwe i po'og ekai are. Mi'i pote ahẽtup ekawiano etum no emohey haria pe tawa Ewesu piaria pe Epã'ãu wakuat i'atu­moe­saika hamuat hap ahẽtup epe. Atiky­'esat kahato i'atu­wa­nẽtup hap hesaika rakat ewy emohey hap ete.
EPH 3:17 — Etunug no Emipo­'oro Iesui kawiat e'yat sese itote. Ereĩne'en itote emohey haria py'a­setpe. Atiky­'esat i'atu­sapo yi pe iheg me aria'yp wato ga'apy piat hap ewy. Atiky­'esat mi'iria iheg me wo'o­ky'e hawe i'ewyte eky'e hawe hap atiky­'esat are.
EPH 3:18 Ahẽtup kahato ti ewawi Tupana. Atiky­'esat kahato ti itotiaria tikuap Esa'yru piat ta'a­tu­ky'e hap are. Atiky­'esat yne urutoria Esa'yru moheg haria ikuap haria. Etum no esaika hap i'atuepe kat kupitu kat kupitu Esa'yru piat i'atu­ky'e hap kuap hamo are katu­pono iwato kahato Esa'yru piat uruky'e hap i'ywop kahato hap ewy i'anam kahato hap ewy. Mi'i hap kuap hamo atiky­'esat ta'a­tukuap ta'a­tu­ky'e hap Esa'yru piat hap atiky­'esat Tupana are.
EPH 3:19 Yt karãpe i uruikuap yne kat kupitu kat kupitu uruky'e hap Iesui piat hap ma'ato ahẽtup kahato ewawi Tupana etimo­herep emohey haria pe tawa Ewesu piaria pe aikotã aikotã Esa'yru ta'a­tu­ky'e hap ahẽtup epe are. Mi'i hap ta'a­tukuap hawyi te'e­ro­py­hu'at eiam sese wo ra'yn Tupana are i'ewyte ereĩne'en no i'atu­wywo kahato are ahẽtup Tupana pe mỹ'ã­tutuk pepyi mesuwe wo'o­pyhik hawe.
EPH 3:20 Ta'i uiwy­ria'in Ahetu­pana hepap kahato aimiẽtup ium hamo po'og po'og iwato tutum kuap aimiẽtup ko'i kai are. Yt karãpe i teke aiwa­nẽtup hawe kat kupitu kat kupitu hegyi'at hap are. Tutum po'og po'og kuap ahepiat hẽtup kuap hamo kai katu­pono Ipã'ãu hesaika aikai ahepiat hẽtup hamo Tupana pe are.
EPH 3:21 — Uruetu­pana uruimõ­typot kahato En uruto'e. Emipo­'oro Urupo­rekuat nuat mohey haria sese uruto. Ta'i urutu­wehum kahato ewawi wuat'i e'at pe aru uruto'e ewawi Tupana waku ra'yn uruto'e.
EPH 4:1 — Uimi­mu­'eria tawa Ewesu piaria mesup uito Pauru areĩne'en meiũpe wo'o­pyhik hawe. Wanĩ­kaptia uipyhyp ta'yn Aika­'iwat potpap nug hap pyhyp hamo uipyhik wen ma'ato mi'i pytkai woro­ho­'o­mu'e te uimiwan myi uiwy­ria'in. Sa'a­wy'i Tupana ai'airo temiit'in no tomõ­typot hamo. Mi'i pote are'e ehepe — To'iro wati­mõ­typot Ai'airo hat haty wo are. Aikotã aimẽ­pyt'in hãpyk takaria ewy aimo­wepit ta'a­tu­potpap wakuat nug hap ete aimi­ky­'esat nug hap ete mi'i hap ewy waku wati­mo­wepit Ai'ywot atipy piat wakuat nug hap kaipyi.
EPH 4:2 Yt naku i wato'e aiwa­nẽtup hawe — Uito po'og irania'in imohey haria kai yt naku i wato'e. Pyno to'iro watoĩ­ne'en hãpyk kahato rakaria wo. Waku watu­we­potpap Aika­'iwat kape aipe­rup'i wywo yt kat i aipy­'ahak hap mywo waku are. Waku wati­mo­herep irania'in miit'in ky'e hap yne aiminug ko'i ete are. Waku wati­'a­tu­ky'e irania'in yt i'atu­wese i pytkai.
EPH 4:3 Waku watoĩ­ne'en yt kat i aiwu­'uka hap mywo katu­pono Tupana Pã'ãu tiky­'esat aiwo­'o­wese kahato hap are. Mi'i pote waku watuwat Ipã'ãu upi. Waku wẽtup mẽpyt'in ko'i wẽtup piit ewy wato­py­hu'at Iesui wywo.
EPH 4:4 Katu­pono aito Aika­'iwat piit aga ko'i ewywuat are. I'ewyte Aipã'ãu Tupana miium Aika­'iwat Iesui wanuat e. Mi'i pote aito imohey haria wẽtup pã'ãu wẽtup piit ewywuat wato­py­hu'at mesuwe aito imohey haria. Aito ti wẽtup piit imohey haria aito pote aiwo­'o­'e­wy­'ewy katu­pono Iesui wywo watu­kup­te'en. — Mũki­'ite ti aru watoĩ­ne'en wuat'i e'at pe e haria sok aito wato'e.
EPH 4:5 Wẽtup yn Aika­'iwat. Aito aity­py'i kahato wen ma'ato wẽtup yn Aika­'iwat pote wẽtup yn aimi­mohey wẽtup set upi yn ahet'ok hap. Mi'i pote wẽtup piit ewy yn watoĩ­ne'en.
EPH 4:6 Wẽtup yn ni Ai'ywot Atipy piat. Mi'i ti Tupana wuat'i miit'in nug hat. Mi'i ti Ai'akag Koro wo toĩne'en e. Wẽtup yn Ahetu­pana. Tupana ti toĩne'en ahepuo ipotpap nug hamo. Mi'i pote aito wato­py­hu'at ipiit ewy miit'in sem kahato aito pytkai.
EPH 4:7 Mi'i hawyi wẽtup ok pe wẽtup ok pe tomohey haria pe toimõ'ẽ tomi­sepap ko'i nug hap tomi­ky­'esat ewy. Toi'a­tu­mõ'ẽ ahepuo tomi­sepap nug hap ipotpap ko'i nug hamuat. Aipo­typot Iesui miky­'esat ewy Tupana ti'a­tu­mõ'ẽ tomi­sepap ko'i ahepe.
EPH 4:8 Mi'i tutunug aikotã to'e sa'a­wy'i morekuat Tawi miwan me e hap ewy — Meiũran ti aru Tupana Mipo­'oro topy­hu'at wuat'i Porekuat Koro wo e. Mi'i Miit ti'akit yne tewa­nĩ­kaptia hawyi ta'am aru atipy kape e. Mi'i tote pyi toimõ'ẽ aru tesaika hap tomi­sepap ko'i nug hamuat temiit'in me mesuwe e morekuat Tawi sa'a­wy'i tomiwan me tuwepy hawe 68.18 hawe.
EPH 4:9 Pyno ti ta'am e miwan me ma'ato ta'am hap tohenoi pote i'ewyte tohenoi tut hamuat yi ywyt'ok­pype topot­'apyk hap i'ewyte ti tohenoi yt to'e i pytkai.
EPH 4:10 Mekewat ta'apyk hap tohenoi i'ewyte mekewat yi ywyt'ok­pypiat toto hap tohenoi morekuat Tawi miwan me. — Pyno mekewat toto po'og yi ywyt'ok­pype i'ewyte mesup ta'am na'yn po'og atipy kape po'og ta'am na'yn torania kai. Ywaiti hap tote ta'apyk ta'yn Morekuat no. Iesui toto ra'yn waikiru apy tote i'ewyte toĩne'en Morekuat no aipy­'a­setpe.
EPH 4:11 Koitywy toimõ'ẽ kahato ahepuo tomi­sepap ko'i topotpap nug hamuat aikotã to'e miwan me hap ewy — Wẽtup ok pe wẽtup ok pe tomi­'ai­roria pe tutum tesaika hap tehay moherep hamo wẽtup ywania pe wẽtup tama totiaria pe e. Wẽtup ok pe wẽtup ok pe tutum tesaika hap Tupana ehay sese moherep miit'in miat hamo e. Wẽtup ok pe wẽtup ok pe tutum tesaika hap tehay sytpok kahato hamo miit'in sem miat hamo hap tutum e. Wẽtup ok pe wẽtup ok pe ti tutum tesaika hap temiit tohũria apykok hamuat hap tutum e. Wẽtup ok pe wẽtup ok pe ti tutum tesaika hap temiit'in atupo­wyro hamuat hap tutum e. Wẽtup ok pe wẽtup ok pe tutum tesaika hap yne miit'in atumu'e hap kuap kahato hamuat hap tutum.
EPH 4:12 Wẽtup ok pe wẽtup ok pe tutum tesaika hap tomi­sepap ko'i yt uwe minug kuap i nug hamuat hap tutum e. Pyno yt to'o­'e­wy­'ewy hin i toimõ'ẽ tesaika hap tomi­sepap nug hamuat ko'i tominug kuap hap ewywuat nug hamuat hap ko'i are. Ta'i toimõ'ẽ kahato ahepe tomiium ko'i are. Yt to'o­'e­wy­'ewy hin i tutum. Ewat emikuap uiat uimikuap Tupana miium ko'i aimi­sepap ko'i yt to'o­'ewy hin i are. Tomohey haria mowe'eg hamo tutum tesaika hap ahepe topotpap nug kuap hamo tutum e. Tupana tiky­'esat kahato aito tomi­po­'oro ko'i Tosa­'yru Iesui ewywuat e. Mi'i pote aimoe­saika Tosa­'yru Pã'ãu wo topotpap nug hamuat.
EPH 4:13 I'ewyte Tupana tiky­'esat aito Aika­'iwat Iesui ewywuat aito torania iwywo wẽtup piit ewy hap toiky­'esat e.
EPH 4:14 Yt toiky­'esat i wẽtup ok wẽtup ok mienoi sa'ag upi wato­py­hu'at hap kat pote toiky­'esat Tosa­'yru mienoi upi yn wato­py­hu'at hap. Imohey haty wuat hap toiky­'esat. I'atu kahato aimu'e iwe'eg kahato rakaria aimu'e kuap kahato haria ma'ato yt pywo pe i yt Iesui mienoi upi i haria aimu'e ma'ato ahekat ky'ewi yn aimu'e haria e. Mi'iria ehay upi wato­py­hu'at hawyi i'atue­wa­miri pe wato­py­hu'at hap ewy aikotã wasere owa kape wato teran ihyemyi'a wato sakpo teran ma'ato yt wato kuap i ipoity'i pote hap ewy katu­pono mi'iria te'e­ru­wa­nẽtup at ka'ap aima­'at'i ma'at'i hap ete i'atuehay wẽtup upi. Yt eweimohey tei'o mi'iria yne miit'in miat aimu'e hap are. Yt naku i wato­py­hu'at hira­karia ewy aimikuap ete are. Hira­karia imohey yne yne miit'in ehay sio pywo sio yt hap ta'a­tu­mohey. Waku wato­mohey aimu'e hat Iesui e hap ewy aimu'e pote. Waku wati­moheg aimi­mohey Iesui aipy'a pe aiwa­nẽtup hawe e. Tupana wywo wẽtup piit ewy watu­kup­te'en. Mi'i hawyi ai'y­wania uru'y­wania wẽtup ywania ewy yn na'yn ainug e. Koitywy Tupana ywania ra'yn aito. Sa'a­wy'i Iuteu ywania ei'y­wania tukup­te'en to'ope to'ope to'oe­wa­nĩkap mo te'e­ro­py­hu'at. Mekewat e'at pe toĩne'en eipyhyp hap ewywuat Iuteu etawa kapiat eweiwat hamo. Ma'ato mekewat eipyhyp hap Tupana kapiat hap Iesui ti'a­porok yne ra'yn topy wo.
EPH 4:15 Iuteu eko i'ewyte wãi'i­'a­tu'e hap ko'i yt Tupana miwan ewy i toimo­weityk mi'i hawyi towano tutunug mote Iuteu ywania i'atu­py­'ahak kahato ehete kat pote yt i'atueko yt ewy i ra'yn aheko pote i'atu­wo­'o­nãpin hap ko'i i'atu­wo­'oewãi hap ko'i. Mi'i pote i'atu­py­'ahak — Wãi wãi'i­'a­tu'e ma'ato yt eweiwat i wãi'i­'a­tu'e hap upi hawyi wo'oe­wa­nĩ­kaptia wo eweikup­te'en. Typy ywania eweikup­te'en sa'a­wy'i. Mi'i hawyi put'ok'e Aika­'iwat Iesui hawyi toi'a­tu­kaykay yne miit'in tuwe­wawi yne ywania. Mi'i hawyi tutunug yne miit'in Tupana ywania wo. Koitywy ipat'ok yne ywania Iuteu ywania ei'y­wania irania'in ywania tukup­te'en Iesui mohey haria. Mi'i hawyi watu­kup­te'en mesup yne yne ra'yn wẽtup piit ewy Iesui wywo wo'o­wese rakaria ra'yn wato­py­hu'at.
EPH 4:16 Sa'a­wy'i aito wu'uka yne ywania wywuat haria aito wuat'i ewanĩ­kaptia wo watu­kup­te'en. Pya kahato watu­kup­te'en Tupana kai aito torania. Aipiit ete ipoity ahaga ko'i ma'ato wẽtup piit yn watoĩ­ne'en aito wẽtup piit yn aito. Yt tuweran hin i ma'ato ahaga ko'i. To'osat kahato ahaga ko'i. Mi'i hawyi aipiit iheg aipiit wẽtup yn. Aipu'i aikag ko'i ahaga to'osat to'oete kahato. Karãpe watunug Ai'akag Iesui miky­'esat ewy hawyi wato­py­hu'at aikotã haga ko'i ewy ipiit ewy. Mi'i hawyi wahe­wyry aikotã ihãite rakat ewy. Karãpe aito Iesui mohey haria wato­'o­ky'e yne yne aiwo­'ope mi'i hawyi wato­'o­po­wyro mi'i hawyi wato­py­hu'at aito Iesui piit ihãite rakat ewy.
EPH 4:17 Pyno woro­ho­'o­mu'e teran Aika­'iwat Iesui ehay ete. Ewe'eg wo o eiminug sa'ag ko'i eimi­ky­'esat sa'a­wy'i eheko sa'a­wy­'iwuat pupi are. Yt imohey i te turan wuat sa'ag nug hap ete yt aiwe'eg hin i sa'a­wy­'iwuat aiminug sa'ag ko'i kai — Ewei'atoiat ro mi'i ko'i e Tupana pytkai. Uiwy­ria'in yt naku i watu­wa­nẽtup po'og aikotã yt imohey i haria wanẽtup hap ewy ne'i katu­pono mi'iria yt naku i nug hap yn i'atu­wa­nẽtup hawe. — Uito po'og po'og torania kai i'atu'e ta'a­tu­wa­nẽtup hawe. Yt paa'i­'a­tu'e hin i ta'a­tu­minug yt naku i hawyi. Mi'i tã i'ewyte aito sa'a­wy'i ma'ato mesup waku watu­we­nãpin mi'i e hap pun hamuat e.
EPH 4:18 Yt karãpe i te'e­ru­wa­nẽtup Iesui ewawi mi'iria. I'atu­wa­nẽtup hap ho'o­wasat kahato hap ewy aikotã miit'in i'ypyryp we ho'o­wasat hap ewy tukup­te'en. Katu­pono irania'in yt imohey i haria yt karãpe i Tupana mohey haria. — Mi'i pote yt karãpe i areĩne'en I'atu­'ywot no e Tupana i'atuepe. Yt te'e­ru­wa­nẽtup hin i uhehay kape e. I'atue­waure ka'a yt uikuap i hap e. Ta'a­tu­ky­'esat kahato wẽtup mu'ap e. Yt kat i uikuap hap ta'a­tu­ky­'esat e. — Yt urumu'e tei'o yt uimu'e tei'o i'atu'e yn at ka'ap uhepe e. Ta'a­tunug sa'ag sese sakpo yt uimi­ky­'esat ewy i are e Tupana sa'a­wy'i mi'iria piat pe.
EPH 4:19 Karãpe ta'a­tunug sa'ag wemõti hap ewy mi'i hawyi yt te'e­ru­we­mõti hin i. — Yt naku i mi'i tã eweikup­te'en e Tupana pytkai yt paa'i­'a­tu'e hin i. Te'e­ru­wepyi ta'a­tupiit miky­'esat sa'ag hap ok tã yn ta'a­tunug neran yt naku i. Ta'a­tue­waire hap kape yn te'e­ru­we­wa­nẽtup ta'a­tu­py'a pe. Yt te'e­ru­wewãi teran hin i yne sa'ag nug hap ete. Ta'a­tueko sa'ag nug hap kape yn te'e­ru­we­potpap miit'in ehamo ta'a­tunug. Aikotã aikotã miit'in mõti hap ewy yn ta'a­tunug wuat'i ehamo ma'ato yt te'e­ru­we­mõti hin i pytkai.
EPH 4:20 Ma'ato Aipo­typot Iesui — Yt eweikup­te'en nei'o mi'iria ewywuat e. Waku eweikup­te'en ui'e­wywuat e Aimu'e Hat Koro ahepe.
EPH 4:21 Uiwy­ria'in pywo ti waku watoĩ­ne'en Aika­'iwat Iesui ewy are. Waku watikuap kahato ieĩne'en hap etiat i'ewyte sehay etiat aimu'e hap etiat hãpyk kahato rakat ewywuat. Waku wati­'a­tunug yne Ai'akag minug ewywuat aikotã aimu'e Iesui hap ewy. Ma'ato yt naku i watunug mote watikuap ta'yn yt imimu­'eria i aito hap watikuap.
EPH 4:22 Pyno waku watoiat aiwẽ piat sa'ag nug hap ete aheko yt naku i nug hap sa'ag sa'a­wy­'iwuat. Waku yne wati­pugha aiminug sa'ag ko'i sa'a­wy­'iwuat aiminug ko'i are kat pote sa'a­wy'i aiwa­nẽtup sa'ag hap yn watunug neran. Yne aimi­ky­'esat sa'ag koi aima'at hap ewywuat topy­hu'at. Ma'ato yt watoiat i aiminug sa'ag sa'a­wy­'iwuat mi'i pote aheko ewy topy­hu'at ahete. Mi'i hawyi aiwe­ma'at hap yn topy­hu'at iheg me aiwa­nẽtup hap hawyi heso heso rakaria wo wato­py­hu'at wema'at haria ewywuat wo watoĩ­ne'en.
EPH 4:23 Waku wato'e Tupana pe — Uinug o ipakup takat wo waku wato'e. Uinug o waku wanẽtup hano i'ewyte uinug o waku kapiat wanẽtup hat wo waku wato'e. Areĩne'en neran ipakup takano areĩne'en neran uiwa­nẽtup hawe uipy'a pe waku wato'e Tupana pe. Mi'i yn waku katu­pono Tupana yn aihep kuap i aheko sa'ag nug at ka'ap hap po pyi e.
EPH 4:24 Aikotã watopag ahesokpe aipiit pe ipakup takat hawyi aikahu hap ewy ra'yn topy­hu'at. Mi'i hap ewy waku watopag ahete Tupana aimo­kahu hap ewywuat aipainug hap ewywuat. Tupana wanẽtup hap ewy waku watopag aiwa­nẽtup hawe. Tupana wanẽtup hap watopag aiwa­nẽtup hawe hawyi ipakup takaria ewywuat sokpe pakup we ahewyry hap ewy Tupana wanẽtup hawe. Waku watu­we­painug Tupana ehay wo. Waku watunug yne Tupana tunug hãpyk hap ewy. Waku yt kat hin i miit'in ma'at hap aikai. Waku hãpyk Tupana ewy wahe­wyry mesu­wa­ro­tiaria py'a­setpe. Mi'i watunug mote watopag ahesokpe pakup ewywuaria aipainug hap ewy wato­py­hu'at hap yt aipu'i ete i ma'ato aipy'a pe aipainug kahato hap toĩne'en hap ewy.
EPH 4:25 Aito ti Aimi­mohey Iesui piit ewywuat wato­py­hu'at yne aito haga ewy. Pyno yt naku i aheso aiwo­'ope aikotã sa'a­wy'i watunug hap ewy. Waku wati­pugha aiwo­'ope aheso heso hap aikotã watipun ahesokpe hiot'e rakat ewy. Koitywy waku pywuat sehay yn aiwo­'ope ahehay are. Mi'i watunug mote aipainug hap aipy'a piat aiwa­nẽtup hawiat ikahu kahato Tupana ehamo.
EPH 4:26 Karãpe aipy­'ahak put'ok'e wẽtup ok etiat hap yt naku i wati­po­wyro mekewat aipy­'ahak hap are. Waku aipohep mekewat aipy­'ahak hap toĩne'en ahete turan. Waku meremo aipohep mekewat aipy­'ahak mot'i hap ete. Waku meremo watu­we­mo­pe­rup'i aipy­'ahak hap ete. Yt naku i wato­py­hu'at typy e'at aipy­'ahak hap wywo. Waku waure wo wato­py­hu'at at min'e hap e'yianmete.
EPH 4:27 Karãpe ahã'ãg ahiag yt naku i nug hap ete mi'i pote waku yt ahehay upi i are.
EPH 4:28 Sa'a­wy'i wate­ro'ok irania'in ekat ma'ato koitywy waku watoiat mekewat ahesokpe nem hap ewy are. Yt naku i Iesui mohey hat sero­'ok'e hano topy­hu'at. Waku mesup ipakup we watoĩ­ne'en motpap nug haria wo waku watoĩ­ne'en. Waku ahe'at hakup wywo aipotpap at. Mi'i hawyi aipotpap hap sa'up wywo waku ahekat. Yt naku i miit'in ma'at'i ma'at'i hano aipotpap are. Waku watikat ahekat iwato hawyi ahegyi'at hap wywo hatek takaria powyro hanuaria watu­kup­te'en. Mi'i hawyi satek haria poi haria wo wato­py­hu'at aiko wato kaipyi. Mi'i hap watunug mote ahegyi'at hap topy­hu'at ahete aipainug hap ikahu rakat ewy topy­hu'at mesuwe Tupana wanẽtup hawe.
EPH 4:29 Waku ahehay hẽ'ẽ rakat ewy are. Waku iwese kahato rakat ewy watoĩ­ne'en. Waku irania'in mowepit ahehay kuap hanuaria watikuap are. Mi'i tã watunug mote pywo i'atu'e hamo ahehay kuap haria. Mi'i hawyi ahehay kuap haria poityro hat ewy wato­py­hu'at. Yt naku i wato­pot­kuasa ahehay wo. Yt naku i wati­poepyk ahehay wo are.
EPH 4:30 Karãpeĩ sa'a­wy'i wato­py­hu'at Tupana Pã'ãu eiam mo mi'i hap e'at pe Tupana to'e ahepe — Wuat'i e'at pe aru ereĩne'en uianuat uhemiit no e ahepe. Uimie­ha­kye­ra'at wuaria eipe e ahepe. Pywo yt uheso hin i ui'e hap e ahepe Tupana. Pyno uhehay moheg hamuat atum Uipã'ãu ehowawi e ahepe sa'a­wy'i. Mesup Uipã'ãu to'e ehepe — Woro­ho­'onug eipe uhemiit sese nuaria e. Worokuap kahato eipe mesup e ahepe Tupana. Uheiam mo Uipã'ãu eiam mo eweikup­te'en e mesup ahepe. Mi'i pote yt naku i wati­mo­'arot ne'i Tupana Pã'ãu aiminug sa'ag wo are.
EPH 4:31 Wati­mo­'arot kahato Tupana Pã'ãu karãpe aipy­'ahak irania'in ete pote. Mi'i pote waku watoiat mekewat yt naku i haiug nakaria are. Yt naku i watu­wehum hary­poria kape ihainia kape ipiit ky'esat hap wywo ahewaire teran hap wywo. Mi'i watunug mote Tupana Pã'ãu aipiit pe i'arot kahato hap ewy are. Yt naku i wato­pot­wesat ahehay pirik hap wywo ahehay sa'ag wywo. Yt naku i marak'a wo watoĩ­ne'en. Mi'i tã watoĩ­ne'en mote mi'i tã watunug mote Tupana Pã'ãu mo'arot hat watoĩ­ne'en.
EPH 4:32 Ma'ato waku watoĩ­ne'en iwese kahato rakaria wo. Waku aiwo­'o­wese hap ahehay perup'i popuo. Waku meremo wati­waure aima'at hat aikotã Aika­'iwat waure wo toma'at hap aiminug sa'ag kai toĩne'en hap ewy. Waku watu­kup­te'en waure wo yne yne aima'at hap ko'i kai are. Uito ti Pauru. Woro­ho­'o­nãpin kahato waku iwese kahato rakaria wo Iesui ewywuat eweikup­te'en are.
EPH 5:1 Pyno aito Tupana sa'y­ru'in haki­'yt'in wato­py­hu'at mi'i pote waku wahã'ãg kahato Ai'ywot Tupana waku nug hap ewywuat nug hamo Ai'ywot mõtypot hamuat Ai'ywot pote.
EPH 5:2 Aikotã Aipo­typot Iesui aiky'e kahato sa'a­wy'i aiky'e kahato te. Aiky'e kahato hawyi aiky'e hap upi iku'uro. Tutum na'yn heĩne'en hap aika­wiano hap aikotã sa'a­wy­'i­wuaria tum ta'a­tu­hũria aria pe Tupana mowepit hamo. Mi'i hap ewy iku'uro aria'yp posak ete aiky'e kahato haype. Aiky'e sese hat Iesui pote iku'uro ai'a­piheg hap u hamo. Mi'i pote aikotã aiky'e hap ewy waku wati­ky'e irania'in aiku­'uro hap kape.
EPH 5:3 Pyno koitywy aito Tupana ywania sese ko'i aito mi'i pote waku iwe'eg kahato rakaria wo waku watoĩ­ne'en are. Waku ihary'i rakaria wo watoĩ­ne'en i'ewyte he'aito kahato rakaria wo waku watoĩ­ne'en. Yt naku i aheĩne'en hap totiaria i'atuehay sa'ag ahete sio iwe'eg sio yt i'atu'e hap ete sio tuwa­nẽtup sa'ag sio yt i'atu'e hap ete. Mi'i pote waku hãpyk kahato watoĩ­ne'en hary­poria wywo ihainia wywo iwe'eg nakat ewywuat powyro hap are. Mi'i pote miit'in yt uwe i ahete i'atuehay sa'ag sio aiwe'eg sio yt i'atu'e hap ete. Waku yt naku i yt i'atu'e hin i ahepe. Yt naku i aito Iesui mohey haria yt hegyi'at i rakano wato­py­hu'at are. Yt naku i wati­ky­'esat sa'ag irania'in ekat aipy'a pe aheha wo. Yt naku i watu­wa­nẽtup at ka'ap uruwat e hap kape. Waku po'og watikat ahegyi'at hap irania'in hatek takaria powyro hap are.
EPH 5:4 Koitywy aito Iesui mohey haria mi'i pote waku watoiat yne sa'a­wy­'iwuat ahehay sa'ag hap ko'i yt iwe'eg i rakat ewywuat. Waku watoiat yne ahehay sa'ag miit'in muat ahehay sa'ag hap ko'i miit'in wemõti hap ko'i. Waku watoiat yne sehay sa'ag. Koitywy po'og waku sehay aiwẽ pyi Tupana kapiat aiwehum hap.
EPH 5:5 Pyno uiwy­ria'in waku aiwe'eg wo katu­pono pywo ti yt uwe hin i ti aru yt nakuat i wanẽtup sa'ag haria tukup­te'en aru atipy pe aikope Aipo­typot Iesui toĩne'en Morekuat no hap tote are. Yt uwe i itote atipy pe uiano yn mo e haria yt hegyi'at i rakaria. Ewe'eg wo o mi'i pupi katu­pono yt ahegyi'at i hap yt naku i sese Tupana wanẽtup hawe aikotã irania'in tupa­naria mõtypot haria yt naku i nug hap ewywuat minug mõtypot hap ewy yt ahegyi'at i hap are. Yt uwe i aru atipy pe wuat'i hary­poria wywuat ieĩne'en haria wuat'i ihainia wywuat ieĩne'en haria yt uwe i itote katu­pono aito Aipo­typot Iesui emiit.
EPH 5:6 Mi'i tupono waku aiwe'eg wo mi'i ko'i sa'ag nug hap pupi katu­pono i'atu kahato ahã'ãg haria i'atuehay se ahã'ãg neran yt naku i nug hamo. Yt te'e­ro­ken'ẽ hin i mi'i sa'ag nug hamo. Mi'iria aima'at kuap kahato. Waku aiwe'eg wo are. I'atu irania'in — Atunug yne Tupana wãi'e hap e haria. Aiwe'eg wo o mi'i ewywuat aheĩne'en pote katu­pono Tupana ipy'ahak kahato yt tomi­ky­'esat i nug haria ete. Toi'a­tu­'a­piheg mi'iria.
EPH 5:7 Pyno yt naku i watuwat i'atuehay upi are. Yt naku i watunug sa'ag mi'iria ewy are. Yt naku i mi'iria watunug aiwy sese wo.
EPH 5:8 Pyno mi'i ko'i sa'ag nug haria ewy yne sa'a­wy'i aito nimo. Yt watikuap hin i Tupana mekewat e'at pe. Nimo ho'o­wasat i'ypyryp we rakaria ewywuaria watoĩ­ne'en ma'ato mio Aika­'iwat eropat haria wato­py­hu'at. Mi'i pote koitywy watoĩ­ne'en mu'ap upi hẽtyhot puo ikohye­wyry rakat ewy yt wata'at kuap i ra'yn. Waku watunug wakuat yn wuat'i ehamo Tupana ehamo. Waku watunug waku hap yn aikotã Tupana kuap haria ewy.
EPH 5:9 At ipotpap kahato aimikoi ete mi'i pote aimikoi ihãite kahato. Mi'i hawyi hewo kahato kat kat ywa. Ahe'u'i ra'yn aimi'u ra'yn at motpap hap kaipyi. Mi'i hap ewywuat kahato karãpe Tupana Pã'ãu put'ok'e ahete turan ahehãite hap toĩne'en aipã'ãu me. Mi'i hawyi pywo e haria wo woto­py­hu'at waku nug haria wo wato­py­hu'at hãpyk nug haria wo wato­py­hu'at aimikoi ihãite kahato hap ewy are.
EPH 5:10 Pyno waku watikat kat som Aika­'iwat tiky­'esat hap. Mi'i hawyi waku watunug imiky­'esat ewy imowepit hamuat aikotã aimikoi hewo kahato aimo­wepit hap ewy.
EPH 5:11 Yt naku i nug haria hepap kahato sa'ag nug hap ete wãtym nuran aikotã aikotã hap yt naku i nug hap ete yt kat i Tupana mõtypot hap i'atu­minug ete pote. Aikotã yt naku i nug haria i'ypyryp we ta'a­tunug sa'ag mi'i hap ewy yt naku i nug haria. Waku wãiwa­to'e i'atuepe — Yt Tupana miky­'esat ewy hin i ewetunug wato'e i'atuepe. Yt naku i watuwat i'atu­minug hap upi. Yt naku i wato­py­hu'at mi'iria ewy are.
EPH 5:12 Mi'iria inug sa'ag kahato mig'i wo watu­we­mõti hap ewy. Yt are'e kuap i aiwo­'ope i'atu­minug sa'ag ko'i ete katu­pono aiwe­mõti hap sese topy­hu'at. Yt miit ewy i ta'a­tunug sa'ag i'ypyryp we are.
EPH 5:13 Ma'ato meiũran yne i'atu­minug sa'ag mig'i wuat tuwe­mo­herep wuat'i ehamo. Tupana timo­herep i'atu­minug sa'ag ko'i wuat'i ehamo. Mi'i toimo­herep hawyi watikuap ta'yn i'atu­minug sa'ag ko'i. Heremo kahato toĩne'en hẽtyhot rakat hap ewy toĩne'en heremo are.
EPH 5:14 I'ypyryp sese pote yt kat i heremo ma'ato hẽtyhot put'ok'e hawyi heremo kahato ra'yn mi'i hap ewy miit'in minug sa'ag. Karãpe watunug sa'ag waku Tupana pe wato'e — Ati'a­parap kahato ti Tupana wato'e. Mi'i pote atoiat ra'yn sa'ag waku wato'e aipy'a pe. Mi'i watunug pote Iesui aimo­mehit ra'yn hawyi toimo­herep ahepe mu'ap hãpyk takat aipo­re­ra­'aipok Tupana kapiat hap. Mi'i pote to'e wepy hawe — Erehymut ro eket hawyi erehymut ro eku'uro hap kaipyi mi'i hawyi Eipo­typot Iesui eimo­mehit ra'yn e ahepe aiminug sa'ag ko'i aiket hap ewywuat aiku­'uro hap ewy pote.
EPH 5:15 Waku aiwe'eg wo yt naku i nug hap pupi. Waku wati­kat'i kat'i kahato waku hãpyk nug hamo. Pyno waku aiwe'eg wo kahato watoĩ­ne'en mesu­wa­rote. Yt naku i yt aiwe'eg wo i watoĩ­ne'en mesuwe miit'in ehamo.
EPH 5:16 Koitywy sa'ag nug haria sok tukup­te'en mesuwe mi'i pote waku watu­we­potpap po'og waku nug hap ete sa'a­wy­'iwuat kai. Karãpe watikuap hatek takaria ete pote waku wati­po­wyro meremo. Waku wati­'a­tu­mu'e yt Iesui kuap i te haria.
EPH 5:17 Waku watikuap Tupana miky­'esat. Watikuap hawyi waku watunug haty wo. Yt naku i wato­py­hu'at yt Tupana miky­'esat yt kuap i te haria ewywuat yt iwe'eg i rakaria ewywuat.
EPH 5:18 Mi'i tupono yt naku i aimo­pẽ'ã mahy wo ma'ato mahy u hat meiũran topy­hu'at toieĩne'en hap pun hat. Mahy kape yn tuwa­nẽtup hap pote yt miit ewy i aru topy­hu'at. Miit'in miky­ry'i wo yne yt naku i nug hano are. Waku wato'e Tupana Pã'ãu me — Uimo­wepit ro En aikotã mahy irania'in mowepit hap ewywuat waku uimo­wepiit waku wato'e Tupana Pã'ãu me. Waku po'og aito Tupana Pã'ãu eiam mo mahy eiam kai. Tupana Pã'ãu aimo­wepit kuap kahato ma'ato mahy yt kahato i.
EPH 5:19 Eiwo­'o­mu'e ro morekuat Tawi wepy hap ko'i ete sa'a­wy­'iwuat ko'i ete. Waku wati­mõ­typot Tupana wepy hap wywo. Waku watu­wepy Tupana Pã'ãu kaipyi aiwehum hap wywo. Waku wepy nug haria wo watu­kup­te'en Aika­'iwat mõtypot hap ko'i wywo watoĩ­ne'en.
EPH 5:20 Karãpe put'ok'e ahete sio waku sio yt hap waku wato'e Tupana pe — Waku kahato En Tupana. Arehum kahato ewawi Emipo­'oro ete emiium ete katu­pono Esa'yru Iesui mohey hat uito waku wato'e.
EPH 5:21 Pyno Aipo­typot mõtypot haria aito pote i'ewyte waku wato­'o­mõ­typot katu­pono hemiit'in aito pote are. Pyno mana'in etimõ­typot ro e'aito. Etunug no imiky­'esat ewy are.
EPH 5:22 Mi'i tã etunug hawyi Tupana mõtypot hat ereĩne'en.
EPH 5:23 Katu­pono e'aito topy­hu'at e'akag wo Tupana wanẽtup hawe aikotã aikotã aipo­typot Iesui Ai'akag wo topy­hu'at hap ewy.
EPH 5:24 Mi'i hap ewy waku mana'in waku eweipy­hu'at e'aito eropat hano wo imiky­'esat nug hamuat aikotã wato­py­hu'at Iesui eropat haria ewy. Ai'akag sese Iesui. Imohey haria torania Akag wo topy­hu'at wuat'i e'at pe. Imohey haria torania ipiit no topy­hu'at mi'i hawyi Ai'akag wanẽtup hap watunug ipiit aito pote.
EPH 5:25 Mehĩ'in etiky'e kahato ehary'i aikotã sa'a­wy'i Ai'akag Iesui ti'a­tu­ky'e kahato aito temiit'in tomohey haria hap ewy. Etiky'e kahato ehary'i aikotã Iesui tum ahepe toieĩne'en hap aheha­kye­ra'at hamuat mi'i tã aiky'e. Mi'i tã waku etiky'e ehary'i eku'uro hap kape Iesui ewy.
EPH 5:26 Mi'i hawyi tomohey haria yne tutum To'ywot po pe — Ewano mesup e tope. Ati'a­tu­mu'e ra'yn mi'iria ehay nug hamo e. Mi'i pote wei haria ewy tukup­te'en yt i'atu­pitpit hin i e.
EPH 5:27 Mi'i pote aito imohey haria yne wato­py­hu'at ihary'i ewywuat ma'ato aikyi'at e'yianmete ainug ikahu kahato rakat ewy iwe'eg kahato rakat ewy. Yt karãpe i i'aparap hat ewy ainug tehay wo. Ihay y'y ewywuat aikoho hap ma'ato ihay ainug ihãite kahato rakat ewywuat ipe ikahu rakat ewy ipiit kahu rakat ewywuat teha­ry'i ewy ainug. Aipiit yt ipitpit hin i hap ewy ainug imohey haria yt kat i sa'ag ahete aiwei tehay wo hawyi.
EPH 5:28 Uhyt'i'in mehĩ'in etiky'e ro ehary'i eweky'e hap ewy katu­pono uwe uwe tiky'e teha­ry'i tuwe­ky'e i'ewyte uwe uwe tipo­wyro teha­ry'i tuwe­po­wyro are.
EPH 5:29 Aito ahesy'at hawyi watu­wepoi i'ewyte haty aipiit ete hawyi meremo watikat mohag haty monik hamo. Mi'i hap ewy waku etiky'e ehary'i ereky'e hap ewy. Yt naku i aipiit ete aipy­'ahak. Yt naku i mi'i tã watunug aiwete. Wati­po­wyro kahato aipiit. Pywo ti mi'i hap ewy Ai'akag Iesui ti'a­tu­ky'e tomohey haria. Waku etiky'e ehary'i Iesui ky'e hap ok tã.
EPH 5:30 Pyno aito imohey haria torania. Aika­'iwat Iesui piit aga ko'i ewy wato­py­hu'at.
EPH 5:31 Sa'a­wy'i Tupana to'e miwan me — Waku etiky'e ehary'i po'og torania miit'in kai mi'i pote waku etoiat e'ywot ety hawyi waku ehary'i wywo kahato ereĩne'en wẽtup piit ewy yn na'yn e Tupana sa'a­wy'i miwan me.
EPH 5:32 Pyno mio tã to'e Tupana miwan me — Karãpe ihainia ihary'i to'o­kyi'at hap hawyi topy­hu'at wẽtup piit kawiat yn na'yn topy­hu'at typy ok miit pytkai e. Niatpo hap tohenoi mesuwe ma'ato wato­mohey Iesui hawyi aito yne wato­py­hu'at Iesui ehary'i ewywuat. Mi'i iã'ãkap tohenoi ihay sa'a­wy­'iwuat pe.
EPH 5:33 Ihainia'in etiky'e kahato o ehary'i aikotã eweky'e hap ewy e. Mana'in etimõ­typot kahato o e'aito e Tupana ahepe are.
EPH 6:1 Hira­karia kurum'in ko'i pĩ'ã'in ko'i Iesui mohey haria eipe pote ewetunug no e'ywot ety e hap ewy. Etunug e'ywot ety piat epo'oro hap pote waku rakaria wo hãpyk takaria wo ereĩne'en wuat'i wanẽtup hawe.
EPH 6:2 Katu­pono mio tã e Tupana sa'a­wy'i sa'y­ru'in me saki­'yt'in me — Etimõ­typot ro e'ywot ety pote woro­poi­tyro aru eipe e. Pywo etimõ­typot e'ywot ety pote ti aru ereĩne'en mot'i mesuwat yi tote e i'ewyte eweikup­te'en waku pe kahato mesuwe at ka'ap e Tupana sa'a­wy'i ahepe.
EPH 6:3 Pyno waku wati­mõ­typot aity ai'ywot i'e hap ewy katu­pono Tupana piat ainãpin hap wẽtup yn watunug hawyi Tupana to'e — Koitywy ereĩne'en waku pe mot'i aru e.
EPH 6:4 Ai'y­wot'in ko'i eiwe'eg wo o emẽpyt'in nãpin hap ete. Waku eti'a­tu­'a­piheg wen ma'ato i'atu­ky'e hap wywo yn o waku eti'a­tu­'a­piheg. Yt ewei'a­tu­mo­py­'ahak tei'o ma'ato eti'a­tu­nãpin Aipo­typot Iesui piat ainãpin hap ewy are.
EPH 6:5 Uiwy­ria'in miit emiit eweiwat ro eika­'iwat mesu­wa­rotiat ehay upi eipe­rup'i popuo imõtypot popuo yt kat i eheso hap popuo. Waku watu­wehum howawi aipy'a pyi. Waku wate­ropat kahato aika­'iwat mesu­wa­rotiat aikotã Aika­'iwat Iesui eropat hap ewy.
EPH 6:6 Waku wate­ropat kahato haipe kai aikotã heĩne'en turanuat ewy. Waku imowepit hap wywo wate­ropat. Karãpe wate­ropat aika­'iwat mesu­wa­rotiat waku wato'e aipy'a pyi — Tupana woro­mõ­typot teran mesuwat uipotpap ete katu­pono areĩne'en Esa'yru eropat hat waku wato'e Tupana pe aheka­raiwa mesu­wa­rotiat potpap nug hap turan.
EPH 6:7 Waku aika­'iwat mesu­wa­rotiat wate­ropat aiwepit hap popuo. Waku haty wo watunug imiky­'esat ewy. Waku aika­'iwat mesu­wa­rotiat potpap ete wati­mo­wepit Aika­'iwat atipy piat. Yt naku i aika­'iwat mesu­wa­rotiat mowepit hap kape yn watu­wa­nẽtup hap. Waku Aika­'iwat atipy piat mowepit hap wy aiwa­nẽtup hawe wate­ropat aika­'iwat mesu­wa­rotiat turan.
EPH 6:8 Waku aiwa­tetup hap aipotpap sa'up ium hap sese toĩne'en atipy pe hap kape. Yt naku i mesu­wa­rotiat kape yn aheha katu­pono meiũran ti aru Tupana tum aipotpap wakuat sa'up ahepe. Tutum aru wuat'i miit'in me sio miit'in akag sio miit emiit Tupana tum wakuat sa'up watunug yne imõtypot hap wywo pote.
EPH 6:9 Mehĩ'in mana'in eweikup­te'en miit akag wuat mesu­wa­rote pote waku eti'a­tu­po­wyro kahato o emiit'in emipo­'o­roria ko'i. Yt ewei'e tei'o ehemiit'in me — Yt ewetunug i uimi­ky­'esat ewy pote woro­ho­'o­'a­piheg yt ewei'e i katu­pono emiit'in Ka'iwat sese toĩne'en atipy pe. Yt eti'a­tu­mohit emiit'in mesuwe katu­pono meiũran ti aru Ai'akag sese timo­herep wuat'i pe aiminug wakuat ko'i sio aiminug sa'ag ko'i. Mekewat e'at pe heremo yne aiminug ko'i sio miit eropat hat watoĩ­ne'en sio miit akag wo watoĩ­ne'en are.
EPH 6:10 Pyno Uito Pauru. Waku ra'yn uimiwan. Ahenoi hit hawyi toran na'yn are. Pywo uiwy­ria'in Aika­'iwat Iesui aimoe­saika kahato hat toĩne'en. Mi'i pote — Urumoe­saika ro emohey hap ete waku wato'e Iesui pe. Waku wato­py­hu'at wẽtup miit ewy aiwa­nẽtup hawe Mehĩ waku wato'e Iesui pe. Uinug o hesaika kahato rakat waku nug hap ete waku wato'e Aipo­typot pe.
EPH 6:11 Iesui mohey haria aito pote watoĩ­ne'en sura­ra'in ewywuat ahiag akit hanuaria. Waku watopag aipiit pe surara esokpe ewywuat Tupana miium. Waku watat yne Tupana miium wu'uka hamuat. Mi'i hawyi put'ok'e ahewa­nĩkap ahiag hawyi aima'at hamo hawyi waku watu­'uka mekewat ahiag mupiat Tupana miium ahiag akit hamuat hap wywo. Yt naku i ahesaika hap wywo aipiit esaika hap wywo watu­'uka ahiag wywo katu­pono po'og po'og hesaika aikai. Katu­pono aito yt watu­'uka i miit'in wywo ma'ato ahiag wywo watu­'uka.
EPH 6:12 Katu­pono ahiag ahewa­nĩkap sese topy­hu'at. Ahiag esura­ra'in wywo watu­'uka mã'ãu sa'ag kawiat. Ahiag emiit ko'i atipy piaria ewywuat Ahiagnia tukup­te'en mesuwat yi tote miit'in yt naku i nug haria akag wo. Yt heremo i mã'ãu sa'ag wen ma'ato hesaika kahato miit'in powyro yt naku i nug hamo. Yt naku i nug haria akag wo tukup­te'en mi'iria.
EPH 6:13 Mekewat atipy kaipy­wiaria ahewa­nĩ­kaptia kahato mi'iria i'ewyte yne imohey haria ewanĩ­kaptia ahiagnia. Mi'i pote waku watuwat Tupana miium ko'i wywo aipiit piat ahiag sopo hamuat mã'ãu sa'ag ko'i sopo hamo. Waku watopag koran Tupana miium ko'i wu'uka hap ekare'en hawyi waku watopag yianmete yne aipiit pe Tupana miium mekewat sura­ra'in wat ewywuat. Mi'i wywo yn watu­'uka kuap ahiag wywo aimoma teran hap e'at turan. Mekewat e'at pe tu'uka tu'uka kahato ahete at ka'ap. Ma'ato mi'i pytkai yt ai'akit kuap i katu­pono Tupana miium ahiag sopo hap po'og hesaika. Mi'i pote wato­py­hu'at ahiag okpe tote.
EPH 6:14 Pyno waku watoĩ­ne'en sura­ra'in ewywuat ahewa­nĩkap ekatup hamo. Waku aipiit ete ai'auka hap pupiat sokpe sura­ra'in wat ewywuat. Waku wahẽtup Tupana kape ahesokpe ahiag akit hamuat. Waku sa'a­wy'i watopag aiwa­nẽtup hawe pywuat sehay yn Tupana ehay aikotã sura­ra'in topag iwe'ok kytyt hap iheg nakat ewywuat. Mi'i hamo ahiag pory'a ewywuat yt teke kuap i aipy'a pe. Mi'i wo wati­sopo kuap ahiag miat ai'auka hap ko'i pupi. Waku wahẽtup Tupana pe — Uinug no hãpyk kahato rakano waku wato'e aikotã sura­ra'in topag sokpe iheg nakat sumu wato pupiat ewy. Mi'i hap ewy waku watopag Tupana miium aimo­hãpyk hamuat.
EPH 6:15 Topy ete sura­ra'in topag iheg nakat sura­ra'in py sokpe. Mi'i wywo te'e­ru­weput kuap kahato tu'uka hamo. Mi'i hap ewy waku watopag aipy sokpe ewywuat Tupana miium tehay ereto wuat'i miit'in kapiat hamuat hap mekewat sehay wakuat wo'o­wese hap Tupana wywuat hap ete.
EPH 6:16 Sura­ra'in topag ta'a­tupo ete iheg nakat mory'a aria kawiat pupiat. Mory'a pupiat sura­ra'in topag to'o'og me hap ewy. Mi'i ewy Tupana miium ahepiat tomohey hamuat waku aipo pe yne e'at pe ahiag pory'a sem sopo hamo. Waku wato­mohey at ka'ap aiku­'uro hap kape. Mekewat sa'ag nug hat ahiag ahewa­nĩkap kahato. Mi'i ai'a­wa­'awa surara ewy ihay sa'ag mory'a ewy ai'a­wa­'awa surara pory'a wuat hap ewy ma'ato yt put'ok'e i ahete katu­pono sura­ra'in ewy ahe'og iheg nakat aipo pe Iesui mohey pote yt put'ok­'i­'a­tu'e i ahete.
EPH 6:17 Sura­ra'in topag i'atu­'akag ete sura­ra'in akag wepainug hap iheg nakat. Mi'i ewywuat Tupana tum neran ahepe. Mi'i ti aheĩne'en wuat'i e'at pianuat tutum. Sura­ra'in po sese kai toĩne'en kyse wu'uka hap iwato'in nakat typy kai hãi hyk kahato rakat. Mi'i hap ewy Tupana Pã'ãu tum ahepe Tupana ehay ahiag wywuat wu'uka hamo ahiag atek tek hamo.
EPH 6:18 Karãpe watu­'uka ahiag wywo waku wato'e meremo — Tupana uipo­wyro ahiag akit hamo yne e'at pe wakuat nug hamo waku wato'e. Aikope aikope areĩne'en waku uhewyry Tupana Pã'ãu upi waku wato'e Tupana pe. Etipo­wyro o emiit'in ewe'eg wo o ahiag mupi waku wato'e. Yt urutuwat reran i ahiag ehay upi. I'ewyte irania'in Iesui mohey haria upi waku uruhẽtup wy. Yt uruiky­'esat i ahiag ehay upi urutuwat hap. Yt karãpe i uru'atoiat emohey hap waku wato'e Tupana pe.
EPH 6:19 Uito ti Pauru atiky­'esat ewehẽtup o Tupana pe uipo­wyro hamuat. Karãpe ewehẽtup irania'in powyro hamo yt uiwaure tei'o eipe. — Etunug o Pauru ewẽ wo ehay moherep hamo wuat'i miit'in me ewei'e ro uika­wiano. Karãpe toimo­herep ehay wakuat turan etum o tope iwe'eg kahato hap i'ewyte ikuap kahato hamuat hap ewat ewywuat hap ewei'e o. — Ehay pywuat yt uwe i mikuap sa'a­wy'i miwan miat hamo etimoe­saika Pauru Iesui etiat moherep hamo ewei'e yt kat i miit'in ken'ẽ hap wywo waku ewei'e Tupana pe uipo­wyro hamo.
EPH 6:20 Mesu­wa­rote more­kuaria koro ko'i tipo­'oro kahato ta'a­tue­miit'in irania'in etawa kape ta'a­tuehay moherep hamuat. Ta'a­tuehay ereto hamo ta'a­tu­po­'oro wẽtup ok ta'a­tuemiit po'og ta'a­tu­mi­mohey. Mi'i hap ewy kahato uito Pauru. Mi'i hap ewy kahato areĩne'en. Uipo­rekuat Tupana mipo­'oro areĩne'en tehay moherep hamuat irania'in ywania kape. Mi'i ehay moherep hamo ui'airo. Ma'ato mi'i pytkai koitywy areĩne'en wo'o­pyhik hawe. Mesup yt uhewyry kuap i Tupana ehay sytpok hamo. Pyno waku ewehẽtup o Tupana pe mesuwat wo'o­pyhik hawiat uipo­wyro hamo are. Ewehẽtup o yt kat i uiwe­mõti hap Tupana ehay moherep hamuat mesuwe katu­pono atiky­'esat sura­ra'in sem mu'e hano areĩne'en mesup are.
EPH 6:21 Pyno Aika­'iwat emiit sese Tikiku e hap het rakat atipo­'oro ehowawi. Uhehay wywo atipo­'oro aikotã aikotã areĩne'en mesuwe hap enoi hamo. Tikiku waku kahato atipuẽti. Mi'i ti Tupana ehay yt i'atoiat hin i aheywyt sese aikywyt miit sese mi'i.
EPH 6:22 Mi'i pote atipo­'oro Tikiku ehowawi katu­pono atiky­'esat tohenoi ehepe aikotã urutu­kup­te'en hap enoi hamo. Mi'i hap eweikuap hawyi eiwepit kahato. Ta'i eimoe­saika aru eipy'a pe aimi­mohey Iesui mohey hap ete aiwo­'o­ky'e hap ete are.
EPH 6:23 — Uru'ywot Tupana Uruka­'iwat koro Iesui ahẽtup ewawi. Etunug o emohey haria tawa Ewesu piaria wo'o­ky'e haria wo. Etunug o mi'iria wo'o­wese haria wo emohey sese haria wo are.
EPH 6:24 Tupana ereĩne'en hegyi'at kahato rakano emohey haria pe katu­pono Esa'yru Uruka­'iwat Koro Iesui ky'e kahato haria mi'iria are. Eti'a­tu­ky'e te'en ne'i mi'iria katu­pono Emipo­'oro Urupo­rekuat ky'e wuat'i e'at piat haria mi'iria are'e at ka'ap Tupana pe mesuwe wo'o­pyhik hawe. Woro­ho­'o­ky'e eipe are. Uito ti IESUI potpo­'oro PAURU.
PHI 1:1 Uiwy­ria'in tawa Wiripu piaria mesup atipo­'oro miwan ehowawi. Uito ti Pauru i'ewyte uha'yru Timoteu toĩne'en mesuwe uiwywo. Mi'i kuekatu to'e hap ipo'oro wy. Uruto ti Tupana mipo­'oro Aipo­typot koro Iesui eropat haria sese uruto. Mesuwat einãpin hamuat hap atipo­'oro ehowawi yne Tupana mẽpyt'in tawa Wiripu piaria mu'e hamo. I'ewyte ei'akag ko'i kape i'ewyte ai'a­pykok haria kape yne Aipo­typot Iesui mohey haria kape atipo­'oro mesuwat uimiwan are.
PHI 1:2 Pyno meiũpepyi uruhẽtup Tupana pe ehowawi — Uru'ywot etum o Esa'yru mohey haria pe tawa Wiripu totiaria pe wo'o­ky'e hap i'ewyte wo'o­wese hap Uruka­'iwat Urupo­typot Iesui mõtypot hamuat hap uruhẽtup. Eti'a­tu­poi­tyro mi'iria egyi'at hamo uruto'e.
PHI 1:3 Tupana karãpe arewa­nẽtup aiwy­ria'in tawa Wiripu piaria kape mi'i hawyi uimo­wepit kahato. Arehum ewawi are Tupana pe ehowawi are.
PHI 1:4 Pywo uiwy­ria'in karãpe ahẽtup Tupana pe eipoi­tyro hamuat hap mi'i turan uiwepit kahato hap wywo ahẽtup ehupi are.
PHI 1:5 Katu­pono uimo­wepit kahato eipe katu­pono sa'a­wy'i mesup te uipo­wyro kahato haria eipe. Mi'i pote arehum kahato Tupana kape ehupi katu­pono Tupana potpap nug hap uianuat powyro haria eipe.
PHI 1:6 Sa'a­wy'i wato­mohey Iesui hawyi Tupana mieha­kye­ra'at hanuaria wato­py­hu'at. Toha­'a­wynug aheha­kye­ra'at hap hawyi yt ai'atoiat hin i e. Yne e'at pe ha'a­wy­tepyi mesup te mũki­'ite aheha­kye­ra'at kuap hat Iesui topy­hu'at. Po'og po'og yne e'at pe aimoe­saika kahato tewaku hap nug hamo. Aheha­kye­ra'at kahato ha'a­wyte mesup te Ha'yru ta'aipok Aipo­typot no hap kape mesuwat yi kape ta'aipok hap kape aheha­kye­ra'at hamuat wuat'i e'at piat hap kape. Yt uheso hin i are. Topy­hu'at kahato aipy'a pe Iesui wuat'i e'at pe. Ipotpap kahato aiwa­nẽtup hawe aimoe­waku kahato hamo. Yne e'at pe mi'i hap ko'i wyti waku wato­mohey e.
PHI 1:7 Uiwa­nẽtup hawe i'ewyte uipy'a pe waku kahato eipe. Waku mi'i tã are'e katu­pono uikai kahato eipe Iesui potpap nug haria uito ewy eipe pote are. Eweimohey kahato Iesui ehay uito ewy pote uiwa­nẽtup hawe waku kahato eipe are. Karãpe irania'in ti'a­tu­mohit eipe Iesui ehay moherep ehepiat pote yt eiwe­mõti hin i. Yt eiwepyk hin i i'atu­mi­ky­ry'i kahato pytkai ma'ato po'og ewei'a­tu­mu'e. — Waku wato­mohey Iesui ehay pakup waku wato'e ahewa­nĩ­kaptia pe yt kat i aiwe­mõti hap wywo are. Waku wati­'a­tu­mu'e miit'in katu­pono Tupana ai'airo tehay moherep hamo. — Tupana urunug ehay Esa'yru etiat moherep haria are'e at ka'ap Tupana pe. Sa'a­wy'i Tupana ahytpok kahato tehay wakuat Iesui etiat hytpok hamo miit'in me. Ma'ato koran uipyhik ta'yn sura­ra'in wo'o­pyhyp hawe ma'ato mi'i pytkai ahytpok te sehay wakuat Iesui etiat meiũpe wo'o­pyhik hawe.
PHI 1:8 Woro­ho­'o­ky'e kahato eipe. Tupana tikuap yt uheso i hap. Aikotã aikotã Aipo­typot Iesui eiky'e hap ewy uito woro­ho­'o­ky'e haty uipy'a piat wywo woro­ho­'o­ky'e.
PHI 1:9 Mi'i tã are'e Tupana pe — Uru'ywot etum no esaika hap emohey haria pe tawa Wiripu piaria pe i'atu­wo­'o­ky'e hamuat hap po'og po'og yne e'at pe are'e Tupana pe ehupi. Atiky­'esat yne mi'iria ehay yne pywuat kuap haria wo hap po'og po'og sa'a­wy­'iwuat kai. Ta'i atiky­'esat kahato mi'iria ikuap kat som waku kat som yt naku i hap kuap hamo ewanẽtup hap ok tã.
PHI 1:10 Etum i'atuepe esaika hap po'og wakuat airo hamo. Mi'i tã etunug pote e'ewy tukup­te'en yt kat i sa'ag nug hap i'atukai. Mi'i tupono Esa'yru ta'aipok Morekuat no mesuwat yi kape turan uwe waku uwe yt e hamo Wiripu piaria emohey haria yt te'e­ru­we­mõti hin i mi'i hap e'at pe.
PHI 1:11 Tupana etunug o mi'iria waku nug hanuaria wo are. Etunug mi'iria i'atuieĩ­ne'en hap tote wakuat eiam mo kahato are. Atiky­'esat mi'iria aikotã Esa'yru Iesui ewaku hap ewy tukup­te'en. Ewaku hap ewywuat wo eti'a­tunug mi'iria. Tupana mi'i etunug mote emõtypot haria wo kahato tukup­te'en mi'iria are. Waku kahato En i'atu'e aru ewawi irania'in are'e Tupana pe. Pyno mio tã ahẽtup mesuwe ehetiano Tupana pe.
PHI 1:12 Uheywyt'in uheinyt'in atiky­'esat eweikuap uhetiat morekuat uipyhik ta'yn wo'o­pyhik hawe areĩne'en ma'ato mi'i pytkai sehay wakuat Iesui etiat yt ta'a­tu­pyhyp hin i. Yt ta'a­tu­pyhyp kuap i ihay ma'ato uipyhik hawe areĩne'en pote po'og ikuap haria te'e­ro­py­hu'at.
PHI 1:13 Mi'i pote koitywy morekuat esurara sem i'yat wato piaria sehay Iesui etiat kuap haria wo ra'yn tukup­te'en. I'ewyte irania'in mesu­wa­rote wo'o­pyhyp haria uikuap ta'yn. — Ta'i Pauru morekuat tipyhyp ta'yn katu­pono Iesui tutunug Topo­rekuat no i'atu'e.
PHI 1:14 Mi'i hawyi irania'in Iesui mohey haria yt te'e­ro­ken'ẽ hin i aikotã sa'a­wy­'iwuat ewy. — Pauru toĩne'en wo'o­pyhik hawe i'ewyte aito waku watoĩ­ne'en i'ewywuat i'atu'e. Mi'i hawyi yt te'e­ru­we­mõti hin i Aika­'iwat Iesui ehay moherep hamo. Po'og po'og hesaika rakaria tukup­te'en mio imohey haria wo po'og po'og sa'a­wy­'iwuat kai. I'atuehay pirik — Iesui ti Morekuat i'atu'e yt uwe pupi i te'e­ro­ken'ẽ ta'a­tu­henoi.
PHI 1:15 Ta'a­tu­mo­herep kahato ta'a­tuehay wo Aipo­typot etiat. Irania'in Tupana mohey hap kaipyi i'ewyte uiky'e pote ta'a­tu­mu'e miit'in po'og sa'a­wy­'iwuat kai. Irania'in iha'y­wywi uhetiat pote ta'a­tu­'a­tu­mu'e miit'in po'og sa'a­wy'iwuat kai. Irania'in yt uiky'e i pote uimohit teran ta'a­tuehay wo. Mi'i hawyi ta'a­tu­ky­'esat miit'in mu'e hap po'og uikawiat hap.
PHI 1:16 Ma'ato i'atu kahato uiky'e haria. Mi'iria tikuap ta'yn Tupana mi'airo uito hap. Ta'a­tukuap Tupana uipo­'oro tehay wakuat moheg miit'in wanẽtup hawiat miit'in py'a piat tehay pywuat kuap hamo. Mi'i pote uiky'e haria mi'iria.
PHI 1:17 Ma'ato toĩ irania'in ta'a­tu­mo­herep sehay wakuat Iesui etiat wen ma'ato yt kat i Iesui ky'e hap i'atuete. I'atuehay se kahato wen ma'ato te'e­ru­we­mo­wato hap yn ta'a­tukat ta'a­tu­wa­nẽtup hawe. Yt Iesui mõtypot haria hin i mi'iria ta'a­tu­py'a pe. Mi'i tã watunug mote meiũran Pauru emiit'in yt uwe i i'atu'e ra'yn ta'a­tu­wa­nẽtup hawe. Pauru mimu­'eria yne aipo pe hawyi haty kahato topy­hu'at Pauru ete wo'o­pyhik hawe te'e­ro'e ta'a­tu­wa­nẽtup hawe uimohit reran haype. Mi'i pote Iesui ete ta'a­tu­mu'e miit'in ta'a­tuehay se wywo uipo­hari teran haype.
PHI 1:18 Karãpe ta'a­tu­mo­herep Iesui Aipo­rekuat nuat yt ta'a­tu­mohey i pytkai mi'i hawyi uimo­wepit kahato hap toĩne'en katu­pono i'atuehay kaipyi miit'in Iesui kuap haria tukup­te'en. Pyno yt arewa­nẽtup hin i sio mi'iria Iesui ky'e hap mywo ta'a­tu­mu'e miit'in sio te'e­ru­we­mo­wato hap mywo ta'a­tu­mu'e miit'in. Yt atikuap i kat hamo miit'in ta'a­tu­'a­tu­mu'e ma'ato miit'in ta'a­tu­mu'e Iesui etiat hap pote uimo­wepit hap topy­hu'at yt atikuap pytkai i kan hamo ta'a­tu­mu'e hap are.
PHI 1:19 Pyno waku ewehẽtup o Ahetu­pana kape — Etihep o Pauru wo'o­pyhik hap wyi ewei'e o are. Mio tã ewei'e pote atikuap arẽtem aru mesu­wepyi more­kuaria wo'o­pyhik hap kaipyi are. Ta'i atikuap aru Aipo­typot Iesui tipo­'oro Topã'ãu uihep mesu­wepyi hamo ui'a­pypok hamo are.
PHI 1:20 Yt karãpe i atoiat teran Aika­'iwat potpap nug hap uhepiat uipotpap nug hap. Uiku­'uro hap kape Tupana mowepit hap yn uiwa­nẽtup hap yne e'at pe atiky­'esat. I'ewyte mesuwe uipyhik hawe atimõ­typot teran Tupana ma'ato po'og mesuwe atiky­'esat irania'in kai. Yt kat i uiwe­mõti hap atiky­'esat ma'ato areĩne'en neran miit'in pupiat yt uiken'ẽ i hap wywo. Atimõ­typot teran Aipo­typot mesuwe. Aipo­typot Iesui mõtypot hano areĩne'en neran uipy'a pyi uiwa­nẽtup hap kaipyi uhehay kaipyi. Yne uiminug ko'i kaipyi atiky­'esat imõtypot hap uheĩne'en hap turan. I'ewyte uiku­'uro turan imõtypot hano areĩne'en neran are.
PHI 1:21 Pyno ahenoi ehepe kat hamo areĩne'en mesuwat yi tote. Aipo­typot Iesui mõtypot hamo yn areĩne'en uito. Mi'i eropat hamo yn areĩne'en. Uiku­'uro hawyi po'og atikuap Iesui mesu­wa­rotiat kai. Mi'i tupono waku po'og areĩne'en uiku­'uro hawyi.
PHI 1:22 Mi'i pote ati'airo teran uiku­'uro hap. Mi'i hawyi areto Iesui kape kat pote areĩne'en neran iwywo ma'ato mi'i pytkai yt woro­ho­'o­'atoiat reran i eipe katu­pono uiku­'uro hawyi yt uwe i uito mesuwe eimu'e hanuat yt naku i. Mi'i pote yt areto teran i. Po'og waku areĩne'en mot'i mesu­wa­rote miit'in miat Iesui etiat mu'e hamo are.
PHI 1:23 Ma'ato areto teran Aipo­typot kape atipy kape. Atoiat reran uheĩne'en hap mesuwe katu­pono po'og waku itote. Pyno po'og waku uiku­'uro are ma'ato — Mi'i e hap yt ere'e i mio tã e. Wãi'e uiwa­nẽtup hawe are'e.
PHI 1:24 Po'og waku ereĩne'en mesuwe e uiwa­nẽtup hawe. Waku po'og ereĩne'en Iesui mohey haria powyro hamo e uiwa­nẽtup hap. Ereĩne'en no mesuwat yi tote e uhepe.
PHI 1:25 Pyno areĩne'en hap atikuap ta'yn. Arepy­hu'at eipy­'a­setpiat hamo eimotag hamo imohey hap etiat eimo­wepit hamo are. Mi'i hamo arepy­hu'at mesuwat yi tote eipy­'a­setpe.
PHI 1:26 Meiũran aru areĩne'en eiwywo i ra'yn. Mi'i hap e'at pe ti aru waku pe watoĩ­ne'en. Mi'i hap e'at pe aru areĩne'en eipy­'a­setpe. Mi'i hap e'at pe ti aru watu­wehum kahato Aipo­typot Iesui ete tutunug mu'ap ehowawi hawyi are.
PHI 1:27 Karãpe wati­mo­herep sehay wakuat Aipo­typot etiat miit'in me mi'i turan waku aiwe'eg wo o aikotã aikotã watoĩ­ne'en i'atu­py­'a­setpiat turan. Waku iwe'eg kahato rakaria ewy watoĩ­ne'en. Yt naku i wati­'a­tu­mu'e miit'in yt naku i nug haria aito pote. Aimi­mu­'eria yt tiky­'esat i ahehay Iesui etiat ta'a­tu­puẽti yt naku i nug haria aito pote. Yt teke i i'atue­waure ka'a pe wakuat Iesui etiat aheĩne'en hap yt ikahu i pote are. Atiky­'esat kahato wakuaria wo o eweikup­te'en sio areĩne'en eipy­'a­setpe sio yt. Waku eweikup­te'en wakuat nug haria wo o itote yt uiwywuat pytkai i. Mi'i hawyi yt areĩne'en i eipy­'a­setpe pytkai sehay wakuat atikuap aru irania'in wẽ pyi ehetiat eiminug ko'i piat hap wyti aru hap atikuap. — Ta'i yt ta'a­tu­'atoiat hin i te Iesui mohey hap i'atu'e aru uhepe. To'o­'e­wy­'ewy wẽtup miit piit ewy i'atu­potpap e hap aru atikuap wy ehetiat. Ta'i sura­ra'in ewy tu'uka kahato sa'ag ete e hap aru atikuap wy. I'ewyte ta'a­tu­ky­'esat yne miit'in Iesui ehay wakuat mohey haria i'atu'e aru uhepe meiũpe yt heremo i areĩne'en eipy­'a­setpe pytkai are.
PHI 1:28 Yt eraha'at tei'o yi kape ewanĩ­kaptia pupi. Eweikup­te'en wanĩ­kaptia py'a­setpe pote surara ewywuat ereĩne'en yt kat i eha yi kape. Mi'i hawyi meremo ta'a­tukuap — Ta'i mi'iria ti Tupana mowato haria i'atu'e. Mi'iria po'og urukai i'atu'e ta'a­tu­wa­nẽtup hawe te'e­ro­ken'ẽ haype. I'ewyte eipe ti eweikuap ta'yn Tupana toĩne'en eiwywo eipo­wyro hamo. Eweikuap ta'yn Iesui eheha­kye­ra'at hat sese topy­hu'at.
PHI 1:29 Are pãi waku kahato Tupana ainug Tosa­'yru mohey hano. Waku kahato are. Waku wy Aipo­typot Iesui eropat hamo are. I'ewyte waku waho­'opot miit'in miky­ry'i hap ete imohey hat aito pote.
PHI 1:30 Pyno aho'opot kahato mesuwe wo'o­pyhik hawe aikotã surara tu'uka hap turan ewy. Pyno eweikup­te'en o ui'ewy ahiag wu'uka hap surara ewywuat eiwu­'uka kahato itote ahiag akit hamuat tawa Wiripu tote aikotã ewei'a­kasa uito hap ewy. Aikotã sa'a­wy'iwuat hap ewy mi'i hap ewy waku eweikup­te'en uhaipe­piaria eweikup­te'en surara ewywuat. Yt atoiat hin i te mesuwe ahiag wywuat wu'uka hap. Areĩne'en wo'o­pyhyp hawe pytkai atu'uka atu'uka te. Ta'i mi'i hap eweikuap ta'yn kat pote yne ikuap are.
PHI 2:1 Uiwy­ria'in ahẽtup ehepe eiky'e hap wywo waku eweikup­te'en eweiwa­nẽtup Iesui etiat wẽtup miit piit ewy hap yn i'ewyte Iesui ky'e hap ete wẽtup miit piit ewy yn waku eweikup­te'en ahẽtup. Mi'i tã ewetunug mote uimo­wepit haria wo eweikup­te'en. Mi'i tã eweikup­te'en mote uimo­wepit hap sese topy­hu'at.
PHI 2:2 Mi'i hap ti ahẽtup ehepe katu­pono Aipo­typot Iesui mohey hap kaipyi wati­puẽti ra'yn awemo­wepit sese hap. Mi'i hawyi Ipã'ãu topy­hu'at ra'yn ahepe. Mi'i hawyi wato­'oehay iwywo mi'i hawyi irania'in Iesui mohey haria kape wo'o­wese hap topy­hu'at wo'o­ky'e haria wo watu­kup­te'en. Mi'i pote ahẽtup ehepe wẽtup miit piit ewy yn eweikup­te'en Iesui wywo hap. Mi'i tã ewetunug mote uimo­wepit kahato eipe.
PHI 2:3 Uiwy­ria'in yt naku i yt ehegyi'at i rakaria ewy eweikup­te'en. Yt ewetunug tei'o — Uito po'og ei'e hamuat hap ne'i are. Yt ewetunug nei'o — Uito po'og e hano. Po'og waku watoĩ­ne'en kurin hano kahato irania'in mõtypot hamo. Yt ewei'e tei'o eipy'a pe — Uito po'og mekewat miit kai yt ewei'e tei'o eiwo­'ope e.
PHI 2:4 Yt erewa­nẽtup ka'ap tei'o eimi­ky­'esat nug hap kape eimi­ky­'esat ko'i ete. Po'og waku watu­wa­nẽtup at ka'ap irania'in miky­'esat nug hap ete.
PHI 2:5 Po'og waku aiwa­nẽtup hap Aika­'iwat Iesui wanẽtup hap ewy katu­pono tuwe­mohit kahato ihaky­'e'i kahato miit emiit no topy­hu'at.
PHI 2:6 Tupana wo toĩne'en Iesui pytkai tuwe­mohit. Sa'a­wy'iwuat e'yianmete toĩne'en Tupana wo. Mi'i pytkai tuwe­mohit. Tut ahowawi hawyi yt to'e i — Arenug Uito mesuwe Tupana wo yt e i Tupana ra'yn pytkai.
PHI 2:7 Mi'i hawyi tuwepyi totoiat yne mekewat tuweTu­pana hap ko'i hawyi tuwe­mohit miit'in eropat hano. Tuwenug miit no miit sese wo topy­hu'at. Aipiit ewy kahato topy­hu'at.
PHI 2:8 Iesui yt tuwe­mo­wato hin i ma'ato karãpe Tupana to'e — Atiky­'esat eku'uro hap miit'in ehakye­ra'at hamo mi'i hawyi toiwesat — Waku Papai e yt tomi­ky­'esat ewywuat pytkai i. Ma'ato — Atiky­'esat eku'uro hap aria'yp posak ete e Tupana hawyi — Atunug aru Papai e Iesui.
PHI 2:9 Tutunug To'ywot miky­'esat ewy mi'i pote Tupana timo­wato kahato Iesui. Mi'i hawyi i'ewyte Iesui set toimo­wato. Mi'i pote po'og yne set kai topy­hu'at.
PHI 2:10 Meiũran aru yne yne tuwe­pỹ­'ã­tutuk Uha'yru kape e ti Tupana. Atipy piaria yne te'e­ru­we­pỹ­'ã­tutuk e Uha'yru mõtypot hamo i'ewyte yne yi totiaria te'e­ru­we­pỹ­'ã­tutuk imõtypot hamo i'ewyte yne yi ywyt'ok­py­piaria te'e­ru­we­pỹ­'ã­tutuk Uha'yru mõtypot hamo e ti Tupana.
PHI 2:11 Mi'i hap e'at pe yne yne to'e — Pywo ti pywo ti Iesui Tupana Mipo­'oro Aipo­rekuat nuat Aika­'iwat koro wuat i'atu'e aru torania. Tuwe­mohit kahato sa'a­wy'i Iesui mi'i pote ti aru Tupana timo­wato kahato Aika­'iwat. Mekewat e'at pe yne yne — Tupana i'atu'e Emipo­'oro Aipo­rekuat nuat Aika­'iwat sese hap uruikuap ta'yn i'atu'e. Uruimõ­typot kahato En i'atu'e. Uru'ywot sese En i'atu'e aru. Ma'ato aito aikotã Iesui tuwe­mohit waku watu­we­mohit ewy are.
PHI 2:12 Uheka­tu­wy­ria'in uimi­ky­'eria kahato eipe. Sa'a­wy'i areĩne'en eipy­'a­setpe eimu'e hamo. Mekewat e'at pe woro­ho­'o­nãpin kahato kat som kat som Tupana tiky­'esat ewetunug hap. Mi'i hap e'at pe waku pe eweikup­te'en. Einãpin hap ewetunug yne ma'ato mesup yt areĩne'en i eipy­'a­setpe katu­pono morekuat wo'o­pyhik hawe areĩne'en mi'i pote yt uwe i uito eipy­'a­setpe. Mi'i pytkai ti atiky­'esat kahato eweikup­te'en uhehay upi. Yt uwe i uito itote pytkai ewetunug o einãpin hap ko'i are ma'ato po'og po'og sa'a­wy'iwuat kai ui'e hap ewy atiky­'esat kahato ewetunug wakuat nug hap ko'i. Waku eweiken'ẽ yt naku i nug hap pupi Aikotã aityry hap ewy eiken'ẽ hap. Waku watunug Tupana miky­'esat ko'i yn Tupana miha­kye­ra'at aito pote. Waku watoĩ­ne'en Tupana miha­kye­ra'at ko'i wo wato­py­hu'at. Mi'i hawyi karãpe miit'in te'e­ra­'a­kasa aiminug wakuat kape hawyi — Pywo i'atu'e mi'iria ti Tupana miha­kye­ra'at ko'i wo i'atu'e.
PHI 2:13 Are pãi Tupana tiky­'esat kahato watunug tomi­ky­'esat ewywuat hap. Mi'i pote ainãpin at ka'ap aiwa­nẽtup hawe kat som kat som waku watunug hap. Karãpe aiwẽ pyi yt watunug neran i imiky­'esat ko'i mi'i hawyi perup'i popuo aimu'e aiwa­nẽtup hawe — Etunug o etunug o e. Mi'i hawyi meiũran — Waku Uhyt waku Mimi wato'e Tupana pe katu­pono toiky­'esat kahato tehay upiat watuwat hap.
PHI 2:14 Karãpeĩ watu­we­potpap Tupana miky­'esat nug hap ete waku watuwat sese imiky­'esat hap upi. Yt naku i wato'e — Emiky­'esat ko'i yt atiky­'esat i yt naku i wato'e. I'ewyte yt naku i watu­'uka miit'in ete are. Karãpe watunug Tupana miky­'esat turan yt naku i wato'e tope — Yt atiky­'esat i emiky­'esat nug hap ko'i yt naku i wato'e. Yt naku i watu­'uka Tupana miky­'esat ete aipy'a pe aiwa­nẽtup hawe are.
PHI 2:15 Ma'ato yne mi'i tã imiky­'esat ewy watunug mote Tupana mẽpyt'in wakuaria wo wato­py­hu'at yt kat i sa'ag nug haria wo are. Aikotã aimẽpyt kurin kat yt tutunug kuap i sa'ag hap ewy wato­py­hu'at waku kape yn aiwa­nẽtup hap. Koitywy watoĩ­ne'en yt naku i nug haria py'a­setpe i'ewyte te'e­ru­wa­nẽtup at ka'ap sa'ag nug hap ete yn. Mi'iria tukup­te'en aikotã i'ypyryp we wãtym sese turan wuat ewy yt naku i nug haria yn mi'iria pote. Ma'ato waku aito Iesui mohey haria waikiru ko'i ewywuat wato­py­hu'at aikotã waikiru wãtym sese turan hẽtyhot rakaria ewy aikotã waikiru ko'i aimu'e wãtym muo aikope mu'ap toĩne'en aikope waku ahewyry. Mi'i hap ewy waku wati­mo­herep ho'o­wasat rakaria pe mu'ap Tupana kapiat.
PHI 2:16 Katu­pono wati­mo­herep kahato miit'in me mu'ap Tupana kapiat aikotã waikiru hẽtyhot wãtym muo hap ewy wato­py­hu'at. Meiũran Aipo­typot Iesui put'ok'e mesuwat yi tote yne aiminug moherep hamo sio waku sio yt e hamo. Mi'i hap e'at pe uimo­wepit haria wo eipe katu­pono mi'i hap e'at pe wuat'i ehamo — Mi'iria ti uhemiit sese. Mi'iria ti uhehay moherep haria sese e aru Iesui ehepiat. Mio tã to'e hawyi uimo­wepit kahato hap topy­hu'at katu­pono eipe uimi­mu­'eria sese pote. Ta'i arehum kahato itote katu­pono yt eweipun hin i einãpin uhepiat hap. Mi'i hawyi Tupana tuwehum kahato topotpap nug haria ete.
PHI 2:17 Koitywy sura­ra'in uipyhyp ta'yn mesuwe. Yt ta'a­tu­ky­'esat i po'og woro­ho­'o­mu'e hap ma'ato ui'auka pote ui'auka are ma'ato mi'i pytkai yt karãpe i woro­ho­'o­'atoiat eimu'e hap ete katu­pono atiky­'esat yne eipe Iesui mohey haria wo hap. Uhuu okpun eika­wiano pote uiku­'uro Tupana mowepit hap topy­hu'at are.
PHI 2:18 Uiwy­ria'in woro­ho­'o­mo­wepit reran kahato uheĩne'en ne turan i'ewyte uiku­'uro hap turan. Ui'auka pote meremo areĩne'en Aika­'iwat yatype i'ewyte meremo uimo­wepit hap sese topy­hu'at. Ui'auka pote waku eiwe­mo­wepit wy atiky­'esat katu­pono ui'auka pote areĩne'en uimo­wepit hat yatype are.
PHI 2:19 Uiwy­ria'in atipo­'oro teran aiwy Timoteu ehowawi katu­pono atiky­'esat kahato atikuap teran aikotã eweikup­te'en hap sio waku sio yt hap kuap hamo katu­pono mi'i atikuap hawyi uimo­wepit kahato hap topy­hu'at. Mi'i pote atipo­'oro teran uha'yru Timoteu ehowawi. Mi'i pote ahẽtup Aipo­typot Iesui kape — Etipo­'oro Timoteu aiwy­ria'in tawa Wiripu piaria kape are at ka'ap ahẽtup. Mi'i hawyi atimohey kahato Aika­'iwat Iesui tipo­'oro meremo Timoteu ehewawiat hap. Meiũran ti aru ta'aipok hawyi uimo­wepit kahato hap topy­hu'at imienoi.
PHI 2:20 Timoteu ui'e­wywuat eiky'e kahato hat are. Mi'i aikotã woro­ho­'o­ky'e hap ewy eiky'e. Mi'i hawyi yt uwe i uhemiit Timoteu ewy eiky'e hat. Timoteu woro­ho­'o­ky'e kahato e hat pãi.
PHI 2:21 Irania'in te'e­ru­wa­nẽtup at ka'ap ta'a­tu­mi­ky­'esat nug hap kape yn. Mi'i kape yn te'e­ru­wa­nẽtup. Kat som kat som Aipo­typot Iesui tiky­'esat Tupana wanẽtup hap yt i'atu­wa­nẽtup hap ewy hin i.
PHI 2:22 Ma'ato aipo­wyro kahato Timoteu. Yt irania'in ewywuat hin i katu­pono mi'i ipotpap at Aipo­typot ehay wakuat moherep miit'in kapiat hap ete yn ipotpap. Mi'i hap kaipyi eweikuap kahato Timoteu Tupana eropat hat sese hap. Ui'e­wywuat kahato toĩne'en Timoteu. Ta'i urupotpap Iesui ehay moherep hap ete uruto­'o­'ewy kahato urupotpap aikotã ai'ywot tosa­'yru wywuat ipotpap hap ewy urupotpap uito Timoteu wywo.
PHI 2:23 Meiũran aru atiky­'esat kahato atipo­'oro uha'yru Timoteu ehowawi. Meiũran karãpe atikuap kat som more­kuaria tunug uhepe sio wakuap sio yt. Mi'i hawyi atipo­'oro ehowawi Timoteu henoi ehepiat hamo.
PHI 2:24 Uito i'ewyte areto teran ehowawi mi'i pote are'e at ka'ap — Uruka­'iwat woro­mohey kahato En are. Mi'i pote ahẽtup ewawi uihep o mesuwat wo'o­pyhik hap wyi katu­pono areto teran meremo tapy'yia Wiripu piaria kape are Uika­'iwat pe.
PHI 2:25 Sa'a­wy'i eweipo­'oro uhowawi ehemiit mehĩ Epawu­titu uipo­wyro hamo mesuwe. Mi'i ti uheropat kahato hat toĩne'en mesuwe. Aikotã surara typy ok takaria ewy urutu­kup­te'en mesuwe ahiag moma hamo. Waku kahato atipuẽti eipot­po­'oro mehĩ Epawu­titu. Koitywy mi'i atipo­'oro i ra'yn ehowawi.
PHI 2:26 Toto teran kahato ehowawi katu­pono ihay teran i ra'yn eiwywo ihat'at kahato eiky­'ewi. Ga'atpo i'ahu kahato mesuwe mehĩ Epawu­titu. Mi'i hap eweikuap hawyi haty kahato iwanẽtup hawe katu­pono eweikuap hawyi ei'arot hap yt toiky­'esat i ma'ato.
PHI 2:27 Ta'i aheropat kahato hat Epawu­titu porap iku'uro mesuwe porap ahu ti'auka ma'ato yt pytkai i katu­pono Tupana haty'u kahato topy'a pe. Mi'i hawyi meremo toimoe­hãite katu­pono Tupana yt tiky­'esat i ui'arot ne'i hap. Mi'i hawyi iky'e hap i'ewyte uiky'e hap wywo toimoe­hãite uhyt Epawu­titu hawyi uimo­wepit hap topy­hu'at.
PHI 2:28 Mi'i pote atipo­'oro teran kahato ehowawi ihãite i ra'yn pote eimo­wepit hamo atipo­'oro. Pyno eiwepit i ra'yn hawyi po'og na'yn uimo­wepit uito wy are. Mi'i hawyi yt kat i ui'arot hap.
PHI 2:29 Put'ok'e itote hawyi — Ereke mehĩ ewei'e o eiwepit hap wywo. Ereke ro ewei'e o aikotã aheyke'et aheywyt i'ewyte aheinyt kape hap ewy waku ewei'e katu­pono mi'i Aika­'iwat mohey kahato hat. — Waku kahato epotpap eminug na'yn Tupana kapiat hap ewei'e Epawu­titu pe eiwepit hap wywo. Eweimõ­typot ro mi'i miit are. Waku eweimõ­typot yne Iesui mohey haria Epawu­titu ewywuaria katu­pono Aipo­typot eropat kahato haria mi'iria.
PHI 2:30 Uipo­wyro turan porap iku'uro aiwy Epawu­titu. Aipo­typot Iesui potpap nug hap ete porap iku'uro ahemiit eimi­po­'oro katu­pono uipo­wyro teran eipe ma'ato yt uwe i eipe uipo­wyro hanuaria mesuwe pote. Mi'i hawyi eipot­po­'oro mehĩ Epawu­titu topy­hu'at ehaipepiat eipotpap nug hamo uipo­wyro hamuat. Mi'i turan porap iku'uro wen ma'ato aiwepit kahato Tupana timoe­hãite ra'yn hawyi.
PHI 3:1 Pyno ahenoi kurin hawyi toran na'yn uimiwan. Uheywyt'in uheinyt'in atiky­'esat kahato Aika­'iwat Iesui eimo­wepit kahato hap. Mi'i eimo­wepit hamuat ahẽtup tope. Sa'a­wy'i woro­ho­'o­nãpin uimiwan me — To'iro eiwe­mo­wepit katu­pono Iesui miky­'eria kahato eipe are ra'yn ehepe sa'a­wy'i. Mi'i ui'e hap are'e i ehepe aikotã are'e sa'a­wy'i ehepe are'e i ra'yn eiwe­mo­wepit ro are. Yt aremõti hin i aikotã sa'a­wy'i uimiwan me are'e typuo i typuo i ahenoi eiwe­mo­wepit ro e hap ete katu­pono atiky­'esat kahato einãpin uhepiat hap topy­hu'at kahato eiwa­nẽtup hawe. Mi'i hawyi yt uwe i eima'at kuap einãpin wẽtup etiat hamo. Yt pywo rakat i etiat hap yt uwe i einãpin kuap.
PHI 3:2 Eiwe'eg wo kahato o sa'ag nug haria pupi katu­pono ehã'ãg aru sa'ag nug hamo are. Eiwe'eg wo o wẽtup mu'ap moherep haria pupi. Eiwe'eg wo o yt eiwe­musin ãpy sokpe tek hep i pote yt kat i eheha­kye­ra'at hap e haria pupi. Mi'iria pupi eweiken'ẽ kahato aikotã awahuru sem pupi wato­ken'ẽ hap ewy katu­pono eima'at reran sa'ag nug hap etiat haype. Yt naku i kahato mi'iria.
PHI 3:3 Aito yt mi'iria mohey haria hin i katu­pono Tupana Pã'ãu sese aipiit pe Aipo­typot Iesui mimoieĩ­ne'en aito pote waku kahato Iesui waku kahato Iesui e haria aito. Ma'ato irania'in ahemusin ãpy sokpe tek hap ete yn mi'iria i'atuehay. Yt wati­'a­tu­mohey hin i mi'iria katu­pono wẽtup kawiat aito Iesui mohey haria. Wẽtup ywania ewy yn wato­py­hu'at katu­pono Tupana titek ta'yn aiminug sa'ag sio toĩ ahemusin ãpy sokpe sio yt. Pyno Tupana mieha­kye­ra'at ko'i ra'yn aito katu­pono imohey haria aito pote.
PHI 3:4 Uito ti Pauru Iuteu sese uito. Ta'i uito ui'y­wã'ĩ 8 e'at hawyi ta'a­tutek uhemusin ãpy sokpe uru'y­wania Iuteu eko ewywuat. Atunug yne ui'y­wania eko ko'i ma'ato mi'i ko'i yt uheha­kye­ra'at hin i. Mi'i pote atikuap kahato uipy'a pe aiminug aheko ko'i yt aheha­kye­ra'at kuap i ma'ato tukup­te'en eipy­'a­setpe — Watunug Iuteuria eko hawyi aheha­kye­ra'at Tupana e haria. Mi'i pywo pote uito po'og Tupana mieha­kye­ra'at mi'iria kai katu­pono atunug yne mi'i ko'i ma'ato yt pywo hin i are.
PHI 3:5 Uity ui'ywot ti Isareu ywania sese mi'iria. I'ewyte Epereu pusu kuap haria ui'y­wot'in. Ta'i Epereu pusu ahepap kahato. Mi'i pote Epereu sese uito. Uha'a­se'i sese sa'a­wy­'iwuat Aparãu emiariru Pesamĩ e hap het rakat. Uipiit Iuteuria piit sese. Uimotag hap turan ati'a­tu­mu'e kahato urueko nug hap ete. Mi'i hawyi yt karãpe i ati'a­parap urueko nug hap ete. Uitag hawyi areĩne'en kahato Tupana mõtypot piaria uru'y­wania wo'o­mu'e haria akag koro wo.
PHI 3:6 Mi'i turan atunug yne yne i'atu­wo­'o­nãpin hap ko'i Tupana wãi'e hap ko'i pãi. Mi'i hawyi areĩne'en po'og irania'in kai i'atu­'akag wo yne uhesaika hap wywo. Ati'a­tu­sa­ty'i saty'i kahato Iesui mohey haria sa'a­wy'i. Atunug yne uru'y­wania miky­'esat ewy. Yt kat i urueko etiat i'aparap hap atunug. Yne uru'y­wania wãi'e hap atunug yne urue'a­se'i urunãpin sa'a­wy­'iwuat hap atunug yne. I'ewyte yne urunãpin hap atunug. Yne mi'i ko'i nug hap aimoe­waku kuap Tupana wanẽtup hawe pote waku pe areĩne'en mekewat e'at pe ma'ato yt pytkai i. Yt uinug waku hin i Tupana wanẽtup hawe mekewat e'at pe. Yt atikuap hin i Tupana mi'i turan.
PHI 3:7 Sa'a­wy'i arewa­nẽtup aremoe­waku kuap uhesaika hap wywo. Ta'i uipiit esaika hamo aremoe­waku kuap are. Mi'i hawyi ahã'ãg kahato Tupana mowepit hamo ma'ato uhewaku hap yt put'ok'e i. Mi'i turan yt atikuap hin i Tupana katu­pono Tupana yn uimoewaku kuap hat. Mi'i hawyi atimohey Iesui hawyi Tupana uinug waku. Mi'i pote koitywy Iesui kape yn areto uimo­waku hamo. Yt are'e hin i koitywy — Uiwepe aremoe­waku kuap yt are'e i. Mi'i e hap atipugha ra'yn yt kat hamo i pote.
PHI 3:8 I'atu kahato uiwa­nẽtup hawe sa'a­wy'i. Mi'i atunug mote waku ra'yn areĩne'en Tupana wanẽtup hawe ui'e hap. Atunug uheko hawyi waku pe areĩne'en Tupana wanẽtup hawe ui'e hap sa'a­wy'i. Mi'i hap ewywuat sa'a­wy­'iwuat uiwa­nẽtup hap atipun yne ra'yn aikotã watipun iun ai'yat pyi hap ewy katu­pono koitywy atipuẽti po'og wakuat wuat'i kawiat rakat. Koitywy Iesui kuap hano areĩne'en. Atipuẽti Iesui po'og waku. Mi'i Uika­'iwat no ra'yn. Mi'i yn na'yn atiky­'esat uiwa­nẽtup hawe. Mi'i yn uimoe­waku hat. Huu yn na'yn uimo­hãpyk kuap Tupana wanẽtup hawe. Mi'i pote koitywy atipun yne sa'a­wy­'iwuat uiwa­nẽtup hap ko'i sa'a­wy­'iwuat ui'e hap ko'i sa'a­wy­'iwuat uiwe­moe­waku hap hawyi Aika­'iwat yn uimoe­waku hat are. Tupana yn na'yn uheha­kye­ra'at kuap hat koitywy are yn na'yn. Koitywy sa'a­wy­'iwuat ui'e hap ko'i atipun yne katu­pono atimohey Aheha­kye­ra'at hat Aipo­typot yn. Iesui yn atiky­'esat uiwa­nẽtup hawe are.
PHI 3:9 Koitywy atikuap ta'yn uito yt naku i rakat. Atikuap ta'yn yt karãpe i atipuẽti uheha­kye­ra'at hap uhewaku hap kaipyi. Katu­pono yt arewaku kuap i uito are. Yt karãpe i atikyi'at kuap uheha­kye­ra'at hap uiminug wakuap sa'up mo. Tupana ainãpin hap ko'i koitywy atimohey Iesui. Mi'i hawyi wẽtup miit piit ewy wato­py­hu'at. Mi'i hawyi Iesui ewaku hap topy­hu'at uiano yt uiat pytkai i ma'ato Iesui wano. Mi'i yn waku koitywy Tupana uimoe­waku ra'yn atimohey Ha'yru hawyi.
PHI 3:10 Atikuap ta'yn Iesui ma'ato atikuap teran po'og. Atiky­'esat po'og po'og Uipo­rekuat no aikotã Iesui toĩne'en mesu­wa­rote hap ewy areĩne'en neran. Karãpe iku'uro aika­wiano ho'opot hap turan toiky­'esat uhepiat ho'opot hap wẽtup miit yn uruto pote. Ahupit reran Iesui wywo ho'opot hap i'ewyte atikuap teran uipiit pe hesaika hap. Arẽtem neran gu'uro pyi iwywo wẽtup piit yn urutu­kup­te'en pote.
PHI 3:11 Areĩne'en neran i ra'yn iwywo uiku­'uro hawyi. Areĩne'en i iwywo hap yn ahekatup. Mi'i hap atimohey kahato.
PHI 3:12 Uito wakuat Iesui ewywuat yt are'e hin i. Uito wakuat Tupana ewywuat yt are'e i. Uiwa­nẽtup hawe yt put'ok'e hin i te Iesui wanẽtup hap wakuat hap ewywuat. Yt uitag i te Tupana mohey hap ete. Mi'i ewywuat areĩne'en neran kahato Aipo­typot Iesui ewywuat. Areĩne'en neran aikotã weput haria te'e­ru­weput yne ta'a­tue­saika hap wywo mekewat morekuat miium sat hamo — En po'og weput kuap hat e hap sat hamo. Mi'i hap ewy atimohey teran Aipo­typot Iesui yne uhesaika hap wywo aikotã seput po'og hat ewy Iesui po pyi atat teran ra'yn mekewat — Uito po'og e hap. Uito i'ewyte seput hat ewy katu­pono Iesui uhekyi ra'yn tuwe­wawi.
PHI 3:13 Uiwy­ria'in mekewat miium aikotã seput hat tiky­'esat hap ewy. Yt uipo pe i te ma'ato areĩne'en seput re hat ewy. Mi'i hawyi areput kahato. Mi'i hap kape yn arewa­nẽtup. Yt araha'at hin i uhewat­'ymo uiwa­nẽtup hap. Seput kahuro hap kape yn araha'at. Iesui wanẽtup hap ewywuat sat hamo yn areput.
PHI 3:14 Yt pori'ok pori'ok yt areput hin i. Hãpyk kahato areput atiky­'esat kahato — Waku kahato ereput uhyt e hap yn atiky­'esat Aipo­typot e hap. Atiky­'esat Tupana tum uhepe mekewat seput haria e'amãtap ewy mekewat uipainug hap ewy. Atiky­'esat kahato Tupana to'e uhepe areput kahu hawyi — To'iro atipy kape kat pote Uimi­po­'oro Uha'yru mohey kahato hat en. Itote atum epe uimiium wuat'i e'at piat e hap atiky­'esat. Mi'i pote seput sese hat ewy areĩne'en Iesui wanẽtup hap ewywuat kape areput.
PHI 3:15 Atiky­'esat eipe ui'e­wywuat eiwa­nẽtup hawe. Waku wato­py­hu'at seput sese haria ewy. Waku yne ahesaika hap wywo wato­mohey Tupana mimotag ko'i aito pote. Waku mi'i tã watunug. Waku haty wo wato­mohey. Eweimohey ran ne'i pote Tupana timo­herep aru ehepiat yt tomohey i hap.
PHI 3:16 Karãpe wati­'a­parap mi'i hap aru Tupana timo­herep ahepe aiminug sa'ag hap ko'i. Waku wateput aimikuap ewy Iesui miky­'esat hap ok tã. Mi'i turan Tupana aipo­wyro tesaika hamo seput po'og sa'a­wy­'iwuat kawiat haria wo.
PHI 3:17 Karãpeĩ urutu­kup­te'en eipy­'a­setpe urutu­kup­te'en Iesui mohey haria kahato. Uheywyt'in uheinyt'in aikotã atimohey kahato Iesui mi'i hap ewy waku eweikup­te'en. Karãpe toĩne'en eipy­'a­setpe imohey kahato ui'e­wywuat hat waku ewehe­ha'at mi'i kape. Mi'i hawyi ewetunug iminug ewy. Mi'i iã'ãg haria wo eweikup­te'en.
PHI 3:18 I'atu kahato aria kapiat haria katu­pono Iesui ewanĩ­kaptia kahato mi'iria katu­pono te'e­ru­we­ky­ry'i kahato Aipo­typot ku'uro aria'yp posak etiat ta'a­tue­ka­wiano pote. Aikotã sa'a­wy'i are'e hap ewy are'e i — Mi'iria aria kape tuwat are uiwak popuo.
PHI 3:19 Aikotã sa'a­wy'i are'e hap are'e i — I'atueiam sese ti aru aria are katu­pono i'atue­tu­pana sese i'atu­mi­ky­'esat ko'i mi'u kape yn i'atu­wa­nẽtup hap mesu­wa­rotiat kape yn i'atu­wa­nẽtup hap. Ta'a­tuekat hap kape yn i'atu­wa­nẽtup hap. Mi'i hawyi yt naku i kahato ta'a­tunug ma'ato ta'a­tunug hawyi yt te'e­ru­we­mõti hin i inug te turan. — Waku nug haria uruto i'atu'e ma'ato i'atueiam ti aru aria kawiat.
PHI 3:20 Ma'ato aito atipy kapiaria ahetama sese atipy pe. Mi'i kaipyi aru tut Aheha­kye­ra'at hat. — Hẽ eriot ro meremo meikowo wato'e mot'i Aika­'iwat Aipo­typot Iesui pe.
PHI 3:21 Tut hawyi aipiit mesu­wa­rotiat tutunug towat topiit ewy. Mi'i hawyi yne aipiit Iesui ewy topy­hu'at wuat'i e'at pe. Aipiit iwat piit ewy ikahu kahato. Mi'i tã aru ainug tesaika hap wywo. Hesaika kahato Iesui mi'i nug hamo katu­pono mekewat e'at pe topy­hu'at yne yne Porekuat no po'og hesaika torania kai. Mi'i tesaika hap wywo aimo­pakup aipiit. Pakup tutunug towat ewy are.
PHI 4:1 Mehĩ'in mana'in aiku­'uro hap kape waku wato­mohey o are. Uimi­ky­'eria kahato eipe. Woro­ho­'o­ky'e eipe. Uhehat'at kahato eiky­'ewi. Uimo­wepit haria eipe. Arehum kahato ehowawi. Uheinyt'in uheywyt'in yt uimõti te hin i. Atikuap aikotã eweikup­te'en wẽtup miit ewy Aika­'iwat wywo.
PHI 4:2 Mi'i hawyi mana Ewotia mana Sintiki ahẽtup ehowawi eipe Aika­'iwat mohey haria pote eweikup­te'en wo'o­ky'e haria wo'o­wese haria kahato. Waku wẽtup ehay ewy aikotã eiky­py'yt ewy eweikup­te'en Iesui mohey haria eipe pote. Aito Iesui mohey haria pote yt naku i watu­kup­te'en yt wo'o­ky'e i haria wo yt naku i are.
PHI 4:3 Sa'a­wy'i eipotpap kahato uiwywo mana'in. Sa'a­wy'i mehĩ Kementi wywo watuwat irania'in aipo­wyro haria wywo sehay wakuat Iesui etiat sytpok hamo. Mi'iria set yne toĩne'en Tupana miwan atipy piat ete mekewat miwan ete uwe aru toĩne'en wuat'i e'at pe e hap tote. Pywo pe ti mana'in sa'a­wy'i eipotpap kahato uiwywo. Mi'i pote atiky­'esat kahato waure­'e­wei'e o eiwu­'uka hap ete are. Atiky­'esat kahato eiwo­'o­wese hap ta'yn aikotã sa'a­wy'i eiwo­'o­ky'e hap ewy ra'yn atiky­'esat uheinyt'in are. Mi'i pote ahẽtup ei'a­pykok hanuat pe — Uhyt are'e eti'a­tunug no uheinyt'in wo'o­ky'e haria wo ra'yn are. Mehĩ are'e uipo­wyro en tawa Wiripu piaria nãpin hamo. Pyno mehĩ waku ere'e mana Ewotia i'ewyte mana Sintiki pe — Yt eiwu'uka po'og nei'o ehehay wo ere'e o i'atuepe are ei'a­pykok hat pe mana'in.
PHI 4:4 Pyno uiwy­ria'in wo'o­mo­wepit haria ewywuaria wo o eweikup­te'en. Wuat'i e'at pe waku — Tupana urumo­wepit hat kahato En waku wato'e at ka'ap. Tupana urumo­wepit hat kahato En waku wato'e Tupana pe are.
PHI 4:5 I'ewyte ti waku yt ipy'ahak takaria wo i watu­kup­te'en e. Waku yne miit'in wesat hano watoĩ­ne'en. Yt eweiwaure tei'o Aika­'iwat ut hamuat hap e'at katu­pono ta'aipok irane Ai'akag koro are. Mi'i pote waku wakuaria ewy watu­kup­te'en wuat'i e'at pe.
PHI 4:6 Pyno yt eiwa­nẽtup ko'i ko'i i ran o. Po'og waku wahẽtup Tupana kape aipo­wyro hamuat hap. Waku wato'e Tupana pe — Etum o uruepe uruwat yt kat i rakat. Uruikuap kahato ra'yn egyi'at hap Tupana waku uruhẽtup. Mi'i pote urutu­wehum kahato ewawi urupy'a pyi Tupana waku wato'e Tupana pe.
PHI 4:7 Mi'i tã watunug pote yt kat i hin i aiwa­nẽtup ko'i ko'i hap atunik kahato. Aiwa­nẽtup hawe wo'o­wese hap yn topy­hu'at. Tupana ainug waku pe kahato aiwa­nẽtup hawe yt miit'in mikuap ok tã i tutum ahepe aipe­rup'i kahato hap. Towese hap ewy tutum ahepe. Mi'i pote toihep aheso'ok hap ko'i. Mi'i hawyi aiwa­nẽtup hap Iesui wanẽtup hap ewy wẽtup miit ewy kahato ra'yn ainug. Aipo­typot timoma ra'yn aiwa­nẽtup hap aipy'a piat yt naku i nug hap i'ewyte aiwa­nẽtup sa'ag hawiat.
PHI 4:8 Kurin po'og ahenoi hawyi waku. Uheywyt'in uheinyt'in wati­pyhyp aiwa­nẽtup hap yt naku i hap. Mi'i hawyi wẽtup kape yn aiwa­nẽtup hap. Wakuat kape yn watu­wa­nẽtup aikotã miit'in miat wakuat rakat ewy aiwa­nẽtup hap aikotã pywuat wanẽtup hat ewy aikotã miit'in mimõ­typot kahato hap wanẽtup hap ewy aikotã hãpyk kahato rakat ewy waku watu­wa­nẽtup. Waku ihainia hary­poria we'eg nakaria ewy watu­wa­nẽtup. Waku iwese kahato rakat ewy aiwa­nẽtup hap. Mi'i hawyi — Meimuẽ­waria wyti waku kahato rakaria i'atu'e hap ewy waku aiwa­nẽtup hap. Kat e hap kat e hap po'og po'og waku mi'i ewywuat waku watu­wa­nẽtup. Kat e hap kat e hap ete Tupana — Waku e pyno mi'i hap ete waku watu­wa­nẽtup at ka'ap.
PHI 4:9 I'ewyte atiky­'esat kahato ehewyry uhepiat einãpin hap nug haria wo. Atiky­'esat uimi­po­'oro einãpin hamuat eweiky'e kahato hap. Sa'a­wy'i ti areĩne'en eitokpe turan wakuat yn atunug ehepuo. Waku ewetunug aikotã uheko ewei'a­kasa hap ewy wakuap nug hap ete. Mi'i tã ewetunug mote wo'o­ky'e hap eiwo­'opiat hap eweipuẽti Tupana miky­'esat ewy. Mi'i hawyi ti aru eipe­rup'i hap topy­hu'at aikai are.
PHI 4:10 Mio ti put'ok'e eimiium uipo­wyro hamuat hap. Mi'i hap ti uimo­wepit kahato. Mi'i hawyi uipy'a perup'i kahato Uika­'iwat ete. — Waku kahato En are Iesui pe. Mio tã are emiium uhepiat uimo­'ok­pi­pok'i po'og po'og hap ete katu­pono uiky'e hap moherep kahato hap eimiium. Sa'a­wy'i ti uipo­wyro teran kahato eipe wen ma'ato mi'i re mu'ap yt eweipuẽti i uiky'e ehepiat hap moherep hamo.
PHI 4:11 Sa'a­wy'i te ti yt kat i sẽtup ui'e hap. Yt ahenoi i irania'in me yt kat i uiat e hap katu­pono koitywy atikuap ta'yn uiwepit sio uhekat iwato hap etiat sio kurin uiat uiwepit hap atikuap.
PHI 4:12 Atikuap kahato seha­ky­'e'i hap etiat i'ewyte atikuap kahato sekat hap etiat. Sa'a­wy'i meimuẽwat yt atikuap i yt kurin i ma'ato koitywy atikuap ta'yn uhesy'at pytkai uiwepit i'ewyte ui'ok pote uiwepit. Uhekat kurin hawyi arehum i'ewyte iwato uhekat pote arehum ne. Koitywy ahepap ta'yn wehum hap.
PHI 4:13 Ma'ato yt uiwe­kaipyi i tut uhesaika hap ma'ato Aipo­typot Iesui kaipyi atipuẽti. Mi'i ti kat e hap kat e hap etiat — Uimoe­saika hap wuat'i etiat kuap hap ete uimo­wa­tetup are Tupana pe. I'ewyte waku kahato eipe mi'i e hap ti ere'e Tupana pe.
PHI 4:14 Ma'ato waku eiminug ewetum uhepe. Ta'i uhepiat ho'opot hap toĩne'en mesuwe. Uimo­so­'opot kahato mesuwe wo'o­pyhik hawe. Mi'i turan eimi­po­'oro put'ok'e uhete. Mi'i hawyi arehum kahato eimiium uhepiat ete.
PHI 4:15 Ehe'yi Masẽ­tunia pe mio i'atu kahato Iesui mohey haria tukup­te'en. Ha'a­wyte areto ra'yn i'atue­wawi sehay Iesui etiat wakuat moherep hamo wuat'i tawa pe kat e hap kat e hap upi. Mio koitywy ahok'iwat yne tawa pe Iesui mohey haria te'e­ru­wa­'a­tunug tuereto ma'ato yt kat i te ta'a­tu­po­'oro uhowawi ta'a­tumiium ko'i. Ma'ato eipe Iesui mohey haria tawa Wiripu piaria ewetum kahato ra'yn uhepe. Eweipat'ok kahato uhepe ehekat ko'i.
PHI 4:16 Sa'a­wy'i areto tawa Tesa­ro­nika kape. Itote yt uhekat hin i ma'ato mi'i turan uipo­wyro hap eweipo­'oro po'oro kahato uhowawi kat uimi­ky­'esat ko'i sa'a­wy'i eweipo­'oro.
PHI 4:17 Yt ahẽtup hin i eimiium wuat i'ewyte yt atiky­'esat i eheka­re'en uiwa­nẽtup hawiat hap pytkai eweipo­'oro. Yt eimiium kape hin i araha'at. Yt ehekat hin i uheha pe. Eiky'e hap yn uheha pe uhepiat hap wen ma'ato eimiium uimo­wepit kahato katu­pono mi'i kaipyi atikuap uiky'e ehepiat hap. Mi'i kaipyi atikuap eipe Tupana ky'e kahato haria hap. Mi'i eimiium ko'i yne topy­hu'at atipy pe rakanuat ehegyi'at hap toimo­herep hamuat itote emipo­'oro ko'i.
PHI 4:18 Mehĩ Epawu­titu tum yne eimiium eimi­po­'oro ko'i uhepe. Ikahu kahato uipuẽti eimiium aikotã sa'a­wy'i nagnia tiwuk mohag hy ikamhig se rakat Tupana mõtypot hamo. Mi'i hap ewy atipuẽti eimiium ikamhig se kahato eimiium Tupana mowepit kahato hap. — Waku kahato e Tupana eimiium me. Koitywy areĩne'en hekat rakat ewy ra'yn ewetum iwato uhepiat pote. Ewetum iwato pote uipo sakpo ewetum uhepe.
PHI 4:19 Tupana tum aru yne yt kat i aikawiat rakat ahepe. Ta'i Uhetu­pana tum aru wuat'i yt kat i eiwat rakat tekat iwato kahato hap kaipyi. Aikotã tekat iwato kahato atipy pe hap ewy te tutum ehepe. Ta'i hegyi'at kahato aru ahepe katu­pono Ha'yru Aipo­typot Iesui iku'uro aika­wiano haype. Mi'i pote toĩ yne aipo pe imiium ko'i.
PHI 4:20 Mi'i tupono to'iro watu­wehum Aika­'iwat Tupana kape. To'iro wati­mõ­typot Mi'i yn mesu­wepyi mũki­'ite e'ihot'ok wuat'i e'at pe waku mi'i tã pãi.
PHI 4:21 Mi'i tupono kuekatu atipo­'oro torania Tupana eropat haria kape Tupana emiit'in kape mekewat Aipo­typot Iesui emiit'in ko'i kape i'ewyte Iesui mohey haria uheywyt'in uheinyt'in torania kape atipo­'oro kuekatu hap are.
PHI 4:22 Morekuat Sesara emiit'in sura­ra'in i'ewyte kuekatu ipo'oro ehowawi. I'atu kahato mesuwe Iesui mohey haria. Mi'iria i'ewyte kuekatu ipo'oro ehowawi.
PHI 4:23 Pyno ahẽtup Tupana pe — Eti'a­tu­ky'e kahato emohey haria tawa Wiripu piaria are ahẽtup. Egyi'at kahato hap kaipyi eti'a­tu­poi­tyro mi'iria ewaku hap ok tã are yn Aipo­typot Aika­'iwat Iesui pe eika­wiano hamo ahẽtup. Tupana Pã'ãu eiam mo eipiit ko'i hap yn ahẽtup Tupana pe at ka'ap eika­wiano haype. Morekuat Sesa wo'o­pyhyp hawe areĩne'en mesup. Uimiwan Iesui etiat atipo­'oro ehewowi tawa Wiripu piaria Iesui mohey haria pe. Toran na'yn uimiwan. Uito Iesui potpo­'oro Pauru.
COL 1:1 Uiwy­ria'in uito ti Iesui potpo­'oro Pauru. Mesup atipo­'oro uimiwan ehowawi tapy­'yiaria tawa Korosi piaria Iesui potpo­'o­roria kape. Mesup Tupana emiit'in sese eipe are Iesui mohey pot'i haria eipe. Uito ti Aipo­typot eropat hat sese uito. Uito Tupana mi'airo sese Imipo­'oro Tosa­'yru Iesui moherep hamuat. Tomi­ky­'esat ewy ui'airo.
COL 1:2 Mi'i pote kuekatu e hap atipo­'oro ehowawi. I'ewyte aiwy Timoteu tuwehay po'oro ehowawi urumiwan me. Uruhẽtup ehowawi — Uru'ywot Tupana etum no wo'o­ky'e hap wo'o­wese hap tawa Korosi piaria pe uruto'e. Ereĩne'en o itote hegyi'at kahato Esa'yru mohey haria piat hano uruto'e.
COL 1:3 Uruka­'iwat Iesui Ywot waku kahato En katu­pono Emipo­'oro Esa'yru Uruka­'iwat nuat kahato uruto'e. Waku sakpo'e En katu­pono eti'a­tue­ha­kye­ra'at ra'yn uruwy­ria'in tawa Korosi piaria uruto'e Tupana pe.
COL 1:4 Urumo­wepit kahato mi'iria katu­pono mi'iria emimo­waku ko'i. Mi'iria Esa'yru Emipo­'oro mohey haria kahato. Emipo­'oro Urupo­typot upiat haria kahato mi'iria uruto'e. Waku sese En Tupana katu­pono etunug na'yn mi'iria emẽpyt'in ky'e kahato haria uruto'e Tupana pe.
COL 1:5 Uheka­tu­wyria ga'atpo mekewat sehay pywuat wakuat Iesui etiat put'ok'e ehetawa pe hawyi eiwe­waure ka'a kahato. Eweikuap ta'yn hawyi — Ta'i mi'i wato­mohey pote ti watoĩ­ne'en aru wuat'i e'at pe atipy pe ewei'e ra'yn Tupana e hap ewy ewei'e. — Tupana atunug aru e'e hap ewy ewei'e. Mio tã ewei'e ra'yn hawyi Iesui mohey haria sese eweipy­hu'at. Waku kahato katu­pono i'ewyte wo'o­ky'e kahato haria kahato eweipy­hu'at eipe.
COL 1:6 Koitywy mesuwat Iesui etiat ainãpin hap aimoe­ha­py­hot'ok kahato wuat'i miit'in me mesuwat yi totiaria pe. Tuwe­sytpok kahato ihay wakuat aikowo aikowo tuwat Tupana ehay wuat'i puo. Mi'i hawyi mi'iria wy waku pe ra'yn tukup­te'en. Tupana mipoi­tyro wo ra'yn tukup­te'en. Mi'i hap ewy ra'yn eweikup­te'en eweikuap ta'yn sehay hawyi. Eipe ti eweikuap ta'yn Tupana tum ehepiat wuat'i e'at piat eheĩne'en hamuat hap. Eweikuap ta'yn yt kat sa'up i tegyi'at hap tutum neran hap eweikuap ta'yn.
COL 1:7 Ga'atpo mehĩ Epawai toĩne'en eipy­'a­setpe turan tohenoi kahato ra'yn Tupana egyi'at hap etiat. Ta'i mi'i ti Aipo­typot eropat hat sese uruto ewywuat kahato aipotpap upiat kahato uhyt Epawai. I'ewyte eiwo­'o­mu'e kahato hat mi'i. Yt ipohep hin i wakuat sehay enoi hap ete ehepe. Mi'i kaipyi eweipuẽti ra'yn Tupana egyi'at hap.
COL 1:8 Mi'i hawyi mehĩ Epawai urumu'e kahato mesuwe aikotã eweikup­te'en itote — Tawa Korosi piaria ti wo'o­ky'e kahato haria e uruepe. Tupana Pã'ãu kaipyi to'o­ky'e kahato e ehetiat uruepe mehĩ Epawai.
COL 1:9 Mi'i e hap uruikuap hawyi uruhẽtup kahato Tupana kape eipo­wyro hamuat uhyt Epawai e hap uruikuap hawyi. Mesup te uruhẽtup ehupi — Tupana uruto'e etum tawa Korosi piaria pe emiky­'esat nug hap kuap hamuat uruto'e. I'ewyte etum no i'atu­we'eg kahato hap ewe'eg hap ok tã ewanẽtup hap ewy uruto'e Tupana Pã'ãu me.
COL 1:10 — Tupana uruiky­'esat kahato tawa Korosi piaria Epã'ãu eiam kahato wo ewe'eg hamo i'ewyte emiky­'esat nug kuap hap uruto'e mesuwe uruhẽtup. Uruiky­'esat mi'iria aikotã i'yp i'ywa kahato rakat ewy hewo hewo kahato hap ewy wyti uruiky­'esat kahato mi'iria Tupana uruto'e. Pyno uruiky­'esat mi'iria wakuap yn nug haria En ewy hap uruiky­'esat. I'ewyte uruiky­'esat ekuap hap ihot'ok ewy ewy put'ok'e Esa'yru mohey haria ete uruto'e uruhẽtup Tupana pe.
COL 1:11 Tupana Pã'ãu hesaika kahato yne esaika hap apy tote. Mi'i pote aito ahesaika kahato Tupana Pã'ãu po'og po'og aipyt­'atnug hawyi. Mi'i hawyi wato­py­hu'at hesaika hap wywo. Mi'i hawyi aimoe­saika wuat'i sa'ag miat ai'akit hap pun hamo. Mi'i hawyi wyti i'ewyte wahupit kuap yne i'atu­mi­ky­ry'i hap ko'i. Mi'i hawyi perup'i puo wato­mohey wuat'i e'at pe mot'i kahato Tupana Pã'ãu toĩne'en aikai pote.
COL 1:12 Mi'i hawyi watu­wehum aiwepit kahato hap wywo Ai'ywot Tupana kape katu­pono Ai'ywot atipy piat aimo­hãpyk aiwa­nẽtup hap. Mi'i hawyi — Wakuaria wo ra'yn mi'iria e ahepiat pe. Uhemiit'in sese mi'iria e. Uheka­re'en aru atum yne i'atuepe. Uhetawa hẽtyhot rakat atum aru i'atuepe e. I'atueo­wakai waku pe yne ra'yn e ahepiat Topã'ãu eiam ko'i pe.
COL 1:13 Sa'a­wy'i ahiag potmu­'eria wo watoĩ­ne'en. Yt watu­we­'a­putsit kuap i ipo pyi. I'e hap yn watunug kuap. I'ypyryp wiat ieĩne'en haria ewywuat watoĩ­ne'en. Sa'a­wy'i ho'o­wasat rakaria wo watoĩ­ne'en ma'ato Ai'ywot atipy piat tipo­hari ra'yn aito ahiag po pyi. Mi'i hawyi ahero­kosap Tosa­'yru eropat haria wo ra'yn. Tomi­ky'e kahato emiit no ra'yn ainug. Waku kahato are.
COL 1:14 Mi'i hawyi waure wo ra'yn Tupana toĩne'en aiminug sa'ag ko'i kai. Iesui aikyi'at tosuu wo aheha­kye­ra'at hamo.
COL 1:15 Tupana sese ti yt heremo i ahowawi. Mi'i hawyi toipo­'oro ahowawi Tosa­'yru wẽtup ok tuwe­mo­herep hamo Aipo­rekuat nuat. Imipo­'oro Ha'yru ti i'ewywuat sese topy­hu'at. I'ywot yt heremo pytkai i ma'ato Ha'yru wata­'a­kasa hawyi watikuap ta'yn Ha'yru hawyi watikuap ta'yn To'ywot ewy ra'yn hap. Mi'i hawyi yt heremo i rakat heremo ra'yn. Ha'yru ti po'og na'yn torania irania'in kai ipotput­'ok'e. Torania Tupana minug kai ipotput­'ok'e. Po'og na'yn yne ieĩne'en haria hewyry rakaria yi totiat atipy piat kai po'og Ha'yru.
COL 1:16 Tosa­'yru ehay wo tutunug yne yne. Yt kat kawiat i tutunug. Atipy piaria yne toimo­herep i'ewyte yne yi totiaria Ha'yru inug. Yne heremo rakaria inug i'ewyte yt heremo i rakaria atipy piaria akag ko'i inug. Tu'i­saria yne imi'ai­roria tukup­te'en. More­kuaria i'ewyte imi'ai­roria. Waikiru at waty yi iminug ko'i yne Tosa­'yru ehay wo yne tutunug. Mesup tutum na'yn yne yne Tosa­'yru pe.
COL 1:17 Ha'yru toĩne'en yne iminug ko'i e'yianmete. Wẽtup ok yn na'yn topy­hu'at Tosa­'yru wywo. Ha'yru esaika hap wywo toi'a­tu­mo­py­hu'at yne yne at waikiru waty yi yne yne. Tosa­'yru ehay wo toi'a­tu­mo­wo­'osat yne. Toi'a­tu­moheg yne Tosa­'yru ehay wo yne tominug ko'i.
COL 1:18 Mi'i hawyi wuat'i puo Tupana mohey haria akag wo topy­hu'at ra'yn Ha'yru. Tomohey haria akag akag wo toĩne'en. Mi'i hawyi yne aito imohey haria ipiit ewy wato­py­hu'at ma'ato Iesui ai'akag wo topy­hu'at aikotã ai'akag me watu­we­wa­nẽtup hap ewy aipiit tutunug mi'i hap ewy watunug i'e hap ewy. Tomohey hanuaria Sa'a­wynug hat ti Iesui. Ahesaika hap Ha'yru kaipyi yn tut aimoe­saika hamuat. Ahehaĩte hap i'ewyte Ha'yru tunug wy. Iku'uro sese aika­wiano hawyi Tupana tomoieĩ­ne'en i ra'yn gu'uro pyi. Yt uwe hin i te tuwẽtem gu'uro pyi turan tuwẽtem gu'uro pyi katu­pono Tupana tiky­'esat Tosa­'yru yianmete wuat miit'in wẽtem hap. Mi'i sa'a­wy'i wyti put'ok'e gu'uro hakpo gu'uro hap.
COL 1:19 Pyno aito wẽtup yn imiky­'esat ewywuat Tupana wywo Ha'yru wywo Ipã'ãu wywo wato­mohey Ha'yru hawyi.
COL 1:20 Tupana atoiat haria yne aitoria sa'a­wy'i i'ewyte atipy piaria ahyt Tupana atoiat haria sa'a­wy'i. Mi'i hawyi Tupana watunug ahewa­nĩkap mo. Mi'i pote wẽtup e'at pe to'e Tosa­'yru pe — Woronug En mu'ap ewywuat miit'in aipok uhowawiat hamuat. Eku'uro aria'yp posak ete hawyi ta'at yne esuu ra'yn hawyi uiwaure haria uikat kuap ta'yn. Mi'i esuu wo ati'a­tu­mo­wehik yne miit'in emohey haria uhowawi i ra'yn e mesu­wa­rotiat yi totiaria i'ewyte atipy piaria ui'atoiat haria e. Mi'i hawyi aru wo'o­wese hap i ra'yn topy­hu'at e Tupana Tosa­'yru pe.
COL 1:21 Sa'a­wy'i watoĩ­ne'en pya kahato Tupana kai yt naku i nug haria kahato aiwa­nẽtup hawe i'ewyte aipiit no. Mi'i pote watunug Tupana ahewa­nĩkap mo katu­pono wakuat kahato Tupana pote.
COL 1:22 Ma'ato koran wyti Tupana ainug na'yn towy­ria'in no kahato. Aipo­typot piit iku'uro aria'yp posak ete hawyi Tupana tunug Tosa­'yru mu'ap tuwe­wawiat ai'aipok hamuat. Ipiit aiwanuat ewy iku'uro hawyi Tupana tekyi kahato tuwe­wawi Tosa­'yru mohey haria. Koitywy ihamo ra'yn watoĩ­ne'en. Koitywy to'e ahepe — Yt kat i te sa'ag atipuẽti eikai e. Waku puo ra'yn eweikup­te'en uiwa­nẽtup hawe aikotã yt karãpe i ewei'a­parap uhepe hap ewy eipe e ahepe. Koran uiwy­ria'in no ra'yn eipe e Tupana ahepe.
COL 1:23 Pyno aiwy ra'yn Tupana. Yt nakuap i watoiat ra'yn hawyi waku aiky'e hat sese wato­mohey wuat'i e'at pe. Sa'a­wy'i watikuap mekewat Iesui etiat sehay wakuat ehay hawyi wato­mohey ra'yn Iesui. Mi'i hawyi watoĩ­ne'en aru wuat'i e'at pe e hap ewy wato­mohey. Miit'in te'e­ru­we­ky­ry'i ahetiat pytkai imohey hap yt watoiat hin i. Iheg me kahato watoĩ­ne'en imohey hap ete. Sa'a­wy'i wato­mohey kahato. Pyno koitywy yt naku i ra'yn imohey hap watoiat sehay waku kahato Iesui etiat. Mi'i atikuap sa'a­wy'i hawyi uheropat kahato at ka'ap wuat'i miit'in kape mi'i moherep hamo aikope aikope miit'in tukup­te'en hap upi yne ywania pe ahytpok mi'i ehay wakuat mesuwat yi wato hap ok tã. Mi'i hamo yn uinug uito Pauru.
COL 1:24 Koitywy ho'opot hat ewy areĩne'en mesuwe. Uipiit saty'i kahato areĩne'en katu­pono wo'o­pyhik hawe areĩne'en hatek takat ewy. Mi'i pytkai uiwepit yn katu­pono eika­wiano aho'opot. Sa'a­wy'i Aipo­typot Iesui ho'opot kahato aika­wiano tomohey haria etiano. Koitywy watoĩ­ne'en wẽtup mẽpyt sok ewy Iesui upi katu­pono toho­'opot aika­wiano. Mi'i hap ewy kahato aho'opot Iesui mohey haria kawiano.
COL 1:25 Mi'i pote Tupana to'e uhepe — Woronug en uimohey hano uheropat hano. Atiky­'esat etomo­herep wuat'i pe uhehay e. Mi'i tã etunug mote emimu­'eria waku pe tukup­te'en. Mi'i pote eti'a­tu­mu'e ro uhehay wo wuat'i ywania pe e Tupana uhepe. Uito ti Pauru.
COL 1:26 Mesuwat sehay wakuat yt uwe i ikuap sa'a­wy'i. Nimuaria yt uwe i mesuwat yi tote ikuap mesuwat sehay etiat. Tupana yt tomo­herep i miit'in muo mekewat e'at pe ma'ato mesup heremo ra'yn wuat'i Iesui mohey haria pe ra'yn.
COL 1:27 Koitywy Tupana to'e — Sa'a­wy'i yt uwe i kape atimo­herep uhehay pakup e. Kurin ikuap haria sa'a­wy'i ma'ato koitywy Uha'yru mohey haria kape atimo­herep ta'yn uhehay ikahu kahato rakat sehay hekat rakat wuat'i ywania mesuwat yi totiat kapiat sehay wakuat e. Sa'a­wy'i mig'i wo toĩne'en ma'ato mesup atimo­herep ta'yn ehepe e Tupana ahepe. Etunug no Uha'yru Eporekuat no eipy'a pe pote eweikup­te'en aru uhehamo mesuwe atipy pe uimi­mõ­typot ko'i wo e Tupana ahepe.
COL 1:28 Mi'i tupono koitywy wuat'i ywania pe — Ewetunug no Iesui Eipo­rekuat no uruto'e wuat'i miit'in me. Eiwe'eg wo o wato'e. Eweikuap o mesuwat sehay wakuat wato'e wuat'i pe. Mi'i hawyi yne Tupana esaika hap wywo waku watoĩ­ne'en we'eg haria wo irania'in py'a­setpe katu­pono wati­ky­'esat kahato mi'iria yne yne Tupana wywuat ieĩne'en haria wo. Watekyi teran kahato miit'in aiwe'eg hap wywo Tupana kape. Wati­ky­'esat mi'iria Tupana kuap haria. Wati­ky­'esat mi'iria Ha'yru mohey sese haria. Wati­ky­'esat mi'iria wẽtup wanẽtup hap ewy yn Aipo­typot Iesui wywo.
COL 1:29 Uito Pauru arepotpap kahato miit'in mohãpyk Iesui mohey hap etiat hamo. Uipiit sakup hap wywo aremo­so­'opot kahato mi'i nug hamo yne uhesaika hap wywo. I'ewyte yne Aipo­typot miium uhesaika hap wywo arepotpap katu­pono Tupana Pã'ãu uipiit pyi ipotpap kahato topotpap nug hamo are. Uiwy­ria'in tawa Korosi piaria pywo pe ti are'e teran ehepe arepotpap sa'a­wy­'ipyi mesup te arepotpap kahato. Woro­ho­'onug Aipo­typot Iesui emiit no yt eipe yn i ma'ato i'ewyte irania'in ywania torania ati'a­tu­mu'e teran Iesui ete.
COL 2:1 Mana'in uhyt'i'in tawa Korosi piaria ha'a­wy­tepyi mesup te aho'opot kahato uipy'a pe ehetiano. Uhehay kahato Tupana pe ehetiano katu­pono woro­ho­'onug neran eipe Aika­'iwat emiit no imohey sese haria wo. Ma'ato yt ehepe yn i ahenoi teran ma'ato i'ewyte i'atu kahato yt ui'a­kasa i te haria i'ewyte tawa Irautiseia piaria kape hap ahẽtup at ka'ap Tupana pe.
COL 2:2 — Atiky­'esat mi'iria ieĩne'en kahato Esa'yru mohey hap upi hap ahẽtup. Etimonik to i'atu­'a­rot'i hap are'e Tupana pe. Mi'i hawyi etunug mi'iria iwepit rakaria wo are. Eti'a­tu­'a­po­'ahik mi'iria wo'o­ky'e haria wo aikotã urue'yni urui'ok­po'i hap ewy are. Atiky­'esat mi'iria hesaika rakaria wo surara ewywuaria ehay moherep haria wo are. Atiky­'esat pywuat sehay kuap kahato haria wo are. Atiky­'esat ikuap hot'ok kahato sehay pywuat hawyi — Pywo ti rat e haria wo tukup­te'en are. Atiky­'esat kahato ta'a­tukuap kahato mekewat e'e hap sa'a­wy­'iwuat yt heremo i rakat Iesui e'yianmete wuat are. Mekewat — Atipo­'oro aru Uha'yru Eipo­rekuat no e'e hap are.
COL 2:3 Aika­'iwat Iesui pe toĩne'en yne yne we'eg hap ko'i yne yne mikuap ko'i are. Watikat pote wati­puẽti yne. Wahẽtup tope pote tuwe­mo­herep ta'yn ahepe yne yne wuat'i Tupana mikuap yne. Wahẽtup pote Iesui aimo­we'eg kuap Tupana mikuap ko'i ete are.
COL 2:4 Pyno eiwe'eg wo o eima'at sehay wuat teran haria pupi. Wãi'e­wei'e o i'atuehay wu'uka hap ne'i ete are i'atuehay yt pywo rakat i. Yt eweiwat rei'o i'atuehay upi katu­pono yt pywo i sehay hap nug kuap kahato haria mi'iria. I'atu­we'eg kahato heso nug hamo. I'atuehay se kahato tuereto ma'ato eima'at hamo ne'i. Yt ereto tei'o i'atuehay upi are.
COL 2:5 Uimo­wepit kahato haria eipe. Waku kahato eweikup­te'en Aipo­typot Iesui mohey haria sese ra'yn ewy. Waku wẽtup surara y'am miat hat ewy eweikup­te'en — Yt atoiat i imohey hap ewei'e eiwo­'ope. Eiwa­nẽtup hap yt ewei'ywyk hin i. — Uruto Iesui mohey haria waku ewei'e. Mi'i hap ara'a­kasa yne mesuwe uiwa­nẽtup hawe. Yt areĩne'en i eipy­'a­setpe wen ma'ato uimu­'etu wuat ewy atikuap. Uimo­wepit kahato haria eipe uiwa­nẽtup hawe uipy'a pe are.
COL 2:6 Mi'i hawyi waku ewei'e Iesui pe — Uruiky­'esat kahato En Uruka­'iwat no hap ewei'e. Mi'i ti waku wato'e. I'ewyte mesup yne e'at pe waku wato'e Aika­'iwat Iesui pe — Worokuap kahato teran uipy'a pe waku wato'e. Uruiky­'esat aiwa­nẽtup hap wẽtup ok wanẽtup hap ewy yn waku wato'e. Mi'i ti i'ewyte waku wato'e at ka'ap wato­mohey hawyi.
COL 2:7 Waku wato­py­hu'at Aika­'iwat ewy are. Sa'a­wy'i urui'a­tu­mu'e kahato eipe Iesui ete. Mi'i hawyi eweimohey Iesui hawyi waku. Koitywy ma'ato waku eweimohey po'og po'og yne e'at. Aimikoi hapo kahato rakat ti ihãite ra'yn tuwe­sapo nug kahato hawyi. Mi'i hap ewy karãpe watunug Aimi­mohey miky­'esat ewy at ka'ap. Wati­mohey kahato ra'yn Iesui hawyi ahehãite hap kahato ra'yn watikuap. Mi'i aikotã tuwe­motag kahato aria'yp wato ewy hapo yi piit pe hap ewy watoĩ­ne'en. Mi'i hap ewy waku ahehay wati­pehik Iesui ehay ete. Mi'i hawyi — Waku kahato En Iesui ai'e hap yn wato'e aipy'a pe. Arehum ewawi wato'e yn ahehãite imohey hap kaipyi.
