MAT 1:1 Je² libro xi³ cho⁴ta⁴jchi¹nca³-le⁴ Jesucristo, ˀnti¹-le⁴ David, cˀoa⁴ ˀnti¹-le⁴ Abraham.
MAT 1:2 Abraham nˀai³-le⁴ Isaac, cˀoa⁴ Isaac nˀai³-le⁴ Jacob, cˀoa⁴ Jacob nˀai³-le⁴ Judá cao⁴ ntsˀe⁴.
MAT 1:3 Judá cao⁴ chjon⁴²-le⁴ xi³ Tamar ˀmi², xi³ nˀai³ xi³ na⁴-le⁴ Fares cao⁴ Zara, cˀoa⁴ Fares nˀai³-le⁴ Esrom, cˀoa⁴ Esrom nˀai³-le⁴ Aram.
MAT 1:4 Aram nˀai³-le⁴ Aminadab, cˀoa⁴ Aminadab nˀai³-le⁴ Naasón, cˀoa⁴ Naasón nˀai³-le⁴ Salmón.
MAT 1:5 Salmón cao⁴ chjon⁴²-le⁴ xi³ Rahab ˀmi², xi³ nˀai³ xi³ na⁴-le⁴ Booz, cˀoa⁴ Booz cao⁴ chjon⁴²-le⁴ xi³ Rut ˀmi², xi³ nˀai³ xi³ na⁴-le⁴ Obed, cˀoa⁴ Obed nˀai³-le⁴ Isaí.
MAT 1:6 Isaí nˀai³-le⁴ David xi³ cho⁴ta⁴ti¹tjon² coan³, cˀoa⁴ je² cho⁴ta⁴ti¹tjon² David cao⁴ je² xi³ chjon⁴²-le⁴ Urías, xi³ nˀai³ xi³ na⁴-le⁴ Salomón.
MAT 1:7 Salomón nˀai³-le⁴ Roboam, cˀoa⁴ Roboam nˀai³-le⁴ Abías, cˀoa⁴ Abías nˀai³-le⁴ Asa.
MAT 1:8 Asa nˀai³-le⁴ Josafat, cˀoa⁴ Josafat nˀai³-le⁴ Joram, cˀoa⁴ Joram nˀai³-le⁴ Uzías.
MAT 1:9 Uzías nˀai³-le⁴ Jotam, cˀoa⁴ Jotam nˀai³-le⁴ Acaz, cˀoa⁴ Acaz nˀai³-le⁴ Ezequías.
MAT 1:10 Ezequías nˀai³-le⁴ Manasés, cˀoa⁴ Manasés nˀai³-le⁴ Amón, cˀoa⁴ Amón nˀai³-le⁴ Josías.
MAT 1:11 Josías nˀai³-le⁴ Jeconías cao⁴ ntsˀe⁴, cˀia⁴ nca³ qui³cha³ni² ya⁴ Babilonia.
MAT 1:12 Xi³ coan³scan³-ni³ nca³ qui³cha³ni² ya⁴ Babilonia, Jeconías nˀai³-le⁴ Salatiel coan³, cˀoa⁴ Salatiel nˀai³-le⁴ Zorobabel.
MAT 1:13 Zorobabel nˀai³-le⁴ Abiud, cˀoa⁴ Abiud nˀai³-le⁴ Eliaquim, cˀoa⁴ Eliaquim nˀai³-le⁴ Azor.
MAT 1:14 Azor nˀai³-le⁴ Sadoc, cˀoa⁴ Sadoc nˀai³-le⁴ Aquim, cˀoa⁴ Aquim nˀai³-le⁴ Eliud.
MAT 1:15 Eliud nˀai³-le⁴ Eleazar, cˀoa⁴ Eleazar nˀai³-le⁴ Matán, cˀoa⁴ Matán nˀai³-le⁴ Jacob.
MAT 1:16 Jacob nˀai³-le⁴ José, xˀin⁴-le⁴ María xi³ qui³tsin³-le⁴ Jesús xi³ Cristo tsa³cˀin².
MAT 1:17 Cˀoa⁴-sˀin² nca³tsˀi³ cho⁴ta⁴jchi¹nca³-le⁴ sa³ˀnta³ Abraham sa³ˀnta³ David, te³ño³ jco⁴ ma³-ni³, cˀoa⁴ sa³ˀnta³ David sa³ˀnta³ nca³ qui³cha³ni² ya⁴ Babilonia, te³ño³ jco⁴ ma³-ni³, cˀoa⁴ cˀia⁴ nca³ qui³cha³ni² ya⁴ Babilonia sa³ˀnta³ Cristo, te³ño³ jco⁴ ma³-ni³.
MAT 1:18 Cˀia⁴ nca³ qui³tsin³ Jesucristo cˀoi⁴ coan³: María xi³ na⁴-le⁴ tji¹nˀion¹-le⁴ cjoa⁴chi³con³ cao⁴ José. Cˀia⁴ nca³ cje³ va³tio²cao⁴-jin² xi¹ncjin¹, María coan³sjai³-le⁴ nca³ yˀa³ ˀnti¹ xi³ tsˀe⁴ Espíritu Santo.
MAT 1:19 Cˀoa⁴ nca³ cho⁴ta⁴cjoa⁴qui²xi⁴ José xˀin⁴-le⁴, li²coi³ coan³me³-le⁴ nca³ tsjoa¹-le⁴ cjoa⁴soa³ María. Coan³me³con³ nca³ to⁴ˀma³ qui³tsjion³.
MAT 1:20 Cˀoa⁴ nca³ ti¹si¹cja³ˀai³tsjen³ je² cjoa⁴-vi⁴, coe⁴-ni³ a²ncje⁴-le⁴ Nai³-na¹ coan³tsen³-ni³le⁴ ya³ ni³jña¹-le⁴. Qui³tso²: José ˀnti¹-le⁴ David, li² jcon³-jin² nca³ chjoai¹³ María, chjon⁴²-li⁴, nca⁴ je² xi³ cˀoa⁴-sˀin² yˀa³ tsˀe⁴ Espíritu Santo ni¹.
MAT 1:21 Cˀoa⁴ jnco³ ˀnti¹ cˀoe⁴² xi³ Jesús cˀoin¹-lai⁴ jan³ˀain¹-le⁴, nca⁴ je² cˀoa⁴sje³ntjai² na⁴xi⁴na³nta¹-le⁴ xi³ tˀa³tsˀe⁴ je¹-le⁴.
MAT 1:22 Nca³yi³je³ je²-vi⁴ cˀoa⁴coan³ jme¹-ni³ nca³ cˀoa⁴-sˀin² coi⁴tjo³son²-si¹ni³ xi³ qui³tso² Nai³-na¹ xi³ to⁴tˀa³tsˀe⁴ cho⁴ta⁴ xi³ qui³nchja⁴ya³ xi³ tˀa³tsˀe⁴. Cˀoi⁴ qui³tso²:
MAT 1:23 Coe⁴-ni³ je² chjon⁴²tsje³-vi⁴ cˀoa⁴ ˀnti¹, cˀoa⁴ cˀia⁴ cˀoe⁴², cˀoa⁴ Emanuel coi⁴tso⁴-le⁴ jan³ˀain¹-le⁴, je² jan³ˀain¹ xi³ tso²-ni³: Ni³na¹ ti¹jna³cao⁴-na¹.
MAT 1:24 Cˀia⁴ nca³ ja³ˀa³-le⁴ José, cˀoa⁴qui³sˀin³ jo³-sˀin² tsa³cˀe¹ne²-le⁴ a²ncje⁴-le⁴ Nai³-na¹, cˀoa⁴ qui³scoe¹-ni³ chjon⁴²-le⁴.
MAT 1:25 Li²jme³ xi³ to⁴nqui³-ni³ qui³sˀin³ sa³ˀnta³ nca³ tsa³cˀe¹ ˀnti¹tjon²-le⁴. Cˀoa⁴ Jesús qui³tso²-le⁴ jan³ˀain¹-le⁴.
MAT 2:1 Cˀia⁴ nca³ qui³tsin³ Jesús ya⁴ Belén tsˀe⁴ Judea, cˀia⁴ ni⁴čhjin³-le⁴ cho⁴ta⁴ti¹tjon² Herodes, coe⁴-ni³ ja³ˀai³ ya⁴ Jerusalén cho⁴ta⁴chji⁴ne⁴, xi³ ji³nčhoa³-ni³ jña³ tjo³-ni³ tsˀoi¹.
MAT 2:2 Qui³tso²: Jña¹ ti¹jna³ je² cho⁴ta⁴ti¹tjon²-le⁴ cho⁴ta⁴ judíos xi³ qui³tsin³. Nca⁴ je² ni³ño³-le⁴ je³ca²ˀyai³⁴-jin⁴ jña³ nca³ tjo³-ni³ tsˀoi¹, cˀoa⁴ cjoa²ˀai⁴ ˀya³xcon¹-ni¹⁴jin⁴ nca³ je².
MAT 2:3 Cˀia⁴ nca³ qui³nčhˀoe¹ je²-vi⁴ je² cho⁴ta⁴ti¹tjon² Herodes qui³tsa³cjon¹, cˀoa⁴-ti⁴ nca³yi³je³ cho⁴ta⁴ Jerusalén.
MAT 2:4 Cˀoa⁴ qui³nchja⁴ma³ña³-le⁴ nca³tsˀi³ na⁴ˀmi³ti¹tjon² cao⁴ scribano xi³ tsˀe⁴ na⁴xi⁴na³nta¹, qui³tsi²na³nqui³-le⁴ jña¹-ni³ qui³tsin³-ni³ je² Cristo.
MAT 2:5 Cˀoa⁴ je² qui³tso²-le⁴: Ya⁴ Belén tsˀe⁴ Judea, nca⁴ cˀoa⁴-sˀin² tji¹tˀa³ xon⁴ xi³ to⁴tˀa³tsˀe⁴ je² xi³ qui³nchja⁴ ya³ tˀa³tsˀe⁴ Ni³na¹.
MAT 2:6 Ji³ Belén, na³nqui³-le⁴ Judá, a³li² to⁴jo³ ˀnti¹-jin² ja⁴jin³-le⁴ cho⁴ta⁴ti¹tjon² xi³ tsˀe⁴ Judá. Ya⁴ coi⁴tjo³jin³-ni³li² jnco³ xi³ coa⁴te²xo³ma³ na⁴xi⁴na³nta¹-na⁴ Israel.
MAT 2:7 Cˀia⁴ Herodes qui³nchja⁴ˀma³-le⁴ je² cho⁴ta⁴chji⁴ne⁴-ve⁴. Nˀion¹ qui³tsi²na³nqui³-le⁴ jme¹ ni⁴čhjin³ coan³tsen³ je² ni³ño³.
MAT 2:8 Cˀoa⁴ qui³si³ca³sen¹ cho⁴ta⁴-ve⁴ ya⁴ Belén, qui³tso²: Ta⁴nquin¹ qui⁴tso⁴mao⁴³ ya⁴jan¹, cˀoa⁴ nˀion¹-la² cho⁴na³nquio³ xi³ tˀa³tsˀe⁴ ˀnti¹-ve⁴. Cˀia⁴ nca³ coan⁴sjai³-no³, ti⁴cji³nčhˀoe¹-nao¹³, jme¹-ni³ nca³ cˀoa⁴-ti⁴ cjoi¹-si¹nia³ an³ nca³ scoe³xcoan¹³.
MAT 2:9 Cˀia⁴ nca³ je³qui³nčhˀoe¹-le⁴ cho⁴ta⁴ti¹tjon²-ve⁴, qui³. Coe⁴-ni³ je² ni³ño³ xi³ tsa³ve³ ya⁴ jña³ nca³ tjo³-ni³ tsˀoi¹, cˀoa⁴-sˀin² qui³ti¹tjon²-le⁴ nca³ je² jo³ sa³ˀnta³ nca³ ji³cho² ya⁴ jña³ ti¹jna³ ˀnti¹-ve⁴, ya⁴ tsa³ca³sen²son².
MAT 2:10 Cˀoa⁴ nca³ tsa³ve³ je² ni³ño³-ve⁴, a³li² to⁴cˀoa⁴ cji³ tsjoa³ coan³-le⁴.
MAT 2:11 Ja³ˀa³sˀen³ ya⁴ ntˀia³, tsa³ve³ je² ˀnti¹-ve⁴ cao⁴ María je² na⁴-le⁴, cˀoa⁴ tsa³qui³ncha³xco¹nchˀin³tˀa³-le⁴ tsa³ve³xcon¹. Qui³sco³ˀai²nqui³ tso³jmi²-le⁴ xi³ chji¹, qui³tsjoa³cjoa⁴tjao²-le⁴ oro cao⁴ xo³nco¹sja³ cao⁴ xi³cha³xi³ xi³ na⁴sca¹ njen⁴.
MAT 2:12 Ya³ ni³jña¹-le⁴ cˀoa⁴tsa³cˀin²ya³-le⁴ xcon¹ tsa² ti⁴ya⁴ coai⁴con³-ni³le⁴ Herodes. Xin² ntia⁴² ja³ˀa³ nca³ qui³-ni³ na³nqui³-le⁴.
MAT 2:13 Cˀia⁴ nca³ je³qui³-ni³ nca³ je², coe⁴-ni³ je² a²ncje⁴-le⁴ Nai³-na¹ coan³tsen³-ni³le⁴ ya³ ni³jña¹-le⁴ José, qui³tso²: Ti²so⁴tjain⁴, chjoai¹³ je² ˀnti¹-ve⁴ cao⁴ na⁴-le⁴, cˀoa⁴ ti⁴yoi¹³ ya⁴ Egipto. Ti⁴jnai³ ya⁴-ve⁴ sa³ˀnta³ cˀia⁴ nca³ an³ xi³ cˀoa⁴xin¹-le²³, nca³ cˀoi⁴²coan⁴ nca³ Herodes coa⁴²sjai³ je² ˀnti¹-ve⁴ tsa² si⁴²cˀen³.
MAT 2:14 Cˀoa⁴ José ja³ˀa³-le⁴, qui³scoe¹ ˀnti¹-ve⁴ cao⁴ na⁴-le⁴ nca³ ni⁴tjen⁴, qui³ ya⁴ Egipto.
MAT 2:15 Ya⁴ tsa³cˀe²jna³ sa³ˀnta³ nca³ cˀen³ Herodes, jme¹-ni³ nca³ coi⁴tjo³son²-si¹ni³ je² xi³ qui³tso² je² Nai³-na¹ xi³ to⁴tˀa³tsˀe⁴ cho⁴ta⁴ xi³ qui³nchja⁴ya³ xi³ tˀa³tsˀe⁴, qui³tso²: Na³nqui³ Egipto qui³nchja²³-le⁴ ˀnti¹-na⁴.
MAT 2:16 Cˀia⁴ nca³ Herodes tsa³ve³ nca³ tsa³ve³chi⁴con¹ je² cho⁴ta⁴chji⁴ne⁴-ve⁴, a³li² cˀoa⁴cji³ jti³ coan³-le⁴. Tsa³cˀe¹ne² nca³ qui³ni²cˀen³ nca³tsˀi³ ˀnti¹xˀin⁴ xi³ jao² no¹ tjin¹-le⁴, cˀoa⁴ xi³ nqui²sa⁴ ˀnti-sa³ xi³ qui³sˀe³ ya⁴ Belén cao⁴ nca³tsˀi³ xi³ qui³sˀe³ ntai³-le⁴ na⁴xi⁴na³nta¹-ve⁴, jo³ cjoan³ tjin¹ ni⁴čhjin³ xi³ cˀoa⁴-sˀin² qui³tso²ya³-le⁴ je² cho⁴ta⁴chji⁴ne⁴-ve⁴.
MAT 2:17 Cˀia⁴ cˀoa⁴-sˀin² ji³tjo³son² je² xi³ cˀoa⁴qui³tso² xi³ to⁴tˀa³tsˀe⁴ Jeremías, xi³ qui³nchja⁴ya³ tˀa³tsˀe⁴ Ni³na¹:
MAT 2:18 Nˀion¹ tse³ cjoa⁴fao¹ qui³no²ˀya²-le⁴ ya⁴ ˀnte³ Ramá, qui³squi³ˀntia¹ ja³ˀa¹tse³-le⁴ Raquel xi³ squi³ˀnta¹tˀain³ xti³-le⁴. Li²coi³ coan³me³-le⁴ nca³ qui³ni²je³con³, nca⁴ isi² ti⁴tjio¹-ni³.
MAT 2:19 Cˀia⁴ nca³ je³cˀen³ Herodes, coe⁴-ni³ je² a²ncje⁴-le⁴ Nai³-na¹ coan³tsen³-ni³le⁴ ya³ ni³jña¹-le⁴ José ya⁴ ˀnte³ Egipto.
MAT 2:20 Qui³tso²: Ti²so⁴tjain⁴, chjoai¹³ je² ˀnti¹-ve⁴ cao⁴ na⁴-le⁴, cˀoa⁴ tˀin³ na³nqui³ Israel. Je³cˀen³ je² xi³ cˀoa⁴-sˀin² me³-le⁴ nca³ si⁴²cˀen³ ˀnti¹-vi⁴.
MAT 2:21 Cˀia⁴ tsa³qui³so¹tjen⁴. Qui³scoe¹ je² ˀnti¹ cao⁴ na⁴-le⁴, cˀoa⁴ ja³ˀai³ ya⁴ na³nqui³ Israel.
MAT 2:22 Qui³nčhˀoe¹ nca³ Arquelao ti¹va³te¹xo³ma³ ya⁴ Judea nca³jao³-le⁴ Herodes xi³ nˀai³-le⁴, José qui³tsa³cjon¹-le⁴ nca³ ya⁴ coai⁴. To⁴nca³ cˀia⁴ nca³ cˀoa⁴-sˀin² tsa³cˀin²ya³-le⁴ ya³ ni³jña¹-le⁴, qui³ ya⁴ na³nqui³ Galilea.
MAT 2:23 Cˀoa⁴ ja³ˀai³, ya⁴ tsa³cˀe²jna³ ya⁴ ciudad xi³ Nazaret ˀmi², jme¹-ni³ nca³ coi⁴tjo³son²-si¹ni³ jo³ qui³tso² je² xi³ qui³nchja⁴ya³ tˀa³tsˀe⁴ Ni³na¹, nca³ cˀoa⁴-sˀin² cˀoin¹-ni³le⁴ cho⁴ta⁴ nazareno.
MAT 3:1 Je² coi³ ni⁴čhjin³-ve⁴ ja³ˀai³ Juan Bautista, xi³ qui³nchja⁴ya³ ya⁴ ˀnte³tˀa³xin²tˀa³ xi³ tsˀe⁴ Judea.
MAT 3:2 Cˀoi⁴qui³tso²: Ti⁴cˀa³ntjai³yao³ cjoa⁴fa³ˀai³tsjen³-no³, nca⁴ je³nčhoa¹ ma³čhian³ cjoa⁴te¹xo³ma³-le⁴ ncˀa³jmi³.
MAT 3:3 Je²-vi⁴ jña³-le⁴ xi³ qui³tso²-ni³ Isaías xi³ qui³nchja⁴ya³ tˀa³tsˀe⁴ Ni³na¹: Je²-vi⁴ jta⁴-le⁴ xi³ nˀion¹ nchja⁴ ya⁴ ˀnte³tˀa³xin²tˀa³: Tja³ntao³ ntia⁴²-le⁴ Nai³-na¹, tja³qui²xio⁴³ ntia⁴²ˀnti¹-le⁴.
MAT 3:4 Cˀoa⁴ Juan tsa³cˀa³cja¹ na³jño³ntsja⁴-le⁴ camello, cˀoa⁴ jnco³ čhjoa⁴xin¹ tji¹cja¹ntia³. Cˀoa⁴ tsa³cjen² xi³ tjin¹ nqui³jña¹, chjo⁴va⁴ cao⁴ ntsjen¹-le⁴ cho⁴ntsjen¹ya¹.
MAT 3:5 Cˀia⁴ ji³tjo³ cho⁴ta⁴ Jerusalén, cao⁴ nca³tsˀi³ cho⁴ta⁴ Judea, cao⁴ nca³tsˀi³ xi³ tjio¹ntai³ ya⁴ nta¹je⁴ Jordán. Qui³con³-le⁴ Juan.
MAT 3:6 Cˀoa⁴ tsa³ca³te¹nta¹ cho⁴ta⁴-ve⁴ Juan ya⁴ nta¹je⁴ Jordán. Cˀoa⁴ tsa³cja³ˀa¹con³ je¹-le⁴ cho⁴ta⁴.
MAT 3:7 Juan tsa³ve³ cho⁴ta⁴ fariseos cao⁴ cho⁴ta⁴ saduceos xi³ ncjin² ma³-ni³, xi³ ja³ˀai³ sa³te¹nta¹, qui³tso²-le⁴: Cho⁴ta⁴ xi³ ye⁴ cjoaon³, ˀya¹ xi³ tsa³qui³ncha¹xcon¹-no³ nca³ coi⁴ncha³xin²-lao⁴³ je² cjoa⁴ñˀain³ xi³ nčhoa¹-vi⁴.
MAT 3:8 Cˀoa⁴tˀiaon⁴³ tso²cˀoa⁴ cjoa⁴ xi³ nta³ tjin¹, xi³ va³quin²-no³ tsa² je³qui³ni²cˀa³ntjai²yao³ cjoa⁴fa³ˀai³tsjen³-no³.
MAT 3:9 A³li² vi³xon¹-jion²³ ja⁴jin³ ni⁴ma⁴-no³: Tjin¹-na¹ Abraham je² nˀai³jcha¹cjin³-na¹. An³ cˀoa⁴xin³-no³ nca³ Ni³na¹ coan⁴-le⁴ nta³ tsa² cao⁴ je² la⁴jao⁴-vi⁴, sco¹mi³tjen⁴ ˀnti¹ xi³ tˀa³tsˀe⁴ Abraham.
MAT 3:10 Cˀoa⁴-ti⁴ je² hacha je³qui³jna³tˀa³-le⁴ ja⁴ma⁴-le⁴ ya¹. Nca³yi³je³ ya¹ xi³ tsi² coi³ va³-le⁴ to³ xi³ nta³, jti¹ sˀe³tsao³jin³ lˀi¹.
MAT 3:11 An³-vi⁴ xi³ cjoa⁴qui²xi⁴ va³te³nta¹³-ni³no³ cao⁴ na³nta¹, nca³ qui³ni²cˀa³ntjai²yao³ cjoa⁴fa³ˀai³tsjen³-no³, to⁴nca³ je² xi³ nčhoa¹tjen⁴nqui³-na³, nqui²sa⁴ tse³ nca³nˀion¹ tjin¹-le⁴ cao⁴-ni³ tsa² an³. Je² jte¹-le⁴ an³ li²coi³ va³quin²-na³ nca³ cˀoa³. Je² xi³ coa⁴te²nta¹-ni³no³ cao⁴ Espíritu Santo cˀoa⁴ cao⁴ lˀi¹.
MAT 3:12 Je² xi³ vˀe¹ntjao⁴-ni³le⁴ cjia³ ntsja³, cˀoa⁴ si⁴²tsje³ tˀa³na³nqui³, cˀoa⁴ coi⁴ncha³xco¹ trigo ja⁴ya³ ni³ncˀa³-le⁴, cˀoa⁴ tje¹-le⁴ coi⁴ti⁴jin³ lˀi¹ xi³ ni⁴cˀia³-jin² cjoi⁴tsˀao³.
MAT 3:13 Cˀia⁴ ja³ˀai³-ni³ Galilea Jesús. Ja³ˀai³con³-le⁴ Juan ya⁴ nta¹je⁴ Jordán, jme¹-ni³ nca³ Juan coa⁴te²nta¹-si¹ni³ nca³ je².
MAT 3:14 To⁴nca³ Juan nˀion¹ tsa³cˀe²jna³ta²ja³, qui³tso²: An³ xi³ ma³chjen¹ nca³ coa⁴te²nta¹-nai¹³ ji³, cˀoa⁴ ji³ a³ cjoa²ˀai⁴chon⁴-nai¹³.
MAT 3:15 To⁴nca³ Jesús qui³tso²-le⁴: Ca²ta³vˀe² ntˀai⁴-vi⁴, nca³ cˀoa⁴²-sˀin² sque¹ntia³-na¹ nca³ si⁴qui³tjo³soan² nca³yi³je³ cjoa⁴te¹xo³ma³ xi³ cjoa⁴qui²xi⁴. Cˀia⁴ qui³si³jyo³-le⁴.
MAT 3:16 Cˀoa⁴ Jesús, coan³scan³-ni³ nca³ je³qui³sa³te²nta¹, ji³nčhoa³mi³ jin³nti⁴ton⁴-ni³ na³nta¹. Coe⁴-ni³ je² ncˀa³jmi³ qui³tjo³ˀai²-le⁴, cˀoa⁴ tsa³ve³ je³ Espíritu-le⁴ Ni³na¹ xi³ ji³nčhoa³jen³-ni³ jo³-ni³ ni⁴se³ paloma, ja³ˀai³jen³ne²-le⁴ Jesús.
MAT 3:17 Coe⁴-ni³ jnco³ jta⁴ qui³no²ˀya²-ni³le⁴ ncˀa³jmi³ xi³ cˀoa⁴tso²: Je²-vi⁴ ˀnti¹-na⁴ xi³ tsjoa³que⁴, jo³ nta³ sˀe³coan³ xi³ tˀa³tsˀe⁴.
MAT 4:1 Cˀia⁴ je² Espíritu Santo qui³cao⁴ Jesús ya⁴ ˀnte³tˀa³xin²tˀa³, nca³ je² nai⁴² coan³me³-le⁴ nca³ chˀao³ si⁴²cao⁴.
MAT 4:2 Cˀoa⁴ ña³chan³ ni⁴čhjin³, ña³chan³ ni⁴tjen⁴, nca³ tsi² tsa³cjen². Coan³scan³-ni³ coan³vao³-le⁴.
MAT 4:3 Cˀoa⁴ ji³cho²con³-le⁴ Jesús je² xi³ chˀao³ si⁴²cao⁴, qui³tso²: Tsa² ˀnti¹-le⁴ Ni³na¹ ni¹³ ji³, cˀoa⁴tˀin²-lai⁴ je² la⁴jao⁴-vi⁴ nca³ nio⁴xti²la⁴ ca²ta³ma³.
MAT 4:4 To⁴nca³ qui³nchja⁴-nca¹ni³ Jesús: Tji¹tˀa³: A³li² to⁴cao⁴ nio⁴xti²la⁴ cˀoe¹jna³con³-ni³ cho⁴ta⁴, to⁴nca³ cao⁴ nca³yi³je³ en¹ xi³ nchja⁴-ni³ tsˀoa³ Ni³na¹.
MAT 4:5 Cˀia⁴ je² nai⁴² qui³cao⁴ Jesús ya⁴ na⁴xi⁴na³nta¹tsje³, cˀia⁴ qui³si³cˀe¹jna³son² ya⁴ son²ncˀa³-le⁴ yo⁴nco⁴.
MAT 4:6 Qui³tso²-le⁴: Tsa² ˀnti¹-le⁴ Ni³na¹ ni¹³ ji³, chji¹jen³nqui³-lai⁴ i⁴-vi⁴, nca³ tji¹tˀa³: Ni³na¹ cˀoe⁴²xa¹-le⁴ a²ncje⁴-le⁴ nca³ si⁴²coi²nta⁴-li², cˀoa⁴ je² ntsja⁴ sco¹mi³tjen⁴-ni³li², jme¹-ni³ nca³ je² la⁴jao⁴ li²coi³ sa⁴te¹nqui³-si¹ni³ ntso⁴coi³.
MAT 4:7 Jesús qui³tso²-le⁴: Cˀoa⁴²-ti⁴ tji¹tˀa³: A³li² chˀao³ cho²tˀa³-jin²³ je² Nai³-li⁴ Ni³na¹-li⁴.
MAT 4:8 Nqui²jnco³cˀa² je² nai⁴² qui³cao⁴ jnco³ ni³nto³ xi³ nˀion¹ ncˀa³, cˀoa⁴ tsa³ca³co¹-le⁴ nca³yi³je³ cjoa⁴te¹xo³ma³-le⁴ son³ˀnte³, cao⁴ cjoa⁴je³ya³-le⁴.
MAT 4:9 Qui³tso²-le⁴: Nca³yi³je³ je²-vi⁴ tsjoa³-le²³ ji³-vi⁴, tsa² coi⁴sen⁴xco¹nchˀin³tˀa³-nai¹³, cˀoa⁴ tsa² jcha⁴xcon¹-nai¹³.
MAT 4:10 Cˀia⁴ Jesús tso²-le⁴: Tˀin³, Satanás, nca⁴ tji¹tˀa³: To⁴je² Nai³-li⁴ Ni³na¹-li⁴ xi³ jcha⁴xcoin¹³, cˀoa⁴ to⁴je² to⁴jnco³ xi³ si⁴xa¹-lai⁴.
MAT 4:11 Cˀia⁴ je² nai⁴² qui³xin²-le⁴. Coe⁴-ni³ je² a²ncje⁴ xi³ ji³cho², cˀoa⁴ qui³si³sin³-le⁴.
MAT 4:12 Cˀia⁴ nca³ qui³nčhˀoe¹ Jesús nca³ Juan qui³ni²cˀe¹jna³nˀion¹, qui³ ya⁴ Galilea.
MAT 4:13 Qui³si³cˀe¹jna³ Nazaret, ji³nčhoa³ cˀoa⁴ ya⁴ tsa³cˀe²jna³ Capernaum, je² na⁴xi⁴na³nta¹ xi³ ti¹jna³ntai³ nta¹chi³con³, xi³ nchja⁴-ni³ Zabulón cao⁴ Neftalí,
MAT 4:14 jme¹-ni³ nca³ coan⁴jnco³-si¹ni³ je² xi³ qui³tso² Isaías xi³ qui³nchja⁴ya³ tˀa³tsˀe⁴ Ni³na¹, xi³ cˀoi⁴qui³tso²:
MAT 4:15 Je² na³nqui³ Zabulón cao⁴ je² na³nqui³ Neftalí, xi³ ntia⁴² ya⁴ ja⁴tˀa³-le⁴ nta¹chi³con³, cˀoa⁴ xi³ xi³ncoa³tˀa³ Jordán, cˀoa⁴ ya⁴ Galilea xi³ tsˀe⁴ cho⁴ta⁴ xi³ li² judío-jin².
MAT 4:16 Je² na⁴xi⁴na³nta¹ xi³ tjio¹jin³ njion², jnco³ lˀi¹tse³ tsa³ve³, cˀoa⁴ je² xi³ tjio¹ ya⁴ ˀnte³-le⁴ cjoa⁴vi³ya³, xi³ tjio¹nqui³-le⁴ cjoa⁴vi³ya³, lˀi¹ qui³si³ˀi³sen³-le⁴.
MAT 4:17 Sa³ˀnta³ cˀia⁴ Jesús tsa³cˀe¹tsˀia⁴ nca³ qui³nchja⁴ya³, cˀoa⁴ qui³tso²: Ti⁴cˀa³ntjai²yao³ cjoa⁴fa³ˀai³tsjen³-no³, nca⁴ je³nčhoa¹ ma³čhian³ cjoa⁴te¹xo³ma³-le⁴ ncˀa³jmi³.
MAT 4:18 Cˀia⁴ nca³ ja³ˀa³ Jesús ntai³ nta¹chi³con³ ya⁴ Galilea, tsa³ve³ jao² ntsˀe⁴, Simón xi³ Pedro ˀmi²-ni³, cao⁴ Andrés xi³ ti⁴ntsˀe⁴-ni³. Tjio¹si¹cˀa³tjen⁴jin³ na⁴ˀya³-le⁴ nta¹chi³con³, nca⁴ jti⁴ ma³-le⁴ si¹cˀen³.
MAT 4:19 Jesús qui³tso²-le⁴: Nčhoa¹tjen⁴nqui³-nao¹³, cˀoa⁴ an³ tsjoa³-no³ xa¹ nca³ cˀoe¹xco¹³ cho⁴ta⁴.
MAT 4:20 Nti⁴ton⁴ qui³si³ca³tio² na⁴ˀya³-le⁴, qui³tjen⁴nqui³-le⁴.
MAT 4:21 Cˀoa⁴ qui³-sa³ ya⁴-ve⁴, nqui²jao² ntsˀe⁴ tsa³ve³, je² Jacobo xi³ ˀnti¹-le⁴ Zebedeo, cao⁴ Juan xi³ ti⁴ntsˀe⁴-ni³ ja⁴ya³ chi³tso³ cao⁴ Zebedeo xi³ nˀai³-le⁴, tjio¹vˀe¹jčho³ na⁴ˀya³-le⁴. Cˀoa⁴ qui³nchja⁴-le⁴.
MAT 4:22 Cˀoa⁴ je² nti⁴ton⁴ qui³si³cˀe¹jna³ chi³tso³-ve⁴ cao⁴ nˀai³-le⁴, qui³tjen⁴nqui³-le⁴.
MAT 4:23 Cˀoa⁴ Jesús tsa³cˀa³mjen³jin³jnta² Galilea, tsa³ca³co¹ya³ ya⁴ ntˀia³ xi³ sinagoga ˀmi² xi³ tsˀe⁴, cˀoa⁴ qui³nchja⁴ya³jin³-ni³ en¹nta³ xi³ tˀa³tsˀe⁴ cjoa⁴te¹xo³ma³-le⁴ ncˀa³jmi³. Qui³si³nta³ nca³yi³je³ chˀin³, cˀoa⁴ nca³tsˀi³ xi³ aon³-le⁴ ya⁴ na⁴xi⁴na³nta¹-ve⁴.
MAT 4:24 Cˀoa⁴-sˀin² tsa³nca³va³son² en¹ xi³ tˀa³tsˀe⁴ Jesús nca³qui³jnta² Siria, cˀoa⁴ ja³ˀai³cao⁴-le⁴ nca³tsˀi³ xi³ tjio¹mˀen³, je² xi³ ncjin² jco⁴ya³ tjin¹-le⁴, xi³ tse³ cjoa⁴ñˀain³ tjio¹fa³ˀa¹, xi³ nai⁴² tjio¹jin³ ni⁴ma⁴-le⁴, xi³ chˀin³xin¹ tjin¹-le⁴, xi³ to⁴cjio³ ya¹, cˀoa⁴ qui³si³nta³-ni¹.
MAT 4:25 Ncjin² cho⁴ta⁴ xi³ tsˀe⁴ Galilea qui³tjen⁴nqui³-le⁴, cˀoa⁴ xi³ tsˀe⁴ Decápolis, cˀoa⁴ xi³ tsˀe⁴ Jerusalén, cˀoa⁴ xi³ tsˀe⁴ Judea, cˀoa⁴ xi³ tsˀe⁴ ya⁴ xi³ncoa³tˀa³ Jordán.
MAT 5:1 Cˀia⁴ nca³ tsa³ve³tsˀi³ cho⁴ta⁴, qui³mi³ ya⁴ ni³nto³. Ya⁴ tsa³cˀe²jna³, cˀia⁴ ji³cho²con³-le⁴ cho⁴ta⁴-le⁴.
MAT 5:2 Cˀia⁴ tsa³cˀe¹tsˀia⁴ nca³ qui³nchja⁴, tsa³ca³co¹ya³-le⁴, cˀoi⁴qui³tso²:
MAT 5:3 Jo¹ to⁴nta³-le⁴ je² xi³ yo⁴ma⁴ cjia³ya³con³, nca⁴ tsˀe⁴ ni¹ cjoa⁴te¹xo³ma³-le⁴ ncˀa³jmi³.
MAT 5:4 Jo¹ to⁴nta³-le⁴ je² xi³ cji³ˀntia¹, nca⁴ je² xi³ coan⁴je³con³.
MAT 5:5 Jo¹ to⁴nta³-le⁴ je² xi³ i³nta³jin³, nca⁴ je² xi³ scoe¹cjoa⁴tjao² je² son³ˀnte³-vi⁴.
MAT 5:6 Jo¹ to⁴nta³-le⁴ je² xi³ vao³-le⁴, cˀoa⁴ xi³ fa³ti²-le⁴ cjoa⁴ xi³ cjoa⁴qui²xi⁴, nca⁴ coan⁴squi³.
MAT 5:7 Jo¹ to⁴nta³-le⁴ je² xi³ ma³ma⁴con³, nca⁴ je² xi³ sˀe⁴-le⁴ cjoa⁴ma⁴ta³con².
MAT 5:8 Jo¹ to⁴nta³-le⁴ je² xi³ tsje³ ni⁴ma⁴-le⁴, nca⁴ je² xi³ scoe⁴ Ni³na¹.
MAT 5:9 Jo¹ to⁴nta³-le⁴ je² xi³ si¹qui³njen³nchˀan¹, nca⁴ je² xi³ ˀnti¹-le⁴ Ni³na¹ cˀoin¹-le⁴.
MAT 5:10 Jo¹ to⁴nta³-le⁴ je² xi³ cjoa⁴ñˀain³ fa³ˀa¹ xi³ tˀa³tsˀe⁴ cjoa⁴qui²xi⁴, nca⁴ je² xi³ cjoa⁴te¹xo³ma³-le⁴ ncˀa³jmi³ tjin¹-le⁴.
MAT 5:11 Jo¹ to⁴nta³-no³ cˀia⁴ nca³ no²cjoa⁴ˀaon³-no³, cˀia⁴ nca³ fi²tjen⁴nqui³ co²ntran⁴-no³, cˀoa⁴ nca³ coi⁴tso⁴-no³ nca³yi³je³ xi³ chˀao³ tjin¹ xi³ tˀa³tsˀan⁴, nca³ en¹nti³so³ nchja⁴.
MAT 5:12 Tˀe²tsjoao³-ta³con²³, cˀoa⁴ tˀe²jnco³-ta³con²³, nca⁴ je² chji¹-no³ nˀion¹ tse³ coan⁴ ya⁴ ncˀa³jmi³. Cˀoa⁴-sˀin² qui³tjen⁴nqui³co²ntran⁴-le⁴ je² xi³ qui³nchja⁴ya³ tˀa³tsˀe⁴ Ni³na¹, xi³ ti¹tjon² tjio¹-no³.
MAT 5:13 Jon² nio¹³ na⁴xa⁴-le⁴ son³ˀnte³, cˀoa⁴ tsa² je² na⁴xa⁴ cha⁴jta³, jo¹-sˀin² coan⁴ nqui²ntia³-ni³ cˀoai⁴-le⁴ jta⁴. A³li² ti⁴jme³-ni³ chji¹-le⁴, to⁴sa³ si⁴cˀa³tjen⁴, ca²ti³ncha³ne² cho⁴ta⁴.
MAT 5:14 Jon² nio¹³ lˀi¹-le⁴ son³ˀnte³. Jnco³ na⁴xi⁴na³nta¹ xi³ ti¹jna³son² ni³nto³ li²coi³ coan⁴ sˀe⁴ˀma³.
MAT 5:15 Ni⁴ca³nti²-jin² sˀe³tˀa³ˀi¹, ni⁴ya⁴-jin² sˀe³jna³nqui³-le⁴ jnco³ ca²xa⁴choa⁴, to⁴nca³ ya⁴² sˀe³jna³son² jña³ sa³tio²son² ca³nti², cˀoa⁴ si⁴²ˀi³sen³-le⁴ nca³tsˀi³ xi³ tjio¹ ya⁴ ntˀia³.
MAT 5:16 Cˀoa⁴-sˀin² ca²ta³ma³ˀi³sen³-le⁴ lˀi¹-no³ nqui³xcon⁴ cho⁴ta⁴, jme¹-ni³ nca³ scoe⁴-si¹ni³ xa¹nta³-no³, cˀoa⁴ cˀoa⁴sje³je³ya³-si¹ni³ Nˀai³-no³ xi³ ti¹jna³ ncˀa³jmi³.
MAT 5:17 A³li² ni²cja³ˀai³tsjen³-jion²³ tsa² cjoa⁴te¹xo³ma³ je²ˀe⁴ si³qui³xo²ya³, ni⁴je²-jin² xi³ qui³nchja⁴ya³ tˀa³tsˀe⁴ Ni³na¹. Li²coi³ je²ˀe⁴-nia³ nca³ si³qui³xo²ya³, to⁴nca³ je²ˀe⁴ si³jnco³-nia¹³ cjoa⁴te¹xo³ma³.
MAT 5:18 Xi³ cjoa⁴qui²xi⁴ xi³ xin³-no³, jo³ sa³ˀnta³ nca³ cjoe⁴tˀa³ ncˀa³jmi³ cao⁴ son³ˀnte³, ni⁴jnco³-jin² letra, ni⁴jnco³-jin² choa⁴ xi³ cha⁴ xi³ tsˀe⁴ cjoa⁴te¹xo³ma³-vi⁴, sa³ˀnta³ nca³ coan⁴jnco³ cjoa⁴te¹xo³ma³-vi⁴ nca³yi³je³.
MAT 5:19 To⁴ˀya³-ni³ve⁴ xi³ cˀoa⁴sje³nqui³ jnco³ cjoa⁴te¹xo³ma³-vi⁴, nta³ tsa² to⁴choa³ na⁴cji³-sa³, cˀoa⁴-ti⁴sˀin² coa⁴co²ya³-le⁴ cho⁴ta⁴, cjai¹nca³ to⁴ˀnti¹ cˀoin¹-le⁴ ya⁴ cjoa⁴te¹xo³ma³-le⁴ ncˀa³jmi³. To⁴nca³ to⁴ˀya³-ni³ve⁴ xi³ cˀoa⁴sˀin⁴² xi³ cˀoa⁴ti⁴-sˀin² coa⁴co²ya³, je²-vi⁴ xi³ ncˀa³ cˀoin¹-le⁴ ya⁴ cjoa⁴te¹xo³ma³-le⁴ ncˀa³jmi³.
MAT 5:20 Nca⁴ cˀoa⁴²xin³-no³, tsa² je² cjoa⁴qui²xi⁴-no³ xi³ tsi² tsa² nqui²sa⁴ tse³ coan⁴ cao⁴-ni³ tsa² xi³ tsˀe⁴ cho⁴ta⁴ scribano cao⁴ cho⁴ta⁴ fariseos, ni⁴cˀia⁴-jin² coi⁴tja¹sˀaon³ ya⁴ cjoa⁴te¹xo³ma³-le⁴ ncˀa³jmi³.
MAT 5:21 Qui³no²ˀya²-nio¹³ jo³ tsa³cˀin²-le⁴ nˀai³jcha¹cjin³: A³li² ni²cˀen³-jin²³. Tsa² ˀya³ xi³ si⁴²cˀen³, cji³ne²-le⁴ cjoa⁴ñˀain³.
MAT 5:22 To⁴nca³ an³ xin³-no³, tsa² jnco³ xi³ coan⁴jti³-le⁴ cao⁴ ntsˀe⁴, cji³ne²-le⁴ cjoa⁴ñˀain³. To⁴ˀya³-ni³ve⁴ xi³ chˀao³ coi⁴tso⁴-le⁴ ntsˀe⁴ en¹tsˀen⁴, cji³ne²-le⁴ cjoa⁴ñˀain³ nqui³xcon⁴ cjoa⁴te¹xo³ma³. To⁴ˀya³-ni³ve⁴ xi³ sca¹-li² coi⁴tso⁴-le⁴ ntsˀe⁴, cji³ne²-le⁴ cjoa⁴ñˀain³ ˀnte³ jña³ nca³ ti¹ti² lˀi¹.
MAT 5:23 To⁴coi³, tsa² cjoa²ˀai⁴coai⁴ cjoa⁴tjao²-li⁴ ya⁴ son²xta², cˀoa⁴ tsa² ya⁴ cjoa⁴ˀai¹tsjen³-li² nca³ ntsˀai⁴ tjin¹ˀi⁴tse¹-le⁴ cjoa⁴co²ntran⁴ tˀa³tsi⁴,
MAT 5:24 tˀe²jnai³ cjoa⁴tjao²-li⁴ ya⁴tˀa³ son²xta², cˀoa⁴ tˀin³ ti¹tjon²-cjoan²la² ti⁴mi²yo⁴ nqui²jnco³cˀai²³ ntsˀai⁴, cˀoa⁴ cˀia⁴ nčhoai¹³, cˀoa⁴ tˀai²tˀai³ cjoa⁴tjao²-li⁴ˀni³.
MAT 5:25 Nti⁴ton⁴ cho⁴va²nta³-nio³ cao⁴ xi³ jti³que³-li², to⁴tjen⁴ nca³ ti³ˀmi³coai⁴ ya⁴ ntia⁴², jme¹-ni³ nca³ je² xi³ jti³que³-li² li²coi³ tsjoa¹tˀa³-si¹ni³li² xca²le⁴, cˀoa⁴ je² xca²le⁴ sca⁴ni²tˀa³-li² policía, cˀoa⁴ sca⁴ni²sˀen³-li² nto⁴ya¹.
MAT 5:26 Xi³ cjoa⁴qui²xi⁴ xi³ xin³-le²³, nca³ li²coi³ ti⁴coan⁴ coi²tjo⁴-ni³ ya⁴-ve⁴ sa³ˀnta³ nca³ cˀoe¹chji¹ntjai² yao³-li⁴ nca³yi³je³ jo³ tjin¹ xi³ cji³ne²-li⁴.
MAT 5:27 Qui³no²ˀya²-nio¹³ nca³ cˀoi⁴qui³tso² cjoa⁴: A³li² ni²cha³jnqui³-jin²³.
MAT 5:28 To⁴nca³ an³ xin³-no³: To⁴ˀya³-ni³ve⁴ xi³ co³tsen³-le⁴ jnco³ chjon⁴² nca³ ma³xcai⁴²-le⁴, je³qui³si³cha³jnqui³ ja⁴jin³ ni⁴ma⁴-le⁴ cao⁴ je².
MAT 5:29 To⁴coi³ tsa² xcoin³ nca³qui²xi⁴ si¹cji³tson¹-li², chˀa⁴sjai³, ti⁴cˀe¹jna³ tˀa³xin²-lai⁴ yao³-li⁴. Nqui²sa⁴ nta³-ni³ nca³ cha⁴ jnco³ ya²-le⁴ yao³-li⁴, jme¹-ni³ nca³ tsi² tsa² nca³yi³je³ yao³-li⁴ tsao⁴jin³-si¹ni³ jña³ nca³ ti¹ti² lˀi¹.
MAT 5:30 Tsa² ntsai⁴ nca³qui²xi⁴ si¹cji³tson¹-li², ti⁴cha¹tˀai³, ti⁴-cˀe¹jna³ tˀa³xin²-lai⁴ yao³-li⁴. Nqui²sa⁴ nta³-ni³ nca³ cha⁴ jnco³ ya²-le⁴ yao³-li⁴, jme¹-ni³ nca³ tsi² tsa² nca³yi³je³ yao³-li⁴ tsao⁴jin³-si¹ni³ jña³ nca³ ti¹ti² lˀi¹.
MAT 5:31 Cˀoa⁴-ti⁴ qui³tso²: To⁴ˀya³-ni³ve⁴ xi³ tsjion³ chjon⁴²-le⁴, tˀai²-lai⁴ xon⁴ xi³ tsjion³-ni³ xi¹ncjin¹ cho⁴ta⁴.
MAT 5:32 To⁴nca³ an³ xin³-no³, nca³ je² xi³ tsjion³ chjon⁴²-le⁴, tsa² tsi² xi³ to⁴tˀa³tsˀe⁴ cjoa⁴cha³jnqui³, je² cho⁴ta⁴ cˀoa⁴sˀin¹ nca³ si¹cha³jnqui³ chjon⁴²-le⁴. Cˀoa⁴ je² xˀin⁴ xi³ coi⁴xan³cao⁴ chjon⁴² xi³ qui³njion³-ve⁴, si¹cha³jnqui³tˀa³-le⁴.
MAT 5:33 Cˀoa⁴²-ti⁴ je³qui³no²ˀyao²³ nca³ cˀoa⁴ tsa³cˀin²-le⁴ nˀai³jcha¹cjin³: A³li² en¹nti³so³-jin² vˀai²³. Je² Nai³-na¹ cˀoe¹chji¹-lai⁴ je² cjoa⁴ xi³ en¹-li⁴ vˀai²³.
MAT 5:34 To⁴nca³ an³ xin³-no³: Ni⁴to⁴jme³-jin² xi³ tˀa³tsˀe⁴ vˀai²³ en¹-li⁴, ni⁴tˀa³tsˀe⁴ ncˀa³jmi³-jin², nca⁴ coi³ xi³ ya¹xi²le⁴-le⁴ Ni³na¹.
MAT 5:35 Ni⁴tˀa³tsˀe⁴-jin² son³ˀnte³, nca⁴ coi³ jña³ vi³ncha¹ne² ntso⁴co⁴ Ni³na¹. Ni⁴tˀa³tsˀe⁴-jin² Jerusalén, nca⁴ coi³ xi³ na⁴xi⁴na³nta¹ xi³ tsˀe⁴ je² cho⁴ta⁴ti¹tjon² xi³ nˀion¹ ncˀa³.
MAT 5:36 Ni⁴tˀa³tsˀe⁴ jco⁴-jin² vˀai²³ en¹-li⁴, nca⁴ li²coi³ coan⁴-li² si⁴čhoai³ ni⁴si⁴jmai²³ jnco³ ntsja⁴.
MAT 5:37 To⁴nca³ ca²ta³jaon³-li² tsa² jaon³-li², cˀoa⁴ tsa² mai³ mai³-li². Je² xi³ fa³ˀa³to³-sa³ je²-vi⁴, ya⁴² nčhoa¹-ni³ xi³ chˀao³ tjin¹.
MAT 5:38 Qui³no²ˀya²-nio¹³ nca³ cˀoa⁴tsa³cˀin²-le⁴ nˀai³jcha¹cjin³: Xi³ xcon⁴ ca²ta³si¹nca³jao³-ni³ xcon⁴, cˀoa⁴ xi³ ni⁴ˀño⁴ ca²ta³si¹nca³jao³-ni³ ni⁴ˀño⁴.
MAT 5:39 To⁴nca³ an³ xin³-no³: Ti⁴cjain¹-lao⁴³ xi³ tsˀen⁴. To⁴sa³ tsa² jnco³ xi³ si⁴²qui²ˀaon³ ncjain³ nca³qui²xi⁴-li⁴, ti⁴cˀo¹fa³ya³-lai⁴ xi³ncoa³-ni³.
MAT 5:40 Tsa² jnco³ xi³ coa⁴jnqui³ya³tˀain³-li², cˀoa⁴ tsa² scoe¹ na³jño³-li⁴, cˀoa⁴-ti⁴ ti⁴cˀe¹jna³nqui³-lai⁴ tso⁴nca⁴-li⁴.
MAT 5:41 Cˀoa⁴ to⁴ˀya³-ni³ve⁴ xi³ cjoa⁴nˀion¹ sˀin⁴²-li² nca³ cjin³ cˀoin¹coai⁴, jao² ya³ cˀoa⁴cji³ tˀin³coai⁴.
MAT 5:42 Tsa² jnco³ xi³ si⁴²je¹-li², tˀai²-lai⁴, cˀoa⁴ tsa² jnco³ xi³ me³-le⁴ scoin³ya³tˀa³-li², a³li² mai³-jin² ˀmi²-lai⁴.
MAT 5:43 Qui³no²ˀya²-nio¹³ nca³ cˀoa⁴qui³tso²: Ca²ta³ma³tsjoa³chai³ xi²nqui⁴, cˀoa⁴ ca²ta³ma³jti³chai³ xi³ jti³que³-li².
MAT 5:44 To⁴nca³ an³ xin³-no³: Ca²ta³ma³tsjoa³chao³ xi³ jti³que³-no³, ti⁴chi³con³tˀaon³ xi³ nchja⁴ˀaon³-no³, nta³ ti⁴cao⁴³ xi³ chˀao³ ve³con³-no³, tˀe²tsˀoa³ntjao²³ xi³ chˀao³ si¹cao⁴-no³, cˀoa⁴ xi³ fi²tjen⁴nqui³ co²ntran⁴-no³,
MAT 5:45 jme¹-ni³ nca³ coan⁴-si¹nio³ ˀnti¹-le⁴ Nˀai³-no³ xi³ ti¹jna³ ncˀa³jmi³. Nca⁴ je² xi³ si¹cji³tjo³son² tsˀoi¹-le⁴ xi³ tˀa³tsˀe⁴ xi³ tsˀen⁴ cˀoa⁴ xi³ tˀa³tsˀe⁴ xi³ nta³. Vˀa³ne²-le⁴ jtsi¹ ja⁴son²-le⁴ je² xi³ qui²xi⁴ cˀoa⁴ xi³ tsi² qui²xi⁴ tjio¹ma³.
MAT 5:46 Tsa² tsjoa³chao³ xi³ ma³tsjoa³que³-no³, jme¹-ni³ chji¹-no³. A³ tsi² cˀoa⁴-ti⁴ nˀiaon²³ jo³ sˀin¹ xi³ vˀe¹ña³ taon⁴va³sen³.
MAT 5:47 Cˀoa⁴ tsa² to⁴je² ntsˀao³ ni²ti²ˀntao³, jme¹ xi³ nqui²sa⁴ tse³ nˀiaon²³. A³ tsi² cˀoa⁴-ti⁴ nˀiaon²³ jo³ sˀin¹ cho⁴ta⁴ xi³ li² judío-jin².
MAT 5:48 Ña³qui³ cjoa⁴qui²xi⁴ ca²ta³mao³ nca³ jon², jo³-ni³ tsa² Nˀai³-no³ xi³ ti¹jna³ ncˀa³jmi³ xi³ ña³qui³ qui²xi⁴-ni¹.
MAT 6:1 Ti⁴coi²ntao⁴³ nca³ je² cjoa⁴qui²xi⁴-no³ a³li² cˀia⁴-jin² nˀiaon²³ nqui³xcon⁴ cho⁴ta⁴, jme¹-ni³ nca³ scoe⁴-si¹ni³ xi³ cjoa⁴qui²xi⁴-no³. Tsa² cˀoa⁴sˀiaon⁴³, li²coi³ tsjoa¹-no³ chji¹-no³ je² Nˀai³-no³ xi³ ti¹jna³ ncˀa³jmi³.
MAT 6:2 Cˀia⁴ nca³ cˀoai⁴cjoa⁴tjao²-lai⁴ limosna, a³li² čhjao³-jin² ni²cja³ne³ ti¹tjon²-lai⁴ yao³-li⁴, jo³ sˀin¹ cho⁴ta⁴ xi³ jao² ncjain¹ ya⁴ ni³ˀya³ xi³ sinagoga ˀmi², cˀoa⁴ ya⁴jin³ nti⁴tsin⁴, jme¹-ni³ nca³ cho⁴ta⁴ cˀoa⁴sje³je³ya³-si¹ni³. Xi³ cjoa⁴qui²xi⁴ xi³ xin³-no³, nca³ je³tjin¹-le⁴ chji¹-le⁴.
MAT 6:3 Cˀia⁴ nca³ ji³ vˀai²³ limosna, ntsai⁴ nca³scon¹ li² je²-jin² ve³ jme³ xi³ sˀin¹ ntsai⁴ nca³qui²xi⁴,
MAT 6:4 jme¹-ni³ nca³ je² limosna-li⁴ cˀoai⁴ˀma³-si¹ni³. Cˀoa⁴ Nˀai³-li⁴ xi³ ve³ xi³ tji¹ˀma³, je² xi³ tsjoa¹son²tsen³-li² chji¹-li⁴.
MAT 6:5 Cˀia⁴ nca³ vˀe²tsˀoai³, a³li² cˀoa⁴-jin² nˀiain²³ jo³ sˀin¹ xi³ jao² ncjain¹, nca⁴ je² xi³ ma³tsjoa³que³ xi³ vˀe²tsˀoa³ ˀmi² ya⁴ ni³ˀya³ sinagoga, cˀoa⁴ ya⁴ cro²-le⁴ calle, jme¹-ni³ nca³ cˀoa⁴-sˀin² scoe⁴-si¹ni³ cho⁴ta⁴. Xi³ cjoa⁴qui²xi⁴ xi³ xin³-no³, nca³ je³tjin¹-le⁴ chji¹-le⁴.
MAT 6:6 To⁴nca³ ji³, cˀia⁴ nca³ vˀe²tsˀoai³ ti⁴tja¹sˀain³ tˀa³xin², cˀoa⁴ tˀe²chjoai²³ xo⁴ntjoa⁴-li⁴, tˀe²tsˀoa³-lai⁴ Nˀai³-li⁴ xi³ ti¹jna³ˀma³, cˀoa⁴² Nˀai³-li⁴ xi³ ve³ xi³ tji¹ˀma³, je² xi³ tsjoa¹son²tsen³-li² chji¹-li⁴.
MAT 6:7 Cˀoa⁴ cˀia⁴ nca³ vˀe²tsˀoai³, a³li² ti⁴coi³-jin²ni³ en¹ ni²chjain²³, jo³-sˀin² cho⁴ta⁴ xi³ li² judío-jin², xi³ si¹cja³ˀai³tsjen³ nca³ to⁴coi³ nca³ tse³ nchja⁴, nca³ coi³ xi³ coi⁴no¹ˀya³-ni³le⁴.
MAT 6:8 A³li² cˀoa⁴-jin² nˀiaon²³ jo³ sˀin¹ nca³ je², nca⁴ je² Nˀai³-no³ ve³ nca³yi³je³ xi³ ma³chjen¹-no³, to⁴nqui³-ni³ nca³ ni²jao¹³.
MAT 6:9 Jon² cˀoi⁴-sˀin² tˀe²tsˀoao³: Nˀai³-na⁴jin⁴ xi³ ti³jnai³ ncˀa³jmi³, ca²ta³ˀya³xcon¹ jan³ˀain¹-li⁴.
MAT 6:10 Ca²tji³nčhoa¹ cjoa⁴te¹xo³ma³-li⁴. Cˀoa⁴ca²ta³sˀin¹ jo³-sˀin² nca³ me³-li², jo³-ni³ ya⁴ ncˀa³jmi³ cˀoa⁴-ti⁴sˀin² i⁴ son³ˀnte³.
MAT 6:11 Tˀai²-na³jin⁴ nio⁴xti²la⁴ xi³ ni⁴čhjin³ nca³ nchaon³ ma³chjen¹-na³jin⁴.
MAT 6:12 Ti⁴cha³tˀa³-na³jin⁴ jme³ xi³ tjen⁴-na³jin⁴, jo³-sˀin² nca³ cˀoa⁴-ti⁴ jin⁴-jin⁴ ni²cha³tˀa³-lai⁴jin⁴ je² xi³ qui³tjen⁴-le⁴ tsain⁴-jin⁴.
MAT 6:13 Cˀoa⁴ a³li² cha⁴ni²tˀa³-jin²na³jin⁴ xi³ chˀao³ si¹cao⁴-na³jin⁴, to⁴nca³ chˀa⁴sje³ntjai²-na³jin⁴ xi³ cjoa⁴tsˀen⁴. Nca⁴ tsi⁴ ni¹ cjoa⁴te¹xo³ma³, cao⁴ nca³nˀion¹, cao⁴ cjoa⁴je³ya³ nca³ntsjai² ni⁴čhjin³. Cˀoa⁴ ca²ta³ma³.
MAT 6:14 Cˀia⁴ tsa² jon² si⁴cha³tˀa³-lao⁴³ je¹-le⁴ cho⁴ta⁴, je² Nˀai³-no³ xi³ ti¹jna³ ncˀa³jmi³ cˀoa⁴-ti⁴sˀin² si⁴²cha³tˀa³-no³.
MAT 6:15 To⁴nca³ tsa² tsi² si⁴cha³tˀa³-lao⁴³ cho⁴ta⁴ je¹-le⁴, cˀoa⁴-ti⁴ je² Nˀai³-no³ li²coi³ si⁴²cha³tˀa³-no³ je¹-no³.
MAT 6:16 Cˀia⁴ nca³ vi³yo³nchjaon³, a³li² cˀoa⁴-jin² nˀiaon²³ jo³ sˀin¹ xi³ jao² ncjain¹ nca³ va³-le⁴ ncjain¹. Je² si¹cˀa³ntjai²ya³ ncjain¹, nca³ me³-le⁴ nca³ cˀoa⁴coan⁴ cjoan³ jo³-sˀin² cho⁴ta⁴ xi³ tsi² tsa² cjen². Xi³ cjoa⁴qui²xi⁴ xi³ xin³-no³, nca³ je³tjin¹-le⁴ chji¹-le⁴.
MAT 6:17 To⁴nca³ ji³, cˀia⁴ nca³ vi³jna³nchjain³, tˀe²jin³ si²ti⁴ ntsja⁴jcoi³, cˀoa⁴ cho¹ncjain⁴,
MAT 6:18 jme¹-ni³ nca³ tsi² scoe⁴-si¹ni³li² cho⁴ta⁴, tsa² ti³jna³nchjain³, to⁴je² Nˀai³-li⁴ xi³ ti¹jna³ˀma³ xi³ scoe⁴-li², cˀoa⁴ je² Nˀai³-li⁴ xi³ ve³ xi³ tji¹ˀma³, je² xi³ tsjoa¹son²tsen³-li² chji¹-li⁴.
MAT 6:19 A³li² cjoa⁴nchi⁴na¹-jin² vˀe²xco¹³ i⁴ son³ˀnte³-vi⁴, jña³ nca³ cho⁴qui³xo³, cˀoa⁴ cao⁴ ntsjao¹ si¹qui³tson¹, cˀoa⁴ jña³ nca³ che¹ va³cja¹nqui³, cˀoa⁴ si¹che¹.
MAT 6:20 To⁴nca³ chjoe¹xco¹ cjoa⁴nchi⁴na¹ ya⁴ ncˀa³jmi³, jña³ nca³ tsi² cho⁴qui³xo³, cˀoa⁴ cao⁴ ntsjao¹ xi³ si¹qui³tson¹, jña³ nca³ tsi² che¹-jin² xi³ va³cja¹nqui³, ni⁴ si¹che¹-jin².
MAT 6:21 Nca⁴ ya⁴ jña³ nca³ ti¹jna³ cjoa⁴nchi⁴na¹-li⁴, cˀoa⁴²-ti⁴ ya⁴ cˀoe¹jna³ ni⁴ma⁴-li⁴.
MAT 6:22 Je² xcoan³² lˀi¹-le⁴ yao³-na¹ ni¹. Tsa² je² xcoin³ ña³qui³ nta³, cˀoa⁴²-ti⁴ i³sen³ coan⁴-le⁴ nca³yi³je³ yao³-li⁴.
MAT 6:23 To⁴nca³ tsa² xcoin³ xi³ chˀao³ cjoan³, njion² chon³-le⁴ nca³yi³je³ yao³-li⁴. Cˀoa⁴-sˀin² tsa² je² lˀi¹ xi³ ti¹jna³jin³ ni⁴ma⁴-li⁴, to⁴cjoa⁴njion² ni¹, jo¹ to⁴tse³ cjoa⁴njion²-ni³.
MAT 6:24 Ni⁴ˀya³-jin² xi³ jao² nai³-le⁴ ma³ si¹xa¹-le⁴. Cˀoa⁴ jti³que³ coan⁴ jnco³, cˀoa⁴ xi³jnco³ tsjoa³que³, cˀoa⁴ coai⁴tˀa³-le⁴ jnco³ cˀoa⁴ xi³jnco³ chˀao³ scoe⁴con³. A³li²coi³ coan⁴ ni²xa¹-lao⁴³ nca³ jao², Ni³na¹ cao⁴ cjoa⁴nchi⁴na¹.
MAT 6:25 Cˀoa⁴xin³-no³: A³li² vˀe²xcon¹-jin²lao⁴³ yao³-no³ xi³ tˀa³tsˀe⁴ cjoa⁴vi³jna³chon³-no³, jme³ xi³ chi⁴nao⁴³, jme³ xi³ sˀio⁴³, ni⁴ xi³ tˀa³tsˀe⁴ yao³-no³, jme³ xi³ chˀa²cjao¹³. A³ tsi² nqui²sa⁴ chji¹-le⁴ cjoa⁴vi³jna³chon³-no³ cao⁴-ni³ tsa² xi³ chi⁴nao⁴³, cˀoa⁴ je² yao³-no³ cao⁴-ni³ tsa² je² xi³ chˀa²cjao¹³.
MAT 6:26 Cho¹tsen³-lao⁴³ ni⁴se³ xi³ fi²tjen⁴ jin³sen¹, ni⁴vˀe¹ntje²-jin² jno⁴, ni⁴vˀe¹xco¹-jin², ni⁴vi³ncha³-jin² ya⁴ ni³ncˀa³. Cˀoa⁴ je² Nˀai³-no³ xi³ ti¹jna³ ncˀa³jmi³, tsjoa¹-le⁴ xi³ cji³ne³. Cˀoa⁴ jon² nqui²sa⁴-sa³ chji¹-no³ cao⁴-ni³ tsa² je².
MAT 6:27 ˀya¹-ni³ xi³ jon²-vi⁴ xi³ coan⁴-le⁴ si⁴²ncˀa³-sa³ yao³-le⁴ jnco³ nta³, nta³ tsa² vˀe²xcon¹-lao⁴³ yao³-no³.
MAT 6:28 Xi³ chˀa²cjao¹³, a¹-ni³ vˀe²xcon¹-ni³lao⁴³ yao³-no³. Cho¹tsen³-lao⁴³ na³xo¹jña¹, jo³-sˀin² ma³jcha¹. A³li²coi³ si¹xa¹, ni⁴va¹ˀa³-jin².
MAT 6:29 To⁴nca³ an³ xin³-no³, nta³ tsa² Salomón, cao⁴ nca³yi³je³ cjoa⁴je³ya³-le⁴, li²coi³ tsa³cˀa³cja¹-ni³ na³jño³ xi³ cˀoa⁴cjoan³ jo³ cjoan³ na³xo¹-ve⁴.
MAT 6:30 Cˀoa⁴ tsa² Ni³na¹ cˀoa⁴-sˀin² si¹cˀa³cja¹ je² xca⁴jña¹ xi³ tjio¹ ntˀai⁴-vi⁴, cˀoa⁴ nchaon³-li⁴ sˀe⁴tsao³ya³ nca⁴ja¹ˀnti¹, a³ tsi² si⁴²cˀa³cja¹-no³ jon², cho⁴ta⁴ xi³ to⁴choa³ ma³cjain¹-no³.
MAT 6:31 A³li² vˀe²xcon¹-jin²lao⁴³ yao³-no³, tso²cˀoa⁴, nca³ coi⁴xon¹³: Jme¹ xi³ chi⁴ne⁴², cˀoa⁴ jme¹ xi³ sˀioa⁴², a³xo⁴ jme¹ xi³ chˀa²cja¹.
MAT 6:32 Nca⁴ je² cho⁴ta⁴ xi³ li² judío-jin² xi³ va¹sjai³ je² cjoa⁴ xo⁴tjin¹-vi⁴. Je² Nˀai³-no³ xi³ ti¹jna³ ncˀa³jmi³ ve³ nca³ ma³chjen¹-no³ nca³yi³je³ cjoa⁴ je²-vi⁴.
MAT 6:33 To⁴nca³ ti¹tjon² ti⁴jnchi¹sjao³ je² cjoa⁴te¹xo³ma³-le⁴ Ni³na¹, cao⁴ cjoa⁴qui²xi⁴-le⁴, cˀoa⁴ nca³yi³je³ cjoa⁴ je²-vi⁴ cˀoa⁴-sˀin² cˀoai⁴son²-no³.
MAT 6:34 Cˀoa⁴-sˀin² a³li² vˀe²xcon¹-jin²lao⁴³ yao³-no³ xi³ tˀa³tsˀe⁴ nchaon³, nca⁴ nchaon³-li⁴ sˀe⁴-no³ cjoa⁴ xi³ cˀoe¹xcon¹-ni³lao⁴³ yao³-no³. Ca²ta³ma³-ni³le⁴ jnco¹jnco¹ ni⁴čhjin³ cjoa⁴ñˀain³-le⁴.
MAT 7:1 A³li² je¹-jin² fa³nao²³, jme¹-ni³ nca³ tsi² je¹ coa⁴ne²-ni³no³.
MAT 7:2 Jo³-sˀin² nca³ je¹ fa³nao²³, cˀoa⁴-ti⁴sˀin² je¹ coa⁴ne²-ni³no³. Cˀoa⁴ jo³-sˀin² nca³ vˀe²cho⁴yao³, cˀoa⁴-ti⁴sˀin² cˀoe⁴²cho⁴ya³-ni³no³.
MAT 7:3 A¹-ni³ nca³ cho¹tsen³-si¹ni³lai⁴ je² tje¹ xi³ ti¹jna³nqui³ xcon⁴ ntsˀai⁴, to⁴nca³ je² ya¹qui⁴cho⁴ xi³ ti¹jna³nqui³ ya⁴ xcoin³ li²coi³ cho¹tsain³.
MAT 7:4 A³xo⁴ jo¹ cˀoin¹-lai⁴ ntsˀai⁴: Ti⁴jyo³-la⁴ i⁴tse¹nai¹³, cˀoa³-sje²nquia³ je² tje¹-ve⁴ xi³ ti¹jna³nqui³ xcoin³, cˀoa⁴ ji³, to⁴jo³ ti¹jna³nqui³ ya¹qui³cho³ xcoin³.
MAT 7:5 Cho⁴ta⁴ jao² ncjain¹ ni¹³ nca³ ji³, chˀa⁴sje³nqui³ ti¹tjon²cjoa²lai² je² ya¹qui³cho³-ve⁴ xi³ qui³jna³nqui³ xcoin³, cˀia⁴ nta³ jcha⁴-ni³ nca³ chˀa⁴sje³nqui³ tje¹-ve⁴ xi³ qui³jna³nqui³ xcon⁴ ntsˀai⁴.
MAT 7:6 A³li² nia¹-jin² vˀai²-lai⁴ je² xi³ tsje³, ni⁴ ya⁴-jin² ni²cˀa³tsao³-lao⁴³ to³fa³nqui³-no³ chi⁴nca⁴, jme¹-ni³ nca³ tsi² tsa² coi⁴ncha²ne²-si¹ni³ ntso⁴co⁴, cˀoa⁴ tsa² si⁴²cˀo¹fa³ya³ nca³ si⁴²na³ˀño¹-no³ nca³ jon².
MAT 7:7 Ti⁴jao¹³, cˀoa⁴ cˀoai⁴-no³. Ti⁴jnchi¹sjao³, cˀoa⁴ coan⁴sjai³-no³. Ti⁴cja³ne³tˀao³ xo⁴ntjoa⁴, cˀoa⁴ tjo¹ˀai²-no³.
MAT 7:8 To⁴ˀya³-ni³ve⁴ xi³ si¹je¹, vˀai²-le⁴. Cˀoa⁴ je² xi³ va³jnqui³sjai³, ma³sjai³-le⁴. Cˀoa⁴ je² xi³ si¹cja³ne³tˀa³ xo⁴ntjoa⁴, tjo¹ˀai²-le⁴.
MAT 7:9 ˀya¹ cho⁴ta⁴ xi³ ti¹jna³jin³jnco³-no³, tsa² ˀnti¹-le⁴ si⁴²je¹-le⁴ nio⁴xti²la⁴, a³ la⁴jao⁴² tsjoa¹-le⁴.
MAT 7:10 Cˀoa⁴ tsa² jti⁴ si⁴²je¹-le⁴, a³ ye⁴² tsjoa¹-le⁴.
MAT 7:11 Tsa² jon² xi³ chˀao³ cjoaon³, ma³-no³ nca³ nta³ vˀai²cjoa⁴tjao²-lao⁴³ xti³-no³, je² Nˀai³-no³ xi³ ti¹jna³ ncˀa³jmi³, a³ tsi² nqui²sa⁴-sa³ tse³ tsjoa¹-le⁴ cjoa⁴tjao²nta³ je² xi³ si¹je¹-le⁴.
MAT 7:12 Cˀoa⁴-sˀin² nca³yi³je³ cjoa⁴ xi³ me³-no³ nca³ si¹cao⁴-no³ cho⁴ta⁴, cˀoa⁴-ti⁴sˀin² ti⁴cao⁴-nio³ nca³ je². Coi³ cjoa⁴ je²-vi⁴ xi³ tso² cjoa⁴te¹xo³ma³ cao⁴ cho⁴ta⁴ xi³ qui³nchja⁴ya³ tˀa³tsˀe⁴ Ni³na¹.
MAT 7:13 Ti⁴tja¹sˀen³-nio³ xo⁴ntjoa⁴ xi³ nčhˀoe²ya³, nca³ te³ya³ xo⁴ntjoa⁴, cˀoa⁴ te³ya³ je² ntia⁴² xi³ fi²-ni³ jña³ nca³ cha⁴-jin³, cˀoa⁴ a³li² cˀoa⁴cji³ ncjin² xi³ ya⁴ fa³ˀa³sˀen³.
MAT 7:14 Nca⁴ nčhˀoe²ya³ je² xo⁴ntjoa⁴, cˀoa⁴ xco¹ya³ je² ntia⁴² xi³ fi²-ni³ cjoa⁴vi³jna³chon³, cˀoa⁴ choa³ ma³-ni³ xi³ ya⁴ ma³sjai³-le⁴.
MAT 7:15 Nta³ ti⁴coi²nta⁴-lao⁴³ yao³-no³ je² xi³ en¹nti³so³ nchja⁴ya³, xi³ fa³ˀai³con³-no³ xi³ qui³jte¹jon³ čhjoa⁴ xi³ tsˀe⁴ va³rre², to⁴nca³ ya⁴³ ni⁴ma⁴-le⁴ nco³ya²-le⁴ tsen⁴² xcai⁴²-ni¹.
MAT 7:16 Cao⁴ xa¹-le⁴ jcha⁴-ni³le⁴ cho⁴ta⁴-ve⁴. To³tse⁴² a³ tjoe¹jin³-le⁴ na³ˀya¹, a³xo⁴ to³ higo a³ tjoe¹jin³-le⁴ na³xo¹na³ˀya¹.
MAT 7:17 Cˀoa⁴-sˀin² nca³ nca³yi³je³ ya¹ xi³ nta³, va³-le⁴ to³ xi³ nta³, to⁴nca³ je² ya¹ xi³ tsi² nta³, va³-le⁴ to³ xi³ chˀao³ cjoan³.
MAT 7:18 Jnco³ ya¹ xi³ nta³ li²coi³ ma³ va³-le⁴ to³ xi³ chˀao³ cjoan³, ni⁴je²-jin² ya¹ xi³ tsi² nta³, va³-le⁴ to³ xi³ nta³.
MAT 7:19 Nca³yi³je³ ya¹ xi³ tsi² tsa² va³-le⁴ to³ xi³ nta³, ti³-ni¹, cˀoa⁴ sˀe³jin³ lˀi¹.
MAT 7:20 Cˀoa⁴-sˀin² cao⁴ xa¹-le⁴ jcha⁴-ni³le⁴ cho⁴ta⁴.
MAT 7:21 Li²coi³ cjoa⁴ˀa³sˀen³ cjoa⁴te¹xo³ma³-le⁴ ncˀa³jmi³ nca³tsˀi³ xi³ Señor, Señor, tso²-na³. To⁴je² xi³ cˀoa⁴sˀin⁴² jo³-sˀin² me³-le⁴ Nˀai³-na⁴ xi³ ti¹jna³ ncˀa³jmi³ xi³ cjoa⁴ˀa³-sˀen³.
MAT 7:22 Ncjin² xi³ cˀoi⁴coi⁴tso⁴-na³ coi³ ni⁴čhjin³-ve⁴: Señor, Señor, a³ tsi² qui³no²cjoa⁴yai³⁴-jin⁴ cao⁴ jan³ˀain¹-li⁴, cˀoa⁴ cao⁴ jan³ˀain¹-li⁴ qui³cha³ˀa²xin²-ni³⁴jin⁴ nai⁴² xi³ nta³jin³, cˀoa⁴ cao⁴ jan³ˀain¹-li⁴ a³li² cˀoa⁴cji³ ncjin² cjoa⁴xcon¹ qui³nˀiain²⁴-jin⁴.
MAT 7:23 Cˀoa⁴ cˀia⁴ si³qui²xi⁴ya³-le⁴: Ni⁴cˀia³-jin² tsa³ˀve³xcon³-no³, ti⁴ncha³xin²-nao¹³ cho⁴ta⁴ xi³ cjoa⁴tsˀen⁴ ma³-no³ ni²xao¹³.
MAT 7:24 To⁴ˀya³-ni³ xi³ nčhˀoe¹ je² en¹-na⁴vi⁴, cˀoa⁴ xi³ cˀoa⁴sˀin¹, si³nco¹son²coa⁴ jnco³ cho⁴ta⁴ xi³ to⁴nqui³-ni³ nta³ qui³si³cja³ˀai³tsjen³, nca³ ntˀia³-le⁴ tsa³cˀe¹nta³son² na⁴xi⁴.
MAT 7:25 Cˀoa⁴ nˀion¹ tsˀa³ jtsi¹, cˀoa⁴ ja³ˀa³ nta¹je⁴, cˀoa⁴ ja³ˀa³ ntjao⁴nˀion¹, ja³ˀa³ne² ntˀia³, cˀoa⁴ li²coi³ chi³xo²ya³, nca³ cˀoa⁴-sˀin² qui³sˀe³nta³son² na⁴xi⁴.
MAT 7:26 Cˀoa⁴ to⁴ˀya³-ni³ xi³ nčhˀoe¹ je² en¹-na⁴vi⁴, cˀoa⁴ xi³ li²coi³ cˀoa⁴sˀin¹, si³nco¹son²coa⁴ jnco³ cho⁴ta⁴ xi³ chi⁴con¹, xi³ tsa³cˀe¹nta³son² ntˀia³-le⁴ jin³ tso⁴mi¹.
MAT 7:27 Cˀoa⁴ nˀion¹ tsˀa³ jtsi¹, cˀoa⁴ ja³ˀa³ nta¹je⁴, cˀoa⁴ ja³ˀa³ ntjao⁴nˀion¹, ja³ˀa³ne² ntˀia³-ve⁴, cˀoa⁴ chi³xo²ya³. A³li² to⁴cˀoa⁴² xi³ coan³ nca³ chi³xo²ya³.
MAT 7:28 Cˀoa⁴ coan³ cˀia⁴ nca³ Jesús qui³si³cje³ en¹-vi⁴, jo³ to⁴coan³xcon¹-le⁴ nca³tsˀi³ cho⁴ta⁴, jo³-sˀin² tsa³ca³co¹ya³.
MAT 7:29 Nca⁴ tsa³ca³co¹ya³-le⁴ jo³-ni³ tsa² jnco³ cho⁴ta⁴ xi³ tjin¹-le⁴ ˀnte³, li²coi³ jo³-ni³ tsa² cho⁴ta⁴ scribano-le⁴.
MAT 8:1 Cˀia⁴ nca³ ja³ˀai³jen³-ni³ ya⁴ ni³nto³, a³li² cˀoa⁴cji³ ncjin² cho⁴ta⁴ qui³tjen⁴nqui³-le⁴.
MAT 8:2 Cˀoa⁴ coe⁴-ni³ jnco³ cho⁴ta⁴ xi³ jtse¹ cji³ ja³ˀai³con³-le⁴, cˀoa⁴ tsa³ca³sen²xco¹nchˀin³tˀa³-le⁴ Jesús, qui³tso²: Señor, tsa² me³-li², coan⁴ ni⁴tsje³-nai¹³.
MAT 8:3 Cˀoa⁴ tsa³cjen¹ ntsja³ Jesús, qui³si³cao⁴, qui³tso²: Me³-na³, ca²ta³ma³tsjai³. Cˀoa⁴ nti⁴ton⁴ coan³nta³ jtse¹-le⁴.
MAT 8:4 Cˀia⁴ Jesús qui³tso²-le⁴: Na²nta³-lai²³, ni⁴ˀya³-jin² xi³ jo³ ˀmi²-lai⁴, to⁴nca³ tˀin³, ta⁴co²-lai⁴ yao³-li⁴ na⁴ˀmi³, cˀoa⁴ tˀai² cjoa⁴tjao² je² xi³ tsa³cˀe¹ne² Moisés, jme¹-ni³ nca³ coan⁴qui²xi⁴ya³-ni³le⁴ nca³ je².
MAT 8:5 Cˀia⁴ nca³ ja³ˀa³sˀen³ Jesús ya⁴ Capernaum, ja³ˀai³con³-le⁴ Jesús jnco³ xi³ nca³jco⁴-le⁴ so³nta²do⁴, tsa³cˀe¹tsˀoa³-le⁴.
MAT 8:6 Qui³tso²-le⁴: Señor, je² cho⁴ˀnta³-na⁴ ti¹qui³jna³ ya⁴ ntˀia³-na⁴, to⁴cji³ ya¹ ni¹, nˀion¹ tao¹.
MAT 8:7 Cˀoa⁴ Jesús qui³tso²-le⁴: Cjoia¹³, cˀoa⁴ si³nta³-nia¹³.
MAT 8:8 Qui³nchja⁴-nca¹ni³ je² xi³ nca³jco⁴-le⁴ so³nta²do⁴-ve⁴, qui³tso²: Li²coi³ va³quin²-na³ nca³ coi⁴tja¹sˀain³ ntˀia³-na⁴. To⁴ti⁴no²cjoai⁴ en¹, cˀoa⁴ cho⁴ˀnta³-na⁴ coan⁴nta³-ni³.
MAT 8:9 Cˀoa⁴²-ti⁴ an³ nia¹³ cho⁴ta⁴ xi³ ti²jna⁴ nqui³ cjoa⁴te¹xo³ma³, cˀoa⁴²-ti⁴ an³ tjin¹-na³ so³nta²do⁴ xi³ tjio¹nqui³-na³. Cˀoa⁴xin³-le⁴ jnco³: Tˀin³, cˀoa⁴ fi²-ni¹, cˀoa⁴xin³-le⁴ xi³jnco³: Nčhoai¹³, cˀoa⁴ nčhoa¹-ni¹, cˀoa⁴xin³-le⁴ cho⁴ˀnta³-na⁴: Cˀoa⁴tˀiain⁴ je²-vi⁴, cˀoa⁴ cˀoa⁴²sˀin¹.
MAT 8:10 Cˀia⁴ nca³ Jesús qui³nčhˀoe¹-le⁴, to⁴coan³xcon¹-le⁴, cˀoa⁴ qui³tso²-le⁴ xi³ qui³tjen⁴nqui³-le⁴: Xi³ cjoa⁴qui²xi⁴ xi³ xin³-no³, nca³ ni⁴jnco³-jin² xi³ qui³sa³co³-na³ xi³ cˀoa⁴-sˀin² nta³ ma³cjain¹-le⁴ ya⁴ Israel.
MAT 8:11 Cˀoa⁴xin³-no³ nca³ ncjin² cjoa⁴ˀai¹-ni³ ya⁴ jña³ nca³ tjo³-ni³ tsˀoi¹, cˀoa⁴ ya⁴ jña³ nca³ ca³ntjai²-ni³, cˀoa⁴ to⁴jnco³ coa⁴tio⁴tˀa³ cao⁴ Abraham, cao⁴ Isaac, cao⁴ Jacob ya⁴ cjoa⁴te¹xo³ma³-le⁴ ncˀa³jmi³.
MAT 8:12 To⁴nca³ je² xti³-le⁴ xi³ tjen⁴-ni³ cjoa⁴te¹xo³ma³-ve⁴, cjoi⁴chon³sje³ jin³ njion² nti³tsin³-jan¹. Ya⁴ squi¹ˀnta¹, cˀoa⁴ ya⁴ tsao⁴cjao² ni⁴ˀño⁴.
MAT 8:13 Cˀia⁴ Jesús qui³tso²-le⁴ nca³jco⁴-le⁴ so³nta²do⁴-ve⁴: Tˀin³, cˀoa⁴ jo³-sˀin² nca³ coan³cjain¹-li², cˀoa⁴-sˀin² coi⁴tjo³son²-li². Cˀoa⁴ cho⁴ˀnta³-le⁴ ti⁴cˀia⁴-ni³ coan³nta³.
MAT 8:14 Cˀoa⁴ ja³ˀai³ Jesús ya⁴ ntˀia³-le⁴ Pedro, cˀoa⁴ tsa³ve³ je² na⁴cha¹-le⁴ nca³ ti¹qui³jna³ nca³ chˀin³ntˀai⁴ tjin¹-le⁴.
MAT 8:15 Cˀoa⁴ qui³si³cao⁴ ntsja³ chjon⁴²-ve⁴, cˀoa⁴ ji³tjo³xin²-le⁴ ntˀai⁴-ve⁴. Tsa³qui³so¹tjen⁴-ni³, cˀoa⁴ qui³si³sin³-ni³le⁴.
MAT 8:16 Nca³ je³coan³xon²-ni³, ja³ˀai³cao⁴-le⁴ Jesús ncjin² ma³-ni³ xi³ nai⁴² tjio¹jin³-le⁴. Tsa³cja³ˀa¹xin² nai⁴²-ve⁴ xi³ cao⁴ en¹, cˀoa⁴ qui³si³nta³ nca³tsˀi³ xi³ tjio¹mˀen³,
MAT 8:17 jme¹-ni³ nca³ coi⁴tjo³son²-si¹ni³ je² xi³ qui³tso² Isaías xi³ qui³nchja⁴ya³ tˀa³tsˀe⁴ Ni³na¹: Ti⁴je² qui³scoe¹-ni³ chˀin³-na¹, cˀoa⁴ qui³cao⁴ cjoa⁴ˀaon³-na¹.
MAT 8:18 Cˀia⁴ nca³ tsa³ve³ Jesús nca³ ncjin² ma³-ni³ cho⁴ta⁴ xi³ qui³tse³ntai³-le⁴, tsa³cˀe¹ne²-le⁴ nca³ ja³ˀa³to³tˀa³ xi³ncoa³-le⁴ nta¹chi³con³.
MAT 8:19 Cˀoa⁴ ja³ˀai³con³-le⁴ jnco³ cho⁴ta⁴ scribano xi³ qui³tso²-le⁴: Maestro, cjoi¹tjen⁴nqui³-le²³ to⁴jña³-ni³ nca³ cˀoin¹.
MAT 8:20 Jesús qui³tso²-le⁴: Je² ni⁴nta⁴ tjin¹-le⁴ nqui³jao³, cˀoa⁴ je² ni⁴se³ xi³ si¹ma³ncˀa³ tjin¹-le⁴ tje¹, to⁴nca³ je² ˀnti¹-le⁴ cho⁴ta⁴ tsin²-le⁴ ˀnte³-jin² jña³ si⁴²cja¹ya³.
MAT 8:21 Nqui²jnco³ cho⁴ta⁴-le⁴ qui³tso²-le⁴: Señor, tˀai²ˀnte³-nai¹³ nca³ ti¹tjon²-cjoa²la² cjoi¹cˀe³ñe³ nˀai³-na⁴.
MAT 8:22 Cˀoa⁴ Jesús qui³tso²-le⁴: Nčhoa¹tjen⁴nqui³-nai¹³. Je² xi³ tjio¹cˀen³, ca²ta³vˀe¹ñai³ cˀen³-le⁴.
MAT 8:23 Cˀia⁴ ja³ˀa³sˀen³ Jesús ya⁴ chi³tso³. Qui³tjen⁴nqui³-le⁴ cho⁴ta⁴-le⁴.
MAT 8:24 Coe⁴-ni³ ja³ˀai³ne² ntjao⁴xcon¹ ja⁴jin³ nta¹chi³con³, sa³ˀnta³ nca³ je² chi³tso³ ña³qui³ tsa³cˀe¹ˀma³-ni³ nta¹xo¹-le⁴, to⁴nca³ Jesús qui³jna³fe².
MAT 8:25 Cˀoa⁴ cho⁴ta⁴-le⁴ ji³cho²con³-le⁴ nca³ qui³si³cja³ˀa¹-le⁴, qui³tso²: Señor, chˀa⁴sje³ntjai²-na³jin⁴ nca³ je³ti³ncha³mˀain³-jin⁴.
MAT 8:26 Cˀoa⁴ Jesús qui³tso²-le⁴: A¹-ni³ nca³ vi³jcon³-si¹nio³, cho⁴ta⁴xˀin⁴ xi³ choa³ ma³cjain¹-no³. Cˀia⁴ tsa³qui³so¹tjen⁴, tsa³cˀe¹chjoa²-le⁴ ntjao⁴-ve⁴ cao⁴ nta¹chi³con³, coan³nta³chon³-ni³.
MAT 8:27 Cˀoa⁴ je² cho⁴ta⁴-le⁴ jo³ to⁴coan³xcon¹-le⁴, qui³tso²: Jo¹ cjoan³ cho⁴ta⁴ je²-vi⁴, nta³ tsa² ntjao⁴ cao⁴ nta¹chi³con³ si¹tjo³son²-le⁴.
MAT 8:28 Cˀia⁴ nca³ ji³cho² xi³ncoa³nta¹-ni³ jan¹ ya⁴ na³nqui³-le⁴ cho⁴ta⁴ gadarenos, ya⁴ qui³sa³te³cjao³ jao² cho⁴ta⁴ xi³ nai⁴² xi³ nta³jin³ tjin¹-le⁴ ja⁴jin³ ni⁴ma⁴-le⁴, xi³ ji³tjo³jin³-ni³ tsjo¹, nˀion¹ tsˀen⁴, jo³ sa³ˀnta³ nca³ ni⁴ˀya³-jin² xi³ coan³ ja³ˀa³ ntia⁴²-ve⁴.
MAT 8:29 Coe⁴-ni³ qui³squi³ˀntia¹, qui³tso²: Jme¹ xi³ tjin¹-na³jin⁴ xi³ cao⁴ ji³, Jesús, ˀnti¹-le⁴ Ni³na¹. A³ ca²fa²ˀai⁴ cˀai²-na³jin⁴ cjoa⁴ñˀain³ nca³ to⁴nqui³-ni³.
MAT 8:30 Cjin³ tjio¹jtin¹-le⁴ nca³ je², chi⁴nca⁴ xi³ tjio¹ma³cjen².
MAT 8:31 Cˀoa⁴ je² nai⁴² xi³ nta³jin³-ve⁴ tsa³cˀe¹tsˀoa³-le⁴ Jesús, qui³tso²: Tsa² cha³ˀa²xin²-na³jin⁴, tˀai²ˀnte³-na³jin⁴ nca³ coa⁴nqui¹-ni³⁴jin⁴ jña³ nca³ tjio¹jtin¹ chi⁴nca⁴.
MAT 8:32 Cˀoa⁴ qui³tso²-le⁴: Ta⁴nquion¹³. Ji³tjo³, cˀoa⁴ ja³ˀa³sˀen³-le⁴ chi⁴nca⁴-ve⁴. Coe⁴-ni³ nca³tsˀi³ ña³jtin¹ chi⁴nca⁴-ve⁴ tsa³nca³jen³nqui³ na⁴xi⁴-ve⁴, qui³tsao³jin³ nta¹chi³con³, cˀoa⁴ ya⁴ cˀen³jin³ na³nta¹.
MAT 8:33 Cˀoa⁴ tsa³nca³ cho⁴ta⁴ xi³ co³ˀnta³ chi⁴nca⁴. Ja³ˀai³-ni³ ya⁴ na⁴xi⁴na³nta¹, tsa³cˀe¹ na⁴jmi¹ nca³yi³je³ cjoa⁴-ve⁴ xi³ coan³ tsˀe⁴ chi⁴nca⁴ cao⁴ cho⁴ta⁴ xi³ nai⁴² xi³ nta³jin³ tjin¹-le⁴ ja⁴jin³ ni⁴ma⁴-le⁴.
MAT 8:34 Cˀoa⁴ coe⁴-ni³ nca³yi³je³ na⁴xi⁴na³nta¹-ve⁴ ji³tjo³con³-le⁴ Jesús. Cˀia⁴ nca³ tsa³ve³, tsa³cˀe¹tsˀoa³-le⁴ nca³ ca²ta³fi²-ni³ ya⁴ˀnte³-le⁴.
MAT 9:1 Cˀia⁴ ja³ˀa³sˀen³ Jesús ya⁴ chi³tso³, ja³ˀa³to³tˀa³ xi³ncoa³-ni³, ja³ˀai³-ni³ na⁴xi⁴na³nta¹-le⁴ xi³ tsˀe⁴.
MAT 9:2 Coe⁴-ni³ ja³ˀai³cha³ni²-le⁴ jnco³ cho⁴ta⁴yo⁴ma⁴ xi³ qui³jna³son² na⁴chan³. Cˀia⁴ nca³ tsa³ve³ Jesús jo³-sˀin² nca³ ma³cjain¹-le⁴ nca³ je², qui³tso²-le⁴ cho⁴ta⁴yo⁴ma⁴-ve⁴. Ji³, ˀnti¹ti³, a³li² cˀoa⁴-jin² ma³-li², qui³cha³tˀa³-li² je¹-li⁴.
MAT 9:3 Coe⁴-ni³ tjin¹ cˀa³ cho⁴ta⁴ scribano xi³ cˀoi⁴-sˀin² qui³tso²-le⁴ yao³-le⁴: Je² cho⁴ta⁴-vi⁴ ti¹nchja⁴ˀaon³-ni³.
MAT 9:4 Tsa³ve³ Jesús cjoa⁴fa³ˀai³tsjen³-le⁴, qui³tso²: A¹-ni³ nca³ cˀoa⁴-sˀin² chˀao³ ni²cja³ˀai³tsjen³jin³-si¹nio³ ni⁴ma⁴-no³.
MAT 9:5 Jña¹-le⁴ xi³ li²coi³ to⁴jo³ ñˀain³, tsa² coi⁴xoan¹: Qui³cha³tˀa³-li² je¹-li⁴, a³xo⁴ tsa² coi⁴xoan¹: Ti²so⁴tjain⁴, ti⁴to²mjain³.
MAT 9:6 Coi³ cjoa⁴, jme¹-ni³ nca³ jcha⁴-si¹nio³ nca³ je² ˀnti¹-le⁴ cho⁴ta⁴ tjin¹-le⁴ ˀnte³ i⁴ son³ˀnte³-vi⁴ nca³ si⁴²cha³tˀa³ je¹, Jesús qui³tso²-le⁴ cho⁴ta⁴yo⁴ma⁴-ve⁴: Ti²so⁴tjain⁴, chjoai¹³ na⁴chan³-li⁴, cˀoa⁴ tˀin³-ni³ ya⁴ ni³ˀya³-li⁴.
MAT 9:7 Cˀia⁴ tsa³qui³so¹tjen⁴, qui³ ya⁴ ni³ˀya³-le⁴.
MAT 9:8 Cˀia⁴ nca³ tsa³ve³ cho⁴ta⁴ jo³ to⁴coan³xcon¹-le⁴, tsa³cˀa³sje³je³ya³ Ni³na¹ xi³ cˀoa⁴-sˀin² tse³ nca³nˀion¹ qui³tsjoa³-le⁴ cho⁴ta⁴.
MAT 9:9 Cˀia⁴ nca³ ja³ˀa³-ni³ ya⁴-ve⁴ Jesús, tsa³ve³ jnco³ cho⁴ta⁴xˀin⁴ xi³ ˀmi² Mateo, xi³ ti¹jna³ ya⁴ jña³ sˀe³ña³ taon⁴va³sen³, cˀoa⁴qui³tso²-le⁴: Nčhoa¹tjen⁴nqui³-nai¹³. Tsa³qui³so¹tjen⁴, cˀoa⁴ qui³tjen⁴nqui³-le⁴.
MAT 9:10 Cˀoi⁴ coan³ nca³ Jesús ya⁴ ti¹jna³tˀa³ ya¹mi²xa⁴ ya³ ni³ˀya³, coe⁴-ni³ ja³ˀai³ ncjin² cho⁴ta⁴ xi³ vˀe¹ña³ taon⁴va³sen³, cao⁴ cho⁴ta⁴ xi³ tsˀen⁴. Tsa³ca³tio²tˀa³cao⁴ ya¹mi²xa⁴ Jesús cao⁴ cho⁴ta⁴-le⁴.
MAT 9:11 Cˀia⁴ nca³ qui³sco²tsen³-le⁴ coi³-vi⁴, je² cho⁴ta⁴ fariseos qui³tso²-le⁴ cho⁴ta⁴-le⁴: A¹-ni³ nca³ cjen²cao⁴-si¹ni³ je² Maestro-no³ je² xi³ vˀe¹ña³ taon⁴-ve⁴ cao⁴ cho⁴ta⁴tsˀen⁴-ve⁴.
MAT 9:12 Qui³nčhˀoe¹ Jesús, qui³tso²: Cho⁴ta⁴ xi³ nta³ tjio¹, li²coi³ ma³chjen¹-le⁴ chji⁴ne⁴xqui³, to⁴je² xi³ tjio¹mˀen³ xi³ ma³chjen¹-le⁴.
MAT 9:13 Ta⁴nquion¹³, tso²cˀoa⁴, cho¹tˀa³yao³ jo³ tso²-ni³: Cjoa⁴ma⁴ta³con² xi³ me³-na³, a³li² je²-jin² cjoa⁴tjao² xi³ vˀai²tˀa³-nao¹³, nca⁴ tsin² cho⁴ta⁴ xi³ qui²xi⁴-jin² je²ˀe⁴ nchja²³-le⁴, to⁴je² xi³ cho⁴ta⁴je¹, nca³ si⁴²cˀa³ntjai²ya³ cjoa⁴fa³ˀai³tsjen³-le⁴.
MAT 9:14 Cˀia⁴ cho⁴ta⁴-le⁴ Juan ja³ˀai³con³-le⁴, qui³tso²: A¹-ni³ nca³ ncjin² cˀa³ vi³yo³nchjan³-si¹ni³jin⁴ jin⁴-jin⁴ cao⁴ cho⁴ta⁴ fariseos, cˀoa⁴ cho⁴ta⁴-li⁴ li²coi³ va³tio²nchjan³.
MAT 9:15 Cˀoa⁴ Jesús qui³tso²-le⁴: A³ coan⁴²-le⁴ mi²yo⁴-le⁴ xˀin⁴ xi³ vi³xan³ nca³ sˀe⁴-le⁴ cjoa⁴va³, tjen⁴ nca³ to⁴jo³ ti¹jna³ xi³ xˀin⁴. To⁴nca³ cjoa⁴ˀai¹ ni⁴ñchjin³ cˀia⁴ nca³ je² xˀin⁴ coi⁴tjo³tˀa³xin²-le⁴. Cˀia⁴ coa⁴tio⁴nchjan².
MAT 9:16 A³li²ˀya³ xi³ na³jño³ jchi¹nca³ vˀe¹jčho³ cao⁴ i⁴tse¹ na³jño³ cho⁴tse⁴. Je² na³jño³ cho⁴tse⁴ nqui²sa⁴ tse³ vˀe¹jnta³ na³jño³ jchi¹nca³-ve⁴, cˀoa⁴ nqui²sa⁴ xi³jnta² jña³ nca³ tjon³ya³.
MAT 9:17 Ni⁴cˀoa⁴-jin² sˀin¹ nca³ vino cho⁴tse⁴ sˀe³ya³ čhjoa⁴ jchi¹nca³, nca³ cja⁴ˀai¹ sˀin¹ cho⁴ta⁴, nca⁴ čhjoa⁴-ve⁴ xi¹jnta¹-ni¹, cˀoa⁴ vino-ve⁴ xi¹jten⁴-ni¹, cˀoa⁴ cha⁴ čhjoa⁴-ve⁴. To⁴nca³ vino cho⁴tse⁴ ma³ sˀe³ya³ čhjoa⁴ cho⁴tse⁴. Cˀoa⁴-sˀin² nta³ tjio¹ nca³ jao².
MAT 9:18 Tjen⁴ nca³ tsa³cja¹cao⁴ je² cjoa⁴-vi⁴, coe⁴-ni³ jnco³ cho⁴ta⁴ti¹tjon² ja³ˀai³, cˀoa⁴ tsa³ca³sen²xco¹nchˀin³tˀa³-le⁴, qui³tso²: ˀnti¹tso²ti³-na⁴ sˀa⁴cjoan² je³cˀen³. To⁴nca³ nčhoai¹³, ta³jna³son²-lai⁴ ntsai⁴, cˀoa⁴ cˀoe¹jna³con³-ni³.
MAT 9:19 Tsa³qui³so¹tjen⁴ Jesús, cao⁴ cho⁴ta⁴-le⁴ qui³tjen⁴nqui³-le⁴ cho⁴ta⁴ti¹tjon²-ve⁴.
MAT 9:20 Coe⁴-ni³ jnco³ chjon⁴² xi³ je³coan³ te³jao² no¹ nca³ ti¹ve³ njin¹. Je² chjon⁴²-ve⁴ ja³ˀai³ ca³sen²čhian³ ja⁴jton⁴ ya¹tsˀin³ Jesús, qui³si³cao⁴ tjon² na³jño³-le⁴,
MAT 9:21 nca³ cˀoi⁴-sˀin² qui³si³cja³ˀai³tsjen³jin³ ni⁴ma⁴-le⁴: Tsa² to⁴je²-cjoan² na³jño³-le⁴ si³coa⁴, coan⁴nta³-nia¹³.
MAT 9:22 To⁴nca³ Jesús qui³si³cˀo¹fa³ya³, tsa³ve³ chjon⁴²-ve⁴, qui³tso²-le⁴: A³li² cˀoa⁴-jin² ma³-li², ˀnti¹na⁴². Coi³ nca³ ma³cjain¹-li², ca²ma³nta³-ni³. Cˀoa⁴ je² chjon⁴²-ve⁴ coan³nta³ ti⁴coi³-ni³ hora.
MAT 9:23 Cˀia⁴ nca³ ji³cho² Jesús ni³ˀya³-le⁴ cho⁴ta⁴ti¹tjon², tsa³ve³ cho⁴ta⁴ xi³ tjio¹si¹cja³ne³ čhjao³xo⁴vi¹, cao⁴ cho⁴ta⁴ xi³ to⁴si³ tjio¹ma³sˀin¹.
MAT 9:24 Qui³tso²-le⁴: Ti⁴ncha³xion²³, nca³ tso²ti³-ve⁴ li²coi³ qui³jna³cˀen³, to⁴qui³jna³fe²-ni¹. Cˀoa⁴ jo³ to⁴tsa³qui³jno²que³ Jesús nca³tsˀi³.
MAT 9:25 Cˀia⁴ nca³ cho⁴ta⁴-ve⁴ qui³ni²qui³tjo³ nti³tsin³, Jesús ja³ˀa³sˀen³ qui³scoe¹ ntsja³ tso²ti³-ve⁴, cˀoa⁴ tsa³qui³so¹tjen⁴ tso²ti³-ve⁴.
MAT 9:26 Tsˀa³tji³vi¹son² en¹ nca³qui³jnta² ya⁴ ˀnte³-ve⁴ tˀa³tsˀe⁴ cjoa⁴ xi³ coan³.
MAT 9:27 Cˀoa⁴ nca³ ja³ˀa³-ni³ Jesús ya⁴-ve⁴, jao² cho⁴ta⁴ xi³ xca⁴ cjio³ qui³tjen⁴nqui³-le⁴, nˀion¹ qui³nchja⁴, qui³tso²: Jcha⁴ma⁴ta³con²-na³jin⁴, ji³ ˀnti¹-le⁴ David.
MAT 9:28 Cˀia⁴ nca³ ja³ˀa³sˀen³ ni³ˀya³ ja³ˀai³con³-le⁴ xi³ xca⁴ cjio³, cˀoa⁴ Jesús qui³tso²-le⁴: A³ ma³cjain¹-no³ nca³ coan⁴-na³ cˀoa⁴sˀian³ je²-vi⁴. Je² qui³tso²: Jaon³, Señor.
MAT 9:29 Cˀia⁴ qui³si³cao⁴ xcon⁴ nca³ je², qui³tso²-le⁴: Jo³-sˀin² nca³ ma³cjain¹-no³, cˀoa⁴-sˀin² ca²ta³ma³-no³.
MAT 9:30 Je² xcon⁴ nca³ je² qui³tjo³ˀai²nqui³-ni³. Jesús nˀion¹ tsa³cˀe¹ne²-le⁴, qui³tso²: Nta³ ti⁴coi²ntao⁴³ nca³ ni⁴ˀya³-jin² xi³ ca²ta³sˀe³jin³-le⁴.
MAT 9:31 Cˀia⁴ ji³tjo³ nca³ je², qui³si³cˀa³vi¹son² en¹ xi³ tˀa³tsˀe⁴ Jesús nca³qui³jnta² ya⁴ ˀnte³-ve⁴.
MAT 9:32 Cˀia⁴ nca³ ji³tjo³ nca³ je², coe⁴-ni³ ja³ˀai³ cha³ni²tˀa³-le⁴ Jesús jnco³ cho⁴ta⁴yo⁴ma⁴ xi³ nai⁴² xi³ nta³jin³ ti¹jna³jin³ ni⁴ma⁴-le⁴.
MAT 9:33 Cˀia⁴ nca³ ji³tjo³xin² je² nai⁴² xi³ nta³jin³-ve⁴, qui³nchja⁴ je² cho⁴ta⁴yo⁴ma⁴-ve⁴. Cˀoa⁴ nca³tsˀi³ cho⁴ta⁴ to⁴coan³xcon¹-le⁴, qui³tso²: Ni⁴cˀia³-jin² tsa³ˀya³² cjoa⁴ xi³ cˀoi⁴coan³ i⁴ ˀnte³ Israel.
MAT 9:34 To⁴nca³ je² cho⁴ta⁴ fariseos qui³tso²: Tˀa³tsˀe⁴ je² xi³ nca³jco⁴-le⁴ nai⁴² vˀa³sje³xin² nai⁴² xi³ nta³jin³.
MAT 9:35 Cˀoa⁴ Jesús tsˀa³mjen³jin³jnta² na⁴xi⁴na³nta¹ cao⁴ nqui³chao³, tsa³ca³co¹ya³ ya⁴ ntˀia³ sinagoga xi³ tsˀe⁴, cˀoa⁴ qui³nchja⁴ya³ je² en¹nta³ xi³ tˀa³tsˀe⁴ cjoa⁴te¹xo³ma³-le⁴ ncˀa³jmi³, cˀoa⁴ qui³si³nta³ nca³yi³je³ chˀin³, cao⁴ nca³tsˀi³ xi³ coan³ˀaon³-le⁴ ya⁴ na⁴xi⁴na³nta¹-ve⁴.
MAT 9:36 Cˀia⁴ nca³ Jesús tsa³ve³ cho⁴ta⁴ncjin², coan³ma⁴que³, nca³ cˀoa⁴-sˀin² tjio¹tsao³va³, cˀoa⁴ tˀa³xin² tjio¹, jo³-ni³ va³rre² xi³ tsin²-le⁴ xi³ co³ˀnta³.
MAT 9:37 Cˀia⁴ Jesús qui³tso²-le⁴ cho⁴ta⁴-le⁴: Xi³ cjoa⁴qui²xi⁴, nˀion¹ tse³ xi³ ma³jcha¹, to⁴nca³ to⁴choa³ ma³-ni³ xi³ si¹xa¹.
MAT 9:38 Tˀe²tsˀoa³-lao⁴³ tso²cˀoa⁴ je² Nai³-na¹ xi³ tsˀe⁴ je² xi³ cji³ma³jcha¹-ve⁴, nca³ ca²ta³si¹ca³sen¹ cho⁴ta⁴ xi³ si¹xa¹ xi³ tˀa³tsˀe⁴ xi³ ma³jcha¹-le⁴.
MAT 10:1 Cˀia⁴ qui³nchja⁴-le⁴ xi³ te³jao² cho⁴ta⁴-le⁴, qui³tsjoa³-le⁴ ˀnte³ nca³ coa⁴te²xo³ma³-le⁴ ntjao⁴ xi³ nta³jin³, jme¹-ni³ nca³ cˀoa⁴sje³xin²-si¹ni³. Cˀoa⁴ qui³tsjoa³-le⁴ ˀnte³ nca³ si⁴²nta³ nca³yi³je³ chˀin³, cˀoa⁴ nca³yi³je³ cjoa⁴ñˀain³ xi³ cjoa⁴ˀa² cho⁴ta⁴.
MAT 10:2 Cˀoi⁴ ˀmi² je² te³jao² cho⁴ta⁴ xi³ pa²stro⁴: Je² xi³ ti¹tjon², Simón, je² xi³ ˀmi²-ni³ Pedro; cˀoa⁴ Andrés xi³ ntsˀe⁴; Jacobo xi³ ˀnti¹-le⁴ Zebedeo; cao⁴ Juan xi³ ntsˀe⁴.
MAT 10:3 Felipe, cao⁴ Bartolomé; Tomás, cao⁴ Mateo xi³ vˀe¹ña³ taon⁴va³sen³; Jacobo xi³ ti³-le⁴ Alfeo, cao⁴ Lebeo xi³ ˀmi²-ni³ jan³ˀain¹-le⁴ Tadeo.
MAT 10:4 Simón xi³ cho⁴ta⁴ cananita; cao⁴ Judas Iscariote xi³ cˀoa⁴-ti⁴ tsa³cˀe¹tˀain³ na⁴jmi¹ xi³ tˀa³tsˀe⁴ Jesús.
MAT 10:5 Je² xi³ te³jao²-vi⁴ Jesús qui³si³ca³sen¹, cˀoa⁴-sˀin² tsa³cˀe¹ne²-le⁴ qui³tso²: Ntia⁴²-le⁴ cho⁴ta⁴ xi³ li² judío-jin² a³li² ma³nquin¹-jion²³, cˀoa⁴ na⁴xi⁴na³nta¹-le⁴ cho⁴ta⁴ samaritanos a³li² vi³tja³sˀen³-jion²³.
MAT 10:6 To⁴nca³ to⁴sa³ ta⁴nqui¹chon³-lao⁴³ va³rre² xi³ qui³cha³ xi³ tsˀe⁴ cho⁴ta⁴ Israel.
MAT 10:7 Cˀia⁴ nca³ ti³ma³nquion¹³, ti⁴no²cjoa⁴yao³, cˀoi⁴ti⁴xon¹³: Je² cjoa⁴te¹xo³ma³-le⁴ ncˀa³jmi³ je³nčhoa¹ ma³čhian³.
MAT 10:8 Ti⁴ntao³ xi³ tjio¹mˀen³, ti⁴tsjao³ xi³ jtse¹ cjoan³ yao³-le⁴, ti⁴cja³ˀa¹ya³-lao⁴³ xi³ cjio³cˀen³, ti⁴chon³sje³jion³ xi³ nai⁴² xi³ nta³jin³. To⁴cjoa⁴tjao² qui³tsˀai²-no³, to⁴cjoa⁴tjao² tˀai²-nio³.
MAT 10:9 A³li² taon⁴si³ne²-jin², ni⁴taon⁴čhoa³-jin², ni⁴qui⁴cha⁴si³ne²-jin² chjoao¹³ xi³ vi³nchao³ xi³jtsa³-no³,
MAT 10:10 ni⁴na⁴ˀya³-jin² chˀao²³ xi³ tˀa³tsˀe⁴ ntia⁴², ni⁴jao²-jin² chi⁴nca³ chˀa²cjao¹³, ni⁴jte¹-jin² fa³yao³, ni⁴ya¹ni³se³-jin² chˀao²³, nca⁴ je² xi³ si¹xa¹, va³quin²-le⁴ nio⁴-le⁴.
MAT 10:11 To⁴jña³-ni³ na⁴xi⁴na³nta¹ a³xo⁴ nqui³chao³ jña³ coi⁴tja¹sˀaon³, cho⁴na³nquio³ ˀya³ xi³ scoe⁴tjao²-no³. Ya⁴ to⁴jnco³ cˀa² ti⁴yo³ jo³ sa³ˀnta³ nca³ coi²tjo⁴-nca¹nio³.
MAT 10:12 Cˀia⁴ nca³ coi⁴tja¹sˀaon³ ni³ˀya³, ti⁴ti²ˀntao³.
MAT 10:13 Cˀoa⁴ tsa² je² ni³ˀya³ scoe⁴tjao²-no³, nchˀan¹ ca²ta³tio² tˀa³tsˀe⁴ cjoa⁴ni²ti²ˀnta³-no³, to⁴nca³ tsa² tsi² scoe⁴tjao²-no³, ca²ta³cha³jin³ cjoa⁴ni²ti²ˀnta³-no³.
MAT 10:14 Cˀoa⁴ to⁴ˀya³-ni³ xi³ tsi² tsjoa¹ˀnte³-no³, ni⁴cjoi⁴nčhˀoe¹-jin² en¹-no³, tˀe²cha³jon³ chao³-le⁴ ntso⁴co³ cˀia⁴ nca³ coi²tjo⁴-nio³ ya⁴ ntˀia³-ve⁴, a³xo⁴ na⁴xi⁴na³nta¹-ve⁴.
MAT 10:15 Xi³ cjoa⁴qui²xi⁴ xi³ xin³-no³, cho⁴ta⁴ Sodoma cao⁴ xi³ tsˀe⁴ Gomorra nqui²sa⁴ choa³ cjoa⁴ñˀain³ sˀe⁴-le⁴ cao⁴-ni³ tsa² je² na⁴xi⁴na³nta¹-ve⁴ coi³ ni⁴čhjin³-ve⁴ nca³ sˀe⁴-le⁴ cjoa⁴ñˀain³.
MAT 10:16 Coe⁴-ni³ an³ si³ca³sen¹³-no³ jo³-ni³ tsa² va³rre² ya⁴jin³-le⁴ tsen⁴². Cjoa⁴fa³ˀai³tsjen³ ca²ta³sˀe³-no³ jo³-ni³ tsa² ye⁴, cˀoa⁴ nta³ ca²ta³mao³ jo³-ni³ tsa² ni⁴se³paloma.
MAT 10:17 Ti⁴coi²nta⁴-lao⁴³ yao³-no³ cho⁴ta⁴, nca³ cˀoa⁴-sˀin² tsjoa¹tˀa³-no³ ya⁴ cjoa⁴te¹xo³ma³, cˀoa⁴ ya⁴ya³ ni³ˀya³sinagoga coa⁴²-no³.
MAT 10:18 Cˀoa⁴ xi³ to⁴tˀa³tsˀan⁴ coai⁴cao⁴-no³ gobernador cao⁴ cho⁴ta⁴ti¹tjon², cˀoa⁴-sˀin² cˀoai⁴-lao⁴³ en¹ je² cho⁴ta⁴-ve⁴ cao⁴ cho⁴ta⁴ xi³ li² judío-jin².
MAT 10:19 To⁴nca³ cˀia⁴ nca³ tsjoa¹tˀa³-no³, a³li² vˀe²xcon¹-jin²lao⁴³ yao³-no³, jo³-sˀin² a³xo⁴ jme³ xi³ coi⁴no²cjoao⁴³, nca³ ti⁴cˀia⁴-ni³ cˀoai⁴-no³ jo³-sˀin² coi⁴no²cjoao⁴³,
MAT 10:20 nca⁴ tsi² tsa² jon² xi³ coi⁴no²cjoao⁴³, to⁴je² Espíritu-le⁴ Nˀai³-no³ xi³ nchja⁴jin³-no³ nca³ jon².
MAT 10:21 Cˀoa⁴ ntsˀe⁴ tsjoa¹tˀa³-le⁴ cjoa⁴vi³ya³ ntsˀe⁴, cˀoa⁴ nˀai³ tsjoa¹tˀa³ ˀnti¹-le⁴. Cˀoa⁴ ˀnti¹-le⁴ co²ntran⁴ coai⁴-le⁴ xi³jcha¹-le⁴, cˀoa⁴ si⁴²cˀen³.
MAT 10:22 Cˀoa⁴ coan⁴jti³que³-no³ nca³tsˀi³ xi³ to⁴tˀa³tsˀan⁴, to⁴nca³ je² xi³ jcho¹cjoa⁴-le⁴ jo³ sa³ˀnta³ nca³ cjoe⁴tˀa³-ni³, je²-vi⁴ coi⁴tjo³ntjai²-ni¹.
MAT 10:23 To⁴nca³ cˀia⁴ nca³ coi⁴yo³tjen⁴nqui³ co²ntran⁴-no³ i⁴ na⁴xi⁴na³nta¹-vi⁴, ti⁴yo¹³ jña³ xin² na⁴xi⁴na³nta¹. Cjoa⁴qui²xi⁴ xi³ xin³-no³, nca³ ti¹tjon² cjoa⁴ˀai¹ je² ˀnti¹-le⁴ cho⁴ta⁴, ti⁴cje³ fe³tˀa³-jin²ni³no³ nca³ coi⁴tso⁴mao⁴³ nca³qui³jnta² na⁴xi⁴na³nta¹ xi³ tsˀe⁴ Israel.
MAT 10:24 Je² xi³ fi²tˀa³-le⁴ jnco³ xi³ va³co¹ya³-le⁴, li²coi³-jin² nqui²-sa⁴ ncˀa³ ti¹jna³ cao⁴-ni³ tsa² xi³ va³co¹ya³-le⁴, ni⁴je²-jin² cho⁴ˀnta³ nqui²sa⁴ ncˀa³ ti¹jna³ cao⁴-ni³ tsa² Nai³-le⁴.
MAT 10:25 To⁴ma³-ni³le⁴ je² cho⁴ta⁴-ve⁴ nca³ cˀoa⁴ma³-le⁴ jo³-sˀin² ma³-le⁴ maestro-le⁴, cˀoa⁴ to⁴ma³-ni³le⁴ je² cho⁴ˀnta³-ve⁴ nca³ cˀoa⁴ma³-le⁴ jo³-sˀin² ma³-le⁴ Nai³-le⁴. Tsa² Beelzebú tsa³cˀin²-le⁴ nˀai³-le⁴ ntˀia³, nqui²sa⁴-sa³ cˀoa⁴cˀoin¹-le⁴ xi³ tsˀe⁴ ntˀia³-le⁴.
MAT 10:26 A³li² vi³jcon³-jin²lao⁴³, nca³ nca³yi³je³ xi³ tjio¹jtsa³nqui³, cˀoa⁴-sˀin² jcha⁴son²tsen³-le⁴, cˀoa⁴ nca³yi³je³ xi³ tjio¹ˀma³, cˀoa⁴-sˀin² jcha⁴-le⁴.
MAT 10:27 Je² xi³ cˀoa⁴xin³ˀma²³-no³, ya⁴ jña³ i³sen³ cˀoa⁴ti⁴xon¹³ nca³ jon². Cˀoa⁴ je² xi³ no²ˀya²che¹-nio³, nˀion¹ ti⁴no²cjoa⁴ya³-nio³ sa³ˀnta³ son²ncˀa³ ntˀia³.
MAT 10:28 Cˀoa⁴ a³li² vi³jcon³-jin²lao⁴³ je² xi³ si¹cˀen³ yao³-na¹, to⁴nca³ ni⁴ma⁴-na¹ li²coi³ coan⁴-le⁴ si⁴²cˀen³. To⁴je² ti⁴jcon¹-lao⁴³ xi³ ma³-le⁴ si¹qui³xo²ya³ ni⁴ma⁴-na¹ cao⁴ yao³-na¹ ya⁴ jña³ nca³ ti¹ti² lˀi¹.
MAT 10:29 A³ tsi² tsa² sa³te¹na³ jao² ni⁴se³ˀnti¹ nca³ to⁴jnco³ ˀnti¹taon⁴. Nta³ tsa² cˀoa⁴tjin¹, ni⁴jnco³-jin² nca³ je² ca³tˀa³na³nqui³, tsa² tsi² tsa² jyo³-le⁴ Nˀai³-no³.
MAT 10:30 Nta³ tsa² ntsja⁴jco³ tjio¹xqui⁴ nca³yi³je³.
MAT 10:31 Cˀoa⁴-sˀin² a³li² vi³jcon³-jion²³, nca³ nqui²sa⁴ chji¹-no³ nca³ jon² cao⁴-ni³ tsa² ncjin² ni⁴se³ˀnti¹.
MAT 10:32 Nca³tsˀi³ xi³ tsen³ coi⁴tso⁴ nqui³xcon⁴ cho⁴ta⁴ nca³ tsˀan⁴, cˀoa⁴²-ti⁴ an³ tsen³ cˀoa⁴xian¹³ nca³ tsˀan⁴, nqui³xcon⁴ Nˀai³-na⁴ xi³ ti¹jna³ ncˀa³jmi³.
MAT 10:33 Cˀoa⁴ to⁴ˀya³-ni³ve⁴ xi³ coi⁴tso⁴ nqui³xcon⁴ cho⁴ta⁴ nca³ tsi² tsˀan⁴, cˀoa⁴²-ti⁴ an³ cˀoa⁴xian¹³ nca³ tsi² tsˀan⁴, nqui³xcon⁴ Nˀai³-na⁴ xi³ ti¹jna³ ncˀa³jmi³.
MAT 10:34 A³li² ni²cja³ˀai³tsjen³-jion²³ tsa² nchˀan¹ tjin¹ xi³ je²ˀe⁴ si³cˀe¹jna²³-le⁴ i⁴ son³ˀnte³-vi⁴. A³li²coi³ je²ˀe⁴ nca³ si³cˀe¹jna²³ xi³ nchˀan¹ tjin¹, to⁴cjoa⁴jchan¹ xi³ je²ˀe⁴ si³cˀe¹jna²³.
MAT 10:35 Coi³ xa¹ ja²ˀai⁴-nia³, jme¹-ni³ nca³ je² ti³-ve⁴ co²ntran⁴ coai⁴-si¹ni³le⁴ nˀai³-le⁴, cˀoa⁴ xi³ tso²ti³ co²ntran⁴ coai⁴-le⁴ xi³ na⁴-le⁴, cˀoa⁴ xi³ ja⁴ˀnta³ co²ntran⁴ coai⁴-le⁴ xi³ na⁴cha¹-le⁴.
MAT 10:36 Cˀoa⁴ je² xi³ co²ntran⁴-le⁴ cho⁴ta⁴, ti⁴je²-ni³ xi³ tjio¹ ya⁴ ntˀia³-le⁴.
MAT 10:37 Je² xi³ nqui²sa⁴ tsjoa³que³ nˀai³-le⁴ cao⁴ na⁴-le⁴ cao⁴-ni³ tsa² an³, li²coi³ va³quin²-le⁴ nca³ je² xi³ tsˀan⁴. Cˀoa⁴ je² xi³ nqui²sa⁴ tsjoa³que³ ˀnti¹-le⁴ a³xo⁴ tso²ti³-le⁴ cao⁴-ni³ tsa² an³, li²coi³ va³quin²-le⁴ nca³ je² xi³ tsˀan⁴.
MAT 10:38 Cˀoa⁴ je² xi³ tsi² scoe¹ cro²-le⁴ nca³ nta³ coai⁴tˀa³-na³, li²coi³ va³quin²-le⁴ xi³ tsˀan⁴.
MAT 10:39 Je² xi³ va¹sjai³ jo³-sˀin² vˀe¹jna³tjao² ni⁴ma⁴-le⁴, to⁴si⁴²cha³-ni¹, cˀoa⁴ je² xi³ si⁴²cha³ ni⁴ma⁴-le⁴ xi³ to⁴tˀa³tsˀan⁴, coan⁴sjai³-ni³le⁴.
MAT 10:40 Je² xi³ nta³ ve³tjao²-no³ nca³ jon², cˀoa⁴-ti⁴ ve³tjao²-na³ nca³ an³. Cˀoa⁴ je² xi³ ve³tjao²-na³ nca³ an³, cˀoa⁴-ti⁴ ve³tjao² xi³ qui³si³ca³sen¹-na³.
MAT 10:41 Je² xi³ ve³tjao² jnco³ cho⁴ta⁴ xi³ nchja⁴ya³ tˀa³tsˀe⁴ Ni³na¹, nca⁴ ve³ nca³ cho⁴ta⁴ xi³ nchja⁴ya³ tˀa³tsˀe⁴ Ni³na¹, chji¹-le⁴ cho⁴ta⁴ xi³ nchja⁴ya³ tˀa³tsˀe⁴ Ni³na¹ to⁴nco¹son²-sˀin² cˀoai⁴-le⁴. Cˀoa⁴ je² xi³ ve³tjao² cho⁴ta⁴cjoa⁴qui²xi⁴, nca⁴ ve³ nca³ cho⁴ta⁴cjoa⁴qui²xi⁴, chji¹-le⁴ cho⁴ta⁴cjoa⁴qui²xi⁴ to⁴nco¹son²-sˀin² cˀoai⁴-le⁴.
MAT 10:42 Cˀoa⁴ to⁴ˀya³-ni³ve⁴ xi³ tsjoa¹ ˀi⁴tse¹-le⁴ na³nta¹ jnco³ ˀnti¹xti³-vi⁴, nca⁴ je² xi³ cho⁴ta⁴-na⁴, xi³ cjoa⁴qui²xi⁴ xi³ xin³-no³ nca³ ni⁴ˀi⁴tse¹-jin² si⁴²cha³ chji¹-le⁴.
MAT 11:1 Cˀoi⁴coan³-ni³ cˀia⁴ nca³ Jesús je³qui³tsjoa³-le⁴ cjoa⁴-te¹xo³ma³ je² xi³ te³jao² cho⁴ta⁴-le⁴, qui³-ni³ ya⁴-ve⁴, qui³ ca³co¹ya³, cˀoa⁴ qui³nchja⁴ya³ ya⁴ na⁴xi⁴na³nta¹ xi³ tsˀe⁴.
MAT 11:2 Je² Juan xi³ ti¹jna³ nto⁴ya¹, cˀia⁴ nca³ qui³nčhˀoe¹ je² xi³ qui³sˀin³ Cristo, jao² cho⁴ta⁴-le⁴ qui³si³ca³sen¹con³-le⁴.
MAT 11:3 Qui³tso²-le⁴: A³ ji³ ni¹³ je² xi³ cjoi⁴nčhoa³, a³xo⁴ cho¹ya³-lai⁴jin⁴ xi³ cja⁴ˀai¹.
MAT 11:4 Cˀoa⁴ qui³nchja⁴ Jesús, qui³tso²-le⁴: Ta⁴nquion¹³, cˀoa⁴ cˀoa⁴tˀin²-lao⁴³ Juan cjoa⁴ xi³ ti³no²ˀyao²³, cˀoa⁴ xi³ ti³ˀyao³.
MAT 11:5 Je² xi³ xca⁴ cjoan³ ma³tsen³-le⁴, cˀoa⁴ je² xi³ chi⁴ˀnque¹ cjoan³ vˀe¹ma³-ni¹, cˀoa⁴ je² xi³ jtse¹ cjoan³ ma³tsje³jon³-ni¹, cˀoa⁴ je² xi³ jta³ya³ ma³ nčhˀoe¹-ni¹, cˀoa⁴ je² xi³ cˀen³ fa³ˀa¹ya³-ni³le⁴, cˀoa⁴ je² xi³ yo⁴ma⁴ tjio¹ ti¹no²cjoa⁴ya³jin³-le⁴ je² en¹nta³ xi³ tˀa³tsˀan⁴.
MAT 11:6 Jo¹ to⁴nta³-le⁴ je² xi³ tsi² ni²qui³tson¹ya³ cjoa⁴fa³ˀai³tsjen³-le⁴ xi³ to⁴tˀa³tsˀan⁴.
MAT 11:7 Cˀoa⁴ cˀia⁴ nca³ qui³ nca³ je², tsa³cˀe¹tsˀia⁴cao⁴ Jesús nca³ qui³nchja⁴cao⁴ cho⁴ta⁴ xi³ tˀa³tsˀe⁴ Juan: Jme¹ xi³ ji²tjo⁴ cho²tsen³-lao⁴³ ya⁴ ˀnte³tˀa³xin²tˀa³. A³ jnco³ ya¹na⁴xo⁴ xi³ si¹tin²ya³ ntjao⁴.
MAT 11:8 To⁴nca³ jme¹ xi³ ji²tjo⁴ cho²tsen³-lao⁴³. A³ jnco³ cho⁴ta⁴ xi³ nˀion¹ nta³ cjoan³ na³jño³-le⁴. Coe⁴-ni³ je² xi³ yˀa³cja¹ na³jño³ xi³ se¹xcon¹ cjoan³, ya⁴ tjio¹ ntˀia³-le⁴ cho⁴ta⁴ti¹tjon².
MAT 11:9 To⁴nca³ jme¹ xi³ ji²tjo⁴ cho²tsen³-lao⁴³. A³ jnco³ xi³ nchja⁴ya³ tˀa³tsˀe⁴ Ni³na¹. Jaon³, an³ xin³-no³, cˀoa⁴ nqui²sa⁴-sa³ ti¹tjon² ti¹jna³ cao⁴-ni³ tsa² jnco³ xi³ nchja⁴ya³ tˀa³tsˀe⁴ Ni³na¹.
MAT 11:10 Je²-vi⁴ je² cho⁴ta⁴ xi³ tˀa³tsˀe⁴ xi³ tji¹tˀa³-ni³: Coe⁴-ni³ an³ si³ca³sen¹³ ti¹tjon²-le²³ je² cho⁴ta⁴-na⁴ xi³ fi²cao⁴ en¹, xi³ coa⁴²nta³ ti¹tjon²-li² ntia⁴²-li⁴.
MAT 11:11 Xi³ cjoa⁴qui²xi⁴ xi³ xin³-no³, nca³ jin³-le⁴ cho⁴ta⁴son³ˀnte³ tsin² xi³ nqui²sa⁴ ti¹tjon² ma³ cao⁴-ni³ tsa² Juan Bautista. To⁴nca³ je² xi³ nqui²sa⁴ na³nqui³ ma³ ya⁴ cjoa⁴te¹xo³ma³-le⁴ ncˀa³jmi³ nqui²sa⁴ ti¹tjon² ma³ cao⁴-ni³ tsa² je².
MAT 11:12 Sa³ˀnta³ ni⁴čhjin³-le⁴ Juan Bautista sa³ˀnta³ ntˀai⁴-vi⁴, je² cjoa⁴te¹xo³ma³-le⁴ ncˀa³jmi³ nˀion¹ tse³ cjoa⁴ñˀain³ ti¹fa³ˀa¹, cˀoa⁴ je² cho⁴ta⁴ xi³ si¹cja³ˀa¹ cjoa⁴ñˀain³ cjoe¹.
MAT 11:13 Nca³tsˀi³ xi³ qui³nchja⁴ya³ tˀa³tsˀe⁴ Ni³na¹, cˀoa⁴ je² cjoa⁴te¹xo³ma³ qui³nchja⁴ya³-ni³ xi³ tˀa³tsˀe⁴, sa³ˀnta³ nca³ ja³ˀai³ Juan.
MAT 11:14 Tsa² me³-no³ nca³ chjoe¹tjao²³, je² ni¹ Elías xi³ cˀoa⁴-sˀin² tjin¹-ni³ nca³ cjoa⁴ˀai¹.
MAT 11:15 Je² xi³ tjin¹ xo⁴ño³ xi³ nčhˀoe¹-ni³, nta³ ca²ta³va³sen¹ño³.
MAT 11:16 ˀya¹-ni³ve⁴ˀni³ xi³ si³nco¹son²coa⁴ je² cho⁴ta⁴-vi⁴ xi³ tjio¹ ntˀai⁴-vi⁴. Cˀoa⁴ cjoan³ jo³ cjoan³ xi³ tjio¹ nti⁴tsin⁴, cˀoa⁴ xi³ tjio¹nchja⁴-le⁴ xi¹ncjin¹.
MAT 11:17 Xi³ tso²: Qui³ni²cji³ˀnta¹-lai²jin⁴ čhjao³xo⁴vi¹, cˀoa⁴ li²coi³ qui³chao²³. Qui³chi³ˀntia¹-lai²jin⁴, cˀoa⁴ li²coi³ qui³chi³ˀntiao¹³.
MAT 11:18 Nca⁴ ja³ˀai³ Juan xi³ ni⁴tsa³cjen²-jin², ni⁴qui³tsˀi³-jin². Cˀoa⁴ tso² cho⁴ta⁴: Nai⁴² xi³ nta³jin³ ti¹jna³jin³ ni⁴ma⁴-le⁴.
MAT 11:19 Ja³ˀai³ ˀnti¹-le⁴ cho⁴ta⁴ xi³ cjen², xi³ ˀvi³. Cˀoa⁴ tso² cho⁴ta⁴: Coe⁴-ni³ jnco³ cho⁴ta⁴xˀin⁴ xi³ nˀion¹ cjen², cˀoa⁴ xi³ nˀion¹ ˀvi³ vino, cˀoa⁴-ti⁴ mi²yo⁴-le⁴ cho⁴ta⁴ xi³ vˀe¹ña³ taon⁴va³sen³ cao⁴ cho⁴ta⁴tsˀen⁴. To⁴nca³ je² cjoa⁴ˀi³sen³ta³con² ma³qui²xi⁴ya³ xi³ to⁴tˀa³tsˀe⁴ xti³-le⁴.
MAT 11:20 Cˀia⁴ tsa³cˀe¹tsˀia⁴ nca³ qui³nchja⁴ti³cao⁴ cho⁴ta⁴ xi³ tsˀe⁴ na⁴xi⁴na³nta¹-ve⁴, jña³-ni³ nca³ cˀoa⁴-sˀin² qui³sˀin³ ncjin² cjoa⁴xcon¹, nca⁴ tsi² qui³si³cˀa³ntjai²ya³ cjoa⁴fa³ˀai³tsjen³-le⁴, qui³tso²-le⁴:
MAT 11:21 Ma⁴-xo¹ni³ nca³ ji³, Corazín. Ma⁴xo¹ni³ nca³ ji³, Betsaida. Je² cjoa⁴xcon¹-vi⁴ xi³ coan³ ya⁴ tsaon⁴³, tsa² cˀoa⁴qui³sˀin³ ya⁴ Tiro, tsa² cˀoa⁴qui³sˀin³ ya⁴ Sidón, je³co²tse³ qui³si³cˀa³ntjai²ya³ cjoa⁴fa³ˀai³tsjen³-le⁴ cao⁴ na³jño³-na³xa¹ cao⁴ chao³lˀi¹.
MAT 11:22 To⁴coi³ cˀoa⁴xin³-no³ nca³ cho⁴ta⁴ Tiro, cao⁴ xi³ tsˀe⁴ Sidón, nqui²sa⁴ choa³ cjoa⁴ñˀain³ sˀe⁴-le⁴ cao⁴-ni³ tsa² jon² je² ni⁴čhjin³-ve⁴ nca³ sˀe⁴ cjoa⁴ñˀain³.
MAT 11:23 Cˀoa⁴ ji³, Capernaum, a³ mi³ncˀa³-ni¹ sa³ˀnta³ ncˀa³jmi³. Sa³ˀnta³ ˀnte³cjoa⁴ñˀain³ sca⁴jin³. Je² cjoa⁴xcon¹-vi⁴ xi³ cˀoa⁴coan³ ya⁴ tsi⁴, tsa² cˀoa⁴coan³ ya⁴ Sodoma, to⁴jo³ ti¹jna³ sa³ˀnta³ ntˀai⁴-vi⁴.
MAT 11:24 To⁴coi³ cˀoa⁴xin³-no³ nca³ ya⁴ ˀnte³ Sodoma nqui²sa⁴ jcho¹cjoa⁴-le⁴ je² cjoa⁴ñˀain³-le⁴ cao⁴-ni³ tsa² ji³, je² ni⁴čhjin³-ve⁴ nca³ sˀe⁴ cjoa⁴ñˀain³.
MAT 11:25 Ti⁴coi³-ni³ ni⁴čhjin³ qui³nchja⁴ Jesús, qui³tso²: Tsjoa³-le²³ cjoa⁴nta³, Nˀai³, Nai³ xi³ tsi⁴ ncˀa³jmi³, xi³ tsi⁴ son³ˀnte³, nca³ ji³ tsa³cˀe²jna³ˀma³-lai⁴ je² cjoa⁴-vi⁴ cho⁴ta⁴chji⁴ne⁴ cao⁴ xi³ ma³cho⁴ya³-le⁴, cˀoa⁴ tsa³ca³co²son²tsen³-lai⁴ xi³ to⁴xquia⁴ xti³.
MAT 11:26 Tsjoa³-le²³ cjoa⁴nta³, Nˀai³, nca³ cˀoa⁴-sˀin² coan³me³-li².
MAT 11:27 Nca³yi³je³ cjoa⁴ an³ qui³tsjoa³-na³ Nˀai³-na⁴. To⁴je² xi³ Nˀai³ xi³ ve³ jo³ cjoan³ xi³ ˀnti¹, ni⁴ˀya³-jin²sa³ xi³ ve³. To⁴je² xi³ ˀnti¹ xi³ ve³ jo³ cjoan³ xi³ Nˀai³, cˀoa⁴ cao⁴ je² xi³ je² ˀnti¹ me³-le⁴ nca³ coa⁴co²son²tsen³-le⁴.
MAT 11:28 Nčhoa¹chon³-nao¹³ nca³tsˀio³ xi³ nˀion¹ ti³ni²xao¹³, cˀoa⁴ xi³ tse³ chˀa¹ ti³chˀao²³, nca³ an³ xi³ si³cˀe¹yo³cja¹ya³-no³.
MAT 11:29 Tja³ya³son²-lao⁴³ yao³-no³ yugo xi³ tsˀan⁴, cho¹tˀa³yao³ xi³ tsˀan⁴, nca³ ntˀe¹-nia¹³, cˀoa⁴ yo⁴ma⁴ cjia³coan³. Cˀoa⁴ sa⁴co²-no³ cjoa⁴ni²cja¹ya³ xi³ tˀa³tsˀe⁴ ni⁴ma⁴-no³.
MAT 11:30 Nca⁴ yugo-na⁴ a³li² ñˀain³-jin², cˀoa⁴ tja⁴-ni¹ chˀa¹-na⁴.
MAT 12:1 Coi³ ni⁴čhjin³-ve⁴ cˀia⁴ nca³ ni⁴čhjin³ ni²cja¹ya³ tso²ˀva³jin³ Jesús jña³ cji³ntje² tso³jmi². Cˀoa⁴ cho⁴ta⁴-le⁴ coan³vao³-le⁴, tsa³cˀe¹tsˀia⁴cao⁴ nca³ qui³scoe¹ trigo, cˀoa⁴ qui³squi³ne³.
MAT 12:2 Cˀia⁴ nca³ tsa³ve³ je² cho⁴ta⁴ fariseos, qui³tso²-le⁴: Coe⁴-ni³ cho⁴ta⁴-li⁴ cˀoa⁴tjio¹sˀin¹ jña³-le⁴ xi³ tsi² tjo³ˀnte³ je² ni⁴čhjin³ ni²cja¹ya³.
MAT 12:3 Cˀoa⁴ je² qui³tso²-le⁴: A³ tsi² tsa³cˀe²xquiao⁴³ jme³ xi³ qui³sˀin³ David, cˀia⁴ nca³ coan³vao³-le⁴, cao⁴ je² xi³ ña³tjen⁴ tsa³ca³tio².
MAT 12:4 Jo³-sˀin² nca³ ja³ˀa³sˀen³ ni³ˀya³-le⁴ Ni³na¹, cˀoa⁴ tsa³cjen² nio⁴xti²la⁴ xi³ ya⁴ ncha³tsen³ nqui³xcon⁴ Ni³na¹, xi³ li²coi³ qui³tjo³ˀnte³-le⁴ nca³ tsa³cjen², ni⁴qui³tjo³ˀnte³-jin²le⁴ je² xi³ ña³tjen⁴ tsa³ca³tio², to⁴je²-cjoan²ni¹ na⁴ˀmi³-ve⁴.
MAT 12:5 A³xo⁴, a³ tsi² tsa³cˀe²xquiao⁴³ ya⁴ cjoa⁴te¹xo³ma³, nca³ ni⁴čhjin³ ni²cja¹ya³ je² na⁴ˀmi³-ve⁴ ya⁴ yo⁴nco⁴ li²coi³ ve³xcon¹ ni⁴čhjin³ ni²cja¹ya³, cˀoa⁴ tsin²-le⁴ je¹-jin².
MAT 12:6 An³ xin³-no³ nca³ je² xi³ ti¹jna³ i⁴-vi⁴, je² ni¹ nqui²sa⁴ ti¹tjon² cao⁴-ni³ tsa² yo⁴nco⁴.
MAT 12:7 To⁴nca³ tsa² coan³cho⁴ya³-no³ tsa²cai³ jo³ tso²-ni³ je²-vi⁴: Cjoa⁴ma⁴ta³con² xi³ me³-na³, cˀoa⁴ a³li² cjoa⁴tjao² xi³ vˀai²tˀa³-nao¹³jin². Cˀia⁴ li²coi³ tsa³cˀai²-ni³lao⁴³ tsa²cai³ cjoa⁴ñˀain³ je² xi³ tsin²-le⁴ je¹-jin².
MAT 12:8 Nca⁴ je² ˀnti¹-le⁴ cho⁴ta⁴, Nai³-le⁴ ma³ ni⁴čhjin³ ni²cja¹ya³.
MAT 12:9 Cˀoa⁴ nca³ ji³tjo³-ni³ ya⁴-ve⁴, ja³ˀa³sˀen³ ya⁴ ni³ˀya³ sinagoga xi³ tsˀe⁴.
MAT 12:10 Coe⁴-ni³ ya⁴ ti¹jna³ jnco³ cho⁴ta⁴ xi³ qui³xi²tˀa³ jnco³ ntsja³, cˀoa⁴ qui³sco²na³nqui³-le⁴ Jesús cho⁴ta⁴, qui³tso²: A³ tjo³ˀnte³-ni¹ nca³ si¹nta³ cho⁴ta⁴ ni⁴čhjin³ ni²cja¹ya³. To⁴coi³ qui³sco²na³nqui³-le⁴, jme¹-ni³ nca³ ma³ va³jnqui³ya³tˀain³-si¹ni³.
MAT 12:11 Cˀoa⁴ Jesús qui³tso²-le⁴: ˀya¹-ni³ jon², xi³ tjin¹-le⁴ jnco³ va³rre², tsa² ya⁴ sca⁴sˀen³ jnco³ nca⁴jao⁴ je² ni⁴čhjin³ ni²cja¹ya³, a³ tsi² tsa² scoe¹-ni³, cˀoa⁴ cˀoa⁴sje³-ni³.
MAT 12:12 Nqui²sa⁴ chji¹-le⁴ cho⁴ta⁴ cao⁴-ni³ tsa² jnco³ va³rre². Cˀoa⁴-sˀin² tjo³ˀnte³-ni¹ nca³ nta³ nˀian² ni⁴čhjin³ ni²cja¹ya³.
MAT 12:13 Cˀoa⁴ cˀia⁴ Jesús qui³tso²-le⁴ je² cho⁴ta⁴-ve⁴: Tjain³ ntsai⁴. Cˀoa⁴ tsa³cjen¹, cˀoa⁴ coan³nta³-ni³ ntsja³ jo³-ni³ xi³jnco³.
MAT 12:14 Cˀia⁴ ji³tjo³-ni³ cho⁴ta⁴ fariseos, tsa³cjao¹ya³-ni³ qui³ co²ntran⁴-le⁴ Jesús, nca³ coan³me³-le⁴ nca³ si⁴²cˀen³.
MAT 12:15 To⁴nca³ tsa³ve³ Jesús, tsa³ca³sen²xin²-le⁴ ya⁴-ve⁴, cˀoa⁴ ncjin² cho⁴ta⁴ qui³tjen⁴nqui³-le⁴. Qui³si³nta³ nca³tsˀi³.
MAT 12:16 Cˀoa⁴ je² nˀion¹ tsa³cˀe¹ne²-le⁴ nca³ tsi² tsa² jme³ xi³ coa⁴co²son²tsen³ xi³ tˀa³tsˀe⁴,
MAT 12:17 jme¹-ni³ nca³ coi⁴tjo³son²-si¹ni³ xi³ qui³tso² Isaías xi³ qui³nchja⁴ya³ tˀa³tsˀe⁴ Ni³na¹, xi³ qui³tso²:
MAT 12:18 Coe⁴-ni³ je² cho⁴ˀnta³-na⁴ xi³ tsa³cja³ˀa³jian³. Je² xi³ tsjoa³que⁴, jña³-le⁴ xi³ ma³tsjoa³jin³-le⁴ ni⁴ma⁴-na⁴. Cˀoe³jna³son²-le⁴ je² espíritu-na⁴, cˀoa⁴ je² xi³ coi⁴nchja⁴ya³jin³-le⁴ cho⁴ta⁴ xi³ li² judío-jin² xi³ tˀa³tsˀe⁴ cjoa⁴qui²xi⁴.
MAT 12:19 Li²coi³ scan³, ni⁴squi¹ˀntia¹xa¹-jin², ni⁴ˀya³-jin² xi³ ˀncho² calle cjoi⁴nčhˀoe¹-le⁴ jta⁴-le⁴.
MAT 12:20 Je² ya¹na⁴xo⁴ xi³ chi³cjan³, li²coi³ sco¹tˀao¹. Je² xca⁴ xi³ to⁴tjo³ˀnti⁴, li²coi³ si⁴²qui³tsˀao² sa³ˀnta³ nca³ coi⁴njen⁴-le⁴ cao⁴ cjoa⁴qui²xi⁴.
MAT 12:21 Cˀoa⁴ xi³ tˀa³tsˀe⁴ jan³ˀain¹-le⁴ sˀe⁴-le⁴ cjoa⁴cho⁴ya³cao⁴cjoa⁴ cho⁴ta⁴ xi³ li² judío-jin².
MAT 12:22 Cˀia⁴ ja³ˀai³cha³ni²tˀa³-le⁴ jnco³ xi³ nai⁴² xi³ nta³jin³ ti¹jna³jin³ ni⁴ma⁴-le⁴, xi³ xca⁴ cji³, cˀoa⁴ xi³ yo⁴ma⁴. Cˀoa⁴-sˀin² qui³si³nta³-ni¹, cˀoa⁴ je² xi³ xca⁴ xi³ yo⁴ma⁴ cji³ qui³nchja⁴, cˀoa⁴ coan³tsen³-le⁴.
MAT 12:23 Cˀoa⁴ nca³tsˀi³ cho⁴ta⁴ jo³ to⁴coan³xcon¹-le⁴, qui³tso²: A³ je²-vi⁴ ˀnti¹-le⁴ David tso²cˀoa⁴.
MAT 12:24 Cˀia⁴ nca³ je² cho⁴ta⁴ fariseos qui³nčhˀoe¹-le⁴, qui³tso²: To⁴cao⁴ nca³nˀion¹-le⁴ Beelzebú xi³ nca³jco⁴-le⁴ cho⁴to⁴-nai⁴², ma³-le⁴ je² cho⁴ta⁴ vˀa³sje³xin² nai⁴² xi³ nta³jin³.
MAT 12:25 Cˀoa⁴ nca³ tsa³ve³ cjoa⁴fa³ˀai³tsjen³-le⁴ Jesús qui³tso²-le⁴: Nca³yi³je³ cjoa⁴te¹xo³ma³ xi³ ma³ jao² ya³, xi³ co²ntran⁴ tjio¹-le⁴ xi¹ncjin¹, fi³tson³ya². Cˀoa⁴ nca³yi³je³ na⁴xi⁴na³nta¹ a³xo⁴ ntˀia³ xi³ jao² ya³ ma³-ni³, xi³ co²ntran⁴ tjio¹-le⁴ xi¹-ncjin¹, li²coi³ ti⁴cˀoe¹yo³-ni³.
MAT 12:26 Tsa² Satanás vˀa³sje³xin² xi³ ti⁴je²-ni³ Satanás, jao² ya³ ma³-ni³, co²ntran⁴ fi²-le⁴ yao³-le⁴. Jo¹-sˀin² cˀoe¹jna³-ni³ cjoa⁴te¹xo³ma³-le⁴.
MAT 12:27 Cˀoa⁴ tsa² an³ cao⁴ nca³nˀion¹-le⁴ Beelzebú vˀa³sje³xian²³ je² nai⁴²-ve⁴, ja⁴xti³-no³ ˀya¹ tsˀe⁴ nca³nˀion¹ xi³ vˀa³sje³xin²-ni³. Coi³ cjoa⁴-vi⁴ je² xti³-no³ xca²le⁴ coan⁴ xi³ tsjoa¹ cjoa⁴qui²xi⁴ xi³ tˀa³tsaon⁴³.
MAT 12:28 Cˀoa⁴ tsa² an³ xi³ to⁴tˀa³tsˀe⁴ Espíritu xi³ tsˀe⁴ Ni³na¹, vˀa³sje³xian²³ je² nai⁴²-ve⁴, cjoa⁴qui²xi⁴ je³ja³ˀai³-no³ nca³ jon² cjoa⁴te¹xo³ma³-le⁴ Ni³na¹.
MAT 12:29 Jo¹-sˀin² coan⁴-ni³le⁴ cho⁴ta⁴ nca³ cjoa⁴ˀa³sˀen³-ni³ ntˀia³-le⁴ cho⁴ta⁴ xi³ tjin¹-le⁴ nca³nˀion¹, nca³ si⁴²che¹ tso³jmi²-le⁴, tsa² tsi² tsa² ti¹tjon² vˀe¹tˀa³nˀion¹ je² xi³ tjin¹-le⁴ nca³nˀion¹. Cˀia⁴² si⁴²che¹ tso³jmi²-le⁴.
MAT 12:30 Je² xi³ tsi² fi²tˀa³-na³, co²ntran⁴ fi²-na³. Je² xi³ tsi² tsa² vˀe¹xco¹cao⁴-na³, vˀe¹tsao³va³.
MAT 12:31 To⁴coi³ cˀoa⁴xin³-no³: Nca³yi³je³ je¹ a³xo⁴ cjoa⁴ˀaon³ cha⁴tˀa³-le⁴ cho⁴ta⁴, to⁴nca³ tsa² coi⁴nchja⁴ˀaon³-le⁴ je² Espíritu-ve⁴, li²coi³ cha⁴tˀa³-le⁴.
MAT 12:32 Cˀoa⁴ to⁴ˀya³-ni³ xi³ coi⁴nchja⁴ˀaon³-le⁴ je² ˀnti¹-le⁴ cho⁴ta⁴, cˀoa⁴-sˀin² cha⁴tˀa³-le⁴, to⁴nca³ to⁴ˀya³-ni³ xi³ coi⁴nchja⁴ˀaon³-le⁴ Espíritu Santo, li²coi³ cha⁴tˀa³-le⁴, ni⁴je²-jin² ni⁴čhjin³-vi⁴, ni⁴je²-jin² ni⁴čhjin³ xi³ cjoa⁴ˀai¹.
MAT 12:33 Tˀe²ntjao²³ ya¹ xi³ nta³, cˀoa⁴ xi³ nta³ to³ va³-le⁴, a³xo⁴ tˀe²ntjao²³ ya¹ xi³ tsi² nta³, cˀoa⁴ xi³ li²coi³ nta³ to³-le⁴. To⁴tˀa³tsˀe⁴ to³-le⁴ cˀoa⁴-sˀin² ˀya³-ni³le⁴ ya¹-ve⁴.
MAT 12:34 Cho⁴ta⁴ xi³ ye⁴ cjoaon³, jo¹-sˀin² coan⁴-no³ coi⁴no²cjoao⁴³ cjoa⁴nta³, nca³ tsˀaon⁴³. Nca⁴ je² xi³ nˀion¹ tjin¹-le⁴ ni⁴ma⁴-na¹, coi³ xi³ nchja⁴-ni³ ntso⁴ˀva³².
MAT 12:35 Je² xi³ nta³ cho⁴ta⁴, cjoa⁴nta³ xi³ sˀin¹, nca⁴ cjoa⁴nta³ tjin¹-le⁴ ni⁴ma⁴-le⁴. Cˀoa⁴ je² cho⁴ta⁴ xi³ tsˀen⁴, cjoa⁴tsˀen⁴ xi³ sˀin¹, nca⁴ cjoa⁴tsˀen⁴ tjin¹-le⁴ ni⁴ma⁴-le⁴.
MAT 12:36 To⁴nca³ an³ xin³-no³ nca³ je² nca³yi³je³ en¹ xi³ to⁴xquia⁴ coi⁴tso⁴ cho⁴ta⁴, ti⁴coi³-ni³ tsjoa¹ coi²nta⁴ ni⁴čhjin³ cˀia⁴ nca³ sˀe⁴-le⁴ cjoa⁴ñˀain³.
MAT 12:37 Xi³ tˀa³tsˀe⁴ en¹-li⁴ coi²tjo⁴qui²xi⁴-ni³. Xi³ tˀa³tsˀe⁴ en¹-li⁴ sca⁴ne²-li² cjoa⁴ñˀain³.
MAT 12:38 Tjin¹ cˀa³ cho⁴ta⁴ scribano cao⁴ cho⁴ta⁴ fariseos xi³ cˀia⁴ qui³tso²-le⁴: Maestro, me³-na³jin⁴ nca³ jchai⁴-jin⁴ jnco³ choa⁴ xi³ tsi⁴.
MAT 12:39 Cˀoa⁴ Jesús qui³tso²-nca¹ni³le⁴: Cho⁴ta⁴ xi³ tsˀen⁴, cˀoa⁴ xi³ si¹cha³jnqui³, si¹je¹ choa⁴, to⁴nca³ choa⁴ li²coi³ cˀoai⁴-le⁴, to⁴je² choa⁴-le⁴ Jonás xi³ qui³nchja⁴ya³ tˀa³tsˀe⁴ Ni³na¹.
MAT 12:40 Nca⁴ jo³-sˀin² nca³ jan² ni⁴čhjin³ cao⁴ jan² ni⁴tjen⁴ tsa³cˀe²jna³ Jonás ya³ tsˀoa⁴ jnco³ jti⁴je³, cˀoa⁴-sˀin² jan² ni⁴čhjin³ cao⁴ jan² ni⁴tjen⁴ cˀoe¹jna³jin³ na³nqui³ je² ˀnti¹-le⁴ cho⁴ta⁴.
MAT 12:41 Cˀia⁴ nca³ sˀe⁴ cjoa⁴ñˀain³, je² cho⁴ta⁴na⁴xi⁴na³nta¹ Nínive coi⁴so¹tjen⁴ cao⁴ je² cho⁴ta⁴ xi³ ntˀai⁴ tjio¹, cˀoa⁴ coa⁴²ne²-le⁴ cjoa⁴ñˀain³. Nca⁴ qui³si³cˀa³ntjai²ya³ cjoa⁴fa³ˀai³tsjen³-le⁴ nca³ qui³nchja⁴ya³ Jonás, cˀoa⁴ coe⁴-ni³ i⁴ ti¹jna³-vi⁴ jnco³ xi³ nqui²sa⁴-sa³ to⁴nˀion¹ cao⁴-ni³ tsa² Jonás.
MAT 12:42 Cˀia⁴ nca³ sˀe⁴ cjoa⁴ñˀain³, je² reina xi³ tsˀe⁴ sur cjoa⁴ˀa¹ya³-ni³le⁴ cao⁴ je² cho⁴ta⁴ xi³ ntˀai⁴ tjio¹, cˀoa⁴ coa⁴²ne²-le⁴ cjoa⁴ñˀain³. Nca⁴ ja³ˀai³-ni³ sa³ˀnta³ jña³ nca³ fe³tˀa³-ni³ son³ˀnte³, nca³ qui³nčhˀoe¹-le⁴ cjoa⁴chji⁴ne⁴-le⁴ Salomón. Cˀoa⁴ coe⁴-ni³ i⁴ ti¹jna³-vi⁴ jnco³ xi³ nqui²sa⁴-sa³ to⁴nˀion¹ cao⁴-ni³ tsa² Salomón.
MAT 12:43 Cˀia⁴ nca³ ntjao⁴ xi³ nta³jin³ ji³tjo³-ni³le⁴ cho⁴ta⁴, tso²ˀva³ jña³ nca³ ˀnte³qui³xi², va¹sjai³ jña³ nca³ si¹cja¹ya³, cˀoa⁴ li²coi³ ma³sjai³-le⁴.
MAT 12:44 Cˀia⁴ tso²: Cjoi¹-nca¹nia³ tso²cˀoa⁴ ntˀia³-na⁴ jña³ nca³ ji²tjo⁴-nia³. Cˀia⁴ nca³ fa³ˀai³ to⁴cji³tia³-ni¹, cˀoa⁴ je³qui³sa³te²cha², cˀoa⁴ je³coan³nta³chon³.
MAT 12:45 Cˀia⁴ fi², cˀoa⁴ nčhoa¹cao⁴ nqui²ña³to³ ntjao⁴ xi³ nta³jin³ xi³ nqui²sa⁴-sa³ chˀao³ cjoan³ cao⁴-ni³ tsa² je². Cˀoa⁴ ya⁴ fa³ˀa³sˀen³, ya⁴ va³tio². Je² cho⁴ta⁴-ve⁴ nqui²sa⁴-sa³ chˀao³ ma³ cjoan³ xi³ fe³tˀa³-ni³le⁴ cao⁴-ni³ tsa² xi³ ti¹tjon². Cˀoa⁴-ti⁴sˀin² coan⁴ cho⁴ta⁴tsˀen⁴ xi³ tjio¹ ntˀai⁴-vi⁴.
MAT 12:46 Cˀia⁴ nca³ to⁴jo³ ti¹fa¹cao⁴ cho⁴ta⁴ Jesús, coe⁴-ni³ na⁴-le⁴ cao⁴ ntsˀe⁴ tjio¹nti³tsin³, nca³ me³-le⁴ nca³ cjoa⁴²cao⁴.
MAT 12:47 Cˀoa⁴ jnco³ xi³ qui³tso²-le⁴: Coe⁴-ni³ na⁴-li⁴ cao⁴ ntsˀai³ tjio¹ nti³tsian³². Me³-xo¹le⁴ cjoa⁴²cao⁴-li².
MAT 12:48 Cˀoa⁴ Jesús qui³nchja⁴-nca¹ni³le⁴ nca³ je² xi³ cˀoa⁴qui³tso²-le⁴ je²-vi⁴, qui³tso²: ˀya¹-ni³ xi³ na⁴-na⁴, cˀoa⁴ ˀya¹-ni³ xi³ ntsˀe³.
MAT 12:49 Cˀoa⁴ tsa³cjen¹ ntsja³ ya⁴ jña³ nca³ tjio¹ cho⁴ta⁴-ve⁴: Coe⁴-ni³vi⁴ je² xi³ na⁴-na⁴, cˀoa⁴ je² xi³ ntsˀe³.
MAT 12:50 To⁴ˀya³-ni³ xi³ sˀin⁴² jo³-sˀin² me³-le⁴ Nˀai³-na⁴ xi³ ti¹jna³ ncˀa³jmi³, je²-ve⁴ xi³ ntsˀe³, cˀoa⁴ xi³ ti²chja³, cˀoa⁴ xi³ na⁴-na⁴.
MAT 13:1 Cˀia⁴ coi³ ni⁴čhjin³-ve⁴ ji³tjo³-ni³ ni³ˀya³ Jesús, tsa³cˀe²jna³ntai³ nta¹chi³con³.
MAT 13:2 Ncjin² cho⁴ta⁴ coan³xco¹tˀa³-le⁴, sa³ˀnta³ Jesús ja³ˀa³sˀen³ jnco³ chi³tso³ xi³ tsa³cˀe²jna³ya³, cˀoa⁴ nca³tsˀi³ cho⁴ta⁴ tsa³ca³tio²ntai³-le⁴ nta¹chi³con³.
MAT 13:3 Cˀoa⁴ a³li² cˀoa⁴cji³ cjoa⁴ xi³ cjoa⁴xco¹son² qui³nchja⁴ni³le⁴, qui³tso²: Coe⁴-ni³ jnco³ cho⁴ta⁴ xi³ co³jnti² na⁴xin⁴, qui³ co³jnti².
MAT 13:4 Cˀia⁴ nca³ ti¹co³jnti², tjin¹ cˀa³ na⁴xin⁴ xi³ qui³tsao³ntai³ ntia⁴², cˀoa⁴ ja³ˀai³ ni⁴se³, tsa³cjen².
MAT 13:5 Cˀoa⁴ tjin¹ cˀa³ na⁴xin⁴ xi³ qui³tsao³ jña³ la⁴jao⁴ chon³, jña³ nca³ to⁴choa³ na³nqui³ chon³. Coan³ntje² nti⁴ton⁴, coi³ nca³ tsi² tse³ ni³ˀnte³ xi³ tjin¹-le⁴.
MAT 13:6 Cˀia⁴ nca³ ji³tjo³ tsˀoi¹, qui³ti², cˀoa⁴ qui³xi², coi³ nca³ tsin²-le⁴ ja⁴ma⁴-jin².
MAT 13:7 Cˀoa⁴ tjin¹ cˀa³ xi³ qui³tsao³jin³ na³ˀya¹, cˀoa⁴ je² na³ˀya¹-ve⁴ chi³so², tsa³cˀe¹chjoa²jin³-le⁴.
MAT 13:8 Cˀoa⁴ tjin¹ cˀa³ xi³ nta³ na³nqui³ qui³tsao³jin³, cˀoa⁴ qui³tsjoa³ ntje⁴-le⁴, tjin¹ cˀa³ xi³ jnco³ ciento, tjin¹ cˀa³ xi³ jan² can³, tjin¹ cˀa³ xi³ can³te².
MAT 13:9 Je² xi³ tjin¹ xo⁴ño³ xi³ nčhˀoe¹-ni³, nta³ ca²ta³va³sen¹ño³.
MAT 13:10 Cˀia⁴ nca³ ji³cho²con³-le⁴ cho⁴ta⁴-le⁴, qui³tso²-le⁴: A¹-ni³ nca³ to⁴cjoa⁴xco¹son² no²cjoa⁴-si¹ni³lai⁴.
MAT 13:11 Cˀoa⁴ je² qui³nchja⁴-nca¹ni³: Nca⁴ jon² qui³tsˀai²-no³ nca³ jchao⁴³ cjoa⁴ˀma³-le⁴ cjoa⁴te¹xo³ma³-le⁴ ncˀa³jmi³, to⁴nca³ je², li²coi³ cˀoa⁴-sˀin² qui³tsˀai²-le⁴.
MAT 13:12 To⁴ˀya³-ni³ xi³ tjin¹-le⁴, cˀoai⁴-sa³le⁴, cˀoa⁴ coan⁴tse³sa³le⁴, cˀoa⁴ je² xi³ li²jme³ xi³ tjin¹-le⁴, sa³ˀnta³ je² xi³ tjin¹-le⁴, tjo¹xin²-le⁴.
MAT 13:13 To⁴coi³ nca³ to⁴cjoa⁴xco¹son² fa²cao⁴-nia³, nca⁴ cˀia⁴ nca³ tjio¹ve³, li²coi³ ve³-ni³, cˀoa⁴ cˀia⁴ nca³ tjio¹nčhˀoe¹, li²coi³ nčhˀoe¹-ni³, ni⁴ma³cho⁴ya³-jin²ni³le⁴.
MAT 13:14 Xi³ tˀa³tsˀe⁴ nca³ je² cji³ma³jnco³-ni³le⁴ je² cjoa⁴ xi³ qui³nchja⁴ya³ Isaías tˀa³tsˀe⁴ Ni³na¹, xi³ qui³tso²: Xo⁴ño³ coi⁴no¹ˀya²-nio³, to⁴nca³ li²coi³ coan⁴cho⁴ya³-no³, cˀoa⁴ ña³qui³ ti³cho²tsaon³, to⁴nca³ li²coi³ jchao⁴³.
MAT 13:15 Nca⁴ je² ni⁴ma⁴-le⁴ na⁴xi⁴na³nta¹-vi⁴ je³nˀion¹ coan³nchja¹, cˀoa⁴ xo⁴ño³ ñˀain³ nčhˀoe¹-ni³, cˀoa⁴ xcon⁴ to⁴sa³-sa³ tsa³cˀe¹chjoa²nqui³-ni³, jme¹-ni³ nca³ tsi² scoe⁴-ni³ xcon⁴, cˀoa⁴ jme¹-ni³ nca³ tsi² cjoi⁴nčhˀoe¹-ni³ xo⁴ño³, cˀoa⁴ jme¹-ni³ nca³ tsi² coan⁴cho⁴ya³-ni³le⁴ ni⁴ma⁴-le⁴, cˀoa⁴ jme¹-ni³ nca³ tsi² si⁴²cˀo¹fa³tˀa³-ni³le⁴ Ni³na¹, cˀoa⁴ an³ si³nta³-nia³.
MAT 13:16 To⁴nca³ jo¹ to⁴nta³-le⁴ xcon³ xi³ tsaon⁴³, nca³ ma³tsen³-le⁴, cˀoa⁴ xo⁴ño³ nca³ nčhˀoe¹-ni³.
MAT 13:17 Xi³ cjoa⁴qui²xi⁴ xi³ xin³-no³, nca³ ncjin² xi³ qui³nchja⁴ya³ tˀa³tsˀe⁴ Ni³na¹ cˀoa⁴ cao⁴ cho⁴ta⁴cjoa⁴qui²xi⁴ coan³me³con³ nca³ tsa³ve³ je² xi³ ti³cho²tsen³-lao⁴³, to⁴nca³ li²coi³ tsa³ve³. Coan³me³con³ nca³ qui³nčhˀoe¹ je² xi³ ti³no³ˀyao²³, to⁴nca³ li²coi³ qui³nčhˀoe¹.
MAT 13:18 Ti⁴no¹ˀyao²³ tso²cˀoa⁴ nca³ jon², jo³ tso²-ni³ je² cjoa⁴xco¹son²-vi⁴ xi³ tˀa³tsˀe⁴ xi³ co³jnti² na⁴xin⁴.
MAT 13:19 Cˀia⁴ nca³ nčhˀoe¹ je² en¹ xi³ tsˀe⁴ cjoa⁴te¹xo³ma³-le⁴ ncˀa³jmi³, cˀoa⁴ nca³ tsi² ma³cho⁴ya³-ni³le⁴, fa³ˀai³ je² xi³ tsˀen⁴, fa³ˀai³ cja¹ˀa³-le⁴ je² xi³ sˀe³ntje² ya³ ni⁴ma⁴-le⁴. Je²-vi⁴ xi³ ya⁴ ma³ntje² ntai³ ntia⁴².
MAT 13:20 Cˀoa⁴ je² xi³ ma³ntje²jin³ la⁴jao⁴, je²-vi⁴ xi³ nčhˀoe¹ je² en¹, cˀoa⁴ nti⁴ton⁴ cjoe¹-ni³ cao⁴ cjoa⁴tsjoa³.
MAT 13:21 To⁴nca³ tsin²-le⁴ ja⁴ma⁴ ya³ ni⁴ma⁴-le⁴, to⁴jnco³ tjo² fa³ˀa³. Cˀia⁴ nca³ fa³ˀai³ cjoa⁴ñˀain³, a³xo⁴ tjin¹ xi³ fi²co²ntran⁴-le⁴ xi³ tˀa³tsˀe⁴ en¹-vi⁴, nti⁴ton⁴ tsjion¹ ntia⁴²-le⁴ Ni³na¹.
MAT 13:22 Cˀoa⁴ je² xi³ ma³ntje²jin³ na³ˀya¹, je² xi³ nčhˀoe¹ en¹-vi⁴, to⁴nca³ coi³ nca³ cjoa⁴va³ xi³ tjin¹ tsˀe⁴ coi³ ni⁴čhjin³-vi⁴, cao⁴ cjoa⁴chˀa¹na⁴cha⁴ xi³ tsˀe⁴ cjoa⁴nchi⁴na¹, to⁴ya⁴ sa³te¹chjoa²-le⁴ en¹nta³-vi⁴, cˀoa⁴ li²jme³ xi³ tsjoa¹.
MAT 13:23 To⁴nca³ je² xi³ ya⁴ ma³ntje² jña³ nta³ na³nqui³, je²-vi⁴ xi³ nčhˀoe¹, cˀoa⁴ ma³cho⁴ya³-le⁴ en¹-vi⁴, cˀoa⁴ je²-vi⁴ xi³ ña³qui³ si¹ncjin²ya³-ni³. Cˀoa⁴ jnco³ xi³ ciento cˀa³ si¹ncjin²ya³-ni³, cˀoa⁴ nqui²jnco³ xi³ jan² can³ cˀa³ tsjoa¹, cˀoa⁴ nqui²jnco³ xi³ can³te² cˀa³.
MAT 13:24 Tsa³cˀe¹ nqui²jnco³-le⁴ cjoa⁴xco¹son²: Je² cjoa⁴te¹xo³ma³-le⁴ ncˀa³jmi³ ya³ ma³nco¹son² cho⁴ta⁴ xi³ nta³ na⁴xin⁴ vˀe¹ntje²son² na³nqui³-le⁴.
MAT 13:25 To⁴nca³ cˀia⁴ nca³ cjio³fe² cho⁴ta⁴, ja³ˀai³ xi³ co²ntran⁴-le⁴, cˀoa⁴ jña¹ xi³ tsi²coi³ nta³ tsa³cˀe¹ntje²jin³ trigo, cˀia⁴ qui³tˀa³xin²-ni³.
MAT 13:26 Cˀia⁴ nca³ je² trigo qui³tsjoa³ xca⁴ntsja³, qui³sˀe³-le⁴ to³, cˀoa⁴ cˀia⁴ coan³tsen³ je² jña¹ xi³ tsi² nta³.
MAT 13:27 Cˀia⁴ nca³ ji³cho² cho⁴ˀnta³-le⁴ nˀai³-le⁴ ntˀia³ qui³tso²-le⁴: Señor, a³ tsi² nta³ ntje⁴ tsa³cˀe²ntjai²³ ya⁴ na³nqui³-li⁴. Jña¹-ni³ve⁴ tso²cˀoa⁴, tjin¹-le⁴ jña¹ xi³ tsi² nta³-ve⁴.
MAT 13:28 Cˀoa⁴ je² qui³tso²-le⁴: Jnco³ cho⁴ta⁴ co²ntran⁴-na⁴ xi³ cˀoa⁴qui³sˀin³ je²-vi⁴. Cˀoa⁴ cho⁴ˀnta³-le⁴ qui³tso²-le⁴: A³ me³-li² nca³ coa⁴nquin¹ cˀe²xco¹jin³-jin⁴.
MAT 13:29 Cˀoa⁴ je² qui³tso²-le⁴: Mai³, tsa² cho⁴nao²³ je² jña¹ xi³ tsi² nta³-ve⁴, a³ tsi² tsa² cˀoa⁴-ti⁴ cho⁴ne²cao⁴³ trigo-ve⁴.
MAT 13:30 Ña³tjen⁴ ca²ta³ma³jcha¹ nca³ jao² cˀa³, sa³ˀnta³ nca³ sˀe⁴xco¹. Cˀia⁴ ni⁴čhjin³ nca³ sˀe⁴xco¹, an³ cˀoa⁴xin¹-le⁴ ˀya³ xi³ cˀoe⁴²xco¹: Tˀe²xco¹ti¹tjon² jña¹ xi³ tsi² nta³-ve⁴, jnco¹ jte¹ tˀiaon⁴³, jme¹-ni³ nca³ coi⁴ti⁴-si¹ni³. To⁴nca³ ca²ti³ncha³ je² trigo-ve⁴ ya⁴ya³ ni³ncˀa³-na⁴.
MAT 13:31 Tsa³cˀe¹ nqui²jnco³-le⁴ cjoa⁴xco¹son²: Je² cjoa⁴te¹xo³ma³-le⁴ ncˀa³jmi³ ya³ ma³nco¹son² jnco³ na⁴xin⁴ xi³ tsˀe⁴ mostasa. Jnco³ cho⁴ta⁴ qui³scoe¹ je² na⁴xin⁴-ve⁴, cˀoa⁴ tsa³cˀe¹ntje² ya⁴ na³nqui³-le⁴.
MAT 13:32 Cjoa⁴qui²xi⁴ je²-sa³ xi³ nqui²sa⁴ ˀnti¹ cji³ cao⁴-ni³ tsa² to⁴jña³-ni³le⁴ na⁴xin⁴, to⁴nca³ cˀia⁴ nca³ je³coan³ncˀa³, je²-vi⁴ xi³ nqui²sa⁴-sa³ ncˀa³ cao⁴-ni³ tsa² to⁴jña³-ni³le⁴ na⁴xin⁴ xi³ sˀe³ntje². Cˀoa⁴-sˀin² ma³ jnco³ ya¹, jña³ fa³ˀai³ ni⁴se³ xi³ si¹ma³ jin³sen¹, cˀoa⁴ ya⁴ vˀe¹nta³ˀa³ tje¹-le⁴ jin³ ya¹ntsja³.
MAT 13:33 Nqui²jnco³ cjoa⁴xco¹son² qui³tso²-le⁴: Je² cjoa⁴te¹xo³ma³-le⁴ ncˀa³jmi³ ya³ ma³nco¹son² na⁴ˀyo⁴san³ xi³ qui³scoe¹ jnco³ chjon⁴², cˀoa⁴ jan² choa⁴ scoan⁴ nio⁴xti²la⁴ qui³si³cˀo¹tji³jin³ sa³ˀnta³ nca³ qui³tsin³jin³ nca³yi³je³ na⁴ˀyo⁴-ve⁴.
MAT 13:34 Nca³yi³je³ je²-vi⁴ Jesús qui³nchja⁴cao⁴ cho⁴ta⁴ncjin² cao⁴ cjoa⁴xco¹son². To⁴cao⁴ cjoa⁴xco¹son² tsa³cja¹cao⁴.
MAT 13:35 Coi³ cjoa⁴-vi⁴ nca³ cˀoa⁴-sˀin² coan⁴jnco³-si¹ni³ je² xi³ qui³tso² cho⁴ta⁴ xi³ qui³nchja⁴ya³ tˀa³tsˀe⁴ Ni³na¹: Coi³nchja²³ cjoa⁴xco¹son². Si³qui²xi⁴ya³ cjoa⁴ xi³ tjio¹ˀma³ sa³ˀnta³ nca³ qui³sˀe³nta³ son³ˀnte³.
MAT 13:36 Cˀia⁴ nca³ je³qui³si³xa³tˀa³ je² cho⁴ta⁴ncjin²-ve⁴, ja³ˀa³sˀen³ ni³ˀya³-le⁴. Ji³cho²con³-le⁴ cho⁴ta⁴-le⁴, qui³tso²-le⁴: Ti⁴qui²xi⁴ya³nta³-ni³na³jin⁴ je² cjoa⁴xco¹son² xi³ tˀa³tsˀe⁴ je² jña¹ xi³ tsi² nta³, xi³ qui³sˀe³ntje²jin³ na³nqui³.
MAT 13:37 Cˀoa⁴ qui³nchja⁴-nca¹ni³ Jesús: Je² xi³ nta³ na⁴xin⁴ vˀe¹ntje², je² ni¹ xi³ ˀnti¹-le⁴ cho⁴ta⁴.
MAT 13:38 Je² na³nqui³ je² ni¹ xi³ son³ˀnte³. Je² na⁴xin⁴ xi³ nta³, je² ni¹ xi³ cho⁴ta⁴ xi³ sˀe⁴-le⁴ cjoa⁴te¹xo³ma³-le⁴ ncˀa³jmi³. Cˀoa⁴ je² jña¹ xi³ tsi² nta³, je² ni¹ xi³ cho⁴ta⁴-le⁴ nai⁴².
MAT 13:39 Je² xi³ co²ntran⁴ xi³ tsa³cˀe¹ntje², je² ni¹ xi³ nai⁴². Je² xi³ sˀe³xco¹, je² xi³ cjoe⁴tˀa³-ni³ je² ni⁴čhjin³-vi⁴. Cˀoa⁴ je² xi³ vˀe¹xco¹, je² ni¹ je² a²ncje⁴.
MAT 13:40 Jo³-sˀin² nca³ sˀe³xco¹ je² jña¹ xi³ tsi² nta³, cˀoa⁴ ti² jin³ lˀi¹, cˀoa⁴-sˀin² coan⁴ nca³ cjoe⁴tˀa³-ni³ je² ni⁴čhjin³-vi⁴.
MAT 13:41 Je² ˀnti¹-le⁴ cho⁴ta⁴ si⁴²ca³sen¹ a²ncje⁴-le⁴, cˀoa⁴ cˀoe⁴²xco¹jin³ cjoa⁴te¹xo³ma³-le⁴ ncˀa³jmi³ nca³yi³je³ xi³ vˀe¹tsˀia⁴ cjoa⁴si³, cˀoa⁴ je² xi³ cjoa⁴tsˀa³ntjai²cjoa⁴ sˀin¹.
MAT 13:42 Cˀoa⁴ ya⁴ nca⁴ja¹ jña³ ti¹ti², si⁴²cˀa³tsao³jin³. Ya⁴ squi¹ˀntia¹, cˀoa⁴ ya⁴ tsao⁴cjao³ ni⁴ˀño⁴.
MAT 13:43 Cˀoa⁴ cˀia⁴ je² xi³ cho⁴ta⁴cjoa⁴qui²xi⁴ coan⁴fa³te³jon³ jo³-ni³ tsa² ntoa¹, ya⁴ cjoa⁴te¹xo³ma³-le⁴ Nˀai³-le⁴. Je² xi³ tjin¹ xo⁴ño³ xi³ nčhˀoe¹-ni³ nta³ ca²ta³va³sen¹ño³.
MAT 13:44 Cˀoa⁴-ti⁴ je² cjoa⁴te¹xo³ma³-le⁴ ncˀa³jmi³ ya³ ma³nco¹son² jo³-ni³ tsa² cjoa⁴nchi⁴na¹ xi³ ti¹jna³ˀma³ jin³-le⁴ na³nqui³. Cˀia⁴ nca³ jnco³ cho⁴ta⁴ coan³sjai³-le⁴, tsa³cˀe¹jna³ˀma³. Coi³ nca³ tsjoa³-le⁴ xi³ tˀa³tsˀe⁴, qui³ ca³te¹na³ nca³yi³je³ xi³ tjin¹-le⁴, cˀoa⁴ tsa³ca³tse³ je² na³nqui³-ve⁴.
MAT 13:45 Cˀoa⁴-ti⁴ je² cjoa⁴te¹xo³ma³-le⁴ ncˀa³jmi³ ya³ ma³nco¹son² jnco³ cho⁴ta⁴ xi³ cjoa⁴ma⁴ sˀin¹, xi³ va¹sjai³ to³fa³nqui³ xi³ nta³.
MAT 13:46 Cˀia⁴ nca³ coan³sjai³-le⁴ jnco³ to³fa³nqui³ xi³ nˀion¹ chji¹, qui³ tsa³ca³te¹na³ nca³yi³je³ xi³ tjin¹-le⁴, cˀoa⁴ coi³ tsa³ca³tse³-ni³.
MAT 13:47 Cˀoa⁴-ti⁴sˀin²ni³ je² cjoa⁴te¹xo³ma³-le⁴ ncˀa³jmi³ ya³ ma³nco¹son² jnco³ na⁴ˀya³ xi³ je³, xi³ ni²cˀa³tjen⁴jin³ nta¹chi³con³, xi³ cjoe¹ to⁴jña³-ni³le⁴ jco⁴ya³-ni³ jti⁴.
MAT 13:48 Cˀia⁴ nca³ je³qui³tse³, tsa³cˀa³sje³ ya⁴ ntai³-le⁴ nta¹chi³con³. Cˀoa⁴ tsa³ca³tio² tsa³cja³ˀa¹jin³. Nca³yi³je³ xi³ nta³ qui³si³ncha³ ni⁴sin⁴ya¹, cˀoa⁴ je² xi³ tsi² nta³ qui³si³cˀa³tsao³.
MAT 13:49 Cˀoa⁴-sˀin² coan⁴ nca³ cjoe⁴tˀa³ je² ni⁴čhjin³-vi⁴. Coi⁴tjo³ je² a²ncje⁴-ve⁴, cˀoa⁴ cjoa⁴ˀa²xin²jin³ jña³-le⁴ xi³ tsˀen⁴, cˀoa⁴ xi³ cho⁴ta⁴cjoa⁴qui²xi⁴.
MAT 13:50 Cˀoa⁴ ya⁴ nca⁴ja¹ jña³ nca³ ti¹ti² si⁴²cˀa³tsao³jin³. Ya⁴ squi¹ˀntia¹, cˀoa⁴ ya⁴ tsao⁴cjao³ ni⁴ˀño⁴.
MAT 13:51 Jesús qui³tso²-le⁴: A³ je³ca²ma³cho⁴ya³-no³ nca³yi³je³ je² cjoa⁴-vi⁴. Cˀoa⁴ je² qui³nchja⁴: Jaon³, Señor.
MAT 13:52 Cˀoa⁴ je² qui³tso²-le⁴: To⁴coi³ nca³tsˀi³ cho⁴ta⁴ scribano xi³ qui³sco²tˀa³ya³ tˀa³tsˀe⁴ cjoa⁴te¹xo³ma³-le⁴ ncˀa³jmi³, ya³ ma³nco¹son² jnco³ nˀai³-le⁴ ntˀia³ xi³ vˀa³sje³-ni³ cjoa⁴nchi⁴na¹-le⁴ cjoa⁴ xi³ cho⁴tse⁴, cˀoa⁴ cjoa⁴ xi³ jchi¹nca³.
MAT 13:53 Cˀoi⁴ coan³ nca³ je³je³tˀa³cao⁴ je² cjoa⁴xco¹son²-vi⁴ Jesús, ja³ˀa³-ni³ ya⁴-ve⁴.
MAT 13:54 Cˀia⁴ ja³ˀai³-ni³ na³nqui³ jña³ nchja⁴-ni³, tsa³ca³co¹ya³-le⁴ ya⁴ ni³ˀya³ sinagoga xi³ tsˀe⁴ cho⁴ta⁴. Cˀoa⁴-sˀin² coan³ nca³ to⁴coan⁴xcon¹-le⁴ cho⁴ta⁴-ve⁴, cˀoa⁴qui³tso²: Jña¹-ni³ qui³sa³co³-le⁴ cjoa⁴chji⁴ne⁴ je²-vi⁴, cˀoa⁴ coi³ cjoa⁴xcon¹-vi⁴.
MAT 13:55 A³ tsi² tsa² je²-vi⁴ ti³-le⁴ chji⁴ne⁴ya¹. A³ tsi² María ˀmi² na⁴-le⁴. Cˀoa⁴ ntsˀe⁴ Jacobo, cao⁴ José, cao⁴ Simón, cao⁴ Judas.
MAT 13:56 A³ tsi² tjio¹cao⁴-na¹ nca³tsˀi³ nti³chja³. Jña¹-ni³ qui³sa³co³-le⁴ tso²cˀoa⁴ nca³yi³je³ cjoa⁴-vi⁴.
MAT 13:57 To⁴jti³ coan³-le⁴ nca³tsˀi³ xi³ tˀa³tsˀe⁴. To⁴nca³ Jesús qui³tso²-le⁴: Nca³tsˀi³ xi³ nchja⁴ya³ tˀa³tsˀe⁴ Ni³na¹ tjin¹-le⁴ xi³ ve³xcon¹ nca³ je². To⁴ya⁴² na³nqui³-le⁴ jña³ nchja⁴-ni³, cˀoa⁴ ya⁴ ni³ˀya³-le⁴ li²coi³ ˀya³xcon¹.
MAT 13:58 Coi³ cjoa⁴ nca³ tsi² coan³cjain¹-le⁴ cho⁴ta⁴-ve⁴, li²coi³ ncjin² cjoa⁴xcon¹ qui³sˀin³ ya⁴-ve⁴.
MAT 14:1 Coi³ ni⁴čhjin³-ve⁴ je² gobernador xi³ Herodes ˀmi² qui³nčhˀoe¹ je² en¹ xi³ tsˀa³tji³vi¹son² tˀa³tsˀe⁴ Jesús.
MAT 14:2 Cˀoa⁴qui³tso²-le⁴ cho⁴ˀnta³-le⁴: Je²-vi⁴ Juan Bautista, ca²fa³ˀa¹ya³jin³-ni³le⁴ cˀen³. Coi³ nca³ cˀoa⁴-sˀin² tjin¹ cjoa⁴xcon¹ xi³ ma³-le⁴.
MAT 14:3 Nca⁴ Herodes je² xi³ qui³tsoa³ Juan, xi³ ya⁴ nto⁴ya¹ tsa³cˀe¹tˀa³nˀion¹ xi³ tˀa³tsˀe⁴ Herodías, chjon⁴²-le⁴ Felipe, ntsˀe⁴.
MAT 14:4 Nca⁴ Juan qui³tso²-le⁴: Li²coi³ tjo¹ˀnte³-li² ji³ nca³ coi⁴jna³coai⁴.
MAT 14:5 Cˀoa⁴ coan³me³-le⁴ nca³ qui³si³cˀen³, to⁴nca³ qui³tsa³cjon¹-le⁴ cho⁴ta⁴ncjin² xi³ qui³si³cja³ˀai³tsjen³ nca³ Juan qui³nchja⁴ya³ tˀa³tsˀe⁴ Ni³na¹.
MAT 14:6 To⁴nca³ tsˀa³sje³ sˀoi¹-le⁴ je² Herodes. Tso²ti³-le⁴ Herodías qui³te²jin³-le⁴ cho⁴ta⁴, cˀoa⁴ qui³sa³sen³-le⁴ Herodes.
MAT 14:7 Cˀoa⁴ qui³si³sˀe³nqui³-le⁴ nca³ qui³tsjoa³ en¹-le⁴ nca³ tsjoa¹-le⁴ to⁴jme³-ni³ xi³ si⁴²je¹.
MAT 14:8 Cˀoa⁴ ti¹tjon² na⁴-le⁴ qui³si³ma²ña⁴ tso²ti³-ve⁴, cˀia⁴ tso²ti³-ve⁴ qui³tso²-le⁴ Herodes: Tˀai²ya³-ni³nai¹³ jnco³ čhoa⁴ jco⁴ Juan Bautista.
MAT 14:9 Cˀia⁴ to⁴coan³fao¹-le⁴ cho⁴ta⁴ti¹tjon²-ve⁴, to⁴nca³ to⁴coi³ nca³ je³qui³tsjoa³ en¹-le⁴, cˀoa⁴ coi³ nca³ cho⁴ta⁴ tjio¹cao⁴ ya⁴tˀa³ ya¹mi²xa⁴, cho⁴ta⁴ti¹tjon²-ve⁴ tsa³cˀe¹ne² nca³ cˀoai⁴-le⁴.
MAT 14:10 Cˀia⁴ qui³si³ca³sen¹, tsa³cˀe¹ne² nca³ qui³ ca³te³sin³ Juan ya⁴ya³ nto⁴ya¹-ve⁴.
MAT 14:11 Cˀoa⁴ ja³ˀai³cha³ni² jco⁴ ja⁴ya³ jnco³ čhoa⁴, qui³tsˀai²-le⁴ tso²ti³-ve⁴. Je² ja³ˀai³cao⁴-le⁴ na⁴-le⁴.
MAT 14:12 Cˀia⁴ ji³cho² cho⁴ta⁴-le⁴ Juan, qui³scoe¹ yao³-le⁴, cˀoa⁴ tsa³cˀe¹ñai³. Qui³, cˀoa⁴ tsa³cˀe¹-le⁴ na⁴jmi¹ Jesús.
MAT 14:13 Cˀia⁴ nca³ qui³nčhˀoe¹ Jesús, qui³tˀa³xin²-ni³ ya⁴-ve⁴. Qui³ya³ jnco³ chi³tso³, qui³ ya⁴ ˀnte³tˀa³xin²tˀa³. Cˀia⁴ nca³ cho⁴ta⁴ncjin² qui³nčhˀoe¹, ntso⁴co⁴ qui³-ni³ na⁴xi⁴na³nta¹-le⁴ nca³ qui³tjen⁴nqui³-le⁴.
MAT 14:14 Cˀia⁴ nca³ ji³tjo³-ni³ chi³tso³-ve⁴ Jesús, tsa³ve³ cho⁴ta⁴ncjin². Cˀoa⁴ coan³ma⁴que³ nca³ je², cˀoa⁴ qui³si³nta³ xi³ tjio¹mˀen³.
MAT 14:15 Cˀoa⁴ cˀia⁴ nca³ je³coan³xon², cho⁴ta⁴-le⁴ ji³cho²con³-le⁴, qui³tso²: Je² ˀnte³-vi⁴ cjai¹ to⁴tˀa³xin²tˀa³, cˀoa⁴ je³coan³xon². Cˀoa⁴tˀin²-lai⁴ ca²ta³fi² cho⁴ta⁴, jme¹-ni³ nca³ coai⁴-si¹ni³ ya⁴ na⁴xi⁴na³nta¹ˀnti¹, cˀoa⁴ ca²ta³va³tse³-le⁴ yao³-le⁴ jme³ xi³ squi⁴ne⁴.
MAT 14:16 Cˀoa⁴ Jesús qui³tso²-le⁴: Li²coi³ ma³chjen¹ nca³ coai⁴. Tˀai²-lao⁴³ nca³ jon² xi³ squi⁴ne⁴.
MAT 14:17 Cˀoa⁴ je² qui³tso²: Tsin²-na³jin⁴ i⁴-vi⁴, to⁴ˀaon² ma³ nio⁴xti²la⁴, cˀoa⁴ jao² jti⁴ xi³ tjio¹-na³jin⁴.
MAT 14:18 Cˀoa⁴ je² qui³tso²-le⁴: Nčhoa¹cao⁴-nao¹³ i⁴-vi⁴.
MAT 14:19 Cˀoa⁴ tsa³cˀe¹ne²-le⁴ cho⁴ta⁴ncjin², nca³ ca²ta³va³tio²jin³ jña¹, qui³scoe¹ je² aon² nio⁴xti²la⁴ cao⁴ xi³ jao² jti⁴, qui³sco²tsen³ncˀa² qui³si³chi³con³tˀain³. Qui³si³xcoa⁴ nio⁴xti²la⁴-ve⁴, qui³tsjoa³-le⁴ cho⁴ta⁴-ve⁴. Cˀoa⁴ cho⁴ta⁴-le⁴ qui³si³cˀa³vi¹-le⁴ cho⁴ta⁴ncjin²-ve⁴.
MAT 14:20 Cˀoa⁴ tsa³cjen² nca³tsˀi³, ña³qui³ coan³squi³-ni³. Cˀoa⁴ tsa³cˀe¹xco¹ xi³ qui³njen²nqui³, te³jao² ni⁴sin⁴ ma³-ni³ nio⁴xti²la⁴ čhˀoa¹.
MAT 14:21 Cˀoa⁴ aon² jmi³-la⁴ ma³-ni³ cho⁴ta⁴xˀin⁴ xi³ tsa³cjen², cˀoa⁴ tˀa³xin² ya¹nchjin¹ cao⁴ ˀnti¹xti³.
MAT 14:22 Jesús tsa³cˀe¹ne² nti⁴ton⁴-le⁴ cho⁴ta⁴-le⁴ nca³ ja³ˀa³sˀen³ ya⁴ya³ chi³tso³-ve⁴, cˀoa⁴ nca³ qui³ti¹tjon²-le⁴ sa³ˀnta³ xi³ncoa³nta¹-ni³ jan¹. Tjen⁴ Jesús qui³si³xa³tˀa³ cho⁴ta⁴.
MAT 14:23 Cˀia⁴ nca³ je³cˀoa⁴-sˀin² tsa³cˀe¹ne²-le⁴ cho⁴ta⁴ncjin², Jesús qui³mi³ ya⁴ ni³nto³, qui³cˀe¹tsˀoa³ tˀa³xin². Cˀia⁴ nca³ je³coan³xon², to⁴je² tsa³cˀe²jna³ ya⁴-ve⁴.
MAT 14:24 Cˀoa⁴ je² chi³tso³-ve⁴ je³tjen⁴ va³sen³ jin³ nta¹chi³con³-ve⁴. Na³nta¹ si³ ti¹si¹cao⁴, nca⁴ ntjao⁴ cja⁴ˀai¹-sˀin² ti¹fa³ˀa³.
MAT 14:25 Cˀia⁴ nca³ ji³cho²ca³ las tres nca³ ta⁴njion²ya³, Jesús qui³con³-le⁴ tso²ˀva³son² nta¹chi³con³-ve⁴.
MAT 14:26 Cˀoa⁴ je² cho⁴ta⁴-le⁴ nca³ tsa³ve³ nca³ tso²ˀva³son² nta¹chi³con³, jo³ qui³tsa³cjon¹, qui³tso²: To⁴sen¹-le⁴ cho⁴ta⁴. Jo¹ nˀion¹ qui³squi³ˀntia¹, nca³ qui³tsa³cjon¹.
MAT 14:27 To⁴nca³ Jesús nti⁴ton⁴ qui³nchja⁴-le⁴, qui³tso²: Tˀe²jnco³ta³con²³, an³ nia¹³, a³li² jcon³-jion²³.
MAT 14:28 Cˀia⁴ Pedro qui³nchja⁴-le⁴, qui³tso²-le⁴: Señor, tsa² ji³ ni¹³, tˀe²ne²-nai¹³ nca³ cjoi¹con³-le²³ son² na³nta¹-ve⁴.
MAT 14:29 Cˀoa⁴ Jesús qui³tso²: Nčhoai¹³. Cˀoa⁴ Pedro ji³tjo³jen³-ni³ ya⁴ chi³tso³-ve⁴. Tsˀa³mjen³son² na³nta¹ nca³ qui³con³-le⁴ Jesús.
MAT 14:30 Cˀia⁴ nca³ tsa³ve³ je² ntjao⁴ xi³ nˀion¹, qui³tsa³cjon¹. Tsa³cˀe¹tsˀia⁴cao⁴ nca³ qui³sˀen³jin³ na³nta¹, qui³squi³ˀntia¹, qui³tso²: Señor, chˀa⁴sje³ntjai²-nai¹³.
MAT 14:31 Nti⁴ton⁴ Jesús tsa³cjen¹ ntsja³, qui³tsoa³, cˀoa⁴ qui³tso²-le⁴: Ji³ xi³ choa³ ma³cjain¹-li², a¹-ni³ nca³ jao² ca²vˀe²-si¹ni³ ta³coin²³.
MAT 14:32 Cˀia⁴ nca³ je² ja³ˀa³sˀen³ ya⁴ chi³tso³-ve⁴, qui³sˀe³jyo¹ ntjao⁴.
MAT 14:33 Cˀia⁴ je² xi³ tjio¹ ya⁴ chi³tso³, tsa³qui³ncha³xco¹nchˀin³tˀa³-le⁴ tsa³ve³xcon¹, qui³tso²: Xi³ ña³qui³ cjoa⁴qui²xi⁴, ji³ ni¹³ ˀnti¹-le⁴ Ni³na¹.
MAT 14:34 Cˀia⁴ nca³ je³ja³ˀa³to³tˀa³ nta¹chi³con³, ji³cho² ya⁴ na³nqui³ jña³ Genesaret ˀmi².
MAT 14:35 Cˀia⁴ nca³ je² cho⁴ta⁴ xi³ tsˀe⁴ ya⁴ ˀnte³-ve⁴ tsa³ve³xcon³ Jesús, qui³si³ca³sen¹ nca³qui³jnta² ja⁴ˀnte³ ya⁴ čhian³-le⁴, ja³ˀai³ cha³ni²-le⁴ nca³ je² nca³tsˀi³ xi³ tjio¹mˀen³.
MAT 14:36 Cˀoa⁴ tsa³cˀe¹tsˀoa³-le⁴ nca³ to⁴coi³cjoan² si⁴²cao⁴ tjon³ na³jño³-le⁴, cˀoa⁴ nca³tsˀi³ xi³ cˀoa⁴-sˀin² qui³si³cao⁴ coan³nta³-ni¹.
MAT 15:1 Cˀia⁴ tjin¹ cˀa³ cho⁴ta⁴ scribano cao⁴ cho⁴ta⁴ fariseos xi³ tsˀe⁴ Jerusalén, xi³ ji³cho²con³-le⁴ Jesús, qui³tso²-le⁴:
MAT 15:2 A¹-ni³ nca³ si¹qui³tson¹-si¹ni³ cho⁴ta⁴-li⁴ costumbre-le⁴ cho⁴ta⁴jchi¹nca³, nca³ tsi² va³ne¹jon³ ntsja³ cˀia⁴ nca³ cjen² nio⁴.
MAT 15:3 Cˀia⁴ Jesús qui³tso²-le⁴: A¹-ni³ nca³ cˀoa⁴-ti⁴ ti³ma³ni²qui³tson¹-si¹nio³ jon² cjoa⁴te¹xo³ma³-le⁴ Ni³na¹ xi³ to⁴cjoa⁴ tˀa³tsˀe⁴ costumbre-no³.
MAT 15:4 Nca⁴ Ni³na¹ xi³ cˀoa⁴qui³tso²: Jcha⁴xcoin¹³ nˀai³-li⁴ cao⁴ na⁴-li⁴. Je² xi³ nchja⁴ˀaon³-le⁴ nˀai³-le⁴ a³xo⁴ na⁴-le⁴ ntia³ ca²ta³mˀen³.
MAT 15:5 To⁴nca³ jon² xi³ vi³xon¹³: To⁴ˀya³-ni³ xi³ coi⁴tso⁴-le⁴ nˀai³-le⁴ a³xo⁴ na⁴-le⁴: Nca³yi³je³ xi³ ma³chjen¹-li² xi³ tsˀan⁴, an³ je³qui³tsjoa³-le⁴ cjoa⁴tjao² Ni³na¹,
MAT 15:6 nca³ je² cho⁴ta⁴-ve⁴ li²coi³ ma³chjen¹ nca³ scoe⁴xcon¹ nˀai³-le⁴ a³xo⁴ na⁴-le⁴. Cˀoa⁴-sˀin² qui³ni²xo²yao³ cjoa⁴te¹xo³ma³-le⁴ Ni³na¹ xi³ to⁴cjoa⁴ tˀa³tsˀe⁴ costumbre-no³.
MAT 15:7 Xi³ cho⁴ta⁴ jao²ncjain¹ ˀmi²-no³, nta³ qui³nchja⁴ya³ xi³ tˀa³tsaon⁴³ je² Isaías xi³ cˀoi⁴qui³tso²:
MAT 15:8 Je² na⁴xi⁴na³nta¹ cao⁴ en¹-le⁴ ve³xcon¹-na³, to⁴nca³ ni⁴ma⁴-le⁴ xin² tjio¹-na³.
MAT 15:9 To⁴nca³ li²jme³ chji¹-le⁴ nca³ ve³xcon¹-na³, nca⁴ va³co¹ya³ cjoa⁴fa³ˀai³tsjen³ xi³ to⁴xquia⁴ cjoa⁴te¹xo³ma³-le⁴ cho⁴ta⁴.
MAT 15:10 Cˀoa⁴ qui³nchja⁴-le⁴ cho⁴ta⁴ncjin², qui³tso²-le⁴: Ti⁴no¹ˀyao²³, cˀoa⁴ nta³ ca²ta³ma³cho⁴ya³-no³:
MAT 15:11 Li²coi³ je² xi³ fa³ˀa³sˀen³ tsˀoa³ xi³ si¹qui³tson¹ cho⁴ta⁴, to⁴nca³ je² xi³ vi³tjo³-ni³ tsˀoa³, je² xi³ si¹qui³tson¹.
MAT 15:12 Cˀia⁴ ji³cho²con³-le⁴ cho⁴ta⁴-le⁴, qui³tso²-le⁴: A³ ˀya³-ni¹ nca³ je² cho⁴ta⁴ fariseos coan³jti³-le⁴ cˀia⁴ nca³ qui³nčhˀoe¹ je² en¹-vi⁴.
MAT 15:13 To⁴nca³ cˀia⁴ qui³nchja⁴-nca¹ni³ Jesús: Nca³yi³je³ tso³jmi²ntje² xi³ tsi² tsa² coi³ tsa³cˀe¹ntje² Nˀai³-na⁴ xi³ tsˀe⁴ ncˀa³jmi³, cˀoa⁴-sˀin² tjo¹ne²-ni³.
MAT 15:14 Ti⁴ca³tio¹ xi³ cˀoa⁴cjoan³. To⁴xca⁴² cjoan³, cˀoa⁴ va¹ntia⁴²-le⁴ xi³ xca⁴. Cˀoa⁴ tsa² je² xi³ xca⁴ cjoan³ coa⁴²ntia⁴²-le⁴ je² xi³ xca⁴ cjoan³, tsao⁴ya³ nca³ jao² jña³ ti⁴xˀa⁴.
MAT 15:15 Cˀoa⁴ qui³nchja⁴ Pedro: Ti⁴qui²xi⁴ya³-ni³na³jin⁴ je² cjoa⁴xco¹son²-vi⁴.
MAT 15:16 Cˀoa⁴ Jesús qui³tso²: A³ cˀoa⁴²-ti⁴ to⁴jo³ cje³ ma³cho⁴ya³-jin²no³ jon².
MAT 15:17 A³ tsi² ma³cho⁴ya³-no³ nca³ nca³yi³je³ xi³ fa³ˀa³sˀen³ tsˀoa³ fi²sˀen³ tsˀoa⁴, cˀoa⁴ fa³ˀa³-ni³le⁴.
MAT 15:18 To⁴nca³ je² xi³ vi³tjo³-ni³ tsˀoa³, ni⁴ma⁴-le⁴ nčhoa¹jin³-ni³. Je²-vi⁴ xi³ si¹qui³tson¹ cho⁴ta⁴.
MAT 15:19 Nca⁴ ni⁴ma⁴-ve⁴ vi³tjo³-ni³ cjoa⁴fa³ˀai³tsjen³ xi³ tsˀen⁴, xi³ si¹cˀen³ cˀen³, cˀoa⁴ cjoa⁴cha³jnqui³ xi³ sˀin¹ xi³ je³chi³xan² cˀoa⁴ xi³ cje³ vi³xan³-jin², cjoa⁴che¹, xi³ en¹nti³so³ va³sen¹-le⁴ xi¹ncjin¹, cˀoa⁴ xi³ nchja⁴ˀaon³.
MAT 15:20 Coi³ cjoa⁴ je²-vi⁴ xi³ si¹qui³tson¹ cho⁴ta⁴. Je² xi³ cjen² nca³ cje³ va³ne¹jon³ ntsja³, je²-vi⁴ li²coi³ si¹qui³tson¹ cho⁴ta⁴.
MAT 15:21 Cˀoa⁴ ji³tjo³-ni³ ya⁴-ve⁴ Jesús, qui³ ˀnte³ jña³ Tiro ˀmi² cao⁴ ya⁴ jña³ Sidón ˀmi².
MAT 15:22 Coe⁴-ni³ jnco³ chjon⁴² cananita ji³tjo³-ni³ ya⁴ ˀnte³-ve⁴ nˀion¹ qui³nchja⁴-le⁴ Jesús: Señor, ˀnti¹-le⁴ David, jcha⁴ma⁴ta³con²-nai¹³. Je² tso²ti³-na⁴ cjai¹ tse³ cjoa⁴ñˀain³ ti¹fa³ˀa¹ nca³ nai⁴² xi³ nta³jin³ ti¹jna³jin³ ni⁴ma⁴-le⁴.
MAT 15:23 To⁴nca³ Jesús ni⁴jnco³-jin² en¹ tsa³cja¹cao⁴. Cˀia⁴ ji³cho²con³-le⁴ cho⁴ta⁴-le⁴, tsa³cˀe¹tsˀoa³-le⁴: Cˀoa⁴tˀin²-lai⁴ nca³ ca²ta³vi³tjo³xin² nca³ cji³ˀntia¹tjen⁴nqui³-na¹.
MAT 15:24 Cˀoa⁴ je² qui³nchja⁴-nca¹ni³le⁴: Li²coi³ cˀoa⁴-sˀin² qui³ni²ca³sen¹-na³. To⁴tˀa³tsˀe⁴ va³rre² xi³ qui³cha³, xi³ tsˀe⁴ ntˀia³-le⁴ Israel qui³ni²ca³sen¹-ni³na³.
MAT 15:25 Cˀia⁴ je² chjon⁴²-ve⁴ ja³ˀai³, tsa³ca³sen²xco¹nchˀin³tˀa³-le⁴, qui³tso²-le⁴: Señor, ti⁴sen⁴cao⁴-nai¹³.
MAT 15:26 Cˀoa⁴ Jesús qui³tso²-le⁴: Li²coi³ nta³ nca³ chjoe¹ nio⁴xti²la⁴-le⁴ ˀnti¹xti³, cˀoa⁴ nia¹ˀnti¹ ni²cˀa³tsao³-le⁴.
MAT 15:27 Cˀoa⁴ je² qui³tso²: Jaon³, Señor, to⁴nca³ nia¹ˀnti¹ cji³ne³ xcoa⁴ˀnti¹ xi³ tsao³nqui³ ya¹mi²xa⁴-le⁴ xi³ tsˀe⁴ nai³-le⁴.
MAT 15:28 Cˀia⁴ qui³nchja⁴ Jesús: Ji³ chjon⁴², nˀion¹ nta³ ma³cjain¹-li². Cˀoa⁴ ca²ta³ma³-li² jo³-sˀin² nca³ me³-li². Cˀoa⁴ tso²ti³-le⁴ coan³nta³-ni³ ti⁴coi³-ni³ hora.
MAT 15:29 Cˀia⁴ nca³ qui³-ni³ Jesús ya⁴-ve⁴, ja³ˀai³ čhian³-le⁴ nta¹chi³con³ Galilea. Qui³mi³jon³ ni³nto³, ya⁴ tsa³cˀe²jna³.
MAT 15:30 Cˀoa⁴ ncjin² cho⁴ta⁴ ji³cho²con³-le⁴ xi³ cˀoa⁴-sˀin² tjen⁴cao⁴ xi³ chi⁴ˀnque¹, xi³ xca⁴, xi³ yo⁴ma⁴, xi³ tjio¹xco¹ya³ ntsja³, cˀoa⁴ ncjin²-sa³je⁴, cˀoa⁴ ya⁴ qui³si³ca³tio¹ nqui³ntso⁴co⁴ Jesús, cˀoa⁴ qui³si³nta³-ni³.
MAT 15:31 Cˀoa⁴-sˀin² to⁴coan³xcon¹-le⁴ cho⁴ta⁴, nca³ tsa³ve³ nca³ coan³ qui³nchja⁴ je² xi³ yo⁴ma⁴, cˀoa⁴ je² xi³ tjio¹xco¹ya³ ntsja³ coan³nta³-ni³, coan³ tsa³cˀe¹ma³-ni³ je² xi³ chi⁴ˀnque¹, coan³ qui³sco²tsen³-ni³ je² xi³ xca⁴. Tsa³cˀa³sje³je³ya³ Ni³na¹ xi³ tsˀe⁴ cho⁴ta⁴ Israel.
MAT 15:32 Cˀoa⁴ Jesús qui³nchja⁴-le⁴ cho⁴ta⁴-le⁴: Cjai¹nca³ ma³ma⁴que⁴ cho⁴ta⁴ncjin²-vi⁴, nca³ je³coan³ jan²-le⁴ ni⁴čhjin³ nca³ tjio¹ma³tjen⁴nqui³-na³, nca³ tsin²-le⁴ xi³ cji³ne³-jin². A³li²coi³ me³-na³ nca³ sca⁴ni²nchjan², jme¹-ni³ nca³ tsi² ya⁴ coan⁴ˀi³nta³-si¹ni³ ya⁴ ntia⁴².
MAT 15:33 Cˀia⁴ cho⁴ta⁴-le⁴ qui³tso²-le⁴: Jña¹-ni³ sa⁴co²-na³jin⁴ nio⁴xti²la⁴ xi³ ncjin² ma³-ni³ i⁴ ˀnte³tˀa³xin²tˀa³-vi⁴, xi³ coan⁴squi³-ni³ cho⁴ta⁴ncjin²-vi⁴.
MAT 15:34 Cˀia⁴ Jesús qui³tso²-le⁴: Jo¹ tjin¹ nio⁴xti²la⁴ cjio³-no³. Cˀoa⁴ je² qui³tso²: Ña³to³ ma³-ni³, cˀoa⁴ jnco³jao² ma³-ni³ jti⁴ˀnti¹.
MAT 15:35 Cˀoa⁴ tsa³cˀe¹ne²-le⁴ cho⁴ta⁴ nca³ ca²ta³va³tio²ne² na³nqui³.
MAT 15:36 Cˀoa⁴ qui³scoe¹ je² nio⁴xti²la⁴ xi³ ña³to³-ve⁴ cao⁴ jti⁴-ve⁴, cˀoa⁴ qui³tsjoa³ cjoa⁴nta³, qui³si³xcoa⁴, cˀoa⁴ qui³tsjoa³-le⁴ cho⁴ta⁴-le⁴. Je² cho⁴ta⁴-le⁴ qui³si³cˀa³vi¹-le⁴ cho⁴ta⁴ncjin².
MAT 15:37 Cˀoa⁴ tsa³cjen² nca³tsˀi³, ña³qui³ coan³squi³. Tsa³cˀe¹xco¹ xi³ qui³njen²nqui³, ña³to³ ni⁴sin⁴ya¹ ma³-ni³ nio⁴xti²la⁴ čhˀoa¹.
MAT 15:38 Cˀoa⁴ je² xi³ tsa³cjen² ño³ jmi³ ma³-ni³ xi³ xˀin⁴, cˀoa⁴ tˀa³xin² ya¹nchjin¹ cao⁴ ˀnti¹xti³.
MAT 15:39 Cˀia⁴ nca³ tsa³cˀe¹ne²-le⁴ nca³ ca²ta³fi²-ni³ cho⁴ta⁴, ja³ˀa³sˀen³ chi³tso³, ji³nčhoa³ ya⁴ ˀnte³ Magdala.
MAT 16:1 Cˀia⁴ ji³cho²con³-le⁴ cho⁴ta⁴ fariseos cao⁴ cho⁴ta⁴ saduceos, nca³ chˀao³ si⁴²cao⁴, qui³si³je¹-le⁴ nca³ coa⁴co²jnco³-le⁴ choa⁴ ya⁴ ncˀa³jmi³.
MAT 16:2 To⁴nca³ Jesús qui³nchja⁴-nca¹ni³: Cˀia⁴ nca³ je³ma³xon² nca³ ni⁴čhjin³, jon²-vi⁴ vi³xon¹³: Nta³ chon³ nchaon³, nca⁴ ni² chon³ ncˀa².
MAT 16:3 Cˀoa⁴ nca³ ta⁴njion²: Ntˀai⁴ cˀoa⁴ jtsi¹, nca⁴ yo³jvi³jma² cjoan³ xi³ ncha³ ncˀa², cˀoa⁴ ni² chon³ ncˀa². Xi³ cho⁴ta⁴jao²ncjain¹ ˀmi²-no³, ma³-no³ cho¹tˀa³ jo³ ma³ chon³ ncˀa², to⁴nca³ choa⁴-le⁴ ni⁴čhjin³ li²coi³ ma³-no³.
MAT 16:4 Je² cho⁴ta⁴ xi³ ntˀai⁴ tjio¹, xi³ tsˀen⁴-ni¹, xi³ to⁴si¹cha³jnqui³, si¹je¹ choa⁴, to⁴nca³ choa⁴ li²coi³ cˀoai⁴-le⁴, to⁴je² choa⁴-le⁴ Jonás xi³ qui³nchja⁴ya³ tˀa³tsˀe⁴ Ni³na¹. Cˀoa⁴ Jesús qui³si³ca³tio¹ cho⁴ta⁴, qui³-ni³.
MAT 16:5 Cˀoa⁴ ja³ˀai³ cho⁴ta⁴-le⁴ xi³ncoa³tˀa³ nta¹chi³con³, qui³cha³jin³-le⁴ nio⁴xti²la⁴.
MAT 16:6 Jesús qui³tso²-le⁴: Cho¹tsaon³, ti⁴coi²nta⁴-lao⁴³ yao³-no³ je² na⁴ˀyo⁴san³ xi³ tsˀe⁴ cho⁴ta⁴ fariseos cao⁴ cho⁴ta⁴ saduceos.
MAT 16:7 To⁴nca³ je² tsa³cjao¹ya³-ni³, cˀoa⁴ qui³tso²-le⁴ xi¹ncjin¹: Coi³ nca³ cˀoa⁴ ca²tso²-na¹ nca³ tsi² qui³chˀa¹ nio⁴xti²la⁴.
MAT 16:8 Cˀoa⁴ coan³jin³-le⁴ Jesús, qui³tso²-le⁴: Cho⁴ta⁴ xi³ choa³ ma³cjain¹-no³, a¹-ni³ nca³ cˀoa⁴-sˀin² ti³cho³va²ya³-si¹nio³ jin³-no³ nca³ jon² nca³ tsin²-no³ nio⁴xti²la⁴-jin².
MAT 16:9 A³ cje³ ma³cho⁴ya³-jin²no³, a³ tsi² tjin¹jin³-no³ je² xi³ aon² nio⁴xti²la⁴-ve⁴ xi³ tsˀe⁴ cho⁴ta⁴ xi³ aon² jmi³ ma³-ni³, cˀoa⁴ jo³ tjin¹ ni⁴sin⁴ tsa³cˀe²xco¹³.
MAT 16:10 Ni⁴je²-jin² xi³ ña³to³ nio⁴xti²la⁴, xi³ tsˀe⁴ xi³ ño³ jmi³ ma³-ni³, cˀoa⁴ jo³ tjin¹ ni⁴sin⁴ya¹ tsa³cˀe²xco¹³.
MAT 16:11 Jo¹-sˀin²ni³ nca³ tsi² ma³cho⁴ya³-no³ nca³ tsi² to⁴tˀa³tsˀe⁴ nio⁴xti²la⁴ cˀoa⁴ca²xin³-no³ nca³ ti⁴coi²nta⁴-lao⁴³ yao³-no³ je² na⁴ˀyo⁴san³ xi³ tsˀe⁴ cho⁴ta⁴ fariseos cao⁴ cho⁴ta⁴ saduceos.
MAT 16:12 Cˀia⁴ coan³cho⁴ya³-le⁴ nca³ tsi² tsa² cˀoa⁴qui³tso²-le⁴ nca³ si⁴²coi²nta⁴-le⁴ yao³-le⁴ na⁴ˀyo⁴san³ xi³ tsˀe⁴ nio⁴xti²la⁴, to⁴nca³ xi³ to⁴tˀa³tsˀe⁴ cjoa⁴fa³ˀai³tsjen³-le⁴ cho⁴ta⁴ fariseos cao⁴ cho⁴ta⁴ saduceos.
MAT 16:13 Cˀia⁴ nca³ ji³nčhoa³ Jesús ya⁴ ˀnte³ jña³ Cesarea xi³ nchja⁴-ni³ Filipo, qui³sco²na³nqui³-le⁴ cho⁴ta⁴-le⁴: Jo¹ tso² cho⁴ta⁴, ˀya¹-la⁴ xi³ ˀnti¹-le⁴ cho⁴ta⁴.
MAT 16:14 Cˀoa⁴ je² qui³tso²: Tjin¹ cˀa³ xi³ tso² nca³ je² Juan Bautista, cˀoa⁴ tjin¹ cˀa³ xi³ tso² je² Elías, cˀoa⁴ tjin¹ xi³ tso² je² Jeremías, a³xo⁴ je² jnco³ xi³ tsˀe⁴ xi³ nchja⁴ya³ tˀa³tsˀe⁴ Ni³na¹.
MAT 16:15 Cˀoa⁴ Jesús qui³tso²-le⁴: Cˀoa⁴ nca³ jon², jo¹ vi³xon¹³, ˀya¹-nia³ an³.
MAT 16:16 Qui³nchja⁴ Simón Pedro: Ji³ ni¹³ Cristo, xi³ ˀnti¹-le⁴ Ni³na¹ xi³ ti¹jna³con³.
MAT 16:17 Cˀia⁴ qui³nchja⁴ Jesús: Jo¹ to⁴nta³-li² nca³ ji³, Simón, ˀnti¹-le⁴ Jonás, nca³ tsi² tsa² cho⁴ta⁴son³ˀnte³ xi³ tsa³ca³co¹son²tsen³-li², to⁴je² Nˀai³-na⁴ xi³ ti¹jna³ ncˀa³jmi³.
MAT 16:18 To⁴nca³ cˀoa⁴-ti⁴ xin³-le²³, nca³ ji³ ni¹³ Pedro. Cˀoa⁴ son² coi³ la⁴jao⁴-vi⁴ cˀoe³nta³soan²³ je² na⁴xi⁴na³nta¹-na⁴. Cˀoa⁴ je² nca³nˀion¹-le⁴ ˀnte³cjoa⁴ñˀain³, li²coi³ si⁴²qui³njen³-le⁴ na⁴xi⁴na³nta¹-na⁴.
MAT 16:19 Cˀoa⁴ ji³ si³ntsja³-le²³ yo²vi⁴ xi³ tsˀe⁴ xo⁴ntjoa⁴-le⁴ cjoa⁴te¹xo³ma³-le⁴ ncˀa³jmi³, cˀoa⁴ nca³yi³je³ cjoa⁴ xi³ tsi² tsa² coi³ cˀoai⁴ˀnte³-lao⁴³ i⁴ son³ˀnte³-vi⁴, cˀoa⁴-ti⁴ li²coi³ cˀoai⁴ˀnte³-le⁴ ya⁴ ncˀa³jmi³. Nca³yi³je³ cjoa⁴ xi³ cˀoai⁴ˀnte³-lao⁴³ i⁴ son³ˀnte³-vi⁴, cˀoa⁴-ti⁴ cˀoai⁴ˀnte³-le⁴ ya⁴ ncˀa³jmi³.
MAT 16:20 Cˀia⁴ Jesús tsa³cˀe¹ne²-le⁴ cho⁴ta⁴-le⁴ nca³ ni⁴ˀya³-jin² xi³ jo³ coi⁴tso⁴-le⁴ nca³ je² ni¹ xi³ Cristo.
MAT 16:21 Sa³ˀnta³ nca³ ti⁴coi³-ni³ ni⁴čhjin³-ve⁴. Jesús tsa³cˀe¹ tsˀia⁴cao⁴ nca³ qui³si³qui²xi⁴ya³-le⁴ cho⁴ta⁴-le⁴ nca³ coan⁴chjen¹-le⁴ nca³ coai⁴ Jerusalén, nca³ tse³ cjoa⁴ñˀain³ cjoa⁴ˀa² xi³ tˀa³tsˀe⁴ cho⁴ta⁴jchi¹nca³, cao⁴ cho⁴ta⁴ti¹tjon²-le⁴ na⁴ˀmi³, cao⁴ cho⁴ta⁴ scribano, cˀoa⁴ nca³ si⁴cˀen³-ni³ nca³ je², to⁴nca³ si⁴cja³ˀa¹ya³-ni³le⁴ xi³ coan⁴jan²-ni³ ni⁴čhjin³.
MAT 16:22 Cˀoa⁴ Pedro qui³cao⁴ tˀa³xin², tsa³cˀe¹tsˀia⁴ nca³ qui³nchja⁴ti³cao⁴ qui³tso²: Señor, Ni³na¹ ca²ta³vˀe¹chjoa²-le⁴ cjoa⁴-vi⁴ tˀa³tsi⁴. Ni⁴cˀia³-jin² nca³ cˀoa⁴coan⁴tˀain³.
MAT 16:23 Cˀia⁴ qui³si³cˀo¹fa³ya³ Jesús, qui³nchja⁴ti³cao⁴ Pedro: Ti⁴tja¹jton³-nai¹³, ji³ Satanás. Cjai¹ to⁴chˀao³ ni²cao⁴-nai¹³, nca³ tsi² ˀmi³tˀa³-lai⁴ cjoa⁴-le⁴ Ni³na¹, to⁴nca³ ˀmi³tˀa³-lai⁴ cjoa⁴-le⁴ cho⁴ta⁴.
MAT 16:24 Cˀia⁴ Jesús qui³tso²-le⁴ cho⁴ta⁴-le⁴: To⁴ˀya³-ni³ve⁴ xi³ me³-le⁴ nca³ cho⁴ta⁴-na⁴ coan⁴, ca²ta³tsjion¹con³ yao³-le⁴, ca²ta³vˀa³mi³ cro²-le⁴, cˀoa⁴ nta³ ca²ta³fi²tˀa³-na³.
MAT 16:25 To⁴ˀya³-ni³ve⁴ xi³ me³-le⁴ cˀoa⁴sje³ntjai² ni⁴ma⁴-le⁴, to⁴si⁴²cha³ ni⁴ma⁴-le⁴, cˀoa⁴ to⁴ˀya³-ni³ve⁴ xi³ si⁴²cha³ ni⁴ma⁴-le⁴ xi³ to⁴tˀa³tsˀan⁴, coan⁴sjai³-ni³le⁴.
MAT 16:26 Jme¹ xi³ sca⁴son²-le⁴ cho⁴ta⁴, nta³ tsa² coi⁴njen⁴-le⁴ nca³yi³je³ son³ˀnte³, tsa² si⁴²cha³ ni⁴ma⁴-le⁴. A³xo⁴ jme¹ chji¹ xi³ tsjoa¹ cho⁴ta⁴ xi³ tˀa³tsˀe⁴ ni⁴ma⁴-le⁴.
MAT 16:27 Nca⁴ je² ˀnti¹-le⁴ cho⁴ta⁴ sˀa⁴ cjoa⁴ˀai¹cao⁴ cjoa⁴je³ya³-le⁴ Nˀai³-le⁴ cao⁴ a²ncje⁴-le⁴, cˀoa⁴ cˀia⁴ cˀoe⁴²chji¹ nca³ jnco¹jnco¹ jo³-sˀin² si¹xa¹.
MAT 16:28 Xi³ cjoa⁴qui²xi⁴ xi³ xin³-no³: tjin¹ cˀa³ xi³ i⁴ tjio¹-vi⁴ xi³ tsi²coi³ coi⁴ya² sa³ˀnta³ nca³ scoe⁴ ˀnti¹-le⁴ cho⁴ta⁴ xi³ cjoa⁴ˀai¹cao⁴ cjoa⁴te¹xo³ma³-le⁴.
MAT 17:1 Xi³ coan³ jaon³ ni⁴čhjin³, Jesús qui³cao⁴ Pedro cao⁴ Jacobo cao⁴ Juan xi³ ntsˀe⁴, cˀoa⁴ qui³mi³jon³ tˀa³xin² jnco³ ni³nto³ xi³ nˀion¹ ncˀa³.
MAT 17:2 Tsˀa³ntjai²ya³ nqui³xcon⁴ nca³ je². Coan³fa³te³ ncjain¹ jo³-ni³ tsa² tsˀoi¹, cˀoa⁴ na³jño³-le⁴ coan³čhoa³ jo³-ni³ tsa² nchˀan¹.
MAT 17:3 Coe⁴-ni³ je² cho⁴ta⁴-ve⁴ tsa³ve³ Moisés cao⁴ Elías, xi³ tjio¹fa¹cao⁴ Jesús.
MAT 17:4 Cˀoa⁴ qui³nchja⁴ Pedro, qui³tso²-le⁴ Jesús: Señor, nta³-ni¹ nca³ i⁴ ti³yoi³⁴-jin⁴. Tsa² me³-li² i⁴ si⁴nta³² jan² xco¹jnta², jnco³ xi³ tsi⁴, jnco³ xi³ tsˀe⁴ Moisés, cˀoa⁴ jnco³ xi³ tsˀe⁴ Elías.
MAT 17:5 Tjen⁴ nca³ ti¹nchja⁴ nca³ je², coe⁴-ni³ jnco³ yo³jvi³fa³te³ ja³ˀa³ne²-le⁴. Cˀoa⁴ coe⁴-ni³ jnco³ jta⁴ qui³no²ˀya²-le⁴ ya⁴jin³ yo³jvi³-ve⁴, xi³ qui³tso²: Je²-vi⁴ ˀnti¹-na⁴ xi³ tsjoa³que⁴. Jo³ nta³ sˀe³coan³ xi³ tˀa³tsˀe⁴. Ti⁴no¹ˀya²-lao⁴³ nca³ je².
MAT 17:6 Cˀia⁴ nca³ qui³nčhˀoe¹ cho⁴ta⁴-le⁴, qui³tsao³tso³cjan¹, cˀoa⁴ nˀion¹ qui³tsa³cjon¹.
MAT 17:7 Cˀoa⁴ Jesús ji³cho², qui³si³cao⁴, cˀoa⁴qui³tso²: Ti²so⁴tjaon⁴³, a³li² vi³jcon³-jion²³.
MAT 17:8 Cˀoa⁴ cˀia⁴ nca³ qui³sco²tsen³ncˀa², ni⁴ˀya³-jin² xi³ tsa³ve³, to⁴jnco³ Jesús.
MAT 17:9 Ti⁴ˀa³-ni³ nca³ tjio¹nčhoa¹jen³tˀa³, tsa³cˀe¹ne²-le⁴ Jesús, qui³tso²: Ni⁴ˀya³-jin² xi³ jo³ ˀmi²-lao⁴³ je² xi³ ca²ˀyao³, sa³ˀnta³ nca³ ˀnti¹-le⁴ cho⁴ta⁴ cjoa⁴ˀa¹ya³jin³-ni³le⁴ cˀen³.
MAT 17:10 Cˀia⁴ cho⁴ta⁴-le⁴ qui³sco²na³nqui³-le⁴: A¹-ni³ nca³ cˀoa⁴tso²-si¹ni³ cho⁴ta⁴ scribano nca³ tjin¹-ni³ nca³ ti¹tjon² cjoa⁴ˀai¹ Elías.
MAT 17:11 Qui³nchja⁴ Jesús: Xi³ ña³qui³ cjoa⁴qui²xi⁴, ti¹tjon² cjoa⁴ˀai¹ Elías, cˀoe⁴²nta³ya³ nqui²jnco³cˀa² nca³yi³je³ cjoa⁴ jo³ coan³ nca³sˀa⁴.
MAT 17:12 To⁴nca³ an³ xin³-no³ nca³ je³ja³ˀai³ Elías, cˀoa⁴ cho⁴ta⁴ li²coi³ tsa³ve³xcon³. Cˀoa⁴ cho⁴ta⁴ qui³si³cao⁴ jo³-sˀin² coan³me³con³. Cˀoa⁴-ti⁴sˀin² je² ˀnti¹-le⁴ cho⁴ta⁴ cjoa⁴ˀa² cjoa⁴ñˀain³ xi³ tˀa³tsˀe⁴.
MAT 17:13 Cˀia⁴ cho⁴ta⁴-le⁴ coan³cho⁴ya³-le⁴ nca³ qui³nchja⁴ xi³ tˀa³tsˀe⁴ Juan Bautista.
MAT 17:14 Cˀia⁴ nca³ je³ji³cho² jña³ nca³ tjio¹ cho⁴ta⁴ncjin², ja³ˀai³con³jnco³-le⁴ xˀin⁴, tsa³ca³sen²xco¹nchˀin³tˀa³-le⁴.
MAT 17:15 Cˀoa⁴qui³tso²: Señor, jcha⁴ma⁴ta³coin²³ tˀa³tsˀe⁴ ˀnti¹-na⁴, nca³ chˀin³xin¹ tjin¹-le⁴, cˀoa⁴ li² cˀoa⁴cji³ cjoa⁴ñˀain³ ti¹fa³ˀa¹, nca³ coan³ ncjin² cˀa³ ca³jin³ lˀi¹, cˀoa⁴ ncjin² cˀa³ jin³ na³nta¹.
MAT 17:16 Cˀoa⁴ je³ja²ˀai⁴ ca³co³-le⁴ cho⁴ta⁴-li⁴, li²coi³ coan³-le⁴ qui³si³nta³.
MAT 17:17 Qui³nchja⁴ Jesús: Cho⁴ta⁴ xi³ tsi² ma³cjain¹-no³ tˀa³tsˀe⁴ Ni³na¹, xi³ to⁴xin² ntia⁴² ma³nquin¹cao⁴³ yao³-no³. Cˀia¹ sa³ˀnta³ tjin¹ne²-na³ nca³ coa²te⁴jna³cao⁴-no³ nca³ jon². Cˀia¹ sa³ˀnta³ tjin¹ne²-na³ nca³ si³cjain¹-no³ nca³ jon². Nčhoa¹cao⁴-nao¹³ i⁴-vi⁴.
MAT 17:18 Cˀoa⁴ Jesús qui³nchja⁴ti³cao⁴ nai⁴² xi³ nta³jin³ xi³ ti¹jna³jin³-le⁴ ti³-ve⁴, cˀoa⁴ ji³tjo³jin³-ni³le⁴ nai⁴² xi³ nta³jin³. Cˀoa⁴ ti³-ve⁴ coan³nta³-ni³ sa³ˀnta³ ti⁴coi³-ni³ hora.
MAT 17:19 Cˀia⁴ ji³cho²con³ tˀa³xin²-le⁴ Jesús cho⁴ta⁴-le⁴, qui³tso²: A¹-ni³ nca³ jin⁴-jin⁴ li²coi³ coan³-si¹ni³na³jin⁴ nca³ qui³chˀa²sje³xin²-lai⁴jin⁴ nai⁴²-ve⁴ xi³ nta³jin³.
MAT 17:20 Cˀoa⁴ Jesús qui³tso²-le⁴: Coi³ nca³ to⁴choa³ ma³cjain¹-no³. Xi³ cjoa⁴qui²xi⁴ xi³ xin³-no³, tsa² nta³ ma³cjain¹-no³, nta³ tsa² to⁴choa³ tjin¹ jo³-ni³ tsa² jnco³ na⁴xin⁴-le⁴ mostaza xi³ ˀnti¹ na⁴cjoan³, cˀoa⁴cˀoin¹-lao⁴³ je² ni³nto³-vi⁴: Ti⁴tja¹-ni³ i⁴-vi⁴ ˀnta³ xi³ncoa³ jan¹, cˀoa⁴ cjoa⁴ˀa³. Cˀoa⁴ ni⁴jme³-jin² xi³ tsi² coan⁴-no³.
MAT 17:21 Ni⁴ˀi⁴tse¹-jin² ma³vi³tjo³ nai⁴² xo⁴cjoan³-vi⁴, tsa² tsi² cˀoe¹tsˀoa³², cˀoa⁴ tsa² tsi² coi⁴yo³nchjan³².
MAT 17:22 Cˀia⁴ nca³ tjio¹ma³ña³ ya⁴ Galilea, Jesús qui³tso²-le⁴: Je² ˀnti¹-le⁴ cho⁴ta⁴ cˀoa⁴-sˀin² cˀoai⁴tˀa³-le⁴ ntsja³ cho⁴ta⁴.
MAT 17:23 Cˀoa⁴ cho⁴ta⁴ si⁴²cˀen³, cˀoa⁴ xi³ coan⁴jan²-ni³ ni⁴čhjin³ si⁴cja³ˀa¹ya³-ni³le⁴. Cˀoa⁴ cho⁴ta⁴-le⁴ nˀion¹ coan³fao¹-le⁴.
MAT 17:24 Cˀia⁴ nca³ ji³cho² Capernaum, je² cho⁴ta⁴ xi³ vˀe¹xco¹ taon⁴ xi³ tsˀe⁴ yo⁴nco⁴, cˀoa⁴qui³tso²: Je² Maestro-no³, a³ tsi² vˀe¹chji¹ taon⁴ xi³ tsˀe⁴ yo⁴nco⁴.
MAT 17:25 Cˀoa⁴ Pedro qui³tso²: Jaon³. Cˀia⁴ nca³ ja³ˀa³sˀen³ ya⁴ ntˀia³, Jesús qui³nchja⁴ ti¹tjon²-le⁴: Jo¹ si³, Simón. Je² xi³ cho⁴ta⁴ti¹tjon²-le⁴ i⁴ son³ˀnte³-vi⁴, ˀya¹-ni³ xi³ ma³chjen¹ nca³ vˀe¹chji¹-le⁴ taon⁴va³sen³ cˀoa⁴ taon⁴sa¹. A³ je² xi³ xti³-le⁴ na⁴xi⁴na³nta¹-le⁴, a³xo⁴ xi³ xin²ˀnte³-le⁴.
MAT 17:26 Pedro qui³tso²-le⁴: Je² xi³ xin²ˀnte³-le⁴. Jesús qui³tso²-le⁴: Cˀia⁴ je² xi³ xti³-le⁴ na⁴xi⁴na³nta¹-le⁴ tjio¹ntai¹ xi³ tˀa³tsˀe⁴ taon⁴-ve⁴.
MAT 17:27 To⁴nca³ jme¹-ni³ nca³ tsi² tsa² chˀao³ si⁴cao⁴-si¹nia³², tˀin³ ya⁴ nta¹chi³con³, ti⁴cˀa³tjen⁴jin³ qui⁴cha⁴ˀva⁴, cˀoa⁴ jti⁴ xi³ cjoa⁴ˀai¹ti¹tjon² chjoai¹³. Cˀia⁴ nca³ ti⁴xˀa⁴ tsˀoa³ coan⁴sjai³-li² taon⁴. Chjoai¹³, cˀoa⁴ tˀai²-lai⁴ xi³ tˀa³tsˀan⁴ cao⁴ xi³ tˀa³tsi⁴.
MAT 18:1 Coi³ hora-ve⁴ cho⁴ta⁴-le⁴ ji³cho²con³-le⁴ Jesús, qui³tso²: ˀya¹-ni³ xi³ nqui²sa⁴ ti¹tjon² ya⁴ cjoa⁴te¹xo³ma³-le⁴ ncˀa³jmi³.
MAT 18:2 Cˀoa⁴ Jesús qui³nchja⁴-le⁴ jnco³ ˀnti¹ti³, qui³si³ca³sen¹jna³ ˀncho²va³sen³-le⁴.
MAT 18:3 Qui³tso²: Xi³ cjoa⁴qui²xi⁴ xi³ xin³-no³, tsa² tsi² cˀoa⁴ntjai²yao³ nca³ coaon⁴³ jo³-ni³ xti³, li²coi³ coan⁴ coi⁴tja¹sˀaon³ ya⁴ cjoa⁴te¹xo³ma³-le⁴ ncˀa³jmi³.
MAT 18:4 Cˀoa⁴-sˀin² nca³ to⁴ˀya³-ni³ xi³ na³nqui³ vˀa³sje³ yao³-le⁴ jo³-ni³ je² ˀnti¹ti³-ve⁴, je²-vi⁴ xi³ nqui²sa⁴ ti¹tjon² ya⁴ cjoa⁴te¹xo³ma³-le⁴ ncˀa³jmi³.
MAT 18:5 Cˀoa⁴ to⁴ˀya³-ni³ve⁴ xi³ scoe¹tjao² xi³ tˀa³tsˀan⁴ jnco³ ˀnti¹, an³ xi³ cjoe¹tjao²-na³.
MAT 18:6 Cˀoa⁴ to⁴ˀya³-ni³ve⁴ xi³ si⁴²ca³jnqui³ je¹ jnco³ xi³ je² ˀnti¹xti³-vi⁴ xi³ ma³cjain¹-le⁴ tˀa³tsˀan⁴, nqui²sa⁴ nta³-le⁴ tsa² jnco³ la⁴jao⁴ xi³ ai¹ xi³ tsˀe⁴ molino sˀe⁴tjen⁴vˀa³nqui³ ya¹sin³, cˀoa⁴ nca³ ya⁴ cha⁴ni²čhjoa³jin³ nta¹chi³con³ jña³ nˀion¹ na⁴nca⁴.
MAT 18:7 Ma⁴xo¹ni³ cho⁴ta⁴son³ˀnte³, nca⁴ tjin¹ xi³ si¹ca³jnqui³ je¹. Ma³chjen¹ nca³ cjoa⁴ˀai¹ xi³ si⁴²ca³jnqui³ je¹ xi¹ncjin¹. To⁴nca³ ma⁴xo¹ni³ je² cho⁴ta⁴ xi³ si¹ca³jnqui³ je¹ xi³jnco³.
MAT 18:8 To⁴coi³, tsa² ntsai⁴ a³xo⁴ tsa² ntso⁴coi³ si¹qui³tson¹-li², ti⁴cha¹tˀai³, cˀoa⁴ ti⁴cˀa³tjain⁴. Nqui²sa⁴ nta³ tsa² chi⁴ˀnque¹tˀai³ a³xo⁴ tsa² co³to³ ntsja³ ti³soi³ nca³ coi⁴tja¹sˀain³ cjoa⁴vi³jna³chon³ nca³ntsjai² cao⁴-ni³ tsa² nca³ jao² ma³ ntso⁴coi³ a³xo⁴ nca³ jao² ntsai⁴, cˀoa⁴ nca³ cˀoa⁴-sˀin² cha⁴ni²jin³-li² lˀi¹ xi³ nca³ntsjai².
MAT 18:9 Cˀoa⁴ tsa² je² xcoin³ si¹qui³tson¹-li², chˀa⁴sjai³, cˀoa⁴ ti⁴cˀa³tjain⁴. Nqui²sa⁴ nta³ tsa² cˀoa⁴-sˀin² coi⁴tja¹sˀain³ cjoa⁴vi³jna³chon³ nca³ntsjai² cao⁴ to⁴jnco³ xcoin³ cao⁴-ni³ tsa² nca³ jao² ma³ xcoin³, cˀoa⁴ nca³ cˀoa⁴-sˀin² cha⁴ni²jin³-li² ya⁴ ˀnte³ jña³ nca³ ti¹ti² lˀi¹.
MAT 18:10 Cho¹tsaon³ nca³ li²coi³ chˀa²sje³nquio³ jnco³ ˀnti¹xti³-vi⁴. Cˀoa⁴xin³-no³ nca³ je² a²ncje⁴-le⁴ ˀnti¹xti³-vi⁴, ya⁴ ncˀa³jmi³ ve³ntsjai² ncjain¹ Nˀai³-na⁴ xi³ ti¹jna³ ncˀa³jmi³.
MAT 18:11 Je² ˀnti¹-le⁴ cho⁴ta⁴ ja³ˀai³ nca³ cˀoa⁴sje³ntjai² je² xi³ qui³cha³.
MAT 18:12 Jo¹ vi³xon¹³. Tsa² jnco³ cho⁴ta⁴ tjin¹-le⁴ jnco³ ciento va³rre², cˀoa⁴ tsa² qui³cha³ jnco³ va³rre², a³ tsi² tsa² si⁴²ca³tio¹ je² xi³ ño³ can³ cao⁴-ni³ čhja³ˀaon²ño³, nca³ coai⁴ ya⁴jin³jña¹ nca³ coai⁴ ca¹sjai³ je² xi³ ca²cha³.
MAT 18:13 Tsa² coan⁴sjai³-le⁴, xi³ cjoa⁴qui²xi⁴ xi³ xin³-no³, nqui²-sa⁴ ma³tsjoa³-le⁴ xi³ tˀa³tsˀe⁴ xi³ jnco³ xi³ qui³cha³ cao⁴-ni³ tsa² xi³ tˀa³tsˀe⁴ je² xi³ ño³ can³ cao⁴-ni³ čhja³ˀaon²ño³ xi³ tsi² tsa² qui³cha³.
MAT 18:14 Cˀoa⁴²-sˀin² li²coi³ me³-le⁴ Nˀai³-no³ xi³ ti¹jna³ ya⁴ ncˀa³jmi³ nca³ cha⁴ jnco³ xi³ je² ˀnti¹xti³-vi⁴.
MAT 18:15 Cˀoa⁴ tsa² ntsˀai³ coa⁴jnqui³ je¹ xi³ tˀa³tsi⁴, tˀin³chon¹-lai⁴, cˀoa⁴ ti⁴qui²xi⁴ya³-lai⁴ nca³ to⁴ji³ nca³ to⁴je² to⁴jnco³. Tsa² cjoi⁴nčhˀoe¹-li², je³qui³ni²qui³njain³ ntsˀai³.
MAT 18:16 To⁴nca³ tsa² tsi² cjoi⁴nčhˀoe¹-li², ca²tji³cao⁴-li² tsa² jnco³ tsa² jao², jme¹-ni³ nca³ si⁴²qui²xi⁴ya³nta³-ni³ nca³yi³je³ en¹-le⁴, tsa² jao², cˀoa⁴ tsa² jan² testigo.
MAT 18:17 Tsa² tsi² cjoi⁴nčhˀoe¹-le⁴ je² xi³ coai⁴cao⁴-li², cˀoa⁴tˀin²-lai⁴ nca³tsˀi³ xi³ ya⁴ yo⁴nco⁴, cˀoa⁴ tsa² tsi² cjoi⁴nčhˀoe¹-le⁴ je² nca³tsˀi³-ve⁴, to⁴cˀoa⁴-sˀin² jcha⁴ta³coin²³ jo³-ni³ jnco³ cho⁴ta⁴ xi³ xin² ˀnte³ a³xo⁴ cho⁴ta⁴ xi³ vˀe¹ña³ taon⁴va³sen³.
MAT 18:18 Xi³ cjoa⁴qui²xi⁴ xi³ xin³-no³, nca³yi³je³ cjoa⁴ xi³ tsi² tsa² coi³ cˀoai⁴ˀnte³-lao⁴³ i⁴ son³ˀnte³-vi⁴, cˀoa⁴-ti⁴ li²coi³ cˀoai⁴ˀnte³-le⁴ ya⁴ ncˀa³jmi³. Nca³yi³je³ cjoa⁴ xi³ cˀoai⁴ˀnte³-lao⁴³ i⁴ son³ˀnte³-vi⁴, cˀoa⁴-ti⁴ cˀoai⁴ˀnte³-le⁴ ya⁴ ncˀa³-jmi³.
MAT 18:19 Nqui²jnco³ cˀa² cˀoa⁴xin³-no³, tsa² jao² xi³ nca³ jon²-vi⁴ xi³ i⁴ son³ˀnte³-vi⁴ cˀoa⁴-sˀin² nta³ cˀoe¹jnco³-ta³con²³ tˀa³tsˀe⁴ to⁴jme³ cjoa⁴-ni³ xi³ si⁴jao¹³, cˀoa⁴-sˀin² sˀe⁴-no³ xi³ to⁴tˀa³tsˀe⁴ Nˀai³-na⁴ xi³ ti¹jna³ ya⁴ ncˀa³jmi³.
MAT 18:20 Ya⁴ jña³ nca³ to⁴jnco³ tjio¹ jao² a³xo⁴ jan² xi³ tsˀan⁴ cho⁴ta⁴, ya⁴² ti²jna⁴jin³ va³sen³-le⁴ nca³ je².
MAT 18:21 Cˀia⁴ Pedro ji³cho²con³-le⁴ Jesús, qui³tso²: Señor, jo¹ tjin¹ cˀa³ si³cha³tˀa³-le⁴ ntsˀe³ xi³ coa³jnqui³ je¹ xi³ tˀa³tsˀan⁴. A³ sa³ˀnta³ ña³to³ cˀa³.
MAT 18:22 Jesús tso²-le⁴: A³li²coi³ cˀoa⁴xin³-le²³ tsa² sa³ˀnta³ ña³to³ cˀa³, to⁴nca³ to⁴sa³ sa³ˀnta³ ña³to³ cˀa³ jan²can³ cao⁴ te³.
MAT 18:23 To⁴coi³ je² cjoa⁴te¹xo³ma³-le⁴ ncˀa³jmi³ ma³nco¹son² jnco³ cho⁴ta⁴ti¹tjon² xi³ coan³me³-le⁴ nca³ tsa³cˀe¹xqui⁴cao⁴ cho⁴ˀnta³-le⁴.
MAT 18:24 Cˀia⁴ nca³ tsa³cˀe¹tsˀia⁴cao⁴ nca³ tsa³cˀe¹xqui⁴, ja³ˀai³ cha³ni²tˀa³-le⁴ jnco³ xi³ qui³tjen⁴-le⁴ te³ jmi³ xi³ tsˀe⁴ cho⁴ta⁴ti¹tjon²-ve⁴.
MAT 18:25 Je²-vi⁴ li²coi³ coan³ tsa³cˀe¹chji¹-le⁴. Nai³-le⁴ tsa³cˀe¹ne² nca³ sa⁴te¹na³ cao⁴ chjon⁴²-le⁴, cao⁴ ˀnti¹xti³-le⁴, cao⁴ nca³yi³je³ xi³ tjin¹-le⁴, cˀoa⁴-sˀin² coan⁴chji¹-ni³le⁴ nai³-le⁴.
MAT 18:26 Cˀia⁴ je² cho⁴ˀnta³-ve⁴ tsa³ca³sen²xco¹nchˀin³tˀa³-le⁴ nai³-le⁴ qui³tso²-le⁴: Señor, ca²ta³sˀe³-li² cjoa⁴je³ta³con² xi³ tˀa³tsˀan⁴. An³ cˀoe³chji¹³-le²³ nca³yi³je³.
MAT 18:27 Je² nai³-le⁴ coan³ma⁴que³ cho⁴ˀnta³-ve⁴, qui³si³cˀe¹jna³ntai¹, cˀoa⁴ qui³si³cha³tˀa³-le⁴ nca³yi³je³ xi³ qui³tjen⁴-le⁴.
MAT 18:28 Cˀia⁴ nca³ ji³tjo³ je² cho⁴ˀnta³-ve⁴, qui³sa³te³cjao³ jnco³ xi³ cho⁴ˀnta³xi¹ncjin¹ xi³ qui³tjen⁴-le⁴ jnco³ ciento vi²xo⁴ xi³ tsˀe⁴. Qui³tsoa³ nca³ je², jo³ qui³si³xi²jnto³, qui³tso²: Tˀe²chji¹-nai¹³ je² xi³ qui³tjen⁴-li².
MAT 18:29 Cˀia⁴ je² cho⁴ˀnta³xi¹ncjin¹ qui³sca³nqui³ ntso⁴co⁴, tsa³cˀe¹tsˀoa³-le⁴: Ca²ta³sˀe³-li² cjoa⁴je³ta³con² xi³ tˀa³tsˀan⁴. An³ cˀoe³chji¹-le²³ nca³yi³je³.
MAT 18:30 To⁴nca³ je² coan³cai³-le⁴. To⁴nca³ qui³ qui³sca³ni¹ nto⁴ya¹ sa³ˀnta³ nca³ cˀoe⁴²chji¹-le⁴ je² xi³ qui³tjen⁴-le⁴.
MAT 18:31 Cˀia⁴ nca³ tsa³ve³ xi³cˀa³ cho⁴ˀnta³xi¹ncjin¹ je² cjoa⁴ xi³ coan³, nˀion¹ coan³va³-le⁴. Ja³ˀai³ tsa³cˀe¹-le⁴ na⁴jmi¹ nai³-le⁴ nca³yi³je³ je² cjoa⁴ xi³ coan³.
MAT 18:32 Cˀia⁴ nai³-le⁴ qui³nchja⁴-le⁴ je² cho⁴ˀnta³-ve⁴, qui³tso²-le⁴: Ji³ cho⁴ˀnta³ xi³ tsˀain⁴. Nca³yi³je³ xi³ qui³tjen⁴-li², an³ qui³si³cha³tˀa³-le²³ nca³ tsa³cˀe²tsˀoa³-nai¹³.
MAT 18:33 A³ tsi² cˀoa⁴-ti⁴ ma³chjen¹ nca³ coan³ma⁴chai³ cho⁴ˀnta³xi²nqui⁴, jo³-sˀin² nca³ an³ coan³ma⁴que³-le²³.
MAT 18:34 Cˀia⁴ nai³-le⁴ coan³jti³-le⁴, qui³tsjoa³tˀa³-le⁴ cho⁴ta⁴ xi³ nˀion¹ tsjoa¹ cjoa⁴ñˀain³, sa³ˀnta³ nca³ tsa³cˀe¹chji¹ nca³yi³je³ xi³ qui³tjen⁴-le⁴.
MAT 18:35 Cˀoa⁴-ti⁴ si⁴²cao⁴-no³ Nˀai³-na⁴ xi³ ti¹jna³ ncˀa³jmi³, tsa² tsi² si⁴cha³tˀa³-lao⁴³ cao⁴ ni⁴ma⁴-no³ nca³ jnco¹jnco¹ ntsˀao³.
MAT 19:1 Cˀoa⁴ coan³ cˀia⁴ nca³ je³qui³nchja⁴ Jesús je² en¹-vi⁴, ji³tjo³-ni³ Galilea, ja³ˀai³ na³nqui³ Judea xi³ ti¹jna³ xi³ncoa³nta¹-ni³ nta¹je⁴ Jordán.
MAT 19:2 Nˀion¹ ncjin² cho⁴ta⁴ qui³tjen⁴nqui³-le⁴, cˀoa⁴ Jesús qui³si³nta³ cho⁴ta⁴ ya⁴-ve⁴.
MAT 19:3 Cˀia⁴ ji³cho²con³-le⁴ Jesús cho⁴ta⁴ fariseos, chˀao³-sˀin² qui³si³cao⁴, qui³tso²-le⁴: A³ tjo³ˀnte³-le⁴ xi³ xˀin⁴ nca³ tsjion¹ chjon⁴²-le⁴ xi³ tˀa³tsˀe⁴ to⁴jme³ cjoa⁴-ni³.
MAT 19:4 Cˀoa⁴ Jesús qui³tso²-le⁴: A³ cje³ vˀe²xquia⁴jion²³ nca³ je² xi³ qui³si³nta³-le⁴ sa³ˀnta³ nca³ ti¹tjon², xi³ xˀin⁴ cao⁴ xi³ chjon⁴² qui³si³nta³-le⁴.
MAT 19:5 Cˀoa⁴ Ni³na¹ qui³tso²: To⁴coi³ cjoa⁴ je² xˀin⁴ si⁴²ca³tio¹ nˀai³-le⁴ cao⁴ na⁴-le⁴, cˀoa⁴ to⁴jnco³ cˀoe¹jna³cao⁴ chjon⁴²-le⁴, cˀoa⁴ to⁴coan⁴jnco³-ni³ yao³-le⁴.
MAT 19:6 Cˀoa⁴-sˀin² nca³ tsi² ti⁴jao² ma³nqui²-sa³ni³, to⁴jnco³ yao³ ma³-ni³. To⁴coi³ je² xi³ Ni³na¹ tsa³cˀe¹cjao², a³li² vˀa³sje³xin²-jin² cho⁴ta⁴.
MAT 19:7 Cho⁴ta⁴ fariseo qui³tso²-le⁴ Jesús: A¹-ni³ tso²cˀoa⁴ nca³ Moisés tsa³cˀe¹ne² nca³ tsjoa¹ xon⁴ xi³ tsjion¹-ni³ xi¹ncjin¹ cho⁴ta⁴, cˀoa⁴ cˀia⁴ ntia³ tsjion¹.
MAT 19:8 Jesús qui³tso²-le⁴: To⁴coi³ nca³ xi¹jin³ ni⁴ma⁴-no³, Moisés qui³tsjoa³ˀnte² nca³ coi⁴njion¹³ ya¹nchjin¹-no³, to⁴nca³ nca³sˀa⁴ sa³ˀnta³ nca³ ti¹tjon² li²coi³ cˀoa⁴coan³.
MAT 19:9 To⁴nca³ an³ xin³-no³, to⁴ˀya³-ni³ xi³ tsjion¹ chjon⁴²-le⁴, tsa² tsi² tsa² xi³ to⁴tˀa³tsˀe⁴ nca³ chjon⁴²-le⁴ qui³si³cha³jnqui³tˀa³-le⁴, cˀoa⁴ tsa² cja⁴ˀai¹ chjon⁴² coi⁴xan³cao⁴, je² xˀin⁴-ve⁴ si¹cha³jnqui³tˀa³-le⁴ chjon⁴²-le⁴. Cˀoa⁴ je² xˀin⁴ xi³ coi⁴xan³cao⁴ chjon⁴² xi³ je³qui³njion³, si¹cha³jnqui³tˀa³-le⁴.
MAT 19:10 Cho⁴ta⁴-le⁴ qui³tso²-le⁴: Tsa² cˀoa⁴-sˀin² tjin¹ cjoa⁴-le⁴ xˀin⁴ cao⁴ chjon⁴²-le⁴, li²coi³ nta³-ni³ nca³ coi⁴xan³².
MAT 19:11 Cˀia⁴ Jesús qui³tso²-le⁴: Li²coi³ nca³tsˀi³ xi³ coan⁴-le⁴ scoe¹ cjoa⁴fa³ˀai³tsjen³ je²-vi⁴, to⁴je²-ni¹ xi³ cˀoa⁴-sˀin² qui³tsˀai²-le⁴.
MAT 19:12 Tjin¹ cˀa³ xi³ ˀnti⁴ xi³ xa¹ cˀoa⁴-sˀin² qui³tsin³-ni³. Cˀoa⁴ tjin¹ xi³ ˀnti⁴ xi³ cˀoa⁴-sˀin² coan³ ˀnti⁴ xi³ to⁴tˀa³tsˀe⁴ cho⁴ta⁴. Cˀoa⁴ tjin¹ xi³ ˀnti⁴ xi³ ti⁴je² cˀoa⁴sˀin¹-ni³, jme¹-ni³ nca³ si⁴²xa¹-si¹ni³le⁴ cjoa⁴te¹xo³ma³-le⁴ ncˀa³jmi³. Je² xi³ cˀoa⁴-sˀin² jcho¹cjoa⁴-le⁴ xi³ tˀa³tsˀe⁴ je²-vi⁴, cˀoa⁴ ca²ta³sˀin¹.
MAT 19:13 Cˀia⁴ qui³cha³ni²tˀa³-le⁴ ˀnti¹xti³, jme¹-ni³ nca³ coa⁴son²-si¹ni³le⁴ ntsja³, cˀoa⁴ cˀoe⁴²tsˀoa³. Je² cho⁴ta⁴-le⁴ Jesús qui³nchja⁴ti³cao⁴ xi³ ja³ˀai³cao⁴.
MAT 19:14 To⁴nca³ Jesús qui³tso²: Tˀai²ˀnte³-lao⁴³, ca²tji³nčhoa¹con³-na³ ˀnti¹xti³-ve⁴, a³li² vˀe²chjoa¹-jin²lao⁴³, nca⁴ cˀoa⁴-sˀin² cjoan³ je² xi³ tsˀe⁴ cjoa⁴te¹xo³ma³-le⁴ ncˀa³jmi³.
MAT 19:15 Jesús tsa³ca¹son²-le⁴ ntsja³, cˀia⁴ qui³-ni³ ya⁴-ve⁴.
MAT 19:16 Coe⁴-ni³ jnco³ cho⁴ta⁴ ji³cho²con³-le⁴, qui³tso²: Maestro, jme¹ cjoa⁴nta³ xi³ sˀian³ nca³ sˀe⁴-si¹ni³na³ cjoa⁴vi³jna³chon³ nca³ntsjai².
MAT 19:17 Cˀoa⁴ Jesús qui³tso²-le⁴: A¹-ni³ nca³ cho¹na³nqui³-si¹ni³nai¹³ tˀa³tsˀe⁴ xi³ nta³. Ni⁴ˀya³-jin² xi³ nta³, to⁴jnco³ xi³ je² Ni³na¹. Tsa² me³-li² nca³ sˀe⁴-li² cjoa⁴vi³jna³chon³, ti⁴qui³tjo³soin²³ cjoa⁴te¹xo³ma³.
MAT 19:18 Cho⁴ta⁴-ve⁴ qui³tso²-le⁴: Jna¹-le⁴, Jesús qui³tso²: A³li² ni²cˀen³-jin². A³li² ni²cha³jnqui³-jin². A³li² ni²che¹-jin². A³li² va³sen² nti³so³-jin²lai⁴ xi³cˀa³.
MAT 19:19 Jcha⁴xcoin¹³ nˀai³-li⁴ na⁴-li⁴. Ca²ta³ma³tsjoa³chai³ xi³cˀa³ jo³-ni³ tsa² ti⁴ji³-ni³.
MAT 19:20 Je² ti³xˀin⁴ qui³tso²-le⁴ Jesús: Nca³yi³je³ je²-vi⁴ cˀoa⁴-sˀin² qui³si³tjo³soan²³ jo³ sa³ˀnta³ nca³ xtia³. Jme¹-sa³ xi³ cha³-na³.
MAT 19:21 Jesús qui³tso²-le⁴: Tsa² me³-li² nca³ ña³qui³ coan⁴jncoi³, tˀin³ ta⁴te²nai³ nca³yi³je³ xi³ tjin¹-li², cˀoa⁴ tˀai²-lai⁴ je² xi³ yo⁴ma⁴. Cˀoa⁴ sˀe⁴-li² cjoa⁴nchi⁴na¹ ya⁴ ncˀa³jmi³. Cˀoa⁴ nčhoai¹³, nčhoa¹tˀa³-nai¹³.
MAT 19:22 Cˀia⁴ nca³ je² ti³xˀin⁴ qui³nčhˀoe¹ je² en¹-ve⁴, fao¹ coan³-le⁴ nca³ qui³, nca⁴ ncjin² tso³jmi² xi³ tjin¹-le⁴.
MAT 19:23 Cˀia⁴ Jesús qui³tso²-le⁴ cho⁴ta⁴-le⁴: Xi³ cjoa⁴qui²xi⁴ xi³ xian³, nca³ nˀion¹ ñˀain³ coan⁴-le⁴ jnco³ xi³ nchi⁴na¹ nca³ cjoa⁴ˀa³sˀen³jin³ cjoa⁴te¹xo³ma³-le⁴ ncˀa³jmi³.
MAT 19:24 To⁴nca³ an³ xin³-no³, li²coi³ to⁴jo³ ñˀain³ cjoa⁴ˀa³sˀen³ jnco³ camello jña³ ti⁴xˀa⁴ ni³nto³, cao⁴-ni³ tsa² nca³ cjoa⁴ˀa³sˀen³jin³ cjoa⁴te¹xo³ma³-le⁴ Ni³na¹ jnco³ cho⁴ta⁴nchi⁴na¹.
MAT 19:25 To⁴nca³ cho⁴ta⁴-le⁴ nˀion¹ coan³xcon¹-le⁴ cˀia⁴ nca³ qui³nčhˀoe¹ je² cjoa⁴-vi⁴, qui³tso²: ˀya¹-ni³ tso²cˀoa⁴ xi³ coan⁴ coi⁴tjo³ntjai².
MAT 19:26 Jesús qui³sco²tsen³-le⁴ qui³tso²-le⁴: Cho⁴ta⁴ li²coi³ coan⁴-le⁴, to⁴nca³ Ni³na¹ coan⁴²-le⁴ nca³yi³je³ cjoa⁴.
MAT 19:27 Cˀia⁴ Pedro qui³tso²-le⁴: Coe⁴-ni³ jin⁴-jin⁴ je³qui³ni²ca³toi¹⁴-jin⁴ nca³yi³je³, cˀoa⁴ je³ji³nčhoa³tˀa³-lai²⁴jin⁴. Jme¹-ni³ tso²cˀoa⁴ xi³ sˀe⁴-na³jin⁴.
MAT 19:28 Jesús qui³tso²-le⁴: Xi³ cjoa⁴qui²xi⁴ xi³ xin³-no³, jon² xi³ je³ji³nčhoa³tˀa³-nao¹³, cˀia⁴ nca³ coan⁴cho⁴tse⁴ya³ nca³yi³je³ cˀia⁴ nca³ je² ˀnti¹-le⁴ cho⁴ta⁴ cˀoe¹jna³son² ya¹xi²le⁴-le⁴ cjoa⁴je³ya³-le⁴, cˀoa⁴-ti⁴ jon² coi⁴yo³son² te³jao² ya¹xi²le⁴, nca³ coa⁴te²xo³ma³-lao⁴³ je² te³jao² ntje⁴-le⁴ Israel.
MAT 19:29 To⁴ˀya³-ni³ve⁴ xi³ tˀa³tsˀe⁴ jan³ˀain¹-na⁴ qui³si³cˀe¹jna³ ntˀia³-le⁴, a³xo⁴ ntsˀe⁴, a³xo⁴ nti³chja³, a³xo⁴ nˀai³-le⁴, a³xo⁴ na⁴-le⁴, a³xo⁴ chjon⁴²-le⁴, a³xo⁴ ˀnti¹xti³, a³xo⁴ na³nqui³, nqui²jnco³ ciento cˀoa⁴tjin¹ cˀoai⁴-le⁴, cˀoa⁴ sˀe⁴-le⁴ cjoa⁴tjao² xi³ cjoa⁴vi³jna³chon³ nca³ntsjai².
MAT 19:30 To⁴nca³ ncjin² xi³ ma³ ti¹tjon², cˀia⁴ cjoe⁴tˀa³-ni³ coan⁴, cˀoa⁴ je² xi³ fe³tˀa³-ni³, ti¹tjon² coan⁴.
MAT 20:1 Nca⁴ je² cjoa⁴te¹xo³ma³-le⁴ ncˀa³jmi³ ma³nco¹son² jo³-ni³ tsa² jnco³ xi³ nˀai³-le⁴ ntˀia³, xi³ ji³tjo³ nca³ ta⁴njion²ya³ nca³ qui³ ca³jnqui³ cho⁴ˀnta³ xi³ si⁴²xa¹cao⁴ tso³jmi²ntje²-le⁴.
MAT 20:2 Cˀia⁴ nca³ je³qui³sˀe³nta³cao⁴ cho⁴ˀnta³ nca³ jnco³ vi²xo⁴ nca³ jnco³ ni⁴čhjin³, qui³sca³ni¹jin³ tso³jmi²ntje²-le⁴.
MAT 20:3 Ja⁴me³-la⁴ las nueve nca³ ta⁴njion² ji³tjo³-nca¹ni³, tsa³ve³ cˀa³ xi³ tjio¹ ya⁴ nti⁴tsin⁴, xi³ tsi²jme³ xa¹ tjin¹-le⁴.
MAT 20:4 Qui³tso²-le⁴: Cˀoa⁴-ti⁴ ta⁴nquion¹³ nca³ jon² ja⁴jin³ tso³jmi²ntje²-na⁴, an³ tsjoa³-no³ jo³ tjin¹ xi³ va³quin²-no³. Cˀoa⁴ qui³ cho⁴ˀnta³-ve⁴.
MAT 20:5 Ja⁴me³nchi³sen³-le⁴ ji³tjo³ nqui²jnco³ cˀa², cˀoa⁴ nqui²jnco³ cˀa² las tres nca³ coan³xon², cˀoa⁴ ti⁴qui³sˀin³-nca¹ni³.
MAT 20:6 Ja⁴me³-la⁴ las cinco nca³ coan³xon² ji³tjo³-nca¹ni³, coan³sjai³cˀa³-le⁴ xi³ to⁴xquia⁴ ya⁴ tjio¹, cˀoa⁴qui³tso²-le⁴: A¹-ni³ nca³ ti⁴ˀi⁴ ti³yo³-si¹nio³ cˀoa³ni⁴čhjin³ nca³ tsi² ni²xao¹³.
MAT 20:7 Cho⁴ˀnta³ qui³tso²-le⁴: Nca⁴ tsi² tsa² ˀya³ xi³ tsa³cˀe¹nta³cao⁴-na³jin⁴. Je² qui³tso²-le⁴: Cˀoa⁴-ti⁴ ta⁴nquion¹³ nca³ jon² ja⁴jin³ tso³jmi²ntje²-na⁴, cˀoai⁴-no³ jo³ tjin¹ xi³ va³quin²-no³.
MAT 20:8 Cˀia⁴ nca³ je³coan³xon² je² nai³-le⁴ tso³jmi²ntje²-ve⁴ qui²tso²-le⁴ je² cho⁴ˀnta³ xi³ si¹coi²nta⁴ xi³cˀa³: Ti⁴no²cjoa⁴-lai⁴ cho⁴ˀnta³, tˀai²-lai⁴ chji¹-le⁴, tˀe²tsˀia⁴coai⁴ sa³ˀnta³ xi³ fe³tˀa³-ni³ sa³ˀnta³ xi³ ti¹tjon².
MAT 20:9 Cˀia⁴ nca³ ja³ˀai³ je² xi³ me³ las cinco nca³ coan³xon² qui³ si¹xa¹, qui³tsˀai²-le⁴ jnco³ vi²xo⁴ nca³ jnco¹jnco¹.
MAT 20:10 Cˀia⁴ nca³ ja³ˀai³ je² xi³ ti¹tjon², qui³si³cja³ˀai³tsjen³ nca³ nqui²sa⁴ tse³ cˀoai⁴-le⁴. To⁴nca³ cˀoa⁴-ti⁴ nca³ je² qui³tsˀai²-le⁴ jnco³ vi²xo⁴ nca³ jnco¹jnco¹.
MAT 20:11 Cˀia⁴ nca³ qui³scoe¹, tsa³cja³yo³je¹tˀa³-le⁴ nˀai³-le⁴ ntˀia³.
MAT 20:12 Qui³tso²: Je² xi³ scan³ ca²fa³ˀai³, to⁴jnco³ hora qui³si³xa¹ cˀoa⁴ to⁴nco¹son² ca²si¹cao⁴-na³jin⁴ cao⁴ xi³ scan³ ca²si¹xa¹ cao⁴ nca³ jin⁴-jin⁴ xi³ qui³jcho¹cjoa⁴-na³jin⁴ chˀa¹-le⁴ ntoa¹-le⁴ ni⁴čhjin³.
MAT 20:13 Cˀia⁴ je² nˀai³-le⁴ ntˀia³ qui³tso²-le⁴ jnco³ xi³ tsˀe⁴ cho⁴ˀnta³-ve⁴: Mi²yo⁴, a³li²jme³ xi³ chˀao³ ti²si³cao⁴-le²³. A³ tsi² tsa³cˀe²nta³cao⁴-nai¹³ nca³ jnco³ vi²xo⁴.
MAT 20:14 Chjoai¹³ je² xi³ tsi⁴, cˀoa⁴ tˀin³, an³ me³-na³ tsjoa³-le⁴ je² xi³ fe³tˀa³-ni³ jo³-ni³ ji³.
MAT 20:15 A³ tsi² tjin¹-na³ ˀnte³ nca³ cˀoa⁴-sˀin² sˀian³ jo³-sˀin² me³-na³ cao⁴ je² xi³ tsˀan⁴. A³ chˀao³ ntai³ cjoain³, nca⁴ an³ ña³qui³ nta³ ni⁴ma⁴-na⁴.
MAT 20:16 Cˀoa⁴-sˀin² je² xi³ ma³ ti¹tjon² cjoe⁴tˀa³-ni³ coan⁴, cˀoa⁴ je² xi³ fe³tˀa³-ni³ ti¹tjon² coan⁴, Ncjin² xi³ qui³no²cjoa⁴-le⁴, to⁴nca³ choa³ xi³ ji³tjo³jin³.
MAT 20:17 Cˀia⁴ nca³ qui³mi³ Jesús ya⁴ Jerusalén, qui³cao⁴ tˀa³xin² xi³ te³jao² cho⁴ta⁴-le⁴, cˀoa⁴qui³tso²-le⁴ ya⁴ ntia⁴²:
MAT 20:18 Coe⁴-ni³ ma³nquin¹mia³² ya⁴ Jerusalén. Cˀoa⁴ je² ˀnti¹-le⁴ cho⁴ta⁴ cˀoai⁴tˀa³-le⁴ cho⁴ta⁴ti¹tjon²-le⁴ na⁴ˀmi³, cao⁴ cho⁴ta⁴ scribano, cˀoa⁴ cˀaon⁴ne²-le⁴ cjoa⁴vi³ya³.
MAT 20:19 Cˀoa⁴ sca⁴ni²tˀa³-le⁴ cho⁴ta⁴ xi³ li² judío-jin², jme¹-ni³ nca³ cˀoa⁴-sˀin² coi⁴jno²que³-si¹ni³, cˀoa⁴ nca³ coa⁴²-le⁴, cˀoa⁴ nca³ coa⁴²tˀa³ cro², cˀoa⁴ xi³ ma³jan²-ni³ ni⁴čhjin³ si⁴cja³ˀa¹ya³-ni³le⁴.
MAT 20:20 Cˀia⁴ na⁴-le⁴ xti³-le⁴ Zebedeo ji³cho²con³-le⁴ Jesús, cao³ xti³-le⁴, tsa³ca³sen²xco¹nchˀin³tˀa³-le⁴ nca³ tjin¹ xi³ qui³si³je¹-le⁴.
MAT 20:21 Cˀoa⁴ Jesús qui³tso²-le⁴: Jme¹ xi³ me³-li². Qui³tso²: Cˀoa⁴-si¹ nca³ ca²ta³tio² je² jao² xti³-na⁴, jnco³ xi³ nca³qui²xi⁴-li⁴, cˀoa⁴ nqui²jnco³ xi³ nca³scon¹-li⁴ ya⁴ cjoa⁴te¹xo³ma³-li⁴.
MAT 20:22 Cˀia⁴ Jesús qui³nchja⁴-nca¹ni³: Li²coi³ ˀyao³ jme³ xi³ ni²jai¹³. A³ coan⁴²-no³ sˀio⁴yao³ je² cho⁴tsin¹ cjoa⁴ñˀain³-na⁴ xi³ an³ scˀoi⁴ya²³, cˀoa⁴ nca³ sa⁴te¹ntao¹³ tˀa³tsˀe⁴ cjoa⁴ñˀain³ jo³-sˀin² nca³ an³ sa³te¹nta¹. Je² xi³ jao²-ve⁴ qui³tso²-le⁴: Coan⁴-na³jin⁴.
MAT 20:23 Jesús qui³tso²-le⁴: Xi³ cjoa⁴qui²xi⁴ sˀio⁴yao³ je² cho⁴-tsin¹ cjoa⁴ñˀain³-na⁴, cˀoa⁴ jo³-sˀin² nca³ an³ sa³te¹nta¹-nia³, cˀoa⁴-sˀin² sa⁴te¹ntao¹³ ja⁴tˀa³tsˀe⁴ cjoa⁴ñˀain³, to⁴nca³ xi³ coi⁴yo³tˀa³-nao¹³ nca³qui²xi⁴-na⁴ cˀoa⁴ nca³scon¹-na⁴, a³li² an³-jian²³ xi³ tsjoa³-le⁴, to⁴nca³ je² ˀnte³-ve⁴ cˀoai⁴-le⁴ je² xi³ Nˀai³-na⁴ tsa³cˀe¹nta³-le⁴.
MAT 20:24 Cˀia⁴ nca³ je² xi³ te³-ve⁴ qui³nčhˀoe¹ je²-vi⁴, coan³jti³-le⁴ xi³ tˀa³tsˀe⁴ xi³ jao² ntsˀe⁴-ve⁴.
MAT 20:25 Cˀia⁴ Jesús qui³nchja⁴-le⁴, cˀoa⁴qui³tso²: ˀya³-nio¹³ nca³ je² cho⁴ta⁴ti¹tjon²-le⁴ cho⁴ta⁴ xi³ li² judío-jin² si¹cˀe¹yo³nqui³ cho⁴ta⁴-le⁴ tˀa³tsˀe⁴ cjoa⁴te¹xo³ma³-le⁴, cˀoa⁴ je² xi³ nca³jco⁴-le⁴ nˀion¹ vˀe¹ne²-le⁴.
MAT 20:26 To⁴nca³ jin³-le⁴ nca³ jon², li²coi³ cˀoa⁴coan⁴, to⁴sa³ to⁴ˀya³-ni³ve⁴ xi³ me³-le⁴ nca³ je³ya³ cˀoe¹yo³jin³-no³ nca³ jon², ca²ta³si¹xa¹-le⁴ xi³cˀa³.
MAT 20:27 Cˀoa⁴ je² xi³ jin³-le⁴ nca³ jon², xi³ me³-le⁴ nca³ ti¹tjon² coan⁴, cho⁴ˀnta³-no³ nca³tsˀio³ ca²ta³ma³ nca³ je².
MAT 20:28 Ti⁴cˀoa⁴-sˀin²ni³ je² ˀnti¹-le⁴ cho⁴ta⁴ li²coi³ ja³ˀai³ nca³ si⁴xa¹-le⁴, to⁴nca³ je² xi³ si⁴²xa¹, cˀoa⁴ tsjoa¹ ni⁴ma⁴-le⁴ nca³ cˀoe⁴²chji¹ntjai² ncjin² cho⁴ta⁴.
MAT 20:29 Cˀia⁴ ji³tjo³-ni³ Jesús ya⁴ ˀnte³ Jericó, cho⁴ta⁴ncjin² qui³tjen⁴nqui³-le⁴.
MAT 20:30 Coe⁴-ni³ jao² cho⁴ta⁴ xi³ xca⁴ cjio³ tjio¹ntai³ ntia⁴². Cˀia⁴ nca³ qui³nčhˀoe¹ nca³ Jesús ja³ˀa³to³-ve⁴ qui³squi³ˀntia¹tˀa³, qui³tso²: Señor, ji³ xi³ ˀnti¹-le⁴ David, jcha⁴ma⁴ta³con²-na³jin⁴.
MAT 20:31 Je² cho⁴ta⁴ncjin²-ve⁴ qui³nchja⁴ti³cao⁴, jme¹-ni³ nca³ jyo¹ ca²ta³va³tio²-si¹ni³, to⁴nca³ je² nqui²sa⁴ nˀion¹ qui³nchja⁴: Señor, ji³ xi³ ˀnti¹-le⁴ David, jcha⁴ma⁴cha³-na³jin⁴.
MAT 20:32 Cˀia⁴ Jesús tsa³ca³sen²jna³, qui³nchja⁴-le⁴, qui³tso²: Jme¹ xi³ me³-no³ nca³ si³cao⁴-no³.
MAT 20:33 Je² xi³ xca⁴ cjio³ qui³tso²-le⁴: Señor, ca²ta³tjo³ˀai²nqui³ xcoin³⁴-jin⁴.
MAT 20:34 Cˀia⁴ Jesús coan³ma⁴que³ qui³si³cao⁴ xcon⁴. Coan³tsen³ nti⁴ton⁴-le⁴, cˀoa⁴ qui³tjen⁴nqui³-le⁴.
MAT 21:1 Cˀia⁴ nca³ ja³ˀai³čhian³ Jerusalén, ja³ˀai³ ya⁴ ˀnte³ Betfagé, ya⁴ ni³nto³ xi³ ˀmi² Olivos, cˀia⁴ Jesús qui³si³ca³sen¹ jao² cho⁴ta⁴-le⁴.
MAT 21:2 Qui³tso²-le⁴: Ta⁴nquion¹³ ya⁴ na⁴xi⁴na³nta¹ˀnti¹ xi³ ti¹jna³tsen³-ve⁴, nti⁴ton⁴ coan⁴sjai³-no³ jnco³ bo²rra⁴ xi³ ti¹jna³tˀa³nˀion¹, cˀoa⁴ jnco³ bo¹rro¹ˀnti¹ xi³ ti¹jna³cao⁴. Cho¹jnta¹ˀño¹³, cˀoa⁴ nčhoa¹cao⁴-nao¹³.
MAT 21:3 Tsa² ˀya³-ni³ve⁴ xi³ jo³ coi⁴tso⁴-no³, cˀoi⁴ti⁴xon¹³: Je² Nai³-na¹ ma³chjen¹-le⁴. Nti⁴ton⁴ si⁴²ca³sen¹.
MAT 21:4 Nca³yi³je³ je²-vi⁴ cˀoa⁴coan³, jme¹-ni³ nca³ coan⁴jnco³-si¹ni³ je² xi³ qui³tso² je² xi³ qui³nchja⁴ya³ tˀa³tsˀe⁴ Ni³na¹:
MAT 21:5 Cˀoa⁴tˀin²-lao⁴³ tso²ti³-le⁴ Sión: Coe⁴-ni³ je² cho⁴ta⁴ti¹tjon²-li⁴ nčhoa¹con³-li², ntˀe¹, ti¹jna³son²-le⁴ jnco³ bo²rra⁴, cˀoa⁴ son²-le⁴ jnco³ bo¹rro¹ˀnti¹ xi³ ˀnti¹-le⁴ cho⁴chˀa¹.
MAT 21:6 Cˀia⁴ cho⁴ta⁴-le⁴ qui³, cˀoa⁴qui³sˀin³ jo³-sˀin² Jesús tsa³cˀe¹ne²-le⁴.
MAT 21:7 Ja³ˀai³cao⁴ bo²rra⁴ cao⁴ bo¹rro¹ˀnti¹-ve⁴. Tsa³ca¹yo³son²-le⁴ tso⁴nca⁴-le⁴, cˀoa⁴ Jesús tsa³cˀe²jna³son²-le⁴.
MAT 21:8 Ncjin² ma³-ni³ tsˀe⁴ cho⁴ta⁴ncjin²-ve⁴ xi³ tsa³ca¹yo³nta³-le⁴ ya³ ntia⁴² tso⁴nca⁴-le⁴. Xi³cˀa³ tsa³ca³te³tˀa³ xca⁴-le⁴ ya¹, cˀoa⁴-ti⁴ tsa³ca¹yo³ ya³ ntia⁴².
MAT 21:9 Je² cho⁴ta⁴ncjin² xi³ tjen⁴ti¹tjon²-le⁴ cao⁴ xi³ tjen⁴nqui³-le⁴ nˀion¹ qui³nchja⁴, qui³tso²: Viva ˀnti¹-le⁴ David. Jo¹ to⁴nta³-le⁴ je² xi³ nčhoa¹ nca³jao³-le⁴ Nai³-na¹. Viva xi³ nqui²sa⁴ ncˀa³.
MAT 21:10 Cˀia⁴ nca³ Jesús ja³ˀa³sˀen³ ya⁴ Jerusalén nca³yi³je³ na⁴xi⁴na³nta¹ jo³ cja⁴ˀai¹-nca¹ coan³, qui³tso²: ˀya¹-ni³ je²-vi⁴.
MAT 21:11 Je² cho⁴ta⁴ncjin²-ve⁴ qui³tso²: Je²-vi⁴ je² Jesús, xi³ nchja⁴ya³ tˀa³tsˀe⁴ Ni³na¹, xi³ tsˀe⁴ na⁴xi⁴na³nta¹ Nazaret xi³ nchja⁴-ni³ Galilea.
MAT 21:12 Cˀia⁴ Jesús ja³ˀa³sˀen³ ya³ yo⁴nco⁴, qui³tsˀaon³sje³ nca³tsˀi³ xi³ tjio¹va³te¹na³, xi³ tjio¹va³tse³ ya³ yo⁴nco⁴-ve⁴. Qui³sca³ni¹ti¹cja¹ ya¹mi²xa⁴-le⁴ je² xi³ tjio¹si¹cˀa³ntjai² taon⁴. Qui³sca³ni¹ti¹cja¹ ya¹xi²le⁴-le⁴ je² xi³ tjio¹va³te¹na³ ni⁴se³ paloma.