COL 2:8 Aimu'e haria irania'in tuwe­kaipyi aimu'e. Yt Tupana mipo­'o­roria i i'atu kahato tukup­te'en. Irania'in aimu'e haria nagnia ehay kaipyi miit wanẽtup hap kaipyi mekewat mã'ãu sa'ag wanẽtup hap aimu'e sa'ag. Yt imohey i haria porekuat ehay moherep haria irania'in. Yt Aipo­typot upiat aimu'e haria hin i wo'o­ma'at haria wo mi'iria. Miit'in wanẽtup hap ewy yn aimu'e. Eiwe'eg wo o i'atu­wo­'o­mu'e hap pupi katu­pono aima'at reran haype are.
COL 2:9 Ta'a­tu­ky­'esat eipe ta'a­tuemiit no aikotã wamiri ewy aimu'e irania'in. Tupana tipo­'oro Tosa­'yru Aipo­rekuat no ma'ato Tosa­'yru piit pe toĩne'en miit sese wo Tupana tuwe­pu'i nug. Iesui ti miit sese toĩne'en ai'e­wywuat. I'ewyte Iesui piit pe Tupana yne yne toĩne'en.
COL 2:10 I'atu kahato atipy piaria akag more­kuaria ko'i tukup­te'en wen Iesui po'og po'og mi'iria kai e. Iesui ti po'og po'og Morekuat no ahiag kai po'og hesaika ahiagnia kai po'og po'og nakat. Mi'i hawyi aito Iesui mohey haria pote iwywo wẽtup miit ewy yn watoĩ­ne'en. Mi'i pote tutum ahepe toieĩne'en hap wuat'i e'at piat ieĩne'en hap mesuwe i'ewyte atipy pe. Koitywy po'og waku aheĩne'en hap sa'a­wy­'iwuat kai.
COL 2:11 Pyno karãpe topy­hu'at aito Iesui mohey haria wato­py­hu'at wẽtup ywania ewy iwywo. Sa'a­wy'i aipiit miky­'esat sa'ag ewy yn watunug kuap ma'ato mesup Iesui titek ta'yn hawyi toipugha aimi­ky­'esat sa'ag ko'i aheko sa'ag ko'i aipotpap sa'ag hap ko'i. Toitek pun na'yn aiwa­nẽtup hawiat aikotã sa'a­wy'i Iuteu ywania tunug ta'a­tu­mẽpyt tuwe­mo­herep ihainia hawyi ta'a­tue­murui sokpe tek pun i'atueko ewy. Mi'i hap ewy Tupana titek aimi­ky­'esat sa'ag hawyi toipun na'yn pya aikai e. Mi'i hap ewy Iesui titek kuap aimi­ky­'esat sa'ag ko'i are.
COL 2:12 Iuteu ywania emurui ãpy tek — Uito Iuteu ywania e hamo ma'ato aito Iesui mohey haria ahet'ok y'y wuat hamo wati­mo­herep Iesui mohey hap. Minwa­to'e y'y pe turan Iesui syp hap wati­mo­herep ahet'ok hawe. Aiminug sa'ag ko'i kaipywiat aihep Tupana piat hap watu­wẽtem y'y pywiat hawyi. Wati­mo­herep Tupana tihep ta'yn Iesui gu'uro pyi hap tesaika hap no wati­mo­herep ahet'ok hawe. Aiminug sa'ag nug hap pywiat aihep Tupana piat hap wati­mo­herep ahet'ok hawe.
COL 2:13 Aikotã iku'uro rakat yt ikuap hin i ahehay. Yt toikuap i watoĩ­ne'en itotiat hap ewy wato­py­hu'at sa'a­wy'i Tupana kapiat iku'uro rakat ewy yt watikuap i ihay yt wata­'a­kasa kuap i howawi katu­pono aiminug sa'ag aipyhyp kahato howawi ikuap hamuat. I'ewyte aimi­ky­'esat sa'ag kape yn aiwa­nẽtup hap. Kat pote sa'a­wy'i yt kat i i Tupana ehay aikai ma'ato koran yt mi'i tã hin i katu­pono Tupana tomo­weityk yne yne ra'yn aiminug sa'ag ko'i. Aimoieĩ­ne'en i gu'uro pyi hap ewy tutum ahepe. Karãpe wato­mohey Iesui mekewat e'at pe watu­wẽtem gu'uro pyi hap ewy Iesui tuwẽtem hap ewy. Koitywy watoĩ­ne'en Tupana ewawi yt sa'ag ewawi i ra'yn. Yt iku'uro rakaria ewy i ra'yn mesup watoĩ­ne'en ma'ato Tupana ewawi aheha ahewaure mesup.
COL 2:14 Sa'a­wy'i wato­py­hu'at wete­weru wato kahato haria ewy. Aikotã aiwe­te­weru hap wato turan aimo­'arot kahato hap ewy. Miwan me iwato kahato topy­hu'at hap ewy aiwe­te­weru hap. Yt ikahu hin i ewy ai'akit hap topy­hu'at. Mi'i hap ewy aiwe­te­weru hap sa'a­wy'i aikotã yt karãpe i waha'up nug kuap hap ewy. Mi'i hawyi ma'ato — Atum yne miit'in wete­weru hap sa'up mo e Iesui Tupana pe. Mi'i hawyi ta'a­tu­moheg Iesui aria'yp posak ete. Toieĩne'en hap tutum aiwe­te­weru hap sa'up mo. Koitywy Tupana to'e ahepe — Yt kat i ira'yn ti mekewat miwan miat ewete­weru hap tuweityk ta'yn e. Uha'yru tum yne ra'yn eiwe­te­weru hap sa'up Uha'yru suu ta'at yne hawyi iku'uro aria'yp posak ete e Tupana ahepe mesup ta'yn.
COL 2:15 Sa'a­wy'i ra'yn Iesui iku'uro turan toi'akit yne ra'yn ahiag. Tesaika wo toi'a­tu­'a­peman kytyt mã'ãu sa'ag ko'i. Aipo­typot iku'uro aria'yp posak ete hawyi aihep ahiagnia po pyi kahato. Iesui ti'akit yne ra'yn ahiag. Koitywy wuat'i miky­ry'i wo ra'yn tukup­te'en ahiagnia — Yt ewesaika i ra'yn e Tupana wuat'i ehamo ahiag ko'i pe.
COL 2:16 Mi'i pote yt naku i watuwat wẽtup sehay upi katu­pono — Ewehenuk i urueko yt ewy i hawyi Tupana yt eheha­kye­ra'at hin i i'atu'e. Yt eiwe­'y'u hãpyk i uru'ewy pote yt naku i te eweikup­te'en Tupana wanẽtup hawe i'atu'e sa'ag. Yt eweimohey tei'o i'atuehay — Yt eweiwat i uruenuk wato hap Tupana mõtypot hap kape pote ho'o­wasat rakaria eweipy­hu'at i'atu'e. Tupana e'at mesup i'atu'e. Tupana ewaty mesup i'atu'e. Tupana e'anu mesup i'atu'e. Ma'ato yt eweimõ­typot i Tupana mesuwat e'at pe pote yt Tupana mieha­kye­ra'at ko'i i wo eweipy­hu'at i'atu'e. Ma'ato yt eweiwat rei'o mekewat wẽtup sehay upi katu­pono Iesui yn aheha­kye­ra'at kuap pãi are.
COL 2:17 Sa'a­wy­'i­wuaria Iuteu ywania inug kahato ta'a­tueko ko'i aheha­kye­ra'at hap Iesui ut hap moherep hamo Aipo­rekuat nuat ut hap moherep hamo. Karãpe wata­'a­kasa miit put'ok'e turan wata­'a­kasa ipã'ãu kape. Mi'i hap ewy i'atueko ko'i Iesui ut hap moherep hamuat. Iuteu eko timo­herep kahato Iesui ut sa'a­wy­'ipyi te aikotã aipã'ãu yi totiat timo­herep ahut hap ewy are.
COL 2:18 Yt eweiwat rei'o i'atuehay upi karãpeĩ te'e­ro'e ehepe — Yt eweikup­te'en i Tupana mieha­kye­ra'at ko'i katu­pono yt uru'ewy i ehewaku hap. Po'og uruto eikai katu­pono atipy piaria ihay uruwywo urumu­'etu i'atu'e. Uruta­'a­kasa Tupana urumu­'etu i'atu'e. Atipy piaria kuap haria uruto uruehay i'atu­wywo i'atu'e. Mi'i pote po'og uruto eikai i'atu'e. Tupana mieha­kye­ra'at ko'i sese uruto. Eipe yt hin i katu­pono uruto paa'e haria sese i'atu'e. Ma'ato yt pywo pe i mio tã i'atu'e. Te'e­ru­we­mõ­typot hap yn i'atu­wa­nẽtup hawe. I'atu­wa­nẽtup hap miit wanẽtup hap ewywuat yn. Ma'ato yt kat i Iesui mõtypot hap i'atu­py'a piat pytkai.
COL 2:19 Ma'ato aito yt i'atu­'ewy i. Iesui sat haria kahato aito. Mi'i Miit yn Ai'akag. Aipiit tuwehik kahato Ai'akag Iesui wanẽtup hap upi. Ahãtikag i'ewyte apy'yha aipu'i hawyi aipe hawyi ahaga ko'i to'osat kahato Ai'akag Iesui wywo hawyi aipu'i apy'yha wẽtup piit yn wato­py­hu'at. Mi'i hap ewy watoĩ­ne'en Iesui wywo wẽtup piit ewy. Iesui ti Ai'akag. Aito ipiit ewy. Ai'akag kaipyi aipiit ihãite tuwe­motag. Ma'ato mi'iria — Uruto po'og eikai e haria — Uruto ti ei'akag e haria mi'iria. Yt ta'a­tu­ky­'esat i Iesui ta'a­tu­'akag wo are. Ma'ato aito Iesui mohey haria watu­kup­te'en. Ta'i Iesui piit iaga ewywuaria aito. Mi'i pote aipiit tuwehik kahato Ai'akag Iesui ete. — Urutu­we­ha­kye­ra'at uruto waku nug haria pote i'atu'e sa'ag ma'ato — Aito Iesui mieha­kye­ra'at haria wato'e. Tupana esaika hamo yn aimo­hãpyk kuap wato'e.
COL 2:20 Kat pote pyno mesup te eweiwa­nẽtup te mi'iria ewywuaria are. Mesu­wa­ro­tiaria — Urutu­we­ha­kye­ra'at kuap rat aru e haria. Yt naku i mekewat mi'u watu'u e haria. Yt naku i watemig mekewat i'atu'e. Yt naku i watopag aiwẽ pe mekewat ipu'i e haria. Mi'i tã watunug mote yt wata'am i i'atu'e sa'ag ahiag ehay upi.
COL 2:21 Te'e­ru­we­ha­kye­ra'at teran mi'u kaipyi. — Ewetunug yne wãi'u­ru'e hap mi'i pote Tupana eheha­kye­ra'at i'atu'e. Ma'ato wãi'i­'a­tu'e hap yt Tupana wãi'e hap ewy hin i are katu­pono te'e­ru­we­kaipyi te'e­ru­we­ha­kye­ra'at teran haype. Yt naku i kahato are.
COL 2:22 Ma'ato wato­mohey ra'yn Aipo­typot Iesui yn Aheha­kye­ra'at kuap hat wato'e katu­pono iku'uro aika­wiano hawyi aihep mekewat ahiagnia ehay po pyi wato'e. Yt wato­mohey po'og i ra'yn watu­we­ha­kye­ra'at kuap hap wato'e. Koitywy watikuap ta'yn yt mi'u kaipyi i aheha­kye­ra'at hap wato'e. Watikuap ta'yn aheko mi'u yt aimo­hãpyk kuap i Tupana wanẽtup hawe wato'e.
COL 2:23 Mã'ãu sa'ag upiaria te'e­ru­we­piit­mo­sa­ty'i kahato hawyi — Uruimõ­typot Tupana po'og eikai i'atu'e sa'ag ahepe. Urutu­we­mohit kahato po'og eikai urutu­we­mo­sy'at at ka'ap pote po'og waku uruto eikai i'atu'e ahepe. Wate­ha'at mi'iria kape hawyi aikotã we'eg kahato haria ewy tukup­te'en ma'ato i'atu­wa­nẽtup hawe sa'ag yn i'atu­wa­nẽtup hap ta'a­tupiit miky­'esat sa'ag nakat ewy yn i'atu­wa­nẽtup hawe. Te'e­ru­we­piit­mo­sa­ty'i kahato te'e­ru­we­mõ­typot hamo. Ma'ato i'atu­wa­nẽtup hawe ta'a­tunug ta'a­tupiit miky­'esat sa'ag nakat yn. I'atu­pot­'ewãi hap ko'i yt i'atu­mõ­hapyk kuap i Tupana wanẽtup hawe. Te'e­ru­we­pit­mo­ha­ty'i te'e­ru­we­ha­kye­ra'at hamo wen ma'ato yt pytkai i katu­pono Iesui yn aheha­kye­ra'at kuap toku­'uro hamo pãi an wato'e.
COL 3:1 Aipo­typot Iesui toku­'uro hawyi tuwẽtem gu'uro pyi. Koitywy wato­mohey Iesui toĩne'en atipy pe To'ywot Tupana po sese kai hap wato­mohey. Mi'i pote wẽtup miit piit ewy yn wato­py­hu'at. Karãpe Iesui tuwẽtem gu'uro pyi hawyi aito imohey haria i'ewyte watu­wẽtem gu'uro pyi hap ewy. Karãpe ta'am atipy kape hawyi aito i'ewyte wata'am atipy kape hap ewy. Mi'i tote Aipo­typot Iesui ta'apyk Tupana po sese kai. To'ywot mõtypot hawe toĩne'en itote. Waku mi'i kape aiwa­nẽtup hap.
COL 3:2 Waku watu­wa­nẽtup atipy kape aikope Aipo­typot Iesui toĩne'en hap kape. Waku aiwa­nẽtup hap Aika­'iwat atipy piat wanẽtup hap ewy are. Yt naku i watu­wa­nẽtup mesu­wa­ro­tiaria yt imohey i haria ewy katu­pono mesu­wa­rotiat kape yn te'e­ru­wa­nẽtup.
COL 3:3 Wati­mohey Iesui hawyi wẽtup piit ewy watoĩ­ne'en. Iku'uro hawyi aikotã watoĩ­ne'en ipiit pe hap ewy iku'uro hawyi aiku­'uro hap topy­hu'at hap ewy. Tuwẽtem mi'i pote watu­wẽtem aito gu'uro pyi hap ewy. Koitywy Aika­'iwat Iesui toĩne'en atipy pe To'ywot wywo i ra'yn. Mi'i hawyi aito ipiit pe watoĩ­ne'en. Mi'i pote waku yt kat i mesu­wa­rotiat sa'ag ko'i kape watu­wa­nẽtup.
COL 3:4 Karãpe ta'aipok i ra'yn mesuwat yi kape hawyi aito wata­'aipok iwywo te ipiit piat ieĩne'en haria aito hap ewy. Wẽtup miit ewy yn na'yn watoĩ­ne'en mekewat e'at pe. Iwywuat iwemo­herep mesuwe pote watu­we­mo­herep e. Mekewat e'at pe Iesui mõtypot hap e'at kahato i'ewyte aimõ­typot hap e'at katu­pono imohey haria aito ipu'i kawiat ewywuat aito pote. Mi'i hap e'at pe — Pywo i'atu'e irania'in yt imohey i haria.
COL 3:5 Waku wati­'akit yne aiwa­nẽtup sa'ag hap aiwa­nẽtup hawiat. Waku wati­waure yne sa'a­wy­'iwuat aiwary wary hap ahe'aito aito hap. Mi'i hap waku watoiat yne e. Waku watipun yne yt ahegyi'at i hap katu­pono yt ahegyi'at i hap sa'ag kahato topy­hu'at Tupana wanẽtup hawe. Aikotã aria'yp nu kawiat Tupana iã'ãkap mõtypot hap yt naku i hap ewy te yt ahegyi'at i hap topy­hu'at yt naku i Tupana wanẽtup hawe. Waku watimak aipiit miky­'esat sa'ag ko'i aiwe­mõti hap ko'i. Waku wahasep wẽtup ok aheha­ry'i wuat ky'esat i hap wẽtup ok ahe'aito wuat ky'esat i hap. Waku wãiwa­to'e aiwa­nẽtup hawe aipot­mõti te mõti te hap ko'i are. Waku wati­'auka ai'e hap aiwa­nẽtup hawe — Uiwano yn atiky­'esat ekat ko'i e hap. Waku yt kat i ihainia wary wo hap aiwa­nẽtup hawe.
COL 3:6 Katu­pono mi'i hap ko'i watunug mote yt Tupana miky­'esat ewy hin i watunug. Mi'i tã yt imohey i haria ra'yn inug at ka'ap. Yt naku i watuwat mi'iria ehay upi. Mi'i upi watuwat pote Tupana mi'a­piheg ko'i wo wato­py­hu'at aru katu­pono Tupana ta'a­tunug ta'a­tue­wa­nĩkap wo mi'i tã nug haria.
COL 3:7 Mi'i minug sa'ag ko'i ete haiwot kahato Tupana toĩne'en mi'i tã watunug pote. Sa'a­wy'i yt imohey i te turan mi'i tã yn aheko sa'ag yn watunug kuap. Pyno yt atunug i uiminug sa'ag ko'i wato'e sa'a­wy'i ma'ato yt watoiat kuap i katu­pono sa'ag nug hap eropat haria wo watu­kup­te'en sa'a­wy'i.
COL 3:8 Ma'ato koran waku wati­'apun pya aikai yt aiwese i hap. Waku wati­mo­pe­rup'i ahaiwot ne'i hap. Waku wati­waure aipy­'ahak pot'i miit'in etiat hap. Waku yt uwe i wati­mohit ahehay wo. Yt naku i wati­poepyk poepyk ne'i irania'in e. Yt naku i wahu'at aiwo­'o­mõti te hap sehay sa'ag nug hap etiat. Waku wati­waure yne yt naku i nug hap ko'i.
COL 3:9 Waku wati­waure aheso miit'in kapiat hap. Yt naku i ahehay aheso heso hamo katu­pono watunug sa'a­wy'i yt watikuap i te Iesui turan aheko sa'ag upi yn watunug neran. Aikotã watihep ahesokpe pot'i ko'i hawyi watopag ahesokpe ipakup i ko'i ra'yn hap ewy waku wati­pugha sa'a­wy­'iwuat aheso hap. Mi'i hawyi waku watopag aiwa­nẽtup hap pywuat hap ewy. Waku watu­we­painug ahesokpe pakup hap ewy ahehay pywuat ai'e hap ewy.
COL 3:10 Wati­mohey hawyi Tupana aimo­pakup i miit pakup mo wato­py­hu'at toiã'ãkap sese ewy ainug. Mi'i pote waku mekewat yt naku i nug hap aipiit piat aiwa­nẽtup hawiat iku'uro rakat ewy topy­hu'at. Yne e'at pe Tupana ainug kahu aiwa­nẽtup hawe po'og po'og sa'a­wy­'iwuat kai. Yne e'at pe Tupana kuap haria wo wato­py­hu'at po'og po'og. Koitywy Tupana tiky­'esat tokuap hap kaipyi towy ok sese wo aito hap. Mi'i hawyi toiky­'esat aiwa­nẽtup hap towa­nẽtup hap ewy.
COL 3:11 Karãpe wato­py­hu'at Iesui mohey haria Tupana ainug wẽtup ywania pakup wo ewywuat. Iuteu ywania aito pote sio yt Iuteu ywania i aito pote sio ahemurui sokpe yt kat i sio toĩne'en Tupana wanẽtup hawe wẽtup ywania pakup yn ewy wato­py­hu'at. Sio aito tapy­'yiaria sio yt sio ga'apy piaria sio yt miit akag sio miit emiit wẽtup ywania yn Tupana wanẽtup hawe aito. — Eipe Uimi­po­'oro Eipo­rekuat nuat mohey haria eipe e ahepe mi'i pote wẽtup tapy'yia yn uiwa­nẽtup hawe eweikup­te'en e Tupana ahepe. Eipe Uimi­po­'oro eiam eipe e. Uimi­po­'oro Eipo­rekuat nuat ky'e haria eipe e Tupana. Sio Tapaiũ'a sio yt sio ipe kytsig sio yt wẽtup ywania yn eipe uiwa­nẽtup hawe Uha'yru emiit'in eipe pote e Tupana ahepe.
COL 3:12 Waku watu­we­painug hap ewy waku ahesokpe pakup watopag ma'ato wẽtup ahesokpe pakup wo'o­ky'e hap kawiat. Wẽtup aipainug hap wo'o­wese hap. Wẽtup aipainug hap — En po'og waku uikai e hap aiwa­nẽtup hawe. Wẽtup aipainug hap paa'e hap. Wẽtup hap aipainug hap aipe­rup'i hap. Wẽtup Iesui mohey mot'i hap. Mi'i ko'i wo waku watu­we­painug are.
COL 3:13 I'atu kahato Tupana wanuat aimo­kahu hap. Wẽtup wo'o­po­wyro hap. Wẽtup yt aipot­mõ­py­'ahak i hap. Wẽtup aiwo­'oe­waure aiwo­'o­minug sa'ag etiat hap. Wẽtup aipainug hap aiwu­'uka hap monik hap. Wẽtup aiwo­'oehay aiwo­'opiat hap — Waure wo areĩne'en uhyt mimi mana emi'a­parap uhepiat hap kai ai'e hap. Mi'i ko'i yne waku ahesokpe pakup ewywuat aiwe­painug hap ikahu rakat ewywuat. Mi'i wo waku watu­we­painug aikotã Iesui tiwaure ahepiat i'aparap tetiat hap ewy te waku wati­waure irania'in piat hap ai'a­parap hap.
COL 3:14 Wẽtup aipainug hap toĩne'en ikahu po'og torania kai mi'i ti aiwo­'o­ky'e hap kawiat. Yt naku i wati­waure aiwo­'o­ky'e hap katu­pono karãpe aiwo­'o­ky'e hap toĩne'en hawyi aiwo­'o­wese hap topy­hu'at wẽtup miit ewywuat yn wato­py­hu'at.
COL 3:15 Aika­'iwat Iesui ainug kahato aipy'a piat aiwo­'o­wese haria wo. Mi'i hawyi karãpe yt aiwo­'o­wese i hap put'ok'e ahete mi'i hawyi haty kahato aipy'a pe. Mi'i hawyi meremo watikat aiwo­'o­wese hap i ra'yn katu­pono Tupana tiky­'esat kahato aiwo­'o­ky'e hap. Toiky­'esat kahato watoĩ­ne'en wẽtup wo'o­ky'e haria sok ewy yn mesuwiat aheĩne'en turan. Mi'i hap kape ti aikaykay mesup. Toiky­'esat kahato wato'e aiwo­'ope — Arehum ewowi uhyt mehĩ mana mimi e hap ewy toiky­'esat. Uimo­wepit en waku wato'e. Toiky­'esat — Arehum emiium ete mehĩ mana pĩ'ã kurum e hap ewy toiky­'esat aiwo­'ope.
COL 3:16 Sehay wakuat Aipo­typot etiat Iesui etiat Tupana tiky­'esat kahato aiwa­nẽtup hawe aipy'a pe. Toiky­'esat yne Iesui mienoi aikai howapy sakpo hap ti ra'yn toiky­'esat. Toiky­'esat yne Tosa­'yru ehay aipy'a pyi tuwẽtem nakat aikotã hekat rakat hegyi'at rakat tum hap ewy. Toiky­'esat ahegyi'at kahato hap tehay wywuat torania pe. Toiky­'esat wati­'a­tu­mu'e kahato irania'in tehay wepy puat hap. Toiky­'esat wati­'a­tu­mu'e kahato tehay wo irania'in hap yne aiwe'eg hap wywo waku aiwo­'o­mu'e hamo. Toiky­'esat morekuat Tawi wepy hawuo watu­wepy hap. Toiky­'esat tehay kaipywiat hap watu­wehum kahato tewawiat wepy hamuat wuat'i ehamo hap. Toiky­'esat watu­wepy mekewat sehay ikahu rakano tuetiat hamo. Toiky­'esat watu­wepy mekewat sa'a­wy­'iwuat wepy hap pyi. Toiky­'esat towawiat wepy hap aipy'a pywiat hap Topã'ãu wywo. Toiky­'esat watu­wehum tewawiat wepy hap mywo — Waku kahato En ai'e hap toiky­'esat. — Emiium waku kahato Tupana ai'e hap toiky­'esat.
COL 3:17 Toiky­'esat yne aiminug ko'i Tosa­'yru Aipo­typot Iesui mõtypot hap. Toiky­'esat yne ahehay Tosa­'yru Iesui set mõtypot hap. Toiky­'esat kahato ahehay towawiat hap aiwepit hap wywo. Toiky­'esat ahehay towawi Tosa­'yru set upi hap. Toiky­'esat wato'e — Urupo­rekuat nuat urumo­wepit kahato. En waku kahato Esa'yru waku kahato emiium e hap ewywuat ai'e hap Tupana tiky­'esat.
COL 3:18 Mana'in erepy­hu'at ro e'aito ehay upi Iesui mohey hat en mote. Etunug no e'aito miky­'esat ewy Tupana miky­'esat ewy are.
COL 3:19 Mehĩ'in waku wati­ky'e kahato aheha­ry'i aipy'a pyi. Yt naku i wati­mohit mi'iria ahehay wo. Yt naku i watoĩ­ne'en marak'a wo aheha­ry'i ete.
COL 3:20 Hira­karia kurum'in pĩ'ã'in eweimohey Iesui pote erepy­hu'at ro e'ywot ety ehay upi. E'ywot ety mõtypot hano ereĩne'en mote Tupana mowepit hano ereĩne'en are.
COL 3:21 Papai'in waku eweinãpin eha'y­ru'in ehaki­'yt'in i'atu­ky'e hawuo wen ma'ato yt etimo­py­'ahak tei'o ehehay sa'ag wo. Eti'a­piheg apiheg yn mote yi kape yn teha'at aru hawyi i'arot rakaria wo tukup­te'en at ka'ap.
COL 3:22 Miit'in eropat haria mesuwe woro­ho­'o­nãpin neran ewetunug no mesu­wa­ro­tiaria eika­'i­waria piat miky­'esat ewy waku ewetunug. ehetu­'i­saria eipo­'oro hap ewy ewetunug no e. Yt eimi­ky­'esat ewy pytkai i ma'ato ei'akag miky­'esat ewy ewetunug are. Eika­'iwat okpe wuat ne'i pytkai o eweiwe­potpap ihamo hap ewy e. Yt naku i aheha mesu­wa­rotiat aika­'iwat kape sio teha'at sio yt aipotpap nug hap kape ai'e hawe. Po'og waku watu­we­potpap haty wo aipy'a pyi Tupana eropat haria aito pote.
COL 3:23 Waku watu­we­potpap kahato aika­'iwat mesu­wa­rotiat miky­'esat nug hap ete ma'ato aiwa­nẽtup hap Aika­'iwat atipy piat potpap nug hap watunug mesuwat motpap nug hap kaipyi.
COL 3:24 Waku wato'e aipy'a pe — Aipotpap sa'up sese topy­hu'at atipy pe waku nug haria aito mesuwe pote waku wato'e. Itote atipy pe tutum aru aha'up watu­we­potpap mesu­wa­rotiat pytkai katu­pono Aika­'iwat Iesui eropat haria sese aito waku wato'e.
COL 3:25 Aiminug waku pote ha'up toĩne'en Tupana miium muat. Ma'ato waku aiwe'eg wo katu­pono aiminug sa'ag sa'up i'ewyte Tupana tum. Waku aiwe'eg wo katu­pono Tupana tiky'e kahato torania aitoria to'oe­wy­'ewy. Yt naku i watunug mote ai'a­piheg sio aito miit'in akag sio aito miit'in mimõ­typot sio aito yt uwe mikuap i e. Mi'i pote to'oe­wy­'ewy toi'a­tu­'a­piheg yt naku i nug tipyt. Wẽtup e'at pe ti aru toimo­herep wuat'i pe aiminug sa'ag ko'i yt heremo i rakat ko'i — Waku kahato eipe torania irania'in to'e ahepiat pytkai toi'a­tu­'a­piheg yt naku i nug haria.
COL 4:1 Ga'i­waria Iesui mohey haria waku watum aipotpap nug haria pe sa'up waku hap ewy i'atu­potpap hap ok tã. Waku watum sa'up aikotã miit hãpyk takat tum hap ewy aikotã miit hegyi'at rakat ewy. Mi'i pote waku wati­mõ'ẽ hãpyk ahemiit'in me ahekat katu­pono atipy pe toĩne'en Aika­'iwat koro ga'i­waria aito mesuwe pytkai.
COL 4:2 Karãpeĩ wahẽtup Tupana kape aimi­ky­'esat waku wahẽtup — Tut wyti aru ai'e hap wywo. Yt tutum i te hawyi waku wahẽtup i. Mi'i hawyi aiwesat sio waku e wahẽtup hap kape sio yt e waku — Arehum ewawi Tupana waku wato'e.
COL 4:3 Karãpe ewehẽtup eimi­ky­'esat ko'i urupo­wyro hamuat waku ewehẽtup to — Tupana etum Pauru'in moesaika hamuat ehay etiat henoi hamo ewei'e. Eti'a­tu­po­wyro o mi'iria irania'in yt ekuap i te haria atumu'e hamo katu­pono typy'i kahato te Emipo­'oro Esa'yru Urupo­rekuat nuat yt kuap i te haria tukup­te'en ehay ti mig'i wo te topy­hu'at i'atuepe waku ewei'e Tupana pe — Uruiky­'esat kahato Pauru'in powyro hap katu­pono more­kuaria tipyhyp teran ehay Urupo­rekuat koro etiat waku ewei'e Tupana pe are. Iesui ehay pyhyp hamo more­kuaria uipyhyp mesuwe wo'o­pyhik hawe are.
COL 4:4 Pyno ewehẽtup — Tupana etipo­wyro kahato o Pauru ehay enoi miit'in miat kuap hamo waku ewei'e o katu­pono yt naku i ihik wo ne'i ehay moherep hap waku ewei'e Tupana pe at ka'ap uipo­wyro hamuat.
COL 4:5 Waku we'eg kahato haria wo wato­py­hu'at karãpe yt Iesui mohey i ra'yn haria py'a­setpiat ahehay turan. Waku wahenoi i'atuepe Aipo­typot Iesui etiat. Waku watikat miit'in i'atu­mu'e hamuat ihay se rakat yne e'at turan.
COL 4:6 Waku watikat kahato aiwa­nẽtup hawe i'atu­wesat hamuat yne apo apo'i­'a­tu'e hap ete. Waku wati­'a­tu­wesat Tupana we'eg hap ewy pywuat wo'o­wesat hap ewy ihay se rakat ewy waku watekyi Iesui kape yt imohey i te haria are.
COL 4:7 Mesup atipo­'oro ehowawi aikywyt aheywyt Tikiku. Waku kahato Tikiku uimi­ky'e kahato. Yt iperup hin i Tupana potpap nug hamo. Tikiku yt toiwaure hin i Tupana eropat hap. Ai'ewy kahato ipotpap takat Tikiku Aika­'iwat potpap ete.
COL 4:8 Pyno atipo­'oro Tikiku ehowawi tohenoi yne aru put'ok­to'e hawyi uhetiat aikotã areĩne'en mesuwe hap etiat. I'ewyte aru tohenoi yne ehetiat aikotã eweikup­te'en Korosi pe hap tohenoi aru put'ok­to'e mesuwe i hawyi. Woro­ho­'o­mo­wepit teran haype atipo­'oro Tikiku ehowawi. Tohenoi yne mesuwiat uheĩne'en hap hawyi eiwepit kahato rakaria wo eweikup­te'en aru are.
COL 4:9 Ehetawa piat Unesimu aru atipo­'oro wy ehowawi. Aikywyt aheywyt kahato Unesimu. Iesui mohey kahato hat Unesimu. Put'ok­'i­'a­tu'e Unesimu Tikiku wywo hawyi ta'a­tu­henoi kahato ehowawi kat som urutunug mesuwe hap ko'i.
COL 4:10 Aiwy Aritaku toĩne'en mesuwe wo'o­pyhyp hawe uiwywo toĩne'en. Kuekatu toipo­'oro ehowawi. I'ewyte Panãpe enyt mẽpyt Maku ipo'oro tehay wy tuwehum hap ehowawi. Pyno meiũran Maku put'ok'e itote pote waku — Ereke ro uruwy ewei'e o Maku pe eiwepit hap wywo iky'e hap wywo aikotã are'e sa'a­wy'i hap ewy ewetunug Maku pe are.
COL 4:11 Mehĩ Iusue i'ewyte ipo'oro kuekatu ehowawi mekewat wẽtup het Iutu e hap. Pywo ti rat uipo­wyro kahato mesuwe mi'iria kuekatu e haria are. Ta'a­tu­ky­'esat kahato Tupana topy­hu'at Morekuat no mesuwat yi tote hap mi'i pote i'atu­potpap kahato inug hamo. Mi'iria yne ui'ewy Iuteu ywania kawiat Iesui mohey haria. Uimo­wepit haria kahato mi'iria are.
COL 4:12 Aiwy Epawai toĩne'en mesuwe. Mi'i i'ewyte waku e hap toipo­'oro ehowawi. Aipo­typot Iesui eropat kahato hat Epawai eipy­'a­set­pywiat mi'i. Mi'i pote tohẽtup at ka'ap topy'a pyi Tupana kape yne hesaika hap wywo — Etipo­wyro aiwy­ria'in tawa Korosi piaria emiky­'esat ok tã nug hanuaria te'e­ro­py­hu'at. Eti'a­tu­motag mi'iria Esa'yru ok tã e. Eti'a­tu­moe­saika yt karãpe i e'atoiat hamuat e. Atiky­'esat itotiaria pywo i'atu'e yne hap ehay etiat hap e Epawai at ka'ap meiũpepyi Tupana kape epowyro hamuat.
COL 4:13 Aiwy Epawai tiky­'esat kahato yne eipe yne tawa Korosi piaria Iesui mohey haria wo hap toi'a­tu­ky­'esat i'ewyte tawa Irautiseia piaria i'ewyte tawa Iero­puri piaria yt uheso hin i toi'a­tu­ky­'esat yne eipe imohey haria wo hap are.
COL 4:14 I'ewyte aimi­ky'e aipohag nug hat Iruka i'ewyte aiwy Tema ti'a­tu­po­'oro eiky'e hap — Uruipo­'oro urui'a­tu­ky'e eiperia e hap.
COL 4:15 Yne Iesui mohey haria piat waku e hap uruipo­'oro. Kuekatu uruipo­'oro tawa Irautiseia piaria kape. Uruiky­'esat kahato ehehãite hap ewei'e mehĩ Niwa pe i'ewyte yne Iesui mohey haria to'yat puat wa'a­tunug haria pe are. Mi'iria kape kuekatu uruipo­'oro.
COL 4:16 Meikowat uimiwan o eweimo­wẽpap aiũpe eiwa­'a­tung hap tote are. Mi'i hawyi eweikuap yne ra'yn hawyi waku eweipo­'oro tawa Irautiseia kape mi'iria piat ikuap hamo te'e­ru­wa­'a­tunug hawyi. I'ewyte eiperia eweimo­wẽpap o uimiwan sa'a­wy­'iwuat uimi­po­'oro tawa Irautiseia piaria pe.
COL 4:17 Mi'i hawyi atipo­'oro i sehay uhyt Akipu kape. Pyno koitywy atoiat eipo pe ra'yn Aika­'iwat potpap ko'i. Mi'i hap ti koitywy tutum eipo pe ra'yn. Pyno koitywy ewe'eg wo o. Eweimoma o ipotpap hap imiky­'esat ok tã are.
COL 4:18 Pyno ti uipo wo ti yne mesuwat atunug uimiwan are. Pyno atunug mesuwe miwan me uhet sese uipo minug uikuap hamuat sio uito sio yt kuap hamo. Uhet ti Pauru. Pyno yt eweiwaure tei'o uipyhik hap mesuwe morekuat wo'o­pyhyp hawe. Saity iheg nakat uipo ete areĩne'en Tupana miky­'esat ewywuat hap. Yt uiwaure tei'o. — Pyno Tupana eti'a­tu­ky'e kahato Esa'yru mohey haria tawa Korosi piaria. Eti'a­tu­poi­tyro egyi'at kahato hap upi ahẽtup mesuwe uipyhyp wyi are. Toran na'yn uhehay are. Waku Tupana pe.
1TH 1:1 Uito ti Pauru kuekatu sese atipo­'oro ehowawi Iesui mohey haria kape tawa Tesa­ro­nika piaria kape are. Uiwy­ria'in Iesui mohey haria mesuwat uimiwan atipo­'oro ehowawi katu­pono atiky­'esat kahato ti Tupana hegyi'at kahato ehepiat hap. I'ewyte atiky­'esat kahato Tupana kaipywiat eiwo­'o­wese hap. Pyno uito hawyi mehĩ Sira hawyi Timoteu wywo kuekatu uruto'e ehowawi uruwy­ria'in tawa Tesa­ro­nika piaria kape. Mesuwat uruipo­'oro ehowawi urumiwan Ai'ywot Tupana Aika­'iwat Iesui hũria kape tomohey haria wa'a­tunug haria kape.
1TH 1:2 Yne e'at pe — Waku kahato tawa Tesa­ro­nika piaria uruto'e Tupana pe. Urutu­wehum kahato ewawi Tupana katu­pono torania Tesa­ro­nika piaria emohey haria kahato tukup­te'en uruto'e Tupana pe.
1TH 1:3 Yt ehẽku kaipyi yn i ti tuwẽtem ehepiat Iesui mohey hap ma'ato yne kaipyi tuwe­mo­herep. Mi'i tupono urutu­wehum kahato Ai'ywot atipy piat kape. Yt waure­'u­ru­to'e hin i ti uruky'e ehepiat hap i'ewyte miit'in ky'e ehepiat hap ete Aipo­typot Iesui mohey hap kaipyi. I'ewyte eipotpap hap ko'i yt uruiwaure hin i.
1TH 1:4 Ta'i uheywyt'in uheinyt'in uruikuap kahato ti aikotã Tupana eiky'e kahato pote ei'airo kahato ti towano.
1TH 1:5 Sa'a­wy'i ti uruhenoi kahato ehepe sehay wakuat Iesui etiat ma'ato yt uruwat uruẽku kaipyi yn i ma'ato Tupana esaika hap kaipyi i'ewyte Tupana Pã'ãu kaipyi urui'a­tu­mu'e eipe. Ta'i pywuat sese uruto'e. Urumi­mohey mesuwat sehay uruto'e uruhenoi ehepe turan. Eweikuap ta'yn aikotã sa'a­wy'i urutu­kup­te'en eipy­'a­setpiat hap. Ta'i eiky'e uruepiat hap yn ni toĩne'en urukai.
1TH 1:6 Sa'a­wy'i uruminug wakuap kape ti ewehe­ha'at kahato hawyi — Ta'i uruto ti i'ewyte urutu­kup­te'en teran Pauru'in ewy ewei'e. Ta'i I'atu­ka­'iwat Iesui mohey haria wo urutu­kup­te'en teran ewei'e. I'atu­mienoi ahepiat wyti pywuat kahato rakat ewei'e. Mio tã ewei'e hawyi ti Tupana Pã'ãu put'ok'e ra'yn ehetiat hawyi eiwepit kahato hap ta'yn topy­hu'at ehete. Mi'i hawyi ti ma'ato mekewat ho'opot hap e'at put'ok'e ra'yn ehete turan yt hep e kuap i ra'yn ehepiat imohey hap i'ewyte eiwepit hap.
1TH 1:7 Mi'i pote ti yi Masẽ­tunia yi Akaia piaria te'e­ra­ha'at kahato ehepiat mohey hap kape. — Pyno waku aito tawa Tesa­ro­nika piaria ewy waku wato­mohey Iesui i'atu'e te'e­ra­ha'at ehowawi hawyi.
1TH 1:8 Mi'i hap kaipyi ti Aika­'iwat mohey hap tuwẽtem na'yn eiwẽ pyi. Mi'i hawyi ti ihay eweihytpok kahato ra'yn yne tawa Masẽ­tunia puo yne yi Akaia puo ra'yn. Mi'i hawyi ti yne tawa ko'i puo ra'yn imohey hap tuwe­sytpok.
1TH 1:9 Mi'i hawyi ti karãpe uruhenoi teran na'yn irania'in me Iesui eimohey hap etiat hap mi'i pote ti — Ta'i uruikuap ta'yn i'atu'e. Mi'i hawyi ti karãpe uruewyry turan uruewyry hap upi te'e­ro'e uruepe irania'in — Eweikuap apo Tesa­ro­nika piaria Iesui mohey hap i'atu'e uruepe. Koitywy ti i'atu­wese kahato eimi­mohey ete. Mo wuat minug tupa­naria atoiat haria ra'yn mi'iria i'atu'e uruepe miit'in. Mi'i hawyi ti Wuat'i E'at Piat Ieĩne'en hat Tupana sese eropat haria ra'yn mi'iria i'atu'e ra'yn uruepe uruewyry tipytpe.
1TH 1:10 Koitywy ta'a­tu­he­katup ta'yn Aika­'iwat Iesui Tupana Sa'yru i'ewyte Tupana mihep gu'uro pywiat mohey haria wo ra'yn tukup­te'en i'atu'e ahepe. Ta'i sa'a­wy'i wyti ipy'ahak kahato Tupana aiminug sa'ag ete. Sa'a­wy'i wyti ai'a­piheg hap yn topy­hu'at ahepe yt kat i Tupana wywo aiwo­'o­wese nug hanuat pote sa'a­wy'i. Ma'ato Aheha­kye­ra'at hat put'ok'e ai'a­piheg hap u hamuat hawyi Tupana aihep ta'yn ai'a­piheg hap kaipyi. Mi'i hawyi irania'in yt kat i'atu'e kuap i ra'yn ahete katu­pono — Waku eipe e yn na'yn ahepe. Mi'i hap are'e ehepe Iesui mohey haria tawa Tesa­ro­nika piaria. Ma'ato yt uito yn i katu­pono torania mesuwat yi tote waku i'atu'e ehepe. Yt kat are'e kuap i ra'yn miit'in me eimohey kahato hap etiat uruewyry tipytpe katu­pono ta'a­tukuap yne ra'yn ehepiat imohey waku kahato hap. Mi'i tupono urutu­wehum kahato ehepiat imohey hap ete uruto Pauru'in.
1TH 2:1 Uiwy­ria'in eweikuap ta'yn aikotã uhepiat eimu'e hap tuwenug kahato itotiat hap. Eweikuap ta'yn aikotã miit'in i'atupap kahato uimienoi upi.
1TH 2:2 Eweikuap ta'yn uiwy­ria'in karãpe urutuwat ehetawa Tesa­ro­nika kape tawa Wiripu piaria mu'e hamo urutuwat ma'ato itotiaria yt uru'ok­sat'i hin i. I'atu­mi­ky­ry'i kahato uruete urupiit ete haty. Mi'i totepyi urutuwat ehowawi uruepiat ho'opot rokirẽ. Mi'i hawyi put'ok­'u­ru­to'e ehetawa pe hawyi yt paa'u­ru­to'e hin i Tupana ehay moherep hap ete uruho­'opot kahato itotiat pytkai. Mi'i pytkai yt uruwẽ­pohep hin i eimu'e hap ete. Sehay pywuat sese yn uruwẽ pyi tuwẽtem. Po'og ne'i urumoe­saika Tupana. Mi'i hawyi urutu­'uka hap pupi yt uruto­ken'ẽ hin i tawa Wiripu piaria uru'ahyk ahyk pytkai.
1TH 2:3 Yt kat i eima'at uruepiat hap uruwa­nẽtup hawe. Yt kat i eipiit ky'esat hap wywo i woro­ho­'o­mu'e.
1TH 2:4 Ta'i Tupana eropat haria wo yn urutu­kup­te'en mi'i pote Tupana wẽ wo urutu­kup­te'en. Sa'a­wy'i Tupana to'e uruepe — Woro­ho­'o­mohey kahato eipe uhehay enoi hamo e. Uimi­'ai­roria sese eipe uhehay wakuat sytpok hanuaria e uruepe. Mi'i hawyi hãpyk kahato urui'a­tu­mu'e eipe. Yt eimi­ky­'esat ewy i wen ma'ato Tupana miky­'esat ewy yn. Ma'ato itote uruiã'ãg kahato Tupana. Toikuap teran pywuat toky'e hap kaipywiat urupotpap hap haype sio miit'in miat urumõ­typot hap kaipyi ne'i urupotpap mi'i hap toikuap teran.
1TH 2:5 Yt karãpe i eima­'at'i ma'at'i wo urui'a­tu­mo­pe­rup'i eipe. Ma'ato ti yt eimi­ky­'esat ewy i urui'a­tu­nãpin. Ta'i Tupana miky­'esat ewy yn urui'a­tu­nãpin. Yt kat i urute­ha'at ehekat ky'ewi hap kape. Mi'i pote pywo e Tupana ei'a­tu­mu'e uruepiat hap ete.
1TH 2:6 I'ewyte yt kat i urumõ­typot hap uruiky­'esat eimu'e turan. Yt uwe kaipyi hin i uruiky­'esat urumõ­typot hap. Yt eikaipyi i wyti ma'ato urupo­'oro hat mowepit hap yn uruwa­nẽtup hawe eimu'e turan.
1TH 2:7 Uruto ti Iesui potpo­'o­roria sese ma'ato mi'i pytkai urumõ­typot ro urupoi ro yt uruto'e i ehepe. Perup'i popuo urutu­kup­te'en eipy­'a­setpe aikotã aity aimo­pe­rup'i mope­rup'i temi ete hap ewy.
1TH 2:8 Ta'i eipy­'a­setpe urutu­kup­te'en eiky'e kahato haria wo. Urutu­wehum kahato ehete. Mi'i pote eheropat haria wo uruto­py­hu'at katu­pono urui'a­tu­ky'e kahato eipe.
1TH 2:9 Yt sẽtup i sẽtup i haria wo hin i urutu­kup­te'en eipy­'a­setpiat turan. Yt kat i hin i uruhẽtup ehepe. Yt eimi'u ky'ewi i ti urui'a­tu­mu'e Tupana ehay wo eipe. Ma'ato urupotpap urupo wuat kaipyi yn ni urutenuk. Yt ei'okpe tote hin i urutu­kup­te'en yt ehekat ky'ewi hin i ti urutu­kup­te'en. Yt waure­'e­wei'e tei'o mi'i hap kai uruwy­ria'in.
1TH 2:10 Mi'i hap ete pywo ewei'e i'ewyte Tupana pywo e urutu­kup­te'en eipy­'a­setpiat turan katu­pono wakuap mywo hãpyk puo yt kat i eima'at hap mywo urutu­kup­te'en ehehamo i'ewyte Tupana ehamo.
1TH 2:11 Eweikuap ta'yn eipy­'a­setpe urutu­kup­te'en turan ei'ywot sese ewy urutu­kup­te'en einãpin haype aikotã ai'ywot tuwe­ha­ponik kahato hap ewy eipy­'a­setpe urutu­kup­te'en einãpin hanuaria.
1TH 2:12 Urui'a­tu­ma­ha­ra'i maha­ra'i kahato eipe urumẽ­pyt'in mote. Ehewyry hãpyk kahato o Tupana miky­'esat ewy uruto'e. Eikaykay ra'yn temiit'in no tetawa kape aikope toĩne'en Morekuat no hap kape aikope tewaku hap moherep hap kape eikaykay. Mi'i tote yt tuwe­mõti hin i Tupana eiminug ko'i pupi. Mi'i hap uruiky­'esat kahato. Yt kat i hin i Tupana wemõti eiminug ko'i pupiat hap uruiky­'esat.
1TH 2:13 Waku kahato eipe uiwa­nẽtup hawe katu­pono sa'a­wy'i Iesui kapiat uruehay hap kape ehewaure ka'a kahato. — Yt miit'in ehay wo hin i urunãpin ewei'e eipy'a pe tawa Tesa­ro­nika piaria. Waku kahato eiperia. — Tupana ehay sese wo urumu'e katu­pono Iesui Aimoieĩ­ne'en hat ete urumu'e ewei'e uruepiat. Mi'i hawyi Iesui mohey haria wo ra'yn eweipy­hu'at kahato itote waku hap ewy are. Mi'i hap upi urutu­wehum kahato Tupana kape at ka'ap ehupi are. Yt karãmuat i ikahuro rakat uruwehum hap katu­pono Tupana ehay mio tuwenug kahato ra'yn eheĩne'en hawuo Iesui mohey hawyi.
1TH 2:14 Mi'i hawyi ehetawa Tesa­ro­nika piaria i'atu­hoiro haria kahato ehete ei'a­tu­mo­so­'opot kahato itote aikotã sa'a­wy'i Iesui mohey haria Iuteuria ho'opot i'atue­tawa piaria hap ewy topy­hu'at ehete eiwo­'o­'e­wy­'ewy.
1TH 2:15 Nimo Iuteuria tu'uka Tupana potpo­'o­roria tehay moherep haria. Mi'i hawyi Aika­'iwat Iesui ta'a­tu­'auka ra'yn wy. Mi'i pote koitywy ai'auka teran mi'iria. Yt Tupana mowepit hap hin i te ta'a­tunug ahete. I'ewyte yne ahewa­nĩ­kaptia wo tukup­te'en mi'iria Iuteuria.
1TH 2:16 Yt ewehenoi tei'o irania'in wẽtup ywania pe i'atu'e uruepe. Katu­pono mi'iria yt tiky­'esat hin i irania'in ehakye­ra'at hap katu­pono — Howapy yne ra'yn i'atupiit i'atu­minug sa'ag ko'i wo. Yt kat i ra'yn heiam howapy poity'i pote e Tupana. Toran na'yn put'ok'e ra'yn koitywy i'atu­'a­piheg hap e Tupana Iuteuria pe topy­'ahak popuo.
1TH 2:17 Uiwy­ria'in ehepiat ho'opot turan yt uwe hin i uruto eiwywo eipo­wyro hamo. Urupiit yt uwe i ma'ato uruwa­nẽtup hap toĩne'en ehowawi yn are. Ta'i uruehat'at kahato eiky­'ewi kat pote sa'a­wy'i uru'aipok wo urutuwat ehowawi. Mi'i hawyi po'og urupap ehowawi — To'iro wata­'aipok i ro aheka­tu­wyria Tesa­ro­nika piaria ewawi uruto'e urupap haype.
1TH 2:18 I'ewyte uito Pauru mi'i hap yn uiwẽ pyi tuwẽtem — To'iro wata­'aipok i ui'e hap ewy. Mi'i hawyi urutuwat ma'ato yt put'ok­'u­ru­to'e i. Ta'i karania wo ne'i urupyhyp ahiag ehowawiat urutuwat turan. Urutuwat wen ma'ato yt put'ok­'u­ru­to'e hin i. Urupyhyp yn tuereto ahiag ehowawiat uruwat turan.
1TH 2:19 Katu­pono karãpeĩ put'ok'e Aika­'iwat Iesui Wuat'i Miit'in Porekuat nuat turan eipe yn eweipy­hu'at uimo­wepit kahato hanuaria wo aikotã more­kuaria te'e­ru­wehum kahato hamuat ta'a­tu­'akag painug hap ete. Mi'i hap ewy hamuat uruto urutu­wehum kahato hamuat ehete. Mi'i hap yn uiwa­nẽtup hawe.
1TH 2:20 Katu­pono eipe yn eweipy­hu'at uimo­'ok­pi­pok'i haria wo uruto'e Pauru'in.
1TH 3:1 Karãpe yt urutuwat kuap i ehowawiat pote pyno uruipo­'oro Timoteu iha'at ehowawiat hamo are aikotã eweikup­te'en hap kuap hamo uruehat'at kahato hawyi. Uruipo­'oro mi'i pytkai uruto urutu­kup­te'en tawa Atena pe.
1TH 3:2 Mi'i hawyi urueka­tuwy Timoteu uruipo­'oro ehowawi Iesui ehay etiat urupotpap hap moherep ehepiat hamo katu­pono Tupana eropat hat kahato Timoteu ai'e­wywuat sese. Mi'i uruipo­'oro pote eimoe­hãite kahato ehepiat imohey hap upi. Yt uruiky­'esat i eihep imohey hap kaipyi ho'opot hap.
1TH 3:3 Katu­pono Iesui mohey ra'yn ahepiat pote i'atu­mi­ky­ry'i kahato miit'in ahete mi'i pytkai Tupana yt tipyhyp hin i katu­pono mi'i hap kaipyi aikuap pywuat tomohey hap sese i'ewyte yt toky'e i haria kuap hamo.
1TH 3:4 Sa'a­wy'i urutu­kup­te'en eiwywuat turan — Tut aru ehepiat ho'opot hap uruto'e. Mi'i hawyi put'ok'e ra'yn ehete uru'e hap ewy. Koitywy ewehã'ãg na'yn i'ewyte eweikuap ta'yn miit'in miky­ry'i ehetiat hap.
1TH 3:5 Sa'a­wy'i tawa Atena pe areĩne'en turan ehowawi yn uiwa­nẽtup hap. Wẽtup e'at pe haty kahato uhete katu­pono yt atikuap i aikotã som eweikup­te'en hap. Mi'i hawyi yt ahupit kuap i ra'yn mesuwat haty hap hawyi atipo­'oro Timoteu i'atuepiat imohey hap kuap hamo are sio ahiag i'atuiã'ãg moity'i hawyi imohey hap pun haria wo ra'yn tukup­te'en hawyi uipotpap hap topy­hu'at yt kat hamo i hap kuap hamo atipo­'oro Timoteu.
1TH 3:6 Mio tã are turan Timoteu put'ok'e ra'yn uruete. Mi'i hawyi sehay wakuat kahato tohenoi uruepe ehetiat — Ta'i sakpo'e te ta'a­tu­mohey hap e. Ta'i Tupana ky'e hap te toĩne'en itote e. Aiky'e hap wuat'i e'at piat toĩne'en ne e. I'atue­hat'at kahato te ti aiky­'ewi e. Ta'a­tu­ky­'esat kahato te'e­ra­'a­kasa ahowawiat hap e aikotã sa'a­wy'i aito ahehat'at i'atu­ky­'ewi hap ewy e Timoteu uruepe ehehay tohenoi.
1TH 3:7 Mi'i hawyi urusa­ty'i hap tuweityk ta'yn uruete. Waku sakpo'e ta'a­tu­mohey kahato te uruto'e. Mi'i hawyi yt uruho­'opot kahato i ra'yn katu­pono Timoteu mienoi ehetiat urumo­wepit kahato.
1TH 3:8 Pyno Iheg me kahato o eweikup­te'en imohey hap ete. Mi'i tupono waku pe eweikup­te'en ma'ato yt pote yt uimo­wepit hin i.
1TH 3:9 Mi'i hap uruikuap hawyi po'og po'og urutu­wehum Tupana ete — Waku kahato En uruto'e katu­pono tawa Tesa­ro­nika piaria emohey kahato te waku kahato uruto'e.
1TH 3:10 Tupana urupo­wyro o mi'iria kapiat uru'a­kasa hamo uruto'e katu­pono urutuwat teran i ra'yn emohey haria yt ihãite i te rakat moehãite hamo uruto'e at ka'ap Tupana pe.
1TH 3:11 — Uru'ywot uruhẽtup Uruka­'iwat Iesui set upi etum o uruepe mu'ap mekewat Tesa­ro­nika kapiat uruwat hamo uruto'e Tupana pe.
1TH 3:12 Urui'a­tu­ky'e kahato eipe. Mi'i hap ewy atiky­'esat eiwo­'ope eiwo­'o­ky'e hap mi'i pote ahẽtup Tupana pe — Eti'a­tu­moe­saika o po'og po'og Iesui mohey haria eky'e po'og hamo i'ewyte irania'in atuky'e hamo are. Mi'i hap ti ahẽtup Tupana pe ehupi.
1TH 3:13 Eiwo­'o­ky'e kahato pote Tupana eimoe­saika wakuat nug hamo aikotã to'o­wywuat hamo. Mi'i pote ti aru karãpe Tupana tut Tosa­'yru wywo teropat haria wywuat turan ehewaku kahato hap toipuẽti eikai katu­pono miit'in ky'e kahato haria eipe pote. Mi'i hap uruikuap ta'yn uruto Pauru'in.
1TH 4:1 Uruwy­ria'in koitywy uruhẽtup kahato ehupi po'og po'og Tupana mowepit haria wo eweikup­te'en hap Iesui miky­'esat ewy kahato. Uruikuap ta'yn ti koitywy Tupana mowepit haria wo ra'yn eweikup­te'en. Mi'i tã ra'yn pytkai ti uruhẽtup po'og po'og ne.
1TH 4:2 I'ewyte yt waure­'e­wei'e tei'o Iesui kaipywiat einãpin uruepiat hap ete.
1TH 4:3 Pyno koitywy uruhenoi teran ehepe kat som Tupana tiky­'esat watunug hap. Yt toiky­'esat i ti wuat'i hary­po­ria'in wywuat hap i'ewyte wuat'i ihainia'in wywuat yt aiwe'eg i hap ti yt toiky­'esat i. Waku iwe'eg kahato rakaria wo toiky­'esat aheĩne'en hap.
1TH 4:4 Tupana tiky­'esat wyti wẽtup ok wywo yn ahe'aito hap iwary hap toiky­'esat iwe'eg kahato rakaria aito pote. Mi'i tã watunug pote miit'in mimõ­typot no watoĩ­ne'en.
1TH 4:5 Ma'ato irania'in yt Tupana kuap i haria ti i'atue­waire ewaire hap yn ta'a­tunug. Ma'ato aito ti yt toiky­'esat hin i mi'iria ewywuat aheĩne'en hap.
1TH 4:6 Yt naku i kahato ti wati­po­hari aiwy ihary'i ete pãi uruto'e sa'a­wy­'ite ehepe. I'ewyte wy koitywy yt eweima'at rei'o wẽtup ok hary­poria imoewaire hamo uruto'e haty wo katu­pono mi'i tã watunug pote Tupana mi'a­piheg wo watu­kup­te'en pãi.
1TH 4:7 Tupana yt tiky­'esat hin i ti yt iwe'eg i rakaria wo aheĩne'en hap ma'ato to'e­wywuat ahewaku hap yn toiky­'esat.
1TH 4:8 Ipã'ãu we'eg kahato rakat aimu'e hamuat. Mi'i tupono uwe uwe topot­ma­'at'i ma'at'i hary­po­ria'in ihainia'in wywo yt tuwe'eg i haype. Mi'i hat topy­hu'at Tupana ehay pun hano. I'ewyte miit'in ma'at hat mi'i.
1TH 4:9 Nimo pyi te mesup te Tupana eimu'e kahato aikotã eiwo­'o­ky'e hamuat hap ete. Mi'i tupono ipotmu­'eria wo ra'yn eweikup­te'en koitywy. Mi'i tupono yt kat no kuap i ra'yn po'og woro­ho­'o­mu'e wo'o­ky'e hap ete mesuwat uimiwan me katu­pono eiwo­'o­ky'e kuap kahato ra'yn.
1TH 4:10 Iesui mohey haria wuat'i tawa Masẽ­tunia piaria ikuap yne ra'yn wo'o­ky'e hap eikaipyi. Mi'i tupono ti uruhẽtup po'og ehepe eiwo­'o­ky'e hap miit'in ky'e hap.
1TH 4:11 Uiwy­ria'in woro­ho­'o­nãpin pywuat sehay wo. Wo'oe­re­mo­pusu haria wo yt naku i aito watu­kup­te'en. Waku te'en aipotpap kaipyi aimi'u ahaka­re'en aikotã uruto'e sa'a­wy'i hap ewy waku watoiat yne aiperup hap ko'i uruto'e.
1TH 4:12 Mi'i hawyi ipotpap kahato rakaria wo eweikup­te'en are. Mi'i pote ti aru meiũran — Ta'i waku kahato mi'iria i'atu'e Iesui mohey haria. Waku kahato mi'iria i'atu'e irania'in. Eipo minug kaipyi mio tã i'atu'e. Yt eweikup­te'en nei'o irania'in okpe tote ne'i i'atue­ka­re'en i'atu­mi'u etiano ne'i ma'ato motpap haria wo eweikup­te'en. Yt sẽtup i sẽtup i e haria wo tei'o eweikup­te'en are.
1TH 4:13 Uruwy­ria'in uruiky­'esat eweikuap kahato pywuat sehay aikotã iku'uro rakaria tukup­te'en hamuat hap. Yt uruiky­'esat i eweikup­te'en Iesui mohey ran haria wo ne'i katu­pono ta'a­tuwy ku'uro pote to'o­kak'i kahato — Yt karãpe i ra'yn aru wata­'a­kasa aiwy kape ta'a­tue­haype.
1TH 4:14 Ma'ato aito ti wato­mohey kahato ra'yn karãpe Iesui toku­'uro hawyi toĩne'en pakup i hap. I'ewyte wato­mohey kahato ra'yn karãpe Tupana tut hamuat Iesui wywo i'ewyte map haria imohey haria tõ'ẽ tõ'ẽ Iesui upi atipy kaipyi hap wato­mohey kahato ra'yn aito.
1TH 4:15 Pyno mio tã e Tupana henoi map haria etiat tomohey haria etiat — Ta'i ariot i ti aru yt ihãite rakaria kape yn i ma'ato map haria uimohey haria kape wy ariot. Mi'i hawyi to'o­pype atero­po'ok e Tupana.
1TH 4:16 Pyno Aika­'iwat sese ti aru ta'apyk atipy kaipyi mi'i hawyi atipy piaria esurara akag ti aru ihay pirik kahato. Mi'i turan ti aru huhu'e akuara wato pyi mekewat hut hap enoi hamo. Mi'i turan ti aru mekewat Iesui mohey haria iku'uro rakaria Tupana ti'a­tu­po­re­nõ'ẽ yne yne ai'am hap e'yianmete.
1TH 4:17 Mi'i hawyi aito ihãite te rakaria ahytmoi tomi­moieĩ­ne'en gu'uro pywiat haria wywo. Mi'i hawyi ti aru wata'am aiwo­'o­pype howa kape hut turan ywyhig kape. Mi'i hawyi itote wato­'o­puẽti ywaiti pe.
1TH 4:18 Pyno waku wato­'o­mo­wepit aiwo­'ope aheĩne'en pakup i hap ete uruto'e ehepe Pauru'in.
1TH 5:1 Tut aru Iesui ma'ato yt watikuap i karãpeĩ put'ok'e hamuat sio i'aman motpe sio at pe hap ko'i ti yt urutuwan kuap i ewawi.
1TH 5:2 Yt urutuwan kuap i ehowawi katu­pono yt uwe i ikuap aikotã yt uwe i sero'ok e hat ikuap wãtym muat. Mi'i hap ewy kahato Iesui ut hap yt uwe i ikuap.
1TH 5:3 Mi'i turan ti aru miit'in te'e­ro'e to'ope — Yt kat i wyti po'og ho'opot hap i'atu'e aru. Yt eweiken'ẽ tei'o i'atu'e katu­pono waku pe ra'yn watoĩ­ne'en i'atu'e ma'ato yt pywo pe i. Katu­pono hupi'a rakat hary­poria ete watikuap imẽpyt haty hap meremo put'ok'e tuwete hap ewy meremo put'ok'e hamuat ikahuro hap e'at imoma hap e'at meremo put'ok'e. Yt uwe i aru tuwemig kuap i aru mekewat e'at pe.
1TH 5:4 Ma'ato ariãty ewy watoĩ­ne'en aito pote ariãty hot pe ti ra'yn watoĩ­ne'en hut turan mote yt aimogyt kuap i. Hẽtyhot pe watoĩ­ne'en mote watikuap ta'yn put'ok'e irane mekewat ikahuro hap e'at pe. Ma'ato i'ypyryp mẽpyt'in ne'i aito pote ti i'ypyryp we ti ra'yn watoĩ­ne'en hut turan. Mi'i hawyi get haria ewy wato­py­hu'at pote mekewat e'at pe aimogyt kahato katu­pono mekewat e'at pe i'ypyryp we ieĩne'en haria i'atu­minug sa'ag hap ko'i heremo ra'yn.
1TH 5:5 Ma'ato ariãty mẽpyt'in no wato­py­hu'at aito pote ihot'ok mẽpyt'in sese wo ra'yn aito katu­pono wato­py­hu'at Iesui ehay wywo. Mi'i pote aito yt i'ypyryp mẽpyt'in wo hin i katu­pono yt watunug neran i ra'yn sa'ag.
1TH 5:6 Ta'i aito Iesui ut hap kape wate­ha'at kahato. Yt naku i get haria ewy ne'i watoĩ­ne'en hut hap owakai irania'in ewy.
1TH 5:7 Ta'i get haria wãtym muo te'e­roket kahato. I'ewyte mahy u haria i'atu­mo­pẽ'ã mi'iria wãtym muo tukup­te'en.
1TH 5:8 Ma'ato aito hẽtyhot puo ahewyry yt kat i aimo­pẽ'ã hap mywo. Waku wato­py­hu'at aikotã sura­ra'in ewy katu­pono sura­ra'in ipag ta'a­tu­po­ti'a tote iheg nakat mory'a pupi ta'a­tu­'auka hap. Mi'i hap ewy waku wato­mohey Iesui hawyi i'ewyte wato­'o­po­wyro waku aiwo­'o­ky'e hap ete. Karãpe Iesui mohey hano watoĩ­ne'en i'ewyte miit'in ky'e hano pote ti surara ipoti'a tote iheg nakat ewy watoĩ­ne'en. I'ewyte sura­ra'in ipag ta'a­tue­sapeu iheg nakat ta'a­tu­'ahot hap pupi hap ewy waku watoĩ­ne'en. Uheywyt'in uheinyt'in waku wate­ha'at kahato Aheha­kye­ra'at hat yatypiat aheĩne'en hap ky'ewi. Mi'i hap ewy ti waku wate­ha'at kahato surara esapeu iheg nakat ewy.
1TH 5:9 Tupana ai'airo yt ai'a­piheg hamuat i ma'ato aheha­kye­ra'at hamo.
1TH 5:10 Iesui iku'uro ai'a­piheg hap u hamo. Mi'i tupono karãpe hut turan watuwat hupi sio watoĩ­ne'en map haria wo ra'yn mekewat e'at pe sio ahehãite te watuwat hupi.
1TH 5:11 Mi'i tupono ti waku wato­'o­moe­saika wato­'o­mo­wepit tut aru Iesui ai'e hap ete. Ta'i atikuap ta'yn eipe mi'i hap nug haria ra'yn are. Mi'i yn uruiky­'esat po'og.
1TH 5:12 Uhyt'i'in ewei'a­tu­mõ­typot o eimu'e haria eipy­'a­set­piaria. Mio tã uruto'e uruwese popuo. Yt ewei'a­tu­mohit ne'i tei'o ai'a­pykok haria katu­pono Tupana minug ai'akag wuat ainãpin hanuaria. I'ewyte aipo­reto mu'ap hãpyk takat kapiat haria.
1TH 5:13 Waku aimu'e haria ky'e haria wo watu­kup­te'en. Waku i'atu­mõ­typot haria wo watu­kup­te'en. I'ewyte wato­'o­wese kahato aiwo­'ope.
1TH 5:14 Ma'ato toĩne'en eipy­'a­setpe motpap pupiat wo'oksep hat ne'i pote waku wãi'e­wei'e mi'i hat pe merup upiat ne'i myhu'at hat pe. I'ewyte waku ti wati­mo­'ok­pi­pok'i ihay ken'ẽ tehay hamuat rakat. I'ewyte waku wati­'y­kesat imohey hap etiat yt hesaika i rakat. I'ewyte waku aipe­rup'i yn wuat'i miit'in ete.
1TH 5:15 I'ewyte yt naku i nug ehetiat haria o yt ewei'a­tu­poepyk tei'o. Mi'i hawyi ti waku watikat aikotã miat waku watunug wakuat aiwo­'ope hap yn na'yn. Ma'ato yt Iesui mohey haria kape yn i wyti mio tã are ma'ato yne miit'in me.
1TH 5:16 Yne e'at pe waku watu­wehum Tupana kape.
1TH 5:17 I'ewyte yne e'at pe wahẽtup Tupana kape yt ikahuro i hamuat hap.
1TH 5:18 I'ewyte yne e'at pe — Waku kahato En Tupana wato'e sio ho'opot pote sio ahehãite pote. Mi'i tã yne e'at pe waku watunug katu­pono mi'i tã hap Tupana tiky­'esat Iesui mohey haria tunug hap.
1TH 5:19 Yt naku i wãiwa­to'e Tupana Pã'ãu miat aimu'e turan.
1TH 5:20 I'ewyte yt naku i watu­we­ky­ry'i ne'i aimu'e wẽtup ok Tupana Pã'ãu kaipywiat turan.
1TH 5:21 Karãpe wẽtup ok aimu'e turan waku watu­wa­nẽtup — Tupana e hap ewy sio waku wato'e aiwa­nẽtup hawe. Ipã'ãu kaipyi pote waku wato'e yt pote wati­'airo hawyi waku yt nakuat i watipun.
1TH 5:22 Ipotyi kahato ti aheko sa'ag. Pyno mi'i waku watoiat yne.
1TH 5:23 — Tupana eti'a­tu­po­wyro o uruwy­ria'in itotiaria. Eti'a­tu­mo­pe­rup'i wakuap nug hamo are. Uruiky­'esat tawa Tesa­ro­nika piaria emohey haria wuat'i kupte'en hap. Eti'a­tu­mo­pa­kup'i i'atu­wa­nẽtup pakup i hamo are. Mi'i hawyi yt kat i i'atu­wa­nẽtup sa'ag hap kapiat hap uruiky­'esat Uru'ywot uruto'e. Uruiky­'esat mi'iria ewano yn hap uruto'e. Mi'i tã etunug mote ti aru karãpe Esa'yru emipo­'oro ut turan yt kat i i'atu­minug sa'ag hut turan etipuẽti aru uruto'e yn Tupana pe.
1TH 5:24 Yt karãpe i Tupana ai'atoiat. Sa'a­wy'i aikaykay towano. Mio toĩne'en aiwywo wuat'i e'at pe to'oewy ainug.
1TH 5:25 Uruwy­ria'in ewehẽtup o Tupana ewawi urupo­wyro hamuat.
1TH 5:26 Mesuwat uhekue­katu atipo­'oro torania Iesui mohey haria itotiaria kape. Waku wato­'a­hi­'y­pysat tuereto aiwo­'o­ky'e hap moherep hamo.
1TH 5:27 Mesuwat urumiwan me uruhenoi Aika­'iwat Iesui etiat. Mi'i tupono eweimo­wẽpap to mesuwat mienoi yne Iesui mohey haria pe.
1TH 5:28 Toran na'yn urumiwan. — Iesui ereĩne'en kahato Morekuat no tawa Tesa­ro­nika piaria emohey haria py'a­setpe. Etum ne'en ne'i i'atuepe po'og po'og egyi'at hap. Mi'i yn uruhẽtup Aika­'iwat pe ekawiano. Toran na'yn urumiwan ewawi mesup. Woro­ho­'o­ky'e kahato. Mi'i tupono uito Pauru hawyi mehĩ Sira hawyi mehĩ Timoteu kuekatu uruipo­'oro.
2TH 1:1 Uiwy­ria'in Tawa Tesa­ro­nika piaria koitywy Uito Pauru atipo­'oro uimiwan ehowawi i'ewyte aiwy Sira aiwy Timo­teu'in wywo kuekatu uru'e hap uruipo­'oro ehowawi Ai'ywot Tupana mẽpyt'in Aika­'iwat Iesui emiit'in torania kape.
2TH 1:2 Uruhẽtup kahato ehupi — Tupana uruto'e etum no aiwy­ria'in me yt kat sa'up i egyi'at hap i'ewyte i'atu­wo­'o­wese hamuat etum kahato uruto'e Ai'ywot kape Aipo­typot Aika­'iwat Iesui kape uruhẽtup.
2TH 1:3 Uruwy­ria'in karãpe urutu­we­kue­katu ehowawi turan — Waku kahato En Tupana uru'e hap yn topy­hu'at. Tupana urutu­wehum kahato eete katu­pono itag na'yn po'og po'og i'atukai emohey hap uruto'e. Koitywy wo'o­ky'e kahato haria wo ra'yn tukup­te'en waku kahato uruto'e. Mi'i tupono ehewaku hap upi urutu­wehum at ka'ap Tupana ete.
2TH 1:4 Irania'in itotiaria to'o­ky­ry'i kahato ehete. Iesui mohey ehepiat pote ehaty'i haty'i kahato. Ta'a­tu­ky­'esat kahato waure­'ei'e Tupana etiat hap. Yt ikahu hin i i'atu'e ehepe ma'ato yt eweiwaure teran hin i Iesui mohey ehepiat hap. Mi'i pote irania'in me uruhenoi — Meiẽ mi'iria tawa Tesa­ro­nika piaria waku kahato rakaria uruto'e. Yt ta'a­tu­'atoiat hin i Iesui mohey ta'a­tuepiat hap ta'a­tu­sa­ty'i saty'i pytkai uruto'e. Mio tã uruto'e yn irania'in tawa piaria imohey haria puo.
2TH 1:5 Eweikuap kat pote eweho­'opot hap. Ta'i Tupana mẽpyt'in eipe pote — Waku kahato eipe e Tupana. Ta'i ehewaku hap put'ok'e ui'ya­typiat wuat'i e'at piat eikup­te'en hamo. Katu­pono i'atu­mi­ky­ry'i pytkai yt ui'atoiat hin i eipe e aru Tupana ehepe.
2TH 1:6 Tupana tomo­herep hãpyk kahato wakuap sio yt hap. Mi'i tupono ti yt toiwaure hin i ehetiat miky­ry'i haria. Toi'a­tu­po­re­ra­'aipok i'atu­pot­sa­ty'i saty'i hap eimo­so­'opot hap kaipyi.
2TH 1:7 Mi'i hawyi ti aru Tupana timonik yne ra'yn ho'opot ehepiat hap. I'ewyte uruwat miit'in miky­ry'i hap monik hamo. Tut Aipo­typot Iesui atipy kaipyi. Tuwe­mo­herep temiit'in hesaika rakaria atipy piaria wywo.
2TH 1:8 Ehaty'i haty'i haria apiheg hamo tut. Yt Tupana kuap i haria apiheg hamo tut. Aika­'iwat wo'o­nãpin wakuap yt nug i haria apiheg hamo tut. Atipy kaipyi Iesui aria wo toi'a­tu­'a­piheg irane mi'iria.
2TH 1:9 Mi'i hawyi mi'iria ewywuaria toi'a­tu­'a­piheg aru wuat'i e'at piat i'atu­moe­wasat hamo. — Eweiwat ro aikope yt ui'a­kasa i hap kape. Eweiwat ro wo'o­pugha hap kape. Yt karãpe i aru uikahu hap mõtypot hap kape ewei'a­kasa. Yt karãpe i ti aru uhesaika hap Morekuat nuat uheĩne'en hap kape ewei'a­kasa e.
2TH 1:10 Karãpe ta'aipok i ra'yn mi'i hap e'at pe ti aru imohey haria hemiit'in torania imõtypot kahato Ta'a­tu­po­rekuat koro. Mi'i hap e'at pe eipe i'ewyte eweimõ­typot kahato wy katu­pono uru'e hap mohey kahato haria eweikup­te'en.
2TH 1:11 Mi'i tupono uruhẽtup kahato wuat'i e'at pe ehupi — Tupana uruiky­'esat hãpyk kahato gupte'en haria wo emohey haria tawa Tesa­ro­nika piaria uruto'e. Yt wẽtup ok i toĩne'en itote ewemõti ehay pupiat hat uruto'e. Etum i'atuepe esaika hap emiky­'esat wakuap yn nug hamuat hap uruto'e. Uru'ywot mi'iria Esa'yru mohey haria sese mi'i tupono po'og uruiky­'esat i'atue­hãite imohey hap etiat hap uruto'e.
2TH 1:12 Mi'i tã ta'a­tunug itote pote irania'in itotiaria yt to'o­ky­ry'i hin i Uruka­'iwat Iesui set ete. Emõtypot kahato itote irania'in Papai uruto'e. I'ewyte emi'a­tu­mõ­ty­poria wo tukup­te'en emohey haria itotiaria Papai uruto'e. Mi'i hap uruhẽtup ewawi etum ne'en ne'i hamuat hap Uruka­'iwat Urupo­rekuat Iesui egyi'at hap kaipyi uruhẽtup Kahato wuat'i e'at pe ehupi uruto Pauru'in.
2TH 2:1 Pyno uruwy­ria'in koitywy uruhenoi pakup i teran ehepe Aipo­typot Aika­'iwat Iesui aipok hap etiat aikotã aikotã ai'a­tunug tuwe­wawi hap etiat uruhenoi teran ehepe.
2TH 2:2 Irania'in wo'o­mu'e haria ti — Tut kahu ra'yn ti Iesui i'atu'e aimu'e yt pywo pe i ma'ato. Tut kahu ra'yn ti e ti Pauru miwan me i'atu'e eimo­'a­kag'aia teran haype. Yt ewei'a­tuehay mohey tei'o mio tã e haria — Pywo ti Tupana ehay wahenoi i'atu'e haty wo pytkai. Yt i'atu­mi­ma­'aria wo tei'o eweikup­te'en.
2TH 2:3 Aiwe'eg wo o aima'at i'atuepiat hap pupi katu­pono yt tut i te rat Iesui. Yt he'at i te katu­pono ti aru Iesui mohey haria sok ihay atoiat haria tukup­te'en aru hut hap owakai. I'ewyte hut hap e'yianme ti aru tuwe­mo­herep Tupana ewanĩkap mekewat ahiagnia akag. Mi'i ti yne sa'ag eiam tuwe­mo­herep Iesui e'yianmete.
2TH 2:4 Mi'i miit ti aru Tupana mohey hap moma miit'in kaipywiat hat. Mi'i ti wuat'i puo Tupana kuap haria ewanĩkap mo toĩne'en — Uito ti wuat'i Tupana kawiat po'og nakat e. Mi'i hawyi ti aru teke Tupana mõtypot yat koro pe tawa Ieru­sarẽi me ta'apyk Tupana eiam note — Uito ti Tupana to'e hamo.
2TH 2:5 Yt eiwa­tetup i ra'yn apo karania wo ne'i ra'yn ahenoi ehepe mi'i miit etiat pytkai are.
2TH 2:6 Ma'ato yt tuwe­mo­herep kuap i te katu­pono topyhyp hawe te toĩne'en. Watikuap kahato ra'yn ti uwe ipyhyp hat. Ma'ato meiũran te'at put'ok'e ra'yn hawyi ti tuwe­mo­herep hamuat wuat'i sa'ag sepap nug hat koro Iesui ut hap e'yianmete tuwe­mo­herep.
2TH 2:7 Koitywy yt herep wyi i te ipotpap sa'ag nug hap ete. Hemiit yn heremo. Mig'i pyi ipotpap ma'ato meiũran ti herep wyi hamuat ra'yn ipotpap. Ma'ato koitywy yt tuwe­mo­herep kuap i te hewãi hat toĩne'en ne pote.
2TH 2:8 Mi'i hawyi tuwe­mo­herep mekewat sa'ag nug hat koro ma'ato Aipo­typot Iesui ti aru i'auka wẽtup tehay wo yn topyhu wo yn teẽtyhot kahato wywo tut hap e'at pe.
2TH 2:9 Mi'i miit sa'ag tuwe­moe­saika ahiag esaika hamo iwemo­herep hap put'ok'e turan. Mi'i hawyi ti aru miit'in ma'at hap iwato kahato tutunug tesaika hap moherep hamo. Topo wo yt uwe miit'in minug ewy i tutunug miit'in miat tomõ­typot hamo teso hap ko'i. Mi'i hawyi miit'in te'e­ru­wa­nẽtup kahato iminug ko'i kape — Aikotã som tutunug i'atu'e aru.
2TH 2:10 Mi'i hawyi ti aru ho'o­wasat rakaria wo miit'in toi'a­tu­ma'at kahato ra'yn mekewat topo wuat tominug wo yt miit'in minug kuap i wo. Mi'i hawyi imima'at ko'i tuwe­hyt'ok yne aria pe katu­pono ta'a­tu­mohey kahato ra'yn heso hap ko'i po'og pywuat sese sehay kai. Yt ta'a­tu­ky­'esat i po'og ta'a­tue­ha­kye­ra'at hanuat Tupana miium.
2TH 2:11 Yt ta'a­tu­ky­'esat i pywuat sehay pote mi'i hawyi Tupana ti'a­tu­po­'oro heso rakaria i'atu­mu'e hamo. Mi'i hawyi heso rakaria pe yn pywo i'atu'e.
2TH 2:12 Mi'i tupono tukup­te'en mi'i haria wuat'i e'at pe Tupana mi'a­piheg wo katu­pono ta'a­tupun na'yn pywuat sehay i'ewyte ta'a­tu­ky­'esat ta'a­tunug sa'ag hap yn.
2TH 2:13 Uruwy­ria'in Tupana mi'a­tu­ky­'eria kahato eipe. Ta'i urutu­wehum kahato Tupana ete wuat'i e'at pe uruwa­tetup ehowawiat hawyi katu­pono Tupana mi'ai­roria ra'yn eipe. Tutum na'yn ni eheha­kye­ra'at hap ehepe pywuat sese tomohey hap upi. Mi'i hawyi mio Tupana Pã'ãu esaika hap wywo yn na'yn eweikup­te'en. Mi'i hap ete urutu­wehum kahato Tupana kape uruwy­ria'in uruto'e.
2TH 2:14 Sa'a­wy'i woro­ho­'o­mu'e mekewat sehay wakuano mi'i hawyi eweikup­te'en imohey haria wo. Mi'i hap e'at pe to'e Tupana ehepe — Pyno woro­ho­'onug eipe ikahu rakaria wo aikotã Uha'yru ewywuat no.
2TH 2:15 Mi'i tupono uruwy­ria'in waku kahato ti mot'i mekewat sehay pywuat eweimohey mekewat uruwẽ pywiat sehay urumiwan urumienoi ko'i.
2TH 2:16 Uruhẽtup kahato Aipo­typot Aika­'iwat Iesui pe i'ewyte Ai'ywot hegyi'at rakat kape — Eti'a­tu­moe­saika ro emohey haria tawa Tesa­ro­nika piaria yt kat pupiat i i'atu­wuwu hamo uruto'e. Eti'a­tu­moe­saika ro mi'iria wakuap nug hamo i'ewyte wakuap enoi hamo.
2TH 2:17 Mi'i yn uruhẽtup kahato aimie­katup kape yt kat pupiat i eiken'ẽ hamuat hap ium hat kape uruhẽtup uruto Pauru'in.
2TH 3:1 Uruwy­ria'in mi'i tupono waku ewehẽtup Tupana kape urupo­wyro ihay sytpok merep'i ran hamuat hap aikotã waku hamuat hap aikotã ei'e­wywuat miit'in ewaku kahato hamuat hap waku ewehẽtup.
2TH 3:2 Ewehẽtup o yt nakuaria i po pywiat heso'ok takaria po pywiat Tupana piat urueha­kye­ra'at hamuat hap. Katu­pono yt imohey yne i haria tukup­te'en mesuwat yi tote.
2TH 3:3 Aika­'iwat wyti temiit yt atoiat hat i toĩne'en ma'ato aimoe­saika kahato hano toĩne'en Aika­'iwat. Aika­wiano kahato ti ahiagnia akag mupi.
2TH 3:4 Koitywy eipe urui'a­tu­mohey kahato Aika­'iwat mohey kahato rakaria eipe pote. Tohenoi ra'yn uruepe imohey ehepiat hap. Mi'i pote urui'a­tu­mohey kahato eipe urumienoi nug yne mũki­'ite mesup hamuat hap katu­pono uruhẽtup kahato ehupi.
2TH 3:5 — Uruka­'iwat uruto'e eti'a­tu­mo­herep tawa Tesa­ro­nika piaria pe aikotã aikotã eti'a­tu­ky'e kahato hap uruiky­'esat. Ta'a­tukuap ta'a­tu­py'a pe epiat ta'a­tu­ky'e hap aikotã Esa'yru Uruka­'iwat iperup'i kahato tepiat ho'opot hap ko'i ete. Mot'i kahato hap ewy eti'a­tu­moe­saika i'atu­wa­nẽtup hawe i'atupiit pe uruto'e.
2TH 3:6 Uruwy­ria'in tukup­te'en aipy­'a­setpe iperup kahato rakaria — Uito ti Iesui mohey hat e haria pytkai. Mi'iria ti yt ipotpap teran i rakaria wo gupte'en haria. Mi'iria ti tukup­te'en eipy­'a­setpe — Yt atunug neran Pauru mienoi e haria. Mi'i haria o yt ewetunug nei'o eiwy wo.
2TH 3:7 Eweikuap ta'yn ipotpap takaria wo urukup­te'en hap mi'i tupono waku ewehã'ãg uru'e­wywuat hap uruto'e. Pyno uruiã'ãkap wo eweikup­te'en itote urusai­pe­piano urueiam mo uru'e­wywuat hewyry rakaria wo eweikup­te'en.
2TH 3:8 Yt uwe yat upi i uruesy'at uruto'e put'ok­'u­ru­to'e turan katu­pono uruewyry hap upi ta'i urumi­sa'up nug kaipyi yn urutenuk. Ta'i motpap urutunug uruepiat turan urusero kahato wãtym muo ihot'ok puo. Mi'i kaipyi ti uruipuẽti urumi'u sa'up ko'i i'ewyte uruesokpe urueka­re'en sa'up ko'i uruto'e. Yt uruiky­'esat hin i urutu­we­te­weru ehepiat hap.
2TH 3:9 I'ewyte eimu'e sa'up yt uruhe­katup hin i eikaipyi. Uruhẽtup teran pote uruhẽtup kuap ma'ato yt urutunug i mi'i tã. Waku eweikup­te'en ipotpap kahato rakaria wo uru'ewy.
2TH 3:10 Katu­pono urutu­kup­te'en eipy­'a­setpiat turan mio tã uruto'e yt ipotpap teran i rakat pe. Pyno yt naku i mi'i hat pe waho'oium imi'u wo uruto'e. Waku merup wuaria hesy'at rakaria wo te'e­ro­py­hu'at uruto'e.
2TH 3:11 Ma'ato tukup­te'en Iesui mohey haria eipy­'a­set­piaria yt ipotpap takaria i yt wo'o­po­wyro teran i haria. Pyno mi'i haria pe waku wãiwa­to'e. I'ewyte wo'oe­re­mõ­pusu hap ete yn i'atu­potpap ta'a­tue­wyry hap upi ta'a­tunug. Mi'iria pe waku wãiwa­to'e.
2TH 3:12 Mi'i tupono waku wãiwa­to'e iperup takaria pe. Aika­'iwat Aipo­typot Iesui yt tiky­'esat i sẽtup i sẽtup i e haria wo watoĩ­ne'en hap waku wato'e mi'i hat pe. Iesui tiky­'esat watoiat mekewat aipot­'e­re­mo­pusu hap hawyi waku aiwe­potpap aimo­sakup i hap aiwe­mo­sero hap kaipyi yn waku aimi'u ahekat toĩne'en waku wato'e aiwo­'ope.
2TH 3:13 Uruwy­ria'in yt naku i kahato aipohep ahero pytkai yt naku i aipohep wakuap nug hap ete pyi.
2TH 3:14 I'ewyte toĩne'en mote wẽtup ok eipy­'a­setpe — Yt atiky­'esat i Pauru'in piat uinãpin hap e hat waku yt eiwehik tei'o mi'i tã hat ete. Mi'i tã watunug hawyi mono te'e­ru­we­mõti ra'yn hawyi tuwat urumienoi kape i ra'yn to'e haype.
2TH 3:15 Ma'ato yt naku i ewei'e — Koitywy en uhewa­nĩkap ta'yn yt naku i mio tã ewei'e mi'i miit pe ma'ato waku eweinãpin perup'i popuo aikotã aheywyt aheinyt nãpin hap ewy.
2TH 3:16 Aiwo­'o­mo­wese hap nug hat sese ti Aipo­typot. Mi'i pe uruhẽtup kahato — Etum o aiwy­ria'in tawa Tesa­ro­nika piaria pe to'o­wese wuat'i e'at piat hamuat hap uruto'e. Karãpe i'atu­satek turan etum o i'atu­mo­wepit hap i'ewyte i'atue­hãite hap. Ereĩne'en wuat'i e'at pe i'atu­py­'a­setpe uruto'e uruhẽtup Tupana pe ehupi uruwy­ria'in.
2TH 3:17 Pyno mesup kurin atiwan uiwewi uipo wuat mesuwat Pauru piat mienoi sese moherep hamo. Pywuat uiat yne uimienoi sehay toĩne'en mesuwe hap kuap hamo uhet Pauru e hap atiwan.
2TH 3:18 — Uika­'iwat Uipo­typot Iesui eti'a­tu­ky'e te'en ne'i o aiwy­ria'in tawa Tesa­ro­nika piaria are'e yn ahẽtup yn ehupi Aika­'iwat pe. Waku ra'yn uhehay. Toran na'yn. Uito ti Pauru hawyi mehĩ Sira hawyi mehĩ Timoteu Iesui potpo­'o­roria uruto.
1TI 1:1 Timoteu koitywy atipo­'oro uimiwan ewawi. Uito ti Pauru mekewat Aipo­typot Iesui ehay moherep hat. Uito ti Aheha­kye­ra'at hat Tupana potpo­'oro pãi. Aimie­katup Iesui potpo­'oro uito pãi.
1TI 1:2 Timoteu uha'yru sese ewy kahato ereĩne'en katu­pono sa'a­wy'i ereĩne'en Iesui mohey hano uimienoi kaipyi pote are. Mi'i tupono ahẽtup kahato Tupana pe eupi — Ui'ywot eraha'at Timoteu kape ihaky­'e'i hap wywo are. Etum o tope yt kat sa'up i egyi'at hap. Iwanẽtup hap wẽtup yn etum iwepit hamuat are Tupana pe eupi.
1TI 1:3 Pyno mesup ahẽtup i ra'yn eupi Timoteu tawa Ewesu piat ereĩne'en hamuat. Aikotã sa'a­wy'i ahẽtup ewawi karãpe areto yi Masẽ­tunia kapiat turan — Ereĩne'en no tawa Ewesu tote mekewat itotiaria sehay yt pywo rakat i enoi haria ewãi hamo.
1TI 1:4 Atikuap koitywy tukup­te'en itote Iesui mohey haria sehay pot'i enoi haria kat ywania kat ywania kat set kat set ko'i enoi haria. Mi'iria pe waku wãi'ere — Wẽtup sehay upi ne'i pote ti aru yt karãpe i Tupana miky­'esat nug hamo eweikup­te'en katu­pono Iesui mohey kahato hap yn Tupana miky­'esat ewy.
1TI 1:5 Yt naku i ti watu­'uka sehay pot'i ete ere'e o itotiaria pe katu­pono Tupana tiky­'esat aiwo­'o­wese ahehay wuat hap ere'e o i'atuepe. Wẽtup wanẽtup hap wywo yn waku wato­'o­ky'e ere'e o. Yt i'atuekat ky'ewi i ti wato­pot­ky'e ere'e o. Waku wato­'o­ky'e wẽtup sok yn aito Iesui mohey haria aito pote.
1TI 1:6 Yt kan hamo i sehay wo watu­'uka. Ma'ato mio tã watu­'uka hap watunug mote aiwo­'o­wese hap moma hamuat hap topy­hu'at. Mi'i pote waku ehenoi itotiaria pe — Yt eiwu­'uka tei'o sehay wo ere. Mi'i tã ewetunug mote yt kat i aiwo­'o­wese hap toĩne'en meiũpe. Waku po'og watunug aiwo­'o­wese hap mi'i hawyi aiwa­nẽtup hap ikahu kahato rakat topy­hu'at waku ere. I'ewyte Iesui mohey haria sese wato­py­hu'at waku ere'e o itotiaria pe Timoteu.
1TI 1:7 Irania'in iky'esat kahato miit'in mu'e hamo Tupana mienoi Musei piat hap ma'ato yt ta'a­tukuap i kat e kat e hap pytkai i. — Waku uruto yn ei'a­tu­mu'e hanuaria wo i'atu'e ta'a­tuehay pirik wo yt ta'a­tukuap i ta'a­tu'e hap ko'i pytkai.
1TI 1:8 Tupana piat ainãpin sa'a­wy­'iwuat hap waku kahato wati­'a­tu­mu'e. Hãpyk kahato wati­'a­tu­mu'e pote ti aipo­wyro kahato wakuap nug hamo.
1TI 1:9 Wakuap nug haria tiky­'esat kahato Tupana piat tonãpin hap. Ma'ato irania'in sa'ag ky'esat hap nug haria yt iky'esat hin i Tupana ehay wuat kat pote yt nakuaria i pote he kahato i'atuepe i'atu­minug sa'ag ko'i. Ma'ato ti mi'iria pe Tupana tum i'atuewãi e hamuat. Ma'ato waku hap nug haria yt kat i ra'yn Tupana miium wãi'e hap kat pote toiky­'esat wakuap nug hap yn pote. Yt wo'oewãi kuap i haria nãpin hamo Tupana tum wãito'e hap. More­kuaria wo'o­nãpin hap pun haria nãpin hamo tutum wãito'e hap. Mekewat yt kat i Tupana e haria nãpin hamo tutum wãito'e hap. Yt naku i nug haria pianuat tutum wãito'e hap i'ewyte yt karãpe i Tupana kapiat wanẽtup teran haria tutum wãito'e hap. To'ywot toty auka haria wo'o­pot­'auka hat nãpin hamuat tutum wãito'e hap.
1TI 1:10 Wuat'i hary­poria wywuat wuat'i ihainia wywuat ieĩne'en haria nãpin hamuat tutum wãito'e hap. I'ewyte wo'opiat wo'o­pytyk piat ewãi hamuat ihainia to'ope i'ewyte hary­poria to'ope mi'i e haria ewãi hanuat. I'ewyte miit'in ero'ok haria pianuat heso rakaria nãpin hanuat tutum. Wo'o­kuasa i kuasa i haria nãpin hanuat tutum wãito'e hap. Toĩ po'og meimẽwat kai sa'ag nug hap ko'i. Yt ahenoi kuap yne i. Mi'i tupono mi'i hap nug haria wãi'e hamo Tupana tum na'yn i'atu­nãpin hap hãpyk kahato rakat.
1TI 1:11 Tupana ewaku hap ewywuat yt kat i mi'i rẽ wati­puẽti. Yt uwe i ikahu hap ewy topy­hu'at i'ewyte yt kat i ikahu iwat ihay ewywuat. Mi'i e hap yn ahytpok wuat'i puo. I'e uhepiat hap yn ahenoi miit'in me pãi.
1TI 1:12 Pyno uiwepit kahato arehum kahato Aika­'iwat Iesui ete Wuat'i Porekuat ete katu­pono Mi'i hum tesaika hap uhepe tehay moherep hamuat. Arehum kahato tuwete katu­pono ui'airo te'e­ropat hat miit'in mu'e hamuat.
1TI 1:13 Sa'a­wy'i te yt atimohey i te turan atere­mõ­pusu kahato Iesui. Ati'a­tu­sa­ty'i saty'i kahato hemiit'in. Mi'i turan ne uhehay sa'ag Iesui ete. Yt imohey i hap kaipyi areĩne'en sa'ag Iesui ete. Yt uiwe'eg hin i haype ma'ato mi'i pytkai uiky'e hap wywo iha'at uhowawi. Yt atikuap i kahato atunug sa'ag mekewat e'at piat.
1TI 1:14 Sakpo'e hegyi'at kahato rat uhepe pãi Uika­'iwat uheĩne'en ne wanĩkap nuat turan. Mi'i hawyi tutum tomohey hamuat hap uhepe. Koitywy iwywo wẽtup piit hap ewy yn na'yn urutu­kup­te'en.
1TI 1:15 Timoteu ahenoi teran epe sehay pywuat sese rakat sakpo aimi­mohey wuat. Mio tã are Aika­'iwat Iesui tuwe­mo­herep mesuwe yi tote yt nakuaria i atueha­kye­ra'at hamo tuwe­mo­herep. Mi'i atikuap kahato katu­pono uito po'og yt nakuat i wuat'i kawiat pãi are.
1TI 1:16 Ma'ato mi'i pytkai Tupana uiky'e kahato yt kat i uhewaku hap upi. Tuwe­kai­pywiat tegyi'at hap moherep hamo uheha­kye­ra'at. Koitywy ti irania'in ui'e­wy­wuaria sa'ag nug haria tikuap ta'yn Tupana ti'a­tue­ha­kye­ra'at kuap torania yt naku i nug haria hap. Mi'i tupono ti aru wuat'i miit'in sa'ag nug haria — Pyno uito uheha­kye­ra'at kuap wy i'atu'e. Uheha­kye­ra'at Tupana piat hap atikuap ta'yn i'atu'e irane.
1TI 1:17 Uru'ywot Tupana uruimõ­typot at ka'ap En i'atu'e. Urupo­typot koro wuat'i e'at piat En i'atu'e Tupana piat uheha­kye­ra'at hap upi. Yt karãpiat i weityk hat En i'atu'e. Miit'in yt te'e­ra­'a­kasa kuap i ewawi rakat En. Wẽtup Tupana yn ereĩne'en. Mi'i rẽ yt kat i hin i Tupana toĩne'en i'atu'e hap upi. Mi'i urumi­mõ­typot kahato En. Wuat'i kawiat po'og ikahu rakat En. I'ewyte wuat'i e'at piat ieĩne'en hat En pãi i'atu'e ta'a­tukuap Tupana piat uheha­kye­ra'at hap hawyi.
1TI 1:18 Uha'yru sese ewy kahato ereĩne'en Timoteu. Mi'i tupono woro­nãpin neran. Sa'a­wy'i Tupana e'airo kahato Iesui mohey haria wẽ pyi. Itote to'e epe — En ni uimi­po­'oro uhehay moherep hanuat e Tupana Pã'ãu epe itote. Mi'i hap o yt etiwaure tei'o. Waku etopytyk mi'i e hap aikotã surara po pe mory'a wato hap ewywuat wanĩkap wywo wu'uka hamuat. Mi'i e hap wywo o waku etu'uka ahiag e hap auka hamo woro­nãpin uha'yru.
1TI 1:19 Uha'yru atimoheg kahato o epiat Iesui mohey hap aikotã enãpin hap kape erewa­nẽtup kahato. Mi'i hawyi etunug ewanẽtup hap kaipyi wakuap erenãpin hap ok tã katu­pono tukup­te'en epy'a­setpe yt naku i nug haria. Sa'a­wy'i mi'iria Iesui mohey haria tukup­te'en ma'ato ta'a­tupun na'yn Iesui mohey hap ta'a­tu­kawiat. Mi'iria ti tukup­te'en ho'o­wasat rakaria ewywuaria aikotã ahe'yara apy'at hap yt wati­puẽti i ra'yn hap ewywuaria mi'iria tukup­te'en yt kat i po'og Iesui mohey hap mio i'atukai.
1TI 1:20 Typy ok ti mi'i haria set mehĩ Imeneu hawyi Arisã­tere. Sa'a­wy'i Iesui mohey haria tukup­te'en mi'iria ma'ato koitywy Tupana moweu­ka'i hanuaria wo ra'yn tukup­te'en — Pyno koitywy eipe ahiag eipo­rekuat no ra'yn Satanai wanu­waria eipe are i'atuepe. Ei'a­piheg hap yn na'yn topy­hu'at ehete. Mi'i tupono ehera­'aipok Iesui kapiat hap are i'atuepe uito Pauru.
1TI 2:1 Timoteu enãpin sese hap ahenoi teran kahato epe. Pyno waku wahẽtup kahato Tupana pe wuat'i miit'in powyro hamuat hap — Tupana etum o ihaky­'e'i rakaria pe i'atu­mi'u i'atue­sokpe i'atu'yat waku wato'e mot'i haty wo hum hap kape. Tutum hawyi — Waku kahato En Papai etum na'yn uimiẽtup ewy waku wato'e Tupana pe Timoteu.
1TI 2:2 I'ewyte waku wahẽtup Tupana pe — Eti'a­tu­po­wyro o urupo­re­kuaria uru'akag ko'i mesu­wa­ro­tiaria. Urupo­wyro kahato urutu­kup­te'en hap ete hamo meiũpe waku wahẽtup. Eti'a­tu­po­wyro uruieĩne'en hap wẽtup ehay yn hamuat. Yt karãpe i sa'ag uruete hamuat yt wẽtup ok i urupyhyp pyhyp wakuat nug hap ete emiky­'esat nug wuat'i puat hamo. Eti'a­tu­po­wyro more­kuaria tu'i­saria waku kahato wahẽtup Tupana pe.
1TI 2:3 Mio tã wahẽtup pote wati­mo­wepit kahato Tupana aheha­kye­ra'at hat.
1TI 2:4 Katu­pono toiky­'esat kahato miit'in torania tomie­ha­kye­ra'at nuaria tehay pywuat sese hap kuap hanuaria toiky­'esat.
1TI 2:5 Wẽtup yn Tupana ma'ato yt uwe i miit ihay kuap iwywo katu­pono sa'ag nug haria yn pote ma'ato wẽtup miit ihay kuap iwywo. Aika­'iwat Iesui ihay kuap iwywo katu­pono miit sese yt sa'ag nug hat i pote. Mi'i iku'uro wo'o­wese nug Tupana wywo hap. Koitywy imohey hap upi ahehay kuap Tupana wywo.
1TI 2:6 Put'ok'e ra'yn aheha­kye­ra'at hap e'at hawyi Aika­'iwat iku'uro ra'yn aika­wiano hamo tuweium na'yn ahepe. Mi'i kape wata­'a­kasa ra'yn hawyi watikuap kahato wuat'i ywania Tupana ti'a­tu­ky­'esat kahato tomie­ha­kye­ra'at no hap watikuap ta'yn.
1TI 2:7 Yt uheso i ti pywo sese ti. Sa'a­wy'i ti uimu'e Tupana mesuwat sehay wo Tosa­'yru etiat — Etimo­herep to mesuwat uhehay wuat'i yt Iuteuria i irania'in ywania pe e. Uwe mesuwat uhehay pywuat mohey haria ti aru uimie­ha­kye­ra'at no tukup­te'en e uhepe sa'a­wy'i Tupana.
1TI 2:8 Timoteu atiky­'esat kahato miit'in torania i'atuehay Tupana kapiat hap atiky­'esat uito. Atiky­'esat mi'iria Tupana wanuaria wo yn hap. Atiky­'esat mi'iria tukup­te'en yt wo'o­weu­ka'i hap mywo i ma'ato wo'o­wese hap yn atiky­'esat yt kat i sa'ag hap i'atu­wywo. I'atuehay to'o­'e­wy­'ewy wẽtup ehay yn hap atiky­'esat.
1TI 2:9 Hary­po­ria'in atiky­'esat kahato eweikup­te'en Iesui mohey haria kahato. Waku we'eg sese rakaria wo eweikup­te'en. Waku eiwe­painug hap ehesokpe hãpyk kahato rakano Iesui mõtypot hap eiwa­nẽtup hawe. Waku ei'asap i'ewyte ehewahi ehesokpe imõtypot hap wywo yn ehete. Eiwe'eg wo o mekewat — Uito po'og hekat rakat ei'e hap eiwe­painug hap pupi. Ma'ato waku ikahu rakano o eweikup­te'en imõtypot ehepiat hap ok tã.
1TI 2:10 Waku po'og ma'ato eiwe­painug eiwa­nẽtup hawe eiwese sese hap wywo i'ewyte waku eweiwe­painug waku nug hap wywo — Uito Iesui mohey hat sese ei'e hap enoi hamuat.
1TI 2:11 Karãpe ewa'a­tunug aiwo­'o­mu'e hamo turan waku eweimu'e kahato yt kat i mekewat sehay sehay hap wywo. Waku eiwe­waure ka'a kahato wo'o­mu'e hat kape. Eweikup­te'en perup'i puo ei'a­tunik takaria wo eweikup­te'en itote.
1TI 2:12 Yt atiky­'esat i eipe ihainia'in akag wo eweikup­te'en. I'ewyte yt naku i ihainia'in mu'e hat akag wo eweikup­te'en. Po'og waku i'atu­mi­mu­'eria wo hewaure ka'a kahato rakaria wo eweikup­te'en.
1TI 2:13 Katu­pono sa'a­wy'i Tupana tunug ihainia ti irokirẽ hary­poria. Ei'yianme mimi Ãtau tutunug hawyi mana Ewa tutunug.
1TI 2:14 I'ewyte sa'a­wy'i mana Ewa ti ipun Tupana piat ainãpin hap. Toi'a­parap mi'i sa'a­wy'i ahiag ehay upi pote.
1TI 2:15 Mi'i pote toĩne'en mesup ehete mekewat Tupana ei'a­piheg hap mekewat haty kahato hap eimẽpyt tuwe­mo­herep hap turan. Koitywy Iesui ti'a­tue­ha­kye­ra'at teran yne eipe hary­po­ria'in. Toiky­'esat eipe tomie­ha­kye­ra'at wuaria hawyi wo'o­ky'e haria hawyi we'eg kahato haria eipe hap toiky­'esat are uito Pauru.
1TI 3:1 Timoteu uwe uwe ipotpap kahato Iesui mohey haria apykok hamo mi'i hat ti po'og wuat'i motpap kawiat ky'esat hat are. Aikotã hãpyk wo'o­mu'e hat ipotpap. Mi'i ti waku to'airo hawyi tutunug kuap hãpyk yn.
1TI 3:2 Ma'ato ewe'eg wo o mi'i wuat airo hap ete Timoteu katu­pono yne miit mikuap hãpyk yn nakat waku eti'airo. Wẽtup ok wywo yn ihary'i rakat eti'airo. Yt naku i eti'airo kowo'i kowo'i wanẽtup haria. Waku — Yt uipo hep i Tupana potpap hap ete e hat eti'airo. Ma'ato waku wy emi'ai­roria paa'e haria miit'in nãpin turanuat hanuaria te'e­ro­py­hu'at. Waku irania'in — Wakuat yn nug haria mi'iria i'atu'e emi'ai­roria etiat. I'ewyte etikat o — Waku eweikup­te'en ui'yat pe e hat waku eti'airo.
1TI 3:3 Yt naku i mahy se kuap hat i'ewyte marak'a yt naku i. Waku miit'in ete iperup'i kahato rakat wo'o­wese hap eti'airo. Yt naku i kare'en ky'esat hap kape yn iwanẽtup hat.
1TI 3:4 Waku wati­'airo to'yat piaria po'oro perup'i tuwat hat. Waku imẽpyt'in mimõ­typot imẽpyt'in miehay mohey kahato. Mi'i haria yn waku eti'airo ei'a­pykok hanuaria wo.
1TI 3:5 Ma'ato yt toi'a­pykok kuap i tomẽ­pyt'in mi'i hap pote ti yt aikotã kuap i Tupana mẽpyt'in apykok kuap hamo pãi.
1TI 3:6 Pyno i'ewyte Iesui mohey pakup i haria ne'i yt naku i ai'a­pykok hamo ai'akag wo katu­pono meremo i te'e­ru­we­mo­wato teran hap kaipyi te'e­ru­we­ma'at ne'i aikotã sa'a­wy­'iwuat sese ahiag — Uito po'og e hat tuwe­ma'at ne'i hap ewy ti Iesui mohey pakup i hat ne'i ai'a­pykok hamo.
1TI 3:7 Yt Iesui mohey haria yn i mimõ­typot ma'ato yne miit'in mimõ­typot eti'airo. Yne miit'in mimõ­typot eti'airo pote yt wẽtup ok pupi i tuwe­mõti. Mi'i pote ahiag yt tima'at kuap i wy.
1TI 3:8 Timoteu waku eti'airo aipy­'a­set­piaria waku rakaria aipo­wyro hanuaria. Miit'in mimõ­typot kahato yn waku eti'airo. Mahy u poity'i rakaria ne'i yt naku i eti'airo. Ahekat nuat ky'esat hap kape yn wanẽtup hat yt naku i ma'ato hegyi'at rakat yn waku.
1TI 3:9 Waku eti'airo yt waure'e hin i Iesui ehay tomi­mo­herep tepiat imohey hat mekewat tomikuap ok tã wakuat nug hat waku eti'airo.
1TI 3:10 Ma'ato wati­'airo aheropat hanuaria hawyi waku wahã'ãg waku sio yt hap kuap hamo. Waku kahato ipotpap hap hawyi waku topy­hu'at aheropat hamo ma'ato yt naku i ipotpap hawyi yt naku i.
1TI 3:11 Ihary'i waku rakat yn waku. I'ewyte yt naku i ihary'i marak'a poity'i rakat ne'i. Waku ihary'i iwe'eg kahato rakat sehay pywuat piat yn ihay rakat.
1TI 3:12 Waku aheropat haria wẽtup kahato yn ihary'i. I'ewyte waku tosa­'y­ru'in tosa­ki­'yt'in to'yat piaria po'oro kuap kahato perup'i puo hat.
1TI 3:13 Uwe topy­hu'at aipo­wyro wakuat motpap wuat mi'i hat ti aru topy­hu'at wuat'i mimõ­typot kahato rakano. Mi'i hawyi karãpe — Uito Aika­'iwat Iesui mohey kahato hat i'atu'e aimu'e turan yt te'e­ru­we­mõti hin i irania'in wo'o­ky­ry'i hap pupi miit'in mimõ­typot ko'i mi'iria pote.
1TI 3:14 Timoteu mesuwat uimiwan atipo­'oro ewawi uhehat'at kahato haype. Mi'i tupono areto teran kahato ewawi uhehay ewywuat hamo.
1TI 3:15 Ma'ato yt areto i pote yt uhewyry kuap i ewawi pote meikowat uimiwan atipo­'oro ewawi aikotã waku etunug itote hap kuap hamo. Mi'i uimiwan kaipyi waku eti'a­tu­nãpin itotiaria aikotã waku aiwo­'o­wese haria wo watu­kup­te'en aito Iesui mohey haria. Ta'i aito ti Tupana sa'y­ru'in wo Tupana saki­'yt'in wo aito watu­kup­te'en wẽtup piit yn aito Tupana yat apy'yha iũtikag ewywuat aito katu­pono Tupana ehay mohey haria aito.
1TI 3:16 Tupana mienoi Iesui etiat watikuap kahato ma'ato yt karãpe i watikuap yne yne. Tupana yn ikuap sese hat. Mi'i hawyi ikuap hat sese tuwe­mo­herep ta'yn ahowawi. Mio tã to'e ahepe Iesui etiat — Meiũ ti pywuat sese e. Mi'i Miit kape atipy piaria te'e­ra­'a­kasa yne. Mi'i ti imoherep ta'yn kat ywania puo kat ywania puo mi'i hap tuwe­mo­herep ta'yn tehay wo. Mi'i hawyi ti i'atu kahato ra'yn imohey haria mesuwat yi tote. Mi'i hawyi Tupana tioto i ra'yn atipy kape i are uito Pauru.
1TI 4:1 Pyno koitywy Tupana Pã'ãu to'e kahato ahepe — Meiũran ikahuro hamo ti aru wẽtup ok wẽtup ok waure'e imohey tepiat hap ete. Mi'i hawyi ti aru mã'ãu sa'ag miat ta'a­tu­ma'at hap upi i ra'yn te'e­ro­py­hu'at. I'ewyte ahiag ko'i ehay enoi hap upi i ra'yn te'e­ro­py­hu'at e Tupana ahepe.
1TI 4:2 Mekewat e'at pe ahiag ko'i eso eso hap upi pywo i'atu'e ahiag eso hap ete. Mi'i tã e haria heso heso rakaria aima­'at'i ma'at'i hanuaria. Yt ta'a­tuenoi teran hin i sehay pywuat ta'a­tukuap sehay pywuat pytkai. Sa'a­wy'i i'atu­wa­nẽtup hawe sehay toĩne'en — Ehenoi ro pywo rat e hap toĩne'en ma'ato koitywy yt kat i ra'yn i'atukai i'atu­wewãi hap katu­pono ti ta'a­tuhep ta'yn mekewat i'e hap ta'a­tu­we­nãpin hap te'e­ru­wa­nẽtup hawiat. Koitywy yt kat i i'atu­we­mõti hap ta'a­tu­'eso atu'eso hamo.
1TI 4:3 — Yt naku i ehary'i e'aito i'atu'e sa'ag. Yt naku i mi'u watu'u yne i'atu'e sa'ag. Yt ta'a­tukuap i aikotã Tupana tunug yne mi'u mesuwat yi tote aimi'u wo. Toiky­'esat waku ai'e popuo i'u hap. Iminug ko'i tomohey haria poi hap tutunug tehay pywuat mohey haria mowepit hamo tutunug kat ko'i kat ko'i som.
1TI 4:4 Yne Tupana minug mi'u ko'i wakuat no tukup­te'en. — Eminug yt naku i yt wato'e kuap i Tupana pe. Wakuat yn tutunug mi'i tupono — Waku kahato emiium Tupana. Urumo­wepit kahato En waku wato'e i'u hap e'yianmete watu­wehum.
1TI 4:5 Katu­pono sa'a­wy'i Tupana to'e — Waku yne emi'u wo e. Mi'i tupono mesup ti aito waku ai'e Tupana pe rokirẽ watenuk. Mi'i tupono yne waku watu'u Tupana miium aimi'u wuat.
1TI 4:6 Pyno mesuwat enãpin hamo eti'a­tu­mu'e ro Iesui mohey haria Timoteu. Eti'a­tu­mu'e hãpyk kahato pote ti aru erepy­hu'at Aipo­typot Iesui eropat kahato hano. I'ewyte etikuap kahato ra'yn uhepiat imohey hap i'ewyte sehay pywuat sese etiat etikuap ta'yn. Mi'i tupono atiky­'esat po'og po'og eremu'e hap mi'i etiano.
1TI 4:7 Ipoty kahato ti sehay yt Tupana mienoi kaipywiat i yt Tupana e hap ewywuat hin i. Mi'i tupono waku waure wo mi'i hap ko'i kai. Yt kan hamo i wato­pot­mu'e mi'i hap ko'i ete. Ta'i po'og waku wato­'o­moe­saika kahato Tupana e hamo Ipã'ãu wo miit'in e hap ko'i kai.
1TI 4:8 Waku aiwe­saika saika hap aipiit moheg hamo are ma'ato po'og waku wuat'i kai watu­we­saika saika Tupana Pã'ãu e hap nug hamo. Katu­pono imiky­'esat ewy watunug mote ipakup takano watoĩ­ne'en mesuwe. I'ewyte aiku­'uro hap e'at pe wuat'i e'at pe aikai Tupana.
1TI 4:9 Pyno Timoteu ahenoi teran epe sehay pywuat sese aimi­mohey aipy'a piat hap — Tupana ti wuat'i e'at piat ieĩne'en hat toĩne'en. I'ewyte wuat'i miit'in ehakye­ra'at teran hat Tupana.
1TI 4:10 Wuat'i tomohey haria Ehakye­ra'at hat Mi'i are ti epe pãi. Mi'i ti aimie­katup sese. Mi'i kape yn watu­we­potpap watu­we­so­'opot waku.
1TI 4:11 Mio tã e hamo eti'a­tu­mu'e at ka'ap yne o miit'in.
1TI 4:12 En ni kurum iwasu te. — Uruewat'yp ne'i wyti en i'atu'e epe itote ma'ato o ereĩne'en i'atu­py­'a­setpe waku kahato rakano i'atue­hamo ihay hãpyk kahato rakano hãpyk kahato wo'o­ky'e hano ereĩne'en. Iesui mohey sese hano ereĩne'en. Yt wẽtup i o sa'ag etunug i'atu­wo­'o­ky­ry'i hamo. Mi'i tã ereĩne'en mote yt uwe i itotiaria emohit kuap nagnia emimu­'eria i'atue­wat'yp ne'i en mytkai.
1TI 4:13 Meiũran ti aru areto ewawi Timoteu ma'ato put'ok­'are itote hap kape waku yt ewẽpohep tei'o mekewat Tupana miwan miat mowẽpap wa'a­tunug haria piat hap ete. Mi'i hawyi kat e hap kat e hap o etimo­herep i'atuepe mekewat Tupana miwan miat mowẽpap hap. I'ewyte waku Tupana ehay mohey hamo kahato ereĩne'en.
1TI 4:14 Sa'a­wy'i Tupana tum epe tesaika hap topotpap nug hamuat tutum epe sa'a­wy'i. Mi'i tupono yt waure wo tei'o mekewat miium kai ma'ato waku etimo­herep kahato hesaika hap miit'in me. Sa'a­wy'i Tupana ehay moherep haria te'e­ro'e epe — Tupana mi'airo en i'atu'e. I'ewyte Iesui mohey haria akag ko'i te'e­ru­we­ponug e'akag ete — Tupana potpap nug hat en ta'a­tu'e haype. Mi'i tupono waku etimo­herep kahato hesaika hap imiium epiat miit'in me.
1TI 4:15 Timoteu waku mesup ui'e hap sepap kahato hano ereĩne'en. Mi'i pote ti aru wuat'i seha'at haria — Pywo Timoteu tuwe­motag kahato Tupana emiit no i'atu'e.
1TI 4:16 Ewe'eg wo o Timoteu koran ti itu erema'at ne'i. I'ewyte ewe'eg wo o emienoi Tupana ehay mienoi aparap hap pupi. Mi'i tã etunug at ka'ap pote ti aru ehakye­ra'at Tupana emimu­'eria wywo are uito Pauru.
1TI 5:1 Karãpe wẽtup ok e'yian ti'a­parap Tupana pe pote yt ehoiro'i hoiro'i tei'o mi'i miit ete. Yt naku i wati­mohit ase'i'i ko'i hary ko'i e. Ma'ato waku perup'i puo wati­nãpin aimi­mõ­typot ko'i waku — Papai Mamai yt naku i mi'i tã watunug aito waku wato'e perup'i puo i'atu­ky'e hap wywo iporo pote.
1TI 5:2 Mi'i hawyi karãpe e'yian hary­poria kawiat ti'a­parap Tupana pe pote waku eti'a­tu­nãpin perup'i puo. — Mamai ere'e popuo imõtypot haype. Ma'ato irania'in makup­tiaria ti'a­parap Tupana pe pote waku eti'a­tu­nãpin perup'i puo Uheinyt ere'e popuo yt i'atu­ky­'esat popuo i.
1TI 5:3 Waku hiwuria sese wati­po­wyro he'aito ku'uro rakaria yt imẽpyt i te turanuat iku'uro he'aito rakat yt hemia­riru i te rakat.
1TI 5:4 Waku hiwuria mẽpyt'in me hemia­ri­ru'in me ere'e — Eweimõ'ẽ ro eity'in me eheha­ry'in me. Eweha'up nug o eimotag hap Tupana miky­'esat ewy ere'e o hiwu mẽpyt'in me hiwu emiari­ru'in me.
1TI 5:5 Ma'ato tukup­te'en hiwu sese ko'i yt uwe i mipo­wyro ko'i Tupana mohey haria ta'a­tu­hẽtup kahato Tupana kape ihot'ok puo wãtym mo — Uruieĩne'en hap mi'u sokpe etum o uruepe i'atu'e.
1TI 5:6 Ma'ato hiwu tomi­ky­'esat sa'ag nug hat iku'uro rakat ewywuat toĩne'en Tupana wanẽtup hawe. Ipiit ihãite rakat wen ma'ato yt iwe'eg i rakat pote.
1TI 5:7 Timoteu eti'a­tu­nãpin o hiwuria mẽpyt'in hiwuria emiari­ru'in aikotã uimienoi ewy. Mesuwat ewy ta'a­tunug mote yt uwe i te'e­ru­we­ky­ry'i kuap Iesui mohey haria ete.
1TI 5:8 Ma'ato toĩne'en wẽtup ok eipy­'a­set pe — Yt atipo­wyro teran i ui'ywot uity uimẽ­pyt'in e hat mi'i hat wyti ipun ne'i ra'yn Iesui mohey hap sese. Mi'i hawyi topy­hu'at po'og yt naku i Tupana ehay pun haria kai.
1TI 5:9 Timoteu waku wati­po­wyro hiwu iporo rakat 60 anu ieĩne'en hat he'aito wẽtup ok wywuat yn ieĩne'en hat mi'i rokirẽ wuat he'aito ku'uro rakat. Mi'iria eti'a­tuset pehik i'ewy­wuaria wywo Iesui mohey haria miium Tupana piat kaipywiat i'atuieĩ­ne'en hamo.
1TI 5:10 — Wakuap yn nug hat meiẽ hiwu i'atu'e irania'in hap upi watikuap wakuat hiwu. — Sa'a­wy'i tomẽ­pyt'in erohik kahato hat i'atu'e. Meiẽ — Ereke ro ui'yat pe e hat wuat'i piat hat meiẽ i'atu'e hap upi watikuap wakuat hiwu. — Tupana emiit ho'opot haria powyro kahato hat meiũ i'atu'e ihaky­'e'i rakaria eropat hat meiũ wuat'i e'at piat waku yn hap nug hat meiũ i'atu'e hap upi watikuap uwe wakuat hiwu. Mi'i wahet­pehik kuap Tupana mohey haria miium kaipywiat ieĩne'en hamo.
1TI 5:11 Ma'ato yt etipehik tei'o hiwu ipakup te rakaria mekewat Tupana mohey haria miium kaipywiat gupte'en haria set kape katu­pono mi'i meiũran ipakup te rakaria ti iky'esat re i i'atue­'aito hap i ra'yn. Ta'a­tu­waure ra'yn Aika­'iwat Iesui wẽtup ta'a­tue­'aito i ra'yn ky'esat hap ky'ewi. Yt iwe'eg i rakaria wo tukup­te'en.
1TI 5:12 — Uito ti aru yt karãmuo i ra'yn uhe'aito an i'atu'e pytkai. Iesui kape yn na'yn ti aru uipotpap ta'a­tu'e pytkai hiwu ipakup takaria meiũran ta'a­tu­ky­'esat i ra'yn ihainia hawyi meremo ta'a­tu­waure sa'a­wy­'iwuat ta'a­tuehay.
1TI 5:13 Mi'i hawyi irania'in tuwe­mo­hapap kahato aiperup hap ete sat'i sat'i getap ko'i upi ne'i. Mi'i hap kaipyi tuwe­mo­hapap wo'o­kuasa kuasa i hap ete. Aiwu­'uka hap ne'i enoi enoi hap ete. Wo'o­ma­'at'i ma'at'i hap ete yn ihay. Wemõti hap sehay sa'ag yt watikuap teran i rakat ta'a­tu­hu'at.
1TI 5:14 Mi'i tupono atiky­'esat — Waku e'aito i ro wato'e ipakup te rakaria hiwu pe. E'aito pakup i ra'yn hawyi waku emẽpyt'in hawyi mono eti'a­tue­ropat e'yat pe waku ere'e. Waku pe tukup­te'en hiwuria Iesui mohey haria pote ti aru yt i'atuehay sa'ag kuap i ahewa­nĩ­kaptia imohey ahepiat hap ete.
1TI 5:15 I'ewyte tukup­te'en irania'in hiwuria sa'a­wy­'ite Iesui mohey haria mi'iria wen ma'ato koitywy ahiagnia akag Satanai ehay upiat myhu'at haria mi'iria.
1TI 5:16 Ehenoi irania'in hary­po­ria'in me ihainia'in me Iesui mohey haria pe — Toĩ wẽtup ok e'yat pe hiwu mi'i pote waku eweipo­wyro eweipoi mekewat e'yat piat hiwu ere'e o. Yt ewewei­po­'oro tei'o e'yatypiat hiwu Iesui mohey haria miium wuat ipoi hamo katu­pono ti typy'i kahato hiwuria yt uwe i mipo­wyro ko'i. Waku wati­'a­tu­po­wyro kahato hiwuria yt uwe i mipo­wyro ko'i ere'e o Timoteu Iesui mohey haria pe.
1TI 5:17 Timoteu waku wati­'a­tu­po­wyro kahato Iesui mohey haria akag ko'i sa'up mo. Mi'iria ti i'atu­potpap kahato po'og irania'in kai aimu'e kahato Tupana ehay mohey hap ete pote waku watum po'og sa'up mi'iria pe. Typy ok miit potpap hap sa'up ewy waku watum.
1TI 5:18 Katu­pono sa'a­wy'i Tupana to'e miwan me — Wãi yt eweikytyt tei'o eihũ wewato ahup ipotpap awati eha'ok hap etiat turan. Waku tenuk topotpap popuo e Tupana sa'a­wy'i. I'ewyte ewetum o eheropat haria pe i'atu­we­potpap hap ewy sa'up atiky­'esat e Tupana. Mi'i hap ewy waku sa'up watum ipotpap Tupana ehay etiat aimu'e haria pe.
1TI 5:19 Timoteu waku wahenoi Iesui mohey haria pe — Yt ewei'a­tuehay mohey tei'o meremo aimu'e haria kuasa hap ete ai'akag kuasa hap ko'i ete. Ma'ato waku hepamo apowa­to'e ikuap sese haria pe akasa sese haria pe typy ok mye'ym ok pe hap ewy.
1TI 5:20 Ma'ato ai'akag ti'a­parap pywo pote waku wati­nãpin wahewãi wuat'i ehamo. Mi'i hap watunug pote irania'in te'e­ro­ken'ẽ i'ewywuat sa'ag nug hap pupi.
1TI 5:21 Timoteu etunug no haty wo yne yne enãpin hap uhepiat hap ewy. Eti'a­tu­nãpin ui'ewy yne itotiaria to'e­wy­'ewy. E'yian pupi o yt ereken'ẽ tei'o e'ywania pupi i'atu­nãpin hamo. Ewy ok sese pupi i'ewyte yt ereken'ẽ tei'o inãpin hamo ma'ato waku torania eti'a­tu­nãpin perup'i puo. Woro­nãpin Tupana ehamo Iesui ehamo i'ewyte atipy piaria wakuaria ehamo woro­nãpin uha'yru.
1TI 5:22 Yt naku i ai'akag wanuaria wati­'a­tu­'airo meremo Timoteu aimu'e sese hanuaria are. Karãpe irania'in ahã'ãg sa'ag nug hamo waku — Wãi yt atunug neran i wato'e. I'ewyte waku ereĩne'en pya sa'ag nug hap kai are.
1TI 5:23 Timoteu yt naku i kahato ereĩne'en i'ahu kahato ime'en ete rakano. Waku mohag Uwa hy etu'u eme'en mog hamo. Yt naku i y'y yn etu'u are.
1TI 5:24 Tukup­te'en yt nakuat i nug haria yne piat heremo rakaria. Mi'i haria pe — Yt nakuaria i sese wato'e. Tupana mi'a­piheg wuaria wato'e. I'ewyte irania'in minug sa'ag yt heremo i rakaria tukup­te'en. Mi'iria ti yt watikuap i sio waku sio yt wato'e kuap i ma'ato put'ok'e ra'yn i'atu­minug sa'ag moherep hap e'at pe Tupana tomo­herep yne aru yt heremo i rakat aiminug sa'ag.
1TI 5:25 I'ewyte tukup­te'en waku nug haria yne piat heremo rakaria. I'ewyte tukup­te'en mig'i wuat wakuap nug haria ma'ato meiũran heremo yne i'atu­minug wakuap ko'i Tupana tomo­herep mi'i hap ko'i are Uito Pauru.
1TI 6:1 Timoteu mio tã ere'e ro Iesui mohey haria pe semiit'in me wo'o­'e­ropat haria pe — Uiwy­ria'in waku wati­'a­tu­mõ­typot kahato aipo­'oro haria aika­'i­waria ere. Mi'i tã watunug mot'i pote ti aru ahehay wo aipotpap ete meiũran yt te'e­ru­we­ky­ry'i hin i Ahetu­pana ete ihay aiwẽ piat hap ete pãi ere o.
1TI 6:2 Aipo­'oro hat Aika­'iwat Iesui mohey hat pote waku wati­mõ­typot po'og aipotpap kahato hap upi katu­pono aheyke'et ewy topy­hu'at Iesui mohey hap ete aimi­mohey ewywuat hat pote. Mi'i pote ere'e i — Wẽtup yn aipotpap Aika­'iwat aito pote yt naku i wati­hay­mo­weu­ka'i aika­'iwat mesu­wa­rotiat Iesui mohey hat pote. Waku wati­'a­tu­ky'e aikotã aheyke'et ewy pãi ere wo'o­'e­ropat haria Iesui mohey haria pe. Mi'i e hap eti'a­tu­mu'e kahato o emimu­'eria pe Timoteu.
1TI 6:3 Tukup­te'en ti itote irania'in wo'o­mu'e haria wẽtup sehay wuat haria yt Aika­'iwat Aipo­typot Iesui etiat hin haria i yt uimienoi Iesui etiat yt ewywuat haria i. Ta'i yt pywo pe hin i i'atu­mienoi.
1TI 6:4 Mi'iria ti — Uruto po'og uruikuap irania'in kai e haria yt ta'a­tukuap i kahato pytkai tu'uka yn sehay wo pytkai. Kat e hap kat e hap sehay hit ete tu'uka teran to'ope. Mi'i hap kaipyi to'oe­ha­'y­wywi yn to'ope. Ta'a­tu­pat'ok pat'ok Iesui mohey haria tu'uka sehay wuat haype. To'o­mohit mohit kahato to'ope ta'a­tuehay wo. — Yt naku i mi'i miit i'atu'e yn to'ope. Waku mi'i haria yt eweiwesat i tu'uka teran eiwywo turan ma'ato yt ewetunug nei'o mi'i haria ehewa­nĩkap mo ma'ato eweiky'e mi'iria tu'uka teran pytkai are.
1TI 6:5 I'atu­wa­nẽtup hap yt toto kuap i. Sehay wakuat yt kat i i'atu­wa­nẽtup hawe. Mi'i pote tu'uka yn hap toĩne'en i'atuehay kaipyi i'atu­wa­nẽtup hawyi. — Iesui atimohey hawyi hekat rakano areĩne'en i'atu'e te'e­ru­wepe yt mi'i tã hin i pytkai i.
1TI 6:6 Uwe uwe iwepit Tupana miky­'esat nug hap ete sio yt kat i tekat pytkai mi'i hat toĩne'en hekat kahato rakano Tupana wanẽtup hawe.
1TI 6:7 Pyno apo'are kat ko'i ai'y­wã'ĩ turan waterut aheka­re'en aipo hit pe. Pywo pe ti yt kat i waterut aipo pe. I'ewyte aiku­'uro turan kat som apo watioto kuap. Yt kat kuap i wy.
1TI 6:8 Toĩ aimi'u ahesokpe aikosap hamuat i wyti pote ti waku ra'yn ahete waku wato'e aiwo­'ope.
1TI 6:9 Ma'ato hekat kahato teran rakaria ti aru hewo hamuat ahiag ewamiri pe tominug sa'ag wywo ahiag esuki pe. Tominug sa'ag kaipyi i'atuewo kahato aria kape yt iwe'eg i hap kaipyi ta'a­tu­mi­ky­'esat sa'ag upi. Mi'i kape miit'in i'atuewo kahato aria kape hekat kahato teran rakaria.
1TI 6:10 Timoteu aima'at sese hap ne'i ti uhekat iwato sese hap ky'e hap. Mio tã watu­wa­nẽtup hap kaipyi ti tut aikotã watunug sa'ag ahekat wati­puẽti hamuat. Tukup­te'en irania'in Iesui mohey haria sa'a­wy­'iwuat haria ma'ato mio mi'i haria ti'atoiat ra'yn imohey hap ta'a­tuepiat hap ta'a­tukat hap ete yn te'e­ru­we­mohey. Yt i'atu­wepit hin i ra'yn mi'iria. Koitywy i'atu­'arot hap yn na'yn i'atuete. Yt te'e­ru­wehum kuap i ta'a­tuekat kahato pytkai.
1TI 6:11 Ma'ato aito ti Tupana emiit'in sese aito mi'i tupono waku yt wati­ky­'esat i mekewat uhekat po'og hap — Ati'a­tu­ky­'esat e hap. Po'og waku wati­ky­'esat hãpyk kahato Tupana wywuat waku rakat. Tupana ky'e hap po'og waku imohey hap po'og waku aiwo­'o­ky'e hap po'og waku. — Atimohey pot'i Iesui aru aho'opot kahato pytkai ai'e hap yn waku aiwa­nẽtup hawe aiwe­pe­rup'i hamuat hap kat hap yn aiwa­nẽtup hawe aito Tupana emiit'in hap ewy.
1TI 6:12 Karãpe wateput yn hawyi meiũran watu­we­pokuap kahato mi'i hap ete. Mi'i hawyi put'ok­wa­to'e irania'in e'yianmete. Mi'i hap ewy waku watoĩ­ne'en Tupana mohey hap ete. Meiũran put'ok­wa­to'e Tupana ete wuat'i e'at piat aheĩne'en iwywuat hap tote. Mi'i hamuat kape ha'a­wy­te­pyite aikaykay karãpe — Woro­mohey En Iesui ere tope haty wo wuat'i Iesui mohey haria ehamo turan.
1TI 6:13 Koitywy woro­po­'oro en Timoteu etunug yne ro epo'oro hap ko'i Iesui mienoi ko'i.
1TI 6:14 Mi'i hap upi ereĩne'en pote ti aru yt kat i sa'ag ekai topy­hu'at Iesui e hap yn nug hamo ereĩne'en mote. Ma'ato irania'in wo'o­mu'e miit'in kaipywiat hap etiwaure yne yt Iesui mienoi ewywuat i. Waku yne epo'oro hap ko'i etunug yne Aika­'iwat aimie­katup put'ok'e hap kape. Mi'i hap nug hamo woro­po­'oro Tupana ehamo i'ewyte Aika­'iwat Aipo­typot Iesui ehamo Wuat'i Miit'in Moieĩne'en hat ehamo. Sa'a­wy'i Aika­'iwat Iesui yt token'ẽ hin i morekuat Pũsiu Piratu pupi ma'ato tohenoi kahato pywuat sese sehay. Mi'i hap ewy o ereĩne'en Timoteu.
1TI 6:15 Meiũran ti aru Iesui Tupana tipo­'oro i tepiat iky'esat hap e'at pe toipo­'oro i ra'yn. Waku kahato Iesui mi'i yn ni Wuat'i Miit'in Porekuat no. Mi'i ti more­kuaria Porekuat i'ewyte wuat'i ka'iwat Ka'iwat. Waku kahato Iesui.
1TI 6:16 Aito ti yne iku'uro rakat nuaria aito ma'ato Iesui ti wuat'i e'at piat ieĩne'en sese hanuat ra'yn teiam hẽtyhot kahato rakat pe. Yt uwe i teha'at kuap howawi. Yt uwe i tokosap kuap heiam hẽtyhot rakat kape. Yt uwe i teha'at kuap mesu­wa­rotiat teha wo. Aheha yt put'ok'e i ai'a­kasa hamo. Pyno to'iro Iesui wati­mõ­typot katu­pono wuat'i kawiat hesaika rakat Mi'i. Wuat'i e'at piat ieĩne'en hat mi'i. Mi'i tupono waku wati­mõ­typot Mi'i.
1TI 6:17 Pyno tukup­te'en Iesui mohey haria aipy­'a­setpe hekat rakaria. Waku mi'iria pe ere'e — Ewei'atoiat ro — Uito po'og wakuat irania'in kai eiwa­nẽtup hap ere'e o. I'ewyte yt eheka­re'en ne'i tei'o eweimohey ma'ato Tupana yn o eweimohey ere katu­pono ehekat yt eheĩne'en mot'i hamuat hin i ma'ato Tupana hegyi'at kahato tutum kahato ahepe wuat'i aimo­wepit kahato hamuat ere o.
1TI 6:18 Wakuap nug haria wo o eweikup­te'en ere'e. Waku eipotpap kahato wakuap nug hap ko'i ete yn. Hegyi'at rakaria wo o eweikup­te'en ere. Yt hekat i rakaria tukup­te'en eimikuap pote eweimõ'ẽ mi'iria pe ehekat ere o hekat rakaria pe Iesui mohey haria pe.
1TI 6:19 Ta'a­tunug ta'a­tu­nãpin epiat hap pote ti aru hekat rakaria wo sese tukup­te'en atipy pe.
1TI 6:20 Timoteu waku etopag yne mesuwat ui'e hap ewanẽtup hawe. Mesuwat uimiwan waku iheg me epy'a pe. Tukup­te'en ti sehay wuat — To'iro watu­'uka e haria ma'ato yt eti'a­tu­wesat rei'o mi'iria. Tupana etiat i'atuehay sa'ag hap kape o yt ewaure ka'a tei'o. — Uruto po'og uruikuap uruwa­nẽtup hawe i'atu'e ahepe yt ta'a­tu­we'eg i haype. Pyno yt erewa­nẽtup mot'i tei'o i'atuehay kape.
1TI 6:21 I'atuehay — Uito po'og i'atu'e hap i'atu­ma'at hamo topy­hu'at. Tupana mohey hap ta'a­tu­'atoiat ra'yn aikotã mu'ap wati­waure hawyi aho'o­wasat hap ewy. Pyno ahẽtup kahato Tupana pe — Tupana eti'a­tu­poi­tyro Timo­teu'in torania itotiaria gupte'en haria are'e ahẽtup. Pyno toran na'yn. Uito ti Pauru
2TI 1:1 Timoteu mesup uimiwan atipo­'oro kuekatu ui'e hap. Uito e'ywot Pauru mekewat Aipo­typot mi'airo tehay moherep wuat'i miit'in mianuat hat. Karãpe etomohey Iesui hawyi pywo Aipo­rekuat sese ere o wuat'i pe. Mi'i pote ti aru ereĩne'en wuat'i e'at pe Tupana wywo ere o katu­pono mio tã e hap ti sa'a­wy­'ite Tupana tomo­herep uhepe.
2TI 1:2 Ta'i uha'yru sese ewy ereĩne'en Timoteu. Woro­ky'e kahato en. Ai'ywot sese ti Tupana i'ewyte Aika­'iwat sese ti Iesui. At ka'ap mio tã are Tupana pe — Waku etipo­wyro ro Timoteu egyi'at hap kaipyi. Waku eraha'at Timoteu kape iky'e hap wywo are. Iwanẽtup hap wẽtup yn etum iwepit hamuat are Tupana pe meiũpepyi eupi.
2TI 1:3 I'ewyte — Waku kahato En Uru'ywot are. Ta'i Tupana eheropat kahato hat uito Pauru. Emiky­'esat ewy yn atunug neran. Aikotã sa'a­wy'i ai'y­wania tunug emiky­'esat ewy i'ewyte uito atunug mesup are Tupana pe. Karãpe uiwa­tetup ewawi turan Timoteu — Waku kahato En Tupana are yn wãtym muo ihot'ok ewy ewy are Tupana pe.
2TI 1:4 Timoteu yt atiwaure kuap i aikotã e'yatypiat areĩne'en turanuat aikotã erewak uiky'e epiat haype hap. Uipap kahato ewawiat ui'a­kasa hamo hawyi atikuap uimo­wepit kahato en hap.
2TI 1:5 Uimo­wa­nẽtup kahato en Iesui mohey sese hap kape mekewat pywuat sese hap yt eso hin i Iesui mohey hap ete. Sa'a­wy'i ti ehary Iroiti i'ewyte ety Eunise tukup­te'en imohey sese haria. Mi'i hawyi koitywy en i ra'yn i'atu ewywuat imohey sese hare en ereĩne'en.
2TI 1:6 Mi'i tupono woro­nãpin Timoteu. Sa'a­wy'i woro­'atoiat en itote Iesui mohey haria akag wo. Mi'i hap e'at pe areponug e'akag ete hawyi Tupana tum tesaika hap topotpap nug epiat hamo. Pyno waku ewatetup o mi'i hap kape.
2TI 1:7 Tupana tum na'yn ahepe Topã'ãu aimoe­saika kahato hap yt uwe pupiat i aiken'ẽ hamo. Koitywy Topã'ãu wo aipyt'at nug kahato ra'yn wo'o­ky'e hamo. Mi'i kaipyi koitywy watu­we­nãpin kuap ta'yn sa'ag nug hap akit hamuat.
2TI 1:8 Yt eremõti tei'o Aika­'iwat ehay moherep hamo. I'ewyte uito areĩne'en wo'o­pyhik hawe Iesui mohey hap upi pytkai yt eremõti tei'o — Uito Pauru mẽpyt e hamo. Ma'ato waku ere — Uito i'ewyte aho'opot hawe areĩne'en wy mesuwat sehay wakuat moherep hap upi waku ere o Tupana pe. Uimoe­saika hap ok tã aru atunug ere o Tupana pe Timoteu.
2TI 1:9 Tupana aheha­kye­ra'at hawyi ainug temiit'in wo. Yt aiwa­nẽtup kahu hap upi i yt ahewaku hap upi i ma'ato tomi­ky­'esat no tegyi'at hap ok tã aheha­kye­ra'at wuat'i e'at piat aikotã Tupana to'e nimo sa'a­wy'i tutunug yne wuat'i hap yianmete — Ati'a­tue­ha­kye­ra'at ti aru Uha'yru mohey haria e Iesui etiat hap ewy.
2TI 1:10 Pyno koitywy watikuap kahato hegyi'at ahepiat hap katu­pono Aika­'iwat Iesui ut hawyi tuwe­mo­herep ta'yn ahepe aikotã aiku­'uro hap kaipywiat aimo­herep hamo. Tehay wakuat toimo­herep ta'yn ahepe aheĩne'en wuat'i e'at piat hamuat hap.
2TI 1:11 Ta'i Tupana ui'airo topot­po­'oro sese wo wuat'i puat tehay moherep hamo miit'in atumu'e uhepiat hamo.
2TI 1:12 Mi'i hap upi ti aho'opot aikotã aikotã hap ko'i. Miit'in i'atu­mi­ky­ry'i kahato uhete ma'ato yt aremõti hin i Tupana ehay ete katu­pono atikuap kahato uiwy uimi­mohey Iesui. Mi'i hap toikuap i'ewyte uito atikuap are. Yne uimiium tepiat toi'a­tunug iheg me itote tut hamuat kape.
2TI 1:13 Timoteu epap kahato o uimienoi epiat pywuat sese sehay upi. Ewatetup mi'i e hap ko'i upi katu­pono aikotã aikotã ereĩne'en hamuat ahenoi epe. Mi'i hap tote ereĩne'en wuat'i e'at pe. Etomohey Aika­'iwat Iesui. Etiky'e kahato Mi'i. Mi'i hawyi wẽtup piit ewy yn watoĩ­ne'en Iesui wywo.
2TI 1:14 Tupana Pã'ãu esaika hap topy­hu'at kahato ahepe. Kat e hap kat e hap wakuap ko'i tutum epe emohey haype. Mi'i ko'i o etat kahato etomoheg kahato ewanẽtup hawe uha'yru.
2TI 1:15 Uhyt Wikeru i'ewyte uhyt Emosene yi Asia piaria ui'atoiat ra'yn i'ewyte itotiaria irania'in yt i'atu­wese i ra'yn uhete.
2TI 1:16 Ma'ato mehĩ Onesi­wuru ti yt ui'atoiat hin i pãi. Uipo­wyro kahato mi'i. — Tupana are etum o wakuap yn aiwy Onesi­wuru pe imẽpyt'in me are torania i'yaty­piaria wywo karania wo etum o wakuap Tupana are. Ta'i uimo­wepit hat kahato mi'i. Yt token'ẽ hin i uipyhik hap pupi. Tut tuereto uipyhik hap kape. Yt tuwe­mõti hin i — Uito Pauru ekatuwy to'e hamo.
2TI 1:17 Put'ok'e Huma pe hawyi yt toikuap i aiũpe uipyhik hap tawa Huma piat hap ma'ato mi'i pytkai uikat kahato. Meremo put'ok­to'e itotiat hawyi mi'i hawyi uipuẽti.
2TI 1:18 Tupana ahẽtup aiwy Onesi­wuru upi. Etum egyi'at kahato hap Onesi­wuru pe are. Eti'a­tu­moe­hãite i'yaty­piaria wywo are yn. Pyno Iesui tut turan atiky­'esat Onesi­wuru pe ha'up ikahu rakat are Tupana pe. Pywo etikuap kahato ra'yn Timoteu aikotã sa'a­wy'i areĩne'en tawa Ewesu piat turanuat uipo­wyro kahato hat Onesi­wuru topy­hu'at itote. Mi'i hawyi ipoityro hap ahẽtup kahato Tupana kaipyi uito Pauru.
2TI 2:1 Timoteu Aipo­typot Iesui hegyi'at kahato tesaika hap ium ahepiat hamo. Mi'i hap kaipyi ereĩne'en hemiit hesaika kahato rakano hap wẽtup piit ieĩne'en hap ewy ra'yn ereĩne'en iwywo.
2TI 2:2 Uimienoi kuap kahato hat en uha'yru katu­pono uiwywo yn ereĩne'en uipot­mu'e turan. Yt etiwaure tei'o ui'e hap ma'ato etomo­herep yne o Iesui mohey kahato haria pe — Imohey hap yt atoiat hin i haria pe. Ahaipe­piaria piat uimienoi moherep hanuat ereĩne'en.
2TI 2:3 Aikotã surara tuwe­mo­so­'o­pot'i hap ewy eremo­so­'opot uha'yru. Surara sese ewy o ereĩne'en Iesui emiit wakuano.
2TI 2:4 Katu­pono ti topotpap hawe ti surara tiky­'esat topo­'oro hat mowepit hap yn toiky­'esat. Mi'i pote toto topo­'oro hat miky­'esat nug hamuat. Sa'a­wy­'iwuat tekat ko'i kape yt tuwe­wa­nẽtup i ra'yn ma'ato tuwa­nẽtup surara akag miat topo­'oro hap kape yn. Mi'i hap ewy ro ereĩne'en Aipo­typot piat epo'oro hap ewy.
2TI 2:5 Karãpe aheput hap ete wato­'oiã'ãg hap ewy uwe po'og ihyha hap kuap hamo waku hãpyk kahato rakat morekuat piat ainãpin hap ewy waku watunug. Yt mi'i hap ewy i pote yt uwe i mi'i po'og i'atu'e ahepe aihyha pytkai. Ma'ato i'e hap ewy wateput mi'i pote miit'in mimõ­typot no watoĩ­ne'en. Mi'i hap ewy ti waku watoĩ­ne'en hãpyk kahato imohey hap ete to'o­'e­wywuat seput kahato haria ewy Timoteu.
2TI 2:6 Karãpe — Aiwe­so­'o­pot'i popuo watikoi aiko wato'e mi'i rokirẽ ti ma'ato karãpe haat hawyi aiwano topy­hu'at sa'a­wy­'i­tewuat haat. Mi'i hap ewy ti Iesui ehay upi waku watu­we­so­'o­pot'i popuo watu­we­potpap.
2TI 2:7 Erewa­nẽtup to uimienoi kape Timoteu. Mi'i pote ti aru Aika­'iwat tum epiat wuat'i etiat kuap hamo.
2TI 2:8 Timoteu ewatetup o Aika­'iwat Iesui kape. Ta'i mi'i ti morekuat Tawi emiariru Emiariru sese. Mi'i Miit Tupana mimoieĩ­ne'en pakup i ra'yn hat ahenoi wuat'i puo.
2TI 2:9 Mi'i mienoi upi ti aho'opot te. Uipo'i po'i ra'yn haity wo wo'o­'auka hat ewy. Uito uipyhik kuap ma'ato Tupana ehay ti yt uwe i ipyhik kuap yt uwe i i'akit kuap.
2TI 2:10 Ma'ato yt uiwẽ­pohep hin i Iesui mohey hap ete wãi'i­'a­tu'e pytkai. Ui'auka pote ui'auka ma'ato yt uipohep hin i te. Katu­pono Tupana ti'a­tue­ha­kye­ra'at teran kahato tomi­'ai­roria aho'opot kahato Iesui mohey i'atuepiat hamuat pytkai. Mi'i hap kaipyi Tupana ti'a­tue­ha­kye­ra'at mi'iria. Mi'i hawyi Iesui kahu hap ewywuaria ra'yn tukup­te'en iwywo wuat'i e'at pe ra'yn.
2TI 2:11 — Uiku­'uro pote uiku­'uro ma'ato yt woro­'atoiat Tupana wato'e pote watoĩ­ne'en iwywo wuat'i e'at pe waku wato'e. Hãpyk kahato sehay mi'i.
2TI 2:12 — Iwywo waho­'opot pote iwywo morekuat no watoĩ­ne'en waku wato'e ma'ato — Atoiat Iesui mohey hap wato'e pote i'ewyte — Yt uimohey hat i meiẽ e ahepe e.
2TI 2:13 Watoiat pytkai yt ai'atoiat hin i. Yt ai'atoiat i kat pote yt heso i. — Yt karãpe i ti aru woro­ho­'o­'atoiat e. Mi'i e hap ko'i ti aimi­mohey wuat wato'e waku kahato.
2TI 2:14 Timoteu eti'a­tu­nãpin no haty wo epotmu­'eria — Tupana yt tiky­'esat i wyti aiwo­'oe­wa­nĩkap hap ne'i watunug tehay enoi turanuat hap. Yt kan hamo i watu­'uka sehay hit kuap hap ete e ma'ato aiwu­'uka i pote ti yt kat i aiwo­'o­wehik hap itote ere o. Ewe'eg wo o mi'i hap pupi katu­pono Tupana toĩne'en aipy­'a­setpe aiwa­'a­tunug turan.
2TI 2:15 Eremu'e kahato at ka'ap Tupana ehay enoi hãpyk hamuat hap ete. Yt epohep hin i o Tupana miky­'esat nug hamuat. Mi'i hawyi — Waku kahato epotpap uhepiat hap e Tupana epe. Mi'i hawyi yt eremõti hin i Tupana pupi hãpyk kahato epotmu'e tehay sese wuat pote.
2TI 2:16 Waku watoiat kahato yt aiwe'eg i hap aiwo­'o'ehay wuat wu'uka hap aiwo­'o­mu'e turanuat hap katu­pono mi'i hap yt kan hamo i ma'ato watunug mi'i ne'i pote Tupana tuwe­mõti aipupi i'ewyte wati­'a­tu­putsit ne'i irania'in Tupana kuap teran hap kaipyi.
2TI 2:17 Uhyt Imeneu uhyt Wiretu mi'iria tu'uka kahato sehay wo aiwo­'o­mu'e turan. Yt ikahu hin i iwu'uka hap. Haty kahato aiwo­'o­ky'e hap ete. Topy­hu'at aikotã ahepihi haty kahato hap ewy. Sehay wuat iwu'uka hap miit'in wo'o­'atoiat hap ewy. Yt kan hamo i watu­'uka sehay wo.
2TI 2:18 Ha'a­wyte aimu'e haria uhyt Imeneu uhyt Wiretu pywo sehay upiat haria tukup­te'en wen ma'ato mio ti ta'a­tu­'atoiat ra'yn. Mi'i hawyi wẽtup sehay kape — Tupana ti'a­tu­hymut kahu ra'yn map haria i'atu'e. Mio tuwat ra'yn yne ra'yn Iesui upi i'atu'e. Mio tã i'atu'e pote aimogyt kahato ahepiat imohey hap etiat waure­wa­to'e pote. I'atuepiat aimu'e hap toĩne'en aikotã hepihi wato yt uwe i imog kuap hap ewywuat are. Sat'e ra'yn irania'in ete hap ewy.
2TI 2:19 Ma'ato aito yt watoiat hin i te pywuat sehay mohey hap katu­pono Tupana sa'y­ru'in saki­'yt'in aito. Watunug i'yat iheg nakano pote yt ta'at i. Mi'i hap ewy wato­mohey kahato. Pywo kahato pote yt watoiat i. Aikotã Tupana to'e sa'a­wy'i hap ewy — Woro­ho­'okuap ti eipe uimẽ­pyt'in e. I'ewyte uwe uwe to'e — Uito Tupana wano e mi'i hat pe — Pyno eminug sa'ag etoiat yne e Tupana.
2TI 2:20 Hekat rakat yat koro pe tukup­te'en kahato seiam ko'i yt to'o­'e­wywuat ewywuat rakaria i. Irania'in wuat'i e'at piat ahenuk hap ma'ato irania'in aiwy­ria'in sese poi hap ewy tukup­te'en. Mi'i ko'i yt wẽtup kawiat yn i irania kui'a kawiat irania yi kawiat irania hekat rakat kawiat imehit rakat. Mi'i ko'i heiam wati­puẽti getap wato pe.
2TI 2:21 Watoiat yne sa'ag nug hap pote hekat rakat kui'a ewy watoĩ­ne'en ekui'a wo i'yat koro pe ikahu kahato imowepit kahato hamo. Mi'i hawyi — Waku ti rat uimi­ky­'esat nug hamo en e ahepe Tupana. Mi'i hawyi Tupana emiit sese wo watoĩ­ne'en. Mi'i hawyi kat ko'i kat ko'i imiky­'esat yn na'yn watung.
2TI 2:22 Timoteu yt erewa­nẽtup tei'o emotag hap turan epiit miky­'esat sa'ag nug hamuat kape ma'ato meremo o etoiat. Erepik meremo o mi'i hap kaipyi hãpyk nug hap kape Tupana mohey hap kape wo'o­ky'e hap kape wo'o­wese nug hap kape irania'in Iesui mohey haria upi urupo­wyro Tupana e haria upi wanẽtup kahu haria upi.
2TI 2:23 Uha'yru tukup­te'en kahato ti sehay wuat wu'uka teran haria yt kan nuat i ihay rakaria. Mi'iria pe waku u pãi u an wato'e yn na'yn i'atuehay pe. Yt wati­'a­tu­wesat i ra'yn iwu'uka hap sehay enoi pote.
2TI 2:24 Katu­pono yt uwe i Aika­'iwat eropat hat wakuat wu'uka hano toĩne'en. Ma'ato hemiit sese ti iwese yne miit'in ete. Wo'o­mu'e kuap kahato hat yt ipy'ahak hin i ma'ato hepamo ikuap haria ete Tupana eropat hat.
2TI 2:25 Hepamo towese popuo toi'a­tu­nãpin kuap kahato ipy'ahak teran tetiat rakaria. Eti'a­tu­mu'e mio tã irania'in mote meiũran Tupana tum kuap i'atuepe paa'i­'a­tu'e hamuat ta'a­tu­'atoiat mono ta'a­tu­minug sa'ag — Pywo ra'yn ta'a­tu'e haype.
2TI 2:26 Mi'i hap kaipyi ti aru te'e­ra­'aipok ta'yn ta'a­tu­mo­we'eg hap kape. Mi'i hawyi ti aru toi'a­tue­ha­kye­ra'at ra'yn ahiag ewamiri pyi aikope ahiag miky­'esat yn ta'a­tunug. Mi'i hap kaipyi wati­'a­tu­mu'e wanĩ­kaptia aiwese kahato hap wywo wati­'a­tu­mu'e. Mi'i hap ewy waku watunug Timoteu are uito e'ywot Pauru.
2TI 3:1 Timoteu niatpo ti aru watoĩ­ne'en wuat'i sa'ag nug haria e'at put'ok'e turan katu­pono imohey haria piat ho'opot hap e'at mekewat e'at pe.
2TI 3:2 Katu­pono mekewat e'at pe yt hegyi'at i rakaria tukup­te'en kahato — Ewat uiano yne i'atu'e. Uito po'og ekai e haria. Uito po'og atikuap ekai i'atu'e. To'o­ky­ry'i kahato Tupana ete. I'atuehay ta'a­tu­'ywot ta'a­tuty piat yt ta'a­tu­mohey hin i. Etum ne'en ne'i ikahu rakat i'atuepiat hawyi — Waku yt i'atu'e hin i egyi'at hawe. — Yt kat i Tupana i'atu'e i.
2TI 3:3 Yt uwe etiat i iwese rakaria mi'iria. Ehaky­'e'i hap yt kuap i haria. Ta'a­tu­mo­weu­ka'i yn miit'in. Meremo wu'uka teran haria haiwot rakaria wakuap nug hat etiat ipy'ahak takaria.
2TI 3:4 Ta'a­tu­wy­ria'in ma'at'i ma'at'i hanuaria wo i tukup­te'en. I'atu­hu­hai'i yn tukup­te'en. — Uito po'og e hap yn i'atu­wa­nẽtup hawe. Ta'a­tu­wepit hap kape yn te'e­ru­wa­nẽtup. Yt Tupana mowepit hap yt kape i te'e­ru­wa­nẽtup.
2TI 3:5 Te'e­ru­wa­'a­tunug Tupana mõtypot hamo ma'ato yt pywo pe i. Yt ta'a­tu­ky­'esat hin i Tupana esaika hap ta'a­tu­mo­pakup i hamuat. Mi'i ewywuaria ti aru pywo tukup­te'en kahato. Mi'i tupono o ero'oksep yn na'yn mi'i haria pupi. Eiwe'eg wo o mi'i haria ewamiri pupi.
2TI 3:6 Hary­poria yat pe yt we'eg i hat yat pe tuwe­hyt'ok yt uwe mikuap mo i wẽtup sehay wuat imu'e hamo ima'at hamuat haype. Ta'a­tu­ma'at kuap kahato katu­pono mekewat hary­po­ria'in yt i'atoiat teran hin i ta'a­tu­minug yt ta'a­tu­we'eg i hap ko'i. Mi'i hary­poria iky'esat kahato teha­kye­ra'at Tupana piat hap ma'ato yt totoiat teran hin i tominug yt naku i yt iwe'eg i hap ko'i pytkai.
2TI 3:7 Pywuat sehay atikuap teran i'atu'e wen ma'ato yt ta'a­tukuap i ta'a­tu­mu'e kahato pytkai.
2TI 3:8 Aikotã sa'a­wy'i pywuat sehay pun haria mehĩ Iane i'ewyte mehĩ Iãpere ewywuat gupte'en haria mi'iria. Sa'a­wy'i mi'iria Musei ehay pywuat yt ta'a­tusat i. Mi'i haria ewywuaria ti aru mesuwe tukup­te'en aru. Yt te'e­ru­wa­nẽtup kuap i pywuat sese sehay kape katu­pono ta'a­tuepiat imohey sa'a­wy­'iwuat hap ta'a­tupun ne'i.
2TI 3:9 Aima­'at'i ma'at'i hap kaipyi wuat'i miit'in ti'a­tukuap ta'yn wo'o­ma'at haria wo mi'iria. Aikotã sa'a­wy'i Iane Iãpere ewywuaria mi'iria.
2TI 3:10 Ma'ato en yt mi'iria ewywuat hin i Timoteu katu­pono en uhaipepiat kahato emu'e uhepiat hap ewy kahato nug hat en. Uiminug wakuat e hamuat ewy kahato nug hat en. Uipy­'ãtap upiat ewyry ra'yn. Iesui mohey uhepiat hap upi hewyry mot'i kahato rakat ra'yn en. Yt uihyha i hap upi hin i ewyry en. Uhepiat miit'in ky'e hap upi uhepiat ho'opot hap kuap hamo ewyry ra'yn.
2TI 3:11 I'ewyte etikuap kahato i'atu­mi­ky­ry'i uhaty'i haty'i hap ko'i. Sa'a­wy'i karãpe areĩne'en tawa Atiokia pe tawa Ikuniu pe tawa Iritara pe ta'a­tu­mi­ky­ry'i sa'ag kahato uhete. Uhaty'i haty'i uimo­so­'opot uimo­ha­ky­'e'i ma'ato uipo­re­ro­kosap ne'i Uika­'iwat Iesui.
2TI 3:12 Uwe uwe topy­hu'at teran Aika­'iwat Iesui ewy hewaku hap ewy mi'i hat wyti miit'in miky­ry'i hamo topy­hu'at miit'in misa­ty'i saty'i wo topy­hu'at.
2TI 3:13 Ma'ato miit'in sa'ag nug haria wo'o­ma­'at'i ma'at'i haria ti aru po'og po'og tuwe­mo­herep. I'atu­minug sa'ag kaipyi meiũran po'og sa'ag te'e­ro­py­hu'at. Mi'i hawyi wuat'i ma'at hamo te'e­ro­py­hu'at. I'ewyte mi'i hawyi wuat'i miit'in ma'at hano te'e­ro­py­hu'at.
2TI 3:14 Ma'ato Timoteu yt atiky­'esat i en mi'i tã ereĩne'en. Ma'ato uhepiat emu'e hap ete at ka'ap ereĩne'en po'og po'og katu­pono sa'a­wy­'ite mi'i hap ete pywo haty wo eremu'e. Mi'i hap ewy te mesup etimohey te Timoteu katu­pono etikuap sese ra'yn uiwẽ pywiat emu'e hap.
2TI 3:15 Katu­pono ehire pyi te etikuap Tupana ehay miwan miat hap ete pywuat sese hap kaipyi etipuẽti Eka'iwat Iesui etiat kuap hamuat. Katu­pono yianmete ta'a­tu­henoi Aika­'iwat Iesui etiat. Mi'i hap kaipyi ti wati­puẽti aiwe'eg hap Iesui mohey hamuat. Mi'i hawyi wato­mohey hawyi aheha­kye­ra'at hap topy­hu'at.
2TI 3:16 Wuat'i yianmiat Tupana ehay miwan miat tuwẽtem hemiit'in wẽ pyi Tupana Pã'ãu ihay. Waku kahato aimu'e pywuat sehay wo. Ainãpin kahato kat som waku watunug i'ewyte aimu'e kahato sa'ag kaipyi aipo­re­ro­kosap hamo wakuap yn nug hamo aimu'e.
2TI 3:17 Aimo­hãpyk kahato hamuat Tupana ainãpin tehay wo. To'e hap kaipyi Tupana ti'a­tu­moe­saika kahato teropat haria wuat'i sepap hap kuap yne hamo wuat'i wakuap nug hamo are epe e'ywot uito Pauru.
2TI 4:1 Pyno Timoteu woro­nãpin kahato haty wo Tupana ehamo Aipo­typot Iesui ehamo — Etimohey kahato o Tupana ehay ere'e o epotmu­'eria pe. Yt ewẽpohep hin i nei'o mi'i hap ete. Yt epohepap pytkai i yt epohep tei'o i'atu­mu'e hap ete. Katu­pono tut irane Aika­'iwat uwe waku uwe yt naku i rakaria hap enoi hamo ihãite rakaria kape i'ewyte map haria kape.
2TI 4:2 Yt etoiat rei'o ihay moherep hap. Wãi ere o miit'in minug sa'ag ko'i ete. Yt eweipun nei'o ehepiat imohey hap ere o wuat'i pe. Eiwepit ro ere o epotmu­'eria pe. Yt kat i i'atu­mõ­py­'ahak hap wywo ma'ato hepamo perup'i wo eti'a­tuekyi kahato ro emienoi wo Tupana kape katu­pono tut irane wuat'i Porekuat no emienoi wo.
2TI 4:3 Pywo ti aru meiũran aimi­mu­'eria yt tiky­'esat i kahato ta'a­tu­mu'e hãpyk takanuat hap. Mi'i haype ti aru — Wãi'i­'a­tu'e yt he i i'atu'e yt watu­wa­nẽtup teran i mio tã e hap kape i'atu'e aimu'e ihãite rakat etiat hap ete. Mi'i hawyi ti aru ta'a­tu­mi­ky­'esat ewywuat ta'a­tu­mu'e haria ta'a­tukat.
2TI 4:4 I'atue­waure ka'a yt kat i ra'yn sehay pywuat kape. Ta'a­tu­ky­'esat yt ta'a­tu­we'eg i hap haype.
2TI 4:5 Ma'ato en Timoteu ewe'eg wo o mio tã i'atu'e hap kai. Yt eremoe­ha­ma­na'i tei'o ma'ato Tupana ehay pywuat sese po pe ereĩne'en o. Epiat ho'opot pytkai yt ewẽpohep tei'o. Ma'ato en woro­ky­'esat wuat'i puat Tupana ehay wakuat sytpok hamo. Etimoehãite yne o epotpap Tupana miium epiat uha'yru.
2TI 4:6 Aikotã aihũ wati­'auka Tupana mõtypot hamo hap ewy uito porap put'ok'e ra'yn uiku­'uro hap Tupana mõtypot hamuat hap pãi.
2TI 4:7 Surara wakuat ewy uipotpap ui'akag Iesui miky­'esat ete. Seput hap etiat po'og ihyha rakat ewy areĩne'en. Irania'in ta'a­tu­ku­'uro hap pupi te'e­ro­ken'ẽ kahato i ma'ato uito yt mi'i hat i. Irania'in aipok haria ne'i ma'ato uito put'ok­'are aheput hap ete. Mi'i hap ewy areĩne'en imohey hap mywo.
2TI 4:8 Karãpe wateput turan seput hat akag to'e — En po'og ihyha rakat e wuat'i ehamo. Mi'i hap ewy ti meiũran Ai'akag Iesui to'e irane uhepe — En ni wakuat kahato Tupana wanẽtup hawe e irane uhepe ma'ato yt uhepe yn i ma'ato i'ewyte uwe uwe toky'e haria pe torania — Ati'a­tu­ky­'esat Iesui ta'aipok i e haria pe.
2TI 4:9 Timoteu atiky­'esat kahato eriot uhowawi. Mi'i tupono yne esaika hap mywo eriot meikowo uha'yru.
2TI 4:10 Katu­pono aiwy Tema ui'atoiat ra'yn. Kat pote tekat po'og ky'esat Tupana kawiat haype. Mi'i pote tawa Tesa­ro­nika kape toto. Aiwy Kesente toto yi Karata kape. Titu ti toto ra'yn tawa Taumasia kape mi'i tupono waku eriot meikowo.
2TI 4:11 Ma'ato aiwy Iruka yn ti topy­hu'at uiwywo. Timoteu atiky­'esat etikat o aiwy Maku mi'i hawyi eterut ewywo eut turan katu­pono mi'i waku ra'yn aipo­wyro aipotpap etiat hamo.
2TI 4:12 Uhyt Tikiku ti atipo­'oro tawa Ewesu kape.
2TI 4:13 Timoteu atoiat uheka­misa wato uipysop uhyt Kapu yat pe tawa Turate piat. Mi'i atiky­'esat eterut hap eut tuwywo. I'ewyte miwan ko'i itote tukup­te'en. Mi'i i'ewyte eterut o wy. Atiky­'esat po'og ipe totiat miwan.
2TI 4:14 Uhyt Aresã­tere yne imehit rakat tupa­naria iã'ãkap ko'i nug hat etiat uima'at kahato hat. Uimo­so­'opot kahato mi'i. Ta'i haiwot kahato aipot­mu'e hap ete. Toimoma teran uipot­mu'e hap.
2TI 4:15 Pyno ewe'eg wo o ipupi. Waku wahẽtup Tupana kape — Etipoepyk to Aresã­tere iminug sa'ag ok tã uruma'at hap ok tã ha'up iminug sa'ag waku wato'e Tupana pe.
2TI 4:16 Mi'i hap e'at pe yt i'atu­wese hin i uhemiit'in ran ko'i. Yt uipo­wyro i haype. Yt naku i atipuẽti sehay wuat haria uhemiit'in ui'atoiat yne. Mi'i hawyi ui'atoiat uiwy­ria'in wanĩ­kaptia py'a­setpe uito waku sio yt e hamo. — Tupana waure wo ereĩne'en uiwy­ria'in ui'atoiat haria kai are Tupana pe.
2TI 4:17 Ui'atoiat ma'ato Aika­'iwat yt ui'atoiat hin i. Tutum uhepe tesaika hap tehay wakuat enoi hamuat. Ta'i Tupana uheha­kye­ra'at ui'auka tet pupi aikotã aihũ wati­ka­wiano awy'ato pupi hap ewy.
2TI 4:18 Ta'i Aika­'iwat uhero'ok kuap kahato ui'auka teran haria po pyi uima'at teran haria tok pyi. Mi'i hawyi ui'ãuka i'atu pupi. Tetama atipy piat pe uhereto. — Arehum at ka'ap ewawi Tupana. Ekahu kahato En are aru wuat'i e'at pe. Ta'i mi'i tã wyti pyno.
2TI 4:19 Uhekue­katu atipo­'oro mehĩ Akuira kape ihary'i Pisira kape. I'ewyte kuekatu mehĩ Onesi­wuru pe torania i'yaty­piaria kape.
2TI 4:20 Uhyt Eratu topy­hu'at tawa Kurintiu pe. Aiwy Towimu atimõ­py­hu'at tawa Miretu pe kat pote i'ahu pote.
2TI 4:21 Atiky­'esat eriot mesup uhowawi Timoteu i'aman mot ewakai te. Eyke­'et'in Iesui mohey haria Eũpuru Putensi Irinu i'ewyte mana Kautia i'ewyte torania meiũpiaria Iesui mohey haria kuekatu i'atu'e ewawi.
2TI 4:22 Atiky­'esat ihãite kahato ehepiat imohey hap. Mi'i hap ahẽtup Tupana pe — Etum o Timoteu pe egyi'at hap are ti Tupana pe. Pyno toran na'yn. Uito Pauru
TIT 1:1 Mesup ti Pauru miwan atipo­'oro ewawi uiwy Titu. Uito ti meiũ Tupana eropat hat i'ewyte wuat'i Porekuat Iesui ehay moherep hat uito. Sa'a­wy'i ti Tupana ui'airo tehay moherep hamo tomi­'ai­roria piat hamo uipo­'oro. Mio tã e uhepe — Atiky­'esat en uhehay pywuat moheg miit'in miat hamo e. Uha'yru mohey hap moheg hamo uimi­'ai­roria mu'e hamo woro­'airo en e Tupana uhepe.
TIT 1:2 Katu­pono sa'a­wy­'ite at yt kat i te turan to'e Tupana ahepe — Atum aru ehepe eheĩne'en wuat'i e'at piat hamuat e ti Tupana. Yt heso i ahete Tosa­'yru mohey haria pe. Mi'i hap yn wahe­katup aito mesup.
TIT 1:3 He'at put'ok'e ra'yn hawyi Tupana timo­herep ta'yn uhepe tehay — Atum aru wuat'i e'at piat eheĩne'en hap Uha'yru mohey haria pe e Tupana ahepe. — Koitywy woro­po­'oro en Pauru uha'yru etiat sehay moherep hamo katu­pono woro­mohey en inug hamo e uhepe. Mi'i tupono ti atimo­herep Ha'yru wuat'i uwania pe Tupana e hap ewywuat. Aheha­kye­ra'at Tupana piat hap Iesui mikyi'at moherep hat areĩne'en mesup uito. Uito ti Pauru.
TIT 1:4 En ni Titu uha'yru sese Iesui mohey hap kaipywiat katu­pono aimi­mohey ti wẽtup ok yn toĩne'en mote 'i pote wẽtup ok yn aito. — Etum no egyi'at hap uha'yru Titu pe are'e mesup mesuwe Ai'ywot Tupana pe. I'ewyte imowepit kahato hap etum o uha'yru Titu pe are'e mesup mesuwe Tupana pe Iesui Uheha­kye­ra'at hat pe wuat'i Porekuat pe.
TIT 1:5 Sa'a­wy'i woro­mo­py­hu'at en y'y to'o­raniat yi Kereta pe yt uiminug yne re'ym moma hamo. Pyno waku eti'airo torania yne tawa puat Iesui mohey haria apykok hanuaria are'e sa'a­wy'i epe uha'yru.
TIT 1:6 Waku eti'airo yt i'aparap i hat wẽtup ok yn ihary'i rakat are. I'ewyte imẽpyt'in Iesui mohey haria ewywuat eti'airo. Yt eti'airo tei'o imẽpyt'in ipy'ahak poity'i rakat ne'i are'e. Yt to'ywot ehay upiat i haria. Mi'i yt naku i ai'a­pykok hano.
TIT 1:7 Tupana potpap nug haria pote waku yn nug hat waku eti'airo. Ma'ato — Uito po'og waku irania'in kai e hat yt eti'airo tei'o. I'ewyte marak'a yt eti'airo tei'o. Mahy u hat pote yt naku Iesui mohey haria apykok hat wo topy­hu'at are'e. Yt eti'airo tei'o mi'i hat ewywuat. Wu'uka teran hat i'ewyte yt naku i — Uiwano yn na'yn e hat. Mi'iria ewywuaria yt put'ok'e Iesui mohey haria apykok hanuaria wo. Mi'i pote waku yn nug hat eti'airo.
TIT 1:8 Waku hegyi'at miit'in miat — Ereke ro e hat i'atu­'akag wo waku eti'airo. Wakuap yn nug neran hat waku eti'airo. Iwe'eg kahato hat waku hãpyk kahato rakat waku Tupana ewywuat wakuat rakat eti'airo waku. Wewãikuap hat waku eti'airo i'atu­'akag nuat.
TIT 1:9 Eti'airo aimi­mohey wuat'i e'at piat moherep hat Iesui mimu'e ewywuat eti'airo. Mi'i hat ewywuat eti'airo pote hesaika rakaria watu­kup­te'en ipotmu­'eria pywo piat ta'a­tu­mu'e pote.
TIT 1:10 Mi'i hat eti'airo pote meremo ta'a­tu­mo­pe­rup'i tehay pywuat no yt i'ewy i rat e haria. Ta'i tukup­te'en aipy­'e­set­piaria aimi­mu­'eria wẽtup ehay upiat myhu'at haria. Mi'iria tu'uka teran kahato sehay pywuat ete aima'at teran haype. — Uruto Iesui mohey haria i'atu'e wen ma'ato wẽtup sehay ete aimu'e. Sehay pot'i Iuteu ywania eko enoi haria mi'iria.
TIT 1:11 — Wãi'ere o i'atuepe yt naku i mi'i tã ehenoi katu­pono urumo­'a­kag'aia kahato yne aimẽ­pyt'in nywo ere'e ro mi'iria pe. Pyno ti yt naku i watu­wa­nẽtup mi'i haria ehay kape katu­pono mi'iria ti ahekat ky'ewi aimu'e. Pyno waku te'e­ru­we­mõti mekewat aheka­re'en ky'ewiat hap ete.
TIT 1:12 Sa'a­wy'i yi Kereta pe toĩne'en wẽtup ok wo'o­nãpin hat. Mi'i hat to'e — Pywo ti rat ai'y­wania yi Kereta piaria ti heso heso rakaria e. Haiwot rakaria wo tukup­te'en e. Ienuk yn neran haria. Yt ipotpap teran i rakaria e ti sa'a­wy'i yi Kereta piaria mu'e hat to'y­wania etiat pe.
TIT 1:13 Pywo kahato to'e mi'i miit katu­pono mi'i tã ti tukup­te'en yi Kereta piaria. Mi'i tupono o eti'a­tu­nãpin o Iesui mohey haria — Ewetoiat ro ei'y­wania yi Kereta eko sa'ag hawyi ewei'aipok to Iesui mohey hap kape ere'e o yi Kereta piaria pe. — Pywo ti i'atu'e hawyi mono i'atu­haĩte ra'yn imohey hap ete.
TIT 1:14 — Yt eweimu'e tei'o po'og mekewat eimu'e sa'a­wy­'iwuat heso rakat ete ere'e ro iperup takaria pe. I'ewyte eweitoiat ro Iuteuria eko ko'i aimu'e hap ko'i yt Tupana ehay kaipywiat i ko'i ere'e o epotmu­'eria pe are.
TIT 1:15 Waku hap etiat wanẽtup haria pe — Waku yne Tupana minug ko'i mesuwat yi totiat ko'i i'atu'e. Te'e­ru­wehum yn Tupana minug ete ma'ato irania'in yt imohey i haria yt wẽtup i waku Tupana minug ko'i. Yt naku i i'atu'e yn Tupana miium ete katu­pono i'atu­wa­nẽtup hawe yt naku i hap yn topy­hu'at. Te'e­ru­we­mõti kahato te'e­ru­wa­nẽtup hawe yt ta'a­tunug i i'atueko ewy pote.
TIT 1:16 Mi'iria — Uruikuap Tupana i'atu'e wen ma'ato i'atu­minug ko'i yt Tupana mohey haria minug ewy hin i katu­pono hema­rak'a poity'i irania'in ete. Yt uwe ehay upi i mi'iria te'e­ro­py­hu'at teran. I'ewyte yt kat i i'atu­minug wakuap heremo. Yt ta'a­tu­he­pap'i wakuap nug hap pãi — Uruikuap kahato Tupana i'atu'e pytkai. Mi'i tã hap ewy mi'iria. Uito Pauru.
TIT 2:1 Ma'ato en Titu ehenoi ro Iesui mohey haria pe yi Kereta piaria pe Tupana ehay hãpyk kahato rakat yn pywuat rakat Tupana e hap ewywuat yn.
TIT 2:2 Pyno mio tã ere'e o i'atuepe. Eti'a­tu­nãpin ihainia'in nagnia pe — Waku etunug waku miit'in me hawyi miit'in mimõ­typot no eweikup­te'en ere'e o. Ehehay hãpyk yn haria wo o eweikup­te'en ere'e o. Eiwewãi o eiminug sa'ag ete hawyi Iesui mohey haria kahato wo o eweikup­te'en ere'e o. Wo'o­ky'e hap yn o ewetunug ere'e o. Imohey pot'i haria wo o eweipy­hu'at ere'e o nagnia pe Titu.
TIT 2:3 I'ewyte Titu hary­po­ria'in nagnia pe kotã ere'e o — Ewe'eg wo o mana'in eiminug sa'ag pupi ere'e o. Hary­poria wakuat ewy eweikup­te'en aikotã Tupana ewaku hap ewy o eweikup­te'en ere'e o. Yt naku i ehehay miit'in mohit hap ete eiwẽ pyi ere'e o. Yt naku i mahy u haria wo eweikup­te'en.
TIT 2:4 Waku eweikup­te'en hary­po­ria'in he'aito pakup takaria nãpin haria wo ere'e o nagnia pe. Mana'in waku mio tã ewei'e he'aito pakup takaria pe — Waku eweiky'e e'aito i'ewyte waku ewei'a­tu­ky'e eimẽ­pyt'in ere'e o hary­poria nagnia he'aito pakup takaria nãpin hamo.
TIT 2:5 — I'ewyte wãi'e­wei'e o eiminug sa'ag nug hap pupi. Ewei'a­tu­po­wyro kahato o ehe'aito eimẽ­pyt'in i'ewyte ei'yat piaria waku i'atu'e mana'in nagnia he'aito pakup takaria pe. Ehe'aito miky­'esat ewy o eweikup­te'en ewei'e o he'aito pakup i rakaria pe ere'e o hary'in me are. Pyno Titu e'e hap ewy ta'a­tunug pote ti aru ahewa­nĩ­kaptia — Ta'i Iesui mohey haria hary­po­ria'in iwe'eg kahato haria i'atu'e. Mi'i pote yt te'e­ru­we­ky­ry'i kuap i Tupana ehay ete ere'e o mana'in nagnia pe.
TIT 2:6 Mi'i hawyi ti kurum iwasu ko'i pe ere'e o — Pyno iwe'eg haria ewywuaria wo o eweipy­hu'at ere'e o. Wakuat yn nug haria wo eweikup­te'en Tupana miky­'esat nug haria ere'e o kurum iwasuria pe.
TIT 2:7 I'ewyte en Titu po'og wakuap nug hamo ereĩne'en itotiaria kurum iwasuria kai hawyi ti aru — Pyno waku watunug Titu ewy i'atu'e kurum iwasuria. Tupana ewy ereĩne'en i'atu­mu'e haype yt kat i eso hap wywo. Epy'a hãpyk wywo eti'a­tu­mu'e Titu.
TIT 2:8 I'ewyte ahewa­nĩ­kaptia eti'a­tu­wesat ehay hãpyk kahato ewe'eg hap kaipyi eti'a­tu­wesat perup'i puo. Mi'i tã eti'a­tu­wesat pote ti aru yt kat i i'atu'e kuap i ra'yn Tupana ehay mohit hamuat ete. Te'e­ru­we­mõti ra'yn katu­pono yt kat i ta'a­tu­puẽti ehay kaipyi sa'ag hap ne'i. Yi kape yn na'yn i'atueha pãi.
TIT 2:9 Pyno mi'i tã ere'e o Iesui mohey haria miit'in eropat haria pe — Ewetunug o eika­'i­waria piat Ehetu­'i­saria piat ei'a­tu­po­'oro hap ewy i'atu­mi­ky­'esat ewy ere'e o. Yt naku i more­kuaria ewei'a­tuehay moweu­ka'i eipo­'oro hap pote. Waku eweikup­te'en ei'a­pykok haria mowepit kahato haria wo ere'e o epotmu­'eria pe Titu.
TIT 2:10 — I'ewyte yt ewete­ro'ok tei'o eika­'iwat ekare'en ko'i ere'e o. I'ewyte eipotpap kahato o wakuap ko'i eiminug ko'i ete. Eika­'i­waria emiit'in no kahato o eweikup­te'en ere'e o. Mi'i tã ewetunug mote ti aru eika­'iwat Tupana ehay mõtypot hap kahato ewetunug eika­'i­waria wanẽtup hawe Aheha­kye­ra'at hat Tupana ehay mõtypot hamo eweikup­te'en ere'e o Iesui mohey haria miit'in eropat haria pe Titu.
TIT 2:11 Pyno koitywy Tupana mio tã e ahepe i'ewyte wuat'i miit'in me — Woro­ho­'o­ky'e kahato eipe e ra'yn. Pyno woro­ho­'oe­ha­kye­ra'at reran eipe e wyti Tupana wuat'i ywania pe. Atum hamuat uhegyi'at kahato pote te'en ne'i yne ehepe e ti Tupana ahepe.
TIT 2:12 Mi'i hawyi aiky'e hap watikuap kahato ra'yn. I'ewyte aikotã waku watu­kup­te'en mesu­wa­rotiat hap watikuap katu­pono Tupana aimu'e ra'yn — Sa'a­wy'i te ti eimi­ky­'esat ewy yn ewetunug e. Mekewat e'at pe sa'ag kahato rakaria wo eweikup­te'en e. Ma'ato uhegyi'at hap put'ok'e ehete pote waku eweitoiat ra'yn eiminug sa'ag hap ko'i uimi­ky­'esat ewy yn nug hamuat e. Wakuaria wo uhewaku hap ewy atiky­'esat e. Uimõ­typot haria eipe atiky­'esat e Tupana ahepe.
TIT 2:13 Mi'i hawyi Iesui put'ok'e hap e'at yn na'yn wahe­katup Tupana mõtypot e'at sese ra'yn. Ta'i Uhetu­pana i'ewyte Iesui Aheha­kye­ra'at hat po'og wuat'i kai put'ok'e irane. Put'ok'e hawyi ikahu hap sese watikuap ta'yn. Mekewat e'at pe ti wahe­katup kahato turan tut.
TIT 2:14 Aheha­kye­ra'at hat Iesui iku'uro ra'yn aria'yp posak ete aika­wiano. Yne yt nakuap i nug sa'ag po pyi aihep hamo iku'uro. Tupana wanuaria wo ainug neran pote wakuaria wo aito hap toiky­'esat. Mi'i pote aihep ta'yn sa'ag nug hap po pyi aimo­waku hamo ra'yn. Koitywy Aheha­kye­ra'at hat iwepit kahato ra'yn.
TIT 2:15 Pyno uha'yru Titu uimienoi mesuwat uimiwan miat ehenoi yne Iesui mohey haria epotmu­'eria pe are. Aikotã wo'o­mu'e hat sese ewy eti'a­tu­nãpin Iesui ainãpin hap ewy. I'aparap hap etikuap hawyi wãi'ere o i'atuepe yt i'atu­mohit wywo tei'o ma'ato wãi'ere i'atuepe. — Ta'i Tupana wyti uipo­'oro meikowo ehepiat sehay wakuat Iesui etiat moherep hamo ere'e o i'atuepe. Uito ti ehehay­tuwy sese ere'e o epotmu­'eria pe Titu. Uito Pauru.
TIT 3:1 Eti'a­tu­mu'e epotmu­'eria mio tã ere'e o Titu — Ewei'a­tuehay upi ehetu­'i­saria ei'a­kagnia i'ewyte ehesu­ra­ra'in ewei'a­tuehay upi eweikup­te'en ere'e o. Mi'i hap etiat i'atu­mu'e hap ete yt waure wo eweikut­p­te'en ere'e o. Karãpeĩ ei'a­kagnia eipo­'oro motpap wakuap nug hap mi'i pote — Hẽ ewei'e kahato ere'e o epotmu­'eria pe.
TIT 3:2 I'ewyte yt uwe tei'o ewei'a­tuehay moweu­ka'i ere'e o. I'ewyte miit'in wuat'i wywo o eiwese eweikup­te'en ere'e o Titu. I'ewyte waku eweikat ewy ewese hap wywo. I'ewyte eipe­rup'i kahato yn o yne miit'in ete eweikup­te'en ere'e o Iesui mohey haria pe.
TIT 3:3 Kat pote ti aito nimo te yt hãpyk i sese rakaria watoĩ­ne'en. Wo'oehay upi upi haria wo i ti aito katu­pono mekewat e'at pe aito aiminug sa'ag atoiat reran ai'e pytkai yt watoiat kuap i. Mi'i hawyi ti mekewat aiminug sa'ag kape ne'i watoĩ­ne'en. Mi'i hap kaipyi ti aiwo­'o­weu­ka'i aiwo­'opiat hap yn na'yn tuwekuap ahete. Mi'i haype ti — Atiky­'esat ewat uiwano ai'e hap aiwa­nẽtup hawe. I'ewyte — Atiky­'esat ti uito po'og ekai irania'in kai ai'e hap yn. Mi'i hap kaipyi ti ipy'ahak takaria wo aito yne miit'in ete. I'ewyte irania'in torania ipy'ahak takaria wo ahete tukup­te'en.
TIT 3:4 Yt naku i kahato ahete mekewat e'at pe ma'ato mi'i pytkai Tupana tuwe­mo­herep ta'yn ahepe aiky'e kahato hap. Mi'i kaipyi aheha­kye­ra'at hamuat. Iwese kahato ti ahete. Tuwepyi aiky'e te'en ne'i haype.
TIT 3:5 Ta'i Tupana yn ti Aheha­kye­ra'at kuap hat. Aito ti yt wati­'a­tue­ha­kye­ra'at kuap hin i aiwewi. I'ewyte aiminug wakuap ko'i ti yt put'ok'e i aheha­kye­ra'at hamuat kyi'at hamo. Tepiat aheha­ky­'e'i hap kaipyi yn ti Tupana aheha­kye­ra'at kuap. I'ewyte aiminug sa'ag ipitpit kahato hap ko'i Tupana yn ikoho kuap. I'ewyte ti tutum ahepe Topã'ãu Wakuat Sese ra'yn. Mi'i hawyi ti tosa­'y­ru'in no tosa­ki­'yt'in no ainug Topã'ãu wo. Mi'i hawyi ti koitywy ipakup i rakaria wo ra'yn watoĩ­ne'en. Tupana tunug ni tuweran mi'i tã hap ahetiat tuwepyi.
TIT 3:6 Mi'i hawyi ti aipiit wyti Topã'ãu Wakuat eiam mo ra'yn tutunug. Tutum kahato Topã'ãu wakuat po'og na'yn ahepe aimiẽtup kai katu­pono ti Aika­'iwat Iesui tikyi'at tuwe­kaipyi ra'yn aheha­kye­ra'at hamuat.
TIT 3:7 Koitywy ti Iesui tum na'yn ahepe Topã'ãu aiky'e haype. Yt aiwaku hap upi i tutum ne'en ne'i. Mi'i pote Tupana to'e ahepe wati­mohey Ha'yru hawyi — Koitywy waku rakaria wo eweikup­te'en uipy'a pe e Tupana ahepe e. Eipo pe ra'yn ti atum yne uipo­wat'yp e. Uhekat yne atum ehepe e ahepe. Mi'i tupono wuat'i e'at piat ieĩne'en hap kape yn na'yn aiwa­tetup.
TIT 3:8 Pywo kahato ti mesuwat uimienoi pãi. Mi'i tupono Titu eti'a­tu­nãpin kahato epotmu­'eria — Waku watu­wa­nẽtup kahato aikotã aru watunug waku hap ete ere'e o i'atuepe katu­pono waku nug haria wo watoĩ­ne'en mote Tupana mowepit kahato haria wo wato­py­hu'at. I'ewyte waku miit'in powyro kahato rakaria wo wato­py­hu'at ere'e o Iesui mohey haria pe Titu.
TIT 3:9 — Ma'ato mekewat wu'uka hap ehay wuat yt kat hamuat i. Mi'i hap ko'i waku watoiat yne ere'e o. Yt eiwu­'uka tei'o — Uruwat uru'y­wania ni waku po'og irania'in ywania kai ei'e hap ete. Uru'y­wania set po'og po'og ei'y­wania pe kai ei'e hap ete yt eiwu­'uka tei'o. I'ewyte yt eiwu­'uka tei'o miit'in wãi'e hap hit ko'i ete miit'in seko hit ete kat mi'u waku watu'u kat som waku kat som yt aipainug hap ete. Yt kan hamo i aheko urueko hap ete watu­'uka. Yt aipo­wyro hin i watu­'uka sokpe ete yt Tupana ehay kaipyi i pote. Pyno mekewat nagnia ehay seko etiano yt naku i watu­'uka ere'e o are.
TIT 3:10 Ma'ato toĩ wẽtup ok aipy­'a­setpe Iesui mohey hat wu'uka teran hat eipat'ok pat'ok teran hat mi'i pote waku eweikaykay mi'i ehowawi hawyi eweinãpin mi'i. Uhyt mana etoiat ro mekewat meru­wano sehay ewei'e tope. Mi'i hawyi tutunug i ra'yn mi'i pote waku eweikaykay i ra'yn wãi'ei'e hamo. Ma'ato yt toikuap i tonãpin hap mi'i hawyi o yt eiwa­nẽtup i ra'yn ihay kat e hap kat e hap ko'i kape.
TIT 3:11 katu­pono tu'uka teran haype yt naku i tutunug. Tuwepyi ra'yn tutunug wãi'ai'e pytkai ra'yn. Mekewat wu'uka hap nug hap kaipyi ti yne miit'in tikuap ta'yn yt nakuat inug hat mi'i. Mi'i pote waku ra'yn aipohep ta'yn mekewat ihay ete.
TIT 3:12 Titu atipo­'oro teran wẽtup ok esaipe piano aimi­mu­'eria apykok hamuat ma'ato yt atikuap i te uwe waku atipo­'oro hap. Koitypuo ma'ato atipo­'oro mehĩ Atema sio mehĩ Tikiku are. Pyno put'ok'e esaipepiat hawyi etikat kahato epu'ap uhowawiat e'ut hamuat Titu. Areĩne'en wyti aru mekewat tawa Niko­puri tote are. Mi'i kape eriot meremo uha'yru. Mi'i hawyi mekewat i'aman mot na'ak hap e'at ko'i pe tawa Niko­puri pe watu­kup­te'en.
TIT 3:13 Pyno Titu etipo­wyro mekewat mehĩ Sena mekewat wu'uka haria atunãpin hat mu'ap sa'up ete. I'ewyte mekewat mehĩ Aporu pu'ap sa'up ete etipo­wyro. Etum o mekewat mieroto wo imi'u hesokpe aikotã aikotã waku hap ewy.
TIT 3:14 Pyno Titu koitywy waku wato'e aipot­mu­'eria pe Iesui mohey haria pe — Ewei'a­tu­mu'e ro ho'opot haria powyro hamuat ete. I'ewyte aikotã waku hatek sese rakaria powyro hamo eweikup­te'en hap ete waku wato'e aipot­mu­'eria pe katu­pono yt naku i kahato ti watoĩ­ne'en ne'en ne'i ahowawi yn wanẽtup hano ne'i. Waku wati­'a­tu­nãpin Iesui mohey haria.
TIT 3:15 Pyno koitywy torania meiũpiaria uiwy­wuaria gupte'en haria tipo­'oro ta'a­tue­kue­katu ewawi Titu. I'ewyte kuekatu ra'yn ti aru aiwy­ria'in itotiaria Iesui mohey haria pe uruto'e. Pyno — Tupana etum no uha'yru Titu pe imowepit kahato hap egyi'at hap ok tã i'ewyte torania itotiaria Esa'yru mohey haria pe ahẽtup epe Tupana waku. Toran na'yn uimiwan ewawi uiwy Titu. Uito ti Pauru
PHM 1:1 Waku kahato en Wiremu. Uiwywuat Tupana kapiat ipotpap takat kahato en Wiremu. Meiũ ti areĩne'en morekuat pot pyhik hawe Iesui ehay moherep hap po'ypyi. Koitywy ti atipo­'oro uimiwan ewawi Wiremu. Uito ti Pauru i'ewyte aiwy Timoteu tipo­'oro tehay ewawi.
PHM 1:2 Atikuap kahato ti Iesui mohey haria aikotã te'e­ru­wa­'a­tunug kahato ti e'yat kape. Mi'iria kape ti i'ewyte kuekatu ui'e hap atipo­'oro. I'ewyte uhekue­katu atipo­'oro uheinyt Apia pe i'ewyte aiwy ok Akipu e hap het rakat kape ai'e­wywuat Iesui esurara yt naku i moma hamuat rakat kape.
PHM 1:3 Koitywy ahẽtup kahato Ai'ywot Tupana kape i'ewyte Aipo­typot Iesui kape — Etum ne'en ne'i o Wire­mu'in me egyi'at hap i'ewyte eti'a­tu­mo­wepit mi'iria are Tupana pe.
PHM 1:4 Ta'i uhehay kahato ti Tupana kape mesuwe epowyro hamuat ahẽtup kahato uiwy Wiremu. Mi'i atunug neran ne. Arehum kahato Tupana kape eupi are.
PHM 1:5 Koitywy ti ehay put'ok'e ra'yn uhete aikotã ikahu kahato ereĩne'en hap ete aikotã Tupana emiit'in ky'e kahato hat en Aipo­typot Iesui mohey hat sese ra'yn erepy­hu'at hap. Mi'i hap atikuap ta'yn mesuwe hawyi uimo­wepit kahato.
PHM 1:6 — Tupana atiky­'esat kahato Wire­mu'in wẽtup ehay yn Iesui mohey haria te'e­ro­py­hu'at are Tupana kape. Atiky­'esat kahato Wire­mu'in wẽtup piit ewy yn tukup­te'en hamuat. Tupana urupo­wyro kahato En po'og po'og eminug ikahu kahato rakat kuap hamo Esa'yru Urupo­typot Iesui emiwan ne'en ne'i i'ewywuat haria pe urunug Tupana are.
PHM 1:7 Uiwy Wiremu en uruky'e hap i'ewyte uiky'e hap po'og uimo­wepit kahato hap topy­hu'at. Uimo­wepit kahato meiũpe arewa­nẽtup ewawiat hawyi are. Yt uito yn i ma'ato yne Tupana emiit'in mowepit kahato hat en.
PHM 1:8 Pyno ahẽtup teran epe uimi­ky­'esat iwato'in nakat Wiremu ma'ato eyke'et ewy ahẽtup perup'i puo epe Iesui mohey haria aito pote. Yt ati'akit teran i uiky'e epiat hap uimiẽtup mo. Yt woro­mo­py­'ahak teran i egyi'at hap ete. Mi'i pote etunug o epy'a pyi uiky'e hap wywo uimiẽtup hap atiky­'esat.
PHM 1:9 Uito ti meiũ Iesui mohey haria apykok hanuaria akag wuat Tupana mi'airo kahato. Mi'i pytkai yt woro­po­'oro i haty wo ma'ato perup'i puo yn ahẽtup epe uimi­ky­'esat eky'e popuo Iesui po'y­pywiat uipyhik pyi ahẽtup epe perup'i puo.
PHM 1:10 Areĩne'en meiũpiat wo'o­pyhik hawiat turan ni put'ok'e uhete sa'a­wy­'iwuat emiit emikyi'at wuat'i miit'in eropat re'en ne'i hat Unesimu e hap e'atoiat hat put'ok'e uhete. Mi'i hawyi ti ahenoi tope Aipo­typot Iesui etiat mi'i hawyi ti toto­mohey ra'yn Iesui uhehay upi. Mio koitywy topy­hu'at uha'yru ewy ra'yn pãi meiũpe are. Mio Iesui mohey hano ra'yn topy­hu'at. Mi'i pote i'ywot ewy areĩne'en katu­pono uimienoi kaipyi ra'yn tuwe­mo­herep pakup i.
PHM 1:11 Atikuap ti sa'a­wy'i ti emiit no te'en ne'i yt tuwe'eg hin i rakat Unesimu toĩne'en ma'ato koitywy wakuat semiit no i ra'yn topy­hu'at. Uipo­wyro kahato hat wo ra'yn ti mio topy­hu'at. Ahemiit pakup mo ra'yn ni toĩne'en.
PHM 1:12 Pyno koitywy atipo­re­ra­'aipok i ra'yn ewawi ma'ato uiwak popuo atipo­'oro ewawi katu­pono atiky'e kahato Unesimu.
PHM 1:13 Yt atipo­'oro teran hin i wen ma'ato atiky­'esat kahato uipo pe topy­hu'at katu­pono waku kahato uheropat uipyhik hawiat turan Iesui po'y­pywiat uipyhik turan. En yt uwe i meiũpe pote uheropat emiit Unesimu.
PHM 1:14 Ma'ato atiky­'esat emiky­'esat yn atunug mehĩ. Yt kat i uhepiat epo'oro haty wo hap mywo ahẽtup. Waku topy­hu'at uipo­wyro hano meiũpe wen ma'ato e'e hap yn atiky­'esat.
PHM 1:15 Atikuap aikotã sa'a­wy'i Unesimu e'atoiat rakano toĩne'en. Yt iwe'eg hin i turan topopy e'yaty­pepyi ma'ato mesup atipo­re­ra­'aipok ewawi emiit pakup mo ra'yn. Unesimu ta'aipok ta'yn Tupana piat toto mopakup i hamo uiwa­nẽtup hawe are arewa­nẽtup. Mi'i hawyi wuat'i e'at piat emiit nuat ra'yn topy­hu'at Unesimu.
PHM 1:16 Sa'a­wy'i te ti ewat emiit sese toĩne'en ma'ato mio wyti po'og na'yn emiit no topy­hu'at sa'a­wy­'iwuat kai. Aikotã eywyt ewy sese ra'yn topy­hu'at katu­pono Aika­'iwat mohey hap kaipyi ra'yn aheywyt no Tupana tunug. Uimi­ky'e kahato mi'i kurum Unesimu. Meiũran ti aru po'og sa'a­wy­'iwuat emiit nuat hap kai topy­hu'at katu­pono koitywy eywyt no ra'yn topy­hu'at Iesui mohey hap kaipyi ra'yn.
PHM 1:17 Wiremu uiky'e apo en. Ta'i atikuap uiky'e hap. Uheka­tuwy apo en. Hẽ ere pote waku — Ereke ro ere kurum Unesimu pe are aikotã — Ereke ro ere uhepe hap ewy o ere o mi'i pe. Pyno etiky'e ro aru Unesimu uiky'e hap ewy mehĩ are.
PHM 1:18 Toĩne'en ema'at hap Unesimu minug mote waure wo ereĩne'en mi'i hap ete ema'at hap kai. Toĩ epiat iwete­weru hap pote uito aha'up nug iwete­weru hap ok tã aha'up nug yne iwete­weru hap are.
PHM 1:19 Pyno ti uipo wo atunug uimiwan mesuwe uimi­po­'oro ewawiat Unesimu wete­weru hap aha'up nug yne ui'e hap. Uito ti Pauru uipo wo atiwan mesuwe uhet — Atum Unesimu wete­weru hap etiano Wiremu kape are. Uipo wo atopytyk uimiwan nuat mesuwe Pauru. Yt etiwaure tei'o ma'ato uhepiat ewete­weru iwato hap katu­pono sa'a­wy'i uiwẽ kaipyi etikuap mesuwat wuat'i e'at piat ieĩne'en hap uhehay pyi mehĩ. Mi'i tupono iwato kahato ewete­weru hap te yt kat sa'up i etum pytkai.
PHM 1:20 Mi'i tupono ahẽtup ewawi uipy'a pyi etunug no Aika­'iwat Iesui mõtypot hamuat. Uipo­wyro o mesuwat uimiẽtup ete. Mi'i etunug mote uimo­wepit kahato katu­pono eheyke'et sese areĩne'en uito. Uheywyt en Aika­'iwat Iesui mohey hap kaipyi.
PHM 1:21 Pyno woro­mohey kahato en Wiremu. Ta'i arewa­nẽtup turan ti etunug aru mesuwat uimiẽtup ewy uimiwan miat ewy. Arewa­nẽtup etunug po'og aru uimiẽtup kai uiky'e epiat pote.
PHM 1:22 Uiwy Wiremu pyno etunug kahu o e'okipy uiwat i te uheiam mo itote katu­pono areto irane ewawi ma'ato mesup yt areto kuap i te. Atikuap ta'yn aikotã eweiky­'esat kahato uhewyry ehowawiat hap. Atikuap aikotã eiwe­hẽtup uhepiat ut hap Tupana kapiat — Etum o Pauru pe mu'ap kahu uruewawiat Tupana ei'e hap atikuap. Atiky­'esat kahato Tupana tum eimiẽtup ewy are.
PHM 1:23 I'ewyte ti toĩne'en meiũpe mipyhik aiwy Epawai e hap Iesui po'y­pywiat mipyhik. Epawai tuwe­kue­katu ipo'oro ewawi.
PHM 1:24 I'ewyte aheka­tuwy Tupana potpap nug hat Maku tipo­'oro teran ewawi kuekatu e hap. Mehĩ Aritaku i'ewyte ewy uhyt Tema i'ewyte ewy Iruka i'ewyte kuekatu ehowawi ipo'oro. Mi'iria meiũpe uipo­wyro kahato Tupana motpap nug hap ete.
PHM 1:25 Mio tã are ahẽtup Aika­'iwat Iesui pe — Ereĩne'en no aiwy Wire­mu'in powyro kahato hamo are. Etum ne'en ne'i ro egyi'at hap ok tã i'atuepe are Aipo­typot pe. Mesup toran na'yn uimiwan ewawiat uiwy Wiremu. Uito ti PAURU
HEB 1:1 Nimo te ti Tupana ihay kahato ai'y­wania Epereu ywania Iuteu ywania pe tomi­mo­herep i moherep i ahepe nimo tehay. Aikotã aikotã toimo­herep tehay moherep haria wẽ pyi. Toho'oium i'atuepe tehay tomi­mo­herep ko'i. Yt to'o­'ewy hin i tuwe­mo­herep ai'y­wania sa'a­wy­'iwuat pe tehay e.
HEB 1:2 Ma'ato mesup te Tupana aimu'e Tosa­'yru wẽ pyi. Koitywy tuwe­mo­herep ahepe Tosa­'yru ieĩne'en hap upi Tosa­'yru minug upi Tosa­'yru ehay hap upi tuwe­mo­herep mesup. Yt nimo te wuat aimu'e hap ewy hin i ra'yn tutunug mesup katu­pono Tosa­'yru po wo Tupana tunug wuat'i mesu­wa­ro­tiaria. Atipy totiat at waty waikiru ko'i Tosa­'yru po wuat iminug ko'i. Mi'i tupono ti tutum yne meimẽwat ko'i torania Tosa­'yru pe. Mesuwat torania yne meimẽwat — Ewano e. Pyno ereĩne'en no Mesuwat Yne Ka'iwat no e.
HEB 1:3 Tupana Iã'ãkap Sese Ha'yru yn i'ewy sese rakat. Wẽtup Miit ewy yn i'atueko wẽtup yn i'atu­mi­ky­'esat ko'i wẽtup yn i'atu­mõ­typot hap to'o­ku­pitu. Tosa­'yru esaika hap wo toimõ­py­hu'at yne atipy ko'i mesu­wa­ro­tiaria i'ewyte atipy piaria Ha'yru inug ko'i yne yne. To'ywot ehay upi toimoe­saika yne yi at waikiru ko'i waty Ha'yru esaika hap mo inug iheg me. I'ewyte Tosa­'yru suu wo aipitpit hap aiminug sa'ag toikoho yne. Iesui tipuruk yne aiminug sa'ag hawyi — Waku era'apyk mesuwe uipo sese kai ui'ya­type atipy pe e. Waku era'apyk mesuwe uhepiat emõtypot hap tote e katu­pono woronug En Wuat'i Wuat'i Porekuat no po'og po'og wuat'i kawiat hesaika rakano e Tupana Tosa­'yru pe.
HEB 1:4 Mi'i tupono yt uwe i atipy piaria po'og hesaika Ha'yru kai. Yt uwe i put'ok'e kuap tuwete atipy piaria Iesui esaika sakpo hap ete katu­pono mi'i ra'yn Wuat'i Akag Koro topy­hu'at. I'ewyte het po'og i'atuset kai iwato katu­pono Tupana tuwe­set­pehik — Uha'yru sese ti En e Iesui pe.
HEB 1:5 Mi'i rokirẽ yt karãpe i atipy piaria pe — Uha'yru sese En wuat'i e'at pe E'ywot sese wo areĩne'en Uito e Tupana Tosa­'yru pe yn. Ma'ato yt karãpe i atipy piaria pe — Uha'yru sese ti En e Tupana morekuat Tawi wepy miwan 2.7 pe.
HEB 1:6 Ma'ato Tosa­'yru sese tomi­mõ­typot wuat'i e'yianmete wuat pe mio tã e — Meiũran aru woro­mo­herep En wuat'i miit'in me e. Mi'i tupono uipot­po­'o­roria pe are'e — Eweimõ­typot ro Uha'yru sese are'e yn atipy piaria pe e Tupana.
HEB 1:7 Ma'ato atipy piaria pe mio tã e Tupana miwan me — Eipe ti uheropat haria meremo rakaria wasere hyha hap ewywuaria eipe e. Merep merep'e hap ẽty ewywuaria eipe woro­ho­'onug e. Uhehay ereto merep hanuaria eipe e Tupana topot­po­'o­roria atipy piaria pe mekewat Tawi wepy 104 piat pe.
HEB 1:8 Ma'ato Tosa­'yru pe mio tã wẽtup e — Wuat'i Porekuat Eporekuat no ti erepy­hu'at e. Wuat'i akag Porekuat no En e. Yt karãmuo i ikahuro Miit'in Porekuat Koro wo En e. Toĩne'en epo pe puretig ewywuat hap esaika moherep hamuat e. Ta'i En ni wuat'i miit'in powyro teran hanuat katu­pono wakuat yn nug hat En e Tupana Tosa­'yru pe.
HEB 1:9 Morekuat Koro wo ieĩne'en hat Uha'yru katu­pono En hãpyk yn hat Wakuat Sese Ky'e Hat En mote e. En ni yne yt naku i etiat haiwot rakano e. Mi'i pote woro­'airo En Uha'yru Wuat'i Porekuat no e. Koitywy atopag e'akag me ikap takat mohag ewywuat e. Mi'i ti wuat'i kawiat Morekuat po'og po'og ekatu­wy­ria'in kai e hap e. En ni Uimi­mo­wato Uimi­mo­wepit En e Tupana morekuat Tawi miwan 45.67 piat pe.
HEB 1:10 Mi'i hawyi to'e Tosa­'yru piat pe sa'a­wy­'iwuat miwan me — Wuat'i nug hat En Uha'yru e. Yi ga'apy mikoi nug hat at waty waikiru ko'i nug hat En e. Torania sa'a­wy­'iwuat nug hat En e. Epo esaika hamo atunug yne yne e.
HEB 1:11 Ma'ato mi'iria aru meiũran te'e­ru­wewuk yne ta'a­tu­poro hawyi ikahuro ra'yn ma'ato En ni aru ereĩne'en ihãite wuat'i e'at piat rakano e. En ni ereĩne'en yne yne weityk pytkai e. Ma'ato at atipy waikiru yi ga'apy y'y waty ti aru tuwe­mo­weityk yne sokpe pot'i ewy ma'ato En yt karãpe i e.
HEB 1:12 Mi'iria aikotã sokpe pot'i ewywuat tukup­te'en. Topugha hawyi sokpe pot'i tuweityk hap ewy aru mi'i hawyi ipakup takat toimo­herep e. Ma'ato En Uha'yru yt karãpe i epot'i aru katu­pono ereĩne'en aru wuat'i e'at pe epakup yn e Tupana Iesui pe sa'a­wy­'i­pyite nimo te morekuat Tawi wepy 102.25 pe.
HEB 1:13 Mi'i hawyi Tosa­'yru pe mio tã e iwan me — Era'apyk to Uha'yru mesuwe uipo sese kai uimi­mõ­typot no e. Meiũran aru ewanĩ­kaptia okpe tote epy topy­hu'at aikotã more­kuaria tunug — Uito po'og e hap moherep hamo. Wuat'i e'at pe ewanĩ­kaptia akit hano areĩne'en e miwan me. Ma'ato irania'in atipy piaria pe yt karãpe i mio tã e.
HEB 1:14 Pyno ahenoi ehepe mio tã e Tupana atipy piaria pe. Ta'i mio tã e teropat haria pe — Eipe uheropat haria e. Mã'ãu kawiat eipe e. Eipe ti uimie­ha­kye­ra'at haria yi totiaria powyro hanuaria e. Mi'i nug hamo woro­ho­'o­po­'oro e. Uha'y­ru'in uhaki­'yt'in uimohey haria powyro hanuaria wo woro­ho­'onug eipe e. I'ewyte yt uimohey i te haria powyro imohey hap etiat haria wo woro­ho­'onug eipe e Tupana sa'a­wy­'ite miwan me atipy piaria pe. Pyno koitywy watikuap ta'yn po'og Ha'yru atipy piaria teropat haria kawiat hap.
HEB 2:1 Pyno waku Tupana ehay moherep haria aimu'e turan watu­we­waure ka'a kahato. Yt naku i watoket ne'i Tupana piat aimu'e hap ete. Yt naku i wati­waure mekewat sa'a­wy­'iwuat aimikuap Tupana etiat. Pyno waku aiwẽ'ẽg wo o mi'i hap pupi uiwy­ria'in ui'y­wania.
HEB 2:2 Sa'a­wy'i Tupana tipo­'oro topot­po­'o­roria atipy piaria yi kape tehay sese moherep hamo mesu­wa­ro­tiaria ai'y­wania kape. Ta'a­tu­mo­herep kahato ihay pywo kahato rakat Tupana e hap ewy ta'a­tu­mo­herep. Ma'ato yt ta'a­tu­mohey i Tupana ehay pywuat ko'i pote toi'a­tu­'a­piheg sa'a­wy'i ai'y­wania. I'atu­minug sa'ag sa'up tutum i'atuepe to'e hap ewy.
HEB 2:3 Mi'i tupono waku aiwe'eg wo kahato to'e hap ete katu­pono koitywy Tosa­'yru wẽ pyi aimu'e ra'yn Tupana. Ha'yru piat aimu'e hap ti po'og atipy piaria wẽ pywiat kai. Mi'i tupono yt naku i kahato wato­'o­ky­ry'i aheha­kye­ra'at hat ete. Ma'ato yt watat i Ha'yru e hap hawyi watipun ne'i aheha­kye­ra'at hap hawyi aikotã aru. — Yt atiky­'esat i emiium Iesui ai'e hawyi aikotã aru. Ta'i yt kat i hin i aru wati­puẽti mu'ap Tupana kapiat mio tã ai'e hawyi. Ma'ato ai'a­piheg hap yn na'yn topy­hu'at yt watat i imiium hawyi. Sa'a­wy'i aheha­kye­ra'at hap ete aimu'e kahato Aika­'iwat Iesui. I'ewyte tosai­pe­piaria topot­mu­'eria kaipyi aimu'e kahato wy. Ta'a­tu­moheg kahato i'e hap torania ahowawi.
HEB 2:4 Katu­pono Aika­'iwat Iesui ti'a­tu­po­wyro kahato tosai­pe­piaria tehay enoi hanuaria hawyi tutum tesaika hap i'atuepe. Topã'ãu tutum tomi­sepap ko'i ewywuat nug hamuat. Toipywo kahato tehay i'atuwẽ piat katu­pono ta'a­tunug imisepap yt miit'in misepap ewy hin i ipã'ãu esaika hap wywo. Mi'i hawyi i'atupiit pyi tuwẽtem hesaika hap miit'in moehãite hamuat. I'atupo i'atupiit pyi ta'a­tunug kahato miit'in yt ewy hin i miit'in mowa­nẽtup hamo miit'in wa'a­kasa hamo. Mi'i hap kape te'e­ra­ha'at i'atue­saika hap kape hawyi pywo i'atu'e. Tutum Topã'ãu i'atuepe topotpap nug waku kahato hamo. Tomi­ky­'esat ewy toimõ'ẽ yne tesaika hap i'atuepe.
HEB 2:5 Ui'y­wania pywo ti rat yt karãpe i Tupana tunug temiit'in atipy piaria Yi Pakuwiat Morekuat no — Woro­ho­'onug eipe Miit'in Porekuat no yt e i atipy piaria pe Tupana. Meimẽwat yi totiaria porekuat no woro­ho­'onug yt e i. Ma'ato Tosa­'yru Iesui pe mio tã e — Woronug ni En Wuat'i Miit'in Porekuat no e. Mi'i hap etiat wyti mesup ahenoi hamuat ehepe.
HEB 2:6 Sa'a­wy'i wẽtup ok to'e miwan me — Tupana kat poteĩ miit'in ewawi uruewawi eraha'at kahato uruky'e kahato hap wywo e. Kat kawiano pyno urupã'ãu katu­pono uruto emiky'e kahato ko'i i'ewyte uwe sese Aheyke'et koro e. Kat poteĩ uruepiok kahato at ka'ap uruky'e hap wywo e. I'ewyte kat poteĩ ewyry teran kahato uruwywo. Kat poteĩ ehay teran kahato uruwyro Tupana e.
HEB 2:7 Tupana koitywy urumõ­typot hap iwato kahato aikotã atipy piaria ewy urumõ­typot En e. Kat poteĩ uruky'e mi'i kupitu e. Koitywy Urueyke'et etunug Yne Yne Eminug Ko'i Apykok Hano e. Ta'i imõtypot kahato hat En. Urueyke'et Painug Kahato Hat En Tupana e miwan me.
HEB 2:8 — Mi'i hawyi yne atopag Mi'i py ywyt'ok­pype ere'e Tupana. Mi'i Uimi­mõ­typot kahato topy­hu'at e. Mi'i aru atunug Wuat'i Porekuat no e miwan me. Pyno Mi'i Uruyke'et Wuat'i Porekuat nuat e. Mi'i pote ipo pe tutum torania hawyi yt kat i ra'yn yt ipo pe i re'ym e. Yne ra'yn ipo pe e. ma'ato mesup te yt i te ma'ato meiũran ti aru pywo sese topy­hu'at yne yne ipo pe to'e hap ewy e Tawi wepy hawe 8.4 piat pe.
HEB 2:9 Pyno koran aheha Iesui kape i'ewyte koitywy howawi aiwa­nẽtup hap. Mi'i ra'yn topy­hu'at hap kape aheha. Mekewat po'og iwato atipy piaria kawiat hat kape aiwa­nẽtup hap. Ma'ato mesu­wa­rotiat toĩne'en turan tuwe­mohit kahato. Atipy piaria e'yi kai te topy­hu'at. Yt atipy piat ewy hin i toĩne'en Aheyke'et mesu­wa­rote tuwe­pu'i nug hap e'at pe. Ma'ato ho'opot kahato aika­wiano hamo yi tote toĩne'en turan. Iku'uro miit'in ehakye­ra'at hamo. Koitywy Tupana tunug na'yn Wuat'i Porekuat no. Mi'i Miit tuwe­painug na'yn. Mi'i hawyi Tupana tunug Tosa­'yru Wuat'i Epa'i Koro wo ra'yn e. Mio koitywy Ahepa'i Koro wo Iesui ra'yn katu­pono Mi'i Miit ipitpit'ok yne aiminug sa'ag ko'i. — Koitywy waku ra'yn uiwa­nẽtup hawe eipe e Tupana ahepe. Koitywy wẽtup miit ewywuat wato­py­hu'at Tupana Ai'ywot ahepe. Wẽtup mẽpyt'in sok yn aito Aheyke'et mohey haria e. Ta'i yt watu­we­mõti hin i mesup te aiminug sa'ag sa'a­wy­'iwuat ete katu­pono wato­mohey Tupana Sa'yru hawyi wẽtup miit ewy wato­py­hu'at i'ywot wywo. Eipe uheywyt'in uheinyt'in e Iesui ahepe.
HEB 2:10 Tupana ti'a­tu­mo­herep yne yne mesuwat yi tote atipy tote at yi waikiru ko'i toi'a­tu­'a­tunug wuat'i toran na'yn toi'a­tu­mo­herep yi y'y ga'apy mi'at aimikoi ko'i toi'a­tunug wuat'i meimuẽ­waria e. Toi'a­tu­'a­tunug yne yne hawyi toi'a­tu­'a­pykok kahato yne tominug ko'i e. Ta'i toi'a­tu­moe­wyry yne tominug ko'i e. Waku pe tutunug at ka'ap yne tominug ko'i e. Mi'i pytkai toipo­'oro Tosa­'yru Iesui ho'opot kahato mesuwat yi hawywiat aheha­kye­ra'at hamo. Mi'i hawyi toho­'opot kahato po'og aikai mesuwat yi tote hawyi yt totoiat hin i ma'ato To'ywot miky­'esat ko'i tutunug yne. Toho­'opot kahato toĩne'en hawe toku­'uro hawe hawyi waku wato'e aiiã'ãg hap upi Aika­'iwat ewywuat — Mesup waho­'opot ma'ato Iesui po'og ho'opot aikai waku wato'e. Aheha­kye­ra'at hat ho'opot kahato aika­wiano hamo aiky'e pote waku wato'e. Aiky'e kahato hawyi ahereto atipy kape Aheha­kye­ra'at hat waku wato'e aiwo­'ope are.
HEB 2:11 Iesui ti aikoho kuap kahato. Pywo ti rat aipy'a piat aiminug sa'ag ko'i aiwa­nẽtup hap ko'i toimo­weityk kuap. Mi'i hawyi ainug To'ywot sa'y­ru'in saki­'yt'in no. Tupana mẽpyt'in no ainug hawyi Iesui Aheyke'et Aikywyt toĩne'en. Waku pe kahato hawyi wato­py­hu'at. Aikoho tosuu wo hawyi yt tuwe­mõti i to'e hamo ahepiat — Mi'iria ti uheywyt'in ko'i uheinyt'in ko'i e hap pupi yt tuwe­mõti hin i to'e hamo. Aheyke'et Aikywyt Iesui wati­mohey hawyi aikoho tosuu wo hawyi waku kahato e.
HEB 2:12 Sa'a­wy'i mio tã e Ha'yru Tupana pe — Woro­mo­herep En Papai wuat uheywyt'in uheinyt'in me e aikope aikope te'e­ru­we­'a­tunug ehay kuap hamo hap upi e. Mi'i pote — Areĩne'en i'atu­py­'a­setpe emõtypot hamo Papai uhehay wo uiwepy hamo irania'in wywo emõtypot haria yatype emõtypot haype Papai e morekuat Tawi miwan 22.22 pe.
HEB 2:13 I'ewyte mio tã e Ha'yru Tupana pe — Emohey uhepiat hap koitywy tuwehik kahato ra'yn uhete e. Eraha'at ro uhowawi Papai e. Koitywy emohey haria ahyt ra'yn tukup­te'en na'yn uiwywo emiium ko'i esa'y­ru'in ko'i esaki­'yt'in ko'i e sa'a­wy'i Tupana ehay moherep hat Isaia miwan 8.18 pe.
HEB 2:14 Pyno aito miit kawiat ma'ato — Uha'y­ru'in uhaki­'yt'in eipe e Tupana ahepe Tosa­'yru mohey haria pe mesup. Miit pu'i kawiat kahato Iesui piit ma'ato yt karãpe i tutunug yt naku i. Iku'uro aika­wiano hare pote tuwenug miit no i'ewyte wẽtup piit ewy iwywo wato­py­hu'at wati­mohey hawyi e. Wẽtup suu ewy kahato iwywo aito i'ewyte aihep ta'yn ahiag po pyi tutu'u yne aiku­'uro hap hawyi. Sa'a­wy'i ahiag aimo­ken'ẽ kahato aiku­'uro hamo ma'ato mesup Iesui tihep ta'yn mekewat aimo­ken'ẽ hap.
HEB 2:15 Nimo te turan ni aiku­'uro hap pupi wato­ken'ẽ kahato. Sa'a­wy­'i­tewuat aheĩne'en hap ti aiken'ẽ aiku­'uro pupiat hap yn ni toĩne'en ahete ma'ato mesup yt kat i ra'yn katu­pono Aheyke'et Aikywyt iku'uro aheiam me pote.
HEB 2:16 Iesui topy­hu'at miit piit ai'e­wywuat pote. Yt tuwe­pu­'inug hin i atipy piat topu'i ewy ma'ato mesuwiat mu'i ewy yn tuwe­pu­'inug hawyi aipiit wo topy­hu'at. Aha'a­se'i Aparãu Saipepiat hemia­riru Emiariru kaipywiat tuwe­pu­'inug yne miit'in mesu­wa­rotiat powyro hamuat.
HEB 2:17 Mi'i hawyi tuwe­'y­wã'ĩ miit no tuwe­mo­herep. Miit kahato no ra'yn topy­hu'at. Mi'i tupono waku kahato Miit Mi'i hat. Tuwe­moe­ha­ky­'e'i tuwewi aika­wiano hano Ahepa'i Koro topy­hu'at pote toha'up nug na'yn aiminug sa'ag Tupana pe. Tutu'u yne ai'a­piheg hap ko'i hawyi aiwywo topy­hu'at. I'ywot Tupana waure wo topy­hu'at aiminug sa'ag ko'i kai koitywy. Yt karãpe i aima'at hano topy­hu'at i'ewyte yt karãpe i To'ywot ma'at hano topy­hu'at. Mi'i pote Ahepa'i sese Mi'i.
HEB 2:18 Ahepa'i Iesui tikuap kahato ahepiat ho'opot hap i'ewyte ahiag kaipywiat ahã'ãg hap tohã'ãg yne. Mi'i tupono ihaky­'e'i kahato ahepiat ho'opot turan. Aika­wiano hat kahato topy­hu'at Mi'i Iesui. Toikuap kahato ahã'ãg piat ahã'ãg hap pote koitywy aipo­wyro kuap kahato ahiag miat aima'at turan. Aipo­wyro kuap kahato ahepiat ho'opot hap e'at pe katu­pono toikuap kahato ahiag piat toiã'ãg hap. Sa'a­wy'i mesu­wa­rote toho­'opot kahato miit'in miky­ry'i hap ete mi'i pote aipo­wyro kuap kahato ahepiat ho'opot hap ahete turan. Ta'i Iesui tikuap kahato ahatek hap saty hap mesup watikuap.
HEB 3:1 Pyno Iesui po'og atipy piaria kai i'ewyte mesu­wiaria kai. Waku watu­wa­nẽtup kahato aimi­mohey kape. Tupana mimowaku ko'i aito uiwy­ria'in. Aito wẽtup ok ywyt'in ko'i wo yn Tupana ainug Aheyke'et Iesui pote. Aito wẽtup sok yn wuat'i atipy kapiat wat hanuaria aito. Koitywy Tupana aikaykay atipy kape. Mi'i pote waku watu­wa­nẽtup kahato Ahepa'i Koro Iesui kape hawyi — Iesui Ahepa'i Koro wato'e irania'in me mi'i pote wẽtup yn miit ewywuat wato­py­hu'at wẽtup ehay ewy yn wato'e.
HEB 3:2 Sa'a­wy'i aha'a­se'i Musei ti'a­tu­'a­pykok Tupana emiit'in Tupana piat topo­'oro hap ewy. To'ya­ty­piaria ewy tutunug. Yt ipohep hin i i'atu­ky'e hap ete. Mi'i pote Musei Tupana mimõ­typot kahato wo topy­hu'at. Ma'ato Ha'yru Iesui po'og Musei kai — Mi'i Miit Uimi­mõ­typot Po'og e Tupana. Yt uwe i mi'i rẽ mi'i kai uimi­ky­'esat yn nug hat e. Mi'i Miit po'og uiwa­nẽtup hawe uimi­ky­'esat nug yne hat e Tupana Iesui etiat.
HEB 3:3 Pyno Musei Tupana mohey haria apykok kahato hat Tupana emiit'in powyro kahato hat. Mi'i hawyi Iesui po'og Musei kai katu­pono po'og toi'a­tu­'a­pykok Tupana yat piaria Musei kai e. Pyno Tupana yat piaria Akag Iesui topy­hu'at Tupana yat piaria Apykok hat sese. Tupana yat yne nug hat toĩne'en.
HEB 3:4 Uiwy­ria'in karãpe aiminug ai'yat ipakup ikahu rakat topy­hu'at aimi­mõ­typot kahato hamo toine'en. — Ta'i ehepap kahato yat nug hamuat e miit'in ahepe. Ikahu tig iatu'e ahepe ai'yat pakup hawyi ainug hap aimõ­typot hap topy­hu'at. Ma'ato po'og po'og Tupana mõtypot hap wato­py­hu'at ai'yat kai katu­pono inug hat aito pote.
HEB 3:5 Pyno Tupana miky­'esat ewy Musei tunug Tupana yat piaria apykok hap ete. Ipotpap Tupana mohey haria apykok hap ete. — Atunug aru e'e hap ewy e Tupana pe. Mi'i hawyi ihay kahato aikotã aikotã Tupana to'e hap ewy to'e.
HEB 3:6 Ma'ato Aipo­typot Iesui po'og Musei kai kat pote Tupana Sa'yru sese pote. Mi'i pote po'og waku topy­hu'at i'yat piaria apykok hamo Ha'yru pote. Musei Tupana eropat hat ma'ato Iesui Ha'yru sese. Pyno aito imohey haria Tupana yat piaria ewywuaria watoĩ­ne'en. Ta'i mi'i tã aito wato­mohey pot'i pote — Uito imohey hat wato'e yt aiwe­mõti hin i pote. Pywo ti rat Iesui yn aimie­katup ai'e pote. Iesui yn aheha­kye­ra'at kuap hat wato'e pote. Yt kat i aiwe­mogyt hap aiku­'uro hap mesup wato'e. Mio tã ai'e pote Tupana yat piaria wuat aito.
HEB 3:7 Koitywy Tupana Pã'ãu Wakuat aimu'e kahato mio tã e — Karãpe Tupana ihay ewywo turan o yt ehewã­'ãhik tei'o ehewaure ka'a e.
HEB 3:8 Yt epy'a ran nei'o e. Yt ere'e sa'ag nei'o eipy'a pe — Yt atiky­'esat i uipy'a pe Tupana ehay e hap ewy yt ere'e tei'o. Yt eweikup­te'en nei'o aikotã ai'y­wania sa'a­wy­'i­wuaria ipy'ahak takaria yahig notiaria ewy e. Katu­pono mi'iria tu'uka kahato Tupana ete. Ta'a­tu­hã'ãg kahato Tupana ta'a­tu­minug sa'ag wo sio uru'a­piheg sio yt hap kuap hamo. — Pyno yt naku i mi'iria ewy ewetunug e Tupana Pã'ãu ahepe.
HEB 3:9 Pyno mio tã e Tupana mesup ahepe. — Yahig notiaria ehe'yian­miaria uhã'ãg kahato ta'a­tu­minug sa'ag wo sio ati'a­tu­'a­piheg sio yt hap kuap hamo e. Mot'i uhã'ãg e hawyi uimo­py­'ahak teran 40 anu itote e. Te'e­ra­'a­kasa yne uiminug wakuap ta'a­tuepiat ko'i pytkai yt miit'in minug kuap i ko'i atimo­herep kahato i'atuepiat pytkai yt uimohey i e.
HEB 3:10 — Mot'i hawyi uimo­py­'ahak kahato ehe'yian­miaria eha'a­se­'i'in e. Ei'y­wa­niaria wanẽtup hap yt karãpe i waku atipuẽti e. Yt naku i hap kape yn i'atu­wa­nẽtup hap. Ati'a­tu­mo­'a­kasa kahato uipu'ap uiwa­nẽtup waku rakat kapiat ma'ato — Yt uruiky­'esat i i'atu'e uhepe e.
HEB 3:11 Mi'i pote uipy­'ahak i'atuete ei'y­wania sa'a­wy­'i­wuaria ete e. Mi'i hawyi mio tã are'e i'atuepe. — Uimo­py­'ahak eipe e. Woro­ho­'okuap ta'yn eipe e. Yt naku i nug haria eipe e. Mi'i pote aru woro­ho­'o­'a­pihag ui'e hap ewy e. Eweipap yne mesuwat yahig wato tote e. Yt eweipuẽti i eimo­wepit hap yi wakuat rote aikope ewemohy hap tote e sa'a­wy'i Tupana ai'y­wania Epereu ywania pe.
HEB 3:12 Uiwy­ria'in uheinyt'in wẽtup yn I'ywot rakaria aito pote woro­ho­'o­nãpin — Waku aiwe'eg wo Ahetu­pana mohey hap pun hap pupi katu­pono yt naku i kahato aipy­'ahak Tupana ete hap are'e. Yt naku i watoiat Tupana yt kat i imohey hap aikawiat haype. Yt naku i wato­py­hu'at wuat'i e'at piat ieĩne'en hat ewanĩkap mo Ahetu­pana atoiat haria wo.
HEB 3:13 Ui'y­wania waku wato­py­hu'at aito wo'o­ky'e haria wo katu­pono mesup ta'yn wato­'o­po­wyro kuap. Waku mesup ta'yn wato­'o­po­wyro aipy'a heg Tupana kapiat hap monik hamo. Waku wato­'o­ky'e mesup ta'yn mesup te katu­pono yt watikuap i sio toine'en mũki­'ite aiwanuat sio yt hap. Sa'ag nug hap aheko aima'at kahato hap topy­hu'at wuat'i e'at pe e. Waku wo'o­ky'e haria wo wato­py­hu'at. Mũki­'ite put'ok'e pote waku yn mi'i tã hap nug haria wo watu­kup­te'en hawyi mũki­'ite e'ihot'ok waku wo'o­ky'e haria wo te'en te'en wato­py­hu'at wuat'i e'at pe mesuwat ewy. Yt pote wo'o­ma­'at'i haria wo wato­py­hu'at.
HEB 3:14 Pyno waku uiwy­ria'in wato­mohey aheĩne'en hap ok tã aikotã sa'a­wy'i wato­mohey hap ewy te te'en te'en waku wato­mohey Iesui hawyi yt naku i wẽtup mohey hap kape i kowo'i kowo'i ne'i wati­'ywyk ywyk imohey hap. Waku wato­mohey Iesui akasa hap kape. Waku iheg me imohey hap ete aiku­'uro hap kape. Mi'i tã watunug mote Aika­'iwat ekatu­wyria wo wato­py­hu'at torania aitoria wuat'i e'at pe.
HEB 3:15 Tupana piat ai'y­wania nãpin hap ewy woro­ho­'o­nãpin. Mio tã e Tupana sa'a­wy'i miwan me — Koitywy eweikuap uhehay pote yt eweikup­te'en nei'o ipy'ahak takaria wo uhehay ete e. Yt eweikup­te'en nei'o sa'a­wy­'iwuat uhehay pun haria wo aikotã eha'a­se­'i'in yahig notiaria ewy e. Uiwy­ria'in yt naku i wato­py­hu'at ipy'ahak Tupana etiat rakaria aha'a­se­'i'in sa'a­wy­'iwuat ewy.
HEB 3:16 Uwe apo ipy'ahak sa'a­wy­'i­wuaria Tupana piat ta'a­tu­nãpin hap ete. Ta'i ai'y­wania aha'a­se­'i'in Musei mihep wanĩ­kap­tiaria po pywiaria ko'i i'atu­py­'ahak kahato Tupana nãpin hap ete.
HEB 3:17 Uwe apo meimuẽ­waria 40 anu turanuat yahig wato tote sa'ag yn nug haria Tupana mõpy­'ahak hanuaria. Ta'i aha'a­se­'i'in ai'y­wa­niaria Iuteu ywania. Ta'i ai'y­wot'in aity'in topap yne i'atu­minug sa'ag ti'a­tu­'uka.
HEB 3:18 Uwe wywo Tupana to'e sa'a­wy'i — Pywo ti rat yt wẽtup ok i atipuẽti eiperia waku rakaria pote yt uwe i teke kuap eiperia uhe'yi pakup we aikope aiwo­'o­mo­wepit hap kape aiwe­mohy hap kape e ipy'ahak takaria pe ahe'yian­miaria pe Tupana.
HEB 3:19 Pyno ahary'in aha'a­se­'i'in yt tipuẽti i ta'a­tue'yi wakuat yi Kanã'ã Tupana — Atum aru e pytkai. Ta'i yt ta'a­tu­mohey i — Atum aru e hap pote yt ta'a­tu­puẽti i. Yt naku i yt wato­mohey i mi'iria ewy are.
HEB 4:1 Pyno mio tã e Tupana sa'a­wy'i — Eweihyt'ok yi pakup we yi Kanã'ã pe pote eiwe­mohy aru itote uiwywo ui'e hap ewy e. Pyno to'iro watu­we­hyt'ok Tupana e'yi pakup we iwywuat aiwo­'o­mo­wepit hap kape. Waku wato­ken'ẽ kahato yt wateke i hap pupi.
HEB 4:2 Pyno koitywy watikuap mekewat sehay aikotã sa'a­wy'i aha'a­se­'i'in tikuap hap ewy ma'ato ta'a­tukuap pytkai yt kat hamo i topy­hu'at yt ta'a­tu­mohey i pote.
HEB 4:3 Mio tã e ai'y­wa­niaria nimo te wuaria pe — Uimo­py­'ahak haria eipe e mi'i pote pywo ti rat yt karãpe i aru eiwe­hyt'ok aikope aiwe­mohy hap kape yi wakuat pe yt uimohey i eipe pote e. Ma'ato aito imohey haria pote aiwe­mohy Tupana piat hap toĩne'en i'e hap ewy katu­pono karãpe Tupana tunug yne hawyi — Waku ra'yn toran na'yn e mi'i hawyi tuwe­mohy. Mi'i hap ewy waku watu­we­mohy iwywo e morekuat Tawi wepy 95.11 pe.
HEB 4:4 I'ewyte Tupana henoi aikotã sa'a­wy­'ite tuwe­mohy hap etiat miwan me — Tutunug yne mesuwat mytyp at waty waikiru ko'i hawyi tuwe­mohy e miwan me. 6 e'at tuwe­potpap hawyi ipohep waku yne ra'yn tominug hawyi tuwe­mohy 7 e'at piat hawyi e miwan me.
HEB 4:5 Mi'i hawyi to'e tominug ko'i miit'in me — Eweikup­te'en no mesuwe hawyi woro­ho­'o­poi­tyro mono mesuwat uimikoi yi wakuat pe e. Eiwe­mo­wepit kahato hap atum teran ehepe mesuwe e ai'y­wania pe sa'a­wy'i ma'ato — Yt rat i'atu'e Tupana pe. Mi'i pote — Yt karãpe i eiwe­hyt'ok aru mesuwe aiwe­mohy hamuat uhetama pakup we e Tupana haty wo morekuat Tawi miwan 95.11 pe.
HEB 4:6 Yt ta'a­tu­mohey i pote yt tuwe­hyt'ok kuap i tawa wakuat Kanã'ã pe. Mi'i pote mesup Tupana to'e irania'in me wuat'i ywania pe — Waku eiwe­mohy mesuwe uhetama pe uiwywo e ahepe. Ai'y­wania sa'a­wy­'i­wuaria yt imohey i Tupana toi'a­tu­nãpin kahato pytkai. Yt tuwe­hyt'ok i Tupana wemohy hawe yi kanã'ã pe. Pyno waku aiwe'eg wo hap wywo wateke Tupana wemohy hawe atipy pe i'ewyte mesuwe toiky­'esat.
HEB 4:7 Tupana ti'airo aiwe­mohy hap e'at yt sa'a­wy­'iwuat yi kanã'ã piat yt ewywuat i. Mio tã e Tupana mesup ahepe — Koitywy ehe'at sese eiwe­mo­wepit hamuat e. Mi'i pote meiũran Tupana ihay i ra'yn morekuat Tawi wẽ pyi aiwe­mohy sese hap e'at ete ihay — Mesup e'at eweiwe­mohy teran wuat'i e'at pe pote eweĩ'ẽ ro uhowawi mesup e. Eweikuap uhehay pote yt eweimopun nei'o eipy'a pe eikaykay hap kape e Tupana ahepe morekuat Tawi wepy 95.7 pe.
HEB 4:8 Pyno aha'a­se'i Musei yt teke i yi Kanã'ã pe ma'ato haipepiat Iusue hupi ai'y­wania Epereu pusu kuap haria nimuat tuwe­hyt'ok yi Kanã'ã pe e. Ma'ato itote yt te'e­ru­we­mohy hin i yi Kanã'ã pe. Tu'uka hap yn ta'a­tunug itote irania'in ywania wywo. Ma'ato mi'i pytkai — Atum aru meiũran ehe'at sese eiwe­mohy hap e Tupana ahe'yian­miaria pe.
HEB 4:9 — Ma'ato tut aru eiwe­mohy hap e morekuat Tawi. Ma'ato sa'a­wy'i yt kat i itote morekuat Iusue e'at pe. Mio ti wati­ky­'esat pote toĩne'en na'yn aiwe­mohy Tupana kaipywiat hap aiwepit hap aito Tupana emiit'in wuat pote.
HEB 4:10 Aheha­kye­ra'at ra'yn hawyi waku yne ra'yn hawyi aiwe­mohy hap ewy toĩne'en. Yt kat i aipotpap po'og aiwe­ha­kye­ra'at hamuat katu­pono Iesui potpap upi aheha­kye­ra'at hap toĩne'en. Aria'yp posok tote toikyiat aiwepit hap. Tuwe­mohy ra'yn mesup Iesui. Apyk pe ra'yn toĩne'en. Waku ra'yn watu­we­mohy iwywo. Mi'i pote yt naku i watu­we­potpap aheha­kye­ra'at hap kyi'at hamo ne'i katu­pono aheha­kye­ra'at hap kyi'at hap toĩne'en na'yn Aika­'iwat tunug.
HEB 4:11 Sa'a­wy'i — Eweiwe­hyt'ok o ehe'yi Kanã'ã pe e Tupana ahe'yian­miaria pe. Waku itote eiwe­mohy e ma'ato — Yt i'atu'e. Mi'i hawyi howasat rakaria wo tukup­te'en yahig note. Yt naku i mio tã wato'e Tupana pe. Waku wato'e — Ta'i urupap kahato eupi waku wato'e. Urutu­we­mohy teran kahato ewywo waku wato'e. Yt naku i aho'o­wasat hap topy­hu'at nagnia ewy uiwy­ria'in.
HEB 4:12 Tupana aikuap kahato. Tehay hãi hyk kahato aikotã kyse'yp haĩhyk to'owa piat rakat sura­ra'in ekyse'yp ewywuat Tupana e hap. Hãihyk hesaika mekewat kyse'yp ewywuat Tupana ehay teke kuap kahato aipiit pe aiwa­nẽtup hawe. Toitek tek kuap kahato aiminug sa'ag ko'i. Tupana ehay aimoieĩ­ne'en kuap kahato. Yt heremo i aipiit piat rakat yt naku i hap toipuruk kuap kahato aiwa­nẽtup hap kaipyi aipiit pyi. Hesaika kahato Tupana ehay aimoe­hãite hap nug hamuat aiwa­nẽtup hawe. Tupana ehay tikuap kahato aipã'ãu. Toikuap kahato kat e hap kat e hap aipiit pe toĩne'en hap sio wato­mohey teran sio wati­mõ­typot teran sio watu­we­mõ­typot teran sio miit'in aimõ­typot hap yn wati­ky­'esat sio Tupana mõtypot hap wati­ky­'esat hap. Kyse'yp haĩhyk takat ewy Tupana ehay tipo­'oro kuap kahato yt naku i aiwa­nẽtup hap pya pyi aikai. Toipat'ok kuap kahato yt naku i sio waku hap. Toikuap yne aipiit piat yt heremo i rakat. Toikuap kahato aipy'a piat aimi­ky­'esat ky'esat hap toĩne'en hap ihay teke teke kahato aiwa­nẽtup hawe pote. I'ewyte kan hamõi watunug wakuap hap toikuap. Toikuap aiwa­nẽtup waku sio yt hap. Kat pote mekewat sio Tupana ky'e hap aikai sio yt mi'i i hap toikuap. Sio aiwe­mõ­typot hap sio Tupana mõtypot hap toikuap. Yt heremo i rakat wen aiwa­nẽtup hap toikuap yne aipy'a piat aimi­ky­'esat ko'i kyse'yp hãi hyk to'owa piat rakat ewywuat tehay wo.
HEB 4:13 I'ewyte Tupana tikuap yne yne miit'in waku hap sio yt naku i hap wuat'i ywania wat aikope aikope gupte'en hap tote katu­pono yne aiminug ko'i miit'in mi'iria pote. Yt watu­wemig kuap i Tupana pupi aiwa­nẽtup hap waku sio yt hap toikuap yne pote. Aiminug ko'i i'ewyte heremo yne Tupana pe sio waku pe sio yt naku i pe hap toikuap. Pyno waku aiwe'eg wo katu­pono meiũran tuwe­mo­herep yne kuap aiminug ko'i wuat'i ehamo. — Kat poteĩ mi'i tã ne'i ewetunug e aru ahepe. Kat poteĩ mio tã ne'i erewa­nẽtup e aru Tupana ahepe. Uiwesat ro e aru. Ara'a­kasa yne tig eminug ko'i e aru ahepe haty wo.
HEB 4:14 Ma'ato toĩne'en wẽtup aika­wiano hat ihay Tupana wywo rakat Mi'i Miit ri Ahepa'i sese Iesui. Ha'a­wy­tepyi tutunug yne To'ywot miky­'esat ok tã hawyi ti ta'am atipy kape. Teke ra'yn To'ywot wywuat pe Ahepa'i Koro sese. Mi'i tupono waku wato­mohey Mi'i Mi'it aiku­'uro hap kape. Mi'i tupono waku wato'e yne e'at pe howawi — Woro­mohey En Iesui wato'e waku.
HEB 4:15 Katu­pono Ahepa'i Tupana wywuat ihay aika­wiano hat yt mesu­wa­ro­tiaria yt ewy hin i. Karãpe ahete ahatek hap put'ok'e hap haty hap topy­hu'at hawyi toikuap kahato katu­pono Mi'i Pa'i haty'u kahato satek hap sa'a­wy'i tuwete. I'ewyte yt ahesaika i hap toikuap kahato katu­pono sa'a­wy'i mesuwe ai'ewy tohã'ãg tosero hap mesuwat yi tote. Sa'a­wy'i hã'ãg ahiag kaipywiat hap toikuap kahato yt naku i nug hamuat hap katu­pono ahiag hã'ãg kahato Iesui yne yt naku i mug hamuat katu­pono Iesui aipiit pi'i eweywuat kawiat sese Ahepa'i Koro hawyi yne toiã'ãg ahiag miat hap toikuap ma'ato yt ta'at i toma'at hap upi. Ta'i Aika­'iwat no kahato ti Ahepa'i toĩne'en. Karãpe yt naku i hap ahete pote aika­wiano hamo topy­hu'at aipo­wyro kahato ahiag sopo hamo.
HEB 4:16 Mi'i pote waku watuwat Tupana kape yt aiken'ẽ wywo hin i yt kat i aiwe­mõti hap wywo katu­pono toĩne'en aiwywo Ahepa'i Koro. Mi'i pote ti hegyi'at kahato Tupana ahepe Ahepa'i Koro ky'e haype Ahepa'i Koro emiit no watoĩ­ne'en mote. Wahenoi yne aiminug sa'ag tope pote meremo topy­hu'at waure wo. Wati­ky­'esat aipo­wyro hap ho'opot hap e'at piat pote waku merep wahenoi tope. Wahẽtup hawyi meremo tutum ne'en ne'i aipo­wyro hap. I'ewyte satek hap saty monik hamo wahẽtup pote meremo tutum ahepe teha­ky­'e'i hap. Ta'i hegyi'at kahato ahepe katu­pono Ha'yru Ahepa'i wo toĩne'en pote. Toĩne'en atipy pe ahehay moherep To'ywot piat hano Ahepa'i. Mi'i hawyi I'ywot aimoe­saika kahato kat e hap kat e hap niatpo kahato rakat ahete hap turan aimoe­saika kuap kahato e.
HEB 5:1 Nimo te pyi Tupana ti'airo wẽtup miit ai'y­wania pa'i koro wo — Atiky­'esat en pa'i wo miit'in ehay moherep uhepiat hamo e i'ewyte i'atu­minug moherep uhepiat hamo e. Woro­'airo en wẽtup ok yn pa'i akag wo e. Karãpeĩ miit tunug sa'ag hawyi waku eti'auka i'atumiium wo ehũ i'atu­minug sa'ag hep hamo e. Mi'i etunug mote waure wo areĩne'en i'atu­minug sa'ag kai e Tupana tomi­'airo pa'i koro pe sa'a­wy'i ai'y­wania pe.
HEB 5:2 — Woro­'airo en miit'in atuky'e hamuat e. Karãpeĩ miit'in ui'atoiat hawyi waku paa'ere o epy'a pe miit'in satek hawyi e. Mi'i hawyi etimo­herep i'atuepe mu'ap uhowawiat e. — En miit kawiat ereĩne'en e i'ewyte etikuap miit'in miat i'aparap ta'yn hap yt i'atu­we'eg i hap ko'i yt ikuap kahato i hap ko'i hawyi waku eti'auka ta'a­tue­hũria ta'a­tue­ka­wiano i'ewyte ekawiano e sa'a­wy'i Tupana tomi­'airo pa'i koro pe.
HEB 5:3 — En ni tapy'yia ewy kahato i'aparap hat pote waku eti'auka ehũ emi'a­parap moweityk hamo i'ewyte emiit'in minug sa'ag ko'i hep hamuat e. Mi'i nug hamo woro­'airo e Tupana.
HEB 5:4 — Woro­'airo pa'i akag wo e. Yt miit'in mi'airo hap kaipyi i ereĩne'en pa'i koro wo ma'ato uimi­'airo en e. Yt naku i ere'e miit'in me — Ui'airo no eipa'i wo katu­pono uito yn waku pa'i akag airo hamo e. Yt e'e hap kaipyi pa'i koro wo ereĩne'en. Ma'ato ui'e hap kaipyi yn waku e. Nimo are'e Musei ywyt Arãu me — Woro­'airo en miit'in epa'i akag wo e. Ereĩne'en no miit'in py'a­setpe pa'i koro wo are'e Musei ywyt Arãu me sa'a­wy'i e. Arãu yt tuwenug hin i pa'i koro wo ma'ato uimi­'airo uimi­ky­'esat ewywuat ne'i Arãu e Tupana.
HEB 5:5 Tupana tunug Aika­'iwat Iesui Arãu ewywuat kahato ma'ato po'og mi'i kai. Yt tuwenug hin i Ahepa'i Koro wo Iesui. Yt tuwe­mõ­typot i pa'i wo ma'ato Tupana mimõ­typot no Mi'i Miit toĩne'en. Aikotã Tupana to'e sa'a­wy'i miwan me hap ewy — E'ywot sese ti Uito Uha'yru e. Wuat'i e'at piat Uha'yru En e katu­pono wuat'i e'at piat E'ywot sese wo areĩne'en e. Mesup e'at woro­mo­herep En wuat'i miit'in me Uha'yru hap e. En yn Uha'yru mesuwe miit kaipywiat e wepy hawe 2.7 miwan me.
HEB 5:6 Mi'i hawyi to'e Tupana wẽtup miwan me — Uha'yru e woronug en wuat'i e'at piat wuat'i ywania Pa'i Koro wuat woronug En mekewat aikotã sa'a­wy­'i­tewuat pa'i koro Meke­se­teki hap het rakat ewywuat sese Uha'yru e sa'a­wy'i morekuat Tawi Tosai­pepiat Iesui etiat 110.4 miwan me.
HEB 5:7 Mi'i hawyi mesuwat yi totiat toĩne'en turan Ahepi'i Sese Iesui ihay Tupana kape tuwak popuo tepiat haty'u hap wywo tohẽtup hẽtup tehay wo — Papai Papai e uihep En gu'uro po pyi e uiku­'uro hap kaipyi uihep o En gu'uro po pyi e haty wo. Mi'i hawyi Tupana tiwesat — Pywo Uha'yru atunug aru e'e hap ewy e. Worohep En gu'uro pyi e Uimõ­typot kahato hat En mote e uimi­ky­'esat ewy ne'i eku'uro pote e. Eremohit kahato mi'i pote woro­mõ­typot Uha'yru e. Emiẽtup ok tã worohep En gu'uro pyi e.
HEB 5:8 Tupana Sa'yru sese Iesui ma'ato toho­'opot popuo tuwe­mu'e Tupana miky­'esat nug hap ete paa'e hat ewy. Mi'i kaipyi aimo­hãpyk hamuat tutu'u yne tepiat ho'opot hap hawyi toikuap Tupana miky­'esat nug hap. Yt iku'uro teran i pytkai iku'uro aika­wiano Tupana miky­'esat toiky­'esat pote.
HEB 5:9 Aika­'iwat yt karãpe hin i i'aparap To'ywot miky­'esat nug hap ete pote — En yn miit'in ehakye­ra'at hano e Tupana. Iesui wato­mohey hawyi tutum aheĩne'en wuat'i e'at piat hamuat ahepe tomi­ky­'esat nug haria wo watoĩ­ne'en mote.
HEB 5:10 Toho­'opot kahu hawyi. — Pywo sese hãpyk takat miit En e Tupana tope. Ewaku hap uiat ewy pote waku En yne miit'in Epa'i wo e. En ni mekewat pa'i wakuat sa'a­wy­'iwuat Meke­se­teki ewywuat e. Pa'i Meke­se­teki Saipe­piano Sese woronug En e Tosa­'yru pe.
HEB 5:11 Uiwy­ria'in woro­ho­'o­mu'e teran Pa'i Meke­se­teki Saipepiat ete. Ahenoi teran po'og Iesui ete wen ma'ato ehewaure ka'a iperup kahato Tupana ehay etiat kuap hamo. Ta'i eweiket kahato eiwa­nẽtup hawe Tupana etiat eimu'e turan mi'i pote yt woro­ho­'o­mu'e kuap i yne Ahepa'i Akag etiano.
HEB 5:12 Mot'i eweikup­te'en Iesui mohey haria pytkai — Urumu'e i ro ewei'e yn yt uruikuap i te ti urumu'e hap Tupana eha etiat ewei'e at ka'ap haria eipe. Are pãi koitywy ti waku ra'yn miit'in mu'e haria wo eweikup­te'en ma'ato ti yt itag i te Tupana ehay kuap hap etiaria eiperia are. Mi'i hawyi ikuap perup i haria eweikup­te'en. Mi'i pote miit'in mimu'e wo te ne'i eweikup­te'en. Mi'i pote — Uruiwaure ra'yn sa'a­wy­'i­tewuat urumu'e hap e haria wo eipe. Mi'i pote urumu'e i ro mehĩ mana mekewat sa'a­wy­'iwuat sehay Tupana etiat ehenoi i ro uruepe ewei'e. Aikotã hirakat ihire te rakat ewy eweikup­te'en Tupana ehay kuap hap ete. Aikotã aimẽpyt hit yt tenuk kuap i iheg kahato rakat ete hap ewywuat kahato eweikup­te'en Tupana ehay u hap ete. Aikotã aimẽ­pyt'in mĩ hy yn iky'esat hap ewy eweikup­te'en. Tupana ehay mi'u pu'i ewywuat u hap ete yt eweikuap kuap i.
HEB 5:13 Niatpo rakat sa'a­wy­'iwuat Tupana ehay etiat kurin kurin eweikuap. Aimẽpyt ihup te rakat ewy mĩ hy yn toisym kuap ewywuat eipe katu­pono yt eweikuap i te kat ko'i kat ko'i som sio pywuat sio yt pywuat i hap. Sio waku watunug sio yt naku i watunug e hap katu­pono Tupana pywuat hap yt eweikuap i te sio waku sio yt Tupana e hap yt eweikuap i te pote.
HEB 5:14 Ma'ato nagnia hãi rakaria ihãite rakaria tutu'u kuap kahato ipu'i kã'ã iheg nakat ihainia'in hary­po­ria'in. — To'iro watenuk i'atu'e aimi'u ra'yn i'atu'e. Mi'i hap ewy Tupana ehay miwan miat kuap haria ihãite rakaria Iesui mohey haria Tupana ehay kuap kahato rakaria tikuap kahato kat som waku watunug kat som yt naku i watunug hap ko'i Tupana e hap miwan miat pyi. Mi'i haria Tupana nug haria te'e­ro­py­hu'at ta'a­tue­hãite imohey hap etiano. Mi'iria mi'u pu'i u haria ewy are.
HEB 6:1 Sa'a­wy'i kurin kurin watikuap Aipo­typot Iesui etiat. Kurin kurin watikuap ihay etiat. I'ewyte sa'a­wy'i aipot­mu­'eria Iuteuria aimu'e kurin kurin Tupana Mipo­'oro Aipo­rekuat nuat ete. Mi'i ko'i toĩne'en ne aiwa­nẽtup hawe. Waku mi'i ko'i wen ma'ato po'og waku watikuap yne yne Iesui e hap yne yne iminug ko'i e. Waku watu­we­motag ikuap hap ete. Yt naku i wato­py­hu'at mekewat aimikuap hit hap ewy yn. Sa'a­wy'i — Ewetoiat ro eiminug sa'ag ko'i hawyi eweto­mohey ro Tupana i'atu'e ahepe hawyi i'atuehay upi watuwat.
HEB 6:2 Pyno ai'y­wania Iuteuria te'e­ru­we­piitsei te'e­ru­we­posei te'e­ru­we­pysei kahato aheko ewy. Mi'i hap yn sa'a­wy'i watu­we­mu'e. Mi'i watunug watunug aiwe­mõ­pokuap hamo pote — Waku pe wato­py­hu'at Tupana pe sa'a­wy'i wato'e. Sa'a­wy'i watu­we­ponug aimi­'auka aihũ tote hawyi tuweityk aiminug sa'ag wato'e sa'a­wy'i. Waku watoiat mi'i ko'i katu­pono mesup Aika­'iwat yn aheha­kye­ra'at kuap waku wato'e yn. Sa'a­wy'i aikotã aru iku'uro rakaria tukup­te'en hap kape yn watu­wa­nẽtup aikotã te'e­ru­we­hymut hap kape yn watu­wa­nẽtup aikotã aru Tupana ti'a­tu­hymut mi'iria gu'uro pyi hap ete yn watu­wa­nẽtup.
HEB 6:3 Sa'a­wy'i mi'i hap kape yn watu­wa­nẽtup Iuteuria ywania aito pote. Mesup koitywy waku watu­wa­nẽtup aheko kape ma'ato aikotã aimu'e hit hap kape hap ewy. Waku po'og watu­wa­nẽtup Iesui eko kape katu­pono aimu'e Iesui etiat po'og aheko sa'a­wy­'iwuat kai pote.
HEB 6:4 Iesui toine'en aipy­'a­setpe turan ai'y­wania tuwat kahato Aika­'iwat ehay upi — Pywo i'atu'e sa'a­wy'i Iesui e hap ete hawyi paa'i­'a­tu'e ta'a­tu­minug sa'ag ete hawyi i'atu­wepit kahato mekewat kuap pakup hap ete. Tupana Miium Iesui ta'a­tuiã'ãg sio waku sio yt hap ete sio Tupana ehay ihay sio yt hap kuap hamo ta'a­tuiã'ãg. Mi'i turan Tupana Pã'ãu wakuat i'atu­mu'e kahato ai'y­wania Iuteuria. Mi'i hawyi te'e­ro­py­hu'at Tupana Wakuat Pã'ãu eiam wo.
HEB 6:5 Mi'i hawyi Tupana ehay wakuat ete iwẽ pywiat kurin kurin ta'a­tukuap hawyi — Waku kahato i'atu'e. He kahato Tupana ehay i'atu'e ai'y­wania. Waku kahato aru karãpe put'ok'e ra'yn ti Tupana mesuwe Aipo­rekuat no i'atu'e irania'in ai'y­wania.
HEB 6:6 Mi'i ta'a­tukuap yne hap kaipyi ta'a­tu­'atoiat sa'ag Iesui. Ta'a­tupun yne imohey hap itote hawyi — Yt uruimohey i Mi'i Miit i'atu'e — Ewei'auka ro ewei'auka ro e haria tukup­te'en ai'y­wania. Ewei'auka aria'yp posak ete yt wati­ky­'esat i Tupana Sa'yru Aipo­rekuat no e haria mi'iria. Yt kan hamo i Mesuwat Miit i'atu'e haty wo ta'a­tuehay pirik wo. Mi'i hap kaipyi Tupana ti'a­tukuap mi'iria topy'a pe. — I'atuehay kaipyi Uha'yru auka hap kaipyi ati'a­tu­'a­piheg aru irania'in ai'y­wania tuwat Iesui mohey hap upi pytkai. Ta'a­tu­mohey rokirẽ ra'yn ta'a­tupun Iesui mohey hap. Mi'iria ewywuaria koitywy yt wati­morem kuap i ra'yn Tupana kape katu­pono Tupana Sa'yru pun haria ra'yn mi'iria.
HEB 6:7 Ma'ato aito Tupana Sa'yru mohey haria aikotã aiko wakuat rakat ewywuaria wato­py­hu'at yi wakuat i'aman sym hat ewy aito Tupana mikoi wakuat ewywuaria mikoi Tupana mipoi­tyro kahato ewywuat ko'i. Tupana tum i'aman hawyi ihãite kahato hap ewy wato­py­hu'at watat aheha­kye­ra'at hap hawyi.
HEB 6:8 Ma'ato aiko aimikoi yi yt kan hamo i ewy Tupana Sa'yru pun haria tukup­te'en. Hu ypia ewy hyri hyp ewy yt uwe i miky­'esat ewywuaria tukup­te'en yt imohey i haria. Mi'i hawyi meipepe ro ekahuro epyp e'u aria wato'e. Mi'i hap ewy topy­hu'at mi'iria. Ai'y­wania Tupana Sa'yru pun haria aria wo tukup­te'en aru aiko piat hyri hyp ewy.
HEB 6:9 Ma'ato eipe uiwy­ria'in uimi­ky'e ko'i yt mi'iria ewywuaria hin i eipe. Yt aiko aimikoi wẽki'a e'yi ewy hin i eipe are. Ma'ato aiko aipoi kahato hap ewywuaria eipe are. Woro­ho­'o­mohey kahato eipe uheka­tu­wyria. Aheha­kye­ra'at hat mohey sese haria eipe. Aheha­kye­ra'at hat moherep haria kahato eipe. Wuat'i miit'in eikuap Aheha­kye­ra'at hat mohey haria eipe hap. Ma'ato eipe aimikoi hẽ'ẽ kahato rakat ewywuat hap kaipyi eikuap miit'in.
HEB 6:10 Ta'i Tupana hãpyk kahato. Yt karãpe i toiwaure toky'e hap eipotpap tomõ­typot ehepiat hap etiat e. Yt toiwaure kuap i eiminug wakuat tomõ­typot etiat hap Tupana pote. Yt karãpe i toiwaure temiit'in powyro hap tomõ­typot toky'e ehepiat hap kaipywiat ko'i.
HEB 6:11 Pyno po'og waku mi'i hap ewywuat no watu­kup­te'en. Waku Tupana mõtypot hap kahato wywo watoĩ­ne'en. Imohey pot'i kahato aiku­'uro hap e'at kape yn waku imohey hap wato'e.
HEB 6:12 Pyno yt naku i watoĩ­ne'en iperup wo'o­mu'e hap etiat rakano ne'i are. Yt naku i iperup ne'i imohey hap ete. Yt naku i wato­py­hu'at yt ikuap teran i haria wo e. Yt naku i aiwa­nẽtup hap wati­mo­ken'ẽ ne'i Tupana Pã'ãu miat aimu'e turan. Waku watu­kup­te'en aikotã sa'a­wy­'iwuat Tupana ehay moherep haria ewywuat imohey iwato'in rakaria ewywuat meimuẽwat sa'a­wy­'i­wuaria Tupana ehay moherep haria ewy. Katu­pono mi'iria tukup­te'en wuat'i e'at pe Tupana mohey mot'i haria. Yt te'e­ru­we­mõti hin i — Atimohey ta'a­tu'e hap ete. Yt ta'a­tupun hin i ta'a­tu­mi­mohey Tupana piat — Atunug aru e hap mohey hap. Waku mi'iria ewywuaria watu­kup­te'en. Yt naku i pya kahato ne'i aiwa­nẽtup hap Tupana kapiat hap.
HEB 6:13 Waku wato­py­hu'at aha'a­se'i Aparãu ewywuaria. Sa'a­wy'i Tupana to'e Aparãu me — Pywo ti rat woro­poi­tyro en e. Uhet wyti Tupana e. Yt kat i miit mi'i rẽ po'og uhet kawiat e. Atunug aru emiari­ru'in waikiru i'atu kahato hap ewy e. Mi'i pote areset pehik atunug aru ui'e hap ete e Tupana Aparãu me.
HEB 6:14 — Woro­poi­tyro poityro e. Pywo ti rat atunug aru ui'e hap ewy e. Atimo­ty­py'i esa'y­ru'in e. I'atu sakpo typy'i esaipe­piaria yi kyt ewy i'atu hap ewy emiari­ru'in e Tupana Aparãu me.
HEB 6:15 Ma'ato Tupana yt meremo hin i hum to'e hap ewy. Mi'i pytkai toimohey pot'i Aparãu. Yt ipun hin i — Atunug aru e Tupana piat hap. Mi'i hawyi tuwe­mo­herep ta'yn ha'yru Isaki Tupana e hap ewy.
HEB 6:16 Karãpeĩ miit'in to'e ahepe — Atunug aru ui'e hap ewy to'e hawyi ma'ato yt wato­mohey i pote ta'a­tu­kaykay ra'yn ta'a­tue­tu­'isa ta'a­tu'e hamuat — Yt atunug i ui'e hap ewy pote heso rakat areĩne'en wuat'i ehamo i'ewyte Tupana ehamo e hamuat. Mio tã to'e hawyi wato­mohey po'og wuat'i ehamo to'e pote.
HEB 6:17 Ma'ato Tupana to'e tuwe­hamo yn — Atunug aru emẽpyt'in i'atu waikiru ewy e Aparãu me. — Areĩne'en hegyi'at kahato rakano aru emiari­ru'in ko'i pe e. Yt uheso hin i e. Atunug aru ui'e hap ok tã e. Meiũran aru ati'a­tu­poi­tyro esaipe­piaria e. Yt atiwaure hin i kat ui'e hap e. Ma'ato atunug aru ui'e hap ewy e. Uito Tupana pote atunug ui'e hap ewy e Aparãu me haty wo. Yt karãpe i kue wẽtup sehay atunug aru ma'ato atipyt­'atnug uhehay Uito Tupana pote e nimo te Aparãu me. I'ewyte yne esaipe­piaria pe pywuat ui'e hap kuap hanuaria tukup­te'en aru e.
HEB 6:18 Pyno atipyt­'atnug uhehay Tupana Uito pote e. Pywo yt uwe i imonik kuap ui'e hap — Atunug aru Tupana e hap Tupana i'e pote. Tupana yt heso kuap i mi'i pote waku wato­mohey kahato mi'i tã — Atunug aru e hap ko'i. — Urumo­wepit hat kahato En Tupana wato'e. Ewawi uruteput wanĩ­kaptia pupi. Uruto­pytyk kahato ehay — Atunug aru e'e hap. Pyno typy to'e — Atunug aru e hap ko'i. Typy tohenoi tehay ahepe.
HEB 6:19 Tupana e hap wẽtup — Woro­ho­'o­poi­tyro aru wuat'i e'at pe e hap aimo­wepit kahato. Mi'i hawyi i'e hap typy — Atunug aru e hap. Pyno pywo ti aru urueha­kye­ra'at wato'e tope. Uruhe­katup kahato urupy'a pe wato'e. Mi'i hawyi urueha­kye­ra'at aru to'e hap ewy wato'e. Aimi­mohey aikytyt kahato iheg me aikotã haity Tupana eiam sese kaipyi tut aipiit kape hap ewy. Ta'i imohey hap haity ewy. Yt karãpe i uruiwaure e'e hap Tupana wato'e.
HEB 6:20 Katu­pono mekewat Aimi­mohey Iesui teke Tupana eiam koro sese pe ra'yn. Sa'a­wy'i Ahepa'i Iesui teke Tupana eiam sese pe. Hewat­'ymo ti aito. Ahepa'i mekewat Meke­se­teki ewywuat po'og nakat Ahepa'i Koro wuat'i e'at piat. Yianme teke aikotã ahe'yara tuwe­moheg i'asaity ete. Mi'i hap ewy wato­mohey Tupana e hap — Atunug aru e hap wato­mohey kahato mi'i e hap hawyi aimoheg kahato Tupana ete wuat'i e'at pe saity iheg nakat ewy.
HEB 7:1 Pyno ahenoi teran sa'a­wy­'iwuat pa'i wato Meke­se­teki etiat. Mi'i ti morekuat no topy­hu'at mekewat Ieru­sarẽi notiat ma'ato mekewat e'at pe tawa Sareĩ i'atu'e ta'a­tu­pusu puo ma'ato aipusu puo tawa wo'o­wese e hap wato'e. Sa'a­wy'i ti Tupana ti'airo temiit Meke­se­teki pa'i koro wuat miit'in ehay enoi tepiat hamuat. Tupana po'og ywaiti wuat'i kawiat mi'airo Meke­se­teki. Sa'a­wy'i Aparãu ta'aipok wo'o­'auka hap wato kaipyi wanĩ­kap­tiaria atu'uka hap kaipyi. I'atuekat yne topo piat wywo tut. Mi'i hap tote mu'ap upi pa'i wato Meke­se­teki tipuẽti. Mi'i hawyi toipoi­tyro aha'a­se'i Aparãu.
HEB 7:2 Mi'i hawyi Aparãu ho'oium tope wanĩ­kaptia pohari hap ko'i ipat'ok. 10 rakat kaipyi tutum wẽtup iwat. Iwato tutum pa'i akag Meke­se­teki pe. Meke­se­teki set aipusu puo wo'oe­waku nug hat akag e. Mi'i ti morekuat tawa Sareĩ totiat. Sareĩ aipusu puo wo'o­wese hap. Mi'i pote Meke­se­teki topy­hu'at wo'o­wese hap nug hat akag aipusu puo e. Aipo­typot Iesui ewywuat topy­hu'at morekuat Meske­se­teki.