MAT 21:13 Qui³tso²-le⁴: Tji¹tˀa³-ni¹: Je² ntˀia³-na⁴ cˀoin¹-le⁴ ntˀia⁴ jña³ sˀe³tsˀoa³ya³, to⁴nca³ jon² nqui³jao³-le⁴ che¹ ti³nˀiaon²³.
MAT 21:14 Cˀia⁴ je² xi³ xca⁴ cjoan³, cao⁴ xi³ chi⁴ˀnque¹, ja³ˀai³con²-le⁴ ya⁴ yo⁴nco⁴, cˀoa⁴ qui³si³nta³.
MAT 21:15 To⁴nca³ cho⁴ta⁴ti¹tjon²-le⁴ na⁴ˀmi³ cao⁴ cho⁴ta⁴ scribano jo³ coan³jti³-le⁴ cˀia⁴ nca³ tsa³ve³ cjoa⁴xcon¹ xi³ qui³sˀin³, cˀoa⁴ tsa³ve³ xti³ xi³ nˀion¹ tjio¹nchja⁴ ya³ yo⁴nco⁴, tjio¹-tso²: Viva ˀnti¹-le⁴ David. Jo³ coan³jti³-le⁴ cho⁴ta⁴ti¹tjon²-le⁴ na⁴ˀmi³ cao⁴ cho⁴ta⁴ scribano.
MAT 21:16 Qui³tso²-le⁴ Jesús: A³ no²ˀya²-ni¹ xi³ je²-vi⁴ tjio¹tso². Jesús qui³tso²-le⁴: Jaon³. A³ ni⁴cˀia³-jin² tsa³cˀe²xquiao⁴³: Tsˀoa³-ni³ ˀnti¹xti³, cˀoa⁴ cao⁴ xi³ tjio¹va³qui³, qui³chˀa²sje³-ni³ cjoa⁴nta³ xi³ ña³qui³ cˀoa⁴tjin¹.
MAT 21:17 Cˀoa⁴ Jesús qui³si³ca³tio¹ cho⁴ta⁴-ve⁴, ji³tjo³-ni³ ya⁴ na⁴xi⁴na³nta¹-ve⁴, qui³-ni³ ya⁴ Betania. Ya⁴ qui³si³cja¹ya³ nca³ ni⁴tjen⁴.
MAT 21:18 Cˀia⁴ nca³ ta⁴njion² ja³ˀai³ nqui²ntia³-ni³ ya⁴ na⁴xi⁴na³nta¹-ve⁴, coan³vao³-le⁴.
MAT 21:19 Tsa³ve³ jnco³ ya¹ higo čhian³ ntai³ ntia⁴². Ja³ˀai³ jña³ se¹jna³, cˀoa⁴ li²jme³ to³ xi³ qui³sa³co³-le⁴, to⁴xca⁴-ni¹, cˀia⁴ qui³tso²-le⁴: Ni⁴to⁴cˀia³-jin² ni⁴čhjin³ ti⁴ca²ta³va³-ni³li² to³ sa³ˀnta³ nca³ntsjai². Cˀoa⁴ qui³xi² nti⁴ton⁴ je² ya¹ higo-ve⁴.
MAT 21:20 Cˀia⁴ nca³ tsa³ve³ je²-vi⁴ cho⁴ta⁴-le⁴ coan³xcon¹-le⁴. Qui³tso²: Jo¹-sˀin²ni³ nca³ ca²xi² nti⁴ton⁴ je² ya¹ higo.
MAT 21:21 Jesús qui³tso²-le⁴: Xi³ cjoa⁴qui²xi⁴ xi³ xin³-no³, tsa² ma³cjain¹-no³, cˀoa⁴ tsa² tsi² jao² tjin¹-ta³con²³, a³li² to⁴je²-vi⁴ cˀoa⁴si⁴cao⁴³ je² ya¹ higo, to⁴nca³ tsa² cˀoa⁴cˀoin¹-lao⁴³ je² ni³nto³-ve⁴: Ti⁴se⁴xin², cˀoa⁴ ca²ta³ni²cˀa³tjen⁴jin³-li² nta¹chi³con³, cˀoa⁴² coan⁴.
MAT 21:22 Nca³yi³je³ to⁴jme³-ni³ xi³ ni²jao¹³ nca³ vˀe²tsˀoao³, cˀia⁴ tsa² ma³cjain¹-no³, cˀoa⁴-sˀin² cˀoai⁴-no³.
MAT 21:23 Cˀia⁴ nca³ Jesús ja³ˀa³sˀen³ ya³ yo⁴nco⁴, cho⁴ta⁴ti¹tjon²-le⁴ na⁴ˀmi³ cao⁴ cho⁴ta⁴jchi¹nca³-le⁴ na⁴xi⁴na³nta¹ ji³cho²con³-le⁴, cˀia⁴ nca³ ti¹va³co¹ya³, qui³tso²: Jña¹-le⁴ cjoa⁴te¹xo³ma³-ni³ xi³ tsjoa¹ˀnte³-li² nca³ cˀoa⁴nˀiain²³ je² cjoa⁴-vi⁴. ˀya¹-ni³ je² xi³ qui³tsjoa³-li² je² cjoa⁴te¹xo³ma³.
MAT 21:24 Jesús qui³tso²-le⁴: Cˀoa⁴-ti⁴ an³ sco¹na³nqui³-no³ jnco³ cjoa⁴. Cˀia⁴ tsa² jon² cˀoa⁴cˀoin¹-nao¹³, cˀoa⁴-ti⁴ an³ cˀoa⁴xin¹-no³ jña³-le⁴ cjoa⁴te¹xo³ma³ xi³ tsjoa¹ˀnte³-na³ nca³ cˀoa⁴sˀian³ je² cjoa⁴-vi⁴.
MAT 21:25 Je² cjoa⁴sa⁴te¹nta¹ xi³ qui³sˀin³ Juan, jña¹ ja³ˀai³-ni³le⁴. A³ tsˀe⁴ ncˀa³jmi³ ni¹, a³xo⁴ tsˀe⁴ cho⁴ta⁴ ni¹. Cˀia⁴ je² tsa³cjao¹ya³-ni³: Cˀia⁴ tsa² coi⁴xoan¹ nca³ tsˀe⁴ ncˀa³jmi³ ni¹, cˀoa⁴-jin² coi⁴tso⁴-ˀni³: A¹-ni³ nca³ tsi² coan³cjain¹-si¹ni³no³ xi³ tˀa³tsˀe⁴.
MAT 21:26 Cˀoa⁴ tsa² coi⁴xoan¹ nca³ tsˀe⁴ cho⁴ta⁴ ni³, jcon³-le⁴² je² na⁴xi⁴na³nta¹, nca⁴ nca³tsˀi³ cˀoa⁴qui³tso² nca³ Juan jnco³ cho⁴ta⁴ xi³ nchja⁴ya³ tˀa³tsˀe⁴ Ni³na¹.
MAT 21:27 Cˀia⁴ qui³nchja⁴-nca¹ni³ Jesús: Li²coi³ ˀyai³-jin⁴. Cˀoa⁴-ti⁴ Jesús qui³tso²-le⁴: Ni⁴ˀan³-jin² cˀoa⁴xin¹-no³ jña³-le⁴ cjoa⁴te¹xo³ma³ xi³ tsjoa¹ˀnte³-na³ nca³ cˀoa⁴sˀian³ je² cjoa⁴-vi⁴.
MAT 21:28 To⁴nca³ jo¹ vi³xon¹³. Jnco³ cho⁴ta⁴ tjin¹-le⁴ jao² xti³xˀin⁴, cˀoa⁴ nˀai³-le⁴ ji³cho²con³ ti¹tjon²-le⁴ jnco³ ti³-le⁴ qui³tso²-le⁴: ˀnti¹-na⁴, tˀin³ ni⁴xa¹-lai⁴ tso³jmi²ntje²-na⁴ ntˀai⁴ntai⁴.
MAT 21:29 Cˀoa⁴ je² qui³tso²: Li²coi³ me³-na³. To⁴nca³ scan³ qui³si³cˀa³ntjai²ya³ cjoa⁴fa³ˀai³tsjen³-le⁴, cˀoa⁴ qui³.
MAT 21:30 Cˀoa⁴ nˀai³-le⁴ ji³cho²con³-le⁴ xi³jnco³ ti³-le⁴, qui³tso²-le⁴ ti⁴coi³-ni³ en¹. Cˀoa⁴ je² qui³tso²: Jaon³, nˀai³, cjoia¹³. To⁴-nca³ li²coi³ qui³.
MAT 21:31 Jña¹-le⁴ nca³ jao² cˀoa⁴qui³sˀin³ jo³-sˀin² nca³ coan³me³-le⁴ nˀai³-le⁴. Qui³tso² je² cho⁴ta⁴-ve⁴: Je² ti³ xi³ ti¹tjon². Jesús qui³tso²-le⁴: Xi³ cjoa⁴qui²xi⁴ xi³ xin³-no³, nca³ je² cho⁴ta⁴ xi³ vˀe¹ña³ taon⁴va³sen³ cˀoa⁴ je² ya¹nchjin¹sca¹ xi³ si¹cha³jnqui³ fa³ˀa³sˀen³ ti¹tjon²-no³ je² cjoa⁴te¹xo³ma³-le⁴ Ni³na¹.
MAT 21:32 Juan ja³ˀai³con³-no³ tsa³ca³co¹ya³-no³ ntia⁴² xi³ tsˀe⁴ cjoa⁴qui²xi⁴, cˀoa⁴ li²coi³ coan³cjain¹-no³. To⁴nca³ je² cho⁴ta⁴ xi³ vˀe¹ña³ taon⁴va³sen³ cao⁴ ya¹nchjin¹sca¹ xi³ si¹cha³jnqui³ coan³cjain¹-le⁴. Nta³ tsa² tsa³ˀyao³ je²-vi⁴, jon² li²coi³ scan³ qui³ni²cˀa³ntjai²yao³ cjoa⁴fa³ˀai³tsjen³-no³ nca³ coan³cjain¹-no³.
MAT 21:33 Ti⁴no¹ˀyao²³ je² cjoa⁴xco¹son²: Jnco³ cho⁴ta⁴ xi³ nˀai³-le⁴ ntˀia³ xi³ tsa³cˀe¹ntje² xca⁴to³tse⁴². Tsa³cˀe¹nchˀoa¹ntai³-le⁴, tsa³cˀe¹jna³nta³ jnco³ máquina xi³ si⁴²tsˀion³nqui² na³nta¹-le⁴ to³tse⁴², tsa³cˀe¹nta³ jnco³ xjao¹ncˀa³, cˀoa⁴ qui³si³quin³ya³son²-le⁴ cho⁴ta⁴ xi³ si¹xa¹son², cˀia⁴ qui³ jña³ nca³ cjin³.
MAT 21:34 Cˀia⁴ nca³ coan³čhian³-le⁴ ni⁴čhjin³ nca³ coan³jcha¹ to³tse⁴²-ve⁴, cho⁴ˀnta³ qui³si³ca³sen¹con³-le⁴ je² cho⁴ta⁴ xi³ si¹xa¹son² na³nqui³-le⁴, jme¹-ni³ nca³ scoe¹-si¹ni³ jo³ tjin¹ xi³ coan³jcha¹-le⁴ xi³ je² vˀa³cao⁴-le⁴.
MAT 21:35 To⁴nca³ je² cho⁴ta⁴ xi³ si¹xa¹son² qui³tsoa³ cho⁴ˀnta³-le⁴ve⁴, qui³si³qui²ˀaon³ xi³ coan³ ti¹tjon², qui³si³cˀen³ xi³ nqui²jnco³, la⁴jao⁴ tsa³cˀe¹-le⁴ xi³ nqui²jnco³.
MAT 21:36 Cˀia⁴ je² qui³si³ca³sen¹ xi³ cja⁴ˀai¹ cho⁴ˀnta³, xi³ nqui²-sa⁴ ncjin² ma³-ni³ jo³-ni³ xi³ ti¹tjon², cˀoa⁴-ti⁴sˀin² qui³si³cao⁴ jo³-ni³ xi³cˀa³.
MAT 21:37 Cˀia⁴ nca³ je³tˀa³-ni³, qui³si³ca³sen¹ ti³-le⁴, qui³tso²: Scoe⁴xcon¹ ti³-na⁴.
MAT 21:38 To⁴nca³ je² cho⁴ta⁴ xi³ si¹xa¹son², cˀia⁴ nca³ tsa³ve³ je² ti³-le⁴, qui³tso²-le⁴ xi¹ncjin¹: Je²-vi⁴ xi³ cˀoai⁴cjoa⁴tjao²-le⁴ tso³jmi²ntje²-vi⁴. Tjin³ si⁴cˀen⁴², cˀoa⁴ chjoe¹ cjoa⁴tjao²-le⁴.
MAT 21:39 Qui³tsoa³ tsˀaon³sje³jin³ tso³jmi²ntje²-ve⁴, cˀoa⁴ qui³si³cˀen³.
MAT 21:40 Cˀia⁴ nca³ cjoa⁴ˀai¹ nai³-le⁴ tso³jmi²ntje²-ve⁴, jme¹ xi³ si⁴²cao⁴ je² cho⁴ta⁴ xi³ si¹xa¹son²-ve⁴.
MAT 21:41 Cho⁴ta⁴ qui³tso²-le⁴ Jesús: Je² cho⁴ta⁴tsˀen⁴-ve⁴ ña³qui³ si⁴²cha³. Cˀoa⁴ je² tso³jmi²ntj²-le⁴ tsjoa¹son²-le⁴ cja⁴ˀai¹ cho⁴ta⁴si¹xa¹ xi³ cˀoe⁴²chji¹son²-le⁴ cao⁴ xca⁴to³tse⁴² xi³ ma³jcha¹ cˀia⁴ nca³ ni⁴čhjin³-le⁴.
MAT 21:42 Jesús qui³tso²-le⁴: A³ tsi² tsa³cˀe²xquiao⁴³ je² xon⁴ Escritura. Je² la⁴jao⁴ xi³ qui³si³cˀa³tjen⁴ cho⁴ta⁴ xi³ vˀe¹nta³ ni³ˀya³, je²-vi⁴ xi³ coan³ la⁴jao⁴ xi⁴nqui⁴. Je² Nai³-na¹ cˀoa⁴qui³sˀin³ je²-vi⁴. Ña¹ to⁴ma³xcon¹-ni³na¹ nca³ ˀya³².
MAT 21:43 To⁴coi³ cˀoa⁴xin³-no³, nca³ je² cjoa⁴te¹xo³ma³-le⁴ Ni³na¹ cˀoa⁴-sˀin² tjo¹xin²-ni³no³ nca³ jon², cˀoa⁴ cˀoai⁴-le⁴ na⁴xi⁴-na³nta¹ xi³ cˀoa⁴sˀin⁴² xa¹ xi³ va³quin²-le⁴ cjoa⁴te¹xo³ma³-le⁴ Ni³na¹.
MAT 21:44 Je² xi³ sca³son² la⁴jao⁴-vi⁴, cˀoa⁴-sˀin² coan⁴xcoa⁴. Cˀoa⁴ tsa² ˀya³ xi³ la⁴jao⁴-vi⁴ sca³ne²-le⁴, cˀoa⁴-sˀin² coan⁴chao³.
MAT 21:45 Cˀia⁴ nca³ je² cho⁴ta⁴ti¹tjon²-le⁴ na⁴ˀmi³ cao⁴ cho⁴ta⁴ fariseos qui³nčhˀoe¹ je² cjoa⁴xco¹son²-ve⁴, coan³cho⁴ya³-le⁴ nca³ Jesús qui³nchja⁴ xi³ tˀa³tsˀe⁴.
MAT 21:46 Cˀia⁴ nca³ tsa³ca¹sjai³ jo³-sˀin² nca³ tsoa⁴, qui³tsa³cjon¹-le⁴ cho⁴ta⁴na⁴xi⁴na³nta¹. Nca⁴ cho⁴ta⁴ coan³cjain¹-le⁴ nca³ Jesús jnco³ cho⁴ta⁴ xi³ nchja⁴ya³ tˀa³tsˀe⁴ Ni³na¹.
MAT 22:1 Cˀoa⁴ Jesús qui³nchja⁴, nqui²jnco³ cˀa² qui³tso²-ni³le⁴ cao⁴ cjoa⁴xco¹son²:
MAT 22:2 Je² cjoa⁴te¹xo³ma³-le⁴ ncˀa³jmi³ ma³nco¹son² jnco² cho⁴ta⁴ti¹tjon² cˀia⁴ nca³ tsa³cˀe¹jna³ sˀoi¹ tˀa³tsˀe⁴ cjoa⁴vi³xan³-le⁴ ti³-le⁴.
MAT 22:3 Qui³si³ca³sen¹ cho⁴ˀnta³-le⁴ nca³ qui³nchja⁴-le⁴ je² xi³ qui³no²cjoa⁴-le⁴ tˀa³tsˀe⁴ cjoa⁴vi³xan³, to⁴nca³ coan³cai³-le⁴ nca³ ji³nčhoa³.
MAT 22:4 Cja⁴ˀai¹ cho⁴ˀnta³ ti⁴qui³si³ca³sen¹-nca¹ni³, qui³tso²: Cˀoa⁴tˀin²-lao⁴³ je² xi³ qui³no²cjoa⁴-le⁴: Coe⁴-ni³, je² xi³ coi⁴chi³-nia¹ je³tsa³cˀe³nta²³. Je² nčha⁴ja⁴-na⁴, cˀoa⁴ nčha⁴ja⁴ˀnti¹nchja¹-na⁴ je³qui³ni²cˀen³, cˀoa⁴ nca³yi³je³ je³tjin¹nta³. Nčhoao¹³ cjoa⁴vi³xan³-vi⁴.
MAT 22:5 To⁴nca³ je² li²coi³ qui³si³sin³. Qui³ jnco³ ya⁴ nqui³chao³-le⁴, cˀoa⁴ xi³jnco³ ntia⁴² cjoa⁴ma⁴-le⁴.
MAT 22:6 Xi³cˀa³ qui³tsoa³ cho⁴ˀnta³-le⁴, chˀao³ qui³si³cao⁴, cˀoa⁴ qui³si³cˀen³.
MAT 22:7 Je² cho⁴ta⁴ti¹tjon² coan³jti³-le⁴, qui³si³ca³sen¹ so³nta²do⁴-le⁴, qui³si³cˀen³ je² cho⁴ta⁴ xi³ cˀen³ qui³si³cˀen³, cˀoa⁴ tsa³ca³ca¹ na⁴xi⁴na³nta¹-le⁴.
MAT 22:8 Cˀia⁴ cho⁴ta⁴ti¹tjon² qui³tso²-le⁴ cho⁴ˀnta³-le⁴: Je² cjoa⁴vi³xan³ ña³qui³ cjoa⁴qui²xi⁴ je³tji¹nta³, to⁴nca³ je² xi³ qui³no²cjoa⁴-le⁴ li²coi³ cˀoa⁴-sˀin² tsa³quin²-le⁴.
MAT 22:9 Ta⁴nquion¹³ tso²cˀoa⁴, ya⁴ jña³ nca³ ma³jnco³-ni³ ntia⁴², cˀoa⁴ ti⁴no²cjoa⁴-lao⁴³ tˀa³tsˀe⁴ cjoa⁴vi³xan³ jo³ tjin¹ xi³ ma³sjai³-no³.
MAT 22:10 Ji³tjo³ cho⁴ˀnta³-le⁴ ya⁴ ntia⁴²-ve⁴, tsa³cˀe¹xco¹ nca³tsˀi³ xi³ coan³sjai³-le⁴ xi³ tsˀen⁴, cˀoa⁴ xi³ nta³. Cˀoa⁴ je² ntˀia³ jña³ tjin¹ cjoa⁴vi³xan³ qui³tse³ cho⁴ta⁴ xi³ tsa³cjen².
MAT 22:11 Ja³ˀa³sˀen³ je² cho⁴ta⁴ti¹tjon² nca³ sco¹tsen³-le⁴ je² xi³ ja³ˀai³ cjen². Ya⁴ tsa³ve³ jnco³ cho⁴ta⁴ xi³ tsi² yˀa³cja¹ na³jño³ xi³ tsˀe⁴ cjoa⁴vi³xan³.
MAT 22:12 Cˀoa⁴qui³tso²-le⁴: Mi²yo⁴, jo¹-sˀin² ca²vi³tja³sˀain³ i⁴-vi⁴, nca³ tsin²-li² na³jño³ xi³ tsˀe⁴ cjoa⁴vi³xan³. To⁴nca³ je² tsa³cˀe¹chjoa² tsˀoa³.
MAT 22:13 Cˀia⁴ je² cho⁴ta⁴ti¹tjon²-le⁴ qui³tso²-le⁴ je² xi³ tjio¹vˀe¹ya³: Ti⁴ntoao⁴³ tˀe²tˀa³nˀion¹³ ntso⁴co⁴ cao⁴ ntsja³, cˀoa⁴ ti⁴chˀaon³sje³ tˀa³xion²³ jña³ nca³ njion². Ya⁴ squi¹ˀnta¹, cˀoa⁴ tsao⁴cjao² ni⁴ˀño⁴.
MAT 22:14 Nca⁴ ncjin² xi³ cˀoa⁴-sˀin² qui³no²cjoa⁴-le⁴, cˀoa⁴ choa³ xi³ qui³tjo³jin³.
MAT 22:15 Cˀia⁴ qui³ je² cho⁴ta⁴ fariseos, tsa³cjao¹ya³-ni³ jo³-sˀin² coan⁴-ni³ nca³ coa⁴²nqui³ Jesús xi³ tˀa³tsˀe⁴ jnco³ en¹-le⁴.
MAT 22:16 Cho⁴ta⁴ fariseos qui³si³ca³sen¹con³-le⁴ Jesús cho⁴ta⁴-le⁴ xi³ ti⁴je²-ni³ cao⁴ cho⁴ta⁴ herodianos, xi³ qui³tso²: Maestro, ˀya³-ni¹jin⁴ nca³ ji³ xi³ ña³qui³ cjoa⁴qui²xi⁴, cˀoa⁴ nca³ va³co²yai³ je² ntia⁴²-le⁴ Ni³na¹ cao⁴ xi³ cjoa⁴qui²xi⁴, cˀoa⁴ nca³ ni⁴ˀya³-jin² xi³ jcon³-lai⁴, nca⁴ tsi² tsa² cho²tsen³-lai⁴ jo³ cji³ cho⁴ta⁴.
MAT 22:17 Cˀoa⁴tˀin²-na³jin⁴ tso²cˀoa⁴: Jo¹ ma³-li². A³ nta³ tjin¹ nca³ cˀoe¹chji¹-le⁴² taon⁴sa¹ César, a³xo⁴ mai³.
MAT 22:18 To⁴nca³ Jesús tsa³ve³ cjoa⁴taon³-le⁴, qui³tso²-le⁴: A¹-ni³ nca³ cho¹tˀa³-si¹ni³nao¹³, jon² xi³ cho⁴ta⁴ jao²ncjain¹ cjoaon³.
MAT 22:19 Ta⁴co²-nao¹³ je² taon⁴ xi³ ni²cˀe¹chji¹ntje². Cˀia⁴ ja³ˀai³cao⁴ jnco³ xi³ coi³ taon⁴-ve⁴.
MAT 22:20 Cˀoa⁴ Jesús qui³tso²-le⁴: ˀya¹ tsˀe⁴ je² xco¹son²-vi⁴, cˀoa⁴ je² en¹ xi³ tjio¹tˀa³.
MAT 22:21 Qui³tso²-le⁴: Tsˀe⁴ César. Cˀia⁴ Jesús qui³tso²-le⁴: Tˀai²-lao⁴³ tso²cˀoa⁴ César je² xi³ tsˀe⁴ César, cˀoa⁴ tˀai²-lao⁴³ Ni³na¹ je² xi³ tsˀe⁴ Ni³na¹.
MAT 22:22 Cˀia⁴ nca³ qui³nčhˀoe¹ je²-vi⁴, coan³xcon¹-le⁴ qui³si³cˀe¹jna³ Jesús, cˀoa⁴ qui³.
MAT 22:23 Ti⁴coi³-ni³ ni⁴čhjin³-ve⁴ ji³cho²con³-le⁴ Jesús cho⁴ta⁴ saduceos, je² xi³ tso² nca³ tsi² cjoa⁴fa³ˀa¹ya³-jin², qui³sco²na³nqui³-le⁴,
MAT 22:24 Maestro, Moisés qui³tso²: Tsa² jnco³ cho⁴ta⁴ xi³ coi⁴ya² nca³ tsin²-le⁴ xti³-jin², je² ntsˀe⁴ coi⁴xan³cao⁴ chjon⁴²-le⁴, cˀoa⁴ ca²ta³sˀe³-le⁴ xti³ nca³jao³-le⁴ ntsˀe⁴.
MAT 22:25 Tsa³ca³tio²cao⁴-na³jin⁴ ña³to³ ntsˀe⁴. Je² xi³ ti¹tjon² qui³sˀe³-le⁴ chjon⁴², cˀoa⁴ cˀen³ xˀin⁴-ve⁴. Coi³ nca³ tsi²jme³ xti³ xi³ qui³sˀe³-le⁴, qui³si³cˀe¹jna³-le⁴ ntsˀe⁴ chjon⁴²-le⁴.
MAT 22:26 Ti⁴cˀoa⁴-sˀin² coan³ je² xi³ ma³jao²-ni³, cˀoa⁴ je² xi³ ma³jan²-ni³, sa³ˀnta³ je² xi³ ma³ña³to³-ni³.
MAT 22:27 Cˀoa⁴ coan³scan³-ni³ nca³ je³cˀen³ nca³tsˀi³, cˀoa⁴-ti⁴ cˀen³ chjon⁴²-ve⁴.
MAT 22:28 Cˀia⁴ nca³ cjoa⁴ˀa¹ya³-na¹ tso²cˀoa⁴, ˀya¹ tsˀe⁴ coan⁴ chjon⁴²-ve⁴, nca⁴ nca³tsˀi³ xi³ ña³to³-ve⁴ cˀoa⁴-sˀin² tsa³ca³tio²cao⁴ je² chjon⁴²-ve⁴.
MAT 22:29 Cˀia⁴ Jesús qui³tso²-le⁴: Ma³sca¹ya³-no³, nca³ tsi² ˀyao³ jo³ tso² xon⁴ Escrituras ni⁴nca³nˀion¹-le⁴ Ni³na¹-jin².
MAT 22:30 Cˀia⁴ nca³ cjoa⁴ˀa¹ya³-na¹, ni⁴coi⁴xan³-jin², cˀoa⁴ ni⁴si⁴²qui³xan³-jin², ni⁴je²-jin² ya¹nchjin¹ xˀin⁴ sˀe⁴-le⁴. To⁴-nca³ cˀoa⁴² cjoan³ jo³-ni³ a²ncje⁴ xi³ tsˀe⁴ Ni³na¹ ya⁴ ncˀa³-jmi³.
MAT 22:31 Cˀia⁴ nca³ cjoa⁴ˀa¹ya³-ni³le⁴ je² xi³ cˀen³, a³ tsi² tsa³cˀe²xquiao⁴³ je² xi³ Ni³na¹ qui³tso²-no³:
MAT 22:32 An³ nia¹³ Ni³na¹-le⁴ Abraham, Ni³na¹-le⁴ Isaac, cˀoa⁴ Ni³na¹-le⁴ Jacob. Ni³na¹ a³li² Ni³na¹-le⁴ cˀen³-jin², to⁴nca³ tsˀe⁴ xi³ tjio¹con³.
MAT 22:33 Cˀia⁴ nca³ cho⁴ta⁴ncjin² qui³nčhˀoe¹ je²-vi⁴, cˀoa⁴-sˀin² tsa³ca³tio²xcon¹ xi³ tˀa³tsˀe⁴ cjoa⁴fa³ˀai³tsjen³-le⁴.
MAT 22:34 Cˀia⁴ nca³ je² cho⁴ta⁴ fariseos qui³nčhˀoe¹ nca³ Jesús cˀoa⁴-sˀin² qui³si³cˀe¹chjoa²-le⁴ tsˀoa³ cho⁴ta⁴ saduceos, to⁴jnco³ tsa³ca³tio²xco¹.
MAT 22:35 Jnco³ cho⁴ta⁴chji⁴ne⁴ xi³ si¹cˀa³to³ya³ cjoa⁴te¹xo³ma³, qui³sco²na³nqui³ nca³ qui³sco²tˀa³-le⁴ Jesús:
MAT 22:36 Maestro, jña¹-le⁴ cjoa⁴te¹xo³ma³ xi³ nqui²sa⁴ ncˀa³ cao⁴ nca³yi³je³ cjoa⁴te¹xo³ma³.
MAT 22:37 Jesús cˀoa⁴qui³tso²-le⁴: Ca²ta³ma³tsjoa³chai³ Nai³-li⁴ Ni³na¹-li⁴. Ca²ta³ma³tsjoa³cha³-ni³ nca³yi³je³ ni⁴ma⁴-li⁴, cao⁴ nca³yi³je³ cjoa⁴tsjoa³-li⁴, cˀoa⁴ cao⁴ nca³yi³je³ cjoa⁴fa³ˀai³tsjen³-li⁴.
MAT 22:38 Je²-vi⁴ xi³ ti¹tjon², xi³ nqui²sa⁴ ncˀa³ cjoa⁴te¹xo³ma³.
MAT 22:39 Cˀoa⁴ je² xi³ ma³jao²-ni³ cˀoa⁴-ti⁴sˀin²ni³ je²-vi⁴: Ca²ta³ma³tsjoa³chai³ xi³cˀa³ jo³-ni³ nca³ ti⁴ji³-ni³.
MAT 22:40 Xi³ coi³ je² jao² cjoa⁴te¹xo³ma³-vi⁴ ti⁴ya⁴ nčhoa¹-ni³ nca³yi³je³ cjoa⁴te¹xo³ma³ cao⁴ en¹-le⁴ cho⁴ta⁴ xi³ qui³nchja⁴ya³ tˀa³tsˀe⁴ Ni³na¹.
MAT 22:41 Cˀia⁴ nca³ to⁴jnco³ tjio¹ cho⁴ta⁴ fariseos, Jesús qui³sco²na³nqui³-le⁴:
MAT 22:42 Jo¹ vi³xon¹³ xi³ tˀa³tsˀe⁴ Cristo. ˀya¹ tsˀe⁴ ˀnti¹-le⁴. Cho⁴ta⁴ fariseos qui³tso²-le⁴ Jesús: Tsˀe⁴ David.
MAT 22:43 Cˀia⁴ Jesús qui³tso²-le⁴: Jo¹-sˀin²ˀni³ nca³ David qui³tso²-le⁴ Nai³-na⁴ cˀia⁴ nca³ to⁴tˀa³tsˀe⁴ Espíritu Santo qui³nchja⁴, nca⁴ tso²:
MAT 22:44 Je² Nai³-na¹ qui³tso²-le⁴ je² Nai³-na⁴: Ti⁴jna³tˀa³-nai¹³ nca³ qui²xi⁴-na⁴ sa³ˀnta³ nca³ cˀoa⁴-sˀin² si³cˀe¹yoa³ co²ntran⁴-li⁴ ya⁴nqui³ ntso⁴coi³.
MAT 22:45 Tsa² je² David Nai³-na⁴ tso²-le⁴, jo¹-sˀin² nca³ ˀnti¹-le⁴ ma³-le⁴.
MAT 22:46 Ni⁴ˀya³-jin² xi³ coan³ qui³nchja⁴cao⁴-nca¹ni³. Ni⁴ˀya³-jin² xi³ ti⁴ma³nˀion¹-ni³con³ nca³ scoi⁴na³nqui³-sa³le⁴, sa³ˀnta³ coi³ ni⁴čhjin³-ve⁴.
MAT 23:1 Cˀia⁴ Jesús tsa³cja¹cao⁴ cho⁴ta⁴ncjin², cˀoa⁴ cao⁴ cho⁴ta⁴-le⁴.
MAT 23:2 Qui³tso²: Je² cho⁴ta⁴ scribano cao⁴ cho⁴ta⁴ fariseos va³tio²son² ya¹xi²le⁴-le⁴ nca³ si¹cˀa³to³ya³ xi³ qui³tso² Moisés.
MAT 23:3 Nca³yi³je³ xi³ cˀoa⁴coi⁴tso⁴-no³ cˀoa⁴sˀiaon⁴³, cˀoa⁴-sˀin² si⁴qui³tjo³son²³. To⁴nca³ li² cˀoa⁴-jin² nˀiaon²³ jo³-sˀin² sˀin¹ nca³ je², nca⁴ cˀoa⁴tso², to⁴nca³ li²coi³ cˀoa⁴sˀin¹.
MAT 23:4 Va³nˀion¹ chˀa¹ xi³ ai¹, xi³ nˀion¹ ñˀain³ chˀa², cˀoa⁴ va¹yo³son² ya¹tsˀin⁴ cho⁴ta⁴, to⁴nca³ ti⁴je²-ni³ ni⁴si¹cao⁴-jin² cao⁴ jnco³ na⁴jma¹ntsja³.
MAT 23:5 Nca³yi³je³ je² xa¹ xi³ sˀin¹, cˀoa⁴sˀin¹ jme¹-ni³ nca³ ca²ta³ve³-si¹ni³ cho⁴ta⁴. Si¹te³ya³-sa³ je² čhjoa⁴ jña³ va¹yo³ya² xon⁴cjoa⁴te¹xo³ma³, cˀoa⁴ si¹jnčho³tjon²-sa³ ntsja⁴ˀa³-le⁴ na³jño³jnčho³-le⁴.
MAT 23:6 Tsjoa³que³ ˀnte³ xi³ nqui²sa⁴ ti¹tjon² cˀia⁴ nca³ cjen², cˀoa⁴ je² ya¹xi²le⁴ xi³ nqui²sa⁴ ti¹tjon² ya⁴ ntˀia³ sinagoga.
MAT 23:7 Tsjoa³que³ cjoa⁴ni²ti²ˀnta³ ya⁴ nti⁴tsin⁴, cˀoa⁴ nca³ Rabí, Rabí tso²-le⁴ cho⁴ta⁴.
MAT 23:8 To⁴nca³ jon² li²coi³ ca²ta³ˀmi²-no³ Rabí, nca⁴ to⁴jnco³ je² xi³ Maestro-no³, je² Cristo, cˀoa⁴ nca³tsˀio³ nca³ jon² ntsˀe⁴ ma³-nio³.
MAT 23:9 Cˀoa⁴ ni⁴ˀya³-jin² xi³ cˀoa⁴ˀmi²-lao⁴³ nˀai³ i⁴ son³ˀnte³-vi⁴, nca⁴ to⁴jnco³ je² xi³ Nˀai³-no³, je² xi³ cˀoa⁴-sˀin² ti¹jna³ ncˀa³jmi³.
MAT 23:10 Ni⁴nca³jco⁴-jin² ca²ta³ˀmi²-no³, nca⁴ to⁴jnco³ je² xi³ nca³jco⁴-no³, je² Cristo.
MAT 23:11 Je² xi³ ti¹tjon² cˀoe¹yo³jin³-no³ nca³ jon², je²-vi⁴ xi³ si⁴²xa¹-no³.
MAT 23:12 Je² xi³ ncˀa³ vˀa³sje³ yao³-le⁴, cjai¹nca³ na³nqui³ coan⁴-ni³, cˀoa⁴ je² xi³ na³nqui³ vˀa³sje³ yao³-le⁴, ncˀa³ coi⁴tjo³-ni³.
MAT 23:13 To⁴nca³ ma⁴-xo¹nio³ nca³ jon², cho⁴ta⁴ scribano cao⁴ cho⁴ta⁴ fariseos, jao²ncjain¹ nio¹³. Vˀe²chjoa²-nio¹³ xo⁴ntjoa⁴-le⁴ je² cjoa⁴te¹xo³ma³-le⁴ Ni³na¹ nqui³xcon⁴ cho⁴ta⁴ xi³ me³-le⁴ fa³ˀa³sˀen³, ti⁴jon²-nio³ li²coi³ vi³tja³sˀaon³, cˀoa⁴ je² xi³ tjio¹fa³ˀa³sˀen³ tsa³cˀe²chjoa²-lao⁴³ nca³ fa³ˀa³sˀen³.
MAT 23:14 Ma⁴-xo¹nio³ nca³ jon², cho⁴ta⁴ scribano cao⁴ cho⁴ta⁴ fariseos, jao²ncjain¹ nio¹³. So³yo³ntjao²³ ni³ˀya³-le⁴ ya¹nchjin¹cˀan³ xi³ cˀen³-le⁴ xˀin⁴, cˀoa⁴ to⁴nti³so³-nio¹³ nca³ cˀoa⁴-sˀin² tse³ vˀe²tsˀoao³. Xi³ to⁴coi³ cjoa⁴ nqui²sa⁴ tse³ cjoa⁴ñˀain³ sˀe⁴-no³.
MAT 23:15 Ma⁴-xo¹nio³ nca³ jon², cho⁴ta⁴ scribano cao⁴ cho⁴ta⁴ fariseos, jao²ncjain¹ nio¹³. Cˀoa⁴-sˀin² vi³ma³jion³ nta¹chi³con³ cˀoa⁴ son² na³nqui³, jme¹-ni³ nca³ si⁴qui³njen³-si¹ni³lao⁴³ jnco³ cho⁴ta⁴ xi³ coai⁴tˀa³-no³. Cˀia⁴ nca³ je³cˀoa⁴-sˀin² coan⁴, jon² cˀoa⁴ni²cao⁴³ sa³ˀnta³ nca³ va³quin²-le⁴ ˀnte³cjoa⁴ñˀain³, jao²ya³ cˀoa⁴tjin¹ nqui²sa⁴ va³quin²-le⁴ cao⁴-ni³ tsa² jon².
MAT 23:16 Ma⁴-xo¹nio³ nca³ jon², cho⁴ta⁴ xi³ fa³ntiao⁴², to⁴nca³ xca⁴ nio¹³, cˀoa⁴vi³xon¹³: To⁴ˀya³-ni³ve⁴ xi³ tsjoa¹ en¹-le⁴ xi³ tˀa³tsˀe⁴ ˀnte³tsje-le⁴ yo⁴nco⁴, a³li²jme³-jin², to⁴nca³ to⁴ˀya³-ni³ve⁴ xi³ tsjoa¹ en¹-le⁴ xi³ tˀa³tsˀe⁴ taon⁴si³ne² xi³ tsˀe⁴ ˀnte³tsje³, cˀoa⁴-sˀin² tjin¹ne²-le⁴.
MAT 23:17 Cho⁴ta⁴ xi³ tsi² cjoa⁴fa³ˀai³tsjen³ tjin¹-no³, cˀoa⁴ xca⁴ nio¹³. Jña¹-le⁴ xi³ nqui²sa⁴ ti¹tjon², a³ je² taon⁴si³ne², a³xo⁴ je² yo⁴nco⁴ xi³ si¹tsje³ je² taon⁴si³ne².
MAT 23:18 Cˀoa⁴ vi³xon¹³ to⁴ˀya³-ni³ve⁴ xi³ tsjoa¹ en¹-le⁴ xi³ tˀa³tsˀe⁴ xta², a³li²jme³-jin², to⁴nca³ to⁴ˀya³-ni³ve⁴ xi³ tsjoa¹ en¹-le⁴ xi³ tˀa³tsˀe⁴ je² cjoa⁴tjao² xi³ ti¹jna³son²-le⁴ xta²-ve⁴, cˀoa⁴-sˀin² tjin¹ne²-le⁴.
MAT 23:19 Cho⁴ta⁴ xi³ tsi² cjoa⁴fa³ˀai³tsjen³ tjin¹-no³ cˀoa⁴ xca⁴ nio¹³. Jña¹-le⁴ xi³ nqui²sa⁴ ti¹tjon², a³ je² cjoa⁴tjao², a³xo⁴ je² xta² xi³ si¹tsje³ je² cjoa⁴tjao².
MAT 23:20 Je² xi³ tsjao¹ en¹-le⁴ xi³ tˀa³tsˀe⁴ xta²-ve⁴, tsjoa¹ en¹-le⁴ xi³ tˀa³tsˀe⁴, cˀoa⁴ xi³ tˀa³tsˀe⁴ nca³yi³je³ xi³ ti¹jna³son²-le⁴.
MAT 23:21 Cˀoa⁴ je² xi³ tsjoa¹ en¹-le⁴ xi³ tˀa³tsˀe⁴ ˀnte³tsje³, tsjoa¹ en¹-le⁴ xi³ tˀa³tsˀe⁴, cˀoa⁴ xi³ tˀa³tsˀe⁴ je² xi³ ti¹jna³ya³-le⁴.
MAT 23:22 Cˀoa⁴ je² xi³ tsjoa¹ en¹-le⁴ xi³ tˀa³tsˀe⁴ ncˀa³jmi³, tsjoa¹ en¹-le⁴ xi³ tˀa³tsˀe⁴ ya¹xi²le⁴-le⁴ Ni³na¹, cˀoa⁴ xi³ tˀa³tsˀe⁴ je² xi³ ti¹jna³son².
MAT 23:23 Ma⁴-xo¹nio³ nca³ jon², cho⁴ta⁴ scribano cao⁴ cho⁴ta⁴ fariseos, jao²ncjain¹ nio¹³. Jon² vˀao²³ jnco³ ya³ xi³ te³ ya³ ma³-ni³, jo³ tjin¹ xi³ njen²-no³ xi³ tsˀe⁴ xca⁴ menta cao⁴ xca⁴ eneldo cao⁴ xca⁴ comino, cˀoa⁴ tsa³cˀe²jnao³ je² xi³ nqui²sa⁴ nˀion¹ ma³chjen¹ xi³ tsˀe⁴ cjoa⁴te¹xo³ma³, xi³ coi³ cjoa⁴qui²xi⁴ cao⁴ cjoa⁴ma⁴ta³con² cao⁴ xi³ ma³cjain¹-na¹. Je²-vi⁴ xi³ tjin¹ne²-no³ nca³ cˀoa⁴sˀiaon⁴³ tsa²cai³, cˀoa⁴ ni⁴cˀoe¹jna³-jion²³ xi³cˀa³ cjoa⁴.
MAT 23:24 Cho⁴ta⁴ xi³ fa³ntiao⁴² to⁴nca³ xca⁴ nio¹³, nca³ ni²cˀao³ je² ˀnti¹ na⁴tse⁴, to⁴nca³ cho⁴jaon⁴³ camello.
MAT 23:25 Ma⁴-xo¹nio³ nca³ jon², cho⁴ta⁴ scribano cao⁴ cho⁴ta⁴ fariseos, jao²ncjain¹ nio¹³. Ni²tsjao³ son²ncˀa³-le⁴ cho⁴tsin¹ cao⁴ čhoa⁴, to⁴nca³ ja⁴ya³-le⁴ tjio¹qui³tse³-ni³ cjoa⁴che¹ cao⁴ cjoa⁴chi⁴nca⁴.
MAT 23:26 Xca⁴ ni¹³, ji³ xi³ cho⁴ta⁴ fariseo, ti⁴tsje³ ti¹tjoin²³ ja⁴ya³-le⁴ cho⁴tsin¹, cao⁴ čhoa⁴, jme¹-ni³ nca³ cˀoa⁴-ti⁴ son²ncˀa³-le⁴ ña³qui³ coan⁴tsje³-si¹ni³.
MAT 23:27 Ma⁴-xo¹nio³ nca³ jon², cho⁴ta⁴ scribano cao⁴ cho⁴ta⁴ fariseos, jao²ncjain¹ nio¹³. Cˀoa⁴ cjoaon³ jo³-ni³ tsjo¹ xi³ coan³ čhoa³jon³, xi³ son²tˀain³-le⁴ na⁴sca¹ ma³tsen³, to⁴nca³ ja⁴ya³-le⁴ tjio¹qui³tse³-ni³ ni³nta³-le⁴ cˀen³, cao⁴ nca³yi³je³ xi³ jnti¹.
MAT 23:28 Cˀoa⁴-sˀin² nca³ jon² xi³ son²tˀain³-no³ ma³tsen³ nca³ nˀion¹ qui²xi⁴ ti³mao³ nqui³xcon⁴ cho⁴ta⁴, to⁴nca³ ja⁴ya³-no³ tjio¹qui³tse³-nio³ cjoa⁴jao²ncjain¹ cao⁴ cjoa⁴tsˀen⁴.
MAT 23:29 Ma⁴-xo¹nio³ nca³ jon², cho⁴ta⁴ scribano cao⁴ cho⁴ta⁴ fariseos, cho⁴ta⁴jao²ncjain¹ nio¹³. Cˀoa⁴-sˀin² vˀe²ntao³ tsjo¹-le⁴ cˀen³ xi³ tsˀe⁴ cho⁴ta⁴ xi³ qui³nchja⁴ya³ tˀa³tsˀe⁴ Ni³na¹, cˀoa⁴ ni²nˀion¹jon³ lao⁴chi³con³-le⁴ cho⁴ta⁴cjoa⁴qui²xi⁴.
MAT 23:30 Cˀoa⁴ vi³xon¹³: Tsa² ña¹-la⁴ nia¹ xi³ tsa³qui³yo³choan³² cˀia⁴ ni⁴čhjin³-le⁴ nˀai³jcha¹cjin³-na¹ tsa²cai³, li²coi³ cˀoa⁴-sˀin² cao⁴ je² to⁴jnco³ tsa³cˀe²jten⁴² njin¹-le⁴ cho⁴ta⁴ xi³ qui³nchja⁴ya³ tˀa³tsˀe⁴ Ni³na¹.
MAT 23:31 Cˀoa⁴-sˀin² ti⁴jon² fa³nqui³-nio³ yao³-no³ nca³ jon² nio¹³ xti³-le⁴ je² cho⁴ta⁴ xi³ qui³si³cˀen³ cho⁴ta⁴ xi³ qui³nchja⁴ya³ tˀa³tsˀe⁴ Ni³na¹.
MAT 23:32 Tˀe²qui³tsao³-ˀni³ je² choa⁴-le⁴ nˀai³jcha¹cjin³-no³.
MAT 23:33 Jon² xi³ cho⁴ta⁴ xi³ ye⁴ cjoaon³, jo¹-sˀin² coi²tjo⁴xin³-ni³lao⁴³ je² cjoa⁴ñˀain³-le⁴ ˀnte³cjoa⁴ñˀain³.
MAT 23:34 To⁴coi³ cjoa⁴-vi⁴ an³ si³ca³sen¹³-no³ cho⁴ta⁴ xi³ nchja⁴ya³ tˀa³tsˀe⁴ Ni³na¹, cao⁴ cho⁴ta⁴chji⁴ne⁴, cao⁴ cho⁴ta⁴ scribano. Tjin¹ cˀa³ xi³ tsˀe⁴ xi³ si⁴cˀaon³, cˀoa⁴ cjoa¹tˀao³ cro². Cˀoa⁴ xi³cˀa³ cjoa¹-lao⁴³ ya⁴ ntˀia³ sinagoga, cˀoa⁴ coai⁴tjen⁴nqui³ co²ntran⁴-lao⁴³ xqui⁴ na⁴xi⁴na³nta¹.
MAT 23:35 An³ cˀoa⁴-sˀin² si³ca³sen¹³-no³ je² cho⁴ta⁴-ve⁴, jme¹-ni³ nca³ cjoa⁴ˀai¹ne²-si¹ni³no³ nca³ jon² je² njin¹-le⁴ cho⁴ta⁴cjoa⁴qui²xi⁴ xi³ qui³sˀe³jten⁴ son² son³ˀnte³-vi⁴, sa³ˀnta³ njin¹-le⁴ Abel, xi³ cho⁴ta⁴cjoa⁴qui²xi⁴, sa³ˀnta³ njin¹-le⁴ Zacarías, ˀnti¹-le⁴ Berequías, xi³ qui³ni²cˀen³ˀncho² ˀnte³tsje³-ve⁴ cao⁴ xta²-ve⁴.
MAT 23:36 Xi³ cjoa⁴qui²xi⁴ xi³ xin³-no³, nca³yi³je³ je² cjoa⁴ je²-vi⁴ cjoa⁴ˀai¹ne²-le⁴ je² cho⁴ta⁴ xi³ tjio¹ ntˀai⁴-vi⁴.
MAT 23:37 Jerusalén, Jerusalén, xi³ ni²cˀain³ cho⁴ta⁴ xi³ nchja⁴ya³ tˀa³tsˀe⁴ Ni³na¹, cˀoa⁴ la⁴jao⁴ ni²cˀen³-ni³ je² xi³ ni²ca³sen¹con³-li². Jo¹-la²na¹ tjin¹ cˀa³ nca³ coan³me³-na³ nca³ tsa³cˀe³xcoa¹³ xti³-li⁴ jo³-ni³ tsa² xa⁴ˀnta⁴ xi³ vˀe¹nqui³jnca³ ˀnti¹-le⁴, to⁴nca³ coan³cai³-li².
MAT 23:38 Coe⁴-ni³ ntˀia³-no³ sˀe³jna³ cji³tia³-no³.
MAT 23:39 Cˀoa⁴xin³-no³ nca³ va³se²tsˀia⁴-cjoan²ni³ ntˀai⁴-vi⁴, li²coi³ ti⁴jcha⁴-ni³nao¹³ sa³ˀnta³ nca³ coi⁴xon¹³: Jo¹ to⁴nta³-le⁴ je² xi³ nčhoa¹ nca³jao³-le⁴ Nai³-na¹.
MAT 24:1 Cˀia⁴ nca³ Jesús ji³tjo³-ni³ yo⁴nco⁴, cˀoa⁴ ti¹fi²-ni³, cho⁴ta⁴-le⁴ ji³cho²con³-le⁴, nca³ tsa³ca³co¹-le⁴ jo³ tjin¹ ma³-ni³ ntˀia³-le⁴ yo⁴nco⁴.
MAT 24:2 Jesús qui³tso²-le⁴: A³ ti³ˀya³-nio¹³ nca³yi³je³ je²-vi⁴. Xi³ cjoa⁴qui²xi⁴ xi³ xin³-no³, nca³ li²coi³ ti⁴sa⁴tio²son²-ni³le⁴ xi¹ncjin¹ la⁴jao⁴, tsao⁴nqui³ nca³yi³je³.
MAT 24:3 Cˀia⁴ nca³ Jesús tsa³cˀe²jna³jon³ ya⁴ ni³nto³ xi³ ˀmi² Olivos, cho⁴ta⁴-le⁴ ji³cho²con³ tˀa³xin²-le⁴, qui³tso²: Cˀoa⁴tˀin²-na³jin⁴, cˀia¹-ni³ve⁴ nca³ cˀoa⁴ coan⁴ je² cjoa⁴-vi⁴. Jme¹ choa⁴ xi³ sˀe⁴ cˀia⁴ nca³ cjoa²ˀai⁴, cˀoa⁴ nca³ cjoe⁴tˀa³ son³ˀnte³-vi⁴.
MAT 24:4 Jesús qui³tso²-le⁴: Ti⁴coi²ntao⁴³ yao³-no³ nca³ tsi² tsa² ˀya³ xi³ cˀoa⁴na⁴cha⁴-no³.
MAT 24:5 Ncjin² xi³ cjoa⁴ˀai¹ xi³ jan³ˀain¹-na⁴ yˀa³, xi³ cˀoa⁴coi⁴tso⁴: An³ nia¹³ Cristo, cˀoa⁴ ncjin² xi³ cˀoa⁴na⁴cha⁴-le⁴.
MAT 24:6 Coi⁴no¹ˀya²-lao⁴³ tˀa³tsˀe⁴ cjoa⁴jchan¹, cˀoa⁴ en¹ xi³ cˀoa¹mjen³ tˀa³tsˀe⁴ cjoa⁴jchan¹. Ti⁴coi²ntao⁴³ yao³-no³, a³li² vi³yo³xcon¹-jion²³. Ma³chjen¹ nca³ cˀoa⁴coan⁴ nca³yi³je³ je² cjoa⁴-vi⁴, to⁴nca³ cje³ fe³tˀa³-jin².
MAT 24:7 Coi⁴so¹tjen⁴ne² na⁴xi⁴na³nta¹ co²ntran⁴-le⁴ xi³ cja⁴ˀai¹ na⁴xi⁴na³nta¹, cˀoa⁴ cjoa⁴te¹xo³ma³ coi⁴so¹tjen⁴ne² xi³ cja⁴ˀai¹ cjoa⁴te¹xo³ma³. Sˀe⁴ chˀin³, cˀoa⁴ sˀe⁴ cji³nčha¹, cˀoa⁴ chaon¹ cjoa⁴ˀa³ ncjin² ˀnte³.
MAT 24:8 Nca³yi³je³ je² cjoa⁴-vi⁴ to⁴vˀe¹tsˀia⁴ cjoa⁴ñˀain³.
MAT 24:9 Cˀia⁴ sca⁴ni²tˀa³-no³ nca³ cˀoa⁴-sˀin² si⁴²cja³ˀa¹-no³ cjoa⁴ñˀain³, si⁴²cˀen³-no³, chˀao³ scoe⁴con³-no³ nca³tsˀi³ na⁴xi⁴-na³nta¹ xi³ tˀa³tsˀan⁴.
MAT 24:10 Cˀia⁴ ncjin² xi³ coa⁴tio⁴ tˀa³xin², cˀoa⁴ tsjoa¹tˀa³ xi¹-ncjin¹, cˀoa⁴ chˀao³ scoe⁴con³ xi¹ncjin¹.
MAT 24:11 Ncjin² cho⁴ta⁴nti³so³ xi³ coi⁴nchja⁴ya³ xi³ coi⁴so¹tjen⁴, cˀoa⁴ ncjin² xi³ cˀoa⁴na⁴cha⁴-le⁴.
MAT 24:12 Cˀia⁴ nca³ coan⁴ncjin²ya³ cjoa⁴tsˀen⁴, je² cjoa⁴tjao²cha³-le⁴ ncjin² cho⁴ta⁴ sa⁴te¹nchˀan¹jin³.
MAT 24:13 Je² xi³ jcho¹cjoa⁴-le⁴ sa³ˀnta³ nca³ cjoe⁴tˀa³-ni³, je²-vi⁴ coi⁴tjo³ntjai².
MAT 24:14 Cˀoa⁴ je² en¹nta³ xi³ tˀa³tsˀe⁴ je² cjoa⁴te¹xo³ma³-le⁴ ncˀa³jmi³ coi⁴no²cjoa⁴ya³-ni³ nca³qui³jnta² son³ˀnte³, nca³ si⁴²qui²xi⁴ya³nta³-le⁴ nca³tsˀi³ na⁴xi⁴na³nta¹. Cˀia⁴ cjoa⁴ˀai¹ xi³ cjoe⁴tˀa³.
MAT 24:15 Cˀia⁴ nca³ jchao⁴³ nca³ cˀoe¹jna³ ya⁴ ˀnte³ jña³ tsje³ je² xi³ chˀao³ cjoan³ xi³ si¹qui³xo²ya³ nca³yi³je³, xi³ cˀoa⁴qui³tso² Daniel xi³ qui³nchja⁴ya³ tˀa³tsˀe⁴ Ni³na¹ (je² xi³ vˀe¹xquia⁴, ca²ta³ma³cho⁴ya³-le⁴),
MAT 24:16 cˀia⁴ je² xi³ tjio¹ ya⁴ ˀnte³ Judea, ca²ta³ma³nca³ ya⁴ jin³jña¹ jan¹.
MAT 24:17 Cˀoa⁴ je² xi³ ti¹jna³son² ntˀia³-le⁴, li²coi³ ca²ta³vi³tjo³jen³ nca³ scoe¹ jme³-ni³ ya⁴ ntˀia³-le⁴.
MAT 24:18 Je² xi³ ya⁴ jin³jña¹ ti¹si¹xa¹, li²coi³ si⁴²cˀo¹fa³ya³-ni³ nca³ scoe¹ tso⁴nca⁴-le⁴.
MAT 24:19 To⁴nca³ ma⁴xo¹ni³ je² xi³ yˀa³ ˀnti¹, cˀoa⁴ je² xi³ si¹ca³qui³ coi³ ni⁴čhjin³-ve⁴.
MAT 24:20 Tˀe²tsˀoao³ tso²cˀoa⁴, nca³ tsi² coi⁴yo¹³ cˀia⁴ nca³ chan⁴ nchˀan¹, ni⁴ ni⁴čhjin³ ni²cja¹ya³-jin².
MAT 24:21 Nca⁴ cˀia⁴ nˀion¹ tse³ sˀe⁴ cjoa⁴ñˀain³ xi³ tsi² tsa² cˀoa⁴coan³ sa³ˀnta³ nca³ to²tsˀin³-le⁴ cjoa⁴, sa³ˀnta³ ntˀai⁴, ni⁴cˀia³-jin² cˀoa⁴coan⁴-nca¹ni³.
MAT 24:22 Cˀoa⁴ tsa² je² ni⁴čhjin³-ve⁴ tsi² tsa² cjoi⁴nčhoa¹jen³, ni⁴jnco³-jin² cho⁴ta⁴ xi³ coi⁴tjo³ntjai², to⁴nca³ xi³ tˀa³tsˀe⁴ je² xi³ qui³tjo³jin³ je² ni⁴čhjin³-ve⁴ cjoi⁴nčhoa¹jen³.
MAT 24:23 Cˀia⁴ tsa² jnco³ cho⁴ta⁴ coi⁴tso⁴-no³: Coe⁴-ni³ i⁴ ti¹jna³-vi⁴ Cristo, a³xo⁴ tsa² coi⁴tso⁴: Ya⁴ ti¹jna³-ve⁴, a³li² ma³cjain¹-jin²no³,
MAT 24:24 nca⁴ cˀoa⁴-sˀin² coi⁴so¹tjen⁴ cho⁴ta⁴nti³so³ xi³ Cristo coi⁴tso⁴-le⁴ yao³-le⁴, cˀoa⁴ cho⁴ta⁴nti³so³ xi³ coi⁴nchja⁴ya³, tse³ choa⁴ cao⁴ cjoa⁴xcon¹ xi³ tsjoa¹. Cˀoa⁴-sˀin² cˀoa⁴na⁴cha⁴-le⁴ nta³ tsa² je² xi³ Ni³na¹ tsa³cja³ˀa¹jin³, tsa² coan⁴-le⁴.
MAT 24:25 Coe⁴-ni³ to⁴nqui³-ni³ cˀoa⁴ca²xin³-no³.
MAT 24:26 Tsa² coi⁴tso⁴-no³: Coe⁴-ni³ ˀnte³tˀa³xin²tˀa³ ti¹jna³, a³li² vi²tjo⁴-jion²³ ya⁴-ve⁴. Tsa² coi⁴tso⁴-no³: Coe⁴-ni³ ti¹jna³ˀya³, a³li² ma³cjain¹-jin²no³.
MAT 24:27 Jo³-ni³ lˀi¹chˀaon⁴ xi³ vi³tjo³-ni³ jña³ nca³ vi³tjo³ tsˀoi¹, cˀoa⁴ nca³ ma³tsen³ sa³ˀnta³ jña³ nca³ ca³ntjai²-ni³ tsˀoi¹, cˀoa⁴-ti⁴sˀin² coan⁴ cˀia⁴ nca³ cjoa⁴ˀai¹ je² ˀnti¹-le⁴ cho⁴ta⁴.
MAT 24:28 To⁴jña³-ni³ nca³ ti¹jna³ yao³cˀen³, ya⁴² coa⁴tio⁴jtin¹ ni¹que¹.
MAT 24:29 Xi³ cjoe⁴tˀa³ je² cjoa⁴ñˀain³ xi³ tsˀe⁴ coi³ ni⁴čhjin³-ve⁴, nti⁴ton⁴ tsˀoi¹ sˀe⁴njion²-ni³, cˀoa⁴ sa¹ li²coi³ ti⁴si⁴²ˀi³sen³-ni³, cˀoa⁴ ni³ño³ coi⁴xo⁴jen³-ni³ ncˀa³jmi³, cˀoa⁴ je² lˀi¹ xi³ tjin¹-le⁴ ncˀa³jmi³ jtin¹ya³-ni¹.
MAT 24:30 Cˀia⁴² coan⁴tsen³ choa⁴-le⁴ ˀnti¹-le⁴ cho⁴ta⁴ ya⁴ ncˀa³-jmi³. Cˀia⁴² squi¹ˀntia¹va³ nca³tsˀi³ nca³yi³je³ ntje⁴-le⁴ son³ˀnte³, cˀoa⁴ scoe⁴ je² ˀnti¹-le⁴ cho⁴ta⁴ xi³ cjoa⁴ˀai¹jin³-ni³ yo³jvi³ ya⁴ ncˀa³jmi³ cao⁴ tse³ nca³nˀion¹, cˀoa⁴ cao⁴ tse³ cjoa⁴je³ya³.
MAT 24:31 Cˀia⁴ nca³ si⁴²ca³sen¹ a²ncje⁴-le⁴ nˀion¹ squi¹ˀntia¹ čhjao³, cˀoa⁴ a²ncje⁴-le⁴ cˀoe⁴²xco¹ je² xi³ qui³tjo³jin³. Cˀoe⁴²xco¹-ni³ nca³ ño³ xi⁴nqui⁴-le⁴ son³ˀnte³, cˀoa⁴ sa³ˀnta³ jnco³ ncoa³ ncˀa³jmi³, sa³ˀnta³ xi³ nqui²jnco³ ncoa³.
MAT 24:32 Cho¹tˀa³yao³ jnco³ cjoa⁴xco¹son² xi³ tsˀe⁴ ya¹ higo: Cˀia⁴ nca³ ya¹ntsja³ cˀoe⁴²jtsˀen¹, cˀia⁴ xca⁴ nčhoa¹-le⁴, ˀya³-nio¹³ nca³ je³ti¹jna³čhian³ chan⁴jtsi¹.
MAT 24:33 Cˀoa⁴-ti⁴sˀin²ni³ nca³ jon², cˀia⁴ nca³ jchao⁴³ nca³ cˀoa⁴cji³ma³ je² cjoa⁴-vi⁴, ca²ta³ˀyao³ nca³ je² ˀnti¹-le⁴ cho⁴ta⁴ je³ti¹jna³čhian³ ja⁴jčho³ xo⁴ntjoa⁴.
MAT 24:34 Xi³ cjoa⁴qui²xi⁴ xi³ xin³-no³, nca³ tsi² tsa² coi⁴ya¹ cho⁴ta⁴ xi³ tjio¹ ntˀai⁴-vi⁴ sa³ˀnta³ nca³ nca³yi³je³ je² cjoa⁴-vi⁴ cˀoa⁴coan⁴.
MAT 24:35 Ncˀa³jmi³ cao⁴ son³ˀnte³ cjoe⁴tˀa³-ni³, to⁴nca³ je² en¹-na⁴ li²coi³ cjoe⁴tˀa³.
MAT 24:36 To⁴nca³ xi³ cjoi⁴cho²ca³ je² ni⁴čhjin³-ve⁴, cˀoa⁴ je² hora-ve⁴ nca³ cˀoa⁴coan⁴, li²ˀya³ xi³ ve³, ni⁴je²-jin² a²ncje⁴ xi³ tsˀe⁴ ncˀa³jmi³, to⁴jnco³ je² Nˀai³-na¹ xi³ ve³.
MAT 24:37 To⁴nca³ jo³ coan³chon³ ni⁴čhjin³-le⁴ Noé, cˀoa⁴-ti⁴sˀin² coan⁴ cˀia⁴ nca³ cjoa⁴ˀai¹ je² ˀnti¹-le⁴ cho⁴ta⁴.
MAT 24:38 Jo³ coan³chon³ je² ni⁴čhjin³-ve⁴ to⁴nqui³-ni³ je² jtsi¹nˀion¹, nca³ tjio¹cjen², tjio¹ˀvi³, tjio¹vi³xan³, cˀoa⁴ tjio¹si¹qui³xan³, sa³ˀnta³ nca³ je² ni⁴čhjin³ nca³ Noé ja³ˀa³sˀen³ je² chi³tso³yˀai³.
MAT 24:39 Cho⁴ta⁴ li²coi³ tsa³ve³ sa³ˀnta³ nca³ ja³ˀai³ je² jtsi¹nˀion¹-ve⁴ xi³ qui³cao⁴ nca³tsˀi³. Cˀoa⁴-ti⁴sˀin² coan⁴chon³ cˀia⁴ nca³ cjoa⁴ˀai¹ je² ˀnti¹-le⁴ cho⁴ta⁴.
MAT 24:40 Cˀia⁴² coa⁴tio⁴ jao² ya⁴ nqui³chao³. Jnco³ xi³ tjo¹ve¹, cˀoa⁴ xi³ nqui²jnco³ sˀe⁴jna³-ni¹.
MAT 24:41 Jao² ya¹nchjin¹ xi³ tjio¹vˀao³ nca³ si¹cˀa³tji³. Jnco³ xi³ tjo¹ve¹, cˀoa⁴ xi³ nqui²jnco³ sˀe⁴jna³-ni¹.
MAT 24:42 Tjen⁴ya³-ta³con²³ ti⁴yo³, nca⁴ tsi² tsa² ˀyao³ jme³ hora nca³ cjoa⁴ˀai¹ Nai³-no³.
MAT 24:43 To⁴nca³ ca²ta³ˀyao³ je²-vi⁴, tsa² je² nai³-le⁴ ntˀia³ tsa³ve³ jo³ chon³ nca³ cjoa⁴ˀai¹ cho⁴ta⁴che¹, tsa³cˀe²jna³con³ˀnta³ tsa²cai³, cˀoa⁴ li²coi³ qui³tsjoa³ˀnte³ nca³ tsa³ca³cjan¹jčho³ xjao¹ ni³ˀya³ nca³ ja³ˀa³sˀen³che¹.
MAT 24:44 To⁴coi³ cˀoa⁴-ti⁴ nca³ jon² cjia³-ta³con²³ ti⁴yo³, nca⁴ je² ˀnti¹-le⁴ cho⁴ta⁴ cjoa⁴ˀai¹ coi³ hora cˀia⁴ nca³ tsi² tjin¹jin³-no³.
MAT 24:45 ˀya¹ ni¹³ tso²cˀoa⁴ je² cho⁴ˀnta³ xi³ nˀion¹tˀa³con³, xi³ nta³ ve³ xa¹, xi³ je² nai³-le⁴ qui³si³cˀe¹jna³ˀnta³ xi³cˀa³ cho⁴ˀnta³-le⁴, jme¹-ni³ nca³ tsjoa¹-si¹ni³le⁴ xi³ coa⁴cjen⁴-ni³ nca³ fi³cho² choa⁴-le⁴.
MAT 24:46 Jo¹ to⁴nta³-le⁴ je² cho⁴ˀnta³-ve⁴, xi³ nai³-le⁴ coan⁴sjai³-le⁴ cˀia⁴ nca³ cjoa⁴ˀai¹ nca³ cˀoa⁴ti¹sˀin¹.
MAT 24:47 Xi³ cjoa⁴qui²xi⁴ xi³ xin³-no³, nca³ je² nai³-le⁴ si⁴²cˀe¹jna³ˀnta³-le⁴ nca³yi³je³ tso³jmi²-le⁴.
MAT 24:48 To⁴nca³ tsa² je² cho⁴ˀnta³ xi³ tsˀen⁴ coi⁴tso⁴jin³ ni⁴ma⁴-le⁴: Nai³-na⁴ cˀoa⁴čhjin³-le⁴ nca³ cjoa⁴ˀai¹.
MAT 24:49 Cˀoa⁴ cˀoe⁴²tsˀia⁴cao⁴ nca³ si⁴²qui²ˀaon³ je² xi³ to⁴nco¹son² cho⁴ˀnta³cao⁴, cˀoa⁴ coa⁴cjen⁴cao⁴ scˀoi¹cao⁴ je² xi³ chˀi⁴.
MAT 24:50 Cjoa⁴ˀai¹ nai³-le⁴ je² cho⁴ˀnta³-ve⁴, cˀia⁴ ni⁴čhjin³ nca³ tsi² ti¹co³ya³-le⁴, cˀoa⁴ hora nca³ tsi² tsa² ve³.
MAT 24:51 Coa³te³nca³ yao³-le⁴, cˀoa⁴ sca⁴ni²jin³-le⁴ xi³ jao² ncjain¹. Ya⁴ squi¹ˀntia¹, cˀoa⁴ ya⁴ tsao⁴cjao² ni⁴ˀño⁴.
MAT 25:1 Cˀia⁴ je² cjoa⁴te¹xo³ma³-le⁴ ncˀa³jmi³ coan⁴nco¹son² cao⁴ te³ ya¹nchjin¹ xo³nco¹ xi³ qui³scoe¹ lˀi¹-le⁴, cˀoa⁴ ji³tjo³ nca³ qui³ co³ya³ya⁴³ntia⁴²-le⁴ xˀin⁴ xi³ coi⁴xan³.
MAT 25:2 Cˀoa⁴ aon² ma³-ni³ xi³ i³sen³con³, cˀoa⁴ je² xi³ nqui² aon² chi⁴con¹.
MAT 25:3 Je² xi³ chi⁴con¹ qui³scoe¹ lˀi¹-le⁴, to⁴nca³ li²coi³ tsa³cˀa³ si²ti⁴.
MAT 25:4 Je² xi³ i³sen³con³ qui³scoe¹ cho⁴tsin¹si²ti⁴-le⁴, to⁴jnco³cao⁴ lˀi¹-le⁴.
MAT 25:5 Coan³tse³ya²-le⁴ xˀin⁴ xi³ coi⁴xan³, coan³ ni³jña¹-le⁴ nca³tsˀi³, cˀoa⁴ tsa³cja³yo³fe².
MAT 25:6 Cˀia⁴ nca³ va³sen³ni⁴tjen⁴, qui³no²ˀya²-le⁴ jnco³ jta⁴ xi³ nˀion¹ qui³squi³ˀntia¹: Coe⁴-ni³ je² xˀin⁴ nčhoa¹, ti²tjo⁴³ nca³ cho¹ya³ya⁴³ntia⁴²-lao⁴³.
MAT 25:7 Cˀia⁴ nca³tsˀi³ ya¹nchjin¹ xo³nco¹-ve⁴ tsa³qui³so¹tjen⁴, cˀoa⁴ tsa³cˀe¹nta³ lˀi¹-le⁴.
MAT 25:8 Je² xi³ chi⁴con¹ qui³tso²-le⁴ je² xi³ i³sen³con³: Tˀai² i⁴tse¹-na³jin⁴ si²ti⁴-no³, nca⁴ je² lˀi¹-na⁴jin⁴ je³tjio¹fi³tsˀao³.
MAT 25:9 To⁴nca³ je² xi³ i³sen³con³ qui³tso²: Li²coi³-la⁴ coan⁴son²-nia¹ nca³tsˀia³². To⁴sa³ nta³ tsa² coa⁴nquin¹ qui³jnchi¹tˀa³-lao⁴³ je² xi³ va³te¹na³, cˀoa⁴-ti⁴ ti⁴ntao¹³ xi³ tˀa³tsaon⁴³.
MAT 25:10 Tjen⁴ nca³ qui³ca³tse³ nca³ je², ja³ˀai³ xˀin⁴-ve⁴. Je² xi³ tjio¹nta³, ja³ˀa³sˀen³ cao⁴ je² ya⁴ cjoa⁴vi³xan³, cˀia⁴ qui³sˀe³chjoa² xo⁴ntjoa⁴.
MAT 25:11 Coan³scan³-ni³ ja³ˀai³ ya¹nchjin¹ xo³nco¹ xi³cˀa³, qui³tso²: Señor, Señor, ti⁴nto¹ˀai²-na³jin⁴.
MAT 25:12 To⁴nca³ je² qui³tso²: Xi³ cjoa⁴qui²xi⁴ xi³ xin³-no³, li²coi³ ˀve³xcon³-no³.
MAT 25:13 Tjen⁴ya³-ta³con²³ ti⁴yo³, tso²cˀoa⁴, nca⁴ tsi² tsa² ˀyao³ jme³ ni⁴čhjin³-ni³, cˀoa⁴ jme³ hora-ni³ nca³ cjoa⁴ˀai¹ je² ˀnti¹-le⁴ cho⁴ta⁴.
MAT 25:14 Cˀoa⁴ coan⁴ je² cjoa⁴te¹xo³ma³-le⁴ ncˀa³jmi³ jo³-ni³ tsa² jnco³ cho⁴ta⁴ xi³ cjin³ ti¹fi², xi³ qui³nchja⁴-le⁴ cho⁴ˀnta³-le⁴, cˀoa⁴ qui³tsjoa³tˀa³-le⁴ tso³jmi²-le⁴.
MAT 25:15 Jnco³ xi³ qui³tsjoa³-le⁴ aon² jmi³, cˀoa⁴ xi³ nqui²jnco³ jao² jmi³, cˀoa⁴ xi³ nqui²jnco³ jnco³ jmi³. Nca³ jnco¹jnco¹ qui³tsjoa³-le⁴ jo³-sˀin² nca³ coan³-le⁴. Cˀia⁴ qui³ jña³ nca³ cjin³.
MAT 25:16 Je² xi³ qui³tsˀai²-le⁴ aon² jmi³, qui³ sˀin¹ nti⁴ton⁴ cjoa⁴ma⁴ cao⁴ taon⁴-ve⁴, cˀoa⁴ aon² jmi³ qui³si³qui³njen³son².
MAT 25:17 Cˀoa⁴-ti⁴sˀin²ni³ je² xi³ qui³tsˀai²-le⁴ jao² jmi³. Cˀoa⁴-ti⁴ qui³si³qui³njen³son² nqui²jao²-sa³.
MAT 25:18 To⁴nca³ je² xi³ qui³tsˀai²-le⁴ jnco³ jmi³, qui³ cˀe¹ñai³jin³ na³nqui³, cˀoa⁴ tsa³cˀe¹jna³ˀma³ taon⁴-le⁴ nai³-le⁴.
MAT 25:19 Cˀia⁴ nca³ je³coan³ ncjin² ni⁴čhjin³, ja³ˀai³ nai³-le⁴ cho⁴ˀnta³-ve⁴, cˀoa⁴ tsa³cˀe¹nta³ cuenta-le⁴ cao⁴ je².
MAT 25:20 Cˀia⁴ nca³ ji³cho² je² xi³ qui³tsˀai²-le⁴ aon² jmi³, ja³ˀai³cao⁴ nqui² aon² jmi³, qui³tso²: Señor, aon² jmi³ qui³tsˀai²-nai¹³, coe⁴-ni³ nqui² aon² jmi³ qui³njen³son²-na³.
MAT 25:21 Je² nai³-le⁴ qui³tso²-le⁴: To⁴ma¹-ni³, ntai³ cho⁴ˀnta³, cˀoa⁴ xˀin⁴cjoai⁴. Cjai¹nca³ nta³ qui³ni²qui³tjo³soin²³ cjoa⁴ xi³ to⁴choa³ tjin¹. Ntˀai⁴ cˀoe³jna³tˀa³-le²³ xi³ nqui²sa⁴ tse³ tjin¹. Ti⁴tja¹sˀen³jin³ cjoa⁴tsjoa³-le⁴ nai³-li⁴.
MAT 25:22 Cˀoa⁴-ti⁴ ji³cho² je² xi³ qui³tsˀai²-le⁴ jao² jmi³, qui³tso²: Señor, jao² jmi³ qui³tsˀai²-nai¹³. Coe⁴-ni³ nqui² jao² jmi³ qui³njen³son²-na³.
MAT 25:23 Je² nai³-le⁴ qui³tso²-le⁴: To⁴ma¹-ni³, ntai³ cho⁴ˀnta³, cˀoa⁴ xˀin⁴cjoai⁴. Cjai¹nca³ nta³ qui³ni²qui³tjo³soin²³ cjoa⁴ xi³ to⁴choa³ tjin¹. Ntˀai⁴ cˀoe³jna³tˀa³-le²³ xi³ nqui²sa⁴ tse³ tjin¹. Ti⁴tja¹sˀen³jin³ cjoa⁴tsjoa³-le⁴ nai³-li⁴.
MAT 25:24 Cˀoa⁴-ti⁴ ji³cho² je² xi³ qui³tsˀai²-le⁴ jnco³ jmi³, qui³tso²: Señor, ˀve³xcon³-le²³ nca³ ji³ ni¹³ cho⁴ta⁴ cha³ti¹xai¹³, nca³ ji³ vˀe²xcoi¹³ je² xi³ tsi² tsa² ji³ tsa³cˀe²ntjai²³, cˀoa⁴ vˀe²xcoi¹³ je² xi³ tsi² tsa² ji³ qui³cho³jnti².
MAT 25:25 Cˀoa⁴ qui³tsa³cjoan³, quia³, tsa³cˀe³jna³ˀma²³ taon⁴-li⁴ jin³ na³nqui³. Coe⁴-ni³ i⁴ ti¹jna³-li² xi³ tsi⁴.
MAT 25:26 Je² nai³-le⁴ qui³tso²-le⁴: Tsˀen⁴-ni¹³, cˀoa⁴ cho⁴ˀnta³ tsˀe² ni¹³. Tsa² cˀoa⁴-sˀin² tsa³ˀya³-nai¹³ nca³ vˀe³xcoa¹³ je² xi³ tsi² tsa² an³ tsa³cˀe³ntje²³, cˀoa⁴ vˀe³xcoa¹³ je² xi³ tsi² tsa² an³ qui³sco³jntia²,
MAT 25:27 cjai¹-la²nca³ nta³ ma³chjen¹ nca³ qui³tsˀai²-la²ni³lai⁴ taon⁴-na⁴ tsa²cai³ je² cho⁴ta⁴ xi³ vˀe¹tjao² taon⁴. Cˀia⁴ nca³ je²ˀe⁴ an³, cˀoa⁴-la⁴sˀin² qui³tsˀai²-na³ taon⁴-na⁴ cao⁴ ˀnti¹-le⁴.
MAT 25:28 Cha⁴ˀa²xin²-lao⁴³ tso²cˀoa⁴ je² taon⁴-ve⁴, cˀoa⁴ tˀai²-lao⁴³ je² xi³ te³ jmi³ tjin¹-le⁴.
MAT 25:29 To⁴ˀya³-ni³ve⁴ xi³ tjin¹-le⁴, cˀoai⁴²-sa³le⁴, cˀoa⁴ nˀion¹ sˀe⁴-sa³le⁴. Cˀoa⁴ je² xi³ li²jme³ xi³ tjin¹-le⁴, sa³ˀnta³ je² xi³ tjin¹-le⁴ tjo¹xin²-le⁴.
MAT 25:30 Cˀoa⁴ je² cho⁴ˀnta³ xi³ tsi²jme³ chji¹-le⁴, ti⁴cˀa³tjaon⁴³ nti³tsin³ jña³ njion². Ya⁴ squi¹ˀntia¹, cˀoa⁴ ya⁴ tsao⁴cjao² ni⁴ˀño⁴.
MAT 25:31 Cˀia⁴ nca³ je² ˀnti¹-le⁴ cho⁴ta⁴ cjoa⁴ˀai¹cao⁴ cjoa⁴je³ya³-le⁴, cˀoa⁴ cao⁴ nca³tsˀi³ a²ncje⁴-le⁴ xi³ tsje³ cao⁴ je², cˀia⁴ cˀoe¹jna³son² ya¹xi²le⁴-le⁴ cjoa⁴je³ya³-le⁴.
MAT 25:32 Coan⁴xco¹ nqui³xcon⁴ nca³ je² nca³tsˀi³ na⁴xi⁴na³nta¹, cˀoa⁴ si⁴²ca³tio¹ tˀa³xin² nca³ jnco¹jnco¹ cˀa³, jo³-sˀin² je² xi³ co³ˀnta³ cho⁴ si¹ca³tio¹ tˀa³xin² va³rre², cˀoa⁴ tˀa³xin² ti²ntso⁴.
MAT 25:33 Cˀoa⁴ je² si⁴²ca³tio¹ va³rre² nca³qui²xi⁴-le⁴, cˀoa⁴ ti²ntso⁴ nca³scon¹-le⁴.
MAT 25:34 Cˀia⁴ je² cho⁴ta⁴ti¹tjon² coi⁴tso⁴-le⁴ je² xi³ tjio¹ nca³qui²xi⁴-le⁴: Nčhoao¹³, jon² xi³ Nˀai³-na⁴ qui³si³chi³con³tˀain³, chjoe¹cjoa⁴tjao²³ je² cjoa⁴te¹xo³ma³ xi³ ti¹jna³nta³ xi³ tˀa³tsaon⁴³, sa³ˀnta³ nca³ to²tsˀin³-le⁴ cjoa⁴.
MAT 25:35 Coan³vao³-na³, cˀoa⁴ qui³tsˀai²-nao¹³ xi³ tsa²cjen⁴. Coan³fa³ti²-na³, cˀoa⁴ qui³tsˀai²-nao¹³ xi³ tsa³cˀia⁴. Qui³tsˀai²ˀnte³-nao¹³, nta³ tsa² tsi² tsa³ˀya³xcon³-nao¹³.
MAT 25:36 Cji³jtia²³, cˀoa⁴ qui³ni²cˀa³cja¹-nao¹³. Ti²mˀen³, cˀoa⁴ tsa³nquin¹ ni²coi²nta⁴-nao¹³. Tsa³ca²te⁴jna³ ya⁴ nto⁴ya¹, cˀoa⁴ ji³nčhoa³chon³-nao¹³.
MAT 25:37 Cˀia⁴ je² cho⁴ta⁴cjoa⁴qui²xi⁴-ve⁴ coi⁴tso⁴-le⁴: Señor, cˀia¹-ni³ tsa³ˀya³-lai²⁴jin⁴ nca³ coan³vao³-li², cˀoa⁴ nca³ qui³tsˀai²-lai²⁴jin⁴ xi³ qui³chi³nai³. Cˀia¹ni³ coan³fa³ti²-li², cˀoa⁴ nca³ qui³tsˀai²-lai²⁴jin⁴ xi³ qui³ˀyoi²³.
MAT 25:38 Cˀia¹-ni³ nca³ tsi² tsa² tsa³ˀya³xcon³-lai²⁴jin⁴, cˀoa⁴ nca³ qui³tsˀai²ˀnte³-lai²⁴jin⁴. Cˀoa⁴ nca³ qui³so³jna³jti²³, cˀoa⁴ nca³ qui³ni²cˀa³cja¹-lai²⁴jin⁴.
MAT 25:39 Cˀia¹-ni³ tsa³ˀya³-lai²⁴jin⁴ nca³ ti³mˀain³, a³xo⁴ ya⁴ nto⁴ya¹, cˀoa⁴ nca³ ja²ˀai⁴chon³-lai²⁴jin⁴.
MAT 25:40 Cˀia⁴ je² cho⁴ta⁴ti¹tjon² coi⁴tso⁴-le⁴: Xi³ cjoa⁴qui²xi⁴ xi³ xin³-no³, cˀia⁴ nca³ cˀoa⁴qui³ni²cao⁴³ jnco³ xi³ je² ntsˀe³-vi⁴ xi³ nqui²sa⁴ na³nqui³ tjio¹, cˀoa⁴-ti⁴ an³ xi³ cˀoa⁴qui³ni²cao⁴-nao¹³.
MAT 25:41 Cˀia⁴ cˀoa⁴-ti⁴ coi⁴tso⁴-le⁴ je² xi³ tjio¹ nca³scon¹-le⁴: Ti⁴ncha³ tˀa³xin²-nao¹³ nca³ jon², xi³ nai⁴² ti¹vˀe¹xa¹-no³, ta⁴nquion¹³ ya⁴ ˀnte³ jña³ nca³ ti¹ti² lˀi¹ nca³ntsjai², xi³ ti¹jna³nta³ tˀa³tsˀe⁴ nai⁴², cˀoa⁴ xi³ tˀa³tsˀe⁴ a²ncje⁴-le⁴.
MAT 25:42 Cˀoa⁴-sˀin² coan³vao³-na³, a³li²coi³ tsa³cˀai²-nao¹³ xi³ tsa²cjen⁴. Cˀoa⁴ coan³fa³ti²-na³, cˀoa⁴ li²coi³ qui³tsˀai²-nao¹³ xi³ tsa³cˀia⁴.
MAT 25:43 To⁴coi³ nca³ tsi² tsa² tsa³ˀya³xcon³-nao¹³, li²coi³ qui³tsˀai²ˀnte³-nao¹³. Cji³jtia²³, cˀoa⁴ li²coi³ qui³ni²cˀa³cja¹-nao¹³. Ti²mˀen³, cˀoa⁴ ya⁴ nto⁴ya¹ tsa³ca²te⁴jna³, cˀoa⁴ li²coi³ tsa³nquin¹ ni²coi²nta⁴-nao¹³.
MAT 25:44 Cˀia⁴ cˀoa⁴-ti⁴ je² cho⁴ta⁴ nca³scon¹-le⁴ coi⁴tso⁴: Señor, cˀia¹-ni³ tsa³ˀya³-lai²⁴jin⁴ nca³ coan³vao³-li², a³xo⁴ coan³fa³ti²-li², a³xo⁴ tsi² tsa² tsa³ˀya³xcon³-lai²⁴jin⁴, a³xo⁴ qui³so³jna³jti²³, a³xo⁴ ti³mˀain³, a³xo⁴ nto⁴ya¹ tsa³qui³jna³ˀyai³, cˀoa⁴ li²coi³ qui³ni²sin³-lai²⁴jin⁴.
MAT 25:45 Cˀia⁴ coi⁴tso⁴-le⁴: Xi³ cjoa⁴qui²xi⁴ xi³ xin³-no³, cˀia⁴ nca³ tsi² cˀoa⁴qui³ni²cao⁴³ jnco³ xi³ je²-vi⁴ xi³ nqui²sa⁴ na³nqui³ tjio¹, ni⁴ˀan³-jian²³ cˀoa⁴qui³ni²cao⁴-nao¹³.
MAT 25:46 Je²-vi⁴ coai⁴ ya⁴ cjoa⁴ñˀain³ xi³ nca³ntsjai², cˀoa⁴ je² cho⁴ta⁴cjoa⁴qui²xi⁴ ya⁴ coai⁴ cjoa⁴vi³jna³chon³ nca³ntsjai².
MAT 26:1 Cˀia⁴ nca³ je³qui³nchja⁴ nca³yi³je³ je² en¹-vi⁴, Jesús qui³tso²-le⁴ cho⁴ta⁴-le⁴:
MAT 26:2 ˀya³-nio¹³ nca³ ntˀai⁴ jan² ni⁴čhjin³ coan⁴ sˀoi¹ pa²xco⁴, cˀoa⁴ je² ˀnti¹-le⁴ cho⁴ta⁴ cha⁴ni²tˀa³ nca³ sˀe⁴tˀa³ cro².
MAT 26:3 Cˀia⁴ cho⁴ta⁴ti¹tjon²-le⁴ na⁴ˀmi³, cˀoa⁴ cho⁴ta⁴ scribano, cˀoa⁴-ti⁴ cho⁴ta⁴jchi¹nca³-le⁴ na⁴xi⁴na³nta¹ coan³xco¹ ya⁴ nti³tsin³ xi³ tsˀe⁴ na⁴ˀmi³ti¹tjon², xi³ ˀmi² Caifás.
MAT 26:4 Tsa³cjao¹ya³-ni³ nca³ tsoa⁴che¹ Jesús, cˀoa⁴ nca³ si⁴²cˀen³.
MAT 26:5 Cˀoa⁴qui³tso²: A³li² cˀia⁴² ni⁴čhjin³-le⁴ sˀoi¹, jme¹-ni³ nca³ tsi² cjoa⁴si³ sˀe⁴-si¹ni³ i⁴ na⁴xi⁴na³nta¹-vi⁴.
MAT 26:6 Cˀia⁴ nca³ ti¹jna³ Jesús ya⁴ Betania ya⁴ ni³ˀya³-le⁴ Simón, je² xi³ ti¹fi³ˀnto³jon³ yao³-le⁴,
MAT 26:7 ja³ˀai³con²-le⁴ jnco³ chjon⁴² xi³ yˀa³ jnco³ cho⁴tsin¹ xi³ la⁴jao⁴ xi³ na⁴sca¹ cji³, xi³ tjia¹ si²ti⁴ xi³ nˀion¹ chji¹. Tsa³cˀe¹jten⁴son² jco⁴ Jesús, nca³ ti¹jna³tˀa³ ya¹mi²xa⁴.
MAT 26:8 Cˀia⁴ nca³ cho⁴ta⁴-le⁴ tsa³ve³ je²-vi⁴, coan³jti³-le⁴, qui³tso²: A¹-ni³ nca³ qui³si³qui³tson¹-si¹ni³ je²-vi⁴.
MAT 26:9 Coan⁴² nca³ nˀion¹ chji¹ sa⁴te²na³ si²ti⁴-vi⁴ tsa²cai³-ni³, cˀoa⁴ cˀoai⁴-le⁴ taon⁴-ve⁴ cho⁴ta⁴yo⁴ma⁴.
MAT 26:10 Cˀia⁴ nca³ coan³cho⁴ya³-le⁴ Jesús, qui³tso²-le⁴: A¹-ni³ nca³ ni²jti³-si¹ni³lao⁴³ je² chjon⁴²-vi⁴, nca³ na⁴sca¹ tjin¹ xa¹ xi³ ca²si¹cao⁴-na³.
MAT 26:11 Je² cho⁴ta⁴yo⁴ma⁴ tjio¹cao⁴ntsjai²-no³, to⁴nca³ an³ li²coi³ nca³ntsjai² coa²te⁴jna³cao⁴-no³.
MAT 26:12 Cˀia⁴ nca³ je² qui³tsjo³jon³ yao³-na⁴ je² si²ti⁴ xi³ nta³ njen⁴, cˀoa⁴qui³sˀin³ nca³ qui³si³ca¹jna³nta³-na³ nca³ sˀe⁴ñe³.
MAT 26:13 Xi³ cjoa⁴qui²xi⁴ xi³ xin³-no³, to⁴jña³-ni³ nca³qui³jnta² son³ˀnte³ nca³ coi⁴no²cjoa⁴ya³-ni³ je² en¹nta³-vi⁴ xi³ tˀa³tsˀan⁴, cˀoa⁴-ti⁴sˀin² sˀe⁴ en¹ nca³ cˀoa⁴-sˀin² ca²si¹cao⁴-na³, jme¹-ni³ nca³ cjoa⁴ˀai¹tsjen³-ni³le⁴ cho⁴ta⁴ xi³ tˀa³tsˀe⁴.
MAT 26:14 Cˀia⁴ jnco³ xi³ te³jao²-ve⁴ xi³ ˀmi² Judas Iscariote, qui³con³-le⁴ cho⁴ta⁴ti¹tjon²-le⁴ na⁴ˀmi³.
MAT 26:15 Cˀoa⁴qui³tso²-le⁴: Jme¹ xi³ me³-no³ nca³ cˀoai⁴-nao¹³, cˀoa⁴ an³ sca³ni³tˀa³-no³ Jesús. Cˀia⁴ je²-vi⁴ can³te³ taon⁴čhoa³ tsa³cˀe¹chji¹-le⁴.
MAT 26:16 Cˀia⁴ sa³ˀnta³ tsa³ca¹sjai³ jo³-sˀin² nca³ sca⁴ni²tˀa³ Jesús.
MAT 26:17 Je² ti¹tjon² ni⁴čhjin³-le⁴ sˀoi¹ nio⁴xti²la⁴ xi³ tsin²-le⁴ na⁴ˀyo⁴san³-jin², ja³ˀai³con³-le⁴ Jesús je² cho⁴ta⁴-le⁴, qui³tso²-le⁴: Jña¹-ni³ nca³ me³-li² nca³ cˀoe¹ntai³-jin⁴ ˀnte³ xi³ tˀa³tsi⁴ nca³ coi⁴chi³ sˀoi¹ pa²xco⁴.
MAT 26:18 Jesús qui³tso²: Ta⁴nquin¹chon³-lao⁴³ jnco³ cho⁴ta⁴ ya⁴ na⁴xi⁴na³nta¹, cˀoa⁴tˀin²-lao⁴³: Je² Maestro xo⁴tso²: Ni⁴čhjin³-na⁴ je³ti¹jna³čhian³, ya⁴ ni³ˀya³-li⁴ cˀoa³sje³ sˀoi¹ pa²xco⁴ cao⁴ cho⁴ta⁴-na⁴.
MAT 26:19 Cˀoa⁴ cho⁴ta⁴-le⁴ cˀoa⁴qui³sˀin³ jo³-sˀin² nca³ Jesús tsa³cˀe¹ne²-le⁴, cˀoa⁴ ya⁴ tsa³cˀe¹nta³ je² pa²xco⁴-ve⁴.
MAT 26:20 Cˀia⁴ nca³ coan³xon² je² ni⁴čhjin³-vi⁴, Jesús tsa³cˀe²jna³tˀa³ ya¹mi²xa⁴ cao⁴ xi³ te³jao².
MAT 26:21 Cˀia⁴ nca³ tjio¹cjen² qui³tso²: Xi³ cjoa⁴qui²xi⁴ xi³ xin³-no³, nca³ jnco³ xi³ jon² sca⁴ni²tˀa³-na³.
MAT 26:22 Nˀion¹ coan³fao¹-le⁴ cho⁴ta⁴-le⁴, tsa³cˀe¹tsˀia⁴ nca³ jnco¹jnco¹ nca³ qui³tso²-le⁴: A³ an³ nia¹³, Señor.
MAT 26:23 Cˀia⁴ Jesús qui³tso²: Je² xi³ ca³ni¹sˀen³ ntsja³ ya⁴ čhoa⁴ cao⁴ an³, je² xi³ sca⁴ni²tˀa³-na³.
MAT 26:24 Xi³ cjoa⁴qui²xi⁴ je² ˀnti¹-le⁴ cho⁴ta⁴ coai⁴, jo³-sˀin² nca³ tji¹tˀa³ xi³ tˀa³tsˀe⁴. To⁴nca³ ma⁴xo¹ni³ je² cho⁴ta⁴ xi³ sca⁴ni²tˀa³ je² ˀnti¹-le⁴ cho⁴ta⁴. Nqui²sa⁴ nta³-ni¹ tsa² tsi² qui³tsin³ je² cho⁴ta⁴-ve⁴.
MAT 26:25 Cˀia⁴ Judas, je² xi³ qui³sca³ni¹tˀa³ Jesús, qui³tso²: A³ an³ nia¹³, Señor. Jesús qui³tso²-le⁴: Ji³ xi³ cˀoa⁴ca²si³.
MAT 26:26 Cˀia⁴ nca³ tjio¹cjen², Jesús qui³scoe¹ nio⁴xti²la⁴, qui³si³chi³con³tˀain³, qui³si³xcoa⁴, qui³tsjoa³-le⁴ cho⁴ta⁴-le⁴, cˀoa⁴qui³tso²: Chjoao¹³, ti⁴cho³, je²-vi⁴ yao³-na⁴ ni¹.
MAT 26:27 Cˀia⁴ qui³scoe¹ jnco³ cho⁴tsin¹, qui³tsjoa³ cjoa⁴nta³, qui³tsjoa³-le⁴, qui³tso²: Tˀio⁴³ nca³tsˀio³.
MAT 26:28 Je²-vi⁴ njin¹-na⁴ ni¹ xi³ tsˀe⁴ cjoa⁴cho⁴tse⁴ xi³ qui³sˀe³nˀion¹, xi³ xi²jten⁴ xi³ tˀa³tsˀe⁴ xi³ ncjin² cho⁴ta⁴, jme¹-ni³ nca³ cha⁴tˀa³-ni³le⁴ je¹-le⁴.
MAT 26:29 To⁴nca³ an³ xin³-no³, nca³ li²coi³ ti⁴scˀoi⁴-nia³ na³nta¹to³tse⁴²-vi⁴ sa³ˀnta³ cˀia⁴ ni⁴čhjin³-ve⁴ cˀia⁴ nca³ scˀoi⁴ nqui²jnco³cˀa²-nia³ cao⁴ nca³ jon² ya⁴ cjoa⁴te¹xo³ma³-le⁴ Nˀai³-na⁴.
MAT 26:30 Cˀia⁴ nca³ je³qui³se³ tˀa³tsˀe⁴ Ni³na¹, qui³ ya⁴ ni³nto³ Olivos.
MAT 26:31 Cˀia⁴ Jesús qui³tso²-le⁴: Nca³tsˀio³ nca³ jon², cˀoa⁴-sˀin² tsao⁴tˀa³xion²³ xi³ tˀa³tsˀan⁴ coi³ ni⁴tjen⁴-vi⁴, nca⁴ cˀoa⁴-sˀin² tji¹tˀa³: Si³qui²ˀoan³ je² xi³ co³ˀnta³ cho⁴, cˀoa⁴ je² va³rre² xi³ tjio¹jtin¹ tsao⁴ya³.
MAT 26:32 To⁴nca³ scan³-ni³ nca³ cjoa⁴ˀa¹ya³-na³, cjoi¹ti¹tjon²-no³ ya⁴ ˀnta³ na³nqui³ Galilea.
MAT 26:33 Cˀia⁴ Pedro qui³tso²-le⁴: Nta³ tsa² cˀoa⁴-sˀin² tsao⁴tˀa³xin² nca³tsˀi³ xi³ tˀa³tsi⁴, an³ ni⁴cˀia⁴-jin² sca⁴tˀa³xian²³.
MAT 26:34 Jesús qui³tso²-le⁴: Xi³ cjoa⁴qui²xi⁴ xi³ xin³-le²³, nca³ coi³ ni⁴tjen⁴-vi⁴ to⁴nqui³-ni³ nca³ squi¹ˀnta¹ cha¹xi³cha¹, jan² cˀa³ coi⁴jna³ˀma³cao⁴-nai¹³.
MAT 26:35 Pedro qui³tso²-le⁴: Nta³ tsa² ma³chjen¹ nca³ coi³ya²cao⁴-le²³, li²coi³ coa²te⁴jna³ˀma³cao⁴-le²³. Cˀoa⁴ cho⁴ta⁴-le⁴ ti⁴cˀoa⁴qui³tso²-ni³ nca³tsˀi³.
MAT 26:36 Cˀia⁴ ji³cho² Jesús cao⁴ cho⁴ta⁴-le⁴ ya⁴ ˀnte³ jña³ nca³ Getsemaní ˀmi². Jesús qui³tso²-le⁴ cho⁴ta⁴-le⁴: Ti⁴yo³ i⁴-vi⁴ sa³ˀnta³ nca³ cjoia¹³ ya⁴-ve⁴, cˀoa⁴ cˀoe³tsˀoa²³.
MAT 26:37 Qui³cao⁴ Pedro, cao⁴ jao² xti³-le⁴ Zebedeo, tsa³cˀe¹tsˀia⁴ nca³ nˀion¹ coan³fao¹-le⁴, cˀoa⁴ nca³ nˀion¹ qui³si³cjao¹jin³.
MAT 26:38 Cˀia⁴ Jesús qui³tso²-le⁴: Nˀion¹ fao¹-le⁴ ni⁴ma⁴-na⁴ sa³ˀnta³ cjoa⁴vi³ya³. Ti⁴yo³ i⁴-vi⁴, cˀoa⁴ ti⁴yo³chon³ˀnta³cao⁴-nao¹³.
MAT 26:39 Jesús qui³ti¹tjon² i⁴tse¹-sa³ tsa³ca²jna³tsa³cjan² tˀa³na³nqui³, tsa³cˀe¹tsˀoa³ qui³tso²: Nˀai³-na⁴, tsa² coan⁴-ni³ cha³ˀa²xin²-nai¹³ je² cjoa⁴ñˀain³-vi⁴, to⁴nca³ li²coi³ jo³-sˀin² nca³ me³-na³, to⁴jo³-sˀin² nca³ me³-li² nca³ ji³.
MAT 26:40 Cˀia⁴ ja³ˀai³con³-le⁴ cho⁴ta⁴-le⁴, coan³sjai³-le⁴ nca³ cjio³fe², cˀoa⁴ qui³tso²-le⁴ Pedro: A³ tsi² tsa² ma³ nca³ ca²vi³yo³chon³cao⁴-nao¹³ jnco³ hora.
MAT 26:41 Ti⁴yo³chon³ˀntao³, cˀoa⁴ tˀe²tsˀoao³, jme¹-ni³ nca³ tsi² tsao⁴jin³-si¹nio³ je¹ cˀia⁴ nca³ chˀao³ si⁴²cao⁴-no³. Je² espíritu-na¹ ti¹jna³nta³, to⁴nca³ je² yao³-na¹ tsin²-le⁴ nca³nˀion¹-jin².
MAT 26:42 Qui³ nqui²jnco³ cˀa², xi³ ma³jao²-ni³ cˀa², tsa³cˀe¹tsˀoa³ qui³tso²: Nˀai³-na⁴, tsa² tsi² tsa² coan⁴ nca³ tjo¹xin²-na³ je² cjoa⁴ñˀain³-vi⁴, tsa² tsi² tsa² an³ scˀoia⁴, cˀoa⁴ ca²ta³sˀe³jo³-sˀin² nca³ me³-li².
MAT 26:43 Ti⁴ja³ˀai³-nca¹ni³, coan³sjai³-le⁴ nca³ cjio³fe² nca⁴ xcon⁴ qui³sˀe³chjoa²ntso¹.
MAT 26:44 Qui³si³ca³tio¹ qui³ nqui²jnco³ cˀa², cˀoa⁴ tsa³cˀe¹tsˀoa³ xi³ ma³jan²-ni³ cˀa², qui³tso²-nca¹ni³ ti⁴coi³-ni³ en¹.
MAT 26:45 Cˀia⁴ ja³ˀai³con³-le⁴ cho⁴ta⁴-le⁴, cˀoa⁴ qui³tso²-le⁴: Sa¹yo³fao²³ tso²cˀoa⁴, cˀoa⁴ ti⁴cja¹yao³. Coe⁴-ni³ je³ca²fi³cho² hora, cˀoa⁴ je² ˀnti¹-le⁴ cho⁴ta⁴ cha⁴ni²tˀa³-le⁴ ntsja³ cho⁴ta⁴tsˀen⁴.
MAT 26:46 Ti⁴so¹tjaon⁴³, tjian¹. Coe⁴-ni³ je³ti¹jna³čhian³ xi³ sca⁴ni²tˀa³-na³.
MAT 26:47 Cˀia⁴ nca³ to⁴jo³ ti¹nchja⁴-sa³ Jesús, coe⁴-ni³ ja³ˀai³ Judas, jnco³ xi³ te³jao²-ve⁴, cao⁴ cho⁴ta⁴ncjin² xi³ yˀa³ qui⁴cha⁴, yˀa³ ya¹. Ja³ˀai³-ni³ xi³ tˀa³tsˀe⁴ cho⁴ta⁴ti¹tjon²-le⁴ na⁴ˀmi³, cˀoa⁴ xi³ tˀa³tsˀe⁴ cho⁴ta⁴jchi¹nca³-le⁴ na⁴xi⁴na³nta¹.
MAT 26:48 Judas xi³ tsa³cˀe¹tˀain³ na⁴jmi¹ xi³ tˀa³tsˀe⁴ Jesús, cˀoa⁴-sˀin² qui³tsjoa³-le⁴ choa⁴ cho⁴ta⁴, qui³tso²: Je² xi³ an³ cˀoe³ntso³ˀa²³, je² ni¹-ve⁴, ti⁴ntoao⁴³.
MAT 26:49 Nti⁴ton⁴ nca³ ji³cho²con³-le⁴ Jesús, qui³tso²: Ti²ˀnta³-li² Maestro. Cˀoa⁴ tsa³cˀe¹ntso⁴ˀa³.
MAT 26:50 Cˀia⁴ Jesús qui³tso²-le⁴: Mi²yo⁴, cˀoa⁴tˀiain⁴ jme³ xa¹ ca²nčhoa¹-ni³. Cˀia⁴ ja³ˀai³ cho⁴ta⁴, qui³tsoa³nˀion¹-ni³ ntsja³ Jesús.
MAT 26:51 Jnco³ xi³ ti¹jna³cao⁴ Jesús tsa³cjen¹ ntsja³, tsa³cˀa³sje³ qui⁴cha⁴-le⁴, tsa³ca¹-le⁴ jnco³ cho⁴ˀnta³-le⁴ na⁴ˀmi³ti¹tjon², cˀoa⁴ tsa³ca³te³tˀa³ xo⁴ño³.
MAT 26:52 Cˀia⁴ Jesús qui³tso²-le⁴: Cha⁴ni²sˀain³ qui⁴cha⁴-li⁴ ya⁴³čhjoa⁴-le⁴, nca⁴ nca³tsˀi³ xi³ scoe¹ qui⁴cha⁴, qui⁴cha⁴ coi⁴ya³-ni³.
MAT 26:53 A³ ni²cja³ˀai³tsjen³-nio¹³ nca³ tsi² tsa² coan⁴-na³ cˀoe³tsˀoa²³-le⁴ Nˀai³-na⁴, cˀoa⁴ je² tsjoa¹-na³ xi³ nqui²sa⁴ tsˀa³to³ cao⁴-ni³ tsa² te³jao² jmi³ a²ncje⁴-le⁴.
MAT 26:54 Jo¹-sˀin² coan⁴-ni³ nca³ coan⁴jnco³-ni³ jo³ tso² xon⁴ Escrituras, nca⁴ cˀoa⁴²-sˀin² ma³chjen¹ nca³ cˀoa⁴coan⁴.
MAT 26:55 Cˀia⁴ hora-ve⁴ Jesús qui³tso²-le⁴ cho⁴ta⁴ncjin²: A³ jo³ni³ che¹ ca²vi²tjo⁴³-nio³ cao⁴ qui⁴cha⁴ cao⁴ ya¹, nca³ coi⁴ntoa⁴-nao¹³. Nchaon³nchaon³ tsa³ca²te⁴jna³cao⁴-no³ nca³ tsa³ca³co³ya²³ ya⁴³yo⁴nco⁴, cˀoa⁴ li²coi³ qui³ntoa³-nao¹³.
MAT 26:56 To⁴nca³ nca³yi³je³ je²-vi⁴ cˀoa⁴coan³, jme¹-ni³ coan⁴jnco³-si¹ni³ jo³ tso² xon⁴ Escrituras xi³ qui³squi³ cho⁴ta⁴ xi³ qui³nchja⁴ya³ tˀa³tsˀe⁴ Ni³na¹. Cˀia⁴ nca³tsˀi³ cho⁴ta⁴-le⁴ tsa³nca³ qui³tsjion³con³ Jesús.
MAT 26:57 Cˀia⁴ je² xi³ qui³tsoa³ Jesús, qui³cao⁴-le⁴ Caifás xi³ na⁴ˀmi³ti¹tjon², jña³ nca³ tjio¹xco¹ cho⁴ta⁴ scribano cao⁴ cho⁴ta⁴jchi¹nca³.
MAT 26:58 To⁴nca³ Pedro cjin³cjin³ qui³ co³tsen³tjen⁴nqui³-le⁴, sa³ˀnta³ nca³ ji³cho² nti³tsin³-le⁴ na⁴ˀmi³ti¹tjon². Ja³ˀa³sˀen³, cˀoa⁴-sˀin² tsa³cˀe²jna³cao⁴ cho⁴ˀnta³-ve⁴ nca³ scoe⁴ jo³-sˀin² cjoe⁴tˀa³ cjoa⁴.
MAT 26:59 Cˀia⁴ je² cho⁴ta⁴ti¹tjon²-le⁴ na⁴ˀmi³, cao⁴ cho⁴ta⁴jchi¹nca³, cao⁴ nca³tsˀi³ xi³ xa¹ tjio¹xco¹-ni³, tsa³ca¹sjai³ en¹ xi³ coai⁴ne²-ni³le⁴ Jesús, jme¹-ni³ nca³ si⁴²cˀen³-si¹ni³.
MAT 26:60 Cˀoa⁴ li²jme³ xi³ coan³sjai³-le⁴, nta³ tsa² cˀoa⁴-sˀin² ncjin² cho⁴ta⁴nti³so³ xi³ ji³cho² tsjoa¹ en¹. Xi³ je³tˀa³-ni³, ja³ˀai³ jao² cho⁴ta⁴nti³so³,
MAT 26:61 xi³ qui³tso²: Je²-vi⁴ qui³tso²: Coan⁴-na³ si³qui³xo²ya² je² yo⁴nco⁴-le⁴ Ni³na¹, cˀoa⁴ nca³ jan² ni⁴čhjin³ cˀoe³nta³ya³ nqui²ntia³.
MAT 26:62 Tsa³ca³sen²nto³ na⁴ˀmi³ti¹tjon², qui³tso²-le⁴ Jesús: A³ tsi² jme³ xi³ coi⁴no²cjoai⁴. Jme¹ en¹ xi³ tjio¹tsjoa¹ je²-vi⁴ co²ntran⁴ tsi⁴.
MAT 26:63 To⁴nca³ Jesús jyo¹ tsa³cˀe²jna³. Qui³nchja⁴ je² na⁴ˀmi³ti¹tjon², qui³tso²-le⁴: Vˀe³ne²³-le²³ xi³ tˀa³tsˀe⁴ Ni³na¹ xi³ ti¹jna³con³ nca³ cˀoa⁴tˀin²-na³jin⁴ tsa² ji³ ni¹³ je² Cristo, ˀnti¹-le⁴ Ni³na¹.
MAT 26:64 Jesús qui³tso²-le⁴: Ji³ xi³ cˀoa⁴ca²si³. To⁴nca³ an³ xin³-no³, nca³ sa³ˀnta³ ntˀai⁴-vi⁴, cˀoa⁴ xi³ fi²-sa³ni³ jchao⁴³ je² ˀnti¹-le⁴ cho⁴ta⁴ nca³ ti¹jna³ nca³qui²xi⁴-le⁴ nca³nˀion¹-le⁴ Ni³na¹, cˀoa⁴ nca³ cjoa⁴ˀai¹jin³-ni³ yo³jvi³ ya⁴ ncˀa³jmi³.
MAT 26:65 Cˀia⁴ je² na⁴ˀmi³ti¹tjon² tsa³cˀe¹jnta³ na³jño³-le⁴, qui³tso²: Ca²nchja⁴ˀaon³-le⁴ Ni³na¹, jme¹-sa³ testigo xi³ ma³chjen¹-na¹. Coe⁴-ni³ ntˀai⁴ je³ca²no²ˀyao²³ nca³ ca²nchja⁴ˀaon³-le⁴ Ni³na¹.
MAT 26:66 Jo¹ vi³xon¹³. Cˀia⁴ qui³nchja⁴ cho⁴ta⁴-ve⁴: Va³quin²-le⁴ cjoa⁴vi³ya³.
MAT 26:67 Cˀia⁴ tsa³cˀe¹čha¹ˀa³ ncjain¹, cˀoa⁴ xo⁴nco⁴ tsa³cˀe¹-le⁴, cˀoa⁴ xi³cˀa³ qui³si³jtsin³ˀa³ ncjain¹.
MAT 26:68 Qui³tso²: Cˀoa⁴tˀin²-na³jin⁴ ji³, Cristo, ˀya¹-ni³ xi³ cˀoa⁴-sˀin² ca²si¹qui²ˀaon³-li².
MAT 26:69 Pedro ti¹jna³ ya⁴ nti³tsin³. Ji³cho²con³-le⁴ jnco³ chjon⁴² cho⁴ˀnta³ xi³ qui³tso²: Cˀoa⁴-ti⁴ ji³ to⁴jnco³ tsa³qui³jna³coai⁴ Jesús, je² cho⁴ta⁴ galileo.
MAT 26:70 Cˀoa⁴ je² tsa³cˀe²jna³ˀma³ nqui³xcon⁴ nca³tsˀi³, qui³tso²: Li²coi³ ˀve³ jme³ xi³ si³.
MAT 26:71 Cˀia⁴ Pedro ji³tjo³ ca³sen²jčho³ xo⁴ntjoa⁴, nqui²jnco³ chjon⁴² cho⁴ˀnta³ tsa³ve³ Pedro, cˀoa⁴ qui³tso²-le⁴ je² xi³ cˀoa⁴-ti⁴ ya⁴ tjio¹: Cˀoa⁴-ti⁴ je²-vi⁴ to⁴jnco³ tsa³cˀe²jna³cao⁴ Jesús, je² cho⁴ta⁴ nazareno.
MAT 26:72 Cˀoa⁴ nqui²jnco³ cˀa² tsa³cˀe²jna³ˀma³ Pedro, qui³tsoa³nˀion¹ en¹-le⁴: Li²coi³ ˀve³xcoan³ je² xˀin⁴-ve⁴.
MAT 26:73 Cˀoa⁴ coan³scan³ i⁴tse¹-ni³ ji³cho² je² xi³ cˀoa⁴-sˀin² tsa³ca³tio², cˀoa⁴qui³tso²-le⁴ Pedro: Xi³ ña³qui³ cjoa⁴qui²xi⁴, cˀoa⁴-ti⁴ ji³ ni¹ cho⁴ta⁴-le⁴ Jesús, nca⁴ je² en¹-li⁴ va³co¹son²tsen³-li².
MAT 26:74 Cˀia⁴ tsa³cˀe¹tsˀia⁴ nca³ qui³tso²: Ni³na¹ ca²ta³tsjoa¹-na³ cjoa⁴ñˀain³ tsa² tsi² cˀoa⁴tjin¹ en¹-na⁴. Ña³qui³ qui³tsjoa³ en¹-le⁴: Li²coi³ ˀve³xcoan³ je² xˀin⁴-ve⁴. Ti⁴ˀa³ cˀia⁴-ni³ cha¹xi³cha¹ qui³squi³ˀnta¹.
MAT 26:75 Cˀia⁴ Pedro ja³ˀai³tsjen³-le⁴ je² en¹-le⁴ Jesús jo³ qui³tso²-le⁴: To⁴nqui³-ni³ nca³ squi¹ˀnta¹ cha¹xi³cha¹, jan² cˀa³ coi⁴jna³ˀma³cao⁴-nai¹³. Cˀia⁴ ji³tjo³ Pedro nti³tsin³, a³li² to⁴cˀoa⁴²cji³ aon³ coan³-le⁴.
MAT 27:1 Cˀia⁴ nca³ qui³sˀe³sen¹, nca³tsˀi³ cho⁴ta⁴ti¹tjon²-le⁴ na⁴ˀmi³, cao⁴ cho⁴ta⁴jchi¹nca³-le⁴ na⁴xi⁴na³nta¹ tsa³cjao¹ya³-ni³ nca³ co²ntran⁴ qui³-le⁴ Jesús, jme¹-ni³ nca³ si⁴²cˀen³-si¹ni³.
MAT 27:2 Tji¹tˀa³nˀion¹ qui³cao⁴, qui³sca³ni¹tˀa³-le⁴ Poncio Pilato, je² gobernador.
MAT 27:3 Judas, je² xi³ tsa³cˀe¹tˀain³ na⁴jmi¹ xi³ tˀa³tsˀe⁴ Jesús, qui³si³cˀa³ntjai²ya³ cjoa⁴fa³ˀai³tsjen³-le⁴ cˀia⁴ nca³ tsa³ve³ nca³ cji³ne²-le⁴ cjoa⁴ñˀain³ Jesús. Qui³tsjoa³-ni³le⁴ cho⁴ta⁴ti¹tjon²-le⁴ na⁴ˀmi³ cao⁴ cho⁴ta⁴jchi¹nca³ je² xi³ can³te³ taon⁴čhoa³-ve⁴.
MAT 27:4 Qui³tso²: An³ tsa³jnquia³ je¹, nca⁴ qui³sca³ni³tˀa³ njin¹-le⁴ cho⁴ta⁴ xi³ tsi²jme³ je¹ tjin¹-le⁴. To⁴nca³ je² qui³tso²: Jme¹ xi³ ˀyai³⁴-jin⁴ nca³ jin⁴-jin⁴, ji³ xi³ ˀyai³.
MAT 27:5 Cˀia⁴ Judas tsa³cˀe¹tsao³ taon⁴-ve⁴ ya⁴³yo⁴nco⁴, ji³tjo³. Qui³ si¹xi²jnto³ yao³-le⁴.
MAT 27:6 Je² cho⁴ta⁴ti¹tjon²-le⁴ na⁴ˀmi³ qui³scoe¹ taon⁴-ve⁴, cˀoa⁴qui³tso²: Li²coi³ tjo³ˀnte³ nca³ si⁴jnco³tˀa³-le⁴² taon⁴ xi³ tjia¹ ca²xa⁴, nca⁴ chji¹-le⁴ njin¹ ni¹.
MAT 27:7 Cˀia⁴ nca³ tsa³cjao¹ya³-ni³, cao⁴ coi³ tsa³ca³tse³-ni³ nqui³chao³-le⁴ je² xi³ si¹nta³ ti⁴², jme¹-ni³ nca³ ya⁴ cˀoe⁴²ñai³si¹ni³ cho⁴ta⁴ xi³ tsi² tsa² i⁴ tsˀe⁴.
MAT 27:8 Xi³ coi³ cjoa⁴-vi⁴, sa³ˀnta³ ntˀai⁴, nqui³chao³-le⁴ njin¹ ˀmi².
MAT 27:9 Cˀia⁴ coan³jnco³ je² xi³ cˀoa⁴qui³tso² Ni³na¹ xi³ to⁴tˀa³tsˀe⁴ Jeremías xi³ qui³nchja⁴ya³: Qui³scoe¹ je² can³te³ taon⁴čhoa³-ve⁴, chji¹-le⁴ xi³ qui³sˀe³nta³tˀain³, xi³ je² xi³cˀa³ cho⁴ta⁴ Israel tsa³cˀe¹nta³ne².
MAT 27:10 Cˀoa⁴ qui³tsjoa³ taon⁴-ve⁴ xi³ tˀa³tsˀe⁴ nqui³chao³-le⁴ je² xi³ si¹nta³ ti⁴², jo³-sˀin² tsa³cˀe¹ne²-na³ je² Nai³-na¹.
MAT 27:11 Jesús tsa³cˀe²jna³ nqui³xcon⁴ gobernador. Je² gobernador qui³sco²na³nqui³-le⁴: A³ ji³ ni¹³ cho⁴ta⁴ti¹tjon²-le⁴ cho⁴ta⁴ judíos. Jesús quit³tso²-le⁴: Cˀoa⁴tjin¹ xi³ si³-ve⁴.
MAT 27:12 Je² cho⁴ta⁴ti¹tjon²-le⁴ na⁴ˀmi³ cao⁴ cho⁴ta⁴jchi¹nca³ tsa³ca¹nqui³ Jesús, to⁴nca³ ni⁴jme³-jin² xi³ qui³nchja⁴.
MAT 27:13 Cˀia⁴ Pilato qui³tso²-le⁴: A³ tsi² no²ˀyai²³, jo³ tjin¹ cjoa⁴ tjio¹tso² co²ntran⁴-li².
MAT 27:14 Cˀoa⁴ ni⁴jme³-jin² en¹ qui³nchja⁴ Jesús. Jo¹ to⁴coan³xcon¹-le⁴ gobernador.
MAT 27:15 Cˀia⁴ nca³ sˀoi¹je³, je² gobernador cˀoa⁴-sˀin² coan³nca³-le⁴ nca³ si¹cˀe¹jna³ntai¹-le⁴ na⁴xi⁴na³nta¹ jnco³ preso, to⁴jña³-le⁴ xi³ na⁴xi⁴na³nta¹ me³-le⁴.
MAT 27:16 Cˀia⁴ ti¹jna³ jnco³ preso xi³ nˀion¹ cji³xqui⁴-le⁴, xi³ ˀmi² Barrabás.
MAT 27:17 Cˀia⁴ nca³ coan³xco¹ nca³ je², Pilato qui³tso²-le⁴: Jña¹-le⁴ xi³ me³-no³ nca³ si³cˀe¹jna³ntai¹-no³. A³ Barrabás, a³xo⁴ Jesús xi³ ˀmi² Cristo.
MAT 27:18 Nca⁴ tjin¹jin³-le⁴ Pilato nca³ to⁴cjoa⁴xin²ta³con² qui³sca³ni¹tˀa³-le⁴ Jesús.
MAT 27:19 Cˀia⁴ nca³ Pilato ti¹jna³son² ya¹xi²le⁴-le⁴, je² chjon⁴²-le⁴ qui³si³ca³sen¹-le⁴ en¹, qui³tso²: A³li²jme³ xi³ vˀa³cao⁴-li² cao⁴ je² cho⁴ta⁴cjoa⁴qui²xi⁴-ve⁴, nca³ ntˀai⁴-vi⁴ tse³ cjoa⁴ñˀain³ ti²fa³ˀa³ya³ ni³jña¹-na⁴ xi³ tˀa³tsˀe⁴ nca³ je².
MAT 27:20 To⁴nca³ je² cho⁴ta⁴ti¹tjon²-le⁴ na⁴ˀmi³, cao⁴ cho⁴ta⁴jchi¹nca³ tsa³cˀe¹sjoe²-le⁴ na⁴xi⁴na³nta¹, jme¹-ni³ nca³ si⁴²je¹-ni³ Barrabás, cˀoa⁴ nca³ Jesús si⁴²cˀen³-si¹ni³.
MAT 27:21 Je² gobernador qui³tso²-le⁴: Jña¹-le⁴ nca³ jao²-ve⁴ me³-no³ nca³ si³cˀe¹jna³ntai¹-no³. Cˀoa⁴ je² qui³tso²: Barrabás.
MAT 27:22 Pilato qui³tso²-le⁴: Jme¹-ni³ tso²cˀoa⁴ xi³ sˀian³ cao⁴ Jesús xi³ ˀmi² Cristo. Qui³tso²-le⁴: Ca²ta³sˀe³tˀa³ cro².
MAT 27:23 Je² gobernador qui³tso²-le⁴: Jme¹ cjoa⁴tsˀen⁴ xi³ qui³sˀin³-ˀni³. To⁴nca³ je² qui³squi³ˀntia¹-sa³: Ca²ta³sˀe³tˀa³ cro².
MAT 27:24 Cˀia⁴ nca³ tsa³ve³ Pilato nca³ tsi² tsa² jme³ xi³ coan³ qui³sˀin³, to⁴nca³ nqui²sa⁴-sa³ tse³ cjoa⁴si³ coai⁴tsˀia³, qui³scoe¹ na³nta¹ tsa³ca³ne¹jon³ ntsja³ nqui³xcon⁴ cho⁴ta⁴ncjin², qui³tso²: A³li²jme³ je¹ tjin¹-na³ xi³ tˀa³tsˀe⁴ njin¹-le⁴ je² cho⁴ta⁴cjoa⁴qui²xi⁴-vi⁴. Jon² xi³ ˀyao³.
MAT 27:25 Nca³tsˀi³ cho⁴ta⁴na⁴xi⁴na³nta¹ qui³tso²: Je² njin¹-le⁴ ca²ta³sˀe³ne²-na³jin⁴ nca³ jin⁴, cao⁴ xti³-na⁴jin⁴.
MAT 27:26 Cˀia⁴ qui³si³cˀe¹jna³ntai¹-le⁴ Barrabás, cˀoa⁴ nca³ je³tsa³ca¹-le⁴ Jesús, qui³sca³ni¹tˀa³, jme¹-ni³ nca³ sˀe⁴tˀa³-si¹ni³ cro².
MAT 27:27 Cˀia⁴ je² so³nta²do⁴-le⁴ gobernador qui³cao⁴ Jesús ya⁴ ˀnte³-le⁴ cho⁴ta⁴xa¹ti¹tjon², cˀoa⁴ coan³jtin¹ntai³-le⁴ nca³tsˀi³ so³nta²do⁴.
MAT 27:28 Tsa³cˀa³sje³xin²-le⁴ na³jño³-le⁴, qui³si³cˀa³cja¹ jnco³ na³jño³jnčho³ xi³ ni² cji³ xi³ tsˀe⁴ so³nta²do⁴.
MAT 27:29 Qui³si³cˀe¹jna³son² jco⁴ jnco³ coronana³ˀya¹, cˀoa⁴ jnco³ ya¹ni³se³ ja⁴ya³ ntsja³ nca³qui²xi⁴. Tsa³qui³ncha³xco¹nchˀin³ nqui³xcon⁴ nca³ je², to⁴tsa³qui³jno²que³, qui³tso²: Ti²ˀnta³-li², cho⁴ta⁴ti¹tjon²-le⁴ cho⁴ta⁴ judíos.
MAT 27:30 Tsa³cˀe¹čha¹jon³, qui³scoe¹ ya¹ni³se³-le⁴, cˀoa⁴ tsa³ca¹-le⁴ jco⁴.
MAT 27:31 Cˀia⁴ nca³ je³qui³si³tsjoa³tˀain³, tsa³cˀa³sje³xin²-le⁴ je² na³jño³jnčho³-le⁴ so³nta²do⁴, cˀoa⁴ qui³si³cˀa³cja¹ xi³ tsˀe⁴, cˀia⁴ qui³cao⁴ nca³ coa⁴tˀa³ cro².
MAT 27:32 Cˀia⁴ nca³ ji³tjo³, qui³sa³te³cjao³ jnco³ cho⁴ta⁴ cireneo xi³ Simón ˀmi², je² qui³ni²cˀa³ncˀa³ cjoa⁴nˀion¹, jme¹-ni³ nca³ cˀoa⁴-si¹ni³ cro²-le⁴ Jesús.
MAT 27:33 Cˀia⁴ nca³ ji³cho² ˀnte³ jña³ nca³ Gólgota ˀmi², xi³ tso²-ni³ ˀnte³jco⁴cˀen³,
MAT 27:34 qui³tsjoa³-le⁴ vinagre xi³ ti¹tsˀo¹jin³-le⁴ xqui³sja³. Cˀia⁴ nca³ qui³sco²tˀa³, li²coi³ qui³tsˀi³.
MAT 27:35 Coan³scan³-ni³ nca³ je³tsa³ca¹tˀa³ cro², qui³si³sca¹-ni³ na³jño³-le⁴ nca³ qui³si³cˀa³vi¹-le⁴ xi¹ncjin¹. Cˀoa⁴-sˀin² coan³jnco³ je² xi³ cˀoa⁴qui³tso² cho⁴ta⁴ xi³ qui³nchja⁴ya³ tˀa³tsˀe⁴ Ni³na¹: Qui³si³cˀa³vi¹-le⁴ xi¹ncjin¹ na³jño³-na⁴, cˀoa⁴ tˀa³tsˀe⁴ na³jño³-na⁴ qui³si³sca¹-ni³.
MAT 27:36 Cˀia⁴ tsa³ca³tio², ya⁴ qui³si³coi²nta⁴ Jesús.
MAT 27:37 Cˀoa⁴ son² jco⁴ tsa³cˀe¹tˀa³ cjoa⁴-le⁴ xi³ tsa³ca¹nqui³ tˀa³tsˀe⁴: Je²-vi⁴ Jesús cho⁴ta⁴ti¹tjon²-le⁴ cho⁴ta⁴ judíos.
MAT 27:38 Cˀia⁴ cˀoa⁴-ti⁴ tsa³ca¹tˀa³ cro² jao² cho⁴ta⁴che¹, xi³ tsa³qui³ncha¹ jnco³ nca³qui²xi⁴-le⁴, cˀoa⁴ xi³jnco³ nca³scon¹-le⁴.
MAT 27:39 Cˀia⁴ je² xi³ tjio¹fa³ˀa³to³ qui³nchja⁴ˀaon³-le⁴, jo³ nca³ tsa³cˀe¹jco⁴ qui³sˀin³.
MAT 27:40 Cˀoa⁴qui³tso²: Ji³ xi³ qui³si³ nca³ si⁴qui³xo²jain³ je² yo⁴nco⁴, cˀoa⁴ nca³ jan² ni⁴čhjin³ cˀoe¹nta³-ni³, chˀa⁴sje³ntjai²³ yao³-li⁴. Tsa² ji³ xi³ ˀnti¹-le⁴ Ni³na¹, ti²tjo⁴jen³-lai⁴ cro²-ve⁴.
MAT 27:41 Cˀoa⁴-ti⁴ cho⁴ta⁴ti¹tjon²-le⁴ na⁴ˀmi³ cao⁴ cho⁴ta⁴ scribano, cao⁴ cho⁴ta⁴ fariseos, cao⁴ cho⁴ta⁴jchi¹nca³ cˀoi⁴-sˀin² qui³tsjoa³tˀain³, qui³tso²:
MAT 27:42 Tsa³cˀa³sje³ntjai² xi³ cja⁴ˀai¹, to⁴nca³ li²coi³ ma³-le⁴ nca³ vˀa³sje³ntjai²-ni³ yao³-le⁴. Tsa² je² ni¹ xi³ cho⁴ta⁴ti¹tjon²-le⁴ Israel, ca²ta³vi³tjo³jen³tˀa³-ni³ cro²-ve⁴ ntˀai⁴-vi⁴, cˀia⁴ coan⁴cjain¹-na¹ xi³ tˀa³tsˀe⁴.
MAT 27:43 Je² coan³cjain¹-le⁴ xi³ tˀa³tsˀe⁴ Ni³na¹, ca²ta³vˀa³sje³ntjai²-ni³le⁴ ntˀai⁴-vi⁴, tsa² tsjoa³que³, nca⁴ cˀoa⁴qui³tso²: An³ nia¹³ ˀnti¹-le⁴ Ni³na¹.
MAT 27:44 Cˀoa⁴-ti⁴sˀin²ni³ je² cho⁴ta⁴che¹-ve⁴ xi³ ya⁴ to⁴jnco³ tjen⁴vˀa³tˀa³ cro², qui³nchja⁴ti³cao⁴ Jesús.
MAT 27:45 Cˀia⁴ nca³ ji³cho²ca³ nchi³sen³ coan³njion² nca³qui³jnta² son³ˀnte³, sa³ˀnta³ las tres nca³ ma³xon².
MAT 27:46 Cˀia⁴ nca³ ja⁴me³ las tres nca³ ma³xon², Jesús nˀion¹ qui³nchja⁴: Elí, Elí, lama sabactani, xi³ tso²-ni³: Ni³na¹-na⁴, Ni³na¹-na⁴, a¹-ni³ nca³ ti³njion³ta³con²-si¹ni³nai¹³.
MAT 27:47 Qui³nčhˀoe¹-le⁴ cˀa³ xi³ ya⁴ tjio¹, qui³tso²: Je²-vi⁴ nchja⁴-le⁴ Elías.
MAT 27:48 Qui³to²ca³ nti⁴ton⁴ jnco³ xi³ ya⁴ ti¹jna³, qui³scoe¹ tsa⁴nca⁴, qui³si³ca³ˀnchi⁴-ni³ vinagre, cˀoa⁴ qui³si³cˀe¹jna³jco³ ya¹na⁴xo⁴, qui³si³cˀi³.
MAT 27:49 To⁴nca³ xi³cˀa³ qui³tso²: Ca²ta³vˀe², cho¹tsen³-le⁴² tsa² cjoa⁴ˀai¹ Elías nca³ cˀoa⁴sje³ntjai² nca³ je².
MAT 27:50 Cˀia⁴ Jesús, cˀia⁴ nca³ je³qui³squi³ˀntia¹ nqui²jnco³cˀa², qui³cha³jta³.
MAT 27:51 Coe⁴-ni³ je² na³jño³ xi³ qui³tjen⁴chjoa² ya⁴ya³ yo⁴nco⁴, coan³va³sen³ya³. Cˀoa⁴ ja³ˀa³ chaon¹, cˀoa⁴ coan³jao²ya³ la⁴jao⁴.
MAT 27:52 Qui³tjo³ˀai² tsjo¹cˀen³, cˀoa⁴ ncjin² yao³-le⁴ cho⁴ta⁴-le⁴ Cristo xi³ tsa³cja³yo³fe² qui³ni²qui³so¹tjen⁴.
MAT 27:53 Ji³tjo³-ni³ tsjo¹-le⁴ coan³scan³-ni³ nca³ ja³ˀa¹ya³-ni³le⁴ Jesús, ja³ˀa³sˀen³ ya⁴ na⁴xi⁴na³nta¹ tsje³, cˀoa⁴ ncjin² xi³ ya⁴ coan³tsen³-le⁴ nca³ je².
MAT 27:54 Je² nca³jco⁴-le⁴ so³nta²do⁴ cao⁴ je² xi³ tjio¹cao⁴, xi³ tjio¹si¹coi²nta⁴ Jesús, nˀion¹ qui³tsa³cjon¹-le⁴ cˀia⁴ nca³ tsa³ve³ chaon¹-ve⁴, cˀoa⁴ je² cjoa⁴ xi³ coan³, qui³tso²: Xi³ ña³qui³ cjoa⁴qui²xi⁴ je² ni¹ ˀnti¹-le⁴ Ni³na¹ ni¹.
MAT 27:55 Cˀoa⁴ ncjin² ya¹nchjin¹ xi³ ya⁴ tjio¹, xi³ cjin³ tjio¹co³tsen³-ni³, xi³ ji³nčhoa³tjen⁴nqui³-ni³le⁴ Jesús ya⁴ Galilea, nca³ qui³si³sin³-le⁴.
MAT 27:56 Jin³-le⁴ nca³ je² tjio¹ María Magdalena, María na⁴-le⁴ Jacobo cao⁴ José, cˀoa⁴ na⁴-le⁴ xti³-le⁴ Zebedeo.
MAT 27:57 Cˀia⁴ nca³ coan³xon² je² ni⁴čhjin³-ve⁴ ja³ˀai³ jnco³ cho⁴ta⁴ xi³ nchi⁴na¹, xi³ Arimatea tsˀe⁴, xi³ José ˀmi², xi³ cˀoa⁴ti⁴ cho⁴ta⁴-le⁴ Jesús coan³.
MAT 27:58 Je²-vi⁴ ji³cho²con³-le⁴ Pilato, cˀoa⁴ qui³si³je¹ yao³-le⁴ Jesús. Cˀia⁴ Pilato tsa³ca³te¹xo³ma³ nca³ ca²ta³vˀai²-le⁴.
MAT 27:59 Cˀia⁴ José qui³scoe¹ yao³-le⁴ Jesús, qui³si³ca¹jte¹jin³ jnco³ sábana xi³ tsje³.
MAT 27:60 Qui³sca³ni¹sˀen³nqui³ tsjo¹cho⁴tse⁴ xi³ ti⁴tsˀe⁴-ni³, xi³ qui³sˀe³nta³ jña³ nca³ qui³tjo³ˀai²cja¹ jnco³ na⁴xi⁴. Qui³sca³ni¹ti¹cja¹jčho³ xo⁴ntjoa⁴-le⁴ tsjo¹-ve⁴ jnco³ la⁴jao⁴tse³, cˀia⁴ qui³.
MAT 27:61 Cˀoa⁴ tjio¹ ya⁴-ve⁴ María Magdalena, cao⁴ xi³ nqui²jnco³ María, tjio¹ntai³-le⁴ tsjo¹-ve⁴.
MAT 27:62 Cˀia⁴ nca³ coan³nchaon³-ni³, coan³scan³-le⁴ víspera, coan³xco¹tˀa³-le⁴ Pilato cho⁴ta⁴ti¹tjon²-le⁴ na⁴ˀmi³ cao⁴ cho⁴ta⁴ fariseos.
MAT 27:63 Qui³tso²-le⁴: Señor, fa³ˀai³tsjen³-na³jin⁴ nca³ je² cho⁴ta⁴chˀa¹na⁴cha⁴-ve⁴ qui³tso² nca³ ti¹jna³con³-sa³: Xi³ coan⁴ jan² ni⁴čhjin³ cjoa⁴ˀa¹ya³-na³.
MAT 27:64 Ta⁴te²xo³mai³ tso²cˀoa⁴ nca³ c²ta³sˀe³chjoa²nta³ je² tsjo¹cˀen³ sa³ˀnta³ coan⁴ jan² ni⁴čhjin³, jme¹-ni³ nca³ tsi² cjoa⁴ˀai¹-si¹ni³ cho⁴ta⁴-le⁴ nca³ njion², cˀoa⁴ si⁴²che¹, cˀoa⁴coi⁴tso⁴-le⁴ na⁴xi⁴na³nta¹: Ca²fa³ˀa¹ya³jin³-ni³le⁴ cˀen³. Cˀoa⁴ je² cjoa⁴chˀa¹na⁴cha⁴ xi³ coan⁴scan³-ni³ nqui²sa⁴ chˀao³ coan⁴ jo³-ni³ xi³ ti¹tjon².
MAT 27:65 Pilato cˀoa⁴qui³tso²-le⁴: Chjoao¹³ so³nta²do⁴ xi³ si⁴²coi²nta⁴, ta⁴nquion¹³ cˀe²chjoa²ntao³ tsjo¹-ve⁴, jo³-sˀin² coan⁴-no³.
MAT 27:66 Cˀia⁴ qui³ nca³ je², tsa³cˀe¹chjoa²nta³ tsjo¹-ve⁴, tsa³cˀe¹choa⁴ la⁴jao⁴, cˀoa⁴ qui³si³ca³tio²ˀnta³ so³nta²do⁴.
MAT 28:1 Cˀia⁴ nca³ coan³njion² nca³ xo³to², cˀoa⁴ nca³ qui³sˀe³sen¹ ni⁴čhjin³ tai²nco⁴ nca³ to²tsˀin³ xo³ma²na⁴, ja³ˀai³ María Magdalena, cao⁴ je² xi³ nqui²jnco³ María, ja³ˀai³ co³tsen³ tsjo¹.
MAT 28:2 Coe⁴-ni³ ja³ˀa³ jnco³ chaon¹ xi³ nˀion¹, nca⁴ jnco³ a²ncje⁴-le⁴ Nai³-na¹ xi³ ji³tjo³jen³-ni³ ncˀa³jmi³, ji³cho² qui³sca³ni¹ti¹cja¹ tˀa³xin² la⁴jao⁴-ve⁴, cˀoa⁴ tsa³cˀe²jna³son².
MAT 28:3 Sen¹-le⁴ cˀoa⁴cji³ jo³-ni³ lˀi¹chaon⁴, cˀoa⁴ na³jño³-le⁴ čhoa³ jo³-ni³ nchˀan¹.
MAT 28:4 Qui³tsa³cjon¹ je² xi³ tjio¹si¹coi²nta⁴, jo³ nca³ ja³tse³, cˀoa⁴ jo³-ni³ cˀen³ coan³ cjoan³.
MAT 28:5 Qui³nchja⁴ je² a²ncje⁴, qui³tso²-le⁴ ya¹nchjin¹-ve⁴: A³li² vi³jcon³-jion²³ nca³ jon², nca⁴ an³ ˀve³ nca³ ti³ma³fa³sjai³-nio¹³ Jesús xi³ qui³sˀe³jna³tˀa³ cro².
MAT 28:6 A³li² i⁴ ti¹jna³, nca⁴ ca²fa³ˀa¹ya³-ni³le⁴ jo³ qui³tso²: Nčhoao¹³, cho¹tsaon³ ˀnte³ jña³ nca³ qui³sˀe³jna³.
MAT 28:7 Ta⁴nquin¹ nti⁴ton⁴³, cˀoa⁴tˀin²-lao⁴³ cho⁴ta⁴-le⁴ nca³ je³ca²fa³ˀa¹ya³jin³-ni³le⁴ cˀen³. Cˀoa⁴ coe⁴-ni³ fi²ti¹tjon²-no³ ya⁴ Galilea, ya⁴ jchao⁴³ nca³ je². Coe⁴-ni³ an³ xi³ je³cˀoa⁴qui³xin³-no³.
MAT 28:8 Cˀia⁴ ya¹nchjin¹-ve⁴, nca³ qui³-ni³ tsjo¹cˀen³ tjio¹tsa³cjon¹, cˀoa⁴ nˀion¹ tsjoa³-le⁴. Qui³to²ca³ nca³ qui³ si¹qui³nčhˀoe² cho⁴ta⁴-le⁴.
MAT 28:9 Coe⁴-ni³ Jesús qui³sa³te³cjao³ qui³tso²: Ti²ˀnta³-li². Cˀoa⁴ ya¹nchjin¹-ve⁴ ji³cho²tˀa³-le⁴ qui³tsoa³cja¹ ntso⁴co⁴, tsa³ca³sen²xco¹nchˀin³tˀa³-le⁴.
MAT 28:10 Cˀia⁴ Jesús qui³tso²-le⁴: A³li² vi³jcon³-jion²³, ta⁴nquin¹ ni²qui³nčhˀoao¹³ ntsˀe³, jme¹-ni³ nca³ coai⁴-si¹ni³ ya⁴ Galilea, cˀoa⁴ ya⁴ scoe⁴-na³.
MAT 28:11 Cˀia⁴ nca³ tjio¹fi² nca³ je², coe⁴-ni³ tjio¹ cˀa³ so³nta²do⁴ xi³ tjio¹si¹coi²nta⁴, xi³ ja³ˀai³ ya⁴ na⁴xi⁴na³nta¹-ve⁴, qui³si³qui³nčhˀoe¹ cho⁴ta⁴ti¹tjon²-le⁴ na⁴ˀmi³ xi³ tˀa³tsˀe⁴ nca³yi³je³ cjoa⁴ xi³ cˀoa⁴-sˀin² coan³.
MAT 28:12 Cˀia⁴ nca³ coan³xco¹ cao⁴ cho⁴ta⁴jchi¹nca³, tsa³cjao¹ya³-ni³, cˀoa⁴ tse³ taon⁴ qui³tsjoa³-le⁴ je² so³nta²do⁴,
MAT 28:13 qui³tso²-le⁴: Cˀoi⁴tˀin²-lao⁴³: Je² cho⁴ta⁴-le⁴ ja³ˀai³ nca³ njion², cˀoa⁴ qui³si³che¹ cˀia⁴ nca³ ti³sa³yo³fai²⁴-jin⁴.
MAT 28:14 Cˀoa⁴ tsa² je²-vi⁴ cjoi⁴nčhˀoe¹ gobernador, jin⁴-jin⁴ si⁴cˀe¹jyo¹ˀai³⁴-jin⁴, cˀoa⁴ si⁴ca³tio¹nta³-lai²⁴jin⁴ nca³ jon².
MAT 28:15 Cˀia⁴ je² qui³scoe¹ taon⁴-ve⁴, cˀoa⁴qui³sˀin³ jo³-sˀin² nca³ tsa³ca³co¹ya³-le⁴. Cˀoa⁴ je² en¹-ve⁴ qui³son² jin³-le⁴ cho⁴ta⁴ judíos sa³ˀnta³ ntˀai⁴-vi⁴.
MAT 28:16 To⁴nca³ je² xi³ te³jnco³ cho⁴ta⁴-le⁴ Jesús qui³ ya⁴ Galilea, ya⁴ ni³nto³ jña³ nca³ Jesús tsa³cˀe¹ne²-le⁴.
MAT 28:17 Cˀia⁴ nca³ tsa³ve³ Jesús, tsa³qui³ncha³xco¹nchˀin³tˀa³-le⁴, to⁴nca³ tjin¹ cˀa³ xi³ jao² tsa³ca³tio²con³.
MAT 28:18 Cˀia⁴ nca³ Jesús ji³nčhoa³tˀa³čhian³-le⁴, tsa³cja¹cao⁴: Nca³yi³je³ cjoa⁴te¹xo³ma³ qui³tsˀai²-na³ ncˀa³jmi³, cˀoa⁴ i⁴ son³ˀnte³.
MAT 28:19 Ta⁴nquion¹³, ti⁴ncha³ˀao³ nca³tsˀi³ na⁴xi⁴na³nta¹, ti⁴qui³njaon³ cho⁴ta⁴ tˀa³tsˀan⁴, ta⁴te²ntao¹³ cao⁴ jan³ˀain¹-le⁴ Nˀai³, cao⁴ tsˀe⁴ ˀnti¹, cˀoa⁴ cao⁴ tsˀe⁴ Espíritu Santo.
MAT 28:20 Ta⁴co²ya³-lao⁴³ nca³ ca²ta³si¹tjo³son² nca³yi³je³ cjoa⁴ xi³ an³ tsa³cˀe³ne²³-no³. Coe⁴-ni³ an³ ti²jna⁴cao⁴-no³ nca³ jon² nca³ntsjai² ni⁴čhjin³, sa³ˀnta³ nca³ cjoe⁴tˀa³ son³ˀnte³-vi⁴. Cˀoa⁴ ca²ta³ma³.
MAR 1:1 Cˀoa⁴-sˀin² qui³to²tsˀin³cao⁴ en¹nta³ xi³ tˀa³tsˀe⁴ Jesucristo xi³ ˀnti¹-le⁴ Ni³na¹.
MAR 1:2 Jo³-sˀin² nca³ qui³squi³ je² cho⁴ta⁴ xi³ Isaías xi³ qui³nchja⁴ya³ tˀa³tsˀe⁴ Ni³na¹: Coe⁴-ni³, an³ si³ca³sen¹ ti¹tjon²-le²³ je² cho⁴ta⁴-na⁴ xi³ fi²cao⁴ en¹, xi³ coa⁴²nta³ ti¹tjon²-li² ntia⁴²-li⁴.
MAR 1:3 Tjin¹ xi³ nˀion¹ nchja⁴ ya⁴ ˀnte³tˀa³xin²tˀa³: Tja³ntao³ ntia⁴² xi³ tˀa³tsˀe⁴ Nai³-na¹. Tja³qui²xio⁴³ ntia⁴²ˀnti¹-le⁴.
MAR 1:4 Juan tsa³ca³te¹nta¹ ya⁴ jña³ ˀnte³tˀa³xin²tˀa³. Cˀoa⁴-sˀin² qui³nchja⁴ya³ cjoa⁴sa³te¹nta¹ xi³ tˀa³tsˀe⁴ cho⁴ta⁴ nca³ si⁴²cˀa³ntjai²ya³ cjoa⁴fa³ˀai³tsjen³-le⁴, jme¹-ni³ nca³ cha⁴tˀa³-si¹ni³ je¹-le⁴.
MAR 1:5 Ji³tjo³con³-le⁴ nca³tsˀi³ cho⁴ta⁴ xi³ tjin¹ jña³ nca³ Judea ˀmi², cao⁴ cho⁴ta⁴ xi³ tjin¹ Jerusalén. Juan tsa³ca³te¹nta¹ cho⁴ta⁴-ve⁴ ya⁴ nta¹je⁴ xi³ Jordán ˀmi², nca³ qui³si³qui²xi⁴ya³nta³ je¹-le⁴.
MAR 1:6 Juan tsa³cˀa³cja¹ na³jño³ntsja⁴-le⁴ camello, cˀoa⁴ jnco³ čhjoa⁴xin¹ tji¹cja¹ cja¹ntia³-le⁴. Tsa³cjen² cho⁴va⁴ cao⁴ ntsjen¹-le⁴ cho⁴ntsjen¹ya¹ xi³ tjin¹ nqui³jña¹.
MAR 1:7 Cˀoa⁴-sˀin² qui³nchja⁴ya³: Ja⁴ve³ cjoa⁴ˀai¹ jnco³ xi³ nqui²sa⁴ nta³ ma³-le⁴ cao⁴-ni³ tsa² an³, sa³ˀnta³ li²coi³ va³quin²-na³ nca³ coa²sen⁴nia³ nca³ sco³jnta¹³ čhjoa⁴xin¹-le⁴ jte¹-le⁴.
MAR 1:8 Xi³ cjoa⁴qui²xi⁴ an³-vi⁴ to⁴na³nta¹ tsa³ca³te³nta¹³-ni³no³, to⁴nca³ je² xi³ cjoa⁴ˀai¹, Espíritu Santo coa⁴te²nta¹-ni³no³.
MAR 1:9 Coi³ ni⁴čhjin³-ve⁴ Jesús ja³ˀai³-ni³ Nazaret xi³ nchja⁴-ni³ Galilea. Juan tsa³ca³te¹nta¹ Jesús ya⁴ nta¹je⁴ xi³ Jordán ˀmi².
MAR 1:10 Nti⁴ton⁴ nca³ ji³tjo³ca²jin³-ni³ na³nta¹, cˀia⁴ tsa³ve³ nca³ ti¹tjo³ˀai² ncˀa³jmi³. Je² Espíritu Santo ji³nčhoa³jen³ne²-le⁴ Jesús jo³-ni³ ni⁴se³ paloma.
MAR 1:11 Jnco³ jta⁴ qui³no²ˀya²-ni³le⁴ ncˀa³jmi³ xi³ cˀoa⁴tso²: Ji³ ni¹³ xi³ ˀnti¹-na⁴ xin³-le²³. Ji³ ni¹³ xi³ tsjoa³que⁴-le²³, jo³ nta³ sˀe³coan³ xi³ tˀa³tsi⁴.
MAR 1:12 Je² Espíritu Santo qui³cao⁴ nti⁴ton⁴ Jesús jña³ ˀnte³tˀa³xin²tˀa³.
MAR 1:13 Ña³chan² ni⁴čhjin³ tsa³cˀe²jna³ Jesús ya⁴ ˀnte³tˀa³xin²tˀa³. Satanás coan³me³-le⁴ nca³ chˀao³ si⁴²cao⁴. Ña³tjen⁴ tjio¹ cho⁴jña¹ cao⁴ Jesús. A²ncje⁴ qui³si³sin³-le⁴ Jesús.
MAR 1:14 Cˀia⁴ nca³ je³qui³cha³ni² nto⁴ya¹ Juan, Jesús ja³ˀai³-ni³ ya⁴ Galilea. Qui³nchja⁴ya³ en¹nta³ xi³ tˀa³tsˀe⁴ cjoa⁴te¹xo³ma³-le⁴ Ni³na¹.
MAR 1:15 Cˀoa⁴qui³tso²: Ni⁴čhjin³-vi⁴ je³coan³jnco³, cˀoa⁴ je² cjoa⁴te¹xo³ma³-le⁴ Ni³na¹ je³nčhoa¹ ma³čhian³. Ti⁴cˀa³ntjai²yao³ cjoa⁴fa³ˀai³tsjen³-no³, ca²ta³ma³cjain¹-no³ en¹nta³-vi⁴.
MAR 1:16 Cˀia⁴ nca³ ja³ˀa³ ntai³-le⁴ nta¹chi³con³ ya⁴ Galilea, Jesús tsa³ve³ Simón, cao⁴ ntsˀe⁴ Andrés xi³ tjio¹si¹cˀa³tjen⁴ na⁴ˀya³ ja⁴jin³ nta¹chi³con³. Jti⁴ ma³-le⁴ si¹cˀen³.
MAR 1:17 Jesús cˀoa⁴qui³tso²-le⁴: Nčhoa¹tjen⁴nqui³-nao¹³, cˀoa⁴ an³ tsjoa³-no³ xa¹ nca³ cˀoe¹xco¹³ cho⁴ta⁴.
MAR 1:18 Simón cao⁴ Andrés tsa³ca³tio¹ nti⁴ton⁴ na⁴ˀya³-le⁴. Qui³tjen⁴nqui³-le⁴ Jesús.
MAR 1:19 Qui³ntai³-sa³ nta¹chi³con³. Tsa³ve³ Jacobo cao⁴ ntsˀe⁴ Juan xi³ ja⁴xti³-le⁴ Zebedeo. Tjio¹ya³ chi³tso³. Ya⁴ tjio¹-vˀe¹jčho³ na⁴ˀya³-le⁴ xi³ ca³ni¹ya³ jti⁴.
MAR 1:20 Jesús qui³nchja⁴ nti⁴ton⁴-le⁴ Jacobo cao⁴ Juan. Ya⁴ qui³si³ca³tio¹ nˀai³-le⁴ Zebedeo cao⁴ cho⁴ˀnta³-le⁴ ja⁴ya³ chi³tso³-ve⁴. Qui³tjen⁴nqui³-le⁴ Jesús.
MAR 1:21 Jesús ji³cho² ya⁴ ˀnte³ jña³ nca³ Capernaum ˀmi². Cˀia⁴ nca³ ji³cho² ni⁴čhjin³ ni²cja¹ya³, ja³ˀa³sˀen³ ntˀia³ sinagoga. Ya⁴ tsa³ca³co¹ya³.
MAR 1:22 To⁴coan³xcon¹-le⁴ cho⁴ta⁴ jña³-le⁴ cjoa⁴fa³ˀai³tsjen³ xi³ qui³nchja⁴ Jesús nca³ tsa³ca³co¹ya³-le⁴ jo³-ni³ tsa² jnco³ cho⁴ta⁴ xi³ cjoa⁴te¹xo³ma³ ntsja³, li²coi³ jo³-ni³ tsa² xi³ to⁴cho⁴ta⁴ scribano ma³.
MAR 1:23 Ya⁴ ntˀia³ sinagoga ti¹jna³ jnco³ cho⁴ta⁴ xi³ tjin¹-le⁴ ntjao⁴ xi³ nta³jin³. Nˀion¹ qui³nchja⁴ cho⁴ta⁴ xo⁴cji³-ve⁴.
MAR 1:24 Cˀoa⁴qui³tso²: Jain⁴²! Jme¹ xi³ tjin¹-na³jin⁴ xi³ cao⁴ ji³, ji³ ni¹³ Jesús xi³ cho⁴ta⁴ nazareno ˀmi²-li². A³ ca²fa²ˀai⁴ ni²cji³tson¹-na³jin⁴. An³ ˀve³-le²³ ˀya³-ni³ve⁴ ji³. Ji³ ni¹³ xi³ tsjai³ xi³ tsˀe⁴ Ni³na¹.
MAR 1:25 Jesús qui³nchja⁴ti³cao⁴ ntjao⁴ xi³ nta³jin³. Jyo¹ ti⁴jnai³, qui³tso²-le⁴. Ti²tjo⁴xin²-lai⁴ nca³ je².
MAR 1:26 Jo³ qui³si³tin³ya³ cho⁴ta⁴. Je² ntjao⁴ xi³ nta³jin³ xi³ qui³si³cao⁴. Jo³ qui³squi³ˀnta¹, cˀia⁴ ji³tjo³xin²-le⁴.
MAR 1:27 Jo³ coan³xcon¹-le⁴ nca³tsˀi³, jo³ nca³ i⁴ nca³ jan¹ qui³sco²na³nqui³-le⁴ xi¹ncjin¹: Jme¹ xi³ cji³ma³ ntˀai⁴-vi⁴. A³ sˀa⁴² cjoa⁴cho⁴tse⁴ xi³ ti¹va³co¹ya³, nca³ je² cho⁴ta⁴ cˀoa⁴-sˀin² tjin¹-le⁴ cjoa⁴te¹xo³ma³ nca³ va³te¹xo³ma³-le⁴ nta³ tsa² je² ntjao⁴ xi³ nta³jin³. Je² ntjao⁴-ve⁴ si¹cji³tjo³son² xi³ tso² Jesús.
MAR 1:28 Qui³son² en¹ xi³ tˀa³tsˀe⁴ Jesús nca³qui³jnta² Galilea.
MAR 1:29 Cˀia⁴ ji³tjo³-ni³ Jesús ntˀia³ sinagoga. Ji³nčhoa³ nti⁴ton⁴ ntˀia³-le⁴ Simón cao⁴ Andrés. Ña³tjen⁴ qui³ Jacobo cao⁴ Juan.
MAR 1:30 Je² na⁴cha¹-le⁴ Simón ti¹qui³jna³, chˀin³ntˀai⁴ tjin¹-le⁴. Je² xti³-le⁴ cˀoa⁴qui³tso² nti⁴ton⁴-le⁴ Jesús xi³ tˀa³tsˀe⁴ na⁴cha¹-le⁴.
MAR 1:31 Cˀia⁴ ja³ˀa³sˀen³ Jesús, qui³scoe¹ ntsja³, qui³si³qui³so¹tjen⁴. Ji³tjo³xin² nti⁴ton⁴-le⁴ chˀin³ntˀai⁴-le⁴, qui³si³sin³-ni³le⁴ Jesús cao⁴ cho⁴ta⁴ xi³cˀa³.
MAR 1:32 Cˀia⁴ nca³ coan³xon² nca³ qui³sca³ntjai² tsˀoi¹, ja³ˀai³ ca³ni¹-le⁴ nca³tsˀi³ xi³ tjio¹mˀen³, xi³ tjin¹-le⁴ nai⁴² xi³ nta³jin³.
MAR 1:33 Nca³tsˀi³ cho⁴ta⁴ xi³ tjio¹ ya⁴-ve⁴ qui³tse³jčho² xo⁴ntjoa⁴.
MAR 1:34 Ncjin² ma³-ni³ cho⁴ta⁴ xi³ tjio¹mˀen³ xi³ Jesús qui³si³nta³. Qui³si³nta³ to⁴jme³-ni³ chˀin³ xi³ tjin¹-le⁴. Ncjin² ma³-ni³ nai⁴² xi³ nta³jin³ xi³ tsa³cˀa³sje³xin²-le⁴. Li²coi³ qui³tsjoa³ˀnte²-le⁴ nai⁴²-ve⁴ nca³ coi⁴nchja⁴ nca⁴ je² nai⁴²-ve⁴ tsa³ve³ Jesús.
MAR 1:35 Cjai¹nca³ ta⁴njion² ji³so¹tjen⁴ Jesús, njion²ya³-sa³ ji³tjo³, qui³ jña³ tˀa³xin²tˀa³. Ya⁴-ve⁴ tsa³cˀe¹tsˀoa³-le⁴ Ni³na¹.
MAR 1:36 Simón cao⁴ xi³ tjio¹cao⁴, qui³tjen⁴nqui³-le⁴ Jesús.
MAR 1:37 Cˀia⁴ nca³ tsa³ve³ cho⁴ta⁴ jña³ ti¹jna³ Jesús, cˀoa⁴qui³tso²-le⁴: Nca³tsˀi³ cho⁴ta⁴ tjio¹va¹sjai³-li².
MAR 1:38 Jesús qui³tso²-le⁴: Tjian¹ na⁴xi⁴na³nta¹ jña³ nca³ čhian³, jme¹-ni³ nca³ cˀoa⁴-ti⁴ coi³nchja²ya³-si¹nia³ ya⁴-ve⁴. Coi³ cjoa⁴ nca³ ji²tjo⁴-nia³.
MAR 1:39 Qui³nchja⁴ya³ ya⁴ ntˀia³ xi³ sinagoga ˀmi². Tsa³cˀa³mjen³jin³jnta² Galilea. Tsa³cˀa³sje³xin²-le⁴ je² nai⁴² xi³ nta³jin³ xi³ tjio¹jin³ ni⁴ma⁴-le⁴ cho⁴ta⁴.
MAR 1:40 Jnco³ cho⁴ta⁴ xi³ jo³ ti¹fi³ˀnto³jon³ yao³-le⁴, ji³cho²con³-le⁴, tsa³cˀe¹tsˀoa³-le⁴, tsa³ca³sen²xco¹nchˀin³-le⁴, qui³tso²-le⁴: Tsa² me³-li² coan⁴ si⁴tsje³-nai¹³.
MAR 1:41 Cˀoa⁴ Jesús coan³ma⁴que³. Tsa³cjen¹ ntsja³, qui³si³cao⁴, qui³tso²-le⁴: Me³-na³, ca²ta³ma³tsjai³.
MAR 1:42 Cˀia⁴ nca³ je³qui³nchja⁴, nti⁴ton⁴ ji³tjo³xin² chˀin³-le⁴ cho⁴ta⁴-ve⁴. Coan³tsje³.
MAR 1:43 Cˀia⁴ Jesús tsa³qui³ncha¹ˀa³. Tˀin³, qui³tso² nti⁴ton⁴-le⁴.
MAR 1:44 Jesús qui³tso²-le⁴: Ji³, a³li²ˀya³-jin² xi³ jo³ ˀmi²-lai⁴, to⁴nca³ tˀin³, ta⁴co²-lai⁴ yao³-li⁴ na⁴ˀmi³. Tˀai²tˀa³-lai⁴ xi³ Moisés tsa³ca³te¹xo³ma³ nca³ coan³tsjai³. Cˀoa⁴-sˀin² cˀoai⁴-lai⁴ cjoa⁴qui²xi⁴ jo³-sˀin² coan³ntai³.
MAR 1:45 To⁴nca³ je² cho⁴ta⁴-ve⁴ qui³. Cˀoa⁴ tsa³cˀe¹tsˀia⁴ nca³ qui³nchja⁴ ncjin² en¹. Qui³sca³ni¹son² cjoa⁴nta³-le⁴ Jesús, sa³ˀnta³ li²coi³ ti⁴coan³-ni³le⁴ nca³ ja³ˀa³sˀen³tsen³ ya⁴jin³ na⁴xi⁴na³nta¹. To⁴ ya⁴ jña³ tˀa³xin²tˀa³ tsa³cˀe²jna³. Ya⁴² ja³ˀai³con³-le⁴ nca³tsˀi³.
MAR 2:1 Xi³ coan³nchaon³ coan³jnqui³-ni³, ja³ˀa³sˀen³-nca¹ni³ ˀnte³ jña³ nca³ Capernaum ˀmi², ya⁴ tsa³ˀya³-le⁴ nca³ ti¹jna³ˀya³ ni³ˀya³.
MAR 2:2 A³li² to⁴cˀoa⁴cji³ ncjin² cho⁴ta⁴ xi³ ja³ˀai³ ma³xco¹tˀa³-le⁴ Jesús, sa³ˀnta³ li²coi³ ti⁴ti³ˀnte²-ni³ ja⁴jčho³ xo⁴ntjoa⁴-le⁴ ni³ˀya³. Cˀoa⁴ ya⁴ qui³nchja⁴ya³jin³-le⁴ en¹-le⁴ Ni³na¹.
MAR 2:3 Cˀia⁴ ja³ˀai³cao⁴ jnco³ cho⁴ta⁴yo⁴ma⁴. Ño³ cho⁴ta⁴ tsa³cˀa³ncˀa³.
MAR 2:4 Li²coi³ qui³tjo³ˀnte²-le⁴ ji³cho²sˀen³con³-le⁴ Jesús, nca³ cˀoa⁴-sˀin² chon³ cho⁴ta⁴ncjin² xi³ qui³tse³ˀya² ni³ˀya³. Ya⁴ qui²xi⁴ jña³ nca³ ti¹jna³ Jesús, tsa³cja³ˀa¹xin² te²ja⁴-le⁴ ncˀa¹. Ya⁴ qui³sca³ni¹jen³ne²-ni³le⁴ na⁴chan³ xi³ tsa³ca³jna³ne² je² xi³ ti¹mˀen³.
MAR 2:5 Cˀia⁴ nca³ tsa³ve³ Jesús jo³-sˀin² nca³ coan³cjain¹-le⁴, cˀoa⁴qui³tso²-le⁴ cho⁴ta⁴yo⁴ma⁴: ˀnti¹ mi²yo⁴-na⁴, i⁴² ca²cha³tˀa³-li² je¹-li⁴ ntˀai⁴.
MAR 2:6 Ya⁴ tjio¹čhian³ cˀa³ cho⁴ta⁴ scribano xi³ tjio¹ma³ si¹cja³-ˀai³tsjen³jin³ ni⁴ma⁴-le⁴.
MAR 2:7 Cˀoa⁴tso²: A¹-ni³ nca³ cˀoa⁴tso²-si¹ni³ je²-vi⁴, nca³ Ni³na¹ nchja⁴ˀaon³-ni³le⁴. ˀya¹-ni³ xi³ coan⁴-le⁴ si⁴²cha³tˀa³-na¹ je¹-na¹, a³ tsi² tsa² to⁴jnco³ Ni³na¹ xi³ coan⁴-le⁴.
MAR 2:8 Jesús tsa³ve³ nti⁴ton⁴ ni⁴ma⁴-le⁴ nca³ cˀoa⁴-sˀin² cho⁴ta⁴-ve⁴ tjio¹ma³ si¹cja³ˀai³tsjen³jin³ ni⁴ma⁴-le⁴. Cˀoa⁴qui³tso²-le⁴: A¹-ni³ nca³ cˀoa⁴-sˀin² si¹cja³ˀai³tsjen³jin³-si¹ni³ ni⁴ma⁴-no³.
MAR 2:9 Jña¹-le⁴ xi³ li²coi³ to⁴jo³ ñˀain³, tsa² cˀoa⁴xin¹-le⁴ cho⁴ta⁴yo⁴ma⁴-ve⁴: Je¹-li⁴ cha³tˀa³-li² ntˀai⁴, a³xo⁴ tsa² cˀoa⁴xin¹-le⁴: Ti²so⁴tjain⁴, chjoai¹³ na⁴chan³-li⁴, ti⁴to¹mjain³.
MAR 2:10 To⁴nca³ coi³ cjoa⁴-vi⁴ jme¹-ni³ nca³ jcha⁴-si¹nio³ nca³ je² ˀnti¹-le⁴ cho⁴ta⁴ tjin¹-le⁴ ˀnte³ i⁴ son³ˀnte³-vi⁴ nca³ si¹cha³tˀa³ je¹-le⁴ cho⁴ta⁴, cˀia⁴ cˀoa⁴qui³tso²-le⁴ cho⁴ta⁴yo⁴ma⁴-ve⁴:
MAR 2:11 Cˀoa⁴xin¹-le²³ nca³ ji³: Ti²so⁴tjain⁴, chjoai¹³ na⁴chan³-li⁴, tˀin³ ni³ˀya³-li⁴.
MAR 2:12 Cˀia⁴ tsa³qui³so¹tjen⁴ cho⁴ta⁴yo⁴ma⁴-ve⁴, qui³scoe¹ nti⁴ton⁴ na⁴chan³-le⁴, ji³tjo³jin³ nqui³xcon⁴ nca³tsˀi³ cho⁴ta⁴. Nca³tsˀi³ to⁴coan³xcon¹-le⁴. Nˀion¹ ncˀa³ tsa³cˀa³sje³ Ni³na¹, cˀoa⁴qui³tso²: Ni⁴sa³jnco³-jin² ni⁴čhjin³ tsa³ˀya³² xi³ cˀoa⁴ma³.
MAR 2:13 Jesús ji³tjo³-ni³ ni³ˀya³. Qui³-nca¹ni³ ja⁴ntai³ nta¹chi³con³. Ya⁴ ja³ˀai³con²-le⁴ nca³tsˀi³ cho⁴ta⁴. Cˀoa⁴ tsa³ca³co¹ya³-le⁴.
MAR 2:14 Cˀia⁴ nca³ Jesús ja³ˀa³to³, tsa³ve³ Leví, ti³-le⁴ Alfeo, xi³ ti¹jna³ ya⁴ jña³ nca³ vˀe¹ña³ taon⁴va³sen³. Cˀoa⁴qui³tso²-le⁴: Nčhoa¹tjen⁴nqui³-nai¹³. Je² Leví tsa³ca³sen²nto³, cˀoa⁴ qui³tjen⁴nqui³-le⁴.
MAR 2:15 Cˀoa⁴ xi³ coan³-ni³ cˀia⁴ nca³ Jesús ti¹jna³tˀa³ ya¹mi²xa⁴ ya⁴³ ni³ˀya³-le⁴ Leví, ncjin² cho⁴ta⁴ xi³ vˀe¹ña³ taon⁴va³sen³, cˀoa⁴ ncjin² cho⁴ta⁴tsˀen⁴, ya⁴ ña³tjen⁴ tjio¹tˀa³ ya¹mi²xa⁴ cao⁴ Jesús, cˀoa⁴ cao⁴ cho⁴ta⁴ xi³ tsˀe⁴, nca⁴ li²to⁴ ncjin² cho⁴ta⁴ xi³ ja³ˀai³tjen⁴nqui³-le⁴.
MAR 2:16 Cˀia⁴ nca³ cho⁴ta⁴ scribano cao⁴ cho⁴ta⁴ fariseos tsa³ve³ nca³ Jesús ti¹cjen²cao⁴ cho⁴ta⁴ xi³ vˀe¹ña³ taon⁴va³sen³ cao⁴ cho⁴ta⁴tsˀen⁴, cˀoa⁴qui³tso²-le⁴ cho⁴ta⁴-le⁴: A¹-ni³ nca³ je² cjen²cao⁴-si¹ni³, cˀoa⁴ nca³ je² ˀvi³cao⁴-si¹ni³ cho⁴ta⁴ xi³ vˀe¹ña³ taon⁴va³sen³ cao⁴ cho⁴ta⁴tsˀen⁴.
MAR 2:17 Cˀia⁴ nca³ Jesús qui³nčhˀoe¹ je²-vi⁴, qui³tso²-le⁴: Je² cho⁴ta⁴ xi³ nta³, a³li² chji⁴ne⁴xqui³-jin² ma³chjen¹-le⁴, to⁴je² xi³ tjio¹mˀen³ xi³ ma³chjen¹-le⁴ chji⁴ne⁴xqui³. A³li²coi³ je²ˀe⁴ nca³ an³ nca³ coi³nchja²³-le⁴ cho⁴ta⁴ xi³ tjin¹-le⁴ cjoa⁴qui²xi⁴, to⁴je² cho⁴ta⁴je¹ xi³ coi³nchja²³-le⁴.
MAR 2:18 Cho⁴ta⁴-le⁴ Juan cao⁴ cho⁴ta⁴-le⁴ cho⁴ta⁴ fariseos va³tio²nchjan³. Cˀoa⁴ ja³ˀai³ xi³ qui³tso²-le⁴ Jesús: A¹-ni³ nca³ va³tio²nchjan³-si¹ni³ cho⁴ta⁴-le⁴ Juan cao⁴ cho⁴ta⁴-le⁴ cho⁴ta⁴ fariseos, cˀoa⁴ tsi² tsa² va³tio²nchjan³ cho⁴ta⁴ xi³ tsi⁴.
MAR 2:19 Jesús cˀoa⁴qui³tso²-le⁴: A³ ma³² nca³ va³tio²nchjan³ mi²yo⁴-le⁴ xˀin⁴ xi³ ti¹vi³xan³, tjen⁴ nca³ to⁴jo³ ti¹jna³ xi³ xˀin⁴. Tjen⁴ nca³ ti¹jna³cao⁴ xi³ xˀin⁴ li²coi³ ma³ va³tio²nchjan³.
MAR 2:20 To⁴nca³ cjoa⁴ˀai¹ ni⁴čhjin³ cˀia⁴ nca³ je² xˀin⁴ coi⁴tjo³tˀa³xin²-le⁴. Cˀia⁴ je² ni⁴čhjin³-ve⁴ coa⁴tio²nchjan³ mi²yo⁴-le⁴.
MAR 2:21 Li²ˀya³ xi³ na³jño³ cho⁴tse⁴ vˀe¹jčho³ya³-ni³ na³jño³ jchi¹nca³. Tsa² tjin¹ xi³ cˀoa⁴-sˀin² sˀin¹ je² na³jño³ cho⁴tse⁴ fa³ˀai³xco¹, cˀoa⁴ to⁴xi³jnta²-sa³ na³jño³ jchi¹nca³.
MAR 2:22 Li²ˀya³ xi³ vino cho⁴tse⁴ vˀe¹ya³ čhjoa⁴ jchi¹nca³. Tsa² tjin¹ xi³ cˀoa⁴-sˀin² sˀin¹, va³sen¹jnta³-ni¹ čhjoa⁴-ve⁴, cˀoa⁴ vi³tjo³xi¹jten³ vino-ve⁴. Ya⁴² si¹cha³ čhjoa⁴-ve⁴. To⁴nca³ vino cho⁴tse⁴ ma³ sˀe³ya³ čhjoa⁴ cho⁴tse⁴.
MAR 2:23 Cˀia⁴ ni⁴čhjin³ ni²cja¹ya³, Jesús ja³ˀa³ ya⁴ jña³ nca³ tji¹ntje² trigo. Cˀoa⁴ nca³ tjio¹fi² cho⁴ta⁴-le⁴ tsa³cˀe¹tsˀia⁴cao⁴ nca³ qui³sco³ne² na⁴tin¹-le⁴ trigo.
MAR 2:24 Cˀia⁴ cho⁴ta⁴ fariseos cˀoa⁴qui³tso²-le⁴: Ne²-ni³ntai⁴, a¹-ni³ nca³ cˀoa⁴sˀin¹-si¹ni³ jnco³ cjoa⁴ xi³ tsi² tjo³ˀnte³ coi³ ni⁴čhjin³-vi⁴ nca³ ni²cja¹ya³².
MAR 2:25 Jesús qui³tso²-le⁴: A³ tsi² tsa³cˀe²xquiao⁴³ jme³ xi³ qui³sˀin³ David cˀia⁴ nca³ coan³vao³-le⁴ cao⁴ je² xi³ ña³tjen⁴ tsa³ca³tio²,
MAR 2:26 jo³-sˀin² nca³ ja³ˀa³sˀen³ David ya⁴ ni³ˀya³-le⁴ Ni³na¹ cˀia⁴ nca³ Abiatar coan³ na⁴ˀmi³ti¹tjon². To⁴je² na⁴ˀmi³-ve⁴ xi³ tjin¹ ˀnte³ nca³ cjen² nio⁴xti²la⁴ xi³ ya⁴ ncha³tsen³ nqui³xcon⁴ Ni³na¹. To⁴nca³ je² David tsa³cjen² nio⁴xti²la⁴-ve⁴, cˀoa⁴-ti⁴ qui³tsjoa³-le⁴ je² xi³ ña³tjen⁴ tsa³ca³tio².
MAR 2:27 Jesús qui³tso²-sa³: Je² ni⁴čhjin³ ni²cja¹ya³ qui³ni²nta³ xi³ tˀa³tsˀe⁴ cho⁴ta⁴. A³li² cho⁴ta⁴-jin² xi³ qui³ni²nta³ xi³ tˀa³tsˀe⁴ coi³ ni⁴čhjin³-vi⁴.
MAR 2:28 Cˀoa⁴-sˀin² nca³ je² ˀnti¹-le⁴ cho⁴ta⁴ Nai³-le⁴ ma³ ni⁴čhjin³ ni²cja¹ya³.
MAR 3:1 Ja³ˀa³sˀen³ Jesús nqui²jnco³cˀa² ntˀia³ sinagoga. Ya⁴ ti¹jna³ jnco³ cho⁴ta⁴ xi³ qui³xi²tˀa³ jnco³ ntsja³.
MAR 3:2 Cho⁴ta⁴ tjio¹co²tsen³-le⁴ Jesús, tsa² si⁴²nta³ cho⁴ta⁴-ve⁴ coi³ ni⁴čhjin³ ni²cja¹ya³. Cˀoa⁴-sˀin² qui³sˀin³ cho⁴ta⁴ nca³ me³-le⁴ nca³ coa⁴²nqui³ Jesús.
MAR 3:3 Cˀia⁴ Jesús cˀoa⁴qui³tso²-le⁴ je² cho⁴ta⁴-ve⁴ xi³ qui³xi²tˀa³ ntsja³: Ti²so⁴tjain⁴, ti⁴sen³nto³ ˀncho²va³sen³-lai⁴.
MAR 3:4 Cˀia⁴ Jesús qui³tso²-le⁴ cho⁴ta⁴ xi³ tjio¹ntai³-le⁴: A³ tjo³ˀnte³-ni¹ cˀia⁴ nca³ ni⁴čhjin³ ni²cja¹ya³ nca³ nta³ sˀian⁴², a³xo⁴ nca³ chˀao³ sˀian⁴², nca³ chˀa³sje³ntje² jnco³ cho⁴ta⁴, a³xo⁴ nca³ ni²cˀen³² cho⁴ta⁴.
MAR 3:5 Jesús qui³sco²tsen³ntai³-le⁴, coan³jti³-le⁴. Aon³ coan³-le⁴ nca³ xi¹jin³ ni⁴ma⁴-le⁴ cho⁴ta⁴-ve⁴. Qui³tso²-le⁴ cho⁴ta⁴xˀin⁴-ve⁴: Tjain³ ntsai⁴. Tsa³cjen¹ ntsja³, ntsja³ xi³ qui³xi²tˀa³ coan³nta³.
MAR 3:6 Cˀia⁴ ji³tjo³ cho⁴ta⁴ fariseos, coan³ña³ cao⁴ cho⁴ta⁴ herodianos. Tsa³cjao¹ya³-ni³ jo³-sˀin² nca³ coan⁴-ni³ si⁴²cˀen³ Jesús.
MAR 3:7 To⁴nca³ Jesús tsa³ca³sen²xin² cao⁴ cho⁴ta⁴-le⁴. Qui³ ya⁴ ja⁴ntai³-le⁴ nta¹chi³con³. Qui³tjen⁴nqui³-le⁴ ncjin² cho⁴ta⁴ xi³ tsˀe⁴ Galilea, cao⁴ xi³ tsˀe⁴ Judea,
MAR 3:8 cao⁴ xi³ tsˀe⁴ na⁴xi⁴na³nta¹ Jerusalén, cao⁴ xi³ tsˀe⁴ na³nqui³ Idumea, cao⁴ xi³ tsˀe⁴ na³nqui³ xi³ncoa³tˀa³ nta¹je⁴ Jordán, cao⁴ xi³ tsˀe⁴ ja⁴ntai³-le⁴ na⁴xi⁴na³nta¹ Tiro cao⁴ na⁴xi⁴na³nta¹ Sidón. Cˀoa⁴-sˀin² coan³-ni³ nca³ ja³ˀai³con²-ni³le⁴ cho⁴ta⁴ xi³ qui³nčhˀoe¹ cjoa⁴ xi³ qui³sˀin³ Jesús.
MAR 3:9 Jesús qui³tso²-le⁴ cho⁴ta⁴-le⁴ nca³ ja⁴nta³ ca²ta³jna³ntsjai² xi³ tˀa³tsˀe⁴ jnco³ chi³tso³ ˀnti¹ jme¹-ni³ nca³ tsi² tsa² si⁴²cˀe¹jna³ˀncho²nˀion¹-si¹ni³ cho⁴ta⁴.
MAR 3:10 Nca⁴ Jesús qui³si³nta³ ncjin² cho⁴ta⁴. Coi³ cjoa⁴ nca³tsˀi³ xi³ tjio¹mˀen³ qui³si³cˀe¹jna³ˀncho²nˀion¹ jme¹-ni³ nca³ si⁴²cao⁴-si¹ni³ Jesús nca³tsˀi³.
MAR 3:11 Cˀoa⁴ je² ntjao⁴ xi³ nta³jin³, to⁴cˀia⁴-ni³ nca³ qui³sco²tsen³-le⁴ nca³ je², nˀion¹ qui³nchja⁴: Ji³ ni¹³ ˀnti¹-le⁴ Ni³na¹.
MAR 3:12 To⁴nca³ Jesús cjai¹nca³ nˀion¹ tsa³cˀe¹ne²-le⁴ nca³ tsi² tsa² coi⁴tso⁴ya³-le⁴ cho⁴ta⁴ ˀya³-ni³ve⁴ nca³ je².
MAR 3:13 Cˀia⁴ Jesús qui³mi³jon³ jnco³ ni³nto³. Qui³nchja⁴ma³ña³-le⁴ cho⁴ta⁴ xi³ je² coan³me³-le⁴ nca³ ja³ˀai³con³-le⁴.
MAR 3:14 Tsa³cja³ˀa¹jin³ te³jao² cho⁴ta⁴ xi³ coa⁴tio²cao⁴ nca³ je², xi³ je² sca⁴ni²son² nca³ coi⁴nchja⁴ya³,
MAR 3:15 cˀoa⁴ xi³ sˀe⁴-le⁴ ˀnte³ nca³ coan⁴-le⁴ si⁴²nta³ cho⁴ta⁴ xi³ chˀin³ tjin¹-le⁴, cˀoa⁴ nca³ cˀoa⁴sje³xin² nai⁴² xi³ nta³jin³ xi³ tjio¹jin³ ni⁴ma⁴-le⁴ cho⁴ta⁴.
MAR 3:16 Je² xi³ te³jao²-ve⁴ xi³ Jesús tsa³qui³ncha¹: Je² Simón xi³ Pedro qui³tso²-le⁴,
MAR 3:17 cao⁴ Jacobo xi³ ti³-le⁴ Zebedeo, cao⁴ Juan xi³ ntsˀe⁴ Jacobo. Apellido-le⁴ Boanerges qui³tso²-le⁴, xi³ tso²-ni³ nca³ ˀnti¹-le⁴ chˀaon⁴,
MAR 3:18 cao⁴ Andrés, cao⁴ Felipe, cao⁴ Bartolomé, cao⁴ Mateo, cao⁴ Tomás, cao⁴ Jacobo xi³ ti³-le⁴ Alfeo, cao⁴ Tadeo, cao⁴ Simón xi³ cho⁴ta⁴ cananita,
MAR 3:19 cao⁴ Judas Iscariote xi³ tsa³cˀe¹tˀain³ na⁴jmi¹ xi³ tˀa³tsˀe⁴ Jesús. Cˀia⁴ nca³ je³tsa³cja³ˀa¹jin³ cho⁴ta⁴ xi³ te³jao²-ve⁴, Jesús ja³ˀai³-nca¹ni³ ni³ˀya³-le⁴.
MAR 3:20 Coan³xco¹-nca¹ni³ cho⁴ta⁴ncjin², sa³ˀnta³ li²coi³ coan³ tsa³cjen².
MAR 3:21 Cˀia⁴ nca³ qui³nčhˀoe¹ xi¹ncjin¹ Jesús, ji³nčhoa³tsoa³ nca³ qui³tso²: A³li²coi³ nta³ tjin¹³con³.
MAR 3:22 Cho⁴ta⁴ scribano xi³ ja³ˀai³jen³-ni³ na⁴xi⁴na³nta¹ Jerusalén cˀoa⁴qui³tso² nca³ Beelzebú ti¹jna³jin³ ni⁴ma⁴-le⁴ Jesús. Coi³ nca³ Jesús coan³ tsa³cˀa³sje³xin²-le⁴ nai⁴² xi³ nta³jin³ xi³ tjio¹jin³ ni⁴ma⁴-le⁴ cho⁴ta⁴ nca³ je² xi³ nca³jco⁴-le⁴ nai⁴² xi³ qui³tsjoa³ˀnte²-le⁴, tso²-sa³.
MAR 3:23 Jesús qui³nchja⁴-le⁴ cho⁴ta⁴ scribano, tsa³cja¹cao⁴ jnco³ cjoa⁴xco¹son²: Jo¹-sˀin² ma³-le⁴ Satanás nca³ ti⁴je²-ni³ vˀa³sje³xin²-ni³le⁴ je² xi³ ti⁴je²-ni³ Satanás.
MAR 3:24 Tsa² jnco³ cjoa⁴te¹xo³ma³ ma³jao²ya³, tsa² co²ntran⁴ tjio¹-le⁴ xi¹ncjin¹, a³li²coi³ coan⁴ cˀoe¹jna³-ni³.
MAR 3:25 Tsa² jnco³ familia ma³jao²ya³, tsa² co²ntran⁴ tjio¹-le⁴ xi¹ncjin¹, je² familia a³li²coi³ coan⁴ cˀoe¹jna³-ni³.
MAR 3:26 Tsa² Satanás coi⁴so¹tjen⁴ne² yao³-le⁴, tsa² jao² ya³ coan⁴, ni⁴to⁴cˀia³-jin² coan⁴ cˀoe¹jna³-ni³, to⁴sa³ ña³qui³ si¹cha³ yao³-le⁴.
MAR 3:27 Ni⁴ˀya³-jin² xi³ coan⁴ cjoa⁴ˀa³sˀen³ ni³ˀya³-le⁴ cho⁴ta⁴ xi³ tjin¹-le⁴ nca³nˀion¹ nca³ si⁴²che¹ tso³jmi²-le⁴, tsa² tsi² ti¹tjon² vˀe¹tˀa³nˀion¹ je² xi³ tjin¹-le⁴ nca³nˀion¹. To⁴cˀia⁴² nca³ coan⁴ si⁴²che¹ tso³jmi²-le⁴.
MAR 3:28 Xi³ cjoa⁴qui²xi⁴ xi³ xin³-no³ nca³yi³je³ je¹-le⁴ cha⁴tˀa³-le⁴ cho⁴ta⁴, cˀoa⁴-ti⁴ en¹ xi³ nchja⁴ˀaon³-le⁴ Ni³na¹, to⁴jme³-ni³-ve⁴ en¹ xi³ nchja⁴ˀaon³, cha⁴tˀa³-le⁴.
MAR 3:29 To⁴nca³ to⁴ˀya³-ni³ve⁴ xi³ nchja⁴ˀaon³-le⁴ Espíritu Santo, ni⁴to⁴cˀia³-jin² cha⁴tˀa³-le⁴, to⁴nca³ ti¹jna³-le⁴ cjoa⁴ñˀain³ nca³ntsjai².
MAR 3:30 Coi³ cjoa⁴ nca³ je² cho⁴ta⁴ scribano cˀoa⁴qui³tso²-le⁴: Ntjao⁴ xi³ nta³jin³ ti¹jna³jin³ ni⁴ma⁴-le⁴ Jesús.
MAR 3:31 Cˀia⁴ ja³ˀai³ ntsˀe⁴ cao⁴ na⁴-le⁴ Jesús. Tjio¹nti³tsin³. Qui³si³ca³sen¹cjoa⁴-le⁴ Jesús nca³ qui³nchja⁴-le⁴.
MAR 3:32 Ncjin² cho⁴ta⁴ tjio¹ntai³-le⁴ Jesús, qui³tso²-le⁴: Coe⁴-ni³, na⁴-li⁴ cao⁴ ntsˀai³ ja⁴ncha³ ja⁴nti³tsian³². Ji³ xoi¹³, tjio¹va¹sjai³-li².
MAR 3:33 Jesús qui³nchja⁴cao⁴, qui³tso²-le⁴: ˀya¹-ni³ xi³ na⁴-na⁴, cˀoa⁴ ˀya¹-ni³ xi³ ntsˀe³.
MAR 3:34 Qui³sco²tsen³-le⁴ xi³ tjio¹ntai³-le⁴, qui³tso²: Coe⁴-ni³, je²-vi⁴ xi³ na⁴-na⁴, cˀoa⁴ xi³ ntsˀe³.
MAR 3:35 To⁴ˀya³-ni³ve⁴ xi³ cˀoa⁴-sˀin² sˀin¹ jo³-sˀin² me³-le⁴ Ni³na¹, je²-vi⁴ xi³ ña³qui³ ntsˀe³, xi³ ti²chja³, cˀoa⁴ xi³ na⁴-na⁴.
MAR 4:1 Nqui²jnco³cˀa² Jesús tsa³cˀe¹tsˀia⁴cao⁴ nca³ tsa³ca³co¹ya³ ya⁴ ntai³ nta¹chi³con³. Ncjin² cho⁴ta⁴ coan³xco¹tˀa³-le⁴ sa³ˀnta³ Jesús ja³ˀa³sˀen³ jnco³ chi³tso³ xi³ tsa³cˀe²jna³ya³ ja⁴jin³ nta¹chi³con³. Nca³tsˀi³ cho⁴ta⁴ tsa³ca³tio² jña³ nca³ qui³jna³ na³nqui³ ja⁴ntai³ nta¹chi³con³.
MAR 4:2 Ncjin² cjoa⁴ tsa³ca³co¹ya³-le⁴ cho⁴ta⁴ Jesús. Tsa³ca³co¹ya³-le⁴ cao⁴ cjoa⁴xco¹son². Cˀoa⁴-sˀin² tsa³ca³co¹ya³-le⁴:
MAR 4:3 Ti⁴no¹ˀyao³: Coe⁴-ni³, jnco³ xi³ co³jnti² na⁴xin⁴ qui³ co³jnti².
MAR 4:4 Cˀoa⁴coan³ cˀia⁴ nca³ ti¹co³jnti², jnco³ cˀa³ qui³tsao³ntai³ ntia⁴², cˀoa⁴ ni⁴se³ xi³ si¹ma³tjen⁴ jin³sen¹ qui³squi³ne³.
MAR 4:5 Xi³ nqui²jnco³ cˀa³ qui³tsao³ jña³ la⁴jao⁴ chon³, jña³ nca³ to⁴choa³ na³nqui³ chon³. Coan³ntje² nti⁴ton⁴-ni¹ nca³ tsi²coi³ na⁴nca⁴ na³nqui³ xi³ tjin¹-le⁴.
MAR 4:6 To⁴nca³ cˀia⁴ nca³ ji³tjo³ tsˀoi¹, qui³ti² nca³ tsin²-le⁴ ja⁴ma⁴-jin².
MAR 4:7 Tjin¹ cˀa³ xi³ qui³tsao³jin³ na³ˀya¹. Je² na³ˀya¹ chi³so², tsa³cˀe¹chjoa²jin³-le⁴, cˀoa⁴ li²jme³ xi³ qui³tsjoa³.
MAR 4:8 Cˀoa⁴ tjin¹ cˀa³ xi³ nta³ na³nqui³ qui³tsao³jin³. Cjai¹nca³ nta³ qui³tsjoa³, nta³ coan³ncˀa³, nˀion¹ coan³ncjin²ya³. Jnco³ xi³ can³te² cˀa³ qui³tsjoa³ ntje⁴-le⁴, jnco³ xi³ jan²can³ cˀa³ qui³tsjoa³, xi³jnco³ sa³ˀnta³ jnco³ ciento cˀa³ qui³tsjoa³.
MAR 4:9 Cˀia⁴ Jesús qui³tso²-le⁴: Je² xi³ tjin¹ xo⁴ño³ xi³ nčhˀoe¹-ni³, nta³ ca²ta³va³sen¹ño³.
MAR 4:10 Cˀia⁴ nca³ je³tˀa³xin² ti¹jna³ Jesús, je² xi³ čhian³ tjio¹tˀa³-le⁴ cao⁴ xi³ te³jao²-ve⁴ qui³sco²na³nqui³-le⁴: Jo¹ tso²-ni³ je² cjoa⁴-vi⁴.
MAR 4:11 Jesús cˀoa⁴qui³tso²-le⁴: Nca³ jon² qui³tsˀai²-no³ nca³ jchao⁴³ je² cjoa⁴ˀma³-le⁴ cjoa⁴te¹xo³ma³-le⁴ Ni³na¹, to⁴nca³ je² xi³ tsi²coi³ tjio¹cao⁴-na³, cˀoa⁴xin¹-le⁴ nca³yi³je³ cjoa⁴ cao⁴ en¹ xi³ to⁴cjoa⁴xco¹son²,
MAR 4:12 jme¹-ni³ nca³ li²coi³ scoe⁴-si¹ni³, nta³ tsa² nta³ sco¹tsen³, cˀoa⁴ jme¹-ni³ nca³ li²coi³ coan⁴cho⁴ya³-si¹ni³le⁴ nta³ tsa² nta³ cjoi⁴nčhˀoe¹, cˀoa⁴ jme¹-ni³ nca³ tsi² si⁴²cˀo¹fa³ya³tˀa³-si¹ni³le⁴ yao³-le⁴, nca³ tsi² tsa² coi³ cha⁴tˀa³-si¹ni³le⁴ je¹-le⁴.
MAR 4:13 Jesús qui³tso²-le⁴: A³ tsi² tsa² ma³cho⁴ya³-no³ je² cjoa⁴xco¹son²-vi⁴. Jo¹-sˀin² coan⁴cho⁴ya³-no³ tso²cˀoa⁴, nca³yi³je³ cjoa⁴xco¹son².
MAR 4:14 Je² xi³ co³jnti² na⁴xin⁴, je² ni¹ xi³ vˀe¹ntje² en¹nta³-le⁴ Ni³na¹.
MAR 4:15 Je² xi³ qui³tsao³ ya⁴³ ntia⁴², cˀoa⁴cjoan³ cho⁴ta⁴ xi³ nčhˀoe¹ je² en¹nta³-vi⁴, to⁴nca³ nca³ nčhˀoe¹-le⁴, cˀoa⁴ ja⁴cjoan² nčhoa¹ Satanás, fa³ˀa¹xin² en¹nta³ xi³ tji¹ntje²jin³ ni⁴ma⁴-le⁴.
MAR 4:16 Cˀoa⁴ti⁴sˀin²ni³ je² xi³ qui³sˀe³ntje²jin³ jña³ nca³ la⁴jao⁴ chon³. Cˀoa⁴cjoan³ cho⁴ta⁴ xi³ tjin¹-le⁴ cjoa⁴tsjoa³ nca³ cjoe¹ nti⁴ton⁴ je² en¹ xi³ nčhˀoe¹.
MAR 4:17 To⁴nca³ tsin²-le⁴ ja⁴ma⁴-jin². To⁴xqui⁴ ni⁴čhjin³ ma³tse³-le⁴. Cˀia⁴ nca³ fa³ˀai³ cjoa⁴si³, a³xo⁴ cˀia⁴ nca³ fa³ˀa¹ cjoa⁴ñˀain³ xi³ tˀa³tsˀe⁴ en¹nta³-vi⁴, nti⁴ton⁴ tsjion¹ ntia⁴²-le⁴ Ni³na¹.
MAR 4:18 Je² xi³ qui³sˀe³ntje² jin³ na³ˀya¹, cˀoa⁴cjoan³ cho⁴ta⁴ xi³ qui³nčhˀoe¹ en¹nta³,
MAR 4:19 to⁴nca³ je² cjoa⁴va³ xi³ tsˀe⁴ coi³ ni⁴čhjin³-vi⁴, cao⁴ cjoa⁴chˀa¹na⁴cha⁴ xi³ tsˀe⁴ cjoa⁴nchi⁴na¹, cao⁴ cjoa⁴xi²ta³con², nca³yi³je³ coi³ cjoa⁴-vi⁴ nca³ fa³ˀa³sˀen³jin³-le⁴ vˀe¹chjoa²-le⁴ en¹nta³-vi⁴, li²jme³ xi³ tsjoa¹.
MAR 4:20 Je²-vi⁴ xi³ qui³sˀe³ntje² jña³ nca³ nta³ na³nqui³, cˀoa⁴cjoan³ cho⁴ta⁴ xi³ nčhˀoe¹ en¹nta³, cjoe¹ya³-ni¹, cˀoa⁴ si¹-ncjin²ya³-ni³, jnco³ sa³ˀnta³ can³te² cˀa³, xi³jnco³ sa³ˀnta³ jan²can³ cˀa³, xi³ nqui²jnco³ sa³ˀnta³ jnco³ ciento cˀa³ tsjoa¹.
MAR 4:21 Jesús qui³tso²-sa³le⁴: A³ fa³ˀai³cao⁴ ca³nti² cho⁴ta⁴ jme¹-ni³ nca³ vˀe¹jna³nqui³-si¹ni³ ca²xa⁴choa⁴, a³xo⁴ nqui³na⁴chan³. A³ tsi² tsa² vˀe¹jna³ncˀa³.
MAR 4:22 Li²jme³ xi³ tjin¹ xi³ tji¹ˀma³ xi³ tsi² sˀe⁴son²tsen³, ni⁴cjoa⁴che¹-jin² xi³ tsi² jcha⁴-le⁴.
MAR 4:23 Tsa² ˀya³ xi³ tjin¹ xo⁴ño³ xi³ nčhˀoe¹-ni³, nta³ ca²ta³-va³sen¹ño³.
MAR 4:24 Jesús qui³tso²-sa³le⁴ cho⁴ta⁴-ve⁴: Ti⁴coi²ntao⁴³ jo³-sˀin² no²ˀyao²³: Je² xi³ ti⁴coi³-ni³ choa⁴ xi³ vˀe²choao⁴³, sˀe⁴cho⁴ya³-ni³no³, cˀoa⁴ nqui²sa⁴ tse³ sˀe⁴-no³ nca³ jon².
MAR 4:25 Je² xi³ tjin¹-le⁴, cˀoai⁴-sa³le⁴, cˀoa⁴ je² xi³ li²jme³ xi³ tjin¹-le⁴, tjo¹xin²-le⁴ sa³ˀnta³ je² xi³ tjin¹-le⁴.
MAR 4:26 Jesús cˀoa⁴qui³tso²: Cˀoa⁴-sˀin² ma³nco¹son² je² cjoa⁴te¹xo³ma³-le⁴ Ni³na¹, jo³-ni³ tsa² jnco³ cho⁴ta⁴ xi³ vˀe¹tsao³ na⁴xin⁴-le⁴ tso³jmi²ntje² ja⁴jin³ na³nqui³.
MAR 4:27 Va³jna³fe² nca³ ni⁴tjen⁴, vi³so¹tjen⁴ nca³ ni⁴čhjin³. Je² na⁴xin⁴ ma³ntje², ma³jcha¹, to⁴nca³ li²coi³ ve³ cho⁴ta⁴-ve⁴ jo³-sˀin² ma³-ni³.
MAR 4:28 To⁴ya⁴ ma³ntje² jin³na³nqui³ nca³ to⁴je². Ti¹tjon² vi³tjo³ je⁴ˀe⁴, cˀia⁴ ma³ ncho⁴tin⁴, ja⁴scan³ ma³ ni⁴jin⁴.
MAR 4:29 Cˀia⁴ nca³ je³coan³jcha¹ ni⁴jin⁴, nti⁴ton⁴ vi³cha²-ni³ qui⁴cha⁴, nca³ je³ji³cho² ni⁴čhjin³-le⁴ nca³ sˀe⁴xco¹.
MAR 4:30 Jesús qui³tso²: Jme¹ xi³ nco¹son² coan⁴-na¹ je² cjoa⁴te¹xo³ma³-le⁴ Ni³na¹, a³xo⁴ jme¹ en¹ xi³ coi⁴no²cjoa⁴² xi³ ma³nco¹son².
MAR 4:31 Je² ma³nco¹son² jo³-ni³ jnco³ na⁴xin⁴-le⁴ mostaza. Cˀia⁴ nca³ sˀe³ntje² jin³na³nqui³, je²-sa³ xi³ nqui²sa⁴ ˀnti¹ cji³ cao⁴-ni³ tsa² nca³yi³je³ na⁴xin⁴ xi³ tjin¹ son³ˀnte³-vi⁴.
MAR 4:32 To⁴nca³ cˀia⁴ nca³ fe³ sˀe³ntje², ma³jcha¹, nqui²sa⁴-sa³ ma³ncˀa³ cao⁴-ni³ tsa² nca³yi³je³ tso³jmi²ntje². Cjai¹nca³ to⁴te³jnca² ma³, sa³ˀnta³ ma³ fa³yo²tˀain²ˀa³ ni⁴se³ xi³ fi²tjen⁴ jin³sen¹.
MAR 4:33 Cao⁴ ncjin² en¹ xi³ cjoa⁴xco¹son² xi³ cˀoa⁴²tjin¹, Jesús qui³tso²ya³-le⁴ en¹nta³, jo³ tjin¹ xi³ ji³cho¹cjoa⁴-le⁴ nca³ qui³nčhˀoe¹.
MAR 4:34 To⁴cao⁴ en¹ xi³ cjoa⁴xco¹son² tsa³cja²cao⁴, to⁴nca³ cˀia⁴ nca³ ti¹jna³cao⁴ tˀa³xin² cho⁴ta⁴-le⁴, qui³tso²ya³nta³-le⁴ nca³yi³je³.
MAR 4:35 Ti⁴coi³-ni³ ni⁴čhjin³-ve⁴ nca³ coan³xon², cˀoa⁴qui³tso²-le⁴: Coi⁴tja¹ xi³ncoa³tˀa³ nta¹chi³con³.
MAR 4:36 Cho⁴ta⁴-le⁴ qui³si³ca³tio¹tjen⁴nqui³ nca³tsˀi³ jo³ tjin¹ ma³-ni³ cho⁴ta⁴ncjin². Qui³cao⁴ Jesús jo³-sˀin² nca³ ti¹jna³ya³ ja⁴ya³ chi³tso³. Cˀoa⁴ti⁴ tjin¹-sa³ chi³tso³ ˀnti¹ xi³ qui³tse³ntai³-le⁴.
MAR 4:37 A³li² to⁴jo³ xi³ coan³ ntjao⁴xcon¹. Tsa³qui³ncha¹ na³nta¹ ja⁴ya³ chi³tso³, jo³ me³qui³tse³ntjai² na³nta¹ chi³tso³-ve⁴.
MAR 4:38 Jesús qui³jna³fe² ya⁴ to²tsˀin³-le⁴ chi³tso³. Qui³jna³fe² tjin¹nqui³jco³ jnco³ na³jño³fa³nqui³jco³. Qui³si³cja³ˀa¹-le⁴ qui³tso²-le⁴: Maestro, a³ tsi² jo³ coan⁴-li² tsa² ti³ncha³mˀain³-jin⁴.
MAR 4:39 Tsa³qui³so¹tjen⁴ Jesús, tsa³cˀe¹chjoa²-le⁴ ntjao⁴-ve⁴, qui³tso²-le⁴ nta¹chi³con³: Jyo¹ ti⁴jnai³. Qui³sˀe³jyo¹ nti⁴ton⁴ ntjao⁴-ve⁴. Coan³nta³chon³-ni³.
MAR 4:40 Jesús qui³tso²-le⁴: A¹-ni³ nca³ cˀoa⁴-sˀin² jcon³-si¹nio³. A¹-ni³ nca³ tsi² tsa² ma³cjain¹-si¹ni³no³.
MAR 4:41 Cho⁴ta⁴-le⁴ cjai¹nca³ qui³tsa³cjon¹, qui³tso²-le⁴ xi¹ncjin¹: ˀya¹-ni³ve⁴ je²-vi⁴, nca³ sa³ˀnta³ ntjao⁴-vi⁴ cao⁴ nta¹chi³con³-vi⁴ si¹tjo³son²-le⁴.
MAR 5:1 Jesús cao⁴ cho⁴ta⁴-le⁴ ji³cho² xi³ncoa³-ni³le⁴ nta¹chi³con³ ya⁴ na³nqui³-le⁴ cho⁴ta⁴ gadarenos.
MAR 5:2 Cˀia⁴ nca³ Jesús ji³tjo³ chi³tso³, ji³tjo³con³ nti⁴ton⁴-le⁴ jnco³ cho⁴ta⁴ xi³ ja⁴jin³ tsjo¹ ti¹jna³, xi³ cjai¹nca³ tjin¹-le⁴ ntjao⁴ xi³ nta³jin³.
MAR 5:3 Jnco³ cˀa² ya⁴ ti¹jna³ntsjai² ja⁴jin³ tsjo¹-ve⁴. Ni⁴ˀya³-jin² xi³ coan⁴-le⁴ cˀoe⁴²tˀa³nˀion¹ nca³ je², nta³ tsa² cao⁴ cadena.
MAR 5:4 Ncjin² cˀa³ tsa³cˀe¹nˀion¹-ni³ cadena ntso⁴co⁴ cao⁴ ntsja³, to⁴nca³ tsa³ca³te³jtso² cadena. Ni⁴ˀya³-jin² xi³ coan³-le⁴ qui³si³ntˀe¹.
MAR 5:5 Nca³ntsjai² ni⁴čhjin³, nca³ntsjai² ni⁴tjen⁴, tso²ˀva³ ti¹cji³ˀntia¹ nqui³jña¹ cao⁴ ya⁴jin³ tsjo¹-ve⁴. Si¹qui³ˀaon³ yao³-le⁴ cao⁴ la⁴jao⁴.
MAR 5:6 Cˀia⁴ nca³ tsa³ve³ Jesús nca³ cjin³, je² cho⁴ta⁴-ve⁴ qui³to²ca³, tsa³ca³sen²xco¹nchˀin³tˀa³-le⁴, cˀoa⁴ tsa³ve³xcon¹ Jesús.
MAR 5:7 Nˀion¹ qui³nchja⁴, qui³tso²: Jme¹ xi³ tjin¹-na¹ xi³ cao⁴ ji³, ji³ xi³ ˀnti¹-le⁴ Ni³na¹ xi³ nˀion¹ ncˀa³ ti¹jna³. Vˀe³tsˀoa³-le²³ nqui³xcon⁴ Ni³na¹ nca³ tsi² cjoa⁴ñˀain³ si⁴cja³ˀa¹-nai¹³.
MAR 5:8 Nca⁴ Jesús qui³tso²-le⁴: Ti²tjo⁴jin³-lai⁴ je² cho⁴ta⁴-vi⁴, ntjao⁴ xi³ nta³jin³.
MAR 5:9 Jesús qui³sco²na³nqui³-le⁴: Jo¹ ˀmi²-li². Je² qui³tso²: Legión ˀmi²-na³, coi³ nca³ ncjin² ma³-ni³jin⁴.
MAR 5:10 Cˀoa⁴ cjai¹nca³ tsa³cˀe¹tsˀoa³-le⁴ Jesús nca³ tsi² tˀa³xin² ˀnte³ sca⁴ni².
MAR 5:11 Ncjin² chi⁴nca⁴ xi³ tjio¹ma³cjen² ya⁴ tjio¹xco¹-le⁴ čhian³-le⁴ ni³nto³-ve⁴.
MAR 5:12 Nca³tsˀi³ nai⁴² xi³ nta³jin³ tsa³cˀe¹tsˀoa³-le⁴ Jesús, qui³tso²-le⁴: Ya⁴ ti⁴cja³ˀa³sˀen³jin³-na³jin⁴ chi⁴nca⁴-ve⁴, jme¹-ni³ nca³ ya⁴ coi⁴tja¹sˀen³jin³-si¹ni³lai⁴jin⁴.
MAR 5:13 Jesús qui³tsjoa³ˀnte³ nti⁴ton⁴-le⁴. Ji³tjo³ je² nai⁴² xi³ nta³jin³, ya⁴ ja³ˀa³sˀen³-le⁴ chi⁴nca⁴-ve⁴. Ña³jtin¹ chi⁴nca⁴-ve⁴ tsa³nca³jen³nqui³ na⁴xi⁴-ve⁴, qui³tsao³jin³ nta¹chi³con³. Jao² jmi³-la⁴ ma³-ni³ chi⁴nca⁴-ve⁴ xi³ ya⁴ cˀen³jin³ nta¹chi³con³.
MAR 5:14 Tsa³nca³ cho⁴ta⁴ xi³ tjio¹ma³ co³ˀnta³ chi⁴nca⁴-ve⁴. Tsa³cˀe¹ na⁴jmi¹ ya⁴ na⁴xi⁴na³nta¹ cao⁴ ya⁴ nqui³chao³. Cho⁴ta⁴ ji³tjo³ co³tsen³-le⁴ cjoa⁴ xi³ coan³.
MAR 5:15 Cho⁴ta⁴ ja³ˀai³con³-le⁴ Jesús. Tsa³ve³ je² xi³ qui³sˀe³-le⁴ nai⁴² xi³ nta³jin³. To⁴nca³ ntˀai⁴ ti¹jna³, yˀa³cja¹ na³jño³-le⁴, nta³ tjin¹con³. Cho⁴ta⁴ qui³tsa³cjon¹.
MAR 5:16 Je² xi³ tsa³ve³ tsa³cˀe¹-le⁴ na⁴jmi¹ cho⁴ta⁴ jo³ coan³-le⁴ je² xi³ tjin¹-le⁴ nai⁴² xi³ nta³jin³, cˀoa⁴ jo³ coan³-le⁴ chi⁴nca⁴-ve⁴.
MAR 5:17 Cho⁴ta⁴ na³nqui³-ve⁴ tsa³cˀe¹tsˀoa³-le⁴ Jesús nca³ ca²ta³fi² cjin³-le⁴.
MAR 5:18 Jesús ja³ˀa³sˀen³ ya⁴ chi³tso³. Je² xi³ nai⁴² xi³ nta³jin³ qui³si³jti³-le⁴ tsa³cˀe¹tsˀoa³-le⁴ Jesús nca³ ca²ta³vˀe²jna³tˀa³ntsjai²-le⁴.
MAR 5:19 To⁴nca³ Jesús li²coi³ qui³tsjoa³ˀnte²-le⁴, qui³tso²-le⁴: Tˀin³ ni³ˀya³-li⁴, tˀin³chon³-lai⁴ xi²nqui⁴, tˀe²-lai⁴ na⁴jmi¹ jo³ nca³ tjin¹ cjoa⁴nta³ xi³ ca²sˀin¹ xi³ tˀa³tsi⁴ je² Nai³-na¹, jo³-sˀin² nca³ ca²ma³ma⁴que³-li².
MAR 5:20 Qui³ cho⁴ta⁴-ve⁴, tsa³cˀe¹tsˀia⁴cao⁴ nca³ qui³si³nca³son² en¹ ya⁴ ˀnte³ Decápolis, jo³ nca³ tjin¹ cjoa⁴xcon¹ xi³ qui³sˀin³ Jesús xi³ tˀa³tsˀe⁴. Nca³tsˀi³ cho⁴ta⁴ jo³ coan³xcon¹-le⁴.
MAR 5:21 Ji³nčhoa³ nqui²jnco³cˀa²-ni³ Jesús ya⁴³ chi³tso³ xi³ncoa³-ni³ nta¹chi³con³. A³li² to⁴ncjin² cho⁴ta⁴ xi³ coan³xco¹tˀa³-le⁴. Ya⁴ ntai³ nta¹chi³con³ ti¹jna³.
MAR 5:22 Ja³ˀai³nčhˀoe² Jesús jnco³ cho⁴ta⁴ti¹tjon² xi³ tsˀe⁴ ntˀia³ sinagoga. Jairo ˀmi². Cˀia⁴ nca³ tsa³ve³ Jesús, tsa³ca³sen²xco¹nchˀin³tˀa³ ntso⁴co⁴ Jesús.
MAR 5:23 Cjai¹nca³ tsa³cˀe¹tsˀoa³-le⁴, qui³tso²-le⁴ Jesús: ˀnti¹ tso²ti³-na⁴ je³me³mˀen³. Nčhoai¹³ tja³son²-lai⁴ ntsai⁴, jme¹-ni³ nca³ coan⁴nta³-si¹ni³, nca³ cˀoe⁴² jna³con³-si¹ni³.
MAR 5:24 Jesús qui³cao⁴ nca³ je². A³li² to⁴ncjin² cho⁴ta⁴ xi³ qui³tjen⁴nqui³-le⁴, jo³ nca³ tsa³cˀe²jna³ˀncho²nˀion¹-le⁴ Jesús cho⁴ta⁴ncjin².
MAR 5:25 Je³coan³ te³jao² no¹ nca³ ti¹vi³tjo³ njin¹-le⁴ jnco³ chjon⁴².
MAR 5:26 A³li² to⁴cˀoa⁴cji³ cjoa⁴ñˀain³ xi³ je³tsa³cja³ˀa¹ xi³ tˀa³tsˀe⁴ ncjin² chji⁴ne⁴xqui³. Je³qui³si³cje³ nca³yi³je³ taon⁴-le⁴. Ni⁴jme³-jin² xi³ tsa³ca³sen²cao⁴, to⁴sa³ nqui²sa⁴ tao¹ coan³.
MAR 5:27 Cˀia⁴ nca³ qui³nčhˀoe¹ xi³ tˀa³tsˀe⁴ Jesús, qui³jin³-le⁴ nca³tsˀi³ cho⁴ta⁴, ja³ˀai³ca³sen²čhian³ ja⁴jton⁴ ya¹tsˀin⁴ Jesús. Qui³si³cao⁴ na³jño³-le⁴.
MAR 5:28 Chjon⁴²-ve⁴ cˀoa⁴qui³tso²: Tsa² to⁴je² cjoan² na³jño³-le⁴ si³coa⁴, coan⁴nta³-nia¹³.
MAR 5:29 Nti⁴ton⁴ qui³sa³te³chjoa²-le⁴ njin¹-le⁴. Chjon⁴²-ve⁴ ña³qui³ tsen³ coan³-le⁴ yao³-le⁴ nca³ coan³nta³-ni³ chˀin³-le⁴.
MAR 5:30 Nti⁴ton⁴ Jesús tsa³ve³ yao³-le⁴ nca³ ji³tjo³-le⁴ xi³ nca³nˀion¹-le⁴, qui³si³cˀo¹fa³ya³, qui³sco²tsen³-le⁴ cho⁴ta⁴ncjin² xi³ tjen⁴cao⁴, cˀoa⁴qui³tso²: ˀya¹-ni³ xi³ ca²si¹cao⁴ na³jño³-na⁴.
MAR 5:31 Cho⁴ta⁴-le⁴ cˀoa⁴qui³tso²-le⁴: Ji³ ˀyai³ nca³ cˀoa⁴-sˀin² cho⁴ta⁴ncjin² vˀe¹jna³ˀncho²nˀion¹-li². A¹-ni³ cˀoa⁴si³-si¹ni³, ˀya¹-ni³ xi³ ca²si¹cao⁴-na³.
MAR 5:32 Jesús qui³sco²tsen³ntai³-le⁴ nca³ scoe⁴ ˀya³-ve⁴ xi³ cˀoa⁴qui³si³cao⁴.
MAR 5:33 Cˀia⁴ chjon⁴²-ve⁴, qui³tsa³cjon¹, jo³ ja³tse³, nca³ ve³ jo³ coan³-ni³ chˀin³-le⁴. Ji³nčhoa³nčhˀoe², tsa³ca³sen²xco¹nchˀin³tˀa³-le⁴ Jesús, cˀoa⁴qui³tso²-le⁴ nca³yi³je³ xi³ cjoa⁴qui²xi⁴.
MAR 5:34 Jesús cˀoa⁴qui³tso²-le⁴: ˀnti¹ na⁴², coi³ nca³ coan³cjain¹-li², ca²ma³nta³-ni³. Tˀin³-la²na¹ ntai³, ca²ta³ma³ntai³ chˀin³-li⁴.
MAR 5:35 To⁴jo³ ti¹nchja⁴-sa³ Jesús nca³ ja³ˀai³-ni³ cho⁴ta⁴ xi³ tsˀe⁴ ni³ˀya³-le⁴ cho⁴ta⁴ti¹tjon²-le⁴ ntˀia³ sinagoga, cˀoa⁴qui³tso²: Je² tso²ti³-li⁴ je³cˀen³. A¹-ni³ nca³ to⁴jo³ ni²si³-si¹ni³lai⁴ Maestro.
MAR 5:36 Cˀia⁴ Jesús, nca³ qui³nčhˀoe¹ je² cjoa⁴qui²xi⁴ xi³ ja³ˀai³-le⁴, qui³tso²-le⁴ cho⁴ta⁴ti¹tjon²-ve⁴: A³li² jcon³-jin²³, to⁴ca²ta³ma³cjain¹-li².
MAR 5:37 To⁴je² Pedro, cao⁴ Jacobo, cao⁴ Juan ntsˀe⁴ Jacobo xi³ Jesús qui³tsjoa³ˀnte²-le⁴ nca³ ji³nčhoa³tjen⁴nqui³-le⁴, ni⁴ˀya³-jin²sa³ xi³ cja⁴ˀai¹.
MAR 5:38 Ja³ˀai³ ni³ˀya³-le⁴ cho⁴ta⁴ti¹tjon²-ve⁴, cˀia⁴ tsa³ve³ nca³ li² to⁴jo³ xi³ cji³ma³. Cjai¹nca³ tjio¹vˀe¹jta³, tjio¹cji³ˀntia¹.
MAR 5:39 Jesús ja³ˀa³sˀen³ cˀoa⁴qui³tso²-le⁴: A¹-ni³ nca³ cˀoa⁴-sˀin² si³ nˀian²-si¹nio³, cˀoa⁴ ti³chi³ˀntao¹³. ˀnti¹ tso²ti³-ve⁴ a³li² ca²mˀen³-jin², to⁴qui³jna³fe²-ni¹.
MAR 5:40 Jo¹ to⁴tsa³qui³jno²que³ Jesús cho⁴ta⁴. To⁴nca³ cˀia⁴ nca³ je³tsa³cˀa³sje³ nti³tsian³² nca³tsˀi³ cho⁴ta⁴-ve⁴, qui³scoe¹ nˀai³-le⁴ na⁴-le⁴ ˀnti¹ tso²ti³-ve⁴ cao⁴ je² xi³ tjio¹cao⁴ nca³ je², ja³ˀa³sˀen³ jña³ nca³ ti¹jna³ ˀnti¹ tso²ti³-ve⁴.
MAR 5:41 Qui³scoe¹ ntsja³ ˀnti¹ tso²ti³-ve⁴, qui³tso²-le⁴: Talita cumi xi³ tso²-ni³: Tso²ti³, ji³ xi³ xin³-le²³, ti⁴so²tjain⁴-ntai⁴.
MAR 5:42 ˀnti¹ tso²ti³ ji³so¹tjen⁴ nti⁴ton⁴. Tsa³cˀa³mjen³, nca³ te³jao² no¹ tjin¹-le⁴. Cho⁴ta⁴ to⁴coan³xcon¹-le⁴.
MAR 5:43 To⁴nca³ Jesús cjai¹nca³ nˀion¹ tsa³cˀe¹ne²-le⁴ nca³ ni⁴ˀya³-jin² xi³ scoe⁴ je²-vi⁴. Qui³tso²-le⁴ nca³ ca²ta³tsjoa¹-le⁴ xi³ squi⁴ne⁴ tso²ti³-ve⁴.
MAR 6:1 Jesús ji³tjo³-ni³ ya⁴-ve⁴. Ja³ˀai³-ni³ na³nqui³-le⁴. Cho⁴ta⁴-le⁴ tjen⁴nqui³tsao³-le⁴.
MAR 6:2 Ji³cho²ca³ ni⁴čhjin³ ni²cja¹ya³, Jesús tsa³cˀe¹tsˀia⁴cao⁴ nca³ tsa³ca³co¹ya³ ya⁴ ntˀia³ sinagoga. Ncjin² cho⁴ta⁴ nca³ qui³nčhˀoe¹-le⁴, jo³ to⁴coan³xcon¹-le⁴, qui³tso²: Jña¹-ni³ nca³ tjin¹-le⁴ coi³ cjoa⁴-vi⁴. Jme¹ cjoa⁴chji⁴ne⁴ xi³ tsa³cˀai²-le⁴ nca³ to⁴cao⁴ ntsja³ sˀin¹ cjoa⁴xcon¹ xi³ cˀoa⁴chon³.
MAR 6:3 A³ tsi² tsa² je²-vi⁴ xi³ chji⁴ne⁴ya¹, xi³ ˀnti¹-le⁴ María, xi³ ntsˀe⁴ Jacobo, cao⁴ José, cao⁴ Judas, cao⁴ Simón. A³ tsi² tsa² cˀoa⁴-ti⁴ i⁴ tjio¹cao⁴-na¹vi⁴ je² nti³chja³. To⁴ jti³ coan³-le⁴ cho⁴ta⁴ xi³ tˀa³tsˀe⁴ Jesús.
MAR 6:4 To⁴nca³ Jesús cˀoa⁴qui³tso²-le⁴: Nca³tsˀi³ xi³ nchja⁴ya³ tˀa³tsˀe⁴ Ni³na¹ tjin¹-le⁴ xi³ ve³xcon¹ nca³ je². To⁴ya⁴² na³nqui³-le⁴ jña³ nchja⁴-ni³, cˀoa⁴ ya⁴ jin³-le⁴ xi¹ncjin¹, cˀoa⁴ ya⁴ ni³ˀya³-le⁴ li²coi³ ˀya³xcon¹.
MAR 6:5 Ni⁴jme³-jin² cjoa⁴xcon¹ coan³-le⁴ Jesús ya⁴-ve⁴. To⁴choa³ cho⁴ta⁴ xi³ tjio¹mˀen³, xi³ je² qui³si³nta³ nca³ tsa³ca¹yo³son²-le⁴ ntsja³.
MAR 6:6 Jo¹ to⁴coan³xcon¹-le⁴ Jesús nca³ tsi² coan³cjain¹-le⁴ cho⁴ta⁴. Tsa³cˀa³mjen³ ya⁴ nqui³chao³-ve⁴ xi³ tjio¹ntai³-le⁴, tsa³ca³co¹ya³-le⁴.
MAR 6:7 Qui³nchja⁴-le⁴ xi³ te³jao² cho⁴ta⁴-le⁴ve⁴. Jao²jao² qui³si³ca³sen¹. Qui³tsjoa³-le⁴ ˀnte³ nca³ coa⁴te²xo³ma³-le⁴ ntjao⁴ xi³ nta³jin³.
MAR 6:8 Jesús tsa³ca³te¹xo³ma³-le⁴ nca³ tsi²jme³ xi³ cˀoa⁴ nca³ coai⁴ ya⁴ ntia⁴², ni⁴na⁴ˀya³-jin², ni⁴nio⁴xti²la⁴-jin², to⁴je² ya¹ni³se³-le⁴ xi³ cˀoa⁴, ni⁴taon⁴-jin² coi⁴ncha³ xi³jtsa³-le⁴.
MAR 6:9 To⁴nca³ čhjoa⁴jte¹ ca²ta³va¹ya³, to⁴jnco³ chi⁴nca³ ca²ta³vˀa³cja¹, a³li² jao²-jin².
MAR 6:10 Jesús cˀoa⁴qui³tso²-le⁴: To⁴jña³-ni³ nca³ coi⁴tja¹sˀaon³ jnco³ ni³ˀya³, to⁴jnco³ cˀa² ti⁴yo³ jo³ sa³ˀnta³ nca³ coi²tjo⁴nio³ ya⁴ ˀnte³-ve⁴.
MAR 6:11 Je² nca³tsˀi³ xi³ tsi² tsjoa¹-no³ ˀnte³, cˀoa⁴ xi³ tsi² nčhˀoe¹-no³, cˀia⁴ nca³ coi²tjo⁴-nio³ ya⁴ ˀnte³-ve⁴, tˀe²tsao³jnao³ chao³-le⁴ ntso⁴co³, nca³ cˀoa⁴-sˀin² cˀoai⁴-lao⁴³ en¹ nca³ tsi² nta³ cjoan³ ni⁴ma⁴-le⁴. Xi³ cjoa⁴qui²xi⁴ xi³ xin³-no³ nca³ cˀia⁴ ni⁴čhjin³ nca³ tsjoa¹ cjoa⁴ñˀain³ nqui²sa⁴ tse³ cjoa⁴ñˀain³ cjoa⁴ˀa³ coi³ na⁴xi⁴na³nta¹-ve⁴ cao⁴-ni³ tsa² tsˀe⁴ na⁴xi⁴na³nta¹ Sodoma a³xo⁴ xi³ tsˀe⁴ na⁴xi⁴na³nta¹ Gomorra.
MAR 6:12 Cho⁴ta⁴-le⁴ ji³tjo³, qui³nchja⁴ya³ nca³ ca²ta³si¹cˀa³ntjai²ya³ cho⁴ta⁴ cjoa⁴fa³ˀai³tsjen³-le⁴.
MAR 6:13 Ncjin² nai⁴² xi³ nta³jin³ tsa³cˀa³sje³xin². Si²ti⁴ qui³tso²jon³ ncjin² xi³ tjio¹mˀen³, coan³nta³-ni¹.
MAR 6:14 Je² cho⁴ta⁴ti¹tjon² xi³ Herodes ˀmi² qui³nčhˀoe¹ xi³ tˀa³tsˀe⁴ Jesús, nca³ nca³qui³jnta² qui³no²ˀya²-le⁴ jan³ˀain¹-le⁴ Jesús. Cˀoa⁴qui³tso² Herodes: Je² Juan xi³ tsa³ca³te¹nta¹, ja³ˀa³ya²jin³-ni³le⁴ cˀen³, coi³ nca³ cˀoa⁴-sˀin² tjin¹ cjoa⁴xcon¹ xi³ ma³-le⁴.
MAR 6:15 Cˀoa⁴ cho⁴ta⁴ xi³cˀa³ qui³tso²: Je² Elías. Xi³cˀa³-nca¹ni³ qui³tso²: Jnco³ xi³ nchja⁴ya³ tˀa³tsˀe⁴ Ni³na¹ jo³-ni³ tsa² xi³ qui³nchja⁴ya³ nca³sˀa⁴.
MAR 6:16 Cˀia⁴ nca³ Herodes qui³nčhˀoe¹ je²-vi⁴, qui³tso²: Je²-vi⁴ je² Juan xi³ an³ tsa³ca³te³sian³. Ja³ˀa³ya²jin³-ni³le⁴ cˀen³.
MAR 6:17 Nca⁴ ti⁴je²-ni³ Herodes xi³ qui³si³ca³sen¹ cho⁴ta⁴ xi³ qui³tsoa³ Juan, xi³ qui³sca³ni¹ nto⁴ya¹ Juan to⁴tˀa³tsˀe⁴ Herodías. Je² xi³ chjon⁴²-le⁴ ntsˀe⁴ xi³ Felipe ˀmi². Herodes chi³xan³cao⁴ je² chjon⁴²-le⁴ ntsˀe⁴.
MAR 6:18 Juan cˀoa⁴qui³tso²-le⁴ Herodes: Ni⁴to⁴ˀi⁴tse¹-jin² tjo¹ˀnte³-li² nca³ ji³ coi⁴jna³coai⁴ chjon⁴²-le⁴ ntsˀai³.
MAR 6:19 Cˀoa⁴ Herodías coan³jti³que³ Juan, me³-le⁴ si¹cˀen³, to⁴nca³ li²coi³ cˀia⁴² coan³-le⁴ qui³si³cˀen³.
MAR 6:20 Herodes qui³tsa³cjon¹-le⁴ Juan, nca³ ve³-ni¹ nca³ Juan jnco³ cho⁴ta⁴xˀin⁴ xi³ tjin¹-le⁴ cjoa⁴qui²xi⁴, xi³ tsje³, coi³ cjoa⁴ nca³ tsa³ve³cho⁴ta⁴ nca³ je². Cˀia⁴ nca³ qui³nčhˀoe¹-le⁴ ncjin² cjoa⁴ xi³ qui³sˀin³. Cjai¹nca³ to⁴nta³ qui³nčhˀoe¹-le⁴ cao⁴ cjoa⁴tsjoa³.
MAR 6:21 Ja³ˀai³ jnco³ ni⁴čhjin³ xi³ nta³, cˀia⁴ nca³ Herodes tsa³cˀa³sje³ sˀoi¹-le⁴ ni⁴čhjin³ nca³ qui³tsin³. Cˀia⁴ nca³ coan³xon² tsa³cjen²cao⁴ cho⁴ta⁴ti¹tjon²-le⁴, cao⁴ xi³ nca³jco⁴-le⁴ so³nta²do⁴, cao⁴ cho⁴ta⁴ti¹tjon²-le⁴ ya⁴ jña³ nca³ Galilea ˀmi².
MAR 6:22 Ji³cho²sˀen³ tso²ti³-le⁴ Herodías, qui³te², qui³sa³sen³-le⁴ Herodes cao⁴ je² xi³ tjio¹tˀa³ ya¹mi²xa⁴ cao⁴ nca³ je². Je² cho⁴ta⁴ti¹tjon² qui³tso²-le⁴ tso²ti³-ve: Ti⁴je¹-nai¹³ to⁴jme³-ni³ xi³ me³-li², tsjoa³-le²³.
MAR 6:23 Herodes qui³tsjoa³ en¹-le⁴: Nca³yi³je³ xi³ si⁴je¹-nai¹³ tsjoa³-le²³, sa³ˀnta³ va³sen³ xi³ an³ va³te³xo³ma³-le⁴.
MAR 6:24 Tso²ti³ ji³tjo³, cˀoa⁴qui³tso²-le⁴ na⁴-le⁴: Jme¹ xi³ si³je¹-le⁴. Na⁴-le⁴ cˀoa⁴qui³tso²: Ti⁴je¹-lai⁴ jco⁴ Juan Bautista.
MAR 6:25 Tso²ti³-ve⁴ ja⁴cjoan² ja³ˀa³sˀen³nčhˀoe² Herodes, cˀoa⁴-sˀin² qui³si³je¹-le⁴: Coi³ xi³ me³-na³ nca³ ntˀai⁴cjoan² cˀoai⁴ya³-ni³nai¹³ jnco³ čhoa⁴ jco⁴ Juan Bautista.
MAR 6:26 Cjai¹nca³ coan³fao¹-le⁴ Herodes, to⁴nca³ to⁴coi³ nca³ je³qui³tsjoa³ en¹-le⁴, cˀoa⁴-ti⁴ coi³ nca³ cho⁴ta⁴ tjio¹cao⁴ ya⁴tˀa³ ya¹mi²xa⁴, a³li²coi³ coan³me³-le⁴ nca³ mai³ qui³tso²-le⁴.
MAR 6:27 Herodes qui³si³ca³sen¹ nti⁴ton⁴ jnco³ so³nta²do⁴-le⁴ nca³ ca²tji³nčhoa³cao⁴ jco⁴ Juan.
MAR 6:28 Je² so³nta²do⁴ qui³ ca³te³sin³ Juan ya⁴ nto⁴ya¹. Ja³ˀai³cao⁴ jco⁴ ja⁴ya³ jnco³ čhoa⁴. Qui³tsjoa³-le⁴ tso²ti³-ve⁴. Je² tso²ti³-ve⁴ qui³tsjoa³ nqui²ntia³-le⁴ na⁴-le⁴.
MAR 6:29 Cˀia⁴ nca³ qui³nčhˀoe¹ cho⁴ta⁴-le⁴ Juan nca³ cˀoa⁴coan³, ja³ˀai³ qui³scoe¹ yao³-le⁴, tsa³ca¹ñai³.
MAR 6:30 Pa²stro⁴ coan³xco¹tˀa³-le⁴ Jesús, tsa³cˀe¹yi³je³-le⁴ na⁴jmi¹ jña³-le⁴ cjoa⁴ xi³ qui³sˀin³, cao⁴ nca³yi³je³ xi³ tsa³ca³co¹ya³.
MAR 6:31 Jesús cˀoa⁴qui³tso²-le⁴: Nčhoao¹³ nca³ jon² jña³ ˀnte³tˀa³xin²tˀa³. Ya⁴ ti⁴cja¹yao³ jnco³ tjo², nca⁴ ncjin² cho⁴ta⁴ xi³ tjio¹fi², xi³ tjio¹fa³ˀai³con²-le⁴, sa³ˀnta³ li²coi³ tjo³ˀnte³-le⁴ nca³ cjen².
MAR 6:32 Qui³ ya⁴³ chi³tso³ jin³nta¹chi³con³ sa³ˀnta³ ya⁴ ˀnte³tˀa³xin²tˀa³.
MAR 6:33 Ncjin² xi³ tsa³ve³ nca³ tjio¹fi², cˀoa⁴ ncjin² xi³ tsa³ve³xcon³ nca³ je². Ya⁴-jan¹ qui³-ni³ ntso⁴co⁴ ncjin² xi³ tsˀe⁴ nca³yi³je³ na⁴xi⁴na³nta¹ xi³ ya⁴čhian³. Ji³cho² ti¹tjon²-le⁴ nca³ je², coan³xco¹tˀa³-le⁴ Jesús.
MAR 6:34 Cˀia⁴ nca³ Jesús ji³tjo³-ni³ chi³tso³-ve⁴, tsa³ve³ cho⁴ta⁴ncjin². Coan³ma⁴que³ nca³ je², nca⁴ je² jo³-ni³ tsa² va³rre² xi³ tsin²-le⁴ xi³ co³ˀnta³. Tsa³cˀe¹tsˀia⁴cao⁴ nca³ tsa³ca³co¹ya³-le⁴ ncjin² cjoa⁴.
MAR 6:35 Cˀia⁴ nca³ je³coan³xon², ji³cho²con³-le⁴ cho⁴ta⁴-le⁴, qui³tso²: Cjai¹to⁴ tˀa³xin²tˀa³ ˀnte³-vi⁴, cˀoa⁴ je³coan³xon².
MAR 6:36 Cˀoa⁴tˀin²-lai⁴ cho⁴ta⁴-ve⁴ nca³ ca²ta³fi², jme¹-ni³ nca³ coai⁴-si¹ni³ jña³-ve⁴ nqui³chao³ jña³-ve⁴ na⁴xi⁴na³nta¹ ˀnti¹ xi³ čhian³, jme¹-ni³ nca³ ya⁴ coa⁴tse³-si¹ni³le⁴ yao³-le⁴ xi³ coa⁴cjen⁴.
MAR 6:37 Jesús qui³nchja⁴, qui³tso²-le⁴: Tˀai²-lao⁴³ nca³ jon² xi³ coa⁴cjen⁴. Cho⁴ta⁴-le⁴ qui³tso²-le⁴: A³ coa⁴nquin¹ qui³ntai¹³-jin⁴ jao² ciento vi²xo⁴ nio⁴xti²la⁴ nca³ cˀoai⁴-le⁴² xi³ coa⁴cjen⁴.
MAR 6:38 Jesús qui³tso²-le⁴: Jo¹ tjin¹ nio⁴xti²la⁴ tjin¹-no³. Ta⁴nquin¹ cho⁴tsen³-lao⁴³. Cˀia⁴ nca³ tsa³ve³, qui³tso²: Aon² ma³-ni³, cˀoa⁴ jao² jti⁴.
MAR 6:39 Cˀia⁴ tsa³cˀe¹xa¹-le⁴ nca³ qui³si³ca³tio² nca³tsˀi³ cho⁴ta⁴ ya⁴ jin³ li⁴ji⁴xcoen¹. Tsa³ca³tio²jtin¹ jnco¹jnco¹ ˀnte³.
MAR 6:40 Jnco¹jnco¹ ciento tsa³ca³tio²jtin¹, cˀoa⁴ ña³chan²te³ ña³chan²te³ tsa³ca³tio².
MAR 6:41 Jesús qui³scoe¹ xi³ aon² nio⁴xti²la⁴ cao⁴ xi³ jao² jti⁴-ve⁴, qui³sco²tsen³ncˀa², qui³si³chi³con³tˀain³, qui³si³xcoa⁴ nio⁴xti²la⁴-ve⁴, qui³tsjoa³-le⁴ cho⁴ta⁴-le⁴ jme¹-ni³ nca³ si⁴²cˀa³vi¹-si¹ni³le⁴. Ti⁴cˀoa⁴-sˀin²ni³ qui³si³cˀa³vi¹-le⁴ nca³tsˀi³ je² jao² jti⁴-ve⁴.
MAR 6:42 Tsa³cjen² nca³tsˀi³, coan³squi³.
MAR 6:43 Tsa³cˀe¹xco¹ nio⁴xti²la⁴čhˀoa¹, cao⁴ čhˀoa¹-le⁴ jti⁴. Te³jao² ma³-ni³ ni⁴sin⁴ xi³ qui³tse³.
MAR 6:44 Aon² jmi³ cho⁴ta⁴xˀin⁴ tsa³cjen².
MAR 6:45 Jesús tsa³cˀe¹ne² nti⁴ton⁴-le⁴ cho⁴ta⁴-le⁴ nca³ ja³ˀa³sˀen³ chi³tso³-ve⁴, nca³ qui³ ti¹tjon²-le⁴ sa³ˀnta³ na⁴xi⁴na³nta¹ Betsaida ya⁴ xi³ncoa³-ni³. Tjen⁴ nca³ tjio¹fi² nca³ je², ti⁴je²-ni³ Jesús tsa³cˀe¹ne²-le⁴ cho⁴ta⁴ncjin² nca³ ca²ta³fi² nca³tsˀi³.
MAR 6:46 Cˀia⁴ nca³ je³cˀoa⁴-sˀin² tsa³cˀe¹ne²-le⁴ nca³tsˀi³, qui³ cˀe¹tsˀoa³ tˀa³xin².
MAR 6:47 Xi³ je³coan³xon², je² chi³tso³-ve⁴ ti¹jna³ nca³va³sen³-le⁴ jin³ nta¹chi³con³. Jesús ti¹jna³ nca³ to⁴je² ya⁴ na³nqui³qui³xi².
MAR 6:48 Jesús tsa³ve³ nca³ je³coi³jta² cho⁴ta⁴-le⁴ nca³ tjio¹cjen³nta¹ chi³tso³-ve⁴, nca⁴ je² ntjao⁴-ve⁴ cjai¹nca³ cja⁴ˀai¹-sˀin² ti¹fa³ˀa³. Jo³-ni³ tsa² las tres nca³ ta⁴njion²ya³, Jesús ji³cho²con³-le⁴ cho⁴ta⁴-le⁴ nca³ tso²ˀva³son² nta¹chi³con³ jo³-ni³ tsa² me³-le⁴ fi² ti¹tjon².
MAR 6:49 Cˀia⁴ nca³ cho⁴ta⁴-le⁴ tsa³ve³ nca³ tso²ˀva³son² nta¹chi³con³, qui³si³cja³ˀai³tsjen³ nca³ tsa³ve³ xi³ cˀoa⁴cji³ sen¹-le⁴ cho⁴ta⁴ cji³. Qui³squi³ˀntia¹xcon¹ cho⁴ta⁴-le⁴.
MAR 6:50 Nca³tsˀi³ cho⁴ta⁴-le⁴ tsa³ve³ nca³ je², to⁴qui³jma²-le⁴ chˀin³xcon¹. To⁴nca³ Jesús tsa³cja¹cao⁴ nti⁴ton⁴ cho⁴ta⁴-le⁴. Cˀoa⁴qui³tso²-le⁴: Ti⁴nˀion¹ta³con²³, an³ nia¹³, a³li² jcon³jion²³.
MAR 6:51 Jesús ja³ˀa³sˀen³con³-le⁴ ya⁴³ chi³tso³-ve⁴, qui³sˀe³jyo¹ ntjao⁴. Je² cho⁴ta⁴-le⁴ jo³ nca³ li²coi³ ti⁴ve³-jin²ni³ yao³-le⁴, jo³ coan³xcon¹-le⁴,
MAR 6:52 nca⁴ li²coi³ coan³cho⁴ya³-le⁴ je² cjoa⁴-le⁴ nio⁴xti²la⁴, to⁴nca³ xi¹jin³ ni⁴ma⁴-le⁴.
MAR 6:53 Cˀia⁴ nca³ je³ja³ˀa³to³tˀa³ nta¹chi³con³, ji³cho² ya⁴ na³nqui³ jña³ Genesaret ˀmi². Tsa³qui³ncha¹ chi³tso³-ve⁴.
MAR 6:54 Cˀia⁴ nca³ ji³tjo³-ni³ chi³tso³-ve⁴, cho⁴ta⁴ xi³ ya⁴ tjin¹ tsa³ve³ nti⁴ton⁴ Jesús.
MAR 6:55 Si¹ma³ nca³qui³jnta² ja⁴ˀnte³ xi³ ya⁴ čhian³-le⁴. Ja³ˀai³cao⁴ qui³jnta²-ni³ xi³ tjio¹mˀen³, xi³ tjio¹son²-ni³le⁴ ni³jña³, to⁴jña³-ni³ nca³ nčhˀoe¹ nca³ ti¹jna³ Jesús.
MAR 6:56 To⁴jña³-ni³ve⁴ nca³ ja³ˀa³sˀen³ nca³ je², nta³ tsa² na⁴xi⁴na³nta¹ ˀnti¹, nta³ tsa² na⁴xi⁴na³nta¹ yˀai³, nta³ tsa² nqui³chao³, qui³si³ca³tio¹ jin³sen¹ ya⁴ nti³tsin³ je² xi³ tjio¹mˀen³. Tsa³cˀe¹tsˀoa³-le⁴ nca³ to⁴coi³ cjoan² si⁴²cao⁴ tjon³ je² na³jño³-le⁴. Nca³tsˀi³ xi³ cˀoa⁴-sˀin² qui³si³cao⁴ coan³nta³-ni³.
MAR 7:1 Coan³xco¹tˀa³-le⁴ Jesús cho⁴ta⁴ fariseos, cao⁴ cˀa³ xi³ tsˀe⁴ cho⁴ta⁴ scribano xi³ ja³ˀai³-ni³ Jerusalén.
MAR 7:2 Qui³sco²tsen³-le⁴ cˀa³ cho⁴ta⁴-le⁴ Jesús nca³ tjio¹cjen² nio⁴xti²la⁴ cao⁴ ntsja³ xi³ li²coi³ tsje³ nca³ cje³ va³ne¹jon³jin², tsa³cja³ˀa¹nqui³jmi¹.
MAR 7:3 (Nca⁴ je² cho⁴ta⁴ fariseos cao⁴ nca³tsˀi³ cho⁴ta⁴ judíos cˀoa⁴-sˀin² qui³si³tjo³son² costumbre-le⁴ nˀai³jcha¹cjin³-le⁴, nca³ tsa² tsi² ncjin² cˀa³ coa⁴ne²jon³ ntsja³ li²coi³ cjen².
MAR 7:4 Cˀia⁴ nca³ fe³fa³ˀai³-ni³ nti⁴tsian⁴², tsa² tsi² ti¹tjon² coa⁴nco²ya³, li²coi³ cjen². Cˀoa⁴-ti⁴ ncjin²-sa³ cjoa⁴ xi³ cja⁴ˀai¹ xi³ qui³sˀe³-le⁴ nca³ va³ne¹ya³ cho⁴tsin¹ xi³ ˀvi³ya², cao⁴ xo²lo⁴, cao⁴ ti⁴²qui⁴cha⁴, cao⁴ ni³jña³-le⁴.)
MAR 7:5 Cho⁴ta⁴ fariseos cao⁴ cho⁴ta⁴ scribano qui³sco²na³nqui³-le⁴ Jesús: A¹-ni³ nca³ tsi² si¹cji³tjo³son²-si¹ni³ cho⁴ta⁴-li⁴ je² costumbre-le⁴ nˀai³jcha¹cjin³-na¹, to⁴nca³ cjen² nio⁴xti²la⁴ cao⁴ ntsja³ xi³ li²coi³ tsje³.
MAR 7:6 Jesús cˀoa⁴qui³tso²-le⁴: Nta³ qui³nchja⁴ya³ Isaías xi³ tˀa³tsaon⁴³ xi³ cho⁴ta⁴ jao²ncjain¹ ˀmi²-no³. Cˀoa⁴-sˀin² tji¹tˀa³: Je² cho⁴ta⁴-vi⁴ ve³xcon¹-na³ cao⁴ en¹-le⁴, to⁴nca³ ni⁴ma⁴-le⁴ xin² tjio¹-na³.
MAR 7:7 Li²jme³ xi³ chji¹-le⁴ nca³ ve³xcon¹-na³, nca⁴ va³co¹ya³ jo³-ni³ cjoa⁴fa³ˀai³tsjen³ xi³ tsˀan⁴, cjoa⁴ xi³ to⁴xquia⁴ cjoa⁴te¹xo³ma³-le⁴ cho⁴ta⁴.
MAR 7:8 Qui³njion² cjoa⁴te¹xo³ma³-le⁴ Ni³na¹, ni²tjo³son²-lao⁴³ costumbre-le⁴ cho⁴ta⁴: Nca³ va³ne¹ya³ xo²lo⁴, cao⁴ cho⁴tsin¹ xi³ ˀvi³ya². Ncjin²-sa³ cjoa⁴ xi³ cˀoa⁴-sˀin² nˀiaon²³.
MAR 7:9 Jesús qui³tso²-sa³le⁴: Ni²cji³tson²³ cjoa⁴te¹xo³ma³-le⁴ Ni³na¹ jme¹-ni³ nca³ ni²tjo³son²-si¹ni³lao⁴³ costumbre-no³ xi³ tsaon⁴³.
MAR 7:10 Moisés cˀoa⁴qui³tso²: Jcha⁴xcoin¹³ nˀai³-li⁴ na⁴-li⁴. Cˀoa⁴ je² xi³ nchja⁴ˀaon³-le⁴ nˀai³-le⁴ na⁴-le⁴ ntia³ ca²ta³mˀen³.
MAR 7:11 To⁴nca³ jon² vi³xon¹³ nca³ nta³-ni¹ tsa² jnco³ cho⁴ta⁴ cˀoa⁴tso²-le⁴ nˀai³-le⁴ a³xo⁴ na⁴-le⁴: To⁴jme³-ni³ve⁴ xi³ coan⁴chjen¹-no³ xi³ tsˀan⁴, Corbán ni¹, xi³ tso²-ni³: Je³qui³tsˀai²tˀa³-le⁴ Ni³na¹.
MAR 7:12 Jon² li²coi³ ti⁴vˀai²ˀnte³-ni³lao⁴³ nca³ jme³-sa³ xi³ sˀin⁴² xi³ tˀa³tsˀe⁴ nˀai³-le⁴ a³xo⁴ xi³ tˀa³tsˀe⁴ na⁴-le⁴.
MAR 7:13 Jon² ni²cji³tson²³ en¹-le⁴ Ni³na¹ nca³ li²jme³ chji¹-le⁴ xi³ to⁴cjoa⁴ tˀa³tsˀe⁴ costumbre-no³. Cˀoa⁴-ti⁴sˀin² nˀiaon²³ ncjin² cjoa⁴ jo³-ni³ tsa² je²-vi⁴.
MAR 7:14 Jesús qui³nchja⁴-le⁴ cho⁴ta⁴ncjin², qui³tso²-le⁴: Nta³ ti⁴no¹ˀya³-nao¹³ nca³tsˀio³, ca²ta³ma³cho⁴ya³-no³.
MAR 7:15 Li²jme³ xi³ tjin¹ xi³ fa³ˀa³sˀen³jin³-le⁴ cho⁴ta⁴ xi³ coan⁴ si⁴²cji³tson¹ nca³ je², to⁴je² xi³ vi³tjo³jin³-ni³ ni⁴ma⁴-le⁴, to⁴je²-ve⁴ xi³ si¹cji³tson¹ cho⁴ta⁴.
MAR 7:16 Tsa² ˀya³ xi³ tjin¹-le⁴ xo⁴ño³ xi³ nčhˀoe¹-ni³, nta³ ca²ta³va³sen¹ño³.
MAR 7:17 Jesús ji³tjo³xin²-le⁴ cho⁴ta⁴, ja³ˀa³sˀen³ jnco³ ni³ˀya³, cho⁴ta⁴-le⁴ qui³sco²na³nqui³-le⁴ xi³ tˀa³tsˀe⁴ je² cjoa⁴xco¹son².
MAR 7:18 Jesús qui³tso²-le⁴: Cˀoa⁴-ti⁴ jon² a³ tsi² ma³cho⁴ya³-no³. A³ tsi² ma³cho⁴ya³-no³ nca³ nca³yi³je³ xi³ fa³ˀa³sˀen³jin³-le⁴ cho⁴ta⁴ li²coi³ coan⁴ si⁴²cji³tson¹ ni⁴ma⁴-le⁴.
MAR 7:19 Li²coi³ fa³ˀa³sˀen³jin³ ni⁴ma⁴-le⁴, to⁴ya⁴ tsˀoa⁴, cˀoa⁴ cˀia⁴ vi³tjo³ nca³ va³jti³. Jesús cˀoa⁴qui³tso² nca³ tsi²jme³ tso³jmi² xi³ ma³chi³ne³ xi³ si¹cji³tson¹ ni⁴ma⁴-na¹.
MAR 7:20 To⁴nca³ qui³tso² nca³ je² cjoa⁴fa³ˀai³tsjen³ xi³ vi³tjo³jin³-ni³le⁴ ni⁴ma⁴-le⁴ cho⁴ta⁴, je² ni¹ xi³ si¹cji³tson¹ cho⁴ta⁴.
MAR 7:21 Ja⁴jin³ ni⁴ma⁴-le⁴ cho⁴ta⁴ nčhoa¹-ni³ cjoa⁴fa³ˀai³tsjen³ tsˀen⁴ xi³ tsi² nta³ tjin¹, nca³yi³je³ cjoa⁴cha³jnqui³ xi³ tsˀe⁴ xˀin⁴ cao⁴ ya¹nchjin¹ xi³ je³chi³xan³ cao⁴ xi³ cje³ vi³xan³-jin², cao⁴ xi³ cˀen³ si¹cˀen³,
MAR 7:22 nca³yi³je³ cjoa⁴che¹, cjoa⁴xi²ta³con², cjoa⁴tsˀen⁴, cjoa⁴chˀa¹na⁴cha⁴, cao⁴ xi³ tsin²-le⁴ cjoa⁴soa³-jin², cao⁴ xi³ to⁴xcon⁴ vˀi²ma³cao⁴, cjoa⁴ˀaon³ta³con², cjoa⁴chi⁴con¹.
MAR 7:23 Nca³yi³je³ coi³ cjoa⁴tsˀen⁴-vi⁴, ni⁴ma⁴-le⁴ nčhoa¹jin³-ni³ cho⁴ta⁴. Je²-vi⁴ xi³ si¹cji³tson¹ cho⁴ta⁴.
MAR 7:24 Jesús tsa³qui³so¹tjen⁴. Qui³ na³nqui³-le⁴ na⁴xi⁴na³nta¹ Tiro, cao⁴ na⁴xi⁴na³nta¹ Sidón. Ja³ˀa³sˀen³ jnco³ ni³ˀya³. Cai³-le⁴ nca³ ˀya³ xi³ scoe⁴, to⁴nca³ li²coi³ coan³ tsa³cˀe²jna³ˀma³.
MAR 7:25 Jnco³ chjon⁴² xi³ tjin¹-le⁴ jnco³ tso²ti³ ˀnti¹ xi³ tjin¹-le⁴ ntjao⁴ xi³ nta³jin³. Nti⁴ton⁴ nca³ qui³nčhˀoe¹ xi³ tˀa³tsˀe⁴ Jesús, ja³ˀai³nčhˀoe², tsa³ca³sen²xco¹nchˀin³tˀa³-le⁴ ntso⁴co⁴ Jesús.
MAR 7:26 Je² chjon⁴²-ve⁴ tsˀe⁴ cho⁴ta⁴ griega to⁴nca³ Sirofenicia na³nqui³-le⁴. Je² chjon⁴²-ve⁴ tsa³cˀe¹tsˀoa³-le⁴ Jesús nca³ cˀoa⁴sje³xin²-le⁴ tso²ti³-le⁴ je² nai⁴² xi³ nta³jin³.
MAR 7:27 To⁴nca³ Jesús cˀoa⁴qui³tso²-le⁴: Ti¹tjon² ca²ta³cjen² xi³ ˀnti¹xti³, nca³ li²coi³ nta³ nca³ chjoe¹ nio⁴xti²la⁴-le⁴ ˀnti¹xti³ nca³ nia¹ ˀnti¹ ni²cˀa³tsao³-le⁴.
MAR 7:28 Chjon⁴²-ve⁴ qui³tso²-le⁴ Jesús: Jaon³, Señor, to⁴nca³ nia¹ ˀnti¹ xi³ va³tio²nqui³ ya¹mi²xa⁴ cji³ne³ xcoa⁴-le⁴ nio⁴xti²la⁴-le⁴ ˀnti¹xti³.
MAR 7:29 Cˀia⁴ Jesús qui³tso²-le⁴: Coi³ nca³ cˀoa⁴ca²si³, tˀin³-la²na¹ntai³. Je² nai⁴² xi³ nta³jin³ ca²vi³tjo³jin³-ni³ ni⁴ma⁴-le⁴ tso²ti³-li⁴.
MAR 7:30 Chjon⁴² qui³ ni³ˀya³-le⁴. Tsa³ve³ tso²ti³-le⁴ nca³ qui³ni²ca³te³son² na⁴chan³, cˀoa⁴ nai⁴²-ve⁴ je³ji³tjo³jin³-ni³ ni⁴ma⁴-le⁴.
MAR 7:31 Jesús ji³tjo³ nqui²jnco³cˀa²-ni³ na⁴xi⁴na³nta¹ Tiro. Ja³ˀa³to³ na⁴xi⁴na³nta¹ Sidón. Cˀoa⁴ ja³ˀa³to³jin³ jña³ nca³ Decápolis ˀmi². Ja³ˀai³ nta¹chi³con³ Galilea.
MAR 7:32 Cho⁴ta⁴ ja³ˀai³cao⁴-le⁴ jnco³ xi³ jta³ya³, xi³ li²coi³ nta³ ma³-le⁴ nchja⁴. Tsa³cˀe¹tsˀoa³-le⁴ Jesús nca³ coa⁴²son²-le⁴ ntsja³.
MAR 7:33 Jesús qui³scoe¹ tsa³cja³ˀa¹xin²jin³-le⁴ cho⁴ta⁴ncjin² xi³ tjio¹. Qui³sca³ni¹sˀen³ na⁴jma¹ntsja³ ya⁴ xo⁴ño³ nca³ je², tsa³cˀe¹čha¹, qui³si³cao⁴ ni⁴jen⁴.
MAR 7:34 Jesús qui³sco²tsen³ncˀa², ja³ˀa¹tse³jin³ ni⁴ma⁴-le⁴, qui³tso²-le⁴: Efata xi³ tso²-ni³ ca²ta³tjo³ˀai².
MAR 7:35 Nti⁴ton⁴ qui³tjo³ˀai² xo⁴ño³, coan³jnta¹ya³-ni³ ni⁴jen⁴. Nta³ qui³nchja⁴.
MAR 7:36 Jesús tsa³cˀe¹ne²-le⁴ nca³ ni⁴jo³-jin² coi⁴tso⁴-le⁴ ni⁴ˀya³-jin². To⁴nca³ cˀia⁴ nca³ cˀoa⁴-sˀin² tsa³cˀe¹ne²-le⁴, to⁴nqui²sa⁴ qui³sca³ni¹son² en¹.
MAR 7:37 A³li² to⁴cˀoa⁴cji³ coan³xcon¹-le⁴ cho⁴ta⁴, qui³tso²: Nta³ qui³sˀin³ nca³yi³je³. Si¹nta³ya³-ni³ xi³ jta³ya³ nca³ nčhˀoe¹, xi³ yo⁴ma⁴ nca³ nchja⁴.
MAR 8:1 Coi³ ni⁴čhjin³-ve⁴, cjai¹ to⁴ncjin² cho⁴ta⁴ xi³ coan³xco¹. Tsi²jme³ xi³ tjin¹-le⁴ xi³ cji³ne³. Jesús qui³nchja⁴-le⁴ cho⁴ta⁴-le⁴, cˀoa⁴qui³tso²-le⁴:
MAR 8:2 Cjai¹nca³ ma³ma⁴que⁴ cho⁴ta⁴ncjin²-vi⁴ nca³ je³coan³ jan² ni⁴čhjin³ nca³ tjio¹ma³tjen⁴nqui³-na³, cˀoa⁴ tsin²-le⁴ xi³ cji³ne³-jin².
MAR 8:3 Tsa² to⁴sca³ni³nchjan³-nia¹³ ni³ˀya³-le⁴, to⁴coan⁴ˀi³nta³-ni¹ ya⁴ya³ ntia⁴², nca⁴ tjin¹ cˀa³ xi³ cjin³ fa³ˀai³-ni³.
MAR 8:4 Je² cho⁴ta⁴-le⁴ qui³tso²-le⁴: Jo¹-ni³ coan⁴squi³-jin²ni³ nio⁴xti²la⁴ je² cho⁴ta⁴-vi⁴ i⁴ jña³ ˀnte³tˀa³xin²tˀa³.
MAR 8:5 Jesús qui³sco²na³nqui³-le⁴: Jo¹ tjin¹ nio⁴xti²la⁴ xi³ tjin¹-no³. Ña³to³ ma³-ni³, qui³tso² cho⁴ta⁴-le⁴.
MAR 8:6 Cˀia⁴ tsa³cˀe¹ne²-le⁴ cho⁴ta⁴ncjin² nca³ ca²ta³va³tio²ne² na³nqui³. Qui³scoe¹ nio⁴xti²la⁴ xi³ ña³to³-ve⁴, cˀoa⁴ qui³tsjoa³ cjoa⁴nta³, qui³si³xcoa⁴, qui³tsjoa³-le⁴ cho⁴ta⁴-le⁴ jme¹-ni³ nca³ si⁴²cˀa³vi¹-si¹ni³le⁴ cho⁴ta⁴ xi³ coan³xco¹. Cho⁴ta⁴-le⁴ qui³si³cˀa³vi¹-le⁴ cho⁴ta⁴ncjin².
MAR 8:7 Cˀoa⁴-ti⁴ tjio¹jnco³jao²-le⁴ jti⁴ˀnti¹. Jesús qui³si³chi³con³tˀain³. Tsa³cˀe¹ne² nca³ cˀoa⁴-ti⁴ ca²ta³si¹cˀa³vi¹-le⁴ cho⁴ta⁴ xi³ coan³xco¹.
MAR 8:8 Cho⁴ta⁴ tsa³cjen², ña³qui³ coan³squi³. Tsa³cˀe¹xco¹ čhˀoa¹-le⁴ xi³ qui³njen²nqui³, ña³to³ ni⁴sin⁴ ma³-ni³.
MAR 8:9 Ño³-la⁴ jmi³ ma³-ni³ cho⁴ta⁴ xi³ tsa³cjen². Jesús tsa³cˀe¹ne²-le⁴ cho⁴ta⁴ nca³ ca²ta³fi².
MAR 8:10 Ja³ˀa³sˀen³ nti⁴ton⁴ chi³tso³ cao⁴ cho⁴ta⁴-le⁴. Ja³ˀai³ ya⁴ ˀnte³ Dalmanuta.
MAR 8:11 Ja³ˀai³con³-le⁴ cho⁴ta⁴ fariseos, tsa³cˀe¹tsˀia⁴cao⁴ nca³ qui³scan³cao⁴ Jesús. Qui³sco²tˀa³ nca³ je² nca³ qui³si³je¹-le⁴ jnco³ choa⁴ xi³ tsˀe⁴ ncˀa³jmi³.
MAR 8:12 Jesús to⁴ja³ˀa¹tse³jin³ ni⁴ma⁴-le⁴, qui³tso²: A¹-ni³ nca³ choa⁴ si¹je¹-si¹ni³ je² na⁴xi⁴na³nta¹-vi⁴. Xi³ cjoa⁴qui²xi⁴ xi³ xin³-no³ nca³ li²coi³ cˀoai⁴-le⁴ choa⁴ je² na⁴xi⁴na³nta¹-vi⁴.
MAR 8:13 Jesús qui³si³ca³tio¹ cho⁴ta⁴-ve⁴, ja³ˀa³sˀen³ nqui²jnco³cˀa²-ni³ chi³tso³, qui³ xi³ncoa³tˀa³ nta¹chi³con³.
MAR 8:14 Cho⁴ta⁴-le⁴ qui³cha³jin³-le⁴ nio⁴xti²la⁴, li²coi³ tsa³cˀa³. To⁴jnco³ ma³-ni³ nio⁴xti²la⁴ xi³ yˀa³ nca³ qui³ ya⁴³ chi³tso³.
MAR 8:15 Jesús tsa³cˀe¹ne²-le⁴ cho⁴ta⁴-le⁴, qui³tso²-le⁴: Cho¹tsen³lao⁴³, ti⁴coi²ntao⁴³ yao³-no³ xi³ tˀa³tsˀe⁴ na⁴ˀyo⁴san³-le⁴ cho⁴ta⁴ fariseos, cao⁴ na⁴ˀyo⁴san³-le⁴ Herodes.
MAR 8:16 Cho⁴ta⁴-le⁴ tsa³cjao¹ya³-ni³, cˀoa⁴qui³tso²-le⁴ xi¹ncjin¹: Coi³ nca³ tsin²-na¹ nio⁴xti²la⁴, coi³² nca³ cˀoa⁴qui³tso²-na¹.
MAR 8:17 Cˀia⁴ nca³ Jesús coan³jin³-le⁴, qui³tso²-le⁴: A¹-ni³ nca³ cˀoa⁴-sˀin² ti³cho³va³ya³-si¹nio³ nca³ tsin²-no³ nio⁴xti²la⁴. A³ cje³ ˀya³-jion²³. A³ cje³ ma³cho⁴ya³-jin²no³. A³ to⁴jo³ xi¹jin³ ni⁴ma⁴-no³.
MAR 8:18 Tjin¹ xcon³. A¹-ni³ nca³ tsi² ma³tsen³-si¹ni³no³. Tjin¹ xo⁴ño³. A¹-ni³nca³ tsi² no²ˀya²-si¹nio³. A³ tsi² tjin¹jin³-no³.
MAR 8:19 Cˀia⁴ nca³ aon² jmi³ ma³-ni³ cho⁴ta⁴ xi³ an³ qui³si³xcoa⁴-le⁴ je² nio⁴xti²la⁴ xi³ aon² ma³-ni³, jo¹ tjin¹ ni⁴sin⁴ ma³-ni³ je² nio⁴xti²la⁴čhˀoa¹ xi³ tsa³cˀe²xco¹³. Cho⁴ta⁴-le⁴ qui³tso²-le⁴: Te³jao² ni⁴sin⁴ coan³.
MAR 8:20 Cˀia⁴ Jesús qui³tso²: Cˀia⁴ nca³ ña³to³ ma³-ni³ nio⁴xti²la⁴, cˀoa⁴ ño³ jmi³ cho⁴ta⁴, jo¹ tjin¹ ni⁴sin⁴ya¹ ma³-ni³ je² nio⁴xti²la⁴čhˀoa¹ xi³ tsa³cˀe²xco¹³. Cho⁴ta⁴-le⁴ qui³tso²-le⁴: Ña³to³ ni⁴sin⁴ya¹ coan³.
MAR 8:21 Jesús qui³tso²-le⁴: A³ cje³ma³cho⁴ya³-jin²no³.
MAR 8:22 Jesús ji³cho² na⁴xi⁴na³nta¹ Betsaida. Cho⁴ta⁴ ja³ˀai³cao⁴-le⁴ jnco³ cho⁴ta⁴ xi³ xca⁴ cji³. Tsa³cˀe¹tsˀoa³-le⁴ Jesús nca³ ca²ta³si¹cao⁴ nca³ je² cho⁴ta⁴-ve⁴.
MAR 8:23 Cˀia⁴² Jesús qui³scoe¹ ntsja³ je² cho⁴ta⁴ xi³ xca⁴ cji³-ve⁴. Tsa³cˀa³sje³jin³ ja⁴jin³ na⁴xi⁴na³nta¹. Tsa³cˀe¹čha¹nqui³ xcon⁴, tsa³ca¹son²-le⁴ ntsja³, qui³sco²na³nqui³-le⁴ tsa² tjin¹ xi³ ma³tsen³-le⁴.
MAR 8:24 Cho⁴ta⁴-ve⁴ qui³sco²tsen³ncˀa², qui³tso²: Je³²ˀve³ cho⁴ta⁴, to⁴nca³ to⁴cˀoa⁴cjoan³ ya¹ cjoan³ xi³ si¹ma³, ma³-na³.
MAR 8:25 Nqui²ntia³ Jesús tsa³ca¹son² ntsja³ xcon⁴, nˀion¹ qui³si³cˀa³ xcon⁴. Coan³nta³ cho⁴ta⁴-ve⁴. Nta³ tsa³ve³yi³je³.
MAR 8:26 Jesús qui³sca³ni¹ ni³ˀya³-le⁴ cho⁴ta⁴-ve⁴, qui³tso²-le⁴: A³li² vi³tja³sˀen³jin³-jin² na⁴xi⁴na³nta¹-li⁴. A³li² ˀya³ xi³ jo³ ˀmi²-lai⁴ na⁴xi⁴na³nta¹-li⁴.
MAR 8:27 Ji³tjo³ Jesús cao⁴ cho⁴ta⁴-le⁴, qui³ ya⁴ na⁴xi⁴na³nta¹ˀnti¹ xi³ nchja⁴-ni³ na⁴xi⁴na³nta¹ Cesarea de Filipo. Ya⁴ya³ ntia⁴² Jesús qui³sco²na³nqui³-le⁴ cho⁴ta⁴-le⁴, qui³tso²-le⁴: Jo¹ tso²-na³ cho⁴ta⁴, ˀya¹-nia³ an³-vi⁴.
MAR 8:28 Cho⁴ta⁴-le⁴ qui³nchja⁴: Juan Bautista. Tjin¹ cˀa³ xi³ Elías tso², cˀoa⁴ tjin¹ cˀa³ xi³ tso² nca³ jnco³ xi³ nchja⁴ya³ tˀa³tsˀe⁴ Ni³na¹.
MAR 8:29 Cˀia⁴ Jesús qui³tso²-le⁴: Cˀoa⁴ jon², jo¹ vi³xon¹³, ˀya¹nia³ an³-vi⁴. Pedro qui³nchja⁴ qui³tso²-le⁴: Ji³ ni¹³ xi³ Cristo ˀmi²-li².
MAR 8:30 Jesús tsa³cˀe¹ne²-le⁴ nca³ ni⁴ˀya³-jin² xi³ jo³ coi⁴tso⁴-le⁴ xi³ tˀa³tsˀe⁴.
MAR 8:31 Tsa³cˀe¹tsˀia⁴cao⁴ nca³ tsa³ca³co¹ya³-le⁴ nca³ je² ˀnti¹-le⁴ cho⁴ta⁴-ve⁴ tjin¹ne²-le⁴ nca³ cjoa⁴ˀa³ cjoa⁴ñˀain³. Cho⁴ta⁴jchi¹nca³ cao⁴ cho⁴ta⁴ti¹tjon²-le⁴ na⁴ˀmi³, cao⁴ cho⁴ta⁴ scribano taon³ scoe⁴ nca³ je², si⁴cˀen³-ni³ nca³ je², to⁴nca³ xi³ coan³jan²-ni³ ni⁴čhjin³ cjoa⁴ˀa¹ya³-ni³le⁴.
MAR 8:32 Jesús qui³nchja⁴tsen³ je² en¹-vi⁴. Cˀia⁴ Pedro qui³cao⁴ tˀa³xin² Jesús, tsa³cˀe¹tsˀia⁴cao⁴ nca³ qui³nchja⁴ti³cao⁴ nca³ je².
MAR 8:33 To⁴nca³ Jesús qui³si³cˀo¹fa³ya³, qui³sco²tsen³-le⁴ cho⁴ta⁴-le⁴, qui³nchja⁴ti³cao⁴ Pedro, qui³tso²: Ti⁴tja¹jton³-nai¹³ Satanás nca³ tsi² ˀmi³tˀa³-lai⁴ cjoa⁴-le⁴ Ni³na¹, to⁴nca³ ˀmi³tˀa³-lai⁴ cjoa⁴-le⁴ cho⁴ta⁴.
MAR 8:34 Cˀoa⁴ qui³nchja⁴-le⁴ cho⁴ta⁴-le⁴ cao⁴ cho⁴ta⁴ncjin², qui³tso²-le⁴: To⁴ˀya³-ni³ve⁴ xi³ me³-le⁴ nca³ cho⁴ta⁴-na⁴ coan⁴, ca²ta³tsjion¹con³ yao³-le⁴, ca²ta³vˀa³mi³ cro²-le⁴, nta³ ca²ta³fi²tˀa³-na³.
MAR 8:35 To⁴ˀya³-ni³ve⁴ xi³ me³-le⁴ cˀoa⁴sje³ntjai² ni⁴ma⁴-le⁴, to⁴si⁴²cha³ ni⁴ma⁴-le⁴. To⁴ˀya³-ni³ve⁴ xi³ si⁴²cha³ ni⁴ma⁴-le⁴ xi³ to⁴tˀa³tsˀan⁴, xi³ to⁴tˀa³tsˀe⁴ je² en¹nta³, cˀoa⁴sje³ntjai² ni⁴ma⁴-le⁴.
MAR 8:36 Jme¹ xi³ coi⁴njen⁴-le⁴ cho⁴ta⁴ tsa² si⁴²cha³ ni⁴ma⁴-le⁴, nta³ tsa² coi⁴njen⁴-le⁴ nca³yi³je³ son³ˀnte³.
MAR 8:37 A³xo⁴ jme¹ chji¹-le⁴ xi³ tsjoa¹-nca¹ni³ cho⁴ta⁴ xi³ ti⁴tˀa³tsˀe⁴-ni³ ni⁴ma⁴-le⁴.
MAR 8:38 Je² xi³ ma³soa³con³que³-na³ cao⁴ je² en¹-na⁴ nqui³xcon⁴ cho⁴ta⁴ xi³ tjin¹ ntˀai⁴-vi⁴, xi³ cho⁴ta⁴cha³jnqui³, xi³ cho⁴ta⁴-je¹, je² ˀnti¹-le⁴ cho⁴ta⁴ cˀoa⁴-ti⁴ coan⁴soa³con³que³ nca³ je² cˀia⁴ nca³ cjoa⁴ˀai¹-ni³ cao⁴ cjoa⁴je³ya³-le⁴ nˀai³-le⁴ cao⁴ a²ncje⁴ xi³ tsje³.
MAR 9:1 Jesús cˀoa⁴-ti⁴ qui³tso²-le⁴: Xi³ cjoa⁴qui²xi⁴ xi³ xin³-no³ nca³ tjin¹ cˀa³ xi³ i⁴ tjio¹-vi⁴ xi³ tsi² sco¹tˀa³ cjoa⁴vi³ya³ sa³ˀnta³ nca³ scoe⁴ cjoa⁴te¹xo³ma³-le⁴ Ni³na¹ xi³ cjoa⁴ˀai¹ cao⁴ nca³nˀion¹.
MAR 9:2 Xi³ coan³ jaon³ ni⁴čhjin³ Jesús qui³cao⁴ Pedro cao⁴ Jacobo cao⁴ Juan. Qui³mi³jon³ tˀa³xin² jnco³ ni³nto³ xi³ ncˀa³. Ya⁴ tjio¹ to⁴je². Jesús tsˀa³ntjai²ya³-le⁴ nqui³xcon⁴ nca³ je².
MAR 9:3 Coan³fa³te³ na³jño³-le⁴. Cjai¹nca³ nˀion¹ coan³čhoa³. Cˀoa⁴²cjoan³ nchˀan¹ coan³ na³jño³-le⁴. Ni⁴jnco³-jin² xi³ cˀoa⁴-sˀin² va³ne¹ i⁴ son³ˀnte³-vi⁴ nca³ cˀoa⁴-sˀin² nˀion¹ čhoa³ si¹čhoa³ na³jño³.
MAR 9:4 Cˀoa⁴-ti⁴ coan³tsen³-le⁴ Elías cao⁴ Moisés xi³ tjio¹fa¹cao⁴ Jesús. Pedro cao⁴ Jacobo cao⁴ Juan tsa³ve³.
MAR 9:5 Cˀia⁴ qui³nchja⁴ Pedro, cˀoa⁴ qui³tso²-le⁴ Jesús: Maestro, nta³-ni¹ nca³ i⁴ ti³yoi³⁴-jin⁴vi⁴, tsa² jan² xco¹jnta² si⁴ntai³⁴-jin⁴, jnco³ xi³ tˀa³tsi⁴, jnco³ xi³ tˀa³tsˀe⁴ Moisés, nqui²jnco³ xi³ tˀa³tsˀe⁴ Elías.
MAR 9:6 Li²coi³ coan³cho⁴ya³-le⁴ jña³-le⁴ xi³ qui³tso²-le⁴, to⁴qui³tso³cjon¹ nca³ jan².
MAR 9:7 Ja³ˀai³ jnco³ yo³jvi³ xi³ qui³si³ncˀian¹-le⁴. Jnco³ jta⁴ qui³no²ˀya²-le⁴ ya⁴ jin³ yo³jvi³ xi³ qui³tso²: Je²-vi⁴ ˀnti¹-na⁴ xi³ tsjoa³que⁴, ti⁴no¹ˀya³-lao⁴³ nca³ je².
MAR 9:8 Nti⁴ton⁴ cho⁴ta⁴-le⁴ qui³sco²tsen³ntai³. Ni⁴ˀya³-jin² xi³ ti⁴tsa³ve³-ni³ xi³ ti¹jna³cao⁴ Jesús. To⁴jnco³ je² Jesús xi³ ti¹jna³.
MAR 9:9 Ti⁴ˀa³-ni³ nca³ tjio¹nčhoa¹jen³tˀa³ ni³nto³-ve⁴, Jesús tsa³cˀe¹ne²-le⁴ nca³ ni⁴ˀya³-jin² xi³ jo³ coi⁴tso⁴-le⁴ jme³ xi³ tsa³ve³. To⁴cˀia⁴² coan⁴ cˀoe⁴² na⁴jmi¹ cˀia⁴ nca³ je² ˀnti¹-le⁴ cho⁴ta⁴ cjoe⁴ cjoa⁴ˀa¹ya³jin³-ni³le⁴ cˀen³.
MAR 9:10 Je² cho⁴ta⁴-le⁴ tsa³cˀe¹jin³con³ je² en¹-ve⁴, tsa³cjao¹ya³-ni³ jme¹-ni³ xo⁴ tso²-le⁴ve⁴: Cjoa⁴ˀa¹ya³jin³-ni³le⁴ cˀen³.
MAR 9:11 Cho⁴ta⁴-le⁴ qui³sco²na³nqui³-le⁴ Jesús: Jme¹-ni³ xi³ tso² cho⁴ta⁴ scribano, nca³ ma³chjen¹ nca³ Elías ti¹tjon²-cjoa²la² cjoa⁴ˀai¹.
MAR 9:12 Jesús qui³tso²-le⁴: Cjoa⁴qui²xi⁴ ti¹tjon² cjoa⁴ˀai¹ Elías. Cˀoe⁴²nta³ nqui²jnco³cˀa² nca³yi³je³ cjoa⁴ jo³ cjoan³ nca³sˀa⁴. Jo¹-sˀin² tji¹tˀa³ xi³ tˀa³tsˀe⁴ je² ˀnti¹-le⁴ cho⁴ta⁴, nca³ tse³ cjoa⁴ñˀain³ cjoa⁴ˀa², nca³ cho⁴ta⁴ taon³ scoe⁴ nca³ je².
MAR 9:13 To⁴nca³ cˀoa⁴xin³-no³ nca³ an³ nca³ je³ja³ˀai³ Elías, cˀoa⁴qui³si³cao⁴ jo³-sˀin² coan³me³con³, jo³-sˀin² tji¹tˀa³ xi³ tˀa³tsˀe⁴.
MAR 9:14 Cˀia⁴ nca³ Jesús ji³cho²con³-le⁴ cho⁴ta⁴-le⁴, tsa³ve³ nca³ li² to⁴ncjin² cho⁴ta⁴ xi³ qui³tse³ntai³-le⁴. Cho⁴ta⁴ scribano tjio¹fao¹ya³-ni³ cao⁴ je².
MAR 9:15 To⁴coan³xcon¹ nti⁴ton⁴-le⁴ nca³tsˀi³ cho⁴ta⁴, cˀia⁴ nca³ tsa³ve³ Jesús. Qui³to²ca³nčhˀoe², qui³si³ti²ˀnta³.
MAR 9:16 Jesús qui³sco²na³nqui³-le⁴: Jme¹-ni³ xi³ ti³cho⁴va²ya³-nio³.
MAR 9:17 Qui³nchja⁴ jnco³ xi³ ti¹jna³jin³-le⁴, qui³tso²: Maestro, ja²ˀai⁴cao⁴-le²³ ˀnti¹-na⁴ xi³ tsi² ma³-le⁴ nchja⁴, xi³ tjin¹-le⁴ ntjao⁴ xi³ nta³jin³.
MAR 9:18 To⁴jña³-ni³ve⁴ nca³ fi²cao⁴ nca³ je², si¹cˀa³tjen⁴tˀa³ na³nqui³ yao³-le⁴. Nta¹xo¹ vi³tjo³ tsˀoa³, ma³nca³ya³ ni⁴ˀño⁴, ti¹xi²ya³. Cˀoa⁴ca²xin³-le⁴ cho⁴ta⁴-li⁴ nca³ ca²ta³mˀaon³sje³, to⁴nca³ li²coi³ ca²ma³-le⁴.
MAR 9:19 Jesús qui³nchja⁴, qui³tso²-le⁴: Jon² xi³ cho⁴ta⁴ xi³ li²coi³ ma³cjain¹-no³. Cˀia¹ sa³ˀnta³ nca³ coa²te⁴jna³cao⁴-no³. Cˀia¹ sa³ˀnta³ nca³ si³cjain¹-no³. Nčhoa¹cao⁴-nao¹³ ti³ xi³ ti¹mˀen³.
MAR 9:20 Ji³nčhoa³cao⁴-le⁴. Cˀia⁴ nca³ qui³sco²tsen³-le⁴, nti⁴ton⁴ ntjao⁴ xi³ nta³jin³-ve⁴ qui³si³cja³tse¹ ti³-ve⁴. Qui³si³cˀa³tjen⁴tˀa³ na³nqui³, tsa³nco¹ya³ ˀnte³. Nta¹xo¹ ji³tjo³ tsˀoa³.
MAR 9:21 Jesús qui³sco²na³nqui³-le⁴ nˀai³-le⁴ ti³-ve⁴: Jo¹ coan³ tjin¹ ni⁴čhjin³ nca³ cˀoa⁴coan³-le⁴. Nˀai³-le⁴ qui³tso²: Sa³ˀnta³ nca³ ˀnti¹ cji³.
MAR 9:22 Ncjin² cˀa³ ntjao⁴ xi³ nta³jin³ ca³ni¹ti¹cja¹ ˀnti¹-na⁴vi⁴, lˀi¹ ca³ni¹jin³, na³nta¹ ca³ni¹jin³, jme¹-ni³ nca³ si⁴²cˀen³-si¹ni³ nca³ je². To⁴nca³ tsa² coan⁴-li², jcha⁴ma⁴ta³con²-na³jin⁴, ti⁴sen⁴cao⁴-na³jin⁴.
MAR 9:23 Jesús cˀoa⁴qui³tso²-le⁴: Tsa² coan⁴-li² nca³ coan⁴cjain¹-li², nca³yi³je³ cjoa⁴ coan⁴²-le⁴ je² xi³ ma³cjain¹-le⁴.
MAR 9:24 Nti⁴ton⁴ nˀion¹ qui³nchja⁴ nˀai³-le⁴ ti³-ve⁴, qui³tso²: Ma³cjain¹-na³, xi³ tsi² ti⁴ma³cjain¹-ni³na³, ti⁴sen⁴cao⁴-nai¹³.
MAR 9:25 Cˀia⁴ nca³ tsa³ve³ Jesús nca³ coan³ncjin² cho⁴ta⁴, qui³nchja⁴ti³cao⁴ ntjao⁴ xi³ nta³jin³, qui³tso²-le⁴: Ntjao⁴ xi³ tsi² ma³-li² en¹, xi³ tsi² no²ˀyai²³, an³ va³te³xo³ma³-le²³, ti²tjo⁴jin³-lai⁴ nca³ je², a³li² ti⁴vi³tja³sˀen³-jin²ni³lai⁴ ni⁴ma⁴-le⁴ ti³-ve⁴.
MAR 9:26 Cˀia⁴ qui³squi³ˀntia¹ ntjao⁴-ve⁴. Cjai¹nca³ qui³si³cja³tse¹ ti³-ve⁴. Ntjao⁴-ve⁴ ji³tjo³jin³-le⁴. Ti³-ve⁴ qui³sˀe³jna³ jo³-ni³ tsa² cˀen³. Cˀoa⁴-sˀin² nca³ ncjin² cho⁴ta⁴ xi³ cˀoa⁴qui³tso²: Je³qui³jna³cˀen³.