HEB 7:3 Ma'ato Meke­se­teki uwe i'ywot kuap hat yt to'e i miwan miat pote. Uwe ity kuap hat yt to'e i iwan miat pote. I'ewyte uwe imẽpyt'in kat ywania hap yt uwe i ikuap yt to'e i iwan me pote. Sio i'ywã'ĩ hap toĩ sio yt hap yt watikuap i yt to'e i pote. Sio iku'uro sio yt hap yt to'e i pote yt watikuap i. Yt uwe i ikuap mi'i pote wuat'i e'at piat miit ewy topy­hu'at morekuat Meke­se­teki. Mi'i pote wuat'i e'at piat miit'in epa'i koro ewywuat topy­hu'at. Mi'i pote Tupana Sa'yru ewywuat kahato topy­hu'at. Mi'i Ahepa'i wuat'i e'at piat iã'ãkap kahato.
HEB 7:4 Ui'y­wania waku watu­wa­nẽtup morekuat Meke­se­teki kape katu­pono Iesui e'yianmiat iã'ãkap kahato topy­hu'at mi'i. Miit'in mimo­wato kahato mi'i. Aha'a­se'i koro Aparãu mimõ­typot mi'i. Ta'i toho­'o­pat'ok kahato tewa­nĩkap pohari hap kaipyi toho'oium wẽtup 10 rakat kaipyi mokekuat Meke­se­teki pe. Mi'i ti po'og Aparãu kai topy­hu'at katu­pono toho'oium tope.
HEB 7:5 Sa'a­wy'i ase'i Aparãu emiariru Irewi e hap het rakat toĩne'en ahepa'i koro wo. Mi'i hawyi yne Irewi saipe­piaria tukup­te'en ahepa'i wo. Mi'iria pe mesup watum aimiium ko'i Irewi saipe­piaria pe pa'i kororia pote Irewi saipe­piaria pote. Aikotã Tupana to'e hap ewy — Eho'oium o uhepe eimikoi hat ko'i wẽtup 10 rakat kaipyi pa'i koro Irewi saipe­piaria pe e hap ewy. Kat e hap kat e hap eimi­puẽti kaipyi eho'oium o uhepe wẽtup 10 piat e Tupana. Pyno mesup te aito Aparãu emiari­ru'in ko'i waho'oium ahekat pa'i koro Irewi saipe­piaria pe. Ma'ato sa'a­wy'i Irewi tum tekat Pa'i Koro Meke­se­teki pe katu­pono Irewi e'ase'i Aparãu tum tekat Pa'i Koro Meke­se­teki pe pote Irewi tum wy tekat Pa'i Koro Meke­se­teki pe te'a­se'i Aparãu po wo tutum hap ewy. Mi'i pote Pa'i Meke­se­teki Saipepiat Iesui topy­hu'at po'og Ahepa'i Koro wo ahepa'i koro Irewi saipe­piaria kai katu­pono Irewi i'ewyte hum ha'up Pa'i Koro Iesui Meke­se­teki Saipepiat pe.
HEB 7:6 Ma'ato pa'i koro Meke­se­teki yt Irewi ywania hin i. Yt Aparãu kaipywiat i ma'ato yt uwe i ikuap kat ywania morekuat Meke­se­teki toĩne'en. Mi'i kape aha'a­se'i sese hum wuat'i kat ko'i kat ko'i. Toipat'ok hawyi toho'oium pa'i Meke­se­teki pe. Mi'i hawyi pa'i Meke­se­teki tipoi­tyro ra'yn aha'a­se'i Aparãu e — Tupana emowato e Aparãu me. Tupana mipoi­tyro toipoi­tyro te.
HEB 7:7 Pywo ti rat po'og Aparãu kawiat iwato Meke­se­teki kat pote yt po'og i mi'i pote yt toipoi­tyro kuap i.
HEB 7:8 Mi'i tupono koitywy aito ai'y­wania miium ko'i watum Irewi ywania pe ma'ato Irewi ywania iku'uro rakaria wo tukup­te'en torania ma'ato Ahepa'i Koro pakup Iesui yt mi'i tã i mesup. Aikotã to'e sa'a­wy­'iwuat miwan me hap ewy — Mi'i Miit toĩne'en wuat'i e'at piat Pa'i wuat e. En ni Pa'i wato Meke­se­teki ewywuat e miwan me morekuat Tawi wepy hawe.
HEB 7:9 Pyno sa'a­wy­'iwuat aha'a­se'i koro Aparãu tum na'yn pa'i koro Meke­se­teki pe tomiium ko'i. Pyno Aparãu topy­hu'at pa'i Irewi e'ase'i. Mi'i tupono sa'a­wy'i pa'i Irewi topy­hu'at te'a­se'i Aparãu piit pe. Mi'i hawyi Aparãu tum tomiium Meke­se­teki pe turan pa'i Irewi i'ewyte hum tomiium ko'i Meke­se­teki pe Irewi e'ase'i Aparãu po wo yt tuwe­mo­herep i te turan. Katu­pono pa'i Irewi e'yianmete ha'a­se'i Aparãu tum imiium Meke­se­teki pe. Mi'i turan Irewi toĩne'en ne iã'ỹi wo Aparãu piit pe imiairiru Irewi pote. Mi'i tã aha'a­se'i i'ewyte torania aito Aparãu emiari­ru'in watum yne aimiium Tupana piat Meke­se­teki pe Aparãu saipe­piaria iã'ỹi ko'i Iesui pote.
HEB 7:10 Sa'a­wy'i to'o­puẽti mu'ap tote morekuat Meke­se­teki wywo aha'a­se'i Aparãu. Mi'i turan aha'a­se'i pa'i koro Irewi'in aha'a­se'i Aparãu piit te tukup­te'en hã'ỹi ewy yt hẽtyt i te rakat ewy. Mi'i hawyi ta'atuium itote aha'a­se'i Aparãu po wo.
HEB 7:11 Pywo ti rat pa'i kororia ko'i Irewi'in kaipyi yt tut i aimo­hãpyk hap Tupana wywuat hap. Yt kat i rat aheha­kye­ra'at hap mi'iria kaipyi. Ai'y­wania ewãi hap yn tuwe­mo­herep ainãpin Tupana kaipywiat hap Tupana ehay kat som waku watunug hap watikuap Musei e'ase'i Irewi wẽ pyi. Irewi ywania kaipyi Musei tuwe­mo­herep ma'ato Tupana to'e sa'a­wy'i — Tut aru wẽtup ok Ehepa'i Koro pakup e. Mi'i Miit ti Pa'i Koro Meke­se­teki ewywuat toĩne'en e Tupana sa'a­wy'i morekuat Tawi pe. Pyno Ahepa'i Koro sese yt tut i Musei ywot'in Irewi ywania kaipyi i'ewyte yt Musei ywania kaipyi i te wy. Mi'i pote pa'i Musei ehay yt aimo­hãpyk kuap i Tupana wywo. Ma'ato aimo­hãpyk hamuat Tupana tipo­'oro wẽtup ok i Aipo­rekuat no Ahepa'i Koro wo mekewat Meke­se­teki Ewywuat Aheha­kye­ra'at Hat Iesui.
HEB 7:12 Pyno Ahepa'i Koro ipakup takat yt Irewi ywania ewywuat i ma'ato wẽtup kaipyi ra'yn ipakup takat toĩne'en. Ahepa'i Pakup Iesui kaipyi ainãpin Irewi piat yt hap ewy i. I'ewyte Irewi emiariru Musei yt ewywuat i. I'ewyte Musei ywyt Arãu yt kaipyi i Iesui ma'ato Ahepa'i Pakup Iesui kaipyi ra'yn ainãpin hap tut aimo­hãpyk kuap Tupana wywuat hap sese. Musei piat ainãpin hap yt ewywuat i.
HEB 7:13 Aha'a­se'i Musei yt kaipyi hin i Ahepa'i Koro Iesui. Yt Musei suu yt ewywuat i katu­pono Aha'a­se'i Iuta emiariru Emiariru ti Iesui. Yt karãpe i aha'a­se'i Iuta emiari­ru'in tukup­te'en ahepa'i koro wo. Yt karãpe i Iuta ywania tum aihũria Tupana pe aria pe mekewat yparakai aihũ wuk hap nu kawiat tote. Ma'ato mi'i pytkai mesup topy­hu'at Ahepa'i Akag wo Iesui mekewat Meke­se­teki ewywuat.
HEB 7:14 I'ewyte watikuap kahato aha'a­se'i Iuta emiariru emiariru kaipywiat tut Aheha­kye­ra'at hat Tupana Mipo­'oro Aipo­rekuat nuat hap. Ma'ato Tupana yt to'e i — Iuta ywania kaipyi tuwẽtem ahepa'i koro yt e i. Ma'ato watikuap Iesui topy­hu'at Ahepa'i Koro wo hap ma'ato wẽtup kaipyi Meke­se­teki pa'i koro ewywuat. Yt Irewi ywania i ma'ato Meke­se­teki ewywuat e hap kaipyi watikuap.
HEB 7:15 Iesui topy­hu'at Pa'i Koro wuat miit'in yt eko ewy hin i. Heremo kahato mi'i mesup watikuap ta'yn Iesui tuwe­mo­herep mekewat Meke­se­teki ewywuat sese. Aikotã aikotã Tupana to'e hap ewy. Mi'i ewywuat topy­hu'at Ahepa'i Koro wo.
HEB 7:16 Tupana mi'airo Iesui Ahepa'i Koro wuat ma'ato yt aheko upi hin i toi'airo. Aikotã irania'in aimi­'airo ahepa'i yt ewywuat hin i. Yt aha'a­se'i Irewi sa'y­ru'in hin i Mi'i ma'ato mi'i pytkai Tupana ti'airo katu­pono wuat'i e'at piat ieĩne'en hat Iesui pote mekewat Meke­se­teki ewywuat toi'airo Ahepa'i Koro wuat sese Mi'i.
HEB 7:17 Pyno ti mekewat miwan me mio tã e sa'a­wy­'ite Tupana to'e — Uha'yru mesup woro­'airo En miit'in Epa'i Koro wo ma'ato yt karãpe i ra'yn ekahuro En Pa'i Porekuat no hap e. Pa'i Meke­se­teki ewy En e sa'a­wy'i Tupana Tawi wepy 110.4 hap we.
HEB 7:18 Mekewat sa'a­wy­'iwuat pa'iria aimu'e hap ko'i ainãpin hap ko'i ai'y­wania wat yt put'ok'e i ahehay moherep Tupana kapiat hamo. Yt hesaika i miit'in mohãpyk Tupana wywuat hamo. Mi'i pote Tupana to'e — Yt kan hamo i i'atueko e katu­pono yt put'ok'e i miit'in ekyi uhowawiat hamo miit'in mohãpyk hamo e Tupana.
HEB 7:19 Sa'a­wy­'iwuat ahepa'i aimotag teran tehay wo sa'a­wy­'iwuat ainãpin hap ko'i ete. Toimo­pakup teran yne ma'ato mekewat sa'a­wy­'iwuat waku wen ma'ato yt hesaika i aimo­waku hamo. Yt aimo­pe­rup'i kuap i mekewat Musei piat ainãpin hap. Yt aimo­hãpyk kuap i yt watunug i pote. Wati­'a­parap yne mi'i hap ko'i ete pote. Pa'i Musei wãi'e hap upi yt kat i mu'ap Tupana kapiat hap katu­pono yt watunug kuap i yne Musei piat ainãpin hap ko'i pote. Ma'ato wato­mohey Pa'i Koro wo Iesui hawyi meremo watikuap Tupana.
HEB 7:20 Pyno sa'a­wy'i Tupana kapiat ihay rakat tukup­te'en pa'i koro wo miit'in mi'airo ko'i. Ma'ato Iesui Ahepa'i Sese wuat Tupana Mi'airo toĩne'en. Tupana ehay kaipyi topy­hu'at Ahepa'i Wato wo. — Pywo ti rat woronug En Wuat'i Miit'in Epa'i Wato wo e Tupana. Ewẽ pyi yn atiky­'esat miit'in ehay enoi hap e. Karãpe ehay turan meremo emiẽtup atum epe e Tupana Iesui pe. Emiit miẽtup ewẽ pywiat atum yne e. Karãpe uhehay teran miit'in kape mi'i hawyi ewẽ pyi yn uhehay e. Miit'in Epa'i Wato wo woronug En e Tupana Iesui pe Wuat'i E'at Piat Ieĩne'en Hanuat En mote e.
HEB 7:21 Mi'i pote woro­'airo En Pa'i Wato wuat mekewat pa'i wato Meke­se­teki Saipepiat En e Tupana miwan me Iesui piat pe. Yt karãpe i Tupana to'e irania'in pa'iria pe mio wat to'e hap ewy. I'ewyte Musei pe i'ewyte haipe piaria pe Tupana yt to'e i mekewat to'e hap ewy ma'ato Tosa­'yru pe yn to'e — En ni Uimi­'airo Miit'in Epa'i wuat wuat'i e'at piat ieĩne'en hanuat e. Yt uheso i rat e Tupana sa'a­wy'i Iesui piat morekuat Tawi wepy 110.4 piat pe.
HEB 7:22 Ta'i waku sakpo Iesui Ahepa'i Akag wo wati­puẽti po'og po'og irania'in pa'i ko'i kai. Katu­pono Tupana to'e hap ewy — En ni Uimi­'airo Pa'i wato wo e ma'ato yt karãpe i to'e Tupana irania'in pa'iria pe mi'i ta e hap.
HEB 7:23 Sa'a­wy­'i­wuaria i'atu kahato pa'iria tukup­te'en map haria ne'i pote yt ieĩne'en mot'i pa'i wo itote. Wẽtup iku'uro hawyi toĩne'en wẽtup i ra'yn haipe­piano. Ma'ato Wẽtup Ok yn waku I'atu'akag Sese Mi'i ti Iesui wẽtup ok takat.
HEB 7:24 Ma'ato koran pa'i wato sese mesu­wa­rotiat yt ewy hin i katu­pono Mi'i ieĩne'en wuat'i e'at piat hamuat Pa'i Pakup mo. Mesu­wa­rotiat pa'i ko'i iku'uro yne pytkai toĩne'en ne wẽtup teiam me atipy pe.
HEB 7:25 Ahepa'i Wato Pakup Iesui aheha­kye­ra'at kuap yne mesu­wa­ro­tiaria torania ywania e. Pywo ti rat torania Tupana kapiaria toi'a­tue­ha­kye­ra'at kuap ta'a­tu­ky­'esat imohey hawyi katu­pono Mi'i Miit ti mu'ap Tupana kapiat. Koitywy uwe uwe mi'i mu'ap upi toto Tupana kape Mi'i Miit tuwat hupi haria put'ok­'i­'a­tu'e Tupana kuap hap kape e. Kat emiit kat emiit put'ok'e kuap Tupana kape Mi'i Pa'i sehay upi. Ahehay enoi ok tã tohenoi Tupana pe. Yt toima'at hin i To'ywot ahehay wo i'ewyte tohẽtup kahato aika­wiano Tupana pe Ahepa'i Wato Iesui.
HEB 7:26 Mi'i miit ti waku kahato Ahepa'i Wato wo katu­pono aika­wiano hat aiwy kahato topy­hu'at. Aimi­ky­'esat toikuap kahato. Po'og po'og waku irania'in pa'i ko'i kai. Yt uwe i po'og Mi'i Miit kai. Tupana ewywuat wanẽtup hat Mi'i Miit. Tupana ewywuat wakuat nug hat Mi'i Miit Iesui. Mi'i pote Ahepa'i wo waku kahato. Yt aima'at kuap i. Yt ai'a­parap kuap i. I'ewyte yt uwe i i'aparap kuap teko sa'ag wo. Waku kahato Ahepa'i Wato wo. Yt karãpe i toi'a­parap irania'in miit'in ewy ai'ewy. Pywo ti rat po'og po'og waku wuat'i pa'i ko'i kai Ahepa'i wo Iesui irania'in i'aparap aparap haria ne'i pote. Tupana Mimõ­typot sese Ahepa'i pakup. Yt uwe i atipy pe po'og mi'i rẽ Tupana Mimõ­typot kai. — En po'og po'og atipy piaria kai e Tosa­'yru pe yn. En po'og po'og rakat torania kawiat e Iesui pe.
HEB 7:27 Ahepa­'iria mesu­wa­rotiat i'aparap aparap kahato Tupana piat ta'a­tu­potpap nug hap ete. Ai'y­wania pa'i ko'i ti'auka ta'a­tu­hũria ta'a­tu­'a­tuwuk wuk mohag wo ta'a­tu­minug sa'ag moweityk hamo — Urui'a­parap ta'yn ewawi Tupana i'atu'e hamuat. Ereĩne'en waure wo uruminug sa'ag kai i'atu'e. I'ewyte sa'a­wy'i ta'a­tu­'auka aihũria aiminug sa'ag pohag wo. Aihũria suu wywo ta'a­tu­mo­weityk teran ahepiat i'aparap hap. Ta'a­tu­hã'ãg kahato mi'i hap ete. Ma'ato mio Iesui iku'uro aihũria ewy aika­wiano aipohag wo aiminug sa'ag moweityk hamo Ahepa'i Wato pote. Yt kat i tominug sa'ag pytkai iku'uro aiminug sa'ag upi toho­'opot ai'a­piheg hap tutu'u hamo. Wẽtup mo yn iku'uro hawyi tuweium Tupana pe ai'a­piheg hap sa'up mo yt kat i tominug sa'ag pytkai. Iku'uro aiku­'uro hap u hamo. Wẽtup mo yn iku'uro mi'i hap yn imoma ra'yn aiminug sa'ag. Ma'ato irania'in pa'i akag ko'i aihũria atu'uka kahato i'ewyte ta'a­tu­hũria at ka'ap. Ma'ato Iesui ti wẽtup mo yn iku'uro hawyi waku ra'yn koitywy e Tupana. — Waku ra'yn e.
HEB 7:28 Irania'in pa'i ko'i aimi­'airo ko'i Irewi eko ewywuaria mi'iria miit aipu'i ewywuat ta'a­tu­'a­parap aparap kahato ai'a­parap hap ewy yne yt naku i nug hawiat. Iku'uro rakaria ai'ewy ahepa'i akag ko'i mesu­wa­ro­tiaria. Mi'iria yt naku i nug haria ai'ewy mesu­wiaria pa'i ko'i. Ma'ato Ahepa'i Akag Sese Iesui pakup we Tupana to'e haty wo — Woronug En Wuat'i Miit'in Epa'i Koro wo aru sa'a­wy­'iwuat mekewat pa'i Meke­se­teki ewywuat woro­'airo En e haty wo sa'a­wy'i Iesui pe. I'atu kahato pa'i mesuwe tukup­te'en e ma'ato mi'i turan woro­'airo En wuat'i miit'in Epa'i Wato wo e Tupana miwan me. Mi'i hawyi ti aru ereĩne'en na'yn wuat'i e'at piat miit'in Epa'i wo e Tosa­'yru pe. Waku En Pa'i wo Uha'yru e katu­pono En yn ui'ewy Uha'yru e Tupana Tosa­'yru pe.
HEB 8:1 Pyno ahenoi i ehepe to'e Ahehay Enoi To'ywot piat hat ete. Mi'i ta'apyk To'ywot po sese kai aikope Tupana ta'apyk Morekuat Akag wo hap tote Tupana po sese kai ta'apyk wuat'i mimõ­typot rote Tupana mõtypot eiam sese tote.
HEB 8:2 Mi'i tote tohẽtup hẽtup ahupi ahepa'i koro wo toĩne'en pote ipotpap mekewat atipy piat Tupana eiam sese pe. Sa'a­wy'i pa'i akag Musei tunug yahig note Tupana mõtypot yat mi'at pe kawiat ipe hup ipe heryp'i kawiat tutunug i'ewyte sokpe kawiat. Ikahu rakat tutunug. Mi'i hap tote Musei topy­hu'at pa'i wo. Ma'ato Ahepa'i sese Iesui topy­hu'at atipy pe Tupana mõtypot eiam sese tote ikahu rakat rote yt miit'in minug hin i hap tote toĩne'en. Ipotpap Pa'i wo po'og po'og Musei minug kawiat rote katu­pono Tupana minug note ipotpap.
HEB 8:3 Karãpeĩ ahepa'i ko'i mesu­wa­ro­tiaria aimi­'airo ko'i i'atu­potpap aimiium Tupana piat hap ete ta'atuium aimiium tope hawyi ta'a­tu­'auka aihũria Tupana piat ta'a­tumiium mo. Ma'ato Iesui Tupana mi'airo Ahepa'i Wato Iesui wo hawyi tutum To'ywot Tupana pe To'ywot mowehum hap kahato ko'i. Aika­wiano hamuat ipotpap hap. Iwat imiium To'ywot piat ko'i po'og waku aihũria kai katu­pono tosuu aika­wiano hamo.
HEB 8:4 Ahepa'i Sese Iesui ti yt pa'i Irewi ywania saipepiat hin i. Mi'i pote po'og Pa'i wo pa'i Irewi kai po'og mekewat Musei minug sokpe kawiat Tupana mõtypot yat epa'i wato kai katu­pono toĩne'en kuap Ahepa'i atipy piat i'ewyte mesuwe Ahepa'i wo toĩne'en wuat'i e'at piat.
HEB 8:5 Pyno mesu­wa­rotiat Tupana eiam Musei minug yahig notiat aikotã Tupana eiam sese atipy piat iã'ãkap ewy kahato. Ahepa­'iria mekewat sokpe kawiat piat motpap nug haria tukup­te'en atipy pe Tupana eiam notiat motpap ewywuat Ahepa'i Wato Iesui iã'ãkap ewywuat. Aikotã Tupana to'e Musei pe ha'a­wyte mio tã e — Ewe'eg o Musei e. Waku etunug o uimõ­typot yat ui'e hap ewy e. Atiky­'esat hãpyk kahato ui'e hap ewywuat hap e. Aikotã atomo­herep epe sa'a­wy'i yity'ok tote hap ewy etunug o atipy pe e. Kat kupitu kat kupitu are'e yity'ok tote hap ewy etunug o e Tupana Musei pe tutunug inug hap e'yianmete.
HEB 8:6 Pyno Tupana tunug na'yn wẽtup ok Ahepa'i Ipakup takat ra'yn Tosa­'yru kawiat. Mi'i po'og heropat kuap torania pa'iria mesu­wa­ro­tiaria kai. Mi'i ti ahehay Tupana kapiat enoi kuap kahato To'ywot Tupana piat hat. I'ewyte ti Tupana Ehay Moherep Ahepiat Hat sese Mi'i. Aiwo­'o­wese hap to'ywot wywuat nug hat sese Mi'i Miit Akag. Koitywy po'og aiwesat kuap Tupana katu­pono ahehay enoi kuap hat toĩne'en na'yn mi'i pote po'og waku irania'in sa'a­wy­'i­wuaria pa'iria kai. Mi'i pote mio tã to'e Tupana tope — Atunug aru ui'e hap ewy Uha'yru e. Woronug En wuat'i epa'i koro wo wuat'i e'at piano e Tupana. Yt karãpe i Tupana to'e mi'i tã irania'in pa'i pe. Yt Musei pe te wy ma'ato mio tã Musei pe — Eipe mesu­wa­ro­tiaria pa'i ko'i wo woro­ho­'onug e yn.
HEB 8:7 Sa'a­wy'i Tupana to'e Musei pe — Atiky­'esat en miit'in wo'o­wese nug uiwywuat hap e. Mi'i hap ete Musei ipotpap kahato waku kahato ma'ato meiũran Tupana to'e tope — Atunug aru wẽtup ok Pa'i wo Esaipepiat e. Wẽtup ok ati'airo En ewywuat wo'o­wese hap nug miit'in wywuat hat e. Mi'i uhemiit sese e katu­pono Musei yt put'ok'e i wo'o­wese hap nug sese hamo. Mi'i pote Tupana tunug wẽtup ok i Musei ewywuat Pa'i Sese wo.
HEB 8:8 Sa'a­wy'i Tupana to'e aha'a­se­'i'in me — Yt put'ok'e i Musei uiwywuat wo'o­wese nug hamuat e. Mi'i pote aru meiũran wo'o­wese hap nug hat ipakup takat atunug e ai'y­wania sa'a­wy­'i­wuaria pe mekewat Isareu ywania pe. Yt ewetunug hin i ui'e hap ewy pote e ase'i Iuta ywania pe. Mi'i pote wẽtup wo'o­wese hap atunug aru wẽtup ok kawiat e.
HEB 8:9 Sa'a­wy'i ati'a­tue­ha­kye­ra'at ei'y­wania wanĩ­kaptia po pyi i'ewyte ati'a­tu­'y­kesat yi Esitu kaipyi e. Mi'iria yahig note ati'a­tu­nãpin uhehay wo — Ewetunug o uhepiat einãpin hap pote ti aru ei'y­kesat hano areĩne'en e. Mi'i hawyi — Pyno urutunug e'e hap ewy i'atu'e uhepe ma'ato ta'a­tu­nãpin uhepiat hap ta'a­tupun ne'i. Yt te'e­ru­wa­nẽtup i po'og uhehay kape pote yt ati'a­tu­wesat kuap po'og mi'iria e Tupana miwan me.
HEB 8:10 — Pyno wo'o­wese hap ipakup aru atunug i uhehay moheg hamuat e Tupana ai'y­wania pe. Ikahu rakat aru atunug mesup e. Sa'a­wy'i atiwan nu ete uhehay ma'ato mesup eipy'a pe eiwa­nẽtup hawe atiwan uimi­ky­'esat ewetunug hamuat uhehay einãpin hap. Aikotã sa'a­wy'i nu ete atiwan iheg me mi'i hap ewy mesup iheg me eipy'a pe uhehay atiwan e. Ehetu­pana wo sese areĩne'en mote uimo­wepit haria aru eweikup­te'en uha'y­ru'in uhaki­'yt'in are'e aru ehepe. Mekewat e'at pe areĩne'en Ehetu­pana wo sese e. Waku watu­kup­te'en mekewat e'at pe wo'o­wese haria wo e.
HEB 8:11 Mekewat e'at pe uheiam mo eweikup­te'en e. Uhehay kuap haria wo yne eweikup­te'en eipe. Ahowapy ra'yn yne eiperia Uipã'ãu wo e. Mekewat e'at pe uimẽ­pyt'in hary­po­ria'in ihainia'in torania eipe eweikup­te'en e. Uikuap haria eweikup­te'en yne eiperia tu'i­saria wo more­kuaria wo miit eropat haria wo uheiam mo eweikup­te'en e. Mekewat e'at pe yt uwe i eiperia — Urumu'e ro urumu'e ro ewei'e irania'in me Tupana kuap hamo katu­pono mekewat e'at pe uikuap haria yne eipe eweikup­te'en e. Uikuap sese haria sok eweikup­te'en eipe e Tupana. I'ewyte uhemiit'in uikuap haria wo eweikup­te'en e. I'ewyte iwato'in nakaria uikuap takaria yne eipe uikuap sese haria wo eweikup­te'en mekewat e'at pe e.
HEB 8:12 Waku kahato mekewat e'at pe katu­pono mekewat e'at uima'at ehepiat hap atiwaure yne e. Atoiat aru ei'a­piheg hap mekewat e'at pe e. Yt atunug i ma'ato ihaky­'e'i rakano areĩne'en e. Woro­ho­'o­ky'e pote uipohep ei'a­piheg hap ete yt hãpyk hin i eipe sa'a­wy'i pytkai yt naku i nug haria eipe sa'a­wy'i pytkai e. Uima'at ehepiat hap i'atu kahato pytkai waure wo areĩne'en eimi­'a­parap uhepiat sa'a­wy­'iwuat ko'i ete. Mi'i hawyi ipakup we wato­py­hu'at e. Wẽtup miit ewywuat yn ahehay topy­hu'at mekewat e'at pe aru e. Mekewat e'at einãpin uhepiat hap nug haria wo eweikup­te'en i'ewyte atunug ui'e hap ewy e. Waku pe kahato watoĩ­ne'en e. Mi'i hawyi sa'a­wy­'iwuat yt naku i hap yt ewy hin i eweikup­te'en e. Ta'i mekewat e'at ipakup we eweikup­te'en e. Pyno mekewat sa'a­wy­'iwuat Musei kaipywiat aiwo­'o­wese hap nug hap yt put'ok'e hin i wo'o­wese hap nug hamuat e. Mekewat e'at pe aru yt uwe i tuwa­nẽtup kape ipakup po'og po'og waku pote e.
HEB 8:13 Aikotã nem nakat ewy aiwo­'o­wese sa'a­wy­'iwuat hap topy­hu'at aikotã iku'uro rakat ewy ipot'i rakat tuweityk hap ewy ra'yn. Mi'i hawyi ipakup aiwo­'o­wese hap topy­hu'at mekewat e'at pe waku kahato rakano e Tupana sa'a­wy'i miwan me aipyt­'atnug Topã'ãu wuat hap ete Iesui Pã'ãu aipiit piat hap ete.
HEB 9:1 Pyno nimo Tupana tunug ai'y­wania wywo wo'o­wese hap ma'ato mesumuat towese hap yt ewywuat i. Mekewat wo'o­wese sa'a­wy­'iwuat hap niatpo kahato aikotã hãpyk tomõ­typot hap aikotã toiky­'esat tomõ­typot yat hãpyk sese hap tohenoi ahepe. Niatpo kahato to'e — Ewetunug yne ui'e hap ewy pote waku pe eweikup­te'en yt pote yt e tohenoi nimo.
HEB 9:2 Aikotã toiky­'esat tomõ­typot yat typy okipy rakat. Aikotã toiky­'esat wẽtup kai ariãty hekat rakat nu mehit kawiat i'ewyte mekewat yparakai man eiam toiky­'esat wẽtup kai hawyi toiky­'esat ta'a­tu­set'ok wakuat e'okipy e hap.
HEB 9:3 Tupana e'okipy toĩne'en okenhyp towat i te itote ekuekai. Mi'i ti toiky­'esat ta'a­tu­set'ok wakuat wakuat e'okipy e hap Tupana Pã'ãu eiam mote. — Waku ewetunug sokpe i'anam nakat mo topyhyp we Tupana Pã'ãu eiam ete e. Tupana Pã'ãu eiam sese po'og po'og wakuat torania kai e hap tohenoi. Wẽtup kai Tupana mõtypot hap sese topy­hu'at ma'ato wẽtup kai Tupana Pã'ãu eiam topy­hu'at e.
HEB 9:4 Itote toĩne'en ikamhig se rakat wuk hap eiam Tupana mõtypot yat mokamhig se hamuat hap. Mi'i eiam imehit kahato iheg nakat hekat rakat nu Uru kawiat e. Mekewat okipy tote toĩne'en amyap ewywuat aria'yp kawiat e. Tupana Pã'ãu toĩne'en mesuwe i'atu'e hap. Mekewat amyap pe imehit rakat kawiat nu Uru kawiat ikahu kahato Tupana Pã'ãu amyap i'atu'e hap. Mi'i pe waku Tupana ihay aiwywo i'atu'e teiam me pyi i'atu'e sa'a­wy'i. Mi'i heiam amyap ika'a rakat toĩne'en hawyi ipuo kamũti hekat rakat i'ewyte toĩne'en man atipy kaipywiat Tupana sa'a­wy­'iwuat mekewat i'aman ewywuat at hat. Sa'a­wy­'i­wuaria pusu puo man a i'atu'e mekewat pe. Mekewat Tupana amyap ka'a pe toĩne'en wy mekewat pa'i Arãu po'yha sa'a­wy­'iwuat hẽtyt rakat haat rakat. I'ewyte toĩne'en mekewat puretig ewywuat ma'ato nu kawiat ipuo. Mi'i tote toĩne'en Tupana wat miwan topo wuat puretig aikotã waku watunug aikotã yt naku i watunug hap. Mi'i aiwo­'o­wese hap aikotã waku watunug Tupana mowepit hamuat enoi hap. Mi'i ti puretig nu etiat iheg nakat etiat.
HEB 9:5 Itote toĩne'en ikahu kahato rakat amyap e'og atipy piaria mopy kuap haria ewywuaria imehit rakaria nu Uru kawiat i'atu­pope topy­hu'at he'og wo Tupana Pã'ãu eamyap tote wẽtup kuekai wẽtup kuekai. Ta'a­tu­'ãuka ta'a­tu­pope wo Tupana Pã'ãu eamyap. Mi'iria iã'ãkap ko'i Tupana ieĩne'en hap enoi hamuat hap imehit kahato toĩne'en. Niatpo kahato ahenoi yne mesuwat etiat uimiwan me aikotã Tupana mõtypot hap sa'a­wy'i toĩne'en hap etiat. Mi'i tã sa'a­wy'i heiam mesu­wa­rote i'yat sokpe kawiat mi'at pe kawiat.
HEB 9:6 Sa'a­wy'i pa'iria tuwe­hyt'ok wehyt'ok Tupana mõtypot yat pe at ka'ap ma'ato heiam sese pe yt tuwe­hyt'ok i. Mi'i tote pa'iria i'atu­potpap kahato Tupana eropat hap ete. Pa'iria wẽtup kai okipy kawiat pe yn i'atu­potpap Tupana mõtypot hap ete pa'i e'okipy tote ma'ato yt tuwe­hyt'ok kuap i Tupana e'okipy sese pe. Mi'i tã pa'iria sa'a­wy­'i­wuaria ai'y­wania tunug mekewat sokpe kawiat mi'at pe kawiat Tupana mõtypot yat pe.
HEB 9:7 Ma'ato mekewat ai'y­wania pa'i akag sese yn teke kuap aikope Tupana eiam toĩne'en hap tote. Mekewat sokpe i'anam nakat kawiat oken'ypy pyhyp hap sakpo. — Pa'i koro yn waku tut mesuwe uhowawi e Tupana. Ma'ato yt yne e'at i waku e teke. Wẽtup anu wẽtup anu hap ewy yn Tupana Pã'ãu eiam sese kape toto sa'a­wy'i pa'i akag. Ma'ato yt teke kuap i yt aihũ suu yt kat i i topo piat wywo. Topo piat aihũ suu wywo pote yn waku teke aimi­'auka aihũ suu wywo mi'i aiminug sa'ag weityk hamo. Mi'i pote totioto mohag wo aihũria suu — Heno urumi­'a­parap sa'up e. Heno emiit'in piaria aparap sa'up e Tupana pe.
HEB 9:8 Aikotã Tupana to'e miwan me sa'a­wy'i hap ewy — Yt uwe i teke kuap uhowawi e. Katu­pono uhowawiat a'akasa hap uhẽtyhot hap ei'auka hap topy­hu'at katu­pono areĩne'en wakuat kahato pote e. Uimõ­typot eiam i'ewyte waku kahato e Tupana Pã'ãu sa'a­wy'i ahepe. Sa'a­wy'i yt kat i mu'ap Tupana kapiat wakuat sese pote. Mekewat Musei minug sokpe kawiat mi'at pe kawiat Tupana mõtypot yat yt mu'ap hin i Tupana kapiat. Mi'i sokpe kawiat oken'ypy hyp hap sokpe i'anam sakpo yt uwe i teke kuap Tupana kape.
HEB 9:9 Iesui auka hap moherep hamo ta'a­tu­'auka ta'a­tu­hũria sa'a­wy'i. Ta'i watikuap kahato i'atu­hũria i'atumiium kaipywiat aheha­kye­ra'at Tupana piat hap ete Tupana hũ miium Tosa­'yru ete aimo­waku hap ete. Hã'ãkap wo sa'a­wy­'i­wuaria tunug aimu'e hamo. Sa'a­wy­'i­wuaria i'atuwuk kahato ta'a­tu­hũria ma'ato yt put'ok'e hin i i'atu­minug sa'ag hep hamo. Watunug kahato sa'a­wy'i ma'ato haty kahato te aiwa­nẽtup hawe topy­hu'at. Yt kat i — Mesup waku pe ra'yn ereĩne'en Tupana e hap ahepiat hap aipy'a piat hap. Yt kat i — Mesup ti waure wo ra'yn Tupana toĩne'en uiminug sa'ag ete e hap aiwa­nẽtup hawe. Sa'a­wy'i Mesup te i'atu­minug sa'ag i'atu­wa­nẽtup hawe topy­hu'at kahato te haty te i'atu­wa­nẽtup hawe.
HEB 9:10 Yt put'ok'e hin i Musei e hap watunug yne pytkai. Watunug yne aipe aipiit aimi'u aheko Musei ainãpin hap ewy wen ma'ato mi'i kaipyi yt kat i mu'ap wati­puẽti Tupana kape. Haty te aipy'a pe. Aiminug sa'ag moweityk hap yt kat i wati­puẽti pote haty te aiwa­nẽtup hawe. Mi'i turan put'ok'e mu'ap aimo­hãpyk sese Tupana wywuat hamuat. Ha'yru suu mohag kahato aimo­wepit hamo aiminug sa'ag moweityk hamo. Mi'i hawyi mu'ap toĩne'en Tupana kape Tosa­'yru minug kaipyi. Mesup — Waku kahato eipe e ra'yn Tupana ahepe wato­mohey hawyi. Mekewat haty monik hap topy­hu'at ra'yn ahete wato­mohey Iesui pote.
HEB 9:11 Mi'i ti Ahepa'i Wato Pakup toĩne'en Ahehay Moherep Tupana kapiat hat. Wakuap yn tut Aika­'iwat Iesui po pyi. Wakuap yn tutum ahepe wuat'i e'at piat nuat aheĩne'en pakup po'og sa'a­wy­'iwuat kawiat hap erut hamo tut. I'ewyte mu'ap pakup Tupana kapiat hap. Koitywy yt pya hin i Tupana aikai. Watoĩ­ne'en heiam wakuat sese pe. Imõtypot hap we watoĩ­ne'en iwywo mesup mũki­'ite wuat'i e'at pe. Aheiam Tupana mõtypot yat pakup po'og wakuat mekewat yahig notiat kawiat ai'y­wania sa'a­wy­'iwuat sokpe kawiat kai po'og waku rakat. Koitywy Tupana mõtypot yat yt mesuwiat Tupana mõtypot yat ewy hin i katu­pono koitywy Tupana mõtypot yat yt miit'in po wuat minug i — Atunug Tupana mõtypot yat pakup e.
HEB 9:12 Ahepa'i Koro Iesui teke ra'yn Tupana yat wato pe. Mekewat imõtypot eiam atipy piat pe teke ra'yn oken'ypy pyhyp hap sakpo. Towat tosuu wywo teke. Tutum na'yn tosuu Tupana pe. Yt tutum i wewato ahup suu. Yt tutum i aihũria kaneiru suu ma'ato towat tosuu tutum hekat rakat Tupana pe. Aheha­kye­ra'at hap sese sa'up tutum hawyi — Waku ra'yn e Tupana tope. Put'ok'e ra'yn esuu sa'up mo wuat'i miit'in kyi'at hap sakpo e Tupana Tosa­'yru pe.
HEB 9:13 Sa'a­wy­'i­wuaria ahepa'i ko'i ai'a­tu­sapei sapei kahato aihũria suu wo. Aipiit ete wewato ahup suu wo aipehom pehom. Ta'a­tuwuk kahato wewato ahup mẽpyt iwary ko'i. Aihũ ta'a­tuwuk hawyi aria ku'i tup mo aipen aipiit ete Tupana mõtypot yat pe wateke hap mohag wo sa'a­wy'i. Ma'ato aipe ete yn aipen mote aiminug topy­hu'at re aiwa­nẽtup hawe aipy'a pe.
HEB 9:14 Ma'ato Aika­'iwat Iesui suu po'og hesaika yn suu kai mohag wo. Sa'a­wy'i Aika­'iwat tum yne topiit Tupana pe aha'up mo. Sa'a­wy'i ikahu rakat aihũ yn waku aimiium mo yt kat i hatek takat yt kat i i'ahu hap rakat. Ipe kyt hap ihãite sese rakat yn ni waku e. Mi'i hap ewy Iesui po'og waku mohag wo katu­pono yt kat i sa'ag tuete Tupana tipuẽti. Ihãite put'ok'e kahato turan tutum topiit. Pyno koitywy wato­mohey Iesui hawyi Aihũ Aimiium Tupana piat hap ewy topy­hu'at. Mi'i watum Tupana pe hawyi yt kat i hin i aheha yi kape hap. Yt kat i aiwe­mõti hap aiminug sa'ag kapiat hap ete. Aihũ Aimiium Ikahu Rakat Iesui pote.
HEB 9:15 Koran Tupana Wywuat Wo'o­wese Nug Hat ra'yn toĩne'en Iesui. Koitywy Mu'ap toĩne'en Tupana kapiat. Katu­pono mesup ahepe Tosa­'yru mohey haria pe — Eweĩ'ẽ ro uhowawi e. Koitywy wuat'i e'at piat ieĩne'en hap atum neran ehepe yt ikahuro rakat i e Tupana. Katu­pono Uha'yru suu topy­hu'at eha'up mo e. Uha'yru iku'uro ei'a­piheg hap sa'up mo e. Mi'i pote mesup waku pe ra'yn eweikup­te'en e. Waku ahehay aiwo­'ope aiwo­'ope aiwo­'o­wese hap e Tupana ahepe wati­mohey Ha'yru hawyi. Ipakup we ra'yn watu­kup­te'en mesup Tupana wywo — Koitywy Uha'yru mikyi'at ko'i eipe pote eweĩ'ẽ ro uhowawi uha'y­ru'in uhaki­'yt'in e Tupana ahepe.
HEB 9:16 Mi'i hawyi mesup Tupana to'e ahepe — Uha'yru Sese Miit Kawiat iku'uro ehetiano pote waku eweĩ'ẽ ro uhowawi e. Atum yne teran ehepe Uha'yru mi'atoiat toku­'uro turanuat ipowat'yp ko'i e. Sa'a­wy'i yt atum kuap i te ehepe Uha'yru yt iku'uro i te pote e. Ma'ato koitywy atum kuap yne ipowat'yp ko'i eiwano ra'yn e. Toieĩne'en hap tutum na'yn ehepe e ahepe.
HEB 9:17 Uiwy­ria'in karãpe watoĩ­ne'en ne turan aipowat'yp ko'i yt watum kuap i te ahaipe piaria pe. Ma'ato aiku­'uro hawyi ta'a­tu­mõ'ẽ aipo­wat'yp ko'i ahaipe­piaria pe aimi­ky­'esat miwan etiat hap ewy. Aikotã iwan watoiat aheka­re'en ky'ewi hap ete. Aikotã aimi­ky­'esat miwan miat e hap ewy yn ta'a­tu­mõ'ẽ waku hap ewywuat. Yt ta'a­tu­mõ'ẽ hin i aheĩne'en ne turan ma'ato aiku­'uro hawyi ta'a­tu­mõ'ẽ aipo­wat'yp ai'e hap toĩne'en iwan hap ewy.
HEB 9:18 Sa'a­wy'i mio tã e Tupana nagnia pe — Eihũria suu sat yne hap kaipyi put'ok'e aiwo­'o­wese hap nug hamo e. Eihũria suu ta'at yne yne yi to'e hawyi waku ra'yn aiwo­'oehay pywuat hamuat e Tupana sa'a­wy'i nagnia pe. Mi'i hawyi koitywy Tosa­'yru suu ta'at yne yi tote hawyi aiwo­'oehay sat hap topy­hu'at wuat'i e'at piat Tupana wywo.
HEB 9:19 Sa'a­wy'i aimu'e kahu yne hawyi ahepa'i Musei tat ra'yn tekui'a hawyi toi'auka mekewat wewato ahup mẽpyt hit ko'i aihũria hit ko'i hawyi huu toipag kui'a pe. Mi'i hawyi totat aihũ kaneiru sap amũkiusu ap ewywuat ihup takat hawyi toipo'i mekewat aria'yp ãpo ete hawyi toipuka suu y'y puat pe. Mi'i suu wo sapei sapei'e miit'in ete. I'ewyte suu wo sapei sapei'e mekewat Tupana miwan ete. Mi'i hawyi yne tomi­mu­'eria toi'a­tu­sapei sapei ra'yn.
HEB 9:20 Tupana mõtypot ekare'en ko'i ete i'ewyte toi'a­tu­sapei sapei yne ra'yn suu wo hawyi to'e topot­mu­'eria pe — Eweikuap apo meikotã woro­ho­'o­sapei sapei suu wo hap e. Ta'i eipehik Tupana etiat hap ti mi'i e katu­pono suu yn waku ahehay Tupana kapiat hap sa'up mo e. — Mi'i tã e hap ewetunug no e Tupana ahepe. Suu yn ahehay wesat kuap uiwywo hap e ahepe Musei sa'a­wy'i. Yt ta'at i yne suu yi tote pote yt kat i eiminug sa'ag moweityk hap e Tupana ahepe sa'a­wy'i.
HEB 9:21 Mi'i hawyi Musei tat mekewat kui'a piat suu hawyi topopag hawyi toi'a­tu­sapei sapei yne miit'in Tupana mõtyot yat piaria hawyi to'e. Mio tã e Tupana ahepe — Suu at hat yne waku eheha­kye­ra'at mo e.
HEB 9:22 Mi'i yn imoweityk kuap eiminug sa'ag e Tupana ahepe e. Eiwe'eg wo o katu­pono yt ehei i suu at hat wo pote eipitpit rakat ewy eweikup­te'en ne uiwa­nẽtup hawe e Tupana ahepe miwan me e.
HEB 9:23 Hã'ãkap wuo Tosa­'yru suu at hat ete mekewat atipy kaipywiat sut hat ete ihay. Aihũ aimi­'auka ko'i sa'a­wy­'iwuat Iesui auka hap ete ihay yianmete. Iesui suu yn waku yne koho hamo yi tote i'ewyte atipy pe e. Po'og waku Iesui suu aihũria suu at hap kai katu­pono — Eihũ Sese Uha'yru moherep hap eihũria toĩne'en e. Mi'i ti iku'uro eika­wiano e Tupana ahepe.
HEB 9:24 Mi'i suu at hawyi toĩne'en mu'ap uimõ­typot yat atipy piat teke hamo. Mi'i hawyi uiwywo topy­hu'at Eipai Wato wo. Mesu­wa­rotiat miit'in minug ta'a­tupo wuat uimõ­typot yat pe i teke kuap ma'ato mesuwe atipy pe teke tosuu topo etiat wywo e Tupana ahepe.
HEB 9:25 Sa'a­wy­'iwuat pa'i akag ko'i yne 12 waty pe teke tuereto uimõ­typot yat pe miit'in hũria suu wywo aikope Uito yn waku areĩne'en hap tote e.
HEB 9:26 Ma'ato Uha'yru Ehepa'i Wato toĩne'en wuat'i e'at pe uiwywo wẽtup muat tosuu at hawyi. Koitywy yt kat i ra'yn typuot i epiat ho'opot hamuat are'e Uha'yru pe e.
HEB 9:27 Mi'i hawyi mio tã e Tupana yne miit'in me — Mi'i hap ewy eipe wẽtup mo yn eiku­'uro hap e. Mi'i hap ewy Uimi­po­'oro Eipo­rekuat nuat Iesui wẽtup mo yn iku'uro eika­wiano yne eiminug sa'ag moweityk hamo e. Mi'i hawyi woro­ho­'o­mo­herep wuat'i miit'in ehamo sio Uha'yru mohey haria eipe sio yt hap kuap hamo e.
HEB 9:28 Mi'i hawyi yt karãmuo i iku'uro i ra'yn Uha'yru katu­pono wẽtup mo yn miit'in iku'uro e. Mi'i pote Mi'i Miit Uha'yru wẽtup mo yn iku'uro hawyi mesup hut hap yn na'yn toine'en aru eimi­he­katup e. Sa'a­wy'i toku­'uro hamo tut miit'in kape e. Ma'ato meiũran aru yt toku­'uro hamo i tut tohe­katup haria kape. Katu­pono Uha'yru yt typuat iku'uro rakat i e. Uha'aru tut wyti aru tomie­ha­ky­'e­ra'at ko'i moherep hamo e Tupana ahepe Tosa­'yru Iesui ete.
HEB 10:1 Waku kahato sa'a­wy­'iwuat Musei miwan ai'y­wa­niaria Epereu pusu kuap haria mowe'eg hamo katu­pono tohenoi tomiwan me — Tut aru Aheha­kye­ra'at hat e. Yne Musei miwan ete aimu'e — Waku aru waku aru tut wyti aru Tupana Mipo­'oro uito ewywuat ma'ato po'og waku rakat e kahato ma'ato hã'ãkap ewy ihay aheha­kye­ra'at hamuat ete. Aikotã aipã'ãu ai'ewy toĩne'en yi tote mi'i hap ewy toimo­herep Iesui ai'akag Musei. Yianmiat miwan me tohenoi yne Iesui etiat aikotã wẽtup ok pã'ãu at kape tut heremo yt heremo kahato i wen ma'ato to'ewy ipã'ãu wywo hap ewy toimo­herep iesui yianmete aha'a­se'i Musei miwan yt heremo kahato i rakat pe. Hã'ãkap wuat Musei henoi yne Iesui ieĩne'en hap ete iku'uro hap ete i'ewyte toĩne'en i gu'uro pywiat hamuat hap ete. Sa'a­wy'i aha'a­se'i Musei ti'a­tu­'uka kahato aihũria aika­wiano Iesui auka hap moherep hamo. Mi'i ti imoherep kahato po'og wakuat ut hamuat ete. Katu­pono yne 12 ewaty pe ta'a­tu­'a­tu­'uka ta'a­tue­hũria Tupana piat ta'a­tu­moe­waku hap puẽti hamo wen ma'ato yt ta'a­tu­puẽti hin i. Ma'ato mi'i hap nug hap kaipyi te'e­ru­wa­nẽtup Tupana hũ sese kape ta'a­tue­ha­kye­ra'at sese hamuat kape yianmete ipã'ãu ewy tukup­te'en ta'a­tu­hũria.
HEB 10:2 Aihũria wewato ahup auka hap kaipyi yt put'ok'e i aipy'a piat aiwa­nẽtup hawiat sa'ag nakat monik hamo. Sa'a­wy'i wahã'ãg kahato put'ok'e hap ete ma'ato yt put'ok'e i Tupana piat aimo­hãpyk hamo. Sa'a­wy'i tõ'ẽ tõ'ẽ miit'in Tupana mõtypot hamo — Heno aihũria i'atu'e pa'i pe. Eti'auka ro aiminug sa'ag hep hamo i'atu'e. Katu­pono haty kahato aipy'a pe aiwa­nẽtup hawe aiminug sa'ag i'atu'e. Aiwe­mõti mi'i hap ko'i yt wati­waure kuap i mi'i hap ko'i i'atu'e pa'i pe. Ta'a­tu­'auka wuat'i 12 ewaty pe. Ta'a­tunug yne hãpyk ta'a­tuhũ auka hap ete ma'ato yt naku i hap te topy­hu'at re i'atu­py'a pe katu­pono aihũria suu yt put'ok'e i aipy'a piat aiwa­nẽtup hap koho hamo. Ta'a­tunug kahato pytkai haty te ahete. Mi'i pote watunug anu i anu i ewy yt put'ok'e kuap i mohag wo sese pote. Put'ok'e pote yt ta'a­tunug i ra'yn. Ma'ato ta'a­tunug anu i anu i pote tohenoi ra'yn yt put'ok'e i hap.
HEB 10:3 Sa'a­wy'i watunug yne 12 ewaty pe mi'i hap ete watikuap ta'yn yt naku i te aipy'a pe aiminug sa'ag hap Tupana pe wati­'a­parap toĩne'en ne. Mi'i pote toĩne'en ne aiminug sa'ag aiwa­nẽtup hawe hawyi watu­we­mõti watunug na'yn yne anu hawyi.
HEB 10:4 Katu­pono aihũ wewato ahup suu yt put'ok'e i aiminug sa'ag hep hamo. Topy­hu'at re aiminug sa'ag hep hamuat. Aihũria suu watum kahato pytkai yt put'ok'e i Tupana wywuat waku hamo. Aihũ suu yt tomo­weityk kuap i ahepiat i'aparap hap ko'i.
HEB 10:5 Karãpe Aipo­typot put'ok'e mesuwat yi tote turan — Uhetu­pana e yt etiky­'esat i po'og miit'in ti'auka ta'a­tu­hũria e. Pyno koitywy waku ra'yn atum uipiit Papai e. Uhuu yn waku mohag wo emowepit hamo Papai e.
HEB 10:6 Worokuap kahato En Papai e. I'atumiium ko'i yt emowepit hin i i'atuhũ wuk heiam notiat hap e. Katu­pono mekewat i'atu­hũria suu i'atu­minug sa'ag hep hamuat yt put'ok'e i emowepit hamo e. Mi'i pote uipiit atum epe Papai e.
HEB 10:7 Pyno koitywy ariot miit'in ehakye­ra'at hamo eimi­ky­'esat ewy Papai emiky­'esat ewywuat nug hamo e. Aikotã Musei to'e hap ewywuat atunug yne yne Papai e. Ta'i Musei ihay kahato yianme uhetiat tohenoi e. I'ewyte yne sa'a­wy­'i­wuaria ehay moherep haria i'atuehay kahato uheĩne'en hap ete uhehay ete uimo­herep haria sa'a­wy­'i­wuaria e. Uheĩne'en hamuat hap ete yn i'atuehay ui'y­wã'ĩ hap e'yianmete i'atuehay uhetiat Papai e. Mi'i i'atuehay ewy yne yne atunug na'yn Papai emiky­'esat ewy miit'in ehakye­ra'at hamo Papai e Iesui sa'a­wy­'ite morekuat Tawi wepy hap miwan 40.6 pe.
HEB 10:8 Aikotã ere'e hap ewy are'e i ra'yn Papai. — Yt atiky­'esat i po'og eihũria eimiium ko'i ere'e miit'in me sa'a­wy'i e hap ewy Papai. Eimi­'auka eimiwuk ko'i yt atiky­'esat i po'og yt uimo­wepit kuap i pote ere'e Papai e. Eihũria suu eimiium ko'i yt put'ok'e i uimo­wepit hamo ere'e hap ewy. Eihũria suu yt put'ok'e i eiminug sa'ag hep hamo uiwa­nẽtup hawe ere'e. Hãpyk kahato eimiwuk pytkai einãpin uhepiat hap miwan miat ewy kahato pytkai miwan me to'e hap ewy ewetunug pytkai ma'ato yt atiky­'esat i po'og eimiwuk ko'i ere'e miit'in me e hap ewy sa'a­wy'i Papai e. Waku wen ma'ato yt put'ok'e i eiminug sa'ag hap ko'i hep hamo ere'e e.
HEB 10:9 Mi'i e'e hap atikuap hawyi pyno areto Papai are'e epe sa'a­wy'i. Ui'ywot atum aru uipiit emowepit hamo e. Areto are yi kape emiky­'esat nug hamo e. Areto emowepit hap nug hamo aru e Ha'yru Tupana pe sa'a­wy'i miwan me. Mi'i pote mesup Tupana yt tiky­'esat i aihũria suu katu­pono wẽtup suu yn waku mesup Ha'yru suu yn waku e.
HEB 10:10 Mi'i pote koitywy waku pe ra'yn watoĩ­ne'en Tupana ehamo. Imiewaku sese wo ra'yn wato­py­hu'at aito katu­pono mekewat Tosa­'yru piit ium hap kaipyi aimo­hãpyk hap toĩne'en. Tupana towaku hap ewy ainug. Aika­'iwat Aipo­typot suu at yi totiat hap kaipyi aimo­hãpyk hap toĩne'en mesup. Tupana tewaku hap ewy tutum ahepe. Ha'yru ha'up nug tosuu wo wẽtup mo yn. Yt kat i mi'i rẽ katu­pono — Waku ra'yn eipe e Tupana toran na'yn e.
HEB 10:11 Ma'ato nagnia hepa'i ko'i yne i'atu­potpap aihũria ko'i wuk hap ete te. Yne e'at pe mi'i tã ta'a­tunug. Ta'a­tuwuk tuereto aihũria wen ma'ato ahepiat i'aparap hap topy­hu'at kahato te. Ta'a­tunug hãpyk kahato Tupana e hap sa'a­wy­'iwuat ewy pytkai yne e'at pytkai yt put'ok'e i aimo­waku hamo Tupana wanẽtup hawe.
HEB 10:12 Ma'ato Ahepa'i Akag Iesui wẽtup mo yn ha'up nug yne ra'yn wuat'i e'at piat ahepiat i'aparap hap hawyi — Mi'i Miit Eihũ wo waku e Tupana. Iku'uro miit'in apiheg hap u yne hamo aria'yp posak ete e. Wẽtup mo topiit tutum Tupana pe aria'yp posak ete hawyi ta'aipok gu'uro pyi hawyi — Woro­mõ­typot teran mesuwe Uha'yru e. Era'apyk to mesuwe uipo sese kai e Tupana. Uhũ sese En e Tosa­'yru pe. Mi'i Miit yn wyti waku mohag wo e Tupana ahepe mesup.
HEB 10:13 — Era'apyk to mesuwe Uha'yru uipo sese kai katu­pono woro­mõ­typot teran En aikope ereĩne'en Morekuat no hap e. Uha'yru woronug aru En Wuat'i Ywania Porekuat no e yne yne ewanĩ­kaptia ati'a­tu­mohit kahato e. Pywo ti rat ewanĩ­kaptia okpe tote aru ereĩne'en Morekuat no wuat'i e'at pe Uha'yru e. Epy ywyt'ok­pype aru torania ewanĩ­kaptia ahytmoi e. Pyno waku mesuwe era'apyk Uha'yru e. Waku ehekatup mesuwe katu­pono atunug yne aru ui'e hap ok e'e hap ok tã tã e Tupana Iesui pe sa'a­wy'i.
HEB 10:14 Sa'a­wy'i wato­mohey hawyi aimo­hãpyk kahato Iesui suu wo i'ewyte mesup te aimo­hãpyk yne e'at Tupana Sa'yru suu wo yne e'at po'og sa'a­wy­'iwuat kai. Waku wahẽtup yne e'at huu wywo aikoho hap aimo­waku hamuat. Mi'i watunug mote meiũran itag nakaria wo watoĩ­ne'en imohey hap ete. Tupana miewaku ko'i wo wato­py­hu'at mesu­wa­rote. Tupana Sa'yru ewywuat wato­py­hu'at hawyi yt kat i sa'ag aikai. Mi'i hawyi tosuu wo aimotag kuap kahato.
HEB 10:15 Aikotã Tupana Pã'ãu to'e aipy'a pe hap ewy — Uha'yru suu yn eimo­hãpyk kuap mehĩ mana e kahato ahepuo. Aikotã sa'a­wy'i to'e hap ewy mio tã te to'e mesup Tupana Pã'ãu aipy'a pyi ra'yn — Waku pe ereĩne'en uiwywo e ahepe.
HEB 10:16 Aikotã Tupana Pã'ãu to'e sa'a­wy'i miwan me hap ewy — Meiũran aru uhehay atimoheg kahato Uha'yru mohey haria py'a pe e. Mi'i pote waku eweĩ'ẽ uhowawi atunug aru ui'e hap ewy e. Mekewat e'at pe aru eweiky­'esat ui'e hap pote uhehay eiam ko'i kahato eweikup­te'en eipe e. Pywo ti rat ui'e hap atiwan aru eiwa­nẽtup hawe e. Ui'e hap ewy atiwan yne eiwa­nẽtup hap ete e. Eweiky­'esat ui'e hap pote atipyt­'atnug eipy'a ui'e hamo hawyi yt pya hin i einãpin uhepiat hap eikai e. Mi'i hawyi eweikuap yne eipy'a pyi uhehay e. Uhehay eiam mo eweipy­hu'at e. Waku eweĩ'ẽ pote ahytmoi eipy'a pe uiwa­nẽtup hap ewywuat e Tupana Pã'ãu ahepe miwan me sa'a­wy'i e hap ewy mesup te to'e pakup i ahepe.
HEB 10:17 Mi'i hawyi ehepiat i'aparap hap atiwaure yne e Tupana Pã'ãu ahepe mekewat Ieremia miwan 31.33 pe.
HEB 10:18 Pywo ti rat eiminug sa'ag uhetiat yt kat i ra'yn Uha'yru mohey haria eipe pote e ahepe mesup. Yt kat i ra'yn topy­hu'at uiwa­nẽtup hawe eiminug yt naku i ko'i e. Atiwaure yne yne ra'yn e Tupana Pã'ãu ahepe. Mi'i tupono koran yt kat hamo i ra'yn eihũria ewei'auka ei'a­parap hap sa'up mo katu­pono waku ra'yn uiwa­nẽtup hawe eipe e Tupana ahepe tosuu hum hat mohey haria pe.
HEB 10:19 Mi'i tupono koitywy yt wato­ken'ẽ i Tupana kapiat ahehat'at hamo ahehay hamo. Ta'i uiwy­ria'in koitywy yt wato­ken'ẽ hin i ra'yn Tupana eiam kapiat ahehat'at hamo. Iesui suu aipo pe ra'yn pote aipit pit'ok yne hamo aipy'a koho yne hamo pote — Waku ra'yn meiẽwat teke ahowawi Papai e Iesui ahepiat pe To'ywot pe. Mi'i pote waku wateke Tupana eiam sese pe yt kat i aimo­ken'ẽ hap wywo.
HEB 10:20 Koitywy toĩne'en mu'ap Tupana kapiat wuat'i e'at piat aheĩne'en sese hamuat. Koitywy ereke ro meiũpe e yn na'yn ahepe. Waku ra'yn koitywy eiwe­hyt'ok uha'y­ru'in eipe uhaki­'yt'in eipe pote e ahepe mesup. Sa'a­wy'i sokpe i'anam nakat kawiat eipyhyp uhowawi ma'ato mesup hiot'e ra'yn oken'ypy e Tupana. Mi'i pote waku yne ra'yn eiperia eiwe­hyt'ok uhowawi Uha'yru mohey haria eipe pote e. Mekewat sokpe i'anam hiot'e hap Uha'yru pu'i hiot'e hap iã'ãkap kahato e. Mi'i puo tõi mu'ap uhowawi mesup e Tupana ahepe.
HEB 10:21 Koitywy waku ra'yn eiwe­hyt'ok uhowawi katu­pono Uha'yru Ehepa'i Koro wo ra'yn toĩne'en uimõ­typot hap yat sese pe e Tupana ahepe.
HEB 10:22 Pyno to'iro Tupana kape uiwy­ria'in. Waku watipun ahehay aheso hap ko'i wateke Tupana wywuat piat hamo. Waku yt kat i aipy'a piat aheso hap. Mi'i hawyi yt kat i aimo­we­mõti hap wywo wateke. To'iro pyno Tupana ewawi. Waku watipen aiwa­nẽtup hap aipy'a piat Iesui suu wo. Waku Iesui aipy'a sei hap Tupana tunug suu wo wateke. Waku yt kat i aiwa­nẽtup hap sa'ag aimõti hap wywo i waku wateke. Waku watuwei kahato mekewat y'y wakuat sese wuat'i e'at piat wat pe. Mi'i hawyi waku wateke aipy'a sei hap wywo aikoho hap mywo aipiit toran koho hap mywo yn waku wateke Tupana ewawi uiwy­ria'in.
HEB 10:23 — Uha'yru eweimohey pote woro­ho­'oe­ha­kye­ra'at e Tupana. Pyno Tupana tunug to'e hap ewy yt heso kuap i Tupana pote. Koitywy waku wato'e — Woro­mohey kahato ti rat En Iesui wato'e waku haty wo. Waku mi'i wahenoi wuat'i miit'in muo — Iesui Uimi­mohey kahato wato'e. Yt naku i wato­ken'ẽ ne'i — Iesui yn mu'ap atipy kapiat ai'e irania'in tok piat hamo. Katu­pono sa'a­wy'i to'e Tupana — Eweimo­herep irania'in ne Uha'yru mohey hap hawyi woro­ho­'oe­ha­kye­ra'at eipe e. Mio tã e hap wato'e pote yt aima'at kuap i irania'in. Mi'i pote waku wato­py­hu'at i'ewy­wuano. Waku watunug ai'e hap ewy tope wy.
HEB 10:24 I'ewyte waku wati­ky'e irania'in Iesui mohey haria. Waku wati­'a­tu­po­wyro aiwy­ria'in imohey haria. Waku wato­'o­po­wyro wẽtup yat piaria ewy. Waku wato­'o­nãpin aiwy­ria'in — To'iro wato­'o­ky'e wato'e aiminug wakuap mywo. Waku ahegyi'at hap kaipyi wati­'a­tuekyi irania'in Iesui mohey haria wo.
HEB 10:25 Yt naku i wato­'o­'atoiat atoiat ne'i aiwa­'a­tunug hap totepyi karãpe watu­wa­'a­tunug turan. Yt naku i wato'e — Yt uipap i mesup Tupana ehay etiat uiwe­mu'e hamo wato'e aiwo­'ope. Karãpe Aipo­typot mohey haria te'e­ru­wa­'a­tunug mi'i pote waku wati­'a­tu­wy­'inug waku watuwat i'atuupi. Toĩne'en aipy­'a­setpe wẽtup ok wẽtup ok aiwa­'a­tunug hap kape — U pãi U an e haria yt uipap i kahato aiwa­'a­tunug hap kape e hat pote pyno waku mi'i e haria wati­'a­tu­nãpin — Tupana tiky­'esat kahato ereto hap uhyt mana katu­pono Aika­'iwat tut irane hawyi waku ereĩne'en uruwywo hut turan waku wato'e yt ipap i e haria pe. Mi'i watunug aiwo­'o­mu'e hap tote pote po'og wato­moe­saika moesaika imohey hap ete. Waku watu­wa­'a­tunug po'og po'og Iesui ut hap watikuap yt pya i ra'yn hawyi.
HEB 10:26 Ma'ato karãpe irania'in yt Iesui mohey i hat watoĩ­ne'en hawyi watikuap pywuat sehay yne Iesui etiat ne'i hawyi — Yt atiky­'esat i wato'e aipy'a pe mi'i pote yt kat i mu'ap ahepe atipy kapiat ma'ato ai'a­piheg hap kapiat mu'ap upi yn watuwat. Mi'i hawyi heremo kahato aiminug sa'ag Tupana pe yt kat i Iesui suu ahepiat aipiit aipiit i'aparap hap koho hap pote. Yt kat i ai'a­parap hap moweityk hamuat. Watipun na'yn Iesui mu'ap sese ra'yn watipun hawyi yne e'at pe ra'yn aimoma hap topy­hu'at mesuwe aimoma ne'i. Aimo­'a­kag'aia hap yn na'yn topy­hu'at. Aria kape areto uiminug sa'ag upi ai'e hap yn na'yn aiwa­nẽtup hawe. — Tupana ewanĩ­kaptia wuk hap kape yn na'yn aru areto ai'e hap yn na'yn aiwa­nẽtup hawe pote. Kat pote yt kat i wati­puẽti wẽtup mu'ap Tupana kape watipun na'yn Iesui hawyi.
HEB 10:27 Ma'ato watikat aihũ suu upi ne'i Tupana kapiat mu'ap pote yt put'ok­wa­to'e i atipy kape yt naku i ahei hamo katu­pono — Uha'yru suu yn put'ok'e eikoho hamo e Tupana. Ma'ato — Yt atiky­'esat i epu'ap wato'e Tupana pe hawyi yt naku i ti Esa'yru suu wato'e hap ewy wato'e Tupana pe. Mi'i hawyi yt kat i aheha­kye­ra'at hap mio tã wato'e ne'i pote. Mi'i hawyi yt kat i topy­hu'at mu'ap Tupana kape watikat pytkai.
HEB 10:28 Sa'a­wy'i ahepa'i koro Musei ainãpin kahato kat som waku kat som yt naku i watunug hap ete. Ainãpin haty wo niatpo rakat ainãpin kahato sa'a­wy'i. Mi'i ainãpin hap yt watunug i hawyi ai'auka hap topy­hu'at sa'a­wy'i. Typy ok miit ta'a­kasa aiminug sa'ag yt ainãpin Musei piat hap ewy i hawyi mi'iria henoi more­kuaria pe hawyi ai'auka hap topy­hu'at yt aheha­ky­'e'i hin i ai'auka hap e'at pe.
HEB 10:29 Ma'ato Tosa­'yru auka haria po'og Tupana ti'a­tu­mo­so­'opot mekewat Musei wãi'e hap pun haria kai — Yt atiky­'esat i Esa'yru suu uimoe­waku hamo e haria yt atiky­'esat i Esa'yru suu uhekye­ra'at e haria yt kat hamo i Esa'yru suu e haria. Mi'iria ewywuaria Tupana ti'a­tu­'a­piheg typy sakpo kahato Tosa­'yru pun haria Tosa­'yru akit ne'i teran haria. Karãpe Tupana Pã'ãu — Pywo ti Iesui Uha'yru Sese e ahepe ma'ato — Heso wato'e Tupana Pã'ãu pe mi'i hawyi po'og ai'a­piheg hap topy­hu'at Musei piat ai'a­piheg hap kai. Karãpe — Yt egyi'at i kahato wato'e Tupana Pã'ãu pywo rakat pe. Eso En wato'e Tupana Pã'ãu pe hawyi — Yt atiky­'esat i egyi'at hap e haria wo wato­py­hu'at. Tupana eremo­pusu kahato hewaku hap etiat haria wo wato­py­hu'at. Mi'i tã haria aito pote Tupana ai'a­piheg wuaria wo watu­kup­te'en po'og po'og Musei piat ai'a­piheg hap kai.
HEB 10:30 Sa'a­wy'i mio tã e Tupana — Ateru­wepyk ti aru Uha'yru etiat miky­ry'i haria yne yne e. I'atu­minug sa'ag upi ati'a­tu­'a­piheg aru e. Meiũran aru ahenoi uwe waku uwe yt naku i hap Uha'yru etiat haria wuat'i ehamo e. Uwe hemiit sese uwe yt hap ahenoi e Tupana mesup ahepe. Tupana yt heso kuap hin i pote pywo yn tohenoi sio pywo wato­mohey sio yt e hap.
HEB 10:31 Pyno waku wato­ken'ẽ kahato Tupana piat ai'a­piheg hap pupi katu­pono yt naku i kahato wato­py­hu'at Tupana ewanĩkap wuat'i e'at piano. Yt naku i wato­py­hu'at Tupana mi'a­piheg wo ne'i. Waku wato­ken'ẽ ai'a­piheg hap pupi.
HEB 10:32 Wato­mohey sa'a­wy'i Iesui hawyi aheha­kye­ra'at hap topy­hu'at kahato ahete. Mi'i hap e'at pe ahewyry waku pe kahato heremo yne Tupana aiwa­nẽtup hawe. Aiwepit hap yn ahete. Mi'i hawyi miit'in te'e­ru­we­ky­ry'i kahato ahete e. Mi'i hawyi ahaty'i haty'i kahato mi'iria. Mi'i hap waho­'opot kahato.
HEB 10:33 Mi'i hawyi aimohit wuat'i ehamo te'e­ra­ha'at kahato ahowawi. Irania'in yt aiwesat i. Irania'in yt te'e­ru­wehum i po'og ahowawi Iesui waku wato'e pote. Aimo­'arot kahato ta'a­tu­minug sa'ag kaipyi aima'at hamo. Karãpe irania'in Iesui mohey haria ho'opot miit'in miky­ry'i hap ete mekewat e'at pe watuwat i'atu­wywo ho'opot i'atu­wywuat hamo. Mi'i hawyi waho­'opot aiwo­'o­'e­wy­'ewy itote ahatek hap e'at pe. Yt naku i ta'a­tunug ahete hap e'at pe.
HEB 10:34 Mi'i pote mekewat e'at pe aipyhyp wo'o­pyhyp hawe wanĩ­kaptia po pe watoĩ­ne'en. Mi'i tote ai'ahyk ahyk sa'ag ne'i Iesui mohey haria aito pote. Ma'ato wãi'i­'a­tu'e pytkai yt watoiat hin i Iesui. Iesui mohey haria irania'in yt ai'atoiat hin i ho'opot hap e'at pe ma'ato — Waku urumo­sa­ty'i saty'i wy wato'e more­kuaria pe katu­pono waku uruho­'opot wy uruwy­ria'in nywo uruto Iesui mohey haria wy pote waku wato'e sura­ra'in me. Mi'i hawyi wẽtup miit ewy waho­'opot hap topy­hu'at katu­pono aiwo'o­ky'e kahato hap itote pote. — Pyno waku watuwat aito wy i'atu­wywo waho­'opot hamo waku wato'e aiwa­nĩ­kaptia pe. Mi'i hawyi sura­ra'in ti'a­tu­po­hari yne yne ahekat ko'i ete Iesui mohey haria aito pote wen ma'ato mi'i turan yt kat wato'e hin i ma'ato Tupana kape watu­wehum kahato imimo­wepit ko'i wuat'i e'at piaria aito pote. — Pywo ti rat aheka­re'en sese atipy pe yn toĩne'en mio wato'e aiwo­'ope mekewat e'at sa'ag me ahekat yne ta'a­tu­po­hari turan hap e'at pe. Itote ti wakuat po'og aheka­re'en wato'e aiwo­'ope aipo­hari yne ete pytkai.
HEB 10:35 Ta'i mekewat e'at pe waho­'opot kahato wato­mohey Iesui hawyi. I'atu­mi­ky­ry'i hamo watu­kup­te'en. Mesup e'at pe po'og waku sa'a­wy­'iwuat kai toĩne'en ahete pote waku watu­we'eg wo watu­kup­te'en uiwy­ria'in katu­pono yt naku i mekewat ahatek hap e'at pe watoiat ne'i Aimi­mohey Iesui. Waku wati­moheg kahato Iesui mohey hap aiku­'uro hap kape. Mi'i watunug mote sa'up iwato kahato aiwanuat topy­hu'at wuat'i e'at pe aru ma'ato watoiat ne'i imohey hap pote yt kat i i wati­puẽti mekewat waho­'opot i ho'opot sa'a­wy­'iwuat hap sa'up e.
HEB 10:36 Waku typy sakpo wato­mohey mot'i Iesui aiwepit hap e'at i'ewyte ai'arot hap e'at. Yt naku i aipohep imohey hap ete. Yt naku i watunug tunug waure ne'i. Waku pot'i wato­mohey hawyi — Atum aru ui'e hap ewy e Tupana ahepe. Mio tã e hap yn waku wahe­katup. Yt naku i wahe­katup hawyi yt hum i te turan watoiat ne'i ra'yn — Atum aru e hap e. Ma'ato wahe­katup po'og po'og hawyi put'ok'e Aika­'iwat atipy kaipyi ha'up mywo hawyi yt watu­we­mõti hin i. Pywo pywo yn wato'e aimi­mõ­typot hap e'at pe. Waku kahato watoĩ­ne'en itote.
HEB 10:37 Pyno kurin waho­'opot po'og na'yn hawyi merep tut Aheha­kye­ra'at hat Iesui tomi­moe­waku ko'i moehãite hamo wuat'i e'at pe.
HEB 10:38 Imohey haria sese imohey hap ete ti ra'yn Tupana timo­pokuap. Ma'ato Tupana to'e sa'a­wy'i — Uwe uwe ipohep ne'i uimohey hap ete pyi mi'i hat yt uimo­wepit hano i topy­hu'at e Tupana tehay moherep hat Apakuki miwan 2.34 pe.
HEB 10:39 Ma'ato aito yt mi'i haria yt ewywuat i katu­pono yt wata­'aipok hin i Iesui mohey hap kaipyi. Tupana kapiat wat imohey wywuat haria wo aito. Yt wata­'aipok teran i ahowasat aria kapianuat ai'a­piheg hap kape. Aito ti mekewat Iesui mohey aiku­'uro hap kapiat haria. Mi'i tã imohey haria aito aheha­kye­ra'at wuat'i e'at piat hap kapiat haria yn aito pãi an uhyt'i'in mana'in are'e.
HEB 11:1 Karãpe wato­mohey sese Tupana hawyi tut kahato aimiẽtup Tupana kaipyi. — Atikuap kahato uipy'a pe tut wyti aru uimiẽtup Tupana po pyi wato'e imohey hap wywo aiwa­nẽtup hawe yt toĩne'en i te aipo pe pytkai yt heremo i te ma'ato wato­mohey kahato toĩne'en na'yn hap hawyi heremo rakano topy­hu'at aipy'a pe hap ewy. Wato­mohey te yt heremo i te pytkai aimi­mohey. — Toĩne'en na'yn mesup wato'e yt heremo i te pytkai hawyi tuwe­mo­herep ahepiat imohey hap ok tã Tupana po pyi hawyi heremo aimi­mohey ok tã.
HEB 11:2 Sa'a­wy­'iwuat tomohey haria sese pe yn Tupana to'e — Uimo­wepit kahato haria eipe katu­pono uimohey haria sese eipe e.
HEB 11:3 Sa'a­wy'i Tupana tuwa­nẽtup — Atunug aru waikiru waty at e topy'a pe. Mi'i hawyi tutunug to'e hap ewy tomohey ewy. Toi'a­tu­moe­wyry at waikiru waty yi tomohey hamo hawyi ikahu kahato tukup­te'en to'e hap ewy. Mekewat e'at pe yt kat i aito yt wata­'a­kasa hin i inug hap pytkai wato­mohey Tupana tunug yne yne hap. Wato­mohey hawyi watikuap Wuat'i Sa'a­wy­'iwuat Nug Hat Tupana. Watikuap Tupana ehay kawiat yne yne topy­hu'at mesuwe atipy pe.
HEB 11:4 Sa'a­wy­'iwuat sese Ãtãu sa'yru Apeu tum tomiium imohey wywo Tupana pe — Woro­mohey kahato En Tupana e hamo. I'ewyte ieyke'et Kãi tum Tupana pe tomiium wen ma'ato Tupana yt tuwehum kahato i Kãi miium ete katu­pono Kãi yt timohey kahato — Atiky­'esat ehũ suu emiium e hap hawyi tutum tomiium tomikoi ko'i Tupana pe pote. Ma'ato iywyt pe — En ni uimimoe­waku ereĩne'en e Tupana Apeu pe. Ehũ emiwuk po'og waku Kãi wat kai katu­pono uimohey en mote e. Mesup te — Waku kahato Apeu miium e uimohey kahato hat Apeu pote e ahepe. Iku'uro ra'yn pytkai Apeu ihay aimu'e te Tupana mohey hap yn aimo­hãpyk hap e ahepe. Apeu suu ihay te hap ewy ahowawi yi pyi ihay te.
HEB 11:5 Sa'a­wy'i aha'a­se'i Inoki yt iku'uro hin i te turan Tupana tioto atipy kape tomohey hap ikawiat iwato pote. Ipiit mesuwiat wywo te Tupana ti'y­kesat ra'yn atipy kape. Tupana tioto ra'yn yt uwe i ipuẽti Tupana tipo­hari ra'yn mesuwat ete tomohey kahato hawyi. Yt iku'uro hin i mesu­wa­rote ma'ato toto yianmete mi'i tã e miwan me — Uimo­wepit kahato hat ti mehĩ Inoki e Tupana.
HEB 11:6 Ma'ato watikuap ta'yn yt wato­mohey i Tupana pote yt karãpe i wati­mo­wepit kuap. Ma'ato watikat Tupana imohey hap mywo mi'i hawyi wati­puẽti Tupana ma'ato yt wato­mohey i hawyi yt karãmuo i put'ok­wa­to'e ipuẽti hamo. Mi'i hawyi yt to'e kuap i ahepe — Eriot ro uhowawi e hap yt to'e kuap i yt tomohey i rakat pe.
HEB 11:7 Nimo Tupana to'e aha'a­se'i Nu'e pe — Tut aru y'y wato mesuwat yi wuat'i moma hamo e. Mi'i pote ahenoi epe yianmete i'aman kahato at ka'ap hap etiat e. Waku pe etunug ehe'yara wato y'y wato owakai ui'e ewy e. Waku etunug yara iwato'in nakat eheha­kye­ra'at hamuat e Tupana Nu'e pe. Pyno yt kat i te i'aman pytkai tutunug yara wato. Nu'e timohey Tupana e hap hawyi tutunug i'e hap ewy to'e pote. Yt heremo i te y'y wato pytkai tutcunug yara wato at ka'ap hap ewy. Mi'i hawyi token'ẽ kahato mekewat i'aman wato ut hap pupi pote Tupana e hap ewy tutunug yara wato kahato. To'yat piaria teha­ry'i tosa­'y­ru'in tomi­moe­ha­py­'aptia ehakye­ra'at hamo tutunug. Ma'ato irania'in yi totiaria yt imohey hin i — Tut irane y'y wato ai'akit hamo e Nu'e hap ma'ato te'e­ru­we­ky­ry'i kyry'i at ka'ap iminug ete imohey ete. Ma'ato Nu'e timohey kahato te Tupana — Atunug aru e hap. Mi'i pote tutunug yara wato. Tepiat imohey hap mywo toimo­herep mesu­wa­ro­tiaria yt imohey i haria pe. Mi'i hawyi Tupana to'e — Uimohey hap kaipywiat uimi­mo­hãpyk ti Nu'e e mi'i pote uipy'a pe hãpyk kahato Nu'e topy­hu'at e Tupana mesup te ahepe.
HEB 11:8 I'ewyte nimo te Tupana to'e aha'a­se'i pot Aparãu me — Atiky­'esat ereto wẽtup yi kape uimi­mo­herep e'yi kape yt emikuap i yi kape e uimiium epiat wuat e'yi kape e i'ewyte yne yne emẽpyt'in emiari­ru'in wanuat e yi kape e. Mi'i hawyi Aparãu timohey Tupana e hap hawyi toto i'e hap ewy yt ta'a­kasa i aikope toto hap kapiat pytkai.
HEB 11:9 Mi'i hawyi ikohye­wyry kahato mekewat — Yi atum aru e Tupana piat hap tote. — Mesuwat yi aru Tupana tum uhepe e Aparãu topy'a pe Tupana yt tum i te turan. Sewyry at haype ma'ato to'yat aparap ko'i te toĩne'en sokpe kawiat pe. Mi'i tote ikohye­wyry tosa­'yru Isaki wywo i'ewyte temia­ri­ru'in wywo. — Mesuwat yi aru yne eiwano e Aparãu i'atuepe tomẽ­pyt'in me katu­pono Tupana tum aru mesuwat yi yne ahepe e Aparãu imohey hap wywo. Uha'y­ru'in e atikat kahato ahetawa sese yt mesu­wa­rotiat tawa ewywuat hin i e. Iheg kahato rakat tawa atikat e. Yt miit'in minug ewywuat i ma'ato Tupana minug tomikuap ewywuat atikat e temia­ri­ru'in me. Atimohey kahato Tupana tum aru ahepe mesuwat yi yt ara'a­kasa i te pytkai e.
HEB 11:10 — Tupana atiky­'esat kahato ahetawa yt karãpe i ikahuro rakat e. Atiky­'esat ahetawa iheg sese rakat yt karãpe i ipot'i rakat e. Mi'i pote toikat kahato mesu­wa­rotiat tetawa sese Tupana minug yt karãpe i ikahuro rakat toikat. — Atiky­'esat kahato ahetama uhe'yi wuat'i e'at piat ieĩne'en hanuat eminug ara'a­kasa hap e Tupana pe ase'i Aparãu Tupana mohey kahato hap wywo.
HEB 11:11 Sa'a­wy'i ihary'i mana Sara yt imẽpyt nug i toĩne'en ipot'i kahato rakat. Tuwei wuat'i e'at piat ewy toĩne'en hawyi yt imẽpyt i rakat sese topy­hu'at. Mi'i turan Tupana to'e Sara pe — 9 ewaty hawyi aru emẽpyt ra'yn Mana e. Mi'i pote — Pywo ti aru an woro­mohey En e. Toimohey pote ti Tupana tum tesaika hap Mana Sara pe hawyi hupi'a rakano topy­hu'at Aparãu ehary'i. Mi'i hawyi Tupana tum na'yn tesaika hap Sara pe hawyi tuwe­mo­herep Aparãu sa'yru Isaki. Mi'i hawyi Sara to'e — Are an Tupana tunug na'yn koitywy ahepe to'e sa'a­wy­'iwuat hap ewy e. Yt heso hin i ahepe e.
HEB 11:12 Aparãu iporo sese kahato rakat yt imẽpyt'i kahato rakat i ma'ato tomohey hap kaipyi Aparãu tuwe­sa­'yru nug na'yn. Koitywy Aparãu emiari­ru'in typy'i tukup­te'en. Haipe­piaria i'atu kahato waikiru ko'i i'atu hap ewy aikotã y'y wato hyẽpe etiat yi kyt i'atu hap ewy Aparãu emiariru sem. Yt uwe i imorania kuap Aparãu emiari­ru'in toimohey yn mote.
HEB 11:13 Ta'i sa'a­wy­'i­wuaria Ase'i Apeu Nu'e Aparãu Inoki hary Sara ti Tupana mohey pot'i kahato haria. Ta'a­tu­mohey kahato ta'a­tu­ku­'uro hap kape. Yt heremo i te — Atunug aru e Tupana piat hap turan pytkai ta'a­tu­mohey te. Ta'a­tu­ku­'uro hap turan te'e­ra­'a­kasa hap ewy ta'a­tu­wa­nẽtup hawe Tupana tunug aru e hap. Yt tutunug i te to'e hap ewywuat pytkai ta'a­tu­mohey kahato ta'a­tu­py'a pe. Ta'i uruto yt mesu­wa­ro­tiaria imohey haria ewy hin i i'atu'e. Wẽtup ywania ewywuaria aito i'atu'e. Ihama­na'i rakaria ewywuaria uruto mesuwe i'atu'e. Wẽtup yi kat haria ewywuaria uruto i'atu'e.
HEB 11:14 Mi'i tã haria imoherep kahato mesuwe ahepe ta'a­tuehay wo — Uruikat kahato wẽtup setama ta'a­tu­mo­herep ta'a­tuehay wo. Uruetawa sese yt kat i mesuwe i'atu'e ahepe.
HEB 11:15 Yt te'e­ra­'aipok teran hin i te'e­ru­wa­nẽtup hawe sa'a­wy­'iwuat ta'a­tue'yi kape ne'i yt i'atue­hat'at hin i sa'a­wy­'iwuat ta'a­tue'yi ky'ewi. Ma'ato ta'a­tu­ky­'esat sa'a­wy­'iwuat ta'a­tue'yi pote meiũran te'e­ra­'aipok ma'ato yt hin i.
HEB 11:16 Mi'iria tikat kahato wẽtup tawa po'og po'og waku sa'a­wy­'iwuat mesuwiat kawiat rakat katu­pono atipy piat e tawa ta'a­tukat. Koitywy Tupana yt tuwe­mõti hin i to'e — Uito ti rat Aparãu Etupana to'e hamo. Mi'i pote i'atue­tawa atipy piat waku piat ra'yn toĩne'en Tupana minug pakup yn na'yn itote. Ikahu pe ra'yn tutunug i'atuewa kai ta'a­tu­mohey pote.
HEB 11:17 Sa'a­wy'i Aparãu Tupana hã'ãg kahato sio toimohey sio yt hap kuap hamo — Atiky­'esat eti'auka esa'yru wẽtup ok takat Isaki uimõ­typot hamo e Tupana Aparãu pe. Ma'ato yianmete Aparãu me — Esa'yru Isaki kawiat ti aru atunug yne esaipe­piaria e. Mi'i pytkai Aparãu toto tosa­'yru wẽtup ok takat auka hamo Tupana e hap ewy.
HEB 11:18 Nimo Tupana to'e Aparãu me — Esa'yru Isaki kaipyi aru esaipe­piaria ahyt tuwẽtem yne e. Mi'i e hap Aparãu tikuap pytkai totioto Isaki i'auka hamo Tupana e hap ewy.
HEB 11:19 Pyno ati'auka rokirẽ Tupana timoieĩ­ne'en i gu'uro pyi to'e hap mywo toto. Ma'ato i'auka irane turan Tupana to'e — Aparãu yt eti'auka tei'o Isaki. Waku ra'yn koitywy worokuap sese hap atikuap ta'yn mesup uimohey kahato epiat hap e. Mi'i hawyi tutum Aparãu me Isaki i ra'yn Tupana tum. Mi'i hawyi Isaki topy­hu'at Iesui iã'ãkap ewy katu­pono Isaki aikotã tuwẽtem i gu'uro pywiat hap ewy topy­hu'at. Koitywy atikuap uimohey hap e Aparãu me Tupana.
HEB 11:20 Sa'a­wy'i Isaki ti'a­tu­poi­tyro tosa­'y­ru'in toku­'uro hap e'yianmete. Mio tã e Iako Esau pe — Tupana timo­ty­py'i kahato aru eimia­riru emiari­ru'in aikotã Tupana to'e uhepe hap ewy tutunug aru e hap kaipyi watikuap ta'yn Isaki tomohey kahato te Tupana e hap toku­'uro hap ewywuat e'at pe.
HEB 11:21 Sa'a­wy'i aha'a­se'i Isaki sa'yru Iako ti'a­tu­poi­tyro te temia­ri­ru'in toku­'uro turan — Atimohey kahato Tupana e hap uhepiat — Atunug aru esa'y­ru'in saipe­piaria waikiru sem ko'i i'atu mi'i pote eterut ro uhowawi uhemia­ri­ru'in e Iako tosa­'yru Iuse pe katu­pono ati'a­tu­poi­tyro teran mi'iria e. Mi'i hawyi — Tupana e waku etunug no uhemia­riru ko'i typy'i kahato rakaria wo e'e hap ewy e Iako tuwe­mo­po'og myi aria'yp topo­'yha etiat pyi toku­'uro sese hamo. Mi'i tehay wywo toimo­herep tepiat Tupana mohey kahato hap.
HEB 11:22 Mi'i hawyi aha'a­se'i Iuse iku'uro hap owakai to'e to'y­wania Isareu ywania pe — Meiũran Tupana tunug aru to'e hap ewy e. Meiũran aru mesuwat yi Esitu pyi eiwe­nõ'ẽ Tupana e hap ewy e. Tupana tipo­re­ra'at aru eipe wanĩ­kaptia po pyi hawyi mekewat tawa Tupana piat — Atum aru e hap kape eweiwat e. Uiku­'uro ra'yn mesup ma'ato atiky­'esat karãpe eweiwat turan ewetioto eiwywo uikag ko'i eweiwat Tupana piat — Atum aru e hap kapiat turan e. Mi'i to'e hap kaipyi watikuap Iuse tomohey kahato Tupana atunug aru e hap tomohey hap.
HEB 11:23 Sa'a­wy'i aha'a­se'i Musei i'ewyte Tupana mohey kahato hat. Musei ywã'ĩ ikahu kahato tuwe­mo­herep hawyi — Ikahu kahato aimẽpyt i'atu'e i'ywot'in. Mi'i turan wanĩ­kaptia morekuat Warãu tama Esitu piat to'e Tupana ywania pe — Ewei'a­tu­'uka ro yne eimẽpyt ihainia iatu­'y­wã'ĩ hap e'at pe e. Yt naku i kahato eipe typy'i kahato po'og i'atu aru eiperia uru'y­wania kai pote e. Ma'ato Musei ty i'ywot yt ti'auka hin i yt te'e­ro­ken'ẽ hin i morekuat Esitu piat pupi hawyi ta'a­tue­rewyi Musei ywã'ĩ — Tupana i'atu'e etieha­kye­ra'at urumẽpyt morekuat sura­ra'in po pyi hawyi meiũran i'atu kahato ai'y­wania i'atu'e hap pyi watikuap Tupana e hap — Atunug aru emẽpyt'in i'atu yi kyt ẽpe etiat i'atu hap ewy e hap mohey haria Musei ywot'in hap.
HEB 11:24 Mi'i hawyi meiũran Musei mõto hap turan hawyi morekuat saki'yt tipuẽti hawyi totat tomẽpyt no. Itag hawyi waku ereĩne'en uimẽpyt no sese e uru'y­wania wo e Musei pe morekuat saki'yt.
HEB 11:25 Ma'ato Musei to'e — Mamai e yt atiky­'esat i ui'y­wania sese atoiat e katu­pono mi'iria Tupana mi'airo ywania e. Ta'i Ui'y­wania ho'opot kahato haria mesuwe tukup­te'en e. Mi'i pote are'airo aho'opot i'atu­wywo hamo e. Yne eheko yt Tupana mowepit hap hin i e. Mi'i atoiat yne e. Aimo­wepit kahato porap i aheko Mamai ma'ato po'og waku aho'opot Tupana emiit'in nywo mesu­wa­rote hawyi watoĩ­ne'en Tupana wywo wuat'i e'at pe e. Aimo­wepit mesuwiat yt naku i nug hap etiat eiewywuat yt atiky­'esat mamai e Musei Morekuat Akag saki'yt pe — Woronug en morekuat no uhaipepiat e hat pe.
HEB 11:26 Atikuap ta'yn ehekat uiano yne aru hap ikahu rakat i'ewyte yne Esitu'in ekat emẽpyt no pote uiano yne epowat'yp hap atikuap ta'yn pytkai atiky­'esat po'og areĩne'en Tupana ywania wo katu­pono atimohey mi'iria ywania kaipyi aru Tupana Mi'airo tuwe­mo­herep Wuat'i Ywania Porekuat Nuat mamai e Musei morekuat koro Warãu saki'yt toty hit pe. Mi'i hap mohey hap upi ui'y­wania ho'opot mamai e. I'ewyte uito aho'opot aru i'atu­wywuat hamo ati'airo e. Meiũran aru Tupana mipoi­tyro areĩne'en e. Mi'i e'at pe Tupana tum iwato kahato po'og iwato yne yne mesuwat yi Esitu ekat hap kai tutum uhepe Mamai e. Mi'i pote mi'i Tupana miium atiky­'esat po'og e.
HEB 11:27 Ta'i mamai atimohey kahato areto meiũpepyi hawyi ara'a­kasa aru Tupana sese mekewat yt heremo rakat i e. Atikuap e'ywot uha'a­se'i Warão Esitu piat morekuat aru ipy'ahak kahato uhete yt ui'ok­sat'i i hin i ma'ato yt areken'ẽ i Warão pupi e. Ui'auka pote ui'auka ma'ato areto ra'yn Tupana mohey haria upi katu­pono ara'a­kasa teran Tupana sese yt heremo rakat i e Musei toty Esitu piat pe. Mi'i hawyi totoiat yne yi Esitu ekat iwato kahato hawyi tomi­mohey upi toto.
HEB 11:28 Sa'a­wy'i Tupana to'e Musei pe — Atipo­'oro aru uhesu­rara atipy kaipyi Esitu'in apiheg hamo e. Mi'i e'at pe ati'a­tu­moma Esitu'in eyke­'et'in torania e. Mi'i pote waku eihũria suu wo eti'a­tu­sapei sapei ei'yat oken'ypy ete e. Mi'i ewetunug mote aru yt atimoma i eheyke­'et'in e. Mi'i hawyi Musei tunug Tupana e hap ewy toimohey kahato pote. Toimohey kahato Tupana e hap hawyi to'e to'y­wania pe — Tut aru yke'et yne moma hanuat e. Mi'i pote waku wato­py­hu'at aihũ suu ai'yat ete Tupana mohey haria aito hap kuap hamo e. Mi'i watunug mote tokosap aheyke­'et'in sakpo hawyi yt toi'a­tu­moma aheyke­'et'in surara akag atipy kaipywiat e Musei tomohey hap wywo. Mi'i hawyi ta'a­tunug suu yne yat oken'ypy ete hawyi yt wẽtup ok i iku'uro Tupana mohey piaria eyke­'et'in ma'ato yi Esitu eyke­'et'in topap yne itote.
HEB 11:29 Mi'i rẽ tuwat to'y­wania wywo ihyemyi'a wato kape y'y hup e hap kape. Mi'i hawyi Tupana to'e i'atuepe — Atunug ni aru ehepe mu'ap wato y'y wato sakpo e y'y to'oran muo yi heg upi ehewyry hamo e. Mi'i hawyi ta'a­tu­mohey hawyi y'y wato sakpuat mu'ap upi ra'yn tuwat yi Esitu esura­ra'in ko'i pupi y'y hy teke mu'ap upi. Mi'i hawyi wanĩ­kaptia ti'a­tu­mohan na'yn ysakpo. Mi'i hawyi wanĩ­kaptia hã'ãg na'yn ma'ato mi'iria topap yne y'y pe y'y wato mi'akit ko'i wo tukup­te'en.
HEB 11:30 Meiũran Tupana ywania put'ok­'i­'a­tu'e tawa Ieriko tote. Mekewat tawa wato apypueri wo ipyhyp hap toĩne'en i'anam nakat ywaiti kahato rakat wanĩ­kaptia pupiat. Mi'i tawa ewei'a­py­pueri 7 wo hawyi aru ta'at ra'yn ipyhyp hap e Tupana. Yne nu wato ko'i hewo hewo e. Mi'i hawyi Tupana e hap ta'a­tu­mohey hawyi ta'a­tunug i'e hap ewy. Mi'i hawyi hewo hewo ipyhyp hap imohey hap kaipyi pote.
HEB 11:31 Ma'ato wẽtup hary­poria wewe­neru hat yt iku'uro itote mana Hape e hap katu­pono yianmete mi'i imohey Tupana e hap — Atimoma hamuat meiũwat tawa Ieriko e hap katu­pono yianmete typy ok tuwat sura­ra'in Iuteuria wat i'atue­tawa epiok hamo. Mi'iria pe — Eiwe­hyt'ok to mimi'in e i'atuepe mekewat hary­poria. Mi'i hawyi toi'a­tue­rowyi to'yat pe i'atu­'uka teran haria pupi. Toimohey pote toimo­herep mu'ap tetawa pyi. Mekewat hary­poria yn imohey. Mi'i pote irania'in topap ma'ato Mana Hape yt iku'uro hin i toimohey i'atu'e hap pote. Yt naku i nug hat Hape pytkai toimohey hawyi Tupana mieha­kye­ra'at topy­hu'at.
HEB 11:32 Ta'i ahenoi teran mekewat sa'a­wy­'i­wuaria imohey haria etiat ma'ato i'atu kahato mi'iria pote yt ahenoi kuap i. Iwan hamo yt uipot­put­'ok'e i typy'i kahato tupono. Ahenoi teran mekewat surara Kiteãu piat Tupana mohey hap etiat i'ewyte mekewat surara akag Paraki piat imohey hap etiat ahenoi teran i'ewyte mekewat hesaika rakat Sasãu piat imohey hap etiat ahenoi teran wy. I'ewyte mekewat surara akag Iete piat Tupana mohey hap ahenoi teran i'ewyte ahenoi teran aipo­rekuat sa'a­wy­'iwuat Tawi piat Tupana imohey hap ma'ato yt uipo­hepap i ne'i are. I'ewyte Tupana tunug aru e hap moherep hat Samueu piat imohey hap ahenoi teran i'ewyte yne sa'a­wy­'i­wuaria ai'y­wa­niaria piat Tupana ehay moherep haria etiat ahenoi teran ma'ato yt uipot­put­'ok'e i henoi yne hamo mesuwat uimiwan me.
HEB 11:33 Tupana mohey hap kaipyi te'e­ro­py­hu'at i'atue­saika kahato wanĩkap ywania moma hamo irania'in mope­rup'i hamo. Ta'a­tu­wa­nĩ­kaptia porekuat no tukup­te'en Tupana mohey hap wywo. Yt naku i nug hap ta'a­tu­moma kahato hawyi wakuap nug haria ra'yn tukup­te'en ta'a­tu­mohey hawyi. More­kuaria yt nakuaria i ta'a­tu­sopo ne'i Tupana mohey hap wywo. Ta'a­tu­mohey Tupana e hap hawyi topy­hu'at i'atupo pe i'e hap ok tã. Karãpe wanĩ­kaptia hytmõi Tupana ehay moherep hat Tanieu awyato tok pe i'u hamo mi'i hap e'at pe Tupana ti'a­tu­wẽhik awyatoria hawyi yt ta'a­tu­'auka kuap i Tupana mohey hat.
HEB 11:34 I'ewyte ta'a­tuwuk teran aria pe imohey haria ma'ato yt sat'e i aria i'atuete katu­pono Tupana ti'a­tue­ha­kye­ra'at aria pe tukup­te'en mot'i pytkai tomohey hap upi. I'ewyte Irania'in tu'uka sura­ra'in ete turan wani­kaptia ekyse'yp yt ti'auka kuap i Tupana mohey haria pote. Tupana ti'a­tue­ka­wiano kahato tomohey haria yt i'atue­saika hin i turan ta'a­tu­mohey hawyi Tupana ti'a­tu­moe­saika kahato. Karãpe tu'uka surara wanĩ­kaptia wywo turan toi'a­tu­moe­saika kahato tomohey haria sura­ra'in ko'i. Mi'i hawyi te'e­ro­py­hu'at surara sa'ag wu'uka sepap haria ewy. Mi'i hawyi wanĩ­kaptia ikohyeput ne'i topap tet pupi.
HEB 11:35 Sa'a­wy­'iwuat hary­poria wẽtup ok wẽtup mẽpyt Tupana tihep gu'uro pyi mana'in tomohey hap upi. Sa'a­wy'i mekewat yt Tupana mohey i haria te'e­ro'e imohey haria pe — Ewetoiat Tupana mohey hap pote yt urui'a­tu­'uka i eipe yt urui'a­tu­mo­so­'opot i eipe i'atu'e wen ma'ato — Yt rat i'atu'e yt urui'atoiat i yt sake i ra'yn Tupana i'atu'e. Mi'i hawyi ta'a­tu­'a­tu­'uka turan ma'ato te'e­ro'e — Pywo ti rat Tupana urumoieĩ­ne'en aru i'atu'e. Mesuwat e'at pe Tupana mimõ­typot ko'i wato­py­hu'at i'atu'e.
HEB 11:36 Irania'in Tupana mohey haria miit'in miky­ry'i kahato haria wo te'e­ro­py­hu'at Tupana mohey hap yt pun haria i pote. Wuat'i ehamo ta'a­tu­'ahyk ahyk — Eweipun no Tupana mohey hap i'atu'e ma'ato — Yt karãpe i uruipun imohey hap i'atu'e. Ta'a­tu­hã'ãg kahato ra'yn mekewat imohey hap moma hamuat ma'ato — Yt i'atu'e. Irania'in Tupana mohey haria miit'in mipakpak wo te'e­ro­py­hu'at. Irania'in imohey haria miit'in mi'ahyk ahyk wo miit'in mituktuk wo miit'in mi'auka wo te'e­ro­py­hu'at. Irania'in ituktuk i'atupiit ete irania'in ikohye­wyry haity iheg nakat ete irania'in ta'a­tu­pyhik iheg me i'ypyryp we kahato ma'ato yt ta'a­tu­'atoiat hin i imohey hap.
HEB 11:37 Irania'in kape nu wo makmak­'i­'a­tu'e imohey haria kape hawyi topap ta'yn. Irania'in topap hepamo ta'a­tu­'oktek kyse hãi kurup takat wywo imohey hap atoiat hap ky'ewi ma'ato — Yt i'atu'e. Irania'in wyti — Etoiat imohey hap pote ti aru urutum iwato kare'en ehepe i'atu'e ma'ato — Yt i'atu'e hawyi irania'in ta'a­tu­'uka kyse'yp mo. Irania'in imohey haria kyse'yp mo ta'a­tu­'okpak ma'ato mi'i pytkai — Yt uruo'atoiat i Ahetu­pana i'atu'e. Irania'in imohey haria yt i'atu'yat hin i. Irania'in imohey haria yt kat i i'atu'yat ikohye­wyry kowo'i kowo'i i'atue­sokpe sa'ag mi'at pe kawiat hesy'at rakaria tukup­te'en. Miit'in mimo­so­'opot kahato ko'i miit'in miky­ry'i hap ko'i. Miit'in ti'a­tu­mo­so­'opot kahato wo tukup­te'en mesu­wa­rote pytkai yt ta'a­tu­waure hin i ta'a­tuepiat Tupana mohey hap.
HEB 11:38 I'atue­ha­ma­na'i ne'i yahig note tukup­te'en. Ga'apy puo tukup­te'en. Yi hot pe i'atu'yat aria'yp ka'a pe tukup­te'en. I'atu'yat mi'at ka'a ko'i yi ka'a ko'i. — Mi'iria uimohey haria kahato e Tupana po'og waku mi'iria eikai e mesu­wa­ro­tiaria pe. Pyno Atipo­re­nõ'ẽ mi'iria eipy'­setpyi e. Ehewaku hap yt put'ok'e i mi'iria uimohey haria kupte'en eipy­'a­setpiat hamo e mesu­wa­ro­tiaria pe. Waku kahato uimohey haria e. Yt atiky­'esat mi'iria po'og eipy­'a­setpe pote ati'a­tu­nõ'ẽ eipo pyi e yt imohey i haria pe.
HEB 11:39 — Uimohey kahato haria mi'iria e Tupana typy'i sok miit'in sem ehamo. Ma'ato mi'i pytkai yt ta'a­tu­puẽti hin i mesu­wa­rote ta'a­tu­poi­tyro Tupana kaipywiat ta'a­tu­mo­wepit hap ma'ato ta'a­tu­mohey te — Yt heremo i te wen ma'ato Tupana mipoi­tyro wo uruto­py­hu'at wuat'i e'at piat Tupana e hap ewy i'atu'e. Ta'a­tu­ku­'uro hap turan ta'a­tu­mohey i te hap wywo topap — Meiũran aru tukup­te'en i'atu kahato Aparãu mimohey saipe­piaria Tupana e hap ewy i'atu'e. Ma'ato yt te'e­ra­'a­kasa hin i te Tupana ehay mi'iria ma'ato ta'a­tu­mohey kahato te miit'in miat ta'a­tu­'auka hap kape. Yt te'e­ra­'a­kasa i te Iesui put'ok'e hap i'ewyte yt te'e­ra­'a­kasa i te aito aheĩne'en hap pytkai. Yt te'e­ra­'a­saka i te aito imohey haria sem pytkai ma'ato ta'a­tu­mohey te topap hap kape yt heremo i pytkai.
HEB 11:40 — Pyno i'atu kahato uimohey haria aru ehaipe­piaria e Tupana tomohey yianmiaria pe. Pyno mesup wato­py­hu'at mi'iria mimu­'eria katu­pono mi'iria ewywuat wato­mohey. Pyno wato­mohey yne hawyi wẽtup piit ewy wato­py­hu'at hawyi — Waku ra'yn e aru Tupana. Toran na'yn. Atunug yne ra'yn ui'e hap ewywuat pote mesup waku ra'yn miit'in sem na'yn waikiru ko'i ewywuat yi kyt ko'i ewywuat uimohey haria sok i'atu kahato hap ewywuat tukup­te'en uimie­ha­kye­ra'at ko'i wuat'i ywania hap ewywuat mesup uimohey haria tukup­te'en mesup e aru. Mi'i pote atunug na'yn yne ui'e hap ewywuat e aru Tupana hawyi waku ma'ato yt uwe i aito Iesui mohey haria pote yt tutunug yne i te to'e hap ewywuat e.
HEB 12:1 Aikotã wate­ha'at seput haria kape hap ewy ahe'yian­miaria Tupana mohey haria te'e­ra­ha'at ahowawi atipy kaipyi aikotã som wato­py­hu'at Tupana mohey hap ete hap kape te'e­ra­ha'at. I'atu kahato mi'iria ahowawiat seha'at haria. Atipy kape tuwat ra'yn ahe'yian­miaria sa'a­wy­'i­wuaria Tupana mohey sese haria seha'at ahowawiat haria. Ta'i ipotyi rakat yrysakag ai'akag etiat wywo pote yt aihyha hin i aiko­hyeput turan. Aiminug sa'ag yrysakag howapy kahato ai'ok pe tote hap ewy aiwa­nẽtup sa'ag hap ipotyi hap ewy. Ai'akit hamuat wateput turanuat hap ewy ma'ato yt kat i ipotyi hap pote wateput kuap aihyha kahato aiminug sa'ag watipun hawyi. Mi'i pote waku wati­'ok­hytpun aiminug yt naku i nug hap ko'i. Mi'i rẽ waku wato­mohey Tupana haty wo yne aipy'a pe. Mi'i watunug mote seput haria ikohyeput haty wo rakaria ewy wato­py­hu'at. Ma'ato ahepiat ai'a­parap kahato imohey hap etiat pote aikotã ipotyi hap ai'a­parap hap ewy. Aikotã seput hat teput hap ete yt waure i hatek pytkai ipy sero pytkai hap ewy waku wato­mohey — Put'ok­'are aru pãi an waku wato'e hap yn aiwa­nẽtup hap. Waku wato­mohey pot'i yt kat i iwaure wo wuat ne'i hap wywo aiwa­nẽtup hawiat hap wywo.
HEB 12:2 Aikotã seput haria te'e­ra­ha'at popuo ta'a­tueput hap etiat — Put'ok­'are i'atu'e hamuat hap kape yn hap ewy waku wate­ha'at aiwa­nẽtup hawe — Put'ok­'are aru Iesui yatype ai'e hap kape yn katu­pono Iesui topy­hu'at seput haria akag ewy katu­pono toimohey Tupana po'og torania kai. Uiwy­ria'in waku Iesui piat Tupana mohey hap ewy waku wato­mohey Tupana are. Iesui ti aimoe­hãite kuap kahato Tupana mohey hap ete. Ha'a­wy­tepyi wato­mohey Iesui hawyi aiwa­nẽtup hap Iesui yn topy­hu'at mi'i hap ewy waku wato­mohey te Iesui put'ok­wa­to'e i'yaty piat hap e'at kape. Aikotã seput haria ta'a­tu­sa­'a­wynug hawyi te ikahuro hap kape te'e­ru­wa­nẽtup hap ewy Iesui toĩne'en mesuwiat turan seput hat ewy topy­hu'at. Put'ok'e Tupana etiat hap kape yn iha aria'yp posak kape yn iha Tupana miky­'esat nug kap kape yn iha. Mi'i hap yn imowepit hap. Mi'i hawyi tutu'u ai'a­piheg hap aria'yp posak ete. Yt toiky­'esat hin i miit'in miky­ry'i hap pytkai. Toikuap kahato tomohit hap ma'ato yt tuwe­mõti hin i aria'yp posak totiat toĩne'en sa'ag hap miit'in eha'at hap pupi. Toku­'uro hawyi ta'apyk Tupana po sese kai aikope Tupana piat topainug hap tote. Toku­'uro hap no aika­wiano hap kape yn toto toĩne'en mesuwe turan. Tupana miky­'esat nug hap yn imowepit hap mesu­wa­rote topy­hu'at toho­'opot hap e'at turan. Iesui seput hat akag ewy toĩne'en meiũpe turan.
HEB 12:3 Waku watu­wa­nẽtup kahato Iesui ieĩne'en hap kape. Waku watunug i'ewy yne. Sa'a­wy'i yt naku i nug haria miky­ry'i hap toho­'opot kahato ma'ato yt ipohep hin i imohey hap ete Iesui. Waku iminug ewy wahã'ãg. Karãpeĩ yt naku i nug haria ahaty'i haty'i kahato imohey pote mi'i pote yt naku i watoiat ne'i imohey hap aikotã watoiat aheput hap aipiit sero hawyi hap ewy. Yt naku i watihep imohey hap aipy'a piat.
HEB 12:4 Iesui tikuap kahato yt naku i nug hap. Yne tosuu toipun yt naku i hap moma hamo. Waku mi'i ewy wato­py­hu'at ai'auka pote waku ahuu okpun pytkai yt watoiat i imohey hap. Waku wahã'ãg Iesui ewy ho'opot hap ete yt naku i hap ko'i akit hamuat.
HEB 12:5 Sa'a­wy'i Tupana ainãpin kahato waho­'opot hamuat hap ete miwan me — Uha'y­ru'in uhaki­'yt'in e eipe uimẽ­pyt'in pote woro­ho­'o­'a­piheg tuereto eiminug sa'ag ko'i po'ypyi e. Pywo yt eweipoepyk ne'i tei'o uhete Ei'ywot uito pote e. Yt eweikup­te'en nei'o eipe­rup'i rakaria e. — Pywo kahato uru'a­piheg waku ewei'e woro­ho­'o­'a­piheg hap e'at pe. Woro­ho­'o­ky'e pote woro­ho­'o­nãpin ei'a­piheg hap wywo. Yt atiky­'esat i eheha yi kape woro­ho­'o­'a­piheg hawyi katu­pono eimo­wepit hamuat woro­ho­'o­'a­piheg e Tupana sa'a­wy'i miwan me. Yt naku i wati­waure mesuwat i'e ahepiat hap.
HEB 12:6 — Uha'y­ru'in uhaki­'yt'in e uimi­ky­'eria kahato ti eipe uimohey haria ti eipe pote wãi nei'o are'e tuereto ehepe e Tupana ahepe. Aikotã aikotã ei'ywot ewy areĩne'en mi'i tupono woro­ho­'o­'a­piheg tuereto e. Uiano eweikup­te'en wuat'i e'at pe woro­ho­'o­'ahyk eimo­we'eg hamo e. Eiwe­hyt'ok uha'y­ru'in uhaki­'yt'in are aru ehepe mi'i pote woro­ho­'o­'a­piheg tuereto eiminug sa'ag po'ypyi Ei'ywot Uito pote e Tupana sa'a­wy'i.
HEB 12:7 Pyno karãpe Tupana ai'a­piheg sese hap waku watu'u yne surara ewy. Yt naku i wati­poepyk katu­pono ai'a­piheg hap kaipyi watikuap Tupana sa'ay­ru'in saki­'yt'in sese wuaria wo aito hap. Katu­pono yne Tupana sa'ay­ru'in saki­'yt'in iminãpin ko'i wo watu­kup­te'en. Aikotã ai'y­wot'in ainãpin ai'a­piheg hap wywo hap ewy koitywy Tupana ainãpin ai'a­piheg hap wywo.
HEB 12:8 Ma'ato aito Tupana sa'y­ru'in saki­'yt'in pote ai'a­piheg aimo­we'eg hamo. Mi'i tã Ai'ywot tunug yne imohey haria ete ma'ato yt karãpe i ai'a­piheg hap topy­hu'at Tupana kaipyi pote yt i'ywot i rakaria ewy watu­kup­te'en yt kat i ai'a­piheg hap pote yt Tupana saki­'yt'in Tupana sa'y­ru'in i aito.
HEB 12:9 Sa'a­wy'i mesu­wa­ro­tiaria ai'y­wot'in aipo­petek aimo­we'eg hamo. Mi'i hawyi i'atu­mõ­typot haria wo wato­py­hu'at po'og sa'a­wy­'iwuat kai. Mi'i pote karãpe Ai'ywot Atipy piat ai'a­piheg mi'i hawyi waku imõtypot haria wo watu­kup­te'en. Waku imiky­'esat nug haria wo wato­py­hu'at ai'a­piheg hawyi. Katu­pono Tupana ainug tomẽ­pyt'in no Topã'ãu wo.
HEB 12:10 Ai'ywot aity mesu­wa­rotiat aipo­petek kahato aimotag hap e'at pe turan ta'a­tu­mõ­typot hap ky'ewi ta'a­tu­mikuap wakuap hap ok tã aihire te yn. Ma'ato Tupana ai'a­piheg wẽtup wanẽtup hap mywo toiky­'esat ahehãite aimoe­waku hap aimotag hamuat wuat'i e'at piat. Toiky­'esat aito waku rakaria wo tewaku hap ewy ainug neran haype. Tewaku hap ewy ainug neran hãpyk wuat'i e'at piat teko hãpyk takat ewy ainug toiky­'esat aito to'ewy hap aiky'e haype aimo­wepit teran haype.
HEB 12:11 Karãpe Tupana ainãpin hamo ai'a­piheg turan yt he hin i ma'ato haty kahato yt aimo­wehum kuap i yt aimo­wepit i ai'a­piheg turan. Meiũran ma'ato aru tokosap haty hap hawyi ti sat'e kahato ahete hewaku hap. Ha'y­ru'in haki­'yt'in hãpyk kahato rakaria wo wato­py­hu'at. Tupana tiky­'esat aimoe­hãite tomohey hap etiat hap tomi­ky­'esat etiat hap. Uiwy­ria'in yt naku i aiperup Tupana potpap nug hap ete. Waku aipo hesaika ipotpap nug hap ete. Waku aipy hesaika ipotpap ereto hamuat hap ete. Toiky­'esat aito to'ypia aikotã hewo kahato rakat ewywuat tomo­wepit haria wo.
HEB 12:12 Pyno waku watu­we­moe­saika Tupana esaika hap wywo ipotpap hap nug hamo are. Waku watu­we­moe­saika Tupana esaika hap wywo aipy ihay sytpok hamo ahewyry wuat'i tap'yia mu'e hamo.
HEB 12:13 Sa'a­wy'i yt hãpyk i ahewyry ma'ato mesup ti hãpyk ta'yn. Aheko sa'ag yt naku i nug hap aipy pik hap ewy waku watunug aipu'ap ikahu rakat ewy aipy powyro hamo. Mu'ap ewy waku watu­wa­nẽtup Tupana kape aipy pik'e hap mog hamo. Mi'i hawyi waku ahewyry iwywo o. Waku aipu'ap yt i'anam hin i rakat ewy mi'i hawyi yt wata'at kuap i. Aipy haty rakat yt hewyry kuap i mu'ap i'anam nakat upi. Ahewyry itote hawyi wata'at merep i'anam kahato pote. Ahewyry ra'yn po'og hawyi merep aipy i'ahu kahato. Yt karãpe i aipy waku. Mu'ap iherep upi yn waku ahewyry hãpyk takat mu'ap upi pote. Mi'i hawyi aipy ihãite kuap. Mi'i hap ewy aito waku wahe­wyry Tupana pu'ap upi ma'ato yt pote yt karãpe i ahehãite ma'ato ipy pik rakaria ewy yn wahe­wyry. Waku watoiat mu'ap sa'ag sa'a­wy­'iwuat aiminug yt naku i hap i'aparap aparap hap aiwa­nẽtup sa'ag ko'i hap.
HEB 12:14 Uiwy­ria'in waku watikat at ka'ap aiwo­'o­wese torania wywuat hamuat. Iesui suu aimo­hãpyk kuap aikoho kahato hawyi ainug Tupana ewaku hap ewywuat hamo. Ma'ato yt kat i aimo­waku hap Tupana wuat hap ahete pote yt karãpe i aru wato­py­hu'at Tupana akasa hamo. Pywo ti rat yt Tupana yt ewy i watoĩ­ne'en pote yt Karãmuo i Tupana kape wata­'a­kasa aru e.
HEB 12:15 Pyno waku aiwe'eg wo kahato. Yt naku i watipun Tupana piat aiky'e hap aipoi­tyro teran hap. Yt naku i wato­py­hu'at ipy'ahak miit'in etiat rakaria wo i'ewyte Tupana ete katu­pono ahaiwot hap uku hapo kahato rakat ewy toĩne'en. Pyno waku aiwe'eg wo watoĩ­ne'en katu­pono yt niatpo hin i wato­py­hu'at my'ahak haria wo watoiat ainãpin Tupana piat hap hawyi. Waku watihep hapo miit'in auka hap uku ewywuat aipy'a pyi yt pote my'ahak rakaria wo yn wato­py­hu'at miit'in ete i'ewyte Tupana ete. Mi'i hawyi yt uwe i wo'o­ky'e hat itote. Ahaiwot irania'in Iesui mohey haria ete hawyi torania itote aiwo­'o­'ewy hawyi yt uwe i iwese to'ope itote.
HEB 12:16 Nimo te Iako eyke'et Esau hewaire kahato irania'in hary­po­ria'in wywo i'ewyte tuwe­ky­ry'i Tupana ehay ete. Uiwy­ria'in Iesui mohey haria yt naku i Esau ewywuat wato­py­hu'at. Sa'a­wy'i ase'i Isaki to'e to'yat piaria pe — Uiku­'uro hawyi atiky­'esat uha'yru Esau uhaipe piano uipo­wat'yp e. Esau ti topy­hu'at aru Tupana Mipo­'oro Yianmiat Aheha­kye­ra'at hanuat aha'a­se'i pono e. Wẽtup e'at pe Esau hesy'at kahato hawyi to'e toywyt Iako pe — Uipoi ro en pãi ipu'i apokik wo katu­pono uhesy'at kahato uhyt e. Mi'i hawyi Iako tiwesat — Areĩne'en teran ai'ywot saipe­piano uito e. Atiky­'esat Tupana mipoi­tyro wo ai'ywot e hap ewy e. Mi'i e hap etum uhepe pote woro­mo'ok kahato meikowat ipu'i mõi wo e. Mi'i hawyi — Ta'i ewano ra'yn katu­pono yt kan hamo i Tupana aipoi­tyro hap e Esau e Iako pe.
HEB 12:17 Mi'i tuwe­mo'ok kahato mekewat mi'u pu'i mõi wo. Ma'ato meiũran Esau tiky­'esat i ra'yn Tupana piat topoi­tyro hap. Toiky­'esat kahato Tupana mi'airo to'ywot Isaki saipe­piano hap. Mi'i hawyi toikat hãpyk kahato to'ywot e hap — Papai etum i ro uhepe Tupana miium epowat'yp e towak popuo. Ma'ato i'ywot Isaki — Yt rat e yt atum kuap i ewawi uha'yru e — Papai papai etum i ro etum i ro uhepe epowat'yp e towak popuo wen ma'ato yt tutum kuap i tutum na'yn tosa­'yru Iako pe Esau eywyt pe pote. Yt naku i aito Esau ewywuaria wato­py­hu'at e.
HEB 12:18 Sa'a­wy'i tuwat tuwat ai'y­wania Iuteuria ywania yity'ok wato Sinai e hap kape Tupana piat ainãpin hamuat kape mekewat ase'i Musei upi. Sa'a­wy'i watuwat mekewat yity'ok kape turan wate­ha'at turan hẽty wato kahato toĩne'en he'yhig hun kahato itote. He'yhig wepy­pueri kahato ywytu uato ewy. I'ypyryp yn itote yity'ok tote. Aria ẽty hun hap aimo­'arot hap ewy.
HEB 12:19 Put'ok'e aha'a­se­'i'in hawyi ihay pirik hap topy­hu'at aikotã huhu'e hap ewywuat. Ma'ato mekewat huhu'e hap sehay ewy toĩne'en. Watikuap mekewat sehay haty kahato ahewaure ka'a pe i'ewyte aiwa­nẽtup hawe aimo­ken'ẽ kahato hap sio aiku­'uro hap ewy wato'e. Mi'i hawyi Musei pe — Wãi uruto'e yt uruiky­'esat ewy hin i mekewat sehay wato'e sa'a­wy'i.
HEB 12:20 — Ehẽtup to Tupana pe ihay monik hamo wato'e katu­pono huhu'e hap ehay iwato kahato hap ewy topy­hu'at ihay pirik. — Yt urutu­we­sepap i mekewat sehay wywo wato'e. Mekewat sehay yt uruikuap teran i po'og wato'e sa'a­wy'i Musei pe. Sa'a­wy'i Tupana mekewat yity'ok totepyi to'e — Yt naku i eihũria tukup­te'en meiũpe yity'ok tote e. Musei yn waku meiũpe uiwywo toĩne'en yity'ok tote e. Ma'ato eihũ ta'am uhowawi yity'ok kape pote meremo nu wo mak mak wo ewei'auka ro eihũ e Tupana Musei'in me. Mio tã e hawyi — Yt ihay se i Tupana i'atu'e. Yt atikuap teran po'og i Tupana e hap i'atu'e Musei pe aha'a­se­'i'in.
HEB 12:21 Mekewat yity'ok Sinai e hap kape yt wate­ha'at kuap i sa'a­wy'i i katu­pono wate­ha'at pote ipoity'i ne'i ai'auka kuap ne'i. Mi'i hap Musei ta'a­kasa hawyi — Uimõgyt kahato uimo­tyry uimo­ken'ẽ kahato hap e.
HEB 12:22 — Yt naku i i'atu'e te'e­ra­'a­kasa hawyi. Mi'i yity'ok Sinai pyi sa'a­wy'i ai'y­wania Tupana ti'a­tu­nãpin tehay pirik wo yt aimo­wepit hin i hap ewy Tupana ihay yity'ok Sinai totepyi. Ma'ato mesup Tupana ihay i ra'yn atipy kaipyi ihay ahowawi mekewat atipy piat Ieru­sarẽi kaipyi yity'ok Siãu e hap kaipyi ihay mesup ahowawi. Yt sa'a­wy'i i wuat ewy mesup Tupana ihay ahowawi atipy kaipyi Tosa­'yru mohey haria aito pote. Po'og wakuat sa'a­wy­'iwuat kai ihay ahowawi Tosa­'yru wẽ pyi mekewat Nusaken pakup e hap kaipyi aikope tukup­te'en atipy piaria sem po'og yt wati­mo­rania kuap i etawa kaipyi ihay mesup ahowawi. Mesup watuwat mekewat atipy kape tawa Ieru­sarẽi pakup kape Tupana sese eiam kape watuwat. Itote ti aru watu­wa­'a­tunug kahato aitoria Iesui mohey haria pote.
HEB 12:23 Koitywy watu­wa­'a­tunug Aheyke'et Iesui Musei saipepiat kape Aikywyt Iesui kape hap. Atipy pe toĩne'en miwan me ahet ko'i yne yne aikotã wẽtup ok i ra'yn herohik hap ewy aheywyt'in aheyke­'et'in aheinyt'in aiky­py­'yt'in koitywy wate­'e­ru­wa­'a­tunug ienuk hamo hap ewy Aheyke'et Sese Aikywyt Sese Iesui wywo. Aikope atipy pe torania iwan me Tupana mieha­kye­ra'at wuaria ko'i set toĩne'en hap kape. Wuat'i miit'in kuap hap sio waku sio yt hat Tupana kape watu­wa­'a­tunug aito. Aikope to'e­wywuat Tupana mimo­hãpyk ko'i tukup­te'en hap kape watu­wa­'a­tunug aito Aikope Tupana mimo­hãpyk yianmiaria imohãpyk sese towaku hap ok tã hap kape watu­wa­'a­tunug aito. Aikope aipiit waku pe topy­hu'at Tupana ewaku hap ewy hap kape watu­wa­'a­tunug atipy piat tawa kape watu­wa­'a­tunug aru. Tupana kape watuwat aito Iesui emiit aito Tupana Sa'yru Pã'ãu Sese aipiit pe toĩne'en mote.
HEB 12:24 Pyno koitywy yt sa'a­wy'i i yity'ok Sinai yt kape hin i aikope ainãpin Musei piat hap ewy watuwat. Watuwat mesup aito ma'ato po'og sa'a­wy­'iwuat kawiat kape aikope Iesui ainãpin hap kape watuwat ra'yn mesup mekewat yity'ok atipy piat kape katu­pono Ahepa'i Koro Iesui tunug Tupana wywuat aiwo­'o­wese hamuat hap atipy pe. Mesup ahehay toimo­herep Tupana pe. Iesui ti aimo­wehik Tupana wywuat hat. Sa'a­wy'i Ãtãu sa'yru Apeu suu at hat ihay Tupana kape yi pyi hap ewy e miwan me. Mi'i hap ewy mesup Iesui suu ihay ahetiano ma'ato po'og mi'i sehay ikahu Apeu suu at hat kai — Eti'auka ro ui'auka hat e Apeu suu ma'ato Iesui suu to'e Tupana pe — Waure wo o ereĩne'en ui'auka haria kai Papai e. Yt ta'a­tukuap i rat kat som ta'a­tunug e Iesui suu at hat ihay yi pyi te. Iesui suu wo waku watu­wepen yne aiminug sa'ag moweityk hamo. Waku Tupana ahapei hapei Tosa­'yru suu wo. Mi'i yn waku aheha­kye­ra'at kuap hamo.
HEB 12:25 Sa'a­wy'i Tupana ihay yity'ok totepyi ai'y­wania pe yity'ok Sinai pyi ma'ato ai'y­wania sa'a­wy­'i­wuaria itotiaria yt iky'esat i Tupana ehay te'e­ru­we­wau­rehik ne'i. Mi'i hawyi mi'iria Tupana mi'a­piheg ko'i wo te'e­ro­py­hu'at. Ta'i mi'i hawyi topap topap yahig note sa'a­wy­'i­wuaria ai'y­wania Epereu pusu kuap haria. Ta'a­tu­hã'ãg Tupana e hap nug hamuat ma'ato yt wẽtup ok i tuwenug kuap. Yt ta'a­tunug i ta'a­tu­nãpin hap. Ma'ato koitywy Tupana ainãpin Tosa­'yru wẽ pyi atipy kaipyi. Waku watunug atipy kaipywiat ainãpin hap. Waku aiwe'eg wo ainãpin hap nug hamuat hap ete. Ma'ato watu­we­wau­rehik sa'ag Ha'yru piat ainãpin kape hawyi po'og na'yn sa'ag sa'a­wy­'iwuat kai. Yt watu­wemig kuap ai'a­piheg hap pupi watipun na'yn ainãpin hap ipakup i Tupana piat hap pote.
HEB 12:26 Mio tã e Tupana mesup miwan me — Sa'a­wy'i atihuruk ta'yn yity'ok mesuwat Sinai e hap totiat ma'ato meiũran aru atihuruk ta'yn mesuwat yi wato hap ok tã e ma'ato yt mesuwat yi yn i atihuruk ma'ato i'ewyte at waikiru waty yne atihuruk e miwan me Tupana.
HEB 12:27 Pyno Tupana to'e — Atihuruk i ra'yn wẽtup mo yn e. Mi'i atunug hawyi waku ra'yn toran na'yn uimi­huruk e. Yt typuo i atihuruk aru e katu­pono yt kan hamo i typuo e. Mi'i huruk hap put'ok'e yne ra'yn e. Mekewat e'at yne yt iheg nakat i ta'at yne e. Ma'ato mekewat yt huruk'e i rakat iheg sese rakat aru topy­hu'at wuat'i e'at pe e. Mesu­wa­rotiat more­kuaria minug ko'i yne ta'at e ma'ato Uimi­'airo Eipo­re­kuanuat minug ko'i aru topy­hu'at re atihuruk yne yne hawyi e Tupana.
HEB 12:28 Pyno yt iheg nakat i aru ta'at yne hawyi yt ta'at kuap i rakat ko'i aiwano ra'yn topy­hu'at katu­pono watunug Aipo­rekuat nuat Ha'yru pote. Mi'i hap kape waku watu­wehum kahato hawyi waku watunug Aipo­typot Tupana mowepit hamuat hap ete waku wati­mõ­typot Ha'yru.
HEB 12:29 Tupana aria ewywuat toĩne'en. Waku kahato aria aimo­wepit hap aria ma'ato i'ewyte waku aiwe'eg wo ipupi katu­pono aria aiwuk kuap i'ewyte e.
HEB 13:1 Pyno to'iro wato­'o­ky'e mot'i uiwy­ria'in Iesui mohey haria aito pote. Waku wato­'o­ky'e aikotã wẽtup ok yat piaria ewy.
HEB 13:2 Karãpe put'ok'e ai'yat pe yt aimikuap i te wen mi'i pytkai waku — Ereke ro mehĩ mana waku wato'e. Eweikup­te'en no meiũpe waku wato'e. Aimi'u ra'yn waku wato'e i'atuepe yt aimikuap i pe katu­pono Tupana tipo­'oro tuereto temiit ahowawi atipy piaria yt aimikuap i ko'i aiwese hap kuap hamo. Sa'a­wy'i Tupana tipo­'oro temiit'in atipy piaria tehay moherep hamo. Mi'i hawyi ta'a­tu­poi­tyro kahato Aparãu sa'a­wy'i. Mi'i ewywuat waku watu­we­wy­'inug yt eimikuap i te rakaria e Tupana ahepe mesup.
HEB 13:3 Waku wati­ky'e kahato aiwy­ria'in more­kuaria mipyhyp ko'i. Yt naku i waure wo watoĩ­ne'en wo'o­pyhyp haria kai. Waku waha­ty'u aipy'a pe i'atu­pyhik hap ko'i upi. Waku aikotã itote watoĩ­ne'en mote haty ahete hap ewywuat kuap hap wywo. Waku wato­'o­ky'e aiwo­'o­'ewy wato­mohey haype. Toĩne'en wẽtup ok Iesui mohey hat irania'in miky­ry'i hamo mi'i hat waku watuwat mi'i powyro hamo kat pote wẽtup yn hap ewy wato­py­hu'at imohey haria. Waku waha­ty'u haty'u haria wywo wẽtup aimi­mohey yn mote wẽtup miit yn aipiit pote.
HEB 13:4 Uiwy­ria'in Iesui mohey haria — Waku he'aito kahato rakano ereĩne'en e. Waku ihary'i kahato rakano ereĩne'en e. Waku ehary'i wywo yn ewaire e. Waku e'aito wywo yn ewaire e. Mi'i etunug pote arehum ewawi e Tupana ma'ato irania'in wywuat eiwo­'o­pytyk pote — Yt naku i en are'e e. Woro­'a­piheg aru e Tupana yt iwe'eg i haria pe. I'ewyte wewiat wewe­neru wuat'i piat haria ati'a­tu­'a­piheg yne yne e ahepe. I'ewyte wewiat wewe­neru haria kyi'at haria ati'a­tu­'a­piheg e. Hewaire rakaria uimi­'a­piheg wuaria e Tupana. E'aito wywo ehary'i wywo kahato hap uimo­wepit hap e Tupana.
HEB 13:5 I'ewyte yt naku i ti wate­ha'at irania'in ekare'en kape iky'esat hap wywo aiwat no teran ai'e hap mywo. Waku watu­wehum Tupana kape imiium aheka­re'en sio iwato sio yt. — Waku kahato eimiium ok tã Tupana wato'e waku. Katu­pono sa'a­wy'i Tupana to'e — Yt karãpe i ti aru woro­ho­'o­'atoiat e. Yt karãpe i eikup­te'en piku piku ko'I sese wo e Tupana ahepe sa'a­wy'i. Waku watikat Tupana miium ko'i aimo­wepit hap wywo ma'ato yt naku i wati­ky­'esat irania'in ekare'en e Musei tomiwan Teute­ru­numiu 3.5 pe.
HEB 13:6 Waku wato'e — Pywo rat uipo­wyro kahato hat En Tupana mi'i pote yt areken'ẽ hin i Uipo­wyro kahato hat En mote waku wato'e. Uiwywo ereĩne'en mote aikotã aikotã sa'ag miit'in tunug uhetiat pytkai yt areken'ẽ hin i waku wato'e Tupana pe e morekuat Tawi towepy 118.67 hawe.
HEB 13:7 Waku wati­mõ­typot ai'a­pykok haria aimu'e haria mesu­wa­ro­tiaria i'ewyte sa'a­wy­'i­wuaria Tupana ehay moherep haria. Yt naku i waure wo ne'i mi'iria kai wato­py­hu'at katu­pono mi'iria aimotag Tupana mohey hap etiaria wo tukup­te'en. Waku watu­kup­te'en ai'a­pykok haria saipe­piaria wo i'atu­minug wakuap nug haria wo. Waku i'atuiã­'ãkap wo watoĩ­ne'en i'atu­minug wakuap ko'i nug hap ete. Mi'iria Tupana mimõ­typot wuanuaria. Waku aito watunug mi'iria minug wakuat ewywuat. Waku wato­mohey Tupana mi'iria piat imohey hap ok tã.
HEB 13:8 Iesui ti Ai'akag Akag toĩne'en tuwe­'awy wuat'i e'at pe. Aikotã sa'a­wy'i Iesui toĩne'en koitywy i'ewyte toĩne'en tuwe­'awy te mũki­'ite tuwe­'awy te toĩne'en e'ihot'ok tuwe­'awy te wuat'i e'at pe tuwe­'awy te yn toĩne'en. Tewaku hap ewy yn topy­hu'at wuat'i e'at pe.
HEB 13:9 Waku wato­py­hu'at imohey hap ete Iesui kape yn watu­wa­nẽtup wuat'i e'at. Yt naku i watuwat irania'in miat aimu'e hap upi yt Iesui yt etiat i ra'yn hap upi. Katu­pono i'atu kahato aimu'e hap ko'i yt pywuat i ra'yn ko'i. I'ewyte i'atu kahato aimu'e yt Iesui etiat i. I'atu aimu'e Iesui etiat rakaria ma'ato yt hãpyk i rakaria. Yt naku i watuwat heso rakari aimu'e wẽtup sehay yt Iesui etiat i hap upi. Waku wato­mohey Iesui hap yn sehay pywuat Iesui etiat. Mi'i ti waku watunug. Waku watu­wa­nẽtup at ka'ap aikotã Tupana aiky'e yt kat sa'up i pytkai aiky'e hap upi. Aikotã ahewaku hap yt put'ok'e i aiky'e hamuat sa'up ete hap upi waku watu­wa­nẽtup. Mi'i watunug mote aipy'a iheg me Iesui mohey hap ete. Yt naku i watu­wa­nẽtup at ka'ap mi'u sio waku Tupana tiky­'esat sio waku atu'u sio yt ai'e hap kape. Irania'in mi'u waku sio yt aheko ewy hap kape yn te'e­ru­wa­nẽtup haria tukup­te'en. Te'e­ru­wa­nẽtup mi'u waku sio yt hap kape yn ma'ato mi'i haria yt i'atue­hãite i kahato Iesui mohey hap ete. Hãpyk kahato aheko mi'u u hap etiat i'atu'e wen ma'ato Tupana mohey hap kape yt te'e­ru­wa­nẽtup hin i mi'i pote yt i'atue­saika i te Tupana ehay moherep hamo.
HEB 13:10 Sa'a­wy'i pa'iria te'e­runuk kahato aihũria aimiium Tupana piat ete. Ta'a­tuwuk Tupana kape turan ta'a­tuhep ipu'i kã'ã ta'a­tu­mi'u wo. Ma'ato aito Iesui mohey haria wẽtup auka hap kaipyi watenuk. Yt mesu­wa­rotiat ai'y­wania Tupana yat sokpe kawiat piat ewy hin i aimi'u ma'ato po'og po'og wakuat Aihũ Aimiium sa'a­wy­'i­wuaria kai katu­pono Aihũ Pakup Aimiium ti Iesui piit.
HEB 13:11 Sa'a­wy'i aitoria waterut kahato aihũria Tupana mõtypot yat kape imõtypot hamo. Itote ahepa'i akag ti'auka aimierut Tupana mõtypot yat sokpe kawiat oken'y­pyke hawyi tote­reke aihũria suu Tupana yat sokpe kawiat pe aiminug sa'ag moweityk hamo ai'a­piheg hap monik hamo. Mi'i hawyi mekewat aihũ piit ta'a­tue­reto pya ai'yat kai iwuk hamo pa'i tioto.
HEB 13:12 Mi'i hap ewy kahato Iesui iku'uro pya tawa wato Ieru­sarẽi pyi toho­'opot mekewat tawa Ieru­sarẽi ekuekai aika­wiano iku'uro Aihũ ewy. Huu ta'at itote aimo­waku hamuat. Iesui tum tosuu itote temiit'in moewaku hamo.
HEB 13:13 Yt ikahu hin i ta'a­tunug Aheha­kye­ra'at hat ete. Ta'a­tu­'auka turan mekewat tawa Ieru­sarẽi ekuekai ta'a­tunug. Waku watuwat tawa pyi i'ewywuat hamo wy i'atu­mi­ky­ry'i hamo ahete hemiit'in aito pote. Waku wẽtup miit ewy wẽtup piit ewy woho­'opot iwywo wẽtup ok piat ho'opot hap ewy yn waku.
HEB 13:14 Katu­pono ahetawa sese yt mesuwat tawa Ieru­sarẽi i ma'ato aiwat ahetawa iheg nakat yt karãpiat i ikahuro rakat. Mesuwat yi tote yt karãpe i wati­puẽti aru ahetawa yt iku'uro rakat i. Ahetawa sese tut aru yi kape atipy kaipyi wato'e.
HEB 13:15 Atipy kaipywiat yn wahe­katup ahetawa sese ut hap wato'e. Uiwy­ria'in waku kahato wato­mõ­typot Tupana. Waku aiwẽ pyi ahẽku pe Tupana kapiat yn aiwehum hap — Eset Tupana po'og ikahu torania kai waku wato'e. Yt watu­wehum teran i pytkai waku watu­wehum ahehay wo Tupana pe — Waku kahato Aheha­kye­ra'at Hat Aika­'iwat waku wato'e at ka'ap howawi aikotã aimiium iwato kahato hap ewy Tupana mowepit kahato hap topy­hu'at.
HEB 13:16 Waku hegyi'at rakaria wo watoĩ­ne'en. Ihaky­'e'i rakaria pe waku wati­mõ'ẽ ahekat. Waku wati­po­wyro hatek takaria ahekat kaipyi ahesokpe kaipyi ahe'u'i kaipyi e. Yt naku i waure wo watoĩ­ne'en ihaky­'e'i rakaria kai. Wati­mõ'ẽ pote Tupana mowepit haria wo wato­py­hu'at. Haty pytkai waku watum. Ahegyi'at hap kape Tupana ta'a­kasa hawyi tuwehum kahato ahowawi.
HEB 13:17 Waku watuwat Iesui mohey haria akagnia ehay upi ai'a­pykok haria upi. Katu­pono mi'iria tiky­'esat kahato ahehãite kahato Iesui mohey hap etiat hap. Waku watunug i'atu­mi­ky­'esat ewy katu­pono mi'iria hẽtup kahato Tupana kape ahupi. Mi'i watunug mote i'atu­mo­wepit hap topy­hu'at aiwo­'o­wese hap wywo. Ma'ato yt pote haty i'atuete hap wywo te'e­ro­py­hu'at. Mi'i hawyi yt aiwe'eg i hap ta'a­tu­henoi ra'yn Tupana pe hawyi ai'a­piheg hap topy­hu'at Tupana kaipyi. Eiwe'eg wo o. Mi'i hawyi aheĩne'en hap mesuwe po'og sa'ag topy­hu'at yt watunug i ra'yn i'atuehay upiat hawyi. Ma'ato watunug i'atuehay upi pote po'og ihãite rakaria wo wato­py­hu'at. Mi'i hawyi i'ewyte aiwe'eg hap ta'a­tu­henoi ra'yn Tupana pe hawyi aipoi­tyro aimo­wepit hamo wato­py­hu'at.
HEB 13:18 Pyno ewehẽtup i hẽtup i urupo­wyro hamuat uruwy­ria'in Tupana kape. Urutung neran wakuap yn wuat'i e'at pe. Yt kat i uruminug sa'ag upi urutu­we­mõti Tupana ehamuat hap uruiky­'esat. I'ewyte yt kat i uruminug sa'ag upi urutu­we­mõti miit'in ehamuat hap uruiky­'esat. Urutoĩ­ne'en neran hãpyk kahato miit'in py'a­setpe yt uwe pupiat i uruwe­mõti hap mywo. Mi'i pote ewehẽtup uruupi Tupana pe uruieĩne'en hap ikahu rakat nug hamo.
HEB 13:19 Uimi­mu­'eria waku ewehẽtup uhupi uikai­wiano haty wo ui'aipok ehowawiat hamuat. Ewehẽtup wote meremo ara'aipok ehowawi.
HEB 13:20 Mio tã are'e Tupana pe eika­wiano — Tupana are atiky­'esat kahato aimi­mu­'eria waku nug haria wo En ewy are. Waku kahato En Wuat'i Wo'o­wese Hap Nug Hat are. En ni Uruka­'iwat Iesui Moieĩne'en Iku'uro Hap Kaipywiat Hat are. En ni Ehũria Emohey Haria Apykok Hat Moieĩne'en Hat are. En ni urupyhik ehay wakuat wuat'i e'at pe hamo are. Esa'yru suu wo urumosat epy'a pe Tupana are.
HEB 13:21 — Tupana eti'a­tu­mo­hãpyk aiwy­ria'in wakuap nug haria are. Etunug mi'iria Esa'yru miky­'esat ewy waku nug haria wo are. Etunug mi'iria Esa'yru mohey hap etiat itag nakaria wo are. Atiky­'esat etum i'atuepe esaika hap wakuap nug hamuat are. Atiky­'esat i'atu­minug emowepit hap yne hawyi eha mowepit hap topy­hu'at are. Tupana uito ti emipo­'oro Esa'yru mohey kahato hat. Esa'yru wywo ahẽtup mesup ewawi are. Atiky­'esat Esa'yru mowato mesuwat yi totiat wuat'i e'at piat hap atiky­'esat Tupana. Tupana waku kahato En at ka'ap are. Eti'a­tu­ka­wiano meiũpepyi uiwy­ria'in Iuteu ywania are. Iesui set upi ahẽtup Toran na'yn ui'e hap are.
HEB 13:22 Pyno uiwy­ria'in uheinyt'in Iesui mohey haria atiky­'esat eiwa­nẽtup kahato mesuwat uimiwan einãpin hap kape. Ewetum no ehewaure ka'a po'og po'og uimienoi kape. Uiky'e ehepiat pote eiwe­mu'e ro mesuwat uimiwan kurin kat ete. Yt i'ywop hin i mesuwat uimiwan. Ewei'a­tu­mu'e yne irania'in uimiwan mo are. Uimiwan mesu­wa­rote yt i'ywop hin i are katu­pono atimohit kahato uhehay mesuwe.
HEB 13:23 Aheywyt Timoteu tuwẽtem na'yn morekuat wo'o­pyhyp hawyi. Koitywy — Waku ewyry emiky­'esat ewy e morekuat tope. Pywo ti rat waku kahato. Karãpe tut uhowawi Timoteu hawyi uimo­wepit kahato. Mi'i hawyi atioto teran uha'yru Timoteu ehowawi ei'a­kasa hamo.
HEB 13:24 Kuekatu atipo­'oro ehowawi i'ewyte ei'a­pykok haria kape i'ewyte kuekatu atipo­'oro yne Tupana mimoe­waku ko'i kape. Yne Iesui mohey haria meiũpiaria yi Itarianu piaria tipo­'oro kuekatu ehowawi.
HEB 13:25 Tupana eti'a­tu­ky'e ro yne uru'y­wania Esa'yru mohey haria Iuteuria ywania are. Yt i'atu­waku hap upi i ma'ato egyi'at hap kaipyi eti'a­tu­poi­tyro uru'y­wania are Tupana pe eika­wiano. Ikahuro ra'yn uimiwan ehowawiat ui'y­wania Iuteu ywania ewawi mekewat ase'i Aparãu emiariru emiariru ko'i ewawi mekewat Iesui ywania Iuteuria ewawi mekewat Epereu pusu kuap haria kape. Toran na'yn uimiwan
JAM 1:1 Uito Iesui ywyt sese Tiaku. Iesui ti uheyke'et sese are. Pyno meiũ uito Tiaku uimiwan atipo­'oro ehowawi. Uito ti Tiaku Tupana eropat hat i'ewyte Aika­'iwat Aipo­typot Iesui eropat hat uito are. Koitywy atipo­'oro ui'e hap torania kape Tupana mẽpyt'in aimẽpuo aimẽpuo yi wato hap ok tã tukup­te'en hap kape.
JAM 1:2 Uiwy­ria'in karãpe put'ok'e ahete aikotã aikotã miky­ry'i hap ho'opot hap ahã'ãg hap mi'i pote waku watu­wehum kahato Tupana kape.
JAM 1:3 Mi'i hap watunug mote po'og ihãite ahepiat imohey hap. Mi'i hawyi wahaty sepap ne'i ra'yn karãpe wẽtup ok kaipyi ra'yn ahã'ãg hap put'ok'e turan.
JAM 1:4 Waku yt watu­wemig i ahã'ãg hap pupi. — Waku arakosap aru ho'opot hap sakpo wato'e yn waku yn aipy'a pe. Mi'i hap watunug mot'i pote Iesui mohey haria wo kahato watoĩ­ne'en hãpyk sese rakat hap ete. Wahupit kuap waho­'opot hap ahã'ãg hap pote ti hekat kahato rakaria ewy watoĩ­ne'en Tupana wanẽtup hawe.
JAM 1:5 Karãpe yt watikuap i kat som waku watunug hãpyk takat ahã'ãg hap put'ok'e turan mi'i hap e'at pe waku wahẽtup kahato wuat'i kuap sese hat Tupana kape. Mi'i hawyi aikotã waku hamuat tohenoi kahato ahepe towese popuo aimu'e yt ahaty'i haty'i popuo hin i ainãpin Tupana.
JAM 1:6 Imohey kahato hap wywo yn waku wahẽtup aimo­we'eg hamuat wahẽtup Tupana pe. Yt naku i wahẽtup Tupana pe imohey ran hap wywo. Ma'ato karãpe wahẽtup imohey ran hap wywo ne'i pote ahehay yt aiwesat i wyti aru imohey ran nywo ne'i wahẽtup wote. Yt naku i imohey hap kowo'i kowo'i aiwa­nẽtup hap mywo wahẽtup. Ma'ato mi'i hap wywo wahẽtup pote wato­py­hu'at aikotã y'y hyemueri piat ewy ne'i aiwa­nẽtup hap. Aikowo aikowo wasere wato upi hap ewywuat watoĩ­ne'en aiwa­nẽtup hawe imohey hap upi. Yt naku i are.
JAM 1:7 Aikowo aikowo ne'i imohey hap aiwa­nẽtup hawe pote yt naku i kahato wato­py­hu'at katu­pono atimohey kahato Tupana wato'e irania'in me ma'ato yt pywo pe i katu­pono typy ihay rakat ewy watoĩ­ne'en aiwa­nẽtup hawe.
JAM 1:8 Karãpe wahẽtup Tupana kaipyi aimi­ky­'esat ko'i ma'ato yt wato­mohey kahato i hap wywo pote typy ehay rakat ewy watoĩ­ne'en. Yt naku i wato'e Tupana pe — Woro­mohey En Tupana wen ma'ato yt atikuap i sio etum aru uimiẽtup sio yt wato'e pote kowo'i kowo'i wato­mohey typy wanẽtup haria wato­py­hu'at. Mi'i hap ewy wahẽtup pote aimiẽtup yt heremo hin i Tupana wanẽtup hawe. Mi'i pote yt tutum kuap i aimiẽtup Tupana tuwe­kaipyi.
JAM 1:9 Karãpe wato­mohey Iesui hawyi ho'opot kahato hap topy­hu'at ahete katu­pono irania'in yt imohey i haria yt i'atu­wese hin i ahete — Yt naku i kahato eipe i'atu'e ahepe. Mi'i hawyi aheha­ky­'e'i kahato hap toĩne'en ahete. Mi'i pote yt naku i aiwa­nẽtup hap yi kape are. Yt naku i watu­we­mõti imohey hap ete katu­pono Tupana wanẽtup hawe waku pe watoĩ­ne'en.
JAM 1:10 Hekat rakaria miit'in mimõ­typot ko'i tukup­te'en mesu­wa­rote i'atu'e ma'ato Tupana wanẽtup hawe imohey haria hekat rakaria ewy tukup­te'en katu­pono yne Tupana wanuat toĩne'en imohey haria po pe. Mi'i tupono waku hekat rakaria mesu­wa­rote aito pote waku watu­wehum Tupana kape are ma'ato yt naku i watu­wehum ahekat ete — Uito po'og uhekat wato'e aiwa­nẽtup hawe. Waku paa'e haria wo wato­py­hu'at aheka­re'en ko'i ete katu­pono iku'uro irane mi'iria hekat rakaria pytkai. Mi'i hawyi aiku­'uro hawyi yt kat i ahekat mesu­wa­rote. Ta'i aheĩne'en hap mesu­wa­rote ipohyt ko'i ewy kahato. At hakup kahato hawyi igag ipohyt hawyi iteneg na'yn hawyi iku'uro.
JAM 1:11 Pywo ipohyt ewy kahato hekat rakaria tukup­te'en. Mesup hekat kahato rakaria tukup­te'en mi'i hawyi mũki­'ite satek hap e'at pe hawyi ihaky­'e'i kahato rakaria wo tukup­te'en ipohyt teneg ewy. Karãpe Tupana ainug hekat rakano mi'i pote waku watu­wehum kahato ahekat nug hat Tupana ete. I'ewyte karãpe yt aheka­re'en kahato i hap put'ok'e ahete waku watu­wehum kahato wy Aimo­wepit hat Tupana ete are katu­pono watikuap yt ahekat kaipyi i aimo­wepit sese hap tut. Waku wato'e — Ta'i ahekat mesu­wa­rotiat ipohyt ewy waku wato'e mesup. Ikahu kahato tig wen ma'ato mũki­'ite toto ra'yn. Mi'i hap ewy ahekat yt toĩne'en mot'i hin i waku wato'e ahatek hap e'at pe mesuwe.
JAM 1:12 Ma'ato uwe uwe tepiat ho'opot turan te haky­'e'i turan yt iwaure i imohey hap mi'i hat ti Tupana mimo­waku wo toĩne'en i'ewyte Tupana mimo­wepit kahato wo topy­hu'at wuat'i e'at pe katu­pono ho'opot hap sakpo gosap hat toĩne'en imohey hat. Mi'i hat pe Tupana to'e aru — Uiky'e hat sese en e. Mi'i pote woro­moieĩ­ne'en kahato wuat'i e'at pe e yt tewaure i haria pe.
JAM 1:13 Karãpe ahã'ãg hap toĩne'en ahete yt naku i nug hamuat mi'i pote yt naku i wato'e aipy'a pe — Tupana ti uhã'ãg kahato yt naku i nug hamo yt naku i wato'e katu­pono Tupana yt ahã'ãg kuap i sa'ag nug hamo i. I'ewyte yt wahã'ãg kuap i Tupana sa'ag nug hap ete aito.
JAM 1:14 Aiwa­nẽtup hap miky­'esat sa'ag kaipyi ti tuwẽtem ahã'ãg sa'ag nug hamuat hap. Aimi­ky­'esat sa'ag aipy'a piat aima'at hamuat topy­hu'at aikotã ewamiri miat hã'ãg hap ewy. Aimi­ky­'esat ahã'ãg kahato yt naku i nug hamuat. Wahã'ãg hawyi wato­py­hu'at aima'at hawe aikotã hapiri topy­hu'at ewamiri pe hap ewywuat.
JAM 1:15 Aimi­ky­'esat sa'ag ko'i ahepiat i'aparap hap toĩne'en. Aiwa­nẽtup sa'ag hap aikotã aikotã waku watunug aru aiminug sa'ag ainug yt naku i nug haria sese katu­pono meremo watuwat aiwa­nẽtup sa'ag hap ko'i upi. Watunug aimi­ky­'esat sa'ag ko'i hawyi sa'ag nug haria wo ra'yn wato­py­hu'at Tupana wanẽtup hawe. Mi'i hawyi Tupana ui'a­piheg hap yn topy­hu'at aiwa­nẽtup hawe.
JAM 1:16 Yt naku i watu­we­ma'at uiwy­ria'in are. Yt naku i watunug aimi­ky­'esat sa'ag. Waku watoiat aimi­ky­'esat ko'i yt naku i nug neran hap ko'i.
JAM 1:17 Tupana ti hẽtyhot kahato rakat ewy toĩne'en. Tupana ti at nug hat waty nug hat i'ewyte wuat'i waikiru nug hat wyti Mi'i. Tupana yne wakuap nug hat. Yt kat hin i sa'ag Tupana tunug. Yne imienoi ko'i hãpyk yn na'yn. Ewaty at yt hẽtyhot mot'i i ahowawi. Hẽtyhot rokirẽ yt ra'yn tuereto at waty waikiru ko'i wen ma'ato Tupana sese yt mi'iria tominug ko'i yt ewywuat hin i toĩne'en. Tupana ti po'og po'og aipo­wyro hat tominug at waty waikiru ko'i kai. Mi'i ti po'og po'og ipotpap at ka'ap wyti aipoi­tyro hamuat. Yt kat sa'up i watum pytkai tutum yne yne ahepe tekat ko'i aimo­wepit hamuat ko'i. Hẽtyhot at ka'ap Tupana.
JAM 1:18 Tehay pywuat sese wo ainug tomẽ­pyt'in ko'i. Mi'i hawyi aito wato­py­hu'at Tupana mowepit kahato haria aikotã aimikoi pakup haat rakat aimo­wepit hap topy­hu'at. Mi'i hap ewy aito Iesui mohey haria wato­py­hu'at Tupana mowepit hanuaria wo sese katu­pono — Po'og po'og uimi­ky­'eria eipe torania uiminug ko'i kai e Tupana ahepe tosa­'y­ru'in me tosa­ki­'yt'in me.
JAM 1:19 Uiwy­ria'in waku wyti watu­we­waure ka'a kahato aimu'e haria mienoi kape. Waku watu­wa­nẽtup kahato hawyi waku aiwe'eg ahehay. Yt naku i iũte'en hap wywo. Yt naku i aipy­'ahak hap wywo ne'i wati­wesat aiwy are. Yt etiwaure tei'o mi'i hap nug hamuat. Uiwy­ria'in waku ehewaure ka'a kahato aimu'e haria ehay kape. Waku watu­wa­nẽtup kahato. Waku aiwe'eg hap wywo ahehay yt kat i iũte'en hap wywo. Yt naku i aipy­'ahak hap wywo wati­wesat iũte'en. Yt etiwaure tei'o mi'i hap nug hamuat. Uiwy­ria'in waku ehewaure ka'a kahato aimu'e haria ehay kape. Waku watu­wa­nẽtup — Uimu'e o uiwy e hap yn aiwa­nẽtup hawe waku wato'e.
JAM 1:20 Tupana tiky­'esat kahato wyti hãpyk takat yn mi'i tupono ti aiwo­'o­py­'ahak hap kaipyi ne'i yt watunug kuap i Tupana miky­'esat ewywuat ko'i.
JAM 1:21 Waku ti watoiat yne yne aiminug yt naku i hap ko'i i'ewyte yne aheko sa'ag nug hap ko'i. Mi'i hawyi ti waku watu­we­waure ka'a kahato Tupana ehay kape paa'ai'e hap wywo yn katu­pono Tupana yn aheha­kye­ra'at kuap tehay wo. Mi'i pote — Uimu'e kahato ro ehay nug hamo waku wato'e Tupana pe. Tupana etikoi kahato o ehay uiwa­nẽtup hawe waku wato'e. Yt naku i aheko sa'a­wy­'iwuat ewywuat ahewaire waire nug hap.
JAM 1:22 Yt naku i ti ahewaure ka'a wo yn watu­we­wa­nẽtup Tupana ehay kape. Ahewaure pe yn Tupana ehay toĩne'en mote ti aiwe­ma'at hap yn toĩne'en katu­pono ihay watunug hap kaipyi Tupana miky­'esat wy. Toiky­'esat kahato aheko towat ewy hap toiky­'esat. Toiky­'esat tehay hẽtyt rakat ewy hap aimikoi ewy hap toiky­'esat. Tomi­ky­'esat nug hepiat hap wyti toiky­'esat.
JAM 1:23 Y'y kape wate­ha'at aipã'ãu kape watu­wepiok kahato aipã'ãu kape. Aikotã aipiit aikotã aipainug hap aikotã aikahu hap wate­ha'at aipã'ãu y'y piat kape. Ma'ato wate­ha'at kahu hawyi wato i ra'yn hawyi meremo wati­waure ra'yn aikotã ahowapy aikotã hap.
JAM 1:24 Mi'i hap ewy ti Tupana ehay watikuap sa'ag hawyi wato hawyi wati­waure ra'yn watikuap sa'a­wy'i rokirẽ wuat pytkai.
JAM 1:25 Ma'ato ahewaure ka'a kahato Tupana ehay kape — Atikuap teran kahato ehay wato'e Tupana pe hawyi watu­we­waure ka'a kahato Tupana piat ainãpin hãpyk takat kapiat hawyi watu­we­mu'e kahato hawyi watikuap kahato inug hamuat hap. Watunug Tupana miky­'esat ewy hawyi Tupana aimo­wepit kahato aiminug upi katu­pono watunug i'e hap ewy kahato hawyi aipoi­tyro kahato yne aiminug ete.
JAM 1:26 Karãpe yt wãiwa­to'e i ahehay sa'ag hap miit'in ete mi'i pote yt kan hamo i — Tupana mohey kahato hat uito wato'e katu­pono wema'at haria wo i watoĩ­ne'en. Yt kan hamo i ahehay miit'in mu'e hap ete katu­pono ta'a­tukuap typy ihay rakaria aito hawyi ahehay Tupana ete ihay se wen ma'ato ahehay irania'in ete yt naku i katu­pono sehay i'ewyte sa'ag tuwẽtem aiwẽ pyi wy.
JAM 1:27 Uwe uwe yt ity i yt i'ywot i rakat powyro hap kaipyi Ai'ywot atipy piat Tupana tikuap kahato tomohey hat sese pywo sio yt hap. Uwe uwe hiwuria powyro hap ko'i toikuap aito tomohey hat sese pywo sio yt hap e. Uwe uwe hatek takaria powyro hap ko'i toikuap tomohey hat sese pywo sio yt hap e. Karãpe irania'in ahã'ãg yt naku i nug hamo ma'ato yt watuwat i i'atu'e hap upi — Uito Iesui mohey hat pote yt atunug neran i te wato'e. Mio tã wato'e hawyi Ai'ywot atipy piat tikuap kahato aito tomohey sese haria wo ra'yn aikuap are uito Tiaku.
JAM 2:1 Uiwy­ria'in Apotypot Koro Iesui ti wuat'i mimõ­typot nuat topy­hu'at. Mi'i tupono ti waku wati­'a­tu­mõ­typot irania'in. Yt naku i uimi­'ai­roria yn i miit'in wati­'a­tu­ky'e. Ma'ato Aika­'iwat ti'a­tu­ky'e yne miit'in torania hap ewy waku wati­'a­tu­ky'e yne. Yt naku i wati­'airo aiwy­ria'in i'atuekat hap upi i'atu­we­painug hap upi ne'i are. Yt naku i wati­'a­tu­ky'e ai'y­wania ko'i yn.
JAM 2:2 Karãpe aiwo­'o­mu'e hawe tut wẽtup ok miit hekat rakat wuat'i iwat toĩ tuwe­painug hesokpe ikahu ipu'iãpiat imehit. I'ewyte tut wy wẽtup ok yt hekat i rakat hesokpe sa'ag wywo tut.
JAM 2:3 Mi'i hawyi wato'e hekat rakat pe — Uiwy kahato en. Waku era'apyk mesuwe e'amyap ikahu rakat rote ma'ato mi'i hawyi yt hekat i rakat pe — Pyno waku en itote y'am me ro ereĩne'en sio yi tote ro era'apyk wato'e hap kaipyi Ai'ywot Tupana aikuap.
JAM 2:4 Uiwy­ria'in yt naku i wati­mohit hatek takaria yt hekat i rakaria. Ma'ato wati­mohit miit'in yt hekat rakaria i yt uwe wat i mimõ­typot ko'i yt hekat i rakaria pote meremo Tupana tikuap aiminug yt naku i hap. Tupana ti'a­tu­ky'e yne aito sio aipiit ikahu sio yt. Sio ahesokpe ikahu sio yt kat i ahesokpe toi'a­tu­ky'e torania aitoria topy'a pe. Waku Tupana ewy wati­'a­tu­ky'e torania miit'in sio hekat rakat sio yt. Waku wati­'a­tu­ky'e irania'in Tupana aiky'e hap ewy. Miit'in ekat ky'ewi hap ne'i wati­'airo aiwy­ria'in mote — Uito po'og e hat ewy watoĩ­ne'en Tupana wanẽtup hawe katu­pono wati­ky'e miit'in i'atukat ky'ewi hap wywo ne'i. Wẽtup ky'e hamo yn waku wati­'a­tu­ky'e miit'in sio more­kuaria sio miit emiit ko'i.
JAM 2:5 Pyno ewetum no ehewaure ka'a uhepe uimi­ky'e ko'i. Yt eweikuap i te apo aikotã Tupana ti'airo kahato yt hekat i rakaria Iesui mohey kahato hanuaria wo hap. Po'og toi'airo ihaky­'e'i rakaria temiit no tetama pianuaria wo irania'in kai katu­pono sa'a­wy'i to'e — Uhemiit sese wyti aru tukup­te'en miit emiit haria wo karãpe arepy­hu'at Wuat'i Miit'in Morekuat Koro mesu­wa­rote e Tupana miwan me sa'a­wy'i. Mio tã to'e hap ewy ra'yn ti mesup te toi'airo temiit'in no miit yt uwe mikuap ewywuat ko'i i yt uwe miky'e ewywuat ko'i i e. Mi'iria pe ti — Woro­ho­'o­'airo eipe miit'in pore­kuaria wo uimohey sese haria eiperia pote e. Woro­ho­'onug eipe morekuat no yne mesuwat yi tote e hatek takaria pe toky'e sese haria pe. Woro­ho­'o­moe­saika uimohey kahato hap wywo wuat'i nug hamo e Tupana tomohey haria pe.
JAM 2:6 Eiperia yt hekat i rakaria pote hekat rakaria eimohit reran ne'i. Yt naku i ta'a­tunug hekat rakaria. Ta'a­tu­'a­tu­ky­'esat wyti eiwe­te­weru ta'a­tuepiat hap yn ta'a­tu­ky­'esat. Mi'i hawyi yt eweha'up nug i ra'yn eiwe­te­weru hap hawyi ti ehereto ra'yn sura­ra'in kape ei'a­piheg hamo. Yt ewenug nei'o mi'iria ewy ne'i are.
JAM 2:7 Aipo­typot Iesui set mohit kahato haria wyti hekat rakaria. Yt i'atu­we'eg hin i mi'iria katu­pono Tupana ahet'ok Iesui set upi. Yt kat set i po'og Iesui set kai ikahu rakat ahepe. Iesui ti Aika­'iwat koro ma'ato yt ta'a­tu­mõ­typot hin i Aika­'iwat.
JAM 2:8 Sa'a­wy'i Aipo­typot Iesui aimu'e tehay pywuat sese wo. Mio tã e — Waku wati­'a­tu­ky'e kahato irania'in aiwe­ky'e kahato hap ewy e ahepe ainãpin hap sese.
JAM 2:9 Pyno waku watunug Aika­'iwat koro ainãpin hap ewy yn waku watunug. Waku wati­'a­tu­ky'e torania miit'in aiwe­ky'e hap ewy. Ma'ato waho­'o­ky'e miit'in hekat hap upi ikahu hap upi mi'i pote Aimu'e hat ainãpin hat ehay pun haria wo wato­py­hu'at. Mi'i hawyi yt nakuaria i wo wato­py­hu'at Tupana wanẽtup hawe. Waku wati­'a­tu­ky'e torania miit'in watu­we­ky'e kahato hap ewy e ahepe.
JAM 2:10 Tupana tiky­'esat kahato watunug wuat'i tepiat ainãpin hap ma'ato wati­'a­parap wẽtup ainãpin hap mi'i hawyi yt naku i nug haria wo ra'yn watoĩ­ne'en. Wẽtup yn aimi­'a­parap hawyi yt naku i wato­py­hu'at Tupana wanẽtup hawe katu­pono wẽtup ainãpin hap pe toĩne'en yne Tupana piat ainãpin hap wẽtup sehay pe — Aikotã ewei'a­tu­ky'e irania'in eiwe­ky'e hap ewy e hap. Mi'i hap yt watunug i mote wati­'a­parap yne Tupana piat ainãpin hap ko'i.
JAM 2:11 Katu­pono sa'a­wy­'ite Tupana ainãpin miwan me — Yt eweipo­hari tei'o wẽtup ok ihary'i ete he'aito ete e. I'ewyte to'e — Yt ewei'auka tei'o miit e tomiwan nu kawiat puretig etiat. Mi'i hawyi yt wati­po­hari i wẽtup ok ihary'i ete he'aito ete ma'ato wati­'auka wẽtup ok hawyi Tupana wo'o­nãpin hap wati­'a­parap kahato katu­pono miit auka hano ra'yn wato­py­hu'at ra'yn.
JAM 2:12 Ma'ato ahowawi Tupana iha'at kahato sio watunug imiky­'esat ewy sio yt hap kape yn. Tupana iha'at ahowawi sio wati­'a­tu­ky'e irania'in aiwe­ky'e hap ewy. Mi'i tupono waku wati­'a­tu­ky'e miit'in Iesui ewy. Waku aiwe'eg wo aiminug ko'i kai ahehay ko'i kai sio miit'in ky'e hap toĩne'en aikai Iesui miky­'esat ewy sio yt Iesui miky­'esat ewy i watunug hap ko'i.
JAM 2:13 Tupana piat miit'in apiheg hap e'at put'ok'e ra'yn turan mi'i hap e'at pe wyti yt kat i ra'yn Tupana kai i'atue­ha­ky­'e'i hap meimuẽ waria miit'in yt ehaky­'e'i kuap i haria ete. Ma'ato irania'in wo'o­ha­ky­'e'i kuap haria kape yt kat i hin i aru i'atu­'a­piheg hap topy­hu'at katu­pono Tupana tuwehum wo'o­ha­ky­'e'i kuap haria ete.
JAM 2:14 Pyno uiwy­ria'in yt naku i ti ahehay wo yn wato­mohey Iesui katu­pono yt wato­mo­herep i ahepiat imohey hap miit'in me aiminug wakuap ko'i mi'i pote ti yt kat hamo i ahehay se — Uito atimohey kahato Tupana wato'e. Uito ti Iesui mohey hat sese ai'e hap toĩne'en aikai hawyi yt kat i aiminug wakuap ko'i miit'in ky'e hap moherep hamuat aikai mi'i pote ti yt kat i Iesui mohey hap sese toĩne'en aipy'a pe ma'ato heso rakaria wo watoĩ­ne'en irania'in wanẽtup hawe i'ewyte Tupana wanẽtup hawe.
JAM 2:15 Karãpe put'ok'e ai'yat pe hatek takat Iesui mohey hat yt imi'u i rakat yt hesokpe i rakat hawyi yt kat i watum tope ma'ato wahenoi Tupana pe yn — Pyno waku mehĩ mana ahẽtup aru Tupana pe eipo­wyro hamuat wato'e yt kat i watum pytkai — Tupana aru epoi mehĩ mana wato'e yt kat i mi'u watum pytkai.
JAM 2:16 Ma'ato yt kat i watum mote yt karãpe i ta'a­tu­mohey ahehay — Uruto ti Iesui mohey kahato haria ai'e hap. Tupana eipainug wato'e yt kat i sokpe ium wywo i'atu­po­wyro hamo hawyi yt ta'a­tu­mohey i ahehay — Uruimohey kahato Iesui ai'e hap.
JAM 2:17 Mi'i tã watunug pote yt wato­mo­herep hin i i'atuepe ahepiat Iesui mohey sese hap are. Mi'i pote heso rakaria wo watoĩ­ne'en i'atu­wa­nẽtup hawe i'ewyte Tupana wanẽtup hawe. Uiwy­ria'in iku'uro rakat nem kahato rakat yt ikahu hin i toĩne'en. Yt uwe miky­'esat ewy hin i toĩne'en aikotã i'okpuk nem nakat ewy watoĩ­ne'en aitoria Iesui mohey haria yt hegyi'at i rakaria aito hawyi.
JAM 2:18 Mi'i hawyi te'e­ro'e irania'in ahepe — Ma'ato tukup­te'en ni Iesui mohey haria yt kat i ta'a­tu­minug wakuap ko'i e haria. Mi'i hawyi eheso kahato are i'atuepe katu­pono Iesui mohey hap sese kaipyi tuwẽtem wuat'i waku nug hamuat ko'i are. Yt pote yt kat i Iesui mohey sese hap aikai are i'atuepe. Uito ti atimo­herep uhepiat Aika­'iwat mohey hap miit'in ky'e hap wywo are.
JAM 2:19 — Uruto ti uruimohey kahato Tupana i'atu'e uhepe irania'in. Uruimohey sese Tupana wẽtup yn toĩne'en i'atu'e uhepe. Pyno waku mi'i tã wato­mohey i'atuepe wen ma'ato eiwe'eg wo o katu­pono i'ewyte ahiag timohey kahato wy wẽtup yn Tupana toĩne'en hap token'ẽ popuo. Ahiagnia timohey Tupana toĩne'en hap wen ma'ato yt Tupana miky­'esat ewywuat nug hin i haria wo tukup­te'en. Ahiagnia ta'a­tu­mohey sa'ag pytkai.
JAM 2:20 Yt kan hamo i — Atomohey kahato Tupana wato'e hawyi yt kat i watunug wakuap miit'in me. Mi'i tã watunug pote — Heso kahato rakaria eipe i'atu'e irania'in ahepe te'e­ru­wa­nẽtup hawe. Ahehay wo yn wato­mohey Iesui pote yt aiwe'eg hin i aito.
JAM 2:21 Watikuap ta'yn aikotã sa'a­wy­'ite aha'a­se'i Aparãu tunug nu kawiat heiam aikope aihũ watiwuk Tupana mowepit hamuat hap ewy. Mi'i hap tote toipo­rokpun tosa­'yru Isaki i'auka hamo Tupana piat ipo'oro hap ewy. Mi'i hawyi mi'i tã iminug kapiat teha'at howawi Tupana hawyi — Waku kahato rakat en Aparãu e Tupana tope. Eminug kaipyi mesup atikuap sese ra'yn uimohey hat sese en e Tupana tope.
JAM 2:22 — Waku en Tupana katu­pono aha'a­se'i pot timo­herep tepiat Tupana mohey hap tominug wo. Imohey hap toimo­herep kahato wuat'i pe tominug wo. To'o­ku­pitu kahato imohey hap iminug ko'i. I'e hap tutunug hap kaipyi Tupana tikuap tomohey hap sese aha'a­se'i pot Aparãu sa'a­wy'i.
JAM 2:23 Aikotã Tupana to'e sa'a­wy'i hap ewy — Uiwy kahato ti en Aparãu e. Uimohey hat sese ti en e. Hãpyk kahato rakat en uiwa­nẽtup hawe uiwy e Tupana tope.
JAM 2:24 Uiwy­ria'in imohey hap toĩne'en ahehay pe yn mote Tupana yt aimo­hãpyk kuap i katu­pono uiminug wakuap kaipyi yn wati­mo­herep kuap Tupana mohey hap sese toĩne'en aipy'a pe. Ma'ato yt kat i imohey hap moherep hap aikai waku nug hap ko'i mi'i pote yt toĩne'en i Iesui mohey hap sese aikai ma'ato heso rakaria wo wato­py­hu'at aito.
JAM 2:25 Sa'a­wy'i mana Irapi timo­herep kahato Tupana mohey tepiat hap katu­pono toi'a­tu­po­re­reke to'yat pe typy ok surara Isareu ywania Tupana mipo­'oro ko'i sepiok e hanuaria. Mi'iria pe mana Irapi timo­herep mu'ap wẽtup i'atu­popy hamuat mig'i wo toimo­herep i'atue­ha­kye­ra'at hap katu­pono irania'in surara tikat mi'iria i'atu­'uka hamo. Mi'i hap ewywuat mana Irapi tunug hawyi Tupana tikuap ta'yn tomohey hat ra'yn toĩne'en hap. Mi'i hawyi toieha­kye­ra'at mekewat hary­poria yt iwe'eg i rakat wuat'i ihainia'in wywuat ieĩne'en hat pytkai.
JAM 2:26 Pywo ti rat uheka­tu­wyria yt kat i aipã'ãu pote yt kat hamo i aipiit katu­pono iku'uro ra'yn. Aheha piat toto hawyi — Iku'uro sese ra'yn i'atu'e. Mi'i hap ewy ti yt kat i miit'in powyro hap Iesui mohey hap moherep hap aikai hawyi iku'uro rakat ewy ra'yn watoĩ­ne'en yt iwese rakat ewy i yt kat nug hat wo i ra'yn watoĩ­ne'en. Yt wati­mo­herep Iesui piat miit'in ky'e hap irania'in me ahegyi'at hamo pote yt kan hamo i wato'e hatek takaria pe — Uruimohey kahato Iesui wato'e ai'e hap. Pywo ti rat uimienoi are uito Tiaku.
JAM 3:1 Uiwy­ria'in eiwe'eg wo o — Uito po'og torania kawiat wo'o­mu'e hat ei'e hap wywo katu­pono miit'in mu'e haria kape yn Tupana po'og iha'at sio ta'a­tu­mu'e hap ewy ta'a­tunug sio yt te'e­ro­py­hu'at sio ta'a­tunug ta'a­tuepiat miit'in nãpin hap ewy sio yt hap kape teha'at kahato Tupana. Ma'ato yt watunug i ahepiat miit'in nãpin hap mi'i pote po'og ai'a­piheg hap topy­hu'at aipot­mu­'eria kai katu­pono yt watunug i Tupana ainãpin hap ko'i pote mi'i pote ti — Typy ihay haria eipe e aru ahepe Tupana mekewat e'at pe karãpe Tupana timo­herep yne miit'in me uwe waku uwe yt naku i hap airo hap e'at pe. Mi'i tupono waku perup'i puo wati­'a­tu­mu'e miit'in are. Waku wato'e aiwa­nẽtup hawe — Yt hãpyk i ahenoi pote ati'a­parap kahato Tupana pe waku wato'e aipy'a pe.
JAM 3:2 Pyno torania aito i'aparap haria watoĩ­ne'en. Ma'ato ahehay wo ahẽku wo yt wati­'a­parap i pote yt karãpe i sa'ag nug hano watoĩ­ne'en katu­pono aipy'a piat aiwa­nẽtup hap moherep hap ahehay topy­hu'at. Karãpe yt wati­'a­parap i ahehay wo pote hãpyk pe kahato watoĩ­ne'en aheĩne'en hap tote. Ahehay hãpyk takat watunug kuap pote watu­we­po­'oro kuap yne aipiit wakuap nug hamo.
JAM 3:3 Aihũ Kawaru wẽ sakpo wati­kytyt saity hawyi mi'i ete wati­mo­hãpyk aikotã hewyry aimi­ky­'esat ewy hamo. Kurin kat ete pyi wati­moe­wyry aihũ iwato sese pytkai.
JAM 3:4 I'ewyte ahe'yara iwato kahato rakat pytkai wati­mo­hãpyk kahato y'y puo apukuita kurin kat no. Mi'i hawyi aimi­ky­'esat ewy toto ahe'yara iwato kahato pytkai. Imohãpyk hap kurin hetu'a pe toĩne'en wen ma'ato toto­moe­saika kuap yne wasere wato pytkai waku ahewyry.
JAM 3:5 Mi'i hap ewy ahẽku topy­hu'at kurin aipiit kai mekewat saity aihũ Kawaru wẽ sakpuat ewy mekewat imohãpyk hap kurin hetu'a piat ahe'yara etiat hap ewy. Ta'i ahẽku ti yt iwato i pytkai — Uito po'og torania kai wato'e ahẽku hit no. I'ewyte aikotã aria hit ta'at go iwato rakat rote igag nakat rote hap ewy meremo aria iwato kahato topy­hu'at itote. Mi'i hap ewy ahẽku hit kaipyi iwato kahato sa'ag tuwenug.
JAM 3:6 Ahehay sa'ag ni aiwa­nẽtup hap ma'at kuap hat toĩne'en. Aima'at hat kahato ti rat ahẽku. Wo'oe­re­mo­pusu hap tuwẽtem ahẽku pyi aiwo­'o­ma­'at'i ma'at'i hamo. Aikotã aria aheka­re'en wuk hap ewy ahehay toĩne'en. Ahehay aikotã mekewat sa'ag nug hat eiam wyti aria wato yn toĩne'en. Ahehay sa'ag ahẽku kaipywiat miit'in wuk hap ewy topy­hu'at. Ahehay wo miit'in ma'at hap topy­hu'at katu­pono aheĩne'en hap moko'i moko'i hap aiwa­nẽtup hap pyi tuwẽtem ahẽku pyi are. Ta'i aimohun hap wyti ahehay sa'ag.
JAM 3:7 Ta'i watikuap kahato haiwot rakaria ga'apy piaria mope­rup'i aihũ wuat hap i'ewyte weitaria aihũ wo atimo­pe­rup'i kuap i'ewyte topy­hu'at hewyry rakaria aihũ wo watunug. I'ewyte piraria wati­mo­pe­rup'i kuap aito.
JAM 3:8 Ma'ato mi'i pytkai ahẽku yt wati­mo­perup i kuap i katu­pono ahẽku miit'in auka kuap hap topy­hu'at. Ahehay wo wati­ma'at kuap kahato miit'in. Moi haiwot rakat ewy ahẽku toĩne'en katu­pono mi'i wo wati­'a­tu­'uka kuap miit'in aimi­ma'at ko'i.
JAM 3:9 Ahehay sa'ag ahẽku pyi gu'uro hy ewy toĩne'en katu­pono — Waku kahato en wato'e Ai'ywot Aika­'iwat Tupana pe wen ma'ato miit'in me — Motoro meiũpepyi aria wato kape wato'e sa'ag ahewa­nĩ­kaptia pe miit'in me Tupana minug toiã'ãkap ko'i pe. Ahẽku wo — Waku kahato En Tupana wato'e mi'i hawyi mekewat ahẽku wo wati­'a­tu­kuasa Tupana minug miit'in ko'i. Yt naku i kahato mi'i tã are.
JAM 3:10 Wẽtup ahehay pyi tuwẽtem Tupana mõtypot hap i'ewyte wẽtup ahehay pyi tuwẽtem miit'in mohit hap. Yt naku i ti rat mi'i tã are. Are pãi yt aiwe'eg hin i ahẽku mope­rup'i hap ete aito. Aiwe­mõti hap kahato ahehay.
JAM 3:11 Yrasa pyi yt karãmuo i y'y tuwẽtem he rakat nop takat wẽtup ka'a pyi yn. Mi'i hap ewy yt naku i ahehay he rakat ahehay nop takat ahẽku pywiat.
JAM 3:12 I'ewyte yt karãpe i Paku'a yp kaipyi hewo muse saat ne'i. I'ewyte yt karãpe i hewo Warana yp kaipyi Wasa'i saat ne'i. I'ewyte yrasa ihy nop takat yt tum kuap i aimi'u he rakat.
JAM 3:13 Mi'i hap ewy kahato yt naku i ahehay sa'ag yt Tupana Pã'ãu miky­'esat ewy i ahẽku wo. Waku watunug wakuat yt kat i aiwe­mõ­typot hap wywo. Mi'i hap ewy waku aheĩne'en hap he rakat ewy aiminug wo'o­wese hap wywo yt kat i — Uito po'og ai'e hap aiwa­nẽtup hawe. Waku yne ahehay wakuap wo wati­mo­herep aiwe'eg hap imõtypot hamuat.
JAM 3:14 Karãpeĩ wato­'oe­ha­'y­wywi hawyi yt kat i aiwo­'o­wese hap aikai topy­hu'at. Mi'i pote yt kan hamo i — Uito ti po'og irania'in kai wato'e ne'i. Ma'ato mi'i tã mote watu­we­ma'at ne'i.
JAM 3:15 Karãpeĩ watu­'uka aiwo­'ope Tupana piat aimu'e hap kaipyi mi'i pote yt we'eg hin haria wo i wato­py­hu'at. Karãpe wato­'oe­ha­'y­wywi aiwo­'ope wato­py­hu'at irania'in yt imohey i haria ewy ne'i. Aikotã ahiag potmu­'eria ewy watoĩ­ne'en. Aikotã ta'a­tu­mi­ky­'esat yn nug haria ewy wato­py­hu'at. Yt naku i kahato watu­'uka aiwo­'ope Tupana piat aimu'e hap kaipyi. Mi'i tã watunug mote yt karãpe i Tupana mimu­'eria wato­py­hu'at ma'ato ahiag potmu­'eria watoĩ­ne'en.
JAM 3:16 Karãpe wato­'oe­ha­'y­wywi aiwo­'ope — Uito ti po'og eikai ai'e hap aipy'a piat kaipyi mi'i hawyi meiũran wanĩ­kaptia wo wato­py­hu'at itote hawyi aiwo­'o­ma­'at'i ma'at'i hap yt ikahu hin i rakat topy­hu'at aiwo­'opiat. Yt naku i are.
JAM 3:17 Ma'ato Ai'ywot atipy piat iwe'eg sakpo toĩne'en. Mi'i ti aimu'e kahato aipy'a pe towe'eg hap yt ahiag wat ewywuat hin i. Mio tã e ahepe — Pywuat kahato eweikup­te'en no Ui'ewy e ahepe. Wo'o­wese haria wo ro eweikup­te'en e. Wo'o­ky'e haria wo wo'o­po­wyro haria wo wo'o­wesat kahu hanuaria ui'ewy o eweikup­te'en o e ahepe. Waku wo'o­ky'e hap moherep hanuaria wo eweikup­te'en e ahepe. Waku wakuat nug haria wo eipe e. Waku yt wẽtup ok i miit mohit hanuaria wo eweikup­te'en no e ahepe. Waku yt typy ehay rakaria wo eweikup­te'en e. Waku to'o­'e­wy­'ewy wuat'i miit'in ky'e haria wo eweikup­te'en e ahepe aimu'e kahato hat atipy piat Ai'ywot.
JAM 3:18 Watikoi aikope aimikoi wakuat pote waku kahato hẽtyt hawyi ma'ato yt pote yt kat i aimi'u wakuat wati­puẽti aru hat hawyi. Mi'i hap ewy kahato wo'o­ky'e hap watikoi hawyi aiwo­'o­wese hap toĩne'en aru aiwo­'ope hawyi aimo­wepit hap toĩne'en aiwo­'ope. Mi'i hawyi hewo kahato aru waku hap ahete aimi'u he kahato hap ewy aimikoi he hap ewy. Uito eimu'e hat pot Tiaku are.
JAM 4:1 Koitywy ahenoi teran ehepe kat kaipyi kat kaipyi aiwu­'uka hamuat aiwo­'oehay poepyk hamuat hap tuwe­mo­herep hap ko'i. Pyno ahenoi ehepe — Uiat uipo pe atiky­'esat ewat ekat ai'e hap sa'ag kaipyi ti watu­'uka. — Uimi­ky­'esat yn waku watunug e hap kaipyi watu­'uka. Mi'i hap kaipyi yt aiwo­'o­wese i hap toĩne'en.
JAM 4:2 — Atiky­'esat ewat uiano wato'e irania'in me ma'ato — Yt atum i i'atu'e ahepe hawyi — Pyno yt etum i pote yt uiwese i aru wato'e aipy'a pe aiwy­ria'in me. Mi'i hawyi wato­'o­'auka teran irania'in ete i'atuekat ky'ewi. Yt naku i mi'i tã are. Po'og waku wahẽtup hẽtup Ai'ywot Tupana pe aimi­ky­'esat ko'i are. Yt kat i aimi­ky­'esat ko'i toĩne'en aipo pe katu­pono yt wahẽtup Ahekat nug hat Tupana pe i pote e.
JAM 4:3 Mi'i hawyi aimi­ky­'esat Tupana pe wahẽtup tuereto wen ma'ato yt tutum i aimiẽtup katu­pono yt tomi­ky­'esat ewy i wahẽtup pote. Aimi­ky­'esat ewy sa'ag ne'i wywo yn wahẽtup wote aimo­wepit hamuat kape yn wahẽtup pote yt tutum kuap i aimiẽtup.
JAM 4:4 Aikotã aheha­ry'i ete aipo­hari hap ewy yt ikahu hin i mi'i hap ewy kahato yt ikahu hin i typy ahetu­pana pote. Yt naku i typy ok miky­'esat ewy watunug Tupana miky­'esat wakuat i'ewyte mesu­wa­ro­tiaria miky­'esat ewywuat yt naku i nug haria miky­'esat ewywuat pote. Yt ikahu hin i mi'i tã watoĩ­ne'en are. Tupana ewanĩ­kaptia miky­'esat ewy watunug mote Tupana ewanĩ­kaptia wo watoĩ­ne'en. Uwe uwe mesu­wa­rotiat yt naku i nug haria seko sa'ag wo tuwe­wy­'inug mi'i hat Tupana ewanĩkap mo topy­hu'at.
JAM 4:5 Ewe'eg wo e Tupana sa'a­wy­'iwuat pupi — Uiwano yn woro­ky­'esat e ahepe. Ma'ato wẽtup tupana eweimohey hawyi uheha­'y­wywi kahato tupa­naria ete e Tupana Pã'ãu ahepe.
JAM 4:6 — Ati'a­tu­moe­saika kahato waure wuat gupte'en haria pe. Mi'iria pe atum ne'en kahato wakuap mi'iria pe ma'ato irania'in me — Uito po'og e haria ewanĩkap wo areĩne'en e Tupana ahepe. Uhegyi'at hap po'og atum paa'e haria pe e Tupana ahepe.
JAM 4:7 Tupana tiky­'esat ai'e hap — Tupana atiky­'esat emiit sese wo waku wato'e aipe­rup'i popuo e. Ui'ywot uimoe­saika kahato uiminug sa'ag ko'i akit hamo waku wato'e. Tupana eti'akit o ahiag ui'okpe totiat wato'e waku. Uimoe­saika Epã'ãu wo ahiag sopo hamo ehay wo — Motoro ui'ya­ty­pepyi ahiag me e hamo waku wahẽtup Tupana pe. Mi'i hawyi waku wato'e — Tupana etisopo ro ahiag uhã'ãg hat mesuwe waku wato'e. Mi'i hawyi ahiag topopy ra'yn meremo ai'ya­ty­pepyi Tupana pupi.
JAM 4:8 Pyno karãpe wati­ky­'esat watu­kup­te'en Tupana wywo mi'i pote waku watuwat Tupana kape aimi­ky­'esat ẽtup hamo. Aiwa­nẽtup hap kaipyi aipy'a pyi ahehay hawyi tut ahowawi aimi­ky­'esat ewy. Mi'i hawyi aikotã watuwei aipitpit potiat hap ewy ra'yn y'y pe waku mi'i hap ewy waku wato'e Tupana pe — Ui'ywot uikoho Esa'yru suu wo uimi­'a­parap sa'ag ko'i waku wato'e. Uipo ti iminug yt naku i hap ko'i pote uipo ipitpit hap ewy. Mi'i pote etikoho uipo yt naku i nug hap hep hamo waku wato'e. Ui'ywot atipy piat pe uiwa­nẽtup hap uipy'a piat typy sehay potiat uipiit yt naku i topy­hu'at. Mi'i pote etikoho kahato uhepiat i'aparap hap ko'i yne waku wato'e Tupana pe.
JAM 4:9 Waku paawa­to'e Tupana pe aiminug sa'ag upi aikotã haty kahato hap aipy'a pe hap ewy aikotã aiwy sese iku'uro hawyi haty hap ewy waku aiwak hap aipy'a pe hawyi — Tupana sakpo'e atunug sa'ag wato'e. Yt ikahu hin i atunug eete. Mi'i tupono uimõti te kahato rat uipy'a pe waku wato'e aiwak popuo. Tupana uhepiat ema'at hap ko'i yt ikahu hin i uipy'a pe uiwa­nẽtup hawe. Ahaty'u kahato yt kat i hin i uiwepit hap toĩne'en. Uimõti hap yn toĩne'en uikai waku wato'e yt kat i aimi­ky­ry'i hap wywo.
JAM 4:10 — Ehamo Tupana aremõti kahato uipy'a pe paa'e hap wywo wato'e. Pywo pe pote Tupana mimõ­typot sese ko'i wato­py­hu'at wuat'i e'at pe wuat'i ehamo.
JAM 4:11 Uiwy­ria'in yt naku i ahehay sa'ag wẽtup ok ete irania'in ete katu­pono Tupana to'e miwan me — Eiwo­'o­ky'e ro eiwo­'ope e. Mi'i pytkai wati­mohit ne'i wẽtup ok irania'in ehamo pote — Yt naku i meiẽwat miit wato'e pote Tupana wo'o­nãpin hap pun hanuaria wo watoĩ­ne'en katu­pono yt i'e hap ewy hin i watunug mote. Uiwy­ria'in yt naku i wati­mohit wẽtup ok ahehay yt naku i rakano. — Eti'a­tu­mõ­typot ro irania'in e Tupana sa'a­wy'i miwan me. Karãpe wati­'a­tu­sa­ty'i saty'i miit'in ahehay wo hawyi wati­'a­parap kahato Tupana piat ainãpin hap yt wati­mõ­typot i aiwy pote. Mi'i hawyi wati­mohit Tupana piat ainãpin ko'i katu­pono ai'e hap aiwe­nãpin hap sa'ag yn watunug. Po'og waku watunug ainãpin hap sese Tupana iwe'eg sese rakat piat ainãpin hap. Yt naku i ewei'a­tu­mohit wẽtup ok miit e Tupana pote.
JAM 4:12 Tupana yn aikuap sese sio waku aito sio yt hap katu­pono Tupana yn ni ikuap aiwa­nẽtup hap wakuap ko'i sio yt nakuap i ko'i. Mi'i tupono kat poteĩ pyno — Yt naku i en wato'e wẽtup ok miat pe yt watikuap i kahato ipy'a piat pytkai. Tupana yn ikuap wakuat sio yt hap. Mi'i yn ikuap ainug ko'i. Mi'i pote Tupana yn aheha­kye­ra'at kuap i'ewyte Tupana yn ni ai'a­piheg kuap. Mi'i pote yt naku i wato'e wẽtup ok etiat — Yt kan hamo i mekewat miit. Yt naku i kahato mi'i tã wato'e katu­pono yne miit'in Tupana miky'e ko'i tukup­te'en. — Wuat'i miit'in torania ahekat ko'i ewy tukup­te'en e Tupana ahepe. Mi'i pote yt eweimohit rei'o uhekat ko'i e Tupana yt miit'in mõtypot i haria pe.
JAM 4:13 Waku aiwe'eg wo kahato ahehay pupi — Uimi­ky­'esat yn atunug neran e hap pupi — Pyno mũki­'ite uimi­ky­'esat ewy uiwepyi areto wẽtup tawa kape hawyi itote areĩne'en mot'i hawyi itote atunug uiko iwato'in nakat uimi­ky­'esat ok tã hawyi uhekat kahato ra'yn areĩne'en itote ai'e hap pupi waku aiwe'eg wo. — Pywo ti rat ui'e hap ewy atunug aru uimi­ky­'esat ok tã hawyi uiwepyi arepotpap kahato itote hawyi ati'a­tunug iwato kahato uhekat ko'i hawyi areĩne'en hekat kahato rakano itote uito. Ta'i uimi­ky­'esat ewy yn aru ati'a­tunug e hap pupi waku aiwe'eg wo uiwy­ria'in.
JAM 4:14 Katu­pono yt watikuap hin i aikotã mũki­'ite aipo­re­'i­hot'ok hap pytkai i aikotã aru watoĩ­ne'en sio are. Tupana yn mi'i tã kuap hat i'ewyte yt watikuap hin i karania e'at re aheĩne'en hamuat hap ko'i. Ta'i aikotã hunete y'y he'yhig am hawyi atpo­sake hawyi yt kat i ra'yn toĩne'en itote. Mi'i hap ewy kahato aheĩne'en hap topy­hu'at mesu­wa­rote. Ta'i aheĩne'en porap i hawyi aiku­'uro ra'yn meremo hap ewy watoĩ­ne'en mesuwat yi tote uiwy­ria'in.
JAM 4:15 Mi'i pote po'og waku wato'e aipy'a pe — Tupana atunug neran emiky­'esat ewy po'og waku wato'e. Tupana etum uhepe ehesaika hap uipo­wyro hamuat. Mi'i pote ti aru areto motpap nug hamo po'og waku wato'e aipy'a pe.
JAM 4:16 Yt naku i kahato watu­we­mo­wato kahato ahehay wo — Atunug kuap yne ai'e hap ete uiwy­ria'in. Yt naku i wato'e — Uito po'og yne miit'in kai ai'e hap ete. Yt naku i aito wato­py­hu'at aiwehay pyi. Yt naku i — Uito po'og ekai e hano wato­py­hu'at.
JAM 4:17 Uimi­mu­'eria karãpe watikuap kat som waku Tupana tiky­'esat watunug hap hawyi ma'ato yt watunug i imiky­'esat ewy hawyi wati­'a­parap kahato Tupana pe yt watunug i imiky­'esat pote. Yt nakuaria i wo wato­py­hu'at yt kat i hin i watunug pytkai. Mi'i tã hap atiky­'esat eweikuap ta'yn uiwy­ria'in are uito Tiaku.
JAM 5:1 — Eiwe'eg wo o hekat rakaria. Eiwe'eg wo o wo'o­po­'oro i po'oro i te'en ne'i haria pupi e Tupana. Koitywy yt pya hin i eiwo­'o­kak'i hamuat hap e'at e Tupana. Yt pya hin i kynkyn­'ei'e hap e'at ehepiat ho'opot hap wuat'i e'at piat hamuat e katu­pono eiwe­moekat kahato miit'in ma'at hap kaipyi e Tupana.
JAM 5:2 Mekewat e'at pe ti aru eimi­soknug ni hokpyp ne'i ra'yn topy­hu'at e Tupana. Ehesokpe sok ko'i nupi'a yat no ra'yn topy­hu'at yne yne aru e Tupana.
JAM 5:3 Ehekat ikahuria rakat ahyt aru yt kan hamo i ra'yn topy­hu'at i'ytyk tutu'u yne ra'yn hawyi e. Mekewat e'at ehekat ikahu miit'in mipugha wo ra'yn topy­hu'at nem ne'i pote e. Sa'a­wy'i imehit rakat yn ehekat ma'ato mekewat e'at pe i'ytyk kahato rakano ra'yn topy­hu'at ikamhig sa'ag nakano ra'yn topy­hu'at e. — Kat pote kahu yt eweimõ'ẽ i ehekat ko'i nimo te uruepe i'atu'e ti aru ehepe ewyria'in hatek takaria. Kat pote yt ehegyi'at hin i uruepe nimo i'atu'e aru ehepe ihaky­'e'i rakaria. — Mi'i hawyi ehekat ko'i i'ytyk kaipyi ti aru ta'a­tukuap meremo ra'yn yt ehegyi'at hin i kahato hap e Tupana — Uiwano yn neran e haria pe. — Ehekat ahyt topy­hu'at aru aria wato mi'u wo e Tupana. Mi'i hawyi eipe ekat wuk hap pe eweikup­te'en at ka'ap ei'a­piheg hamuat wuat'i e'at pe e Tupana aru hatek takaria pohari haria pe.
JAM 5:4 — Sa'a­wy'i eimikoi eropat haria i'atu­potpap kahato eiko nug hamuat pytkai ma'ato yt kat i ewetum i'atuepe. — Pywo ti rat mũki­'ite aru atum eipotpap sa'up ewei'e pytkai yt kat hin i ewetum i'atuepe. Yt ehegyi'at i hap kape ara'a­kasa yne ra'yn Uito e aru Tupana yt imõ'ẽ i haria pe. I'atue­sy'at kahato ehemiit'in e. Yt i'atue­sokpe hin i rakaria mi'iria. I'atue­ha­ky­'e'i kahato te'e­re­potpap at ka'ap pytkai yt kat hin i ewetum e. Sa'a­wy'i kak'i­'a­tu'e kak'i­'a­tu'e ahetiat — Tupana yt urupoi i urupo­'oro haria uruka­'i­waria hekat rakaria i'atu'e uhepe e. Yt ta'a­tu­mõ'ẽ hin i uruepe urupotpap hap sa'up i'atu'e irane to'o­kak'i popuo uhepe ihaky­'e'i rakaria e Tupana.
JAM 5:5 Yt ehegyi'at hin i eipe e aru ehepe katu­pono eiwe­mo­wepit hap yn ewetunug eheĩne'en hap turan e. Kat ko'i kat ko'i eimi­ky­'esat ok tã ewei'a­tunug atunug kahato. Ei'yat wakuat pe ienuk hap yn ewetunug. Eimi'u ikahu kahato ma'ato eiweran ewei'a­tu­mo'ok kahato. Yt kat i ewetum hesy'at sese rakaria pe e Tupana aru ihaky­'e'i rakaria ma'at haria pe. Aikotã sa'a­wy'i eihũria ewei'a­tu­mokyt kahato awati wo i'atu­'uka hamuat i'u hamuat hap ewy kahato eiperia tukup­te'en ikap kahato rakaria wo e aru Tupana yt hegyi'at rakaria i pe. Ikap kahato rakaria wo koitywy eweikup­te'en eihũria ewy e. Eikap ti waku kahato aria mi'u wo pote mesup ta'yn waku pe eweikup­te'en kahato ma'ato uimi­'a­piheg wuanuaria wo e Tupana mi'iria pe yt ta'a­tupoi hin i ta'a­tu­potpap nug haria hawyi.
JAM 5:6 — Sa'ag nug haria ti eipe katu­pono miit'in wakuat kuasa haria wo eweikup­te'en are'e aru ehepe e Tupana. I'atuekat ky'ewi — Ewei'a­tu­'uka mi'iria ewei'e yn esura­ra'in me wakuap yn ta'a­tunug pytkai e. Ewei'a­tu­'uka yt kat i sa'ag i'atu'e i ehepiat pytkai e aru Tupana yt hegyi'at i rakaria hekat rakaria pe.
JAM 5:7 Uiwy­ria'in waku aipe­rup'i po'og po'og watoĩ­ne'en Iesui ekatup haype miit'in aimo­weu­ka'i pytkai. Aikotã aikopiat aimikoi wahe­katup hepamo hap ewy. Sa'a­wy'i watikoi hawyi i'aman hap wahe­katup imoẽtyt hamo. Mi'i hawyi wahe­katup i i'aman tuereto hap imotag hamo. Perup'i popuo wahe­katup haat hap kape imo'a­puhup hamuat kape. Mi'i hap ewy waku wahe­katup Iesui ut hap.
JAM 5:8 — Yt pya hin i ti Iesui ut hap waku wato'e yn aiwo­'ope aiwe­moe­saika hamo. Yt naku i watoiat hut hap mohey hap katu­pono tut aru Aika­'iwat. Waku wahe­katup hut hap aiwe­mo­wepit hap wywo.
JAM 5:9 Uiwy­ria'in yt naku i wato­'oehay petek petek hekatup haype katu­pono wo'oehay petek petek haria pe ti aru — Yt nakuaria i eipe e aru Tupana. Yt pya hin i aika­'iwat ut hamuat uwe waku uwe yt naku i to'e hamo. Yt pya hin i Aika­'iwat ut hap aikotã oken'ypy og me hap ewy yn ni toĩne'en meke — Areke teran e hat ewy toĩne'en.
JAM 5:10 Uiwy­ria'in yt naku i ti wati­waure aipy'a pe sa'a­wy­'iwuat Tupana ehay moherep haria piat ho'opot hap ko'i. Ta'i nimo te ti ta'a­tu­ho­'opot pot'i kahato miit'in miky­ry'i ta'a­tuetiat imohey hap wywuat hap. Ta'i yt i'atu­wẽ­pohep hin i ti Tupana e hap moherep hap ete miit'in ti'a­tu­sa­ty'i saty'i pytkai. Mi'i tupono waku watunug mi'iria ewy.
JAM 5:11 Mi'iria sa'a­wy'i toko­ka'at ra'yn ho'opot hap sakpo. Mi'i tupono koitywy Tupana mi'a­tue­waku ko'i wo tukup­te'en eimi­'a­tu­mõ­typot no ra'yn tukup­te'en. Watikuap ta'yn ti aikotã nimo aha'a­se'i Io ho'opot pot'i kahato hap ma'ato yt toiwaure hin i Tupana mohey tepiat hap. Imohey mot'i hap po'og iwato ho'opot hap kai. Mi'i pote ho'opot kahato hap sakpo tokosap ase'i Io. Mi'i pote Tupana mipoi­tynug wo ra'yn topy­hu'at. Uiwy­ria'in Tupana tikuap kahato ahepiat ho'opot hap. Ta'i Aika­'iwat aiky'e kahato toha­ty'u kahato ahepiat ho'opot hap.
JAM 5:12 Ahehay pywo piat hap yn Tupana tiky­'esat. Karãpe irania'in me — Atunug aru wato'e pote waku watunug ai'e hap ewy hap. Yt naku i aheso — Atunug aru ai'e hap ete. Ma'ato aheso hap ne'i pote Tupana ai'a­piheg e. I'ewyte ti yt naku i Tupana set wati­pehik — Atunug aru e hap ete. Yt naku i wato'e — Yt atunug i aru ui'e hap ewy pote waku Tupana ui'auka wato'e. Po'og waku — Atunug aru mehĩ mana wato'e hawyi waku watunug ai'e hap ok tã po'og waku are. I'ewyte yt naku i miit'in set wati­pehik pywo ai'e hap moheg hamo. Ma'ato Tupana tiky­'esat pywo piat yn ahehay hap — Atunug aru ai'e hap ete.
JAM 5:13 Ahatek pote wate­moe­ha­ma­na'i hawyi waku wahẽtup Tupana kape aika­wiano hamuat hap. Ma'ato toĩne'en ahehãite hap aiwepit hap yn ahete pote waku watu­wehum Tupana ete aiwepy hap wywo.
JAM 5:14 Wẽtup ok i'ahu aipy­'a­setpiat pote waku mekewat i'ahu rakat ti'a­tu­kaykay tuwe­wawi Iesui mohey haria apykok haria ko'i ta'a­tu­hẽtup Tupana kapiat hamo i'ahu kosap hamuat hap. Mi'i hawyi ikap takat mohag wo waku ta'a­tupag i'ahu rakat ete. Mi'i hawyi waku ta'a­tu­hẽtup — Tupana etimoe­hãite kahato mesuwat i'ahu rakat esaika hap mywo Esa'yru Iesui mõtypot hamo waku i'atu'e itote i'ahu rakat moehãite hamuat.
JAM 5:15 Mi'i tã ta'a­tunug Iesui mohey hap mywo pote ti aru ipoĩ'ãm na'yn te'yni pyi ihãite ra'yn topy­hu'at i'ahu rakat. I'ewyte iminug sa'ag kaipywiat i'ahu pote Tupana timo­weityk ta'yn iminug yt naku i sa'ag hap ko'i.
JAM 5:16 Mi'i pote waku wahenoi aiwo­'ope aiminug sa'ag ko'i i'ewyte waku wahẽtup kahato Tupana kape aiwy­ria'in kawiano hamuat. Wahẽtup aipy'a pyi pote aiwo­'o­poi­tyro kahato hap ewy topy­hu'at ahete aiwo­'o­ky'e hap ewy aiwo­'ope. Mi'i hawyi toĩne'en kahato aimoe­hãite kahato hap Tupana kaipywiat hap. Aipy'a hãpyk kahato Tupana wywo hawyi meremo tutum aimiẽtup niatpo kahato rakat pytkai. Meremo tutum waku miẽtup ko'i.
JAM 5:17 Sa'a­wy'i mekewat Tupana ehay moherep hat Eria ai'e­wywuat miit kahato ma'ato tohẽtup kahato tepiat imohey kahato hap mywo yn — Tupana etipyhyp to i'aman mye'ym anu 6 ewaty hap atiky­'esat e. Mi'i hawyi hẽtup ewy Tupana tunug itote.
JAM 5:18 Mi'i hawyi tohẽtup i ra'yn — Etum i ro i'aman e hawyi i'aman kahato i ra'yn hap Tupana tunug i'e hap ewy. Mi'i hawyi itote ihãite kahato i ra'yn i'atu­mikoi ko'i.
JAM 5:19 Uiwy­ria'in toĩ wẽtup ok wẽtup ok tuereto aipy­'a­set­piaria wemig Tupana po piat haria ta'a­tu­minug sa'ag ky'ewiat haria. Waku mi'iria watekyi ahehay wo te'e­ra­'aipok Tupana ewawiat hamo.
JAM 5:20 Uwe uwe yt nakuat i nug hat pore­ro­kosap Tupana kapiat iminug sa'ag myi mi'i hat tihep wẽtup ok miit wo'o­'a­piheg hap kaipyi iminug sa'ag ahyt po pyi toipo­re­nõtem Tupana piat ieha­kye­ra'at hamo. Uiwy­ria'in yt eweiwaure ro mi'i tã nug hamo yt waure wo tei'o. Uito Tiaku ti mekewat Iesui ywyt sese. Uheyke'et sese Iesui uruty Maria pote. Koitywy toran na'yn uimiwan.
1PE 1:1 Uito ti Peteru Aipo­typot Iesui eropat hat sese uito. Uito ti Iesui mipo­'oro miit'in mu'e hanuat ihay moherep hat uito are. Uiwy­ria'in Iesui mohey haria mesup uimiwan Iesui etiat atipo­'oro ehowawi aikope aikope eweikup­te'en mesuwat yi wato hap ok tã are. Atipo­'oro einãpin hamuat ehowawi tama Puntu puaria i'ewyte yi Karasia puaria kape. Atipo­'oro wy ui'e hap yi Kapa­tusia totiaria kape i'ewyte yi wato Asia puaria kape i'ewyte yi Pitinia puaria kape. Mesuwat sehay miwan miat atipo­'oro ehowawi uiwy­ria'in torania imohey haria kape aikope aikope eweikup­te'en hap kape. Sa'a­wy'i aitoria yne watu­kup­te'en tawa wato Ieru­sarẽi me ma'ato mesup ahewa­nĩ­kaptia aimohan mohan kahato ai'a­tu­'uka hamo mesuwat yi wato hap ok tã are. Mi'i pote atipo­'oro ehowawi uimiwan uipot­mu­'eria aikope aikope wesytpok hap ewywuaria hap kape uimiwan atipo­'oro.
1PE 1:2 Sa'a­wy'i sese ti Ai'ywot atipy piat Tupana ai'airo Tosa­'yru sese eropat hanuaria wo. Mesuwat yi e'yianmete Tupana aikuap kahato yt uwe i te aitoria mesu­wa­ro­tiaria pytkai aikuap yne. Pywo ti rat sa'a­wy'i Tupana to'e tuwepe — Meiũran ti aru atipo­'oro Uha'yru sese wuat'i miit'in uiminug ko'i Potypot nuat e tuwepe. Uwe uwe aru topy­hu'at Uha'yru mohey haria wo mi'iria ti aru uimi­moe­waku ko'i wo tukup­te'en. Katu­pono Uha'yru suu wo ati'a­tu­moe­waku mi'iria hawyi Uipã'ãu Wakuat atum i'atupiit piat ieĩne'en hanuat e Tupana tuwepe nimo te yt kat i te tutunug ne turan. — Mi'i hawyi Uipã'ãu yne i'atupiit puo atopag i'atu­moe­waku hamo e ahepe. Mi'i hawyi atiky­'esat kahato imohey haria imiky­'esat yne nug haria wo hap etiat atiky­'esat. Mi'i hap atiky­'esat e Tupana Ai'ywot koro sa'a­wy'i sese atipy piat pe.
1PE 1:3 Sa'a­wy'i Aipo­typot Iesui iku'uro hawyi Tupana timoieĩ­ne'en gu'uro pyi. Sa'a­wy'i yt wato­mohey hin i aiku­'uro hawywiat aheĩne'en i hamuat hap. Ma'ato mesup koitywy wato­mohey kahato kat pote Ai'ywot Tupana tihep ta'yn Aika­'iwat iku'uro hap kaipyi. Mi'i pote koitywy — Waku kahato En Tupana. Po'og wakuat torania kai uruto'e kat pote egyi'at kahato uruepe. Uruky'e kahato En. Po'og po'og torania miit'in kai uruky'e hat En katu­pono etihep ta'yn Uruka­'iwat hyp hawyi uruto'e.
1PE 1:4 Waku kahato En Tupana katu­pono koitywy urutu­kup­te'en esa'y­ru'in esaki­'yt'in. Mi'i pote ewywo irane urutu­kup­te'en wuat'i e'at pe aru atipy pe e'yat pe. Mi'i tote urutu­kup­te'en kat pote esa'y­ru'in esaki­'yt'in uruto pote. Uruekat atipy piat yt tuweityk kuap i. Yt tuwepik pik kuap i. Yt ikahuro kuap i katu­pono iheg me toĩne'en ai'yat pe atipy piat Tupana uruto'e.
1PE 1:5 Tupana pywo ti rat En yn Urueha­kye­ra'at kuap hat ereĩne'en. Koitywy uruto emẽpyt'in pote Uru'a­pykok hat kahato En Tupana. Esaika kahato En. Uruimohey kahato En. Meiũran aru yne miit'in tikuap uruimohey kahato En hap Urueha­kye­ra'at Hat En hap. Mi'i pote urutu­kup­te'en aikotã hekat kahato rakat ewy katu­pono epowat'yp yne tukup­te'en urupo pe Tupana. Hekat rakat En ewy urutu­kup­te'en. Yt urui'atoiat hin i aru katu­pono urumoe­saika ra'yn Epã'ãu wo. Mi'i pote yt wẽtup ok i uruto ho'o­wasat rakaria wo uruto'e ewawi Tupana.
1PE 1:6 Urumo­wepit kahato En. Mi'i pote urutu­wehum kahato ewawi Tupana. Uruho­'opot kahato wen mesuwe ma'ato yt mot'i i. Uruho­'opot hap uruipuẽti tuereto ma'ato tokosap aru uruto'e. Uruiã'ãg kahato ahiag. Urumo­'a­rot'i kahato ahiag. Uruiã'ãg kahato urusatek hap wywo uruto'e Tupana pe.
1PE 1:7 Uiwy­ria'in waku aho'opot hap katu­pono mi'i kaipyi Tupana tikuap tomohey sese sio yt haria aito are. Mesu­wa­rotiat miit'in tikat kahato mekewat nu mehit rakat hekat kahato rakat kawiat Uru e hap het rakat. Ma'ato i'ytyk kahato i'atu­mi­puẽti yi puat pote. Mi'i hawyi ta'a­tupag aria pe hawyi ihywap ta'yn hawyi i'ytyk hap toto yne. Mi'i hawyi imehit hawyi ikahu kahato mekewat nu Uru kawiat. Mi'i hap ewy kahato aito uruwy­ria'in are. Uito ti Peteru uhepiat ho'opot hap uhatek hap miit'in miky­ry'i hap aria ewy i'ytyk uhepiat hap ewy hep hamuat. Mi'i hawyi po'og hesaika rakat areĩne'en Tupana mõtypot hamuat. Waho­'opot turan mekewat Tupana mõtypot hap Tupana kapiat aiwehum hap po'og po'og aimoe­saika sa'a­wy­'iwuat kai are. Meiũran aru Aika­'iwat Aipo­typot Iesui tuut mesuwat yi kape tuut Morekuat nuat hamo. Mi'i hap e'at pe ti aru aitoria watu­kup­te'en imehit rakaria ewy aikotã mekewat Uru mehit hap ewy are. Kat pote waho­'opot hap kaipyi waku pe ra'yn watoĩ­ne'en. Mi'i hawyi aikotã hekat rakaria ewywuaria wo watoĩ­ne'en mekewat nu imehit rakat ewy watoĩ­ne'en mekewat e'at pe aru Iesui ut hap e'at pe ti aru. Mi'i hap e'at pe urumo­wepit kahato mesu­wa­rotiat uruepiat ho'opot hap katu­pono yt urui'atoiat hin i Iesui mohey uruepiat hap urusatek pytkai uru'ahyk ahyk pytkai i'ewyte urupyhik pytkai uru'a­tu­'uka pytkai are.
1PE 1:8 Ta'i atikuap kahato Iesui uito katu­pono ara'a­kasa uito ma'ato eiperia yt ewei'a­kasa i eheha wo Aika­'iwat Iesui. Ma'ato yt ewei'a­kasa pytkai i eweimohey kahato ra'yn. Mi'i hawyi eimo­wepit hap kahato toĩne'en imohey hap kaipyi. Mekewat wepit hap Iesui tum tomohey hap kaipyi. Waku kahato mekewat. Yt wati­mo­herep kuap i miit'in me Iesui piat aimo­wepit sese hap. Ahowapy kahato Iesui mõtypot hap wywo mi'i pote aimo­wepit kahato po'og torania kai. Yt heremo i ma'ato aipy'a pe toĩne'en aimi­ky'e sese aimi­mohey Iesui are.
1PE 1:9 Sa'a­wy'i wo'o­wy­'inug Iesui mohey hap ete. Koitywy wato­mohey te. Mũki­'ite ti aru wato­mohey te. Sa'a­wy'i wato­mohey hawyi aheha­kye­ra'at aipy'a aipiit piat aiwa­nẽtup hap yne toieha­kye­ra'at. Meiũran aru wuat'i e'at pe aheha­kye­ra'at hap toĩne'en katu­pono mekewat e'at pe heremo kahato Tupana miium sa'a­wy­'iwuat ahepiat aheha­kye­ra'at hamuat are.
1PE 1:10 Sa'a­wy'i sese ahe'yian­miaria Tupana ehay moherep haria henoi kahato aikotã aru Tupana topy­hu'at hegyi'at kahato wuat'i ywania piat hap ete i'atuehay. Aikotã aikotã aru tutunug hap ete i'atu'e Iesui etiat. Ta'a­tu­mo­herep kahato aikotã Tupana aheha­kye­ra'at hap. Ta'a­tukuap teran sese sa'a­wy'i ma'ato i'ypyryp hap ewy ta'a­tukuap. Ma'ato ta'a­tu­mikuap ok tã ta'a­tu­mo­herep Tupana Pã'ãu kaipyi ahepe Iesui ut hap etiat katu­pono miwan myi sa'a­wy­'i­wuaria imoherep Tupana yn mikuap ko'i sehay are.
1PE 1:11 Kat e'at pe aru Aipo­typot Iesui tuut e hap kape te'e­ru­wa­nẽtup kahato ta'a­tukat kahato. Ta'i sa'a­wy­'i­wuaria Tupana ehay moherep haria i'atuehay kahato Aika­'iwat Pã'ãu mimo­herep ko'i ete. Ta'i ta'a­tu­mo­herep yianmete aikotã aru Aipo­typot iku'uro ho'opot hap rokire hamuat ko'i ta'a­tuwan kahato miwan me. I'ewyte ta'a­tuwan kahato Tupana Pã'ãu kaipyi aikotã me Aipo­typot wuat'i miit'in potypot no topy­hu'at hamuat ko'i ta'a­tuwan are.
1PE 1:12 Aikotã i'atu­mu­'etu wuat ewy Tupana Pã'ãu timo­herep i'atuepe aikotã aru Aipo­typot toku­'uro hap e'yianmete toĩne'en hap ko'i aikotã tuwẽtem gu'uro pyi hap ta'a­tukuap kahato Tupana Pã'ãu kaipyi. Mi'i hawyi put'ok'e mekewat e'at pe hawyi uruepe topot­mu­'eria sese pe tuwe­mo­herep ta'yn Aipo­typot. Mi'i hawyi uruimo­herep ta'yn ehepe i'atu'e hap ewywuat sa'a­wy­'iwuat Tupana ehay moherep haria e hap ewywuat. Uruta­'a­kasa yne i'atu'e hap ewywuat Aika­'iwat moherep hap. Uruta­'a­kasa yne mi'i hawyi mesup uruimo­herep yne Iesui etiat ehepe uru'a­kasa hap ko'i. Uruimo­herep kahato uruehay wywo Iesui etiat Tupana Pã'ãu urupiit piat uruwa­nẽtup hap ko'i. Uruimo­herep mesuwat sehay wakuat Iesui etiat kat pote uruta­'a­kasa ra'yn Tupana Mipo­'oro atipy kaipywiat. Koitywy uruikuap Tupana mieha­kye­ra'at ko'i wuat aito hap. Mekewat atipy piaria te'e­ru­wa­nẽtup kahato kat pote sa'a­wy'i yt uruimohey hin i ma'ato mesup uruimohey ra'yn. Sa'a­wy'i yt Tupana kape hin i uruwa­nẽtup hap. Koitywy Tupana kape yn na'yn uruwa­nẽtup hap. Mi'i hap ete atipy piaria te'e­ru­wa­nẽtup kahato. Ta'a­tukuap teran haype ma'ato yt ta'a­tukuap i kat pote mesup Tupana mieha­kye­ra'at ko'i wuat ra'yn mesup uruto are.
1PE 1:13 Uiwy­ria'in meiũran ti aru Tupana tipo­'oro Aipo­rekuat nuat. Tuwe­mo­herep mesuwat yi tote i ra'yn wuat'i ehamo. Mi'i pote waku aiwa­nẽtup hap Aheha­kye­ra'at hat kape yn watu­wa­nẽtup. Yt naku i aiwa­nẽtup hap kowo'i kowo'i ne'i. Waku wahe­katup kahato Aipo­typot hut hap kape iwemo­herep hap kape katu­pono mekewat e'at pe tuut irane Aheha­kye­ra'at hat. Mi'i hawyi iwese kahato ahete hegyi'at kahato ahepe tomohey haria aito pote. Mi'i pote waku aikotã watopag aiwe'ok kytyt hap aipiit ete ahesokpe moheg hamo mi'i hap ewy waku wati­moheg kahato aiwa­nẽtup hap Iesui kape yn hap ewy are ehepe uiwy­ria'in. Uito ti Peteru are.
1PE 1:14 Pywo ti rat waku aito Tupana mẽpyt'in no watu­kup­te'en aikotã Ai'ywot miky­'esat ewy yn waku watunug are. Waku i'ywot kahato rakat ewy watoĩ­ne'en Sa'a­wy'i watu­kup­te'en aikotã piku piku ko'i ewy yt i'ywot rakaria ewywuat i watoĩ­ne'en aito uiwy­ria'in. Ma'ato watunug mesu­wa­ro­tiaria ainãpin hap ewy yn pote sa'ag ko'i upi yn watuwat. Watunug sa'a­wy­'iwuat aimi­ky­'esat ewy pote yt watunug kuap Ai'ywot atipy piat miky­'esat ewy hin i are. Mi'i hawyi mekewat e'at pe yt we'eg hin i haria wo wato­py­hu'at. Aipiit miky­'esat ko'i aiwuk kahato yne yt naku i nug ahepiat hap ko'i. Ma'ato mesup Ai'ywot toĩne'en na'yn. Mi'i hawyi yt piku piku ko'i ewy i ra'yn aito. Mi'i pote waku Ai'ywot atipy piat miky­'esat ewy yn waku watunug are.
1PE 1:15 Ai'ywot atipy piat waku sese rakat. Yt kat i hin i i'aparap hap Tupana kaipyi. Mi'i tupono waku aito Ai'ywot Tupana ewaku hap ewy waku watunug mesu­wa­rote aheĩne'en turan are.
1PE 1:16 Katu­pono sa'a­wy'i Tupana to'e — Uiat uiminug ko'i wyti hãpyk yne e. Yt karãpe i ati'a­parap Uito Tupana pote. Mi'i pote atiky­'esat kahato eiperia ui'e­wy­wuaria wo e Tupana sa'a­wy'i tomiwan me.
1PE 1:17 Pyno eipe wyti Tupana saki­'yt'in Tupana sa'y­ru'in eipe mi'i pote i'ewyte Tupana wywuat ihay rakaria wo eipe pote pyno waku eiwe'eg kahato mesu­wa­rote eiminug sa'ag ko'i pupi i'aparap ehepiat hap ko'i pupi are. Kat pote meiũran Ai'ywot Tupana ti'a­tu­'a­piheg kahato yt naku i nug haria sio aitoria hekat rakaria sio yt sio aitoria miit'in akag ko'i sio yt sio aitoria ikuap kahato rakaria sio yt are. Mekewat e'at pe Tupana ti'a­tu­'a­piheg miit'in i'atu­minug sa'ag upi. Toimo­herep yne aiminug sa'ag ko'i. Yt toimõ­typot hin i aiminug sa'ag miit'in akag aito pytkai. Mi'i pote ti waku aiwe'eg wo kahato ahepiat i'aparap hap pupi are.
1PE 1:18 Mi'i tupono waku wati­koho kahato aiminug sa'ag ko'i Aika­'iwat suu wo. Waku wati­mo­weityk yne aiminug sa'ag ko'i are. Ahekat yt aheha­kye­ra'at kuap i kat pote ahekat yt toĩne'en mot'i i pote. Meiũran ahekat ipyp i'ytyk topy­hu'at aikotã ahewahi aiminug imehit rakat ewy Paratu kawiat Uru kawiat ewy. Porap ne'i imehit ma'ato meiũran yt ikahu i hap ewy ra'yn topy­hu'at. Mi'i ko'i wo yt wati­kyi'at kuap i aheĩne'en wuat'i e'at piat hamuat hap are. Uiwy­ria'in sa'a­wy­'i­wuaria ai'y­wania ai'y­wot'in tikyi'at teran wuat'i e'at piat ta'a­tuieĩ­ne'en hamuat hap. Kat pote ta'a­tunug neran Tupana mowepit hamuat ta'a­tue­sokpe ete ta'a­tu­mi'u ete ta'a­tueko ete ma'ato yt put'ok'e hin i mu'ap Tupana kapiat ete. Koitywy watikuap yt mi'i kaipyi i aheha­kye­ra'at hap aheĩne'en wuat'i e'at piat hamuat hap are.
1PE 1:19 Koitywy watikuap ta'yn mekewat sa'up iwato'in nakat kaipyi aheha­kye­ra'at hap. Ta'i Iesui Aipo­typot suu kaipyi yn aheha­kye­ra'at hap. Koitywy watikuap ta'yn Aika­'iwat iku'uro aikotã sa'a­wy­'i­wuaria ti'auka ta'a­tu­hũria Kuteiru hap ewy. I'atu­hũria ikahuria kahato rakat yt kat i ipiit ete sa'ag hap ewy ikytsig kahato rakat ta'a­tu­'auka Tupana mowepit hamo hap ewy Aika­'iwat Aipo­typot iku'uro. Mi'i hawyi huu ta'at yne itote Tupana kapiat aheha­kye­ra'at hap sa'up mo are.
1PE 1:20 Sa'a­wy'i sese Tupana to'e tuwepe. Mesuwat yi yt kat i te turan Tupana to'e — Atipo­'oro aru Uha'yru wuat'i ywania minug sa'ag sa'up mo e nimo sese turan. Koitywy tuwe­mo­herep ta'yn iku'uro ra'yn Tupana Sa'yru. Aihũ Kuteiru ewy iku'uro. Ga'atpo e'at iku'uro ra'yn Aika­'iwat. Howapy hap e'at pe hap ewy iku'uro are.
1PE 1:21 Mi'i pote mesup yt niatpo hin i wato­mohey Tupana aipy'a pe kat pote uruehamo Aika­'iwat toihep gu'uro pyi. Mi'i hawyi Tupana to'e itote wuat'i ehamo — Miit'in Ehakye­ra'at hanuat Mi'i Miit e. Mi'i pote koitywy Iesui yn wato­mohey aheha­kye­ra'at hamo. Waku wato'e tope — Uruimohey En yn Iesui Urueha­kye­ra'at hanuat waku wato'e Iesui pe are.
1PE 1:22 Uiwy­ria'in karãpe Aipo­typot suu topy­hu'at aheha ete aipy ete aiwa­nẽtup hawe aipiit ete mi'i hawyi ikytsig kahato rakat ewy topy­hu'at aikai. Yt sa'a­wy­'iwuat aiminug sa'ag ko'i ewywuat hin i. Mi'i hawyi waku watunug yne Tupana mimo­herep tomi­ky­'esat ko'i pywuat ko'i waku watunug. Yt watunug kuap i wen ma'ato Tupana Pã'ãu aimoe­saika kahato mekewat pywuat sehay nug hamo are. Waku Tupana Pã'ãu ainug miit'in ky'e sese haria wo yt kat i aheso hap aipy'a piat miit'in ky'e hap wywo ma'ato aipy'a pyi miit'in ky'e sese hap yne ahesaika hap wywo. Waku wati­'a­tu­ky'e miit'in Tupana Pã'ãu aimoe­saika hap kaipyi are.
1PE 1:23 Kat pote aito Tupana sa'y­ru'in sese Tupana saki­'yt'in sese ewy aitoria katu­pono Tupana Pã'ãu aity ewy aimo­herep pakup i ra'yn. Sa'a­wy'i aimo­herep haria aity ai'ywot. Aipiit nug hap ta'a­tunug mekewat to'u­pi'a kaipyi mekewat iã'ỹi kaipyi ainug. Mi'i ti waku kahato wen ma'ato yt toĩne'en mot'i i aipiit. Aikotã aipiit nug haria ewy aiku­'uro ne'i are. Meiũran iku'uro ra'yn i'atu­minug aipiit ma'ato aiwe­mo­herep pakup i hap Tupana kaipywiat mekewat hã'ỹi Tupana ehay aity ai'ywot ewy topy­hu'at. Mi'i ti ainug wuat'i e'at piat aimoieĩ­ne'en hamuat. Yt karãpe i ikahuro Tupana ehay ma'ato toĩne'en wuat'i e'at pe. Mi'i kaipyi aiwe­mo­herep hawyi watoĩ­ne'en wuat'i e'at pe are.
1PE 1:24 Ma'ato aito ti ipu'i kawiat. Aipiit aimikoi ewy katu­pono meiũran ti aru ipot'i hawyi igag na'yn hawyi iku'uro. Aimi­mõ­typot mesu­wa­rotiat aikotã ipohyt ewy ikahu kahato sa'a­wy'i ma'ato meiũran ta'at ra'yn hawyi yt ikahu i ra'yn hap ewy topy­hu'at. Mi'i hap ewy watoĩ­ne'en mesu­wa­rote aimikoi ewy ipohyt ewy are.
1PE 1:25 Ma'ato Tupana e hap wuat'i e'at pe toĩne'en. Yt aimikoi i yt pohyt pot'i rakat i ewy Tupana ehay. Sehay wakuat tuwe­mo­herep wuat'i miit'in me. Mi'i tã ti sehay wakuat atimo­herep ehepe uiwy­ria'in are. Uito ti Peteru are.
1PE 2:1 Pyno uiwy­ria'in waku watoĩ­ne'en Tupana mẽpyt'in no ipakup i rakaria ewy kurin nakaria ewy. Aikotã mihy sym haria ewy watu­kup­te'en katu­pono Tupana mimo­herep pakup i ko'i ra'yn aito. Mi'i tupono waku watoiat yne aiminug ko'i sa'a­wy­'iwuat yt naku i hap ko'i. Mekewat miit'in ma'at hap ko'i mekewat miit'in mohit hap ko'i mekewat typy sehay nug hap ko'i mekewat irania'in ekat ky'esat hap ko'i mekewat sehay sa'ag nug hap ko'i mekewat miit'in ekat ky'esat hap ko'i uheha­'y­wywi hap ko'i waku watoiat yne aikotã watoiat ahesokpe yt ikahu i rakat hap ewy waku watoiat.
1PE 2:2 Kat pote Tupana saki­'yt'in Tupana sa'y­ru'in sok aito mi'i pote waku wati­ky­'esat kahato Tupana ehay aikotã aimẽpyt hit tiky­'esat kahato mihy hap ewy. Pyno watu'u kahato Tupana ehay hawyi ahehãite aikap aipiit hesaika aimotag hap topy­hu'at aikotã aimẽpyt pakup mihy ete itag hap ewy.
1PE 2:3 Pyno watikuap kahato mi'u ete aimotag hap. Mi'i hap ewy wahã'ãg Aika­'iwat egyi'at hap ete aiky'e hap ete. Mi'i hawyi watikuap ta'yn iwese kahato rakat he kahato rakat Aipo­typot Iesui hap.
1PE 2:4 Uiwy­ria'in sa'a­wy'i mesu­wa­ro­tiaria ipun kahato haria Aika­'iwat ta'a­tu­mi­mohey wuanuat. Aikotã miit'in tikat nu ikahu rakat ta'a­tu'yat nug hamuat hap ewy. — Wẽtup waku wẽtup yt naku i watikat nu turan. Mi'i hap ewy sa'a­wy­'i­wuaria ta'a­tu­pugha mekewat nu — Yt naku i meimẽwat nu ai'yat nug no i'atu'e. Mi'i yt kan hamo i ai'yat ha'awy nug hamo i'atu'e. Mi'i hap ewy ti Iesui topy­hu'at Tupana mi'airo ai'yat nug nu kawiat hamo. Ma'ato mi'i Nu hekat kahato rakat mekewat ai'yat wuat — Po'og waku torania kai mesuwat Nu e'yat nug hamo e Tupana. Uimi­'airo kahato mesuwat Nu e Tosa­'yru Iesui etiat. Waku etopag mesuwat Nu sa'a­wy­'iwuat e'yat nug hamo e Tupana ahepe.
1PE 2:5 I'ewyte aitoria Iesui mohey haria wato­py­hu'at nu ko'i ewy Tupana yat nug hamuat hap ewy. Pyno i'atu kahato nu Tupana yat nug hap wẽtup nu uito wẽtup nu en wẽtup nu eipe hap ewy. Tupana yat nu ko'i aito hap ewy wato­py­hu'at. I'ewyte ti aito Tupana epa'i ko'i ewywuat watoĩ­ne'en katu­pono ahehay kuap Tupana wywo aikotã sa'a­wy­'i­wuaria ta'a­tu­'a­tu­'uka ta'a­tu­hũria hawyi ta'a­tuwuk Tupana mowepit hamo. Mi'i hap ewy watunug mesup. Wati­mohey Iesui Aipo­typot hawyi Tupana mowepit haria wo wato­py­hu'at Tupana hũ Aika­'iwat pote. Mi'i aihũ watum Tupana pe imowese hamuat imowepit hamo aikotã pa'i ko'i ewy aito.
1PE 2:6 Mio tã Tupana to'e sa'a­wy'i tehay moherep haria wẽ pyi miwan me. Mio tã e — Toĩne'en uhetama pe tawa Ieru­sarẽi me yity'ok Siãu note aha'a­wynug uimõ­typot yat sese mekewat Nu wato tote mekewat Nu uimi­'airo tote mekewat Nu ikahu rakat rote mekewat Nu hekat rakat rote aha'a­wynug uimõ­typot yat sese e. Sa'a­wy'i sese atopag mekewat Nu yity'ok Siãu tote. Irania'in yt tiky­'esat i mekewat Nu ma'ato uwe uwe iky'esat uwe uwe imohey mekewat miit topy­hu'at iheg kahato rakat aikotã mekewat Nu totiat e'yat iheg nakat kahato hap ewy. Uwe uwe inug to'yat mekewat Nu tote mi'i pote yt karãpe i ta'at i'atu'yat.
1PE 2:7 Ikahu kahato mekewat Nu wato'e imohey haria aito pote. Ma'ato irania'in yt imiky­'esat nug neran i haria — Yt kan hamo i mekewat Nu i'atu'e. Yt naku i watunug ai'yat itote i'atu'e. Mi'i hawyi ta'a­tu­'atoiat mekewat Nu ma'ato Tupana yt totoiat hin i. Mi'i pote pyno — Mekewat Nu irania'in mi'atoiat wakuat kahato rakat Uimẽpyt ewywuat e. Irania'in mi'atoiat wo topy­hu'at ma'ato Mi'i tote atunug uimõ­typot yat koro e kat pote atipuẽti mekewat Nu po'og hãpyk takat torania kai e Tupana.
1PE 2:8 Karãpe toĩne'en nu mu'ap tote hawyi wata'at tuereto mekewat nu ete aimõ­py­'ahak kahato. — Yt naku i mekewat nu aipu'ap tote wato'e ma'ato iheg me toĩne'en. Mi'i hap ewy kahato irania'in yt Iesui mohey i haria tukup­te'en Tupana e hap Iesui etiat pe. Ta'a­tu­puẽti mekewat sehay wakuat hawyi i'atu­mõ­py­'ahak hap topy­hu'at — Yt naku i i'atu'e.
1PE 2:9 Ma'ato aito ti aikotã wẽtup ywania Tupana mi'airo wẽtup ywania ewywuat ko'i aito. Kat pote Tupana sa'y­ru'in saki­'yt'in aito. Mi'i pote Tupana ai'airo tepa'i ko'i wo ma'ato yt mesu­wa­rotiat pa'i ko'i ewywuat i. Katu­pono aito more­kuaria ewy wato­py­hu'at Tupana wanẽtup hawe. Aitoria aikotã wẽtup tama piaria ewywuat Tupana e'yi ka'i­waria aito. Aiwa­nẽtup hap ko'i yt mesu­wa­ro­tiaria minug ko'i mesu­wa­ro­tiaria wanẽtup hap ko'i ewy hin i. Mi'i pote — Eiperia yt miit ewy i i'atu'e ahepe. Mi'i pote Tupana mõtypot hap yn wati­ky­'esat mesu­wa­rote. — Waku kahato Uruetu­pana wato'e irania'in me. Sa'a­wy'i urutu­kup­te'en aikotã i'ypyryp we hap ewy. Ma'ato mesup urutu­kup­te'en hẽtyhot puo hap ewy. Sa'a­wy'i Tupana yt heremo hin i uruepe. Koitywy heremo hap ewy urupy'a pe uruimohey pote.
1PE 2:10 Sa'a­wy'i watoĩ­ne'en aikotã piku piku ko'i ewy yt i'ywot i yt ity i rakaria ewy. Ga'apy piat hewyry rakaria ewy yt uwe ywania ewy i ahewyry. Ma'ato wato­mohey Aika­'iwat Iesui hawyi Tupana ainug tosa­ki­'yt'in sese tosa­'y­ru'in sese wo ra'yn. Mi'i hawyi Tupana ywania wo wato­py­hu'at. Sa'a­wy'i yt uwe i aiky'e haria — Yt kan hamo i eipe i'atu'e ahepe. Ma'ato koitywy Tupana miky'e ko'i kahato aito. Aheha­kye­ra'at ra'yn Tupana yt ahewaku pytkai hin i aiky'e. Mi'i pote Tupana etama puaria aito wato­py­hu'at.
1PE 2:11 Uito ti Peteru. Uimi­ky­'eria sese eipe. Mi'i pote atiky­'esat kahato ewetunug uimi­ky­'esat ewy. Atiky­'esat kahato ewei'atoiat yne ehewaire hap ky'esat hap ko'i eipiit miky­'esat sa'ag ko'i. Karãpe wẽtup ok ehã'ãg hawyi — Yt atiky­'esat i ewei'e. Ta'i aimi­ky­'esat sa'ag ko'i aipy'a piat toĩne'en at ka'ap hawyi meiũran yt kat i Tupana ky'e hap toĩne'en aikai kat pote mekewat aimi­ky­'esat sa'ag ko'i tu'uka kahato Tupana miky­'esat hap wywo aipy'a pe. Mesuwat rotiaria ewy yt naku i wato­py­hu'at kat pote atipy piaria aito pote. Ahewyry mesu­wa­rote wen ma'ato ahetama sese yt mesu­wa­rote i. Mi'i pote yt naku i irania'in miky­'esat ewywuat watunug sa'ag i'atu­wywo.
1PE 2:12 Irania'in te'e­ra­ha'at kahato ahowawi sio pywo pe wato­mohey sio yt hap kape. Mi'i pote aheĩne'en hap mesu­wa­rote aikotã Iesui ewy hãpyk kahato rakat ewy waku wato­py­hu'at are. Uiwy­ria'in waku watunug hãpyk kahato i'atue­hamo. Mi'i pote meiũran ho'opot hap e'at put'ok'e i'atuete hawyi meremo ta'a­tu­mohey aikotã aito hap ewy. Mi'i hawyi Tupana mõtypot hap ete aikotã ai'ewy tukup­te'en hãpyk kahato watunug wakuat pote. Mesup i'atu­mi­ky­ry'i hamo watoĩ­ne'en wato­mohey Iesui pote — Yt naku i nug haria i'atu'e ma'ato yt pywo pe i. Katu­pono aikotã wẽtup ywania mi'iria tukup­te'en yt Tupana ywania hin i yt ai'e hap ewywuat i mi'iria.
1PE 2:13 Pyno watoĩ­ne'en mesu­wa­rote turan waku watunug aika­'i­waria piat aipo­'oro hap ok tã ahetu­'isa piat aipo­'oro hap ok tã ai'akag ko'i piat aipo­'oro hap ok tã. Mi'i watunug pote ai'akag sese atipy piat mõtypot haria wo watoĩ­ne'en. — Wãi yt etunug nei'o i'atu'e pote pyno — Waku wato'e. — Mi'i tã o etunug i'atu'e pote pyno — Waku more­kuaria wato'e.
1PE 2:14 More­kuaria ti Tupana mi'airo ko'i tukup­te'en. I'atue­su­ra­ra'in i'ewyte Tupana mi'airo ko'i tukup­te'en. Mi'iria tukup­te'en yt naku i nug mupiat monik hamuat mesuwat yi totiat. I'ewyte waku nug haria mõtypot hamuat. Mi'i hamo ta'a­tu­'airo mesu­wa­ro­tiaria more­kuaria tu'i­saria aipo­wyro hamuat.
1PE 2:15 Mesuwat rotiaria yt iwe'eg i rakaria i ihay sa'ag nakaria aimohit reran ta'a­tuehay wuat rakaria ma'ato wati­'a­tunug wakuat kahato yne miit'in kape hawyi yt i'atuehay sa'ag kuap i po'og ahete. Mi'i hap ewy Tupana tiky­'esat kahato.
1PE 2:16 Pyno pywo pe ti aitoria Iesui mohey haria watu­kup­te'en aikotã yt kat i i aipyhyp hap ewy kat pote Tupana eropat haria watu­kup­te'en Tupana miky­'esat watunug i'e hap ewy pote. Yt naku i wato'e more­kuaria pe — Pyno yt po'og i atunug emiky­'esat ewy katupono mi'i hawyi ti aru Tupana miky­'esat ewy yn atunug yt naku i wato'e. Yt naku i wato'e aika'iwaria pe — Uito Iesui eropat hat mesup pote yt atunug i po'og emipo'oro ewy naku i wato'e ahetu'isaria pe.
1PE 2:17 Waku wati­'a­tu­mõ­typot yne mesu­wa­rotiat miit'in. Yt naku i wati­mohit mesu­wa­ro­tiaria miit'in. Waku i'ewyte wati­'a­tu­ky'e kahato yne Iesui mohey haria aikotã wẽtup yat piaria ewy waku watu­kup­te'en. Waku wato'oky'e aikotã watiky'e aheywyt'in aheinyt'in aheyke­'et'in aiky­wyt'in aiky­py­'yt'in aheki­'it'in wati­ky'e hap ewy. Waku wati­mõ­typot kahato Ahetu­pana yne aiky'e hap wywo. Waku tyry'­wa­to'e aipy'a pe Tupana pupi. I'ewyte waku wati­'a­tu­mõ­typot kahato mesu­wa­rotiat aipo­re­kuaria are.
1PE 2:18 Uiwy­ria'in toĩne'en aika­'i­waria ahetu­'i­saria aipo­re­kuaria mesu­wa­ro­tiaria iwese kahato rakaria. I'ewyte toĩne'en yt iwese hin i rakaria. Toĩne'en wakuaria i'ewyte toĩne'en yt nakuaria i. Mi'i pote woro­ho­'o­nãpin eipe. Waku ewetunug eika­'i­waria ehetu­'i­saria eipo­re­kuaria miky­'esat ewy sio iwese rakaria sio yt sio ipy'ahak takaria sio yt hap. Pyno waku wato­py­hu'at i'atue­ropat haria wo i'atu­mõ­typot hanuaria wo aito Tupana eropat haria aito pote.
1PE 2:19 Karãpe irania'in mesu­wa­ro­tiaria aimohit kahato ta'a­tuehay wo ai'a­piheg kahato yt kat i watunug sa'ag pytkai ahaty­'i ha­ty'i kahato ta'a­tu­wepyi mi'i hawyi yt wati­poepyk hin i i'atue­wawi. Yt kat wato'e i. Wati­mohey te ti Tupana. Mi'i hawyi mi'i hap watunug pote Tupana — Waku kahato eipe e ahepe.
1PE 2:20 Karãpeĩ watunug yt naku i hawyi sura­ra'in more­kuaria ai'a­piheg kahato aiminug sa'ag sa'up ta'atuium kahato ahepe. Mi'i hap e'at pe yt waho­'o­wesat kuap i kat pote yt naku i nug haria aito pote. Ma'ato karãpe more­kuaria esura­ra'in ko'i ai'a­piheg yt kat i watunug sa'ag pytkai Iesui mohey haria aito pote mi'i turan yt wati­'a­tu­wesat i pote yt watu­we­mõ­py­'ahak i. Waku watu­wehum yn Tupana kape ai'a­piheg turan. Mi'i watunug pote Tupana mõtypot hap sese topy­hu'at ahepe — Waku kahato eiperia e Tupana ahepe.
1PE 2:21 Aika­'iwat Aipo­typot Iesui sa'a­wy'i ho'opot kahato miit'in i'atu­mi­ky­ry'i kahato tuwete. Yt kat i tutunug sa'ag pytkai ta'a­tu­'ahyk ta'a­tu­'auka ma'ato yt kat i to'e sa'ag i'atuepe. Yt toi'a­tu­poepyk hin i mi'i tã ta'a­tunug pytkai kat pote toimo­herep teran ahepe aikotã waku watunug ai'a­piheg haria pe hap. Toiky­'esat kahato watunug tominug hap ok tã toiky­'esat. Mi'i hap kape aikaykay aikotã topiat ho'opot hap ewy hamuat hap kape.
1PE 2:22 Pywo pe ti rat Aika­'iwat yt kat sa'ag hin i tutunug pytkai ta'a­tu­'auka. Yt wẽtup sehay sa'ag tutunug towẽ pywiat pytkai i ta'a­tu­'ahyk ahyk Aika­'iwat are.
1PE 2:23 Ta'a­tu­mohit kahato Aika­'iwat Iesui ta'a­tuehay sa'ag wywo ma'ato yt kat i i toi'a­tu­wesat sa'ag. Yt toi'a­tu­poepyk hin i sa'ag wywo. Ta'a­tu­'ahyk ahyk Iesui turan ho'opot kahato tepiat turan yt kat e hin i i'atuepe — Meiũran woro­ho­'o­'ahyk eipe yt e i ma'ato to'e Tupana pe — Atikuap Papai aikotã aru uhewaku hap etimo­herep wuat'i ehamo. Ewẽ pyi yn waku uwe waku uwe yt enoi hamo. En yn etikuap e Iesui To'ywot pe.
1PE 2:24 Pywo ti rat Aika­'iwat Iesui tuut irane kat pote yne aiminug ai'a­piheg sa'ag ko'i yne miit'in mesu­wa­ro­tiaria minug sa'ag ko'i topy­hu'at Aika­'iwat piit pe. Mekewat aria'yp tote toho­'opot kahato topiit ete. Tupana mi'a­piheg wo topy­hu'at. Tuwepyi Aika­'iwat yne Tupana piat ai'a­piheg hap aiminug sa'ag ko'i u hamo tuut. Mi'i hawyi ai'a­piheg hap yne topy­hu'at Iesui piit ete mekewat aria'yp posak tote. Ipiit ete yne topy­hu'at Tupana kaipywiat ai'a­piheg hap ko'i ai'ahyk ahyk hap tutu'u yne. Haty kahato tuete. Mi'i hawyi aimoe­hãite hamuat hap topy­hu'at. Haty hap yne tutu'u yne hawyi iku'uro aheiam me. Aiku­'uro hap tutu'u yne. Mi'i pote aito watoĩ­ne'en iku'uro rakaria ewy iwywo mekewat aiminug sa'ag ete. Yt ahesaika i po'og aito watoĩ­ne'en. Aikotã iku'uro rakat yt wahã'ãg kuap i yt naku i nug hamo hap ewy. Mi'i hap ewy wato­py­hu'at mesup. Ma'ato wakuat yn sake i watunug kuap mesup kat pote watu­wẽtem gu'uro pyi Aika­'iwat wywo hap ewy. Mi'i hawyi waku nug haria wo wato­py­hu'at iwywo.
1PE 2:25 Ma'ato sa'a­wy'i aitoria watu­kup­te'en aikotã aihũria mi'a­pykok ko'i ewy piku piku ko'i ewy aikotã aihũria Kuteiru ko'i ho'o­wasat ga'apy piat hap ewywuaria watu­kup­te'en sa'a­wy'i. Ma'ato mesup aitoria Aika­'iwat Koro hũria wo watu­kup­te'en. Mi'i ti ai'a­pykok hat akag. Mi'i upi ti watuwat atipy kape Ahepa'i Koro Mi'i Miit Iesui pote are.
1PE 3:1 Pyno waku watunug more­kuaria miky­'esat ewywuat. I'ewyte waku etunug e'aito miky­'esat ewywuat uheinyt'in are. E'aito toĩne'en pote etunug o imiky­'esat ewywuat. Ma'ato e'aito yt Iesui mohey hat i pote i'ewyte waku etunug imiky­'esat ewy. Mi'i tã etunug mote meremo etekyi Iesui mohey hap kape. Kat pote te'e­ra­ha'at kahato ewese hap kape ma'ato yt ehenoi hin i Tupana ehay tope pytkai. Eheĩne'en hap ikahu rakat kaipyi topy­hu'at Iesui mohey hano sa'a­wy'i yt tutunug neran hin i Tupana ehay pytkai are. Mi'i pote waku etunug e'aito e'akag wo uheinyt'in are.
1PE 3:2 Waku etum epiit e'aito pe yn yt kat i ewaire waire hap wywo. Mi'i hawyi waku etimõ­typot kahato e'aito. Mi'i hap kape teha'at hawyi meremo ehekyi kuap Iesui kape.
1PE 3:3 Mi'i hawyi waku ewepainug hap ko'i eipy'a pe eiwese hap wywo ewepit hap wywo eiwa­nẽtup hawe. Waku pe eweikup­te'en Tupana miky­'esat ewywuat. I'ewyte eweikup­te'en hekat rakat ewy mekewat ewepainug hap wuat'i e'at piat hap ewy. Waku ewetopag wahi ko'i eimo­kahu hamuat eiwa­nẽtup hap ikahu rakat. I'ewyte eipy'a piat ikahu hap ewywuat are. Irania'in hary­po­ria'in mesu­wa­ro­tiaria te'e­ru­wa­nẽtup ta'a­tu­kahu hap kape yn ta'a­tupiit kape yn te'e­ru­wa­nẽtup.
1PE 3:4 Ta'a­tu­kyi'at ta'a­tuekat ikahu kahato rakat mekewat mehit rakat hekat rakat kawiat Uru kawiat saity ko'i hawyi ta'a­tupag yne ta'a­tu­'asap ta'a­tupiit ko'i ete Uru imehit rakat yn ta'a­tupag. Te'e­ru­we­painug kahato wen ma'ato ta'a­tupiit ete yn. Ma'ato eipe waku po'og ewetunug eipy'a pe ehekat ikahu hap eiwa­nẽtup hawe eiwese hap eiwepit hap ko'i. Mi'i ewetunug mote ikahu rakat sese wo eweikup­te'en Tupana wanẽtup hawe. Hekat rakaria sese wo eweikup­te'en Tupana wanẽtup hawe Tupana miky­'esat ewy ewetunug mote.
1PE 3:5 I'atu kahato sa'a­wy­'i­wuaria hary­po­ria'in Tupana mohey haria wakuap nug kahato haria are. Mi'iria inug kahato ta'a­tue­'aito miky­'esat ewywuat. Ta'a­tue­'aito eropat haria kahato mi'iria tukup­te'en. Mi'iria te'e­ru­we­painug kahato Tupana mohey hap wywo.
1PE 3:6 Sa'a­wy'i sese ahehary mana Sara tunug yne aha'a­se'i pot Aparãu miky­'esat ewy. — Uika­'iwat en e te'aito pe. Pyno waku hary­po­ria'in eweikup­te'en ehehary pot ko'i ewywuaria wo. Pywo ti rat ewetunug ehe'aito miky­'esat ewy ewetunug wakuat pote yt uwe i pupi i eweiken'ẽ aru are. Yt kowo'i kowo'i hin i eiwa­nẽtup hap topy­hu'at kat pote eika­'iwat ehe'aito topy­hu'at pote.
1PE 3:7 I'ewyte woro­ho­'o­nãpin neran yne eipe mehĩ'in. Toĩne'en ehary'i pote mio tã are'e ehepe — Eiwe'eg wo o yt eiwe'eg i hap pupi are. Ereĩne'en ehary'i wywo aikotã iwe'eg nakat ewy are. Etimõ­typot ro ehary'i are. Epiit po'og hesaika ehary'i kai pote etipo­wyro ehary'i epiit wywo. Pyno wẽtup miit ewywuat eweikup­te'en mote waku eweiwat atipy kape eiwo­'o­ky'e hap wywo eiwo­'o­wese hap wywo eiwo­'o­gyi'at hap wywo are. Waku wo'o­mo­wepit haria wo eweikup­te'en. Mi'i ewetunug mote karãpe ehehay Tupana kape eheha­ry'i wywo hawyi meremo Tupana eiwesat eipe wẽtup miit wanẽtup hap ewy eweikup­te'en mote.
1PE 3:8 Pyno mesup ahenoi teran uiwe­nãpin hap yne Iesui mohey haria pe. Mio tã are aikotã wẽtup miit ewy waku eweikup­te'en eiwa­nẽtup hawe. Waku wo'o­ky'e kahato haria wo eweikup­te'en are. Waku eipy'a pe eiwo­'o­ky'e eiwo­'ope are. Waku eiwo­'o­ky'e Iesui mohey haria pote aikotã eheywyt'in eheyke­'et'in eheinyt'in ky'e hap ewywuat are. Aikotã eiky­wyt'in eiky­py­'yt'in eheki­'it'in ky'e hap ewy wẽtup mẽpyt'in sok ewy waku eiwo­'o­ky'e are. Karãpe ho'opot hap put'ok'e wẽtup ok Iesui mohey hat ete hawyi etipo­wyro o mi'i. I'ewyte karãpe irania'in hatek pote etipo­wyro mi'i eipy'a pyi iky'e hap wywo. Waku eweikup­te'en eiwese kahato irania'in etiat rakaria wo. Waku ewei'e irania'in Iesui mohey haria pe — Wẽtup yn aimi­mohey uhyt mana ewei'e o are. Ereke uhyt mana mimi ewei'e. Era'apyk o ewei'e. Mi'i hawyi hegyi'at rakaria wo aru eweikup­te'en Iesui mohey hap wywo are.
1PE 3:9 Karãpe Iesui mohey haria irania'in yt i'atu­wese i ehete hawyi waku eweikup­te'en iwese rakaria wo. Yt eweipoepyk tei'o irania'in tunug sa'ag ehetiat pote. Ta'a­tunug sa'ag hawyi — Waku ewei'e emohit mi'iria pote. Eti'a­tu­mõ­typot mi'iria uhyt'i'in mana'in. Mi'i tã ewetunug mote Tupana mipoi­tyro ko'i wo eweikup­te'en. Yne Tupana ekat topy­hu'at eiwanuat atipy pe. Mi'i tã ewetunug mote — Woro­ho­'o­poi­tyro eipe e Tupana ahepe.
1PE 3:10 Uiwy­ria'in eweikup­te'en mesu­wa­rote iwese kahato rakaria wo iwepit sese rakaria wo eweikup­te'en are. Ma'ato eheĩne'en hap mesu­wa­rotiat i'ewyte wepit hap ikahu sese hap ko'i eweiky­'esat pote eiwe­nãpin ihay nug hap ete irania'in wywo. Eweimu'e ro ehẽku sehay wakuat nug hamo are. Karãpe ehẽku ihay teran sa'ag nug hap ete pote — Wãi'e­wei'e o ehẽku pe. Karãpe ehẽku timohit reran irania'in mote — Wãi'e­wei'e o ehay sa'ag nug hap ete.
1PE 3:11 Waku eweimu'e ehẽku sehay iwese rakat nug hamuat hap ete miit'in wywo. Mi'i hawyi eimo­wepit hap mesu­wa­rotiat eweipuẽti Tupana kaipyi are. Yt naku i aiwẽ pyi ahehay haiug nakat yt iwese rakat i yt hẽ'ẽ i rakat. Waku watu­we­mu'e sehay miit'in mowepit hamuat e hap nug hamuat ete are. Waku wati­'atoiat yne aiminug sa'ag ko'i aimi­ky­'esat ko'i aiminug sa'a­wy­'iwuat hap ewy. Mi'i hawyi waku watikat at ka'ap wo'o­wese nug hamuat hap. Aikotã wati­mohan miat yne ahesaika hap wywo hap ewy. Mi'i hap ewywuat yne ahesaika hap wywo wati­mohan aiwo­'o­mo­wepit hap are.
1PE 3:12 Ta'i uiwy­ria'in Tupana tikuap kahato uwe uwe topy­hu'at waku nug hat waku wanẽtup hat iwese rakat. Mi'i hat kape Tupana ewaure ka'a tuwehik kahato. Tupana tikuap kahato mekewat miit miẽtup ko'i. Mekewat miit ihay hawyi meremo Tupana tiwesat. Ma'ato irania'in yt naku i nug haria ete Tupana yt tuwehum hin i i'atue­wawi ma'ato topy­hu'at yt naku i nug haria ewanĩkap mo are.
1PE 3:13 Watunug Tupana miky­'esat ewy pote waku mekewat wati­mohan kahato inug hamo kat pote yt uwe i mesu­wa­rotiat aima'at kuap hat topy­hu'at.
1PE 3:14 Uiwy­ria'in karãpe mesu­wa­ro­tiaria yt i'atu­wese i kahato ahete waku nug haria aito pote waku watu­we­mo­wepit mesu­wa­rote. Yt naku i wato­ken'ẽ i'atu­pupi. Yt naku i aiwa­nẽtup hap kowo'i kowo'i mi'iria pupi.
1PE 3:15 Waku po'og wati­mõ­typot Tupana aipy'a pe. Mi'i hawyi waku watikat sehay wakuat aiwa­nẽtup hawe yne miit'in wesat hamuat hap. Karãpe put'ok'e wẽtup ok ahowawi hawyi to'e ahepe — Kat pote etimohey Iesui. Mi'i hawyi waku wati­mo­herep i'atuepe aimi­mohey Iesui ahehay perup'i puo yt kat i — Uito po'og eikai ai'e hap wywo. Ma'ato aikotã paa'e haria ewy waku wati­'a­tuekyi miit'in aimi­mohey Iesui kape.
1PE 3:16 Uiwy­ria'in waku watoiat yne aiminug ko'i aiwa­nẽtup sa'ag hap ko'i. Mi'i hawyi waku ahewyry yt kat i haty aipy'a piat wywo aiwa­nẽtup hawiat aiminug sa'ag wywo. Mi'i hawyi karãpe irania'in i'atu'e sa'ag kahato ahete i'atueso hap kaipyi yt kat i aiwe­mõti hap topy­hu'at kat pote watikuap yt kat i i sa'ag watunug pote. Watikuap Aika­'iwat Iesui miky­'esat ewy watunug mesu­wa­rote pote.
1PE 3:17 Pyno Tupana tiky­'esat tuereto ho'opot ahepiat hap waku nug haria aito pote. Mi'i hawyi mesu­wa­ro­tiaria ahaty­'i­ha­ty'i haria wo tukup­te'en. Karãpe ho'opot hap toĩne'en waku nug haria aito pote mi'i pote waku watu­wehum Tupana kape. Ma'ato karãpe aito Iesui mohey hat pytkai watunug sa'ag mote mesu­wa­ro­tiaria ahaty­'i­ha­ty'i hawyi haty sese hap topy­hu'at kat pote yt watu­wehum kuap i Tupana kape.
1PE 3:18 Sa'a­wy'i Aipo­typot Aipo­rekuat Iesui miit'in miky­ry'i hamo topy­hu'at mesu­wa­rote aikotã aikotã ta'a­tunug sa'ag tuwete waku rakat pytkai ta'a­tu­'auka. Ma'ato yt kat i sa'ag tutunug pytkai toho­'opot kahato. Ma'ato aiminug sa'ag upi toho­'opot. Iesui hãpyk kahato rakat ma'ato iku'uro yt hãpyk i rakaria mohãpyk hamo. Iku'uro mu'ap nug hamo To'ywot Tupana kapiat mu'ap nug hamuat. Koitywy toĩne'en mu'ap Tupana kapiat Iesui ho'opot hap kaipyi. Yt hãpyk i sese rakat toimo­hãpyk kuap ta'yn. Pyno ipiit iku'uro aria'yp posak ete ma'ato mi'i hawyi Tupana Pã'ãu timoieĩ­ne'en Aika­'iwat.
1PE 3:19 Iku'uro aria'yp posak ete hawyi Iesui toto aikope miit'in pã'ãu sem tukup­te'en hap kape aikope miit'in pã'ãu sem tukup­te'en i'atu­pyhyp hap kape toto. Mi'i tote toimo­herep i'atuepe tehay ikahu rakat toku­'uro hawyi.
1PE 3:20 I'atu kahato miit itote yt naku i nug haria. Mi'i haria kape toto. Aikope tukup­te'en Nu'e mimu­'eria. Sa'a­wy'i Nu'e ti'a­tu­mu'e mi'iria. Tutunug mekewat yara wato koro turan toi'a­tu­mu'e ma'ato yt ta'a­tu­mohey i. Tupana ti'a­tu­ky­'esat kahato mi'iria tuwe­wawiat hap. Toi'a­tuekyi kahato Nu'e ehay wo ma'ato yt ta'a­tu­mohey i. Mi'iria kape Iesui toto toku­'uro hawyi aikope tukup­te'en iku'uro rakaria hap kape. Mi'i hawyi toimo­herep i'atuepe mekewat sehay wakuat. Katu­pono sa'a­wy'i mesuwat yi tote Nu'e'in yn Tupana mieha­kye­ra'at ko'i topy­hu'at. Mekewat yara wato pe tukup­te'en 8 ok yn Nu'e'in ko'i. Mi'i hawyi i'aman iwato ti'a­tu­'uka yne mesu­wa­ro­tiaria ma'ato mekewat Nu'e minug yara wato ti'a­tue­ha­kye­ra'at 8 ok takaria katupono mekewat yara wato pe tukupte'en Nu'e'in mekewat y'y wato yowa tote.
1PE 3:21 Mi'i hap ewy kahato ahet'ok hap topy­hu'at. Y'y piat wateke aikotã Iesui iku'uro hap ewy. Watu­wẽtem y'y pyi hawyi aikotã Iesui tuwẽtem gu'uro pyi hap ewy watoĩ­ne'en. Ma'ato mekewat y'y yt aikoho kuap i aipitpit ok hap aiminug sa'ag ko'i ma'ato ahet'ok hap watunug hawyi yt kat i haty hap aiwa­nẽtup hawe kat pote Tupana miky­'esat ewy watunug aikotã Nu'e ewy y'y sakpo watuwat ahe'yara puo hap ewy.
1PE 3:22 Mesup ta'yn Aheyke'et Iesui teke ra'yn atipy pe. Koitywy ta'apyk Tupana po sese kai ta'apyk. Mi'i tote Tupana mimõ­typot no topy­hu'at — Koitywy Uha'yru woronug En wuat'i miit'in Akag wuat'i pore­kuaria Akag wuat'i atipy piaria akag wo woronug En e Tupana Tosa­'yru pe. Yne esaika hap atum epe e Tupana Tosa­'yru pe Iesui pe.
1PE 4:1 Pyno uiwy­ria'in Aipo­typot Iesui ho'opot kahato topiit no mesuwat yi tote ma'ato yt tominug sa'ag upi hin i toho­'opot miit'in mi'a­piheg wo ma'ato aiminug sa'ag upi i toho­'opot ai'a­piheg hap upi. Pyno waku watu­wa­nẽtup Aika­'iwat ewy waku waho­'opot irania'in ehakye­ra'at hamo hap ewy. Karãpe wati­mo­wepit aipu'i hawyi yt kat i aho'opot hap wati­ky­'esat wen ma'ato yt kan hamo i watoĩ­ne'en katu­pono aipiit miky­'esat sa'ag hap yne watunug. Po'og waku watunug Iesui miky­'esat wakuap ko'i are. Po'og waku waho­'opot Aika­'iwat ewy miit'in ehakye­ra'at hamo are.
1PE 4:2 Ma'ato yt naku i watoĩ­ne'en mesu­wa­rote aiku­'uro hap kape yt naku i nug hanuaria wo aikotã sa'a­wy'i yt wato­mohey i te Iesui turan wuat ewy are. Yt naku i aipiit miky­'esat sa'ag watunug. Ma'ato watunug mote yt kat hamo i watoĩ­ne'en. Waku watoĩ­ne'en mesu­wa­rote Tupana miky­'esat nug hamo Tupana mowepit hamo are.
1PE 4:3 Sa'a­wy'i yt aiwe'eg hin i yt watikuap i te Iesui turan. Sa'a­wy'i aimi­ky­'esat yn watunug i'ewyte irania'in mesu­wa­ro­tiaria miky­'esat ewy yn watunug. Mekewat e'at pe yt watikuap i Iesui te turan yt watunug hin i Tupana miky­'esat ewy. katu­pono watunug at ka'ap irania'in miky­'esat ewy yn watunug. Ta'i yt Tupana kuap i haria miky­'esat ewy yn watunug. Mi'i turan watunug ahewaire waire hap yn aiwa­nẽtup hawe. Aipiit miky­'esat sa'ag ko'i yn watunug neran mekewat e'at pe. I'ewyte mahy u hap at ka'ap hap wati­ky­'esat watunug mekewat e'at pe. Watu­'uka teran yne miit'in wywo ahehay wo aipiit wywo yt aiwese hin i. — Uito po'og e hap yn aiwa­nẽtup hawe. Ta'i sa'a­wy'i ienuk hap nug hap kape yn watuwat. Yt miit'in ewywuat i watenuk. Ai'ok hap sakpo watenuk mekewat e'at pe. Mi'i hawyi ahetu­pa­naria sem karania ahetu­pa­naria sa'a­wy'i aheĩne'en hap yt watikuap i Iesui turan.
1PE 4:4 Koitywy aiwy­ria'in sa'a­wy­'i­wuaria — Kat pote uru'atoiat i'atu'e. Kat pote yt etunug i te aikotã sa'a­wy'i etunug hap ewy i'atu'e. To'iro uhyt'i'in mana'in pĩ'ã'in kurum'in i'atu'e ahepe ma'ato — Yt wato'e. To'iro i'atu'e ma'ato yt watuwat i hawyi i'atuehay sa'ag ahete. Ta'a­tu­ky­'esat watunug sa'ag aikotã ta'a­tunug hap ewy.
1PE 4:5 Ma'ato aito yt watuwat i i'atupi mekewat sa'ag nug hamo kat pote watikuap ta'yn tuut irane yt pya hin i Aika­'iwat Iesui ut hap. Mi'i hawyi toipo­'oro miit'in aikotã aikotã imohey hap etiat kuap hamo. Wẽtup kai totopag yne tomohey haria. Wẽtup kai yt tomohey haria i ko'i totopag. Mekewat e'at pe toimo­herep wuat'i ehamo uwe waku uwe yt sio watoĩ­ne'en sio aiku­'uro hut turan ma'ato yne miit'in sio toĩne'en wakuaria ihãite rakaria sio iku'uro rakaria toipat'ok mekewat e'at pe. Towanuat sio yt towanuat ko'i i hap moherep hamo toipat'ok.
1PE 4:6 Mi'i pote toto toku­'uro hawyi aikope miit'in pã'ãu tukup­te'en hap kape wo'o­pyhyp hap kape toto toku­'uro hap totepyi mekewat Nu'e mimu­'eria mu'e hamo. Yt ta'a­tukuap i te iku'uro ta'a­tu­ka­wiano hamuat hap. Yt ta'a­tukuap i te pote toto. Mi'i pote koitywy iku'uro rakaria ikuap i'ewyte ihãite rakaria ikuap. Mi'i hawyi meiũran aru toi'a­tu­pat'ok uwe imohey haria uwe yt rakaria i. I'ewyte iku'uro rakaria ihãite rakaria Tupana Pã'ãu tomo­herep yne.