MAR 9:27 To⁴nca³ Jesús qui³scoe¹-ni³ ntsja³ ti³-ve⁴, qui³si³qui³so¹tjen⁴, cˀoa⁴ ji³so¹tjen⁴ ti³-ve⁴.
MAR 9:28 Cˀia⁴ nca³ je³ja³ˀa³sˀen³ ni³ˀya³ Jesús, je² cho⁴ta⁴-le⁴ qui³sco²na³nqui³ tˀa³xin²-le⁴: A¹-ni³ nca³ tsi² coan³-si¹ni³na³jin⁴ nca³ jin⁴ nca³ qui³chˀa²sje³xin²-lai⁴jin⁴ ntjao⁴-ve⁴.
MAR 9:29 Jesús qui³tso²-le⁴: Ni⁴ˀi⁴tse¹-jin² ma³vi³tjo³ ntjao⁴ xo⁴ cjoan³-vi⁴, to⁴cao⁴ cjoa⁴vˀe²tsˀoa³ cao⁴ cjoa⁴vi³jna³nchjan³.
MAR 9:30 Cˀia⁴ nca³ je³ji³tjo³-ni³ ya⁴-ve⁴, ja³ˀa³to³jin³ na³nqui³ Galilea. Li²coi³ coan³me³-le⁴ nca³ scoe⁴ cho⁴ta⁴.
MAR 9:31 Jesús tsa³ca³co¹ya³-le⁴ cho⁴ta⁴-le⁴, cˀoa⁴qui³tso²-le⁴: Je² ˀnti¹-le⁴ cho⁴ta⁴ cˀoai⁴tˀa³-le⁴ ntsja³ cho⁴ta⁴. Si⁴²cˀen³ nca³ je². Cˀia⁴ nca³ je³cˀen³, cjoa⁴ˀa¹ya³-ni³le⁴ nca³ coan⁴ jan² ni⁴čhjin³.
MAR 9:32 To⁴nca³ cho⁴ta⁴-le⁴ li²coi³ coan³cho⁴ya³-le⁴ je² en¹-vi⁴. To⁴qui³tsa³cjon¹ nca³ scoi⁴na³nqui³-le⁴.
MAR 9:33 Ji³cho² ya⁴ na⁴xi⁴na³nta¹ jña³ Capernaum ˀmi². Cˀia⁴ nca³ je³ti¹jna³ ja⁴ya³ ni³ˀya³, Jesús qui³sco²na³nqui³-le⁴ cho⁴ta⁴-le⁴: Jme¹ xi³ ti³cho⁴va²ya³-nio³ ya⁴ya³ ntia⁴².
MAR 9:34 To⁴nca³ cho⁴ta⁴-le⁴ to⁴tsa³ca³tio²jyo¹. Cˀoa⁴-sˀin² tsa³cjao¹ya³-ni³ xi¹ncjin¹ ya⁴ya³ ntia⁴², ˀya¹ xi³ coa⁴sen⁴jna³ ti¹tjon².
MAR 9:35 Cˀia⁴ Jesús tsa³cˀe²jna³, qui³nchja⁴-le⁴ xi³ te³jao²-ve⁴, qui³tso²-le⁴: Tsa² ˀya³ xi³ me³-le⁴ coa⁴sen⁴jna³ ti¹tjon², cˀoe¹jna³tjen⁴nqui³-le⁴ nca³tsˀi³, cˀoa⁴ cho⁴ˀnta³-le⁴ nca³tsˀi³ coan⁴.
MAR 9:36 Jesús qui³scoe¹ jnco³ ˀnti¹, qui³si³ca¹jna³ ˀncho²va³sen³-le⁴ nca³ je². Tsa³cˀa³ncˀa³. Qui³tso²-le⁴ nca³tsˀi³ cho⁴ta⁴.
MAR 9:37 Je² xi³ scoe¹tjao² jnco³ ˀnti¹ xi³ tˀa³tsˀan⁴, an³ xi³ scoe¹tjao²-na³, cˀoa⁴ je² xi³ scoe¹tjao²-na³ nca³ an³, a³li² an³-jian²³ xi³ scoe¹tjao²-na³, to⁴nca³ scoe¹tjao² je² xi³ qui³si³ca³sen¹-na³.
MAR 9:38 Juan qui³nchja⁴, qui³tso²-le⁴: Maestro, jnco³ cho⁴ta⁴ tsa³ˀyai³⁴-jin⁴ xi³ cao⁴ jan³ˀain¹-li⁴ vˀa³sje³xin²-ni³ nai⁴² xi³ nta³jin³ xi³ tjio¹jin³ ni⁴ma⁴-le⁴ cho⁴ta⁴, to⁴nca³ li²coi³ fi²tˀa³-na¹. Tsa³ca³te³chjoa²-lai⁴jin⁴, nca³ li²coi³ ña¹ fi²tˀa³-na¹.
MAR 9:39 Jesús qui³tso²: A³li² vi³yo³chjoa²-jion²³. Ni⁴ˀya³-jin² xi³ tjin¹ xi³ sˀin¹ cjoa⁴xcon¹ cao⁴ jan³ˀain¹-na⁴, xi³ cˀia⁴² nti⁴ton⁴ coan⁴-le⁴ aon³ coi⁴nchja⁴-na³.
MAR 9:40 Je² xi³ tsi² fi²co²ntran⁴-na¹, ja⁴tˀa³tsan⁴² ti¹jna³.
MAR 9:41 Xi³ cjoa⁴qui²xi⁴ xi³ xin³-no³ nca³ ni⁴ˀi⁴tse¹-jin² si⁴²cha³ chji¹-le⁴ to⁴ˀya³-ni³ve⁴ xi³ tsjoa¹ ˀi⁴tse¹-no³ na³nta¹ xi³ tˀa³tsˀan⁴, nca³ cho⁴ta⁴-le⁴ Cristo nio¹³.
MAR 9:42 To⁴ˀya³-ni³ve⁴ xi³ si⁴²ca³jnqui³ je¹ jnco³ ˀnti¹ xi³ ma³cjain¹-le⁴ tˀa³tsˀan⁴, cjai¹-la² nca³ nta³-le⁴ tsa² jnco³ la⁴jao⁴ xi³ tsˀe⁴ molino sˀe⁴tˀa³nˀion¹nqui³ ya¹sin³, cˀoa⁴ si⁴cˀa³tjen⁴jin³ nta¹chi³con³ cho⁴ta⁴ xo⁴ cji³-ve⁴.
MAR 9:43 Tsa² ntsai⁴ si¹cji³tson¹-li², to⁴sa³ ti⁴cha³tˀai³. Nqui²sa⁴ nta³ tsa² coi⁴jna³choin³ nca³ co³to³ ntsja³ ti³soi³, cao⁴-ni³ tsa² to⁴jo³ jao² ma³ ntsai⁴, cˀoa⁴ nca³ cha⁴ni²jin³-li² ya⁴ infierno, ya⁴jin³ lˀi¹ xi³ tsi² coan⁴ coi⁴tsˀao³,
MAR 9:44 jña³ nca³ tsi² coi³ mˀen³ cho⁴nto³-le⁴, cˀoa⁴ ni⁴cˀia⁴-jin² fi³tsˀao³ lˀi¹.
MAR 9:45 Tsa² ntso⁴coi³ si¹cji³tson¹-li², to⁴sa³ ti⁴cha³tˀai³. Nqui²sa⁴ nta³ tsa² coi⁴jna³choin³ chi⁴ˀnque¹, cao⁴-ni³ tsa² to⁴jo³ jao² ma³ ntso⁴coi³, cˀoa⁴ nca³ cha⁴ni²jin³-li² ya⁴ infierno, jña³ nca³ tjin¹ lˀi¹ xi³ tsi² coan⁴ coi⁴tsˀao³,
MAR 9:46 jña³ nca³ tsi² coi³ mˀen³ cho⁴nto³-le⁴, cˀoa⁴ ni⁴cˀia⁴-jin² fi³tsˀao³ lˀi¹.
MAR 9:47 Tsa² xcoin³ si¹cji³tson¹-li², chˀa⁴sjai³. Nqui²sa⁴ nta³ tsa² coi⁴tja¹sˀain³jin³ cjoa⁴te¹xo³ma³-le⁴ Ni³na¹ cao⁴ to⁴jnco³ xcoin³, cao⁴-ni³ tsa² nca³ jao² ma³ xcoin³, cˀoa⁴ nca³ cha⁴ni²jin³-li² ya⁴ infierno,
MAR 9:48 jña³ nca³ tsi² coi³ mˀen³ cho⁴nto³-le⁴, cˀoa⁴ ni⁴cˀia⁴-jin² fi³tsˀao³ lˀi¹.
MAR 9:49 Nca³tsˀi³ coan⁴tsje³-ni³ cao⁴ lˀi¹, nca³yi³je³ cjoa⁴tjao² si⁴²jnčha³-ni³ na⁴xa⁴.
MAR 9:50 Nta³-ni¹ je² na⁴xa⁴-ve⁴, to⁴nca³ tsa² je² na⁴xa⁴-ve⁴ cha⁴jta³, jo¹-sˀin² coan⁴ nqui²ntia³ cˀoai⁴-le⁴ jta⁴. Ca²ta³sˀe³jna³jin³ ni⁴ma⁴-no³ na⁴xa⁴-ve⁴. Nchˀan¹ ti⁴yo³cao⁴³ xi²nquio⁴³.
MAR 10:1 Jesús ji³tjo³-ni³ ya⁴-ve⁴, ja³ˀai³ ya⁴ jña³ na³nqui³ xi³ Judea ˀmi², cˀoa⁴ ja³ˀa³to³tˀa³ nta¹je⁴ Jordán. Coan³xco¹tˀa³ nqui²ntia³-le⁴ cho⁴ta⁴ncjin². Nqui²ntia³ Jesús tsa³ca³co¹ya³-le⁴ jo³-sˀin² nca³ coan³nca³-le⁴.
MAR 10:2 Cho⁴ta⁴ fariseos ji³cho²con³-le⁴, qui³sco²na³nqui³-le⁴, nca³ chˀao³-sˀin² si⁴²cao⁴ nca³ je²: A³ tjo³ˀnte³-le⁴ xi³ xˀin⁴ nca³ tsjion¹ chjon⁴²-le⁴.
MAR 10:3 To⁴nca³ Jesús qui³tso²-le⁴: Jo¹-sˀin² tsa³cˀe¹ne²-no³ Moisés.
MAR 10:4 Cho⁴ta⁴ fariseos qui³tso²: Moisés qui³tsjoa³ˀnte² nca³ sˀe³nta³ xon⁴ nca³ coan⁴ tsjion¹ xi¹ncjin¹.
MAR 10:5 Jesús qui³tso²-le⁴: Coi³ nca³ xi¹jin³ ni⁴ma⁴-no³ qui³squi³-no³ je² cjoa⁴te¹xo³ma³-vi⁴.
MAR 10:6 Sa³ˀnta³ qui³sˀe³nta³ son³ˀnte³-vi⁴, Ni³na¹ tsa³cˀe¹nta³ xi³ xˀin⁴ cao⁴ xi³ chjon⁴².
MAR 10:7 Coi³-vi⁴ je² xˀin⁴ si⁴²ca³tio¹ nˀai³-le⁴ na⁴-le⁴, cˀoa⁴ chjon⁴²-le⁴ cˀoe¹jna³cao⁴.
MAR 10:8 Je² xi³ jao² coan³-ni³ nca³ chjon⁴² nca³ xˀin⁴, to⁴ma³jnco³-ni³ yao³-le⁴. Cˀoa⁴-sˀin² nca³ li² ti⁴jao² ma³-ni³ nca³ je², to⁴nca³ to⁴jnco³ yao³ coan³-ni³.
MAR 10:9 Je² xi³ Ni³na¹ tsa³cˀe¹cjao², a³li² vˀa³sje³xin²-jin² cho⁴ta⁴.
MAR 10:10 Cˀia⁴ nca³ ji³cho² ni³ˀya³-le⁴ cho⁴ta⁴-le⁴ qui³sco²na³nqui³ nqui²ntia³-le⁴ Jesús xi³ tˀa³tsˀe⁴ ti⁴coi³-ni³ cjoa⁴.
MAR 10:11 Jesús tso²-le⁴: To⁴ˀya³-ni³ve⁴ xi³ tsjion¹ chjon⁴²-le⁴, xi³ cja⁴ˀai¹ chjon⁴² vi³xan³cao⁴, si¹cha³jnqui³tˀa³-le⁴ chjon⁴²-le⁴.
MAR 10:12 Tsa² chjon⁴² xi³ tsjion¹ xˀin⁴-le⁴, xi³ cja⁴ˀai¹ xˀin⁴ vi³xan³cao⁴, cˀoa⁴-ti⁴ si¹cha³jnqui³tˀa³-le⁴ xˀin⁴-le⁴.
MAR 10:13 Cho⁴ta⁴ ja³ˀai³ cha³ni²tˀa³-le⁴ ˀnti¹xti³ Jesús, jme¹-ni³ nca³ si⁴²cao⁴-si¹ni³. Cho⁴ta⁴-le⁴ qui³nchja⁴ti³cao⁴ je² xi³ ja³ˀai³cao⁴.
MAR 10:14 Cˀia⁴ nca³ Jesús tsa³ve³, coan³jti³-le⁴, qui³tso²-le⁴: Tˀai²ˀnte³-lao⁴³ ca²tji³nčhoa¹con³-na³ ˀnti¹xti³-ve⁴, a³li² vˀe²chjoa²-jin²lao⁴³, nca⁴ cˀoa⁴-sˀin² cjoan³ je² xi³ tsˀe⁴ cjoa⁴te¹xo³ma³-le⁴ Ni³na¹.
MAR 10:15 Xi³ cjoa⁴qui²xi⁴ xi³ xin³-no³, to⁴ˀya³-ni³ve⁴ xi³ tsi² scoe¹ je² cjoa⁴te¹xo³ma³-le⁴ Ni³na¹ jo³-ni³ tsa² ˀnti¹xti³ scoe¹ xi³ vˀai²-le⁴, li²coi³ coan⁴ cjoa⁴ˀa³sˀen³.
MAR 10:16 Jesús tsa³cˀa³ncˀa³ ˀnti¹xti³-ve⁴, tsa³ca¹yo³son²-le⁴ ntsja³, qui³si³chi³con³tˀain³.
MAR 10:17 Cˀia⁴ nca³ Jesús ji³tjo³-ni³ nca³ coai⁴ ya⁴³ ntia⁴², ji³nčhoa³ to³ca³nčhˀoe² jnco³ xi³ tsa³ca³sen²xco¹nchˀin³ nqui³xcon⁴ nca³ je², qui³sco²na³nqui³-le⁴: Maestro ntai³, jme¹ cjoa⁴nta³ xi³ sˀian³ jme¹-ni³ nca³ sˀe⁴-si¹ni³na³ cjoa⁴vi³jna³chon³ nca³ntsjai².
MAR 10:18 Jesús qui³tso²-le⁴: A¹-ni³ nca³ cho⁴ta⁴ntai³ ˀmi²-si¹ni³nai¹³, ni⁴ˀya³-jin² xi³ nta³, to⁴jnco³ je² Ni³na¹.
MAR 10:19 Je² cjoa⁴te¹xo³ma³ ji³ ˀyai³: A³li² ni²cˀen³-jin²³, a³li² ni²che¹-jin²³, a³li² va³sen²nti³so³-jin²lai⁴ xi³cˀa³, a³li² chˀa²na⁴cha⁴-jin²³, jcha⁴xcoin¹³ nˀai³-li⁴ na⁴-li⁴.
MAR 10:20 Cho⁴ta⁴-ve⁴ qui³tso²-le⁴: Maestro, je² nca³yi³je³ xi³ ˀmi²-nai¹³, ña³qui³ cˀoa⁴-sˀin² qui³si³tjo³soan²³ jo³ sa³ˀnta³ nca³ xtia³.
MAR 10:21 Cˀia⁴ Jesús qui³sco²tsen³-le⁴ coan³tsjoa³que³, qui³tso²-le⁴: Nqui²jnco³-sa³ cjoa⁴ xi³ cha³-li². Tˀin³, ta⁴te²nai³ nca³yi³je³ xi³ tjin¹-li², tˀai²-lai⁴ je² xi³ yo⁴ma⁴, sˀe⁴-li² cjoa⁴nchi⁴na¹ ya⁴ ncˀa³jmi³. Nčhoai¹³, nčhoa¹tˀa³-nai¹³, chˀa¹mi³ cro²-li⁴.
MAR 10:22 Coan³fao¹-le⁴ cho⁴ta⁴-ve⁴ cˀia⁴ nca³ qui³nčhˀoe¹ je² en¹-vi⁴. Cjai¹nca³ fao¹-le⁴ nca³ qui³, nca³ ncjin² tso³jmi² xi³ tjin¹-le⁴.
MAR 10:23 Cˀia⁴ Jesús qui³sco²tsen³ntai³, qui³tso²-le⁴ cho⁴ta⁴-le⁴: A³li² to⁴cˀoa⁴²cji³ ñˀain³ coan⁴-le⁴ cjoa⁴ˀa³sˀen³jin³ cjoa⁴te¹xo³ma³-le⁴ Ni³na¹ je² xi³ cjoa⁴nchi⁴na¹ tjin¹-le⁴.
MAR 10:24 Cho⁴ta⁴-le⁴ to⁴coan³xcon¹-le⁴ cao⁴ je² en¹-le⁴. To⁴nca³ Jesús qui³tso² nqui²ntia³-le⁴: Jon² xi³ ˀnti¹xtio³, cjai¹nca³ to⁴ñˀain³ fa³ˀa³sˀen³ cjoa⁴te¹xo³ma³-le⁴ Ni³na¹ je² xi³ taon⁴-le⁴ nˀion¹tˀa³con³ yao³-le⁴.
MAR 10:25 Li²coi³ to⁴jo³ ñˀain³ nca³ cjoa⁴ˀa³sˀen³ jnco³ camello jña³ ti⁴xˀa⁴ xcon⁴ ni³nto³ cao⁴-ni³ tsa² nca³ cjoa⁴ˀa³sˀen³jin³ cjoa⁴te¹xo³ma³-le⁴ Ni³na¹ jnco³ cho⁴ta⁴nchi⁴na¹.
MAR 10:26 Cho⁴ta⁴-le⁴ to⁴nqui²sa⁴-sa³ coan³xcon¹-le⁴, qui³tso²-le⁴ xi¹ncjin¹: ˀya¹-ni³ tso²cˀoa⁴ xi³ coan⁴ coi⁴tjo³ntjai².
MAR 10:27 Cˀia⁴ Jesús qui³sco²tsen³-le⁴, qui³tso²: Cho⁴ta⁴-le⁴ li²coi³ coan⁴-le⁴, to⁴nca³ Ni³na¹ coan⁴²-le⁴. Nca³yi³je³ cjoa⁴ coan⁴²-le⁴ Ni³na¹.
MAR 10:28 Cˀia⁴ Pedro tsa³cˀe¹tsˀia⁴cao⁴ nca³ cˀoa⁴qui³tso²-le⁴: Coe⁴-ni³, jin⁴-jin⁴ je³qui³ni²ca³toi¹⁴-jin⁴ nca³yi³je³, cˀoa⁴ ji³nčhoa³tˀa³-lai²⁴jin⁴ nca³ ji³.
MAR 10:29 Jesús qui³tso²: Xi³ cjoa⁴qui²xi⁴ xi³ xin³-no³, nca³ ni⁴ˀya³-jin² xi³ tjin¹ xi³ qui³si³cˀe¹jna³ ni³ˀya³-le⁴, a³xo⁴ ntsˀe⁴, a³xo⁴ nti³chja³, a³xo⁴ nˀai³-le⁴, a³xo⁴ na⁴-le⁴, a³xo⁴ chjon⁴²-le⁴, a³xo⁴ xti³-le⁴, a³xo⁴ na³nqui³-le⁴, xi³ to⁴tˀa³tsˀan⁴, xi³ to⁴tˀa³tsˀe⁴ je² en¹nta³-na⁴,
MAR 10:30 xi³ tsi² ntˀai⁴-vi⁴ nca³ je² ni⁴čhjin³-vi⁴ nqui²sa⁴ ncjin² ya³ cˀoa⁴tjin¹ cˀoai⁴-le⁴ ni³ˀya³-le⁴, cao⁴ ntsˀe⁴, cao⁴ nti³chja³, cao⁴ na⁴-le⁴, cao⁴ xti³-le⁴, cao⁴ na³nqui³-le⁴, cˀoa⁴ cao⁴ cjoa⁴ñˀain³, cˀoa⁴ cˀia⁴² ni⁴čhjin³ xi³ cjoa⁴ˀai¹ sˀe⁴-le⁴ cjoa⁴vi³jna³chon³ nca³ntsjai².
MAR 10:31 To⁴nca³ ncjin² xi³ ma³ti¹tjon², cˀia⁴ cjoe⁴tˀa³-ni³ coan⁴, cˀoa⁴ je² xi³ fe³tˀa³-ni³ ti¹tjon³ coan⁴.
MAR 10:32 Ya⁴ tjio¹ma³ ya⁴³ ntia⁴² nca³ tjio¹fi²mi³ ˀnta³ na⁴xi⁴na³nta¹ Jerusalén. Jesús tjen⁴ti¹tjon²-le⁴ cho⁴ta⁴-le⁴. To⁴coan³xcon¹-le⁴ cho⁴ta⁴-le⁴. Cˀoa⁴ je² cho⁴ta⁴ncjin² xi³ qui³tjen⁴nqui³-le⁴ qui³tsa³cjon¹. Cˀia⁴ nqui²ntia³ qui³cao⁴ tˀa³xin² xi³ te³jao²-ve⁴. Cˀia⁴ tsa³cˀe¹tsˀia⁴cao⁴ nca³ qui³tso²-le⁴ je² cjoa⁴ xi³ coan⁴tˀain³.
MAR 10:33 Coe⁴-ni³, ma³nquin¹mia³² ya⁴ na⁴xi⁴na³nta¹ Jerusalén. Cho⁴ta⁴ti¹tjon²-le⁴ na⁴ˀmi³ cao⁴ cho⁴ta⁴ scribano scoe¹ ˀnti¹-le⁴ cho⁴ta⁴, tsjoa¹-le⁴ cjoa⁴ñˀain³ xi³ tsˀe⁴ cjoa⁴vi³ya³, cˀoa⁴ sca⁴ni²tˀa³-le⁴ cho⁴ta⁴ xi³ li² Judío-jin².
MAR 10:34 Taon³ scoe⁴ ˀnti¹-le⁴ cho⁴ta⁴, coa⁴²-le⁴, cˀoe⁴²čha¹jon³ nca³ je², si⁴²cˀen³ nca³ je², to⁴nca³ xi³ coan⁴ jan² ni⁴čhjin³ cjoa⁴ˀa²ya³-ni³le⁴.
MAR 10:35 Cˀia⁴ Jacobo cao⁴ Juan xi³ ˀnti¹-le⁴ Zebedeo, ji³cho²con³-le⁴, cˀoa⁴qui³tso²-le⁴: Maestro, coi³ xi³ me³-na³jin⁴ nca³ cˀoa⁴sˀiain⁴ xi³ tˀa³tsain⁴-jin⁴ to⁴jme³-ni³ve⁴ xi³ si⁴jai¹⁴-jin⁴.
MAR 10:36 Jesús cˀoa⁴qui³tso²-le⁴: Jme¹-ni³ xi³ me³-no³ nca³ sˀian³ xi³ tˀa³tsaon⁴³.
MAR 10:37 Jacobo cao⁴ Juan qui³tso²-le⁴: Cˀia⁴ nca³ sˀe⁴-li² cjoa⁴te¹xo³ma³ cao⁴ cjoa⁴je³ya³-li⁴, tˀai²ˀnte³-na³jin⁴ nca³ coi⁴yo³tˀa³-lai²⁴jin⁴, jnco³ nca³qui²xi⁴-li⁴ xi³jnco³ nca³scon¹-li⁴.
MAR 10:38 Cˀia⁴ Jesús qui³tso²-le⁴: Li²coi³ ˀyao³ jme³ xi³ ni²jao¹³. A³ coan⁴ sˀio⁴yao³ cho⁴tsin¹ xi³ an³ ti²ˀvi⁴ya³, a³xo⁴ coan⁴² sa⁴te¹nta¹-nio³ cao⁴ cjoa⁴ñˀain³ jo³-sˀin² nca³ an³ ti¹sa³te¹nta¹-nia³.
MAR 10:39 Je² xi³ jao²-ve⁴ qui³tso²-le⁴: Coan⁴-na³jin⁴. Jesús cˀoa⁴qui³tso²-le⁴: Xi³ cjoa⁴qui²xi⁴, je² cho⁴tsin¹cjoa⁴ñˀain³-na⁴ xi³ an³ ti²ˀvi⁴ya³, sˀio⁴ya³-nio¹³, cˀoa⁴ jo³-sˀin² nca³ an³ ti¹sa³te¹nta¹-nia³ cao⁴ cjoa⁴ñˀain³, cˀoa⁴-ti⁴sˀin² sa⁴te¹nta¹-nio³.
MAR 10:40 To⁴nca³ xi³ coi⁴yo³tˀa³-nao¹³ nca³qui²xi⁴-na⁴ cao⁴ nca³scon¹-na⁴, a³li² an³-jian²³ xi³ tsjoa³-le⁴. To⁴je² xi³ ti¹jna³nta³ xi³ tˀa³tsˀe⁴ cˀoai⁴-le⁴ ˀnte³-ve⁴.
MAR 10:41 Cˀia⁴ je² xi³ te³-ve⁴ cˀia⁴ nca³ qui³nčhˀoe¹-le⁴, tsa³cˀe¹tsˀia⁴cao⁴ nca³ coan³jti³-le⁴ xi³ tˀa³tsˀe⁴ Jacobo cao⁴ Juan.
MAR 10:42 To⁴nca³ Jesús qui³tso²-le⁴: Jon² ˀyao³ nca³ je² xi³ cho⁴ta⁴ti¹tjon²-le⁴ cho⁴ta⁴ xi³ li² judío-jin², si¹cˀe¹yo³nqui³ cho⁴ta⁴-le⁴ xi³ tˀa³tsˀe⁴ cjoa⁴te¹xo³ma³-le⁴, cˀoa⁴ je² xi³ nca³jco⁴-le⁴ je² xi³ tjin¹-le⁴ ˀnte³ nca³ va³te¹xo³ma³.
MAR 10:43 To⁴nca³ jin³-le⁴ nca³ jon², li²coi³ cˀoa⁴coan⁴, to⁴sa³ to⁴ˀya³-ni³ve⁴ xi³ me³-le⁴ nca³ je³ya³ cˀoe¹yo³jin³-no³ nca³ jon², ca²ta³si¹xa¹-le⁴ xi³cˀa³.
MAR 10:44 Cˀoa⁴ to⁴ˀya³-ni³ve⁴ nca³ jon² xi³ me³-no³ nca³ coi⁴ncha³ti¹tjon², cho⁴ˀnta³-no³ nca³tsˀio³ ca²ta³ma³ nca³ je².
MAR 10:45 Nta³ tsa² je² ˀnti¹-le⁴ cho⁴ta⁴, li²coi³ ja³ˀai³ nca³ si⁴xa¹-le⁴, to⁴nca³ je² xi³ si⁴²xa¹, cˀoa⁴ tsjoa¹ ni⁴ma⁴-le⁴ nca³ cˀoe⁴²chji¹ntjai² ncjin² cho⁴ta⁴.
MAR 10:46 Cˀia⁴ ja³ˀai³ na⁴xi⁴na³nta¹ xi³ Jericó ˀmi². Cˀia⁴ nca³ ji³tjo³-ni³ ya⁴ Jericó cao⁴ cho⁴ta⁴-le⁴, cao⁴ xi³ cho⁴ta⁴ncjin², Bartimeo xi³ xca⁴ cji³, xi³ ˀnti¹-le⁴ Timeo, ti¹jna³ntai³ ntia⁴², ti¹si¹je¹ caridad.
MAR 10:47 Cˀia⁴ nca³ qui³nčhoe¹ nca³ ti¹jna³ Jesús xi³ Nazaret tsˀe⁴, tsa³cˀe¹tsˀia⁴cao⁴ nca³ qui³squi³ˀntia¹tˀa³, qui³tso²: Jesús, ˀnti¹-le⁴ David, jcha⁴ma⁴ta³con²-nai¹³.
MAR 10:48 Ncjin² ma³-ni³ xi³ qui³nchja⁴ti³cao⁴ Bartimeo, jme¹-ni³ nca³ jyo¹ ca²ta³vˀe²jna³-si¹ni³. To⁴nca³ je² to⁴nqui²sa⁴ nˀion¹ qui³nchja⁴: ˀnti¹-le⁴ David, jcha⁴ma⁴ta³con²-nai¹³.
MAR 10:49 Cˀia⁴ Jesús tsa³ca³sen²jna³, tsa³cˀe¹ne² nca³ coi⁴nchja⁴-le⁴. Qui³nchja⁴-le⁴ cho⁴ta⁴xca⁴-ve⁴, qui³tso²-le⁴: Ca²ta³ma³nˀion¹ta³coin²³, ti⁴so¹tjain⁴, ti¹nchja⁴-li².
MAR 10:50 Cˀia⁴ Bartimeo tsa³cja³ˀa¹xin² tso⁴nca⁴-le⁴, ji³so²tjen⁴, ja³ˀai³nčhˀoe² Jesús.
MAR 10:51 Cˀia⁴ Jesús qui³tso²-le⁴: Jme¹-ni³ xi³ me³-li² nca³ si³cao⁴-le²³. Cho⁴ta⁴xca⁴-ve⁴ qui³tso²le⁴: Me³-na³ nca³ coan⁴tsen³ nqui²ntia³-na³.
MAR 10:52 Jesús qui³tso²-le⁴: Tˀin³-la²ntai³, coi³ nca³ ma³cjain¹-li² ca²ma³nta³-ni³. Nti⁴ton⁴ coan³tsen³-le⁴, qui³cao⁴ Jesús ya⁴³ ntia⁴² jan¹.
MAR 11:1 Cˀia⁴ nca³ ji³cho²čhian³-le⁴ na⁴xi⁴na³nta¹ Jerusalén, jña³ nca³ Betfagé ˀmi², cao⁴ xi³ Betania ˀmi², ya⁴ ni³nto³ xi³ Olivos ˀmi², Jesús qui³si³ca³sen¹ jao² cho⁴ta⁴-le⁴,
MAR 11:2 cˀoa⁴qui³tso²-le⁴: Ta⁴nquion¹³ ya⁴ na⁴xi⁴na³nta¹ xi³ ti¹jna³tsen³-ve⁴. Nti⁴ton⁴ nca³ coi⁴tja¹sˀaon³, coan⁴sjai³-no³ jnco³ bo¹rro¹ˀnti¹ xi³ ya⁴ ti¹jna³tˀa³nˀion¹, xi³ ni⁴-sa³ ˀya³-jin² cho⁴ta⁴ tsa³cˀe²jna³son²-le⁴. Chjo¹jnta¹ˀño¹³, nčhoa¹cao⁴-nao¹³.
MAR 11:3 Tsa² ˀya³-ni³ve⁴ xi³ jo³ coi⁴tso⁴-no³: A¹-ni³ cˀoa⁴nˀian²-si¹nio³ coi³-vi⁴. Cˀoa⁴tˀin²-lao⁴³ nca³ je² Nai³-na¹ ma³chjen¹-le⁴. Cˀoa⁴ si⁴²ca³sen¹ nti⁴ton⁴-nca¹ni³ i⁴-vi⁴.
MAR 11:4 Cho⁴ta⁴-le⁴ qui³-ˀni³, coan³sjai³-le⁴ bo¹rro¹ˀnti¹-ve⁴ xi³ ya⁴ ti¹jna³tˀa³nˀion¹ nti³tsin³ xo⁴ntjoa⁴, ya⁴ jña³ nca³ fa³ˀa³cja¹cro²-le⁴ xi¹ncjin¹ ntia⁴², qui³sco³jnta¹nˀion¹.
MAR 11:5 Cho⁴ta⁴ ya⁴ tjio¹, jnco³ qui³tso²-le⁴: Jme¹ xi³ sˀian⁴-nio³ nca³ ti³chjo³jnta¹ˀño¹-si¹nio³ bo¹rro¹ˀnti¹-ve⁴.
MAR 11:6 Cˀia⁴ cho⁴ta⁴-le⁴ Jesús cˀoa⁴qui³tso²-le⁴ jo³ qui³tso² Jesús. Cˀia⁴ cho⁴ta⁴ qui³tsjoa³ˀnte²-le⁴ nca³ coai⁴cao⁴.
MAR 11:7 Ja³ˀai³cao⁴-le⁴ Jesús je² bo¹rro¹ˀnti¹-ve⁴. Cho⁴ta⁴-le⁴ tsa³ca¹son²-le⁴ tso⁴nca⁴-le⁴. Jesús tsa³cˀe²jna³son²-le⁴.
MAR 11:8 Ncjin² cho⁴ta⁴ xi³ tsa³ca¹nta³-le⁴ na³jño³-le⁴ ya⁴ya³ ntia⁴². Cˀoa⁴ xi³cˀa³ xca⁴-le⁴ ya¹ tsa³ca³te³. Tsa³ca¹nta³-le⁴ ya⁴³ ntia⁴².
MAR 11:9 Je² xi³ tjen⁴ti¹tjon², cˀoa⁴ je² xi³ tjen⁴nqui³, nˀion¹ qui³nchja⁴, tjio¹tso²: Viva. Jo¹ to⁴nta³-le⁴ je² xi³ nčhoa¹ nca³jao³-le⁴ Nai³-na¹.
MAR 11:10 Jo¹ to⁴nta³-le⁴ je² cjoa⁴te¹xo³ma³-le⁴ nˀai³-na¹ David xi³ nčhoa¹. Viva xi³ nqui²sa⁴ ncˀa³.
MAR 11:11 Jesús ja³ˀa³sˀen³ ya⁴ na⁴xi⁴na³nta¹ Jerusalén, qui³sˀen³ ja⁴ya³ yo⁴nco⁴. Qui³sco²tsen³ntai³-le⁴ nca³yi³je³ tso³jmi². Coi³ nca³ je³coan³xon², ji³tjo³ ˀnta³ na⁴xi⁴na³nta¹ Betania cao⁴ xi³ te³jao²-ve⁴.
MAR 11:12 Xi³ coan³nchaon³-ni³ cˀia⁴ nca³ ji³tjo³-ni³ Betania, coan³vao³-le⁴.
MAR 11:13 Cjin³ tsa³ve³-ni¹ jnco³ ya¹ higo xi³ tjin¹-le⁴ xca⁴. Ji³cho²čhian³-le⁴ tsa² jme³ to³-le⁴ xi³ so⁴co²-le⁴. To⁴nca³ cˀia⁴ nca³ ji³cho²nčhˀoe², ni⁴jme³-jin² to³ xi³ qui³so³co³-le⁴, to⁴xca⁴ ni¹, nca³ tsi² tsa² cˀia⁴ ni⁴čhjin³-le⁴ higo.
MAR 11:14 Cˀia⁴ Jesús qui³tso²-le⁴ je² ya¹ higo: Ni⁴ˀya³-jin² xi³ ti⁴squi⁴ne⁴-ni³ to³-li⁴ nca³ntsjai² ni⁴čhjin³. Cho⁴ta⁴-le⁴ qui³nčhˀoe¹ je²-vi⁴.
MAR 11:15 Ja³ˀai³ ya⁴ na⁴xi⁴na³nta¹ Jerusalén, cˀoa⁴ Jesús ja³ˀa³sˀen³ yo⁴nco⁴. Tsa³cˀe¹tsˀia⁴cao⁴ nca³ qui³tsˀaon³sje³ je² xi³ tjio¹va³te¹na³, xi³ tjio¹va³tse³ ya⁴ya³ yo⁴nco⁴. Qui³sca³ni¹ti¹cja¹ ya¹mi²xa⁴-le⁴ je² xi³ tjio¹si¹cˀa³ntjai² taon⁴. Qui³sca³ni¹ti¹cja¹ ya¹xi²le⁴-le⁴ je² xi³ tjio¹va³te¹na³ ni⁴se³ paloma.
MAR 11:16 Li²coi³ qui³tsjoa³ˀnte² nca³ ˀya³ xi³ chˀa¹ fa³ˀa³to³ya³cao⁴ yo⁴nco⁴.
MAR 11:17 Tsa³ca³co¹ya³-le⁴ qui³tso²: A³ tsi² tji¹tˀa³ nca³ je² ntˀia³-na⁴ cˀoa⁴cˀoin¹-le⁴ ntˀia³ jña³ vˀe¹tsˀoa³ya³ nca³tsˀi³ cho⁴ta⁴, to⁴nca³ jon² nqui³jao³-le⁴ che¹ ti³nˀiaon²³.
MAR 11:18 Cho⁴ta⁴ scribano cao⁴ cho⁴ta⁴ti¹tjon²-le⁴ na⁴ˀmi³ qui³nčhˀoe¹-le⁴. Tsa³ca¹sjai³ jo³-sˀin² si⁴²cˀen³ nca³ je². To⁴nca³ qui³tsa³cjon¹-le⁴ Jesús, nca⁴ nca³tsˀi³ cho⁴ta⁴ jo³ to⁴coan³xcon¹-le⁴ cjoa⁴ xi³ tˀa³tsˀe⁴ cjoa⁴fa³ˀai³tsjen³-le⁴.
MAR 11:19 Cˀia⁴ nca³ je³coan³xon² Jesús ji³tjo³-ni³ na⁴xi⁴na³nta¹ Jerusalén.
MAR 11:20 Cˀia⁴ nca³ ta⁴njion² ya⁴ ja³ˀa³to³-nca¹ni³ jña³ sˀe³jna³ ya¹ higo. Tsa³ve³ nca³ je³qui³xi² ya¹ higo sa³ˀnta³ ja⁴ma⁴-le⁴.
MAR 11:21 Cˀia⁴ Pedro ja³ˀai³tsjen³-le⁴, qui³tso²-le⁴: Maestro, coe⁴-ni³ je² ya¹ higo xi³ qui³no²cjoa⁴ˀaon³-lai⁴. Je³qui³xi².
MAR 11:22 Jesús qui³tso²-le⁴: Ca²ta³ma³cjain¹-no³ tˀa³tsˀe⁴ Ni³na¹.
MAR 11:23 Xi³ cjoa⁴qui²xi⁴ xi³ xin³-no³, nca³ to⁴ˀya³-ni³ve⁴ xi³ cˀoa⁴coi⁴tso⁴-le⁴ je² ni³nto³-vi⁴: Ti⁴se⁴xin²³, ca²ta³ni²cˀa³tjen⁴jin³-li² nta¹chi³con³, tsa² vˀe¹jnco³con³ ni⁴ma⁴-le⁴ nca³ ma³cjain¹-le⁴ nca³ cˀoa⁴coan⁴ je² xi³ tso², je² xi³ coi⁴tso⁴ cˀoa⁴²coan⁴-le⁴.
MAR 11:24 Coi³ nca³ cˀoa⁴xin³-no³, nca³yi³je³ to⁴jme³-ni³ xi³ ni²-jao¹³ nca³ vˀe²tsˀoao³ Ni³na¹, ca²ta³ma³cjain¹-no³ nca³ cˀoa⁴²-sˀin² sˀe⁴-no³, cˀoa⁴ cˀoa⁴²-sˀin² cjoa⁴ˀai¹-no³.
MAR 11:25 Cˀia⁴ nca³ ti³ncha³nto³ nca³ vˀe²tsˀoao³ Ni³na¹, ti⁴cha³tˀa³-lao⁴³ tsa² jme³ xi³ tjin¹-no³ tˀa³tsˀe⁴ co²ntran⁴-no³, jme¹-ni³ nca³ je² Nˀai³-no³ xi³ ti¹jna³ ncˀa³jmi³ cˀoa⁴-ti⁴ si⁴²cha³tˀa³-si¹ni³no³ nca³ jon² je² cjoa⁴tsˀen⁴-no³.
MAR 11:26 To⁴nca³ tsa² tsi² si⁴cha³tˀa³-lao⁴³ cho⁴ta⁴, cˀoa⁴-li⁴ je² Nˀai³-no³ xi³ ti¹jna³ ncˀa³jmi³ li²coi³ si⁴²cha³tˀa³-no³ cjoa⁴tsˀen⁴-no³.
MAR 11:27 Qui³-nca¹ni³ ya⁴ Jerusalén. Cˀia⁴ nca³ Jesús tso²ˀva³ya³ yo⁴nco⁴, cho⁴ta⁴ti¹tjon²-le⁴ na⁴ˀmi³ cao⁴ cho⁴ta⁴ scribano cao⁴ cho⁴ta⁴jchi¹nca³ ja³ˀai³con²-le⁴ Jesús.
MAR 11:28 Qui³tso²-le⁴: Jme¹ cjoa⁴te¹xo³ma³-ni³ xi³ tsjoa¹-li² ˀnte³ nca³ cˀoa⁴nˀiain²³ je² cjoa⁴-vi⁴. ˀya¹-ni³ je² xi³ qui³tsjoa³-li² je² cjoa⁴te¹xo³ma³ nca³ cˀoa⁴sˀian⁴-si¹ni³.
MAR 11:29 Cˀia⁴ Jesús qui³nchja⁴ qui³tso²-le⁴: Cˀoa⁴-ti⁴ an³ sco³na³nqui³-no³ jnco³ cjoa⁴. Ti⁴no²cjoa⁴-nao¹³, cˀia⁴² cˀoa⁴xin¹-no³ jña³-le⁴ cjoa⁴te¹xo³ma³ xi³ tsjoa¹ˀnte³-na³ nca³ cˀoa⁴-sˀian³ je² cjoa⁴-vi⁴.
MAR 11:30 Je² cjoa⁴sa³te¹nta¹ xi³ qui³sˀin³ Juan, a³ tsˀe⁴ ncˀa³jmi³ ni¹, a³xo⁴ tsˀe⁴ cho⁴ta⁴ ni¹. Ti⁴no²cjoa⁴-nao¹³.
MAR 11:31 Cˀia⁴ na⁴ˀmi³ cao⁴ cho⁴ta⁴ scribano cao⁴ cho⁴ta⁴jchi¹nca³ tsa³cjao¹ya³-ni³, qui³tso²: Cˀia⁴ tsa² coi⁴xoan¹ nca³ tsˀe⁴ ncˀa³jmi³ ni¹, cˀoa⁴coi⁴tso⁴-jin²ˀni³: A¹-ni³ nca³ tsi² coan³cjain¹-si¹ni³no³ xi³ tˀa³tsˀe⁴.
MAR 11:32 Cˀia⁴ tsa² cˀoa⁴coi⁴xoan¹ nca³ tsˀe⁴ cho⁴ta⁴ ni¹, jcon³-le⁴² cho⁴ta⁴na⁴xi⁴na³nta¹ nca⁴ nca³tsˀi³ cˀoa⁴qui³tso² nca³ ña³qui³ cjoa⁴qui²xi⁴ nca³ Juan jnco³ xi³ nchja⁴ya³ tˀa³tsˀe⁴ Ni³na¹.
MAR 11:33 Cˀia⁴ qui³nchja⁴-nca¹ni³le⁴ Jesús: Li²coi³ ˀyai³-jin⁴. Cˀia⁴ Jesús qui³tso²: Ni⁴ˀan³-jin² cˀoa⁴xin¹-no³ jña³-le⁴ cjoa⁴te¹xo³ma³ xi³ tsjoa¹ˀnte³-na³ nca³ cˀoa⁴sˀian³ je² cjoa⁴-vi⁴.
MAR 12:1 Jesús tsa³cˀe¹tsˀia⁴cao⁴ nca³ tsa³cja¹cao⁴ cao⁴ cjoa⁴xco¹son²: Jnco³ cho⁴ta⁴xˀin⁴ tsa³ca¹ntje² xca⁴-le⁴ to³tse⁴², tsa³cˀe¹nchˀoa¹ntai³-le⁴, tsa³ˀnqui³ya³, tsa³cˀe¹jna³nta³ jnco³ máquina xi³ si¹tsˀion³nqui²-ni³ na³nta¹-le⁴ to³tse⁴². Tsa³cˀe¹nta³ jnco³ xjao¹ncˀa³, qui³si³quin³ya³son²-le⁴ cho⁴ta⁴ xi³ si¹xa¹son². Cˀia⁴ qui³ jña³ nca³ cjin³.
MAR 12:2 Cˀia⁴ nca³ ji³cho² ni⁴čhjin³-le⁴ nca³ sˀe³xco¹ to³tse⁴²-ve⁴, qui³si³ca³sen¹con³-le⁴ je² cho⁴ta⁴ xi³ si¹xa¹son²-ve⁴ jnco³ cho⁴ˀnta³, jme¹-ni³ nca³ tsjoa¹-si¹ni³le⁴ tso³jmi²-ve⁴ xi³ je² vˀa³cao⁴-le⁴.
MAR 12:3 To⁴nca³ je² cho⁴ta⁴ xi³ si¹xa¹son² qui³tsoa³ cho⁴ˀnta³-ve⁴, qui³si³qui²ˀaon³, qui³sca³ni¹cji³tia³.
MAR 12:4 Je² nai³-le⁴ ti⁴qui³si³ca³sen¹ nqui²jnco³-nca¹ni³ cho⁴ˀnta³. To⁴nca³ nqui²ntia³ cho⁴ta⁴-ve⁴ to⁴la⁴jao⁴ tsa³cˀe¹-le⁴, qui³si³qui²ˀaon³ jco⁴, qui³tsˀaon³tjen⁴nqui³ cao⁴ cjoa⁴tsˀen⁴.
MAR 12:5 Je² nai³-le⁴ ti⁴qui³si³ca³sen¹ nqui²jnco³-nca¹ni³ cho⁴ˀnta³. Cho⁴ta⁴-ve⁴ ña³qui³ qui³si³cˀen³-ni¹ nca³ je². Ncjin² xi³ cˀoa⁴qui³si³cao⁴, tjin¹ xi³ to⁴qui³si³qui²ˀaon³-ni³, cˀoa⁴ tjin¹ xi³ ña³qui³ qui³si³cˀen³-ni³.
MAR 12:6 Je² nai³-le⁴ to⁴jo³ tjin¹-sa³le⁴ jnco³ ˀnti¹ xi³ tsjoa³que³, cˀoa⁴-ti⁴ qui³si³ca³sen¹ nca³ je². Je² xi³ je³tˀa³-ni³. Scoe⁴xcon¹ ti³-na⁴, qui³tso².
MAR 12:7 To⁴nca³ je² cho⁴ta⁴-ve⁴ xi³ si¹xa¹son²-ve⁴, qui³tso²-le⁴ xi¹-ncjin¹: Je²-vi⁴ xi³ cˀoai⁴cjoa⁴tjao²-le⁴ xca⁴-le⁴ to³tse⁴²-vi⁴. Tjian¹ si⁴cˀen³-nia¹ jme¹-ni³ nca³ cjoa⁴tjao²-le⁴ tsan⁴² coan⁴-ni³.
MAR 12:8 Qui³tsoa³ ti³-ve⁴, qui³si³cˀen³ nca³ je², qui³si³cˀa³tjen⁴ tˀa³xin².
MAR 12:9 Je² nai³-le⁴ xca⁴-le⁴ to³tse⁴²-ve⁴, jme¹ xi³ si⁴²cao⁴-ˀni³ tso²cˀoa⁴ je² cho⁴ta⁴-ve⁴. Cjoi⁴nčhoa³ cˀoa⁴ si⁴²qui³xo²ya³ je² cho⁴ta⁴ xi³ si¹xa¹son²-ve⁴, cˀoa⁴ xca⁴-le⁴ to³tse⁴²-le⁴ tsjoa¹son²-le⁴ xi³ cja⁴ˀai¹.
MAR 12:10 A³ tsi² tsa³cˀe²xquiao⁴³ xon⁴ Escritura: Je² la⁴jao⁴ xi³ qui³si³cˀa³tjen⁴ cho⁴ta⁴ xi³ vˀe¹nta³ ni³ˀya³, je²-vi⁴ xi³ coan³ la⁴jao⁴xi⁴nqui⁴.
MAR 12:11 Je² Nai³-na¹ cˀoa⁴qui³sˀin³ je²-vi⁴, ña¹ to⁴ma³xcon¹-na¹ nca³ ˀya³².
MAR 12:12 Cho⁴ta⁴ti¹tjon²-le⁴ na⁴ˀmi³ cao⁴ cho⁴ta⁴ scribano cao⁴ cho⁴ta⁴jchi¹nca³ tsa³ca¹sjai³ jo³-sˀin² tsoa⁴ Jesús, nca⁴ coan³cho⁴ya³-le⁴ nca³ cˀoa⁴qui³tso² je² cjoa⁴xco¹son²-ve⁴ xi³ tˀa³tsˀe⁴ nca³ je², to⁴nca³ qui³tsa³cjon¹-le⁴ cho⁴ta⁴na⁴xi⁴na³nta¹. Coi³ nca³ qui³si³cˀe¹jna³ Jesús, cˀoa⁴ qui³-ni³.
MAR 12:13 Qui³sca³ni¹nčhˀoe² Jesús cˀa³ cho⁴ta⁴ xi³ tsˀe⁴ cho⁴ta⁴ fariseos cao⁴ xi³ tsˀe⁴ cho⁴ta⁴ herodianos, jme¹-ni³ nca³ si⁴²qui³njen³-si¹ni³ cao⁴ en¹-le⁴.
MAR 12:14 Cˀia⁴ nca³ ji³cho²con³-le⁴ Jesús, qui³tso²-le⁴: Maestro, ˀya³-ni¹jin⁴ nca³ ji³ xi³ tjin¹-li² cjoa⁴qui²xi⁴. Ni⁴ˀya³-jin² xi³ jcon³-lai⁴, nca³ tsi² tsa² cho²tsen³-lai⁴ jo³ cji³ cho⁴ta⁴, to⁴nca³ cjai¹nca³ nta³ va³co²yai³ ntia⁴²-le⁴ Ni³na¹ cao⁴ xi³ cjoa⁴qui²xi⁴. A³ nta³ tjin¹ nca³ cˀoe¹chji¹-le⁴² taon⁴sa¹ César, a³xo⁴ mai³. A³ cˀoai⁴-le⁴² a³xo⁴ tsi² tsa² cˀoai⁴-le⁴².
MAR 12:15 Cˀia⁴ Jesús nca³ tsa³ve³ nca³ cho⁴ta⁴jao²ncjain¹, cˀoa⁴qui³tso²-le⁴: A¹-ni³ nca³ cho¹tˀa³-si¹ni³nao¹³. Nčhoa¹cao⁴-nao¹³ taon⁴-ve⁴, jme¹-ni³ nca³ sco³tsen³-si¹ni³le⁴.
MAR 12:16 Ja³ˀai³cao⁴-le⁴ taon⁴-ve⁴. Jesús qui³tso²-le⁴: ˀya¹ tsˀe⁴ je² xco¹son²-vi⁴, cˀoa⁴ je² en¹ xi³ tjio¹tˀa³. Cˀoa⁴ cho⁴ta⁴-ve⁴ qui³tso²-le⁴: Tsˀe⁴ César.
MAR 12:17 Jesús qui³tso²-le⁴: Tˀai²-lao⁴³ César je² xi³ tsˀe⁴ César, cˀoa⁴ tˀai²-lao⁴³ Ni³na¹ je² xi³ tsˀe⁴ Ni³na¹. Cho⁴ta⁴-ve⁴ to⁴coan³xcon¹-le⁴ je²-vi⁴.
MAR 12:18 Cˀia⁴ ja³ˀai³con³-le⁴ cho⁴ta⁴ saduceos, je² xi³ tso² nca³ tsin² cjoa⁴fa³ˀa²ya³-jin². Qui³sco²na³nqui³-le⁴, cˀoa⁴qui³tso²-le⁴:
MAR 12:19 Maestro, Moisés qui³squi³-na¹, tsa² jnco³ ntsˀe⁴ coi⁴ya¹, xi³ si⁴²cˀe¹jna³ chjon⁴²-le⁴, cˀoa⁴ tsa² tsin²-le⁴ xti³-jin² xi³ si⁴²ca³tio¹, cˀia⁴ je² ntsˀe⁴ ca²ta³cjoe¹tjao² chjon⁴²-le⁴, cˀoa⁴ ca²ta³sˀe³-le⁴ xti³ nca³jao³-le⁴ ntsˀe⁴.
MAR 12:20 Ña³to³ coan³ xi³ ti⁴ntsˀe⁴-ni³. Je² xi³ ˀnti¹tjon² qui³sˀe³-le⁴ chjon⁴², cˀen³ xˀin⁴-ve⁴, cˀoa⁴ ni⁴jnco³-jin² xti³ qui³sˀe³-le⁴.
MAR 12:21 Je² ntsˀe⁴ xi³ ma³jao²-ni³ qui³scoe¹tjao² chjon⁴²-le⁴, cˀoa⁴-ti⁴ cˀen³ nca³ je², cˀoa⁴-ti⁴ ni⁴jnco³-jin² ˀnti¹ qui³sˀe³-le⁴. Cˀoa⁴ je² xi³ ma³jan²-ni³ tsa³cˀe²jna³cao⁴-nca¹ni³ chjon⁴²-ve⁴, cˀoa⁴²-ti⁴sˀin² coan³tˀain³.
MAR 12:22 Xi³ ña³to³ ntsˀe⁴ tsa³ca³tio²cao⁴ chjon⁴²-ve⁴. Cˀoa⁴ ni⁴jnco³-jin² xti³ qui³sˀe³-le⁴ nca³tsˀi³. Xi³ je³tˀa³-ni³ cˀoa⁴²-ti⁴ cˀen³ chjon⁴²-ve⁴.
MAR 12:23 Cˀia⁴ nca³ cjoa⁴ˀa²ya³-na¹ tso²cˀoa⁴, ˀya¹ tsˀe⁴ coan⁴ chjon⁴²-ve⁴, nca⁴ je² xi³ ña³to³-ve⁴ tsa³ca³tio²cao⁴ chjon⁴²-ve⁴.
MAR 12:24 Cˀia⁴ Jesús qui³tso²-le⁴: A³ tsi² ma³sca¹ya³-no³ nca³ tsi² ˀyao³ xon⁴ Escrituras, cˀoa⁴-ti⁴ li²coi³ ˀyao³ nca³nˀion¹-le⁴ Ni³na¹.
MAR 12:25 Cˀia⁴ nca³ cjoa⁴ˀa²ya³-le⁴ xi³ cˀen³, li²coi³ coi⁴xan³, cˀoa⁴ li²ˀya³ xi³ si⁴²qui³xan³, to⁴nca³ cˀoa⁴² cjoan³ jo³-ni³ a²ncje⁴ xi³ tjio¹ ncˀa³jmi³.
MAR 12:26 Je² cjoa⁴ je²-vi⁴ nca³ cjoa⁴ˀa²ya³-le⁴ xi³ cˀen³, a³ tsi² tsa³cˀe²xquiao⁴³ libro-le⁴ Moisés, jo³-sˀin² nca³ Ni³na¹ tsa³cja¹cao⁴ ya⁴jin³ ya¹na³ˀya¹, nca³ qui³tso²: An³ nia¹³ Ni³na¹-le⁴ Abraham, Ni³na¹-le⁴ Isaac, cˀoa⁴ Ni³na¹-le⁴ Jacob.
MAR 12:27 Ni³na¹ a³li² Ni³na¹-le⁴ cˀen³-jin², to⁴nca³ tsˀe⁴ xi³ tjio¹con³. Jon² cjai¹nca³ ma³sca¹ya³-no³.
MAR 12:28 Jnco³ cho⁴ta⁴ scribano ja³ˀai³con³-le⁴ Jesús, qui³nčhˀoe¹-le⁴ nca³ tjio¹fao¹ya³-ni³, tsa³ve³ nca³ nta³ qui³nchja⁴ Jesús, qui³sco²na³nqui³-le⁴: Jña¹-le⁴ cjoa⁴te¹xo³ma³ xi³ ti¹tjon² cao⁴-ni³ nca³yi³je³.
MAR 12:29 Jesús qui³nchja⁴: Je² cjoa⁴te¹xo³ma³ xi³ ti¹tjon² cao⁴-ni³ nca³yi³je³: Ti⁴no¹ˀyao³ cho⁴ta⁴ Israel, je² Nai³-na¹ Ni³na¹-na¹ to⁴jnco³ ma³-ni³.
MAR 12:30 Ca²ta³ma³tsjoa³chai³ tso²cˀoa⁴ je² Nai³-na¹ Ni³na¹-li⁴. Ca²ta³ma³tsjoa³cha³-ni³ nca³yi³je³ ni⁴ma⁴-li⁴, cao⁴ nca³yi³je³ cjoa⁴tsjoa³-li⁴, cao⁴ nca³yi³je³ cjoa⁴fa³ˀai³tsjen³-li⁴, cao⁴ nca³yi³je³ nca³nˀion¹-li⁴. Je²-vi⁴ je² ni¹ cjoa⁴te¹xo³ma³ xi³ ti¹tjon².
MAR 12:31 Cˀoa⁴ je² xi³ ma³jao²-ni³ cˀoa⁴-ti⁴sˀin²ni³ je²-vi⁴. Ca²ta³ma³tsjoa³chai³ xi³cˀa³ jo³-ni³ nca³ ti⁴ji³-ni³. Tsin² cjoa⁴te¹xo³ma³ xi³ cja⁴ˀai¹, xi³ nqui²sa⁴ ti¹tjon² cao⁴-ni³ je²-vi⁴.
MAR 12:32 Cˀia⁴ je² cho⁴ta⁴ scribano qui³tso²-le⁴: Nta³ tjin¹, Maestro, cjoa⁴qui²xi⁴ xi³ ca²si³-ve⁴ nca³ to⁴jnco³ Ni³na¹, tsin² xi³ cja⁴ˀai¹.
MAR 12:33 Cˀoa⁴ nca³ tsjoa³cha³² nca³ je² cao⁴ nca³yi³je³ ni⁴ma⁴-na¹, cao⁴ nca³yi³je³ cjoa⁴fa³ˀai³tsjen³-na¹, cao⁴ nca³yi³je³ cjoa⁴tsjoa³-na¹, cao⁴ nca³yi³je³ nca³nˀion¹-na¹, nca³ tsjoa³cha³² xi³cˀa³ jo³-sˀin² nca³ tsjoa³cha³² yao³-na¹, je²-vi⁴ xi³ to⁴nqui²sa⁴-sa³ chji¹-le⁴ cao⁴-ni³ tsa² nca³yi³je³ cjoa⁴tjao² xi³ ña³qui³ ti² nca³yi³je³, cao⁴ cho⁴ xi³ ni²cˀen³ nca³ cˀoai⁴tˀa³-le⁴² Ni³na¹.
MAR 12:34 Cˀia⁴ Jesús nca³ tsa³ve³ nca³ je² cho⁴ta⁴ qui³nchja⁴ cao⁴ cjoa⁴chji⁴ne⁴, qui³tso²-le⁴: A³li² cjin³-jin² ti³jnai³ cjoa⁴te¹xo³ma³-le⁴ Ni³na¹. Ni⁴ˀya³-jin² xi³ ti⁴ma³nˀion¹ni³con³ nca³ scoi⁴na³nqui³-sa³le⁴.
MAR 12:35 Jesús tsa³ca³co¹ya³ ya⁴³ yo⁴nco⁴, cˀoa⁴qui³tso²: Jo¹-sˀin²ˀni³ nca³ cˀoa⁴tso²-ni³ cho⁴ta⁴ scribano nca³ Cristo ˀnti¹-le⁴ David.
MAR 12:36 Ti⁴je²-ni³ David cˀoa⁴qui³tso² cao⁴ Espíritu Santo: Je² Nai³-na¹ qui³tso²-le⁴ Nai³-na⁴. Ti⁴jna³tˀa³-nai¹³ nca³qui²xi⁴-na⁴ sa³ˀnta³ nca³ si³cˀe¹yoa³ co²ntran⁴-li⁴ ya⁴nqui³ ntso⁴coi³.
MAR 12:37 Ti⁴je²-ni³ David Nai³-na⁴ tso²-le⁴. Jo¹-sˀin²ˀni³ nca³ ˀnti¹-le⁴ ma³-le⁴. Nca³tsˀi³ cho⁴ta⁴na⁴xi⁴na³nta¹ qui³nčhˀoe¹ cao⁴ cjoa⁴tsjoa³ jo³ qui³tso² Jesús.
MAR 12:38 Cˀoa⁴-sˀin² tsa³ca³co¹ya³-le⁴: Ti⁴coi²nta⁴-lao⁴³ yao³-no³ cho⁴ta⁴ scribano xi³ tsjoa³-le⁴ vˀa³mjen³ cao⁴ na³jño³jnčho³, cˀoa⁴ tsjoa³-le⁴ nca³ cho⁴ta⁴ si⁴²ti²ˀnta³-le⁴ ya⁴ nti⁴tsin⁴-ve⁴.
MAR 12:39 Cˀoa⁴ tsjoa³que³ je² ya¹xi²le⁴ xi³ ti¹tjon² ya⁴ ntˀia³ sinagoga, cˀoa⁴ je² ˀnte³ xi³ ti¹tjon² ya⁴ jña³ cjen² sˀoi¹.
MAR 12:40 Je² fa³yo³ntjai² ntˀia³-le⁴ ya¹nchjin¹cˀan³ xi³ cˀen³ xˀin⁴-le⁴. To⁴chji³ne³-ni³ tse³² vˀe¹tsˀoa³. Je² xi³ cˀoa⁴cjoan³ nqui²sa⁴ tse³ cjoa⁴ñˀain³ sˀe⁴-le⁴.
MAR 12:41 Jesús tsa³cˀe²jna³ jña³ nca³ qui³jna³ ca²xa⁴ xi³ si³ncha¹ taon⁴ limosna. Qui³sco²tsen³ jo³-sˀin² nca³ cho⁴ta⁴na⁴xi⁴na³nta¹ tsa³qui³ncha¹ taon⁴ ca²xa⁴-ve⁴. Ncjin² ma³-ni³ cho⁴ta⁴nchi⁴na¹ xi³ tse³ taon⁴ tsa³qui³ncha¹.
MAR 12:42 Cˀia⁴ ji³cho² jnco³ chjon⁴²cˀan³ xi³ je³cˀen³ xˀin⁴-le⁴, cˀoa⁴ xi³ yo⁴ma⁴. ˀnti¹ qui⁴cha⁴si³ne² tsa³qui³ncha¹ xi³ to⁴choa³ chji¹-le⁴.
MAR 12:43 Cˀia⁴ Jesús qui³nchja⁴-le⁴ cho⁴ta⁴-le⁴, cˀoa⁴qui³tso²-le⁴: Xi³ cjoa⁴qui²xi⁴ xi³ xin³-no³ nca³ je² chjon⁴²cˀan³ xi³ je³cˀen³ xˀin⁴-le⁴, cˀoa⁴ xi³ yo⁴ma⁴, nqui²sa⁴ tse³ tsa³qui³ncha¹ cao⁴-ni³ tsa² nca³tsˀi³ xi³ tsa³qui³ncha¹ ca²xa⁴.
MAR 12:44 Nca⁴ nca³tsˀi³ tsa³qui³ncha¹ je² xi³ vˀa³nqui³-le⁴, to⁴nca³ nta³ tsa² yo⁴ma⁴ je² chjon⁴²-vi⁴ tsa³qui³ncha¹ nca³yi³je³ xi³ tjin¹-le⁴ xi³ tˀa³tsˀe⁴ xi³ cjen².
MAR 13:1 Cˀia⁴ nca³ ji³tjo³-ni³ yo⁴nco⁴, jnco³ cho⁴ta⁴-le⁴ Jesús qui³tso²-le⁴: Maestro, coe⁴-ni³, jme¹-si³ cjoan³-ni³ la⁴jao⁴, jme¹-si³ cjoan³-ni³ ntˀia³-vi⁴.
MAR 13:2 Jesús qui³tso²-le⁴: A³ ti³ˀya³-nio¹³ je² ntˀia³yˀai³-vi⁴. Jtsao⁴nqui³ nca³yi³je³, li²coi³ ti⁴sa⁴tio²son²-ni³le⁴ xi¹ncjin¹ la⁴jao⁴.
MAR 13:3 Jesús ya⁴ tsa³cˀe²jna³ ni³nto³ xi³ Olivos ˀmi². Qui³sco²tsen³tˀa³ yo⁴nco⁴. Pedro, Jacobo, Juan, cao⁴ Andrés qui³sco²na³nqui³ tˀa³xin²-le⁴ Jesús.
MAR 13:4 Cˀoa⁴tˀin²-na³jin⁴: Cˀia¹-ni³ve⁴ nca³ cˀoa⁴coan⁴. Jme¹ choa⁴ xi³ sˀe⁴ cˀia⁴ nca³ me³coan⁴jnco³ nca³yi³je³ je² cjoa⁴-vi⁴.
MAR 13:5 Jesús qui³nchja⁴, tsa³cˀe¹tsˀia⁴ nca³ cˀoa⁴qui³tso²-le⁴: Ti⁴coi²ntao⁴³ yao³-no³ jme¹-ni³ nca³ ni⁴ˀya³-jin² xi³ cˀoa⁴na⁴cha⁴-si¹ni³no³.
MAR 13:6 Nca⁴ ncjin² xi³ cjoa⁴ˀai¹ xi³ jan³ˀain¹-na⁴ yˀa³, xi³ cˀoa⁴coi⁴tso⁴: An³ nia¹³ Cristo. Cˀoa⁴na⁴cha⁴-le⁴ ncjin² cho⁴ta⁴.
MAR 13:7 To⁴cˀia³-ni³ve⁴ nca³ coi⁴no¹ˀyao³ nca³ tjin¹ cjoa⁴jchan¹, cˀoa⁴-ti⁴ cˀoa¹mjen³ en¹ nca³ tjin¹ cjoa⁴jchan¹, a³li² cˀoa⁴-jin² ma³-no³, nca⁴ ma³chjen¹ nca³ cˀoa⁴coan⁴, to⁴nca³ cje³fe³tˀa³-jin².
MAR 13:8 Coi⁴so¹tjen⁴ne² na⁴xi⁴na³nta¹ co²ntran⁴-le⁴ xi³ cja⁴ˀai¹ na⁴xi⁴na³nta¹, cˀoa⁴ cjoa⁴te¹xo³ma³ coi⁴so¹tjen⁴ne² co²ntran⁴-le⁴ xi³ cja⁴ˀai¹ cjoa⁴te¹xo³ma³. Cˀoa⁴ chaon¹ cjoa⁴ˀa² ncjin² ˀnte³. Cji³nčha¹ coan⁴ cao⁴ cjoa⁴-si³. Je² cjoa⁴-vi⁴ to⁴cˀoe⁴²tsˀia⁴ cjoa⁴ñˀain³.
MAR 13:9 Jon² ti⁴coi²ntao⁴³ yao³-no³ nca³ sca⁴ni²tˀa³-no³ cho⁴ta⁴xa¹, ya⁴ ntˀia³ sinagoga coa⁴²-no³ ya¹jti³. Ja⁴nqui³xcon⁴ gobernador cao⁴ cho⁴ta⁴ti¹tjon² coi⁴no²cjoa⁴-no³ xi³ to⁴tˀa³tsˀan⁴ nca³ cˀoai⁴-lao⁴³ nca³ je² je² en¹-no³.
MAR 13:10 Ti¹tjon² ma³chjen¹ nca³ je² en¹nta³ xi³ tˀa³tsˀe⁴ Cristo ca²ta³fi²son²-le⁴ nca³tsˀi³ cho⁴ta⁴.
MAR 13:11 Cˀia⁴ nca³ cjoa⁴ˀai¹cao⁴-no³ nca³ sca⁴ni²tˀa³-no³ cjoa⁴te¹xo³ma³, a³li² cˀoa⁴-jin² ma³-no³ to⁴nqui³-ni³ jme³ xi³ coi⁴xon¹³, ni⁴ni²cja³ˀai³tsjen³-jion²³. Sˀe⁴-no³ cjoa⁴fa³ˀai³tsjen³ cˀia⁴ hora-ve⁴, coi³ xi³ ti⁴no²cjoao⁴³. A³li² jon²-jion²³ xi³ coi⁴no²cjoao⁴³, to⁴je² Espíritu Santo xi³ coi⁴nchja⁴.
MAR 13:12 Ti⁴je²-ni³ ntsˀe⁴ sca⁴ni²tˀa³ ntsˀe⁴ nca³ si⁴²cˀen³, cˀoa⁴ je² xi³ nˀai³ sca⁴ni²tˀa³ ˀnti¹-le⁴ nca³ si⁴²cˀen³. Xi³ xti³-le⁴ coi⁴so¹tjen⁴ne²-le⁴ xi³jcha¹-le⁴, sca⁴ni²tˀa³ nca³ si⁴²cˀen³.
MAR 13:13 Nca³tsˀi³ cho⁴ta⁴ coan⁴jti³que³-no³ xi³ to⁴tˀa³tsˀan⁴, to⁴nca³ je² xi³ jcho¹cjoa⁴-le⁴ sa³ˀnta³ xi³ cjoe⁴tˀa³-ni³, je²-vi⁴ coi⁴tjo³ntjai²-ni¹.
MAR 13:14 To⁴nca³ cˀia⁴ nca³ jchao⁴³ je² xi³ chˀao³ cjoan³, xi³ si¹qui³xo²ya³, xi³ sˀe⁴jna³ ˀnte³ jña³ tsi² va³quin²-le⁴, cˀia⁴ je² xi³ tjio¹ ya⁴ Judea, ca²ta³ma³nca³ jin³jña¹. (Je² xi³ vˀe¹xquia⁴ jo³ qui³tso² Daniel xi³ qui³nchja⁴ya³ tˀa³tsˀe⁴ Ni³na¹ ca²ta³ma³cho⁴ya³-le⁴.)
MAR 13:15 Je² xi³ ya⁴ ti¹jna³son²ncˀa³ ntˀia³-le⁴, a³li² vi³tjo³jen³-jin² ni⁴fa³ˀa³sˀen³-jin², nta³ tsa² tjin¹ xi³ me³-le⁴ scoe¹ ja⁴ya³ ntˀia³-le⁴.
MAR 13:16 Je² xi³ ti¹jna³ jin³jña¹ jan¹, a³li² ya¹tsˀin⁴ si⁴²cˀo¹fa³ya³-ni³ nca³ scoe¹ tso⁴nca⁴-le⁴.
MAR 13:17 Ma⁴-xo¹ni³ je² ya¹nchjin¹ xi³ ˀnti¹ yˀa³, cˀoa⁴ je² xi³ ˀnti¹ si¹ca³qui³ coi³ ni⁴čhjin³-ve⁴.
MAR 13:18 Tˀe²tsˀoao³ tso²cˀoa⁴ nca³ tsi² coi⁴yo¹³ cˀia⁴ nca³ chan⁴nchˀan¹.
MAR 13:19 Cˀia⁴ ni⁴čhjin³-ve⁴ cjai¹nca³ to⁴sˀe⁴ cjoa⁴ñˀain³. Ni⁴-sa³ jnco³ cˀa³-jin² cˀoa⁴ma³ jo³ sa³ˀnta³ nca³ Ni³na¹ tsa³ca¹nta³ son³ˀnte³, ni⁴to⁴cˀia⁴-jin² cˀoa⁴coan⁴-nca¹ni³.
MAR 13:20 Tsa² je² Nai³-na¹ li²coi³ qui³si³ˀnti¹ya³ coi³ ni⁴čhjin³-ve⁴, ni⁴jnco³-jin² cho⁴ta⁴ xi³ coi⁴tjo³ntjai², to⁴nca³ xi³ tˀa³tsˀe⁴ je² cho⁴ta⁴ xi³ Ni³na¹ tsa³cja³ˀa¹jin³, qui³si³ˀnti¹ya³ coi³ ni⁴čhjin³-ve⁴.
MAR 13:21 Cˀia⁴ tsa² jnco³ cho⁴ta⁴ cˀoa⁴coi⁴tso⁴-no³: Coe⁴-ni³, i⁴ ti¹jna³-vi⁴ Cristo, a³xo⁴ tsa² coi⁴tso⁴, coe⁴-ni³, ya⁴ ti¹jna³-ve⁴, a³li² ma³cjain¹-jin²no³.
MAR 13:22 Cjai¹nca³to⁴ coi⁴so¹tjen⁴ cho⁴ta⁴nti³so³ xi³ Cristo coi⁴tso⁴-le⁴ yao³-le⁴, cˀoa⁴ xi³ je² xi³ nchja⁴ya³ tˀa³tsˀe⁴ Ni³na¹ coi⁴tso⁴-le⁴ yao³-le⁴. Tse³ choa⁴ cao⁴ cjoa⁴xcon¹ xi³ tsjoa¹. Cˀoa⁴-sˀin² xin² ntia⁴² fi²cao⁴, nta³ tsa² je² xi³ Ni³na¹ tsa³cja³ˀa¹jin³, tsa² coan⁴-le⁴.
MAR 13:23 Ti⁴coi²ntao⁴³ nca³ jon², to⁴nqui³-ni³ cˀoa⁴xin³-no³ nca³yi³je³.
MAR 13:24 To⁴nca³ cˀia⁴ ni⁴čhjin³-ve⁴ nca³ cjoe⁴tˀa³ je² cjoa⁴ñˀain³-ve⁴, tsˀoi¹ sˀe⁴njion²-ni¹, cˀoa⁴ sa¹ li²coi³ ti⁴si⁴²ˀi³sen³-ni³.
MAR 13:25 Cˀoa⁴ ni³ño³ jtsao⁴-ni³ ncˀa³jmi³, cˀoa⁴ je² lˀi¹ xi³ tjin¹-le⁴ ncˀa³jmi³ jtin¹ya³-ni¹.
MAR 13:26 Cˀia⁴ scoe⁴ je² ˀnti¹-le⁴ cho⁴ta⁴ xi³ cjoa⁴ˀai¹jin³-ni³ yo³jvi³, cao⁴ tse³ nca³nˀion¹ cao⁴ cjoa⁴je³ya³.
MAR 13:27 Cˀia⁴ je² ˀnti¹-le⁴ cho⁴ta⁴ si⁴²ca³sen¹ a²ncje⁴-le⁴, cˀoa⁴ cˀoe⁴²xco¹ cho⁴ta⁴-le⁴ xi³ tsa³cja³ˀa¹jin³, cˀoe⁴²xco¹-ni³ nca³ ño³ xi⁴nqui⁴-le⁴ son³ˀnte³, cˀoa⁴ nca³qui³jnta² son³ˀnte³, cˀoa⁴ nca³qui³jnta² ncˀa³jmi³.
MAR 13:28 Cho¹tˀa³yao³ je² xi³ va³co¹ ya¹ higo-ve⁴. Cˀia⁴ nca³ ya¹ntsja³ cˀoe⁴²jtsˀen¹, cˀia⁴ nca³ xca⁴ nčhoa¹-le⁴, ˀya³-nio¹³ nca³ je³ti¹jna³čhian³ chan⁴jtsi¹.
MAR 13:29 Cˀoa⁴-ti⁴sˀin² nca³ jon² cˀia⁴ nca³ jchao⁴³ nca³ cˀoa⁴cji³ma³ je² cjoa⁴-vi⁴. Ca²ta³ˀyao³ nca³ je² ˀnti¹-le⁴ cho⁴ta⁴ je³ti¹jna³čhian³, ja⁴jčho³ xo⁴ntjoa⁴.
MAR 13:30 Xi³ cjoa⁴qui²xi⁴ xi³ xin³-no³, nca³ tsi² tsa² coi⁴ya² cho⁴ta⁴ xi³ tjio¹ ntˀai⁴-vi⁴ sa³ˀnta³ nca³yi³je³ je² cjoa⁴-vi⁴ cjoe⁴cˀoa⁴coan⁴.
MAR 13:31 Ncˀa³jmi³ cao⁴ son³ˀnte³ cjoe⁴tˀa³-ni¹, to⁴nca³ je² en¹-na⁴ li²coi³ cjoe⁴tˀa³.
MAR 13:32 To⁴nca³ xi³ cjoi⁴cho²ca³ je² ni⁴čhjin³-ve⁴, cˀoa⁴ je² hora-ve⁴ nca³ cˀoa⁴coan⁴, li²ˀya³ xi³ ve³, ni⁴je²-jin² a²ncje⁴ xi³ tsˀe⁴ ncˀa³jmi³, ni⁴je²-jin² ˀnti¹-le⁴ Ni³na¹, to⁴jnco³ je² Nˀai³-na¹ xi³ ve³.
MAR 13:33 Ti⁴coi²ntao⁴³, ti⁴yo³chon³ˀntao³, tˀe²tsˀoao³, nca⁴ li²coi³ ˀyao³ cˀia⁴²-ni³ve⁴ nca³ cˀoa⁴coan⁴.
MAR 13:34 Jo³-ni³ jnco³ cho⁴ta⁴ xi³ cjin³ qui³. Tsa³cˀe¹jna³ ni³ˀya³-le⁴, tsa³cˀe¹ne²-le⁴ cho⁴ˀnta³-le⁴ nca³ jnco¹jnco¹ qui³tsjoa³-le⁴ xa¹-le⁴. Tsa³ca³te¹xo³ma³-le⁴ je² xi³ si¹coi²nta⁴ xo⁴ntjoa⁴. Ti⁴jna³chon³ˀntai³, qui³tso²-le⁴.
MAR 13:35 Tjen⁴ya³to³con² ti⁴yo³, nca⁴ tsi² ˀyao³ cˀia⁴ cjoa⁴ˀai¹ je² nai³-le⁴ ntˀia³, tsa² sˀai⁴nqui³xon², a³xo⁴ va³sen³ni⁴tjen⁴, cˀia⁴ nca³ squi¹ˀntia¹ cha¹xi³cha¹, a³xo⁴ nca³ ta⁴njion²ya³,
MAR 13:36 jme¹-ni³ nca³ tsi² sa³yo³fe²-si¹nio³ cˀia⁴ nca³ cjoa⁴ˀai¹ nti⁴ton⁴.
MAR 13:37 Je² cjoa⁴ xi³ xin³-no³ nca³ jon², cˀoa⁴xin¹-le⁴ nca³tsˀi³: Tjen⁴ya³to³con² ti⁴yo³.
MAR 14:1 Jao² ni⁴čhjin³ to⁴nqui³-ni³ nca³ qui³tsˀia⁴ sˀoi¹pa²xco⁴, cˀoa⁴ ni⁴čhjin³ nca³ tsa³cjen² nio⁴xti²la⁴ xi³ tsin²-le⁴ na⁴ˀyo⁴san³-jin², je² cho⁴ta⁴ti¹tjon²-le⁴ na⁴ˀmi³ cao⁴ cho⁴ta⁴ scribano tsa³ca¹sjai³ jo³-sˀin² nca³ tsoa⁴che¹ nca³ si⁴²cˀen³ Jesús.
MAR 14:2 Cˀoa⁴qui³tso²: A³li² cˀia⁴² ni⁴čhjin³-le⁴ sˀoi¹, jme¹-ni³ tsi² cjoa⁴si³ sˀe⁴-si¹ni³ i⁴ na⁴xi⁴na³nta¹.
MAR 14:3 Jesús ti¹jna³ˀya³ ni³ˀya³-le⁴ Simón ya⁴ na⁴xi⁴na³nta¹ Betania. Simón tjin¹-le⁴ chˀin³ nca³ ti¹fi²ˀnto³jon³ yao³-le⁴. Cˀia⁴ nca³ ti¹jna³tˀa³ ya¹mi²xa⁴, ja³ˀai³nčhˀoe² jnco³ chjon⁴² xi³ yˀa³ jnco³ ti⁴²xo²lo⁴ xi³ tjia¹-le⁴ si²ti⁴ nardo xi³ ña³qui³ coi³, xi³ cjai¹nca³ chji¹-le⁴. Tsa³ca³cjan¹ ti⁴²xo²lo⁴-ve⁴, tsa³cˀe¹jten⁴son² jco⁴.
MAR 14:4 Tjin¹ cˀa³ xi³ coan³jti³-le⁴, qui³tso²: A¹-ni³ nca³ qui³si³qui³tson¹-si¹ni³ si²ti⁴-ve⁴.
MAR 14:5 Coan⁴² nca³ sa³te¹na³ tsa²cai³-ni³. Sa³ˀnta³ tsˀa³to³ jan² ciento vi²xo⁴ coi⁴tjo³ chji¹-le⁴. Coan⁴² cˀoai⁴-le⁴ cho⁴ta⁴yo⁴ma⁴ taon⁴-ve⁴ tsa²cai³-ni³. Qui³nchja⁴ti³cao⁴ chjon⁴²-ve⁴ xi³ cˀoa⁴qui³sˀin³.
MAR 14:6 To⁴nca³ Jesús qui³tso²: Ca²ta³vˀe²-no³. A¹-ni³ nca³ ni²jti³-si¹ni³lao⁴³. Cjai¹nca³ to⁴nta³-ni¹ nca³ cˀoa⁴-sˀin² ca²si¹cao⁴-na³.
MAR 14:7 Je² cho⁴ta⁴yo⁴ma⁴ coa⁴tio⁴cao⁴ntsjai²-no³. To⁴cˀia⁴²-ni³ me³-no³ coan⁴-no³ nta³ si⁴cao⁴ nca³ je². To⁴nca³ an³ li²coi³ nca³ntsjai² coa²te⁴jna³cao⁴-no³.
MAR 14:8 Je² chjon⁴²-ve⁴ cˀoa⁴ca²sˀin¹ jña³ sa³ˀnta³ tjen⁴ ca²ma³-le⁴, nca³ to⁴nqui³-ni³ qui³tsjo²jon³ yao³-na⁴ xi³ tˀa³tsˀe⁴ nca³ coa²jna⁴ñe³.
MAR 14:9 Xi³ cjoa⁴qui²xi⁴ xi³ xin³-no³, to⁴jña³-ni³ nca³qui³jnta² son³ˀnte³ nca³ coi⁴no²cjoa⁴ya³-ni³ en¹nta³-vi⁴, cˀoa⁴ti⁴-sˀin² sˀe⁴ en¹ nca³ cˀoa⁴-sˀin² ca²si¹cao⁴-na³, jme¹-ni³ nca³ cˀoa⁴-sˀin² cjoa⁴ˀai¹tsjen³-ni³le⁴ cho⁴ta⁴ xi³ tˀa³tsˀe⁴.
MAR 14:10 Cˀia⁴ Judas Iscariote, jnco³ xi³ te³jao²-ve⁴, ja³ˀai³con³-le⁴ cho⁴ta⁴ti¹tjon²-le⁴ na⁴ˀmi³, jme¹-ni³ nca³ cˀoe⁴²tˀa³-si¹ni³le⁴ na⁴jmi¹ xi³ tˀa³tsˀe⁴ Jesús.
MAR 14:11 Cho⁴ta⁴ti¹tjon²-le⁴ na⁴ˀmi³ nca³ qui³nčhˀoe¹-le⁴, coan³tsjoa³-le⁴. Qui³tsjoa³ tsˀoa³ nca³ tsjoa¹-le⁴ taon⁴. Judas tsa³ca¹sjai³ jo³-sˀin² nca³ sca⁴ni²tˀa³ Jesús.
MAR 14:12 Xi³ ti¹tjon² ni⁴čhjin³-le⁴ sˀoi¹ nio⁴xti²la⁴ xi³ tsin²-le⁴ na⁴ˀyo⁴san³-jin², cˀia⁴ nca³ xi¹jten⁴ njin¹-le⁴ va³rre² xi³ tˀa³tsˀe⁴ sˀoi¹pa²xco⁴, cho⁴ta⁴-le⁴ Jesús qui³tso²-le⁴: Jña¹-ni³ nca³ me³-li² nca³ coa⁴nquin¹ cˀe²ntai³⁴-jin⁴ jme¹-ni³ nca³ chi⁴ne⁴-si¹ni³ je² va³rre² xi³ tsˀe⁴ pa²xco⁴.
MAR 14:13 Jesús qui³si³ca³sen¹ jao² cho⁴ta⁴-le⁴, cˀoa⁴qui³tso²-le⁴: Ta⁴nquion¹³ ya⁴ na⁴xi⁴na³nta¹, ya⁴ sa⁴te¹jion³ jnco³ cho⁴ta⁴xˀin⁴ xi³ yˀa³ jnco³ ni³sa³na³nta¹. Tain¹tjen⁴nqui³-lao⁴³.
MAR 14:14 Ya⁴ jña³ cjoa⁴ˀa³sˀen³ nca³ je², cˀoa⁴tˀin²-lao⁴³ je² xi³ tsˀe⁴ ntˀia³: Maestro xo⁴ tso²: Jña¹ ti¹jna³ je² cuarto jña³ nca³ coa²cjen⁴ cao⁴ cho⁴ta⁴-na⁴ je² pa²xco⁴.
MAR 14:15 Je² xi³ tsˀe⁴ ntˀia³ coa⁴co²-no³ jnco³ cuarto xi³ je³, xi³ ti¹jna³ son²ncˀa³, xi³ je³chon³nta³. Ya⁴ tˀe²ntao³ xi³ tˀa³tsan⁴².
MAR 14:16 Qui³ cho⁴ta⁴-le⁴, ji³cho² ya⁴ na⁴xi⁴na³nta¹, cˀoa⁴-sˀin² coan³sjai³-le⁴ jo³ qui³tso²-le⁴ Jesús. Tsa³cˀe¹nta³ je² pa²xco⁴-ve⁴.
MAR 14:17 Cˀia⁴ nca³ je³coan³xon², Jesús qui³cao⁴ xi³ te³jao²-ve⁴.
MAR 14:18 Cˀia⁴ nca³ tsa³ca³tio²tˀa³ ya¹mi²xa⁴, tjen⁴ nca³ tjio¹cjen², Jesús cˀoa⁴qui³tso²: Xi³ cjoa⁴qui²xi⁴ xi³ xin³-no³, jnco³ xi³ jon² xi³ coi⁴chi³cao⁴-nao¹³ xi³ sca⁴ni²tˀa³-na³.
MAR 14:19 Cho⁴ta⁴-le⁴ coan³fao¹-le⁴. Qui³tso²-le⁴ jnco¹jnco¹: A³ an³ nia¹³. Xi³cˀa³, a³ an³ nia¹³, cˀoa⁴-ti⁴ qui³tso².
MAR 14:20 Jesús qui³tso²-le⁴: Je² jnco³ xi³ te³jao²-ve⁴ xi³ ti¹si¹ca³ˀnchi⁴cao⁴-na³ ja⁴ya³ čhoa⁴.
MAR 14:21 Xi³ cjoa⁴qui²xi⁴ je² ˀnti¹-le⁴ cho⁴ta⁴ coai⁴ jo³-sˀin² nca³ tji¹tˀa³ xi³ tˀa³tsˀe⁴. To⁴nca³ ma⁴-xo¹ni³ je² cho⁴ta⁴-ve⁴ xi³ sca⁴ni²tˀa³ je² ˀnti¹-le⁴ cho⁴ta⁴. Nqui²sa⁴ nta³-ni¹ tsa² tsi² qui³tsin³ cho⁴ta⁴-ve⁴.
MAR 14:22 Cˀia⁴ nca³ tjio¹cjen², Jesús qui³scoe¹ nio⁴xti²la⁴, qui³si³chi³con³tˀain³, qui³si³xcoa⁴, qui³tsjoa³-le⁴, qui³tso²: Chjoao¹³, je²-vi⁴ yao³-na⁴ ni¹.
MAR 14:23 Qui³scoe¹ cho⁴tsin¹, qui³tsjoa³ cjoa⁴nta³, qui³tsjoa³-le⁴. Nca³tsˀi³ qui³tsˀi³ya².
MAR 14:24 Jesús qui³tso²-le⁴: Je²-vi⁴ njin¹-na⁴ ni¹ xi³ tsˀe⁴ cjoa⁴cho⁴tse⁴ xi³ qui³sˀe³nˀion¹, xi³ xi¹jten⁴ xi³ tˀa³tsˀe⁴ ncjin² cho⁴ta⁴.
MAR 14:25 Xi³ cjoa⁴qui²xi⁴ xi³ xin³-no³ nca³ tsi² ti⁴scˀoi⁴-nia³ na³nta¹to³tse⁴² sa³ˀnta³ cˀia⁴ ni⁴čhjin³-ve⁴ cˀia⁴ nca³ scˀoi⁴ nqui²jnco³cˀa²-nia³ ya⁴ cjoa⁴te¹xo³ma³-le⁴ Ni³na¹.
MAR 14:26 Cˀia⁴ nca³ je³qui³se³ tˀa³tsˀe⁴ Ni³na¹, ji³tjo³ ˀnta³ ni³nto³ Olivos.
MAR 14:27 Cˀia⁴ Jesús qui³tso²-le⁴: Nca³tsˀio³ jtsao⁴tˀa³xion²³ xi³ tˀa³tsˀan⁴ coi³ ni⁴tjen⁴-vi⁴, nca³ tji¹tˀa³: Si³qui²ˀoan³ je² xi³ co³ˀnta³ cho⁴, cˀoa⁴ va³rre² nca³ i⁴ nca³ jan¹ coai⁴.
MAR 14:28 To⁴nca³ coan⁴scan³-ni³ nca³ cjoa⁴ˀa²ya³-na³, cjoi¹ ti¹tjon²-no³ ya⁴ ˀnta³ na³nqui³ Galilea.
MAR 14:29 Cˀia⁴ Pedro qui³tso²-le⁴: Nta³ tsa² nca³tsˀi³ jtsao⁴tˀa³xin², an³ ma³jain².
MAR 14:30 Jesús qui³tso²-le⁴: Xi³ cjoa⁴qui²xi⁴ xi³ xin³-le²³ nca³ je² ni⁴tjen⁴-vi⁴ ntˀai⁴, jan² cˀa³ coi⁴jna³ˀma³cao⁴-nai¹³ to⁴nqui³-ni³ nca³ squi¹ˀntia¹ jao² cˀa³ cha¹xi³cha¹.
MAR 14:31 To⁴nca³ Pedro nqui²sa⁴ nˀion¹ qui³tso²: Nta³ tsa² ma³chjen¹ nca³ coi³ya²cao⁴-le²³, li²coi³ coa²te⁴jna³ˀma³cao⁴-le²³. Ti⁴cˀoa⁴qui³tso²-ni³ nca³tsˀi³.
MAR 14:32 Ji³cho² ja⁴ˀnte³ xi³ Getsemaní ˀmi², Jesús qui³tso²-le⁴ cho⁴ta⁴-le⁴: Ti⁴yo³ i⁴-vi⁴, tjen⁴ an³ cˀoe³tsˀoa²³.
MAR 14:33 Qui³cao⁴ Pedro, Jacobo, cao⁴ Juan. Jesús tsa³cˀe¹tsˀia⁴ nca³ ja³tse³xcon¹, cˀoa⁴ nˀion¹ qui³si³cjao¹jin³.
MAR 14:34 Cˀoa⁴qui³tso²-le⁴: Nˀion¹ fao¹-le⁴ ni⁴ma⁴-na⁴, sa³ˀnta³ cjoa⁴vi³ya³. Cho¹yao³ i⁴-vi⁴, ti⁴yo³chon³ˀntao³.
MAR 14:35 Qui³ ti¹tjon² i⁴tse¹-sa³, tsa³ca²jna³ tsa³cjan² tˀa³na³nqui³, tsa³cˀe¹tsˀoa³ tsa² coan⁴ ca²ta³fa³ˀa³to³-le⁴ hora-ve⁴.
MAR 14:36 Cˀoa⁴qui³tso²: Abba Nˀai³-na⁴, ji³ ma³-li² nca³yi³je³ cjoa⁴. Chja⁴ˀa²xin²-nai¹³ je² cjoa⁴ñˀain³, to⁴nca³ li² je²-jin² xi³ an³ me³-na³, to⁴je² xi³ ji³ me³-li².
MAR 14:37 Ja³ˀai³-nca¹ni³ coan³sjai³-le⁴ Pedro, Jacobo, cao⁴ Juan nca³ cjio³fe². Jesús qui³tso²-le⁴ Pedro: Simón, a³ so³jna³fe²-ni¹³. A³ tsi² tsa² ma³ nca³ ca²vi³jna³chon³ˀntai³ jnco³ hora.
MAR 14:38 Ti⁴yo³chon³ˀntao³, tˀe²tsˀoao³, jme¹-ni³ nca³ tsi² jtsao⁴jin³-si¹ni³no³ je¹, cˀia⁴ nca³ chˀao³ si⁴²cao⁴-no³. Je² espírituna¹ ti¹jna³nta³, to⁴nca³ je² yao³-na¹ tsin²-le⁴ nca³nˀion¹-jin².
MAR 14:39 Nqui²jnco³cˀa² qui³-nca¹ni³, tsa³cˀe¹tsˀoa³, qui³tso²-nca¹ni³ xi³ ti⁴coi³-ni³ en¹.
MAR 14:40 Ti⁴ja³ˀai³-nca¹ni³, nqui²jnco³cˀa² coan³sjai³-le⁴ nca³ cjio³fe², nca⁴ xcon⁴ qui³sˀe³chjoa²ntso¹, cˀoa⁴ li²coi³ ve³ jo³ coi⁴tso⁴-le⁴ Jesús.
MAR 14:41 Jesús ja³ˀai³ xi³ coan³jan²-ni³ cˀa³, qui³tso²-le⁴: Sa¹yo³fao²³ ntˀai⁴, ti⁴cja¹yao³. Je³ji³cho² hora. Coe⁴-ni³ je² ˀnti¹-le⁴ cho⁴ta⁴ cha³ni²tˀa³-le⁴ ntsja³ cho⁴ta⁴tsˀen⁴.
MAR 14:42 Ti⁴so¹tjaon⁴³, tjian¹. Coe⁴-ni³ je² xi³ tsa³cˀe¹tˀain³ na⁴jmi¹ xi³ tˀa³tsˀan⁴ je³ti¹jna³čhian³.
MAR 14:43 To⁴jo³ ti¹nchja⁴-sa³ Jesús cˀia⁴ nca³ ja³ˀai³ nti⁴ton⁴ Judas, jnco³ xi³ te³jao²-ve⁴. Ja³ˀai³cao⁴ cho⁴ta⁴ncjin² xi³ yˀa³ qui⁴cha⁴ yˀa³ ya¹, ja³ˀai³-ni³ tˀa³tsˀe⁴ cho⁴ta⁴ti¹tjon²-le⁴ na⁴ˀmi³, cho⁴ta⁴ scribano, cao⁴ cho⁴ta⁴jchi¹nca³.
MAR 14:44 Judas xi³ tsa³cˀe¹tˀain³ na⁴jmi¹ xi³ tˀa³tsˀe⁴ Cristo, je³qui³tsjoa³-le⁴ cho⁴ta⁴ jnco³ choa⁴, qui³tso²: Je² xi³ an³ cˀoe³ntso³ˀa²³, je² ni¹-ve⁴. Ti⁴ntoao⁴³ nca³ je², nta³ ta⁴nquin¹cao⁴³.
MAR 14:45 Cˀia⁴ Judas ja³ˀai³, nti⁴ton⁴ ji³nčhoa³tˀa³čhian³-le⁴ Jesús, qui³tso²-le⁴: Maestro, Maestro. Tsa³cˀe¹ntso³ˀa³.
MAR 14:46 Cˀia⁴ cho⁴ta⁴ qui³tsoa³nˀion¹-ni³ ntsja³.
MAR 14:47 Jnco³ xi³ ti¹jna³ ya⁴-ve⁴, tsa³cˀa³sje³ qui⁴cha⁴. Tsa³ca¹-le⁴ cho⁴ˀnta³-le⁴ na⁴ˀmi³ti¹tjon². Tsa³ca³te³tˀa³ xo⁴ño³.
MAR 14:48 Jesús qui³nchja⁴, qui³tso²-le⁴: A³ ca²vi²tjo⁴-nio³ cao⁴ qui⁴cha⁴, cao⁴ ya¹ nca³ coi⁴ntoa⁴-nao¹³.
MAR 14:49 Nchaon³nchaon³ tsa³ca²te⁴jna³cao⁴-no³ nca³ tsa³ca³co³ya²³-no³ ya⁴³ yo⁴nco⁴. Cˀoa⁴ li²coi³ qui³ntoa³-nao¹³, to⁴nca³ ca²ta³ma³jnco³ jo³ tso² xon⁴ Escrituras.
MAR 14:50 Cˀia⁴ nca³tsˀi³ cho⁴ta⁴-le⁴ qui³tsjion²con³, tsa³nca³.
MAR 14:51 To⁴nca³ jnco³ cho⁴ta⁴xti³ qui³tjen⁴nqui³-le⁴, ti¹jna³jte¹ jnco³ sábana nca³ qui³jna³jti². Cho⁴ta⁴ qui³tsoa³ nca³ je².
MAR 14:52 To⁴nca³ cho⁴ta⁴xti³-ve⁴ tsa³cˀe¹jna³ sábana, qui³jti² nca³ tsa³nca³-le⁴ cho⁴ta⁴-ve⁴.
MAR 14:53 Cho⁴ta⁴ncjin²-ve⁴ qui³cao⁴ Jesús. Qui³con³-le⁴ je² xi³ na⁴ˀmi³ti¹tjon². Coan³ña³ nca³tsˀi³ cho⁴ta⁴ti¹tjon²-le⁴ na⁴ˀmi³, cho⁴ta⁴jchi¹nca³, cao⁴ cho⁴ta⁴ scribano.
MAR 14:54 To⁴nca³ Pedro qui³ co³tsen³tjen⁴nqui³-le⁴ sa³ˀnta³ nca³ ji³cho² ja⁴ya³ nti³tsin³-le⁴ je² xi³ na⁴ˀmi³ti¹tjon². Ya⁴ tsa³cˀe²jna³cao⁴ cho⁴ˀnta³. Ti¹si¹so³-ni³le⁴ lˀi¹ yao³-le⁴.
MAR 14:55 Je² cho⁴ta⁴ti¹tjon²-le⁴ na⁴ˀmi³ cao⁴ nca³tsˀi³ cho⁴ta⁴xa¹ tsa³ca¹sjai³ en¹ xi³ coai⁴ne²-ni³le⁴ Jesús, jme¹-ni³ nca³ si⁴²cˀen³, to⁴nca³ li²coi³ qui³sa³co³-le⁴.
MAR 14:56 Ncjin² xi³ en¹nti³so³ tsa³cˀe¹nta³ne² Jesús, to⁴nca³ cja⁴-ˀai¹ cja⁴ˀai¹ qui³tso² nca³ jnco¹jnco¹.
MAR 14:57 Cˀia⁴ tsa³qui³ncha³nto³ cˀa³, qui³tsjoa³ en¹nti³so³ xi³ tˀa³tsˀe⁴ Jesús, qui³tso²:
MAR 14:58 Jin⁴-jin⁴ qui³no²ˀya²-lai⁴jin⁴ nca³ cˀoa⁴qui³tso²: An³ si³qui³xo²ya³ je² yo⁴nco⁴-vi⁴ xi³ ntsja³ qui³si³nta³-ni³, cˀoa⁴ to⁴jan² ni⁴čhjin³ cˀoe³nta³-nia³ xi³ nqui²jnco³ xi³ tsi² ntsja³ sˀe⁴nta³-ni³.
MAR 14:59 Ni⁴cˀoa⁴²-jin²sˀin² coan³nco¹son² en¹-le⁴.
MAR 14:60 Cˀia⁴ je² xi³ na⁴ˀmi³ti¹tjon² tsa³qui³ncha³nto³ jin³va³sen³, qui³sco²na³nqui³-le⁴ Jesús, qui³tso²: A³ tsi²jme³ en¹ xi³ no²cjoai⁴. Jo¹ tso²-ni³ je² en¹ xi³ tsjoa¹ je² cho⁴ta⁴-vi⁴ co²ntran⁴ tsi⁴.
MAR 14:61 To⁴nca³ Jesús jyo¹ tsa³cˀe²jna³, ni⁴jme³-jin² en¹ xi³ qui³nchja⁴. Je² na⁴ˀmi³ti¹tjon² nqui²ntia³ qui³sco²na³nqui³-le⁴, qui³tso²-le⁴: A³ tsi² tsa² ji³ xi³ Cristo xi³ ˀnti¹-le⁴ je² xi³ to⁴nta³.
MAR 14:62 Jesús qui³tso²-le⁴: An³ nia¹³. Jcha⁴-nio¹³ ˀnti¹-le⁴ cho⁴ta⁴ nca³ ti¹jna³ nca³qui²xi⁴-le⁴ nca³nˀion¹-le⁴ Ni³na¹, nca³ cjoa⁴ˀai¹jin³-ni³ yo³jvi³-le⁴ ncˀa³jmi³.
MAR 14:63 Cˀia⁴ je² na⁴ˀmi³ti¹tjon² tsa³ca³sen¹jnta³ na³jño³-le⁴, cˀoa⁴qui³tso²: Jme¹-sa³ testigo xi³ ma³chjen¹-na¹.
MAR 14:64 Je³ca²no²ˀyao²³ nca³ ca²nchja⁴ˀaon³-le⁴ Ni³na¹: Jo¹ vi³xon¹³. Cˀia⁴ nca³tsˀi³ qui³tsjoa³-le⁴ Jesús cjoa⁴ñˀain³, cˀoa⁴qui³tso² nca³ va³quin²-le⁴ cjoa⁴vi³ya³.
MAR 14:65 Tjin¹ cˀa³ xi³ tsa³cˀe¹tsˀia⁴cao⁴ nca³ tsa³cˀe¹čha¹jon³ Jesús. Tsa³ca¹jtsa³ ncjain¹, tsa³cˀe¹-le⁴, cˀoa⁴qui³tso²-le⁴: Ti⁴no²cjoa⁴yai³. Je² xi³ cho⁴ˀnta³ qui³si³jtsin³ˀa³ ncjain¹.
MAR 14:66 Pedro ya⁴ ti¹jna³nqui³ nti³tsin³ jan¹. Ja³ˀai³ jnco³ tso²ti³ xi³ si¹xa¹-le⁴ na⁴ˀmi³ti¹tjon².
MAR 14:67 Je² tso²ti³-ve⁴ cˀia⁴ nca³ tsa³ve³ Pedro nca³ ti¹si¹so³ yao³-le⁴, qui³sco²tsen³ˀa³, qui³tso²-le⁴: Cˀoa⁴-ti⁴ ji³ to⁴jnco³ tsa³qui³jna³coai⁴ Jesús je² cho⁴ta⁴ nazareno.
MAR 14:68 To⁴nca³ Pedro tsa³cˀe²jna³ˀma³, qui³tso²: Li²coi³ ˀve³xcoan³, li²coi³ ma³cho⁴ya³-na³ jo³ si³. Ji³tjo³ sa³ˀnta³ ja⁴jčho³ xo⁴ntjoa⁴. Qui³squi³ˀntia¹ cha¹xi³cha¹.
MAR 14:69 Je² tso²ti³ xi³ si¹xa¹-le⁴ na⁴ˀmi³ti¹tjon² ti⁴tsa³ve³-nca¹ni³ Pedro, tsa³cˀe¹tsˀia⁴cao⁴ nca³ cˀoa⁴qui³tso²-le⁴ cho⁴ta⁴ xi³ ya⁴ tjio¹: Je² cho⁴ta⁴-vi⁴ tsˀe⁴ Jesús.
MAR 14:70 To⁴nca³ Pedro mai³ ti⁴qui³tso²-nca¹ni³. Xi³ coan³jnco³tjo²-ni³ je² cho⁴ta⁴ xi³ ya⁴ tjio¹ qui³tso² nqui²jnco³cˀa²-le⁴ Pedro: Xi³ cjoa⁴qui²xi⁴ ji³ ni¹³ cho⁴ta⁴-le⁴ Jesús, nca⁴ ji³ ni¹³ cho⁴ta⁴ galileo. Je² en¹-li⁴ cˀoa⁴tso².
MAR 14:71 Pedro tsa³cˀe¹tsˀia⁴ nca³ qui³tso²: Ni³na¹ ca²ta³tsjoa¹-na³ cjoa⁴ñˀain³ tsa² tsi² cˀoa⁴tjin¹ en¹-na⁴. Ña³qui³ qui³tsjoa³ en¹-le⁴. Li²coi³ ˀve³xcoan³ cho⁴ta⁴ xo⁴cji³-vi⁴ xi³ vi³xon¹³ nca³ jon².
MAR 14:72 Cha¹xi³cha¹ qui³squi³ˀntia¹ xi³ coan³jao² cˀa²-ni³. Pedro ja³ˀai³tsjen³-le⁴ je² en¹-le⁴ Jesús jo³ qui³tso²-le⁴: Jan² cˀa³ coi⁴jna³ˀma³cao⁴-nai¹³ to⁴nqui³-ni³ nca³ squi¹ˀntia¹ jao² cˀa³ cha¹xi³cha¹. Cˀia⁴ nca³ qui³si³cja³ˀai³tsjen³ je²-vi⁴, qui³squi³ˀnta¹.
MAR 15:1 Nca³ ta⁴njion² cˀia⁴ nca³ je³coan³ junta, cho⁴ta⁴ti¹tjon²-le⁴ na³ˀmi³, cho⁴ta⁴jchi¹nca³, cho⁴ta⁴ scribano, cao⁴ nca³tsˀi³ cho⁴ta⁴xa¹. Qui³cao⁴ Jesús xi³ tji¹tˀa³nˀion¹, qui³ ca³ni¹tˀa³-le⁴ Pilato.
MAR 15:2 Pilato qui³sco²na³nqui³-le⁴: A³ ji³ ni¹³ cho⁴ta⁴ti¹tjon²-le⁴ cho⁴ta⁴ judíos. Jesús qui³tso²-le⁴: Cˀoa⁴tjin¹ xi³ si³-ve⁴.
MAR 15:3 Cjai¹nca³ ncjin² je¹ tsa³ca¹nqui³ Jesús cho⁴ta⁴ti¹tjon²-le⁴ na⁴ˀmi³.
MAR 15:4 Pilato nqui²jnco³cˀa² ti⁴qui³sco²na³nqui³-nca¹ni³le⁴: A³ tsi² jme³ en¹ xi³ no²cjoai⁴. Coe⁴-ni³ jo³ nca³ ncjin² cjoa⁴ xi³ va¹nqui³-li².
MAR 15:5 To⁴nca³ Jesús li²coi³ qui³nchja⁴ nta³ tsa² cˀoa⁴ti¹ˀmi²-le⁴. Jo¹ to⁴coan³xcon¹-le⁴ Pilato.
MAR 15:6 Cˀia⁴ nca³ sˀoi¹je³ Pilato si¹cˀe¹jna³ntai¹ntsjai² jnco³ preso nca³ xqui⁴no¹, to⁴ˀya³-ni³ve⁴ xi³ cho⁴ta⁴na⁴xi⁴na³nta¹ qui³si³je¹.
MAR 15:7 Ti¹jna³ cjoa⁴ñˀain³ jnco³ cho⁴ta⁴ xi³ Barrabás ˀmi², cao⁴ mi²yo⁴-le⁴ xi³ tsa³qui³so¹tjen⁴ cao⁴ cjoa⁴si³. Qui³si³cˀen³ cˀen³ ja⁴jin³ cjoa⁴si³-ve⁴.
MAR 15:8 Cho⁴ta⁴ncjin² ja³ˀai³con³-le⁴ Pilato. Tsa³cˀe¹tsˀia⁴ nca³ qui³si³je¹-le⁴ nca³ cˀoa⁴-sˀin² si⁴²tjo³son²-nca¹ni³le⁴ jo³-sˀin² nca³ntsjai² xi³ tˀa³tsˀe⁴.
MAR 15:9 Pilato qui³tso²-le⁴: A³ me³-no³ nca³ si⁴²cˀe¹jna³ntai¹-no³ je² cho⁴ta⁴ti¹tjon²-le⁴ cho⁴ta⁴ judíos.
MAR 15:10 Pilato tjin¹jin³-le⁴ nca³ to⁴cjoa⁴xin²ta³con²³-le⁴ nca³ cho⁴ta⁴ti¹tjon²-le⁴ na⁴ˀmi³ ji³cho² ca³ni¹tˀta³-le⁴ Jesús.
MAR 15:11 To⁴nca³ cho⁴ta⁴ti¹tjon²-le⁴ na⁴ˀmi³ tsa³qui³ncha¹ˀa³ nca³tsˀi³ cho⁴ta⁴ nca³ to⁴sa³ ca²ta³si¹cˀe¹jna³ntai¹-le⁴ Barrabás.
MAR 15:12 Pilato nqui²jnco³cˀa² qui³tso²-nca¹ni³le⁴: Jme¹ xi³ me³-no³ tso²cˀoa⁴ nca³ sˀian³ xi³ tˀa³tsˀe⁴ je² cho⁴ta⁴-vi⁴ xi³ ˀmi²-lao⁴³ cho⁴ta⁴ti¹tjon²-le⁴ cho⁴ta⁴ judíos.
MAR 15:13 Cho⁴ta⁴ nqui²ntia³ tsa³cˀe¹jta³: Cro² tja³tˀai³.
MAR 15:14 To⁴nca³ Pilato qui³tso²-le⁴: Jme¹ cjoa⁴tsˀen⁴ xi³ qui³sˀin³-ˀni³. Cho⁴ta⁴ nqui²sa⁴ tsa³cˀe¹jta³: Cro² tja³tˀai³.
MAR 15:15 Pilato me³-le⁴ si¹ña³con³ cho⁴ta⁴na⁴xi⁴na³nta¹, coi³ cjoa⁴-vi⁴ qui³si³cˀe¹jna³ntai¹-le⁴ Barrabás. Cˀoa⁴ cˀia⁴ nca³ je³tsa³ca¹-le⁴ Jesús, qui³sca³ni¹tˀa³ jme¹-ni³ nca³ sˀe⁴tˀa³-si¹ni³ cro².
MAR 15:16 Cˀia⁴ so³nta²do⁴ qui³cao⁴ Jesús ya⁴ ˀnte³-le⁴ cho⁴ta⁴xa¹ti¹tjon² xi³ ˀmi² Pretorio. Qui³nchja⁴ma³ña³-le⁴ nca³tsˀi³ so³nta²do⁴.
MAR 15:17 Qui³si³cˀa³cja¹ Jesús na³jño³jco³. Tsa³cˀe¹jna³son² jco⁴ jnco³ corona na³ˀya¹.
MAR 15:18 Tsa³cˀe¹tsˀia⁴cao⁴ nti⁴ton⁴ nca³ qui³si³ti²ˀnta³: Ti²ˀnta³-li², cho⁴ta⁴ti¹tjon²-le⁴ cho⁴ta⁴ judíos.
MAR 15:19 Tsa³ca¹ntjai² ya¹ jco⁴. Tsa³cˀe¹čha¹jon³ nca³ je², jo³ tsa³qui³ncha³xco¹nchˀin³tˀa³-le⁴ jo³-ni³ xi³ tsa³ve³xcon¹.
MAR 15:20 Cˀia⁴ nca³ je³qui³si³tsjoa³tˀain³, tsa³cˀa³sje³xin²-le⁴ na³-jño³jco³-le⁴. Qui³si³cˀa³cja¹-ni³ na³jño³ xi³ tsˀe⁴, cˀia⁴ ji³tjo³cao⁴ nca³ coa³tˀa³ cro².
MAR 15:21 Qui³si³cˀa³ncˀa³ cjoa⁴nˀion¹ xi³ ya⁴ ja³ˀa³, xi³ ja³ˀai³-ni³ nqui³chao³-le⁴, (je² Simón xi³ cho⁴ta⁴ cireneo, nˀai³-le⁴ Alejandro cao⁴ Rufo) jme¹-ni³ nca³ cˀoa⁴-si¹ni³ cro²-le⁴ Jesús.
MAR 15:22 Qui³cao⁴ Jesús ja⁴ˀnte³ Gólgota, xi³ tso²-ni³ je² ˀnte³jco⁴cˀen³.
MAR 15:23 Qui³tsjoa³-le⁴ vino xi³ ti¹tsˀo¹jin³-le⁴ mirra, to⁴nca³ Jesús li²coi³ qui³tsˀi³.
MAR 15:24 Cˀia⁴ nca³ je³tsa³ca¹tˀa³ cro², qui³si³cˀa³vi¹ na³jño³-le⁴, qui³si³sca¹cao⁴ ˀya³-ni³ xi³ cˀoa⁴ nca³ jnco¹jnco¹.
MAR 15:25 Las nueve nca³ ta⁴njion² cˀia⁴ nca³ tsa³ca¹tˀa³ cro².
MAR 15:26 Cˀoa⁴ son²jco⁴ tsa³cˀe¹tˀa³ xi³ tsa³ca¹nqui³ Jesús: Cho⁴ta⁴ti¹tjon²-le⁴ cho⁴ta⁴ judíos.
MAR 15:27 Cˀoa⁴-ti⁴ tsa³ca¹tˀa³ cro² Jesús jao² cho⁴ta⁴che¹ xi³ tsa³qui³ncha¹ jnco³ nca³qui²xi⁴-le⁴, cˀoa⁴ xi³jnco³ nca³scon¹-le⁴.
MAR 15:28 Cˀoa⁴-sˀin² coan³jnco³ je² en¹ Escritura xi³ tso²: Cao⁴ cho⁴ta⁴tsˀa³ntjai²cjoa⁴ coan³xqui⁴cao⁴ nca³ je².
MAR 15:29 Je² xi³ ya⁴ ja³ˀa³to³ qui³nchja⁴ˀaon³-le⁴, jo³ nca³ tsa³cˀe¹jco⁴ qui³sˀin³, qui³tso²: Jan⁴. Ji³ xi³ qui³si³ nca³ si⁴qui³xo²jain³ yo⁴nco⁴ xi³ tsˀe⁴ Ni³na¹, cˀoa⁴ nca³ jan² ni⁴čhjin³ cˀoe¹nta³-ni³,
MAR 15:30 chˀa⁴sje³ntjai² yao³-li⁴, ti²tjo⁴jen⁴-lai⁴ cro²-ve⁴.
MAR 15:31 Ti⁴cˀoa⁴qui³sˀin³-ni³ cho⁴ta⁴ti¹tjon²-le⁴ na⁴ˀmi³, cao⁴ cho⁴ta⁴ scribano qui³si³tsjoa³tˀain³ nca³ i⁴ nca³ jan¹ qui³tso²-le⁴ xi¹ncjin¹: Tsa³cˀa³sje³ntjai² xi³ cja⁴ˀai¹, to⁴nca³ li²coi³ ma³-le⁴ vˀa³sje³ntjai²-ni³ yao³-le⁴.
MAR 15:32 Je² Cristo, cho⁴ta⁴ti¹tjon²-le⁴ cho⁴ta⁴ Israel, ca²ta³vi³tjo³jen³tˀa³ cro² ntˀai⁴-vi⁴, jme¹-ni³ nca³ jcha⁴-si¹nia³², cˀoa⁴ coan⁴cjain¹-si¹ni³na¹. Cˀoa⁴-ti⁴ je² xi³ ya⁴ to⁴jnco³ tjen⁴vˀa³tˀa³ cro² qui³nchja⁴ti³cao⁴ Jesús.
MAR 15:33 Cˀia⁴ nca³ ji³cho²ca³ nchi³sen³, coan³njion² nca³qui³jnta² son³ˀnte³, sa³ˀnta³ las tres nca³ ma³xon².
MAR 15:34 Cˀia⁴ nca³ las tres nca³ ma³xon² Jesús nˀion¹ qui³nchja⁴, qui³tso²: Eloi, Eloi, lama sabactani, xi³ tso²-ni³: Ni³na¹-na⁴, Ni³na¹-na⁴, a¹-ni³ nca³ ca²njion³ta³con²-si¹ni³nai¹³.
MAR 15:35 Xi³ je³qui³nčhˀoe¹-le⁴ cˀa³ xi³ ya⁴ tjio¹, qui³tso²: Coe⁴-ni³ nchja⁴-le⁴ Elías.
MAR 15:36 Jnco³ cho⁴ta⁴ qui³to²ca³, qui³si³ca³ˀnchi⁴-ni³ tsa⁴nca⁴, qui³si³cˀe¹jna³jco³ ya¹na⁴xo⁴, qui³si³cˀi³, qui³tso²: Ca²ta³vˀe², cho¹tsen³-le⁴² tsa² cjoa⁴ˀai¹ Elías nca³ cjoa⁴ˀa²xin² Jesús.
MAR 15:37 To⁴nca³ Jesús nˀion¹ qui³squi³ˀntia¹, qui³cha³jta³.
MAR 15:38 Cˀia⁴ je² na³jño³ xi³ qui³tjen⁴chjoa² ya⁴ya³ yo⁴nco⁴ coan³va³sen³ya³. Ji³nčhoa³-ni³ jco⁴ sa³ˀnta³ tˀa³na³nqui³ qui³xi³jnta¹jen³.
MAR 15:39 Je² xi³ nca³jco⁴-le⁴ so³nta²do⁴ xi³ ya⁴ tsa³ca³sen²jna³tˀa³-le⁴ Jesús, cˀia⁴ nca³ tsa³ve³ nca³ ntia³ qui³cha³jta³ Jesús, qui³tso²: Xi³ cjoa⁴qui²xi⁴ je² cho⁴ta⁴-vi⁴ ˀnti¹-le⁴ Ni³na¹ ni¹.
MAR 15:40 Cˀoa⁴-ti⁴ tjio¹ cˀa³ ya¹nchjin¹ xi³ cjin³ tjio¹co³tsen³-ni³le⁴. María Magdalena, cˀoa⁴ María xi³ na⁴-le⁴ Jacobo xi³ ma³ˀnti¹ cao⁴ José, cˀoa⁴ Salomé tjio¹ jin³-le⁴ nca³ je².
MAR 15:41 Je² ya¹nchjin¹ qui³tˀa³-le⁴, qui³si³sin³-le⁴ Jesús cˀia⁴ nca³ to⁴jo³ tsa³cˀe²jna³ ya⁴ na³nqui³ Galilea. Cˀoa⁴ ncjin²-sa³ ya¹nchjin¹ xi³ ña³tjen⁴ ji³nčhoa³mi³ cao⁴ Jesús ya⁴ na⁴xi⁴na³nta¹ Jerusalén.
MAR 15:42 Cˀia⁴ nca³ je³coan³xon², coi³ nca³ je² víspera-le⁴ cˀia⁴ nca³ tsa³cˀe¹nta³ xi³ tˀa³tsˀe⁴ ni⁴čhjin³ ni²cja¹ya³,
MAR 15:43 José xi³ Arimatea tsˀe⁴, jnco³ cho⁴ta⁴xa¹ xi³ cjai¹nca³ tjin¹-le⁴ cjoa⁴qui²xi⁴, xi³ cˀoa⁴-ti⁴ qui³sco²ya³-le⁴ cjoa⁴te¹xo³ma³-le⁴ Ni³na¹, coan³nˀion¹con³ nca³ ja³ˀa³sˀen³nčhˀoe² Pilato, qui³si³je¹-le⁴ yao³-le⁴ Jesús.
MAR 15:44 Pilato to⁴coan³xcon¹-le⁴ nca³ je³cˀen³. Qui³nchja⁴-le⁴ je² xi³ nca³jco⁴-le⁴ so³nta²do⁴-ve⁴, qui³sco²na³nqui³-le⁴ tsa² je³cˀen³.
MAR 15:45 Je² xi³ nca³jco⁴-le⁴ so³nta²do⁴ qui³tsjoa³-le⁴ cjoa⁴qui²xi⁴. Cˀia⁴ nca³ Pilato tsa³ve³, qui³tsjoa³-le⁴ José yao³-le⁴ Jesús.
MAR 15:46 José tsa³ca³tse³ jnco³ sábana, tsa³cja³ˀa¹xin² Jesús, tsa³ca¹jte¹ sábana, qui³sca³ni¹sˀen³nqui³ tsjo¹ jña³ qui³tjo³-ˀai²cja¹ jnco³ na⁴xi⁴. Jnco³ la⁴jao⁴ qui³sca³ni¹ti¹cja¹ jčho³xo⁴ntjoa⁴-le⁴ tsjo¹.
MAR 15:47 María Magdalena, cao⁴ María xi³ na⁴-le⁴ José, tsa³ve³ jña³-ni³ nca³ ti¹qui³jna³ñai³.
MAR 16:1 Cˀia⁴ nca³ je³ja³ˀa³to³ ni⁴čhjin³ ni²cja¹ya³, María Magdalena, María na⁴-le⁴ Jacobo, cao⁴ Salomé, tsa³ca³tse³ xqui³ xi³ nta³ njen³, jme¹-ni³ nca³ cjoa⁴ˀai¹ si¹ca³jon³-si¹ni³le⁴ yao³-le⁴ Jesús.
MAR 16:2 Cˀia⁴ nca³ ni⁴čhjin³ tai²nco⁴ nca³ cjai¹nca³ ta⁴njion²ya³, xi³ qui³sˀe³sen¹, ji³nčhoa³ jña³ qui³jna³ tsjo¹-ve⁴.
MAR 16:3 Qui³tso²-le⁴ xi¹ncjin¹: ˀya¹-ni³ve⁴ xi³ cjoa⁴ˀa²xin²-na¹ je² la⁴jao⁴ xi³ qui³jna³jčho³ xo⁴ntjoa⁴-le⁴ tsjo¹.
MAR 16:4 Cˀia⁴ nca³ qui³sco²tsen³, tsa³ve³ la⁴jao⁴-ve⁴ xi³ je³qui³tji³ tˀa³xin²-le⁴ tsjo¹-ve⁴. Cjai¹nca³ to⁴je³ cji³ la⁴jao⁴-ve⁴.
MAR 16:5 Qui³sˀen³ tsjo¹-ve⁴. Tsa³ve³ jnco³ cho⁴ta⁴xti³ xi³ ti¹jna³ nca³qui²xi⁴-le⁴. Ti¹jna³jte¹ jnco³ na³jño³jnčho³ xi³ čhoa³ cji³. Ya¹nchjin¹ qui³tsa³cjon¹.
MAR 16:6 To⁴nca³ je² cˀoa⁴qui³tso²-le⁴: A³li² vi³jcon³-jion²³, ti³ma³fa³sjai³-nio¹³ Jesús xi³ tsˀe⁴ Nazaret, xi³ qui³sˀe³jna³tˀa³ cro². Ca²fa³ˀa¹ya³-ni³le⁴, li²coi³ i⁴ ti¹jna³-vi⁴. Cho¹tsen³-lao⁴³ i⁴ ˀnte³-vi⁴ jña³ nca³ tsa³ca³jna³.
MAR 16:7 Ta⁴nquion¹³ tso²cˀoa⁴, cˀoa⁴tˀin²-lao⁴³ cho⁴ta⁴-le⁴ cao⁴ Pedro nca³ je² ti¹fi² ti¹tjon²-no³ ya⁴ Galilea. Ya⁴ jchao⁴³ nca³ je², jo³-sˀin² nca³ qui³tso²-no³.
MAR 16:8 Ya¹nchjin¹ ji³tjo³ nti⁴ton⁴-ni³ tsjo¹-ve⁴. Jo³ qui³to²ca³, jo³ ja³tse³ yao³-le⁴, jo³ coan³xcon¹-le⁴. Ni⁴ˀya³-jin² xi³ jo³ qui³tso²-le⁴, nca⁴ nˀion¹ tjio¹tsa³cjon¹.
MAR 16:9 Jesús ja³ˀa²ya³-ni³le⁴ nca³ tai²nco⁴ ni⁴tjen⁴ya³. Tsˀa³tsen³ ti¹tjon²-le⁴ María Magdalena xi³ tsa³cˀa³sje³xin²-le⁴ ña³to³ nai⁴² xi³ nta³jin³.
MAR 16:10 Qui³ María Magdalena, tsa³cˀe¹-le⁴ na⁴jmi¹ je² xi³ tsa³ca³tio²cao⁴ Jesús. Fao¹-le⁴ cho⁴ta⁴-ve⁴, tjio¹qui³ˀnta¹.
MAR 16:11 Cˀia⁴ nca³ qui³nčhˀoe¹ nca³ ti¹jna³con³ Jesús, cˀoa⁴ nca³ María tsa³ve³ nca³ je², cho⁴ta⁴-le⁴ li²coi³ coan³cjain¹-le⁴.
MAR 16:12 To⁴nca³ coan³scan³-ni³ cja⁴ˀai¹ cji³ yao³-le⁴ nca³ qui³si³cˀa³tsen³-le⁴ jao² cho⁴ta⁴ xi³ tjio¹fi² ntia⁴² nqui³chao³.
MAR 16:13 Qui³si³cˀo¹fa³-ni³ nca³ jao². Qui³ cˀe¹-le⁴ na⁴jmi¹ xi³cˀa³. Cˀoa⁴-ti⁴ li²coi³ coan³cjain¹-le⁴.
MAR 16:14 Xi³ je³tˀa³-ni³ Jesús qui³si³cˀa³tsen³-le⁴ yao³-le⁴ je² xi³ ti⁴je²-ni³ te³jnco³ cho⁴ta⁴-le⁴ cˀia⁴ nca³ tjio¹tˀa³ ya¹mi²xa⁴. Qui³nchja⁴ti³cao⁴ nca³ cˀoa⁴-sˀin² xi¹jin³ ni⁴ma⁴-le⁴, nca³ tsi² coan³cjain¹-le⁴ jo³ qui³tso² je² xi³ tsa³ve³ Jesús cˀia⁴ nca³ ja³ˀa²ya³-ni³le⁴.
MAR 16:15 Cˀoa⁴qui³tso²-le⁴: Ta⁴nquion¹³ nca³qui³jnta² son³ˀnte³. Ti⁴no²cjoa⁴ya³jin³-lao⁴³ nca³tsˀi³ cho⁴ta⁴ je² en¹nta³ xi³ tˀa³tsˀan⁴.
MAR 16:16 Je² xi³ coan⁴cjain¹-le⁴, cˀoa⁴ xi³ sa⁴te¹nta¹-ni¹, coi⁴tjo³ntjai²-ni¹. To⁴nca³ je² xi³ tsi² coan⁴cjain¹-le⁴, sˀe⁴-le⁴ cjoa⁴ñˀain³.
MAR 16:17 Je² xi³ coan⁴cjain¹-le⁴, cˀoa⁴sˀin⁴² je² choa⁴ je²-vi⁴: Cao⁴ jan³ˀain¹-na⁴ cˀoa⁴sje³xin² nai⁴² xi³ nta³jin³, cˀoa⁴ coi⁴nchja⁴ en¹ xi³ cja⁴ˀai¹.
MAR 16:18 Sco¹mi³tjen⁴ ye⁴, cˀoa⁴ tsa² scˀoi¹ tso³jmi² xi³ si¹cˀen³, li²jo³ si⁴²cao⁴. Coa⁴²yo³son²-le⁴ ntsja³ je² xi³ tjio¹mˀen³, coan⁴nta³-ni¹.
MAR 16:19 Je² Nai³-na¹, cˀia⁴ nca³ je³tsa³cja¹cao⁴ cho⁴ta⁴-le⁴ qui³tjoe¹mi³ ncˀa³jmi³. Tsa³cˀe²jna³ nca³qui²xi⁴-le⁴ Ni³na¹.
MAR 16:20 Ji³tjo³ je² cho⁴ta⁴-le⁴ve⁴, qui³nchja⁴ya³ nca³qui³jnta² ˀnte³. Je² Nai³-na¹ qui³si³xa¹cao⁴ nca³ je², ña³qui³ qui³si³qui²xi⁴ya³nta³ en¹-le⁴ cao⁴ choa⁴ xi³ qui³sˀin³. Cˀoa⁴ ca²ta³ma³.
LUK 1:1 Ncjin² xi³ qui³si³qui²xi⁴ya³nta³ je² historia xi³ tsˀe⁴ cjoa⁴ nca³yi³je³ xi³ coan³jin³-na¹, xi³ cjoa⁴qui²xi⁴xcon¹.
LUK 1:2 Jo³-sˀin² nca³ qui³tso²ya³-na¹ je² cho⁴ta⁴ xi³ sa³ˀnta³ nca³ to²tsˀin³-le⁴cjoa⁴ tsa³ve³-ni³ cao⁴ xcon⁴, nca³ qui³sˀe³-le⁴ xa¹ xi³ tˀa³tsˀe⁴ je² en¹.
LUK 1:3 Cˀoa⁴²-ti⁴an³ nta³ qui³sa³sen³-na³ nca³ squi³-le²³, ji³ xi³ nˀion¹ ntai³ Teófilo, jo³-sˀin² tjio¹ nca³ jnco²cˀa³jnco²cˀa³, nca³ ña³qui³ nta³ qui³sco³tˀa³jian³ nca³yi³je³ cjoa⁴ sa³ˀnta³ to²tsˀin³-le⁴ cjoa⁴,
LUK 1:4 jme¹-ni³ nca³ jcha⁴-si¹ni³ xi³ ña³qui³ cˀoa⁴tjin¹ je² cjoa⁴ xi³ to⁴ˀen¹ tsa³cˀin²ya³-li².
LUK 1:5 Je² ni⁴čhjin³-ve⁴ cˀia⁴ nca³ Herodes cho⁴ta⁴ti¹tjon² tsˀe⁴ Judea, ti¹jna³ jnco³ na⁴ˀmi³ xi³ Zacarías ˀmi², xi³ tsˀa³cao⁴-le⁴ ni⁴čhjin³-le⁴ xa¹-le⁴ Abías. Je² Zacarías tjin¹-le⁴ chjon⁴² xi³ Elisabet ˀmi², xi³ ntje⁴-le⁴ Aarón.
LUK 1:6 Cˀoa⁴ je² nca³ jao² tjin¹-le⁴ cjoa⁴qui²xi⁴ nqui³xcon⁴ Ni³na¹, nca⁴ si¹ma³ nca³ tsi²jme³ je¹ xi³ tjin¹-le⁴ ja⁴tˀa³tsˀe⁴ nca³yi³je³ cjoa⁴te¹xo³ma³-le⁴, jo³-sˀin² nca³ vˀe¹ne² Nai³-na¹.
LUK 1:7 Tsin²-le⁴ xti³-jin², nca³ ˀnti⁴-ni¹ je² Elisabet, nca³ jao² je³fi³cje³tˀa³-le⁴ ni⁴čhjin³.
LUK 1:8 Cˀoa⁴ coan³ nca³ tsˀa³cao⁴-le⁴ Zacarías nca³ si¹xa¹ nqui³xcon⁴ Ni³na¹ jo³-sˀin² si¹xa¹ na⁴ˀmi³ nca³ fi³cho² ni⁴čhjin³-le⁴.
LUK 1:9 Jo³-sˀin² coan³nca³-le⁴ na⁴ˀmi³, tsˀa³cao⁴-le⁴ Zacarías nca³ cˀoe¹jna³ xo³nco¹sja³, nca³ ja³ˀa³sˀen³ ya⁴³ ˀnte³tsje³-le⁴ Nai³-na¹.
LUK 1:10 Nca³tsˀi³ to⁴jo³ tjin¹ ma³-ni³ cho⁴ta⁴ xi³ tjio¹ nti³tsin³, tjio¹vˀe¹tsˀoa³-ni¹, cˀia⁴ hora cˀia⁴ nca³ ti² xo³nco¹sja³.
LUK 1:11 Coan³tsen³-le⁴ Zacarías jnco³ a²ncje⁴ xi³ tsˀe⁴ Nai³-na¹, ya⁴ se¹nto³tˀa³ nca³ qui²xi⁴-le⁴ xta²-ve⁴ jña³ ti² xo³nco¹sja³.
LUK 1:12 Coan³xcon¹-le⁴ Zacarías nca³ tsa³ve³, cˀoa⁴ nˀion¹ qui³tsa³cjon¹.
LUK 1:13 To⁴nca³ a²ncje⁴-ve⁴ qui³tso²-le⁴: Zacarías, a³li² jcon³-jin², cjai¹nca³ nta³ qui³no²ˀya²-le⁴ je² cjoa⁴vˀe²tsˀoa³-li⁴. Cˀoa⁴ je² chjon⁴²-li⁴, Elisabet, cˀoe⁴² jnco³ ˀnti¹ xi³ tsi⁴, cˀoa⁴ ji³ cˀoai⁴-lai⁴ jan³ˀain¹-le⁴ Juan.
LUK 1:14 Cˀoa⁴ sˀe⁴-li² cjoa⁴tsjoa³, nˀion¹ tsjoa³ sˀe⁴to³coin²³. Cjai¹nca³ ncjin² xi³ coan⁴tsjoa³-le⁴ cˀia⁴ nca³ jtsin¹ nca³ je².
LUK 1:15 Je² coan⁴ cho⁴ta⁴je³ya³ nqui³xcon⁴ Ni³na¹. A³li²coi³ scˀoi¹ vino ni⁴xan¹-jin². Cjai¹nca³ to⁴sˀe⁴jin³ ni⁴ma⁴-le⁴ ˀnti¹-ve⁴ je² Espíritu Santo, jo³-sˀin² nca³ sa³ˀnta³ ji³nčhoa³-ni³ ja⁴ya³ tsˀoa⁴ na⁴-le⁴.
LUK 1:16 Ncjin² ntje⁴-le⁴ Israel si⁴²cˀo¹fa³ya³tˀa³-le⁴ Nai³-na¹ Ni³na¹-le⁴ xi³ to⁴tˀa³tsˀe⁴ nca³ je².
LUK 1:17 Je² coai⁴ ti¹tjon²-le⁴ nca³ je² cao⁴ espíritu, cˀoa⁴ cao⁴ nca³nˀion¹-le⁴ Elías, jme¹-ni³ nca³ ni⁴ma⁴-le⁴ nˀai³-le⁴ si⁴²cˀo¹fa³ya³tˀa³-si¹ni³le⁴ xti³-le⁴, cˀoa⁴ jme¹-ni³ nca³ cho⁴ta⁴ tsˀa³ntjai²cjoa⁴ scoe¹-si¹ni³ cjoa⁴chji⁴ne⁴-le⁴ cho⁴ta⁴cjoa⁴qui²xi⁴, jme¹-ni³ nca³ si⁴²ca³tio²nta³-si¹ni³ xi³ tˀa³tsˀe⁴ Nai³-na¹ cho⁴ta⁴ na⁴xi⁴na³nta¹ xi³ coa⁴tio⁴nta³.
LUK 1:18 Zacarías cˀoa⁴qui³tso²-le⁴ a²ncje⁴: Jo¹-sˀin² coan⁴-ni³ nca³ scoe³ je²-vi⁴, nca⁴ je³coan³ jchi¹nca³ nca³ an³, cˀoa⁴-ti⁴ chjon⁴²-na⁴ je³fi³cje³tˀa³-le⁴ ni⁴čhjin³.
LUK 1:19 Cˀoa⁴ je² a²ncje⁴ qui³tso²-le⁴: An³-nia¹³ Gabriel xi³ ti²jna⁴ nqui³xcon⁴ Ni³na¹. Qui³ni²ca³sen¹-na³ nca³ coi³nchja²cao⁴-le²³ nca³ tsjoa³-le²³ je² en¹nta³-vi⁴.
LUK 1:20 Coe⁴-ni³, coan⁴ chi⁴sin¹-ni¹³ ji³. Li²coi³ coi⁴no²cjoai⁴ sa³ˀnta³ ni⁴čhjin³ nca³ sˀe⁴nta³ je²-vi⁴, coi³ nca³ tsi² coan³cjain¹-li² je² en¹-na⁴, jña³-le⁴ xi³ coi⁴tjo³son² je² ni⁴čhjin³-le⁴.
LUK 1:21 Je² cho⁴ta⁴ na⁴xi⁴na³nta¹ tjio¹co³ya³-le⁴ Zacarías. To⁴coan³xcon¹-le⁴ nca³ ma³tse³ya²-le⁴ ja⁴ya³ ˀnte³tsje³-le⁴ Ni³na¹.
LUK 1:22 Cˀia⁴ nca³ ji³tjo³ li²coi³ ma³-le⁴ nchja⁴. Cˀoa⁴ coan³cho⁴ya³-le⁴ cho⁴ta⁴ nca³ je² Zacarías qui³tsˀai²-le⁴ jnco³ ni³jña¹ ja⁴ya³ ˀnte³tsje³-ve⁴. Cˀoa⁴ to⁴ti¹mjen³chi⁴sin¹-ni¹ ntsja³. Je³coan³chi⁴sin¹.
LUK 1:23 Xi³ je³qui³si³jnco³ ni⁴čhjin³-le⁴ xa¹-le⁴, qui³ ni³ˀya³-le⁴.
LUK 1:24 Xi³ coan³scan³-ni³le⁴ je² ni⁴čhjin³-ve⁴, coan³tse³nqui³ tsˀoa⁴ Elisabet xi³ chjon⁴²-le⁴ Zacarías. Tsa³cˀe²jna³ˀma³ aon² sa¹, qui³tso²:
LUK 1:25 Je² Nai³-na¹ cˀoa⁴qui³sˀin³ xi³ tˀa³tsˀan⁴ je² ni⁴čhjin³ nca³ qui³si³cja³ˀai³tsjen³ nca³ cjoa⁴ˀa²xin² xi³ taon³ ve³-na³ cho⁴ta⁴.
LUK 1:26 Xi³ coan³ jaon³ sa¹, Ni³na¹ qui³si³ca³sen¹ je² a²ncje⁴ Gabriel sa³ˀnta³ jnco³ na⁴xi⁴na³nta¹ xi³ Nazaret ˀmi², xi³ nchja⁴-ni³ ya⁴ ˀnte³ Galilea.
LUK 1:27 Qui³ni²ca³sen¹con³-le⁴ jnco³ chjon⁴²xo³nco¹ xi³ tsje³, xi³ si⁴²qui³xan³cao⁴ jnco³ xˀin⁴ xi³ José ˀmi², xi³ ntje⁴-le⁴ David. Je² jan³ˀain¹-le⁴ chjon⁴²xo³nco¹ xi³ tsje³-ve⁴ María ni¹.
LUK 1:28 Ja³ˀa³sˀen³ a²ncje⁴-ve⁴ ya⁴ jña³ ti¹jna³, qui³tso²-le⁴: ˀnta³-li² ji³ xi³ cjai¹nca³ to⁴nta³-li². Je² Nai³-na¹ ti¹jna³cao⁴-li². Nqui²sa⁴ to⁴nta³-li² cao⁴-ni³ tsa² ya¹nchjin¹ xi³cˀa³.
LUK 1:29 María coan³xcon¹-le⁴ en¹-le⁴, cˀia⁴ nca³ tsa³ve³. Qui³si³cja³ˀai³tsjen³, a¹-ni³ nca³ cˀoa⁴-sˀin² cjoa⁴ˀai¹ si¹xa³tˀa³-si¹ni³na³.
LUK 1:30 Cˀoa⁴ je² a²ncje⁴ qui³tso²-le⁴: María, a³li² jcon³-jin², je³coan³sjai³-li² cjoa⁴nta³ nqui³xcon⁴ Ni³na¹.
LUK 1:31 Coe⁴-ni³ coan⁴jcha¹ya³-li² jnco³ ˀnti¹xˀin⁴ xi³ cˀoai¹³, xi³ cˀoai⁴ jan³ˀain¹-le⁴ Jesús.
LUK 1:32 Je²-vi⁴ cho⁴ta⁴je³ya³ coan⁴, cˀoa⁴ cˀoin¹-le⁴ ˀnti¹-le⁴ Ni³na¹ xi³ nˀion¹ ncˀa³ ti¹jna³. Je² Nai³-na¹ Ni³na¹ tsjoa¹-le⁴ ya¹xi²le⁴-le⁴ David nˀai³-le⁴.
LUK 1:33 Je² coa⁴te²xo³ma³ ntsjai²-le⁴ cho⁴ta⁴ ntˀia³-le⁴ Jacob. Cˀoa⁴ je² cjoa⁴te¹xo³ma³-le⁴ li²coi³ cjoe⁴tˀa³.
LUK 1:34 Cˀia⁴ María qui³tso²-le⁴ a²ncje⁴: Jo¹ coan⁴ je²-vi⁴, nca⁴ tsi² xˀin⁴ tjin¹-na³.
LUK 1:35 Cˀoa⁴ a²ncje⁴ qui³tso²-le⁴: Je² Espíritu Santo cjoa⁴ˀai¹-li², cˀoa⁴ cˀoe¹jna³son²-li² nca³nˀion¹-le⁴ Ni³na¹ xi³ nˀion¹ ncˀa³ ti¹jna³. Coi³ nca³ je² ˀnti¹ xi³ ña³qui³ tsje³ xi³ jtsin¹, ˀnti¹-le⁴ Ni³na¹ cˀoin¹.
LUK 1:36 Coe⁴-ni³ Elisabet xi³ xi²nqui⁴, cˀoa⁴-ti⁴ je² coan³tse³nqui³ tsˀoa⁴ nta³ tsa² jchi¹nca³. Cˀoa⁴-ti⁴ ntˀai⁴-vi⁴ je² xi³ ma³jaon³-ni³ sa¹-le⁴ je² xi³ chjon⁴²ˀnti⁴ tsa³cˀin²-le⁴.
LUK 1:37 Ni⁴jnco³-jin² cjoa⁴ xi³ tsi² tsa² coi³ coan⁴-le⁴ Ni³na¹.
LUK 1:38 Cˀia⁴ María qui³tso²: I⁴ ti²jna⁴-vi⁴ an³, chjon⁴²cho⁴ˀnta³-le⁴ Ni³na¹ nia¹³. Cˀoa⁴ ca²ta³ma³-na³ jo³ tso² en¹-li⁴. Cˀoa⁴ je² a²ncje⁴ tsa³ca³sen¹xin²-le⁴ nca³ je².
LUK 1:39 Je² coi³ ni⁴čhjin³-ve⁴ tsa³qui³so¹tjen⁴ María, qui³ nti⁴ton⁴ jnco³ na⁴xi⁴na³nta¹je³ xi³ ti¹jna³ ˀncho³ni³nto³ ya⁴ na³nqui³ Judá.
LUK 1:40 Cˀoa⁴ ja³ˀa³sˀen³ ni³ˀya³-le⁴ Zacarías, qui³si³ti²ˀnta³ Elisabet.
LUK 1:41 Cˀoa⁴ xi³ coan³-ni³ve⁴, cˀia⁴ nca³ qui³nčhˀoe¹ Elisabet nca³ qui³si³ti²ˀnta³ María, je² ˀnti¹-ve⁴ qui³si³cjan⁴ ya⁴³ tsˀoa⁴. Cˀoa⁴ cjai¹nca³ to⁴qui³sˀe³jin³ ni⁴ma⁴-le⁴ Elisabet je² Espíritu Santo.
LUK 1:42 Cjai¹nca³ nˀion¹ qui³nchja⁴: Nqui²-sa⁴ to⁴nta³-li² cao⁴-ni³ tsa² ya¹nchjin¹ xi³cˀa³, cˀoa⁴ jo¹ to⁴nta³-le⁴ ˀnti¹-li⁴ ja⁴ya³ ntsˀoai³.
LUK 1:43 Jo¹-sˀin²ni³ˀni³ je²-vi⁴ nca³ je² na⁴-le⁴ Nai³-na⁴ cjoa⁴ˀai¹con³-na³.
LUK 1:44 Coe⁴-ni³ cˀia⁴ nca³ qui³nčhˀoe³jta³-le²³ nca³ qui³ni²ti²ˀnta³-nai¹³, je² ˀnti¹ qui³si³cjan⁴ cao⁴ cjoa⁴tsjoa³ ja⁴ya³ ntsˀoa³.
LUK 1:45 Jo¹ to⁴nta³-le⁴ je² xi³ coan³cjain¹-le⁴, nca⁴ coan⁴jnco³ je² cjoa⁴ xi³ qui³cˀin²-le⁴ ja⁴tˀa³tsˀe⁴ Nai³-na¹.
LUK 1:46 Cˀia⁴ María qui³tso²: Je² ni⁴ma⁴-na⁴ cjai¹nca³ je³ya³ vˀa³sje³ Ni³na¹.
LUK 1:47 Je² espíritu-na⁴ coan³tsjoa³-le⁴ tˀa³tsˀe⁴ Ni³na¹ xi³ vˀa³sje³ntjai²-na³.
LUK 1:48 Qui³sco²tsen³-ni¹ nca³ yo⁴ma⁴-nia¹³ xi³ cho⁴ˀnta³ ma³. Coe⁴-ni³ sa³ˀnta³ ntˀai⁴-vi⁴ jo¹ to⁴nta³ coi⁴tso⁴-na³ nca³tsˀi³ cho⁴ta⁴.
LUK 1:49 Cjai¹nca³ tse³ cjoa⁴ qui³si³nta³-na³ Ni³na¹ xi³ tjin¹-le⁴ nca³yi³je³ nca³nˀion¹, cˀoa⁴ tsje³ je² jan³ˀain¹-le⁴.
LUK 1:50 Je² Ni³na¹ tjin¹-le⁴ cjoa⁴ma⁴ta³con² xi³ tˀa³tsˀe⁴ nca³tsˀi³ cho⁴ta⁴ xi³ nca³sˀa⁴ sa³ˀnta³ ntˀai⁴-vi⁴, xi³ tˀa³tsˀe⁴ je² xi³ ve³xcon¹ nca³ je².
LUK 1:51 Cao⁴ čhja³-le⁴ tsa³ca³co¹ nca³nˀion¹-le⁴. Tsa³cˀe¹tsao³va³ je² cho⁴ta⁴ xi³ ncˀa³con³ cjoa⁴fa³ˀai³tsjen³-le⁴ ni⁴ma⁴-le⁴.
LUK 1:52 Ni³na¹ qui³si³cji³nčhoa³jen³ xi³ ncˀa³ tjio¹, cˀoa⁴ qui³si³quin³ncˀa³ xi³ yo⁴ma⁴ tjio¹.
LUK 1:53 Je² cho⁴ta⁴ xi³ vao³-le⁴ qui³si³tse³-le⁴ tso³jmi²nta³, cˀoa⁴ je² xi³ nchi⁴na¹ qui³sca³ni¹cji³tia³.
LUK 1:54 Ni³na¹ tsa³ca³sen¹cao⁴ Israel xi³ cho⁴ˀnta³-le⁴, nca³ qui³si³cja³ˀai³tsjen³-le⁴ cjoa⁴ma⁴ta³con²-le⁴.
LUK 1:55 Jo³-sˀin² nca³ tsa³cja¹cao⁴ nˀai³jcha¹cjin³-na¹, cao⁴ Abraham cao⁴ ntje⁴-le⁴ jo³ˀnta³ nca³ntsjai² ni⁴čhjin³.
LUK 1:56 Jan² sa¹ tsa³cˀe²jna³ María cao⁴ Elisabet. Cˀia⁴ ja³ˀai³-nca¹ni³ ntˀia³-le⁴.
LUK 1:57 Je³qui³cho² ni⁴čhjin³-le⁴ Elisabet nca³ cˀoe⁴² ˀnti¹, cˀoa⁴ tsa³cˀe¹ jnco³ ˀnti¹xˀin⁴.
LUK 1:58 Qui³nčhˀoe¹ cho⁴ta⁴ ntai³ ni³ˀya³-le⁴, cˀoa⁴ xi³ xi¹ncjin¹, nca³ Ni³na¹ cjai¹nca³ coan³ma⁴que³ nca³ je², cˀoa⁴ coan³tsjoa³-le⁴ cao⁴ je².
LUK 1:59 Cˀoa⁴ xi³ coan³ jin³-ni³ ni⁴čhjin³ ja³ˀai³ qui³tsjoa³-le⁴ cjoa⁴circuncisión je² ˀnti¹-ve⁴. Cˀoa⁴ Zacarías tsa³cˀin² tsa²cai³-ni³, me³-le⁴ qui³tsjoa³-le⁴ jan³ˀain¹-le⁴ nˀai³-le⁴.
LUK 1:60 Qui³tso² na⁴-le⁴: Mai³, Juan cˀoin¹.
LUK 1:61 Cˀoa⁴qui³tso²-le⁴: A¹-ni³ve⁴, nca⁴ ni⁴ˀya³-jin² xi³ xi²nqui⁴ xi³ cˀoa⁴ˀmi².
LUK 1:62 Cˀoa⁴ qui³nchja⁴chi⁴sin¹-ni¹ ntsja³, cˀoa⁴-sˀin² qui³tsi²na³nqui³-le⁴ nˀai³-le⁴ jo³-sˀin² me³-le⁴ jo³ cˀoin¹.
LUK 1:63 Cˀia⁴ Zacarías qui³si³je¹ jnco³ ntsja²xon⁴. Qui³squi³jon²: Juan ˀmi² jan³ˀain¹-le⁴. Nca³tsˀi³ to⁴coan³xcon¹-le⁴.
LUK 1:64 Nti⁴ton⁴ qui³tjo³ˀai²-le⁴ tsˀoa³, qui³si³cjan³ ni⁴jen⁴, cˀoa⁴ qui³nchja⁴. Nta³ tsˀa³sje³ Ni³na¹.
LUK 1:65 Cˀoa⁴ qui³tsa³cjon¹ nca³tsˀi³ xi³ ntai³ ntˀia³-le⁴. Cˀoa⁴ nca³qui³jnta² ˀncho²ni³nto³ Judea tso²ya³ i⁴ tso²ya³ jan¹-le⁴ xi¹ncjin¹.
LUK 1:66 Nca³tsˀi³ xi³ qui³nčhˀoe¹ cjoa⁴-vi⁴ tsa³cˀe¹yo³tjao²jin³ ni⁴ma⁴-le⁴, qui³tso²: ˀya¹ xo⁴cjoan³ ˀnti¹ xo⁴cji³-vi⁴. Je² ntsja³ Nai³-na¹ ti¹jna³cao⁴ nca³ je².
LUK 1:67 Cˀoa⁴ Zacarías nˀai³-le⁴ a³li² to⁴cˀoa⁴cji³ Espíritu Santo xi³ qui³sˀe³jin³ ni⁴ma⁴-le⁴, cˀoa⁴ qui³nchja⁴ya³ tˀa³tsˀe⁴ Ni³na¹, qui³tso²:
LUK 1:68 Jo¹ to⁴nta³-le⁴ je² Nai³-na¹ Ni³na¹-le⁴ Israel, xi³ ja³ˀai³ co³tsen³-le⁴, cˀoa⁴ xi³ tsa³cˀe¹chji¹ntjai² na⁴xi⁴na³nta¹-le⁴.
LUK 1:69 Ya⁴ ntˀia³-le⁴ David cho⁴ˀnta³-le⁴, Ni³na¹ qui³sco²mi³tjen⁴-na¹ jnco³ xi³ tjin¹-le⁴ nca³nˀion¹ xi³ vˀa³sje³ntjai²-na¹.
LUK 1:70 Jo³-sˀin² nca³ Ni³na¹ cˀoa⁴qui³tso²-ni³ cao⁴ tsˀoa³ cho⁴ta⁴ xi³ tsje³ xi³ qui³nchja⁴ya³ tˀa³tsˀe⁴ sa³ˀnta³ nca³ nˀion¹ coa²tse³.
LUK 1:71 Ni³na¹ qui³sco²mi³tjen⁴ je²-vi⁴, jme¹-ni³ nca³ coi²tjo⁴ntjai²-si¹nia³² tˀa³tsˀe⁴ co²ntran⁴-na¹, cˀoa⁴ tˀa³tsˀe⁴ ntsja³ xi³ coan³jti³que³-na¹,
LUK 1:72 jme¹-ni³ nca³ coan³ma⁴que³-si¹ni³ nˀai³jcha¹cjin³-na¹, cˀoa⁴ jme¹-ni³ nca³ ja³ˀai³tsjen³-si¹ni³le⁴ je² cjoa⁴ xi³ tsje³, xi³ tsa³cˀe¹nˀion¹.
LUK 1:73 Cˀoa⁴-sˀin² Ni³na¹ qui³tsjoa³-le⁴ tsˀoa³ Abraham nˀai³jcha¹cjin³-na¹,
LUK 1:74 nca³ li²coi³ cao⁴ cjoa⁴jcon³ si⁴xa¹-le⁴², cˀia⁴ nca³ coi²tjo⁴ntje² xi³ tˀa³tsˀe⁴ co²ntran⁴-na¹.
LUK 1:75 Cˀoa⁴-sˀin² Ni³na¹ qui³tsjoa³ tsˀoa³ nca³ cˀoa⁴-sˀin² si⁴xa¹-le⁴² nca³ tsje³ ti³ma³², nca³ tjin¹-na¹ cjoa⁴qui²xi⁴ nqui³xcon⁴ nca³ je² nca³ntsjai² ni⁴čhjin³-na¹vi⁴.
LUK 1:76 Cˀoa⁴ ji³, ˀnti¹, cˀoa⁴cˀoin¹-li² je² xi³ nchja⁴ya³ tˀa³tsˀe⁴ Ni³na¹ xi³ ncˀa³ ti¹jna³. Cˀoin¹ ti¹tjon²-lai⁴ Nai³-na¹ nca³ cjoa¹ntai³ ntia⁴²-le⁴.
LUK 1:77 Nca³ cˀoai⁴-lai⁴ cjoa⁴qui²xi⁴ na⁴xi⁴na³nta¹-le⁴, jo³-sˀin² coi⁴tjo³ntjai², cˀia⁴ nca³ cha⁴tˀa³-le⁴ je¹-le⁴.
LUK 1:78 Nca³yi³je³ coi³ cjoa⁴-vi⁴ cˀoa⁴coan⁴ xi³ to⁴tˀa³tsˀe⁴ cjoa⁴ma⁴to³con²-le⁴ Ni³na¹-na¹, cˀia⁴ nca³ ja³ˀai³ co³tsen³-na¹ jo³-ni³ tsˀoi¹ xi³ tjo³ ncˀa³jmi³.
LUK 1:79 Nca³ si⁴²ˀi³sen³-le⁴ xi³ tjio¹ ja⁴jin³ njion², cˀoa⁴ xi³ tjio¹co³ya³-le⁴ cjoa⁴vi³ya³, nca³ si⁴²qui³ncha² ya⁴³ ntia⁴² ntso⁴coa³² jña³ nca³ jña¹ chon³.
LUK 1:80 Cˀoa⁴ je² ˀnti¹ coan³jcha¹, qui³sˀe³-le⁴ nca³nˀion¹. Ya⁴ tsa³cˀe²jna³ ˀnte³tˀa³xin²tˀa³ sa³ˀnta³ ni⁴čhjin³ nca³ tsa³ca³co¹-le⁴ yao³-le⁴ Israel.
LUK 2:1 Cˀoa⁴coan³ coi³ ni⁴čhjin³ je²-ve⁴ nca³ Augusto César tsa³ca³te¹xo³ma³ nca³ ca²tja³ˀa³ sˀe³tˀa³ xon⁴ jan³ˀain¹-le⁴ nca³tsˀi³ cho⁴ta⁴ xi³ tjio¹ nca³qui³jnta².
LUK 2:2 Je² padron ti¹tjon²-vi⁴ ji³tjo³ cˀia⁴ nca³ Cirenio ti¹jna³ gobernador ya⁴ ˀnte³ Siria.
LUK 2:3 Cˀoa⁴ nca³tsˀi³ fi²ca¹ya³ xon⁴ yao³-le⁴ nca³ jnco¹jnco¹ na⁴xi⁴na³nta¹-le⁴ jña³ vˀa³cao⁴-le⁴.
LUK 2:4 Cˀoa⁴-ti⁴ qui³mi³-ni³ José ya⁴ Galilea, ya⁴ na⁴xi⁴na³nta¹ Nazaret, qui³ ya⁴ Judea ya⁴ na⁴xi⁴na³nta¹-le⁴ David xi³ Belén ˀmi², coi³ nca³ tsˀe⁴ ntˀia³-le⁴ cao⁴ ntje⁴-le⁴ David.
LUK 2:5 Qui³ ca¹ya³ xon⁴ yao³-le⁴. Cˀoa⁴-ti⁴ qui³ María chjon⁴²-le⁴ xi³ tji¹nˀion¹cao⁴-le⁴ cjoa⁴ cao⁴ je², je² xi³ je³yˀa³ ˀnti¹.
LUK 2:6 Cˀoa⁴ coan³-le⁴ cˀia⁴ nca³ tjio¹ ya⁴-ve⁴, ji³cho² ni⁴čhjin³ nca³ jtsin¹ ˀnti¹-le⁴.
LUK 2:7 Cˀoa⁴ qui³tsin³ ˀnti¹tjon² xi³ ˀnti¹xˀin⁴. Qui³si³cˀo¹jin³ ˀnti¹na³jño³va³-le⁴. Ya⁴ tsa³ca¹jna³ya³ ca²xa⁴ xi³ cjen²ya³ cho⁴ nca³ tsin² ˀnte³-jin² xi³ tˀa³tsˀe⁴ jña³ nca³ ma³ si⁴²cja¹ya³ cho⁴ta⁴.
LUK 2:8 Tjin¹ pastor xi³ co³ˀnta³ cho⁴ xi³ ti⁴ya⁴-ni³ na³nqui³-ve⁴, xi³ qui³si³cˀa³ya³ ni³jña¹-le⁴ jin³sen¹, xi³ qui³sco²ˀnta³ cho⁴-le⁴ nca³ ni⁴tjen⁴.
LUK 2:9 Coe⁴-ni³ je² a²ncje⁴-le⁴ Nai³-na¹ ja³ˀai³con³-le⁴ nca³ je². Je² cjoa⁴je³ya³-le⁴ Ni³na¹ qui³si³ˀi³sen³ntai³-le⁴. A³li² cˀoa⁴cji³ qui³tsa³cjon¹.
LUK 2:10 To⁴nca³ je² a²ncje⁴ qui³tso²-le⁴: A³li² jcon³-jion²³, nca³ coe⁴-ni³, an³ si³cji³nčhˀoe¹-no³ en¹nta³ xi³ tse³ tjin¹ cjoa⁴tsjoa³, xi³ tˀa³tsˀe⁴ nca³tsˀi³ na⁴xi⁴na³nta¹.
LUK 2:11 Ca²tsin³-no³ ntˀai⁴-vi⁴ ya⁴ na⁴xi⁴na³nta¹-le⁴ David, jnco³ xi³ cˀoa⁴sje³ntjai²-no³ xi³ Cristo je² Nai³-na¹.
LUK 2:12 Cˀoa⁴ je²-vi⁴ coan⁴-no³ jnco³ choa⁴: Coan⁴sjai³-no³ jnco³ ˀnti¹ xi³ tji¹tsˀo¹jin³ na³jño³va³-le⁴ xi³ qui³jna³ya³ ca²xa⁴ xi³ cjen²ya³ cho⁴.
LUK 2:13 Nti⁴ton⁴ tjio¹cao⁴ a²ncje⁴ cjai¹nca³ ncjin²-sa³ xi³ tsˀe⁴ ncˀa³jmi³, xi³ nta³ tjio¹vˀa³sje³ Ni³na¹, xi³ qui³tso²:
LUK 2:14 Ca²ta³sˀe³-le⁴ cjoa⁴je³ya³ Ni³na¹ ya⁴ ncˀa³jmi³, cˀoa⁴ i⁴ son³ˀnte³ jña¹ ca²ta³ma³chon³-le⁴ jin³-le⁴ cho⁴ta⁴ xi³ qui³sˀe³-le⁴ cjoa⁴nta³-le⁴ Ni³na¹.
LUK 2:15 Cˀoa⁴coan³-ˀni³ cˀia⁴ nca³ je² a²ncje⁴ qui³tˀa³xin²-le⁴ pastor, qui³ ya⁴ ncˀa³jmi³. Cˀia⁴ pastor-ve⁴ qui³tso²-le⁴ xi¹ncjin¹: Tjian¹ sa³ˀnta³ Belén, cˀoa⁴ ca²ta³ˀya³² je²-vi⁴ xi³ cji³ma³, xi³ je² Nai³-na¹ ca²va³co¹-na¹.
LUK 2:16 Qui³ nti⁴ton⁴, coan³sjai³-le⁴ María cao⁴ José cao⁴ ˀnti¹-ve⁴ xi³ ti¹qui³jna³ya³ ca²xa⁴ xi³ cjen²ya³ cho⁴.
LUK 2:17 Cˀia⁴ nca³ qui³sco²tsen³-le⁴ tsa³cˀe¹ na⁴jmi¹ jme³ xi³ tsa³cˀin²-le⁴ xi³ tˀa³tsˀe⁴ ˀnti¹-ve⁴.
LUK 2:18 Nca³tsˀi³ xi³ qui³nčhˀoe¹ to⁴coan³xcon¹-le⁴ je² cjoa⁴ xi³ pastor qui³tso²-le⁴.
LUK 2:19 To⁴nca³ María tsa³cˀe¹jin³con³ nca³yi³je³ je² cjoa⁴-vi⁴, to⁴je² tsa³cja¹cao⁴ ni⁴ma⁴-le⁴.
LUK 2:20 Qui³ nqui²ntia³ pastor xi³ co³ˀnta³ cho⁴, to⁴je³ya³ to⁴nta³ tsˀa³sje³ Ni³na¹ xi³ tˀa³tsˀe⁴ nca³yi³je³ cjoa⁴ xi³ qui³nčhˀoe¹, cˀoa⁴ xi³ tsa³ve³, jo³-sˀin² nca³ tsa³cˀin²-le⁴.
LUK 2:21 Cˀoa⁴ cˀia⁴ nca³ coan³jnco³ jin³ ni⁴čhjin³, cjoa⁴circuncisión coan³-le⁴ ˀnti¹-ve⁴. Jesús tsa³cˀin² jan³ˀain¹-le⁴, jña³-le⁴ xi³ cˀoa⁴qui³tso² a²ncje⁴ to⁴nqui³-le⁴ni³ nca³ qui³sˀe³jna³ya³ tsˀoa⁴.
LUK 2:22 Cˀia⁴ nca³ ji³cho² ni⁴čhjin³ nca³ qui³si³tsje³ yao³-le⁴ na⁴-le⁴, jo³ tso² cjoa⁴te¹xo³ma³-le⁴ Moisés, ja³ˀai³cao⁴ ˀnti¹-ve⁴ ya⁴ Jerusalén nca³ coa⁴co²-le⁴ Nai³-na¹.
LUK 2:23 Jo³-sˀin² tji¹tˀa³ cjoa⁴te¹xo³ma³-le⁴ Nai³-na¹: Nca³tsˀi³ xˀin⁴ xi³ ˀnti¹tjon²-le⁴ na⁴-le⁴ cˀoa⁴cˀoin¹-le⁴ nca³ tsje³ xi³ tˀa³tsˀe⁴ Nai³-na¹.
LUK 2:24 Ja³ˀai³ nca³ tsjoa¹tˀa³ jnco³ nca² to¹cjo³ a³xo⁴ jao² paloma, jo³ tso² cjoa⁴te¹xo³ma³-le⁴ Nai³-na¹.
LUK 2:25 Tjin¹ jnco³ cho⁴ta⁴ ya⁴ Jerusalén xi³ Simeón ˀmi². Je² ni¹ jnco³ nˀin³ xi³ cjoa⁴qui²xi⁴, xi³ nta³ tsa³ve³xcon¹ Ni³na¹. Ti¹co³ya³-le⁴ je² xi³ si⁴²nˀion¹con³ Israel. Je² Espíritu Santo ti¹jna³cao⁴ nca³ je².
LUK 2:26 Je² Espíritu Santo qui³tso²son²tsen³-le⁴ Simeón nca³ tsi² coi³ coi⁴ya¹ to⁴nqui³-le⁴ni³ nca³ scoe⁴ Cristo xi³ tsˀe⁴ Nai³-na¹.
LUK 2:27 Simeón ja³ˀa³sˀen³ ya⁴³ yo⁴nco⁴ nca³ je² Espíritu Santo cˀoa⁴qui³tso²-le⁴. Cˀia⁴ nca³ xi³jcha¹-le⁴ ja³ˀa³sˀen³cao⁴ ˀnti¹ Jesús ya⁴³ yo⁴nco⁴, jme¹-ni³ nca³ cˀoa⁴sˀin⁴²-si¹ni³ tˀa³tsˀe⁴, jo³ tso² cjoa⁴te¹xo³ma³ xi³ ti¹jna-le⁴,
LUK 2:28 cˀia⁴ Simeón qui³scoe¹ tsa³cja¹ya³čhja³ Jesús, qui³tsjoa³-le⁴ cjoa⁴tjao²cha³ Ni³na¹, qui³tso²:
LUK 2:29 Ntˀai⁴-vi⁴ntai⁴ Nai³-na¹, cˀoai⁴ˀnte³-lai⁴ cho⁴ˀnta³-li⁴ nca³ nchˀan¹ ca²ta³fi², jo³ tso² en¹-li⁴.
LUK 2:30 Nca⁴ tsa³ˀve³xcoan³ je² xi³ vˀa³sje³ntjai²,
LUK 2:31 jña³-le⁴ xi³ tsa³cˀe²jna³ntai³ nqui³xcon⁴ nca³tsˀi³ na⁴xi⁴na³nta¹.
LUK 2:32 Je² ni¹ xi³ si¹ˀi³sen³ cho⁴ta⁴ xi³ li² judío-jin², cˀoa⁴ je² ni¹ xi³ coan⁴ cjoa⁴je³ya³-le⁴ na⁴xi⁴na³nta¹-li⁴ Israel.
LUK 2:33 Nˀai³-le⁴ cao⁴ na⁴-le⁴ to⁴coan³xcon¹-le⁴ je² cjoa⁴ xi³ ti¹ˀmi²-le⁴ xi³ tˀa³tsˀe⁴ Jesús.
LUK 2:34 Simeón qui³si³chi³con³tˀain³ José cao⁴ María, qui³tso²-le⁴ María na⁴-le⁴ Jesús: Coe⁴-ni³ je² ˀnti¹ qui³sˀe³jna³ va³sen³ xi³ tˀa³tsˀe⁴ ncjin² xi³ tsˀe⁴ Israel xi³ tsao³nqui³, cˀoa⁴ xi³ tjo¹mi³tjen⁴-ni³, cˀoa⁴ jo³-ni³ tsa² jnco³ choa⁴ xi³ cho⁴ta⁴ coi⁴nchja⁴ˀaon³-le⁴.
LUK 2:35 Qui³sˀe³jna³va³sen³ nca³ je² jme¹-ni³ nca³ sˀe⁴son²tsen³-si¹ni³ cjoa⁴fa³ˀai³tsjen³-le⁴ ncjin² ni⁴ma⁴. Cˀoa⁴-ti⁴ jnco³ qui⁴cha⁴nto³ cjoa⁴ˀa³to³cja¹ ya⁴ ni⁴ma⁴-li⁴ xi³ ti⁴ji³-ni³.
LUK 2:36 Cˀoa⁴-ti⁴ ya⁴ ti¹jna³ Ana chjon⁴² xi³ nchja⁴ya³ tˀa³tsˀe⁴ Ni³na¹, tso²ti³-le⁴ Fanuel xi³ tsˀe⁴ ntje⁴-le⁴ Aser, jña³-le⁴ xi³ je³fi³cje³tˀa³ ni⁴čhjin³-le⁴. Cˀia⁴ nca³ je³chi³xan³, tsa³cˀe²jna³cao⁴ xˀin⁴-le⁴ ña³to³ no¹.
LUK 2:37 Coan³scan³-ni³ nca³ cˀen³ xˀin⁴-le⁴ ño³can³ cao⁴-ni³ ño³ no¹ tsa³cˀe²jna³cˀan². A³li²coi³ tsa³ca³sen²xin²-le⁴ yo⁴nco⁴ jña³ tsa³ve³xcon¹ Ni³na¹ nca³ ni⁴čhjin³ nca³ ni⁴tjen⁴ cao⁴ cjoa⁴vi³jna³nchjan³ cao⁴ cjoa⁴vˀe²tsˀoa³.
LUK 2:38 Je²-vi⁴ ja³ˀai³čhian³ ti⁴je²-ni³ hora, cˀoa⁴-ti⁴ qui³tsjoa³-le⁴ cjoa⁴tjao²cha³ Ni³na¹, cˀoa⁴ qui³nchja⁴-ni³le⁴ tˀa³tsˀe⁴ ˀnti¹-ve⁴ nca³tsˀi³ xi³ tjio¹co³ya³ nca³ coi⁴tjo³ntjai² Jerusalén.
LUK 2:39 Cˀia⁴ nca³ José cao⁴ María qui³si³cji³tjo³son² nca³yi³je³ cjoa⁴ jo³ tso² cjoa⁴te¹xo³ma³-le⁴ Nai³-na¹, qui³ nqui²jnco³cˀa² ya⁴ Galilea ya⁴ na⁴xi⁴na³nta¹ Nazaret.
LUK 2:40 Cˀoa⁴ je² ˀnti¹-ve⁴ coan³jcha¹, qui³sˀe³-le⁴ nca³nˀion¹. Nˀion¹ qui³sˀe³-le⁴ cjoa⁴ˀi³sen³ta³con². Cjoa⁴nta³-le⁴ Ni³na¹ ti¹jna³cao⁴ nca³ je².
LUK 2:41 Xqui⁴ no¹ qui³ xi³jcha¹-le⁴ ya⁴ Jerusalén, cˀia⁴ nca³ sˀoi¹ pa²xco⁴.
LUK 2:42 Cˀia⁴ nca³ Jesús tjin¹-le⁴ te³jao² no¹, nca³tsˀi³ qui³mi³ ya⁴ Jerusalén jo³-sˀin² coan³nca³-le⁴ sˀoi¹ pa²xco⁴.
LUK 2:43 Cˀia⁴ nca³ qui³si³cji³tjo³son² ni⁴čhjin³-le⁴, qui³-ni³ xi³jcha¹-le⁴, tsa³cˀe²jna³ ti³ xi³ Jesús ˀmi² ya⁴ Jerusalén, to⁴nca³ li²coi³ tjin¹jin³-le⁴ xi³jcha¹-le⁴.
LUK 2:44 Xi³jcha¹-le⁴ qui³si³cja³ˀai³tsjen³ nca³ Jesús ti¹jna³jin³-le⁴ cho⁴ta⁴ xi³ tjio¹fi², tsa³cˀe²ma³ ya⁴ ntia⁴² jnco³ ni⁴čhjin³. Cˀoa⁴ tsa³ca¹sjai³tˀa³-le⁴ xi¹ncjin¹ cao⁴ xi³ ve³xcon³.
LUK 2:45 Cˀia⁴ nca³ tsi² coan³sjai³-le⁴, qui³ nqui²jnco³cˀa² ya⁴ Jerusalén. Tsa³ca¹sjai³.
LUK 2:46 Cˀoa⁴ xi³ coan³ jan² ni⁴čhjin³ coan³sjai³-le⁴ ya⁴³ yo⁴nco⁴ nca³ ti¹jna³jin³-le⁴ cho⁴ta⁴ xi³ va³co¹ya³ cjoa⁴te¹xo³ma³, ti¹nčhˀoe¹-le⁴, cˀoa⁴ ti¹vi³na³nqui³-le⁴.
LUK 2:47 Nca³tsˀi³ xi³ qui³nčhˀoe¹-le⁴ to⁴coan³xcon¹-le⁴ cjoa⁴fa³ˀai³tsjen³-le⁴ jo³-sˀin² nca³ qui³nchja⁴.
LUK 2:48 Cˀia⁴ nca³ xi³jcha¹-le⁴ tsa³ve³, to⁴coan³xcon¹-le⁴, cˀoa⁴ na⁴-le⁴ qui³tso²-le⁴: Ji³, ˀnti¹, a¹-ni³ nca³ cˀoa⁴qui³ni²cao⁴-si¹ni³na³jin⁴. Coe⁴-ni³ nˀai³-li⁴ cˀoa⁴ an³ ti³vi³jnchi²sjai²-lai²⁴jin⁴ cao⁴ cjoa⁴va³.
LUK 2:49 Cˀia⁴ je² qui³tso²-le⁴: Jme¹-ni³ve⁴. A¹-ni³ nca³ an³ vi³jnchi²sjai²-si¹ni³nao¹³. A³tsi²-la²na¹ tjin¹jin³-no³ nca³ ma³chjen¹-na³ nca³ coa²te⁴jna³ ntˀia³-le⁴ Nˀai³-na⁴.
LUK 2:50 To⁴nca³ je² xi³jcha¹-le⁴ li²coi³ coan³cho⁴ya³-le⁴ je² en¹ xi³ Jesús tsa³cja¹cao⁴.
LUK 2:51 Jesús ja³ˀai³jen³cao⁴ José cao⁴ María, cˀoa⁴ ja³ˀai³ ya⁴ Nazaret. Qui³si³tjo³son²-le⁴. Je² na⁴-le⁴ tsa³cˀe¹jin³con³ ni⁴ma⁴-le⁴ nca³yi³je³ je² cjoa⁴-vi⁴.
LUK 2:52 Cˀoa⁴ Jesús cji³ma³jcha¹cao⁴ cjoa⁴ncjin²ta³con², cji³ma³jchi¹nca³, ti¹sˀe³-sa³le⁴ cjoa⁴nta³ xi³ tˀa³tsˀe⁴ Ni³na¹, cˀoa⁴ xi³ tˀa³tsˀe⁴ cho⁴ta⁴.
LUK 3:1 Nca³ ma³ čhja³ˀaon²-ni³ no¹ nca³ va³te¹xo³ma³ Tiberio César, cˀia⁴ nca³ coan³ gobernador Poncio Pilato ya⁴ ˀnte³ Judea, cˀoa⁴ Herodes cho⁴ta⁴ti¹tjon² ya⁴ ˀnte³ Galilea, cˀoa⁴ Felipe xi³ ntsˀe⁴ Herodes cho⁴ta⁴ti¹tjon² ya⁴ ˀnte³ Iturea cao⁴ ya⁴ ˀnte³ Traconite, cˀoa⁴ Lisanias cho⁴ta⁴ti¹tjon² ya⁴ ˀnte³ Abilinia,
LUK 3:2 cˀia⁴ nca³ coan³ na⁴ˀmi³ti¹tjon² Anás cao⁴ Caifás, en¹-le⁴ Ni³na¹ ja³ˀai³-le⁴ Juan, ˀnti¹-le⁴ Zacarías ya⁴ ˀnte³tˀa³xin²tˀa³.
LUK 3:3 Juan ji³cho²qui³jnta² ya⁴ˀnte³ ja⁴ntai³ nta¹je⁴ Jordán. Qui³nchja⁴ya³ cjoa⁴sa³te¹nta¹ xi³ tˀa³tsˀe⁴ cho⁴ta⁴ nca³ si⁴²cˀa³ntjai²ya³ cjoa⁴fa³ˀai³tsjen³-le⁴, jme¹-ni³ nca³ cha⁴tˀa³-si¹ni³ je¹-le⁴.
LUK 3:4 Jo³-sˀin² tji¹tˀa³ je² libro xi³ tjin¹-le⁴ en¹-le⁴ Isaías xi³ qui³nchja⁴ya³ tˀa³tsˀe⁴ Ni³na¹: Jta⁴-le⁴ xi³ nˀion¹ nchja⁴ ya⁴ ˀnte³tˀa³xin²tˀa³, tja³ntao³ ntia⁴²-le⁴ Nai³-na¹, tja³qui²xio⁴³ ntia⁴²ˀnti¹-le⁴.
LUK 3:5 Nca³qui³jnta² co³nca³ coan⁴nca³son², coai⁴jen³qui³jnta² ni³nto³ cao⁴ xi⁴nqui⁴, je² ntia⁴² xi³ cˀoe⁴²tin³ coan⁴qui²xi⁴-ni¹, cˀoa⁴ je² ntia⁴² xi³ tjen⁴jen³ya³ tjen⁴jen³tˀa³ chon³ coan⁴ čhja³ˀai²-ni¹.
LUK 3:6 Scoe⁴ nca³tsˀi³ jo³-sˀin² nca³ vˀa³sje³ntjai² Ni³na¹.
LUK 3:7 Juan qui³tso²-le⁴ cho⁴ta⁴ xi³ ji³tjo³ jme¹-ni³ nca³ coa⁴te¹nta¹-si¹ni³: Jon² xi³ ye⁴ cjoaon³, ˀya¹ xi³ tsa³qui³ncha¹xco¹-no³ nca³ coi⁴ncha³xin²-lao⁴³ je² cjoa⁴ñˀain³ xi³ nčhoa¹-vi⁴.
LUK 3:8 Cˀoa⁴tˀiaon⁴³ tso²cˀoa⁴ cjoa⁴ xi³ nta³ tjin¹ xi³ va³quin²-no³ tsa² je³qui³ni²cˀa³ntjai²yao³ cjoa⁴fa³ˀai³tsjen³-no³. A³li² vˀe²tsˀia⁴cao⁴-jion²³ nca³ vi³xon¹³ ja⁴jin³ ni⁴ma⁴-no³: Tjin¹-na¹ Abraham je² nˀai³jcha¹cjin³-na¹. An³ cˀoa⁴xin³-no³ nca³ Ni³na¹ coan⁴-le⁴ nta³ tsa² cao⁴ je² la⁴jao⁴-vi⁴, sco¹mi³tjen⁴ ˀnti¹ xi³ tˀa³tsˀe⁴ Abraham.
LUK 3:9 Cˀoa⁴-ti⁴ je² hacha je³qui³jna³tˀa³-le⁴ ja⁴ma⁴-le⁴ ya¹. Nca³yi³je³ ya¹ xi³ tsi² coi³ va³-le⁴ to³ xi³ nta³, jti¹ sˀe³atsao³jin³ lˀi¹.
LUK 3:10 Cho⁴ta⁴ qui³tsi²na³nqui³-le⁴: Jme¹ xi³ sˀiain⁴-jin⁴.
LUK 3:11 Juan qui³nchja⁴-le⁴: Je² xi³ jao² chi⁴nca³ tjin¹-le⁴, ca²ta³tsjoa¹-le⁴ xi³ tsin²-le⁴. Je² xi³ tjin¹-le⁴ xi³ cji³ne³, ti⁴cˀoa⁴ ca²ta³sˀin¹-ni³.
LUK 3:12 Cˀoa⁴-ti⁴ ja³ˀai³ cho⁴ta⁴ xi³ vˀe¹xco¹ taon⁴va³sen³, qui³tso²-le⁴ Juan: Maestro, jme¹ xi³ sˀiain⁴-jin⁴ ntˀai⁴.
LUK 3:13 Cˀoa⁴ je² qui³tso²-le⁴: A³li² nqui²sa⁴ tse³ ni²je¹-jion²³ cao⁴-ni³ tsa² xi³ qui³sa³te³xo³ma³-no³.
LUK 3:14 Cˀoa⁴-ti⁴ so³nta²do⁴ qui³tsi²na³nqui³-le⁴: Cˀoa⁴ jin⁴-jin⁴, jme¹ xi³ sˀiain⁴-jin⁴. Juan cˀoa⁴qui³tso²-le⁴: A³li² cjoa⁴nˀion¹-jin² ni²che¹-lao⁴³, a³li² vi³jnchi³ya²tˀain³-jion²³ xi³ cja⁴ˀai¹ to⁴jo³ nca³ me³-no³ nca³ coan⁴chji¹-no³. Tˀe²jnco³-lao⁴³ to³con²³ jña³-le⁴ xi³ cji³ma³chji¹-no³.
LUK 3:15 Tjio¹co³ya³ na⁴xi⁴na³nta¹, tjio¹si¹cja³ˀai³tsjen³jin³ ni⁴ma⁴-le⁴ tˀa³tsˀe⁴ Juan, tsa² je² Cristo.
LUK 3:16 Juan qui³tso²-le⁴ nca³tsˀi³: An³ xi³ cjoa⁴qui²xi⁴ va³te³nta¹-ni³no³ cao⁴ na³nta¹, to⁴nca³ cjoa⁴ˀai¹ je² xi³ nqui²sa⁴ tse³ nca³nˀion¹ tjin¹-le⁴ cao⁴-ni³ tsa² an³. An³ li²coi³ va³quin²-na³ nca³ sco³jnta¹³ čhjoa⁴xin¹-le⁴ jte¹-le⁴. Je² xi³ coa³te²nta¹-ni³no³ cao⁴ Espíritu Santo, cˀoa⁴ cao⁴ lˀi¹.
LUK 3:17 Je² xi³ vˀe¹ntjao⁴-ni³le⁴ cjia³ ntsja³, si⁴²tsje³ tˀa³na³nqui³, cˀoa⁴ coi⁴ncha³xco¹ trigo ja⁴ya³ ni³ncˀa³-le⁴, cˀoa⁴ tje¹-le⁴ coi⁴ti⁴jin³ lˀi¹ xi³ ni⁴cˀia³-jin² cjoi⁴tsˀao³.
LUK 3:18 Cˀoa⁴-sˀin² qui³nchja⁴ya³jin³-le⁴ na⁴xi⁴na³nta¹ en¹nta³ cao⁴ ncjin² xi³ cja⁴ˀai¹-sa³ cjoa⁴ xi³ ti¹vˀe¹ne²-le⁴.
LUK 3:19 Cˀia⁴ Juan qui³nchja⁴ti³cao⁴ Herodes xi³ cho⁴ta⁴ti¹tjon² xi³ tˀa³tsˀe⁴ Herodías, chjon⁴²-le⁴ Felipe xi³ ntsˀe⁴, cˀoa⁴ xi³ tˀa³tsˀe⁴ nca³yi³je³ cjoa⁴tsˀen⁴ xi³ qui³sˀin³ Herodes.
LUK 3:20 Herodes qui³si³taon³ya²cao⁴-sa³ nca³ qui³sca³ni¹ nto⁴ya¹ Juan.
LUK 3:21 Cˀia⁴ nca³ nca³tsˀi³ na⁴xi⁴na³nta¹ je³qui³sa³te¹nta¹, cˀoa⁴-ti⁴ Jesús qui³sa³te¹nta¹. Tjen⁴ nca³ Jesús ti¹vˀe¹tsˀoa³ ncˀa³jmi³ qui³tjo³ˀai².
LUK 3:22 Cˀoa⁴ ji³tjo³jen³ne²-le⁴ Jesús je² Espíritu Santo xi³ cˀoa⁴cji³ jo³ cji³ ni⁴se³ paloma. Jnco³ jta⁴ qui³no²ˀya²-ni³le⁴ ncˀa³jmi³ xi³ qui³tso²: Ji³ ni¹³ ˀnti¹-na⁴ xi³ tsjoa³que⁴-le²³, jo³ nta³ sˀe³coan³ xi³ tˀa³tsi⁴.
LUK 3:23 Cˀoa⁴ ti⁴je²-ni³ Jesús tsa³cˀe¹tsˀia⁴ cjoan³ can³te²-la⁴ no¹-le⁴. ˀnti¹-le⁴ José qui³tso²-le⁴ cho⁴ta⁴. Je² José ˀnti¹-le⁴ Elí,
LUK 3:24 xi³ ˀnti¹-le⁴ Matat, xi³ ˀnti¹-le⁴ Leví, xi³ ˀnti¹-le⁴ Melqui, xi³ ˀnti¹-le⁴ Jana, xi³ ˀnti¹-le⁴ José
LUK 3:25 xi³ ˀnti¹-le⁴ Matatías, xi³ ˀnti¹-le⁴ Amós, xi³ ˀnti¹-le⁴ Nahum, xi³ ˀnti¹-le⁴ Esli, xi³ ˀnti¹-le⁴ Nagai,
LUK 3:26 xi³ ˀnti¹-le⁴ Maat, xi³ ˀnti¹-le⁴ Matatías, xi³ ˀnti¹-le⁴ Semei, xi³ ˀnti¹-le⁴ José, xi³ ˀnti¹-le⁴ Judá,
LUK 3:27 xi³ ˀnti¹-le⁴ Joana, xi³ ˀnti¹-le⁴ Resa, xi³ ˀnti¹-le⁴ Zorobabel, xi³ ˀnti¹-le⁴ Salatiel, xi³ ˀnti¹-le⁴ Neri,
LUK 3:28 xi³ ˀnti¹-le⁴ Melqui, xi³ ˀnti¹-le⁴ Adi, xi³ ˀnti¹-le⁴ Cosam, xi³ ˀnti¹-le⁴ Elmodam, xi³ ˀnti¹-le⁴ Er,
LUK 3:29 xi³ ˀnti¹-le⁴ Josué, xi³ ˀnti¹-le⁴ Eliezer, xi³ ˀnti¹-le⁴ Jorim, xi³ ˀnti¹-le⁴ Matat,
LUK 3:30 xi³ ˀnti¹-le⁴ Leví, xi³ ˀnti¹-le⁴ Simeón, xi³ ˀnti¹-le⁴ Judá, xi³ ˀnti¹-le⁴ José, xi³ ˀnti¹-le⁴ Jonán, xi³ ˀnti¹-le⁴ Eliaquim,
LUK 3:31 xi³ ˀnti¹-le⁴ Melea, xi³ ˀnti¹-le⁴ Mainán, xi³ ˀnti¹-le⁴ Matata, xi³ ˀnti¹-le⁴ Natán,
LUK 3:32 xi³ ˀnti¹-le⁴ David, xi³ ˀnti¹-le⁴ Isaí, xi³ ˀnti¹-le⁴ Obed, xi³ ˀnti¹-le⁴ Booz, xi³ ˀnti¹-le⁴ Salmón, xi³ ˀnti¹-le⁴ Naasón,
LUK 3:33 xi³ ˀnti¹-le⁴ Aminadab, xi³ ˀnti¹-le⁴ Aram, xi³ ˀnti¹-le⁴ Esrom, xi³ ˀnti¹-le⁴ Fares, xi³ ˀnti¹-le⁴ Judá,
LUK 3:34 xi³ ˀnti¹-le⁴ Jacob, xi³ ˀnti¹-le⁴ Isaac, xi³ ˀnti¹-le⁴ Abraham, xi³ ˀnti¹-le⁴ Taré, xi³ ˀnti¹-le⁴ Nacor,
LUK 3:35 xi³ ˀnti¹-le⁴ Serug, xi³ ˀnti¹-le⁴ Ragau, xi³ ˀnti¹-le⁴ Peleg, xi³ ˀnti¹-le⁴ Heber, xi³ ˀnti¹-le⁴ Sala,
LUK 3:36 xi³ ˀnti¹-le⁴ Cainán, xi³ ˀnti¹-le⁴ Arfaxad, xi³ ˀnti¹-le⁴ Sem, xi³ ˀnti¹-le⁴ Noé, xi³ ˀnti¹-le⁴ Lamec,
LUK 3:37 xi³ ˀnti¹-le⁴ Matusalén, xi³ ˀnti¹-le⁴ Enoc, xi³ ˀnti¹-le⁴ Jared, xi³ ˀnti¹-le⁴ Mahalaleel, xi³ ˀnti¹-le⁴ Cainán,
LUK 3:38 xi³ ˀnti¹-le⁴ Enós, xi³ ˀnti¹-le⁴ Set, xi³ ˀnti¹-le⁴ Adán, xi³ ˀnti¹-le⁴ Ni³na¹.
LUK 4:1 Espíritu Santo qui³sˀe³jin³ ni⁴ma⁴-le⁴ Jesús. Ji³nčhoa³ nqui²jnco³cˀa²-ni³ nta¹je⁴ Jordán, je² Espíritu qui³cao⁴ jnco³ ˀnte³tˀa³xin²tˀa³.
LUK 4:2 Ña³chan³ ni⁴čhjin³ je² nai⁴² coan³me³-le⁴ nca³ chˀao³ si⁴²cao⁴ Jesús. Li²jme³ xi³ tsa³cjen² coi³ ni⁴čhjin³-ve⁴. Cˀia⁴ nca³ je³tˀa³ ni⁴čhjin³-ve⁴, coan³vao³-le⁴.
LUK 4:3 Cˀia⁴ je² nai⁴²-ve⁴ qui³tso²-le⁴: Tsa² ˀnti¹-le⁴ Ni³na¹ ni¹³ ji³, cˀoa⁴tˀin²-lai⁴ je² la⁴jao⁴-vi⁴ nca³ nio⁴xti²la⁴ ca²ta³ma³.
LUK 4:4 Jesús qui³tso²-le⁴: Tji¹tˀa³: A³li² to⁴cao⁴ nio⁴xti²la⁴-jin² cˀoe¹jna³con³-ni³ cho⁴ta⁴, to⁴nca³ cao⁴ nca³yi³je³ en¹-le⁴ Ni³na¹.
LUK 4:5 Cˀia⁴ je² nai⁴² qui³cao⁴ Jesús ya⁴ jnco³ ni³nto³ncˀa³. To⁴jnco³ tjo² tsa³ca³co¹-le⁴ nca³yi³je³ ˀnte³ cjoa⁴te¹xo³ma³-le⁴ son³ˀnte³.
LUK 4:6 Je² nai⁴²-ve⁴ qui³tso²-le⁴: Ji³ tsjoa³-le²³ nca³yi³je³ je² nca³nˀion¹-vi⁴, cˀoa⁴ cjoa⁴je³ya³-le⁴, nca⁴ an³ tsa³cˀai²-na³, cˀoa⁴ je² xi³ me³-na³ tsjoa³-le⁴.
LUK 4:7 Cˀia⁴ tsa² ji³ coi⁴sen⁴xco¹nchˀin³tˀa³-nai¹³, jcha⁴xcon¹-nai¹³, tsi⁴ coan⁴ nca³yi³je³.
LUK 4:8 Cˀoa⁴ Jesús qui³tso²-le⁴: Ti⁴sen⁴xin²-nai¹³ Satanás, nca⁴ cˀoa⁴-sˀin² tji¹tˀa³ xon⁴: Je² Ni³na¹-li⁴ coi⁴sen³xco¹nchˀin³tˀa³-lai⁴, jcha⁴xcoin¹³, cˀoa⁴ to⁴je² to⁴jnco³ xi³ si⁴xa¹-lai⁴.
LUK 4:9 Cˀia⁴ nai⁴²-ve⁴ qui³cao⁴ Jesús ya⁴ Jerusalén, cˀoa⁴ qui³si³cˀe¹jna³son² ja⁴son²ncˀa³-le⁴ yo⁴nco⁴ qui³tso²-le⁴: Tsa² ˀnti¹-le⁴ Ni³na¹ ni¹³ ji³, chji¹³jen³nqui³ tˀa³na³nqui³.
LUK 4:10 Nca⁴ cˀoa⁴-sˀin² tji¹tˀa³: Ni³na¹ cˀoe⁴²xa¹-le⁴ a²ncje⁴-le⁴ jme¹-ni³ nca³ si⁴²coi²nta⁴-si¹ni³li².
LUK 4:11 Cˀoa⁴ je² ntsja³ sco¹mi³tjen⁴-ni³li², jme¹-ni³ nca³ la⁴jao⁴-ve⁴ li²coi³ sa⁴te¹nqui³-si¹ni³ ntso⁴coi³.
LUK 4:12 Cˀoa⁴ Jesús qui³tso²-le⁴: Cˀoa⁴tso²: A³li² chˀao³ cho¹tˀa³-jin²³ je² Nai³-li⁴ Ni³na¹-li⁴.
LUK 4:13 Cˀia⁴ nca³ je³tˀa³ nca³yi³je³ cjoa⁴-ve⁴ xi³ chˀao³ cho²tˀa³-le⁴ Jesús, je² nai⁴² qui³xin²-le⁴ jnco³ tji¹cja¹ ni⁴čhjin³.
LUK 4:14 Cˀoa⁴ Jesús ja³ˀai³ cao⁴ nca³nˀion¹-le⁴ Espíritu Santo ya⁴ Galilea, qui³son² en¹ xi³ tˀa³tsˀe⁴ nca³qui³jnta² son³ˀnte³ xi³ tjio¹ntai³-le⁴.
LUK 4:15 Tsa³ca³co¹ya³ ya⁴³ ntˀia³ sinagoga xi³ tsˀe⁴. Nca³tsˀi³ tsˀa³sje³je³ya³ Jesús.
LUK 4:16 Ja³ˀai³ Nazaret ya⁴ ˀnte³ jña³ nca³ coan³jcha¹. Jo³-sˀin² nca³ tjin¹ costumbre-le⁴ je² ni⁴čhjin³ ni²cja¹ya³, ja³ˀa³sˀen³ ya⁴³ ntˀia³ sinagoga. Tsa³ca³sen²nto³ nca³ tsa³cˀe¹xquia⁴.
LUK 4:17 Tsa³cˀai²-le⁴ xon⁴-le⁴ Isaías xi³ qui³nchja⁴ya³. Cˀia⁴ nca³ qui³sco³ˀai² xon⁴, coan³sjai³-le⁴ jña³ nca³ tji¹tˀa³ en¹ xo⁴ tso²:
LUK 4:18 Je² Espíritu-le⁴ Nai³-na¹ ti¹jna³cao⁴-na³, nca⁴ qui³tsjon²jon³-na³ tˀa³tsˀe⁴ xa¹ nca³ an³ nchja²ya³jin³-le⁴ xi³ yo⁴ma⁴ je² en¹nta³. Qui³si³ca³sen¹-na³ nca³ si³nta³ya³ cho⁴ta⁴ xi³ cjoa⁴ˀaon³ tjio¹jin³ ni⁴ma⁴-le⁴, nca³ coi³nchja²ya³jin³-le⁴ preso nca³ coa⁴tio⁴ntai¹, cˀoa⁴ cao⁴ je² xi³ xca⁴ cjoan³ nca³ coan⁴tsen³-le⁴ xcon⁴, nca³ si³cˀe¹yo³ntai¹ xi³ qui³ni²quin²ˀaon³.
LUK 4:19 Nca³ coi³nchja²ya³ je² no¹ cˀia⁴ nca³ coan⁴tsen³ cjoa⁴nta³-le⁴ Nai³-na¹.
LUK 4:20 Tsa³ca³xco¹ya³cjao³-ni³ xon⁴, qui³tsjoa³-le⁴ je² xi³ si¹coi²nta⁴ xon⁴, cˀoa⁴ tsa³cˀe²jna³. Je² xcon⁴ nca³tsˀi³ tjio¹co³ˀa³ nca³ je² ya⁴³ ntˀia³ sinagoga.
LUK 4:21 Jesús tsa³cˀe¹tsˀia⁴cao⁴ nca³ qui³tso²-le⁴: Ntˀai⁴-vi⁴ je³coan³jnco³ jo³ tso² je² xon⁴-vi⁴ nca⁴ je³ca²no²ˀyao²³.
LUK 4:22 Cˀoa⁴ ña³qui³ nta³ qui³nchja⁴ nca³tsˀi³ xi³ tˀa³tsˀe⁴. To⁴coan³xcon¹-le⁴ je² en¹ xi³ nˀion¹ tjin¹-le⁴ cjoa⁴nta³ jo³-sˀin² nca³ qui³nchja⁴-ni³ tsˀoa³, cˀoa⁴qui³tso²: A³ tsi² tsa² je²-vi⁴ ˀnti¹-le⁴ José.
LUK 4:23 Cˀia⁴ Jesús qui³tso²-le⁴: Xi³ cjoa⁴qui²xi⁴ cˀoa⁴cˀoin¹-nao¹³ je² en¹ xo⁴ tso²-vi⁴: Chji⁴ne⁴xqui³, ti⁴xqui³-lai⁴ yao³-li⁴ nca³ ti⁴ji³-ni³. Xi³ cˀoa⁴to⁴xcon¹ tjin¹ cjoa⁴ xi³ qui³no²ˀyai²⁴-jin⁴ xi³ tsa³cˀe²ntai³ ya⁴ Capernaum, cˀoa⁴-ti⁴ tˀiain⁴ i⁴ ˀnte³-vi⁴ xi³ tsi⁴.
LUK 4:24 Cˀoa⁴ Jesús qui³tso²-sa³: Xi³ cjoa⁴qui²xi⁴ xi³ xin³-no³, nca³ ni⁴jnco³-jin² cho⁴ta⁴ xi³ nchja⁴ya³ tˀa³tsˀe⁴ Ni³na¹, xi³ nta³ ˀya³xcon¹ ya⁴ na³nqui³-le⁴.
LUK 4:25 To⁴nca³ cjoa⁴qui²xi⁴ xi³ xin³-no³, cjai¹nca³ to⁴tjin¹ ya¹nchjin¹ xi³ cˀen³ xˀin⁴-le⁴ ya⁴ Israel cˀia⁴ nca³ ni⁴čhjin³-le⁴ Elías, cˀia⁴ nca³ qui³sˀe³chjoa² ncˀa³jmi³ jan² no¹ va³sen³, nca³ ni⁴jme³-jin² jtsi¹ qui³tsjoa³. Cjai¹nca³ tse³ coan³cji³nčha¹-le⁴ nca³qui³jnta² na³nqui³.
LUK 4:26 To⁴nca³ ni⁴jnco³-jin² xi³ coi³ xi³ Elías qui³cha³ni²tˀa³-le⁴. To⁴jnco³ chjon⁴² xi³ cˀen³ xˀin⁴-le⁴ xi³ qui³cha³ni²tˀa³-le⁴ ya⁴ Sarepta tsˀe⁴ Sidón.
LUK 4:27 Cjai¹nca³ to⁴tjin¹ xi³ ti¹fi³ˀnto³jon³ yao³-le⁴ ya⁴ Israel coi³ ni⁴čhjin³-le⁴ Eliseo xi³ qui³nchja⁴ya³ tˀa³tsˀe⁴ Ni³na¹, to⁴nca³ ni⁴jnco³-jin² xi³ je² coan³tsje³, to⁴je² Naamán xi³ tsˀe⁴ Siro.
LUK 4:28 Cˀia⁴ nca³tsˀi³ ya⁴³ ntˀia³ sinagoga nˀion¹ coan³jti³-le⁴ nca³ qui³nčhˀoe¹ je² cjoa⁴-vi⁴.
LUK 4:29 Ji³so¹tjen⁴ nca³tsˀi³, qui³tsˀaon³sje³jin³ Jesús ya⁴ na⁴xi⁴na³nta¹-ve⁴, cˀoa⁴ qui³cao⁴ sa³ˀnta³ jco⁴ ni³nto³ jña³ nca³ qui³sˀe³jna³ na⁴xi⁴na³nta¹-le⁴. Cho⁴ta⁴-ve⁴ me³-le⁴ si⁴²cˀa³tjen⁴jin³ na⁴xi⁴ jña³ nˀion¹ tˀa³jen³tˀa³.
LUK 4:30 To⁴nca³ Jesús ja³ˀa³to³jin³va³sen³-le⁴. Qui³.
LUK 4:31 Qui³jen³ ya⁴ Capernaum, na⁴xi⁴na³nta¹ xi³ nchja⁴-ni³ ˀnte³ Galilea. Tsa³ca³co¹ya³-le⁴ nca³ ni⁴čhjin³ ni²cja¹ya³.
LUK 4:32 Cho⁴ta⁴ to⁴coan³xcon¹-le⁴ cjoa⁴fa³ˀai³tsjen³-le⁴ nca⁴ en¹-le⁴ nˀion¹ tjin¹-le⁴ nca³nˀion¹.
LUK 4:33 Ya⁴³ ntˀia³ sinagoga-ve⁴ ti¹jna³ jnco³ cho⁴ta⁴ xi³ tjin¹-le⁴ ntjao⁴ xi³ tsˀe⁴ nai⁴² xi³ nta³jin³. Nˀion¹ qui³nchja⁴ cho⁴ta⁴ xo⁴cji³-ve⁴.
LUK 4:34 Qui³tso²: A³li² cˀoa⁴-jin² ni²cao⁴-na³jin⁴. Jme¹ xi³ tjin¹-na¹ xi³ cao⁴ ji³, Jesús nazareno. A³ ca²fa²ˀai⁴ ni²cji³tson¹-na³jin⁴. An³ ˀve³-le²³ ˀya³-ni³ve⁴ ji³. Ji³ ni¹³ xi³ tsjai³ xi³ tsˀe⁴ Ni³na¹.
LUK 4:35 Jesús qui³nchja⁴ti³cao⁴, cˀoa⁴ qui³tso²: Jyo¹ ti⁴jnai³, cˀoa⁴ ti²tjo⁴xin²-lai⁴. Cˀia⁴ je² nai⁴²-ve⁴ qui³tson³tsja¹tˀa³ na³nqui³ ya⁴ jin³va³sen³-le⁴. Ji³tjo³xin²-le⁴ to⁴nca³ li²coi³ qui³si³qui²ˀaon³ cho⁴ta⁴-ve⁴.
LUK 4:36 Qui³tsa³cjon¹-le⁴ nca³tsˀi³ nca³ˀi⁴ nca³jan¹ qui³nchja⁴cao⁴ xi¹ncjin¹: Jme¹ en¹-ni³ je²-vi⁴ nca⁴ cao⁴ cjoa⁴te¹xo³ma³, cˀoa⁴ cao⁴ nca³nˀion¹ va³te¹xo³ma³-le⁴ ntjao⁴ xi³ nta³jin³, cˀoa⁴ vi³tjo³.
LUK 4:37 Qui³son² en¹ xi³ tˀa³tsˀe⁴ Jesús nca³qui³jnta² ˀnte³ xi³ ti¹jna³ntai³.
LUK 4:38 Cˀia⁴ ji³so¹tjen⁴ Jesús nca³ coi⁴tjo³ ntˀia³ sinagoga, ja³ˀa³sˀen³ ntˀia³-le⁴ Simón. Na⁴cha¹-le⁴ Simón ti¹mˀen³, chˀin³ tjin¹-le⁴. Cho⁴ta⁴ tsa³cˀe¹tsˀoa³-le⁴ Jesús xi³ tˀa³tsˀe⁴ nca³ je².
LUK 4:39 Jesús tsa³cja³te³ne²-le⁴. Qui³scan³cao⁴ ntˀai⁴, cˀoa⁴ ji³tjo³xin²-le⁴ ntˀai⁴-ve⁴. Cˀoa⁴ je² chjon⁴²-ve⁴ ji³so¹tjen⁴ nti⁴ton⁴, qui³si³sin³-ni³le⁴ xi³cˀa³.
LUK 4:40 Cˀia⁴ nca³ qui³sca³ntjai² tsˀoi¹, nca³tsˀi³ xi³ tjin¹-le⁴ xi³ tjio¹mˀen³ xi³ cja⁴ˀai¹cja⁴ˀai¹ chˀin³-le⁴, ja³ˀai³cao⁴-le⁴ Jesús. Jesús tsa³ca¹yo³son²-le⁴ ntsja³ nca³ jnco¹jnco¹. Cˀoa⁴-sˀin² qui³si³nta³-ni³.
LUK 4:41 Cˀoa⁴-ti⁴ je² nai⁴² xi³ nta³jin³ ji³tjo³-le⁴ xi³ ncjin² cho⁴ta⁴. Qui³squi³ˀntia¹, qui³tso² ntjao⁴-ve⁴: Ji³ ni¹³ ˀnti¹-le⁴ Ni³na¹. To⁴nca³ Jesús qui³scan³cao⁴, li²coi³ qui³tsjoa³ˀnte²-le⁴ nca³ coi⁴nchja⁴, nca⁴ ve³ nca³ je² xi³ Cristo.
LUK 4:42 Xi³ je³qui³sˀe³sen¹, ji³tjo³ Jesús. Cˀoa⁴ qui³ jña³ ˀnte³tˀa³xin²tˀa³. Cˀoa⁴ cho⁴ta⁴ncjin² tsa³ca¹sjai³. Ja³ˀai³con³-le⁴. Coan³me³-le⁴ nca³ si⁴²cˀe¹jna³nˀion¹ nca³ tsi² tsa² coi³ coai⁴tˀa³xin²-le⁴.
LUK 4:43 To⁴nca³ Jesús qui³tso²-le⁴: Cˀoa⁴²-ti⁴ xi³ xin²-sa³ na⁴xi⁴na³nta¹ ma³chjen¹ nca³ coi³nchja²ya³ je² en¹nta³ xi³ tˀa³tsˀe⁴ cjoa⁴te¹xo³ma³-le⁴ Ni³na¹ nca⁴ coi³ xa¹ ji³nčhoa³-nia³.
LUK 4:44 Cˀoa⁴ ti¹nchja⁴ya³ ya⁴³ ntˀia³ sinagoga ya⁴ ˀnte³ Galilea.
LUK 5:1 Cˀia⁴ nca³ Jesús ti¹jna³ ja⁴ntai³-le⁴ jnčho¹je³ Genezaret, je² cho⁴ta⁴ncjin² ma³jtin¹ntai³-le⁴ nca³ cjoi⁴nčhˀoe¹-le⁴ en¹-le⁴ Ni³na¹.
LUK 5:2 Jesús tsa³ve³ jao² chi³tso³ xi³ tjio¹čhian³ ya⁴ntai³ jnčho¹. Cˀoa⁴ je² xi³ jti⁴ si¹cˀen³ je³ji³tjo³jen³ chi³tso³, tjio¹va³ne¹jon³ na⁴ˀya³-le⁴.
LUK 5:3 Cˀia⁴ Jesús ja³ˀa³sˀen³ jnco³ chi³tso³ xi³ tsˀe⁴ Simón, tsa³cˀe¹tsˀoa³-le⁴ nca³ si⁴²cˀa³to³jin³ na³nta¹ i⁴tse¹ tˀa³xin² na³nqui³. Ya⁴ tsa³cˀe²jna³ya³ ya⁴³ chi³tso³-ve⁴ nca³ qui³tso²ya³-le⁴ cho⁴ta⁴.
LUK 5:4 Cˀia⁴ nca³ je³qui³nchja⁴, qui³tso²-le⁴ Simón: Tˀin³ jña³ nca³ nqui²sa⁴ nˀion¹ na⁴nca⁴ jnčho¹, cˀoa⁴ ti⁴cˀa³tjen⁴nqui³ntao¹³ ˀnti¹na⁴ˀya³-no³ nca³ coi⁴nto³vao³ jti⁴.
LUK 5:5 Simón qui³tso²-le⁴: Maestro, je³ca²ni²xai¹⁴-jin⁴ ca²vˀa³ni⁴tjen⁴, ni⁴jme³-jin² xi³ ca²sa³co¹-na³jin⁴, to⁴nca³ tsa² ji³ xi³ cˀoa⁴si³, si³cˀa³tjen⁴nqui³nta¹³ na⁴ˀya³.
LUK 5:6 Cˀia⁴ nca³ cˀoa⁴qui³sˀin³, a³li² to⁴cˀoa⁴²cji³ jti⁴ xi³ qui³si³ncha³, cˀoa⁴ na⁴ˀya³-ve⁴ xi³jnta².
LUK 5:7 Qui³si³cˀa³tji³chi⁴sin¹-le⁴ ntsja³ xi¹ncjin¹ xi³ tjio¹ya³ chi³tso³ xi³jnco³ nca³ cjoi⁴nčhoa³qui³ncha³cao⁴. Ja³ˀai³-ni³. Ña³qui³ qui³tse³ nca³ jao² chi³tso³ sa³ˀnta³ me³ qui³tse³nta¹ chi³tso³.
LUK 5:8 Cˀia⁴ nca³ Simón Pedro tsa³ve³ je²-vi⁴, tsa³ca³sen²xco¹nchˀin³tˀa³-le⁴ Jesús. Qui³tso²-le⁴: Ti⁴se⁴xin²-nai¹³ nca³ an³, Señor, nca⁴ cho⁴ta⁴je¹-nia¹³.
LUK 5:9 Coi³ nca³ qui³tsa³cjon¹-ni¹ nca³ je² cao⁴ nca³tsˀi³ xi³ tjio¹cao⁴ nca⁴ ncjin² jti⁴ qui³tjo³ve¹-le⁴.
LUK 5:10 Cˀoa⁴-ti⁴sˀin² qui³tsa³cjon¹ Jacobo cao⁴ Juan xi³ ˀnti¹-le⁴ Zebedeo, xi³ xi¹ncjin¹ Simón. Cˀia⁴ Jesús qui³tso²-le⁴ Simón: A³li² jcon³-jin²³, va³se²tsˀia⁴-cjoan²ni³ ntˀai⁴-vi⁴ntai⁴ coi⁴no²cjoa⁴xco¹-lai⁴ cho⁴ta⁴ xi³ tˀa³tsˀan⁴.
LUK 5:11 Cˀia⁴ nca³ ja³ˀai³ca³jna³ntai³ na³nqui³ chi³tso³-ve⁴, qui³si³ca³tio¹ nca³yi³je³, qui³tjen⁴nqui³-le⁴ Jesús.
LUK 5:12 Cˀia⁴ nca³ Jesús tsa³cˀe²jna³ jnco³ na⁴xi⁴na³nta¹, coe⁴-ni³ jnco³ xˀin⁴ xi³ ti¹fi³ˀnto³jon³ yao³-le⁴ qui³sco²tsen³-le⁴ Jesús, tsa³cja³nia³ne² ncjain¹ tsa³cˀe¹tsˀoa³-le⁴, qui³tso²-le⁴: Señor, tsa² me³-li² coan⁴ si⁴tsje³-nai¹³.
LUK 5:13 Cˀia⁴ Jesús tsa³cjen² ntsja³, qui³tso²-le⁴: Me³-na³ ca²ta³ma³tsjai³. Nti⁴ton⁴ ji³tjo³xin² chˀin³-le⁴ cho⁴ta⁴-ve⁴.
LUK 5:14 Jesús tsa³cˀe¹ne²-le⁴ nca³ ni⁴ˀya³-jin² xi³ jo³ coi⁴tso⁴-le⁴, to⁴nca³ tˀin³ (qui³tso²-le⁴) ta⁴co²-lai⁴ yao³-li⁴ na⁴ˀmi³, cˀoa⁴ tˀai²³ cjoa⁴tjao² nca³ je³coan³ntai³ jo³-sˀin² nca³ tsa³cˀe¹ne² Moisés nca³ cˀoai⁴-lai⁴ en¹-li⁴ xi³ tˀa³tsˀe⁴.
LUK 5:15 To⁴nca³ cjai¹ ncjin² en¹ tsa³nca³son²-sa³ xi³ tˀa³tsˀe⁴ Jesús. Coan³xco¹ ncjin² cho⁴ta⁴ jme¹-ni³ nca³ cjoi⁴nčhˀoe¹-si¹ni³le⁴, cˀoa⁴ jme¹-ni³ nca³ coan⁴nta³-si¹ni³ chˀin³ xi³ tjin¹-le⁴.
LUK 5:16 To⁴nca³ Jesús qui³ ya⁴ ˀnte³tˀa³xin²tˀa³, ya⁴ tsa³cˀe¹tsˀoa³.
LUK 5:17 Jnco³ ni⁴čhjin³ cˀia⁴ nca³ Jesús ti¹va³co¹ya³, ya⁴ tjio¹ cho⁴ta⁴ fariseo cao⁴ cho⁴ta⁴ xi³ va³co¹ya³ cjoa⁴te¹xo³ma³, jña³-le⁴ xi³ ja³ˀai³-ni³ nca³qui³jnta² na⁴xi⁴na³nta¹ xi³ nchja⁴-ni³ Galilea, cˀoa⁴ xi³ nchja⁴-ni³ Judea, cˀoa⁴ ja³ˀai³-ni³ Jerusalén. Je² nca³nˀion¹-le⁴ Ni³na¹ ti¹jna³cao⁴ Jesús nca³ si⁴²nta³ xi³ tjio¹mˀen³.
LUK 5:18 Coe⁴-ni³ cˀa³ cho⁴ta⁴xˀin⁴ ja³ˀai³cao⁴ jnco³ xˀin⁴ xi³ ti¹fa³ˀai³xco¹, xi³ cji³son²-le⁴ na⁴chan³. Tsa³ca¹sjai³ˀnte³-le⁴ jo³-sˀin² sca³ni¹sˀen³ nca³ si⁴²cˀe¹jna³tˀa³-le⁴ Jesús.
LUK 5:19 Li²coi³ coan³sjai³-le⁴ jo³-sˀin² nca³ sca³ni¹sˀen³, nca⁴ nˀion¹ ncjin² cho⁴ta⁴ qui³tse³ˀya². Qui³tsin³son² ntˀia³. Ya⁴son² ntˀia³ tsa³cja³ˀa¹xin² te²ja⁴-le⁴, qui³sca³ni¹jen³ne²-le⁴ cao⁴ na⁴chan³, ya⁴ nca³va³sen³-le⁴ cho⁴ta⁴ nqui³xcon⁴ Jesús.
LUK 5:20 Cˀia⁴ nca³ tsa³ve³ Jesús, jo³-sˀin² nca³ coan³cjain¹-le⁴ cho⁴ta⁴-ve⁴, qui³tso²-le⁴: Ji³, qui³cha³tˀa³-li² je¹-li⁴.
LUK 5:21 Cˀia⁴ je² cho⁴ta⁴ scribano cao⁴ cho⁴ta⁴ fariseo tsa³cˀe¹tsˀia⁴cao⁴ nca³ qui³si³cja³ˀai³tsjen³, qui³tso²: ˀya¹-ni³ je²-vi⁴ xi³ cˀoi⁴-sˀin² to⁴chˀao³ nchja⁴. ˀya¹-ni³ xi³ coan⁴-le⁴ si⁴²cha³tˀa³-na¹ je¹-na¹, a³ tsi² tsa² to⁴jnco³ Ni³na¹ xi³ ma³-le⁴.
LUK 5:22 Jesús nta³ tsa³ve³ cjoa⁴fa³ˀai³tsjen³-le⁴, qui³tso²-le⁴: Jme¹ xi³ ni²cja³ˀai³tsjaon³ ja⁴jin³ ni⁴ma⁴-no³.
LUK 5:23 Jña¹-le⁴ xi³ li²coi³ to⁴jo³ ñˀain³. Tsa² coi⁴xoan¹: Qui³cha³tˀa³-li² je² je¹-li⁴, a³xo⁴ tsa² coi⁴xoan¹: Ti⁴so²tjain⁴, ti⁴to²mjain³.
LUK 5:24 To⁴nca³ jme¹-ni³ nca³ jcha⁴-si¹nio³ nca³ je² ˀnti¹-le⁴ cho⁴ta⁴ tjin¹-le⁴ ˀnte³ i⁴ son³ˀnte³-vi⁴ nca³ si⁴²cha³tˀa³ je¹, Jesús qui³tso²-le⁴ je² cho⁴ta⁴ xi³ ti¹fa³ˀai³xco¹: Ji³ xi³ xin³-le²³, ti⁴so²tjain⁴, cˀoa⁴ chjoai¹³ na⁴chan³-li⁴, cˀoa⁴ tˀin³ ntˀia³-li⁴.
LUK 5:25 Cˀoa⁴ ji³so¹tjen⁴ nti⁴ton⁴ nqui³xcon⁴ nca³tsˀi³, cˀoa⁴ qui³scoe¹ na⁴chan³ xi³ qui³jna³son², qui³ ntˀia³-le⁴, cjai¹nca³ je³ya³ tsˀa³sje³ Ni³na¹.
LUK 5:26 To⁴coan³xcon¹-le⁴ nca³tsˀi³, tsa³cˀa³sje³je³ya³ Ni³na¹. Ña³qui³ qui³tsa³cjon¹-ni¹, qui³tso²: Je³tsa³ˀya³² cjoa⁴xcon¹ ntˀai⁴-vi⁴.
LUK 5:27 Ja⁴scan³-ni³ je² cjoa⁴ je²-vi⁴, Jesús ji³tjo³, cˀoa⁴ tsa³ve³ jnco³ cho⁴ta⁴ xi³ vˀe¹ña³ taon⁴va³sen³ xi³ Leví ˀmi². Ya⁴ ti¹jna³ jña³ vˀe¹ña³ taon⁴va³sen³. Jesús qui³tso²-le⁴: Nčhoa¹tjen⁴nqui³-nai¹³.
LUK 5:28 Leví tsa³cˀe¹jna³ nca³yi³je³, tsa³qui³so¹tjen⁴, qui³tjen⁴nqui³-le⁴.
LUK 5:29 Leví a³li² to⁴cˀoa⁴²cji³ sˀoi¹ tsa³cˀa³sje³-le⁴ Jesús ya⁴³ ntˀia³-le⁴. A³li² to⁴cˀoa⁴cji³ ncjin² cho⁴ta⁴ xi³ taon⁴va³sen³ vˀe¹xco¹, cˀoa⁴ xi³ cja⁴ˀai¹ cho⁴ta⁴ xi³ tjio¹tˀa³ ya¹mi²xa⁴ cao⁴ je².
LUK 5:30 Cho⁴ta⁴ scribano cao⁴ cho⁴ta⁴ fariseo tsa³cˀe¹jta⁴cao⁴ cho⁴ta⁴-le⁴ Jesús qui³tso²: A¹-ni³ nca³ ti³vi³chi³-si¹nio³, cˀoa⁴ ti³ˀyo²³ cao⁴ cho⁴ta⁴ xi³ taon⁴va³sen³ vˀe¹ña³, cˀoa⁴ cao⁴ cho⁴ta⁴tsˀen⁴.
LUK 5:31 Jesús qui³tso²-le⁴: Je² xi³ nta³ tjio¹, li²coi³ ma³chjen¹-le⁴ chji⁴ne⁴xqui³, to⁴je² xi³ tjio¹mˀen³ xi³ ma³chjen¹-le⁴.
LUK 5:32 Li²coi³ ja²ˀai⁴ nchja²-le⁴ xi³ tjin¹-le⁴ cjoa⁴qui²xi⁴, to⁴je² cho⁴ta⁴ xi³ je¹ tjin¹-le⁴ nca³ si⁴²cˀa³ntjai²ya³ cjoa⁴fa³ˀai³tsjen³-le⁴.
LUK 5:33 Cˀia⁴ je² cho⁴ta⁴-ve⁴ qui³tso²-le⁴ Jesús: A¹-ni³ nca³ cho⁴ta⁴-le⁴ Juan va³tio²nchjan³-ni³ ncjin² cˀa³, cˀoa⁴-ti⁴ vˀe¹tsˀoa³, cˀoa⁴-ti⁴sˀin²ni³ cho⁴ta⁴ fariseos, to⁴nca³ cho⁴ta⁴-li⁴ cjen², cˀoa⁴ ˀvi³-ni³.
LUK 5:34 Jesús qui³tso²-le⁴: A³ coan⁴²-no³ cˀoa⁴sˀiaon⁴³ nca³ va³tio²nchjan³ mi²yo⁴-le⁴ xˀin⁴ xi³ vi³xan³ tjen⁴ nca³ to⁴jo³ ti¹jna³ xi³ xˀin⁴.
LUK 5:35 To⁴nca³ cjoa⁴ˀai¹ ni⁴čhjin³ cˀia⁴ nca³ je² xˀin⁴ coi⁴tjo³tˀa³xin²-le⁴. Coi³ ni⁴čhjin³-ve⁴ coa⁴tio⁴nchjan³.
LUK 5:36 Jesús qui³tso²-le⁴: Li²ˀya³ xi³ na³jño³ cho⁴tse⁴ vˀe¹jčho³-ni³ na³jño³ jchi¹nca³. Tsa² cˀoa⁴sˀin¹ je² xi³ cho⁴tse⁴ vˀe¹jnta³, cˀoa⁴ je² na³jño³ jchi¹nca³ li²coi³ va³quin²-le⁴ nca³ na³jño³ cho⁴tse⁴ sˀe⁴jčho³-ni³.
LUK 5:37 Ni⁴ˀya³-jin² xi³ cˀoe⁴²ya³ vino cho⁴tse⁴ ya⁴³ čhjoa⁴ jchi¹nca³. Tsa² cˀoa⁴sˀin¹ je² vino cho⁴tse⁴ cˀoe⁴²jnta³ čhjoa⁴-ve⁴, cˀoa⁴ je² vino-ve⁴ xi¹jten⁴, cˀoa⁴ čhjoa⁴-ve⁴ cha⁴-ˀni³.
LUK 5:38 To⁴nca³ vino cho⁴tse⁴ ma³ sˀe³ya³ čhjoa⁴ cho⁴tse⁴. Cˀoa⁴ je² vino cao⁴ čhjoa⁴ cjai¹nca³ nta³ sˀe³tjao².
LUK 5:39 Ni⁴ˀya³-jin² xi³ scˀoi¹ vino jchi¹nca³ xi³ me³ nti⁴ton⁴-le⁴ je² xi³ cho⁴tse⁴, nca³ tso²: Je² vino jchi¹nca³ xi³ nqui²sa⁴ nta³.
LUK 6:1 Jnco³ ni⁴čhjin³ ni²cja¹ya³ Jesús ja³ˀa³to³ ya⁴ jña³ nca³ tji¹ntje². Je² cho⁴ta⁴-le⁴ qui³sco³ne²ya³ na³tin¹-le⁴ trigo, qui³tso³jve²ya³ cao⁴ ntsja³, qui³squi³ne³.
LUK 6:2 Tjin¹ cˀa³ cho⁴ta⁴ fariseos xi³ qui³tso²-le⁴: A¹-ni³ nca³ cˀoa⁴ti³nˀian²-si¹nio³ xi³ tsi² tsa² tjo³ˀnte³ cˀia⁴ nca³ ni⁴čhjin³ ni²cja¹ya³.
LUK 6:3 Qui³nchja⁴ Jesús qui³tso²-le⁴: A³ tsi² tsa³cˀe²xquiao⁴³ jme³ xi³ qui³sˀin³ David cˀia⁴ nca³ coan³vao³-le⁴ cao⁴ je² xi³ ña³tjen⁴ tsa³ca³tio².
LUK 6:4 Jo³-sˀin² ja³ˀa³sˀen³ ntˀia³-le⁴ Ni³na¹, cˀoa⁴ qui³scoe¹ nio⁴xti²la⁴ xi³ ya⁴ ncha³tsen³. Tsa³cjen² je² nio⁴xti²la⁴-ve⁴ xi³ li²coi³ tjo³ˀnte³ nca³ coi⁴cha³² nca³ to⁴je² na⁴ˀmi³ xi³ cjen². Cˀoa⁴-ti⁴ David qui³tsjoa³-le⁴ je² xi³ ña³tjen⁴ tsa³ca³tio².
LUK 6:5 Cˀoa⁴ Jesús qui³tso²-le⁴: Je² ˀnti¹-le⁴ cho⁴ta⁴ nai³-le⁴ ma³ ni⁴čhjin³ ni²cja¹ya³.
LUK 6:6 Nqui²jnco³ ni⁴čhjin³ ni²cja¹ya³ Jesús ja³ˀa³sˀen³ ntˀia³ sinagoga. Ya⁴ tsa³ca³co¹ya³. Ya⁴ ti¹jna³ jnco³ cho⁴ta⁴ xi³ qui³xi²tˀa³ jnco³ ntsja³ nca³qui²xi⁴.
LUK 6:7 Je² cho⁴ta⁴ scribano cao⁴ cho⁴ta⁴ fariseos cjai¹nca³ nta³ qui³sco²tsen³ˀa³ Jesús, tsa² si⁴²nta³-la⁴ cho⁴ta⁴ coi³ ni⁴čhjin³ ni²cja¹ya³. Coan³me³-le⁴ nca³ coan⁴sjai³-le⁴ jo³-sˀin² nca³ coa⁴²nqui³.
LUK 6:8 To⁴nca³ Jesús tjin¹jin³-le⁴ jo³ tjio¹ cjoa⁴fa³ˀai³tsjen³-le⁴. Qui³tso²-le⁴ je² cho⁴ta⁴ xi³ qui³xi²tˀa³ ntsja³: Ti⁴so²tjain⁴, ti⁴sen⁴ntoi³ nca³va³sen³-vi⁴. Cˀoa⁴ je² tsa³qui³so¹tjen⁴, tsa³ca³sen²nto³.
LUK 6:9 Cˀia⁴ Jesús qui³tso²-le⁴ nca³tsˀi³: Scoi⁴na³nqui³-no³ jnco³ cjoa⁴: A³ tjo³ˀnte³-ni¹ cˀia⁴ nca³ ni⁴čhjin³ ni²cja¹ya³ nca³ nta³ sˀian⁴² a³xo⁴ chˀao³ sˀian⁴², nca³ chˀa⁴sje³ntje² jnco³ cho⁴ta⁴ a³xo⁴ chja⁴ˀa²xin²-nia¹.
LUK 6:10 Qui³sco²tsen³-le⁴ nca³tsˀi³ xi³ tjio¹ntai³-le⁴, cˀia⁴ qui³tso²-le⁴ cho⁴ta⁴ xi³ qui³xi²tˀa³ ntsja³: Tjain³ ntsai⁴. Je² cˀoa⁴qui³sˀin³, ntsja³ coan³nta³.
LUK 6:11 Nca³tsˀi³ je² cho⁴ta⁴-ve⁴ ña³qui³ coan³jti³-le⁴. Tsa³cjao¹ya³-ni³ xi¹ncjin¹ jme³ xi³ si⁴²cao⁴ Jesús.
LUK 6:12 Coi³ ni⁴čhjin³-ve⁴ Jesús qui³ nqui³jña¹ nca³ qui³cˀe¹tsˀoa³. Tsˀa³ni⁴tjen⁴ tsa³cˀe¹tsˀoa³-le⁴ Ni³na¹.
LUK 6:13 Cˀia⁴ nca³ qui³sˀe³sen¹ qui³nchja⁴ma³ña³-le⁴ cho⁴ta⁴-le⁴, cˀoa⁴ tsa³cja³ˀa¹jin³ te³jao² xi³ cˀoa⁴-ti⁴ pa²stro⁴ qui³tso²-le⁴.
LUK 6:14 Je² Simón xi³ Pedro qui³tso²-le⁴, cˀoa⁴ Andrés xi³ ntsˀe⁴, Jacobo, Juan, Felipe, Bartolomé,
LUK 6:15 Mateo, Tomás, Jacobo ti³-le⁴ Alfeo, Simón xi³ Zelote ˀmi²-le⁴,
LUK 6:16 Judas ntsˀe⁴ Jacobo, cao⁴ Judas Iscariote xi³ coan³ co²ntran⁴.
LUK 6:17 Cˀoa⁴ ji³tjo³jen³ cao⁴ je², ya⁴ jnco³ ˀnte³ jña³ nca³son² tsa³cˀe²jna³ cao⁴ ncjin² cho⁴ta⁴-le⁴ cao⁴ nˀion¹ ncjin² ma³-ni³ xi³ tsˀe⁴ nca³yi³je³ Judea, cao⁴ Jerusalén, cao⁴ xi³ tsˀe⁴ ntai³-le⁴ nta¹chi³con³ ya⁴ Tiro cao⁴ Sidón. Coi³ xa¹ ja³ˀai³ nca³ nčhˀoe¹-le⁴, cˀoa⁴ nca³ coan⁴nta³ chˀin³ xi³ tjin¹-le⁴.
LUK 6:18 Je² xi³ tjin¹-le⁴ ntjao⁴ xi³ nta³jin³ xi³ si¹jti³-le⁴, cˀoa⁴-ti⁴ je² coan³xqui³-le⁴.
LUK 6:19 Je² nca³tsˀi³ cho⁴ta⁴ncjin² coan³me³-le⁴ nca³ qui³si³cao⁴ Jesús, nca⁴ tse³ nca³nˀion¹ ji³tjo³-le⁴, cˀoa⁴ qui³si³nta³ nca³tsˀi³.
LUK 6:20 Cˀia⁴ Jesús qui³sco²tsen³ˀa³ cho⁴ta⁴-le⁴, qui³tso²: Jo¹ to⁴nta³-no³ jon² xi³ yo⁴ma⁴, nca⁴ tsaon⁴³ nio¹³ je² cjoa⁴te¹xo³ma³-le⁴ Ni³na¹.
LUK 6:21 Jo¹ to⁴nta³-no³ jon² xi³ vao³-no³ ntˀai⁴-vi⁴, nca⁴ jon² coan⁴squio³. Jo¹ to⁴nta³-no³ jon² xi³ chi¹ˀntao¹³, nca⁴ coi⁴jno³.
LUK 6:22 Jo¹ to⁴nta³-no³ cˀia⁴ nca³ cho⁴ta⁴ chˀao³ ve³-no³, cˀia⁴ nca³ fa³ˀa¹xin²-no³, cˀia⁴ nca³ nchja⁴ˀaon³-no³, cˀia⁴ nca³ vˀa³sje³nqui³ jan³ˀain¹-no³ jo³-ni³ tsa² tsˀen⁴, xi³ to⁴tˀa³tsˀe⁴ ˀnti¹-le⁴ cho⁴ta⁴.
LUK 6:23 Ti⁴tsjoa³ya³-lao⁴³ ta³con²³ coi³ ni⁴čhjin³-ve⁴, tsjoa¹ tˀao²³ta³con²³. Coe⁴-ni³ cjai¹nca³ tse³ coan⁴ je² chji¹-no³ ya⁴ ncˀa³jmi³, nca⁴ nˀai³jcha¹cjin³-le⁴ cˀoa⁴qui³si³cao⁴ je² xi³ qui³nchja⁴ya³ tˀa³tsˀe⁴ Ni³na¹.
LUK 6:24 To⁴nca³ ma⁴-xo¹nio³ jon² xi³ cho⁴ta⁴nchi⁴nao¹³, nca⁴ je³tjin¹-no³ xi³ si¹je³con³-no³.
LUK 6:25 Ma⁴-xo¹nio³ jon² xi³ ti³yo³qui³tsao³, nca⁴ coan⁴vao³-no³. Ma⁴-xo¹nio³ jon² xi³ ntˀai⁴-vi⁴ vi³jno²³, nca⁴ coan⁴va³-no³, cˀoa⁴ chi¹ˀntao¹³.
LUK 6:26 Ma⁴-xo¹nio³ jon² cˀia⁴ nca³ cho⁴ta⁴ntao³ coi⁴tso⁴-no³ nca³tsˀi³, nca⁴ nˀai³jcha¹cjin³-le⁴ cˀoa⁴qui³si³cao⁴ je² xi³ nti³so³ qui³nchja⁴ya³.
LUK 6:27 To⁴nca³ jon² xi³ no²ˀyao²³ cˀoa⁴xin³-no³: Ca²ta³ma³tsjoa³chao³ co²ntran⁴-no³, nta³ ti⁴cao⁴³ je² xi³ chˀao³ ve³-no³.
LUK 6:28 Ti⁴chi³con³tˀaon³ je² xi³ nchja⁴ˀaon³-no³, tˀe²tsˀoa³ntjao²³ je² xi³ chˀao³ si¹cao⁴-no³.
LUK 6:29 Je² xi³ si¹jtsin³ tˀa³jtsa³-li⁴, ti⁴cˀo¹fa³ya³-lai⁴ xi³ncoa³-ni³, cˀoa⁴ je² xi³ fa³ˀa¹xin²-li² tso⁴nca⁴-li⁴, cˀoa⁴-ti⁴ ti⁴cˀe¹jna³nqui³-lai⁴ chi⁴nca³-li⁴.
LUK 6:30 To⁴ˀya³-ni³ xi³ si⁴²je¹-li², tˀai²-lai⁴, cˀoa⁴ je² xi³ scoe¹ xi³ tsi⁴, a³li² ti⁴ni²je¹-jin²ni³lai⁴.
LUK 6:31 Jo³-sˀin² nca³ me³-no³ nca³ si⁴²cao⁴-no³ cho⁴ta⁴, jon² cˀoa⁴-ti⁴sˀin² ti⁴cao⁴-nio³ nca³ je².
LUK 6:32 Tsa² tsjoa³chao³ je² xi³ ma³tsjoa³que³-no³, jme¹ cjoa⁴nta³ xi³ nˀiaon²³. Cˀoa⁴-ti⁴sˀin² cho⁴ta⁴tsˀen⁴ ma³tsjoa³que³ cho⁴ta⁴ xi³ tsjoa³que³ nca³ je².
LUK 6:33 Tsa² nta³ si⁴cao⁴³ je² xi³ nta³ si¹cao⁴-no³, jme¹ cjoa⁴nta³ xi³ nˀiaon²³. Cˀoa⁴-ti⁴ sˀin¹ cho⁴ta⁴tsˀen⁴.
LUK 6:34 Tsa² si⁴quin²ya³-lao⁴³ nca³ je² xi³ cho¹ya³-lao⁴³ nca³ chjoe¹-nca¹nio³, jme¹ cjoa⁴nta³ xi³ nˀiaon²³. Cˀoa⁴-ti⁴ cho⁴ta⁴tsˀen⁴ si¹quin²ya³-le⁴ cho⁴ta⁴tsˀen⁴, jme¹-ni³ nca³ scoe¹-si¹ni³ chji¹-le⁴ nca³yi³je³.
LUK 6:35 Ca²ta³ma³tsjoa³chao³ tso²cˀoa⁴ co²ntran⁴-no³, cˀoa⁴ nta³ tˀiaon⁴³, cˀoa⁴ ti⁴quin²yao³ nca³ a³li²jme³-jin² xi³ cho¹ya³-lao⁴³ xi³ tsˀe⁴. Tse³ coan⁴chji¹-no³, cˀoa⁴ coaon⁴³ ˀnti¹-le⁴ Ni³na¹ xi³ nˀion¹ ncˀa³, nca⁴ je² tjin¹-le⁴ cjoa⁴nta³ xi³ tˀa³tsˀe⁴ xi³ ncˀa³con³, cˀoa⁴ xi³ chˀao³ cjoan³.
LUK 6:36 Ca²ta³ma³ma⁴chao³ jo³-sˀin² nca³ cˀoa⁴-ti⁴ Nˀai³-no³ Ni³na¹ ma³ma⁴que³.
LUK 6:37 A³li² je¹-jin² fa³nao²³, cˀoa⁴ li²coi³ coa⁴ne²-no³ je¹. A³li² cjoa⁴ñˀain³-jin² vi³cho³nao²³, cˀoa⁴ li²coi³ coi⁴cho³ne²-no³ cjoa⁴ñˀain³. Ti⁴cha³tˀa³-lao⁴³, cˀoa⁴ jon² cha⁴tˀa³-no³.
LUK 6:38 Tˀao²³, cˀoa⁴ cˀoai⁴-no³. Cˀoa⁴-sˀin² tsjoa¹-no³ nca³ cˀoe¹jte¹tjon³-no³ jchˀao¹-no³, jnco³ choa⁴ xi³ nta³, xi³ ti¹cji³tse³-nˀion¹, xi³ sˀe³tsao³jne³ya², xi³ nˀion¹ qui³tse³ sa³ˀnta³ tsao³-ntjai². Je² choa⁴ xi³ vˀe²cho⁴yao³, ti⁴coi³-ni³ xi³ sˀe⁴cho⁴ya³-ni³no³ nqui²ntia³.
LUK 6:39 Cˀoa⁴ Jesús qui³tso²-le⁴ jnco³ cjoa⁴xco¹son²: A³ coan⁴²-le⁴ cho⁴ta⁴ xi³ xca⁴ cjoan³, coa⁴²ntia⁴²-le⁴ xi³ xca⁴ cjoan³. A³ tsi² jtsao⁴ya³ nca³ jao²-ve⁴ jña³ nca³ ti⁴xˀa⁴.
LUK 6:40 Je² xi³ co³tˀa³ya³ a³li²coi³-jin² nqui²sa⁴ ncˀa³ ti¹jna³ cao⁴-ni³ tsa² xi³ va³co¹ya³-le⁴. To⁴ˀya³-ni³ xi³ ti⁴cˀoa⁴²coan⁴ jo³-ni³ maestro-le⁴, sˀe⁴jnco³ nca³ je².
LUK 6:41 A¹-ni³ cho¹tsen³-si¹ni³lai⁴ je² tje¹ xi³ ti¹jna³nqui³ xcon⁴ ntsˀai³. To⁴nca³ je² ya¹qui⁴cho⁴-ve⁴ xi³ ti¹jna³nqui³ xcoin³ li²coi³ cho¹tsen³-lai⁴.
LUK 6:42 Jo¹-sˀin² coan⁴-li² nca³ cˀoin¹-lai⁴ ntsˀai³: Ntsˀe³, tˀai²ˀnte³-nai¹³ cˀoa³sje²nquia³ je² tje¹-ve⁴ xi³ ti¹jna³nqui³ xcoin³, cˀia⁴ nca³ ti⁴ji³-ni³ li²coi³ ti³cho²tsen³-lai⁴ ya¹qui⁴cho⁴-ve⁴ xi³ ti¹jna³nqui³ xcoin³. Cho⁴ta⁴ jao²ncjain¹ ni¹³ nca³ ji³, chˀa⁴-sje³nqui³ ti¹tjon²-cjoa²lai²³ je² ya¹qui⁴cho⁴-ve⁴ xi³ qui³jna³-nqui³ xcoin³, cˀia⁴ nta³ jcha⁴-ni³ nca³ chˀa⁴sje³nqui³ tje¹-ve⁴ xi³ ti¹jna³nqui³ xcon⁴ ntsˀai³.
LUK 6:43 Nca⁴ tsi² tsa² coi³ nta³ ya¹ xi³ va³-le⁴ to³ xi³ chˀao³ cjoan³, ni⁴chˀao³ cjoan³-jin² ya¹ xi³ va³-le⁴ to³ xi³ nta³ cjoan³.
LUK 6:44 Nca⁴ jnco¹jnco¹ ya¹ cˀoa⁴-sˀin² ˀya³-ni³le⁴ jo³ cjoan³ to³-le⁴. To³ higo a³li² ya¹na³ˀya¹ ma³jcha¹-ni³, ni⁴je²-jin² to³tse⁴² ma³jcha¹-ni³ ya¹chji³ˀnčho³.
LUK 6:45 Je² xi³ nta³ cho⁴ta⁴ cjoa⁴nta³ xi³ sˀin¹, nca⁴ cjoa⁴nta³ tjin¹-le⁴ ni⁴ma⁴-le⁴. Je² xi³ tsˀen⁴ cjoa⁴tsˀen⁴ xi³ sˀin¹, nca⁴ cjoa⁴tsˀen⁴ tjin¹-le⁴ ni⁴ma⁴-le⁴, nca⁴ je² xi³ nˀion¹ tjin¹-le⁴ ni⁴ma⁴-le⁴ coi³ xi³ nchja⁴-ni³ tsˀoa³.
LUK 6:46 A¹-ni³ nca³ no²cjoa⁴-si¹ni³nao¹³ Nai³-na⁴, Nai³-na⁴, cˀoa⁴ li²coi³ ni²cji³tjo³son²³ jo³ xin³-no³.
LUK 6:47 Je² nca³tsˀi³ xi³ fa³ˀai³con²-na³, xi³ nčhˀoe¹ en¹-na⁴, xi³ si¹cji³tjo³son², coa⁴co²ya³-no³ jo³ cjoan³ nca³ je².
LUK 6:48 To⁴nco¹son² cjoan³ je² cho⁴ta⁴ xi³ vˀe¹nta³ jnco³ ntˀia³, cjai¹nca³ na⁴nca⁴ tsa³ˀnqui³, tsa³cˀe¹jna³ xjao¹ja⁴ma⁴ ya⁴son² na⁴xi⁴. Cˀia⁴ nca³ nˀion¹ tsˀa³ jtsi¹, je² xo⁴nca¹-ve⁴ qui³-sca³tˀa³nˀion¹ ni³ˀya³-ve⁴, to⁴nca³ li²coi³ coan³ qui³tin²ya³-le⁴ nca³ ya⁴ ti¹jna³son²nˀion¹ na⁴xi⁴-ve⁴.
LUK 6:49 To⁴nca³ je² xi³ qui³nčhˀoe¹ en¹-na⁴, xi³ li²coi³ si¹cji³tjo³-son², to⁴nco¹son² cjoan³ je² cho⁴ta⁴ xi³ tsa³cˀe¹nta³ ntˀia³-le⁴ ya⁴jin³ na³nqui³, cˀoa⁴ li²coi³ tsa³cˀe¹jna³ xjao¹ja⁴ma⁴. Je² xo⁴nca¹-ve⁴ qui³sca³tˀa³nˀion¹ qui³sca³ nti⁴ton⁴. Qui³so³co³ cjoa⁴xcon¹ chi³xo²jen³yi³je³ ni³ˀya³-le⁴.
LUK 7:1 Cˀia⁴ nca³ je³qui³nchja⁴ nca³yi³je³ en¹-le⁴ xi³ tjio¹nčhˀoe¹-le⁴ cho⁴ta⁴na⁴xi⁴na³nta¹, Jesús ja³ˀa³sˀen³ ya⁴ Capernaum.
LUK 7:2 Jnco³ capitán tjin¹-le⁴ cho⁴ˀnta³ xi³ tsjoa³que³, ti¹mˀen³-ni¹ cho⁴ˀnta³-ve⁴, ja⁴me³ vi³ya³.
LUK 7:3 Cˀia⁴ nca³ je² capitán qui³nčhˀoe¹ xi³ tˀa³tsˀe⁴ Jesús, qui³si³ca³sen¹-le⁴ cho⁴ta⁴jchi¹nca³ xi³ tsˀe⁴ cho⁴ta⁴ judíos, tsa³cˀe¹tsˀoa³-le⁴ nca³ cjoi⁴nčhoa³nčhˀoe² nca³ si⁴²xqui³-le⁴ cho⁴ˀnta³-le⁴.
LUK 7:4 Cˀia⁴ je² cho⁴ta⁴jchi¹nca³ ji³nčhoa³nčhˀoe² Jesús, cjai¹nca³ nˀion¹ tsa³cˀe¹tsˀoa³-le⁴, qui³tso²-le⁴: Va³quin²-le⁴ nca³ cˀoa⁴sˀiain⁴ xi³ tˀa³tsˀe⁴.
LUK 7:5 Je² tsjoa³que³ na⁴xi⁴na³nta¹-na⁴jin⁴, cˀoa⁴ je² ni¹ xi³ tsa³cˀe¹nta³-na³jin⁴ ntˀia³ sinagoga-na⁴jin⁴.
LUK 7:6 Cˀia⁴ Jesús qui³cao⁴ nca³ je². To⁴nca³ cˀia⁴ nca³ tsi² coi³ ti⁴cjin³ tjio¹-ni³ ntˀia³-le⁴, je² capitán qui³si³ca³sen¹-le⁴ Jesús cˀa³ mi²yo⁴-le⁴ nca³ qui³tso²-le⁴: Señor, a³li² ni²jti³-jin²lai⁴ yao³-li⁴, nca³ li²coi³ va³quin²-na³ nca³ coi⁴tja¹sˀain³ ntˀia³-na⁴.
LUK 7:7 Cˀoa⁴-ti⁴ an³ qui³si³cja³ˀai³tsjen³ nca³ tsi² coi³ va³quin²-na³ nca³ cjoa²ˀai⁴con³-le²³, to⁴nca³ tˀai² en¹ cˀia⁴ cho⁴ˀnta³-na⁴ coan⁴nta³-ni¹.
LUK 7:8 Cˀoa⁴²-ti⁴ an³ ti²jna⁴nqui³-le⁴ cjoa⁴te¹xo³ma³, cˀoa⁴-ti⁴ tjin¹-na³ so³nta²do⁴ xi³ tjio¹nqui³-na³. Cˀoa⁴xin³-le⁴ jnco³: Tˀin³, cˀoa⁴ fi²-ni¹. Cˀoa⁴ cˀoa⁴xin³-le⁴ xi³jnco³: Nčhoai¹³, cˀoa⁴ nčhoa¹-ni¹. Cˀoa⁴ cˀoa⁴xin³-le⁴ cho⁴ˀnta³-na⁴: Cˀoa⁴tˀiain⁴ je²-vi⁴, cˀoa⁴ cˀoa⁴²sˀin¹.
LUK 7:9 Cˀia⁴ nca³ Jesús qui³nčhˀoe¹ je²-vi⁴, to⁴coan³xcon¹-le⁴. Qui³si³cˀo¹fa³-ni³ qui³tso²-le⁴ cho⁴ta⁴ncjin² xi³ tjen⁴nqui³-le⁴: Cˀoa⁴xin³-no³, ni⁴jnco³-jin² ya⁴ Israel xi³ qui³sa³co³-na³, xi³ cˀoa⁴-sˀin² nta³ ma³cjain¹-le⁴.
LUK 7:10 Cˀia⁴ nca³ je² xi³ qui³ni²ca³sen¹-le⁴ ja³ˀai³ nqui²ntia³ ni³ˀya³-le⁴, coan³sjai³-le⁴ nca³ je³coan³nta³ cho⁴ˀnta³-ve⁴ xi³ ti¹mˀen³.
LUK 7:11 Coan³scan³-ni³ Jesús qui³ ya⁴ na⁴xi⁴na³nta¹ xi³ Naín ˀmi². Ncjin² cho⁴ta⁴-le⁴, cˀoa⁴ a³li² to⁴cˀoa⁴²cji³ ncjin² cho⁴ta⁴ xi³ ña³tjen⁴ qui³cao⁴.
LUK 7:12 Cˀia⁴ nca³ ja³ˀai³čhian³-ni³ xo⁴ntjoa⁴ na⁴xi⁴na³nta¹, coe⁴-ni³ nti³tsin³-jan¹ tjio¹vˀa³sje³ jnco³ cˀen³ xi³ to⁴je² to⁴jnco³ ˀnti¹-le⁴ na⁴-le⁴ jña³-le⁴ xi³ ti¹jna³cˀan². Cˀoa⁴ ncjin² cho⁴ta⁴ xi³ ya⁴ tsˀe⁴ na⁴xi⁴na³nta¹-ve⁴ tjio¹cao⁴ nca³ je².
LUK 7:13 Cˀia⁴ nca³ je² Nai³-na¹ tsa³ve³, coan³ma⁴que³ nca³ je², cˀoa⁴qui³tso²-le⁴: A³li² chi¹ˀnta¹-jin²³.
LUK 7:14 Cˀia⁴ nca³ ja³ˀai³tˀa³-le⁴ qui³si³cao⁴ ca²xa⁴-le⁴ cˀen³-ve⁴. Je² xi³ yˀa³ tsa³qui³ncha³, Jesús qui³tso²: Ti³, ji³ xo⁴ xin³-le²³, ti⁴so²tjain⁴.
LUK 7:15 Cˀia⁴ tsa³cˀe²jna³qui²xi⁴ cˀen³-ve⁴, cˀoa⁴ tsa³cˀe¹tsˀia⁴ nca³ qui³nchja⁴. Cˀoa⁴ Jesús qui³tsjoa³-le⁴ na⁴-le⁴.
LUK 7:16 Nca³tsˀi³ qui³tsa³cjon¹, cˀoa⁴ tsa³cˀa³sje³je³ya³ Ni³na¹. Qui³tso²: Jnco³ tsa³qui³so¹tjen⁴jin³-na¹ xi³ nˀion¹ ncˀa³, xi³ nchja⁴ya³ tˀa³tsˀe⁴ Ni³na¹. Cˀoa⁴qui³tso²-sa³: Ni³na¹ ja³ˀai³ qui³si³xa³tˀa³ cho⁴ta⁴na⁴xi⁴na³nta¹-le⁴.
LUK 7:17 Qui³son² je² en¹-vi⁴ nca³qui³jnta² Judea cao⁴ nca³qui³jnta² na³nqui³ xi³ ntai³-le⁴.
LUK 7:18 Cˀoa⁴ cho⁴ta⁴-le⁴ Juan tsa³cˀe¹-le⁴ na⁴jmi¹ tˀa³tsˀe⁴ nca³yi³je³ je² cjoa⁴-vi⁴. Cˀia⁴ Juan qui³nchja⁴-le⁴ jao² cho⁴ta⁴-le⁴.
LUK 7:19 Qui³si³ca³sen¹con³-le⁴ Jesús, qui³tso²: A³ ji³ ni¹³ je² xi³ cjoi⁴nčhoa³ a³xo⁴ cho¹ya³-lai⁴jin⁴ xi³ cja⁴ˀai¹.
LUK 7:20 Cˀia⁴ nca³ je² cho⁴ta⁴ ja³ˀai³con²-le⁴ Jesús, qui³tso²: Je² Juan Bautista qui³si³ca³sen¹-na³jin⁴ xi³ tˀa³tsi⁴, qui³tso²: A³ ji³ ni¹³ je² xi³ cjoi⁴nčhoa³ a³xo⁴ cho¹ya³-lai⁴jin⁴ xi³ cja⁴ˀai¹.
LUK 7:21 Ti⁴coi³-ni³ hora qui³si³nta³ ncjin² xi³ tjio¹mˀen³, xi³ chˀin³tao¹, chˀin³ˀvi³ tjin¹-le⁴, xi³ ntjao⁴ xi³ nta³jin³ tjin¹-le⁴, cˀoa⁴ ncjin² cho⁴ta⁴xca⁴ qui³sco³ˀai²nqui³ xcon⁴.
LUK 7:22 Cˀia⁴ qui³nchja⁴ Jesús, qui³tso²-le⁴: Ta⁴nquion¹³ cˀoa⁴tˀin²-lao⁴³ Juan cjoa⁴ xi³ ca²ˀyao³-vi⁴, xi³ ca²no²ˀyao²³ nca³ je² xi³ xca⁴ cjoan³ ma³tsen³-ni³le⁴, cˀoa⁴ je² xi³ chi⁴ˀnque¹ ma³ fi²-ni³, je² xi³ jtse¹ cjoan³ ma³tsje³jon³-ni³, je² xi³ jta³ya³ ma³ nčhˀoe¹-ni³, je² xi³ cˀen³ fa³ˀa²ya³-le⁴, je² xi³ cho⁴ta⁴yo⁴ma⁴ ti¹no²cjoa⁴ya³jin³-le⁴ je² en¹nta³ xi³ tˀa³tsˀe⁴ Cristo.
LUK 7:23 Jo¹ to⁴nta³-le⁴ je² xi³ tsi² tsa² ni²qui³tson¹ya³ cjoa⁴fa³ˀai³tsjen³-le⁴ xi³ to⁴tˀa³tsˀan⁴.
LUK 7:24 Cˀia⁴ nca³ je³qui³ je² xi³ Juan qui³si³ca³sen¹cao⁴ en¹, Jesús tsa³cˀe¹tsˀia⁴ nca³ tsa³cja¹cao⁴ cho⁴ta⁴ xi³ tˀa³tsˀe⁴ Juan: Jme¹ xi³ ji²tjo⁴ cho²tsen³-lao⁴³ ya⁴ ˀnte³tˀa³xin²tˀa³, a³ jnco³ ya¹na⁴xo⁴ xi³ si¹tin²ya³ ntjao⁴.
LUK 7:25 To⁴nca³ jme¹ xi³ ji²tjo⁴ cho²tsen³-lao⁴³. A³ jnco³ cho⁴ta⁴ xi³ yˀa³cja¹ na³jño³ xi³ nˀion¹ nta³ cjoan³. Coe⁴-ni³ je² xi³ yˀa³cja¹ na³jño³ xi³ na⁴sca¹ cjoan³, xi³ nˀion¹ sin³cjoa⁴, ya⁴ tjio¹ ntˀia³nˀion¹ xi³ tsˀe⁴ cho⁴ta⁴ti¹tjon².
LUK 7:26 To⁴nca³ jme¹ xi³ ji²tjo⁴ cho²tsen³-lao⁴³. A³ jnco³ cho⁴ta⁴ xi³ nchja⁴ya³ tˀa³tsˀe⁴ Ni³na¹. Jaon³, an³ cˀoa⁴xin³-no³, to⁴nca³ jnco³ xi³ nqui²sa⁴-sa³ ti¹tjon² cao⁴-ni³ tsa² jnco³ xi³ nchja⁴ya³ tˀa³tsˀe⁴ Ni³na¹.
LUK 7:27 Je² ni¹ je² cho⁴ta⁴ xi³ tˀa³tsˀe⁴ xi³ tji¹tˀa³-ni³: Coe⁴-ni³ an³ si³ca³sen¹ ti¹tjon²-le²³ je² cho⁴ta⁴-na⁴ xi³ fi²cao⁴ en¹-na⁴, xi³ coa⁴²nta³ ti¹tjon²-li² ntia⁴²-li⁴.
LUK 7:28 Cˀoa⁴xin³-no³ nca³ ja⁴jin³-le⁴ cho⁴ta⁴son³ˀnte³ tsin² xi³ nqui²sa⁴ ti¹tjon² ma³ cao⁴-ni³ tsa² Juan Bautista. To⁴nca³ je² xi³ nqui²sa⁴ na³nqui³ ma³ ya⁴ cjoa⁴te¹xo³ma³-le⁴ ncˀa³jmi³ nqui²sa⁴ ti¹tjon² ma³ cao⁴-ni³ tsa² Juan.
LUK 7:29 Cˀia⁴ nca³ nca³tsˀi³ cho⁴ta⁴na⁴xi⁴na³nta¹ cao⁴ cho⁴ta⁴ xi³ vˀe¹ña³ taon⁴va³sen³ qui³nčhˀoe¹ je²-vi⁴, qui³tsjoa³ en¹-le⁴ nca³ tjin¹-le⁴ cjoa⁴qui²xi⁴ Ni³na¹. Qui³sa³te¹nta¹ cao⁴ cjoa⁴sa³te¹nta¹-le⁴ Juan.
LUK 7:30 To⁴nca³ cho⁴ta⁴ fariseo cao⁴ cho⁴ta⁴chji⁴ne⁴ xi³ tsˀe⁴ cjoa⁴te¹xo³ma³ tsa³cˀa³sje³nqui³ en¹ jo³-sˀin² qui³tso²ya³-le⁴ Ni³na¹. Li²coi³ qui³sa³te¹nta¹ tˀa³tsˀe⁴ Juan.
LUK 7:31 Cˀoa⁴qui³tso² Jesús: ˀya¹-ni³ve⁴ˀni³ xi³ si³nco¹son²coa⁴ je² cho⁴ta⁴ xi³ tjio¹ ntˀai⁴-vi⁴. Jña¹-le⁴ xi³ nco¹son².
LUK 7:32 Cˀoa⁴ cjoan³ jo³ cjoan³ xti³ xi³ tjio¹ nti⁴tsian⁴², xi³ tjio¹nchja⁴-le⁴ xi¹ncjin¹, cˀoa⁴tso²: Qui³ni²cji³ˀntia¹-lai²⁴jin⁴ xo⁴vi¹, cˀoa⁴ li²coi³ qui³chao²³. Qui³chi³ˀnta¹va³-lai²⁴jin⁴, cˀoa⁴ li²coi³ qui³chi³ˀntao¹³.
LUK 7:33 Ja³ˀai³ Juan Bautista xi³ ni⁴tsa³cjen²-jin² nio⁴xti²la⁴, ni⁴qui³tsˀi³-jin² vino, cˀoa⁴vi³xon¹³: Nai⁴² xi³ nta³jin³ ti¹jna³jin³-le⁴.
LUK 7:34 Cˀoa⁴ ja³ˀai³ je² ˀnti¹-le⁴ cho⁴ta⁴ xi³ cjen², xi³ ˀvi³, cˀoa⁴vi³xon¹³: Coe⁴-ni³ jnco³ cho⁴ta⁴ xi³ nˀion¹ cjen², xi³ cjai¹ nˀion¹ ˀvi³, xi³ mi²yo⁴-le⁴ cho⁴ta⁴ xi³ vˀe¹ña³ taon⁴va³sen³ cao⁴ xi³ cho⁴ta⁴tsˀen⁴.
LUK 7:35 To⁴nca³ je² cjoa⁴ˀi³sen³ta³con² ma³qui²xi⁴ya³ xi³ to⁴tˀa³tsˀe⁴ nca³tsˀi³ xti³-le⁴.
LUK 7:36 Tsa³cˀe¹tsˀoa³-le⁴ Jesús jnco³ cho⁴ta⁴ fariseo nca³ coa⁴cjen⁴cao⁴. Ja³ˀa³sˀen³ ya⁴³ ntˀia³-le⁴ cho⁴ta⁴ fariseo, tsa³cˀe²jna³tˀa³ ya¹mi²xa⁴.
LUK 7:37 Coe⁴-ni³ ya⁴ na⁴xi⁴na³nta¹ ti¹jna³ jnco³ chjon⁴²sca¹, xi³ qui³nčhˀoe¹ nca³ Jesús ti¹jna³tˀa³ ya¹mi²xa⁴ ya⁴³ ntˀia³-le⁴ je² cho⁴ta⁴ fariseo-ve⁴, yˀa³ jnco³ cho⁴tsin¹la⁴jao⁴ ˀnti¹ xi³ xqui³xi¹ne¹ tjia¹-le⁴.
LUK 7:38 Ya⁴ ti¹jna³jton³ tˀa³ntso⁴co⁴, qui³squi³ˀnta¹ chjon⁴²-ve⁴, tsa³cˀe¹tsˀia⁴ nca³ qui³tsao³jon³ nta¹xcon⁴ ntso⁴co⁴ Jesús, cˀoa⁴ qui³si³tsje³-ni³ cao⁴ ntsja⁴-le⁴. Ncjin² cˀa³ tsa³cˀe¹tˀa³tsˀoa³-le⁴ ntso⁴co⁴ Jesús, cˀoa⁴ qui³tso³jon³ cao⁴ xqui³-ve⁴.
LUK 7:39 Cˀia⁴ nca³ tsa³ve³ je²-vi⁴ je² cho⁴ta⁴ fariseo xi³ qui³nchja⁴-le⁴ Jesús, qui³si³cja³ˀai³tsjen³jin³, qui³tso²-le⁴ yao³-le⁴: Tsa² cjoa⁴qui²xi⁴ nca³ je²-vi⁴ jnco³ xi³ nchja⁴ya³ tˀa³tsˀe⁴ Ni³na¹, scoe⁴ tsa²cai³-ni³ ˀya³-ni³ve⁴, cˀoa⁴ jo³ cjoan³ chjon⁴²-ve⁴ xi³ si¹cao⁴ nca³ je² nca³ chjon⁴²sca¹ ni¹.
LUK 7:40 Cˀia⁴ qui³nchja⁴ Jesús qui³tso²-le⁴: Simón, jnco³ cjoa⁴ xi³ ma³chjen¹ nca³ xin¹-le²³. Cˀoa⁴ Simón qui³tso²-le⁴: Cˀoa⁴tˀin²-nai¹³, Maestro.
LUK 7:41 Tjio¹ jao² xi³ qui³tjen⁴-le⁴ taon⁴ xi³ tsˀe⁴ jnco³ cho⁴ta⁴ xi³ si¹quin²ya³ taon⁴, jnco³ xi³ aon² ciento vi²xo⁴ qui³tjen⁴-le⁴, cˀoa⁴ xi³ nqui²jnco³ ña³chan²te³ vi²xo⁴.
LUK 7:42 Cˀoa⁴ tsin²-le⁴ taon⁴ xi³ si⁴²jnta²-ni³. Qui³si³cha³tˀa³-le⁴ nca³ jao². Cˀoa⁴tˀin²-nai¹³ tso²cˀoa⁴: Jña¹-le⁴ je²-ve⁴ xi³ nqui²sa⁴ to⁴nta³ coan³tsjoa³que³ nca³ je².
LUK 7:43 Simón qui³tso²: ˀve³-nia¹³ nca³ je² xi³ nqui²sa⁴ tse³ qui³si³cha³tˀa³-le⁴. Jesús qui³tso²-le⁴: Nta³ qui³cho³son²-lai⁴.
LUK 7:44 Cˀoa⁴ qui³si³cˀo¹fa³ya³tˀa³-le⁴ chjon⁴²-ve⁴, qui³tso²-le⁴ Simón: Cho¹tsen³-lai⁴ chjon⁴²-vi⁴. Ja²ˀa⁴sˀen³con³-le²³ ntˀia³-li⁴, li²coi³ qui³tsˀai²-nai¹³ na³nta¹ xi³ coan³chjen¹-le⁴ ntso⁴coa³. To⁴nca³ je² chjon⁴²-vi⁴ qui³tsao³jon³ nta¹xcon⁴ ntso⁴coa³, cˀoa⁴ qui³si³tsje³-ni³ cao⁴ ntsja⁴-le⁴.
LUK 7:45 Li²coi³ tsa³cˀe²tˀa³tsˀoa³-nai¹³ to⁴nca³ je²-vi⁴ jo³ˀnta³ nca³ ja²ˀa⁴sˀen³, li²coi³ tsa³te³cja¹ya³-le⁴ nca³ vˀe¹tˀa³tsˀoa³-le⁴ ntso⁴coa³.
LUK 7:46 Li²coi³ qui³no²join³ jcoa³ si²ti⁴ xi³ nta³ njen³, to⁴nca³ je²-vi⁴ qui³tso²jon³ cao⁴ xqui³xi¹ne¹ ntso⁴coa³.
LUK 7:47 Coi³ cˀoa⁴xin³-le²³ nca³ je¹-le⁴ chjon⁴²-vi⁴ xi³ cjai¹nca³ to⁴tse³ qui³cha³tˀa³-le⁴, nca⁴ je² cjai¹nca³ coan³tsjoa³que³, to⁴nca³ je² cho⁴ta⁴ xi³ choa³ cha³tˀa³-le⁴ choa³ tsjoa³que³.
LUK 7:48 Cˀia⁴ Jesús qui³tso²-le⁴ chjon⁴²-ve⁴: Je¹-li⁴ qui³cha³tˀa³-li².
LUK 7:49 Cˀia⁴ je² xi³ ña³tjen⁴ tjio¹tˀa³ ya¹mi²xa⁴ cao⁴ je², tsa³cˀe¹tsˀia⁴cao⁴ nca³ cˀoa⁴qui³tso²-le⁴ xi¹ncjin¹: ˀya¹-ni³ je²-vi⁴ xi³ cˀoa⁴-ti⁴ si¹cha³tˀa³ je¹.
LUK 7:50 Jesús qui³tso²-le⁴ chjon⁴²-ve⁴: Coi³ nca³ coan³cjain¹-li² ji²tjo⁴ntjai²-ni¹³, tˀin³ ca²ta³njen³nchˀan¹jin³ ni⁴ma⁴-li⁴.
LUK 8:1 Coan³scan³-ni³ Jesús qui³ nca³qui³jnta² na⁴xi⁴na³nta¹-ve⁴ cao⁴ na⁴xi⁴na³nta¹ˀnti¹. Qui³nchja⁴ya³, qui³tso²ya³ je² en¹nta³ xi³ tˀa³tsˀe⁴ cjoa⁴te¹xo³ma³-le⁴ Ni³na¹. Je² xi³ te³jao²-ve⁴ tjio¹cao⁴ nca³ je².
LUK 8:2 Cˀoa⁴-ti⁴ tjio¹ ya¹nchjin¹ xi³ coan³nta³ tsˀe⁴ ntjao⁴ xi³ nta³jin³ cˀoa⁴ tsˀe⁴ chˀin³-le⁴: María xi³ Magdalena ˀmi² xi³ ji³tjo³-le⁴ ña³to³ nai⁴².
LUK 8:3 Juana chjon⁴²-le⁴ Chuza xi³ si¹coi²nta⁴ tso³jmi²-le⁴ Herodes, Susana, cao⁴ ncjin²-sa³ xi³ qui³si³sin³-le⁴ cao⁴ tso³jmi²-le⁴.
LUK 8:4 Cˀia⁴ nca³ cjai¹nca³ ncjin² cho⁴ta⁴ coan³xco¹, cˀoa⁴ ja³ˀai³con³-le⁴ je² xi³ tjio¹ nca³ jnco¹jnco¹ na⁴xi⁴na³nta¹, Jesús qui³nchja⁴ jnco³ cjoa⁴xco¹son².
LUK 8:5 Jnco³ xi³ co³jnti² na⁴xin⁴ qui³ co³jnti². Cˀia⁴ nca³ ti¹co³jnti², jnco³ cˀa² qui³tsao³ntai³ ntia⁴², cˀoa⁴ tsa³qui³ncha³ne²-ni¹, cˀoa⁴ ni⁴se³ xi³ si¹ma³tjen⁴ jin³sen¹ qui³squi³ne³.
LUK 8:6 Xi³ nqui²jnco³ cˀa² qui³tsao³ jña³ la⁴jao⁴ chon³, qui³xi² nca³ coan³ntje², coi³ nca³ tsin² ˀnchi⁴ ˀnte³.
LUK 8:7 Tjin¹ cˀa³ xi³ qui³tsao³ jin³ na³ˀya¹. Je² na³ˀya¹-ve⁴ xi³ chi³so²cja³jao² tsa³cˀe¹chjoa²jin³-le⁴.
LUK 8:8 Cˀoa⁴ tjin¹ cˀa³ xi³ nta³ na³nqui³ qui³tsao³jin³. Coan³ntje², tsa³ca³-le⁴ to³, jnco³ ciento ya³ coan³. Cˀia⁴ nca³ je³qui³tso² je² cjoa⁴-vi⁴, nˀion¹ qui³nchja⁴ Jesús: Je² xi³ tjin¹ xo⁴ño³ xi³ nčhˀoe¹-ni³, nta³ ca²ta³va³sen¹ño³.
LUK 8:9 Cˀia⁴ cho⁴ta⁴-le⁴ qui³sco²na³nqui³-le⁴: Jo¹ tso²-ni³ je² cjoa⁴xco¹son²-vi⁴.
LUK 8:10 Jesús qui³tso²: Nca³ jon² qui³tsˀai²-no³ nca³ jchao⁴³ je² cjoa⁴ˀma³-le⁴ cjoa⁴te¹xo³ma³-le⁴ Ni³na¹, to⁴nca³ xi³cˀa³ vˀai²-le⁴ cao⁴ cjoa⁴xco¹son², jme¹-ni³ nca³ tsi² scoe⁴-si¹ni³ cˀia⁴ nca³ tjio¹ve³-ni³, cˀoa⁴ jme¹-ni³ nca³ tsi² coan⁴cho⁴ya³-si¹ni³le⁴ cˀia⁴ nca³ tjio¹nčhˀoe¹.
LUK 8:11 Je² xi³ cˀoa⁴tso²-ni³ cjoa⁴xco¹son²-ve⁴: Je² na⁴xin⁴ en¹-le⁴ Ni³na¹ ni¹.
LUK 8:12 Je² xi³ qui³tsao³ntai³ ntia⁴²-ve⁴, je²-vi⁴ xi³ nčhˀoe¹, cˀoa⁴ ja⁴cjoan² nčhoa¹ nai⁴², cˀoa⁴ fa³ˀa¹xin²-le⁴ ni⁴ma⁴-le⁴ je² en¹, jme¹-ni³ nca³ tsi² ma³cjain¹-si¹ni³le⁴, cˀoa⁴ nca³ tsi² vi³tjo³ntjai²-si¹ni³.
LUK 8:13 Je² xi³ qui³tsao³son² jña³ la⁴jao⁴ chon³, je²-vi⁴ xi³ qui³nčhˀoe¹ cao⁴ cjoa⁴tsjoa³, qui³scoe¹ en¹-ve⁴, to⁴nca³ tsin²-le⁴ ja⁴ma⁴. To⁴jnco³jao² ni⁴čhjin³ ma³cjain¹-le⁴, cˀia⁴ nca³ ni⁴čhjin³ nca³ cho²tˀa³ vi³tjo³xin².
LUK 8:14 Je² xi³ qui³tsao³jin³ na³ˀya¹, je²-vi⁴ xi³ qui³nčhˀoe¹, to⁴nca³ cˀia⁴ nca³ tjio¹fi²-sa³, je² cjoa⁴ni²cjao²jin³ cao⁴ cjoa⁴nchi⁴na¹ cao⁴ cjoa⁴tsjoa³ xi³ tsˀe⁴ son³ˀnte³ vˀe¹chjoa²-le⁴, li²coi³ ma³jcha¹ to³-le⁴.
LUK 8:15 To⁴nca³ je² xi³ qui³tsao³jin³ jña³ nta³ na³nqui³, je²-vi⁴ xi³ tjin¹-le⁴ ni⁴ma⁴qui²xi⁴ xi³ ña³qui³ nta³, xi³ nčhˀoe¹ en¹, xi³ vˀe¹jin³con³ en¹, xi³ cˀoa⁴sˀin¹-ni³ cjoa⁴tse³jta³ cjoa⁴ xi³ nta³ tjin¹.
LUK 8:16 Ni⁴ˀya³-jin² xi³ va³ca¹ lˀi¹ xi³ vˀe¹jtsa³nqui³-ni³ cao⁴ tso³jmi², a³xo⁴ na⁴chan³ vˀe¹jna³ˀma³nqui³, to⁴nca³ ˀnte³-le⁴ mi³ncha¹ya³, jme¹-ni³ nca³ je² xi³ fa³ˀa³sˀen³ scoe⁴-si¹ni³ lˀi¹.
LUK 8:17 Li²jme³ xi³ tjin¹ xi³ ti¹jna³ˀma³ xi³ tsi² sˀe⁴son²tsen³, ni⁴cjoa⁴ xi³ qui³sˀe³ˀma³ xi³ tsi² jcha⁴-le⁴, xi³ tsi² cjoa⁴ˀai¹-le⁴ lˀi¹.
LUK 8:18 Ti⁴coi²ntao⁴³ tso²cˀoa⁴ jo³-sˀin² no²ˀyao²³. To⁴ˀya³-ni³ve⁴ xi³ tjin¹-le⁴, cˀoai⁴-sa³le⁴. Cˀoa⁴ je² xi³ li²jme³ xi³ tjin¹-le⁴, tjo¹xin²-le⁴ sa³ˀnta³ je² xi³ tjin¹-le⁴, ma³-le⁴.
LUK 8:19 Cˀia⁴ ja³ˀai³con²-le⁴ Jesús na⁴-le⁴ cao⁴ ntsˀe⁴. Li²coi³ coan³-le⁴ ji³cho²nčhˀoe² Jesús, nca⁴ nˀion¹ ncjin² ma³-ni³ cho⁴ta⁴.
LUK 8:20 Ji³cho² ni²cji³nčhˀoe², qui³cˀin²-le⁴: Na⁴-li⁴ cao⁴ ntsˀai³ tjio¹ nti³tsian³², me³-xo¹le⁴ nca³ sco¹tsen³-li².
LUK 8:21 Cˀia⁴ Jesús qui³nchja⁴, qui³tso²-le⁴ nca³tsˀi³: To⁴ˀya³-ni³ xi³ nčhˀoe¹ en¹-le⁴ Ni³na¹, cˀoa⁴ xi³ cˀoa⁴sˀin¹, je² ni¹ na⁴-na⁴, cˀoa⁴ je² ni¹ ntsˀe³.
LUK 8:22 Jnco³ ni⁴čhjin³ Jesús ja³ˀa³sˀen³ jnco³ chi³tso³ cao⁴ cho⁴ta⁴-le⁴, cˀoa⁴qui³tso²-le⁴: Coi⁴tja¹ xi³ncoa³tˀa³ nta¹chi³con³-ve⁴. Cˀoa⁴ qui³-ni¹.
LUK 8:23 To⁴nca³ tjen⁴ nca³ qui³jin³nta¹, Jesús tsa³ca³jna³fe². Cˀia⁴ ja³ˀai³ne² ntjao⁴xcon¹ ja⁴jin³ nta¹chi³con³. Ja³ˀa³sˀen³ntjai² na³nta¹ chi³tso³, cˀoa⁴ cjai¹nca³ nˀion¹ xcon¹ tsa³ca³tio².
LUK 8:24 Cˀia⁴ ji³cho²con³-le⁴ Jesús, qui³si³cja³ˀa¹-le⁴, qui³tso²-le⁴: Maestro, Maestro, je³ti³ncha³mˀain³-jin⁴. Cˀia⁴ ja³ˀa¹-le⁴ Jesús, tsa³cˀe¹chjoa²-le⁴ ntjao⁴-ve⁴ cao⁴ xo¹-le⁴ na³nta¹-ve⁴, cˀoa⁴ qui³sˀe³jyo¹. Coan³nta³chon³-ni³.
LUK 8:25 Cˀia⁴ qui³tso²-le⁴: Jme¹ xi³ coan³ nca³ tsi² coan³cjain¹-no³. Qui³tsa³cjon¹, to⁴coan³xcon¹-le⁴, qui³tso²-le⁴ xi¹ncjin¹: ˀya¹-ni³ve⁴ je²-vi⁴, nca³ sa³ˀnta³ ntjao⁴-vi⁴ cao⁴ na³nta¹-ve⁴ va³te¹xo³ma³-le⁴, cˀoa⁴ si¹tjo³son²-le⁴.
LUK 8:26 Qui³jin³nta¹, ja³ˀai³ na³nqui³-le⁴ cho⁴ta⁴ gadarenos xi³ncoa³tˀa³ tsˀe⁴ Galilea.
LUK 8:27 Ji³tjo³jen³-ni³ chi³tso³ Jesús. Ja³ˀa³tˀa³ na³nqui³. Ji³nčhoa³ sa³te¹cjao² jnco³ cho⁴ta⁴ xi³ tsˀe⁴ na⁴xi⁴na³nta¹-ve⁴, xi³ je³co²tse³ tjin¹-le⁴ nai⁴² xi³ nta³jin³. Li²coi³ vˀa³cja¹ na³jño³, ni⁴ntˀia³-jin² vˀe²jna³ya³, to⁴ti¹jna³jin³ tsjo¹.
LUK 8:28 Cˀia⁴ nca³ cho⁴ta⁴-ve⁴ tsa³ve³ Jesús, qui³squi³ˀntia¹, tsa³ca³sen²xco¹nchˀin³tˀa³-le⁴ Jesús, cˀoa⁴ nˀion¹ qui³nchja⁴: Jme¹ xi³ tjin¹-na¹ xi³ cao⁴ ji³, ji³ xi³ ˀnti¹-le⁴ Ni³na¹ xi³ nˀion¹ ncˀa³ ti¹jna³. Cˀoe³tsˀoa³-le²³ nca³ tsi² cjoa⁴ñˀain³ si⁴cja³ˀa¹-nai¹³.
LUK 8:29 Cˀoa⁴qui³tso² nca⁴ Jesús tsa³ca³te¹xo³ma³-le⁴ ntjao⁴ xi³ nta³jin³ nca³ coi⁴tjo³-le⁴ cho⁴ta⁴-ve⁴. Ncjin² cˀa³ ntjao⁴-ve⁴ qui³tsoa³ nca³ je². Qui³si³cˀe¹jna³tjao² preso. Tsa³cˀe¹nˀion¹-ni³ cadena ntsja³ cao⁴ ntso⁴co⁴. To⁴nca³ tsa³ca³te³jtso² cadena, je² nai⁴² xi³ nta³jin³ qui³cao⁴ ya⁴ ˀnte³tˀa³xin²tˀa³.
LUK 8:30 Jesús qui³tsi²na³nqui³-le⁴: Jo¹ ˀmi²-li². Je² qui³tso²: Legión ˀmi²-na³. Cˀoa⁴ˀmi²-le⁴ nca⁴ cjai¹nca³ ncjin² nai⁴² xi³ nta³jin³ xi³ ja³ˀa³sˀen³-le⁴ nca³ je².
LUK 8:31 Cˀoa⁴ nai⁴²-ve⁴ tsa³cˀe¹tsˀoa³-le⁴ Jesús nca³ tsi² tsa² coi³ sca⁴ni² ya⁴ jña³ sˀe⁴jna³-le⁴ cjoa⁴ñˀain³.
LUK 8:32 Cjai¹nca³ ncjin² chi⁴nca⁴ ya⁴ tjio¹jtin¹. Tjio¹cjen² jin³jña¹-ve⁴. Nai⁴²-ve⁴ tsa³cˀe¹tsˀoa³-le⁴ Jesús nca³ tsjoa¹ˀnte³-le⁴ nca³ cjoa⁴ˀa³sˀen³-le⁴ chi⁴nca⁴-ve⁴. Cˀoa⁴ je² qui³tsjoa³ˀnte²-le⁴.
LUK 8:33 Cˀia⁴ nai⁴²-ve⁴ ji³tjo³-le⁴ cho⁴ta⁴-ve⁴, ja³ˀa³sˀen³-le⁴ chi⁴nca⁴. Ña³jtin¹ chi⁴nca⁴-ve⁴ tsa³nca³jen³nqui³ na⁴xi⁴ sa³ˀnta³ ji³cho² tsao³jin³nta¹. Ya⁴ cˀen³jin³ na³nta¹.
LUK 8:34 Tsa³nca³ je² xi³ tjio¹co³ˀnta³ je² cho⁴-ve⁴, cˀia⁴ nca³ tsa³ve³ cjoa⁴ xi³ coan³. Qui³si³cji³nčhˀoe¹ ya⁴ na⁴xi⁴na³nta¹-ve⁴, cˀoa⁴ ya⁴ nqui³chao³-ve⁴.
LUK 8:35 Cho⁴ta⁴ ji³tjo³ co³tsen³-le⁴ cjoa⁴ xi³ coan³, cˀoa⁴ ja³ˀai³con²-le⁴ Jesús. Coan³sjai³-le⁴ je² cho⁴ta⁴xˀin⁴-ve⁴ xi³ ji³tjo³-le⁴ nai⁴² xi³ nta³jin³, nca³ ti¹jna³tˀa³ nqui³ntso⁴co⁴ Jesús. Yˀa³cja¹ na³jño³, cˀoa⁴ nta³ tjin¹con³. Qui³tsa³cjon¹ cho⁴ta⁴-ve⁴.
LUK 8:36 Je² xi³ tsa³ve³, tsa³cˀe¹-le⁴ na⁴jmi¹, jo³-sˀin² coan³-ni³ nca³ ji³tjo³ntjai²-ni³ je² cho⁴ta⁴-ve⁴ xi³ nai⁴² xi³ nta³jin³ tjin¹-le⁴.
LUK 8:37 Cˀia⁴ nca³tsˀi³ cho⁴ta⁴ xi³ tjio¹ ya⁴ na³nqui³-le⁴ cho⁴ta⁴ gadarenos, cˀoa⁴ ya⁴ntai³-le⁴, tsa³cˀe¹tsˀoa³-le⁴ Jesús nca³ ca²ta³fi²-ni³, nca⁴ cjai¹nca³ tjin¹-le⁴ cjoa⁴jcon³. Cˀia⁴ Jesús qui³tsin³ chi³tso³-ve⁴ qui³ nqui²jnco³cˀa²-ni³.