1PE 4:7 Pywo ti rat yne mesu­wa­rotiat mesuwat yi i'ewyte aheka­re'en ai'yat ko'i aiko hawyi waikiru waty at ga'apy yne mesu­wa­rotiat ikahuro hamuat ko'i e'at yt pya hin i. Pywo ti rat tuut irane uiwy­ria'in yne mesuwat ikahuro hap e'at. Yt pya hin i are. Mi'i pote waku we'eg haria wo watu­kup­te'en mesu­wa­rote. Waku wahẽtup at ka'ap Tupana kape mesu­wa­ro­tiaria ehakye­ra'at hamo. Waku wahe­katup Iesui ut hap.
1PE 4:8 Pyno mesuwat ikahuro hap e'at yt pya hin i pote Tupana tiky­'esat kahato aito tomohey haria wo wẽtup miit ewy aiwo­'o­ky'e hap toiky­'esat. mi'i tã Tupana tiky­'esat kahato. Uiwy­ria'in toiky­'esat wati­'a­tu­ky'e irania'in Iesui mohey haria yne ahesaika hap wywo. Toiky­'esat wati­mo­herep aiwo­'ope aiwo­'o­ky'e hap aimiium kaipyi aimi­mõ'ẽ hap kaipyi aiminug kaipyi toiky­'esat aiwo­'o­ky'e hap. Pywo ti rat toĩne'en aiwo­'o­ky'e hap sese aiwo­'opiat hap hawyi yt kat i aiwo­'o­ma­'at'i hap toine'en. Yt heremo i aiwo­'o­'a­parap hap ko'i aiwo­'o­ky'e kahato hap toĩne'en mote. Aiwu­'uka hap yt tuwe­mo­herep i. Aiwo­'o­ky'e hap toĩne'en pote yt watikat aiwy­ria'in kai i'atu­minug sa'ag ko'i aiwo­'o­'a­parap hap ko'i.
1PE 4:9 Uiwy­ria'in waku — Eiwe­hyt'ok o wato'e irania'in me. Waku eiwe­hyt'ok wato'e aiwo­'ope. Ewei'apyk o waku wato'e. Waku — Uru'yat aiwanuat wato'e irania'in me. Waku wati­po­wyro hatek takaria ai'yat pe. Yt naku i wato'e irania'in me — Yt atiky­'esat hin i irania'in ui'yat piat wato'e.
1PE 4:10 Pyno Tupana tum ahepe tesaika hap wakuat moherep hamuat miit'in powyro hamuat. Yt to'o­'ewy hin i tutum ahepe tesaika hap. Pyno kat som wati­puẽti Tupana esaika hap kaipyi waku wati­mõ'ẽ irania'in me. Kat som watikuap waku rakat pyno waku wahenoi irania'in me Tupana mienoi hepiat ko'i. Waku wati­po­wyro irania'in aipo wywo Tupana miium aimi­sepap ko'i wywo aikotã Tupana piat aimu'e hap ewy. Watikuap pote waku wati­'a­tu­po­wyro irania'in aimi­sepap ko'i wywo aikotã Tupana aimu'e hap ok tã. Aimi­sepap ko'i yne Tupana miium ko'i tukup­te'en yne aimikuap ko'i Tupana aimu'e hap ko'i. Yt kat sa'up i tutum ahepe pote waku watum miit'in me yt kat sa'up i. Waku wato­py­hu'at Tupana eropat haria wo wakuaria ewy. Waku Tupana miium wati­mõ'ẽ irania'in me ahegyi'at kahato hap wywo aikotã Tupana hegyi'at hap ewy.
1PE 4:11 Pyno irania'in aitoria Tupana mimu­'eria kahato ahehay se kahato Iesui etiat moherep hamo aimu'e kahato. Ahẽku ete tutum tesaika hap tehay moherep hamuat. Mi'i pote karãpe wati­'a­tu­mu'e miit'in waku ahehay wati­mo­herep aipy'a pyi aikotã Tupana ihay aiwẽ pyi Topã'ãu kaipyi hap ewy waku wati­mo­herep Tupana ehay. Ma'ato irania'in yt ahehay kuap i rakaria Tupana tiky­'esat aipo wywo aipy wywo wati­'a­tu­po­wyro miit'in hap. Mi'i pote tutum ahepe irania'in me tesaika hap miit'in eropat hamuat. Tupana aimu'e kahato aipy'a pyi aikotã aikotã waku watunug miit'in eropat hap ete. Mi'i hawyi tutum ahepe tesaika hap wakuat sese nug aipo wywo aipiit wywo hamuat hap. Pyno kat som tutum ahepe sepap nug hamuat hap ko'i mi'i pote waku i ok tã wati­mõ'ẽ miit'in me Tupana mõtypot hamuat Aipo­typot Tupana Mipo­'oro Iesui mõtypot hamuat hap ko'i are. Pyno ahẽtup uiwy Iesui pe — Atiky­'esat kahato ereĩne'en Wuat'i Miit'in Porekuat no hap. Atiky­'esat En Wuat'i Miit'in Mimõ­typot no. Mesup wuat'i e'at pe aru atiky­'esat En yne mesu­wa­ro­tiaria emiit'in sem akag wo. Mi'i ti mesup ahẽtup are waku.
1PE 4:12 Uimi­ky­'esat ko'i Iesui mohey haria karãpe put'ok'e ehete ehatek hap miit'in miky­ry'i hap ko'i eho'opot hap ko'i aikotã aria haty hap ewy put'ok'e ehete yt eiwa­nẽtup tei'o kowo'i kowo'i — Kat pote mi'i tã uhete yt ewei'e tei'o eiwa­nẽtup hawe. Katu­pono mi'i tã yne Iesui mohey haria ete toĩne'en tuereto uiwy­ria'in uimi­ky'e ko'i. Mi'i pote yt eweiwa­nẽtup tei'o — Ta'i yt irania'in ewy hin i aho'opot yt ewei'e i kat pote yne aitoria Iesui mohey haria ihaky­'e'i rakaria watu­kup­te'en tuereto. Mi'i tã Tupana tunug ahete ahã'ãg hap ko'i sio watoĩ­ne'en Ha'yru mohey haria sese wo sio yt haria wo i kuap hamo.
1PE 4:13 Karãpe put'ok'e ahã'ãg hap ahatek hap miit'in miky­ry'i hap ai'ahu hap yne mekewat ko'i put'ok'e pote waku meremo watu­we­mo­wepit hawyi waku wato'e Tupana pe aho'opot hap put'ok'e hawyi — Tupana koitywy atikuap ta'yn Esa'yru Emipo­'oro Urupo­rekuat nuat ho'opot hap. Yt atikuap yne i ma'ato aho'opot hap kaipyi atikuap Emipo­'oro ho'opot hap. Waku kahato atu'u Iesui ewy mekewat ho'opot ko'i waku wato'e Tupana pe. Meiũran aru atikuap Esa'yru Urupo­rekuat nuat put'ok'e mesuwe Wuat'i Mimõtyot no tuwe­mo­herep mesuwe. Mi'i hap e'at pe uimo­wepit hap sese wuat'i e'at piat hap toĩne'en waku wato'e Tupana pe.
1PE 4:14 Pywo ti rat uiwy­ria'in karãpe miit'in ihay sa'ag kahato ahetiat pote wato­mohey Aipo­rekuat nuat pote mi'i hap e'at pe waku watu­we­mo­wepit kahato. Eweikuap kat pote. Aimo­wepit hap sese topy­hu'at aru ahete wuat'i e'at pe katu­pono wato­py­hu'at Tupana mimõ­typot ko'i sese. Tupana Pã'ãu eiam kahato wato­py­hu'at. Katu­pono Tupana yt ai'atoiat hin i waho­'opot turan. Katu­pono mesu­wa­ro­tiaria i'atuehay sa'ag Aika­'iwat Iesui ete ma'ato aitoria wati­mõ­typot kahato Aika­'iwat. Mi'i hap kaipyi Tupana aikuap. Mi'i pote tutum ahepe Topã'ãu pywuat imõtypot ko'i wato­py­hu'at pote.
1PE 4:15 Pyno waku wato­py­hu'at miit'in mesu­wa­ro­tiaria miky­ry'i hamo. Waku wato­py­hu'at miit'in misa­ty'i saty'i ko'i wo Iesui mohey haria aito pote. Ma'ato yt naku i kahato waho­'opot mesu­wa­rotiat sero­'ok'e haria aito pote yt naku i nug haria pote miit'in ma'at haria aito pote miit'in ekat pore­ra'at haria aito pote miit'in potpap pyhyp haria aito pote ahehay sa'ag irania'in etiat aito pote. Mi'i hap upi aipyhyp ahaty'i haty'i pote yt nakuaria i wo wato­py­hu'at. Ma'ato waho­'opot Iesui potpap nug pote waku.
1PE 4:16 Ta'i karãpe ahaty'i haty'i Iesui Aipo­typot emiit'in pote waku watu­we­mo­wepit. Yt naku i watu­we­mõti ne'i Aika­'iwat pupi ahaty'i haty'i Iesui etiat turanuat pote. Po'og waku wato'e Tupana pe — Tupana waku kahato En kat pote aho'opot Esa'yru mohey hap upi waku wato'e.
1PE 4:17 Pyno waho­'opot hap kaipyi miit'in irania'in minug sa'ag kaipyi ai'a­piheg hap mesu­wa­ro­tiaria piat hap kaipyi Tupana tikuap sio aito Iesui mohey haria sese sio yt hap sio aito imẽpyt'in sese aito sio yt hap. Pyno sa'a­wy'i ahã'ãg Tupana mi'i hawyi waku pe aito aipuẽti aheĩne'en wuat'i e'at piat hamo. Ma'ato aikotã aru irania'in meimuẽ wuaria yt sehay wakuat Iesui etiat yt ky'esat i haria ete aikotã aru mi'iria ete. Kat som aru Tupana tunug mi'iria ete yt tomi­ky­'esat nug neran i haria ete. Ta'i mi'iria ete po'og po'og sa'ag topy­hu'at i'atuepiat ho'opot hamo. Mesuwat rotiat ho'opot hit i'atuepiat hap kaipyi ho'opot hap te topy­hu'at wuat'i e'at pe i'atuete.
1PE 4:18 Pyno niatpo kahato aheha­kye­ra'at hap Tupana mimoe­waku ko'i aito pytkai. Ma'ato aikotã aru irania'in yt Tupana ky'esat i haria irania'in mesu­wa­ro­tiaria yt naku i nug haria ete aikotã aru mi'iria ete mekewat e'at pe. Ta'i aitoria wato­py­hu'at Tupana mieha­kye­ra'at ko'i wo ma'ato mi'iria yt karãpe i i'atue­ha­kye­ra'at hap topy­hu'at.
1PE 4:19 Pyno are'e ehepe — Miit'in miky­ry'i hamo o eweikup­te'en Iesui mohey haria eipe pote waku eweikup­te'en no Iesui mohey haria wo are. Waku ewetunug no Tupana miky­'esat ewywuat. Waku ewei'e Tupana kape — Tupana atum uipiit uiwa­nẽtup hap uipy'a piat uheĩne'en hap yne atum epe. Uiku­'uro pote uiku­'uro ma'ato yt atoiat hin i waku nug hap. I'ewyte yt atoiat hin i emohey hap uinug hat En mote Tupana wato'e waku. Mi'i pote atikuap yt ui'atoiat hin i hap. Mi'i pote epo pe atum uipiit uipã'ãu uiwa­nẽtup hap uinug hat waku wato'e miit'in miky­ry'i hano watoĩ­ne'en turan Iesui mohey haria aito pote.
1PE 5:1 Pyno uito Peteru iporo rakat areĩne'en. Ei'a­pykok hat areĩne'en. Pyno uhehay teran Iesui mohey haria apykok haria pe. Woro­ho­'o­nãpin neran eipe. Uito ti Iesui potmu'e sese uito. Ara'a­kasa yne Aika­'iwat iku'uro hap kape. Ara'a­kasa aikotã ho'opot hap kape. I'ewyte ara'a­kasa Iesui wẽtem gu'uro pywiat hap kape. Ara'a­kasa Iesui Tupana mõtypot hawe hẽtyhot hap py'a­setpe ara'a­kasa. Mi'i hap ewy tut irane. Mi'i hap kape i'ewyte ara'a­kasa uimu­'etu wuat ewy are.
1PE 5:2 Mi'i pote woro­ho­'o­nãpin eipe uipy'a pyi aikotã watopoi aihũria yne e'at pe aikotã wati­'a­pykok aihũria wãtym muo. Mi'i hap ewy ewei'a­tupoi Tupana ehay wo Iesui mohey haria Tupana hũria eimi­'a­pykok ko'i are. Ewei'a­tu­'a­pykok o Tupana hũria ahiag mupi yt naku i nug hap pupi are. Ewei'atoiat ro mekewat eiwa­nẽtup hawe — Yt atunug neran i e hap. Mi'i hawyi ewei'a­tu­'a­pykok Iesui mohey haria yne eipy'a pyi yne ehepiat ky'esat hap wywo. Uiwy­ria'in karãpe put'ok'e mekewat eiwa­nẽtup hawe — Atiky­'esat uhekat kahato Tupana hũria kaipyi. I'ewyte areĩne'en neran hekat rakano Tupana hũria apykok hap sa'up kaipyi e hap pupi eiwe'eg wo kahato o are. Katu­pono yt naku i wati­ky­'esat kahato Iesui mohey haria ekat ko'i. Pyno waku watu­we­potpap i'atu­mu'e hap ete po'og miit'in ky'e hap aikai waku. Yt naku i watoket ne'i. Waku aiwa­nẽtup hawe aiperup yn aipotpap turan miit'in mu'e Iesui etiat hap turan are ehepe nagnia pe ai'a­pykok haria pe are.
1PE 5:3 Yt naku i wati­'a­tu­po­'oro po'oro ahehay pirik hap wywo aihũria kat pote aihũria Tupana sa'y­ru'in saki­'yt'in. Mi'i pote po'og waku wati­mo­herep Tupana hũria pe mu'ap ikahu rakat. Waku wato­py­hu'at Iesui iã'ãkap ko'i wo ewywuat no. Mi'i hawyi waku wato'e aimi­mu­'eria pe — Ereĩne'en no eweikup­te'en no aikotã areĩne'en waku hap ewy waku wato'e. Waku watu­we­potpap po'og aihũria kai. Mi'i hap kaipyi ta'a­tukuap aikotã waku ta'a­tunug hap ko'i wakuap ko'i are.
1PE 5:4 Pyno karãpe wati­'a­tu­'a­pykok aihũria turan waku watu­wa­nẽtup kahato Ai'a­pykok hat toĩne'en hap kape. Mi'i kaipyi aha'up sese tut aru. Mekewat sa'up waku rakat aimõ­typot hap sese wuat'i e'at piat tut Ai'a­pykok hat Iesui kaipyi aru wato'e aiwa­nẽtup hawe. More­kuaria mesu­wa­ro­tiaria te'e­ru­we­painug kahato nu imehit rakat wywo te'e­re­we­painug kahato ta'a­tu­'akag ete. Hekat kahato rakat ewy te'e­re­we­painug more­kuaria mesu­wa­rote. Mi'i hap ewy Tupana tum aru ahepe aipotpap sa'up. Ma'ato aipainug hap wuat'i mimõ­typot ko'i wato­py­hu'at aru wuat'i e'at piat more­kuaria ewywuat aipainug hap are.
1PE 5:5 Pyno uito Peteru ati'a­tu­nãpin neran mesuwe kurum'in. Makup­tiaria woro­ho­'o­nãpin neran eipe. Uiwy­ria'in eweimõ­typot ro nagnia are. Ewetunug no ei'a­pykok haria miky­'esat ko'i. Karãpe ei'a­pykok haria eipo­'oro hawyi meremo ewetunug i'atu­mi­ky­'esat ko'i. Eweikup­te'en no miit'in mimu'e ko'i wo — Uimu'e ro ewei'e ro nagnia pe. Eweimõ­typot ro irania'in eiwo­'o­mõ­typot eiwo­'ope are ehepe. Ewei'atoiat ro mekewat — Uito po'og irania'in kai e hap. Mi'i hawyi aikotã watopag sokpe pakup hap ewy eweipag wẽtup wanẽtup hap ikahu rakat eipy'a pe mekewat — Atikuap teran uhyt mana e hap mekewat — Uimu'e ro e hap mekewat paa'ei'e hap wywo eiwe­painug o aikotã sokpe pakup hap ewy. Katu­pono — Uito po'og irania'in kai e hat Tupana mimohit no aru topy­hu'at. Tupana yt tiky­'esat i — Uito po'og irania'in kai e haria wo watu­kup­te'en. Ma'ato paa'e haria kape yn teha'at. Mi'iria pe tutum kahato hegyi'at hap kaipyi tekat yne tomi­mõ­typot ko'i pe are.
1PE 5:6 Pyno uiwy­ria'in ipakup takaria waku ewei'e Tupana kape — En ni po'og po'og uikai. Uimu'e ro. Aremohit epy'a­setpe Tupana. Paa'are areĩne'en epo pe Tupana. I'ewyte areĩne'en neran yt uwe i uimõ­typot mesu­wa­rote. Atikuap ta'yn uito kurum te ipakup takat re waku ewei'e Tupana pe. Mio tã ewei'e pote meiũran Tupana mimõ­typot no eweipy­hu'at mesuwat yi tote. I'ewyte miit'in akag wo miit'in apykok hano eweipy­hu'at. Kurum hin pĩ'ã hin Tupana miky'e ko'i kahato wo eipe are.
1PE 5:7 Mi'i pote waku ewei'e Tupana pe — Tupana aikotã miit'in timohy yrysakag ipotyi rakat hero i'akag ete mi'i hap ewy etihep uhetiat uhero hap uipy'a piat hap. Wẽtup ok po pe wẽtup ok akag note aikotã ta'a­tue­reto mekewat yrysakag ipotyi rakat ewy. Mi'i hap ewy atoiat yne uiwa­nẽtup hap ipotyi rakat ewywuat kowo'i kowo'i hap ko'i. Aikotã aikotã aru atunug ui'e hap ko'i atoiat yne epo pe e'akag ete Tupana ewei'e. Kat pote uiky'e kahato hat En waku ewei'e kurum iwasuria makup­tiaria are.
1PE 5:8 Pyno eiwe'eg wo o ahiag mupi kurum iwasuria makup­tiaria i are. Aikotã sura­ra'in ewy eweikup­te'en. Eiwe'eg wo kahato o ahiag mupi kat pote ehewa­nĩkap sese toĩne'en ahiag kurum iwasu ko'i makup­tiaria. Pyno eweikup­te'en aikotã mory'a epo pe hap ewy. Kat pote ahiag awyato marak'a hap ewy toĩne'en kowo'i kowo'i hewyry rakat ewy hesy'at rakat ewy. Toikat kahato Tupana hũria ipakuptia u hamo are.
1PE 5:9 Pyno eti'awa ahiag — Wãi'e­wei'e ahiag me. Iesui mohey hat uito ewei'e. Karãpe eweho­'opot kahato Iesui mohey haria eipe pote yt ewehe­ha'at rei'o yi kape kat pote irania'in mesu­wa­ro­tiaria py'a­setpe kurum iwasuria makuptia eiperia ewy tukup­te'en ho'opot hawe. Ta'a­tukuap wy mi'i pote waku hesaika rakaria ewywuat eweikup­te'en ahiag sopo hamo are.
1PE 5:10 Ma'ato Tupana ti eipo­wyro kahato hat toĩne'en uiwy­ria'in ipakup takaria. Tutum neran ehepe yne tesaika hap yt kat sa'up i. Toiky­'esat kahato eiperia tomi­mõ­typot ko'i wuat'i e'at piat hano. Kat pote Aipo­typot Iesui mohey haria eipe pote. Pyno ho'opot hap yt mot'i hamuat i toĩne'en. Mũki­'ite e'ihot'ok e'ihot'ok hap ewy tokosap ta'yn. Pyno waku etu'u ho'opot hap mesup mi'i hawyi meiũran Tupana mimotag ko'i wo eweikup­te'en waku rakaria hãpyk kahato rakaria wo. Yt uwe mima'at ko'i wo i eweikup­te'en. Meiũran Tupana ehay wywo ehesaika eweikup­te'en. Mi'i hawyi meiũran eiwa­nẽtup hap yt kowo'i kowo'i hin i toĩne'en. Hesaika rakaria wo Tupana mohey haria ewy eweikup­te'en eweho­'opot hap tokosap hawyi ehã'ãg hap tokosap hawyi are yne pe nagnia pe makup­tiaria pe kurum iwasuria pe hira­karia pe yne pe are.
1PE 5:11 Uito ei'a­pykok hat Peteru mio tã are yn Tupana pe — Atiky­'esat kahato emõtypot hap mesu­wa­rote are. Atiky­'esat yne miit'in epo pe are. Mesup mũki­'ite wuat'i e'at pe atiky­'esat En Miit'in Potypot Koro wo are. Pyno waku toran na'yn ui'e hap uito Peteru.
1PE 5:12 Pyno uito Siwanu atunug mesuwat miwan. Peteru wẽ pyi atiwan yne mesuwat sehay. Uhet wyti Siwanu. Uito areĩne'en aikotã eheywyt eikywyt yt eima'at hat hin i ewywuat i areĩne'en. Atipo­'oro mesuwat Peteru miwan Peteru e hap ehowawi uimiwan miat. Yne miit'in tikuap uimiwan aikotã aikotã atunug hap. Ta'i heremo kahato uimiwan kaipyi uwe uito hap. Yt iwato hin i uimiwan. Pyno pywo kahato aimu'e mesuwe Peteru. Ui'e hap ewy kahato to'e mesuwe. Are'e Peteru e hap ewy uito. Ta'i wato­py­hu'at ahã'ãg hap turan waho­'opot turan mi'i pote wato­py­hu'at wuat'i e'at pe Tupana mipoi­tyro ko'i wo. Tupana aiky'e kahato pote waku wato­py­hu'at y'am me hap ewy sura­ra'in ewy. Yt karãpe i watoiat aiky'e hat hegyi'at kahato pote are.
1PE 5:13 Pyno Iesui mohey haria mesuwe kuekatu ta'a­tu­po­'oro ehowawi are. Sa'a­wy'i ti Iesui ui'airo mesuwe Tosa­'yru eropat hat wo ui'airo are. Aikotã ta'a­tu­'airo eipe hap ewy. Mi'i pote kuekatu atipo­'oro ehowawi. I'ewyte yne uiwy­woria Iesui mohey haria kuekatu ehowawi ta'a­tu­po­'oro. Urupo wywo y'am me urueko ewy uruipo­'oro kuekatu ehowawi. Uha'yru i'ewyte toĩne'en mesuwe. Uha'yru set Maku. Mi'i i'ewyte kuekatu toipo­'oro ehowawi are.
1PE 5:14 Uiwy­ria'in eiwo­'o­ky'e ro eiwo­'ope. Waku eiwo­'o­ky'e eiwo­'ope aikotã wẽtup mẽpyt'in ko'i ewy. Pyno ahẽtup Tupana pe — Tupana etunug no mi'iria Esa'yru mohey haria wẽtup miit ewy are. Etunug mi'iria wo'o­ky'e kahato haria wo Tupana are kat pote ta'a­tu­mohey Esa'yru Iesui pote are. Ta'a­tu­mohey Emipo­'oro Urupo­rekuat nuat pote are. Pyno toran na'yn ui'e hap are. Uito ti Peteru
2PE 1:1 Uito ti Peteru Aipo­typot Iesui eropat hat sese uito. Uito Iesui mipo­'oro miit'in mu'e hanuat ihay moherep hat uito. Uito ti 12 ok hap Iesui emiit uito. I'ewyte imohey haria nãpin hat uito. Aimi­mohey ikahu rakat moherep hat uito. Hekat kahato rakaria ewywuaria watu­kup­te'en katu­pono imohey hap sa'up iwato kahato hap ewy topy­hu'at imohey hap kaipyi. — Uha'yru mohey haria ti eipe uiwa­nẽtup hawe uipy'a pe e Tupana ahepe. Mi'i pote atum yne wakuat ehepe e Tupana.
2PE 1:2 Atiky­'esat kahato eipe Iesui kuap kahato haria wo eweikup­te'en. Ta'i eweikuap Aipo­typot Iesui hawyi Tupana tum ne'en ne'en ne'i tegyi'at hap ehepe. I'ewyte tutum wo'o­wese hap tutum yt kat sa'up i. Aipoi­tyro kahato Tupana tuwehay pyi. Iwese pote tutum yne ahepe. Tutum iwato kahato typy sakpo itote. Toimõ'ẽ kahato tegyi'at hap are. Tutum ahepe wuat'i tokuap hap Tosa­'yru kuap hap kaipyi tutum yne yne ahepe are.
2PE 1:3 Tutum ahepe yne yne towanuat yt kat sa'up i. Tesaika hap toieĩne'en hap tewaku hap tutum ahepe are. Watikuap Ha'yru Iesui hawyi tutum yne yne tomõ­typot hamuat hap tutum. Ta'i i'ewyte wato­mohey Iesui hawyi Tupana ai'airo topot­po­'o­roria ko'i wo are.
2PE 1:4 Tutum ahepe tehay wakuat. Koitywy mio tã e ahepe — Atum aru yne yne ehepe e. Pywo yt uheso hin i e. Woro­ho­'o­ky'e haype e. Ta'i sa'a­wy'i ti watoĩ­ne'en yi totiaria ewy ne'i yt naku i hap nug haria wo are. Katu­pono yt watu­wẽtem kuap i ti aipiit miky­'esat seko sa'ag myi. Aiminug sa'ag yt nakuat i po pe yn watoĩ­ne'en. Ma'ato koitywy ti watu­wẽtem na'yn mekewat kaipyi Tupana piat ainug pakup i ra'yn hap kape. Mi'i tupono ti koitywy aito ipakup takaria wo ra'yn watoĩ­ne'en Tupana to'e hap ewy — Woro­ho­'onug ti aru eipe ipakup takaria wo e hap ewy watu­kup­te'en are mesuwe.
2PE 1:5 Pyno toĩne'en na'yn aikai Iesui mohey hap. Mi'i tupono ti Tupana tiky­'esat po'og Tosa­'yru ewywuat wato­py­hu'at hap uiwy­ria'in are. I'ewyte aikaipyi toiky­'esat aiwa­nẽtup hap aheko Tosa­'yru ewywuat ikahu rakat yn toiky­'esat. Mi'i hawyi toiky­'esat ahepiat tokuap hap aikotã aiwo­'o­'e­wy­'ewy hap toiky­'esat are.
2PE 1:6 Waku hawyi i'ewyte toiky­'esat aiwewãi kuap hap toiky­'esat. Mi'i hap watikuap hawyi toiky­'esat aiwo­'o­ky'e hap. I'ewyte toiky­'esat yt aipohep i tomohey hap etiat hap toiky­'esat. Mi'i watunug kuap hawyi toiky­'esat aito toiã'ãkap ko'i ewy hap toiky­'esat are.
2PE 1:7 Mi'i toĩne'en hawyi toiky­'esat aiwo­'o­ky'e sese hap aikotã wati­ky'e aheywyt aheinyt hap ewy aikywyt aiky­py'yt hap ewy are. Mi'i watunug kuap hawyi toiky­'esat aiwo­'o­ky'e pot'i sese hap. Itag sa'a­wy­'i­tewuat imohey hap kaipyi hap toiky­'esat are.
2PE 1:8 Mi'i tã watu­kup­te'en mote ti aru ikahu kahato watoĩ­ne'en are. Mi'i hawyi ti aru hekat kahato rakaria wo watoĩ­ne'en Tupana mõtypot hanuaria aito hawyi are. Mi'i hawyi ti ihãite rakano watu­kup­te'en are. Mi'i hawyi aikotã mekewat mikoi haat kahato rakat ewy watoĩ­ne'en are. Mi'i hawyi ti aru watu­kup­te'en Aika­'iwat Iesui kuap haria kahato are. Mi'i hawyi ti aru Aipo­rekuat no kahato topy­hu'at Aika­'iwat are.
2PE 1:9 Ma'ato meimuẽwat wakuat ko'i yt iwato i aikai pote ti aru yt ihapytig i rakaria wo watoĩ­ne'en uiwy­ria'in katu­pono sa'a­wy'i yt eweikuap hin i Iesui eipe. Mi'i turan ti yt ihapytig i rakaria ewy eweikup­te'en. Yt kat i heremo Tupana etiat uiwy­ria'in sa'a­wy'i mekewat e'at pe. Sa'a­wy­'iwuat eiminug sa'ag ko'i yn topy­hu'at. Mi'i pote ti yt ihapytig i rakaria ewywuaria wo eweikup­te'en. Mi'i pote ti eiminug sa'ag ko'i tukup­te'en ne ei'y­myẽpe katu­pono ti kurin kat Iesui mohey hap kaipyi wyti yt watikuap i mekewat pywuat sese hap. Yt wato'e kuap i pywo sio yt katu­pono yt wato­mo­wato i Iesui mohey hap ahepiat pote.
2PE 1:10 Pyno uheywyt'in uheinyt'in eiwe­mu'e ro haty wo mekewat Tupana mi'airo sio uito sio yt hap kuap ehepiat hamo are. Mi'i hawyi ti aru eweimo­wato ro mekewat seko pakup i eiwa­nẽtup hawe hawyi ti aru eweikuap ta'yn — Pywo ti rat uito Tupana emiit no areĩne'en e hap eweikuap. Uito ti Tupana mi'airo areĩne'en hap eweikuap. Mi'i hawyi ti aru eweimo­wato mekewat seko pakup i eiwa­nẽtup hawe ui'e hap ewy. Mi'i hawyi ti aru eweikuap kahato ra'yn — Pywo ti Iesui wanuat uito hap eweikuap are. Mi'i pote ti aru yt karãpe i ra'yn ewei'atoiat mekewat aheha­kye­ra'at hap mohey hap kaipyi.
2PE 1:11 Mi'i hawyi ti aru mekewat e'at put'ok'e turan — Ereke ro e Tupana. Aikotã aiwy sese pe wato'e — Ereke ro wato'e hap ewy ti aru topy­hu'at. Mi'i hawyi ti aru itote watu­kup­te'en na'yn wuat'i e'at pe ra'yn aikope Iesui toĩne'en Aipo­rekuat no aheha­kye­ra'at hap tote. Mi'i hawyi ti aru Aika­'iwat yat pe ra'yn watu­kup­te'en.
2PE 1:12 Mi'i pytkai yt uipohep hin i eimo­we'eg hamo. Yt eweiwaure tei'o Tupana piat einãpin hap ko'i are yn katu­pono eweikuap ta'yn sa'a­wy­'ite. Mi'i tupono po'og waku watikuap pakup i hap po'og waku. Waku watikuap kahato aipy'a pe.
2PE 1:13 Pyno ti waku wuat'i e'at pe pywo ai'e hap yn. Pyno to'iro watu­we­mu'e i mu'e i kahato iwan miat ete.
2PE 1:14 Pyno koitywy areĩne'en eipy­'a­setpe Tupana Pã'ãu uipiit piat wywo ma'ato yt atikuap i karãmuo yt uwe i ra'yn uipiit piat hap. Meiũran ta'at hawyi yt uwe i ra'yn. Koitywy ui'yat toĩne'en ne. Mi'i tupono areĩne'en eimu'e hamo. Pyno sa'a­wy­'iwuat meimuẽwat eimi­waure ko'i koitywy atimo­pakup i. Moro­ho­'o­mu'e pakup i ra'yn. Meimuẽwat eimi­waure ko'i ahenoi pakup i ra'yn. Pyno uito ti eimu'e hat. Meiũran yt uwe i mesuwe katu­pono uheiam iku'uro rakat nuat ne'i. Aikotã ai'yat ipot'i ra'yn hawyi watipun hap ewy areĩne'en. Katu­pono Uika­'iwat Iesui to'e uhepe — Wuat'i e'at pe eieĩne'en hap yt pya i e. Porap yn na'yn eku'uro hap e. Mio tã to'e hamo Uika­'iwat tuwe­mo­herep wuat'i e'at pe uhepe.
2PE 1:15 Mi'i tupono moro­ho­'o­mu'e po'og po'og katu­pono uiku­'uro hawyi eiwa­nẽtup hawe uimienoi topy­hu'at re — Ta'i Peteru mienoi ewy kahato ti tut irane Aipo­rekuat Iesui i'e hap ewy ewei'e aru uiku­'uro hawyi.
2PE 1:16 Pywo ti rat uruta­'a­kasa hap sese Iesui ieĩne'en hap. Mi'i kape urueha wo uruta­'a­kasa are. Uruto uruikuap kahato Mi'i Miit katu­pono uruewyry kahato iwywo are. Iesui hesaika kahato hap uruikuap ta'yn are. Yt urumu­'etu wuat hap kaipyi hin i urui'a­tu­mu'e eipe Iesui ete are. Pywo ti rat uruta­'a­kasa ra'yn Tupana Mipo­'oro Wuat'i Potypot Koro wuat. Waku kahato Mi'i Miit po'og po'og torania miit'in kai are. Uruikuap kahato Mi'i uruewyry at ka'ap hawyi. Uruikuap kahato Tupana Mimõ­typot sese Iesui hap. Urumi­mo­herep Iesui etiat ehepe yt urumu­'etu wuat hap kaipyi i ma'ato urueha wuat uru'a­kasa hap kaipyi urui'a­tu­mu'e eipe Mi'i Miit sese ete are.
2PE 1:17 Pyno sa'a­wy'i Tupana henoi atipy kaipyi uruehamo Tosa­'yru etiat tohenoi. Mio tã e Ai'ywot Tupana itote — Mi'i ti Uha'yru sese uimi­ky'e kahato e. Uimo­wepit sese Mi'i Miit e. Pywo ti rat uimõ­typot kahato hat Mi'i e Tupana teiam ywyhig muo ikytsig nakat ikahu rakat kaipyi mekewat tomõ­typot hap teiam kaipyi mio tã e are.
2PE 1:18 Pyno sa'a­wy­'ite mio tã e Tupana atipy kaipyi uruehamo. Ta'i urutu­kup­te'en Iesui wywo mekewat yity'ok wakuat hap tote turan mio tã to'e.
2PE 1:19 Sa'a­wy­'i­wuaria Tupana ehay moherep haria ti'a­tu­mu'e kahato Tupana Mipo­'oro Aipo­rekuat nuat ete. Mesup wẽtup ihay po'og hesaika mi'iria kai katu­pono koitywy I'ywot ihay atipy kaipyi uruehamo — Mi'i ti Uha'yru sese uimo­wepit hat sese Mi'i Miit e atipy kaipyi ahowawi. Ta'i Tupana kaipywiat ti sehay po'og hesaika torania irania'in mienoi ko'i kai are. Mi'i pote waku wato­mohey kahato mi'i e hap katu­pono mi'i Tupana wẽ kaipywiat sehay sese are. Pywuat sese ti topy­hu'at mi'i e hap po'og torania kai are. Mi'i tupono eiwa­nẽtup kahato o mio tã e Tosa­'yru piat hap kape are uiwy­ria'in e. Katu­pono ti mekewat sehay ti Tupana ehay moherep haria timo­herep kahato Tupana Mipo­'oro Aipo­rekuat nuat hap etiat. Aikotã ariãty i'ypyryp wiat hẽtyhot hap ewywuat. Pyno mi'i sehay eweikuap eipy'a pe Tupana Sa'yru hap mi'i hawyi aikotã at tuwe­mo­herep hune pyi hẽtyhot tuerut hap ewy eipy'a pyi wyti aru hẽtyhot hap tuwe­mo­herep are. Aikotã waikiru wato tuwẽtem hunete mi'i hap ewy eipy'a pyi tuwẽtem hẽtyhot tuerut eweimohey ra'yn Iesui Tupana Sa'yru hap hawyi.
2PE 1:20 Pyno ahenoi hamuat Tupana ehay aikope pyi tut sa'a­wy'i hap mekewat miwan miat. Pyno ti yt miit'in wanẽtup hap kaipyi i tut are. Yt yne miit'in mikuap kaipyi i tut mi'i wuat are. Yt miit'in mu'etu wuat kaipyi hin i ti.
2PE 1:21 Pyno miit'in wakuaria Tupana kuap haria kaipyi ti tuwẽtem Tupana ehay. Sa'a­wy'i yianmete ta'a­tu­henoi Tupana Pã'ãu mienoi aikotã aikotã hamuat ko'i. Ta'i Tupana Pã'ãu mienoi ko'i ahepiat ti ta'a­tu­mo­herep kahato ra'yn.
2PE 2:1 Sa'a­wy'i tukup­te'en Tupana ehay enoi haria ma'ato ti yt pywuat sese ko'i i te. Mi'i hap ewy te ti mesup tukup­te'en ne eimu'e haria heso rakaria eipy­'a­setpe. Mi'iria ti imoherep yt pywo piat i sehay eima'at hamuat ne'i Tupana etiat. Mi'iria ti — Iesui ti yt Aheha­kye­ra'at hat i e haria. Yt Iesui kaipyi i ti aheha­kye­ra'at hap sa'up e haria. Aipo­rekuat pun haria ne'i mio tã e haria. Pyno mio tã e haria ti Aipo­rekuat Iesui atoiat haria. Mi'i haria ti te'e­ru­we­'a­tu­'uka aima'at hap kaipyi.
2PE 2:2 Mi'iria ehay aimu'e hap topy­hu'at i'atuehay se ma'ato yt pywo piat i. Mi'i hawyi irania'in tuwat i'atu­mienoi upi. Ta'a­tunug sa'ag kahato ta'a­tu­mu'e haria minug ewy. Mi'i hawyi hary­po­ria'in seha­ry'i wo hary­po­ria'in wywo i'ewyte ihainia'in se'aito wo ihainia'in wywo hap ta'a­tunug iwaire waire hap ewy. Yne mi'i tã sa'ag hap ewy ta'a­tunug. Mi'i hawyi irania'in weha'at haria mekewat pywuat sese hap ete i'atuehay sa'ag sa'ag ne'i meimuẽ waria wẽtup sehay upiaria inug sa'ag hap haria kaipywiat.
2PE 2:3 Pyno ehekat ky'ewi yn eimu'e haria. Ta'i ehekat ta'a­tu­ky­'esat ei'a­tu­mu'e hap eima'at hamuat hap kaipyi. Mi'iria ti eiky­'esat ta'a­tuemiit no i'ewyte ta'a­tu­ky­'esat torania ta'a­tupo puo hap eheka­re'en eimẽ­pyt'in. Mi'i tã hap yn ta'a­tu­ky­'esat. Pyno Tupana toĩne'en ne mi'iria apiheg hamo. Ta'i Tupana toĩne'en eima'at hanuaria moma hanuat. Ta'i Tupana ti yt pya hin i i'atukai i'atu­'uka hamo.
2PE 2:4 Sa'a­wy'i sese ti atipy piaria Tupana wywuat hap ta'a­tu­'atoiat kahato ra'yn. Mi'i pote ti yt naku i nug haria te'e­ro­py­hu'at mi'iria. Mi'i pote ti Tupana ti'a­tu­'a­piheg na'yn. Yt toihep hin i i'atu­'a­piheg hap kaipyi ma'ato ti aria koro kape toi'ok­hyt­pugha atipy kaipyiaria are. I'ypyryp hap kape toi'a­tu­po­'oro po'oro are i'atu­pyhik hap i'ypyryp takat kape. Mi'i hawe ti tukup­te'en ta'a­tu­pyhik hawe iheg me. Meiũran ti aru put'ok'e mekewat uwe waku uwe yt naku i hap moherep hap e'at pe hawyi Tupana timo­herep ta'yn i'atu­minug sa'ag ko'i wuat'i puo.
2PE 2:5 Sa'a­wy'i te tukup­te'en kahato yt nakuaria mesu­wa­rotiat. Mekewat e'at turan Nu'e wywuaria to'yat piaria 7 ok takaria yn wakuaria Tupana tipuẽti. Mi'i pote mi'iria yn toi'a­tue­ha­kye­ra'at. Ma'ato irania'in yt Tupana mohey i haria yt naku i nug haria Tupana ti'a­tu­moma yne yne y'y wato wo i'aman 40 e'at piat 40 wãtym miat tutunug hawyi. Mekewat aha'a­se'i Nu'e ti'a­tu­mu'e kahato wen — Ewei'atoiat ro eiminug sa'ag ko'i hawyi ewei'aipok to Tupana kape e wen ma'ato yt te'e­ru­we­morem hin i Tupana kape yt ta'a­tu­'atoiat teran i i'atu­minug sa'ag hap ko'i pote. Mi'i pote ti Tupana tikaykay y'y kahato i'atu­'a­tu­'uka hamo. Mi'i hawyi te'e­ropap kahato Tupana yt miky­'esat ewy i gupte'en haria. Te'e­ru­we­'ã­py­hyka ãpy­hyka miit'in. Tupana yt ipohep hin i i'atu­'a­piheg hap ete. Mi'i hawyi aha'a­se'i Nu'e'in 8 ok takaria imohey haria yn Tupana ti'a­tue­ha­kye­ra'at ra'yn.
2PE 2:6 I'ewyte ahenoi teran tawa Sutuma tawa Kumura e hap etiat are. Itotiaria ti yt nakuap i nug kahato haria torania. Sa'ag nug hap kape yn te'e­ru­wa­nẽtup. Mi'iria ti Tupana timoma ra'yn aria wato wo. Toi'a­tuwuk kahato i'atu'yat ko'i yne yne i'atue­tawa ko'i. Yne yne Tupana tiwuk ta'yn torania. Mi'i hawyi itup yn topy­hu'at itote. Mi'i hawyi yt wẽtup ok i topy­hu'at itote. Toi'a­tu­'akit yne ra'yn mi'iria. Mi'i tupono koitywy eiminug sa'ag hap kai eiwe'eg wo o. Yt eweiwaure tei'o tawa Sutuma tawa Kumura Tupana piat i'apiheg hap ko'i. Yt nakuaria i minug upiat mi'i tã hap. Mi'iria ti Tupana kuap hap pun haria. Mi'i pote waku i'atu­'a­piheg hap aimu'e hap aimo­ken'ẽ hamuat hap topy­hu'at are. Mi'i ete ti aimu'e kahato ra'yn aimo­ken'ẽ hap ete are. Mi'i hawyi watikuap yt naku i nug motiat yt naku i kue pãi ai'e aiwa­nẽtup hawiat hamo.
2PE 2:7 Ma'ato toĩne'en tawa Sutuma pe wẽtup ok Tupana mohey sese hat wakuat nug neran hat Iro e hap het rakat. Mi'i ti Aparãu ywyt sa'yru — Yt naku i yn nug haria mesuwe uhetawa piaria e. Sewaire hap kape yn wanẽtup haria e. Yt naku i kahato atipuẽti mi'iria e Iro tawa Sutuma totiat gupte'en haria minug sa'ag ko'i ete. Iro yt tiky­'esat hin i itotiat seko sa'ag ko'i. Mi'i tupono Tupana tieha­kye­ra'at Iro tosa­ki­'yt'in wywo. Mi'i pote mekewat aria yt tu'u hin i iro'in mekewat tawa wuk turan katu­pono yt toiky­'esat hin i i'atu­minug sa'ag itotiat hap ko'i.
2PE 2:8 Itotiaria yt ta'a­tunug hin i Tupana miky­'esat ewy. I'ewyte yt miit'in miky'e ewy hin i ta'a­tunug. Ta'i i'atu­minug ko'i yt miit'in eko ewy hin i ta'a­tunug. Mi'i hap ko'i Iro yt tiky­'esat i pote Tupana mieha­kye­ra'at wo topy­hu'at.
2PE 2:9 Ta'i Tupana aheha­kye­ra'at kuap kahato ahã'ãg hap kaipyi inug hap kaipyi imohey haria aito pote. Yne mekewat yt tomi­ky­'esat ewywuat i hap ko'i kaipyi aihep kuap. I'ewyte toikuap yt nakuaria i apiheg hap. Pyno ti yt nakuaria i apiheg hamuat Tupana po pe toĩne'en. Ta'i yt pya hin i mekewat e'at Tupana piat — Yt naku i kahato eipe e hamuat hap e'at are.
2PE 2:10 Tupana timoma yne ra'yn tawa Sutuma tawa Kumura piaria. Katu­pono Tupana yt tiky­'esat hin i i'atuwat i'atuieĩ­ne'en hap. Wuat'i yne ta'a­tu­pu'i miky­'esat ewy yn ta'a­tunug wuat'i hary­po­ria'in wywo wuat'i ihainia'in wywo. Ta'a­tupiit miky­'esat hap ko'i yn ta'a­tunug to'ope to'ope. — Yt kan hamo i Tupana miky­'esat hap ko'i ta'a­tu'e haype. Ta'a­tu­mi­ky­'esat ewy yn ta'a­tunug. Yt ta'a­tu­mõ­typot hin i Tupana wãi'e hap i'ewyte miit'in wãi'e hap yt ta'a­tu­mõ­typot i. Yt te'e­ru­we­mõti hin i ta'a­tu­minug sa'ag hap ko'i ete. — Atunug mote atunug e haria yn. Ta'i mi'iria ti to'o­ky­ry'i kahato ne'i wakuaria ete. I'ewyte atipy piaria ete to'o­ky­ry'i. Ta'i atipy piaria ti sakpo'e ikahuria i'ewyte po'og hesaika rakaria. Mi'i pytkai wemu'e haria yt pywuat i enoi haria — Uruto po'og irania'in kai i'atu'e yn i'ewyte mio tã i'atu'e atipy piaria pe.
2PE 2:11 Ta'i atipy piaria ikahu rakaria hesaika kahato rakaria. Ta'i po'og hesaika mekewat eima'at haria kai wen ma'ato yt kat i sa'ag i'atu'e Tupana pe yt pywo piat i henoi haria ete.
2PE 2:12 Meke­waria ti aikotã miat haiwot rakaria ewywuaria. Aikotã miat wati­'auka teran meremo hap ewywuaria mi'iria. Mi'i haype to'o­ky­ry'i kahato mekewat wakuap wuat'i mikuap wuat ete. Ma'ato ti yt ta'a­tukuap i haype. Mekewat seko sa'ag ta'a­tu­minug wo ne'i ti te'e­ru­we­'a­tu­'uka kahato.
2PE 2:13 — Urumi­ky­'esat ewy yn urutunug neran i'atu'e sa'ag. Mi'i hawyi miit'in py'a­setpuo ihot'ok puo yt naku i kahato ta'a­tunug irania'in ehamo. Ma'ato Tupana ha'up nug irane i'atu­minug sa'ag hap ko'i. Yne i'atu­mi­ky­'esat ewy ta'a­tunug hawyi yt te'e­ru­we­mõti hin i. Ma'ato eipe ti eiwe­mõti kahato eweipy­hu'at meke­waria te'e­renuk eipy­'a­setpe turan katu­pono te'e­ru­we­mo'ok sa'ag kahato. Ta'i eima'at kahato ti eimi'u wuat te'e­renuk turan. I'atupiit mo'ok hap mowepit hap yn ta'a­tu­ky­'esat. Mi'iria ti te'e­ru­wa­nẽtup hap ywyk hanuaria. Ta'i sa'ag nug hap ete ti to'o­mo­wepit kahato ra'yn. Ma'ato i'atu­sa'up i'atu­minug sa'ag hap ete put'ok'e irane. Ta'i Tupana ti'a­tu­sa­ty'i saty'i irane yt naku i nug hap ko'i ete. Ta'a­tu­mo­so­'opot hap ewy ta'a­tu­puẽti irane.
2PE 2:14 Mi'iria eha pe ti toĩne'en hary­po­ria'in ihainia'in ky'esat hap ko'i yn ti ra'yn. Mi'iria ti — Ta'i yt karãmuo hin i ti aru ahero aiminug sa'ag wo e haria. Mi'i hawyi Tupana mohey haria yt hesaika kahato rakaria ma'at haria wo te'e­ro­py­hu'at mi'iria. Ta'i miit'in ekare'en ko'i ta'a­tu­ky­'esat yne ta'a­tu­wano hap. Mio tã hap ewy i'atuieĩ­ne'en hap yt naku i kahato. Pywo ti rat mi'iria Tupana mikuasa wuanuaria wo te'e­ro­py­hu'at.
2PE 2:15 Ta'i mi'iria ti mu'ap hãpyk takat atoiat haria wo te'e­ro­py­hu'at. Aikotã ga'apy piat ho'o­wasat rakaria ewy tukup­te'en. Mekewat Tupana ehay moherep sa'ag hat Parãu e hap Posu sa'yru upiaria mi'iria. Kat pote Parãu ti ha'up etiat Tupana ywania ma'at hat — Pyno ha'up ewetum uhepe pote kat e kat e hap sa'ag atunug e hat mi'i. Ma'ato inug sa'ag hat ete Tupana ihay pirik kahato ne'i. Wãi'e kahato ne'i Tupana mekewat ete.
2PE 2:16 Mi'i hawyi Tupana tinãpin yt we'eg i hat wẽ pyi mekewat ihũ wẽ pyi wãi'e Parãu me. Mi'i hawyi ihay mekewat ihũ miit ehay ewy — Wãi'e etiwaure ro eso hap e. Heso'ok takat ewy ereĩne'en e mekewat Iumentu ihay mekewat kat ko'i kat ko'i moherep hat pe mekewat Tupana ehay moherep ran hat pe.
2PE 2:17 Pyno meke­waria yt pywuat sehay enoi haria i yrasa gag ewy mi'iria. Aiwe­'y­'utui turan y'y hit'i yrasa kaipyi waku kahato wati­puẽti ma'ato wẽtup tuereto igag na'yn pote yt kat i y'y wati­puẽti aiwe­'y­'utui hap monik hamuat. Mio tã hap ewy yt kat i waku wati­puẽti mi'iria kai. Aikotã ywyhig ko'i ywytu uato turan hewyry kahato wasere upi hap ewy mi'iria. Ta'i mi'iria eiam ti Tupana tunug na'yn i'ypyryp sese yt wẽtup i'ypyryp ewywuat'i ti i'atueiam Tupana minug. Mi'i hawyi ti aru mi'iria tukup­te'en i'ypyryp we yn na'yn wuat'i e'at pe.
2PE 2:18 Mi'iria i'atuehay se wen ma'ato yt kat i'atu'e pytkai i ra'yn. Ta'i i'atuehay kahato ma'ato kat i'atu'e kat i'atu'e yt watikuap i. — Uruto ti iwe'eg kahato rakaria i'atu'e. Mi'i wo ti ahekyi te'e­ru­we­wawi. Mi'i hawyi ta'a­tupiit ko'i wywo ta'a­tu­ma'at ne'i irania'in Iesui mohey pakup haria yt hesaika kahato rakaria i te. Irania'in te'e­ru­wẽtem neran yt naku i nug hawyi ma'ato mi'iria ta'a­tuiã'ãg kahato irania'in ta'a­tupiit minug sa'ag wo. Mio wyti ta'a­tunug aikotã pina puta ewy miit'in pytyk teran haype. Mi'i hawyi sa'ag nug hap kaipyi wẽtem neran haria yt hesaika i pote wo'o­pyhik hawiat ewywuaria te'e­ro­py­hu'at. Mi'i tã me ti ta'a­tu­ho­'o­ma'at reran Iesui mohey pakup i haria.
2PE 2:19 Mi'i hawyi — Eweiwat uruupiat pote ti ren eweikup­te'en eimi­ky­'esat ewy e haria. Yt uwe po pe i eweikup­te'en e haria ti. Mi'i pote yn ti ren waku kahato rakaria wo eweikup­te'en e haria. Ta'i eweiwat uruupiat pote yt uwe i eipo­'oro hat e haria. Mi'i tupono po'og waku pe eweikup­te'en i'atu'e sa'ag. Ma'ato ti i'atueso kahato ne'i katu­pono mi'iria yt te'e­ru­we­nõ'ẽ kuap i mekewat ta'a­tu­minug sa'ag pyi. Pywo pe ti ta'a­tu­minug sa'ag ko'i eropat haria mi'iria. I'atueko sa'ag ni topy­hu'at i'atu­'okpe tote i'atu­'akit hamo. — Yt uwe i uruka­'iwat i'atu'e pytkai i'atu­minug sa'ag hap ko'i i'atu­ka­'iwat sese topy­hu'at. Pyno ti mi'iria iheg me tukup­te'en mekewat seko sa'ag eiam me. Pyno uwe po pe watoĩ­ne'en pote pyno mi'i ti ra'yn aika­'iwat no toĩne'en. Yt watoiat kuap i aiminug sa'ag pote aiminug sa'ag topy­hu'at aipo­typot no ti ra'yn are.
2PE 2:20 Ma'ato tukup­te'en yt naku i nug hap atoiat haria Iesui kuap haria ma'ato meiũran te'e­ra­'aipok i mekewat sa'a­wy­'iwuat seko sa'ag kape ra'yn mesuwat yi totiaria wemohun hap kape i ra'yn. Mi'i hawyi ti aikotã kiã e'yni pianuaria ewy tukup­te'en. Mi'i hawyi ti yt te'e­ru­we­nõ'ẽ kuap i ira'yn mekewat ta'a­tu­minug sa'ag hap sa'a­wy­'iwuat kaipyi. Mi'i hawyi ta'a­tu­minug sa'ag hap ko'i po pe i ra'yn tukup­te'en. Mi'i hawyi po'og po'og sa'ag sa'a­wy­'iwuat kai te'e­ro­py­hu'at.
2PE 2:21 Mi'i hawyi ti yt naku i kahato ra'yn tukup­te'en. Ta'i po'og waku mi'iria yt karãpe i ta'a­tu­puẽti mu'ap hãpyk takat wakuap nug hap sio ta'a­tukuap hawyi te'e­ra­'aipok i ra'yn sa'a­wy­'iwuat yt naku i nug hap kape. Mi'i hap ewy pote po'og na'yn sa'ag te'e­ro­py­hu'at sa'a­wy­'iwuat kai.
2PE 2:22 Aikotã aware te'en hawyi tutu'u i hap ewy are. Hã'ãkap aimikuap awareria etiat hap ewy mi'iria. Aikotã hamaut tuwei hawyi meiũran ta'at i ra'yn ipitpit pe hap ewy tuwei hawyi. Tuwesot sot ihy nem nakat pe hap ewy mi'iria are. Pyno typuat ra'yn uimiwan ewawi.
2PE 3:1 Typuo ra'yn atipo­'oro uimiwan ehowawi uiwy­ria'in. I'ewyte mesuwat uimiwan aikotã sa'a­wy'i einãpin hap ewywuat re. Yt eweiwaure tei'o aikotã sa'a­wy'i ho'o­wasat rakaria ewy eweikup­te'en. Koitywy ti eiwa­nẽtup hap yt ipitpit hin i ra'yn toĩne'en. Pyno o yt eweiwaure tei'o aikotã sa'a­wy'i ho'o­wasat rakaria eweikup­te'en eiwa­nẽtup hawe hap. I'ewyte yt eweiwaure tei'o aikotã meiũran tut eima'at hanuaria ikahuro turan wuat hap ete. Mi'i ti aru Tupana ehay etiat weky­ry'i hat e hap.
2PE 3:2 Aikotã sa'a­wy­'i­wuaria mienoi iwan miat Tupana ehay ewy put'ok'e. Aikotã uruto Aika­'iwat Iesui potmu­'eria e hap ewy.
2PE 3:3 Tut wyti aru eimu'e hanuaria. Mi'iria ti aru ta'a­tu­mi­ky­'esat ete yn eimu'e. Ta'a­tupiit piat miky­'esat sa'ag ko'i hap ta'a­tunug kahato eiky­'ewi i'ewyte eheka­re'en ky'ewi. Mi'i hawyi eimi­mohey Iesui tut aru e hap ete ta'a­tu­ky­ry'i kahato.
2PE 3:4 — Yt tut i wyti Eika­'iwat Iesui i'atu'e irane ahepe. Pyno eipe i'ewyte sa'a­wy­'i­wuaria Tupana mohey haria — Tut irane uruka­'iwat ewei'e ra'yn wen ma'ato yt tut i te i'atu'e irane ahepe. Ta'i sa'a­wy­'i­wuaria Tupana mohey haria i'ewyte Iesui potpo­'o­roria 12 ok takaria topap yne pytkai yt tut i te i'atu'e. Sa'a­wy­'iwuat mesuwat mytyp waha­'a­wynug hap ewy ra'yn topy­hu'at mesup. Mi'i tupono ti yt put'ok'e hin i irane aiminug sa'ag ai'a­piheg hamuat Tupana piat i'atu'e irane mesu­wa­ro­tiaria wo'o­ky­ry'i haria.
2PE 3:5 Pyno ti aru te'e­ru­wepyi ra'yn yt iwe'eg i rakaria wo te'e­ro­py­hu'at mi'iria katu­pono mi'iria ti yt Tupana ehay kaipyi i te'e­ru­we­mu'e. Katu­pono Tupana to'e — Sa'a­wy'i ti waikiru ko'i tukup­te'en mi'i hawyi i'ewyte mesuwat yi. Mi'i hap ewy te ti mesuwat yi toĩne'en. Mi'i hawyi y'y toĩne'en mesuwat yi tote. Pyno ti mi'i tã sa'a­wy­'ite toĩne'en y'y yn ma'ato y'y pe yi toĩne'en. Mi'i hawyi meiũran pe'am'e ra'yn yi y'y pyi. Mi'i hawyi y'y tuwe­pat'ok ta'yn. Mi'i hawyi yi po'og ywaiti y'y kai toĩne'en. Ma'ato i'ewyte toĩ y'y ywyt'ok­pype.
2PE 3:6 Mi'i hawyi meiũran aikotã sa'a­wy­'iwuat ewy y'y i ra'yn po'og iwato mekewat Nu'e e'at pe. Heremo rakaria min'i­'a­tu'e i ra'yn. Mi'i hawyi ti mekewat sa'a­wy­'iwuat yi heremo rakat min'e yne i ra'yn. Mi'i hawyi ti topy­hu'at yt sa'a­wy­'iwuat ewy i ra'yn mytyp.
2PE 3:7 Aikotã mekewat e'at pe Tupana to'e Nu'e pe mi'i hap ti tutunug na'yn. Ma'ato koitywy ti mekewat sa'a­wy­'iwuat ewy sehay wẽtup te toĩ. Ma'ato ti mekewat yi wuk hap etiat ra'yn Tupana tohenoi — Pyno ti aru meimuẽwat aria wo yi waikiru yne atimoma aria wo e ti Tupana. Aikotã sa'a­wy­'ite atimoma yne y'y wo hap ewy te ti aru. Ta'i tut ti aru mekewat e'at katu­pono mi'i hap ewy atunug e ti Tupana. Mi'i hawyi ti aru yt nakuap i nug haria apiheg hap e'at put'ok'e ra'yn e ti Tupana are. Ma'ato mio tã e Tupana pytkai yt tut i aru i'atu'e ne'i meimuẽ waria ta'a­tu­wa­nẽtup hap kaipyi ne'i.
2PE 3:8 Ma'ato uimie­ha­kye­ra'at ko'i uimi­ky­'eria yt eweipy­hu'at rei'o i'atuehay upi. Eweikuap to aikotã mekewat Tupana e'at. Ta'i Tupana yt tomo­rania i ti yne e'at aikotã aikotã hap ko'i. Wẽtup e'at yn ni Tupana po pe toĩne'en aikotã wẽtup 1000 anu hap ewy. Tupana wanẽtup hawe wẽtup e'at wẽtup 1000 anu hap ewy i'ewyte wẽtup 1000 ano wẽtup e'at hap ewy Tupana wanẽtup hawe.
2PE 3:9 Katu­pono sa'a­wy­'i­tewuat — Atunug aru e hap tutunug na'yn. Pyno ti Aika­'iwat wyti sa'a­wy­'iwuat — Atunug aru e hap tutunug na'yn. Yt aima'at hin i are. Ta'i Tupana ti yt waure'e hin i sa'a­wy­'iwuat tehay — Ati'a­tu­'a­piheg ti aru yt nakuaria i te hap ete. Ma'ato ahowawi ti iperup'i kahato. Yt tutunug neran i te aiky'e haype katu­pono toiky­'esat yt wẽtup i ho'o­wasat hap. Yne torania topo piat hap toiky­'esat. Kat pote yt meremo i ai'a­piheg neran i ma'ato ti hepamo put'ok'e mekewat mio tã e hap. Toiky­'esat miit'in te'e­ru­we­morem tewawiat yt naku i pywiat hap haype. Mi'i pote hepamo put'ok'e mekewat — Atunug aru e hap. Yt toiky­'esat i miit'in moma hamuat hap.
2PE 3:10 Ma'ato pywo put'ok'e irane mekewat e'at pe. Ta'i pywo ti aru put'ok'e Aika­'iwat piat miit'in apiheg hap. Ma'ato ti karãmuo kat e'at pe yt uwe i ikuap ma'ato ti put'ok'e hamuat. Aikotã sero­'ok'e hat ewywuat tut irane. Kat e'at pe yt uwe i ikuap are. Mekewat e'at pe ti aru ikahuro ra'yn wakiru ko'i. Mekewat e'at pe tehay pirik wo toimo­weityk ta'yn waikiru ko'i. I'ewyte mesuwat yi tuweityk ta'yn. Mi'i hap e'at pe ti aru yi ihywap ta'yn hakup wote yt aikopiat wẽtup hakup i'ewy­'ewy i hakup sese ti ra'yn. Mi'i hawyi ti aru wuk'e yne ra'yn mesu­wa­rotiat miit'in minug sa'ag ko'i. I'ewyte yi ikahuro ra'yn.
2PE 3:11 Pyno uiwy­ria'in watikuap ta'yn mesuwat yi ihywap irane hap. Mi'i hawyi yt kat i ra'yn. Mi'i tupono waku wato­mo­hãpyk yne aiwa­nẽtup hap ko'i. Mi'i hawyi wakuaria Tupana ewaku hap ewywuat watu­kup­te'en. Waku Tupana kape yn aiwa­nẽtup hap watu­kup­te'en mesu­wa­rotiat turan. Mi'i hawyi ti aheko pakup wywo yn ra'yn ahewyry waku kat pote wakuaria yn na'yn aito.
2PE 3:12 Mi'i hawyi ti waku — Eriot ro Mehĩ Eriot ro Mimi wato'e yn na'yn. Mi'i pote ti wate­ha'at kahato ra'yn Tupana put'ok'e hap e'at kape. Yt pya i ra'yn wato'e yn na'yn. Ta'i wuk'e ti aru waikiru ko'i. Mi'i hawyi ti aru tuweityk yne ra'yn wato'e. Watikuap ta'yn mio tã e hap. Ta'i meiũran ti aru yne ra'yn iheg nakat i'ewyte yt iheg i rakat i ti aru wuk'e ra'yn hakup pote ihywap yne. Ma'ato ti aito watikuap ta'yn.
2PE 3:13 Mi'i hawyi i'ewyte Tupana to'e — Atunug ti aru mi'i rẽ wẽtup yi ipakup takat. I'ewyte ti waikiru ko'i ipakup takat ra'yn atunug e. Ma'ato ti aru mi'i hawyi itote sa'a­wy­'iwuat ko'i kai hãpyk sese rakaria yn na'yn. Mi'i hawyi ti aru wakuat nug haria yn na'yn tukup­te'en itote Tupana mimoe­waku ko'i mio tã wato'e ti aiwo­'ope. Uiwy­ria'in mi'i watikuap ta'yn hawyi ti aru merep ta'yn wati­ky­'esat put'ok'e yi pakup hap i'ewyte waikiru pakup ko'i.
2PE 3:14 Mi'i pote ti hãpyk yn wati­ky­'esat watoĩ­ne'en Tupana wywuat hap. Irania'in wywuat aiwo­'o­wese hap yn waku watikat. Tupana wywuat aiwo­'o­wese hap yn wati­ky­'esat. Pyno uiwy­ria'in waku watoĩ­ne'en iwywo mekewat e'at pe. Waku yt kat i i'aparap hap aiwa­nẽtup hawe. Waku yt kat i yt nakuap i aikai Tupana wanẽtup hawe. Waku yt kat i hin i ra'yn aiminug sa'ag aikawiat ko'i.
2PE 3:15 Ta'i ewehe­ha'at kahato mekewat e'at pe hekatup turan. Yt perup'i puo hin i ewehe­katup ma'ato Tupana miky­'esat nug hap ete ewehe­katup are katu­pono Tupana tunug irane to'e hap ewy wen ma'ato yt waure'e hin i aheha­kye­ra'at hamuat hap ete. Toiky­'esat wuat'i miit'in ehakye­ra'at hamuat pote yt merep i tut. Yt tut i te katu­pono toiky­'esat yne eiperia tomie­ha­kye­ra'at ko'i wo eweipy­hu'at hap. Aikotã aheyke'et Pauru henoi hap ewy are. Tuwe'eg hap Tupana kaipywiat wo eimu'e mi'i hat ti meke. Tupana miium ewy kahato eimu'e. Ta'i toiwan kahato ti mesuwat ehowawi.
2PE 3:16 Ta'i mio tã e Pauru Tupana ut hap etiat tohenoi tomiwan miat. Yne tomiwan me mio tã e. Aimu'e kahato mekewat sehay wo. Pyno niatpo kahato aimu'e wen mekewat sehay wo. Yt watikuap i kahato ti yne aiwy Pauru miwan ko'i. Mi'i pote tukup­te'en yt we'eg i haria mekewat Pauru ehay ywyk haria. Mi'i pote ti mehĩ Pauru miwan kaipyi eimu'e wen ma'ato ti yt aimu'e hat Pauru mienoi ewy sese i. Ta'i mi'i haria ti i'atu kahato. Kat pote mekewat Pauru miwan etiat yt wemu'e kahato haria pytkai i are. Mi'i pote Iesui mohey ran haria i'ewyte Tupana mipo­'o­roria ran nakaria pote Tupana ehay pun haria mi'iria. I'ewyte ta'a­tue­ro'ok ta'yn imienoi kat e hap kat e hap. Mi'i hawyi ti ta'a­tu­wa­nẽtup hap kaipyi ra'yn ta'a­tunug yt Pauru e hap ewy i. Mi'i hap kaipyi ti te'e­ru­we­ma'at Tupana ehay ran enoi hap ete. Mi'i hawyi Tupana mimoma haria te'e­ro­py­hu'at.
2PE 3:17 Pyno uheka­tu­wyria eiwe'eg wo o mi'i haria pupi are. Mi'iria yt aiwy Pauru ewy hin i ta'a­tu­henoi — Ta'i Pauru e hap mi'i i'atu'e pytkai. Yt ehewyry tei'o i'atuehay upi are. Yt nakuaria i mi'iria are. Yt Tupana miky­'esat ewywuat nug haria i mi'iria. I'ewyte yt miit'in miky­'esat ewywuat nug haria i. Pyno mesup yianmete uimiwan me ahenoi ra'yn yne yne eimo­we'eg hap. Aikotã aru aikotã aru miit'in eima'at reran haria put'ok'e aru ehete hap turan. Mi'iria ti aru wẽtup Iesui e hap ran ta'a­tu­mo­herep wen ma'ato yt to'e hap ewy hin i are. Karãpe aru meimuẽwat ewywuat put'ok­'i­'a­tu'e ehã'ãg hamo mi'i hawyi ti aru — Yt rat ewei'e yn no i'atuepe. — Kopuo yn mu'ap meiko yn mu'ap i'atu'e pytkai ti aru. — Yt rat ewei'e o i'atuepe Iesui ehay sese upiaria uruto ewei'e ro. Eheso i rat ewei'e i ro i'atuepe. Mi'i hawyi ti aru yt eima'at kuap i ra'yn mi'iria. Ta'i mi'iria eima'at teran haype wẽtup sehay upi. Mi'i hawyi awyato ewy tõ'ẽ ei'u hamo. Ta'a­tu­ky­'esat Iesui mohey hap ahepiat hep hamuat. Ta'a­tu­ky­'esat watunug yt naku i ta'a­tu­minug sa'ag hap ewy. Eiwe'eg wo mi'iria pupi are. Pyno yt ewei'atoiat tei'o Iesui mohey hetiat hap i'atu­mi­mohey wẽtup sehay upi pãi are. Ma'ato iheg me kahato imohey hawe waku eweikup­te'en pote waku pe ra'yn eweikup­te'en wuat'i e'at pe are pãi.
2PE 3:18 Pyno eiwe­motag o Tupana ehay wo hegyi'at hap kaipyi are i'ewyte Tupana eiky'e hap kaipyi. Aheha­kye­ra'at hat Aipo­typot Iesui mohey hamo eiwe­motag o. Imohey kahato haria wo eweikup­te'en hawyi ihãite kahato rakaria eipe. Imohey hap upi ihay wakuat upi yn atiky­'esat eweikup­te'en uito are'e ehepe uimiwan me ahenoi. Uito ti Peteru Iesui potpo­'oro sese uito.
1JO 1:1 Uito ti Iesui miky'e Iuwãu. Mesuwat uimiwan atipo­'oro ehowawi uiwy­ria'in. Iesui etiat atiwan ehowawi. Aheĩne'en hap e'yianmete Iesui toĩne'en are. Pywo ti rat uruto ipotmu­'eria urueha wo uruta­'a­kasa ra'yn mesuwe mekewat Tupana ehay Miit kawiat rakat. I'ewyte mi'i turan uruewaure ka'a wo uruikuap ihay wakuat. I'ewyte ti urutemig urupo wo mekewat aipiit ewywuat rakat.
1JO 1:2 Sa'a­wy'i yt heremo i toĩne'en Tupana ehay wakuat rakat ma'ato mi'i hawyi tuwepit nug na'yn tuwe­mo­herep ta'yn Miit no sese ra'yn ahowawi are. Mi'i Miit wyti uruta­'a­kasa ra'yn. Mi'i hap ti koitywy uruimo­herep ta'yn ehepuo uruehay wuat. Mi'i ti wuat'i e'at piat ieĩne'en hat uruta­'a­kasa ra'yn. Sa'a­wy'i To'ywot atipy piat wywo yn toĩne'en ma'ato koitywy toimo­herep ahepe Tosa­'yru.
1JO 1:3 Aiwywo ra'yn toĩne'en. Mi'i hap uruikuap uruewaure ka'a pe. Urueha'at hap uruimo­herep ehepe katu­pono uru'ewy aiwo­'o­'e­wy­'ewy wato­py­hu'at hap uruiky­'esat kahato I'ywot wywo Ha'yru wywuat aiwo­'o­wese hap. Uru'e­wywuat Aipo­typot Iesui ewywuat hap uruiky­'esat.
1JO 1:4 Mi'i hap ky'ewi ti mesuwat urumiwan atipo­'oro ehowawi uruehay eimo­wepit kahato hamuat.
1JO 1:5 Pyno Ha'yru wẽ pywiat imienoi uruimo­herep ta'yn ehepe sa'a­wy­'i­tewuat imienoi mio tã e hap. Tupana yn nyti ariãty sese e hap. Tupana kai ti yt kat i i'ypyryp hap toĩne'en. Yt naku i nug hap yt kat i ikai.
1JO 1:6 Pyno Tupana wywo uruto­'o­wese kahato wato'e ma'ato watunug ne seko sa'ag nug hap pote i'ypyryp wiat watoĩ­ne'en hap ewy. Mi'i pote ti — Atikuap Tupana wato'e ma'ato yt naku i watunug sa'ag pytkai. Mi'i pote aiwe­ma'at hap ne'i topy­hu'at yt kat i wyti ai'e pywo piat hap pote are.
1JO 1:7 Ma'ato wato­py­hu'at hẽtyhot pe Aika­'iwat ewy pote pywo pe watoĩ­ne'en. Mi'i pote ti iwywuat aiwo­'o­wese hap topy­hu'at kahato are. Mi'i hap kaipyi ti Tosa­'yru Iesui suu wo Tupana tikoho yne aiminug sa'ag ko'i. Mekewat kat ko'i kat ko'i aiminug sa'ag ko'i toi'a­tu­koho at ka'ap ahewyry Iesui wywo imiky­'esat ewywuat pote. Mi'i hawyi tomi­ky­'esat nug haria wato­py­hu'at.
1JO 1:8 I'ewyte ti — U yt karãpe i sa'ag atunug wato'e pote i'ewyte koitywy yt karãpe i ati'a­parap Tupana pe wato'e pote heso rakano wato­py­hu'at katu­pono i'aparap kahato haria aito pote. — Yt kat i sa'ag atunug wato'e pote aiwe­ma'at hap topy­hu'at mio tã ai'e hap kaipyi are. Yt kat i hin i topy­hu'at pywo ai'e hamuat hap e. Mi'i hawyi heso rakaria wo watoĩ­ne'en.
1JO 1:9 Ma'ato wato'e Tupana pe aipy'a pyi — Ui'ywot ati'a­parap kahato epe uhehay wo uiminug sa'ag wo wato'e pote aimo­hãpyk kahato. Mi'i hawyi — Waku pe ereĩne'en mesup e ahepe watoiat yne aiminug sa'ag hawyi. Tupana aiky'e kahato pote toĩne'en kahato aika­wiano hamo. Yt ai'atoiat teran hin i wati­'a­parap topiat pytkai aiky'e kahato. Ai'a­piheg hamuat pytkai aiky'e hap wywo ai'a­piheg are.
1JO 1:10 Ma'ato wato'e — Yt karãpe i ati'a­parap Tupana pe miit'in me wato'e pote ti — Heso rakaria wo eipe e Tupana ahepe katu­pono yne miit'in i'aparap haria atikuap kahato e Tupana ahepe. Atikuap yne eiwa­nẽtup sa'ag hap ko'i e ahepe.
1JO 2:1 Pyno uha'y­ru'in ko'i uhaki­'yt'in ko'i yt atiky­'esat i ti ewei'a­parap Tupana pe i'ewyte miit'in me. Mi'i hap etiano ti mesup atiwan ehowawi. Ma'ato wati­'a­parap Tupana pe miit'in me pote waku wahenoi ahepiat i'aparap hap. Mi'i hawyi Aika­'iwat timo­herep To'ywot pe aimo­hãpyk hamuat to'e.
1JO 2:2 Aika­'iwat Iesui ti ihay kuap kahato aika­wiano hamo katu­pono mi'i ti yt karãpe i i'aparap Tupana piat hat. Ai'a­piheg hap tutu'u yne. I'ewyte ai'a­piheg hap sa'up tutum yne. Ma'ato yt aiwat aha'up mo yn i tuweium ma'ato yne yi totiaria yne ywania sa'up mo tuweium To'ywot pe ai'a­piheg hap sa'up mo are.
1JO 2:3 Karãpe watunug Tupana miky­'esat ewy ainãpin hap ok tã mi'i hawyi watikuap ta'yn aipy'a pe Tupana kuap haria sese wo watoĩ­ne'en hap.
1JO 2:4 Ma'ato — Atikuap ti Tupana wato'e yt imiky­'esat ewywuat nug hin i pytkai mi'i pote heso rakano watoĩ­ne'en. Mio tã wato'e pote yt kat i aipy'a pe topy­hu'at pywo ai'e hap.
1JO 2:5 Ma'ato watunug ihay ewy imiky­'esat ewywuat pote iky'e sese hano watoĩ­ne'en watunug imiky­'esat ewy pote. Mi'i tã watunug pote watikuap kahato Tupana wo'o­wese hap.
1JO 2:6 Uito ti Tupana wywo sese wato'e pote waku watoĩ­ne'en ha'yru ewy haki'yt ewy are. Waku watunug Aika­'iwat Iesui minug ewywuat yn waku watunug.
1JO 2:7 Uheka­tu­wyria yt kat i einãpin pakup i hap ahenoi ehepe ma'ato ahenoi sa'a­wy­'iwuat ainãpin hap te aikotã sa'a­wy­'ite ainãpin hap ewy yn ahenoi ehepe. Pyno Tupana e hap sa'a­wy­'iwuat ahenoi ehepe. Eiwo­'o­ky'e ro e hap yn ahenoi ehepe.
1JO 2:8 Ipot'i rakat sehay ma'ato ti yne e'at pe wyti ipakup takano topy­hu'at aikotã Aika­'iwat aiky'e hap ewy waku wato­'o­ky'e are. Mi'i tã watunug hawyi pywo imohey haria mi'iria i'atu'e aru irania'in.
1JO 2:9 Ma'ato uito ti Tupana mohey kahato hat hẽtyhot puo uhewyry wato'e wen ma'ato ti aiwy­ria'in ete aipy­'ahak yn watoĩ­ne'en pote i'ypyryp we wãtym muat ewy ra'yn wato­py­hu'at are.
1JO 2:10 Ma'ato uwe uwe towy­ria'in Iesui mohey haria wywo waku kahato toĩne'en to'o­ky'e kahato mi'i pote ti pywo ariãty hot puo hewyry rakat ewy topy­hu'at. Mi'i hat ti yt ta'at kuap i kat pote yt i'ypyryp we i hewyry pote. I'ewyte yt kat i ikai miit'in ma'at hamuat ne'i.
1JO 2:11 Ma'ato aiwy­ria'in Iesui mohey haria ete aipy­'ahak mi'i hap kaipyi i'ypyryp wiat ewy watu­kup­te'en aikotã yt ihapytig i rakaria sese wo watoĩ­ne'en.
1JO 2:12 Uimẽ­pyt'in eiminug sa'ag ko'i yne Tupana timo­hãpyk ta'yn wato­mohey Aika­'iwat Iesui hawyi.
1JO 2:13 Mi'i pote woro­ho­'o­nãpin neran kahato uimiwan me ui'y­wot'in. Eipe ti wuat'i nug hap e'yianote wuat ieĩne'en haria ti eipe. Tupana kuap kahato haria eipe. I'ewyte mi'i pote woro­ho­'o­nãpin uimiwan me kurum'in makup­tiaria katu­pono wuat'i sa'ag ka'iwat akit haria ti eipe ahiag akit haria. Mi'i pote woro­ho­'o­nãpin uimiwan me.
1JO 2:14 Uimẽ­pyt'in eweikuap kahato Ai'ywot sese. Mi'i pote woro­ho­'o­nãpin eipe uimiwan me. Ui'y­wot'in eipe ti yi nug hap e'yianmete wuat'i wo'o­moieĩ­ne'en hat kuap haria eipe. Tupana sese kuap haria eipe are mi'i pote woro­ho­'o­nãpin eipe uimiwan me. Kurum'in ehesaika kahato katu­pono Tupana ehay ahyt eiam ni eipe. Mi'i pote wuat'i sa'ag nug haria akag akit haria ti eipe. Mi'i pote ti uimiwan me woro­ho­'o­nãpin.
1JO 2:15 Pyno yt eweiky­'esat i ra'yn o irania'in miky­'esat sa'ag ko'i. I'ewyte yt eweiky­'esat i ra'yn o mesu­wiaria yi totiaria sa'ag ko'i. Ma'ato wati­ky'e mesu­wa­rotiat minug sa'ag pote yt kat i ra'yn Ai'ywot atipy piat ky'e hap aikai. Pyno ahenoi teran ehepe kat ko'i kat ko'i yt naku i wati­ky'e mesu­wa­rotiat ko'i aipiit miky­'esat ko'i yt nakuat i nug hap.
1JO 2:16 Ta'i eheha tiky­'esat kat ko'i kat ko'i yt Tupana miky­'esat ewy i i'ewyte — Uito po'og wato'e hap yn wati­ky­'esat. Uimõ­typot hap yn atiky­'esat wato'e pote mi'i hap ko'i yt Ai'ywot atipy kaipywiat piat yt aimu'e hap i.
1JO 2:17 Ma'ato mesu­wa­rote pywiat kaipyi yn aimu'e sa'ag ko'i miit'in miky­'esat ko'i ti aru tuweityk yne. Ma'ato uwe uwe Tupana miky­'esat ewywuat nug haria ti aru te'e­ro­py­hu'at wuat'i e'at pe.
1JO 2:18 Uhaki­'yt'in uha'y­ru'in put'ok'e irane ikahuro hap e'at katu­pono ti put'ok'e irane Aipo­typot Iesui ewanĩ­kaptia are. Mi'i ti Aipo­typot Iesui pohari teran haype. Koitywy typy'i kahato mi'i ewywuaria tukup­te'en. Mi'i hap kaipyi ti watikuap ta'yn yt pya i ra'yn ikahuro hap e'at hap.
1JO 2:19 Sa'a­wy'i te ti ai'ewy kahato tukup­te'en tuereto aipy­'a­setpe ma'ato mesup ti ai'atoiat ra'yn. Tuwat yne ra'yn mi'iria. Tuwat ra'yn ahiag upi kat pote yt aimi­mohey ewywuat i mi'iria pote. Ma'ato aimi­mo­heyria pote ti te'e­ro­py­hu'at aiwywo. Mi'i pote ahok'iwat ra'yn.
1JO 2:20 Ma'ato aito ti yt mi'i tã haria hin i ra'yn katu­pono ti Tupana Pã'ãu topy­hu'at kahato ra'yn ahete. Ahowapy kahato ra'yn Iesui tum ahepe Topã'ãu hawyi.
1JO 2:21 Mi'i hap kaipyi watikuap yne kahato ra'yn pywuat sese sehay Tupana Pã'ãu aimu'e pote. Ehepiat ikuap pytkai ra'yn ti woro­ho­'o­mu'e i ra'yn sehay pywuat sese rakano.
1JO 2:22 — Iesui yt Tupana Mipo­'oro Aipo­rekuat nuat i e haria ti heso yn nakaria wo te'e­ro­py­hu'at. Iesui ewanĩ­kaptia wo wyti mi'iria.
1JO 2:23 Mi'iria ti I'ywot Ha'yru ewanĩ­kaptia sese mi'iria. Uwe uwe irania'in me — U yt atimohey i ti Iesui toĩne'en Tupana Sa'yru hap e hat. Mi'i hat ti yt Tupana wywo i sese toĩne'en. Ma'ato uwe uwe irania'in me — Uito Iesui mohey hat e mi'i hat ti Tupana wy sese toĩne'en. Ta'i watipun ne'i ra'yn Ha'yru pote i'ewyte I'ywot pun haria wo ra'yn watoĩ­ne'en. Ma'ato — Iesui En nyti Tupana Sa'yru sese wato'e pote I'ywot mohey haria wo watoĩ­ne'en. Tupana toĩne'en aipy'a pe.
1JO 2:24 Sa'a­wy­'iwuat aimikuap aikai pot'i toĩne'en pote mi'i hawyi Ha'yru I'ywot wywo watoĩ­ne'en wo'o­wese kahato haria wo.
1JO 2:25 Mi'i tã eweikup­te'en pote — Atum pot'i eheĩne'en wuat'i e'at piat hamuat hap e Aipo­typot ahepe.
1JO 2:26 Pyno arehay po'oro hamuat ehowawi eiwe'eg wo o eima'at sehay wuat haria pupi.
1JO 2:27 Aipo­typot Iesui Pã'ãu aimu'e hap sese topy­hu'at katu­pono toĩne'en Ipã'ãu aikai pote mi'i yn aimu'e. Mi'i hawyi yt uwe i aimu'e pytkai toĩne'en. Mi'i ti aimu'e at ka'ap. Yne e'at pywo rakat etiat aimu'e kahato Ipã'ãu. Yt kat i sa'ag ete aimu'e. — Pyno uipap eupi wato'e. Uimu'e ro wato'e Ipã'ãu me. Mi'i tã watunug mote aiwo­'o­wese hap yn topy­hu'at Aika­'iwat Iesui wywo.
1JO 2:28 Uimẽ­pyt'in waku kahato ti aipap Aika­'iwat upi. Mi'i pote ti aru karãmuo Aika­'iwat ta'aipok i ra'yn meikowo mi'i hawyi yt kat i aiwe­mõti hap toĩne'en ipupiat hap. Yt watu­wemig hin i ipupi ma'ato watu­wehum yn hut turan. Yt kat i aheha yi kape hut turan. Aipo­typot ewywuat hap wahe­katup kahato pote yt kat i ai'a­piheg hap Tupana kaipyi. — Waku yn e ahepe. Mi'i pote aito i'ewyte waku pe yn watoĩ­ne'en i'ewy aito pote.
1JO 2:29 Ta'i watikuap kahato ra'yn mekewat wakuap yn nug hat Aika­'iwat Tupana Sa'yru. Mi'i hawyi Aika­'iwat ewy wakuap nug haria aito pote i'ewyte Tupana mẽpyt'in sese wo ra'yn watu­kup­te'en are.
1JO 3:1 Katu­pono ti iwato kahato Ai'ywot piat aiky'e hap. Toimo­herep kahato ti aiky'e hap tomẽ­pyt'in wuat ra'yn ainug hawyi. Ta'i tegyi'at hap toimo­herep kahato aiky'e hap. Pyno yt ta'a­tukuap i Tupana pote i'ewyte yt ta'a­tukuap i aito Tupana mẽpyt'in ko'i hap.
1JO 3:2 Uimi­ky­'eria koitywy ti aito Tupana mẽpyt'in na'yn. Ta'i yt watikuap hin i ti aikotã miat aheĩne'en hamuat hap. Iesui ut hawyi ti aru watikuap aikotã me watoĩ­ne'en hamuat katu­pono topiit ewy ti ainug hamuat. Mi'i hawyi ti aru mekewat e'at pe wata­'a­kasa ra'yn Iesui sese. Mi'i hawyi ti aru wato­py­hu'at aikotã i'ewy ra'yn are.
1JO 3:3 Mi'i hap wato­mohey yne e'at pe pote ti yt kat i sa'ag aipitpit hap topy­hu'at. Mi'i hawyi ti ma'ato po'og po'og aikoho hap toĩne'en. Mi'i hawyi ti watoĩ­ne'en aikotã topiit kahu hap ewy ainug.
1JO 3:4 Ma'ato uwe uwe yt inug i Tupana piat tonãpin hap ko'i mi'i hat Tupana piat yt naku i nug hat topy­hu'at katu­pono karãpeĩ wati­'a­parap Tupana piat ainãpin hap mot'i mi'i hawyi yt naku i nug haria watoĩ­ne'en Tupana wanẽtup hawe.
1JO 3:5 Katu­pono Aika­'iwat yt karãpe i i'aparap Tupana pe. Ma'ato Aika­'iwat tuut hamuat yne yt nakuat i hep hamo. Mi'i hap eweikuap ta'yn.
1JO 3:6 I'ewyte uwe uwe toĩne'en Aika­'iwat wywo kahato mi'i hat yt i'aparap teran i Aika­'iwat pe. Toiky'e kahato haype. Ma'ato irania'in Aika­'iwat ma'at haria mi'iria kaipyi watikuap Aika­'iwat yt kuap i haria hap. Yt karãmuat i Aika­'iwat mohey hanuaria i ra'yn.
1JO 3:7 Uhaki­'yt'in uha'y­ru'in eiwe'eg wo o wẽtup sehay pupi. Eiwe'eg wo o eima'at hap pupi. Waku nug haria waku pe tukup­te'en Tupana wanẽtup hawe aikotã Aika­'iwat toĩne'en waku pe Tupana wanẽtup hawe hap ewy.
1JO 3:8 Ma'ato uwe uwe inug sa'ag Tupana pe mi'i hat ahiag wano topy­hu'at katu­pono sa'a­wy­'iwuat yt nakuat i nug hat sese ahiag. Mi'i pote yt nakuat i akit hamo tuwe­mo­herep Tupana Sa'yru yne ahiag minug sa'ag ko'i moma hamo tuwe­mo­herep.
1JO 3:9 Uwe uwe tuwe­mo­herep Tupana mẽpyt no mi'i hat yt toiky­'esat i Tupana piat i'aparap hap katu­pono Tupana Pã'ãu toĩne'en ipiit pe. Mi'i pote To'ywot atipy piat ewy topy­hu'at. Yt toiky­'esat i po'og sa'ag nug hap Tupana mẽpyt pote ti ra'yn.
1JO 3:10 Pyno yt to'o­'ewy hin i Tupana mẽpyt'in ahiag wat wywo yt to'o­ku­pitu hin i. Katu­pono uwe uwe wakuat nug hano topy­hu'at i'ewyte uwe uwe Tupana mẽpyt'in ky'e hano topy­hu'at mi'i hat ti topy­hu'at Tupana sa'yru wo Tupana saki'yt ko'i wo are.
1JO 3:11 Pyno ahenoi i ra'yn sa'a­wy­'iwuat sehay sese yianmiat Tupana ainãpin hap — Eiwo­'o­ky'e ro e Tupana sa'a­wy'i.
1JO 3:12 Sa'a­wy'i sese toĩne'en Kãi e hap het rakat. Mi'i yt iky'e hin i toywyt. Toi'auka ne'i. Mi'i pote yt naku i watoĩ­ne'en Kãi minug ewy ne'i.
1JO 3:13 Uiwy­ria'in tukup­te'en miit'in mesu­wa­ro­tiaria mekewat Kãi ewywuat yt naku i nug haria ahiag wywuaria ai'auka teran haria. Karãpe i'atu­py­'ahak ahete mi'i pote yt naku i watu­wa­nẽtup ko'i ko'i ne'i mi'iria yt i'atu­wese i ahete hap kape.
1JO 3:14 Sa'a­wy'i watu­kup­te'en iku'uro rakaria ewy Tupana wanẽtup hawe katu­pono yt watikuap i ihay pote. Katu­pono yt kat i aikai Tupana aimoieĩ­ne'en pakup i hap. Ma'ato mio watoĩ­ne'en Tupana wywo katu­pono koitywy aiwo­'o­ky'e hap toĩne'en. Ma'ato yt kat i aiwo­'o­ky'e hap aikai pote iku'uro rakaria ewy watoĩ­ne'en Tupana wanẽtup hawe.
1JO 3:15 Ma'ato wato­'o­weu­ka'i ne'i pote watu­kup­te'en wo'o­'auka haria ewy watu­kup­te'en Tupana wanẽtup hawe. Ma'ato wo'o­pot­'auka hat aito pote yt kat i Tupana kapiat aheĩne'en hap.
1JO 3:16 Kat pote Aika­'iwat Iesui iku'uro aika­wiano hamo ra'yn. Iku'uro hawyi yt kat i aiku­'uro hap sese topy­hu'at aikai. Pyno iku'uro ahetiano hap watikuap hawyi watikuap aiky'e hap sese. Koitywy waku wati­'a­tu­po­wyro wuat'i aiwy­ria'in Iesui mohey haria aiku­'uro hap kape.
1JO 3:17 Hekat rakaria aito pote waku wati­mõ'ẽ ihaky­'e'i rakat pe wati­puẽti hawyi. Waku ahekat watum i'atuepe. Yt naku i wato'e aiwepe — Pyno yt naku i atimõ'ẽ uheka­re'en ihaky­'e'i rakaria pe. Mio tã wato'e pote yt kat i Tupana ky'e hap aikai. Yt ahegyi'at i pote yt naku i wato'e irania'in me — Tupana ky'e kahato hat uito yt naku i wato'e katu­pono yt pywo pe i wato'e.
1JO 3:18 Yt naku i wato­'o­ky'e ahehay wo yn uimẽ­pyt'in. Waku wati­mo­herep aiwo­'o­ky'e hap aiwo­'o­po­wyro hap wywo are.
1JO 3:19 Aiwo­'o­ky'e sese pote mi'i hap kaipyi watikuap ta'yn pywo rakaria aito hap. Mi'i pote karãpe watoĩ­ne'en Tupana ehamo yt watu­we­mõti hin i Iesui mohey haria ky'e haria aito pote.
1JO 3:20 Wati­'a­parap Tupana pe hawyi watu­we­mõti i ra'yn ma'ato Tupana tikuap aiwa­nẽtup hap. Toikuap yt watunug neran i hap. Watu­we­mõti pytkai aiky'e te koran.
1JO 3:21 Ma'ato po'og waku yt kat i hin i aiwe­mõti hap Tupana ehamo watoĩ­ne'en turan. Watunug yne Tupana miky­'esat ko'i ainãpin hap ko'i mi'i hawyi Tupana mowepit haria wo watoĩ­ne'en.
1JO 3:22 Mi'i hawyi kat e hap kat e hap wahẽtup tope hawyi tutum aimiẽtup ok tã watunug imiky­'esat ewy pote.
1JO 3:23 Pyno ahenoi ehepe Tupana miky­'esat sese. Mio tã e — Eweimohey ro Uha'yru e. Ewetunug Mi'i Eipo­rekuat no e. Mi'i hawyi eiwo­'o­ky'e ro aikotã Eika­'iwat Iesui e hap ewy e Tupana ahepe.
1JO 3:24 Uwe uwe Tupana piat tonãpin hap inug mi'iria ti tukup­te'en kahato Tupana wanẽtup hawe. Tupana tomoieĩ­ne'en tomohey haria wo tukup­te'en hap. I'ewyte Tupana toĩne'en i'atu­py'a pe. Tupana tum na'yn Topã'ãu ahepe hawyi watikuap kahato watoĩ­ne'en hap sese tepiat hamuat. Mi'i hawyi watikuap kahato ra'yn Tupana toĩne'en aipy'a pe hap.
1JO 4:1 Uiwy­ria'in yt eweimohey tei'o yne wo'o­mu'e haria — Uito Tupana Pã'ãu eiam i'atu'e pytkai. Waku eweikat i kat i mi'iria sio Tupana Pã'ãu eiam sio yt hap kuap hamo. Katu­pono i'atu kahato wo'o­mu'e haria mesuwat yi totiaria yt pywo piat haria i katu­pono wẽtup pã'ãu i'atupiit pe.
1JO 4:2 Pyno ahenoi teran ehepe aikotã aikotã waku wahã'ãg mi'iria sio waku sio yt naku i hap kuap hamo sio Tupana Pã'ãu kaipyi sio yt hap kuap hamo. Mi'i pe waku apo'ere o — Mehĩ mana etimohey apo uhyt Tupana Mipo­'oro Aipo­rekuat nuat Iesui tuwe­mo­herep miit kawiat hap sio yt apowa­to'e. Mi'i pote aiwesat — Ta'i atimohey kahato mi'i uito e pote Tupana eiam kahato mi'i.
1JO 4:3 Ma'ato — Yt atimohey i mi'i e pote i'ewyte yt Iesui mohey hat i mio tã e hat yt Tupana eiam hin i topy­hu'at. Kat pote wẽtup Pã'ãu eiam pote. Aikotã to'e Tupana sa'a­wy'i hap ewy koitywy topy­hu'at ra'yn. — Tuut aru wẽtup pã'ãu porekuat nuat ewanĩkap ti mi'i. Koitywy watikuap mi'i mã'ãu sa'ag toĩne'en na'yn aipy­'a­setpe hawyi aima­'at'i ma'at'i ra'yn.
1JO 4:4 Uimẽ­pyt'in aito ti Tupana wanuat ko'i sese. Yt pywo piat sehay akit hanuaria i aito. Aimu'e haria yt pywo piat i yt Tupana kaipywiat ko'i akit hanuat haria aito. Ma'ato Tupana Pã'ãu aipiit piat po'og hesaika aimu'e sa'ag haria pã'ãu kai. Aito Tupana ehay moherep haria ma'ato mi'iria mesu­wa­rotiat seko sa'ag enoi haria.
1JO 4:5 Tupana ehay ta'a­tu­henoi sa'ag kahato ahepe. Mi'i hawyi irania'in yt Iesui mohey i haria — Pywo i'atu'e katu­pono miit'in eko sa'ag ewywuat waku watunug i'atu'e pote. Mi'iria ahiag wanuaria tukup­te'en.
1JO 4:6 Ma'ato aito Tupana wanuaria watoĩ­ne'en. Mi'i hawyi yne Tupana wanuaria te'e­ru­we­waure ka'a kahato aimienoi kape. Ma'ato irania'in yt te'e­ru­we­waure ka'a i aimienoi pywuat kape. Mi'i hap kaipyi meremo watikuap uwe Tupana Pã'ãu pywuat ehay upi toĩne'en sio uwe ahiag pã'ãu sa'ag ehay upi ne'i toĩne'en hap.
1JO 4:7 Uiwy­ria'in to'iro wato­'o­ky'e katu­pono aiwo­'o­ky'e hap nug hat Tupana. Wo'o­ky'e haria wo watoĩ­ne'en pote Tupana mẽpyt'in no watu­kup­te'en. Tupana kuap sese haria wo wato­py­hu'at.
1JO 4:8 Ma'ato yt wo'o­ky'e i haria aito pote yt Tupana kuap haria wo i aito katu­pono wo'o­pot­ky'e hat sese ti Tupana.
1JO 4:9 Tupana timo­herep ta'yn ahepe aiky'e kahato hap katu­pono toipo­'oro Tosa­'yru sese ahowawi aimoieĩ­ne'en pakup i hap nug hamo.
1JO 4:10 Sa'a­wy'i yt wati­ky'e hin i Tupana. Mi'i pytkai aiky'e kahato hawyi toipo­'oro Tosa­'yru aiminug sa'ag ko'i atumoma yne hamo. Ha'yru iku'uro hawyi ai'a­piheg hap tutu'u yne ra'yn.
1JO 4:11 Pyno waku wato­'o­ky'e aikotã Tupana piat aiky'e hap ewy waku wato­'o­ky'e.
1JO 4:12 Uiwy­ria'in yt karãpe i wata­'a­kasa Tupana ma'ato mi'i pytkai watikuap kahato toĩne'en aiwywo. Mi'i hawyi wati­'a­tu­ky'e miit'in pote Tupana toĩne'en po'og aikai. Aimoe­saika kahato miit'in ky'e hap hãpyk nug hamo tepiat aiky'e hap ewywuat nug hamo.
1JO 4:13 Tupana tum na'yn ahepe Topã'ãu hawyi meremo watikuap Tupana wywuat aheĩne'en hap watoĩ­ne'en hap. I'ewyte aipy'a pe Tupana toĩne'en hap.
1JO 4:14 Tupana tipo­'oro ra'yn ahepe Tosa­'yru aheha­kye­ra'at hamo. Mi'i kape uruta­'a­kasa ra'yn. Mi'i hawyi uruimo­herep ta'yn wuat'i miit'in me uruehay wo.
1JO 4:15 Uwe uwe to'e irania'in me — Uito atimohey kahato Iesui toĩne'en Tupana Sa'yru sese hap e mi'i hat Tupana eiam mo topy­hu'at. I'ewyte Tupana topy­hu'at heiam mo.
1JO 4:16 Mi'i pote watikuap ta'yn Tupana aiky'e hap wato­mohey kahato ra'yn hawyi. Tupana ti wo'o­pot­ky'e hat sese. Mi'i pote uwe uwe wo'o­pot­ky'e hat sese toĩne'en Tupana wywo mi'i pote Tupana toĩne'en iwywo ipy'a pe.
1JO 4:17 Aipo­typot saipe­piaria ti aito. Mi'i pote i'ewy sese waku watoĩ­ne'en miit'in py'a­setpe hãpyk kahato Aika­'iwat ewaku hap ewy. Mi'i tã watoĩ­ne'en pote yt watu­we­mõti hin i mekewat karãpe Tupana timo­herep ahewaku hap sio yt hap e'at pe. Mi'i hap e'at pe yt watu­we­mõti hin i katu­pono wo'o­ky'e haria wo Tupana ainug towat miit'in ky'e hap ewywuat no ainug.
1JO 4:18 Wati­ky'e sese irania'in pote yt wato­ken'ẽ hin i i'atu­pupi katu­pono toĩne'en aikai i'atu­ky'e hap sese Tupana miium kaipywiat hawyi yt wato­ken'ẽ kuap i i'atu­pupi. Ma'ato wato­ken'ẽ ne'i pote yt kat i i'atu­ky'e hap aikai. Mi'i hawyi wato­ken'ẽ po'og katu­pono Tupana piat ai'a­piheg hap pupi.
1JO 4:19 Yt wati­ky'e i te Tupana turan aiky'e Mi'i. Mi'i hap kaipyi wati­ky'e Tupana mesup. Aiky'e yianmete pote mesup aito wati­ky'e Tupana.
1JO 4:20 Karãpe wẽtup ok to'e ahepe — Uito atiky'e Tupana e ma'ato mi'i yt topot­ky'e hin i pytkai mi'i watikuap ta'yn heso rakat. Karãpeĩ yt wati­'a­tu­ky'e i aiwy­ria'in mi'i pote yt wati­ky'e hin i Tupana. Katu­pono yt heremo hin i Tupana ma'ato irania'in heremo kahato mi'i pote po'og yt niatpo i wati­ky'e hamo mi'iria heremo pote.
1JO 4:21 Pyno ahenoi i ra'yn Aika­'iwat piat ainãpin hap sese. Mio tã e hap — Ewei'a­tu­ky'e ro eiwy­ria'in e. Yt ewei'a­tu­ky'e eiwy­ria'in pote pyno yt Tupana ky'e haria hin i eweikup­te'en are.
1JO 5:1 Uwe uwe imohey Iesui Tupana Mipo­'oro Aipo­typot nuat mi'i hat Tupana mẽpyt sese wo topy­hu'at. Karãpe wati­ky'e Ai'ywot mẽpyt'in mi'i hawyi Ai'ywot mowepit hano wato­py­hu'at. Mi'i hawyi watoĩ­ne'en Ai'ywot ky'e hano sese.
1JO 5:2 Karãpe wati­ky'e Tupana i'ewy karãpeĩ watunug Tupana piat ainãpin hap ko'i mi'i hawyi Tupana mẽpyt'in ky'e hano watoĩ­ne'en.
1JO 5:3 Iesui Ywot ky'e haria ti imiky­'esat nug haria wo tukup­te'en. Karãpe irania'in ahã'ãg yt naku i nug hamo Tupana mẽpyt'in aito mi'i pote Ai'ywot ehay upi yn waku watoĩ­ne'en.
1JO 5:4 Ta'i yt niatpo hin i watunug Ai'ywot ainãpin hap ko'i katu­pono Ai'ywot mohey haria kahato aito pote. Karãpeĩ irania'in ahã'ãg yt naku i nug hamo mi'i hawyi yt i'atuehay upi hin i watoĩ­ne'en katu­pono Tupana mẽpyt'in aito pote.
1JO 5:5 Karãpeĩ wato­mohey kahato Iesui Tupana Sa'yru e hap mi'i hawyi Tupana aipo­wyro kahato miit'in miat ahã'ãg hap akit hamo. Mi'i hawyi po'og ahesaika watoĩ­ne'en i'atueko sa'ag nug hap kai.
1JO 5:6 Iesui ti Tupana mi'airo Aheha­kye­ra'at hanuat. Mi'i pote put'ok'e hawyi Tupana miky­'esat ok tã yne tutunug. Hãpyk kahato toĩne'en To'ywot ehay ewy toĩne'en. Sa'a­wy'i toto toset'ok hamo. Meiũran iku'uro. Mi'i hawyi huu ta'at yne yi tote To'ywot miky­'esat ewy. Koitywy Tupana to'e wuat'i pe — Uha'yru ti uimi­'airo wuat'i Porekuat nuat e. I'ewyte Tupana Pã'ãu mio tã e. — Yt heso hin i e Tupana Pã'ãu ahepe.
1JO 5:7 Toĩne'en mye'ym aimu'e haria mesuwat yi totiaria pywo Iesui Tupana Mipo­'oro Eipo­rekuat nuat e haria.
1JO 5:8 Ta'i Tupana Pã'ãu ihay Iesui ete. I'ewyte I'ywot ihay Tosa­'yru set'ok turan. I'ewyte Iesui suu aimu'e kahato. Mi'iria mye'ym ok ihay te Iesui mõtypot haria to'o­'e­wy­'ewy i'atu­mienoi.
1JO 5:9 I'ewyte typy'i kahato miit'in ihay Iesui etiat rakaria. Mi'iria — Waku wato­mohey Tupana e hap Tosa­'yru piat hap. Pywo pe ti Mi'i po'og po'og hesaika miit'in mienoi kai — Uha'yru kahato En e hap waku wato­mohey.
1JO 5:10 Ma'ato — Yt atimohey i Tupana e pote — Heso rakat En wato'e tope. Ma'ato wato­mohey Iesui Tupana Sa'yru hawyi i'ewyte toĩne'en aipy'a pe ihay rakat pywuat e hap ewy. Ma'ato aipiit yt e i pote yt kat i Tupana pywo e hap aikai — Heso heso yn wato'e Tupana pe.
1JO 5:11 Mio tã e aipy'a pe — Tupana tum na'yn uhepe Tosa­'yru. Mi'i pote areĩne'en na'yn wuat'i e'at piano wato'e aiwepe.
1JO 5:12 Pywo pe ti rat uwe uwe topy­hu'at Tupana Sa'yru eiam mo mi'i hat yn toĩne'en wuat'i e'at pe ma'ato uwe uwe yt Tupana Sa'yru yt eiam mo i mi'i hat yt kat i heĩne'en wuat'i e'at piat hamuat hap.
1JO 5:13 Eipe ti Tupana Sa'yru mohey haria sese eipe. Mi'i pote atiky­'esat eweikuap eweikup­te'en wuat'i e'at piat hamuat hap. Mi'i hap kuap hamo atiwan mesuwat uimiwan ehepe.
1JO 5:14 Karãpeĩ wahẽtup Tupana pe imiky­'esat ewy hawyi watikuap ta'yn ahehay Tupana ewaure ka'a pe teke ra'yn ahehay. Mi'i hawyi watu­wehum at howawi aimiẽtup ium hat kape.
1JO 5:15 Karãpe wahẽtup imiky­'esat ok tã hawyi tuwe­waure ka'a kahato ahehay kape hawyi — Pywo wato'e tutum aru aimiẽtup wato'e aiwo­'ope.
1JO 5:16 Uiwy­ria'in karãpe wẽtup ok aiwy­ria'in Aipo­typot Iesui mohey hat yt naku i nug hat pote waku wato'e Tupana pe — Waku waure wo ereĩne'en aiwy minug sa'ag ete waku wato'e. Etihep aiwy iminug sa'ag myi wato'e katu­pono yt tuwepyi hin i tutunug sa'ag waku wato'e. Emohey te ma'ato yt hesaika kahato i te yt naku i nug hap akit hamo waku wato'e Tupana pe. Toĩne'en mekewat sa'ag nug hat sese emohey hap pun hat ma'ato mi'i hawyi yt tutunug i mi'i pote waku waure wo ereĩne'en aiwy minug sa'ag ko'i kai waku wato'e Tupana pe. Mio tã wato'e pote meremo Tupana topy­hu'at waure wo i'ewyte tutum aiwy pe imoehãite hap imoesaika hamo are uiwy­ria'in. Ma'ato karãpe wẽtup ok Iesui mohey hat topy­hu'at ipy'ahak Tupana ete Iesui ete ahete i'ewyte — Yt atimohey i te Iesui e mio tã to'e haype yt imohey i hat ewy tutunug tuwepyi. Mi'i hawyi Tupana ipy'ahak kahato topy­hu'at mi'i hat ete. Yt kan hamo i wato'e Tupana pe — Waure wo ereĩne'en aiwy minug sa'ag kai katu­pono tuwepyi i ipy'ahak toĩne'en Tupana ete wato'e.
1JO 5:17 Yne aiminug sa'ag ko'i yt naku i topy­hu'at Tupana wanẽtup hawe wen ma'ato wẽtup aiminug sa'ag po'og sa'ag torania kawiat katu­pono karãpe aiwepyiat hap — Yt woro­mohey i En po'og wato'e Tupana pe Ha'yru pe mi'i hawyi yt kat i po'og paa'ai'e hap sa'ag nug hap etiat. Mi'i hawyi Tupana yt aimo­hãpyk kuap i katu­pono aiwepyi watipun aheha­kye­ra'at hap pote. Aiwepyi watikat ai'a­piheg hap wuat'i e'at piat hap. Yt naku i kahato watipun imohey hap are.
1JO 5:18 Uiwy­ria'in karãpe wato­mohey Iesui hawyi Tupana ainug tosa­'y­ru'in tosa­ki­'yt'in wo. Mi'i hawyi imẽpyt'in ko'i wo wato­py­hu'at. Mi'i hawyi Ai'ywot ewy watoĩ­ne'en yt kat i sa'ag yt kat i yt naku i hap watunug neran. Aheko yt watunug neran i po'og aiminug sa'ag ko'i sa'a­wy­'iwuat aheko sa'ag ko'i katu­pono Tupana ainug tomẽ­pyt'in no Tosa­'yru Pã'ãu wo aipyt­'atnug hawyi. Koitywy ahowapy kahato Tupana Pã'ãu wywo. Mi'i hawyi Tupana eiam mo kahato watoĩ­ne'en. Mi'i hawyi karãpe Ahiag ahã'ãg neran kat sa'ag kat sa'ag nug hamo mi'i hawyi Tupana Pã'ãu ai'ãuka kahato ainãpin kahato aihep ahiag aima­'at'i ma'at'i hap po pyi. Mi'i hawyi yt kat i ahewaure ahiag ahã'ãg hap kape — Yt rei'o yt rei'o wato'e ahiag me.
1JO 5:19 Pywo ti rat irania'in mesu­wa­ro­tiaria ahiag ehay upi yn te'e­ru­we­wa­nẽtup at ka'ap katu­pono ahiag emiit no te'e­ro­py­hu'at are. Ma'ato aito Tupana mẽpyt'in nuat watoĩ­ne'en pote yt irania'in ewy i aito yt kat i aikai ahiag wat.
1JO 5:20 Koitywy watikuap kahato Tupana sa'y­ru'in saki­'yt'in aito hap. Ta'i watikuap Tupana Sa'yru hawyi Tupana moherep hat sese topy­hu'at po'og po'og mekewat pywuat etiat kuap hamo. Mi'i tupono mekewat Tupana Mipo­'oro Aipo­rekuat nuat hat watikuap hawyi topo­'oro hat Tupana watikuap i'ewyte. Sa'a­wy'i watikuap teran uwe Tupana hap ma'ato yt heremo hin i Tupana ahepe. Ma'ato mesup heremo ra'yn Ahetu­pana katu­pono Ha'yru imoherep ahepe. Tupana Ha'yru ti To'ywot ewywuat wẽtup miit ewy. Karãpe wata­'a­kasa Ha'yru kape pote I'ywot kape ti ra'yn wata­'a­kasa wy are. Mi'i pote mesup — Worokuap kahato En wato'e yn Tupana pe. Koitywy uiwy­ria'in watoĩ­ne'en Tupana pe aikotã Tupana eiam ewy mi'i pe wato­py­hu'at. Sa'a­wy'i wato­mohey Iesui ti Tupana Sa'yru e hap hawyi Iesui po pe wato­py­hu'at. Ipy'a pe kahato watoĩ­ne'en. Aika­'iwat yat piaria ewywuaria wato­py­hu'at. Iesui ti Tupana sese mi'i pote Tupana pe watoĩ­ne'en Iesui pe watoĩ­ne'en pote. Iesui ti wuat'i e'at piat ieĩne'en hat i'ewyte aito wuat'i e'at piat watoĩ­ne'en Iesui wywo wẽtup miit piit ewywuat pote are.
1JO 5:21 Uimi­ky'e ko'i uha'y­ru'in uhaki­'yt'in uito Iuwãu ti e'ywot uito. Uimẽ­pyt'in ewywuat eipe mi'i pote woro­ho­'o­nãpin. Ewei'a­tu­'atoiat ro tupa­naria yne yne aipo wuat aiminug sa'ag koi are. Mi'i hawyi ewetunug no Tupana yn Ehetu­pana wo are uito Iuwãu. Pyno toran na'yn uimiwan are'e. Uito ti Iesui potpo­'oro Iuwãu.
2JO 1:1 Uito ti Iesui potmu'e sese Iuwãu. Koitywy ase'i pot areĩne'en uiporo kahato ra'yn mote. Mesuwat uimiwan atipo­'oro ewawi mana. Waku sese kahato en katu­pono sa'a­wy'i Tupana e'airo temiit sese wo. Kuekatu atipo­'oro uimi­ky'e ko'i kape emẽpyt'in kape. Pywo ti rat woro­ho­'o­ky'e kahato eiperia. Yt uito yn i eiky'e ma'ato yne yne Iesui kuap haria eiky'e kahato wy Iesui pywo e hap ewy eiky'e urutoria.
2JO 1:2 Tupana ehay pywuat sese eiam kahato aito mana. Mi'i hawyi yt karãmuat i wati­waure mekewat pywuat e hap katu­pono toĩne'en aru wuat'i e'at pe aikai.
2JO 1:3 Mi'i hawyi ahẽtup kahato Ai'ywot atipy piat kape i'ewyte Ha'yru Aipo­typot kape — Etum no uruepe egyi'at hap. Uruky'e ro yt kat sa'up i are. Urueha­ky­'e'i pote etum no uruky'e hap yt kat sa'up i are. Urunug o wo'o­wese haria wo are. I'eywte urunug sehay pywuat ky'esat haria wo. I'ewyte wo'o­ky'e haria wo are at ka'ap ahẽtup Ai'ywot kape.
2JO 1:4 Mana emẽpyt'in ko'i uimo­wepit kahato haria tukup­te'en katu­pono pywuat sehay upiaria kahato mi'iria. Mekewat sa'a­wy­'iwuat Ai'ywot ainãpin hap sese nug haria mi'iria.
2JO 1:5 Pyno ahenoi i ra'yn epe mana mekewat sa'a­wy­'iwuat Tupana piat ainãpin hap sese. Mio tã e — Waku eiwo­'o­ky'e yne e. Yt ipakup i ra'yn wen ma'ato atiwan ne ewawi uimi­ky'e kahato en mote.
2JO 1:6 Pyno waku yne sa'a­wy­'iwuat ainãpin hap aimikuap ok tã waku watunug. Karãpeĩ are'e ehepe — To'iro wato­'o­ky'e i'ewyte are'e ehepe — Watunug yne yianmiat ainãpin hap aimikuap ok tã meimẽwat sa'a­wy­'iwuat mi'i pote wo'o­ky'e haria wo ra'yn watoĩ­ne'en.
2JO 1:7 Ta'i typy'i kahato ti mesu­wa­ro­tiaria aima­'at'i ma'at'i hanuaria. Wẽtup sehay wuat aima'at reran haype — Iesui ti yt miit kawiat i i'atu'e sa'ag. Tupana yt tuwe­mo­herep miit no i'atu'e reran haype. Aika­'iwat ewanĩ­kaptia ti mi'iria.
2JO 1:8 Waku aiwe'eg wo o mi'iria pupi katu­pono ta'a­tu­ky­'esat kahato watuwat i'atuehay upi. Watuwat mi'iria ehay upi pote watoiat ra'yn aimi­mohey Iesui etiat. I'atuehay upi watuwat hawyi yt naku i pe wato­py­hu'at. Yt kat i aipotpap hap sa'up topy­hu'at Tupana kaipyi. Mi'iria ehay — Iesui ti yt miit pu'i kawiat i yn i'atu'e ahepe. Tupana yt tuwe­pu'i nug i i'atu'e ahepe sa'ag. Mi'i hawyi watuwat i'atuehay upi hawyi yt kat i sa'up toĩne'en aru Tupana kaipyi mekewat e'at pe mekewat aipotpap sa'up.
2JO 1:9 Yt naku i wahenoi irania'in me aiwa­nẽtup hap yt Aipo­typot Iesui e hap ewy i. Mi'i tã watunug mote yt Tupana wanuat i wato­py­hu'at. Ma'ato miit'in wati­'a­tu­mu'e Iesui e hap ewy imienoi ewy mi'i pote toĩne'en I'ywot Ha'yru aipy'a pe.
2JO 1:10 Mi'i hawyi put'ok'e wẽtup ok aimu'e hat hawyi — Ta'i wẽtup kawiat ti Iesui yt aipiit ewywuat i Iesui i'atu'e sa'ag. Mi'iria put'ok'e ai'yat oken'y­pyke hawyi — Wãi yt ereke tei'o waku wato'e tope.
2JO 1:11 Ma'ato — Tupana epowyro ere'e pote mi'i hawyi meiẽwat miit sa'ag ewy ra'yn iwy ok wo ra'yn erepy­hu'at.
2JO 1:12 I'atu kahato ti atiwan neran ewawi mana ma'ato waku ahenoi mi'i ko'i uiwẽ pyi areĩne'en ewywo hawyi. Ma'ato yt atunug neran koitywy uhehay uimiwan me. Areto teran ewawi mana hawyi mi'i tote ahenoi uhehay sese epe mana. I'ewyte waku ehenoi ehay uhepe aiwo­'oewa pe. Mi'i hap e'at pe uimo­wepit hap sese toĩne'en.
2JO 1:13 Pyno kuekatu atipo­'oro ewawi mana. I'ewyte ekypy'yt mẽpyt'in tipo­'oro ewawi kuekatu. Waku ra'yn uimiwan toran na'yn. Uito Iesui potmu'e Iuwãu
3JO 1:1 Pyno uito ti Iuwãu Iesui potmu'e sese Uito. I'ewyte imiky'e kahato uito. Waku kahato ti en mehĩ Kaiu. Mi'i pote atipo­'oro mesup uimiwan ewawi woro­ky'e kahato haype.
3JO 1:2 Uheka­tuwy sese en. Mi'i pote ahẽtup kahato Tupana pe ewawi — Etipoi­tyro kahato uiwy Kaiu are. Atiky­'esat kahato ipiit ihãite hap aikotã ihãite topy'a pe Tupana wywo hap ewy are Tupana pe.
3JO 1:3 Ga'atpo put'ok­'i­'a­tu'e meiũpe aiwy­ria'in Iesui mohey haria. Mi'i hawyi ta'a­tu­henoi sehay etiat aikotã Tupana ehay pywuat upi ereĩne'en mot'i imohey hap ete hap etiat ta'a­tu­henoi. Mi'i hap atikuap hawyi uimo­wepit kahato en.
3JO 1:4 Karãpeĩ uimẽ­pyt'in tukup­te'en pywuat sehay upi hap uimo­wepit kahato. Mesu­wa­rotiat yt kat i po'og uimo­wepit hap mi'i kai. Atikuap uimẽ­pyt'in hãpyk kahato tukup­te'en hawyi uimo­wepit hap sese toĩne'en.
3JO 1:5 Uiwy kahato en Kaiu. Waku ti ereĩne'en mot'i Tupana potpap we. Iesui mohey haria eropat kahato hat en ereĩne'en. I'ewyte Iesui mohey hat yt emikuap ko'i i eropat kahato hat en.
3JO 1:6 Mi'i pote Iesui mohey haria meiũpe ta'a­tu­henoi kahato to'ope to'ope aikotã ereĩne'en hap. — Wo'o­pot­ky'e hat toĩne'en itote i'atu'e to'ope to'ope. Mi'iria tuwat Iesui etiat enoi miit'in miat hamo wẽtup tawa piaria atumu'e hamo sakpuaria mu'e hamo tuwat aru. Waku o ewei'a­tu­po­wyro o mi'iria i'atu­potpap ete. Ewei'a­tu­po­wyro o i'atu­pu'ap sa'up ete Tupana mõtypot hamo Tupana miky­'esat nug hamo are.
3JO 1:7 Tuwat ra'yn mi'iria yt kat ha'up wywo i. I'ewyte yt ta'a­tu­ky­'esat i sa'up irania'in kaipyi yt Iesui mohey i haria kaipyi katu­pono Aipo­typot eropat haria mi'iria pote. Mi'i pote ta'a­tu­ky­'esat Iesui kaipyi yn i'atu­pu'ap sa'up. Tuwat ra'yn yt kat sa'up wywo i Aika­'iwat potpap nug hamo.
3JO 1:8 Aito ti Aipo­typot emiit mi'i pote waku wati­'a­tu­po­wyro hemiit'in Aika­'iwat ehay sytpok haria. Mi'iria wati­'a­tu­po­wyro pote meiũran Aika­'iwat tum ahepe i'atuwat i'atu­sa'up ok tã tutum ahepe are. Katu­pono mi'iria tuwat sehay pywuat sytpok hamo tuwat.
3JO 1:9 Sa'a­wy'i atiwan uhehay Iesui mohey haria kape tawa piaria kape ma'ato itote uhyt Teotewe toĩne'en uhehay akit hat. — Yt watu­we­waure ka'a tei'o Iuwãu piat ainãpin hap kape e hat. Waku po'og uhehay kape eweiwa­nẽtup e hat toĩne'en itote. Katu­pono toiky­'esat kahato tuwenug i'atu­'akag wo. Mi'i pote toipun uimiwan. Mi'i pote areto ewawi hawyi ahenoi iminug sa'ag ehepe.
3JO 1:10 Put'ok­'are itote hawyi ati'a­piheg mi'i. Ahenoi aru iminug sa'ag ko'i. Ahenoi aru i'e hap heso hap ko'i katu­pono ihay at kahato ahete yt pywo piat sehay i. Yt naku i kahato mi'i. Toipyhyp Tupana Mipo­'oro tehay sytpok hanuaria. Yt karãpe i — Ereke e Tupana ehay sytpok haria pe. Yt iwese hin i Iesui mohey haria ete. Yt toiky­'esat i Iesui mohey haria eke to'yat piat hap. Yt toiky­'esat i aimi­po­'o­roria to'yat piat hap. I'ewyte yt toiky­'esat i aimi­po­'o­roria eke Iesui mohey haria yat piat hap. Wãi'e i'atu­pu'ap tote. Mi'i hawyi karãpe aimi­po­'o­roria tuwe­hyt'ok Tupana mõtypot yat pe hawyi tohytpok hytpok ne'i. Yt iwe'eg hin i. Mi'i pote areto i'apiheg hamo.
3JO 1:11 Uiwy are yt ereĩne'en tei'o mi'i ewy ne'i. Kat pote mi'i sa'ag nug hat kahato are.
3JO 1:12 Atiky­'esat en wakuat nug hano ereĩne'en katu­pono wakuat nug hano yn Tupana wanuat. Uwe uwe inug sa'ag mi'i hat yt Tupana kuap i hat sese. Yt karãpe i Tupana toĩne'en ipy'a pe. Ma'ato toĩne'en wẽtup ok eipy­'a­setpe Temetiu e hap het rakat yne Iesui mohey haria mimõ­typot. Mi'i wyti pywuat sehay iã'ãkap yne pywuat sehay enoi haria mimõ­typot mi'i. I'ewyte uimi­mõ­typot mi'i. Uruimõ­typot kahato mi'i are.
3JO 1:13 Ahenoi teran po'og po'og epe mehĩ Kaiu ma'ato yt atunug neran hin i popera tote.
3JO 1:14 Mi'i pote areto irane meremo ewawi. Uhehay teran ewywo haype. — Tupana etum o uiwy Kaiu pe iwepit hap are Tupana pe.
3JO 1:15 Pyno yne meiũpiaria tipo­'oro kuekatu e hap ewawi. I'ewyte uruipo­'oro kuekatu e hap ko'i ehowawi uruwy­ria'in itotiaria kape uruipo­'oro uruepiat i'atu­ky'e haype. Pyno wuat'i aiwy­ria'in me atipo­'oro uhehay — Woro­ho­'o­ky'e kahato e hap atipo­'oro are. Toran na'yn uimiwan. Uito ti Iesui eropat hat Iuwãu. Uhet sese Iesui miky'e.
JUD 1:1 Mesuwat uimiwan atipo­'oro Iesui mohey haria kape aikope aikope mesuwat yi tote eikup­te'en hap kape. Uito ti Iesui ywyt sese Iuta e hap het rakat. I'ewyte mekewat Iesui ywyt Tiaku ywyt sese areĩne'en. Kuekatu atipo­'oro ehowawi uiwy­ria'in. Pyno uimiwan atipo­'oro ehowawi uiwy­ria'in. Eiperia ti Ai'ywot Tupana mimo­hãpyk ko'i sese eipe tomohey haria eipe pote. Pywo ti rat Iesui waku kahato ai'a­pykok hamo. Yt uwe hin i ti aihep kuap Iesui piat ai'a­pykok hawyi katu­pono iheg me kahato watoĩ­ne'en ipo pe.
JUD 1:2 — Tupana are atiky­'esat kahato ereĩne'en uruky'e hat urueha­ky­'e'i hap uruete turan miit'in yt i'atu­wese i uruete hap turan are. I'ewyte Papai eremoe­ha­ky­'e'i Esa'yru mohey haria ky'ewi are yn ehupi Tupana pe. Etunug no mi'iria emiit'in sese iwepit kahato rakaria wo mesup mũki­'ite hawyi wuat'i e'at pe are Tupana pe. Ui'ywot Koro are eti'a­tu­mo­wepit ro emiit'in po'og sa'a­wy­'iwuat kai to'o­po­wyro powyro hamo are ahẽtup epe Tupana Urupo­typot Iesui set upi mesuwe ehowawi are ra'yn.
JUD 1:3 Uimi­ky'e kahato ko'i eipe. Sa'a­wy'i arehay­po­'oro teran ehowawi aikotã Iesui aheha­kye­ra'at hap kuap hamo. Uimiwan ehowawiat nuat atunug neran ma'ato Tupana Pã'ãu — Yt etiwan nei'o miowat Iuta e uhepe. Apuete Iuta ma'ato waku etiwan wẽtup aikotã aikotã hap etiat e uhepe. Waku wẽtup sehay yn na'yn etipo­'oro uimohey haria pe. Mi'i hawyi woro­ho­'o­mu'e teran Tupana Pã'ãu mienoi uhepiat ewywuat yn na'yn. Pyno koitywy eipe Iesui mi'a­pykok yne. Koitywy uimiwan me woro­ho­'o­nãpin Tupana Pã'ãu e hap einãpin hamuat wo. — Uimẽ­pyt'in atiky­'esat kahato eweimoheg eipy'a pe Uha'yru mohey hap e Ipã'ãu ahepuo are. Yt eipohep ne'i tei'o imohey hap ete ma'ato eweimohey po'og po'og yne e'at pe Uha'yru Iesui e ahepe. Aikotã sa'a­wy'i eweimohey haty wo hap ewy po'og po'og eweimohey te wuat'i e'at kape e Tupana ahepe. Aikotã sura­ra'in tunug yne ta'a­tu­'akag koro ehay mi'i haria ewywuat ro eweikup­te'en Uha'yru miky­'esat ko'i nug hamo e Tupana Pã'ãu ahepe mesup are. Uito Iuta eiwy sese eimu'e ra'yn are waku.
JUD 1:4 Koitywy tuwe­hyt'ok tuereto aipy­'a­setpe Tupana mohey hap pun haria. Yt Tupana mõtypot rakaria i mi'iria are. Mi'iria aipy­'a­setpe tukup­te'en ma'ato yt naku i nug hamuat aima'at hamo tõ'ẽ ahowawi. Mi'iria ti Tupana Sa'yru yt kuap i haria. Mi'iria ti aikotã Tupana ehay enoi haria te'e­ro'e sa'a­wy­'ite hap ewy. Mio tã i'atu'e — Tut wyti aru eima'at hanuaria sese e miwan me. Mi'iria wyti aru uimi­'a­tu­'a­piheg wuanuaria te'e­ro­py­hu'at wuat'i e'at piat nuaria e Tupana miwan me mi'iria etiat hap nug haria. Mi'iria ti yt kat i uimõ­typot hap i'atu­wa­nẽtup hawe haria e. Mi'i haria wyti aru tuwe­hyt'ok wehyt'ok eipy­'a­setpe uimõ­typot yat pe yt naku i nug hamo e. Mi'iria Tupana e hap ewy — Ta'i waku ti watunug sa'ag aimi­ky­'esat ewywuat i'atu'e. Waku ahewaire waire kahato i'atu'e aru are. Ta'i Tupana yt ai'a­piheg hin i katu­pono ti aiky'e kahato Tupana iwese kahato rakat pote i'atu'e aru aimu'e sa'ag ne'i. Yt naku i watunug Tupana Mipo­'oro Aipo­typot no i'atu'e aru mi'iria e sa'a­wy­'ite Tupana miwan me eima'at reran haria etiat.
JUD 1:5 Pyno eiwe'eg wo o mi'iria hap pupi uiwy­ria'in are. Yt eweiwaure tei'o sa'a­wy'i wanĩ­kaptia po pywiat ai'y­wania Iuteu ywania Tupana ti'a­tue­ha­kye­ra'at yne yi Esitu'in ahewa­nĩ­kaptia po pyi hap. Ma'ato mi'i pytkai yt ta'a­tu­mohey po'og hin i ta'a­tue­ha­kye­ra'at hat Tupana are. Ta'i mi'i hawyi mekewat yahig wato tote Tupana ti'a­tu­'a­piheg mi'iria are. Ta'i tomohey hap pun haria toi'a­tu­moma kahato itote are. Nagnia yne topap itote hawyi ta'a­tu­mẽ­pyt'in yn put'ok­'i­'a­tu'e yi wakuat Tupana miium kape are. Mekewat yahig wato tote hakpap kahato tomohey hap pun haria are. Tupana ti'a­tu­moma yne yahig wato tote. Ta'a­tu­mohey kahato sa'a­wy'i pytkai topap ta'a­tupun imohey hap pote. Mi'i hawyi i'atu­mẽ­pyt'in yn toko­ka'at Tupana miium e'yi kape are.
JUD 1:6 I'ewyte sa'a­wy­'i­wuaria atipy piaria waku kahato tukup­te'en atipy pe Tupana wywo are. Ta'i sa'a­wy'i sese ti mi'iria tukup­te'en Tupana ehamo atipy pe wen ma'ato meiũran — Uruto po'og Tupana kai i'atu'e sa'ag hawyi Tupana ti'a­tu­pugha ra'yn i'atuieĩ­ne'en hap atipy piat pyi i'atu­mi­ky­'esat sa'ag nug hamuat. Mi'i pote ti koitywy mi'iria tukup­te'en ta'a­tu­po'i po'i hawe ra'yn are. Sa'a­wy'i atipy piaria mi'iria ma'ato mio te ta'a­tu­pyhyp hawe tukup­te'en. I'ypyryp sese pe mekewat i'ypyryp hun kahato rakat pe iheg sese pe tukup­te'en. Mio ti itote ta'a­tu­he­katup ta'a­tu­'a­piheg sese hap e'at Tupana piat hap. Katu­pono Tupana to'e i'atuepe — Ati'a­tu­'a­piheg wyti aru eipe e ra'yn i'atuepe. Koitywy he'at yn ta'a­tu­he­katup. Mi'i e hap ewy te Tupana to'e koran Tosa­'yru mohey hap pun haria pe. Mi'i pote waku wato­ken'ẽ kahato mi'iria ewywuaria pupi e.
JUD 1:7 Sa'a­wy'i mekewat tawa Sutuma piaria i'ewyte mekewat tawa Kumura piaria topap meremo katu­pono Tupana tiwuk yne mi'iria are. Mi'i tawa ko'i piaria etiat eweikuap ta'yn. Ta'i meimuẽwat tawa ko'i ti Tupana tiwuk aikotã atipy piaria Tupana atoiat haria ewy kahato tukup­te'en pote. Katu­pono mi'iria eko ti i'atue­waire waire hap kape yn i'atu­wa­nẽtup hap hawyi ihainia'in ti ihainia'in wywo i'ewyte hary­po­ria'in ti hary­po­ria'in wywo. Yt miit'in ewywuat i ta'a­tunug hap ete yn ta'a­tu­wa­nẽtup. Te'e­ru­wa­nẽtup yn aikotã mekewat ta'a­tu­minug sa'ag ko'i ete yn. Mi'iria ti ihainia'in wywo yne hary­po­ria'in wywo hap kape yn te'e­ru­wa­nẽtup at ka'ap are. Mi'i pote yt miit'in ewywuat hin i tukup­te'en to'ope to'ope to'o­pytyk pytyk pote. Ihainia ti ihainia wywo ti ra'yn hary­poria ti hary­poria wywo ti ra'yn ta'a­tu­ky­'esat sa'ag. Mi'i tã hawyi Tupana tiwuk i'atue­tawa aria sa'ag i'aman ewywuat wo. Mi'iria wuk hap ti aria hewo atipy kaipyi i'atu­'a­piheg hamuat. Mi'i hap ti mesup topy­hu'at aimu'e hamo ra'yn ainãpin hap ta'yn. Waku ai'a­piheg hap pupi wato­ken'ẽ are. Yt naku i Tupana mi'a­piheg ko'i tawa Sutuma tawa Kumura piaria ewy wato­py­hu'at. I'atue­tawa wuk hap kaipyi watikuap aria wato wuat'i e'at piat yt imohey i haria wuk hap etiat watikuap are.
JUD 1:8 I'ewyte yt naku i wato­py­hu'at mi'iria ewywuat uiwy­ria'in. Mi'iria ti at ka'ap te'e­ru­wa­nẽtup hawe ikat aikotã me waku ta'a­tunug sa'ag hap i'ewyte miit'in ma'at hap kape. Mi'i pote i'atu­mu­'etu ti sa'ag yn na'yn are. Mi'i hap kaipyi ti ta'a­tupiit ete i'atu­mi­ky­ry'i kahato katu­pono waire waire hap yn i'atu­wa­nẽtup hawe. Mi'i pote ti ta'a­tu­nãpin neran irania'in ta'a­tueko nug hamuat. I'atu­saiwot kahato Tupana ete ta'a­tu­py'a pe. I'atu­hu­ha'i ne'i pote waĩ'i­'a­tu'e Tupana pe. I'ewyte torania more­kuaria ete yne tu'i­saria ete i'atu­saiwot i'atu­hu­ha'i yn na'yn. I'ewyte Tupana emiit'in atipy piaria ete i'atu­mi­ky­ry'i. Yt te'e­ro­ken'ẽ hin i ahiag mupi are.