LUK 8:38 Je² cho⁴ta⁴xˀin⁴-ve⁴ xi³ ji³tjo³-le⁴ nai⁴² xi³ nta³jin³, tsa³cˀe¹tsˀoa³-le⁴ Jesús nca³ ca²ta³vˀe²jna³tˀa³ntsjai²-le⁴. To⁴nca³ Jesús qui³sca³ni¹ nca³ je², qui³tso²-le⁴:
LUK 8:39 Tˀin³ ni³ˀya³-li⁴, tˀe²-lai⁴ na⁴jmi¹ jo³ nca³ tjin¹ cjoa⁴nta³ xi³ ca²sˀin¹ xi³ tˀa³tsi⁴. Cˀoa⁴ qui³ cho⁴ta⁴-ve⁴, qui³si³nca³son² en¹ nca³qui³jnta² na⁴xi⁴na³nta¹-ve⁴ jo³ nca³yi³je³ cjoa⁴xcon¹ xi³ qui³sˀin³ Jesús xi³ tˀa³tsˀe⁴.
LUK 8:40 Cˀia⁴ nca³ ja³ˀai³ nqui²jnco³cˀa²-ni³ Jesús, ncjin² cho⁴ta⁴ qui³si³ti²ˀnta³, nca⁴ nca³tsˀi³ tjio¹co³ya³-le⁴.
LUK 8:41 Coe⁴-ni³ jnco³ xˀin⁴ xi³ Jairo ˀmi², xi³ cho⁴ta⁴ti¹tjon²-le⁴ ntˀia³ sinagoga, ji³nčhoa³, qui³sca³nqui³ tˀa³ntso⁴co⁴ Jesús, tsa³cˀe¹tsˀoa³-le⁴ nca³ cjoa⁴ˀa³sˀen³ ntˀia³-le⁴,
LUK 8:42 nca⁴ tjin¹jnco³-le⁴ tso²ti³ xi³ to⁴jnco³ ma³-ni³, xi³ te³jao²la⁴ no¹-le⁴, xi³ je³me³mˀen³. Cˀia⁴ nca³ ti¹fi² Jesús, tsa³cˀe²jna³ˀncho²nˀion¹-le⁴ cho⁴ta⁴ncjin².
LUK 8:43 Ja³ˀai³ jnco³ chjon⁴² xi³ je³coan³ te³jao² no¹ nca³ ji³tjo³-le⁴ njin¹. Je³qui³si³cje³ nca³yi³je³ tso³jmi²-le⁴ tˀa³tsˀe⁴ chji⁴ne⁴xqui³. Ni⁴jnco³-jin² xi³ coan³-le⁴ qui³si³nta³.
LUK 8:44 Ja³ˀai³ ca³sen²čhian³ ja⁴jton³ ya¹tsˀin⁴ Jesús. Qui³si³cao⁴ tjon³ na³jño³-le⁴. Nti⁴ton⁴ qui³sa³te³chjoa²-le⁴ nca³ ti¹vi³tjo³-le⁴ njin¹.
LUK 8:45 Cˀia⁴ Jesús qui³tso²: ˀya¹-ni³ xi³ ca²si¹cao⁴-na³. Mai³ qui³tso² nca³tsˀi³. Pedro cao⁴ xi³ tjio¹cao⁴ qui³tso²: Maestro, cho⁴ta⁴ncjin² si¹te³ne²ˀncho²-li² ca³ni¹tsja¹-li². Cˀoa⁴ jo¹ si³: ˀya¹-ni³ xi³ ca²si¹cao⁴-na³.
LUK 8:46 Cˀoa⁴ qui³tso² Jesús: Tjin¹ xi³ ca²si¹cao⁴-na³. An³ ˀve³nia¹³ nca³ ji³tjo³ nca³nˀion¹ xi³ tsˀan⁴.
LUK 8:47 Cˀia⁴ nca³ chjon⁴²-vi⁴ tsa³ve³-ni¹ nca³ tsi² coi³ ti¹jna³ˀma³, ja³ˀai³ nca³ ti¹fa³tse¹, tsa³ca³sen¹xco¹nchˀin³tˀa³-le⁴ Jesús, nqui³xcon⁴ nca³tsˀi³ cho⁴ta⁴na⁴xi⁴na³nta¹ tsa³cˀe¹-le⁴ na⁴jmi¹, jme³ cjoa⁴-ni³ nca³ cˀoa⁴-sˀin² qui³si³cao⁴-ni³, cˀoa⁴ jo³-sˀin² nca³ nti⁴ton⁴ coan³nta³-ni³.
LUK 8:48 Jesús qui³tso²-le⁴: ˀnti¹ na⁴², coi³ nca³ coan³cjain¹-li², ca²ma³nta³-ni³. Tˀin³ntai³ ca²ta³njen³nchˀan¹jin³ ni⁴ma⁴-li⁴.
LUK 8:49 Cˀia⁴ nca³ to⁴jo³ ti¹nchja⁴-sa³ Jesús, ja³ˀai³-ni³ jnco³ cho⁴ta⁴ xi³ tsˀe⁴ ni³ˀya³-le⁴ cho⁴ta⁴ti¹tjon²-le⁴ ntˀia³ sinagoga, cˀoa⁴tso²: Je² tso²ti³-li⁴ je³cˀen³. A³li² ti⁴ni²jti³-ni³lai⁴ maestro-ve⁴.
LUK 8:50 Cˀia⁴ nca³ qui³nčhˀoe¹ je²-vi⁴ Jesús, cˀoa⁴qui³tso²-le⁴: A³li² jcon³-jin², to⁴ca²ta³ma³cjain¹-li², cˀoa⁴ coan⁴nta³-ni¹ˀni³.
LUK 8:51 Jesús ja³ˀa³sˀen³ ntˀia³, ni⁴ˀya³-jin² xi³ qui³tsjoa³ˀnte²-le⁴ nca³ ja³ˀa³sˀen³cao⁴, to⁴je² Pedro, Jacobo, Juan, cao⁴ nˀai³-le⁴, na⁴-le⁴ tso²ti³-ve⁴.
LUK 8:52 Sen¹jta⁴ nca³tsˀi³ nca³ tjio¹, jo³ tjio¹si¹jtsin³tˀa³ ni⁴ma⁴-le⁴. Jesús qui³tso²: A³li² chi³ˀnta¹-jion²³, a³li² ca²mˀen³-jin², to⁴qui³jna³fe²-ni¹.
LUK 8:53 Jo¹ to⁴tsa³qui³jno²que³ Jesús cho⁴ta⁴, nca⁴ tjin¹jin³-le⁴ nca³ ca²mˀen³.
LUK 8:54 To⁴nca³ Jesús qui³scoe¹ ntsja³, qui³nchja⁴le⁴: Tso²ti³, ti⁴so²tjain⁴-ntai⁴.
LUK 8:55 Cˀia⁴ je² espíritu-le⁴ ja³ˀai³ nqui²jnco³cˀa², tsa³qui³so¹tjen⁴ nti⁴ton⁴-ni³, cˀoa⁴ Jesús tsa³ca³te¹xo³ma³ nca³ sˀe⁴nta³-le⁴ xi³ squi⁴ne⁴.
LUK 8:56 Nˀai³-le⁴ na⁴-le⁴ to⁴coan³xcon¹-le⁴. Jesús tsa³cˀe¹ne²-le⁴ nca³ ni⁴ˀya³-jin² xi³ jo³ coi⁴tso⁴-le⁴ jme³ xi³ ca²ma³.
LUK 9:1 Jesús qui³nchja⁴-le⁴ xi³ te³jao² cho⁴ta⁴-le⁴. Qui³tsjoa³-le⁴ ˀnte³ nca³ coa⁴te²xo³ma³-le⁴ nca³tsˀi³ nai⁴² xi³ nta³jin³, cˀoa⁴ nca³ coan⁴-le⁴ si⁴²nta³ chˀin³.
LUK 9:2 Qui³sca³ni¹ nca³ coai⁴ tso²ya³ cjoa⁴te¹xo³ma³-le⁴ Ni³na¹, cˀoa⁴ nca³ si⁴²nta³ xi³ tjio¹mˀen³.
LUK 9:3 Qui³tso²-le⁴: Ni⁴jme³-jin² xi³ jchˀao⁴³ ya⁴ ntia⁴²-ve⁴, ni⁴ya¹ni³se³-jin², ni⁴na⁴ˀya³-jin², ni⁴nio⁴xti²la⁴-jin², ni⁴taon⁴-jin², ni⁴jao²-jin²la² ma³-ni³ chi⁴nca³-no³.
LUK 9:4 To⁴jña³-ni³le⁴ ni³ˀya³ jña³ coi⁴tja¹sˀaon³, to⁴jnco³ cˀa² ti⁴yo³, ya⁴² coi²tjo⁴-nio³.
LUK 9:5 Je² nca³tsˀi³ xi³ tsi² tsjoa¹ˀnte³-no³, cˀia⁴ nca³ coi²tjo⁴-nio³ ya⁴ na⁴xi⁴na³nta¹-ve⁴, tˀe²tsao³jnao³ chao³-le⁴ ntso⁴co³ nca³ cˀoa⁴-sˀin² vˀao²³ en¹-no³ nca³ co²ntran⁴ tsˀe⁴.
LUK 9:6 Ji³tjo³ cho⁴ta⁴-le⁴ve⁴. Tsa³cˀe¹ma³ jnco³tjo²ntai³ nca³qui³jnta² na⁴xi⁴na³nta¹-ve⁴. Qui³nchja⁴ya³jin³ je² en¹nta³ xi³ tˀa³tsˀe⁴ Cristo, cˀoa⁴ qui³si³nta³ cho⁴ta⁴ nca³qui³jnta².
LUK 9:7 Cho⁴ta⁴ti¹tjon² xi³ Herodes ˀmi² qui³nčhˀoe¹ nca³yi³je³ cjoa⁴ xi³ ti¹sˀin¹ Jesús, to⁴jao² tjin¹-le⁴ nca³ qui³tso² cˀa³: Juan je³ja³ˀa³ya²jin³-ni³le⁴ cˀen³.
LUK 9:8 Xi³cˀa³ qui³tso²: Elías je³coan³tsen³-ni³. Cˀoa⁴ xi³cˀa³: Ja³ˀa³ya²-ni³le⁴ jnco³ cho⁴ta⁴ xi³ nchja⁴ya³ tˀa³tsˀe⁴ Ni³na¹, xi³ tsˀe⁴ cho⁴ta⁴jchi¹nca³.
LUK 9:9 Qui³tso² Herodes: An³ tsa³ca³te³sian³ Juan. ˀya¹-ni³ je²-vi⁴ xi³ nčhˀoe³-le⁴ je² cjoa⁴-vi⁴. Nˀion¹ coan³me³-le⁴ nca³ qui³sco²tsen³-le⁴.
LUK 9:10 Cˀia⁴ nca³ ja³ˀai³-ni³ pa²stro⁴, tsa³cˀe¹-le⁴ na⁴jmi¹ nca³yi³je³ cjoa⁴ Jesús, jme³ xi³ qui³sˀin³. Cˀia⁴ Jesús qui³cao⁴tˀa³xin² jnco³ ˀnte³ xi³ tsˀe⁴ na⁴xi⁴na³nta¹ xi³ Betsaida ˀmi².
LUK 9:11 Cˀia⁴ nca³ qui³nčhˀoe¹ cho⁴ta⁴, qui³tjen⁴nqui³-le⁴. Jesús qui³si³sin³-le⁴, tsa³cja¹cao⁴ cjoa⁴te¹xo³ma³-le⁴ Ni³na¹, cˀoa⁴ qui³si³nta³ xi³ tjio¹mˀen³.
LUK 9:12 Xi³ je³cji³ma³xon² je² xi³ te³jao²-ve⁴ ji³cho²con³-le⁴ Jesús, cˀoa⁴qui³tso²-le⁴: Cˀoa⁴tˀin²-lai⁴ nca³ ca²ta³fi² cho⁴ta⁴, jme¹-ni³ nca³ coai⁴-si¹ni³ ya⁴ na⁴xi⁴na³nta¹ ˀnti¹-ve⁴ cao⁴ nqui³chao³ ya⁴ntai³-ve⁴, nca³ coan⁴sjai³-si¹ni³le⁴ ˀnte³, cˀoa⁴ sa⁴co²-le⁴ xi³ coa⁴cjen⁴, nca⁴ i⁴ jña³ ti³yoa³²-vi⁴ to⁴ˀnte³tˀa³xin²tˀa³ ni¹.
LUK 9:13 Cˀia⁴ Jesús qui³tso²-le⁴: Tˀai²-lao⁴³ xi³ coa⁴cjen⁴. Qui³tso²-ˀni³ nca³ je²: Tsin²-na³jin⁴. To⁴ˀaon² ma³ nio⁴xti¹la⁴, cˀoa⁴ jao² jti⁴ xi³ tjin¹-na³jin⁴, tsa² tsi² coa⁴nqui¹ qui³nta¹-lai⁴jin⁴ xi³ coa⁴cjen⁴ nca³tsˀi³ cho⁴ta⁴ xo⁴chon³-vi⁴.
LUK 9:14 Aon²-la⁴ jmi³ ma³-ni³ xi³ cho⁴ta⁴xˀin⁴. Cˀia⁴ Jesús qui³tso²-le⁴ cho⁴ta⁴-le⁴: Ti⁴qui³ncha²ntao³, ña³chan²te³ ña³chan²te³ ti⁴qui³nchao³.
LUK 9:15 Cˀoa⁴-sˀin² qui³sˀin³. Qui³si³ca³tio² nca³tsˀi³.
LUK 9:16 Jesús qui³scoe¹ xi³ aon² nio⁴xti²la⁴-ve⁴ cao⁴ xi³ jao² jti⁴, qui³sco²tsen³ncˀa¹, qui³si³chi³con³tˀain³. Cˀoa⁴ qui³si³xcoa⁴ nio⁴xti²la⁴-ve⁴, qui³tsjoa³-le⁴ cho⁴ta⁴-le⁴ nca³ qui³si³cˀa³vi¹-le⁴ cho⁴ta⁴ncjin²-ve⁴.
LUK 9:17 Tsa³cjen², coan³squi³ nca³tsˀi³. Tsa³cˀe¹xco¹ xi³ qui³njen²nqui³-le⁴. Te³jao² ni⁴sin⁴ ma³-ni³ nio⁴xti²la⁴čhˀoa¹.
LUK 9:18 Cˀia⁴ nca³ ti¹jna³tˀa³xin² Jesús, ti¹vˀe¹tsˀoa³. Cho⁴ta⁴-le⁴ tjio¹cao⁴ nca³ je². Jesús qui³tsi²na³nqui³-le⁴: Jo¹ tso² cho⁴ta⁴ncjin², ˀya¹-nia³ an³-vi⁴.
LUK 9:19 Qui³tso²-le⁴ nca³ je²: Juan Bautista. Cˀoa⁴ tjin¹ cˀa³ xi³ Elías qui³tso². Cˀoa⁴ tjin¹ cˀa³ xi³ tso² nca³ ja³ˀa³ya²-ni³le⁴ jnco³ cho⁴ta⁴ xi³ nchja⁴ya³ tˀa³tsˀe⁴ Ni³na¹, xi³ cho⁴ta⁴jchi¹nca³.
LUK 9:20 Cˀia⁴ Jesús qui³tso²-le⁴: Cˀoa⁴ jon², jo¹ vi³xon¹³, ˀya¹-nia³ an³. Cˀia⁴ qui³nchja⁴ Simón Pedro, qui³tso²: Ji³ ni¹³ Cristo xi³ tsˀe⁴ Ni³na¹.
LUK 9:21 To⁴nca³ Jesús nˀion¹ tsa³cˀe¹ne²-le⁴ nca³ ni⁴ˀya³-jin² xi³ jo³ coi⁴tso⁴-le⁴ cjoa⁴-vi⁴.
LUK 9:22 Qui³tso²: Ma³chjen¹-ni¹ nca³ tse³ cjoa⁴ñˀain³ cjoa⁴ˀa³ je² ˀnti¹-le⁴ cho⁴ta⁴, nca³ taon³ scoe⁴ nca³ je² je² cho⁴ta⁴jchi¹nca³ cao⁴ cho⁴ta⁴ti¹tjon²-le⁴ na⁴ˀmi³ cao⁴ cho⁴ta⁴ scribano, si⁴cˀen³-ni³ nca³ je², to⁴nca³ si⁴cja³ˀa¹ya³-ni³le⁴ xi³ coan⁴ jan² ni⁴čhjin³.
LUK 9:23 Cˀia⁴ Jesús qui³tso²-le⁴ nca³tsˀi³: To⁴ˀya³-ni³ve⁴ xi³ me³-le⁴ nca³ cho⁴ta⁴-na⁴ coan⁴, ca²ta³tsjion¹con³ yao³-le⁴, ca²ta³vˀa³mi³ cro²-le⁴ nca³ xqui⁴ ni⁴čhjin³, nta³ ca²ta³fi²tˀa³-na³.
LUK 9:24 Nca⁴ to⁴ˀya³-ni³ xi³ me³-le⁴ cˀoa⁴sje³ntjai² ni⁴ma⁴-le⁴, to⁴si⁴²cha³-ni¹. Cˀoa⁴ to⁴ˀya³-ni³ xi³ si⁴²cha³ ni⁴ma⁴-le⁴ xi³ to⁴tˀa³tsˀan⁴, je²-vi⁴, cˀoa⁴sje³ntjai² ni⁴ma⁴-le⁴.
LUK 9:25 Jme¹ xi³ coi⁴njen⁴-le⁴ cho⁴ta⁴nta³ nca³ si⁴²qui³njen³ nca³yi³je³ son³ˀnte³ tsa² si⁴²cha³ yao³-le⁴, cˀoa⁴ tsa² si⁴²qui³tson¹ yao³-le⁴.
LUK 9:26 Je² xi³ ma³soa³con³que³-na³ cao⁴ je² en¹-na⁴, je² ˀnti¹-le⁴ cho⁴ta⁴ coan⁴soa³con³que³ nca³ je² cˀia⁴ nca³ cjoa⁴ˀai¹cao⁴ cjoa⁴je³ya³ xi³ tsˀe⁴, cˀoa⁴ cao⁴ cjoa⁴je³ya³ xi³ tsˀe⁴ Nˀai³-le⁴, xi³ tsˀe⁴ a²ncje⁴tsje³-le.
LUK 9:27 Cˀoa⁴ xin³-no³ xi³ cjoa⁴qui²xi⁴, nca³ tjin¹ cˀa³ xi³ i⁴ tjio¹-vi⁴ xi³ cje³ mˀen³-jin² sa³ˀnta³ nca³ scoe⁴ cjoa⁴te¹xo³ma³-le⁴ Ni³na¹.
LUK 9:28 Xi³ coan³-ni³ jin³-la⁴ ni⁴čhjin³ nca³ coan³scan³-ni³le⁴ je² en¹, Jesús qui³scoe¹ Pedro, Juan, cao⁴ Jacobo, qui³mi³jon³ ni³nto³ nca³ me³-le⁴ vˀe¹tsˀoa³.
LUK 9:29 Tjen⁴ ti¹vˀe¹tsˀoa³ tsˀa³ntjai²ya³ ncjain¹, cja⁴ˀai¹ qui³sˀe³, cˀoa⁴ na³jño³-le⁴ čhoa³ qui³sˀe³, jo³ fa³te³jon³.
LUK 9:30 Coe⁴-ni³ jao² cho⁴ta⁴ xi³ Moisés cao⁴ Elías tsa³cja¹cao⁴ nca³ je².
LUK 9:31 Coan³tsen³ cao⁴ cjoa⁴je³ya³, qui³nchja⁴ jo³ coan⁴ nca³ coi⁴tjo³ Jesús ya⁴ Jerusalén.
LUK 9:32 Cjai¹ nˀion¹ ni³jña¹-le⁴ Pedro cao⁴ xi³ tjio¹cao⁴ nca³ je², to⁴nca³ qui³si³ca³nca³ ni³jña¹-le⁴, cˀoa⁴ tsa³ve³ cjoa⁴je³ya³-le⁴ Jesús, cˀoa⁴ tsa³ve³ nca³ jao² cho⁴ta⁴ xi³ tjio¹cao⁴.
LUK 9:33 Cˀia⁴ nca³ je² jao² cho⁴ta⁴-ve⁴ tjio¹fi²tˀa³xin²-le⁴ Jesús, Pedro qui³tso²-le⁴ Jesús: Maestro, nta³-ni¹ nca³ i⁴ ti³yoi³⁴-jin⁴vi⁴, cˀoa⁴ tsa² jan² xco¹jnta² si⁴ntai³⁴-jin⁴, jnco³ xi³ tsi⁴, jnco³ xi³ tsˀe⁴ Moisés, jnco³ xi³ tsˀe⁴ Elías. Li²coi³ ve³ xi³ qui³tso².
LUK 9:34 Cˀia⁴ nca³ cˀoa⁴-sˀin² ti¹nchja⁴ je²-vi⁴, ja³ˀai³ jnco³ yo³jvi³ xi³ ja³ˀa³ne²-le⁴. Cˀoa⁴ je² qui³tsa³cjon¹ cˀia⁴ nca³ ja³ˀa³jin³ yo³jvi³.
LUK 9:35 Jnco³ jta⁴ qui³no²ˀya²-le⁴ ya⁴jin³ yo³jvi³-ve⁴ xi³ qui³tso²: Je²-vi⁴ ˀnti¹-na⁴ xi³ tsjoa³que⁴. Ti⁴no¹ˀya²-lao⁴³ nca³ je².
LUK 9:36 Cˀia⁴ nca³ je³qui³nchja⁴ je² jta⁴ je²-ve⁴, to⁴je² ti¹jna³ Jesús, cˀoa⁴ je² cho⁴ta⁴-le⁴ jyo¹ tsa³ca³tio², cˀoa⁴ coi³ ni⁴čhjin³-ve⁴ ni⁴jme³-jin² xi³ qui³tso²-le⁴ ni⁴ˀya³-jin² jme³ xi³ tsa³ve³.
LUK 9:37 Xi³ coan³nchaon³-ni³, xi³ je³ji³nčhoa³jen³jon³-ni³ ni³nto³-ve⁴, nˀion¹ ncjin² cho⁴ta⁴ xi³ qui³sa³te²cjao³.
LUK 9:38 Coe⁴-ni³ jnco³ xi³ ya⁴ tjen⁴jin³-le⁴ qui³nchja⁴-le⁴ Jesús: Maestro, cˀoe³tsˀoa³-le²³ nca³ cho¹tsen³-lai⁴ ˀnti¹-na⁴, nca⁴ to⁴je² to⁴jnco³ xi³ tjin¹-na³.
LUK 9:39 Coe⁴-ni³ jnco³ ntjao⁴ xi³ nta³jin³ tsoa³ nca³ je², nti⁴ton⁴ cji³ˀntia¹, cˀoa⁴ si¹cja³tse¹ yao³-le⁴ sa³ˀnta³ nta¹xo¹ vi³tjo³ tsˀoa³, jo³ to⁴ñˀain³ vi³tjo³xin²-le⁴, mi²ˀaon³ nca³ je².
LUK 9:40 Tsa³cˀe³tsˀoa²-le⁴ cho⁴ta⁴-li⁴ nca³ ca²ta³mˀaon³sje³, to⁴nca³ li²coi³ ca²ma³-le⁴.
LUK 9:41 Jesús qui³tso²-le⁴: Jon² na⁴xi⁴na³nta¹ xi³ tsi² ma³cjain¹-no³, xi³ to⁴xin² ntia⁴² ma³nquin¹cao⁴³ yao³-no³. Cˀia¹-ni³ ˀnta³ tjin¹ne²-na³ nca³ coa²te⁴jna³cao⁴-no³, nca³ si³cjain¹-no³. Nčhoa¹cao⁴-nai¹³ ˀnti¹-li⁴ i⁴-vi⁴.
LUK 9:42 Cˀia⁴ nca³ ti¹nčhoa¹čhian³, nai⁴² xi³ nta³jin³ qui³si³ca³tsao³ tˀa³na³nqui³, qui³si³cja³tse¹ yao³-le⁴, to⁴nca³ Jesús qui³nchja⁴ti³cao⁴ je² ntjao⁴ xi³ nta³jin³, cˀoa⁴ qui³si³nta³-ni³ ti³-ve⁴, qui³tsjoa³ nqui²ntia³-ni³le⁴ nˀai³-le⁴.
LUK 9:43 Nca³tsˀi³ to⁴coan³xcon¹-le⁴ je² cjoa⁴je³ya³ xi³ tsˀe⁴ Ni³na¹. Tjen⁴ cji³ma³xcon¹-le⁴ nca³tsˀi³ nca³yi³je³ cjoa⁴ xi³ qui³sˀin³, Jesús qui³tso²-le⁴ cho⁴ta⁴-le⁴:
LUK 9:44 Nta³ ti⁴ncha³ño³ ntˀai⁴-ntai⁴ je² en¹-vi⁴, nca⁴ sˀa⁴cˀoa⁴coan⁴ nca³ je² ˀnti¹-le⁴ cho⁴ta⁴ cˀoai⁴tˀa³-le⁴ ntsja³ cho⁴ta⁴.
LUK 9:45 To⁴nca³ li²coi³ coan³cho⁴ya³-le⁴ je² en¹-vi⁴. Qui³sˀe³ˀma²-le⁴ jme¹-ni³ nca³ tsi² coi³ coan⁴cho⁴ya³-si¹ni³le⁴. Cˀoa⁴ qui³tsa³cjon¹ nca³ scoi⁴na³nqui³-le⁴ tˀa³tsˀe⁴ en¹ je²-vi⁴.
LUK 9:46 Cˀia⁴ cjai¹nca³ nta³ tsa³cjao¹ya³-ni³, ˀya¹ xi³ coa⁴sen⁴jna³ ti¹tjon².
LUK 9:47 To⁴nca³ Jesús ve³ cjoa⁴fa³ˀai³tsjen³-le⁴ ni⁴ma⁴-le⁴, qui³scoe¹ jnco³ ˀnti¹ti³, qui³si³cˀe¹jna³tˀa³-le⁴ yao³-le⁴.
LUK 9:48 Cˀoa⁴qui³tso²-le⁴: To⁴ˀya³-ni³ xi³ scoe¹tjao² xi³ tˀa³tsˀan⁴ jnco³ ˀnti¹, an³ xi³ scoe¹tjao²-na³. To⁴ˀya³-ni³ xi³ scoe¹tjao²-na³ nca³ an³, cˀoa⁴-ti⁴ scoe¹tjao² nca³ je² xi³ qui³si³ca³sen¹-na³. Je² xi³ nqui²sa⁴ na³nqui³ ti¹jna³jin³-no³, je²-vi⁴ xi³ je³ya³ ma³.
LUK 9:49 Cˀia⁴ Juan qui³tso²: Maestro, tsa³ˀya³-ni¹jin⁴ jnco³ xi³ cao⁴ jan³ˀain¹-li⁴ ma³-le⁴ fa³ˀa¹xin² nai⁴² xi³ nta³jin³. Tsa³cˀe²chjoa²-lai⁴jin⁴, nca⁴ tsi² tsa² fi²cao⁴-na¹.
LUK 9:50 Jesús qui³tso²-le⁴: Li² vˀe²chjoa²-jin²lao⁴³, nca⁴ je² xi³ tsi² co²ntran⁴ fi²-no³, fi²tˀa³-no³.
LUK 9:51 Cˀia⁴ nca³ je³cji³ma³jnco³ ni⁴čhjin³ nca³ tjo¹ve¹ ncˀa¹, Jesús ña³qui³ cˀoa⁴tjin¹con³ nca³ coai⁴ ya⁴ Jerusalén.
LUK 9:52 Qui³si³ca³sen¹ cho⁴ta⁴ xi³ qui³ ti¹tjon²-le⁴. Qui³, ja³ˀa³sˀen³ jnco³ na⁴xi⁴na³nta¹-le⁴ cho⁴ta⁴ samaritano, nca³ coa⁴jnqui³ˀnte³ xi³ tˀa³tsˀe⁴.
LUK 9:53 To⁴nca³ li²coi³ qui³tsjoa³ˀnte²-le⁴ nca⁴ tsa³ve³ nca³ coai⁴ Jerusalén.
LUK 9:54 Cˀia⁴ nca³ cho⁴ta⁴-le⁴ tsa³ve³ je²-vi⁴, Jacobo cao⁴ Juan qui³tso²: Señor, a³ me³-li² nca³ coa⁴te²xo³mai³⁴-jin⁴ nca³ ca²tji³nčhoa¹jen³-ni³ lˀi¹ ncˀa³jmi³, nca³ ca²ta³fe³jco³ nca³ je² jo³ qui³sˀin³ Elías.
LUK 9:55 Jesús qui³si³cˀo¹fa³ya³ˀa³ nca³ je², tsa³ca³te³cja¹ya³-le⁴, qui³tso²-le⁴: Jon²-vi⁴ li²coi³ ˀyao³ ˀya¹ tsˀe⁴ espíritu xi³ tsaon⁴³.
LUK 9:56 Je² ˀnti¹-le⁴ cho⁴ta⁴ li²coi³ ja³ˀai³ jme¹-ni³ nca³ si⁴²cha³-si¹ni³ ni⁴ma⁴-le⁴ cho⁴ta⁴, to⁴nca³ ja³ˀai³ jme¹-ni³ nca³ cˀoa⁴sje³ntjai²-si¹ni³ ni⁴ma⁴-le⁴. Cˀia⁴ qui³ cja⁴ˀai¹ na⁴xi⁴na³nta¹.
LUK 9:57 Cˀia⁴ nca³ tjio¹fi² ya⁴³ ntia⁴²-ve⁴, jnco³ cho⁴ta⁴ cˀoa⁴qui³tso²-le⁴: Señor, cjoi¹tjen⁴nqui³-le²³ to⁴jña³-ni³ nca³ cˀoin¹³.
LUK 9:58 Jesús qui³tso²-le⁴: Je² ni⁴nta⁴ tjin¹-le⁴ nqui³jao³, cˀoa⁴ ni⁴se³ xi³ si¹ma³ncˀa³ so⁴co²-le⁴ ˀnte³ jña³ nca³ si⁴²cja¹ya³ˀa³ ya¹, to⁴nca³ je² ˀnti¹-le⁴ cho⁴ta⁴ tsin²-le⁴ ˀnte³-jin² jña³ nca³ si⁴²cja¹ya³.
LUK 9:59 Cˀoa⁴ qui³tso²-le⁴ xi³ nqui²jnco³: Nčhoa¹tjen⁴nqui³-nai¹³. Je² qui³tso²: Señor, tˀai²ˀnte³-nai¹³ nca³ ti¹tjon²-cjoa²la² cjoi¹cˀe³ñe³ nˀai³-na⁴.
LUK 9:60 Jesús qui³tso²-le⁴: Je² xi³ jo³-ni³ tsa² xi³ tjio¹cˀen³, ca²ta³vˀe¹ñai³ cˀen³-le⁴. Cˀoa⁴ ji³ tˀin³, ti⁴no²cjoa⁴ya³jin³-lai⁴ cho⁴ta⁴ cjoa⁴te¹xo³ma³-le⁴ Ni³na¹.
LUK 9:61 Cˀia⁴ cˀoa⁴-ti⁴ qui³tso² xi³ nqui²jnco³: Cjoi¹tjen⁴nqui³-le²³, Señor. To⁴nca³ tˀai²ˀnte³-nai¹³ nca³ si³xa³tˀa³ ti¹tjon²cjoa²la²³ je² xi³ tjio¹ ni³ˀya³-na⁴.
LUK 9:62 Jesús qui³tso²-le⁴: To⁴ˀya³-ni³ xi³ ntsja³ qui³tsoa³-ni³ ya¹ arado, xi³ jton⁴ ya¹tsˀin⁴ co³tsen³-ni³, a³li²coi³ va³quin²-le⁴ cjoa⁴te¹xo³ma³-le⁴ Ni³na¹.
LUK 10:1 Xi³ coan³scan³-ni³ je² cjoa⁴-vi⁴, je² Nai³-na¹ tsa³qui³ncha¹nta³ jan²can³ cao⁴ te³ cho⁴ta⁴ xi³ cja⁴ˀai¹, jña³-le⁴ xi³ qui³si³ca³sen¹ ti¹tjon²-le⁴, jao²jao² nca³qui³jnta² na⁴xi⁴-na³nta¹ cao⁴ ˀnte³ jña³ nca³ je² sˀa⁴coai⁴.
LUK 10:2 Cˀoa⁴ qui³tso²-le⁴: Nˀion¹ tse³ xi³ ma³jcha¹, to⁴nca³ to⁴choa³ ma³-ni³ xi³ si¹xa¹. Tˀe²tsˀoa³-lao⁴³ tso²cˀoa⁴ je² Nai³-le⁴ xi³ tsˀe⁴ je² xi³ cji³ma³jcha¹-ve⁴ nca³ ca²ta³si¹ca³sen¹ cho⁴ta⁴ xi³ si¹xa¹ xi³ tˀa³tsˀe⁴ xi³ ma³jcha¹-le⁴.
LUK 10:3 Ta⁴nquion¹³, coe⁴-ni³, an³ si³ca³sen¹-no³ jo³-ni³ tsa² va³rre² ya⁴jin³-le⁴ tsen⁴².
LUK 10:4 A³li² xi³jtsa³taon⁴-jin² chˀao²³, ni⁴na³xa¹xi³jtsa³-jin², ni⁴jte¹-jin². Cˀoa⁴ ni⁴ˀya³-jin² xi³ cha²cao⁴³ ya⁴ ntia⁴²-ve⁴.
LUK 10:5 To⁴jña³-le⁴ ntˀia³-ni³ve⁴ xi³ coi⁴tja¹sˀaon³, ti¹tjon²-cjoa²la² cˀoa⁴tˀin²-lao⁴³: Nchˀan¹ ca²ta³sˀe³-le⁴ ni³ˀya³-vi⁴.
LUK 10:6 Tsa² ti¹jna³ ya⁴-ve⁴ jnco³ xi³ nchˀan¹ tjin¹con³, je² cjoa⁴ni²xa³tˀa³-no³ xi³ nchˀan¹ tjin¹ sˀe³jna³-le⁴, tsa² mai³ coai⁴nčhˀoe² nqui²ntia³-ni³no³.
LUK 10:7 Ti⁴yo³ xi³ ti⁴coi³-ni³ ni³ˀya³, chi⁴nao⁴³, cˀoa⁴ tˀio⁴³ je² xi³ tsjoa¹-no³, nca⁴ je² xi³ si¹xa¹ va³quin²-le⁴ chji¹-le⁴. A³li² xqui⁴ ni³ˀya³-jin² ni²cˀa³ntjai²yao³.
LUK 10:8 To⁴jña³-ni³ na⁴xi⁴na³nta¹ jña³ coi⁴tja¹sˀaon³, jña³ scoe¹tjao²-no³, chi⁴nao⁴³ je² xi³ cˀoe⁴²yo³ nqui³xcon³.
LUK 10:9 Cˀoa⁴ ti⁴ntao³ xi³ tjio¹mˀen³ xi³ ya⁴ tjio¹, cˀoa⁴tˀin²-lao⁴³ nca³ je³nčhoa¹ ma³čhian³ cjoa⁴te¹xo³ma³-le⁴ Ni³na¹.
LUK 10:10 To⁴nca³ to⁴jña³-ni³ na⁴xi⁴na³nta¹ jña³ nca³ coi⁴tja¹sˀaon³, jña³ nca³ tsi² coi³ scoe¹tjao²-no³, cˀia⁴ nca³ vi²tjo⁴-nio³ ya⁴ ntia⁴²te¹-le⁴, cˀoa⁴tˀin²-lao⁴³:
LUK 10:11 Nta³ tsa² je² chao³-le⁴ na⁴xi⁴na³nta¹-no³ xi³ tsa³ca¹jon³ ntso⁴coi³⁴-jin⁴, cˀoe¹tsao³jne²jon²-lai²⁴jin⁴ nca³ jon². To⁴nca³ ca²ta³ˀyao³ je²-vi⁴, je² cjoa⁴te¹xo³ma³-le⁴ Ni³na¹ je³nčhoa¹ ma³čhian³.
LUK 10:12 Cˀoa⁴xin³-no³ nca³ Sodoma nqui²sa⁴ choa³ cjoa⁴ñˀain³ sˀe⁴-le⁴ cao⁴-ni³ tsa² je² na⁴xi⁴na³nta¹-ve⁴, coi³ ni⁴čhjin³-ve⁴ nca³ sˀe⁴-le⁴ cjoa⁴ñˀain³.
LUK 10:13 Ma⁴-xo¹ni³ nca³ ji³ Corazín. Ma⁴-xo¹ni³ Betsaida. Je² cjoa⁴xcon¹ xi³ coan³ ya⁴ tsaon⁴³, tsa² cˀoa⁴qui³sˀin³ ya⁴ Tiro, tsa² ya⁴ Sidón, je³co²tse³ qui³si³cˀa³ntjai²ya³ cjoa⁴fa³ˀai³tsjen³-le⁴ nca³ yˀa³cja¹ na³jño³na³xa¹ cao⁴ chao³lˀi¹.
LUK 10:14 Coi³ Tiro cao⁴ Sidón nqui²sa⁴ choa³ cjoa⁴ñˀain³ sˀe⁴-le⁴ cao⁴-ni³ tsa² xi³ sˀe⁴-no³ nca³ jon²-vi⁴ coi³ ni⁴čhjin³-ve⁴ cˀia⁴ nca³ sˀe⁴ cjoa⁴ñˀain³.
LUK 10:15 Cˀoa⁴ ji³ Capernaum, a³ mi³ncˀa³-ni¹ sa³ˀnta³ ncˀa³jmi³. Sa³ˀnta³ ˀnte³cjoa⁴ñˀain³ sca⁴jin³.
LUK 10:16 Je² xi³ nčhˀoe¹-no³ an³ xi³ nčhˀoe¹-na³, cˀoa⁴ je² xi³ jon² vˀa³sje³xin²-no³ an³ xi³ vˀa³sje³xin²-na³. Je² xi³ vˀa³sje³xin²-na³ nca³ an³, vˀa³sje³xin² je² xi³ qui³si³ca³sen¹-na³.
LUK 10:17 Ja³ˀai³ nqui²ntia³-ni³ cao⁴ cjoa⁴tsjoa³ xi³ jan²can³ cao⁴ te³, qui³tso²: Señor, nta³ tsa² nai⁴² xi³ nta³jin³ si¹tjo³son²-na³jin⁴ cao⁴ jan³ˀain¹-li⁴.
LUK 10:18 Jesús qui³tso²-le⁴: An³ tsa³ˀve³ Satanás jo³-ni³ lˀi¹chˀaon⁴ xi³ qui³sca³jen³-ni³ ncˀa¹.
LUK 10:19 Je³qui³tsjoa³-no³ cjoa⁴te¹xo³ma³ nca³ coi⁴ncha³nao²³ ye⁴ cao⁴ cho⁴na³ˀya¹, nca³ ni²qui³njen³-lao⁴³ nca³tsˀi³ nca³nˀion¹-le⁴ xi³ co²ntran⁴-no³. Ni⁴jme³-jin² xi³ si⁴²qui²ˀaon³-no³.
LUK 10:20 To⁴nca³ a³li² ni²tsjoa³-jion²³ xi³ coi³ je²-vi⁴ nca³ ntjao⁴ xi³ nta³jin³ si¹tjo³son²-no³, to⁴sa³ ca²ta³tsjoa³-no³ nca³ je² jan³ˀain¹-no³ je³tji¹tˀa³ ya⁴ ncˀa³jmi³.
LUK 10:21 Ti⁴coi³-ni³ hora Jesús nˀion¹ coan³tsjoa³-le⁴ xi³ tˀa³tsˀe⁴ Espíritu Santo, qui³tso²: Tsjoa³-le²³ cjoa⁴nta³, Nˀai³, Señor, xi³ tsi⁴ ncˀa³jmi³, xi³ tsi⁴ son³ˀnte³, nca³ je² cjoa⁴-vi⁴ tsa³cˀe²jna³ˀma³-lai⁴ cho⁴ta⁴chji⁴ne⁴ cao⁴ xi³ ma³cho⁴ya³-le⁴, cˀoa⁴ tsa³ca³co²son²tsen³-lai⁴ xi³ to⁴xquia⁴ xti³. Cˀoa⁴-sˀin² tsjoa³-le²³ cjoa⁴nta³, Nˀai³, nca³ cˀoa⁴-sˀin² coan³me³-li².
LUK 10:22 Nca³yi³je³ cjoa⁴ an³ qui³tsjoa³-na³ Nˀai³-na⁴. To⁴je² xi³ Nˀai³ xi³ ve³ jo³ cjoan³ xi³ ˀnti¹, ni⁴ˀya³-jin²sa³ xi³ ve³. To⁴je² xi³ ˀnti¹ xi³ ve³ jo³ cjoan³ xi³ Nˀai³. Cˀoa⁴ ve³ je² xi³ je² ˀnti¹ me³-le⁴ nca³ coa⁴co²son²tsen³-le⁴.
LUK 10:23 Qui³si³cˀo¹fa³ya³tˀa³-le⁴ cho⁴ta⁴-le⁴ nca³ tˀa³xin² qui³tso²-le⁴: Jo¹ to⁴nta³-le⁴ xcon⁴ xi³ ve³ je² xi³ jon² cho²tsen³-lao⁴³.
LUK 10:24 Cˀoa⁴xin³-no³ nca³ ncjin² cho⁴ta⁴ xi³ qui³nchja⁴ya³ tˀa³tsˀe⁴ Ni³na¹, cˀoa⁴ ncjin² cho⁴ta⁴ti¹tjon² coan³me³-le⁴ nca³ scoe⁴ je² xi³ jon² ˀyao³, to⁴nca³ li²coi³ tsa³ve³, cˀoa⁴ coan³me³-le⁴ nca³ cjoi⁴nčhˀoe¹ xi³ jon² no²ˀyao²³, to⁴nca³ li²coi³ qui³nčhˀoe¹.
LUK 10:25 Coe⁴-ni³, jnco³ cho⁴ta⁴chji⁴ne⁴ xi³ ve³ cjoa⁴te¹xo³ma³, tsa³ca³sen²nto³, cˀoa⁴ qui³sco²tˀa³-le⁴, qui³tso²-le⁴: Maestro, jme¹ cjoa⁴nta³ xi³ sˀian³ nca³ sˀe⁴-si¹ni³na³ cjoa⁴vi³jna³chon³ntsjai².
LUK 10:26 Jesús qui³tso²-le⁴: Jme¹ xi³ tji¹tˀa³ ja⁴jin³ cjoa⁴te¹xo³ma³. Jo¹-sˀin² vˀe²xquiai⁴.
LUK 10:27 Cho⁴ta⁴chji⁴ne⁴ qui³tso²: Ca²ta³ma³tsjoa³chai³ je² Nai³li⁴ Ni³na¹-li⁴. Ca²ta³ma³tsjoa³cha³-ni³ nca³yi³je³ ni⁴ma⁴-li⁴, cˀoa⁴ cao⁴ nca³yi³je³ cjoa⁴tsjoa³-li⁴, cˀoa⁴ cao⁴ nca³yi³je³ nca³nˀion¹-li⁴, cˀoa⁴ cao⁴ nca³yi³je³ cjoa⁴fa³ˀai³tsjen³-li⁴. Cˀoa⁴-ti⁴ ca²ta³ma³tsjoa³chai³ nca³tsˀi³ xi³cˀa³ jo³-ni³ tsa² ti⁴ji³-ni³.
LUK 10:28 Jesús qui³tso²-le⁴: Nta³ ca²no²cjoai⁴. Cˀoa⁴tˀiain⁴ je²-vi⁴, cˀoa⁴ coi⁴jna³chon³-ni¹³ˀni³.
LUK 10:29 To⁴nca³ me³-le⁴ cho⁴ta⁴ nca³ ti⁴je² si¹cje³tˀa³-ni³ je¹-le⁴, qui³tso²-le⁴ Jesús: ˀya¹-ni³ xi³ xi²nquia⁴².
LUK 10:30 Jesús qui³tso²: Jnco³ cho⁴ta⁴xˀin⁴ qui³jen³-ni³ ya⁴ Jerusalén ˀnta³ Jericó. Qui³sca³ya³ ntsja³ jnco³ che¹ xi³ tsa³cja¹ˀa³-le⁴ na³jño³-le⁴, cˀoa⁴ qui³si³qui²ˀaon³. Ja⁴me³ qui³si³ca¹jna³cˀen³. Qui³-ni³ che¹.
LUK 10:31 To⁴na²nta³ jnco³ cho⁴ta⁴na⁴ˀmi³ ya⁴ ja³ˀa³jen³ je² ntia⁴²-ve⁴. Xi³ tsa³ve³xcon³, ja³ˀa³tˀa³xin² xi³ncoa³-ni³.
LUK 10:32 Cˀoa⁴-ti⁴sˀin²ni³ jnco³ cho⁴ta⁴ levita ji³cho² ya⁴ ˀnte³-ve⁴, tsa³ve³xcon³, ja³ˀa³tˀa³xin² xi³ncoa³-ni³.
LUK 10:33 To⁴nca³ jnco³ cho⁴ta⁴ samaritano xi³ ya⁴ ti¹fi², cˀia⁴ nca³ ja³ˀai³tˀa³čhian³-le⁴ xi³ qui³tsi²ˀaon³, cˀia⁴ nca³ tsa³ve³xcon³, coan³ma⁴que³.
LUK 10:34 Ji³cho²con³-le⁴, tsa³qui³ncha¹sˀen³ si²ti⁴ cao⁴ vino, tsa³ca¹jte¹jon³ jña³ nca³ qui³tsin²ˀaon³, qui³si³cˀe¹jna³son²-le⁴ cho⁴-le⁴, qui³cao⁴ jña³ si¹cja¹ya³ cho⁴ta⁴, qui³si³coi²nta⁴ nca³ je².
LUK 10:35 Xi³ coan³ nchaon³-ni³ tsˀa³sje³ jao² taon⁴vi²xo⁴, qui³tsjoa³-le⁴ nai³-le⁴ ntˀia³, cˀoa⁴qui³tso²-le⁴: Ti⁴coi²nta⁴-la²nai¹³, cˀoa⁴ nca³yi³je³ xi³ si⁴cje³-sai³, an³ cˀoe³chji¹-le²³ cˀia⁴ nca³ cjoe²ˀe⁴-nia³.
LUK 10:36 Jo¹ si³, ˀya¹-ni³ xi³ jan² ma³-ni³, xi³ mi²yo⁴-le⁴ je²-ve⁴ xi³ qui³sca³ya³ ntsja³ je² che¹-ve⁴.
LUK 10:37 Cˀoa⁴ je² qui³tso²: Je² xi³ coan³ma⁴que³. Jesús qui³tso²: Tˀin³, cˀoa⁴tˀiain⁴ nta³ tsa² ji³.
LUK 10:38 Cˀia⁴ nca³ ti¹fi² Jesús, ja³ˀa³sˀen³ jnco³ na⁴xi⁴na³nta¹ ˀnti¹. Jnco³ chjon⁴² xi³ Marta ˀmi² qui³tsjoa³-le⁴ ˀnte³ ya⁴ ntˀia³-le⁴.
LUK 10:39 Je²-vi⁴ tjin¹-le⁴ jnco³ nti³chja³ xi³ María ˀmi², xi³ tsa³cˀe¹jna³nqui³ tˀa³ntso⁴co⁴ Jesús, nca³ ti¹nčhˀoe¹-le⁴ en¹-le⁴.
LUK 10:40 To⁴nca³ Marta nca³ i⁴ nca³ jan¹ tse³ xa¹ si¹ca¹jon³-le⁴ yao³-le⁴. Qui³con³-le⁴ Jesús, qui³tso²-le⁴: Señor, a³ tsi² cˀoa⁴ma³-li² nca³ je² ti²chja³ si¹cˀe¹jna³-na³ nca³ si³xa¹³ nca³ to⁴jnco³ an³. Cˀoa⁴tˀin²-lai⁴ˀni³ nca³ ca²ta³sen²cao⁴-na³.
LUK 10:41 To⁴nca³ Jesús qui³tso²-le⁴: Marta, Marta, ni²jti³-lai⁴ yao³-li⁴, cjai¹nca³ ncjin² cjoa⁴ sa⁴te¹tˀai³.
LUK 10:42 To⁴jnco³ cjoa⁴ xi³ ma³chjen¹. María tsa³cja³ˀa¹jin³ xi³ nta³ tjin¹, xi³ tsi² tsa² tjo¹ˀa³-ni³le⁴.
LUK 11:1 Jesús ti¹jna³ jnco³ ˀnte³, ti¹vˀe¹tsˀoa³. Cˀia⁴ nca³ je³tˀa³-le⁴, jnco³ cho⁴ta⁴-le⁴ qui³tso²-le⁴: Señor, ta⁴co²ya³-na³jin⁴ jo³-sˀin² cˀoe¹tsˀoai³⁴-jin⁴, jo³ nca³ qui³sˀin³ Juan nca³ tsa³ca³co¹ya³-le⁴ cho⁴ta⁴-le⁴.
LUK 11:2 Jesús qui³tso²-le⁴: Cˀia⁴ nca³ vˀe²tsˀoao³, cˀoi⁴ ti⁴xon¹³: Nˀai³-na⁴jin⁴ xi³ ti³jnai³ ncˀa³jmi³, ca²ta³ˀya³xcon¹ jan³ˀain¹-li⁴. Ca²tji³nčhoa¹ cjoa⁴te¹xo³ma³-li⁴. Cˀoa⁴ca²ta³sˀin¹ jo³-sˀin² nca³ me³-li², jo³-ni³ ya⁴ ncˀa³jmi³ cˀoa⁴-ti⁴sˀin² i⁴ son³ˀnte³.
LUK 11:3 Tˀai²-na³jin⁴ nio⁴xti²la⁴ xi³ ni⁴čhjin³ nca³ nchaon³ ma³chjen¹-na³jin⁴.
LUK 11:4 Ti⁴cha³tˀa³-na³jin⁴ je² je¹-na⁴jin⁴, nca⁴ cˀoa⁴-ti⁴ jin⁴-jin⁴ ni²cha³tˀa³-lai⁴jin⁴ je² nca³tsˀi³ xi³ qui³tjen⁴-le⁴ tsain⁴-jin⁴. Cˀoa⁴ a³li² cha⁴ni²tˀa³-jin²na³jin⁴ xi³ chˀao³ si¹cao⁴-na³jin⁴, to⁴nca³ chˀa⁴sje³ntjai²-na³jin⁴ xi³ cjoa⁴tsˀen⁴.
LUK 11:5 Cˀoa⁴-ti⁴ Jesús qui³tso²-le⁴: ˀya¹-ni³ xi³ jon²-vi⁴ xi³ tjin¹jnco³-le⁴ mi²yo⁴ xi³ coai⁴con³-le⁴ va³sen³ni⁴tjen⁴, xi³ coi⁴tso⁴-le⁴: Mi²yo⁴, ti⁴quin²ya³ jan²-nai¹³ nio⁴xti²la⁴,
LUK 11:6 nca⁴ jnco³ mi²yo⁴-na⁴ xi³ tso²ˀva³ ya⁴³ ntia⁴² ca²fa³ˀai³con³-na³, cˀoa⁴ tsin²-na³ jme³ xi³ tsjoa³-le⁴.
LUK 11:7 Cˀoa⁴ je² mi²yo⁴-le⁴ ja⁴ya³ ntˀia³-jan¹ nchja⁴-ni³, tso²-le⁴: A³li² an³-jin²³ ni²jti³-nai¹³. Je² xo⁴ntjoa⁴ je³tji¹chjoa², cˀoa⁴ je² ˀnti¹xti³-na⁴ cjio³son²cao⁴-na³ na⁴chan³. A³li²coi³ coan⁴ coi²so⁴tjen⁴ nca³ tsjoa³-le²³.
LUK 11:8 Cˀoa⁴ ti²xin³-no³: Nta³ tsa² tsi² coi⁴so¹tjen⁴ nca³ tsjoa¹-le⁴ xi³ to⁴tˀa³tsˀe⁴ cjoa⁴mi²yo⁴, to⁴coi³ nca³ cjai¹nca³ si³ sˀin¹, coi⁴so¹tjen⁴, tsjoa¹-le⁴ nca³yi³je³ xi³ ma³chjen¹-le⁴.
LUK 11:9 Cˀoa⁴ an³ xi³ xin³-no³ nca³ jon²: Ti⁴jao¹³, cˀoa⁴ cˀoai⁴-no³, ti⁴jnchi¹sjao³, cˀoa⁴ coan⁴sjai³-no³, ti⁴cja³ne³tˀao³ xo⁴ntjoa⁴, cˀoa⁴ tjo¹ˀai²-no³.
LUK 11:10 To⁴ˀya³-ni³ve⁴ xi³ si¹je¹, vˀai²-le⁴. Je² xi³ va³jnqui³sjai³, ma³sjai³-le⁴. Je² xi³ si¹cja³ne³tˀa³ xo⁴ntjoa⁴, tjo¹ˀai²-le⁴.
LUK 11:11 Jña³-le⁴ jon² xi³ nˀai³ ˀmi²-no³, tsa² ˀnti¹-no³ si⁴²je¹-no³ nio⁴xti²la⁴, a³ la⁴jao⁴ cˀoai⁴-lao⁴³. Cˀoa⁴ tsa² jti⁴ si⁴²je¹-no³, a³ ye⁴² cˀoai⁴-lao⁴³.
LUK 11:12 Tsa² si⁴²je¹-no³ chjao⁴², a³ cho⁴na³ˀya¹ cˀoai⁴-lao⁴³.
LUK 11:13 Cˀia⁴ tsa² ma³-no³ jon²-vi⁴ xi³ chˀao³ cjoaon³ nca³ nta³ vˀai²cjoa⁴tjao²-lao⁴³ je² xti³-no³, je² Nˀai³-no³ xi³ ti¹jna³ ya⁴ ncˀa³jmi³, a³ tsi² nqui²sa⁴-sa³ tsjoa¹-le⁴ je² Espíritu Santo je² xi³ si⁴²je¹-le⁴ nca³ je².
LUK 11:14 Cˀia⁴ Jesús ti¹vˀa³sje³xin²-le⁴ jnco³ cho⁴ta⁴ jnco³ nai⁴² xi³ nta³jin³ xi³ yo⁴ma⁴. Cˀia⁴ nca³ je³ji³tjo³xin²-le⁴ nai⁴² xi³ nta³jin³-ve⁴, je² cho⁴ta⁴yo⁴ma⁴ qui³nchja⁴. Cˀoa⁴ nca³tsˀi³ cho⁴ta⁴ to⁴coan³xcon¹-le⁴.
LUK 11:15 To⁴nca³ tjin¹ cˀa³ xi³ qui³tso²: Cao⁴ nca³nˀion¹-le⁴ Beelzebú xi³ nca³jco⁴-le⁴ cho⁴ta⁴nai⁴² vˀa³sje³xin² nai⁴² xi³ nta³jin³.
LUK 11:16 Cˀoa⁴ xi³cˀa³ nca³ tjio¹co³tˀa³ nca³ je², qui³si³je¹-le⁴ choa⁴ xi³ nčhoa¹-ni³ ncˀa³jmi³.
LUK 11:17 To⁴nca³ Jesús tsa³ve³ cjoa⁴fa³ˀai³tsjen³-le⁴, qui³tso²-le⁴: Nca³yi³je³ cjoa⁴te¹xo³ma³ xi³ ma³jao²ya³, xi³ co²ntran⁴ tjio¹-le⁴ xi¹ncjin¹, fi³tson³ya². Cˀoa⁴ jnco³ ntˀia³ xi³ ma³jao²ya³, xi³ co²ntran⁴ tjio¹-le⁴ xi¹ncjin¹, tsao³nti¹jao³.
LUK 11:18 Tsa² cˀoa⁴-ti⁴ je² Satanás ma³jao²ya³, tsa² co²ntran⁴ tjio¹-le⁴ xi¹ncjin¹, jo¹-sˀin² sˀe⁴jna³ cjoa⁴te¹xo³ma³-le⁴, nca⁴ jon² xo⁴ vi³xon¹³ nca³ cao⁴ nca³nˀion¹-le⁴ Beelzebú vˀa³sje³xian²³ nai⁴²-le⁴.
LUK 11:19 Tsa² an³ vˀa³sje³xian²³ nai⁴²-ve⁴ cao⁴ nca³nˀion¹-le⁴ Beelzebú, ja⁴xti³-no³ ˀya¹ cao⁴ tsˀe⁴ nca³nˀion¹ xi³ vˀa³sje³xin²-ni³ˀni³. Coi³ cjoa⁴-vi⁴ xti³-no³ coan³ xca²le⁴, tsjoa¹ cjoa⁴qui²xi⁴ tˀa³tsaon⁴³.
LUK 11:20 To⁴nca³ tsa² an³ cao⁴ na⁴jma¹ntsja³ Ni³na¹ vˀa³sje³xian²³ nai⁴² xi³ nta³jin³-ve⁴, cjoa⁴qui²xi⁴ je³ja³ˀai³-no³ nca³ jon² je² cjoa⁴te¹xo³ma³-le⁴ Ni³na¹.
LUK 11:21 Cˀia⁴ nca³ jnco³ cho⁴ta⁴ xi³ ta²ja³, si¹coi²nta⁴ cao⁴ tjo⁴ ntˀia³nˀion¹-le⁴, cjai¹nca³ nchˀan¹ tjio¹ tso³jmi²-le⁴.
LUK 11:22 To⁴nca³ tsa² nqui²jnco³ cho⁴ta⁴ xi³ nqui²sa⁴ nˀion¹ cao⁴-ni³ tsa² je², cjoa⁴ˀai¹ne², si⁴²qui³njen³-le⁴, cjoa⁴ˀa²-le⁴ nca³yi³je³ tjo⁴-le⁴ xi³ ma³nˀion¹tˀa³con³, cˀoa⁴ cˀoa⁴vi¹son² tso³jmi²-le⁴.
LUK 11:23 Je² xi³ tsi² fi²tˀa³-na³, co²ntran⁴ fi²-na³. Je² xi³ tsi² vˀe¹xco¹cao⁴-na³ vˀe¹tsao³va³.
LUK 11:24 To⁴cˀia⁴-ni³ nca³ je² ntjao⁴ xi³ nta³jin³ coi⁴tjo³-ni³le⁴ cho⁴ta⁴, tso²ˀva³ jña³ nca³ ˀnte³qui³xi², va¹sjai³ jña³ nca³ si⁴²cja¹ya³. Cˀoa⁴ li²coi³ ma³sjai³-le⁴, tso²: Cjoi¹-nca¹nia³ tso²cˀoa⁴ ntˀia³-na⁴ jña³ nca³ ji²tjo⁴-nia³.
LUK 11:25 Cˀia⁴ nca³ ja³ˀai³, je³qui³sa³te²cha², je³coan³ nta³ chon³.
LUK 11:26 Cˀia⁴ fi², cˀoa⁴ nčhoa¹cao⁴ nqui² ña³to³ ntjao⁴ xi³ nta³jin³, xi³ nqui²sa⁴-sa³ chˀao³ cjoan³ cao⁴-ni³ tsa² je². Cˀia⁴ fa³ˀa³sˀen³, ya⁴ va³tio². Je² cho⁴ta⁴-ve⁴ nqui²sa⁴-sa³ chˀao³ ma³ cjoan³ xi³ fe³tˀa³-ni³le⁴ cao⁴-ni³ tsa² xi³ ti¹tjon².
LUK 11:27 Cˀia⁴ nca³ Jesús ti¹tso² je² cjoa⁴, jnco³ chjon⁴² xi³ ya⁴ tjen⁴cao⁴ cho⁴ta⁴ncjin²-ve⁴, nˀion¹ qui³nchja⁴, qui³tso²-le⁴: Jo¹ to⁴nta³-le⁴ tsˀoa⁴ jña³ coan³jcha¹yai³, cˀoa⁴ je² chi³qui³ xi³ tsa³ca²qui³.
LUK 11:28 To⁴nca³ Jesús qui³tso²: Nqui²sa⁴ to⁴xcon¹ nta³-ni³ je² xi³ nčhˀoe¹ en¹-le⁴ Ni³na¹, cˀoa⁴ xi³ si¹tjo³son².
LUK 11:29 Cˀia⁴ nca³ ji³cho² ma³ña³tˀa³-sa³le⁴ cho⁴ta⁴, Jesús tsa³cˀe¹tsˀia⁴cao⁴ nca³ qui³tso²: Je² cho⁴ta⁴ xi³ ntˀai⁴ tjio¹, chˀao³ cjoan³. Va¹sjai³ choa⁴, to⁴nca³ li²coi³ cˀoai⁴-le⁴, to⁴je² choa⁴-le⁴ Jonás xi³ cˀoai⁴-le⁴.
LUK 11:30 Jo³-sˀin² nca³ Jonás qui³sˀe³jna³ choa⁴ xi³ tˀa³tsˀe⁴ cho⁴ta⁴ ninivitas, cˀoa⁴²-ti⁴sˀin² je² ˀnti¹-le⁴ cho⁴ta⁴ sˀe⁴jna³ choa⁴ xi³ tˀa³tsˀe⁴ cho⁴ta⁴ xi³ ntˀai⁴ tjio¹.
LUK 11:31 Je² reina xi³ ya⁴ tsˀe⁴ Sur, cjoa⁴ˀa¹ya³-ni³le⁴ cao⁴ je² cho⁴ta⁴xˀin⁴ xi³ tjio¹ ntˀai⁴, cˀia⁴ nca³ sˀe⁴nta³jin³-le⁴ cjoa⁴ cho⁴ta⁴, cˀoa⁴ cˀia⁴ tsjoa¹-le⁴ cjoa⁴ñˀain³, nca⁴ je² reina ja³ˀai³-ni³ sa³ˀnta³ jña³ fe³tˀa³ son³ˀnte³ nca³ qui³nčhˀoe¹-le⁴ cjoa⁴ˀi³sen³ta³con²-le⁴ Salomón. Coe⁴-ni³ tjin¹ xi³ nqui²sa⁴-sa³ nˀion¹ cao⁴-ni³ tsa² Salomón xi³ i⁴ ti¹jna³-vi⁴.
LUK 11:32 Je² cho⁴ta⁴xˀin⁴ xi³ tsˀe⁴ Nínive, cjoa⁴ˀa¹ya³-ni³le⁴ cao⁴ cho⁴ta⁴ xi³ tjio¹ ntˀai⁴, cˀia⁴ nca³ sˀe⁴nta³jin³-le⁴ cjoa⁴ cho⁴ta⁴, cˀoa⁴ cˀia⁴ tsjoa¹-le⁴ cjoa⁴ñˀain³, nca⁴ je² qui³si³cˀa³ntjai²ya³ cjoa⁴fa³ˀai³tsjen³-le⁴ cˀia⁴ nca³ Jonás qui³nchja⁴ya³jin³-le⁴. Coe⁴-ni³, i⁴ ti¹jna³-vi⁴ jnco³ xi³ nqui²sa⁴²-sa³ to⁴nˀion¹ cao⁴-ni³ tsa² Jonás.
LUK 11:33 Ni⁴jnco³-jin² xi³ vˀe¹jna³ˀma³ lˀi¹ xi³ ti¹ti², ni⁴vˀe¹jna³ˀma³nqui³-jin² ca²xa⁴choa⁴, to⁴nca³ ya⁴ jña³ ma³ si¹ncha¹ya³ lˀi¹, jme¹-ni³ nca³ coan⁴ˀi³sen³-si¹ni³le⁴ je² xi³ cjoa⁴ˀa³sˀen³.
LUK 11:34 Je² xcoan³² lˀi¹-le⁴ ni¹ yao³-na¹. Tsa² je² xcoin³ ña³qui³ nta³, cˀoa⁴²-ti⁴ i³sen³ coan⁴-le⁴ nca³yi³je³ yao³-li⁴. To⁴nca³ tsa² tsi² tsa² nta³ xcoin³, cˀoa⁴²-ti⁴ njion² chon³-le⁴ yao³-li⁴.
LUK 11:35 Ti⁴coi²ntai⁴ tso²cˀoa⁴ je² lˀi¹ xi³ ti¹jna³jin³-li², jme¹-ni³ nca³ tsi² tsa² njion² ma³-si¹ni³le⁴.
LUK 11:36 Cˀoa⁴-sˀin² tsa² nca³yi³je³ yao³-li⁴ coan³ˀi³sen³jin³, nca³ ni⁴ˀi⁴tse¹-jin² cjoa⁴njion² ti¹jna³jin³-le⁴, ña³qui³ coan³ˀi³sen³jin³-ni¹ jo³-sˀin² cˀia⁴ nca³ jnco³ lˀi¹ xi³ nˀion¹ fa³te³ si¹ˀi³sen³-li².
LUK 11:37 Cˀia⁴ nca³ Jesús je³qui³nchja⁴, jnco³ cho⁴ta⁴ fariseo tsa³cˀe¹tsˀoa³-le⁴ nca³ coa⁴cjen⁴cao⁴. Ja³ˀa³sˀen³ Jesús, tsa³cˀe²jna³tˀa³ ya¹mi²xa⁴.
LUK 11:38 Je² cho⁴ta⁴ fariseo coan³xcon¹-le⁴ cˀia⁴ nca³ tsa³ve³ nca³ tsi² tsa³ca³ne¹jon³ ntsja³ to⁴nqui³-ni³ nca³ coa⁴cjen⁴.
LUK 11:39 Je² Señor qui³tso²-le⁴: Jon² xi³ cho⁴ta⁴ fariseo ˀmi²-no³, ya⁴ son²ncˀa³-le⁴ cho⁴tsin¹ cao⁴ čhoa⁴-ve⁴ ni²tsjao³, to⁴nca³ ja⁴ya³ ni⁴ma⁴-no³ tjio¹qui³tse³-ni³ cjoa⁴che¹ cao⁴ cjoa⁴tsˀen⁴.
LUK 11:40 Xi¹jion³, je² xi³ qui³si³nta³ son²ncˀa³-le⁴, a³ tsi² cˀoa⁴-ti⁴ qui³si³nta³ ja⁴ya³-le⁴.
LUK 11:41 To⁴nca³ je² xi³ ncha³ya³ tso³jmi²-no³ tˀai²cjoa⁴tjao²-lao⁴³ xi³ yo⁴ma⁴. Coe⁴-ni³ nca³yi³je³ tsje³ coan⁴-no³.
LUK 11:42 Ma⁴-xo¹nio³ jon², cho⁴ta⁴ fariseo, nca⁴ jnco³ ya³ xi³ te³ya³ ma³-ni³ vˀao²³ xi³ tsˀe⁴ xca⁴xi³ cao⁴ xca⁴ ruda cao⁴ nca³yi³je³ ˀnti¹ xca⁴ntia⁴-ve⁴, to⁴nca³ tˀa³xin² vˀe²jnao³ je² xi³ cjoa⁴qui²xi⁴ cao⁴ cjoa⁴tjao²cha³ xi³ tˀa³tsˀe⁴ Ni³na¹. Je² cjoa⁴-vi⁴ ma³chjen¹ nca³ cˀoa⁴sˀiaon⁴³ tsa²cai³, cˀoa⁴ li²coi³ ma³chjen¹ nca³ ni²cˀe¹yo³tˀa³-xion²³ xi³cˀa³ cjoa⁴-ve⁴.
LUK 11:43 Ma⁴-xo¹nio³ jon², cho⁴ta⁴ fariseo, nca⁴ tsjoa³chao³ ˀnte³ xi³ ti¹tjon² ya⁴³ ntˀia³ sinagoga, cˀoa⁴ cjoa⁴ni²xa³tˀa³-no³ ya⁴ nti⁴tsin⁴-ve⁴.
LUK 11:44 Ma⁴-xo¹nio³ jon², cho⁴ta⁴ scribano cao⁴ cho⁴ta⁴ fariseo, xi³ jao²ncjain¹, xi³ cjoaon³ jo³-ni³ tsa² tsjo¹ xi³ tsi² coi³ ma³tsen³, cˀoa⁴ xi³ vˀe¹ma³son²-le⁴ cho⁴ta⁴ nca³ li²coi³ ve³.
LUK 11:45 Cˀoa⁴ qui³tso² jnco³ cho⁴ta⁴chji⁴ne⁴ xi³ tsˀe⁴ cjoa⁴te¹xo³ma³: Maestro, cˀia⁴ nca³ cˀoa⁴si³ je² cjoa⁴ je²-vi⁴, cˀoa⁴ti⁴ no²cjoa⁴ˀaon³-na³jin⁴.
LUK 11:46 Jesús qui³tso²: Ma⁴-xo¹nio³ nta³ tsa² jon², cho⁴ta⁴chji⁴nao⁴³ xi³ tsˀe⁴ cjoa⁴te¹xo³ma³, nca³ ni²cˀao³ chˀa¹ cho⁴ta⁴ xi³ tsi²coi³ coan⁴ coai⁴cao⁴, to⁴nca³ jon²-vi⁴ ni⁴jnco³-jin² na⁴jma¹ntsao⁴³ ni²cao⁴-nio³ chˀa¹-ve⁴.
LUK 11:47 Ma⁴-xo¹nio³ jon² xi³ vˀe²ntao³ tsjo¹-le⁴ cho⁴ta⁴ xi³ qui³nchja⁴ya³, xi³ nˀai³jcha¹cjin³-no³ qui³si³cˀen³.
LUK 11:48 Cjoa⁴qui²xi⁴ nca³ vˀao²³ en¹, cˀoa⁴ tjio¹jnco³ta³con²³ cjoa⁴ xi³ qui³sˀin³ nˀai³jcha¹cjin³-no³, nca⁴ ña³qui³ cjoa⁴qui²xi⁴ je² ni¹ xi³ qui³si³cˀen³, cˀoa⁴ jon² xi³ vˀe²ntao³ tsjo¹-le⁴.
LUK 11:49 Ni³na¹ cao⁴ cjoa⁴ˀi³sen³ta³con²-le⁴ qui³tso²: Si³ca³sen¹-le⁴ cho⁴ta⁴ xi³ coi⁴nchja⁴ya³ tˀa³tsˀan⁴ cao⁴ xi³ pastro. Si⁴²cˀen³ cˀa³ xi³ tsˀe⁴, cˀoa⁴ xi³cˀa³ coai⁴tjen⁴nqui³ co²ntran⁴-le⁴.
LUK 11:50 Coi³ xi³ sˀian³ jme¹-ni³ nca³ ca²ta³ni²je¹-ni³le⁴ je² cho⁴ta⁴ xi³ ntˀai⁴ tjio¹, je² chji¹-le⁴ njin¹-le⁴ nca³tsˀi³ cho⁴ta⁴ xi³ qui³nchja⁴ya³ tˀa³tsˀe⁴ Ni³na¹, xi³ qui³xi²jten⁴ sa³ˀnta³ nca³ qui³sˀe³nta³ son³ˀnte³,
LUK 11:51 sa³ˀnta³ njin¹-le⁴ Abel, cˀoa⁴ sa³ˀnta³ njin¹-le⁴ Zacarías xi³ cˀen³ ya⁴ ˀncho²-le⁴ xta²-ve⁴ cao⁴ yo⁴nco⁴. Cˀoa⁴-sˀin² xin³-no³ nca³ si⁴je¹-le⁴ je² cho⁴ta⁴ xi³ ntˀai⁴ tjio¹.
LUK 11:52 Ma⁴-xo¹nio³ cho⁴ta⁴chji⁴ne⁴-le⁴ cjoa⁴te¹xo³ma³, nca⁴ qui³chja³ˀa²xion²³ yo²vi⁴-le⁴ cjoa⁴chji⁴ne⁴. Ti⁴jon²-nio³ li²coi³ ji³tja³sˀaon³, cˀoa⁴ je² xi³ tjio¹fa³ˀa³sˀen³ tsa³cˀe²chjoa²-lao⁴³.
LUK 11:53 Cˀia⁴ nca³ qui³tso²-le⁴ je² cjoa⁴-vi⁴, cho⁴ta⁴ scribano cao⁴ cho⁴ta⁴ fariseo tsa³cˀe¹tsˀia⁴cao⁴ nca³ tse³ tsa³ca¹nˀion¹, qui³si³jtso²ˀa³ ncjin² cjoa⁴.
LUK 11:54 Qui³si³coi²nta⁴ tˀa³xin² jo³ tjio¹co³xin⁴-le⁴ tsa² jme³ xi³ coi⁴nchja⁴, jme¹-ni³ nca³ coa⁴²nqui³-si¹ni³.
LUK 12:1 Cˀia⁴ coan³xco¹ ncjin²xcon¹ cho⁴ta⁴, qui³si³te³ˀncho² xi¹ncjin¹. Jesús tsa³cˀe¹tsˀia⁴cao⁴ nca³ qui³nchja⁴cao⁴ ti¹tjon²-cjoa²la² cho⁴ta⁴-le⁴: Ti⁴coi²ntao⁴³ yao³-no³ tˀa³tsˀe⁴ je² na⁴ˀyo⁴san³-le⁴ cho⁴ta⁴ fariseo xi³ coi³ cjoa⁴jao²ncjain¹ ni¹.
LUK 12:2 Nca³yi³je³ xi³ tjio¹jtsa³nqui³, cˀoa⁴-sˀin² jcha⁴son²tsen³-le⁴, nca³yi³je³ xi³ tjio¹ˀma³ cˀoa⁴-sˀin² jcha⁴-le⁴.
LUK 12:3 Nca⁴ je² cjoa⁴ xi³ tsa³qui³xon¹³ jin³ njion², ya⁴ jin³sen¹ coi⁴no¹ˀya²-le⁴, cˀoa⁴ xi³ qui³no²cjoa⁴chao¹³ ja⁴ya³ ntˀia³-no³, nˀion¹ coi⁴nchja⁴-ni³ ya⁴ son²ncˀa³ ni³ˀya³.
LUK 12:4 To⁴nca³ cˀoa⁴xin³-no³ xi³ mi²yo⁴-na⁴: A³li² vi³jcon³-jin²lao⁴³ je² xi³ si¹cˀen³ yao³-na¹, cˀia⁴ li²jme³-sa³ xi³ ma³ sˀin¹.
LUK 12:5 To⁴nca³ xin¹ya³-no³ ˀya³ xi³ coi⁴jcon³-lao⁴³. Ti⁴jcon¹-lao⁴³ je²-ve⁴ xi³ scan³ nca³ si¹cˀen³, tjin¹-le⁴ ˀnte³ nca³ si⁴²cˀa³tsao³jin³ je² infierno. Cˀoa⁴-sˀin² xin³-no³: Je²-ve⁴ xi³ ti⁴jcon¹-lao⁴³.
LUK 12:6 A³ tsi² sa³te¹na³ aon² ˀnti¹ni⁴se³ nca³ to⁴jao² ˀnti¹taon⁴. Ni⁴jnco³-jin² xi³ je² xi³ ti¹cha³jin³-le⁴ Ni³na¹.
LUK 12:7 Nta³ tsa² ntsja⁴jco³ tjio¹xqui⁴ nca³yi³je³. A³li² jcon³-jion²³ˀni³. Nqui²sa⁴-sa³ chji¹-no³ nca³ jon² cao⁴-ni³ tsa² ncjin² ˀnti¹ni⁴se³.
LUK 12:8 Cˀoa⁴xin³-no³, nca³ nca³tsˀi³ xi³ tsen³ coi⁴tso⁴ nqui³xcon⁴ cho⁴ta⁴ nca³ tsˀan⁴, cˀoa⁴²-ti⁴ je² ˀnti¹-le⁴ cho⁴ta⁴ tsen³ coi⁴tso⁴ nqui³xcon⁴ a²ncje⁴-le⁴ Ni³na¹ nca³ tsˀe⁴.
LUK 12:9 To⁴nca³ je² xi³ coi⁴tso⁴ nqui³xcon⁴ cho⁴ta⁴ nca³ tsi² tsˀan⁴, cˀoa⁴²-ti⁴ sˀe⁴ˀma³-le⁴ nqui³xcon⁴ a²ncje⁴-le⁴ Ni³na¹.
LUK 12:10 Je² nca³tsˀi³ xi³ nchja⁴ˀaon³-le⁴ ˀnti¹-le⁴ cho⁴ta⁴, cˀoa⁴-sˀin² cha⁴tˀa³-le⁴, to⁴nca³ je² xi³ nchja⁴ˀaon³-le⁴ je² Espíritu Santo, li²coi³ cha⁴tˀa³-le⁴.
LUK 12:11 Cˀia⁴ nca³ cjoa⁴ˀai¹cao⁴-no³ ntˀia³ sinagoga, cˀoa⁴ ya⁴ nqui³xcon⁴ cho⁴ta⁴ti¹tjon² cao⁴ cho⁴ta⁴xa¹, a³li² vˀe²xcon¹-jin²lao⁴³ jo³-sˀin² a³xo⁴ jme³-ni³ xi³ coi⁴no²cjoao⁴³ a³xo⁴ jme³-ni³ xi³ coi⁴xon¹³.
LUK 12:12 Nca⁴ je² Espíritu Santo coi⁴tso⁴ya³-no³ nca³ ti⁴coi³-ni³ hora jña³-le⁴ xi³ ma³chjen¹ nca³ coi⁴xon¹³.
LUK 12:13 Qui³tso²jnco³-le⁴ xi³ tsˀe⁴ cho⁴ta⁴ncjin²: Maestro, cˀoa⁴tˀin²-lai⁴ ntsˀe³ nca³ ca²ta³si¹jao²ya³ je² cjoa⁴tjao² xi³ sˀe⁴-na³jin⁴.
LUK 12:14 To⁴nca³ Jesús qui³tso²-le⁴: Ji³ xˀin⁴, ˀya¹ xi³ qui³si³cˀe¹jna³-na³ jo³-ni³ xca²le⁴ nca³ an³ si³jao²ya³-no³ tso³jmi² xi³ tsaon⁴³.
LUK 12:15 Cˀia⁴ Jesús qui³tso²-le⁴ nca³tsˀi³: Cho¹tsaon³, cˀoa⁴ ti⁴coi²ntao³ yao³-no³ ja⁴tˀa³tsˀe⁴ nca³yi³je³ cjoa⁴chi⁴nca⁴, nca⁴ je² cjoa⁴vi³jna³chon³-le⁴vi⁴ cho⁴ta⁴, a³li²coi³-jin² xi³ tso²-ni³le⁴ nca³ ncjin² tso³jmi² xi³ tjin¹-le⁴.
LUK 12:16 Cˀia⁴ qui³tso²ya³-le⁴ jnco³ cjoa⁴xco¹son², qui³tso²: Tse³ tso³jmi² qui³tsjoa³ je² na³nqui³-le⁴ jnco³ cho⁴ta⁴nchi⁴na¹.
LUK 12:17 Je² ti¹fa²cao⁴ jco⁴, ti¹tso²: Jme¹ xi³ sˀian³, nca⁴ tsin²-na³ jña³ coi³ncha³xcoa¹³ tso³jmi²-na⁴ xi³ ma³jcha¹.
LUK 12:18 Cˀoa⁴qui³tso²: Je²-vi⁴ cˀoa⁴sˀian³. Si³qui³xo²ya³ ni³ncˀa³-na⁴, cˀoa⁴ cˀoe³nta³ xi³ nqui²sa⁴ je³. Ya⁴-ve⁴ coi³ncha³xcoa¹³ nca³yi³je³ xi³ coan⁴jcha¹-na³ cao⁴ tso³jmi²-na⁴.
LUK 12:19 Cˀoa⁴xin¹-le⁴ ni⁴ma⁴-na⁴: Ni⁴ma⁴, cjai¹nca³ ncjin² tso³jmi² tjin¹-li² xi³ ncjin² no¹ si⁴ncha¹tjao². Ti⁴cja¹yai³, ti⁴chi³, tˀoi⁴, cjoa¹ya³tsjoai³ ta³coin²³.
LUK 12:20 To⁴nca³ Ni³na¹ qui³tso²-le⁴: Chi⁴coin¹³, je² ni⁴tjen⁴-vi⁴ cjoa⁴ˀai¹ si¹je¹-nca¹ni³ ni⁴ma⁴-li⁴, cˀoa⁴ nca³yi³je³ xi³ to⁴nqui³-ni³ tjio¹nta³-li², ˀya¹ tsˀe⁴ coan⁴.
LUK 12:21 Cˀoa⁴-sˀin² je² xi³ vˀe¹xco¹-le⁴ yao³-le⁴ cjoa⁴nchi⁴na¹ xi³ ti⁴tˀa³tsˀe⁴-ni³, a³li² nchi⁴na¹-jin² tˀa³tsˀe⁴ Ni³na¹.
LUK 12:22 Cˀia⁴ Jesús qui³tso²-le⁴ cho⁴ta⁴-le⁴: Coi³ cˀoa⁴xin³-no³, a³li² vˀe²xcon¹-jin²lao⁴³ yao³-no³ tˀa³tsˀe⁴ cjoa⁴vi³jna³chon³-no³ jme³ xi³ chi⁴nao⁴³, ni⁴ xi³ tˀa³tsˀe⁴ yao³-no³ jme³ xi³ chˀa²cjao¹³.
LUK 12:23 Je² cjoa⁴vi³jna³chon³-na¹ nqui²sa⁴ chji¹-le⁴ cao⁴-ni³ tsa² xi³ chi⁴ne⁴², cˀoa⁴ je² yao³-na¹ nqui²sa⁴ chji¹-le⁴ cao⁴-ni³ tsa² chi⁴nca³ xi³ chˀa²cja¹.
LUK 12:24 Cho¹tsen³-lao⁴³ nčha⁴², ni⁴vˀe¹ntje²-jin² jno⁴, ni⁴vˀe¹xco¹-jin², ni⁴tjin¹-jin²le⁴ jña³ vˀe¹xco¹, ni⁴ni³ncˀa³-jin² tjin¹-le⁴, cˀoa⁴ Ni³na¹ si¹cjen². Cˀoa⁴ jon² nqui²sa⁴-sa³ chji¹-no³ cao⁴-ni³ tsa² ˀnti¹ni⁴se³-ve⁴.
LUK 12:25 ˀya¹-ni³ xi³ jon²-vi⁴ xi³ coan⁴-le⁴ si⁴²ncˀa³-sa³ yao³-le⁴ jnco³ nta³, nta³ tsa² vˀe²xcon¹-lao⁴³ yao³-no³.
LUK 12:26 Tsa² tsi² tsa² coan⁴-no³ xi³ to⁴choa³ tjin¹, a¹-ni³ nca³ vˀe²xcon¹-si¹ni³lao⁴³ yao³-no³ tˀa³tsˀe⁴ cjoa⁴ xi³cˀa³-ˀni³.
LUK 12:27 Cho¹tsen³-lao⁴³ na³xo¹ jo³-sˀin² ma³jcha¹, li²coi³ si¹xa¹, ni⁴va¹ˀa³-jin², cˀoa⁴ cˀoa⁴xin³-ni³no³, li²coi³ tsa³cˀa³cja¹ na³jño³ xi³ cˀoa⁴cjoan³ nta³ tsa² Salomón cao⁴ nca³yi³je³ cjoa⁴je³ya³-le⁴.
LUK 12:28 Cˀia⁴ tsa² Ni³na¹ cˀoa⁴-sˀin² si¹cˀa³cja¹ je² xca⁴jña¹-ve⁴ xi³ tjio¹ ntˀai⁴-vi⁴, cˀoa⁴ xi³ si⁴²cˀa³tsao³jin³ lˀi¹-le⁴ nca⁴ja¹ nchaon³-li⁴, a³ tsi² nqui²sa⁴ si⁴²cˀa³cja¹-no³ jon², cho⁴ta⁴ xi³ to⁴choa³ ma³cjain¹-no³.
LUK 12:29 Jon²-ˀni³, a³li² vi³jnchi³sjai³-jion²³ jme³ xi³ chi⁴nao⁴³, jme³ xi³ sˀio⁴³, ni⁴coi³-jin² si⁴cjao¹jion³.
LUK 12:30 Nca³tsˀi³ na⁴xi⁴na³nta¹ xi³ tjin¹ i⁴ son³ˀnte³-vi⁴ va¹sjai³ nca³yi³je³ je² cjoa⁴-vi⁴. Je² Nˀai³-no³ ve³-ni¹ nca³ ma³chjen¹-no³ je² cjoa⁴-vi⁴.
LUK 12:31 To⁴nca³ ti⁴jnchi¹sjao³ cjoa⁴te¹xo³ma³-le⁴ Ni³na¹, cˀoa⁴ nca³yi³je³ je² cjoa⁴-vi⁴ cˀoai⁴son²-no³.
LUK 12:32 A³li² jcon³-jion²³, jon² xi³ to⁴choa³ ma³-ni³ xi³ ti³yo³jtion¹³, nca⁴ je² Nˀai³-na¹ cjai¹nca³ coan³tsjoa³-le⁴ nca³ tsjoa¹-no³ cjoa⁴te¹xo³ma³-le⁴.
LUK 12:33 Ta⁴te²nao³ xi³ tjin¹-no³, cˀoa⁴ tˀai² cjoa⁴tjao²-lao⁴³ xi³ yo⁴ma⁴. Ti⁴ntao³ xi³jtsa³taon⁴ xi³ tsi² tsa² coan⁴jchi¹nca³, cjoa⁴nchi⁴na¹ xi³ ti¹jna³tjao² ya⁴ ncˀa³jmi³, xi³ ni⁴cˀia³-jin² cha⁴, jña³ tsin² cho⁴ta⁴che¹-jin², ni⁴cho⁴qui³xo³-jin² si¹qui³tson¹.
LUK 12:34 Ya⁴ jña³ ti¹jna³ cjoa⁴nchi⁴na¹-no³, cˀoa⁴²-ti⁴ ya⁴ ti¹jna³ ni⁴ma⁴-no³.
LUK 12:35 Tˀe²xco¹nquio³ cja¹ntia³-no³ na³jño³-no³, cˀoa⁴ lˀi¹-no³ ca²ta³ti².
LUK 12:36 Cˀoa⁴ jon²-vi⁴ cˀoa⁴²-sˀin² nco³ya³-lao⁴³ je² cho⁴ta⁴ xi³ co³ya³-le⁴ nai³-le⁴, nca³ cjoa⁴ˀai¹-ni³ jnco³ cjoa⁴vi³xan³, jme¹-ni³ nca³ nti⁴ton⁴ sco¹ˀai²-si¹ni³le⁴ cˀia⁴ nca³ cjoa⁴ˀai¹, cˀoa⁴ si⁴²cja³ne³tˀa³ xo⁴ntjoa⁴.
LUK 12:37 Jo¹ to⁴nta³-le⁴ je² cho⁴ˀnta³-ve⁴ xi³ je² nai³-le⁴ sa⁴te¹jin³ nca³ tjio¹co³ˀnta³, cˀia⁴ nca³ cjoa⁴ˀai¹. Xi³ cjoa⁴qui²xi⁴ xi³ xin³-no³, je² nai³-le⁴ cˀoe⁴²xco¹nqui³ cja¹ntia³-le⁴ na³jño³-le⁴, si⁴²cˀe¹jna³tˀa³ ya¹mi²xa⁴ cho⁴ˀnta³-le⁴, cjoa⁴ˀai¹, cˀoe⁴²ya³-le⁴.
LUK 12:38 Nta³ tsa² cjoa⁴ˀai¹ nai³-le⁴ nca³ las diez nca³ coan³njion², nta³ tsa² cjoa⁴ˀai¹ tsa² las dos nca³ ta⁴njion²ya³-sa³, tsa² cˀoa⁴-sˀin² sa⁴te¹jin³ cho⁴ˀnta³ nca³ tjio¹co³ˀnta³, jo¹ to⁴nta³-le⁴ je² cho⁴ˀnta³ xi³ cˀoa⁴cjoan³-ve⁴.
LUK 12:39 To⁴nca³ ca²ta³ˀyao³ je²-vi⁴, tsa² je² nai³-le⁴ ntˀia³ tsa³ve³ tsa²cai³, jo³ chon³ cjoa⁴ˀai¹ cho⁴ta⁴che¹, cjoa⁴qui²xi⁴ tsa³cˀe²jna³con³ˀnta³, cˀoa⁴ li²coi³ qui³tsjoa³ˀnte²-le⁴ nca³ ja³ˀa³sˀen³ ntˀia³-le⁴.
LUK 12:40 Jon²-vi⁴ tso²cˀoa⁴, cjia³to³con² ti⁴yo³, nca⁴ je² ˀnti¹-le⁴ cho⁴ta⁴ cjoa⁴ˀai¹ coi³ hora cˀia⁴ nca³ tsi² tjin¹jin³-no³.
LUK 12:41 Cˀia⁴ Pedro qui³tso²-le⁴: Señor, a³ to⁴tˀa³tsain⁴-jin⁴ xo⁴ ˀmi²-na³jin⁴ je² cjoa⁴xco¹son²-vi⁴, a³xo⁴ cˀoa⁴-ti⁴ tˀa³tsˀe⁴ nca³tsˀi³ ni¹.
LUK 12:42 Cˀoa⁴qui³tso² je² Nai³-na¹: ˀya¹ cho⁴ˀnta³ xi³ si¹coi²nta⁴ cho⁴ˀnta³ xi¹ncjin¹, cˀoa⁴ xi³ nˀion¹tˀa³con³, xi³ nta³ ve³ xa¹, xi³ je² nai³-le⁴ si⁴²cˀe¹jna³ˀnta³ xi³cˀa³ cho⁴ˀnta³-le⁴, jme¹-ni³ nca³ tsjoa¹-si¹ni³le⁴ xi³ coa⁴cjen⁴-ni³ nca³ fi³cho² choa⁴-le⁴.
LUK 12:43 Jo¹ to⁴nta³-le⁴ je² cho⁴ˀnta³-ve⁴ xi³ je² nai³-le⁴ coan⁴ sjai³-le⁴ nca³ cˀoa⁴ti¹sˀin¹, cˀia⁴ nca³ cjoa⁴ˀai¹.
LUK 12:44 Xi³ cjoa⁴qui²xi⁴ xi³ xin³-no³, nca³ je² nai³-le⁴ si⁴²cˀe¹jna³ˀnta³ nca³yi³je³ tso³jmi²-le⁴.
LUK 12:45 To⁴nca³ tsa² je² cho⁴ˀnta³ coi⁴tso⁴jin³ ni⁴ma⁴-le⁴: Je² nai³-na⁴ cˀoa⁴čhjin³-le⁴ nca³ cjoa⁴ˀai¹, cˀoa⁴ cˀoe⁴²tsˀia⁴cao⁴ nca³ si⁴²qui²ˀaon³ cho⁴ˀnta³ xi³ xˀin⁴ cao⁴ xi³ ya¹nchjin¹, cˀoa⁴ coa⁴cjen⁴, scˀoi¹, coan⁴chˀi⁴.
LUK 12:46 Cjoa⁴ˀai¹ nai³-le⁴ cho⁴ˀnta³-ve⁴ cˀia⁴ ni⁴čhjin³ nca³ tsi² ti¹co³ya³-le⁴, cˀoa⁴ jme³ hora nca³ tsi² tsa² ve³, coa⁴²-le⁴ sa³ˀnta³ coa⁴te³nca³ yao³-le⁴, cˀoa⁴ sˀe⁴-le⁴ cjoa⁴ñˀain³ cao⁴ je² xi³ tsi² tsa² si¹cji³tjo³son².
LUK 12:47 Nˀion¹ coa⁴²-le⁴ je² cho⁴ˀnta³ xi³ tsa³ve³ jo³-sˀin² coan³me³-le⁴ nai³-le⁴, cˀoa⁴ li²coi³ tsa³cˀe²jna³nta³, ni⁴cˀoa⁴-jin² qui³sˀin³ jo³-sˀin² nca³ me³-le⁴.
LUK 12:48 To⁴nca³ je² xi³ li²coi³ tsa³ve³, cˀoa⁴ xi³ cˀoa⁴qui³sˀin³ cjoa⁴ xi³ va³quin²-le⁴ nca³ coa⁴²-le⁴, coa⁴²choa³-le⁴. To⁴ˀya³-ni³ xi³ tse³ qui³tsˀai²-le⁴, tse³ si⁴²je¹ nqui²jnco³cˀa²-le⁴. Cˀoa⁴ je² xi³ tse³ qui³tsˀai²-le⁴ nca³ si⁴²coi²nta⁴, nqui²sa⁴ tse³ si⁴²je¹son²-le⁴.
LUK 12:49 Lˀi¹ ja²ˀai⁴ si³ca³sˀen³jian³ i⁴ son³ˀnte³. Jme¹-sa³ xi³ me³-na³ tsa² je³ti¹ti².
LUK 12:50 Tjin¹ cjoa⁴sa³te¹nta¹ xi³ nta³ ma³chjen¹-na³ nca³ an³ sa³te¹nta¹³. A³li² to⁴cˀoa⁴cji³ si³cjao¹jian³ sa³ˀnta³ coan⁴jnco³.
LUK 12:51 A³ ni²cja³ˀai³tsjen³-nio¹³ nca³ cjoa⁴ xi³ nchˀan¹ tjin¹ je²ˀe⁴ si³cˀe¹jna³-le⁴ i⁴ son³ˀnte³. Ma³jain² cˀoa⁴xin³-no³, to⁴nca³ xi³ si¹jao²ya³ cho⁴ta⁴.
LUK 12:52 Ntˀai⁴ xi³ fi²-ni³ jan¹, cˀoi⁴²-sˀin² coi⁴yo³, coan⁴jao²ya³ aon² nca³ jnco³ ni³ˀya³, jan² co²ntran⁴-le⁴ nca³ jao², cˀoa⁴ jao² co²ntran⁴-le⁴ nca³ jan².
LUK 12:53 Coan⁴jao²ya³ nca³tsˀi³. Je² nˀai³ co²ntran⁴ coai⁴-le⁴ ti³-le⁴, cˀoa⁴ ti³-le⁴ co²ntran⁴ coai⁴-le⁴ nˀai³-le⁴. Na⁴-le⁴ co²ntran⁴ coai⁴-le⁴ tso²ti³-le⁴, cˀoa⁴ tso²ti³-le⁴ co²ntran⁴ coai⁴-le⁴ na⁴-le⁴, cˀoa⁴ xi³ na⁴cha¹ co²ntran⁴ coai⁴-le⁴ ˀnta³-le⁴, cˀoa⁴ xi³ ˀnta³ co²ntran⁴ coai⁴-le⁴ na⁴cha¹-le⁴.
LUK 12:54 Cˀoa⁴²-ti⁴ Jesús qui³tso²-le⁴ cho⁴ta⁴ncjin²: Cˀia⁴ nca³ jchao⁴³ yo³jvi³ xi³ vi³tjo³-ni³ jña³ ca³ntjai²-ni³ tsˀoi¹, nti⁴ton⁴ vi³xon¹³-ˀni³: Jtsi¹ cˀoa⁴ ntˀai⁴. Cˀoa⁴-jin² coan⁴.
LUK 12:55 Cˀia⁴ nca³ jchao⁴³ nca³ fa³ˀa³ ntjao⁴qui³xi² xi³ nčhoa¹-ni³ nca³scon¹-le⁴ son³ˀnte³, vi³xon¹-ˀni³: Ntoa¹ nˀion¹ coan⁴sjoe², cˀoa⁴-jin² coan⁴-ˀni³.
LUK 12:56 Cho⁴ta⁴ jao²ncjain¹ nio¹³, ma³-no³ nca³ cho¹tˀao³ jo³ ma³ chon³ son³ˀnte³ cao⁴ ncˀa³jmi³. A¹-ni³ nca³ tsi² ˀya³-si¹nio³ jo³-sˀin² cho¹tˀao³ coi³ ni⁴čhjin³-vi⁴ ntˀai⁴.
LUK 12:57 A¹-ni³ nca³ tsi² tsa² ti⁴jon² ˀya³-si¹nio³ xi³ cjoa⁴qui²xi⁴.
LUK 12:58 Cˀia⁴ nca³ cˀoin¹³ cao⁴ co²ntran⁴-li⁴ nqui³xcon⁴ cho⁴ta⁴xa¹, cho¹son² nti⁴ton⁴-lai⁴ nca³ nta³ cˀoe¹ntai³ cjoa⁴-li⁴ cao⁴ co²ntran⁴-li⁴ ya⁴ya³ ntia⁴², jme¹-ni³ nca³ tsi² tsa² cjoa⁴nˀion¹ coai⁴cao⁴-si¹ni³li² nqui³xcon⁴ xca²le⁴, cˀoa⁴ je² xca²le⁴-ve⁴ sca⁴ni²tˀa³-li² policía, cˀoa⁴ je² policía sca⁴ni¹sˀen³-li² nto⁴ya¹.
LUK 12:59 Cˀoa⁴xin³-le⁴ nca³ li²coi³ ti⁴coan⁴ coi²tjo⁴-ni³ xi³ ya⁴-ve⁴, sa³ˀnta³ nca³ cˀoe¹chji¹ntjai² yao³-li⁴ nca³yi³je³ jo³ tjin¹ xi³ cji³ne²-li².
LUK 13:1 Ti⁴coi³-ni³ ni⁴čhjin³ tjio¹ cˀa³ cho⁴ta⁴ xi³ tsa³cˀe¹-le⁴ na⁴jmi¹ Jesús xi³ tˀa³tsˀe⁴ cho⁴ta⁴ galileo. Coi³ njin¹-le⁴ cho⁴ta⁴-ve⁴ xi³ Pilato tsa³cˀe¹jten⁴jin³-le⁴ njin¹-le⁴ cho⁴ xi³ cho⁴ta⁴-ve⁴ qui³tsjoa³tˀa³-le⁴ Ni³na¹.
LUK 13:2 Jesús qui³tso²-le⁴: Jo¹ vi³xon¹³, a³ nqui²sa⁴ to⁴cho⁴ta⁴tsˀen⁴ coan³ je² cho⁴ta⁴ galileo cao⁴-ni³ tsa² nca³tsˀi³ cho⁴ta⁴ galileo, nca⁴ cˀoa⁴-sˀin² tsa³cja³ˀa¹ cjoa⁴ñˀain³.
LUK 13:3 Ma³jain², xin³-no³, to⁴nca³ tsa² tsi² si⁴cˀa³ntjai²ya³ nqui²ntia³-nio³ cjoa⁴fa³ˀai³tsjen³-no³, cˀoa⁴-ti⁴sˀin² coi⁴ya¹-nio³ˀni³.
LUK 13:4 A³xo⁴ je² xi³ čhja³ˀaon²jan² xi³ torre qui³sca³ne²-le⁴ ya⁴ Siloé, cˀoa⁴ qui³si³cˀen³-ni¹, jo¹ vi³xon¹³, a³ nqui²sa⁴-sa³ tse³ qui³tjen⁴-le⁴ cao⁴-ni³ tsa² nca³tsˀi³ cho⁴ta⁴ xi³ tjio¹ ya⁴ Jerusalén.
LUK 13:5 Ma³jain², xin³-no³, to⁴nca³ tsa² tsi² si⁴cˀa³ntjai²ya³ nqui²ntia³-nio³ cjoa⁴fa³ˀai³tsjen³-no³, cˀoa⁴-ti⁴sˀin² coi⁴ya¹-nio³ˀni³.
LUK 13:6 Cˀia⁴ Jesús qui³tso² je² cjoa⁴xco¹son²: Jnco³ cho⁴ta⁴ xi³ tjin¹-le⁴ ya¹ higo xi³ tjin¹ntje²-le⁴ ya⁴jin³ tso³jmi²ntje²-le⁴. Ja³ˀai³ ca¹sjai³ to³-le⁴, cˀoa⁴ li²coi³ qui³sa³co³-le⁴.
LUK 13:7 Cˀoa⁴ qui³tso²-le⁴ xi³ si¹coi²nta⁴ tso³jmi²ntje²-ve⁴: Coe⁴-ni³, je³coan³ jan² no¹ nca³ fa²ˀai⁴ ca³sje²³ to³-le⁴ ya¹ higo xo⁴ cji³-vi⁴, cˀoa⁴ li²coi³ sa³co¹-na³. Ti⁴chao¹³, a¹-ni³ nca³ to⁴cjoa⁴tjao² si¹cji³tson¹-ni³ na³nqui³.
LUK 13:8 Je² cho⁴ˀnta³-ve⁴ qui³tso²-le⁴: Señor, ca²ta³se¹jna³-la²sa³ to⁴je²-sa³ no¹-vi⁴ sa³ˀnta³ coi³ncha²xan⁴-le⁴ na³nqui³, cˀoa⁴ si³tje¹ˀnte³-le⁴.
LUK 13:9 Cˀia⁴ tsa² no¹ xi³jnco³ coa⁴-le⁴ to³, nta³-ni¹ˀni³. Cˀoa⁴ tsa² mai³, coi⁴chai¹³-ˀni³.
LUK 13:10 Jnco³ ni⁴čhjin³ ni²cja¹ya³ Jesús tsa³ca³co¹ya³ ya⁴³ ntˀia³ sinagoga.
LUK 13:11 Coe⁴-ni³ jnco³ chjon⁴² xi³ čhja³ˀaon²jan² no¹ tjin¹-le⁴ ntjao⁴ xi³ nta³jin³ xi³ tsjoa¹-le⁴ chˀin³. Cji³nia³ nca³ tsˀa³mjen³, cˀoa⁴ ni⁴to⁴jo³-jin²sˀin² ma³qui²xi⁴.
LUK 13:12 Cˀia⁴ nca³ Jesús tsa³ve³, qui³nchja⁴-le⁴: Chjon⁴², je³to²mjen³nta³-lai⁴ chˀin³-li⁴.
LUK 13:13 Jesús tsa³ca¹jna³son²-le⁴ ntsja³, cˀoa⁴ nti⁴ton⁴ tsa³cja³qui²xi⁴-ni³, cˀoa⁴ tsa³cˀa³sje³je³ya³ Ni³na¹.
LUK 13:14 Je² cho⁴ta⁴ti¹tjon²-le⁴ ntˀia³ sinagoga coan³jti³-le⁴, nca³ Jesús qui³si³xqui³-le⁴ cˀia⁴ nca³ ni⁴čhjin³ ni²cja¹ya³. Cˀoa⁴ cho⁴ta⁴ti¹tjon² qui³tso²-le⁴ cho⁴ta⁴ncjin² xi³ ya⁴ tjio¹: Jaon³ ni⁴čhjin³ tjin¹-ni³ nca³ ma³ ni²xa¹. Coi³ ni⁴čhjin³-ve⁴ nčhoao¹³, cˀoa⁴ coan⁴nta³-nio³, cˀoa⁴ mai³ cˀia⁴ nca³ ni⁴čhjin³ ni²cja¹ya³.
LUK 13:15 Cˀia⁴ je² Nai³-na¹ qui³tso²-le⁴: Cho⁴ta⁴ jao²ncjain¹ nio¹³. Jnco¹jnco¹ nca³ jon²-vi⁴, a³ tsi² chjo¹jnta¹nˀion¹³ nčha⁴ja⁴-no³ a³xo⁴ bo¹rro¹-no³ ya⁴ ntˀia³cho⁴-ve⁴ cˀia⁴ nca³ ni⁴čhjin³ ni²cja¹ya³, cˀoa⁴ coa⁴nquin¹cao⁴³ nca³ coa⁴nquin¹ ni²cˀio³ na³nta¹.
LUK 13:16 Cˀoa⁴ je² ˀnti¹tso²ti³-le⁴ Abraham xi³ Satanás tsa³cˀe¹nˀion¹-le⁴ čhja³ˀaon²jan² no¹, a³ tsi² tsa² ma³chjen¹ nca³ tjo¹jnta¹ je² chjon⁴²-vi⁴ coi³ ni⁴čhjin³ ni²cja¹ya³.
LUK 13:17 Cˀia⁴ nca³ ti¹tso² je² cjoa⁴-vi⁴, coan³soa³-le⁴ nca³tsˀi³ xi³ co²ntran⁴-le⁴, to⁴nca³ nca³tsˀi³ cho⁴ta⁴ncjin² coan³tsjoa³-le⁴ nca³yi³je³ cjoa⁴ xi³ je³ya³ xi³ Jesús qui³sˀin³.
LUK 13:18 Cˀia⁴ Jesús qui³tso²: Jme¹ xi³ nco¹son² coan⁴-na¹ cjoa⁴te¹xo³ma³-le⁴ Ni³na¹. Jme¹ cjoa⁴ xi³ si³nco¹son²coa⁴.
LUK 13:19 Cˀoa⁴-sˀin² nco³ya³-le⁴ jnco³ ˀnti¹na⁴xin⁴ xi³ tsˀe⁴ mostaza xi³ qui³scoe¹ cho⁴ta⁴. Tsa³cˀe¹ntje² jin³ tso³jmi²ntje²-le⁴. Coan³ntje², cˀoa⁴ jnco³ ya¹ coan³, cˀoa⁴ ni⁴se³ xi³ si¹ma³jin³sen¹ tsa³cˀe¹nta³ˀa³ tje¹-le⁴.
LUK 13:20 Cˀoa⁴ qui³tso² nqui²jnco³cˀa²: Jme¹ cjoa⁴ xi³ si³nco¹son²coa⁴ je² cjoa⁴te¹xo³ma³-le⁴ Ni³na¹.
LUK 13:21 Cˀoa⁴-sˀin² nco³ya³-le⁴ na⁴ˀyo⁴san³ xi³ qui³scoe¹ jnco³ chjon⁴², cˀoa⁴ jan² choa⁴ scoan⁴ nio⁴xti²la⁴ qui³si³cˀo¹jin³ sa³ˀnta³ qui³tsin³jin³ nca³yi³je³ na⁴ˀyo⁴scoan⁴-ve⁴.
LUK 13:22 Jesús ja³ˀa³to³ nca³qui³jnta² na⁴xi⁴na³nta¹ cao⁴ nqui³chao³. Ti¹va³co¹ya³, cˀoa⁴ ti¹fi² ntia⁴² Jerusalén.
LUK 13:23 Jnco³ cho⁴ta⁴ qui³tso²-le⁴: Señor, a³ to⁴choa³ ma³-ni³ xi³ vi³tjo³ntjai². Jesús qui³tso²-le⁴:
LUK 13:24 Chˀa²sjao³ nca³nˀion¹-no³ nca³ coi⁴tja¹sˀaon³ xo⁴ntjoa⁴ xi³ nčhˀoe²ya³. Cˀoa⁴xin³-no³ nca³ jon²-vi⁴ nca³ cjai¹ ncjin² xi³ coa⁴sjai³ nca³ cjoa⁴ˀa³sˀen³, to⁴nca³ li²coi³ coan⁴-le⁴.
LUK 13:25 Coan⁴scan³-ni³ nca³ je² nˀai³-le⁴ ntˀia³ coi⁴so¹tjen⁴ nca³ cˀoe⁴²chjoa² xo⁴ntjoa⁴, cˀoe¹tsˀia⁴cao⁴³ nca³ coi⁴yo³ nti³tsin³, cˀoa⁴ si⁴cja³ne³tˀao³ xo⁴ntjoa⁴, coi⁴xon¹³: Señor, Señor, ti⁴nto¹ˀai²-na³jin⁴, cˀoa⁴ coi⁴tso⁴-no³: Li²coi³ ˀve³-no³ jña³-ni³ tsaon⁴³.
LUK 13:26 Cˀia⁴ cˀoe¹tsˀia⁴cao⁴³ nca³ cˀoa⁴cˀoin¹-lao⁴³: Nqui³xcoin³ tsa³qui³chi³⁴-jin⁴, qui³ˀyoi²⁴-jin⁴, cˀoa⁴ ya⁴ nti⁴tsin⁴-na⁴jin⁴ tsa³ca³co²yai³.
LUK 13:27 Cˀoa⁴ je² coi⁴tso⁴-no³: Cˀoa⁴²xin³-no³ nca³ tsi² coi³ ˀve³-no³ jña³-ni³ tsaon⁴³, ti⁴ncha³xin²-nao¹³ nca³tsˀio³, cho⁴ta⁴ xi³ cjoa⁴tsˀen⁴ sˀiaon⁴³.
LUK 13:28 Ya⁴ chi¹ˀntao¹³ tsao⁴nao²³ ni⁴ˀño³ cˀia⁴ nca³ jchao³ Abraham, Isaac, Jacob, cao⁴ nca³tsˀi³ xi³ qui³nchja⁴ya³ tˀa³tsˀe⁴ Ni³na¹, xi³ ya⁴ tjio¹ ya⁴ cjoa⁴te¹xo³ma³-le⁴ Ni³na¹. Cˀoa⁴ jon² tˀa³xin²-nio¹³.
LUK 13:29 Cho⁴ta⁴ cjoi⁴nčhoa³-ni³ ya⁴jña³ tjo³-ni³ tsˀoi¹, cˀoa⁴ ya⁴ jña³ ca³ntjai²-ni³ tsˀoi¹, cˀoa⁴ nca³qui²xi⁴, cˀoa⁴ nca³scon¹-le⁴ son³ˀnte³, cˀoa⁴ cˀoe¹yo³tˀa³ ya¹mi²xa⁴ ya⁴ cjoa⁴te¹xo³ma³-le⁴ Ni³na¹.
LUK 13:30 Coe⁴-ni³ je² xi³ fe³tˀa³-ni³ ti¹tjon² coan⁴, cˀoa⁴ je² xi³ ma³ti¹tjon² cjoe⁴tˀa³-ni³ coan⁴.
LUK 13:31 Ti⁴coi³-ni³ hora ji³cho² cˀa³ cho⁴ta⁴ fariseo xi³ qui³tso²-le⁴: Ti²tjoi⁴, cˀoa⁴ tˀin³-ni³ i⁴-vi⁴, nca⁴ Herodes me³-le⁴ si⁴²cˀen³-li².
LUK 13:32 Jesús qui³tso²-le⁴: Ta⁴nquion¹³, cˀoa⁴tˀin²-lao⁴³ je² ni⁴nta⁴-ve⁴, coe⁴-ni³ vˀa³sje³xin²-nia³ nai⁴² xi³ nta³jin³, cˀoa⁴ si³nta³-nia³ cho⁴ta⁴ ntˀai⁴-vi⁴ cao⁴ nchaon³-li⁴, cˀoa⁴ cˀia⁴ nca³ coi⁴cho² jan² ni⁴čhjin³ si³cje³tˀa³-nia³ xa¹-na⁴.
LUK 13:33 To⁴nca³ ma³chjen¹ nca³ ntˀai⁴-vi⁴ cao⁴ nchaon³-li⁴ cao⁴ jnqui³-li⁴ nca³ cjoi¹-nia¹³, nca⁴ tsi² tsa² coi³ coan⁴ nca³ cho⁴ta⁴ xi³ nchja⁴ya³ tˀa³tsˀe⁴ Ni³na¹ coi⁴ya¹tˀa³xin²-le⁴ Jerusalén.
LUK 13:34 Jerusalén, Jerusalén, ji³ xi³ ni²cˀain³ cho⁴ta⁴ xi³ nchja⁴ya³ tˀa³tsˀe⁴ Ni³na¹, cˀoa⁴ la⁴jao⁴ ni²cˀen³-ni³ je² xi³ ni²ca³sen¹con³-li² nca³ ji³. Jo¹-la²na¹ tjin¹ cˀa³ nca³ coan³me³-na³ nca³ tsa³cˀe³xcoa¹³ ˀnti¹xti³-li⁴ jo³-ni³ tsa² xa⁴ˀnta⁴ xi³ vˀe¹nqui³jnca³ ˀnti¹-le⁴, to⁴nca³ coan³cai³-li².
LUK 13:35 Coe⁴-ni³ sˀe³jna³-no³ ntˀia³-no³, to⁴nca³ cˀoa⁴xin³-no³ nca³ li²coi³ ti⁴jcha⁴-ni³nao¹³ sa³ˀnta³ nca³ coi⁴xon¹³: Jo¹ to⁴nta³-le⁴ je² xi³ nčhoa¹ nca³jao³-le⁴ Nai³-na¹.
LUK 14:1 Jnco³ ni⁴čhjin³ ni²cja¹ya³ Jesús ja³ˀa³sˀen³ ni³ˀya³-le⁴ jnco³ cho⁴ta⁴ti¹tjon²-le⁴ cho⁴ta⁴ fariseos, nca³ coa⁴cjen⁴, tjio¹co³xin⁴-le⁴.
LUK 14:2 Coe⁴-ni³, jnco³ cho⁴ta⁴ xi³ nchi³con³jao³ ti¹jna³ nqui³xcon⁴ Jesús.
LUK 14:3 Jesús qui³nchja⁴cao⁴ cho⁴ta⁴chji⁴ne⁴ xi³ ve³ cjoa⁴te¹xo³ma³ cao⁴ cho⁴ta⁴ fariseos, qui³tso²-le⁴: A³ tjo³ˀnte³ nca³ ma³xqui³-le⁴ cˀia⁴ nca³ ni⁴čhjin³ ni²cja¹ya³.
LUK 14:4 To⁴nca³ je² to⁴jyo¹ tsa³cˀe¹yo³. Cˀia⁴ Jesús qui³scoe¹ cho⁴ta⁴-ve⁴, qui³si³nta³-le⁴, cˀoa⁴ qui³sca³ni¹.
LUK 14:5 Cˀia⁴ qui³tso²-le⁴ xi³cˀa³: Tsa² bo¹rro¹, cˀoa⁴ tsa² nčha⁴ja⁴ xi³ tsaon⁴³ sca⁴sˀen³ jnco³ nca⁴jao⁴, ˀya¹-ni³ xi³ jon² xi³ tsi² coi³ chˀa⁴sje³ nti⁴ton⁴³ nta³ tsa² ni⁴čhjin³ ni²cja¹ya³.
LUK 14:6 Li²coi³ coan³-le⁴ nca³ qui³nchja⁴ je² cjoa⁴-vi⁴.
LUK 14:7 Cˀia⁴ nca³ Jesús qui³sco²tsen³-le⁴ jo³-sˀin² nca³ je² cho⁴ta⁴ xi³ xa¹ ca²no²cjoa⁴-le⁴ qui³scoe¹jin³ ya¹xi²le⁴ xi³ ti¹tjon² xi³ sˀe³jna³tˀa³ ya¹mi²xa⁴, tsa³cˀe¹-le⁴ na⁴jmi¹ jnco³ cjoa⁴xco¹son², qui³tso²-le⁴:
LUK 14:8 Tsa² coi⁴nchja⁴jnco³-li² xi³ coi⁴chi³coai⁴ jña³ nca³ vi³xan³, a³li² ya⁴-jin² vi³jna³soin²³ ya¹xi²le⁴ ti¹tjon², tsa² coi³ ni⁴čhjin³ tjin¹ nqui²jnco³ cho⁴ta⁴ xi³ nqui²sa⁴ ti¹tjon² cao⁴-ni³ tsa² ji³, xi³ xa¹ ca²no²cjoa⁴-ni³le⁴.
LUK 14:9 Cjoa⁴ˀai¹ xi³ qui³nchja⁴-li², cˀoa⁴ je² coi⁴tso⁴-li²: Tˀai²-lai⁴ ˀnte³ cho⁴ta⁴ je²-vi⁴. Cˀia⁴-jin² coan⁴soa³-li²ˀni³ nca³ coi⁴jnai³ ˀnte³ xi³ fe³tˀa³-ni³ jan¹.
LUK 14:10 To⁴nca³ cˀia⁴ nca³ coi⁴no²cjoa⁴-li², tˀin³, ti⁴jnai³ ˀnte³ xi³ fe³tˀa³-ni³. Cˀoa⁴-sˀin² cˀia⁴ nca³ cjoa⁴ˀai¹ je² xi³ qui³nchja⁴-li², tsa² cˀoa⁴coi⁴tso⁴-li²: Mi²yo⁴, tˀin³ vˀa³cja¹mi³tˀain³, cˀia⁴-jin² sˀe⁴-li² cjoa⁴je³ya³ nqui³xcon⁴ cho⁴ta⁴ xi³ to⁴ña³ tjio¹tˀa³ ya¹mi²xa⁴.
LUK 14:11 Nca³tsˀi³ xi³ ncˀa³ vˀa³sje³ yao³-le⁴, cjai¹nca³ na³nqui³ coan⁴-ni³, cˀoa⁴ je² xi³ na³nqui³ vˀa³sje³ yao³-le⁴, ncˀa³ coi⁴tjo³-ni³.
LUK 14:12 Jesús cˀoa⁴-ti⁴ qui³tso²-le⁴ xi³ xa¹ qui³nchja⁴-le⁴: Cˀia⁴ nca³ vˀe²ntai³ comida a³xo⁴ cjen²sˀoi¹, a³li² no²cjoa⁴-jin²lao⁴³ xi³ to⁴mi²yo⁴-li⁴, ni⁴to⁴ntsˀai³-jin², ni⁴to⁴xi²nqui⁴-jin², ni⁴to⁴ cho⁴ta⁴nchi⁴na¹ xi³ ntai³ ntˀia³-li⁴jin², jme¹-ni³ nca³ tsi² tsa² je² cˀoa⁴-ti⁴sˀin² coi⁴nchja⁴-si¹ni³li², cˀoa⁴ cˀoa⁴-sˀin² cˀoe⁴²chji¹-si¹ni³li² je²-vi⁴.
LUK 14:13 To⁴nca³ cˀia⁴ nca³ sˀoi¹ no²sjai³, ti⁴no²cjoa⁴-lai⁴ cho⁴ta⁴yo⁴ma⁴, cˀoa⁴ xi³ yo⁴ma⁴ cjoan³ yao³-le⁴, xi³ chi⁴ˀnque¹, xi³ xca⁴.
LUK 14:14 Jo¹ to⁴nta³ coan⁴-li², nca³ tsi² tsa² coan⁴-le⁴ cˀoe⁴²chji¹ nqui²ntia³-ni³li², ya⁴ coan⁴chji¹ nqui²ntia³-li² cˀia⁴ nca³ cjoa⁴ˀa¹ya³-le⁴ cho⁴ta⁴cjoa⁴qui²xi⁴.
LUK 14:15 Cˀia⁴ nca³ qui³nčhˀoe¹ je²-vi⁴, jnco³ xi³ to⁴ña³ tjio¹tˀa³ ya¹mi²xa⁴, qui³tso²-le⁴: Jo¹ to⁴nta³-le⁴ je² xi³ coa⁴cjen⁴ ya⁴ cjoa⁴te¹xo³ma³-le⁴ Ni³na¹.
LUK 14:16 Cˀia⁴ Jesús qui³tso²-le⁴: Jnco³ cho⁴ta⁴ tsa³cˀe¹nta³ tso³jmi² nca³ cjen²sˀoi¹, cˀoa⁴ qui³nchja⁴-le⁴ ncjin² cho⁴ta⁴.
LUK 14:17 Cˀia⁴ nca³ ji³cho²ca³ hora-le⁴ nca³ vi³chi³, qui³si³ca³sen¹ cho⁴ˀnta³-le⁴ nca³ coi⁴nchja⁴-le⁴ je² xi³ cjoa⁴ˀai¹. Cho⁴ˀnta³-ve⁴ cˀoa⁴qui³tso²-le⁴: Nčhoao¹³. Je³tjin¹nta³ nca³yi³je³.
LUK 14:18 Tsa³cˀe¹tsˀia⁴ nca³tsˀi³ nca³ qui³tso² a³li²coi³-la⁴ coan⁴. Ni⁴jnco³-jin² xi³ tsi² cˀoa⁴qui³tso². Je² xi³ ti¹tjon², qui³tso²-le⁴: Jnco³ nqui³chao³ tsa³ca³tse³, cˀoa⁴ ma³chjen¹-na³ nca³ coi²tjoa⁴, cjoi¹ co³tsen³-le⁴. Cˀoe³tsˀoa²-le²³: Tjin¹-li² cjoa⁴je³to³con². A³li²coi³ cjoia¹³.
LUK 14:19 Xi³ nqui²jnco³ qui³tso²: Aon² nca² nčha⁴ja⁴vˀe¹nchi³ tsa³ca³tse³, cˀoa⁴ cjoi¹ co³tˀa³-cjoa²la². Cˀoe³tsˀoa²-le²³: Tjin¹-li² cjoa⁴je³to³con². A³li²coi³ cjoia¹³.
LUK 14:20 Xi³ nqui²jnco³ qui³tso²: Sˀa⁴ca²fe³ ca²vi³xan³ an³-vi⁴, coi³ cjoa⁴ nca³ tsi² tsa² coi³ cjoi¹-nia³ˀni³.
LUK 14:21 Cˀia⁴ nca³ ja³ˀai³-ni³ cho⁴ˀnta³-ve⁴, tsa³cˀe¹-le⁴ na⁴jmi¹ nca³yi³je³ je² cjoa⁴-vi⁴ nai³-le⁴. Coan³jti³-le⁴ nˀai³-le⁴ ntˀia³-ve⁴. Qui³tso²-le⁴ cho⁴ˀnta³-le⁴: Tˀin³ nti⁴toin⁴ nti⁴tsin⁴-jan¹, cˀoa⁴ cao⁴ calle-le⁴ na⁴xi⁴na³nta¹-vi⁴, cˀoa⁴ ti⁴cji³nčhoa³coai⁴ i⁴-vi⁴ cho⁴ta⁴yo⁴ma⁴, cˀoa⁴ xi³ yo⁴ma⁴ cjoan³ yao³-le⁴, xi³ chi⁴ˀnque¹, xi³ xca⁴.
LUK 14:22 Qui³tso² cho⁴ˀnta³-ve⁴: Señor, je³ca²vi³tjo³son² ntˀai⁴ jo³-sˀin² ca²vˀe²nai²³, to⁴jo³ tjin¹-sa³ ˀnte³.
LUK 14:23 Cˀoa⁴ nai³-ve⁴ qui³tso²-le⁴ cho⁴ˀnta³-le⁴: Tˀin³ ya⁴ ntia⁴²jan¹, cˀoa⁴ ntia⁴²ˀnti¹-ve⁴. Cjoa⁴nˀion¹ ti⁴cja³ˀa³sˀain³, jme¹-ni³ nca³ jtse¹-ni³ ni³ˀya³-na⁴.
LUK 14:24 Cˀoa⁴xin³-no³ nca³ ni⁴jnco³-jin² cho⁴ta⁴ xi³ qui³no²cjoa⁴-le⁴ve⁴ xi³ coa⁴cjen⁴ sˀoi¹-na⁴.
LUK 14:25 Li² to⁴cˀoa⁴cji³ cho⁴ta⁴ncjin² xi³ qui³cao⁴ Jesús, qui³si³cˀo¹fa³ya³ˀa³, qui³tso²-le⁴:
LUK 14:26 To⁴ˀya³-ni³ve⁴ xi³ fa³ˀai³con²-na³, xi³ tsi² jti³que³ nˀai³-le⁴ na⁴-le⁴ chjon⁴²-le⁴ xti³-le⁴ ntsˀe⁴ nti³chja³, cˀoa⁴ nta³ tsa² ni⁴ma⁴-le⁴, li²coi³ coan⁴ nca³ cho⁴ta⁴-na⁴ coan⁴.
LUK 14:27 To⁴ˀya³-ni³ xi³ tsi² tsa² yˀa³ cro²-le⁴ xi³ ti⁴tsˀe⁴-ni³, cˀoa⁴ xi³ tsi² tsa² nta³ coai⁴tˀa³-na³, li²coi³ coan⁴ nca³ cho⁴ta⁴-na⁴ coan⁴.
LUK 14:28 ˀya¹-ni³ xi³ jon²-vi⁴ xi³ me³-le⁴ sco¹mi³tjen⁴ jnco³ torre xi³ tsi² ti¹tjon² cˀoe¹jna³ sco¹son²-ni³le⁴ jo³ tjin¹ sˀe⁴nqui³-le⁴, tsa² tjin¹-le⁴ xi³ ma³chjen¹-le⁴ nca³ si⁴²cje³tˀa³.
LUK 14:29 Tsa² mai³ cˀia⁴ nca³ ca²fe³ ca²vˀe¹jna³ xjao¹ja⁴ma⁴, tsa² tsi² coan⁴-le⁴ si⁴²cje³tˀa³, je² nca³tsˀi³ xi³ scoe⁴ cˀoe⁴²tsˀia⁴cao⁴ nca³ coi⁴jno²que³.
LUK 14:30 Coi⁴tso⁴: Je² xe¹-vi⁴ xa¹ tsa³cˀe¹tsˀia⁴cao⁴ nca³ qui³sco²mi³tjen⁴, cˀoa⁴ li²coi³ coan³ je³tˀa³-le⁴.
LUK 14:31 A³xo⁴ jña¹-le⁴ cho⁴ta⁴ti¹tjon² xi³ sˀin⁴² cjoa⁴jchan¹ cao⁴ nqui²jnco³ cho⁴ta⁴ti¹tjon² xi³ tsi² ti¹tjon² cˀoe¹jna³ sco¹son²-ni³le⁴ tsa² cao⁴ te³ jmi³ cho⁴ta⁴ coan⁴ sa⁴te¹cjao³ je² co²ntran⁴-le⁴ xi³ cjoa⁴ˀai¹ cao⁴ can³ jmi³ cho⁴ta⁴.
LUK 14:32 Tsa² mai³, cˀia⁴ nca³ xi³jnco³ to⁴jo³ cjin³ ti¹jna³, si⁴²ca³sen¹ nca³jao³-le⁴, cˀoe⁴²tsˀoa³-le⁴ nca³ jña¹ sˀe⁴.
LUK 14:33 Cˀoa⁴-sˀin²ˀni³ to⁴ˀya³-ni³ve⁴ xi³ jon²-vi⁴ xi³ tsi² tsa² si⁴²ca³tio¹ nca³yi³je³ xi³ tjin¹-le⁴, li²coi³ coan⁴ cho⁴ta⁴-na⁴ coan⁴.
LUK 14:34 Nta³-ni¹ je² na⁴xa⁴-ve⁴, to⁴nca³ tsa² je² na⁴xa⁴-ve⁴ cha⁴jta³, jo¹-sˀin² coan⁴ nqui²ntia³ cˀoai⁴-le⁴ jta⁴.
LUK 14:35 Li²coi³ nta³ ni⁴tˀa³tsˀe⁴ na³nqui³-jin², ni⁴tˀa³tsˀe⁴ na³nqui³tje¹-jin². Xin² sˀe⁴jten³. Je² xi³ tjin¹ xo⁴ño³ xi³ nčhˀoe¹, nta³ ca²ta³va³sen¹ño³.
LUK 15:1 Ji³cho²čhian³-le⁴ Jesús nca³tsˀi³ cho⁴ta⁴ xi³ vˀe¹ña³ taon⁴va³sen³ cao⁴ cho⁴ta⁴je¹ nca³ cjoi⁴nčhˀoe¹-le⁴.
LUK 15:2 Tjio¹si¹cˀa³xqui⁴che¹ cho⁴ta⁴ fariseos cao⁴ cho⁴ta⁴ scribano xi³ tˀa³tsˀe⁴ Jesús, qui³tso²: Je²-vi⁴ nta³ fa²cao⁴ cho⁴ta⁴tsˀen⁴, cˀoa⁴ cjen²cao⁴.
LUK 15:3 Cˀia⁴ Jesús qui³tso²-le⁴ je² cjoa⁴xco¹son²-vi⁴.
LUK 15:4 ˀya¹ xˀin⁴ xi³ jon²-vi⁴ xi³ tjin¹-le⁴ jnco³ ciento va³rre², cˀia⁴ tsa² jnco³ va³rre²-ve⁴ cha⁴, a³ tsi² si⁴²ca³tio¹ xi³ ño³can³ cao⁴-ni³ čhja³ˀaon²ño³-ve⁴ ya⁴ jin³jña¹-ve⁴, cˀoa⁴ coai⁴ ca¹sjai³ xi³ ca²cha³ jo³ sa³ˀnta³ coan⁴sjai³-le⁴.
LUK 15:5 Cˀia⁴ nca³ coan⁴sjai³-le⁴, coa⁴²ntjai²čhja³ cao⁴ cjoa⁴tsjoa³.
LUK 15:6 Cˀia⁴ nca³ cjoa⁴ˀai¹ ntˀia³-le⁴ coi⁴nchja⁴ma³ña³-le⁴ mi²yo⁴-le⁴ cao⁴ xi³ čhian³ ntˀia³-le⁴, coi⁴tso⁴-le⁴: Ca²ta³ma³tsjoa³-no³ cao⁴ an³, nca⁴ je³ca²ma³sjai³ va³rre²-na⁴ xi³ qui³cha³.
LUK 15:7 Cˀoa⁴xin³-no³ nca³ cˀoa⁴-sˀin² nqui²sa⁴ tse³ cjoa⁴tsjoa³ sˀe⁴ ya⁴ ncˀa³jmi³ xi³ tˀa³tsˀe⁴ jnco³ cho⁴ta⁴tsˀen⁴ xi³ si⁴²cˀa³ntjai²ya³ cjoa⁴fa³ˀai³tsjen³-le⁴ cao⁴-ni³ tsa² ño³can³ cao⁴-ni³ čhja³ˀaon²ño³ xi³ tjin¹-le⁴ cjoa⁴qui²xi⁴, xi³ tsi² tsa² ma³chjen¹-le⁴ nca³ si⁴²cˀa³ntjai²ya³ cjoa⁴fa³ˀai³tsjen³-le⁴.
LUK 15:8 A³xo⁴ ˀya¹ chjon⁴²-ni³ xi³ ti¹jna³-le⁴ te³ ˀnti¹taon⁴čhoa³, cˀia⁴ tsa² jnco³ ˀnti¹taon⁴čhoa³ si⁴²cha³, a³ tsi² coa⁴ca² lˀi¹, cˀoa⁴ cˀoe⁴²cha³ ntˀia³-le⁴, nˀion¹ nta³ coa⁴²sjai³ jo³ sa³ˀnta³ nca³ coan⁴sjai³-le⁴.
LUK 15:9 Cˀia⁴ nca³ je³coan³sjai³-le⁴, coi⁴nchja⁴ma³ña³-le⁴ mi²yo⁴-le⁴ cao⁴ ya¹nchjin¹ xi³ čhian³ ntˀia³-le⁴, coi⁴tso⁴-le⁴: Ca²ta³ma³tsjoa³-no³ cao⁴ an³, nca⁴ je³ca²ma³sjai³-na³ je² ˀnti¹taon⁴čhoa³-vi⁴ xi³ qui³si³cha²³.
LUK 15:10 Cˀoa⁴xin³-no³ nca³ cˀoa⁴-sˀin² tjin¹ cjoa⁴tsjoa³ nqui³xcon⁴ a²ncje⁴-le⁴ Ni³na¹ xi³ tˀa³tsˀe⁴ jnco³ cho⁴ta⁴tsˀen⁴ xi³ si⁴²cˀa³ntjai²ya³ cjoa⁴fa³ˀai³tsjen³-le⁴.
LUK 15:11 Cˀia⁴ Jesús qui³tso²: Jnco³ cho⁴ta⁴ xi³ jao² ma³ xti³xˀin⁴-le⁴.
LUK 15:12 Je² xi³ ma³ˀnti¹ qui³tso²-le⁴ nˀai³-le⁴: Nˀai³, tˀai²-nai¹³ cjoa⁴tjao²-na⁴ jo³ tjin¹ xi³ an³ vˀa³cao⁴-na³ i⁴ nqui³chao³-vi⁴. Cˀoa⁴ nˀai³-le⁴ qui³si³xcoa⁴-le⁴ nqui³chao³-ve⁴.
LUK 15:13 Li²coi³ ncjin² ni⁴čhjin³ coan³scan³-ni³, je² ti³ xi³ ma³ˀnti¹ tsa³cˀe¹xco¹ nca³yi³je³ tso³jmi²-le⁴. Qui³tˀa³xin² jnco³ ˀnte³ xi³ cjin³tˀa³. Ya⁴ qui³si³cji³tson¹ xi³ qui³tsˀai²cjoa⁴tjao²-le⁴, to⁴ña³qui³ chˀao³ qui³cao⁴ yao³-le⁴.
LUK 15:14 Cˀia⁴ nca³ nca³yi³je³ je³qui³si³cje³ya³, jnco³ cji³nčha¹ xi³ nˀion¹ ja³ˀai³ ya⁴ˀnte³. Ñˀain³ tsa³cˀe²jna³ nca³ je².
LUK 15:15 Qui³, qui³tˀa³jnco³-le⁴ cho⁴ta⁴ na⁴xi⁴na³nta¹ ya⁴ ˀnte³-ve⁴. Je² qui³si³ca³sen¹ ti³-ve⁴ ya⁴ nqui³chao³-le⁴, jme¹-ni³ nca³ coai⁴ si⁴²cjen²-si¹ni³ chi⁴nca⁴.
LUK 15:16 Cˀoa⁴ coan³me³-le⁴ ti³-ve⁴ nca³ qui³si³tse³ tsˀoa⁴ cao⁴ xca⁴ xi³ cjen² chi⁴nca⁴, cˀoa⁴ ni⁴ˀya³-jin² xi³ tsjoa¹-le⁴.
LUK 15:17 Cˀia⁴ nca³ je³coan³nta³ya³-ni³ cjoa⁴fa³ˀai³tsjen³-le⁴, qui³tso²: Jo¹ tjin¹ ma³-ni³ cho⁴ˀnta³-le⁴ nˀai³-na⁴ xi³ cjai¹nca³ tjin¹-le⁴ nio⁴xti²la⁴ sa³ˀnta³ njen³nqui³-le⁴, cˀoa⁴ an³-ˀni³ ti²vi³ya³-nia¹³ cji³nčha¹ i⁴-vi⁴.
LUK 15:18 Coi²so⁴tjen⁴, cjoi¹con³-le⁴ nˀai³-na⁴, cˀoa⁴xin¹-le⁴: Nˀai³, tsa³jnquia³ je¹ xi³ tˀa³tsˀe⁴ ncˀa³jmi³, cˀoa⁴ xi³ tˀa³tsi⁴.
LUK 15:19 Li²coi³ ti⁴va³quin²-ni³na³ nca³ ˀnti¹-li⁴ cˀoin¹-na³, cˀoa⁴-sˀin² ti⁴cao⁴-nai¹³ jo³-ni³ tsa² jnco³ cho⁴ˀnta³-li⁴.
LUK 15:20 Cˀia⁴ tsa³qui³so¹tjen⁴, ji³nčhoa³nčhˀoe² nˀai³-le⁴. Cˀia⁴ nca³ cjin³-sa³ ti¹jna³, nˀai³-le⁴ tsa³ve³ coan³ma⁴que³, qui³to²ca³nˀion¹, qui³tsoa³cja¹, nˀion¹ tsa³cˀe¹ntso³ˀa².
LUK 15:21 Je² ˀnti¹-le⁴ qui³tso²-le⁴: Nˀai³, tsa³jnquia³ je¹ xi³ tˀa³tsˀe⁴ ncˀa³jmi³, cˀoa⁴ xi³ tˀa³tsi⁴. Li²coi³ ti⁴va³quin²-ni³na³ nca³ ˀnti¹-li⁴ cˀoin¹-na³.
LUK 15:22 To⁴nca³ nˀai³-ve⁴ qui³tso²-le⁴ cho⁴ˀnta³-le⁴: Chˀa⁴sjao³ na³jño³ xi³ na⁴sca¹ cjoan³, ti⁴cˀa³cjao¹³ nca³ je², cˀoa⁴² tˀe²yao³ jnco³ taon⁴nco³ na⁴jma¹ntsja³, cˀoa⁴-ti⁴ tja³ya³-lao⁴³ jte¹.
LUK 15:23 Nčhoa¹cao⁴³ nčha⁴ja⁴ˀnti¹ xi³ nchja¹, ti⁴cˀaon³. Chi⁴ne⁴², cˀoa⁴ sˀoi¹ coi⁴no⁴sje³².
LUK 15:24 Nca⁴ je² ˀnti¹-na⁴ je²-vi⁴ je³cˀen³ tsa²cai³, cˀoa⁴ ti¹jna³con³ nqui²jnco³cˀa²-nca¹ni³. Je³qui³cha³ tsa²cai³, to⁴nca³ je³²coan³sjai³-ni³ˀni³, cˀoa⁴ tsa³cˀe¹tsˀia⁴cao⁴ sˀoi¹.
LUK 15:25 Je² ˀnti¹-le⁴ xi³ ma³jchi¹nca³ ti¹jna³ nqui³chao³-jan¹, cˀoa⁴ qui³nčhˀoe¹-le⁴ čhjao³ cao⁴ xi³ tjio¹te², cˀia⁴ nca³ ti¹nčhoa¹čhian³ ntˀia³.
LUK 15:26 Qui³nchja⁴-le⁴ jnco³ cho⁴ˀnta³, qui³tsi²na³nqui³-le⁴ jme¹-ni³ je²-ve⁴.
LUK 15:27 Je² qui³tso²-le⁴: Ntsˀai³ ja³ˀai³-ni³, cˀoa⁴ nˀai³-li⁴ ca²si¹cˀen³ je² nčha⁴ja⁴ˀnti¹ xi³ nchja¹, nca⁴ to⁴cˀoa⁴²nta³ ca²tjoe¹tjao² nqui²jnco³cˀa²-ni³le⁴ ˀnti¹-le⁴.
LUK 15:28 Cˀia⁴ coan³jti³-le⁴, cˀoa⁴ cai³-le⁴ ja³ˀa³sˀen³. Coi³ cjoa⁴ ji³tjo³-ni³ nˀai³-le⁴, cˀoa⁴ tsa³cˀe¹tsˀoa³-le⁴ nca³ cjoa⁴ˀa³sˀen³.
LUK 15:29 To⁴nca³ je² qui³tso²-le⁴ nˀai³-le⁴: Coe⁴-ni³ coan³ ncjin² no¹ nca³ si³xa¹-le²³, ni⁴jnco³cˀa²-jin² ti²fa²ˀa⁴to³-le⁴ cjoa⁴te¹xo³ma³-li⁴. Ni⁴cˀia³-jin² tsa³cˀai²-nai¹³ ˀnti¹ti²ntso⁴ˀnti¹, jme¹-ni³ nca³ cˀoa³sje²-nia³ sˀoi¹ cao⁴ mi²yo⁴-na⁴.
LUK 15:30 To⁴nca³ cˀia⁴ nca³ ja³ˀai³ je² ˀnti¹-li⁴ je²-vi⁴ xi³ qui³si³cje³ cjoa⁴tjao²-li⁴ cao⁴ ya¹nchjin¹sca¹, qui³ni²cˀain³ xi³ tˀa³tsˀe⁴ je² ˀnti¹nčha⁴ja⁴ˀnti¹ xi³ nchja¹.
LUK 15:31 Cˀia⁴ nˀai³-le⁴ qui³tso²-le⁴: Ji³ ˀnti¹, i⁴² ti³jna³cao⁴ntsjai²-nai¹³vi⁴, cˀoa⁴ nca³yi³je³ xi³ tsˀan⁴ tsi⁴ ni¹.
LUK 15:32 To⁴nca³ ma³chjen¹ nca³ sˀoi¹ coi⁴no⁴sje³², cˀoa⁴ cˀoai⁴-le⁴² cjoa⁴tsjoa³ yao³-na¹, nca⁴ je² ntsˀai³-vi⁴ je³cˀen³ tsa²cai³, cˀoa⁴ ti¹jna³con³ nqui²jnco³cˀa²-nca¹ni³. Je³qui³cha³ tsa²cai³, to⁴nca³ je³coan³sjai³-ni³ˀni³.
LUK 16:1 Cˀoa⁴-ti⁴ Jesús qui³tso²-le⁴ cho⁴ta⁴-le⁴: Jnco³ cho⁴ta⁴nchi⁴na¹ tjin¹-le⁴ jnco³ cho⁴ˀnta³ xi³ ti¹jna³ˀnta³-le⁴ tso³jmi²-le⁴, cˀoa⁴ je²-vi⁴ qui³sˀe³nqui³ nqui³xcon⁴ nai³-le⁴ nca³ tso³jmi²-le⁴ ti¹si¹cje³ cjoa⁴tjao².
LUK 16:2 Nai³-ve⁴ qui³nchja⁴-le⁴: Jme¹-ni³ je²-vi⁴ xi³ ti²nčhˀoe³-le²³vi⁴. Tˀai² coi²nta⁴ xi³ tˀa³tsˀe⁴ tso³jmi² xi³ qui³ni²cˀe²jna³ˀnta³-li², nca⁴ li²coi³ ti⁴coan⁴ coi⁴jna³ˀnta³-ni³.
LUK 16:3 Cˀia⁴ je² cho⁴ˀnta³-ve⁴ ti⁴je² qui³tso² nca³ ti⁴je²-ni³: Jme¹ xi³ sˀian³. Je² nai³-na⁴ ti¹fa³ˀa¹xin²-na³ xa¹-vi⁴. A³ cjoi¹ ca³ˀnqui³-nia¹³, to⁴nca³ tsin²-na³ nca³nˀion¹. Tsa² tso³jmi² si³je¹cjoa⁴tjoa²³, cjoa⁴soa³ tjin¹-na³.
LUK 16:4 An³ xi³ ˀve³-nia³ jo³ sˀian³ jme¹-ni³ nca³ cho⁴ta⁴ tsjoa¹ˀnte³-si¹ni³na³ ya⁴ ntˀia³-le⁴, cˀia⁴ nca³ tjo¹xin²-na³ xa¹ je²-vi⁴.
LUK 16:5 Cˀia⁴ qui³nchja⁴-le⁴ nca³ jnco¹jnco¹ xi³ qui³tjen⁴-le⁴ tsˀe⁴ nai³-le⁴, qui³tso²-le⁴ xi³ ti¹tjon²: Jo¹ tjin¹ qui³tjen⁴-li² tsˀe⁴ nai³-na⁴.
LUK 16:6 Je² qui³tso²: Jnco³ ciento lata si²ti⁴. Cˀoa⁴ qui³tso²-le⁴: Chjoai¹³ xon⁴ xi³ tji¹tˀa³-li², cˀoa⁴ cji³tˀa³na³nqui³ ti⁴jnai³, cˀoa⁴ ña³chan²te³ chji¹³.
LUK 16:7 Cˀia⁴ qui³tso²-le⁴ xi³ nqui²jnco³: Cˀoa⁴ ji³, jo¹ tjin¹ qui³tjen⁴-li². Je² qui³tso²: Jnco³ ciento quin³ta² xi³ trigo: Cˀoa⁴ je² qui³tso²-le⁴: Chjoai¹³ xon⁴ xi³ tji¹tˀa³-li², cˀoa⁴ chji¹³ ño³can³ quin³ta².
LUK 16:8 Je² nai³-le⁴ tsa³cˀa³sje³nta³ je² cho⁴ˀnta³tsˀen⁴-ve⁴ xi³ ti¹jna³ˀnta³ tso³jmi²-ve⁴, nca⁴ cˀoa⁴qui³sˀin³ nca³ xˀin⁴cjoa⁴. Nca⁴ je² cho⁴ta⁴ xi³ si¹xa¹cao⁴ cjoa⁴son³ˀnte³ ntˀai⁴-vi⁴ nca³ coi³ ni⁴čhjin³-vi⁴, nqui²sa⁴ nˀion¹ chji⁴ne⁴ ma³ tˀa³tsˀe⁴ cjoa⁴ma⁴-le⁴ cao⁴-ni³ tsa² cho⁴ta⁴ xi³ tsˀe⁴ lˀi¹.
LUK 16:9 An³ cˀoa⁴xin³-no³: Mi²yo⁴ tˀiaon⁴³ xi³ tˀa³tsˀe⁴ cjoa⁴nchi⁴na¹ xi³ chˀao³ tjin¹. Cˀoa⁴-sˀin² tsjoa¹ˀnte³-no³ ya⁴ jña³ si⁴cja¹yao³ nca³ntsjai² ni⁴čhjin³ cˀia⁴ nca³ cha⁴ cjoa⁴nchi⁴na¹-no³.
LUK 16:10 Je² xi³ ña³qui³ nta³ si¹tjo³son²-le⁴ cjoa⁴ xi³ to⁴choa³ tjin¹, cˀoa⁴²-ti⁴ ña³qui³ nta³ si¹tjo³son²-le⁴ xi³ nqui²sa⁴ tse³ tjin¹ cjoa⁴. To⁴nca³ je² xi³ vˀa³na⁴cha⁴ cao⁴ cjoa⁴ xi³ to⁴choa³ tjin¹, cˀoa⁴²-ti⁴ vˀa³na⁴cha⁴ cao⁴ xi³ nqui²sa⁴ tse³ tjin¹.
LUK 16:11 Tsa² cao⁴ cjoa⁴nchi⁴na¹ xi³ chˀao³ tjin¹, li²coi³ nta³ qui³nˀiaon²³, ˀya¹ xi³ si⁴²ca³tio²ˀnta³-no³ je² cjoa⁴nchi⁴na¹ xi³ ña³qui³ cˀoa⁴tjin¹.
LUK 16:12 Cˀia⁴ tsa² cao⁴ tso³jmi²-le⁴ xi³ cja⁴ˀai¹ cho⁴ta⁴ li²coi³ nta³ qui³nˀiaon²³, ˀya¹ xi³ tsjoa¹-no³ xi³ tsaon⁴³.
LUK 16:13 Ni⁴jnco³-jin² cho⁴ˀnta³ xi³ jao² nai³-le⁴ si¹xa¹-le⁴, nca⁴ jti³que³ coan⁴ jnco³, cˀoa⁴ xi³jnco³ coan⁴tsjoa³que³, a³xo⁴ coai⁴tˀa³-le⁴ jnco³, cˀoa⁴ xi³jnco³ chˀao³ scoe⁴con³. Li²coi³ coan⁴ si⁴xa¹-lao⁴³ nca³ jao², Ni³na¹ cao⁴ cjoa⁴nchi⁴na¹.
LUK 16:14 Cˀoa⁴-ti⁴ qui³nčhˀoe¹ nca³yi³je³ je² cjoa⁴-vi⁴ je² cho⁴ta⁴ fariseos xi³ tsjoa³que³ taon⁴, to⁴tsa³qui³jno²que³ Jesús.
LUK 16:15 Cˀia⁴ Jesús qui³tso²-le⁴: Jon² xi³ nˀo²sje³ntao³ yao³-no³ nqui³xcon⁴ cho⁴ta⁴, to⁴nca³ Ni³na¹ ve³ ni⁴ma⁴-no³. Je² cjoa⁴-vi⁴ xi³ nqui²sa⁴ ncˀa³ tjin¹ jo³ tso² cho⁴ta⁴, chˀao³ tjin¹ nqui³xcon⁴ Ni³na¹.
LUK 16:16 Tjio¹ sa³ˀnta³ ni⁴čhjin³-le⁴ Juan cjoa⁴te¹xo³ma³ cao⁴ je² xi³ nchja⁴ya³ tˀa³tsˀe⁴ Ni³na¹. Cˀia⁴² sa³ˀnta³ no²cjoa⁴ya³-ni³ en¹nta³ tˀa³tsˀe⁴ cjoa⁴te¹xo³ma³-le⁴ Ni³na¹. Nca³tsˀi³ vˀa³sje³ nca³nˀion¹-le⁴ nca³ cjoa⁴ˀa³sˀen³ cjoa⁴te¹xo³ma³-ve⁴.
LUK 16:17 Nqui²sa⁴ choa³ ñˀain³ cjoa⁴ nca³ cjoe⁴tˀa³ ncˀa³jmi³ cao⁴ son³ˀnte³ cao⁴-ni³ tsa² nca³ jnco³ ˀnti¹ letra-le⁴ cjoa⁴te¹xo³ma³ xi³ tsi²coi³ coan⁴jnco³.
LUK 16:18 To⁴ˀya³-ni³ xi³ tsjion¹ chjon⁴²-le⁴, tsa² cja⁴ˀai¹ coi⁴xan³cao⁴, cjoa⁴cha³jnqui³ tjin¹-le⁴. Cˀoa⁴ je² xi³ coi⁴xan³cao⁴ je² chjon⁴² xi³ xˀin⁴-le⁴ qui³tsjion³, cjoa⁴cha³jnqui³ tjin¹-le⁴.
LUK 16:19 Tjin¹ jnco³ cho⁴ta⁴nchi⁴na¹ xi³ tsa³cˀa³cja¹ na³jño³jco³ xi³ nˀion¹ nta³. Nchaon³nchaon³ tsa³cjen²sˀoi¹.
LUK 16:20 Cˀoa⁴-ti⁴ tjin¹ jnco³ cho⁴ta⁴yo⁴ma⁴ xi³ Lázaro ˀmi², xi³ ni²cˀe¹jna³tˀa³ xo⁴ntjoa⁴-le⁴, nˀion¹ ya³jon³-le⁴ jtse¹.
LUK 16:21 Me³-le⁴ nca³ si¹tse³-ni³ yao³-le⁴ ˀnti¹čhˀoa¹ xi³ tsao³nqui³-ni³ ya¹mi²xa⁴-le⁴ cho⁴ta⁴nchi⁴na¹-ve⁴. Nta³ tsa² je² nia¹ ja³ˀai³ qui³to³ma²jon³ jtse¹-le⁴.
LUK 16:22 Cˀoa⁴ coan³-ni³ nca³ cˀen³ ˀnti¹cho⁴ta⁴yo⁴ma⁴-ve⁴. A²ncje⁴ qui³cao⁴, qui³si³cˀe¹jna³tˀa³-le⁴ Abraham. Cˀoa⁴-ti⁴ cˀen³ cho⁴ta⁴nchi⁴na¹-ve⁴, cˀoa⁴ qui³sˀe³ñai³.
LUK 16:23 Cˀoa⁴ ya⁴ ˀnte³ cjoa⁴ñˀain³ cho⁴ta⁴nchi⁴na¹-ve⁴ ti¹fa³ˀa¹ cjoa⁴ñˀain³. Qui³sco²mi³xcon⁴, tsa³ve³ Abraham nca³ cjin³tˀa³, cˀoa⁴ Lázaro ya⁴ ti¹jna³tˀa³-le⁴.
LUK 16:24 Cˀia⁴ qui³squi³ˀntia¹, qui³tso²: Nˀai³ Abraham, jcha⁴ma⁴ta³con³-nai¹³, cˀoa⁴ ti⁴ca³sain¹³ Lázaro, ca²ta³si¹ca³ˀnchi⁴ jco⁴na⁴jma¹ntsja³ cao⁴ na³nta¹, ca²ta³si¹qui³njen³nchˀan¹ ni³jen³. Cjai¹nca³ tse³ cjoa⁴ñˀain³ ti²fa³ˀa³ jin³lˀi¹-vi⁴.
LUK 16:25 Abraham qui³tso²-le⁴: ˀnti¹, nta³ ti⁴cja³ˀai³tsjain³ nca³ nˀion¹ qui³tjoe¹-li² tso³jmi² xi³ nta³ tjin¹ cˀia⁴ nca³ tsa³qui³jna³choin³, cˀoa⁴ Lázaro qui³scoe¹ xi³ chˀao³ tjin¹. To⁴nca³ ntˀai⁴-ntai⁴ je² ma³tsjoa³ya³-le⁴ i⁴-vi⁴, cˀoa⁴ ji³ cjoa⁴ñˀain³ ti³chja³ˀai².
LUK 16:26 Cˀoa⁴ xi³ tjin¹-sa³, jnco³ xo⁴nca¹ xi³ nˀion¹ na⁴nca⁴ qui³jna³ ˀncho²va³sen³-na¹, jme¹-ni³ nca³ je² xi³ me³-le⁴ cjoa⁴ˀa³to³tˀa³-no³ ya⁴-ve⁴ li²coi³ coan³-le⁴, ni⁴je² xi³ jan¹ cjoa⁴ˀa³ i⁴-vi⁴.
LUK 16:27 Qui³tso² cho⁴ta⁴nchi⁴na¹-ve⁴: Cˀoe³tsˀoa²-le²³ˀni³, nˀai³, nca³ si⁴ca³sen¹-ni³ Lázaro ya⁴ ntˀia³-le⁴ nˀai³-na⁴.
LUK 16:28 Nca⁴ aon² ntsˀe³ tjin¹-na³, jme¹-ni³ nca³ nta³ tsjoa¹-si¹ni³le⁴ cjoa⁴qui²xi⁴, jme¹-ni³ nca³ tsi² tsa² je² cˀoa⁴-ti⁴ cjoa⁴ˀai¹-si¹ni³ ja⁴ˀnte³ je²-vi⁴ jña³ tjin¹ cjoa⁴ñˀain³.
LUK 16:29 Abraham qui³tso²-le⁴: Tjin¹-le⁴ Moisés cao⁴ cho⁴ta⁴ xi³ qui³nchja⁴ya³ tˀa³tsˀe⁴ Ni³na¹. Ca²tji³nčhˀoe¹-le⁴.
LUK 16:30 Cˀia⁴ qui³tso² cho⁴ta⁴nchi⁴na¹-ve⁴: Mai³, nˀai³ Abraham. To⁴nca³ tsa² jnco³ xi³ je³tsa³ve³ cjoa⁴vi³ya³ coai⁴con³-le⁴, si⁴²cˀa³ntjai²ya³ cjoa⁴fa³ˀai³tsjen³-le⁴.
LUK 16:31 To⁴nca³ Abraham qui³tso²-le⁴: Tsa² tsi² nčhˀoe¹-le⁴ Moisés cao⁴ cho⁴ta⁴ xi³ qui³nchja⁴ya³ tˀa³tsˀe⁴ Ni³na¹, cˀoa⁴-ti⁴ li²coi³ coan⁴cjain¹-le² tsa² jnco³ xi³ cjoa⁴ˀa²ya³jin³-ni³le⁴ cˀen³.
LUK 17:1 Jesús qui³tso²-le⁴ cho⁴ta⁴-le⁴: Ña³qui³ cjoa⁴qui²xi⁴ nca³ cjoa⁴ˀai¹ xi³ me³-le⁴ sca⁴ni²jin³-na¹ je¹, to⁴nca³ ma⁴-xo¹ni³ je² xi³ to⁴tˀa³tsˀe⁴ cjoa⁴ˀai¹.
LUK 17:2 Nqui²sa⁴ to⁴nta³-le⁴ tsa² jnco³ la⁴jao⁴ sˀe⁴tˀa³nˀion¹nqui³ ya¹sin³, cˀoa⁴ si⁴cˀa³tjen⁴jin³ nta¹chi³con³ cao⁴-ni³ tsa² nca³ sca⁴ni²jin³ je¹ jnco³ je² ˀnti¹xti³-vi⁴.
LUK 17:3 Cˀoa⁴-sˀin² ti⁴coi²ntao⁴³ yao³-no³ nca³ jon². Tsa² je¹ coa⁴jnqui³ ntsˀai³ xi³ tˀa³tsi⁴, ti⁴cha¹cja¹ya³-lai⁴, cˀoa⁴ tsa² si⁴²cˀa³ntjai²ya³ cjoa⁴fa³ˀai³tsjen³-le⁴ ti⁴cha³tˀa³-lai⁴.
LUK 17:4 Cˀia⁴ tsa² ña³to³ cˀa³ nca³ jnco³ ni⁴čhjin³ coa⁴jnqui³ je¹ xi³ tˀa³tsi⁴, cˀoa⁴ tsa² ña³to³ cˀa³ nca³ jnco³ ni⁴čhjin³ cjoa⁴ˀai¹con³-li² nca³ coi⁴tso⁴: Ca²si³cˀa³ntjai²ya³ cjoa⁴fa³ˀai³tsjen³-na⁴, ti⁴cha³tˀa³-lai⁴.
LUK 17:5 Cˀia⁴ cho⁴ta⁴-le⁴ qui³tso²-le⁴ Nai³-na¹: Ti⁴sen⁴cao⁴-na³jin⁴, jme¹-ni³ nca³ nqui²sa⁴ nˀion¹ coan⁴cjain¹-si¹ni³na³jin⁴.
LUK 17:6 Cˀia⁴ je² Nai³-na¹ qui³tso²: Cˀia⁴ tsa² nta³ ma³cjain¹-no³ nta³ tsa² to⁴choa³ tjin¹ jo³-ni³ tsa² jnco³ na⁴xin⁴-le⁴ mostaza, cˀoa⁴coi⁴xon¹-lao⁴³ je² ya¹ sicómoro: Chjo⁴ne²yai³ yao³-li⁴, cˀoa⁴ tˀe²ntjai² yao³-li⁴ ya⁴ jin³ nta¹chi³con³, cˀoa⁴ si⁴²tjo³son²-no³.
LUK 17:7 ˀya¹-ni³ xi³ jon²-vi⁴ xi³ tjin¹jnco³-le⁴ cho⁴ˀnta³ xi³ fi²cˀe¹nchi³, a³xo⁴ cho⁴ si¹coi²nta⁴, xi³ cˀoa⁴coi⁴tso⁴-le⁴ cˀia⁴ nca³ cjoa⁴ˀai¹-ni³ nqui³chao³: Nti⁴ton⁴ nti⁴ton⁴ ti⁴tjai¹³, ti⁴jna³tˀai³ ya¹mi²xa⁴.
LUK 17:8 A³ tsi² tsa² coi⁴tso⁴-le⁴: Tˀe²nta³-nai¹³ xi³ coa²cjen⁴-nia³, tˀe²xco¹nqui³ cja¹ntia³-li⁴ na³jño³-li⁴, tˀe²ya³-nai¹³ sa³ˀnta³ cjoe⁴ coa²cjen⁴, scˀoia⁴. Xi³ coan⁴scan³-ni³ je²-vi⁴ coi⁴chi³ nca³ ji³, cˀoa⁴ sˀoi⁴.
LUK 17:9 A³ tsjoa¹-le⁴ cjoa⁴nta³ cho⁴ˀnta³-le⁴ nca³ nta³ ca²si¹tjo³son² xi³ qui³sˀe³tˀain³-le⁴. An³ xian³ nca³ mai³.
LUK 17:10 Cˀoa⁴-ti⁴sˀin² nca³ jon²-vi⁴ cˀia⁴ nca³ ca²fe³ca²vi³tjo³son²-no³ nca³yi³je³ xi³ ca²sˀe³tˀain³-no³, cˀoa⁴ti⁴xon¹³: Ña¹-vi⁴ cho⁴ˀnta³ xi³ tsi²jme³ chji¹-le⁴, nca³ to⁴je² xi³ tji¹tˀain³-na¹ cˀoa⁴qui³nˀian².
LUK 17:11 Cˀoa⁴coan³ cˀia⁴ nca³ ti¹fi² Jesús ya⁴ Jerusalén, ja³ˀa³jin³va³sen³ Samaria cao⁴ Galilea.
LUK 17:12 Cˀia⁴ nca³ ja³ˀa³sˀen³ jnco³ na⁴xi⁴na³nta¹ˀnti¹, te³ cho⁴ta⁴xˀin⁴ xi³ ti¹fi²ˀnto³jon³ yao³-le⁴ ji³nčhoa³nčhˀoe² ya⁴ya³ ntia⁴². Je² xi³ cjin³ tsa³qui³ncha³-ni³le⁴.
LUK 17:13 Nˀion¹ qui³nchja⁴-le⁴, qui³tso²: Jesús, Maestro, jcha⁴ma⁴ta³con³-na³jin⁴.
LUK 17:14 Cˀia⁴ nca³ je² tsa³ve³, qui³tso²-le⁴: Ta⁴nquion¹³, ta⁴co²-lao⁴³ yao³-no³ na⁴ˀmi³-ve⁴. Cˀoa⁴coan³ nca³ tjio¹fi², tsje³ coan³-ni³.
LUK 17:15 Cˀia⁴ nca³ jnco³ nca³ je² tsa³ve³ nca³ je³coan³nta³, qui³si³cˀo¹fa³ya³, cao⁴ nˀion¹jta⁴ tsˀa³sje³je³ya³ Ni³na¹.
LUK 17:16 Ji³cho² si¹cˀa³tjen⁴ tˀa³na³nqui³ yao³-le⁴ ya⁴nqui³ ntso⁴co⁴ Jesús. Ni³na¹ xi³ ca²tˀe¹chji¹-li² qui³tso²-le⁴. Cˀoa⁴ je²-vi⁴ cho⁴ta⁴ samaritano ni¹.
LUK 17:17 Jesús qui³tso²: A³ tsi² te³ ma³-ni³ xi³ coan³tsje³. Xi³ nqui² ña³jan², jña¹ tjio¹.
LUK 17:18 A³ tsi² ˀya³-sa³ tjin¹ xi³ qui³si³cˀo¹fa³ya³, xi³ qui³tsjoa³-le⁴ cjoa⁴nta³ Ni³na¹. A³ to⁴je²-vi⁴ xi³ cho⁴ta⁴tˀa³xin² ni¹.
LUK 17:19 Cˀia⁴ Jesús qui³tso²-le⁴: Ti⁴so²tjain⁴, tˀin³-la²ntai³, coi³ nca³ coan³cjain¹-li² ca²ma³nta³-ni³.
LUK 17:20 Cˀia⁴ cho⁴ta⁴ fariseos qui³tsi²na³nqui³-le⁴: Cˀia¹ tjin¹-ni³ nca³ cjoa⁴ˀai¹ cjoa⁴te¹xo³ma³-le⁴ Ni³na¹. Jesús qui³tso²-le⁴: Je² cjoa⁴te¹xo³ma³-le⁴ Ni³na¹ li²coi³ tsen³ cji³ nca³ cjoa⁴ˀai¹.
LUK 17:21 Ni⁴coi⁴tso⁴-jin²: Coe⁴-ni³ i⁴-vi⁴, a³xo⁴ coe⁴-ni³ ya⁴-ve⁴, nca⁴ je² cjoa⁴te¹xo³ma³-le⁴ Ni³na¹ i⁴ ti¹jna³jin³-no³vi⁴.
LUK 17:22 Cˀoa⁴qui³tso²-le⁴ cho⁴ta⁴-le⁴: Ni⁴čhjin³ cjoa⁴ˀai¹ cˀia⁴ nca³ coan⁴me³-no³ jchao⁴³ jnco³ ni⁴čhjin³-le⁴ ˀnti¹-le⁴ cho⁴ta⁴, cˀoa⁴ li²coi³ jchao⁴³.
LUK 17:23 Cˀoa⁴coi⁴tso⁴-no³: Coe⁴-ni³ i⁴-vi⁴, coe⁴-ni³ ya⁴-ve⁴. A³li² ma³nquin¹-jion²³, ni⁴mai¹tjen⁴nqui³-jin²lao⁴³.
LUK 17:24 Jo³-ni³ tsa² lˀi¹chˀaon⁴ xi³ si¹cja³te³ sa³ˀnta³ nca³qui³jnta² ncˀa¹, cˀoa⁴-ti⁴sˀin² coan⁴ ˀnti¹-le⁴ cho⁴ta⁴ coi³ ni⁴čhjin³-le⁴.
LUK 17:25 To⁴nca³ ti¹tjon²-cjoa²la² ma³chjen¹ nca³ tse³ cjoa⁴ñˀain³ cjoa⁴ˀa², cˀoa⁴ cho⁴ta⁴ xi³ tjio¹ ntˀai⁴ cˀoa⁴sje³xin²-le⁴.
LUK 17:26 Jo³ coan³ chon³ ni⁴čhjin³-le⁴ Noé, cˀoa⁴-ti⁴sˀin² coan⁴ ni⁴čhjin³-le⁴ je² ˀnti¹-le⁴ cho⁴ta⁴.
LUK 17:27 Tsa³cjen², qui³tsˀi³, chi³xan³, qui³si³qui³xan³ xi¹ncjin¹, sa³ˀnta³ ni⁴čhjin³ nca³ ja³ˀa³sˀen³ Noé chi³tso³ yˀai³-ve⁴. Cˀia⁴ ja³ˀai³ jtsi¹xcon¹-ve⁴ xi³ qui³si³cˀen³ nca³tsˀi³.
LUK 17:28 Cˀoa⁴-ti⁴sˀin² jo³ coan³ chon³ ni⁴čhjin³-le⁴ Lot. Tsa³cjen², qui³tsˀi³, tsa³ca³tse³, tsa³ca³te¹na³, tsa³cˀe¹ntje², tsa³cˀe¹nta³ ni³ˀya³.
LUK 17:29 To⁴nca³ je² ni⁴čhjin³ nca³ Lot ji³tjo³-ni³ ˀnte³ Sodoma, tsˀa³-ni³ ncˀa³jmi³ lˀi¹ cao⁴ chao³ azufre xi³ qui³si³cˀen³ nca³tsˀi³.
LUK 17:30 Jo³-ni³ tsa² je²-vi⁴, cˀoa⁴-sˀin² coan⁴ chon³ je² ni⁴čhjin³ cˀia⁴ nca³ je² ˀnti¹-le⁴ cho⁴ta⁴ coan⁴tsen³son²tsen³.
LUK 17:31 Coi³ ni⁴čhjin³-ve⁴ je² xi³ ya⁴ ti¹jna³son² ntˀia³-le⁴, cˀoa⁴ tso³jmi²-le⁴ tjio¹ya³ ntˀia³-le⁴, nqui²sa⁴ nta³ tsa² li²coi³ fi²jen³ nca³ scoe¹. Cˀoa⁴ je² xi³ jan¹ ti¹jna³ nqui³chao³ jan¹, cˀoa⁴-ti⁴ nqui²sa⁴ nta³ tsa² li²coi³ si⁴²cˀo¹fa³ya³tˀa³.
LUK 17:32 Na¹nta³ ti⁴cja³ˀai³tsjaon³ je² chjon⁴²-le⁴ Lot.
LUK 17:33 To⁴ˀya³-ni³ xi³ me³-le⁴ nca³ cˀoa⁴sje³ntjai² ni⁴ma⁴-le⁴, to⁴si⁴²cha³ ni⁴ma⁴-le⁴. Cˀoa⁴ to⁴ˀya³-ni³ xi³ si⁴²cha³ ni⁴ma⁴-le⁴, cˀoa⁴sje³ntjai² ni⁴ma⁴-le⁴.
LUK 17:34 Cˀoa⁴xin³-no³ nca³ jao² cho⁴ta⁴ cˀoe¹yo³son² jnco³ na⁴chan³ je² ni⁴tjen⁴-ve⁴, jnco³ xi³ tjo¹ve¹, cˀoa⁴ xi³ nqui²jnco³ sˀe⁴jna³-ni¹.
LUK 17:35 Jao² ya¹nchjin¹ xi³ to⁴ña³ scˀao¹, jnco³ xi³ tjo¹ve¹, cˀoa⁴ xi³ nqui²jnco³ sˀe⁴jna³-ni¹.
LUK 17:36 Jao² xi³ coa⁴tio⁴ ya⁴ nqui³chao³, jnco³ xi³ tjo¹ve¹, cˀoa⁴ xi³ nqui²jnco³ sˀe⁴jna³-ni¹.
LUK 17:37 Cho⁴ta⁴ qui³tso²-le⁴ Jesús: Jña¹-ni³, Señor. Cˀoa⁴ je² qui³tso²-le⁴: Ya⁴ jña³ sˀe⁴jna³ yao³cˀen³, ya⁴² coa⁴tio⁴jtin¹ ni¹que¹.
LUK 18:1 Jesús qui³tso²-le⁴ jnco³ cjoa⁴xco¹son² jo³-sˀin² ma³chjen¹ nca³ cˀoe¹tsˀoa³ntsje², cˀoa⁴ li²coi³ coan⁴ nca³ si⁴qui³jta³².
LUK 18:2 Qui³tso²: Ya⁴ jnco³ na⁴xi⁴na³nta¹ tjin¹ jnco³ xca²le⁴ xi³ tsi² tsa² tsa³cjon¹-le⁴ Ni³na¹, ni⁴tsa³ve³xcon¹-jin² cho⁴ta⁴.
LUK 18:3 Cˀoa⁴-ti⁴ ya⁴ na⁴xi⁴na³nta¹-ve⁴ tjin¹ jnco³ chjon⁴² xi³ cˀen³ xˀin⁴-le⁴, cˀoa⁴ xi³ ncjin² cˀa³ ja³ˀai³nčhˀoe² xca²le⁴-ve⁴, qui³tso²: Ti⁴sen⁴cao⁴-nai¹³, chˀa⁴sje³ntjai²-nai¹³ tˀa³tsˀe⁴ co²ntran⁴-na⁴.
LUK 18:4 To⁴nca³ jnco³jao² ni⁴čhjin³ coan³cai³-le⁴, li²coi³ qui³si³sin³-le⁴. Xi³ coan³scan³-ni³ qui³tso²-le⁴ yao³-le⁴: Nta³ tsa² li²coi³ tsa³cjon³-le⁴ Ni³na¹, ni⁴ˀve³xcon¹-jian²³ cho⁴ta⁴,
LUK 18:5 coi³ nca³ je² chjon⁴²cˀan³-ve⁴ ti¹si¹jti³-na³, cˀoa³sje³ntjai²-le⁴, jme¹-ni³ nca³ tsi² tsa² ti⁴cjoa⁴ˀai¹ qui³ncha²si³-ni³na³.
LUK 18:6 Qui³tso² je² Nai³-na¹: Ti⁴no¹ˀya³-lao⁴³ jo³ tso² xca²le⁴tsˀen⁴ xi³ tsin²-le⁴ cjoa⁴qui²xi⁴.
LUK 18:7 Cˀoa⁴ Ni³na¹ a³ tsi² cˀoe⁴²nta³jin³-le⁴ xi⁴ tsˀe⁴ cho⁴ta⁴ xi³ tsa³cja³ˀa¹jin³ xi³ nˀion¹ nchja⁴-le⁴ ni⁴čhjin³ cao⁴ ni⁴tjen⁴, a³ tsin²-le⁴ cjoa⁴tse³jta³ xi³ tˀa³tsˀe⁴.
LUK 18:8 Cˀoa⁴xin³-no³ nca³ nˀion¹ xi¹ti¹ cˀoe⁴²nta³jin³-le⁴. To⁴nca³ cˀia⁴ nca³ je² ˀnti¹-le⁴ cho⁴ta⁴ cjoa⁴ˀai¹, a³ coan⁴sjai³-le⁴ cho⁴ta⁴ xi³ coan⁴cjain¹-le⁴ i⁴ son³ˀnte³.
LUK 18:9 Cˀoa⁴-ti⁴ qui³tso²cˀa³-le⁴ xi³ ti⁴je²-ni³ ma³cjain¹-le⁴ nca³ cho⁴ta⁴cjoa⁴qui²xi⁴ cjoan³, xi³ tsˀa³sje³nqui³ nca³tsˀi³ xi³cˀa³, qui³tso²jnco³-le⁴ cjoa⁴xco¹son².
LUK 18:10 Jao² cho⁴ta⁴ xi³ qui³quin³ yo⁴nco⁴ nca³ cˀoe⁴²tsˀoa³, jnco³ xi³ cho⁴ta⁴ fariseo, xi³ nqui²jnco³ xi³ cho⁴ta⁴ xi³ vˀe¹ña³ taon⁴va³sen³.
LUK 18:11 Je² cho⁴ta⁴ fariseo nca³ se¹nto³, cˀoa⁴-sˀin² ti¹vˀe¹tsˀoa³ ti⁴je²-ni³: Ni³na¹ tsjoa³-le²³ cjoa⁴nta³ nca³ a³li² coi³-jian²³ jo³ cjoan³ xi³cˀa³ cho⁴ta⁴, xi³ cho⁴ta⁴che¹, xi³ tsin²-le⁴ cjoa⁴qui²xi⁴, xi³ cha³jnqui³, ni⁴ jo³-sˀin² cjoan³ nta³ tsa² je² cho⁴ta⁴-vi⁴ xi³ vˀe¹ña³ taon⁴va³sen³.
LUK 18:12 Jao² cˀa³ nca³ jnco³ xo³ma²na⁴ vi³jna³nchjan²³, tsjoa³nia¹³ jnco³ ya³ xi³ te³ ya³ to⁴jo³ tjin¹ xi³ sa³co¹-na³.
LUK 18:13 To⁴nca³ je² cho⁴ta⁴ xi³ vˀe¹ña³ taon⁴va³sen³, cjin³ ti¹jna³. Cai³-le⁴ nca³ cjo³mi³ncˀa³ xcon⁴ ncˀa³jmi³. To⁴si¹jtsin³tˀa³-ni³ nta³ni⁴sin⁴-le⁴, qui³tso²: Ni³na¹, ca²ta³sˀe³-li² cjoa⁴ma⁴ta³con² xi³ tˀa³tsˀan⁴, nca⁴ cho⁴ta⁴tsˀen⁴ nia¹³.
LUK 18:14 Cˀoa⁴xin³-no³ nca³ je²-vi⁴, li²coi³ je² xi³jnco³-ve⁴, xi³ qui³jen³ ni³ˀya³-le⁴ nca³ je³tˀa³ je¹-le⁴. Nca⁴ to⁴ˀya³-ni³ xi³ ncˀa³ vˀa³sje³ yao³-le⁴, cjai¹nca³ na³nqui³ coan⁴-ni³, cˀoa⁴ je² xi³ na³nqui³ vˀa³sje³ yao³-le⁴, ncˀa³ coi⁴tjo³-ni³.
LUK 18:15 Ja³ˀai³cao⁴-le⁴ nta³ tsa² ˀnti¹xti³, jme¹-ni³ nca³ si⁴²cao⁴-si¹ni³. Cˀia⁴ nca³ je² cho⁴ta⁴-le⁴ Jesús tsa³ve³, qui³nchja⁴ti³cao⁴ xi³ ji³cho²cao⁴.
LUK 18:16 To⁴nca³ Jesús qui³tso²: Tˀai²ˀnte³-lao⁴³ xti³-ve⁴, nca³ ca²tji³nčhoa¹con³-na³, a³li² vˀe²chjoa²-jin²lao⁴³ nca³ cˀoa⁴-sˀin² cjoan³ je² xi³ tsˀe⁴ cjoa⁴te¹xo³ma³-le⁴ Ni³na¹.
LUK 18:17 Xi³ cjoa⁴qui²xi⁴ xi³ xin³-no³, to⁴ˀya³-ni³ xi³ tsi²coi³ scoe¹ cjoa⁴te¹xo³ma³-le⁴ Ni³na¹ jo³-ni³ tsa² jnco³ ˀnti¹ scoe¹ xi³ vˀai²-le⁴, li²coi³ coan⁴ cjoa⁴ˀa³sˀen³.
LUK 18:18 Jnco³ cho⁴ta⁴ti¹tjon² qui³tsi²na³nqui³-le⁴: Maestro ntai³, jme¹ cjoa⁴nta³ xi³ sˀian³, jme¹-ni³ nca³ sˀe⁴-si¹ni³na³ cjoa⁴vi³jna³chon³ xi³ nca³ntsjai².
LUK 18:19 Jesús qui³tso²-le⁴: A¹-ni³ nca³ cho⁴ta⁴nta³ ˀmi²-si¹ni³nai¹³. Ni⁴ˀya³-jin² xi³ nta³, to⁴jnco³ je² Ni³na¹.
LUK 18:20 Je³²ˀyai³ cjoa⁴te¹xo³ma³: A³li² ni²cˀen³-jin²³, a³li² ni²cha³jnqui³-jin²³, a³li² ni²che¹-jin²³, a³li² va³sen²nti³so³-jin²lai⁴ xi³cˀa³. Jcha⁴xcoin¹³ nˀai³-li⁴ na⁴-li⁴.
LUK 18:21 Cˀia⁴ je² qui³tso²: Nca³yi³je³ cjoa⁴ je²-vi⁴, cˀoa⁴-sˀin² ti²si³cji³tjo³soan²³ jo³ sa³ˀnta³ nca³ xtia³.
LUK 18:22 Cˀia⁴ nca³ Jesús qui³nčhˀoe¹ je²-vi⁴, qui³tso²-le⁴: Nqui²jnco³-sa³ cjoa⁴ xi³ cha³-li². Ta⁴te²nai³ nca³yi³je³ xi³ tjin¹-li², tˀai²-lai⁴ je² xi³ yo⁴ma⁴, cˀoa⁴ sˀe⁴²-li² cjoa⁴nchi⁴na¹ ncˀa³jmi³, cˀoa⁴ nčhoa¹tˀa³-nai¹³.
LUK 18:23 Cˀia⁴ nca³ je² qui³nčhˀoe¹ je²-vi⁴, cjai¹nca³ to⁴fao¹ coan³-le⁴, nca⁴ cjai¹nca³ nchi⁴na¹.
LUK 18:24 Ti¹ve³ Jesús nca³ cjai¹nca³ va³ coan³-le⁴ cho⁴ta⁴ je²-ve⁴, qui³tso²: A³li² to⁴cˀoa⁴²cji³ ñˀain³ coan⁴-le⁴ cjoa⁴ˀa³sˀen³jin³ cjoa⁴te¹xo³ma³-le⁴ Ni³na¹ je² xi³ cjoa⁴nchi⁴na¹ tjin¹-le⁴.
LUK 18:25 Li²coi³ to⁴jo³ ñˀain³ nca³ cjoa⁴ˀa³sˀen³ jnco³ camello jña³ ti⁴xˀa⁴ xcon⁴ni³nto³, cao⁴-ni³ tsa² cjoa⁴ˀa³sˀen³jin³ cjoa⁴te¹xo³ma³-le⁴ Ni³na¹ jnco³ cho⁴ta⁴nchi⁴na¹.
LUK 18:26 Je² xi³ qui³nčhˀoe¹-le⁴, qui³tso²: ˀya¹-ni³ tso²cˀoa⁴ xi³ coan⁴ coi⁴tjo³ntjai².
LUK 18:27 Cˀia⁴ Jesús qui³tso²-le⁴: Je² xi³ tsi² coi³ coan⁴-le⁴ cho⁴ta⁴, Ni³na¹ coan⁴-le⁴.
LUK 18:28 Cˀia⁴ Pedro qui³tso²: Coe⁴-ni³, je³qui³ni²ca³toi¹⁴-jin⁴ jme³ xi³ tsain⁴-jin⁴, cˀoa⁴ ji³ ji³nčhoa³tˀa³-lai²⁴jin⁴.
LUK 18:29 Cˀia⁴ Jesús qui³tso²-le⁴: Xi³ cjoa⁴qui²xi⁴ xi³ xin³-no³, ni⁴ˀya³-jin² tjin¹ xi³ qui³si³ca³tio¹ ntˀia³-le⁴, xi³jcha¹-le⁴, ntsˀe⁴, chjon⁴²-le⁴, xti³-le⁴, xi³ tˀa³tsˀe⁴ cjoa⁴te¹xo³ma³-le⁴ Ni³na¹,
LUK 18:30 xi³ tsi² tsa² nqui²sa⁴ ncjin² ya³ cˀoa⁴tjin¹ cˀoai⁴-le⁴, coi³ ni⁴čhjin³ je²-vi⁴, cˀoa⁴ sˀe⁴-le⁴ cjoa⁴vi³jna³chon³ je² ni⁴čhjin³ xi³ sˀa⁴nčhoa¹.
LUK 18:31 Cˀia⁴ Jesús qui³tˀa³xin²cao⁴ xi³ te³jao² cho⁴ta⁴-le⁴, qui³tso²-le⁴: Coe⁴-ni³ ma³nquin¹mia³² ya⁴ Jerusalén, cˀoa⁴ coi⁴tjo³son² nca³yi³je³ cjoa⁴ xi³ je² cho⁴ta⁴ xi³ qui³nchja⁴ya³ tˀa³tsˀe⁴ Ni³na¹ qui³squi³ tˀa³tsˀe⁴ ˀnti¹-le⁴ cho⁴ta⁴.
LUK 18:32 Sca⁴ni²tˀa³-le⁴ cho⁴ta⁴ xi³ li² judío-jin², coi⁴jno³que³, cˀoa⁴ chˀao³ si⁴²cao⁴, cˀoe⁴²čha¹jon³-le⁴.
LUK 18:33 Cˀia⁴ nca³ cjoe⁴ coa⁴²-le⁴, si⁴²cˀen³-ni¹, to⁴nca³ xi³ coan⁴jan²-ni³ ni⁴čhjin³ cjoa⁴ˀa²ya³-ni³le⁴.
LUK 18:34 To⁴nca³ cho⁴ta⁴-le⁴ ni⁴ˀi⁴tse¹-jin² coan³cho⁴ya³-le⁴ je² cjoa⁴-vi⁴. Je² en¹ je²-vi⁴ ti¹jna³ˀma³-le⁴, cˀoa⁴ li²coi³ coan³cho⁴ya³-le⁴ jo³ tso²-ni³.
LUK 18:35 Cˀia⁴ nca³ Jesús ji³nčhoa³čhian³ ya⁴ Jericó, jnco³ cho⁴ta⁴xca⁴ ti¹jna³ ya⁴ntai³ ntia⁴², ti¹si¹je¹ caridad.
LUK 18:36 Cˀia⁴ nca³ qui³nčhˀoe¹ nca³ cho⁴ta⁴ncjin² xi³ tjio¹fa³ˀa³to³, qui³tsi²na³nqui³ jme¹-ni³ je²-ve⁴.
LUK 18:37 Qui³tso²-le⁴ nca³ Jesús nazareno ti¹fa³ˀa³to³.
LUK 18:38 Cˀia⁴ nˀion¹ qui³nchja⁴, qui³squi³ˀntia¹tˀa³, qui³tso²: Jesús, ˀnti¹-le⁴ David, jcha⁴ma⁴ta³con³-nai¹³.
LUK 18:39 Je² xi³ tjen⁴ti¹tjon² qui³nchja⁴ti³cao⁴, jme¹-ni³ nca³ jyo¹ ca²ta³vˀe²jna³-si¹ni³, to⁴nca³ je² nqui²sa⁴ nˀion¹ qui³nchja⁴: ˀnti¹-le⁴ David, jcha⁴ma⁴ta³con³-nai¹³.
LUK 18:40 Cˀia⁴ Jesús tsa³ca³sen²jna³, tsa³cˀe¹ne²-le⁴ nca³ cjoi⁴nčhoa³tˀa³cao⁴-le⁴. Cˀia⁴ nca³ ja³ˀai³tˀa³čhian³-le⁴, qui³tsi²na³nqui³-le⁴:
LUK 18:41 Jme¹ xi³ me³-li² nca³ si³cao⁴-le²³, cˀoa⁴ je² qui³tso²: Señor, me³-na³ nca³ nta³ coan⁴tsen³ nqui²ntia³-na³.
LUK 18:42 Cˀia⁴ Jesús qui³tso²-le⁴: Ca²ta³ma³tsen³-li², coi³ nca³ coan³cjain¹-li², ca²ma³nta³-ni³.
LUK 18:43 Nti⁴ton⁴ coan³tsen³-le⁴, qui³tjen⁴nqui³-le⁴, tsˀa³sje³je³ya³ Ni³na¹. Nca³tsˀi³ na⁴xi⁴na³nta¹ tsˀa³sje³nta³ Ni³na¹ cˀia⁴ nca³ tsa³ve³.
LUK 19:1 Jesús ja³ˀa³sˀen³ Jericó, ti¹fa³ˀa³to³.
LUK 19:2 Coe⁴-ni³, jnco³ cho⁴ta⁴ xi³ Zaqueo ˀmi², xi³ nca³jco⁴-le⁴ cho⁴ta⁴ xi³ vˀe¹ña³ taon⁴va³sen³, cˀoa⁴ je²-vi⁴ cho⁴ta⁴nchi⁴-na¹ ni¹.
LUK 19:3 Me³-le⁴ sco¹tsen³ ˀya³-ni³ve⁴ Jesús, to⁴nca³ li²coi³ coan³-le⁴ nca³ cjai¹nca³ nˀion¹ ncjin² ma³ cho⁴ta⁴, cˀoa⁴ ˀnti¹jtoa² cji³ nca³ je².
LUK 19:4 Qui³to²ca³ ti¹tjon². Jnco³ ya¹ sicómoro qui³quin³ˀa², jme¹-ni³ nca³ sco¹tsen³-si¹ni³le⁴ Jesús, nca⁴ cˀoa⁴-sˀin² cjoa⁴ˀa³to³ ya⁴-ve⁴.
LUK 19:5 Cˀia⁴ nca³ ya⁴² ji³nčhoa³ ja⁴ˀnte³ je²-ve⁴, Jesús qui³sco²tsen³ncˀa³, cˀoa⁴qui³tso²-le⁴: Zaqueo, ti²tjo⁴jen⁴ nti⁴toin⁴, nca⁴ ma³chjen¹-na³ coa²te⁴jna³ ni³ˀya³-li⁴ ntˀai⁴-vi⁴.
LUK 19:6 Cˀia⁴ Zaqueo ji³tjo³jen³ nti⁴ton⁴, cˀoa⁴ qui³scoe¹tjao² cao⁴ cjoa⁴tsjoa³.
LUK 19:7 Cˀia⁴ nca³ tsa³ve³ je²-vi⁴, nca³tsˀi³ qui³si³cˀa³xqui⁴, qui³tso² nca³ je³ja³ˀa³sˀen³ si¹cja¹ya³ ntˀia³-le⁴ jnco³ cho⁴ta⁴tsˀen⁴.
LUK 19:8 Cˀia⁴ Zaqueo tsa³ca³sen²nto³, qui³tso²-le⁴ Nai³-na¹: Coe⁴-ni³ Señor, va³sen³ tso³jmi² xi³ tjin¹-na³ tsjoa³-le⁴ cho⁴ta⁴yo⁴ma⁴, cˀia⁴ tsa² tjin¹ xi³ tsa³cˀa³na⁴cha⁴-le⁴, tsjoa³-nca¹ni³le⁴ ño³ cˀa³.
LUK 19:9 Cˀia⁴ Jesús qui³tso²-le⁴: Ntˀai⁴-vi⁴ ca²fa³ˀai³ xi³ cjoa⁴vi³tjo³ntjai² i⁴ ntˀia³-vi⁴, nca⁴ ˀnti¹-le⁴ Abraham ni¹ nta³ tsa² je².
LUK 19:10 Nca⁴ je² ˀnti¹-le⁴ cho⁴ta⁴ ja³ˀai³ ca¹sjai³, cˀoa⁴ ja³ˀai³ cˀa³sje³ntjai² je² xi³ qui³cha³.
LUK 19:11 Cˀia⁴ nca³ cho⁴ta⁴ qui³nčhˀoe¹ je² cjoa⁴-vi⁴, Jesús qui³tso² jnco³ cjoa⁴xco¹son², nca⁴ Jesús ti¹jna³čhian³-le⁴ Jerusalén, cˀoa⁴ nca⁴ cho⁴ta⁴ qui³si³cja³ˀai³tsjen³ nca³ nti⁴ton⁴ coan⁴tsen³ je² cjoa⁴te¹xo³ma³-le⁴ Ni³na¹.
LUK 19:12 Cˀoa⁴ qui³tso²-ˀni³: Jnco³ cho⁴ta⁴ xi³ ncˀa³ ti¹jna³ nca³ cˀoa⁴-sˀin² qui³tsin³, qui³ jnco³ ˀnte³ jña³ nca³ cjin³tˀa³, jme¹-ni³ nca³ scoe¹jnco³-ni³ cjoa⁴te¹xo³ma³ xi³ ti⁴tˀa³tsˀe⁴-ni³, cˀoa⁴ cjoi⁴nčhoa³ nqui²ntia³-ni³.
LUK 19:13 Qui³nchja⁴-le⁴ te³ cho⁴ˀnta³ xi³ tsˀe⁴, qui³tsjoa³-le⁴ te³ vi²xo⁴. Cˀoa⁴qui³tso²-le⁴: Tˀiaon⁴³ cjoa⁴ma⁴ jo³-sˀin² tjen⁴ nca³ cjoe²ˀe⁴.
LUK 19:14 To⁴nca³ cho⁴ta⁴na⁴xi⁴na³nta¹-le⁴ coan³jti³que³, cˀoa⁴ qui³si³ca³sen¹tjen⁴nqui³-le⁴ cho⁴ta⁴ xi³ xa¹ yˀa³, qui³tso²: Li²coi³ me³-na³jin⁴ nca³ je² coa⁴te²xo³ma³-na³jin⁴.
LUK 19:15 Cˀia⁴ nca³ ja³ˀai³ nqui²ntia³-ni³ nca³ je³qui³scoe¹ cjoa⁴te¹xo³ma³-ve⁴, tsa³cˀe¹tˀain³ nca³ qui³no²cjoa⁴-le⁴ je² cho⁴ˀnta³ jña³-le⁴ xi³ qui³tsjoa³-le⁴ taon⁴, jme¹-ni³ nca³ jcha⁴-ni³le⁴ jña³-le⁴ cjoa⁴ma⁴ xi³ qui³sˀin³ nca³ jnco¹jnco¹.
LUK 19:16 Ja³ˀai³ je² xi³ ti¹tjon², qui³tso²: Señor, je² taon⁴vi²xo⁴-li⁴ qui³si³qui³njen³son² te³ vi²xo⁴.
LUK 19:17 Je² nai³-le⁴ qui³tso²-le⁴: Nta³ tjin¹-ni³, nta³-ni¹ cho⁴ˀnta³ ji³. Nta³ qui³ni²tjo³soin²³ cao⁴ xi³ choa³, te³ na⁴xi⁴na³nta¹ coa⁴te²xo³ma³-lai⁴.
LUK 19:18 Ja³ˀai³ xi³ ma³jao²-ni³, qui³tso²: Señor, je² taon⁴vi²xo⁴-li⁴ qui³si³qui³njen³son² aon² vi²xo⁴.
LUK 19:19 Cˀoa⁴-ti⁴ nai³-le⁴ qui³tso²-le⁴ je²-vi⁴: Cˀoa⁴²-ti⁴ ji³ aon² na⁴xi⁴na³nta¹ coa⁴te²xo³ma³-lai⁴.
LUK 19:20 Ja³ˀai³ nqui²jnco³ xi³ qui³tso²: Señor, i⁴ ti¹jna³-li² je² taon⁴vi²xo⁴-li⁴ xi³ ti¹jna³tjao²-na³ ja⁴jin³ pa³ne²to⁴.
LUK 19:21 Nca⁴ qui³tsa³cjon³-le²³ nca³ ji³ ni¹³ cho⁴ta⁴ cha³ti¹xai¹³, ji³ chjoai¹³ xi³ tsi² tsa² ji³ tsa³cˀe²jnai³, cˀoa⁴ vˀe²xcoi¹³ xi³ tsi² ji³ tsa³cˀe²ntjai²³.
LUK 19:22 Cˀia⁴ je² qui³tso²-le⁴: Chˀao³ cho⁴ˀnta³ cjoain³ ji³, to⁴cao⁴ en¹-li⁴ mˀaon³ne²-le²³ je¹. Tsa² cˀoa⁴-sˀin² tsa³ˀya³-nai¹³ nca³ an³ cho⁴ta⁴cha³ti¹xa¹, nca³ cjoe¹ xi³ tsi² tsa² an³ tsa³cˀe³jna²³, cˀoa⁴ vˀe³xcoa¹³ je² xi³ tsi² tsa² an³ tsa³cˀe³ntje²³,
LUK 19:23 a¹-ni³ nca³ tsi² tsa³cˀai²-si¹ni³ taon⁴-na⁴ ntˀia³ jña³ nca³ ma³tse³ taon⁴. Cˀia⁴ nca³ cjoe²ˀe⁴ tsa² cao⁴ ˀnti¹-le⁴ xi³ ca³son² si³je¹-le²³ tsa²cai³.
LUK 19:24 Cˀia⁴ qui³tso²-le⁴ xi³ ya⁴ tjio¹: Chja⁴ˀa²xin²-lao⁴³ je² taon⁴vi²xo⁴-ve⁴, cˀoa⁴ je² tˀai²-lao⁴³ xi³ te³ vi²xo⁴ tjin¹-le⁴.
LUK 19:25 Cˀia⁴ cho⁴ta⁴ qui³tso²-le⁴: Señor, je³tjin¹-le⁴ te³ vi²xo⁴.
LUK 19:26 Cˀoa⁴xin³-no³ jon²-vi⁴, to⁴ˀya³-ni³ve⁴ xi³ tjin¹-le⁴, cˀoai⁴²-sa³le⁴, to⁴nca³ je² xi³ tsin²-le⁴, nta³ tsa² xi³ tjin¹-le⁴, tjo¹ˀa²-le⁴.
LUK 19:27 Cˀoa⁴-ti⁴ je² xi³ co²ntran⁴-na⁴ xi³ tsi² coi³ me³-le⁴ nca³ an³ coa³te³xo³ma²³-le⁴ nca³ je², nčhoa¹cao⁴³ i⁴-vi⁴, ti⁴cha¹sion³ i⁴ nqui³xcoan³-vi⁴.
LUK 19:28 Cˀia⁴ nca³ Jesús je³²cˀoa⁴qui³tso² je²-vi⁴, qui³ ti¹tjon², qui³mi³ ya⁴ Jerusalén.
LUK 19:29 Cˀia⁴ nca³ ji³cho²čhian³-le⁴ ya⁴ Betfagé cao⁴ ya⁴ Betania, ya⁴ ni³nto³ xi³ Olivos ˀmi², qui³si³ca³sen¹ jao² cho⁴ta⁴-le⁴,
LUK 19:30 qui³tso²: Ta⁴nquion¹³ na⁴xi⁴na³nta¹ˀnti¹ xi³ ti¹jna³tsen³, ya⁴ jña³ nca³ coi⁴tja¹sˀaon³ coan⁴sjai³jnco³-no³ bo¹rro¹ˀnti¹ xi³ ti¹jna³tˀa³nˀion¹, xi³ ni⁴-sa³ ˀya³-jin² cho⁴ta⁴ tsa³cˀe²jna³son²-le⁴. Chjo¹jnta¹ˀño¹³ nčhoa¹cao⁴-nao¹³.
LUK 19:31 Tsa² ˀya³-ni³ve⁴ scoi¹na³nqui³-no³: A¹-ni³ nca³ ti³ma³chjo²jnta¹ˀño¹-si¹nio³, cˀoa⁴tˀin²-lao⁴³, je² Nai³-na¹ ma³chjen¹-le⁴.
LUK 19:32 Cˀoa⁴ qui³ xi³ qui³sˀe³tˀain³-le⁴vi⁴, cˀoa⁴ coan³sjai³-le⁴ jo³ nca³ qui³tso²-le⁴.
LUK 19:33 Cˀia⁴ nca³ ti¹cjen³jnta¹ˀño¹ bo¹rro¹-ve⁴, nai³-le⁴ qui³tso²-le⁴: A¹-ni³ nca³ ti³chjo³jnta¹ˀño¹-si¹nio³ bo¹rro¹ ˀnti¹-vi⁴.
LUK 19:34 Cˀoa⁴ je² qui³tso²: Je² Nai³-na¹ ma³chjen¹-le⁴.
LUK 19:35 Cˀia⁴ ja³ˀai³cao⁴-le⁴ Jesús, tsa³ca¹son²-le⁴ tso⁴nca⁴ bo¹rro¹ˀnti¹-ve⁴, qui³si³cˀe¹jna³son² Jesús.
LUK 19:36 Cˀia⁴ nca³ ti¹fi² nca³ je², cho⁴ta⁴ tjio¹va¹nta³-le⁴ tso⁴nca⁴-le⁴ ya⁴³ ntia⁴².
LUK 19:37 Cˀia⁴ nca³ je³ji³cho²čhian³ jña³ fi²jen³ ni³nto³ Olivos, nca³tsˀi³ cho⁴ta⁴ncjin² xi³ fi²tˀa³-le⁴ coan³tsjoa³-le⁴, tsa³cˀe¹tsˀia⁴ tsa³cˀa³sje³nta³ Ni³na¹, nˀion¹ tsa³cˀe¹jta³ xi³ tˀa³tsˀe⁴ nca³yi³je³ cjoa⁴xcon¹ xi³ tsa³ve³.
LUK 19:38 Qui³tso²: Jo¹ to⁴nta³-le⁴ cho⁴ta⁴ti¹tjon² xi³ nčhoa¹ nca³jao³-le⁴ Nai³-na¹. Jña¹ chon³ ncˀa³jmi³, cˀoa⁴ cjoa⁴je³ya³ ya⁴ jña³ ncˀa³-ve⁴.
LUK 19:39 Cˀia⁴ cˀa³ cho⁴ta⁴ fariseos xi³ ya⁴ tjen⁴jin³-le⁴ cho⁴ta⁴ncjin²-ve⁴ qui³tso²-le⁴: Maestro, ti⁴no²cjoa⁴ti³coai⁴ cho⁴ta⁴-li⁴.
LUK 19:40 Cˀia⁴ Jesús qui³tso²-le⁴: Cˀoa⁴xin³-no³ nca³ tsa² je²-vi⁴ jyo¹ cˀoe¹yo³, la⁴jao⁴ squi³ˀntia¹-ni¹.
LUK 19:41 Cˀia⁴ nca³ ji³cho²čhian³, cˀia⁴ tsa³ve³ na⁴xi⁴na³nta¹-ve⁴. Qui³squi³ˀnta¹ xi³ tˀa³tsˀe⁴.
LUK 19:42 Qui³tso²: Tsa² cˀoa⁴-ti⁴ ji³ ˀyai³ ntˀai⁴-vi⁴ je² cjoa⁴ xi³ si¹qui³njen³nchˀan¹-li², to⁴nca³ ntˀai⁴-vi⁴ ti¹jna³ˀma³-le⁴ xcoin³.
LUK 19:43 Cjoa⁴ˀai¹ne²-li² ni⁴čhjin³ nca³ je² co²ntran⁴-li⁴ cˀoe⁴²jna³-li² jnco³ nchˀoa¹ni³ˀnte³, cjoa⁴ˀai¹ca³tio²ntai³-li², cˀoa⁴ to⁴jña³-ni³ nca³qui³jnta² si⁴²cˀe²jna³ˀncho²nˀion¹-li².
LUK 19:44 Cˀoa⁴ si⁴²qui³xo²jen³-li² tˀa³na³nqui³ cao⁴ je² xti³-li⁴ xi³ ya⁴ tjio¹cao⁴-li², li²coi³ ti⁴cˀoe¹yo³son²-ni³le⁴ xi¹ncjin¹ la⁴jao⁴ ya⁴ tsi⁴, nca⁴ tsi² tsa³ˀyai³ ni⁴čhjin³ nca³ Ni³na¹ ja³ˀai³ si¹xa³tˀa³-li².
LUK 19:45 Cˀia⁴ Jesús ja³ˀa³sˀen³ yo⁴nco⁴. Tsa³cˀe¹tsˀia⁴cao⁴ nca³ qui³tsˀaon³sje³ nca³tsˀi³ xi³ tjio¹va³te¹na³ cao⁴ xi³ tjio¹va³tse³ ya⁴-ve⁴.
LUK 19:46 Qui³tso²-le⁴: Tji¹tˀa³ xon⁴: Ntˀia³-na⁴ ntˀia³ xi³ sˀe³tsˀoa³ya³-ni¹, to⁴nca³ jon²-vi⁴ nqui³jao³-le⁴ che¹ qui³nˀiaon²³.
LUK 19:47 Tsa³ca³co¹ya³ ni⁴čhjin³ nca³ nchaon³ ya⁴ yo⁴nco⁴, to⁴nca³ je² cho⁴ta⁴ti¹tjon²-le⁴ na⁴ˀmi³ cao⁴ cho⁴ta⁴ scribano cao⁴ cho⁴ta⁴ti¹tjon²-le⁴ na⁴xi⁴na³nta¹ va¹sjai³ jo³-sˀin² nca³ si⁴²cˀen³ Jesús.
LUK 19:48 Cˀoa⁴ li²coi³ coan³sjai³-le⁴ jme³-ni³ve⁴ xi³ si⁴²cao⁴, nca⁴ nca³tsˀi³ na⁴xi⁴na³nta¹ cjai¹nca³ nta³ tjio¹nčhˀoe¹-le⁴.
LUK 20:1 Jnco³ ni⁴čhjin³ cˀia⁴ nca³ ti¹va³co¹ya³-le⁴ na⁴xi⁴na³nta¹ ya⁴ yo⁴nco⁴, cˀoa⁴ ti¹nchja⁴ya³jin³-le⁴ je² en¹nta³, ji³cho²ne²-le⁴ cho⁴ta⁴ti¹tjon²-le⁴ na⁴ˀmi³ cao⁴ cho⁴ta⁴ scribano cao⁴ cho⁴ta⁴jchi¹nca³.
LUK 20:2 Qui³tso²-le⁴: Cˀoa⁴tˀin²-na³jin⁴ jme¹ cjoa⁴te¹xo³ma³-ni³ xi³ tsjoa¹ˀnte³-li² nca³ cˀoa⁴nˀiain²³ je² cjoa⁴-vi⁴ a³xo⁴ ˀya¹-ni³ je² xi³ qui³tsjoa³-li² je² cjoa⁴te¹xo³ma³ je²-vi⁴.
LUK 20:3 Cˀia⁴ Jesús qui³tso²-le⁴: Cˀoa⁴-ti⁴ an³ sco¹na³nqui³-no³ jnco³ cjoa⁴, cˀoa⁴tˀin²-nao¹³,
LUK 20:4 Je² cjoa⁴sa³te¹nta¹ xi³ qui³sˀin³ Juan a³ tsˀe⁴ ncˀa³jmi³ ni¹, a³xo⁴ tsˀe⁴ cho⁴ta⁴ ni¹.
LUK 20:5 Cˀia⁴ je² tsa³cjao¹ya³-ni³: Cˀia⁴ tsa² coi⁴xoan¹ nca³ tsˀe⁴ ncˀa³jmi³ ni¹, cˀoa⁴coi⁴tso⁴-jin²ˀni³: A¹-ni³ nca³ tsi² coan³cjain¹-si¹ni³no³ xi³ tˀa³tsˀe⁴.
LUK 20:6 Cˀia⁴ tsa² cˀoa⁴coi⁴xoan¹ nca³ tsˀe⁴ cho⁴ta⁴ ni¹, nca³tsˀi³ na⁴xi⁴na³nta¹ la⁴jao⁴ cˀoe⁴²-na¹, nca⁴ ña³qui³ ma³cjain¹-le⁴ nca³ je² Juan jnco³ xi³ qui³nchja⁴ya³ xi³ tˀa³tsˀe⁴ Ni³na¹.
LUK 20:7 Cˀoa⁴ qui³tso² nca³ tsi² tsa² coi³ ve³ jña³ tsˀe⁴.
LUK 20:8 Cˀia⁴ Jesús qui³tso²-le⁴: Ni⁴ˀan³-jin² cˀoa⁴xin¹-no³ jña³-le⁴ xi³ tsjoa¹ˀnte³-na³ nca³ cˀoa⁴sˀin³-si¹nia³ je² cjoa⁴-vi⁴.
LUK 20:9 Jesús tsa³cˀe¹tsˀia⁴cao⁴ nca³ qui³tso²jnco³-le⁴ na⁴xi⁴na³nta¹ cjoa⁴xco¹son²: Jnco³ cho⁴ta⁴ tsa³cˀe¹ntje² jnco³ xca⁴-le⁴ to³tse⁴², cˀoa⁴ qui³si³quin²ya³son²-le⁴ cho⁴ta⁴ xi³ si¹xa¹son², cˀoa⁴ ncjin² no¹ qui³.
LUK 20:10 Cˀia⁴ nca³ ji³cho² ni⁴čhjin³-le⁴ nca³ sˀe³xco¹ to³tse⁴²-ve⁴, qui³si³ca³sen¹con³-le⁴ je² cho⁴ta⁴ xi³ si¹xa¹son²-ve⁴ jnco³ cho⁴ˀnta³, jme¹-ni³ nca³ tsjoa¹-si¹ni³le⁴ tso³jmi²-ve⁴ xi³ je² vˀa³cao⁴-le⁴, to⁴nca³ je² cho⁴ta⁴si¹xa¹-ve⁴ tsa³ca¹-le⁴, qui³sca³ni¹cji³tia³ cho⁴ˀnta³-ve⁴.
LUK 20:11 Nqui²jnco³cˀa² qui³si³ca³sen¹-nca¹ni³ nqui²jnco³ cho⁴ˀnta³, to⁴nca³ je²-ˀni³ cˀoa⁴²-ti⁴ tsa³ca¹-le⁴, cˀoa⁴ chˀao³ qui³tso²-le⁴, cˀoa⁴ ti⁴qui³si³ca³sen¹ cji³tia³-nca¹ni³.
LUK 20:12 Ti⁴qui³si³ca³sen¹ nqui²jnco³-nca¹ni³ xi³ ma³jan²-ni³ cho⁴ˀnta³, to⁴nca³ je² cˀoa⁴²-ti⁴ qui³si³qui²ˀaon³ je²-vi⁴, cˀoa⁴ qui³tsˀaon³sje³.
LUK 20:13 Cˀia⁴² qui³tso² je² nai³-le⁴ xca⁴-le⁴ to³tse⁴²-ve⁴: Jme¹ xi³ sˀian³. Tsa² coi³ ni⁴čhjin³ si³ca³sen¹³ ˀnti¹-na⁴ xi³ tsjoa³que⁴. Je²-vi⁴ scoe⁴xcon¹ cˀia⁴ nca³ scoe⁴.
LUK 20:14 To⁴nca³ cho⁴ta⁴ xi³ si¹xa¹son²-ve⁴ cˀia⁴ nca³ tsa³ve³, qui³tso²-le⁴ xi¹ncjin¹: Je²-vi⁴ xi³ cˀoai⁴cjoa⁴tjao²-le⁴ xca⁴-le⁴ to³tse⁴²-vi⁴. Tjian¹ si⁴cˀen³-nia¹ jme¹-ni³ nca³ cjoa⁴tjao²-le⁴ve⁴ tsan⁴² coan⁴-ni³.
LUK 20:15 Qui³tsˀaon³sjejin³ tso³jmi²ntje²-ve⁴, cˀoa⁴ qui³si³cˀen³. Je² nai³-le⁴ xca⁴-le⁴ to³tse⁴²-ve⁴, jme¹ xi³ si⁴²cao⁴-ˀni³ tso²cˀoa⁴ je² cho⁴ta⁴-ve⁴.
LUK 20:16 Je² nai³-le⁴ xca⁴-le⁴ to³tse⁴²-ve⁴ cjoi⁴nčhoa³, cˀoa⁴ si⁴²qui³xo²ya³ je² cho⁴ta⁴ xi³ si¹xa¹son²-ve⁴, cˀoa⁴ xca⁴-le⁴ to³tse⁴²-le⁴ tsjoa¹son²-le⁴ xi³ cja⁴ˀai¹. Cˀia⁴ nca³ je² cho⁴ta⁴ xi³ tjio¹nčhˀoe¹-le⁴ Jesús qui³nčhˀoe¹ je²-vi⁴, qui³tso²: Ni⁴ˀi⁴tse¹-jin² cˀoa⁴tjin¹.
LUK 20:17 To⁴nca³ Jesús qui³sco²tsen³-le⁴ qui³tso²: Jme¹-ni³ tso²cˀoa⁴ je² xi³ tji¹tˀa³ xon⁴: Je² la⁴jao⁴ xi³ qui³si³cˀa³tjen⁴ cho⁴ta⁴ xi³ vˀe¹nta³ ntˀia³, je²-vi⁴ xi³ coan³ la⁴jao⁴xi⁴nqui⁴.
LUK 20:18 To⁴ˀya³-ni³ xi³ ya⁴ sca⁴son² je² la⁴jao⁴-ve⁴ coan⁴xcoa⁴-ni¹, to⁴nca³ je² xi³ la⁴jao⁴-ve⁴ sca⁴ne²-le⁴ coan⁴chao³.
LUK 20:19 Tsa³ca¹sjai³ cho⁴ta⁴ti¹tjon²-le⁴ na⁴ˀmi³ cao⁴ cho⁴ta⁴ scribano jo³-sˀin² nca³ tsoa⁴ Jesús ti⁴coi³-ni³ hora-ve⁴, to⁴nca³ qui³tsa³cjon¹-le⁴ cho⁴ta⁴na⁴xi⁴na³nta¹, nca⁴ coan³cho⁴ya³-le⁴ nca³ co²ntran⁴ tsˀe⁴ qui³tso² je² cjoa⁴xco¹son²-ve⁴.
LUK 20:20 Tjio¹co³xin⁴-le⁴. Qui³si³ca³sen¹ˀma³ cho⁴ta⁴ xi³ sco¹tsen³xin²-le⁴ xi³ cˀoa⁴qui³sˀin³ jo³-ni³ cho⁴ta⁴nta³ jme¹-ni³ nca³ cjoi⁴nčhˀoe¹-ni³le⁴ en¹-le⁴ jo³ tso², cˀoa⁴ cˀoa⁴-sˀin² coan⁴sjai³-le⁴ jo³-sˀin² nca³ sca⁴ni¹tˀa³-le⁴ je² cho⁴ta⁴xa¹ti¹tjon² xi³ tjin¹-le⁴ ˀnte³ cao⁴ cjoa⁴te¹xo³ma³.
LUK 20:21 Je² cho⁴ta⁴ xi³ co³tsen³xin²-le⁴ qui³tsi²na³nqui³-le⁴ Jesús: Maestro, ˀya³-ni¹⁴jin⁴ nca³ ji³ nta³ cˀoa⁴si³, cˀoa⁴ nta³ va³co²yai³, cˀoa⁴ to⁴nco¹son² ˀmi³coai⁴ cho⁴ta⁴, cˀoa⁴ cjai¹nca³ nta³ va³co²yai³ ntia⁴²-le⁴ Ni³na¹ cao⁴ cjoa⁴qui²xi⁴.
LUK 20:22 A³ nta³ tjin¹ nca³ cˀoe¹chji¹-le⁴² taon⁴sa¹ César a³xo⁴ mai³.
LUK 20:23 To⁴nca³ je² tsa³ve³-le⁴con³ cjoa⁴ma²ña⁴-le⁴, qui³tso²-le⁴: A¹-ni³ nca³ cho¹tˀa³-si¹ni³nao¹³.
LUK 20:24 Ta⁴co²-nao¹³ taon⁴-ve⁴: ˀya¹ tsˀe⁴ xco¹son² xi³ tjin¹-le⁴, cˀoa⁴ je² en¹ xi³ tjio¹tˀa³. Cˀoa⁴qui³tso²: Tsˀe⁴ César.
LUK 20:25 Cˀia⁴ Jesús qui³tso²-le⁴: Tˀai²-lao⁴³ tso²cˀoa⁴ César je² xi³ tsˀe⁴ César, cˀoa⁴ tˀai²-lao⁴³ Ni³na¹ je² xi³ tsˀe⁴ Ni³na¹.
LUK 20:26 Li²coi³ coan³sjai³-le⁴ jo³-sˀin² tsa³ca¹nqui³ en¹-le⁴ nqui³xcon⁴ na⁴xi⁴na³nta¹, to⁴sa³ coan³xcon¹-le⁴ jo³ qui³tso²-le⁴. To⁴tsa³cˀe²yo³jyo¹-ni¹.
LUK 20:27 Cˀia⁴ ji³cho²con³cˀa²-le⁴ cho⁴ta⁴ saduceos. Je² cho⁴ta⁴ saduceos tso² nca³ tsin² cjoa⁴fa³ˀa¹ya³-jin². Qui³tsi²na³nqui³-le⁴ Jesús:
LUK 20:28 Maestro, Moisés qui³squi³-na¹: Tsa² jnco³ ntsˀe³² coi⁴ya¹, tsa² chjon⁴² tjin¹-le⁴, tsa² tsi² qui³sˀe³-le⁴ xti³ nca³ coi⁴ya¹, je² ntsˀe⁴ ca²ta³cjoe¹tjao² chjon⁴²-ve⁴, cˀoa⁴ ca²ta³sˀe³-le⁴ xti³ nca³jao³-le⁴ ntsˀe⁴.
LUK 20:29 Ña³to³ coan³ xi³ ti⁴ntsˀe⁴-ni³. Je² xi³ ˀnti¹tjon² qui³sˀe³-le⁴ chjon⁴². Tsin²-le⁴ xti³-jin² nca³ cˀen³.
LUK 20:30 Tsa³cˀe²jna³cao⁴ chjon⁴²-ve⁴ ntsˀe⁴ xi³ ma³jao²-ni³. Cˀoa⁴²-ti⁴ je² tsin²-le⁴ xti³-jin² nca³ cˀen³.
LUK 20:31 Tsa³cˀe²jna³cao⁴ chjon⁴²-ve⁴ ntsˀe⁴ xi³ ma³jan²-ni³, cˀoa⁴-ti⁴sˀin² nca³tsˀi³ xi³ ña³to³, cˀoa⁴ cˀen³-ni¹, a³li²coi³ xti³ qui³sˀe³-le⁴.
LUK 20:32 Xi³ fe³tˀa³-ni³, cˀoa⁴²-ti⁴ cˀen³ chjon⁴²-ve⁴.
LUK 20:33 Cˀia⁴ nca³ cjoa⁴ˀa¹ya³-na¹ tso²cˀoa⁴, ˀya¹ tsˀe⁴ coan⁴ chjon⁴²-ve⁴, nca⁴ je² xi³ ña³to³-ve⁴ tsa³ca³tio²cao⁴ chjon⁴²-ve⁴.
LUK 20:34 Cˀia⁴ Jesús qui³tso²-le⁴: Je² cho⁴ta⁴ xi³ tjio¹ coi³ ni⁴čhjin³ je²-vi⁴ coi⁴xan³-ni¹, cˀoa⁴ cjoa⁴vi³xan³ cˀoai⁴-le⁴.
LUK 20:35 To⁴nca³ je² cho⁴ta⁴ xi³ va³quin²-le⁴ cjoa⁴fa³ˀa¹ya³ cˀia⁴ ni⁴čhjin³-ve⁴, ni⁴coi⁴xan³-jin², ni⁴cˀoai⁴²-jin²le⁴ cjoa⁴vi³xan³.
LUK 20:36 Li²coi³ ti⁴coan³-ni³le⁴ coi⁴ya¹, nca⁴ ma³nco¹son² a²ncje⁴. ˀnti¹-le⁴ Ni³na¹ coan⁴, nca⁴ cˀoa⁴cao⁴-le⁴ cjoa⁴fa³ˀa¹ya³.
LUK 20:37 Je² xi³ cˀen³ cjoa⁴ˀa¹ya³-ni³le⁴. Nta³ tsa³ Moisés cˀoa⁴-sˀin² tsa³ca³co¹son²tsen³, ya⁴ jña³ tji¹tˀa³ xi³ tˀa³tsˀe⁴ ˀnti¹ya¹na³ˀya¹, jña³ nca³ qui³tso²-le⁴ Nai³-na¹ Ni³na¹-le⁴ Abraham, cˀoa⁴ Ni³na¹-le⁴ Isaac, cˀoa⁴²-ti⁴ Ni³na¹-le⁴ Jacob.
LUK 20:38 Ni³na¹ a³li² Ni³na¹-le⁴ xi³ cˀen³-jin², to⁴nca³ tsˀe⁴ xi³ tjio¹con³, nca⁴ nca³tsˀi³ tˀa³tsˀe⁴ Ni³na¹ tjio¹con³.
LUK 20:39 Qui³nchja⁴cˀa²-le⁴ xi³ cho⁴ta⁴ scribano: Maestro, cjoa⁴qui²xi⁴ xi³ ca²si³-ve⁴.
LUK 20:40 A³li²coi³ coan³nˀion¹con³ nca³ qui³tsi²na³nqui³-sa³le⁴.
LUK 20:41 Jesús qui³tso²-le⁴: Jo¹-sˀin²ˀni³ nca³ tso² nca³ Cristo ˀnti¹-le⁴ David.
LUK 20:42 Ti⁴je²-ni³ David tso² ya⁴ libro Salmos: Je² Nai³-na¹ qui³tso²-le⁴ Nai³-na⁴: Ti⁴jna³tˀa³-nai¹³ nca³qui²xi⁴-na⁴,
LUK 20:43 sa³ˀnta³ si³cˀe¹yoa³ co²ntran⁴-li⁴ ya⁴nqui³ ntso⁴coi³, jo³-ni³ tsa² ya¹ jña³ ncha³son² ntso⁴coi³.
LUK 20:44 Cˀoa⁴-sˀin² David Nai³-na⁴ tso²-le⁴. Jo¹-sˀin²ˀni³ nca³ ˀnti¹-le⁴ ma³-le⁴.
LUK 20:45 Tjio¹nčhˀoe¹-le⁴ nca³tsˀi³ na⁴xi⁴na³nta¹, cˀia⁴ nca³ Jesús cˀoa⁴qui³tso²-le⁴ cho⁴ta⁴-le⁴:
LUK 20:46 Ti⁴coi²nta⁴-lao⁴³ yao³-no³ cho⁴ta⁴ scribano xi³ tsjoa³-le⁴ vˀa³mjen³ cao⁴ na³jño³jnčho³, cˀoa⁴ tsjoa³-le⁴ nca³ cho⁴ta⁴ si⁴²ti²ˀnta³-le⁴ ya⁴ nti⁴tsin⁴-ve⁴, cˀoa⁴ me³-le⁴ je² ya¹xi²le⁴ xi³ ti¹tjon² ya⁴³ ntˀia³ sinagoga, cˀoa⁴ je² ˀnte³ xi³ ti¹tjon² ya⁴ jña³ cjen²sˀoi¹.
LUK 20:47 Xi³ fa³yo³ntjai² ntˀia³-le⁴ ya¹nchjin¹ xi³ cˀen³ xˀin⁴-le⁴. To⁴chji³ne³-ni¹ tse³² vˀe¹tsˀoa³. Je² xi³ cˀoa⁴cjoan³ nqui²sa⁴ tse³ cjoa⁴ñˀain³ sˀe⁴-le⁴.
LUK 21:1 Cˀia⁴ Jesús qui³sco²tsen³-le⁴, tsa³ve³ cho⁴ta⁴nchi⁴na¹ nca³ tsa³qui³ncha¹ taon⁴-le⁴ ya⁴³ ca²xa⁴-le⁴ yo⁴nco⁴.
LUK 21:2 Cˀoa⁴-ti⁴ tsa³ve³ jnco³ ˀnti¹chjon⁴² xi³ yo⁴ma⁴, xi³ je³cˀen³ xˀin⁴-le⁴. ˀnti¹qui⁴cha⁴si³ne² tsa³qui³ncha¹ ya⁴-ve⁴.
LUK 21:3 Jesús qui³tso²: Xi³ cjoa⁴qui²xi⁴ xi³ xin³-no³ nca³ je² chjon⁴²-vi⁴ xi³ yo⁴ma⁴, xi³ je³cˀen³ xˀin⁴-le⁴, nqui²sa⁴ tse³ tsa³qui³ncha¹ cao⁴-ni³ tsa² nca³tsˀi³.
LUK 21:4 Nca³tsˀi³ je²-vi⁴ to⁴ca²tsjoa¹cjoa⁴tjao²-le⁴ Ni³na¹ xi³ njen³nqui³-le⁴, to⁴nca³ je²-vi⁴ nta³ tsa² yo⁴ma⁴ tsa³qui³ncha¹ nca³yi³je³ xi³ tjin¹-le⁴ tˀa³tsˀe⁴ xi³ cjen².
LUK 21:5 Cˀoa⁴ tjin¹ cˀa³ cho⁴ta⁴ xi³ qui³nchja⁴ xi³ tˀa³tsˀe⁴ yo⁴nco⁴, nca³ coan³nˀion¹tˀa³ la⁴jao⁴ xi³ na³sca¹cjoan³, cˀoa⁴ cao⁴ cjoa⁴tjao² xi³ tsa³cˀai²-le⁴. Jesús qui³tso²-le⁴:
LUK 21:6 Tˀa³tsˀe⁴ je² cjoa⁴ xi³ ˀyao³-vi⁴, cjoa⁴ˀai¹ ni⁴čhjin³ nca³ tsi² ti⁴sa⁴tio²son²-ni³le⁴ xi¹ncjin¹ la⁴jao⁴, cˀoa⁴ jtsao⁴nqui³ nca³yi³je³.
LUK 21:7 Qui³tsi²na³nqui³-le⁴: Maestro, cˀia¹-ni³ve⁴ nca³ cˀoa⁴coan⁴ je² cjoa⁴-vi⁴. Jme¹ choa⁴ xi³ sˀe⁴ cˀia⁴ nca³ me³coan⁴jnco³ nca³yi³je³ je² cjoa⁴-vi⁴.
LUK 21:8 Cˀia⁴ qui³tso² Jesús: Cho¹tsaon³ jme¹-ni³ nca³ tsi² coai⁴cao⁴-si¹ni³no³ ntia⁴²tˀa³xin², nca⁴ cjai¹ ncjin² cjoa⁴ˀai¹ cao⁴ jan³ˀain¹-na⁴, coi⁴tso⁴: An³ nia¹³ Cristo. Cˀoa⁴ coi⁴tso⁴-sa³: Ni⁴čhjin³ ti¹jna³čhian³-ni¹. A³li² ma³nquin¹tjen⁴nqui³-jin²lao⁴³ nca³ je².
LUK 21:9 Cˀia⁴ nca³ coi⁴no²ˀya²-lao⁴³ xi³ tˀa³tsˀe⁴ cjoa⁴jchan¹ cao⁴ cjoa⁴si³, a³li² vi³jcon³-jion²³, nca⁴ ma³chjen¹-ni¹ nca³ ti¹tjon² cˀoa⁴coan⁴ cjoa⁴ je²-vi⁴. To⁴nca³ li²coi³ nti⁴ton⁴ cjoe⁴tˀa³.
LUK 21:10 Cˀia⁴ qui³tso²-le⁴ˀni³: Coi⁴so¹tjen⁴ne² na⁴xi⁴na³nta¹ co²ntran⁴-le⁴ xi³ cja⁴ˀai¹ na⁴xi⁴na³nta¹, cˀoa⁴ cjoa⁴te¹xo³ma³ co²ntran⁴-le⁴ cjoa⁴te¹xo³ma³.
LUK 21:11 Cˀoa⁴ cjoa⁴ˀa² chaon¹xcon¹, cˀoa⁴ cjai¹ ncjin² ˀnte³ coan⁴ cji³nčha¹ chˀin³ˀvi³. Cˀoa⁴ sˀe⁴ cjoa⁴xcon¹, cˀoa⁴ cjai¹ tse³ choa⁴xcon¹ xi³ nčhoa¹-ni³ ncˀa³jmi³.
LUK 21:12 To⁴nca³ to⁴nqui³-ni³ nca³yi³je³ je² cjoa⁴-vi⁴, tsoa⁴-ni³no³ cao⁴ ntsja³, chˀao³ coai⁴tjen⁴nqui³-no³, sca⁴ni²tˀa³-no³ ntˀia³ sinagoga, cˀoa⁴ sca⁴ni²sˀen³-no³ nto⁴ya¹. Coai⁴cao⁴-no³ nqui³xcon⁴ cho⁴ta⁴ti¹tjon², cˀoa⁴ nqui³xcon⁴ gobierno xi³ to⁴tˀa³tsˀe⁴ jan³ˀain¹-na⁴.
LUK 21:13 Je²-vi⁴ cˀoa⁴coan⁴-no³ nca³ cˀoa⁴-sˀin² cˀoao⁴³ en¹-no³.
LUK 21:14 Cˀoa⁴-sˀin² tˀao²³-to³con²³, nca³ tsi² to⁴nqui³-ni³ ni²cja³ˀai³tsjaon³ jme³ xi³ coi⁴xon¹³.
LUK 21:15 Nca⁴ an³ tsjoa³-no³ en¹ cao⁴ cjoa⁴ncjin²to³con² xi³ tsi² tsa² coi³ coan⁴-le⁴ cˀoe⁴²tˀa³-no³, ni⁴cˀoe⁴²cjao²ˀa²cao⁴-jin²no³ nca³tsˀi³ xi³ co²ntran⁴ coai⁴-no³.
LUK 21:16 Sca⁴ni²tˀa³-no³, nta³ tsa² nˀai³-no³ cao⁴ ntsˀao³ cao⁴ xi²nquio⁴³ cao⁴ mi²yo⁴-no³. Cˀoa⁴ si⁴²cˀen³cˀa³-no³ nca³ jon².
LUK 21:17 Coan⁴jti³que³-no³ nca³tsˀi³ xi³ to⁴tˀa³tsˀan⁴.
LUK 21:18 To⁴nca³ ni⁴jnco³-jin² ntsja⁴-le⁴ jco³ cha⁴.
LUK 21:19 Xi³ to⁴tˀa³tsˀe⁴ cjoa⁴tse³jta³-no³ si⁴qui³njaon³ cjoa⁴vi³jna³chon³-no³.
LUK 21:20 Cˀia⁴ nca³ jchao⁴³ Jerusalén, nca³ tjio¹chjoa²ntai³-le⁴ so³nta²do⁴, jchao⁴³-ˀni³ nca³ coi⁴xo⁴ya³ xi¹ti¹.
LUK 21:21 Cˀia⁴ je² cho⁴ta⁴ xi³ tjio¹ ya⁴ Judea, ca²ta³ma³nca³ ya⁴ jin³jña¹, cˀoa⁴ je² xi³ tjio¹ nca³va³sen³-le⁴ Jerusalén, cˀoa⁴²-ti⁴ ca²ta³fi²xin², cˀoa⁴ je² xi³ ya⁴ tjio¹ nqui³chao³, a³li² ya⁴ fa³ˀa³sˀen³jin³ na⁴xi⁴na³nta¹.
LUK 21:22 Nca⁴ je² ni⁴čhjin³-le⁴ cjoa⁴nca³jao³, jme¹-ni³ nca³ coi⁴tjo³son²-ni³ nca³yi³je³ cjoa⁴ xi³ tji¹tˀa³ xon⁴.
LUK 21:23 Ma⁴-xo¹ni³ je² xi³ ˀnti¹ yˀa³, cˀoa⁴ je² xi³ si¹ca³qui³ coi³ ni⁴čhjin³-ve⁴, nca⁴ sˀe⁴ cjoa⁴ñˀain³ xi³ nˀion¹ i⁴ son³ˀnte³-vi⁴, cˀoa⁴ cjoa⁴ñˀain³ cjoa⁴ˀa² je² na⁴xi⁴na³nta¹-vi⁴ xi³ to⁴tˀa³tsˀe⁴ cjoa⁴jti³-le⁴ Ni³na¹.
LUK 21:24 Ña³qui³ qui⁴cha⁴nto³ coi⁴ya¹-ni³, cˀoa⁴²-ti⁴ preso coai⁴cao⁴ nca³qui³jnta² na⁴xi⁴na³nta¹yˀai³, cˀoa⁴ coi⁴ncha⁴ne²taon³ Jerusalén cho⁴ta⁴-le⁴ na⁴xi⁴na³nta¹yˀai³ xi³ li² judío-jin², jo³ sa³ˀnta³ nca³ ni⁴čhjin³-le⁴ je² cho⁴ta⁴ xi³ li² judío-jin² coan⁴jnco³.
LUK 21:25 Cˀia⁴ sˀe⁴ choa⁴ tsˀe⁴ tsˀoi¹, tsˀe⁴ sa¹, tsˀe⁴ ni³ño³, cˀoa⁴ i⁴ son³ˀnte³-vi⁴ cjoa⁴va³ sˀe⁴-le⁴ nca³tsˀi³ na⁴xi⁴na³nta¹yˀai³, nca³ i⁴ nca³ jan¹ cˀoe⁴²jta³ jo³-sˀin² nˀion¹ fa³ne³ nta¹chi³con³ cao⁴ nta¹xo¹-le⁴.
LUK 21:26 Coan⁴ˀi³nta³ cho⁴ta⁴ xi³ to⁴coi³ cjoa⁴jcon³-ve⁴, cˀoa⁴ xi³ sco¹ya³-le⁴ je² cjoa⁴-ve⁴ xi³ cjoa⁴ˀai¹ne²-le⁴ i⁴ son³ˀnte³-vi⁴, nca⁴ je² lˀi¹ xi³ tjin¹-le⁴ nca³nˀion¹ ncˀa³jmi³ jtin¹ya³-ni³.
LUK 21:27 Cˀia⁴² scoe⁴ ˀnti¹-le⁴ cho⁴ta⁴ xi³ cjoa⁴ˀai¹jin³ yo³jvi³ cao⁴ nca³nˀion¹-le⁴, cˀoa⁴ cao⁴ tse³ cjoa⁴je³ya³.
LUK 21:28 Cˀia⁴ nca³ je² cjoa⁴-vi⁴ cˀoe⁴²tsˀia⁴cao⁴ nca³ cˀoa⁴coan⁴, cho¹tsen³ncˀao³, cˀoa⁴ cho¹mi³tjaon⁴³ jco³, nca⁴ je² cjoa⁴vi³tjo³ntjai²-no³ nčhoa¹čhian³.
LUK 21:29 Qui³tso²jnco³-le⁴ cjoa⁴xco¹son²: Cho¹tsen³-lao⁴³ ya¹ higo-ve⁴, cˀoa⁴ nca³yi³je³ ya¹.
LUK 21:30 To⁴cˀia⁴-ni³ nca³ vˀe¹jtsˀen¹ ˀnti¹xca⁴-le⁴, nta³ ˀyao³ nca³ chan⁴jtsi¹ ti¹nčhoa¹čhian³.
LUK 21:31 Cˀoa⁴-ti⁴sˀin² nca³ jon²-vi⁴, cˀia⁴ nca³ jchao⁴³ nca³ cˀoa⁴cji³ma³ je² cjoa⁴-vi⁴, ca²ta³ˀyao³ nca³ ti¹jna³čhian³ cjoa⁴te¹xo³ma³-le⁴ Ni³na¹.
LUK 21:32 Xi³ cjoa⁴qui²xi⁴ xi³ xin³-no³ nca³ tsi² coi³ coi⁴ya¹ cho⁴ta⁴ xi³ tjio¹ ntˀai⁴-vi⁴, jo³ sa³ˀnta³ cˀoa⁴coan⁴ nca³yi³je³ je² cjoa⁴-vi⁴.
LUK 21:33 Ncˀa³jmi³ cao⁴ son³ˀnte³ cjoe⁴tˀa³-ni¹, to⁴nca³ je² en¹-na⁴ li²coi³ cjoe⁴tˀa³.
LUK 21:34 Ti⁴coi²ntao⁴³ yao³-no³ nca³ tsi² tsa² coi³ ai¹ sca⁴-le⁴ ni⁴ma⁴-no³ cao⁴ cjoa⁴chi⁴nca⁴ cao⁴ cjoa⁴chˀi⁴, cˀoa⁴ cao⁴ nca³yi³je³ cjoa⁴ xi³ ai¹ xi³ tsˀe⁴ i⁴ son³ˀnte³-vi⁴. Cˀia⁴ je² ni⁴čhjin³ cˀia⁴ nca³ tsi² tsa² cjia³to³con²³, cjoa⁴ˀai¹ne²-no³ jo³-ni³ tsa² chen⁴.
LUK 21:35 Nca⁴ je² ni⁴čhjin³-ve⁴ cjoa⁴ˀai¹ne²-le⁴ nca³tsˀi³ xi³ tjio¹ nca³qui³jnta² son³ˀnte³-vi⁴.
LUK 21:36 Cjia³ta³con² ti⁴yo³-ˀni³, tˀe²tsˀoao³ nca³ntsjai² ni⁴čhjin³, jme¹-ni³ nca³ sˀe⁴-si¹ni³no³ nca³nˀion¹ nca³ coi⁴ncha³xin²-lao⁴³ nca³yi³je³ je² cjoa⁴-vi⁴ xi³ cjoa⁴ˀai¹, cˀoa⁴ jme¹-ni³ nca³ sa⁴co²-si¹ni³no³ ˀnte³ nqui³xcon⁴ ˀnti¹-le⁴ cho⁴ta⁴.
LUK 21:37 Nca³ ni⁴čhjin³ Jesús tsa³ca³co¹ya³ ya⁴³ yo⁴nco⁴, cˀia⁴ nca³ njion² ji³tjo³ tsa³cˀe²jna³ ya⁴ ni³nto³ xi³ Olivos ˀmi².
LUK 21:38 Nca³ ta⁴njion² nca³tsˀi³ na⁴xi⁴na³nta¹ ja³ˀai³con²-le⁴ ya⁴³ yo⁴nco⁴, jme¹-ni³ nca³ cjoi⁴nčhˀoe¹-si¹ni³le⁴.
LUK 22:1 Coan³čhian³-le⁴ ni⁴čhjin³ nca³ vi³tjo³ sˀoi¹-le⁴ nio⁴xti²la⁴ xi³ tsin²-le⁴ na⁴ˀyo⁴san³, xi³ pa²xco⁴ ˀmi²-le⁴.
LUK 22:2 Je² cho⁴ta⁴ti¹tjon²-le⁴ na⁴ˀmi³ cao⁴ cho⁴ta⁴ scribano tjio¹va¹sjai³ jo³-sˀin² nca³ si⁴²cˀen³ Jesús, nca⁴ qui³tsa³cjon¹-le⁴ na⁴xi⁴na³nta¹.
LUK 22:3 Cˀia⁴ Satanás ja³ˀa³sˀen³jin³-le⁴ ni⁴ma⁴-le⁴ Judas xi³ Iscariote ˀmi², je² jnco³ xi³ te³jao²-ve⁴.
LUK 22:4 Qui³ Judas, tsa³cja¹cao⁴ cho⁴ta⁴ti¹tjon²-le⁴ na⁴ˀmi³ cao⁴ nca³jco⁴-le⁴ cho⁴ta⁴ xi³ si¹coi²nta⁴ yo⁴nco⁴. Tsa³cja¹cao⁴ jo³-sˀin² nca³ sca⁴ni²tˀa³-le⁴.
LUK 22:5 Je²-vi⁴ coan³tsjoa³-le⁴. Cˀoa⁴ tsa³cˀe¹nta³-ni³ nca³ tsjoa¹-le⁴ taon⁴.
LUK 22:6 Judas qui³si³sˀe³nqui³-le⁴, cˀoa⁴ tsa³ca¹sjai³ˀnte³ nca³ sca⁴ni²tˀa³ Jesús cˀia⁴ nca³ ni⁴cho⁴ta⁴ncjin²-jin² scoe⁴.
LUK 22:7 Ja³ˀai³ ni⁴čhjin³-le⁴ sˀoi¹ nio⁴xti²la⁴ xi³ tsin²-le⁴ na⁴ˀyo⁴san³-jin² cˀia⁴ nca³ ma³chjen¹ nca³ xi¹jten⁴ njin¹-le⁴ je² va³rre² xi³ tˀa³tsˀe⁴ sˀoi¹.
LUK 22:8 Jesús qui³si³ca³sen¹ Pedro cao⁴ Juan, qui³tso²-le⁴: Ta⁴nquion¹³, tˀe²ntao³ tˀa³tsan⁴² pa²xco⁴, jme¹-ni³ nca³ coi⁴chi³-si¹nia¹.
LUK 22:9 Je² qui³tso²-le⁴: Jña¹-ni³ nca³ me³-li² nca³ cˀoe¹ntai³⁴-jin⁴.
LUK 22:10 Jesús qui³tso²-le⁴: Coe⁴-ni³ cˀia⁴ nca³ coi⁴tja¹sˀaon³ ya⁴ na⁴xi⁴na³nta¹-ve⁴, sa⁴te¹jion³ jnco³ cho⁴ta⁴xˀin⁴ xi³ yˀa³ jnco³ ni³sa³na³nta¹, tain¹tjen⁴nqui³-lao⁴³ sa³ˀnta³ ni³ˀya³ jña³ cjoa⁴ˀa³sˀen³.
LUK 22:11 Cˀoa⁴tˀin²-lao⁴³ je² xi³ tsˀe⁴ ntˀia³: Maestro xo⁴ tso²-li²: Jña¹ ti¹jna³ je² cuarto jña³ nca³ coa²cjen⁴ cao⁴ cho⁴ta⁴-na⁴ je² pa²xco⁴.
LUK 22:12 Cˀia⁴ je² coa⁴co²-no³ jnco³ cuarto xi³ je³, xi³ ti¹jna³ son²ncˀa³, xi³ je³chon³nta³. Tˀe²yo³ntao³ ya⁴-ve⁴.
LUK 22:13 Qui³ tso²cˀoa⁴, coan³sjai³-le⁴ jo³ qui³tso²-le⁴, tsa³cˀe¹nta³ je² pa²xco⁴-ve⁴.
LUK 22:14 Cˀia⁴ nca³ ji³cho²ca³ hora, Jesús tsa³cˀe²jna³tˀa³ ya¹mi²xa⁴, cˀoa⁴ cao⁴ pa²stro⁴.
LUK 22:15 Qui³tso²-le⁴: Cjai¹nca³ to⁴nˀion¹ tse³ coan³me³-na³ nca³ coa²cjen⁴cao⁴-no³ je² pa²xco⁴-vi⁴ to⁴nqui³-le⁴ni³ nca³ cjoa³ˀa³ cjoa⁴ñˀain³.
LUK 22:16 Cˀoa⁴xin³-no³ nca³ tsi² tsa² ti⁴squi²ne⁴-sa³nia³ pa²xco⁴ sa³ˀnta³ nca³ coi⁴tjo³son² ya⁴ cjoa⁴te¹xo³ma³-le⁴ Ni³na¹.
LUK 22:17 Qui³scoe¹ jnco³ cho⁴tsin¹, qui³tsjoa³ cjoa⁴nta³, qui³tso²: Chjoao¹³ je²-vi⁴, cˀoa⁴ ti⁴cˀa³vi¹jin³-lao⁴³ xi²nquio⁴³.
LUK 22:18 Cˀoa⁴xin³-no³ nca³ li²coi³ ti⁴scˀoi⁴-sa³nia³ je² na³nta¹to³tse⁴²-ve⁴ sa³ˀnta³ nca³ cjoa⁴ˀai¹ cjoa⁴te¹xo³ma³-le⁴ Ni³na¹.
LUK 22:19 Qui³scoe¹ nio⁴xti²la⁴, qui³tsjoa³ cjoa⁴nta³, qui³si³xcoa⁴, qui³tsjoa³-le⁴ cho⁴ta⁴-le⁴, qui³tso²: Je²-vi⁴ yao³-na⁴ ni¹ xi³ tsjoa³ xi³ tˀa³tsaon⁴³, cˀoa⁴tˀiaon⁴³ coi³-vi⁴ jme¹-ni³ nca³ nta³ cˀoe¹jin³ta³con²-si¹ni³nao¹³.
LUK 22:20 Cˀia⁴ nca³ je³tsa³cjen², cˀoa⁴-ti⁴sˀin² qui³sˀin³ cao⁴ je² cho⁴tsin¹, qui³tso²: Je² cho⁴tsin¹-vi⁴ je² ni¹ xi³ cjoa⁴cho⁴tse⁴ xi³ vˀe³nta³coa⁴ cao⁴ njin¹-na⁴ xi³ xi¹jten⁴ tˀa³tsaon⁴³.
LUK 22:21 To⁴nca³, coe⁴-ni³, ntsja³ je² xi³ cˀoe⁴²tˀain³ na⁴jmi¹ xi³ tˀa³tsˀan⁴, i⁴ ti¹jna³tˀa³cao⁴-na³ ya¹mi²xa⁴-vi⁴.
LUK 22:22 Xi³ cjoa⁴qui²xi⁴ je² ˀnti¹-le⁴ cho⁴ta⁴ coai⁴ jo³-sˀin² nca³ to⁴nqui³-ni³ xa¹ tji¹nta³-ni³, to⁴nca³ ma⁴-xo¹ni³ je² cho⁴ta⁴-ve⁴ xi³ cˀoe⁴²tˀain³ na⁴jmi¹ xi³ tˀa³tsˀe⁴.
LUK 22:23 Cˀia⁴ nca³tsˀi³ cho⁴ta⁴-le⁴ tsa³cˀe¹tsˀia⁴cao⁴ nca³ qui³tsi²na³nqui³-le⁴ xi¹ncjin¹ jña³-le⁴ xi³ cˀoa⁴sˀin⁴² je²-vi⁴.
LUK 22:24 Cˀoa⁴coan³ nca³ tsa³cjao¹ti³ya³-ni³ ˀya³-ni³ xi³ ti⁴je²-ni³ xi³ coa⁴sen⁴jna³ ti¹tjon².
LUK 22:25 Cˀia⁴ Jesús qui³tso²-le⁴: Je² cho⁴ta⁴ti¹tjon²-le⁴ cho⁴ta⁴ xi³ li² judío-jin² si¹cˀe¹yo³nqui³ cho⁴ta⁴-le⁴ tˀa³tsˀe⁴ cjoa⁴te¹xo³ma³-le⁴, cˀoa⁴ je² xi³ va³te¹xo³ma³-le⁴, je² ni¹ xi³ cho⁴ta⁴nta³ cˀoa⁴ˀmi²-le⁴.
LUK 22:26 To⁴nca³ jon²-vi⁴ a³li² coi³-jion²³, to⁴sa³ je² xi³ ti¹tjon² jin³-no³, ca²ta³ma³ jo³-ni³ tsa² je² xi³ ma³ˀnti¹. Cˀoa⁴ je² xi³ cho⁴ta⁴ti¹tjon², ca²ta³ma³ jo³-ni³ tsa² je² xi³ si¹xa¹.
LUK 22:27 Jña¹-le⁴ xi³ ti¹tjon²-ˀni³, a³ je² xi³ vˀe²jna³tˀa³ ya¹mi²xa⁴, a³xo⁴ je² xi³ vˀe¹ya³ tso³jmi². A³ tsi² tsa² je² xi³ vˀe²jna³tˀa³ ya¹mi²xa⁴-vi⁴. Cˀoa⁴ an³ nia¹³ xi³ ti²jna⁴jin³-no³vi⁴ jo³-ni³ tsa² cho⁴ta⁴ xi³ si¹xa¹-no³.
LUK 22:28 Jon² nio¹³ xi³ tsa³qui³yo³cao⁴ntsjai²-nao¹³, cˀia⁴ nca³ chˀao³ qui³cho²tˀa³-na³.
LUK 22:29 Cˀoa⁴ an³ cˀoa⁴-sˀin² tsjoa³-no³ cjoa⁴te¹xo³ma³, jo³-sˀin² nca³ qui³tsjoa³-na³ Nˀai³-na⁴,
LUK 22:30 jme¹-ni³ nca³ coi⁴chi³-si¹nio³, sˀio⁴-si¹nio³ tˀa³ ya¹mi²xa⁴-na⁴, ya⁴ jña³ va³te³xo³ma²³, cˀoa⁴ coi⁴yo³son²-si¹nio³ ya¹xi²le⁴, cˀoa⁴ si⁴²coi²ntao⁴³ xi³ te³jao² ntje⁴-le⁴ Israel.
LUK 22:31 Cˀoa⁴-ti⁴ qui³tso² je² Nai³-na¹: Simón, Simón, coe⁴-ni³, Satanás qui³si³je¹-no³ nca³ si⁴²tsje³-no³ jo³-ni³ tsa² trigo xi³ sˀe⁴tsao³jne³nqui³.
LUK 22:32 To⁴nca³ an³ tsa³cˀe³tsˀoa²ntjai²-le²³, jme¹-ni³ nca³ tsi² tsa² ntia³² cha⁴ xi³ ma³cjain¹-li², cˀoa⁴ ji³, cˀia⁴ nca³ cjoe⁴cˀo¹fa³ya³-ni³, ti⁴nˀioin¹³-con³ ntsˀai³.
LUK 22:33 Cˀia⁴ Pedro qui³tso²-le⁴: Señor, ti²jna⁴nta³-nia¹³ nca³ cjoi¹cao⁴-le²³ nta³ tsa² nto⁴ya¹, nta³ tsa² cjoa⁴vi³ya³.
LUK 22:34 Cˀia⁴ Jesús qui³tso²: Pedro, cˀoa⁴xin³-le²³ nca³ li²coi³ squi¹ˀntia¹ cha¹xi³cha¹ ntˀai⁴-vi⁴ sa³ˀnta³ ji³ jan² cˀa³ coi⁴jna³ˀma³cao⁴-nai¹³ nca³ tsi² coi³ ˀya³xcon³-nai¹³.
LUK 22:35 Cˀia⁴ Jesús qui³tso²-le⁴: Cˀia⁴ nca³ an³ qui³si³ca³sen¹-no³, a³li² cao⁴ xi³jtsa³taon⁴-jin², ni⁴ cao⁴ na⁴ˀya³-jin², ni⁴ cao⁴ jte¹-jin², a³ tjin¹ xi³ cha³-no³. Cˀoa⁴ je² qui³tso²: Ni⁴jme³-jin².
LUK 22:36 Cˀoa⁴ qui³tso²-le⁴: To⁴nca³ ntˀai⁴-vi⁴ je² xi³ tjin¹-le⁴ xi³jtsa³taon⁴, ca²ta³cjoe¹, cˀoa⁴-ti⁴ je² xi³ tjin¹-le⁴ na⁴ˀya³, ca²ta³cjoe¹. Je² xi³ tsin²-le⁴ qui⁴cha⁴nto³-le⁴, ca²ta³te¹na³ tso⁴nca⁴-le⁴, ca²ta³tse³.
LUK 22:37 Coi³ cˀoa⁴xin³-no³, je² xi³ tji¹tˀa³ xon⁴-ve⁴ ma³chjen¹-ni¹ nca³ coi⁴tjo³son²-sa³ tˀa³tsˀan⁴: Tsˀa³xqui⁴cao⁴ cao⁴ cho⁴ta⁴ xi³ tsˀa³ntjai²cjoa⁴. Nca⁴ je² xi³ qui³chji³ tˀa³tsˀan⁴ tjin¹-ni³ nca³ coi⁴tjo³son².
LUK 22:38 Cˀia⁴ je² qui³tso²-le⁴: Señor, coe⁴-ni³ jao² qui⁴cha⁴nto³. Cˀoa⁴ je² qui³tso²-le⁴: To⁴coan⁴²-ni³.
LUK 22:39 Cˀia⁴ Jesús ji³tjo³, qui³ jo³-sˀin² nca³ coan³nca³-le⁴ ya⁴ ni³nto³ Olivos, cˀoa⁴-ti⁴ cho⁴ta⁴-le⁴ qui³tjen⁴nqui³-le⁴.
LUK 22:40 Cˀia⁴ nca³ ji³cho² je² ˀnte³-ve⁴, qui³tso²-le⁴: Tˀe²tsˀoao³ jme¹-ni³ nca³ tsi² tsao⁴jin³-si¹nio³ je¹ cˀia⁴ nca³ chˀao³ si⁴²cao⁴-no³.
LUK 22:41 Cˀia⁴ Jesús tsa³ca³sen²xin²-le⁴ jo³-ni³ tsa² jnco³ la⁴jao⁴ xi³ cjin³ sa³te¹, cˀoa⁴ tsa³ca³sen²xco¹nchˀin³, tsa³cˀe¹tsˀoa³.
LUK 22:42 Qui³tso²: Nˀai³, tsa² me³-li² chja⁴ˀa²xin²-nai¹³ je² cjoa⁴ñˀain³, to⁴nca³ li²coi³ jo³-sˀin² nca³ me³-na³ nca³ an³, to⁴jo³-sˀin² nca³ me³-li² nca³ ji³.
LUK 22:43 Cˀia⁴ coan³tsen³jnco³-le⁴ a²ncje⁴ xi³ tsˀe⁴ ncˀa³jmi³, xi³ qui³tsjoa³-le⁴ nca³nˀion¹.
LUK 22:44 Cjai¹ aon³ cji³ma³-le⁴ ni⁴ma⁴-le⁴ nqui²sa⁴ to⁴nˀion¹ tsa³cˀe¹tsˀoa³, cˀoa⁴ qui³tjo³nta¹ jo³-ni³ tsa² tse³ njin¹ xi³ ca²tin³ xi³ qui³tsao³va³ tˀa³na³nqui³.
LUK 22:45 Cˀia⁴ nca³ tsa³qui³so¹tjen⁴-ni³ nca³ ti¹vˀe¹tsˀoa³, ja³ˀai³con³-le⁴ cho⁴ta⁴-le⁴, coan³sjai³-le⁴ nca³ cjio³fe² tˀa³tsˀe⁴ cjoa⁴fao¹-le⁴.
LUK 22:46 Qui³tso²-le⁴: A¹-ni³ ti³yo³fe²-si¹nio³. Ti⁴so²tjaon⁴³, tˀe²tsˀoao³ jme¹-ni³ nca³ tsi² tsao⁴jion³ je¹ cˀia⁴ nca³ chˀao³ si⁴²cao⁴-no³.
LUK 22:47 Cˀia⁴ nca³ to⁴jo³ ti¹nchja⁴-sa³ Jesús, coe⁴-ni³ ja³ˀai³ cho⁴ta⁴ncjin², cˀoa⁴ je² xi³ Judas ˀmi², jnco³ xi³ te³jao²-ve⁴, tjen⁴ti¹tjon²-le⁴ nca³ je². Ji³cho²nčhˀoe² Jesús nca³ cˀoe⁴²ntso³ˀa².
LUK 22:48 Cˀia⁴ Jesús qui³tso²-le⁴: Judas, a³ je² cjoa⁴vˀe²ntso³ˀa²-vi⁴ cha³ni²tˀa³-ni³ je² ˀnti¹-le⁴ cho⁴ta⁴.
LUK 22:49 Je² xi³ tjio¹cao⁴ Jesús, cˀia⁴ nca³ tsa³ve³ jme³ xi³ coan⁴-ve⁴, qui³tso²-le⁴: Señor, a³ si⁴qui²ˀaon³-ni¹⁴jin⁴ cao⁴ qui⁴cha⁴nto³.
LUK 22:50 Cˀia⁴ jnco³ cho⁴ta⁴-le⁴ qui³si³qui²ˀaon³ jnco³ cho⁴ˀnta³-le⁴ na⁴ˀmi³ti¹tjon², tsa³ca³te³tˀa³ xo⁴ño³ nca³qui²xi⁴.
LUK 22:51 Cˀia⁴ Jesús qui³tso²: Ti⁴cˀe¹jnao³ to⁴ˀi⁴² tjen⁴-vi⁴, cˀia⁴ qui³si³cao⁴ xo⁴ño³, qui³si³nta³-ni³.
LUK 22:52 Jesús qui³tso²-le je² cho⁴ta⁴ti¹tjon²-le⁴ na⁴ˀmi³ cao⁴ cho⁴ta⁴ xi³ nca³jco⁴-le⁴ cho⁴ta⁴ xi³ si¹coi²nta⁴ yo⁴nco⁴ cao⁴ cho⁴ta⁴jchi¹nca³ xi³ ji³nčhoa³con³-le⁴: A³ tˀa³tsˀe⁴ jnco³ che¹ ca²vi²tjo⁴cao⁴³ qui⁴cha⁴nto³ cao⁴ ya¹.
LUK 22:53 Ya⁴ tsa³ca²te⁴jna³cao⁴-no³ ni⁴čhjin³ nca³ nchaon³ ya⁴ya³ yo⁴nco⁴, a³li²coi³ qui³cho²mi³tjaon⁴³ ntsao⁴³ nca³ qui³nto³va³-nao¹³, to⁴nca³ je²-vi⁴ tsaon⁴³ hora, cˀoa⁴ tsˀe⁴ cjoa⁴te¹xo³ma³-le⁴ cjoa⁴njion².
LUK 22:54 Cˀia⁴ qui³tsoa³, qui³cao⁴, qui³sca³ni¹sˀen³ ya⁴³ ntˀia³-le⁴ na⁴ˀmi³ti¹tjon²-le⁴. Pedro qui³ co³tsen³tjen⁴nqui³-le⁴.
LUK 22:55 Cho⁴ta⁴ tsa³cˀe¹tse³ lˀi¹ ya⁴ nca³va³sen³-le⁴ nti³tsin³-ve⁴, cˀoa⁴ tsa³cˀe²yo³ntai³-le⁴ nca³tsˀi³. Cˀoa⁴-ti⁴ tsa³cˀe²jna³jin³-le⁴ Pedro.
LUK 22:56 Cˀia⁴ jnco³ chjon⁴² cho⁴ˀnta³ tsa³ve³ Pedro nca³ ti¹jna³ntai³ lˀi¹, qui³sco²tsen³ˀa², qui³tso²: Je² cho⁴ta⁴ xo⁴cji³-vi⁴ ya⁴ tsa³cˀe²jna³cao⁴ nca³ je².
LUK 22:57 To⁴nca³ Pedro tsa³cˀe²jna³ˀma³, qui³tso²: Ji³ chjon⁴², li²coi³ ˀve³xcoan³ nca³ je².
LUK 22:58 Xi³ ti⁴coan³ jnco³tjo²-nca¹ni³ xi³ cja⁴ˀai¹ tsa³ve³ Pedro, qui³tso²: Ji³-vi⁴ cˀoa⁴²-ti⁴ tsˀe⁴ Jesús. Cˀia⁴ Pedro qui³tso²: Ji³ xˀin⁴, a³li² an³-jian²³.
LUK 22:59 Jnco³-la⁴ hora scan³-ni³, nqui²jnco³ cˀoa⁴qui³tso²-nca¹ni³: Xi³ ña³qui³ cjoa⁴qui²xi⁴, cˀoa⁴-ti⁴ je²-vi⁴ ya⁴ tsa³cˀe²jna³cao⁴, nca⁴ cho⁴ta⁴ galileo ni¹.
LUK 22:60 Pedro qui³tso²: Ji³ xˀin⁴, li²coi³ ˀve³ jme³ xi³ si³. Nti⁴ton⁴ cˀia⁴ nca³ to⁴jo³ ti¹nchja⁴-sa³, qui³squi³ˀntia¹ cha¹xi³cha¹.
LUK 22:61 Cˀia⁴ Nai³-na¹ qui³si³cˀo¹fa³ya³, qui³sco²tsen³-le⁴ Pedro. Cˀia⁴ Pedro ja³ˀai³tsjen³-le⁴ en¹-le⁴ Nai³-na¹, jo³ qui³tso²-le⁴: Cˀia⁴ nca³ cje³ cji³ˀntia¹-jin² cha¹xi³cha¹, coi⁴jna³ˀma³cao⁴-nai¹³ jan² cˀa³.
LUK 22:62 Cˀia⁴ Pedro ji³tjo³ nti³tsin³, a³li² to⁴cˀoa⁴²cji³ qui³squi³ˀnta¹.
LUK 22:63 Je² cho⁴ta⁴ xi³ tjio¹tsoa³nˀion¹ Jesús, tsa³qui³jno²que³, cˀoa⁴ tsa³ca¹-le⁴.
LUK 22:64 Tsa³ca¹jčho³ˀma³ ncjain¹, qui³si³jtsin³ˀa³, cˀoa⁴ qui³tsi²na³nqui³-le⁴: Cˀoa⁴tˀin²-na³jin⁴ ˀya¹ xi³ ca²vˀe¹-li².
LUK 22:65 Cˀoa⁴-ti⁴ qui³tso²-sa³le⁴, cˀoa⁴ cjai¹ ncjin² cjoa⁴ qui³nchja⁴ˀaon³-le⁴.
LUK 22:66 Cˀia⁴ nca³ qui³sˀe³sen¹, coan³ña³ cho⁴ta⁴jchi¹nca³ xi³ tsˀe⁴ na⁴xi⁴na³nta¹-ve⁴ cao⁴ cho⁴ta⁴ti¹tjon²-le⁴ na⁴ˀmi³ cao⁴ cho⁴ta⁴ scribano, qui³cao⁴ Jesús ya⁴ junta-le⁴ve⁴.
LUK 22:67 Qui³tso²: Tsa² ji³ ni¹³ Cristo, cˀoa⁴tˀin²-na³jin⁴. Jesús qui³tso²-le⁴: Cˀia⁴ tsa² cˀoa⁴xin¹-no³ li²coi³ coan⁴cjain¹-no³.
LUK 22:68 Cˀia⁴ tsa² an³ sco³na³nqui³-no³ nca³ jon²-vi⁴, li²coi³ coi⁴no²cjoa⁴-nao¹³, ni⁴ coi⁴njion¹-jin²nao¹³.
LUK 22:69 Xi³ va³se²tsˀia⁴ ntˀai⁴ cˀoa⁴ xi³ fi²-sa³ni³, je² ˀnti¹-le⁴ cho⁴ta⁴ ya⁴ cˀoe¹jna³ nca³qui²xi⁴-le⁴ nca³nˀion¹-le⁴ Ni³na¹.
LUK 22:70 Qui³tso² nca³tsˀi³: Nco⁴ a³ ji³ ni¹³ ˀnti¹-le⁴ Ni³na¹-ˀni³. Jesús qui³tso²-le⁴: Jon² xo⁴ vi³xon¹³ nca³ coia³.
LUK 22:71 Cˀia⁴ qui³tso² nca³ je²: Jme¹-sa³ testigo xi³ ma³chjen¹-na¹, nca⁴ ña¹ soa³² xi³ je³qui³no²ˀya²-le⁴² tsˀoa³.
LUK 23:1 Ji³so¹tjen⁴ nca³tsˀi³ cho⁴ta⁴-ve⁴, qui³cao⁴-le⁴ Pilato Jesús.
LUK 23:2 Tsa³cˀe¹tsˀia⁴cao⁴ nca³ tsa³ca¹nqui³, qui³tso²: Je²-vi⁴ coan³sjai³-na³jin⁴ nca³ xin²ntia⁴² fi²cao⁴ na⁴xi⁴na³nta¹-na⁴jin⁴, nca³ vˀe¹chjoa²-na³jin⁴ nca³ vˀai²-lai⁴jin⁴ taon⁴sa¹ César, nca³ tso² nca³ ti⁴je² ni¹ Cristo je² cho⁴ta⁴ti¹tjon².
LUK 23:3 Cˀia⁴ Pilato qui³sco²na³nqui³-le⁴: A³ ji³ ni¹³ cho⁴ta⁴ti¹tjon²-le⁴ cho⁴ta⁴ judíos. Cˀia⁴ Jesús qui³tso²-le⁴: Cˀoa⁴tjin¹ xi³ si³-ve⁴.
LUK 23:4 Cˀia⁴ Pilato qui³tso²-le⁴ cho⁴ta⁴ti¹tjon²-le⁴ na⁴ˀmi³ cao⁴ cho⁴ta⁴na⁴xi⁴na³nta¹: Ni⁴jme³-jin² je¹ xi³ ma³sjai³-na³ tˀa³tsˀe⁴ cho⁴ta⁴ je²-vi⁴.
LUK 23:5 To⁴nca³ qui³nchja⁴qui³ti³-ni¹, qui³tso²: Vˀe¹tsˀia⁴ cjoa⁴-si³ nca³ va³co¹ya³ nca³qui³jnta² na³nqui³ Judea, vˀe¹tsˀia⁴cao⁴-cjoan²ni³ na³nqui³ Galilea sa³ˀnta³ i⁴-vi⁴.
LUK 23:6 Cˀia⁴ nca³ Pilato qui³nčhˀoe¹ je² en¹ xi³ Galilea tso²-ve⁴, qui³tsi²na³nqui³-le⁴ tsa² je² cho⁴ta⁴-ve⁴ nchja⁴-ni³ Galilea.
LUK 23:7 Cˀia⁴ nca³ nta³ ve³ nca³ vˀa³cao⁴-le⁴ cjoa⁴te¹xo³ma³-le⁴ Herodes, Pilato qui³si³ca³sen¹con³-le⁴ je² Jesús, nca⁴ Herodes cˀoa⁴²-ti⁴ ya⁴ ti¹jna³ Jerusalén coi³ ni⁴čhjin³-ve⁴.
LUK 23:8 Cˀia⁴ nca³ Herodes tsa³ve³ Jesús, cjai¹nca³ tsjoa³ coan³-le⁴ nca³ coa²tse³ me³-le⁴ nca³ scoe⁴xcon³ Jesús, nca⁴ nˀion¹ tse³ cjoa⁴ qui³nčhˀoe¹ xi³ tˀa³tsˀe⁴. Ti¹co³ya³-le⁴ nca³ Cristo coa⁴co²-le⁴ jnco³ cjoa⁴xcon¹.
LUK 23:9 Qui³tsi²na³nqui³-le⁴ tˀa³tsˀe⁴ ncjin² cjoa⁴, to⁴nca³ ni⁴to⁴jme³-jin² xi³ qui³nchja⁴ Jesús.
LUK 23:10 Cˀia⁴ cho⁴ta⁴ti¹tjon²-le⁴ na⁴ˀmi³ cao⁴ cho⁴ta⁴ scribano xi³ tsa³ca³tio² ya⁴-ve⁴, tjio¹va¹nqui³. Cjai¹nca³ qui³ti²ˀa².
LUK 23:11 To⁴nca³ Herodes cao⁴ so³nta²do⁴-le⁴ nˀion¹ taon³ tsa³ve³ Cristo. Tsa³qui³jno²que³. Qui³si³cˀa³cja¹ jnco³ na³jño³jnčho³ xi³ nˀion¹ nta³ cji³, cˀia⁴ qui³si³ca³sen¹ nqui²jnco³cˀa²-le⁴ Pilato.
LUK 23:12 Ti⁴coi³-ni³ ni⁴čhjin³ coan³ mi²yo⁴-le⁴ xi¹ncjin¹ Pilato cao⁴ Herodes, nca³ nca³sˀa⁴ co²ntran⁴ tjio¹-le⁴ xi¹ncjin¹.
LUK 23:13 Cˀia⁴ Pilato qui³nchja⁴ma³ña³-le⁴ cho⁴ta⁴ti¹tjon²-le⁴ na⁴ˀmi³ cao⁴ cho⁴ta⁴xa¹, cˀoa⁴ cao⁴ na⁴xi⁴na³nta¹.
LUK 23:14 Qui³tso²-le⁴: Ca²ni²qui³ncha¹va³sen³-nao¹³ je²-vi⁴ jo³-ni³ tsa² cho⁴ta⁴ xi³ xin²ntia⁴² fi²cao⁴ na⁴xi⁴na³nta¹. Coe⁴-ni³, an³ ca²si³tso²ˀa³ nqui³xcon³ nca³ jon²-vi⁴, ni⁴jme³-jin² je¹ xi³ ca²ma³sjai³-na³ xi³ tˀa³tsˀe⁴ cho⁴ta⁴, jña³-le⁴ je¹ xi³ ti³ma³cja³nquio³.
LUK 23:15 Ni⁴ nta³ tsa² Herodes ca²ma³sjai³-le⁴, nca⁴ Herodes qui³si³ca³sen¹ nqui²jnco³cˀa²-no³ Jesús. Coe⁴-ni³, ni⁴jme³-jin² qui³sˀin³ xi³ va³quin²-le⁴ cjoa⁴vi³ya³.
LUK 23:16 Coa³-cjoan²la²le⁴, cˀia⁴ sca³ni³nte¹³.
LUK 23:17 Tjin¹ne²-le⁴ nca³ si⁴²cˀe¹jna³ntai¹ jnco³ cho⁴ta⁴ xi³ ti¹jna³nˀion¹ nca³ xqui⁴ sˀoi¹.
LUK 23:18 To⁴nca³ cho⁴ta⁴na⁴xi⁴na³nta¹ to⁴jnco³ qui³squi³ˀntia¹ nca³tsˀi³: Chja⁴ˀa²xin² je²-vi⁴, ti⁴cˀe¹jna³ntai¹-na³jin⁴ Barrabás.
LUK 23:19 Je² cho⁴ta⁴-ve⁴ qui³cha³ni² nto⁴ya¹ xi³ to⁴cjoa⁴-le⁴ cjoa⁴-si³ xi³ qui³tjo²mi³tjen⁴ ya⁴ na⁴xi⁴na³nta¹-ve⁴, cˀoa⁴ nca³ cˀen³ qui³si³cˀen³.
LUK 23:20 Cˀia⁴ Pilato qui³nchja⁴ nqui²jnco³cˀa²-le⁴, nca⁴ me³-le⁴ nca³ si⁴²cˀe¹jna³ntai¹ Jesús.
LUK 23:21 To⁴nca³ je² tsa³cˀe¹jta³ nqui²ntia³: Cro² tja³tˀai³, cro² tja³tˀai³.
LUK 23:22 Cˀia⁴ Pilato qui³tso²-le⁴ xi³ ma³jan²-ni³ cˀa³: Cˀoa⁴ jme¹ cjoa⁴tsˀen⁴ qui³sˀin³-ˀni³. Ni⁴jme³-jin² je¹ xi³ coan³sjai³-na³ xi³ tˀa³tsˀe⁴ xi³ va³quin²-le⁴ cjoa⁴vi³ya³. Coa³-le⁴ tso²cˀoa⁴, sca³ni³nte¹³-ˀni³.
LUK 23:23 To⁴nca³ to⁴jo³ nˀion¹ tsa³cˀe¹jta³qui³ti³-nca¹ni³ nca³ cro² sˀe⁴tˀa³ Jesús. Jta⁴-le⁴ cho⁴ta⁴ cao⁴ tsˀe⁴ cho⁴ta⁴ti¹tjon²-le⁴ na⁴ˀmi³ qui³njen²-le⁴.
LUK 23:24 Cˀia⁴ Pilato tsa³ca³te¹xo³ma³ nca³ ca²tji³tjo³son² jña³-le⁴ xi³ qui³si³je¹ nca³ je².
LUK 23:25 Qui³si³cˀe¹jna³ntai¹-le⁴ je² cho⁴ta⁴ xi³ qui³cha³ni² nto⁴ya¹ xi³ to⁴cjoa⁴-le⁴ cjoa⁴si³ xi³ ji³tjo³mi³tjen⁴, cˀoa⁴ nca³ cˀen³ qui³si³cˀen³. Cˀia⁴ qui³sca³ni¹tˀa³-le⁴ Jesús nca³ cˀoa⁴si⁴²cao⁴ jo³-sˀin² me³-le⁴.
LUK 23:26 Cˀia⁴ nca³ qui³cao⁴ Jesús, qui³tsoa³ jnco³ cho⁴ta⁴ xi³ Simón ˀmi², xi³ cho⁴ta⁴ cireneo, xi³ ti¹nčhoa¹-ni³ nqui³chao³. Tsa³ca¹jna³ne²-le⁴ cro² nca³ coai⁴cao⁴ jton³-le⁴ Jesús.
LUK 23:27 Qui³tjen⁴nqui³-le⁴ ncjin² cho⁴ta⁴ na⁴xi⁴na³nta¹ cao⁴ ya¹nchjin¹ xi³ tjio¹si¹jtsin³tˀa³ ni⁴ma⁴-le⁴, xi³ tjio¹cji³ˀntia¹va³.
LUK 23:28 To⁴nca³ Jesús qui³si³cˀo¹fa³ya³tˀa³-le⁴, qui³tso²-le⁴: Ja⁴xti³ ya¹nchjin¹ Jerusalén, a³li² an³ chi¹ˀnta¹ntjai²-nao¹³, to⁴nca³ chi¹ˀntao¹³ xi³ ti⁴tˀa³tsaon⁴³-nio³ cao⁴ xi³ tˀa³tsˀe⁴ ˀnti¹xti³-no³.
LUK 23:29 Coe⁴-ni³ cjoa⁴ˀai¹ ni⁴čhjin³ cˀia⁴ nca³ coi⁴tso⁴: Jo¹ to⁴nta³-le⁴ xi³ ˀnti⁴, je² tsˀoa⁴ xi³ tsi² ˀnti¹ tsa³cˀa³, cˀoa⁴ je² chi³qui³ xi³ tsi² ˀnti¹ qui³si³jcha¹.
LUK 23:30 Cˀia⁴ cˀoe⁴²tsˀia⁴cao⁴ nca³ coi⁴tso⁴-le⁴ ni³nto³: Ca²ta³ca³ne²son²-na³jin⁴, cˀoa⁴ coi⁴tso⁴-le⁴ xi⁴nqui⁴ tja³jtsa³ˀma³-na³jin⁴.
LUK 23:31 Cˀia⁴ tsa² cˀoa⁴²sˀin⁴² je² cjoa⁴, cˀia⁴ nca³ xcoen¹ cjoan³ ya¹, jme¹ xi³ coan⁴ cˀia⁴ nca³ qui³xi².
LUK 23:32 Cˀoa⁴-ti⁴ qui³cao⁴tˀa³ nqui²jao² cho⁴ta⁴ xi³ chˀao³ cjoan³, nca³ si⁴²cˀen³.
LUK 23:33 Cˀia⁴ nca³ ja³ˀai³ ˀnte³ jña³ nca³ ˀnte³jco⁴cˀen³ ˀmi², tsa³ca¹tˀa³ cro² ya⁴-ve⁴, cˀoa⁴ cao⁴ cho⁴ta⁴ xi³ chˀao³ cjoan³, jnco³ xi³ nca³qui²xi⁴-le⁴, cˀoa⁴ xi³jnco³ nca³scon¹-le⁴.
LUK 23:34 Cˀia⁴ Jesús qui³tso²: Nˀai³, ti⁴cha³tˀa³-lai⁴ nca³ tsi² coi³ ve³ jme³ xi³ sˀin¹. Qui³si³cˀa³vi¹ na³jño³-le⁴, qui³si³sca¹cao⁴ ˀya³-ni³ xi³ cˀoa⁴cao⁴-le⁴.
LUK 23:35 Cho⁴ta⁴ na⁴xi⁴na³nta¹ tjio¹co³tsen³. Cho⁴ta⁴xa¹ tjio¹vi³jno²que³, qui³tso²: Xi³ cja⁴ˀai¹ tsa³cˀa³sje³ntjai², ca²ta³vˀa³sje³ntjai² yao³-le⁴ nca³ ti⁴je²-ni³, cˀia⁴ tsa² je²-vi⁴ xi³ Cristo xi³ tsˀe⁴ Ni³na¹, xi³ Ni³na¹ tsa³cja³ˀa¹jin³.
LUK 23:36 Je² so³nta²do⁴-ve⁴ qui³tsjoa³tˀain³, ji³cho²nčhˀoe² ji³cho²cao⁴-le⁴ vinagre.
LUK 23:37 Qui³tso²-le⁴: Cˀia⁴ tsa² ji³ ni¹³ cho⁴ta⁴ti¹tjon²-le⁴ cho⁴ta⁴ judíos, chˀa⁴sje³ntjai² yao³-li⁴ nca³ ti⁴ji³-ni³.
LUK 23:38 Cˀoa⁴-ti⁴ tji¹tˀa³son²-le⁴ jnco³ en¹ cao⁴ letra griega, latina, cao⁴ hebrea xi³ tso²: Je²-vi⁴ cho⁴ta⁴ti¹tjon²-le⁴ cho⁴ta⁴ judíos.
LUK 23:39 Jnco³ xi³ jao²-ve⁴ xi³ chˀao³ cjoan³, xi³ cjio³ tjen⁴vˀa³nqui³tˀa³-le⁴, qui³nchja⁴ti³cao⁴: A³ tsi² tsa² ji³ ni¹³ Cristo, chˀa⁴sje³ntjai² yao³-li⁴ nca³ ti⁴ji³-ni³, cˀoa⁴ cao⁴ jin⁴-jin⁴.
LUK 23:40 Xi³jnco³ qui³nchja⁴ti³cao⁴: A³ tsi² jcon³-lai⁴ Ni³na¹, nca⁴ ti⁴coi³-ni³ cjoa⁴ñˀain³ xi³ ti¹sˀe³-li².
LUK 23:41 Ña¹-vi⁴ nta³ va³quin²-na¹ nca³ ti¹vˀai²-na¹ cjoa⁴ñˀain³, nca³ chjoe¹-nia¹ jme³ xi³ va³quin²-le⁴ xi³ qui³nˀian², to⁴nca³ je²-vi⁴ ni⁴jme³-jin² xi³ chˀao³ qui³sˀin³.
LUK 23:42 Cˀoa⁴qui³tso²-le⁴ Jesús: Ti⁴cja³ˀai³tsjen³-nai¹³ cˀia⁴ nca³ cjoa²ˀai⁴coai⁴ cjoa⁴te¹xo³ma³-li⁴.
LUK 23:43 Cˀia⁴ Jesús qui³tso²-le⁴: Cjoa⁴qui²xi⁴ xi³ xin³-le²³, ntˀai⁴-vi⁴ntai⁴ coi⁴jna³cao⁴-nai¹³ jña³ na³sca¹ chon³ ncˀa³jmi³.
LUK 23:44 Cˀia⁴ nca³ ji³cho²ca³ nchi³sen³-la⁴, coan³njion² nca³qui³jnta² son³ˀnte³ sa³ˀnta³ las tres nca³ ma³xon².
LUK 23:45 Je² tsˀoi¹ coan³njion², cˀoa⁴ qui³xi³jnta²jen³ va³sen³ je² na³jño³ xi³ qui³tjen⁴chjoa² nca³va³sen³-le⁴ yo⁴nco⁴.
LUK 23:46 Cˀia⁴ Jesús nˀion¹ qui³nchja⁴, qui³tso²: Nˀai³ ja⁴ya³ ntsai⁴ vˀe³jna²³ espíritu-na⁴ ntˀai⁴. Cˀia⁴ nca³ je³cˀoa⁴qui³tso² qui³cha³jta³.
LUK 23:47 Cˀia⁴ nca³ je² xi³ nca³jco⁴-le⁴ so³nta²do⁴ tsa³ve³ je² cjoa⁴ xi³ coan³, tsˀa³sje³je³ya³ Ni³na¹, qui³tso²: Xi³ cjoa⁴qui²xi⁴ je² cho⁴ta⁴ je²-vi⁴ cho⁴ta⁴cjoa⁴qui²xi⁴ ni¹.
LUK 23:48 Je² nca³tsˀi³ cho⁴ta⁴xcon¹ xi³ tjio¹va³sen³ je² cjoa⁴ je²-vi⁴, tjio¹co³tsen³-le⁴ jme³ xi³ coan³, qui³ nqui²ntia³ ni³ˀya³-le⁴, jo³ to⁴tjio¹si¹jtsin³tˀa³ ni⁴ma⁴-le⁴.
LUK 23:49 To⁴nca³ cjin³ tjio¹co³tsen³-le⁴ cjoa⁴ je²-vi⁴ nca³tsˀi³ xi³ ve³xcon³ Jesús cao⁴ ya¹nchjin¹ xi³ ji³nčhoa³tjen⁴nqui³-ni³le⁴ Galilea sa³ˀnta³ Jerusalén.
LUK 23:50 Coe⁴-ni³ jnco³ cho⁴ta⁴ xi³ José ˀmi², xi³ tsˀe⁴ Arimatea jnco³ na⁴xi⁴na³nta¹-le⁴ Judea, xi³ tsˀe⁴ cho⁴ta⁴jchi¹nca³. Je² ni¹ jnco³ cho⁴ta⁴nta³, cˀoa⁴ cho⁴ta⁴cjoa⁴qui²xi⁴.
LUK 23:51 Je² li²coi³ tjin¹jnco³-le⁴con³ cjoa⁴ xi³ tsa³cˀe¹nta³, ni⁴je²-jin² cjoa⁴ xi³ qui³sˀin³. Cˀoa⁴ je² qui³sco²ya³-le⁴ cjoa⁴te¹xo³ma³-le⁴ Ni³na¹.
LUK 23:52 Je²-vi⁴ ji³cho²con³-le⁴ Pilato, qui³si³je¹-le⁴ yao³-le⁴ Jesús.
LUK 23:53 Cˀia⁴ nca³ je³tsa³cˀa³jen⁴tˀa³ cro², sábana tsa³cˀe¹jte¹jin³. Qui³sca³ni¹sˀen³nqui³ tsjo¹ xi³ qui³tjo³ˀa²cja¹ na⁴xi⁴, ya⁴ jña³ nca³ ni⁴-sa³ ˀya³-jin² xi³ sˀe³jna³ya³.
LUK 23:54 Coi³ ni⁴čhjin³ víspera-le⁴ sˀoi¹ pa²xco⁴, cˀia⁴ nca³ ja⁴me³ tsa³cˀe¹tsˀia⁴ ni⁴čhjin³ ni²cja¹ya³.
LUK 23:55 Je² ya¹nchjin¹ xi³ ña³tjen⁴ ji³nčhoa³-ni³ Galilea, qui³tjen⁴nqui³-le⁴, qui³sco²tsen³ tsjo¹-ve⁴ cˀoa⁴ jo³-sˀin² nca³ qui³sˀe³jna³ yao³-le⁴.
LUK 23:56 Qui³-ni³, tsa³ca³tio²nta³ xqui³ xi³ na⁴sca¹ njen⁴ cao⁴ xqui³xi¹ne¹, cˀoa⁴ ni⁴čhjin³ ni²cja¹ya³ qui³si³cja¹ya³ jo³ tso² cjoa⁴te¹xo³ma³.
LUK 24:1 Cˀia⁴ nca³ ni⁴čhjin³ tai²nco⁴ nca³ to²tsˀin³ xo³ma²na⁴, cjai¹nca³ ta⁴njion²ya³ ji³nčhoa³ jña³ qui³jna³ tsjo¹-ve⁴. Ja³ˀai³cao⁴ xqui³ xi³ na⁴sca¹ njen⁴, xi³ tsa³cˀe¹nta³. Cˀoa⁴ tjen⁴cao⁴-sa³ nqui²jnco³jao² ya¹nchjin¹.
LUK 24:2 Coan³sjai³-le⁴ la⁴jao⁴-ve⁴ nca³ je³qui³tji³ tˀa³xin²-le⁴ tsjo¹-ve⁴.
LUK 24:3 Cˀia⁴ nca³ ja³ˀa³sˀen³, li²coi³ coan³sjai³-le⁴ yao³-le⁴ Nai³-na¹ Jesús.
LUK 24:4 Cˀia⁴ nca³ cˀoa⁴coan³-ve⁴, to⁴coan³xcon¹-le⁴ ya¹nchjin¹-ve⁴ xi³ tˀa³tsˀe⁴ je²-vi⁴. Coe⁴-ni³ jao² cho⁴ta⁴ xi³ yˀa³cja¹ na³jño³jnčho³ xi³ jo³ fa³te³, tsa³qui³ncha³tˀa³-le⁴.
LUK 24:5 Qui³tsa³cjon¹-le⁴, tsa³qui³ncha³jten³ tˀa³na³nqui³, cˀia⁴ je² cho⁴ta⁴ qui³tso²-le⁴: A¹-ni³ ti³ma³fa³sjai³-si¹nio³ i⁴ jin³ cˀen³-vi⁴ je² xi³ ti¹jna³con³-ni³.
LUK 24:6 Li²coi³ i⁴ ti¹jna³-vi⁴, to⁴nca³ ja³ˀa³ya²-ni³le⁴. Ti⁴cja³ˀai³tsjaon³ jo³-sˀin² tsa³cja¹cao⁴-no³, cˀia⁴ nca³ ti¹jna³-sa³ ya⁴ Galilea.