JUD 1:9 Ma'ato atipy piaria sura­ra'in akag Mikeu atipy kaipywiat yt tuwe­ky­ry'i hin i ahiag ete. Mi'i ti sa'a­wy'i Tupana tipo­'oro tesu­rara koro Mikeu atipy kaipyi yi kape Musei syp hamo ma'ato mu'ap upi ahiag tipyhyp teran. Mi'i hawyi yt kat e i Mikeu ahiag me ma'ato meremo tohẽtup atipy kape — Tupana meremo ro eti'akit ahiag katu­pono uipyhyp teran emiky­'esat nug hap ete e token'ẽ haype. Musei iku'uro hawyi ahiag tiky­'esat ipiit towanuat. Mi'i pote atipy kaipywiat surara akag Mikeu hẽtup meremo Tupana pe — Eti'akit ro ahiag Uika­'iwat mesuwe e. Eti'a­piheg no ahiag e yn. Yt to'e hin i — Woro'pun en yt e i ahiag me atipy piaria surara koro pytkai. Ma'ato toĩne'en aipy­'a­setpe miit'in yt imohey i te haria. Mi'iria to'o­ky­ry'i kahato Tupana ete i'ewyte ahiag ete i'ewyte torania akag ko'i ete sio tu'i­saria sio more­kuaria ete — Uruto ti po'og nakaria wo torania kai i'atu'e ta'a­tu­wa­nẽtup hawe.
JUD 1:10 Yt naku i wato­py­hu'at aikotã tawa Sutuma hawi tawa Kumura eko ewy. Itotiaria yt te'e­ro­ken'ẽ hin i atipy kaipy­wiaria pupi. I'ewyte mi'iria ta'a­tu­mi­ky­ry'i kahato yne akag ko'i etiat haria. Yt ta'a­tukuap i Tupana esaika hap pytkai i'atuehay sa'ag ne'i. Yne akag ko'i ete i'atuehay sa'ag. Ta'i mi'iria ti aikotã ga'apy piaria haiwot rakaria ewy tukup­te'en katu­pono torania miit'in akag ko'i ete i'atu­hu­ha'i ne'i irania'in mimõ­typot ko'i ete. Yt ta'a­tukuap i waku rakaria haype hawyi yne wakuap ko'i ete i'atu­saiwot. Mi'iria ti Tupana mi'a­tu­sa­ty'i saty'i ko'i katu­pono tuweu­piaria ra'yn ta'a­tu­minug sa'ag ete yn te'e­re­moe­hapap. Mi'iria irania'in moweu­ka'i ta'a­tueso wywuat haria. Mi'iria wakuap sese ko'i yt kuap i haria aikotã Awyato miit auka hat ewywuaria i'atueko. Mi'i pote miit'in mi'auka wo te'e­ro­py­hu'at Awyato auka hap ewywuat are. I'atu­haiwot popuo sy'at i'atu'e yt nakuap i utui hap ete hawyi te'e­ru­wewi te'e­ru­we­'auka.
JUD 1:11 Ta'i uiwy­ria'in mi'iria ti sa'a­wy­'iwuat Kãi e hap het rakat ewywuat heko rakaria. Kãi ti sa'a­wy'i ipy'ahak toywyt wakuat Apeu toi'auka yt nakuat i uito te'e hap toimo­herep. Kãi ewywuat sese ko'i mi'iria tukup­te'en at ka'ap are. Nimo te mekewat Tupana ehay ran moherep hat paini koro Parãu me Tupana to'e — Yt ereto tei'o ui'y­wania Iuteu ywania kuasa te hamo e. Ma'ato Parãu toto ra'yn toiky­'esat kahato ha'up iwato morekuat po pyi. Miit'in ti'a­parap mono Tupana kapiat we'eg hap te'etu yt naku i nug hamo toto. Itote toimo­herep yne sa'ag sepap hap. Mi'i hap ewy mi'iria paini Parãu ewywuat tukup­te'en Tupana ehay ran moherep haria ma'ato i'atu­py'a pe yt kat i Tupana ky'e sese hap wywo. are. Ta'a­tu­henoi miit'in wen ma'ato i'atuekat ky'ewi hap yn te'e­ru­we­wa­nẽtup wywo. I'ewyte ti te'e­ru­we­mo­wato teran kahato hap kape yn te'e­ru­we­wa­nẽtup ka'ap are. Yt kat i Tupana mõtypot hap sese i'atuekai are. Sa'a­wy­'iwuat pa'i ran Kore e hap wanẽtup hap — Uito po'og Musei kai e nimo Tupana mohey haria Musei mi'a­py­koktia pe. Toipo­hari yne teran Musei Tupana mohey haria Tupana hũria haype. Ma'ato toi'a­parap kahato Tupana pe hawyi Tupana mi'auka meremo rakano topy­hu'at yi ka'a pe ipyp. Ta'i mekewat pa'i Kore ewywuaria kahato tukup­te'en ne mesup aipy­'a­setpe are. Mi'iria Tupana hũria aimi­'a­pykok aiwy­ria'in Iesui mohey haria ete aipo­hari teran aimi­'a­pykok wẽtup sehay upi yt Iesui ehay upi i haria. Mi'iria wyti aru Tupana mimoma wuanuaria pa'i Kore ewywuat are.
JUD 1:12 Yt naku i mi'iria tunug at ka'ap to'ope to'ope pytkai yt te'e­ro­ken'ẽ hin i te'e­renuk aiwywuat hamo. Aikotã ut aimi'u ete tenuk hap ewy mi'iria aipy­'a­setpe ahenuk aiwo­'o­ky'e hap nug hap etiat turan. — Heno watenuk yt ai'e pytkai i te'e­renuk aiwywo Iesui piit iã'ãkap man watu'u turan i'ewyte Iesui suu iã'ãkap Uwa hy watu'u turan. — Tupana tiky­'esat ahewaire waire hap i'atu'e Iesui mohey haria ewaure ka'a pe yt kat i wemõti hap wywo. Ta'a­tu­mi­ky­'esat yt we'eg i hap nug hap kape yn i'atuehay. Mi'iria ti tukup­te'en aikotã mekewat ywyhig hun ewy. — Meiẽ tut aru i'aman aimikoi hu'i hamo wato'e wen ma'ato ywytu uwato yn put'ok'e ai'mikoi pun hamuat. Yt i'aman hin i hewo aiko aimikoi ete. Mi'i hap ewywuaria ti mi'iria tukup­te'en are. Mi'iria ti ikahuria aimikoi ypia iyhop ikahuria ewywuat ko'i ma'ato yt karãpe i haat rakaria ewywuaria. Karãpe haat e'at put'ok'e hawyi watuwat i'ywa so'ohep hamo ma'ato yt kat hin i ikaipyi wati­puẽti mi'u hewo hap ewy haria are. Mi'i tã ti tukup­te'en mi'iria aikotã aimikoi aimi­'ypy hep yi pywiat rakat igag hap ewy are. Aikotã aimikoi iku'uro rakaria ewy mi'iria tukup­te'en aimikoi ypia py'a­setpe are.
JUD 1:13 — Ta'i uruto ei'ewy Iesui mohey kahato haria i'atu'e wen ma'ato Iesui mohey ran haria aikotã y'y ihy we'okmõi ko'i wasere upi tõ'ẽ tõ'ẽ hawyi ihy mohun hap hawyi aimi'u wuat hap ewy Iesui mohey ran haria. I'atu­wa­nẽtup sa'ag nakat yn pote ti aiwa­nẽtup hap ywyk hanuaria. I'ewyte Iesui mohey ran haria ti aikotã waikiru hewyry ewy kahato are. Aikotã waikiru ho'o­wasat tuwewi aikowo aikowo ta'a­tu­mi­ky­'esat ewy tuwat. Ma'ato meiũran i'atuo­wasat hawe tukup­te'en yt hẽtyhot i ywyhig hun me i'ypyryp sese pe hap ewy aru aikope Tupana yn ikuap hap tote. Mi'i hap ewy ti Iesui mohey ran haria i'ypyryp aikotã wãtym koro i'ypyryp hap ewy Tupana kuap hap ete.
JUD 1:14 Nimo te ti mio tã e mekewat Tupana ehay moherep hat pot Enoki Atãu emiariru emiariru to'e — Tut ti aru Tupana Aika­'iwat ahowawi typy'i kahato tesu­ra­ra'in atipy piaria wakuaria sese wywo e yt naku i nug haria moma hamo e.
JUD 1:15 Wuat'i miit'in yt imohey haria i apiheg hamo tut Ahetu­pana e Enoki. Mi'i hawyi ti aru toimo­herep yne uwe waku uwe yt nakuat i hap e. Mekewat e'at pe ti aru toimo­herep miit'in minug sa'ag nakat ko'i yt nakuat i nug haria pe Tupana yt miky­'esat i nug haria pe e. toi'a­tu­mo­herep wuat'i ehamo e. I'ewyte torania yt naku i i'atuehay sa'ag tetiat e. I'atu­py­'ahak tetiat hap enoi wuat'i miit'in ehamuat hamo tut Ahetu­pana e. Toimo­herep yn wo'oe­ro­mo­pusu hap koi hawyi yn soso hap i'ewyte — Tupana ti yt naku i kahato i'atu'e hap moherep hamo tut e.
JUD 1:16 I'atu­weu­ka'i tetiat hap sio tomohit hap ko'i toi'a­pykok yne hamo Ahetu­pana tut tesu­ra­ra'in sem wywo e Enoki nimo. Mi'iria ti ta'a­tu­mi­ky­'esat sa'ag ewywuat ra'yn nug at ka'ap ma'ato yt heremo i haria are. Ta'a­tuwẽ pyi ti — Uito po'og wuat'i kai i'atu'e ahepe are. Mi'iria tiky­'esat kahato ta'a­tu­mõ­typot kahato hap — En po'og urukai i'atu'e irania'in hap. Mi'iria ti ikat kahato ta'a­tu­mõ­typot kahato — En ni yt naku i rakat i'atu'e wakuaria pe. Karãpe aiwat aimi­ky­'esat ete aipo­wyro hawyi ahero­mo­pusu kahato hap — Yt naku i ti meke tã mi'i miit ewy watunug i'atu'e irania'in me ahetiat pe. Yt wati­'a­tu­mo­wepit kuap i ra'yn mi'iria are. Ta'a­tu­mi­ky­'esat sa'ag yn ta'a­tunug neran mote wakuat yt ta'a­tunug kuap i ta'a­tu­hã'ãg pytkai are. — Uito ti waku kahato po'og torania kai wakuap atunug i'atu'e. Waku kahato en i'atu'e ahepe ahekat ky'ewi. I'atuehay se rakat ta'a­tuehay wo aimo­wepit ma'ato yt pywo pe hin i aima'at teran haype ne'i are. Mi'i tã hap ete te'e­re­mo­pokuap kahato. Mi'iria ti te'e­ro­pot­mu'e wẽtup sehay yt Iesui etiat enoi haria hin i. Eiwe'eg wo o Tupana ehay pun haria mi'iria are.
JUD 1:17 Ta'i mesup ta'yn ui'e hap ewy ta'a­tunug na'yn mi'iria eipy­'a­setpe wẽtup sehay enoi haria are. Uihey­wyt'in uheinyt'in yne uheka­tu­wyria wẽtup sehay kape yn ni waku watu­wa­nẽtup. Mi'i ti ainãpin sa'a­wy­'iwuat Iesui etiat 12 ok takaria aimu'e hap kape yn waku are.
JUD 1:18 Mekewat sa'a­wy­'i­wuaria Aipo­typot Iesui potpo­'o­roria sese ainãpin kahato mi'iria aima'at teran haria ete aima'at pupi are. Ta'i mio tã i'atu'e ahepe 12 ok takaria — Meiũran wuat'i kahuro hap e'yianmete wyti aru tõ'ẽ kahato wẽtup ehay enoi haria. Mi'iria ti aru ai'a­tu­ma'at reran haria i'atu'e ra'yn ahepe. Mekewat yi kahuro hap yt pya i ra'yn turan put'ok­'i­'a­tu'e ahowawi. Mi'iria ti ikohyeput kahato ta'a­tupiit miky­'esat gu'uro ypy yn nug hap upi i'atu'e. Tõ'ẽ ehowawi wẽtup sehay moherep hanuaria i'atu'e. Eimi­mohey hãpyk takat Iesui etiat mohit hanuaria tõ'ẽ hawyi eipy­'a­setpe tukup­te'en i'atu'e 12 ok takaria. Mi'iria ti ta'a­tupiit miky­'esat yt naku i gu'uro ypy nug hap etiat wemoe­hapap haria yt Tupana miky­'esat wuat'i e'at piat ieĩne'en hap yt ky'esat i haria i'atu'e ahepe sa'a­wy'i 12 ok takaria.
JUD 1:19 Mi'iria aimu'e haria wẽtup takat wakuat aiwo­'o­ky'e hap moma rakaria aimohey ete aipo­hari teran haria. Mi'iria ti iky'esat aiwo­'oe­waure aimi­mohey etiat hap yn. Mi'iria piit pe ti yt kat i ra'yn Tupana Pã'ãu rakaria. Mi'iria ti aikotã ga'apy puat haiwot rakaria miit auka haria ewy. Te'e­ru­wa­nẽtup mesu­wa­rotiat ko'i kape yn.
JUD 1:20 Mi'iria ehay upi yt naku i watuwat are. Waku wato­mohey po'og po'og wuat'i e'at Aiwy Iesui are. Waku iheg kahato ihay hawyi watunug i'e hap yn. Waku aikotã ipotmu­'eria 12 ok takaria ainãpin haria wo watu­kup­te'en mot'i hap ewy aito are. Mio tã are yn uiwy­ria'in waku sese rakat aimi­mohey pote. Waku wato­'o­moe­saika moesaika aimi­mohey wakuat ete yn are. Ta'i aiwat aimi­mohey ti po'og wakuat torania kawiat hat are. Ta'i mi'i yn ni waku kahato ahehay Tupana kapiat hamo het upi are. Tupana Pã'ãu miky­'esat ewy yn waku wahẽtup Ipã'ãu upi are. — Etum no esaika hap uhehay ewawiat sepap hamo wato'e Ipã'ãu me are. Mi'i hap yn ni waku ra'yn Ipã'ãu upi wahẽtup hap are.
JUD 1:21 Uito ti atimohey kahato. Mi'i pote eipe atiky­'esat ui'e eweimohey kahato hap. Tupana ti yt puo hin i eikai ui'e tomohey hap ium ehepiat hamo. Tupana tum neran aiky'e hap mi'i pote to'iro wati­ky'e Aiky'e hat. Waku watuweium Tupana pe aiky'e hamo. Waku Tupana yt wahowai i aiky'e teran tipyt. Ta'i waku ti Aika­'iwat wahe­katup wuat'i e'at pe. Mi'i hap yn ti waku uiwy­ria'in. Tupana mipo­'oro ahetiano ihaky­'e'i kahato tutum toĩne'en wuat'i e'at piat hamo. Mi'i pote waku wati­ky'e Aiky'e hat are.
JUD 1:22 Tupana ti waku wati­po­wyro ihay enoi hap ete. Mi'i tã ti toiky­'esat kahato katu­pono irania'in yt tokuap i te haria piat tokuap hap toiky­'esat tomõ­typot hap. Tomõ­typot sa'up mo tutum neran i'atue­ha­kye­ra'at hap. Katu­pono toi'a­tue­ha­kye­ra'at teran irania'in yt imohey kuap i te haria are.
JUD 1:23 Waku ti wati­'a­tue­ha­kye­ra'at irania'in aria wato po pyi. Waku wati­mo­herep mu'ap aria wuat'i e'at piat ho'opot hap pyi. Waku paawa­to'e i'atu­ky'e hap aipy'a pyi are. I'ewyte irania'in yt imohey kahato i te haria waku wati­'a­tuekyi i'atu­ky'e hap wywo. Uiwy­ria'in waku ti aiwe'eg wo kahato yt nakuaria i yt imohey i te haria i mu'e turan. Mi'iria ti karãpe wati­mo­herep Iesui ehay aimo­'a­kag'aia teran yt nakuap i nug hamo. Yt naku i wata'at i'atuehay upi waire waire nug hamo. Waku wato­ken'ẽ mi'i nug hamo. Waku ti i'atupiit kahu hap yt aimo­'a­kag'aia i i'atupiit ky'esat hamo. Waku aikotã ahesokpe ikytsig kahato ete yt wati­ky­'esat i hap ewy. Waku ti wati­'a­tuekyi yt naku i nug haria Iesui kape. Waku ti ta'a­tupiit miky­'esat nug haria waire waire haria ta'a­tuwuk hap kapiat haria watekyi Iesui kapiat we'eg haria wo. Aiwe'eg i hap wati­'ywyk wywo pote wato­ken'ẽ i'atueko pupi are. Yt naku i wata­'aipok ne'i aheko sa'a­wy­'iwuat yt naku i nug hap kape i ra'yn are.
JUD 1:24 Uiwy­ria'in karãpe put'ok'e ahete aho'opot hap ahatek hap turan ni Tupana ti aimoe­saika kuap yne ahã'ãg hap akit hamo are. Mi'i pote waku wato'e Tupana pe — Urupo­wyro En Tupana katu­pono yt urutunug neran i ahiag miat irania'in miat uruiã'ãg hap upi waku wato'e. Yt naku i urui'atoiat En Tupana Uru'ywot ma'ato urupo­wyro En uruma'at hap akit hamo wato'e ne'i. Ta'i etikuap yne uruiã'ãg hap put'ok'e turan. Mi'i pote urumoe­saika mekewat sa'ag nug hap akit hamuat waku wato'e Tupana pe are.
JUD 1:25 — Tupana En yn ni Uruetu­pana uruto'e. Mi'i hawyi En ni po'og we'eg torania kawiat hat uruto'e. I'ewyte En yn Urueha­kye­ra'at kuap hat uruto'e. Urupo­wyro En urui'a­parap hap moma hamo Tupana. Urunug no En hãpyk sese rakaria wo ewaku hap ewy uruto'e. Uruiky­'esat kahato ehamo urutu­kup­te'en mesup mũki­'ite wuat'i e'at pe uruto'e. Urumo­wepit ro En ewy. Uruimõ­typot reran En Urumo­hãpyk kuap hat sese En mote. En ni po'og wuat'i apy tote uruto'e. En ni Wuat'i pore­kuaria Porekuat. En ni Wuat'i Miit'in Akag Koro. En ni wuat'i atipy piaria i'ewyte yi totiaria Akag Koro uruto'e. En ni rat wuat'i apy i ipotmo­ko'i rakat. Ga'atpo hawyi mesup mũki­'ite hawyi torania e'at piat uruto'e ewawi i'ewyte Esa'yru Emipo­'oro Urupo­rekuat nuat Iesui set puo waku. Uito ti Iuta. Iesui ti uheyke'et sese are. Tiaku ti Iesui ywyt re i'ewyte mi'i Uheyke'et are.
REV 1:1 Uito Ei'akag Iesui e. Ui'ywot Tupana tiky­'esat kahato atimo­herep ehepe yne aikotã yt pya hin i ra'yn hap e. Mi'i ko'i toiky­'esat uheropat haria ikuap e. Atipo­'oro uhehay atipy piat uhehay moherep hat wẽ pyi e. Ahenoi yne uheropat hat uipot­mu'e uimi­ky'e kahato Iuwãu me.
REV 1:2 Etimo­herep to mesuwat uhehay yne yne uheropat haria pe are'e. Mesuwat sehay yne Tupana e hap uhetiat e. Mesuwat uhehay wakuat yne are'e yne eimikuap ok tã ehewaure ka'a mikuap ok tã ui'e hap. I'ewyte aikotã emu'etu era'a­kasa uimi­mo­herep epiat hap ewy topy­hu'at are'e epe uiwy Iuwãu e.
REV 1:3 Uimohey haria waku ehewaure ka'a ewetum kahato mesuwat uhehay wakuat kape e. Waku eweimo­wẽ­pap'i mowẽ­pap'i kahato mesuwat miwan ehepiat ikuap hawywiat ehepiat inug hamuat hap kape aikotã aikotã Tupana tunug hap ahenoi ehepe e'yianmete e. Yt pya hin i Mesuwat uhehay Tupana tipyt­'atnug hamuat e'at. Eweimo­wẽpap mesuwat uhehay pote aru toĩne'en eipoi­tyro kahato hap eimo­wepit hap e Iesui ahepe.
REV 1:4 Mi'i pote uito Iuwãu atiwan na'yn Iesui ehay tomikuap ok tã hawyi atipo­'oro Iesui mohey haria pe 7 tawa yi Asia piaria pe. Aikotã Iesui mimo­herep ewy mekewat temiit tomi­po­'oro atipy kaipywiat wẽ pywiat ewy atipo­'oro ehowawi uito Iuwãu. Ma'ato sa'a­wy'i uimiwan me wepoi­tyro hap tohẽtup Tupana kaipyi 7 tawa piat Tupana mõtypot yat piaria wat hamo. Mio tã are'e epe Tupana — Uito ti emiit Iuwãu ma'ato En ni mekewat wuat'i e'at piat ieĩne'en hat are. En ni torania mesuwiat ieĩne'en hat e'yianmiat ieĩne'en hat are. En ni mesuwuat re ieĩne'en hat are. En ni wuat'i e'at sakpo ieĩne'en hat are. Tupana ahẽtup kahato ewawi ereĩne'en hegyi'at kahato Esa'yru mohey haria pe hap are. Etum o wo'o­ky'e hap i'atuepe. Etimõ'ẽ Epã'ãu 7 tawa piaria Esa'yru mohey haria kape are ewawi Tupana.
REV 1:5 Tupana Esa'yru sese Iesui kaipyi ahẽtup etipoi­tyro emohey haria. Etum no i'atuepe i wo'o­wese hap are epe. Wuat'i Porekuat no En po'og po'og irania'in kai are. En ni wuat'i e'yianmete wuat gu'uro pywiat ieĩne'en i hat. En ni pywo yn e hat. Iesui En ni uruky'e hat sese katu­pono Esuu wo urupitpit hap etikoho yne torania uruminug sa'ag are. Eku'uro hap uruka­wiano hap.
REV 1:6 Waku yne hawyi urunug na'yn more­kuaria wo mesuwat yi tote E'ywot eropat hamuat are. En ni urunug miit'in epa'i wo E'ywot miky­'esat ewy. Urunug na'yn emiit miit'in ekyi ewewawiat emõtypot haria wo hamo. Wuat'i e'at piat esaika hap moherep hanuaria urunug na'yn are. Etum no Emohey haria pe egyi'at hap kaipyi i'atu­mo­wepit hap wuat'i e'at pe aru yt kat sa'up i hap ahẽtup are'e epe Tupana. Pyno waku ra'yn uhehay. Uito Iuwãu.
REV 1:7 Uiwy­ria'in Iesui mohey haria meiẽ ewehe­ha'at ro Aika­'iwat Iesui tut ra'yn teiam ywyhig me. Ta'i yne yne te'e­ra­'a­kasa. I'ewyte ipiit suk haria i'auka haria te'e­ra­'a­kasa kahato howawi. Ewehe­ha'at ro te'e­ruwak kahato wuat'i ywania yt imohey i haria te'e­ro­ken'ẽ haype kak'i­'a­tu'e. Ma'ato aito imohey haria wahe­katup kahato. Waku eriot Mehĩ waku eriot Mimi wato'e. I'ewute aitoria 7 tawa piat Tupana mõtypot yat piaria pe yi Asia totiaria pe Iesui tuwe­mo­herep wy.
REV 1:8 — Ta'i uito ti rat Iesui e ahepe tut hawyi. Aha'a­wynug yne uito hawyi areĩne'en ni hat uito. Uhepiat inug yne hap e'yianme areĩne'en ni e. Uimi­sa­'a­wynug sa'a­wynug atimo­put'ok yne. Ma'ato wuat'i mesu­wa­rotiat e'yianme areĩne'en ne wuat'i e'at pe e. Uito ti rat Eika­'iwat Wuat'i Esaika Hap Eiam uito e Iesui ahepe.
REV 1:9 Pyno uito Iesui potpo­'oro 12 ok takat Iuwãu areĩne'en eheyke'et ewy katu­pono waho­'opot aiwo­'o­'e­wy­'ewy Iesui mohey haria aito pote are. Wẽtup sok yn aito. Iesui yn Aipo­rekuat ai'e pote ai'a­tu­sa­ty'i saty'i kahato irania'in. Mi'i pote wẽtup miit yn ewy wahe­katup Aika­'iwat put'ok'e wuat'i Porekuat nuat hap e'at. Iesui yn Aipo­typot are'e hap etiat no uipyhyp mesuwe yi a y'y wato py'a­setpiat ui'a­piheg hamo. Wo'o­pyhyp hat ewy uinug katu­pono ahenoi uhehay wo Iesui ti Aipo­rekuat nuat are'e pote. Mi'i pote uhehay monik hap ky'ewi ui'atoiat mesuwat yi a Patumu e hap tote.
REV 1:10 Mi'i yi a tote Aika­'iwat wanuat e'at Mytu'u e'at pe turan Tupana Pã'ãu topy­hu'at kahato uhete. Put'ok'e hawyi uipyt­'atnug kahato hawyi uimu­'etu kahato. Mi'i hawyi ui'ok pe kai put'ok'e ra'yn sehay aikotã huhu'e hap ewy atikuap kahato. Ihay pirik kahato atikuap heremo kahato rakat. Huhu'e hap ewy ma'ato ihay ewy atikuap.
REV 1:11 — Uito ti yne sa'a­wynug hat ma'ato uhepiat inug hap yianmete areĩne'en wuat'i e'at pe e. Uminug ko'i yne ikahuro hap sakpo areĩne'en ne wuat'i e'at pe e uhepe. Mi'i hawyi to'e i uhepe — Iuwãu e atomo­herep aru epe emi'a­kasa ko'i emu'etu wuat ewywuat ko'i e. Etiwan o uimi­mo­herep emu'etu hap ko'i e. Mi'i hawyi emiwan o etipo­'oro uimohey haria pe 7 Tupana mõtypot yat kape yi Asia tote. Tawa EWESU piaria we'a­tunug haria kape. I'ewyte Tupana mõtypot yat tawa SIMINA piaria wa'a­tunug haria kape etipo­'oro ui'e hap emiwan. I'ewyte Tupana mõtypot yat tawa PẼKAMU piaria we'a­tunug haria kape etipo­'oro emiwan. I'ewyte Tupana mõtypot yat tawa SATU piaria kape etipo­'oro. I'ewyte Tupana mõtypot yat tawa TIATIRA kape etipo­'oro wy. I'ewyte Tupana mõtypot yat tawa WIRATEWIA piaria kape etipo­'oro hawyi Tupana mõtypot yat IRAUTISEIA piaria kape etipo­'oro emiwan ipe pewiu tote e Iesui uhepe.
REV 1:12 Mio tã to'e hawyi aremorem mekewat ihay rakat IESUI kape ara'a­kasa hamo. Aremorem turan hẽtyhot hap atipuẽti. Tuwẽtem wẽtup eiam myi ariãty.
REV 1:13 Mi'i hawyi mekewat aria ẽty ko'i py'a­setpe toĩne'en Aheyke'et to'e­wywuat sokpe i'ywop takat puo yi kapiat hap. Ipoti'a ete toĩne'en iwo'o­kytyt hap ewywuat hekat rakat Uru kawiat imehit rakat.
REV 1:14 I'asap ikytsig kahato aikotã nukara kytsig hap amukiusu ap ewy ikytsig hap. Iha aria sapuẽ sapyhot hap ewy aria ẽty ewy.
REV 1:15 Ipy ko'i ihup hapyhot hap ewy aikotã Asu watopag aria pe hapyke kahato rakat ihup imehit hap ewy. Mi'i hawyi ihay topy­hu'at y'y esaika hap topyhyp pote hap ewy y'y wato puehay ewy woo woo'e ne'i soo'e hap.
REV 1:16 Mi'i hawyi toĩne'en 7 waikiru ipo sese kai. Iwẽ pyi tuwẽtem kyse'yp surara wat to'owa piat hãihyk kahato rakat. Mi'i kape araha'at turan yne ipiit hẽtyhot yne atpo­sake turanuat wate­ha'at at kape hap ewy kape ara'a­kasa.
REV 1:17 Ara'a­kasa howawi hawyi ara'at yi tote uhowa yi kape hap ewy ipoity'i uhetiat hawyi ipy yatype gen'ẽ pono iku'uro rakat ewy areĩne'en. Mi'i pote tuwe­ponug uipiit ete topo sese kai haype to'e — Uimi­ky'e Iuwãu e yt ereken'ẽ tei'o uipupi e uhepe. Pywo ti rat uito wuat'i e'yianmete wuat e'at piat ieĩen'en hat Uito e i'ewyte yt kat i ra'yn topy­hu'at re mesu­wa­rotiat pytkai aru areĩne'en ne Uito e uhepe.
REV 1:18 Iuwãu e eraha'at ro uhowawi e. Ha'a­wyte areĩne'en eipy­'a­setpe. Mi'i hawyi uiku­'uro sese koitywy areĩne'en i ra'yn wuat'i e'at piat hamo e. Mi'i pote ui'e hap uhehay upi yn miit'in tuwẽtem kuap gu'uro pyi e. I'ewyte uhehay upi yn miit'in tuwat ta'a­tu­'a­piheg aria wuat e'at piat hamuat kape e uhepe.
REV 1:19 Mi'i hawyi — Iuwãu e emiwan nug uimi­mo­herep tepiat emi'a­kasa aikotã topy­hu'at irane hamuat i'ewyte mesup muat toĩne'en hap ewywuat hap etiwan no e i'ewyte aikotã aikotã irane atunug uimi­mo­herep epe hap ewy e uhepe.
REV 1:20 Mũki 7 waikiru uipo sese kawiat atomo­herep ta'yn epe. Katu­pono atiky­'esat etikuap yt uwe mikuap i aikotã aru kat kat ko'i ewywuat tukup­te'en hap e. I'ewyte atimo­herep teran epe mekewat emo'a­kasa hap 7 ariãty wẽtup teiam mywiat hẽtyhot rakat nu Uru kawiat etiat e. Mi'i ti atimo­herep teran kat som kat som mi'i ewy hap topy­hu'at hap mekewat ariãty eiam e. I'ewyte kat kawiat uipo sese kawiat 7 waikiru e hap som kat ewy hap e uhepe. Iuwãu e mekewat 7 waikiru uipo sese kawiat tukup­te'en aikotã uimohey haria akag ko'i yi Asia totiaria tawa piat Tupana mõtypot yat apykok haria mi'i aikotã 7 waikiru ewywuat tukup­te'en aikope te'e­ru­we­'a­tunug hap tote mekewat 7 tawa yi Asia piaria akag ko'i 7 waikiru uipupiat ewywuat ko'i are e uhepe. Mekewat ariãty eiam 7 haga rakat mi'i ti aikotã uimohey haria yi Asia piaria ewy e. Wẽtup haga wẽtup tawa piaria uimohey haria ewy wẽtup haga wẽtup tawa piaria ewy hap ewy te'e­ro­py­hu'at uimohey haria te'e­ru­we­'a­tunug haria ti te'e­ro­py­hu'at mekewat 7 rakat ariãty ewy 7 tawa Asia piaria e uhepe ihay huhu'e hap ewywuat puo e Iesui uhepe. Uito Iuwãu uimi­'a­kasa hap ahenoi.
REV 2:1 Mi'i hawyi Aheyke'et Iesui to'e uhepe — Iuwãu e mio tã etiwan no uimohey haria tawa EWESU apykok hat pe tawa Ewesu piaria etiat. Mio tã ere'e — Pyno atiky­'esat ereĩne'en uipo pe katu­pono tukup­te'en uipo sese kai ra'yn 7 waikiru ko'i ewy 7 ok takaria Tupana mõtypot yat piaria apykok haria e. Uito ti uhewyry eipy­'a­setpe aikotã aikotã ariãty yt hẽtyhot kahato i rakat moẽtyhot hat ewy e. Uhewyry eipy­'a­setpe eimoẽ­tyhot hamuat e. Eipe wẽtup haga 7 haga py'a­setpiat ariãty eiam ewy mekewat 7 ariãty wẽtup eiam hekat rakat py'a­setpuo e.
REV 2:2 Uimohey haria tawa Ewesu piaria woro­ho­'okuap kahato eipe. Uipotpap nug kahato haria eipe are e. Yt eipohep hin i uheropat hap ete e. Yt eweiky'e hin i yt naku i nug hap ne'i. Atikuap eheko waku hap. Karãpe wẽtup ok put'ok'e eimu'e hamo turan hepamo ihay eweimohey sio uhehay wo sio yt hap kuap hamo e. Ma'ato yt uhehay i ne'i pote meremo — Eso i rat ewei'e tope. Ewehã'ãg kahato mekewat sio Tupana mipo­'oro wẽtup miit sio tuwehay pyi ne'i hap kuap hamo e.
REV 2:3 Eweho­'opot kahato ra'yn uimohey hap upi e uimohey mot'i haria eipe e. Ta'i uheropat mot'i kahato haria eipe pãi are.
REV 2:4 Waku kahato eipe e wen ma'ato wẽtup yt naku i eikawiat yt uimo­wepit hin i hap toĩne'en. Sa'a­wy'i uiky'e kahato haty wo ma'ato mesup yt sa'a­wy­'iwuat yt ewy i ra'yn uiky'e eipe. Ui'atoiat uiky'e sa'a­wy­'iwuat hap ete e. Haty kahato uipy'a pe mi'i hap uhete e.
REV 2:5 Pyno eiwa­nẽtup o aikotã sa'a­wy­'iwuat uiky'e haty wo ehepiat hap kape uimi­ky­'eria e. Mesup uiky'e hap waure haria wo eweikup­te'en e. Ewei'aipok to uhowawi i uiky'e pote are'e ehepe ma'ato yt pote ariot ehe'a­riãty sasep hamo e. Mi'i hawyi i'ypyryp hap yn toĩne'en itote e. Koitywy 7 ariãty toĩne'en ma'ato ahasep hawyi ti aru eiwat pote i'ypyryp yt naku i topy­hu'at e. Ewei'aipok to uhowawi are'e ehepe tawa Ewesu piaria e.
REV 2:6 Tukup­te'en tawa EWESU piaria uimohey haria mu'e haria uhyt Niku­raita mimu­'eria — Waku ehary'i uiat uheha­ry'i wo hawyi uheha­ry'i ewano e haria to'ope yt naku u. Waku ehaiwot ro eweikup­te'en mi'i potmu­'eria ete katu­pono Uito i'ewyte uhaiwot areĩne'en i'atu­pot­mu'e hap upiaria ete e Iesui.
REV 2:7 Uimohey haria ehewaure ka'a kahato ro kat som Tupana Pã'ãu to'e topot­mu­'eria pe Tupana mõtypot yat piaria pe yi Asia tote e. Ewetum no ehewaure ka'a Tupana Pã'ãu einãpin hap kape e. Uimohey haria e pywo pe ti uimikoi ypia pe toĩne'en wẽtup uimikoi ywa py'a­setpe eimoieĩ­ne'en wuat'i e'at piat hap e. Uwe uwe uimohey toku­'uro hap kape i'ewyte uwe uwe topy­hu'at ahiag potiã'ãg hap akit hat toku­'uro hap kape mi'i hat pe aru are'e — Waku etu'u ro uimikoi ypia ywa eimoieĩ­ne'en wuat'i e'at piat hamo are'e aru e Tupana Pã'ãu ehepe e mekewat waikiru ipupiat rakat uimiwan nug hamuat tawa EWESU piaria pe.
REV 2:8 Mi'i hawyi to'e i ra'yn uhepe mekewat 7 waikiru ipo piat rakat — Iuwãu e wẽtup uhehay etiwan hawyi etipo­'oro wẽtup Tupana mõtypot yat piaria kape e. Etipo­'oro uhehay i'atu­'a­pykok hat kape. Uimohey haria tawa SIMINA piaria kape e. Mio tã etiwan — Tawa SIMINA piaria uimohey haria Uito ti areĩne'en wuat'i e'yianmiat ieĩne'en hat e. I'ewyte areĩne'en aru yi waikiru ko'i kahuro pytkai hap e'at e. Mesuwe sa'a­wy'i uiku­'uro ma'ato mesup areĩne'en i ra'yn e.
REV 2:9 Uimohey haria tawa SIMINA piaria woro­ho­'okuap kahato eipe. Waku sakpo'e eipe e. Uheropat haria seseria kahato eipe e. Atikuap eweho­'opot uhetiano hap e. Atikuap aikotã ho'opot kahato popuo eipotpap uimi­ky­'esat nug hap ete. Satek takaria eweikup­te'en ma'ato uiwa­nẽtup hawe hekat kahato rakaria wuat'i e'at piaria eweikup­te'en e. I'ewyte atikuap aikotã itotiaria tukup­te'en hap ei'a­tu­sa­ty'i saty'i kahato haria e. Atikuap aikotã uruto yn ni Tupana kuap haria katu­pono Iuteu ywania sese uruto irania'in ehepe ma'ato eipe yt ewei'e. Mi'iria ta'a­tuehay sa'ag wo ehepe. Yt Tupana emiit'in hin i mi'iria ma'ato ahiag mõtypot yat piaria mi'iria e. Yt Iuteu ywania hin i ma'ato ahiag ywania sa'ag tukup­te'en mi'iria Iuteu ywania ran ne'i ko'i e.
REV 2:10 Yt eweiken'ẽ tei'o ahiag mupi e katu­pono mi'iria ahiag mõtypot haria ei'a­tuiã'ãg aru eimo­so­'opot ehepiat imohey hap sa'ag hamo ehepiat uimohey hap moweityk hap ky'ewi. Ma'ato yt eweitoiat rei'o ehepiat uimohey hap ehã'ãg hap upi 10 e'at hap ewy eweho­'opot uimohey hap waure hamo. Eweipy­hu'at ro uimohey hap mywo eiku­'uro hap e'at kape pote eheĩne'en hap sese ikahu rakat wuat'i e'at piat atum ehepe aru e. Yt kat i sa'ag atipuẽti eikai e. Mi'i hawyi woro­ho­'o­painug more­kuaria wo uimi­mõ­typot wuat'i e'at piaria wo ra'yn uimohey haria sese eweikup­te'en mote are'e ehepe tawa SIMINA totiaria pe e uhepe uimiwan nug hamuat tawa SIMINA piaria pe.
REV 2:11 — Pywo ti wuat'i uimohey haria pe mio tã e te Tupana Pã'ãu are aikotã are'e tawa SIMINA piaria pe hap ewy e. Waku ehewaure ka'a kahato Tupana Pã'ãu e hap uiwẽ pywiat e hap kape e torania 7 Tupana mõtypot yat piaria pe. Uwe uwe ahiag miat toiã'ãg hap akit hat topy­hu'at toku­'uro hap kape mi'i hat yt iku'uro i typuot hap mekewat wuat'i e'at piat miit'in moso­'opot at ka'ap hap e Tupana Pã'ãu ahepe.
REV 2:12 Mi'i hawyi po'og tohenoi uhepe — Iuwãu e etiwan uhehay uimohey haria tawa PEKAMU piaria pe yi Asia totiaria pe e. Kotã ere o etiwan mi'iria pe — Tawa PEKAMU piaria uimohey haria apykok hat e uhehay ti surara ekyse'yp typy hãi nakat to'owa piat hãihyk takat ewy kahato.
REV 2:13 Uimohey haria tawa PEKAMU piaria woro­ho­'okuap kahato eipe e. Atikuap aikotã eweikup­te'en uimohey haria sese wo ahiag emiit'in sem py'a­setpe e. Atikuap eweikup­te'en aikope ahiag topy­hu'at morekuat no hap tote e. Atikuap aikotã uiky'e sese haria eweikup­te'en itote. Yt eiwe­mõti hin i uhet enoi itotiaria piat hamo wãi'e ahiag pytkai e. Atikuap aikotã uimohey sese kahato haria eweikup­te'en itote. Atikuap aikotã yt eweipun hin i te kue uikuap ehepiat hap e. Atikuap sa'a­wy'i aikotã uhehay moherep hat wakuat kahato Antipa ahiag etama piaria ti'auka eipy­'a­setpia uhehay enoi uimohey hap kaipyi pote e. Uimi­po­'oro ta'a­tu­'auka hawyi atikuap sese yt naku i mi'iria ehetawa piaria e.
REV 2:14 Ma'ato tukup­te'en eipy­'a­set­piaria uimohey ran haria uhehay ewanĩ­kaptia tawa PEKAMU piaria. — Uruto Tupana ehay moherep haria i'atu'e wen ma'ato wẽtup sehay moherep haria aikotã nimo sehay yt hãpyk i rakat enoi hat Parãu mienoi ewy ta'a­tu­mo­herep. Nimo Tupana ehay moherep hat Parãu e hap het rakat ti'a­tu­mu'e kahato Isareu ywania ewanĩ­kaptia eporekuat Paraki e het rakat Tupana emiit Isareu ywania mo'a­kag'aia Tupana set etiat hap tehay wo. Mio tã e Parãu — Waku ewetunug ienuk hap iwato hawyi ewei'auka eihũria Tupa­naria iã'ãkap ko'i mõtypot hamo e. Mi'i hawyi waku yne hary­po­ria'in wywo to'ope eweikup­te'en e. Mi'i etunug mote ewanĩ­kaptia Isareu ywania Tupana mi'a­piheg wo tukup­te'en eipy­'a­setpe e Parãu morekuat Paraki pe tomi­nãpin e uhepe uimiwan nug hamuat.
REV 2:15 I'ewyte sehay yt naku i moherep haria tukup­te'en eipy­'a­setpe. Wẽtup sehay sa'ag moherep haria uimo­py­'ahak kahato mi'i ti mekewat uhyt Niku­raita ehay upiat gupte'en haria mekewat — Waku ahewaire waire watunug i'atu'e sa'ag uimo­py­'ahak haria e.
REV 2:16 Ewetoiat ro yne Tupa­naria are'e. Ewetoiat ehewaire hap yne are'e. Ewei'aipok to uhowawi uimienoi ko'i nug hamo e. Yt pote ariot ehowawi eiwu­'uka hap erut hamo e. Mekewat uiwẽ piat kyse'yp typy hãihyk takat wywo areto ehowawi surara ewy e. Eiwe'eg wo'o are'e tawa Pekamu piat uimohey haria pe.
REV 2:17 I'ewyte yne eipe uimohey haria kape mio tã are aikotã Tupana Pã'ãu eimu'e hap ewy e. Ehewaure ka'a pote ewewa­nẽtup to aikotã are'e 7 Tupana mõtypot yat piaria pe yi Asia piaria pe. Uwe uwe uimohey pot'i ahiag miat toiã'ãg pytkai toi'akit ne'i toiã'ãg hap toku­'uro hap kape mi'i hat pe atum man a atipy kaipywiat aikotã Ui'ywot tum sa'a­wy'i yahig note man a Iuteu ywania pe hap ewy atum tope uimiium to'ewy. Uito yn atikuap aikope mekewat man a uimiium uimohey sese haria piat nuat hap e. I'ewyte uimohey sese hat ahet'ok het pakup atum tope. Atiwan nu ikytsig sese rakat rote hawyi atum tope. Mekewat nu etiat uimiset pehik uito yn atikuap het. I'ewyte nu kytsig sat hat ikuap het ma'ato irania'in yt ikuap i toset uiat uimiwan. Mi'i atum uimohey toku­'uro hap kapiat haria pe pãi are'e uimohey haria 7 ywania yi Asia totiaria pe e mekewat hesokpe ikytsig nakat uhepe uimiwan nug hamuat tawa Pekamu piaria nãpin hamuat i'ewyte ahepe yne imohey haria pe nãpin hamo.
REV 2:18 Mi'i hawyi mekewat ariãty eiam 7 haga rakat puat hewyry rakat to'e uhepe — Iuwãu etiwan ui'e hap ko'i hawyi etipo­'oro uimohey haria awa TIATIRA piaria kape i'atu­'a­pykok hat kape etipo­'oro. Mio tã etiwan — Tawa Tiatira piaria Uito ti Tupana Sa'yru e uhehay sese atipo­'oro ehowawi e. Uheha ko'i ti aria sapuẽ sapyhot hap ewy nu mehit hap ewy e.
REV 2:19 Woro­ho­'okuap kahato eipe. Atikuap eipotpap ko'i waku kahato hap e. Wakuap nug hap ko'i ewetunug hap atikuap. Atikuap eiwo­'o­ky'e kahato eiwo­'o­po­wyro eipotpap etiat kaipyi hap atikuap. Aikotã eiwo­'o­mõ­typot eiwo­'oehay upiat hap kaipyi hap atikuap e. I'ewyte atikuap aikotã eweikup­te'en mot'i uimohey wywo hap e. Atikuap mesup ta'yn uheropat po'og haria wo eweikup­te'en hap e. Atikuap aikotã ha'a­wy­tewuat kai po'og na'yn waku eipe hap ko'i atikuap yne.
REV 2:20 Ma'ato i'ewyte atikuap aikotã ehewaku hap toĩne'en kahato pytkai toĩne'en yt naku i hap itote yt eweitoiat hin i te e. Mi'i hap nug hap ete ehewa­nĩkap wo kahato areĩne'en e. Toĩne'en wẽtup ok hary­poria eipy­'a­setpe — Uito Tupana ehay moherep hat e hat Iesapeu e hap het rakat e. — Pyno sig waku ahewaire hewaire e Tupa­naria mõtypot hamo i'ewyte waku Tupa­naria iã'ãkap mõtypot ienuk hamo e Tupana uhepe e hat Mana Iesapeu. Mi'i ete toi'a­tu­mu'e uhemiit pytkai yt kat ewei'e i tope. Yt eweipo­'oro hin i eipy­'a­setpyi. Yt naku i kahato ewetunug tawa TIATIRA uimohey haria e.
REV 2:21 Sa'a­wy'i are'e — Mana Iesapeu pe — Etoiat ro ewaire waire hap meremo hawyi era'aipok to uhowawi mana are'e. Karania wo ne'i mio tã are'e tope ma'ato — Yt yt an e ne'i uhepe e.
REV 2:22 Pyno koitywy Mana ewaire waire hap e'yni e'ahu hap eiam mo topy­hu'at e. Hary­poria yt we'eg i hat mio koitywy woro­'a­piheg epiat ho'opot hap mywo. I'ewyte ihainia'in etiat wema'at haria i'ewyte ati'a­tu­'a­piheg yne emo'ahu hap e'yni pe e. Torania emoewaire haria i'atu­'ahu emoewaire hap ta'a­tue­'yni pe uhepiat ta'a­tu­'a­piheg e'apiheg tuwywuat. Eiwo­'o­'e­wy­'ewy mot'i mana Iesapeu e. Ewetoiat eiminug sa'ag hawyi ewei'aipok to uhowawi hawyi waure wo areĩne'en ma'ato yt pote uimi­'a­piheg ko'i wo eweikup­te'en ehehatek hap sese topy­hu'at e. Iwato kahato ho'opot aru e.
REV 2:23 Yt ewe'eg i kahato i mana pote topap topap kahato aru hira­karia emẽpyt'in ko'i e. Woro­'a­piheg kahu hawyi uimohey haria te'e­ru­wa­nẽtup kahato aikope aikope te'e­ru­we­'a­tunug yi Asia totiaria te'e­ru­wa­nẽtup kahato aru e'apiheg hap emimu­'eria e — Tupana tikuap kahato aiminug wuat'i yt naku i rakat ko'i i'atu'e aru are e. Meiẽ toikuap sewaire waire nug i wuat'i wywuat hap i'atu'e aru e. Pywo ti rat Tupana tikuap aiwa­nẽtup hap i'ewyte aiminug ko'i sio waku sio yt hap ko'i i'atu'e aru. Are pãi aipoepyk aiminug ok tã ne sio waku sio yt i'atu'e aru uimohey haria yne 7 tawa ko'i piaria e.
REV 2:24 Ma'ato tukup­te'en eipy­'e­satpe hary­poria yt iwe'eg i rakat ehay upiat yt tuwat i rakaria uimohey haria. Mi'iria ihainia iwe'eg kahato rakaria — Yt naku i kahato ahewaire e. Mi'iria pe Woro­ho­'o­ky'e kahato e Tupana katu­pono yt eweiwat i mekewat Iesapeu wẽ pywiat po'og ahiag ehay sa'ag wuat'i kawiat rakat upi are'e e Tupana tawa TIATIRA piaria piat pe. Sa'a­wy'i Iesapeu to'e — To'iro woro­ho­'o­mu'e yt eimikuap i te ete e. Mi'i ahenoi teran ehepe ma'ato wẽtup sehay piat pe. To'iro ahewaire waire mig'i wo ahiag ehay pyi e. Ma'ato yt i'atu'e irania'in. Mi'iria pe yt woro­ho­'o­nãpin teran i katu­pono — Yt ewei'e ra'yn mana Iesapeu mienoi hap kape.
REV 2:25 Pyno mio tã are'e waku nug haria pe tawa TIATIRA piaria pe. Uimohey mot'i ro e. Karamuo ariot hap kape uhut ehowawiat hap kape eweikup­te'en no uimohey haria mot'i pote morekuat nuaria wuat'i pianuaria woro­ho­'onug e.
REV 2:26 Uwe uwe eipe uimohey mot'i rakaria i'ewyte uwe uwe i'akit ahiag miat toiã'ãg hap i'ewyte uwe uwe inug uhehay toku­'uro hap kape mi'i haria pe are aru — Waku kahato eipe are. Woro­ho­'onug eipe wuat'i ywania porekuat wo wuat'i e'at pe aru are e.
REV 2:27 Sa'a­wy'i sese mio tã to'e Ui'ywot uhepe — Uha'yru e aikotã aikotã kamũti nug hat ti'a­porok tominug yt hãpyk i hawyi mi'i hap ewy ti aru waku eti'a­tu­'a­piheg o yt naku i nug haria wẽtup ywania wẽtup ywania yt uimohey teran i haria e nimo Ui'ywot uhepe.
REV 2:28 Pyno koitywy kat Ui'ywot to'e uhepe mi'i hap ewy are ehepe. Pywo ti rat eipe ui'e­wywuat pote woro­ho­'onug eipe wuat'i ywania pore­kuaria wo ui'ewy eweikup­te'en aru wuat'i e'at piat are. I'ewyte meiũran ti aru ariot ehowawi aikotã aikotã mekewat waikiru wato at wẽtem hap enoi hap e'yianmete wuat ipohup at tuerut hap ewy ariot ehowawi i'ypyryp hap moma hamuat eimo­wepit hamuat ariot aru ehowawi are e.
REV 2:29 Waku ehewaure ka'a kahato kat som are'e uipot­mu­'eria 7 Tupana mõtypot yat ko'i piat we'a­tunug haria pe yi Asia totiaria pe are'e e. Uito Iuwãu pyno waku watikuap kahato torania aitoria wuat'i Tupana Pã'ãu mimo­herep ahepe mesuwat uimiwan me. Uito Iuwãu.
REV 3:1 Mi'i hawyi mekewat Miit waikiru ko'i 7 rakaria topo piat hat to'e i ra'yn uhepe — Iuwãu e etiwan no uhehay Tupana mohey haria tawa SARATU piaria kape e. Etiwan hawyi etipo­'oro i'atu­'a­pykok hat kape. Kotã ere'e o etiwan e — Uito ti Tupana Pã'ãu yne eiam e. Koitywy atimõ'ẽ ehowawi Tupana mõtypot yat piaria 7 tawa yi Asia totiaria pe e. I'ewyte toĩne'en uipo pe mekewat waikiru ko'i 7 rakaria. Atikuap kahato eiminug wakuat ko'i e. Wakuat kahato eipe i'atu'e miit'in mesu­wa­ro­tiaria. Wuat'i miit'in mimõ­typot ko'i eipe wen ma'ato uiwa­nẽtup hawe iku'uro rakat ewy eweikup­te'en katu­pono yt karãpe i uiwesat eipe e. Uiky'e hap eipy'a piat iku'uro ra'yn e.
REV 3:2 Ewe'eg wo o kat pote kurin uimohey hap eipy'a pe topy­hu'at e. Mi'i pote iku'uro rakat ewy uimohey ehepiat hap e. Waku eweiwyro o ehepiat uimohey hit hap. Ma'ato yt pote iku'uro aru eipy'a pe uimohey hap katu­pono atipuẽti eipotpap hap Tupana kapiat yt pywo pe i. Eiminug wakuat uimõ­typot hamuat yt uimo­wepit hin i uimohey ehepiat hap yt iwato i pote e. Pyno kurin kat uimohey hap ekawiat etimotag no e.
REV 3:3 Uimohey haria sa'a­wy'i uhehay sat kahato haria eipe e. Sa'a­wy'i ehewaure ka'a yn uhehay kape ma'ato mio yt e. Tawa SARATU piaria ewei'aipok to uimohey hap kape aikotã eweimoheg eheha pe'ok hap ewy eweimoheg uimohey hap ehepiat katu­pono ariot ehowawi aikotã sero'ok e hat ewy. Waku surara ewy eweikup­te'en ma'ato yt pote yt eweikuap hin i uhut hap e. Pyno eiwe­hymut ro katu­pono eiket kai put'ok­'are sere­'ok'e hat ewy e.
REV 3:4 Ma'ato wẽtup ok wẽtup ok toĩne'en eipy­'a­setpe uimohey te kahato hap wywo e. Mi'iria ete yt aremõti hin i — Uheropat haria eipe are'e hamuat yt ta'a­tu­hã'ãg hin i irania'in ewy sa'ag nug hap ete. Katu­pono ehewaku hap put'ok'e uhupiat ehewyry uiwywo hamo are'e ehepe ipat'ok etiat tawa SARATU piaria pe. Pywo pe ti ehepe ti aru atum eipainug hap ikytsig kahato rakat ehepe uhemiit sese eipe hap moherep hamo e.
REV 3:5 Pywo Uimohey haria torania pe are'e — Uwe uwe uimohey mot'i toku­'uro hap kape uwe uwe ti'akit yne ahiag miat toiã'ãg hap ko'i mi'iria ati'a­tu­painug kahato sokpe ikytsig nakano uhemiit sese eipe hap moherep hamo e. I'ewyte i'atuset yne atimo­herep wuat'i ehamo. I'atuset ko'i atimo­herep miwan me atipy pe e. Yt karãpe i ati'a­tu­set­mo­weityk mekewat miwan myi are'e. Tupana mimoieĩ­ne'en ko'i wuat'i e'at piat gupte'en hanuaria mi'iria e. Mi'iria uhemiit sese ko'i are'e atipy piaria pe. Mi'iria uheka­tu­wyria sese are'e Ui'ywot pe e.
REV 3:6 Pyno waku ehewaure ka'a kahato kat e som Tupana Pã'ãu to'e 7 Tupana mõtypot yat ko'i piaria pe katu­pono yne Tupana mohey haria kape wy ihay mesuwe.
REV 3:7 Mi'i hawyi po'og Iesui henoi uhepe — Iuwãu e mesup etiwan uimi­'a­tu­nãpin uimohey haria tawa WIRATEU piaria kape. Etiwan hawyi etipo­'oro ui'e hap i'atu­'a­pykok hat kape — Uiwy­ria'in Uito ti mekewat wakuat sese rakat Tupana ewywuat e. Hãpyk sese rakano areĩne'en pywuat yn uhehay e. Ta'i Uito morekuat Tawi Saipepiat Sese e. Mi'i pote Wuat'i Porekuat no areĩne'en e. Mi'i pote are'o­ken­hyp'ok kuap kahato i'ewyte atunug kuap kahato mu'ap ehewyry hamo e. Aho'o­ken­hyp'ok hawyi yt uwe i uhemiit'in pyhyp kuap mesu­wa­rote e. Wuat'i Ywania Porekuat no areĩne'en. Uito Tawi Saipepiat Sese Are. Katu­pono morekuat Tawi tum tepu­retig uhepe ipowat'yp sese uipo pe toĩne'en e. Mi'i pote uhehay wo aho'o­ken­hyp'ok kuap wuat'i pu'ap uipotpap nug hamuat i'ewyte atipyhyp kuap wuat'i pu'ap ewanĩ­kaptia wat e. Yt uwe i uipyhyp kuap e.
REV 3:8 Uimohey haria tawa WIRATEU piaria woro­ho­'okuap kahato eipe e. Ehesaika hap mesu­wa­rote yt iwato hin i hap atikuap wen ma'ato mi'i pytkai uiwa­nẽtup hawe ehesaika kahato uhesaika hamo katu­pono ewetunug yne uhepiat einãpin hap ko'i e. Waku kahato eipe katu­pono yt eiwe­mõti hin i uimohey hap moherep hamuat hap uhetiat enoi enoi irania'in miat hamo. Mi'i pote woro­ho­'o­po­'oro eipe wuat'i miit'in kape uhehay moherep hamo e. Yt uwe i uipyhyp kuap pãi e. Yt uwe i uhe'o­ken­hyp'ok kuap e. Mi'i pytkai Uito wuat'i uhewa­nĩ­kaptia e'oken­hyp'ok kuap hat areĩne'en e. Uiphyp kuap haria yt uwe i e. — Yt ehenoi tei'o ehay mesuwe i'atu'e pytkai ahenoi te itote uhehay e. Yt uhehay pyhyp kuap i. Mi'i pote uito atikuap kahato eipo­'oro uhehay moherep hamuat wuat'i ywania mu'e hamuat uimi­ky­'esat ewywuat hap katu­pono woro­ho­'okuap kahato wakuap nug haria eipe hap e. Koitywy woro­ho­'o­po­'oro wuat'i miit'in mu'e hamo yt hekat rakaria hin i eipe pytkai e.
REV 3:9 Ma'ato tukup­te'en ehetawa pe ahiag mõtypot sese haria — Uruto po'og eikai i'atu'e ehepe katu­pono uruto ti Aparãu emiariru sese ko'i ma'ato eiperia yt i'atu'e. I'atu­'eso mio tã i'atu'e pote. Yt Iuteu ywania hin i mi'iria e. Pyno ati'a­tu­mohit kahato mi'iria hawyi eimõ­typot hamo te'e­ru­we­pỹ­'ã­tutuk ehowawi — Aparãu emiariru sese eipe i'atu'e aru ehepe katu­pono Iesui miky'e sese ko'i eipe i'atu'e aru ehepe. Ati'a­tu­mohit kahato mi'iria ehamo hawyi te'e­ru­we­pỹ­'ã­tutuk ehowawi e.
REV 3:10 Waku kahato uhehay mohey mot'i haria eipe e. Ta'i yt eipo hep hin i uhehay moherep hap ete uhehay nug hap ete e. Meiũran aru torania iã'ãg koro hap e'at put'ok'e mesu­wa­ro­tiaria wuat'i miit'in iã'ãg hamo sio uhemiit sese sio yt hap kuap hap e'at sese ma'ato mi'i hap e'at e'yianme woro­ho­'ohep mesuwat yi pyi eiperia katu­pono woro­ho­'okuap ta'yn uhehay nug mot'i haria eipe hap atikuap ta'yn e. Mi'i pote mekewat e'at wuat'i iã'ãg hap yt put'ok'e i eiwat ehã'ãg hamuat e.
REV 3:11 Pywo ti rat ariot merep'e hap ewy e. Yt uwe i Uito hawyi meremo aremo­herep i. Ahut hap e'at pe woro­ho­'o­painug eipe more­kuaria wo mekewat e'at pe e. Pyno eweimohey ro ui'e hap eipy'a pe uhut hap kape e. Yt naku i wẽtup sehay upi ne'i eweiwat eima'at hap upi ne'i e. Ma'ato eima'at hap upi eweiwat pote yt atum kuap i eimiẽtup e. Yt woro­ho­'onug kuap i more­kuaria wo e. Mekewat wuat'i e'at piat more­kuaria wo hap eweipun hawyi.
REV 3:12 Mi'i pote are torania pe uwe uwe i'akit ahiagnia piat toiã'ãg hap yt naku i nug hamuat mi'i hat uimõ­typot sese hat topy­hu'at wuat'i e'at pe Tupana mõtypot yat atipy pe e. Aikotã Tupana mõtypot yat e'ãkukag iwato'in nakat nu heg kawiat ikahu rakat ewywuat eweikup­te'en atipy pe aru Tupana mõtypot yat apy'aha wo katu­pono ahiag miat eima'at hap pun haria yne eweipy­hu'at pote e. Mekewat e'at pe aru eipiit ete atiwan uhet pakup i'ewyte Ui'ywot etawa set atipehik ehete mekewat Nusaken Pakup i het rakat atiwan ehete. Mekewat tawa atipy kaipywiat yi kapiat sut hat set mekewat tawa wakuat Ui'ywot Tupana mipo­'oro set atiwan aru ehete katu­pono eheko sa'ag akit haria eweikup­te'en pote are'e uimohey haria tawa WIRATEU piaria pe e.
REV 3:13 Pyno waku ehewaure ka'a kahato kat e kat e Tupana pã'ãu to'e Tupana mõtypot yat piaria pe. Kat e toi'a­tu­nãpin tomohey haria itotiaria hap kape.
REV 3:14 Pyno mi'i hawyi po'og to'e uhepe — Iuwãu e etiwan no tawa IRAUTISEIA piaria kape e. Uhet Iesui. Ta'i yt uipo hep hin i pywuat sehay enoi hamuat ete e. Ta'i sa'a­wy'i mesuwat mytyp nug hap e'yianmete areĩne'en itote wuat'i Tupana Miky­'esat Nug Hano yi atipy at waty waikiru ko'i aha'a­wynug yne Uito e Iesui uhepe.
REV 3:15 Uimohey haria tawa IRAUTISEIA piaria woro­ho­'okuap kahato eipe e. Atikuap kahato aikotã eiwe­potpap uimi­ky­'esat nug hap ete e. Are pãi yt haty wo hin i eiwe­potpap uipotpap nug hap ete uimi­ky­'esat nug hap ete — Hepama waku hap ne'i ewei'e. Eipiit yt at hakup hin i uipotpap nug hap ete hap atikuap. I'ewyte — Aipiit yt ra'ak hin i Tupana potpap nug hap ete ewei'e hap atikuap. Ma'ato eiperup i pot'i eiwe­potpap are'e. Uiwa­nẽtup hawe po'og waku haty wo eiwe­potpap sio eipe­rup'i sese hap wywo ma'ato — Mũki­'ite ti rat waku watunug ei'e hap yt uimo­wepit hin i hap e.
REV 3:16 Pyno yt eipy'a pyi i hin i uiky'e e. Eiwe­potpap wen ma'ato — Arepotpap teran kahato Tupana potpap hap ete haty wo yt ewei'e hin i eipy'a pe. Mi'i pote woro­ho­'o­pugha aru e. Yt atiky­'esat i mi'i tã haria uipotpap nug haria hap e. Uito atiky­'esat eipy'a pyi eiwa­nẽtup hawe — Atunug neran kahato e haria ma'ato yt pote uimo­py­'ahak haria wo eweikup­te'en e.
REV 3:17 Mi'i hap ewy arewa­nẽtup ehowawi tawa IRAUTISEIA piaria. Ma'ato — Waku kahato rakaria uruto ewei'e irania'in me. Waku kahato uruto ewei'e eiwo­'ope. Waku pe kahato uruto ewei'e. Ahekat kahato rakaria aito ewei'e eiwo­'ope. Aimi­ky­'esat ok tã topy­hu'at ra'yn mesup aipo pe ewei'e eiwo­'ope. Ma'ato yt mi'i tã hin i eweikup­te'en uiwa­nẽtup hawe are'e e. Yt naku i pe eweikup­te'en uiky'e ran haria e. Pywo ti rat aikotã satek takaria ewy ti rat eweikup­te'en e. Aikotã sẽtup i sẽtup i e haria ewy eweikup­te'en e. Aikotã yt ihapytig i rakaria ewy eweikup­te'en e. Aikotã yt hesokpe i rakaria ewywuat eweikup­te'en e. Mi'i ewywuat eweikup­te'en mytkai — Waku pe watoĩ­ne'en ewei'e eiwo­'ope. Ma'ato yt i'atu­wepit hin i rakaria ewy eipe e.
REV 3:18 Tawa IRAUTISEIA piaria Uimohey haria koitywy woro­ho­'o­nãpin neran aikotã ehekat wuat'i e'at piat sat hap kuap hap ete e. Uimohey haria eweikyi'at ro uipo pyi ehekat sese yt ikahuro rakat i e. Toĩne'en uipo pe hekat kahato rakat wuat'i e'at piat e. Mi'i ti aria yt i'u kuap i hap ewy e Imehit kahato rakat mi'i mekewat nu Uru kawait ewywuat e. Mi'i eweikyi'at uikai hawyi hekat rakaria sese rakano eweikup­te'en are e. Eweikyi'at ro uipo pyi ehesokpe sese wuat'i e'at piat nuat e. Eipainug ikahu rakat sese mekewat ikytsig sese rakat eweikyi'at ro eipainug sese wuat'i e'at pe hap e. Ma'ato yt pote eiwe­mõti kahato aru yt kat i ehesokpe turanuat ewy pote eweikup­te'en wuat'i ehamo wuat'i e'at pe e. I'ewyte eweikyi'at mohag sese seha pohag eheha moeha­pytig hamuat wuat'i e'at piat nuat e.
REV 3:19 Pywo ti rat uimohey haria uimi­ky'e sese ko'i ati'a­tu­nãpin meremo ati'a­tu­'a­piheg meremo yt naku i ta'a­tunug hawyi uimẽ­pyt'in mote e. I'atu­minug sa'ag ko'i atimo­herep kahato i'atuepe. Eiwe­morem no eiminug sa'ag ko'i kaipyi hawyi ewei'aipok to uhowawi yne ehesaika hap wywo hawyi ewetunug no uimi­ky­'esat ewywuat are'e yn e.
REV 3:20 Uimohey haria pywo ti rat areĩne'en eho'o­ken­'ypy ete hawyi mi'i kaipyi woro­ho­'o­kaykay — Mehĩ'in mana'in are areke teran ei'yat pe are'e at ka'ap Ui'ywot Tupana mõtypot yat piaria pe e. Uwe uwe kaykay­'ui'e hap ikuap hawyi uiwesat — Waku Mehĩ waku Mimi — Ereke ro e. Mi'i hat pe areke sese hawyi arenuk iwywo i'ewyte tenuk uiwywo itote — Ereke ro Mehĩ Mimi e haria py'a pe areĩne'en e Iesui ahepe.
REV 3:21 Sa'a­wy'i ati'akit kahato ne'i ahiag hawyi areĩne'en wuat'i Porekuat no Ui'ywot yatype e. I'ewyte uwe uwe i'akit ahiag ui'ewy i'ewyte uwe uwe uimohey toku­'uro hap kape mi'i hat pe aru are'e — Waku era'apyk to uiwywo mesuwe ui'ya­type are'e aru mekewat uiky'e hat pe e.
REV 3:22 Pyno mio tã are uimohey haria we'a­tunug haria pe mekewat 7 Tupana mõtypot yat piaria pe yi Asia totiaria pe. I'ewyte torania uimohey haria pe are'e waku ehewaure ka'a kahato mesuwat ui'e hap kape e. Waku eiwe­wa­nẽtup kahato mesuwat Tupana Pã'ãu mienoi kape kat are'e sese Tupana mõtypot yat piaria pe e Iesui ahepe. Uito Iuwãu i'e hap ewy atiwan yne ehewowi.
REV 4:1 Sa'a­wy'i uito Iuwãu Iesui potmu'e 12 ok takat ara'a­kasa oken'ypy ewy atipy pe. Mi'i puo heremo yne atipy kape. Mi'i hawyi atipy kaipyi sehay atikuap sehay wen ma'ato huhu'e hap ewy — Iuwãu e eriot ro mesuwe atipy kape e. Atimo­herep teran epe aikotã aru topy­hu'at hamuat sese hap e. Yne aru topy­hu'at ui'e hap ewy e uhepe sa'a­wy'i.
REV 4:2 Mi'i hawyi meremo Tupana Pã'ãu uimoe­ha­py­hot'ok aikotã wẽtup ok miit ewy areĩne'en Tupana Pã'ãu wywo. Mi'i hawyi uhereto atipy kape. Mi'i tote ara'a­kasa yne uimu­'etu ewy ikahu kahato.
REV 4:3 Sa'a­wy'i ara'a­kasa Aipo­typot Koro Iesui apyk pe wuat'i ka'iwat no. Ikahu kahato topy­hu'at itote. Aikotã nu ikahu hekat rakat imehit hap ewy aikotã hẽtyhot meri­hup­'ok'e mekewat nu Iasipi hẽtyhot hap ewy aikotã nu Satuniu ewy Ai'akag Koro Iesui kahu hap. I'ewyte Morekuat apyk hap apypueri wo toĩne'en ipainũg hap we'yp ikahu kahato rakat ewy. Aika­'iwat e'amyap heryp'i ikahu rakat nu Emerauta mehit hap ewy.
REV 4:4 I'ewyte itote ara'a­kasa 24 miit apyk pe Morekuat e'amyap apypueri wo sa'a­wy­'i­wuaria po'og Tupana mohey haria. I'atue­sokpe ikytsig kahato rakat. I'atu­'akag note i'atu­'a­mãtap hekat rakat nu Uru kawiat morekuat painug hap ko'i.
REV 4:5 Mi'i hawyi araha'at i Aipo­typot Tupana e'amyap wato kape. Mi'i heiam myi tuwẽtem merep merep'e hap ko'i i'atu kahato. Huruhu­ru'e kahato itote sehay ewywuat wen huhu'e ihay pirik takat ewywuat tuwẽtem itote pyi. Ikahu kahato itote are'e uiwepe. Mi'i hawyi araha'at hawyi ara'a­kasa ariãty itote wen ma'ato Tupana Pã'ãu kawiat. Ikahu kahato itote katu­pono 7 ariãty ewywuat tuwẽtem itote pyi 7 ariãty eiam itote pote hap kape ara'a­kasa itote atipy pe.
REV 4:6 Mi'i hawyi araha'at i hawyi ara'a­kasa hyemyi'a iwato'in nakat ewy. Itote Aipo­typot wat amyap toĩne'en hyemyi'a py'a­setpe. Mekewat hyemyi'a wato ewa ete heremo yne aipã'ãu. Mekewat hyemyi'a y'y yt ipitpit hin i heremo kahato ipuo aikotã mekewat Nu hekat rakat Tiamante ewy. Mi'i hawyi ara'a­kasa 4 ok atipy piaria itote. Mi'iria pe ete iha ko'i yne i'atupiit ete. Mi'i hap kape ara'a­kasa.
REV 4:7 Wẽtup ok atipy piat Awyato eowa ewywuat. Wẽtup ok atipy piat Wewato ahup mẽpyt eowa ewywuat. Wẽtup ok atipy piat miit eowa ewywuat. Wẽtup ok atipy piat hywi wato eowa ewywuat toĩne'en.
REV 4:8 Yne 4 ok atipy piaria tukup­te'en topopy kuap takaria 6 ipepo wẽtup atipy piat ete. I'ewyte yne i'atu­pepo ete iha ko'i torania puo. Ipepo ywyt'ok­pypuo i'ewyte iha ko'i tukup­te'en. Mi'iria yt te'e­roket hin i ma'ato te'e­ru­wepy at ka'ap Tupana kape — Wakuat sese En Tupana i'atu'e. Wakuat sese En Tupana i'atu'e. Wakuat sese En Tupana i'atu'e. En yn UrueTupana i'atu'e. En yn Urupo­typot Sese i'atu'e. En yn po'og po'og hesaika torania kawiat rakat i'atu'e. Wuat'i eminug hap e'yianmete ereĩne'en En i'atu'e. I'ewyte mesup te wuat'i e'at pe ereĩne'en i'atu'e. I'ewyte ikahuro hap ekuekai te ereĩne'en te'e­ru­wepy at ka'ap meimuẽwat 4 ok takaria atipy piaria.
REV 4:9 — Uruimõ­typot mõtypot kahato En Tupana i'atu'e. Hãpyk kahato En i'atu'e. Ewato kahato En i'atu'e. Urutu­wehum wehum kahato ewawi Tupana i'atu'e. Wuat'i e'at ieĩne'en hat i'atu'e. Ereĩne'en no Wuat'i Porekuat no i'atu'e te'e­ru­wepy puo meimuẽwat 4 ok atipy piaria.
REV 4:10 Mi'iria te'e­ru­wepy turan meimuẽwat 24 miit sa'a­wy­'i­wuaria po'og Tupana mohey haria te'e­ru­we­pỹ­'ã­tutuk i'atuewa yi kape Morekuat Wato oro ewa kape imõtypot hamo. Mi'i hawyi i'atue­'a­mãtap wakuat ko'i ta'a­tuhep i'atu­'akag totepyi hawyi ta'a­tu­pugha Aipo­typot py ywyt'ok­pype hawyi — Urupo­rekuat En i'atu'e. Ereĩne'en no wuat'i e'at pe wuat'i Porekuat no uruto'e i'atu'e.
REV 4:11 En yn ni Uruka­'iwat Urupo­typot i'atu'e. Ewaku hap put'ok'e sakpo'e wuat'i piat emõtypot hamo i'atu'e. Mi'i pote uruimõ­typot mõtypot En i'atu'e. Wuat'i Mimõ­typot En i'atu'e. Wuat'i Mimõ­wato En i'atu'e. Po'og po'og wuat'i kai En i'atu'e. I'ewyte esaika hap po'og po'og torania kai i'atu'e. Waku uruimõ­typot En katu­pono Urunug Hat En Wuat'i Nug hat En mote i'atu'e. Emowepit hap sese eminug ko'i katu­pono i'atu­kahu hap timo­herep Ekahu hap i'atu'e. Urutu­wehum kahato emiium ete emiky­'esat ewy pote i'atu'e. Emõtypot hap ko'i yne mi'i eminug ko'i i'atu'e 24 ok takaria sa'a­wy­'i­wuaria po'og imohey haria. I'atu'e hap ewy atiwan yne mesuwe uimiwan me. Uito Iuwãu.
REV 5:1 Mi'i hawyi uito Iuwãu araha'at i atipype hawyi ara'a­kasa Aipo­typot apyk hap ikahu rakat tote. Mi'i kape araha'at hawyi ara'a­kasa miwan Aipo­typot po sese kai to'okmõi me. I'yhop ipe pewiu rakat ete miwan kokai kokai toĩne'en typy kawiat miwan. Howapy kahato ipyt'at kahato mekewat miwan ipe ete. Mekewat iwan yt uwe i imowẽpap kuap katu­pono iheg me to'okmõi me toĩne'en. Tomo­sat'e hap 7 wo ipyhyp hap i'ywop hap ok tã 7 imosat'e hap ete ytyghe ewywuat toĩne'en.
REV 5:2 Mi'i hawyi ara'a­kasa wẽtup ok atipy piat ieĩne'en hat surara akag hesaika rakat hẽtup tehay pirik wo — Uwe uwe ewaku hap put'ok'e Aipo­typot mi'ok­po'i miwan porap mowẽpap e hamo e tehay pirik wo ahowawi.
REV 5:3 Mi'i hawyi toikat kahato ma'ato yt wẽtup ok i toipuẽti katu­pono i'atue­waku hap yt put'ok'e hin i i'okpo'i porop mowẽpap e hamo. Yt uwe i toipuẽti atipy pe i'ewyte yt uwe i yi tote toipuẽti. I'atue­waku hap yt put'ok'e hin i imowẽpap hamo i'ewyte teha'at mekewat miwan kape hamo.
REV 5:4 Yt uwe i toipuẽti i'okpo'i porop hamuat hawyi uito Iuwãu arawak haty wo katu­pono waku waku sese rakat yt wẽtup i aito toipuẽti pote arawak itote.
REV 5:5 Ma'ato wẽtup ok 24 rakaria po'og Tupana mohey sa'a­wy­'iwuat haria to'e uhepe — Yt erewak tei'o mehĩ e uhepe — Eraha'at ro toĩne'en aipy­'a­setpe wẽtup ok waku kahato rakat hewaku hap put'ok'e mekewat miwan moherep hamo e. Meiẽ mekewat Morekuat Tawi E'yianmiat Wuat'i Porekuat nuat yt karãpe i'aparap i pote hewaku hap put'ok'e Tupana miwan imoherep hamo e. Eraha'at ro hesaika kahato Awyato Tig ewy hesaika hap ewy e. Ei'y­wania Akag Mi'i Eha'a­se'i Pot Iuta Saipepiat Mi'i e. Mi'i ewaku hap put'ok'e mekewat miwan sat hamo mekewat puratig ewywuat moherep hamo e. Katu­pono mi'i yn Gu'uro Sese Hap Moma Hat e. Mi'i yn ahiag yt toma'at kuap i hat e uhepe mekewat sa'a­wy­'i­tewuat po'og imohey hat.
REV 5:6 Mi'i hawyi araha'at hawyi ara'a­kasa wuat'i py'a­setpe wẽtup ok Miit Aihũ Mẽpyt Hit Kuteiru Ewywuat. Aipo­typot koro eiam note y'am me toĩne'en meimuẽwat 24 ok takaria sa'a­wy­'i­wuaria po'og imohey haria py'a­setpe. I'ewyte meke­waria 4 ok takaria atipy piaria te'e­ru­wepy puo Tupana mõtypot haria py'a­setpe. Mi'i hawyi uito Iuwãu araha'at kahato mekewat Hũ Hit kape. — Gu'uro Kaipywiat Wẽtem Hat Mi'i Miit are'e. Mi'i hawyi ara'a­kasa ipiit suk hap ko'i kape. — Pywo ti rat Miit'in Mi'auka Sa'a­wy­'iwuat Mi'i Miit are'e araha'at isuk hap ko'i kapiat hawyi. Aikotã wati­'auka aihũ hit aiminug sa'ag Tupana piat hep hamo aika­wiano ai'a­piheg hap moma hamo hap ewy are'e uiwa­nẽtup hawe. Tupana Mipo­'oro Aihũ hit wuat'i py'a­setpe hap kape araha'at. Ta'i 7 i'aut rakat i'akag note hap kape ara'a­kasa. I'ewyte 7 iha rakat ara'a­kasa 7 iha pyi Tupana Pã'ãu hẽtyhot hap 7 iha Tupana eha piat ewywuat. Teha wo toi'a­tuepiok kuap kahato mesup­wa­rotiat yne miit'in sio waku sio yt hap kuap hamo. Yne heremo tope ewywuat.
REV 5:7 Mi'i hawyi mekewat Hũ Hit tat mekewat miwan topo sese kai to'okmõi miat miwan Wuat'i Porekuat po sese kai. Mi'i pote mekewat Hũ Kuteiru ta'a­tu­mõ­typot meimuẽwat 4 ok takaria atipy piaria po'og rakaria.
REV 5:8 Mekewat miwan totat topo pe hawyi Tupana Hũ Hit Kuteiru itotiaria timõ­typot kahato mekewat Hũ Kuteiru. Meimuẽwat 4 ok takaria wuat'i e'at piat ieĩne'en haria. I'ewyte meimuẽwat 24 ok takaria po'og nakaria te'e­ru­we­pỹ­'ã­tutuk yi kape imõtypot hamo. Mi'i hawyi te'e­ru­wepy kahato ta'a­tupo piat wepy nug hap wywo. Haity ko'i imehit kahato rakaria wywo ikahu rakaria wywo te'e­ru­wepy ta'a­tupo piat kawakĩu wywo Tupana Hũ Kuteiru Hit mõtypot hamo. Mi'i hawyi ta'a­tuwuk ikamhig se rakat tyghe mohag hy puat Mekewat Kuteiru mõtypot hamo. Ta'a­tuwuk ikamhig se rakat aria eiam imehit rakat Uru kawiat puo. Mi'i ikamhig se kahato hap ewywuat Tupana wanẽtup hap ewy. Katu­pono Ihũ Hit mõtypot hap ahehay howawiat hap ewy.
REV 5:9 Mi'i hawyi ara'a­kasa typy'i kahato miit'in Ihũ Hit mõtypot haria itote. Mi'i hawyi te'e­ru­wepy kahato irania'in nywo. Ma'ato i'atu­wepy hap ipakup takat — Waku kahato En Tupana Hũ i'atu'e. — Waku kahato En i'atu'e. Ewaku hap put'ok'e mekewat miwan okpo'i porop hamo. Waku eti'ok­po'i porop hawyi etimo­herep uruepe Mimi Uhyt i'atu'e. Ewaku hap yn put'ok'e Tupana mimo­sat'e hap hep hamo i'atu'e. Ewaku hap yn iwato hap ok tã i'okman miat miwan moherep hamo e'auka uruka­wiano pote i'atu'e Sa'a­wy'i esuu topy­hu'at Tupana piat urukyi'at towanuat hawe i'atu'e. Katu­pono wuat'i mesu­wa­rotiat ywania kaipyi uruho­'oekyi Tupana emiit no wuat'i miit'in wẽtup pusu wẽtup pusu kuap haria i'ewyte wuat'i miit'in yt to'o­'e­wywuat rakaria kaipyi i'ewyte wuat'i miit'in wẽtup seko wẽtup seko mohey haria yt to'o­'ewy ewywuat i rakaria kaipyi i'ewyte wuat'i yt to'o­'e­wywuat i i'atupiit ete i'atueko rakaria kaipyi uruho­'o­kyi'at esuu wo i'atu'e. I'ewyte wuat'i setama kaipyi uruho­'o­kyi'at wuat'i ipe hun ipe kytsig ipe hup rakaria kaipyi uruho­'oekyi Tupana emiit no Esuu wo i'atu'e te'e­ru­wepy puo wuat'i ywania Tupana Mipo­'oro Aihũ Kuteiru ewywuat aikawiat iku'uro rakat kape.
REV 5:10 — Waku kahato En Iesui i'atu'e. Katu­pono urunug miit'in moherep Tupana kapiat hamuat i'atu'e. Koitywy urunug pa'i ko'i wo. Koitywo wato­py­hu'at emi'ai­roria miit'in pore­kuaria wo emiky­'esat nug hamo i'atu'e. Waku kahato En Tupana Hũ Kuteiru Waku sakpo'e kahato i'atu'e te'e­ru­wepy puo wuat'i ywania itotiaria.
REV 5:11 Mi'i hawyi atikuap wẽtup wepy hap Tupana Hũ Kuteiru kape. Atipy piaria i'atu kahato te'e­ru­wepy hap atikuap itote. Atipy piaria sem te'e­ru­we­'a­tunug kahato wuat'i Morekuat Akag apyk hap kape ara'a­kasa. I'ewyte meimuẽwat 24 ok takaria po'og imohey sese haria wywo te'e­ru­we­'a­tunug torania atipy piaria wywo Tupana Hũ Kuteiru mõtypot hamo. Typy'i kahato mi'iria ewywuat hap kape ara'a­kasa. I'atu kahato 10000 wo 10000 rakat watopag itote itote hap ewy typy'i hap ewy ara'a­kasa atipy piaria sem yt mimo­rania yne kuap takat i hap ewy ara'a­kasa itote.
REV 5:12 Mi'i hawyi yne atipy piaria te'e­ru­wepy Tupana hũ Kuteiru kape haty wo — Waku kahato En Waku kahato En Miit'in Mi'auka i'atu'e te'ru­wepy puo atipy piaria — Ewaku hap put'ok'e miit'in airo hamo sio waku yt e hamo i'atu'e te'e­ru­wepy puo. Ewaku hap put'ok'e Wuat'i Miit'in Porekuat Nuat pote i'atu'e. Waku wuat'i ekat topy­hu'at epo pe. Ta'i ewaku hap put'ok'e kahato katu­pono wuat'i we'eg hap kuap hat En i'ewyte wuat'i hesaika hap ekai toĩne'en i'atu'e. Pyno hãpyk kahato En mote waku Wuat'i Mimo­wato wo ereĩne'en i'atu'e. Waku yne ehay emõtypot hap topy­hu'at te'e­ru­wepy haty wo atipy piaria sem mekewat Tupana Mipo­'oro Aihũ Kuteiru Miit'in Mi'auka Iesui kape. Uito Iuwãu ara'a­kasa yne uimu­'etu.
REV 5:13 Mi'i hawyi uito Iuwãu wẽtup i wepy hap atikuap Tupana Hũ Kuteiru mõtypot kahato hap wepy hap. Wuat'i atipy piaria i'ewyte wuat'i yi totiaria wepy hap atikuap wuat'i yi ywyt'ok piaria i'ewyte y'y wato piaria wepy hap atikuap. Mio tã i'atu'e — Uruimõ­typot kahato En i'atu'e. Era'apyk to wuat'i Morekuat eiam note Urupo­rekuat koro wo Mehĩ Mimi i'atu'e. Ereĩne'en no Wuat'i Akag Wato wo i'atu'e. Ereĩne'en no Wuat'i Kawaiat Po'og Nakano i'atu'e. Yt uwe i po'og hesaika ekai Mimi Mehĩ i'atu'e. Ta'i ewaku hap uruikuap kahato i'atu'e. Waku kahato En wato'e wuat'i e'at pe katu­pono wuat'i e'at pe ga'atpo mũki­'ite mesup wuat'i e'at pe ewaku hap put'ok'e Urumi­mõ­typot no eminug ko'i.
REV 5:14 Mi'i hawyi mekewat 4 ok takaria — Pywo ti rat pywo ti rat i'atu'e. I'ewyte mekewat 24 ok takaria po'og Tupana mohey sa'a­wy­'iwuat haria te'e­ru­we­pỹ­'ã­tutuk i'atuowa yi kape ta'a­tu­mõ­typot Tupana Hũ Kuteiru haype — Wuat'i e'at piat ieĩne'en hat uruhe­waku kahato En i'atu'e. Mi'i tã uito Iuwãu ara'a­kasa uimu­'etu.
REV 6:1 Mi'i hawyi uito Iuwãu araha'at hawyi ara'a­kasa Tupana Hũ Kuteiru. Mi'i hawyi toipak wẽtup sa'a­wy­'iwuat miwan Tupana mosat'e hap. Mekewat 7 rakat imosat'e hap wẽtup toipak hawyi atikuap sehay wẽtup ok 4 ok takaria wẽ pyi — Iuwãu e eriot ro atipy kape e katu­pono atiky­'esat eraha'at yi kape aikotã aru topy­hu'at miit'in hap kape e.
REV 6:2 Araha'at hawyi ara'a­kasa ra'yn wẽtup ok aihũ kawaru ikytsig kahato rakat ok pe tote surara akag ewywuat ara'a­kasa. Mi'i hawyi mekewat miit toto wuat'i ywania moperup'i hamo wuat'i akit hamo toto. Ipo pe mory­'awat mory'a ko'i. Mi'i hawyi miit'in te'e­ro'e — Waku En urupo­rekuat no i'atu'e. Mi'i hawyi ta'a­tu­painug mekewat surara akag morekuat no — En uru'akag wo i'atu'e. Mi'i hap kape ara'a­kasa.
REV 6:3 Mi'i hawyi araha'at i ra'yn Tupana Hũ Kuteiru Iesui kape. Mi'i hawyi wẽtup i ra'yn toihiot miwan mosat'e hap toipak hawyi mekewat 4 ok takaria wẽtup ok ihay uhowawi — Iuwãu e eraha'at ro yi kape eraha'at ro aikotã aru miit'in te'e­ro­py­hu'at aru itote hap kape e.
REV 6:4 Mi'i hawyi ara'a­kasa wẽtup ok surara akag aihũ kawaru hup kahato rakat okpe tote. Mi'i hawyi hesaika kahato morekuat no topy­hu'at. Ta'a­tunug mi'i ta'a­tu­'akag akag wo. Mi'i hawyi toi'a­tu­mu'e kahato tesu­ra­ra'in me miit'in moma kuap kahato hap. Mi'i hawyi toto te miit'in wywuat wu'uka hamo mesuwat yi totiaria yne wywo hamo. Mi'i hawyi totat ra'yn surara wato kyse'yp ewywuat wuat'i moperup hamo. Mi'i hawyi yt kat i topy­hu'at wo'o­wese hap mesuwat yi tote ma'ato wo'o­'auka haria yn tukup­te'en itote. Mi'i hap kape ara'a­kasa.
REV 6:5 Mi'i hawyi Tupana Hũ Kuteiru Iesui tipak ta'yn wẽtup miwan etiat mosat'e hap mye'ym hap ta'yn toipak. Mi'i tutunug hawyi atikuap sehay wẽtup ok 4 takaria wẽ pyi. Iuwãu e eraha'at ro yi kape aikotã aru topy­hu'at miit'in hap kape e. Araha'at hawyi ara'a­kasa ra'yn wẽtup ok aihũ kawaru hun kahato okpe tote rakat surara akag kape ara'a­kasa. Mekewat miit po piat kape ara'a­kasa karania ipotyi hap kuap hap.
REV 6:6 Atikuap sehay 4 ok takaria py'a­setpyi — Mi'i ha'up iwato kahato — Miu ha'up ha'up woity'i hap topy­hu'at yi totiaria mikyi'at nuat e ikap rakat i'ewyte hesapo hy rakat i'ewyte u'i. — Ta'i wẽtup e'at miit'in ta'a­tu­potpap at wẽtup ekui'a u'i kyi'at hamo. Mi'u ha'up woity'i e. Ta'i awati mye'ym ekui'a kyi'at hamo i'atu­potpap at e. Waku satek hap wywo etu'u kurin kurin mi'u e yi totiaria pe.
REV 6:7 Mi'i hawyi Tupana Hũ Kuteiru Hit tipik wẽtup i ra'yn miwan mosat'e hap 4 ra'yn toipik hawyi atikuap sehay wẽtup ok 4 ok takaria wẽ pyi ihay ra'yn uhowawi 4 ok ta'yn meimuẽwat morekuat apyk hap kaipyi hay rakaria. — Iuwãu e eriot ro meikowo e. Eraha'at ro aikotã aru miit'in te'e­ro­py­hu'at yi tote hap kape e uhepe.
REV 6:8 Araha'at hawyi ara'a­kasa wẽtup ok surara akag kape tohũ Kawaru okpe tote. Ihũ ete ika'ay rakat hepihi pihi rakat yt ikahu hin i rakat. Mekewat miit set Gu'uro i'atu'e. Tohũ sa'ag okpe tote hewyry aikope aikope tomi­ky­'esat kape. I'ewyte toĩne'en hewat­'ymo yne mu'ap upi iku'uro rakaria sem. Mi'i hawyi Gu'uro miit'in py'a­setpe ikosap hap upi miit'in topap kahato ikuasa hap upi. Mi'i hawyi atikuap sehay Gu'uro pe — Eho'o­'auka ro yi totiaria e. Aikope aikope toĩne'en 4 miit ekai pote eti'auka wẽtup miit e. Toĩne'en 40 miit ekai pote eti'auka 10 miit e. Mi'i hawyi toto miit'in wu'uka hamo. Ipat'ok topap surara akag Gu'uro e hap het rakat ekyse'yp mo. Ipat'ok sy'at pe topap ipat'ok ahu pono topap ipat'ok mi'at ko'i ipy'ahak takaria ti'a­tu­'uka. Topap topap yi totiaria sok kape ara'a­kasa.
REV 6:9 Mi'i hawyi Tupana Hũ Kuteiru kape ara'a­kasa. Mi'i hawyi toipak miwan pyhyp 5 hap ta'yn miwan pyhyp hap toipak hawyi araha'at yparakai wato kape mekewat miium Tupana kapiat kape. mi'i hawyi yparakai ywyt'o'­pype miit'in sem Tupana ehay moherep potiat miit'in mi'auka sem kape ara'a­kasa. — Eiwe­mohey Tupana pote urui'auka eipe i'atu'e e Tupana wanĩ­kaptia. Ma'ato mi'i pytkai — Uruimohey te pãi an i'atu'e imohey haria ta'a­tu­'a­tu­'uka teran haria pe. Mi'i hawyi miit'in mi'auka wo tukup­te'en mi'iria.
REV 6:10 Mi'iria tukup­te'en yparakai wato ywyt'ok­pype wuat'i miium Tupana kapiat py'a­setpe tukup­te'en. Itote — Urupo­typot Urupo­typot i'atu'e ta'a­tuehay pirik wo. Wakuat sese En i'atu'e. Hãpyk sese rakat En i'atu'e. Karãpe aru karãpe aru urueru­wepyk urusuu okpun haria ete uru'auka haria ete mytyp totiaria ete i'atu'e Tupana pe.
REV 6:11 Mi'i hawyi tutum i'atue­sokpe ikytsig nakat miit'in mi'auka tomohey potiat haria hap moherep hamo hawyi — Apu'ete e hawyi woro­ho­'o­ka­wiano irane e. Eiwe­mohey ro mesu­wete e. Pywo ti rat woho­'o­poepyk irane ma'ato eipe yt eirania i te miit'in mi'auka ko'i e. Tukup­te'en ei'e­wy­wuaria miit'in mi'auka wuat irane. Ta'a­tu­'auka yne aru eipe torania yne mesuwe hawyi woro­ho­'o­ka­wiano eipe e. Ati'a­tu­'a­piheg kahato aru eisuu okpun haria ei'auka haria e wuat'i miium yparakai koro ywyt'okpy piaria pe. Mi'i hap kape ara'a­kasa yne.
REV 6:12 Mi'i hawyi araha'at i ra'yn Tupana Hũ Kuteiru kape. Mi'i hawyi toipak ta'yn wẽtup miwan moheg hap 6 hap ta'yn hawyi yi tyry'e tyry'e kahato. Mi'i hawyi at yt hẽtyhot hin i. I'ewyte at hun kahato aikotã sokpe hun puo hẽtyhot hap ewy. I'ewyte waty ihup aikotã suu ewy to'o­puẽti pytkai ihup. Mi'i hap kape ara'a­kasa.
REV 6:13 Mi'i hawyi waikiru ko'i hewo hewo atipy kaipyi yi kape. Hewo aikotã ywa hewo kahato ywytu uato turanuat hap ewy hewo hewo waikiru sem yi kape.
REV 6:14 Mi'i hawyi waikiru ko'i yt te'e­ru­wekuap i ra'yn aikotã wati­'ok­po'i ahe'yni hap ewy at wẽtem hap kaipyi at min'e hap kape tuwe­'ok­mueri hawyi yity'ok ko'i tuwat wẽtup teiam kape. I'ewyte y'y wato piat tuwat wẽtup ta'atueiam y'y wato piat kape hap ara'a­kasa.
REV 6:15 Mi'i hawyi yi totiaria te'e­ro­ken'ẽ kahato te'e­ra­ha'at hamo. Miit'in porekuat ko'i te'e­ro­ken'ẽ kahato. I'ewyte hekat rakaria te'e­ro­ken'ẽ kahato. Miit iwato'in nakaria te'e­ro­ken'ẽ i'ewyte Tupana pupi. I'ewyte sura­ra'in akag ko'i te'e­ro­ken'ẽ kahato. Miit'in ipiit hesaika rakaria te'e­ro­ken'ẽ. I'ewyte miit eropat haria i'ewyte te'e­ro­ken'ẽ kahato Tupana owa kapiat te'e­ra­ha'at hamo. Ga'apy pe mi'at ka'a pe te'e­ru­wemig gen'ẽ pono yity'ok ka'a pe Tupana Hũ Kuteiru pupi te'e­ro­ken'ẽ kahato.
REV 6:16 Mi'i haype kak'i­'a­tu'e kak'i­'a­tu'e — Urusyp to urusyp to i'atu'e yihot kaipyi yity'ok kape. Ehewo ro ehewo ro urusyp hamo i'atu'e. Katu­pono uruto­ken'ẽ kahato Tupana owa kape uruta­'a­kasa hamo i'atu'e. Yt uruiky­'esat i teha'at uruewawi i'atu'e. Uruto­ken'ẽ kahato Tupana Hũ Kuteiru pupi i'atu'e. Katu­pono mesup haiwot ra'yn ahete i'atu'e te'e­ru­wẽ­powat yihot kaipyi torania.
REV 6:17 — Are pãi are an put'ok'e ra'yn ai'a­piheg hap e'at kak'i­'a­tu'e kak'i­'a­tu'e popuo. Mesup haiwot ra'yn ahete i'atu'e. Ipoity'i kahato ahete i'atu'e. Yt uruhupit kuap i uru'a­piheg hap kak'i­'a­tu'e kak'i­'a­tu'e popua e hap kape ara'a­kasa yne uito. Gyt'i­'a­tu'e popuo kyry'et­ky­ry'et­'i­ta­tu'e. Mi'i kape ara'a­kasa yne uito Iesui Kaitywy Iuwãu.
REV 7:1 Mi'i hawyi uito Iuwãu araha'at yi kape. Mi'i turan ara'a­kasa 4 ok atipy piaria Tupana mipo­'oro ko'i yi aipytyp tote wasere hewyry yi totiat pyhyp hamo. Wẽtup Tupana mipo­'oro toĩne'en y'am me aikope at tuwẽtem hap tote. Mi'i hawyi toipyhyp sese wasere at wẽtem hap kaipywiat. Wẽtup Tupana mipo­'oro toĩne'en y'am me at min'e hap tote mekewat at min'e hap kaipywiat wasere pyhyp hamo. Ma'ato wẽtup ok atipy kaipywiat Tupana mipo­'oro toĩne'en y'am me at posak pe wasere pyhyp hamo. Irokirẽ wẽtup ok Tupana mipo­'oro koka­wiano toĩne'en at posak pe y'am me koka­wiano wasere pyhyp hamo. Mi'i tã me ta'a­tu­pyhyp yne wasere aipytyp tote. Mi'i hawyi yt kat i wasere hewyry aipytyp tote hawyi ihyemyi'a wato ko'i ihy nik kahato ra'yn. Mi'i hawyi ga'apy ete yt wasere hin i. Mi'i hawyi ga'apy ko'i yt i'ywa yt hẽ'ẽ hin ĩ ra'yn yt kat i wasere pote. Mi'i kape araha'at yne atipy kaipyi yi kape.
REV 7:2 Mi'i hawyi uito Iuwãu araha'at at tuwẽtem hap kape. Mi'i turan ara'a­kasa wẽtup ok Tupana mipo­'oro atipy kaipywiat Tupana eropat hat sese. Mi'i ti topopy puo ta'am at wẽtem hap kaipyi. Mi'i hawyi toikat Tupana eropat haria sese yi totiaria. Tupana eropat hat sese toipuẽti yi tote hawyi toiwan mi'i miit owatu'a mi'i ete Tupana pusu puo — Uheropat hat sese mi'i e hamo howa­tu'a ete uwe Tupana emiit sese moherep hamo.
REV 7:3 Topopy at wẽtem hap kaipyi turan tuwẽ­powat tehay pirik wo wasere pyhyp haria atipy kaipy­wiaria kape — Wasere pyhyp haria yt eweipyhyp ti tei'o wasere yi totiat y'y wato totiat. Yt ewei'a­piheg tei'o yi y'y e. Aput'i te e atimo­wekuap teran uwe Tupana eropat sese haria e. I'atue­wa­tu'a atipehik iwan i'atue­wa­tu'a tote e tehay pirik wo wasere pyhyp haria pe.
REV 7:4 Mi'i hawyi toi'a­tu­mo­rania Tupana emiit sese hap mekewat miwan wywuat toiwan iatue­wa­tu'a sokpe ete. Mi'i hawyi atikuap karania. 144000 miit Tupana wanuat i'atu'e hap atikuap. Torania mi'iria Iuteu ywania meimuẽwat yne ase'i pot Isareu emiariru ko'i. 144000 miit Iuteu ywania kawiat i'atu'e hap atikuap.
REV 7:5 Pyno 12000 miit ase'i IUTA ywania kaipyi Tupana eropat haria sese. Mi'i hawyi 12000 miit ase'i HUPIN ywania kaipywiat. 12000 miit ase'i KATI kaipywiat.
REV 7:6 Mi'i hawyi 12000 miit ase'i ASA kaipywiat. Mi'i hawyi 12000 miit ase'i NATARI kaipywiat. Mi'i hawyi 12000 miit ase'i MANASE kaipywiat toi'a­tu­mo­rania.
REV 7:7 Mi'i hawyi ase'i SIMIÃU kaipywiat 12000 miit. Mi'i hawyi 12000 miit ase'i IREWI kaipy­wiaria. Mi'i hawyi 12000 miit ase'i ISAKA kaipy­wiaria toi'a­tu­mo­rania.
REV 7:8 Mi'i hawyi ase'i SAPURUM kaipy­wiaria 12000 miit. Mi'i hawyi 12000 miit ase'i IUSE kaipywiat toi'a­tu­mo­rania. Mi'i hawyi 12000 miit ase'i PEISAMĨ kaipywiat toi'a­tu­mo­rania. Yne ASE'I POT ISAREU ha'y­ru'in kaipy­wiaria 12000 miit torania Tupana eropat haria sese mesuwat yi tote toi'a­tu­mo­rania 144000 miit ASE'I POT ISAREU ywania sa'yru'in 12 ok takaria emiariru emiariru ko'i mesuwat yi totiaria. Mi'i hap kape ara'a­kasa torania mi'iria Iuteu ywania Iesui mohey haria pakup takaria hehay wakuat moherep haria.
REV 7:9 Mi'i hawyi uito Iuwãu araha'at i hawyi ara'a­kasa miit'in sem kahato yt wati­mo­rania kuap i hap ewy. Katu­pono typy'i kahato mi'iria. Te'e­ru­we­'a­tunug Tupana Hũ Kuteiru owa kape Morekuat koro apyk hap tote te'e­ru­we­'a­tunug. Tupana Hũ hit Kuteiru mõtypot hamo te'e­ru­we­'a­tunug. Typy'i kahato ara'a­kasa. Mi'i hawyi araha'at meimuẽ­wuaria kape hawyi atikuap yne ywania py'a­setpyi te'e­ru­we­'a­tunug yt to'o­'ewy hin i. I'atupiit ko'i ihup ikytsig hun. Katu­pono yne tama kaipyi i'atueko yt to'o­'e­wy­'ewy hin i mi'aria katu­puno wuat'i pusu kuap hap kaipyi te'e­ru­we­'a­tunug wuat'i more­kuaria etama kaipyi te'e­ru­we­'a­tunug Tupana Hũ Kuteiru owa kape. Yne i'atupo puat ikahu rakaria aria'yp iãgã ko'i ta'a­tuerut Tupana Hũ Kuteiru hit mõtypot hamo. Ta'a­tue­sokpe ikytsig nakat ikahu rakat puo tõ'ẽ imõtypot hamo.
REV 7:10 Mi'i hawyi i'atu­wẽpap'i ta'a­tuehay wo — Tupana En yn Urueha­kye­ra'at kuap hat katu­pono Esa'yru Iesui iku'uro uruka­wiano hawyi emeiha­kye­ra'at ko'i wo urutu­kup­te'en i'atu'e. Wakuat En wakuat En i'atu'e. Waku ere'apyk Urupo­rekuat koro wo wuat'i e'at pe aru i'atu'e. Era'apyk to eiam ikahu rakat tote. Waku morekuat akag epuretig toĩne'en epope wuat'i e'at pe i'atu'e. Wakuat En wakuat En i'atu'e i'atu­wẽpap'i haty wo.
REV 7:11 Mi'i hawyi wuat'i atipy piaria i'ewyte mio tã i'atu'e i'atu­wẽ­pap'i meimuẽ­waria 24 ok takaria po'og imohey sa'a­wy­'iwuat haria te'e­ru­wẽ­powat irania'in i'ewyte te. Mi'i hawyi meimuẽwat 4 ok takaria atipy piat ieĩne'en haria te'e­ru­we­pỹ­'ã­tutuk i'atuowa yi kape mekewat wuat'i Porekuat Koro Atipy Piat Apyk Piat Iesui mõtypot hamo — Waku sakpo'e En waku sakpo'e En i'atu'e. Po'og waku wuat'i ewaku hap kai i'atu'e. Uruimõ­typot mõtypot kahato En wuat'i e'at pe i'atu'e haty wo i'atu'e.
REV 7:12 Pywo sese ti rat En. Uruhe­waku En uruimo­wato En katu­pono wuat'i we'eg hap heiam En i'atu'e. Emiium uruepiat ete urutu­wehum kahato i'atu'e. Uruimo­wato En uruehay wo i'atu'e. Eropy­hu'at ro wuat'i mimõ­typot wo wuat'i akag wo. Esaika po'og po'og wuat'i kai i'atu'e. Wuat'i mimõ­typot sese wo po'og po'og rakano ereĩne'en. Ewaku po'og po'og uruto'e. Emiium po'og waku uruto'e. Emiium waku yne uruto'e. En yn Tupana wẽtup yn wuat'i e'at piat ieĩne'en hat En uruto'e. Tupana wo ereĩne'en esaika hap yne esaika hap torania kai i'atu'e miit'in sem ta'a­tue­sokpe kytsig puo atipy piaria torania wywo.
REV 7:13 Mi'i hawyi wẽtup ok 24 rakaria apo'e uhepe — Iuwãu e etikuap apo uwe mi'iria miit'in sem i'atue­sokpe kytsig nakat piaria. Etikuap karãpe tukup­te'en aru mi'iria yi tote e uhepe.
REV 7:14 — U pãi are'e yt atikuap i rat. En yn etikuap mehĩ are. Mi'i hawyi uiwesat — Pyno ahehoi mi'iria etiat epe Iuwãu e. Mi'iria tõ'ẽ tõ'ẽ meikowo ta'a­tu­ho­'opot ho'opot sese hap kaipyi. Ha'a­wyte mi'iria miit'in mimo­so­'opot kahato wo tukup­te'en yi tote ta'a­tu­mohey Tupana Sa'yru hawyi e. Wakuaria kahato mi'iria katu­pono Tupana Hũ Kuteiru iku'uro i'atu­ka­wiano. Ta'a­tu­mohey hawyi Tupana tihep ta'yn i'atu­minug sa'ag hap ko'i e. Sa'a­wy'i i'atu­minug sa'ag i'atu­pitpit hap ewy ma'ato koitywy ikytsig hap ewy te'e­ro­py­hu'at mi'iria Tupana Hũ Kuteiru suu mikoho ko'i ra'yn e. Sa'a­wy'i i'atu­minug sa'ag sokpe hun hap ipitpit rakat ewy te'e­ro­py­hu'at e. Ma'ato ta'a­tu­mohey hawyi sokpe koho hap ewy Iesui suu puo hap ewy hawyi ikytsig na'yn i'atue­sokpe te'e­ro­py­hu'at e uhepe.
REV 7:15 Mi'i tupono Tupana ehamo tukup­te'en kuap mesup e. Tupana owa kape te'e­ra­ha'at kuap e. Mi'i hawyi to'oehay Tupana wywo to'oewa kape. Mi'i pote Aipo­typot amyap ikahu rakat yatype tukup­te'en mi'iria e. Mi'i pote tukup­te'en at ka'ap ihamo e. Ta'a­tue­ropat at ka'ap wuat'i e'at pe Tupana miky­'esat nug hap ete e. Mi'i pote Tupana yt paa'e hin i i'atuete katu­pono toĩne'en i'atu­py­'a­setpe ta'a­tueTu­pana wo e uhepe.
REV 7:16 Sa'a­wy'i Miit'in misa­ty'i saty'i kahato haria mi'iria miit'in mimoe­sy'at ko'i wo tukup­te'en e. Te'e­re­'y­'utui kahato pytkai yt kat i y'y ta'atuium e. Sa'a­wy'i ta'a­tu­ho­'opot at ka'ap imohey pote e. Miit'in mimo­so­'opot motpap wiat haria i'atupiit sero hakup pono haria e. Koitywy yt hakup i haria wo yt iã'ãg haria wo i ra'yn tukup­te'en e. Koitywy waku pe tukup­te'en e. Yt kat i po'og ho'opot hap katu­pono Tupana mipoi ko'i tukup­te'en e. Koitywy Tupana mowepit at ka'ap takaria wo tukup­te'en mi'iria e uhepe.
REV 7:17 — Koitywo Tupana Hũ Kuteiru topy­hu'at i'atu­'a­pykok hat sese. Toi'a­tu­'a­pykok mekewat Morekuat e'amyap ikahu rakat rote pyi. Koitywy Tupana Sa'yru topy­hu'at i'atupoi hat e. Te'e­re­'y­'utui hawyi Tupana Hũ hit timo­herep y'y wakuat rakat yt ipitpit hin i rakat aimoieĩ­ne'en wuat'i e'at piat hat y'y e. Toi'a­tu­'y­kesat yrasa sese ko'i kape i'atu­moieĩ­ne'en sese hamo e. Tupana sese topy­hu'at i'atu­mo­wepit hat — Uha'y­ru'in uhaki­'yt'in wãi ehekiri tei'o e. Koitywy ti aru yt karamuo i ra'yn eheha hy homhom'e ehekiri hap upi e. Atihep yne ehepiat haty'u hap e. Koitywy wuat'i e'at pe eweikup­te'en waku pe eweikup­te'en e Tupana Hũ Kuteiru Hit mekewat ho'opot haria kape e uhepe mekewat wẽtup ok 24 rakaria kaipyiat hat. Ara'a­kasa yne mekewat kape uimu­'etu Uito Iuwãu.
REV 8:1 Mi'i hawyi mekewat Kuteiru tipik ta'yn popera mosat'e hap torania ra'yn mekewat 7 hap ta'yn. Toipik yne ra'yn hawyi i'atu­po­'inik yne atipy piaria. Wẽtup ora pat'ok turan yt uwe hin i ihay atipy pe hap kape ara'a­kasa. Ipo'inik sese itote toipik yne ra'yn mote.
REV 8:2 Mi'i hawyi ara'a­kasa ra'yn 7 ok takaria atipy piat gupte'en haria Tupana py'a­setpe imiky­'esat nug hanuaria. Yne mi'iria kape tutum huhu'e hap akuara wato.
REV 8:3 Mi'i hawyi wẽtup ok atipy piat ieĩne'en hat put'ok'e ra'yn mekewat aimiium Tupana kapiat yparakai wato Tupana ywyt pe. Toĩne'en ipo pe heiam nu imehit rakat kawiat. Toĩne'en mekewat heiam me mohag hy ikamhig se rakat wẽtup ok miium iwuk hamuat. Sa'a­wy­'iwuat aimiium Tupana kapiat ieĩne'en hap tote toĩne'en Tupana emiit i'atu­mienoi Tupana kapiat ywytpe. Mi'i hawyi wẽtup ok tum tope ahehay Tupana kapiat sehay wuat'i imohey haria ehay Tupana kapiat sehay ewywuat mekewat mohag ikamhig se rakat ewywuat. Mi'i totopag heiam me mohag hy puo hawyi toiwuk Tupana mowepit hamuat.
REV 8:4 Mi'i hawyi mekewat heiam kaipyi ta'am na'yn ywyhig i'atu­miẽtup Tupana kapiat e'yhig. Mi'i turan heiam toĩne'en Tupana yatypiat ieĩne'en hat po pe ra'yn. Mi'i hawyi ikamhig se rakat ta'am aria upi Tupana kape imowepit hap.
REV 8:5 Mi'i hawyi mekewat atipy piat tipag na'yn aria teiam kamũti pe yparaka aikope aria wo watum aimiium Tupana kapiat hap tote pyi hawyi toto kamũti topo piat wywo hawyi toipun na'yn yi kape aipytyp kape. Toipun na'yn yi kape hawyi atikuap sehay yi tote huhu'e hap ewy ihay pirik. Mi'i hawyi merep merep'e i'ewyte mytyp tyry'e kahato.
REV 8:6 Mi'i hawyi 7 ok takaria i'atue­huhu i'atu­rania tukup­te'en i'atupo pe i'atu­mipy wuat.
REV 8:7 Mi'i hawyi wẽtup ok i huhu'e ra'yn tuwepy ra'yn. Mi'i pote i'aman ewy nukara to'o­pype suu wywo tuwe­mo­herep. Mi'i hawyi ta'at ra'yn yi kape. Mi'i pote ga'apy piat wuk'e ra'yn aria'yp wato'in i'ewyte ga'akyt hyp ko'i ipat'ok wuk'e ra'yn.
REV 8:8 Mi'i rokirẽ wẽtup ok tuwe­hu­hupy akuara wato. Mi'i ti imipy typy hap. Totopy ra'yn mote wẽtup yity'ok aria kawiat ta'at y'y wato pe. Mi'i hawyi y'y wato puaria ho'opap kahato wẽtup iku'uro mye'ym puo y'y piaria.
REV 8:9 Mi'i pote y'y wato piat gupte'en haria ho'opap ta'yn yne y'y hit upi y'y wato upi. I'ewyte yara wato ko'i ipat'ok ta'yn toimoma.
REV 8:10 Mi'i hawyi wẽtup ok i 7 ok takaria tehu­hupy. Mi'i wyti i'okhyt pun na'yn waikiru iwato rakat ewywuat ta'at ra'yn atipy kaipyi y'y hit'i ko'i ete.
REV 8:11 Mekewat waikiru set nop e hap katu­pono ta'at ra'yn mekewat waikiru y'y hit'i ko'i piat hawyi i'ewyte nop ta'yn i'ewyte yrasa ko'i te'e­ro­py­hu'at nop ta'yn. Mi'i hawyi miit'in te'e­re­'y'u mekewat nop takat wo hawyi topap ta'yn.
REV 8:12 Mi'i hawyi wẽtup ok i 7 ok takaria i'uhu te'akuara wato hawyi wãtym na'yn aikope aikope yt hẽtyhot hin i ra'yn at waty i'ewyte waikiru ihot'ok puo yt hẽtyhot hin i yt heremo i ra'yn aikotã wãtym'i ewy aikotã wãtym yt heremo i hap ewy.
REV 8:13 Mi'i hawyi araha'at hawyi uheha wo atikuap wẽtup ok atipy piat ywaiti pe topopy ra'yn yi totiaria mu'e hamo. Mi'i kaipyi sehay atikuap ihay pirik wo to'e — Yt naku i kahato yt naku i kahato yt naku i kahato topy­hu'at irane mesuwe katu­pono toĩne'en mye'ym atipy piaria yt i'uhuu te'a­kuara wato i te ta'a­tue­huhu mye'ym ok takaria e tehay pirik wo yi totiaria pe. Mi'i sehay atikuap hawyi atiwan na'yn uimu­'etu uito Iesui potmu'e Iuwãu are.
REV 9:1 Mi'i hawyi uito Iuwãu araha'at i hawyi ara'a­kasa wẽtup ok atipy piat Tupana eropat hat mekewat 7 ok takaria kaipyi wẽtup ok 7 ok hap. Mi'i i'uhuu te'a­kuara wato. Huhu'e hawyi wẽtup ok atipy piat ta'at yi kape waikiru wato at hap ewy. Ma'ato mekewat atipy kaipywiat waikiru ewywuat hẽtyhot kahato rakat toĩne'en. Mi'i hawyi Tupana tum na'yn tope tesaika hap yi ka'a wato sa'ag okenhyp'ok hamo yi ka'a yn nakat yt ika'a sasat rakat i okenhyp'ok hamo.
REV 9:2 Toho­'o­'oken­hyp'ok hawyi he'yhig hun am yi ka'a wato pyi aikotã go wato wuk hap ewy. Mi'i hawyi ywyhig hun tomo­'y­pyryp yne ra'yn at i'ewyte yt hẽtyhot kuap i ra'yn mekewat ywyhig hun ta'am yi ka'a pyi pote.
REV 9:3 Mi'i hawyi hewo hewo mekewat ywyhig hun kaipyi pohit iwato kahato ko'i sem kasi­kasi iwato kahato ko'i sem tuwe­nõ'ẽ mekewat ika'a wato pyi. Mi'iria pe Tupana tum sapot ewywuat haty hap miit'in atumo­so­'opot hamuat miit'in hok hok hap hamuat.
REV 9:4 Mi'i hawyi Tupana to'e kasi­kasi wato pohit wato sa'ag ko'i pe — Yt ewetu'u tei'o po'og upip yhop aria'yp ko'i e. Ma'ato eweiwat ro miit'in irania'in kape i'atu­mo­so­'opot hamo are'e e. Yt kat i miwan Uhet etiat rakaria i'atuo­wa­tu'a ete pote waku eti'a­tu­mo­so­'opot ihokhok hap mywo e.
REV 9:5 Mi'i hap ete 5 ewaty i'ypyryp we eweimo­so­'opot ro mi'iria e. Ma'ato yt ewei'auka tei'o ma'ato aikotã sapot piat miit'in hok hap turan wuat saty hap ewy o ewetunug mi'iria e Tupana sapot iwato kahato ewywuaria pe. Mi'i hawyi tuwat ra'yn pohit kasi­kasi ko'i miit'in hokhok hamuat. Yt Tupana mohey i haria iatu­'a­piheg hamo.
REV 9:6 — Haty pãi haty an i'atu'e haty kahato uhete haty kahato uhete kak'i­'a­tu'e kak'ia­tu'e. Uruku­'uro teran uruku­'uro teran i'atu'e ma'ato gu'uro hap pya kahato urukai i'atu'e to'ope. Ui'auka ro i'atu'e ma'ato 5 ewaty turan ta'a­tu­ho­'opot ma'ato yt uwe i iku'uro.
REV 9:7 Meimuẽwat kasi­kasi wato kahato rakaria ko'i pohit wato kahato rakaria ko'i sapot ewywuat mi'iria owa ko'i miit ewy. Morekuat ewy i'atue­'a­mãtap imehit rakat kawiat Uru kawiat. I'atupiit aikotã surara hũria ewy kawaru ewy tu'uka turanuat te'e­ru­we­painug hap ewy i'atupiit ete meimuẽwat kasi­kasi ko'i sapot ewywuat ko'i hap kape araha'at.
REV 9:8 I'atuiãi ko'i awyato iãi ewy. I'atu­'asap ko'i i'ywop kahato aikotã makuptia asap ewy.
REV 9:9 I'atu­po­ti'a ete surara ewy i'atu­'auka hap sopo hamo iheg kahato rakat ewy. Mi'i hawyi te'e­ru­we­popy turan i'atu­po­pesap ipuehay kahato aikotã surara sem kawaru totiaria ikohyeput tu'uka hamo hap ewy aikotã sura­ra'in e'yara sem yi upiat puehay ewy.
REV 9:10 I'atu­su­waipo miit'in hok hamuat aikotã sapot ewywuat. Mi'i wo ta'a­tu­so­'opot kahato yt Tupana mohey haria i 5 ewaty turan.
REV 9:11 Meimuẽwat sapot ewywuat potypot set wuat'i moma hat e. Mi'i yi ka'a sa'ag upiaria topy­hu'at. Iuteuria pusu puat ta'a­tu­set'ok Apatãu i'atu'e ma'ato kereku pusu puo Apariãu i'atu'e ahiag i'atu'e.
REV 9:12 Pyno wẽtup ra'yn tokosap ho'opot hap sese hap ma'ato typy te toĩne'en ho'opot hap sese hap katu­pono typy ok te yt huhu'e i te.
REV 9:13 Mi'i hawyi uito Iuwãu araha'at i hawyi ara'a­kasa wẽtup atipy piat huhu'e irane rakat kape. Akuara wato ipo pe toĩne'en. Mi'i hawyi atikuap sehay aimiium Tupana kapiat yparakai kaipyi yparakai 4 e'aut rakat kaipyi mekewat yparakai imehit kahato rakat Uru kawiat rakat kaipyi.
REV 9:14 Mi'i hawyi to'e 6 rakat huhu'e hat pe — Mehĩ e tukup­te'en y'y wato Eurate ywyt'ok­pype iheg me ta'a­tu­kytyt puo yi ka'a pe 4 ok takaria e. Mi'iria sa'a­wy'i Tupana atoiat haria te'e­ro­py­hu'at ma'ato mesup ta'a­tu­'a­saity iheg nakat ete tukup­te'en y'y wato Eurate e hap het rakat ywyt'ok­pype e. Etihep i'atu­kytyt hap kaipyi e.
REV 9:15 Mi'i hawyi toto mekewat y'y wato Eurate e hap kape mekewat atipy piat mi'i hawyi 4 ok takaria toi'a­tu­po­re­nõtem i'atu­pyhyp hawyi — Ahe'at ra'yn i'atu'e to'ope aimi­ky­'esat sa'ag nug hamo i'atu'e. Waku watunug aimi­ky­'esat sa'ag mesup ta'yn i'atu'e. Waku watu­we­potpap katu­pono mi'i nug hamo ainug sa'a­wy'i i'atu'e. Pyno to'iro waho­'o­'auka miit'in i'atu'e. Waku yne mye'ym miit'in kaipyi wati­'auka wẽtup miit i'atu'e katu­pono mi'i nug hamo watoĩ­ne'en mesup e'at pe i'atu'e. To'iro miit'in ho'o­'auka hamo i'atu'e. Mesup e'at ahe'at miit'in sem atu'uka hamo i'atu'e to'ope.
REV 9:16 Mi'i hawyi te'e­ru­we­'a­tunug kahato sura­ra'in sem i'atu kahato yne te'e­ra­'apyk i'atuhũ okpe tote. Mi'i hawyi wẽtup ok to'e uhepe — Iuwãu e etikuap apo karania surara tukup­te'en itote miit'in atu'uka haria apo uhepe. — U yt atikuap i are'e hawyi uiwesat — Pywo pe ti i'atu kahato yt aimikuap i ko'i hap ewy tukup­te'en 200.000.000 sura­ra'in i'atu hap 200.000 wo 1000 sura­ra'in itote tukup­te'en e uhepe.
REV 9:17 Mi'i hawyi uimu­'etu ara'a­kasa mekewat sura­ra'in sem ta'a­tuhũ kawaru sem okpe tote. I'atue­sokpe i'atupyt etiat sura­ra'in wat ewywuat ta'a­tu­'auka hap sopo hap ma'ato aria kawiat toĩne'en nu hup ewy aria sapuẽ hapyke rakat ewy. Mi'i hawyi i'atu­hũria kawaru akag ko'i awyato akag ewy. Mi'i hawyi ta'a­tuwẽ pyi tuwẽtem aria ẽty hun ytyghe wuk hap ewy tuwẽtem haty wo i'atuwẽ pyi miit'in ho'o­'a­tu­'uka hamo.
REV 9:18 Mi'i hawyi mekewat aria i'atuwẽ pywiat ho'o­'auka kahato miit'in mye'ym kaipyi wẽtup miit ta'a­tu­'auka.
REV 9:19 I'atue­saika hap topy­hu'at i'atuwẽ pyi miit'in auka hamuat. Katu­pono aria sapuẽ hapyke rakano ta'a­tu­'a­tuowa irania'in ta'a­tu­wẽpyi. I'ewyte i'atu­su­waipo ãpy ete moi akag ewy. I'atu­su­waipo wo miit'in moso­'opot hap topy­hu'at.
REV 9:20 Mi'i hawyi ta'a­tu­'a­tu­moma kahato miit'in yi totiaria 30 kaipyi 10 ok miit ta'a­tu­moma kahato miit'in. Ma'ato mi'i pytkai irania'in yt iku'uro i rakaria yt te'e­ru­we­morem hin i Tupana kape. Te'e­ra­'a­kasa yne ho'opot hap pytkai yt paa'i­'a­tu'e hin i. Ta'a­tu­mõ­typot re ahiagnia. Ta'a­tunug ne tupa­naria hekat rakaria ihup ikytsig ika'ay rakaria ta'a­tu­'a­tu­mõ­typot re. Mi'i hawyi ta'a­tu­mõ­typot yt ihapytig i rakaria tupa­naria ta'a­tu­minug ko'i yt kat kuap haria i yt hewyry kuap i rakaria ta'a­tu­'a­tu­mõ­typot kahato te. Yt ta'a­tu­mõ­typot teran hin i Ta'a­tunug Hat Sese. Ta'a­tu­ho­'opot pytkai yt te'e­ra­'aipok hin i Tupana Sese kape.
REV 9:21 I'ewyte ta'a­tu­minug sa'ag ko'i yt ta'atoiat hin i. Miit'in auka haria wo te te'e­ro­py­hu'at i'ewyte paini ko'i wo te tukup­te'en ne miit'in ma'at hamo. Ta'a­tu­ma'at hap topy­hu'at mekewat paini mimo­herep. Yt nakuaria i tukup­te'en ne. I'atue­waire atuewaire te. Sero­'ok­'i­'a­tu'e te. Mi'iria Tupana ti'a­tu­'a­piheg kahato pytkai yt paa'i­'a­tu'e hin i i'atu­minug sa'ag nug hap ete. Ma'ato po'og ta'a­tu­'a­tunug yt Tupana miky­'esat ko'i i. Mi'i hap kape ara'a­kasa yne uito Iesui miky'e Iuwãu uimu­'etu aikotã aru hap.
REV 10:1 Mi'i hawyi uito Iuwãu araha'at i hawyi ara'a­kasa wẽtup ok po'og hesaika rakat atipy piat. Mi'i ti ta'apyk yi kape. Ipiit ete hesokpe ywyhig ikytsig kahato rakat. Ipainug hap i'akag ete we'yp ewy ikahu kahato rakat. Howa hẽtyhot kahato at ewy. Ipy typy wasere yp ok tã toĩne'en ma'ato aria kawiat ewy topy­hu'at.
REV 10:2 Mi'i hawyi wẽtup iwan okpo'i hit totat. Mi'i hawyi toi'ok­po­'i­porop ta'yn. Ipy sese topypag y'y wato owa tote ma'ato topy ran kai topypag yi tote.
REV 10:3 Mi'i hawyi mekewat atipy piat akag tuwẽ­powat tehay pirik wo aikotã awyato ko'i i'atuehay hap ewy. Tuwẽ­powat kahu hawyi 7 wo huhu'e.
REV 10:4 Ma'ato huhu'e hap miit'in pusu ewy topy­hu'at. Mi'i pote uito Iuwãu atikuap kat som to'e huhu'e tohenoi hap — Pyno atiwan mesu­wa­rote kat som te'e­ro'e hap uiwepe atiwan turan put'ok'e uhete sehay atipy kaipyi — Yt etiwan nei'o kat som to'e huhu'e puat hap e. Yt atiky­'esat i miit'in ikuap hap koran te e.
REV 10:5 Mi'i hawyi mekewat atipy piat ihay ra'yn — Yt uheso i rat e. Mi'i hawyi topo sese tohupit ywaipe tehay Tupana kapiat pywo yn e hamo.
REV 10:6 — En ni atipy nug hat i'ewyte yne atipy piaria nug hat e. En ni mytyp nug hat i'ewyte yne yi totiaria nug hat e. En ni y'y wato nug hat i'ewyte yne y'y piaria nug hat e. Eset ri Tupana e. En ni pywo sese rakat e. Mi'i pote are'e pywo rakat e'e hap ewy wuat'i miit'in me are'e — Mũki­'ite yt kat i po'og miit'in wanuat e'at ko'i sa'a­wy­'iwuat ewy e Tupana e. Mekewat 7 huhu'e hap ikahuro hawyi i'ewyte ikahuro ra'yn e'at ko'i yi totiaria wanuat e Tupana e.
REV 10:7 Pywo ti rat e mekewat 7 ok huhu'e hawyi aikotã Tupana to'e sa'a­wy'i tehay moherep haria wẽ pyi topy­hu'at aru yne i'atu'e hap ewy huhu'e hap tutunug 7 rakat hawyi e. Topy­hu'at aru aikotã atunug aru e tehay moherep haria wẽ pyi sa'a­wy'i hap ewy topy­hu'at e. Mi'i tokosap yne ra'yn hawyi yne mekewat atunug aru e hap sa'a­wy'i yt heremo i rakat heremo ra'yn topy­hu'at kat atunug na'yn atunug aru ehehamo ui'e hap ewy e Tupana e. Mi'i hawyi — Atikuap yne atunug aru e hap e Tupana wuat'i miit'in me e mekewat atipy piat iwato'in nakat.
REV 10:8 Mi'i tohenoi kahu hawyi atikuap sehay atikuap sa'a­wy'i hap ewy — Iuwãu e etat atipy piat po pyi mekewat iwan okpo'i hit e uhepe. Etat ro mekewat atipy piat ipy y'y pe kokawiat ipy yi totiat rakat po pyi e. Mekewat miwan ta'a­py­meha piat e mekewat sehay atipy kaipywiat e uhepe.
REV 10:9 Mi'i hawyi areto ra'yn mekewat atipy piat owa kape hawyi — Mehĩ etum no mekewat miwan hit uhepe are'e tope. Mi'i hawyi uiwesat — Etat ro miwan hit hawyi etu'u yne ro e. Hẽ'ẽ kahato aru etipuẽti ewẽ pe awi'a hy ewywuat e ma'ato etohon hawyi yt naku i etipuẽti aru epy'a pe yt hẽ'ẽ hin i ma'ato nop hap topy­hu'at epy'a pe e uhepe.
REV 10:10 Mi'i hawyi atat mekewat miwan hit atipy piat akag po pyi hawyi atu'u ra'yn hawyi i'e hap ewy topy­hu'at hẽ'ẽ kahato waku kahato awi'a hy ewy ma'ato atu'u hawyi nop hap ewy topy­hu'at uime'en me.
REV 10:11 Mi'i hawyi mekewat po'og atipy piat rakat to'e uhepe — Iuwãu e pyno ti pywo ti rat Tupana ehay etimo­herep aru i'atu kahato miit'in kape e. Ehenoi aru aikotã topy­hu'at i'atuete irane hap e. Ehenoi po'og aru i'atuepe mekewat sehay emihon kaipyi waku yne pusu puo aru ehenoi mekewat miwan miat emi'u yne yne ywania kape i'ewyte yne more­kuaria kape i'ewyte yne tama piaria kape miwan miat e hap ewy waku eti'a­tu­mo­herep aru e. Yt naku i mesup miit'in ikuap ma'ato he'at put'ok'e aru hawyi waku etimo­herep yne kat to'e kat to'e huhu'e hap puo e uhepe mekewat miwan kaipywiat uipoi hat atipy piat. Pyno mesuwe uimiwan me mekewat miwan uimi'u hap ewy ahenoi mesup ehepe uito Iuwãu.
REV 11:1 Mi'i hawyi Aipo­typot Iesui tum uhepe aria'yp hit kat kupitu kat kupitu Tupana yat toine'en hap hã'ãg hamuat ãpy hãpyk kahato rakat. Tutum uhepe hawyi to'e — Uiwy Iuwãu ereto ro meikowat aria'yp hit ãpy hã'ãg hamuat wywo Tupana mõtypot yat sese kape e. Mi'i hawyi ehã'ãg no karan iwato hap karan i'ywop hap karan itypore hap e i'ewyte yne Tupana mõtypot yat ipyt'at ko'i ehã'ãg iwato hap e uhepe. I'ewyte eti'a­tu­mo­rania yne miit'in Tupana mõtypot haria itotiaria e uhepe. I'ewyte yparakai aikope Tupana kapiat ta'a­tumiium pytyp hap waku ehã'ãg yne mekewat aria'yp hit ãpy wo karan iwato karan i'ywop hap itypore hap e uhepe.
REV 11:2 — Ma'ato Tupana mõtypot yat e'oken yt ehã'ãg nei'o katu­pono Tupana mõtypot yat e'oken mesup koitywy yt ai'y­wania wat i ma'ato irania'in yt Iuteu i ywania wanuat topy­hu'at. I'ewyte Tupana etawa Ieru­sarẽi irania'in ywania tipo­hari ra'yn ai'y­wania Iuteu ywania po pyi. Sura­ra'in hewyry aru itote 42 ewaty sura­ra'in tipo­hari Ieru­sarẽi i'atu­'y­wania wanuat e uhepe e Akag Iesui uhepe.
REV 11:3 Mekewat e'at pe aru atipo­'oro typy ok uimi­'airo ko'i uhehay moherep hamuat tawa Ieru­sarẽi miaria kape e. Atum mi'iria pe uhesaika hap uhehay moherep hamuat 1260 e'at ta'a­tu­mo­herep uhehay uhesaika hap wywo e. I'atue­sokpe i'anam nakat waku paa'wa­to'e aiminug sa'ag ete e hap moherep hamo e.
REV 11:4 — Meke­waria typy ok takaria te'e­ro­py­hu'at Uriweiru yp ewy Tupana e'ariãty rakat ewywuaria e. Ta'a­tu­pyt'at ikap ihy rakat wo hap ewy mi'iria Tupana e'ariãty hapyke rakaria ewy te'e­ro­py­hu'at e. Katu­pono Tupana ehay moherep haria mi'iria typy ok takaria e. To'o­'ewy kahato aikotã typy rakat ariãty Tupana yaty­piaria ieĩne'en haria ariãty eiam hẽtyhot kahato rakaria ewy mekewat typy ok Tupana mipo­'o­roria e. Te'e­ro­py­hu'at hamuat Wuat'i Miit'in Yi Totiaria Ka'iwat e'ariãty moherep hamo e uhepe.
REV 11:5 Mi'i hawyi yi tote ta'a­tu­mo­herep kahato uhehay e. I'atu­wa­nĩ­kaptia i'atu kahato ma'ato umipo­'o­roria typy ok po'og hesaika i'atu­'uka teran haria kai e. Karãpe miit'in tuwat aru uimi­po­'ororia typy ok auka hamo mi'i hawyi i'atu­wa­nĩ­kaptia ko'i yne topap aria i'atuwẽ pywiat wo e. Yt uwe i uimi­po­'o­roria typy ok auka kuap hat e uhepe.