LUK 24:7 Qui³tso²: Ma³chjen¹-ni¹ nca³ ˀnti¹-le⁴ cho⁴ta⁴ cha⁴ni²tˀa³-le⁴ ntsja³ cho⁴ta⁴tsˀen⁴, nca³ cro² sˀe⁴tˀa³, cˀoa⁴ cjoa⁴ˀa¹ya³-ni³le⁴ nca³ ma³jan²-ni³ ni⁴čhjin³.
LUK 24:8 Cˀia⁴ je² ja³ˀai³tsjen³-le⁴ˀni³ en¹-le⁴ Jesús.
LUK 24:9 Cˀia⁴ nca³ ji³nčhoa³-ni³ ya⁴ tsjo¹-ve⁴ qui³tsjoa³-le⁴ cjoa⁴qui²xi⁴ xi³ te³jnco³ cao⁴ nca³tsˀi³ xi³cˀa³, xi³ tˀa³tsˀe⁴ nca³yi³je³ je² cjoa⁴ je²-vi⁴.
LUK 24:10 María Magdalena, Juana, María na⁴-le⁴ Jacobo, cao⁴ xi³cˀa³ xi³ cˀoa⁴qui³tso²-le⁴ pa²stro⁴ je² cjoa⁴ je²-vi⁴.
LUK 24:11 To⁴cjoa⁴sca¹ tsa³ve³con³ en¹-le⁴, li²coi³ coan³cjain¹-le⁴.
LUK 24:12 To⁴nca³ ji³so²tjen⁴ Pedro, qui³to²ca³ jña³ qui³jna³ tsjo¹-ve⁴. Cˀia⁴ nca³ qui³sco²tsen³sˀen³, ja⁴ncha³ to⁴je² na³jño³ xi³ qui³sˀe³jte¹jin³ Jesús. To⁴coan³xcon¹-le⁴ coi³ cjoa⁴ xi³ coan³-ve⁴.
LUK 24:13 Coe⁴-ni³, ti⁴coi³-ni³ ni⁴čhjin³ jao² cho⁴ta⁴ tjio¹fi² jnco³ na⁴xi⁴na³nta¹ xi³ Emaús ˀmi², xi³ jao²-la⁴ hora cjin³ ti¹jna³-le⁴ Jerusalén.
LUK 24:14 Cˀia⁴ nca³ tjio¹fi², tjio¹fao¹ya³-ni³ nca³yi³je³ cjoa⁴ xi³ coan³-ve⁴.
LUK 24:15 Cˀoa⁴coan³ nca³ tjio¹fao¹ya³-ni³, cˀoa⁴ nca³ tjio¹cjo³na³nqui³-le⁴ xi¹ncjin¹, ti⁴je²-ni³ Jesús ji³cho²tˀa³čhian³-le⁴, to⁴ña³ qui³tsjen³-ni³.
LUK 24:16 To⁴nca³ xcon⁴ qui³sˀe³chjoa²-le⁴ nca³ tsi² tsa² scoe⁴xcon³ Jesús.
LUK 24:17 Cˀoa⁴ Jesús qui³tso²-le⁴: Jme¹ en¹-ni³ xi³ cho³va²-nio³vi⁴ nca³ ti³mao³. Cˀoa⁴ je² tsa³qui³ncha³. Nˀion¹ va³ cjoan³.
LUK 24:18 Qui³nchja⁴ jnco³ xi³ Cleofas ˀmi², qui³tso²-le⁴: A³ to⁴ji³ to⁴jnco³ ni¹ xi³ cjoa²ˀai⁴ ni²xa³tˀai³ Jerusalén, xi³ li²coi³ tsa³ˀyai³ cjoa⁴ xi³ ya⁴ cˀoa⁴coan³ coi³ ni⁴čhjin³-vi⁴.
LUK 24:19 Cˀia⁴ Jesús qui³tso²-le⁴: Jme¹ cjoa⁴-ni³. Cˀia⁴ cho⁴ta⁴-ve⁴ qui³tso²-le⁴: Tsˀe⁴ Jesús cho⁴ta⁴ nazareno, xi³ qui³nchja⁴ya³ tˀa³tsˀe⁴ Ni³na¹. Cjai¹nca³ ma³yi³je³-le⁴ cjoa⁴, cˀoa⁴-ti⁴ ma³yi³je³-le⁴ en¹ nqui³xcon⁴ Ni³na¹, cˀoa⁴ nqui³xcon⁴ nca³tsˀi³ na⁴xi⁴na³nta¹.
LUK 24:20 Cho⁴ta⁴ti¹tjon²-le⁴ na⁴ˀmi³ cao⁴ cho⁴ta⁴ti¹tjon²-na⁴jin⁴ qui³sca³ni¹tˀa³ nca³ qui³ni²cˀen³, cˀoa⁴ tsa³ca¹tˀa³ cro².
LUK 24:21 To⁴nca³ jain⁴-jin⁴ qui³cho²ya²-lai⁴jin⁴ nca³ ti⁴je²-ni³ xi³ cˀoe⁴²chji¹ntjai² cho⁴ta⁴ Israel. Cˀoa⁴ je² xi³ cji³ma³-sa³, ntˀai⁴ jan² ni⁴čhjin³ nca³ cˀoa⁴coan³ coi³ cjoa⁴-vi⁴.
LUK 24:22 Cˀoa⁴-ti⁴ cˀa³ ya¹nchjin¹ xi³ ti⁴jin⁴-ni¹⁴jin⁴ tsa³qui³ncha¹xcon¹-na³jin⁴. Ta⁴njion²ya³ qui³ ya⁴ tsjo¹-ve⁴.
LUK 24:23 A³li²coi³-xo¹ coan³sjai³-le⁴ yao³-le⁴. Ji³nčhoa³-ni³ qui³tso²: Cˀoa⁴-xo¹ti⁴ tsa³ve³ sen¹-le⁴ a²ncje⁴ xi³ qui³tso²-le⁴ nca³ Cristo ti¹jna³con³-ni¹.
LUK 24:24 Qui³ cˀa³ xi³ ti⁴jin⁴-ni¹⁴jin⁴ ya⁴ tˀa³ tsjo¹-ve⁴, cˀoa⁴²-ti⁴ chon³ coan³sjai³-le⁴ jo³ nca³ qui³tso² ya¹nchjin¹-ve⁴, to⁴nca³ je² li²coi³ tsa³ve³ Jesús.
LUK 24:25 Cˀia⁴ Jesús qui³tso²-le⁴: Jo¹ to⁴chi⁴con¹³, cˀoa⁴ xi¹jin³ ni⁴ma⁴-no³ nca³ tsi² nti⁴ton⁴ coan³cjain¹-no³ nca³yi³je³ xi³ qui³tso² je² cho⁴ta⁴ xi³ qui³nchja⁴ya³ tˀa³tsˀe⁴ Ni³na¹.
LUK 24:26 A³ tsi² tsa² coan³chjen¹ nca³ Cristo tsa³cja³ˀa¹ cjoa⁴ñˀain³ je² cjoa⁴-vi⁴, cˀoa⁴ nca³ ja³ˀa³sˀen³ cjoa⁴je³ya³-le⁴.
LUK 24:27 Cˀia⁴ Jesús tsa³cˀe¹tsˀia⁴cao⁴ nca³ qui³tso²ya³tsen³-le⁴ nca³yi³je³ xi³ tji¹tˀa³ xon⁴ Escrituras xi³ tˀa³tsˀe⁴, sa³ˀnta³ xi³ tsˀe⁴ Moisés cao⁴ nca³tsˀi³ cho⁴ta⁴ xi³ qui³nchja⁴ya³ tˀa³tsˀe⁴ Ni³na¹.
LUK 24:28 Cˀia⁴ ji³cho²čhian³ na⁴xi⁴na³nta¹ˀnti¹ jña³ nca³ tjio¹fi², Jesús cˀoa⁴qui³sˀin³ jo³-ni³ tsa² cjin³ coai⁴-sa³.
LUK 24:29 To⁴nca³ je² jao² cho⁴ta⁴-ve⁴ cjoa⁴nˀion¹ qui³sˀin³-le⁴, qui³tso²-le⁴: Ti⁴jna³cao⁴-na³jin⁴ nca³ je³²coan³xon², cˀoa⁴ tsˀoi¹ je³qui³sca³ntjai². Ja³ˀa³sˀen³, cˀoa⁴ tsa³cˀe²jna³cao⁴.
LUK 24:30 Xi³ coan³-ni³, tsa³cˀe²jna³tˀa³cao⁴ ya¹mi²xa⁴, Jesús qui³scoe¹ nio⁴xti²la⁴, qui³si³chi³con³tˀain³, qui³si³xcoa⁴, cˀoa⁴ qui³tsjoa³-le⁴.
LUK 24:31 Cˀia⁴ qui³tjo³ˀai²nqui³ xcon⁴, cˀoa⁴ tsa³ve³xcon³-ˀni³ to⁴nca³ je² qui³ qui³cha³ nqui³xcon⁴ nca³ je².
LUK 24:32 Tsa³cja¹cao⁴ xi¹ncjin¹: A³ tsi² tsa² cjai¹ tsjoa³ya³ coan³-le⁴ ni⁴ma⁴-na¹, cˀia⁴ nca³ tsa³cja¹cao⁴ na⁴jmi¹-na¹ ya⁴ya³ ntia⁴², cˀoa⁴ cˀia⁴ nca³ qui³sco³xˀa¹nqui³ xcoan³² jo³ tso² en¹ xi³ tji¹tˀa³ xon⁴ Escrituras.
LUK 24:33 Ti⁴coi³-ni³ hora tsa³qui³so¹tjen⁴. Qui³ ya⁴ Jerusalén. Coan³sjai³-le⁴ xi³ te³jnco³ xi³ tjio¹xco¹ cao⁴ xi³cˀa³ xi³ ya⁴ tjio¹cao⁴.
LUK 24:34 Xi³ tjio¹tso²: Cjoa⁴qui²xi⁴ ni¹ nca³ ja³ˀa³ya²-le⁴ Nai³-na¹, cˀoa⁴ coan³tsen³ nqui³xcon⁴ Simón.
LUK 24:35 Cˀia⁴ je² xi³ jao²-ve⁴ tsa³cˀe¹ na⁴jmi¹ jme³ xi³ coan³-le⁴ ya⁴³ntia⁴², cˀoa⁴ jo³-sˀin² nca³ tsa³ve³xcon³ Jesús cˀia⁴ nca³ qui³si³xcoa⁴ nio⁴xti²la⁴.
LUK 24:36 Tjen⁴ nca³ tjio¹nchja⁴ je² cjoa⁴-vi⁴, Jesús je² soa³ tsa³ca³sen²jna³jin³ va³sen³-le⁴, qui³tso²-le⁴: Nchˀan¹ ti⁴yo³ nca³ jon²-vi⁴.
LUK 24:37 Cˀia⁴ nca³tsˀi³ nˀion¹ qui³tso³cjon¹, tsa³ca³tio²xcon¹, qui³si³cja³ˀai³tsjen³ nca³ tsa³ve³ jnco³ espíritu.
LUK 24:38 To⁴nca³ Jesús qui³tso²-le⁴: A¹-ni³ nca³ ti³yo³xcon¹-si¹ni³no³, a¹-ni³ nca³ nˀion¹ tjio¹si¹cjao¹jin³-si¹ni³ ni⁴ma⁴-no³.
LUK 24:39 Cho¹tsen³-lao⁴³ ntsa⁴ ntso⁴coa³, nca⁴ ti⁴ˀan³-nia³: Cha¹jon³-nao¹³, cho¹tsaon³, nca⁴ je² xi³ espíritu ˀmi² ni⁴yao³-jin² ni⁴ni³nta³-jin² tjin¹-le⁴, jo³-sˀin² ˀyao³ nca³ tjin¹-na³.
LUK 24:40 Cˀia⁴ nca³ cˀoa⁴qui³tso²-le⁴ je²-vi⁴, tsa³ca³co¹-le⁴ ntsja³ cao⁴ ntso⁴co⁴.
LUK 24:41 To⁴nca³ je² cje³ ma³cjain¹-jin²le⁴, nca⁴ nˀion¹ tsjoa³-le⁴, cˀoa⁴ tjio¹xcon¹. Cˀia⁴ Jesús qui³tso²-le⁴: A³ tjin¹ i⁴tse¹-no³ xi³ ma³vi³chi³-ni³.
LUK 24:42 Cˀia⁴ je² qui³tsjoa³ i⁴tse¹-le⁴ jti⁴qui³chjan¹ cao⁴ jnco³ čhjoa⁴ntsjen¹-le⁴ cho⁴se²rra⁴.
LUK 24:43 Jesús qui³scoe¹, qui³squi³ne³ nqui³xcon⁴ nca³ je².
LUK 24:44 Cˀia⁴ qui³tso²-le⁴: Je²-vi⁴ en¹ xi³ tsa³cja³cao⁴-no³ cˀia⁴ nca³ an³ tsa³ca²te⁴jna³cao⁴-no³, nca³ ma³chjen¹-ni¹ nca³ coi⁴tjo³son² nca³yi³je³ cjoa⁴-ve⁴ xi³ tjio¹tˀa³ xi³ tˀa³tsˀan⁴ ya⁴ cjoa⁴te¹xo³ma³-le⁴ Moisés, cˀoa⁴ ya⁴ xon⁴libro-le⁴ cho⁴ta⁴ xi³ qui³nchja⁴ya³ tˀa³tsˀe⁴ Ni³na¹, cˀoa⁴ ya⁴ xon⁴ xi³ Salmo ˀmi².
LUK 24:45 Cˀia⁴ qui³sco³ˀai²ˀnte³-le⁴ cjoa⁴fa³ˀai³tsjen³-le⁴, jme¹-ni³ nca³ coan⁴cho⁴ya³-si¹ni³le⁴ xi³ tjio¹tˀa³ xon⁴ Escritura.
LUK 24:46 Qui³tso²-le⁴: Cˀoa⁴²-sˀin² tji¹tˀa³ xon⁴, nca³ cˀoa⁴²-sˀin² coan³chjen¹ nca³ je² Cristo tsa³cja³ˀa¹ cjoa⁴ñˀain³, cˀoa⁴ nca³ ja³ˀa³ya²jin³-ni³le⁴ cˀen³ nca³ coan³ jan² ni⁴čhjin³,
LUK 24:47 cˀoa⁴ nca³ coi⁴no²cjoa⁴ya³jin³-le⁴ nca³tsˀi³ na⁴xi⁴na³nta¹ cao⁴ jan³ˀain¹-le⁴, nca³ ma³chjen¹-le⁴ nca³ si⁴²cˀa³ntjai²ya³ cjoa⁴fa³ˀai³tsjen³-le⁴, cˀoa⁴ jo³-sˀin² nca³ cha⁴tˀa³-le⁴ je¹-le⁴. Coai⁴tsˀia⁴-cjoan²ni³ ya⁴ Jerusalén.
LUK 24:48 Cˀoa⁴ jon² nio¹³ xi³ cˀoao⁴³ cjoa⁴qui²xi⁴ coi³ cjoa⁴ je²-vi⁴.
LUK 24:49 Coe⁴-ni³ an³ si³ca³sen¹-no³ je² xi³ qui³si³sˀe³nqui³-no³ Nˀai³-na⁴, to⁴nca³ jon² ti⁴yo³ ya⁴ na⁴xi⁴na³nta¹ Jerusalén, sa³ˀnta³ nca³ sa⁴co²-no³ nca³nˀion¹ xi³ ncˀa¹ nčhoa¹-ni³.
LUK 24:50 Qui³cao⁴ sa³ˀnta³ Betania. Tsa³cjen¹ncˀa³ ntsja³, qui³si³chi³con³tˀain³.
LUK 24:51 Tjen⁴ nca³ ti¹si¹chi³con³tˀain³, tsa³ca³sen²xin²-le⁴, cˀoa⁴ qui³cha³ni² ncˀa³jmi³.
LUK 24:52 Xi³ je³tsa³ve³xcon¹ Jesús, cao⁴ tse³ cjoa⁴tsjoa³ qui³ ya⁴ Jerusalén.
LUK 24:53 Cˀoa⁴ tjio¹ntsjai² ya⁴³ yo⁴nco⁴, tjio¹vˀa³sje³je³ya³ Ni³na¹. Cˀoa⁴ ca²ta³ma³.
JOH 1:1 Cˀia⁴ nca³ to²tsˀin³-le⁴ cjoa⁴ to⁴cˀoa⁴ ti¹jna³ je² en¹. Je² en¹ ti¹jna³tˀa³ Ni³na¹. Je² en¹ ña³qui³ Ni³na¹ ni¹.
JOH 1:2 Je²-vi⁴ xi³ ti¹jna³tˀa³ Ni³na¹ cˀia⁴ nca³ to²tsˀin³-le⁴ cjoa⁴.
JOH 1:3 Je² tsa³cˀe¹nta³ nca³yi³je³ tso³jmi². Tsa² tsin² je², ni⁴to⁴jme³-jin² xi³ tjin¹ xi³ qui³sˀe³nta³.
JOH 1:4 Je² xi³ tjin¹-le⁴ cjoa⁴vi³jna³chon³. Je² cjoa⁴vi³jna³chon³ je² lˀi¹ xi³ si¹ˀi³sen³-le⁴ cho⁴ta⁴.
JOH 1:5 Je² lˀi¹ si¹ˀi³sen³ jña³ nca³ njion²-na¹, to⁴nca³ je² cjoa⁴njion² li²coi³ coan³cho⁴ya³-le⁴ tˀa³tsˀe⁴ lˀi¹-ve⁴.
JOH 1:6 Jnco³ cho⁴ta⁴xˀin⁴ xi³ Ni³na¹ qui³si³ca³sen¹, je² xi³ Juan ˀmi².
JOH 1:7 Jo³-ni³ tsa² testigo ja³ˀai³, nca³ cˀoa⁴sˀin² tsjoa¹ en¹ xi³ tˀa³tsˀe⁴ je² lˀi¹, jme¹-ni³ nca³ nca³tsˀi³ coan⁴cjain¹-si¹ni³le⁴ xi³ to⁴tˀa³tsˀe⁴ Juan.
JOH 1:8 A³li²je²-jin² xi³ je² lˀi¹. To⁴je² xi³ ja³ˀai³ tsjoa¹ en¹ xi³ tˀa³tsˀe⁴ lˀi¹-ve⁴.
JOH 1:9 Je²-ve⁴ je² lˀi¹ xi³ ña³qui³ cjoa⁴qui²xi⁴, xi³ ja³ˀai³ i⁴ son³ˀnte³-vi⁴, xi³ si¹ˀi³sen³-le⁴ nca³tsˀi³ cho⁴ta⁴.
JOH 1:10 I⁴ son³ˀnte³-vi⁴ tsa³cˀe²jna³, cˀoa⁴ je² tsa³cˀe¹nta³ son³ˀnte³. To⁴nca³ cho⁴ta⁴son³ˀnte³-vi⁴ li²coi³ tsa³ve³xcon³.
JOH 1:11 Ja³ˀai³ jña³ tsˀe⁴, to⁴nca³ je² cho⁴ta⁴-le⁴ li²coi³ tsa³ve³tjao².
JOH 1:12 Nca³tsˀi³ jo³ tjin¹ ma³-ni³ xi³ je² tsa³ve³tjao², qui³tsjoa³ˀnte²-le⁴ nca³ ˀnti¹-le⁴ Ni³na¹ coan³, je² nca³tsˀi³ xi³ ma³cjain¹-le⁴ tˀa³tsˀe⁴ jan³ˀain¹-le⁴,
JOH 1:13 xi³ tsi² tsa² njin¹ qui³tsin³-ni³, ni⁴ tˀa³tsˀe⁴-jin² cjoa⁴tsjoa³-le⁴ yao³-na¹, ni⁴ tˀa³tsˀe⁴-jin² cjoa⁴tsjoa³-le⁴ xˀin⁴, to⁴nca³ tˀa³tsˀe⁴ Ni³na¹ qui³tsin³-ni³.
JOH 1:14 Je² en¹ cho⁴ta⁴² coan³. I⁴ tsa³cˀe²jna³jin³-na¹. (Tsa³ˀya³-ni¹⁴jin⁴ cjoa⁴je³ya³-le⁴ jo³-ni³ tsa² xi³ tsˀe⁴ to⁴jnco³ ˀnti¹-le⁴ Nˀai³-na¹.) Cjai¹nca³ to⁴tjin¹-le⁴ cjoa⁴nta³ cao⁴ cjoa⁴qui²xi⁴.
JOH 1:15 Je² Juan cˀoa⁴sˀin² qui³tsjoa³ en¹ xi³ tˀa³tsˀe⁴. Nˀion¹ qui³nchja⁴, cˀoi⁴qui³tso²: Je²-vi⁴ ntai⁴ xi³ cˀoa⁴-na¹ qui³xin³-no³, je² xi³ cjoa⁴ˀai¹tjen⁴nqui³-na³, je² nqui²sa⁴ ti¹tjon² tso²ˀva³ cao⁴ an³, nca⁴ je² nqui²sa⁴ ti¹tjon² ti¹jna³-na³.
JOH 1:16 Ja⁴sa³tse³ ja⁴sa³tse³-sa³ cjoa⁴nta³ qui³tjoe¹-na¹ nca³tsˀia³² xi³ tsˀe⁴ cjoa⁴nta³-le⁴ xi³ cjai¹nca³ nˀion¹ tse³ tjin¹-le⁴.
JOH 1:17 To⁴tˀa³tsˀe⁴ Moisés qui³tsˀai² cjoa⁴te¹xo³ma³, to⁴nca³ cjoa⁴nta³ cao⁴ cjoa⁴qui²xi⁴ ja³ˀai³ xi³ to⁴tˀa³tsˀe⁴ Jesucristo.
JOH 1:18 Ni⁴to⁴ˀya³-jin² ni⁴cˀia³-jin² tsa³ve³ Ni³na¹. Je² to⁴jnco³ ˀnti¹-le⁴ xi³ ti¹jna³tˀa³ Nˀai³-na¹, je² xi³ cˀoa⁴sˀin² qui³tso²ya³ tˀa³tsˀe⁴.
JOH 1:19 Je²-vi⁴ en¹ xi³ qui³tsjoa³ Juan, cˀia⁴ nca³ cho⁴ta⁴ judíos qui³si³ca³sen¹ xa¹ je² na⁴ˀmi³ cao⁴ cho⁴ta⁴ levitas tsˀe⁴ Jerusalén, jme¹-ni³ nca³ sco¹na³nqui³-si¹ni³le⁴ Juan: Ji³, ˀya¹-ni³.
JOH 1:20 Juan qui³si³qui²xi⁴ya³nta³, li²coi³ tsa³cˀe¹ˀma³, to⁴nca³ cˀoa⁴qui³tso²: A³li² an³-jian²³ Cristo.
JOH 1:21 Cˀia⁴ qui³sco²na³nqui³-le⁴: ˀya¹-ni³ˀni³. A³ ji³ ni¹³ Elías. Qui³nchja⁴ Juan: A³li² an³-jian²³. A³ ji³ ni¹³ xi³ no²cjoa⁴yai³ tˀa³tsˀe⁴ Ni³na¹. Ma³jain², qui³tso².
JOH 1:22 Cˀoa⁴qui³tso²-le⁴: ˀya¹-cjoan²ni³ ji³, nca³ cˀoa⁴cˀoin¹-ni³lai⁴jin⁴ je² xi³ qui³si³ca³sen¹-na³jin⁴. Jo¹ si³ xi³ ti⁴tˀa³tsi⁴-ni³.
JOH 1:23 Juan qui³tso²: An³ nia¹³ xi³ nˀion¹ nchja²³ ya⁴ ˀnte³tˀa³xin²tˀa³. Tja³qui²xio⁴³ ntia⁴²-le⁴ Nai³-na¹, jo³ qui³tso² Isaías xi³ qui³nchja⁴ya³ tˀa³tsˀe⁴ Ni³na¹.
JOH 1:24 Je² cho⁴ta⁴ xi³ qui³ni²ca³sen¹tˀa³-le⁴ Juan tsˀe⁴ cho⁴ta⁴ fariseos.
JOH 1:25 Cˀoa⁴sˀin² qui³sco²na³nqui³-le⁴ Juan: A¹-ni³ nca³ ma³-ni³li² va³te²nta¹, tsa² tsi² tsa² ji³ ni¹³ Cristo, ni⁴ Elías-jin², ni⁴je²-jin² cho⁴ta⁴ xi³ nchja⁴ya³ tˀa³tsˀe⁴ Ni³na¹.
JOH 1:26 Cˀia⁴ Juan qui³tso²-le⁴: An³ va³te³nta¹³-nia³ na³nta¹, to⁴nca³ ti¹jna³jin³-no³ jnco³ xi³ tsi² tsa² coi³ ˀya³xcon³.
JOH 1:27 Je²-vi⁴ ntai⁴ xi³ cjoa⁴ˀai¹tjen⁴nqui³-na³. Je² nqui²sa⁴ ti¹tjon² tso²ˀva³ cao⁴ an³, sa³ˀnta³ li²coi³ va³quin²-na³ nca³ sco³jnta¹³ čhjoa⁴xin¹-le⁴ jte¹-le⁴.
JOH 1:28 Je² cjoa⁴ xi³ coan³-vi⁴ ya⁴ cˀoa⁴ coan³ ya⁴ Betábara ya⁴ xi³ncoa³-ni³le⁴ je² nta¹je⁴ Jordán, jña³ nca³ Juan tsa³ca³te¹nta¹.
JOH 1:29 Xi³ coan³ nchaon³ Juan tsa³ve³ Jesús xi³ ti¹nčhoa¹con³-le⁴, cˀoi⁴qui³tso²: Coe⁴-ni³ ˀnti¹ va³rre²-le⁴ Ni³na¹, xi³ fa³ˀa¹xin² je¹-le⁴ cho⁴ta⁴son³ˀnte³.
JOH 1:30 Je²-vi⁴ ntai⁴ xi³ qui³xin³-no³: Cjoa⁴ˀai¹tjen⁴nqui³-na³ jnco³ cho⁴ta⁴xˀin⁴. Je² nqui²sa⁴ ti¹tjon² tso²ˀva³ cao⁴ an³, nca⁴ je² nqui²sa⁴ ti¹tjon² ti¹jna³-na³.
JOH 1:31 An³ li²coi³ tsa³ˀve³xcoan³, to⁴nca³ ja²ˀai⁴ ca³te³nta¹³-nia³ na³nta¹, jme¹-ni³ nca³ cho⁴ta⁴ Israel scoe⁴-si¹ni³ nca³ je².
JOH 1:32 Juan cˀoa⁴sˀin² qui³tsjoa³ en¹ cˀoi⁴qui³tso²: Tsa³ˀve³ je² Espíritu Santo nca³ ji³tjo³jen³-ni³ ncˀa³jmi³, jo³-ni³ tsa² jnco³ ni⁴se³ paloma, qui³sa³sen³jna²son²-le⁴ Jesús.
JOH 1:33 An³ li²coi³ tsa³ˀve³xcoan³, to⁴nca³ je² xi³ qui³si³ca³sen¹-na³ nca³ na³nta¹ coa³te³nta¹³-nia³, je²-ve⁴ xi³ cˀoi⁴qui³tso²-na³: To⁴ˀya³-ni³ xi³ jchai⁴, xi³ je² Espíritu Santo cjoa⁴ˀai¹jen³tˀain³-le⁴, xi³ ya⁴ sa⁴sen¹jna³son²-le⁴, je²-vi⁴ ntai⁴ xi³ va³te¹nta¹-ni³ Espíritu Santo.
JOH 1:34 An³ tsa³ˀve³, qui³tsjoa³ en¹-na⁴ nca³ je²-vi⁴ xi³ ˀnti¹-le⁴ Ni³na¹.
JOH 1:35 Xi³ coan³ nchaon³ ti⁴ya⁴ ti¹jna³-nca¹ni³ Juan cao⁴ jao² cho⁴ta⁴-le⁴.
JOH 1:36 Ti¹co³tsen³-le⁴ Jesús xi³ ya⁴ tso²ˀva³, cˀoi⁴qui³tso²: Coe⁴-ni³ ˀnti¹ va³rre²-le⁴ Ni³na¹.
JOH 1:37 Je² nca³ jao² cho⁴ta⁴-le⁴ qui³nčhˀoe¹-le⁴ nca³ qui³nchja⁴, cˀia⁴ qui³tjen⁴nqui³-le⁴ Jesús.
JOH 1:38 Cˀia⁴ qui³si³cˀo¹fa³ Jesús, tsa³ve³ nca³ tjio¹fi²tjen⁴nqui³-le⁴, cˀoa⁴qui³tso²-le⁴: Jme¹ xi³ vi³jnchi³sjao³. Cˀia⁴ qui³nchja⁴ nca³ jao²: Rabí (je² en¹-vi⁴ Maestro tso²-ni³), jña¹-ni³ ti³jnai³.
JOH 1:39 Jesús qui³tso²-le⁴: Nčhoao¹³ cho¹tsaon³. Cˀia⁴ ji³nčhoa³, tsa³ve³ jña³ ti¹jna³. Ya⁴ tsa³ca³tio²cao⁴ cˀia⁴ ni⁴čhjin³-ve⁴, nca³ je² hora jo³-ni³ tsa² las cuatro nca³ ma³xon².
JOH 1:40 Je² Andrés, ntsˀe⁴ Simón Pedro, jnco³ nca³ jao²-ve⁴ xi³ qui³nčhˀoe¹-le⁴ Juan, cˀoa⁴ qui³tjen⁴nqui³-le⁴ Jesús.
JOH 1:41 Je²-vi⁴ ti¹tjon² coan³sjai³-le⁴ ti⁴tsˀe⁴-ni³ ntsˀe⁴ xi³ Simón ˀmi², cˀoa⁴qui³tso²-le⁴: Je³coan³sjai³-na³jin⁴ je² Mesías (Cristo tso²-ni³ je² en¹-vi⁴).
JOH 1:42 Cˀia⁴ ja³ˀai³cao⁴-le⁴ Jesús. Cˀia⁴ nca³ Jesús ti¹co³tsen³-le⁴ qui³tso²: Ji³ ni¹³ Simón, ˀnti¹-le⁴ Jonás. Ji³ Cefas cˀoin¹-li² (je² en¹-vi⁴ la⁴jao⁴ tso²-ni³).
JOH 1:43 Xi³ coan³ nchaon³ Jesús me³-le⁴ nca³ coai⁴ ya⁴ Galilea. Qui³sa³te³jin³ Felipe, cˀoa⁴qui³tso²-le⁴: Tˀin³tjen⁴nqui³-nai¹³.
JOH 1:44 Felipe, ya⁴ Betsaida tsˀe⁴, je² na⁴xi⁴na³nta¹-le⁴ Andrés cao⁴ Pedro.
JOH 1:45 Felipe qui³sa³te³jin³ Natanael, cˀoa⁴qui³tso²-le⁴: Je³coan³sjai³-na³jin⁴ Jesús, ˀnti¹-le⁴ José, xi³ ya⁴ Nazaret tsˀe⁴, jo³ tso² cjoa⁴te¹xo³ma³ xi³ tsa³ca¹jna³ Moisés cao⁴ cho⁴ta⁴ xi³ qui³nchja⁴ya³ tˀa³tsˀe⁴ Ni³na¹.
JOH 1:46 Natanael qui³tso²-le⁴: A³ tjin¹ xi³ nta³ xi³ Nazaret fa³ˀai³-ni³. Felipe qui³tso²-le⁴: Nčhoai¹³ cho¹tsain³.
JOH 1:47 Cˀia⁴ nca³ Jesús tsa³ve³ Natanael xi³ ti¹nčhoa¹con³-le⁴, qui³tso² xi³ tˀa³tsˀe⁴: Ne³ jnco³ xi³ cjoa⁴qui²xi⁴ cho⁴ta⁴ israelita, xi³ tsin²-le⁴ cjoa⁴chˀa²na⁴cha⁴-jin².
JOH 1:48 Natanael qui³tso²-le⁴: Jña¹-ni³ tsa³ˀya³-ni³nai¹³. Jesús qui³nchja⁴-nca¹ni³: To⁴nqui³-ni³ nca³ cje³ nchja⁴-jin²li² Felipe, cˀia⁴ nca³ ya⁴ ti³jna³nqui³ ya¹ higo tsa³ˀve³-le²³.
JOH 1:49 Natanael qui³tso²-le⁴: Rabí, ji³ ni¹³ ˀnti¹-le⁴ Ni³na¹, ji³ ni¹³ cho⁴ta⁴ti¹tjon²-le⁴ cho⁴ta⁴ Israel.
JOH 1:50 Jesús cˀoa⁴qui³tso²-le⁴: A³ coi³ nca³ ma³cjain¹-li² nca³ cˀoa⁴ca²xin³-le²³ nca³ tsa³ˀve³-le²³ nca³ ti³jna³nqui³ ya¹ higo. Jcha⁴-sai³ cjoa⁴ xi³ nqui²sa⁴ xcon¹ tjin¹.
JOH 1:51 Qui³tso²-le⁴: Ña³qui³ cjoa⁴qui²xi⁴ ña³qui³ cjoa⁴qui²xi⁴ xi³ xin³-no³: Ni⁴čhjin³ xi³ fi²-sa³ni³ jcha⁴-nio¹³ ncˀa³jmi³ nca³ ti⁴xˀa⁴ cao⁴ je² a²ncje⁴ xi³ tsˀe⁴ Ni³na¹, xi³ fi²mi³, xi³ vi³tjo³jen³tˀain³-le⁴ je² ˀnti¹-le⁴ cho⁴ta⁴, je² Jesús.
JOH 2:1 Xi³ coan³jan²-ni³ ni⁴čhjin³ qui³sˀe³ jnco³ cjoa⁴vi³xan³ ya⁴ Caná xi³ tsˀe⁴ Galilea. Ya⁴ ti¹jna³ na⁴-le⁴ Jesús.
JOH 2:2 Cˀoa⁴-ti⁴ qui³no²cjoa⁴-le⁴ Jesús cao⁴ cho⁴ta⁴-le⁴ jña³ chi³xan² cho⁴ta⁴.
JOH 2:3 Cˀia⁴ nca³ je³tˀa³ vino, na⁴-le⁴ Jesús cˀoi⁴qui³tso²-le⁴: Tsin²-le⁴ vino-jin².
JOH 2:4 Cˀia⁴ Jesús qui³tso²-le⁴: Jme¹ xi³ tjin¹-na¹ cao⁴ ji³, chjon⁴². Cje³ fi³cho¹-jin² hora-na⁴.
JOH 2:5 Na⁴-le⁴ cˀoi⁴qui³tso²-le⁴ cho⁴ˀnta³: Cˀoa⁴tˀiaon⁴³ ni⁴tjo³son²-lao⁴³ nca³yi³je³ xi³ je² coi⁴tso⁴-no³.
JOH 2:6 Ya⁴ tjio¹ jaon³ ti⁴² tsian³ xi³ la⁴jao⁴, xi³ na³nta¹ sˀe³ya³, jo³sˀin² si¹tsje³-ni³ cho⁴ta⁴ judíos. Jao² jan²-la⁴ ni³sa³na³nta¹ jcho¹ya³ ti⁴²-ve⁴ nca³ jnco¹jnco¹.
JOH 2:7 Jesús cˀoi⁴qui³tso²-le⁴: Ti⁴nchao³ na³nta¹ ti⁴²-ve⁴. Cˀia⁴ qui³si³tse³ntjai².
JOH 2:8 Cˀoi⁴qui³tso²-le⁴: Chˀa⁴sjao³ na³nta¹-ve⁴, ta⁴nquin¹cao⁴-lao⁴³ ma³xtoan². Qui³cao⁴-le⁴.
JOH 2:9 Ma³xtoan²-ve⁴ qui³sco²tˀa³ je² na³nta¹ xi³ qui³tsˀon¹ya³ vino. Li²coi³ tsa³ve³ jña³ ja³ˀai³-ni³ (to⁴nca³ je² cho⁴ˀnta³ xi³ tsa³cˀa³sje³ na³nta¹ tsa³ve³). Cˀia⁴ ma³xtoan²-ve⁴ qui³nchja⁴-le⁴ je² xˀin⁴ xi³ ti¹vi³xan³.
JOH 2:10 Cˀoi⁴qui³tso²-le⁴: Nca³tsˀi³ cho⁴ta⁴ ti¹tjon² tsjoa¹ vino xi³ nqui²sa⁴ nta³. Cˀia⁴ nca³ je³qui³tse³, cˀia⁴ tsjoa¹ xi³ li²coi³ to⁴jo³ nta³. To⁴nca³ ji³ to⁴tsa³cˀe²jna³tjao²-ni¹ je² vino xi³ nqui²sa⁴ nta³ sa³ˀnta³ ntˀai⁴.
JOH 2:11 Je²-vi⁴ choa⁴ xi³ tsa³cˀe²jna³ ti¹tjon²-le⁴ nca³yi³je³ choa⁴ xi³ Jesús qui³tsjoa³ ya⁴ Caná xi³ tsˀe⁴ Galilea. Cˀoa⁴sˀin² tsa³ca³co¹son²tsen³ cjoa⁴je³ya³-le⁴. Cˀia⁴ coan³cjain¹-le⁴ cho⁴ta⁴-le⁴ xi³ tˀa³tsˀe⁴.
JOH 2:12 Cˀia⁴ nca³ je³coan³ je²-vi⁴, qui³jen³ ya⁴ Capernaum Jesús, cao⁴ na⁴-le⁴, cao⁴ ntsˀe⁴, cao⁴ cho⁴ta⁴-le⁴. To⁴jnco³jao² ni⁴čhjin³ tsa³ca³tio² nca³ ya⁴.
JOH 2:13 Je³cji³ma³čhian³-le⁴ sˀoi¹ pa²xco⁴ xi³ tsˀe⁴ cho⁴ta⁴ judíos. Qui³mi³ Jesús ya⁴ Jerusalén.
JOH 2:14 Ya⁴ya³ yo⁴nco⁴ qui³sa³te³jin³ cho⁴ta⁴ xi³ tjio¹va³te¹na³ nčha⁴ja⁴ cao⁴ va³rre², cao⁴ ni⁴se³ paloma. Cˀoa⁴-ti⁴ ya⁴ tjio¹ je² xi³ si¹cˀa³ntjai² taon⁴.
JOH 2:15 Jesús qui³si³nta³ jnco³ nˀo¹, tsa³cˀaon³sje³ nca³tsˀi³ yo⁴nco⁴ cao⁴ va³rre²-ve⁴ cao⁴ nčha⁴ja⁴-ve⁴. Tsa³cˀe¹tsao³va³ taon⁴-le⁴ xi³ taon⁴ si¹cˀa³ntjai². Ña³qui³ qui³si³ncha³nca³jten³ ya¹mi²xa⁴-le⁴.
JOH 2:16 Cˀoa⁴qui³tso²-le⁴ je² xi³ tjio¹va³te¹na³ ni⁴se³ paloma: Cha⁴ˀa²xion²³ je²-vi⁴. A³li² nti⁴tsin⁴-jin² nˀiaon²³ ntˀia³-le⁴ Nˀai³-na⁴.
JOH 2:17 Cˀia⁴ ja³ˀai³tsjen³-le⁴ cho⁴ta⁴-le⁴ nca³ tji¹tˀa³ xon⁴: Nˀion¹ sin³-na³ ntˀia³-li⁴ sa³ˀnta³ coan³xcˀen¹jin³-nia¹³.
JOH 2:18 Cˀia⁴ cho⁴ta⁴ judíos cˀoi⁴qui³tso²-le⁴: Jme¹ choa⁴ xi³ vˀai²³ nca³ cˀoi⁴nˀiain²³.
JOH 2:19 Cˀia⁴ Jesús qui³tso²-le⁴: Ti⁴qui³xo¹yao³ je² yo⁴nco⁴-vi⁴, to⁴jan² ni⁴čhjin³ cˀoe³nta³-nia³.
JOH 2:20 Cˀia⁴ qui³tso² cho⁴ta⁴ judíos: Ña³chan²jaon³ no¹ qui³sˀe³nta³-ni³ je² yo⁴nco⁴-vi⁴. Cˀoa⁴ ji³-ˀni³, a³ to⁴jan² ni⁴čhjin³ cˀoe¹nta³-ni³.
JOH 2:21 To⁴nca³ je² yo⁴nco⁴ xi³ je² yao³-le⁴ qui³tso²-le⁴ Jesús.
JOH 2:22 Cˀia⁴ nca³ Jesús ja³ˀa³ya²jin³-ni³le⁴ cˀen³, je² cho⁴ta⁴-le⁴ cˀoa⁴sˀin² ja³ˀai³tsjen³-le⁴ nca³ cˀoa⁴qui³tso²-le⁴. Cˀia⁴ coan³cjain¹-le⁴ je² xon⁴ Escritura cao⁴ je² en¹ xi³ Jesús qui³nchja⁴.
JOH 2:23 Ya⁴ ti¹jna³ ya⁴ Jerusalén cˀia⁴ nca³ qui³sˀe³jna³ sˀoi¹ pa²xco⁴. Cjai¹nca³ ncjin² xi³ coan³cjain¹-le⁴ tˀa³tsˀe⁴ jan³ˀain¹-le⁴, nca³ tsa³ve³ jña³-le⁴ choa⁴ xi³ qui³tsjoa³.
JOH 2:24 To⁴nca³ Jesús li²coi³ tjin¹jnco³-le⁴con³ nca³tsˀi³, nca³ Jesús je³ve³ nca³tsˀi³.
JOH 2:25 Li²ˀya³ xi³ Jesús coan³chjen¹-le⁴ xi³ cˀoa⁴coi⁴tso⁴-le⁴ jo³ cjoan³ cho⁴ta⁴. Je² ve³ jo³ cjoan³ cho⁴ta⁴.
JOH 3:1 Tjin¹ jnco³ cho⁴ta⁴ fariseo xi³ Nicodemo ˀmi², cho⁴ta⁴ti¹tjon²-le⁴ judíos.
JOH 3:2 Je²-vi⁴ ja³ˀai³nčhˀoe² Jesús nca³ njion², cˀoi⁴qui³tso²-le⁴: Rabí, ˀya³-ni¹⁴jin⁴ nca³ ji³ ja²ˀai⁴ jo³-ni³ jnco³ Maestro. Qui³si³ca³sen¹-li² Ni³na¹. Ni⁴ˀya³-jin² xi³ tsjoa¹ choa⁴ xi³ vˀai²³ nca³ ji³, tsa² Ni³na¹ li²coi³ ti¹jna³cao⁴.
JOH 3:3 Cˀia⁴ Jesús cˀoi⁴qui³tso²: Ña³qui³ cjoa⁴qui²xi⁴ ña³qui³ cjoa⁴qui²xi⁴ xi³ xin³-le²³, je² xi³ tsi² jtsin¹ nqui²jnco³ cˀa², li²coi³ coan⁴ scoe⁴ cjoa⁴te¹xo³ma³-le⁴ Ni³na¹.
JOH 3:4 Cˀia⁴ qui³tso² Nicodemo: Jo¹ coan⁴-ni³ nca³ jtsin¹ cho⁴ta⁴ xi³ je³coan³ jchi¹nca³. A³ coan⁴² cjoa⁴ˀa³sˀen³ nqui²ntia³ tsˀoa⁴ na⁴-le⁴, cˀoa⁴ jtsin¹-ˀni³.
JOH 3:5 Jesús qui³nchja⁴: Ña³qui³ cjoa⁴qui²xi⁴ ña³qui³ cjoa⁴qui²xi⁴ xi³ xin³-le²³, je² xi³ tsi² qui³tsin³ tˀa³tsˀe⁴ na³nta¹ cˀoa⁴ tˀa³tsˀe⁴ Espíritu Santo, li²coi³ coan⁴ cjoa⁴ˀa³sˀen³ cjoa⁴te¹xo³ma³-le⁴ Ni³na¹.
JOH 3:6 Je² xi³ tˀa³tsˀe⁴ yao³ tsin³-ni³, yao³ ni¹. Je² xi³ tˀa³tsˀe⁴ Espíritu Santo tsin³-ni³, espíritu ni¹.
JOH 3:7 A³li² ma³xcon¹-jin²li² jo³ ca²xin³-le²³: Ma³chjen¹ nca³ nqui²jnco³ cˀa² jtsion¹³.
JOH 3:8 Je² ntjao⁴ to⁴jña³-ni³ve⁴ cjo³na³jon³-ni¹, cˀoa⁴ no²ˀya²-ni³lai⁴ nca³ fa³ne³, to⁴nca³ li²coi³ ˀyai³ jña³ nca³ nčhoa¹-ni³, ni⁴ jña³ fi². Cˀoa⁴sˀin² ma³ nca³tsˀi³ xi³ tˀa³tsˀe⁴ Espíritu Santo qui³tsin³-ni³.
JOH 3:9 Nicodemo cˀoi⁴qui³tso²-le⁴: Jo¹ ma³-ni³ nca³ cˀoa⁴ ma³-ni³.
JOH 3:10 Jesús cˀoi⁴qui³tso²-le⁴: A³ tsi² tsa² ji³ maestro-le⁴ cho⁴ta⁴ Israel, cˀoa⁴ li²coi³ ˀyai³-ˀni³ je²-vi⁴.
JOH 3:11 Ña³qui³ cjoa⁴qui²xi⁴ ña³qui³ cjoa⁴qui²xi⁴ xi³ xin³-le²³, je² xi³ ˀyai³⁴-jin⁴ no²cjoa⁴-ni¹⁴jin⁴, cˀoa⁴ je² xi³ qui³cho²tsen³-lai⁴jin⁴ coi³ xi³ vˀai²⁴-jin⁴ en¹-na⁴jin⁴. Cˀoa⁴ jon² li²coi³ chjoao¹³ en¹-na⁴jin⁴.
JOH 3:12 Tsa² je³cˀoa⁴qui³xin³-no³ jña³-le⁴ xi³ chon³ son³ˀnte³, cˀoa⁴ li²coi³ ma³cjain¹-no³, jo¹sˀin² coan⁴cjain¹-no³ tsa² cˀoa⁴xin¹-no³ jña³-le⁴ xi³ chon³ ncˀa³jmi³.
JOH 3:13 Ni⁴ˀya³-jin² xi³ qui³mi³ ncˀa³jmi³, to⁴je² xi³ ya⁴ ja³ˀai³jen³-ni³, je² ˀnti¹-le⁴ cho⁴ta⁴ xi³ ti¹jna³ ncˀa³jmi³.
JOH 3:14 Jo³ qui³sˀin³ Moisés nca³ qui³sco²mi³tjen⁴ je² ye⁴ ya⁴ ˀnte³tˀa³xin²tˀa³, cˀoa⁴sˀin² ma³chjen¹ nca³ je² ˀnti¹-le⁴ cho⁴ta⁴ tjo¹mi³tjen⁴-ni³,
JOH 3:15 jme¹-ni³ nca³ nca³tsˀi³-si¹ni³ xi³ ma³cjain¹-le⁴ tˀa³tsˀe⁴ Jesús, li²coi³ cha⁴, to⁴nca³ tjin¹-le⁴ cjoa⁴vi³jna³chon³ nca³ntsjai².
JOH 3:16 Nca⁴ Ni³na¹ cˀoa⁴sˀin² coan³tsjca³que³ son³ˀnte³ nca³ qui³tsjoa³ je² xi³ to⁴jnco³ ˀnti¹-le⁴, jme¹-ni³ nca³ nca³tsˀi³-si¹ni³ xi³ ma³cjain¹-le⁴ tˀa³tsˀe⁴, li²coi³ cha⁴, to⁴nca³ tjin¹-le⁴ cjoa⁴vi³jna³chon³ nca³ntsjai².
JOH 3:17 Nca⁴ Ni³na¹ li²coi³ xa¹ qui³si³ca³sen¹-ni³ ˀnti¹-le⁴ nca³ cˀaon⁴ne²-le⁴ cjoa⁴ñˀain³ cho⁴ta⁴son³ˀnte³, to⁴coi⁴² nca³ cˀoa⁴sje³ntjai² cho⁴ta⁴son³ˀnte³.
JOH 3:18 Je² xi³ ma³cjain¹-le⁴ tˀa³tsˀe⁴ Jesús, li²coi³ ti¹jna³ne²-le⁴ cjoa⁴ñˀain³, to⁴nca³ je² xi³ tsi² tsa² coi³ ma³cjain¹-le⁴ tˀa³tsˀe⁴, je³ti¹jna³ne²-le⁴ cjoa⁴ñˀain³, nca⁴ tsi² tsa² coi³ coan³ecjain¹-le⁴ tˀa³tsˀe⁴ jan³ˀain¹-le⁴ xi³ je² to⁴jnco³ ˀnti¹-le⁴ Ni³na¹.
JOH 3:19 Je² lˀi¹ ja³ˀai³ i⁴ son³ˀnte³, to⁴nca³ cho⁴ta⁴son³ˀnte³ nqui²sa⁴ coan³tsjoa³que³ cjoa⁴njion² cao⁴-ni³ lˀi¹, nca⁴ cjoa⁴tsˀen⁴ xi³ qui³sˀin³. Coi³ nca³ ti¹jna³ne²-le⁴ cjoa⁴ñˀain³.
JOH 3:20 Je² nca³tsˀi³ xi³ cjoa⁴tsˀen⁴ sˀin¹, ma³jti³que³ lˀi¹, li²coi³ ya⁴ nčhoa¹ jña³ tjin¹ lˀi¹, jme¹-ni³ nca³ tsi²coi³ coan⁴tsen³-si¹ni³ je² cjoa⁴tsˀen⁴ xi³ sˀin¹.
JOH 3:21 To⁴nca³ je² xi³ cjoa⁴qui²xi⁴ xi³ sˀin¹, nčhoa¹nčhˀoe² lˀi¹-ve⁴, jme¹-ni³ nca³ coan⁴tsen³-si¹ni³ cjoa⁴nta³-le⁴ nca³ tsˀe⁴ Ni³na¹.
JOH 3:22 Xi³ coan³-ni³ ja³ˀai³ Jesús cao⁴ cho⁴ta⁴-le⁴ ya⁴ na³nqui³ Judea. Ya⁴ tsa³cˀe²jna³cao⁴ cho⁴ta⁴-le⁴ tsa³ca³te¹nta¹.
JOH 3:23 Juan cˀoa⁴-ti⁴ tsa³ca³te¹nta¹ ya⁴ Enón čhian³-le⁴ Salim, nca³ cjai¹nca³ tjin¹ na³nta¹ nca³ya⁴. Cho⁴ta⁴ ji³nčhoa³nčhˀoe² qui³sa³te¹nta¹.
JOH 3:24 Juan cje³ ni²cja³ˀa³sˀen³-jin² nto⁴ya¹.
JOH 3:25 Tsa³cjao¹ya³-ni³ cho⁴ta⁴-le⁴ Juan cao⁴ cho⁴ta⁴ judíos jo³sˀin² nca³ si¹tsje³-ni³.
JOH 3:26 Cˀia⁴ je² ji³nčhoa³nčhˀoe² Juan cˀoi⁴qui³tso²-le⁴: Rabí, tsa³cˀai²³ en¹-li⁴ xi³ tˀa³tsˀe⁴ Jesús xi³ tsa³cˀe²jna³cao⁴-li² xi³ncoa³nta¹-ni³ Jordán. Coe⁴-ni³ cˀoa⁴-ti⁴ je² va³te¹nta¹, cˀoa⁴ ña³qui³ je² fa³ˀai³nčhˀoe² nca³tsˀi³.
JOH 3:27 Juan cˀoi⁴qui³tso²: Li²jme³ xi³ tjin¹-le⁴ cho⁴ta⁴ xi³ tsi² tsa² ncˀa³jmi³ ja³ˀai³-ni³le⁴.
JOH 3:28 Jon² nio¹³ nca³tsˀio³ testigo-na⁴ jo³ qui³xian³: A³li² an³-jian²³ Cristo, to⁴nca³ nqui³xcon⁴ qui³ni²ca³sen¹ ti¹tjon²-na³.
JOH 3:29 Je² xi³ tjin¹-le⁴ chjon⁴² je² xˀin⁴-le⁴. To⁴nca³ je² mi²yo⁴-le⁴ xˀin⁴-le⁴ xi³ se¹jna³tˀa³, nčhˀoe¹-le⁴, cjai¹nca³ to⁴ma³tsjoa³-le⁴ jo³ tso² xˀin⁴-ve⁴. Cˀoa⁴sˀin² cjoa⁴tsjoa³-na⁴ coan⁴tse³ya³.
JOH 3:30 Ma³chjen¹ nca³ je² Cristo ca²ta³mi³ncˀa³, nqui²sa⁴ ca²ta³sa³sen¹tjen⁴nquia³ nca³ an³.
JOH 3:31 Je² xi³ nčhoa¹-ni³ ja⁴ncˀa¹, je² xi³ ti¹tjon²-le⁴ nca³tsˀi³. Je² xi³ tsˀe⁴ son³ˀnte³, cho⁴ta⁴son³ˀnte³ ni¹, to⁴je² cjoa⁴ xi³ tsˀe⁴ son³ˀnte³ nchja⁴. Je² xi³ nčhoa¹-ni³ ncˀa³jmi³, je² xi³ ti¹tjon²-le⁴ nca³tsˀi³.
JOH 3:32 Je²-vi⁴ tsjoa¹ en¹-le⁴ jme³ xi³ tsa³ve³ cao⁴ xi³ qui³nčhˀoe¹, to⁴nca³ ni⁴ˀya³-jin² xi³ cjoe¹ en¹-le⁴.
JOH 3:33 Je² xi³ cjoe¹ en¹-le⁴, je²-vi⁴ qui³si³qui²xi⁴ya³nta³ nca³ Ni³na¹ xi³ cjoa⁴qui²xi⁴.
JOH 3:34 Je² xi³ Ni³na¹ qui³si³ca³sen¹, je² en¹-le⁴ Ni³na¹ xi³ nchja⁴. Ni³na¹ li²coi³ fa³ˀa¹cho⁴ya³ nca³ tsjoa¹ Espíritu Santo.
JOH 3:35 Je² Nˀai³-na¹ tsjoa³que³ ˀnti¹-le⁴, tsa³cˀe¹jna³ya³ ntsja³ nca³yi³je³ cjoa⁴.
JOH 3:36 Je² xi³ ma³cjain¹-le⁴ tˀa³tsˀe⁴ ˀnti¹-le⁴ Ni³na¹, tjin¹-le⁴ cjoa⁴vi³jna³chon³ nca³ntsjai². Je² xi³ tsi² ma³cjain¹-le⁴ tˀa³tsˀe⁴ ˀnti¹-le⁴ Ni³na¹, li²coi³ scoe⁴ cjoa⁴vi³jna³chon³, to⁴nca³ je² cjoa⁴ñˀain³ xi³ Ni³na¹ tsjoa¹-le⁴ ti¹jna³ne²-le⁴.
JOH 4:1 Cˀia⁴ nca³ tsen³ coan³-le⁴ Jesús nca³ je² cho⁴ta⁴ fariseos qui³nčhˀoe¹ nca³ Jesús nqui²sa⁴ ncjin² tsa³ca³te¹nta¹ cho⁴ta⁴ cao⁴-ni³ tsa² Juan,
JOH 4:2 (Nta³ tsa² tsi² je² cjoan² Jesús xi³ va³te¹nta¹, to⁴nca³ je² cho⁴ta⁴-le⁴,)
JOH 4:3 Jesús ji³tjo³-ni³ ya⁴ Judea, nqui²ntia³ qui³ ya⁴ Galilea.
JOH 4:4 Coan³chjen¹ nca³ ja³ˀa³to³jin³ ya⁴ Samaria.
JOH 4:5 Cˀia⁴ ji³cho² Samaria jña³ nca³ na⁴xi⁴na³nta¹ Sicar ˀmi², ya⁴ čhian³-le⁴ ˀnte³ xi³ Jacob qui³tsjoa³-le⁴ José, je² ˀnti¹-le⁴.
JOH 4:6 Ya⁴ ti¹jna³ je² pilana³nta¹ xi³ tsˀe⁴ Jacob. Cjai¹nca³ ji³jta³-le⁴ ntia⁴² Jesús, cˀia⁴ tsa³cˀe²jna³tˀa³ je² pilana³nta¹-ve⁴. Je² hora jo³-ni³ tsa² nchi³sen³.
JOH 4:7 Ja³ˀai³ jnco³ chjon⁴² xi³ tsˀe⁴ Samaria. Ji³cho² cja³ˀa¹ na³nta¹. Jesús cˀoi⁴qui³tso²-le⁴: Tˀai²-nai¹³ xi³ scˀoia⁴.
JOH 4:8 (Je² cho⁴ta⁴-le⁴ je³qui³ na⁴xi⁴na³nta¹-ve⁴. Qui³ ca³tse³ xi³ cji³ne³.)
JOH 4:9 Je² chjon⁴² samaritana cˀoi⁴qui³tso²-le⁴: Jo¹ ma³-ni³ nca³ ji³ xi³ cho⁴ta⁴ judío na³nta¹ ni²je¹-nai¹³, nca³ chjon⁴² samaritana nca³ an³. Je² cho⁴ta⁴ judíos li²coi³ fa¹cao⁴ cho⁴ta⁴ samaritanos.
JOH 4:10 Jesús cˀoi⁴qui³tso²-le⁴: Tsa² ˀyai³ cjoa⁴tjao²-le⁴ Ni³na¹ cˀoa⁴ tsa² ˀya³xcoin³ je² xi³ cˀoa⁴tso²-li²: Tˀai²-nai¹³ xi³ scˀoia⁴, ji³ xi³ si⁴je¹-lai⁴ nca³ je², cˀoa⁴ je² tsjoa¹-li² na³nta¹ xi³ ti¹jna³con³.
JOH 4:11 Cˀia⁴ chjon⁴²-ve⁴ qui³tso²-le⁴: Señor, a³li²jme³ xi³ qui³chˀai²³ xi³ chˀa²sje³-ni³ na³nta¹. Cjai¹nca³ na⁴nca⁴ je² nca⁴jao⁴-ve⁴. Jña¹-ni³ve⁴ˀni³ tjin¹-li² je² na³nta¹ xi³ ti¹jna³con³.
JOH 4:12 A³ ji³ ni¹³ ti¹tjon²-le⁴ nˀai³-na⁴jin⁴ Jacob, xi³ qui³tsjoa³-na³jin⁴ je² pila-vi⁴. Je² tsa³cˀi³ na³nta¹ xi³ i⁴ tjia¹-vi⁴, cao⁴ xti³-le⁴ cao⁴ nčha⁴ja⁴-le⁴.
JOH 4:13 Cˀia⁴ Jesús cˀoi⁴qui³tso²-le⁴: To⁴ˀya³-ni³ xi³ scˀoi¹ je² na³nta¹-vi⁴ coan⁴fa³ti² nqui²ntia³-le⁴.
JOH 4:14 To⁴nca³ je² xi³ scˀoi¹ je² na³nta¹ xi³ an³ tsjoa³-le⁴, ni⁴cˀia³-jin² ti⁴coan⁴fa³ti²-ni³le⁴. Je² na³nta¹ xi³ an³ tsjoa³-le⁴, to⁴ya⁴² sˀe³jna³jin³-le⁴ jo³-ni³ na³nta¹ xi³ cji²⁴ncˀa³jin³-le⁴, xi³ tsjoa¹ cjoa⁴vi³jna³chon³ nca³ntsjai².
JOH 4:15 Cˀia⁴ chjon⁴²-ve⁴ qui³tso²-le⁴: Señor, tˀai²-nai¹³ je² na³nta¹ je²-vi⁴, jme¹-ni³ nca³ tsi² ti⁴coan⁴fa³ti²-ni³na³, cˀoa⁴ li²coi³ ti⁴ˀi⁴ cjoe²ˀe⁴ cja³ˀa³-nia³.
JOH 4:16 Cˀoi⁴qui³tso² Jesús: Tˀin³ ti⁴no²cjoa⁴-lai⁴ xˀin⁴-li⁴, nčhoai¹³ i⁴-vi⁴.
JOH 4:17 Qui³nchja⁴ chjon⁴²-ve⁴ cˀoi⁴qui³tso²: Tsin²-na³ xˀin⁴-jin². Jesús qui³tso²-le⁴: Cjai¹ cjoa⁴qui²xi⁴ xi³ ca²si³, tsin²-na³ xˀin⁴-jin².
JOH 4:18 Coan³ aon² xˀin⁴ je³qui³sˀe³-li². Je² xi³ tjin¹-li² ntˀai⁴-vi⁴, a³li² je² xˀin⁴-li⁴. Je²-vi⁴ cjoa⁴qui²xi⁴ xi³ ca²si³.
JOH 4:19 Chjon⁴²-ve⁴ qui³tso²-le⁴: Señor, je³ti²ˀve³ nca³ ji³ xi³ no²cjoa⁴yai³ tˀa³tsˀe⁴ Ni³na¹.
JOH 4:20 Je² nˀai³-na⁴jin⁴ tsa³ve³xcon¹ Ni³na¹ i⁴ ni³nto³-vi⁴. To⁴nca³ jon² cˀoa⁴vi³xon¹³ nca³ ya⁴ Jerusalén ya⁴ ˀnte³ jña³ nca³ ma³chjen¹ nca³ ˀya³xcoan¹ Ni³na¹.
JOH 4:21 Cˀia⁴ Jesús qui³tso²-le⁴: Chjon⁴², ca²ta³ma³cjain¹-li² nca³ cjoa⁴ˀai¹ hora, cˀia⁴ nca³ ni⁴ˀi⁴-jin² ni³nto³-vi⁴, ni⁴ya⁴ Jerusalén-jin², jcha⁴xcon¹³ Nˀai³-na¹.
JOH 4:22 Jon²-ˀni³ ˀya³xcon¹³-nio³ xi³ tsi² tsa² ˀyao³, to⁴nca³ jin⁴-jin⁴ ˀya³xcon¹-ni³⁴jin⁴ xi³ ˀyai³⁴jin⁴, nca⁴ cho⁴ta⁴ judíos fa³ˀai³-ni³ xi³ vˀa³sje³ntjai².
JOH 4:23 To⁴nca³ cjoa⁴ˀai¹ hora, cˀoa⁴ je³ja³ˀai³, cˀia⁴ nca³ je² xi³ ña³qui³ cjoa⁴qui²xi⁴ ve³xcon¹ Ni³na¹, scoe⁴xcon¹ Nˀai³-na¹ cao⁴ ni⁴ma⁴-le⁴ cˀoa⁴ cao⁴ cjoa⁴ˀya³xcon¹ xi³ ña³qui³ cˀoa⁴tjin¹, nca⁴ je² Nˀai³-na¹ cˀoa⁴-ti⁴ va¹sjai³ cho⁴ta⁴ xi³ cˀoa⁴sˀin² scoe⁴xcon¹ nca³ je².
JOH 4:24 Ni³na¹ espíritu ni¹. Je² xi³ ve³xcon¹ nca³ je², ma³chjen¹ nca³ ve³xcon¹ cao⁴ ni⁴ma⁴-le⁴ cˀoa⁴ cao⁴ cjoa⁴ˀya³xcon¹ xi³ ña³qui³ cˀoa⁴tjin¹.
JOH 4:25 Cˀia⁴ chjon⁴²-ve⁴ cˀoa⁴qui³tso²-le⁴: ˀve³-nia¹³ nca³ cjoa⁴ˀai¹ je² Mesías, je² xi³ Cristo ˀmi². Cˀia⁴ nca³ je² cjoa⁴ˀai¹, ña³qui³ cˀoa⁴coi⁴tso⁴-na¹ jo³ chon³ nca³yi³je³.
JOH 4:26 Jesús cˀoi⁴qui³tso²-le⁴: An³ nia¹³ je² xi³ fa²cao⁴-le²³.
JOH 4:27 Cˀia⁴ ja³ˀai³ cho⁴ta⁴-le⁴. Jo³ to⁴coan³xcon¹-le⁴ nca³ Jesús ti¹fa¹cao⁴ jnco³ chjon⁴². To⁴nca³ ni⁴ˀya³-jin² xi³ qui³tso²: Jme¹-ni³ xi³ cho²na³nqui³, a³xo⁴ jme¹-ni³ en¹ xi³ cha²coai⁴ chjon⁴²-ve⁴.
JOH 4:28 Cˀia⁴ chjon⁴²-ve⁴ tsa³cˀe¹jna³ ni³sa³-le⁴, qui³ ya⁴ na⁴xi⁴na³nta¹, cˀoi⁴qui³tso²-le⁴ cho⁴ta⁴xˀin⁴-ve⁴:
JOH 4:29 Nčhoao¹³ cho¹tsen³-lao⁴³ jnco³ cho⁴ta⁴ xi³ cˀoa⁴qui³tso²-na³ nca³yi³je³ jo³ qui³sˀian³. Tsa² je²-vi⁴ xi³ Cristo ˀmi².
JOH 4:30 Cˀia⁴ cho⁴ta⁴ ji³tjo³-ni³ na⁴xi⁴na³nta¹, ja³ˀai³nčhˀoe² nca³ je².
JOH 4:31 Je² cho⁴ta⁴-le⁴ Jesús tjio¹vˀe¹tsˀoa³-le⁴, cˀoi⁴qui³tso²: Rabí, ti⁴chi³.
JOH 4:32 Jesús cˀoi⁴qui³tso²-le⁴: Tjin¹-na³ xi³ va²cjen⁴-nia³ xi³ tsi² coi³ ˀyao³ nca³ jon².
JOH 4:33 Cˀia⁴ cho⁴ta⁴-le⁴ nca³ i⁴ nca³ jan¹ nchja⁴cao⁴ xi¹ncjin¹: ˀya¹-ni³ xi³ ca²fa³ˀai³cao⁴-le⁴ xi³ coa⁴cjen⁴.
JOH 4:34 Qui³nchja⁴ Jesús: Je² xi³ va²cjen⁴-nia³, nca³ cˀoa⁴sˀian³ jo³sˀin² me³-le⁴ je² xi³ qui³si³ca³sen¹-na³ cˀoa⁴ nca³ si³jncoa³ xa¹-le⁴.
JOH 4:35 A³ tsi² tsa² vi³xon¹³ nca³ jon²: Cha³-sa³ nqui²ño³ sa¹ nca³ coi⁴cho² je² ni⁴čhjin³ nca³ sˀe⁴xco¹ xi³ ma³jcha¹. Ne³ cˀoa⁴xin³-no³, cho¹ˀai²nquio³ xcon³, cho¹tsen³-lao⁴³ son³ˀnte³, nca⁴ je³ji³cho²taon³ ni⁴čhjin³-le⁴ nca³ sˀe⁴xco¹.
JOH 4:36 Je² xi³ vˀe¹xco¹ ntje⁴, ma³chji¹-le⁴. Vˀe¹xco¹ ntje⁴ xi³ tˀa³tsˀe⁴ cjoa⁴vi³jna³chon³ nca³ntsjai², jme¹-ni³ nca³ cˀoa⁴-ti⁴ je² xi³ vˀe¹ntje² tjin¹-si¹ni³le⁴ cjoa⁴tsjoa³ cao⁴ je² xi³ vˀe¹xco¹ ntje⁴.
JOH 4:37 Je²-vi⁴ en¹ xi³ cjoa⁴qui²xi⁴: Jnco³ xi³ vˀe¹ntje², cˀoa⁴ cja⁴ˀai¹-ˀni³ xi³ vˀe¹xco¹ ntje⁴.
JOH 4:38 An³ qui³si³ca³sen¹³-no³ nca³ cˀoe¹xco¹³ ntje⁴ xi³ tsi² tsa² jon² qui³sˀe³nqui³ cjoa⁴ma⁴-no³ nca³ qui³ni²xa¹-lao⁴³. Cja⁴ˀai¹ xi³ qui³sˀe³nqui³ cjoa⁴ma⁴-le⁴ nca³ qui³si³xa¹, cˀoa⁴ jon² qui³ni²qui³njaon³.
JOH 4:39 Cjai¹nca³ ncjin² cho⁴ta⁴ samaritanos xi³ ya⁴ tsˀe⁴ na⁴xi⁴na³nta¹-ve⁴ coan³cjain¹-le⁴ tˀa³tsˀe⁴ Jesús xi³ to⁴tˀa³tsˀe⁴ en¹-le⁴ chjon⁴²-ve⁴ xi³ cˀoa⁴sˀin² qui³tsjoa³ en¹-le⁴: Ña³qui³ cˀoa⁴qui³tso²-na³ nca³yi³je³ jo³ qui³sˀian³.
JOH 4:40 Ncjin² cho⁴ta⁴ samaritanos ji³nčhoa³nčhˀoe² Jesús, tsa³cˀe¹tsˀoa³-le⁴ nca³ ya⁴ ca²ta³vˀe²jna³cao⁴. Jao² ni⁴čhjin³ ya⁴ tsa³cˀe²jna³ Jesús.
JOH 4:41 Nqui²sa⁴ ncjin² cho⁴ta⁴ xi³ coan³cjain¹-le⁴ xi³ to⁴tˀa³tsˀe⁴ en¹-le⁴ Jesús.
JOH 4:42 Cho⁴ta⁴ cˀoa⁴qui³tso²-le⁴ chjon⁴²-ve⁴: A³li² tsa² to⁴coi³ nca³ ma³cjain¹-na³jin⁴ xi³ to⁴tˀa³tsˀe⁴ en¹-li⁴. Cˀoa⁴-ti⁴ je³ca²no²ˀyai²⁴-jin⁴ nca³ jin⁴, cˀoa⁴ ˀya³-ni¹⁴jin⁴ nca³ je² xi³ ña³qui³ cjoa⁴qui²xi⁴ vˀa³sje³ntjai² cho⁴ta⁴, je² Cristo ˀmi².
JOH 4:43 Xi³ coan³ jao²-ni³ ni⁴čhjin³ ji³tjo³-ni³ nca³ya⁴. Qui³ ya⁴ Galilea.
JOH 4:44 Sa³ˀnta³ je² soa³ Jesús cˀoa⁴qui³tso² nca³ jnco³ xi³ nchja⁴ya³ xi³ tˀa³tsˀe⁴ Ni³na¹ li²coi³ ˀya³xcon¹ ya⁴ na³nqui³ xi³ tsˀe⁴.
JOH 4:45 Cˀia⁴ nca³ ji³cho² ya⁴ Galilea, je² cho⁴ta⁴ galileos cjai¹nca³ nta³ tsa³ve³tjao², nca³ je³tsa³ˀya³-le⁴ nca³yi³je³ cjoa⁴ xi³ qui³sˀin³ ya⁴ Jerusalén cˀia⁴ nca³ sˀoi¹, nca³ cˀoa⁴-ti⁴ qui³ cho⁴ta⁴-ve⁴ je² sˀoi¹.
JOH 4:46 Nqui²ntia³ ti⁴ja³ˀai³-nca¹ni³ Jesús ya⁴ Caná xi³ tsˀe⁴ Galilea, jña³ nca³ je² na³nta¹ qui³tsˀon¹ya³ vino. Ya⁴ Capernaum ti¹jna³ jnco³ xi³ tsˀe⁴ cho⁴ta⁴ti¹tjon². ˀnti¹-le⁴ ti¹mˀen³.
JOH 4:47 Cˀia⁴ nca³ qui³nčhˀoe¹ nca³ Jesús ji³nčhoa³-ni³ Judea, ja³ˀai³ ya⁴ Galilea, qui³con³-le⁴ tsa³cˀe¹tsˀoa³-le⁴ nca³ ca²ta³vi³tjo³jen³, ca²ta³si¹xqui³-le⁴ ˀnti¹-le⁴ nca³ je³me³mˀen³.
JOH 4:48 Cˀia⁴ Jesús cˀoi⁴qui³tso²-le⁴: Tsa² tsi² tsa² jchao⁴³ choa⁴ cˀoa⁴ cjoa⁴xcon¹, li²coi³ coan⁴cjain¹-no³.
JOH 4:49 Je² xi³ tsˀe⁴ cho⁴ta⁴ti¹tjon² cˀoi⁴qui³tso²: Señor, tˀian⁴-nai¹³ cjoa⁴nta³, nčhoa¹jain³ nca³ cje³ mˀen³-jin² ˀnti¹-na⁴.
JOH 4:50 Jesús cˀoi⁴qui³tso²-le⁴: Tˀin³, ˀnti¹-li⁴ ti¹jna³con³-ni¹. Je² cho⁴ta⁴-ve⁴ coan³cjain¹-le⁴ en¹-le⁴ Jesús. Qui³-ˀni³.
JOH 4:51 Cˀia⁴ nca³ je³ti¹fi³cho²jen³ cho⁴ta⁴-ve⁴, je² cho⁴ta⁴cho⁴ˀnta³-le⁴ ji³tjo³nčhˀoe² cˀoa⁴qui³tso²-le⁴: ˀnti¹-li⁴ ti¹jna³con³-ni¹.
JOH 4:52 Cˀia⁴ je² qui³sco²na³nqui³-ni³le⁴ jo³ chon³ nca³ coan³xan⁴-ni³le⁴. Cˀoi⁴qui³tso²-le⁴: Nco²jña⁴ la una coan³xan⁴-le⁴ ntˀai⁴.
JOH 4:53 Cˀia⁴ qui³sˀe³jin³nta³-le⁴ nˀai³-le⁴ nca³ ti⁴coi³-ni³ hora-ve⁴ cˀia⁴ nca³ Jesús cˀoa⁴qui³tso²-le⁴: ˀnti¹-li⁴ ti¹jna³con³-ni¹. Coan³cjain¹-le⁴ nca³ je² cao⁴ nca³tsˀi³ xi³ tjio¹ ni³ˀya³-le⁴.
JOH 4:54 Je² xi³ coan³ jao² cˀa³-ni³ choa⁴ xi³ qui³tsjoa³ Jesús nca³ ji³nčhoa³-ni³ Judea nca³ ja³ˀai³ ya⁴ Galilea.
JOH 5:1 Xi³ je³coan³ je² cjoa⁴ je²-vi⁴, jnco³ ni⁴čhjin³ sˀoi¹ tsˀe⁴ cho⁴ta⁴ judíos qui³mi³ Jesús ya⁴ Jerusalén.
JOH 5:2 Ti¹jna³ ya⁴ Jerusalén ya⁴ xo⁴ntjoa⁴ nchˀoa¹-le⁴ cho⁴ jnco³ tanque na³nta¹ xi³ Betesda ˀmi² nca³ en¹ hebreo. Aon² corredor tjin¹-le⁴.
JOH 5:3 Ya⁴nqui³ corredor cjai¹nca³ ncjin² cho⁴ta⁴ cjio³ xi³ tjio¹mˀen³, xi³ xca⁴, xi³ chi⁴ˀnque¹, xi³ qui³xi² cjoan³, xi³ tjio¹co³ya³-le⁴ nca³ jtin¹ya³ na³nta¹-ve⁴.
JOH 5:4 Ja⁴sa³cˀoa⁴ tjin¹ ni⁴čhjin³ cˀia⁴ nca³ jnco³ a²ncje⁴ vi³tjo³jen³ya³ tanque-ve⁴, cˀoa⁴ si¹cˀo¹jin³ na³nta¹-ve⁴. Je² xi³ ti¹tjon² vi³tjo³jen³ya³ tanque-ve⁴ nca³ je³qui³tin²ya³ na³nta¹-ve⁴, coan³nta³-ni³ to⁴jña³-ni³le⁴ chˀin³ xi³ tjin¹-le⁴.
JOH 5:5 Ya⁴ ti¹jna³ jnco³ cho⁴ta⁴xˀin⁴ xi³ coan³ can³ čhja³ˀaon²-jan² no¹ ti¹mˀen³.
JOH 5:6 Cˀia⁴ nca³ Jesús tsa³ve³ nca³ ti¹qui³jna³ cho⁴ta⁴-ve⁴, coan³jin³-le⁴ nca³ nˀion¹ coa²tse³ nca³ ti¹mˀen³, cˀoi⁴qui³tso²-le⁴: A³ me³-li² nca³ coan⁴ntai³.
JOH 5:7 Qui³nchja⁴ xi³ ti¹mˀen³: Señor, tsin²-na³ cho⁴ta⁴xˀin⁴-jin² xi³ cˀoa⁴ncˀa³-na³, xi³ si⁴²ca²jna³ya³-na³ tanque cˀia⁴ nca³ ma³tin²ya³ na³nta¹-ve⁴. Tjen⁴ an³ nčhoa¹³ cja⁴ˀai¹ xi³ je³ji³tjo³jen³ya³ ti¹tjon²-na³.
JOH 5:8 Jesús cˀoi⁴qui³tso²-le⁴: Ti²so⁴tjain⁴, chjoai¹³ ni³jña³-li⁴, cˀoa⁴ to²mjain³.
JOH 5:9 Nti⁴ton⁴ coan³nta³ cho⁴ta⁴-ve⁴, qui³scoe¹ ni³jña³-le⁴, qui³ˀni³. Cˀia⁴ je² ni⁴čhjin³-ve⁴ ni⁴čhjin³ ni²cja¹ya³ ni¹.
JOH 5:10 Cˀia⁴ cho⁴ta⁴ judíos qui³tso²-le⁴ xi³ coan³nta³-ve⁴: Ni⁴čhjin³ ni²cja¹ya³ ntˀai⁴-vi⁴. Tsin²-li² ˀnte³-jin² nca³ jchˀai⁴ ni³jña³-li⁴.
JOH 5:11 Cho⁴ta⁴-ve⁴ qui³tso²-le⁴: Je² xi³ ca²si¹nta³-na³, je² soa³ cˀoa⁴ca²tso²-na³: Chjoai¹³ ni³jña³-li⁴, cˀoa⁴ to²mjain³.
JOH 5:12 Cˀia⁴ qui³sco²na³nqui³-le⁴: ˀya¹ xi³ cˀoa⁴ca²tso²-li²: Chjoai¹³ ni³jña³-li⁴, cˀoa⁴ to²mjain³.
JOH 5:13 Je² xi³ coan³nta³-ve⁴ li²coi³ ve³ ˀya³-ni³ve⁴, nca⁴ Jesús ji³tjo³xin²jin³-le⁴ cho⁴ta⁴ xi³ tjio¹ ya⁴ ˀnte³-ve⁴.
JOH 5:14 Cˀia⁴ nca³ coan³scan³-ni³ Jesús qui³sa³te³jin³-nca¹ni³ cho⁴ta⁴-ve⁴ ya⁴³ yo⁴nco⁴, cˀoi⁴qui³tso²-le⁴: Coe⁴-ni³ je³coan³ntai³, a³li² ti⁴je¹-jin² vi³jnchi³-ni³, jme¹-ni³ nca³ tsi² tsa² ti⁴cjoa⁴ˀai¹ne²-ni³li² xi³ nqui²sa⁴ to⁴ˀai¹ tjin¹.
JOH 5:15 Cho⁴ta⁴-ve⁴ qui³, cˀoa⁴qui³tso²-le⁴ cho⁴ta⁴ judíos: Je² Jesús xi³ qui³si³nta³-na³.
JOH 5:16 To⁴coi³ cjoa⁴-vi⁴ je² cho⁴ta⁴ judíos qui³tjen⁴nqui³ co²ntran⁴-le⁴ Jesús, me³-le⁴ nca³ si⁴²cˀen³, nca³ Jesús cˀoi⁴qui³sˀin³ ni⁴čhjin³ ni²cja¹ya³.
JOH 5:17 Jesús cˀoi⁴qui³tso²-le⁴: Je² Nˀai³-na⁴ si¹xa¹ sa³ˀnta³ ntˀai⁴-vi⁴, cˀoa⁴ an³ si³xa¹³.
JOH 5:18 Cˀia⁴ nqui²sa⁴ to⁴nˀion¹ me³-le⁴ cho⁴ta⁴ judíos nca³ si⁴²cˀen³, nca⁴ tsi² tsa² to⁴je² ni⁴čhjin³ ni²cja¹ya³ ti¹fa³ˀa³to³ntjai². Cˀoa⁴²-ti⁴ Jesús Nˀai³-na⁴ qui³tso²-le⁴ Ni³na¹, cˀoa⁴sˀin² ti¹si¹nco¹son² yao³-le⁴ cao⁴ Ni³na¹.
JOH 5:19 Cˀia⁴ Jesús cˀoi⁴qui³tso²-le⁴: Ña³qui³ cjoa⁴qui²xi⁴ ña³qui³ cjoa⁴qui²xi⁴ xi³ xin³-no³: Li²jme³ xi³ ma³ sˀin¹ ˀnti¹ nca³ to⁴je²-ni¹, to⁴coi³ xi³ je² ve³ jo³ sˀin¹ Nˀai³-na¹. Je² nca³yi³je³ xi³ sˀin¹ Nˀai³-na¹, cˀoa⁴-ti⁴ sˀin¹ ˀnti¹-le⁴.
JOH 5:20 Je² Nˀai³-le⁴ cjai¹nca³ to⁴tsjoa³que³ ˀnti¹-le⁴, cˀoa⁴sˀin² va³co¹-le⁴ nca³yi³je³ xi³ cˀoa⁴sˀin¹ nca³ je². To⁴jo³ coa⁴co²sa³le⁴ jña³-le⁴ xi³ nqui²-sa⁴ xcon¹ tjin¹, jme¹-ni³ nca³ to⁴coan⁴xcon¹-si¹ni³no³.
JOH 5:21 Jo³sˀin² je² Nˀai³-na¹ cjo³mi³tjen⁴ cˀen³, tsjoa¹-le⁴ cjoa⁴vi³jna³chon³, cˀoa⁴-ti⁴sˀin²ni³ ˀnti¹-le⁴ tsjoa¹-le⁴ cjoa⁴vi³jna³chon³ ˀya³ xi³ me³-le⁴.
JOH 5:22 Tsi² tsa² je² Nˀai³-na¹ xi³ vˀe¹nta³jin³-le⁴ cho⁴ta⁴, to⁴nca³ coi³ xa¹ tsa³cˀe¹jna³ya³-ni³ ntsja³ ˀnti¹-le⁴,
JOH 5:23 jme¹-ni³ nca³ cˀoa⁴sˀin² nca³tsˀi³ scoe⁴xcon¹-si¹ni³ ˀnti¹-le⁴ jo³sˀin² ve³xcon¹ Nˀai³-na¹. Je² xi³ tsi² ve³xcon¹ ˀnti¹-le⁴, cˀoa⁴-ti⁴ tsi² ve³xcon¹ Nˀai³-na¹ xi³ qui³si³ca³sen¹ ˀnti¹-le⁴.
JOH 5:24 Ña³qui³ cjoa⁴qui²xi⁴ ña³qui³ cjoa⁴qui²xi⁴ xi³ xin³-no³: Je² xi³ nčhˀoe¹ en¹-na⁴, cˀoa⁴ xi³ ma³cjain¹-le⁴ tˀa³tsˀe⁴ je² xi³ qui³si³ca³sen¹-na³, tjin¹-le⁴ cjoa⁴vi³jna³chon³ nca³ntsjai². Li²jme³ cjoa⁴ñˀain³ sˀe⁴-le⁴, to⁴nca³ je³ji³tjo³-ni³ cjoa⁴vi³ya³, je³tjin¹-le⁴ cjoa⁴vi³jna³chon³.
JOH 5:25 Ña³qui³ cjoa⁴qui²xi⁴ ña³qui³ cjoa⁴qui²xi⁴ xi³ xin³-no³: Cjoa⁴ˀai¹ hora, cˀoa⁴ je³ja³ˀai³, cˀia⁴ nca³ je² xi³ cˀen³ cjoi⁴nčhˀoe¹ jta⁴-le⁴ ˀnti¹-le⁴ Ni³na¹. Je² xi³ cjoi⁴nčhˀoe¹ coa⁴tio⁴con³-ni¹.
JOH 5:26 Jo³sˀin² nca³ Nˀai³-na¹ tjin¹-le⁴ cjoa⁴vi³jna³chon³ xi³ ti⁴tˀa³tsˀe⁴-ni³, cˀoa⁴-ti⁴sˀin²ni³ qui³tsjoa³-le⁴ ˀnti¹-le⁴ nca³ tjin¹-le⁴ cjoa⁴vi³jna³chon³ xi³ ti⁴tˀa³tsˀe⁴-ni³.
JOH 5:27 Cˀoa⁴-ti⁴ qui³tsjoa³-le⁴ cjoa⁴te¹xo³ma³ nca³ cˀoe⁴²nta³jin³, nca⁴ je² ni¹ xi³ ˀnti¹-le⁴ cho⁴ta⁴.
JOH 5:28 A³li² ma³xcon¹-jin²no³ je²-vi⁴. Cjoa⁴ˀai¹ hora cˀia⁴ nca³ je² nca³tsˀi³ xi³ tjio¹ ya⁴ nchˀoa¹cˀen³ cjoi⁴nčhˀoe¹-le⁴ jta⁴-le⁴.
JOH 5:29 Cˀoa⁴ coi⁴tjo³-ni³ nca³tsˀi³, je² xi³ cjoa⁴nta³ qui³sˀin³ cjoa⁴ˀa¹ya³-ni³le⁴, sˀe⁴-le⁴ cjoa⁴vi³jna³chon³, to⁴nca³ je² xi³ cjoa⁴tsˀen⁴ qui³sˀin³ cjoa⁴ˀa¹ya³-ni³le⁴, sˀe⁴-le⁴ cjoa⁴ñˀain³.
JOH 5:30 A³li²jme³ xi³ ma³ sˀian³ nca³ to⁴ˀan³. Jo³sˀin² nčhˀoe³-le⁴ Nˀai³-na¹, cˀoa⁴sˀin² vˀe³nta³jian³. Vˀe³nta³jian³ xi³ cjoa⁴qui²xi⁴, nca⁴ tsi² tsa² an³ va³sje²³ jo³sˀin² me³-na³, to⁴nca³ to⁴jo³-sˀin² me³-le⁴ je² xi³ qui³si³ca³sen¹-na³, je² Nˀai³-na¹.
JOH 5:31 Tsa² ti⁴ˀan³-nia³ tsjoa³ en¹ xi³ tˀa³tsˀan⁴, je² en¹-na⁴ li²coi³ cjoa⁴qui²xi⁴.
JOH 5:32 Cja⁴ˀai¹ xi³ tsjoa¹ en¹ xi³ tˀa³tsˀan⁴. ˀve³-nia¹³ nca³ je² xi³ cˀoa⁴tso² xi³ tˀa³tsˀan⁴, ña³qui³ cjoa⁴qui²xi⁴-ni¹ xi³ tso².
JOH 5:33 Jon² qui³ni²ca³sen¹chon³-lao⁴³ Juan. Je²-vi⁴ xi³ qui³tsjoa³ en¹-le⁴ xi³ tˀa³tsˀe⁴ xi³ cjoa⁴qui²xi⁴.
JOH 5:34 To⁴nca³ an³ li²coi³ va³sje³sian²³ en¹ xi³ tsjoa¹ cho⁴ta⁴. Coi³ cˀoa⁴xian³, jme¹-ni³ nca³ jon² coi²tjo⁴ntjai²-si¹nio³.
JOH 5:35 Juan xi³ jo³-ni³ tsa² lˀi¹ xi³ ti¹ti², cˀoa⁴ xi³ si¹ˀi³sen³. Cˀoa⁴ jon²-ˀni³ coan³me³-no³ nca³ qui³ni²tsjoa³ i⁴tse¹-lao⁴³ yao³-no³ jnco³ tjo² cao⁴ xi³ i³sen³-le⁴.
JOH 5:36 To⁴nca³ an³ tjin¹-na³ xi³ nqui²sa⁴ nta³ si¹qui²xi⁴ya³nta³ xi³ tˀa³tsˀan⁴ cao⁴-ni³ tsa² je² xi³ tsˀe⁴ Juan. Je² xa¹ xi³ qui³tsjoa³-na³ Nˀai³-na¹ nca³ si³jncoa²³, ti⁴je²-ni³ xa¹ xi³ cˀoa⁴sˀian³, cˀoa⁴sˀin² si¹qui²xi⁴ya³nta³ tˀa³tsˀan⁴ nca³ qui³si³ca³sen¹-na³ Nˀai³-na¹.
JOH 5:37 Je² xi³ qui³si³ca³sen¹-na³, je² Nˀai³-na¹, je² xi³ qui³tsjoa³ en¹ xi³ tˀa³tsˀan⁴. Ni⁴cˀia³-jin² qui³no²ˀyao²³ jta⁴-le⁴, ni⁴ tsa³ˀya³-jion²³ jo³ cji³ nca³ je².
JOH 5:38 Ni⁴ tjin¹jin³ntsjai²-jin²no³ en¹-le⁴, nca³ je² xi³ Ni³na¹ qui³si³ca³sen¹, li²coi³ ma³cjain¹-no³ xi³ tˀa³tsˀe⁴.
JOH 5:39 Jon² fa³sjai³jion³ xon⁴ Escrituras, nca⁴ jon² ni²cja³ˀai³tsjaon³ nca³ cˀoa⁴sˀin² sˀe⁴-no³ cjoa⁴vi³jna³chon³ nca³ntsjai². Je² xon⁴ Escrituras xi³ tsjoa¹ en¹ xi³ tˀa³tsˀan⁴.
JOH 5:40 Jon²-ˀni³ cai³-no³ nčhoa¹nčhˀoe²-nao¹³, jme¹-ni³ nca³ cˀoa⁴sˀin² sˀe⁴-si¹ni³no³ cjoa⁴vi³jna³chon³.
JOH 5:41 An³ li²coi³ cjoe¹ je² cjoa⁴je³ya³ xi³ tsjoa¹-le⁴ xi¹ncjin¹ cho⁴ta⁴.
JOH 5:42 To⁴nca³ an³ ˀve³xcon³-no³ nca³ tsi² tsa² tsjoa³chao³ Ni³na¹ nca³ jon².
JOH 5:43 Ja²ˀai⁴-nia¹³ cao⁴ jan³ˀain¹-le⁴ Nˀai³-na⁴, to⁴nca³ jon² li²coi³ chjoe¹-nao¹³. Tsa² cja⁴ˀai¹ xi³ cjoa⁴ˀai¹ cao⁴ ti⁴tsˀe⁴-ni³ jan³ˀain¹, cˀoa⁴ to⁴sa³ je² chjoao¹³-ˀni³.
JOH 5:44 Jo¹sˀin² coan⁴cjain¹-no³ nca³ jon² xi³ chjoao¹³ cjoa⁴je³ya³ xi³ cho⁴ta⁴ tsjoa¹-le⁴ xi¹ncjin¹, cˀoa⁴ li²coi³ fa³sjao³ je² cjoa⁴je³ya³ xi³ to⁴jnco³ je² Ni³na¹ tsjoa¹.
JOH 5:45 A³li² ni²cja³ˀai³tsjen³-jion²³ tsa² an³ xi³ coa³nqui³-no³ nqui³xcon⁴ Nˀai³-na¹. Tjin¹ xi³ cˀoa⁴sˀin² va¹nqui³-no³, je² Moisés, ti⁴je²-ni³ xi³ nˀion¹tˀa³ ta³con²³.
JOH 5:46 Cˀia⁴ tsa² jon² coan³cjain¹-no³ jo³ qui³tso² Moisés, coan⁴cjain¹-no³ xi³ tˀa³tsˀan⁴ tsa²cai³-ni³, nca⁴ je² xi³ qui³-squi³ xi³ tˀa³tsˀan⁴.
JOH 5:47 Tsa² tsi² tsa² ma³cjain¹-no³ jo³ tso² xon⁴-le⁴ Moisés, jo¹-sˀin²ni³ coan⁴cjain¹-no³ en¹-na⁴.
JOH 6:1 Xi³ coan³ je² cjoa⁴-vi⁴, Jesús qui³ xi³ncoa³nta¹-ni³ nta¹chi³con³ Galilea ya⁴ tsˀe⁴ Tiberias.
JOH 6:2 Jo³ nca³ ncjin² cho⁴ta⁴ qui³tjen⁴nqui³-le⁴, nca⁴ tsa³ve³ je² choa⁴ xi³ qui³tsjoa³ Jesús, nca³ cˀoa⁴-sˀin² qui³si³nta³ xi³ tjio¹mˀen³.
JOH 6:3 Jesús qui³mi³jon³ ni³nto³, ya⁴ tsa³cˀe²jna³ cao⁴ cho⁴ta⁴-le⁴.
JOH 6:4 Je³nčhoa¹čhian³-le⁴ sˀoi¹ pa²xco⁴ xi³ tsˀe⁴ cho⁴ta⁴ judíos.
JOH 6:5 Cˀia⁴ nca³ Jesús qui³sco²tsen³-le⁴, tsa³ve³ nca³ li² cˀoa⁴cji³ cho⁴ta⁴ xi³ ja³ˀai³con²-le⁴. Cˀoi⁴qui³tso²-le⁴ Felipe: Jña¹ coi⁴nta¹ nio⁴xti²la⁴ xi³ coa⁴cjen⁴ cho⁴ta⁴-vi⁴.
JOH 6:6 To⁴cˀoa⁴²qui³tso²-le⁴ nca³ qui³sco²tˀa³-ni³ Felipe, nca⁴ je³tjin¹jin³-le⁴ jo³ sˀin⁴².
JOH 6:7 Felipe qui³nchja⁴: Li²coi³ coan⁴-ni³le⁴ jao² ciento vi²xo⁴ nio⁴xti²la⁴, jme¹-ni³ nca³ i⁴tse¹ˀi⁴tse¹ squi⁴ne⁴-si¹ni³ nca³tsˀi³.
JOH 6:8 Cˀia⁴ jnco³ cho⁴ta⁴-le⁴, je² Andrés, ntsˀe⁴ Simón Pedro, cˀoi⁴qui³tso²-le⁴:
JOH 6:9 Jnco³ ti³ ti¹jna³ i⁴-vi⁴, aon² ma³-ni³ nio⁴xti²la⁴ cebada-le⁴ cˀoa⁴ jao² ma³-ni³ jti⁴ yˀa³. Jo¹ tjin¹ coan⁴-le⁴ xo⁴na⁴tjin¹-vi⁴, nca⁴ ncjin² ma³-ni³.
JOH 6:10 Cˀia⁴ cˀoi⁴qui³tso² Jesús: Ca²ta³va³tio²tsˀi³ cho⁴ta⁴-vi⁴. Cjai¹nca³ tjin¹ li⁴ji⁴ ya⁴ ˀnte³-ve⁴. Tsa³ca³tio² jo³-ni³ tsa² aon² jmi³ xi³ cho⁴ta⁴xˀin⁴.
JOH 6:11 Jesús qui³scoe¹ je² nio⁴xti²la⁴-ve⁴. Cˀia⁴ nca³ je³qui³tsjoa³-le⁴ cjoa⁴nta³ Ni³na¹, qui³si³cˀa³vi¹-le⁴ cho⁴ta⁴-le⁴. Cˀoa⁴ je² cho⁴ta⁴-le⁴ve⁴ qui³si³cˀa³vi¹-le⁴ je² cho⁴ta⁴ xi³cˀa³ xi³ ya⁴ tjio¹. Ti⁴cˀoa⁴-sˀin²ni³ qui³tsjoa³ jti⁴, jo³ tjin¹ coan³me³-le⁴.
JOH 6:12 Cˀia⁴ nca³ nta³ coan³squi³ cho⁴ta⁴-ve⁴, Jesús cˀoi⁴qui³tso²-le⁴ cho⁴ta⁴-le⁴: Tˀe²xco¹³ xcoa⁴-le⁴ xi³ ca²vˀa³nqui³, jme¹-ni³ nca³ tsi² cjoi⁴tson¹-si¹ni³.
JOH 6:13 Tsa³cˀe¹xco¹, te³jao²-la⁴ ni⁴sin⁴ya¹ coan³ je² xcoa⁴-le⁴ je² aon² nio⁴xti²la⁴ cebada xi³ tsˀa³nqui³ nca³ je³tsa³cjen² cho⁴ta⁴.
JOH 6:14 Cˀia⁴ nca³ tsa³ve³ je² choa⁴ xi³ qui³tsjoa³ Jesús, cˀoi⁴qui³tso² cho⁴ta⁴-ve⁴: Je²-vi⁴ xi³ ña³qui³ cjoa⁴qui²xi⁴ nchja⁴ya³ tˀa³tsˀe⁴ Ni³na¹, je² xi³ tjin¹-ni³ nca³ cjoa⁴ˀai¹ son³ˀnte³.
JOH 6:15 Tsen³ coan³-le⁴ Jesús nca³ me³-le⁴ nca³ cjoa⁴ˀai¹ tsoa⁴, nca³ cho⁴ta⁴ti¹tjon²-le⁴ sˀin⁴². Ti⁴qui³-nca¹ni³ ni³nto³ nca³ to⁴je².
JOH 6:16 Cˀia⁴ nca³ je³coan³xon², ji³tjo³jen³ cho⁴ta⁴-le⁴, ji³cho² ya⁴ ntai³ nta¹chi³con³.
JOH 6:17 Ja³ˀa³sˀen³ jnco³ chi³tso³, qui³ ya⁴ Capernaum, nčhoa¹-ni³ xi³ncoa³nta¹. Je³coan³njion², to⁴nca³ Jesús cje³ fa³ˀai³con²-jin²le⁴.
JOH 6:18 Jo³ qui³tsin³ncˀa³ na³nta¹ nca³ je² ntjao⁴ xi³ nˀion¹ ja³ˀa³.
JOH 6:19 Cˀia⁴ nca³ je³qui³ jo³-ni³ tsa² jnco³ hora, cho⁴ta⁴-le⁴ tsa³ve³ Jesús nca³ tso²ˀva³son² nta¹chi³con³, ti¹nčhoa¹čhian³-le⁴ ya⁴ chi³tso³. Jo³ nca³ qui³tsa³cjon¹-le⁴ cho⁴ta⁴-le⁴.
JOH 6:20 To⁴nca³ Jesús cˀoi⁴qui³tso²-le⁴: An³ nia¹³, a³li² jcon³-jion²³.
JOH 6:21 Cˀia⁴ cho⁴ta⁴-le⁴ coan³tsjoa³-le⁴ nca³ qui³scoe¹sˀen³ Jesús ya⁴ya³ chi³tso³. Nti⁴ton⁴ ji³cho² chi³tso³ ya⁴ ˀnte³ jña³ nca³ tjio¹fi².
JOH 6:22 Xi³ coan³ nchaon³ je² cho⁴ta⁴ xi³ tjio¹ xi³ncoa³nta¹ jan¹ tsa³ve³ nca³ tsin²-sa³ chi³tso³ ya⁴-ve⁴, to⁴jnco³ ma³-ni³ je² xi³ qui³ya³ cho⁴ta⁴-le⁴ Jesús. To⁴nca³ Jesús li²coi³ ja³ˀa³sˀen³, to⁴je² cho⁴ta⁴-le⁴ xi³ qui³.
JOH 6:23 Xi³ cja⁴ˀai¹ chi³tso³ ja³ˀai³-ni³ ya⁴ Tiberias, ya⁴ čhian³ jña³ nca³ tsa³cjen² nio⁴xti²la⁴ cˀia⁴ nca³ je² Nai³-na¹ je³qui³tsjoa³ cjoa⁴nta³.
JOH 6:24 Cˀia⁴ nca³ tsa³ve³ cho⁴ta⁴ nca³ Jesús li² ya⁴ ti¹jna³, ni⁴cho⁴ta⁴-le⁴jin², je² cho⁴ta⁴ xi³ tjio¹-sa³ve⁴ qui³sˀen³ ya⁴ chi³tso³-ve⁴, ja³ˀai³ ya⁴ Capernaum, tsa³ca¹sjai³ Jesús.
JOH 6:25 Cˀia⁴ nca³ qui³sa³te³jin³ xi³ncoa³nta¹ jan¹, cˀoi⁴qui³tso²-le⁴: Rabí, cˀia¹ ja²ˀai⁴ i⁴-vi⁴.
JOH 6:26 Jesús cˀoi⁴qui³tso²-le⁴: Ña³qui³ cjoa⁴qui²xi⁴ ña³qui³ cjoa⁴qui²xi⁴ xi³ xin³-no³, nca³ jon² ti³vi³jnchi³sjai³-nao¹³, a³li²coi³-jin² nca³ je² choa⁴ qui³ˀyao³, to⁴coi³ nca³ tsa³qui³cho³ nio⁴xti²la⁴, cˀoa⁴ coan³squio³.
JOH 6:27 Ti⁴xao¹³ a³li² to⁴tˀa³tsˀe⁴ je² xi³ vi³cha³² xi³ fi³tson³, to⁴nca³ tˀa³tsˀe⁴ je² xi³ vi³cha³² xi³ ti¹jna³ntsjai² xi³ tsjoa¹ cjoa⁴vi³jna³chon³ nca³ntsjai², xi³ je² ˀnti¹-le⁴ Ni³na¹ tsjoa¹-no³. Je² ˀnti¹-le⁴ xi³ Nˀai³-na¹ Ni³na¹ tsa³cˀe¹choa⁴.
JOH 6:28 Cho⁴ta⁴-ve⁴ cˀoi⁴qui³tso²-le⁴ Jesús: Jme¹ xi³ sˀiain⁴-jin⁴, jme¹-ni³ nca³ si⁴xa¹-si¹ni³lai⁴jin⁴ Ni³na¹ jo³-sˀin² me³-le⁴.
JOH 6:29 Jesús cˀoi⁴qui³tso²-le⁴: Je²-vi⁴ xa¹ xi³ me³-le⁴ Ni³na¹, nca³ cˀoa⁴-sˀin² coan⁴cjain¹-no³ xi³ tˀa³tsˀe⁴ je² Cristo xi³ Ni³na¹ qui³si³ca³sen¹.
JOH 6:30 Cˀia⁴ cho⁴ta⁴-ve⁴ cˀoi⁴qui³tso²-le⁴ˀni³: Jme¹-ni³ choa⁴ xi³ cˀoai⁴-na³jin⁴, jme¹-ni³ nca³ cˀoa⁴-sˀin² jcha⁴-si¹ni³jin⁴, cˀoa⁴ coan⁴cjain¹-na³jin⁴ xi³ tˀa³tsi⁴. Jme¹ xa¹ xi³ nˀiain²³ ji³.
JOH 6:31 Ne³ je² nˀai³jcha¹cjin³-na¹ tsa³cjen² je² nio⁴xti²la⁴ maná ya⁴ ˀnte³tˀa³xin²tˀa³, jo³-sˀin² tji¹tˀa³ xon⁴: Qui³si³cjen² je² nio⁴xti²la⁴ xi³ ja³ˀai³-ni³ ncˀa³jmi³.
JOH 6:32 Cˀia⁴ Jesús qui³tso²-le⁴: Ña³qui³ cjoa⁴qui²xi⁴ ña³qui³ cjoa⁴qui²xi⁴ xi³ xin³-no³: A³li²coi³ je² Moisés xi³ qui³tsjoa³-no³ je² nio⁴xti²la⁴ xi³ ncˀa³jmi³ ja³ˀai³-ni³, to⁴nca³ Nˀai³-na⁴ je²-vi⁴ xi³ tsjoa¹-no³ je² nio⁴xti²la⁴ xi³ ncˀa³jmi³ fa³ˀai³-ni³ xi³ ña³qui³ cjoa⁴qui²xi⁴.
JOH 6:33 Je² nio⁴xti²la⁴ xi³ tsˀe⁴ Ni³na¹, je² xi³ vi³tjo³jen³-ni³ ncˀa³jmi³, xi³ tsjoa¹-le⁴ cjoa⁴vi³jna³chon³ cho⁴ta⁴son³ˀnte³.
JOH 6:34 Cho⁴ta⁴-ve⁴ cˀoi⁴qui³tso²-le⁴: Señor, tˀai²ntsjai²-na³jin⁴ je² nio⁴xti²la⁴ je²-vi⁴.
JOH 6:35 Jesús qui³tso²-le⁴: An³ nia¹³ je² nio⁴xti²la⁴ xi³ tsjoa¹ cjoa⁴vi³jna³chon³. Je² xi³ fa³ˀai³con²-na³ nca³ an³, a³li² cˀia³ coan⁴vao³-le⁴. Je² xi³ ma³cjain¹-le⁴ xi³ tˀa³tsˀan⁴, a³li² cˀia³ coan⁴fa³ti²-le⁴.
JOH 6:36 To⁴nca³ cˀoa⁴qui³xin³-no³, nta³ tsa² an³ je³tsa³ˀya³-nao¹³, li²coi³ ma³cjain¹-no³.
JOH 6:37 Je² nca³tsˀi³ xi³ tsjoa¹-na³ Nˀai³-na¹ cjoa⁴ˀai¹con³-na³, cˀoa⁴ je² xi³ fa³ˀai³con²-na³, an³ li²coi³ mˀaon³sje³.
JOH 6:38 Li²coi³ ji²tjo⁴jen³-nia³ ncˀa³jmi³, jme¹-ni³ nca³ cˀoa⁴sˀin³-si¹nia³ jo³-sˀin² me³-na³ nca³ an³, to⁴nca³ jo³-sˀin² nca³ me³-le⁴ je² Nˀai³-na¹ xi³ qui³si³ca³sen¹-na³.
JOH 6:39 Coi³ xi³ me³-le⁴ je² Nˀai³-na¹ xi³ qui³si³ca³sen¹-na³, nca³ ni⁴jnco³-jin² cha⁴-na³ je² nca³tsˀi³ xi³ je² qui³tsjoa³-na³, to⁴nca³ an³ si³cja³ˀa¹ya³-ni³le⁴ nca³ coi⁴cho³cje³tˀa³ ni⁴čhjin³.
JOH 6:40 Cˀoa⁴ coi³ xi³ me³-le⁴ je² xi³ qui³si³ca³sen¹-na³, nca³ je² nca³tsˀi³ xi³ ve³ ˀnti¹-le⁴, cˀoa⁴ xi³ ma³cjain¹-le⁴ tˀa³tsˀe⁴, ca²ta³sˀe³-le⁴ cjoa⁴vi³jna³chon³ nca³ntsjai². Cˀoa⁴ an³ si³cja³ˀa¹ya³-ni³le⁴ nca³ coi⁴cho³cje³tˀa³ ni⁴čhjin³.
JOH 6:41 Cˀia⁴ cho⁴ta⁴ judíos tsa³cjao¹ya³-ni³ xi³ tˀa³tsˀe⁴ nca³ cˀoi⁴qui³tso²: An³ nia¹³ nio⁴xti²la⁴ xi³ ji²tjo⁴jen³-nia³ ncˀa³jmi³.
JOH 6:42 Cho⁴ta⁴ judíos cˀoi⁴qui³tso²: A³ tsi² tsa² je²-vi⁴ Jesús, ˀnti¹-le⁴ José. ˀya³xcon³-nia¹ nˀai³-le⁴ cao⁴ na⁴-le⁴. A¹-ni³ cˀoa⁴tso²-si¹ni³: Ji²tjo⁴jen³-nia³ ncˀa³jmi³.
JOH 6:43 Cˀia⁴ Jesús cˀoi⁴qui³tso²-le⁴: A³li² cˀoa⁴-jin²sˀin² cho⁴va²ya³-nio³ xi²nquio⁴³.
JOH 6:44 Ni⁴ˀya³-jin² xi³ coan⁴ nca³ cjoa⁴ˀai¹con³-na³, tsa² je² Nˀai³-na¹ xi³ qui³si³ca³sen¹-na³ li²coi³ cjoa⁴ˀai¹cao⁴. An³ si³cja³ˀa¹ya³-ni³le⁴ nca³ coi⁴cho³cje³tˀa³ ni⁴čhjin³.
JOH 6:45 Je² xi³ qui³nchja⁴ya³ tˀa³tsˀe⁴ Ni³na¹, cˀoa⁴-sˀin² qui³squi³: Ni³na¹ coa⁴co²ya³-le⁴ nca³tsˀi³. Cˀoa⁴-sˀin²ˀni³ je² nca³tsˀi³ xi³ qui³nčhˀoe¹-le⁴ Nˀai³-na¹, xi³ coan³cho⁴ya³-le⁴, an³ fa³ˀai³con²-na³.
JOH 6:46 Li²ˀya³ xi³ tsa³ve³ Nˀai³-na¹ to⁴je² xi³ ja³ˀai³ xi³ tsˀe⁴ Ni³na¹, je²-vi⁴ xi³ tsa³ve³ Nˀai³-na¹.
JOH 6:47 Ña³qui³ cjoa⁴qui²xi⁴ ña³qui³ cjoa⁴qui²xi⁴ xi³ xin³-no³: Je² xi³ ma³cjain¹-le⁴ xi³ tˀa³tsˀan⁴, tjin¹-le⁴ cjoa⁴vi³jna³chon³ nca³ntsjai².
JOH 6:48 An³ nia¹³ nio⁴xti²la⁴ xi³ tsjoa¹ cjoa⁴vi³jna³chon³.
JOH 6:49 Je² nˀai³jcha¹cjin³-no³ tsa³cjen² je² nio⁴xti²la⁴ maná ya⁴ ˀnte³tˀa³xin²tˀa³, cˀoa⁴ cˀen³-ni¹.
JOH 6:50 Je²-vi⁴ je² nio⁴xti²la⁴ xi³ vi³tjo³jen³-ni³ ncˀa³jmi³, jme¹-ni³ nca³ tsi² coi⁴ya²-si¹ni³ je² xi³ je² coa⁴cjen⁴.
JOH 6:51 An³ nia¹³ nio⁴xti²la⁴ xi³ ti¹jna³con³, xi³ ji²tjo⁴jen³-nia³ ncˀa³jmi³. Tsa² jnco³ xi³ je² nio⁴xti²la⁴ coa⁴cjen⁴, cˀoe¹jna³con³-ni¹ nca³ntsjai². Je² yao³-na⁴ je² nio⁴xti²la⁴ xi³ an³ tsjoa³. Coi³ xi³ an³ tsjoa³, jme¹-ni³ nca³ coa⁴tio⁴con³-si¹ni³ cho⁴ta⁴son³ˀnte³.
JOH 6:52 Cˀia⁴ cho⁴ta⁴ judíos qui³nchja⁴ i⁴ qui³nchja⁴ jan¹ qui³tso²: Jo¹-sˀin² coan⁴-ni³le⁴ je²-vi⁴ nca³ si⁴²cjen²-na¹ yao³-le⁴.
JOH 6:53 Jesús cˀoi⁴qui³tso²-le⁴ cho⁴ta⁴ judíos: Ña³qui³ cjoa⁴qui²xi⁴ ña³qui³ cjoa⁴qui²xi⁴ xi³ xin³-no³, tsa² tsi² tsa² chi⁴nao⁴³ yao³-le⁴ ˀnti¹-le⁴ cho⁴ta⁴, tsa² tsi² tsa² sˀio⁴³ njin¹-le⁴je⁴, tsin²-no³ cjoa⁴vi³jna³chon³-jin².
JOH 6:54 Je² xi³ squi⁴ne⁴ yao³-na⁴, cˀoa⁴ scˀoi¹ njin¹-na⁴, tjin¹-le⁴ cjoa⁴vi³jna³chon³ nca³ntsjai². An³ si³cja³ˀa¹ya³-ni³le⁴ nca³ coi⁴cho³cje³tˀa³ ni⁴čhjin³.
JOH 6:55 Je² yao³-na⁴ xi³ ña³qui³ ma³chi³ne³, cˀoa⁴ je² njin¹-na⁴ xi³ ña³qui³ ma³ˀyo².
JOH 6:56 Je² xi³ squi⁴ne⁴ yao³-na⁴, cˀoa⁴ xi³ scˀoi¹ njin¹-na⁴, an³ ti¹jna³cao⁴ntsjai²-na³, cˀoa⁴-ti⁴ an³ ti²jna⁴jin³ntsje²³ ni⁴ma⁴-le⁴.
JOH 6:57 Jo³-sˀin² qui³si³ca³sen¹-na³ Nˀai³-na¹ xi³ ti¹jna³con³, cˀoa⁴ an³ ti²jna⁴coan³ xi³ to⁴tˀa³tsˀe⁴ Nˀai³-na¹, cˀoa⁴-ti⁴sˀin² ˀya³ xi³ an³ squi⁴ne⁴-na³ cˀoe¹jna³con³ xi³ to⁴tˀa³tsˀan⁴.
JOH 6:58 Je²-vi⁴ nio⁴xti²la⁴ xi³ ji³tjo³jen³-ni³ ncˀa³jmi³. A³li² jo³-sˀin² nˀai³jcha¹cjin³-no³ tsa³cjen² je² nio⁴xti²la⁴ maná, cˀoa⁴ cˀen³-ni¹. Je² xi³ cjen² je² nio⁴xti²la⁴ cˀoe¹jna³con³ nca³ntsjai².
JOH 6:59 Je² cjoa⁴ je²-vi⁴ cˀoa⁴qui³tso² ya⁴³ ntˀia³ sinagoga cˀia⁴ nca³ tsa³ca³co¹ya³ ya⁴ Capernaum.
JOH 6:60 Ncjin² cho⁴ta⁴-le⁴ cˀoi⁴qui³tso² cˀia⁴ nca³ qui³nčhˀoe¹-le⁴: Cjai¹nca³ ñˀain³ tjin¹ en¹ je²-vi⁴. ˀya¹ xi³ coan⁴ cjoi⁴nčhˀoe¹-le⁴.
JOH 6:61 Cˀia⁴ nca³ tsa³ve³-le⁴con³ Jesús nca³ cho⁴ta⁴-le⁴ tjio¹fao¹ya³-ni³ xi³ tˀa³tsˀe⁴ en¹-vi⁴ cˀoi⁴qui³tso²-le⁴: A³ si¹jti³-no³ je² en¹-vi⁴.
JOH 6:62 Jo¹ coan⁴-no³ tsa² jchao⁴³ ˀnti¹-le⁴ cho⁴ta⁴ nca³ coai⁴mi³ jña³ nca³ ja³ˀai³-ni³.
JOH 6:63 Je² espíritu-na¹ xi³ tsjoa¹ cjoa⁴vi³jna³chon³. Je² yao³-na¹ li²jme³ xi³ chji¹-le⁴. Je² en¹ xi³ tsa³cja²cao⁴-no³ je² xi³ espíritu, cˀoa⁴ je² xi³ cjoa⁴vi³jna³chon³.
JOH 6:64 To⁴nca³ tjin¹ cˀao³ nca³ jon² xi³ tsi² ma³cjain¹-no³. Jesús tsa³ve³-le⁴con³ jo³ sa³ˀnta³ nca³ ti¹tjon² ˀya³-ni³ve⁴ xi³ tsi² tsa² coi³ ma³cjain¹-le⁴, cˀoa⁴ ˀya³-ni³ve⁴ xi³ cˀoe⁴²tˀain³ na⁴jmi¹ xi³ tˀa³tsˀe⁴.
JOH 6:65 Cˀoi⁴qui³tso² Jesús: Coi³ cˀoa⁴qui³xin³-no³, ni⁴ˀya³-jin² xi³ coan⁴ cjoa⁴ˀai¹con³-na³ tsa² tsi² je² Nˀai³-na¹ xi³ qui³si³ca³sen¹con³-na³.
JOH 6:66 Cˀia⁴ sa³ˀnta³ ncjin² cho⁴ta⁴-le⁴ Jesús qui³si³cˀo¹fa³ya³, li²coi³ ti⁴ya⁴ tsˀa³mjen³cao⁴-ni³.
JOH 6:67 Cˀia⁴ Jesús qui³tso²-le⁴ xi³ te³jao² pa²stro⁴-le⁴: A³ cˀoa⁴-ti⁴ me³-no³je⁴ nca³ jon² nca³ coa⁴nquion¹³.
JOH 6:68 Simón Pedro qui³tso²-le⁴: ˀya¹ xi³ coa⁴nquin¹chon³-lai⁴jin⁴. Ji³ xi³ tjin¹-li² en¹ xi³ tsjoa¹ cjoa⁴vi³jna³chon³ nca³ntsjai².
JOH 6:69 Jin⁴-jin⁴ ma³cjain¹-na³jin⁴, cˀoa⁴ ˀya³-ni¹⁴jin⁴ nca³ ji³ ni¹³ Cristo, xi³ ˀnti¹-le⁴ Ni³na¹ xi³ ti¹jna³con³.
JOH 6:70 Cˀia⁴ Jesús qui³tso²-le⁴: A³ tsi² tsa² an³ qui³scoe²jin³-no³ xi³ te³jao² mao³, to⁴nca³ jnco³ xi³ ti¹jna³jin³-no³ xi³ nai⁴² cjoan³.
JOH 6:71 Qui³nchja⁴ xi³ tˀa³tsˀe⁴ Judas Iscariote, ˀnti¹-le⁴ Simón, nca⁴ je²-vi⁴ xi³ cˀoe⁴²tˀain³ na⁴jmi¹ xi³ tˀa³tsˀe⁴ Jesús. Je² Judas jnco³ xi³ te³jao² ma³-ni¹ pa²stro⁴-ve⁴.
JOH 7:1 Xi³ coan³ je² cjoa⁴-vi⁴ tsˀa³mjen³ Jesús ya⁴ Galilea. Cai³-le⁴ vˀa³mjen³ ya⁴ Judea, nca⁴ je² cho⁴ta⁴ judíos to⁴cˀoa⁴-sˀin² me³-le⁴ nca³ si⁴²cˀen³.
JOH 7:2 Je³nčhoa¹čhian³-le⁴ sˀoi¹-le⁴ cho⁴ta⁴ judíos, je² sˀoi¹ tabernáculos.
JOH 7:3 Ntsˀe⁴ qui³tso²-le⁴ Jesús: Ti²tjo⁴-ni³ i⁴-vi⁴, tˀin³ ya⁴ Judea, jme¹-ni³ nca³ cho⁴ta⁴-li⁴ cˀoa⁴-ti⁴ scoe⁴-si¹ni³ jo³ nˀiain²³.
JOH 7:4 Ni⁴to⁴ˀya³-jin² xi³ me³-le⁴ va³co¹son²tsen³ yao³-le⁴ si¹xa¹-nqui³ˀma³. Tsa² cˀoa⁴nˀiain²³ je² cjoa⁴-vi⁴, ta³co²son²tsen³-lai⁴ yao³-li⁴ cho⁴ta⁴.
JOH 7:5 Sa³ˀnta³ je² ntsˀe⁴ li²coi³ coan³cjain¹-le⁴ xi³ tˀa³tsˀe⁴.
JOH 7:6 Cˀia⁴ Jesús cˀoi⁴qui³tso²-le⁴: Ni⁴čhjin³-na⁴ cje³ fa³ˀai³jin², to⁴nca³ ni⁴čhjin³-no³ ti¹jna³ntsjai²-ni¹.
JOH 7:7 Je² cho⁴ta⁴son³ˀnte³ li²coi³ ma³ nca³ jon² chˀao³ ve³-no³, to⁴nca³ an³ chˀao³ ve³-na³, nca⁴ an³ tsjoa³ en¹-na⁴ xi³ tˀa³tsˀe⁴ nca³ li²coi³ nta³ sˀin¹.
JOH 7:8 Jon² ta⁴nquin¹mio³ sˀoi¹-ve⁴. Cje³ fi³mi³-jian²³ je² sˀoi¹-vi⁴, nca³ ni⁴čhjin³-na⁴ cje³ fi³cho¹-jin².
JOH 7:9 Cˀia⁴ nca³ je³cˀoa⁴qui³tso²-le⁴, ya⁴ tsa³cˀe²jna³ ya⁴ Galilea.
JOH 7:10 Cˀia⁴ nca³ je³qui³mi³ ntsˀe⁴, cˀoa⁴-ti⁴ qui³mi³ Jesús ya⁴ sˀoi¹-ve⁴. Li²coi³ qui³tsen³, to⁴qui³ˀma³-ni¹.
JOH 7:11 Cho⁴ta⁴ judíos tsa³ca¹sjai³ Jesús ya⁴ sˀoi¹-ve⁴, cˀoi⁴qui³tso²: Jña¹ ti¹jna³ ntai⁴ nca³ je².
JOH 7:12 Jo³ nca³ tsa³cjao¹ya³-ni³ nca³tsˀi³ cho⁴ta⁴ xi³ tˀa³tsˀe⁴ Jesús. Tjin¹ cˀa³ xi³ qui³tso²: Cjai¹nca³ nta³ nca³ je². Xi³ cja⁴ˀai¹ qui³tso²: Ma³jain², to⁴vˀa³na⁴cha⁴-le⁴ cho⁴ta⁴.
JOH 7:13 Ni⁴ˀya³-jin² xi³ qui³nchja⁴tsen³ xi³ tˀa³tsˀe⁴, nca⁴ qui³tsa³cjon¹-le⁴ cho⁴ta⁴ judíos.
JOH 7:14 Cˀia⁴ jin³ sˀoi¹-ve⁴ qui³mi³ Jesús ya⁴ yo⁴nco⁴, cˀoa⁴ tsa³ca³co¹ya³.
JOH 7:15 Jo³ to⁴coan³xcon¹-le⁴ cho⁴ta⁴ judíos, cˀoi⁴qui³tso: Jo¹ ma³-ni³ nca³ cˀoa⁴-sˀin² to⁴chji⁴ne⁴-si¹ni³, nca³ tsi² tsa² coi³ qui³sco²tˀa³ya³.
JOH 7:16 Jesús qui³tso⁴-le⁴: Je² en¹ xi³ ti²va³co³ya²³ a³li² tsˀan⁴-jian²³ en¹, to⁴nca³ tsˀe⁴-ni³ je² xi³ qui³si³ca³sen¹-na³.
JOH 7:17 Je² xi³ me³-le⁴ nca³ sˀin¹ jo³-sˀin² me³-le⁴ Ni³na¹, cˀoa⁴-sˀin² scoe⁴ je² en¹ xi³ ti²va³co³ya²³, tsa² tsˀe⁴ Ni³na¹, cˀoa⁴ tsa² an³ nchja²³ xi³ to⁴tsˀan⁴.
JOH 7:18 Je² xi³ to⁴tsˀe⁴ nchja⁴-ni¹, va¹sjai³ cjoa⁴je³ya³ xi³ ti⁴tˀa³tsˀe⁴-ni³. Je² xi³ va¹sjai³ cjoa⁴je³ya³ xi³ tˀa³tsˀe⁴ je² xi³ qui³si³ca³sen¹ nca³ je², je²-vi⁴ xi³ cjoa⁴qui²xi⁴, cˀoa⁴ tsin²-le⁴ cjoa⁴chˀa²na⁴cha⁴-jin².
JOH 7:19 A³ tsi² tsa² qui³tsjoa³-no³ Moisés je² cjoa⁴te¹xo³ma³, cˀoa⁴ ni⁴ˀya³-jin² nca³ jon² xi³ coi³ ti¹si¹qui³tjo³son². A¹-ni³ nca³ cˀoa⁴-sˀin² me³-no³ nca³ si⁴cˀen³-nao¹³.
JOH 7:20 Cho⁴ta⁴-ve⁴ cˀoi⁴qui³tso²: Cho⁴ta⁴nai⁴²-lai⁴. ˀya¹ xi³ me³-le⁴ nca³ si⁴²cˀen³-li².
JOH 7:21 Cˀia⁴ Jesús cˀoi⁴qui³tso²-le⁴: Jnco³ xa¹ qui³sˀian³. Jo³ coan³xcon¹-no³ nca³tsˀio³.
JOH 7:22 Cjoa⁴qui²xi⁴-ni¹ Moisés qui³tsjoa³-no³ je² cjoa⁴circuncisión (a³li² tsa² je² Moisés xi³ tsˀe⁴, to⁴cˀoa⁴-sˀin² yˀa³-ni³ sa³ˀnta³ nˀai³jcha¹cjin³-na¹). Jon² nˀian²-lao⁴³ cjoa⁴circuncisión cho⁴ta⁴xˀin⁴ coi³ ni⁴čhjin³ ni²cja¹ya³.
JOH 7:23 Cˀia⁴ tsa² coi³ ni⁴čhjin³ ni²cja¹ya³ cjoe¹ cjoa⁴circuncisión cho⁴ta⁴xˀin⁴, jme¹-ni³ nca³ tsi² cjoi⁴tson¹ya³-si¹ni³ cjoa⁴te¹xo³ma³-le⁴ Moisés, a³ ma³jti³cha³-nao¹³ nca³ qui³si³nta³ nca³yi³je³ yao³-le⁴ jnco³ cho⁴ta⁴xˀin⁴ coi³ ni⁴čhjin³ ni²cja¹ya³.
JOH 7:24 A³li²coi³ cˀoa⁴-sˀin² cho¹son²-ni³lao⁴³ jña³-le⁴ve⁴ jo³-sˀin² nca³ ma³tsen³, to⁴nca³ cˀoa⁴-sˀin² cho¹son²-la²na¹nta³lao⁴³ jña³-le⁴ xi³ tjin¹-le⁴ cjoa⁴qui²xi⁴.
JOH 7:25 Cˀia⁴ qui³tso² cˀa³ cho⁴ta⁴ xi³ Jerusalén tsˀe⁴: A³ tsi² tsa² je²-vi⁴ xi³ tjio¹va¹sjai³ nca³ si⁴²cˀen³.
JOH 7:26 Coe⁴-si³ ti¹sˀin¹, ti¹nchja⁴jin³ va³sen³-le⁴ cho⁴ta⁴, cˀoa⁴ li²jo³ tso²-le⁴. Tsa² ña³qui³ je³coan³cho⁴ya³-le⁴ cho⁴ta⁴ti¹tjon² nca³ je² je²-vi⁴ Cristo.
JOH 7:27 To⁴nca³ je²-vi⁴ ˀya³-nia¹ jña³-ni³ve⁴ tsˀe⁴. Cˀia⁴ nca³ cjoa⁴ˀai¹ Cristo, li²ˀya³ xi³ scoe⁴ jña³-ni³ve⁴ tsˀe⁴.
JOH 7:28 Cˀia⁴ nˀion¹ qui³nchja⁴ Jesús ya⁴³ yo⁴nco⁴, tsa³ca³co¹ya³, cˀoi⁴qui³tso²: ˀya³xcon³-nao¹³ nca³ an³, ˀya³-nio¹³ jña³-ni³ve⁴ tsˀan⁴. Li²coi³ je²ˀe⁴ xi³ to⁴tˀa³tsˀan⁴, to⁴nca³ je² Nˀai³-na¹ xi³ qui³si³ca³sen¹-na³, je² xi³ cjoa⁴qui²xi⁴. A³li²coi³ ˀya³xcon³ nca³ je².
JOH 7:29 To⁴nca³ an³ ˀve³xcoan³ Nˀai³-na¹, nca⁴ an³ nia¹³ xi³ tsˀe⁴. Je² qui³si³ca³sen¹-na³.
JOH 7:30 Cˀia⁴ cho⁴ta⁴ me³-le⁴ nca³ tsoa⁴ Jesús, to⁴nca³ ni⁴ˀya³-jin² xi³ jo³ qui³si³cao⁴, nca⁴ cje³ fi³cho¹-jin² hora-le⁴.
JOH 7:31 Cjai¹nca³ ncjin² cho⁴ta⁴na⁴xi⁴na³nta¹-ve⁴ xi³ coan³cjain¹-le⁴ tˀa³tsˀe⁴ Jesús. Cˀoi⁴qui³tso² cho⁴ta⁴-ve⁴: Cˀia⁴ nca³ cjoa⁴ˀai¹ je² Cristo, a³ nqui²sa⁴ cja⁴ˀai¹-sˀin² tsjoa¹ choa⁴ jo³-sˀin² tsjoa¹ je²-vi⁴.
JOH 7:32 Cho⁴ta⁴ fariseos qui³nčhˀoe¹-le⁴ cho⁴ta⁴-vi⁴ nca³ cˀoa⁴tjio¹tso² je² cjoa⁴-vi⁴ xi³ tˀa³tsˀe⁴. Je² cho⁴ta⁴ti¹tjon²-le⁴ na⁴ˀmi³ cao⁴ cho⁴ta⁴ fariseos qui³si³ca³sen¹ ma³yo² nca³ ca²ta³tsoa³ Jesús.
JOH 7:33 Cˀia⁴ cˀoi⁴qui³tso² Jesús: To⁴jo³ coa²te⁴jna³cao⁴-sa³no³ to⁴choa³ ni⁴čhjin³. Cjoi¹con³-le⁴ xi³ qui³si³ca³sen¹-na³.
JOH 7:34 Coi⁴jnchi¹sjai³-nao¹³, li²coi³ coan⁴sjai³-nao¹³. Ya⁴ jña³ nca³ ti²jna⁴ li²coi³ coan⁴ cjoi⁴nčhoao²³ nca³ jon².
JOH 7:35 Cˀia⁴ cho⁴ta⁴ judíos qui³tso²-le⁴ xi¹ncjin¹: Jña¹-la⁴ coai⁴ xo⁴cji³-vi⁴, nca³ tsi² tsa² coan⁴sjai³-na¹. A³ ya⁴ coai⁴con³-le⁴ je² xi³ qui³jin³-le⁴ cho⁴ta⁴ griegos. A³ coai⁴ ca³co¹ya³-le⁴ cho⁴ta⁴ griegos.
JOH 7:36 Jo¹ tso²-ni³le⁴ nca³ cˀoi⁴ca²tso²: Coi⁴jnchi¹sjai³-nao¹³, li²coi³ coan⁴sjai³-nao¹³. Ya⁴ jña³ nca³ ti²jna⁴ li²coi³ coan⁴ cjoi⁴nčhoao²³ nca³ jon².
JOH 7:37 Je² ni⁴čhjin³ xi³ je³tˀa³-ni³ nca³ sˀoi¹je³, Jesús tsa³ca³sen¹nto³, nˀion¹ qui³nchja⁴: Tsa² jnco³ xi³ fa³ti²-le⁴, ca²tji³nčhoa¹con³-na³ ca²ta³ˀvi³.
JOH 7:38 Je² xi³ ma³cjain¹-le⁴ xi³ tˀa³tsˀan⁴, jo³-ni³ xo³nca¹na³nta¹ xi³ ti¹jna³con³ coi⁴tjo³jin³-ni³le⁴ ni⁴ma⁴-le⁴, jo³ tso² xon⁴ Escritura.
JOH 7:39 Coi³ xi³ qui³tso² xi³ tˀa³tsˀe⁴ je² Espíritu Santo xi³ je² xi³ ma³cjain¹-le⁴ tˀa³tsˀe⁴ Jesús sˀa⁴ scoe¹. Cje³-sa³ fa³ˀai³-jin² je² Espíritu Santo, nca⁴ cje³ sˀe³-jin²le⁴ cjoa⁴je³ya³ Jesús.
JOH 7:40 Cˀa³ cho⁴ta⁴ xi³ ya⁴ tjio¹jin³ cˀoi⁴qui³tso² cˀia⁴ nca³ qui³nčhˀoe¹ je² en¹-vi⁴: Je²-vi⁴ ntai⁴ xi³ ña³qui³ nchja⁴ya³ tˀa³tsˀe⁴ Ni³na¹.
JOH 7:41 Cja⁴ˀai¹-sa³ xi³ cˀoi⁴qui³tso²: Je²-vi⁴ Cristo. To⁴nca³ tjin¹ cˀa³ xi³ qui³tso²: A³ ya⁴ Galilea cjoa⁴ˀai¹-ni³ Cristo.
JOH 7:42 A³ tsi² tsa² cˀoa⁴tso² xon⁴ Escritura nca³ Cristo cjoa⁴ˀai¹-ni³ ntje⁴-le⁴ David ya⁴ na⁴xi⁴na³nta¹ Belén, jña³ nca³ tsˀe⁴ David.
JOH 7:43 Cˀoa⁴-sˀin² coan³jao²ya³ cho⁴ta⁴ xi³ tˀa³tsˀe⁴ je² Cristo.
JOH 7:44 Tjin¹ cˀa³ cho⁴ta⁴ xi³ me³-le⁴ nca³ tsoa⁴, to⁴nca³ li²ˀya³ xi³ je² qui³si³cao⁴.
JOH 7:45 Je² ma³yo² ja³ˀai³con²-le⁴ cho⁴ta⁴ti¹tjon²-le⁴ na⁴ˀmi³ cao⁴ cho⁴ta⁴ fariseos xi³ qui³sco²na³nqui³-le⁴: A¹-ni³ nca³ tsi² ji³nčhoa³cao⁴-si¹nio³.
JOH 7:46 Je² ma³yo² qui³nchja⁴: Ni⁴to⁴cˀia³-jin² qui³nchja⁴ cho⁴ta⁴ jo³-sˀin² ti¹nchja⁴ je² cho⁴ta⁴xˀin⁴-vi⁴.
JOH 7:47 Cˀia⁴ je² cho⁴ta⁴ fariseos cˀoi⁴qui³tso²-le⁴: A³ cˀoa⁴²-ti⁴ qui³chˀa²na⁴cha⁴-no³ nta³ tsa² jon².
JOH 7:48 A³ cˀoa⁴-ti⁴ cji³ma³cjain¹cˀa³-le⁴ cho⁴ta⁴ti¹tjon² a³xo⁴ cho⁴ta⁴ fariseos.
JOH 7:49 To⁴nca³ je² cho⁴ta⁴yo⁴ma⁴ xi³ tsi² tsa² ve³ cjoa⁴te¹xo³ma³, nai⁴² ca²ta³fi²cao⁴.
JOH 7:50 Nicodemo cˀoi⁴qui³tso²-le⁴ (je² ni¹ xi³ ja³ˀai³con²-le⁴ Jesús nca³ njion², je² xi³ jnco³ xi³ ti⁴je²-ni³ cho⁴ta⁴):
JOH 7:51 Je² cjoa⁴te¹xo³ma³-na¹ a³ tsjoa¹-le⁴ cjoa⁴ñˀain³ jnco³ cho⁴ta⁴, tsa² tsi² tsa² ti¹tjon²-cjoa²la² coi⁴no¹ˀya²-le⁴², cˀoa⁴ coan⁴cho⁴ya³-na¹ jme³ xi³ qui³sˀin³.
JOH 7:52 Cho⁴ta⁴ fariseos qui³tso²-le⁴ Nicodemo: A³ cˀoa⁴-ti⁴ ya⁴² tsi⁴ ya⁴ Galilea. Tja³sjai³jin³, cˀoa⁴ cho¹tsian³ nca³ ni⁴cˀia³-jin² ja³ˀai³-ni³ ya⁴ Galilea jnco³ xi³ nchja⁴ya³ tˀa³tsˀe⁴ Ni³na¹.
JOH 7:53 To⁴cˀoa⁴-sˀin² qui³tsao³ya³ cho⁴ta⁴. Nca³ˀi⁴ nca³jan¹ qui³ ni³ˀya³-le⁴.
JOH 8:1 Cˀia⁴ qui³ Jesús ya⁴ ni³nto³ Olivos.
JOH 8:2 Xi³ qui³sˀe³sen¹ ja³ˀai³-nca¹ni³ yo⁴nco⁴. Nca³tsˀi³ cho⁴ta⁴ ja³ˀai³con²-le⁴. Jesús tsa³cˀe²jna³ tsa³ca³co¹ya³-le⁴.
JOH 8:3 Cˀia⁴ je² cho⁴ta⁴ scribano cao⁴ cho⁴ta⁴ fariseos ja³ˀai³cao⁴-le⁴ jnco³ chjon⁴² xi³ qui³si³cha³jnqui³. Cho⁴ta⁴ qui³si³cˀe¹jna³va³sen³ chjon⁴²-ve⁴.
JOH 8:4 Cˀoi⁴qui³tso²-le⁴ Jesús: Maestro, je² chjon⁴²-vi⁴ tsa³ˀya³tˀain³-ni¹ nca³ qui³si³cha³jnqui³.
JOH 8:5 Tji¹tˀa³ cjoa⁴te¹xo³ma³-le⁴ Moisés nca³ coa⁴sen²-le⁴² la⁴jao⁴ cho⁴ta⁴ xi³ cˀoa⁴sˀin¹. Jo¹ si³ nca³ ji³.
JOH 8:6 To⁴cˀoa⁴qui³tso² nca³ qui³sco²tˀa³ Jesús, jme¹-ni³ nca³ coan⁴-ni³le⁴ nca³ coa⁴²nqui³. To⁴nca³ Jesús tsa³ca³sen²nia³, qui³squi³-ni³ na⁴jma¹ntsja³ ja⁴tˀa³na³nqui³.
JOH 8:7 Cˀia⁴ nca³ to⁴jo³ qui³tsin²na³nqui³-sa³le⁴ Jesús qui³sa³sen³qui²xi⁴-ni³ qui³tso²-le⁴: Je² nca³ jon² xi³ tsin²-le⁴ je¹-jin², je²-vi⁴ xi³ ti¹tjon² ca²ta³sen¹-le⁴ la⁴jao⁴ chjon⁴²-ve⁴.
JOH 8:8 Nqui²ntia³ tsa³ca³sen²nia³-nca¹ni³, qui³squi³ ja⁴tˀa³na³nqui³.
JOH 8:9 Cho⁴ta⁴ qui³nčhˀoe¹-le⁴, cˀoa⁴ coan³soa³-le⁴. Jnco¹jnco¹ ji³tjo³, va³se²tsˀia⁴cjoan²-ni³ xi³ jchi¹nca³ sa³ˀnta³ xi³ ma³ˀnti¹. Tsa³cˀe²jna³ to⁴je² Jesús cao⁴ chjon⁴²-ve⁴ xi³ ti¹jna³jin³va³sen³.
JOH 8:10 Qui³sa³sen³qui²xi⁴-ni³ Jesús, tsa³ve³ nca³ li²ˀya³ xi³ ti⁴ya⁴ tjio¹-ni³ to⁴je²-sa³ chjon⁴²-ve⁴, qui³tso²-le⁴: Chjon⁴², jña¹ tjio¹ xi³ tsa³ca¹nqui³-li². A³ tsi² ˀya³ xi³ tsa³cˀaon³ne²-li² cjoa⁴ñˀain³.
JOH 8:11 Chjon⁴²-ve⁴ qui³tso²: Señor, ni⁴ˀya³-jin². Cˀia⁴ Jesús qui³tso²-le⁴: Cˀoa⁴-ti⁴ an³ li²coi³ cˀaon³ne²-le²³ cjoa⁴ñˀain³. Tˀin³, a³li² ti⁴je¹-jin² vi³jnchi³-ni³.
JOH 8:12 Jesús cˀoi⁴qui³tso²-nca¹ni³le⁴ cho⁴ta⁴ fariseos: An³ nia¹³ lˀi¹ xi³ si¹ˀi³sen³ son³ˀnte³. Je² xi³ fi²tˀa³-na³ li²coi³ cˀoa¹mjen³ jña³ nca³ njion², to⁴nca³ sˀe⁴-le⁴ je² lˀi¹ xi³ tsjoa¹ cjoa⁴vi³-jna³chon³.
JOH 8:13 Cˀia⁴ cho⁴ta⁴ fariseos cˀoi⁴qui³tso²-le⁴: Ji³ vˀai²³ en¹-li⁴ xi³ to⁴tˀa³tsi⁴-ni¹, to⁴nca³ li²coi³ cjoa⁴qui²xi⁴ en¹-li⁴.
JOH 8:14 Qui³nchja⁴ Jesús cˀoi⁴qui³tso²-le⁴: Nta³ tsa² an³ tsjoa³ en¹-na⁴ xi³ to⁴tˀa³tsˀan⁴, je² en¹-na⁴ cjoa⁴qui²xi⁴-ni¹, nca³ ˀve³ jña³ nca³ ja²ˀai⁴-nia³, cˀoa⁴ jña³ nca³ cjoia¹³, to⁴nca³ jon² li²coi³ ˀyao³ jña³ nca³ ja²ˀai⁴-nia³, cˀoa⁴ jña³ cjoia¹³.
JOH 8:15 Jon² cˀoa⁴-sˀin² cho¹son²-ni³lao⁴³ jo³ cjoan³ cho⁴ta⁴ jo³-sˀin² cho²tsen³-lao⁴³, to⁴nca³ li²ˀya³ xi³ an³ cˀoa⁴-sˀin² co³son²-ni³le⁴.
JOH 8:16 Tsa² an³ co³son²-ni³le⁴, ña³qui³ cˀoa⁴tjin¹ xi³ an³ co³son²-ni³le⁴, nca³ tsi² tsa² to⁴ˀan³-jian²³, to⁴nca³ an³ cao⁴ je² xi³ qui³si³ca³sen¹-na³, je² Nˀai³-na¹.
JOH 8:17 Ya⁴ xon⁴ cjoa⁴te¹xo³ma³-no³ tji¹tˀa³, cˀia⁴ nca³ jao² ma³-ni³ testigo, je² en¹-le⁴ cjoa⁴qui²xi⁴-ni¹.
JOH 8:18 An³ nia¹³ xi³ tsjoa³ en¹-na⁴ xi³ to⁴tˀa³tsˀan⁴, cˀoa⁴-ti⁴ tsjoa¹ en¹-le⁴ xi³ tˀa³tsˀan⁴ je² xi³ qui³si³ca³sen¹-na³, je² Nˀai³-na¹.
JOH 8:19 Cho⁴ta⁴ fariseos cˀoi⁴qui³tso²-le⁴ Jesús: Jña¹ ti¹jna³ Nˀai³-li⁴. Jesús qui³nchja⁴: Sa³ˀnta³ an³ li²coi³ ˀya³xcon³-nao¹³, cˀoa⁴ ni⁴ˀya³xcon³-jion²³ Nˀai³-na⁴. Tsa² ˀya³xcon³-la²ni³nao¹³, cˀoa⁴-ti⁴ ˀya³xcon³ Nˀai³-na⁴.
JOH 8:20 Je² en¹-vi⁴ ya⁴ qui³nchja⁴ Jesús ya⁴ ˀnte³ jña³ nca³ sˀe³xco¹ taon⁴, nca³ ti¹va³co¹ya³ ya⁴³ yo⁴nco⁴. Ni⁴ˀya³-jin² xi³ qui³tsoa³ Jesús, nca⁴ cje³ fi³cho¹-jin² hora-le⁴.
JOH 8:21 Jesús cˀoi⁴qui³tso²-nca¹ni³le⁴: Cjoi¹-nia³ an³, cˀoa⁴ coi⁴jnchi¹sjai³-nao¹³, to⁴nca³ je¹-no³ coi⁴ya¹jion³. Jña³ nca³ cjoia¹³ nca³ an³, jon² li²coi³ coan⁴ coa⁴nquion¹³.
JOH 8:22 Cˀia⁴ cˀoi⁴qui³tso² cho⁴ta⁴ judíos: A³ ti⁴je² si⁴²cˀen³-ni³ yao³-le⁴ nca³ cˀoa⁴ tso²: Jña³ nca³ cjoia¹³ nca³ an³, jon² li²coi³ coan⁴ coa⁴nquion¹³.
JOH 8:23 Jesús cˀoi⁴qui³tso²-le⁴: Jon² nio¹³ xi³ i⁴ tsaon⁴³ na³nqui³-vi⁴, an³ ja⁴ncˀa¹ tsˀan⁴. Jon² i⁴ son³ˀnte³-vi⁴ tsaon⁴³, to⁴nca³ an³-vi⁴ a³li² i⁴ son³ˀnte³-vi⁴ tsˀan⁴.
JOH 8:24 Coi³ cˀoa⁴qui³xin³-ni³no³ nca³ je¹-no³ coi⁴ya¹jion³. Tsa² tsi² tsa² coan⁴cjain¹-no³ ˀya³-ni³ nca³ an³, to⁴ya⁴ je² je¹-no³ coi⁴ya¹jion³.
JOH 8:25 Cho⁴ta⁴ judíos cˀoi⁴qui³tso²-le⁴: ˀya¹-ni³ ji³. Cˀia⁴ Jesús qui³tso²-le⁴: Je² xi³ je³cˀoa⁴qui³xin³-no³ nca³ ti¹tjon².
JOH 8:26 Cjai¹nca³ ncjin² cjoa⁴ xi³ coi³nchja²³, xi³ sco³son²-ni³le⁴ xi³ tˀa³tsaon⁴³. Je² xi³ qui³si³ca³sen¹-na³, je² xi³ cjoa⁴qui²xi⁴. Je² en¹ xi³ qui³nčhˀoe³-le⁴ nca³ je², ña³qui³ coi³ xi³ nchja²³ i⁴ son³ˀnte³-vi⁴.
JOH 8:27 To⁴nca³ li²coi³ coan³cho⁴ya³-le⁴ cho⁴ta⁴ judíos nca³ cˀoa⁴qui³tso²-le⁴ xi³ tˀa³tsˀe⁴ Nˀai³-na¹.
JOH 8:28 Cˀia⁴ Jesús cˀoi⁴qui³tso²-le⁴: Cˀia⁴ nca³ cho¹mi³tjaon⁴³ ˀnti¹-le⁴ cho⁴ta⁴, cˀia⁴² coan⁴cho⁴ya³-no³ nca³ an³ nia¹³ ˀnti¹-le⁴ cho⁴ta⁴. Ni⁴jme³-jin² xi³ sˀian³ nca³ to⁴ˀan³-nia¹³. Jo³-sˀin² qui³tso²ya³-na³ Nˀai³-na¹, cˀoa⁴-sˀin² nchja²³.
JOH 8:29 Je² xi³ qui³si³ca³sen¹-na³ i⁴ ti¹jna³cao⁴-na³. Je² Nˀai³-na¹ li²coi³ qui³si³cˀe¹jna³-na³ nca³ to⁴ˀan³, nca⁴ cˀoa⁴sˀian³ nca³ntsjai² je² xi³ sa³sen¹-le⁴ nca³ je².
JOH 8:30 Cˀia⁴ nca³ Jesús qui³nchja⁴ je² cjoa⁴-vi⁴, cjai¹nca³ ncjin² xi³ coan³cjain¹-le⁴ xi³ tˀa³tsˀe⁴.
JOH 8:31 Jesús cˀoi⁴qui³tso²-le⁴ cho⁴ta⁴ judíos xi³ coan³cjain¹-le⁴: Tsa² en¹-na⁴ si⁴qui³tjo³son²ntsjao²³, jon² nio¹³ xi³ ña³qui³ cho⁴ta⁴-na⁴.
JOH 8:32 Jcha⁴-nio¹³ xi³ cjoa⁴qui²xi⁴, cˀoa⁴ je² xi³ cjoa⁴qui²xi⁴ si⁴²ca³tio²ntai¹-no³.
JOH 8:33 Cho⁴ta⁴ judíos qui³nchja⁴: Jin⁴ ni¹⁴-jin⁴ ntje⁴-le⁴ Abraham, ni⁴to⁴cˀia³-jin² ni⁴ˀya³-jin² xi³ qui³ni²xa¹nqui³-lai⁴jin⁴. Jo¹ si³ nca³ ji³: Coi⁴yo³ntai¹-nio¹³.
JOH 8:34 Jesús qui³tso²-le⁴: Ña³qui³ cjoa⁴qui²xi⁴ ña³qui³ cjoa⁴qui²xi⁴ xi³ xin³-no³: Nca³tsˀi³ xi³ va³jnqui³ je¹, si¹xa¹nqui³-le⁴ je¹.
JOH 8:35 Je² xi³ si¹xa¹nqui³-le⁴ cho⁴ta⁴ li²coi³ vˀe²jna³ntsjai² ni³ˀya³. Je² xi³ ˀnti¹ ma³ vˀe²jna³ntsjai².
JOH 8:36 Cˀia⁴ tsa² cˀoa⁴-sˀin² je² ˀnti¹-le⁴ Ni³na¹ si⁴²ca³tio²ntai¹-no³, ña³qui³ cjoa⁴qui²xi⁴ nca³ coi⁴yo³ntao¹³.
JOH 8:37 ˀve³-nia¹³ nca³ jon² ntje⁴-le⁴ Abraham, to⁴nca³ me³-no³ nca³ si⁴cˀen³-nao¹³, nca⁴ je² en¹-na⁴ tsin²-le⁴ ntia⁴²-jin² xi³ tˀa³tsaon⁴³.
JOH 8:38 An³ nchja²³ je² xi³ tsa³ˀve³ cˀia⁴ nca³ ti²jna⁴coa⁴ Nˀai³-na¹. Jon² cˀoa⁴-ti⁴sˀin² cˀoa⁴nˀiaon²³ je² xi³ qui³no²ˀya²-lao⁴³ nˀai³-no³.
JOH 8:39 Cˀia⁴ cho⁴ta⁴ judíos cˀoi⁴qui³tso²-le⁴: Je² nˀai³-na⁴jin⁴ Abraham. Jesús qui³tso²-le⁴: Tsa² jon² ˀnti¹-le⁴ Abraham, cˀoa⁴tˀiaon⁴³ jo³ qui³sˀin³ Abraham.
JOH 8:40 To⁴nca³ ntˀai⁴-vi⁴ cˀoa⁴-sˀin² me³-no³ nca³ si⁴cˀen³-nao¹³. An³ nia¹³ cho⁴ta⁴xˀin⁴ xi³ cˀoa⁴qui³xin³-no³ xi³ cjoa⁴qui²xi⁴, xi³ an³ qui³nčhˀoe³-le⁴ Ni³na¹. Li²coi³ cˀoa⁴qui³sˀin³ Abraham.
JOH 8:41 Jon² cˀoa⁴nˀiaon²³ jo³ qui³sˀin³ nˀai³-no³. Cˀia⁴ cho⁴ta⁴ qui³tso²-le⁴: Jin⁴-jin⁴ a³li² cjoa⁴cha³jnqui³-jin² qui³tsin³jin³-jin⁴. To⁴jnco³ ma³-ni³ nˀai³-na⁴jin⁴, je² xi³ Ni³na¹.
JOH 8:42 Cˀia⁴ Jesús cˀoa⁴qui³tso²-le⁴: Tsa² Ni³na¹ je² nˀai³-no³, ña³qui³ cjoa⁴qui²xi⁴ nca³ coan⁴tsjoa³cha³-nao¹³. An³ ji²tjo⁴-nia³ Ni³na¹, coi³ ja²ˀai⁴-nia³. Li²coi³ je²ˀe⁴ xi³ ti⁴tˀa³tsˀan⁴-nia³, to⁴nca³ je² qui³si³ca³sen¹-na³.
JOH 8:43 A¹-ni³ nca³ tsi² tsa² ma³cho⁴ya³-si¹ni³no³ en¹-na⁴. Coi³ nca³ li²coi³ ma³-no³ no²ˀyao²³ en¹-na⁴.
JOH 8:44 Jon² nio¹³ xi³ nˀai³-no³ je² nai⁴², cˀoa⁴ tsjoa³-no³ nca³ cˀoa⁴sˀiaon⁴³ jo³-sˀin² me³-le⁴ nˀai³-no³. Je² nˀai³-no³ si¹cˀen³ cˀen³ sa³ˀnta³ ti¹tjon², cˀoa⁴ li²coi³ tsa³cˀe²jna³jin³-le⁴ xi³ cjoa⁴qui²xi⁴, nca⁴ tsin²-le⁴ cjoa⁴qui²xi⁴-jin². Cˀia⁴ nca³ nchja⁴ en¹nti³so³, nchja⁴ jo³ cjoan³ nca³ je². Nti³so³ nca³ je², cˀoa⁴ nˀai³-le⁴ cjoa⁴nti³so³.
JOH 8:45 Coi³ nca³ an³ cˀoa⁴xian³ xi³ cjoa⁴qui²xi⁴ li²coi³ ma³cjain¹-no³.
JOH 8:46 ˀya¹-ni³ xi³ jon² xi³ si⁴²qui²xi⁴ya³ nca³ an³ tjin¹-na³ je¹. Tsa² cjoa⁴qui²xi⁴ xi³ xian³, a¹-ni³ nca³ tsi² tsa² ma³cjain¹-si¹ni³no³.
JOH 8:47 Je² xi³ tsˀe⁴ Ni³na¹, nčhˀoe¹ je² en¹-le⁴ Ni³na¹. Coi³ nca³ tsi² tsa² no²ˀya²-lao⁴³ nca³ jon², nca⁴ tsi² tsa² tsˀe⁴ Ni³na¹-jion²³.
JOH 8:48 Cˀia⁴ cho⁴ta⁴ judíos cˀoi⁴qui³tso²-le⁴ Jesús: A³ tsi² tsa² nta³ vi³xoin¹⁴-jin⁴ nca³ ji³ cho⁴ta⁴ samaritano, nca³ cho⁴ta⁴nai⁴²-lai⁴.
JOH 8:49 Jesús qui³nchja⁴: A³li² cho⁴ta⁴nai⁴²-jian²³, to⁴nca³ ˀve³xcoan¹³ Nˀai³-na⁴. Jon² tsa³ˀya³taon³-nao¹³.
JOH 8:50 A³li²coi³ an³ xi³ vˀa³sje³je³ya³ yao³-na⁴. Tjin¹ jnco³ xi³ ti¹vˀa³sje³je³ya³-na³, xi³ ti¹co³son²-ni³le⁴ nca³yi³je³.
JOH 8:51 Ña³qui³ cjoa⁴qui²xi⁴ ña³qui³ cjoa⁴qui²xi⁴ xi³ xin³-no³: Je² xi³ si¹qui³tjo³son² en¹-na⁴, ni⁴cˀia³-jin² scoe⁴ cjoa⁴vi³ya³.
JOH 8:52 Cˀia⁴ cho⁴ta⁴ judíos qui³tso²-le⁴: ˀya³-ni¹⁴jin⁴ ntai⁴ nca³ ji³ cho⁴ta⁴nai⁴². Ne³ Abraham cˀen³-ni¹ cao⁴ je² xi³ qui³nchja⁴ya³ tˀa³tsˀe⁴ Ni³na¹, to⁴nca³ ji³ si³-ni¹³: Je² xi³ si¹qui³tjo³son² en¹-na⁴, ni⁴to⁴cˀia³-jin² nca³ coi⁴cho³-le⁴ cjoa⁴vi³ya³.
JOH 8:53 A³ ji³ nqui²sa⁴ ti¹tjon² cao⁴-ni³ nˀai³-na⁴jin⁴ Abraham, je² xi³ cˀen³. Cˀoa⁴-ti⁴ je² cho⁴ta⁴ xi³ qui³nchja⁴ya³ tˀa³tsˀe⁴ Ni³na¹ cˀen³-ni¹. ˀya¹ xi³ ti⁴ji³-ni³ chˀa²sje³je³ya³-ni³ yao³-li⁴.
JOH 8:54 Qui³nchja⁴ Jesús: Tsa² an³ vˀa³sje³je³ya³ yao³-na⁴, je²-vi⁴ ni⁴to⁴jme³-jin² chji¹-le⁴. Je² Nˀai³-na⁴ je² xi³ ti¹vˀa³sje³je³ya³-na³, ti⁴je²-ni³ xi³ Ni³na¹-na⁴jin⁴ ˀmi²-lao⁴³.
JOH 8:55 Jon² li²coi³ ˀya³xcon³ nca³ je², to⁴nca³ an³ ˀve³xcoan³. Tsa² cˀoi⁴xian¹³ a³li²coi³ ˀve³xcoan³, to⁴ya⁴² coan⁴nco¹son²-nia³ˀni³ cao⁴ jon² xi³ nti³so³. To⁴nca³ an³ ˀve³xcon³-nia¹³, cˀoa⁴-sˀin² si³qui³tjo³soan²³ en¹-le⁴.
JOH 8:56 Je² Abraham nˀai³-no³ cjai¹nca³ coan³tsjoa³-le⁴ nca³ coi⁴cho³ ve³ ni⁴čhjin³-na⁴, cˀoa⁴ tsa³ve³ coan³tsjoa³-le⁴.
JOH 8:57 Cˀia⁴ cho⁴ta⁴ judíos qui³tso²-le⁴ Jesús: Cje³ tjin¹-jin²li² ña³chan²te³ no¹. Jo¹ coan⁴-ni³ nca³ tsa³ˀya³-ni³ Abraham.
JOH 8:58 Jesús qui³tso²-le⁴: Ña³qui³ cjoa⁴qui²xi⁴ ña³qui³ cjoa⁴qui²xi⁴ xi³ xin³-no³: An³ ti¹tjon² ti²jna⁴-le⁴ Abraham.
JOH 8:59 Cˀia⁴ qui³scoe¹ la⁴jao⁴ cho⁴ta⁴ judíos nca³ coa⁴sen²-le⁴ Jesús. To⁴nca³ Jesús tsa³cˀe²jna³ˀma³, ji³tjo³-ni³ yo⁴nco⁴, ya⁴ ja³ˀa³jin³ va³sen³-le⁴ cho⁴ta⁴, qui³.
JOH 9:1 Cˀia⁴ nca³ ja³ˀa³ Jesús, tsa³ve³ jnco³ cho⁴ta⁴ xi³ xca⁴ cji³ jo³ sa³ˀnta³ nca³ qui³tsin³.
JOH 9:2 Cho⁴ta⁴-le⁴ qui³sco²na³nqui³-le⁴: Rabí, ˀya¹ xi³ tsa³jnqui³ je¹, a³ je² xi³ xca⁴ cji³ a³xo⁴ je² xi³jcha¹-le⁴, nca³ cˀoa⁴-sˀin² xca⁴ cji³-ni³ nca³ qui³tsin³.
JOH 9:3 Jesús qui³nchja⁴: Ni⁴je²-jin² je²-vi⁴ tsa³jnqui³ je¹, cˀoa⁴ ni⁴je²-jin² xi³jcha¹-le⁴, to⁴nca³ cˀoa⁴-sˀin² qui³tsin³ jme¹-ni³ nca³ coan⁴tsen³-si¹ni³ xa¹-le⁴ Ni³na¹ xi³ to⁴tˀa³tsˀe⁴.
JOH 9:4 Cjai¹nca³ to⁴ma³chjen¹-na³ nca³ si³qui³tjo³soan²³ xa¹ xi³ tsˀe⁴ je² xi³ qui³si³ca³sen¹-na³, ntˀai⁴ ti⁴ˀa³-ni³ nca³ cje³ ma³njion²-jin². Nčhoa¹ ma³njion² cˀia⁴ nca³ li²ˀya³ xi³ ti⁴coan⁴ si⁴²xa¹-ni³.
JOH 9:5 Tjen⁴ ti²jna⁴ i⁴ son³ˀnte³-vi⁴, an³ nia¹³ lˀi¹ xi³ si¹ˀi³sen³ son³ˀnte³.
JOH 9:6 Cˀia⁴ nca³ je³cˀoa⁴qui³tso², tsa³cˀe¹čha¹ tˀa³na³nqui³, qui³si³nta³-ni³ nta¹si³ nta¹na³čha¹-le⁴, qui³si³ca³jon³ xcon⁴ xi³ xca⁴ cji³.
JOH 9:7 Cˀoi⁴qui³tso²-le⁴: Tˀin³ cho¹ncjan⁴-ni³ ya⁴ na³nta¹ Siloé (tso²-ni³ en¹-vi⁴ je² xi³ qui³ni²ca³sen¹). Cˀia⁴ qui³ qui³sco²ncjan⁴, ji³nčhoa³-ni³, je³ma³tsen³-le⁴.
JOH 9:8 Cˀia⁴ cho⁴ta⁴ ntai³ni³ˀya³-le⁴ cao⁴ xi³ nca³sˀa⁴ tsa³ve³ nca³ xca⁴ cji³ cˀoi⁴qui³tso²: A³ tsi² tsa² je²-vi⁴ xi³ ya⁴ tsa³cˀe²jna³ nca³ qui³si³je¹ qui⁴cha⁴si³ne².
JOH 9:9 Cˀoi⁴qui³tso² xi³cˀa³: Je²-nco¹. Cˀoa⁴ xi³cˀa³ cˀoi⁴tso²: Cˀoa⁴-nco¹ me³cji³ jo³ cji³ nca³ je². Cˀia⁴ qui³nchja⁴ xi³ xca⁴ cji³ nca³sˀa⁴: An³ nia¹³.
JOH 9:10 Cˀoi⁴qui³tso²-le⁴: Jo¹ coan³-ni³ nca³ qui³tjo³ˀai²nqui³-ni³ xcoin³.
JOH 9:11 Je² cˀoi⁴qui³tso²: Je² cho⁴ta⁴xˀin⁴ xi³ Jesús ˀmi² qui³-si³nta³ nta¹si³ qui³si³ca³jon³ xcoan³, qui³tso²-na³: Tˀin³ ya⁴ na³nta¹ Siloé cho¹ncjain⁴. Cˀia⁴ quia³-ˀni³ qui³sco³ncjan⁴, coan³tsen³-na³.
JOH 9:12 Cˀia⁴ cˀoi⁴qui³tso²-le⁴: Jña¹ ti¹jna³ nca³ je². Li²coi³ ˀve³ qui³tso².
JOH 9:13 Qui³cao⁴-le⁴ cho⁴ta⁴ fariseos je² xi³ xca⁴ cji³ nca³sˀa⁴.
JOH 9:14 Ni⁴čhjin³ ni²cja¹ya³ ni¹ cˀia⁴ nca³ qui³si³nta³ nta¹si³-ve⁴ Jesús, nca³ qui³sco³ˀai²nqui³ xcon⁴ je² xi³ xca⁴ cji³.
JOH 9:15 Cˀia⁴ cho⁴ta⁴ fariseos ti⁴qui³sco²na³nqui³-nca¹ni³le⁴ jo³ coan³-ni³ nca³ qui³tjo³ˀai²nqui³ xcon⁴. Cˀia⁴ je² cˀoi⁴qui³tso²-le⁴: Nta¹si³ qui³si³ca³jon³ xcoan³, cˀia⁴ qui³sco³ncjan⁴. Ma³tsen³-na³ˀni³ ntai⁴.
JOH 9:16 Cˀia⁴ cˀoi⁴qui³tso² cˀa³ cho⁴ta⁴ fariseos: Je² cho⁴ta⁴xˀin⁴-vi⁴ a³li² Ni³na¹-jin² qui³si³ca³sen¹, nca³ tsi² tsa² tˀa³xin² vˀe¹jna³ ni⁴čhjin³ ni²cja¹ya³. Cˀoi⁴tso² xi³cˀa³: Jo¹ ma³-ni³ nca³ jnco³ cho⁴ta⁴xˀin⁴ xi³ je¹ tjin¹-le⁴ nca³ ma³-le⁴ tsjoa¹ choa⁴ je²-vi⁴. Coan³jao²ya³ cho⁴ta⁴.
JOH 9:17 Cˀoi⁴qui³tso²-nca¹ni³le⁴ cho⁴ta⁴xca⁴-ve⁴: Ji³, jme¹-ni³ en¹ xi³ no²cjoai⁴ xi³ tˀa³tsˀe⁴ xi³ qui³sco³ˀai²nqui³ xcoin³. Cˀia⁴ qui³nchja⁴ je² cho⁴ta⁴xca⁴: Je² ni¹ xi³ nchja⁴ya³ tˀa³tsˀe⁴ Ni³na¹.
JOH 9:18 To⁴nca³ je² cho⁴ta⁴ judíos li²coi³ coan³cjain¹-le⁴ nca³ je² xi³ xca⁴ cji³ nca³ je³coan³tsen³-le⁴. Cˀia⁴² sa³ˀnta³ coan³cjain¹-le⁴ nca³ qui³no²cjoa⁴-le⁴ xi³jcha¹-le⁴ je² xi³ coan³nta³ xcon⁴.
JOH 9:19 Qui³sco²na³nqui³-le⁴: A³ je²-vi⁴ ˀnti¹-no³, je² xi³ vi³xon¹³ nca³ xca⁴ cji³ nca³ qui³tsin³. Jo¹ ma³-ni³ nca³ ma³tsen³-ni³le⁴ ntˀai⁴-vi⁴.
JOH 9:20 Xi³jcha¹-le⁴ cˀoi⁴qui³tso²-le⁴: ˀya³-ni¹⁴jin⁴ nca³ je²-vi⁴ ˀnti¹-na⁴jin⁴, cˀoa⁴ xca⁴ cji³ nca³ qui³tsin³.
JOH 9:21 Jo¹ ma³-ni³ nca³ ma³tsen³-le⁴ ntˀai⁴ li²coi³ ˀyai³⁴-jin⁴. ˀya¹-ni³ xi³ qui³sco³ˀai²nqui³ xcon⁴ cˀoa⁴-ti⁴ li²coi³ ˀyai³⁴-jin⁴. Je³coan³jchi¹nca³, je² soa³ cho¹na³nqui³-lao⁴³.
JOH 9:22 Cˀoi⁴qui³tso² xi³jcha¹-le⁴ nca³ qui³tsa³cjon¹-le⁴ cho⁴ta⁴ judíos. Je³cˀoa⁴qui³tso² cho⁴ta⁴ judíos, tsa² ˀya³-ni³ve⁴ xi³ je² Mesías coi⁴tso⁴-le⁴ Jesús, ña³qui³ coi⁴chon³sje³-ni³ ya⁴³ ntˀia³ sinagoga.
JOH 9:23 Coi³ cˀoa⁴qui³tso²-ni³ xi³jcha¹-le⁴: Je³coan³jchi¹nca³, je² soa³ cho¹na³nqui³-lao⁴³.
JOH 9:24 Nqui²ntia³ ti⁴qui³no²cjoa⁴-nca¹ni³le⁴ xi³ xca⁴ cji³, cˀoi⁴qui³tso²-le⁴: Chˀa⁴sje³je³yai³ Ni³na¹. Jin⁴-jin⁴ ˀya³-ni¹⁴jin⁴ nca³ cho⁴ta⁴je¹ je² cho⁴ta⁴xˀin⁴-vi⁴.
JOH 9:25 Cˀia⁴ cho⁴ta⁴xca⁴-ve⁴ qui³tso²: Tsa² cho⁴ta⁴je¹ li²coi³ ˀve³. To⁴coi³ xi³ ˀve³ nca³ xca⁴ cji²ˀya⁴, ntˀai⁴-vi⁴ je³ma³tsen³-na³.
JOH 9:26 Ti⁴qui³sco²na³nqui³-nca¹ni³le⁴: Jme¹ xi³ qui³si³cao⁴-li². Jo¹ qui³sˀin³ nca³ qui³sco³ˀai²nqui³ xcoin³.
JOH 9:27 Cho⁴ta⁴xca⁴-ve⁴ qui³tso²: Je³cˀoa⁴qui³xin³-no³, li²coi³ qui³no²ˀyao²³. A¹-ni³ nca³ me³-si¹ni³no³ nca³ nqui²ntia³ no²ˀya²-nio³. A³ cˀoa⁴²-ti⁴ me³-no³ nca³ je² cho⁴ta⁴-le⁴ ca²ta³mao³.
JOH 9:28 Cˀia⁴ qui³nchja⁴ˀaon³-le⁴ qui³tso²: Ji³ ni¹³ cho⁴ta⁴-le⁴ Jesús, to⁴nca³ jin⁴-jin⁴ cho⁴ta⁴-le⁴ Moisés ni¹⁴-jin⁴.
JOH 9:29 ˀya³-ni¹⁴jin⁴ nca³ Ni³na¹ tsa³cja¹cao⁴ Moisés, to⁴nca³ je²-vi⁴ li²coi³ ˀyai³⁴-jin⁴ jña³ ja³ˀai³-ni³.
JOH 9:30 Cho⁴ta⁴-ve⁴ cˀoi⁴qui³tso²-le⁴: Cjoa⁴qui²xi⁴-ni¹ nca³ cjai¹-nca³ tse³ cjoa⁴ je²-vi⁴, nca³ jon² li²coi³ ˀyao³ jña³ ja³ˀai³-ni³, to⁴nca³ cˀoa⁴-sˀin² qui³sco³ˀai²nqui³ xcoan³.
JOH 9:31 Je³ˀya³² nca³ Ni³na¹ li²coi³ nčhˀoe¹-le⁴ cho⁴ta⁴tsˀen⁴, to⁴nca³ tsa² jnco³ xi³ cˀoa⁴-sˀin² tsa³cjon¹que³ Ni³na¹, xi³ cˀoa⁴-sˀin² si⁴²qui³tjo³son² jo³-sˀin² me³-le⁴ Ni³na¹, je²-vi⁴ xi³ Ni³na¹ nčhˀoe¹-le⁴.
JOH 9:32 Ni⁴cˀia³-jin² qui³no²ˀya²-le⁴ nca³ tjin¹ xi³ qui³sco³ˀai²nqui³ xcon⁴ jnco³ xi³ cˀoa⁴-sˀin² xca⁴ cji³ nca³ qui³tsin³.
JOH 9:33 Tsa² je²-vi⁴ a³li²coi³ Ni³na¹ xi³ qui³si³ca³sen¹, li²jme³ xi³ coan⁴ sˀin⁴².
JOH 9:34 Cho⁴ta⁴ judíos cˀoi⁴qui³tso²-le⁴: A³ tsi² je¹ qui³tsin³jin³ ji³. A³ ji³ xi³ va³co²ya³-na³jin⁴. Cˀia⁴ tsa³cˀaon³sje³ nti³tsin³.
JOH 9:35 Jesús qui³nčhˀoe¹ nca³ tsa³qui³chon³sje³ ˀnti¹cho⁴ta⁴-ve⁴. Cˀia⁴ nca³ qui³sa³te³jin³ qui³sco²na³nqui³-le⁴: A³ ma³cjain¹-li² ji³ xi³ tˀa³tsˀe⁴ je² ˀnti¹-le⁴ Ni³na¹.
JOH 9:36 Cho⁴ta⁴-ve⁴ cˀoi⁴qui³tso²: ˀya¹-ni³ je², Señor, jme¹-ni³ nca³ cˀoa⁴-sˀin² coan⁴cjain¹-si¹ni³na³ xi³ tˀa³tsˀe⁴.
JOH 9:37 Jesús cˀoi⁴qui³tso²-le⁴: je³tsa³ˀyai³, je² xi³ fa¹cao⁴-li², je² ni¹.
JOH 9:38 Cho⁴ta⁴-ve⁴ cˀoi⁴qui³tso²-le⁴ Jesús: Ma³cjain¹-na³, Señor. Cˀoa⁴-sˀin² tsa³ve³xcon¹ Jesús.
JOH 9:39 Cˀoi⁴qui³tso² Jesús: An³ to⁴coi³ xa¹ ja²ˀai⁴-nia³ i⁴ son³ˀnte³-vi⁴, nca³ cˀoa⁴-sˀin² sco³son²-ni³le⁴ jo³-sˀin² va³quin²-le⁴ cho⁴ta⁴, jme¹-ni³ nca³ je² xi³ tsi² ma³tsen³-le⁴ coan⁴tsen³-ni³le⁴, cˀoa⁴ je² xi³ ma³tsen³-le⁴ coan⁴xca⁴-ni³.
JOH 9:40 Tjin¹ cˀa³ cho⁴ta⁴ fariseos xi³ ya⁴ tjio¹cao⁴ Jesús, xi³ qui³nčhˀoe¹ je² en¹-ve⁴. Cˀoi⁴qui³tso²-le⁴: A³ cˀoa⁴-ti⁴ xca⁴ cjoain³-jin⁴.
JOH 9:41 Jesús qui³tso²-le⁴: Tsa² xca⁴ cjoaon³, tsin²-la⁴no³ je¹-jin². To⁴nca³ ntˀai⁴-vi⁴ cˀoi⁴vi³xon¹³: Ma³tsen³-na³jin⁴. Coi³ cjoa⁴ nca³ cˀoa⁴-sˀin² cˀoe¹jna³tˀa³-ni³no³ je¹-no³.
JOH 10:1 Ña³qui³ cjoa⁴qui²xi⁴ ña³qui³ cjoa⁴qui²xi⁴ xi³ xin³-no³: Je² xi³ tsi² fa³ˀa³sˀen³-ni³ ya⁴ xo⁴ntjoa⁴-le⁴ nchˀoa¹-le⁴ va³rre², to⁴xin² mi³jon³-ni³ nchˀoa¹, je² xi³ che¹, cˀoa⁴ cho⁴ta⁴ xi³ fi²cao⁴che¹ cho⁴.
JOH 10:2 To⁴nca³ je² xi³ xo⁴ntjoa⁴-le⁴ nchˀoa¹ fa³ˀa³sˀen³-ni³, je² ni¹ xi³ co³ˀnta³ va³rre².
JOH 10:3 Je² xi³ si¹coi²nta⁴ xo⁴ntjoa⁴ cjo³ˀai²-le⁴, cˀoa⁴ je² va³rre² xi³ ncha³ˀya³ nčhˀoe¹ jta⁴-le⁴. Nchja⁴-le⁴ jan³ˀain¹-le⁴ va³rre²-le⁴, cˀia⁴ vˀa³sje³.
JOH 10:4 Cˀia⁴ nca³ je³tsˀa³sje³jin³ nca³tsˀi³ va³rre²-le⁴, cˀoa⁴-sˀin² fi²ti¹tjon²-le⁴. To⁴fi²tjen⁴nqui³ va³rre²-ve⁴ nca³ ve³ jta⁴-le⁴.
JOH 10:5 To⁴nca³ li²coi³ coai⁴tjen⁴nqui³-le⁴ cho⁴ta⁴ xi³ cja⁴ˀai¹, to⁴sa³-la⁴ to⁴coa⁴nca³-le⁴, nca⁴ tsi² tsa² ve³ jta⁴-le⁴ cho⁴ta⁴ xi³ cja⁴ˀai¹.
JOH 10:6 Je²-vi⁴ cjoa⁴xco¹son² xi³ Jesús qui³tso²-le⁴, to⁴nca³ li²coi³ coan³cho⁴ya³-le⁴ cho⁴ta⁴ jo³ qui³tso²-le².
JOH 10:7 Nqui²ntia³ Jesús ti⁴cˀoa⁴qui³tso²-nca¹ni³le⁴: Ña³qui³ cjoa⁴qui²xi⁴ ña³qui³ cjoa⁴qui²xi⁴ xi³ xin³-no³, an³ nia¹³ xo⁴ntjoa⁴-le⁴ va³rre².
JOH 10:8 Je² nca³tsˀi³ xi³ ja³ˀai³ti¹tjon²-na³ to⁴cho⁴ta⁴che¹ ni¹, cˀoa⁴ cho⁴ta⁴ xi³ fi²cao⁴che¹ cho⁴, to⁴nca³ va³rre² li²coi³ qui³nčhˀoe¹-le⁴.
JOH 10:9 An³ nia¹³ xo⁴ntjoa⁴. Je² xi³ cjoa⁴ˀa³sˀen³ tˀa³tsˀan⁴, cˀoa⁴-sˀin² coi⁴tjo³ntjai². Cjoa⁴ˀa³sˀen³ coi⁴tjo³ sa⁴co²-le⁴ li⁴-ji⁴.
JOH 10:10 Cho⁴ta⁴che¹ to⁴fa³ˀai³ si¹che¹, fa³ˀai³ si¹cˀen³, fa³ˀai³ si¹qui³xo¹ya³, to⁴nca³ an³ coi³ xa¹ ja²ˀai⁴-nia³, jme¹-ni³ nca³ tjin¹-si¹ni³le⁴ cjoa⁴vi³jna³chon³, jme¹-ni³ nca³ nˀion¹ tse³ tjin¹-si¹ni³le⁴.
JOH 10:11 An³ nia¹³ xi³ nta³ co³ˀnta³ va³rre². Je² xi³ nta³ co³ˀnta³ va³rre², tsjoa¹ntjai² ni⁴ma⁴-le⁴ xi³ to⁴tˀa³tsˀe⁴ va³rre².
JOH 10:12 To⁴nca³ je² xi³ cho⁴ˀnta³ ma³, xi³ li² je²-jin² xi³ co³ˀnta³ va³rre², xi³ tsi² tsa² nai³-le⁴ va³rre², ve³ nca³ nčhoa¹ tsen⁴², to⁴cˀoa⁴-sˀin² si¹ca³tio¹ va³rre², cˀoa⁴ ma³nca³-le⁴. Je² tsen⁴²-ve⁴ tsoa³, tsao³va³ va³rre².
JOH 10:13 Coi³-jin²ˀni³ nca³ je² xi³ cho⁴ˀnta³ ma³ ma³nca³-le⁴, nca⁴ cho⁴ˀnta³ ni¹. A³li²coi³ nta³ si¹coi²nta⁴ va³rre²-ve⁴.
JOH 10:14 An³ nia¹³ xi³ nta³ co³ˀnta³ va³rre². Cˀoa⁴-sˀin² ˀve³xcon³-nia¹³ va³rre²-na⁴ jo³ cjoan³, cˀoa⁴ je² ve³xcon³-na³ nca³ an³.
JOH 10:15 Jo³-sˀin² nca³ ve³xcon³-na³ Nˀai³-na¹, cˀoa⁴-ti⁴ an³ ˀve³xcoan³ Nˀai³-na¹. Tsjoa³ntje²³ ni⁴ma⁴-na⁴ xi³ tˀa³tsˀe⁴ je² ˀnti¹cho⁴va³rre². tjio¹jin³. Cˀoa⁴-ti⁴ je²-ve⁴ ma³chjen¹-na³ nca³ cjoi⁴nčhoa³
JOH 10:16 Cˀoa⁴-ti⁴ tjin¹-sa³na³ xi³ cja⁴ˀai¹ va³rre² xi³ tsi² tsa² i⁴ coa⁴, cjoi⁴nčhˀoe¹ jta⁴-na⁴. To⁴jnco³ coan⁴jtin¹, cˀoa⁴ to⁴jnco³ coan⁴ xi³ sco³ˀnta³.
JOH 10:17 Coi³ nca³ cˀoa⁴-sˀin² tjao²que³-ni³na³ Nˀai³-na¹, nca⁴ cˀoa⁴-sˀin² tsjoa³ntje²³ ni⁴ma⁴-na⁴, jme¹-ni³ nca³ nqui²ntia³ cˀoa⁴-sˀin² scoe¹-si¹nia³.
JOH 10:18 Ni⁴to⁴ˀya³-jin² xi³ cjoa⁴ˀa²xin²-na³ ni⁴ma⁴-na⁴, to⁴ˀan³ cˀoa⁴-sˀin² tsjoa³ntje²³ ni⁴ma⁴-na⁴. Tjin¹-na³ ˀnte³ nca³ cˀoa⁴sˀian³, cˀoa⁴ tjin¹-na³ ˀnte³ nca³ nqui²ntia³ scoe¹-nia³ ni⁴ma⁴-na⁴. Coi³ cjoa⁴te¹xo³ma³ xi³ tsa³cˀe¹ne²-na³ Nˀai³-na⁴.
JOH 10:19 Nqui²ntia³ coan³jao²ya³ cho⁴ta⁴ judíos xi³ tˀa³tsˀe⁴ je² en¹-vi⁴.
JOH 10:20 Ncjin² cho⁴ta⁴ judíos xi³ cˀoi⁴qui³tso²: Cho⁴ta⁴nai⁴²-la⁴, sca¹-la⁴le⁴. A¹-ni³ nca³ no²ˀya²-si¹ni³lao⁴³.
JOH 10:21 Cˀoi⁴qui³tso² xi³cˀa³: Je² en¹-vi⁴ a³li² tsˀe⁴ cho⁴ta⁴nai⁴²-jin². A³ coan⁴²-le⁴ nai⁴²-ve⁴ nca³ sco¹ˀai²nqui³ xcon⁴ xi³ xca⁴ cjoan³.
JOH 10:22 Cˀia⁴ ji³tjo³ sˀoi¹ dedicación ya⁴ Jerusalén, cˀia⁴ nca³ chan⁴nchˀan¹.
JOH 10:23 Jesús tso²ˀva³ ya⁴ nqui³ corredor Salomón ya⁴ yo⁴nco⁴.
JOH 10:24 Cho⁴ta⁴ judíos tsa³ca³tio²ntai³-le⁴ qui³tso²-le⁴: Cˀia¹ sa³ˀnta³ nca³ cho¹ya³-lai²⁴jin⁴. Tsa² ji³ ni¹³ Cristo, ti⁴no²cjoa⁴tsen³-na³jin⁴.
JOH 10:25 Cˀia⁴ qui³nchja⁴ Jesús: Cˀoa⁴qui³xin³-no³, to⁴nca³ li²coi³ ma³cjain¹-no³. Je² xa¹ xi³ cˀoa⁴sˀian³ cao⁴ jan³ˀain¹-le⁴ Nˀai³-na⁴, je² xi³ cˀoa⁴-sˀin² si¹qui²xi⁴ya³nta³ xi³ tˀa³tsˀan⁴.
JOH 10:26 To⁴nca³ jon² li²coi³ cˀoa⁴-sˀin² ma³cjain¹-no³, nca⁴ li² jon²-jion²³ tsˀe⁴ va³rre²-na⁴, jo³ nca³ qui³xin³-no³.
JOH 10:27 Je² va³rre²-na⁴ nčhˀoe¹ jta⁴-na⁴, cˀoa⁴ an³ ˀve³xcon³-nia¹³, cˀoa⁴ fi²tjen⁴nqui³-na³.
JOH 10:28 An³ tsjoa³-le⁴ cjoa⁴vi³jna³chon³ nca³ntsjai². Ni⁴to⁴cˀia³-jin² nca³ ntia³ cha⁴, ni⁴to⁴ˀya³-jin² xi³ cjoa⁴ˀa²xin²ya³-ni³ ntsa⁴.
JOH 10:29 Je² Nˀai³-na⁴ xi³ qui³tsjoa³-na³ va³rre²-na⁴, je² ni¹ ti¹tjon²-le⁴ nca³yi³je³ cjoa⁴. Ni⁴ˀya³-jin² xi³ coan⁴ cjoa⁴ˀa²xin²ya³-ni³ ntsja³ Nˀai³-na⁴ je² va³rre²-na⁴.
JOH 10:30 An³ cao⁴ Nˀai³-na¹ to⁴jnco³-ni¹⁴jin⁴.
JOH 10:31 Cˀia⁴ qui³scoe¹-nca¹ni³ la⁴jao⁴ je² cho⁴ta⁴ judíos nca³ coa⁴sen²-le⁴ Jesús.
JOH 10:32 Jesús qui³tso²-le⁴: Cjai¹nca³ to⁴ncjin² xa¹ xi³ nta³ xi³ tsa³ca³co³-no³ xi³ tsˀe⁴ Nˀai³-na⁴. Jña¹-le⁴ xi³ je¹ntjai²-le⁴ xa¹-vi⁴ coa⁴sen²-si¹ni³nao¹³ la⁴jao⁴.
JOH 10:33 Cho⁴ta⁴ judíos cˀoi⁴qui³tso²-le⁴: Li²coi³ la⁴jao⁴ coa⁴sen²-lai²⁴jin⁴ ja⁴tˀa³tsˀe⁴ xa¹ xi³ nta³, to⁴coi³ nca³ no²cjoa⁴ˀaon³-lai⁴ Ni³na¹, nca⁴ ji³ xi³ cho⁴ta⁴xˀin⁴, Ni³na¹ nia¹³ cˀoi⁴si³.
JOH 10:34 Jesús qui³tso²-le⁴: A³ tsi² cˀoa⁴-sˀin² tji¹tˀa³ cjoa⁴te¹xo³ma³-no³: An³ cˀoi⁴qui³xian³: Jon² xi³ ni³na¹ nio¹³.
JOH 10:35 Tsa² ni³na¹ tsa³cˀin²-le⁴ je² xi³ ja³ˀai³-le⁴ en¹-le⁴ Ni³na¹ (xon⁴ Escritura li²coi³ ˀya³ xi³ coan⁴ si⁴²qui³xo²ya³jin³),
JOH 10:36 Je² xi³ Nˀai³-na¹ tsa³ca³sen¹ xa¹ cˀoa⁴ qui³si³ca³sen¹ i⁴ son³ˀnte³-vi⁴, jon² vi³xon¹-lao⁴³: Ji³ no²cjoa⁴ˀaon³-lai⁴ Ni³na¹, nca⁴ coi³ qui³xian³, ˀnti¹-le⁴ Ni³na¹ nia¹³.
JOH 10:37 Tsa² tsi² tsa² cˀoa⁴sˀian³ xa¹-le⁴ Nˀai³-na⁴, a³li² ma³cjain¹-jin²no³ jo³ xian³.
JOH 10:38 Nta³ tsa² tsi² ma³cjain¹-no³ jo³ xian³, tsa² cˀoa⁴sˀian³ xa¹-le⁴ Nˀai³-na⁴, ca²ta³ma³cjain¹-no³ xi³ to⁴tˀa³tsˀe⁴ xa¹ xi³ sˀian³, jme¹-ni³ nca³ cˀoa⁴-sˀin² jcha⁴-si¹nio³ cˀoa⁴ coan⁴cjain¹-si¹ni³no³ nca³ je² Nˀai³-na¹ ti¹jna³cao⁴-na³ cˀoa⁴ an³ ti²jna⁴coa⁴ Nˀai³-na¹.
JOH 10:39 Nqui²ntia³ ti⁴me³-le⁴ qui³tsoa³-nca¹ni³, to⁴nca³ je² ji³tjo³ca³ya³ ntsja³.
JOH 10:40 Cˀia⁴ ti⁴qui³-nca¹ni³ ya⁴ xi³ncoa³nta¹ Jordán, ya⁴ jña³ nca³ Juan ti¹tjon² tsa³ca³te¹nta¹. Ya⁴ tsa³cˀe²jna³ Jesús.
JOH 10:41 Cjai¹nca³ to⁴ncjin² xi³ ja³ˀai³con²-le⁴ Jesús, cˀoi⁴qui³tso²: Juan, ña³qui³ cjoa⁴qui²xi⁴-ni¹ nca³ tsi²jme³ choa⁴ qui³tsjoa³. To⁴nca³ nca³yi³je³ jo³ qui³tso² Juan xi³ tˀa³tsˀe⁴ Jesús ña³qui³ cjoa⁴qui²xi⁴ ni¹.
JOH 10:42 Cjai¹nca³ to⁴ncjin² xi³ ya⁴ coan³cjain¹-le⁴ xi³ tˀa³tsˀe⁴ Jesús.
JOH 11:1 Cˀia⁴ jnco³ xi³ ti¹mˀen³ xi³ Lázaro ˀmi², ya⁴ Betania tsˀe⁴, ya⁴ na⁴xi⁴na³nta¹-le⁴ María cao⁴ Marta nti³chja³.
JOH 11:2 (Je² María je² xi³ qui³si³ca³jon³ je² Señor cao⁴ jnco³ xqui³xi¹ne¹. Ntsja⁴-le⁴ qui³si³xi²-ni³ ntso⁴co⁴. Je² ntsˀe⁴ xi³ Lázaro ˀmi², xi³ ti¹mˀen³.)
JOH 11:3 Nti³chja³ Lázaro qui³si³ca³sen¹cjoa⁴-le⁴ Jesús, cˀoi⁴qui³tso²-le⁴: Señor, coe⁴-ni³ je² xi³ tjao²chai³ ti¹mˀen³-ni¹.
JOH 11:4 Cˀia⁴ nca³ Jesús qui³nčhˀoe¹-le⁴, cˀoi⁴qui³tso²: Je² chˀin³-vi⁴ li²coi³ coi⁴ya¹-ni³, to⁴nca³ tˀa³tsˀe⁴ cjoa⁴je³ya³-le⁴ Ni³na¹, jme¹-ni³ nca³ je² ˀnti¹-le⁴ Ni³na¹ coi⁴tjo³je³ya³-si¹ni³.
JOH 11:5 Jesús cjai¹nca³ tjao²que³ Marta cao⁴ nti³chja³ cao⁴ Lázaro.
JOH 11:6 Cˀia⁴ nca³ qui³nčhˀoe¹ nca³ ti¹mˀen³ nqui²jao² ni⁴čhjin³ tsa³cˀe²jna³ ya⁴ ˀnte³ jña³ nca³ ti¹jna³.
JOH 11:7 Xi³ je³coan³ je²-vi⁴, cˀia⁴ cˀoi⁴qui³tso²-le⁴ cho⁴ta⁴-le⁴: Tjin³-la²nca¹nia³² ya⁴ Judea.
JOH 11:8 Cho⁴ta⁴-le⁴ cˀoi⁴qui³tso²-le⁴ Jesús: Rabí, la⁴jao⁴-na¹ me³-le⁴ va³sen¹-li² cho⁴ta⁴ judíos. A³ nqui²ntia³ ti⁴cˀoin¹-nca¹ni³ ya⁴-ve⁴.
JOH 11:9 Qui³nchja⁴ Jesús: A³ tsi² te³jao² hora tjin¹-le⁴ ni⁴čhjin³. Je² xi³ tso²ˀva³ nca³ ni⁴čhjin³ li²coi³ sa⁴te¹nqui³, nca⁴ ma³tsen³-ni³le⁴ je² lˀi¹ xi³ si¹ˀi³sen³ son³ˀnte³.
JOH 11:10 To⁴nca³ je² xi³ tso²ˀva³ nca³ njion², sa⁴te¹nqui³-ni¹, nca⁴ tsi² tsa² i³sen³-le⁴.
JOH 11:11 Cˀia⁴ nca³ je³cˀoa⁴qui³tso², cˀia⁴ Jesús cˀoi⁴qui³tso²-le⁴ cho⁴ta⁴-le⁴: Lázaro je² mi²yo⁴-na¹ ti¹qui³jna³fe²-ni¹, to⁴nca³ cjoi¹ si³cja³ˀa¹-ni³le⁴.
JOH 11:12 Cˀia⁴ qui³tso² cho⁴ta⁴-le⁴: Señor, tsa² qui³jna³fe², coan⁴nta³-ni¹.
JOH 11:13 Cˀoi⁴qui³tso² Jesús tˀa³tsˀe⁴ cjoa⁴vi³ya³-le⁴ Lázaro. Cˀoa⁴ je² cho⁴ta⁴-le⁴ cja⁴ˀai¹-sˀin² coan³cho⁴ya³-le⁴ xi³ Jesús ca²nchja⁴. Qui³si³cja³ˀai³tsjen³ nca³ to⁴ti¹si¹cja¹ya³ Lázaro nca³ ti¹qui³jna³fe².
JOH 11:14 Cˀia⁴ Jesús qui³nchja⁴tsen³: Lázaro ti¹qui³jna³cˀen³-ni¹.
JOH 11:15 Ma³tsjoa³-na³ xi³ tˀa³tsaon⁴³ nca³ tsi² ya⁴ ti²jna⁴, jme¹-ni³ nca³ coan⁴cjain¹-si¹ni³no³. To⁴nca³ tjin³chon¹-le⁴².
JOH 11:16 Cˀia⁴ Tomás, je² xi³ Dídimo ˀmi², cˀoi⁴qui³tso²-le⁴ xi³cˀa³ cho⁴ta⁴-le⁴ Jesús: Cˀoa⁴-ti⁴ tjian¹ nca³ ña¹, jme¹-ni³ nca³ ya⁴ coi⁴ya²cao⁴-si¹nia³².
JOH 11:17 Cˀia⁴ ji³nčhoa³ Jesús, qui³sˀe³jin³-le⁴ nca³ je³coan³ ño³ ni⁴čhjin³ nca³ qui³sˀe³ñai³ Lázaro.
JOH 11:18 Betania ti¹jna³ čhian³-ni³le⁴ Jerusalén, jo³-ni³ tsa² va³sen³ hora-la⁴.
JOH 11:19 Cjai¹nca³ to⁴ncjin² cho⁴ta⁴ judíos ja³ˀai³nčhˀoe² Marta cao⁴ María. Ja³ˀai³ si¹je³con³ nca³ cˀen³ ntsˀe⁴.
JOH 11:20 Cˀia⁴ nca³ Marta qui³nčhˀoe¹ nca³ Jesús ti¹nčhoa¹ ya⁴³ ntia⁴², qui³ cja³ˀa¹, to⁴nca³ je² María ya⁴ tsa³cˀe²jna³ ya⁴³ ni³ˀya³.
JOH 11:21 Marta qui³tso²-le⁴ Jesús: Señor, tsa² i⁴-la²sa³ ti³jnai³ tsa²cai³, je² ntsˀe³ li²coi³ cˀen³.
JOH 11:22 To⁴nca³ cˀoa⁴-ti⁴ ˀve³-nia¹³ ntˀai⁴-vi⁴, to⁴jme³-ni³ xi³ ni²je¹-lai⁴ Ni³na¹, Ni³na¹ tsjoa¹-li².
JOH 11:23 Jesús qui³tso²-le⁴: Cjoa⁴ˀa¹ya³-ni³le⁴ ntsˀai⁴.
JOH 11:24 Marta cˀoi⁴qui³tso²-le⁴: ˀve³-nia¹³ nca³ cjoa⁴ˀa¹ya³-ni³le⁴ cˀia⁴ nca³ coi⁴cho³cje³tˀa³ ni⁴čhjin³.
JOH 11:25 Jesús qui³tso²-le⁴: An³ nia¹³ xi³ si³cja³ˀa¹ya³, cˀoa⁴ an³ nia¹³ xi³ cjoa⁴vi³jna³chon³. Je² xi³ ma³cjain¹-le⁴ tˀa³tsˀan⁴, nta³ tsa² cˀen³, cˀoe¹jna³con³-ni¹.
JOH 11:26 Cˀoa⁴ to⁴ˀya³-ni³ve⁴ xi³ ti¹jna³con³, xi³ ma³cjain¹-le⁴ tˀa³tsˀan⁴, li²coi³ ntia³ coi⁴ya¹. A³ ma³cjain¹-li² je²-vi⁴.
JOH 11:27 Marta qui³tso²-le⁴ Jesús: Jaon³, Señor, je³coan³cjain¹-na³ nca³ ji³ ni¹³ Cristo, je² ˀnti¹-le⁴ Ni³na¹, xi³ ja²ˀai⁴ son³ˀnte³.
JOH 11:28 Cˀia⁴ nca³ je³cˀoa⁴qui³tso² Marta, qui³ qui³nchja⁴ˀma³-le⁴ María xi³ nti³chja³, cˀoi⁴qui³tso²-le⁴: I⁴ ti¹jna³-vi⁴ Maestro, ti¹nchja⁴-li².
JOH 11:29 Cˀia⁴ nca³ María qui³nčhˀoe¹-le⁴, nti⁴ton⁴ tsa³qui³so²tjen⁴ ji³nčhoa³nčhˀoe² Jesús.
JOH 11:30 Cje³-sa³ fi³cho¹-jin² Jesús ya⁴ na⁴xi⁴na³nta¹, to⁴ya⁴ ti¹jna³ ya⁴ ˀnte³ jña³ nca³ Marta qui³sa³te³cjao³.
JOH 11:31 Cˀia⁴ je² cho⁴ta⁴ judíos xi³ tjio¹cao⁴ María ya⁴³ ni³ˀya³-le⁴, xi³ si¹je³con³, tsa³ve³ nca³ María tsa³qui³so²tjen⁴ nti⁴ton⁴ cˀoa⁴ ji³tjo³, qui³tjen⁴nqui³-le⁴, cˀoi⁴qui³tso²: Ya⁴-la⁴ coai⁴ cji³ˀnta¹ ya⁴ tˀa³tsjo¹-le⁴.
JOH 11:32 María ji³cho² ya⁴ jña³ nca³ ti¹jna³ Jesús, tsa³ve³ tsa³ca³sen²xco¹nchˀin³tˀa³-le⁴, cˀoi⁴qui³tso²-le⁴: Señor, tsa² i⁴-la²sa³ ti³jnai³ tsa²cai³, je² ntsˀe³ li²coi³ cˀen³.
JOH 11:33 Cˀia⁴ nca³ Jesús tsa³ve³ nca³ ti¹cji³ˀnta¹ María cˀoa⁴ti⁴ tjio¹cji³ˀnta¹ je² cho⁴ta⁴ judíos xi³ tjen⁴cao⁴, cˀia⁴ aon³ coan³-le⁴ Jesús, coan³fao¹-le⁴.
JOH 11:34 Cˀoi⁴qui³tso²: Jña¹ tsa³cˀe²ñao³. Qui³tso²-le⁴: Señor, nčhoai¹³ cho¹tsain³.
JOH 11:35 Qui³squi³ˀnta¹ Jesús.
JOH 11:36 Cˀia⁴ qui³nchja⁴ cho⁴ta⁴ judíos: Coe⁴-ni³ jo³ nca³ tjao²que³ coan³ Lázaro.
JOH 11:37 Tjin¹ cˀa³ cho⁴ta⁴ judíos xi³ cˀoi⁴qui³tso²: Ne³ qui³sco³ˀai²nqui³ xcon⁴ xi³ xca⁴ cji³. A³ tsi² tsa² coan³-le⁴ je²-vi⁴ nca³ qui³sˀin³ cjoa⁴nta³ nca³ tsi² tsa² cˀen³ Lázaro.
JOH 11:38 Aon³ coan³-nca¹ni³le⁴ Jesús. Ja³ˀai³ ja⁴tsjo¹-ve⁴, jnco³ nqui³jao³ jña³ nca³ qui³jna³jčho³ jnco³ la⁴jao⁴te³.
JOH 11:39 Cˀoi⁴qui³tso² Jesús: Cha³ˀa²xion²³ la⁴jao⁴. Marta, nti³chja³ Lázaro, cˀoi⁴qui³tso²-le⁴: Señor, je³njen⁴, nca⁴ je³ño³-le⁴ ni⁴čhjin³ nca³ qui³sˀe³ñai³.
JOH 11:40 Jesús qui³tso²-le⁴ Marta: A³ tsi² tsa² cˀoa⁴qui³xin³-le²³, tsa² coan⁴cjain¹-li², jcha⁴-ni¹³ cjoa⁴je³ya³-le⁴ Ni³na¹.
JOH 11:41 Cˀia⁴ tsa³cja³ˀa¹xin² la⁴jao⁴ jña³ nca³ qui³sˀe³ñai³ cˀen³. Jesús qui³sco²tsen³ncˀa¹ qui³tso²: Nˀai³-na⁴, tsjoa³-le²³ cjoa⁴nta³ nca³ cˀoa⁴-sˀin² ca²no²ˀya²-nai¹³.
JOH 11:42 An³ tsa³ˀve³-nia¹³ nca³ no²ˀya²-nai¹³ nca³ntsjai². To⁴coi³ nca³ ncjin² cho⁴ta⁴ tjio¹ntai³, cˀoa⁴ca²xin³-nia³, jme¹-ni³ nca³ cˀoa⁴-sˀin² ca²ta³ma³cjain¹-si¹ni³le⁴ nca³ ji³ qui³ni²ca³sen¹-nai¹³.
JOH 11:43 Cˀia⁴ nca³ je³cˀoa⁴qui³tso² nca³yi³je³ en¹-vi⁴, nˀion¹ qui³nchja⁴: Lázaro, nčhoai¹³ nti³tsin³-vi⁴.
JOH 11:44 Je² xi³ qui³jna³cˀen³ ji³tjo³. Ntsja³ cao⁴ ntso⁴co⁴ tji¹nˀion¹-ni³ na³jño³. Je² ncjain¹ jnco³ na³jño³ ti¹jte¹jin³. Jesús qui³tso²-le⁴ cho⁴ta⁴: Cho¹jnta¹-nio³, ca²ta³fi².
JOH 11:45 Cjai¹nca³ ncjin² cho⁴ta⁴ judíos xi³ ja³ˀai³nčhˀoe² María. Tsa³ve³ nca³yi³je³ jo³ qui³sˀin³ Jesús, coan³cjain¹-le⁴ xi³ tˀa³tsˀe⁴.
JOH 11:46 To⁴nca³ tjin¹ cˀa³ cho⁴ta⁴ judíos xi³ qui³con³-le⁴ cho⁴ta⁴ fariseos, cˀoa⁴qui³tso²-le⁴ jo³ qui³sˀin³ Jesús.
JOH 11:47 Cˀia⁴ cho⁴ta⁴ti¹tjon²-le⁴ na⁴ˀmi³ cao⁴ cho⁴ta⁴ fariseos qui³sˀin³ junta qui³tso²: Jme¹ xi³ nˀian², nca³ ncjin² choa⁴ xi³ tsjoa¹ je² cho⁴ta⁴-vi⁴.
JOH 11:48 Tsa² to⁴cˀoa⁴-sˀin² si⁴cˀe¹jna³², ña³qui³ nca³tsˀi³ coan⁴cjain¹-le⁴ xi³ tˀa³tsˀe⁴. Cjoa⁴ˀai¹ cho⁴ta⁴ romanos, cjoa⁴ˀa²xin²-na¹ ˀnte³-na¹ cao⁴ na⁴xi⁴na³nta¹-na¹.
JOH 11:49 Je² Caifás jnco³ xi³ ya⁴ tjio¹, je² xi³ na⁴ˀmi³ti¹tjon² coi³ no¹-ve⁴, cˀoi⁴qui³tso²-le⁴: Jon² li²jme³ xi³ ma³-no³.
JOH 11:50 Sa³ˀnta³ li²coi³ ni²cja³ˀai³tsjaon³ nca³ ma³chjen¹-na¹ nca³ jnco³ cho⁴ta⁴ coi⁴ya¹ntjai² na⁴xi⁴na³nta¹-na¹, cˀoa⁴ li²coi³ nta³ nca³ ña³qui³ si⁴cha³² nca³tsˀi³ cho⁴ta⁴.
JOH 11:51 Je²-vi⁴ a³li² to⁴je² xi³ cˀoa⁴qui³tso². To⁴coi³ nca³ xa¹-le⁴ na⁴ˀmi³ti¹tjon² vˀa³ je² no¹-ve⁴, cˀoa⁴-sˀin² tsa³ca¹ya³con³ nca³ Jesús coi⁴ya¹ntjai² na⁴xi⁴na³nta¹.
JOH 11:52 A³li² tsa² to⁴je² na⁴xi⁴na³nta¹-ve⁴ xi³ coi⁴ya¹ntjai² Jesús, cˀoa⁴²-ti⁴ cˀoe⁴²xco¹ nca³tsˀi³ ˀnti¹-le⁴ Ni³na¹ xi³ tjio¹tsao³va³ son³ˀnte³.
JOH 11:53 Sa³ˀnta³ coi³ ni⁴čhjin³-ve⁴ cˀoa⁴-sˀin² tsa³cjao¹ya³-ni³ jo³-sˀin² nca³ si⁴²cˀen³.
JOH 11:54 To⁴coi³ cjoa⁴-vi⁴ Jesús li²coi³ ti⁴tsa³cˀa³mjen³ va³sen³jin³-ni³le⁴ cho⁴ta⁴ judíos. Qui³-ni³ ya⁴-ve⁴, qui³ jnco³ na⁴xi⁴na³nta¹ xi³ Efraín ˀmi², xi³ ti¹jna³čhian³-le⁴ ˀnte³tˀa³xin²tˀa³. Ya⁴ tsa³cˀe²jna³cao⁴ cho⁴ta⁴-le⁴.
JOH 11:55 Je³nčhoa¹čhian³ sˀoi¹ pa²xco⁴ xi³ tsˀe⁴ cho⁴ta⁴ judíos. Cjai¹nca³ ncjin² xi³ qui³-ni³ ya⁴ ˀnte³-ve⁴. Qui³mi³ Jerusalén, nca³ cje³ vi³tjo³-jin²sa³ pa²xco⁴, jme¹-ni³ nca³ si⁴²tsje³-si¹ni³ yao³-le⁴.
JOH 11:56 Tsa³ca¹sjai³ Jesús. Nca³ˀi⁴ nca³jan¹ tsa³cja¹cao⁴ xi¹-ncjin¹ nca³ tjio¹ ya⁴³ yo⁴nco⁴: Jo¹ vi³xon¹³, a³ tsi² cjoa⁴ˀai¹ sˀoi¹-vi⁴.
JOH 11:57 Je² cho⁴ta⁴ti¹tjon²-le⁴ na⁴ˀmi³ cao⁴ cho⁴ta⁴ fariseos cˀoa⁴-sˀin² tsa³ca³te¹xo³ma³, tsa² ˀya³-ve⁴ xi³ ve³ jña³ nca³ ti¹jna³ Jesús, cˀoa⁴ca²ta³tso², jme¹-ni³ nca³ coi⁴ntoa⁴-si¹ni³.
JOH 12:1 Jaon³ ni⁴čhjin³ nca³ cje³ vi³tjo³-jin²sa³ sˀoi¹ pa²xco⁴, Jesús ja³ˀai³ ya⁴ Betania jña³ nca³ ti¹jna³ Lázaro, je² xi³ cˀen³ xi³ Jesús qui³si³cja³ˀa¹ya³jin³-ni³le⁴ xi³ cˀen³.
JOH 12:2 Ya⁴ qui³si³cjen² Jesús nca³ njion². Je² Marta tsa³cˀe¹ya³-le⁴. Je² Lázaro cˀoa⁴-ti⁴ jnco³ xi³ ti⁴je²-ni³ xi³ tsa³ca³tio²tˀa³ ya¹mi²xa⁴ cao⁴ Jesús.
JOH 12:3 Cˀia⁴ María qui³scoe¹ jnco³ libra xqui³xi¹ne¹ xi³ ˀmi² nardo xi³ cjai¹nca³ chji¹. Qui³si³ca³jon³ ntso⁴co⁴ Jesús, cao⁴ ntsja⁴-le⁴ qui³si³xi²-ni³ ntso⁴co⁴. A³li² to⁴jo³ xi³ qui³njen³ ja⁴ya³ ni³ˀya³.
JOH 12:4 Qui³tso² jnco³ cho⁴ta⁴-le⁴ Jesús, je² Judas Iscariote, ˀnti¹-le⁴ Simón, je² xi³ cˀoe⁴²tˀain³ na⁴jmi¹ xi³ tˀa³tsˀe⁴ Jesús.
JOH 12:5 A¹-ni³ nca³ tsi² jan² ciento qui³sa³te³na²-si¹ni³ je² xqui³xi¹ne¹-vi⁴, cˀoa⁴ tsa² qui³tsˀai²-le⁴ cho⁴ta⁴yo⁴ma⁴.
JOH 12:6 To⁴coi³ cˀoa⁴qui³tso²-ni³, a³li² tsa² nca³ cjoa⁴qui²xi⁴-jin² nca³ nˀion¹ cji³jin³-le⁴ cho⁴ta⁴yo⁴ma⁴, to⁴coi³² nca³ che¹. Ti¹jna³-le⁴ ˀnti¹ ca²xa⁴taon⁴, qui³si³che¹ je² xi³ ya⁴ qui³sˀe³ya³.
JOH 12:7 Cˀia⁴ Jesús cˀoi⁴qui³tso²: Ca²ta³vˀe²-le⁴. Ca²ta³vˀe¹jna³tjao² sa³ˀnta³ cˀia⁴ nca³ an³ xi³ sˀe⁴ñe²³.
JOH 12:8 Je² cho⁴ta⁴yo⁴ma⁴ tjio¹cao⁴ntsjai²-no³, to⁴nca³ an³ li²coi³ i⁴ coa²te⁴jna³cao⁴ntsjai²-no³.
JOH 12:9 Cjai¹nca³ to⁴ncjin² cho⁴ta⁴ judíos tjin¹jin³-le⁴ nca³ Jesús ya⁴ ti¹jna³. A³li² to⁴coi³cjoan² cjoa⁴ ja³ˀai³-ni³ xi³ tˀa³tsˀe⁴ Jesús. Cˀoa⁴-ti⁴ ja³ˀai³ co³tsen³-le⁴ je² Lázaro xi³ Jesús qui³si³cja³ˀa¹ya³-ni³le⁴ xi³ cˀen³.
JOH 12:10 Cˀoa⁴-sˀin² tsa³cjao¹ya³-ni³ je² cho⁴ta⁴ti¹tjon²-le⁴ na⁴ˀmi³, nca³ cˀoa⁴-ti⁴ me³-le⁴ nca³ si⁴²cˀen³ Lázaro.
JOH 12:11 Coi³ nca³ cjai¹nca³ to⁴ncjin² cho⁴ta⁴ judíos qui³, cˀoa⁴ coan³cjain¹-le⁴ tˀa³tsˀe⁴ Jesús xi³ to⁴coi³ cjoa⁴-le⁴ Lázaro.
JOH 12:12 Xi³ coan³ nchaon³ cjai¹nca³ to⁴ncjin² cho⁴ta⁴ xi³ ja³ˀai³ je² sˀoi¹-ve⁴ cˀia⁴ nca³ qui³nčhˀoe¹ nca³ Jesús ti¹nčhoa¹ ya⁴ Jerusalén.
JOH 12:13 Qui³scoe¹ xca⁴jen¹, ji³tjo³cja³ˀa¹ya³ntia³, nˀion¹ qui³nchja⁴: Viva. Jo¹ to⁴nta³-le⁴ je² xi³ fa³ˀai³ nca³jao³-le⁴ Nai³na¹, je² cho⁴ta⁴ti¹tjon² xi³ tsˀe⁴ cho⁴ta⁴ Israel.
JOH 12:14 Jesús qui³sa³co³-le⁴ jnco³ bo¹rro¹ˀnti¹, tsa³cˀe²jna³son²-le⁴ jo³-sˀin² tji¹tˀa³ xon⁴:
JOH 12:15 A³li² jcon³-jin²³, tso²ti³-le⁴ Sión, coe⁴-ni³ cho⁴ta⁴ti¹tjon²-li⁴ ti¹nčhoa¹, ti¹jna³son² jnco³ bo¹rro¹ˀnti¹.
JOH 12:16 Je² en¹-vi⁴ li²coi³ coan³cho⁴ya³-le⁴ cho⁴ta⁴-le⁴ Jesús nca³ ti¹tjon². To⁴nca³ cˀia⁴ nca³ qui³sˀe³-le⁴ cjoa⁴je³ya³ Jesús, cˀia⁴² ja³ˀai³tsjen³-le⁴ nca³ cˀoa⁴-sˀin² tji¹tˀa³ xon⁴ xi³ tˀa³tsˀe⁴, cˀoa⁴ nca³ cˀoa⁴-sˀin² qui³si³cao⁴ Jesús.
JOH 12:17 Je² cho⁴ta⁴ xi³ ya⁴ tjio¹cao⁴ cˀoa⁴-sˀin² qui³tsjoa³ en¹, jo³-sˀin² nca³ qui³nchja⁴-le⁴ Lázaro ja⁴tsjo¹-le⁴ nca³ qui³si³cja³ˀa¹ya³jin³-ni³le⁴ xi³ cˀen³.
JOH 12:18 Coi³ cjoa⁴ nca³ cˀoa⁴-sˀin² to⁴nta³ coan³xco¹-ni³ cho⁴ta⁴ nca³ qui³ co³ya³ntia³-le⁴, nca³ qui³nčhˀoe¹ nca³ qui³tsjoa³ je² choa⁴ je²-vi⁴.
JOH 12:19 To⁴nca³ je² cho⁴ta⁴ fariseos cˀoi⁴qui³tso²-le⁴ xi¹ncjin¹: A³ tsi² ˀyao³ nca³ li²jme³ xi³ njen³-no³. Coe⁴-si³sˀin¹ nca³tsˀi³, cjai¹nca³ nta³ fi²tˀa³-le⁴.
JOH 12:20 Tjin¹ cˀa³ cho⁴ta⁴ griegos xi³ ji³cho² que³xcon¹ ya⁴ sˀoi¹.
JOH 12:21 Je²-vi⁴ˀni³ ji³cho²con³-le⁴ Felipe xi³ tsˀe⁴ Betsaida ya⁴ Galilea, tsa³cˀe¹tsˀoa³-le⁴: Señor, cjai¹nca³ me³-na³jin⁴ nca³ jchai⁴-jin³ Jesús.
JOH 12:22 Felipe ja³ˀai³, cˀoa⁴qui³tso²-le⁴ Andrés. Cˀia⁴ Andrés cao⁴ Felipe cˀoa⁴qui³tso²-le⁴ Jesús.
JOH 12:23 Cˀia⁴ Jesús cˀoi⁴qui³tso²: Je³ja³ˀai³ hora nca³ je² ˀnti¹-le⁴ cho⁴ta⁴ sˀe⁴-le⁴ cjoa⁴je³ya³.
JOH 12:24 Ña³qui³ cjoa⁴qui²xi⁴ ña³qui³ cjoa⁴qui²xi⁴ xi³ xin³-no³: Tsa² je² na⁴xin⁴-le⁴ trigo li²coi³ sca⁴jin³ na³nqui³, cˀoa⁴ tsa² tsi² coi⁴ya¹, to⁴je² cˀoe¹jna³. To⁴nca³ tsa² coi⁴ya¹, a³li² to⁴cˀoa⁴ cji³ to³ xi³ coa⁴-le⁴.
JOH 12:25 Je² xi³ tsjoa³que³ ni⁴ma⁴-le⁴, cˀoa⁴-sˀin² si⁴²cha³ ni⁴ma⁴-le⁴, to⁴nca³ je² xi³ ma³jti³que³ ni⁴ma⁴-le⁴ i⁴ son³ˀnte³-vi⁴, cˀoa⁴-sˀin² cˀoe⁴²tjao² ni⁴ma⁴-le⁴ sa³ˀnta³ cjoa⁴vi³jna³chon³ nca³ntsjai².
JOH 12:26 Tsa² jnco³ xi³ si¹xa¹-na³, ca²ta³fi²tˀa³-na³. Jña³ nca³ coa²te⁴jna³ nca³ an³, cˀoa⁴-ti⁴ ya⁴ cˀoe¹jna³ je² xi³ si¹xa¹-na³. Tsa² jnco³ xi³ si¹xa¹-na³, je² Nˀai³-na⁴ cjai¹nca³ nta³ cˀoa⁴sje³.
JOH 12:27 Ntˀai⁴ cjai¹nca³ fao¹-le⁴ ni⁴ma⁴-na⁴. Jo¹ xian¹³. Nˀai³-na⁴, chˀa⁴sje³ntjai²-nai¹³ je² hora je²-vi⁴, to⁴nca³ coi³ xa¹ ja²ˀai⁴-nia³ je² hora je²-vi⁴.
JOH 12:28 Nˀai³-na⁴, chˀa⁴sje³je³yai³ jan³ˀain¹-li⁴. Cˀia⁴ qui³no²ˀya²-ni³le⁴ jnco³ jta⁴ ncˀa³jmi³: Je³tsˀa³sje³je³ya²³ jan³ˀain¹-na⁴, cˀoa⁴ cˀoa⁴-sˀin² cˀoa³sje³je³ya³-nca¹nia³.
JOH 12:29 Je² cho⁴ta⁴ xi³ ya⁴ tjio¹cao⁴ qui³nčhˀoe¹, cˀoa⁴qui³tso² nca³ chˀaon⁴. Xi³cˀa³ qui³tso²: A²ncje⁴ xi³ ca²fa¹cao⁴.
JOH 12:30 Jesús cˀoi⁴qui³tso²: Je² jta⁴-vi⁴ a³li² tˀa³tsˀan⁴ ja³ˀai³, to⁴nca³ tˀa³tsaon⁴³ nio¹³.
JOH 12:31 Ntˀai⁴-vi⁴ ntai⁴ cho¹son²-ni³le⁴ jo³ cjoan³ cho⁴ta⁴son³ˀnte³. Ntˀai⁴-vi⁴ je² nai⁴² xi³ va³te¹xo³ma³ son³ˀnte³-vi⁴ coi⁴chon³sje³-ni³.
JOH 12:32 An³ tsa² tjo¹mi³tjen⁴tˀa³-nia³ na³nqui³, cjoa⁴ˀai¹tˀa³tsˀi³-na³.
JOH 12:33 Coi³ cˀoa⁴qui³tso²-ni³ nca³ cˀoa⁴-sˀin² qui³tso²ya³-ni³ jo³-sˀin² nca³ coi⁴ya¹.
JOH 12:34 Cho⁴ta⁴ cˀoi⁴qui³tso²-le⁴ Jesús: Jin⁴-jin⁴ qui³no²ˀya²-lai⁴jin⁴ cjoa⁴te¹xo³ma³ xi³ cˀoa⁴tso² nca³ Cristo ti¹jna³ nca³ntsjai². A¹-ni³ cˀoi⁴si³-si¹ni³ nca³ ji³, nca³ ma³chjen¹ nca³ je² ˀnti¹-le⁴ cho⁴ta⁴ tjio¹mi³tjen⁴tˀa³-ni³ na³nqui³. ˀya¹-ni³ je² ˀnti¹-le⁴ cho⁴ta⁴.
JOH 12:35 Cˀia⁴ Jesús cˀoi⁴qui³tso²-le⁴: To⁴jo³ ti¹jna³jin³-la²sa³no³ nca³ jon² lˀi¹-vi⁴. Ti⁴mao³ ti⁴ˀa³-ni³ nca³ i³sen³-sa³no³, jme¹-ni³ nca³ tsi² coan⁴njion²-ni³no³. Je² xi³ vˀe¹ma³njion², li²coi³ ve³ jña³ fi².
JOH 12:36 Ntˀai⁴-vi⁴ ti⁴ˀa³-ni³ nca³ i³sen³-no³, ca²ta³ma³cjain¹-no³ xi³ tˀa³tsˀe⁴ je² lˀi¹-vi⁴, jme¹-ni³ nca³ ˀnti¹-le⁴ lˀi¹-ve⁴ coan⁴-si¹nio³. Cˀoi⁴qui³tso² Jesús. Cˀia⁴ qui³, tsa³cˀe²jna³ˀma³-le⁴ nca³tsˀi³.
JOH 12:37 Nta³ tsa² cˀoa⁴-sˀin² to⁴tse³ choa⁴ qui³tsjoa³-le⁴, to⁴jo³ li²coi³ coan³cjain¹-le⁴ xi³ tˀa³tsˀe⁴ Jesús,
JOH 12:38 jme¹-ni³ nca³ cˀoa⁴-sˀin² coi⁴tjo³son²-ni³ je² en¹-le⁴ Isaías xi³ qui³nchja⁴ya³ tˀa³tsˀe⁴ Ni³na¹: Señor, ˀya¹-ni³ xi³ coan³cjain¹-le⁴ je² en¹ xi³ ˀmi²yai³⁴-jin⁴. ˀya¹ xi³ coan³tsen³-le⁴ je² čhja³-le⁴ Nai³-na¹.
JOH 12:39 Coi³ nca³ li²coi³ coan³cjain¹-le⁴ nca³ nqui²jnco³cˀa² cˀoa⁴qui³tso²-nca¹ni³ Isaías:
JOH 12:40 Qui³si³xca⁴ xcon⁴, qui³si³ta²ja³ ni⁴ma⁴-le⁴, jme¹-ni³ nca³ tsi² coan⁴tsen³-ni³le⁴ cao⁴ xcon⁴, nca³ tsi² coan⁴cho⁴ya³jin³-ni³le⁴ ni⁴ma⁴-le⁴, nca³ si⁴²cˀo¹fa³ya³tˀa³-le⁴, cˀoa⁴ nca³ an³ si³nta³ nca³ je².
JOH 12:41 Je² cjoa⁴-vi⁴ cˀoa⁴qui³tso² Isaías, cˀia⁴ nca³ tsa³ve³ cjoa⁴je³ya³-le⁴ Nai³-na¹, cˀoa⁴ qui³nchja⁴ xi³ tˀa³tsˀe⁴.
JOH 12:42 Coi³ cjoa⁴ nta³ tsa² ncjin² cho⁴ta⁴ti¹tjon² coan³cjain¹-le⁴ xi³ tˀa³tsˀe⁴ Jesús. To⁴nca³ to⁴coi³ cjoa⁴ nca³ tsa³cjon¹-le⁴ cho⁴ta⁴ fariseos li²coi³ cˀoa⁴cjoan³-sˀin² tsa³ca³co¹ yao³-le⁴ nca³ coan³cjain¹-le⁴ xi³ tˀa³tsˀe⁴ Cristo, jme¹-ni³ nca³ tsi² ya⁴ coi⁴chon³sje³-si¹ni³ ya⁴³ ntˀia³ sinagoga.
JOH 12:43 Nqui²sa⁴ coan³tsjoa³que³ cjoa⁴je³ya³ xi³ cho⁴ta⁴ tsjoa¹-le⁴ cao⁴-ni³ tsa² cjoa⁴je³ya³ xi³ Ni³na¹ tsjoa¹.
JOH 12:44 To⁴nca³ Jesús nˀion¹ qui³nchja⁴, cˀoi⁴qui³tso²: Je² xi³ ma³cjain¹-le⁴ xi³ tˀa³tsˀan⁴, a³li²coi³ tsa² to⁴tˀa³tsˀan⁴ ma³cjain¹-le⁴, to⁴nca³ ma³cjain¹-le⁴ xi³ tˀa³tsˀe⁴ je² xi³ qui³si³ca³sen¹-na³.
JOH 12:45 Je² xi³ ve³-na³, cˀoa⁴²-ti⁴ ve³ je² xi³ qui³si³ca³sen¹-na³.
JOH 12:46 An³ je²ˀe⁴ son³ˀnte³-vi⁴ jo³-ni³ lˀi¹, jme¹-ni³ nca³ nca³tsˀi³-si¹ni³ xi³ ma³cjain¹-le⁴ xi³ tˀa³tsˀan⁴, a³li²coi³ jin³njion² coa⁴tio⁴ntsjai².
JOH 12:47 Je² xi³ cjoi⁴nčhˀoe¹ en¹-na⁴, cˀoa⁴ tsi² tsa² coan⁴cjain¹-le⁴, an³ a³li²coi³ tsjoa³-le⁴ cjoa⁴ñˀain³. Nca⁴ tsi² tsa² coi³ xa¹ ja²ˀai⁴-nia³ nca³ tsjoa³-le⁴ cjoa⁴ñˀain³ cho⁴ta⁴son³ˀnte³, to⁴coi³ xa¹ ja²ˀai⁴-nia³ nca³ cˀoa³sje³ntje²³ cho⁴ta⁴son³ˀnte³.
JOH 12:48 Je² xi³ chˀao³que³-na³, cˀoa⁴ tsi² cjoe¹ en¹-na⁴, tjin¹ xi³ tsjoa¹-le⁴ cjoa⁴ñˀain³. Je² en¹ xi³ qui³nchja²³, coi³ xi³ tsjoa¹-le⁴ cjoa⁴ñˀain³ cˀia⁴ nca³ coi⁴cho³cje³tˀa³ ni⁴čhjin³.
JOH 12:49 A³li² to⁴ˀan³ xi³ cˀoa⁴-sˀin² qui³nchja²³, to⁴nca³ je² Nˀai³-na¹ xi³ qui³si³ca³sen¹-na³, je² tsa³ca³te¹xo³ma³-na³ jña³-le⁴ xi³ xian¹³, cˀoa⁴ jña³-le⁴ xi³ coi³nchja²³.
JOH 12:50 ˀve³-nia¹³ nca³ je² cjoa⁴te¹xo³ma³-le⁴ je² xi³ tsjoa¹ cjoa⁴vi³jna³chon³ nca³ntsjai². Je² en¹ xi³ nchja²³, cˀoa⁴-sˀin² nchja²³ jo³-sˀin² qui³tso²-na³ Nˀai³-na¹.
JOH 13:1 Cje³ vi³tjo³-jin²sa³ sˀoi¹ pa²xco⁴. Tjin¹jin³-le⁴ Jesús nca³ je³nčhoa¹čhian³ hora-le⁴ nca³ coi⁴tjo³-ni³ son³ˀnte³, nca³ coai⁴con³-le⁴ Nˀai³-na¹. Jesús tjao²que³ coan³ nca³tsˀi³ xi³ tsˀe⁴ xi³ tjio¹ i⁴ son³ˀnte³-vi⁴, cˀoa⁴-sˀin² tjao²que³ coan³ sa³ˀnta³ xi³ je³tˀa³-ni³.
JOH 13:2 Cˀia⁴ nca³ je³coan³ tsa³cjen² nca³ njion², je² nai⁴² je³cˀoa⁴-sˀin² qui³sca³ni¹jin³ ni⁴ma⁴-le⁴ Judas, xi³ ˀnti¹-le⁴ Simón Iscariote, nca³ je² xi³ cˀoe⁴²tˀain³ na⁴jmi¹ xi³ tˀa³tsˀe⁴ Jesús.
JOH 13:3 Ve³ Jesús nca³ je² Nˀai³-na¹ cˀoa⁴-sˀin² qui³tsjoa³-le⁴ nca³yi³je³ cjoa⁴ ja⁴ya³ ntsja³, nca³ cˀoa⁴-sˀin² ja³ˀai³-ni³ tˀa³tsˀe⁴ Ni³na¹, cˀoa⁴-ti⁴ ya⁴ coai⁴con³-le⁴ Ni³na¹.
JOH 13:4 Ji³so²tjen⁴tˀa³ ya¹mi²xa⁴ nca³ je³tsa³cjen², tsa³cja³ˀa¹xin² tso⁴nca⁴-le⁴, qui³scoe¹ jnco³ toalla, tsa³cˀe¹cja¹ntia³.
JOH 13:5 Cˀia⁴ tsa³cˀe¹ya³ na³nta¹ jnco³ bandeja, tsa³ca³ne¹jon³ ntso⁴co⁴ cho⁴ta⁴-le⁴. Qui³si³tsje³jon³-ni³ toalla xi³ tji¹cja¹ntia³.
JOH 13:6 Cˀia⁴ nca³ ja³ˀai³ ca³tˀa³-le⁴ Simón Pedro, Pedro cˀoi⁴qui³tso⁴-le⁴: Señor, a³ ji³ coa⁴ne²join³ ntso⁴coa³.
JOH 13:7 Jesús cˀoi⁴qui³tso²-le⁴: Je² xi³ sˀian³ nca³ an³, li²coi³ ˀyai³ ntˀai⁴-vi⁴, to⁴nca³ coan⁴scan³-ni³ coan⁴cho⁴ya³-li².
JOH 13:8 Pedro qui³tso²-le⁴: Li²coi³ cˀia³ coa⁴ne²join³ ntso⁴coa³. Jesús qui³tso²-le⁴: Tsa² tsi² coa³ne³jon³-le²³, li²coi³ sˀe⁴-li² ˀnte³ cao⁴ an³.
JOH 13:9 Simón Pedro cˀoi⁴qui³tso²-le⁴: Señor, a³li² to⁴je²-jin² ntso⁴coa³, cˀoa⁴-ti⁴ ntsa⁴ cao⁴ jcoa³.
JOH 13:10 Jesús cˀoi⁴qui³tso²-le⁴: Je² xi³ tsa³ca³nco¹ya³, to⁴je² ntso⁴co⁴ xi³ ma³chjen¹-le⁴ nca³ va³ne¹jon³, nca³ je³tsje³ nca³yi³je³. Jon² je³tsje³ cjoaon³, nta³ tsa² tsi² nca³tsˀio³.
JOH 13:11 Jesús je³ve³-le⁴con³ ˀya³ xi³ cˀoa⁴-sˀin² cˀoe⁴²tˀain³ na⁴jmi¹ xi³ tˀa³tsˀe⁴. Coi³ cˀoa⁴qui³tso²-ni³: Li²coi³ tsje³ cjoaon³ nca³tsˀio³.
JOH 13:12 Cˀia⁴ nca³ je³tsa³ca³ne¹jon³ ntso⁴co⁴, tsa³cˀa³cja¹ tso⁴nca⁴-le⁴, tsa³cˀe²jna³tˀa³-nca¹ni³ ya¹mi²xa⁴, cˀoi⁴qui³tso²-le⁴: A³ ma³cho⁴ya³-no³ xi³ ca²si³cao⁴-no³.
JOH 13:13 Jon² Maestro cˀoa⁴ Señor ˀmi²-nao¹³. Cjai¹nca³ nta³ vi³xon¹³, nca³ coi³ nia¹³.
JOH 13:14 Ne³-ni³ tsa² an³ xi³ Señor, xi³ Maestro, ca²va³ne³joan²³ ntso⁴co³, cˀoa⁴-ti⁴ jon² ma³chjen¹-no³ nca³ ta⁴ne²jon³-nca³ñao¹³ ntso⁴co⁴ xi²nquio⁴³.
JOH 13:15 Cˀoa⁴-sˀin² ca²vˀe³jna²cho⁴ya³-no³ jo³-sˀin² nca³ an³ ca²si³cao⁴-no³. Cˀoa⁴-sˀin² ti⁴cao⁴³ xi²nquio⁴³.
JOH 13:16 Ña³qui³ cjoa⁴qui²xi⁴ ña³qui³ cjoa⁴qui²xi⁴ xi³ xin³-no³: Je² xi³ cho⁴ˀnta³ ma³, a³li² je²-jin² ti¹tjon²-le⁴ nai³-le⁴. Ni⁴je²-jin² xi³ qui³ni²ca³sen¹ ti¹tjon²-le⁴ je² xi³ qui³si³ca³sen¹ nca³ je².
JOH 13:17 Tsa² ˀya³-nio¹³ cjoa⁴ je²-vi⁴, jo¹ to⁴nta³-no³ tsa² cˀoa⁴sˀiaon⁴³.
JOH 13:18 A³li² cˀoa⁴-sˀin² nchja²³ xi³ tˀa³tsaon⁴³ nca³tsˀio³. ˀve³nia¹³ jo³ cjoan³ xi³ tsa³cja³ˀa³jian³, to⁴nca³ jme¹-ni³ nca³ cˀoa⁴-sˀin² ca²ta³vi³tjo³son²-ni³ je² xon⁴ Escritura: Je² xi³ cjen²cao⁴-na³ nio⁴xti²la⁴, qui³tsjon²-na³.
JOH 13:19 Cˀoa⁴ ti²xin³-no³ ntˀai⁴-vi⁴ to⁴nqui³-ni³ nca³ cˀoa⁴coan⁴, jme¹-ni³ nca³ coan⁴cjain¹-si¹ni³no³ nca³ an³ nia¹³ cˀia⁴ nca³ cˀoa⁴coan⁴.
JOH 13:20 Ña³qui³ cjoa⁴qui²xi⁴ ña³qui³ cjoa⁴qui²xi⁴ xi³ xin³-no³: Je² xi³ cjoe¹tjao² xi³ an³ si³ca³sen¹³, an³ xi³ cjoe¹tjao²-na³. Cˀoa⁴ je² xi³ an³ cjoe¹tjao²-na³, cjoe¹tjao² xi³ qui³si³ca³sen¹-na³.
JOH 13:21 Cˀia⁴ nca³ je³cˀoa⁴qui³tso², Jesús aon³ coan³-le⁴, qui³si³qui²xi⁴ya³: Ña³qui³ cjoa⁴qui²xi⁴ ña³qui³ cjoa⁴qui²xi⁴ xi³ xin³-no³, jnco³ xi³ jon² cˀoe⁴²tˀain³ na⁴jmi¹ xi³ tˀa³tsˀan⁴.
JOH 13:22 Cˀia⁴ nca³ˀi⁴ nca³jan¹ qui³sco²tsen³-le⁴ xi¹ncjin¹ cho⁴ta⁴-le⁴, nca³ tsi² tsa² ve³ ˀya³-ve⁴ xi³ cˀoa⁴tso²-le⁴.
JOH 13:23 Jnco³ xi³ ti⁴je²-ni³ cho⁴ta⁴-le⁴, je² xi³ Jesús cjai¹nca³ tjao²que³, ti¹jna³tˀa³-le⁴ Jesús.
JOH 13:24 Simón Pedro qui³si³cao⁴ seña, jme¹-ni³ nca³ sco¹na³nqui³-si¹ni³ ˀya³-ni³ xi³ cˀoa⁴tso²-le⁴.
JOH 13:25 Cˀia⁴ je² xi³ ti¹jna³tˀa³-le⁴ Jesús cˀoi⁴qui³tso²-le⁴: Señor, ˀya¹-ni³.
JOH 13:26 Qui³nchja⁴ Jesús: Je² ni¹ je² xi³ nio⁴xti²la⁴ ˀnchi⁴ tsjoa³-le⁴. Qui³si³ca³ˀnchi⁴ nio⁴xti²la⁴, qui³tsjoa³-le⁴ Judas Iscariote, ˀnti¹-le⁴ Simón.
JOH 13:27 Cˀia⁴ nca³ je³qui³scoe¹ nio⁴xti²la⁴ ˀnchi⁴, cˀoa⁴-sˀin² je² nai⁴² Satanás ja³ˀa³sˀen³jin³-le⁴ Judas. Cˀia⁴ Jesús cˀoi⁴qui³tso²-le⁴: Je² xi³ nˀiain²³, xi¹ti¹ tˀiain⁴.
JOH 13:28 Ni⁴ˀya³-jin² xi³ tjio¹tˀa³ ya¹mi²xa⁴ coan³cho⁴ya³-le⁴ a³-ni³ nca³ cˀoa⁴qui³tso²-ni³le⁴.
JOH 13:29 Tjin¹ cˀa³ xi³ qui³si³cja³ˀai³tsjen³ nca³ coi³ nca³ je² Judas xi³ ti¹jna³-le⁴ ˀnti¹ ca²xa⁴taon⁴, coi³ nca³ Jesús cˀoi⁴qui³tso²-le⁴: Ti⁴ntai¹³ jme³-ni³ xi³ ma³chjen¹-na¹ i⁴ sˀoi¹-vi⁴, a³xo⁴ tˀai² jo³ tjin¹-lai⁴ cho⁴ta⁴yo⁴ma⁴.
JOH 13:30 Cˀia⁴ nca³ Judas je³qui³scoe¹ nio⁴xti²la⁴, ji³tjo³ nti⁴ton⁴. Je³coan³ njion².
JOH 13:31 Cˀia⁴ nca³ je³ji³tjo³ Judas, cˀoi⁴qui³tso² Jesús: Ntˀai⁴ntai⁴ je³ji³tjo³je³ya³ ˀnti¹-le⁴ cho⁴ta⁴, cˀoa⁴ Ni³na¹ je³ji³tjo³je³ya³ xi³ tˀa³tsˀe⁴ nca³ je².
JOH 13:32 Tsa² Ni³na¹ ji³tjo³je³ya³ xi³ tˀa³tsˀe⁴, cˀoa⁴-ti⁴ Ni³na¹ cˀoa⁴sje³je³ya³ Jesús cao⁴ cjoa⁴je³ya³-le⁴ xi³ ti⁴tsˀe⁴-ni³ Ni³na¹, nti⁴ton⁴ cˀoa⁴sje³je³ya³.
JOH 13:33 ˀnti¹xti³, to⁴jo³ ti²jna⁴cao⁴-sa³no³ nqui²jnco³ tjo². Coi⁴jnchi¹sjai³-nao¹³, to⁴nca³ jo³ qui³xin³-le⁴ cho⁴ta⁴ judíos, cˀoa⁴xin³-no³ ntˀai⁴-vi⁴, jña³ nca³ cjoia¹³, jon² li²coi³ coan⁴ coa⁴nquion¹³.
JOH 13:34 Jnco³ cjoa⁴te¹xo³ma³ cho⁴tse⁴ xi³ tsjoa³-no³: Ca²ta³ma³tsjoa³chao³ xi²nquio⁴³. Jo³-sˀin² nca³ an³ coan³tsjoa³que⁴-no³, cˀoa⁴-sˀin² ca²ta³ma³tsjoa³chao³ xi²nquio⁴³.
JOH 13:35 Cˀoi⁴-sˀin² scoe⁴ nca³tsˀi³ nca³ jon² nio¹³ cho⁴ta⁴-na⁴, tsa² cˀoa⁴-sˀin² ma³tsjoa³chao³ xi²nquio⁴³.
JOH 13:36 Simón Pedro cˀoi⁴qui³tso²-le⁴: Señor, jña¹ ti³ˀmi³. Jesús qui³tso²-le⁴: Jña³ nca³ cjoia¹³, li²coi³ coan⁴-li² cˀoin¹tjen⁴nqui³-nai¹³ ntˀai⁴-vi⁴, to⁴nca³ coan⁴scan³-ni³ cˀoin¹tjen⁴nqui³-nai¹³.
JOH 13:37 Pedro qui³tso²-le⁴: Señor, a¹-ni³ nca³ tsi² coan⁴-na³ cjoi¹tjen⁴nqui³-si¹ni³le²³ ntˀai⁴-vi⁴. Je² ni⁴ma⁴-na⁴ cˀoe³jna²³ xi³ tˀa³tsi⁴.
JOH 13:38 Jesús qui³tso²-le⁴: A³ ni⁴ma⁴-li⁴ cˀoe¹jnai³ xi³ tˀa³tsˀan⁴. Ña³qui³ cjoa⁴qui²xi⁴ ña³qui³ cjoa⁴qui²xi⁴ xi³ xin³-le²³: Li²coi³ squi¹ˀntia¹ cha¹xi³cha¹ sa³ˀnta³ ji³ coi⁴jna³ˀma³cao⁴-nai¹³ jan² cˀa³.
JOH 14:1 A³li² aon³-jin² ma³-le⁴ ni⁴ma⁴-no³. Ma³cjain¹-no³ xi³ tˀa³tsˀe⁴ Ni³na¹, cˀoa⁴-ti⁴ ca²ta³ma³cjain¹-no³ xi³ tˀa³tsˀan⁴.
JOH 14:2 Ya⁴ ntˀia³-le⁴ Nˀai³-na⁴ cjai¹nca³ to⁴tjin¹ ˀnte³. Tsa² tsi² cˀoa⁴tjin¹, cˀoa⁴qui³xin³-no³. Cjoia¹³ tso²cˀoa⁴, cjoi¹ si³nta³chon³-no³ ˀnte³ xi³ tˀa³tsaon⁴³.
JOH 14:3 Tsa² cjoia¹³, tsa² si³nta³chon³-no³ ˀnte³, cjoa²ˀai⁴ nqui²ntia³-nia³. Scoe²tjao²-no³ tˀa³tsˀan⁴, jme¹-ni³ nca³ cˀoa⁴-ti⁴ jon² ya⁴ coi⁴yo³-si¹nio³, jña³ nca³ ti²jna⁴ nca³ an³.
JOH 14:4 ˀya³-nio¹³ jña³ nca³ cjoia¹³, cˀoa⁴ ˀya³-nio¹³ ntia⁴².
JOH 14:5 Tomás qui³tso²-le⁴: Señor, li²coi³ ˀyai³⁴-jin⁴ jña³ nca³ cˀoin¹³. Jo¹ coan⁴-ni³ˀni³ nca³ jchai⁴-jin⁴ ntia⁴².
JOH 14:6 Jesús qui³tso²-le⁴: An³ nia¹³ xi³ ntia⁴², an³ nia¹³ xi³ cjoa⁴qui²xi⁴, an³ nia¹³ xi³ cjoa⁴vi³jna³chon³. Ni⁴to⁴ˀya³-jin² xi³ fa³ˀai³con²-le⁴ Nˀai³-na¹, tsa² tsian² nca³ an³.
JOH 14:7 Tsa² tsa³ˀya³-ni³nao¹³, cˀoa⁴-ti⁴sˀin² tsa³ˀyao³ Nˀai³-na⁴. Va³se²tsˀia⁴-ni³ ntˀai⁴ ˀya³-nio¹³ nca³ je², cˀoa⁴ qui³cho²tsen³-lao⁴³.
JOH 14:8 Felipe qui³tso²-le⁴: Señor, ta⁴co²-na³jin⁴ Nˀai³-na¹. To⁴coan⁴-ni³na³jin⁴.
JOH 14:9 Jesús qui³tso²-le⁴: A³ to⁴cˀoa⁴² cji³tse³ ti²jna⁴cao⁴-no³, cˀoa⁴ li²coi³ tsa³ˀya³-nai¹³, Felipe. Je² xi³ tsa³ve³-na³ nca³ an³, tsa³ve³ Nˀai³-na¹. A¹-ni³ cˀoa⁴si³-si¹ni³ ta⁴co²-na³jin⁴ Nˀai³-na¹.
JOH 14:10 A³ tsi² ma³cjain¹-li² nca³ an³ ti²jna⁴coa⁴ Nˀai³-na¹, cˀoa⁴ je² Nˀai³-na¹ ti¹jna³cao⁴-na³. Je² en¹ xi³ an³ fa²cao⁴-no³, a³li² to⁴ˀan³ xi³ cˀoa⁴-sˀin² nchja²³, to⁴nca³ je² Nˀai³-na¹ xi³ ti¹jna³cao⁴-na³, je² xi³ cˀoa⁴sˀin¹ je² xa¹-vi⁴.
JOH 14:11 Ca²ta³ma³cjain¹-no³ nca³ an³ ti²jna⁴coa⁴ Nˀai³-na¹, cˀoa⁴ je² Nˀai³-na¹ ti¹jna³cao⁴-na³. Tsa² tsi² cˀoa⁴-sˀin², ca²ta³ma³cjain¹-no³ tˀa³tsˀan⁴ xi³ to⁴tˀa³tsˀe⁴ je² xa¹ xi³ ti²sˀian³.
JOH 14:12 Ña³qui³ cjoa⁴qui²xi⁴ ña³qui³ cjoa⁴qui²xi⁴ xi³ xin³-no³: Je² xi³ ma³cjain¹-le⁴ xi³ tˀa³tsˀan⁴, je² nca³yi³je³ jo³ nca³ ti²sˀian³, cˀoa⁴-ti⁴sˀin² sˀin⁴² nca³ je², sa³ˀnta³ nqui²sa⁴-sa³ cjoa⁴ˀa³to³ntjai²-le⁴, nca⁴ an³ cjoi¹con³-le⁴ Nˀai³-na¹.
JOH 14:13 To⁴jme³-ni³ xi³ si⁴je¹-lao⁴³ Nˀai³-na¹ cao⁴ jan³ˀain¹-na⁴, cˀoa⁴-sˀin² sˀian³, jme¹-ni³ nca³ cˀoa⁴-sˀin² Nˀai³-na¹ coi⁴tjo³je³ya³ xi³ to⁴tˀa³tsˀe⁴ ˀnti¹-le⁴.
JOH 14:14 Tsa² si⁴jao¹³ jme³-ni³ve⁴ cao⁴ jan³ˀain¹-na⁴, an³ cˀoa⁴-sˀian³.
JOH 14:15 Tsa² tsjoa³cha³-nao¹³, ti⁴qui³tjo³son²³ cjoa⁴te¹xo³ma³-na⁴.
JOH 14:16 Cˀoa⁴-sˀin² cˀoe³tsˀoa²³-le⁴ Nˀai³-na¹, cˀoa⁴ je² tsjoa¹ nqui²jnco³-no³ xi³ coa⁴sen⁴cao⁴-no³, jme¹-ni³ nca³ cˀoe¹jna³cao⁴ntsjai²-si¹ni³no³.
JOH 14:17 Je² xi³ Nˀai³-na¹ tsjoa¹-no³, je² Espíritu Santo xi³ ña³qui³ cjoa⁴qui²xi⁴, xi³ cho⁴ta⁴son³ˀnte³-vi⁴ li²coi³ ma³-le⁴ cjoe¹tjao² nca³ tsi² tsa² coi³ ve³, ni⁴ve³xcon³-jin². To⁴nca³ jon² ˀya³xcon³-nio¹³, nca⁴ ti¹jna³cao⁴-no³, cˀoa⁴ cjoa⁴ˀa³sˀen³jin³ ni⁴ma⁴-no³.
JOH 14:18 A³li²coi³ si³ca³tio¹jchˀan⁴-no³, cjoa²ˀai⁴con³-no³.
JOH 14:19 Nqui²jnco³ tjo², cˀia⁴ son³ˀnte³ li²coi³ ti⁴scoe⁴-ni³na³, to⁴nca³ jon² jcha⁴-nao¹³. Coi³ nca³ ti²jna⁴coan³, cˀoa⁴-ti⁴ jon² coi⁴yo³chon³.
JOH 14:20 Cˀoa⁴ coi³ ni⁴čhjin³-ve⁴ jcha⁴-nio¹³ nca³ an³ ti²jna⁴coa⁴ Nˀai³-na¹, cˀoa⁴ jon² ti³yo³cao⁴-nao¹³, cˀoa⁴ an³ ti²jna⁴cao⁴-no³.
JOH 14:21 Je² xi³ tjin¹-le⁴ cjoa⁴te¹xo³ma³-na⁴, xi³ si¹qui³tjo³son² coi³ cjoa⁴te¹xo³ma³-vi⁴, je²-vi⁴ xi³ tsjoa³que³-na³. Je² xi³ tsjoa³que³-na³ nca³ an³, cˀoa⁴-sˀin² Nˀai³-na⁴ tsjoa³que³ nca³ je², cˀoa⁴ an³ tsjoa³que⁴ nca³ je². Cˀoa⁴-ti⁴ coa³co³son²tsen³-le⁴ yao³-na⁴.
JOH 14:22 Judas, a³li² je² xi³ Iscariote ˀmi², qui³tso²-le⁴: Señor, jme¹ xi³ coan³ nca³ jin⁴ coa⁴co²son²tsen³-na³jin⁴ yao³-li⁴, nca³ tsi² scoe⁴-ni³ nca³tsˀi³ cho⁴ta⁴.
JOH 14:23 Jesús qui³tso²-le⁴: Je² xi³ tsjoa³que³-na³, si⁴²qui³tjo³son² en¹-na⁴. Nˀai³-na⁴ tsjoa³que³ nca³ je², cjoa²ˀai⁴chon³-lai⁴jin⁴, cˀoa⁴ coi⁴yo³coai⁴-jin⁴.
JOH 14:24 Je² xi³ tsi² tsjoa³que³-na³, li²coi³ si¹qui³tjo³son² en¹-na⁴. Je² en¹ xi³ qui³no²ˀyao²³ a³li² tsˀan⁴-jian²³, tsˀe⁴ Nˀai³-na¹ xi³ qui³si³ca³sen¹-na³.
JOH 14:25 Je² en¹ xi³ cˀoi⁴sˀin² tsa³cja²cao⁴-no³ nca³ ti²jna⁴jin³-no³.
JOH 14:26 Je² Nˀai³-na¹ si⁴²ca³sen¹ nca³jao³-na⁴ je² Espíritu Santo, je² xi³ va³sen¹cao⁴. Je²-vi⁴ xi³ coa⁴co²ya³-no³ nca³yi³je³, cˀoa⁴ si⁴²cja³ˀai³tsjen³-no³ nca³yi³je³ jo³ qui³xin³-no³.
JOH 14:27 An³ si³qui³njen³nchˀan¹jian³ ni⁴ma⁴-no³. Jo³-sˀin² nca³ nchˀan¹ ti²jna⁴, cˀoa⁴-sˀin² tsjoa³-no³. A³li² cˀoa⁴-sˀin² si³qui³njen³nchˀan¹jian³ ni⁴ma⁴-no³, jo³-sˀin² tsjoa¹ son³ˀnte³-vi⁴. A³li² aon³-jin² ma³-le⁴ ni⁴ma⁴-no³, a³li² jcon³-jion²³.
JOH 14:28 Qui³no²ˀya²-nio¹³ jo³ qui³xin³-no³: Cjoia¹³, cjoa²ˀai⁴con³-nca¹ni³no³. Tsa² coan³tsjoa³cha³-nao¹³, cjai¹nca³ to⁴tsjoa³ coan³-no³, nca⁴ cˀoa⁴qui³xian³ nca³ cjoi¹con³-le⁴ Nˀai³-na¹. Je² Nˀai³-na¹ nqui²sa⁴ ti¹tjon² cao⁴-ni³ tsa² an³.
JOH 14:29 Cˀoa⁴qui³xin³-no³ to⁴nqui³-ni³ nca³ cˀoa⁴coan⁴, jme¹-ni³ nca³ coan⁴cjain¹-si¹ni³no³ cˀia⁴ nca³ cˀoa⁴coan⁴.
JOH 14:30 A³li²coi³ ti⁴tse³ coi³nchja²cao⁴-ni³no³, nca³ nčhoa¹ je² nai⁴² xi³ va³te¹xo³ma³ son³ˀnte³-vi⁴. To⁴nca³ ni⁴jme³-jin² xi³ tjin¹-le⁴ xi³ tˀa³tsˀan⁴.
JOH 14:31 Cˀoa⁴-sˀin² sˀian³ jo³-sˀin² nca³ Nˀai³-na¹ qui³tsjoa³-na³ cjoa⁴te¹xo³ma³, jme¹-ni³ nca³ cˀoa⁴-sˀin² ca²ta³ve³-ni³ son³ˀnte³-vi⁴ nca³ tsjoa³que⁴ Nˀai³-na¹. Ti²so⁴tjaon⁴³ cjoian¹.
JOH 15:1 An³ nia¹³ ya¹je³ xi³ ña³qui³ cjoa⁴qui²xi⁴, cˀoa⁴ je² Nˀai³-na⁴ xi³ si¹coi²nta⁴.
JOH 15:2 Nca³yi³je³ ya¹ntsa⁴ xi³ tsi² tsa² va³-le⁴ to³, fa³ˀa¹xin². Nca³yi³je³ ya¹ntsa⁴ xi³ va³-le⁴ to³, va³te³tˀa³cˀa³, jme¹-ni³ nca³ nqui²sa⁴ to⁴ncjin² to³ coa⁴-si¹ni³le⁴.
JOH 15:3 Jon² je³cˀoa⁴-sˀin² coan³tsjao³, xi³ to⁴tˀa³tsˀe⁴ je² en¹ xi³ qui³nchja²³-no³.
JOH 15:4 Ti⁴yo³cao⁴-nao¹³, cˀoa⁴ an³ coa²te⁴jna³cao⁴-no³. Jo³-ni³ tsa² jnco³ ya¹ntsa⁴ xi³ tsi² tsa² va³-le⁴ to³ nca³ to⁴je², tsa² tsi² ti¹jna³tˀa³nˀion¹ ya¹je³, cˀoa⁴-ti⁴sˀin² li²jme³ xi³ coan⁴ sˀiaon⁴³ nca³ jon², tsa² tsi² cˀoa⁴-sˀin² coi⁴yo³cao⁴-nao¹³.
JOH 15:5 An³ nia¹³ ya¹je³, cˀoa⁴ jon² nio¹³ ya¹ntsa⁴. Je² xi³ an³ ti¹jna³cao⁴-na³, cˀoa⁴ an³ ti²jna⁴coa⁴ nca³ je², je²-vi⁴ xi³ cjai¹nca³ to⁴ncjin² to³ va³-le⁴. Li²jme³ xi³ ma³ nˀiaon²³ nca³ jon², tsa² ti³yo³tˀa³xin²-nao¹³.
JOH 15:6 Je² xi³ tsi² ti¹jna³cao⁴-na³, cˀoa⁴-sˀin² tjo¹xin² jo³-ni³ tsa² jnco³ ya¹ntsa⁴ xi³ tsi² tsa² jme³ xi³ tsjoa¹, cˀoa⁴ xi¹-ˀni³. Cˀia⁴ sˀe⁴xco¹, sˀe⁴yo³jin³ lˀi¹, cˀoa⁴ ti²-ˀni³.
JOH 15:7 Tsa² an³ ti³yo³cao⁴-nao¹³, cˀoa⁴ tsa² en¹-na⁴ tjin¹jin³-no³, nca³yi³je³ xi³ me³-no³, ti⁴jao¹³, cˀoa⁴-sˀin² coi⁴tjo³son²-no³.
JOH 15:8 Coi³-vi⁴ xi³ cˀoa⁴-sˀin² vˀa³sje³je³ya³ Nˀai³-na⁴, nca³ cˀoa⁴-sˀin² to⁴ncjin² to³ coa⁴-no³. Cˀoa⁴-sˀin² jcha⁴qui²xi⁴-no³ nca³ cho⁴ta⁴-na⁴ mao³.
JOH 15:9 Jo³-sˀin² nca³ tsjoa³que³-na³ Nˀai³-na¹, cˀoa⁴-sˀin² tsjoa³que⁴-no³. Ti⁴yo³cao⁴³ cjoa⁴tsjoa³cha³-na⁴.
JOH 15:10 Tsa² si⁴qui³tjo³son²³ cjoa⁴te¹xo³ma³-na⁴, coi⁴yo³cao⁴³ cjoa⁴tsjoa³cha³-na⁴, jo³-sˀin² nca³ an³ qui³si³qui³tjo³soan²³ je² cjoa⁴te¹xo³ma³-le⁴ Nˀai³-na⁴, cˀoa⁴ ti²jna⁴coa⁴ cjoa⁴tsjoa³cha³-le⁴.
JOH 15:11 Je² en¹-vi⁴ tsa³cja²cao⁴-no³, jme¹-ni³ nca³ je² cjoa⁴tsjoa³-na⁴ sˀe⁴jna³jin³-si¹ni³ ni⁴ma⁴-no³, cˀoa⁴ je² cjoa⁴tsjoa³-no³ coan⁴tse³ya³-si¹ni³.
JOH 15:12 Je²-vi⁴ cjoa⁴te¹xo³ma³-na⁴: Ca²ta³ma³tsjoa³chao³ xi²-nquio⁴³, jo³-sˀin² tsjoa³que⁴-no³ nca³ an³.
JOH 15:13 Li²ˀya³-sa³ xi³ nqui²sa⁴ tsjoa³que³ jo³-ni³ jnco³ xi³ tsjoa¹ntjai² ni⁴ma⁴-le⁴ xi³ tˀa³tsˀe⁴ mi²yo⁴-le⁴.
JOH 15:14 Jon² nio¹³ mi²yo⁴-na⁴, tsa² cˀoa⁴-sˀin² sˀiaon⁴³ nca³yi³je³ jo³-sˀin² vˀe³ne²³-no³.
JOH 15:15 Li²coi³ ti⁴cho⁴ˀnta³-na⁴ xin¹-ni³no³, nca⁴ je² cho⁴ˀnta³ li²coi³ ve³ jme³ xi³ sˀin¹ nai³-le⁴. To⁴nca³ mi²yo⁴-na⁴ qui³xin³-no³, nca⁴ cˀoa⁴-sˀin² qui³xin³ya³-no³ nca³yi³je³ cjoa⁴ xi³ qui³nčhˀoe³-le⁴ Nˀai³-na⁴.
JOH 15:16 A³li² jon²-jion²³ qui³chjoe¹jin³-nao¹³, to⁴nca³ an³ qui³scoe²jin³-no³ nca³ jon². Qui³si³qui³ncha²nta³-no³, jme¹-ni³ nca³ coa⁴nquin¹-nio³, cˀoa⁴ nta³ si⁴xa¹-si¹nio³, cˀoa⁴ je² xa¹-no³ sa⁴tio²-si¹ni³, jme¹-ni³ nca³ Nˀai³-na¹ tsjoa¹-ni³no³ nca³yi³je³ xi³ ni²je¹-lao⁴³ cao⁴ jan³ˀain¹-na⁴.
JOH 15:17 Je²-vi⁴ xi³ cˀoa⁴-sˀin² vˀe³ne²³-no³: Ca²ta³ma³tsjoa³chao³ xi²nquio⁴³.
JOH 15:18 Tsa² cho⁴ta⁴son³ˀnte³ jti³que³-no³, ˀya³-nio¹³ nca³ an³ ti¹tjon² coan³jti³que³-na³.
JOH 15:19 Tsa² i⁴ tsaon⁴³ i⁴ son³ˀnte³-vi⁴, je² cho⁴ta⁴son³ˀnte³ tsjoa³que³ xi³ tsˀe⁴. To⁴nca³ jon² li²coi³ i⁴ tsaon⁴³, to⁴sa³ an³ qui³scoe²jin³-ni³no³ cho⁴ta⁴son³ˀnte³. Coi³ nca³ jti³que³-ni³no³ cho⁴ta⁴son³ˀnte³-vi⁴.
JOH 15:20 Nta³ ca²ta³fa³ˀai³tsjen³-no³ je² en¹ xi³ qui³xin³-no³: Je² xi³ cho⁴ˀnta³ ma³, a³li² je²-jin² ti¹tjon²-le⁴ nai³-le⁴. Tsa² an³ chˀao³ qui³si³cao⁴-na³, cˀoa⁴-ti⁴ jon² chˀao³ si⁴²cao⁴-no³. Tsa² qui³si³qui³tjo³son² en¹-na⁴, cˀoa⁴-ti⁴ si⁴²qui³tjo³son² tsaon⁴³.
JOH 15:21 To⁴ña³qui³ cˀoa⁴-sˀin² si⁴²cao⁴-no³ xi³ to⁴tˀa³tsˀan⁴, nca⁴ tsi² tsa² coi³ ve³xcon³ je² xi³ qui³si³ca³sen¹-na³.
JOH 15:22 Tsa² tsi² je²ˀe⁴, cˀoa⁴ tsa² tsi² tsa² tsa³cja³coa⁴, a³li²coi³ je¹ tjin¹-le⁴ˀni³. To⁴nca³ ntˀai⁴-vi⁴ ntai⁴ li²jme³ xqui³ tjin¹-le⁴ xi³ tˀa³tsˀe⁴ je¹-le⁴.
JOH 15:23 Je² xi³ an³ jti³que³-na³, cˀoa⁴-ti⁴ jti³que³ Nˀai³-na⁴.
JOH 15:24 Tsa² tsi² cˀoa⁴qui³sˀian³ jin³-le⁴ nca³ je², je² cjoa⁴ xi³ ni⁴ˀya³-jin²sa³ cˀoa⁴qui³sˀin³, a³li²coi³ je¹ tjin¹-le⁴ˀni³. To⁴-nca³ je³tsa³ve³-na³jin⁴, cˀoa⁴ coan³jti³que³-na³jin⁴ an³ cao⁴ Nˀai³-na⁴.
JOH 15:25 Cˀoa⁴-sˀin² ca²ta³vi³tjo³son²-ni³ je² en¹ xi³ tji¹tˀa³ je² cjoa⁴te¹xo³ma³-le⁴: Tsi² tsa² jme³ cjoa⁴ xi³ tjin¹ nca³ cˀoa⁴-sˀin² coan³jti³que³-na³.
JOH 15:26 To⁴nca³ cˀia⁴ nca³ cjoa⁴ˀai¹ je² xi³ va³sen¹cao⁴, xi³ an³ si³ca³sen¹³-no³ tˀa³tsˀe⁴ Nˀai³-na¹, je² Espíritu Santo xi³ ña³qui³ cjoa⁴qui²xi⁴, xi³ ya⁴ fa³ˀai³-ni³ Nˀai³-na¹, je² xi³ tsjoa¹ en¹-le⁴ xi³ tˀa³tsˀan⁴.
JOH 15:27 Cˀoa⁴-ti⁴ jon² cˀoao⁴³ en¹-no³ nca⁴ cˀoa⁴-sˀin² ti³yo³cao⁴-nao¹³ jo³ sa³ˀnta³ nca³ ti¹tjon².
JOH 16:1 Je² cjoa⁴-vi⁴ tsa³cja³cao⁴-no³, jme¹-ni³ nca³ tsi² tsao⁴tˀa³xin²-si¹nio³.
JOH 16:2 Cˀaon⁴sje³-no³ ntˀia³ sinagoga. Cjoa⁴ˀai¹ hora cˀia⁴ nca³ to⁴ˀya³-ni³ xi³ si⁴²cˀen³-no³ si⁴²cja³ˀai³tsjen³ nca³ cˀoa⁴-sˀin² si⁴²xa¹-le⁴ Ni³na¹.
JOH 16:3 Je²-vi⁴ cjoa⁴ cˀoa⁴si⁴²cao⁴-no³, nca⁴ tsi² tsa² ve³xcon³ Nˀai³-na¹ cao⁴ an³.
JOH 16:4 Cˀoa⁴qui³xin³-no³ je² cjoa⁴-vi⁴, jme¹-ni³ nca³ cjoa⁴ˀai¹tsjen³-si¹ni³no³ nca³ je³cˀoa⁴qui³xin³-no³, cˀia⁴ nca³ cjoa⁴ˀai¹ hora je²-ve⁴. A³li²coi³ cˀoa⁴qui³xin³-no³ nca³ ti¹tjon², nca⁴ an³ tsa³ca²te⁴jna³cao⁴-no³.
JOH 16:5 To⁴nca³ je³ti²fi³con³-le⁴ je² xi³ qui³si³ca³sen¹-na³. Ni⁴ˀya³-jin² xi³ jon² xi³ tso²-na³: Jña¹ ti³ˀmi³.
JOH 16:6 To⁴nca³ cjai¹nca³ to⁴va³-le⁴ ni⁴ma⁴-no³, nca⁴ tsa³cja³cao⁴-no³ je² cjoa⁴-vi⁴.
JOH 16:7 Cˀoa⁴ ti²xin³-no³ xi³ cjoa⁴qui²xi⁴: Cjai¹nca³ to⁴ma³chjen¹-no³ nca³ an³ cjoia¹³. Tsa² tsi² tsa² cjoia¹³, li²coi³ cjoa⁴ˀai¹con³-no³ je² xi³ va³sen¹cao⁴. Tsa² an³ cjoia¹³, si³ca³sen¹³-no³ je² xi³ va³sen¹cao⁴.
JOH 16:8 Cˀia⁴ nca³ je² cjoa⁴ˀai¹, cˀoa⁴-sˀin² si⁴²qui²xi⁴ya³-le⁴ cho⁴ta⁴son³ˀnte³-vi⁴ je¹-le⁴, cˀoa⁴ si⁴²qui²xi⁴ya³-le⁴ cjoa⁴qui²xi⁴ xi³ tjin¹-na³, cˀoa⁴ si⁴²qui²xi⁴ya³-le⁴ nca³ sˀe⁴nta³jin³ cjoa⁴.
JOH 16:9 Si⁴²qui²xi⁴ya³-le⁴ je¹-le⁴, nca⁴ tsi² tsa² ma³cjain¹-le⁴ xi³ tˀa³tsˀan⁴.
JOH 16:10 Si⁴²qui²xi⁴ya³-le⁴ cjoa⁴qui²xi⁴ xi³ tjin¹-na³, nca⁴ cjoi¹con³-le⁴ Nˀai³-na⁴, cˀoa⁴ li²coi³ ti⁴jcha⁴-ni³nao¹³.
JOH 16:11 Si⁴²qui²xi⁴ya³-le⁴ nca³ sˀe⁴nta³jin³ cjoa⁴, nca⁴ je² nai⁴² xi³ va³te¹xo³ma³ son³ˀnte³-vi⁴ ti¹jna³ne²-le⁴ cjoa⁴ñˀain³.
JOH 16:12 To⁴jo³ tjin¹-sa³na³ cjoa⁴ xi³ cˀoa⁴xin³-no³, to⁴nca³ ntˀai⁴-vi⁴ li²coi³ coan⁴cho⁴ya³-no³.
JOH 16:13 Cˀia⁴ nca³ cjoa⁴ˀai¹ je² Espíritu Santo xi³ ña³qui³ cjoa⁴qui²xi⁴, je² xi³ si⁴²qui³ncha¹ya³ntia³-no³ nca³yi³je³ xi³ ña³qui³ cjoa⁴qui²xi⁴, nca⁴ tsi² tsa² to⁴je² xi³ cˀoa⁴-sˀin² coi⁴nchja⁴, to⁴cˀoa⁴-sˀin² coi⁴nchja⁴ jña³-le⁴ xi³ cjoi⁴nčhˀoe¹, cˀoa⁴-sˀin² si⁴²cji³nčhˀoe¹-no³ jme³-sa³ni³ cjoa⁴ xi³ cjoa⁴ˀai¹.
JOH 16:14 Je² xi³ cˀoa⁴sje³je³ya³-na³, nca⁴ scoe¹ xi³ tsˀan⁴, cˀoa⁴ si⁴²cji³nčhˀoe¹-no³.
JOH 16:15 Je² nca³yi³je³ xi³ tjin¹-le⁴ Nˀai³-na¹, tsˀan⁴ nia¹³. Coi³ cˀoa⁴ca²xin³-nia³ nca³ scoe¹ xi³ tsˀan⁴, cˀoa⁴ si⁴²cji³nčhˀoe¹-no³.
JOH 16:16 Jnco³ tjo², cˀia⁴ li²coi³ ti⁴jcha⁴-ni³nao¹³. Nqui²jnco³ tjo², cˀia⁴ jcha⁴-nao¹³, nca⁴ cjoi¹con³-le⁴ Nˀai³-na¹.
JOH 16:17 Cˀia⁴ cˀa³ cho⁴ta⁴-le⁴ tsa³cja¹cao⁴ xi¹ncjin¹: Jme¹-ni³ xo⁴ tso²-le⁴vi⁴. Jnco³ tjo², cˀia⁴ li²coi³ ti⁴jcha⁴-ni³nao¹³. Nqui³jnco³ tjo², cˀia⁴ jcha⁴-nao¹³, nca⁴ cjoi¹con³-le⁴ Nˀai³-na¹.
JOH 16:18 Cˀoi⁴qui³tso²: Jme¹-ni³ xo⁴ tso²-le⁴ve⁴: Jnco³ tjo². Li²coi³ ma³cho⁴ya³-na¹ jo³ tso².
JOH 16:19 Tsen³ coan³-le⁴ Jesús nca³ me³-le⁴ nca³ sco¹na³nqui³-le⁴, cˀoa⁴ qui³tso²-le⁴: A³ cho¹na³nqui³-lao⁴³ xi²nquio⁴³ jo³ ca²xian³: Jnco³ tjo², cˀia⁴ li²coi³ ti⁴jcha⁴-ni³nao¹³. Nqui²jnco³ tjo², cˀia⁴ jcha⁴-nao¹³.
JOH 16:20 Ña³qui³ cjoa⁴qui²xi⁴ ña³qui³ cjoa⁴qui²xi⁴ xi³ xin³-no³: Cjai¹nca³ to⁴chi¹ˀntao¹³, jo³ to⁴coan⁴va³-no³, to⁴nca³ je² son³ˀnte³ cjai¹nca³ to⁴tsjoa³ coan⁴-le⁴. Nta³ tsa² jon² va³ coan⁴-no³, je² cjoa⁴va³-no³ cjoa⁴tsjoa³ coan⁴.
JOH 16:21 Cˀia⁴ nca³ jnco³ chjon⁴² vˀe¹ ˀnti¹, tse³ cjoa⁴ñˀain³ vˀe¹-ni³, nca⁴ je³ja³ˀai³ hora-le⁴. To⁴nca³ cˀia⁴ nca³ je³tsa³cˀe¹ ˀnti¹, li²coi³ ti⁴fa³ˀai³tsjen³-ni³le⁴ je² cjoa⁴ñˀain³ xi³ ca²fa³ˀa³to³. To⁴cjoa⁴tsjoa³ xi³ tjin¹-le⁴ nca³ jnco³ cho⁴ta⁴ ca²tsin³ i⁴ son³ˀnte³.
JOH 16:22 Cˀoa⁴-ti⁴ jon² cjoa⁴qui²xi⁴ cjai¹nca³ va³-no³ ntˀai⁴-vi⁴, to⁴nca³ scoe³ nqui²jnco³cˀa²-no³. Cjai¹nca³ coan⁴tsjoa³-le⁴ ni⁴ma⁴-no³. Ni⁴ˀya³-jin² xi³ cjoa⁴ˀa²xin²-no³ cjoa⁴tsjoa³-no³.
JOH 16:23 Cˀia⁴ ni⁴čhjin³-ve⁴ ni⁴jme³-jin² xi³ cho⁴na³nqui³-nao¹³. Ña³qui³ cjoa⁴qui²xi⁴ ña³qui³ cjoa⁴qui²xi⁴ xi³ xin³-no³, to⁴jme³-ni³ xi³ si⁴je¹-lao⁴³ Nˀai³-na¹ cao⁴ jan³ˀain¹-na⁴, je² tsjoa¹-no³.
JOH 16:24 Sa³ˀnta³ ntˀai⁴-vi⁴ ni⁴jme³-jin² xi³ ti³ma³ni²jao¹³ cao⁴ jan³ˀain¹-na⁴. Ti⁴jao¹³, cˀoa⁴-sˀin² cˀoai⁴-no³, jme¹-ni³ nca³ cˀoa⁴-sˀin² cjoa⁴tsjoa³-no³ coan⁴tse³ya³-si¹ni³.
JOH 16:25 Je² en¹ tsa³cja³cao⁴-ni³no³ cao⁴ cjoa⁴xco¹son². Cjoa⁴ˀai¹ hora cˀia⁴ nca³ tsi² tsa² ti⁴cjoa²cao⁴-ni³no³ cao⁴ cjoa⁴xco¹son², to⁴nca³ si³cji³nčhˀoe¹tsen³-no³ xi³ tˀa³tsˀe⁴ Ni³na¹.
JOH 16:26 Cˀia⁴ ni⁴čhjin³-ve⁴ si⁴jao¹³ cao⁴ jan³ˀain¹-na⁴. A³li²coi³ cˀoa⁴xin³-no³ nca³ an³ cˀoe³tsˀoa²³-le⁴ Nˀai³-na¹ xi³ tˀa³tsaon⁴³.
JOH 16:27 Ti⁴je²-ni³ Nˀai³-na¹ tsjoa³que³-no³ nca⁴ je³coan³tsjoa³cha³-nao¹³, cˀoa⁴ je³coan³cjain¹-no³ nca³ ya⁴ ji²tjo⁴-nia³ Ni³na¹.
JOH 16:28 Ji²tjo⁴-nia³ Nˀai³-na¹, ja²ˀa⁴sˀen³ son³ˀnte³. Cˀoe³jna²³-nia³ son³ˀnte³, cjoi¹con³-le⁴ Nˀai³-na¹.
JOH 16:29 Cho⁴ta⁴-le⁴ qui³tso²-le⁴: Coe⁴-ni³ ntˀai⁴-vi⁴, ti³no²cjoa⁴tsain³. Ni⁴jme³-jin² cjoa⁴xco¹son² si³.
JOH 16:30 Je³ˀyai³⁴-jin⁴ ntˀai⁴ nca³ ji³ ni¹³ xi³ ˀyai³ nca³yi³je³, li²coi³ ma³chjen¹-li² nca³ ˀya³ xi³ sco¹na³nqui³-li². Cˀoa⁴-sˀin² ma³cjain¹-na³jin⁴ nca³ ji²tjo⁴-ni³ Ni³na¹.
JOH 16:31 Jesús qui³tso²-le⁴: A³ ma³cjain¹-no³ ntˀai⁴.
JOH 16:32 Coe⁴-ni³ cjoa⁴ˀai¹ hora, cˀoa⁴ je³ja³ˀai³, cˀia⁴ nca³ jnco¹jnco¹³ tsao⁴va³-nio³ jña³ nca³ tsaon⁴³. To⁴ˀan³ si⁴cˀe¹jna³-nao¹³. To⁴nca³ li² to⁴ˀan³-jin² ti²jna⁴, nca⁴ je² Nˀai³-na¹ ti¹jna³cao⁴-na³.
JOH 16:33 Je² cjoa⁴-vi⁴ je³qui³xin³-no³, jme¹-ni³ nca³ cao⁴ an³ coi⁴njen³nchˀan¹jin³-si¹ni³no³. I⁴ son³ˀnte³-vi⁴ cjoa⁴ñˀain³ chja⁴ˀao²³, to⁴nca³ ca²ta³ma³nˀion¹-ta³con²³. An³ je³qui³si³qui³njen³-le⁴ son³ˀnte³.
JOH 17:1 Je² en¹-vi⁴ qui³nchja⁴ Jesús, qui³sco²tsen³ncˀa³, cˀoi⁴qui³tso²: Nˀai³, je² hora je³ji³cho²ca³, chˀa⁴sje³je³yai³ ˀnti¹-li⁴, jme¹-ni³ nca³ cˀoa⁴-ti⁴ ˀnti¹-li⁴ cˀoa⁴sje³je³ya³-ni³li².
JOH 17:2 Jo³-sˀin² nca³ tsa³cˀai²-lai⁴ cjoa⁴te¹xo³ma³ xi³ tˀa³tsˀe⁴ nca³tsˀi³ cho⁴ta⁴, jme¹-ni³ nca³ tsjoa¹-si¹ni³le⁴ cjoa⁴vi³jna³chon³ nca³ntsjai² nca³tsˀi³ xi³ tsa³cˀai²-lai⁴.
JOH 17:3 Je² xi³ cjoa⁴vi³jna³chon³ nca³ntsjai², nca³ cˀoa⁴-sˀin² scoe⁴-li² xi³ to⁴jnco³ ji³ Ni³na¹ xi³ ña³qui³ cjoa⁴qui²xi⁴, cˀoa⁴ scoe⁴ Jesucristo je² xi³ qui³ni²ca³sain¹³.
JOH 17:4 An³ tsˀa³sje³je³ya³-le²³ i⁴ son³ˀnte³. Je³qui³si³jncoa³ je² xa¹ xi³ ji³ tsa³cˀai²-nai¹³.
JOH 17:5 Ntˀai⁴-vi⁴ Nˀai³, cˀoa⁴-sˀin² chˀa⁴sje³je³ya³-nai¹³ ya⁴tˀa³-li⁴ nca³ ji³, cao⁴ je² cjoa⁴je³ya³-ve⁴ xi³ qui³sˀe³-na³ cˀia⁴ nca³ tsa³ca²te⁴jna³tˀa³-le²³ cˀia⁴ nca³ cje³ tsin²-jin² son³ˀnte³.
JOH 17:6 Je² cho⁴ta⁴ xi³ tsa³cˀai²-nai¹³ i⁴ son³ˀnte³-vi⁴, an³ tsa³ca³co³son²tsen³-le⁴ jo³ cjoain³ nca³ ji³. Tsi⁴ ni¹³, cˀoa⁴ ji³ tsa³cˀai²-nai¹³. Qui³si³qui³tjo³son² en¹-li⁴.
JOH 17:7 Ntˀai⁴-vi⁴ je³tsa³ve³ nca³ nca³yi³je³ cjoa⁴ xi³ tsa³cˀai²-nai¹³ tsi⁴ ni¹³.
JOH 17:8 Nca⁴ je² en¹ xi³ tsa³cˀai²-nai¹³ cˀoa⁴-sˀin² qui³tsjoa³-le⁴, cˀoa⁴ je² qui³scoe¹. Tsa³ve³ nca³ cjoa⁴qui²xi⁴ nca³ ja²ˀai⁴-nia³ xi³ tˀa³tsi⁴. Cˀoa⁴-sˀin² coan³cjain¹-le⁴ nca³ ji³ qui³ni²ca³sen¹-nai¹³.
JOH 17:9 An³ vˀe³tsˀoa³ntje²³ nca³ je². A³li² je² cho⁴ta⁴son³ˀnte³-vi⁴ vˀe³tsˀoa³ntje²³, to⁴je² cho⁴ta⁴ xi³ ji³ tsa³cˀai²-nai¹³, nca⁴ je² xi³ tsi⁴.
JOH 17:10 Je² nca³tsˀi³ xi³ tsˀan⁴, tsi⁴ ni¹³. Cˀoa⁴ je² xi³ tsi⁴, tsˀan⁴ nia¹³. Ji²tjo⁴je³ya³-nia¹³ xi³ to⁴tˀa³tsˀe⁴.
JOH 17:11 Li²coi³ ti⁴ˀi⁴ ti²jna⁴-nia³ i⁴ son³ˀnte³-vi⁴, to⁴nca³ je² i⁴ tjio¹ i⁴ son³ˀnte³-vi⁴. An³ cjoi¹con³-le²³ nca³ ji³. Nˀai³tsje³, nta³ ti⁴ca³tio²tjoa²nqui³ nca³nˀion¹-li⁴ je² xi³ cao⁴ jan³ˀain¹-li⁴ tsa³cˀai²-nai¹³.
JOH 17:12 Cˀia⁴ nca³ tsa³ca²te⁴jna³coa⁴ i⁴ son³ˀnte³-vi⁴, an³ qui³si³ca³tio²tjoa²³ cao⁴ jan³ˀain¹-li⁴. Je² xi³ ji³ tsa³cˀai²-nai¹³, cˀoa⁴-sˀin² qui³si³coi²nta⁴. Ni⁴jnco³-jin² qui³cha³, to⁴je² xi³ cjoe⁴tˀa³ ni⁴čhjin³-le⁴ cha⁴ nca³ntsjai², jme¹-ni³ nca³ cˀoa⁴-sˀin² ca²ta³vi³tjo³son²-ni³ je² xon⁴ Escritura.
JOH 17:13 To⁴nca³ ntˀai⁴-vi⁴ cjoi¹con³-le²³. Je² en¹-vi⁴ xi³ nchja²³ i⁴ son³ˀnte³-vi⁴, jme¹-ni³ nca³ cˀoa⁴-sˀin² coan⁴tse³ya³-si¹ni³ je² cjoa⁴tsjoa³-na⁴ ja⁴jin³ ni⁴ma⁴-le⁴.
JOH 17:14 An³ qui³tsjoa³-le⁴ en¹-li⁴. Je² cho⁴ta⁴son³ˀnte³ coan³jti³que³ cho⁴ta⁴-na⁴, nca⁴ li² tsˀe⁴ son³ˀnte³-jin², jo³-ni³ nca³ cˀoa⁴-ti⁴ an³ li² tsˀe⁴ son³ˀnte³-jian²³.
JOH 17:15 A³li²coi³ vˀe³tsˀoa²³-nia³ nca³ cha³ˀa²xin²-lai⁴ son³ˀnte³ cho⁴ta⁴-na⁴. To⁴coi³ xi³ vˀe³tsˀoa³ntje²³ nca³ cˀoa⁴-sˀin² si⁴coi²ntai⁴, jme¹-ni³ nca³ je² xi³ tsˀen⁴ li²coi³ si⁴²cao⁴-si¹ni³.
JOH 17:16 A³li² tsˀe⁴ son³ˀnte³-jin², jo³-ni³ nca³ cˀoa⁴-ti⁴ an³ li² tsˀe⁴ son³ˀnte³-jian²³.
JOH 17:17 Ti⁴ca³tio²nta³tsjai³ xi³ to⁴tˀa³tsˀe⁴ cjoa⁴qui²xi⁴-li⁴. Je² en¹-li⁴ xi³ ña³qui³ cjoa⁴qui²xi⁴.
JOH 17:18 Jo³-sˀin² nca³ qui³ni²ca³sen¹-nai¹³ nca³ an³ i⁴ son³ˀnte³-vi⁴, cˀoa⁴-ti⁴sˀin² qui³si³ca³sen¹³ je² cho⁴ta⁴-na⁴ i⁴ son³ˀnte³.
JOH 17:19 Xi³ tˀa³tsˀe⁴ cˀoa⁴-sˀin² vˀe²jna⁴nta³tsje³-le⁴ yao³-na⁴, jme¹-ni³ nca³ cˀoa⁴-ti⁴ je² ña³qui³ cjoa⁴qui²xi⁴ coa⁴tio²nta³tsje³-si¹ni³.
JOH 17:20 A³li² tsa² to⁴je² cho⁴ta⁴-vi⁴ xi³ vˀe³tsˀoa³ntje²³, to⁴nca³ cˀoa⁴-ti⁴ vˀe³tsˀoa³ntje²³ je² xi³ coan⁴cjain¹-le⁴ xi³ tˀa³tsˀan⁴, xi³ to⁴tˀa³tsˀe⁴ en¹-le⁴ je² cho⁴ta⁴-vi⁴,
JOH 17:21 jme¹-ni³ nca³ to⁴jnco³ coan⁴-si¹ni³ nca³tsˀi³, jo³-ni³ nca³ ji³, Nˀai³, ti³jna³cao⁴-nai¹³, cˀoa⁴ an³ ti²jna⁴cao⁴-le²³. Cˀoa⁴-ti⁴ je² to⁴jnco³ ca²ta³tio²cao⁴-na¹, jme¹-ni³ nca³ cho⁴ta⁴son³ˀnte³ coan⁴cjain¹-si¹ni³le⁴ nca³ ji³ qui³ni²ca³sen¹-nai¹³.
JOH 17:22 Je² cjoa⁴je³ya³ xi³ ji³ tsa³cˀai²-nai¹³, cˀoa⁴-ti⁴sˀin² qui³tsjoa³-le⁴, jme¹-ni³ nca³ to⁴jnco³ coan⁴-si¹ni³ jo³-ni³ tsa² ña¹ to⁴jnco³ ma³-nia³².
JOH 17:23 An³ ti²jna⁴coa⁴ je² cho⁴ta⁴-na⁴, cˀoa⁴ ji³ ti³jna³cao⁴-nai¹², jme¹-ni³ nca³ ña³qui³ to⁴jnco³ coan⁴-si¹ni³, jme¹-ni³ nca³ cˀoa⁴-sˀin² scoe⁴-si¹ni³ cho⁴ta⁴son³ˀnte³ nca³ ji³ qui³ni²ca³sen¹-nai¹³, cˀoa⁴ nca³ ji³ coan³tsjoa³chai³ nca³ je², jo³-sˀin² nca³ cˀoa⁴-ti⁴ coan³tsjoa³cha³-nai¹³ nca³ an³.
JOH 17:24 Nˀai³, coi³ xi³ me³-na³, nca³ je² cho⁴ta⁴ xi³ ji³ tsa³cˀai²-nai¹³, cˀoa⁴-ti⁴ ya⁴ coa⁴tio⁴cao⁴-na³ jña³ nca³ an³ ti²jna⁴, jme¹-ni³ nca³ cˀoa⁴-sˀin² scoe⁴-si¹ni³ cjoa⁴je³ya³-na⁴ xi³ ji³ tsa³cˀai²-nai¹³, nca⁴ coan³tsjoa³cha³-nai¹³ to⁴nqui³-ni³ nca³ cje³ sˀe³nta³-jin² son³ˀnte³.
JOH 17:25 Nˀai³ xi³ tjin¹-li² cjoa⁴qui²xi⁴, cho⁴ta⁴son³ˀnte³-vi⁴ li²coi³ tsa³ve³-li², to⁴nca³ an³ tsa³ˀve³-le²³. Cˀoa⁴-ti⁴ je² cho⁴ta⁴-na⁴vi⁴ tsa³ve³ nca³ ji³ qui³ni²ca³sen¹-nai¹³.
JOH 17:26 Je² cho⁴ta⁴-vi⁴ an³ tsa³ca³co³son²tsen³-le⁴ jo³ cjoain³ nca³ ji³. To⁴jo³ cˀoa⁴-la²sˀin² coa³co³son²tsen³ nqui²sa⁴-le⁴, jme¹-ni³ nca³ sˀe⁴-si¹ni³le⁴ cjoa⁴tsjoa³cha³, jo³-sˀin² nca³ coan³tsjoa³cha³-nai¹³, cˀoa⁴ an³ coa²te⁴jna³jian³ ni⁴ma⁴-le⁴.
JOH 18:1 Cˀia⁴ nca³ je³cˀoa⁴qui³tso² Jesús nca³yi³je³ je² en¹-vi⁴, qui³cao⁴ cho⁴ta⁴-le⁴ xi³ncoa³nta¹-ni³ xo⁴nca¹ Cedrón, jña³ nca³ cji³ tso³jmi²ntje². Ya⁴ ja³ˀa³sˀen³ Jesús cao⁴ cho⁴ta⁴-le⁴.
JOH 18:2 Cˀoa⁴-ti⁴ Judas, je² xi³ tsa³cˀe¹tˀain³ na⁴jmi¹ xi³ tˀa³tsˀe⁴ Jesús, ve³ je² ˀnte³-ve⁴, nca⁴ ncjin² cˀa³ coan³ña³ ya⁴-ve⁴ Jesús cao⁴ cho⁴ta⁴-le⁴.
JOH 18:3 Judas cao⁴ ncjin² so³nta²do⁴, cao⁴ policía xi³ tsˀe⁴ cho⁴ta⁴ti¹tjon²-le⁴ na⁴ˀmi³, cao⁴ cho⁴ta⁴ fariseos, ja³ˀai³ ya⁴-ve⁴. Yˀa³ linterna cao⁴ lˀi¹ni³cha³ cao⁴ qui⁴cha⁴.
JOH 18:4 Jesús je³tjin¹jin³-le⁴ nca³yi³je³ cjoa⁴ xi³ cjoa⁴ˀai¹ne²-le⁴, ji³tjo³ ti¹tjon², cˀoi⁴qui³tso²-le⁴: ˀya¹-ni³ xi³ vi³jnchi³sjao³.
JOH 18:5 Cho⁴ta⁴ qui³tso²-le⁴: Je² Jesús xi³ Nazaret tsˀe⁴. Jesús qui³tso²-le⁴: An³ nia¹³. Judas, je² xi³ qui³sca³ni¹tˀa³ Jesús, cˀoa⁴-ti⁴ ya⁴ ti¹jna³cao⁴ cho⁴ta⁴ncjin²-ve⁴.
JOH 18:6 Cˀia⁴ nca³ Jesús qui³tso²-le⁴: An³ nia¹³, cho⁴ta⁴-ve⁴ qui³-ni³ ya¹tsˀin⁴, qui³tsao³ tˀa³na³nqui³.
JOH 18:7 Cˀia⁴ Jesús ti⁴qui³sco²na³nqui³-nca¹ni³le⁴: ˀya¹-ni³ xi³ vi³jnchi³sjao³. Cˀoa⁴ cho⁴ta⁴-ve⁴ qui³tso²: Je² Jesús xi³ Nazaret tsˀe⁴.
JOH 18:8 Qui³nchja⁴ Jesús: Je³cˀoa⁴ca²xin³-no³ nca³ an³ nia¹³. Tsa² an³ xi³ vi³jnchi³sjai³-nao¹³, ca²ta³fi² je² cho⁴ta⁴ je²-vi⁴.
JOH 18:9 Cˀoa⁴qui³tso² jme¹-ni³ nca³ cˀoa⁴-sˀin² coi⁴tjo³son²-si¹ni³ en¹ xi³ qui³nchja⁴: Je² xi³ ji³ tsa³cˀai²-nai¹³, ni⁴jnco³-jin² qui³si³cha²³.
JOH 18:10 Cˀia⁴ Simón Pedro tsa³cˀa³sje³ qui⁴cha⁴nto³-le⁴, qui³si³qui²ˀaon³ jnco³ cho⁴ˀnta³-le⁴ na⁴ˀmi³ti¹tjon². Tsa³ca³te³tˀa³ xo⁴ño³ nca³qui²xi⁴. Malco ˀmi² cho⁴ˀnta³-ve⁴.
JOH 18:11 Cˀia⁴ Jesús cˀoi⁴qui³tso²-le⁴ Pedro: Qui⁴cha⁴nto³-li⁴ve⁴ cha⁴ni²sˀen³-ni³ čhjoa⁴-le⁴. Je² cho⁴tsin¹cjoa⁴ñˀain³ xi³ je² Nˀai³-na¹ qui³tsjoa³-na³, a³ tsi² scˀoia⁴.
JOH 18:12 Cˀia⁴ so³nta²do⁴ cao⁴ nai³-le⁴ cao⁴ je² policía-le⁴ cho⁴ta⁴ judíos qui³tsoa³ Jesús, tsa³ca¹nˀion¹.
JOH 18:13 Ya⁴ ti¹tjon² qui³cao⁴-le⁴ Anás, je² nˀai³cha¹-le⁴ Caifás, je² xi³ na⁴ˀmi³ti¹tjon² coi³ no¹-ve⁴.
JOH 18:14 Je² Caifás xi³ tsa³qui³ncha¹ˀa³ cho⁴ta⁴ judíos, nca³ cjai¹nca³ ma³chjen¹ nca³ jnco³ cho⁴ta⁴ coi⁴ya¹ntjai² na⁴xi⁴na³nta¹.
JOH 18:15 Je² Simón Pedro qui³tjen⁴nqui³-le⁴ Jesús cao⁴ nqui²jnco³-sa³ cho⁴ta⁴-le⁴. Je² xi³jnco³-ve⁴ tjia¹xcon³ je² na⁴ˀmi³ti¹tjon². Ja³ˀa³sˀen³cao⁴ Jesús ya⁴ nti³tsin³-le⁴ na⁴ˀmi³ti¹tjon².
JOH 18:16 To⁴nca³ je² Pedro ya⁴ tsa³cˀe²jna³ nti³tsin³, ya⁴ jčho³ xo⁴ntjoa⁴. Ji³tjo³-ni³ je² xi³jnco³-ve⁴ xi³ tjia¹xcon³ na⁴ˀmi³ti¹tjon², tsa³cja¹cao⁴ chjon⁴² xi³ si¹coi²nta⁴ xo⁴ntjoa⁴, qui³si³cja³ˀa³sˀen³ Pedro.
JOH 18:17 Cˀia⁴ je² chjon⁴² xi³ si¹coi²nta⁴ xo⁴ntjoa⁴ cˀoi⁴qui³tso²-le⁴ Pedro: A³ tsi² tsa² ji³-je⁴ tsˀe⁴ je² cho⁴ta⁴ xo⁴cji³-vi⁴. Cˀoi⁴qui³tso² Pedro: Ma³jain².
JOH 18:18 Cho⁴ˀnta³ cao⁴ policía ya⁴ ncha³nto³ntai³-le⁴ lˀi¹ xi³ tsa³cˀe¹tse³. Tjio¹ma³ si¹so³-le⁴ yao³-le⁴ nca³ cjai¹nca³ nchˀan¹. Cˀoa⁴-ti⁴ Pedro ya⁴ ti¹jna³cao⁴. Ti¹si¹so³-le⁴ yao³-le⁴.
JOH 18:19 Je² na⁴ˀmi³ti¹tjon² qui³sco²na³nqui³-le⁴ Jesús xi³ tˀa³tsˀe⁴ cho⁴ta⁴-le⁴ cˀoa⁴ xi³ tˀa³tsˀe⁴ je² en¹ xi³ va³co¹ya³.
JOH 18:20 Jesús qui³tso²-le⁴: Cjai¹nca³ to⁴qui³nchja²tsen³-le⁴ nca³tsˀi³ cho⁴ta⁴. Nca³ntsjai² tsa³ca³co³ya²³ ya⁴³ ntˀia³ sinagoga cao⁴ ya⁴³ yo⁴nco⁴ jña³ nca³ ma³ña³ nca³tsˀi³ cho⁴ta⁴ judíos. Ni⁴jme³-jin² xi³ qui³nchja²ˀma³.
JOH 18:21 A¹-ni³ nca³ cho¹na³nqui³-si¹ni³nai¹³. Je² cho¹na³nqui³-lai⁴ xi³ qui³nčhˀoe¹ jo³ qui³xin³-le⁴. Coe⁴-ni³ je²-ve⁴ xi³ ve³ jo³ qui³xian³.
JOH 18:22 Cˀia⁴ nca³ je³cˀoa⁴qui³tso² je²-ve⁴, jnco³ policía xi³ ya⁴ ti¹jna³ qui³si³jtsin³jnco³-le⁴ Jesús, cˀoi⁴qui³tso²: A³ cˀoa⁴tso² en¹ xi³ no²cjoa⁴coai⁴ na⁴ˀmi³ti¹tjon².
JOH 18:23 Jesús qui³tso²-le⁴: Tsa² ca²nchja²³ en¹tsˀen⁴, tˀai²³ en¹-li⁴ xi³ tˀa³tsˀe⁴ je² cjoa⁴tsˀen⁴. Tsa² nta³ ca²xian³, a¹-ni³ nca³ vˀe²-si¹ni³nai¹³.
JOH 18:24 Jesús tji¹tˀa³nˀion¹ nca³ je² Anás qui³si³ca³sen¹tˀa³-le⁴ Caifás xi³ na⁴ˀmi³ti¹tjon².
JOH 18:25 Pedro se¹jna³ˀnqui³ nca³ ti¹si¹so³-le⁴ yao³-le⁴. Cˀoi⁴qui³tso²-le⁴: A³ tsi² tsa² cˀoa⁴-ti⁴ ji³ tsˀe⁴ cho⁴ta⁴-le⁴. Pedro tsa³cˀe²jna³ˀma³cao⁴, ma³jain² qui³tso².
JOH 18:26 Jnco³ cho⁴ˀnta³-le⁴ na⁴ˀmi³ti¹tjon², xi¹ncjin¹ ma³-ni³ je² xi³ Pedro tsa³ca³te³tˀa³ xo⁴ño³, cˀoi⁴qui³tso²-le⁴: A³ tsi² tsa³ˀve³-le²³ jña³ cji³ tso³jmi²ntje² cao⁴ Jesús.
JOH 18:27 Nqui²jnco³ cˀa² mai³ ti⁴qui³tso²-nca¹ni³ Pedro. Qui³squi³ˀntia¹ nti⁴ton⁴-sa³ni³ cha¹xi³cha¹.
JOH 18:28 Qui³cao⁴-ni³ Jesús ntˀia³-le⁴ Caifás sa³ˀnta³ ntˀia³-le⁴ Pilato cho⁴ta⁴xa¹ti¹tjon². Ta⁴njion²ya³ ni¹. Cho⁴ta⁴-ve⁴ li²coi³ ya⁴ ja³ˀa³sˀen³ ntˀia³-le⁴ Pilato, jme¹-ni³ nca³ tsi² cjoi⁴tson¹-si¹ni³, jme¹-ni³ nca³ coan⁴ coa⁴cjen⁴-si¹ni³ sˀoi¹ pa²xco⁴.
JOH 18:29 Cˀia⁴ ji³tjo³con³-le⁴ Pilato ya⁴ nti³tsin³, cˀoi⁴qui³tso²: Jme¹ xi³ sa³yo³je¹tˀain³-nio³ je² cho⁴ta⁴xˀin⁴-vi⁴.
JOH 18:30 Cho⁴ta⁴-ve⁴ cˀoi⁴qui³tso²-le⁴: Tsa² je² cho⁴ta⁴-vi⁴ tsi² tsa² jme³ je¹ tjin¹-le⁴, li²coi³-la⁴ i⁴ cjoa²ˀai⁴cao⁴-lai²⁴jin⁴.
JOH 18:31 Cˀia⁴ Pilato cˀoi⁴qui³tso²-le⁴: Ta⁴nquin¹cao⁴³ nca³ jon², tˀe²nta³jin³-lao⁴³ jo³ tjin¹ cjoa⁴te¹xo³ma³-no³. Cho⁴ta⁴ judíos cˀoi⁴qui³tso²-le⁴: To⁴nca³ jin⁴-jin⁴ li²coi³ tjo³ˀnte³-na³jin⁴ nca³ ni²cˀain³-jin⁴ cho⁴ta⁴.
JOH 18:32 Cˀoa⁴-sˀin² ji³tjo³son²-ni³ jo³ qui³tso² Jesús, nca³ cˀoa⁴-sˀin² tsa³cˀe¹jna³ en¹ jo³-sˀin² nca³ coi⁴ya¹.
JOH 18:33 Pilato ja³ˀa³sˀen³-nca¹ni³ ya⁴³ ntˀia³-le⁴, qui³nchja⁴-le⁴ Jesús cˀoi⁴qui³tso²-le⁴: A³ ji³ ni¹³ cho⁴ta⁴ti¹tjon²-le⁴ cho⁴ta⁴ judíos.
JOH 18:34 Jesús qui³tso²-le⁴: A³ cˀoa⁴ˀmi²-nai¹³ nca³ to⁴ji³, a³xo⁴ cja⁴ˀai¹ xi³ cˀoa⁴qui³tso²-li² xi³ tˀa³tsˀan⁴.
JOH 18:35 Pilato qui³nchja⁴: A³ an³ nia¹³ cho⁴ta⁴ judío. Ti⁴je²-ni³ cho⁴ta⁴na⁴xi⁴na³nta¹-li⁴ cao⁴ cho⁴ta⁴ti¹tjon²-le⁴ na⁴ˀmi³ xi³ cˀoi⁴sˀin² ca²fa³ˀai³ ca³ni¹tˀa³-li² tˀa³tsˀan⁴. Jme¹ ni¹³ xi³ qui³nˀiain²³.
JOH 18:36 Qui³nchja⁴ Jesús: Je² cjoa⁴te¹xo³ma³-na⁴ li²coi³ tsˀe⁴ i⁴ son³ˀnte³-vi⁴. Tsa² tsˀe⁴ son³ˀnte³-vi⁴ je² cjoa⁴te¹xo³ma³-na⁴, je² cho⁴ta⁴-na⁴ scan³-la⁴, jme¹-ni³ nca³ tsi²coi³ cha⁴ni²tˀa³-si¹ni³na³ cho⁴ta⁴ judíos, to⁴nca³ cjoa⁴te¹xo³ma³-na⁴ˀni³ a³li² i⁴-jin² tsˀe⁴.
JOH 18:37 Cˀia⁴ Pilato cˀoi⁴qui³tso²-le⁴: A³ cho⁴ta⁴ti¹tjon² ˀmi²-li² tso²cˀoa⁴. Qui³nchja⁴ Jesús: Cˀoa⁴tjin¹ xi³ ti³si³-ve⁴ nca³ cho⁴ta⁴ti¹tjon² ˀmi²-na³. Coi³ xa¹ qui³tsin³-nia³, coi³ xa¹ ja²ˀai⁴-nia³ i⁴ son³ˀnte³-vi⁴, jme¹-ni³ nca³ tsjoa³-si¹nia³ en¹-na⁴ xi³ tˀa³tsˀe⁴ xi³ cjoa⁴qui²xi⁴. Je² nca³tsˀi³ xi³ tsˀe⁴ cjoa⁴qui²xi⁴ nčhˀoe¹ jta⁴-na⁴.
JOH 18:38 Pilato cˀoi⁴qui³tso²-le⁴: Jme¹ ni¹³ xi³ cjoa⁴qui²xi⁴. Cˀia⁴ nca³ je³cˀoa⁴qui³tso²-le⁴, ji³tjo³con³-nca¹ni³le⁴ cho⁴ta⁴ judíos, cˀoi⁴qui³tso²-le⁴: Ni⁴to⁴jme³-jin² je¹ ma³sjai³-na³ xi³ tˀa³tsˀe⁴.
JOH 18:39 To⁴nca³ jon² cˀoa⁴-sˀin² ˀya³-nio³ nca³ si³cˀe¹jna³ntai¹jnco³-no³ preso nca³ sˀoi¹ pa²xco⁴. A³ me³-no³ tso²cˀoa⁴ nca³ si³cˀe¹jna³ntai¹-no³ je² cho⁴ta⁴ti¹tjon²-le⁴ cho⁴ta⁴ judíos.
JOH 18:40 Cˀia⁴ nca³tsˀi³ nˀion¹ qui³nchja⁴ nqui²jnco³ cˀa²: A³li² je²-vi⁴, to⁴nca³ je² Barrabás. Je² Barrabás cho⁴ta⁴che¹ ni¹.
JOH 19:1 Cˀia⁴ Pilato qui³scoe¹ Jesús, cˀoa⁴ tsa³ca¹-le⁴.
JOH 19:2 Je² so³nta²do⁴ tsa³cˀe¹nta³ jnco³ corona na³ˀya¹, tsa³cˀe¹jna³son² jco⁴, qui³si³cˀa³cja¹ jnco³ na³jño³ xi³ jco³ cji³.
JOH 19:3 Cˀoi⁴qui³tso²: Ti²ˀnta³-li², cho⁴ta⁴ti¹tjon²-le⁴ cho⁴ta⁴ judíos. A³li² cˀoa⁴cji³ qui³si³jtsin³-le⁴.
JOH 19:4 Cˀia⁴ Pilato ji³tjo³-nca¹ni³ nti³tsin³, cˀoi⁴qui³tso²-le⁴: Coe⁴-ni³ cjoa²ˀai⁴cao⁴-no³ i⁴ nti³tsin³-vi⁴, jme¹-ni³ nca³ cˀoi⁴-sˀin² jcha⁴-si¹nio³ nca³ ni⁴jme³-jin² je¹ ma³sjai³-na³ xi³ tˀa³tsˀe⁴.
JOH 19:5 Ji³tjo³ nti³tsin³ Jesús. Tji¹son² jco⁴ corona na³ˀya¹, yˀa³cja¹ na³jño³ xi³ jco³ cjoan³. Pilato cˀoi⁴qui³tso²-le⁴ cho⁴ta⁴-ve⁴: Coe⁴-ni³ je² cho⁴ta⁴xˀin⁴-vi⁴.
JOH 19:6 Cˀia⁴ nca³ je² cho⁴ta⁴ti¹tjon²-le⁴ na⁴ˀmi³ cao⁴ policía tsa³ve³ Jesús, nˀion¹ qui³nchja⁴: Tja³tˀai³ cro², tja³tˀai³ cro². Pilato qui³tso²-le⁴: Jon² chjoao¹³, jon² tja³tˀao³ cro², nca⁴ tsi² tsa² jme³ je¹ ma³sjai³-na³ xi³ tˀa³tsˀe⁴.
JOH 19:7 Cho⁴ta⁴ judíos qui³tso²-le⁴: Jin⁴-jin⁴ tjin¹-na³jin⁴ cjoa⁴-te¹xo³ma³. Cˀoa⁴tso² cjoa⁴te¹xo³ma³-na⁴jin⁴ nca³ ma³chjen¹-le⁴ nca³ coi⁴ya¹, nca⁴ ˀnti¹-le⁴ Ni³na¹ qui³tso²-le⁴ yao³-le⁴.
JOH 19:8 Cˀia⁴ nca³ Pilato qui³nčhˀoe¹ je² en¹-vi⁴, nqui²sa⁴-sa³ qui³tsa³cjon¹.
JOH 19:9 Ja³ˀa³sˀen³-nca¹ni³ ntˀia³-le⁴, qui³tso²-le⁴ Jesús: Jña¹-ni³ tsi⁴. To⁴nca³ Jesús li²coi³ qui³nchja⁴.
JOH 19:10 Cˀia⁴ Pilato qui³tso²-le⁴: A³ tsi² cha²cao⁴-nai¹³. A³ tsi² ˀyai³ nca³ tjin¹-na³ ˀnte³ nca³ coa³tˀa³-le²³ cro², cˀoa⁴-ti⁴ tjin¹-na³ ˀnte³ nca³ si³cˀe¹jna³ntai¹-le²³.
JOH 19:11 Qui³nchja⁴ Jesús: Ni⁴to⁴jme³-jin² ˀnte³ tjin¹-li² xi³ tˀa³tsˀan⁴, tsa² tsi² ncˀa¹ qui³tsˀai²-ni³li². Coi³ nca³ je² xi³ ca²tsjoa¹tˀa³-na³ tˀa³tsi⁴ nqui²sa⁴ tse³ je¹ tjin¹-le⁴.
JOH 19:12 Cˀia⁴ sa³ˀnta³ coan³me³-le⁴ Pilato nca³ si⁴²cˀe¹jna³ntai¹ Jesús, to⁴nca³ je² cho⁴ta⁴ judíos nˀion¹ qui³nchja⁴: Cˀia⁴ tsa² je² si⁴cˀe¹jna³ntai¹, a³li²coi³ ji³ mi²yo⁴-le⁴ César. To⁴ˀya³-ni³ xi³ cho⁴ta⁴ti¹tjon² tso²-le⁴ yao³-le⁴ fi²co²ntran⁴-le⁴ César.
JOH 19:13 Cˀia⁴ nca³ Pilato qui³nčhˀoe¹ je² en¹ je²-vi⁴, qui³cao⁴ Jesús nti³tsin³. Ya⁴ tsa³cˀe²jna³son² ya¹xi²le⁴, ya⁴ ˀnte³ jña³ ˀmi² Xjao¹cjia³, cˀoa⁴ Gabata nca³ en¹ hebreo.
JOH 19:14 Cˀia⁴ víspera-le⁴ sˀoi¹ pa²xco⁴, ja⁴me³-la⁴ nchi³sen³. Cˀia⁴ Pilato cˀoi⁴qui³tso²-le⁴ cho⁴ta⁴ judíos: Coe⁴-ni³ cho⁴ta⁴ti¹tjon²-no³ xi³ tsaon⁴³.
JOH 19:15 Cho⁴ta⁴-ve⁴ nˀion¹ qui³nchja⁴: Cha³ˀa²xin²³, cha³ˀa²xin²³, tja³tˀai³ cro². Pilato qui³tso²-le⁴: A³ je² cho⁴ta⁴ti¹tjon²-no³ xi³ coa³tˀa³ cro². Qui³nchja⁴ cho⁴ta⁴ti¹tjon²-le⁴ na⁴ˀmi³: Tsin²-na³jin⁴ xi³ cja⁴ˀai¹ cho⁴ta⁴ti¹tjon², to⁴je² César.
JOH 19:16 Cˀia⁴ Pilato qui³sca³ni¹tˀa³-le⁴ cho⁴ta⁴ judíos Jesús, jme¹-ni³ nca³ coa⁴²tˀa³-si¹ni³ cro². Qui³scoe¹ Jesús, qui³cao⁴.
JOH 19:17 Ji³tjo³, yˀa³ cro²-le⁴. Qui³ ya⁴ ˀnte³ jña³ ˀmi² ˀnte³jco⁴cˀen³, cˀoa⁴ nca³ en¹ hebreo Gólgota ˀmi²,
JOH 19:18 jña³ nca³ tsa³ca¹tˀa³ cro² cao⁴ nqui²jao²-sa³ cho⁴ta⁴, jnco¹jnco¹ ncoa³ncoa³, Jesús ya⁴ nca³va³sen³-le⁴.
JOH 19:19 Cˀoa⁴-ti⁴ qui³squi³ Pilato jnco³ en¹ xi³ tsa³cˀe¹tˀa³ ya⁴ cro². Je² xi³ tji¹tˀa³ cˀoi⁴tso²: Jesús xi³ tsˀe⁴ Nazaret, cho⁴ta⁴ti¹tjon²-le⁴ cho⁴ta⁴ judíos.
JOH 19:20 Ncjin² cho⁴ta⁴ judíos xi³ tsa³cˀe¹xquia⁴ je² en¹-vi⁴, nca⁴ je² ˀnte³ jña³ nca³ tsa³ca¹tˀa³ cro² Jesús ti¹jna³čhian³-le⁴ na⁴xi⁴na³nta¹. En¹ hebreo tji¹tˀa³ cao⁴ en¹ griego cao⁴ en¹ latín.
JOH 19:21 Je² cho⁴ta⁴ti¹tjon²-le⁴ na⁴ˀmi³ xi³ tsˀe⁴, cho⁴ta⁴ judíos cˀoi⁴qui³tso²-le⁴ Pilato: A³li² chji³-jin²³ cho⁴ta⁴ti¹tjon²-le⁴ cho⁴ta⁴ judíos, to⁴nca³ chji¹³ nca³ je² xi³ cˀoa⁴qui³tso²: An³ nia¹³ cho⁴ta⁴ti¹tjon²-le⁴ cho⁴ta⁴ judíos.
JOH 19:22 Qui³nchja⁴ Pilato: Je² xi³ qui³squia³, qui³squia³.
JOH 19:23 Cˀia⁴ nca³ so³nta²do⁴ je³tsa³ca¹tˀa³ cro² Jesús, qui³scoe¹ na³jño³-le⁴, ño³ ya³ qui³sˀin³ (Jnco¹jnco¹ ya³ qui³scoe¹ jnco¹jnco¹ so³nta²do⁴). Cˀoa⁴-ti⁴ qui³scoe¹ je² na³jño³jnčho³-le⁴, to⁴nca³ je² na³jño³jnčho³-le⁴ li²coi³ qui³tjon³ya³, to⁴ña³qui³ cji³jnco³-ni¹.
JOH 19:24 So³nta²do⁴ qui³tso²-le⁴ xi¹ncjin¹: Li²coi³ cˀoe¹jnta² je² na³jño³jnčho³-le⁴, to⁴si⁴sca¹cao⁴-nia¹, ˀya³-la²xo¹ xi³ tjoe¹-le⁴, jme¹-ni³ cˀoa⁴-sˀin² coi⁴tjo³son²-ni³ je² xon⁴ Escritura xi³ cˀoi⁴tso²: Qui³si³cˀa³vi¹-le⁴ xi¹ncjin¹ na³jño³-na⁴, cˀoa⁴ to⁴qui³si³sca¹cao⁴ na³jño³-na⁴. Cˀoa⁴qui³sˀin³ so³nta²do⁴.
JOH 19:25 Ya⁴ tjio¹tˀa³-le⁴ cro²-le⁴ Jesús je² na⁴-le⁴ cao⁴ nti³chja³ na⁴-le⁴, María chjon⁴²-le⁴ Cleofas, cao⁴ María Magdalena.
JOH 19:26 Cˀia⁴ nca³ Jesús tsa³ve³ na⁴-le⁴ cao⁴ je² cho⁴ta⁴-le⁴ xi³ Jesús cjai¹nca³ tsjoa³que³ xi³ ya⁴ ti¹jna³, Jesús qui³tso²-le⁴ na⁴-le⁴: Chjon⁴², coe⁴-ni³ ˀnti¹-li⁴.
JOH 19:27 Cˀia⁴ qui³tso²-le⁴ je² cho⁴ta⁴-le⁴vi⁴: Coe⁴-ni³ na⁴-li⁴. Sa³ˀnta³ cˀia⁴-ni³ hora-ve⁴ je² cho⁴ta⁴-le⁴vi⁴ qui³scoe¹tjao² na⁴-le⁴ Jesús.
JOH 19:28 Xi³ coan³ je²-vi⁴, Jesús tsa³ve³ nca³ je³ji³tjo³son² nca³yi³je³. Cˀoa⁴qui³tso², jme¹-ni³ nca³ xon⁴ Escritura coi⁴tjo³son²-si¹ni³: Fa³ti²-na³.
JOH 19:29 Ya⁴ ti¹jna³ jnco³ cho⁴tsin¹ cji³tse³ vinagre. Cˀia⁴ qui³si³ca³ˀnchi⁴-ni³ vinagre jnco³ tsa⁴nca⁴, tsa³cˀe¹jco³ jnco³ ya¹ hisopo, qui³si³ca²ˀa³ tsˀoa³.
JOH 19:30 Cˀia⁴ nca³ Jesús qui³tsˀi³ vinagre, cˀoi⁴qui³tso²: Je³ji³tjo³son² nca³yi³je³. Tsa³cjen²jten³ jco⁴. Qui³cha³jta³.
JOH 19:31 Coi³ nca³ víspera-le⁴ sˀoi¹ pa²xco⁴ cho⁴ta⁴ judíos tsa³cˀe¹tsˀoa³-le⁴ Pilato nca³ ca²ta³cjo³tˀao¹ nca³so³-le⁴, ca²ta³fa³ˀa¹xin² yao³-le⁴ Jesús cao⁴ xi³ nqui²jao²-ve⁴, jme¹-ni³ nca³ tsi² tsa² je² yao³-le⁴ sa⁴tio²-si¹ni³ ya⁴tˀa³ cro² cˀia⁴ ni⁴čhjin³ ni²cja¹ya³, nca⁴ coi³ ni⁴čhjin³ sˀoi¹je³.
JOH 19:32 Ja³ˀai³ so³nta²do⁴, qui³sco³tˀao¹ nca³so³-le⁴ je² xi³ ti¹tjon². Ti⁴cˀoa⁴qui³si³cao⁴-ni³ je² xi³jnco³ xi³ ña³tjen⁴ tsa³ca¹tˀa³ cro².
JOH 19:33 Cˀia⁴ nca³ ja³ˀai³ jña³ cji³tˀa³ cro² Jesús, tsa³ve³ nca³ je³cˀen³. Li²coi³ qui³sco³tˀao¹ nca³so³-le⁴.
JOH 19:34 To⁴nca³ jnco³ so³nta²do⁴-ve⁴ qui³sca³ni¹sˀen³ ni³nta³ni⁴sin⁴-le⁴ jnco³ qui⁴cha⁴ lanza. Nti⁴ton⁴ ji³tjo³ njin¹ cao⁴ na³nta¹.
JOH 19:35 Je² xi³ tsa³ve³ je³qui³tsjoa³ en¹-le⁴, cˀoa⁴ je² en¹-le⁴ ña³qui³ cjoa⁴qui²xi⁴-ni¹. Je² ve³ nca³ ña³qui³ en¹ xi³ cjoa⁴qui²xi⁴ xi³ nchja⁴, jme¹-ni³ nca³ cˀoa⁴-ti⁴ jon² coan⁴cjain¹-si¹ni³no³.
JOH 19:36 Je² cjoa⁴-vi⁴ cˀoa⁴coan³, jme¹-ni³ nca³ coi⁴tjo³son²-si¹ni³ je² xon⁴ Escritura: Ni⁴jnco³-jin² ni³nta³-le⁴ xi³ tjo¹tˀao¹.
JOH 19:37 Cˀoa⁴-ti⁴ nqui²jnco³ xon⁴ Escritura cˀoi⁴tso²: Je² sco¹tsen³-le⁴ je² xi³ qui³sca³ni¹sˀen³-le⁴ qui⁴cha⁴.
JOH 19:38 Xi³ coan³ je² cjoa⁴-vi⁴, je² José xi³ Arimatea tsˀe⁴, cho⁴ta⁴-le⁴ Jesús xi³ tsa³cˀa³mjen³ˀma³tˀa³-le⁴, nca⁴ qui³tsa³cjon¹-le⁴ cho⁴ta⁴ judíos, tsa³cˀe¹tsˀoa³-le⁴ Pilato nca³ coan⁴ cjoa⁴ˀa²xin² yao³-le⁴ Jesús. Qui³tsjoa³ˀnte² Pilato. Cˀia⁴ José ja³ˀai³ tsa³cja³ˀa¹xin² yao³-le⁴ Jesús.
JOH 19:39 Cˀoa⁴-ti⁴ ji³cho² Nicodemo, je² xi³ nca³sˀa⁴ ji³cho²nčhˀoe² Jesús nca³ coan³njion². Ji³cho²cao⁴ jnco³ xqui³ xi³ tji¹tsˀo¹jin³ mirra cao⁴ áloes, jnco³ ciento-la⁴ libra tjin¹-ni³.
JOH 19:40 Qui³cao⁴ yao³-le⁴ Jesús, tsa³ca¹jte¹jin³ sábana cao⁴ xqui³ xi³ nta³ njen⁴, jo³-sˀin² ve³-ni³ cho⁴ta⁴ judíos nca³ vˀe¹ñai³.
JOH 19:41 Ya⁴ ˀnte³ jña³ nca³ tsa³ca¹tˀa³ cro², tjin¹ jnco³ ˀnte³ jña³ nca³ cji³ tso³jmi²ntje². Cˀoa⁴ ya⁴ ˀnte³-vi⁴ qui³jna³ jnco³ tsjo¹cho⁴tse⁴, jña³ nca³ cje³ ˀya³-jin² cˀen³ xi³ sˀe³jna³ya³.
JOH 19:42 Ya⁴ tsa³ca¹ñai³ Jesús, nca⁴ je² tsjo¹-ve⁴ qui³jna³čhian³, nca⁴ víspera-le⁴ sˀoi¹ pa²xco⁴ xi³ tsˀe⁴ cho⁴ta⁴ judíos.
JOH 20:1 Cˀia⁴ ni⁴čhjin³ tai²nco⁴ nca³ je² María Magdalena ja³ˀai³ ya⁴ tsjo¹-ve⁴ nca³ ta⁴njion², nca³ ta⁴njion²ya³-sa³. Tsa³ve³ nca³ je³qui³tjo³xin² la⁴jao⁴-ve⁴.
JOH 20:2 Cˀia⁴ qui³to²ca³, ja³ˀai³nčhˀoe² Simón Pedro cao⁴ xi³ nqui²jnco³ cho⁴ta⁴-le⁴ xi³ Jesús cjai¹nca³ tsjoa³que³, cˀoi⁴qui³tso²-le⁴: Je³tsˀa³sje³ñai³-ni³ tsjo¹-ve⁴ Nai³-na¹. Li²coi³ ˀyai³⁴-jin⁴ jña³ qui³ ca¹jna³.
JOH 20:3 Cˀia⁴ ji³tjo³ Pedro cao⁴ xi³jnco³ cho⁴ta⁴-le⁴ Jesús, ja³ˀai³ ja⁴tsjo¹.
JOH 20:4 Ña³tjen⁴ qui³to²ca³ nca³ jao², to⁴nca³ je² xi³ nqui²jnco³ qui³to²ca³ ti¹tjon²-le⁴ Pedro. Ji³cho² ti¹tjon² ya⁴ tsjo¹-le⁴ Jesús.
JOH 20:5 Cˀia⁴ tsa³ca³sen²nia³, qui³sco²tsen³sˀen³. Tsa³ve³ je² na³jño³nta³-ve⁴ xi³ ya⁴ cjio³, to⁴nca³ li²coi³ qui³sˀen³.
JOH 20:6 Cˀia⁴ ji³cho² Simón Pedro xi³ qui³tjen⁴nqui³-le⁴. Qui³sˀen³ ja⁴tsjo¹, tsa³ve³ je² na³jño³nta³ xi³ ya⁴ cjio³.
JOH 20:7 Je² na³jño³ xi³ qui³sˀe³jte¹jin³ jco⁴ Jesús, li²coi³ ya⁴ qui³jna³ cao⁴ xi³cˀa³ na³jño³nta³, to⁴xin² ti¹jna³xco¹ya³.
JOH 20:8 Cˀoa⁴-ti⁴ cˀia⁴ qui³sˀen³ xi³ nqui²jnco³-ve⁴, je² xi³ ti¹tjon² ji³cho² ya⁴ tsjo¹-ve⁴. Tsa³ve³ cˀoa⁴ coan³cjain¹-le⁴.
JOH 20:9 Cje³ ve³-jin² jo³ tso² xon⁴ Escritura nca³ ma³chjen¹ nca³ Jesús cjoa⁴ˀa¹ya³jin³-ni³le⁴ cˀen³.
JOH 20:10 Cˀia⁴ cho⁴ta⁴-le⁴ qui³-nca¹ni³ ntˀia³-le⁴.
JOH 20:11 To⁴nca³ je² María ti¹jna³ nti³tsin³. Ti¹cji³ˀnta¹ ya⁴tˀa³ tsjo¹. Cˀia⁴ nca³ ti¹cji³ˀnta¹ tsa³ca³sen²nia³, qui³sco²tsen³sˀen³ tsjo¹-le⁴ Jesús.
JOH 20:12 Tsa³ve³ jao² a²ncje⁴ xi³ na³jño³čhoa³ yˀa³cja¹, jnco³ xi³ ti¹jna³ ya⁴jco⁴, jnco³ xi³ ti¹jna³nqui³ ntso⁴co⁴ jña³ nca³ qui³ sˀe³ñai³ yao³-le⁴ Jesús.
JOH 20:13 A²ncje⁴ cˀoi⁴qui³tso²-le⁴ María: Chjon⁴², a¹-ni³ ti³chi³ˀnta¹-si¹ni³. María qui³tso²-le⁴: Qui³cao⁴ je² Nai³-na⁴. Li²coi³ ˀve³ jña³ nca³ tsa³ca¹jna³.
JOH 20:14 Cˀia⁴ nca³ je³cˀoa⁴qui³tso², qui³si³cˀo¹fa³ya³. Tsa³ve³ Jesús nca³ ya⁴ ti¹jna³, to⁴nca³ li²coi³ ve³ tsa² je² Jesús.
JOH 20:15 Jesús qui³tso²-le⁴: Chjon⁴², a¹-ni³ ti³chi³ˀnta¹-si¹ni³. ˀya¹-ni³ xi³ vi³jnchi³sjai³. María qui³si³cja³ˀai³tsjen³, je²-la⁴ cho⁴ˀnta³ xi³ si¹xa¹jin³ tso³jmi²ntje², qui³tso²-le⁴: Señor, tsa² ji³ cˀin³coai⁴, cˀoa⁴tˀin²-nai¹³ jña³ nca³ ji³ tsa³ca³jnai³. An³ cjoi¹coa⁴.
JOH 20:16 Jesús qui³nchja⁴-le⁴: María. Cˀia⁴ qui³si³cˀo¹fa³ya³ María, qui³tso²-le⁴: Raboni, xi³ Maestro tso²-ni³.
JOH 20:17 Jesús qui³tso²-le⁴: A³li² ni²cao⁴-jin²nai¹³, nca⁴ cje³ fi³mi³con³-jin²le⁴ Nˀai³-na⁴. Ya⁴ tˀin³nčhˀoai²³ ntsˀe³, cˀoa⁴tˀin²-lai⁴: Ti²fi³mi³con³-le⁴ Nˀai³-na⁴, cˀoa⁴-ti⁴ je² Nˀai³-no³, je² Ni³na¹-na⁴, cˀoa⁴-ti⁴ Ni³na¹-no³.
JOH 20:18 Cˀia⁴ qui³ María Magdalena, qui³si³cji³nčhˀoe¹ cho⁴ta⁴-le⁴ Jesús nca³ tsa³ve³ Jesús, nca³ tsa³cja¹cao⁴ je² en¹-vi⁴.
JOH 20:19 Cˀia⁴ nca³ je³coan³xon² je² ni⁴čhjin³ tai²nco⁴, tjio¹chjoa² xo⁴ntjoa⁴ jña³ nca³ tjio¹ cho⁴ta⁴-le⁴ Jesús, nca⁴ qui³tsa³cjon¹-le⁴ cho⁴ta⁴ judíos. Ja³ˀai³ Jesús, tsa³ca³sen²jna³ jin³va³sen³-le⁴, cˀoi⁴qui³tso²-le⁴: Nchˀan¹ ca²ta³sˀe³-no³ nca³ jon²-vi⁴.
JOH 20:20 Cˀia⁴ nca³ je³cˀoa⁴qui³tso², tsa³ca³co¹-le⁴ ntsja³ cao⁴ ni³nta³ni⁴sin⁴-le⁴. Jo³ coan³tsjoa³-le⁴ cho⁴ta⁴-le⁴ nca³ tsa³ve³ Nai³-na¹.
JOH 20:21 Jesús ti⁴qui³tso²-nca¹ni³le⁴: Nchˀan¹ ca²ta³sˀe³-no³. Jo³-sˀin² xa¹ qui³si³ca³sen¹-na³ Nˀai³-na¹, cˀoa⁴-ti⁴sˀin²ni³ si³ca³sen¹³-no³ nca³ an³.
JOH 20:22 Cˀia⁴ nca³ je³cˀoa⁴qui³tso², qui³sco²na³jon³ cˀoi⁴qui³tso²-le⁴: Chjoao¹³ Espíritu Santo.
JOH 20:23 Je² xi³ si⁴cha³tˀa³-lao⁴³ je¹-le⁴, cˀoa⁴-sˀin² tjio¹cha³tˀa³-le⁴. Je² xi³ tsi² si⁴cha³tˀa³-lao⁴³, li²coi³ tjio¹cha³tˀa³-le⁴.
JOH 20:24 To⁴nca³ Tomás, jnco³ xi³ te³jao² ma³-ni³, je² xi³ Dídimo ˀmi², li²coi³ ya⁴ ti¹jna³cao⁴ cˀia⁴ nca³ ji³cho² Jesús.
JOH 20:25 Je² xi³cˀa³ cho⁴ta⁴-le⁴ Jesús cˀoi⁴qui³tso²-le⁴ Tomás: Ca²ˀya³-ni¹⁴jin⁴ Nai³-na¹. Tomás qui³tso²-le⁴: Tsa² tsi² tsa² scoe³ ntsja³ jña³ nca³ qui³sa³sen³sˀen³ xo², cˀoa⁴ tsa² tsi² tsa² sca³ni³sˀen²³ na⁴jma¹ntsa⁴ jña³ nca³ qui³sˀen³-le⁴ xo², cˀoa⁴ tsa² tsi² tsa² sca³ni³sˀen²³ ntsa⁴ ya⁴ ni³nta³ni⁴sin⁴-le⁴, li²coi³ coan⁴cjain¹-na³.
JOH 20:26 Xi³ coan³ jin³ ni⁴čhjin³ ya⁴ tjio¹ˀya³-nca¹ni³ je² cho⁴ta⁴-le⁴ Jesús. Tomás ti¹jna³cao⁴. Xo⁴ntjoa⁴ tjio¹chjoa², to⁴nca³ Jesús ja³ˀai³, tsa³ca³sen²jna³ jin³va³sen³-le⁴, cˀoi⁴qui³tso²: Nchˀan¹ ca²ta³sˀe³-no³.
JOH 20:27 Nti⁴ton⁴ cˀoi⁴qui³tso²-le⁴ Tomás: Cha⁴ni²sˀain³ na⁴jma¹ntsai⁴ i⁴-vi⁴, cho¹tsen³-lai⁴ ntsa⁴, tja³ntoi³ ntsai⁴ i⁴-vi⁴, cha⁴ni²sˀain³ ni³nta³ni⁴sin⁴-na⁴. A³li² ni²ta²ja⁴jin³-jin², ca²ta³ma³cjain¹-li².
JOH 20:28 Cˀia⁴ Tomás cˀoi⁴qui³tso²-le⁴: Señor-na⁴, Ni³na¹-na⁴.
JOH 20:29 Jesús qui³tso²-le⁴: Coi³ nca³ tsa³ˀya³-nai¹³ Tomás, a³ coan³cjain¹-ni³li². Jo¹ to⁴nta³-ni³ je² xi³ tsi² tsa² an³ tsa³ve³-na³, to⁴nca³ coan³cjain¹-le⁴.
JOH 20:30 Cjai¹nca³ to⁴ncjin²-sa³ choa⁴ qui³tsjoa³ Jesús ya⁴ nqui³xcon⁴ cho⁴ta⁴-le⁴, xi³ tsi² tsa² i⁴ tjio¹tˀa³ je² libro je²-vi⁴.
JOH 20:31 To⁴nca³ je² en¹ xi³ cˀoi⁴-sˀin² tjio¹tˀa³, jme¹-ni³ nca³ coan⁴cjain¹-si¹ni³no³ nca³ Jesús, je² xi³ Cristo, je² ˀnti¹-le⁴ Ni³na¹, jme¹-ni³ nca³ tjin¹-si¹ni³no³ cjoa⁴vi³jna³chon³ xi³ to⁴tˀa³tsˀe⁴ jan³ˀain¹-le⁴, cˀia⁴ nca³ cˀoa⁴-sˀin² ma³cjain¹-no³.
JOH 21:1 Nqui²jnco³ cˀa² Jesús tsa³ca³co¹son²tsen³-le⁴ yao³-le⁴ cho⁴ta⁴-le⁴ ya⁴ntai³ nta¹chi³con³ Tiberias. Cˀoi⁴-sˀin² tsa³ca³co¹son²tsen³ yao³-le⁴.
JOH 21:2 Tjio¹ Simón Pedro cao⁴ Tomás xi³ Dídimo ˀmi², cao⁴ Natanael, je² xi³ tsˀe⁴ Caná xi³ nchja⁴-ni³ Galilea, cao⁴ xti³-le⁴ Zebedeo, cao⁴ nqui²jao²-sa³ cho⁴ta⁴-le⁴ Jesús.
JOH 21:3 Simón Pedro qui³tso²-le⁴: Jti⁴ ti²fi³ si³cˀen³. Cˀoa⁴-ti⁴ ti³ma³nquin¹cao⁴-lai²⁴jin⁴, qui³tso² xi³cˀa³. Ji³tjo³, cˀoa⁴ qui³sˀen³ jnco³ chi³tso³. Je² ni⁴tjen⁴-ve⁴ ni⁴to⁴jme³-jin² xi³ qui³tjoe¹-le⁴.
JOH 21:4 Cˀia⁴ nca³ qui³sˀe³sen¹ Jesús tsa³cˀe²jna³ntai³ na³nta¹, to⁴nca³ je² cho⁴ta⁴-le⁴ li²coi³ tsen³ coan³-le⁴ tsa² je² Jesús.
JOH 21:5 Jesús qui³tso²-le⁴: Xti³, a³ cje³ sa³co¹-jin²no³ jti⁴. Mai³, qui³tso²-le⁴.
JOH 21:6 Jesús cˀoi⁴qui³tso²-le⁴: Chjoao¹³ na⁴ˀya³, cha⁴ni²jin³ntao¹³ ya⁴ nca³qui²xi⁴-le⁴ chi³tso³, cˀoa⁴ sa⁴co²-no³. Cˀia⁴ qui³sca³-ni¹jin³nta¹ na⁴ˀya³-le⁴, li²coi³ coan³ qui³tjoe¹mi³-ni³le⁴ nca³ cˀoa⁴-sˀin² to⁴ncjin² ma³-ni³ jti⁴ xi³ qui³si³ncha³.
JOH 21:7 Cˀia⁴ je² cho⁴ta⁴-le⁴ xi³ Jesús cjai¹nca³ tsjoa³que³, qui³tso²-le⁴ Pedro: Je² ni¹ Nai³-na¹. Cˀia⁴ nca³ qui³nčhˀoe¹ Simón Pedro nca³ je² Nai³-na¹, tsa³cˀe¹cja¹ na³jño³-le⁴ nca³ tsi² tsa² coi³ na³jño³ yˀa³cja¹. Qui³sca³ni¹jin³nta¹ yao³-le⁴.
JOH 21:8 Je² xi³cˀa³ cho⁴ta⁴-le⁴ ja³ˀai³cao⁴ chi³tso³ (nca³ tsi² tsa² coi³ cjin³ tjio¹jin³nta¹, čhian³ na³nqui³ ni¹, to⁴tjin¹-la⁴le⁴ tsa² jnco³ ciento metro). Tsa³ca¹jve³jin³ na³nta¹ na⁴ˀya³ jti⁴-le⁴ xi³ nˀion¹ qui³tse³ jti⁴.
JOH 21:9 Cˀia⁴ nca³ je³ji³tjo³jen³-ni³ chi³tso³ ja⁴tˀa³ na³nqui³, tsa³ve³ nca³ ncha³ xo¹lˀi¹, jnco³ jti⁴ cji³chjan¹, cˀoa⁴ tsa³ve³ nio⁴xti²la⁴.
JOH 21:10 Jesús qui³tso²-le⁴: Nčhoa¹cao⁴³ je² jti⁴ xi³ ca²tjoe¹-no³ ntˀai⁴-vi⁴.
JOH 21:11 Cˀia⁴ qui³sˀen³ chi³tso³ Simón Pedro. Tsa³cˀe¹jve³ na⁴ˀya³-le⁴ tˀa³na³nqui³. Jo³ ncjin² jti⁴ xi³ yˀai³ cjoan³ cjio³ya³, jnco³ ciento va³sen³ cao⁴-ni³ jan² ma³-ni³, to⁴nca³ nta³ tsa² ncjin² ma³-ni³, li²coi³ qui³xi³jnta² na⁴ˀya³.
JOH 21:12 Jesús qui³tso²-le⁴: Nčhoao¹³, ti⁴cho³. Ni⁴ˀya³-jin² cho⁴ta⁴-le⁴ xi³ coan³nˀion¹con³ nca³ scoi⁴na³nqui³-le⁴: ˀya¹-ni³ ji³. Tsen³ coan³-le⁴ nca³ je² Nai³-na¹.
JOH 21:13 Ji³nčhoa³ Jesús, qui³scoe¹ nio⁴xti²la⁴, qui³tsjoa³-le⁴. Ti⁴cˀoa⁴qui³sˀin³-ni³ cao⁴ jti⁴-ve⁴.
JOH 21:14 Je²-vi⁴ coan³jan²cˀa³-ni³ nca³ Jesús tsa³ca³co¹son²tsen³-le⁴ yao³-le⁴ cho⁴ta⁴-le⁴, cˀia⁴ nca³ je³ja³ˀa³ya²jin³-ni³le⁴ cˀen³.
JOH 21:15 Cˀia⁴ nca³ je³tsa³cjen², Jesús qui³tso²-le⁴ Simón Pedro: Simón, ˀnti¹-le⁴ Jonás, a³ nqui²sa⁴ tsjoa³cha³-nai¹³ cao⁴-ni³ tsa² je²-vi⁴. Pedro qui³tso²-le⁴: Jaon³, Señor, ji³ ˀyai³ nca³ tsjoa³que⁴-le²³. Jesús qui³tso²-le⁴: Ti⁴coi²ntai⁴ va³rre²ˀnti¹-na⁴.
JOH 21:16 Jesús cˀoa⁴qui³tso²-nca¹ni³le⁴ nca³ ma³jao²cˀa²-ni³: Simón, ˀnti¹-le⁴ Jonás, a³ tsjoa³cha³-nai¹³. Pedro qui³tso²-le⁴: Jaon³, Señor, ji³ ˀyai³ nca³ tsjoa³que⁴-le²³. Jesús qui³tso²-le⁴: Ti⁴coi²ntai⁴ va³rre²-na⁴.
JOH 21:17 Cˀia⁴ cˀoi⁴qui³tso²-le⁴ xi³ coan³jan²cˀa²-ni³: Simón, ˀnti¹-le⁴ Jonás, a³ tsjoa³cha³-nai¹³. Coan³va³-le⁴ Pedro nca³ coan³jan²cˀa²-ni³ cˀoa⁴qui³tso²-le⁴: A³ tsjoa³cha³-nai¹³. Qui³tso²-le⁴: Señor, ji³ xi³ ˀyai³ nca³yi³je³ cjoa⁴, ji³ ˀyai³ nca³ tsjoa³que⁴-le²³. Jesús qui³tso²-le⁴: Ti⁴coi²ntai⁴ va³rre²-na⁴.
JOH 21:18 Ña³qui³ cjoa⁴qui²xi⁴ ña³qui³ cjoa⁴qui²xi⁴ xi³ xin³-le²³: Cˀia⁴ nca³ nqui²sa⁴-sa³ xti³ ti³soi³, ti⁴ji³ qui³chˀa²cja¹-ni³ na³jño³-li⁴, cˀin³ jña³ nca³ coan³me³-li². To⁴nca³ cˀia⁴ nca³ coan⁴jchi¹ncai³ cjoe¹ncˀai³ ntsai⁴, cja⁴ˀai¹ xi³ si⁴²cˀa³cja¹-li² na³jño³-li⁴, coai⁴cao⁴-li² jña³ nca³ li²coi³ coan⁴me³-li².
JOH 21:19 Coi³ cˀoi⁴qui³tso²-ni³ Jesús, nca³ cˀoa⁴-sˀin² qui³si³cho⁴ya³-le⁴ jo³-sˀin² nca³ coi⁴ya¹, nca³ cˀoa⁴sje³je³ya³ Ni³na¹. Cˀia⁴ nca³ je³cˀoa⁴qui³tso², tˀin³tjen⁴nqui³-nai¹³, qui³tso²-le⁴ Pedro.
JOH 21:20 Qui³si³cˀo¹fa³ Pedro, qui³sco²tsen³-le⁴ nca³ ti¹fi²tjen⁴nqui³-le⁴ je² cho⁴ta⁴-le⁴ xi³ Jesús cjai¹nca³ tsjoa³que³, xi³ tsa³cˀe²jna³tˀa³-le⁴ Jesús cˀia⁴ nca³ tsa³cjen² nca³ njion², xi³ cˀoi⁴qui³tso²-le⁴: Señor, ˀya¹-ni³ xi³ sca⁴ni²tˀa³-li².
JOH 21:21 Cˀia⁴ nca³ Pedro tsa³ve³ je² cho⁴ta⁴-vi⁴, cˀoi⁴qui³tso²-le⁴ Jesús: Señor, cˀoa⁴ je²-vi⁴, jme¹ xi³ coan⁴-le⁴.
JOH 21:22 Jesús cˀoi⁴qui³tso²-le⁴: Tsa² me³-na³ nca³ je² cˀoe¹jna³ jo³ sa³ˀnta³ nca³ cjoe²ˀe⁴, jme¹ coi²nta⁴-li⁴. Tˀin³tjen⁴nqui³-nai¹³ nca³ ji³.
JOH 21:23 Ji³tjo³jin³-le⁴ ntsˀe⁴ jnco³ en¹ xi³ tso² nca³ je² cho⁴ta⁴-le⁴ve⁴ li²coi³ coi⁴ya¹. To⁴nca³ Jesús li²coi³ cˀoa⁴qui³tso² nca³ li²coi³ coi⁴ya¹, to⁴nca³ qui³tso² tsa² me³-na³ nca³ je² cˀoe¹jna³ jo³ sa³ˀnta³ nca³ cjoe²ˀe⁴, jme¹ coi²nta⁴-li⁴.
JOH 21:24 Je²-vi⁴ je² cho⁴ta⁴-le⁴ Jesús xi³ cˀoa⁴-sˀin² tsjoa¹ en¹ xi³ tˀa³tsˀe⁴ nca³yi³je³ cjoa⁴-vi⁴. Je² qui³squi³ je² cjoa⁴-vi⁴, cˀoa⁴ ˀya³-nia¹ nca³ en¹-le⁴ cjoa⁴qui²xi⁴-ni¹.
JOH 21:25 Cˀoa⁴-ti⁴ cjai¹nca³ to⁴ncjin²-sa³ cjoa⁴ xi³ qui³sˀin³ Jesús. Tsa² tji¹tˀa³-la²sa³ xon⁴ nca³ jnco¹jnco¹, an³ xian³ nca³ ni⁴ˀi⁴-jin²la⁴ son³ˀnte³ coan⁴ jcho¹ya³ je² libro xi³ cˀoa⁴-sˀin² sˀe⁴tˀa³. Cˀoa⁴ ca²ta³ma³.
ACT 1:1 Ji³-lai²³ Teófilo, je² xon⁴ xi³ ti¹tjon² qui³squi³-le²³ ya⁴ qui³nchja²tˀa³ nca³yi³je³ cjoa⁴ xi³ Jesús tsa³cˀe¹tsˀia⁴cao⁴ nca³ cˀoa⁴qui³sˀin³, cˀoa⁴ nca³ qui³sˀin³, cao⁴ nca³ tsa³ca³co¹ya³,
ACT 1:2 sa³ˀnta³ je² ni⁴čhjin³ nca³ qui³tjo³ve¹ ja⁴ncˀa¹. Xi³ to⁴tˀa³tsˀe⁴ je² Espíritu Santo Jesús je³qui³tsjoa³-le⁴ cjoa⁴-te¹xo³ma³ je² pa²stro⁴ xi³ tsa³cja³ˀa¹jin³.
ACT 1:3 Cˀia⁴ nca³ je³tsa³cja³ˀa¹ cjoa⁴ñˀain³, Jesús tsa³ca³co¹-le⁴ yao³-le⁴ nca³ ti¹jna³con³. Li² to⁴cˀoa⁴cji³ ncjin² cjoa⁴ xi³ tsa³ca³co¹, nca³ ña³qui³ cˀoa⁴²tjin¹ nca³ ti¹jna³con³. Ña³chan² ni⁴čhjin³ Jesús coan³tsen³-ni³le⁴ pa²stro⁴-le⁴, cˀoa⁴ tsa³cja¹cao⁴ xi³ tˀa³tsˀe⁴ cjoa⁴te¹xo³ma³-le⁴ Ni³na¹.
ACT 1:4 Cˀia⁴ nca³ Jesús ti¹jna³cao⁴-sa³ je² pa²stro⁴, tsa³cˀe¹ne²-le⁴ nca³ tsi² tsa² coi⁴tjo³-ni³ Jerusalén, to⁴nca³ ca²ta³co³ya³-le⁴ je² xi³ Nˀai³-na¹ qui³si³sˀe³nqui³-le⁴ nca³ je². Jesús cˀoi⁴qui³tso²-le⁴: Coi³ xi³ qui³no²ˀya²-ni³nao¹³.
ACT 1:5 Ña³qui³ cjoa⁴qui²xi⁴ nca³ Juan tsa³ca³te¹nta¹-ni³ cao⁴ na³nta¹, to⁴nca³ ma³čhian³-le⁴ ni⁴čhjin³ nca³ jon² sa⁴te²nta¹-nio³ cao⁴ je² Espíritu Santo.
ACT 1:6 Cˀia⁴ nca³ tjio¹xco¹, qui³tsi²na³nqui³-le⁴: Señor, a³ cˀoe¹nta³ya³ nqui²jnco³cˀa²-lai⁴ cho⁴ta⁴ Israel je² cjoa⁴te¹xo³ma³ coi³ ni⁴čhjin³-vi⁴.
ACT 1:7 Jesús cˀoa⁴qui³tso²-le⁴: Li²coi³ jon² vˀa³cao⁴-no³ nca³ jchao⁴³ cˀia⁴-ni³ a³xo⁴ jo³ chon³-ni³. Je² Nˀai³-na¹ to⁴je² to⁴jnco³ tsa³cˀe¹jna³-le⁴ yao³-le⁴ cjoa⁴te¹xo³ma³.
ACT 1:8 To⁴nca³ tjoe¹-no³ nca³nˀion¹ cˀia⁴ nca³ je² Espíritu Santo cjoa⁴ˀai¹-no³. Jon² coaon⁴³ testigo-na⁴ i⁴ Jerusalén, cao⁴ nca³qui³jnta² na³nqui³ Judea, cao⁴ ya⁴ Samaria, cao⁴ jña³ sa³ˀnta³ nca³ fe³tˀa³ son³ˀnte³.
ACT 1:9 Cˀia⁴ nca³ Jesús je³cˀoa⁴qui³tso², tjen⁴ nca³ je² pa²stro⁴ tjio¹co³tsen³-le⁴, Jesús qui³tjo³ve¹ ja⁴ncˀa¹. Qui³cha³jin³ yo³jvi³. Pa²stro⁴ li²coi³ ti⁴tsa³ve³-ni³ Jesús.
ACT 1:10 Tjen⁴ nca³ tjio¹co³tsen³ncˀa¹ pa²stro⁴, nca³ ti¹fi² Jesús, jao² cho⁴ta⁴xˀin⁴ tsa³qui³ncha³tˀa³-le⁴ pa²stro⁴. Na³jño³čhoa³ yˀa³cja¹.
ACT 1:11 Je² cho⁴ta⁴ xo⁴cjoan³-ve⁴ cˀoa⁴qui³tso²-le⁴: Jon² cho⁴ta⁴xˀin⁴ galileos, a¹-ni³ nca³ ti³ncha³nto³-nio³, nca³ ti³cho²tsen³-lao⁴³ ncˀa³jmi³. Ti⁴je²-ni³ Jesús xi³ ji³tjo³xin²-no³, xi³ qui³ ncˀa¹, ti⁴cˀoa⁴-sˀin² cjoa⁴ˀai¹-ni³, jo³-sˀin² nca³ ca²ˀyao³ nca³ ca²fi²mi³ ncˀa¹.
ACT 1:12 Cˀia⁴ ji³nčhoa³-ni³ ni³nto³ jña³ nca³ Olivar ˀmi² xi³ ti¹jna³čhian³-le⁴ Jerusalén, jo³-sˀin² nca³ tjo³ˀnte³-le⁴ fi² jña³ čhian³ cˀia⁴ nca³ ni⁴čhjin³ ni²cja¹ya³. Ja³ˀai³-ni³ Jerusalén.
ACT 1:13 Ja³ˀa³sˀen³ Jerusalén. Qui³mi³ cuarto xi³ ma³jao²jco³-ni³ jña³ nca³ tjio¹ Pedro, Jacobo, Juan, Andrés, Felipe, Tomás, Bartolomé, Mateo, Jacobo ˀnti¹-le⁴ Alfeo, Simón Zelote, Judas ntsˀe⁴ Jacobo.
ACT 1:14 Je² nca³tsˀi³ pa²stro⁴-vi⁴ cao⁴ ya¹nchjin¹, cao⁴ María na⁴-le⁴ Jesús, cˀoa⁴ cao⁴ ntsˀe⁴, to⁴jnco³ cjoa⁴fa³ˀai³tsjen³-le⁴, cˀoa⁴ to⁴jnco³ tjio¹. Nchaon³nchaon³ tjio¹vˀe¹tsˀoa³-le⁴ Ni³na¹.
ACT 1:15 Cˀia⁴ ni⁴čhjin³-ve⁴ Pedro tsa³qui³so¹tjen⁴jin³-le⁴ ntsˀe⁴. (Je² nca³tsˀi³ cho⁴ta⁴ xi³ coan³xco¹ jnco³ ciento cao⁴ can³-la⁴ ma³-ni³.) Pedro qui³tso²-le⁴:
ACT 1:16 Nca³tsˀio³ ˀnti¹ntsˀe³, coan³chjen¹ nca³ ji³tjo³son² xon⁴ Escritura jo³ qui³tso² nca³sˀa⁴ xi³ tˀa³tsˀe⁴ Judas, je² xi³ qui³ca³co¹-le⁴ je² xi³ qui³tsoa³ Jesús. Je² Espíritu Santo xo⁴ qui³tso² cao⁴ tsˀoa³ David.
ACT 1:17 Je² cho⁴ta⁴-ve⁴ coan³xqui⁴ cao⁴ ña¹-vi⁴. Qui³tsˀai²-le⁴ ˀnte³ nca³ qui³si³cji³tjo³son² xa¹-vi⁴.
ACT 1:18 Je²-vi⁴ˀni³ tsa³ca³tse³ jnco³ ˀnte³ cao⁴ je² taon⁴ xi³ qui³njen²-ni³le⁴ cjoa⁴tsˀen⁴-le⁴. Qui³sca³tsa³cjan² tˀa³na³nqui³. Qui³tjo³ˀai² tsˀoa⁴, nca³yi³je³ nˀo¹yˀe⁴-le⁴ qui³tsao³va³.
ACT 1:19 Tsa³ve³ nca³tsˀi³ xi³ tsa³ca³tio² ya⁴ Jerusalén. Coi³ cjoa⁴ Acéldama ˀmi² je² ˀnte³-ve⁴ nca³ en¹-le⁴ xi³ tso²-ni³ ˀnte³njin¹.
ACT 1:20 Ya⁴ tji¹tˀa³ libro xi³ salmos ˀmi²: Ca²ta³vi³xo²ya³ ni³ˀya³-le⁴, ni⁴ˀya³-jin² cho⁴ta⁴ xi³ ca²ta³va³tio². Cja⁴ˀai¹ cho⁴ta⁴ xi³ ca²ta³vˀai²-le⁴ xa¹-le⁴.
ACT 1:21 Ma³chjen¹-la⁴ˀni³ jnco³ xi³ testigo ca²ta³ma³ cao⁴ ña¹ nca³ Cristo ja³ˀa²ya³-le⁴,
ACT 1:22 jnco³ xi³ tsˀe⁴ je² cho⁴ta⁴xˀin⁴ xi³ tjio¹cao⁴-na¹ nca³ntsjai² ni⁴čhjin³ cˀia⁴ nca³ je² Nai³-na¹ Jesús tsa³cˀe²jna³jin³-na¹, sa³ˀnta³ ni⁴čhjin³ nca³ Juan tsa³ca³te¹nta¹, cˀoa⁴ sa³ˀnta³ ni⁴čhjin³ nca³ qui³tjo³ve¹jin³-na¹ Jesús ja⁴ncˀa¹.
ACT 1:23 Cˀia⁴ jao² cho⁴ta⁴ tsa³cja³ˀa¹jin³: Jnco³ xi³ Matías, jnco³ xi³ José xi³ Barsabás ˀmi², nqui²jnco³ jan³ˀain¹ tjin¹-le⁴ Justo ˀmi².
ACT 1:24 Tsa³cˀe¹tsˀoa³: Ji³ Señor xi³ ˀyai³ ni⁴ma⁴-le⁴ nca³tsˀi³, ta⁴co²-na³jin⁴ jña³-le⁴ xi³ chja³ˀa²jin³ nca³ jao²-vi⁴,
ACT 1:25 jme¹-ni³ nca³ je² scoe¹-si¹ni³ xa¹-le⁴ pa²stro⁴ xi³ qui³tsjion³ Judas nca³ tsa³ca³jnqui³ je¹. Je³qui³ jña³ ˀnte³ tsˀa³cao⁴-le⁴.
ACT 1:26 Qui³si³sca¹cao⁴. Je² Matías qui³njen²-le⁴. Coan³xqui⁴cao⁴ xi³ te³jnco³ pa²stro⁴.
ACT 2:1 Cˀia⁴ nca³ ji³cho² ni⁴čhjin³-le⁴ sˀoi¹ Pentecostés, nca³tsˀi³ to⁴jnco³ tjio¹.
ACT 2:2 Nti⁴ton⁴ ja³ˀai³-ni³ ncˀa³jmi³ jnco³ xi³ fa³ne³, jo³-ni³ ntjao⁴ xi³ nˀion¹ fa³ˀa³. Ja³ne³ya³ nca³yi³je³ ni³ˀya³ jña³ nca³ tjio¹.
ACT 2:3 Coan³tsen³-le⁴ jo³-ni³ tsa² ni⁴jen⁴lˀi¹ xi³ coan³jao²ya³. Jnco¹jnco¹ qui³tsao³son²-le⁴.
ACT 2:4 Cˀia⁴ cjai¹nca³ to⁴qui³sˀe³jin³ ni⁴ma⁴-le⁴ nca³tsˀi³ je² Espíritu Santo. Tsa³cˀe¹tsˀia⁴cao⁴ nca³ cja⁴ˀai¹ en¹ qui³nchja⁴, jo³-sˀin² nca³ je² Espíritu qui³tsjoa³-le⁴ nca³ qui³nchja⁴ya³.
ACT 2:5 Coi³ ni⁴čhjin³ tjio¹ ya⁴ Jerusalén cho⁴ta⁴ judíos, cho⁴ta⁴xˀin⁴ xi³ ve³xcon¹ Ni³na¹. Ja³ˀai³-ni³ nca³qui³jnta² ˀnte³ xi³ tjin¹ son³ˀnte³-vi⁴.
ACT 2:6 Cˀia⁴ coan³xco¹ nca³tsˀi³ cho⁴ta⁴ncjin²-ve⁴ nca³ qui³nčhˀoe¹ je²-ve⁴. Jo³ to⁴coan³xcon¹-le⁴ nca³ jnco¹jnco¹ qui³nčhˀoe¹-le⁴ nca³ qui³nchja⁴ xi³ ti⁴tsˀe⁴-ni³ en¹.
ACT 2:7 Jo³ to⁴cˀoa⁴coan³-le⁴, jo³ to⁴coan³xcon¹-le⁴. Qui³tso²: A³ tsi² tsa² cho⁴ta⁴ galileo je² nca³tsˀi³ xi³ tjio¹nchja⁴.
ACT 2:8 Jo¹ ma³-ni³ˀni³ nca³ no²ˀya²-le⁴² nca³ jnco¹jncoa¹ je² en¹-na¹ xi³ qui³tsin³coa⁴².
ACT 2:9 Cho⁴ta⁴ partos, cho⁴ta⁴ medos, cho⁴ta⁴ elamitas, nca³tsˀia³² xi³ ti³yoa³² ya⁴ Mesopotamia, i⁴ Judea, ya⁴ Capadocia, ya⁴ Ponto, ya⁴ Asia,
ACT 2:10 ya⁴ Frigia, ya⁴ Panfilia, ya⁴ Egipto, je² ˀnte³ Africa xi³ tjio¹ntai³-le⁴ na³nqui³ Cirene, cho⁴ta⁴ romanos xi³ to⁴ja³ˀai³ co³tsen³, cho⁴ta⁴ judíos cao⁴ je² xi³ qui³si³cˀa³ntjai²ya³ yao³-le⁴ nca³ judío coan³,
ACT 2:11 cho⁴ta⁴ cretenses cao⁴ cho⁴ta⁴ árabes, no²ˀya²-le⁴² nca³ nchja⁴ xi³ ti⁴tsan⁴²-nia³² en¹ je² cjoa⁴xcon¹ xi³ tsˀe⁴ Ni³na¹.
ACT 2:12 Jo³ to⁴cˀoa⁴coan³-le⁴ nca³tsˀi³, to⁴qui³jma²-le⁴. Cˀoi⁴qui³tso²-le⁴ nca³ i⁴ nca³ jan¹ xi¹ncjin¹: Jme¹ xi³ tso²ya³-ni³le⁴ je²-vi⁴.
ACT 2:13 Cˀoa⁴ xi³cˀa³ to⁴tsa³qui³jno²que³, cˀoi⁴qui³tso²: Cjai¹-la² nca³ tse³ xan¹ ca²ˀvi³-vi⁴.
ACT 2:14 Cˀia⁴ Pedro tsa³ca³sen²nto³jin³-le⁴ cao⁴ xi³ te³jnco³ pa²stro⁴, nˀion¹ qui³nchja⁴cao⁴, cˀoa⁴ qui³nchja⁴ya³jin³-le⁴: Nˀai³ judíos, cˀoa⁴ nca³tsˀio³ xi³ ti³yo³ i⁴ Jerusalén, na¹nta³ ˀyao³ je²-vi⁴, cˀoa⁴ ti⁴no¹ˀyao²³ en¹-na⁴.
ACT 2:15 Je² cho⁴ta⁴-vi⁴ a³li² chˀi⁴-jin², jo³-sˀin² nca³ ni²cja³ˀai³tsjaon³, nca⁴ sˀa⁴coan³ jan² hora-le⁴ ni⁴čhjin³.
ACT 2:16 To⁴nca³ je²-vi⁴ xi³ cˀoa⁴qui³tso² Joel, je² xi³ qui³nchja⁴ya³ tˀa³tsˀe⁴ Ni³na¹:
ACT 2:17 Cˀoa⁴tso² Ni³na¹ nca³ cˀoa⁴coan⁴ cˀia⁴ nca³ cjoe⁴tˀa³-ni³ ni⁴čhjin³. Je² Espíritu Santo-na⁴ si³cˀa³vi¹son²-le⁴ nca³tsˀi³ cho⁴ta⁴. Je² xti³xˀin⁴-no³, cˀoa⁴ je² xti³ya¹nchjin¹-no³ coi⁴nchja⁴ya³. Je² cho⁴ta⁴xti³-no³ scoe⁴ cjoa⁴xcon¹, cˀoa⁴ je² cho⁴ta⁴jchi¹nca³-no³ cˀoai⁴-le⁴ ni³jña¹.
ACT 2:18 Xi³ cjoa⁴qui²xi⁴, cˀia⁴ ni⁴čhjin³-ve⁴ je² cho⁴ˀnta³-na⁴ xi³ xˀin⁴ cao⁴ xi³ ya¹nchjin¹ si³cˀa³vi¹son²-le⁴ Espíritu Santo-na⁴. Cˀoa⁴-sˀin² coi⁴nchja⁴ya³.
ACT 2:19 Coa³coa³ cjoa⁴xcon¹ ya⁴ ncˀa³jmi³, cˀoa⁴ i⁴ son³ˀnte³-vi⁴ tsjoa³ choa⁴ xi³ njin¹ cao⁴ lˀi¹ cao⁴ ni⁴ˀnti⁴.
ACT 2:20 Je² tsˀoi¹ coan⁴njion²-ni¹, cˀoa⁴ je² sa¹ njin¹ coan⁴, to⁴nqui³-ni³ nca³ cjoa⁴ˀai¹ ni⁴čhjin³-le⁴ Nai³-na¹. Nˀion¹ tse³ cjoa⁴ xi³ coan⁴tsen³ coi³ ni⁴čhjin³-ve⁴.
ACT 2:21 Cˀoa⁴coan⁴ nca³ je² nca³tsˀi³ xi³ coi⁴nchja⁴-le⁴ Jesucristo je² Nai³-na¹ cao⁴ jan³ˀain¹-le⁴ coi⁴tjo³ntjai²-ni¹.
ACT 2:22 Nca³tsˀio³ nˀai³ israelitas, ti⁴no¹ˀyao²³ je² en¹-vi⁴: Jesús cho⁴ta⁴ nazareno, cho⁴ta⁴xˀin⁴ xi³ Ni³na¹ ja³ˀai³-ni³ xi³ coan³qui²xi⁴ya³jin³-no³ xi³ to⁴tˀa³tsˀe⁴ nca³nˀion¹-le⁴, cao⁴ cjoa⁴xcon¹, cao⁴ choa⁴. Je² cjoa⁴-vi⁴ xi³ Ni³na¹ qui³si³nta³ cao⁴ Jesús nqui³xcon³ nca³ jon², jo³-sˀin² nca³ cˀoa⁴-ti⁴ ˀyao³ nca³ jon².
ACT 2:23 Je² Jesús qui³ni²⁴ntsja³, jo³-sˀin² nca³ Ni³na¹ to⁴nqui³-ni³ qui³sco³son²-ni³le⁴, cˀoa⁴ to⁴nqui³-ni³ tsa³ve³. Jon² qui³nto³vao³ qui³ni²cˀen³-nio³ cao⁴ ntsja³ cho⁴ta⁴je¹. Tsa³cja³tˀao³ cro².
ACT 2:24 Je² Jesús Ni³na¹ qui³sco²mi³tjen⁴, tsa³cja³ˀa¹xin²-le⁴ je² cjoa⁴ñˀain³ xi³ tsˀe⁴ cjoa⁴vi³ya³. Li²coi³ coan³ nca³ ntia³ qui³sˀe³jna³nˀion¹ cjoa⁴vi³ya³ Jesús.
ACT 2:25 Je² David qui³tso² xi³ tˀa³tsˀe⁴: Tsa³ˀve³-nia¹³ je² Nai³-na¹ nca³ntsjai² nqui³xcoan³. I⁴ ntsa⁴qui²xi⁴ ti¹jna³, jme¹-ni³ nca³ tsi² cjoa⁴tse¹xcon¹-si¹nia³.
ACT 2:26 Coi³ cjoa⁴ ni⁴ma⁴-na⁴ coan³tsjoa³-le⁴, cˀoa⁴ ni³jen³ to⁴tsjoa³ coan³-le⁴. Cˀoa⁴-ti⁴ yao³-na⁴ nta³ si⁴²cja¹ya³ nca³ ti¹co³ya³cao⁴cjoa⁴.
ACT 2:27 Li²coi³ si⁴cˀe¹jnai³ ni⁴ma⁴-na⁴ nqui³ cjoa⁴te¹xo³ma³-le⁴ cjoa⁴vi³ya³. Li²coi³ cˀoai⁴ˀnte³-lai⁴ Cristo xi³ ˀnti¹tsje³-li⁴ nca³ cjoi⁴ˀnto³.
ACT 2:28 Tsa³cˀin²ya³-nai¹³ ntia⁴²-le⁴ cjoa⁴vi³jna³chon³. Cjai¹nca³ to⁴tsjoa³ coan⁴ ni⁴ma⁴-na⁴ cˀia⁴ nca³ ti³jna³cao⁴-nai¹³.
ACT 2:29 Nca³tsˀio³ ˀnti¹ntsˀe³, tjo³ˀnte³-na³ nca³ fa³cao⁴tsen³-no³ xi³ tˀa³tsˀe⁴ je² cho⁴ta⁴jchi¹nca³-na¹ David xi³ cˀen³, cˀoa⁴ xi³ qui³sˀe³ñai³. Je² tsjo¹-le⁴ ti¹jna³cao⁴-na¹ sa³ˀnta³ ntˀai⁴-vi⁴.
ACT 2:30 Je² David xi³ qui³nchja⁴ya³ tsa³ve³ nca³ cˀoa⁴-sˀin² Ni³na¹ qui³tsjoa³ tsˀoa³ nca³ ña³qui³ cjoa⁴qui²xi⁴ cˀoe¹jna³ne² ya¹xi²le⁴-le⁴ jnco³ xi³ cjoi⁴nčhoa³-ni³ ntje⁴-le⁴, je² Cristo.
ACT 2:31 Cˀoa⁴-sˀin² David to⁴nqui³-ni³ tsa³ve³, cˀoa⁴ qui³nchja⁴ xi³ tˀa³tsˀe⁴ cjoa⁴fa³ˀa²ya³-le⁴ Cristo, nca³ tsi² tsa² ya⁴ qui³sˀe³jna³ ni⁴ma⁴-le⁴ nqui³ cjoa⁴te¹xo³ma³-le⁴ cjoa⁴vi³ya³, ni⁴je²-jin² yao³-le⁴ ji³ˀnto³.
ACT 2:32 Je² Jesús xi³ Ni³na¹ qui³si³cja³ˀa¹ya³-le⁴. Nca³tsˀi³-jin⁴ testigo ni¹⁴-jin⁴ xi³ tˀa³tsˀe⁴ je²-vi⁴.
ACT 2:33 Ni³na¹ qui³si³quin³ncˀa³ Jesús, qui³si³cˀe¹jna³ ya⁴ nca³qui²xi⁴-le⁴. Jesús qui³tjoe¹-le⁴ je² Espíritu Santo xi³ Nˀai³-na¹ qui³tsjoa³ tsˀoa³ nca³ tsjoa¹-le⁴. Cˀoa⁴-sˀin² Jesús qui³si³cˀa³vi¹son² je² cjoa⁴-vi⁴ xi³ ˀyao³ xi³ no²ˀyao²³ ntˀai⁴-vi⁴.
ACT 2:34 Je² David li²coi³ qui³mi³ ncˀa³jmi³, to⁴nca³ je² cˀoa⁴qui³tso²: Je² Nai³-na¹ qui³tso²-le⁴ Nai³-na⁴, ti⁴jnai³ nca³qui²xi⁴-na⁴,
ACT 2:35 sa³ˀnta³ nca³ si³cˀe¹jna³nquia³ ntso⁴coi³ co²ntran⁴-li⁴.
ACT 2:36 Cjai¹nca³ nta³ ca²ta³ve³ nca³tsˀi³ cho⁴ta⁴ Israel nca³ je² Jesús xi³ jon² tsa³cja³tˀao³ cro², Ni³na¹ tsa³ca³sen¹nta³ Nai³-na¹ cˀoa⁴ Cristo.
ACT 2:37 Cˀia⁴ nca³ qui³nčhˀoe¹ en¹ xo⁴ tso²-ve⁴, cho⁴ta⁴ qui³si³cjao¹jin³ ni⁴ma⁴-le⁴, cˀoa⁴qui³tso²-le⁴ Pedro cao⁴ xi³cˀa³ pa²stro⁴: Nca³tsˀio³ ˀnti¹ntsˀai³⁴-jin⁴, jme¹-ni³ xi³ sˀiain⁴-jin⁴ ntˀai⁴.
ACT 2:38 Cˀia⁴ Pedro qui³tso²-le⁴: Ti⁴cˀa³ntjai²yao³ cjoa⁴fa³ˀai³tsjen³-no³, ca²ta³sa³te¹ntao¹³ nca³tsˀio³ nca³ cho⁴ta⁴-le⁴ Cristo coaon⁴³, jme¹-ni³ nca³ cha⁴tˀa³-si¹ni³ je¹-no³, cˀoa⁴ tjoe¹-no³ je² cjoa⁴tjao² xi³ je² Espíritu Santo.
ACT 2:39 Tsaon⁴³-nio¹³ je² xi³ Ni³na¹ qui³tsjoa³-no³ tsˀoa³ cao⁴ xti³-no³ cao⁴ nca³tsˀi³ xi³ cjin³ tjio¹, jo³ tjin¹ ma³-ni³ xi³ je² Nai³-na¹, je² Ni³na¹-na¹, coi⁴nchja⁴-le⁴.
ACT 2:40 A³li² to⁴cˀoa⁴cji³ en¹ xi³ cja⁴ˀai¹ xi³ qui³nchja⁴ Pedro nca³ qui³tsjoa³ en¹ nca³ tsa³cˀe¹ne²-le⁴, cˀoa⁴qui³tso²: Chˀa⁴sje³ntjai²-lao⁴³ yao³-no³ cho⁴ta⁴tsˀen⁴ xi³ tjin¹ ntˀai⁴-vi⁴.
ACT 2:41 Je² xi³ qui³scoe¹ en¹-le⁴ qui³sa³te¹nta¹-ni³. Jan²-la⁴ jmi³ ma³-ni³ cho⁴ta⁴ xi³ ja³ˀa³sˀen³tˀa³-le⁴ coi³ ni⁴čhjin³-vi⁴.
ACT 2:42 Nchaon³nchaon³ to⁴coi³ qui³tjen⁴nqui³-le⁴ je² en¹ jo³-sˀin² qui³tso²ya³ pa²stro⁴, cˀoa⁴ nca³ to⁴jnco³ coan³xco¹, cˀoa⁴ nca³ qui³si³xcoa⁴ nio⁴xti²la⁴, cˀoa⁴ nca³ tsa³cˀe¹tsˀoa³.
ACT 2:43 Nca³tsˀi³ cho⁴ta⁴ qui³tso³cjon¹-le⁴. Cjai¹nca³ to⁴ncjin² cjoa⁴xcon¹ cao⁴ choa⁴ xi³ qui³sˀin³ je² pa²stro⁴.
ACT 2:44 Je² nca³tsˀi³ xi³ coan³cjain¹-le⁴ ña³qui³ tsa³ca³tio²jtin¹-ni¹. To⁴jnco³ tjin¹-le⁴ nca³yi³je³ tso³jmi²-le⁴.
ACT 2:45 Tso³jmi²-le⁴ cao⁴ na³nqui³-le⁴ tsa³ca³te¹na³-ni¹. Qui³si³cˀa³vi¹-le⁴ nca³tsˀi³ jo³-sˀin² nca³ coan³chjen¹-le⁴ nca³ jnco¹jnco¹.
ACT 2:46 Nchaon³nchaon³ qui³si³sin³ nca³tsˀi³ ya⁴ya³ yo⁴nco⁴, cˀoa⁴ ya⁴³ ni³ˀya³-le⁴ qui³si³xcoa⁴ nio⁴xti²la⁴. Ña³tjen⁴ tsa³cjen² cao⁴ cjoa⁴tsjoa³ nca³ ña³qui³ tjio¹jnco³con³ ni⁴ma⁴-le⁴.
ACT 2:47 Cjai¹nca³ to⁴je³ya³ tsˀa³sje³ Ni³na¹, cˀoa⁴ nca³tsˀi³ cho⁴ta⁴ na⁴xi⁴na³nta¹ cjai¹nca³ to⁴nta³ tsˀa³sje³ nca³ je². Nchaon³nchaon³ je² Nai³-na¹ qui³si³cja³ˀa³sˀen³tˀa³-le⁴ je² cho⁴ta⁴-le⁴ Cristo je² xi³ coi⁴tjo³ntjai².
ACT 3:1 Pedro cao⁴ Juan ña³tjen⁴ qui³mi³ ya⁴ yo⁴nco⁴, choa⁴-le⁴ nca³ vˀe¹tsˀoa³ cho⁴ta⁴, las tres nca³ ma³xon².
ACT 3:2 Cho⁴ta⁴ ya⁴ ja³ˀai³cao⁴ jnco³ cho⁴ta⁴xˀin⁴ xi³ chi⁴ˀnque¹ jo³ sa³ˀnta³ nca³ qui³tsin³. Nchaon³nchaon³ ya⁴ qui³si³cˀe¹jna³ jčho³ xo⁴ntjoa⁴-le⁴ yo⁴nco⁴, coi³ xo⁴ntjoa⁴ xi³ na⁴sca¹ cji³ ˀmi². Ya⁴ qui³si³je¹-le⁴ limosna je² xi³ fa³ˀa³sˀen³.
ACT 3:3 Je² cho⁴ta⁴ chi⁴ˀnque¹-vi⁴ cˀia⁴ nca³ tsa³ve³ Pedro cao⁴ Juan nca³ tjio¹fa³ˀa³sˀen³ ya⁴³ yo⁴nco⁴, tsa³cˀe¹tsˀoa³-le⁴ nca³ ca²ta³tsjoa¹ jo³ tjin¹-le⁴ limosna.
ACT 3:4 Pedro cao⁴ Juan qui³sco³ˀa² qui³tso²: Cho¹tsen³ˀa²-na³jin⁴.
ACT 3:5 Cˀoa⁴ je² cho⁴ta⁴-ve⁴ˀni³ qui³sco³ˀa³jnta². Ti¹co³ya³ tsa² jme³ xi³ tsjoa¹ i⁴tse¹-le⁴.
ACT 3:6 Cˀoi⁴qui³tso² Pedro: Tsin²-na³ taon⁴čhoa³, tsin²-na³ taon⁴si³ne², to⁴nca³ je² xi³ tjin¹-na³, tsjoa³-le²³. Cao⁴ jan³ˀain¹-le⁴ Jesucristo xi³ Nazaret tsˀe⁴, ti²so⁴tjain⁴ to¹mjain³.
ACT 3:7 Qui³scoe¹ ntsja³ nca³qui²xi⁴ qui³sco²mi³tjen⁴. Cˀia⁴ qui³sˀe³ nti⁴ton⁴-le⁴ nca³nˀion¹ ntso⁴co⁴ cao⁴ ya¹sin³ntso⁴co⁴.
ACT 3:8 Cˀia⁴ qui³squi²⁴ncˀa³, tsa³ca³sen²nto³, tsa³cˀa³mjen³. Ja³ˀa³sˀen³ yo⁴nco⁴ cao⁴ Pedro cao⁴ Juan. Tso²ˀva³, cji²⁴ncˀa³, jo³ vˀa³sje³je³ya³ Ni³na¹.
ACT 3:9 Nca³tsˀi³ cho⁴ta⁴ na⁴xi⁴na³nta¹ tsa³ve³ nca³ tso²ˀva³ nca³ vˀa³sje³je³ya³ Ni³na¹.
ACT 3:10 Ve³ nca³tsˀi³ nca³ je² ˀnti¹cho⁴ta⁴ xo⁴cji³-ve⁴ je² ni¹ xi³ qui³si³je¹ limosna, xi³ tsa³cˀe²jna³ jčho³ xo⁴ntjoa⁴-le⁴ yo⁴nco⁴ xi³ na⁴sca¹ cji³ ˀmi². Jo³ nca³ to⁴coan³xcon¹-le⁴, jo³ to⁴qui³tso³cjon¹ je² cjoa⁴ xi³ coan³-le⁴.
ACT 3:11 Je² cho⁴ta⁴ chi⁴ˀnque¹ xi³ coan³nta³-ni³ qui³tsoa³ Pedro cao⁴ Juan. Nca³tsˀi³ cho⁴ta⁴ na⁴xi⁴na³nta¹ ji³cho²nčhˀoe² ya⁴nqui³ corredor jña³ nca³ Salomón ˀmi². To⁴coan³xcon¹-le⁴ nca³tsˀi³.
ACT 3:12 Cˀia⁴ nca³ Pedro tsa³ve³, cˀoi⁴qui³tso²-le⁴ cho⁴ta⁴ na⁴xi⁴na³nta¹: Cho⁴ta⁴xˀin⁴ israelitas, a¹-ni³ nca³ ma³xcon¹-si¹ni³no³ je²-vi⁴. A¹-ni³ nca³ cho²tsen³ˀa²-si¹ni³na³jin⁴ jo³-ni³ tsa² jin⁴-jin⁴ xi³ qui³ni²cˀa³mjain³⁴-jin⁴ je² cho⁴ta⁴-vi⁴ cao⁴ nca³nˀion¹, cˀoa⁴ cao⁴ cjoa⁴nta³ xi³ ti⁴tsain⁴-ni³jin⁴.
ACT 3:13 Je² Ni³na¹-le⁴ Abraham cao⁴ Isaac cao⁴ Jacobo, je² Ni³na¹-le⁴ nˀai³jcha¹cjin³-na¹ tsa³cˀa³sje³je³ya³ Jesús xi³ ˀnti¹-le⁴, je² xi³ jon² qui³ni²⁴ntsjao³. A³li² tsain⁴-jin²jin⁴ tsa³qui³xon¹³ nqui³xcon⁴ Pilato, cˀia⁴ nca³ je² qui³si³cja³ˀai³tsjen³ nca³ si⁴²cˀe¹jna³ntai¹.
ACT 3:14 Jon² tsa³cˀe²ˀmao³ je² xi³ tsje³, xi³ tjin¹-le⁴ cjoa⁴qui²xi⁴. Qui³ni²jao¹³ nca³ qui³tsˀai²-no³ jnco³ cho⁴ta⁴ xi³ cˀen³ qui³tjen⁴-le⁴.
ACT 3:15 Cˀoa⁴ qui³ni²cˀaon³ je² xi³ tsjoa¹ cjoa⁴vi³jna³chon³, je² xi³ Ni³na¹ qui³si³cja³ˀa¹ya³jin³-ni³le⁴ xi³ cˀen³. Testigo ni¹⁴-jin⁴ nca³tsˀi³-jin⁴ xi³ tˀa³tsˀe⁴ je²-vi⁴.
ACT 3:16 Jesús qui³si³nta³ je² cho⁴ta⁴-vi⁴ xi³ ti³ˀyao³ xi³ ˀya³xcon³, nca³ ma³cjain¹-na³jin⁴ xi³ tˀa³tsˀe⁴ Jesús. To⁴coi³ nca³ ma³cjain¹-na³jin⁴ tˀa³tsˀe⁴ Jesús, coi³ nca³ ca²vˀai²-ni³le⁴ cjoa⁴nta³ je² cho⁴ta⁴-vi⁴ nca³ ña³qui³ ca²ma³nta³-ni³ nqui³xcon³ nca³ jon².
ACT 3:17 Ntˀai⁴-vi⁴ntai⁴, ˀnti¹ntsˀe³, je³ˀve³ nca³ to⁴cjoa⁴njion²-no³ nca³ cˀoa⁴qui³nˀiaon²³. Ti⁴cˀoa⁴qui³sˀin³-ni³ cho⁴ta⁴ti¹tjon²-no³.
ACT 3:18 To⁴nca³ cˀoa⁴-sˀin² Ni³na¹ je³qui³si³tjo³son² je² en¹-le⁴ xi³ qui³tso² nca³ Cristo cjoa⁴ˀa² cjoa⁴ñˀain³. Coi³ xi³ to⁴nqui³-ni³ qui³tso²tsˀi³ cho⁴ta⁴-le⁴ xi³ qui³nchja⁴ya³.
ACT 3:19 Ti⁴cˀa³ntjai²yao³ tso²cˀoa⁴ cjoa⁴fa³ˀai³tsjen³-no³, ca²ta³vˀa³ntjai²ya³-nio³, jme¹-ni³ nca³ cha⁴tˀa³-si¹ni³ je¹-no³, jme¹-ni³ nca³ cjoa⁴ˀai¹-si¹ni³ ni⁴čhjin³ nca³ coi⁴njen⁴ nchˀan¹ jo³-sˀin² Ni³na¹ coa⁴te²xo³ma³,
ACT 3:20 cˀoa⁴ jme¹-ni³ nca³ Ni³na¹ si⁴²ca³sen¹-si¹ni³ Jesucristo, xi³ qui³sa³sen²nta³-no³.
ACT 3:21 To⁴nca³ cjoa⁴qui²xi⁴ nca³ ma³chjen¹ nca³ cˀoe¹jna³ Jesucristo ya⁴ ncˀa³jmi³, jo³ sa³ˀnta³ nca³ cjoi⁴cho³ ni⁴čhjin³ nca³ coan⁴cho⁴tse⁴ya³ nca³yi³je³, jo³-sˀin² qui³tso² Ni³na¹ cao⁴ tsˀoa³ cho⁴ta⁴-le⁴ xi³ tsje³ xi³ qui³nchja⁴ya³ sa³ˀnta³ coa²tse³.
ACT 3:22 Je² Moisés cˀoi⁴qui³tso²-le⁴ nˀai³jcha¹cjin³-na¹: Je² Nai³-no³ Ni³na¹-no³ sco¹mi³tjen⁴jin³-le⁴ ntsˀao³ jnco³ xi³ coi⁴nchja⁴ya³ tˀa³tsˀe⁴ Ni³na¹ jo³-ni³ an³. Je² xi³ coi⁴no¹ˀya²-lao⁴³ nca³yi³je³ jo³ coi⁴tso⁴-no³.
ACT 3:23 Je² nca³tsˀi³ xi³ tsi² cjoi⁴nčhˀoe¹-le⁴ je² cho⁴ta⁴ xi³ coi⁴nchja⁴ya³ tˀa³tsˀe⁴ Ni³na¹, ña³qui³ ntia³ tjo¹xin²-ni¹.
ACT 3:24 Nca³tsˀi³ cho⁴ta⁴ xi³ qui³nchja⁴ya³ tˀa³tsˀe⁴ Ni³na¹ sa³ˀnta³ cˀia⁴ ni⁴čhjin³ Samuel, cˀoa⁴ je² nca³tsˀi³ xi³ ji³nčhoa³-sa³ni³ xi³ qui³nchja⁴, ña³qui³ je² tsa³cˀi¹ma³ tso²ya³ jme³ xi³ coan⁴ coi³ ni⁴čhjin³-vi⁴.
ACT 3:25 Jon² nio¹³ xi³ xti³-le⁴ je² xi³ qui³nchja⁴ya³ tˀa³tsˀe⁴ Ni³na¹, cˀoa⁴ tsaon⁴³ je² cjoa⁴ xi³ Ni³na¹ tsa³cˀe¹nˀion¹ cao⁴ nˀai³jcha¹cjin³-na¹. Ni³na¹ cˀoa⁴qui³tso²-le⁴ Abraham: Nca³tsˀi³ xi²nqui⁴ xi³ tjin¹ son³ˀnte³ coan⁴chi³con³tˀain³ xi³ to⁴tˀa³tsˀe⁴ ntje⁴-li⁴.
ACT 3:26 Ni³na¹ qui³sco²mi³tjen⁴ ˀnti¹-le⁴. Cˀia⁴ jon² nio¹³ xi³ ti¹tjon²cjoa²la² Ni³na¹ qui³si³ca³sen¹-no³ je² ˀnti¹-le⁴, jme¹-ni³ nca³ si⁴²chi³con³tˀain³-si¹ni³no³ nca³ si⁴²cˀa³ntjai²ya³ ntia⁴²-no³ nca³ jnco¹jnco¹³ nca³ li²coi³ ti⁴cˀoa⁴sˀian⁴-nio³ cjoa⁴tsˀen⁴-no³.
ACT 4:1 Je² Pedro cao⁴ Juan tjio¹fa¹cao⁴ cho⁴ta⁴ na⁴xi⁴na³nta¹ cˀia⁴ nca³ ji³cho²ne²-le⁴ na⁴ˀmi³ cao⁴ nai³-le⁴ yo⁴nco⁴, cao⁴ cho⁴ta⁴ saduceos.
ACT 4:2 Cjai¹nca³ to⁴jti³ coan³-le⁴ nca³ Pedro cao⁴ Juan cˀoa⁴-sˀin² tsa³ca³co¹ya³-le⁴ cho⁴ta⁴ na⁴xi⁴na³nta¹. Qui³nchja⁴ya³jin³-le⁴ nca³ cho⁴ta⁴ cjoa⁴ˀa¹ya³jin³-ni³le⁴ cˀen³ jo³-sˀin² nca³ Cristo ja³ˀa²ya³-ni³le⁴.
ACT 4:3 Cˀia⁴ qui³tsoa³ Pedro cao⁴ Juan. Qui³sca³ni¹ nto⁴ya¹ sa³ˀnta³ coan³nchaon³-ni³, nca⁴ je³coan³xon².
ACT 4:4 Ncjin² xi³ qui³nčhˀoe¹ je² en¹ coan³cjain¹-le⁴. Aon²-la⁴ jmi³ ma³-ni³ xi³ cho⁴ta⁴xˀin⁴.
ACT 4:5 Xi³ coan³nchaon³-ni³ coan³xco¹ cho⁴ta⁴xa¹, cho⁴ta⁴jchi¹nca³, cho⁴ta⁴ scribano ya⁴ Jerusalén.
ACT 4:6 Coan³xco¹ Anás xi³ na⁴ˀmi³ti¹tjon², Caifás, Juan, Alejandro, cao⁴ nca³tsˀi³ xi³ xi¹ncjin¹ na⁴ˀmi³.
ACT 4:7 Qui³si³qui³ncha²va³sen³ Pedro cao⁴ Juan, cˀoa⁴ qui³sco²na³nqui³-le⁴: Jña¹-le⁴ nca³nˀion¹, ˀya¹ xi³ ca²tsjoa¹ˀnte³ nca³ cˀoa⁴ca²nˀiaon²³ je²-vi⁴.
ACT 4:8 Cˀia⁴ cjai¹nca³ to⁴ti¹jna³jin³ ni⁴ma⁴-le⁴ Pedro je² Espíritu Santo, cˀoa⁴qui³tso²-le⁴: Nca³tsˀio³ cho⁴ta⁴xa¹-le⁴ na⁴xi⁴na³nta¹ cao⁴ cho⁴ta⁴jchi¹nca³-le⁴ cho⁴ta⁴ Israel,
ACT 4:9 ti¹chjo²na³nqui³-na³jin⁴ ntˀai⁴-vi⁴ xi³ tˀa³tsˀe⁴ je² cjoa⁴nta³ xi³ ca²nˀian²-lai⁴jin⁴ jnco³ cho⁴ta⁴ xi³ ti¹mˀen³, jo³-sˀin² nca³ ca²ma³nta³-ni³ je²-vi⁴.
ACT 4:10 Na¹nta³ˀyao³ nca³tsˀio³ cao⁴ nca³tsˀi³ na⁴xi⁴na³nta¹ Israel nca³ je² cho⁴ta⁴-vi⁴ ti¹jna³ nqui³xcon³, cˀoa⁴ je³coan³nta³-ni³ xi³ to⁴tˀa³tsˀe⁴ je² xi³ Jesucristo ˀmi², xi³ Nazaret tsˀe⁴, je² xi³ tsa³cja³tˀao³ cro², cˀoa⁴ je² xi³ Ni³na¹ qui³si³cja³ˀa¹ya³jin³-ni³le⁴ cˀen³.
ACT 4:11 Jesucristo, je² ni¹ je² la⁴jao⁴ xi³ ca²ˀya³taon³ nca³ jon² xi³ ma³-no³ chjo¹mi³tjen⁴ ni³ˀya³, to⁴nca³ ntˀai⁴-vi⁴ntai⁴ sˀe³jna³ ti¹tjon² ya⁴ xi⁴nqui⁴-le⁴.
ACT 4:12 Ni⁴to⁴ˀya³-jin²sa³ xi³ vˀa³sje³ntjai²-na¹, nca³ tsi² xi³ cja⁴ˀai¹ xi³ tjio¹ i⁴ son³ˀnte³-vi⁴ xi³ ma³-le⁴ vˀa³sje³ntjai²-na¹.
ACT 4:13 Cˀia⁴ coan³xcon¹-le⁴ nca³tsˀi³ nca³ qui³sco²tsen³-le⁴ cjoa⁴nˀion¹to³con²-le⁴ Pedro cao⁴ Juan. Ve³tsˀi³ nca³ to⁴xquia⁴ ˀnti¹cho⁴ta⁴ ni¹, xi³ tsi² tsa² tse³ qui³sco²tˀa³ya³. Tsa³ve³xcon³ nca³ tsa³ca³tio²cao⁴ Jesús.
ACT 4:14 Qui³sco²tsen³-le⁴ je² cho⁴ta⁴xˀin⁴ xi³ coan³nta³-ni³, xi³ ya⁴ ti¹jna³cao⁴. A³li²coi³ coan³ nca³ qui³nchja⁴ co²ntran⁴ xi³ tˀa³tsˀe⁴.
ACT 4:15 Cˀia⁴ tsa³ca³te¹xo³ma³-le⁴ nca³ ca²ta³vi³tjo³jin³-le⁴ cho⁴ta⁴ xi³ ti¹jna³-le⁴ junta. Cˀia⁴ je² cho⁴ta⁴xa¹-ve⁴ˀni³ tsa³cjao¹ya³-ni³.
ACT 4:16 Cˀoi⁴qui³tso²: Jme¹ xi³ ni²coa⁴² cho⁴ta⁴ xo⁴cjoan³-ve⁴. Cjoa⁴qui²xi⁴ ni¹ tsen³ choa⁴ xi³ qui³tsjoa³. Ve³ nca³tsˀi³ xi³ tjio¹ i⁴ Jerusalén. A³li²coi³ coan⁴ cˀoe¹ˀma³-le⁴².
ACT 4:17 Nˀion¹ cˀoe¹ne²-le⁴² nca³ li²ˀya³ xi³ ti⁴cjoa⁴²cao⁴-ni³ cao⁴ je² jan³ˀain¹-vi⁴ ntˀai⁴-vi⁴ cˀoa⁴ xi³ fi²-sa³ni³, jme¹-ni³ nca³ tsi² coai⁴son²-sa³ni³le⁴ cho⁴ta⁴ na⁴xi⁴na³nta¹ je² cjoa⁴-ve⁴.
ACT 4:18 Cˀia⁴ qui³nchja⁴-le⁴ Pedro cao⁴ Juan. Tsa³ca³te¹xo³ma³-le⁴ nca³ ni⁴ˀi⁴tse¹-jin² coan⁴ coi⁴nchja⁴, ni⁴coa⁴co²ya³-jin² cao⁴ jan³ˀain¹-le⁴ Jesús.
ACT 4:19 Cˀia⁴ Pedro cao⁴ Juan cˀoi⁴qui³tso²-le⁴: Cho¹son²-ni³lao⁴³ a³ nta³ tjin¹ nqui³xcon⁴ Ni³na¹ tsa² jon² xi³ no²ˀya²-no³ a³xo⁴ Ni³na¹ xi³ no²ˀya²-le⁴.
ACT 4:20 A³li²coi³ coan⁴ nca³ jyo¹ coi⁴yoi³⁴-jin⁴ xi³ tˀa³tsˀe⁴ xi³ tsa³ˀyai³⁴-jin⁴, xi³ qui³no²ˀyai²⁴-jin⁴.
ACT 4:21 Cˀia⁴ cho⁴ta⁴xa¹-ve⁴ qui³sca³ni¹ntai¹ Pedro cao⁴ Juan. Chˀao³-sˀin² tsa³cˀe¹ne²-le⁴. A³li²coi³ qui³sa³co³sjai³-le⁴ jo³-sˀin² nca³ tsjoa¹-le⁴ cjoa⁴ñˀain³ to⁴tˀa³tsˀe⁴ cho⁴ta⁴ na⁴xi⁴-na³nta¹, nca⁴ nca³tsˀi³ tsˀa³sje³je³ya³ Ni³na¹ jña³-le⁴ xi³ coan³.
ACT 4:22 Tsˀa³to³ ña³chan² no¹-le⁴ je² cho⁴ta⁴ xi³ cˀoa⁴-sˀin² coan³nta³-ni³ cao⁴ je² cjoa⁴xcon¹-vi⁴.
ACT 4:23 Xi³ je³to⁴tjen⁴ntai¹ Pedro cao⁴ Juan, qui³con³-le⁴ mi²yo⁴-le⁴. Tsa³cˀe¹ na⁴jmi¹ jo³ qui³tso²-le⁴ cho⁴ta⁴ti¹tjon²-le⁴ na⁴ˀmi³ cao⁴ cho⁴ta⁴jchi¹nca³.
ACT 4:24 Cˀia⁴ nca³ qui³nčhˀoe¹, to⁴jnco³jta² qui³tsjoa³-le⁴ cjoa⁴nta³ Ni³na¹, cˀoi⁴qui³tso²-le⁴: Señor, ji³ ni¹³ Ni³na¹ xi³ qui³ni²ntai³ ncˀa³jmi³ cao⁴ son³ˀnte³ cao⁴ nta¹chi³con³ cao⁴ nca³yi³je³ xi³ tjin¹-le⁴ nca³ je².
ACT 4:25 Ji³ xi³ cˀoi⁴qui³si³ cao⁴ tsˀoa³ David, je² cho⁴ˀnta³-li⁴: A¹-ni³ nca³ cˀoa⁴-sˀin² to⁴qui³squi³ˀntia¹-si¹ni³ cho⁴ta⁴ son³ˀnte³, cˀoa⁴ je² cho⁴ta⁴ na⁴xi⁴na³nta¹ a¹-ni³ nca³ qui³si³cja³ˀai³tsjen³-si¹ni³ cjoa⁴ xi³ tsi²jme³ chji¹-le⁴.
ACT 4:26 Je² cho⁴ta⁴ti¹tjon²-le⁴ xi³ tjin¹ son³ˀnte³ tsa³qui³so¹tjen⁴, cˀoa⁴ je² xi³ va³te¹xo³ma³ to⁴jnco³ coan³xco¹ co²ntran⁴-le⁴ Nai³-na¹, cˀoa⁴ co²ntran⁴-le⁴ Cristo xi³ tsˀe⁴.
ACT 4:27 Herodes cao⁴ Poncio Pilato, cao⁴ cho⁴ta⁴ xi³ li² judío jin², cao⁴ na⁴xi⁴na³nta¹-le⁴ Israel, cjoa⁴qui²xi⁴ nca³ coan³xco¹ i⁴ na⁴xi⁴na³nta¹je³ co²ntran⁴-le⁴ Jesús ˀnti¹-li⁴ xi³ tsje³, xi³ tsa³cˀai²-lai⁴ cjoa⁴te¹xo³ma³.
ACT 4:28 Je² coan³xco¹co²ntran⁴-le⁴ nca³ cˀoa⁴sˀin⁴² jo³-sˀin² to⁴nqui³-ni³ qui³cho²son²-ni³lai⁴ cao⁴ nca³nˀion¹-li⁴ nca³ cˀoa⁴-sˀin² cˀoa⁴coan⁴.
ACT 4:29 Ntˀai⁴-vi⁴ntai⁴, Señor, cho¹tsen³-lai⁴ jo³-sˀin² nca³ chˀao³-sˀin² vˀe¹ne²-na³jin⁴. Cho¹xˀa¹ˀnte³-lai⁴ cho⁴ˀnta³-li⁴ nca³ tsi² tsa² ca²ta³fi²cja³ˀa¹ cjoa⁴jcon³ nca³ coi⁴nchja⁴ en¹-li⁴.
ACT 4:30 Tjain³ ntsai⁴, jme¹-ni³ nca³ coan⁴nta³-si¹ni³ chˀin³. Choa⁴ cao⁴ cjoa⁴xcon¹ ca²ta³ma³ xi³ to⁴tˀa³tsˀe⁴ jan³ˀain¹-le⁴ Jesús ˀnti¹-li⁴ xi³ tsje³.
ACT 4:31 Cˀia⁴ nca³ je³tsa³cˀe¹tsˀoa³, ja³ˀa³ chaon¹ ya⁴ ˀnte³ jña³ nca³ coan³ña³. Espíritu Santo qui³sˀe³jin³ ni⁴ma⁴-le⁴ nca³tsˀi³. Li²coi³ qui³tsa³cjon¹ nca³ qui³nchja⁴ en¹-le⁴ Ni³na¹.
ACT 4:32 Je² nca³tsˀi³ xi³ coan³cjain¹-le⁴ to⁴jnco³ coan³ ni⁴ma⁴-le⁴ cao⁴ cjoa⁴fa³ˀai³tsjen³-le⁴. Ni⁴jnco³-jin² xi³ qui³tso²-le⁴ xi¹-ncjin¹: Tsˀan⁴ nia¹³ tso³jmi² xi³ tjin¹-na³.
ACT 4:33 A³li² to⁴cˀoa⁴cji³ nca³nˀion¹ qui³sˀe³-le⁴ pa²stro⁴ nca³ qui³tsjoa³ en¹ nca³ ja³ˀa²ya³-ni³le⁴ Nai³-na¹ Jesús. A³li² to⁴cˀoa⁴cji³ cjoa⁴nta³ xi³ qui³sˀe³-le⁴ nca³tsˀi³.
ACT 4:34 Ni⁴ˀya³-jin² xi³ ni⁴jme³-jin² xi³ coan³tsin²-le⁴. Nca³tsˀi³ xi³ tjin¹-le⁴ na³nqui³, cˀoa⁴ tsa² ni³ˀya³, cˀoa⁴-sˀin² tsa³ca³te¹na³. Ja³ˀai³ ca³ni¹ nca³yi³je³ taon⁴-le⁴ tso³jmi² xi³ qui³sa³te²na³.
ACT 4:35 Ya⁴nqui³ ntso⁴co⁴ pa²stro⁴ tsa³ca³tio¹ taon⁴. Tsˀa³vi¹-le⁴ nca³ jnco¹jnco¹ cho⁴ta⁴ jo³ tjin¹ xi³ ma³chjen¹-le⁴.
ACT 4:36 Cˀia⁴ tjin¹ jnco³ cho⁴ta⁴ levita xi³ José ˀmi². Je² pa²stro⁴ Bernabé qui³tso²-le⁴ (xi³ tso²-ni³ ˀnti¹-le⁴ cjoa⁴ni²je³con³). Ya⁴ ˀnte³-le⁴ Chipre tsˀe⁴ je² cho⁴ta⁴-ve⁴.
ACT 4:37 Tjin¹-le⁴ na³nqui³ xi³ tsa³ca³te¹na³. Ja³ˀai³cao⁴ taon⁴-le⁴. Ya⁴ tsa³cˀe¹jna³ nqui³ ntso⁴co⁴ pa²stro⁴.
ACT 5:1 To⁴nca³ jnco³ cho⁴ta⁴xˀin⁴ xi³ Ananías ˀmi², cao⁴ chjon⁴²-le⁴ xi³ Safira ˀmi², tsa³ca³te¹na³ jnco³ na³nqui³-le⁴.
ACT 5:2 Tsa³cja³ˀa¹xin²tˀa³ chji¹-le⁴ xi³ tˀa³tsˀe⁴ yao³-le⁴. Cˀoa⁴-ti⁴ tsa³ve³ chjon⁴²-le⁴. Je² xi³ tsˀa³nqui³-le⁴ ja³ˀai³cao⁴. Tsa³cˀe¹jna³ nqui³ ntso⁴co⁴ pa²stro⁴.
ACT 5:3 Pedro qui³tso²: Ananías, a¹-ni³ nca³ ya⁴ ti¹jna³jin³-si¹ni³ ni⁴ma⁴-li⁴ Satanás nca³ en¹nti³so³ chja²coai⁴ Espíritu Santo, nca³ ti³chja³ˀa²xin²tˀa³-ni¹ je² chji¹-le⁴ na³nqui³-li⁴.
ACT 5:4 Cˀia⁴ nca³ qui³sˀe³jna³-li², a³ tsi² tsi⁴ ni¹. Cˀia⁴ nca³ je³qui³sa³te²na³, a³ tsi² tsa² ji³ xi³ qui³sˀe³jna³ya³ ntsai⁴ taon⁴-ve⁴. A¹-ni³ nca³ cˀoa⁴-sˀin² tsa³cˀe²-ni³ ni⁴ma⁴-li⁴. A³li² cho⁴ta⁴-jin² xi³ tsa³ca³sen²nti³so³-lai⁴, je² Ni³na¹.
ACT 5:5 Cˀia⁴ nca³ qui³nčhˀoe¹ Ananías je² en¹ xo⁴ tso²-ve⁴, cˀia⁴ qui³sca³tsˀo³tjen⁴, je³cˀen³. A³li² to⁴cˀoa⁴cji³ qui³tso³cjon¹ nca³tsˀi³ xi³ qui³nčhˀoe¹ nca³ cˀen³.
ACT 5:6 Cho⁴ta⁴xti³ tsa³qui³ncha³nto³, tsa³ca¹jte¹ yao³-le⁴ Ananías. Tsa³cˀa³sje³, tsa³cˀe¹ñai³.
ACT 5:7 Cˀia⁴ nca³ je³coan³ jo³-ni³ jan² hora, ja³ˀa³sˀen³ chjon⁴²-le⁴. A³li²coi³ ve³ jme³-ni³ xi³ ca²ma³.
ACT 5:8 Cˀia⁴ Pedro cˀoa⁴qui³tso²-le⁴: Cˀoa⁴tˀin²-nai¹³, a³ cˀoa⁴tjin¹ tsa³ca³te²na³-nio³ je² na³nqui³-no³. Cˀoa⁴ je² cˀoi⁴qui³tso²: Jaon³, cˀoa⁴tjin¹.
ACT 5:9 Pedro cˀoi⁴qui³tso²-le⁴: A¹-ni³ nca³ cˀoa⁴-sˀin² qui³cho³va²ya³-si¹nio³ nca³ qui³chˀa²na⁴cha⁴-lao⁴³ je² Espíritu xi³ tsˀe⁴ Nai³-na¹. Coe⁴-ni³ ya⁴ ncha³ jčho³ xo⁴ntjoa⁴-ve⁴ je² xi³ ca²vˀe¹ñai³ xˀin⁴-li⁴. Cˀoa⁴-ti⁴ cˀoa⁴sje³-li².
ACT 5:10 Nti⁴ton⁴ chjon⁴²-ve⁴ qui³sca³tsˀo³tjen⁴ ya⁴nqui³ ntso⁴co⁴ Pedro. Je³cˀen³. Cˀia⁴ ja³ˀa³sˀen³ cho⁴ta⁴xti³. Tsa³ve³ nca³ qui³jna³cˀen³ chjon⁴²-ve⁴. Nti⁴ton⁴ tsa³cˀa³sje³ tsa³cˀe¹ñai³tˀa³-le⁴ xˀin⁴-le⁴.
ACT 5:11 A³li² to⁴cˀoa⁴cji³ qui³tso³cjon¹ nca³tsˀi³ xi³ tsˀe⁴ na⁴xi⁴na³nta¹-le⁴ Cristo cao⁴ nca³tsˀi³ xi³ qui³nčhˀoe¹ je² en¹-vi⁴.
ACT 5:12 A³li² to⁴cˀoa⁴cji³ choa⁴ cao⁴ cjoa⁴xcon¹ xi³ qui³sˀin³ pa²stro⁴ cao⁴ ntsja³ ja⁴jin³-le⁴ cho⁴ta⁴ na⁴xi⁴na³nta¹. Nca³tsˀi³ to⁴jnco³ cjoa⁴fa³ˀai³tsjen³-le⁴, cˀoa⁴ to⁴jnco³ tjio¹ ya⁴nqui³ corredor-le⁴ Salomón.
ACT 5:13 Je² xi³cˀa³ ni⁴jnco³-jin²la² coan³nˀion¹con³ nca³ qui³tˀa³-le⁴ pa²stro⁴. To⁴nca³ je² cho⁴ta⁴ na⁴xi⁴na³nta¹ cjai¹nca³ to⁴nta³ tsa³cˀa³sje³ pa²stro⁴.
ACT 5:14 Je² xi³ coan³cjain¹-le⁴ tˀa³tsˀe⁴ Jesús to⁴sin³ to⁴nta³ coan³ncjin². A³li² to⁴cˀoa⁴cji³ ncjin² ma³-ni³ cao⁴ xˀin⁴ cao⁴ ya¹nchjin¹.
ACT 5:15 Tsˀa³sje³ xi³ tjio¹mˀen³ ya⁴³ ntia⁴², cˀoa⁴ qui³si³ca¹yo³son² ya¹na⁴chan³ cao⁴ ni³jña³, jme¹-ni³ nca³ cˀoa⁴cao⁴cˀa³-si¹ni³le⁴ ˀnta³ to⁴ncˀian¹-le⁴ Pedro cˀia⁴ nca³ cjoa⁴ˀai¹.
ACT 5:16 Cˀoa⁴ti⁴ je² cho⁴ta⁴ xi³ tsˀe⁴ na⁴xi⁴na³nta¹ xi³ tjio¹ntai³, a³li² to⁴cˀoa⁴cji³ ji³cho² ya⁴ Jerusalén. Ja³ˀai³cao⁴ xi³ tjio¹mˀen³, cao⁴ cho⁴ta⁴ xi³ nai⁴² tjio¹jin³ ni⁴ma⁴-le⁴. Ña³qui³ ji³tjo³xin²-le⁴ chˀin³-le⁴ nca³tsˀi³.
ACT 5:17 Cˀia⁴ tsa³qui³so¹tjen⁴ na⁴ˀmi³ti¹tjon² cao⁴ nca³tsˀi³ xi³ tjio¹cao⁴ xi³ cho⁴ta⁴ saduceos. A³li² to⁴cˀoa⁴cji³ coan³chi⁴ni⁴que³.
ACT 5:18 Qui³tsoa³ je² pa²stro⁴. Qui³sca³ni¹ nto⁴ya¹-le⁴ na⁴xi⁴-na³nta¹.
ACT 5:19 Xi³ je³coan³njion² jnco³ a²ncje⁴-le⁴ Nai³-na¹ qui³sco³ˀai² xo⁴ntjoa⁴-le⁴ nto⁴ya¹. Tsa³cˀa³sje³ je² pa²stro⁴-ve⁴, cˀoa⁴qui³tso²-le⁴.
ACT 5:20 Ta³nquin¹ qui³yo³ ya⁴³ yo⁴nco⁴. Cˀoa⁴tˀin²-lao⁴³ nca³tsˀi³ cho⁴ta⁴ na⁴xi⁴na³nta¹ nca³yi³je³ en¹ xi³ tˀa³tsˀe⁴ je² cjoa⁴vi³-jna³chon³.
ACT 5:21 Cˀia⁴ nca³ qui³nčhˀoe¹ jña³-le⁴ xi³ tsa³cˀin²-le⁴, ja³ˀa³sˀen³ yo⁴nco⁴ nca³ qui³sˀe³sen¹. Tsa³ca³co¹ya³. Cˀia⁴ ja³ˀai³ je² na⁴ˀmi³ti¹tjon² cao⁴ nca³tsˀi³ xi³ tjio¹cao⁴. Qui³nchja⁴-le⁴ cho⁴ta⁴xa¹ cao⁴ nca³tsˀi³ cho⁴ta⁴jchi¹nca³ xi³ tsˀe⁴ ntje⁴-le⁴ Israel. Qui³si³ca³sen¹cja³ˀa¹ pa²stro⁴-ve⁴ ya⁴ nto⁴ya¹.
ACT 5:22 Cˀia⁴ nca³ ji³cho² policía, li²coi³ qui³sa³co³sjai³-le⁴ je² pa²stro⁴-ve⁴ ya⁴³ nto⁴ya¹. Qui³si³cˀo¹fa³ya³-ni³, cˀoa⁴ tsa³cˀe¹ na⁴jmi¹.
ACT 5:23 Cˀoa⁴qui³tso²: Cˀia⁴ nca³ ca²fi³choi³⁴-jin⁴, ca²ˀyai³⁴-jin⁴ nca³ cjai¹nca³ nˀion¹ tji¹chjoa² nto⁴ya¹. Je² cho⁴ta⁴ xi³ ya⁴ tjio¹ma³ si¹coi²nta⁴ tjio¹ ya⁴jčho³ xo⁴ntjoa⁴. Cˀia⁴ nca³ qui³cho³ˀai²⁴-jin⁴, ni⁴ˀya³-jin² xi³ tjin¹ ya⁴³ nto⁴ya¹.
ACT 5:24 Cˀia⁴ nca³ qui³nčhˀoe¹ en¹ xo⁴ tjin¹-vi⁴, je² na⁴ˀmi³ti¹tjon² cao⁴ je² nai³-le⁴ yo⁴nco⁴, cao⁴ cho⁴ta⁴ti¹tjon²-le⁴ na⁴ˀmi³, a³li²coi³ tsa³ve³ jo³ coan⁴ je²-vi⁴.
ACT 5:25 Cˀia⁴ ja³ˀai³ jnco³ xi³ tsa³cˀe¹-le⁴ na⁴jmi¹: Coe⁴-ni³ je² cho⁴ta⁴ xi³ qui³cha²nio²³ nto⁴ya¹, i⁴ tjio¹ ya⁴³ yo⁴nco⁴, tjio¹va³co¹ya³-le⁴ cho⁴ta⁴.
ACT 5:26 Cˀia⁴ qui³ nai³-le⁴ yo⁴nco⁴ cao⁴ policía. Ja³ˀai³cao⁴-la²nta³, nca⁴ qui³tso³cjon¹-le⁴ cho⁴ta⁴ na⁴xi⁴na³nta¹, tsa² lao⁴ coa⁴sen²-le⁴.
ACT 5:27 Cˀia⁴ nca³ ja³ˀai³cao⁴, qui³si³ca³tio²va³sen³ junta. Je² na⁴ˀmi³ti¹tjon² qui³sco²na³nqui³-le⁴:
ACT 5:28 A³ tsi² tsa² cˀoa⁴-sˀin² nˀion¹ sta³cˀe²ne²-lai²⁴jin⁴, nca³ tsi² tsa² coa⁴co²yao³ cao⁴ je² jan³ˀain¹. Coe⁴-ni³ jo³ ti³cha³ni²son²³ nca³qui³jnta² Jerusalén je² en¹ xi³ ti³va³co²yao³. Cˀoa⁴ me³-no³ cha³ni²ne²-na³jin⁴ je² njin¹-le⁴ cho⁴ta⁴ xo⁴cji³-ve⁴.
ACT 5:29 Cˀia⁴ cˀoi⁴qui³tso² Pedro cao⁴ nca³tsˀi³ pa²stro⁴: Nqui²-sa⁴ ma³chjen¹ nca³ ni²cji³tjo³son²-le⁴² Ni³na¹ cao⁴-ni³ tsa² cho⁴ta⁴son³ˀnte³.
ACT 5:30 Je² Ni³na¹-le⁴ nˀai³jcha¹cjin³-na¹ qui³sco²mi³tjen⁴ Jesús. Je² xi³ jon² qui³ni²cˀaon³, ya⁴ tsa³cjen³tˀao³ jnco³ ya¹.
ACT 5:31 Je²-vi⁴ xi³ Ni³na¹ qui³si³quin³ncˀa³ ya⁴ nca³qui²xi⁴-le⁴. Je²-vi⁴ xi³ cho⁴ta⁴ti¹tjon²-na¹, cˀoa⁴ xi³ vˀa³sje³ntjai²-na¹, jme¹-ni³ nca³ tsjoa¹-si¹ni³le⁴ cjoa⁴nta³ cho⁴ta⁴ Israel nca si⁴²cˀa³ntjai²ya³ cjoa⁴fa³ˀai³tsjen³-le⁴, nca³ cha⁴tˀa³-le⁴ je¹-le⁴.
ACT 5:32 Jin⁴ ni¹⁴-jin⁴ testigo xi³ tˀa³tsˀe⁴ je² cjoa⁴. Cˀoa⁴ testigo je² Espíritu Santo xi³ Ni³na¹ qui³tsjoa³-le⁴ je² xi³ si¹cji³tjo³son²-le⁴.
ACT 5:33 Cˀia⁴ nca³ qui³nčhˀoe¹ je²-vi⁴, nˀion¹ coan³jti³-le⁴, tsa³cjao¹ya³-ni³ nca³ me³-le⁴ si⁴²cˀen³.
ACT 5:34 Cˀia⁴ tsa³ca³sen²nto³jin³-le⁴ cho⁴ta⁴junta jnco³ cho⁴ta⁴ fariseo xi³ Gamaliel ˀmi², je² xi³ va³co¹ya³ cjoa⁴te¹xo³ma³. Nca³tsˀi³ cho⁴ta⁴ na⁴xi⁴na³nta¹ cjai¹nca³ ve³xcon¹. Je² Gamaliel tsa³ca³te¹xo³ma³ nca³ jnco³ tjo² ca²ta³vi³tjo³ je² pa²stro⁴.
ACT 5:35 Cˀoi⁴qui³tso²-le⁴: Nca³tsˀio³ xi³ cho³ta³ israelitas, cho¹tsen³-lao⁴³ yao³-no³ xi³ tˀa³tsˀe⁴ je² cho⁴ta⁴ xo⁴cjoan³-ve⁴, jo³-sˀin² cho¹son²-ni³lao⁴³.
ACT 5:36 Nca³sˀa⁴ nca³ ni⁴čhjin³ jchi¹nca³ ji³so¹tjen⁴ jnco³ xi³ Teudas ˀmi². Cˀoi⁴qui³tso²: An³-vi⁴, an³ nqui²sa⁴-vi⁴. Ño³-la⁴ ciento ma³-ni³ cho⁴ta⁴xˀin⁴ xi³ qui³tˀa³-le⁴. To⁴nca³ qui³ni²cˀen³-ni¹ je² Teudas. Nca³tsˀi³ xi³ qui³tˀa³-le⁴ qui³tsao³va³. Li²jme³ xi³ ti⁴coan³ qui³sˀin³-ni³.
ACT 5:37 Cˀia⁴ nca³ je³ja³ˀa³to³ xo⁴cjoan³-ve⁴, ji³so¹tjen⁴ Judas, je² cho⁴ta⁴ galileo, je² ni⁴čhjin³ nca³ qui³sˀe³nta³ padrón. A³li² to⁴cˀoa⁴cji³ cho⁴ta⁴ na⁴xi⁴na³nta¹ xi³ je² qui³cao⁴. Cˀoa⁴-ti⁴ cˀen³ nca³ je². Nca³tsˀi³ xi³ je² qui³tˀa³-le⁴ ña³qui³ qui³tsao³va³.
ACT 5:38 Ntˀai⁴-vi⁴ntai⁴ cˀoa⁴xin³-no³: Ca²ta³vˀe²-la²no³, to⁴cˀoa⁴-la²sˀin² ti⁴ca³tio¹ je² cho⁴ta⁴xˀin⁴-vi⁴. Je² cjoa⁴ xi³ tji¹nta³-le⁴, cˀoa⁴ je² xa¹-vi⁴ tsa² tsˀe⁴ cho⁴ta⁴xˀin⁴, si⁴²cha³.
ACT 5:39 To⁴nca³ tsa² tsˀe⁴ Ni³na¹ ni¹, a³li²coi³ coan⁴-no³ jo³ si⁴cao⁴³. Ti⁴coi²ntao⁴³ yao³-no³ tsa² coi³ ni⁴čhjin³ coi⁴yo³ta²ja³-lao⁴³ Ni³na¹.
ACT 5:40 Cho⁴ta⁴junta tjio¹jin³con³ cao⁴ je² Gamaliel. Qui³nchja⁴-le⁴ pa²stro⁴. Cˀia⁴ nca³ je³tsa³ca¹-le⁴, chˀao³-sˀin² tsa³cˀe¹ne²-le⁴ nca³ tsi² tsa² cao⁴ jan³ˀain¹-le⁴ Jesús coi⁴nchja⁴. Cˀoa⁴ qui³sca³ni¹ntai¹-ˀni³.
ACT 5:41 Je² pa²stro⁴-ve⁴ ji³tjo³jin³-le⁴ cho⁴ta⁴junta. Cjai¹nca³ to⁴tsjoa³-le⁴ nca³ cˀoa⁴-sˀin² tsa³quin²-le⁴ nca³ qui³chˀa²sje³nqui³ xi³ tˀa³tsˀe⁴ jan³ˀain¹-le⁴ Jesús.
ACT 5:42 Nca³ntsjai² ni⁴čhjin³ ya⁴³ yo⁴nco⁴ ya⁴³ ni³ˀya³-le⁴ ni⁴to⁴cˀia³-jin² tsa³ca³tio²jyo¹ nca³ tsa³ca³co¹ya³, cˀoa⁴ nca³ qui³nchja⁴ya³ tˀa³tsˀe⁴ Jesús je² Cristo.
ACT 6:1 Cˀia⁴ ni⁴čhjin³-ve⁴ cjai¹nca³ coan³ncjin²ya³ cho⁴ta⁴-le⁴ Cristo. Je² cho⁴ta⁴ griegos cjai¹nca³ to⁴chˀao³ tsa³ca³tio²-le⁴con³ cho⁴ta⁴ hebreos nca³ je² ya¹nchjin¹-le⁴ xi³ je³cˀen³ xˀin⁴-le⁴ li²coi³ cˀoa⁴-sˀin² tsˀa³cao⁴-le⁴ je² tso³jmi² xi³ vˀa³vi¹-le⁴ nchaon³nchaon³.
ACT 6:2 Cˀia⁴ je² xi³ te³jao² pa²stro⁴ qui³nchja⁴ma³ña³-le⁴ nca³tsˀi³ cho⁴ta⁴-le⁴ Cristo, cˀoa⁴qui³tso²-le⁴: A³li²coi³ nta³ tjin¹ nca³ jin⁴-jin⁴ cˀoe¹jnai³⁴-jin⁴ je² en¹-le⁴ Ni³na¹ nca³ cˀoe¹yai³⁴-jin⁴ tˀa³ ya¹mi²xa⁴.
ACT 6:3 Chja⁴ˀa²jion³ xi²nquio⁴³, ˀnti¹ntsˀe³, ña³to³ cho⁴ta⁴xˀin⁴ xi³ ˀya³-le⁴ nca³ nta³ cho⁴ta⁴, xi³ cjai¹nca³ to⁴tjin¹jin³ ni⁴ma⁴-le⁴ je² Espíritu Santo, cˀoa⁴ xi³ tjin¹-le⁴ cjoa⁴ˀi³sen³-ta³con². Je² xi³ cˀoai⁴-le⁴² je² xa¹-vi⁴.
ACT 6:4 Jin⁴-jin⁴ to⁴jo³ cˀoe¹tsˀoa³ ntsjai²-ni¹⁴jin⁴, coa⁴co²ya³ ntsjai²-ni¹⁴jin⁴ en¹-le⁴ Ni³na¹.
ACT 6:5 Je² en¹ xi³ qui³tso² je² pa²stro⁴ cjai¹nca³ nta³ qui³sa³sen³-le⁴ nca³tsˀi³ cho⁴ta⁴-ve⁴. Cˀia⁴ tsa³cja³ˀa¹jin³ Esteban, jnco³ cho⁴ta⁴xˀin⁴ xi³ cjai¹nca³ nta³ ma³cjain¹-le⁴, cˀoa⁴ xi³ cjai¹nca³ to⁴tjin¹jin³ ni⁴ma⁴-le⁴ je² Espíritu Santo. Cˀoa⁴-ti⁴ tsa³cja³ˀa¹jin³ Felipe, Prócoro, Nicanor, Timón, Parmenas, cao⁴ Nicolás xi³ ja³ˀai³tˀa³-le⁴, xi³ ya⁴ Antioquía tsˀe⁴.
ACT 6:6 Je² xi³ ña³to³-ve⁴ tsa³qui³ncha³va³sen³ nqui³xcon⁴ pa²stro⁴. Je² pa²stro⁴ tsa³cˀe¹tsˀoa³ tsa³ca¹yo³son²-le⁴ ntsja³.
ACT 6:7 Cjai¹nca³ qui³son² je² en¹-le⁴ Nai³-na¹. Nˀion¹ coan³ncjin²ya³ cho⁴ta⁴-le⁴ ya⁴ Jerusalén. Cˀoa⁴-ti⁴ cjai¹nca³ ncjin² ma³-ni³ na⁴ˀmi³ xi³ cˀoa⁴-sˀin² coan³cjain¹-le⁴.
ACT 6:8 Je² Esteban cjai¹nca³ to⁴qui³sˀe³-le⁴ cjoa⁴nta³ cao⁴ nca³nˀion¹. A³li² to⁴cˀoa⁴cji³ cjoa⁴xcon¹ cˀoa⁴ choa⁴ xi³ qui³sˀin³ jin³-le⁴ cho⁴ta⁴.
ACT 6:9 Cˀia⁴ qui³sco²mi³tjen⁴ yao³-le⁴ cˀa³ cho⁴ta⁴ xi³ tsˀe⁴ ntˀia³ sinagoga-le⁴ cho⁴ta⁴ xi³ cˀoa⁴ˀmi²-le⁴ cho⁴ta⁴ntai¹, cao⁴ xi³ tsˀe⁴ cho⁴ta⁴ cireneos, cao⁴ xi³ tsˀe⁴ cho⁴ta⁴ alejandrinos, cao⁴ xi³ tsˀe⁴ Cilicia, cao⁴ xi³ tsˀe⁴ Asia. Tsa³cjao¹ti³ya³-ni³ cao⁴ je² Esteban.
ACT 6:10 To⁴nca³ li²coi³ coan³ tsa³ca³tio²ta²ja³-le⁴ je² cjoa⁴ˀi³sen³ta³con²-le⁴ cao⁴ je² Espíritu xi³ je² Esteban qui³nchja⁴ya³-ni³.
ACT 6:11 Cˀia⁴ qui³tso²ya³ˀma³ cˀa³ cho⁴ta⁴ xi³ cˀoa⁴coi⁴tso⁴ nca³ qui³nčhˀoe¹-le⁴ Esteban nca³ qui³nchja⁴ˀaon³-le⁴ Moisés cao⁴ Ni³na¹.
ACT 6:12 Qui³si³qui³so¹tjen⁴ cjoa⁴si³ jin³-le⁴ cho⁴ta⁴ na⁴xi⁴na³nta¹ cao⁴ cho⁴ta⁴jchi¹nca³ cao⁴ cho⁴ta⁴ scribano. Ji³cho²con³-le⁴, qui³tsoa³che¹. Ji³cho²cao⁴ ya⁴ jña³ nca³ tjio¹ cho⁴ta⁴ junta.
ACT 6:13 Cˀia⁴ tsa³ca³sen¹va³sen³-le⁴ testigos nti³so³ xi³ cˀoa⁴qui³tso²: Je² cho⁴ta⁴ xo⁴cji³-ve⁴ a³li²coi³ vˀe²jna³jyo¹ nca³ cˀoa⁴-sˀin² ti¹nchja⁴ˀaon³-le⁴ je² ˀnte³tsje³-vi⁴ cao⁴ je² cjoa⁴-te¹xo³ma³.
ACT 6:14 Qui³no²ˀya²-lai⁴jin⁴ nca³ cˀoa⁴qui³tso² nca³ je² Jesús xi³ Nazaret tsˀe⁴ si⁴²qui³xo¹ya³ je² ˀnte³-vi⁴, si⁴²cˀa³ntjai²ya³ je² cjoa⁴ xi³ nˀian² xi³ qui³tsjoa³-na¹ Moisés.
ACT 6:15 Cˀia⁴ je² nca³tsˀi³ cho⁴ta⁴junta qui³sco³ˀa² Esteban. Tsa³ve³ ncjain¹ jo³-ni³ xi³ tsˀe⁴ jnco³ a²ncje⁴.
ACT 7:1 Cˀia⁴ je² na⁴ˀmi³ti¹tjon² cˀoa⁴qui³tso²: A³ cjoa⁴qui²xi⁴ nca³ cˀoa⁴tjin¹ je²-vi⁴.
ACT 7:2 Cˀia⁴ Esteban qui³tso²: Nca³tsˀio³ ˀnti¹ntsˀe³ cao⁴ xi³ nˀao³, ti⁴no¹ˀyao²³: Je² Ni³na¹ xi³ tjin¹-le⁴ cjoa⁴je³ya³ tsˀa³tsen³-le⁴ cho⁴ta⁴jchi¹nca³-na¹ Abraham, cˀia⁴ nca³ ti¹jna³ Mesopotamia. Cje³-sa³ fi³cho¹-jin² ya⁴ Harán.
ACT 7:3 Ni³na¹ cˀoa⁴qui³tso²-le⁴: Ti²tjo⁴-ni³ na³nqui³-li⁴. Ca²ta³va³tio² xi²nqui⁴. Tˀin³ ya⁴ na³nqui³ jña³ nca³ coa³co³-le²³.
ACT 7:4 Cˀia⁴ ji³tjo³-ni³ na³nqui³-le⁴ cho⁴ta⁴ caldeos. Ya⁴ ji³cho²cˀe²jna³ ya⁴ Harán. Cˀia⁴ nca³ cˀen³ nˀai³-le⁴, Ni³na¹ qui³si³cˀa³ntjai²ya³-le⁴ ˀnte³. Ja³ˀai³cao⁴ i⁴ ˀnte³-vi⁴ jña³ nca³ ti³yo³ ntˀai⁴-vi⁴.
ACT 7:5 Ni³na¹ li²coi³ qui³tsjoa³cjoa⁴tjao²-le⁴ na³nqui³, ni⁴ sa³ˀnta³ jña³ nca³ coa⁴sen² jnco³ ntso⁴co⁴. To⁴nca³ Ni³na¹ qui³tsjoa³ tsˀoa³ nca³ tsjoa¹-le⁴ xi³ ti⁴tsˀe⁴-ni³, cao⁴ xi³ tsˀe⁴ ntje⁴-le⁴ xi³ scan³-le⁴ nca³ je² cjoa⁴ˀai¹, nta³ tsa² cje³ tjin¹-jin²le⁴ ˀnti¹.
ACT 7:6 Ni³na¹ cˀoi⁴qui³tso²-le⁴: Je² ntje⁴-li⁴ cˀoi¹ma³son² ˀnte³ xi³ cja⁴ˀai¹ tsˀe⁴, jña³ nca³ to⁴cho⁴ˀnta³ coan⁴, cˀoa⁴ to⁴taon³ jcha⁴ ño³ ciento no¹.
ACT 7:7 Ni³na¹ qui³tso²: To⁴nca³ an³ tsjoa³-le⁴ cjoa⁴ñˀain³ je² na⁴xi⁴na³nta¹ jña³ nca³ cho⁴ˀnta³ coan⁴. Coan⁴scan³-ni³ coi⁴tjo³xin²-ni¹, cˀoa⁴ i⁴ ˀnte³-vi⁴ scoe⁴xcon¹-na³.
ACT 7:8 Ni³na¹ tsa³cˀe¹nˀion¹-le⁴ Abraham je² cjoa⁴ circuncisión. Cˀoa⁴-sˀin² Abraham qui³sˀe³-le⁴ Isaac. Xi³ coan³jin³-ni³ ni⁴čhjin³ cjoa⁴ circuncisión qui³tsjoa³-le⁴. Cˀoa⁴ je² Isaac qui³sˀe³-le⁴ Jacob. Cˀoa⁴ je² Jacob qui³sˀe³-le⁴ je² cho⁴ta⁴jchi¹nca³ xi³ te³jao² ma³-ni³.
ACT 7:9 To⁴coi³ cjoa⁴ nca³ coan³xin²con³que³, je² cho⁴ta⁴jchi¹nca³-ve⁴ tsa³ca³te¹na³-le⁴ José cho⁴ta⁴ xi³ qui³cao⁴ ya⁴ Egipto. To⁴nca³ Ni³na¹ ti¹jna³cao⁴ José.
ACT 7:10 Tsˀa³sje³ntjai² José nca³yi³je³ cjoa⁴ñˀain³ xi³ tjin¹-le⁴. Qui³tsjoa³-le⁴ cjoa⁴nta³ cao⁴ cjoa⁴ˀi³sen³ta³con² ya⁴ nqui³xcon⁴ Faraón xi³ cho⁴ta⁴ti¹tjon² ya⁴ na³nqui³ Egipto. Faraón tsa³ca³sen¹ José nca³jco⁴-le⁴ Egipto, cˀoa⁴ nca³jco⁴-le⁴ nca³yi³je³ ntˀia³-le⁴.
ACT 7:11 Cˀia⁴ ja³ˀai³ cji³nčha¹ nca³qui³jnta² Egipto cao⁴ na³nqui³ Canaán. A³li² to⁴cˀoa⁴cji³ cjoa⁴ñˀain³ tsa³cja³ˀa¹ cho⁴ta⁴. Je² nˀai³jcha¹cjin³-na¹ li²coi³ qui³sa³co³-le⁴ xi³ qui³squi³ne³.
ACT 7:12 Cˀia⁴ nca³ qui³nčhˀoe¹ Jacob nca³ tjin¹ na⁴jme¹ ya⁴ Egipto, ya⁴ qui³si³ca³sen¹ je² nˀai³jcha¹cjin³-na¹ nca³ ti¹tjon².
ACT 7:13 Cˀia⁴ nca³ coan³ jao² cˀa³-ni³, José tsa³ca³co¹-le⁴ yao³-le⁴ ntsˀe⁴. Cˀoa⁴-sˀin² Faraón tsa³ve³ xi¹ncjin¹ José.
ACT 7:14 José qui³si³ca³sen¹ qui³nchja⁴-le⁴ Jacob je² nˀai³-le⁴ cao⁴ nca³tsˀi³ xi¹ncjin¹. Jan²can³ cao⁴-ni³ čhja³ˀaon² ma³-ni³ cho⁴ta⁴.
ACT 7:15 Cˀoa⁴-sˀin² Jacob qui³jen³ ya⁴ Egipto jña³ cˀen³ nca³ je², cao⁴ nca³tsˀi³ nˀai³jcha¹cjin³-na¹.
ACT 7:16 Qui³cao⁴ yao³-le⁴ nˀai³jcha¹cjin³-na¹ ya⁴ Siquem. Ya⁴ qui³sˀe³ñai³ ya⁴ tsjo¹ xi³ Abraham tsa³ca³tse³-ni³ cao⁴ taon⁴ je² xti³-le⁴ Hamor xi³ Siquem tsˀe⁴.
ACT 7:17 Cˀia⁴ nca³ je³coan³čhian³ je² ni⁴čhjin³ xi³ Ni³na¹ qui³tsjoa³-le⁴ tsˀoa³ Abraham, je² cho⁴ta⁴ na⁴xi⁴na³nta¹ coan³ncjin²ya³, cˀoa⁴ qui³sˀe³-le⁴ nca³nˀion¹ ya⁴ Egipto,
ACT 7:18 sa³ˀnta³ ji³so¹tjen⁴ nqui²jnco³ cho⁴ta⁴ti¹tjon² xi³ tsi² tsa² ve³xcon³ José.
ACT 7:19 Je²-vi⁴ˀni³ cjai¹nca³ to⁴tse³ cjoa⁴ma²ña⁴ qui³cja³ˀa¹-le⁴ nca³ tsa³cˀe¹xa¹-le⁴ xi²nquia⁴². Chˀao³ qui³si³cao⁴ je² nˀai³jcha¹cjin³-na¹, jo³ sa³ˀnta³ nca³ cjoa⁴nˀion¹ tsˀa³sje³jin³sen¹ nca³tsˀi³ ˀnti¹xti³-le⁴, jme¹-ni³ nca³ cha⁴-si¹ni³ ntje⁴-le⁴.
ACT 7:20 Ti⁴je²-ni³ ni⁴čhjin³ qui³tsin³ Moisés. Cˀoa⁴ je² cjai¹nca³ na³sca¹ qui³sˀe³ nqui³xcon⁴ Ni³na¹. Jan² sa¹ qui³ni²jcha¹ ya⁴³ ni³ˀya³-le⁴ nˀai³-le⁴.
ACT 7:21 Cˀia⁴ nca³ tsˀa³sje³jin³sen¹ je² tso²ti³-le⁴ Faraón qui³scoe¹. Je² qui³si³jcha¹ jo³-ni³ tsa² ˀnti¹ xi³ tsˀe⁴.
ACT 7:22 Tsa³ca³co¹ya³-le⁴ Moisés nca³yi³je³ cjoa⁴chji⁴ne⁴ xi³ tsˀe⁴ cho⁴ta⁴ egipcios. A³li² to⁴cˀoa⁴cji³ ncˀa³ tsa³cˀe²jna³ cao⁴ nca³yi³je³ xi³ qui³tso², cao⁴ nca³yi³je³ xi³ qui³sˀin³.
ACT 7:23 Cˀia⁴ nca³ je³tjin¹-le⁴ ña³chan² no¹, ja³ˀai³-le⁴ jnco³ cjoa⁴fa³ˀai³tsjen³ nca³ coan³me³-le⁴ nca³ qui³con³-le⁴ ntsˀe⁴, je² xti³-le⁴ Israel.
ACT 7:24 Cˀia⁴ nca³ tsa³ve³ jnco³ xi³ to⁴chˀao³ ti¹ni²cao⁴, je² Moisés qui³si³toan¹ntjai², cˀoa⁴ qui³si³nca³jao³-ni³ je² xi³ chˀao³ ti¹ni²cao⁴ nca³ qui³si³qui²ˀaon³ je² cho⁴ta⁴ egipcio.
ACT 7:25 Moisés qui³si³cja³ˀai³tsjen³ nca³ je² ntsˀe⁴ coan⁴cho⁴ya³-le⁴ nca³ Ni³na¹ ti¹tsjoa¹-le⁴ cjoa⁴vi³tjo³ntjai² cao⁴ ntsja² Moisés, to⁴nca³ je² ntsˀe⁴ li²coi³ coan³cho⁴ya³-le⁴.
ACT 7:26 Xi³ coan³nchaon³-ni³ tjio¹cjan¹ jao² ntsˀe⁴. Cˀia⁴ Moisés ja³ˀai³con²-le⁴, coan³me³-le⁴ nca³ qui³si³ca³tio¹jyo², cˀoa⁴qui³tso²-le⁴: Ntsˀe³² cho⁴vao²³ nca³ jon². A¹-ni³ nca³ cˀoa⁴-sˀin² chˀao³ ni²cao⁴-si¹nio³ xi²nquio⁴³.
ACT 7:27 Cˀia⁴ je² xi³ chˀao³ ti¹si¹cao⁴ xi³jnco³, qui³sca³ni¹tsja qui³tso²-le⁴ Moisés: ˀya¹-ni³ xi³ cho⁴ta⁴ti¹tjon² ca²va³sen¹jna³-li². ˀya¹-ni³ xi³ xca²le⁴ ca²tso²-li² xi³ tˀa³tsain⁴-jin⁴.
ACT 7:28 A³ me³-li² nca³ si⁴cˀen³-nai¹³, jo³-sˀin² nca³ qui³ni²cˀain³ je² cho⁴ta⁴ egipcio nco²jña⁴.
ACT 7:29 Cˀia⁴ nca³ je³cˀoa⁴qui³tso², Moisés tsa³nca³-ni¹, jo³-ni³ cho⁴ta⁴ xi³ cao⁴ cjoa⁴nˀion¹ qui³chon³sje³jin³-ni³ ˀnte³-le⁴. Qui³cˀe²jna³ ya⁴ nqui²jnco³ ˀnte³ jña³ nca³ Madián ˀmi², jña³ nca³ qui³sˀe³jao²-le⁴ ˀnti¹xti³.
ACT 7:30 Coan³son²-le⁴ ña³chan² no¹ ya⁴ ˀnte³-ve⁴. Jnco³ a²ncje⁴ coan³tsen³-le⁴ Moisés ya⁴ ˀnte³tˀa³xin²tˀa³ jña³ nca³ ni³nto³ Sinaí ˀmi². Jnco³ ya¹xca⁴cha³ ti¹ti². Ya⁴ lˀi¹-le⁴ tsˀa³tsen³-jin³ je² a²ncje⁴.
ACT 7:31 Cˀia⁴ Moisés qui³sco²tsen³. To⁴coan³xcon¹-le⁴ jme³ xi³ tsa³ve³. Qui³čhian³ jme¹-ni³ nca³ nta³ scoe⁴-si¹ni³. Cˀia⁴ je² Nai³-na¹ tsa³cja¹cao⁴:
ACT 7:32 An³ nia¹³ Ni³na¹-le⁴ nˀai³jcha¹cjin³-li², Ni³na¹-le⁴ Abraham, Ni³na¹-le⁴ Isaac, Ni³na¹-le⁴ Jacob. To⁴nca³ Moisés to⁴qui³tso³cjon¹-ni¹. A³li²coi³ coan³nˀion¹con³ nca³ qui³sco²tsen³.
ACT 7:33 Cˀia⁴ je² Nai³-na¹ cˀoa⁴qui³tso²-le⁴ Moisés: Chja⁴ˀa²xin²³ jte¹ xi³ cjia³ ntso⁴coi³. Je² ˀnte³ jña³ nca³ ti³vi³sen²nai²³-vi⁴ ˀnte³tsje³xcon¹ ni¹.
ACT 7:34 Tsa³ˀve³, tsa³ˀve³-nia¹³ je² cjoa⁴ñˀain³ xi³ tjin¹-le⁴ je² cho⁴ta⁴-na⁴ xi³ tjio¹ ya⁴ Egipto. Qui³nčhˀoe³-nia¹³ nca³ tjio¹cji³ˀntia¹va³. Coi³ xa¹ ca²vi²tjo⁴jen³-nia³, nca³ cˀoa³sje³ntje²³. Nčhoai¹³ ntˀai⁴, ya⁴ sca³ni³-le²³ ya⁴ Egipto.
ACT 7:35 Je² Moisés xi³ cho⁴ta⁴ Israel to⁴tsa³cja³ˀa¹xin² nca³ qui³tso²: ˀya¹-ni³ xi³ cho⁴ta⁴ti¹tjon² ca²va³sen¹jna³-li². ˀya¹-ni³ xi³ xca²le⁴ ca²tso²-li². Je²-vi⁴ xi³ Ni³na¹ qui³si³ca³sen¹ nca³ cho⁴ta⁴ti¹tjon², nca³ cˀoa⁴sje³ntjai² cao⁴ ntsja³ a²ncje⁴ xi³ coan³tsen³jin³ ya¹xca⁴cha³.
ACT 7:36 Moisés tsa³cˀa³sje³ cho⁴ta⁴ Israel. Ña³chan² no¹ nˀion¹ tse³ cjoa⁴xcon¹ cao⁴ choa⁴ xi³ qui³sˀin³ ya⁴ na³nqui³ Egipto, cao⁴ ya⁴ na³nta¹ Mar Rojo, cao⁴ ya⁴ ˀnte³tˀa³xin²tˀa³.
ACT 7:37 Je²-vi⁴ je² Moisés xi³ qui³tso²-le⁴ nca³tsˀi³ xti³-le⁴ Israel: Je² Nai³-no³ Ni³na¹-no³ sco¹mi³tjen⁴jin³-no³ jnco³ ntsˀao³ xi³ coi⁴nchja⁴ya³jin³-no³ jo³-ni³ an³, je² xi³ coi⁴no¹ˀya²-lao⁴³.
ACT 7:38 Je² cho⁴ta⁴ xo⁴ˀmi²-ve⁴ je² ni¹ xi³ tsa³cˀe²jna³cao⁴ je² na⁴xi⁴na³nta¹-le⁴ Ni³na¹ ya⁴ ˀnte³tˀa³xin²tˀa³, cao⁴ je² a²ncje⁴ xi³ tsa³cja¹cao⁴ ya⁴ ni³nto³ Sinaí, cao⁴ je² nca³tsˀi³ nˀai³jcha¹cjin³-na¹. Je² Moisés xi³ tsa³cˀai²-le⁴ je² en¹ xi³ tsˀe⁴ cjoa⁴vi³jna³chon³ jme¹-ni³ nca³ tsjoa¹-si¹ni³na¹.
ACT 7:39 Je² nˀai³jcha¹cjin³-na¹ coan³cai³-le⁴ nca³ qui³si³tjo³son²-le⁴ Moisés, to⁴sa³ tsa³cja³ˀa¹xin²-le⁴. Coan³me³-le⁴ ni⁴ma⁴-le⁴ nca³ qui³-nca¹ni³ ya⁴ Egipto.
ACT 7:40 Cˀoa⁴qui³tso²-le⁴ Aarón: Ti⁴nta³-na³jin⁴ ni³na¹ xi³ ca²ta³fi² ti¹tjon²-na³jin⁴. Je² Moisés xi³ tsa³cˀa³sje³-na³jin⁴ ya⁴ na³nqui³ Egipto, a³li²coi³ ˀyai³⁴-jin⁴ jme³-ni³ xi³ coan³-le⁴.
ACT 7:41 Cˀia⁴ qui³si³nta³ jnco³ toro ˀnti¹. Qui³tsjoa³tˀa³-le⁴ cjoa⁴tjao² je² xco¹son²-ve⁴. A³li² to⁴cˀoa⁴cji³ tsjoa³ coan³-le⁴ cho⁴ta⁴ Israel cao⁴ je² xa¹ xi³ coan³-le⁴ ntsja³.
ACT 7:42 To⁴nca³ Ni³na¹ tsa³cja³ˀa¹xin² yao³-le⁴. Cˀoa⁴-sin² qui³sca³ni¹ cho⁴ta⁴ Israel nca³ scoe⁴xcon¹ tsˀoi¹ cao⁴ sa¹ cao⁴ ni³ño³, jo³-sˀin² tji¹tˀa³ ya⁴ libro-le⁴ cho⁴ta⁴ xi³ qui³nchja⁴ya³: A³ cˀoa⁴-sˀin² tsa³cˀai²tˀa³-nao¹³ cho⁴cˀen³ cao⁴ cjoa⁴tjao² ya⁴ ˀnte³tˀa³xin²tˀa³ ña³chan² no¹.
ACT 7:43 To⁴nca³ qui³chˀao²³ je² ntˀia³na³jño³ xi³ tsˀe⁴ Moloc, cao⁴ je² ni³ño³-le⁴ je² ni³na¹-no³ Renfán. Je² ni¹ xco¹son² xi³ jon² qui³ni²ntao³ nca³ tsa³ˀya³xcon¹³. To⁴sa³ sca³ni³-no³ jan¹, jña³ cjin³-sa³le⁴ Babilonia.
ACT 7:44 Ya⁴ ˀnte³tˀa³xin²tˀa³ je² nˀai³jcha¹cjin³-na¹ qui³sˀe³-le⁴ je² ntˀia³na³jño³ xi³ tjia¹ en¹-le⁴ Ni³na¹. Cˀoa⁴-sˀin² cˀia⁴ nca³ tsa³cja¹cao⁴ Moisés, Ni³na¹ tsa³ca³te¹xo³ma³ nca³ cˀoa⁴-sˀin² ca²ta³si¹nta³ ntˀia³na³jño³ jo³ cji³ nca³ tsa³ve³.
ACT 7:45 Cˀia⁴ nca³ je³qui³sˀe³-le⁴ ntˀia³na³jño³ je² nˀai³jcha¹cjin³-na¹, cˀoa⁴-ti⁴ ja³ˀai³cao⁴ cˀia⁴ nca³ ja³ˀa³sˀen³ cao⁴ Josué ya⁴ ˀnte³-le⁴ cho⁴ta⁴ xi³ li² judío-jin². Ni³na¹ tsa³cja³ˀa¹xin² je² cho⁴ta⁴ xi³ li² judío-jin² nqui³xcon⁴ nˀai³jcha¹cjin³-na¹, sa³ˀnta³ ni⁴čhjin³-le⁴ David.
ACT 7:46 Je² David qui³sa³co³-le⁴ cjoa⁴nta³ nqui³xcon⁴ Ni³na¹. Qui³si³je¹ nca³ ca²ta³sa³co¹-le⁴ jnco³ ni³ˀya³ xi³ tˀa³tsˀe⁴ je² Ni³na¹-le⁴ Jacob.
ACT 7:47 To⁴nca³ Salomón qui³si³nta³-le⁴ ni³ˀya³.
ACT 7:48 To⁴nca³ je² Ni³na¹ xi³ ncˀa³ ti¹jna³, li²coi³ vˀe²jna³ˀya³ ni³ˀya³ xi³ ntsja³ cho⁴ta⁴ ma³nta³-ni³. Je² xi³ qui³nchja⁴ya³ tˀa³tsˀe⁴ Ni³na¹ tso²:
ACT 7:49 Je² ncˀa³jmi³ je² ni¹ ya¹xi²le⁴-na⁴, cˀoa⁴ je² son³ˀnte³ je² ni¹ jña³ nca³ si³cja¹ya³ne²³ ntso⁴coa³. Jña¹-le⁴ ni³ˀya³ xi³ ni²nta³-nao¹³, tso² Nai³-na¹, a³xo⁴, jña¹-ni³ ˀnte³ jña³ nca³ si³cja¹ya³ nca³ an³.
ACT 7:50 A³ tsi² tsa² je² ntsa⁴ xi³ qui³si³nta³ nca³yi³je³ je²-vi⁴.
ACT 7:51 Jon² cjai¹nca³ to⁴xi¹jin³ jco³. Jon² jo³-ni³ tsa² cho⁴ta⁴ xi³ tsin²-le⁴ cjoa⁴ circuncisión, a³li²coi³ va³sen²sin³-nao¹³ cao⁴ ni⁴ma⁴-no³, cˀoa⁴ cao⁴ xo⁴ño³. To⁴ña³qui³ cˀoa⁴-sˀin² vi³yo³ta²ja³-lao³ je² Espíritu Santo. Je² xi³ qui³sˀin³ nˀai³jcha¹cjin³-no³, cˀoa⁴²-ti⁴ ti³nˀian²-ncao¹³ nca³ jon².
ACT 7:52 Je² nˀai³jcha¹cjin³-no³, jña¹-le⁴ cho⁴ta⁴ xi³ qui³nchja⁴ya³ xi³ tsi² tsa² tsa³nca³tjen⁴nqui³ co²ntran⁴-le⁴. Ña³qui³ qui³si³cˀen³-ni¹ je² xi³ to⁴nqui³-ni³ qui³nchja⁴ya³ nca³ cjoa⁴ˀai¹ jnco³ xi³ tjin¹-le⁴ cjoa⁴qui²xi⁴. Je²-vi⁴ xi³ jon² qui³nto³vao²³ ntˀai⁴-vi⁴, cˀoa⁴ xi³ qui³ni²cˀaon³.
ACT 7:53 Qui³sˀe³-no³ je² cjoa⁴te¹xo³ma³ xi³ qui³tsˀai²-ni³no³ cao⁴ a²ncje⁴, cˀoa⁴ li²coi³ qui³ni²tjo³son²³.
ACT 7:54 Cˀia⁴ nca³ cho⁴ta⁴ qui³nčhˀoe¹ en¹ xo⁴ tso²-ve⁴, a³li² to⁴cˀoa⁴cji³ jti³ coan³-le⁴ ni⁴ma⁴-le⁴. Jo³ qui³squi³ne³ne² ni⁴ˀño⁴ nca³ jti³ coan³-le⁴ xi³ tˀa³tsˀe⁴ Esteban.
ACT 7:55 To⁴nca³ je² Esteban, a³li² to⁴cˀoa⁴cji³ Espíritu Santo xi³ tjin¹jin³ ni⁴ma⁴-le⁴. Qui³sco²tsen³ ncˀa³jmi³. Tsa³ve³ cjoa⁴je³ya³-le⁴ Ni³na¹, cˀoa⁴ tsa³ve³ Jesús xi³ sen¹nto³tˀa³ nca³qui²xi⁴-le⁴ Ni³na¹.
ACT 7:56 Esteban cˀoa⁴qui³tso²: Coe⁴-ni³, ti²ˀve³-nia¹³ ncˀa³jmi³ nca³ ti⁴xˀa⁴, cˀoa⁴ je² ˀnti¹-le⁴ cho⁴ta⁴ xi³ ya⁴ sen¹nto³tˀa³ nca³qui²xi⁴-le⁴ Ni³na¹.
ACT 7:57 Cˀia⁴ a³li² to⁴cˀoa⁴cji³ qui³squi³ˀntia¹xa¹ nca³tsˀi³. Tsa³cˀe¹chjoa² xo⁴ño³. Nca³tsˀi³ qui³to²ca³ne²-le⁴ co²ntran⁴-le⁴.
ACT 7:58 Tsa³cˀa³sje³jin³ na⁴xi⁴na³nta¹. Tsa³cˀe¹-le⁴ la⁴jao⁴. Je² xi³ coan³ testigo ya⁴ qui³si³ca³tio¹ na³jño³-le⁴ nqui³ ntso⁴co⁴ jnco³ cho⁴ta⁴xti³ xi³ Saulo ˀmi².
ACT 7:59 A³li² to⁴cˀoa⁴cji³ la⁴jao⁴ xi³ tsa³cˀe¹-le⁴ Esteban. To⁴nca³ qui³nchja⁴-le⁴ Cristo: Señor Jesús, chjoe¹tjoai²³ ni⁴ma⁴-na⁴.
ACT 7:60 Tsa³ca³sen²xco¹nchˀin³ Esteban, nˀion¹ qui³nchja⁴: Señor a³li² je¹ xo⁴tjin¹-vi⁴jin² mi³chon³tˀa³-lai⁴ je² cho⁴ta⁴-vi⁴. Xi³ je³cˀoa⁴qui³tso², qui³sˀe³fe²-ni¹.
ACT 8:1 Saulo tsa³ca¹cjao³jco⁴ nca³ qui³ni²cˀen³ Esteban. Cˀoa⁴ tsa³cˀa³-ni³ je² ni⁴čhjin³-vi⁴ nca³ ña³qui³ tsa³nca³tjen⁴nqui³ co²ntran⁴-le⁴ je² na⁴xi⁴na³nta¹-le⁴ Cristo xi³ tjio¹ ya⁴ Jerusalén. Nca³tsˀi³ qui³tsao³va³ nca³qui³jnta² na³nqui³ Judea cao⁴ Samaria. To⁴je²-sa³ pa²stro⁴ xi³ tsi² tsa² qui³tsao³va³.
ACT 8:2 Cho⁴ta⁴ xi³ tsa³ve³xcon¹ Ni³na¹, qui³cˀe¹ñai³ Esteban. A³li² to⁴cˀoa⁴cji³ qui³squi³ˀntia¹tˀain³ nca³ je².
ACT 8:3 Cˀia⁴ je² Saulo qui³si³qui³xo²ya³ na⁴xi⁴na³nta¹-le⁴ Cristo. Cˀoa⁴ ja³ˀa³sˀen³ ni³ˀya³-le⁴ nca³ jnco¹jnco¹, tsa³ca¹jve³ xˀin⁴ cao⁴ ya¹nchjin¹. Qui³sca³ni¹ nto⁴ya¹.
ACT 8:4 To⁴nca³ je² nca³tsˀi³ xi³ qui³tsao³va³, qui³ nca³qui³jnta², qui³nchja⁴ya³ je² en¹-le⁴ Ni³na¹.
ACT 8:5 Cˀia⁴ Felipe qui³jen³ jnco³ na⁴xi⁴na³nta¹ ya⁴ Samaria. Cˀoa⁴ qui³nchja⁴ya³jin³-le⁴ xi³ tˀa³tsˀe⁴ Cristo.
ACT 8:6 Ña³qui³ nta³ qui³nčhˀoe¹ cho⁴ta⁴ nca³yi³je³ cjoa⁴ xi³ qui³tso² Felipe. Tjio¹nčhˀoe¹-le⁴, cˀoa⁴ tjio¹ve³ nca³yi³je³ choa⁴ xi³ ti¹tsjoa¹.
ACT 8:7 Ncjin² cho⁴ta⁴ xi³ ntjao⁴ xi³ nta³jin³ tjio¹jin³ ni⁴ma⁴-le⁴, ji³tjo³-le⁴ ntjao⁴-ve⁴, qui³squi³ˀntia¹cao⁴. Cjai¹nca³ ncjin² cho⁴ta⁴yo⁴ma⁴, cao⁴ je² xi³ chi⁴ˀnque¹, xi³ coan³nta³.
ACT 8:8 Coi³ cjoa⁴ nca³ cjai¹nca³ tse³ cjoa⁴tsjoa³ xi³ tjin¹ ya⁴ na⁴xi⁴na³nta¹.
ACT 8:9 Ti¹jna³ jnco³ cho⁴ta⁴xˀin⁴ xi³ Simón ˀmi², xi³ nca³sˀa⁴ ma³-le⁴ vˀe¹nta³ ya⁴ na⁴xi⁴na³nta¹-ve⁴. Tsa³cˀa³na⁴cha⁴-le⁴ cho⁴ta⁴ xi³ Samaria tsˀe⁴ nca³ cˀoa⁴qui³tso²-le⁴ yao³-le⁴ nca³ nˀion¹ cho⁴ta⁴xcon¹.
ACT 8:10 Nca³tsˀi³ ña³qui³ nta³ qui³nčhˀoe¹-le⁴, jo³ sa³ˀnta³ ˀnti¹xti³, jo³ sa³ˀnta³ cho⁴ta⁴jchi¹nca³. Cˀoa⁴qui³tso²: Je²-vi⁴ xi³ tjin¹-le⁴ je² nca³nˀion¹-le⁴ Ni³na¹ xi³ nˀion¹ tse³.
ACT 8:11 Cho⁴ta⁴ ña³qui³ nta³ qui³nčhˀoe¹-le⁴ nca⁴ ncjin² no¹ tsa³qui³ncha³xcon¹-le⁴ cho⁴ta⁴ cao⁴ cjoa⁴vˀe²nta³-le⁴.
ACT 8:12 Cˀia⁴ nca³ cho⁴ta⁴ coan³cjain¹-le⁴ Felipe xi³ qui³nchja⁴ya³ je² en¹nta³ xi³ tˀa³tsˀe⁴ cjoa⁴te¹xo³ma³-le⁴ Ni³na¹, cˀoa⁴ xi³ tˀa³tsˀe⁴ Jesucristo, qui³sa³te¹nta¹ xi³ ya¹nchjin¹-ve⁴, xi³ xˀin⁴-ve⁴.
ACT 8:13 Sa³ˀnta³ ti⁴je²-ni³ Simón cˀoa⁴-ti⁴ coan³cjain¹-le⁴. Cˀia⁴ nca³ je³qui³sa³te¹nta¹, qui³tˀa³-le⁴ Felipe. Tsa³ve³ je² choa⁴ cao⁴ cjoa⁴xcon¹ xi³ cji³ma³, to⁴coan³xcon¹-le⁴.
ACT 8:14 Je² pa²stro⁴ xi³ tjio¹ ya⁴ Jerusalén qui³nčhˀoe¹ nca³ ya⁴ Samaria qui³tjoe¹ je² en¹-le⁴ Ni³na¹. Cˀia⁴ qui³si³ca³sen¹-le⁴ Pedro cao⁴ Juan.
ACT 8:15 Cˀia⁴ nca³ ji³cho² Pedro cao⁴ Juan, tsa³cˀe¹tsˀoa³ntjai² cho⁴ta⁴, jme¹-ni³ nca³ tjoe¹-si¹ni³le⁴ je² Espíritu Santo.
ACT 8:16 (Nca³ cje³ fa³ˀa³sˀen³jin³-jin²le⁴. To⁴qui³sa³te¹nta¹-ni³ xi³ tˀa³tsˀe⁴ jan³ˀain¹-le⁴ Nai³-na¹ Jesús.)
ACT 8:17 Cˀia⁴ Pedro cao⁴ Juan tsa³ca¹yo³son²-le⁴ ntsja³. Cˀoa⁴ je² qui³tjoe¹-le⁴ je² Espíritu Santo.
ACT 8:18 Cˀia⁴ nca³ tsa³ve³ Simón nca³ to⁴je² ntsja³ pa²stro⁴ coa¹jna³son²-le⁴ cho⁴ta⁴ nca³ tsjoa¹-le⁴ Espíritu Santo, cˀia⁴ coan³me³-le⁴ nca³ tsjoa¹-le⁴ taon⁴ je² pa²stro⁴.
ACT 8:19 Cˀoa⁴qui³tso² Simón: Tˀai²-nao¹³ an³ je² cjoa⁴te¹xo³ma³ je²-vi⁴, jme¹-ni³ nca³ to⁴ˀya³-ni³ve⁴ xi³ ntsa⁴ cjoa³son²-le⁴ tjoe¹-si¹ni³le⁴ je² Espíritu Santo.
ACT 8:20 Cˀia⁴ Pedro cˀoa⁴qui³tso²-le⁴: Je² taon⁴-li⁴ ca²ta³mˀen³coai⁴, nca³ ni²cja³ˀai³tsjain³ nca³ je² cjoa⁴tjao²-le⁴ Ni³na¹ ma³ vi³nta³-ni³ taon⁴.
ACT 8:21 Ji³ tsin²-li² ˀnte³-jin² xi³ tˀa³tsˀe⁴ xa¹ xo⁴tjin¹-vi⁴, nca⁴ je² ni⁴ma⁴-li⁴ li²coi³ qui²xi⁴ tˀa³tsˀe⁴ Ni³na¹.
ACT 8:22 Ti⁴cˀa³ntjai²yai³ cjoa⁴fa³ˀai³tsjen³-li⁴ xi³ tˀa³tsˀe⁴ je² cjoa⁴tsˀen⁴-li⁴. Tˀe²tsˀoa³-lai⁴ Ni³na¹ tsa² coan⁴-sa³ nca³ si⁴²cha³tˀa³-li² je² cjoa⁴fa³ˀai³tsjen³-le⁴ ni⁴ma⁴-li⁴.
ACT 8:23 ˀve³ nca³ je² xi³ sja³ ti¹jna³jin³-li², cˀoa⁴ ti³jna³jin³ cjoa⁴ñˀain³ xi³ to⁴tˀa³tsˀe⁴ cjoa⁴tsˀen⁴-li⁴.
ACT 8:24 Cˀia⁴ Simón cˀoa⁴qui³tso²: Tˀian⁴-nao¹³ cjoa⁴nta³, tˀe²tsˀoa³lao⁴³ je² Nai³-na¹ xi³ tˀa³tsˀan⁴, jme¹-ni³ nca³ ni⁴jnco³-jin² cjoa⁴ xi³ ti³ˀmi²-nao¹³ve⁴ nčhoa³ne²-si¹ni³na³.
ACT 8:25 Cˀia⁴ nca³ je² pa²stro⁴ je³qui³tsjoa³ en¹-le⁴, cˀoa⁴ je³qui³nchja⁴ en¹-le⁴ Ni³na¹, cˀia⁴ qui³-nca¹ni³ ya⁴ Jerusalén. Cjai¹nca³ ncjin² ˀnte³-le⁴ cho⁴ta⁴ samaritanos jña³ qui³nchja⁴ya³ je² en¹nta³ xi³ tˀa³tsˀe⁴ Cristo.
ACT 8:26 To⁴nca³ jnco³ a²ncje⁴-le⁴ Nai³na¹ cˀoi⁴qui³tso²-le⁴ Felipe: Ti⁴so¹tjain⁴, tˀin³ jña³ nca³ nca³qui²xi⁴-le⁴ son³ˀnte³, je² ntia⁴² xi³ fi²jen³-ni³ Jerusalén, xi³ fi³cho¹-ni³ Gaza jña³ nca³ ˀnte³tˀa³xin²tˀa³.
ACT 8:27 Cˀia⁴ Felipe ji³so²tjen⁴, qui³. Coe⁴-ni³ jnco³ cho⁴ta⁴ etíope xi³ cho⁴ta⁴ˀnti⁴, cˀoa⁴ xi³ gobernador xi³ tsˀe⁴ Candace je² reina-le⁴ cho⁴ta⁴ etíopes. Je² cho⁴ta⁴-ve⁴ vˀe²jna³ˀnta³ nca³yi³je³ cjoa⁴nchi⁴na¹-le⁴. Cho⁴ta⁴ xo⁴cji³-ve⁴ ja³ˀai³ que³xcon¹ Ni³na¹ ya⁴ Jerusalén.
ACT 8:28 Ji³nčhoa³-nca¹ni³, ti¹jna³ya³ carro-le⁴. Ti¹vˀe¹xquia⁴ xon⁴-le⁴ Isaías je² xi³ qui³nchja⁴ya³ tˀa³tsˀe⁴ Ni³na¹.
ACT 8:29 Je² Espíritu Santo cˀoa⁴qui³tso²-le⁴ Felipe: Ña³tjen⁴ tˀin³coai⁴ je² carro-ve⁴.
ACT 8:30 Felipe qui³to²ca³con³-le⁴ cho⁴ta⁴-ve⁴. Qui³nčhˀoe¹-le⁴ nca³ ti¹vˀe¹xquia⁴ xon⁴-le⁴ Isaías. Cˀoa⁴qui³tso²-le⁴: A³ ma³cho⁴ya³-li² xi³ ti³vˀe²xquiai⁴.
ACT 8:31 Cho⁴ta⁴-ve⁴ qui³tso²: Jo¹-sˀin² coan⁴-ni³na³, tsa² tsi² ˀya³ xi³ coi⁴tso⁴ya³-na³. Cˀia⁴ tsa³cˀe¹tsˀoa³-le⁴ Felipe nca³ ca²ta³fi²quin³ya³ carro-le⁴, nca³ ya⁴ ca²ta³vˀe²jna³tˀa³-le⁴ nca³ je².
ACT 8:32 Je² xi³ tji¹tˀa³ xon⁴ Escritura xi³ ti¹vˀe¹xquia⁴, je² je²-vi⁴: Jo³-ni³ tsa² va³rre² xi³ qui³cha³-ni³ nca³ si⁴cˀen³, cˀoa⁴ jo³-ni³ tsa² va³rre² ˀnti¹ xi³ tsi²coi³ cji³ˀntia¹ nca³ ti¹jna³tˀa³-le⁴ xi³ vˀe¹jon³-le⁴, cˀoa⁴-sˀin² li²coi³ qui³sco³ˀai² tsˀoa³ nca³ qui³nchja⁴.
ACT 8:33 Cˀia⁴ nca³ tsa³cja³ˀa¹ cjoa⁴ñˀain³, a³li²jme³ cao⁴ cjoa⁴qui²xi⁴ xi³ qui³sˀe³nta³jin³-ni³le⁴. Je² na⁴xi⁴na³nta¹-le⁴ ˀya¹-ni³ xi³ coan⁴ coa⁴co² jo³ coan³ cjoan³. Ji³tjo³xin²-le⁴ son³ˀnte³-vi⁴ je² cjoa⁴vi³jna³chon³-le⁴.
ACT 8:34 Cˀia⁴ je² cho⁴ta⁴ˀnti⁴-ve⁴ qui³tso²-le⁴ Felipe: Tjin¹-li² cjoa⁴nta³, ˀya¹ ni¹³ xo⁴ tso²-le⁴ je²-vi⁴ nca³ cˀoa⁴qui³tso² je² xi³ qui³nchja⁴ya³ tˀa³tsˀe⁴ Ni³na¹. A³ je² xo⁴ tso²-le⁴ yao³-le⁴, a³xo⁴ cja⁴ˀai¹ ni¹.
ACT 8:35 Cˀia⁴ Felipe tsa³cˀe¹tsˀia⁴ nca³ qui³nchja⁴. Tsa³cˀe¹tsˀia⁴cao⁴ sa³ˀnta³ je² xon⁴ escritura-vi⁴, cˀoa⁴qui³tso²-le⁴ je² en¹nta³ xi³ tˀa³tsˀe⁴ Jesús.
ACT 8:36 Cˀia⁴ nca³ tjio¹fi² ya⁴³ ntia⁴², ji³cho² jña³ tjin¹ na³nta¹. Cˀoa⁴qui³tso² je² cho⁴ta⁴ˀnti⁴-vi⁴: Tjin¹ na³nta¹ i⁴-vi⁴. A¹-ni³ nca³ tsi² coan⁴-ni³ nca³ sa³te¹nta¹ an³-vi⁴.
ACT 8:37 Je² Felipe cˀoa⁴qui³tso²: Tsa² cao⁴ nca³yi³je³ ni⁴ma⁴-li⁴ ma³cjain¹-li², coan⁴-jin²ˀni³. Cho⁴ta⁴ˀnti⁴-ve⁴ cˀoa⁴qui³tso²: Ma³cjain¹-na³ nca³ Jesucristo je² ni¹ ˀnti¹-le⁴ Ni³na¹.
ACT 8:38 Tsa³ca³te¹xo³ma³ nca³ qui³si³ca³sen¹jna³ je² carro-le⁴. Ji³tjo³jen³jin³ na³nta¹ nca³ jao², Felipe cao⁴ cho⁴ta⁴ˀnti⁴-ve⁴. Felipe tsa³ca³te¹nta¹ cho⁴ta⁴ˀnti⁴-ve⁴.
ACT 8:39 Cˀia⁴ nca³ ji³tjo³jin³-ni³ na³nta¹, je² Espíritu-le⁴ Nai³-na¹ tsa³cja³ˀa¹xin² Felipe. Je² cho⁴ta⁴ˀnti⁴-ve⁴ li²coi³ ti⁴tsa³ve³-ni³ Felipe. Tsjoa³ tjin¹con³ nca³ qui³ ntia⁴²-le⁴.
ACT 8:40 To⁴nca³ je² Felipe ya⁴ ti¹jna³ ya⁴ Azoto. Cˀia⁴ nca³ tsˀa³mjen³ ya⁴³ ntia⁴² qui³tso²ya³ je² en¹nta³ xi³ tˀa³tsˀe⁴ Cristo nca³qui³jnta² na⁴xi⁴na³nta¹, sa³ˀnta³ nca³ ji³cho² ya⁴ Cesarea.
ACT 9:1 Saulo to⁴jo³ cˀoa⁴tso²-sa³ nca³ si⁴²cˀen³ cho⁴ta⁴-le⁴ Nai³-na¹. Ji³cho²nčhˀoe² je² na⁴ˀmi³ti¹tjon².
ACT 9:2 Qui³si³je¹-le⁴ xon⁴nca³nˀion¹-le⁴ xi³ cˀoa⁴-le⁴ je² ntˀia³ sinagogas ya⁴ Damasco, jme¹-ni³ nca³ cjoa⁴ˀai¹cao⁴-ni³ presos ya⁴ Jerusalén, tsa² nka³ sa⁴co²sjai³-le⁴ cho⁴ta⁴xˀin⁴ a³xo⁴ ya¹nchjin¹ xi³ cˀoa⁴-sˀin² ma³cjain¹-le⁴.
ACT 9:3 Cˀia⁴ nca³ ti¹fi² ja⁴ya³ ntia⁴², cˀia⁴ nca³ ji³cho² čhian³ Damasco, to⁴ña³cjoan¹ ja³ˀa³ nca³ coan³ˀi³sen³ntai³-le⁴ jnco³ lˀi¹ xi³ ncˀa³jmi³ ji³nčhoa³-ni³.
ACT 9:4 Saulo qui³sca³tˀa³ na³nqui³, qui³nčhˀoe¹-le⁴ jnco³ xi³ qui³nchja⁴: Saulo, Saulo, a¹-ni³ nca³ an³ ˀmi³tjen⁴nqui³ co²ntran⁴-si¹ni³nai¹³.
ACT 9:5 Cˀia⁴ Saulo qui³tso²: ˀya¹-ni³ ji³, Señor. Cˀia⁴ je² qui³tso²: An³ nia¹³ Jesús xi³ ti³ˀmi³tjen⁴nqui³ co²ntran⁴-nai¹³. To⁴si⁴qui²ˀoain³ yao³-li⁴, tsa² coi⁴njon¹-lai⁴ ya¹ xi³ yao³xcon¹ cji³.
ACT 9:6 Cˀia⁴ Saulo ja³tse³, cjai¹nca³ to⁴qui³tso³cjon¹, cˀoa⁴qui³tso²: Señor, jme¹-ni³ xi³ me³-li² nca³ sˀian³ an³. Je² Nai³-na¹ cˀoa⁴qui³tso²-le⁴: Ti⁴so¹tjain⁴, ti⁴tja¹sˀain³ na⁴xi⁴na³nta¹-vi⁴. Ya⁴ cˀoa⁴cˀoin¹-li² jña³-le⁴ xi³ ma³chjen¹-li² nca³ cˀoa⁴sˀiain⁴.
ACT 9:7 Je² cho⁴ta⁴xˀin⁴ xi³ tjen⁴cao⁴ Saulo tsa³qui³ncha³jyo¹-ni¹, to⁴coan³xcon¹-le⁴. Qui³nčhˀoe¹ jta⁴-le⁴ xi³ ti¹nchja⁴, to⁴nca³ li²ˀya³ xi³ tsa³ve³.
ACT 9:8 Cˀia⁴ Saulo ji³so²tjen⁴tˀa³-ni³ na³nqui³. Qui³sco³ˀai² xcon⁴, a³li²coi³ ti⁴coan³tsen³-ni³le⁴. Cho⁴ta⁴ to⁴qui³tsoa³ ntsja³ nca³ qui³sˀen³cao⁴ ya⁴ Damasco.
ACT 9:9 Jan² ni⁴čhjin³ ya⁴ tsa³cˀe²jna³ nca³ ni⁴ˀi⁴tse¹-jin² tsen³-le⁴. A³li²coi³ tsa³cjen², li²jme³ xi³ tsa³cˀi³.
ACT 9:10 Jnco³ cho⁴ta⁴-le⁴ Cristo ti¹jna³ ya⁴ Damasco xi³ Ananías ˀmi². Je² Nai³-na¹ cˀoa⁴qui³tso²-le⁴ ya⁴ya³ ni³jña¹-le⁴: Ananías. Cˀoa⁴ je²-ˀni³ cˀia⁴ qui³nchja⁴: I⁴ ti²jna⁴-vi⁴, Señor.
ACT 9:11 Je² Nai³-na¹ cˀoa⁴qui³tso²-le⁴: Ti⁴so¹tjain⁴, tˀin³ˀnchoi²³ calle jan¹ jña³ nca³ qui²xi⁴ ˀmi². Chjo¹na³nqui³ ya⁴³ ntˀia³-le⁴ Judas jnco³ xi³ Saulo ˀmi². Tarso tsˀe⁴. Coe⁴-ni³ ti¹vˀe¹tsˀoa³.
ACT 9:12 Je³tsa³ve³ ya⁴ya³ ni³jña¹-le⁴ jnco³ cho⁴ta⁴xˀin⁴ xi³ Ananías ˀmi², xi³ cjoa⁴ˀai¹con³-le⁴, coa⁴²jna³son²-le⁴ ntsja³, jme¹-ni³ nca³ nqui²jnco³cˀa² coan⁴tsen³-si¹ni³le⁴.
ACT 9:13 Cˀia⁴ qui³nchja⁴ je² Ananías: Señor, cjai¹nca³ to⁴ncjin² cho⁴ta⁴ xi³ qui³nčhˀoe³-le⁴ xi³ tˀa³tsˀe⁴ je² cho⁴ta⁴-ve⁴, jo³ nca³ chˀao³ qui³si³cao⁴ cho⁴ta⁴-li⁴ ya⁴ Jerusalén.
ACT 9:14 Sa³ˀnta³ i⁴-vi⁴ yˀa³-sa³ cjoa⁴te¹xo³ma³ xi³ tˀa³tsˀe⁴ cho⁴ta⁴ti¹tjon²-le⁴ na⁴ˀmi³ nca³ tsoa³ nca³tsˀi³ xi³ jan³ˀain¹-li⁴ nchja⁴.
ACT 9:15 Cˀia⁴ je² Nai³-na¹ cˀoa⁴qui³tso²-le⁴ Ananías: Tˀin³. Je² cho⁴ta⁴-vi⁴ tsa³cja³ˀa³jian³, nca³ coan⁴chjen¹-na³ jme¹-ni³ nca³ coai⁴cao⁴-ni³ jan³ˀain¹-na⁴ nqui³xcon⁴ cho⁴ta⁴ xi³ li² judío-jin², cao⁴ cho⁴ta⁴ti¹tjon², cao⁴ xti³-le⁴ Israel.
ACT 9:16 An³ coa³co³-le⁴ nca³yi³je³ cjoa⁴ñˀain³ xi³ ma³chjen¹ nca³ cjoa⁴ˀa³ntjai² xi³ to⁴tˀa³tsˀe⁴ jan³ˀain¹-na⁴.
ACT 9:17 Cˀia⁴ Ananías qui³, ja³ˀa³sˀen³ ni³ˀya³. Tsa³ca¹jna³son²-le⁴ ntsja³, cˀoa⁴qui³tso²: Saulo ˀnti¹ntsˀe³, je² Nai³-na¹ Jesús xi³ coan³tsen³-li² nca³ ja²ˀai⁴ ya⁴³ ntia⁴², qui³si³ca³sen¹-na³ jme¹-ni³ nca³ coan⁴tsen³ nqui²jnco³cˀa²-si¹ni³li², cˀoa⁴ nca³ tse³ sˀe⁴jin³-si¹ni³ ni⁴ma⁴-li⁴ Espíritu Santo.
ACT 9:18 Nti⁴ton⁴ je² xi³ cˀoa⁴cjoan³ čhjoa⁴jtse¹ cjoan³ ji³tjo³xin²-le⁴ xcon⁴ Saulo. Coan³tsen³-ni³le⁴. Cˀia⁴ nca³ ji³so²tjen⁴, qui³sa³te¹nta¹.
ACT 9:19 Xi³ je³tsa³cjen² Saulo, qui³sˀe³-le⁴ nca³nˀion¹.
ACT 9:20 Nti⁴ton⁴ ya⁴³ ntˀia³ sinagogas qui³nchja⁴ya³ Saulo xi³ tˀa³tsˀe⁴ Cristo. Cˀoa⁴qui³tso² nca³ je² ni¹ xi³ ˀnti¹-le⁴ Ni³na¹.
ACT 9:21 Nca³tsˀi³ xi³ qui³nčhˀoe¹-le⁴ to⁴coan³xcon¹-le⁴, cˀoa⁴qui³tso²: A³ tsi² je²-vi⁴ xi³ ya⁴ Jerusalén qui³si³cˀen³ je² xi³ qui³nchja⁴ je² jan³ˀain¹-le⁴ Cristo. Coi³ xa¹ ja³ˀai³ i⁴-vi⁴ nca³ coai⁴cao⁴ preso jña³ tjio¹ cho⁴ta⁴ti¹tjon²-le⁴ na⁴ˀmi³.
ACT 9:22 To⁴nca³ Saulo to⁴nqui²sa⁴-sa³ nˀion¹ qui³sˀe³-le⁴ nca³nˀion¹. Je² cho⁴ta⁴ judíos xi³ tjio¹ ya⁴ Damasco qui³tso²-le⁴ nca³ coan³sca¹ya³-le⁴. Ña³qui³ qui³si³qui²xi⁴ Saulo nca³ Jesús je² Cristo.
ACT 9:23 Xi³ je³ja³ˀa³to³ ncjin² ni⁴čhjin³, je² cho⁴ta⁴ judíos tsa³cjao¹ya³-ni³ jo³-sˀin² nca³ si⁴²cˀen³ Saulo.
ACT 9:24 To⁴nca³ Saulo qui³nčhˀoe¹ jo³-sˀin² nca³ me³-le⁴ si⁴²cˀen³che¹. Cho⁴ta⁴ judíos ña³qui³ qui³si³coi²nta⁴ xo⁴ntjoa⁴ nca³ ni⁴čhjin³ nca³ ni⁴tjen⁴, nca³ me³-le⁴ nca³ si⁴²cˀen³.
ACT 9:25 Cˀia⁴ cho⁴ta⁴-le⁴ Cristo qui³scoe¹ Saulo nca³ njion². Qui³si³cˀe¹jna³ya³ jnco³ ni⁴sin⁴ya¹ ncˀa³. Qui³sca³ni¹jen³jton³ xjao¹ xi³ tji¹ntai³.
ACT 9:26 Xi³ je³ja³ˀai³ ya⁴ Jerusalén, me³-le⁴ nca³ coan⁴ña³tˀa³-le⁴ cho⁴ta⁴-le⁴ Cristo. To⁴nca³ nca³tsˀi³ qui³tso³cjon¹-le⁴ Saulo. A³li²coi³ coan³cjain¹-le⁴ tsa² cˀoa⁴-ti⁴ cho⁴ta⁴-le⁴ Cristo nca³ je².
ACT 9:27 Cˀia⁴ Bernabé qui³scoe¹ Saulo. Ja³ˀai³cao⁴-le⁴ pa²stro⁴. Tsa³cˀe¹-le⁴ na⁴jmi¹ jo³-sˀin² nca³ tsa³ve³ Nai³-na¹ ya⁴ya³ ntia⁴², cˀoa⁴ jo³-sˀin² nca³ je² Nai³-na¹ tsa³cja¹cao⁴, cˀoa⁴ jo³-sˀin² nca³ to⁴nta³ coan³nˀion¹con³ nca³ qui³nchja⁴ya³ xi³ tˀa³tsˀe⁴ jan³ˀain¹-le⁴ Jesús ya⁴ Damasco.
ACT 9:28 Cˀoa⁴-sˀin² Saulo tsa³cˀe²jna³jin³-le⁴ pa²stro⁴ ya⁴ Jerusalén.
ACT 9:29 Cjai¹nca³ to⁴nta³ coan³nˀion¹con³ nca³ qui³nchja⁴ya³ xi³ tˀa³tsˀe⁴ jan³ˀain¹-le⁴ Nai³-na¹. Tsa³cjao¹ya³-ni³ cao⁴ cho⁴ta⁴ griegos. To⁴nca³ je²-vi⁴ˀni³ coan³me³-le⁴ nca³ si⁴²cˀen³.
ACT 9:30 Cˀia⁴ nca³ cho⁴ta⁴ntsˀe⁴ tsa³ve³, ña³tjen⁴ qui³cao⁴ Saulo ya⁴ˀnta³ Cesarea. Ya⁴ qui³si³ca³sen¹ ya⁴ Tarso.
ACT 9:31 Nca³qui³jnta² Judea cao⁴ Galilea cao⁴ Samaria ña³qui³ nchˀan¹ tjio¹ na⁴xi⁴na³nta¹-le⁴ Cristo. Li²jme² cjoa⁴si³ xi³ tjin¹-le⁴. Qui³sˀe³-sa³le⁴ nca³nˀion¹ nca³ cˀoa⁴-sˀin² tjio¹ma³, nca³ qui³tsa³cjon³que³ Nai³-na¹. Je² Espíritu Santo tsa³ca³sen²cao⁴, cˀoa⁴-sˀin² coan³ncjin²ya³.
ACT 9:32 Cˀoa⁴coan³ nca³ Pedro tsa³cˀa³mjen³son² nca³tsˀi³ cho⁴ta⁴-le⁴ Cristo. Cˀoa⁴-ti⁴ ja³ˀai³con²-le⁴ je² cho⁴ta⁴-le⁴ Cristo xi³ tjio¹ ya⁴ Lida.
ACT 9:33 Ya⁴ qui³sa³te³cjao³ jnco³ xi³ Eneas ˀmi². Coan³ jin³ no¹ nca³ ti¹qui³jna³, nca³ tsi² ti⁴ma³ si¹tin²ya³-ni³ yao³-le⁴.
ACT 9:34 Pedro cˀoi⁴qui³tso²-le⁴: Eneas, Jesucristo si⁴²nta³-li². Ti⁴so¹tjain⁴, tja³xco¹yai³ ni³jña³-li⁴. Ji³so²tjen⁴ nti⁴ton⁴.
ACT 9:35 Tsa³ve³ nca³tsˀi³ cho⁴ta⁴ xi³ tjio¹ ya⁴ Lida cao⁴ ya⁴ Sarón. Qui³tˀa³-le⁴ Nai³-na¹.
ACT 9:36 Ya⁴ Jope ti¹jna³ jnco³ chjon⁴² xi³ cˀoa⁴-ti⁴ cho⁴ta⁴-le⁴ Cristo. Tabita ˀmi², xi³ tso²-ni³ Dorcas. A³li² to⁴cˀoa⁴cji³ nta³ chjon⁴² je²-vi⁴. Cjai¹nca³ nta³ tjin¹ xa¹-le⁴, cˀoa⁴ tse³ limosna xi³ tsjoa¹.
ACT 9:37 Cˀoa⁴coan³ je² ni⁴čhjin³-ve⁴ nca³ coan³ˀaon³-le⁴. Cˀoa⁴ cˀen³. Cˀia⁴ nca³ je³qui³si³ca³nco¹ya³, qui³si³ca¹jna³ yao³-le⁴ ya⁴ cuarto jña³ ncˀa³.
ACT 9:38 Je² na⁴xi⁴na³nta¹ xi³ Lida ˀmi² ti¹jna³čhian³-le⁴ Jope. Je² cho⁴ta⁴-le⁴ Cristo qui³nčhˀoe¹ nca³ Pedro ya⁴ ti¹jna³. Jao² cho⁴ta⁴xˀin⁴ qui³sca³niln¹nčhˀoe², tsa³cˀe¹tsˀoa³-le⁴: A³li² ni²tse³ya²-jin²³, nti⁴ton⁴ nčhoa¹chon³-ni³na³jin⁴.
ACT 9:39 Cˀia⁴ Pedro ji³so²tjen⁴, qui³cao⁴ nca³ je². Xi³ je³ji³cho², qui³cao⁴ ya⁴ cuarto jña³ ncˀa³. Jo³ tsa³qui³ncha³tˀa³-le⁴ ya¹nchjin¹ xi³ je³cˀen³ xˀin⁴-le⁴. Tjio¹cji³ˀntia¹, tjio¹va³co¹-le⁴ na³jño³ chˀo¹tji³ xi³ Dorcas qui³si³nta³ cˀia⁴ nca³ ti¹jna³cao⁴-sa³.
ACT 9:40 Cˀia⁴ Pedro qui³tsˀaon³sje³ nti³tsin³ nca³tsˀi³. Tsa³ca³sen²xco¹nchˀin³, tsa³cˀe¹tsˀoa³. Qui³sco²tsen³-le⁴ yao³-le⁴ cˀen³-ve⁴, cˀoi⁴qui³tso²: Tabita ti⁴so¹tjain⁴. Cˀoa⁴ je²-vi⁴ˀni³ qui³sco³ˀai²nqui³ xcon⁴. Cˀia⁴ nca³ tsa³ve³ Pedro, tsa³cˀe²jna³qui²xi⁴.
ACT 9:41 Pedro qui³tsjoa³-le⁴ ntsja³, qui³si³qui³so¹tjen⁴. Cˀia⁴ qui³nchja⁴-le⁴ nca³tsˀi³ cho⁴ta⁴-le⁴ Cristo cao⁴ je² ya¹nchjin¹ xi³ cˀen³ xˀin⁴-le⁴. Tsa³ca³co¹-le⁴ Dorcas nca³ ti¹jna³con³.
ACT 9:42 A³li² to⁴cˀoa⁴cji³ qui³son² je²-vi⁴ nca³qui³jnta² ya⁴ Jope. A³li² to⁴cˀoa⁴cji³ cho⁴ta⁴ xi³ coan³cjain¹-le⁴ xi³ tˀa³tsˀe⁴ Nai³-na¹.
ACT 9:43 Cˀoa⁴coan³ nca³ ncjin² ni⁴čhjin³ tsa³cˀe²jna³ Pedro ya⁴ Jope, ya⁴³ ntˀia³-le⁴ jnco³ Simón chji⁴ne⁴čhjoa⁴.
ACT 10:1 Ya⁴ Cesarea ti¹jna³ jnco³ cho⁴ta⁴xˀin⁴ xi³ Cornelio ˀmi². Je²-vi⁴ xi³ nca³jco⁴-le⁴ jnco³ ciento so³nta²do⁴ xi³ Italiana ˀmi².
ACT 10:2 A³li² to⁴cˀoa⁴cji³ tsa³ve³xcon¹, cao⁴ nca³yi³je³ ntˀia³-le⁴ qui³tsa³cjon³que³ Ni³na¹. A³li² to⁴cˀoa⁴cji³ limosna tsjoa¹-le⁴ cho⁴ta⁴ na⁴xi⁴na³nta¹, cˀoa⁴ ña³qui³ vˀe¹tsˀoa³ntsjai²-le⁴ Ni³na¹.
ACT 10:3 Tjin¹ xi³ tsa³ve³ Cornelio nca³ tsa³cˀai²-le⁴ ni³jña¹, jo³-ni³ tsa² las tres nca³ ma³xon². Jnco³ a²ncje⁴-le⁴ Ni³na¹ ji³cho²nčhˀoe², cˀoa⁴qui³tso²-le⁴: Cornelio.
ACT 10:4 Cˀoa⁴ je²-vi⁴ qui³sco³ˀa², jo³ to⁴qui³tso³cjon¹-ni¹, cˀoa⁴qui³tso²: Jme¹ ni¹³, Señor. Cˀoi⁴qui³tso²-le⁴: Je² xi³ ti³vˀe²tsˀoai³, cao⁴ je² limosna xi³ ti³vˀai²³, ji³cho² ca³tˀa³-le⁴ cjoa⁴fa³ˀai³tsjen³-le⁴ Ni³na¹.
ACT 10:5 Ntˀai⁴-vi⁴ ti⁴ca³sain¹³ xˀin⁴ ya⁴ Jope. Ca²tji³cja³ˀa¹ jnco³ Simón. Pedro ˀmi² je² jan³ˀain¹-le⁴ xi³ ma³jao²-ni³.
ACT 10:6 Pedro ti¹jna³ ntˀia³-le⁴ jnco³ Simón chji⁴ne⁴čhjoa⁴. Ja⁴ntai³ nta¹chi³con³ qui³jna³ ni³ˀya³-le⁴. Je² cˀoa⁴coi⁴tso⁴-li² jña³-le⁴ xi³ ma³chjen¹ nca³ sˀiain⁴.
ACT 10:7 Qui³ je² a²ncje⁴ xi³ ti¹fa¹cao⁴ Cornelio. Cˀia⁴ Cornelio qui³nchja⁴-le⁴ jao² cho⁴ˀnta³-le⁴ cao⁴ jnco³ so³nta²do⁴ xi³ ve³xcon¹ Ni³na¹, xi³ ti⁴je²-ni³ so³nta²do⁴-le⁴ xi³ si¹chjen¹ntsjai².
ACT 10:8 Xi³ je³tsa³cˀe¹-le⁴ na⁴jmi¹ nca³yi³je³, qui³si³ca³sen¹ ya⁴ Jope.
ACT 10:9 Xi³ coan³nchaon³-ni³ cˀia⁴ nca³ tjio¹fi² ya⁴³ ntia⁴², cˀia⁴ nca³ ji³cho²čhian³ na⁴xi⁴na³nta¹-ve⁴, jo³-ni³ tsa² nchi³sen³, Pedro qui³tsin³ ya⁴ son²ncˀa³ ni³ˀya³ nca³ cˀoe⁴²tsˀoa³.
ACT 10:10 A³li² to⁴cˀoa⁴cji³ coan³vao³-le⁴, coan³me³-le⁴ nca³ tsa³cjen². Cˀia⁴ nca³ sˀa⁴ ti¹sˀe³nta³-le⁴ tso³jmi² xi³ squi⁴ne⁴, tsa³cˀai²jnco³-le⁴ ni³jña¹.
ACT 10:11 Tsa³ve³ ncˀa³jmi³ nca³ ti⁴xˀa⁴. Ya⁴ ji³nčhoa³jen³-ni³ jnco³ tso³jmi², jo³-ni³ tsa² jnco³ na³jño³ xi³ nˀion¹ te³, xi³ tjin¹nˀion¹tjon² nca³ ño³ xi⁴nqui⁴-le⁴. Ji³nčhoa³jen³ tˀa³na³nqui³.
ACT 10:12 Ya⁴ ja³ˀai³ya² nca³yi³je³ jco⁴ya³ cho⁴ xi³ ño³ ma³ ntso⁴co⁴ xi³ tjin¹ i⁴ son³ˀnte³-vi⁴, cao⁴ cho⁴ xi³ fi²jve³, cao⁴ ni⁴se³ xi³ fi²tjen⁴ncˀa¹.
ACT 10:13 Pedro qui³nčhˀoe¹ jnco³ xi³ qui³nchja⁴-le⁴: Ti⁴so¹tjain⁴ Pedro, ti⁴cˀain³, chi⁴nai⁴.
ACT 10:14 Cˀia⁴ cˀoi⁴qui³tso² Pedro: Ma³jain² Señor. Ni⁴to⁴cˀia³-jin²la² qui³squi²ne⁴ tso³jmi² xi³ xcon¹, a³xo⁴ xi³ chˀao³ cjoan³.
ACT 10:15 Nqui²jnco³cˀa² ti⁴qui³nčhˀoe¹-nca¹ni³ je² jta⁴: Je² xi³ Ni³na¹ qui³si³tsje³, a³li² tso³jmi²xcon¹-jin² ˀmi²-lai⁴.
ACT 10:16 Jan² cˀa³ nca³ cˀoa⁴-sˀin² coan³. Je² na³jño³ qui³tjoe¹ nqui²ntia³-ni³ ya⁴ ncˀa³jmi³.
ACT 10:17 Pedro li²coi³ ma³cho⁴ya³-le⁴ jme³ xi³ tso²ya³-ni³ je² ni³jña¹-ve⁴ xi³ ca²vˀai²-le⁴. Coe⁴-ni³ ji³cho² je² cho⁴ta⁴ xi³ qui³si³ca³sen¹ Cornelio. Qui³tsi²na³nqui³ ni³ˀya³-le⁴ Simón. Ja³ˀai³jčho³ xo⁴ntjoa⁴.
ACT 10:18 Cˀia⁴ qui³tsi²na³nqui³ tsa² ti¹jna³ ya⁴-ve⁴ jnco³ Simón xi³ tjin¹-le⁴ nqui²jnco³ jan³ˀain¹ xi³ Pedro ˀmi².
ACT 10:19 Cˀia⁴ nca³ ti¹si¹cja³ˀai³tsjen³ Pedro je² ni³jña¹ xi³ ca²vˀai²-le⁴, je² Espíritu cˀoi⁴qui³tso²-le⁴: Coe⁴-ni³ i⁴ tjio¹-vi⁴ jan² cho⁴ta⁴xˀin⁴ xi³ va¹sjai³-li².
ACT 10:20 Ti⁴so¹tjain⁴ ntˀai⁴, tˀin³jain⁴, a³li² jao²-jin² vˀai²to³coin²³ nca³ cˀoin¹coai⁴. An³ ca²si³ca³sen¹³ je² cho⁴ta⁴-ve⁴.
ACT 10:21 Cˀia⁴ Pedro qui³jen³con³-le⁴ cho⁴ta⁴ xi³ Cornelio qui³si³ca³sen¹, cˀoa⁴qui³tso²: An³ nia¹³ xi³ vi³jnchi³sjai³-nao¹³. Jme¹ ni¹³ cjoa⁴ xi³ tjin¹ nca³ ca²nčhoa³-si¹nio³.
ACT 10:22 Cho⁴ta⁴-ve⁴ qui³tso²: Ni²xa¹-lai⁴jin⁴ Cornelio, je² xi³ nca³jco⁴-le⁴ jnco³ ciento so³nta²do⁴, cˀoa⁴ cho⁴ta⁴cjoa⁴qui²xi⁴ xi³ ve³xcon¹ Ni³na¹, cˀoa⁴ xi³ nta³ cho⁴ta⁴ tso²-le⁴ nca³tsˀi³ na⁴xi⁴na³nta¹ judío. Jnco³ a²ncje⁴-le⁴ Ni³na¹ qui³si³qui³nčhˀoe¹ nca³ ca²ta³si¹ca³sen¹cja³ˀa¹-li² ni³ˀya³-le⁴, nca³ ca²ta³nčhˀoe¹-li² je² en¹ xi³ ti³vˀai²³.
ACT 10:23 Cˀia⁴ Pedro qui³si³cja³ˀa³sˀen³ ni³ˀya³-le⁴ cho⁴ta⁴-ve⁴, cˀoa⁴ qui³tsjoa³-le⁴ ˀnte³. Xi³ coan³nchaon³-ni³ ji³so²tjen⁴, qui³cao⁴ cho⁴ta⁴-ve⁴. Tjin¹ cˀa³ cho⁴ta⁴ntsˀe⁴ xi³ tjio¹ ya⁴ Jope xi³ cˀoa⁴-ti⁴ qui³cao⁴.
ACT 10:24 Xi³ coan³nchaon³-ni³ ja³ˀa³sˀen³ ya⁴ Cesarea. Cornelio ti¹co³ya³-le⁴. Je³qui³nchja⁴-le⁴ nca³tsˀi³ xi¹ncjin¹ cao⁴ mi²yo⁴-le⁴ xi³ nqui²sa⁴ nta³ fao¹.
ACT 10:25 Cˀia⁴ nca³ ja³ˀa³sˀen³ Pedro, ji³tjo³cja³ˀa¹ Cornelio. Tsa³ca³sen²xco¹nchˀin³tˀa³-le⁴, tsa³ve³xcon¹ Pedro.
ACT 10:26 To⁴nca³ Pedro qui³si³qui³so¹tjen⁴, cˀoa⁴qui³tso²: Ti⁴so¹tjain⁴. Cˀoa⁴-ti⁴ an³-je⁴ cho⁴ta⁴ nia¹³.
ACT 10:27 Pedro tsa³cja¹cao⁴, cˀoa⁴ ja³ˀa³sˀen³. Nˀion¹ ncjin² cho⁴ta⁴ qui³sa³co³-le⁴ xi³ coan³xco¹.
ACT 10:28 Cˀoi⁴qui³tso²-le⁴: ˀya³-nio¹³ nca³ jon²-vi⁴ nca³ tsi² tsa² tjo³ˀnte³ nca³ jnco³ cho⁴ta⁴ judío si¹jnco³ yao³-le⁴, a³xo⁴ fi²con³-le⁴ cho⁴ta⁴ xi³ li² judío-jin². To⁴nca³ Ni³na¹ qui³tso²ya³-na³ nca³ ni⁴jnco³-jin² cho⁴ta⁴ xi³ xcon¹, a³xo⁴ xi³ chˀao³ cjoan³ xin¹-le⁴.
ACT 10:29 Coi³ cjoa⁴ cˀia⁴ nca³ qui³no²cjoa⁴-nai¹³, ja²ˀai⁴ nti⁴toan⁴. Cˀoa⁴-sˀin² ntˀai⁴ cjo³na³nquia³, a¹-ni³ nca³ an³ qui³no²cjoa⁴-si¹ni³nao¹³.
ACT 10:30 Cˀia⁴ Cornelio cˀoa⁴qui³tso²: Coan³ño³-na³ ni⁴čhjin³ nca³ ti²jna⁴nchjan³ coi³-la⁴ hora-vi⁴. Las tres nca³ ma³xon², ti²vˀe³tsˀoa²³ i⁴ ni³ˀya³-na⁴. Coe⁴-ni³ jnco³ cho⁴ta⁴ tsa³ca³sen² nqui³xcoan³. Fa³te³ cji³ na³jño³-le⁴.
ACT 10:31 Cˀoa⁴qui³tso²: Cornelio, je² xi³ ti³vˀe²tsˀoai³, qui³no²ˀya²-li², cˀoa⁴ je² limosna xi³ ti³vˀai²³, ji³cho² ca³tˀa³-le⁴ cjoa⁴fa³ˀai³tsjen³-le⁴ Ni³na¹.
ACT 10:32 Ti⁴ca³sain¹³ cho⁴ta⁴ ya⁴ Jope, ca²tji³cja³ˀa¹ jnco³ Simón. Pedro ˀmi² je² jan³ˀain¹-le⁴ xi³ ma³jao²-ni³. Ti¹jna³ ntˀia³-le⁴ jnco³ Simón chji⁴ne⁴čhjoa⁴. Ja⁴ntai³ nta¹chi³con³ qui³jna³ ni³ˀya³-le⁴. Cˀia⁴ nca³ cjoa⁴ˀai¹, cjoa¹cao⁴-li².
ACT 10:33 Cˀoa⁴-sˀin² nti⁴ton⁴ qui³si³ca³sen¹-le²³. Cˀoa⁴ ji³-ˀni³, cjai¹nca³ nta³ ca²nˀiain²³ nca³ ca²nčhoai¹³. Ntˀai⁴-vi⁴ntai⁴ nca³tsˀi³-jin⁴ i⁴ ti³yoi³⁴-jin⁴ nqui³xcon⁴ Ni³na¹, nca³ coi⁴no²ˀyai²⁴-jin⁴ nca³yi³je³ xi³ cˀoa⁴qui³tso²-li² Ni³na¹.
ACT 10:34 Cˀia⁴ Pedro tsa³cˀe¹tsˀia⁴ nca³ qui³nchja⁴: Cjoa⁴qui²xi⁴ ni¹, ti²ˀve³-nia¹³ nca³ Ni³na¹ to⁴nco¹son² fi²cao⁴ nca³tsˀi³.
ACT 10:35 To⁴jña³-ni³ son³ˀnte³, je² xi³ tso³cjon¹que³ Ni³na¹, xi³ sˀin¹ xi³ cjoa⁴qui²xi⁴, Ni³na¹ tjao²que³-ni¹.
ACT 10:36 Jon² ˀya³-nio¹³ je² en¹ xi³ Ni³na¹ qui³si³ca³sen¹-le⁴ xti³-le⁴ Israel. Qui³nchja⁴ya³ je² en¹nta³ xi³ tso² nca³ Cristo si¹qui³njen³nchˀan¹ ni⁴ma⁴-na¹. Je²-vi⁴ Nai³-le⁴ nca³tsˀi³.
ACT 10:37 Jon² ˀya³-nio¹³ je² en¹ xi³ qui³son² nca³qui³jnta² Judea. Qui³tsˀia³-ni³ Galilea coan³scan³-ni³ nca³ Juan qui³nchja⁴ya³ je² cjoa⁴sa³te¹nta¹.
ACT 10:38 Jon² ˀya³-nio¹³ je² en¹ xi³ tˀa³tsˀe⁴ Jesús xi³ Nazaret tsˀe⁴, jo³-sˀin² nca³ Ni³na¹ qui³tsjoa³-le⁴ xa¹ cao⁴ Espíritu Santo cao⁴ nca³nˀion¹. Je² Jesús xi³ tsa³cˀa³mjen³ nca³ to⁴cjoa⁴nta³ qui³sˀin³, cˀoa⁴ qui³si³nta³ nca³tsˀi³ xi³ je² nai⁴² qui³si³cja³ˀa¹ cjoa⁴ñˀain³, nca⁴ Ni³na¹ ti¹jna³cao⁴ Jesús.
ACT 10:39 Jin⁴-jin⁴ testigo ni¹⁴-jin⁴ nca³yi³je³ jme³-ve⁴ cjoa⁴ xi³ cˀoa⁴qui³sˀin³ i⁴ na³nqui³ Judea cao⁴ Jerusalén. Je² xi³ cho⁴ta⁴ Judea qui³si³cˀen³ nca³ tsa³cˀe¹tjen⁴ vˀa³nqui³tˀa³ jnco³ ya¹.
ACT 10:40 Je²-vi⁴ xi³ Ni³na¹ qui³sco²mi³tjen⁴ nca³ coan³jan²-ni³ ni⁴čhjin³, cˀoa⁴ xi³ qui³si³cˀa³tsen³.
ACT 10:41 A³li²coi³ qui³si³cˀa³tsen³-le⁴ nca³tsˀi³ cho⁴ta⁴ na⁴xi⁴na³nta¹, to⁴jin⁴ qui³si³cˀa³tsen³-na³jin⁴ xi³ testigo tsa³qui³ncha¹-na³jin⁴ nca³sˀa⁴, jin⁴-jin⁴ xi³ tsa³qui³chi³coai⁴-jin⁴, xi³ qui³ˀyo²coai⁴-jin⁴, coan³scan³-ni³ nca³ je³ja³ˀa³ya²jin³-ni³le⁴ cˀen³.
ACT 10:42 Tsa³ca³te¹xo³ma³-na³jin⁴ nca³ coi⁴no²cjoa⁴ya³-lai⁴jin⁴ cho⁴ta⁴ na⁴xi⁴na³nta¹, cˀoa⁴ nca³ cˀoai⁴-jin⁴ en¹-na⁴jin⁴ nca³ je² ni¹ xi³ Ni³na¹ tsa³ca³sen¹ jo³-ni³ tsa² Juez xi³ vˀe¹nta³-jin³ cjoa⁴-le⁴ cho⁴ta⁴ xi³ tjio¹con³ cao⁴ xi³ cˀen³.
ACT 10:43 Nca³tsˀi³ xi³ qui³nchja⁴ya³ tsjoa¹ en¹ xi³ tˀa³tsˀe⁴, nca³ nca³tsˀi³ xi³ coan⁴cjain¹-le⁴ xi³ tˀa³tsˀe⁴ Jesús cha⁴tˀa³-le⁴ je¹-le⁴ xi³ to⁴tˀa³tsˀe⁴ Jesús.
ACT 10:44 To⁴jo³ ti¹nchja⁴-sa³ Pedro je² en¹ xo⁴ tso²-ve⁴, cˀia⁴ nca³ je² Espíritu Santo ja³ˀa³sˀen³jin³ ni⁴ma⁴-le⁴ nca³tsˀi³ xi³ tjio¹nčhˀoe¹ en¹-vi⁴.
ACT 10:45 Je² cho⁴ta⁴ xi³ tjen⁴cao⁴ Pedro, xi³ coan³cjain¹-le⁴, xi³ ti⁴je²-ni³ cho⁴ta⁴-le⁴ cjoa⁴circuncisión coan³xcon¹-le⁴ nca³ je² cjoa⁴tjao² xi³ je² Espíritu Santo cˀoa⁴-ti⁴ ja³ˀai³jin³ ni⁴ma⁴-le⁴ cho⁴ta⁴ xi³ li² judío-jin².
ACT 10:46 Qui³nčhˀoe¹-le⁴ nca³ nchja⁴ xi³ cja⁴ˀai¹ en¹-je⁴, cˀoa⁴ nca³ cjai¹nca³ nta³ vˀa³sje³je³ya³ Ni³na¹.
ACT 10:47 Cˀia⁴ qui³nchja⁴ Pedro, a³ tjin¹-ni³ cho⁴ta⁴ xi³ coa⁴te²chjoa² na³nta¹-ve⁴, jme¹-ni³ nca³ tsi² sa⁴te¹nta¹-si¹ni³ je²-vi⁴ xi³ cˀoa⁴-ti⁴ ca²tjoe¹-le⁴ Espíritu Santo, jo³-sˀin² nca³ ña¹ qui³tjoe¹-na¹.
ACT 10:48 Cˀia⁴ Pedro tsa³ca³te¹xo³ma³-le⁴ nca³ sa⁴te¹nta¹ cao⁴ jan³ˀain¹-le⁴ Nai³-na¹ Jesús. Cho⁴ta⁴ tsa³cˀe¹tsˀoa³-le⁴ nca³ cˀoe¹jna³-sa³ nqui² jo³ tjin¹ ni⁴čhjin³.
ACT 11:1 Ya⁴ Judea je² pa²stro⁴ cao⁴ ntsˀe⁴ xi³ ma³cjain¹-le⁴ qui³nčhˀoe¹ nca³ cˀoa⁴-ti⁴ je² cho⁴ta⁴ xi³ li² judío-jin² qui³scoe¹tjao² en¹-le⁴ Ni³na¹.
ACT 11:2 Cˀia⁴ nca³ Pedro qui³mi³ ya⁴ Jerusalén, cho⁴ta⁴-le⁴ cjoa⁴circuncisión tsa³cjao¹ti³ya³-ni³.
ACT 11:3 Cˀoa⁴qui³tso²: A¹-ni³ cˀoa⁴-sˀin² ca²ˀmi³sˀen³-si¹ni³ ni³ˀya³-le⁴ cho⁴ta⁴ xi³ tsi² cjoa⁴circuncisión coan³-le⁴, cˀoa⁴ ca²vi³chi³coai⁴.
ACT 11:4 Cˀia⁴ tsa³cˀe¹tsˀia⁴ Pedro, ntia³ntia³ qui³tso²ya³-le⁴ jme³ xi³ coan³:
ACT 11:5 Cˀia⁴ nca³ ti²jna⁴ ya⁴ na⁴xi⁴na³nta¹ Jope nca³ ti²vˀe³tsˀoa²³, tsa³cˀai²jnco³-na³ ni³jña¹. Tjin¹ xi³ tsa³ˀve³. Jnco³ tso³jmi² jo³-ni³ tsa² jnco³ na³jño³ xi³ nˀion¹ te³, xi³ tjin¹nˀion¹tjon² nca³ ño³ xi⁴nqui⁴-le⁴, ji³nčhoa³jen³-ni³ ncˀa³-jmi³. Ja³ˀai³ ˀnta³ jña³ ti²jna⁴.
ACT 11:6 Cˀia⁴ nca³ qui³sco²tsen³, tsa³ˀve³-nia¹³ cho⁴son³ˀnte³ xi³ ño³ ma³ ntso⁴co⁴, cao⁴ cho⁴jña¹, cao⁴ cho⁴ xi³ fi²jve³, cao⁴ ni⁴se³ xi³ fi²tjen⁴ncˀa¹.
ACT 11:7 Qui³nčhˀoe³ jnco³ xi³ qui³tso²-na³: Ti⁴so¹tjain⁴ Pedro, ti⁴cˀain³, chi⁴nai⁴.
ACT 11:8 Cˀoi⁴qui³xian³: Ma³jain² Señor. Ni⁴to⁴cˀia³-jin²la² qui³si³cja³ˀa³sˀen³ ntso⁴ˀva³ tso³jmi² xi³ xcon¹, a³xo⁴ xi³ chˀao³ cjoan³.
ACT 11:9 Nqui²jnco³cˀa² je² jta⁴ qui³nchja⁴-ni³na³ ncˀa³jmi³: Je² xi³ Ni³na¹ qui³si³tsje³, a³li² tso³jmi²xcon¹-jin² ˀmi²-lai⁴.
ACT 11:10 Jan² cˀa³ nca³ cˀoa⁴-sˀin² coan³. Nca³yi³je³ tso³jmi²-ve⁴ qui³tjoe¹ nqui²ntia³-ni³ ya⁴ ncˀa³jmi³.
ACT 11:11 Cˀoa⁴ cˀia⁴-ˀni³ jan² cho⁴ta⁴xˀin⁴ ja³ˀai³ ya⁴ ni³ˀya³ jña³ nca³ ti²jna⁴. Jnco³ cho⁴ta⁴ ya⁴ Cesarea qui³si³ca³sen¹con³-na³.
ACT 11:12 Je² Espíritu Santo cˀoa⁴qui³tso²-na³ nca³ ya⁴ cjoi¹coa⁴, nca³ tsi² tsa² jao² cˀoe³coan³. Cˀoa⁴-ti⁴ qui³cao⁴-na³ je² jaon³ ntsˀe⁴. Ji³tja³sˀain³-jin⁴ ni³ˀya³-le⁴ je² cho⁴ta⁴xˀin⁴-ve⁴.
ACT 11:13 Je² cho⁴ta⁴xˀin⁴-ve⁴ tsa³cˀe¹-na³jin⁴ na⁴jmi¹ nca³ tsa³ve³ jnco³ a²ncje⁴ xi³ tsa³ca³sen²jna³ ya⁴³ ni³ˀya³-le⁴, cˀoa⁴qui³tso²-le⁴: Ti⁴ca³sain¹³ xˀin⁴ ya⁴ Jope. Ca²tji³cja³ˀa¹ jnco³ Simón. Pedro ˀmi² je² jan³ˀain¹-le⁴ xi³ ma³jao²-ni³.
ACT 11:14 Je² xi³ cˀoa⁴coi⁴tso⁴-li² en¹ jo³-sˀin² nca³ coi²tjo⁴ntjai² cao⁴ nca³tsˀi³ xi³ tsˀe⁴ ntˀia³-li⁴.
ACT 11:15 Cˀia⁴ nca³ an³ tsa³cˀe³tsˀia⁴ nca³ qui³nchja²³, je² Espíritu Santo ja³ˀai³jin³ ni⁴ma⁴-le⁴ nca³ je², jo³-sˀin² nca³ ja³ˀai³jin³ ni⁴ma⁴-na¹ nca³ ña¹ nca³sˀa⁴.
ACT 11:16 Cˀia⁴ ja³ˀai³tsjen³-na³ en¹-le⁴ Nai³-na¹, jo³ qui³tso²: Cjoa⁴qui²xi⁴ Juan tsa³ca³te¹nta¹-ni³ cao⁴ na³nta¹, to⁴nca³ jon² sa⁴te¹nta¹-nio³ cao⁴ Espíritu Santo.
ACT 11:17 Cˀoa⁴-sˀin²ˀni³, tsa² Ni³na¹ qui³tsjoa³-le⁴ nca³ je² ti⁴je²-ni³ cjoa⁴tjoa², jo³-sˀin² qui³tsjoa³-na¹ nca³ ña¹ xi³ coan³cjain¹-na¹ xi³ tˀa³tsˀe⁴ Nai³-na¹ Jesucristo, ˀya¹-ni³ an³ nca³ coan⁴ coa²te⁴jna³nˀion¹-le⁴ Ni³na¹.
ACT 11:18 Cˀia⁴ nca³ qui³nčhˀoe¹ nca³yi³je³ xo⁴ tso²-ve⁴, tsa³ca³tio²jyo¹. Cjai¹nca³ to⁴je³ya³ tsˀa³sje³ Ni³na¹. Cˀoa⁴qui³tso²: Cjoa⁴qui²xi⁴-ˀni³ nca³ Ni³na¹ cˀoa⁴-ti⁴ qui³tsjoa³-le⁴ cjoa⁴nta³ sa³ˀnta³ cho⁴ta⁴ xi³ li² judío-jin² nca³ si⁴²cˀa³ntjai²ya³ cjoa⁴fa³ˀai³tsjen³-le⁴ nca³ sˀe⁴-le⁴ cjoa⁴vi³jna³chon³ nca³ntsjai².
ACT 11:19 Nca³tsˀi³ xi³ qui³tsao³va³ xi³ to⁴tˀa³tsˀe⁴ je² cjoa⁴ñˀain³ xi³ ja³ˀai³ cˀia⁴ nca³ tsa³cˀe²jna³ Esteban, tsa³cˀe²ma³ ya⁴ˀnta³ Fenicia cao⁴ Chipre cao⁴ Antioquía. Qui³nchja⁴ya³ en¹-le⁴ Ni³na¹, to⁴nca³ to⁴je² cho⁴ta⁴ judíos xi³ cˀoa⁴-sˀin² qui³tso²-le⁴, ni⁴ˀya³-jin²sa³ xi³ cja⁴ˀai¹.
ACT 11:20 Ya⁴ tjio¹jin³-le⁴ cˀa³ cho⁴ta⁴ xi³ tsˀe⁴ Chipre cao⁴ cho⁴ta⁴ xi³ tsˀe⁴ Cirene. Cˀia⁴ nca³ ja³ˀa³sˀen³ ya⁴ Antioquía, je²-vi⁴ tsa³cja¹cao⁴ cho⁴ta⁴ griegos, cˀoa⁴ qui³nchja⁴ya³ en¹nta³ xi³ tˀa³tsˀe⁴ Nai³-na¹ Jesús.
ACT 11:21 Je² Nai³-na¹ qui³tsjoa³nca³nˀion¹-le⁴. Ncjin² coan³ xi³ coan³cjain¹-le⁴, cˀoa⁴ qui³tˀa³-le⁴ Nai³-na¹.
ACT 11:22 Qui³son² je² cjoa⁴-vi⁴ sa³ˀnta³ je² na⁴xi⁴na³nta¹-le⁴ Cristo xi³ tjio¹ ya⁴ Jerusalén. Cˀia⁴ qui³si³ca³sen¹ Bernabé nca³ coai⁴ ya⁴ˀnta³ Antioquía.
ACT 11:23 Cˀia⁴ nca³ Bernabé ji³cho², tsa³ve³ cjoa⁴nta³-le⁴ Ni³na¹, coan³tsjoa³-le⁴. Tsa³cˀe¹ne² nca³tsˀi³ nca³ cao⁴ nca³yi³je³ ni⁴ma⁴-le⁴ ca²ta³va³tio²tˀa³-le⁴ Nai³-na¹.
ACT 11:24 Cjai¹nca³ to⁴nta³ cho⁴ta⁴ Bernabé, cjai¹nca³ to⁴tjin¹jin³ ni⁴ma⁴-le⁴ je² Espíritu Santo, nˀion¹ nta³ ma³cjain¹-le⁴. A³li² to⁴cˀoa⁴cji³ ncjin² cho⁴ta⁴ xi³ ya⁴ ja³ˀa³sˀen³tˀa³-le⁴ je² Nai³-na¹.
ACT 11:25 Cˀia⁴ qui³ Bernabé ya⁴ Tarso, qui³ ca¹sjai³ Saulo. Cˀia⁴ nca³ qui³sa³co³sjai³-le⁴, ji³nčhoa³cao⁴ ya⁴ Antioquía.
ACT 11:26 Jnco³ no¹ ya⁴ coan³ña³tˀa³-le⁴ na⁴xi⁴na³nta¹-le⁴ Cristo. Ncjin² cho⁴ta⁴ tsa³ca³co¹ya³-le⁴. Cˀoa⁴ cho⁴ta⁴-le⁴ Cristo cristianos tsa³cˀin² nca³ ti¹tjon² ya⁴ Antioquía.
ACT 11:27 Cˀia⁴ ni⁴čhjin³-ve⁴ ji³tjo³jen³-ni³ Jerusalén cho⁴ta⁴ xi³ qui³nchja⁴ya³ tˀa³tsˀe⁴ Ni³na¹. Ja³ˀai³ ya⁴ Antioquía.
ACT 11:28 Jnco³ xi³ Agabo ˀmi² tsa³qui³so¹tjen⁴jin³. Tsa³ca¹ya³con³ nca³ nˀion¹ tse³ cji³nčha¹ xi³ coan⁴ nca³qui³jnta² son³ˀnte³, nca⁴ je² Espíritu Santo xi³ cˀoa⁴-sˀin² qui³tso²-le⁴. Cˀoa⁴coan³ je² ni⁴čhjin³ cˀia⁴ nca³ tsa³cˀe²jna³ jnco³ xi³ tsa³ca³te¹xo³ma³ xi³ Claudio ˀmi².
ACT 11:29 Cˀia⁴ je² cho⁴ta⁴-le⁴ Cristo qui³si³cja³ˀai³tsjen³ nca³ tsjoa¹nca³nˀion¹-le⁴ jo³-sˀin² tjin¹-le⁴ nca³ jnco¹jnco¹. Cˀoa⁴-sˀin² tsa³qui³ncha³cao⁴ ntsˀe⁴ xi³ tjio¹ ya⁴ Judea.
ACT 11:30 Cˀoa⁴-ti⁴sˀin² qui³sˀin³, qui³si³ca³sen¹-le⁴ cho⁴ta⁴jchi¹nca³. Bernabé cao⁴ Saulo qui³cao⁴.
ACT 12:1 Ti⁴cˀia³-ni³ je² cho⁴ta⁴ti¹tjon² Herodes tsa³ca³te¹xo³ma³ nca³ chˀao³ qui³si³cao⁴ cˀa³ cho⁴ta⁴ na⁴xi⁴na³nta¹-le⁴ Cristo.
ACT 12:2 Cuchillo qui³si³cˀen³-ni³ Jacobo ntsˀe⁴ Juan.
ACT 12:3 Cˀia⁴ nca³ qui³sa³sen³cˀa³-le⁴ cho⁴ta⁴ judío, cˀoa⁴-ti⁴ coan³me³-le⁴ nca³ qui³tsoa³ Pedro. Coi³ ni⁴čhjin³-ve⁴ cˀia⁴ nca³ nio⁴xti²la⁴ xi³ tsin²-le⁴ na⁴ˀyo⁴san³-jin².
ACT 12:4 Cˀia⁴ nca³ qui³nto³va² preso Pedro, Herodes qui³si³cja³ˀa³sˀen³ nto⁴ya¹. Qui³sca³ni¹tˀa³-le⁴ čhja³ˀaon²jnco³ so³nta²do⁴ xi³ qui³si³coi²nta⁴. Herodes me³-le⁴ nca³ cˀoa⁴sje³-le⁴ cho⁴ta⁴ na⁴xi⁴na³nta¹, cˀia⁴ nca³ je³ja³ˀa³to³ sˀoi¹ pa²xco⁴.
ACT 12:5 Cˀoa⁴-sˀin² Pedro tsa³cˀe²jna³tjao²ˀya³ ya⁴³ nto⁴ya¹. To⁴nca³ je² na⁴xi⁴na³nta¹-le⁴ Cristo li²coi³ va³tio²jyo¹, to⁴jo³ ña³qui³ nˀion¹ tjio¹vˀe¹tsˀoa³-le⁴ Ni³na¹ xi³ tˀa³tsˀe⁴ Pedro.
ACT 12:6 Cˀia⁴ nca³ me³-le⁴ cˀoa⁴sje³ Pedro je² Herodes, ti⁴je²-ni³ ni⁴tjen⁴ Pedro ti¹qui³jna³fe²ˀncho²-le⁴ jao² so³nta²do⁴. Jao² cadena tji¹tˀa³nˀion¹-ni³. Je² xi³ tjio¹ma³ si¹coi²nta⁴ nto⁴ya¹ ya⁴ncha³ jčho³ xo⁴ntjoa⁴-le⁴ nto⁴ya¹.
ACT 12:7 To⁴nca³ coe⁴-ni³ je² a²ncje⁴-le⁴ Nai³-na¹ ji³cho². Coan³ˀi³sen³son² ya⁴³ nto⁴ya¹. Je² a²ncje⁴-ve⁴ qui³si³cao⁴ Pedro tˀa³jni¹-le⁴, qui³si³cja³ˀa¹-le⁴, cˀoi⁴qui³tso²-le⁴: Xa¹ti¹ ti⁴so¹tjain⁴. Cˀia⁴ je² cadena xi³ tji¹tˀa³ ntsja³ Pedro qui³tjo³ca³tˀa³.
ACT 12:8 A²ncje⁴ cˀoa⁴qui³tso²-le⁴ Pedro: Tˀe²nˀioin¹³ nˀo¹cja¹ntia³-li⁴, tja³yai³ jte¹-li⁴. Cˀoa⁴qui³sˀin³ Pedro. A²ncje⁴ cˀoi⁴qui³tso²-le⁴: Chˀa⁴cjai¹³ tso⁴nca⁴-li⁴, nčhoa¹tjen⁴nqui³-nai¹³.
ACT 12:9 Cˀia⁴ ji³tjo³ Pedro, qui³tjen⁴nqui³-le⁴ a²ncje⁴-ve⁴. Li²coi³ ve³ tsa² cjoa⁴qui²xi⁴ xi³ qui³sˀin³ je² a²ncje⁴. Qui³si³cja³ˀai³tsjen³ nca³ to⁴ni³jña¹ xi³ qui³tsˀai²-le⁴.
ACT 12:10 Ja³ˀa³tˀa³-le⁴ xi³ se¹jna³ti¹tjon², cˀoa⁴ xi³ ma³jao²-ni³ xi³ tjio¹ma³ si¹coi²nta⁴ nto⁴ya¹. Ji³cho² jña³ nca³ xo⁴ntjoa⁴qui⁴cha⁴, jña³ nca³ vi³tja¹sˀen³-nia¹ na⁴xi⁴na³nta¹. To⁴qui³tjo³ˀai² to⁴je². Ji³tjo³, ja³ˀa³ˀncho² jnco³ calle. Cˀia⁴ a²ncje⁴-ve⁴ ji³tjo³xin² nti⁴ton⁴-le⁴.
ACT 12:11 Cˀia⁴ Pedro qui³si³cja³ˀai³tsjen³nta³, cˀoi⁴qui³tso²: Ntˀai⁴-vi⁴ntai⁴ ña³qui³ ma³cjain¹-na³ nca³ je² Nai³-na¹ ca²si¹ca³sen¹ a²ncje⁴-le⁴, ca²fa³ˀa¹xin²-na³ ja⁴ya³ ntsja³ Herodes cao⁴ nca³tsˀi³ cho⁴ta⁴ judíos xi³ tjio¹ma³ co³ya³-na³.
ACT 12:12 Cˀia⁴ nca³ je³qui³sco³son²-ni³le⁴ je²-vi⁴, Pedro ji³cho² ya⁴ ni³ˀya³-le⁴ María, na⁴-le⁴ Juan. Je² xi³ Marcos ˀmi² jan³ˀain¹-le⁴ xi³ ma³jao²-ni³. Ya⁴ ni³ˀya³-le⁴ María ncjin² cho⁴ta⁴ tjio¹jtin¹, cˀoa⁴ tjio¹vˀe¹tsˀoa³.
ACT 12:13 Pedro qui³si³cja³ne³tˀa³ xo⁴ntjoa⁴ ni³ˀya³. Ji³tjo³ jnco³ tso²ti³ nca³ cjoi⁴nčhˀoe¹. Rode ˀmi² tso²ti³-ve⁴.
ACT 12:14 Cˀoa⁴ je²-vi⁴ˀni³ qui³nčhˀoe¹ jta⁴-le⁴ Pedro. Coan³tsjoa³-le⁴ sa³ˀnta³ li²coi³ qui³sco³ˀai² xo⁴ntjoa⁴. To⁴ja³ˀa³sˀen³ to³ca³-ni¹ ya⁴ya³ ni³ˀya³. Tsa³cˀe¹ na⁴jmi¹ nca³ je² Pedro ya⁴ se¹jna³ jčho³ xo⁴ntjoa⁴.
ACT 12:15 Cho⁴ta⁴-ve⁴ Cˀoa⁴qui³tso²-le⁴: Sca¹-la⁴li². To⁴nca³ tso²ti³ to⁴jo³ cˀoa⁴-sˀin² ti¹tso² nca³ ña³qui³ je². Cˀia⁴ cˀoa⁴qui³tso² cho⁴ta⁴-ve⁴: Je²-la⁴ a²ncje⁴-le⁴.
ACT 12:16 Cˀoa⁴ Pedro to⁴jo³ ti¹si¹cja³ne³. Cˀia⁴ nca³ qui³tjo³ˀai²-le⁴, tsa³ˀya³-le⁴ nca³ je². To⁴coan³xcon¹-le⁴ cho⁴ta⁴.
ACT 12:17 To⁴nca³ Pedro qui³sco²mi³tjen³ ntsja³ nca³ jyo¹ ca²ta³tio². Tsa³cˀe¹ na⁴jmi¹ jo³-sˀin² tsˀa³sje³-ni³ nto⁴ya¹ Nai³-na¹. Cˀoa⁴qui³tso²: Cˀoa⁴-sˀin² tˀe²-lao⁴³ na⁴jmi¹ Jacobo cao⁴ nca³tsˀi³ ntsˀe³². Cˀia⁴ ji³tjo³ qui³ jña³ nca³ xin².
ACT 12:18 Cˀia⁴ nca³ qui³sˀe³sen¹, cjai¹ to⁴qui³sˀe³-le⁴ cjoa⁴si³ so³nta²do⁴ xi³ tˀa³tsˀe⁴ jo³-sˀin² ca²ma³-ni³ nca³ ca²vi³tjo³-ni³ Pedro.
ACT 12:19 Cˀoa⁴ Herodes tsa³ca¹sjai³, to⁴nca³ li²coi³ coan³sjai³-le⁴. Qui³tsi²na³nqui³-le⁴ nca³tsˀi³ xi³ tjio¹ma³ si¹coi²nta⁴. Tsa³ca³te¹xo³ma³ nca³ coai⁴ ni²cˀen³. Cˀia⁴ Herodes qui³jen³-ni³ ya⁴ Judea, ji³cho² ya⁴ Cesarea, ya⁴ tsa³cˀe²jna³.
ACT 12:20 Herodes a³li² to⁴cˀoa⁴cji³ jti³ coan³-le⁴ cao⁴ cho⁴ta⁴ xi³ tsˀe⁴ Tiro cao⁴ Sidón. To⁴nca³ nca³tsˀi³ cho⁴ta⁴-ve⁴ to⁴jnco³ ja³ˀai³con²-le⁴. Tsa³cˀe¹chji¹ˀma³ Blasto, je² xi³ qui³si³sin³-le⁴ cho⁴ta⁴ti¹tjon²-ve⁴. Cˀia⁴ qui³si³je¹ nca³ ca²ta³njen³nchˀan¹ cjoa⁴si³, nca⁴ je² xi³ qui³squi³ne³ cho⁴ta⁴-ve⁴ ja³ˀai³-ni³ na³nqui³-le⁴ cho⁴ta⁴ti¹tjon²-ve⁴.
ACT 12:21 Jnco³ ni⁴čhjin³ xi³ qui³sˀe³jna³choa⁴, Herodes tsa³cˀa³cja¹ na³jño³ xi³ tsˀe⁴ cho⁴ta⁴ti¹tjon², tsa³cˀe²jna³ne² ya¹xi²le⁴-le⁴, qui³nchja⁴ya³jin³-le⁴ na⁴xi⁴na³nta¹.
ACT 12:22 Nˀion¹ qui³squi³ˀntia¹ cho⁴ta⁴ na⁴xi⁴na³nta¹: Je²-la⁴ve⁴ jta⁴-le⁴ Ni³na¹, a³li² tsa² je² xi³ tsˀe⁴ cho⁴ta⁴.
ACT 12:23 Nti⁴ton⁴ a²ncje⁴-le⁴ Nai³-na¹ tsa³cˀe¹-le⁴ Herodes, to⁴coi³ cjoa⁴ nca³ Herodes li²coi³ qui³tsjoa³-le⁴ cjoa⁴je³ya³ Ni³na¹. Ya¹ja⁴ qui³sˀe³-le⁴, cˀoa⁴-sˀin² cˀen³.
ACT 12:24 To⁴nca³ je² en¹-le⁴ Nai³-na¹ a³li² to⁴cˀoa⁴cji³ qui³son², coan³ncjin²ya³ xi³ coan³cjain¹-le⁴.
ACT 12:25 Bernabé cao⁴ Saulo ji³nčhoa³ nqui²ntia³-ni³ ya⁴ Jerusalén, nca³ je³qui³si³jnco³ xa¹-le⁴. Cˀoa⁴-ti⁴ ji³nčhoa³cao⁴ Juan, je² xi³ Marcos ˀmi² jan³ˀain¹-le⁴ xi³ ma³jao²-ni³.
ACT 13:1 Ja⁴jin³-le⁴ na⁴xi⁴na³nta¹-le⁴ Cristo xi³ ma³ña³ ya⁴ Antioquía, tjin¹ cho⁴ta⁴ xi³ nchja⁴ya³ cao⁴ xi³ va³co¹ya³: Bernabé, cao⁴ Simón xi³ Niger ˀmi², cao⁴ Lucio xi³ tsˀe⁴ Cirene, cao⁴ Manaén, je²-vi⁴ coan³jcha¹ cao⁴ Herodes je² cho⁴ta⁴ti¹tjon², cao⁴ Saulo.
ACT 13:2 Nca³tsˀi³ cho⁴ta⁴-vi⁴ qui³si³xa¹tˀa³-le⁴ Nai³-na¹, tsa³ca³tio²nchjan³-ni¹. Cˀia⁴ qui³tso² Espíritu Santo: Chja⁴ˀa²xin²-nao¹³ Bernabé cao⁴ Saulo xi³ tˀa³tsˀe⁴ xa¹ xi³ an³ qui³nchja²³-ni³le⁴.
ACT 13:3 Cˀia⁴ tsa³ca³tio²nchjan³, cˀoa⁴ tsa³cˀe¹tsˀoa³ cho⁴ta⁴-ve⁴. Tsa³ca¹yo³son² ntsja³ Bernabé cao⁴ Saulo, qui³si³ca³sen¹.
ACT 13:4 Cˀoa⁴ je²-vi⁴ˀni³ qui³ni²ca³sen¹ nca³ je² Espíritu Santo xi³ cˀoa⁴qui³tso², ji³cho²jen³ ya⁴ Seleucia. Ya⁴ qui³son²nta¹ sa³ˀnta³ ya⁴ Chipre.
ACT 13:5 Cˀia⁴ nca³ ji³cho² ya⁴ Salamina, qui³nchja⁴ya³ en¹-le⁴ Ni³na¹ ya⁴³ ntˀia³ sinagoga xi³ tsˀe⁴ cho⁴ta⁴ judío. Cˀoa⁴-ti⁴ qui³ Juan, tsa³ca³sen¹cao⁴ Bernabé cao⁴ Saulo.
ACT 13:6 Qui³ nca³qui³jnta² ˀnte³ ya⁴ Chipre xi³ isla (jña³ tjio¹-jin³ tse³jti³ na³nqui³ nta¹chi³con³). Ji³cho² sa³ˀnta³ Pafos. Ya⁴ qui³sa³te³jin³ jnco³ cho⁴ta⁴ xi³ tji³ˀe³ cjoan³, jnco³ cho⁴ta⁴ judío xi³ to⁴ˀen¹nti³so³ nchja⁴ya³. Barjesús ˀmi².
ACT 13:7 Ya⁴ ti¹jna³cao⁴ je² cho⁴ta⁴ti¹tjon² xi³ ˀmi² Sergio Paulo, jnco³ cho⁴ta⁴xˀin⁴ xi³ cjai¹nca³ nta³ tjin¹ cjoa⁴fa³ˀai³tsjen³-le⁴. Je²-vi⁴ xi³ qui³nchja⁴-le⁴ Bernabé cao⁴ Saulo. Me³-le⁴ nca³ cjoi⁴nčhˀoe¹ en¹-le⁴ Ni³na¹.
ACT 13:8 To⁴nca³ tsa³cˀe²jna³nˀion¹-le⁴ je² Elimas xi³ cho⁴ta⁴chji⁴ne⁴ tso²-ni³. Me³-le⁴ nca³ cjoa⁴ˀa²xin² je² xi³ ti¹fa³ˀa³sˀen³jin³ ni⁴ma⁴-le⁴ cho⁴ta⁴ti¹tjon².
ACT 13:9 Cˀia⁴ Saulo, xi³ cˀoa⁴-ti⁴ Pablo ˀmi², cjai¹nca³ nta³ qui³sˀe³jin³ ni⁴ma⁴-le⁴ je² Espíritu Santo. Qui³sco³ˀa²-ni¹ Elimas.
ACT 13:10 Cˀoi⁴qui³tso²-le⁴: Ja⁴! A³li² to⁴cˀoa⁴cji³ cjoa⁴chˀa¹na⁴-cha⁴ cjoa⁴taon³ xi³ tjin¹-li², ji³ xi³ ˀnti¹-le⁴ nai⁴², co²ntran⁴-le⁴ ji³ nca³yi³je³ xi³ cjoa⁴qui²xi⁴. A³ tsi² tsa² coi⁴jna³jyoi¹³ nca³ cˀoa⁴-sˀin² ni²qui³xo¹yai³ je² ntia⁴² xi³ qui²xi⁴ xi³ tsˀe⁴ Nai³-na¹.
ACT 13:11 Ne³ ntˀai⁴-vi⁴ntai⁴, je² ntsja³ Nai³-na¹ co²ntran⁴ coai⁴-li². Coan⁴xcai⁴, li²coi³ jchai⁴ tsˀoi¹ jo³ tjin¹ ni⁴čhjin³. Nti⁴ton⁴ coan³njion²xa⁴-le⁴ xcon⁴, cˀia⁴ ña³qui³ nˀion¹ coan³njion²-le⁴ son³ˀnte³ je² Barjesús. Tsa³cˀa³mjen³ntai³, tsa³ca¹sjai³ ˀya³-ni³ve⁴ xi³ coai⁴cao⁴-ni³ ntsja³.
ACT 13:12 Cˀia⁴ nca³ je² cho⁴ta⁴ti¹tjon² tsa³ve³ jme³-ve⁴ xi³ coan³, coan³cjain¹-le⁴. To⁴coan³xcon¹-le⁴ je² cjoa⁴ xi³ tsa³ca³co¹ya³ xi³ tsˀe⁴ Nai³-na¹.
ACT 13:13 Pablo cao⁴ mi²yo⁴-le⁴ xi³ tjen⁴cao⁴ ji³tjo³-ni³ ya⁴ Pafos. Ja³ˀai³ ya⁴ Perge xi³ tsˀe⁴ na³nqui³ Panfilia. Cˀia⁴ Juan ji³tjo³xin²tˀa³-le⁴. Qui³ nqui²ntia³-ni³ ya⁴ Jerusalén.
ACT 13:14 Je² xi³cˀa³ to⁴ja³ˀa³to³-ni¹ Perge. Ji³cho² ya⁴ Antioquía xi³ tsˀe⁴ na³nqui³ Pisidia. Jnco³ ni⁴čhjin³ ni²cja¹ya³ ja³ˀa³sˀen³ ya⁴³ ntˀia³ sinagoga. Ya⁴ tsa³ca³tio².
ACT 13:15 Cˀia⁴ nca³ je³qui³sˀe³xquia⁴ je² cjoa⁴te¹xo³ma³ cao⁴ je² xon⁴ xi³ tsˀe⁴ je² xi³ qui³nchja⁴ya³ tˀa³tsˀe⁴ Ni³na¹, je² cho⁴ta⁴ti¹tjon²-le⁴ ntˀia³ sinagoga qui³nchja⁴-le⁴ Pablo cao⁴ mi²yo⁴-le⁴, cˀoa⁴qui³tso²: Nca³tsˀio³ ˀnti¹ntsˀe³, tsa² tjin¹-no³ jme³-ve⁴ en¹ xi³ cˀoe¹ne²-lao⁴³ na⁴xi⁴na³nta¹, ti⁴no²cjoao⁴³.
ACT 13:16 Cˀia⁴ Pablo tsa³ca³sen²nto³, qui³sco²mi³tjen⁴ ntsja³ nca³ jyo¹ ca²ta³tio², cˀoa⁴qui³tso²: Nca³tsˀio³ cho⁴ta⁴ israelitas, cˀoa⁴ jon² xi³ jcon³chao³ Ni³na¹, ti⁴no¹ˀyao²³:
ACT 13:17 Je² Ni³na¹-le⁴ cho⁴ta⁴ israelitas tsa³cja³ˀa¹jin³ nˀai³jcha¹cjin³-na¹, qui³si³quin³ncˀa³ je² cho⁴ta⁴-ve⁴ cˀia⁴ nca³ ji³cho²ca³tio² jo³ tjin¹ ni⁴čhjin³ ya⁴ na³nqui³ Egipto. To⁴nca³ Ni³na¹ qui³sco²mi³tjen⁴ čhja³-le⁴ nca³ tsa³ca³sen¹cao⁴, tsˀa³sje³xin²-ni³ ˀnte³-ve⁴ cho⁴ta⁴ israelitas.
ACT 13:18 Ña³chan²-la⁴ no¹ qui³si³cjain¹ Ni³na¹ jo³-sˀin² qui³cao⁴ yao³-le⁴ cho⁴ta⁴ israelitas ya⁴ ˀnte³tˀa³xin²tˀa³.
ACT 13:19 Ña³to³ ˀnte³ qui³si³qui³xo²ya³ ya⁴ na³nqui³ Canaán. To⁴qui³si³cˀa³vi¹ cjoa⁴tjao²-le⁴ cho⁴ta⁴ israelitas je² ˀnte³-ve⁴.
ACT 13:20 Ño³ ciento cao⁴-ni³ ña³chan²te³ no¹ Ni³na¹ qui³tsjoa³-le⁴ cho⁴ta⁴ israelitas xca²le⁴ti¹tjon² xi³ tsa³ca³te¹xo³ma³ sa³ˀnta³ Samuel xi³ qui³nchja⁴ya³ tˀa³tsˀe⁴ Ni³na¹.
ACT 13:21 Cˀia⁴ qui³si³je¹ cho⁴ta⁴ti¹tjon². Ni³na¹ qui³tsjoa³-le⁴ jnco³ xi³ Saúl ˀmi², ˀnti¹-le⁴ Cis, jnco³ xˀin⁴ xi³ ntje⁴-le⁴ Benjamín. Ña³chan² no¹ tsa³ca³te¹xo³ma³.
ACT 13:22 Cˀia⁴ nca³ je³ji³tjo³xin² je²-vi⁴, cˀia⁴ qui³sa³sen³ xa¹ cho⁴ta⁴ti¹tjon² David. Xi³ tˀa³tsˀe⁴ David Ni³na¹ qui³tsjoa³ en¹, nca³ cˀoi⁴qui³tso²: Je³qui³sa³co³-na³ David, ˀnti¹-le⁴ Isaí, jnco³ cho⁴ta⁴xˀin⁴ xi³ tjin¹jnco³-le⁴ con³ ni⁴ma⁴-na⁴, xi³ cˀoa⁴sˀin⁴² nca³yi³je³ jo³-sˀin² me³-na³.
ACT 13:23 Ya⁴ ntje⁴-le⁴ David ja³ˀai³-ni³ Jesús xi³ cˀoa⁴sje³ntjai² cho⁴ta⁴ israelitas, jo³-sˀin² nca³ Ni³na¹ qui³tsjoa³ tsˀoa³.
ACT 13:24 To⁴nqui³-ni³ nca³ ja³ˀai³ Jesús, Juan qui³nchja⁴ya³jin³-le⁴ nca³tsˀi³ cho⁴ta⁴ israelitas nca ca²ta³sa³te¹nta¹ je² cho⁴ta⁴ xi³ qui³si³cˀa³ntjai²ya³ cjoa⁴fa³ˀai³tsjen³-le⁴.
ACT 13:25 Cˀia⁴ nca³ Juan ti¹fe³tˀain³ xa¹ xi³ tso²ˀva³-ni³, cˀoa⁴qui³tso²: ˀya¹ nia¹³ an³, jo¹ vi³xon¹³. A³li² an³-jian²³ xi³ Cristo. To⁴nca³ coe⁴-ni³ jnco³ xi³ nčhoa¹tjen⁴nqui³-na³, sa³ˀnta³ li²coi³ va³quin²-na³ nca³ sco³jnta¹³ čhjoa⁴xin¹jte¹-le⁴.
ACT 13:26 Nca³tsˀio³ ˀnti¹ntsˀe³, ˀnti¹xti³-le⁴ xi³ ntje⁴-le⁴ Abraham, cˀoa⁴ jon² xi³ ti³yo³jion³-vi⁴, xi³ jcon³chao³ Ni³na¹, jon² nio¹³ xi³ ja³ˀai³-no³ je² en¹-vi⁴, jo³-sˀin² vi²tjo⁴ntje².
ACT 13:27 Nca³tsˀi³ cao⁴ cho⁴ta⁴ti¹tjon²-le⁴ xi³ tjio¹ ya⁴ Jerusalén, li²coi³ tsa³ve³ Jesús, cˀoa⁴ li²coi³ qui³nčhˀoe¹ en¹-le⁴ cho⁴ta⁴ xi³ qui³nchja⁴ya³ tˀa³tsˀe⁴ Ni³na¹, nta³ tsa² jin³jin³ ni⁴čhjin³ nca³ ni⁴čhjin³ ni²cja¹ya³ sˀe³xquia⁴ xon⁴-le⁴. Cˀoa⁴-sˀin² cho⁴ta⁴ ya⁴ Jerusalén qui³si³cji³tjo³son² en¹-le⁴ cho⁴ta⁴ xi³ qui³nchja⁴ya³ tˀa³tsˀe⁴ Ni³na¹ nca³ qui³si³cja³ˀa¹ cjoa⁴ñˀain³ Jesús.
ACT 13:28 Nta³ tsa² tsi²jme³ je¹ xi³ coan³sjai³-le⁴ cho⁴ta⁴ xi³ tˀa³tsˀe⁴ Jesús, nta³ tsa² tsi²coi³ va³quin²-le⁴ nca³ cˀoa⁴-sˀin² qui³ni²cˀen³-ni³, cho⁴ta⁴ qui³si³je¹-le⁴ Pilato nca³ si⁴²cˀen³.
ACT 13:29 Cˀia⁴ nca³ je³qui³si³tjo³son² nca³yi³je³ cjoa⁴ xi³ cˀoa⁴-sˀin² tji¹tˀa³ tˀa³tsˀe⁴ Jesús, tsa³cja³ˀa¹xin²tˀa³ cro², cˀoa⁴ qui³ ca¹jna³ya³ tsjo¹.
ACT 13:30 To⁴nca³ Ni³na¹ qui³sco²mi³tjen⁴jin³-ni³le⁴ cˀen³.
ACT 13:31 Ncjin² ni⁴čhjin³ tsa³ˀya³-ni³le⁴. Je² xi³ tsa³ve³, je² ni¹ xi³ ji³nčhoa³mi³cao⁴-ni³ Galilea sa³ˀnta³ Jerusalén. Je² ni¹ xi³ testigo-le⁴ Jesús, cˀoa⁴ xi³ vˀe¹-le⁴ na⁴jmi¹ cho⁴ta⁴ na⁴xi⁴na³nta¹.
ACT 13:32 Cˀoa⁴-ti⁴ jin⁴-jin⁴ cˀoa⁴-sˀin² no²cjoa⁴ya³jin³-lai²⁴jin⁴ je² en¹nta³ xi³ tˀa³tsˀe⁴ je² xi³ Ni³na¹ qui³tsjoa³-le⁴ tsˀoa³ je² nˀai³jcha¹cjin³-na¹.
ACT 13:33 Coi³ xi³ Ni³na¹ ña³qui³ qui³si³qui³tjo³son²-na¹ xi³ xti³-le⁴ nˀai³jcha¹cjin³-na¹, nca³ qui³si³cja³ˀa¹ya³-ni³le⁴ Jesús, jo³-sˀin² tji¹tˀa³ ya⁴ salmo xi³ ma³jao²-ni³: Ji³ ni¹³ ˀnti¹-na⁴, ntˀai⁴-vi⁴ ji³ xi³ cˀoa⁴-sˀin² ˀnti¹-na⁴ xin³-le²³.
ACT 13:34 Ni³na¹ qui³sco²mi³tjen⁴jin³-ni³ xi³ cˀen³ Jesús, nca³ tsi² cˀia³ cjoi⁴ˀnto³ yao³-le⁴. Cˀoa⁴qui³tso²: An³ tsjoa³-no³ nca³ jon² je² cjoa⁴nta³ xi³ ña³qui³ cˀoa⁴tjin¹ xi³ qui³tsjoa³ ntso⁴ˀva³ tˀa³tsˀe⁴ David.
ACT 13:35 Coi³ nca³ cˀoa⁴-ti⁴ tso² jña³ tji¹tˀa³-sa³: Li²coi³ cˀoai⁴ˀnte³-lai⁴ ˀnti¹-li⁴ xi³ tsje³ nca³ cjoi⁴ˀnto³ yao³-le⁴.
ACT 13:36 Cjoa⁴qui²xi⁴, cˀia⁴ nca³ David je³coan³chjen¹-le⁴ na⁴xi⁴na³nta¹-le⁴ qui³si³tjo³son² jo³-sˀin² me³-le⁴ Ni³na¹, David qui³sˀe³fe². Qui³tjoe¹tjao²tˀa³-le⁴ nˀai³jchi¹nca³-le⁴, yao³-le⁴ ji³ˀnto³.
ACT 13:37 To⁴nca³ li²coi³ ji³ˀnto³ yao³-le⁴ je² xi³ Ni³na¹ qui³sco²mi³tjen⁴.
ACT 13:38 Ca²ta³ˀyao³ nca³tsˀio³ ˀnti¹ntsˀe³ nca³ to³tˀa³tsˀe⁴ Jesús cˀoa⁴-sˀin² no²cjoa⁴ya³jin³-no³ nca³ cha³tˀa³-no³ je¹-no³.
ACT 13:39 Xi³ to⁴tˀa³tsˀe⁴ Jesús nca³tsˀi³ xi³ ma³cjain¹-le⁴ fe³tˀa³-le⁴ je¹-le⁴. Je² cjoa⁴te¹xo³ma³ xi³ tsa³cˀe¹jna³-no³ Moisés li²coi³ qui³si³cje³tˀa³-no³ je¹.
ACT 13:40 Ti⁴coi²ntao⁴³ yao³-no³ tso²cˀoa⁴, jme¹-ni³ nca³ tsi² cˀoa⁴coan³tˀain³-si¹nio³ jo³ qui³tso² cho⁴ta⁴ xi³ qui³nchja⁴ya³ tˀa³tsˀe⁴ Ni³na¹.
ACT 13:41 Cho¹tsaon³ jon² xi³ taon³ ˀyao³, ca²ta³ma³xcon¹-no³, ca²ta³chao³. An³ cˀoa⁴sˀian³ jnco³ xa¹ je² ni⁴čhjin³-no³, jnco³ xa¹ xi³ tsi² coi³ coan⁴cjain¹-no³ tsa² jnco³ xi³ cˀoe⁴²-no³ na⁴jmi¹.
ACT 13:42 Cˀia⁴ nca³ Pablo cao⁴ mi²yo⁴-le⁴ ji³tjo³-ni³ ntˀia³ sinagoga xi³ tsˀe⁴ cho⁴ta⁴ judíos, cho⁴ta⁴ xi³ li² judío-jin² tsa³cˀe¹tsˀoa³-le⁴ nca³ ti⁴ca²ta³tso²ya³-nca¹ni³le⁴ je² en¹ je² ni⁴čhjin³ ni²cja¹ya³ xi³jnco³.
ACT 13:43 Cˀia⁴ nca³ qui³si³xa³tˀa³ xi¹ncjin¹ nca³tsˀi³ xi³ coan³ña³-ve⁴, ncjin² cho⁴ta⁴ judíos cao⁴ cho⁴ta⁴ xi³ qui³tˀa³-le⁴ cho⁴ta⁴ judíos qui³tjen⁴nqui³-le⁴ Pablo cao⁴ Bernabé. Pablo cao⁴ Bernabé tsa³cja¹cao⁴, nˀion¹ tsa³cˀe¹ne²-le⁴ nca³ ca²ta³vˀe²jna³jin³ntsjai² ni⁴ma⁴-le⁴ je² cjoa⁴nta³-le⁴ Ni³na¹.
ACT 13:44 Cˀia⁴ nca³ ni⁴čhjin³ ni²cja¹ya³ xi³jnco³, a³li² to⁴cˀoa⁴cji³ coan³ña³ cho⁴ta⁴ na⁴xi⁴na³nta¹, nca³ qui³nčhˀoe¹ je² en¹-le⁴ Ni³na¹.
ACT 13:45 To⁴nca³ cjai¹nca³ coan³chi⁴ni⁴ cho⁴ta⁴ judíos, cˀia⁴ nca³ tsa³ve³ nca³ nˀion¹ ncjin² cho⁴ta⁴ coan³ña³. Cˀoa⁴qui³tso² nca³ li²coi³ cˀoa⁴tjin¹ je² en¹-le⁴ Pablo. Qui³nchja⁴ˀaon³-le⁴.
ACT 13:46 Cˀia⁴ Pablo cao⁴ Bernabé coan³nˀion¹con³, cˀoa⁴qui³tso²: Cjoa⁴qui²xi⁴ coan³chjen¹-cjoa²la² nca³ qui³nchja⁴ya³jin³-no³ nca³ jon² je² en¹-le⁴ Ni³na¹. To⁴nca³ coi³ nca³ cai³-no³, cˀoa⁴ ni²cja³ˀai³tsjaon³ nca³ tsi² coi³ va³quin²-no³ cjoa⁴vi³jna³chon³ nca³ntsjai², coe⁴-ni³, coa⁴nquin¹chon³-lai⁴jin⁴ cho⁴ta⁴ xi³ li² judío-jin².
ACT 13:47 Cˀoa⁴-sˀin² tsa³ca³te¹xo³ma³-na³jin⁴ Nai³-na¹, cˀoa⁴qui³tso²: Ji³ tsa³cˀe³jna²-le²³ xa¹ nca³ ni⁴ˀi³sen³-lai⁴ cho⁴ta⁴ xi³ li² judío-jin², jme¹-ni³ nca³ cˀoa⁴-sˀin² coi⁴tjo³ntjai²-ni³ cho⁴ta⁴ jña³ sa³ˀnta³ fe³tˀa³-ni³ son³ˀnte³.
ACT 13:48 Cˀia⁴ nca³ je² cho⁴ta⁴ xi³ li² judío-jin² qui³nčhˀoe¹ en¹ xo⁴ tjin¹-vi⁴, a³li² to⁴cˀoa⁴cji³ coan³tsjoa³-le⁴. Tsˀa³sje³je³ya³ je² en¹-le⁴ Nai³-na¹. Coan³cjain¹-le⁴ nca³tsˀi³ xi³ qui³si³ncha³nta³ xi³ tˀa³tsˀe⁴ cjoa⁴vi³jna³chon³ nca³ntsjai².
ACT 13:49 Cˀoa⁴ je² en¹-le⁴ Nai³-na¹ qui³son² nca³qui³jnta² je² na³nqui³-ve⁴.
ACT 13:50 To⁴nca³ cho⁴ta⁴ judíos tsa³qui³ncha¹ˀa³ cho⁴ta⁴ti¹tjon²-le⁴ na⁴xi⁴na³nta¹-ve⁴ cao⁴ ya¹nchjin¹ xi³ nˀion¹ fi² yo⁴nco⁴, cˀoa⁴ xi³ ya¹nchjin¹-le⁴ cho⁴ta⁴ti¹tjon². Cˀoa⁴-sˀin² qui³sco²mi³tjen⁴ cjoa⁴si³ nca³ co²ntran⁴ qui³-le⁴ Pablo cao⁴ Bernabé. Ña³qui³ tsa³cja³ˀa¹xin² ya⁴ ˀnte³-le⁴.
ACT 13:51 Pablo cao⁴ Bernabé tsa³cˀe¹tsao³jne³ chao³-le⁴ ntso⁴co⁴. Cˀoa⁴-sˀin² qui³tsjoa³ en¹ co²ntran⁴-le⁴ cho⁴ta⁴-ve⁴. Ja³ˀai³ ya⁴ Iconio.
ACT 13:52 Cho⁴ta⁴-le⁴ Cristo a³li² to⁴cˀoa⁴cji³ coan³tsjoa³-le⁴. Cjai¹nca³ nta³ qui³sˀe³jin³ ni⁴ma⁴-le⁴ je² Espíritu Santo.
ACT 14:1 Cˀoa⁴coan³ ya⁴ Iconio nca³ Pablo cao⁴ Bernabé ja³ˀa³sˀen³ ntˀia³ sinagoga xi³ tsˀe⁴ cho⁴ta⁴ judíos. A³li² to⁴cˀoa⁴cji³ nta³ qui³nchja⁴, sa³nta³ nˀion¹ ncjin² ma³-ni³ cho⁴ta⁴ judíos cao⁴ cho⁴ta⁴ griegos xi³ coan³cjain¹-le⁴.
ACT 14:2 To⁴nca³ cho⁴ta⁴ judíos xi³ tsi² tsa² coan³cjain¹-le⁴ tsa³qui³ncha¹ˀa³, cˀoa⁴ chˀao³-sˀin² qui³si³cˀe¹yo³ ni⁴ma⁴-le⁴ cho⁴ta⁴ xi³ li² judío-jin² nca³ co²ntran⁴ qui³-le⁴ je² ntsˀe⁴.
ACT 14:3 Nta³ tsa² cˀoa⁴coan³tˀain³, tse³ tsa³ca³tio² ya⁴-ve⁴. Coan³nˀion¹con³ nca³ qui³nchja⁴ya³ tˀa³tsˀe⁴ Nai³-na¹. Cˀoa⁴ je² Nai³-na¹ qui³si³qui²xi⁴ya³ tˀa³tsˀe⁴ en¹ xi³ tsˀe⁴ cjoa⁴nta³-le⁴ nca³ qui³tsjoa³ nca³ to⁴ntsja³ Pablo cao⁴ Bernabé coan³ni³le⁴ choa⁴ cao⁴ cjoa⁴xcon¹.
ACT 14:4 Jao² ya³ coan³ cho⁴ta⁴ na⁴xi⁴na³nta¹. Jnco³ cˀa² xi³ cho⁴ta⁴ judíos tjio¹cao⁴, cˀoa⁴ je² xi³ nqui²jnco³ cˀa² pa²stro⁴ tjio¹cao⁴.
ACT 14:5 Cho⁴ta⁴ judíos, cao⁴ cho⁴ta⁴ xi³ li² judío-jin², cao⁴ cho⁴ta⁴ti¹tjon²-le⁴ ña³qui³ qui³ne²-ni¹ Pablo cao⁴ Bernabé. Coan³me³-le⁴ nca³ chˀao³ si⁴²cao⁴, cˀoa⁴ nca³ coa⁴sen²-le⁴ la⁴jao⁴.
ACT 14:6 Cˀia⁴ nca³ coan³cho⁴ya³-le⁴ jme³-ve⁴ xi³ coan⁴tˀain³, Pablo cao⁴ Bernabé tsa³nca³ ya⁴ Listra cao⁴ ya⁴ Derbe, na⁴xi⁴na³nta¹ xi³ tsˀe⁴ na³nqui³ Licaonia, cˀoa⁴ cao⁴ ya⁴ nca³qui³jnta² ˀnte³ xi³ ja⁴ntai³-le⁴.
ACT 14:7 Ya⁴-ve⁴ qui³nchja⁴ya³ je² en¹nta³ xi³ tˀa³tsˀe⁴ Cristo.
ACT 14:8 Ya⁴ Listra ti¹jna³ jnco³ cho⁴ta⁴xˀin⁴ xi³ tsi² tsa² ma³ fi². Chi⁴ˀnque¹ cji³ jo³ sa³ˀnta³ nca³ qui³tsin³. Ni⁴to⁴cˀia³-jin² coan³ tsˀa³mjen³.
ACT 14:9 Je²-vi⁴ qui³nčhˀoe¹-le⁴ Pablo nca³ qui³nchja⁴. Cˀia⁴ nca³ Pablo qui³sco³ˀa², tsa³ve³ nca³ coan³cjain¹-le⁴ nca³ coan⁴nta³.
ACT 14:10 Cˀia⁴ nˀion¹ qui³nchja⁴ Pablo: Ti⁴so¹tjain⁴, ti⁴sen⁴jna³qui²xi⁴-ni³ ntso⁴coi³. Cˀoa⁴ je² cho⁴ta⁴-ve⁴ˀni³ ña³qui³ qui³squi²⁴ncˀa³-ni¹. Coan³ tsˀa³mjen³.
ACT 14:11 Cˀia⁴ nca³ tsa³ve³ nca³tsˀi³ jme³-ve⁴ xi³ qui³sˀin³ Pablo, nˀion¹ qui³nchja⁴ nca³ en¹ licaónica: Ni³na¹ xi³ cˀoa⁴cjoan³ jo³ cjoan³ cho⁴ta⁴xˀin⁴ ca²vi³tjo³jen³con³-na¹.
ACT 14:12 Bernabé, Júpiter qui³tso²-le⁴. Cˀoa⁴ Pablo, Mercurio qui³tso²-le⁴, nca⁴ je² ni¹ xi³ qui³nchja⁴ya³ en¹.
ACT 14:13 Xco¹son²-le⁴ Júpiter se¹jna³ntai³ na⁴xi⁴na³nta¹, cˀoa⁴ je² na⁴ˀmi³-le⁴ ja³ˀai³cao⁴ nčha⁴ja⁴ cao⁴ corona ya⁴ xo⁴ntjoa⁴-le⁴ nchˀoa¹-le⁴ na⁴xi⁴na³nta¹. Me³-le⁴ cao⁴ nca³tsˀi³ cho⁴ta⁴ na⁴xi⁴na³nta¹ nca³ si⁴²cˀen³tˀa³-le⁴ Pablo cao⁴ Bernabé.
ACT 14:14 Cˀia⁴ nca³ qui³nčhˀoe¹ je² pa²stro⁴ Bernabé cao⁴ Pablo, ña³qui³ tsa³ca³sen¹jnta³ na³jño³-le⁴, qui³to²ca³jin³-le⁴ cho⁴ta⁴ncjin²-ve⁴, qui³squi³ˀntia¹xa¹-le⁴ nca³tsˀi³.
ACT 14:15 Cˀoa⁴qui³tso²: Nca³tsˀio³ ˀnti¹nˀai³, a¹-ni³ nca³ cˀoa⁴nˀian²-si¹nio³. Cˀoa⁴-ti⁴ jin⁴ cho⁴ta⁴ ni¹⁴-jin⁴, jo³ ti³ncha³sa³yo³ nca³ jon². Cˀoa⁴-sˀin² ti³no²cjoa⁴ya³jin³-lai²⁴jin⁴ nca³ ni⁴to⁴jme³-jin² chji¹-le⁴ je² cjoa⁴ xi³ ti³nˀiaon²³. Ti⁴njion¹³ je² cjoa⁴ je²-vi⁴, cˀoa⁴ ta³nquin¹tˀa³-lao⁴³ je² Ni³na¹ xi³ ti¹jna³con³, xi³ qui³si³nta³ ncˀa³jmi³, cao⁴ son³ˀnte³, cao⁴ nta¹chi³con³, cao⁴ nca³yi³je³ jme³-sa³ xi³ ya⁴ tjin¹.
ACT 14:16 Je² ni⁴čhjin³ xi³ je³ja³ˀa³to³, Ni³na¹ qui³tsjoa³ˀnte²-le⁴ nca³tsˀi³ cho⁴ta⁴ nca³ tsa³cˀe²ma³ ntia⁴² xi³ ti⁴tsˀe⁴-ni³.
ACT 14:17 To⁴nca³ Ni³na¹ li²coi³ qui³tsjion³con³ yao³-le⁴, nca tsi² tsa² jme³ testigo qui³sˀe³-le⁴. Cjai¹nca³ nta³ qui³sˀin³. Qui³tsjoa³-no³ jtsi¹ xi³ ncˀa³jmi³ nčhoa³-ni³, cˀoa⁴ ni⁴čhjin³ jo³-sˀin² nca³ ma³jcha¹ tso³jmi²ntje². Qui³tsjoa³-no³ je² tso³jmi² xi³ vi³yo³chon³-nio³, cao⁴ cjoa⁴tsjoa³ xi³ sˀe³jna³-jin³ ni⁴ma⁴-no³.
ACT 14:18 Cˀia⁴ nca³ Pablo cao⁴ Bernabé cˀoa⁴qui³tso² je²-vi⁴, to⁴cˀia⁴ tsa³ca³te³cja¹ya³ i⁴tse¹-le⁴ cho⁴ta⁴ na⁴xi⁴na³nta¹, jme¹-ni³ nca³ tsi² coi³ qui³tsjoa³-si¹ni³le⁴ je² cho⁴ xi³ si⁴²cˀen³tˀa³-le⁴.
ACT 14:19 Cˀia⁴ ji³cho² cˀa³ cho⁴ta⁴ judíos xi³ ji³nčhoa³-ni³ ya⁴ Antioquía cao⁴ ya⁴ Iconio. Tsa³qui³ncha¹ˀa³ cho⁴ta⁴ na⁴xi⁴na³nta¹, tsa³ca³sen¹-le⁴ la⁴jao⁴ Pablo, tsa³ca¹jve³tˀa³xin² na⁴xi⁴na³nta¹-ve⁴. Je³-la⁴ cˀen³, qui³tso² cho⁴ta⁴.
ACT 14:20 To⁴nca³ cho⁴ta⁴-le⁴ Cristo coan³ña³ntai³-le⁴ Pablo. Pablo ji³so²tjen⁴ nqui²ntia³-ni³, ja³ˀa³sˀen³ nqui²ntia³ na⁴xi⁴-na³nta¹. Xi³ coan³nchaon³-ni³ qui³cao⁴ Bernabé ya⁴ Derbe.
ACT 14:21 Cˀia⁴ nca³ je³qui³nchja⁴ya³-le⁴ je² en¹nta³ xi³ tˀa³tsˀe⁴ Cristo ya⁴ na⁴xi⁴na³nta¹-ve⁴, cˀoa⁴ nca³ je³tsa³ca³co¹ya³-le⁴ ncjin² cho⁴ta⁴, qui³-nca¹ni³ ya⁴ Listra, ya⁴ Iconio, ya⁴ Antioquía.
ACT 14:22 Qui³tsjoa³-le⁴ nca³nˀion¹ ni⁴ma⁴-le⁴ cho⁴ta⁴-le⁴ Cristo. Tsa³cˀe¹ne²-le⁴ nca³ cˀoa⁴-sˀin² ca²ta³tio²cao⁴-ntsjai² xi³ ma³cjain¹-le⁴. Qui³tso²-le⁴ nca³ cjai¹nca³ ma³chjen¹ nca³ tse³ cjoa⁴ñˀain³ chja⁴ˀa² nca³ coi⁴tja¹sˀen³² ya⁴ cjoa⁴te¹xo³ma³-le⁴ Ni³na¹.
ACT 14:23 Nca³ jnco¹jnco¹ ˀnte³ jña³ tjin¹ na⁴xi⁴na³nta¹-le⁴ Cristo, Pablo cao⁴ Bernabé tsa³qui³ncha¹nta³-le⁴ cho⁴ta⁴jchi¹nca³. Cˀia⁴ nca³ je³tsa³cˀe¹tsˀoa³ nca³ tsa³ca³tio²nchjan³, qui³si³ca³tio²cao⁴ je² Nai³-na¹ nca³ je³coan³cjain¹-le⁴ xi³ tˀa³tsˀe⁴.
ACT 14:24 Ja³ˀa³to³ ya⁴ na³nqui³ Pisidia. Ji³cho²-nca¹ni³ ya⁴ na³nqui³ Panfilia.
ACT 14:25 Cˀia⁴ nca³ je³qui³nchja⁴ya³ je² en¹-le⁴ Ni³na¹ ya⁴ Perge, qui³jen³ ya⁴ Atalia.
ACT 14:26 Ya⁴ qui³son²nta¹ sa³ˀnta³ ya⁴ Antioquía jña³ qui³ni²ca³sen¹tˀa³-le⁴ je² cjoa⁴nta³-le⁴ Ni³na¹ xi³ tˀa³tsˀe⁴ je² xa¹ xi³ qui³si³cje³tˀa³.
ACT 14:27 Cˀia⁴ nca³ je³ji³cho², tsa³cˀe¹xco¹ na⁴xi⁴na³nta¹-le⁴ Cristo. Pablo cao⁴ Bernabé tsa³cˀe¹-le⁴ na⁴jmi¹ nca³yi³je³, jme³-ve⁴ xi³ Ni³na¹ tsa³cˀe¹nta³ xi³ tˀa³tsˀe⁴, cˀoa⁴ jo³-sˀin² Ni³na¹ qui³sco³ˀai²ˀnte²-le⁴ cho⁴ta⁴ xi³ li² judío-jin² nca³ coan⁴cjain¹-le⁴.
ACT 14:28 Ncjin² ni⁴čhjin³ ya⁴ tsa³ca³tio²cao⁴ cho⁴ta⁴-le⁴ Cristo Pablo cao⁴ Bernabé.
ACT 15:1 Cˀia⁴ tjin¹ cˀa³ xi³ ja³ˀai³-ni³ ya⁴ Judea xi³ cˀoa⁴-sˀin² tsa³ca³co¹ya³-le⁴ je² ntsˀe⁴: Tsa² tsi² je² cjoa⁴circuncisión xi³ coan⁴-no³, jo³ tso² cjoa⁴te¹xo³ma³-le⁴ Moisés, li²coi³ coan⁴ coi²tjo⁴ntjao²³.