REV 11:6 Mi'i hawyi mi'iria typy ok takaria uimi­po­'o­roria hesaika kahato rakaria wo tukup­te'en e. Ta'a­tu­pyhyp kuap aru i'aman e. Miit'in sem me ta'a­tu­mo­herep aikotã aru e hap ko'i e. Wãi'i­'a­tu'e i'aman me ta'a­tu­henoi miit'in miat turan yt kat i i'aman i'atuko ete e. Yt kat i i'aman mesuwat yi tote i'atu'e hap ewy ta'a­tu­mi­ky­'esat ewy e. I'ewyte ta'a­tunug kuap y'y ko'i huu rakano. I'ewyte ta'a­tu­mi­ky­'esat ewy ta'a­tu­po­'oro kuap ahu. Sa'ag nug haria ta'a­tue­wa­nĩ­kaptia moma hanuaria tukup­te'en e. I'ewyte ta'a­tu­po­'oro kuap hamuat ihywy­'okmõi ko'i ta'a­tu­wa­nĩ­kaptia ãpymin hamo e uhepe Iesui.
REV 11:7 Mi'i hawyi 42 ewaty hap ete tokosap ta'yn i'atuehay hap e. Toran na'yn hawyi tuwẽtem irane yi ka'a wato sa'ag myi mekewat haiwot rakat sa'ag kahato rakat ipoity'i rakat ahiag e. Mi'i hawyi tu'uka kahato Tupana ehay enoi haria typy ok takaria ete e. Mi'i hawyi po'og hesaika topy­hu'at e. Mi'i hawyi hamuat ewy toi'a­tu­'akit uimi­po­'o­roria tesu­ra­ra'in sem py wo hawyi toi'a­tu­'uka uimi­po­'o­roria typy ok takaria e uhepe.
REV 11:8 I'atupiit toipun tawa wato py'a­setpyi aikope sa'a­wy'i ta'a­tu­pehik Tupana Mipo­'oro Uito aria'yp posak ete hap tote ta'a­tu­pugha tawa pu'ap tote tawa py'a­setpe wuat'i ehamo e. Tawa Esitu sa'a­wy'i yt naku pe i kahato tukup­te'en uimohey haria. Mi'i hap ewy kahato yt naku i kahato tukup­te'en aru uimohey haria mekewat tawa Ieru­sarẽi miaria e Tupana. Mi'i pote wẽtup set atum tawa Ieru­sarẽi miaria pe — Tawa Sutuma piaria eipe are'e e. Mio tã are'e katu­pono uimiwuk tawa Sutuma sa'a­wy'i e. Yi Esitu piaria uhewa­nĩ­kaptia ewy kahato tawa Ieru­sarẽi miaria mesup e. Sa'ag kahato ta'a­tunug sa'a­wy­'i­wuaria uimohey haria ete e. Sutuma miaria i'ewyte yt naku i yn te'e­ro­py­hu'at uimohey haria ete e. Ieru­sarẽi miaria po'og uimohey haria auka karia wuat'i tawa kai e uhepe.
REV 11:9 — Yt eweisyp tei'o mi'iria ete ne'i i'atu'e irania'in Ieru­sarẽi miaria uimi­po­'o­roria typy'ok takaria piit etiat e. Mi'i pote i'atupiit iku'uro rakaria tukup­te'en mu'ap tote tawa Ieru­sarẽi me mye'ym e'at hawyi wẽtup e'at pat'ok. Mi'i hawyi miit'in tõ'ẽ tõ'ẽ kahato te'e­ra­ha'at hamo. Te'e­ru­we­'a­tunug wuat'i pusu kuap hap kaipyi wuat'i ywania kaipyi wuat'i tama kaipyi ipe hup takaria ipe hun nakaria ipe kytsig nakaria tõ'ẽ tõ'ẽ hepiok hamo mye'ym e'at kape e.
REV 11:10 Mi'i hawyi õ'ẽ haria i'atu­wepit kahato — Waku pe ra'yn i'atu'e e. Iku'uro ra'yn Tupana ehay moherep haria i'atu'e e. Waku kahato i'atu'e to'oepe e. Iku'uro ra'yn Tupana ehay moherep haria typy ok takaria i'atu'e e. Sa'a­wy'i mi'iria aimo­so­'opot haria tukup­te'en mesuwat mytyp tote i'atu'e to'ope. Koitywy waku ra'yn watunug aimi­ky­'esat ewy yt naku i nug hap i'atu'e. Mi'i hawyi ienuk hap ta'a­tunug hawyi to'ope ta'atuium kat ko'i kat ko'i to'o­mo­wepit hamo — Waku pe mesup topap ta'yn aimo­so­'opot haria i'atu'e to'ope e.
REV 11:11 Mye'ym e'at hawyi wẽtup e'at pat'ok hawyi i'atupiit toĩne'en i wuat'i ehamo mu'ap tote hawyi Tupana timoieĩ­ne'en i ra'yn Topã'ãu wo toimo­pyhu'i ra'yn e. I'atuieĩ­ne'en i hap teke i'atupiit pe hawyi i'atu­poĩ'ãm na'yn wuat'i miit'in weky­ry'i haria ehamo e. Mi'i hawyi itotiaria seha'at haria te'e­ro­ken'ẽ kahato ra'yn i'atu­pupi e.
REV 11:12 Mi'i hawyi ti typy ok takaria tikuap sehay pirik atipy kaipyi — Ewei'õ'ẽ ro meikowo e. Mio tã e hawyi ta'a­tue­wa­nĩ­kaptia ehamo te'e­ra'am na'yn ywyhig muo wuat'i ehamo e Iesui uhepe.
REV 11:13 I'atu'am turan huruk'e iwato kahato topy­hu'at tawa Ieru­sarẽi ete e. Mi'i hawyi yat ko'i nu kawiat ko'i hewo hewo kahato e. Ikaipyi i'atu 10 hap ta'at wẽtup tuereto hap ewy yi huruk'e kahato pote miit'in ho'opot kahato hawyi 7000 miit iku'uro itote. Mi'i pote irania'in yt map haria i te'e­ro­ken'ẽ kahato hawyi — Tupana atipy piat po'og torania kai En i'atu'e aru tawa Ieru­sarẽi miaria e Aipo­typot Iesui uhepe.
REV 11:14 Pyno typy ho'opot hap miit'in piat hap tokosap ta'yn ma'ato wẽtup te yt tokosap i te ho'opot hap sese miit'in miat hap katu­pono yt torania i te huhu'e.
REV 11:15 Mi'i hawyi atipy piat wẽtup te myhu'at hat akuara wato huhu'e ra'yn mekewat 7 ok takat hawyi uito Iuwãu ara'a­kasa mi'i hap kape uimu­'etu. Mi'i hawyi atikuap miit'in sem ihay pirik kahato atipy pe — Tupana Mipo­'oro topy­hu'at ra'yn Wuat'i Porekuat nuat i'atu'e haty wo. Wuat'i Ywania Potypot no Aipo­rekuat topy­hu'at mesu­wepyi wuat'i e'at pe i'atu'e. Mi'i Miit yn toĩne'en Ai'akag koro i'atu'e. Aika­'iwat mesup topy­hu'at po'og wuat'i kai i'atu'e te'e­ro­wẽ­powat atipy piaria hap atikuap.
REV 11:16 Mi'i hawyi mekewat 24 ok takaria morekuat e'amyap totiaria te'e­ru­we­pỹ­'ã­tutuk Tupana kape i'atueowa yi kape Tupana mõtypot hamo.
REV 11:17 — Urutu­wehum ewawi Tupana i'atu'e. Uruka­'iwat sese En i'atu'e. Wuat'i E'at piat En i'atu'e. Yne eminug ko'i e'yianmete ereĩne'en ni i'atu'e. Mesup te ereĩne'en i'ewyte wuat'i eminug hap sakpo ereĩne'en ne i'atu'e. I'ewyte wuat'i e'at tokosap pytkai ereĩne'en ne i'atu'e. Yt uwe i put'ok'e esaika hap ete i'atu'e. Mi'i esaika hap iwato rakat wywo ereĩne'en no atipy piat i'atu'e. Yi totiat Potypot no ereĩne'en i'atu'e.
REV 11:18 — Uru'akag wo sa'a­wy­'i­tepyi wuat'i ywania. Yt emohey i haria haiwot kahato eete i'atu'e. Koitywy ma'ato waku ereĩne'en Surara Akag ewy i'atu­'a­piheg hamo i'atu'e. Eti'a­tu­poepyk ta'yn ewanĩ­kaptia i'atu'e. Waku eti'airo uwe waku uwe yt hap i'atu'e. Waku mesup etum no eropat sese haria pe i'atu­sa'up wakuat i'atu'e. Waku i'ewyte ehay moherep sa'a­wy­'iwuat rakaria pe emieha­kye­ra'at ko'i pe i'atu­sa'up wakuat waku etum i'atuepe i'atu'e. Waku i'ewyte emõtypot haria pe iwato'in nakaria ko'i pe i'ewyte yt uwe i mikuap ko'i pe i'atu­sa'up wakuat etum i'atuepe i'atu'e. Waku i'ewyte eti'a­tu­'a­piheg e'yi kahu hap moma haria i'atu'e 24 ok takaria po'og imohey haria Tupana pe.
REV 11:19 Mi'i hawyi uito Iuwãu araha'at i hawyi ara'a­kasa atipy pe Tupana mõtypot yat tuwe­'o­ken­hyp'ok ta'yn hawyi araha'at Tupana yat kape. Mi'i tote ara'a­kasa ra'yn mekewat sa'a­wy­'iwuat Tupana Pã'ãu apyk hap aikope sa'a­wy'i Tupana ihay ra'yn — Atunug aru ui'e hap ewy e hap totepyi ihay i ra'yn. Mi'i hawyi tuwẽtem kahato itote pyi merep merep'e hap ko'i hap ewy ara'a­kasa. Mi'i hawyi huruk'e kahato hap atikuap. Mi'i hawyi yi tyry'e kahato hawyi miit'in te'e­ru­wẽ­powat kahato itote pyi. Mi'i hawyi nukara iwato'in nakat hewo yi kape. Mi'i hap kape ara'a­kasa yne uimu­'etu Iesui mimo­herep uhepe. Uito ti Iesui potmu'e Iuwãu.
REV 12:1 Mi'i hawyi uito Iuwãu ara'a­kasa wẽtup uimu­'etu uimo­wa­nẽtup hap sese kat som Tupana aimu'e hap sese are'e uiwepe. Katu­pono ara'a­kasa waikiru py'a­setpe wẽtup ok hary­poria ewywuat y'am me waty tote. Hesokpe at ewywuat. I'akag ete toĩne'en amãtap iwepainug hap waikiru ko'i 12 waikiru ko'i.
REV 12:2 Mi'i ti tuwak popuo to'e — Uimẽpyt irane e kynkyn­to'e popuo. Uimẽpyt hap e'at ra'yn e tuwak popuo. Haty kahato e.
REV 12:3 Mi'i hawyi uimu­'etu wẽtup kape ara'a­kasa uimo­wa­nẽtup hap sese katu­pono mekewat hary­poria yatype toĩne'en mekewat moi'ok sa'ag iwato'in nakat. Uimo­'a­kag'aia kahato mekewat moi'ok koro 7 i'akag nakat ipe ihup kahato rakat huwaipo waikiru ko'i ete hewyry. Ipainug hap amãtap morekuat ewywuat 7 amãtap. I'aut piit kahato rakat 10 i'aut rakat i'akag ko'i ete.
REV 12:4 Mi'i ti tosu­waipo wo toi'a­tu­pugha kahato waikiru ko'i tosu­waipo wo. Mye'ym kaipyi toipat'ok wẽtup waikiru hap ewy. Waikiru sem toipugha kahato yi kape. Mi'i hawyi itote tohe­katup hary­poria imẽpyt ywã'ĩ hap tutu'u teran imẽpyt haype.
REV 12:5 Mi'i hawyi imẽpyt ihainia ra'yn. Tuwẽtem hawyi Tupana tioto meremo atipy kape aikope toĩne'en Morekuat no hap tote. Mi'i hawyi to'e Hary­poria Mẽpyt pe — Meiũran aru eti'a­tu­mo­pe­rup'i haty wo yne miit'in e Tupana. Aikotã Morekuat tepu­retig wywo hap toimo­pe­rup'i temiit nuat hap ewy ereĩne'en aru e. Mi'i hap ewy etunug irane e Tomie­ra'am Hirakat pe.
REV 12:6 Mi'i hawyi mekewat hary­poria topopy ra'yn moi'ok pupi aikope yt uwe i miit'in hap kape. Mi'i hawyi Tupana minug yahig yt uwe i mikuap hap tote hary­poria tuwemig. Mi'i kape toipo­'oro temiit'in ipoi hamo 1260 e'at turan 42 ewaty hap ewy.
REV 12:7 Mi'i hawyi uito Iuwãu araha'at wu'uka hap kape waikiru pya'setpe. Mekewat atipy piat akag Mikeu temiit'in atipy piaria tesu­ra­ra'in wywo ta'a­tu­'uka kahato moi'ok koro ete.
REV 12:8 Mi'i hawyi moi'ok ti'a­tu­'akit teran surara akag Mikeu'in ma'ato Mikeu ti'a­tu­'akit ne'i moi'ok hawyi to'e — Motoro emiit'in wywo e. Yt naku i ra'yn ereĩne'en po'og mesuwe atipype e. Motoro esura­ra'in wywo e Mikeu moi'ok koro pe.
REV 12:9 Mi'i hawyi toi'a­tu­'ok­hyt­pugha moi'ok hesu­ra­ra'in nywo waikiru kaipyi yi kape. Moi'ok koro wẽtup het ahiag e wẽtup het miit'in mo'a­kag'aia hat. Wẽtup het satanai e.
REV 12:10 Mi'i hawyi wẽtup ok atipy piat tuwẽ­powat tehay pirik wo — Tupana Mipo­'oro Iesui ti'akit ne'i ahiag e. Temiit'in mohit hat toimohin ne'i ra'yn e. Sa'a­wy'i ihay sa'ag Tupana emiit'in ete at ka'ap ahiag — Emiit yt kat hamo i e. Yt nakuaria kahato emiit e yn sa'a­wy'i Tupana pe e. Ma'ato mesup toi'a­tu­pugha ra'yn e. Waku kahato e. Tupana timo­herep ta'yn ahiag akit hamuat e. Koitywy watikuap Tupana Mi'airo Iesui po'og po'og hesaika ahiag kai e hap watikuap e. Aheha­kye­ra'at hap topy­hu'at ra'yn e. Katu­pono Iesui aihep sese ahiag po pyi e wẽtup ok atipy kaipyi haty wo.
REV 12:11 Mesup aheywyt'in aheinyt'in Iesui mohey haria ti'a­tu­'akit ne'i ahiag e. Mekewat aikotã ta'a­tuhũ ewywuat iku'uro rakat suu mohey hap kaipyi ta'a­tu­'a­tuiã'ãg hap ko'i yne ta'a­tu­'akit ne'i e. Iku'uro rakat huu at hap i'atu­ka­wiano ta'a­tu­mohey hawyi esaika hap wywo ta'a­tu­'akit ne'i ahiag e. I'ewyte i'atu­mienoi Iesui piat ta'a­tue­ha­kyera'at hap moherep hap wo ta'a­tu­'akit ne'i ahiag e. Ta'a­tu­ku­'uro hap kape ta'a­tu­mohey hamo ta'a­tu­'akit ahiag e tehay pirik wo atipy piat e.
REV 12:12 Pyno koitywo atipy piaria i'atu­wepit ra'yn e. Yt kat i ahiag mio itote waku pe ra'yn e. Mi'i pote — Eiwehum no Tupana kape yne eipy'a pyi e. Ma'ato eweiwak to yi totiaria e. Katu­pono mesup ahiag haiwot ra'yn ta'a­tu­pugha atipy pyi hawyi. Yt naku i pe eweikup­te'en mesup aru yi totiaria. Eiwe'eg wo o y'y upiaria yi totiaria katu­pono toĩne'en eipy­'a­setpe ahiag to'ok­hytpun atipy kaipyi yi kape hawyi e. Koitywy haiwot rakano toĩne'en katu­pono toikuap ta'yn mesup yt wuat'i porekuat no i toĩne'en ne hap. Mi'i pote aikotã aikotã toikat tuwa­nẽtup miit'in atuekyi tuwe­wawiat hamuat hap teropat haria wo hap e tehay pirik wo — Yt i'atu i ra'yn uhe'at uipotpap hamo e ahiag.
REV 12:13 Ahiag toĩne'en yi tote hawyi — Uipun atipy kaipyi e. Mi'i hawyi toha­ty'i haty'i mekewat Ihainia hit ty.
REV 12:14 Ma'ato Tupana tum na'yn hary­poria pe hywi wato kahato rakat popesap ewywuat tutum hawyi to'e mana pe — Mana e waku erepopy yahig wato kape e. Waku eremig itote uiminug eiam me e. Itote moi'ok yt epuẽti hin i e. Ereĩne'en no mye'ym i'aman motpe itote e. Mi'i hawyi waku at pe erẽtem epyhyp hap wyi e.
REV 12:15 Mi'i hawyi mekewat moi'ok wato wẽ pyi tuwẽtem y'y ihy koro ewy Mekewat Hirakat ty ãpymin teran hamo. Toiky­'esat totioto pya teran haype. Mi'i pote y'y tuwẽtem kahato moi'ok wẽ pyi aikotã y'y mut'e hap ewy.
REV 12:16 Ma'ato mesuwat yi tipo­wyro kahato hary­poria. Ma'ato yi topy­hu'at ika'a wato kahato y'y wato hy sym hamo. Mi'i pote moi'ok wẽ pywiat ma'ato mekewat y'y mut'e rakat yt ti'ã­pymin kuap i mekewat hary­poria.
REV 12:17 Mi'i pote po'og haiwot ahiag mekewat hary­poria yt mi'ã­pymin i ete. Mi'i hawyi toto wu'uka hamo imẽpyt saipe­piaria moma hamo. Tupana piat ainãpin hap nug haria ete Iesui yn Uruka­'iwat e haria mot'i haria moma hamo ete. Mi'iria moma hamo moi'ok toto tosaiwot wywo.
REV 12:18 Toto hawyi toĩne'en yikyt upi hyemyi'a wato yẽpeke mekewat i'akare wasu ewywuat ahiag toĩne'en i'am me Iesui emiit'in u hamuat. Pyno uito Iuwãu uimi­'a­kasa hap atiwan na'yn.
REV 13:1 Mi'i hawyi uito Iuwãu uhewyry y'y wato ẽpe ete yi kyt upi. Mi'i puo araha'at hawyi ara'a­kasa wẽtup ok tuwẽtem y'y wato pyi yt nakuat i sese uimogyt kahato. Mi'i awyato tig koro 7 i'akag nakat. I'akag ko'i ete 10 i'aut. I'ewyte yne i'aut ete ipainug hap amãtap morekuat wat ewywuat. Mi'i kape ara'a­kasa uimu­'etu. Mekewat awyato tig koro 7 i'akag ete howa­tu'a ete toĩne'en het sa'ag ko'i. Het ko'i sa'ag uito Tupana e hap ewy. Toimohit teran kahato Tupana toset wo.
REV 13:2 Araha'at kahato mekewat y'y pywiat wẽtem hat kape. Ta'i awyato tig ewy kahato are'e uiwa­nẽtup hawe. Ipy ipo hĩpa py ewy. Iwẽ awyato wato wẽ ewy are'e. Tuwẽtem y'y pyi hawyi mekewat moi'ok to'e tope — Woronug na'yn en wuat'i uhemiit'in porekuat no e. Waku era'apyk morekuat nuat ui'apyk hap tote e. Woronug en uhehay­tuwy e. Mi'i hawyi ehay topy­hu'at uhehay kaipyi e. Mi'i hawyi ehay upi yne miit'in te'e­ro­py­hu'at e moi'ok mekewat yt nakuat i rakat hĩpa py ewywuat pe.
REV 13:3 Uito Iuwãu araha'at mekewat 7 i'akag nakat kape ma'ato wẽtup ok akag hepihi wato rakat ma'ato tokã'ã ra'yn aikotã sa'a­wy'i i'auka hap ewy. Mi'i hawyi araha'at yne miit'in tutunug tomi­ky­'esat ewy. Tuwat kahato ihay upi.
REV 13:4 — Woro­mõ­typot En moi'ok i'atu'e. Tupana sese moi'ok i'atu'e. Katu­pono y'y pywiat wẽtem hat urupo­rekuat no i'atu'e. Mio tã i'atu'e hawyi te'e­ru­we­pỹ­'ã­tutuk 7 i'akag nakat kape — Yt uwe i ekai po'og wakuat i'atu'e. Yt uwe i e'akit kuap i'atu'e. Torania te'e­ro­ken'ẽ epupi tu'uka ewywuat hamo i'atu'e torania miit'in.
REV 13:5 Mi'i hawyi mekewat moi'ok wẽ wo topy­hu'at hawyi ihay se tuwe­mõ­typot hamuat — Uito ti Tupana e Uito ti Tupana e. Aikotã morekuat wato ewy ihay se 42 ewaty turan mi'i yn topy­hu'at morekuat koro wo. Mi'i turan ipotpap kahato moi'ok miky­'esat ewy.
REV 13:6 Tuwe­ky­ry'i kahato Tupana ete towẽ pyi — Yt ikahu hin i Tupana set e. Tupana mõtypot yat yt kat hamo i e. Yt naku i nug haria atipy piaria e. Yt naku i kahato Tupana e.
REV 13:7 I'ewyte — Eti'a­tu­moma ro Tupana emiit'in e moi'ok mekewat y'y wato pywiat wẽtem hat pe. Wu'uka hamo waku wati­'a­tu­'akit Tupana mohey haria e. Mi'i hawyi wati­'a­tu­'akit yne hawyi waku wuat'i ywania akag wo eropy­hu'at mesuwat yi tote e. Yne pusu ka'iwat sio ihup sio ikytsig sio hun yne ywania ka'iwat kat e pusu kuap haria kat ywania kaipy­wiaria e. Waku yne tama piaria porekuat i'atu­mi­'akit no i'atu­mi­mohit hat no ereĩne'en e ahiag awyato tig koro pe.
REV 13:8 Mekewat e'at turan ta'a­tunug Tupana wo mekewat awyato ewywuat sa'ag nakat. Te'e­ru­we­pỹ­'ã­tutuk hawyi — En ni Tupana i'atu'e irania'in. Ma'ato mekewat iku'uro aihũ Kuteiru ewywuat rakat mohey haria yt inug i mekewat awato tig akag ewywiat ta'a­tue­tu­pana wo. Yt ta'a­tu­mõ­typot i. Katu­pono Tupana Sese yn sa'a­wy'i toĩne'en yi nug hap e'yianmete i'atu'e iesui mohey haria. Mi'iria Tupana tunug i'atuset pehik hawe tomiwan ete. Mi'iria Uihũ Kuteiru hit mohey haria toiwan tomiwan me mesuwat yi nug hap e'yianmete mi'iria aru — Uruimohey Tupana Hũ iku'uro aika­wiano haype pote yt uruimohey i moi'ok mipo­'oro aipo­rekuat nuat i'atu'e haria toiwan tomiwan me mesuwat yi yt kat i tep hap e'at pe turan Tupana.
REV 13:9 Uiwy­ria'in uito ti Iuwãu. Ehewaure ka'a pote eiwa­nẽtup to kat som Tupana to'e ehowawi hap kape are'e.
REV 13:10 Mio tã are'e ehepe — Eiwe'eg wo o Tupana emiit'in eipe pote. Eweimohey ro yne eipy'a pe eiku­'uro hap kape katu­pono ti aru ahaty'i haty'i kahato wo'o­pyhik hawe imohey haria aito pote. Waku waho­'opot aiku­'uro hap kape. Ai'auka kyse'yp wo pytkai yt naku i watoiat Iesui hap ai'auka irania'in imohey pote are'e. Ehewaure ka'a pote eweikuap to ui'e hap. Uito Iuwãu uipyhyp hawe y'y wato py'a­setpe yi a tote ui'atuiat mesuwe Iesui mohey hap upi.
REV 13:11 Mi'i hawyi uito araha'at hawyi ara'a­kasa wẽtup ok kape. Yi ka'a pyi tuwẽtem i'aut kurin kat yt i'aut rakat ewy i. Yty hit mẽpyt ewy aihũ kaneiru mẽpyt ewy. Typy i'aut kurin kat ma'ato ihay hawyi ihay pirik kahato akuara wato ehay ewy.
REV 13:12 Mi'i topy­hu'at uito Tupana e hat saipepiat sa'a­wy­'iwuat morekuat koro yianmiat ewy. — Eweimõ­typot ro uhe'yianmiat Tupana wo eawyoto tig ewywuat piat. Isuk hap tuwe­mo­kã'ã ra'yn i'auka hap tokã'ã ra'yn toĩne'en i ra'yn hap ewy ma'ato yt kahato i.
REV 13:13 Mekewat yi ka'a pywiat wẽtem hat mekewat wẽtup ok Tupana ran saipepiat inug kuap kahato yt miit'in minug ewywuat i. Tutunug iwato kahato miit'in mowa­nẽtup hamo. Toikaykay kuap aria atipy kaipyi yi kape wuat'i miit'in ehamo iwato kahato.
REV 13:14 Toi'a­tu­ma'at miit'in mesuwat yi tote tomi­mo­herep yt miit'in minug kuap i rakat wywo. Ma'ato tuweran note yt uwe i mekewat awyato tig akag 7 i'akag nakat iwywo pote yt toimo­herep kuap i miit'in mowa­nẽtup hamo. Katu­pono yianmiat hap ahiag kaipyi hesaika hap toĩne'en. Mi'i hawyi toi'a­tu­mo­wa­nẽtup pywo i'atu­'e­hamo. Mi'i hawyi — Uimohey pote ewetunug no Tupana iã'ãkap uhe'yianmiat ewywuat e mekewat kyse'yp misuk ma'ato toĩne'en i ra'yn gu'uro pywiat hat e yn miit'in me. Mi'i hawyi ta'a­tunug na'yn mekewat awyato tig akag 7 i'akag nakat iã'ãkap.
REV 13:15 Ta'a­tunug hawyi mekewat iã'ãkap te'yianmiat iã'ãkap toimoieĩ­ne'en. Mi'i hawyi iã'ãkap ihay ra'yn toimo­pyhu ra'yn hawyi tutum tesaika hap mekewat iã'ãkap we yt tomõ­typot i haria auka hamuat.
REV 13:16 — Eweimõ­typot ro Tupana wo iã'ãkap e. Ewetunug no ui'e hap ewy e. Ewetat ro miwan ehowa­tu'a ete mekewat ahetu­pana i'ã'ãkap set e. I'ewyte eipo sese kai mekewat miwan iã'ãkap set ewetat ro e wuat'i miit'in me miit akag ko'i pe i'ewyte miit emiit pe i'ewyte hekat rakaria pe i'ewyte hatek takaria pe mipyhyp ko'i pe i'ewyte wo'o­pyhyp haria pe. — Hẽ to ewei'e ro eipiit etiat miwan nug haria pe e.
REV 13:17 — Yt ewei'e pote yt kat i aru uruiwe­neru ehepe e — Yt ewei'e pote i'ewyte uruipyhyp aru eipe wuat'i weneru hap ete e wuat'i pe. Mi'i hawyi ta'a­tuwan yne miit'in piit mekewat Tupana iã'ãkap set wywo mekewat Tupana iã'ãkap morania hap wywo.
REV 13:18 Uiwy­ria'in we'eg haria eipe pote eweikuap to mekewat Tupana iã'ãkap set mekewat yt nakuat i set e Tupana ahepe. Eiwe'eg mote yt niatpo i eweikuap het kat pote miit'in set wywo topy­hu'at. Wati­mo­rania yne mekewat miwan ko'i het ko'i wati­mo­rania yne tuwat i tuwat i hawyi wati­puẽti miwan to'o­kape 666. Mi'i kaipyi watikuap het aiwe'eg mote e. Yne miwan miat 666 piat wẽtup het toĩne'en. Wati­mo­rania yne numuru hawyi 666 wati­puẽti e Tupana ahepe. Mi'i hap kape uito Iuwãu ara'a­kasa yne.
REV 14:1 Mi'i hawyi uito Iuwãu araha'at hawyi ara'a­kasa uimu­'etu wuat ewy. Eiwe­ha'at ro eiwe­ha'at ro Tupana Hũ Kuteiru toĩne'en tawa Ieru­sarẽi me yity'ok Sitãu tote. Eiwe­ha'at ro. I'atu kahato teropat haria wywo toĩne'en itote 144000 heropat haria iwywo tukup­te'en itote. Eiwe­ha'at ro are'e ehepe. I'ywot set miwan toĩne'en ihũ hit Kuteiru ewatu'a ete.
REV 14:2 Mi'i hawyi atikuap wepy hap ikahu atipy pe ihay se kahato rakat aikotã ywytu y'y ete hap ewy aikotã ipuehay y'y hit'i soro'e hap ewy atikuap uimu­'etu wuat ewy. I'atu kahato y'y soro'e hap ewy ipuehay. Mi'i puehay puo atikuap huruhu­ru'e hap iwato rakat haty wo. Mi'i hawyi atikuap wepy nug hap ewy aikotã mory­'awat ewywuat haity i'atu kahato rakat pyi tuwepy hap ewy tuwepy. Miit'in sem te'e­ru­wepy i'atu kahato kawakiu wywo hap ewy.
REV 14:3 Mi'i hawyi Tupana Hũ hit mieha­kye­ra'at ko'i te'e­ru­wepy atipy pe. Wepy hap ipakup takat sese. Mekewat apyk piat Morekuat e'yian notiat hat mõtypot hamuat. Mi'iria mekewat 24 ok po'og wuat imohey yne e'at piat haria ehamo. I'ewyte 4 ok takaria ehamo. Te'e­ru­wepy mekewat wepy pakup. Ma'ato itotiaria yt tikuap hin ta'a­tu­py'a pe kat e hap kat e hap te'e­ru­wepy hap. Ma'ato mekewat 144000 rakaria Iuteuria Iesui mohey haria ikuap ta'a­tu­py'a pe. Katu­pono mi'iria i'ewyte Tupana mieha­kye­ra'at ko'i ta'a­tukuap.
REV 14:4 I'atu­we'eg kahato mekewat 144000 miit Iesui eropat haria. Yt karãpe i hary­po­ria'in miat ta'a­tu­waire hap upi tuwat. Mi'iria 144000 ihainia yt karãpe i ihary'i rakaria ta'a­tunug kahato Tupana Hũ hit Kuteiru emiit sese imi'ai­roria sese ko'i mi'iria. Toi'a­tue­ha­kye­ra'at mi'iria irania'in Iuteuria e'yianmete. Mi'i hawyi 144000 miit'in rakaria ehay kaipyi miit'in sem toi'a­tue­ha­kye­ra'at. Tupana kapiat weium hap ko'i imowepit hamuat i'ewyte Tupana Hũ hit Kuteiru kapiat weium hap imowepit hamuat te'e­ro­py­hu'at mi'iria 144000 Iuteuria Iesui mohey haria.
REV 14:5 Tupana mimoe­waku ko'i kahato mi'iria katu­pono wakuaria kahato mi'iria. Yt karãpe i te'e­ro­py­hu'at Tupana ma'at haria wo i'ewyte yt karãpe i heso rakaria wo te'e­ro­py­hu'at.
REV 14:6 Mi'i hawyi uito Iuwãu wẽtup ara'a­kasa topopy rakat ywyhig muo. Mi'i hawyi toimo­herep kahato tehay wo sehay wakuat Tupana etiat mekewat sehay wakuat wuat'i e'at piat. Yt karãpiat i ikahuro rakat. Mi'i ti topopy kahato wuat'i Setama kape wuat'i ywania kape toto wuat'i pusu kuap haria kape topo­pypuo. Wuat'i miit'in kape toto hun nakaria ihup takaria i'ewyte ikytsig nakaria kape yt to'o­'e­wywuat i kape topopy. Mi'i hawyi ywyhig kaipyi toimo­herep sehay wakuap.
REV 14:7 Mi'i ti tehay pirik wo tuwẽ­powat — Eweimõ­typot o Tupana yn e. Eiwehum yn no Tupana kape e. Katu­pono yt pya hin i tut uwe waku uwe yt naku i rakat moherep hanuat tut hap e'at e. Uwe imi'a­piheg wuat uwe yt e hamo tut irane. Mi'i pote eweimõ­typot ro Atipy Nug Hat Yi Nug Hat e. Eweiky'e ro Y'y Wato Nug Hat e tehay pirik wo topopy popuo pyi.
REV 14:8 Haipepe wẽtup atipy kaipywiat mopy hat ara'a­kasa. Mi'i ihay ra'yn — Mekewat tawa Papi­runia ewywuat ikahuro ra'yn e. Katu­pono tawa Papi­runia piaria ti'a­tu­mu'e kahato miit'in ta'a­tu­waire waire e hap ete — Ewetunug no urueko ewy i'atu'e yne ywania pe — Waku yne hary­poria wewe­neru haria wo waku ahewaire aikotã mahy wo aimo­pẽ'ã wywo hap ewy i'atu'e. Mi'i pote Tupana haiwot pote toi'a­tu­moma mi'iria tawa Papi­runia piaria ewywuat gupte'en haria e mekewat mopy ywyhig muat hat.
REV 14:9 Mi'i hawyi uito Iuwãu ara'a­kasa wẽtup atipy piat mekewat typy rakat saipepiat. Mi'i hawyi mye'ym na'yn atipy piat mopy hat. Mi'i tuwẽ­powat tehay pirik wo. — Eiwe'eg wo o yt eweimõ­typot rei'o mekewat awyato tig koro 7 i'akag nakat — Uito Tupana heso rakat e. Yt eweimõ­typot rei'o iminug Tupana iã'ãkap e. Karãpe toiwan teran toset ewatu'a ete epo sese ete pote waku wãi'e­wei'e.
REV 14:10 Katu­pono — Uito Tupana heso rakat wywuat wat haria Tupana sese mi'a­piheg wo te'e­ro­py­hu'at. Yt naku i topy­hu'at i'atu­'a­piheg hap aikotã sapo hy watu'u mani hy pyre puo hap ewy — Ewetu'u yne ro e aru Tupana topy­'ahak hap wywo. Mi'i hawyi woro­ho­'o­'a­piheg aria wo e. Mi'i hawyi woro­ho­'o­mo­so­'opot wuat'i e'at pe e Tupana — Uito Tupana sese e heso rakat mõtypot haria pe. Aria sapuẽ puo i'atueiam sese topy­hu'at i'atuepiat ho'opot hap. Mi'i puo ho'opot hap sese topy­hu'at e wuat'i atipy piaria ehamo Tupana Hũ hit Kuteiru ehamo. Ewe'eg wo katu­pono mi'i tã ne'i ti aru eweho­'opot ewetunug mekewat set ehowa­tu'a ete pote. Ewetunug mekewat heso rakat ehetu­pana wo pote.
REV 14:11 Mi'i hawyi Tupana mimo­so­'opot ko'i he'yhig am ywaipe wuat'i e'at pe. Are pãi ho'opot hawe mi'iria yt te'e­roket kuap i yt te'e­re­mohy kuap i mi'iria. Haty pote yt te'e­roket kuap i at ka'ap. Katu­pono mekewat yt naku i nug hat ta'a­tunug ta'a­tue­tu­pana wo. I'ewyte hã'ãkap kape te'e­ru­we­pỹ­'ã­tutuk aikotã imõtypot Tupana ewywuat hamo. I'ewyte het ta'a­tuwan ta'a­tueo­wa­tu'a ete pote ta'a­tu­sa­ty'i saty'i hawe tukup­te'en wuat'i e'at pe.
REV 14:12 Uiwy­ria'in uito Iesui potmu'e 12 ok takat Iuwãu. Eiwe'eg wo o yt eweiwat rei'o — Uito Tupana heso rakat upi eimo­so­'opot pytkai katu­pono mesuwe yn eimo­so­'opot kuap. Waku wato­mohey Iesui ai'auka teran pytkai are'e. Waku Tupana piat ainãpin hap aiku­'uro hap kape wato­pytyk. Aito Tupana mimoe­waku ko'i pote waku wato­mohey aipe­rup'i popuo yt kat i waure­'ai'e hap are'e.
REV 14:13 Mi'i hawyi atikuap sehay atipy kaipyi uimu­'etu — Iuwãu e Etiwan itote ui'e hap e. — Waku kahato meimuẽ­waria ta'a­tu­ka­'iwat potpap ta'a­tunug ta'a­tu­ku­'uro hap kape. Waku kahato meimuẽwat te'e­ru­we­potpap ta'a­tu­ka­'iwat potpap ete mesuwat e'at pyi ta'a­tu­ku­'uro hap kape e. Mi'i hawyi Tupana Pã'ãu i'ewyte to'e — Pywo ti rat waku i'atu­potpap ho'opot hap Tupana potpap ta'a­tunug at ka'ap e. Mi'i hawyi waku pe tukup­te'en wuat'i e'at pe e Tupana Pã'ãu. Waku pe tukup­te'en katu­pono i'atu­minug ko'i yt karãpe i miit'in tiwaure i'atu­miekyi ko'i. Toĩne'en yne itote e Tupana Pã'ãu ahepe.
REV 14:14 Mi'i hawyi uito Iuwãu araha'at ywaipe hawyi ara'a­kasa wẽtup ok apyk pe ywyhig kytsig me Mi'i ti Aheyke'et ewywuat. Morekuat wato painug hap imehit rakat toĩne'en ipiit ete. Ipo pe kyse hãihyk kahato rakat mi'i kape ara'a­kasa.
REV 14:15 Mi'i hawyi uito Iuwãu ara'a­kasa wẽtup ok tuwẽtem Tupana mõtypot yat pyi hawyi tuwẽ­powat mekewat ywyhig notiat apyk piat kape — Etiterek to mikoi mehĩ ekyse wo e. Kat pote iterek hamo waku ra'yn e.
REV 14:16 Mi'i hawyi toiterek ta'yn teky­se'yp wo. Mikoi yi etiat toi'a­tunug.
REV 14:17 Mi'i hawyi araha'at wẽtup ok atipy piat ieĩne'en hat tuwẽtem Tupana yat pyi hawyi ara'a­kasa ipo pe kyse ãpo­ri'ã hãihyk kahato rakat.
REV 14:18 Mi'i hawyi araha'at hawyi ara'a­kasa wẽtup atipy piat te. Mi'i ti ipotpap mekewat aria ikamhig se rakat Tupana kapiat wuk hamuat hap ete. Mi'i hawyi ihay pirik mekewat wẽtup ok kyse'yp hãihyk ipo piat rakat kape — Etipuruk to Uwa ypia sat katu­pono i'atag na'yn e.
REV 14:19 Mi'i hawyi teky­se'yp mo toipuruk yne Uwa sat ko'i yi totepyi yne Uwa ypia kaipyi. Mi'i hawyi tohytmoi yne itok hap we ihy hep hamo. Mekewat itok hap Tupana saiwot hap ewy. Uwa sat miit'in ewy.
REV 14:20 Mi'i hawyi tuwẽtem miit'in suu ewywuat itok hawyi. Toitok yne mekewat Uwa tawa wato Ieru­sarẽi miaria hawyi ti Huu kahato itote aikotã ihyemyi'a wato sese hap ewy. Mi'i kape araha'at turan hawyi i'atuhũ kawaru hewyry mekewat miit'in suu mu'ap tote hewyry ihyemyi'a ewy miit'in suu. hut'ypy puo Uito Iuwãu mi'i tã hap ara'a­kasa yne hawyi atiwan are.
REV 15:1 Mi'i hawyi uito Iuwãu araha'at i ra'yn atipy kape. Mi'i hawyi uimo­wa­nẽtup kahato uimia­'a­kasa hap ko'i. Uimogyt hap ewy katu­pono ara'a­kasa 7 ok atipy piaria kape. Mi'iria 7 ok takaria Tupana ti'a­tu­po­'oro yi kape tosaiwot miit'in minug sa'ag etiat hap apiheg hamuat. Toi'a­tu­po­'oro mi'iria 7 ok takaria wuat'i miit'in apiheg 7 wuat hamo — Mi'i ta'a­tunug hawyi yt kat i ra'yn uipy­'ahak i'atuetiat hap e. Kat pote uimi­po­'o­roria ati'a­tu­mo­ha­ky­'e'i kahato hamuat e. Mi'i atunug hawyi toran na'yn uipy­'ahak hap e.
REV 15:2 Mi'i hawyi ara'a­kasa ihyemyi'a iwato rakat ma'ato iheg kahato rakat imehit kahato rakat. Aikotã aria ewy hẽtyhot itote ihup hap. Mi'i hawyi Tupana tum i'atuepe wepy nug hamuat mory­'awat ewywuat ma'ato haity i'atu kahato rakat. Mi'iria sa'a­wy­'iwuat ahiag akit haria ra'yn. I'ewyte yt karãpe i mekewat het 666 mimo­herep ahiag wat ta'a­tunug ta'a­tue­wa­tu'a ete haria mi'iria. Yt karãpe i ta'a­tu­mõ­typot Tupana wo mekewat yt naku i nug hat — Uito Tupana e hat ne'i. I'ewyte toiã'ãkap iminug yt ta'a­tu­mõ­typot i Tupana wo.
REV 15:3 Are pãi te'e­ru­wepy kahato sa'a­wy­'iwuat Tupana eropat sese hat ase'i Musei minug wepy hap kaipyi i'ewyte mekewat Tupana Hũ hit Kuteiru minug wepy hap kaipyi te'e­ru­wepy. — Tupana En ni urupo­typot koro i'atu'e En ni po'og hesaika torania kai i'atu'e. Eminug ko'i urumo­wa­nẽtup kahato katu­pono iwato kahato etunug kuap yt uwe minug ewy i. Wuat'i ywania akag ereĩne'en i'atu'e. Yne eminug ko'i pywo rakat yn i'ewyte yne hãpyk kahato rakat eminug ko'i i'atu'e. Yt uwe ma'at hat i En i'atu'e. Wuat'i mimõ­typot En i'atu'e. Eset ri Tupana ikahu kahato eset i'atu'e. Uruka­'iwat ti eset i'atu'e.
REV 15:4 Uruto­ken'ẽ popuo katu­pono uruewaku hap yt put'ok'e i uruehay ewywuat hamo i'atu'e. En yn ni wakuat sese i'atu'e. Tupana urumi­mõ­typot En uruto'e wuat'i e'at pe i'atu'e. Meiũran aru wuat'i ywania kaipyi wuat'i tama kaipyi te'e­ru­we­pỹ­'ã­tutuk ewawi En ni Tupana ta'a­tu'e hamo i'atu'e. Eminug wakuat heremo wuat'i miit'in ehamo. Wakuat wakuat i'atu'e Tupana pe te'e­ru­wepy puo ihyemyi'a wato upiaria.
REV 15:5 Mi'i hawyi uito Iuwãu araha'at Tupana mõtypot yat atipy piat kape. Mi'i hawyi tuwe­'o­kenhyp araha'at turan hawyi ipuo heremo kahato. Itote Ara'a­kasa sa'a­wy­'iwuat sokpe kawiat Tupana mõtypot yat aikope topy­hu'at Tupana Pã'ãu sa'a­wy­'ite teiam sokpe kawiat pe hap.
REV 15:6 Mi'i hawyi mekewat Tupana mõtypot yat pyi tuwe­nõ'ẽ mekewat 7 ok takaria atipy piaria uimia­'a­kasa sa'a­wy­'i­tewuat hap ko'i Tupana mipo­'oro miit'in apiheg hamuat tosaiwot hap wywuat hanuaria. I'atu­painug hap sokpe ikytsig kahato rakat. Ikahu kahato rakat. Ipoti'a tote toĩne'en morekuat esokpe ewywuat nu uru kawiat imehit kahato rakat mora'a sopo hamuat.
REV 15:7 Mi'i hawyi mekewat 4 ok takaria wuat'i e'at piat ieĩne'en haria tum 7 ok takaria atipy piaria pe 7 kamũti imehit rakat kawiat. Mi'i 7 eiam me howapy kahato Tupana saiwot hap wywo miit'in yi totiaria apiheg hamuat.
REV 15:8 Mi'i tutum i'atuepe hawyi Tupana mõtypot yat topy­hu'at howapy kahato ra'yn imõtypot hap ywyhig imehit rakat ewy. Mi'i hawyi yt uwe i teke kuap itote. Uipot­po­'o­roria ti'a­tu­'a­piheg yne hawyi waku eiwe­hyt'ok i ra'yn uimõ­typot hap yat pe e. I'atu­moe­ha­ky­'e'i hap tokosap hawyi waku eiwe­hyt'ok i ra'yn e. Uito Iuwãu mi'i hap kape ara'a­kasa kahato.
REV 16:1 Mi'i hawyi uito Iuwãu atikuap ihay wato kahato Tupana mõtypot atipy piat kaipyi — Uheropat haria atipy piaria eweiwat ro meiũpepyi yi kape ui'e hap ewy e. Ewetioto ro kamũti irania'in meimuẽwat howapy uhaiwot hap wywuat rakat e. Put'ok­'e­wei'e uhepiat eipo­'oro hap tote hawyi ewehytpok kamũti pyt'at aiũpe woro­ho­'o­po­'oro hap tote e 4 ok atipy piaria pe.
REV 16:2 Mi'i hawyi toto sa'a­wy­'iwuat atipy pyi ta'a­tu­'ã­ti­'y­pykiat wywo. Put'ok'e mytyp tote hawyi tohytpok mekewat — Uito Tupana e hat heso rakat mohey haria ete. Meimuẽwat hã'ãkap mohey haria ete. Mekewat — Uito Tupana e hap set howa­tu'a etiat rakaria ete. Mi'i hawyi mi'iria ete hepihi pihi sa'ag sat'e kahato i'atupiit ete yt tokã'ã rakat nuat i hap kape ara'a­kasa.
REV 16:3 Mi'i hawyi typy ok toto atipy kaipyi y'y wato kape. Toipugha y'y wato pe hawyi i'ok puk hap ewy huu nem nakat ewy y'y wato pe. Mi'i hawyi yne yne y'y piaria topap.
REV 16:4 Mi'i hawyi wẽtup ok i ra'yn toipo­'oro atipy kaipyi torania ihy koro kape i'ewyte wuat'i y'y hit'i ko'i kape.
REV 16:5 Mi'i hawyi mye'ym nakat ra'yn toipo­'oro hawyi mi'i ti'okpun itote Tupana saiwot hap. Teke y'y pe hawyi suu wo y'y topy­hu'at. Mi'i hawyi atikuap sehay — Y'y topy­hu'at suu ewy e. Mi'i hawyi mekewat kamũti erut hat tuwẽ­powat — Waku ra'yn e emiky­'esat ewy Tupana e katu­pono sa'a­wy'i mesuwat yi totiaria ta'a­tu­'uka emipo­'o­roria ehay moherep hanuaria. Ta'a­tu­pugha emiit suu mesuwat yi tote e. Mi'i pote koran etum na'yn i'atu­mi'u wo suu katu­pono yne y'y topy­hu'at suu wo ra'yn e. Waku etipoepyk mi'iria katu­pono yt naku i kahato emipo­'o­roria suu ok pun haria e.
REV 16:6 I'atu­'a­piheg hap i'atu­minug sa'ag ok tã etum e. Mi'i pote hãpyk kahato etunug no e. Wakuat yn nug hat en Tupana e. Nimo pyi mesup te i'ewyte wuat'i e'at pe waku kahato En e. Koitywy i'atu­we­'y­'utui turan suu yn topy­hu'at ta'a­tu­mi'u wo e atipy kaipywiat y'y nug suu wuat erut hat.
REV 16:7 Mi'i hawyi atikuap sehay aikope ta'atuium Tupana kape hap kaipyi yparakai kaipyi — Pywo ti rat e'e hap ewy etunug no Tupana e eti'a­tu­poepyk emipo­'oro auka haria Tupana e. Waku eti'a­tu­'a­piheg mi'iria e.
REV 16:8 Mi'i hawyi ara'a­kasa 4 ok takat kamũti wywo hewyry rakat kape. Mi'i hawyi toi'okpun kamũti pyt'at at ete hawyi at yt sa'a­wy­'iwuat ewy hin i. Po'og hakup sa'a­wy­'iwuat kai hawyi miit'in ete hakup kahato ra'yn.
REV 16:9 Mi'i hawyi — Yt naku i kahato En Tupana i'atu'e yi totiaria. Urumo­so­'opot kahato at wo i'atu'e. Etunug yt naku i kahato at wo uruete i'atu'e. Yt kan hamo i En uruipuẽti. Wãi'i­'a­tu'e. Etunug hãpyk i ro at i'atu'e. Ma'ato yt te'e­ra­'aipok hin i Tupana kape ta'a­tu­minug sa'ag kaipyi pytkai mio tã i'atu'e. Yt te'e­ru­we­pỹ­'ã­tutuk teran hin i Tupana kape — Waku kahato En Tupana ta'a­tu'e hamuat. Yt karãpe i te'e­ru­wehum Tupana Kape.
REV 16:10 Mi'i hawyi uito Iuwãu araha'at wẽtup ok atipy piat toto teka­mũti wywo hap kape. Toto aikope yt naku i rakat ta'apyk morekuat no hap kape Tupana saiwot hap kamũti howapy rakat wywo toto. Mi'i ti put'ok­to'e hawyi toi'okpun morekuat sa'ag ete hawyi yne hetama i'ypyryp sese tapy­hu'at. Yt karãpiat ewy i i'atu­mo­so­'opot kahato mi'i hap ok tã. Mi'i hap upi kak'i­'a­tu'e kak'i­'a­tu'e — I'ypyryp sese i'ypyryp sese urumo­so­'opot sese i'atu'e kakta­'a­tu'e popuo.
REV 16:11 — Haty ti rat i'atu'e haty ti rat ahepihi i'atu'e te'e­ruwak popuo — Yt naku i kahato En atipy piat Tupana i'atu'e. Yt karãpe i uruta­'aipok uruminug sa'ag myi i'atu'e i'atuehay popuo.
REV 16:12 Mi'i hawyi ara'a­kasa 6 ok hap ta'yn atipy piat kamũti wywuat hat hawyi toto y'y wato Eurate hy kape. Mi'i i'okpun teka­mũti piat Tupana saiwot hap y'y wato pe hawyi y'y wato Eurate hy ihysik ra'yn hawyi — Pyno waku watuwat ra'yn mesup Iuteu ywania momã hamo katu­pono koitywy wati­po­'oro kuap ahesu­ra­ra'in y'y wato sakpo i'atu'e more­kuaria to'ope at min'e hap totiaria. Koitywy toĩ na'yn y'y wato sakpo mu'ap ihy sik hawyi i'atu'e.
REV 16:13 Mi'i hawyi uito Iuwãu araha'at moi'ok kape mekewat yt naku i nug hat — Uito Tupana heso hat kape. I'ewyte mekewat yt naku i nug hat iã'ãkap kape ara'a­kasa. Araha'at turan ara'a­kasa ahiag pã'ãu mye'ym ok tuwe­nõ'ẽ iwẽ pyi. Yt ikahu hin i rakat aikotã wa'asa sa'ag ewy.
REV 16:14 Mi'i hawyi mi'iria mã'ãu sa'ag mye'ym ok takaria inug kuap kahato yt miit'in minug kuap ewy i ta'a­tunug wuat'i miit'in mowa­nẽtup hamo. Mi'i hawyi mye'ym ok takaria ahiag pã'ãu sa'ag ko'i kawiat tuwat aikope more­kuaria tukup­te'en hap kape. Mi'i hawyi te'e­ru­we­'a­tunug yne more­kuaria Tupana etiat wu'uka nug hamo te'e­ru­we­'a­tunug ta'a­tue­su­ra­ra'in wywo. Mi'i hawyi te'e­ru­we­'a­tunug yne torania hawyi Tupana to'e — Koitywy yt pya hin i hamuat uhe'at — Uito po'og hap atimo­herep wuat'i miit'in me hap e'at e Tupana. Wuat'i sura­ra'in te'e­ru­we­'a­tunug mekewat y'y wato ihypap takat sakpo.
REV 16:15 Mi'i hawyi Araha'at turan wẽtup ok to'e — Eiwe'eg wo o miit'in yne yi totiaria e. Eiwa­tetup o katu­pono sero'ok e hat ewy ariot e. Yt uwe i ti ikuap karãmuo uhut hap e. Mi'i pote eweikup­te'en sokpe piaria ewy waku uipuẽti hamo e. Yt pote aru eiwe­mõti kahato yt ehesokpe rakaria ewywuaria eweipy­hu'at uhut turan ariot pote e.
REV 16:16 Mi'i hawyi ahiag pã'ãu wa'asa ewywuaria te'e­ru­we­'a­tunug yne mesuwat yi totiaria ta'a­tue­su­ra­ra'in wywo. More­kuaria i'ewyte ta'a­tue­su­ra­ra'in wywo yi Iuteuria etama kape te'e­ru­we­'a­tunug tu'uka hamo. Iuteuria pusu puo yi wato Amaketũ tote te'e­ru­we­'a­tunug.
REV 16:17 Mi'i hawyi uito Iuwãu araha'at atipy kape turan ara'a­kasa wẽtup ok 7 ok hap toto kamũti wywo. Mi'i hawyi 7 ok hap toran hap ta'yn toto. Mi'i hawyi toto yi kape ma'ato put'ok to'e hap e'yianmete toi'okpun kamũti pyt'at Tupana saiwot hap ywytu ete ywyhig ete. Mi'i tutunug hawyi atikuap ihay pirik Tupana mõtypot yat atipy piat kaipyi aikope Tupana ta'apyk Morekuat no hap kaipyi. — Torania ra'yn uhaiwot hap atunug e. Yne ra'yn yt kat i ra'yn po'og e.
REV 16:18 Mi'i hawyi ywytu uato kahato pig'e pig'e kahato. Mi'i hawyi atikuap i'atu kahato miit'in kak'i­'a­tu'e kak'i­'a­tu'e. Mi'i hawyi i'atu kahato mory'a ewy hewo yi kape. Mi'i hawyi huruhu­ru'e kahato yt ipo'inik takat i. Mi'i hawyi tyry'e haty wo kahato yi. Yt karãpiat ewy i huruk'e hap. Nimuat miit'in nug hap turan yt uwe i ta'a­kasa mi'i ewywuat yi huruk'e hap. Yt kat i huruk'e hap po'og mote.
REV 16:19 Mi'i hawyi mekewat tawa iwato'in nakat Papi­runia mekewat tawa po'og iwato rakat pok pok'e yi tyry'e kahato itote pote. I'ewyte yne tawa ko'i ta'at yne yi totiat ko'i yi tyry'e poity'i pote hewo yne. — Yt naku i kahato tawa Papi­runia piaria e Tupana. — Ati'a­tu­poepyk i'atu­minug ko'i uhaiwot i'atu­minug sa'ag hap kaipyi e. Yt karãpe i ati'a­tu­waure kuap i'atu­minug sa'ag ko'i. Pyno ei'a­piheg uhepiat hap topy­hu'at mekewat kui'a pyt'at howapy aikotã mani hypyre wywo hap ewy. Ewetu'u ro mi'i are'e ehepe. Uhaiwot hap wywo ewetu'u ro e irania'in me yi Papi­runia pe Tupana.
REV 16:20 Hewo yne yity'ok ko'i hawyi ta'a­tukat turan yt uwe i ipuẽti aiũpe aiũpe yity'ok ko'i hap yt uwe i ikuap. Tuweityk ta'yn yi tyry'e hawyi y'y wato py'a­setpiat ko'i i'apo­rok'e yne ra'yn.
REV 16:21 Mi'i hawyi hewo nukara ko'i iwato'in nakat i'aman wato ewy. Aikotã ipotyi sese hap porap yt uwe i hupit hap ewy. Mi'i hawyi hewo hewo miit'in ete. Mi'i hawyi yi totiaria — Yt naku i kahato En Tupana i'atu'e. Kat pote yt naku i etunug uruete i'atu'e. Yt naku i kahato nukara ko'i i'atu'e. Wãi i'atu'e. Yt naku i kahato Tupana i'atu'e ta'a­tu­py­'ahak hap wywo. Mi'i hap ewy ara'a­kasa uito Iuwãu.
REV 17:1 Mi'i hawyi wẽtup atipy piat to'e uhepe — To'iro uhupi Iuwãu e. Atimo­herep teran epe aikotã aru Tupana ti'a­tu­'a­piheg tawa wato Papi­runia piaria hamuat hap kape e uhepe mekewat wẽtup kamũti pyt'at okpun hat. To'iro uhupi e. Atimo­herep epe yt i'atu­we'eg i hap e. Aikotã wẽtup ok hary­poria wuat'i ihainia wywo hat ewy tukup­te'en mi'iria e. Mi'i pote Tupana ti'a­tu­'a­piheg mi'iria tawa Papi­runia piaria e. To'iro pyno mekewat tawa wato kape. Wanĩkap ko'i yt tuwe­hyt'ok kuap i tawa Papi­runia pe katu­pono mekewat tawa topyhyp hawe toĩne'en ihy esaika kahato howawi pote sura­ra'in yt tuwe­hyt'ok kuap i e.
REV 17:2 Yt naku i kahato mi'iria e uhepe. Tupa­naria weneru haria mi'iria e. Aikotã yt iwe'eg i sese rakaria ewy tukup­te'en e uhepe. Ta'a­tu­kaykay tuwe­wawi topiit kyi'at haria e. Mi'i ewywuat tawa Papi­runia piaria tukup­te'en e. — To'iro ahewaire waire i'atu'e wuat'i ywania pe. Aikotã mahy weneru haria tikaykay mahy kyi'at haria hap ewy tawa wato Papi­runia piaria tukup­te'en e uhepe. Mi'i hap ewy tawa Papi­runia ti'a­tu­kaykay more­kuaria ta'a­tue­miit'in wywo wuat'i tupa­naria mõtypot hap etiat i'atu­mu'e hamo e uhepe mekewat kamũti pyt'at okpun hat atipy kaipywiat.
REV 17:3 Mi'i hawyi uhereto mekewat atipy piat hap ara'a­kasa uimu­'etu Tupana timo­herep yne. Mi'i hawyi put'ok­'are yahig wato tote. Itote ara'a­kasa hary­poria waire waire nug hat yt naku i sese rakat apyk pe tohũ awyato tig koro sa'ag note. Ihũ awyato ihup kahato aikotã wewe­neru haria esokpe hup hap ewy. Ihũ awyato sa'ag nakat toĩne'en 7 i'akag nakat ipiit ete. 10 i'aut rakat 7 akag totiat ko'i. Ipiit etiat miwan sa'ag kahato Tupana sese mohit kahato hap toĩne'en — En ni yt naku i kahato Tupana e tope ete miwan sa'ag hap ko'i hap kape ara'a­kasa.
REV 17:4 Itote mekewat ipiit weneru hat esokpe ihup kyre hap ewy. Tuwe­painug kahato wahi hekat rakat ko'i wo. Nu ikahu kahato rakano tuwe­painug hap ihup ika'ay ikytsig ihyryp'i. Ipo pe hekui'a mahy eiam imehit kahato rakat hekat rakat. Hekui'a topy­hu'at Iesui mohey haria suu. Miit'in toimoe­saika yt naku i nug iwywuat hamuat hap.
REV 17:5 Mekewat hary­poria yt naku i nug hat akag ete toĩne'en mekewat hary­poria set itote miwan me — Uito ti wuat'i wewe­neru haria ty e. Uito tawa Papi­runia piaria morekuat hary­poria kawiat e. Yt naku i nug hap etiat miit'in mu'e hat uito e. Yt uwe i te mikuap yt naku i nug hap moherep hat uito e miwan howa­tu'a ete.
REV 17:6 Araha'at hawyi mekewat yt iwe'eg i rakaria akag hary­poria kawaiat temahy u at ka'ap takat ewy topy­hu'at hemahy Iesui mohey haria suu. Yt ta'a­tu­'atoiat hin i Iesui mohey haria suu u hap. Tupana eropat haria sese suu hemahy wo. I'ok sese mi'i mahy wo. Mi'i hawyi arewa­nẽtup hawyi yt naku i sese sa'ag kahato hap ewy are'e uiwa­nẽtup hawe. Mi'i rokirẽ yt heremo hin i uimu­'etu.
REV 17:7 Mi'i hawyi mekewat atipy piat to'e uhepe — Yt heremo hin i emu'etu ewa'a­kasa hap e. Pyno atimo­herep epe mekewat hary­poria yt iwe'eg i rakat koro hap ete uwe uwe mekewat awyato tig koro ihũ sa'ag topy­hu'at mekewat 7 i'akag nakat 10 i'aut rakat mekewat hary­poria ereto hat ete hap ahenoi epe e.
REV 17:8 Mekewat awyato tig sa'ag sa'a­wy'i toĩne'en yi tote ma'ato mi'i hawyi iku'uro hawyi meiũran tuwẽtem gu'uro pyi mekewat yi ka'a sa'ag iwato rakat kaipyi yt ika'a sasat rakat i kaipyi e. Mi'i hawyi yi totiaria yt Iesui mohey i haria te'e­ru­wa­nẽtup kahato toĩne'en i hawyi e. Mekewat e'at pe — Are pãi are an iku'uro sa'a­wy'i mesuwat awyato wato tig ewywuat ma'ato mesup tuwe­mo­herep i ra'yn i'atu'e aru mekewat meimuẽ­waria yt Tupana miwan miaria i'atuset pehik i haria — Mi'iria ti waku tukup­te'en wuat'i e'at pe uiwywo atipy pe yt to'e i Tupana miwan me haria. Sa'a­wy'i Tupana tiwan na'yn tomohey haria sa'a­wy'i sese at yi waikiru yt kat i te turan toiwan tomi­moieĩ­ne'en wuaria set ko'i ma'ato mekewat awyato ahiag mohey haria set ko'i yt wẽtup i Tupana miwan ete e uhepe mekewat atipy kaipywiat Tupana ehay moherep hat uhepe uito Iuwãu me.
REV 17:9 Eiwe'eg wo o eweikuap kat som Tupana to'e ahepe mesuwe katu­pono iwe'eg kahato rakaria yn tikuap ui'e hap mesuwe uito Iuwãu. Pyno mekewat hary­poria hũ awyato sa'ag 7 i'akag ko'i 7 more­kuaria ewy tukup­te'en. Mi'iria ti hary­poria yt iwe'eg i rakat e'aito ko'i mi'iria. Meke­waria 7 ok takaria te'e­ra­'apyk miit'in akag ko'i wo tawa wato yt naku i rakat e'yity'ok ko'i tote 7 yity'ok ko'i tote te'e­ra­'apyk.
REV 17:10 Mi'i hawyi morekuat ko'i ho'opap kahato ra'yn 5 iku'uro ra'yn mekewat 7 yity'ok totiat etawa pe. Mi'i hawyi typy more­kuaria yn na'yn toĩne'en. Wẽtup toĩne'en mesup te morekuat no ma'ato mi'i ti iku'uro irane hawyi mekewat wẽtup ok tuwe­mo­herep morekuat no. Ma'ato mi'i ti yt toĩne'en mot'i morekuat no.
REV 17:11 Mi'i hawyi mekewat hary­poria sa'ag hũ awyato sa'ag 7 ok takaria more­kuaria saipepiat tuwenug na'yn morekuat no. Mi'i ti morekuat koro wo topy­hu'at ra'yn 8 rakat. Mi'i ti ipotpap kahato morekuat no ma'ato ta'at aria wato pe wuat'i e'at piat ho'opot piat pe.
REV 17:12 Mi'i hawyi atipy piat to'e i uhepe — Iuwãu e mekewat ihũ 10 i'aut rakat mekewat hary­poria hũ awyato tig ewywuat ipiit etiat tukup­te'en aikotã 10 more­kuaria hap ewy. Mesup yt morekuat no i ma'ato meiũran aru topy­hu'at more­kuaria wo e. Meiũran aru mekewat hary­poria hũ yt naku i rakat ti'a­tunug more­kuaria wo to'e­wywuat no ma'ato aru yt tukup­te'en mot'i i iwywo more­kuaria wo e.
REV 17:13 Mi'iria wẽtup wanẽtup hap ewy tukup­te'en mekewat hary­poria hũ wywo. Meke­waria 10 i'aut ewywuaria hesaika kahato rakaria tukup­te'en e. Mi'i hawyi i'atue­saika hap wo ta'a­tu­mõ­typot mekewat awyato sa'ag me. Mi'i ti topy­hu'at more­kuaria 10 ok takaria mipo­'oro hanuat i'atu­mi­ky­'esat nug hamuat topy­hu'at mekewat hary­poria hũ awyato sa'ag nakat.
REV 17:14 Mi'i hawyi 10 i'aut rakaria tu'uka Tupana hũ hit Kuteiru wywo ma'ato po'og Tupana hũ hit Kuteiru i'atu­'akit hano topy­hu'at. Katu­pono po'og po'og Morekuat no Iesui toĩne'en. I'ewyte hemiit po'og tuwat Ta'a­tu­ka­'iwat upi. Yt waure­'i­'a­tu'e hin i ta'a­tu­ka­'iwat ete pyi. Ta'a­tu­'auka hap kape yt ta'a­tu­'atoiat hin i. Mi'i pote tukup­te'en Ta'a­tu­ka­'iwat wywo mekewat hary­poria hũ 10 i'aut rakat okpe tote. Mi'i hawyi Tupana hũ topy­hu'at wuat'i Ka'iwat no Wuat'i Morekuat Porekuat no topy­hu'at.
REV 17:15 Mi'i hawyi mekewat atipy piat to'e i uhepe — Mekewat yt iwe'eg i rakat ta'apyk itote yne y'y ete katu­pono y'y wato tapy­hu'at wuat'i miit'in ewywuat. Y'y wato topy­hu'at wuat'i pusu kuap haria aikope aikope tukup­te'en wuat'i y'y ete hap ewy e. Mi'i tote toĩne'en mekewat hary­poria i'atu­mu'e hamo tupa­naria mõtypot hap ete waku ahewaire waire e hap ete e uhepe.
REV 17:16 i'ewyte to'e uhepe — Mekewat yt iwe'eg i rakat hũ ete era'a­kasa 10 i'aut ko'i i'atu­py­'ahak kahato irane mekewat hary­poria ete e. Tu'uka kahato iwywo. Meiũran ihũ aut ko'i tihiot yne hesokpe hary­poria wat e. Mi'i hawyi yt hesokpe i rakano topy­hu'at e. Mi'i hawyi topy­hu'at hiwu e. Mi'i hawyi ta'a­tusuk suk ta'a­tu'aut no e. Mi'i hary­poria ta'a­tuwuk yt iwe'eg i rakat aria wo e. Mio tã hap ewy irane topy­hu'at e atipy piat uhepe.
REV 17:17 Mi'i hawyi Tupana ti'a­tu­mo­wa­nẽtup 10 i'aut rakat more­kuaria ewywuat hary­poria hũ waku topy­hu'at eipo­rekuat no e hap ete. Mi'i hawyi ta'a­tunug Tupana miky­'esat ewy yt ta'a­tukuap pytkai i e. Mi'i pote te'e­ro'e — Waku ereĩne'en urupo­rekuat no i'atu'e hary­roria hũ me ne'i. Mi'i hawyi — Waku e katu­pono Tupana timoma teran. Mi'i e hap ewy e atipy piat uhepe.
REV 17:18 Etikuap mekewat ewa'a­kasap hap hary­poria e. Mi'i ti mekewat tawa wato yt naku i nug hat aikope wuat'i mesu­wa­rotiat more­kuaria sa'ag nug haria akag wo ta'apyk morekuat no e uhepe mekewat atipy piat. Uito Iuwãu ara'a­kasa yne mi'i hap ko'i kape.
REV 18:1 Mi'i hawyi uito Iuwãu araha'at hawyi ara'a­kasa wẽtup ok tut atipy kaipyi yi kape. Tupana emiit Morekuat ewy. Mi'i ti sut hat ipo'oro kuap kahato Morekuat ewy. Imehit kahato rakat. Imehit hap kaipyi yi mesu­wa­rotiat po'og hẽtyhot sa'a­wy­'iwuat kai.
REV 18:2 Mi'i hawyi atipy kaipywiat to'e tehay pirik wo — Hewo hewo irane tawa wato Papi­runia e. Tuweityk ta'yn wuat'i mi'atoiat no ra'yn tapyhu'at tawa sa'ag Pari­runia e. Koitywy yt uwe i toĩne'en itote e. Ahiagnia tukup­te'en itote iehog ko'i yn na'yn e. Tawa Papi­runia pe topy­hu'at uruwu eiam mo hywi eiam wo e. Yne kat kat sa'ag eiam mo topy­hu'at itote e.
REV 18:3 Nimo te pyi tawa Papi­runia piaria ti'a­tu­mu'e kahato wuat'i ywania waku ahewaire hewaire e hap ete e. Aikotã mahy weneru haria wo — Etu'u ro yt pote urui'ahyk en e haria ewy tukup­te'en wuat'i hary­poria wewe­neru hat ete e. Mi'i nug hap ete yne more­kuaria waku i'atu'e. Yt wãi'i­'a­tu'e hin i katu­pono i'atuekat tut mekewat kaipyi e. I'ewyte karaiwa ko'i i'atu­potpap mekewat ete e. Mi'i kaipyi yn tukup­te'en hekat rakaria wo e. Ta'a­tu­we­neru kahato tupana iã'ãkap ko'i tawa Papi­runia pyi e. Tawa Papi­runia ekat kaipyi te'e­ru­we­moekat e. Koitywy tawa Papi­runia i'anam irane tehay pirik wo wuat'i pe e.
REV 18:4 Mi'i hawyi atikuap wẽtup ok tuwẽ­powat atipy kaipyi hap — Uhemiit'in e eiwe­nõ'ẽ ro pya kahato mi'iria kai e. Yt ewetunug nei'o mi'iria tawa Papi­runia piaria minug ewywuat e. Ewetoiat ro tupa­naria e. I'ewyte i'atue­waire atuewaire hap eweitoiat e. Yt naku i aru eweikup­te'en i'atu­py­'a­setpe uhepiat i'atu­'a­piheg hap e'at pe ra'yn e. Katu­pono ati'a­tu­'uhu i'atu­'ahu hap hamo mi'iria e. Yt atiky­'esat i sat'e ehete e sehay atipy kaipyi.
REV 18:5 I'atu kahato i'atu­minug sa'ag i'atuwat e. Mi'i pote koitywy yne tawa Papi­runia piaria yt naku i nug haria sese te'e­ro­py­hu'at i'atu'e to'ope atipy piaria. Mi'i hap ara'a­kasa pyno — Yt eweikuap i uhepiat ehewãi hap pote woro­ho­'o­'a­piheg eipe wy e. Woro­ho­'okuap ta'yn eipe e. Yt naku i nug hap ete e Tupana tawa Papi­runia piaria pe.
REV 18:6 Eweikup­te'en eipe wepit weneru hat ewy e. Mi'i pote ei'a­piheg uhepiat hawe eweikup­te'en e Tupana katu­pono ewei'a­tu­mo­so­'opot kahato uhemiit'in mi'i tã ewetunug haype hap kaipyi e. Mi'i pote woro­ho­'o­'a­piheg eipe e. Ma'ato eweho­'o­sa­ty'i saty'i hap kai aru po'og torania kai e Tupana. Ewei'a­tu­mo­so­'opot kahato uhemiit'in typy'i kahato sa'a­wy'i e. Yt miit'in ewy i ewetunug e. Ma'ato koran atunug ehete aikotã ewetunug uhemiit'in ete hap kai po'og na'yn yt naku i atunug ehete e.
REV 18:7 Aikotã wepit weneru haria sese ewy eweikup­te'en tawa Papi­runia piaria e. — Yt karãpe i ikahuro uhe'ai­toria e haria ewy. Pyno uhekat rakano mot'i areĩne'en ewei'e. Yt karãpe i uhatek ewei'e pote yt iwe'eg i rakat hary­poria ewy eweikup­te'en e. Aikotã te'e­ro'e — Uito areĩne'en morekuat ehary'i wo e haria ewy tawa Papi­runia piaria ma'ato yt mi'i tã hin i e. Ihaky'e i rakaria sese eweikup­te'en e. Aikotã aikotã eweho­'opot kak'e­wei'e kak'e­wei'e e. Ehe'aito kak potiat ewy e Tupana. Sa'a­wy'i eweimo­wato kahato ehekat ko'i — Uruto po'og e hamo ma'ato Uito po'og ei'e pote Tupana eiwe­mo­wato hap kai po'og woro­ho­'o­mohit ne'i e Tupana.
REV 18:8 Wẽtup e'at pe yn atunug eimoma hap ei'ahu hap ehesy'at hap eimoma hap e. Paa'ei'e hap ei'auka e. Woro­ho­'owuk yne eipe aria wo e. Uhesaika kahato ti katu­pono Uito Tupana Wuat'i akag wo areĩne'en mote e. Uito yn atikuap e. Uito Tupana sese pote atikuap kahato tawa Papi­runia piaria i'atu­minug sa'ag ko'i hap e. Mi'i pote uimi­'a­piheg wuaria wo te'e­ro­py­hu'at Papi­runia piaria e.
REV 18:9 Woro­ho­'owuk turan yhig hun aria sa'ag kawiat ta'am wuat'i mesu­wa­ro­tiaria ehamo ehetawa pyi e. Mi'i hawyi more­kuaria tuwak tuwak eiwuk hap ta'a­kasa hawyi e. — Uheha­ry'i ikahu rakat aimi­kyi'at iku'uro ra'yn i'atu'e. Ahetu­pa­naria aria mi'u wo ra'yn i'atu'e. Aikotã aru ahewaire waire hap mesup ahekat sat hamo katu­pono wuk'e yne ra'yn mote i'atu'e to'o­kak'i kahato.
REV 18:10 Pya pyi ne'i ra'yn tuwak popuo te'e­ro'e — Yt naku i kahato an pãi i'atu'e ahetawa koro Papi­runia tuwe­moma wẽtup e'at pe turan yn i'atu'e. Imi'a­piheg sese wo tukup­te'en i'atu'e to'okak'i popuo. Pya pyi te'e­ra­ha'at katu­pono te'e­ro­ken'ẽ kahato aria sat'e ta'a­tuetiat hap pupi.
REV 18:11 Mi'i hawyi weneru haria te'e­ro'e — Sa'a­wy'i tawa Papi­runia piaria kape wati­we­neru aipiit ahetu­pana ko'i yi totiaria karaiwa ko'i kape i'atu'e. Koitywy hawyi yt aikope kuap i wati­we­neru kuap i'atu'e to'okak'i popuo. Aika­'i­waria topap yne ra'yn i'atu'e.
REV 18:12 Yt kat i po'og nu imehit rakat ahekat ko'i aimi­kyi'at wuat aimi­we­neru wuat i'atu'e. Yt kat i po'og nu ikahu rakat ko'i hekat rakat ko'i painug hap i'atu'e. Yt kat i po'og wahi hekat rakat ko'i painug hap i'atu'e. Yt kat i sokpe kype ikahu rakat po'og i'atu'e. Yt kat i sokpe ipewiu rakat ha'up woity rakat i'atu'e. Hekat rakaria esokpe yt kat i ihyryp'i rakat ika'ay rakat i'atu'e. Yt kat i morekuat painug hap yt kat i aria'yp aimi­kyi'at wuat aimi­we­neru wuat i'atu'e. Yt kat i po'og heiam ikahu rakaria nu ikahu rakat kawiat heiam imehit rakat kawiat aria'yp itig nakat kawiat yt kat i ra'yn i'atu'e. Ikag ikytsig kahato rakat kawiat aipainug hap yt kat i po'og aimi­we­neru aimi­kyi'at wuat i'atu'e te'e­ruwak popuo i'atu'e.
REV 18:13 Yt kat i aimi'u mosẽ'ẽ hap i'atu'e. Yt kat i aimo­kamhig se hap. Yt kat i aimiwuk wuat ai'yat mokamhig se hap i'atu'e. Mahy yt kat i wy i'atu'e. Yt kat i aimi'u mokap hap i'atu'e. Yt kat i ahe'u'i i'atu'e. Yt kat i aheman nug hap i'atu'e. Yt kat i ipu'i aimi'u wo i'atu'e. Yt kat i wewato ahup aimi­we­neru wo aimi­kyi'at wo i'atu'e. I'ewyte yt kat i aihũ Kaneiru ko'i i'atu'e. Yt kat i aihũ Kawaru ahereto hap i'atu'e. Ahe'yara ko'i yt kat i i'atu'e. Yt kat i ahemiit wuat'i eropat haria yt kat sa'up i etiaria aimi­we­neru nuat aimi­kyi'at wuat i'atu'e miit'in mesu­wa­ro­tiaria te'e­ruwak popuo i'atu'e. Yt naku i ahetawa Papi­runia yhig hun aria sa'ag kawiat mi'u wo mesup ahetawa akag Papĩ­runia tapy­hu'at Tupana miwuk i'atu'e. Mi'i hawyi aikotã aru i'atu'e.
REV 18:14 Mi'i hawyi te'e­ro'e to'ope — Yt naku i yt naku i i'atu'e. Aheka­re'en aipainug kahato hap aimi­ky­'esat kahato ko'i aimikat ko'i yt kat i mesup ra'yn ahetawa wato aria hun tu'u yne i'atu'e. Imehit hap aimo­kahu hap aipainug hap yt kat hamo i rakat Tuwat yne ra'yn wuk'e yne ra'yn i'atu'e. Watikat pytkai yt kat i wati­puẽti itote mekewat waku hap ko'i i'atu'e to'ope.
REV 18:15 Wuat'i kyi'at haria wuat'i weneru haria ta'a­tuepiok kahato tawa iku'uro rakat hawyi kak'i­'a­tu'e — Sa'a­wy'i ekat kahato kaipyi uruto­py­hu'at hekat rakaria wo i'atu'e. Koitywy yt wateke kuap tawa wato Papi­runia pe katu­pono uruto­ken'ẽ kahato sio sat'e mekewat aria aimo­so­'opot hat i'atu'e to'ope yt ta'a­tu­wepit hin popuo i.
REV 18:16 Sa'a­wy'i tawa Papi­runia te'e­ru­we­painug kahato more­kuaria ewy i'atu'e. I'atue­sokpe hekat rakaria sese wo ipewiu kahato rakano ihup hawyi ihyryp'i i'atu'e. I'atu­painug hap imehit kahato rakat uru kawiat i'atu­puĩ'ã piat ko'i ti ikahu rakaria ihup ika'ay rakaria i'atu'e. I'ewyte i'atue­wahi ko'i ti ikahu rakaria i'atu'e. I'atu­painug hap ti hekat rakaria sese wo i'atu­painug hap i'atu'e to'ope.
REV 18:17 Koitywy yt uwe i itote tuweityk yne ra'yn i'atu'e. Meremo i'atue­ka­re'en ko'i yt kat hamo i'atu'e. Sa'a­wy'i i'atu kahato tawa wakuat Papi­runia wã tote tukup­te'en yara wato piaria i'atu'e. Sa'a­wy'i urutioto yne aheka­re'en ko'i aikope aikope mesuwat yi tote i'atu'e. Mesup yt kat i yara tawa Papi­ruinia wã tote pãi an i'atu'e.
REV 18:18 Karãpe yara wato piaria te'e­ra­'a­kasa iwuk hap kapiat yahig hun sa'ag kapiat hawyi te'e­ro'e ta'a­tuehay pirik wo — Yt naku i ra'yn katu­pono ahetawa Papi­runia po'og ikahu torania kawiat yt kat i ra'yn mesup i'atu'e te'e­ruwak popuo.
REV 18:19 Ahekat iwato kahato tuwat yne i'atu'e kakta­'a­tu'e popuo. Ahetawa wato yahig ewy topy­hu'at i'atu'e to'o­kak'i haype ta'a­tu­wowo yi ta'a­tu­'akag note e ta'a­tueko ewy paa'i­'a­tu'e hap moherep hamo. Eiwe­ha'at ro i'atu'e aimoekat hat tuweityk ta'yn i'atu'e. Sa'a­wy'i ahe'yara ta'a­tu­puru sa'up ete ahe'yara wato i'atue­ka­re'en ereto hamo aikope aikope ha'up iwato ta'atuium i'atu'e. Ma'ato mesup yt kat kuap i ra'yn watioto i'atuekat wuk'e yne hawyi i'atu'e te'e­ruwak popuo.
REV 18:20 Mi'i hawyi uito Iuwãu are'e atipy piaria pe — Waku kahato eiwe­mo­wepit ro atipy pe katu­pono Tupana tiwuk ta'yn tawa sa'ag Papi­runia are'e. Eiwehum no itotiaria katu­pono Tupana ehay moherep haria Papi­runia piaria mi'auka ko'i yt uwe i aru waku ewei'e are'e. I'ewyte uiwy­ria'in 12 ok takaria Iesui potpo­'o­roria eiwe­mo­wepit ro katu­pono mesup Tupana eipoepyk ta'yn ei'auka haria tawa Papi­runia piaria yt uwe i mesup wote are'e uimu­'etu.
REV 18:21 Mi'i hawyi surara akag atipy piat hesaika kahato rakat totat nu myp wato ok tã hawyi toipun haty wo atipy kaipyi hawyi ta'at y'y wato sese pe. Mi'i hawyi min'e hawyi to'e haty wo — Meiẽ mekewat nu wato ewy topy­hu'at aru tawa wato Papi­runia ewywuat katu­pono Tupana tipugha tawa Papi­runia aikotã yt heremo hin i uimipun nu wato hap ewy e. Yt uwe i aru ipuẽti kuap mekewat tawa e haty wo.
REV 18:22 Yt kat i hairu sa'ag Papi­runia pe aru e. Yt kat i wepy hap eweipuẽti aru e. Yt eweipuẽti aru wyti akuara pywiat wepy hat. Yt uwe i huhu'e haria itote e uhepe. Yt kat i mory'a saity pywiat wepy hap e. Yt kat i getap nug haria e. Yt wẽtup ok i kat ko'i kat ko'i nug hat e. Yt kat i tõgtõg'e hap e. Yt kat i itote man ko'i nug hap e atipy piat e.
REV 18:23 Yt wẽtup i hẽtyhot hap eweipuẽti e katu­pono yt karãmuo i wẽtup ok ariãty nug hat toĩne'en aru tawa Papi­runia pe e. Yt karãmuo i aru eweipuẽti wepit hap itote e. — Atiky­'esat en uheha­ry'i wo atiky­'esat en uhe'aito wo e hap yt kat i ra'yn e. Yt uwe i ihainia'in wywuat hat yt uwe i hary­po­ria'in wywuat hat sa'a­wy'i mi'i yn itote pytkai e. Karaiwa akag ko'i yn itote sa'a­wy'i heso rakaria wo'o­mo­'a­kag'aia haria yne mesu­wa­rotiat wo'o­ma'at haria yt miit ewy i ta'a­tu­mo­herep ta'a­tupo wo miit'in ekat ky'ewi ma'ato mekewat e'at pe yt wẽtup i itote e atipy piat uhepe.
REV 18:24 Tupana ei'a­piheg aru tawa Papi­runia piaria e kat pote toipuẽti kahato ehetawa pe temiit'in suu tomi­po­'oro ko'i tehay moherep haria eimi­'auka ko'i suu okpun hap toipuẽti temiit'in ko'i suu eimi­'auka ko'i yne pote ei'a­piheg sese aru haty wo e atipy piaria hesaika kahato rakat tehay pirik wo. Mi'i hap etiat atiwan yne uito miit'in mosa­ty'i Iuwãu.
REV 19:1 Tawa Papi­runia wuk'e hawyi atikuap wepy hap i'atuehay typy'i kahato hap ewy typy'i kahato haty wo heremo kahato i'atuehay. Mio tã i'atu'e te'e­ru­wepy — Urutu­wehum kahato ewawi Tupana i'atu'e. En yn Urueha­kye­ra'at hat i'atu'e. En yn urumi­mõ­typot i'atu'e. En yn UrueTupana ereĩne'en Wuat'i Porekuat no i'atu'e.
REV 19:2 En yn waku miit'in apiheg kuap hat katu­pono En yn etikuap i'atu­py'a piat ko'i kat ko'i kat ko'i hap i'atu'e. Pywo hap upi yn eti'a­tu­'a­piheg i'atu'e. Sa'a­wy'i tawa Papi­runia piaria hary­poria yt iwe'eg i kahato rakat ewy tukup­te'en katu­pono ta'a­tu­'a­tu­mu'e kahato yi totiaria yt naku i nug hamo wuat'i hary­poria wywo wuat'i ihainia wywo i'atu'e. Mi'i hawyi emipo­'oro emiit'in auka haria tukup­te'en mi'iria ma'ato mesup eti'a­tu­moma yne mi'iria emiit'in suu okpun hap upi i'atu'e. Waku kahato En i'atu'e.
REV 19:3 Eti'a­tu­'a­tu­poepyk ta'yn mote urutu­wehum kahato ewowi Tupana i'atu'e. Mi'i hawyi mekewat tawa Papi­runia wuk hap yt karãpe i aru ho'osep i'atu'e. Ywyhig hun yn na'yn ta'am itote pyi at ka'ap wuat'i e'at pe i'atu'e. Waku kahato En Tupana i'atuehay atipy piaria sem wepy hawe.
REV 19:4 Mi'i hawyi mekewat sa'a­wy­'i­wuaria 24 ok takaria te'e­ru­we­pỹ­'ã­tutuk Tupana ewawi imõtypot hamo. I'ewyte 4 ok takaria wuat'i e'at piaria te'e­ru­we­pỹ­'ã­tutuk howawi pywo kahato ti rat i'atu'e hap ewy. I'ewyte urutu­wehum ewawi UrueTupana i'atu'e.
REV 19:5 Mi'i hawyi uito Iuwãu atikuap sehay aikope Tupana ta'apyk Morekuat no hap kaipyi mio tã e — Mehĩ'in mana'in e to'iro watu­wehum ahehay wo Tupana kape e. To'iro Tupana eropat haria wati­mõ­typot Tupana ahehay wo e. Torania aito sio aito more­kuaria sio aito semiit to'iro watu­wehum kahato Tupana kape ahehay wo e sehay aikope Tupana ta'apyk kaipyi.
REV 19:6 Mi'i hawyi uito Iuwãu atikuap wẽtup i wepy hap typy'i kahato rakaria. Te'e­ru­wepy kahato aikotã ywytu uato sese puehay ewy — Urutu­wehum ewowi Tupana urutu­wehum ewowi Tupana urutu­wehum ewowi Tupana mio tã uruto'e katu­pono etunug Esaỹry ra'yn Wuat'i Porekuat no urumi­ky­'esat ewy i'atu'e te'e­ru­wepy puo.
REV 19:7 — To'iro watu­we­mo­wepit i'atu'e to'ope. To'iro watu­wehum Tupana kape ahehay wo i'atu'e to'ope. To'iro waku kahato En katu­pono mesup etum esa'yru pe heha­ry'i ikahu kahato rakat i'atu'e. Waku pe tuwe­painug me ikahu kahato pe ihary'i toine'en i'atu'e.
REV 19:8 He'aito Tupana Sa'yru ikahu rakat no toine'en tesokpe pe ikytsig rakano esokpe ikahu kahato pĩ'ã i'atu'e. Ikytsig imehit kahato aikotã Tupana emiit'in imimo­kytsig ewy esokpe ikahu hap ewy i'atu'e.
REV 19:9 Mi'i hawyi atipy piat to'e uhepe — Iuwãu e etiwan no kat som are'e epe hap ko'i e katu­pono Tupana e hap ahenoi epe — Waku ra'yn Uha'yru ehary'i hap e'at e. Mesup atunug ienuk hap imõtypot hamo e. Uha'yru ehary'i hap mõtypot hap ienuk hap kape woro­ho­'o­kaykay wen ma'ato yt ehewaku hap kaipyi i woro­ho­'o­kaykay eipe e. Woro­ho­'o­kaykay Uha'yru ehary'i hap mõtypot hap ienuk hap kape woro­ho­'o­ky'e kahato pote e. Woro­ho­'o­'airo uimi­poi­tyro ko'i uhegyi'at pote e Tupana e.
REV 19:10 Mi'i hawyi wẽtup ok to'e atipy piat uhepe Iuwãu e Tupana sese ihay teran ewywo e. Mi'i hawyi arepỹ­'ã­tutuk mekewat atipy piat Tupana ehay moherep hat kape hawyi atimõ­typot kahato mi'i wen ma'ato — Iuwãu e yt uimõ­typot tei'o katu­pono uito e'ewywuat Tupana eropat hat yn e. Yne ewyria'in Iesui mohey haria ewywuat arepy­hu'at Tupana eropat hat e. Uito ti yt po'og i ekai e. Waku Tupana yn wati­mõ­typot katu­pono sa'a­wy­'i­wuaria Tupana ehay moherep haria Iesui etiat ta'a­tu­henoi ta'a­tuwẽ pyi yianmete ta'a­tu­henoi Iesui minug ko'i e mi'iria ewy areĩne­'en e atipy piat uhepe.
REV 19:11 Mi'i hawyi uito Iuwãu araha'at atipy kape turan heremo ipuo wuat'i ara'a­kasa yne itote hawyi itote ara'a­kasa waku kahato rakat. Mi'i ti ta'apyk tohũ kawaru ikytsig kahato rakat rote. Mekewat waku rakat Yt Aima'at Kuap I hap het rakat Mi'i. Wẽtup iwat het Aimi­mohey kahato rakat. I'ewyte Pywo Sese rakat wẽtup iwat het. Toikuap kahato uwe waku uwe yt hap ko'i e. Yt naku i nug haria wywo wu'uka hamo toto ra'yn e.
REV 19:12 Mi'i hawyi mekewat Waku Sese Rakat teha'at kahato aikotã hẽtyhot pya hap. I'akag ete i'atu kahato ipainug hap amãtap More­kuaria Akag Sese ewy. Het toĩne'en miwan me ma'ato yt uwe i ikuap tuwewi yn toset toikuap e.
REV 19:13 Mi'i ti ara'a­kasa huu ewy kahato yne hesokpe ete. Ma'ato het aipusu puo Tupana Ehay Yne e hap.
REV 19:14 Mi'i hawyi mekewat toto atipy kaipyi yi kape tohũ kawaru kytsig nakat ok tote. I'ewyte hesu­ra­ra'in tuwat hupi ta'a­tu­hũria kytsig nakaria okpe tote. I'atue­sokpe ikytsig sese hawuo tuwat hupi.
REV 19:15 Topy­'ahak wywo toto tesu­ra­ra'in wywo wuat'i ywania tewa­nĩ­kaptia akit hamo. Ihay kyse'yp hãihyk takat ewywuat wywo toto ipo pe. Heka­ra'yp ihũria atusiu hap ma'ato iheg kahato rakat nu ewywuat wanĩ­kaptia mope­rup'i hamo. Mi'i hawyi te'e­ro­ken'ẽ ipo piat heka­ra'yp pupi. Mi'i hawyi ta'a­tunug i'e hap ewy. Mi'i hawyi tewa­nĩ­kaptia toi'a­tu­'akit yne. Toi'a­tu­'akit mi'iria topy­'ahak hap wywo Tupana saiwot hap wywo po'og haiwot torania kai. Toi'a­tu­'akit akit tewa­nĩ­kaptia aikotã watihep kana hy hap ewy.
REV 19:16 Mi'i hawyi ara'a­kasa i'ok po'i hap hesokpe ete. Het Wuat'i Porekuat Porekuat e. Wuat'i Ka'iwat Ka'iwat e miwan ok po'i hap ete hesokpe ete. Uito Iuwãu ara'a­kasa yne uimu­'etu.
REV 19:17 Mi'i hawyi uito Iuwãu araha'at at kape hawyi ara'a­kasa atipy piat y'am me. Mi'i hawyi tuwẽ­powat haty wo itote pyi — Uruwu ko'i hywi ko'i weita ko'i e eweikuap eimi'u ra'yn koitywy e. Tupana tunug na'yn mi'u eiwanuat e. Eiwe­'a­tunug no meikowo eipopy puo aikope aikope pyi ewehenuk hamo Tupana piat eipoi hap kape e.
REV 19:18 Meiẽ i'atu kahato more­kuaria piit eimi'u wo e. Ewetu'u ro more­kuaria pu'i e. Ewetu'u ro surara akag ko'i pu'i surara hesaika kahato rakaria pu'i ewetu'u ro e. I'atu sura­ra'in hũria Kawaru ko'i pu'i eimi'u wo ra'yn e. Eiwe­'a­tunug no weitaria uruwu ko'i hiwu ko'i katu­pono eimi'u ra'yn e. Ipu'i yn mesuwe karai­waria pu'i e. I'atuemiit pu'i hekat rakaria pu'i i'ewyte miit emiit pu'i miit'in mikuap ko'i pu'i i'ewyte yt miit'in mikuap i ko'i pu'i e. Waku eiwe­popy meikowo katu­pono mũki­'ite ehenuk hap e'at ra'yn e atipy piat tehay pirik atipy kaipyi.
REV 19:19 Mi'i hawyi Uito Iuwãu araha'at hawyi ara'a­kasa mekewat yt naku i rakat — Uito Tupana e hat heso rakat torania tesu­ra­ra'in wywo ta'a­tu­'akag ko'i wywo. Tuwat tuwat tu'uka hamo Morekuat Porekuat apyk piat ieĩne'en tohũ kytsig totiat kape. Mekewat atipy kaipy­wiaria ete i'ewyte yne Iesui mohey haria hesu­ra­ra'in ete tu'uka hamo.
REV 19:20 Mi'i hawyi tu'uka kahato itote. Ma'ato Iesui ti'a­tu­'akit kahato ne'i — Uito Tupana e hat heso rakat yt naku i nug hat. I'ewyte ta'a­tu­'akit mekewat heso rakat — Uito Tupana ehay moherep kahato hat e wo'o­ma­'at'i ma'at'i hat ne'i mekewat yt naku i nug hat set howa­tu'a etiat rakaria wo'o­ma­'at'i ma'at'i hat. Toi'akit ne'i mekewat — Eweimõ­typot ro Tupana iã'ãkap e hat. Mi'i haria Waku Rakat esura­ra'in ko'i ti'a­tu­'akit yne. Mi'i hawyi Wuat'i Porekuat Porekuat topytyk ta'yn mekewat awyato tig sa'ag i'ewyte mekewat — Uito Tupana ehay moherep hat wo'o­ma­'at'i hat hawyi toi'a­tu­pugha mi'iria mekewat ihyemyi'a wato aria sapuẽ sapyhot pe ytyghe wuk hap puo rakat pe. Toipytyk ta'yn wen ma'ato yt toi'a­tu­'auka hin i ma'ato ta'a­tu­puhu hap wywo toi'a­tu­pugha aria pe wuat'i e'at piat pe. Mi'i hap ewy ara'a­kasa.
REV 19:21 Mi'i hawyi mekewat Waku Rakat kawaru okpe totiat rakat Aipo­typot Iesui timoma yne i'atue­su­ra­ra'in tehay wo. Mi'i rẽ to'e — Weitaria Uruwuria eimi'u ra'yn e. Mi'i hawyi toi'a­tunug yne mesu­wa­rotiat hawyi weitaria i'atu'ok wuat'i Tupana wanĩ­kaptia pu'i wo. Uito Iuwãu mi'i hap kape ara'a­kasa yne uimu­'etu.
REV 20:1 Mi'i hawyi uito Iuwãu araha'at hawyi ara'a­kasa wẽtup ok atipy kaipywiat sut hat. Topo pe toterut haity korente iheg sese rakat i'anam kahato rakat. Mi'i hawyi toto atipy kaipyi yi ka'a kape yt ika'a sasat rakat i kape. Ipo pe hesaika hap yi ka'a sese ewãhyp hamuat.
REV 20:2 Mi'i hawyi atipy piat tat haty wo mekewat moi'ok ipo'i po'i hamo ipyhyp mot'i sese hamo. Mi'i hawyi toipyhyp ta'yn mekewat wẽtup het ahiag wẽtup het satanai — Woro­pyhyp en wẽtup 1000 anu e atipy kaipywiat sut hat ahiag me.
REV 20:3 Mi'i hawyi moi'ok toi'ok­hytpun yi ka'a sa'ag yt ika'a sasat rakat i pe hawyi tohe­wãhyp yi ka'a hawyi tutunug imoheg hap itote. Mi'i hawyi ahiag yt toma'at kuap i mesu­wa­ro­tiaria miit'in wẽtup 1000 anu itote toĩne'en. Yt tohã'ãg kuap i wuat'i ywania topyhyp wiat pote turan. Mi'i hawyi atipy piat sut hat to'e uhepe — Wẽtup 1000 anu tokosap hawyi aru atipo­re­nõ'ẽ ika'a pyi ahiag e. Mi'i hap kape ara'a­kasa uimu­'etu.
REV 20:4 Mi'i hawyi uito Iuwãu araha'at more­kuaria typy'i kahato Tupana mipo­'oro aipo­typot nuat ko'i. Mi'iria te'e­ra­'apyk aipo­re­kuaria wo Iesui wywo yne miit'in mesu­wa­rotiat karai­waria wo. Sa'a­wy'i mi'iria timo­herep kahato ta'a­tuehay wo Iesui etiat miit'in me. Mi'iria yt imõtypot hin i mekewat sa'ag nug hat — Uito Tupana e hat heso rakat. Yt ta'a­tu­mõ­typot i — Uito Tupana e hat minug iã'ãkap ko'i. Yt ta'a­tunug i mekewat ihay sa'ag nakat — Yt ewetunug i uhet ehowa­tu'a ete eipo ete pote woro­'auka e rakat. Ma'ato mio tã e pytkai — Yt i'atu'e yt urutunug i i'e hap ewy i'atu'e tipyt ta'a­tu­'auka mi'iria sa'a­wy'i. Ma'ato mi'iria tukup­te'en i ra'yn more­kuaria wo uwe waku uwe yt hap enoi hamuat. Tupana Mipo­'oro Aipo­rekuat nuat emiit'in wuat'i ywania more­karia wo. Mi'iria ti Aika­'iwat Iesui mimoieĩ­ne'en ko'i torania tomohey haria e'yian notiaria ko'i. Mi'i hawyi ahiag toĩne'en 1000 anu ka'ap pe turan mi'iria tukup­te'en more­kuaria wo wuat'i ywania py'a­setpe.
REV 20:5 Mi'i turan irania'in Iesui mohey haria yt tuwe­nõ'ẽ i te gu'uro pyi. Ma'ato wẽtup 1000 at pot tokosap hawyi tuwe­nõ'ẽ gu'uro pyi. Mi'iria yn yianmete te'e­re­hymut katu­pono Iesui ti'a­tu­ka­wiano mi'iria sa'a­wy'i katu­pono yt Tupana mohey i haria mi'auka ko'i wo tukup­te'en sa'a­wy'i pote.
REV 20:6 Waku puo kahato tukup­te'en mi'iria katu­pono Tupana mimõ­typot sese ko'i mi'iria. Mi'i pote toi'a­tu­moieĩ­ne'en mi'iria irania'in e'yianmete. Ma'ato meiũran i'ewyte ta'a­tu­'auka haria yt naku i nug haria Tupana ti'a­tu­moieĩ­ne'en ne hamuat hawyi toi'a­tu­po­'oro wẽtup i'atueiam kape i'atu­mo­so­'opot hamuat kape i'atu­ku­'uro typuot i hap kape. Ma'ato i'atu­mi­'auka ko'i Iesui kawiano ko'i yt karãpe i topap typuo i irania'in ewy. Yt karãpe i ta'a­tu­so­'opot mi'iria tukup­te'en more­kuaria wo Aika­'iwat wywo wuat'i e'at pe. Miit'in ehay moherep Tupana kapiat hanuaria wo tukup­te'en. Wẽtup 1000 anu turan more­kuaria wo tukup­te'en yi tote. Tupana mõtypot haria sese mi'iria.
REV 20:7 Wẽtup 1000 anu tokosap hawyi mekewat atipy piat ta'aipok ta'yn yi ka'a okenhyp'ok hamo hawyi toipok korente ahiag ete pyi hawyi tohe­wy­hyp'ok ta'yn hawyi to'e — Toran na'yn epyhyp hap e ahiag me.
REV 20:8 Mi'i hawyi ahiag toto itote pyi aikope aikope wuat'i ywania mo'a­kag'aia hamo. Hewyry kahato mesu­wa­rotiat wuat'i ywania pe to'e hamo — To'iro uhupi tawa Ieru­sarẽi moma hamo e wuat'i ywania pe yi Koki piaria yi Makoki piaria pe. — To'iro Tupana mohey haria moma hamo e. Mi'i hawyi imima'at ko'i tuwat kahato hupi. I'atu kahato tuwat i'atue­su­ra­ra'in aikotã yi kyt yt wati­mo­rania kuap i hap ewy tuwat ahiag upi tu'uka hamo Tupana emiit'in moma teran hamo.
REV 20:9 Mi'i hawyi ahiag topy­hu'at i'atue­su­ra­ra'in akag wo hawyi toi'a­tu­po­'oro tesu­rara'in Tupana etawa Ieru­sarẽi apypueri hamo. Iuteuria yi wato hap ok tã sura­ra'in yn te'e­ro­py­hu'at itote. Mi'i hawyi tõ'ẽ tõ'ẽ wanĩ­kaptia ahiag esura­ra'in Tupana Miky'e Sese kahato etawa moma hamo. Mi'i ti wanĩ­kaptia ti'a­py­pueri ta'a­tu­'a­pyhik sa'ag ma'ato mi'i turan Tupana tipo­'oro atipy kaipywiat aria meke­waria tewa­nĩ­kaptia wuk hamo. Mi'i hawyi aria tu'u yne mi'iria.
REV 20:10 Mi'i hawyi mekewat wo'o­ma'at hat Tupana topytyk hawyi toipun aria emyi'a wato pe. Sa'a­wy'i mekewat moi'ok toipun mekewat aria pe i'ewyte mekewat yt naku i rakat — Uito Tupana e hat heso rakat toipun tope te. Mi'iria wywo ahiag ho'opot sese at ka'ap wuat'i e'at pe. Mi'i tã hap ti atikuap uimu­'etu aikotã aikotã topy­hu'at irane hap.
REV 20:11 Mi'i hawyi Uito Iuwãu araha'at mekewat Morekuat Porekuat Akag apyk hap kape. Ara'a­kasa hawyi — Ikahu kahato he'amyap are. Ikytsig kahato are. Mi'i hawyi araha'at howa kape. Ikahu kahato rasig pãi are. Po'og ikahu at waikiru waty ko'i kai i'ewyte mytyp ko'i kai po'og ikahu are'e. Mi'i hawyi at waikiru waty ko'i mytyp ko'i te'e­ru­we­mõti kahato hawyi te'e­ru­wemig ipupi hap ewy po'og ikahu i'atukai pote po'og hẽtyhot po'og imehit i'atukai. Mi'i rokirẽ po'og araha'at waikiru waty at mytyp kape. Ma'ato mi'i turan yt ara'a­kasa hin i ra'yn i'atue­wawi yt ta'atueiam note hin i ra'yn apo pãi pote are'e.
REV 20:12 Mi'i hawyi Tupana to'e iku'uro rakaria pe — Eiwe­nõ'ẽ ro eweikup­te'en i ro yne eipe e. Miit'in mikuap ko'i i'ewyte yt miit'in mikuap ko'i i eweikup­te'en i ro e. Eweĩ'ẽ ro uhowawi e Tupana sa'a­wy­'i­wuaria iku'uro rakaria pe. Mi'i hawyi te'e­ru­we­'a­tunug he'amyap kape. Mi'i hawyi miwan ko'i ahyt ara'a­kasa itote. Mi'i miwan myi Tupana timo­herep aikotã aikotã tehamuat i'atu­minug ko'i toi'a­pypok miwan ahyt hawyi ta'a­tuieĩ­ne'en mytyp tote te turanuat aikotã itotiat re turan ta'a­tunug waku sio yt hap toimo­herep. Sio mi'iria hap Tupana mi'a­piheg wo te'e­ro­py­hu'at sio yt. I'ewyte toĩne'en wẽtup miwan itote yt irania'in ewy hin i. Mi'i ti toi'a­pypok hawyi Tupana mimoieĩ­ne'en sese ko'i toimo­herep wuat'i e'at piat ieĩne'en haria.
REV 20:13 Mi'i hawyi uito Iuwãu araha'at y'y wato kape. Mi'i turan y'y piat iku'uro rakaria tuwe­nõ'ẽ y'y wato pyi Tupana e hap ewy. I'ewyte wo'osyp hap kaipyi tuwe­nõ'ẽ kahato. Aikope aikope miit'in iku'uro hap kaipyi tuwe­nõ'ẽ hawyi Tupana kape te'e­ru­we­'a­tunug hawyi wẽtup ok wẽtup ok pe — Waku en kat pote yi tote waku etunug ereĩne'en hap turan e. Ma'ato wẽtup ok pe — En ni yt naku i etunug ereĩne'en hap hap turan e Tupana map haria pe.
REV 20:14 Mi'i hawyi Tupana teha'at mekewat wẽtup miwan kape hawyi to'e i — Uwe uwe wat toĩne'en mesuwe het miwan me mi'i hat yt toto hin i aria wato ẽty py'aset kape e ma'ato yt kat i het mesuwe miwan me pote mi'i hat toto meremo e. Ma'ato Tupana yt tipuẽti i miwan me het ko'i rakaria Tupana tipugha aria emyi'a wato kape. Yt toipuẽti i tomie­ha­kye­ra'at nuat set miwan me pote. Mi'iria yt tomohey i haria ra'yn.
REV 20:15 Mi'i hawyi Tupana tat gu'uro hap miit'in auka hap i'ahu hap i'ewyte ho'opot hap i'ewyte satek hap hawyi toi'a­tu­pugha yne mi'i sa'ag ko'i aria pe. Mi'i hawyi to'e tomipun ko'i pe — Koitywy eiku­'uro typuot i hap put'ok'e ra'yn e. Eweho­'opot ro wuat'i e'at pe e. Mi'i hap ko'i kape ara'a­kasa uimu­'etu. Uito Iuwãu mi'i tã hamuat hap ti ara'a­kasa uimu­'etu aikotã aikotã topy­hu'at irane hamaut hap ewy. Yt uheso i katu­pono uheha wo ara'a­kasa ui'e hap.
REV 21:1 Mi'i hawyi uito Iuwãu araha'at i ra'yn hawyi ara'a­kasa yi waikiru waty ko'i ipakup ko'i sese ra'yn. Koran nuat saipepiat ko'i ipakup takaria Tupana minug ko'i. Mi'i hawyi koran nuat yt kat hamo i ra'yn. Ikahu kahato yi pakup waikiru ko'i pakup waty pakup at pakup wote te'e­ru­we­mõti kahato ne'i ra'yn yianmiat at waikiru waty mytyp.
REV 21:2 Mi'i hawyi araha'at ywaipe turan ara'akasa tawa Ierusarẽi ipakup ta'apyk turan wakuat kahato Tupana ewywuat wakuat. I'ewyte ikahu sese rakat aikotã hary­poria ikahu sese rakat ewy. Are pãi ikahu kahato aikotã hary­poria tuwe­painug to'o­kyi'at hap e'at pe hap ewy are saĩke iro pote. Mi'i hawyi atikuap mi'i tawa Tupana etawa Ieru­sarẽi ipakup e hap het rakat are'e.
REV 21:3 Mi'i hawyi wẽtup ok tuwẽ­powat atipy kaipywiat Tupana ieĩne'en hap kaipyi miit'in py'a­setpiat ra'yn ieĩne'en hat. Waku pe i ra'yn toĩne'en mesup yi tote e. Miit'in topy­hu'at Tupana ywania wo i ra'yn e. Wuat'i miit'in topy­hu'at hemiit'in no e. — AheTupana sese En i'atu'e i ra'yn koitywo tope e. — Eipe uimẽ­pyt'in e Tupana i'atuepe e.
REV 21:4 Mi'i hawyi yt eweiwak po'og nei'o e. Koitywy ti aru yt karãpe i te'e­ruwak po'og e. Yt kat i i'atu­'arot hap e. Yt kat i po'og haty hap itote e i'atue­hãite sese itote katu­pono yt kat i sa'a­wy­'iwuat ewy e. Ipakup we tukup­te'en mesup e.
REV 21:5 Mi'i hawyi to'e Aipo­typot Iesui uhepe atipy kaipyi Morekuat eiam kaipyi — Koitywy atomo­pakup i yne uiminug sa'a­wy'i wuat wuat'i e. Yne aru topy­hu'at uimienoi ui'e hap ewy e. Etiwan no ui'e hap ewy Iuwãu e uhepe.
REV 21:6 Koitywy atunug i ra'yn waku pe yne i ra'yn ui'e hap ewy e. Waku pe i ra'yn uimi­ky­'esat ewy atunug e. Pyno ha'a­wynug sa'a­wy'i hat Uito i'ewyte yne saipepiat nug hat Uito e. Yne wyro hat Uito e. Waku pe yne atunug uimi­ky­'esat ewy e Iesui uhepe. Uwe uwe tikuap sese teran Tupana mi'i hat pe atimo­herep Tupana yt kat sa'up i uhegyi'at hap ok tã e. Atum tope Ui'ywot kuap hap e. Aikotã etipuẽti y'y hit'i ihy kahu rakat ere'y­'utui kahato turan hawyi ere'y'u yt kat sa'up ete i hap ewy atum Tupana kuap hap wuat'i e'at piat eimoieĩ­ne'en hamuat e. Atunug ui'e hap ewy e.
REV 21:7 Uwe uwe ahiag miat toiã'ãg hap yt naku i nug hamuat akit hat mi'i hat pe atum yne Tupana wat e. Mi'i hat pe are'e — Uha'yru sese en uhaki'yt sese en are'e. Mi'i hawyi uiwesat mi'i hat — En ni Ui'ywot sese i'atu'e e.
REV 21:8 Ma'ato irania'in te'e­ro­ken'ẽ uimohey hap moherep hamo e. Mi'i pote mi'iria aru tukup­te'en wuat'i e'at pe mekewat aria emyi'a wato pe ytyghe wuk hap ewywuat pe e. I'ewyte wo'o­pot­'auka haria paini ko'i i'ewyte hewaire hewaire rakaria i'ewyte wuat minug Tupana mõtypot haria i'ewyte wo'o­ma­'at'i ma'at'i haria i'ewyte yt uimohey i haria i'ewyte yt naku i nug haria mi'iria typuot i map hanuaria ho'opot wuat'i e'at pe aria ẽty emyi'a ewywuat pe e uhepe Aipo­typot Iesui atipy kaipywiat morekuat eiam note pyi.
REV 21:9 Mi'i hawyi uito Iuwãu araha'at hawyi ara'a­kasa wẽtup ok mekewat sa'a­wy­'i­wuaria 7 ok takaria yianmiat kamũti howapy rakat erut hat tut uhowawi. Mi'i hawyi ihay uiwywo — Mehĩ e to'iro uhupi e. Atimo­herep teran epe uwe topy­hu'at Tupana Sa'yru ehary'i e hap e. Uwe iku'uro aikotã aihũ iku'uro sa'a­wy'i aika­wiano hap ewy e. Mi'i wat ikahu rakat ihary'i teran e. — To'iro e.
REV 21:10 Mi'i hawyi uhereto uimu­'etu itote hawyi Tupana Pã'ãu timo­herep yne uhepe. Mi'i hawyi to'e uhepe — Era'apyk to meiũpe yity'ok ywaiti sese rakat rote e. Eraha'at ro e hawyi araha'at hawyi ara'a­kasa Tupana etawa sese iwato kahato iminug ikahu kahato Tupana ewy. Hãpyk kahato Tupana e'okipy. Mi'i ta'apyk yi kape tawa Ieru­sarẽi e hap het rakat.
REV 21:11 Are pãi hẽtyhot kahato mekewat Tupana etawa are'e. Tuwe­kaipyi hẽtyhot hap toĩne'en ikahu tonug hat ewy ikahu hap are'e. Ta'i nu ikahu rakat ewy imehit ihup ihyryp'i ika'ay. Mekewat nu ha'up woity rakat ko'i ewy are'e. Mekewat nu IASIPI ewy ikahu kahato mekewat tawa are'e. Nu yt ipitpit hin i rakat ewy aikotã nu TIAMANTE ewy are'e.
REV 21:12 Mi'i hawyi ara'a­kasa 12 oken'ypy mekewat tawa wato ete — Waku eiwe­hyt'ok e hap mekewat tawa ete. Mi'i puo yn waku wateke mekewat tawa pe. Katu­pono tawa pyhyp hap ywaiti rakat toĩne'en mekewat tawa Ieru­sarẽi mipueri wo. Atipy piat surara toĩne'en yne oken'ypy rania tukup­te'en 12 oken'ypy ete. 12 set toĩne'en oken'ypy rania. Wẽtup set toĩne'en yne oken'ypy ete ikuap hamuat. Aha'a­se'i Iako sa'y­ru'in 12 ok takaria Iuteuria ko'i set 12 ywania set toĩne'en itote yne oken'ypy kuap hamo.
REV 21:13 Mekewat tawa okipy owa ete oken'ypy ko'i ete kokai mye'ym oken'ypy hawyi kokai oken'ypy mye'ym oken'ypy kokai mye'ym oken'ypy kokai mye'ym oken'ypy tuereto auriwo. Mye'ym oken'ypy at min'e hap kai mye'ym oken'ypy at wẽtem hap kai mye'ym oken'ypy at posak kai koka­wiano mye'ym oken'ypy i'ewyte koka­wiano at posak kawiano mye'ym oken'ypy.
REV 21:14 Mi'i hawyi araha'at tawa kape hawyi are'e — Pywo ti rat arewa­nẽtup yt karãpe i i'apo­rok'e oken'ypy ko'i mekewat oken'ypy ko'i ny kawiat imehit kahat hap ewy aikotã wahi i'a rakat ikahu rakat nu ko'i yn he'o­kipy wo. Iwato kahato rakaria 12 oken'ypy toĩne'en itote are'e. Ikahu kahato meimẽwat nu ko'i to'o­tote tote yity'ok ewy. Toĩne'en yne wyti itote uruset ko'i Tupana hũ Iesui potmueria 12 ok takaria set ko'i tukup­te'en yne tawa 12 okipy ete hap ara'akasa. I'ewyte uhet Iuwãu itote ara'akasa wy are'e.
REV 21:15 Mi'i hawyi mekewat atipy piat to'e i uhepe — Mesup atikuap teran karan iwato karan i'ywop hap Tupana etawa Ieru­sarẽi pakup e. Toĩne'en ipo pe hã'ãg hap ikahu kahato rakat imehit rakat Tupana etawa iã'ãg hamuat typy miit ywaiti hap ewy iã'ãg hap. Mi'i hawyi oken'ypy ko'i i'ewyte tohã'ãg koran iwato koran i'ywop hap ewy. I'ewyte nu pype i'ãpe'ok takat tohã'ãg atipy piat tawa pyhyp hap.
REV 21:16 Tohã'ãg hawyi iwato kahato e uhepe i'ywop hap iwato hap ywaiti hap to'o­ku­pitu kupitu Tupana etawa 12.000.000 aiko wato hap ok tã hap ewy e uhepe.
REV 21:17 I'anam kahato mekewat tawa pyhyp hap wẽtup go i'anam hap ewy e. Pywo ti rat yt uheso i iwato hap ete. Uipo piat hã'ãg hap hãpyk kahato rakat. Yi totiat iã'ãg hap to'o­'e­wy­'ewy e.
REV 21:18 Ikahu kahato Tupana tunug tetawa. Po'og yi kape tawa Ieru­sarẽi pakup he'okipy suwy ipyhyp hap nu ãpe'ok wẽtup nu kawiat ikahu kahato rakat ihyryp'i nu IASIPI e hap het rakat ikahu kahato imehit kahato nu Uru ewy. Heremo kahato ipuo.
REV 21:19 Mi'i rẽ araha'at hawyi atikuap Tupana etawa pytyp 12 wuat to'o­tote tote ikahu kahato. Mi'i tote typy nu wo tawa pakup he'okipy suwy nu ha'up woity rakat ihyryp'i atipy ewy nu SAWIRA e hap nu kawiat. Mye'ym nu wo tawa Ieru­sarẽi pakup hakipy suwy ha'up woity rakat kawiat wo ihyryp'i imehit hap aikotã pykasu atig e'ai'a etiat ewy itig hap ewy nu KAUSETUNIA kawiat ha'up woity rakat. Mi'i hawyi 4 nu wuat Tupana etawa e'okipy suwy hap toĩne'en nu ha'up woity sese rakat ihyryp'i ga'apy ewy mekewat nu EMERAUTA e hap nu kawiat wo.
REV 21:20 Mi'i hawyi 5 wuat Tupana etawa pytyp mi'i ti ha'up woity rakat sese ihup kahato rakat nu SATUNIU e hap het rakat. Mi'i hawyi 6 wuat nu tawa pytyp ihup kahato suu ewy nu SATIU e hap het rakat ha'up woity rakat. Mi'i hawyi 7 wuat nu tawa pytyp wẽtup ika'ay kahato ikahu kahato rakat ha'up woity rakat nu KISORITU e hap het rakat. Mi'i hawyi mekewat 8 wuat nu tawa pytyp ihyryp'i hawyi itig ikytsig kahato rakat no nu PERIRU e hap het rakat. Mi'i hawyi 9 wuat nu tawa pytyp wẽtup nukara imehit ika'ay rakat hap ewy nu TUPASIU e hap het rakat. Mi'i hawyi 10 wuat nu tawa pytyp ihyryp'i paku'a yhap imehit hap nu tawa pytyp nu KISOPASU hap het rakat. Mi'i hawyi 11 wuat nu tawa pytyp ha'up woity rakat ihyryp'i kyre rakat nu IASINTU e hap het rakat. Mi'i hawyi 12 wuat nu tawa okipy toran hap he'o­kipy ikahu sese rakat ihyryp'i kyre heremo kahato ipuo nu AMETITA e hap het rakat.
REV 21:21 Pyno 12 Tupana e'oken­'ypy ko'i ete ikahu kahato rakaria aikotã wahi ikahu rakat ewy. Wẽtup a yne oken'ypy ete aikotã wahi ikytsig kahato rakat i'a nu PERURA e hap het rakat imehit kahato rakat.
REV 21:22 Mi'i hawyi uito Iuwãu araha'at tawa Ieru­sarẽi Pakup kape hawyi atikat mekewat aikotã sa'a­wy'i tawa Ieru­sarẽi pot'i pe toĩne'en Tupana mõtypot yat iwato'in kahato rakat hap ewy. Arewa­nẽtup toĩne'en Tupana mõtypot yat aikotã tawa Ieru­sarẽi pot'i piat ewy are'e uiwa­nẽtup hawe haype. Ma'ato atikat pytkai yt atipuẽti Tupana mõtypot yat nu kawiat minug. Kat pote are. Mi'i hawyi atikuap hawyi pãi — Aika­'iwat koro Tupana Tohũ Kuteiru wywo koitywy tuwenug Tupana mõtypot yat miit'in eiam mo tomõ­typot hamo toĩne'en mesup are'e uiwepe.
REV 21:23 Hẽtyhot kahato tawa Ieru­sarẽi Pakup we. Tupana kahu hap Ihũ Kuteiru kahu hap topy­hu'at mekewat tawa imoẽtyhot hamo ariãty ewy at ka'ap. Sa'a­wy­'iwuat at waty waikiru ko'i yt imoẽtyhot i ra'yn itote.
REV 21:24 Tupana topy­hu'at tohũ Kuteiru wywo to'ewy at waty waikiru ewy mesuwat yi tote wuat'i ywania tomie­ha­kye­ra'at moẽtyhot hamo. I'ewyte yne i'atu­'akag ko'i Tupana mõtypot haria tukup­te'en Ihũ Kuteiru mõtypot haria wo. Mi'i hawyi miit'in akag ko'i tuwat tawa Ieru­sarẽi Pakup kape Tupana mõtypot hamo — Urupo­rekuat sese En i'atu'e hamo.
REV 21:25 Tupana yt tipyhyp hin i itote — Eiwe­hyt'ok o e yn. Ma'ato sa'a­wy­'iwuat tawa Ieru­sarẽi pot'i pe ta'a­tu­pyhyp wãtym hawyi ma'ato Ieru­sarẽi Pakuwe yt ta'a­tu­pyhyp i wãtym yt kat i itote pote.
REV 21:26 Mi'i hawyi yne ywania te'e­ro'e — Tawa Ieru­sarẽi Pakup po'og yne kai i'atu'e. To'iro watuwat tawa Ieru­sarẽi Pakup kape AheTupana mõtypot hamo i'atu'e. To'iro watioto ahekat aimiium Tupana piat mõtypot hamo i'atu'e.
REV 21:27 Tupana mimo waku ko'i yn teke kuap hetawa pe Tupana Hũ Kuteiru miset pehik ko'i miwan etiat — Mi'iria uimi­moieĩ­ne'en ko'i yn tuwe­hyt'ok kuap mesuwe e. Yt naku i nug haria heso heso rakaria miit'in ma'at haria yt uwe i itote Tupana etawa pe. Mi'i hap ko'i kape uito Iuwãu ara'a­kasa uimu­'etu aikotã topy­hu'at irane hamaut hap.
REV 22:1 Pywo ti rat ikahu kahato tawa Ieru­sarẽi Pakup e atipy piat uhepe. Eraha'at ro y'y kape e hawyi araha'at y'y kape. Mi'i turan ikahu kahato y'y. Yt ihy pitpit hin i. Miir'in mohãite rakat toĩne'en itote. Ihyeput kahu kahato. Ihy py'a­setpiat ikahu sese rakat ewy. Aikope Tupana ta'apyk Tohũ Kuteiru wywo mi'i hap ywy'okpy kaipyi ihyeput y'y.
REV 22:2 Y'y wyti ihyeput mu'ap py'a­setpuo are'e. Y'y ẽpe ete wyti aria'yp ko'i kokai kokai ikahuria kahato rakaria tukup­te'en are'e. I'ywa ko'i hewo kahato ma'ato yt to'o­'ewy hin i hewo tuereto kat kat ywa ko'i. Wẽtup ewaty wẽtup ywa hewo hawyi wẽtup waty hawyi wẽtup ywa hewo tuereto. 12 wo hewo wẽtup 12 waty pe. Watu'u mekewat kat kat ywa ko'i hawyi aimoieĩ­ne'en wuat'i e'at aipiit ipakup wuat'i e'at pe hap topy­hu'at. I'yhop ko'i mohag ewy wuat'i ywania moehãite hamo.
REV 22:3 Sa'a­wy'i Tupana to'e Ãtãu me — Ui'atoiat hawyi e'yi yt ihãite i e. Ma'ato itote yi pakup hawe hesaika kahato toine'en katu­pono Tupana to'e yi pe — Yt woro­'a­kurek po'og i ra'yn e. Erenug i ro e yi pe. I'atu kahato itote Tupana Hũ eropat haria wo. Koitywo Tupana toĩne'en i'atu­py­'a­setpe Morekuat no Iesui wywo e. Wuat'i ywania i'atu­potpap kahato imiky­'esat nug hap ete.
REV 22:4 Tuwehik kahato i'atuete. Mesup yt pya hin i i'atukai e. To'o­ha'at to'oe­wawi toky'e haype e. Toset no toi'a­tu­mo­wekuap i'atue­wa­tu'a ete e.
REV 22:5 Yt kat i ariãty itote kat pote yt kat i i'ypyryp hap itote pote. Wãtym yt kat i katu­pono Aipo­typot Tupana toĩne'en ahe'a­riãty wo. Topy­hu'at Aika­'iwat hẽtyhot puo aiko­hye­wyry e. Mi'i pote yt kat hamo i at itote. Mi'i hawui Iesui eropat haria te'e­ro­py­hu'at irania'in yi totiaria more­kuaria wo wuat'i e'at pe e.
REV 22:6 Mi'i hawyi to'e uhepe atipy piat — Iuwãu e yne aru ui'e hap topy­hu'at aikotã are'e hap ewy e. Yt pya i ra'yn tut aru ui'e hap e'at Aipo­typot Tupana e hap e. Sa'a­wy'i ihay tehay moherep haria wẽ pyi aikotã aikotã topy­hu'at hamuat hawyi i'e hap ewy topy­hu'at. Koitywy Tupana uipo­'oro atipy kaipyi teropat haria mesu­wa­ro­tiaria mu'e hamo aikotã aru topy­hu'at mesu­wa­rote hap e. Pywo yn Tupana ihay uiwẽ pyi e.
REV 22:7 Mi'i hawyi atikuap Tupana Hũ Kuteiru Iesui ehay — Uhyt'i'in mana'in e ehewaure ka'a ro uhowawi kat pote ariot merep hap ewy ehowawi hamuat e. Eiwe'eg wo o katu­pono yt uwe i ikuap karãpe ariot hap. Mesuwe uhemiit Iuwãu tiwan uhehay ko'i yne aikotã aikotã topy­hu'at aru eimo­we'eg hamo hap yt uwe i eima'at hamuat e. Woro­ho­'o­nãpin kahato mesuwat miwan me e. Pyno ewetunug o uhepiat einãpin hap mesuwat miwan miat e.
REV 22:8 Pyno uito Iesui potmu'e Iuwãu are'e. Mesuwe uimiwan me yne toimo­herep Tupana yn uhewaure miẽtup mo hap. Ipat'ok ara'a­kasa ipat'ok atikuap atipy piat wẽ pyi hawyi arepỹ­'ã­tutuk howawi imõtypot hamo. Mi'i hawyi are'e — Ikahu kahato ti emimo­herep emienoi uhewowi are'e. Woro­mõ­typot kahato En pãi are'e.
REV 22:9 Mi'i hawyi mekewat wẽtup atipy piat sehay erut hat to'e uhepe — Yt uimõ­typot tei'o Tupana ewy katu­pono uito Tupana eropat hat sese ne'i ei'e­wywuat re ne'i uito e. Eweimõ­typot ro Tupana yn e. Tupana eropat hat no areĩne'en aikotã sa'a­wy­'iwuat Tupana ehay moherep haria powyro hat re areĩne'en e. Mi'i hap ewy te mesup woro­po­wyro teran Iesui mohey haria e uhepe. Meiũran aru i'atu kahato mesuwat emiwan wo mopywo haria hawyi ta'a­tunug i'e hap ewy haria e. Mi'iria powyro hat areĩne'en e. Ma'ato yt atiky­'esat i uimõ­typot hap ma'ato atiky­'esat Uipo­'oro Hat Tupana Iesui mõtypot hap e atipy piat uhepe.
REV 22:10 Mi'i hawyi to'e uhepe — Iuwãu e etimo­herep o mesuwat emiwan e. Yt atiky­'esat i mig'i wo ne'i etimo­herep e. Epiat ikuap kat aru kat aru toĩne'en hap ewy atiky­'esat irania'in ikuap wy e. Kat pote atiky­'esat yne ikuap miit'in aikotã aru topy­hu'at hap yiam me te i'atu­mo­we'eg hamo — Pywo miwan i'atu'e hamo. Katu­pono yt pya i miwan miat tut aru e hap ko'i e.
REV 22:11 Mi'i hawyi to'e — Eiwe'eg wo o mehĩ'in mana'in e. Waku eweimohey yne torania kat e som to'e mesuwat miwan me hãpyk hap yt put'ok'e yne i te pytkai e. Yt naku i eweimohey ran ne'i kat e som hap ko'i sio mũki­'ite e'ihot'ok ewei'e i'e hap mohey hap ete e. Mũki­'ite atimohey ewei'e pote pot'i poity'i kat pote merep i hap ewy tut Aika­'iwat. Ma'ato hut turan atomohey Iesui ere'e ne'i turan tut pote yt naku i nug haria wo eweikup­te'en. Yt naku i eiwa­nẽtup hut turan ipitpit kahato eiwa­nẽtup hawe e. Ma'ato waku nug haria eweikup­te'en turan tut pote waku kahato rakaria wo te eweikup­te'en ne itote e. Ma'ato Tupana kape ewanẽtup hap hut turan mote — Eipe waku kahato e tut hawyi. Pyno eiwe'eg wo e kat pote mũki­'ite atimohey Iesui ewei'e pote pot'i poity'i e atipy piat ahepe.
REV 22:12 Mi'i hawy Iesui to'e uhepe ahepe — Ehewaure ka'a ro e. Yt pya hin i uhut hap e'at e. Meremo eha'up wywo ariot eiminug wakuap ok tã ium ehepe hamo e. Eiminug yt naku i hap ok tã atum ehepe ha'up e.
REV 22:13 Yne sa'a­wyi­wanuat nug hat sese Uito aikotã miwan toĩne'en sa'a­wy­'ipyi ikahuro hap kape aikotã aru toĩne'en hap atunug yne aru i'e hap ewy e. Mi'i hap ewy aha'a­wynug aikotã wo'o­mu'e hap ete toĩne'en miwan me sa'a­wy'i hap ewy atunug aru e. Mi'i e hap ewy areĩne'en yne e'yianmete e. Mi'i hap ewy areĩne'en yne wyro hamo e. Aikotã miwan toĩne'en mo'y­wopo wuat hawyi yt kat i ra'yn miwan toĩne'en po'og kat pote toran hap ta'yn hap ewy atunug yne ra'yn Tupana e hap atunug aru e hap ahaipepiat nug hat areĩne'en ne e Iesui ahepe.
REV 22:14 Mi'i hawyi to'e atipy piat — Uwe uwe inug mesuwat piat tonãpin hap mi'i Tupana mipoi­tyro wo toĩne'en. Pywo ti rat uwe uwe Tupana mipoi­tyro wo toĩne'en uwe uwe tunug Tupana miky­'esat mi'i hat pe ti aru Tupana to'e — Waku etu'u kat kat ywa wuat'i e'at piat eimoieĩ­ne'en hamuat uimikoi kaipyi e aru Tupana mi'i hat pe. Ereke mehĩ ereke mana uhetawa pakup we e aru tomi­ky­'esat nug haria pe e.
REV 22:15 Ma'ato irania'in me — Ereke ro yt e hin i e. Yt karãpe i — Ereke ro uhetawa pe e paini ko'i pakup we e. Yt karãpe i — Ereko ro e wo'o­'auka haria pe e. Yt karãpe i — Ereke ro e hewaire waire rakaria pe e. Iewyte uwe uwe imõtypot mo wuat Tupana mi'i haria pe — Ereke ro yt e hin i Iewyte uwe uwe miit'in potma­'at'i ma'ati hat toĩne'en ni'i hat pe — Ereke ro uhetawa pakup we yt e i e atipy piat.
REV 22:16 Mi'i hawyi Iesui to'e uhepe ahepe — Uito Iesui morekuat Tawi saipepiat sese aikotã ahewat'yp iku'uro mi'i hawyi toĩne'en i'ypykyt hap ewy areĩne'en morekuat tawi saipepiat meiũran i'yp wato kahato aru e. Uito areĩne'en aikotã mekewat waikiru tut ihot'ok kai i at ut hap enoi hamuat hap ewy atimo­herep Tupana ut hap e. Mi'i hap ewy atipo­'oro ra'yn wẽtup ok uipot­po­'oro atipy kaipyi yne mesuwat miwan moherep ehowawiat uimohey haria kape Iuwãu miwan myi e Iesui.
REV 22:17 Mi'i pote mesup — Era'aipok to Iesui meikowo wato'e. Aikotã hary­poria tiky­'esat kahato tehay­tuwy pya ieĩne'en hat hawyi — Era'aipok to era'aipok to e hap ewy wato'e — Era'aipok to wato'e aipy'a pyi epe Iesui. I'ewyte Tupana Pã'ãu ehay moherep haria sa'a­wy­'i­wuaria i'ewyte koran wuaria — Era'aipok to meikowo Iesui i'atu'e Tupana Pã'ãu ehay moherep haria i'ewyte aito. I'ewyte waku yne mesuwat miwan kuap haria te'e­ro'e — Era'aipok to Iesui waku wato'e. Uiwy­ria'in eweikup­te'en teran wuat'i e'at pe pote ewetat ro yt kat sa'up i aikotã mekewat y'y aimoieĩ­ne'en hap yt kat sa'up i Tupana etawa pe rakat hap ewy waku wato­mohey.
REV 22:18 Uito ti Iuwãu. I'e hap ewy yn atiwan. Waku eweimohey uimiwan hap are'e. Yt etimo­'a­py'i tei'o mesuwat sehay katu­pono Tupana ehay yn atimo­herep. Yt mesuwat uiat kaipyi i ma'ato i'e hap ewy yn atiwan are'e. Yt naku i mesuwat miwan ewei'e pote Tupana mi'apiheg no eweikup­te'en aru aikotã yne mesuwat uimiwan aikotã aikotã aru mesuwe ho'opot hap ewy. Mi'i hap ok tã tohenoi aru.
REV 22:19 Ma'ato ipat'ok yn etimohey pote mi'i hawyi etihep uhehay kurin na'yn mesuwat miwan myi pote mi'i haria pe Tupana to'e — Eipe yt ewetu'u kuap i eimoe­hãite hamuat uimikoi kat kat ywa e uhetawa pakuwe mesuwat miwan miat mienoi ewy eweihep wẽtup uhehay wakuat mesuwat miwan myi pote woro­ho­'ohep eset uimiwan myu uwe toine'en wuat'i e'at pe aru ui'e hap uimiwan miat kaipyi e Tupana.
REV 22:20 Pywo kahato mesuwat miwan me to'e Iesui — Ariot aru merep'e hap ewy e. Pyno — Eriot ro Iesui waku wato'e Aika­'iwat pe.
REV 22:21 — Uika­'iwat Iesui eti'a­tu­poi­tyro o egyi'at hap kaipyi yne mesuwat yi Asia piaria i'ewyte etipoi­tyro mesuwat miwan mohey haria yt i'atue­waku hap upi i wen ma'ato i'atu­ky'e hap wywo hap ok tã. Mi'i hap ahẽtup Iesui set upi waku. Uito Iesui potmu'e 12 ok Iuwãu Iesui mimo­herep aikotã aru e hap miwan nug hat.