ACT 15:2 Cˀoa⁴-sˀin² jao² ya³ coan³, cˀoa⁴ Pablo cao⁴ Bernabé tsa³cjao¹ti³ya³-ni³ cao⁴ xi³cˀa³. Cˀoa⁴-sˀin² tsa³cjao¹ya³-ni³ nca³ ca²ta³fi²mi³-ni³ Pablo cao⁴ Bernabé ya⁴ Jerusalén, cao⁴ cˀa³ xi³ cja⁴ˀai¹. Ca²ta³fi²nčhˀoe² pa²stro⁴ cao⁴ cho⁴ta⁴jchi¹nca³ xi³ tˀa³tsˀe⁴ cjoa⁴ je²-vi⁴.
ACT 15:3 Je² na⁴xi⁴na³nta¹-le⁴ Cristo qui³ ca³ni¹ya³ntia³ Pablo cao⁴ Bernabé cao⁴ xi³cˀa³. Ja³ˀa³to³ ya⁴ Fenicia cao⁴ Samaria. Tsa³cˀe¹ na⁴jmi¹ jo³-sˀin² nca³ qui³si³cˀa³ntjai²ya³ yao³-le⁴ nca³ qui³tˀa³-le⁴ Cristo je² cho⁴ta⁴ xi³ li² judío-jin². A³li² to⁴cˀoa⁴cji³ tsjoa³ coan³-le⁴ nca³tsˀi³ xi³ ntsˀe⁴.
ACT 15:4 Cˀia⁴ nca³ ji³cho² ya⁴ Jerusalén, a³li² to⁴nta³ qui³scoe¹tjao² na⁴xi⁴na³nta¹-le⁴ Cristo cao⁴ pa²stro⁴ cao⁴ cho⁴ta⁴jchi¹nca³. Tsa³cˀe¹-le⁴ na⁴jmi¹ nca³yi³je³ jme³-ve⁴ cjoa⁴ xi³ Ni³na¹ tsa³cˀe¹nta³ xi³ tˀa³tsˀe⁴.
ACT 15:5 To⁴nca³ tjin¹ cˀa³ xi³ cˀoa⁴-ti⁴ coan³cjain¹-le⁴, xi³ cho⁴ta⁴ fariseos, xi³ tsa³qui³ncha³nto³ cˀoi⁴qui³tso²: Cjai¹nca³ to⁴ma³chjen¹ nca³ cjoa⁴circuncisión coan⁴-le⁴ nca³ sˀe³ne²-le⁴ nca³ ca²ta³si¹tjo³son² je² cjoa⁴te¹xo³ma³ xi³ qui³tsjoa³ Moisés.
ACT 15:6 Coan³ña³ pa²stro⁴ cao⁴ cho⁴ta⁴jchi¹nca³, nca³ sco¹son²-ni³le⁴ cjoa⁴ xo⁴ tjin¹-vi⁴.
ACT 15:7 A³li² to⁴cˀoa⁴cji³ tse³ tsa³cjao¹ya³-ni³. Cˀia⁴ tsa³ca³sen²nto³ Pedro cˀoi⁴qui³tso²: Nca³tsˀio³ ˀnti¹ntsˀe³, jon² ˀya³-nio¹³ nca³ je³coa²tse³ Ni³na¹ tsa³cja³ˀa¹jin³-na³ nca³ je² cho⁴ta⁴ xi³ li² judío-jin² cjoi⁴nčhˀoe¹-ni³ ntso⁴ˀva³ je² en¹nta³ xi³ tˀa³tsˀe⁴ Cristo, cˀoa⁴ coan⁴cjain¹-le⁴ˀni³.
ACT 15:8 Cˀoa⁴ Ni³na¹ xi³ ve³ ni⁴ma⁴-na¹ qui³tsjoa³ en¹-le⁴ xi³ tˀa³tsˀe⁴, nca³ cˀoa⁴-ti⁴ qui³tsjoa³-le⁴ nca³ je² Espíritu Santo, jo³-sˀin² qui³tsjoa³-na¹ nca³ ña¹.
ACT 15:9 Ni³na¹ to⁴nco¹son²-sˀin² qui³cao⁴-na¹ nca³tsˀia³² cao⁴ ña¹ cao⁴ je². Qui³si³tsje³-ni³ ni⁴ma⁴-le⁴ cˀia⁴ nca³ coan³cjain¹-le⁴.
ACT 15:10 Ntˀai⁴-vi⁴, a¹-ni³ nca³ cˀoa⁴-sˀin² cho¹tˀa³-si¹nio³ Ni³na¹, nca³ cˀoa⁴-sˀin² ni²chˀa¹nao²³ cjoa⁴ xi³ ñˀain³ tjin¹ cho⁴ta⁴-le⁴ Cristo. Sa³ˀnta³ ni⁴je²-jin² nˀai³jcha¹cjin³-na¹ ni⁴ña¹-jian² qui³jcho¹cjoa⁴-na¹ je²-vi⁴.
ACT 15:11 Cˀoa⁴-sˀin² ma³cjain¹-na¹ nca³ coi²tjo⁴ntje² to⁴tˀa³tsˀe⁴ cjoa⁴nta³-le⁴ Nai³-na¹ Jesús jo³-ni³ cˀoa⁴-ti⁴ je².
ACT 15:12 Cˀia⁴ nca³tsˀi³ cho⁴ta⁴ tsa³ca³tio²jyo¹. Qui³nčhˀoe¹-le⁴ Bernabé cao⁴ Pablo nca³ tsa³cˀe¹-le⁴ na⁴jmi¹, jo³-sˀin² nca³ tse³ choa⁴ cao⁴ cjoa⁴xcon¹ xi³ Ni³na¹ tsa³cˀe¹nta³ jin³-le⁴ cho⁴ta⁴ xi³ li² judío-jin² xi³ to⁴tˀa³tsˀe⁴.
ACT 15:13 Cˀia⁴ nca³ je³tsa³ca³tio²jyo¹ Bernabé cao⁴ Pablo, cˀia⁴ Jacobo cˀoa⁴qui³tso²: Nca³tsˀio³ ˀnti¹ntsˀe³, ti⁴no¹ˀya²-nao¹³.
ACT 15:14 Je² Simón cˀoa⁴-sˀin² tsa³cˀe¹ na⁴jmi¹ jo³-sˀin² Ni³na¹ nca³ ti¹tjon² ji³cho²con³-le⁴ cho⁴ta⁴ xi³ li² judío-jin², nca³ cjoa⁴ˀa²jin³ cho⁴ta⁴ xi³ cˀoin¹-le⁴ nca³ tsˀe⁴.
ACT 15:15 Cˀoa⁴ je² en¹ xo⁴ tso²-ve⁴ cˀoa⁴-sˀin² nco¹son² tso²ya³ cao⁴ en¹-le⁴ je² xi³ qui³nchja⁴ya³ tˀa³tsˀe⁴ Ni³na¹, xi³ tji¹tˀa³ xon⁴.
ACT 15:16 Xi³ coan⁴scan³-ni³ cjoe²ˀe⁴-nia¹³, qui³tso² je² Nai³-na¹, cˀoa⁴ cˀoe³nta³ya³-nia¹³ je² ntˀia³-le⁴ David xi³ je³chi³xo²ya³. Cˀoa⁴ nqui²jnco³ cˀa² cˀoe³nta³-nia³ xjao¹jto³-le⁴, cˀoa⁴-sˀin² nqui²jnco³ cˀa² sco³mi³tjen⁴-nia³,
ACT 15:17 jme¹-ni³ nca³ cˀoa⁴-sˀin² coa⁴²sjai³-si¹ni³ je² Nai³-na¹ cho⁴ta⁴ xi³cˀa³, cao⁴ nca³tsˀi³ cho⁴ta⁴ xi³ li² judío-jin², jña³-le⁴ xi³ yˀa³ jan³ˀain¹-na⁴.
ACT 15:18 Cˀoa⁴tso² je² Nai³-na¹ xi³ tsa³ca³co¹son²tsen³-le⁴ nca³yi³je³ cjoa⁴-vi⁴ sa³ˀnta³ coa²tse³. Je² Ni³na¹ tsa³ve³ nca³yi³je³ xa¹-le⁴, jo³ sa³ˀnta³ qui³sˀe³ son³ˀnte³.
ACT 15:19 Coi³ nca³ an³ xian³ nca³ li²coi³ si⁴jti³-le⁴² je² nca³tsˀi³ cho⁴ta⁴ xi³ li² judío-jin² xi³ si¹cˀa³ntjai²ya³ yao³-le⁴ nca³ fi²tˀa³-le⁴ Ni³na¹.
ACT 15:20 To⁴nca³ chji¹-le⁴² nca³ ca²ta³vi³ncha³xin²-le⁴ tso³jmi² xi³ vˀai²tˀa³-le⁴ xco¹son², ca²ta³vi³ncha³xin²-le⁴ cjoa⁴cha³jnqui³, cao⁴ yao³-le⁴ cho⁴ xi³ qui³cho³ˀnto¹sin³, cao⁴ njin¹.
ACT 15:21 Sa³ˀnta³ coa²tse³ tjin¹ xi³ nchja⁴ya³ xi³ tˀa³tsˀe⁴ Moisés nca³ jnco¹jnco¹ na⁴xi⁴na³nta¹ ya⁴³ ntˀia³ sinagoga. Ya⁴ sˀe³xquia⁴ xon⁴-le⁴ nca³ntsjai² ni⁴čhjin³ ni²cja¹ya³.
ACT 15:22 Cˀia⁴ nta³ qui³sa³sen³-le⁴ pa²stro⁴, cao⁴ cho⁴ta⁴jchi¹nca³, cao⁴ nca³tsˀi³ na⁴xi⁴na³nta¹-le⁴ Cristo, nca³ tsa³cja³ˀa¹jin³ cho⁴ta⁴xˀin⁴ xi³ tsˀe⁴ cho⁴ta⁴ti¹tjon²-le⁴ ntsˀe⁴, je² Judas xi³ tjin¹-le⁴ jan³ˀain¹ xi³ nqui²jnco³ xi³ Barsabás ˀmi², cao⁴ Silas. Qui³sca³ni¹ ya⁴ Antioquía cao⁴ Pablo cao⁴ Bernabé.
ACT 15:23 Je² xon⁴ xi³ qui³squi³-ni³ cao⁴ ntsja³: Je² pa²stro⁴ cao⁴ cho⁴ta⁴jchi¹nca³, cao⁴ ntsˀe⁴ ti³ni²ti²ˀnta³-lai²⁴jin⁴ nca³tsˀio³ xi³ ntsˀai⁴-jin⁴ xi³ cho⁴ta⁴ xi³ li² judío-jin², xi³ ti³yo³ ya⁴ Antioquía cao⁴ ya⁴ Siria cao⁴ ya⁴ Cilicia.
ACT 15:24 Cˀoa⁴-sˀin² qui³no²ˀyai²⁴-jin⁴ nca³ tjin¹ cˀa³ xi³ ji³tjo³jin³-ni³na³jin⁴ xi³ to⁴si³ si¹cao⁴-no³ cao⁴ en¹. Tjio¹si¹qui³tson¹ nqui²jnco³cˀa²-ni³ ni⁴ma⁴-no³ nca³ vˀe¹ne²-no³ nca³ cjoa⁴ circuncisión cˀoai⁴-no³, nca³ cˀoa⁴-sˀin² si⁴tjo³son²³ je² cjoa⁴te¹xo³ma³. Li²coi³ cˀoa⁴-sˀin² tsa³ca³te²xo³ma³-lai⁴jin⁴ cho⁴ta⁴ xo⁴cjoan³-ve⁴.
ACT 15:25 Nta³ qui³sa³sen³-na³jin⁴ nca³ tsa³cˀe²xcoi¹⁴-jin⁴ yao³-na⁴jin⁴, nca³ qui³chja³ˀa²jin³-jin⁴ cho⁴ta⁴xˀin⁴ xi³ qui³cha³ni²chon³-lai²⁴jin⁴, cao⁴ je² Bernabé cao⁴ Pablo xi³ tsjoa³chai³⁴-jin⁴.
ACT 15:26 Je² cho⁴ta⁴xˀin⁴ tsa³cˀe¹jnco³con³ nca³ qui³tsjoa³ ni⁴ma⁴-le⁴ tˀa³tsˀe⁴ Nai³-na¹ Jesucristo.
ACT 15:27 Cˀoa⁴-sˀin² qui³cha³ni²⁴-jin⁴ je² Judas cao⁴ Silas. Je² xi³ ti⁴coi³-ni³ en¹ xi³ tji¹tˀa³ xon⁴ coi⁴tso⁴ya³-no³ nca³ to⁴ˀen¹.
ACT 15:28 Nta³ qui³sa³sen³-le⁴ je² Espíritu Santo, cˀoa⁴ cao⁴ jin⁴-jin⁴, nca³ tsi² to⁴jo³ tse³ chˀa¹ cˀoe¹ne²-lai²⁴jin⁴. To⁴je² je²-vi⁴ xi³ nˀion¹ ma³chjen¹.
ACT 15:29 Cˀoa⁴-sˀin² chja³ˀa²xin²-lao⁴³ yao³-no³ je² nca³yi³je³ tso³jmi² xi³ vˀai²tˀa³-le⁴ xco¹son², cao⁴ njin¹, cao⁴ yao³-le⁴ cho⁴ xi³ qui³cho³ˀnto¹sin³, cao⁴ cjoa⁴cha³jnqui³. Tsa² chja³ˀa²xin²-lao⁴³ yao³-no³ je² nca³yi³je³ cjoa⁴-vi⁴, cjai¹nca³ to⁴nta³ sˀiaon⁴³. Nta³ ca²tji³-no³ ni⁴čhjin³.
ACT 15:30 Cˀia⁴ qui³sca³ni¹ Pablo cao⁴ Bernabé, cao⁴ Judas cao⁴ Silas. Ji³cho²jen³ ya⁴ Antioquía. Tsa³cˀe¹xco¹ nca³tsˀi³ cho⁴ta⁴. Qui³tsjoa³ xon⁴ xi³ yˀa³.
ACT 15:31 Cˀia⁴ nca³ tsa³cˀe¹xquia⁴, cjai¹nca³ to⁴coan³tsjoa³-le⁴ nca³ ji³cho²-le⁴ je² cjoa⁴nta³.
ACT 15:32 Je² Judas cao⁴ Silas cˀoa⁴-ti⁴ coan³-le⁴ qui³nchja⁴ya³. A³li² to⁴cˀoa⁴cji³ qui³si³je³con³ je² ntsˀe⁴. Qui³tsjoa³-le⁴ nca³nˀion¹.
ACT 15:33 Ya⁴ tsa³ca³tio² jo³ tjin¹ ni⁴čhjin³. Cˀia⁴ je² ntsˀe⁴ qui³sca³ni¹con³-le⁴ je² pa²stro⁴ nca³ si⁴²ti²ˀnta³.
ACT 15:34 To⁴nca³ Silas nta³ qui³sa³sen³-le⁴ nca³ tsa³cˀe²jna³ ya⁴-ve⁴.
ACT 15:35 Pablo cao⁴ Barnabé ya⁴ tjio¹ ya⁴ Antioquía. Tjio¹va³co¹ya³ je² en¹-le⁴ Nai³-na¹. Cˀoa⁴ tjio¹nchja⁴ya³ je² en¹nta³ xi³ tˀa³tsˀe⁴ Cristo cao⁴ ncjin² xi³cˀa³.
ACT 15:36 Cˀia⁴ nca³ coan³ jnco³jao²-ni³ ni⁴čhjin³, Pablo cˀoi⁴qui³tso²-le⁴ Bernabé: Tjin³chon¹ nqui²ntia³-le⁴² je² ntsˀe³², nca³qui³jnta² na⁴xi⁴na³nta¹ jña³ nca³ qui³no²cjoa⁴ya³² je² en¹nta³ xi³ tˀa³tsˀe⁴ Nai³-na¹. Jo³-la²xo¹sˀin² tjio¹ ntˀai⁴-vi⁴.
ACT 15:37 Bernabé coan³me³-le⁴ nca³ cˀoa⁴-ti⁴ ca²ta³fi² Juan, je² xi³ tjin¹-le⁴ jan³ˀain¹ xi³ ma³jao²-ni³ xi³ Marcos ˀmi².
ACT 15:38 To⁴nca³ Pablo li²coi³ qui³sa³sen³-le⁴ nca³ coai⁴cao⁴ je² xi³ tsa³cja³ˀa¹xin²-le⁴ yao³-le⁴ sa³ˀnta³ Panfilia, nca³ tsi² tsa² qui³cao⁴ je² xa¹ xi³ tjio¹ma³-ni³.
ACT 15:39 Cjoa⁴si³ qui³sˀe³-le⁴. Tsa³cja³ˀa¹xin²tˀa³-le⁴ yao³-le⁴ xi¹-ncjin¹. Bernabé qui³cao⁴ Marcos. Qui³son²nta¹ cao⁴ barco ya⁴ ˀnta³ Chipre.
ACT 15:40 Pablo tsa³cja³ˀa¹jin³ Silas, cˀoa⁴ ji³tjo³. Je² ntsˀe⁴ qui³si³ca³tio²cao⁴ cjoa⁴nta³-le⁴ Nai³-na¹.
ACT 15:41 Ya⁴ tsa³cˀe²ma³ ya⁴ Siria cao⁴ ya⁴ Cilicia. Qui³tsjoa³-le⁴ nca³nˀion¹ na⁴xi⁴na³nta¹-le⁴ Cristo.
ACT 16:1 Cˀia⁴ ja³ˀai³ Pablo ya⁴ Derbe, cˀoa⁴ ya⁴ Listra. Coe⁴-ni³ ya⁴ ti¹jna³ jnco³ cho⁴ta⁴-le⁴ Cristo xi³ Timoteo ˀmi², ˀnti¹-le⁴ jnco³ chjon⁴² judía xi³ ma³cjain¹-le⁴, to⁴nca³ je² nˀai³-le⁴ cho⁴ta⁴ griego ni¹.
ACT 16:2 Nca³tsˀi³ ntsˀe⁴ xi³ ya⁴ tjio¹ ya⁴ Listra cao⁴ ya⁴ Iconio, cjai¹nca³ to⁴nta³ tsˀa³sje³ je² cho⁴ta⁴-vi⁴.
ACT 16:3 Pablo coan³me³-le⁴ nca³ je² Timoteo coai⁴cao⁴. Cˀoa⁴ qui³scoe¹-ˀni³ qui³tsjoa³-le⁴ cjoa⁴circuncisión xi³ to⁴tˀa³tsˀe⁴ je² cho⁴ta⁴ judío xi³ tjio¹ je² ˀnte³-ve⁴, nca⁴ nca³tsˀi³ ve³-ni¹ nca³ cho⁴ta⁴ griego nˀai³-le⁴.
ACT 16:4 Cˀia⁴ nca³ ja³ˀa³to³ ya⁴ na⁴xi⁴na³nta¹, cˀoa⁴-sˀin² qui³tso²-le⁴, nca³ ca²ta³si¹tjo³son² je² cjoa⁴te¹xo³ma³ xi³ cˀoa⁴-sˀin² tsa³cˀe¹nta³ pa²stro⁴, cao⁴ cho⁴ta⁴jchi¹nca³ xi³ tjio¹ ya⁴ Jerusalén.
ACT 16:5 Cˀoa⁴-sˀin²ˀni³ je² na⁴xi⁴na³nta¹-le⁴ Cristo nca³qui³jnta² qui³ni²nˀion¹jin³ nca³ ma³cjain¹-le⁴. Ña³qui³ nca³ nchaon³nchaon³ coan³ncjin²ya³ cho⁴ta⁴.
ACT 16:6 Cˀia⁴ nca³ je³ja³ˀa³ ya⁴ˀnte³ Frigia, cˀoa⁴ ya⁴ na³nqui³ Galacia, je² Espíritu Santo li²coi³ qui³tsjoa³ˀnte²-le⁴ nca³ coi⁴nchja⁴ya³ je² en¹-vi⁴ ya⁴ Asia.
ACT 16:7 Cˀia⁴ nca³ ja³ˀai³qui²xi⁴cja¹-le⁴ ya⁴ ˀnte³ Misia, coan³me³-le⁴ nca³ qui³ ya⁴ na³nqui³ Bitinia, to⁴nca³ je² Espíritu Santo li²coi³ qui³tsjoa³ˀnte²-le⁴.
ACT 16:8 Cˀia⁴ nca³ ja³ˀa³čhian³ ya⁴ Misia, ja³ˀa³jen³ ya⁴ Troas.
ACT 16:9 Tjin¹ xi³ tsa³ve³ Pablo ya⁴³ ni³jña¹-le⁴. Jnco³ cho⁴ta⁴ xi³ Macedonia tsˀe⁴, tsa³ca³sen² nqui³xcon⁴ Pablo, tsa³cˀe¹tsˀoa³-le⁴ cˀoi⁴qui³tso²: Ti⁴tjai¹³ i⁴ Macedonia, ti⁴sen⁴cao⁴-na³jin⁴.
ACT 16:10 Cˀia⁴ nca³ Pablo tsa³ve³, nti⁴ton⁴ tsa³cja³sjai³⁴-jin⁴ jo³-sˀin² coa⁴nquin¹⁴-jin⁴ ya⁴ Macedonia. Cˀoa⁴tsa³qui³xoin¹⁴-jin⁴ nca³ Ni³na¹ xi³ qui³nchja⁴-na³jin⁴, jme¹-ni³ nca³ coi⁴no²cjoa⁴ya³jin³-lai⁴jin⁴ je² en¹nta³ xi³ tˀa³tsˀe⁴ Cristo.
ACT 16:11 Cˀia⁴ nca³ ji²tjo⁴-ni³jin⁴ ya⁴ Troas, tsa³nquin¹jin³nta¹qui²xi⁴-jin⁴ ya⁴ ˀnta³ Samotracia. Xi³ coan³nchaon³-ni³ ji³choi³⁴-jin⁴ ya⁴ Neápolis.
ACT 16:12 Cˀoa⁴ xi³ ya⁴-ve⁴ tsa³nquin¹⁴-jin⁴ ya⁴ Filipos, xi³ na⁴xi⁴na³nta¹ ti¹tjon² ya⁴ ˀnte³ xi³ tsˀe⁴ Macedonia, cˀoa⁴ xi³ nchja⁴-ni³ Roma, ya⁴ tsa³qui³yoi³⁴-jin⁴ jo³ tjin¹ ni⁴čhjin³.
ACT 16:13 Jnco³ ni⁴čhjin³ ni²cja¹ya³, ya⁴ ji²tjo⁴-ni³jin⁴ xo⁴ntjoa⁴-le⁴ na⁴xi⁴na³nta¹, ya⁴ tsa³nquin¹-ni³jin⁴ jnco³ ˀnte³ xi³ ti¹jna³ntai³ xo⁴nca¹, jña³ nca³ cˀoa⁴-sˀin² ve³ cho⁴ta⁴ nca³ vˀe¹tsˀoa³. Ya⁴ tsa³qui³yoi³⁴-jin⁴ qui³chja²coai⁴-jin⁴ nca³tsˀi³ ya¹nchjin¹ xi³ coan³xco¹.
ACT 16:14 Cˀia⁴ jnco³ chjon⁴² xi³ Lidia ˀmi², xi³ va³te¹na³ na³jño³ni², xi³ ya⁴ na⁴xi⁴na³nta¹ Tiatira tsˀe⁴, tsa³ve³xcon¹ Ni³na¹, ti¹nčhˀoe¹. Je² Nai³-na¹ qui³sco³ˀai² ni⁴ma⁴-le⁴, tsa³ca³sen¹ xo⁴ño³ jme¹-ni³ nca³ qui³nčhˀoe¹-si¹ni³ xi³ qui³tso² Pablo.
ACT 16:15 Cˀia⁴ nca³ je³qui³sa³te³nta¹ cao⁴ nca³tsˀi³ xi³ tsˀe⁴ ntˀia³-le⁴, cˀoa⁴-sˀin² tsa³cˀe¹tsˀoa³-na³jin⁴: Tsa² cjoa⁴qui²xi⁴ nca³ ca²ni²cja³ˀai³tsjaon³ nca³ an³ nta³ fi³tˀa³-le⁴ Nai³-na¹, ti⁴tja¹sˀaon³ ni³ˀya³-na⁴, ya⁴ ti⁴yo³. Jo³ cjoa⁴nˀion¹ qui³sˀin³-na³jin⁴.
ACT 16:16 Jnco³ cˀa³ nca³ cˀoi⁴coan³ cˀia⁴ nca³ tsa³nquin¹⁴-jin⁴ jña³ nca³ vˀe²tsˀoa³, jnco³ tso²ti³ xi³ tjin¹-le⁴ ntjao⁴ xi³ nta³jin³ xi³ ma³-le⁴ co³tˀa³-ni³ suerte qui³sa³te³jin³-jin⁴. A³li² to⁴cˀoa⁴cji³ taon⁴ njen³-le⁴ nai³-le⁴, nca³ tso²ti³-ve⁴ ma³-le⁴ chˀa²sje³ suerte.
ACT 16:17 Je² tso²ti³-vi⁴ qui³tjen⁴nqui³-le⁴ Pablo cao⁴ jin⁴-jin⁴. Nˀion¹ qui³nchja⁴, cˀoi⁴qui³tso²: Je² cho⁴ta⁴-vi⁴ cho⁴ˀnta³-le⁴ Ni³na¹ xi³ ti¹jna³ ncˀa¹. Je²-vi⁴ xi³ nchja⁴ya³jin³-no³ jo³-sˀin² vi²tjo⁴ntje².
ACT 16:18 Ncjin² ni⁴čhjin³ nca³ cˀoa⁴qui³sˀin³ tso²ti³-ve⁴. To⁴nca³ je² Pablo coan³jti³-le⁴, qui³si³cˀo¹fa³, cˀoi⁴qui³tso²-le⁴ je² ntjao⁴ xi³ nta³jin³ xi³ tjin¹-le⁴ tso²ti³-ve⁴: Cˀoa⁴-sˀin² vˀe³ne²-le²³ cao⁴ jan³ˀain¹-le⁴ Jesucristo, ti²tjo⁴xin²-lai⁴ tso²ti³-vi⁴. Ti⁴coi³-ni³ hora ji³tjo³xin²-le⁴.
ACT 16:19 Je² nai³-le⁴ tsa³ve³ nca³ ji³tjo³xin²-le⁴ je² cjoa⁴ma⁴ xi³ tjin¹-le⁴. Qui³tsoa³ Pablo cao⁴ Silas, cˀoa⁴ ji³cho²cao⁴ nti⁴tsin⁴ ya⁴ nqui³xcon⁴ cho⁴ta⁴xa¹.
ACT 16:20 Tsa³ca³sen¹jna³va³sen³ cho⁴ta⁴xa¹, cˀoi⁴qui³tso²: Je² cho⁴ta⁴ xo⁴cjoan³-ve⁴ cho⁴ta⁴ judío ni¹. Fa³ˀai³ cˀe¹jna³ cjoa⁴si³ i⁴ tsan⁴² na⁴xi⁴na³nta¹.
ACT 16:21 Je² costumbre xi³ tjio¹tso²ya³ li²coi³ nta³ tjin¹ nca³ ña¹ chjoe¹. Ni⁴cˀoa⁴-jin² sˀian⁴², nca³ cho⁴ta⁴ romano nia¹ nca³ ña¹.
ACT 16:22 Ña³qui³ coan³jtin¹ne² cho⁴ta⁴ na⁴xi⁴na³nta¹, qui³ co²ntran⁴-le⁴ Pablo cao⁴ Silas. Je² cho⁴ta⁴xa¹ tsa³ca³sen¹jnta³jon³ na³jño³-le⁴. Tsa³ca³te¹xo³ma³ nca³ coa⁴²-le⁴ cao⁴ ya¹jti³.
ACT 16:23 Cjai¹nca³ tsa³ca¹-le⁴ ya¹jti³. Cˀia⁴ nca³ je³qui³si³qui²ˀaon³, qui³sca³ni¹ nto⁴ya¹. Cˀoa⁴-sˀin² tsa³cˀe¹ne²-le⁴ je² xi³ si¹coi²nta⁴ nto⁴ya¹, nca³ nˀion¹ nta³ ca²ta³vi³ncha³ˀya³.
ACT 16:24 Cˀia⁴ nca³ je³cˀoa⁴tsa³cˀin²-le⁴, qui³sca³ni¹sˀen³ nto⁴ya¹ jña³ nqui²sa⁴ cjin³ ˀncho². Tsa³ca¹tˀa³nˀion¹ tˀa³ya¹ ntso⁴co⁴.
ACT 16:25 Cˀia⁴ nca³ ji³cho² va³sen³ni⁴tjen⁴, Pablo cao⁴ Silas tjio¹vˀe¹tsˀoa³, tjio¹se³-le⁴ Ni³na¹. Je² cho⁴ta⁴ xi³cˀa³ xi³ tjio¹ cjoa⁴ñˀain³, tjio¹nčhˀoe¹.
ACT 16:26 Nti⁴ton⁴ ja³ˀa³ jnco³ chaon¹ xi³ nˀion¹, jo³ sa³ˀnta³ qui³tin²ya³ xjao¹ja⁴ma⁴-le⁴ nto⁴ya¹. Cˀia⁴ qui³tjo³ˀai² nti⁴ton⁴ nca³yi³je³ xo⁴ntjoa⁴. Ña³qui³ qui³tjo³xin²-le⁴ cadena nca³tsˀi³ xi³ tjio¹ cjoa⁴ñˀain³.
ACT 16:27 Je² xi³ si¹coi²nta⁴ nto⁴ya¹ ja³ˀa³-le⁴. Tsa³ve³ nca³ ti⁴xˀa⁴ xo⁴ntjoa⁴-le⁴ nto⁴ya¹. Tsˀa³sje³ qui⁴cha⁴nto³-le⁴, nca³ me³-le⁴ nca³ si⁴²cˀen³ yao³-le⁴. Je³-la⁴ qui³ preso, cˀoi⁴qui³tso².
ACT 16:28 To⁴nca³ nˀion¹ qui³nchja⁴ Pablo: Li²jme³-jin² xi³ ni²coai⁴ yao³-li⁴. I⁴ ti³yoi³⁴-jin⁴ nca³tsˀi³-jin⁴.
ACT 16:29 Cˀia⁴ je² xi³ si¹coi²nta⁴ nto⁴ya¹ qui³si³je¹ lˀi¹, qui³to²ca³sˀen³. Jo³ ti¹fa³tse¹. Qui³si³cˀa³tjen⁴ yao³-le⁴ nqui³ntso⁴co⁴ Pablo cao⁴ Silas.
ACT 16:30 Cˀoa⁴ tsa³cˀa³sje³ Pablo cao⁴ Silas. Cˀoa⁴qui³tso²-le⁴: Jon²-ve⁴, jme¹-ni³ xi³ ma³chjen¹ nca³ cˀoa⁴sˀian³ nca³ coi²tjo⁴ntje²³ an³-vi⁴.
ACT 16:31 Cˀoa⁴ Pablo cao⁴ Silas qui³tso²: Ca²ta³ma³cjain¹-li² tˀa³tsˀe⁴ Nai³-na¹ Jesucristo, cˀoa⁴ coi²tjo⁴ntjai²-ni¹ nca³ ji³ cao⁴ nca³tsˀi³ xi³ tsˀe⁴ ni³ˀya³-li⁴.
ACT 16:32 Tsa³cja¹cao⁴ je² en¹-le⁴ Nai³-na¹, cao⁴ nca³tsˀi³ xi³ tjio¹ ni³ˀya³-le⁴.
ACT 16:33 Cˀia⁴ ti⁴coi³-ni³ hora nca³ njion² je² xi³ si¹coi²nta⁴ nto⁴ya¹ qui³cao⁴ Pablo cao⁴ Silas. Tsa³ca³ne¹jon³ jña³ nca³ qui³sˀe³-le⁴ ya¹jti³. Cˀia⁴ qui³sa³te³nta¹ nti⁴ton⁴ nca³ je², cao⁴ nca³tsˀi³ xi³ tjio¹ ni³ˀya³-le⁴.
ACT 16:34 Qui³cao⁴ ni³ˀya³-le⁴, tsa³ca³sen¹jna³-le⁴ ya¹mi²xa⁴. A³li² to⁴tsjoa³ coan³-le⁴ nca³ coan³cjain¹-le⁴ tˀa³tsˀe⁴ Ni³na¹ cao⁴ nca³tsˀi³ xi³ tjio¹ ni³ˀya³-le⁴.
ACT 16:35 Cˀia⁴ nca³ qui³sˀe³sen¹, je² cho⁴ta⁴xa¹-ve⁴ qui³sca³ni¹ policía. Cˀoi⁴qui³tso²-le⁴: Ca²ta³fi² cho⁴ta⁴ xo⁴cjoan³-ve⁴.
ACT 16:36 Je² xi³ si¹coi²nta⁴ nto⁴ya¹-ve⁴ qui³tso²ya³-le⁴ Pablo: Je² cho⁴ta⁴xa¹ ca²si¹ca³sen¹cjoa⁴ nca³ coi⁴yo³ntai¹-nio³. Ntˀai⁴-vi⁴ntai⁴ coan⁴ nca³ coa³nquion¹³. Ta³nquin¹-la²na¹ntao³.
ACT 16:37 Cˀia⁴ Pablo cˀoi⁴qui³tso²-le⁴: Ti¹tjon²cjoa²la² tsa³ca¹na³jin⁴ nqui³xcon⁴ na⁴xi⁴na³nta¹, nca³ ni⁴jme³-jin² je¹ tjin¹-na³jin⁴. Jin⁴-jin⁴ cho⁴ta⁴ romanos ˀmi²-na³jin⁴. Qui³cha³ni²-na³jin⁴ nto⁴ya¹. Cˀoa⁴ ntˀai⁴-vi⁴ a³ cha⁴ni²ˀma³-na³jin⁴. Xi³ cjoa⁴qui²xi⁴, ma³jain². Je² soa³ ca²ta³fa³ˀai³ cˀa³sje³-na³jin⁴.
ACT 16:38 Je² policía cˀoa⁴qui³tso²-le⁴ cho⁴ta⁴xa¹ jo³ qui³tso² Pablo. Qui³tsa³cjon¹ cˀia⁴ nca³ qui³nčhˀoe¹ nca³ cho⁴ta⁴ romano.
ACT 16:39 Ja³ˀai³nčhˀoe²-nca¹ni³ Pablo cao⁴ Silas, tsa³cˀe¹tsˀoa³-le⁴. Tsa³cˀa³sje³, cˀoi⁴qui³tso²-le⁴: Ti²tjo⁴-nio³ na⁴xi⁴na³nta¹.
ACT 16:40 Cˀia⁴ nca³ je³ji³tjo³-ni³ nto⁴ya¹, ja³ˀa³sˀen³ ya⁴ ni³ˀya³-le⁴ Lidia. Tsa³ve³ ntsˀe⁴, tsa³cja¹cao⁴, cˀia⁴ qui³.
ACT 17:1 Ja³ˀa³ Pablo cao⁴ Silas ya⁴ Anfípolis cao⁴ ya⁴ Apolonia. Ji³cho² ya⁴ Tesalónica, jña³ nca³ ti¹jna³ jnco³ ntˀia³ sinagoga-le⁴ cho⁴ta⁴ judío.
ACT 17:2 Jo³-sˀin² ma³nca³-le⁴ je² Pablo ja³ˀa³sˀen³con³-le⁴ cho⁴ta⁴ judío. Jan² xo³ma²na⁴ tsa³cja¹cao⁴ cjoa⁴ xi³ tji¹tˀa³ xon⁴ Escritura.
ACT 17:3 Cˀoa⁴-sˀin² qui³tso²ya³, cˀoa⁴ qui³si³qui²xi⁴ya³ cjoa⁴ nca³ coan³chjen¹ nca³ Cristo tsa³cja³ˀa¹ cjoa⁴ñˀain³, cˀoa⁴ nca³ ja³ˀa³ya²jin³-le⁴ cˀen³. Je² Jesús, je²-vi⁴ je² Cristo. (Je² xi³ an³ cˀoa⁴ti²xin³-no³, qui³tso² Pablo.)
ACT 17:4 Coan³cjain¹cˀa³-le⁴, qui³tˀa³-le⁴ Pablo cao⁴ Silas. Cˀoa⁴ li² to⁴ncjin² cho⁴ta⁴ griego xi³ ve³xcon¹ Ni³na¹, cˀoa⁴ li² tsa² choa³-jin² ya¹nchjin¹ti¹tjon².
ACT 17:5 Cˀia⁴ je² cho⁴ta⁴ judío xi³ tsi² tsa³ coan³cjain¹-le⁴, nˀion¹ coan³chi⁴ni⁴. Qui³scoe¹ cˀa³ cho⁴ta⁴tsˀe² xi³ chˀao³ cjoan³. Tsa³cˀe¹xco¹ xi¹ncjin¹. Tsa³cˀe¹jna³ cjoa⁴si³ ya⁴ na⁴xi⁴na³nta¹. Ji³cho² ni³ˀya³-le⁴ Jasón. Me³-le⁴ nca³ tsa³cˀa³sje³jin³ va³sen³-le⁴ cho⁴ta⁴ na⁴xi⁴na³nta¹ Pablo cao⁴ Silas.
ACT 17:6 To⁴nca³ li²coi³ coan³sjai³-le⁴. To⁴je² Jasón cao⁴ jnco³jao² ntsˀe⁴ xi³ ja³ˀai³cao⁴-le⁴ cho⁴ta⁴xa¹ xi³ tsˀe⁴ na⁴xi⁴na³nta¹. Nˀion¹ qui³nchja⁴: Je² xo⁴cjoan³-ve⁴ xi³ cjoa⁴si³ tjio¹vˀe¹jna³ nca³qui³jnta² son³ˀnte³, cˀoa⁴-ti⁴ i⁴ ca²fa³ˀai³.
ACT 17:7 Je² Jasón ca²tsjoa¹-le⁴ ˀnte³. Je² nca³tsˀi³ co²ntran⁴ qui³-le⁴ cjoa⁴te¹xo³ma³-le⁴ César. Cˀoa⁴tjio¹tso² nca³ tjin¹ nqui²jnco³ cho⁴ta⁴ti¹tjon² xi³ Jesús.
ACT 17:8 Cˀoa⁴-sˀin² qui³sˀe³-le⁴ cjoa⁴jcon³ cho⁴ta⁴ na⁴xi⁴na³nta¹ cao⁴ je² cho⁴ta⁴xa¹-le⁴ na⁴xi⁴na³nta¹, nca³ qui³nčhˀoe¹ je² cjoa⁴-vi⁴.
ACT 17:9 Cho⁴ta⁴xa¹ qui³scoe¹ en¹-le⁴ Jasón cao⁴ xi³cˀa³ nca³ taon⁴ cˀoe⁴²jna³nqui³ yao³-le⁴. Cˀia⁴ qui³cha³ni²ntai¹.
ACT 17:10 Cˀia⁴ nca³ njion² je² ntsˀe⁴ qui³sca³ni¹ nti⁴ton⁴ Pablo cao⁴ Silas ya⁴ Berea. Cˀia⁴ nca³ ji³cho², ja³ˀa³sˀen³ ntˀia³ sinagoga xi³ tsˀe⁴ cho⁴ta⁴ judío.
ACT 17:11 Nqui²sa⁴ nta³ cho⁴ta⁴ je²-vi⁴ cao⁴ xi³ tjio¹ ya⁴ Tesalónica. Je²-vi⁴ cjai¹nca³ to⁴nti⁴ton⁴ qui³scoe¹ je² en¹-le⁴ Ni³na¹ cao⁴ tse³ cjoa⁴tsjoa³. Nchaon³nchaon³ qui³sco²tˀa³ je² xon⁴ Escritura, tsa² cjoa⁴qui²xi⁴ nca³ cˀoa⁴tjin¹ je² cjoa⁴-vi⁴.
ACT 17:12 Ncjin² cho⁴ta⁴-vi⁴ xi³ cˀoa⁴-sˀin² coan³cjain¹-le⁴, cao⁴ ya¹nchjin¹ griega xi³ ya¹nchjin¹ti¹tjon², cˀoa⁴ a³li² tsa² choa³-jin² cho⁴ta⁴xˀin⁴.
ACT 17:13 To⁴nca³ qui³nčhˀoe¹ je² cho⁴ta⁴ judío xi³ Tesalónica tsˀe⁴, nca³ cˀoa⁴-ti⁴ ya⁴ Berea Pablo qui³nchja⁴ya³ je² en¹-le⁴ Ni³na¹. Ya⁴ qui³ cho⁴ta⁴-ve⁴. Cˀoa⁴-ti⁴ ya⁴ tsa³cˀe¹jna³-le⁴ cjoa⁴si³ cho⁴ta⁴ na⁴xi⁴na³nta¹-ve⁴.
ACT 17:14 To⁴nca³ je² ntsˀe⁴ qui³sca³ni¹ nti⁴ton⁴ Pablo ntai³ nta¹chi³con³. Silas cao⁴ Timoteo ya⁴ tsa³ca³tio² ya⁴ Berea.
ACT 17:15 Je² xi³ qui³cao⁴ya³ntia³ nca³ qui³si³coi²nta⁴ Pablo, qui³cao⁴ ya⁴ sa³ˀnta³ Atenas. Cˀoa⁴ ya⁴-ve⁴ Pablo qui³si³ca³sen¹cjoa⁴-le⁴ Silas cao⁴ Timoteo nca³ nti⁴ton⁴ ca²ta³nčhoa³con³-le⁴. Cˀoa⁴ cho⁴ta⁴-ve⁴ qui³.
ACT 17:16 Cˀia⁴ nca³ Pablo ti¹co³ya³-le⁴ ya⁴ Atenas, a³li² to⁴cˀoa⁴cji³ xi³ ma³-le⁴ ni⁴ma⁴-le⁴ nca³ tsa³ve³ nca³ je² na⁴xi⁴na³nta¹-ve⁴ cjai¹nca³ to⁴tjin¹-le⁴ xco¹son².
ACT 17:17 Ña³qui³ cˀoa⁴-sˀin² ya⁴³ ntˀia³ sinagoga tsa³cja¹cao⁴ cho⁴ta⁴ judío, cao⁴ je² xi³ ve³xcon¹. Cˀoa⁴ ya⁴ nti⁴tsin⁴-ve⁴ nchaon³nchaon³ tsa³cja¹cao⁴ je² xi³ to⁴coi³ ni⁴čhjin³ ya⁴ tjio¹.
ACT 17:18 Tjin¹ cˀa³ cho⁴ta⁴chji⁴ne⁴ xi³ tsˀe⁴ cho⁴ta⁴ epicúreos, cao⁴ xi³ tsˀe⁴ cho⁴ta⁴ estoicos, xi³ tsa³cjao¹ya³-ni³ cao⁴ Pablo. Tjin¹ cˀa³ xi³ qui³tso²: Jo¹-sˀin² tso²-ni³ je² cho⁴ta⁴ xi³ cˀoi⁴-sˀin² to⁴ma³-le⁴ nchja⁴. Je² xi³cˀa³: Je²-la⁴ nchja⁴ya³ xi³ tˀa³tsˀe⁴ Ni³na¹ xi³ cja⁴ˀai¹, coi³ qui³tso² nca⁴ Pablo qui³nchja⁴ya³ xi³ tˀa³tsˀe⁴ Jesús cˀoa⁴ xi³ tˀa³tsˀe⁴ cjoa⁴fa³ˀa¹ya³.
ACT 17:19 Cˀia⁴ qui³cao⁴ Pablo. Ja³ˀai³cao⁴ ya⁴ nti⁴tsin⁴ Areópago, cˀoi⁴qui³tso²: A³ coan⁴ nca³ jchai⁴-jin⁴ je² cjoa⁴fa³ˀai³tsjen³ cho⁴tse⁴ xi³ sˀa⁴ti³ˀmi²yai³.
ACT 17:20 Cjai¹nca³ no²ˀyai²⁴-jin⁴ cjoa⁴ cho⁴tse⁴ xi³ ˀmi²ya³-na³jin⁴. Me³-na³jin⁴ nca³ jchai⁴-jin⁴ jo³ tso²-ni³le⁴ je²-vi⁴.
ACT 17:21 (Je² nca³tsˀi³ cho⁴ta⁴ atenienses, cao⁴ cho⁴ta⁴ xi³ ya⁴ tsa³ca³tio² xi³ xin² ˀnte³-le⁴, to⁴coi³ xi³ ma³-le⁴, nca³ nchja⁴, cˀoa⁴ nca³ nčhˀoe¹, cjoa⁴ xi³ nqui²sa⁴ cho⁴tse⁴.)
ACT 17:22 Cˀia⁴ nca³ ti¹jna³ Pablo ya⁴ nca³va³sen³-le⁴ nti⁴tsin⁴ Areópago, cˀoi⁴qui³tso²: Nca³tsˀio³ cho⁴ta⁴ atenienses, ña³qui³ ˀve³-no³ nca³ cjai¹nca³ to⁴nta³ ˀya³xcon¹³ xco¹son².
ACT 17:23 Cˀia⁴ nca³ ja²ˀa⁴, cjai¹nca³ nta³ tsa³ˀve³ xco¹son²-no³. Cˀoa⁴-ti⁴ qui³sa³co³-na³ jnco³ son²xta² jña³ tji¹tˀa³ xi³ cˀoa⁴tso²: Je² Ni³na¹ xi³ tsi² tsa² ˀya³-le⁴. Je² xi³ ˀya³xcon¹³ nca³ tsi² tsa² ˀyao³, je²-vi⁴ xi³ an³ nchja²ya³jin³-no³.
ACT 17:24 Je² Ni³na¹ xi³ qui³si³nta³ son³ˀnte³, cao⁴ nca³yi³je³ tso³jmi² xi³ tjin¹ son³ˀnte³-vi⁴, je² ni¹ xi³ Nai³-le⁴ ncˀa³jmi³, cˀoa⁴ Nai³-le⁴ son³ˀnte³. Je² a³li²coi³ ya⁴ ti¹jna³ ya⁴³ yo⁴nco⁴ xi³ ntsa⁴² qui³sˀe³nta³-ni³.
ACT 17:25 A³li²coi³ je² ntsja³ cho⁴ta⁴son³ˀnte³ xi³ si¹sin³-le⁴ Ni³na¹ jo³-ni³ tsa² tjin¹ xi³ ma³chjen¹-le⁴ nca³ je². Je² tsjoa¹-na¹ cjoa⁴vi³jna³chon³-na¹, cˀoa⁴ nca³ chjen³jta³², cˀoa⁴ cao⁴ nca³yi³je³ tso³jmi².
ACT 17:26 To⁴jnco³ njin¹ qui³si³nta³-ni³ nca³tsˀi³ jco⁴ya³ cho⁴ta⁴ nca³ coa⁴tio⁴ nca³qui³jnta² son³ˀnte³. To⁴nqui³-ni³ tsa³cˀe¹nta³ ni⁴čhjin³-le⁴, cˀoa⁴ jña³ sa³ˀnta³ cjoe⁴tˀa³ ˀnte³-le⁴,
ACT 17:27 jme¹-ni³ nca³ coa⁴²sjai³-ni³ Ni³na¹, tsa² coan⁴-le⁴, jo³-sˀin² nca³ so⁴co²-le⁴ jo³-ni³ tsa² xi³ xca⁴ cji³ xi³ sca¹njon³ˀnte³ nca³ coa⁴²sjai³. To⁴nca³ cjoa⁴qui²xi⁴ nca³ tsi² tsa² cjin³ ti¹jna³-na¹ nca³ jnco¹jncoa¹.
ACT 17:28 To⁴tˀa³tsˀe⁴-ni¹ nca³ ti³yoa³², ni²cjan³², cˀoa⁴ ti³yo³choan³², jo³-sˀin² nca³ cˀoa⁴-ti⁴ qui³tso² cˀa³ cho⁴ta⁴chji⁴ne⁴-no³: Cˀoa⁴-ti⁴ ña¹ ntje⁴-le⁴ Ni³na¹ nia¹.
ACT 17:29 Tsa² ntje⁴-le⁴ Ni³na¹ nia¹, li²coi³ nta³ tsa² ni²cja³ˀai³tsjen³ nca³ je² Ni³na¹ cˀoa⁴cji³ jo³ cji³ taon⁴si³ne², a³xo⁴ jo³-ni³ taon⁴čhoa³, a³xo⁴ jo³-ni³ la⁴jao⁴, je² xi³ xa¹ coan³nta³-ni³ nca³ to⁴jco⁴ tsˀa³sje³-ni³ cho⁴ta⁴.
ACT 17:30 To⁴nca³ Ni³na¹ li²coi³ qui³si³sin³ je² ni⁴čhjin³ xi³ tsˀe⁴ je² cjoa⁴njion²-vi⁴. To⁴nca³ ntˀai⁴-vi⁴ntai⁴ Ni³na¹ vˀe¹ne²-le⁴ nca³tsˀi³ cho⁴ta⁴ nca³qui³jnta² son³ˀnte³ nca³ ca²ta³si¹cˀa³ntjai²ya³ cjoa⁴fa³ˀai³tsjen³-le⁴.
ACT 17:31 Nca⁴ Ni³na¹ tsa³cˀe¹jna³ jnco³ ni⁴čhjin³ cˀia⁴ nca³ cˀoe⁴²nta³jin³ son³ˀnte³ cao⁴ xi³ cjoa⁴qui²xi⁴, to⁴tˀa³tsˀe⁴ je² cho⁴ta⁴xˀin⁴ xi³ tsa³ca³sen¹. Cˀoa⁴-sˀin² Ni³na¹ qui³tsjoa³-le⁴ cjoa⁴qui²xi⁴ nca³tsˀi³ nca³ qui³si³cja³ˀa¹ya³jin³-le⁴ cˀen³ Jesús.
ACT 17:32 Cˀia⁴ nca³ qui³nčhˀoe¹ nca³ fa³ˀa²ya³-ni³le⁴ xi³ mˀen³, tjin¹ cˀa³ xi³ to⁴tsa³qui³jno²que³, cˀoa⁴ xi³cˀa³ qui³tso²: Coi⁴no¹ˀya²-lai²⁴jin⁴ jo³ tjin¹-ni³ je²-vi⁴ nqui²jnco³ ni⁴čhjin³.
ACT 17:33 Cˀoa⁴-sˀin² Pablo ji³tjo³jin³ va³sen³-le⁴.
ACT 17:34 To⁴nca³ tjin¹ cˀa³ xi³ coan³cjain¹-le⁴, xi³ qui³tˀa³-le⁴ Pablo. Ti⁴je²-ni³ Dionisio, je² xi³ tsˀe⁴ nti⁴tsin⁴ Areópago, cao⁴ jnco³ chjon⁴² xi³ Dámaris ˀmi², cao⁴ ncjin²-sa³ xi³cˀa³ xi³ qui³tˀa³-le⁴.
ACT 18:1 Cˀia⁴ nca³ je³ja³ˀa³to³ je² cjoa⁴-vi⁴, Pablo ji³tjo³ ya⁴ Atenas, ji³cho² ya⁴ Corinto. Qui³sa³te³jin³ jnco³ cho⁴ta⁴ judío xi³ Aquila ˀmi², xi³ ya⁴ na³nqui³ Ponto qui³tsin³. To⁴sˀa⁴ choa³ ni⁴čhjin³ tjin¹ nca³ ja³ˀai³-ni³ Italia cao⁴ Priscila chjon⁴²-le⁴ (nca⁴ je² Claudio tsa³ca³te¹xo³ma³ nca³ nca³tsˀi³ cho⁴ta⁴ judío coi⁴tjo³sje³jin³ ya⁴ Roma). Pablo ji³cho²con²-le⁴.
ACT 18:3 Coi³ nca³ ti⁴je²-ni³ xa¹ tjin¹-le⁴ tsa³cˀe²jna³cao⁴ nca³ je², qui³si³xa¹cao⁴. Coi³ xa¹ tjin¹-le⁴ nca³ vˀe¹nta³ carpa.
ACT 18:4 Ya⁴³ ntˀia³ sinagoga ña³qui³ cˀoa⁴-sˀin² tsa³cja¹cao⁴ nca³ntsjai² ni⁴čhjin³ ni²cja¹ya³. Cˀoa⁴-sˀin² coan³me³-le⁴ nca³ si⁴²ˀi³nta³jin³ cho⁴ta⁴ judío cao⁴ cho⁴ta⁴ griego.
ACT 18:5 Cˀia⁴ nca³ ja³ˀai³jen³-ni³ Macedonia, Silas cao⁴ Timoteo, Pablo ña³qui³ tsa³cˀe¹ne²-le⁴ yao³-le⁴ nca³ qui³nchja⁴ya³ je² en¹-le⁴ Ni³na¹. Qui³tsjoa³-le⁴ en¹ cho⁴ta⁴ judío, nca³ je² Jesús xi³ ti⁴je²-ni³ Cristo.
ACT 18:6 To⁴nca³ je² cho⁴ta⁴-ve⁴ to⁴tsa³ca³te¹cjao³ˀa² Pablo, cˀoa⁴ qui³nchja⁴ˀaon³-le⁴. Cˀia⁴ Pablo tsa³cˀe¹tsao³jne³ na³jño³-le⁴, cˀoi⁴qui³tso²-le⁴: Cao⁴ njin¹-no³ tˀe²chji¹-nio³, tsje³ nia¹³ nca³ an³. Ntˀai⁴-vi⁴ cjoi¹con³-le⁴ cho⁴ta⁴ xi³ li² judío-jin².
ACT 18:7 Ji³tjo³-ni³ ya⁴-ve⁴. Ja³ˀa³sˀen³ ni³ˀya³-le⁴ jnco³ xi³ Justo ˀmi², xi³ ve³xcon¹ Ni³na¹. Ni³ˀya³-le⁴ ya⁴ cjio³cjao³ cao⁴ ntˀia³ sinagoga.
ACT 18:8 Crispo, je² xi³ cho⁴ta⁴ti¹tjon²-le⁴ ntˀia³ sinagoga, cao⁴ nca³tsˀi³ xi³ tjio¹ ni³ˀya³-le⁴, coan³cjain¹-le⁴ xi³ tˀa³tsˀe⁴ Nai³-na¹. Ncjin² cho⁴ta⁴ corintios xi³ qui³nčhˀoe¹, coan³cjain¹-le⁴, cˀoa⁴ qui³sa³te³nta¹.
ACT 18:9 Cˀoa⁴ nca³ ni⁴tjen⁴ qui³tsˀai²-le⁴ ni³jña¹ Pablo. Je² Nai³-na¹ tsa³cja¹cao⁴: A³li² jcon³-jin²³, ti⁴no²cjoai⁴, a³li²jyo¹-jin² vi³jnai³.
ACT 18:10 An³ ti²jna⁴cao⁴-le²³. Ni⁴ˀya³-jin² xi³ cja⁴ˀai¹³nca¹ si⁴²cao⁴-li². An³ cjai¹nca³ tjin¹-na³ cho⁴ta⁴ i⁴ ˀnte³-vi⁴.
ACT 18:11 Jnco³ no¹va³sen³ tsa³cˀe²jna³ ya⁴-ve⁴. Tsa³ca³co¹ya³-le⁴ en¹-le⁴ Ni³na¹.
ACT 18:12 Cˀia⁴ nca³ Galión coan³ cho⁴ta⁴ti¹tjon² ya⁴ ˀnte³ Acaya, je² cho⁴ta⁴ judío tsa³qui³so¹tjen⁴ co²ntran⁴-le⁴ Pablo, nca³ to⁴jnco³ tsa³cˀe¹ yao³-le⁴. Qui³cao⁴ ntˀia³va³sen³.
ACT 18:13 Cˀoi⁴qui³tso²: Je² Pablo ti¹vi³ncha¹ˀa³ cho⁴ta⁴ nca⁴ cja⁴ˀai¹-sˀin² scoe⁴xcon¹ Ni³na¹, nca³ tsi² tsa² cˀoa⁴tjin¹ jo³ tso² cjoa⁴te¹xo³ma³.
ACT 18:14 Cˀia⁴ nca³ me³coi⁴nchja⁴ Pablo tsa²cai³, je² Galión cˀoa⁴qui³tso²-le⁴ cho⁴ta⁴ judío: Tsa² jnco³ cjoa⁴tsˀen⁴, a³xo⁴ jnco³ je¹ xi³ tse³ tjin¹, cjoa⁴qui²xi⁴ ni¹ nca³ coi³nčhˀoe³ en¹-no³,
ACT 18:15 to⁴nca³ tsa² je² cjoa⁴ je²-vi⁴ to⁴ˀen¹-ni³, tsa² to⁴jan³ˀain¹-ni³, cˀoa⁴ tsa² to⁴tˀa³tsˀe⁴ cjoa⁴te¹xo³ma³-no³, to⁴jon² tˀe²nta³jion³. A³li²coi³ me³-na³ nca³ an³ cˀoe³nta³jian³ je² cjoa⁴ xo⁴tjin¹-ve⁴.
ACT 18:16 Tsa³cˀaon³sje³ ntˀia³va³sen³.
ACT 18:17 Cˀia⁴ nca³tsˀi³ cho⁴ta⁴ griego qui³scoe¹ Sóstenes, je² cho⁴ta⁴ti¹tjon²-le⁴ ntˀia³ sinagoga. Tsa³ca¹-le⁴ ya⁴ nqui³xcon⁴ ntˀia³va³sen³. Galión li²coi³ qui³si³sin³-le⁴ je² cjoa⁴-vi⁴.
ACT 18:18 Ncjin² ni⁴čhjin³ tsa³cˀe²jna³ Pablo nca³ ya⁴. Cˀia⁴ qui³si³xa³tˀa³ je² ntsˀe⁴. Cao⁴ Priscila cao⁴ Aquila qui³son²nta¹ sa³ˀnta³ ya⁴ na³nqui³ Siria. Tsa³cˀe¹jon³ ntsja⁴jco⁴ ya⁴ Cencrea, nca⁴ cˀoa⁴-sin² qui³tsjoa³-le⁴ choa⁴ nca³ qui³tsjoa³-le⁴ tsˀoa³ Ni³na¹.
ACT 18:19 Ja³ˀai³ ya⁴ Efeso, ya⁴ qui³si³ca³tio¹ Priscila cao⁴ Aquila. Je² ja³ˀa³sˀen³ ya⁴³ ntˀia³ sinagoga. Tsa³cja¹cao⁴ cho⁴ta⁴ judío.
ACT 18:20 Je² cho⁴ta⁴ judío tsa³cˀe¹tsˀoa³-le⁴ Pablo nca³ ncjin²-sa³ ni⁴čhjin³ ca²ta³vˀe²jna³cao⁴ nca³ je². To⁴nca³ je² coan³cai³-le⁴.
ACT 18:21 Qui³si³xa³tˀa³ je² cho⁴ta⁴-ve⁴, cˀoi⁴qui³tso²: Cjai¹nca³ ma³chjen¹ nca³ ya⁴ ti²jna⁴ je² sˀoi¹ xi³ nčhoa¹ ya⁴ Jerusalén. To⁴nca³ cjoa²ˀai⁴con³ nqui²jnco³cˀa²-nca¹ni³no³, tsa² cˀoa⁴-sˀin² me³-le⁴ Ni³na¹. Ji³tjo³-ni³ ya⁴ Efeso.
ACT 18:22 Ji³cho² ya⁴ Cesarea, ji³tjo³-ni³ barco, qui³mi³ ya⁴ Jerusalén. Cˀia⁴ nca³ je³qui³si³xa³tˀa³ na⁴xi⁴na³nta¹-le⁴ Cristo, qui³jen³ ya⁴ Antioquía.
ACT 18:23 Ya⁴ tsa³cˀe²jna³ jo³ tjin¹ ni⁴čhjin³. Cˀia⁴ ji³tjo³. Qui³ xqui⁴ na⁴xi⁴na³nta¹ ya⁴ ˀnte³ Galacia, ya⁴ ˀnte³ Frigia. Qui³tsjoa³-le⁴ nca³nˀion¹ nca³tsˀi³ cho⁴ta⁴-le⁴ Cristo.
ACT 18:24 Cˀia⁴ ji³cho² ya⁴ Efeso jnco³ cho⁴ta⁴ judío xi³ Apolos ˀmi², xi³ qui³tsin³ ya⁴ Alejandría, jnco³ cho⁴ta⁴xˀin⁴ xi³ ña³qui³ nˀion¹ nta³ ma³-le⁴ nchja⁴ya³. Cjai¹nca³ nta³ ma³-le⁴ xon⁴ Escritura.
ACT 18:25 Je²-vi⁴ xa¹ qui³sco²tˀa³ya³-ni³ ntia⁴²-le⁴ Nai³-na¹. Nˀion¹ xa¹ti¹ya³ yao³-le⁴. A³li² to⁴cˀoa⁴cji³ nta³ qui³nchja⁴ya³, a³li² to⁴cˀoa⁴cji³ nta³ tsa³ca³co¹ya³ nca³yi³je³ cjoa⁴ xi³ tˀa³tsˀe⁴ Nai³-na¹, nta³ tsa² to⁴je² cjoa⁴sa³te¹nta¹-le⁴ Juan xi³ je² tsa³ve³.
ACT 18:26 Coan³nˀion¹con³, tsa³cˀe¹tsˀia⁴ nca³ qui³nchja⁴ya³ ya³ ntˀia³ sinagoga. Cˀia⁴ nca³ Priscila cao⁴ Aquila qui³nčhˀoe¹-le⁴, qui³scoe¹ Apolos, nqui²sa⁴ nta³ qui³tso²ya³tsen³-le⁴ je² ntia⁴²-le⁴ Ni³na¹.
ACT 18:27 Apolos coan³me³-le⁴ nca³ coai⁴ ya⁴ Acaya. Tsa³cˀe¹ne²-le⁴ je² ntsˀe⁴ nca³ qui³squi³-le⁴ je² cho⁴ta⁴-le⁴ Cristo nca³ scoe¹tjao². Cˀia⁴ nca³ ji³cho², cjai¹nca³ nta³ tsa³ca³sen¹cao⁴ je² xi³ coan³cjain¹-le⁴ xi³ to⁴tˀa³tsˀe⁴ cjoa⁴nta³.
ACT 18:28 A³li² to⁴cˀoa⁴cji³ nca³nˀion¹ qui³sˀe³-le⁴ nca³ qui³si³ˀi³nta³jin³ cho⁴ta⁴ judío nqui³xcon⁴ nca³tsˀi³. Tsa³ca³co¹-le⁴ cao⁴ xon⁴ Escritura nca³ je² Jesús xi³ ti⁴je²-ni³ Cristo.
ACT 19:1 Cˀoa⁴coan³ cˀia⁴ nca³ ti¹jna³ Apolos ya⁴ Corinto, Pablo ja³ˀai³ ya⁴ Efeso. Je³tsˀa³mjen³ nca³qui³jnta² ja⁴ˀnte³ ja⁴tˀain³-ni³. Qui³sa³te³jin³ cˀa³ cho⁴ta⁴-le⁴ Cristo.
ACT 19:2 I⁴ qui³tso²-le⁴: A³ qui³tjoe¹-no³ je² Espíritu Santo cˀia⁴ nca³ coan³cjain¹-no³. Cˀoa⁴ je² cho⁴ta⁴-ve⁴ˀni³ cˀoa⁴qui³tso²-le⁴: Ma³jain², ni⁴sa³ˀnta³ li²coi³ qui³no²ˀyai²⁴-jin⁴ tsa² tjin¹ Espíritu Santo.
ACT 19:3 Cˀia⁴ Pablo qui³tso²: ˀya¹-ni³ xi³ tˀa³tsˀe⁴ qui³sa³te³ntao¹³-ˀni³. Cho⁴ta⁴-ve⁴ cˀoa⁴qui³tso²: Tˀa³tsˀe⁴ Juan.
ACT 19:4 Cˀoi⁴qui³tso² Pablo: Je² Juan tsa³ca³te¹nta¹-ni³ cˀia⁴ nca³ je³qui³si³cˀa³ntjai²ya³ cjoa⁴fa³ˀai³tsjen³-le⁴ cho⁴ta⁴. Cˀoi⁴qui³tso²-le⁴ cho⁴ta⁴ nca³ ca²ta³ma³cjain¹-le⁴ xi³ tˀa³tsˀe⁴ je² xi³ cjoa⁴ˀai¹tjen⁴nqui³-le⁴, xi³ tso²-ni³ xi³ tˀa³tsˀe⁴ je² Jesús xi³ Cristo.
ACT 19:5 Cˀia⁴ nca³ qui³nčhˀoe¹ je²-vi⁴, qui³sa³te³nta¹ xi³ tˀa³tsˀe⁴ jan³ˀain¹-le⁴ Nai³-na¹ Jesús.
ACT 19:6 Cˀia⁴ Pablo tsa³ca¹jna³son²-le⁴ ntsja³, ja³ˀai³jin³ ni⁴ma⁴-le⁴ je² Espíritu Santo. Qui³nchja⁴cao⁴ xi³ cja⁴ˀai¹ en¹, qui³nchja⁴ya³.
ACT 19:7 Nca³tsˀi³ ma³-la⁴ tsa² te³jao² cho⁴ta⁴.
ACT 19:8 Pablo ja³ˀa³sˀen³ ya⁴ya³ ntˀia³ sinagoga. Coan³nˀion¹-con³, jan²-la⁴ sa¹ qui³nchja⁴. Tsa³cja¹cao⁴ tsa³cˀe¹ne²-le⁴ xi³ tˀa³tsˀe⁴ je² cjoa⁴te¹xo³ma³-le⁴ Ni³na¹.
ACT 19:9 To⁴nca³ ta²ja³ tsa³ca³tio² cˀa³. Li²coi³ coan³cjain¹-le⁴. Chˀao³ qui³tso² xi³ tˀa³tsˀe⁴ ntia⁴²-le⁴ Nai³-na¹ nqui³xcon⁴ nca³tsˀi³ cho⁴ta⁴. Pablo tsa³ca³sen²xin²-le⁴, cˀoa⁴ tsa³cˀa³sje³jin³-le⁴ cho⁴ta⁴-le⁴ Cristo. Nchaon³nchaon³ tsa³cja¹cao⁴ ya⁴³ ntˀia³ scoe²la⁴-le⁴ jnco³ cho⁴ta⁴ xi³ Tirano ˀmi².
ACT 19:10 Jao² no¹ nca³ cˀoa⁴coan³. Cˀoa⁴-sˀin² nca³ nca³tsˀi³ xi³ tjio¹ ya⁴ Asia, cho⁴ta⁴ judío cao⁴ cho⁴ta⁴ griego, qui³nčhˀoe¹ en¹-le⁴ xi³ tˀa³tsˀe⁴ Nai³-na¹ Jesús.
ACT 19:11 Cˀoa⁴-sˀin² nca³ nˀion¹ tse³ cjoa⁴xcon¹ xi³ qui³sˀin³ Ni³na¹ cao⁴ ntsja³ Pablo.
ACT 19:12 Sa³ˀnta³ cˀoa⁴-ti⁴ fi² ca³ni¹-le⁴ cho⁴ta⁴ xi³ tjio¹mˀen³ na³jño³ pa³ne²to⁴ cao⁴ na³jño³fa³tˀa³ xi³ je³tsa³ca¹tˀa³ yao³-le⁴ Pablo. Ji³tjo³-ni³le⁴ nca³yi³je³ chˀin³-le⁴, cao⁴ je² ntjao⁴ xi³ nta³jin³ xi³ tjin¹jin³ ni⁴ma⁴-le⁴.
ACT 19:13 Cˀoa⁴-ti⁴ tjin¹ cˀa³ cho⁴ta⁴ judío xi³ ma³-le⁴ chˀa²sje³ suerte xi³ to⁴ya⁴ ntia⁴² si¹ma³. Je² coan³me³-le⁴ nca³ qui³nchja⁴-le⁴ je² jan³ˀain¹-le⁴ Nai³-na¹ Jesús xi³ tˀa³tsˀe⁴ je² xi³ ntjao⁴ xi³ nta³jin³ tjio¹jin³ ni⁴ma⁴-le⁴. Cˀoi⁴qui³tso²-le⁴: An³ va³te³xo³ma³-no³ xi³ to⁴tˀa³tsˀe⁴ Jesús, je² xi³ Pablo tso²ya³.
ACT 19:14 Ña³to³ ma³-ni³ xti³-le⁴ jnco³ cho⁴ta⁴ judío xi³ Sceva ˀmi², xi³ na⁴ˀmi³ti¹tjon², xi³ cˀoa⁴qui³sˀin³.
ACT 19:15 Cˀia⁴ qui³nchja⁴ je² ntjao⁴ xi³ nta³jin³, cˀoi⁴qui³tso²: Je² Jesús ˀve³-nia¹³ ˀya³-ni³ve⁴, cˀoa⁴-ti⁴ ˀve³-nia¹³ ˀya³ cjoan³ Pablo, to⁴nca³ jon² ˀya¹ nio¹³.
ACT 19:16 Je² cho⁴ta⁴xˀin⁴ xi³ ntjao⁴ xi³ nta³jin³ ti¹jna³jin³ ni⁴ma⁴-le⁴ qui³squi²⁴ne²-le⁴, qui³si³qui³njen³-le⁴ xti³-ve⁴. Nqui²sa⁴ coan³-le⁴ nca³ je² cao⁴-ni³ tsa² xti³-ve⁴. Cˀoa⁴-sˀin² nca³ to⁴tsa³nca³ ya⁴ ni³ˀya³-ve⁴, nca³ cjio³jti², nca³ qui³tsin²ˀaon³.
ACT 19:17 Je²-vi⁴ tsa³ˀya³-le⁴ tˀa³tsˀe⁴ nca³tsˀi³ xi³ tjio¹ ya⁴ Efeso, cho⁴ta⁴ judío cao⁴ cho⁴ta⁴ griego. Ña³qui³ qui³tso³cjon¹ nca³tsˀi³. A³li² to⁴cˀoa⁴cji³ qui³tsin³ncˀa³ jan³ˀain¹-le⁴ Nai³-na¹ Jesús.
ACT 19:18 Cjai¹nca³ to⁴ncjin² xi³ coan³cjain¹-le⁴ xi³ ja³ˀai³ tso²ya³nta³, cˀoa⁴ qui³tso² jo³ chˀao³ qui³sˀin³ xa¹-le⁴.
ACT 19:19 Cˀoa⁴-ti⁴ ncjin² xi³ cˀoa⁴-sˀin² coan³-le⁴ je² cjoa⁴chˀa²-na⁴cha⁴ ja³ˀai³cao⁴ libro-le⁴ tjio¹va³ca¹ nqui³xcon⁴ nca³tsˀi³. Tsa³cˀa³sje³ cuenta jo³ tjin¹ chji¹-le⁴ xon⁴ xi³ tsa³ca³ca¹. Coan³sjai³-le⁴ nca³ ña³chan²te³ jmi³ chji¹-le⁴ nca³yi³je³.
ACT 19:20 Cˀoa⁴-sˀin² nca³ nˀion¹ nta³ tsa³nca³son² je² en¹-le⁴ Nai³-na¹, cˀoa⁴ nˀion¹ qui³sˀe³-le⁴ nca³nˀion¹.
ACT 19:21 Cˀia⁴ nca³ je³je³tˀa³ je² cjoa⁴-vi⁴, cˀoa⁴-sˀin² coan³me³-le⁴ ni⁴ma⁴-le⁴ Pablo nca³ qui³ ya⁴ Jerusalén, cˀia⁴ nca³ je³ja³ˀa³to³ ya⁴ Macedonia cao⁴ Acaya. Cˀoi⁴qui³tso²: Cˀia⁴ nca³ je³ti²jna⁴ ya⁴-ve⁴, cˀoa⁴-la²ti⁴ ma³chjen¹ nca³ cjoia¹³ ya⁴ Roma.
ACT 19:22 Cˀia⁴ Pablo qui³sca³ni¹ Timoteo cao⁴ Erasto ya⁴ Macedonia. Je² jao²-ve⁴ xi³ tjio¹vi³ncha¹cao⁴. To⁴nca³ Pablo tsa³cˀe²jna³ jo³ tjin¹ ni⁴čhjin³ ya⁴ Asia.
ACT 19:23 Cˀia⁴ a³li² to⁴jo³ xi³ cji³tse³ cjoa⁴si³ xi³ tˀa³tsˀe⁴ ntia⁴²-le⁴ Nai³-na¹.
ACT 19:24 Jnco³ cho⁴ta⁴ xi³ si¹xa¹cao⁴ taon⁴čhoa³ xi³ Demetrio ˀmi², xi³ si¹nta³-ni³ taon⁴čhoa³ xco¹son²-le⁴ Diana. Cjai¹nca³ to⁴tse³ cjoa⁴ma⁴ qui³si³qui³njen³-ni³le⁴ je² xi³ ma³-le⁴ xa¹-vi⁴.
ACT 19:25 Tsa³cˀe¹xco¹ xi¹ncjin¹ xi³ je² va¹-vi⁴ ma³-le⁴, cao⁴ xi³cˀa³ xi³ ti⁴coi³-ni³ cjoa⁴ma⁴ tjin¹-le⁴. Je² Demetrio cˀoi⁴qui³tso²-le⁴: Nca³tsˀio³ ˀya³-nio¹³ nca³ je² xa¹-na¹vi⁴ cjai¹nca³ to⁴tse³ taon⁴ si¹qui³njen³-na¹.
ACT 19:26 ˀya³-nio¹³, cˀoa⁴ no²ˀya²-nio¹³ nca³ je² Pablo cˀoa⁴-sˀin² qui³si³ˀi³nta³jin³ ncjin² cho⁴ta⁴ nca⁴ xin² ntia⁴² qui³, a³li² tsa² to⁴ˀi⁴-jin² Efeso-vi⁴, to⁴nca³ me³-la⁴ tsa² nca³qui³jnta² Asia. Cˀoa⁴tso²-le⁴: A³li² Ni³na¹-jin² je² xi³ ntsa⁴² ma³nta³-ni³.
ACT 19:27 A³li² tsa² to⁴coi³-jin² cjoa⁴jcon³ xi³ tjin¹ nca³ to⁴coi³ je² cjoa⁴ma⁴ je²-vi⁴ si⁴²soa³-ni³na¹, to⁴nca³ sa³ˀnta³ je² yo⁴nco⁴-le⁴ na⁴-na¹ Diana taon³ jcha⁴, cˀoa⁴ cjoa⁴je³ya³-le⁴ je² xco¹son²-ve⁴ xi³ ve³xcon¹ nca³tsˀi³ nca³qui³jnta² Asia, cˀoa⁴ nca³qui³jnta² son³ˀnte³, coi⁴xo⁴ya³.
ACT 19:28 Cˀia⁴ nca³ qui³nčhˀoe¹ je² en¹ xo⁴ tso²-ve⁴, a³li² to⁴cˀoa⁴cji³ coan³jti³-le⁴ cho⁴ta⁴-ve⁴. Qui³squi³ˀntia¹xa¹ cˀoi⁴qui³tso²: A³li² to⁴ncˀa³ ti¹jna³ je² Diana xi³ tsˀe⁴ cho⁴ta⁴ efesios.
ACT 19:29 A³li² to⁴cˀoa⁴cji³ cjoa⁴si³ qui³sˀe³ ya⁴ na⁴xi⁴na³nta¹-ve⁴. To⁴jnco³ ja³ˀa³sˀen³jtin¹ ya⁴ ˀnte³jin³sen¹ jña³ ma³ña³ cho⁴ta⁴. Qui³tsoa³, cˀoa⁴ qui³cao⁴ Gayo cao⁴ Aristarco, cho⁴ta⁴ macedonios xi³ mi²yo⁴-le⁴.
ACT 19:30 Coan³me³-le⁴ Pablo nca³ cjoa⁴ˀa³sˀen³con³-le⁴ cho⁴ta⁴ na⁴xi⁴na³nta¹, to⁴nca³ je² cho⁴ta⁴-le⁴ Cristo li²coi³ qui³tsjoa³ˀnte²-le⁴.
ACT 19:31 Cˀoa⁴-ti⁴ tjin¹ cˀa³ je² xi³ ma³xtoan²ti¹tjon² ya⁴ Asia, xi³ mi²yo⁴-le⁴ Pablo, xi³ qui³si³ca³sen¹cjoa⁴-le⁴. Tsa³cˀe¹tsˀoa³-le⁴ nca³ tsi² ya⁴ coai⁴ ya⁴ ˀnte³-ve⁴.
ACT 19:32 Qui³squi³ˀntia¹ nca³ jnco¹jnco¹ cˀa³ cja⁴ˀai¹ cja⁴ˀai¹ qui³tso². Je² junta to⁴qui³sˀin³ jo³ qui³sˀin³, cˀoa⁴ je² xi³ nqui²sa⁴ ncjin² li²coi³ ve³ a³-ni³ve⁴ nca³ coan³ña³-ni³.
ACT 19:33 Tsa³cˀa³sje³jin³-le⁴ cho⁴ta⁴ncjin²-ve⁴ je² Alejandro. Je² cho⁴ta⁴ judío qui³tson²ntsja¹. Cˀia⁴ Alejandro qui³sco²mi³ ntsja³, jyo¹-la² ti⁴yo³ cˀoi⁴qui³tso². Me³-le⁴ nca³ tsjoa¹-le⁴ cjoa⁴qui²xi⁴ cho⁴ta⁴ na⁴xi⁴na³nta¹-ve.
ACT 19:34 To⁴nca³ tsa³ve³ nca³ je² ni¹ cho⁴ta⁴ judío. Ña³qui³ to⁴jnco³ jta³ qui³ nca³tsˀi³. Jao² hora-la⁴ cˀoa⁴-sˀin² tsa³cˀe¹jta³: A³li² to⁴ncˀa³ ti¹jna³ je² Diana xi³ tsˀe⁴ cho⁴ta⁴ efesio.
ACT 19:35 Cˀia⁴ nca³ je² cho⁴ta⁴ scribano qui³si³cˀe¹jyo² cho⁴ta⁴, cˀoi⁴qui³tso²: Nca³tsˀio³ cho⁴ta⁴ efesio, ˀya¹-ni³ cho⁴ta⁴ xi³ tjin¹ xi³ tsi²coi³ ve³ nca³ je² na⁴xi⁴na³nta¹-le⁴ cho⁴ta⁴ efesio nta³ si¹coi²nta⁴ je² xco¹son² ni³na¹ Diana, je² xco¹son² xi³ je² Júpiter qui³sca³jen³-ni³.
ACT 19:36 Cˀoa⁴-sˀin²ˀni³ ni⁴ˀya³-jin² xi³ coan⁴ nca³ cˀoe⁴²ˀma³ je²-vi⁴. Cjai¹nca³ ma³chjen¹ nca³ coi⁴yo³jyo¹³, nca³ tsi² tsa³ jme³ xi³ to⁴xquia⁴ sˀiaon⁴³.
ACT 19:37 Jon² ca²fa²ˀai⁴cao⁴³ je² cho⁴ta⁴-ve⁴, nca³ tsi²jme³ xi³ qui³si³che¹ ya⁴³ yo⁴nco⁴-no³, ni⁴qui³nchja⁴ˀaon³-jin²le⁴ je² ni³na¹-no³.
ACT 19:38 Tsa² je² Demetrio cao⁴ cho⁴ta⁴ xi³ si¹xa¹cao⁴ tjin¹cao⁴-le⁴ cjoa⁴, tjin¹ cjoa⁴te¹xo³ma³, tjin¹ cho⁴ta⁴ti¹tjon². Ca²ta³va¹nqui³ xi¹ncjin¹.
ACT 19:39 Cˀoa⁴ tsa² me³-no³ nca³ fa³nquio³ xi³ cja⁴ˀai¹ cjoa⁴, ca²ta³sˀe³jna³ junta jo³ tso² cjoa⁴te¹xo³ma³. Cˀoa⁴ ca²ta³sˀe³nta³ xi³ cjoa⁴qui²xi⁴.
ACT 19:40 Jo³-la²ni³ tsa² tjin¹ xi³ coa⁴²nqui³-na¹, nca³ ca²vˀe²jna³² cjoa⁴si³ ntˀai⁴. A³li²coi³ coan⁴² cˀoe⁴² en¹ a³-ni³ nca³ cˀoa⁴-sˀin² ca²ma³ña³-nia¹ nca⁴ tsi²jme³ cjoa⁴ xi³ tjin¹.
ACT 19:41 Cˀia⁴ nca³ je³cˀoa⁴qui³tso², tsa³cˀe¹ne²-le⁴ nca³tsˀi³ nca³ qui³-ni³.
ACT 20:1 Cˀia⁴ nca³ je³qui³sˀe³jña¹ cjoa⁴si³, Pablo qui³nchja⁴-le⁴ cho⁴ta⁴-le⁴ Cristo. Tsa³cˀe¹ne²-le⁴, qui³tsoa³cja¹, qui³-si³xa³tˀa³, qui³ ya⁴ Macedonia.
ACT 20:2 Cˀia⁴ nca³ je³tsa³cˀa³mjen³ nca³ ya⁴, a³li² to⁴cˀoa⁴cji³ ncjin² en¹ qui³tso²ya³-le⁴, ja³ˀai³ ya⁴ Grecia.
ACT 20:3 Cˀia⁴ nca³ je³tsa³cˀe²jna³ ya⁴-ve⁴ jan² sa¹, me³ coai⁴son²-ni³ na³nta¹ ya⁴ Siria. To⁴nca³ tsa³ca³tio²chjoa²-le⁴ je² cho⁴ta⁴ judío. Cˀia⁴ qui³si³cja³ˀai³tsjen³ nca³ ti⁴coai⁴to³-nca¹ni³ ya⁴ Macedonia.
ACT 20:4 Qui³cao⁴ sa³ˀnta³ Asia je² Sópater cho⁴ta⁴ xi³ tsˀe⁴ Berea, cˀoa⁴ je² cho⁴ta⁴ xi³ tsˀe⁴ Tesalónica, Aristarco, Segundo, cˀoa⁴-ti⁴ Gayo xi³ Derbe tsˀe⁴, cˀoa⁴ Timoteo, cˀoa⁴ Tíquico, cao⁴ Trófimo xi tsˀe⁴ Asia.
ACT 20:5 Je² nca³tsˀi³ cho⁴ta⁴-vi⁴ qui³ti¹tjon². Ya⁴ qui³sco³ya²-na³jin⁴ ya⁴ Troas.
ACT 20:6 Cˀia⁴ nca³ je³ja³ˀa³to³ ni⁴čhjin³-le⁴ je² nio⁴xti²la⁴ xi³ tsin²-le⁴ na⁴ˀyo⁴san³-jin², tsa³nquin¹-ni³jin⁴ ya⁴ Filipo. Tsa³nquin¹son²ntai¹⁴-jin⁴ cao⁴ barco. Xi³ coan³ aon²-ni³ ni⁴čhjin³, ji³cho³nčhˀoai²⁴-jin⁴ nca³ je² xi³ je³tjio¹ ya⁴ Troas. Ya⁴ tsa³qui³yoi³⁴-jin⁴ ña³to³ ni⁴čhjin³.
ACT 20:7 Ni⁴čhjin³ tai²nco⁴ coan³ña³ cho⁴ta⁴-le⁴ Cristo nca³ qui³si³xcoa⁴ nio⁴xti²la⁴. Pablo tsa³cja¹cao⁴ nca³ coi⁴tjo³ nca³ nchaon³-ni³. A³li² to⁴tse³ qui³nchja⁴ya³-ni³ sa³ˀnta³ va³sen³ni⁴tjen⁴.
ACT 20:8 Cjai¹nca³ to⁴ncjin² lámpara tjin¹ ja⁴ya³ cuarto jña³ nca³ tsa³ca³tio²jtin¹.
ACT 20:9 Jnco³ cho⁴ta⁴xti³ xi³ Eutico ˀmi² ya⁴ ti¹jna³jčho³ ventana. Nˀion¹ coan³ni³jña¹-le⁴ nca³ cˀoa⁴-sˀin² to⁴tse³ qui³nchja⁴ Pablo. Ya⁴ tsa³ca¹jna³fe². Qui³sca³nqui³ xi³ ma³jan²-ni³ piso. Je³qui³jna³cˀen³ nca³ qui³sco²mi³tjen⁴.
ACT 20:10 Cˀia⁴ ji³tjo³jen³ Pablo, tsa³ca¹jna³son²-le⁴ qui³tsoa³cja¹ cˀoi⁴qui³tso²: A³li² cˀoa⁴-jin² ma³-no³, nca⁴ ti¹jna³con³ ni⁴ma⁴-le⁴.
ACT 20:11 Cˀia⁴ nca³ qui³mi³ nqui²ntia³-ni³ Pablo, qui³si³xcoa⁴ nio⁴xti²la⁴, tsa³cjen². A³li² to⁴cˀoa⁴cji³ qui³nchja⁴ nqui²ntia³ sa³ˀnta³ qui³sˀe³-le⁴ sen¹. Cˀia⁴ qui³-ˀni³.
ACT 20:12 Cho⁴ta⁴ ja³ˀai³cao⁴ je² cho⁴ta⁴xti³-ve⁴ nca³ ti¹jna³con³. Cjai¹nca³ to⁴tsa³cˀe¹ya³tsjoa³-ni³con³ cho⁴ta⁴.
ACT 20:13 Cˀoa⁴ jin⁴-jin⁴ tsa³nquin¹ti¹tjoin²⁴-jin⁴ jña³ ti¹qui³jna³ barco. Tsa³nquin¹son²ntai¹⁴-jin⁴ sa³ˀnta³ ya⁴ Asón jña³ nca³ coan³jnco³-ni³jin⁴ cao⁴ Pablo. Je² cˀoa⁴-sˀin² coan³me³-le⁴ nca³ ntia⁴² ntso⁴co⁴ coai⁴-ni³.
ACT 20:14 Cˀia⁴ nca³ coan³jncoi³⁴-jin⁴ ya⁴ Asón, qui³chjoai¹⁴-jin⁴ Pablo ja⁴ya³ chi³tso³, ja²ˀai⁴-jin⁴ ya⁴ Mitilene.
ACT 20:15 Nqui²jnco³ cˀa² tsa³nquin¹son²ntai¹⁴-jin⁴ cao⁴ barco. Xi³ coan³nchaon³-ni³ ji³choi³⁴-jin⁴ ya⁴ nqui³xcon⁴ Quío. Cˀia⁴ nca³ ti⁴coan³nchaon³-nca¹ni³ ya⁴ tsa³qui³yoi³⁴-jin⁴ puerto Samos. Tsa³qui³yo³cja¹yai³⁴-jin⁴ ya⁴ Trogilio. Xi³ coan³nchaon³-ni³ ji³choi²⁴-jin⁴ ya⁴ Mileto.
ACT 20:16 Pablo qui³si³cja³ˀai³tsjen³ nca³ coai⁴son²nta¹, to⁴cjoa⁴ˀa³to³qui²xi⁴ Efeso. Cai³-le⁴ nca³ si⁴²tse³ya²-le⁴ yao³-le⁴ ya⁴ Asia. Qui³si³xa¹ti¹ya³ tsa² coi³ ni⁴čhjin³ coi⁴cho³nčhˀoe² sˀoi¹ Pentecostés ya⁴ Jerusalén.
ACT 20:17 Cˀia⁴ nca³ ti¹jna³-sa³ ya⁴ Mileto, qui³si³ca³sen¹cjoa⁴ ya⁴ Efeso. Qui³nchja⁴-le⁴ cho⁴ta⁴jchi¹nca³-le⁴ je² na⁴xi⁴na³nta¹-le⁴ Cristo.
ACT 20:18 Cˀia⁴ nca³ ja³ˀai³con²-le⁴ cˀoi⁴qui³tso²-le⁴: Na¹nta³ tjin¹jin³-no³ jo³-sˀin² nca³ qui³coa⁴ yao³-na⁴ cˀia⁴ nca³ tsa³ca²te⁴jna³cao⁴-no³ nca³ntsjai² sa³ˀnta³ nca³ ja²ˀa⁴sˀen³ti¹tjoan² i⁴ Asia.
ACT 20:19 I³nta³na³nqui³ qui³si³xa¹-le⁴ je² Nai³-na¹, cjai¹nca³ to⁴tse³ nta¹xcoan³ tsa³cˀe³jten³. A³li² to⁴cˀoa⁴cji³ cjoa⁴ xi³ coan³tˀen³ nca³ cˀoa⁴-sˀin² tsa³ca³tio²chjoa²-na³ je² cho⁴ta⁴ judío.
ACT 20:20 Ni⁴to⁴jme³-jin² xi³ coan³cai³-na³ nca³ qui³nchja²ya³jin³-no³ xi³ coan³chjen¹-no³, nca³ qui³xin²ya³-no³ nqui³xcon³ nca³tsˀio³, cˀoa⁴ xqui⁴ ni³ˀya³-no³.
ACT 20:21 Qui³tsjoa³-le⁴ en¹ je² cho⁴ta⁴ judío cao⁴ cho⁴ta⁴ xi³ li² judío-jin² nca³ ca²ta³si¹cˀa³ntjai²ya³ cjoa⁴fa³ˀai³tsjen³-le⁴ xi³ tˀa³tsˀe⁴ Ni³na¹ cˀoa⁴ ca²ta³ma³cjain¹-le⁴ xi³ tˀa³tsˀe⁴ Nai³-na¹ Jesucristo.
ACT 20:22 Ntˀai⁴-vi⁴ntai⁴ tsen³ ma³-na³ nca³ je² ni⁴ma⁴-na⁴ ti¹ca³ni¹-na³, ti²fi³-nia¹³ ya⁴ Jerusalén. A³li²coi³ ˀve³ jme³ xi³ coan⁴tˀen³ ya⁴-ve⁴.
ACT 20:23 To⁴nca³ je³ Espíritu Santo nca³qui³jnta² na⁴xi⁴na³nta¹ tsjoa¹-na³ cjoa⁴qui²xi⁴ nca³ ya⁴-xo¹ coa²te⁴jna³ nto⁴ya¹, cˀoa⁴ ya⁴ cjoa³ˀa³ cjoa⁴ñˀain³.
ACT 20:24 To⁴nca³ ni⁴jme³-jin² coi²nta⁴-na³. A³li²coi³ ni⁴ma⁴-na⁴ scon³-le⁴ xi³ to⁴tˀa³tsˀan⁴. To⁴coi³ xi³ me³-na³ nca³ nta³ si³cje³tˀa³ ntia⁴²-na⁴ cao⁴ cjoa⁴tsjoa³, cˀoa⁴ nca³ nta³ si³cje³tˀa³ je² xa¹ xi³ qui³tsjoa³-na³ je² Nai³-na¹ Jesús, nca³ tsjoa³ je² en¹nta³ xi³ tˀa³tsˀe⁴ cjoa⁴nta³-le⁴ Ni³na¹.
ACT 20:25 Cˀoa⁴ ntˀai⁴-vi⁴ tsen³ ma³-na³ nca³ li²coi³ ti⁴cho¹ˀa³-ni³nao¹³ nca³tsˀio³ jon²-vi⁴ xi³ tsa³cˀa³mjen³jin³-no³ xi³ qui³nchja²ya³jin³-no³ xi³ tˀa³tsˀe⁴ je² cjoa⁴te¹xo³ma³-le⁴ Ni³na¹.
ACT 20:26 Coi³ cˀoa⁴xin¹-no³ ntˀai⁴-vi⁴ nca³ tsi² tsa² an³ vˀa³cao⁴-na³ xi³ tˀa³tsˀe⁴ njin¹-no³.
ACT 20:27 Li²coi³ coan³cai³-na³ nca³ cˀoa⁴-sˀin² qui³nchja²ya³jin³-no³ nca³yi³je³ jo³ tso² Ni³na¹.
ACT 20:28 Jon² xi³ je² Espíritu Santo tsa³qui³ncha¹nta³-no³ nca³ si⁴coi²ntao⁴³. Jo³-ni³ tsa² va³rre² xi³ tjio¹jtin¹, cˀoa⁴-sˀin² ti⁴coi²ntao⁴³ na⁴xi⁴na³nta¹-le⁴ Nai³-na¹ xi³ je² Nai³-na¹ qui³njen²-le⁴ xi³ ti⁴tˀa³tsˀe⁴-ni³ cao⁴ njin¹-le⁴.
ACT 20:29 ˀve³-nia¹³ nca³ an³ nca³ coan⁴scan³-ni³ nca³ cjoia¹³, cjoa⁴ˀa³sˀen³jin³-no³ jo³-ni³ tsa² tsen⁴² xi³ nˀion¹ toan¹, xi³ li²coi³ si⁴²cha³tˀa³-le⁴ cho⁴ta⁴-le⁴ Cristo xi³ jo³-ni³ tsa² va³rre² tjio¹jtin¹.
ACT 20:30 Xi³ ti⁴jon²-nio³ coi⁴so¹tjen⁴jin³-no³ cho⁴ta⁴ xi³ coi⁴nchja⁴ en¹ xi³ chˀao³ tjin¹. Coan⁴me³-le⁴ coai⁴cao⁴ cho⁴ta⁴ xi³ je² coai⁴tˀa³-le⁴.
ACT 20:31 Cjia⁴to³con²³ ti⁴yo³, ca²ta³fa³ˀai³tsjen³-no³ nca³ jan² no¹ nca³ ni⁴čhjin³ nca³ ni⁴tjen⁴ li²coi³ tsa³ca²te⁴jna³jyoa¹³. Cao⁴ nta¹xcoan³ qui³xin²ya³-no³ nca³ jnco¹jnco¹³ jon².
ACT 20:32 Ntˀai⁴-vi⁴ntai⁴ nca³tsˀio³ ˀnti¹ntsˀe³, si³ca³tio²cao⁴-no³ Ni³na¹ cao⁴ je² en¹ xi³ tˀa³tsˀe⁴ cjoa⁴nta³-le⁴. Je² en¹ coan⁴-le⁴ tsjoa¹-no³ nca³nˀion¹, tsjoa¹-no³ cjoa⁴tjao² cao⁴ nca³tsˀi³ cho⁴ta⁴ xi³ je³coan³tsje³.
ACT 20:33 Ni⁴ˀya³-jin² xi³ an³ coan³xin²con³que⁴ taon⁴čhoa³-le⁴, a³xo⁴ taon⁴si³ne²-le⁴, a³xo⁴ na³jño³-le⁴.
ACT 20:34 Na¹nta³ ˀyao³ nca³ je² ntsa⁴ qui³si³xa¹ xi³ tˀa³tsˀe⁴ xi³ coan³chjen¹-na³, cˀoa⁴ xi³ tˀa³tsˀe⁴ xi³ tjio¹cao⁴-na³.
ACT 20:35 Ña³qui³ cˀoa⁴-sˀin² tsa³ca³co³-no³ nca³ cjai¹nca³ to⁴ma³chjen¹ nca³ cˀoa⁴-sˀin² ni²xa¹ nca³ coi⁴ncha³coa⁴² xi³ tjio¹mˀen³, nca³ si⁴cja³ˀai³tsjen³² je² en¹-le⁴ Nai³-na¹ Jesús xi³ qui³tso²: To⁴nqui²sa⁴ nta³-ni¹ nca³ cˀoe⁴² cao⁴-ni³ tsa² nca³ chjoe¹.
ACT 20:36 Cˀia⁴ nca³ je³cˀoa⁴qui³tso² tsa³ca³sen²xco¹nchˀin³ tsa³cˀe¹tsˀoa³ cao⁴ nca³tsˀi³.
ACT 20:37 Cˀia⁴ ña³qui³ qui³squi³ˀntia¹-ni³ nca³tsˀi³, qui³tsoa³cja¹ Pablo, tsa³cˀe¹tˀa³tsˀoa²-le⁴.
ACT 20:38 A³li² to⁴ˀaon³ coan³-le⁴ je² en¹ xi³ qui³tso² nca³ tsi² ti⁴sco¹ˀa³-ni³ je² Pablo. Qui³ ca³ni¹ ya⁴³ ntia⁴² sa³ˀnta³ jña³ qui³jna³ barco.
ACT 21:1 Cˀia⁴ nca³ je³tsa³nquin¹tˀa³-ni³lai⁴jin⁴ tsa³nquin¹son²ntai¹⁴-jin⁴ tsa³nquin¹qui²xi⁴-ni³jin⁴ sa³ˀnta³ Cos. Xi³ coan³nchaon³-ni³ ji³choi³⁴-jin⁴ ya⁴ Rodas. Cˀia⁴ tsa³nquin¹son²ntai¹⁴-jin⁴ ya⁴ Pátara.
ACT 21:2 Ya⁴ qui³sa³co³jnco³-na³jin⁴ barco xi³ coai⁴ ya⁴ Fenicia, tsa³qui³yo³yai³⁴-jin⁴ tsa³nquin¹son²ntai¹⁴-jin⁴.
ACT 21:3 Qui³cho²tsen³tˀai³-jin⁴ ya⁴ Chipre. I⁴-sˀin² ntsai⁴-jin⁴ nca³scoin¹⁴-jin⁴ ti¹jna³. To⁴jo³ cˀoa⁴-sˀin² tsa³nquin¹son²ntai¹⁴-jin⁴. Ji³choi³⁴-jin⁴ ya⁴ Siria, ji³choi³-nca¹ni³jin⁴ ya⁴ Tiro nca³ je² chˀa¹ xi³ yˀa³ barco-ve⁴ ya⁴ tsˀa³jen⁴.
ACT 21:4 Ña³to³ ni⁴čhjin³ tsa³qui³yoi³⁴-jin⁴ ya⁴-ve⁴ nca³ qui³sa³co³-na³jin⁴ je² cho⁴ta⁴-le⁴ Cristo. Cho⁴ta⁴ cˀoi⁴qui³tso²-le⁴ Pablo nca³ je² Espíritu Santo tsa³cja¹cao⁴, a³li² ˀmi³-jin²xoi¹³ ya⁴ Jerusalén.
ACT 21:5 Cˀia⁴ nca³ je³ja³ˀa³to³ je² ni⁴čhjin³-ve⁴ ji²tjoi⁴-jin⁴. Qui³ ca³ni¹ya³ntia³-na³jin⁴ nca³tsˀi³ cao⁴ ya¹nchjin¹-le⁴ cao⁴ xti³-le⁴ jña³ sa³ˀnta³ nca³ fe³tˀa³-ni³ na⁴xi⁴na³nta¹. Tsa³qui³ncha³xco¹nchˀin³⁴-jin⁴ ya⁴ ntai³na³nta¹ tsa³cˀe²tsˀoai³⁴-jin⁴.
ACT 21:6 Qui³ni²xa³tˀai³⁴-jin⁴ xi²nqui⁴-jin⁴. Cˀia⁴ tsa³nquin¹quin³⁴-jin⁴ barco. Cˀoa⁴ je² cho⁴ta⁴-ve⁴ qui³-ni³ ni³ˀya³-le⁴.
ACT 21:7 Cˀoa⁴ jin⁴-jin⁴ˀni³, ji³nčhoa³-ni³jin⁴ ya⁴ Tiro, cˀia⁴ nca³ je³ji³tja³to³ntai¹⁴-jin⁴, ji³choi³⁴-jin⁴ ya⁴ Tolemaida. Qui³ni²ti²ˀntai³⁴-jin⁴ je² ntsˀe³². Jnco³ ni⁴čhjin³ tsa³qui³yo³coai⁴-jin⁴.
ACT 21:8 Xi³ coan³nchaon³-ni³, ji²tjoi⁴-jin⁴ Pablo cao⁴ jin⁴-jin⁴ xi³ ti³yo³coai⁴-jin⁴, ja²ˀai⁴-jin⁴ ya⁴ Cesarea. Ya⁴ ji³tja³sˀain³-jin⁴ ntˀia³-le⁴ Felipe, je² xi³ qui³nchja⁴ya³-ni³ xi³ tˀa³tsˀe⁴ Ni³na¹. Je² ni¹ jnco³ xi³ ña³to³ ma³-ni³. Ya⁴ tsa³qui³yo³coai⁴-jin⁴.
ACT 21:9 Ño³ ma³ xti³ya¹nchjin¹ xo⁴nco¹ xi³ tjin¹-le⁴ Felipe, cˀoa⁴ xi³ qui³nchja⁴ya³-ni³ xi³ tˀa³tsˀe⁴ Ni³na¹.
ACT 21:10 Ncjin² ni⁴čhjin³ ya⁴ tsa³qui³yo³coai⁴-jin⁴. Jnco³ xi³ qui³nchja⁴ya³ tˀa³tsˀe⁴ Ni³na¹ xi³ Agabo ˀmi² ji³nčhoa³jen³-ni³ ya⁴ Judea.
ACT 21:11 Ji³cho²con³-na³jin⁴. Qui³scoe¹ je² nˀo¹ xi³ vˀe¹cja¹ Pablo. Ti⁴je²-ni³ Agabo tsa³cˀe¹tˀa³nˀion¹ ntso⁴co⁴ cao⁴ ntsja³, cˀoa⁴qui³tso²: Je²-vi⁴ xi³ tso² je² Espíritu Santo. Je² cho⁴ta⁴ judío ya⁴ Jerusalén cˀoi⁴-sˀin² cˀoe⁴²tˀa³nˀion¹ je² cho⁴ta⁴xˀin⁴ xi³ tsˀe⁴ nˀo¹-vi⁴. Cˀoa⁴ si¹⁴ntsja³ cho⁴ta⁴ xi³ li² judío-jin².
ACT 21:12 Cˀia⁴ nca³ qui³no²ˀyai²⁴-jin⁴ je²-vi⁴, jin⁴-jin⁴ cao⁴ je² xi³ ya⁴ ˀnte³-le⁴ tsa³cˀe²tsˀoa³-lai⁴jin⁴ Pablo, nca³ tsi² coai⁴mi³ ya⁴ Jerusalén.
ACT 21:13 Cˀia⁴ qui³nchja⁴ Pablo: Jme¹-ni³ xi³ nˀiaon²³ nca³ chi¹ˀnta¹-si¹nio³, to⁴ni²va³-lao⁴³ ni⁴ma⁴-na⁴. A³li² tsa² to⁴cˀoa⁴-jin²sˀin² ti²jna⁴nta³-nia¹³ nca³ sˀe⁴tˀa³nˀion¹-na³, cˀoa⁴-ti⁴ ti²jna⁴nta³-nia¹³ nta³ tsa² coi⁴ya¹³-nia¹³ ya⁴ Jerusalén, xi³ to⁴tˀa³tsˀe⁴ je² jan³ˀain¹-le⁴ Nai³-na¹ Jesús.
ACT 21:14 A³li²coi³ coan³ qui³chja³ˀa²xin²-lai⁴jin⁴, to⁴cˀoa⁴-sˀin² tsa³qui³yo³jyoi¹⁴-jin⁴. Cˀoa⁴tsa³cˀin²-lai⁴jin⁴: Ca²ta³vi³tjo³son² jo³-sˀin² me³-le⁴ Nai³-na¹.
ACT 21:15 Cˀia⁴ nca³ je³ja³ˀa³to³ ni⁴čhjin³-vi⁴, tsa³cˀe²xcoi¹⁴-jin⁴ tso³jmi²-na⁴jin⁴, tsa³nquin¹mi³-jin⁴ ya⁴ Jerusalén.
ACT 21:16 Cˀoa⁴-ti⁴ ji³nčhoa³cao⁴ cˀa³-na³jin⁴ je² cho⁴ta⁴-le⁴ Cristo xi³ ya⁴ Cesarea tsˀe⁴. Qui³cao⁴-na³jin⁴ ya⁴ ni³ˀya³-le⁴ je² xi³ Mnasón ˀmi², xi³ Chipre tsˀe⁴, xi³ coa²tse³ cho⁴ta⁴-le⁴ Cristo. Je² coi⁴yo³coai⁴-jin⁴.
ACT 21:17 Cˀia⁴ nca³ ji³choi³⁴-jin⁴ ya⁴ Jerusalén, je² ntsˀe³² cjai¹nca³ to⁴nta³ qui³scoe¹tjao²-na³jin⁴ cao⁴ cjoa⁴tsjoa³-le⁴.
ACT 21:18 Xi³ coan³nchaon³-ni³ Pablo cao⁴ nca³tsˀi³⁴-jin⁴ ji³tja³sˀen³chon³-lai⁴jin⁴ Jacobo. Nca³tsˀi³ cho⁴ta⁴jchi¹nca³ tjio¹xco¹.
ACT 21:19 Cˀia⁴ nca³ je³qui³si³ti²ˀnta³, Pablo cˀoa⁴-sˀin² tsa³cˀe¹tsje³ tsje³ na⁴jmi¹ jo³ tjin¹ cjoa⁴ xi³ Ni³na¹ tsa³cˀe¹nta³jin³-le⁴ cho⁴ta⁴ xi³ li² judío-jin² xi³ tˀa³tsˀe⁴ xa¹-le⁴ Pablo.
ACT 21:20 Cˀia⁴ nca³ qui³nčhˀoe¹ cho⁴ta⁴-ve⁴ tsˀa³sje³je³ya³ Ni³na¹. Cˀoi⁴qui³tso²-le⁴: Coe⁴-ni³ na¹nta³ ˀyai³, ˀnti¹ntsˀe³, a³li² to⁴ncjin² jmi³ cho⁴ta⁴ judío xi³ tjin¹ xi³ je³coan³cjain¹-le⁴. Nca³tsˀi³ cjai¹nca³ nta³ si¹cji³tjo³son² cjoa⁴te¹xo³ma³.
ACT 21:21 To⁴nca³ qui³nčhˀoe¹ xi³ tˀa³tsi⁴, nca³ cˀoa⁴-sˀin² va³co²ya³-lai⁴ nca³tsˀi³ cho⁴ta⁴ judío xi³ tjio¹cao⁴ cho⁴ta⁴ xi³ li² judío-jin² nca³ cjoa⁴ˀa²xin²-le⁴ yao³-le⁴ en¹-le⁴ Moisés. Cˀoi⁴ˀmi²-lai⁴ nca³ tsi² tsa² cjoa⁴circuncisión tsjoa¹-le⁴ ˀnti¹xti³-le⁴, nca³ tsi² tsa² ti⁴cˀoa¹mjen³-ni³ jo³ tjin¹ costumbre-na¹.
ACT 21:22 Jme¹-ni³ xi³ ma³chjen¹-ˀni³. Cjoa⁴qui²xi⁴-jin²ˀni³ nca³ coan⁴xco¹ cho⁴ta⁴, nca³ cjoi⁴nčhˀoe¹ nca³ ji³ ja²ˀai⁴.
ACT 21:23 Cˀoa⁴-la² tˀiain⁴-ˀni³, jo³ ti³ˀmi²-lai²⁴jin⁴. Ño³ ma³-ni³ cho⁴ta⁴ xi³ tjio¹jin³-na³jin⁴ xi³ qui³tsjoa³-le⁴ tsˀoa³ Ni³na¹.
ACT 21:24 Tˀin³coai⁴ je²-vi⁴, ti⁴tsjai³ yao³-li⁴ cao⁴ je². Cˀoa⁴ tˀe²chji¹³ xi³ tˀa³tsˀe⁴, jme¹-ni³ nca³ cˀoe⁴²jon³-si¹ni³ ntsja⁴jco⁴. Cˀoa⁴-sˀin² ca²ta³ve³ nca³tsˀi³ nca³ tsi² tsa² cjoa⁴qui²xi⁴ jña³-le⁴ xi³ qui³nčhˀoe¹ tˀa³tsi⁴, nca³ cˀoa⁴-ti⁴ ji³ cˀoa⁴-sˀin² ˀmi³coai⁴ yao³-li⁴ nca³ ni²tjo³soin²³ je² cjoa⁴te¹xo³ma³.
ACT 21:25 To⁴nca³ xi³ tˀa³tsˀe⁴ je² cho⁴ta⁴ xi³ li² judío-jin² xi³ je³coan³cjain¹-le⁴, cˀoa⁴-sˀin² qui³chji³-lai⁴jin⁴ nca³ cˀoa⁴-sˀin² qui³cho³son²-ni³lai⁴jin⁴ nca³ tsi² tsa² jme³ cjoa⁴ xi³ si⁴²tjo³son²-le⁴. To⁴je² xi³ ca²ta³fa³ˀa¹xin²-le⁴ yao³-le⁴ je² tso³-jmi² xi³ vˀai²tˀa³-le⁴ xco¹son², cao⁴ xi³ njin¹, cao⁴ yao³-le⁴ cho⁴ xi³ qui³cho³ˀnto¹sin³, cao⁴ xi³ cjoa⁴cha³jnqui³.
ACT 21:26 Cˀia⁴ Pablo qui³scoe¹ cho⁴ta⁴-ve⁴. Xi³ coan³nchaon³-ni³ qui³si³tsje³ yao³-le⁴ nca³ je². Ja³ˀa³sˀen³ yo⁴nco⁴ nca³ cˀoa⁴coi⁴tso⁴ jo³ tjin¹ ni⁴čhjin³ coan⁴tsje³-ni³, sa³ˀnta³ tsjoa¹tˀa³ cjoa⁴tjao² xi³ tˀa³tsˀe⁴ nca³ jnco¹jnco¹.
ACT 21:27 Cˀia⁴ nca³ me³ti¹fe³ nca³ ña³to³ ni⁴čhjin³, cˀa³ cho⁴ta⁴ judío xi³ Asia tsˀe⁴ tsa³ve³ Pablo ya⁴³ yo⁴nco⁴. Tsa³cˀe¹jna³ cjoa⁴si³ nca³tsˀi³ cho⁴ta⁴ na⁴xi⁴na³nta¹, qui³tsoa³ Pablo.
ACT 21:28 Cˀoa⁴-sˀin² qui³squi³ˀntia¹xa¹: Nca³tsˀio³ nˀai³ israelitas ti⁴ncha³cao⁴-na³jin⁴. Je²-vi⁴ cho⁴ta⁴xˀin⁴ xi³ tso²ˀva³ ca³co¹ya³-le⁴ nca³tsˀi³ nca³qui³jnta². Je²-vi⁴ xi³ ti¹si¹ca³tio¹ co²ntran⁴-le⁴ na⁴xi⁴na³nta¹-na¹ cho⁴ta⁴, cˀoa⁴ co²ntran⁴-le⁴ cjoa⁴te¹xo³ma³, cˀoa⁴ co²ntran⁴-le⁴ je² ˀnte³-vi⁴. A³li² to⁴coi³ je²-vi⁴, sa³ˀnta³ ja³ˀai³cao⁴ cho⁴ta⁴ griegos i⁴ yo⁴ncoa⁴². Cˀoa⁴-sˀin² qui³si³jnti¹ je² ˀnte³tsje³-vi⁴.
ACT 21:29 Coi³ qui³tso² nca⁴ ya⁴ na⁴xi⁴na³nta¹-ve⁴ nca³sˀa⁴ tsa³ˀya³xcon³-le⁴ cao⁴ Pablo je² Trófimo xi³ Efeso tsˀe⁴. Qui³si³cja³ˀai³tsjen³ nca³ je² Pablo ja³ˀai³cao⁴sˀen³ yo⁴nco⁴.
ACT 21:30 Cˀoa⁴-sˀin² nca³qui³jnta² na⁴xi⁴na³nta¹ qui³sa³co³ cjoa⁴si³, coan³ña³ cho⁴ta⁴. Qui³tsoa³ Pablo, tsa³cˀa³sje³ nti³tsin³-le⁴ yo⁴nco⁴. Nti⁴ton⁴ tsa³cˀe¹chjoa² xo⁴ntjoa⁴-le⁴.
ACT 21:31 Coan³me³-le³ cho⁴ta⁴ nca³ si⁴²cˀen³ Pablo. Qui³tsjoa³-le⁴ cjoa⁴qui²xi⁴ je² xi³ nca³jco⁴-le⁴ so³nta²do⁴, nca³ tjin¹ cjoa⁴si³ nca³qui³jnta² ya⁴ na⁴xi⁴na³nta¹ Jerusalén.
ACT 21:32 Je²-vi⁴ˀni³ qui³scoe¹ nti⁴ton⁴ je² so³nta²do⁴ cao⁴ nai³-le⁴, qui³to²ca³jen³nčhˀoe² cho⁴ta⁴-ve⁴. Cˀoa⁴ cho⁴ta⁴-ve⁴ tsa³ca³tio²jyo¹-ni¹, cˀia⁴ nca³ tsa³ve³ je² xi³ nca³jco⁴-le⁴ cao⁴ so³nta²do⁴. Li²coi³ ti⁴qui³si³qui²ˀaon³-ni³ Pablo.
ACT 21:33 Cˀia⁴ ja³ˀai³ je² xi³ nca³jco⁴-le⁴ so³nta²do⁴, qui³tsoa³ Pablo. Tsa³ca³te¹xo³ma³ nca³ jao² cadena cˀoe⁴²nˀion¹tˀa³. Qui³sco²na³nqui³ ˀya¹-la⁴ni³, cˀoa⁴ jme¹-ni³ xi³ qui³sˀin³.
ACT 21:34 Ya⁴jin³ cho⁴ta⁴ ncjin², nca³ i⁴ nca³ jan¹ qui³nchja⁴ xi³ cja⁴ˀai¹ qui³tso². Cˀia⁴ nca³ li²coi³ coan³cho⁴ya³-le⁴ jña³-le⁴ xi³ cjoa⁴qui²xi⁴, nca³ cˀoa⁴-sˀin² to⁴tjio¹vˀe¹jta³ncjin²ya³, tsa³ca³te¹xo³ma³-le⁴ so³nta²do⁴-le⁴ nca³ coai⁴cao⁴ ya⁴ cuartel.
ACT 21:35 Cˀia⁴ nca³ ji³cho² ya⁴ escalón, je² so³nta²do⁴ tsa³cˀa³ncˀa³ Pablo nca³ cˀoa⁴-sˀin² to⁴xcon¹ tjio¹ma³sˀin¹ cho⁴ta⁴-ve⁴.
ACT 21:36 A³li² to⁴cˀoa⁴cji³ cho⁴ta⁴ ncjin² xi³ ji³nčhoa³tjen⁴nqui³-le⁴, qui³squi³ˀntia¹xa¹: Ti⁴cˀaon³.
ACT 21:37 Cˀia⁴ nca³ je³ti¹si¹cˀa³sˀen³ ya⁴³ cuartel, Pablo cˀoi⁴qui³tso²-le⁴ je² xi³ nca³jco⁴-le⁴ so³nta²do⁴: A³ cˀoai⁴ˀnte³-nai¹³ nca³ cjoa²cao⁴ i⁴tse¹-le²³. Cˀoa⁴ je² qui³tso²: A³ ma³-li² en¹ griego?
ACT 21:38 A³ tsi² tsa² ji³ je² cho⁴ta⁴ egipcio xi³ qui³cho²mi³tjain⁴ cjoa⁴si³ nca³sˀa⁴, cˀoa⁴ ya⁴ ˀnte³tˀa³xin²tˀa³ cˀin³coai⁴ ño³ jmi³ cho⁴ta⁴ xi³ si¹cˀen³ cˀen³.
ACT 21:39 Cˀia⁴ cˀoi⁴qui³tso² Pablo: An³-vi⁴ cjoa⁴qui²xi⁴ ni¹ nca³ cho⁴ta⁴ judío ˀmi²-na³. Ya⁴ tsˀan⁴ Tarso, jnco³ na⁴xi⁴na³nta¹ xi³ nˀion¹ ti¹tjon² ya⁴ na³nqui³ Cilicia. To⁴nca³ si³je¹-le²³ cjoa⁴nta³ nca³ cˀoai⁴nte³-nai¹³ nca³ coi³nchja²coa⁴ cho⁴ta⁴ na⁴xi⁴na³nta¹.
ACT 21:40 Cˀia⁴ nca³ je³qui³tsjoa³ˀnte²-le⁴, Pablo tsa³ca³sen²nto³ ya⁴ escalón, qui³sco²mi³-le⁴ ntsja³ cho⁴ta⁴ na⁴xi⁴na³nta¹. Cˀia⁴ nca³ je³jyo¹ tsa³ca³tio², qui³nchja⁴cao⁴ en¹ hebrea, i⁴ qui³tso².
ACT 22:1 Nca³tsˀio³ ˀnti¹ntsˀe³, cao⁴ xi³ nˀao³ ˀmi²-no³, ti⁴no¹ˀyao²³ je² cjoa⁴qui²xi⁴ xi³ tsjoa³-no³.
ACT 22:2 Cˀia⁴ nca³ qui³nčhˀoe¹ nca³ en¹ hebrea qui³nchja⁴cao⁴ nqui²sa⁴ tsa³ca³tio²jyo¹. Pablo qui³tso²-le⁴:
ACT 22:3 An³-vi⁴ ña³qui³ cjoa⁴qui²xi⁴ ni¹ cho⁴ta⁴ judío ˀmi²-na³. Ya⁴ Tarso qui³tsian³, tsˀe⁴ na³nqui³ Cilicia. I⁴ coan³jcha¹ na⁴xi⁴na³nta¹-vi⁴. Je² Gamaliel qui³tso²ya³-na³ jña³-le⁴ xi³ ña³qui³ cjoa⁴qui²xi⁴ xi³ tˀa³tsˀe⁴ cjoa⁴te¹xo³ma³-le⁴ nˀai³jcha¹cjin³-na¹. Cjai¹nca³ nta³ qui³tˀa³-le⁴ Ni³na¹ nca³ an³, jo³-ni³ nca³ jon² nca³tsˀio³ ntˀai⁴-vi⁴.
ACT 22:4 An³-vi⁴ cˀoa⁴-sˀin² qui³tjen⁴nqui³ co²ntran⁴-le⁴ je² ntia⁴²-vi⁴ sa³ˀnta³ nca³ qui³si³cˀen³. Tsa³cˀe³tˀa³nˀioan¹³, cˀoa⁴ qui³sca³ni³-nia¹³ nto⁴ya¹ cho⁴ta⁴xˀin⁴ cao⁴ ya¹nchjin¹.
ACT 22:5 Sa³ˀnta³ je² xi³ nca³jco⁴-le⁴ na⁴ˀmi³ testigo-na⁴ cao⁴ nca³tsˀi³ cho⁴ta⁴jchi¹nca³. Qui³si³je¹-le⁴ xon⁴nca³nˀion¹, je² qui³squi³-le⁴ je² ntsˀe³²-ve⁴. Quia³ ya⁴ Damasco, nca³ cjoi⁴nčhoa³coa⁴ preso i⁴ Jerusalén je² xi³ ya⁴ tjio¹, jme¹-ni³ nca³ cˀoa⁴-sˀin² cˀoai⁴-ni³le⁴ cjoa⁴ñˀain³.
ACT 22:6 To⁴nca³ xi³ coan³-ˀni³ nca³ ti²fia³. Je³ji³cho³čhian³ ya⁴ Damasco, jo³-ni³ tsa² nchi³sen³, to⁴ña³cjoan¹ ja³ˀa³ nca³ coan³ˀi³sen³ntai³-na³ jnco³ lˀi¹ xi³ tse³ xi³ ncˀa³jmi³ ji³nčhoa³-ni³.
ACT 22:7 Cˀoa⁴ qui³sca³tˀa³ na³nqui³, qui³nčhˀoe³ jnco³ xi³ qui³nchja⁴-na³: Saulo, Saulo, a¹-ni³ nca³ an³ ˀmi³tjen⁴nqui³ co²ntran⁴-si¹ni³nai¹³.
ACT 22:8 Cˀia⁴ qui³nchja²-le⁴: ˀya¹-ni³ ji³-vi⁴, Señor. Cˀoi⁴qui³tso²-na³: An³-nia¹³ Jesús xi³ Nazaret tsˀe⁴, xi³ ji³ ti³ˀmi³tjen⁴nqui³ co²ntran⁴-nai¹³.
ACT 22:9 Je² nca³tsˀi³ xi³ tjen⁴coa⁴ ña³qui³ tsa³ve³ xi³ cjoa⁴qui²xi⁴ lˀi¹-ve⁴, qui³tsa³cjon¹-ni¹. To⁴nca³ li²coi³ qui³nčhˀoe¹jta³-le⁴ je² xi³ an³ tsa³cja¹cao⁴-na³.
ACT 22:10 Cˀoi⁴qui³xian³: Jme¹-ni³ xi³ sˀian³, Señor. Cˀoa⁴ je² Nai³-na¹ cˀoi⁴qui³tso²-na³: Ti⁴so¹tjain⁴, tˀin³ ya⁴ Damasco, ya⁴ cˀoa⁴cˀoin¹-li² jña³-le⁴ xi³ ti¹sˀe³jna³choa⁴-li² nca³ cˀoa⁴sˀiain⁴.
ACT 22:11 Cˀoa⁴ an³-ˀni³, a³li²coi³ ti⁴coan³tsen³-ni³na³, nca⁴ cˀoa⁴-sˀin² to⁴coan³fa³te³ lˀi¹-ve⁴. To⁴qui³tsoa³ ntsa⁴ je² xi³ tjen⁴cao⁴-na³. Cˀoa⁴-sˀin² ji³choa³ ya⁴ Damasco.
ACT 22:12 Cˀia⁴ jnco³ Ananías xi³ cho⁴ta⁴nta³, xi³ ve³xcon¹ Ni³na¹ jo³ tso² cjoa⁴te¹xo³ma³, xi³ cho⁴ta⁴nta³ tso²-le⁴ nca³tsˀi³ cho⁴ta⁴ judíos xi³ ya⁴ tjio¹,
ACT 22:13 ja³ˀai³con²-na³, ja³ˀai³ca³sen²tˀa³-na³, cˀoi⁴qui³tso²-na³: Ji³ ntsˀe³ Saulo, ca²ta³ma³tsen³-ni³li². Cˀoa⁴ an³-ˀni³ nti⁴ton⁴ qui³sco³tsen³-le⁴.
ACT 22:14 Cˀoa⁴ je² Ananías cˀoi⁴qui³tso²: Je² Ni³na¹-le⁴ nˀai³jcha¹cjin³-na¹ tsa³ca³sen¹-li², jme¹-ni³ nca³ jcha⁴-si¹ni³ jo³ tso² nca³ je², jme¹-ni³ nca³ cho¹tsen³-si¹ni³lai⁴ je² xi³ tjin¹-le⁴ cjoa⁴qui²xi⁴, jme¹-ni³ nca³ coi⁴no¹ˀya²-si¹ni³lai⁴ je² en¹-le⁴ tsˀoa³.
ACT 22:15 Ji³ ni¹³ xi³ testigo coain⁴ xi³ tˀa³tsˀe⁴, nca³ cˀoai⁴-lai⁴ en¹ nca³tsˀi³ cho⁴ta⁴, jña³-le⁴ xi³ tsa³ˀyai³ cao⁴ xi³ qui³no²ˀyai²³.
ACT 22:16 Ntˀai⁴-vi⁴ tso²cˀoa⁴ a¹-ni³ nca³ vi³sen²jna³jyo¹-si¹ni³. Ti⁴so¹tjain⁴, ca²ta³sa³te¹ntai¹³, ti⁴tsjai³ je¹-li⁴ nca³ no²cjoai⁴ jan³ˀain¹-le⁴.
ACT 22:17 Cˀoa⁴coan³-na³ cˀia⁴ nca³ ji³choa³ ya⁴ Jerusalén, cˀia⁴ nca³ ti²vˀe³tsˀoa²³ ya⁴³ yo⁴nco⁴, tsa³cˀai²-na³ ni³jña¹.
ACT 22:18 Tsa³ˀve³-nia¹³ Nai³-na¹, cˀoi⁴qui³tso²-na³: Ti⁴xi¹ti¹yai³, ti²tjo⁴jin³ nti⁴ton⁴ Jerusalén. Ni⁴ˀya³-jin² xi³ i⁴ scoe¹ en¹-li⁴ xi³ tˀa³tsˀan⁴.
ACT 22:19 Cˀoi⁴qui³xin³-le⁴: Señor, ti⁴je²-ni³ ve³ nca³ xqui⁴ntˀia³ sinagoga an³ qui³sca³nia³ nto⁴ya¹, cˀoa⁴ qui³si³qui²ˀoan³ je² xi³ coan³cjain¹-le⁴ xi³ tˀa³tsi⁴.
ACT 22:20 Cˀia⁴ nca³ qui³xi²jten⁴ njin¹-le⁴ Esteban, je² testigo-li⁴, cˀoa⁴-ti⁴ an³ ya⁴ ti²jna⁴-je⁴. Cˀoa⁴-ti⁴ tjin¹jnco³coan³ nca³ qui³ni²cˀen³. Sa³ˀnta³ an³ xi³ qui³si³coi²nta⁴ na³jño³-le⁴ xi³ qui³si³cˀen³ Esteban.
ACT 22:21 Cˀoi⁴qui³tso²-na³ Nai³-na¹: Tˀin³ nca³ cjai¹nca³ cjin³ sca³ni³-le²³, ya⁴ jña³ nca³ tjio¹ cho⁴ta⁴ xi³ li² judío-jin².
ACT 22:22 Cho⁴ta⁴-ve⁴ qui³nčhˀoe¹-le⁴ Pablo sa³ˀnta³ je² en¹ je²-vi⁴. Cˀia⁴ nˀion¹ qui³nchja⁴, cˀoi⁴qui³tso²: Chja⁴ˀa²xin²³ i⁴ son³ˀnte³-vi⁴ je² cho⁴ta⁴ xo⁴cji³-ve⁴. A³li²coi³ nta³ nca³ cˀoe¹jna³con³.
ACT 22:23 Cˀoa⁴ cho⁴ta⁴-ve⁴ qui³squi³ˀntia¹xa¹. Qui³si³cˀa³tsao³ na³jño³-le⁴. Qui³scoe¹ chao³, tsa³cˀe¹tsao³ncˀa¹.
ACT 22:24 Cˀia⁴ je² xi³ nca³jco⁴-le⁴ so³nta²do⁴ tsa³ca³te¹xo³ma³ nca³ coai⁴sˀen³cao⁴ Pablo ya⁴³ cuartel. Cˀoa⁴ tsa³ca³te¹xo³ma³ nca³ ca²ta³ni²jtso²ˀa³ nca³ sˀe⁴-le⁴ čhjoa⁴xin¹, jme¹-ni³ nca³ jcha⁴-si¹ni³le⁴ a³-ni³ nca³ cˀoa⁴-sˀin² to⁴cji³ˀntia¹-ni³ co²ntran⁴ tsˀe⁴.
ACT 22:25 Cˀia⁴ nca³ tsa³cˀe¹tˀa³nˀion¹-ni³ cao⁴ nˀo¹čhjoa⁴xin¹, Pablo cˀoi⁴qui³tso²-le⁴ je² nai³-le⁴ so³nta²do⁴ xi³ ya⁴ ti¹jna³: A³ tsjoa¹ˀnte³-no³ nca³ cˀoa⁴-sˀin² vˀe²-lao⁴³ čhjoa⁴xin¹ jnco³ cho⁴ta⁴ romano xi³ cje³ˀya³-jin²le⁴ je¹-le⁴.
ACT 22:26 Cˀia⁴ nca³ je² nai³-le⁴ so³nta²do⁴ qui³nčhˀoe¹ en¹-vi⁴, qui³ cˀe¹-le⁴ na⁴jmi¹ je² xi³ nca³jco⁴-le⁴ so³nta²do⁴, cˀoi⁴qui³tso²: Jo¹ sˀiain⁴, nca⁴ je² cho⁴ta⁴-ve⁴ cho⁴ta⁴ romano ni¹.
ACT 22:27 Cˀoa⁴ ji³nčhoa³con³-le⁴ Pablo je² xi³ nca³jco⁴-le⁴ so³nta²do⁴, cˀoi⁴qui³tso²-le⁴: Cˀoa⁴tˀin²-nai¹³ a³ cho⁴ta⁴ romano ni¹ nca³ ji³. Cˀoa⁴ Pablo qui³tso²: Jaon³-na¹.
ACT 22:28 Cˀoa⁴ je² xi³ nca³jco⁴-le⁴ so³nta²do⁴ qui³nchja⁴: An³ cjai¹nca³ tse³ taon⁴ qui³sˀe³nqui³-na³ nca³ cho⁴ta⁴ romano coan³. Cˀia⁴ Pablo qui³tso²: To⁴nca³ an³ cˀoa⁴-sˀin² qui³tsian³.
ACT 22:29 Cˀoa⁴-sˀin² nca³ tsa³qui³ncha³xin² nti⁴ton⁴-le⁴ je² xi³ si¹jtso²ˀa³ Pablo. Cˀia⁴ nca³ tjin¹jin³-le⁴ nca³ cho⁴ta⁴ romano ni¹, sa³ˀnta³ je² xi³ nca³jco⁴-le⁴ so³nta²do⁴ qui³tso³cjon¹ nca³ tsa³cˀe¹tˀa³nˀion¹ Pablo.
ACT 22:30 Xi³ coan³nchaon³-ni³ coan³me³-le⁴ nca³ scoe⁴ xi³ cjoa⁴qui²xi⁴ a³-ni³ nca³ cho⁴ta⁴ judío cˀoa⁴-sˀin² tsa³ca¹nqui³ Pablo. Qui³sco³jnta¹ˀño¹ Pablo. Qui³nchja⁴-le⁴ je² cho⁴ta⁴ti¹tjon²-le⁴ na⁴ˀmi³ cao⁴ nca³tsˀi³ junta-le⁴ cho⁴ta⁴xa¹. Tsa³cˀa³sje³ Pablo. Qui³si³ca³sen²jna³ va³sen³-le⁴ nqui³xcon⁴ nca³ je².
ACT 23:1 Cˀia⁴ Pablo qui³sco³ˀa² je² cho⁴ta⁴junta-ve⁴, cˀoi⁴qui³tso²: Nca³tsˀio³ ˀnti¹ntsˀe³, an³ ña³qui³ nta³ ti¹jna³ ni⁴ma⁴-na⁴, jo³-sˀin² qui³coa⁴ yao³-na⁴ nqui³xcon⁴ Ni³na¹ sa³ˀnta³ ntˀai⁴-vi⁴.
ACT 23:2 Cˀia⁴ je² xi³ na⁴ˀmi³ti¹tjon², je² Ananías, tsa³ca³te¹xo³ma³-le⁴ je² xi³ ncha³tˀa³-le⁴ nca³ si⁴²jtsin³ˀa³ xo⁴ ti¹tso²-ve⁴.
ACT 23:3 Cˀia⁴ qui³tso²-le⁴ Pablo: Ji³ xi³ si⁴²jtsin³ˀa³-li² Ni³na¹ xjao¹ xi³ to⁴coan³ čhoai³. A³ ji³ xi³ ti³jna³-ni³ nca³ cˀoe¹nta³jin³-nai¹³ jo³ tso² cjoa⁴te¹xo³ma³, cˀoa⁴ co²ntran⁴-le⁴ cjoa⁴te¹xo³ma³ va³te²xo³mai³ nca³ ni²jtsin³ˀa³-na³.
ACT 23:4 Je² cho⁴ta⁴ xi³ ncha³tˀa³-le⁴ cˀoi⁴qui³tso²: A³ cˀoa⁴-sˀin² to⁴chˀao³ ˀmi²-lai⁴ je² xi³ na⁴ˀmi³ti¹tjon²-le⁴ Ni³na¹.
ACT 23:5 Cˀia⁴ je² Pablo qui³tso²: Li²coi³ tjin¹jin³-na³, ntsˀe³, tsa² je² xi³ na⁴ˀmi³ti¹tjon², nca³ cˀoa⁴-sˀin² tji¹tˀa³: Je² xi³ nca³jco⁴-le⁴ na⁴xi⁴na³nta¹-li⁴, li²coi³ chˀao³ cˀoin¹-lai⁴.
ACT 23:6 Cˀia⁴ nca³ Pablo ve³ nca³ jnco³ cˀa³ cho⁴ta⁴-ve⁴ xi³ cho⁴ta⁴ saduceo, cˀoa⁴ xi³jnco³ cˀa³ xi³ cho⁴ta⁴ fariseo, nˀion¹ qui³nchja⁴ ya⁴ junta-ve⁴: Nca³tsˀio³ ˀnti¹ntsˀe³, an³ nia¹³ cho⁴ta⁴ fariseo, cˀoa⁴ ˀnti¹-le⁴ cho⁴ta⁴ fariseo. Xi³ tˀa³tsˀe⁴ je² cjoa⁴nta³ xi³ ti²co³ya³-le⁴ nca³ cjoa⁴ˀa¹ya³-ni³le⁴ xi³ cˀen³, coi³ cjoa⁴ nca³ cˀoa⁴-sˀin² ti¹sˀe³nta³jin³-ni³na³ ntˀai⁴.
ACT 23:7 Cˀia⁴ nca³ je³cˀoa⁴qui³tso² qui³scan³tse³-ni¹ cho⁴ta⁴ fariseo cao⁴ cho⁴ta⁴ saduceo. Coan³jao²ya³-ni³ xi³ cho⁴ta⁴ ncjin².
ACT 23:8 Je² cho⁴ta⁴ saduceo cˀoa⁴tso² nca³ tsin² cjoa⁴fa³ˀa¹ya³, ni⁴tsˀe⁴ a²ncje⁴-jin², ni⁴tsˀe⁴ espíritu-jin². To⁴nca³ je² cho⁴ta⁴ fariseo si¹qui²xi⁴ya³ nca³ jao² cˀa³ cjoa⁴.
ACT 23:9 A³li² to⁴cˀoa⁴cji³ tsa³cˀe¹jta³ cho⁴ta⁴-ve⁴. Tsa³qui³so¹tjen⁴jin³ je² cho⁴ta⁴ scribano xi³ tsˀe⁴ cho⁴ta⁴ fariseo, tsa³cjao¹ti³ qui³tso²: Ni⁴to⁴jme³-jin² xi³ chˀao³ tjin¹ ma³sjai³-na³jin⁴ xi³ tˀa³tsˀe⁴ je² cho⁴ta⁴-vi⁴. Tsa² espíritu xi³ qui³nchja⁴cao⁴, a³xo⁴ tsa² a²ncje⁴, li² cˀoa⁴-jin²sˀin² coi⁴yo³nˀion¹-le⁴² Ni³na¹.
ACT 23:10 Cˀia⁴ nca³ je² cjoa⁴si³-ve⁴ nˀion¹ coan³tse³, je² xi³ nca³jco⁴-le⁴ so³nta²do⁴ qui³tso³cjon¹ tsa² cho⁴ta⁴-ve⁴ si⁴²xcoa⁴ Pablo. Qui³nchja⁴-le⁴ so³nta²do⁴, tsa³ca³te¹xo³ma³-le⁴ nca³ cjoa⁴ˀa²xin² cjoa⁴nˀion¹ Pablo ja⁴jin³-le⁴ cho⁴ta⁴-ve⁴, cˀoa⁴ nca³ coai⁴cao⁴ ya⁴ cuartel.
ACT 23:11 Xi³ coan³nchaon³-ni³, cˀia⁴ nca³ coan³ njion², je² Nai³-na¹ tsa³ca³sen²tˀa³-le⁴ Pablo, cˀoi⁴qui³tso²-le⁴: A³li² cˀoa⁴-jin² ma³-li² Pablo. Jo³-sˀin² nca³ qui³tsˀai² en¹-li⁴ xi³ tˀa³tsˀan⁴ i⁴ Jerusalén, cˀoa⁴-sˀin² ma³chjen¹ nca³ cˀoai⁴ en¹-li⁴ cˀoa⁴-ti⁴ ya⁴ Roma.
ACT 23:12 Cˀia⁴ nca³ qui³sˀe³sen¹, tsa³cˀe¹nta³ne² cjoa⁴tsˀen⁴ cho⁴ta⁴ judío. Cˀoa⁴-sˀin² qui³tsjoa³ tsˀoa³, cˀoa⁴ Ni³na¹ ca²ta³tsjoa¹-na³jin⁴ cjoa⁴ñˀain³ qui³tso², nca³ li²coi³ coa⁴cjen⁴ ni⁴scˀoi¹-jin², jo³ sa³ˀnta³ nca³ si⁴²cˀen³ Pablo.
ACT 23:13 Tsˀa³to³-le⁴ ña³chan² ma³-ni³ xi³ cˀoa⁴-sˀin² qui³tsjoa³ tsˀoa³.
ACT 23:14 Je² cho⁴ta⁴-vi⁴ qui³con³-le⁴ je² cho⁴ta⁴ti¹tjon²-le⁴ na⁴ˀmi³ cao⁴ cho⁴ta⁴jchi¹nca³, cˀoi⁴qui³tso²: Jin⁴-jin⁴ cˀoa⁴-sˀin² ca²vˀai²⁴-jin⁴ ntso⁴ˀvai³⁴-jin⁴ nca³ Ni³na¹ ca²ta³tsjoa¹-na³jin⁴ cjoa⁴ñˀain³ nca³ tsi²jme³ xi³ coi⁴chi³⁴-jin⁴ ni⁴sˀio⁴-jin²⁴jin⁴, jo³ sa³ˀnta³ nca³ si⁴cˀain³⁴-jin⁴ Pablo.
ACT 23:15 Ntˀai⁴-vi⁴ tso²cˀoa⁴, jon² cao⁴ cho⁴ta⁴xa¹junta, ti⁴cji³nčhˀoao¹³ je² xi³ nca³jco⁴-le⁴ so³nta²do⁴ nca³ ca²tji³nčhoa¹jen³cao⁴ je² Pablo nchaon³-li⁴, jo³-ni³ tsa² me³-no³ nca³ nqui²sa⁴ nta³ cho¹tˀao³ je² cjoa⁴ xi³ tˀa³tsˀe⁴. Cˀoa⁴ jin⁴-jin⁴ coi⁴yo³ntai³⁴-jin⁴, jme¹-ni³ nca³ coan⁴ si⁴cˀen³-ni³jin⁴ to⁴nqui³-ni³ nca³ je² cjoi⁴cho³.
ACT 23:16 Cˀia⁴ jnco³ ti³-le⁴ nti³chja³ Pablo qui³nčhˀoe¹ nca³ coai⁴ca³tio²chjoa²-le⁴. Qui³ qui³sˀen³ ya⁴³ cuartel, tsa³cˀe¹-le⁴ na⁴jmi¹ Pablo.
ACT 23:17 Cˀia⁴ Pablo qui³nchja⁴-le⁴ jnco³ nai³-le⁴ so³nta²do⁴, cˀoi⁴qui³tso²: Tˀin³coai⁴ ti³-vi⁴ ya⁴ jña³ nca³ ti¹jna³ je² xi³ nca³jco⁴-le⁴ so³nta²do⁴. Tjin¹ en¹ xi³ ya⁴ cˀoe⁴²-le⁴ na⁴jmi¹.
ACT 23:18 Cˀia⁴ je² nai³-le⁴ so³nta²do⁴ qui³scoe¹ ti³-ve⁴, qui³cao⁴-le⁴ je² xi³ nca³jco⁴-le⁴ so³nta²do⁴, cˀoi⁴qui³tso²: Je² Pablo xi³ ti¹jna³ preso ca²nchja⁴-na³, ca²vˀe¹tsˀoa³-na³ nca³ ca²nčhoa³cao⁴-le²³ je² ti³ xo⁴cji³-vi⁴. Tjin¹-xo¹ en¹ xi³ cˀoe⁴²-li² na⁴jmi¹.
ACT 23:19 Je² xi³ nca³jco⁴-le⁴ so³nta²do⁴ qui³scoe¹ ntsja³ ti³-ve⁴, cˀoa⁴ qui³cao⁴ tˀa³xin², qui³sco²na³nqui³-le⁴: Jme¹ ni¹³ xi³ cˀoe¹-nai¹³ na⁴jmi¹.
ACT 23:20 Cˀia⁴ ti³-ve⁴ qui³nchja⁴: Je² cho⁴ta⁴ judío cˀoa⁴-sˀin² tjio¹jnco³con³ nca³ si⁴²je¹-li² cjoa⁴nta³, jme¹-ni³ nca³ nchaon³-li⁴ chˀa⁴sjai³ cˀoin¹jen⁴cao⁴-si¹ni³ je² Pablo ya⁴ tsˀe⁴ cho⁴ta⁴xa¹junta, jo³-ni³ tsa² nca³ nqui²sa⁴ nta³ scoi⁴na³nqui³-xo¹le⁴ jña³-le⁴ xi³ cjoa⁴qui²xi⁴.
ACT 23:21 Cˀoa⁴ ji³, a³li² ma³cjain¹-jin²li², nca⁴ tsˀa³to³-la⁴ ña³chan² cho⁴ta⁴xˀin⁴ xi³ tsˀe⁴ xi³ cˀoa⁴-sˀin² va³tio²chjoa²-le⁴ Pablo. Je² cho⁴ta⁴ xi³ qui³tsjoa³ tsˀoa³ nca³ Ni³na¹ ca²ta³tsjoa¹-le⁴ cjoa⁴ñˀain³ nca³ tsi² tsa² coa⁴cjen⁴ ni⁴scˀoi¹-jin², jo³ sa³ˀnta³ nca³ si⁴²cˀen³ Pablo. Cˀoa⁴ ntˀai⁴-vi⁴ je³tjio¹nta³, tjio¹co³ya³-le⁴ tsi⁴ en¹.
ACT 23:22 Cˀia⁴ je² xi³ nca³jco⁴-le⁴ so³nta²do⁴ qui³si³xa³tˀa³ ti³-ve⁴. Cˀoa⁴-sˀin² tsa³cˀe¹ne²-le⁴, nca³ li²ˀya³ xi³ cˀoa⁴coi⁴tso⁴-le⁴ nca³ cˀoa⁴-sˀin² je³ja³ˀai³cˀe¹ na⁴jmi¹.
ACT 23:23 Cˀoa⁴ qui³no²cjoa⁴-le⁴ jao² cho⁴ta⁴ xi³ nai³-le⁴ so³nta²do⁴. Je² xi³ nca³jco⁴-le⁴ so³nta²do⁴ cˀoa⁴-sˀin² tsa³cˀe¹tˀain³-le⁴ nca³ las nueve nca³ njion² ca²ta³va³tio²nta³ jao² ciento so³nta²do⁴ xi³ coai⁴ ya⁴ sa³ˀnta³ Cesarea, cˀoa⁴ jan²can³ cao⁴ te³ xi³ na⁴xin¹ coa⁴tio⁴son², cˀoa⁴ jao² ciento xi³ lanza cˀoa⁴.
ACT 23:24 Cˀoa⁴-ti⁴ tsa³cˀe¹tˀain³ nca³ ca²ta³sa³sen¹nta³ na⁴xin¹ cao⁴ xi²le⁴ je² xi³ Pablo cˀoe¹jna³son², jme¹-ni³ nca³ nta³ coai⁴cao⁴-si¹ni³le⁴ je² Félix cho⁴ta⁴xa¹ti¹tjon².
ACT 23:25 Jnco³ xon⁴carta qui³squi³ xi³ coi³ tsa³cˀe¹.
ACT 23:26 An³ Claudio Lisias si³ti²ˀnta³-le²³ Félix xi³ cˀoa⁴-sˀin² to⁴ncˀa³ gobernador:
ACT 23:27 Je² cho⁴ta⁴ je²-vi⁴ xi³ qui³tsoa³ je² cho⁴ta⁴ judío. Ja⁴me³ qui³si³cˀen³. An³ tsa³cˀa³sje³ntje²³ nca³ ji³cho³coa⁴ so³nta²do⁴, nca⁴ qui³sˀe³jin³-na³ nca³ cho⁴ta⁴ romano.
ACT 23:28 Coan³me³-na³ nca³ scoe³ jme³ je¹ xi³ tjin¹-le⁴, nca³ cˀoa⁴-sˀin² tsa³ca¹nqui³. Qui³cao⁴-nia¹³ ya⁴ tsˀe⁴ cho⁴ta⁴xa¹junta xi³ tsˀe⁴.
ACT 23:29 Cˀia⁴ coan³sjai³-na³ nca³ tsa³ca¹nqui³ to⁴je² tˀa³tsˀe⁴ cjoa⁴te¹xo³ma³-le⁴ xi³ tsˀe⁴. Ni⁴jnco³-jin² je¹ tjin¹-le⁴ xi³ va³quin²-le⁴ nca³ coi⁴ya¹ntjai², a³xo⁴ nca³ nto⁴ya¹ cˀoe¹jna³.
ACT 23:30 To⁴nca³ tsa³cˀe¹-na³ na⁴jmi¹ nca³ me³-le⁴ coa⁴tio⁴chjoa²-le⁴. Cˀoa⁴-sˀin² tsa³ca³tio²nta³ je² cho⁴ta⁴ judío. Coi³ ji³ qui³sca³ni³ nti⁴ton⁴-ni³le²³. Cˀoa⁴-ti⁴ tsa³cˀe³ne²-le⁴ je² xi³ tjio¹va¹nqui³ Pablo, nca³ ya⁴ nqui³xcoin³ cˀoa⁴ca²ta³tso²-li² jme¹ ni¹³ xi³ tjin¹-le⁴ xi³ co²ntran⁴ tsˀe⁴. Nta³ ca²ta³fi²-li² ni⁴čhjin³.
ACT 23:31 Cˀia⁴ je² so³nta²do⁴ qui³scoe¹ Pablo jo³-sˀin² nca³ qui³sˀe³ne²-le⁴. Qui³cao⁴ nca³ njion² ya⁴ Antípatris.
ACT 23:32 Xi³ coan³nchaon³-ni³ ya⁴ qui³si³ca³tio¹cao⁴ xi³ na⁴xin¹ tjio¹son², nca³ je² xi³ coai⁴cao⁴. Cˀoa⁴ je² xi³cˀa³ qui³si³cˀo¹fa³ya³-ni³ ya⁴ cuartel.
ACT 23:33 Cˀia⁴ nca³ ji³cho² ya⁴ Cesarea, qui³tsjoa³-le⁴ gobernador xi³ ya⁴ ti¹jna³ je² xon⁴carta-ve⁴. Cˀoa⁴-ti⁴ qui³si³ca³sen²jna³va³sen³ Pablo nqui³xcon⁴.
ACT 23:34 Je² gobernador tsa³cˀe¹xquia⁴ xon⁴carta-ve⁴, qui³sco²na³nqui³ jña¹ ni¹³ ˀnte³-le⁴. Coan³jin³-le⁴ nca³ ya⁴ Cilicia tsˀe⁴.
ACT 23:35 Cjoi³nčhˀoe³-le²³ cˀia⁴ nca³ cjoa⁴ˀai¹ je² xi³ ji³ va¹nqui³-li², qui³tso². Cˀia⁴ tsa³ca³te¹xo³ma³ nca³ cˀoe¹jna³ co³ya³ ya⁴ palacio-le⁴ Herodes.
ACT 24:1 Cˀia⁴ nca³ coan³ˀaon²-ni³ ni²čhjin³, ji³cho² je² na⁴ˀmi³ti¹tjon², je² Ananías. Tjen⁴cao⁴ cˀa³ cho⁴ta⁴jchi¹nca³, cˀoa⁴ jnco³ xi³ ma³-le⁴ nchja⁴ya³ xi³ Tértulo ˀmi². Ña³qui³ qui³tso²ya³-le⁴ gobernador cjoa⁴co²ntran⁴ tˀa³tsˀe⁴ Pablo.
ACT 24:2 Cˀia⁴ qui³no²cjoa⁴-le⁴. Tértulo tsa³cˀe¹tsˀia⁴cao⁴ nca³ tsa³ca¹nqui³, cˀoi⁴qui³tso²-le⁴: To⁴tˀa³tsi⁴-sa³ nca³ cˀoa⁴-sˀin² nˀion¹ nchˀan¹ ti³yoa³². A³li² to⁴ncjin² cjoa⁴ xi³ ji³ nta³ vˀe²ntai³ xi³ tˀa³tsˀe⁴ cjoa⁴nta³-le⁴ je² na⁴xi⁴na³nta¹-vi⁴, xi³ to⁴tˀa³tsi⁴ cjoa⁴chji⁴ne⁴.
ACT 24:3 Nca³ntsjai² ni⁴čhjin³ cˀoa⁴ nca³qui³jnta²-ni¹ cˀoa⁴-sˀin² chjoai¹³-jin⁴ je² cjoa⁴-vi⁴. Can³ cˀa³ cˀoa⁴-sˀin² vˀai²-lai²⁴jin⁴ cjoa⁴nta³, ji³ ˀnti¹nˀai³ Félix.
ACT 24:4 To⁴nca³ cai³-na³jin⁴ nca³ to⁴sin³ to⁴nta³ ni²si³-lai²⁴jin⁴. Tjin¹-li² cjoa⁴nta³, cˀoa⁴-sˀin² vˀe³tsˀoa²-le²³ nca³ ti⁴no¹ˀya² i⁴tse¹-na³jin⁴ jo³-sˀin² nca³ tjin¹-li² cjoa⁴ma⁴ta³con².
ACT 24:5 Cˀoa⁴-sˀin² tsa³ˀyai³⁴-jin⁴ je² cho⁴ta⁴-vi⁴ nca³ nˀion¹ chˀao³ cjoan³. Je² xi³ cjo³mi³tjen⁴ cjoa⁴si³ jin³-le⁴ nca³tsˀi³ cho⁴ta⁴ judío nca³qui³jnta² son³ˀnte³. Cˀoa⁴ je² ni¹ cho⁴ta⁴ti¹tjon²-le⁴ je² cho⁴ta⁴ nazarenos xi³ ntia⁴²tˀa³xin²-le⁴ Ni³na¹ fi²tˀa³-le⁴.
ACT 24:6 Je² xi³ cˀoa⁴-ti⁴ coan³me³-le⁴ nca³ qui³si³jnti¹ je² yo⁴nco⁴-na⁴jin⁴. Qui³nto³vai³⁴-jin⁴, me³-na³jin⁴ nca³ cho¹tˀa³-le⁴, jo³ tso² cjoa⁴te¹xo³ma³-na⁴jin⁴.
ACT 24:7 To⁴nca³ je² Lisias xi³ nca³jco⁴-le⁴ so³nta²do tsa³cja³-jin³. Ña³qui³ tsa³cja¹ˀa³-na³jin⁴ Pablo ya⁴³ ntsai⁴-jin⁴.
ACT 24:8 Cˀoa⁴-sˀin² tsa³ca³te¹xo³ma³-le⁴ je² cho⁴ta⁴ xi³ va¹nqui³ nca³ ca²ta³fa³ˀai³con³-li². Je² xi³ ji³ cˀoa⁴-sˀin² coi⁴no¹ˀya²-lai⁴ cˀoa⁴-sˀin² cho¹son²-ni³lai⁴. Cˀoa⁴-sˀin² jcha⁴-ni³ jme¹ cjoa⁴-ni³ nca³ fa³nqui³-ni³jin⁴.
ACT 24:9 Cˀoa⁴-ti⁴ qui³tsjoa³ en¹ cho⁴ta⁴ judío nca³ cˀoa⁴tjin¹ je² cjoa⁴-vi⁴.
ACT 24:10 Cˀia⁴ gobernador qui³sco²mi³-le⁴ ntsja³ nca³ ca²ta³nchja⁴ Pablo. Pablo cˀoi⁴qui³tso²: An³-vi⁴ ˀve³-nia¹³ nca³ coan³ ncjin² no¹ ji³ ti³jna³coai⁴ cjoa⁴te¹xo³ma³ i⁴ ˀnte³-vi⁴. Cˀoa⁴-sˀin² ti⁴ˀan³ coi³nchja²ntjai²-nia³ yao³-na⁴ cao⁴ cjoa⁴tsjoa³.
ACT 24:11 Ji³ jcha⁴-ni³ nca³ to⁴sˀa⁴ te³jao² ni⁴čhjin³ nca³ qui³mia³. Qui³cˀe³tsˀoa²³ ya⁴ Jerusalén.
ACT 24:12 Ni⁴sa³jnco³ cˀa²-jin² ti¹ˀya³-na³ ya⁴ yo⁴nco⁴ nca³ cho⁴ta⁴ fa²coa⁴, ni⁴cho⁴ta⁴ncjin²-jin² vˀe³xcoa¹³, ni⁴ ya⁴-jin² ntˀia³ sinagoga, ni⁴ ya⁴-jin² na⁴xi⁴na³nta¹.
ACT 24:13 Li²coi³ coan⁴-le⁴ si⁴²qui²xi⁴ya³-li² je² cjoa⁴, je² xi³ ntˀai⁴ ti¹va¹nqui³-na³.
ACT 24:14 To⁴nca³ je²-vi⁴ ña³qui³ cˀoa⁴²tjin¹ coan³ nca³ cˀoa⁴xin³-le²³, jo³-sˀin² ntia⁴²tˀa³xin²-le⁴ Ni³na¹ tso²-le⁴, cˀoa⁴-sˀin² ma³chjen¹-le⁴ an³ je² Ni³na¹-le⁴ nˀai³jcha¹cjin³-na⁴, cˀoa⁴-sˀin² ma³cjain¹-na³ nca³yi³je³ jo³-sˀin² tji¹tˀa³ ya⁴ cjoa⁴te¹xo³ma³, cˀoa⁴ ya⁴ xon⁴-le⁴ je² xi³ qui³nchja⁴ya³ tˀa³tsˀe⁴ Ni³na¹.
ACT 24:15 Cˀoa⁴-sˀin² ti²co³ya³-le⁴ xi³ tˀa³tsˀe⁴ Ni³na¹ nca³ cjoa⁴ˀa¹ya³-le⁴ xi³ cˀen³, nta³ tsa² cao⁴ cho⁴ta⁴ xi³ tjin¹-le⁴ cjoa⁴qui²xi⁴, cao⁴ cho⁴ta⁴tsˀen⁴. Cˀoa⁴-ti⁴sˀin²ni³ je² cho⁴ta⁴ judío co³ya³-le⁴ xi³ tˀa³tsˀe⁴ Ni³na¹ xi³ ti⁴coi³-ni³.
ACT 24:16 Coi³ nca³ ña³qui³ vˀe³ne²-le⁴ yao³-na⁴, jme¹-ni³ nca³ nta³ ti¹jna³-si¹ni³ ni⁴ma⁴-na⁴ nca³ntsjai², nca³ tsi²jme³ je¹ xi³ tjin¹-le⁴ xi³ tˀa³tsˀe⁴ Ni³na¹, cˀoa⁴ xi³ tˀa³tsˀe⁴ cho⁴ta⁴son³ˀnte³.
ACT 24:17 Ja⁴scan³-ni³ nca³ ncjin² no¹ ja³ˀa³to³, ja²ˀai⁴ca³nia³ limosna cao⁴ cjoa⁴tjao² na⁴xi⁴na³nta¹-na⁴.
ACT 24:18 Cˀia⁴ cˀa³ cho⁴ta⁴ judío xi³ tsˀe⁴ Asia tsa³ve³-na³ ya⁴ya³ yo⁴nco⁴, nca³ coan³tsje³ nca³ an³. Ni⁴ cao⁴ cho⁴ta⁴ncjin²-jin², ni⁴ cao⁴ cjoa⁴si³-jin² tsa³ve³-na³.
ACT 24:19 Je²-jin² tsa²cai³ xi³ ca²ta³fa³ˀai³ nqui³xcoin³. Cˀoa⁴-sˀin² ca²ta³va¹nqui³-na³ tsa² jme³-ve⁴ xi³ tjin¹-le⁴ xi³ co²ntran⁴ tsˀan⁴.
ACT 24:20 Ti⁴je²-ni³ je²-vi⁴ cˀoa⁴ca²ta³tso² tsa² qui³sa³co³sjai³-le⁴ jme³-ve⁴ xi³ qui³sˀian³ xi³ tsi²coi³ tsa² nta³ tjin¹, cˀia⁴ nca³ tsa³ca²te⁴jna³ ya⁴ nqui³xcon⁴ cho⁴ta⁴xa¹junta.
ACT 24:21 To⁴jnco³-jin² cjoa⁴ xi³ tjin¹-le⁴ xi³ qui³nchja²³ cˀia⁴ nca³ ya⁴ ti²jna⁴jin³-le⁴ xi³ coi³ jo³-sˀin² nca³ cjoa⁴ˀa¹ya³-le⁴ nca³tsˀi³ cˀen³. Coi³ cjoa⁴ xi³ cji³ma³tˀen³ ntˀai⁴-vi⁴.
ACT 24:22 Je² Félix cjai¹nca³ nta³ tjin¹jin³-le⁴ jo³-sˀin² ma³cjain¹-le⁴ je² cho⁴ta⁴-vi⁴ xi³ ntia⁴²tˀa³xin²-le⁴ Ni³na¹ fi²tˀa³-le⁴. Coi³ cjoa⁴ qui³sco³ya³cao⁴cjoa⁴ je² cjoa⁴-ve⁴ cˀia⁴ nca³ je³qui³nčhˀoe¹ nca³yi³je³ je² en¹-vi⁴ cˀoi⁴qui³tso²: Cˀia⁴ nca³ cjoa⁴ˀai¹jen³ je² Lisias xi³ nca³jco⁴-le⁴ so³nta²do⁴, cˀia⁴ cjoe⁴scoe³ je² cjoa⁴ xo⁴tjin¹-no³vi⁴.
ACT 24:23 Cˀia⁴ Félix tsa³ca³te¹xo³ma³-le⁴ nai³-le⁴ so³nta²do⁴ nca³ si⁴²cˀe¹jna³tjao² Pablo, nca³ si⁴²xan⁴-le⁴ cjoa⁴ñˀain³. Li²coi³ qui³sˀe³chjoa²-le⁴ je² xi¹ncjin¹ xi³ me³-le⁴ nca³ si⁴²sin³-le⁴, nca³ cjoa⁴ˀai¹con³-le⁴.
ACT 24:24 Cˀia⁴ nca³ je³ja³ˀa³to³ jo³ tjin¹ ni⁴čhjin³, ja³ˀai³ Félix cao⁴ Drusila chjon⁴²-le⁴ xi³ cho⁴ta⁴ judía ni¹. Qui³nchja⁴-le⁴ Pablo, cˀoa⁴ qui³nčhˀoe¹-le⁴ xi³ cjoa⁴qui²xi⁴ jo³-sˀin² ma³cjain¹-na¹ xi³ tˀa³tsˀe⁴ Jesucristo.
ACT 24:25 Pablo tsa³cja¹cao⁴ jo³-sˀin² sˀe³ne²-na¹ nca³ sˀian⁴² xi³ cjoa⁴qui²xi⁴, nca³ cˀoe¹chjoa²-le⁴² yao³-na¹ xi³ tˀa³tsˀe⁴ cjoa⁴chi⁴con¹. Cˀoa⁴ tsa³cja¹cao⁴ jo³-sˀin² sˀa⁴ cjoa⁴ˀai¹ ni⁴čhjin³ xi³ sˀe⁴nta³jin³ cjoa⁴. To⁴qui³tsa³cjon¹ Félix, cˀoi⁴qui³tso²: Ntˀai⁴-vi⁴ntai⁴ tˀin-ni¹³. Cˀia⁴ nca³ coan⁴ˀa³-na³, coi³nchja²-le²³.
ACT 24:26 Félix qui³sco³ya²-le⁴ nca³ Pablo taon⁴ tsjoa¹ntjai² yao³-le⁴, jme¹-ni³ nca³ si⁴²cˀe¹jna³ntai¹-si¹ni³. Coi³ nca³ ncjin² cˀa³ qui³nchja⁴-le⁴, nca³ tsa³cja¹cao⁴ nca³ je².
ACT 24:27 Cˀia⁴ nca³ coan³jao²-ni³ no¹, tsˀa³ntjai²ya³ Félix. Je² qui³sa³sen³ xa¹ Porcio Festo. Coan³me³-le⁴ Félix nca³ si⁴²ntˀe¹tˀa³-le⁴ je² cho⁴ta⁴ judío. Cˀoa⁴-sˀin² qui³si³cˀe¹jna³ cjoa⁴ñˀain³ Pablo.
ACT 25:1 Je² cho⁴ta⁴xa¹ cho⁴tse⁴ Festo ja³ˀa³sˀen³ ya⁴ˀnte³-le⁴. Xi³ coan³jan²-ni³ ni⁴čhjin³, qui³mi³-ni³ Cesarea, ji³cho² ya⁴ Jerusalén. Jerusalén.
ACT 25:2 Ya⁴ ja³ˀai³con²-le⁴ je² cho⁴ta⁴ti¹tjon²-le⁴ na⁴ˀmi², cao⁴ cho⁴ta⁴ti¹tjon²-le⁴ cho⁴ta⁴ judío xi³ qui³tso²ya³-le⁴ cjoa⁴co²ntran⁴ tˀa³tsˀe⁴ Pablo. Cˀoa⁴-sˀin² tsa³cˀe¹tsˀoa³-le⁴:
ACT 25:3 Qui³si³je¹-le⁴ cjoa⁴nta³ nca³ ca²ta³nčhoa¹cao⁴ Pablo ya⁴ Jerusalén. Je² cho⁴ta⁴-ve⁴ coa⁴tio⁴chjoa²-le⁴ jme¹-ni³ nca³ si⁴²cˀen³che¹-si¹ni³ ya⁴³ ntia⁴².
ACT 25:4 To⁴nca³ je² Festo cˀoa⁴-sˀin² qui³nchja⁴ nca³ je² Pablo ya⁴ ca²ta³vˀe²jna³tjao² ya⁴ Cesarea. Je² soa³ ya⁴ coai⁴ nti⁴ton⁴.
ACT 25:5 Cˀoa⁴qui³tso²-le⁴: To⁴ˀya³-ni³ xi³ jon²-vi⁴ xi³ tjin¹-no³ xa¹, ta³nquin¹jen³cao⁴-nao¹³, tsa² cjoa⁴qui²xi⁴ nca³ je¹ qui³tjen⁴-le⁴ Pablo, cˀoa⁴ ya⁴ tja³nquio³ nca³ je².
ACT 25:6 To⁴jin³-la⁴ to⁴te³-la⁴ ni⁴čhjin³ coan³tse³ya²-le⁴ Festo nca³ ya⁴ tsa³cˀe²jna³cao⁴. Cˀia⁴ qui³jen³ ya⁴ Cesarea. Xi³ coan³nchaon³-ni³ ji³cho²cˀe²jna³ne² ya¹xi²le⁴-le⁴. Cˀia⁴ qui³nchja⁴-le⁴ Pablo nca³ ca²ta³nčhoa³cao⁴.
ACT 25:7 Cˀia⁴ nca³ ja³ˀai³cao⁴, jo³ coan³ma³jtin¹ntai³-le⁴ cho⁴ta⁴ judío xi³ ja³ˀai³-ni³ ya⁴ Jerusalén. A³li² cˀoa⁴cji³ cjoa⁴ xi³ tsa³ca¹nqui³ Pablo, cjoa⁴ xi³ li²coi³ coan³-le⁴ qui³si³qui²xi⁴ya³tˀain³.
ACT 25:8 Cˀia⁴ qui³nchja⁴ntjai² yao³-le⁴ je² Pablo: Ni⁴jme³-jin² je¹ xi³ tsa³jnquia³, ni⁴co²ntran⁴ tsˀe⁴ cjoa⁴te¹xo³ma³ xi³ tsˀe⁴ cho⁴ta⁴ judío-jin², ni⁴co²ntran⁴ tsˀe⁴ yo⁴nco⁴-jin², ni⁴co²ntran⁴ tsˀe⁴ César-jin².
ACT 25:9 To⁴nca³ Festo coan³me³-le⁴ nca³ si⁴²ntˀe¹tˀa³-le⁴ je² cho⁴ta⁴ judío, tsa³cja¹cao⁴ Pablo, cˀoi⁴qui³tso²: A³ me³-li² nca³ cˀoin¹mi³ ya⁴ Jerusalén, cˀoa⁴ ya⁴ cˀoe¹nta³jin³-li² nca³yi³-je³ cjoa⁴-vi⁴ nqui³xcoan³ nca³ an³.
ACT 25:10 Cˀia⁴ Pablo qui³tso²: I⁴ ti²jna⁴tˀa³-le⁴ cjoa⁴te¹xo³ma³-le⁴ César, jña³ nca³ ma³chjen¹ nca³ sˀe³nta³jin³-na³, ni⁴jme³-jin² cjoa⁴taon³ xi³ qui³sˀin³-le⁴ je² cho⁴ta⁴ judío, jo³-sˀin² nca³ cjai¹nca³ nta³ ˀyai³ nca³ ji³.
ACT 25:11 Tsa² tjin¹-na³ je¹, cˀoa⁴ tsa² jme³ cjoa⁴ xi³ va³quin²-le⁴ nca³ coi⁴ya¹ntje²³, li²coi³ cˀoe³tsˀoa³ntje²³ cjoa⁴vi³ya³-na⁴. To⁴nca³ tsa² tsi² tsa² jme³ cjoa⁴ xi³ tjin¹-ni³, jme³ xi³ va¹nqui³-ni³na³ je² cho⁴ta⁴-vi⁴, ni⁴ˀya³-jin² xi³ ti⁴xˀa⁴ˀnte³-le⁴ nca³ ya⁴ sca⁴ni²-na³ cao⁴ je² cho⁴ta⁴-vi⁴. Si³je¹-nia¹³ nca³nˀion¹-na⁴ tˀa³tsˀe⁴ César.
ACT 25:12 Cˀia⁴ Festo tsa³cja¹cao⁴ cho⁴ta⁴ junta-le⁴, cˀoi⁴qui³tso²: A³ je² César qui³ni²je¹-lai⁴ nca³nˀion¹. Ya⁴ cˀoin¹chon³-lai⁴ˀni³.
ACT 25:13 Cˀia⁴ nca³ je³ja³ˀa³to³ jo³ tjin¹ ni⁴čhjin³, je² cho⁴ta⁴ti¹-tjon² Agripa cao⁴ Berenice ja³ˀai³ ya⁴ Cesarea, ja³ˀai³ si¹xa³tˀa³ je² Festo.
ACT 25:14 Cˀoa⁴ ncjin² ni⁴čhjin³ ya⁴ tsa³ca³tio². Je² Festo tsa³cˀe¹-le⁴ na⁴jmi¹ cho⁴ta⁴ti¹tjon² je² cjoa⁴-le⁴ Pablo, cˀoi⁴qui³tso²: Je² Festo qui³si³cˀe¹jna³ preso jnco³ cho⁴ta⁴.
ACT 25:15 Cˀia⁴ nca³ quia³ ya⁴ Jerusalén, je² cho⁴ta⁴ti¹tjon²-le⁴ na⁴ˀmi³, cao⁴ je² cho⁴ta⁴jchi¹nca³-le⁴ cho⁴ta⁴ judío qui³tso²ya³-na³ cjoa⁴co²ntran⁴ xi³ tˀa³tsˀe⁴ Pablo. Qui³si³je¹ jnco³ cjoa⁴ñˀain³ xi³ tˀa³tsˀe⁴ cho⁴ta⁴-ve⁴.
ACT 25:16 Cˀoa⁴qui³xin³-le⁴ an³, nca³ tsi² tsa³ cˀoa⁴-sˀin² ve³ cho⁴ta⁴ romano nca³ to⁴xquia⁴ ni²cˀen³-le⁴ cho⁴ta⁴. Je²-cjoa²la² xi³ va¹nqui³, ca²ta³vi³ncha³va³sen³ cao⁴ je² xi³ fa³nqui³, jme¹-ni³ cˀoa⁴-sˀin² tjo¹ˀnte³-si¹ni³le⁴ nca³ coi⁴nchja⁴ntjai² yao³-le⁴ xi³ tˀa³tsˀe⁴ cjoa⁴ xi³ cji³ma³tˀain³.
ACT 25:17 Cˀoa⁴-sˀin² li²coi³ qui³si³tse³ya²³ nca³ an³, cˀia⁴ nca³ ja³ˀai³tsˀi³ i⁴-vi⁴. Xi³ coan³nchaon³-ni³ nca³ ti²jna⁴ ya⁴ ntˀia³va³sen³ tsa³ca³te³xo³ma³ nca³ ca²ta³fa³ˀai³cao⁴ cho⁴ta⁴-ve⁴.
ACT 25:18 Cˀia⁴ nca³ ncha³va³sen³ je² xi³ va¹nqui³, ni⁴jme³-jin² cjoa⁴ xi³ qui³si³cˀa³tsen³ jo³-sˀin² nca³ co³ya³-le⁴ tsa²cai³.
ACT 25:19 To⁴coi³ qui³co²ntran⁴-ni³le⁴ je² cjoa⁴ xi³ tˀa³tsˀe⁴ jo³-sˀin² nca³ ve³xcon¹ Ni³na¹, cˀoa⁴ xi³ tˀa³tsˀe⁴ jnco³ xi³ Jesús tsa³cˀin² xi³ je³cˀen³. Je² Pablo-ve⁴ cˀoa⁴-sˀin² qui³tso² nca³ ti¹jna³con³.
ACT 25:20 Cˀoa⁴ an³-ˀni³ to⁴jao² tjin¹-na³ je² cjoa⁴-vi⁴. Cˀoa⁴qui³xin³-le⁴ Pablo tsa² me³-le⁴ nca³ coai⁴ ya⁴ Jerusalén, cˀoa⁴ ya⁴ sˀe⁴nta³jin³-le⁴ nca³yi³je³ cjoa⁴ xo⁴tjin¹-vi⁴.
ACT 25:21 To⁴nca³ Pablo qui³si³je¹ nca³ si⁴cˀe¹jna³tjao²-le⁴ sa³ˀnta³ je² Augusto cjoi⁴nčhˀoe¹-le⁴. Cˀia⁴ tsa³ca³te³xo³ma³ nca³ ca²ta³ni²cˀe¹jna³tjao² jo³ sa³ˀnta³ nca³ sca³ni³-le⁴ je² César.
ACT 25:22 Cˀia⁴ Agripa cˀoi⁴qui³tso²-le⁴ Festo: Cˀoa⁴-ti⁴ me³-na³ nca³ cjoi³nčhˀoe³-le⁴ je² cho⁴ta⁴. Festo qui³tso²-le⁴: Nchaon³-li⁴ coi⁴noiˀya²-lai⁴.
ACT 25:23 Xi³ coan³nchaon³-ni³ ja³ˀai³ Agripa cao⁴ Berenice. A³li² to⁴jo³ xi³ coan³ nca³ ja³ˀai³. Ja³ˀa³sˀen³ ya⁴ ntˀia³va³sen³, cao⁴ je² xi³ nca³jco⁴-le⁴ so³nta²do⁴, cao⁴ cho⁴ta⁴ti¹tjon²-le⁴ ya⁴ na⁴xi⁴na³nta¹-ve⁴. Festo tsa³ca³te¹xo³ma³ nca³ qui³chja³ˀa²-le⁴ Pablo.
ACT 25:24 Cˀia⁴ Festo cˀoi⁴qui³tso²: Ji³ ni¹³ cho⁴ta⁴ti¹tjon² Agripa, cao⁴ nca³tsˀio³ xi³ xˀion⁴³ xi³ i⁴ ti³yo³cao⁴-na³jin⁴, cho¹tsen³-lao⁴³ je² cho⁴ta⁴-vi⁴. Je²-vi⁴ xi³ nca³tsˀi³ cho⁴ta⁴ judío tsa³cˀe¹tsˀoa³-na³ co²ntran⁴ xi³ tˀa³tsˀe⁴ ya⁴ Jerusalén cao⁴ i⁴-vi⁴. Cˀoa⁴-sˀin² qui³squi³ˀntia¹ nca³ tsi² tsa² va³quin²-le⁴ nca³ cˀoe¹jna³con³-sa³.
ACT 25:25 To⁴nca³ an³-vi⁴ˀni³ cˀoa⁴-sˀin² tsa³ˀve³ nca³ ni⁴jme³-jin² je¹ xi³ qui³tjen⁴-le⁴, xi³ va³quin²-le⁴ nca³ coi⁴ya²ntjai². Cˀoa⁴ je² soa³ cˀoa⁴-sˀin² qui³si³je¹ tˀa³tsˀe⁴ Augusto nca³nˀion¹-le⁴. Qui³sco³son²-ni³le⁴ nca³ an³ nca³ to⁴sa³ ya⁴ sca³ni³nčhˀoe²³.
ACT 25:26 To⁴nca³ ni⁴jme³-jin² cjoa⁴qui²xi⁴ xi³ coan³sjai³-na³ xi³ squi³-ni³le⁴ je² César xi³ tˀa³tsˀe⁴. Coi³ xa¹-ni³ nca³ ca²vˀa³sje³-no³ nca³ jon² je² Pablo. Ña³qui³ ji³ ni¹³ xi³ ca²vˀa³sje³-le²³, cho⁴ta⁴ti¹tjon² Agripa. Cˀoa⁴-sˀin² sˀe⁴-na³ cjoa⁴qui²xi⁴ xi³ squi³ni³-le⁴ César, cˀia⁴ nca³ je³qui³cho²na³nqui³-le⁴² Pablo.
ACT 25:27 Cˀoa⁴²ma³-na³ nca³ li²coi³ nta³ tjin¹ tsa² sca³nia³ jnco³ preso, tsa² tsi² jo³ xian³ jme³ cjoa⁴ xi³ tjin¹ co²ntran⁴-le⁴ nca³ je².
ACT 26:1 Cˀia⁴ je² Agripa cˀoi⁴qui³tso²-le⁴ Pablo: Vˀai²ˀnte³-li² nca³ coi⁴no²cjoa⁴ntjai²³ yao³-li⁴. Cˀia⁴ Pablo qui³sco²mi³ ntsja³ tsa³cˀe¹tsˀia⁴ nca³ qui³nchja⁴ntjai² yao³-le⁴:
ACT 26:2 Ji³ cho⁴ta⁴ti¹tjon² Agripa jo³ to⁴ma³tsjoa³-na³ nca³ ntˀai⁴-vi⁴ coi³nchja²ntje²³ yao³-na⁴ nqui³xcoin³, xi³ tˀa³tsˀe⁴ je² nca³yi³je³ cjoa⁴ xi³ va¹nqui³-ni³na³ cho⁴ta⁴ judío.
ACT 26:3 Nca⁴ ji³ xi³ nqui²sa⁴ nta³ ˀyai³ nca³yi³je³ jo³-sˀin² ve³-ni³ cho⁴ta⁴ judío, cˀoa⁴ nca³yi³je³ cjoa⁴ xi³ fao¹ya³-ni³. Cˀoa⁴-sˀin² tˀian⁴-nai¹³ cjoa⁴nta³ nca³ ti⁴no¹ˀya²-nai¹³ nca³ sin³ nca³ nta³.
ACT 26:4 Nca³tsˀi³ cho⁴ta⁴ judío tjin¹jin³-le⁴ jo³-sˀin² qui³coa⁴ yao³-na⁴ sa³ˀnta³ nca³ xtia³, jo³-sˀin² sa³ˀnta³ nca³ ti¹tjon² tsa³ca²te⁴jna³ jin³-le⁴ na⁴xi⁴na³nta¹-na⁴ ya⁴ Jerusalén.
ACT 26:5 Tsa² me³-le⁴ nca³ tsjoa¹ en¹-le⁴ je² cho⁴ta⁴ judío coa²tse³ ve³-na³, nca³ an³ qui³coa⁴ yao³-na⁴ sa³ˀnta³ ti¹tjon² jo³-sˀin² ve³-ni³ je² cho⁴ta⁴ fariseo, je² xi³ nqui²sa⁴ vˀe¹ne²-le⁴ yao³-le⁴ nca³ ve³xcon¹ Ni³na¹.
ACT 26:6 Ntˀai⁴-vi⁴ i⁴ ti²jna⁴tˀa³-le⁴ cjoa⁴te¹xo³ma³ xi³ tˀa³tsˀe⁴ je² cjoa⁴nta³ xi³ ti²co³ya³-le⁴, xi³ Ni³na¹ qui³tsjoa³-le⁴ tsˀoa³ je² nˀai³jcha¹cjin³-na¹.
ACT 26:7 Coi³ cjoa⁴nta³ xi³ tjio¹co³ya³-le⁴ xi³ te³jao² jco⁴ya³ ntje⁴-le⁴ nˀai⁴jcha¹cjin³-na¹. Cˀoa⁴-sˀin² tjio¹si¹xa¹-le⁴ Ni³na¹ nca³ntsjai² nca³ ni⁴čhjin³ nca³ ni⁴tjen⁴, nca³ tjio¹co³ya³-le⁴ nca³ sˀe⁴-le⁴ je² cjoa⁴nta³-ve⁴. Cˀoa⁴xin³-le²³ ji³ cho⁴ta⁴ti¹tjon² Agripa nca³ to⁴tˀa³tsˀe⁴ je² cjoa⁴nta³ xi³ ti²co³ya³-le⁴, to⁴coi³² cjoa⁴ tjio¹va¹nqui³-ni³na³ cho⁴ta⁴ judío.
ACT 26:8 Cˀoa⁴ jon², a¹-ni³ nca³ tsi² ma³cjain¹-si¹ni³no³ nca³ Ni³na¹ si¹cja³ˀa¹ya³-ni³le⁴ cˀen³.
ACT 26:9 Cˀoa⁴ cjoa⁴qui²xi⁴ ni¹ nca³ an³ cˀoa⁴-sˀin² qui³si³cja³ˀai³tsjen³ nca³ coan³chjen¹-na³ nca³ cˀoa⁴qui³sˀian³ ncjin² cjoa⁴ co²ntran⁴-le⁴ jan³ˀain¹-le⁴ Jesús xi³ Nazaret tsˀe⁴.
ACT 26:10 Cˀoa⁴qui³sˀian³ ya⁴ Jerusalén. A³li² to⁴cˀoa⁴cji³ cho⁴ta⁴-le⁴ Cristo qui³sca³nia³ ya⁴³ nto⁴ya¹. Cˀoa⁴-sˀin² qui³tsjoa³ˀnte²-na³ je² cho⁴ta⁴ti¹tjon²-le⁴ na⁴ˀmi³. Cˀia⁴ nca³ qui³ni²cˀen³, cˀoa⁴-sˀin² qui³tsjoa³ en¹-na⁴ co²ntran⁴-le⁴ nca³ je².
ACT 26:11 Cjai¹nca³ to⁴ncjin² cˀa³ tsa³ca¹-le⁴ nca³qui³jnta² ja⁴ya³ ntˀia³ sinagoga, sa³ˀnta³ cjoa⁴nˀion¹ qui³sˀin³-le⁴ nca³ nchja⁴ˀaon³-le⁴ Ni³na¹. A³li² to⁴cˀoa⁴cji³ jti³ coan³-na³ xi³ co²ntran⁴ tsˀe⁴. Ña³qui³ cˀoa⁴-sˀin² qui³ co²ntran⁴-le⁴ nta³ tsa² sa³ˀnta³ jña³ nca³ xin² na⁴xi⁴na³nta¹.
ACT 26:12 Cˀia⁴ nca³ cˀoa⁴-sˀin² qui³tjen⁴nqui³ co²ntran⁴-le⁴, quia³ ya⁴ Damasco. Yˀa³ orden jña³ nca³ tsa³cˀe¹ne²-na³ je² cho⁴ta⁴ti¹tjon²-le⁴ na⁴ˀmi³.
ACT 26:13 Ji³-lai²³ cho⁴ta⁴ti¹tjon², cˀia⁴ nca³ nchi³sen³, tsa³ˀve³ ya⁴³ ntia⁴² jnco³ lˀi¹ xi³ ncˀa³jmi³ ji³nčhoa³-ni³ xi³ nqui²sa⁴ to⁴fa³te³ ma³tsen³ cao⁴-ni³ tsa² tsˀoi¹. Ña³qui³ coan³ˀi³sen³ntai³-na³ cao⁴ je² xi³ tjen⁴coa⁴.
ACT 26:14 Qui³tsao³tsa³cjan¹-ni³jin⁴ nca³tsˀi³-jin⁴. Qui³nčhˀoe³-le⁴ jnco³ xi³ qui³nchja⁴-na³ nca³ en¹ hebrea: Saulo, Saulo, a¹-ni³ nca³ an³ ˀmi³tjen⁴nqui³ co²ntran⁴-si¹ni³nai¹³. To⁴si⁴qui²ˀoain³ yao³-li⁴, tsa² coi⁴njon¹-lai⁴ ya¹ xi³ yao³xcon¹ cji³.
ACT 26:15 Cˀia⁴ cˀoa⁴qui³xin³-le⁴: ˀya¹ ni¹³ ji³, Señor. Cˀoa⁴ je² Nai³-na¹ qui³tso²: An³-nia¹³ Jesús xi³ ti³ˀmi³tjen⁴nqui³ co²ntran⁴-nai¹³.
ACT 26:16 To⁴nca³ ti⁴so¹tjain⁴, ti⁴sen⁴ntoi³. To⁴coi³ xa¹-ni³ nca³ an³ ti²si³cˀa³tsen³-le²³ yao³-na⁴, nca³ tsjoa³-le²³ xa¹ nca³ ji³ si⁴xa¹-nai¹³, cˀoa⁴ testigo-na⁴ coain⁴ xi³ tˀa³tsˀe⁴ je² cjoa⁴ xi³ ca²ˀyai³, cˀoa⁴-ti⁴ testigo-na⁴ coain⁴ xi³ tˀa³tsˀe⁴ je² cjoa⁴ xi³ sˀa⁴ si³cˀa³tsen³-le²³ yao³-na⁴.
ACT 26:17 Cˀoa⁴-sˀin² cˀoa³sje³ntjai²-le²³ xi³ tˀa³tsˀe⁴ cho⁴ta⁴ na⁴xi⁴na³nta¹, cˀoa⁴ xi³ tˀa³tsˀe⁴ cho⁴ta⁴ xi³ li² judío-jin², je² xi³ sca³ni³jin³-le²³ ntˀai⁴-vi⁴,
ACT 26:18 jme¹-ni³ nca³ cˀoa⁴-sˀin² cho¹ˀai²nqui³-si¹ni³ xcon⁴. Ca²ta³vi³tjo³-ni³ cjoa⁴njion²-le⁴, ca²ta³ma³ˀi³sen³-le⁴, ca²ta³vi³ncha³xin²-le⁴ je² nca³nˀion¹-le⁴ Satanás, ca²ta³nčhoa¹tˀa³-le⁴ Ni³na¹, jme¹-ni³ nca³ cˀoa⁴-sˀin² cha⁴tˀa³-si¹ni³le⁴ je¹-le⁴, cˀoa⁴ sˀe⁴cjoa⁴tjao²-si¹ni³le⁴ ja⁴jin³-le⁴ je² xi³ je³coan³tsje³ nca³ ma³cjain¹-le⁴ xi³ tˀa³tsˀe⁴.
ACT 26:19 Coi³ cjoa⁴, ji³ cho⁴ta⁴ti¹tjon² Agripa, li²coi³ qui³si³ta²ja³-le⁴ yao³-na⁴ je² xi³ tsa³ˀve³, xi³ ncˀa¹ ja³ˀai³-ni³na³.
ACT 26:20 To⁴sa³ nca³ ti¹tjon² qui³nchja²ya³jin³-le⁴ je² xi³ tjio¹ ya⁴ Damasco, cˀia⁴ je² xi³ tjio¹ ya⁴ Jerusalén, cˀoa⁴ nca³qui³jnta² na³nqui³ Judea, cao⁴ nca³tsˀi³ cho⁴ta⁴ xi³ li² judío-jin², nca³ ca²ta³si¹cˀa³ntjai²ya³ cjoa⁴fa³ˀai³tsjen³-le⁴, ca²ta³nčhoa¹tˀa³-le⁴ Ni³na¹. Cˀoa⁴ ca²ta³sˀin¹ je² xi³ cjoa⁴nta³ ˀmi²-le⁴², xi³ va³quin²-le⁴ je² xi³ je³qui³si³cˀa³ntjai²ya³ cjoa⁴fa³ˀai³tsjen³-le⁴.
ACT 26:21 To⁴tˀa³tsˀe⁴ je² cjoa⁴ xo⁴tjin¹-vi⁴ je² cho⁴ta⁴ judío qui³tsoa³-na³ ya⁴³ yo⁴nco⁴. Coan³me³-le⁴ nca³ si⁴²cˀen³-na³.
ACT 26:22 To⁴nca³ Ni³na¹ tsa³ca³sen¹cao⁴-na³. To⁴jo³ cˀoa⁴ti²sˀian³ sa³ˀnta³ ntˀai⁴-vi⁴. Cˀoa⁴-sˀin² ti²tsjoa³-le⁴ en¹-na⁴, nta³ tsa³ cho⁴ta⁴ xi³ tjen⁴nqui³, nta³ tsa² cho⁴ta⁴ti¹tjon². A³li²jme³-sa³ xi³ cja⁴ˀai¹ xi³ xian³, to⁴je² nca³yi³je³ cjoa⁴ xi³ je² cho⁴ta⁴ xi³ qui³nchja⁴ya³ tˀa³tsˀe⁴ Ni³na¹ cao⁴ Moisés cˀoa⁴qui³tso² nca³ cˀoa⁴coan⁴.
ACT 26:23 Je² cˀoa⁴qui³tso² nca³ je² Cristo cjoa⁴ˀa³ cjoa⁴ñˀain³, cˀoa⁴ nca³ je² ti¹tjon² cjoa⁴ˀa¹ya³jin³-ni³le⁴ cˀen³. Cˀoa⁴-sˀin² coa⁴co²-le⁴ cjoa⁴ˀi³sen³ cho⁴ta⁴ na⁴xi⁴na³nta¹ cao⁴ cho⁴ta⁴ xi³ li² judío-jin².
ACT 26:24 Cˀia⁴ nca³ Pablo cˀoa⁴-sˀin² qui³nchja⁴ntjai² yao³-le⁴, je² Festo nˀion¹ qui³nchja⁴: Sca¹-la⁴li² Pablo, to⁴coi³-la⁴ cjoa⁴chji⁴ne⁴-li⁴ si¹sca¹ya³-ni³li².
ACT 26:25 To⁴nca³ Pablo qui³tso²: A³li² sca¹-jin²na³, ji³-lai²³ Festo, xi³ cˀoa⁴-sˀin² to⁴ncˀa³ ti³jnai³. Ña³qui³ en¹qui²xi⁴ xi³ nchja²³, cˀoa⁴ nta³ tjin¹coan³.
ACT 26:26 Je² cho⁴ta⁴ti¹tjon² ve³ nca³yi³je³ cjoa⁴-vi⁴. Cˀoa⁴-ti⁴ ma³nˀion¹coan³ nca³ fa²coa⁴ nca³ je². Li²coi³ si³cja³ˀai³tsjen³ nca³ tji¹ˀma³-le⁴ nca³yi³je³ je²-vi⁴, nca³ tsi² tsa² to⁴jña³-jin² ˀncho²ño³ cˀoa⁴coan³.
ACT 26:27 A³ ma³cjain¹-li² cho⁴ta⁴ti¹tjon² Agripa, tˀa³tsˀe⁴ je² xi³ qui³tso² je² cho⁴ta⁴ xi³ qui³nchja⁴ya³ tˀa³tsˀe⁴ Ni³na¹. ˀve³-nia¹³ nca³ ma³cjain¹-li².
ACT 26:28 Cˀia⁴ Agripa cˀoa⁴qui³tso²-le⁴ Pablo: Ji³ to⁴choa³tse³-ni¹ ni²ˀi³nta³jin³-nai¹³ nca³ cho⁴ta⁴-le⁴ Cristo coan⁴.
ACT 26:29 Cˀia⁴ qui³nchja⁴ Pablo: Jo¹ to⁴nta³ tsa² to⁴jo³-sˀin²ni³ tsjoa¹-no³ Ni³na¹ nca³ to⁴choa³tse³-ni¹ a³xo⁴ nˀion¹ tse³ cˀoa⁴ca²ta³mao³ jo³-ni³ an³. A³li² to⁴ji³-jin², cˀoa⁴ nca³tsˀi³ nio¹³ xi³ i⁴ ti³no²ˀya²-nao¹³vi⁴ ntˀai⁴-vi⁴. To⁴je² xi³ ti¹tˀa³nˀion¹-na³ xi³ mai³.
ACT 26:30 Cˀia⁴ nca³ je³cˀoa⁴qui³tso² nca³yi³je³ en¹-vi⁴, tsa³qui³so¹tjen⁴ je² cho⁴ta⁴ti¹tjon² cao⁴ je² gobernador cao⁴ Berenice cao⁴ je² nca³tsˀi³ xi³ ya⁴ tsa³ca³tio²cao⁴.
ACT 26:31 Tsa³cjao¹tˀa³xin², cˀoi⁴qui³tso²-le⁴ xi¹ncjin¹: Ni⁴to⁴jme³-jin² cjoa⁴ xi³ sˀin¹ je² cho⁴ta⁴-vi⁴ xi³ va³quin²-le⁴ nca³ coi⁴ya¹ntjai², ni⁴nto⁴ya¹-jin².
ACT 26:32 Je² Agripa cˀoi⁴qui³tso²-le⁴ Festo: Coan⁴-ni¹ tsa²cai³ nca³ cha⁴ni²ntai¹ cho⁴ta⁴-vi⁴, tsa² tsi² tsa² cˀoa⁴-sˀin² qui³si³je¹ nca³nˀion¹-le⁴ xi³ tˀa³tsˀe⁴ César.
ACT 27:1 Je³cˀoa⁴-sˀin² qui³sˀe³nta³ cjoa⁴ nca³ coa⁴nquin¹soin²⁴-jin⁴ na³nta¹ cao⁴ chi³tso³ sa³ˀnta³ Italia. Je² Pablo cao⁴ xi³cˀa³ preso qui³cha³ni²tˀa³-le⁴ jnco³ nai³-le⁴ so³nta²do⁴ xi³ Julio ˀmi². Je² Julio tsˀe⁴ so³nta²do⁴ xi³ yˀa³ jan³ˀain¹-le⁴ Augusta.
ACT 27:2 Cˀia⁴ tsa³nquin¹yai³⁴-jin⁴ jnco³ barco xi³ ya⁴ Adramitio tsˀe⁴, xi³ cjoa⁴ˀa³to³ je² na⁴xi⁴na³nta¹-le⁴ Asia xi³ tjio¹ntai³-le⁴ nta¹chi³con³. Cˀoa⁴-ti⁴ je² Aristarco, jnco³ cho⁴ta⁴ macedonio xi³ Tesalónica tsˀe⁴, qui³cao⁴-na³jin⁴.
ACT 27:3 Xi³ coan³nchaon³-ni³, ji³choi³⁴-jin⁴ ya⁴ Sidón. Je² Julio cjai¹nca³ to⁴nta³ tsa³ve³con³ Pablo. Cˀoa⁴-sˀin² qui³tsjoa³ˀnte²-le⁴ nca³ coai⁴con³-le⁴ mi²yo⁴-le⁴, jme¹-ni³ nca³ si⁴²sin³-ni³le⁴.
ACT 27:4 Cˀia⁴ cˀoa⁴-sˀin² tsa³nquin¹⁴-jin⁴, jo³-sˀin² vˀe¹ ntjao⁴. Cˀoa⁴-sˀin² tsa³nquin¹son²ntai¹⁴-jin⁴ xi³ncoa³-ni³ ya⁴ ˀnte³ Chipre, nca⁴ je² ntjao⁴-ve⁴ xi³ cja⁴ˀai¹-sˀin² qui³.
ACT 27:5 Ya⁴ tsa³qui³ma³toi³⁴-jin⁴ nta¹chi³con³ ya⁴ Cilicia cao⁴ ya⁴ Panfilia. Ya⁴ qui³ni²ca³sen²jnai³⁴-jin⁴ barco ya⁴ Mira, na⁴xi⁴na³nta¹ ya⁴ˀnte³ Licia.
ACT 27:6 Je² nai³-le⁴ so³nta²do⁴ qui³so³co³-le⁴ jnco³ barco xi³ tsˀe⁴ Alejandria xi³ ti¹fi²son²nta¹ ya⁴ Italia. Ya⁴ qui³si³ca³tio¹ya³-na³jin⁴.
ACT 27:7 A³li² to⁴ncjin² ni⁴čhjin³ qui³nˀiain²⁴-jin⁴ nca³ toi⁴² tsa³nquin¹son²ntai¹⁴-jin⁴. To⁴sˀa⁴ ya⁴ Gnido ji³choi³⁴-jin⁴ to⁴coi³ nca³ li²coi³ qui³tsjoa³ˀnte²-na³jin⁴ je² ntjao⁴. To⁴ji³tja³cja¹nqui³-lai⁴jin⁴ ya⁴ ˀnte³ Creta, xi³ qui³jna³tˀa³-le⁴ ˀnte³ Salmón.
ACT 27:8 A³li² to⁴ñˀain³ ji³tja³toi³⁴-jin⁴, ji³choi³⁴-jin⁴ jnco³ ˀnte³ jña³ nca³ Buenos Puertos ˀmi², čhian³-ni³le⁴ jña³-ni³ ti¹jna³ je² na⁴xi⁴na³nta¹ Lasea.
ACT 27:9 Je³ja³ˀa³to³ ncjin² ni⁴čhjin³. Je³xcon¹ chon³ nca³ tsa³nquin¹son²ntai¹⁴-jin⁴, nca⁴ je³ja³ˀa³to³ ni⁴čhjin³ cˀia⁴ nca³ tsa³ca³tio²nchjan³ sˀoi¹. Pablo cˀoa⁴-sˀin² tsa³cˀe¹ne²-le⁴,
ACT 27:10 cˀoi⁴qui³tso²-le⁴: Nca³tsˀio³ ˀve³-nia¹³ nca³ cjai¹nca³ to⁴ñˀain³ cjoian¹, cˀoa⁴ tse³ si⁴cha¹, li² tsa² to⁴je² chˀa¹-ve⁴, li² tsa² to⁴je² barco-vi⁴, to⁴nca³ cˀoa⁴-ti⁴ ña¹-vi⁴ si⁴cha³² yao³-na¹ tsa² cjoian¹.
ACT 27:11 To⁴nca³ je² nai³-le⁴ so³nta²do⁴ nqui²sa⁴ coan³cjain¹-le⁴ xi³ qui³tso² je² xi³ ti¹ca³ni¹ barco, cˀoa⁴ xi³ qui³tso² je² nai³-le⁴ barco, cao⁴-ni³ tsa² je² xi³ qui³tso² Pablo.
ACT 27:12 Cˀoa⁴ je² ˀnte³-ve⁴ li²coi³ nta³ chon³, li²coi³ coan⁴ nca³ coi⁴yoi³⁴-jin⁴ je² chan⁴nchˀan¹. Je² xi³ nqui²sa⁴ ncjin² ma³-ni³ cˀoa⁴-sˀin² tsa³cjao¹ˀa³ nca³ ya⁴ cjoa³ˀa³, tsa² coan⁴ nca³ coi⁴cho³ ya⁴ Fenice, nca³ ya⁴ cjoa³ˀa³to³-le⁴ je² chan⁴nchˀan¹. Ya⁴ Fenice jnco³ puerto xi³ tsˀe⁴ Creta, xi³ co³tsen³tˀa³ jña³ nca³ ca³ntjai²-ni³ tsˀoi¹.
ACT 27:13 Cˀia⁴ nca³ to⁴jvi³ ti¹fa³ˀa³ je² ntjao⁴ xi³ sur fa³ˀai³-ni³, qui³si³cja³ˀai³tsjen³ nca³tsˀi³ nca³ je³ja³ˀai³-le⁴ xi³ me³-le⁴. Qui³son²nta¹-ni³, qui³ čhian³-ni³le⁴ ya⁴ ntai³-le⁴ ˀnte³ Creta.
ACT 27:14 To⁴nca³ ti⁴ˀa³ ja³ˀai³-ni³ jnco³ ntjao⁴ xi³ nˀion¹ tjen⁴, xi³ Euroclidón ˀmi².
ACT 27:15 Ntjao⁴-ve⁴ qui³scoe¹-le⁴ barco-ve⁴. Li²coi³ ti⁴qui³jcho¹cjoa⁴-ni³le⁴. To⁴cˀoa⁴-sˀin² qui³tsˀai²ˀnte³-lai⁴jin⁴ jo³-sˀin² vˀe¹ ntjao⁴. Cˀoa⁴-sˀin² je² ntjao⁴-ve⁴ qui³cao⁴-na³jin⁴.
ACT 27:16 To⁴ña³qui³ qui³-ni¹ ji³cho²ca³tˀa³ jnco³ na³nqui³ˀnti¹ xi³ isla ˀmi², jan³ˀain¹-le⁴ Clauda ˀmi². To⁴ˀya³ qui³chjoai¹⁴-jin⁴ chi³tso³.
ACT 27:17 Cˀia⁴ nca³ qui³scoe¹ chi³tso³, qui³sˀe³tˀa³nˀo¹. Tsa³cˀe¹tˀa³nˀion¹ je² barco-ve⁴. Cjai¹nca³ to⁴qui³tso³cjon¹-le⁴, tsa² ya⁴ sca⁴jin³ je² tso⁴mi¹ xi³ Sirte ˀmi². Tsa³cˀa³jen³ je² na³jño³ xi³ qui³tjen⁴, to⁴cˀoa⁴-sˀin² ntjao⁴-ve⁴ qui³cao⁴.
ACT 27:18 Nˀion¹ ñˀain³ ti¹sˀin¹ nca³ ña³qui³ ja³ˀai³ jtsi¹ntjao⁴. Cjai¹nca³ chˀao³ qui³si³cao⁴. Xi³ coan³nchaon³-ni³ qui³si³cˀa³tsao³ chˀa¹-le⁴.
ACT 27:19 Xi³ coan³jan²-ni³ ni⁴čhjin³ cao⁴ ntsai⁴-jin⁴ ña³qui³ qui³ni²cˀa³tsoai³⁴-jin⁴ je² tso³jmi²-le⁴ barco-ve⁴.
ACT 27:20 Ncjin² ni⁴čhjin³ li²coi³ coan³tsen³ ni⁴tsˀoi¹-jin², ni⁴ni³ño³-jin². Ti⁴cˀoa⁴-sˀin² ja³ˀai³ne²-nca¹ni³na³jin⁴ jtsi¹ntjao⁴, li² to⁴jo³ xi³ coan³. Li²coi³ qui³cho³ya²-lai⁴jin⁴ nca³ coi²tjo⁴ntjai²⁴-jin⁴.
ACT 27:21 Je³coan³ ncjin² ni⁴čhjin³ nca³ tsa³qui³yo³nchjain³⁴-jin⁴. Cˀia⁴ je² Pablo tsa³ca³sen²nto³ nca³va³sen³-le⁴, cˀoi⁴qui³tso²: Nqui²sa⁴-la² nta³ tsa²cai³ nˀai³, tsa² cˀoa⁴-sˀin² qui³no²ˀya²-nao¹³. Li²coi³-ni³ ji²tjo⁴-nia³² Creta tsa²cai³. Li²coi³ cˀoa⁴-sˀin² cji³ma³tˀen³² tsa²cai³.
ACT 27:22 To⁴nca³ ntˀai⁴-vi⁴ntai⁴ vˀe³tsˀoa²³-no³ ti⁴nˀion¹ta³con²³. Ni⁴to⁴jnco³-jin²la² xi³ ña¹ coi⁴ya¹. To⁴je² barco-ve⁴ xi³ si⁴cha³².
ACT 27:23 Ntˀai⁴ je² ni⁴tjen⁴-vi⁴ tsa³ca³sen²tˀa³-na³ je² a²ncje⁴-le⁴ Ni³na¹, je² xi³ an³ cˀoa⁴-sˀin² fi³tˀa³-le⁴, cˀoa⁴ je² xi³ an³ si³xa¹-le⁴.
ACT 27:24 Cˀoa⁴qui³tso²-na³: Pablo, a³li² jcon³-jin²³. Cjai¹nca³ to⁴ma³chjen¹ nca³ ya⁴ coi⁴choi³ nqui³xcon⁴ César. Coe⁴-ni³ Ni³na¹ cˀoa⁴-sˀin² qui³tsjoa³-li² nca³tsˀi³ xi³ ji³ tjio¹fi²cao⁴-li².
ACT 27:25 Coi³ nˀai³, cˀoa⁴-sˀin² ti⁴nˀion¹ta³con²³ nca³ jon². An³ cˀoa⁴-sˀin² nˀion¹tˀa³coan³ Ni³na¹ nca³ cˀoa⁴-sˀin² si³cji³tjo³son² jo³ qui³tso²-na³.
ACT 27:26 To⁴nca³ ma³chjen¹ nca³ coi⁴cho³ca³tˀa³-le⁴² jnco³ isla, jnco³ na³nqui³ˀnti¹.
ACT 27:27 Xi³ je³coan³ te³ño³ ni⁴tjen⁴. Cˀia⁴ qui³cao⁴ ya⁴jin³ na³nta¹ xi³ Adriático ˀmi². Cˀia⁴ nca³ coan³ va³sen³ni⁴tjen⁴, je² cho⁴ta⁴ xi³ si¹xa¹ ya⁴ barco cˀoa⁴qui³tso² nca³ je³cji³ma³čhian³tˀa³-le⁴ na³nqui³.
ACT 27:28 Qui³si³cˀa³tjen⁴jin³ je² xi³ vˀe¹cho⁴ya³ jo³ cji³ na⁴nca⁴ na³nta¹. Tsa³cˀe¹choa⁴. Can³-la⁴ na³nca³ qui³jna³ na³nta¹. Cˀia⁴ qui³ nqui²ˀi⁴tse¹-nca¹ni³, ti⁴nqui²jnco³ cˀa² ti⁴qui³si³cˀa³tjen⁴jin³-nca¹ni³ je² xi³ vˀe¹cho⁴ya³; čhja³ˀaon² na³nca³ ji³cho².
ACT 27:29 Cjai¹nca³ to⁴qui³tsa³cjon¹ tsa² ya⁴ coi⁴cho³ca³tˀa³ ˀnte³ jña³ cˀoa⁴ to⁴tjin¹ la⁴jao⁴. Ño³ qui⁴cha⁴ xi³ jo³-ni³ tsa² ya¹nčhji⁴ qui³si³cˀa³tjen⁴jin³ ya⁴ to²tsˀin³ barco, jme¹-ni³ nca³ tsi² ya⁴ sˀe⁴tˀa³-ni³ la⁴jao⁴. Jo³ coan³ me³-le⁴ nca³ ntˀai⁴cjoan¹ ca²ta³sˀe³sen¹.
ACT 27:30 Je² nca³tsˀi³ xi³ ya⁴ si¹xa¹ ya⁴³ barco-ve⁴ me³-le⁴ nca³ to⁴coai⁴che¹. Qui³sca³ni¹jin³ na³nta¹ je² chi³tso³. To⁴cˀoa⁴qui³sˀin³ jo³-ni³ tsa² me³-le⁴ nca³ sca⁴ni¹nto³-sa³ je² qui⁴-cha⁴nčhji⁴ ya⁴jco⁴ barco-ve⁴.
ACT 27:31 Je² Pablo cˀoi⁴qui³tso²-le⁴ je² nai³-le⁴ so³nta²do⁴ cao⁴ so³nta²do⁴. Tsa² je² nca³tsˀi³ cho⁴ta⁴-vi⁴ li²coi³ coa⁴tio⁴ i⁴ barco-vi⁴, jon² li²coi³ coi²tjo⁴ntjao²³.
ACT 27:32 Cˀia⁴ je² so³nta²do⁴ tsa³ca³te³ je² nˀo¹ xi³ tjio¹tˀa³nˀion¹-ni³ je² chi³tso³. To⁴cˀoa⁴-sˀin² qui³sca³ni¹ nca³ to⁴je².
ACT 27:33 Cˀia⁴ nca³ je³qui³sˀe³sen¹, Pablo tsa³cˀe¹tsˀoa³-le⁴ nca³tsˀi³ nca³ ca²ta³cjen², cˀoi⁴qui³tso²-le⁴: Ntˀai⁴-vi⁴ te³ño³-ni³ ni⁴čhjin³ nca³ cˀoi⁴-sˀin² ti³cho³yao²³ ti³yo³nchjaon³, nca³ ni⁴to⁴jme³-jin² xi³ qui³chi³nao³.
ACT 27:34 Coi³ nca³ vˀe³tsˀoa²³-no³ nca³ ti⁴cho³, jme¹-ni³ nca³ sˀe⁴-si¹ni³no³ nca³nˀion¹. Ni⁴jnco³-jin²la² ntsja⁴jco³ nca³tsˀio³-vi⁴ xi³ cha⁴.
ACT 27:35 Cˀia⁴ nca³ je³cˀoa⁴qui³tso², qui³scoe¹ nio⁴xti²la⁴, qui³tsjoa³-le⁴ cjoa⁴nta³ Ni³na¹ nqui³xcon⁴ nca³tsˀi³. Qui³si³xcoa⁴ tsa³cjen².
ACT 27:36 Cˀia⁴ qui³sa³tio²nta³-ni³con³ nca³tsˀi³. Cˀoa⁴-ti⁴ tsa³cjen² nca³ je².
ACT 27:37 Jao² ciento cao⁴-ni³ jan²can³ cao⁴-ni³ čhja³ˀaon²jnco³ mai³⁴-jin⁴ xi³ ya⁴ ti³yo³yai³⁴-jin⁴ barco-ve⁴.
ACT 27:38 Cˀia⁴ nca³ je³coan³squi³, qui³si³tja⁴-sa³ barco-ve⁴, ya⁴ qui³si³cˀa³tjen⁴jin³ nta¹chi³con³ je² chˀa¹ trigo.
ACT 27:39 Cˀia⁴ nca³ je³qui³sˀe³sen¹, li²coi³ ve³ je² na³nqui³. To⁴nca³ tsa³ve³ jnco³ ˀnte³ jña³ tji¹tin³ xi³ to⁴ya⁴ntai³-le⁴ ña³qui³ tso⁴mi¹ ncha³. Cˀoa⁴-sˀin² qui³si³cja³ˀai³tsjen³ nca³ ya⁴ si⁴²ca³sen¹jna³ barco tsa² coan⁴.
ACT 27:40 Cˀia⁴ tsa³cˀa³sje³ca³ˀa³ je² qui⁴cha⁴nčhji⁴, ya⁴ tsa³cˀe¹jna³jin³-le⁴ nta¹chi³con³. Cˀoa⁴-ti⁴ qui³sca³ni¹nto³ je² nˀo¹ xi³ tjio¹tˀa³ ya⁴ to²tsˀin³-le⁴ barco, xi³ cˀoa⁴-sˀin² tsjoa¹ coi²nta⁴ jo³-sˀin² fi² barco. Qui³sca³ni¹mi³ncˀa³ je² na³jño³ xi³ ti¹tjon² tjen⁴ncˀa³ jo³-sˀin² fi²-ni³ ntjao⁴. Qui³ sa³ˀnta³ jña³ nca³ na³nqui³ tjin¹.
ACT 27:41 Cˀia⁴ nca³ ji³cho² jnco³ ˀnte³ jña³ nca³ jao² na³nta¹ sa³te¹cjao³, ya⁴ qui³si³ca¹jna³ barco-ve⁴. Ya⁴ jco⁴ qui³sca³tˀa³nˀion¹, li²coi³ ti⁴coan³ qui³si³cjan³-ni³. Cˀoa⁴ ya⁴ to²tsˀin³ qui³tjo³cjao³ nca³ to⁴je² nca³nˀion¹-le⁴ na³nta¹.
ACT 27:42 Cˀia⁴ tsa³cjao¹ya³-ni³ so³nta²do⁴. Coan³me³-le⁴ nca³ si⁴²cˀen³ je² preso, jme¹-ni³ nca³ tsi² ˀya³ xi³ coan⁴nca³-ni³ nca³ coai⁴jin³nta¹.
ACT 27:43 To⁴nca³ je² nai³-le⁴ so³nta²do⁴ coan³me³-le⁴ nca³ cˀoa⁴sje³ntjai² Pablo. To⁴tsa³cˀe¹chjoa²-le⁴ je² cjoa⁴fa³ˀai³tsjen³-le⁴. Cˀoa⁴-sˀin² tsa³ca³te¹xo³ma³ ˀya³ xi³ ma³-le⁴ cjen³nta¹, ca²ta³fi²ti¹tjon², ca²ta³fi³cho¹ jña³ nca³ na³nqui³ tjin¹.
ACT 27:44 Cˀoa⁴ je² xi³cˀa³ ca²ta³fi²son², tsa² ya¹te³, tsa² to⁴jña³-ni³le⁴ tso³jmi² xi³ tsˀe⁴ barco. Cˀoa⁴coan³ ji³tjo³ntjai² ña³qui³ nca³tsˀi³. Ji³cho² jña³ nca³ qui³jna³ na³nqui³.
ACT 28:1 Cˀia⁴ nca³ je³ji²tjo⁴ntjai²⁴-jin⁴, cˀia⁴ tsa³ˀyai³⁴-jin⁴ nca³ je² ˀnte³-ve⁴ Malta ˀmi².
ACT 28:2 Je² cho⁴ta⁴yo⁴ma⁴ xi³ ya⁴ tjio¹ cjai¹nca³ to⁴nta³ tsa³ve³-na³jin⁴. Tsa³cˀe¹tse³ lˀi¹. Qui³tsjoa³ˀnte²-na³jin⁴ nca³tsˀi³⁴-jin⁴ nca³ cji³vˀa³ jtsi¹. A³li² to⁴nchˀan¹ coan³.
ACT 28:3 Pablo tsa³cˀe¹xco¹ ya¹xi⁴, tsa³qui³ncha¹jin³ lˀi¹. Jnco³ ye⁴ qui³to²ca³-le⁴ lˀi¹ nca³ coan³sjoe²-le⁴. Qui³tsˀon¹jon³ ya⁴ ntsja³ Pablo.
ACT 28:4 Cˀia⁴ nca³ je² cho⁴ta⁴yo⁴ma⁴ tsa³ve³ je² ye⁴, nca³ cˀoa⁴-sˀin² qui³tjen⁴vˀa³nqui³-ni³ ntsja³ Pablo, nca³ i⁴ nca³ jan¹ qui³tso²-le⁴ xi¹ncjin¹: Cjoa⁴qui²xi⁴²-la⁴ je² cho⁴ta⁴-vi⁴ xi³ si¹cˀen³ cˀen³. Ji³tjo³ntjai²-ni³ nta¹chi³con³, to⁴nca³ xi³ tjin¹-le⁴ cjoa⁴qui²xi⁴ li²coi³ si¹cˀe¹jna³con³.
ACT 28:5 To⁴nca³ Pablo tsa³cˀe¹tsao³jne³jin³ lˀi¹ je² ye⁴-ve⁴. Ni⁴jme³-jin² xi³ coan³-le⁴.
ACT 28:6 Nca³tsˀi³ tjio¹co³ya³-le⁴, cˀia⁴ tsa² coi⁴tjo³ya³, cˀoa⁴ tsa² sca⁴tsˀo¹tjen⁴, nca³ coi⁴ya² nti⁴ton⁴. Tse³ qui³sco³ya³-le⁴. Tsa³ve³ nca³ ni⁴jme³-jin² xi³ coan³-le⁴. Tsa³ca³tio²jyo¹. Ni³na¹-la⁴vi⁴, cˀoi⁴qui³tso².
ACT 28:7 Ya⁴ ˀnte³-ve⁴ cjai¹nca³ to⁴tjin¹-le⁴ na³nqui³ je² cho⁴ta⁴ti¹tjon² xi³ Publio ˀmi². Je²-vi⁴ xi³ qui³tsjoa³ˀnte²-na³jin⁴, jan² ni⁴čhjin³ nta³ tsa³qui³yo³coai⁴-jin⁴.
ACT 28:8 Xi³ coan³ je² nˀai³-le⁴ Publio ti¹qui³jna³son² na⁴chan³, ti¹mˀen³. Ntˀai⁴ tjin¹-le⁴ cao⁴ chˀin³njin¹. Pablo ja³ˀa³sˀen³con³-le⁴. Cˀia⁴ nca³ je³tsa³cˀe¹tsˀoa³, ntsja³ tsa³ca¹jna³son², ña³qui³ coan³nta³-ni¹.
ACT 28:9 Cˀia⁴ nca³ cˀoa⁴coan³, cˀoa⁴-ti⁴ je² xi³cˀa³ xi³ tjio¹mˀen³-ve⁴ ya⁴ ˀnte³-ve⁴, ji³cho²nčhˀoe². Ña³qui³ coan³nta³-ni¹.
ACT 28:10 A³li² to⁴cˀoa⁴cji³ tso³jmi² cjoa⁴tjao² qui³tsjoa³-na³jin⁴. Cˀia⁴ nca³ tsa³nquin¹⁴-jin⁴, ncjin² jco⁴ya³ tso³jmi² xi³ coan⁴chjen¹-na³jin⁴ ya⁴ ntia⁴², qui³tsjoa³-na³jin⁴.
ACT 28:11 Cˀoa⁴-sˀin² xi³ coan³ jan² sa¹ tsa³nquin¹yai³⁴-jin⁴ jnco³ barco xi³ tsˀe⁴ Alejandria. Ya⁴ ˀnte³-ve⁴ tsa³cˀe²jna³ je² chan⁴nchˀan¹ xi³ je³ja³ˀa³to³. Tji¹choa⁴-le⁴ barco-ve⁴ je² ni³ño³ xi³ Cástor cao⁴ Pólux ˀmi².
ACT 28:12 Cˀia⁴ nca³ ji³choi³⁴-jin⁴ ya⁴ Siracusa, jan² ni⁴čhjin³ tsa³qui³yoi³⁴-jin⁴ nca³ ya⁴.
ACT 28:13 Nca³ ya⁴ tsa³cˀe²tin³soin²⁴-jin⁴, sa³ˀnta³ ji³choi³⁴-jin⁴ ya⁴ Regio. Xi³ coan³nchaon³-ni³ je² ntjao⁴ ji³tjo³mi³-ni³ nca³ qui²xi⁴-le⁴ son³ˀnte³. Cˀoa⁴-sˀin² xi³ coan³ jao²-ni³ ni⁴čhjin³ ji³choi³⁴-jin⁴ ya⁴ Puteoli,
ACT 28:14 jña³ qui³sa³te³jin³-jin⁴ cho⁴ta⁴-le⁴ Cristo. Tsa³cˀe¹tsˀoa³-na³jin⁴ nca³ coi⁴yo³coai⁴-jin⁴ ña³to³ ni⁴čhjin³. Cˀia⁴ ya⁴ ji³nčhoa³-ni³jin⁴ sa³ˀnta³ Roma.
ACT 28:15 Ya⁴ qui³nčhˀoe¹ je² ntsˀe³², ji³cho² cja³ˀa¹ya³ntia³-na³jin⁴ ya⁴ sa³ˀnta³ nti⁴tsin⁴-le⁴ Apio, cˀoa⁴-ti⁴ jña³ Jan² Hotel ˀmi². Cˀia⁴ nca³ je² Pablo tsa³ve³ cho⁴ta⁴-ve⁴, qui³tsjoa³-le⁴ cjoa⁴nta³ Ni³na¹, se¹coan³je³con³.
ACT 28:16 Cˀia⁴ nca³ ji³choi³⁴-jin⁴ ya⁴ Roma, je² nai³-le⁴ so³nta²do⁴ qui³tsjoa³-le⁴ je² xi³ nca³jco⁴-le⁴ so³nta²do⁴ nca³tsˀi³ preso. To⁴nca³ je² Pablo tsa³cˀai²ˀnte³-le⁴ nca³ cˀoe¹jna³ nca³ to⁴je², cao⁴ jnco³ so³nta²do⁴ xi³ si⁴²coi²nta⁴.
ACT 28:17 Cˀia⁴ nca³ je³coan³ jan² ni⁴čhjin³, Pablo qui³nchja⁴-le⁴ je² cho⁴ta⁴ti¹tjon²-le⁴ cho⁴ta⁴ judío. Cˀia⁴ nca³ je³coan³xco¹, cˀoi⁴qui³tso²-le⁴: Nca³tsˀio³ ˀnti¹ntsˀe³, ni⁴to⁴jme³-jin² xi³ qui³sˀian³ co²ntran⁴-le⁴ na⁴xi⁴na³nta¹, cˀoa⁴ co²ntran⁴-le⁴ costumbre-le⁴ cho⁴ta⁴jchi¹nca³-na¹. Ya⁴ qui³si²⁴ntsja³-na³ preso ya⁴ Jerusalén ya⁴ ntsja³ cho⁴ta⁴ romano.
ACT 28:18 Cˀia⁴ nca³ je³qui³cho²tˀa³-na³, coan³me³-le⁴ qui³sca³ni¹ntai¹-na³, nca³ tsi² tsa² jme³ je¹ tjin¹-na³ xi³ va³quin²-le⁴ nca³ coi⁴ya¹ntje²³.
ACT 28:19 To⁴nca³ cja⁴ˀai¹ qui³tso² je² cho⁴ta⁴ judío. Cjoa⁴nˀion¹ qui³si³je¹-nia¹³ nca³nˀion¹-na⁴ tˀa³tsˀe⁴ César. An³-vi⁴ ni⁴jme³-jin² xi³ tjin¹-na³ nca³ na³nqui³-na³ coa³nqui³-nia³.
ACT 28:20 To⁴je² cjoa⁴-vi⁴ nca³ ca²nchja²-ni³no³, nca³ scoe³-no³ nca³ cjoa²cao⁴-no³. To⁴tˀa³tsˀe⁴ je² cjoa⁴nta³ xi³ ti¹co³ya³-le⁴ cho⁴ta⁴ judío nca³ cˀoa⁴-sˀin² tji¹tˀa³nˀion¹-nia³.
ACT 28:21 Cˀia⁴ cˀoi⁴qui³tso²-le⁴: To⁴nca³ jin⁴-jin⁴ ni⁴jme³-jin² xon⁴ ja³ˀai³-ni³na³jin⁴ xi³ tˀa³tsi⁴ ya⁴ Judea. Ni⁴jnco³-jin² ntsˀe³² xi³ ja³ˀai³ ca¹nqui³-li², xi³ ja³ˀai³ nchja⁴ xi³ chˀao³ tjin¹ xi³ tˀa³tsi⁴.
ACT 28:22 To⁴nca³ jin⁴-jin⁴ me³-na³jin⁴ coi⁴no¹ˀya²-lai²⁴jin⁴ jo³ si³ nca³ ji³. Je³ˀyai³⁴-jin⁴, nca³qui³jnta² ˀnte³ tjin¹ xi³ cja⁴ˀai¹ tso² xi³ ntia⁴² tˀa³xin² Ni³na¹ tso²-le⁴.
ACT 28:23 Cho⁴ta⁴-ve⁴ tsa³cˀe¹jna³choa⁴-le⁴ jnco³ ni⁴čhjin³ cˀia⁴ nca³ ncjin² xi³ ja³ˀai³con²-le⁴ Pablo ya⁴ ntˀia³ jña³ nca³ tsa³cˀe²jna³. Pablo ña³qui³ qui³tso²ya³-le⁴ nca³ ta⁴njion² jo³ sa³ˀnta³ nca³ coan³xon², qui³tsjoa³-le⁴ en¹ xi³ tˀa³tsˀe⁴ je² cjoa⁴te¹xo³ma³-le⁴ Ni³na¹. Qui³si³ˀi³nta³jin³ cho⁴ta⁴-ve⁴ xi³ tˀa³tsˀe⁴ Jesús jo³ tso² cjoa⁴te¹xo³ma³-le⁴ Moisés cao⁴ xon⁴-le⁴ je² xi³ qui³nchja⁴ya³ tˀa³tsˀe⁴ Ni³na¹.
ACT 28:24 Tjin¹ cˀa³ xi³ coan³cjain¹-le⁴ je² cjoa⁴ xi³ qui³tso²ya³ Pablo. To⁴nca³ tjin¹ cˀa³ xi³ tsi² coan³cjain¹-le⁴.
ACT 28:25 Ti⁴ya⁴ qui³scan³cao⁴-ni³ xi¹ncjin¹, cˀia⁴ nca³ tjio¹fi². Pablo cˀoi⁴qui³tso²-le⁴ je² en¹-vi⁴: Je² Espíritu Santo cjai¹nca³ nta³ tsa³cja¹cao⁴ je² nˀai³jcha¹cjin³-na¹ cˀia⁴ nca³ cˀoa⁴-sˀin² qui³nchja⁴ya³ Isaías.
ACT 28:26 Cˀoa⁴qui³tso²: Tˀin³chon¹-lai⁴ je² na⁴xi⁴na³nta¹-ve⁴, cˀoa⁴tˀin²-lai⁴: Coi⁴no¹ˀya²-nio³ xo⁴ño³, to⁴nca³ li²coi³ coan⁴cho⁴ya³-no³. Cho¹tsen³-nio³ xcon³, to⁴nca³ li²coi³ jchao⁴³.
ACT 28:27 Je² ni⁴ma⁴-le⁴ je² cho⁴ta⁴ na⁴xi⁴na³nta¹-vi⁴ to⁴ña³qui³ tjio¹ta²ja³-ni¹. Xo⁴ño³ to⁴ˀya³ qui³nčhˀoe¹-ni³. Xcon⁴ tsa³cˀe¹chjoa²nqui³, jme¹-ni³ nca³ tsi² ve³-ni³ xcon⁴, nca³ tsi² nčhˀoe¹-ni³ xo⁴ño³, nca³ tsi² coan⁴cho⁴ya³-ni³le⁴ ni⁴ma⁴-le⁴, nca³ tsi² si⁴²cˀa³ntjai²ya³ yao³-le⁴ nca³ si⁴²cˀo¹fa³ya³tˀa³-na³, nca³ an³ si³xqui³-le⁴.
ACT 28:28 Cˀoa⁴-sˀin² tˀe²jin³ta³con²³ tso²cˀoa⁴ nca³ Ni³na¹ qui³si³ca³sen¹-le⁴ je² cho⁴ta⁴ xi³ li² judío-jin² je² cjoa⁴nta³-ve⁴, jo³-sˀin² vˀa³sje³ntjai²-na¹ Ni³na¹. Je² cho⁴ta⁴ xi³ li² judío-jin² cjoi⁴nčhˀoe¹-ni¹.
ACT 28:29 Cˀia⁴ nca³ je³cˀoa⁴qui³tso², je² cho⁴ta⁴ judío ji³tjo³. Ña³qui³ to⁴tsa³cjao¹ya³tse³-ni³ nca³tsˀi³.
ACT 28:30 Je² Pablo jao² no¹ tsa³cˀe²jna³ jnco³ ni³ˀya³ xi³ to⁴tsa³cˀe¹chji¹. Cao⁴ cjoa⁴tsjoa³ qui³scoe¹tjao² nca³tsˀi³ xi³ ja³ˀai³con²-le⁴.
ACT 28:31 Cˀoa⁴-sˀin² qui³nchja⁴ya³ xi³ tˀa³tsˀe⁴ cjoa⁴te¹xo³ma³-le⁴ Ni³na¹. Qui³tso²ya³ je² cjoa⁴ xi³ tˀa³tsˀe⁴ Nai³-na¹ Jesucristo. Ña³qui³ qui³tjo³ˀnte³-le⁴ nca³ qui³tso²ya³, li²ˀya³ xi³ tsa³ca³te¹chjoa²-le⁴.
ROM 1:1 An³ nia¹³ Pablo, xi³ cho⁴ˀnta³-le⁴ Jesucristo. Qui³no²cjoa⁴-na³ nca³ pa²stro⁴ coan³, cˀoa⁴ qui³nˀo²sje³xin²-na³ xi³ tˀa³tsˀe⁴ je² en¹nta³-le⁴ Ni³na¹
ROM 1:2 xi³ to⁴nqui³-ni³ Ni³na¹ qui³tsjoa³ tsˀoa³ nca³ tsjoa¹. Ya⁴ tji¹tˀa³ xon⁴ Escrituras xi³ tsje³, je² xi³ qui³squi³ cho⁴ta⁴ xi³ qui³nchja⁴ya³ tˀa³tsˀe⁴ Ni³na¹.
ROM 1:3 Je² en¹nta³-vi⁴ xi³ nchja⁴-ni³ Jesucristo Nai³-na¹ xi³ ˀnti¹-le⁴ Ni³na¹, xi³ ji³nčhoa³-ni³ ntje⁴-le⁴ David jo³ cjoan³ yao³-le⁴.
ROM 1:4 Je² xi³ cao⁴ nca³nˀion¹ tsa³ˀya³son²tsen³-le⁴ nca³ ˀnti¹-le⁴ Ni³na¹ ni¹, jo³ cjoan³ Espíritutsje³-le⁴, nca³ ja³ˀa²ya³-ni³le⁴ nca³ cˀen³.
ROM 1:5 Xi³ to⁴tˀa³tsˀe⁴ Cristo qui³scoe²³ cjoa⁴nta³ cao⁴ xa¹-le⁴ pa²stro⁴, jme¹-ni³ nca³ nca³tsˀi³ cho⁴ta⁴ xi³ li² judío-jin² coi⁴tjo³son²-si¹ni³le⁴ nca³ coan⁴cjain¹-le⁴ tˀa³tsˀe⁴ jan³ˀain¹-le⁴ Cristo.
ROM 1:6 Cˀoa⁴²-ti⁴ coi³ nio¹³ nca³ jon² xi³ cˀoa⁴-sˀin² qui³no²cjoa⁴-no³ tˀa³tsˀe⁴ Jesucristo.
ROM 1:7 Ti²cji³-no³ nca³tsˀio³ xi³ ti³yo³ ya⁴ Roma, xi³ tsjoa³que³-no³ Ni³na¹, xi³ qui³no²cjoa⁴-no³ nca³ cho⁴ta⁴-le⁴ Cristo coaon⁴³. Ni³na¹ Nˀai³-na¹ cao⁴ Nai³-na¹ Jesucristo ca²ta³tsjoa¹-no³ cjoa⁴nta³, ca²ta³si¹qui³njen³nchˀan¹jin³ ni⁴ma⁴-no³.
ROM 1:8 Ti¹tjon², xi³ to⁴tˀa³tsˀe⁴ Jesucristo tsjoa³-le⁴ cjoa⁴nta³ Ni³na¹-na⁴ xi³ tˀa³tsaon⁴³ nca³tsˀio³ nca³ nca³qui³jnta² son³ˀnte³ no²cjoa⁴ya³-ni³ nca³ ma³cjain¹-no³.
ROM 1:9 Testigo-na⁴ ma³-ni³ Ni³na¹, xi³ an³ si³xa¹³-le⁴ cao⁴ ni⁴ma⁴-na⁴, nca³ nchja²ya³ je² en¹nta³ xi³ tˀa³tsˀe⁴ ˀnti¹-le⁴, nca³ fa³ˀai³tsjen³-na³ nca³ntsjai² xi³ tˀa³tsaon⁴³ cˀia⁴ nca³ vˀe³tsˀoa²³.
ROM 1:10 Ti²si³je¹³-nia¹³ tsa² coi⁴cho³-na³ ni⁴čhjin³ tsa² Ni³na¹ cˀoa⁴-sˀin² me³-le⁴ nca³ cˀoa⁴coan⁴-na³ nca³ cjoi¹con³-no³ nca³ jon² to⁴jo³-sˀin²ni³.
ROM 1:11 Cjai¹nca³ me³-na³ nca³ scoe³-no³, jme¹-ni³ nca³ tsjoa³-si¹ni³no³ jnco³ cjoa⁴tjao² xi³ tsˀe⁴ Espíritu Santo, cˀoa⁴ jme¹-ni³ nca³ sˀe⁴-si¹ni³no³ nca³nˀion¹.
ROM 1:12 Coi³ xi³ tso²-le⁴ nca³ to⁴jnco³ si⁴je³ta³coan³² xi²nquia⁴² cao⁴ jo³-sˀin² ma³cjain¹-na¹ cao⁴ jon² cao⁴ an³.
ROM 1:13 To⁴nca³ me³-na³, ntsˀe³, nca³ jchao⁴³ nca³ ncjin² cˀa³ tsa³ca²te⁴jna³nta³ nca³ cjoi¹con³-no³ (to⁴nca³ sa³ˀnta³ ntˀai⁴-vi⁴ ti¹sˀe³chjoa²-na³), jme¹-ni³ nca³ cˀoa⁴-ti⁴ tjin¹ xi³ si³qui³njen³jin³-si¹ni³no³, jo³-sˀin² nca³ qui³si³qui³njen³jin³-le⁴ xi³cˀa³ cho⁴ta⁴ xi³ li² judío-jin².
ROM 1:14 An³ qui³tjen⁴-na³ xi³ tˀa³tsˀe⁴ cho⁴ta⁴ griego cˀoa⁴ xi³ tˀa³tsˀe⁴ cho⁴ta⁴cja⁴ˀai¹, xi³ tˀa³tsˀe⁴ cho⁴ta⁴chji⁴ne⁴, cˀoa⁴ xi³ tˀa³tsˀe⁴ xi³ tsi² tsa² chji⁴ne⁴.
ROM 1:15 Cˀoa⁴-sˀin² ti²jna⁴nta³ nca³ an³, nca³ cˀoa⁴-ti⁴ coi³nchja²ya³jin³-no³ je² en¹nta³ xi³ tˀa³tsˀe⁴ Cristo, jon² xi³ ti³yo³ ya⁴ Roma.
ROM 1:16 Nca⁴ li²coi³ ma³soa³-na³ xi³ tˀa³tsˀe⁴ je² en¹nta³ xi³ tˀa³tsˀe⁴ Cristo, nca⁴ coi³ xi³ nca³nˀion¹-le⁴ Ni³na¹, xi³ vˀa³sje³ntjai² nca³tsˀi³ xi³ ma³cjain¹-le⁴, ti¹tjon² cho⁴ta⁴ judío cˀoa⁴-ti⁴ cho⁴ta⁴ griego.
ROM 1:17 Je² en¹nta³ xi³ va³co¹son²tsen³ cjoa⁴qui²xi⁴-le⁴ Ni³na¹ xi³ tˀa³tsˀe⁴ xi³ ma³cjain¹-le⁴ cho⁴ta⁴ nca³ ma³cjain¹-sa³le⁴, jo³-sˀin² tji¹tˀa³: Je² xi³ cho⁴ta⁴cjoa⁴qui²xi⁴ cˀoe¹jna³con³ xi³ to⁴tˀa³tsˀe⁴ nca³ ma³cjain¹-le⁴.
ROM 1:18 Ti¹jna³son²tsen³ je² cjoa⁴jti³-le⁴ Ni³na¹ xi³ nčhoa¹-ni³ ncˀa³jmi³ co²ntran⁴-le⁴ nca³yi³je³ xi³ tsi² ve³xcon¹ Ni³na¹ cao⁴ xi³ tsi² cjoa⁴qui²xi⁴ xi³ sˀin¹, cho⁴ta⁴ xi³ vˀe¹chjoa²-le⁴ xi³ cjoa⁴qui²xi⁴ to⁴tˀa³tsˀe⁴ xi³ tsi² cjoa⁴qui²xi⁴.
ROM 1:19 Je² cjoa⁴ xi³ ˀya³-le⁴ xi³ tˀa³tsˀe⁴ Ni³na¹ tjio¹son²tsen³-le⁴ cho⁴ta⁴-ve⁴, nca⁴ Ni³na¹ tsa³cˀe¹jna³son²tsen³-le⁴.
ROM 1:20 Je² cjoa⁴ xi³ tsi²coi³ ma³tsen³ xi³ tsˀe⁴ Ni³na¹, xi³ coi³ nca³nˀion¹-le⁴ xi³ ti¹jna³ntsjai², cˀoa⁴ xi³ coi³ jo³ cjoan³ Ni³na¹, coan³tsen³ sa³ˀnta³ nca³ qui³sˀe³nta³ son³ˀnte³. Je² cjoa⁴-vi⁴ tsa³ˀya³-le⁴ to⁴tˀa³tsˀe⁴ tso³jmi² xi³ qui³sˀe³nta³. Coi³ nca³ ña³qui³ tjin¹-le⁴ je¹ cho⁴ta⁴.
ROM 1:21 Nca⁴ nta³ tsa² tsa³ve³ Ni³na¹, li²coi³ tsa³cˀa³sje³je³ya³ jo³-ni³ tsa² Ni³na¹, ni⁴qui³tsjoa³-jin²le⁴ cjoa⁴nta³, to⁴nca³ qui³si³sca¹ya³-le⁴ cjoa⁴fa³ˀai³tsjen³-le⁴, cˀoa⁴ je² ni⁴ma⁴-le⁴ xi³ chi⁴con¹ qui³sˀe³njion²jin³-le⁴.
ROM 1:22 Chji⁴ne⁴ qui³tso²-le⁴ yao³-le⁴, sca¹ya³ coan³-le⁴.
ROM 1:23 Cˀoa⁴ qui³tsjion³ cjoa⁴je³ya³-le⁴ Ni³na¹ xi³ tsi² fi³tson³ya² cˀoa⁴ nca³jao³-le⁴ qui³si³cjoan³ sen¹-le⁴ cho⁴ta⁴son³ˀnte³ xi³ fi³tson³ya², cˀoa⁴ qui³si³cjoan³ sen¹-le⁴ ni⁴se³, cˀoa⁴ sen¹-le⁴ cho⁴ xi³ ño³ ma³-ni³ ntso⁴co⁴, cˀoa⁴ sen¹-le⁴ ye⁴.
ROM 1:24 Coi³ cjoa⁴ nca³ Ni³na¹ qui³sca³ni¹tˀa³-le⁴ cjoa⁴tsˀen⁴, nca³ cjoa⁴chi⁴nca⁴ tjin¹-le⁴ ni⁴ma⁴-le⁴. Cˀoa⁴-sˀin² qui³si³qui³tson¹ yao³-le⁴ ya⁴jin³-le⁴ xi¹ncjin¹.
ROM 1:25 Je² cho⁴ta⁴ xo⁴cjoan³-vi⁴ qui³si³cˀa³ntjai²ya³ cjoa⁴qui²xi⁴-le⁴ Ni³na¹ nca³ tsa³cˀa³sje³ nti³so³. Nqui²sa⁴ tsa³ve³xcon¹, cˀoa⁴ nqui²sa⁴ qui³si³xa¹-le⁴ cho⁴ta⁴son³ˀnte³ cao⁴-ni³ tsa² Ni³na¹ xi³ tsa³cˀe¹nta³, jña³-le⁴ xi³ coan³chi³con³tˀain³ nca³ntsjai² ni⁴čhjin³. Cˀoa⁴ ca²ta³ma³.
ROM 1:26 Xi³ coi³-vi⁴ Ni³na¹ qui³sca³ni¹tˀa³-le⁴ cjoa⁴chi⁴nca⁴-le⁴ xi³ tjin¹-le⁴ cjoa⁴soa³. Nta³ tsa² ya¹nchjin¹-le⁴ qui³si³cˀa³ntjai²ya³ jo³-sˀin² ma³chjen¹-le⁴ yao³-le⁴ xi³ tˀa³tsˀe⁴ je² xi³ tsi² tsa² coi³ cˀoa⁴-sˀin² ma³chjen¹-le⁴.
ROM 1:27 Ti⁴cˀoa⁴-sˀin² qui³sˀin³-ni³ cho⁴ta⁴xˀin⁴ nca³ qui³si³cˀe¹jna³ jo³-sˀin² nca³ ma³chjen¹ xi³ ya¹nchjin¹. Ña³qui³ nˀion¹ qui³si³sin³-le⁴ yao³-le⁴ cao⁴ xˀin⁴xi¹ncjin¹, qui³si³cao⁴ je¹ xi¹ncjin¹ jo³-ni³ tsa² ya¹nchjin¹. Je² soa³ qui³scoe¹ chji¹-le⁴ xi³ tsa³quin²-le⁴ cjoa⁴sca¹ya³-le⁴.
ROM 1:28 Cˀoa⁴ jo³-sˀin² nca³ je² tsi²coi³ qui³sa³sen³-le⁴ nca³ Ni³na¹ cjoa⁴ˀai¹tsjen³-le⁴, Ni³na¹ qui³sca³ni¹tˀa³-le⁴ cjoa⁴fa³ˀai³tsjen³ xi³ nˀion¹ chˀao³ tjin¹, jme¹-ni³ nca³ cˀoa⁴sˀin⁴²-si¹ni³ xi³ tsi² tsa² coi³ nta³ tjin¹.
ROM 1:29 Tjin¹yi³je³-le⁴ to⁴jo³ tjin¹ jco⁴ya³ cjoa⁴tsˀen⁴, cjoa⁴cha³jnqui³, cjoa⁴taon³, cjoa⁴chˀao³ntai³, cjoa⁴ xi³ chˀao³ tjin¹, cjai¹nca³ tse³ qui³sˀe³-le⁴ cjoa⁴xin²ta³con², cˀoa⁴ xi³ si¹cˀen³ cˀen³, cjoa⁴vi³xcan¹ tjin¹-le⁴, cao⁴ cjoa⁴chˀa²na⁴cha⁴, cˀoa⁴ chˀao³ si¹cja³ˀai³tsjen³-le⁴ nca³tsˀi³ xi³cˀa³.
ROM 1:30 Si¹cˀa³xqui⁴ xi³cˀa³, vi³ncha¹nti³so³-le⁴, jti³que³ Ni³na¹, cho⁴ta⁴tsˀen⁴ˀa³, ncˀa³con³, vˀa³sje³je³ya³ yao³-le⁴, vˀa³sje³-ni³ jco⁴ cjoa⁴ xi³ chˀao³ tjin¹, tsˀa³ntjai²cjoa⁴ tˀa³tsˀe⁴ xi³jcha¹-le⁴,
ROM 1:31 chi⁴con¹, li²coi³ si¹tjo³son²-le⁴ en¹-le⁴, xi¹jin³ ni⁴ma⁴-le⁴, nˀion¹con³, tsin²-le⁴ cjoa⁴ma⁴ta³con²-jin².
ROM 1:32 Nta³ tsa² ve³ jme³ cjoa⁴qui²xi⁴ xi³ tsjoa¹ Ni³na¹, nca³ je² xi³ cˀoa⁴sˀin¹ va³quin²-le⁴ cjoa⁴vi³ya³, a³li² to⁴coi³-jin² nca³ cˀoa⁴sˀin¹, to⁴nca³ cˀoa⁴-ti⁴ to⁴jnco³ ma³tsjoa³ya³-le⁴ cao⁴ je² xi³ cˀoa⁴sˀin¹.
ROM 2:1 Coi³ nca³ tsin²-li² cjoa⁴qui²xi⁴-jin² jo³-sˀin² nca³ chˀa⁴sje³ntjai² je¹ yao³-li⁴, ji³ cho⁴tai⁴ xi³ ˀya³sin³ cho⁴ta⁴. Cˀia⁴ nca³ ˀya³sin³ cho⁴ta⁴ xi³ cja⁴ˀai¹, ti⁴ji³ ˀya³sin³-ni³ yao³-li⁴, nca⁴ cˀoa⁴²-ti⁴ ti⁴nˀian²-ni³, ji³ xi³ ti³ˀya³sin³.
ROM 2:2 To⁴nca³ ˀya³-nia¹ nca³ cao⁴ cjoa⁴qui²xi⁴ Ni³na¹ tsjoa¹-le⁴ cjoa⁴ñˀain³ je² xi³ cˀoa⁴sˀin¹ je² cjoa⁴-vi⁴.
ROM 2:3 Ji³ xi³ ˀya³sin³ cho⁴ta⁴ xi³ cˀoa⁴sˀin¹ je² cjoa⁴-vi⁴, cˀoa⁴-ti⁴ ji³ cˀoa⁴ti³nˀian²-ni³. A³ ni²cja³ˀai³tsjen³-ni¹ nca³ coi²tjo⁴ntjai²-lai⁴ cjoa⁴ñˀain³-le⁴ Ni³na¹.
ROM 2:4 A³xo⁴ nˀo²sje³nqui³-ni¹ xi³ nˀion¹ tse³ cjoa⁴nta³-le⁴ Ni³na¹, cao⁴ cjoa⁴cho⁴ya³cao⁴cjoa⁴-le⁴, cao⁴ cjoa⁴tse³ta³con²-le⁴, nca³ tsi² ˀyai³ nca³ je² cjoa⁴nta³-le⁴ fi²cao⁴-li² nca³ si⁴cˀa³ntjai²ya³-ni³ cjoa⁴fa³ˀai³tsjen³-li⁴.
ROM 2:5 To⁴nca³ jo³-sˀin² xi¹jin³ ni⁴ma⁴-li⁴ nca³ tsi² ni²cˀa³ntjai²yai³ cjoa⁴fa³ˀai³tsjen³-li⁴, ti³ni²chˀa¹ne²-lai⁴ yao³-li⁴ cjoa⁴jti³-le⁴ Ni³na¹ xi³ tˀa³tsˀe⁴ cˀia⁴ ni⁴čhjin³-le⁴ cjoa⁴jti³-le⁴, cˀia⁴ nca³ coa⁴co²tsen³ je² cjoa⁴ñˀain³ xi³ cjoa⁴qui²xi⁴ xi³ tsjoa¹ Ni³na¹.
ROM 2:6 Ni³na¹ cˀoe⁴²chji¹-le⁴ nca³ jnco¹jnco¹ jo³-sˀin² xa¹-le⁴ xi³ qui³sˀin³.
ROM 2:7 Je² cho⁴ta⁴ xi³ va¹sjai³ cjoa⁴je³ya³ cao⁴ cjoa⁴xcon¹ta³con² cao⁴ xi³ ni⁴cˀia³-jin² cjoi⁴tson¹, nca³ tse³jta³ nta³ ncha³ sˀin¹, Ni³na¹ tsjoa¹-le⁴ cjoa⁴vi³jna³chon³ nca³ntsjai².
ROM 2:8 To⁴nca³ je² xi³ me³-le⁴ si¹qui³njen³ tˀa³tsˀe⁴ yao³-le⁴, xi³ tsi² si¹tjo³son²-le⁴ xi³ cjoa⁴qui²xi⁴, to⁴nca³ si¹tjo³son²-le⁴ xi³ cjoa⁴tsˀen⁴, Ni³na¹ nˀion¹ tsjoa¹-le⁴ cjoa⁴jti³ cao⁴ cjoa⁴jti³ xi³ nˀion¹,
ROM 2:9 cjoa⁴ñˀain³ cao⁴ cjoa⁴va³ xi³ tˀa³tsˀe⁴ nca³tsˀi³ cho⁴ta⁴ xi³ chˀao³ sˀin¹, ti¹tjon² cho⁴ta⁴ judío, cˀoa⁴-ti⁴ cho⁴ta⁴ griego,
ROM 2:10 to⁴nca³ cjoa⁴je³ya³ cao⁴ cjoa⁴xcon¹ta³con² cao⁴ cjoa⁴nchˀan¹ta³con² tˀa³tsˀe⁴ nca³tsˀi³ xi³ nta³ sˀin¹, ti¹tjon² cho⁴ta⁴ judío, cˀoa⁴-ti⁴ cho⁴ta⁴ griego.
ROM 2:11 Ni³na¹ to⁴nco¹son²-sˀin² fi²cao⁴ nca³tsˀi³.
ROM 2:12 Je² nca³tsˀi³ xi³ tsin²-le⁴ cjoa⁴te¹xo³ma³, cˀoa⁴ xi³ tsa³jnqui³ je¹, cˀoa⁴²-ti⁴ tsin²-le⁴ cjoa⁴te¹xo³ma³ nca³ cha⁴jin³. Cˀoa⁴ je² nca³tsˀi³ xi³ tjio¹nqui³ cjoa⁴te¹xo³ma³, cˀoa⁴ xi³ tsa³jnqui³ je¹, cˀoa⁴²-ti⁴ cao⁴ cjoa⁴te¹xo³ma³ sˀe⁴nta³jin³-ni³le⁴.
ROM 2:13 A³li² je²-jin² xi³ to⁴nčhˀoe¹-le⁴ cjoa⁴te¹xo³ma³ xi³ tjin¹-le⁴ cjoa⁴qui²xi⁴ nqui³xcon⁴ Ni³na¹, to⁴nca³ je² xi³ si¹tjo³son²-le⁴ cjoa⁴te¹xo³ma³, je² xi³ cjoe⁴tˀa³ je¹-le⁴.
ROM 2:14 Je² cho⁴ta⁴ xi³ li² judío-jin² xi³ tsin²-le⁴ cjoa⁴te¹xo³ma³-jin², xi³ to⁴xa¹ je²-ni³ nca³ cˀoa⁴sˀin¹ jo³ tso² cjoa⁴te¹xo³ma³, nta³ tsa² tsin²-le⁴ cjoa⁴te¹xo³ma³-ve⁴, je² cho⁴ta⁴-ve⁴ to⁴xa¹ je²-ni³ nca³ tjin¹-le⁴ cjoa⁴te¹xo³ma³ ti⁴tˀa³tsˀe⁴-ni³.
ROM 2:15 Va³co¹cho⁴ya³ nca³ je³tjin¹-le⁴ ni⁴ma⁴-le⁴ je² xi³ vˀe¹ne²-le⁴ cjoa⁴te¹xo³ma³. Cˀoa⁴-ti⁴ je² cjoa⁴fa³ˀai³tsjen³-le⁴ to⁴jnco³ si¹qui²xi⁴ya³. Cˀoa⁴ je² cjoa⁴fa³ˀai³tsjen³-le⁴ fao¹ˀa³ nca³ va¹nqui³ cˀoa⁴ vˀa³sje³nqui³ je¹ yao³-le⁴.
ROM 2:16 Cˀoa⁴coan⁴ coi³ ni⁴čhjin³ cˀia⁴ nca³ Ni³na¹ cˀoe⁴²nta³jin³ cjoa⁴ˀma³-le⁴ cho⁴ta⁴ xi³ to⁴tˀa³tsˀe⁴ Jesucristo. Cˀoa⁴tso² en¹nta³ xi³ tˀa³tsˀe⁴ Cristo xi³ nchja²ya³.
ROM 2:17 Coe⁴-ni³vi⁴, ji³ xi³ jan³ˀain¹ judío tjin¹-li², cjai¹nca³ nˀion¹ nta³ ˀya³ta³coin²³ cjoa⁴te¹xo³ma³, cˀoa⁴ nˀo²sje³je³yai³ yao³-li⁴ nca³ Ni³na¹ ˀyai³.
ROM 2:18 Nta³ ˀyai³ jo³-sˀin² me³-le⁴ Ni³na¹. Nta³ chˀa²sjai³ xi³ nqui²sa⁴ nta³ tjin¹, nca³ je² cjoa⁴te¹xo³ma³ xi³ tso²ya³-li².
ROM 2:19 Nˀion¹tˀa³-ta³coin²³ yao³-li⁴ nca³ ji³ xi³ va³co²-lai⁴ ntia⁴² xi³ xca⁴ cjoan³. Ji³ xi³ ni²ˀi³sen³-lai⁴ xi³ njion²jin³ tjio¹.
ROM 2:20 Ji³ xi³ va³co²ya³-lai⁴ xi³ tsi² tsa² jme³ xi³ ma³-le⁴, nca³ maestro-le⁴ xti³ mai³, nca³ ya⁴jin³ cjoa⁴te¹xo³ma³ tjin¹-li² jo³ tjin¹ cjoa⁴chji⁴ne⁴ cao⁴ xi³ cjoa⁴qui²xi⁴.
ROM 2:21 Ji³-ˀni³ xi³ va³co²ya³-lai⁴ xi³ cja⁴ˀai¹, a³ tsi² ˀmi²ya³-lai⁴ yao³-li⁴. Ji³ xi³ no²cjoa⁴yai³ nca³ tsi² tsa² coan⁴ nca⁴ si⁴che¹, a³ ni²che¹-ni¹³.
ROM 2:22 Ji³ xi³ si³ nca³ tsi² tsa² coan⁴ si⁴cha³jnqui³tˀa³², a³ ni²cha³jnqui³tˀa³-ni¹³. Ji³ xi³ chˀao³chai³ xco¹son², a³ ni²che¹tˀa³-ni¹³ yo⁴nco⁴-le⁴.
ROM 2:23 Ji³ xi³ chˀa²sje³je³yai³ yao³-li⁴ nca³ tjin¹-li² cjoa⁴te¹xo³ma³, a³ tsi² tsa² taon³ ˀyai³ Ni³na¹ nca³ cjoa⁴te¹xo³ma³ vi³tja³to³ntjai²-lai⁴.
ROM 2:24 Je² jan³ˀain¹-le⁴ Ni³na¹ no²cjoa⁴ˀaon³-le⁴ xi³ to⁴tˀa³tsaon⁴³ ya⁴jin³-le⁴ cho⁴ta⁴ xi³ li² judío-jin², jo³-sˀin² tji¹tˀa³.
ROM 2:25 Je² cjoa⁴circuncisión ña³qui³ chji¹-le⁴ tsa² si⁴tjo³son²-lai⁴ cjoa⁴te¹xo³ma³, to⁴nca³ tsa² ji³ coi⁴tja¹to³ntjai²-lai⁴ cjoa⁴te¹xo³ma³, je² cjoa⁴circuncisión cˀoa⁴coan⁴-li² jo³-ni³ xi³ tsin²-le⁴ cjoa⁴circuncisión.
ROM 2:26 Cˀoa⁴ tsa² je² xi³ tsin²-le⁴ cjoa⁴circuncisión xi³ si¹tjo³son²-le⁴ cjoa⁴ xi³ vˀe¹ne² cjoa⁴te¹xo³ma³, nta³ tsa² tsin²-le⁴ cjoa⁴circuncisión, cˀoa⁴-ti⁴sˀin² ma³xqui⁴cao⁴ jo³-ni³ tsa² xi³ cjoa⁴circuncisión.
ROM 2:27 Je² xi³ tsin²-le⁴ cjoa⁴circuncisión, to⁴nca³ nˀion¹ nta³ si¹tjo³son²-le⁴ cjoa⁴te¹xo³ma³, si⁴²cja³ˀa¹-li² cjoa⁴ñˀain³ nca³ ji³ xi³ vi³tja³to³ntjai²-lai⁴ cjoa⁴te¹xo³ma³, nta³ tsa² tjin¹-li² cjoa⁴te¹xo³ma³ xi³ tji¹tˀa³ xon⁴, cˀoa⁴ nta³ tsa² tjin¹-li² cjoa⁴circuncisión.
ROM 2:28 Nca⁴ li² judío-jin² je² xi³ to⁴xquia⁴ cˀoa⁴cji³ nca³ judío ni¹, ni⁴coi³-jin² xi³ cjoa⁴circuncisión xi³ to⁴xquia⁴ cˀoa⁴cji³ je² xi³ tsˀe⁴ yao³-le⁴ cho⁴ta⁴.
ROM 2:29 To⁴nca³ je² xi³ ña³qui³ judío xi³ ña³qui³ cˀoa⁴cjoan³ ni⁴ma⁴-le⁴. Cˀoa⁴ je² xi³ ña³qui³ cjoa⁴circuncisión je² xi³ ña³qui³ tsˀe⁴ ni⁴ma⁴-na¹, tsˀe⁴ espíritu, li²coi³ to⁴tsˀe⁴ xi³ tji¹tˀa³, je² xi³ li²coi³ vi³tjo³nta³-ni³ cho⁴ta⁴, to⁴nca³ Ni³na¹ xi³ vˀa³sje³nta³.
ROM 3:1 Jme¹-ni³ˀni³ xi³ tjin¹-sa³le⁴ cho⁴ta⁴ judío. A³xo⁴ jme¹ xi³ chji¹-le⁴ cjoa⁴circuncisión.
ROM 3:2 Cjai¹nca³ ncjin² cˀa³ chji¹-le⁴. Xi³ ti¹tjon², nca⁴ je² en¹-le⁴ Ni³na¹ tsa³cˀai²-le⁴ cho⁴ta⁴ judío nca³ coan⁴tjao²-le⁴.
ROM 3:3 Cˀoa⁴ jme¹-ni³, tsa² tjin¹ cˀa³ xi³ tsi²coi³ coan³cjain¹-le⁴. Je² xi³ tsi²coi³ ma³cjain¹-le⁴, a³ cˀoe⁴²chjoa²-le⁴ cjoa⁴qui²xi⁴-le⁴ Ni³na¹.
ROM 3:4 Ni⁴ˀi⁴tse¹-jin². To⁴sa³ ca²ta³ma³ qui²xi⁴ Ni³na¹, to⁴nca³ ca²ta³vi³tjo³ nti³so³ nca³tsˀi³ cho⁴ta⁴, jo³-sˀin² nca³ tji¹tˀa³: Jme¹-ni³ nca³ coi⁴tjo³qui²xi⁴-ni³ jo³ tso² en¹ xi³ vˀai²³, cˀoa⁴ si⁴qui³njain³ cˀia⁴ nca³ sˀe⁴nta³jin³-li².
ROM 3:5 Cˀia⁴ tsa² je² cjoa⁴tsˀen⁴-na¹ vˀe¹jna³tsen³ cjoa⁴qui²xi⁴-le⁴ Ni³na¹, jo¹ coi⁴xoan¹-ˀni³. A³ tjin¹-le⁴ cjoa⁴tsˀen⁴ Ni³na¹ nca³ tsjoa¹-na¹ cjoa⁴ñˀain³. (Nchja²³-nia¹³ jo³-ni³ tsa² cho⁴ta⁴.)
ROM 3:6 Ni⁴ˀi⁴tse¹-jin² cˀoa⁴tjin¹. Cˀia⁴ tsa² cˀoa⁴tjin¹ cjoa⁴, jo¹-sˀin² cˀoe⁴²nta³jin³-le⁴ˀni³ son³ˀnte³-vi⁴ Ni³na¹.
ROM 3:7 Tsa² an³ li²coi³ qui³si³jncoa³ en¹-na⁴, to⁴nca³ coi³ cjoa⁴-vi⁴ nca³ nqui²sa⁴ nˀion¹ nta³ va³co²son²tsen³ cjoa⁴qui²xi⁴-le⁴ Ni³na¹ tˀa³tsˀe⁴ cjoa⁴je³ya³-le⁴, a¹-ni³ nca³ to⁴jo³ cˀoa⁴-sˀin² an³ sˀe³-si¹ni³na³ cjoa⁴ñˀain³ jo³-ni³ tsa² cho⁴ta⁴je¹.
ROM 3:8 Tjin¹ cˀa³ xi³ no²cjoa⁴ˀaon³-na³jin⁴, xi³ cˀoa⁴tso² nca³ jin⁴ xo⁴ vi³xoin¹⁴-jin⁴: A³ cˀoa⁴sˀian⁴² cjoa⁴tsˀen⁴, jme¹-ni³ nca³ coan⁴-si¹ni³ xi³ nta³ tjin¹. Je² cjoa⁴ñˀain³-le⁴ xi³ cˀoa⁴cjoan³ tjin¹-le⁴ cjoa⁴qui²xi⁴.
ROM 3:9 Jme¹-ni³ˀni³. A³ nqui²sa⁴ tjin¹-sa³na¹ ña¹-vi⁴ cao⁴ je². Ni⁴ˀi⁴tse¹-jin². Je³tsa³ca³nquia²³ cho⁴ta⁴ judío cao⁴ cho⁴ta⁴ xi³ li² judío-jin², nca³ nca³tsˀi³ tjio¹nqui³-le⁴ je¹.
ROM 3:10 Jo³-sˀin² tji¹tˀa³: Tsin² xi³ cho⁴ta⁴cjoa⁴qui²xi⁴-jin², ni⁴jnco³-jin².
ROM 3:11 Tsin² xi³ nčhˀoe¹, tsin² xi³ va¹sjai³ Ni³na¹.
ROM 3:12 Nca³tsˀi³ tsa³qui³ncha³xin²-ni¹. Nca³tsˀi³ li²jme³ ti⁴chji¹-ni³le⁴. Ni⁴ˀya³-jin² xi³ sˀin¹ cjoa⁴nta³, ni⁴jnco³-jin².
ROM 3:13 Na⁴xa⁴jta⁴-le⁴ cˀoa⁴-sˀin² jo³-ni³ nco³ya³-le⁴ tsjo¹ xi³ ti⁴xˀa⁴. Cao⁴ ni⁴jen⁴ vˀa³na⁴cha⁴-ni³ jo³-ni³ tsa² xan¹-le⁴ ye⁴ xi³ tji¹nqui³ čhjoa⁴tsˀoa³.
ROM 3:14 Je² tsˀoa³ ña³qui³ tji¹qui³tse³ xi³ chˀao³ tso², cˀoa⁴ xi³ cjai¹nca³ jnčha³.
ROM 3:15 Cjai¹nca³ chji³nca³ ntso⁴co⁴ nca³ njin¹ vˀe¹jten³.
ROM 3:16 Si¹cje³jco³yi³je³, cjoa⁴va³ si¹ca³tio¹ ya⁴ya³ ntia⁴²-le⁴.
ROM 3:17 Je² ntia⁴² xi³ nchˀan¹ tjin¹ li²coi³ ve³.
ROM 3:18 Li²coi³ tsa³cjon¹que³ Ni³na¹ ya⁴jin³ cjoa⁴fa³ˀai³tsjen³-le⁴.
ROM 3:19 To⁴nca³ ˀya³-nia¹ nca³ nca³yi³je³ xi³ tso² cjoa⁴te¹xo³ma³ nchja⁴-le⁴ je² xi³ cjoa⁴te¹xo³ma³ tjio¹nqui³-le⁴, jme¹-ni³ nca³ nca³tsˀi³ tsˀoa³ sˀe⁴chjoa²-ni³, cˀoa⁴ nca³tsˀi³ cho⁴ta⁴son³ˀnte³ na³nqui³ cˀoe⁴²yo³-si¹ni³le⁴ cjoa⁴te¹xo³ma³-le⁴ Ni³na¹.
ROM 3:20 Nca⁴ ni⁴jnco³-jin² cho⁴ta⁴ xi³ cjoe⁴tˀa³-le⁴ je¹ ya⁴ nqui³xcon⁴ Ni³na¹ nca³ cˀoa⁴sˀin¹ jo³ tso² cjoa⁴te¹xo³ma³, nca⁴ to⁴tˀa³tsˀe⁴ cjoa⁴te¹xo³ma³ ˀya³-le⁴ je¹.
ROM 3:21 To⁴nca³ ntˀai⁴-vi⁴ntai⁴ tˀa³xin² xi³ cjoa⁴te¹xo³ma³ ˀmi², je² cjoa⁴qui²xi⁴-le⁴ Ni³na¹ je³coan³tsen³. Testigo coan³-le⁴ je² cjoa⁴te¹xo³ma³ cao⁴ cho⁴ta⁴ xi³ qui³nchja⁴ya³ tˀa³tsˀe⁴ Ni³na¹.
ROM 3:22 Je³coan³tsen³ je² cjoa⁴qui²xi⁴-le⁴ Ni³na¹ tˀa³tsˀe⁴ nca³tsˀi³ xi³ ma³cjain¹-le⁴, xi³ to⁴tˀa³tsˀe⁴ nca³ ma³cjain¹-le⁴ tˀa³tsˀe⁴ Cristo. Nca⁴ to⁴nco¹son² fi²cao⁴ nca³tsˀi³.
ROM 3:23 Nca³tsˀi³ tsa³jnqui³ je¹, li²coi³ nta³ vi³tjo³ nqui³xcon⁴ Ni³na¹.
ROM 3:24 Fe³tˀa³-le⁴ je¹ xi³ to⁴cjoa⁴tjao², xi³ to⁴tˀa³tsˀe⁴ cjoa⁴nta³-le⁴ Ni³na¹, nca⁴ Cristo tsa³cˀe¹chji¹ntjai² xi³ tˀa³tsˀe⁴.
ROM 3:25 Ni³na¹ qui³si³cˀe¹jna³son²tsen³ Cristo nca³ coan³-le⁴ je¹ntjai²-na¹ cao⁴ njin¹-le⁴. Ña¹ chjoe¹ coi³ cjoa⁴nta³-vi⁴ nca³ ma³cjain¹-na¹. Cˀoa⁴-sˀin² sˀe³son²tsen³ cjoa⁴qui²xi⁴-le⁴ Ni³na¹, nta³ tsa² cao⁴ cjoa⁴tse³jta³-le⁴ qui³si³cˀa³to³-ni³ je¹ xi³ je³ja³ˀa³to³.
ROM 3:26 Cˀoa⁴coan³, jme¹-ni³ nca³ cˀoa⁴-sˀin² sˀe⁴son²tsen³-si¹ni³ cjoa⁴qui²xi⁴-le⁴ Ni³na¹ ni⁴čhjin³ je²-vi⁴, cˀoa⁴ jme¹-ni³ nca³ jcha⁴-si¹ni³ nca³ Ni³na¹ tjin¹-le⁴ cjoa⁴qui²xi⁴ cˀoa⁴ nca³ si¹cje³tˀa³ je¹-le⁴ cho⁴ta⁴ xi³ ma³cjain¹-le⁴ tˀa³tsˀe⁴ Jesús.
ROM 3:27 Jo¹-sˀin² coan⁴-nia¹ nca³ chˀa⁴sje³je³ya³² yao³-na¹. A³li²coi³ coan⁴. Tji¹chjoa²-na¹. Jña¹-le⁴ cjoa⁴te¹xo³ma³ xi³ tji¹chjoa²-ni³na¹. A³ je² xi³ tsˀe⁴ jo³ nˀian². Ma³jain², to⁴nca³ je² xi³ tsˀe⁴ nca³ ma³cjain¹-na¹.
ROM 3:28 Cˀoa⁴-sˀin² nta³ cho¹son²-ni³le⁴² nca³ cho⁴ta⁴ fe³tˀa³-na¹ je¹ to⁴tˀa³tsˀe⁴ nca³ ma³cjain¹-na¹, tˀa³xin² je² xa¹ xi³ tsˀe⁴ cjoa⁴te¹xo³ma³.
ROM 3:29 Ni³na¹, a³ to⁴Ni³na¹ xi³ tsˀe⁴ cho⁴ta⁴ judío. A³ tsi² cˀoa⁴-ti⁴ Ni³na¹ xi³ tsˀe⁴ cho⁴ta⁴ xi³ li² judío-jin². Cjoa⁴qui²xi⁴-jin², cˀoa⁴²-ti⁴ Ni³na¹ xi³ tsˀe⁴ cho⁴ta⁴ xi³ li² judío-jin².
ROM 3:30 Nca⁴ to⁴jnco³ Ni³na¹ xi³ si⁴²cje³tˀa³ je¹-le⁴ cho⁴ta⁴ xi³ tsˀe⁴ cjoa⁴circuncisión xi³ to⁴tˀa³tsˀe⁴ nca³ ma³cjain¹-le⁴, cˀoa⁴ xi³ si⁴²cje³tˀa³ je¹-le⁴ cho⁴ta⁴ xi³ tsin²-le⁴ cjoa⁴circuncisión, xi³ to⁴tˀa³tsˀe⁴ nca³ ma³cjain¹-le⁴.
ROM 3:31 A³ ni²cha³-nia¹ cjoa⁴te¹xo³ma³ xi³ to⁴tˀa³tsˀe⁴ nca³ ma³cjain¹-na¹. Ni⁴ˀi⁴tse¹-jin². To⁴sa³ si⁴cˀe¹jna³nta³² cjoa⁴te¹xo³ma³.
ROM 4:1 Jme¹ xi³ coi⁴xoan¹-ˀni³, jme¹ xi³ qui³sa³co³-le⁴ Abraham je² nˀai³-na¹ jo³ cjoan³ yao³-na¹.
ROM 4:2 Tsa² je¹-le⁴ Abraham je³tˀa³-le⁴ xi³ to⁴tˀa³tsˀe⁴ xi³ qui³sˀin³, tjin¹-le⁴ jo³-sˀin² nca³ vˀa³sje³je³ya³-ni³ yao³-le⁴, to⁴nca³ li²coi³ nqui³xcon⁴ Ni³na¹.
ROM 4:3 Jo¹ tso² xon⁴ Escritura. Abraham coan³cjain¹-le⁴ tˀa³tsˀe⁴ Ni³na¹. Cˀoa⁴-sˀin² Ni³na¹ cho⁴ta⁴cjoa⁴qui²xi⁴ qui³tso²-le⁴.
ROM 4:4 Tˀa³tsˀe⁴ je² xi³ si¹xa¹, je² chji¹-le⁴ li²coi³ ma³xqui⁴cao⁴ jo³-ni³ tsa² xi³ to⁴cjoa⁴tjao², to⁴nca³ jo³-ni³ tsa² xi³ qui³tjen⁴ xi³ tˀa³tsˀe⁴.
ROM 4:5 To⁴nca³ tˀa³tsˀe⁴ je² xi³ tsi² si¹xa¹, to⁴nca³ ma³cjain¹-le⁴ tˀa³tsˀe⁴ Ni³na¹ xi³ si¹cje³tˀa³ je¹-le⁴ cho⁴ta⁴ xi³ tsi² ve³xcon¹ nca³ je², to⁴coi³ tsa² nca³ ma³cjain¹-le⁴, cho⁴ta⁴cjoa⁴qui²xi⁴ tso²-le⁴.
ROM 4:6 Jo³-sˀin² cˀoa⁴-ti⁴ je² David qui³tso²: Jo¹ to⁴nta³-le⁴ je² cho⁴ta⁴ xi³ Ni³na¹ cho⁴ta⁴cjoa⁴qui²xi⁴ tso²-le⁴, tˀa³xin² xa¹-le⁴.
ROM 4:7 Qui³tso²: Jo¹ to⁴nta³-le⁴ je²-ve⁴ xi³ cjoa⁴tsˀa³ntjai²cjoa⁴-le⁴ qui³cha³tˀa³, cˀoa⁴ xi³ je¹-le⁴ qui³sˀe³ˀma³.
ROM 4:8 Jo¹ to⁴nta³-le⁴ je² cho⁴ta⁴ xi³ Nai³-na¹ li²coi³ si¹cˀa³xqui⁴cao⁴ je¹-le⁴.
ROM 4:9 Je² cjoa⁴nta³ je²-vi⁴ a³ to⁴jnco³ tsˀe⁴ xi³ tjin¹-le⁴ cjoa⁴circuncisión, a³xo⁴ cˀoa⁴²-ti⁴ tsˀe⁴ xi³ tsin²-le⁴ cjoa⁴circuncisión-jin². Nca⁴ vi³xon¹-nia¹ nca³ Abraham cho⁴ta⁴cjoa⁴qui²xi⁴ qui³tso²-le⁴ nca³ coan³cjain¹-le⁴.
ROM 4:10 Jo¹-sˀin²ni³ nca³ cho⁴ta⁴cjoa⁴qui²xi⁴ qui³tso²-le⁴. A³ cˀia⁴² nca³ je³qui³sˀe³-le⁴ cjoa⁴circuncisión a³xo⁴ cˀia⁴ nca³ cje³ tjin¹-jin²le⁴. A³li² cˀia⁴ nca³ je³qui³sˀe³-le⁴ cjoa⁴circuncisión, to⁴nca³ cˀia⁴ nca³ cje³ tjin¹-jin²le⁴.
ROM 4:11 Cˀoa⁴ cjoa⁴circuncisión coan³-le⁴ jo³-ni³ tsa² choa⁴, cˀoa⁴ sello xi³ coi³ cjoa⁴qui²xi⁴ xi³ qui³sˀe³-le⁴ nca³ coan³cjain¹-le⁴ cˀia⁴ nca³ cje³ tjin¹-jin²le⁴ cjoa⁴circuncisión. Coi³ cˀoa⁴-sˀin² nca³ nˀai³-le⁴ nca³tsˀi³ cho⁴ta⁴ coan⁴-si¹ni³ xi³ ma³cjain¹-le⁴ nca³ tsin²-le⁴ cjoa⁴circuncisión, jme¹-ni³ nca³ cho⁴ta⁴cjoa⁴qui²xi⁴ coi⁴tso⁴-si¹ni³le⁴ nta³ tsa² je².
ROM 4:12 Cˀoa⁴-ti⁴sˀin² nˀai³-le⁴ coan³ xi³ tjin¹-le⁴ cjoa⁴circuncisión. A³li² tsa² to⁴jnco³ je²-jin² xi³ tjin¹-le⁴ cjoa⁴circuncisión, to⁴nca³ cˀoa⁴²-ti⁴ je² xi³ fi²tjen⁴nqui³-le⁴ ntia⁴²-le⁴ Abraham, jo³-sˀin² coan³cjain¹-le⁴ nca³ cje³ tjin¹-jin²le⁴ cjoa⁴circuncisión.
ROM 4:13 Nca⁴ Ni³na¹ qui³si³sˀe³nqui³-le⁴ Abraham cao⁴ ntje⁴-le⁴ nca³ sˀe⁴-le⁴ cjoa⁴tjao² son³ˀnte³-vi⁴, a³li² to⁴tˀa³tsˀe⁴-jin² cjoa⁴te¹xo³ma³, to⁴nca³ to⁴tˀa³tsˀe⁴ je² cjoa⁴qui²xi⁴ xi³ qui³sˀe³-le⁴ nca³ coan³cjain¹-le⁴.
ROM 4:14 Tsa² je² cho⁴ta⁴ xi³ tsˀe⁴ cjoa⁴te¹xo³ma³ sˀe⁴-le⁴ cjoa⁴tjao², li²jme³-jin² chji¹-le⁴ xi³ ma³cjain¹-na¹ˀni³, cˀoa⁴ qui³cha³ xi³ Ni³na¹ qui³tsjoa³ tsˀoa³.
ROM 4:15 Je² cjoa⁴te¹xo³ma³ si¹cˀe¹jna³ne² cjoa⁴ñˀain³, to⁴nca³ ya⁴ jña³ nca³ tsin² cjoa⁴te¹xo³ma³-jin², cˀoa⁴²-ti⁴ tsin² xi³ fa³ˀa³to³ntjai²-le⁴.
ROM 4:16 Coi³ nca³ cˀoa⁴ma³ xi³ to⁴tˀa³tsˀe⁴ nca³ ma³cjain¹-na¹, jme¹-ni³ nca³ cˀoa⁴ma³-si¹ni³ to⁴cao⁴ cjoa⁴nta³-le⁴ Ni³na¹, cˀoa⁴ jme¹-ni³ nca³ je² xi³ Ni³na¹ qui³tsjoa³-ni³ tsˀoa³ ña³qui³ tjin¹qui²xi⁴-ni¹ tˀa³tsˀe⁴ nca³tsˀi³ ntje⁴-le⁴, a³li² to⁴je²-jin² xi³ tsˀe⁴ cjoa⁴te¹xo³ma³, to⁴nca³ cˀoa⁴²-ti⁴ je² xi³ ma³cjain¹-le⁴ jo³-sˀin² coan³cjain¹-le⁴ Abraham xi³ nˀai³-na¹ nca³tsˀia³².
ROM 4:17 (Jo³-sˀin² tji¹tˀa³: Nˀai³-le⁴ xi³ ncjin² na⁴xi⁴na³nta¹ qui³si³cˀe¹jna³-le²³.) Cˀoa⁴coan³ nqui³xcon⁴ Ni³na¹. Abraham coan³cjain¹-le⁴ tˀa³tsˀe⁴ Ni³na¹, je² xi³ tsjoa¹-le⁴ cjoa⁴vi³jna³chon³ xi³ cˀen³, cˀoa⁴ nchja⁴-le⁴ cjoa⁴ xi³ tsin² jo³-ni³ tsa² xi³ tjin¹.
ROM 4:18 Cˀia⁴ nca³ li²jme³ ti⁴tjin¹-ni³le⁴ cjoa⁴cho³ya²cao⁴cjoa⁴, to⁴jo³ cao⁴ cjoa⁴cho³ya²cao⁴cjoa⁴ coan³cjain¹-ni³le⁴ Abraham, nca³ coan⁴ nˀai³-le⁴ ncjin² na⁴xi⁴na³nta¹, jo³-sˀin² nca³ tsa³cˀin²-le⁴: Cˀoa⁴²-sˀin² coan⁴ ntje⁴-li⁴.
ROM 4:19 Li²coi³ coan³ˀi³nta³jin³ jo³-sˀin² coan³cjain¹-le⁴, cˀia⁴ nca³ qui³si³cja³ˀai³tsjen³ jo³-ni³ tsa² je³cˀen³ yao³-le⁴ (nca³ je³me³ jnco³ ciento no¹-le⁴), cˀoa⁴ cˀia⁴ nca³ qui³si³cja³ˀai³tsjen³ nca³ ˀnti⁴ Sara.
ROM 4:20 To⁴nca³ nta³ coan³cjain¹-le⁴. Li²coi³ jao² tsa³cˀe¹-con³ xi³ tˀa³tsˀe⁴ xi³ Ni³na¹ qui³tsjoa³-le⁴ tsˀoa³. To⁴sa³ nqui²sa⁴ nˀion¹ nta³ coan³cjain¹-le⁴, tsˀa³sje³je³ya³ Ni³na¹,
ROM 4:21 cˀoa⁴ nˀion¹ nta³ tsa³cˀe¹-le⁴con³ nca³ nca³yi³je³ xi³ Ni³na¹ qui³tsjoa³-le⁴ tsˀoa³, cˀoa⁴-ti⁴ Ni³na¹ tjin¹-le⁴ nca³nˀion¹ nca³ cˀoa⁴sˀin⁴².
ROM 4:22 Coi³ nca³ Ni³na¹ cho⁴ta⁴cjoa⁴qui²xi⁴ qui³tso²-le⁴.
ROM 4:23 A³li² tsa² to⁴je²-jin² tˀa³tsˀe⁴ nca³ qui³chji³-ni³ nca³ cho⁴ta⁴cjoa⁴qui²xi⁴ qui³tso²le⁴,
ROM 4:24 to⁴nca³ cˀoa⁴-ti⁴ tˀa³tsan⁴² xi³ cho⁴ta⁴cjoa⁴qui²xi⁴ coi⁴tso⁴-na¹, ña¹ xi³ ma³cjain¹-na¹ tˀa³tsˀe⁴ Ni³na¹ xi³ qui³si³cja³ˀa¹ya³-ni³le⁴ Jesús, Nai³-na¹, ya⁴jin³-le⁴ cˀen³.
ROM 4:25 Je² xi³ qui³ni²cˀen³ tˀa³tsˀe⁴ cjoa⁴tsˀen⁴-na¹, cˀoa⁴ xi³ ja³ˀa²ya³-le⁴ jme¹-ni³ nca³ cjoe⁴tˀa³-si¹ni³ je¹-na¹.
ROM 5:1 Coi³ nca³ je³tˀa³ je¹-na¹ xi³ to⁴tˀa³tsˀe⁴ nca³ ma³cjain¹-na¹, tjin¹-na¹ cjoa⁴ xi³ nchˀan¹ tjin¹ tˀa³tsˀe⁴ Ni³na¹, xi³ to⁴tˀa³tsˀe⁴ Nai³-na¹ Jesucristo.
ROM 5:2 Xi³ to⁴tˀa³tsˀe⁴ Cristo cˀoa⁴-ti⁴ qui³sa³co³-na¹ ˀnte³ nca³ ji³tja³sˀen³² je² cjoa⁴nta³-vi⁴, nca⁴ ma³cjain¹-na¹ tˀa³tsˀe⁴. Nˀion¹ nta³ ti³yo³jin³-le⁴² coi³ cjoa⁴nta³-vi⁴, cˀoa⁴ chˀa²sje³je³ya³² yao³-na¹ tˀa³tsˀe⁴ cjoa⁴cho³ya²cao⁴cjoa⁴ xi³ tjin¹-na¹ nca³ cˀoa⁴cao⁴tˀa³-na¹ cjoa⁴je³ya³-le⁴ Ni³na¹.
ROM 5:3 A³li² tsa² to⁴coi³ je²-vi⁴, to⁴nca³ cˀoa⁴-ti⁴ chˀa²sje³je³ya³² yao³-na¹ tˀa³tsˀe⁴ cjoa⁴ñˀain³ xi³ tjin¹-na¹, nca³ ˀya³² nca³ je² cjoa⁴ñˀain³-ve⁴ si¹jcha¹jin³-na¹ cjoa⁴tse³jta³.
ROM 5:4 Je² cjoa⁴tse³jta³-ve⁴ si¹jcha¹jin³-na¹ nca³ nta³ coi²tjoa⁴². Cˀoa⁴ nca³ nta³ coi²tjoa⁴², coi³ xi³ si¹jcha¹jin³-na¹ cjoa⁴cho³ya²cao⁴cjoa⁴.
ROM 5:5 Cˀoa⁴ je² cjoa⁴cho³ya²cao⁴cjoa⁴ a³li²coi³ si¹soa³, nca⁴ je² cjoa⁴tjao²cha³-le⁴ Ni³na¹ qui³si³tse³ya³ ni⁴ma⁴-na¹ xi³ to⁴tˀa³tsˀe⁴ je² Espíritu Santo xi³ tsa³cˀai²-na¹.
ROM 5:6 Cˀia⁴ nca³ to⁴jo³ i³nta³jin³-sa³na¹, coi³ ni⁴čhjin³ xi³ qui³sˀe³choa⁴ nca³ Cristo cˀen³ xi³ tˀa³tsˀe⁴ xi³ tsi² ve³xcon¹ Ni³na¹.
ROM 5:7 Xi³ cjoa⁴qui²xi⁴ li²coi³-la⁴ coi⁴ya²ntjai² jnco³ cho⁴ta⁴ xi³ tˀa³tsˀe⁴ cho⁴ta⁴cjoa⁴qui²xi⁴, to⁴nca³ tsa² coi³ ni⁴čhjin³ nca³ jnco³ xi³ coan⁴nˀion¹con³ nca³ coi⁴ya²ntjai² xi³ tˀa³tsˀe⁴ jnco³ cho⁴ta⁴nta³.
ROM 5:8 To⁴nca³ Ni³na¹ va³co¹qui²xi⁴ cjoa⁴tjao²cha³-le⁴ xi³ tˀa³tsan⁴² nca³ Cristo cˀen³ xi³ tˀa³tsan⁴², cˀia⁴ nca³ to⁴jo³ cho⁴ta⁴je¹ nia¹.
ROM 5:9 To⁴coi³ cjoa⁴ nca³ ntˀai⁴-vi⁴ je³je³tˀa³ je¹-na¹ xi³ to⁴tˀa³tsˀe⁴ njin¹-le⁴, nqui²sa⁴-jin² nˀion¹ cjoa⁴qui²xi⁴ nca³ coi²tjo⁴ntjai²-nia¹ je² cjoa⁴jti³-le⁴ Ni³na¹ xi³ to⁴tˀa³tsˀe⁴ Cristo.
ROM 5:10 Tsa² cˀia⁴ nca³ co²ntran⁴-na¹ coan³ Ni³na¹, ti⁴je²-ni³ qui³si³cjao¹nta³-na¹ ti⁴tˀa³tsˀe⁴-ni³ xi³ to⁴tˀa³tsˀe⁴ cjoa⁴vi³ya³-le⁴ ˀnti¹-le⁴, to⁴sa³ ntˀai⁴, nca³ je³qui³cho³va²nta³-nia¹, coi²tjo⁴ntjai²-nia¹ xi³ to⁴tˀa³tsˀe⁴ cjoa⁴vi³jna³chon³-le⁴.
ROM 5:11 A³li² tsa² to⁴je² je²-vi⁴, to⁴nca³ cˀoa⁴²-ti⁴ nˀo²sje³je³ya³²sa³ Ni³na¹ to⁴tˀa³tsˀe⁴ Nai³-na¹ Jesucristo. To⁴tˀa³tsˀe⁴ je³qui³chjoe¹ ntˀai⁴-vi⁴ je² cjoa⁴cho³va²nta³-vi⁴.
ROM 5:12 Coi³ je² xi³ je¹ ˀmi² ja³ˀa³sˀen³jin³ son³ˀnte³ xi³ to⁴tˀa³tsˀe⁴ jnco³ cho⁴ta⁴. Cˀoa⁴-sˀin² tjin¹ cjoa⁴vi³ya³ xi³ to⁴tˀa³tsˀe⁴ je¹-ve⁴. Cˀoa⁴ je² cjoa⁴vi³ya³-ve⁴ cˀoa⁴-sˀin² qui³tsao³tˀa³-le⁴ nca³tsˀi³ cho⁴ta⁴, nca⁴ tsa³jnqui³ je¹ nca³tsˀi³.
ROM 5:13 Ti¹tjon² nca³ ja³ˀai³ cjoa⁴te¹xo³ma³, tjin¹ je¹ i⁴ son³ˀnte³-vi⁴, to⁴nca³ li²coi³ ma³xqui⁴tˀa³ je¹, tsa² tsin² cjoa⁴te¹xo³ma³.
ROM 5:14 To⁴nca³ cjoa⁴vi³ya³ tsa³ca³te¹xo³ma³ ni⁴čhjin³-le⁴ Adam sa³ˀnta³ ni⁴čhjin³-le⁴ Moisés. Tsa³ca³te¹xo³ma³-le⁴ nta³ tsa² je² xi³ tsi² je¹ tsa³jnqui³ jo³ qui³sˀin³ Adam nca³ ja³ˀa³to³ntjai²-le⁴ cjoa⁴te¹xo³ma³. Je² Adam nco³ya³-le⁴ je² xi³ cjoa⁴ˀai¹.
ROM 5:15 To⁴nca³ je² cjoa⁴tjao²-le⁴ Ni³na¹, a³li² cˀoa⁴-sˀin² coan³ jo³-ni³ tsa² je² cjoa⁴tsˀa³ntjai²cjoa⁴. Nca⁴ tsa² ncjin² xi³ cˀen³ xi³ to⁴tˀa³tsˀe⁴ je¹-le⁴ jnco³ cho⁴ta⁴-ve⁴, nqui²sa⁴ nˀion¹ coan³ncjin²ya³ cjoa⁴nta³-le⁴ Ni³na¹ xi³ tˀa³tsˀe⁴ xi³ ncjin² ma³-ni³, cˀoa⁴ je² cjoa⁴tjao² coan³ncjin²ya³ xi³ to⁴tˀa³tsˀe⁴ cjoa⁴nta³-le⁴ jnco³ cho⁴ta⁴ xi³ Jesucristo.
ROM 5:16 Je² cjoa⁴tjao²-le⁴ Ni³na¹ li²coi³ cˀoa⁴coan³ jo³ coan³ je² je¹-ve⁴. Cˀia⁴ nca³ Ni³na¹ tsa³cˀe¹nta³jin³ je² cjoa⁴tsˀa³ntjai²cjoa⁴-ve⁴ xi³ jnco³ ma³-ni³, qui³sˀe³ cjoa⁴ñˀain³, to⁴-nca³ je² cjoa⁴tjao² ja³ˀai³ xi³ to⁴tˀa³tsˀe⁴ ncjin² cjoa⁴tsˀa³ntjai²cjoa⁴, nca³ cˀoa⁴-sˀin² cjoe⁴tˀa³ je¹-na¹.
ROM 5:17 Cˀia⁴ tsa² to⁴tˀa³tsˀe⁴ jnco³ cjoa⁴tsˀa³ntjai²cjoa⁴ xi³ tsˀe⁴ jnco³ cho⁴ta⁴-ve⁴, cjoa⁴vi³ya³ tsa³ca³te¹xo³ma³, nqui²sa⁴ to⁴nˀion¹ coa⁴te²xo³ma³ je² cho⁴ta⁴ xi³ cjoe¹ xi³ nˀion¹ tse³ cjoa⁴nta³ cˀoa⁴ je² cjoa⁴tjao² nca³ je³tˀa³ je¹-le⁴. Coa⁴te²xo³ma³ nca³ cˀoe¹jna³con³ntsjai² xi³ to⁴tˀa³tsˀe⁴ jnco³ xi³ Jesucristo.
ROM 5:18 Cˀoa⁴-sˀin² jo³-sˀin² nca³ to⁴tˀa³tsˀe⁴ je² cjoa⁴tsˀa³ntjai²cjoa⁴ xi³ tsˀe⁴ jnco³ cho⁴ta⁴-ve⁴ cjoa⁴ñˀain³ qui³sˀe³-le⁴ nca³tsˀi³ cho⁴ta⁴, cˀoa⁴-ti⁴sˀin² to⁴tˀa³tsˀe⁴ je² cjoa⁴qui²xi⁴-le⁴ jnco³ cho⁴ta⁴ cjoa⁴nta³ qui³sˀe³-le⁴ nca³tsˀi³ cho⁴ta⁴, nca³ cjoe⁴tˀa³ je¹-le⁴, cˀoa⁴ cˀoa⁴-sˀin² sˀe³-le⁴ cjoa⁴vi³jna³chon³.
ROM 5:19 Jo³-sˀin² nca³ cjai¹nca³ ncjin² xi³ cho⁴ta⁴je¹ coan³ xi³ to⁴tˀa³tsˀe⁴ nca³ jnco³ cho⁴ta⁴ xi³ tsi² qui³si³tjo³son², cˀoa⁴-ti⁴sˀin² cjai¹nca³ ncjin² xi³ cho⁴ta⁴cjoa⁴qui²xi⁴ coan⁴ xi³ to⁴tˀa³tsˀe⁴ nca³ jnco³ cho⁴ta⁴ xi³ qui³si³tjo³son².
ROM 5:20 To⁴nca³ je² cjoa⁴te¹xo³ma³ ja³ˀa³sˀen³tˀa³, jme¹-ni³ nca³ je² cjoa⁴tsˀa³ntjai²cjoa⁴-ve⁴ nqui²sa⁴ tse³ coan⁴-si¹ni³. To⁴-nca³ jña³ nca³ je² je¹-ve⁴ coan³tse³, cˀoa⁴²-ti⁴ nqui²sa⁴ tse³ coan³-sa³ cjoa⁴nta³.
ROM 5:21 Jo³-sˀin² nca³ je² je¹-ve⁴ tsa³ca³te¹xo³ma³ xi³ tˀa³tsˀe⁴ cjoa⁴vi³ya³, cˀoa⁴-ti⁴sˀin²ni³ je² cjoa⁴nta³-ve⁴ coa⁴te²xo³ma³ xi³ to⁴tˀa³tsˀe⁴ cjoa⁴qui²xi⁴ nca³ sˀe⁴ cjoa⁴vi³jna³chon³ nca³ntsjai² xi³ to⁴tˀa³tsˀe⁴ Jesucristo Nai³-na¹.
ROM 6:1 Jme¹ xi³ coi⁴xoan¹-ˀni³. A³ coi⁴jnchi¹-sa³² je¹, jme¹-ni³ nca³ nqui²sa⁴ coan⁴tse³-ni³ cjoa⁴nta³.
ROM 6:2 Ni⁴ˀi⁴tse¹-jin². Ña¹ xi³ jo³-ni³ tsa² ti³yo³cˀen³², nca³ li²coi³ ti⁴ña¹ ˀya³-nia¹ je¹. Jo¹-sˀin² ti⁴coi⁴yo³-sa³nia³² cao⁴ je¹.
ROM 6:3 A³xo⁴ tsi² tsa² ˀyao³ nca³ nca³tsˀia³² jo³ tjin¹ ma³-nia³² xi³ qui³sa³te³nta¹tˀa³-le⁴² Cristo Jesús, cˀoa⁴-ti⁴ qui³sa³te³nta¹tˀa³² cjoa⁴vi³ya³-le⁴.
ROM 6:4 To⁴jnco³ qui³sˀe³ñai³-nia¹ cao⁴ je² nca³ cˀoa⁴-sˀin² qui³sa³te³nta¹tˀa³² cjoa⁴vi³ya³-le⁴, jme¹-ni³ nca³ cˀoa⁴-ti⁴sˀin²ni³ ña¹-vi⁴ coi⁴tso⁴ma²coa⁴² cjoa⁴vi³jna³chon³, jo³-sˀin² nca³ Cristo ja³ˀa²ya³jin³-ni³le⁴ cˀen³ xi³ to⁴tˀa³tsˀe⁴ cjoa⁴je³ya³-le⁴ Nˀai³-na¹.
ROM 6:5 Cˀia⁴ tsa² cˀoa⁴-sˀin² to⁴jnco³ coan³² cao⁴ je², jo³-ni³ tsa² cˀen³² jo³-sˀin² cˀen³ nca³ je², cˀoa⁴-ti⁴sˀin² to⁴jnco³ coan⁴² cao⁴ je² nca³ cjoa⁴ˀa¹ya³-na¹ jo³ coan³ nca³ ja³ˀa²ya³-le⁴ nca³ je².
ROM 6:6 ˀya³-nia¹ je²-vi⁴ nca³ nca³yi³je³ jo³ cjoan³² nca³sˀa⁴ to⁴jnco³ qui³sˀe³tˀa³ cro² cao⁴ Jesús, jme¹-ni³ nca³ je² yao³-na¹ xi³ tjin¹-le⁴ je¹ sˀe⁴chjoa²-si¹ni³le⁴, cˀoa⁴ jme¹-ni³ nca³ tsi² ti⁴cjoa⁴nˀion¹ coan⁴chjen¹-si¹ni³na¹ je¹-ve⁴.
ROM 6:7 Nca⁴ je² xi³ cˀen³, je³tˀa³ je¹-le⁴.
ROM 6:8 Cˀia⁴ tsa² cˀen³coa⁴² Cristo, ma³cjain¹-na¹ nca³ cˀoa⁴-ti⁴ coi⁴yo³chon³coa⁴² nca³ je².
ROM 6:9 ˀya³-nia¹ nca³ Cristo li²coi³ ti⁴coi⁴ya²-sa³ni³ nca³ ja³ˀa²ya³jin³-ni³le⁴ cˀen³. Cjoa⁴vi³ya³ li²coi³ ti⁴va³te¹xo³ma³-sa³ni³le⁴ nca³ je².
ROM 6:10 Cˀia⁴ nca³ cˀen³ Cristo, to⁴jnco³ cˀa³ ntia³cˀen³ tˀa³tsˀe⁴ je¹, to⁴nca³ nca³ ti¹jna³con³, ti¹jna³con³-ni¹ tˀa³tsˀe⁴ Ni³na¹.
ROM 6:11 Cˀoa⁴²-ti⁴sˀin² nca³ jon², cho¹son²-ni³lao⁴³ tˀa³tsˀe⁴ yao³-no³ nca³ cjoa⁴qui²xi⁴ nca³ jo³-ni³ tsa² ti³yo³cˀen³-nio¹³ tsˀe⁴ je¹, to⁴nca³ ti³yo³chon³-nio¹³ tˀa³tsˀe⁴ Ni³na¹ nca³ ti³yo³cao⁴³ Cristo Jesús Nai³-na¹.
ROM 6:12 Coi³ cjoa⁴ nca³ li² vˀai²ˀnte³-jin²lao⁴³ je¹-ve⁴ nca³ coa⁴te²xo³ma³ ya⁴jin³ yao³-no³ xi³ vi³ya³, nca³ cˀoa⁴-sˀin² si⁴tjo³son²-ni³lao⁴³ xi³ cjoa⁴chi⁴nca⁴-le⁴.
ROM 6:13 Ni⁴ˀi⁴tse¹-jin² vˀai²ˀnte³-lao⁴³ je¹ jo³ tjin¹ jco⁴ya³-le⁴ yao³-no³, nca³ cjoa⁴tsˀen⁴ si¹chjen¹. To⁴sa³ Ni³na¹ tˀai²ˀnte³-lao⁴³ yao³-no³, jo³-ni³ tsa² xi³ cˀen³ qui³ni²cja³ˀa¹ya³-ni³le⁴, tjio¹con³-ni³ ntˀai⁴-vi⁴. Cˀoa⁴-ti⁴ tˀai²ˀnte³-lao⁴³ Ni³na¹ nca³yi³je³ jco⁴ya³-le⁴ yao³-no³, nca³ coan⁴chjen¹-le⁴ xi³ tˀa³tsˀe⁴ xi³ cjoa⁴qui²xi⁴.
ROM 6:14 Nca⁴ je² je¹-ve⁴ li²coi³ coa⁴te¹xo³ma³-no³, nca³ tsi² tsa² na³nqui³ ti³yo³-lao⁴³ cjoa⁴te¹xo³ma³, to⁴nca³ na³nqui³ ti³yo³-lao⁴³ cjoa⁴nta³-le⁴ Ni³na¹.
ROM 6:15 Jme¹-ni³ˀni³. A³ coi⁴jnchi¹-nia¹ je¹ nca³ tsi² tsa² na³nqui³ ti³yo³-le⁴² cjoa⁴te¹xo³ma³, to⁴nca³ na³nqui³ ti³yo³-le⁴² cjoa⁴nta³. Ma³jain² ni⁴ˀi⁴tse¹-jin².
ROM 6:16 A³ tsi² ˀyao³ ˀya³-ni³ve⁴ xi³ cˀoai⁴-lao⁴³ yao³-no³ nca³ cho⁴ˀnta³-le⁴ coaon⁴³ nca³ si⁴tjo³son²-lao⁴³, jon² nio¹³ xi³ ña³qui³ cho⁴ˀnta³-le⁴ mao³ je² xi³ ni²tjo³son²-lao⁴³. Tsa² je² je¹-ve⁴ xi³ cho⁴ˀnta³-le⁴ coaon⁴³, coi⁴ya²-nio¹³ˀni³, to⁴nca³ tsa² si⁴tjo³son²-lao⁴³ Ni³na¹, cˀoai⁴-no³ xi³ cjoa⁴qui²xi⁴.
ROM 6:17 To⁴nca³ cjoa⁴nta³ cˀoai⁴-le⁴² Ni³na¹ nca⁴ jon² xi³ cho⁴ˀnta³-le⁴ je¹ coaon³, to⁴nca³ je³qui³ni²tjo³son²-lao⁴³ cao⁴ ni⁴ma⁴-no³ jo³ cji³ choa⁴-le⁴ cjoa⁴fa³ˀai³tsjen³ xi³ tsa³cˀin²ya³-no³, jña³-le⁴ xi³ qui³cha³ni²tˀa³-lao⁴³ yao³-no³.
ROM 6:18 To⁴nca³ je³ji²tjo⁴ntai¹-lao⁴³ je² je¹. Je³coaon³ cho⁴ˀnta³-le⁴ xi³ cjoa⁴qui²xi⁴.
ROM 6:19 Cˀoa⁴ ti²si³chjen¹³ en¹ jo³ tso² cho⁴ta⁴, nca⁴ to⁴choa³ nca³nˀion¹ tjin¹-no³. Jo³-sˀin² nca³ tsa³cˀai²ˀnte³-lao⁴³ nca³yi³je³ jco⁴ya³-le⁴ yao³-no³ nca³ jo³ xi³ cho⁴ˀnta³-sˀin² coan³chjen¹-lao⁴³ xi³ chˀao³ tjin¹ cao⁴ xi³ cjoa⁴tsˀa³ntjai²cjoa⁴ xi³ to⁴sin³ to⁴nta³, cˀoa⁴-ti⁴sˀin² ntˀai⁴-vi⁴ tˀai²ˀnte³-lao⁴³ nca³yi³je³ jco⁴ya³-le⁴ yao³-no³ nca³ jo³ xi³ cho⁴ˀnta³-sˀin² coan⁴chjen¹-lao⁴³ xi³ cjoa⁴qui²xi⁴, nca³ cˀoa⁴-sˀin² coan⁴tsje³-nio³ nca³ jon².
ROM 6:20 Cˀia⁴ nca³ cho⁴ˀnta³-le⁴ je¹ coaon³, tsa³qui³ma³ntai¹-lao⁴³ xi³ cjoa⁴qui²xi⁴.
ROM 6:21 Jme¹-ni³ xi³ qui³si³jcha¹jin³-no³ je² cjoa⁴ je²-ve⁴, xi³ ntˀai⁴-vi⁴ntai⁴ ma³soa³-ni³no³. Je² xi³ cjoe⁴tˀa³-le⁴ je² cjoa⁴-ve⁴, cjoa⁴vi³ya³ ni¹.
ROM 6:22 To⁴nca³ ntˀai⁴-vi⁴ntai⁴ nca³ je³ji²tjo⁴ntai¹-lao⁴³ je¹, cˀoa⁴ cho⁴ˀnta³-le⁴ Ni³na¹ coaon³, cˀoa⁴-sˀin² cji³ma³jcha¹jin³-no³ xi³ coan⁴tsje³jin³-ni³no³. Cˀoa⁴ xi³ cjoe⁴tˀa³-ni³ je²-vi⁴ cjoa⁴vi³jna³chon³ nca³ntsjai² ni¹.
ROM 6:23 Nca⁴ je² chji¹-le⁴ je¹ cjoa⁴vi³ya³ ni¹, to⁴nca³ je² cjoa⁴tjao²-le⁴ Ni³na¹ cjoa⁴vi³jna³chon³ nca³ntsjai² ni¹, xi³ to⁴tˀa³tsˀe⁴ Cristo Jesús Nai³-na¹.
ROM 7:1 A³ tsi² tsa² ˀyao³, ntsˀe³, (nca³ fa³coa⁴ je² xi³ ve³ cjoa⁴te¹xo³ma³) nca³ je² cjoa⁴te¹xo³ma³ va³te¹xo³ma³-le⁴ cho⁴ta⁴ cˀia⁴ nca³ ti¹jna³con³-sa³.
ROM 7:2 Je² chjon⁴² xi³ je³chi³xan³ na³nqui³ ti¹jna³-le⁴ xˀin⁴-le⁴ jo³ tso² cjoa⁴te¹xo³ma³, cˀia⁴ nca³ tjen⁴ ti¹jna³con³-sa³ xˀin⁴-le⁴, to⁴nca³ tsa² cˀen³ xˀin⁴-le⁴ ti¹jna³ntai¹-le⁴ cjoa⁴te¹xo³ma³ xi³ tˀa³tsˀe⁴ xˀin⁴-le⁴.
ROM 7:3 Cˀoa⁴-sˀin² cˀia⁴ nca³ ti¹jna³con³ xˀin⁴-le⁴, tsa² tjin¹-le⁴ xˀin⁴ xi³ cja⁴ˀai¹ chjon⁴²cha³jnqui³tˀa³ ˀmi², to⁴nca³ tsa² cˀen³ xˀin⁴-le⁴, ti¹jna³ntai¹-le⁴ cjoa⁴te¹xo³ma³. Cˀia⁴ tsa² xˀin⁴ xi³ cja⁴ˀai¹ sˀe⁴-le⁴, a³li² chjon⁴²cha³jnqui³tˀa³-jin² ˀmi²-le⁴.
ROM 7:4 Cˀoa⁴-ti⁴sˀin² nca³ jon²-vi⁴, ntsˀe³, jo³-ni³ tsa² xi³ ti³yo³cˀaon³ tˀa³tsˀe⁴ cjoa⁴te¹xo³ma³-ve⁴ xi³ to⁴tˀa³tsˀe⁴ yao³-le⁴ Cristo, jme¹-ni³ nca³ tsˀe⁴ xi³ cja⁴ˀai¹ coan⁴-si¹nio³. Tsˀe⁴ coaon⁴³ je² xi³ ja³ˀa²ya³jin³-ni³le⁴ xi³ cˀen³, jme¹-ni³ nca³ coan⁴jcha¹jin³-si¹ni³na¹ cjoa⁴nta³ xi³ tˀa³tsˀe⁴ Ni³na¹.
ROM 7:5 Cˀia⁴ nca³ tsa³qui³yoa³² jo³ coan³ cjoan³ yao³-na¹, je² cjoa⁴chi⁴nca⁴-le⁴ je¹-ve⁴ xi³ coan³ to⁴tˀa³tsˀe⁴ cjoa⁴te¹xo³ma³, qui³si³xa¹jin³ nca³yi³je³ jco⁴ya³-le⁴ yao³-na¹, qui³si³jcha¹jin³-na¹ cjoa⁴ xi³ tˀa³tsˀe⁴ cjoa⁴vi³ya³.
ROM 7:6 To⁴nca³ ntˀai⁴-vi⁴ je³ji²tjo⁴ntai¹-le⁴² cjoa⁴te¹xo³ma³, nca³ jo³-ni³ tsa² je³ti³yo³cˀen³-le⁴² jña³-le⁴ xi³ tsa³qui³yo³nˀion¹-le⁴². Cˀoa⁴-sˀin² coan⁴chjen¹-na¹ jo³-ni³ tsa² cho⁴ˀnta¹ jo³-sˀin² tso² cjoa⁴cho⁴tse⁴ xi³ tsˀe⁴ Espíritu Santo, a³li²coi³ jo³-sˀin² tso² je² cjoa⁴jchi¹nca³ xi³ tji¹tˀa³ xon⁴.
ROM 7:7 Jme¹-ni³ xi³ coi⁴xoan¹-ˀni³. Je² cjoa⁴te¹xo³ma³-ve⁴, a³ je¹ ni¹. Ma³jain², ni⁴to⁴ˀi⁴tse¹-jin² cˀoa⁴tjin¹. To⁴nca³ an³ li²coi³ tsa³ˀve³ xi³ je¹ ˀmi², tsa² tsi² xi³ to⁴tˀa³tsˀe⁴ cjoa⁴te¹xo³ma³. Cˀoa⁴-ti⁴ li²coi³ tsa³ˀve³ xi³ cjoa⁴xin²ta³con², cˀia⁴ tsa² cjoa⁴te¹xo³ma³ li²coi³ cˀoa⁴qui³tso²: A³li² ma³xin²ta³con²-jin²³.
ROM 7:8 To⁴nca³ je² je¹-ve⁴ qui³sˀe³-le⁴ ˀnte³ xi³ to⁴tˀa³tsˀe⁴ cjoa⁴te¹xo³ma³. Cˀoa⁴-sˀin² qui³si³ncjin²-coan³ nca³yi³je³ jco⁴ya³ cjoa⁴chi⁴nca⁴. Cˀia⁴ tsa² tsin² cjoa⁴te¹xo³ma³ je² je¹ jo³-ni³ tsa² ti¹jna³cˀen³-ni¹.
ROM 7:9 Cˀoa⁴-sˀin² tsa³ca²te⁴jna³coan³ xi³jnco³ ni⁴čhjin³ tˀa³xin² cjoa²te¹xo³ma³, to⁴nca³ cˀia⁴ nca³ ja³ˀai³ cjoa⁴te¹xo³ma³-ve⁴, je² je¹-ve⁴ tsa³cˀe²jna³con³-ni¹, cˀoa⁴ an³ jo³-ni³ tsa² cˀen³-nia¹³.
ROM 7:10 Cˀoa⁴ coan³sjai³-na³ nca³ je² cjoa⁴te¹xo³ma³-ve⁴ xi³ tˀa³-tsˀe⁴ cjoa⁴vi³jna³chon³ cˀoa⁴coan³-na³ jo³-ni³ tsa² cjoa⁴-vi³ya³.
ROM 7:11 Nca⁴ je² je¹-ve⁴ qui³sˀe³-le⁴ ˀnte³ xi³ to⁴tˀa³tsˀe⁴ cjoa⁴-te¹xo³ma³. Je² je¹-ve⁴ tsa³cˀa²na⁴cha⁴-na³, cˀoa⁴ qui³si³cˀen³-na³ xi³ to⁴tˀa³tsˀe⁴ cjoa⁴te¹xo³ma³.
ROM 7:12 Cˀoa⁴-sˀin² nca³yi³je³ cjoa⁴te¹xo³ma³ ña³qui³ tsje³-ni¹, cˀoa⁴ tjin¹-le⁴ cjoa⁴qui²xi⁴, cˀoa⁴ nta³-ni¹.
ROM 7:13 Je² xi³ nta³-ve⁴ˀni³ a³ qui³si³cˀen³-na³. Ma³jain², to⁴nca³ je² je¹-ve⁴ qui³si³xa¹jin³-na³ cjoa⁴vi³ya³ xi³ to⁴tˀa³tsˀe⁴ xi³ nta³ tjin¹, jme¹-ni³ nca³ coan⁴tsen³-si¹ni³ nca³ je² xi³ je¹. Xi³ to⁴tˀa³tsˀe⁴ cjoa⁴te¹xo³ma³ je² je¹-ve⁴ nqui²sa⁴ nˀion¹ tjin¹-le⁴ je¹.
ROM 7:14 ˀya³-nia¹ nca³ je² cjoa⁴te¹xo³ma³ tsˀe⁴ Espíritu Santo, to⁴nca³ an³ to⁴xa¹ yao³ nia¹³. Qui³sa³te²na³tˀa³-le⁴ je¹-ve⁴ na³nqui³ ti²jna⁴-le⁴.
ROM 7:15 A³li²coi³ ma³cho⁴ya³-na³ jme³ xi³ sˀian³ an³-vi⁴, ni⁴-cˀoa⁴²-jin² sˀian³ je² xi³ me³-na³, to⁴nca³ je² xi³ chˀao³que⁴, je²-ve⁴ xi³ cˀoa⁴²sˀian³.
ROM 7:16 Cˀoa⁴ tsa² cˀoa⁴²sˀian³ je² xi³ tsi² tsa² coi³ me³-na³, an³ si³qui²xi⁴ya³nta³ nca³ nta³ tjin¹ je² cjoa⁴te¹xo³ma³.
ROM 7:17 Cˀoa⁴-sˀin² li²coi³ an³ xi³ ti⁴cˀoa⁴sˀin³-nia³, to⁴nca³ je² je¹-ve⁴ xi³ ti¹jna³jin³-na³ xi³ cˀoa⁴sˀin¹.
ROM 7:18 Cˀoa⁴ ˀve³-nia³ an³ nca³ tsi²jme³ xi³ nta³ tjin¹ xi³ ti¹jna³jin³-na³ (xi³ ti²xian³ xi³ ti¹jna³jin³ xi³ to⁴xa¹ yao³-na⁴ ni¹). Tjin¹-na³ cjoa⁴me³ta³con² nca³ cˀoa⁴²sˀian³ je² xi³ nta³ tjin¹, to⁴nca³ li²coi³ coi³cho²tjen⁴nqui³-le⁴ nca³ cˀoa⁴²sˀian³.
ROM 7:19 Nca⁴ tsi² tsa² cˀoa⁴sˀian³ je² xi³ nta³ tjin¹ xi³ me³-na³, to⁴nca³ je² xi³ chˀao³ tjin¹-ve⁴ xi³ tsi²coi³ me³-na³, je²-vi⁴ xi³ cˀoa⁴sˀian³.
ROM 7:20 Cˀoa⁴ tsa² cˀoa⁴sˀian³ xi³ tsi²coi³ me³-na³, li²coi³ an³ xi³ ti⁴cˀoa⁴sˀin³-nia³, to⁴nca³ je² je¹-ve⁴ xi³ ti¹jna³jin³-na³, xi³ cˀoa⁴sˀin¹.
ROM 7:21 Cˀoa⁴-sˀin² ma³sjai³-na³ je² cjoa⁴te¹xo³ma³-vi⁴, cˀia⁴ nca³ me³-na³ an³ nca³ cˀoa⁴sˀian³ xi³ nta³ tjin¹, je² xi³ chˀao³ tjin¹ ti¹jna³jin³-na³.
ROM 7:22 Tjin¹-na³ cjoa⁴tsjoa³ xi³ tˀa³tsˀe⁴ cjoa⁴te¹xo³ma³-le⁴ Ni³na¹, jo³-sˀin² tjin¹ ni⁴ma⁴-na⁴.
ROM 7:23 To⁴nca³ ˀve³ nqui²jnco³ cjoa⁴te¹xo³ma³ i⁴jin³ nca³yi³je³ jco⁴ya³-le⁴ yao³-na⁴ xi³ cjan¹cao⁴ je² cjoa⁴te¹xo³ma³ xi³ tsˀe⁴ cjoa⁴fa³ˀai³tsjen³-na⁴. Je²-vi⁴ xi³ si¹cˀe¹jna³tˀa³nˀion¹-na³ je² cjoa⁴te¹xo³ma³ xi³ tsˀe⁴ je¹ xi³ ti¹jna³jin³ nca³yi³je³ jco⁴ya³-le⁴ yao³-na⁴.
ROM 7:24 Ma⁴-xo¹nia³ an³-vi⁴. ˀya¹ xi³ si⁴²cˀe¹jna³ntai¹-ni³na³ yao³-na⁴ xi³ tsˀe⁴ cjoa⁴vi³ya³-vi⁴.
ROM 7:25 Tsjoa³-le⁴ cjoa⁴nta³ Ni³na¹ xi³ to⁴tˀa³tsˀe⁴ Jesucristo Nai³-na¹. Cˀoa⁴-sˀin² ti⁴ˀan³-nia³ cao⁴ cjoa⁴fa³ˀai³tsjen³-na⁴ ma³chjen¹-le⁴ cjoa⁴te¹xo³ma³-le⁴ Ni³na¹, to⁴nca³ cao⁴ yao³-na⁴ an³ ma³chjen¹-le⁴ cjoa⁴te¹xo³ma³-le⁴ je¹.
ROM 8:1 Ntˀai⁴-vi⁴ntai⁴ ni⁴jme³-jin² cjoa⁴ñˀain³ xi³ tjin¹ne²-le⁴ je² xi³ tjio¹cao⁴ Cristo Jesús, je² xi³ tsi² tsa² coi³ cˀoa⁴-sˀin² vˀe²tso⁴ma³ jo³-sˀin² nca³ me³-le⁴ yao³-na¹, to⁴-nca³ jo³-sˀin² nca³ me³-le⁴ Espíritu Santo.
ROM 8:2 Je² cjoa⁴te¹xo³ma³ xi³ tsˀe⁴ Espíritu Santo, je² xi³ tsjoa¹ cjoa⁴vi³jna³chon³, nca³ ti³yo³coa⁴² Cristo Jesús. Qui³si³cˀe¹jna³ntai¹-ni³na³ cjoa⁴te¹xo³ma³ xi³ tsˀe⁴ je¹, cˀoa⁴ xi³ tsˀe⁴ cjoa⁴vi³ya³.
ROM 8:3 Je² xi³ tsi² tsa² coi³ coan³ je² cjoa⁴te¹xo³ma³, nca⁴ tsin²-le⁴ nca³nˀion¹-jin² xi³ to⁴tˀa³tsˀe⁴ yao³-na¹, Ni³na¹ cˀoa⁴qui³sˀin³ je²-vi⁴ cˀia⁴ nca³ qui³si³ca³sen¹ ˀnti¹-le⁴ xi³ cˀoa⁴cji³ yao³-le⁴ jo³ cjoan³ yao³-na¹ xi³ tjin¹-le⁴ je¹, cˀoa⁴ qui³si³ca³sen¹ Cristo xi³ to⁴cjoa⁴-le⁴ je¹-ve⁴. Cˀoa⁴-sˀin² tsa³cˀe¹ne²-le⁴ cjoa⁴ñˀain³ je² je¹ xi³ ti¹jna³jin³ yao³-na¹,
ROM 8:4 jme¹-ni³ nca³ je² cjoa⁴qui²xi⁴ xi³ vˀe¹ne²-na¹ cjoa⁴te¹xo³ma³ coi⁴tjo³son²jin³-si¹ni³na¹ ña¹-vi⁴, xi³ tsi² tsa² coi³ cˀoa⁴-sˀin² coi⁴tso⁴ma²coa⁴² jo³-sˀin² me³-le⁴ yao³-na¹, to⁴nca³ jo³-sˀin² me³-le⁴ Espíritu Santo.
ROM 8:5 Nca⁴ je² xi³ cˀoa⁴-sˀin² fi²cao⁴ yao³-le⁴ jo³-sˀin² me³-le⁴ yao³-na¹, si¹sin³-le⁴ cjoa⁴-le⁴ yao³-na¹, to⁴nca³ je² xi³ cˀoa⁴-sˀin² fi²cao⁴ yao³-le⁴ jo³-sˀin² me³-le⁴ Espíritu Santo, si¹sin³-le⁴ cjoa⁴ xi³ tsˀe⁴ Espíritu Santo.
ROM 8:6 Je² xi³ si¹sin³-le⁴ cjoa⁴-le⁴ yao³-na¹, tjin¹-le⁴ cjoa⁴vi³ya³, to⁴nca³ je² xi³ si¹sin³-le⁴ cjoa⁴ xi³ tsˀe⁴ Espíritu Santo, tjin¹-le⁴ cjoa⁴vi³jna³chon³ cao⁴ cjoa⁴nchˀan¹ta³con².
ROM 8:7 Nca⁴ je² xi³ si¹sin³-le⁴ cjoa⁴-le⁴ yao³-na¹ co²ntran⁴ fi²-le⁴ Ni³na¹, nca³ tsi² na³nqui³ va³tio²-le⁴ cjoa⁴te¹xo³ma³-le⁴ Ni³na¹, ni⁴ˀi⁴tse¹-jin² coan⁴-le⁴.
ROM 8:8 Cˀoa⁴-sˀin² je² xi³ cˀoa⁴-sˀin² yao³-le⁴ tjio¹-ni³, li²coi³ ma³-le⁴ si¹tsjoa³ya³-le⁴ Ni³na¹.
ROM 8:9 To⁴nca³ jon² li²coi³ yao³-no³ ti³yo³-nio³, to⁴nca³ Espíritu Santo ti³yo³-nio³, tsa² cjoa⁴qui²xi⁴ nca³ je² Espíritu Santo xi³ tsˀe⁴ Ni³na¹ ti¹jna³jin³ ni⁴ma⁴-no³. To⁴nca³ tsa² jnco³ xi³ tsin²-le⁴ je² Espíritu xi³ tsˀe⁴ Cristo, a³li² tsˀe⁴ Cristojin²ˀni³.
ROM 8:10 To⁴nca³ tsa² Cristo ti¹jna³jin³ ni⁴ma⁴-no³, je² yao³-no³ cjoa⁴qui²xi⁴ ni¹ nca³ jo³-ni³ tsa² tjio¹cˀen³ xi³ to⁴tˀa³tsˀe⁴ je¹, to⁴nca³ je² espíritu-no³ tjio¹con³-ni¹ xi³ to⁴tˀa³tsˀe⁴ cjoa⁴qui²xi⁴.
ROM 8:11 Cˀoa⁴ tsa² je² Espíritu Santo xi³ tsˀe⁴ Ni³na¹ xi³ qui³si³cja³ˀa¹ya³jin³-ni³le⁴ cˀen³ Cristo, tsa² coi³ Espíritu ti¹jna³jin³ ni⁴ma⁴-no³, je² xi³ qui³si³cja³ˀa¹ya³jin³-ni³le⁴ cˀen³ Cristo Jesús, cˀoa⁴-ti⁴ tsjoa¹-le⁴ cjoa⁴vi³jna³chon³ yao³-no³ xi³ vi³ya³, xi³ to⁴tˀa³tsˀe⁴ je² Espíritu Santo-le⁴ xi³ ti¹jna³jin³ ni⁴ma⁴-no³.
ROM 8:12 Cˀoa⁴-sˀin² ntsˀe³, ni⁴jme³-jin² xi³ qui³tjen⁴-na¹ tˀa³-tsˀe⁴ yao³-na¹, nca³ coi⁴yo³chon³-nia³² jo³-sˀin² me³-le⁴ yao³-na¹.
ROM 8:13 Tsa² coi⁴yo³ jo³-sˀin² me³-le⁴ yao³-na¹, coi⁴ya²-nio¹³ˀni³, to⁴nca³ tsa² cao⁴ je² Espíritu Santo si⁴cˀaon³ je² cjoa⁴ xi³ sˀin¹ yao³-na¹, coi⁴yo³chon³-nio¹³ˀni³.
ROM 8:14 Nca³tsˀi³ xi³ je² Espíritu Santo xi³ tsˀe⁴ Ni³na¹ va¹ntia⁴²-le⁴, je²-vi⁴ xi³ ˀnti¹-le⁴ Ni³na¹-ˀni³.
ROM 8:15 Nca⁴ jon² a³li²coi³ qui³chjoao¹³ cjoa⁴fa³ˀai³tsjen³ xi³ tsˀe⁴ xi³ tjio¹nˀion¹, nca³ nqui²jnco³cˀa² sˀe⁴-no³ cjoa⁴jcon³, to⁴nca³ qui³chjoe¹-nio¹³ je² Espíritu Santo xi³ ve³con³-na¹ jo³-ni³ tsa² xti³-le⁴. Xi³ to⁴tˀa³tsˀe⁴ je² Espíritu Santo no²-cjoa⁴² Abba, xi³ tso²-ni³ Nˀai³.
ROM 8:16 Ti⁴je²-ni³ Espíritu Santo to⁴jnco³ tsjoa¹ cjoa⁴qui²xi⁴ cao⁴ ni⁴ma⁴-na¹ nca³ coia³² ˀnti¹-le⁴ Ni³na¹.
ROM 8:17 Cˀia⁴ tsa² ˀnti¹-le⁴ ma³², cˀoa⁴²-ti⁴ sˀe⁴-na¹ cjoa⁴tjao² tsˀe⁴ Ni³na¹. To⁴jnco³ sˀe⁴-na¹ cjoa⁴tjao² cao⁴ Cristo, tsa² ña³tjen⁴ chja⁴ˀa² cjoa⁴ñˀain³ cao⁴ Cristo, jme¹-ni³ nca³ ña³tjen⁴ coi²tjo⁴je³ya³-si¹nia³² cao⁴ je².
ROM 8:18 Cjai¹nca³ co³son²-le⁴ nca³ an³ nca³ cjoa⁴qui²xi⁴ nca³ je² cjoa⁴ñˀain³ xi³ ti³chja³ˀa² coi³ ni⁴čhjin³-vi⁴ li²coi³ coan⁴nco¹son²cao⁴ je² cjoa⁴je³ya³ xi³ sˀa⁴ nčhoa¹, xi³ coan⁴son²tsen³ tˀa³tsan⁴².
ROM 8:19 Nca⁴ cˀoa⁴-sˀin² nca³yi³je³ xi³ qui³sˀe³nta³ son³ˀnte³-vi⁴ nˀion¹ tjio¹co³ya³cao⁴cjoa⁴ nca³ coan⁴son²tsen³ nca³tsˀi³ xi³ ˀnti¹-le⁴ Ni³na¹.
ROM 8:20 Nca⁴ nca³yi³je³ xi³ qui³sˀe³nta³ son³ˀnte³-vi⁴, na³nqui³ qui³ni²cˀe¹yo³-le⁴ cjoa⁴ xi³ tsi²jme³ nca³nˀion¹ tjin¹-le⁴, a³li² tsa² to⁴je² xi³ cˀoa⁴-sˀin² me³-le⁴, to⁴nca³ cˀoa⁴-sˀin² coan³me³-le⁴ je² xi³ na³nqui³ qui³si³cˀe¹yo³-le⁴ cao⁴ cjoa⁴cho³ya²cao⁴cjoa⁴.
ROM 8:21 Cˀoa⁴-sˀin² ti⁴je²-ni³ je² nca³yi³je³ xi³ qui³sˀe³nta³ son³ˀnte³-vi⁴, coi⁴tjo³ntai¹-le⁴ je² cjoa⁴ xi³ cˀoa⁴-sˀin² vˀe¹nˀion¹-le⁴ xi³ to⁴fi³tson³. Cˀoai⁴-le⁴ nca³ cˀoe¹yo³ntai¹ cao⁴ cjoa⁴je³ya³ xi³ tsˀe⁴ ˀnti¹-le⁴ Ni³na¹.
ROM 8:22 ˀya³-nia¹ nca³ nca³tsˀi³ xi³ qui³sˀe³nta³ son³ˀnte³-vi⁴ sa³ˀnta³ ntˀai⁴-vi⁴, to⁴jnco³ tse³ne², cˀoa⁴ to⁴jnco³ jo³ ma⁴ sˀin¹ jo³-ni³ tsa² jnco³ chjon⁴² xi³ ˀnti¹ ti¹vˀe¹.
ROM 8:23 A³li² tsa² to⁴je²-jin² nca³ je², to⁴nca³ cˀoa⁴²-ti⁴ ña¹ nca³ ña¹-vi⁴ xi³ tjin¹-na¹ je² Espíritu Santo jo³-ni³ tsa² xi³ ti¹tjon² cjoa⁴tjao², ña¹-vi⁴ tse³ne² jin³ yao³-na¹, nca³ ti³ma³cho³ya²-le⁴² nca³ coan⁴jnco³ nca³ coa⁴sen²-na¹ jo³-ni³ tsa² xti³-le⁴, nca³ tso²ˀva³ntai¹ yao³-na¹.
ROM 8:24 Nca⁴ ji²tjo⁴ntjai²-nia¹ cao⁴ cjoa⁴cho³ya²cao⁴cjoa⁴-vi⁴. To⁴nca³ je² xi³ ti³cho³ya²-le⁴², tsa² ma³tsen³, li²coi³ ti³cho³ya²-le⁴². ˀya¹ xi³ sco¹ya³-sa³le⁴ xi³ je³co³tsen³.
ROM 8:25 To⁴nca³ tsa² ti³cho³ya²-le⁴² je² xi³ tsi² tsa² coi³ ˀya³², cao⁴ cjoa⁴tse³jta³ cho¹ya³-ni³le⁴².
ROM 8:26 Cˀoa⁴-ti⁴sˀin²ni³ je² Espíritu Santo va³sen¹cao⁴-na¹ nca³ i³nta³² cjoan³², nca⁴ li²coi³ ˀya³² jme³ xi³ si⁴je¹ jo³-sˀin² va³quin²-le⁴, to⁴nca³ ti⁴je²-ni³ Espíritu Santo vˀe¹tsˀoa³ntjai²-na¹ cao⁴ nca³ cjai¹nca³ to⁴tse³ne², nca³ tsi² ma³-na¹ jo³ vi³xoan¹.
ROM 8:27 To⁴nca³ je² xi³ va¹sjai³jin³ ni⁴ma⁴-na¹, ve³ je² cjoa⁴fa³ˀai³tsjen³-le⁴ Espíritu Santo, nca³ vˀe¹tsˀoa³ntjai² cho⁴ta⁴-le⁴ Cristo jo³-sˀin² nca³ me³-le⁴ Ni³na¹.
ROM 8:28 ˀya³-nia¹ nca³ nca³yi³je³ cjoa⁴ ña³tjen⁴ si¹xa¹ cjoa⁴nta³ tˀa³tsˀe⁴ je² xi³ tsjoa³que³ Ni³na¹, xi³ Ni³na¹ qui³nchja⁴-le⁴ jo³-sˀin² nca³ xa¹ tsa³cˀe¹nta³-ni³,
ROM 8:29 je² xi³ Ni³na¹ to⁴nqui³-ni³ tsa³ve³, cˀoa⁴²-ti⁴ to⁴nqui³-ni³ xa¹ tsa³cˀe¹nta³-ni³ nca³ cˀoa⁴coan⁴ cjoan³ jo³ cjoan³ ˀnti¹-le⁴, jme¹-ni³ nca³ ˀnti¹tjon² coan⁴-si¹ni³le⁴ jin³-le⁴ ncjin² ntsˀe⁴.
ROM 8:30 Cˀoa⁴ je² xi³ Ni³na¹ to⁴nqui³-ni³ xa¹ tsa³cˀe¹nta³-ni³, cˀoa⁴²-ti⁴ Ni³na¹ qui³nchja⁴-le⁴ je²-vi⁴. Cˀoa⁴ je² xi³ qui³nchja⁴-le⁴, cˀoa⁴-ti⁴ je²-vi⁴ xi³ qui³si³cje³tˀa³ je¹-le⁴. Cˀoa⁴ je² xi³ qui³si³cje³tˀa³ je¹-le⁴, cˀoa⁴²-ti⁴ je²-vi⁴ tsa³cˀa³sje³je³ya³.
ROM 8:31 Jme¹ xi³ coi⁴xoan¹-ˀni³ je²-vi⁴. Cˀia⁴ tsa² Ni³na¹ ti¹jna³ tˀa³tsan⁴², ˀya¹ xi³ co²ntran⁴-na¹ coan⁴-ˀni³.
ROM 8:32 Je² xi³ li²coi³ tsa³cˀe¹chjoa²-le⁴ nca³ qui³sˀe³-le⁴ cjoa⁴ñˀain³, nta³ tsa² ti⁴tsˀe⁴-ni³ ˀnti¹-le⁴, to⁴nca³ qui³tsjoa³tˀa³ xi³ tˀa³tsan⁴² nca³tsˀia³², a³ tsi² cˀoa⁴-ti⁴ tsjoa¹cjoa⁴tjao²-na¹ nca³yi³je³ cjoa⁴ cao⁴ Cristo.
ROM 8:33 ˀya¹ xi³ coa⁴²nqui³ je² cho⁴ta⁴ xi³ Ni³na¹ tsa³cja³ˀa¹jin³. Ni³na¹ xi³ si¹cje³tˀa³ je¹.
ROM 8:34 ˀya¹ xi³ vˀe¹ne²-na¹ cjoa⁴ñˀain³. Cristo Jesús xi³ cˀen³, to⁴nca³ cˀoa⁴²-ti⁴ je² xi³ ja³ˀa²ya³-le⁴, xi³ ya⁴ ti¹jna³ nca³qui²xi⁴-le⁴ Ni³na¹, je² xi³ cˀoa⁴-ti⁴ vˀe¹tsˀoa³ xi³ tˀa³tsan⁴².
ROM 8:35 ˀya¹ xi³ cjoa⁴ˀa²xin²-na¹ cjoa⁴tjao²cha³-le⁴ Cristo. A³ cjoa⁴ñˀain³ ni¹. A³ xi³ ai¹ cji³ne³-na¹. A³ je² xi³ co²ntran⁴ ma³nca³tjen⁴nqui³-na¹. A³ cji³nčha¹ ni¹. A³ je² xi³ qui³xi³jnta²joan³². A³ je² xi³ xcon¹-na¹. A³ je² xi³ qui⁴cha⁴ va¹-na¹.
ROM 8:36 Jo³-sˀin² tji¹tˀa³: Xi³ tˀa³tsi⁴ ti³vi³ya³-ni¹⁴jin⁴ nca³ntsjai², to⁴jo³-ni³ va³rre² xi³ ti¹ni²cˀen³ ti¹ˀya³ta³con²-na³jin⁴.
ROM 8:37 To⁴nca³ nca³yi³je³ je² cjoa⁴ je²-vi⁴ nqui²sa⁴ nˀion¹ cˀoa⁴sˀian⁴-sa³² cao⁴-ni³ tsa² je² xi³ si¹qui³njen³, xi³ to⁴tˀa³tsˀe⁴ je² xi³ coan³tsjoa³que³-na¹.
ROM 8:38 To⁴coi³ je²-vi⁴ ña³qui³ tji¹jnco³-le⁴coan³, nca³ ni⁴cjoa⁴vi³ya³-jin², ni⁴cjoa⁴vi³jna³chon³-jin², ni⁴ˀa²ncje⁴-jin², ni⁴ xi³ nca³jco⁴-le⁴jin², ni⁴je²-jin² xi³ tjin¹-le⁴ nca³nˀion¹, ni⁴ xi³ ntˀai⁴-vi⁴jin², ni⁴je² xi³ sˀa⁴ nčhoa¹-jin²,
ROM 8:39 ni⁴ xi³ ncˀa³-jin², ni⁴ xi³ na³nqui³-jin², ni⁴to⁴jnco³-jin²sa³ xi³ xa¹ qui³sˀe³nta³-ni³ xi³ coan⁴ cjoa⁴ˀa²xin²-na¹ je² cjoa⁴tjao²cha³-le⁴ Ni³na¹ nca³ ti³yo³coa⁴² Cristo Jesús Nai³-na¹.
ROM 9:1 Xi³ cjoa⁴qui²xi⁴ xi³ xian³ nca⁴ ti²jna⁴coa⁴ Cristo, li²coi³ vˀe³nti³soa³. Je² cjoa⁴fa³ˀai³tsjen³-na⁴ to⁴jnco³ tsjoa¹ cjoa⁴qui²xi⁴ xi³ tˀa³tsˀan⁴ cao⁴ je² Espíritu Santo.
ROM 9:2 Cjai¹nca³ tse³ cjoa⁴va³ xi³ tjin¹-na³, cˀoa⁴ nca³ntsjai² nˀion¹ cji³ne³ ni⁴ma⁴-na⁴.
ROM 9:3 Ti⁴ˀan³-nia³ me³-na³ ntia³coa²sen⁴tˀa³xin²-le⁴ Cristo, tsa² coan⁴-na³, xi³ tˀa³tsˀe⁴ ntsˀe³, xi³ xi²nquia⁴ xi³ to⁴nco¹son² yao³-na⁴jin⁴,
ROM 9:4 xi³ coi³ cho⁴ta⁴ israelita ni¹, je² xi³ tsa³cˀin²-le⁴ nca³ ˀnti¹-le⁴ Ni³na¹ coan³, cˀoa⁴ tsˀe⁴ cjoa⁴je³ya³, cao⁴ cjoa⁴ xi³ qui³sˀe³nˀion¹, cao⁴ je² cjoa⁴te¹xo³ma³ xi³ qui³tsˀai²-le⁴, cao⁴ cjoa⁴ xi³ ve³xcon¹, cao⁴ xi³ qui³ni²sˀe³nqui³-le⁴.
ROM 9:5 Je² xi³ nˀai³jcha¹cjin³ tsˀe⁴ ni¹, cˀoa⁴²-ti⁴ je² Cristo jo³ cjoan³ yao³-le⁴ ji³nčhoa³-ni³ ntje⁴-le⁴. Je² xi³ Ni³na¹ xi³ va³te¹xo³ma³-le⁴ nca³yi³je³ cjoa⁴, ca²ta³chi³con³tˀain³ nca³ntsjai² ni⁴čhjin³. Cˀoa⁴ ca²ta³ma³.
ROM 9:6 To⁴nca³ en¹-le⁴ Ni³na¹ ni⁴jme³-jin² xi³ qui³cha³-le⁴. Nca⁴ tsi² tsa² to⁴nca³tsˀi³-jin² xi³ nčhoa¹-ni³ ntje⁴-le⁴ Israel xi³ cho⁴ta⁴ israelita ni¹.
ROM 9:7 Ni⁴coi³-jin² nca³ ntje⁴-le⁴ Abraham nca³ ˀnti¹-le⁴ coan³ nca³tsˀi³, to⁴nca³ je² xi³ tsˀe⁴ Isaac, je² xi³ ntje⁴-li⁴ cˀoin¹.
ROM 9:8 Coi³ xi³ tso²-ni³: A³li² je²-jin² xi³ ˀnti¹-le⁴ jo³ cjoan³ yao³-le⁴ xi³ ˀnti¹-le⁴ Ni³na¹, to⁴nca³ je² xi³ ˀnti¹-le⁴ jo³-sˀin² nca³ qui³si³sˀe³nqui³-le⁴, je² ni¹ xi³ coan³xqui⁴cao⁴ nca³ ntje⁴-le⁴.
ROM 9:9 Je² en¹ xi³ Ni³na¹ qui³si³sˀe³nqui³-le⁴ Abraham, coi³ je²-vi⁴: I⁴-cjoan²sˀin² ni⁴čhjin³ no¹ xi³jnco³ cjoe²ˀe⁴, cˀoa⁴ sˀe⁴-le⁴ Sara jnco³ ˀnti¹.
ROM 9:10 A³li² tsa² to⁴coi³ je²-vi⁴, to⁴nca³ cˀoa⁴²-ti⁴ Rebeca, cˀia⁴ nca³ qui³sa³co³-le⁴ ˀnti¹ xi³ tsˀe⁴ jnco³ xˀin⁴ Isaac, nˀai³-na⁴jin⁴,
ROM 9:11 (cˀia⁴ nca³ cje³-sa³ tsin³-jin², cˀoa⁴ cˀia⁴ nca³ ni⁴sa³jme³-jin² xi³ sˀin¹, ni⁴ xi³ nta³ tjin¹, ni⁴ xi³ chˀao³ tjin¹, jme¹-ni³ nca³ sˀe⁴jna³ntsjai²-ni³ jo³-sˀin² xa¹ tsa³cˀe¹nta³-ni³ Ni³na¹ nca³ tsa³cja³ˀa¹jin³, a³li² to⁴tˀa³tsˀe⁴ xa¹-le⁴jin², to⁴-nca³ to⁴tˀa³tsˀe⁴ jo³-sˀin² me³-le⁴ je² xi³ nchja⁴),
ROM 9:12 cˀoa⁴tsa³cˀin²-le⁴ Rebeca nca³ je² xi³ ma³jchi¹nca³ cho⁴ˀnta³ coan⁴-le⁴ xi³ ma³ˀnti¹.
ROM 9:13 Jo³-sˀin² nca³ tji¹tˀa³: Je² Jacobo xi³ coan³tsjoa³que⁴, to⁴nca³ Esaú chˀao³que⁴ coan³.
ROM 9:14 Jme¹ xi³ coi⁴xoan¹-ˀni³. Ni³na¹, a³ tjin¹ xi³ tsi² cjoa⁴qui²xi⁴ xi³ sˀin¹. Ma³jain². Ni⁴ˀi⁴tse¹-jin² cˀoa⁴tjin¹.
ROM 9:15 To⁴nca³ Ni³na¹ qui³tso²-le⁴ Moisés: Coan⁴ma⁴que⁴ to⁴ˀya³-ni³ve⁴ xi³ me³-na³ nca³ coan⁴ma⁴que⁴, cˀoa⁴ aon³ coan⁴-na³ to⁴ˀya³-ni³ve⁴ xi³ tˀa³tsˀe⁴ aon³ coan⁴-na³.
ROM 9:16 Cˀoa⁴-sˀin² nca³ tsi² tsa² coi³ nca³ cˀoa⁴-sˀin² me³-le⁴ cho⁴ta⁴, ni⁴coi³-jin² nca³ nˀion¹ si¹xa¹, to⁴nca³ coi³ nca³ Ni³na¹ xi³ tjin¹-le⁴ cjoa⁴ma⁴ta³con².
ROM 9:17 Nca⁴ je² xon⁴ Escritura cˀoa⁴tso²-le⁴ Faraón: Coi³ je²-vi⁴ nca³ qui³sco³mi³tjen⁴-le²³, jme¹-ni³ nca³ coa³co³-si¹nia³ nca³nˀion¹-na⁴ xi³ to⁴tˀa³tsi⁴, cˀoa⁴ jme¹-ni³ nca³ jan³ˀain¹-na⁴ coi⁴no²cjoa⁴ya³-si¹ni³ nca³qui³jnta² son³ˀnte³.
ROM 9:18 Cˀoa⁴-sˀin² Ni³na¹ tjin¹-le⁴ cjoa⁴ma⁴ta³con² tˀa³tsˀe⁴ cho⁴ta⁴ to⁴ˀya³-ni³ve⁴ xi³ me³-le⁴. Cˀoa⁴-ti⁴ Ni³na¹ si¹ta²ja³ ni⁴ma⁴-le⁴ cho⁴ta⁴ to⁴ˀya³-ni³ve⁴ xi³ me³-le⁴.
ROM 9:19 Cˀoa⁴cˀoin¹-nai¹ˀni³. A¹-ni³ nca³ Ni³na¹ va¹ne²-si¹ni³ je¹ cho⁴ta⁴, nca⁴ ˀya¹ xi³ coan⁴ cˀoe⁴²jna³ta²ja³-le⁴ xi³ me³-le⁴ Ni³na¹.
ROM 9:20 To⁴nca³ ji³ cho⁴ta⁴, ˀya¹ ni¹³ ji³ nca³ coa⁴te²cjao³ˀa²cao⁴-si¹ni³ Ni³na¹. A³ coi⁴nchja⁴cao⁴ ti⁴²ˀnte³ je² xi³ ca²si¹nta³: A¹-ni³ nca³ cˀoa⁴ca²ni²ca¹-si¹ni³nai¹³.
ROM 9:21 A³ tsin²-le⁴ ˀnte³-jin² je² xi³ si¹nta³ ti⁴² nca³ si⁴²nta³-ni³ xi³ ti⁴coi³-ni³ nta¹si³ jnco³ xi³ nˀion¹ nta³ cji³ cˀoa⁴ nqui²jnco³ xi³ to⁴ti⁴²yo⁴ma⁴.
ROM 9:22 To⁴nca³ Ni³na¹, nta³ tsa² me³-le⁴ nca³ coa⁴co² cjoa⁴jti³-le⁴, cˀoa⁴ nta³ tsa² me³-le⁴ nca³ jcha⁴-le⁴ nca³nˀion¹-le⁴, cˀoa⁴-sˀin² qui³cho¹cjoa⁴-le⁴ cao⁴ cjoa⁴tse³jta³-le⁴ je² ti⁴² xi³ xa¹ coan³nta³-ni³ tˀa³tsˀe⁴ cjoa⁴jti³-le⁴. Je² ti⁴² xa¹ coan³nta³-ni³ nca³ coi⁴xo⁴ya³.
ROM 9:23 Coi³ xi³ cˀoa⁴qui³sˀin³ jme¹-ni³ nca³ jcha⁴-si¹ni³le⁴ jo³ nca³ nˀion¹ tse³ tjin¹ cjoa⁴je³ya³-le⁴ xi³ tˀa³tsˀe⁴ ti⁴² xi³ xa¹ coan³nta³-ni³ tˀa³tsˀe⁴ cjoa⁴ma⁴ta³con²-le⁴. Je² ti⁴² xi³ Ni³na¹ to⁴nqui³-ni³ tsa³cˀe¹jna³nta³ tˀa³tsˀe⁴ cjoa⁴je³ya³.
ROM 9:24 Xi³ coi³ ña¹-vi⁴ nca³ cˀoa⁴-ti⁴ Ni³na¹ qui³nchja⁴-na¹, a³li² tsa² to⁴je²-jin² xi³ tsˀe⁴ cho⁴ta⁴ judío, to⁴nca³ cˀoa⁴²-ti⁴ cho⁴ta⁴ xi³ tsˀe⁴ xi³ li² judío-jin².
ROM 9:25 Jo³-sˀin² nca³ Ni³na¹ cˀoa⁴-ti⁴ tso² ya⁴ tsˀe⁴ Oseas: Coi³nchja²³-le⁴ na⁴xi⁴na³nta¹-na⁴, je² xi³ tsi² tsa² coi³ tsˀan⁴ na⁴xi⁴na³nta¹. Cˀoa⁴-ti⁴ coi³nchja²³-le⁴ xi³ tjao²que⁴, je² xi³ tsi² tsa² coi³ coan³tjao²que⁴.
ROM 9:26 Cˀoa⁴ coan⁴ ya⁴ ˀnte³ jña³ nca³ cˀoa⁴tsa³cˀin²-le⁴ve⁴, jon²-vi⁴ a³li² na⁴xi⁴na³nta¹-na⁴jin², ya⁴ coi⁴no²cjoa⁴-le⁴ ˀnti¹-le⁴ Ni³na¹ xi³ ti¹jna³con³.
ROM 9:27 Cˀoa⁴-ti⁴ Isaías nchja⁴ya³ xi³ tˀa³tsˀe⁴ Israel: Nta³ tsa² cˀoa⁴tjin¹ ma³-ni³ ˀnti¹-le⁴ Israel jo³ cji³ ma³-ni³ tso³mi¹-le⁴ nta¹chi³con³, to⁴je² xi³ cˀoa⁴nqui³ coi³tjo³ntjai²-ni¹.
ROM 9:28 Nca⁴ je² Nai³-na¹ si⁴²jnco³ cjoa⁴qui²xi⁴-le⁴ xi³ tjin¹ne²-le⁴ son³ˀnte³ nca³ ña³qui³ cˀoa⁴tjin¹, cˀoa⁴ nti⁴ton⁴ cˀoa⁴coan⁴.
ROM 9:29 Jo³-sˀin² nca³ to⁴nqui³-ni³ cˀoa⁴qui³tso² Isaías: Tsa² je² Nai³-na¹ xi³ Nai³-le⁴ so³nta²do⁴ tsa² tsi² qui³si³ca³tio²con³-na¹ ntje⁴, cˀoa⁴-ti⁴sˀin² cˀoa⁴coan³² jo³ coan³ Sodoma, cˀoa⁴-ti⁴sˀin² cˀoa⁴coan³ cjoan³² jo³ cjoan³ Gomorra.
ROM 9:30 Jme¹ xi³ coi⁴xoan¹-ˀni³: Je² cho⁴ta⁴ xi³ li² judío-jin², xi³ tsi² qui³tjen⁴nqui³-le⁴ cjoa⁴qui²xi⁴-le⁴ Ni³na¹, ji³cho²tjen⁴nqui³ xi³ cjoa⁴qui²xi⁴, xi³ coi³ cjoa⁴qui²xi⁴ tjoe¹-na¹ xi³ to⁴tˀa³tsˀe⁴ nca³ ma³cjain¹-na¹,
ROM 9:31 to⁴nca³ cho⁴ta⁴ Israel xi³ qui³tjen⁴nqui³-le⁴ je² cjoa⁴te¹xo³ma³ xi³ vˀe¹ne² xi³ cjoa⁴qui²xi⁴ li²coi³ ji³cho²tjen⁴nqui³-le⁴ nca³ qui³si³jnco³ cjoa⁴te¹xo³ma³ xi³ vˀe¹ne² xi³ cjoa⁴qui²xi⁴.
ROM 9:32 A¹-ni³. To⁴coi³ nca³ li²coi³ qui³tjen⁴nqui³-le⁴ xi³ cjoa⁴qui²xi⁴ xi³ to⁴tˀa³tsˀe⁴ nca³ coan³cjain¹-le⁴, to⁴nca³ cˀoa⁴-sˀin² qui³tjen⁴nqui³-le⁴ xi³ cjoa⁴qui²xi⁴ xi³ to⁴tˀa³tsˀe⁴ nca³ qui³si³xa¹-le⁴ cjoa⁴te¹xo³ma³. Ya⁴ qui³sa³te³nqui³-ni³ ya⁴ la⁴jao⁴ xi³ qui³jna³chjoa².
ROM 9:33 Jo³-sˀin² tji¹tˀa³: Coe⁴-ni³ i⁴ cˀoe³jna²³ ya⁴ Sión la⁴jao⁴ xi³ qui³jna³chjoa², cˀoa⁴ la⁴jao⁴ xi³ sa³te¹nquia³². Je² xi³ coan⁴cjain¹-le⁴ tˀa³tsˀe⁴ li²coi³ coan⁴soa³-le⁴.
ROM 10:1 Ntsˀe³, ña³qui³ cjoa⁴qui²xi⁴ ni¹ coi³ xi³ me³-le⁴ ni⁴ma⁴-na⁴, cˀoa⁴ coi³ xi³ vˀe³tsˀoa²³-le⁴ Ni³na¹ tˀa³tsˀe⁴ Israel, nca³ coi⁴tjo³ntjai².
ROM 10:2 Nca⁴ an³ tsjoa³ cjoa⁴qui²xi⁴ tˀa³tsˀe⁴ Israel nca³ nˀion¹ xcon¹ ve³ Ni³na¹, to⁴nca³ li²coi³ jo³-sˀin² ma³chjen¹ cjoa⁴i³sen³ta³con².
ROM 10:3 Li²coi³ ve³ cjoa⁴qui²xi⁴ xi³ Ni³na¹ tsjoa¹. To⁴coi³ xi³ me³-le⁴ nca³ vˀa³sje³ cjoa⁴qui²xi⁴ xi³ ti⁴tsˀe⁴-ni³. Li²coi³ na³nqui³ tsa³ca³tio²-le⁴ cjoa⁴qui²xi⁴-le⁴ Ni³na¹.
ROM 10:4 Cristo qui³si³cje³tˀa³ cjoa⁴te¹xo³ma³-ve⁴, jme¹-ni³ nca³ sˀe⁴-si¹ni³le⁴ cjoa⁴qui²xi⁴ nca³tsˀi³ xi³ ma³cjain¹-le⁴.
ROM 10:5 Je² Moisés cˀoa⁴-sˀin² qui³squi³ tˀa³tsˀe⁴ je² cjoa⁴qui²xi⁴ xi³ tsˀe⁴ cjoa⁴te¹xo³ma³: Je² cho⁴ta⁴ xi³ cˀoa⁴sˀin⁴² je² cjoa⁴ je²-vi⁴, xi³ to⁴tˀa³tsˀe⁴ je² cjoa⁴-vi⁴ cˀoe¹jna³con³-ni¹.
ROM 10:6 To⁴nca³ je² cjoa⁴qui²xi⁴ xi³ to⁴tˀa³tsˀe⁴ nca³ ma³cjain¹-na¹ cˀoi⁴tso²: A³li² cˀoa⁴-jin² tso² ni⁴ma⁴-li⁴: ˀya¹ xi³ coai⁴ ncˀa³jmi³, (xi³ tso²-ni³, nca³ coai⁴ cˀa¹jen³ Cristo).
ROM 10:7 A³xo⁴: ˀya¹ xi³ coai⁴sˀen³ tsjo¹ cjoa⁴vi³ya³, (xi³ tso²-ni³, nca³ coai⁴ cˀa¹jin³nqui²ntia³-ni³ cˀen³ Cristo).
ROM 10:8 To⁴nca³ jo¹ tso². Je² en¹-ve⁴ čhian³ ti¹jna³-li², ti¹jna³ˀa³ ntso⁴ˀvai³, cˀoa⁴ ya⁴ ti¹jna³jin³ ni⁴ma⁴-li⁴. Je²-vi⁴ je² en¹ xi³ tˀa³tsˀe⁴ nca³ ma³cjain¹-na¹, jña³-le⁴ xi³ no²cjoa⁴ya³jin³-ni³jin⁴.
ROM 10:9 Xi³ coi³-vi⁴, tsa² si⁴qui²xi⁴ya³nta³-lai⁴ cao⁴ ntso⁴ˀvai³ nca³ Nai³-li⁴ Jesús, cˀoa⁴ tsa² coan⁴cjain¹-le⁴ ni⁴ma⁴-li⁴ nca³ Ni³na¹ qui³si³cja³ˀa¹ya³jin³-ni³le⁴ cˀen³ Cristo, cˀia⁴ coi²tjo⁴ntjai²-ni¹ˀni³.
ROM 10:10 Nca⁴ cao⁴ ni⁴ma⁴-na¹ ma³cjain¹-na¹ xi³ tˀa³tsˀe⁴ nca³ cjoe⁴tˀa³ je¹-na¹, to⁴nca³ cao⁴ ntso⁴ˀva³² ni²qui²xi⁴ya³nta³-nia¹ xi³ tˀa³tsˀe⁴ nca³ coi²tjo⁴ntje².
ROM 10:11 Je² xon⁴ Escritura tso²: Je² nca³tsˀi³ xi³ ma³cjain¹-le⁴ tˀa³tsˀe⁴ Cristo, li²coi³ coan⁴soa³-le⁴.
ROM 10:12 Nca⁴ Ni³na¹ to⁴nco¹son² fi²cao⁴ cho⁴ta⁴ judío cao⁴ cho⁴ta⁴ griego, nca³ ti⁴je²-ni³ Cristo xi³ Nai³-le⁴ nca³tsˀi³, nˀion¹ tjin¹-le⁴ cjoa⁴nchi⁴na¹ tˀa³tsˀe⁴ nca³tsˀi³ xi³ nchja⁴-le⁴.
ROM 10:13 Nca⁴ nca³tsˀi³ to⁴ˀya³-ni³ve⁴ xi³ coi⁴nchja⁴-le⁴ jan³ˀain¹-le⁴ Nai³-na¹, coi⁴tjo³ntjai²-ni¹ˀni³.
ROM 10:14 Jo¹-sˀin² coi⁴nchja⁴-le⁴ Cristo tso²cˀoa⁴, nca³ je² xi³ tsi² coan³cjain¹-le⁴ tˀa³tsˀe⁴. Cˀoa⁴ jo¹-sˀin² coan⁴cjain¹-le⁴ tˀa³tsˀe⁴, nca³ je² xi³ tsi²coi³ nčhˀoe¹ tˀa³tsˀe⁴. Cˀoa⁴ jo¹sˀin² coan⁴-ni³ cjoi⁴nčhˀoe¹, tsa² tsin² xi³ coi⁴nchja⁴ya³jin³-le⁴.
ROM 10:15 Cˀoa⁴ jo¹-sˀin² coi⁴nchja⁴ya³jin³-le⁴ tsa² tsi² ˀya³ xi³ si⁴²ca³sen¹-le⁴, jo³-sˀin² tji¹tˀa³: Li² to⁴cˀoa⁴ na³sca¹ cjoan³ ntso⁴co⁴ je² xi³ tsˀe⁴ xi³ nchja⁴ya³jin³ je² en¹nta³-le⁴ tˀa³tsˀe⁴ xi³ nchˀan¹ tjin¹, xi³ tsˀe⁴ xi³ nchja⁴ya³jin³ je² en¹nta³-le⁴ tˀa³tsˀe⁴ xi³ nta³ tjin¹.
ROM 10:16 To⁴nca³ li²coi³ nca³tsˀi³ xi³ qui³si³tjo³son² en¹nta³-vi⁴, nca³ je² Isaías tso²: Señor, ˀya¹ xi³ coan³cjain¹-le⁴ en¹ xi³ qui³no²cjoa⁴yai³⁴-jin⁴.
ROM 10:17 Cˀoa⁴-sˀin² ma³cjain¹-na¹ xi³ to⁴tˀa³tsˀe⁴ nca³ no²ˀya². Cˀoa⁴ cˀoa⁴-sˀin² no²ˀya² xi³ to⁴tˀa³tsˀe⁴ en¹-le⁴ Ni³na¹.
ROM 10:18 To⁴nca³ cˀoa⁴xian³: A³ tsi² qui³nčhˀoe¹. Ña³qui³ cˀoa⁴tjin¹, nca³qui³jnta² son³ˀnte³ tsˀa³tji³vi¹son² jta⁴-le⁴, cˀoa⁴ ji³cho² en¹-le⁴ sa³ˀnta³ jña³ tjen⁴ fe³tˀa³-ni³ son³ˀnte³.
ROM 10:19 To⁴nca³ cˀoa⁴xian³: A³ tsi² tsa³ve³ je²-vi⁴ cho⁴ta⁴ Israel. Ti¹tjon² Moisés tso²: An³ si³chi⁴ni⁴-no³ co²ntran⁴-le⁴ cho⁴ta⁴ xi³ tsi² na⁴xi⁴na³nta¹, cˀoa⁴ co²ntran⁴-le⁴ cho⁴ta⁴ xi³ tsi²coi³ si¹cja³ˀai³tsjen³ si³jti³-no³.
ROM 10:20 To⁴sa³ Isaías ma³nˀion¹con³ nca³ tso²: Coan³sjai³-le⁴ nca³ an³ je² xi³ tsi² tsa³ca¹sjai³-na³, cˀoa⁴ tsa³ca³co³-le⁴ yao³-na⁴ je² xi³ tsi² tsa² coi³ qui³tsi²na³nqui³ tˀa³tsˀan⁴.
ROM 10:21 To⁴nca³ xi³ tˀa³tsˀe⁴ cho⁴ta⁴ Israel tso²: Nca³yi³je³ ni⁴čhjin³ tsa³cjen³-le⁴ ntsa⁴ jnco³ na⁴xi⁴na³nta¹ xi³ xi¹jin³, xi³ to⁴cja⁴ˀai¹-nca¹ tso².
ROM 11:1 Cˀoa⁴xian³-ˀni³: A³ tsa³cˀa³sje³tˀa³xin²-ni¹ Ni³na¹ na⁴xi⁴na³nta¹-le⁴. Ma³jain², ni⁴ˀi⁴tse¹-jin² cˀoa⁴tjin¹. Cˀoa⁴-ti⁴ an³-vi⁴ cho⁴ta⁴ israelita nia¹³, ntje⁴-le⁴ Abraham nia¹³, xi³ ti⁴coi³-nia³ xi¹ncjin¹ Benjamín.
ROM 11:2 Ni³na¹ li²coi³ tsa³cˀa³sje³xin² na⁴xi⁴na³nta¹-le⁴ xi³ to⁴nqui³-ni³ tsa³ve³. A³ tsi² ˀyao³ jo³ tso² xon⁴ Escritura tˀa³tsˀe⁴ Elías, jo³-sˀin² nca³ tsa³cˀe¹tsˀoa³-le⁴ Ni³na¹ co²ntran⁴-le⁴ Israel,
ROM 11:3 Señor, qui³si³cˀen³ cho⁴ta⁴-li⁴ xi³ qui³nchja⁴ya³ tˀa³tsi⁴, cˀoa⁴ qui³si³xcoa⁴ya³ son²xta²-li⁴, cˀoa⁴ to⁴ˀan³ tsa³ca²te⁴jna³, cˀoa⁴ me³-xo¹le⁴ nca³ si⁴²cˀen³-na³.
ROM 11:4 To⁴nca³ jo¹-sˀin² qui³si³cˀo¹fa³ya³-le⁴ en¹ Ni³na¹: Ña³to³ jmi³ cho⁴ta⁴ qui³si³ca³tioa²³ xi³ tˀa³tsˀan⁴ xi³ tsi² tsa² ya⁴ tsa³qui³ncha³xco¹nchˀin³tˀa³-le⁴ Baal.
ROM 11:5 Cˀoa⁴-ti⁴sˀin²ni³, nta³ tsa² coi³ ni⁴čhjin³ je²-vi⁴ to⁴jo³ tjin¹-sa³ cho⁴ta⁴ xi³ njen³nqui³ xi³ Ni³na¹ tsa³cja³ˀa¹jin³-ni³ cao⁴ cjoa⁴nta³-le⁴.
ROM 11:6 Cˀia⁴ tsa² to⁴tˀa³tsˀe⁴ cjoa⁴nta³, li²coi³ to⁴tˀa³tsˀe⁴ xa¹na¹ˀni³. Tsa² cja⁴ˀai¹ tjin¹ cjoa⁴, je² cjoa⁴nta³-ve⁴ a³li² ti⁴cjoa⁴nta³-ni³ˀni³. Cˀoa⁴ tsa² to⁴tˀa³tsˀe⁴ xa¹-na¹, a³li² ti⁴cjoa⁴nta³-ni³ˀni³. Tsa² cja⁴ˀai¹ tjin¹ cjoa⁴, je² xa¹-na¹ li²coi³ ti⁴xa¹-ni³ˀni³.
ROM 11:7 Jme¹-ni³ˀni³. Israel li²coi³ ji³cho²tjen⁴nqui³-le⁴ jme³ xi³ tsa³ca¹sjai³, to⁴nca³ je² xi³ Ni³na¹ tsa³cja³ˀa¹jin³ ji³cho²tjen⁴nqui³-le⁴. Cˀoa⁴ je² xi³cˀa³ ña³qui³ nˀion¹ xi¹jin³ coan³.
ROM 11:8 Jo³-sˀin² tji¹tˀa³: Ni³na¹ qui³tsjoa³-le⁴ nca³ cjai¹nca³ njion² tjio¹ ni⁴ma⁴-le⁴, cˀoa⁴ xcon⁴ xi³ tsi² ma³tsen³-ni³le⁴, cˀoa⁴ xo⁴ño³ xi³ tsi²coi³ nčhˀoe¹-ni³, sa³ˀnta³ je² ni⁴čhjin³-vi⁴.
ROM 11:9 Cˀoa⁴ David tso²: Ca²ta³vˀa³ntjai²ya³ sˀoi¹-le⁴. Jnco³ nˀo¹chji⁴ye⁴ ca²ta³ma³, cˀoa⁴ na⁴ˀya³ xi³ ya⁴ tsao³ya³, cˀoa⁴ la⁴jao⁴ xi³ sa³te¹nqui³, cˀoa⁴ cao⁴ cjoa⁴ñˀain³-le⁴ ca²ta³vˀe¹chji¹-ni³.
ROM 11:10 Ca²ta³sˀe³chjoa²nqui³ xcon⁴, jme¹-ni³ nca³ tsi² scoe⁴-si¹ni³. Nca³ntsjai² ca²ta³mi³nti³ya³cao⁴ ya¹tsˀin⁴.
ROM 11:11 Cˀoa⁴xian³-ˀni³: A³ qui³sa³te²nqui²-ni³ jo³ sa³ˀnta³ nca³ qui³tsao³nti²jao³. Ma³jain², ni⁴ˀi⁴tse¹-jin², to⁴nca³ to⁴tˀa³tsˀe⁴ nca³ qui³tsao³jin³ je¹ cho⁴ta⁴ Israel, cˀoa⁴-sˀin² ja³ˀai³-le⁴ cjoa⁴vi³tjo³ntjai² cho⁴ta⁴ xi³ li² judío-jin², jme¹-ni³ nca³ coan⁴chi⁴ni⁴que³-si¹ni³ cho⁴ta⁴ Israel.
ROM 11:12 Tsa² to⁴tˀa³tsˀe⁴ nca³ qui³tsao³jin³ je¹ cho⁴ta⁴ Israel, coi³ nca³ sˀe⁴-le⁴ cjoa⁴nchi⁴na¹ son³ˀnte³-vi⁴, cˀoa⁴ tsa² to⁴tˀa³tsˀe⁴ nca³ qui³cha³-le⁴ cho⁴ta⁴ Israel, coi³ nca³ sˀe⁴-le⁴ cjoa⁴nchi⁴na¹ cho⁴ta⁴ xi³ li² judío-jin², jo¹ tjin¹-sa³ cjoa⁴nta³ xi³ sˀe⁴-le⁴ cˀia⁴ nca³ coan⁴jnco³-ni³ cho⁴ta⁴ judío.
ROM 11:13 Jon² xi³ fa³cao⁴-no³ xi³ cho⁴ta⁴ xi³ li² judío-jin². Coi³ nca³ an³ nia¹³ xi³ pa²stro⁴-le⁴ cho⁴ta⁴ xi³ li² judío-jin², vˀa³sje³je³ya²³ je² xa¹ xi³ tsa³cˀai²-na³,
ROM 11:14 tsa² to⁴jo³-sˀin²ni³ cjoa⁴ coan⁴-na³ si³chi⁴nia³ je² xi³ xi²nquia⁴, tsa² cˀoa⁴-ti⁴ coan⁴-na³ cˀoa⁴sje³ntje² jnco³joa² xi³ je².
ROM 11:15 Tsa² je² xi³ qui³tsjion³con³-le⁴ Ni³na¹, tsa² coi³ cjoa⁴ je²-vi⁴ nca³ tsa³cjao²nta³-ni³ cho⁴ta⁴son³ˀnte³ cao⁴ Ni³na¹, jme¹ xi³ coan⁴ cˀia⁴ nca³ tjo¹ve¹tjao² nca³ je², tsa² tsi² jo³-ni³ xi³ tjo¹ve¹tjao² cjoa⁴vi³jna³chon³ nca³jao³-le⁴ cjoa⁴vi³ya³.
ROM 11:16 Tsa² je² xi³ ti¹tjon² ntje⁴ xi³ vˀai²tˀa³, tsje³ ni¹, cˀoa⁴²-ti⁴ tsje³ nca³yi³je³. Cˀoa⁴ tsa² je² ja⁴ma⁴-ve⁴ tsje³ ni¹, cˀoa⁴²-ti⁴ cjoan³ ya¹ntsja³-ˀni³.
ROM 11:17 Cˀia⁴ tsa² jnco³ jao² ya¹ntsja³ xi³ qui³ti³tˀa³, cˀoa⁴ ji³ ni¹ xi³ ya¹ˀoliva xi³ jin³jña¹ cji³ma³jchai¹³, ya⁴² ti³sen³jna³yai³ ˀnte³-le⁴ nca³ je², cˀoa⁴ ya⁴² tji¹cjao³coai⁴ ja⁴ma⁴ nca³ chjoai¹³ nca³nˀion¹-le⁴ ya¹ˀoliva.
ROM 11:18 A³li² chˀa²sje³je³ya³-jin²lai⁴ yao³-li⁴ ya¹ntsja³ xi³ qui³ti³tˀa³-ve⁴. Cˀoa⁴ tsa² chˀa²sje³je³ya³-lai⁴ yao³-li⁴, ca²ta³fa³ˀai³tsjen³-li² nca³ tsi² tsa² coi³ ji³ xi³ vˀai²-lai⁴ nca³nˀion¹ ja⁴ma⁴-ve⁴, to⁴nca³ je² ja⁴ma⁴-ve⁴ xi³ tsjoa¹-li² nca³nˀion¹.
ROM 11:19 Ji³ cˀoa⁴-la² si³: Je² ya¹ntsja³ qui³ti³tˀa³, jme¹-ni³ nca³ an³ coa²se⁴jna³ya³-nia³ ˀnte³-le⁴.
ROM 11:20 Nta³ tjin¹. To⁴tˀa³tsˀe⁴ nca³ tsi² tsa² coan³cjain¹-le⁴ nca³ qui³ti³tˀa³-ni³ nca³ je². To⁴nca³ ji³ to⁴tˀa³tsˀe⁴ nca³ ma³cjain¹-li², vi³sen²jna³nˀion¹-ni³. A³li² ncˀa³ta³con²-jin² mai³, to⁴sa³ ti⁴jcon¹-lai⁴.
ROM 11:21 Nca⁴ tsa² Ni³na¹ li² coi³ tsa³cˀe¹chjoa²-le⁴ nca³ qui³sˀe³-le⁴ cjoa⁴ñˀain³ je² xi³ to⁴xa¹ ya¹ntsja³-ni³, cˀoa⁴²-ti⁴ ji³ ni⁴ˀi⁴tse¹-jin² cˀoe⁴²chjoa²-li² nca³ sˀe⁴-li⁴ cjoa⁴ñˀain³.
ROM 11:22 Cho¹tsen³-lai⁴ˀni³, je² cjoa⁴nta³-le⁴ cˀoa⁴ je² cjoa⁴ta²ja³ta³con²-le⁴ Ni³na¹, je² cjoa⁴ta²ja³ta³con²-le⁴ xi³ tˀa³tsˀe⁴ je² xi³ qui³tsao³-ve⁴, to⁴nca³ je² cjoa⁴nta³-le⁴ Ni³na¹ xi³ tˀa³tsi⁴, tsa² cˀoa⁴-sˀin² coi⁴jna³cao⁴-sai³ je² cjoa⁴nta³-ve⁴. Cˀoa⁴ tsa² mai³, cˀoa⁴-ti⁴ ji³ coi⁴cha¹tˀa³-li²ˀni³.
ROM 11:23 Cˀoa⁴ nta³ tsa² je² xi³cˀa³, tsa² tsi² cˀoa⁴-sˀin² cˀoe¹yo³cao⁴ nca³ tsi² ma³cjain¹-le⁴, sa⁴sen¹jna³ya³ ˀnte³-le⁴, nca⁴ Ni³na¹ tjin¹-le⁴ nca³nˀion¹ nca³ si⁴²ca³sen¹jna³ya³ nqui²jnco³cˀa² ˀnte³-le⁴.
ROM 11:24 Tsa² ji³ xi³ qui³ti³tˀai³ je² ya¹ˀoliva xi³ to⁴xa¹ cjoan³-ni³ jin³jña¹, cˀoa⁴ cˀoa⁴-sˀin² sa³sen¹jna³yai³ ˀnte³-le⁴ xi³ nqui²sa⁴ nta³ ya¹ˀoliva xi³ tsi² tsa² coi³ to⁴xa¹ cjoan³-ni³ jin³jña¹, jo¹ tjin¹-sa³ je²-ve⁴ xi³ ña³qui³ xa¹ cjoan³-ni³ ya¹ntsja³ ya¹-ve⁴ cˀoa⁴-ti⁴ sa⁴sen¹jna³ya³ nqui²jnco³cˀa² ˀnte³-le⁴ ya⁴ ya¹ˀoliva xi³ tsˀe⁴.
ROM 11:25 Nca⁴ tsi²coi³ me³-na³, ntsˀe³, nca³ tsi² jchao⁴³ je² cjoa⁴ˀma³-ve⁴, jme¹-ni³ nca³ tsi² nˀion¹ ncˀa³ta³con²³ coan⁴-si¹nio³ xi³ ti⁴tˀa³tsaon⁴³-nio³. Je² cjoa⁴ta²ja³ta³con² xi³ coan³cˀa³-le⁴ cho⁴ta⁴ Israel, jo³ sa³ˀnta³ nca³ cjoe⁴ coan⁴jnco³ nca³tsˀi³ cho⁴ta⁴ xi³ li² judío-jin² xi³ cjoa⁴ˀa³sˀen³.
ROM 11:26 Cˀia⁴ nca³ cˀoa⁴-sˀin² cjoe⁴ coan⁴-ve⁴, nca³tsˀi³ cho⁴ta⁴ Israel coi⁴tjo³ntjai², jo³-sˀin² tji¹tˀa³: Ya⁴ Sión cjoi⁴nčhoa³-ni³ xi³ cˀoa⁴sje³ntjai², je² xi³ cjoa⁴ˀa²xin²-le⁴ Jacobo cjoa⁴ xi³ tsi² ve³xcon¹ Ni³na¹.
ROM 11:27 Je²-vi⁴ cjoa⁴ xi³ cˀoe³nta³coa⁴ cˀia⁴ nca³ cjoa³ˀa³xian²³ je¹-le⁴.
ROM 11:28 Cˀoa⁴-sˀin² xi³ tˀa³tsˀe⁴ je² en¹nta³ xi³ tˀa³tsˀe⁴ Cristo, co²ntran⁴ ma³-le⁴. Coi³ cjoa⁴ cˀoa⁴coan³ xi³ tˀa³tsaon⁴³. To⁴-nca³ jo³-sˀin² nca³ Ni³na¹ tsa³cja³ˀa¹jin³, Ni³na¹ cjai¹nca³ tjao²que³ nca³ je² xi³ tˀa³tsˀe⁴ nˀai³jcha¹cjin³-le⁴.
ROM 11:29 Nca⁴ li²coi³ coan⁴ cˀoa⁴ntjai²ya³ cjoa⁴tjao²-le⁴ Ni³na¹ cao⁴ jo³-sˀin² nca³ qui³nchja⁴-le⁴ Ni³na¹.
ROM 11:30 Jo³-sˀin² nca³ cˀoa⁴-ti⁴ jon²-vi⁴ cˀia⁴ li²coi³ qui³ni²tjo³son²-lao⁴³ Ni³na¹, to⁴nca³ ntˀai⁴-vi⁴ qui³sa³co³-no³ cjoa⁴ma⁴ta³con² to⁴tˀa³tsˀe⁴ nca³ tsi² qui³si³tjo³son²-le⁴ nca³ je².
ROM 11:31 Cˀoa⁴-ti⁴sˀin² je²-vi⁴ ntˀai⁴-vi⁴ li²coi³ qui³si³tjo³son²-le⁴, jme¹-ni³ nca³ cˀoa⁴-ti⁴ je² sa⁴co²-le⁴ cjoa⁴ma⁴ta³con² to⁴tˀa³tsˀe⁴ cjoa⁴ma⁴ta³con² xi³ qui³sa³co³-no³ nca³ jon².
ROM 11:32 Nca⁴ Ni³na¹ tsa³cˀe¹yo³nqui³-le⁴ nca³tsˀi³ nca³ tsi² tsa² qui³si³tjo³son²-le⁴, jme¹-ni³ nca³ coan⁴ma⁴que³-si¹ni³ nca³tsˀi³.
ROM 11:33 Li² to⁴cˀoa⁴cji³ tse³ tjin¹ cjoa⁴chji⁴ne⁴-le⁴ cao⁴ cjoa⁴ˀi³sen³ta³con²-le⁴ Ni³na¹. Ni⁴ˀya³-jin² xi³ ma³-le⁴ ma³cho⁴ya³-le⁴ jo³ tjin¹ cjoa⁴te¹xo³ma³-le⁴ Ni³na¹. Ni⁴ˀya³-jin² xi³ ma³-le⁴ ve³ ntia⁴²-le⁴.
ROM 11:34 ˀya¹ xi³ coan³cho⁴ya³-le⁴ cjoa⁴fa³ˀai³tsjen³-le⁴ Nai³-na¹. A³xo⁴ ˀya¹ xi³ qui³tso²ya³-le⁴.
ROM 11:35 A³xo⁴ ˀya¹ xi³ ti¹tjon² qui³tsjoa³-le⁴ nca³ je², jme¹-ni³ nca³ coan³chji¹-si¹ni³le⁴.
ROM 11:36 Nca³yi³je³ cjoa⁴ ji³nčhoa³-ni³ nca³ je². Nca³yi³je³ cjoa⁴ tˀa³tsˀe⁴ qui³sˀe³nta. Cˀoa⁴ nca³yi³je³ cjoa⁴ tjio¹ tˀa³tsˀe⁴. Ca²ta³sˀe³-le⁴ cjoa⁴je³ya³ nca³ je² to⁴jo³ tjin¹-ni³ ni⁴čhjin³. Cˀoa⁴ ca²ta³ma³.
ROM 12:1 Cˀoa⁴-sˀin² ntsˀe³, cˀoe³tsˀoa²³-no³ xi³ to⁴tˀa³tsˀe⁴ cjoa⁴ma⁴ta³con²-le⁴ Ni³na¹, nca³ coi⁴ncha³va³saon³ yao³-no³ nca³ cˀoai⁴tˀa³-lao⁴³ Ni³na¹ je² yao³-no³ jo³-ni³ jnco³ cjoa⁴tjao² xi³ ti¹jna³con³, xi³ tsje³, xi³ sa³sen¹-le⁴ Ni³na¹. Cˀoa⁴²-sˀin² ma³chjen¹-lao⁴³ Ni³na¹ cao⁴ ni⁴ma⁴-no³.
ROM 12:2 A³li² cˀoa⁴-jin²sˀin² ma³nquin¹cao⁴³ yao³-no³ jo³ tjin¹ cjoa⁴ son³ˀnte³-vi⁴. Ca²ta³vˀa³ntjai²yao³ yao³-no³ nca³ coan⁴cho⁴tse⁴ya³nta³ nqui²jnco³cˀa²-ni³ cjoa⁴fa³ˀai³tsjen³-no³, jme¹-ni³ nca³ jcha⁴-si¹nio³ jme³-ni³ xi³ Ni³na¹ me³-le⁴, jña³-le⁴ xi³ nta³, xi³ sa³sen¹-le⁴, xi³ ña³qui³ tji¹jnco³.
ROM 12:3 Cˀoa⁴xin³-no³ nca³ jnco¹jnco¹ xi³ ti³yo³-vi⁴, xi³ to⁴tˀa³tsˀe⁴ cjoa⁴nta³ xi³ tsa³cˀai²-na³, nca³ tsi² ˀya³ xi³ nqui²sa⁴ nˀion¹ ncˀa³ si⁴²cja³ˀai³tsjen³-le⁴ yao³-le⁴ cao⁴-ni³ tsa² xi³ jo³-sˀin² nca³ va³quin²-le⁴, to⁴nca³ cˀoa⁴-sˀin² ca²ta³si¹cja³ˀai³tsjen³jin³ nca³ ni⁴ncˀa³-jin² cˀoa⁴ ni⁴na³nqui³-jin² si⁴²cja³ˀai³tsjen³ xi³ tˀa³tsˀe⁴ yao³-le⁴, to⁴nca³ jo³-sˀin² choa⁴ xi³ Ni³na¹ qui³tsjoa³-le⁴ nca³ jnco¹jnco¹ nca³ coan³cjain¹-le⁴.
ROM 12:4 Jo³-sˀin² cjoan³ yao³-na¹ nca³ ncjin² jco⁴ya³ tjin¹-le⁴, to⁴nca³ nca³yi³je³ jco⁴ya³-le⁴ yao³-na¹ a³li² to⁴jnco³-jin² xa¹ tjin¹-le⁴ xi³ to⁴nco¹son².
ROM 12:5 Cˀoa⁴-sˀin² xi³ to⁴tˀa³tsˀe⁴ Cristo to⁴jnco³ yao³ nia¹, nta³ tsa² ncjin² ma³-nia¹, to⁴nca³ nca³tsˀia³² nca³ jnco¹jncoa¹ xi¹ncjin¹ ma³-ni³ yao³-na¹.
ROM 12:6 Cˀoa⁴-sˀin² cja⁴ˀai¹-nca¹ cjoan³ cjoa⁴tjao²-le⁴ Espíritu Santo xi³ tjin¹-le⁴ nca³ jnco¹jnco¹. Jo³-sˀin² qui³tsˀai²-le⁴ cjoa⁴nta³-le⁴, cˀoa⁴-sˀin² ca²ta³si¹chjen¹. Tsa² cjoa⁴tjao²-ve⁴ nca³ nchja⁴ya³jin³-ni³, ca²ta³si¹chjen¹ jo³-sˀin² choa⁴-le⁴ nca³ ma³cjain¹-le⁴,
ROM 12:7 a³xo⁴ tsa² je² cjoa⁴tjao²-ve⁴ nca³ si¹xa¹, ca²ta³si¹chjen¹ jo³-sˀin² vˀai²-le⁴ nca³ si¹xa¹, a³xo⁴ je² xi³ va³co¹ya³, cˀoa⁴-sˀin² ca²ta³si¹chjen¹ jo³-sˀin² vˀai²-le⁴ nca³ va³co¹ya³.
ROM 12:8 Je² xi³ vˀe¹tˀain³, ca²ta³si¹chjen¹ jo³-sˀin² vˀai²-le⁴ nca³ vˀe¹tˀain³. Je² xi³ si¹cˀa³vi¹ cjoa⁴tjao², cˀoa⁴ca²ta³sˀin¹ cao⁴ cjoa⁴nta³. Je² xi³ ma³ nca³jco⁴-le⁴, nta³ ca²ta³si¹coi²nta⁴. Je² xi³ ma³ma⁴que³, cˀoa⁴ca²ta³sˀin¹ cao⁴ cjoa⁴tsjoa³.
ROM 12:9 Je² cjoa⁴tjao²cha³ xi³ ña³qui³ cjoa⁴qui²xi⁴ ca²ta³ma³. Chˀao³cha³ ca²ta³mao³ xi³ chˀao³ tjin¹, nˀion¹ ta³nquin¹tˀa³-lao⁴³ xi³ nta³ tjin¹.
ROM 12:10 Ca²ta³ma³tsjoa³chao³ xi²nquio⁴³ jo³-ni³ nca³ ntsˀao³. Nqui²sa⁴ ti¹tjon² jcha⁴xcon¹³ xi³cˀa³ jo³-ni³ tsa² ti⁴jon²-nio³.
ROM 12:11 A³li² tsˀe²-jion²³ xi³ nˀiaon²³, ti⁴xi¹ti¹yao³, tsjoa³cjoa⁴ ca²ta³mao³ cao⁴ Espíritu Santo, cˀoa⁴ jo³-ni³ cho⁴nta³-sˀin² ti⁴xa¹-lao⁴³ Nai³-na¹.
ROM 12:12 Cjoa⁴tsjoa³ ca²ta³sˀe³-no³ xi³ tˀa³tsˀe⁴ xi³ cho³ya²-lao⁴³, cjoa⁴tse³jta³ ca²ta³sˀe³-no³ xi³ tˀa³tsˀe⁴ cjoa⁴ñˀain³ xi³ ti³chja³ˀao²³, tˀe²tsˀoa³ntsjao²³.
ROM 12:13 Tˀai²-lao⁴³ jme³ xi³ ma³chjen¹-le⁴ cho⁴ta⁴-le⁴ Cristo, tˀai²ˀnte³-lao⁴³ cho⁴ta⁴ xi³ xin² fa³ˀai³-ni³.
ROM 12:14 Ti⁴chi³con³tˀaon³ je² xi³ chˀao³ fi²cao⁴-no³, ti⁴chi³con³tˀain³-nio¹³ a³li² no²cjoa⁴ˀaon³-jin²lao⁴³.
ROM 12:15 Ti⁴tsjoa³cao⁴³ ˀya³ xi³ ma³tsjoa³-le⁴, chji¹ˀnta¹cao⁴³ ˀya³ xi³ cji³ˀnta¹.
ROM 12:16 To⁴jnco³ cjoa⁴fa³ˀai³tsjen³ ca²ta³sˀe³jin³-no³ nca³ jon², a³li² ncˀa³con³-jin² mao³, to⁴nca³ mi²yo⁴ tˀiaon⁴³ cho⁴ta⁴yo⁴ma⁴, a³li² nˀo²sje³ncˀa³-jion²³ yao³-no³.
ROM 12:17 A³li² chˀao³-jin² ni²cao⁴³ je² xi³ chˀao³ si¹cao⁴-no³, ti⁴coi²ntao⁴³ xi³ nta³ tjin¹ nqui³xcon⁴ nca³tsˀi³ cho⁴ta⁴.
ROM 12:18 To⁴jo³ cji³ nca³yi³je³ xi³ coan⁴-no³, cˀoa⁴tˀiaon⁴³ jme¹-ni³ nca³ nchˀan¹ coi⁴yo³-si¹nio³ cao⁴ nca³tsˀi³ cho⁴ta⁴.
ROM 12:19 Jon² xi³ tsjoa³que⁴-no³, a³li² ni²jnta²-jin²nio³ nca³ ti⁴jon²-nio³, to⁴nca³ tˀai²ˀnte³-lao⁴³ Ni³na¹ cao⁴ cjoa⁴jti³-le⁴, nca³ cˀoa⁴-sˀin² tji¹tˀa³: An³ xi³ si³jnta²³-nia³, an³ cˀoe³chji¹-nia³, tso² Nai³-na¹.
ROM 12:20 Tsa² co²ntran⁴-li⁴ xi³ vao³-le⁴, ti⁴cjain²³. Cˀia⁴ tsa² fa³ti²-le⁴, tˀai²-lai⁴ xi³ scˀoi¹. Tsa² cˀoa⁴nˀiain²³, vi³ncha³nto³soin²³ jco⁴ co²ntran⁴-li⁴ xo¹lˀi¹-ve⁴.
ROM 12:21 A³li² je²-jin² si⁴²qui³njen³-li² xi³ chˀao³ tjin¹-ve⁴, to⁴-nca³ ti⁴qui³njen³-lai⁴ xi³ chˀao³ tjin¹ xi³ to⁴tˀa³tsˀe⁴ xi³ nta³ tjin¹.
ROM 13:1 Nca³tsˀi³ cho⁴ta⁴ ca²ta³si¹tjo³son²-le⁴ cho⁴ta⁴ xi³ xa¹ tjin¹-le⁴, xi³ va³te¹xo³ma³, nca³ tsin² cjoa⁴te¹xo³ma³-jin² xi³ tsi² tsjoa¹ˀnte³ Ni³na¹, cˀoa⁴ je² xi³ tjio¹, Ni³na¹ qui³si³qui³ncha¹.
ROM 13:2 Cˀoa⁴-sˀin² je² cho⁴ta⁴ xi³ vˀe²yo³ta²ja³cao⁴ cho⁴ta⁴ xi³ xa¹ tjin¹-le⁴, vˀe²yo³ta²ja³cao⁴ cjoa⁴te¹xo³ma³-le⁴ Ni³na¹, cˀoa⁴ je² xi³ vˀe²yo³ta²ja³-ve⁴ˀni³, ti⁴je² tjo¹ve¹-le⁴ cjoa⁴ñˀain³ yao³-le⁴.
ROM 13:3 Je² xi³ xa¹ tjin¹-le⁴, a³li² coi³-jin² xa¹ tjin¹-le⁴ nca³ si¹qui³ncha¹xcon¹ cho⁴ta⁴ xi³ nta³ sˀin¹, to⁴nca³ je² xi³ chˀao³ sˀin¹. A³ me³-li²ˀni³ nca³ li²coi³ coi⁴jcon¹-lai⁴ cho⁴ta⁴xa¹-ve⁴. Cˀoa⁴tˀiain⁴ xi³ nta³ tjin¹, cˀoa⁴ cˀoa⁴sje³nta³-li²ˀni³.
ROM 13:4 Nca⁴ je² cho⁴ta⁴xa¹ si¹xa¹-le⁴ Ni³na¹ nca³ nta³ coi⁴jna³-ni³ nca³ ji³. Cˀia⁴ tsa² ji³ xi³ chˀao³ sˀiain⁴, ti⁴jcon¹-lai⁴, nca³ tsi² tsa² to⁴cjoa⁴tjao²-jin² yˀa³ je² qui⁴cha⁴, nca³ je² xi³ si¹xa¹-le⁴ Ni³na¹, xi³ si¹jnta²-le⁴, xi³ tsjoa¹-le⁴ cjoa⁴ñˀain³ xi³ chˀao³ sˀin¹.
ROM 13:5 Coi³ nca³ ma³chjen¹-ni¹ nca³ na³nqui³ ti⁴yo³-lao⁴³, a³li² tsa² to⁴coi³-jin² nca³ li²coi³ ti⁴cjoa⁴ñˀain³ sˀe⁴-ni³no³, to⁴nca³ cˀoa⁴-ti⁴ tˀa³tsˀe⁴ cjoa⁴fa³ˀai³tsjen³-no³.
ROM 13:6 Nca⁴ coi³ cjoa⁴-vi⁴ nca³ cˀoe¹chji¹ntjao²³, nca³ je² cho⁴ta⁴xa¹ to⁴xa¹ tjio¹-ni³le⁴ Ni³na¹ nca³ nta³ si¹coi²nta⁴ xi³ ti⁴coi³-ni³ cjoa⁴ je²-vi⁴.
ROM 13:7 Tˀe²chji¹-lao⁴³ nca³tsˀi³ xi³ qui³tjen⁴-no³ tsˀe⁴, tsa² taon⁴sa¹ tˀe²chji¹-lao⁴³ taon⁴sa¹-no³, tsa² taon⁴va³sen³ ni¹, tˀe²chji¹-lao⁴³ taon⁴va³sen³-no³, tsa² je² xi³ va³quin²-le⁴ cjoa⁴xcon¹ta³con², tˀai²-lao⁴³ cjoa⁴xcon¹ta³con², tsa² je² xi³ va³quin²-le⁴ cjoa⁴nˀo²sje³nta³, tˀai²-lao⁴³ cjoa⁴nˀo²sje³nta³.
ROM 13:8 Ni⁴to⁴jme³-jin² xi³ qui³tjen⁴-no³ cao⁴ ˀya³-ni³ve⁴, to⁴je²-jin² cjoa⁴tjao²cha³ nca³ ma³tsjoa³chao³ xi²nquio⁴³. Je² xi³ tsjoa³que³ xi¹ncjin¹, je² xi³ si¹qui³tjo³son² cjoa⁴te¹xo³ma³.
ROM 13:9 Je² cjoa⁴te¹xo³ma³ xi³ tso²: A³li² cha³jnqui³tˀa³-jin² mai³, a³li² ni²cˀen³-jin², a³li² ni²che¹-jin², a³li² en¹nti³so³-jin² no²cjoai⁴, a³li² ma³xin²ta³con²cha³-jin². Cˀia⁴ tsa² tjin¹-sa³ nqui²jnco³ xi³ cja⁴ˀai¹ cjoa⁴te¹xo³ma³, i⁴² ti¹nchja⁴yi³je³ cjoa⁴te¹xo³ma³ je²-vi⁴: Tsjoa³cha³ ca²ta³mai³ xi²nqui⁴ jo³-ni³ tsa² ti⁴ji³-ni³.
ROM 13:10 Je² cjoa⁴tjao²cha³ a³li² chˀao³-jin² si¹cao⁴ xi¹ncjin¹. Cˀoa⁴²-sˀin², je² xi³ si¹jnco³ cjoa⁴te¹xo³ma³, je² xi³ cjoa⁴tjao²cha³.
ROM 13:11 Cˀoa⁴-ti⁴ ˀya³² jme³ ni⁴čhjin³-ni³ ntˀai⁴-vi⁴, nca³ je² coi³ hora nca³ coi⁴so¹tjen⁴-le⁴² ni³jña¹-na¹. Nca⁴ ntˀai⁴-vi⁴ntai⁴ nqui²sa⁴ ti¹jna³čhian³-na¹ nca³ coi²tjo⁴ntje² cao⁴-ni³ tsa² cˀia⁴ nca³ ti¹tjon² coan³cjain¹-na¹.
ROM 13:12 Ni⁴tjen⁴ je³fa³ˀa³to³-ni¹, cˀoa⁴ je³nčhoa¹čhian³ ni⁴čhjin³. Chja⁴ˀa²xian² tso²cˀoa⁴ xa¹ xi³ tjin¹ jña³ njion²chon³, cˀoa⁴ chˀa⁴cja¹ na³jño³qui⁴cha⁴ xi³ tsˀe⁴ jña³ i³sen³.
ROM 13:13 Nta³ coan³nquin¹coa⁴² yao³-na¹ jo³-sˀin² xi³ cjoa⁴qui²xi⁴ jo³-sˀin² vˀe²ma³² nca³ ni⁴čhjin³. A³li²coi³ cjoa⁴chi⁴nca⁴ cao⁴ cjoa⁴chˀi⁴ coi⁴tso⁴ma³jian³². A³li²coi³ ya¹nchjin¹ cjoa¹jta³² cao⁴ xi³ to⁴xquia⁴ nˀian² cao⁴ yao³-na¹. A³li²coi³ coi⁴xcan³coa⁴² xi²nquia⁴². A³li²coi³ coan⁴xin²ta³con² jcha⁴² xi²nquia⁴².
ROM 13:14 To⁴nca³ cˀoa⁴-sˀin² ca²ta³mao³ jo³ cjoan³ Nai³-na¹ Jesucristo. A³li² to⁴nqui³-jin²ni³ vˀe²nta³-lao⁴³ yao³-no³ nca³ si⁴tjo³son²-lao⁴³ jo³ tso² xi³ me³-le⁴ yao³-no³.
ROM 14:1 Chjoe¹tjao²yao³ cho⁴ta⁴ xi³ ma³cjain¹-le⁴, to⁴nca³ xi³ cje³ tsin²-sa³le⁴ nca³nˀion¹. Li²coi³ coi⁴xcan³cao⁴³ cjoa⁴fa³ˀai³tsjen³-le⁴.
ROM 14:2 Jnco³ cho⁴ta⁴ ma³cjain¹-le⁴ nca³ ma³ cji³ne³yi³je³ tso³-jmi², cˀoa⁴ xi³ nqui²jnco³ xi³ tsin²-le⁴ nca³nˀion¹-jin² to⁴ˀnti¹xca⁴ cjen².
ROM 14:3 Je² xi³ cjen², a³li² vˀa³sje³nqui³-jin² je² xi³ tsi²coi³ cjen². Cˀoa⁴ je² xi³ tsi²coi³ cjen², a³li² ve³sin³-jin² je² xi³ cjen², nca⁴ Ni³na¹ xi³ qui³scoe¹tjao².
ROM 14:4 ˀya¹-ni³ ji³ nca³ ˀya³sin³-ni³ cho⁴ˀnta³ xi³ tsˀe⁴ xi³ cja⁴-ˀai¹. Tˀa³tsˀe⁴ xi³ ña³qui³ tsˀe⁴ nai³-le⁴ nta³ ti¹jna³ a³xo⁴ sca⁴nqui³-je⁴. To⁴nca³ ña³qui³ nta³ si⁴cˀe¹jna³, nca⁴ je² Nai³-na¹ ma³-le⁴ si⁴²cˀe¹jna³nta³ nca³ je².
ROM 14:5 Jnco³ xi³ cja⁴ˀai¹-nca¹sˀin² ve³con³ ni⁴čhjin³, to⁴nca³ xi³ cja⁴ˀai¹ to⁴nco¹son² ve³con³ nca³ntsjai² ni⁴čhjin³. Nca³ jnco¹jnco¹ ña³qui³ ca²ta³sˀe³jnco³ta³con².
ROM 14:6 Je² xi³ cjoa⁴-le⁴ ni⁴čhjin³ vˀa³, cˀoa⁴sˀin¹ tˀa³tsˀe⁴ Nai³-na¹, cˀoa⁴ je² xi³ tsi² cjoa⁴-le⁴ ni⁴čhjin³ vˀa³ cˀoa⁴-ti⁴sˀin¹ tˀa³tsˀe⁴ Nai³-na¹. Je² xi³ cjen², cjen² tˀa³tsˀe⁴ Nai³-na¹, nca⁴ tsjoa¹-le⁴ cjoa⁴nta³ Ni³na¹. Cˀoa⁴ je² xi³ tsi²coi³ cjen², cˀoa⁴-ti⁴ tˀa³tsˀe⁴ Nai³-na¹ li²coi³ cjen², cˀoa⁴ tsjoa¹-le⁴ cjoa⁴nta³ Ni³na¹.
ROM 14:7 Nca⁴ ni⁴jnco³-jin² xi³ ña¹-vi⁴, xi³ ti¹jna³con³ xi³ ti⁴tˀa³tsˀe⁴-ni³ yao³-le⁴, cˀoa⁴ ni⁴jnco³-jin² xi³ vi³ya³ xi³ ti⁴tˀa³tsˀe⁴-ni³ yao³-le⁴.
ROM 14:8 Tsa² ti³yo³chon³-nia¹, to⁴tˀa³tsˀe⁴ Nai³-na¹ nca³ ti³yo³choan³². Tsa² vi³ya³², to⁴tˀa³tsˀe⁴ Nai³-na¹ nca³ vi³ya³². Cˀoa⁴-sˀin² tsa² vi³yo³chon³-nia¹ a³xo⁴ vi³ya³-nia¹, tsˀe⁴ nia¹ Nai³-na¹.
ROM 14:9 Cristo coi³ cjoa⁴-vi⁴ cˀen³-ni³, cˀoa⁴ ja³ˀa²ya³-ni³le⁴, cˀoa⁴ tsa³cˀe²jna³con³ nqui²jnco³cˀa²-ni³, jme¹-ni³ nca³ Nai³-le⁴ coan⁴-si¹ni³ xi³ cˀen³ cˀoa⁴ xi³ tjio¹con³.
ROM 14:10 To⁴nca³ ji³, a¹-ni³ nca³ ntsˀai³ ˀya³sin³-si¹ni³. A³xo⁴ cˀoa⁴-ti⁴ ji³, a¹-ni³ nca³ ntsˀai³ nˀo²sje³nqui³-si¹ni³. Nca⁴ nca³tsˀia³² coi⁴yoa³² nqui³xcon⁴ cjoa⁴te¹xo³ma³-le⁴ Cristo.
ROM 14:11 Nca⁴ cˀoa⁴-sˀin² tji¹tˀa³: Tso² je² Nai³-na¹ve⁴: Jo³-sˀin² cjoa⁴qui²xi⁴ nca³ ti²jna⁴coan³, coi⁴ncha¹-na³ xco¹nchˀin³-le⁴ nca³tsˀi³ cho⁴ta⁴, cˀoa⁴ si⁴²qui²xi⁴ya³nta³ Ni³na¹ nca³tsˀi³ cho⁴ta⁴.
ROM 14:12 Cˀoa⁴-sˀin² nca³tsˀia³²-vi⁴ cˀoai⁴-le⁴² coi²nta⁴ Ni³na¹ xi³ ti⁴tˀa³tsˀe⁴ yao³-na¹ni³ nca³ jnco¹jncoa¹.
ROM 14:13 Cˀoa⁴-sˀin² a³li²coi³ ti⁴jcha⁴sin³-sa³nia³² xi²nquia⁴², to⁴sa³ ti⁴cja³ˀai³tsjaon³ nca³ tsi² cˀoe¹jnao³ xi³ sa⁴te¹nqui³ ntsˀao³, a³xo⁴ tsi² si⁴ca³jnquio³ je¹ ntsˀao³.
ROM 14:14 An³ ˀve³-nia¹³, cˀoa⁴ nta³ ˀve³coan³ nca³ ti²jna⁴coa⁴ Nai³-na¹ Jesús, nca³ ni⁴jme³-jin² xi³ tjin¹ xi³ chˀao³ tjin¹ nca³ ti⁴je²-ni³, to⁴nca³ je² xi³ si¹cja³ˀai³tsjen³ nca³ chˀao³ tjin¹ to⁴jme³ cjoa⁴-ni³ve⁴, tˀa³tsˀe⁴ chˀao³ tjin¹-ni³.
ROM 14:15 To⁴nca³ tsa² coi³ cjoa⁴-le⁴ xi³ ma³ vi³chi³-ni³ je² ntsˀai³ aon³ ma³-le⁴, ji³ a³li²coi³ ti⁴to²mjen³cao⁴-ni³ cjoa⁴tjao²cha³. A³li² ni²qui³tson¹-jin² ntsˀai³ cao⁴ xi³ vi³chi³-ni³ve⁴, jña³-le⁴ xi³ Cristo cˀen³ tˀa³tsˀe⁴.
ROM 14:16 A³li² no²cjoa⁴ˀaon³-jin²le⁴ xi³ nta³ tjin¹ tˀa³tsaon⁴³.
ROM 14:17 Je² cjoa⁴te¹xo³ma³-le⁴ Ni³na¹ a³li² to⁴xquia⁴ tso³jmi² xi³ chi³ne³, ni⁴xi³ ˀyo²-jin², to⁴nca³ xi³ cjoa⁴qui²xi⁴, xi³ nchˀan¹ tjin¹, cao⁴ xi³ cjoa⁴tsjoa³ tjin¹-ni¹ xi³ tˀa³tsˀe⁴ Espíritu Santo.
ROM 14:18 Je² xi³ cˀoa⁴-sˀin² si¹xa¹-le⁴ Cristo jo³-ni³ cho⁴ˀnta³, sa³sen¹con³-le⁴ Ni³na¹, cˀoa⁴ nta³ vi³tjo³ nqui³xcon⁴ cho⁴ta⁴.
ROM 14:19 Cˀoa⁴-sˀin² cjoin³tjen⁴nqui³-le⁴² cjoa⁴ xi³ si¹qui³njen³nchˀan¹jin³-na¹, cˀoa⁴-ti⁴ je² xi³ si¹quin³ncˀa³ xi¹ncjin¹.
ROM 14:20 A³li² tˀa³tsˀe⁴ tso³jmi² xi³ ma³vi³chi³-ni³jin² si⁴qui³xo¹ya³-ni³ je² xa¹ xi³ sˀin¹ Ni³na¹. Nca³yi³je³ cjoa⁴ ña³qui³ tsje³-ni¹, to⁴nca³ chˀao³ tjin¹ tˀa³tsˀe⁴ cho⁴ta⁴ xi³ si⁴²ca³te¹-nqui³ xi³cˀa³ xi³ to⁴tˀa³tsˀe⁴ nca³ cjen².
ROM 14:21 Nta³ tjin¹ nca³ tsi² tsa² yao³ chi³nai³, ni⁴ˀyo²-jin² xan¹, cˀoa⁴ ni⁴jme³-jin² xi³ nˀiain²³ xi³ sa⁴te¹nqui³ ntsˀai³, xi³ si⁴²ca³jnqui³ je¹, a³xo⁴ xi³ si⁴²ˀi³nta³jin³ nca³ je².
ROM 14:22 Je² xi³ jo³-sˀin² ma³cjain¹-li² ca²ta³ma³cjain¹-li² xi³ ti⁴tˀa³tsi⁴-ni³ nqui³xcon⁴ Ni³na¹. Jo¹ to⁴nta³-le⁴ xi³ tsi² vˀe¹ne²-le⁴ je¹ yao³-le⁴ cao⁴ xi³ co³son²-ni³le⁴ nca³ nta³ tjin¹.
ROM 14:23 To⁴nca³ je² xi³ jao² tjin¹-sa³con², tsa² coa⁴cjen⁴, cjoa⁴ñˀain³ tjin¹ne²-le⁴, nca³ tsa³cjen² nta³ tsa² tsi² cˀoa⁴-sˀin² coan³cjain¹-le⁴. Cˀoa⁴ je² nca³yi³je³ xi³ sˀian⁴², cˀoa⁴ tsa² tsi² cˀoa⁴-sˀin² coan⁴cjain¹-na¹, je² xi³ je¹-ni³.
ROM 15:1 Cˀoa⁴-sˀin² ña¹-vi⁴ xi³ tjin¹-na¹ nca³nˀion¹, tjin¹ne²-na¹ nca³ coi⁴ncha³coa⁴² cjoa⁴ˀi³nta³jin³-le⁴ xi³ tsin²-le⁴ nca³nˀion¹-jin², cˀoa⁴ li²coi³ si⁴tsjoa³ya³-le⁴² yao³-na¹ xi³ ti⁴ña¹-nia³².
ROM 15:2 Nca³ jnco¹jncoa¹-vi⁴ si⁴tsjoa³ya³-le⁴² xi²nquia⁴² xi³ tˀa³-tsˀe⁴ nca³ nqui²sa⁴ nta³ coan⁴-le⁴ cˀoa⁴ nca³ coin⁴ncˀa³-sa³.
ROM 15:3 Nca⁴ Cristo li²coi³ ti⁴je² qui³si³tsjoa³ya³-ni³le⁴ yao³-le⁴, to⁴nca³ jo³-sˀin² tji¹tˀa³: Je² en¹ xi³ chˀao³ tso², xi³ tsˀe⁴ je² xi³ chˀao³ qui³tso²-li², qui³sca³son²-na³ an³.
ROM 15:4 Je² cjoa⁴ qui³chji³tˀa³ nca³sˀa⁴, qui³chji³tˀa³ xi³ tˀa³tsˀe⁴ nca³ coa⁴co²ya³-na¹, jme¹-ni³ nca³ sˀe⁴-si¹ni³na¹ cjoa⁴cho³ya²cao⁴cjoa⁴ xi³ to⁴tˀa³tsˀe⁴ cjoa⁴tse³jta³ cao⁴ cjoa⁴ni²je³ta³con² xi³ tjin¹-le⁴ xon⁴ Escrituras.
ROM 15:5 To⁴nca³ je² Ni³na¹ xi³ tsjoa¹ cjoa⁴tse³jta³ cao⁴ cjoa⁴ni²je³ta³con², cˀoa⁴ ca²ta³tsjoa¹-no³ nca³ to⁴jnco³ cjoa⁴fa³ˀai³tsjen³ ca²ta³sˀe³jin³-no³, jo³-sˀin² qui³tso² Cristo Jesús,
ROM 15:6 jme¹-ni³ nca³ to⁴jnco³ coan⁴-si¹nio³, nca³ to⁴jnco³ cjoa¹jtao³ nca³ chˀa⁴sje³je³yao³ Ni³na¹-le⁴ cˀoa⁴ Nˀai³-le⁴ je² Nai³-na¹ Jesucristo.
ROM 15:7 Coi³ cjoa⁴ nca³ cˀoa⁴-sˀin² chjoe¹tjao² xi²nquio⁴³, jo³-sˀin² nca³ Cristo qui³scoe¹tjao²-na¹ xi³ tˀa³tsˀe⁴ cjoa⁴je³ya³-le⁴ Ni³na¹.
ROM 15:8 Cˀoa⁴xin³-nia³ nca³ Cristo Jesús coan³ cho⁴ˀnta³-le⁴ cho⁴ta⁴ xi³ tsˀe⁴ cjoa⁴circuncisión xi³ tˀa³tsˀe⁴ cjoa⁴qui²xi⁴-le⁴ Ni³na¹, jme¹-ni³ nca³ cˀoe⁴²jnco³-si¹ni³ je² cjoa⁴ xi³ Ni³na¹ qui³si³sˀe³nqui³-le⁴ nˀai³jcha¹cjin³-na¹,
ROM 15:9 cˀoa⁴ jme¹-ni³ nca³ je² cho⁴ta⁴ xi³ li² judío-jin² cˀoa⁴sje³je³va³-si¹ni³ Ni³na¹ tˀa³tsˀe⁴ cjoa⁴ma⁴ta³con²-le⁴, jo³-sˀin² tji¹tˀa³: Coi³ nca³ an³ si³qui²xi⁴ya³nta³ tˀa³tsi⁴ ja⁴jin³-le⁴ cho⁴ta⁴ xi³ li² judío-jin², cˀoa⁴ se³ya²³-nia³ tˀa³tsˀe⁴ jan³ˀain¹-li⁴.
ROM 15:10 Cˀoa⁴ nqui²jnco³cˀa² tso²: Ca²ta³ma³tsjoa³ya³-no³ xi³ cho⁴ta⁴ xi³ li² judío-jin², cao⁴ na⁴xi⁴na³nta¹-le⁴ Ni³na¹.
ROM 15:11 Cˀoa⁴ nqui²jnco³cˀa² tso²: Chˀa⁴sje³ntao³ Nai³-na¹ nca³tsˀio³ xi³ cho⁴ta⁴ xi³ li² judío-jin², cˀoa⁴ nca³tsˀi³ na⁴xi⁴na³nta¹ chˀa⁴sje³je³yao³ Ni³na¹.
ROM 15:12 Cˀoa⁴ nqui²jnco³cˀa² tso² Isaías: Jtsˀen¹-le⁴ Isaí cjoi⁴nčhoa³-ni¹, cˀoa⁴ je² xi³ coi⁴so¹tjen⁴ nca³ coa⁴te²xo³ma³-le⁴ cho⁴ta⁴ xi³ li² judío-jin². Je² cho⁴ta⁴ xi³ li² judío-jin² sco¹ya³cao⁴cjoa⁴-le⁴ nca³ je².
ROM 15:13 Cˀoa⁴ je² Ni³na¹ xi³ tsjoa¹ cjoa⁴cho³ya²cao⁴cjoa⁴, ca²ta³si¹tse³-no³ cao⁴ nca³yi³je³ cjoa⁴tsjoa³, cˀoa⁴ cao⁴ cjoa⁴nchˀan¹ta³con² nca³ ma³cjain¹-no³, jme¹-ni³ nca³ coan⁴ncjin²ya³-si¹ni³no³ cjoa⁴cho³ya²cao⁴cjoa⁴ xi³ to⁴tˀa³tsˀe⁴ nca³nˀion¹-le⁴ je² Espíritu Santo.
ROM 15:14 To⁴nca³ ña³qui³ tjin¹jnco³coan³ xi³ tˀa³tsaon⁴³, ntsˀe³, nca³ ti⁴jon²-nio³ nˀion¹ ma³tse³-nio³ cjoa⁴nta³, tjin¹yi³je³-no³ cjoa⁴fa³ˀai³tsjen³, cˀoa⁴-ti⁴ coan⁴-no³ cˀoin¹ya³-lao⁴³ xi²-nquio⁴³.
ROM 15:15 To⁴nca³ coan³nˀion¹coan³ nca³ jnco³jao² cˀa² qui³squi³-no³, ntsˀe³, jo³-sˀin² nca³ qui³si³cja³ˀai³tsjen³-no³, nca⁴ cˀoa⁴-sˀin² Ni³na¹ qui³tsjoa³-na³ je² cjoa⁴nta³.
ROM 15:16 Nca³ an³ coan³ cho⁴ˀnta³-le⁴ Jesucristo tˀa³tsˀe⁴ cho⁴ta⁴ xi³ li² judío-jin², nca³ si³xa¹coa⁴ en¹nta³-le⁴ Ni³na¹, jme¹-ni³ nca³ je² cjoa⁴tjao² xi³ tsjoa³tˀa³, xi³ coi³ cho⁴ta⁴ xi³ li² judío-jin², sa⁴sen¹con³-ni³le⁴ Ni³na¹, nca³ coan³tsje³ cao⁴ je² Espíritu Santo.
ROM 15:17 Jo³-sˀin² ti²jna⁴coa⁴ Cristo Jesús, tjin¹-na³ jme³ xi³ cˀoa³sje²je³ya³-nia³ yao³-na⁴ ja⁴tˀa³tsˀe⁴ xa¹-na⁴ xi³ tˀa³tsˀe⁴ Ni³na¹.
ROM 15:18 Li²coi³ coan⁴nˀion¹coan³ nca³ coi³nchja²³ to⁴jme³ cjoa⁴-ni³, to⁴je² cjoa⁴ xi³ Cristo qui³si³nta³ xi³ to⁴tˀa³tsˀan⁴ cao⁴ en¹ cˀoa⁴ cao⁴ xa¹, jme¹-ni³ nca³ cho⁴ta⁴ xi³ li² judío-jin² si⁴²cji³tjo³son²-si¹ni³le⁴.
ROM 15:19 Qui³si³xa¹³ cao⁴ nca³nˀion¹-le⁴ cjoa⁴xcon¹ cao⁴ choa⁴, cˀoa⁴ cao⁴ nca³nˀion¹-le⁴ je² Espíritu Santo xi³ tsˀe⁴ Ni³na¹. Cˀoa⁴-sˀin² tsa³ca²sen⁴tsˀia³cao⁴-nia³ ya⁴ Jerusalén, cˀoa⁴ xi³ cao⁴ ya⁴ ntai³-le⁴ sa³ˀnta³ ya⁴ Ilírico, je³coan³jnco³-na³ nca³ qui³si³cˀa³tji³vi¹soan²³ nca³qui³jnta² je² en¹nta³ xi³ tˀa³tsˀe⁴ Cristo.
ROM 15:20 Cˀoa⁴-sˀin² nca³ tsˀa³sje³ nca³nˀion¹-na⁴ nca³ qui³nchja²ya³ je² en¹nta³-ve⁴, a³li² ya⁴-jin² jña³ nca³ je³qui³no²cjoa⁴ jan³ˀain¹-le⁴ Cristo, jme¹-ni³ nca³ tsi² si⁴²quin³son²-si¹nia³ čhjao¹ja⁴ma⁴ xi³ tsˀe⁴ xi³ cja⁴ˀai¹.
ROM 15:21 To⁴nca³ jo³-sˀin² tji¹tˀa³: Je² xi³ tsi²coi³ qui³no²cjoa⁴ya³jin³-le⁴ tˀa³tsˀe⁴ Cristo, scoe⁴-ni¹. Cˀoa⁴ je² xi³ tsi² tsa² qui³nčhˀoe¹, coan⁴cho⁴ya³-le⁴.
ROM 15:22 Coi³ cjoa⁴-vi⁴ nca³ ncjin² cˀa³ qui³sˀe³chjoa²-na³ nca³ cjoa²ˀai⁴con³-no³ nca³ jon² tsa²cai³.
ROM 15:23 To⁴nca³ ntˀai⁴-vi⁴ntai⁴ tsin²-sa³na³ ˀnte³ nca³ si³xa¹³ i⁴ ˀnte³ je²-vi⁴, cˀoa⁴ coan³ ncjin² no¹-jan¹ nca³ coan³me³-na³ nca³ qui³con³-no³.
ROM 15:24 Coi³ cjoa⁴ cˀia³-la³⁴ nca³ cjoia¹³ España, cjoi¹con³-no³ nca³ jon², nca³ tjin¹-na³ cjoa⁴cho³ya²cao⁴cjoa⁴ nca³ cjoa²ˀa⁴ co³tsen³to³-no³, cˀoa⁴ coi⁴ncha³cao⁴-nao¹³ nca³ jon² nca³ cjoia¹³ ya⁴-jan¹, cˀia⁴ nca³ ti¹tjon² ca²ma³tsjoa³ya³ jnco³tjo²-na³ cao⁴ jon².
ROM 15:25 To⁴nca³ ntˀai⁴-vi⁴ ti²fi³-nia¹³ ya⁴ Jerusalén nca³ coa²sen⁴coa⁴ cho⁴ta⁴-le⁴ Cristo.
ROM 15:26 Nca⁴ ya⁴ Macedonia cao⁴ ya⁴ Acaya coan³tsjoa³-le⁴ nca³ qui³tsjoa³ taon⁴ xi³ tˀa³tsˀe⁴ cho⁴ta⁴yo⁴ma⁴ xi³ tsˀe⁴ cho⁴ta⁴-le⁴ Cristo xi³ tjio¹ ya⁴ Jerusalén.
ROM 15:27 Nta³ coan³tsjoa³-le⁴ nca³ cˀoa⁴qui³sˀin³, cˀoa⁴ qui³tjen⁴-le⁴ xi³ tsˀe⁴. Tsa² cho⁴ta⁴ xi³ li² judío-jin² cˀoa⁴-ti⁴ tsˀa³cao⁴tˀa³-le⁴ cjoa⁴nta³ xi³ tsˀe⁴ Espíritu Santo, cˀoa⁴²-ti⁴ tjin¹ne²-le⁴ nca³ je² nca³ coi⁴ncha³cao⁴ tso³jmi²-le⁴ son³ˀnte³-vi⁴.
ROM 15:28 Cˀoa⁴-sˀin² cˀia⁴ nca³ cjoe⁴ si³jncoa³ cjoa⁴ je²-vi⁴, cˀoa⁴ cˀia⁴ nca³ cjoe⁴ si³cˀa³sˀen³-le⁴ je² cjoa⁴tjao²-vi⁴ je²-vi⁴, cˀia⁴ cjoa²ˀa⁴to³-no³ nca³ cjoia¹³ ya⁴ España.
ROM 15:29 Cˀoa⁴ ˀve³-nia¹³ cˀia⁴ nca³ cjoi³cho³con³-no³, cjoi³cho²cao⁴-nia¹³ xi³ nˀion¹ tse³ cjoa⁴nta³ xi³ tsˀe⁴ en¹nta³ tˀa³tsˀe⁴ Cristo.
ROM 15:30 To⁴nca³ vˀe³tsˀoa²³-no³ ntsˀe³, xi³ to⁴tˀa³tsˀe⁴ Nai³-na¹ Jesucristo, cˀoa⁴ xi³ to⁴tˀa³tsˀe⁴ cjoa⁴tjao²cha³-le⁴ Espíritu Santo, nca³ to⁴jnco³ cao⁴ an³ nˀion¹ vˀao²³ nca³nˀion¹-no³ nca³ vˀe²tsˀoa³-lao⁴³ Ni³na¹ xi³ tˀa³tsˀan⁴,
ROM 15:31 jme¹-ni³ nca³ coi²tjo⁴ntjai²-si¹nia³ tˀa³tsˀe⁴ cho⁴ta⁴ xi³ tsi²coi³ ma³cjain¹-le⁴ xi³ tjio¹ ya⁴ Judea, cˀoa⁴ jme¹-ni³ nca³ je² cjoa⁴tjao²-le⁴ xa¹-na⁴vi⁴ tˀa³tsˀe⁴ cho⁴ta⁴-le⁴ Cristo xi³ tjio¹ ya⁴ Jerusalén sa⁴sen¹-si¹ni³le⁴,
ROM 15:32 cˀoa⁴ jme¹-ni³ nca³ cao⁴ cjoa⁴tsjoa³ cjoi³cho³con³-si¹ni³no³ nca³ jon² jo³-sˀin² me³-le⁴ Ni³na¹, cˀoa⁴ jme¹-ni³ nca³ cˀoa⁴-sˀin² to⁴jnco³ cˀoai⁴nca³nˀion¹-si¹ni³nao¹³ nca³ jon².
ROM 15:33 Je² Ni³na¹ xi³ si¹qui³njen³nchˀan¹jin³-na¹ ca²ta³vˀe²jna³cao⁴-no³ nca³tsˀio³. Cˀoa⁴ ca²ta³ma³.
ROM 16:1 To⁴nca³ vˀe³tˀain²³-no³ xi³ tˀa³tsˀe⁴ Febe je² ti²chja³², je² xi³ si¹xa¹-le⁴ cho⁴ta⁴-le⁴ Cristo xi³ tjio¹ ya⁴ Cencrea.
ROM 16:2 Ti⁴sin³-ni³lao⁴³ jo³-ni³ tsa² xi²nquio⁴³ tˀa³tsˀe⁴ Nai³-na¹, jo³-sˀin² nca³ va³quin²-no³ xi³ cho⁴ta⁴-le⁴ Cristo. Cˀoa⁴-ti⁴ ti⁴ncha³cao⁴³ to⁴jme³ cjoa⁴-ni³ xi³ coan⁴chjen¹-le⁴. Je² ni¹ a³li² to⁴cˀoa⁴²cji³ ncjin² cho⁴ta⁴ tsa³ca³sen¹cao⁴, cˀoa⁴-ti⁴ an³vi⁴je⁴.
ROM 16:3 Ti⁴ti²ˀntao³ je² Priscila cˀoa⁴ cao⁴ Aquila je² xˀin⁴-le⁴, xi³ to⁴ña³tjen⁴ si¹xa¹cao⁴-na³ tˀa³tsˀe⁴ Cristo Jesús,
ROM 16:4 (xi³ me³qui³ti³sin³ tˀa³tsˀan⁴. A³li² to⁴ˀan³-jin² tsjoa³-le⁴ cjoa⁴nta³, to⁴nca³ cˀoa⁴-ti⁴ nca³tsˀi³ cho⁴ta⁴ xi³ li² judío-jin² xi³ cho⁴ta⁴-le⁴ Cristo.)
ROM 16:5 Cˀoa⁴-ti⁴sˀin² ti⁴ti²ˀntao³ je² cho⁴ta⁴-le⁴ Cristo xi³ ma³ña³ ya⁴ ntˀia³-le⁴. Ti⁴ti²ˀntao³ je² Epeneto, xi³ tsjoa³que⁴, je² xi³ ti¹tjon² coan³cjain¹-le⁴ tˀa³tsˀe⁴ Cristo ya⁴ Acaia.
ROM 16:6 Ti⁴ti²ˀntao³ je² María xi³ nˀion¹ nta³ qui³si³xa¹ tˀa³tsaon⁴³.
ROM 16:7 Ti⁴ti²ˀntao³ je² Andrónico cˀoa⁴ cao⁴ Junias, xi³ xi²nquia⁴ xi³ ña³tjen⁴ tsa³qui³yo³ˀyai³-jin⁴ nto⁴ya¹, je² xi³ nta³ ˀya³-le⁴ ya⁴jin³-le⁴ pa²stro⁴-ve⁴, jña³-le⁴ xi³ nqui²sa⁴ ti¹tjon² tsa³ca³tio²tˀa³-le⁴ Cristo cao⁴-ni³ tsa² an³.
ROM 16:8 Ti⁴ti²ˀntao³ je² Amplias, xi³ tsjoa³que⁴ an³ xi³ tˀa³tsˀe⁴ je² Nai³-na¹.
ROM 16:9 Ti⁴ti²ˀntao³ je² Urbano xi³ ña³tjen⁴ si¹xa¹cao⁴-na¹ tˀa³-tsˀe⁴ Cristo Jesús, cao⁴ Estaquis, xi³ tsjoa³que⁴ an³.
ROM 16:10 Ti⁴ti²ˀntao³ je² Apeles, xi³ nta³ ji³tjo³ tˀa³tsˀe⁴ Cristo. Ti⁴ti²ˀntao³ je² xi¹ncjin¹ Aristóbulo.
ROM 16:11 Ti⁴ti²ˀntao³ je² Herodión, xi³ xi²nquia⁴. Ti⁴ti²ˀntao³ je² xi¹ncjin¹ Narciso, xi³ tjio¹cao⁴ Nai³-na¹.
ROM 16:12 Ti⁴ti²ˀntao³ je² Trifena, cao⁴ je² Trifosa, jña³-le⁴ xi³ nˀion¹ si¹xa¹ tˀa³tsˀe⁴ Nai³-na¹. Ti⁴ti²ˀntao³ je² Pérsida xi³ tsjoa³que⁴, je² xi³ cjai¹nca³ nˀion¹ qui³si³xa¹ tˀa³tsˀe⁴ Nai³-na¹.
ROM 16:13 Ti⁴ti²ˀntao³ Rufo, xi³ Nai³-na¹ tsa³cja³ˀa¹jin³, cˀoa⁴ cao⁴ na⁴-le⁴ xi³ cˀoa⁴-ti⁴ na⁴-na⁴.
ROM 16:14 Ti⁴ti²ˀntao³ je² Asíncrito, cao⁴ Flegonte, cao⁴ Hermas, cao⁴ Patrobas, cao⁴ Hermes, cˀoa⁴ cao⁴ je² ntsˀe³² xi³ tjio¹cao⁴ nca³ je².
ROM 16:15 Ti⁴ti²ˀntao³ je² Filólogo, cao⁴ Julia, cao⁴ Nereo, cao⁴ nti³chja³, cao⁴ Olimpas, cao⁴ nca³tsˀi³ cho⁴ta⁴-le⁴ Cristo xi³ tjio¹cao⁴ nca³ je².
ROM 16:16 Ti⁴ti²ˀntao³ xi²nquio⁴³ nca³ tsje³ tˀe²tˀa³tsˀoa³-lao⁴³ xi²-nquio⁴³. Nca³tsˀi³ cho⁴ta⁴-le⁴ Cristo si¹ti²ˀnta³-no³.
ROM 16:17 Cˀoa⁴ vˀe³tsˀoa²³-no³ ntsˀe³, nca³ cho¹son²-ni³lao⁴³ je² xi³ si¹jao²ya³ xi¹ncjin¹, xi³ si¹ca³jnqui³ je¹ xi¹ncjin¹, co²ntran⁴-le⁴ je² cjoa⁴fa³ˀai³tsjen³ xi³ qui³cho²tˀa³yao³ nca³ jon². Chja⁴ˀa²xin²-lao⁴³ yao³-no³ nca³ je².
ROM 16:18 Je² cho⁴ta⁴ xi³ cˀoa⁴cjoan³ a³li²coi³ Nai³-na¹ Jesucristo si¹xa¹tˀa³-le⁴ jo³-ni³ cho⁴ˀnta³, to⁴nca³ to⁴yao³-le⁴ si¹xa¹ntjai². Cjai¹ ntsjen¹ en¹ xi³ nchja⁴, cˀoa⁴ cjai¹nca³ ma³-le⁴ nchja⁴. Cˀoa⁴-sˀin² vˀa³na⁴cha⁴-le⁴ ni⁴ma⁴-le⁴ xi³ tsi²coi³ ve³.
ROM 16:19 Nca⁴ jo³-sˀin² nca³ ni²tjo³son²³ jon²-vi⁴, cjai¹nca³ nˀion¹ nta³ ˀya³-le⁴ nca³tsˀi³. Coi³ nca³ cˀoa⁴²-sˀin² ma³, tsjoa³-na³ xi³ tˀa³tsaon⁴³, to⁴nca³ me³-na³ nca³ chji⁴ne⁴ coaon⁴³ tˀa³tsˀe⁴ xi³ nta³ tjin¹, to⁴nca³ nca³ ña³qui³ tsje³ coaon⁴³ tˀa³tsˀe⁴ xi³ chˀao³ tjin¹.
ROM 16:20 Cˀoa⁴ je² Ni³na¹ xi³ si¹qui³njen³nchˀan¹jin³-na¹ si⁴²xcoa⁴nti⁴ton⁴ Satanás ya⁴ nqui³ntso⁴co⁴ nca³ jon²-vi⁴. Je² cjoa⁴nta³-le⁴ Nai³-na¹ Jesucristo ca²ta³sˀe³-no³.
ROM 16:21 Si¹ti²ˀnta³-no³ Timoteo xi³ ña³tjen⁴ ni²xai¹⁴-jin⁴, cao⁴ Lucio, cao⁴ Jasón, cao⁴ Sosípater, xi³ xi²nquia⁴.
ROM 16:22 An³ xi³ Tercio ˀmi²-na³, xi³ qui³squia³ je² xon⁴-vi⁴, si³ti²ˀnta³-no³ tˀa³tsˀe⁴ Nai³-na¹.
ROM 16:23 Si¹ti²ˀnta³-no³ Gayo xi³ si¹sin³-na³ i⁴ ntˀia³-le⁴vi⁴, xi³ cˀoa⁴-ti⁴ si¹sin³-le⁴ nca³tsˀi³ xi³ cho⁴ta⁴-le⁴ Cristo. Si¹ti²ˀnta³-no³ Erasto xi³ si¹coi²nta⁴ taon⁴ xi³ tsˀe⁴ na⁴xi⁴na³nta¹-vi⁴, cˀoa⁴ cao⁴ je² ntsˀe³ Cuarto.
ROM 16:24 Je² cjoa⁴nta³-le⁴ Nai³-na¹ Jesucristo ca²ta³sˀe³-no³ nca³tsˀio³.
ROM 16:25 Ca²ta³vi³tjo³je³ya³ Ni³na¹ xi³ tjin¹-le⁴ nca³nˀion¹ nca³ si⁴²nˀion¹jin³-no³ jo³ tso² en¹nta³ xi³ yˀa³, jo³-sˀin² nca³ nchja²ya³jin³-nia³ tˀa³tsˀe⁴ Jesucristo, jo³-sˀin² nca³ coan³tsen³ je² cjoa⁴ˀma³-ve⁴ xi³ tsa³cˀe²jna³tjao²ˀma³ sa³ˀnta³ ni⁴čhjin³ coa²tse³.
ROM 16:26 To⁴nca³ je³ti¹jna³son²tsen³ ntˀai⁴-vi⁴. To⁴tˀa³tsˀe⁴ xon⁴ Escrituras xi³ qui³squi³ je² cho⁴ta⁴ xi³ qui³nchja⁴ya³ tˀa³-tsˀe⁴ Ni³na¹, jo³ tso² cjoa⁴te¹xo³ma³-le⁴ Ni³na¹ xi³ ti¹jna³ntsjai², je³tsa³cˀin²ya³-le⁴ nca³tsˀi³ na⁴xi⁴na³nta¹ nca³ qui³jnta² son³ˀnte³, jme¹-ni³ nca³ si⁴²tjo³son²-si¹ni³le⁴ nca³ coan⁴cjain¹-le⁴.
ROM 16:27 Je² xi³ to⁴jnco³ Ni³na¹ xi³ tjin¹-le⁴ cjoa⁴ˀi³sen³ta³con² ca²ta³vi³tjo³je³ya³ xi³ to⁴tˀa³tsˀe⁴ Cristo nca³ntsjai² ni⁴čhjin³. Cˀoa⁴ ca²ta³ma³.
1CO 1:1 An³ nia¹³ Pablo, xi³ qui³no²cjoa⁴-na³ nca³ pa²stro⁴-le⁴ Jesucristo coan³, jo³-sˀin² coan³me³-le⁴ Ni³na¹, cˀoa⁴ cao⁴ je² ntsˀe³² Sóstenes,
1CO 1:2 ti³chji³-lai²⁴jin⁴ jon² xi³ na⁴xi⁴na³nta¹-le⁴ Ni³na¹, xi³ ti³yo³ ya⁴ Corinto, xi³ coan³tsjao³ nca³ ti³yo³cao⁴³ Cristo Jesús. Qui³no²cjoa⁴-no³ nca³ cho⁴ta⁴-le⁴ Cristo coaon⁴³ cao⁴ nca³tsˀi³ to⁴jña³-ni³ve⁴ xi³ nchja⁴ jan³ˀain¹-le⁴ Nai³-na¹ Jesucristo, Nai³-le⁴ xi³ tsˀe⁴, cˀoa⁴ xi³ tsan⁴².
1CO 1:3 Ca²ta³tsjoa¹-no³ cjoa⁴nta³, ca²ta³si¹qui³njen³nchˀan¹jin³ ni⁴ma⁴-no³ Ni³na¹ je² Nˀai³-na¹ cao⁴ Nai³-na¹ Jesucristo.
1CO 1:4 Cjoa⁴nta³ tsjoa³-le⁴ Ni³na¹ nca³ntsjai² xi³ tˀa³tsaon⁴³, xi³ tˀa³tsˀe⁴ je² cjoa⁴nta³-le⁴ Ni³na¹ xi³ qui³tsˀai²-no³ nca³ ti³yo³cao⁴³ Cristo Jesús.
1CO 1:5 Coan³nchi⁴na¹-lao⁴³ nca³yi³je³ cjoa⁴ nca³ ti³yo³cao⁴³ Cristo, jo³-sˀin² nca³ no²cjoao⁴³ cao⁴ jo³-sˀin² nca³ ma³cho⁴ya³-no³.
1CO 1:6 Cˀoa⁴-sˀin² je² en¹ xi³ tˀa³tsˀe⁴ Cristo coan³qui²xi⁴ya³jin³ ni⁴ma⁴-no³.
1CO 1:7 Ni⁴jme³-jin² cjoa⁴tjao² xi³ cha³-no³, nca³ ti³cho³ya²-lao⁴³ nca³ cjoa⁴ˀai¹ cˀa³tsen³ je² Nai³-na¹ Jesucristo.
1CO 1:8 Jesucristo coa⁴sen⁴nˀion¹-no³ sa³ˀnta³ nca³ cjoe⁴tˀa³, jme¹-ni³ nca³ tsi²jme³ je¹ sˀe⁴-si¹ni³no³ cˀia⁴ ni⁴čhjin³-le⁴ je² Nai³-na¹ Jesucristo.
1CO 1:9 Ni³na¹ nˀion¹tˀa³con³, je² xi³ qui³nchja⁴-no³ nca³ to⁴jnco³ coi⁴yo³cao⁴³ je² ˀnti¹-le⁴ xi³ Nai³-na¹ Jesucristo.
1CO 1:10 Vˀe³tsˀoa²³-no³ ntsˀe³², xi³ to⁴tˀa³tsˀe⁴ jan³ˀain¹-le⁴ Nai³-na¹ Jesucristo, nca³ nca³tsˀio³ to⁴nco¹son²-sˀin² coi⁴xon¹³, cˀoa⁴ nca³ tsi² tsa² jme³ cjoa⁴si³ sˀe⁴jin³-no³ nca³ jon². To⁴sa³ ña³qui³ to⁴jnco³ ti⁴yo³ nca³ to⁴jnco³ cjoa⁴fa³ˀai³tsjen³, cˀoa⁴ nca³ to⁴nco¹son²-sˀin² cho¹son²-lao⁴³.
1CO 1:11 Je² cho⁴ta⁴ xi³ tsˀe⁴ Cloé qui³si³qui²xi⁴ya³-na³ xi³ tˀa³tsaon⁴³, ntsˀe³², nca³ tjin¹-no³ cjoa⁴cho³va²ti³ya³-ni³.
1CO 1:12 Coi³ xi³ ti²xian³: Jnco¹jnco¹ nca³ jon² cˀoi⁴vi³xon¹³: An³ tsˀe⁴ Pablo nia¹³, to⁴nca³ an³ tsˀe⁴ Apolos nia¹³, to⁴nca³ an³ tsˀe⁴ Cefas nia¹³, to⁴nca³ an³ tsˀe⁴ Cefas nia¹³, to⁴nca³ an³ tsˀe⁴ Cristo nia¹³.
1CO 1:13 A³ ncjin² ya³ ma³-ni³ Cristo. A³ qui³sˀe³tˀa³ cro² Pablo xi³ tˀa³tsaon⁴³. A³xo⁴ a³ qui³sa³te²nta¹tˀa³-lao⁴³ Pablo.
1CO 1:14 Cjoa⁴nta³ tsjoa³-le⁴ Ni³na¹ nca³ ni⁴jnco³-jin² tsa³ca³te³nta¹³-no³ nca³ jon², to⁴je² Crispo cao⁴ Gayo.
1CO 1:15 Ni⁴ˀya³-jin² xi³ cˀoa⁴coi⁴tso⁴ nca³ qui³sa³te²nta¹tˀa³-nao¹³.
1CO 1:16 Cˀoa⁴-ti⁴ tsa³ca³te³nta¹³ xi¹ncjin¹ Estéfanas, to⁴nca³ li²coi³ ˀve³ tsa² tsa³ca³te³nta¹³-sa³ xi³ cja⁴ˀai¹.
1CO 1:17 Nca⁴ tsi² tsa² coi³ xa¹ qui³si³ca³sen¹-na³ Cristo nca³ cho⁴ta⁴ coa³te³nta¹³. To⁴coi³ xa¹ qui³si³ca³sen¹-na³ nca³ coi³nchja²ya³-nia³ je² en¹nta³ xi³ tˀa³tsˀe⁴ Cristo, li²coi³ cao⁴ cjoa⁴chji⁴ne⁴ xi³ to⁴xquia⁴ en¹, jme¹-ni³ nca³ tsi² cha⁴-si¹ni³ nca³nˀion¹-le⁴ cro²-le⁴ Cristo.
1CO 1:18 Je² en¹ xi³ tˀa³tsˀe⁴ cro² to⁴cjoa⁴sca¹ ma³-le⁴ je² xi³ cha³jin³, to⁴nca³ ña¹ xi³ vi²tjo⁴ntje², coi³ xi³ nca³nˀion¹-le⁴ Ni³na¹ ma³-na¹.
1CO 1:19 Cˀoa⁴-sˀin² tji¹tˀa³: Si³cha³ cjoa⁴chji⁴ne⁴-le⁴ cho⁴ta⁴ xi³ chji⁴ne⁴, cˀoa⁴ sca³ni²tˀa³xian²³ cjoa⁴ˀi³sen³ta³con²-le⁴ cho⁴ta⁴ xi³ ma³cho⁴ya³-le⁴.
1CO 1:20 Jña¹ ti¹jna³ xi³ tjin¹-le⁴ cjoa⁴chji⁴ne⁴. Jña¹ ti¹jna³ xi³ ma³-le⁴ cji³tˀa³ xon⁴. Jña¹ ti¹jna³ xi³ ma³-le⁴ fa³jin³-le⁴ i⁴ son³ˀnte³-vi⁴ ntˀai⁴-vi⁴. Ni³na¹ a³ tsi² tsa² qui³si³sca¹ya³-le⁴ je² cjoa⁴chji⁴ne⁴-le⁴ son³ˀnte³-vi⁴.
1CO 1:21 Je² son³ˀnte³ li²coi³ tsa³ve³ Ni³na¹ xi³ to⁴tˀa³tsˀe⁴ cjoa⁴chji⁴ne⁴-le⁴ cho⁴ta⁴. Ni³na¹ xi³ cˀoa⁴qui³tso² cao⁴ cjoa⁴ˀi³sen³ta³con²-le⁴. Qui³sa³sen³-le⁴ Ni³na¹ nca³ tsˀa³sje³ntjai² je² xi³ ma³cjain¹-le⁴ xi³ to⁴tˀa³tsˀe⁴ cjoa⁴sca¹ xi³ tsˀe⁴ en¹ xi³ qui³no²cjoa⁴ya³.
1CO 1:22 Je² cho⁴ta⁴ judío si¹je¹ choa⁴, cˀoa⁴ je² cho⁴ta⁴ griego va³jnqui³sjai³ cjoa⁴chji⁴ne⁴,
1CO 1:23 to⁴nca³ ña¹-vi⁴ no²cjoa⁴ya³² tˀa³tsˀe⁴ Cristo nca³ qui³sˀe³tˀa³ cro². Xi³ to⁴tˀa³tsˀe⁴ coi³-vi⁴ sa³te¹nqui³ cho⁴ta⁴ judío, cˀoa⁴ to⁴cjoa⁴sca¹ ma³ xi³ tˀa³tsˀe⁴ je² cho⁴ta⁴ xi³ li² judío-jin².
1CO 1:24 To⁴nca³ tˀa³tsˀe⁴ xi³ qui³no²cjoa⁴-le⁴, cho⁴ta⁴ judío cao⁴ cho⁴ta⁴ griego nca³ jao², Cristo nca³nˀion¹-le⁴ Ni³na¹ ni¹ cˀoa⁴ cjoa⁴ˀi³sen³ta³con²-le⁴ Ni³na¹ ni¹.
1CO 1:25 Je² cjoa⁴sca¹-le⁴ Ni³na¹ nqui²sa⁴ chji⁴ne⁴ cao⁴-ni³ tsa² cjoa⁴chji⁴ne⁴-le⁴ cho⁴ta⁴son³ˀnte³, cˀoa⁴ cjoa⁴ˀi³nta³-le⁴ Ni³na¹ nqui²sa⁴ tjin¹-le⁴ nca³nˀion¹ cao⁴-ni³ tsa² nca³nˀion¹-le⁴ cho⁴ta⁴son³ˀnte³.
1CO 1:26 Ti⁴cja³ˀai³tsjaon³ jo³-sˀin² qui³no²cjoa⁴-no³, ntsˀe³², nca³ tsi² to⁴jo³ ncjin² ma³-nio³ xi³ chji⁴nao⁴³ jo³-sˀin² si¹cja³ˀai³tsjen³ cho⁴ta⁴son³ˀnte³, nca³ tsi² ncjin² xi³ nca³nˀion¹ tjin¹-no³, nca³ tsi² ncjin² xi³ ncˀa³ cjoaon³.
1CO 1:27 To⁴sa³ Ni³na¹ tsa³cja³ˀa¹jin³ je² xi³ sca¹ya³-le⁴ i⁴ son³ˀnte³-vi⁴, jme¹-ni³ nca³ si⁴²soa³-si¹ni³le⁴ je² xi³ chji⁴ne⁴. Cˀoa⁴ Ni³na¹ tsa³cja³ˀa¹jin³ je² xi³ i³nta³ i⁴ son³ˀnte³-vi⁴, jme¹-ni³ nca³ si⁴²soa³-si¹ni³le⁴ je² xi³ tjin¹-le⁴ nca³nˀion¹.
1CO 1:28 Cˀoa⁴ Ni³na¹ tsa³cja³ˀa¹jin³ je² xi³ yo⁴ma⁴, cˀoa⁴ je² xi³ taon³ ˀya³ i⁴ son³ˀnte³-vi⁴, cˀoa⁴ je² xi³ tsi² tsa² coi³ tjin¹, jme¹-ni³ nca³ si⁴²qui³xo²ya³-ni³ xi³ tjin¹,
1CO 1:29 jme¹-ni³ nca³ ni⁴jnco³-jin² cho⁴ta⁴ coan⁴ncˀa³-ni³con³ nqui³xcon⁴ nca³ je².
1CO 1:30 Tsˀe⁴ Ni³na¹ nio¹³ jon² nca³ ti³yo³cao⁴³ Cristo Jesús. Je² xi³ Ni³na¹ qui³tsjoa³ nca³ cjoa⁴chji⁴ne⁴-na¹ coan³. Je² xi³ qui³si³cje³tˀa³ je¹-na¹, cˀoa⁴ qui³si³tsje³-na¹, cˀoa⁴ tsa³cˀe¹chji¹ntjai²-na¹.
1CO 1:31 Coi³ cjoa⁴-vi⁴, jo³-sˀin² tji¹tˀa³, je² xi³ vˀa³sje³je³ya³ yao³-le⁴, ca²ta³vˀa³sje³je³ya³ yao³-le⁴ nca³ ti¹jna³cao⁴ Nai³-na¹.
1CO 2:1 Ntsˀe³², cˀia⁴ nca³ qui³con³-no³, a³li² cao⁴ en¹ncˀa³-jin² qui³con³-no³, ni⁴cao⁴ cjoa⁴chji⁴ne⁴ xi³ ncˀa³-jin² nca³ qui³tsjoa³-no³ cjoa⁴qui²xi⁴ xi³ tˀa³tsˀe⁴ Cristo.
1CO 2:2 Tsi² tsa² cja⁴ˀai¹ cjoa⁴ xi³ qui³si³cja³ˀai³tsjen³-sa³ jin³-no³ nca³ jon², to⁴je² Jesucristo, cˀoa⁴ je² nca³ qui³sˀe³tˀa³ cro².
1CO 2:3 I³nta³ coan³ cjoan³ an³, qui³tsa³cjoan³, cˀoa⁴ jo³ qui³fa³tse¹coa⁴ cˀia⁴ nca³ tsa³ca²te⁴jna³cao⁴-no³.
1CO 2:4 Je² en¹-na⁴ cao⁴ je² cjoa⁴qui²xi⁴ xi³ qui³nchja²ya³ li²coi³ qui³nchja²ya³jin³-no³ cao⁴ cjoa⁴chji⁴ne⁴-le⁴ cho⁴ta⁴ xi³ to⁴xquia⁴ vˀe¹jnco³-ta³con²³, to⁴nca³ cˀia⁴ nca³ qui³nchja²ya³ cˀoa⁴-sˀin² tsa³ca³co³son²tsen³-no³ je² Espíritu Santo cao⁴ nca³nˀion¹-le⁴,
1CO 2:5 jme¹-ni³ nca³ tsi² coan⁴cjain¹-si¹ni³no³ to⁴tˀa³tsˀe⁴ cjoa⁴chji⁴ne⁴-le⁴ cho⁴ta⁴, to⁴nca³ to⁴tˀa³tsˀe⁴ nca³nˀion¹-le⁴ Ni³na¹.
1CO 2:6 To⁴nca³ no²cjoa⁴-ni¹⁴jin⁴ cjoa⁴chji⁴ne⁴ jin³-le⁴ cho⁴ta⁴ xi³ je³coan³jcha¹. Je² cjoa⁴chji⁴ne⁴-vi⁴ li²coi³ tsˀe⁴ son³ˀnte³-vi⁴ ntˀai⁴-vi⁴, ni⁴tsˀe⁴ cho⁴ta⁴ti¹tjon² xi³ tsˀe⁴ son³ˀnte³-vi⁴jin² xi³ cha⁴.
1CO 2:7 To⁴nca³ no²cjoa⁴-ni¹⁴jin⁴ cjoa⁴chji⁴ne⁴ xi³ tsˀe⁴ Ni³na¹, xi³ ˀma³ tjin¹, xi³ ti¹jna³ˀma³ sa³ˀnta³ nca³sˀa⁴, xi³ to⁴nqui³-ni³ nca³ to²tsˀin³-le⁴ cjoa⁴, xa¹ tsa³cˀe¹nta³-ni³ Ni³na¹ xi³ tˀa³tsˀe⁴ cjoa⁴je³ya³-na¹.
1CO 2:8 Ni⁴jnco³-jin² cho⁴ta⁴ti¹tjon² xi³ tsˀe⁴ son³ˀnte³-vi⁴ ntˀai⁴-vi⁴ coan³cho⁴ya³-le⁴ je²-vi⁴. Tsa² coan³cho⁴ya³-la²ni³le⁴ tsa²cai³, li²coi³ tsa³ca¹tˀa³ cro² Nai³-na¹ xi³ tjin¹-le⁴ cjoa⁴je³ya³
1CO 2:9 Tji¹tˀa³: Cjoa⁴ xi³ tsi² xcon⁴ tsa³ve³-ni³, ni⁴xo⁴ño³-jin² qui³nčhˀoe¹-ni³, ni⁴ni⁴ma⁴-le⁴ cho⁴ta⁴-jin² qui³si³cja³ˀai³tsjen³-ni³, cjoa⁴ xi³ Ni³na¹ tsa³cˀe¹jna³nta³-ni³ xi³ tˀa³tsˀe⁴ je² xi³ tsjoa³que³ nca³ je².
1CO 2:10 Je² cjoa⁴-vi⁴ Ni³na¹ qui³si³cˀa³tsen³-na¹ xi³ to⁴tˀa³tsˀe⁴ Espíritu Santo. Je² Espíritu Santo nta³ va¹sjai³ya³ nca³yi³je³, nta³ tsa² je² xi³ ñˀain³ tjin¹ xi³ tsˀe⁴ Ni³na¹.
1CO 2:11 ˀya¹-ni³ xi³ cho⁴ta⁴ xi³ ve³ cjoa⁴fa³ˀai³tsjen³-le⁴ xi³ nqui²jnco³ cho⁴ta⁴, to⁴je² espíritu xi³ ti⁴tsˀe⁴-ni³ xi³ ti¹jna³jin³-le⁴ nca³ je². Cˀoa⁴-ti⁴sˀin² ni⁴ˀya³-jin² xi³ coan³cho⁴ya³-le⁴ cjoa⁴fa³ˀai³tsjen³-le⁴ Ni³na¹, to⁴je² Espíritu Santo xi³ tsˀe⁴ Ni³na¹.
1CO 2:12 A³li² je²-jin² espíritu xi³ tsˀe⁴ son³ˀnte³ qui³tsˀai²-na¹, to⁴nca³ je² Espíritu Santo xi³ tsˀe⁴ Ni³na¹, jme¹-ni³ nca³ jcha⁴-si¹nia³² je² cjoa⁴ xi³ Ni³na¹ qui³tsjoa³cjoa⁴tjao²-na¹.
1CO 2:13 Je² cjoa⁴-vi⁴ xi³ cˀoa⁴-sˀin² no²cjoa⁴², a³li²coi³ cao⁴ en¹ xi³ cjoa⁴chji⁴ne⁴-le⁴ cho⁴ta⁴ va³co¹ya³-na¹, to⁴nca³ cao⁴ en¹ xi³ je² Espíritu Santo va³co¹ya³-na¹. Cao⁴ en¹ xi³ tsˀe⁴ Espíritu Santo ni²cˀa³to³ya³² cjoa⁴ xi³ tsˀe⁴ Espíritu Santo.
1CO 2:14 Je² cho⁴ta⁴ xi³ to⁴xa¹ cjoan³-ni³ li²coi³ cjoe¹ je² cjoa⁴ xi³ tsˀe⁴ Espíritu Santo xi³ tsˀe⁴ Ni³na¹, nca³ to⁴cjoa⁴sca¹ ma³-le⁴. Li²coi³ ma³ ma³cho⁴ya³-le⁴ nca⁴ to⁴cao⁴ Espíritu Santo cho²tˀa³jin³ je² cjoa⁴-ve⁴.
1CO 2:15 Je² xi³ Espíritu Santo ti¹jna³jin³ ni⁴ma⁴-le⁴ co³tˀa³jin³ nca³yi³je³ cjoa⁴, to⁴nca³ li²ˀya³ xi³ co³tˀa³ nca³ je².
1CO 2:16 ˀya¹-ni³ xi³ tsa³ve³ cjoa⁴fa³ˀai³tsjen³-le⁴ Nai³-na¹. ˀya¹ xi³ tsa³ca³co¹ya³-le⁴. To⁴nca³ ña¹ tjin¹-na¹ je² cjoa⁴fa³ˀai³tsjen³ xi³ tsˀe⁴ Cristo.
1CO 3:1 An³ li²coi³ coan³-na³ nca³ tsa³cja²cao⁴-no³, ntsˀe³², jo³-ni³ tsa² je² xi³ nta³ si¹tjo³son²-le⁴ Espíritu Santo. To⁴nca³ tsa³cja²cao⁴-no³ jo³-ni³ tsa² xi³ to⁴cho⁴ta⁴son³ˀnte³, jo³-ni³ tsa² xi³ to⁴ˀnti¹xti³ tˀa³tsˀe⁴ Cristo.
1CO 3:2 Qui³si³cˀi³-no³ nta¹chi³qui³. Li²coi³ tso³jmi² xi³ ta²ja³ qui³tsjoa³-no³, nca⁴ cje³ coan³-jin²sa³no³, ni⁴ntˀai⁴-jin² ma³-no³,
1CO 3:3 nca⁴ to⁴jo³ cˀoa⁴mao³ jo³-ni³ tsa² cho⁴ta⁴son³ˀnte³. Ti¹jna³jin³-no³ cjoa⁴chi⁴ni⁴, cjoa⁴cho³va²ti³ya³-ni³, cˀoa⁴ ncjin² ya³ ma³-nio³. A³ tsi² tsa² jo³-ni³ cho⁴ta⁴son³ˀnte³ mao³, cˀoa⁴ ma³nquin¹cao⁴³ yao³-no³ jo³-ni³ tsa² cho⁴ta⁴son³ˀnte³.
1CO 3:4 To⁴cˀia⁴²-ni³ nca³ tjin¹ xi³ cˀoi⁴coi⁴tso⁴: An³ tsˀe⁴ Pablo nia¹³, cˀoa⁴ je² xi³jnco³: An³ tsˀe⁴ Apolos nia¹³, a³ tsi² tsa² to⁴xquia⁴ cho⁴ta⁴son³ˀntao³.
1CO 3:5 ˀya¹-ni³ tso²cˀoa⁴ Pablo. Cˀoa⁴ ˀya¹-ni³ Apolos. Cho⁴ta⁴ xi³ si¹xa¹-le⁴ Ni³na¹, xi³ to⁴tˀa³tsˀe⁴ nca³ cˀoa⁴-sˀin² coan³cjain¹-no³. Cˀoa⁴-sˀin² Nai³-na¹ qui³tsjoa³-le⁴ xa¹ nca³ jnco¹jnco¹.
1CO 3:6 An³ tsa³cˀe³ntje²³, Apolos tsa³cˀe¹jten⁴nqui³-le⁴ na³nta¹, to⁴nca³ Ni³na¹ xi³ qui³si³jcha¹.
1CO 3:7 Ni⁴je²-jin² xi³ vˀe¹ntje² xi³ chji¹-le⁴, ni⁴je²-jin² xi³ na³nta¹ vˀe¹jten⁴nqui³-le⁴, to⁴nca³ Ni³na¹ xi³ si¹jcha¹.
1CO 3:8 Je² xi³ vˀe¹ntje², cˀoa⁴ je² xi³ na³nta¹ vˀe¹jten⁴nqui³-le⁴, to⁴nco¹son² ma³, nta³ tsa² cˀoai⁴-le⁴ jnco¹jnco¹ je² chji¹-le⁴ jo³-sˀin² coan³ xa¹-le⁴.
1CO 3:9 Nca⁴ jin⁴-jin⁴ to⁴jnco³ ni²xa¹coai⁴-jin⁴ Ni³na¹, cˀoa⁴ jon² nio¹³ ˀnte³-le⁴ jña³ nca³ si¹xa¹ Ni³na¹, cˀoa⁴ jon² nio¹³ ntˀia³-le⁴ xi³ vˀe¹nta³ Ni³na¹.
1CO 3:10 Jo³-sˀin² qui³tsjoa³-na³ cjoa⁴nta³ Ni³na¹, jo³-ni³ je² xi³ nˀion¹ nta³ ma³-le⁴ vˀe¹nta³ ntˀia³, an³ xi³ tsa³cˀe³jna²³ xjao¹ja⁴ma⁴, cˀoa⁴ nqui²jnco³ xi³ vˀe¹nta³son². Jnco¹jnco¹ ca²ta³si¹coi²nta⁴ jo³-sˀin² nca³ vˀe¹nta³son².
1CO 3:11 Ni⁴ˀya³-jin² xi³ coan⁴-le⁴ cˀoe⁴²jna³ nqui²jnco³ xjao¹ja⁴ma⁴ cao⁴-ni³ tsa² je² xi³ je³ti¹jna³ xi³ coi³ Jesucristo.
1CO 3:12 Tsa² ˀya³-ni³ xi³ cˀoe⁴²nta³son²-ni³ xjao¹ja⁴ma⁴-vi⁴ taon⁴si³ne², taon⁴čhoa³, la⁴jao⁴chji¹ xi³ na⁴sca¹ cjoan³, ya¹, li⁴ji⁴, xca⁴,
1CO 3:13 xa¹-le⁴ nca³ jnco¹jnco¹ coan⁴tsen³. Je² ni⁴čhjin³-ve⁴ si⁴²cˀa³tsen³ nca³ cao⁴ lˀi¹ coan⁴tsen³-ni³. Je² lˀi¹-ve⁴ xi³ sco¹tˀa³ xa¹-le⁴ nca³ jnco¹jnco¹ jo³ cjoan³.
1CO 3:14 Tsa² jnco³ xi³ xa¹-le⁴ sˀe⁴jna³, xi³ cˀoa⁴-sˀin² tsa³cˀe¹nta³son², cˀoai⁴-le⁴ chji¹-le⁴.
1CO 3:15 Tsa² jnco³ xi³ xa¹-le⁴ coi⁴ti⁴, cha⁴ chji¹-le⁴, to⁴nca³ je² cho⁴ta⁴-ve⁴ coi⁴tjo³ntjai²-ni¹, to⁴nca³ jo³-ni³ xi³ coi⁴tjo³jin³-ni³ lˀi¹.
1CO 3:16 A³ tsi² tsa² ˀyao³ nca³ jon² xi³ ntˀia³-le⁴ Ni³na¹ ˀmi²-no³, cˀoa⁴ je² Espíritu Santo xi³ tsˀe⁴ Ni³na¹ ti¹jna³jin³ ni⁴ma⁴-no³.
1CO 3:17 Tsa² jnco³ xi³ si¹qui³tson¹ je² ntˀia³-le⁴ Ni³na¹, Ni³na¹ si⁴²qui³tson¹ nca³ je², nca⁴ ntˀia³-le⁴ Ni³na¹ tsje³-ni¹, jña³-le⁴ xi³ coio³ nca³ jon².
1CO 3:18 Ni⁴ˀya³-jin² xi³ ti⁴je² ca²ta³vˀe¹na⁴cha⁴-ni³le⁴ yao³-le⁴. Tsa² ˀya³-ni³ve⁴ jin³-no³ nca³ jon² xi³ to⁴si¹cja³ˀai³tsjen³jin³ nca³ chji⁴ne⁴ i⁴ son³ˀnte³-vi⁴ ntˀai⁴-vi⁴, sca¹ya³ ca²ta³ma³-le⁴, jme¹-ni³ nca³ ña³qui³ chji⁴ne⁴ coan⁴-si¹ni³.
1CO 3:19 Je² cjoa⁴chji⁴ne⁴-le⁴ son³ˀnte³-vi⁴ cjoa⁴sca¹ ni¹ xi³ tˀa³tsˀe⁴ Ni³na¹, nca⁴ cˀoa⁴-sˀin² tji¹tˀa³: Je² xi³ tsoa⁴ cho⁴ta⁴chji⁴ne⁴ ti⁴cˀia⁴-ni³ nca³ sˀin¹ cjoa⁴ma²ña⁴-le⁴.
1CO 3:20 Nqui²jnco³cˀa² tji¹tˀa³: Nai³-na¹ ve³ nca³ je² cjoa⁴fa³ˀai³tsjen³-le⁴ cho⁴ta⁴chji⁴ne⁴ tsi²jme³ chji¹-le⁴.
1CO 3:21 Cˀoa⁴-sˀin² ni⁴jnco³-jin² xi³ ca²ta³vˀa³sje³je³ya³ cho⁴ta⁴, nca⁴ nca³yi³je³ tsaon⁴³ nio¹³.
1CO 3:22 Tsa² Pablo, tsa² Apolos, tsa² Cefas, tsa² je² son³ˀnte³-vi⁴, tsa² cjoa⁴vi³jna³chon³, tsa² cjoa⁴vi³ya³, tsa² je² xi³ ntˀai⁴, tsa² je² xi³ cjoa⁴ˀai¹, nca³yi³je³ tsaon⁴³ nio¹³.
1CO 3:23 Cˀoa⁴ jon² tsˀe⁴ Cristo nio¹³, cˀoa⁴ Cristo tsˀe⁴ Ni³na¹ ni¹.
1CO 4:1 Cho⁴ta⁴ cˀoa⁴-sˀin² ca²ta³ve³-na³jin⁴ jo³-ni³ tsa² xi³ si¹xa¹-le⁴ Cristo, xi³ si¹coi²nta⁴ cjoa⁴ˀma³-le⁴ Ni³na¹.
1CO 4:2 Ma³chjen¹ nca³ je² xi³ si¹coi²nta⁴, nca³ jnco¹jnco¹ nˀion¹tˀa³con³ ca²ta³ma³.
1CO 4:3 An³ nˀion¹ choa³ coi²nta⁴-na³ tsa² jon² vˀe²nta³jin³-nao¹³, cˀoa⁴ tsa² xi³ cho⁴ta⁴xa¹ vˀe¹nta³jin³-na³. Ni⁴ˀan³-jian²³ vˀe³nta³jin³-le⁴ yao³-na⁴.
1CO 4:4 Nta³ tsa² an³ si³cja³ˀai³tsjen³ nca³ li²jme³ je¹ tjin¹-na³, li²to⁴coi³-jin² nca³ fe³tˀa³ je¹-na⁴. To⁴nca³ je² xi³ vˀe¹nta³jin³-na³, je² Nai³-na¹.
1CO 4:5 Li²jme³ xi³ cˀoe¹nta³jion³ nca³ to⁴nqui³-ni³ ni⁴čhjin³-le⁴, cˀia⁴² sa³ˀnta³ nca³ cjoa⁴ˀai¹ Nai³-na¹ xi³ si⁴²ˀi³sen³ xi³ tji¹ˀma³ jña³ njion² chon³, cˀoa⁴ xi³ coa⁴co²son²tsen³ cjoa⁴fa³ˀai³tsjen³-le⁴ ni⁴ma⁴-na¹. Cˀia⁴² Ni³na¹ cˀoa⁴sje³je³ya³ nca³ jnco¹jnco¹.
1CO 4:6 To⁴nca³ je²-vi⁴, ntsˀe³², qui³xian³ tˀa³tsˀan⁴, cˀoa⁴ tˀa³tsˀe⁴ Apolos, nca³ cˀoa⁴-sˀin² tsa³cja³ntia⁴²-lai²⁴jin⁴ nca³ jon², jme¹-ni³ nca³ cao⁴ jin⁴-jin⁴ cho¹tˀa³ya³-si¹nio³ nca³ tsi² nqui²sa⁴ tse³ sˀian⁴-sao³ jo³ tjin¹ xi³ tji¹tˀa³, jme¹-ni³ nca³ tsi² ncˀa³con³ coa⁴nquin¹tˀa³-si¹ni³lao⁴³ jnco³ cho⁴ta⁴, cˀoa⁴ co²ntran⁴ coa⁴nquin¹-lao⁴³ xi³ cja⁴ˀai¹.
1CO 4:7 ˀya¹-ni³ xi³ fa³ˀa¹jin³-li², cˀoa⁴ jme¹ xi³ tjin¹-li² xi³ tsi² qui³tsˀai²-li². Tsa² qui³tsˀai²-li², a¹-ni³ nca³ ncˀa³ ma³-ni³li² jo³-ni³ tsa² xi³ tsi² qui³tsˀai²-li².
1CO 4:8 Je³qui³tsao³, je³nchi⁴nao¹³. Nta³ tsa² tsi² cao⁴ jin⁴-jin⁴ je³va³te²xo³mao³. Jo¹ to⁴nta³ tsa² cjoa⁴qui²xi⁴ nca³ va³te²xo³mao³, jme¹-ni³ nca³ cˀoa⁴-ti⁴ jin⁴-jin⁴ to⁴jnco³ cao⁴ jon² coa⁴te²xo³ma³-si¹nia³².
1CO 4:9 Si³cja³ˀai³tsjen³ an³ nca³ jin⁴-jin⁴ xi³ pa²stro⁴ ˀmi²-na³jin⁴, Ni³na¹ tsa³ca³co¹son²tsen³ nca³ jin⁴-jin⁴ xi³ fe³tˀa³, jo³-ni³ xi³ cjoa⁴vi³ya³ cji³ne²-na³jin⁴, nca⁴ to⁴cjoa⁴sca¹ coain³⁴-jin⁴ nqui³xcon⁴ son³ˀnte³ cao⁴ a²ncje⁴ cao⁴ cho⁴ta⁴.
1CO 4:10 Sca¹-na³jin⁴ nca³ jin⁴-jin⁴ xi³ tˀa³tsˀe⁴ Cristo, to⁴nca³ jon² tjin¹-no³ cjoa⁴ˀi³sen³ta³con² nca³ ti³yo³cao⁴³ Cristo. I³nta³jin³ nca³ jin⁴-jin⁴, to⁴nca³ jon² ta²ja³-nio¹³. Jon² xcon¹ ˀya³-no³, to⁴nca³ jin⁴-jin⁴ chˀao³ ˀya³-na³jin⁴.
1CO 4:11 Sa³ˀnta³ je² hora-vi⁴ cji³nčha¹-na³jin⁴, cˀoa⁴ fa³ti²-na³jin⁴, cˀoa⁴ tsin²-na³jin⁴ na³jño³-jin², cˀoa⁴ qui³tsin²ˀoain³⁴-jin⁴ nca³ qui³sˀe³-na³jin⁴, cˀoa⁴ to⁴ti³ma³son²-ni¹⁴jin⁴ nca³ tsin²-na³jin⁴ ntˀia³.
1CO 4:12 Tse³ ni²xa¹-ni³⁴jin⁴ ntsai⁴-jin⁴. Cˀia⁴ nca³ chˀao³ tso²-na³jin⁴, ni²chi³con³tˀain³⁴-jin⁴ nca³ je². Cˀia⁴ nca³ si¹cja³ˀa¹-na³jin⁴ cjoa⁴ñˀain³, jcho¹cjoa⁴cao⁴-na³jin⁴.
1CO 4:13 Cˀia⁴ nca³ nchja⁴ˀaon³-na³jin⁴, nta³ no²cjoa⁴-lai⁴jin⁴. To⁴tje¹-le⁴ son³ˀnte³ je³cji³mai³⁴-jin⁴, jo³-ni³ tsa² nta¹jto³-le⁴ nca³yi³je³ to⁴jme³-ni³ve⁴ sa³ˀnta³ ntˀai⁴-vi⁴.
1CO 4:14 Li²coi³ cjia³ je²-vi⁴ nca³ si³soa³-no³, to⁴nca³ vˀe³ne²³-no³ jo³-ni³ tsa² xti³-na⁴ xi³ tsjoa³que⁴.
1CO 4:15 Nta³ tsa² tjin¹-no³ te³ jmi³ cho⁴ta⁴ xi³ si¹coi²nta⁴-no³ nca³ ti³yo³cao⁴³ Cristo, li²coi³ ncjin² nˀai³ sˀe³-no³. Nca⁴ ti³yo³coa⁴² Cristo an³ coan³ nˀai³-no³ xi³ to⁴tˀa³tsˀe⁴ je² en¹nta³ xi³ tˀa³tsˀe⁴ Cristo.
1CO 4:16 To⁴coi³ vˀe³tsˀoa²³-no³ nca³ chjen¹nqui³-nao¹³.
1CO 4:17 To⁴coi³ cjoa⁴ nca³ qui³si³ca³sen¹³-no³ Timoteo, ˀnti¹-na⁴ xi³ tsjoa³que⁴, xi³ nˀion¹tˀa³con³ nca³ ti¹jna³cao⁴ Nai³-na¹. Timoteo si⁴²cja³ˀai³tsjen³jin³-no³ xi³ tˀa³tsˀe⁴ ntia⁴²-na⁴, jo³-sˀin² tso²ˀva⁴coa⁴ Cristo, jo³-sˀin² va³co³ya²³-le⁴ nca³tsˀi³ cho⁴ta⁴-le⁴ Cristo nca³qui³jnta².
1CO 4:18 Tjin¹ cˀa³ xi³ ncˀa³ ma³con³, jo³-ni³ tsa² ni⁴cˀia⁴-jin² cjoi¹con³-no³ nca³ jon².
1CO 4:19 To⁴nca³ cjoi¹con³nti⁴ton⁴-no³, tsa² Nai³-na¹ me³-le⁴, cˀoa⁴ scoe³-nia¹³ li²coi³ je² en¹-le⁴ xi³ to⁴ncˀa³con³ tjio¹ma³, to⁴nca³ je² nca³nˀion¹-le⁴.
1CO 4:20 Je² cjoa⁴te¹xo³ma³-le⁴ Ni³na¹ li²coi³ to⁴cao⁴ en¹-jin² sˀe³-ni³, to⁴nca³ cao⁴ nca³nˀion¹.
1CO 4:21 Jme¹ xi³ me³-no³. A³ cjoi¹con³-no³ cao⁴ ya¹jti³, a³xo⁴ cao⁴ cjoa⁴tjao²cha³, cˀoa⁴ cao⁴ cjoa⁴ntˀe¹ta³con².
1CO 5:1 Xi³ cjoa⁴qui²xi⁴ no²ˀya²-le⁴ nca³ tjin¹ cjoa⁴cha³jnqui³ jin³-no³ nca³ jon², to⁴nca³ cjoa⁴cha³jnqui³ xi³ cˀoa⁴tjin¹ xi³ ni⁴ya⁴-jin² tjin¹ jin³-le⁴ cho⁴ta⁴ xi³ li² judío-jin². Cˀoa⁴-sˀin² tjin¹ jnco³ xi³ ti¹jna³cao⁴ je² chjon⁴²-le⁴ nˀai³-le⁴.
1CO 5:2 Jon² cˀoa⁴-sˀin² ncˀa³con³ ti³mao³, ni⁴ˀaon³-jin² coan³-no³, jme¹-ni³ nca³ tjo¹xin²-si¹ni³no³ je² xi³ cˀoa⁴qui³sˀin³ coi³ cjoa⁴-vi⁴.
1CO 5:3 Xi³ cjoa⁴qui²xi⁴, cjin³ ti²jna⁴-no³, to⁴nca³ ya⁴-cjoan² ti¹jna³-ni³ ni⁴ma⁴-na⁴. Jo³-ni³ tsa² jnco³ xi³ ya⁴ ti¹jna³, je³tsa³cˀe³nta³jin³-le⁴ je² xi³ cˀoa⁴qui³sˀin³ cjoa⁴-vi⁴.
1CO 5:4 Cao⁴ jan³ˀain¹-le⁴ Nai³-na¹ Jesucristo je³tsa³cˀe³nta³jin³-le⁴. Cˀia⁴ nca³ coan⁴ñao³ nca³ jon², cˀoa⁴ nca³ je² ni⁴ma⁴-na⁴ ya⁴ ti¹jna³, cao⁴ je² nca³nˀion¹-le⁴ xi³ tsˀe⁴ Nai³-na¹ Jesucristo
1CO 5:5 ca²tˀai²tˀain³-le⁴ je² Satanás cho⁴ta⁴-ve⁴ nca³ coi⁴ya² yao³jchi¹nca³-le⁴, jme¹-ni³ nca³ je² espíritu-le⁴ coi⁴tjo³ntjai²-si¹ni³ cˀia⁴ ni⁴čhjin³-le⁴ Nai³-na¹ Jesús.
1CO 5:6 Li²coi³ nta³-ni³ nca³ yao³-no³ nˀo²sje³ncˀao³. A³ tsi² tsa² ˀyao³, nta³ tsa² to⁴choa³ na⁴ˀyo⁴san³, si¹san³ nca³yi³je³ na⁴ˀyo⁴.
1CO 5:7 Ti⁴tsje³yao³ tso²cˀoa⁴ je² na⁴ˀyo⁴san³ xi³ jchi¹nca³, jme¹-ni³ nca³ na⁴ˀyo⁴cho⁴tse⁴ coan⁴-si¹nio³, nca³ jon² li²coi³ na⁴ˀyo⁴san³ coaon³. Je² pa²xco⁴-na¹, xi³ je² Cristo, cˀoa⁴-sˀin² qui³tsˀai²tˀa³-le⁴ cro² xi³ tˀa³tsan⁴².
1CO 5:8 Cˀoa⁴-sˀin² chˀa⁴sje³² sˀoi¹, li²coi³ cao⁴ je² na⁴ˀyo⁴san³ xi³ jchi¹nca³, ni⁴je²-jin² na⁴ˀyo⁴san³ xi³ cjoa⁴fa³ˀai³tsjen³ tsˀen⁴ xi³ sˀin¹ cjoa⁴tsˀen⁴, to⁴nca³ cao⁴ nio⁴xti²la⁴ xi³ tsin²-le⁴ na⁴ˀyo⁴san³-jin², xi³ ña³qui³ cˀoa⁴tjin¹, cˀoa⁴ xi³ cjoa⁴qui²xi⁴.
1CO 5:9 Cˀoa⁴-sˀin² qui³squi³-no³ cao⁴ xon⁴-na⁴, nca³ tsi² tsa² ma³nquin¹tˀa³-lao⁴³ xi³ si¹cha³jnqui³.
1CO 5:10 Nta³ tsa² sa³cˀoa⁴ ma³chjen¹ nca³ cha²cao⁴³, ni⁴ˀi⁴tse¹-jin² ma³nquin¹tˀa³-lao⁴³ je² xi³ si¹cha³jnqui³ xi³ i⁴ tsˀe⁴ son³ˀnte³, a³xo⁴ cao⁴ xi³ xin²con³, a³xo⁴ cao⁴ xi³ che¹, a³xo⁴ cao⁴ xi³ xco¹son² ve³xcon¹. Coan⁴chjen¹-no³ nca³ coi²tjo⁴³ son³ˀnte³-vi⁴, tsa² tˀa³xin² coi⁴yo³-lao⁴³.
1CO 5:11 To⁴nca³ coi³-vi⁴ cˀoa⁴-sˀin² qui³squi³-no³, nca³ tsi² tsa² ma³nquin¹tˀa³-lao⁴³ tsa² jnco³ xi³ ntsˀe³² cho³vao²³, xi³ cˀoa⁴-sˀin² cha³jnqui³, a³xo⁴ xi³ xin²con³, a³xo⁴ xi³ xco¹son² ve³xcon¹, a³xo⁴ xi³ nchja⁴ˀaon³, a³xo⁴ xi³ cho⁴ta⁴chˀi⁴, a³xo⁴ xi³ che¹, cao⁴ je² xi³ cˀoa⁴cjoan³ ni⁴vi³chi³cao⁴-jion²³.
1CO 5:12 Jme¹ xi³ vˀa³cao⁴-na³ nca³ an³ nca³ vˀe³nta³jin³-le⁴ je² xi³ tˀa³xin² tjio¹. A³ tsi² tsa² je² xi³ to⁴jnco³ tjio¹cao⁴-no³ xi³ tjin¹-ni³ nca³ vˀe²nta³jin³-lao⁴³.
1CO 5:13 Je² xi³ tˀa³xin² tjio¹, Ni³na¹ vˀe¹nta³jin³-le⁴. Chja⁴ˀa²xion²³ tso²cˀoa⁴ je² cho⁴ta⁴tsˀen⁴ xi³ ti¹jna³jin³-no³ nca³ jon².
1CO 6:1 Tsa² jnco³ xi³ jin³-no³ nca³ jon² xi³ tjin¹ i⁴tse¹-le⁴ cjoa⁴ cao⁴ xi³jnco³, a³ coan⁴nˀion¹con³ nca³ coai⁴con³-le⁴ cjoa⁴-te¹xo³ma³ xi³ tsˀe⁴ je² xi³ tsi² qui²xi⁴ tjio¹ma³, cˀoa⁴ nca³ tsi² nqui³xcon⁴ cho⁴ta⁴-le⁴ Cristo.
1CO 6:2 A³ tsi² tsa² ˀyao³ nca³ je² cho⁴ta⁴-le⁴ Cristo tjin¹-ni³le⁴ nca³ cˀoe⁴²nta³jin³-le⁴ son³ˀnte³. Cˀoa⁴ tsa² je² son³ˀnte³-vi⁴ sˀe⁴nta³jin³-le⁴ xi³ to⁴tˀa³tsaon⁴³, a³ tsi² va³quin²-no³ nca³ cˀoe¹nta³jin³-lao⁴³ cjoa⁴ xi³ choa³ tjin¹.
1CO 6:3 A³ tsi² ˀyao³ nca³ ña¹ cˀoa⁴-sˀin² cˀoe¹nta³jin³-le⁴² je² a²ncje⁴. Jo¹ to⁴nqui²sa⁴-sa³ cˀoa⁴sˀian⁴² cao⁴ je² cjoa⁴ xi³ tsˀe⁴ son³ˀnte³-vi⁴ ntˀai⁴-vi⁴.
1CO 6:4 Coi³, tsa² tjin¹-no³ cjoa⁴ xi³ tsˀe⁴ son³ˀnte³-vi⁴ ntˀai⁴-vi⁴, je² xi³ nqui²sa⁴ na³nqui³ tjio¹ ya⁴jin³-le⁴ cho⁴ta⁴-le⁴ Cristo, a³ je² xi³ ni²qui³nchao¹³ nca³ cˀoe⁴²nta³jin³ cjoa⁴ je²-vi⁴.
1CO 6:5 Coi³ cˀoa⁴xin³-nia³ nca³ si³soa³-no³. A³ tsi² tsa² tjin¹jnco³-no³ xi³ chji⁴ne⁴, a³ ni⁴to⁴jnco³-jin² xi³ coan⁴-le⁴ nca³ cˀoe⁴²nta³jin³-le⁴ ntsˀe³².
1CO 6:6 To⁴nca³ ti⁴ntsˀe⁴ ti⁴ntsˀe⁴-ni³ fi²co²ntran⁴-le⁴ xi¹ncjin¹ nqui³xcon⁴ cjoa⁴te¹xo³ma³, nta³ tsa² nqui³xcon⁴ xi³ tsi² ma³cjain¹-le⁴.
1CO 6:7 Xi³ cjoa⁴qui²xi⁴ ña³qui³ chˀao³ nˀiaon²³ nca³ cˀoa⁴-sˀin² tjin¹-no³ cjoa⁴cha³jnqui³ya³ jin³-le⁴ xi²nquio⁴³. A¹-ni³ nca³ tsi² to⁴sa³ si⁴cjain¹-si¹ni³lao⁴³ cjoa⁴tsˀen⁴. A¹-ni³ nca³ tsi² to⁴sa³ si⁴cjain¹-si¹ni³lao⁴³ nca³ chˀa²na⁴cha⁴-no³.
1CO 6:8 To⁴nca³ jon² cˀoa⁴-sˀin² nˀiaon²³ cjoa⁴tsˀen⁴, cˀoa⁴ chˀa²na⁴cha⁴-lao⁴³, nta³ tsa² ntsˀao³.
1CO 6:9 A³ tsi² tsa² ˀyao³ nca³ je² xi³ tsin²-le⁴ cjoa⁴qui²xi⁴-jin² li²coi³ sˀe⁴cjoa⁴tjao²-le⁴ cjoa⁴te¹xo³ma³-le⁴ Ni³na¹. A³li² chˀa²na⁴cha⁴-jin²no³. Ni⁴je²-jin² xi³ cha³jnqui³, ni⁴je²-jin² xi³ xco¹son² ve³xcon¹, ni⁴je²-jin² xi³ si¹cha³jnqui³tˀa³-le⁴ chjon⁴²-le⁴ a³xo⁴ xˀin⁴-le⁴, ni⁴je²-jin² xˀin⁴ xi³ ti⁴je² cˀoa⁴si¹cao⁴-ni³ yao³-le⁴, ni⁴je²-jin² xˀin⁴ xi³ ti⁴xˀin⁴ xi¹ncjin¹ fa³yo³cao⁴-ni³,
1CO 6:10 ni⁴je²-jin² xi³ che¹, ni⁴je²-jin² xi³ xin²con³, ni⁴je²-jin² xi³ chˀi⁴, ni⁴je²-jin² xi³ nchja⁴ˀaon³, ni⁴je²-jin² xi³ si¹che¹son², sˀe⁴cjoa⁴tjao²-le⁴ cjoa⁴te¹xo³ma³-le⁴ Ni³na¹.
1CO 6:11 Cˀoa⁴coan³ cjoaon³ cˀao³. To⁴nca³ je³tsa³ca³ne²yao³ yao³-no³, je³coan³tsje³yao³, je³je³tˀa³ je¹-no³, cao⁴ je² jan³ˀain¹-le⁴ je² Nai³-na¹ Jesucristo, cˀoa⁴ xi³ to⁴tˀa³tsˀe⁴ je² Espíritu Santo xi³ tsˀe⁴ Ni³na¹-na¹.
1CO 6:12 Nca³yi³je³ tjo³ˀnte³-na³, to⁴nca³ li²coi³ nca³yi³je³ nta³ ma³chjen¹-na³. Nca³yi³je³ tjo³ˀnte³-na³, to⁴nca³ an³ li²coi³ na³nqui³ coa²te⁴jna³-le⁴ nca³nˀion¹-le⁴.
1CO 6:13 Je² tso³jmi² xi³ chi³ne³, coi³ xi³ tˀa³tsˀe⁴ ntsˀoa³², cˀoa⁴ je² ntsˀoa³² xi³ tˀa³tsˀe⁴ je² tso³jmi² xi³ chi³ne³. To⁴nca³ Ni³na¹ si⁴²xo²ya³ nca³ jao². Je² yao³-na¹ li²coi³ xi³ tˀa³tsˀe⁴ je² cjoa⁴cha³jnqui³, to⁴nca³ xi³ tˀa³tsˀe⁴ je² Nai³-na¹, cˀoa⁴ je² Nai³-na¹ xi³ tˀa³tsˀe⁴ je² yao³-na¹.
1CO 6:14 Ni³na¹ xi³ qui³sco²mi³tjen⁴ je² Nai³-na¹, cˀoa⁴-ti⁴ ña¹-je⁴ sco¹mi³tjen⁴-ni³na¹ cao⁴ nca³nˀion¹-le⁴.
1CO 6:15 A³ tsi² tsa² ˀyao³ nca³ je² yao³-no³ tsˀe⁴ Cristo. A³ cjoa³ˀa²xin²-nia¹³ tso²cˀoa⁴ je² xi³ tsˀe⁴ Cristo, nca³ tsˀe⁴ chjon⁴²cha³jnqui³ sˀian³. Ni⁴cˀia³-jin².
1CO 6:16 A³xo⁴ tsi² tsa² ˀyao³ nca³ je² xi³ chjon⁴²cha³jnqui³ vˀe²jna³cao⁴, cˀoa⁴-sˀin² to⁴jnco³ yao³ ma³ cao⁴ je², nca³ cˀoa⁴tso²: Nca³ jao² cˀoa⁴-sˀin² to⁴jnco³ yao³ coan⁴.
1CO 6:17 To⁴nca³ je² xi³ vˀe²jna³cao⁴ je² Nai³-na¹, to⁴jnco³ espíritu ma³.
1CO 6:18 Ti⁴ncha³xin²-lao⁴³ cjoa⁴cha³jnqui³. To⁴jña³-sa³ni³le⁴ je¹ xi³ va³jnqui³ jnco³ xˀin⁴, li²coi³ va³jnqui³ je¹ xi³ tˀa³tsˀe⁴ yao³-le⁴, to⁴nca³ je² xi³ si¹cha³jnqui³, va³jnqui³ je¹ xi³ ti⁴tˀa³tsˀe⁴-ni³ yao³-le⁴.
1CO 6:19 A³xo⁴ tsi² tsa² ˀyao³ nca³ je² yao³-no³ ntˀia³-le⁴ Espíritu Santo ni¹, je² xi³ ti¹jna³jin³-no³ nca³ jon², jña³-le⁴ xi³ tsˀe⁴ Ni³na¹ tjin¹-ni³no³, cˀoa⁴ nca³ tsi² ti⁴tsaon⁴³-nio³ nca³ jon².
1CO 6:20 Chji¹ tsa³qui³nta³-ni³no³. Chˀa⁴sje³je³yao³ Ni³na¹ tso²cˀoa⁴. Chˀa⁴sje³je³yao³ cao⁴ yao³-no³ cˀoa⁴ cao⁴ espíritu-no³, jña³-le⁴ xi³ coi³ tsˀe⁴ Ni³na¹.
1CO 7:1 Xi³ tˀa³tsˀe⁴ cjoa⁴ xi³ qui³chji³-ni³nao¹³, nta³ tjin¹-ni³le⁴ je² xˀin⁴ nca³ tsi² tsa² chjon⁴² si⁴²cao⁴.
1CO 7:2 To⁴nca³ coi³ nca³ tse³ tjin¹ cjoa⁴cha³jnqui³, nca³ jnco¹jnco¹ ca²ta³sˀe³-le⁴ chjon⁴²-le⁴, cˀoa⁴ nca³ jnco¹jnco¹ ca²ta³sˀe³-le⁴ xˀin⁴-le⁴.
1CO 7:3 Je² xˀin⁴ jo³-sˀin² tjin¹ne²-le⁴ cjoa⁴vi³xan³, cˀoa⁴-sˀin² nta³ ca²ta³si¹cao⁴ chjon⁴²-le⁴, cˀoa⁴-ti⁴sˀin²ni³ je² chjon⁴² cao⁴ xˀin⁴-le⁴.
1CO 7:4 Je² chjon⁴² li²coi³ va³te¹xo³ma³-le⁴ xi³ ti⁴tsˀe⁴-ni³ yao³, to⁴je² xˀin⁴-le⁴ xi³ va³te¹xo³ma³-le⁴. Ti⁴cˀoa⁴-sˀin²ni³ je² xˀin⁴ li²coi³ va³te¹xo³ma³-le⁴ xi³ ti⁴tsˀe⁴-ni³ yao³, to⁴je² chjon⁴²-le⁴ xi³ va³te¹xo³ma³-le⁴.
1CO 7:5 A³li² mai³-jin² vi³xon¹-lao⁴³ xi²nquio⁴³, tsa² tsi² to⁴cˀia³-ni³ ni⁴čhjin³ nca³ tjio¹cjao²jco³, jme¹-ni³ nca³ to⁴sa³ cˀoe¹tsˀoa³-si¹nio³. Cˀia⁴ nqui²jnco³cˀa² ña³qui³ coi⁴yo³cao⁴³ xi²nquio⁴³ nca³ to⁴jnco³ coaon⁴³, jme¹-ni³ nca³ tsi² tsa² Satanás si⁴²cao⁴-si¹ni³no³ xi³ tˀa³tsˀe⁴ nca³ li²coi³ chjoe¹xco¹ yao³-no³.
1CO 7:6 To⁴nca³ je²-vi⁴ cˀoa⁴xian³ nca³ tsjoa³ˀnte³, li²coi³ nca³ cˀoa⁴-sˀin² va³te³xo³ma²³.
1CO 7:7 Me³-na³ nca³ nca³tsˀi³ xi³ xˀin⁴, cˀoa⁴coan⁴ cjoan³ jo³-ni³ tsa² an³, to⁴nca³ jnco¹jnco¹ tjin¹-le⁴ xi³ tsˀe⁴ cjoa⁴tjao²-le⁴ Ni³na¹, jnco³ xi³ cˀoa⁴sˀin¹, jnco³ xi³ cja⁴ˀai¹ sˀin¹.
1CO 7:8 Cˀoa⁴xin³-le⁴ tso²cˀoa⁴ je² xi³ tjio¹ to⁴je², cˀoa⁴ xi³ je³cˀen³ xˀin⁴-le⁴, nca³ nta³ tjin¹-le⁴ tsa² cˀoi⁴-sˀin² coa⁴tio⁴ jo³-sˀin² nca³ an³.
1CO 7:9 Tsa² tsi² coan⁴-le⁴ cjoe¹xco¹ yao³-le⁴, to⁴sa³ ca²ta³vi³xan³. Nqui²sa⁴ nta³ nca³ coi⁴xan³ cao⁴-ni³ tsa² yao³-le⁴ si⁴²sjoe²ya³-le⁴.
1CO 7:10 To⁴nca³ an³ vˀe³ne²³-le⁴ je² xi³ to⁴jnco³ tjio¹ nca³ je³chi³xan³, a³li² an³-jian²³ to⁴nca³ je² Nai³-na¹: Je² chjon⁴² a³li² va³sen²tˀa³xin²-jin²le⁴ xˀin⁴-le⁴.
1CO 7:11 Tsa² coa⁴sen⁴tˀa³xin², cˀoa⁴-sˀin² ca²tˀe²jna³ nca³ tsi² tsa² coi⁴xan³, a³xo⁴ ca²ta³fao¹nta³-ni³ nqui²jnco³cˀa² cao⁴ xˀin⁴-le⁴. Cˀoa⁴ je² xi³ xˀin⁴ a³li² tsjion¹-jin² je² chjon⁴²-le⁴.
1CO 7:12 Je² xi³cˀa³ an³ cˀoa⁴xin³-le⁴, li²coi³ je² Nai³-na¹. Tsa² jnco³ ntsˀe³² xi³ tjin¹-le⁴ chjon⁴² xi³ tsi² ma³cjain¹-le⁴, cˀoa⁴ tsa² je² chjon⁴² ma³me³con³ nca³ vˀe²jna³cao⁴, a³li² tsjion¹-jin².
1CO 7:13 Cˀoa⁴ je² chjon⁴² xi³ tjin¹-le⁴ xˀin⁴ xi³ tsi² tsa² ma³cjain¹-le⁴, cˀoa⁴ tsa² je² xˀin⁴ ma³me³con³ nca³ vˀe²jna³cao⁴, cˀoa⁴-ti⁴ li² tsjion¹-jin².
1CO 7:14 Je² xˀin⁴ xi³ tsi² tsa² ma³cjain¹-le⁴, cˀoa⁴-sˀin² cho⁴ta⁴-le⁴ Cristo ma³ xi³ to⁴tˀa³tsˀe⁴ chjon⁴²-le⁴, cˀoa⁴ je² chjon⁴² xi³ tsi² tsa² ma³cjain¹-le⁴ cˀoa⁴-sˀin² cho⁴ta⁴-le⁴ Cristo ma³ xi³ to⁴tˀa³tsˀe⁴ xˀin⁴-le⁴. Tsa² tsin²-la²ni³ cˀoa⁴-sˀin², je² xti³-no³ to⁴jnti¹ coan⁴ cjoan³, to⁴nca³ ntˀai⁴ cho⁴ta⁴-le⁴ Cristo ma³.
1CO 7:15 Tsa² je² xi³ tsi² ma³cjain¹-le⁴ coa⁴sen⁴tˀa³xin², ca²ta³va³sen²tˀa³xin². Tsa² cˀoa⁴-sˀin² tjin¹ cjoa⁴, je² ntsˀe³² a³xo⁴ ti³chja³² li²coi³ tjin¹ne²-le⁴ nca³ coa⁴tio⁴cao⁴ xi³ tsi² ma³cjain¹-le⁴. To⁴sa³ Ni³na¹ qui³nchja⁴-na¹ nca³ nchˀan¹ coi⁴yoa³².
1CO 7:16 Jo¹-sˀin² ˀya³-ni³ ji³ chjon⁴² tsa² tsi² cˀoa⁴-sˀin² chˀa⁴sje³ntjai² xˀin⁴-li⁴, a³xo⁴ jo¹-sˀin² ˀya³-ni³ ji³ xˀin⁴ tsa² tsi² cˀoa⁴-sˀin² chˀa⁴sje³ntjai² chjon⁴²-li⁴.
1CO 7:17 Jo³-sˀin² nca³ je² Nai³-na¹ qui³si³cˀa³vi¹-le⁴ nca³ jnco¹jnco¹, cˀoa⁴ jo³-sˀin² nca³ Ni³na¹ qui³nchja⁴-le⁴ nca³ jnco¹jnco¹, cˀoa⁴-sˀin² ca²tˀe¹ma³. Cˀoa⁴-sˀin² vˀe³ne²³-le⁴ nca³tsˀi³ cho⁴ta⁴-le⁴ Cristo.
1CO 7:18 A³ tjin¹ cˀa³ xi³ je³coan³-le⁴ cjoa⁴circuncisión nca³ qui³no²cjoa⁴-le⁴. Cˀoa⁴-sˀin² ca²ta³vˀe²jna³. A³ tjin¹ cˀa³ xi³ cje³ ma³-jin²le⁴ cjoa⁴circuncisión nca³ qui³no²cjoa⁴-le⁴. A³li² cjoa⁴circuncisión-jin² va¹sjai³.
1CO 7:19 Je² cjoa⁴circuncisión li²jme³-jin². Je² xi³ tsi² cjoa⁴circuncisión, cˀoa⁴-ti⁴ li²jme³-jin². To⁴je² xi³ chji¹-le⁴ nca³ ni²tjo³son²-le⁴² cjoa⁴te¹xo³ma³-le⁴ Ni³na¹.
1CO 7:20 Jnco¹jnco¹ jo³-sˀin² tjio¹ cˀia⁴ nca³ qui³no²cjoa⁴-le⁴, cˀoa⁴-sˀin² ca²tˀe²yo³.
1CO 7:21 A³ ji³ qui³no²cjoa⁴-li² nca³ cho⁴ˀnta³ mai³. A³li² cˀoa⁴-jin² ma³-li². To⁴nca³ tsa² cˀoa⁴-ti⁴ coan⁴-li² nca³ coi⁴jna³ntai¹, to⁴sa³ nta³ nca³ coi³ ti⁴chjain¹³.
1CO 7:22 Je² xi³ qui³no²cjoa⁴-le⁴ nca³ ti¹jna³cao⁴ Nai³-na¹ nca³ cho⁴ˀnta³ ma³, ti¹jna³ntai¹ nca⁴ tsˀe⁴ Nai³-na¹. Cˀoa⁴-ti⁴sˀin²ni³ je² xi³ cˀoa⁴-sˀin² qui³no²cjoa⁴-le⁴ nca³ ti¹jna³ntai¹ cho⁴ˀnta³-le⁴ Cristo ni¹.
1CO 7:23 Chji¹ tsa³qui³nta³-ni³no³, a³li² cho⁴ˀnta³-le⁴ cho⁴ta⁴-jin² mao³.
1CO 7:24 Nca³ jnco¹jnco¹, ntsˀe³², jo³-sˀin² qui³no²cjoa⁴-le⁴, cˀoa⁴-sˀin² ca²tˀe²yo³cao⁴ Ni³na¹.
1CO 7:25 To⁴nca³ xi³ tˀa³tsˀe⁴ ya¹nchjin¹xo³nco¹, tsin²-na³ cjoa⁴te¹xo³ma³ xi³ tsˀe⁴ Nai³-na¹. To⁴nca³ cˀoa⁴-sˀin² co³son²-le⁴ an³, jo³-ni³ tsa² jnco³ xi³ qui³cho²tjen⁴nqui³ cjoa⁴ma⁴ta³con²-le⁴ Nai³-na¹ nca³ nˀion¹tˀa³con³ ma³.
1CO 7:26 To⁴tˀa³tsˀe⁴ je² cjoa⁴ñˀain³ xi³ tjin¹ ntˀai⁴-vi⁴, si³cja³ˀai³tsjen³-nia¹³ nca³ nta³-ni³ tsa² cho⁴ta⁴ cˀoa⁴-sˀin² ca²ta³tio² jo³-sˀin² tjio¹.
1CO 7:27 A³ je³chi³xan³coai⁴ chjon⁴². A³li² ma³sjai³-jin²li² nca³ coi⁴njioin¹³. A³ cje³ vi³xan³cao⁴-jin² chjon⁴². A³li² chjon⁴²-jin² vi³jnchi³-lai⁴ yao³-li⁴.
1CO 7:28 To⁴nca³ tsa² coi⁴xan³coai⁴ chjon⁴², a³li² je¹-jin² xi³ vi³jnchi³. Cˀoa⁴ tsa² je² chjon⁴²xo³nco¹ coi⁴xan³, a³li² je¹-jin² xi³ va³jnqui³. To⁴nca³ je² xi³ cˀoa⁴sˀin¹, sˀe⁴-le⁴ cjoa⁴ñˀain³ yao³-le⁴, to⁴nca³ an³ cjoa³ˀa³xin²-no³ je² cjoa⁴ñˀain³-vi⁴.
1CO 7:29 Je²-vi⁴ xi³ cˀoa⁴xian³ ntsˀe³², nca³ je² ni⁴čhjin³ choa³ ni¹. Je² ni⁴čhjin³ xi³ cha³-sa³, je² xi³ tjin¹-le⁴ ya¹nchjin¹, cˀoa⁴-sˀin² ca²ta³tio¹ jo³-ni³ je² xi³ tsin²-le⁴.
1CO 7:30 Cˀoa⁴ je² xi³ cji³ˀntia¹va³ jo³-ni³ je² xi³ tsi² cji³ˀntia¹va³. Cˀoa⁴ je² xi³ tjin¹-le⁴ cjoa⁴tsjoa³ jo³-ni³ je² xi³ tsin²-le⁴ cjoa⁴tsjoa³. Cˀoa⁴ je² xi³ va³tse³ jo³-ni³ je² xi³ tsi²jme³ tjin¹-le⁴.
1CO 7:31 Cˀoa⁴ je² xi³ si¹chjen¹ xi³ tsˀe⁴ son³ˀnte³ jo³-ni³ je² xi³ tsi² tsa² nˀion¹ si¹chjen¹, nca⁴ je² xi³ ma³tsen³ son³ˀnte³-vi⁴ to⁴fa³ˀa³to³ ni¹.
1CO 7:32 Me³-na³ nca³ cˀoa⁴-sˀin² coi⁴yo³ nca³ tsi²jme³ xi³ jo³ ma³-no³. Je² xˀin⁴ xi³ ti¹jna³cˀan², to⁴coi³ xi³ cˀoa⁴ma³-le⁴ je² cjoa⁴ xi³ tsˀe⁴ Nai³-na¹, jo³-sˀin² nca³ nta³ si¹tsjoa³-le⁴ Nai³-na¹.
1CO 7:33 To⁴nca³ je² xi³ je³chi³xan³, to⁴coi³ xi³ cˀoa⁴ma³-le⁴ cjoa⁴-le⁴ son³ˀnte³, jo³-sˀin² nca³ nta³ si¹tsjoa³ya³-le⁴ chjon⁴²-le⁴.
1CO 7:34 Cˀoa⁴-ti⁴sˀin²ni³ nca³ cja⁴ˀai¹-sˀin² tjio¹ cao⁴ je² chjon⁴² xi³ je³chi³xan³ cao⁴ je² chjon⁴²xo³nco¹. Je² chjon⁴²xo³nco¹ nqui²sa⁴ cˀoa⁴ma³-le⁴ je² cjoa⁴ xi³ tsˀe⁴ Nai³-na¹, jme¹-ni³ nca³ tsje³ coan⁴-si¹ni³ cao⁴ yao³-le⁴, jo³-ni³ cao⁴ espíritu-le⁴. To⁴nca³ je² chjon⁴² xi³ je³chi³xan³, to⁴coi³ xi³ cˀoa⁴ma³-le⁴ cjoa⁴-le⁴ son³ˀnte³, jo³-sˀin² nca³ nta³ si¹tsjoa³ya³-le⁴ xˀin⁴-le⁴.
1CO 7:35 Je²-vi⁴ cˀoa⁴xin³-no³, jme¹-ni³ nca³ nta³ coi⁴yo³-si¹nio³, li²coi³ nca³ si³qui³ncha¹tˀa³nˀion¹-no³, to⁴nca³ jme¹-ni³ nca³ nta³ coi⁴ma³-si¹nio³, cˀoa⁴ nca³ nta³ si⁴sin³-si¹ni³lao⁴³ Nai³-na¹, nca³ tsi² tsa² jme³ xi³ coa⁴te²chjoa²-no³.
1CO 7:36 Tsa² jnco³ xi³ chˀao³ tjin¹-ni³le⁴ cjoa⁴ nca³ to⁴jo³ cje³ vi³xan³-jin² tso²ti³-le⁴ nta³ tsa² je³coan³jchi¹nca³, cˀoa⁴ tsa² nta³ tjin¹-ni³ nca³ cˀoa⁴coan⁴, cˀoa⁴ ca²ta³sˀin¹ jo³-sˀin² nca³ me³-le⁴. A³li² je¹-jin² va³jnqui³. Ca²ta³vi³xan³.
1CO 7:37 To⁴nca³ je² xi³ nˀion¹ qui²xi⁴ tjin¹ ni⁴ma⁴-le⁴, cˀoa⁴ nca³ tsi²jme³ cjoa⁴nˀion¹ tjin¹-le⁴, to⁴nca³ tjin¹-le⁴ ˀnte³ jo³-sˀin² me³-le⁴, cˀoa⁴ nta³ qui³sco³son²-le⁴ ja⁴jin³ ni⁴ma⁴-le⁴ je²-vi⁴, nca³ cˀoa⁴-sˀin² nta³ ti¹jna³tjao²-le⁴ je² tso²ti³xo³nco¹-le⁴, nta³ sˀin¹.
1CO 7:38 Cˀoa⁴-sˀin² nca³ je² xi³ si¹qui³xan³, nta³ sˀin¹, cˀoa⁴ je² xi³ tsi² tsa² tsjoa¹ nca³ vi³xan³, to⁴sa³ nqui²sa⁴ nta³ sˀin¹.
1CO 7:39 Je² chjon⁴² xi³ je³chi³xan³, cˀoa⁴-sˀin² ti¹jna³nˀion¹tˀa³-le⁴ xˀin⁴-le⁴, cˀia⁴ nca³ ti¹jna³con³-sa³ xˀin⁴-le⁴, to⁴nca³ tsa² je² xˀin⁴-le⁴ coi⁴ya², ti¹jna³ntai¹. Ca²ta³vi³xan³cao⁴ to⁴ˀya³-ni³ xi³ me³-le⁴, tsa² nca³ tjio¹cao⁴ Nai³-na¹.
1CO 7:40 To⁴nca³ nqui²sa⁴ to⁴nta³-le⁴ tsa² to⁴cˀoa⁴-sˀin² cˀoe¹jna³, jo³-sˀin² co³son²-le⁴ an³. Cˀoa⁴ si³cja³ˀai³tsjen³-nia¹³ nca³ cˀoa⁴-ti⁴ tjin¹-na³ je² Espíritu Santo xi³ tsˀe⁴ Ni³na¹.
1CO 8:1 Xi³ tˀa³tsˀe⁴ je² tso³jmi² xi³ vˀai²tˀa³-le⁴ xco¹son², ˀya³-nia¹ nca³ nca³tsˀia³² tjin¹-na¹ cjoa⁴chji⁴ne⁴. Je² cjoa⁴chji⁴ne⁴ si¹ncˀa³con³, to⁴nca³ je² cjoa⁴tjao²cha³ si¹quin³ncˀa³.
1CO 8:2 Tsa² jnco³ xi³ ma³jin³con³ nca³ ma³cho⁴ya³-le⁴, cje³ jme³-jin² xi³ ve³, jo³-sˀin² tjin¹-ni³ nca³ scoe⁴.
1CO 8:3 To⁴nca³ tsa² jnco³ xi³ tsjoa³que³ Ni³na¹, Ni³na¹ xi³ nta³ ve³ nca³ je².
1CO 8:4 Xi³ tˀa³tsˀe⁴ je² tso³jmi² xi³ ma³chi³ne³ xi³ vˀai²tˀa³-le⁴ xco¹son², ˀya³-nia¹ nca³ je² xco¹son² ni⁴jme³-jin² i⁴ son³ˀnte³-vi⁴, nca³ tsi² tsa² tjin¹-sa³ xi³ cja⁴ˀai¹, to⁴jnco³ Ni³na¹.
1CO 8:5 Nta³ tsa² cˀoa⁴-sˀin² tjin¹ xi³ Ni³na¹ ˀmi²-le⁴, a³xo⁴ ya⁴ ncˀa³jmi³, a³xo⁴ i⁴ son³ˀnte³ (nca³ cˀoa⁴-sˀin² ncjin² ni³na¹ tjin¹, cˀoa⁴ ncjin² xi³ nai³ ma³),
1CO 8:6 to⁴nca³ ña¹ to⁴jnco³ Ni³na¹ xi³ tjin¹-na¹, je² Nˀai³-na¹, jña³-le⁴ xi³ je² ji³nčhoa³-ni³ nca³yi³je³ cjoa⁴. Cˀoa⁴ ña¹ tjian¹ xi³ tˀa³tsˀe⁴. Cˀoa⁴ jnco³ Nai³-na¹ Jesucristo xi³ tjin¹-na¹, xi³ to⁴tˀa³tsˀe⁴ coan³nta³-ni³ nca³yi³je³, cˀoa⁴ xi³ to⁴tˀa³tsˀe⁴ tjian¹.
1CO 8:7 To⁴nca³ li²coi³ nca³tsˀi³ xi³ tjin¹-le⁴ je² cjoa⁴chji⁴ne⁴. Tjin¹ cˀa³ xi³ cˀoa⁴-sˀin² coan³nca³cao⁴-le⁴ xco¹son² sa³ˀnta³ ntˀai⁴-vi⁴. Cˀoa⁴-sˀin² cji³ne³ je² cjoa⁴tjao²-ve⁴ jo³-ni³ tsa² xi³ cjoa⁴qui²xi⁴ vˀai²tˀa³-le⁴ xco¹son². Je² cjoa⁴fa³ˀai³tsjen³-le⁴ nca³ choa³con³ cˀoa⁴ma³-le⁴ xi³ je¹ tjin¹-le⁴ ma³-le⁴.
1CO 8:8 Je² tso³jmi² xi³ chi³ne³² li²coi³ je² xi³ nqui²sa⁴ nta³ sa³sen¹con³-le⁴² Ni³na¹. Nta³ tsa² coi⁴cha², li²coi³ nqui²sa⁴ ncˀa³ coan⁴². Nta³ tsa² tsi² coi⁴cha², li²coi³ nqui²sa⁴ na³nqui³ coan⁴².
1CO 8:9 To⁴nca³ cho¹tsaon³ jo³-sˀin² si⁴chjaon¹³ cjoa⁴ntai¹-no³, nca³ tsi² ya⁴ sa⁴te¹nqui³ je² xi³ choa³con³.
1CO 8:10 Tsa² jnco³ xi³ scoe⁴-li² nca³ ji³ xi³ tjin¹-li² cjoa⁴chji⁴ne⁴, nca³ ya⁴ ti³jna³tˀai³ ya¹mi²xa⁴ ya⁴ ˀnte³-le⁴ xco¹son², cˀoa⁴ je² cjoa⁴fa³ˀai³tsjen³-le⁴ je² xi³ choa³con³ a³ tsi² ti⁴cˀoa⁴-sˀin²ni³ coan⁴nˀion¹-ni³con³ nca³ squi⁴ne⁴ je² cjoa⁴tjao² xi³ cˀoa⁴-sˀin² vˀai²tˀa³-le⁴ xco¹son².
1CO 8:11 Cˀoa⁴ xi³ to⁴tˀa³tsˀe⁴ je² cjoa⁴chji⁴ne⁴-li⁴ cha⁴jin³ je² xi³ choa³con³, je² ntsˀe³² xi³ Cristo cˀen³ tˀa³tsˀe⁴.
1CO 8:12 Cˀoa⁴ nca³ cˀoa⁴-sˀin² vi³jnchi³tˀa³-lao⁴³ je¹ ntsˀe³², nca³ ni²qui²ˀaon³ je² cjoa⁴fa³ˀai³tsjen³-le⁴ je² xi³ choa³con³, cˀoa⁴-ti⁴sˀin² vi³jnchi³tˀa³-lao⁴³ je¹ Cristo.
1CO 8:13 To⁴coi³ je²-vi⁴ tsa² je² tso³jmi² xi³ chi³ne³ si⁴²ca³jin³-ni³ je¹ ntsˀe³, ni⁴cˀia³-jin² ti⁴squi²ne⁴-nia³ yao³, jme¹-ni³ nca³ tsi² tsa² an³ si³ca³jin³-si¹nia³ je¹ ntsˀe³.
1CO 9:1 A³ tsi² tsa² an³ pa²stro⁴. A³ tsi² ti²jna⁴nte¹³ nca³ an³. A³ tsi² tsa² tsa³ˀve³ je² Jesús Nai³-na¹. A³ tsi² tsa² jon² xi³ xa¹-na⁴ xi³ tˀa³tsˀe⁴ je² Nai³-na¹.
1CO 9:2 Tsa² je² xi³cˀa³ tso² nca³ tsi² an³ pa²stro⁴, to⁴nca³ jon² nio¹³ xi³ cjoa⁴qui²xi⁴ ˀyao³ nca³ an³ pa²stro⁴ nia¹³, nca⁴ jon² nio¹³ jo³-ni³ sello xi³ tsˀe⁴ cjoa⁴pa²stro⁴-na⁴ nca³ ti³yo³coa⁴² Nai³-na¹.
1CO 9:3 Cˀoa⁴-sˀin² si³cˀo¹fa³-le⁴ en¹ je² xi³ vi²na³nqui³-na³.
1CO 9:4 A³ tsi² tsa² tjin¹-na³jin⁴ ˀnte³ nca³ sˀoi⁴-jin⁴ nca³ coi⁴chi³-jin⁴.
1CO 9:5 A³ tsi² tsa² tjin¹-na³jin⁴ ˀnte³ nca³ coan³nquin¹coai⁴-jin⁴ jnco³ chjon⁴² xi³ ti³chja² mai³-jin⁴, cˀoa⁴-ti⁴sˀin² jo³-sˀin² xi³cˀa³ pa²stro⁴, cˀoa⁴ je² ntsˀe⁴ xi³ tsˀe⁴ Nai³-na¹, cˀoa⁴ Cefas.
1CO 9:6 A³xo⁴ to⁴ˀan³ nia¹³ cao⁴ Bernabé xi³ tsi² tjin¹-na³jin⁴ ˀnte³ nca³ tsi² si⁴xa¹-ni³jin⁴ ntsai⁴-jin⁴.
1CO 9:7 ˀya¹ so³nta²do⁴ xi³ ti⁴je² vˀe¹chji¹-ni³le⁴ yao³-le⁴. ˀya¹ xi³ vˀe¹ntje² tso³jmi²ntje², cˀoa⁴ nca³ tsi² cji³ne³-ni³ to³-le⁴. Cˀoa⁴ ˀya¹ xi³ co³ˀnta³ cho⁴, cˀoa⁴ nca³ tsi² squi⁴ne⁴ xi³ ma³ nta¹chi³qui³-le⁴ cho⁴-ve⁴.
1CO 9:8 A³ cˀoa⁴²xian³ je²-vi⁴ jo³ tso² cho⁴ta⁴. A³ tsi² cˀoa⁴-ti⁴ tso² cjoa⁴te¹xo³ma³.
1CO 9:9 Je² cjoa⁴te¹xo³ma³ xi³ tsˀe⁴ Moisés cˀoa⁴-sˀin² tji¹tˀa³: A³li² na⁴ˀya³-jin² vˀe²ˀai³ nčha⁴ja⁴ cˀia⁴ nca³ vˀe¹ne² tso³-jmi². A³ tjin¹-le⁴ coi²nta⁴ Ni³na¹ xi³ tsˀe⁴ nčha⁴ja⁴.
1CO 9:10 A³xo⁴ tsi² tsa² nchja⁴ Ni³na¹ xi³ to⁴tˀa³tsan⁴². Xi³ tˀa³tsan⁴² cˀoa⁴-sˀin² qui³sˀe³tˀa³ nca³ je² xi³ nčha⁴ja⁴ si¹cˀe¹nchi³, cˀoa⁴-sˀin² si¹cˀe¹nchi³ nca³ tjin¹ xi³ co³ya³-le⁴, cˀoa⁴ je² xi³ vˀe¹ne² tso³jmi², ti¹co³ya³-le⁴ nca³ scoe¹ xi³ ti¹vˀe¹ne².
1CO 9:11 Tsa² jin⁴-jin⁴ tsa³cˀe²ntje²-lai²⁴jin⁴ je² xi³ tsˀe⁴ espíritu, a³ tsi² nta³ tjin¹ tsa² cˀoa⁴-ti⁴ cˀoe¹xcoi¹⁴-jin⁴ je² xi³ coi³ tso³jmi²-no³.
1CO 9:12 Tsa² je² xi³cˀa³ tjin¹-le⁴ ˀnte³ xi³ tˀa³tsaon⁴³, a³ tsi² nqui²sa⁴ tse³ ˀnte³ tjin¹-na³jin⁴ nca³ jin⁴-jin⁴, to⁴nca³ li²coi³ qui³ni²chjain¹-jin⁴ je² ˀnte³, to⁴sa³ nca³yi³je³ cjoa⁴ñˀain³ jcho¹cjoa⁴-na³jin⁴, jme¹-ni³ nca³ tsi² tsa² coi³ cˀoe¹chjoa²-si¹ni³lai⁴jin⁴ je² en¹nta³ xi³ tˀa³tsˀe⁴ Cristo.
1CO 9:13 A³ tsi² tsa² ˀyao³ nca³ je² xi³ si¹xa¹ ya⁴ ˀnte³tsje³, cji³ne³ tso³jmi² xi³ nčhoa¹-ni³ ya⁴ ˀnte³tsje³, cˀoa⁴ je² xi³ si¹sin³ son²xta², cˀoa⁴-ti⁴ vˀa³cao⁴tˀa³-le⁴ tso³jmi² xi³ tsˀe⁴ son²xta².
1CO 9:14 Cˀoa⁴-ti⁴sˀin²ni³ je² Nai³-na¹ tsa³cˀe¹ne² nca³ je² xi³ nchja⁴ya³ je² en¹nta³ xi³ tˀa³tsˀe⁴ Cristo nca³ coi³ coa⁴tio⁴con³-ni³.
1CO 9:15 To⁴nca³ an³ ni⁴jme³-jin² qui³si³cˀa³-nia³ coan³ je²-vi⁴. Ni⁴cˀoa⁴-jin²sˀin² qui³squi³tˀa³ je²-vi⁴, jme¹-ni³ nca³ cˀoa⁴si⁴cao⁴-si¹ni³na³ nca³ an³. An³ nqui²sa⁴ nta³ tjin¹-na³ tsa² coi³ya¹³ coa⁴-ni³ tsa² ˀya³ xi³ cjoa⁴ˀa²xin²-na³ je² cjoa⁴qui²xi⁴ xi³ tjin¹-na³ nca³ vˀa³sje³je³ya²³ yao³-na⁴.
1CO 9:16 Tsa² cˀoa⁴-sˀin² nchja²ya³ je² en¹nta³ xi³ tˀa³tsˀe⁴ Cristo, tsi²jme³ cjoa⁴qui²xi⁴ xi³ tjin¹-na³ nca³ vˀa³sje³je³ya²³ yao³-na⁴, nca³ to⁴cjoa⁴nˀion¹ sˀe³ne²-na³. Ma⁴xo¹-nia³ tsa² tsi² coi³nchja²ya³ je² en¹nta³ xi³ tˀa³tsˀe⁴ Cristo.
1CO 9:17 Tsa² cˀoa⁴sˀian³ nca⁴ cˀoa⁴-sˀin² me³-na³, sˀe⁴ chji¹-na⁴, to⁴nca³ tsa² tsi² cˀoa⁴-sˀin² me³-na³, to⁴jo³ cˀoa⁴-sˀin² cjoa⁴nˀion¹ qui³sˀe³ne²-na³ xa¹-ve⁴.
1CO 9:18 Jña¹-le⁴ tso²cˀoa⁴ je² xi³ chji¹-na⁴. Coi³, cˀia⁴ nca³ an³ coi³nchja²ya³ je² en¹nta³ xi³ tˀa³tsˀe⁴ Cristo, cˀoe³jna²cjoa⁴tjoa²³ je² en¹nta³ tˀa³tsˀe⁴ Cristo, jme¹-ni³ nca³ tsi² chˀao³-sˀin² si³chjen¹-si¹nia³ je² ˀnte³ xi³ tjin¹-na³ xi³ tˀa³tsˀe⁴ je² en¹nta³ tˀa³tsˀe⁴ Cristo.
1CO 9:19 Nta³ tsa² ntai¹ ti²jna⁴-le⁴ nca³tsˀi³, cˀoa⁴-sˀin² cho⁴ˀnta³-le⁴ nca³tsˀi³ tsa³cˀe³nta³-nia³ yao³-na⁴, jme¹-ni³ nca³ nqui²sa⁴ ncjin² cho⁴ta⁴ si³qui³njen³-si¹nia³ tˀa³tsˀe⁴ Cristo.
1CO 9:20 An³ coan³ jo³-ni³ cho⁴ta⁴ judío xi³ tˀa³tsˀe⁴ cho⁴ta⁴ judíos, jme¹-ni³ nca³ si³qui³njen³-si¹nia³ cho⁴ta⁴ judíos. Cˀoa⁴ xi³ tˀa³tsˀe⁴ je² xi³ tjio¹nqui³-le⁴ cjoa⁴te¹xo³ma³, cˀoa⁴-ti⁴sˀin² coan³ jo³-ni³ xi³ tjio¹nqui³-le⁴ cjoa⁴te¹xo³ma³, (nta³ tsa² tsi² an³ va²te⁴jna³nqui³-le⁴ cjoa⁴te¹xo³ma³) jme¹-ni³ nca³ si³qui³njen³-si¹nia³ je² xi³ cˀoa⁴-sˀin² tjio¹nqui³-le⁴ cjoa⁴te¹xo³ma³.
1CO 9:21 Cˀoa⁴ xi³ tˀa³tsˀe⁴ je² xi³ tsin²-le⁴ cjoa⁴te¹xo³ma³, cˀoa⁴-ti⁴ coan³ an³ jo³-ni³ je² xi³ tsin²-le⁴ cjoa⁴te¹xo³ma³-jin², (li²coi³ cˀoa⁴coan³ an³ jo³-ni³ tsa² tsin²-na³ cjoa⁴te¹xo³ma³-jin², to⁴nca³ ti²jna⁴nquia³ cjoa⁴te¹xo³ma³-le⁴ Cristo) jme¹-ni³ nca³ si³qui³njen³-si¹nia³ tˀa³tsˀe⁴ Ni³na¹ je² xi³ cˀoa⁴-sˀin² tsin²-le⁴ cjoa⁴te¹xo³ma³-jin².
1CO 9:22 Cˀoa⁴ xi³ tˀa³tsˀe⁴ je² xi³ choa³con³, cˀoa⁴-ti⁴ an³ choa³coan³, jme¹-ni³ nca³ si³qui³njen³-si¹nia³ je² xi³ cˀoa⁴-sˀin² choa³con³. Xi³ tˀa³tsˀe⁴ nca³tsˀi³, cˀoa⁴-sˀin² coan³ an³ nca³yi³je³, jme¹-ni³ nca³ to⁴jo³ cˀoa⁴sˀin³-nia³ nca³ cˀoa³sje³ntjai²cˀa³-nia³.
1CO 9:23 Cˀoa⁴ je²-vi⁴ cˀoa⁴sˀian³ xi³ tˀa³tsˀe⁴ en¹nta³ tˀa³tsˀe⁴ Cristo, jme¹-ni³ nca³ to⁴jnco³ cˀoa⁴cao⁴tˀa³-si¹ni³na³ cao⁴ je².
1CO 9:24 A³ tsi² tsa² ˀyao³ je² xi³ to³ca³na⁴cha⁴, cjoa⁴qui²xi⁴-ni¹ nca³ nca³tsˀi³ to³ca³, to⁴nca³ to⁴jnco³ xi³ si¹qui³njen³ cjoa⁴tjao². Cˀoa⁴-sˀin² to¹cao⁴³, jme¹-ni³ nca³ cˀoa⁴-sˀin² chjoe¹-si¹nio³ cjoa⁴tjao².
1CO 9:25 Cˀoa⁴ to⁴ˀya³-ni³ve⁴ xi³ cˀoa⁴-sˀin² si¹ta²ja³, cjoe¹xco¹-le⁴ yao³-le⁴ nca³yi³je³. Je²-vi⁴ xi³ cˀoa⁴sˀin¹, jme¹-ni³ nca³ si⁴²qui³njen³-si¹ni³ jnco³ corona xi³ to⁴fi³tson³, to⁴nca³ ña¹ jnco³ corona xi³ tsi² cˀia³ fi³tson³.
1CO 9:26 Cˀoa⁴-sˀin² an³ to³ca³, li²coi³ jo³-ni³ tsa² je² xi³ tsi² ve³ qui²xi⁴. Cˀoa⁴-sˀin² cjan²coa⁴, li²coi³ jo³-ni³ jnco³ xi³ to⁴vˀe¹ jin³sen¹.
1CO 9:27 To⁴sa³ si³qui²ˀoan³ yao³-na⁴, cˀoa⁴-sˀin² vˀe³ne²³-le⁴ yao³-na⁴, jo³-ni³ tsa² jnco³ cho⁴ˀnta³, jme¹-ni³ nca³ tsi² tsa² an³ chja³ˀa²xin²-ni³na³ cjoa⁴tjao² cˀia⁴ nca³ an³ xi³ cˀoa⁴-sˀin² qui³nchja²ya³jin³-le⁴ xi³cˀa³.
1CO 10:1 Li²coi³ me³-na³, ntsˀe³, nca³ tsi² jchao⁴³ nca³ je² nˀai³-na¹ tsa³ca³tio²nqui³ yo³jvi³, cˀoa⁴ nca³tsˀi³ ja³ˀa³to³jin³ nta¹chi³con³.
1CO 10:2 Cˀoa⁴ nca³tsˀi³ qui³sa³te²nta¹tˀa³-le⁴ Moisés ya⁴jin³ yo³jvi³, cˀoa⁴ ya⁴jin³ nta¹chi³con³.
1CO 10:3 Cˀoa⁴ nca³tsˀi³ ti⁴coi³ qui³squi³ne³-ni³ je² tso³jmi² xi³ tsˀe⁴ espíritu.
1CO 10:4 Cˀoa⁴ nca³tsˀi³ ti⁴coi³ tsa³cˀi³-ni³ xi³ tsˀe⁴ espíritu, nca³ qui³tsˀi³-ni³ tsˀe⁴ je² la⁴jao⁴ xi³ tsˀe⁴ espíritu xi³ qui³tjen⁴nqui³-le⁴, cˀoa⁴ je² la⁴jao⁴-vi⁴ Cristo ni¹.
1CO 10:5 Ncjin² xi³ tsˀe⁴ li²coi³ qui³sa³sen³-le⁴ Ni³na¹. Xi³ coi³ qui³tsao³va³ ya⁴ ˀnte³tˀa³xin²tˀa³.
1CO 10:6 Je² cjoa⁴-vi⁴ xi³ cˀoa⁴coan³ nca³ qui³si³cho⁴ya³-na¹, jme¹-ni³ nca³ tsi² coan⁴xin²ta³con²-si¹ni³le⁴² tso³jmi² xi³ chˀao³ tjin¹, jo³-sˀin² nca³ je² coan³xin²con³-le⁴.
1CO 10:7 A³li² cˀoa⁴-jin²sˀin² ˀya³xcon¹³ xco¹son², jo³-sˀin² qui³sˀin³ cˀa³ nca³ je², jo³-sˀin² nca³ tji¹tˀa³: Tsa³ca³tio² je² na⁴xi⁴na³nta¹-ve⁴ nca³ tsa³cjen² tsa³cˀi³, cˀoa⁴ tsa³ca³sen²nto³ nca³ qui³te².
1CO 10:8 A³li² ni²cha³jnqui³-jian², jo³-sˀin² qui³si³cha³jnqui³ cˀa³ nca³ je², cˀoa⁴ nca³ to⁴jnco³ ni⁴čhjin³ can³jan² jmi³ qui³tsao³.
1CO 10:9 Ni⁴chˀao³ si⁴cao⁴-jian² Nai³-na¹ jo³-ni³ nca³ tjin¹ cˀa³ nca³ je² qui³si³cao⁴, cˀoa⁴ cˀen³ nca³ tsa³cˀe¹-le⁴ ye⁴.
1CO 10:10 Ni⁴sa³yo³je¹tˀa³-jion²³, jo³ qui³sˀin³ cˀa³ nca³ je² nca³ tsa³cja³yo³je¹tˀa³, cˀoa⁴ cˀen³, nca³ je² xi³ qui³si³xo²ya³ qui³si³cˀen³.
1CO 10:11 Cˀoa⁴ je² cjoa⁴-vi⁴ cˀoa⁴coan³-le⁴ nca³ qui³si³cho⁴ya³-le⁴, to⁴nca³ cˀoa⁴-sˀin² qui³chji³tˀa³ nca³ va³co¹ya³-na¹ nca³ ña¹ xi³ je³ja³ˀai³ne²-na¹ je² ni⁴čhjin³ xi³ fe³tˀa³-ni³.
1CO 10:12 Cˀoa⁴-sˀin² nca³ je² xi³ si¹cja³ˀai³tsjen³ nca³ nˀion¹ qui²xi⁴ ti¹jna³, ca²ta³si¹coi²nta⁴ yao³-le⁴ nca³ tsi² sca⁴.
1CO 10:13 Ni⁴jme³-jin² cjoa⁴ xi³ chˀao³ si¹cao⁴-no³ xi³ tsi² tsa² cˀoa⁴-ti⁴ chˀao³ si¹cao⁴ nca³tsˀi³ cho⁴ta⁴. To⁴nca³ nˀion¹tˀa³con³ Ni³na¹, xi³ tsi² tsa² tsjoa¹ˀnte³ nca³ nqui²sa⁴ tse³ si⁴²cao⁴-no³ cao⁴-ni³ tsa² je² nca³nˀion¹-no³. Cˀia⁴ nca³ chˀao³ si¹cao⁴-no³, Ni³na¹ ña³tjen⁴ tsjoa¹ jo³-sˀin² coi²tjo⁴³, jme¹-ni³ nca³ coan⁴ jcho¹cjoa⁴-si¹ni³no³.
1CO 10:14 To⁴coi³, ntsˀe³ xi³ tsjoa³que⁴-no³, ti⁴ncha³xin²-lao⁴³ cjoa⁴-le⁴ xco¹son².
1CO 10:15 An³ nchja²³-no³ jo³-ni³ tsa² cho⁴ta⁴ xi³ nta³ tjin¹-le⁴ cjoa⁴fa³ˀai³tsjen³. Cho¹son²-ni³lao⁴³ nca³ jon² je² xi³ xian³.
1CO 10:16 Je² xi³ ˀyoa³² xi³ ma³chi³con³tˀain³, xi³ nta³ ni²chi³con³tˀen³², a³ tsi² tsa² coi³ xi³ njin¹-le⁴ Cristo xi³ ti³yo³cjao³-nia³². Je² nio⁴xti²la⁴ xi³ ni²xcoa⁴², a³ tsi² tsa² coi³ xi³ yao³-le⁴ Cristo xi³ ti³yo³cjao³-nia³².
1CO 10:17 Nca⁴ to⁴jnco³ nio⁴xti²la⁴, cˀoa⁴-sˀin² to⁴jnco³ yao³ nia¹, nta³ tsa² ncjin² ma³-nia¹, nca³ nca³tsˀia³² vˀa³cao⁴tˀa³-na¹ nio⁴xti²la⁴-ve⁴.
1CO 10:18 Cho¹tsen³-lao⁴³ Israel xi³ i⁴ tsˀe⁴ son³ˀnte³-vi⁴. Je² xi³ cjen² cjoa⁴tjao² xi³ qui³tsˀai²tˀa³, a³ tsi² tsa² je² xi³ vˀa³cao⁴tˀa³-le⁴ cao⁴ son²xta².
1CO 10:19 Jme¹ xi³ xian³-vi⁴ tso²cˀoa⁴. A³ tjin¹-le⁴ cjoa⁴qui²xi⁴ xco¹son²-ve⁴, a³xo⁴ a³ tjin¹-le⁴ cjoa⁴qui²xi⁴ je² cjoa⁴tjao² xi³ qui³tsˀai²tˀa³-le⁴ xco¹son².
1CO 10:20 To⁴nca³ cˀoa⁴xian³ nca³ je² xi³ tsjoa¹tˀa³ je² xi³ li² judío-jin², tsjoa¹tˀa³-le⁴ je² nai⁴² xi³ nta³jin³, cˀoa⁴ li²coi³ tsjoa¹tˀa³-le⁴ Ni³na¹. Cˀoa⁴ li²coi³ me³-na³ nca³ jon² to⁴jnco³ coaon⁴³ cao⁴ nai⁴² xi³ nta³jin³.
1CO 10:21 Li²coi³ coan⁴ sˀio⁴yao³ cho⁴tsin¹ xi³ tsˀe⁴ Nai³-na¹ cao⁴ cho⁴tsin¹ xi³ tsˀe⁴ nai⁴² xi³ nta³jin³. Li²coi³ coan⁴ coi⁴yo³tˀao³ ya¹mi²xa⁴ xi³ tsˀe⁴ Nai³-na¹ cao⁴ ya¹mi²xa⁴ xi³ tsˀe⁴ nai⁴² xi³ nta³jin³.
1CO 10:22 A³xo⁴ ña¹ xi³ ni²chi⁴nia⁴² Nai³-na¹. A³ nqui²sa⁴ tjin¹-na¹ nca³nˀion¹ cao⁴-ni³ tsa² je².
1CO 10:23 Nca³yi³je³ tjo³ˀnte³-na¹, to⁴nca³ li²coi³ nca³yi³je³ ma³chjen¹-na¹. Nca³yi³je³ tjo³ˀnte³-na¹, to⁴nca³ li²coi³ nca³yi³je³ nta³ si¹quin³ncˀa³-na¹.
1CO 10:24 Ni⁴ˀya³-jin² xi³ va¹sjai³ nca³ nta³ cˀoe¹jna³ xi³ to⁴tsˀe⁴-ni³, to⁴nca³ ca²ta³va¹sjai³ nca³ nta³ cˀoe¹jna³ xi³ cja⁴ˀai¹.
1CO 10:25 Nca³yi³je³ yao³ xi³ sa³te¹na³ ya⁴ jña³ mˀen³ cho⁴, chi⁴nao⁴³ nca³ tsi² tsa² jme³ xi³ cho¹na³nquio³, jme¹-ni³ nca³ tsi² chˀao³ si⁴²cao⁴-si¹ni³ cjoa⁴fa³ˀai³tsjen³-no³.
1CO 10:26 Nca⁴ tsˀe⁴ Nai³-na¹ je² son³ˀnte³, cˀoa⁴ je² nca³yi³je³ xi³ ncha³ son³ˀnte³-vi⁴.
1CO 10:27 Tsa² jnco³ xi³ tsi² ma³cjain¹-le⁴ xi³ nchja⁴-no³, cˀoa⁴ nca³ me³-no³ nca³ coa⁴nquion¹³, chi⁴nao⁴³ nca³yi³je³ to⁴jme³-ni³ xi³ sa⁴tio² nqui³xcon³ nca³ tsi² tsa² jme³ xi³ cho¹na³nquio³, jme¹-ni³ nca³ tsi² chˀao³ si⁴²cao⁴-si¹ni³ cjoa⁴fa³ˀai³tsjen³-no³.
1CO 10:28 To⁴nca³ tsa² jnco³ xi³ cˀoi⁴coi⁴tso⁴-no³: Je²-vi⁴ xi³ qui³tsˀai²tˀa³-le⁴ xco¹son², a³li² chi⁴ne⁴-jion²³ xi³ to⁴tˀa³tsˀe⁴ je² cho⁴ta⁴ xi³ cˀoa⁴ca²tso²-no³, cˀoa⁴ xi³ to⁴tˀa³tsˀe⁴ cjoa⁴fa³ˀai³tsjen³. Nca⁴ tsˀe⁴ Nai³-na¹ je² son³ˀnte³, cˀoa⁴ je² nca³yi³je³ xi³ ncha³ son³ˀnte³-vi⁴.
1CO 10:29 Cjoa⁴fa³ˀai³tsjen³, xian³, a³li² tsi⁴-jin², to⁴nca³ xi³ tsˀe⁴ xi³jnco³ ni¹. Jme¹ chji¹-le⁴ cjoa⁴ntai¹-na⁴ tsa² cˀoa⁴-sˀin² sˀe⁴-le⁴ cjoa⁴ñˀain³ xi³ to⁴tˀa³tsˀe⁴ cjoa⁴fa³ˀai³tsjen³-le⁴ xi³ cja⁴ˀai¹.
1CO 10:30 Cˀoa⁴ tsa² an³ tsjoa³ cjoa⁴nta³ cˀia⁴ nca³ vˀa³cao⁴tˀa³-na³, a¹-ni³ nca³ cˀoa⁴-sˀin² coi⁴no²cjoa⁴ˀaon³-si¹ni³na³ xi³ to⁴tˀa³tsˀe⁴ je²-ve⁴ jña³-le⁴ xi³ cjoa⁴nta³ tsjoa³-nia³ nca³ cjen².
1CO 10:31 Tsa² vi³cho³, cˀoa⁴ tsa² ˀyo²³, tsa² to⁴jme³-ni³ve⁴ xi³ nˀiaon²³, cˀoa⁴tˀiaon⁴³ nca³yi³je³ xi³ tˀa³tsˀe⁴ cjoa⁴je³ya³-le⁴ Ni³na¹.
1CO 10:32 A³li² chˀao³-jin²sˀin² mai¹cao⁴³ cho⁴ta⁴ judíos cao⁴ cho⁴ta⁴ xi³ li² judío-jin², cˀoa⁴ cao⁴ na⁴xi⁴na³nta¹-le⁴ Ni³na¹,
1CO 10:33 jo³-ni³ nca³ cˀoa⁴-ti⁴ an³ nta³ sa³sen¹con³-le⁴ nca³tsˀi³, nca³ tsi² va³sje²³ xi³ ti⁴ˀan³ ma³chjen¹-na³, to⁴nca³ je² xi³ ma³chjen¹-le⁴ xi³ ncjin², jme¹-ni³ nca³ coi⁴tjo³ntjai²-si¹ni³.
1CO 11:1 Chjen¹nqui³-nao¹³ nca³ an³, jo³-ni³ nca³ cˀoa⁴-ti⁴ an³ cjen³nqui³-le⁴ Cristo.
1CO 11:2 An³ vˀa³sje²nta³-no³, ntsˀe³, nca³ nta³ tjio¹jin³-ta³con²³ tˀa³tsˀan⁴, cˀoa⁴ nca³ vˀe²jin³con³ cjoa⁴qui²xi⁴ jo³-sˀin² nca³ tsa³ca³co³ya²³-no³.
1CO 11:3 To⁴nca³ me³-na³ nca³ jchao⁴³, nca³ Cristo nca³jco⁴-le⁴ nca³tsˀi³ xi³ xˀin⁴. Cˀoa⁴ je² xˀin⁴ nca³jco⁴-le⁴ chjon⁴²-le⁴. Cˀoa⁴ Ni³na¹ xi³ nca³jco⁴-le⁴ Cristo.
1CO 11:4 To⁴ˀya³-ni³ xˀin⁴ xi³ vˀe¹tsˀoa³, a³xo⁴ nchja⁴ya³ tˀa³tsˀe⁴ Ni³na¹, tsa² vˀe¹jtsa³ jco⁴, si¹soa³-le⁴ jco⁴.
1CO 11:5 To⁴nca³ to⁴ˀya³-ni³ chjon⁴² xi³ vˀe¹tsˀoa³ a³xo⁴ nchja⁴ya³ tˀa³tsˀe⁴ Ni³na¹, tsa² tsi² vˀe¹jtsa³ jco⁴, si¹soa³-le⁴ jco⁴, nca³ ti⁴coi³-ni³ tsa² jti¹ ntsja⁴-le⁴.
1CO 11:6 Tsa² je² chjon⁴² li²coi³ vˀe¹jtsa³ jco⁴, cˀoa⁴-ti⁴ ca²ta³sˀe³jon³-le⁴. Tsa² ma³soa³-le⁴ chjon⁴² nca³ sˀe³jon³-le⁴, nca³ jti¹ ntsja⁴-le⁴, ca²ta³vˀe¹jtsa³ jco⁴.
1CO 11:7 Je² xˀin⁴ li²coi³ tjin¹-ni³le⁴ nca³ cˀoe⁴²jtsa³ jco⁴, nca³ cˀoa⁴-sˀin² coan³tsen³ya³ jo³ cjoan³ Ni³na¹, cao⁴ cjoa⁴je³ya³-le⁴. To⁴nca³ je² chjon⁴² cjoa⁴je³ya³-le⁴ ni¹ xˀin⁴-le⁴.
1CO 11:8 A³li² je² xˀin⁴ qui³sˀe³nta³-ni³ chjon⁴², to⁴nca³ je² chjon⁴² qui³sˀe³nta³-ni³ xˀin⁴.
1CO 11:9 Je² xˀin⁴ li²coi³ qui³sˀe³nta³-ni³ xi³ tˀa³tsˀe⁴ chjon⁴², to⁴nca³ je² chjon⁴² qui³sˀe³nta³-ni³ xi³ tˀa³tsˀe⁴ xˀin⁴.
1CO 11:10 To⁴coi³ je² chjon⁴² tjin¹ne²-ni³le⁴ nca³ cˀoe⁴²jtsa³ jco⁴, jo³-ni³ jnco³ choa⁴ xi³ tsˀe⁴ cjoa⁴te¹xo³ma³. Tjin¹ne²-ni³le⁴ nca³ cˀoa⁴sˀin⁴² xi³ tˀa³tsˀe⁴ je² a²ncje⁴.
1CO 11:11 Jo³-sˀin² nca³ tjio¹cao⁴ Nai³-na¹, ni⁴to⁴je²-jin² xˀin⁴ nca³ tsin² chjon⁴², ni⁴je²-jin² chjon⁴² nca³ tsin² xˀin⁴.
1CO 11:12 Jo³-ni³ tsa² je² chjon⁴² qui³sˀe³nta³-ni³ xˀin⁴, cˀoa⁴-ti⁴sˀin²ni³ je² xˀin⁴ qui³sˀe³nta³-ni³ xi³ to⁴tˀa³tsˀe⁴ chjon⁴², to⁴nca³ nca³yi³je³ tsˀe⁴ Ni³na¹ ni¹.
1CO 11:13 Cho¹son²-ni³lao⁴³ nca³ ti⁴jon²-nio³. A³ va³quin²-le⁴ chjon⁴² nca³ cˀoe⁴²tsˀoa³-le⁴ Ni³na¹ nca³ tsi² tji¹jtsa³ jco⁴.
1CO 11:14 Jo³ cjoan³² nca³ to⁴xa¹ cjoan³-nia³² son³ˀnte³, a³ tsi² va³co¹ya³-no³ nca³ je² xˀin⁴ chˀao³ tjin¹-ni³ nca³ ntsja⁴-le⁴ si⁴²nto³.
1CO 11:15 To⁴nca³ je² chjon⁴² nca³ si¹nto³ ntsja⁴-le⁴ coi³ cjoa⁴je³ya³-le⁴, nca³ coi³ xa¹ qui³tsˀai²-le⁴ ntsja⁴-le⁴, nca³ vˀe¹jtsa³ jco⁴ jo³-ni³ pa²ño⁴ coan⁴-le⁴.
1CO 11:16 Tsa² jnco³ xi³ me³-le⁴ nca³ to⁴cja⁴ˀai¹ coi⁴tso⁴, ca²ta³ve³ nca³ jin⁴-jin⁴ li²coi³ cja⁴ˀai¹-sˀin² nca³-na³jin⁴, ni⁴je²-jin² na⁴xi⁴na³nta¹-le⁴ Ni³na¹.
1CO 11:17 To⁴nca³ je²-vi⁴ xi³ vˀe³ne²³-ni³no³, cˀoa⁴ li²coi³ nta³ vˀa³sje²³-no³ nca³ jon² nca³ cˀoa⁴-sˀin² tsi² nta³ nˀiaon²³, to⁴chˀao³ nˀiaon²³ nca³ ma³ñao³.
1CO 11:18 Ti¹tjon² je²-vi⁴, cˀia⁴ nca³ ma³ñao³ jon² xi³ na⁴xi⁴na³nta¹-le⁴ Cristo ˀmi²-no³, nčhˀoe³-nia³ nca³ cˀoa⁴-sˀin² ncjin² ya³ ma³-nio³. Cˀoa⁴ ma³cjain¹ˀi⁴tse¹-na³.
1CO 11:19 Ma³chjen¹ nca³ tjin¹ ya⁴jin³-no³ nca³ jon² xi³ cja⁴ˀai¹ tso², jme¹-ni³ nca³ je² xi³ cho⁴ta⁴cjoa⁴qui²xi⁴ coan⁴tsen³jin³-si¹ni³no³ nca³ jon².
1CO 11:20 Cˀia⁴ nca³ to⁴jnco³ ma³ñao³, li² cena-le⁴ Nai³-na¹jin² xi³ chi³nao³-ve⁴.
1CO 11:21 Jnco¹jnco¹ to⁴nqui³-ni³ cji³ne³ cena xi³ ti⁴tsˀe⁴-ni³, cˀoa⁴ jnco³ xi³ vao³-le⁴, cˀoa⁴ xi³ nqui²jnco³ chˀi⁴.
1CO 11:22 Jme¹-ni³ˀni³. A³ tsi² tjin¹-no³ ntˀia³ jña³ nca³ vi³cho³ jña³ ˀyo²³. A³xo⁴ taon³ ˀyao³ je² na⁴xi⁴na³nta¹-le⁴ Ni³na¹, cˀoa⁴ a³ ni²soa³-lao⁴³ je² xi³ tsin²-le⁴. Jme¹ xi³ xin³-no³. A³ nta³ cˀoa³sje²³-no³. Coi³ je²-vi⁴ li²coi³ nta³ vˀa³sje²³-ni³no³.
1CO 11:23 Nai³-na¹ qui³tsjoa³-na³ ti⁴coi³ xi³ tsa³ca³co³ya²³-no³ nca³ jon²: Je² Nai³-na¹ Jesús qui³scoe¹ nio⁴xti²la⁴ je² ni⁴tjen⁴ cˀia⁴ nca³ qui³cha³ni²tˀa³.
1CO 11:24 Cˀia⁴ nca³ je³qui³tsjoa³ cjoa⁴nta³, qui³si³xcoa⁴ya³, cˀoa⁴qui³tso²: Chjoao¹³, ti⁴cho³. Je²-vi⁴ yao³-na⁴ xi³ cˀoa⁴-sˀin² ma³xcoa⁴ya³ tˀa³tsaon⁴³. Cˀoa⁴tˀiaon⁴³ je²-vi⁴ nca³ cjoa⁴ˀai¹tsjen³-no³ xi³ tˀa³tsˀan⁴.
1CO 11:25 Cˀoa⁴-ti⁴sˀin²ni³ qui³scoe¹ je² cho⁴tsin¹, coan³scan³-ni³ nca³ je³tsa³cjen², qui³tso²: Je² cho⁴tsin¹-vi⁴ je² cjoa⁴cho⁴tse⁴ xi³ sˀe³nˀion¹ cao⁴ njin¹-na⁴. To⁴jo³ tjin¹ cˀa³ nca³ sˀio⁴yao³ cho⁴tsin¹-vi⁴ cˀoa⁴tˀiaon⁴³ nca³ cjoa⁴ˀai¹tsjen³-no³ xi³ tˀa³tsˀan⁴.
1CO 11:26 To⁴jo³ tjin¹ cˀa³ nca³ coi⁴cho³ nio⁴xti²la⁴-vi⁴, cˀoa⁴ nca³ sˀio⁴yao³ cho⁴tsin¹-vi⁴, coi⁴no²cjoa⁴ya³-nio³ cjoa⁴vi³ya³-le⁴ Nai³-na¹ sa³ˀnta³ nca³ cjoa⁴ˀai¹ nca³ je².
1CO 11:27 Cˀoa⁴-sˀin² to⁴ˀya³-ni³ xi³ coa⁴cjen⁴ nio⁴xti²la⁴-vi⁴ a³xo⁴ xi³ scˀoi¹ya³ cho⁴tsin¹-vi⁴, xi³ to⁴xquia⁴ cˀoa⁴sˀin¹, je¹ sˀe⁴-le⁴ tˀa³tsˀe⁴ yao³-le⁴ cˀoa⁴ tˀa³tsˀe⁴ njin¹-le⁴ Nai³-na¹.
1CO 11:28 To⁴coi³ ca²ta³co³tˀa³ nca³ jnco¹jnco¹ yao³-le⁴ nca³ ti⁴je²-ni³, cˀoa⁴-sˀin² ca²ta³cjen² nio⁴xti²la⁴-vi⁴, cˀoa⁴ ca²ta³ˀvi³ya³ cho⁴tsin¹-vi⁴.
1CO 11:29 Cˀoa⁴ je² xi³ cjen², xi³ ˀvi³, xi³ to⁴xquia⁴ cˀoa⁴sˀin¹, ti⁴je² vˀa³sje³-ni³le⁴ cjoa⁴ñˀain³ yao³-le⁴, nca⁴ tsi² tsa² nta³ co³son²-le⁴ tˀa³tsˀe⁴ yao³-le⁴ Nai³-na¹.
1CO 11:30 To⁴coi³ nca³ cˀoa⁴-sˀin² ncjin² xi³ tjio¹mˀen³, cˀoa⁴ xi³ choa³con³, tjio¹ ya⁴jin³-le⁴ nca³ jon², cˀoa⁴ ncjin² xi³ fa³yo³fe² nca³ je³cˀen³.
1CO 11:31 Tsa² cˀoa⁴-sˀin² nta³ cho¹son²-le⁴² tˀa³tsˀe⁴ yao³-na¹ nca³ ti⁴ña¹-nia³², xi³ cjoa⁴qui²xi⁴ li²coi³ cˀoai⁴tˀain³-na¹ cjoa⁴ñˀain³.
1CO 11:32 To⁴nca³ nca³ vˀai²tˀain³-na¹ cjoa⁴ñˀain³, cˀoa⁴-sˀin² si¹que³-na¹ cjoa⁴ñˀain³ je² Nai³-na¹, jme¹-ni³ nca³ tsi² cˀoai⁴tˀain³-si¹ni³na¹ cjoa⁴ñˀain³ cao⁴ je² son³ˀnte³.
1CO 11:33 Cˀoa⁴-sˀin² ntsˀe³, cˀia⁴ nca³ ma³ñao³ nca³ vi³cho³, cho¹ya³-lao⁴³ xi²nquio⁴³.
1CO 11:34 Tsa² jnco³ xi³ vao³-le⁴, ca²ta³cjen² ya⁴ ni³ˀya³-le⁴, jme¹-ni³ nca³ tsi² coan⁴ña³-si¹nio³ nca³ cˀoai⁴tˀain³-no³ cjoa⁴ñˀain³. Je² xi³cˀa³ cjoa⁴ cˀoe³nta³ cˀia⁴ nca³ cjoe²ˀe⁴.
1CO 12:1 Xi³ tˀa³tsˀe⁴ cjoa⁴tjao²-le⁴ Espíritu Santo, li²coi³ me³-na³, ntsˀe³, nca³ tsi² jchao⁴³.
1CO 12:2 ˀya³-nio¹³ cˀia⁴ nca³ cho⁴ta⁴ xi³ li² judío-jin² coaon⁴³, to⁴jo³-sˀin² nca³ˀi⁴ nca³jan¹ qui³cao⁴-no³, nca³ cˀoa⁴-sˀin² cjoa⁴nˀion¹ tsa³nquin¹tˀa³-lao⁴³ xco¹son² xi³ tsi² ma³-le⁴ nchja⁴.
1CO 12:3 To⁴coi³ cˀoa⁴xin³-ni³no³ nca³ ni⁴ˀya³-jin² xi³ nchja⁴ to⁴tˀa³tsˀe⁴ je² Espíritu xi³ tsˀe⁴ Ni³na¹, xi³ cˀoi⁴tso²-le⁴ Jesús, ca²tji³cao⁴-li² nai⁴². Cˀoa⁴ li²ˀya³ xi³ ma³-le⁴ nchja⁴ Jesús Señor, tsa² tsi² to⁴tˀa³tsˀe⁴ je² Espíritu Santo.
1CO 12:4 To⁴nca³ tjin¹ jo³-sˀin² vˀa³vi¹ cjoa⁴tjao², to⁴nca³ ti⁴je²-ni³ Espíritu.
1CO 12:5 Cˀoa⁴ tjin¹ jo³-sˀin² vˀa³vi¹ xa¹, to⁴nca³ ti⁴je²-ni³ Nai³-na¹.
1CO 12:6 Cˀoa⁴ tjin¹ jo³-sˀin² vˀa³vi¹ nca³nˀion¹-le⁴ xa¹, to⁴nca³ ti⁴je²-ni³ Ni³na¹ xi³ cˀoa⁴-sˀin² si¹xa¹jin³-le⁴ nca³tsˀi³ cho⁴ta⁴ nca³yi³je³ coi³ cjoa⁴-vi⁴.
1CO 12:7 To⁴nca³ nca³ jnco¹jnco¹ cˀoa⁴-sˀin² vˀai²-le⁴ nca³ si⁴²cˀa³tsen³ je² Espíritu Santo, jme¹-ni³ nca³ cˀoa⁴-sˀin² nta³ coa⁴tio⁴-si¹ni³ nca³tsˀi³.
1CO 12:8 Xi³ cjoa⁴qui²xi⁴, to⁴tˀa³tsˀe⁴ je² Espíritu Santo vˀai²-le⁴ jnco³ cho⁴ta⁴ en¹ xi³ tsˀe⁴ cjoa⁴fa³ˀai³tsjen³ xi³ nta³ tjin¹, cˀoa⁴ nqui²jnco³ en¹ xi³ tsˀe⁴ cjoa⁴chji⁴ne⁴, jo³-sˀin² nca³ ti⁴je²-ni³ Espíritu Santo tsjoa¹.
1CO 12:9 Cˀoa⁴ to⁴tˀa³tsˀe⁴ ti⁴je²-ni³ Espíritu Santo vˀai²-le⁴ xi³ nqui²jnco³ nca³ ma³cjain¹-le⁴, cˀoa⁴ nqui²jnco³, je² cjoa⁴tjao²-ve⁴ nca³ ma³-le⁴ si¹nta³ to⁴tˀa³tsˀe⁴ ti⁴je²-ni³ Espíritu Santo.
1CO 12:10 Cˀoa⁴ nqui²jnco³, vˀai²-le⁴ nca³nˀion¹ xi³ ma³-le⁴ si¹xa¹-jin³ cjoa⁴xcon¹. Cˀoa⁴ nqui²jnco³, nca³ nˀion¹ nta³ nchja⁴ya³. Cˀoa⁴ nqui²jnco³, nca³ ma³-le⁴ co³tˀa³jin³ espíritu. Cˀoa⁴ nqui²jnco³, nca³ cja⁴ˀai¹ en¹ ma³-le⁴ nchja⁴. Cˀoa⁴ nqui²jnco³, nca³ ma³-le⁴ si¹cˀa³to³ya³ en¹.
1CO 12:11 To⁴nca³ to⁴jnco³, xi³ ti⁴je²-ni³ Espíritu Santo, cˀoa⁴-sˀin² si¹xa¹jin³ nca³yi³je³ cjoa⁴-vi⁴, nca³ si¹cˀa³vi¹-le⁴ nca³ jnco¹jnco¹ nca³tsˀi³ xi³ ti⁴tsˀe⁴-ni³ cjoa⁴tjao², jo³-sˀin² me³-le⁴ nca³ je².
1CO 12:12 Jo³-sˀin² nca³ je² yao³-na¹ to⁴jnco³ ni¹, nta³ tsa² ncjin² jco⁴ya³ tjin¹-le⁴ xi³ tjio¹cjao³tˀa³-ni³, to⁴nca³ nca³yi³je³ jco⁴ya³-le⁴ yao³-na¹, nta³ tsa² ncjin² ma³-ni³, to⁴jnco³ yao³ ma³, ti⁴cˀoa⁴-sˀin²ni³ Cristo.
1CO 12:13 To⁴tˀa³tsˀe⁴ jnco³ Espíritu Santo qui³sa³te²nta¹-nia³² nca³tsˀia³², nca³ to⁴jnco³ yao³-na¹ ma³², tsa² cho⁴ta⁴ judío nia¹, a³xo⁴ cho⁴ta⁴ griego nia¹, tsa² cho⁴ˀnta³ nia¹, a³xo⁴ ti³yo³ntai¹-nia¹. Nca³tsˀia³² to⁴jnco³ Espíritu Santo qui³si³tse³ya³ ni⁴ma⁴-na¹.
1CO 12:14 Je² yao³-na¹ li² to⁴jnco³ jco⁴ya³-jin², to⁴nca³ ncjin² jco⁴ya³ tjio¹cjao³tˀa³-ni³.
1CO 12:15 Tsa² je² ntso⁴co⁴ coi⁴tso⁴: A³li² an³-jian²³ ntsa⁴, coi³ nca³ li² tsˀe⁴ yao³-ve⁴jian²³. A³li² to⁴coi³ nca³ tsi² tsa² tsˀe⁴ coan⁴-ni³ yao³-ve⁴.
1CO 12:16 Cˀoa⁴ tsa² xo⁴ño³ coi⁴tso⁴: A³li² an³-jian²³ xcon⁴, coi³ nca³ li² tsˀe⁴ yao³-ve⁴jian²³. A³li² to⁴coi³ nca³ tsi² tsˀe⁴ coan⁴-ni³ yao³-ve⁴.
1CO 12:17 Tsa² nca³yi³je³ yao³ to⁴xcon⁴ coan⁴, jo¹-sˀin² cjoi⁴nčhˀoe¹-ni³. Tsa² nca³yi³je³ to⁴xo⁴ño³ coan⁴, jo¹-sˀin² coi⁴njen³-le⁴.
1CO 12:18 To⁴nca³ coe⁴-ni³ Ni³na¹ cˀoa⁴-sˀin² tsa³cˀe¹cjao³jin³ yao³-na¹ nca³ jnco¹jnco¹ jco⁴ya³, jo³-sˀin² coan³me³-le⁴.
1CO 12:19 Tsa² nca³yi³je³ to⁴jnco³ jco⁴ya³ coan⁴, jña¹ ti¹jna³ yao³-na¹.
1CO 12:20 To⁴nca³ coe⁴-ni³ ncjin² jco⁴ya³ ma³-ni³, to⁴nca³ to⁴jnco³ yao³-na¹.
1CO 12:21 Ni⁴je²-jin² xcon⁴ coan⁴ coi⁴tso⁴-le⁴ ntsja³: Li²coi³ ma³chjen¹-le²³, ni⁴ti⁴cˀoa⁴-jin²ni³sˀin² je² jco⁴ cao⁴ ntso⁴co⁴: Li²coi³ ma³chjen¹-na³ nca³ jon².
1CO 12:22 To⁴sa³ je² jco⁴ya³-le⁴ yao³-na¹ xi³ ma³tsen³ nca³ tsin²-le⁴ nca³nˀion¹, je² xi³ nqui²sa⁴ ma³chjen¹.
1CO 12:23 Cˀoa⁴ je² jco⁴ya³-le⁴ yao³-na¹ xi³ ma³tsen³ nca³ nqui²sa⁴ choa³ nta³ ˀya³², je²-vi⁴ xi³ nqui²sa⁴ xcon¹ ni²cˀa³cja¹, cˀoa⁴ je² jco⁴ya³-le⁴ xi³ soa³-ta³con²cha³², nqui²sa⁴ to⁴ˀma³ ni²ca³tioa¹.
1CO 12:24 Je² jco⁴ya³-le⁴ yao³-na¹ xi³ nqui²sa⁴ ma³ ni²ca³tio¹tsen³, li²coi³ ma³chjen¹ nca³ ˀma³ ni²ca³tioa¹. To⁴nca³ Ni³na¹ xi³ cˀoa⁴-sˀin² tsa³cˀe¹cjao³tˀa³ je² yao³-na¹, nca³ nqui²sa⁴ ˀya³xcon¹ je² xi³ nqui²sa⁴ tse³ cha³-le⁴,
1CO 12:25 jme¹-ni³ nca³ tsi² tsa² jao²ya³ coan⁴-si¹ni³ yao³-na¹, to⁴nca³ jme¹-ni³ nca³ je² nca³yi³je³ jco⁴ya³-le⁴ to⁴nco¹son²-sˀin² si¹sin³-le⁴ xi¹ncjin¹.
1CO 12:26 Tsa² jnco³ jco⁴ya³-le⁴ aon³-le⁴, nca³yi³je³ jo³ tjin¹ jco⁴ya³ to⁴jnco³ ma³ˀaon³-le⁴, cˀoa⁴ tsa² jnco³ jco⁴ya³-le⁴ xi³ xcon¹ ˀya³, nca³yi³je³ xi³ jo³ tjin¹ ma³-ni³ jco⁴ya³-le⁴ to⁴jnco³ ma³tsjoa³-le⁴.
1CO 12:27 Cˀoa⁴ jon² yao³-le⁴ Cristo nio¹³, cˀoa⁴ jnco¹jnco¹ jco⁴ya³ ma³-nio³.
1CO 12:28 Cˀoa⁴ tjin¹ cˀa³ xi³ Ni³na¹ qui³si³ca³tio¹jin³-le⁴ na⁴xi⁴na³nta¹-le⁴ Cristo, ti¹tjon² je² xi³ pa²stro⁴, cˀia⁴ je² xi³ nchja⁴ya³, ma³jan²-ni³ je² xi³ va³co¹ya³. Cˀia⁴ je² xi³ si¹xa¹jin³ cjoa⁴xcon¹, cˀia⁴ je² xi³ ma³-le⁴ si¹nta³, xi³ va³sen¹cao⁴, xi³ va³te¹xo³ma³, xi³ ma³-le⁴ nchja⁴ en¹ xi³ cja⁴ˀai¹.
1CO 12:29 A³ pa²stro⁴ ni¹ nca³tsˀi³. A³ nchja⁴ya³-ni¹ nca³tsˀi³. A³ va³co¹ya³-ni¹ nca³tsˀi³. A³ ma³-le⁴ si¹xa¹jin³ cjoa⁴xcon¹ nca³tsˀi³.
1CO 12:30 A³ ma³-le⁴ si¹nta³ nca³tsˀi³. A³ nchja⁴ en¹ xi³ cja⁴ˀai¹ nca³tsˀi³. A³ si¹cˀa³to³ya³ en¹ nca³tsˀi³.
1CO 12:31 To⁴nca³ tˀe²-ta³con²lao⁴³ je² cjoa⁴tjao² xi³ nqui²sa⁴ nta³ tjin¹. To⁴nca³ an³ va³co³-no³ jnco³ ntia⁴² xi³ nˀion¹ nqui²sa⁴ nta³ tjin¹.
1CO 13:1 Nta³ tsa² an³ nchja²³ en¹ xi³ tsˀe⁴ cho⁴ta⁴, cˀoa⁴ xi³ tsˀe⁴ a²ncje⁴, cˀoa⁴ tsa² tsin²-na³ cjoa⁴tjao²cha³-jin², cˀoa⁴-sˀin² nca³ an³ jo³-ni³ qui⁴cha⁴ xi³ nˀion¹ fa³ne³ya³, a³xo⁴ platillo xi³ nˀion¹ fa³ne³ nca³ vi³chon³cjao³-le⁴ xi¹ncjin¹.
1CO 13:2 Cˀoa⁴ nta³ tsa² an³ tjin¹-na³ cjoa⁴tjao² nca³ ma³-na³ nchja²ya³, cˀoa⁴ nta³ tsa² ma³cho⁴ya³-na³ nca³yi³je³ cjoa⁴ xi³ tji¹ˀma³, cˀoa⁴ nca³yi³je³ cjoa⁴chji⁴ne⁴, cˀoa⁴ nta³ tsa² tse³ ma³cjain¹-na³ nca³yi³je³, sa³ˀnta³ nca³ coan⁴-na³ cjoa⁴ˀa²xian²³ ni³nto³, tsa² tsin²-na³ cjoa⁴tjao²cha³, ni⁴jme³-jian²ˀni³ an³.
1CO 13:3 Cˀoa⁴ nta³ tsa² si³cˀa³via¹³ nca³yi³je³ xi³ tjin¹-na³, jme¹-ni³ nca³ si³cjen²-si¹nia³ je² xi³ yo⁴ma⁴, cˀoa⁴ nta³ tsa² tsjoa³tˀa³ yao³-na⁴ nca³ cˀoa⁴-sˀin² coi⁴ti⁴, tsa² tsin²-na³ cjoa⁴tjao²cha³, li²jme³ chji¹-na³.
1CO 13:4 Je² cjoa⁴tjao²cha³ tse³jta³-ni¹, cˀoa⁴ tjin¹-le⁴ cjoa⁴nta³. Je² cjoa⁴tjao²cha³ tsin²-le⁴ cjoa⁴xin²ta³con²-jin². Je² cjoa⁴tjao²cha³ li²coi³ vˀa³sje³je³ya³ yao³-le⁴, li²coi³ ma³ncˀa³con³.
1CO 13:5 Li²coi³ si¹soa³-le⁴ xi¹ncjin¹, li²coi³ va¹sjai³ xi³ ti⁴tsˀe⁴-ni³, li²coi³ ma³ti³jta³, li²coi³ vˀe¹jin³con³ xi³ chˀao³ tjin¹.
1CO 13:6 Li²coi³ si¹tsjoa³-ni³le⁴ yao³-le⁴ xi³ tˀa³tsˀe⁴ xi³ tsin² cjoa⁴qui²xi⁴, to⁴nca³ to⁴jnco³ si¹tsjoa³-ni³le⁴ yao³-le⁴ cao⁴ xi³ cjoa⁴qui²xi⁴.
1CO 13:7 Si¹cjain¹-le⁴ nca³yi³je³, ma³cjain¹-le⁴ nca³yi³je³, co³ya³-le⁴ nca³yi³je³, nca³yi³je³ jcho¹cjoa⁴cao⁴-le⁴.
1CO 13:8 Je² cjoa⁴tjao²cha³ ni⁴cˀia³-jin² fe³tˀa³, to⁴nca³ je² cjoa⁴ xi³ no²cjoa⁴ya³-ni³ li²coi³ ti⁴coan⁴chjen¹-ni³, cˀoa⁴-ti⁴ sˀe⁴chjoa²-le⁴ je² en¹-le⁴ cho⁴ta⁴, cˀoa⁴ je² cjoa⁴chji⁴ne⁴ li²coi³ ti⁴coan⁴chjen¹-ni³.
1CO 13:9 To⁴choa³ xi³ ˀya³xcoan³², cˀoa⁴ to⁴choa³ xi³ no²cjoa⁴ya³².
1CO 13:10 To⁴nca³ cˀia⁴ nca³ cjoa⁴ˀai¹ je² xi³ ña³qui³ tjin¹jnco³, cˀia⁴ je² xi³ to⁴choa³ tjin¹, li²coi³ ti⁴coan⁴chjen¹-ni³.
1CO 13:11 Cˀia⁴ nca³ ˀntia¹³, qui³nchja²³ jo³-ni³ ˀnti¹, qui³si³cja³ˀai³tsjen³ jo³-ni³ ˀnti¹, qui³sco³son²-le⁴ jo³-ni³ ˀnti¹, to⁴nca³ cˀia⁴ nca³ je³coan³jchi¹nca³, qui³si³cˀe¹jna²³ cjoa⁴ˀnti¹-na⁴.
1CO 13:12 Ntˀai⁴-vi⁴ jo³-ni³ cho⁴tsin¹ ti³cho²tsen³ya³², to⁴xa⁴ ti³ˀya³², to⁴nca³ cˀia⁴² cho¹tsen³-le⁴² nca³ ncha³cjao³ˀa³². Ntˀai⁴-vi⁴ to⁴choa³ xi³ ˀve³, to⁴nca³ cˀia⁴² scoe³yi³je³ an³, jo³-sˀin² ˀya³-na³ nca³yi³je.
1CO 13:13 Ntˀai⁴-vi⁴ cˀoa⁴-sˀin² tjio¹ntsjai² xi³ ma³cjain¹-na¹, xi³ cjoa⁴cho³ya²cao⁴cjoa⁴, cˀoa⁴ xi³ cjoa⁴tjao²cha³, cˀoa⁴ je² xi³ jan² cjoa⁴-vi⁴, to⁴nca³ je² xi³ nqui²sa⁴ ti¹tjon², je² xi³ cjoa⁴tjao²cha³.
1CO 14:1 Ta⁴nquin¹tjen⁴nqui³-lao⁴³ cjoa⁴tjao²cha³, cˀoa⁴ tˀe²-ta³con²lao⁴³ je² cjoa⁴tjao²-le⁴ Espíritu Santo, to⁴nca³ xi³ nqui²sa⁴ nˀion¹ ma³chjen¹ nca³ no²cjoa⁴ya³-nio³.
1CO 14:2 Je² xi³ en¹cja⁴ˀai¹ nchja⁴, a³li² cho⁴ta⁴-jin² xi³ nchja⁴cao⁴, to⁴je² Ni³na¹ xi³ nchja⁴cao⁴, nca³ tsi² tsa² ˀya³ xi³ nčhˀoe¹-le⁴, nca³ to⁴cjoa⁴ˀma³ nchja⁴ xi³ to⁴tˀa³tsˀe⁴ Espíritu Santo.
1CO 14:3 To⁴nca³ je² xi³ nchja⁴ya³, nchja⁴cao⁴ cho⁴ta⁴, nca³ si¹quin³ncˀa³ cjoa⁴fa³ˀai³tsjen³-le⁴, cˀoa⁴ nca³ si¹nˀion¹jin³-le⁴, cˀoa⁴ nca³ si¹je³con³.
1CO 14:4 Cˀoa⁴ je² xi³ en¹cja⁴ˀai¹ nchja⁴, ti⁴je²-ni³ si¹quin³ncˀa³ yao³-le⁴, to⁴nca³ je² xi³ nchja⁴ya³, na⁴xi⁴na³nta¹-le⁴ Cristo si¹quin³ncˀa³.
1CO 14:5 Cˀoa⁴-sˀin² me³-na³ nca³ coi⁴no²cjoao⁴³ en¹cja⁴ˀai¹ nca³tsˀio³, to⁴nca³ xi³ nqui²sa⁴ me³-na³ nca³ coi⁴no²cjoa⁴yao³. Nqui²sa⁴ ti¹tjon² je² xi³ nchja⁴ya³ cao⁴-ni³ tsa² je² xi³ en¹cja⁴ˀai¹ nchja⁴, tsa² cˀoa⁴-ti⁴ tsin² xi³ si¹cˀa³to³ya³ en¹-le⁴, jme¹-ni³ nca³ je² na⁴xi⁴na³nta¹-le⁴ Cristo coin⁴ncˀa³-si¹ni³.
1CO 14:6 Ntˀai⁴-vi⁴ tso²cˀoa⁴, ntsˀe³, tsa² an³ cjoi¹con³-no³ nca³ coi³nchja²³ en¹cja⁴ˀai¹, jme¹ xi³ coi⁴njen⁴-no³, tsa² tsin² coi³nchja²tsen³jin³-no³, a³xo⁴ tsa² tsi² si³chji⁴ne⁴-no³, a³xo⁴ tsa² tsi² coi³nchja²ya³-no³, a³xo⁴ tsa² tsi² coa³co³ya²³-no³.
1CO 14:7 Xi³ cjoa⁴qui²xi⁴, je² tso³jmi² xi³ tsin²-le⁴ ni⁴ma⁴-jin², xi³ cˀoa⁴-sˀin² cji³ˀntia¹ jo³-ni³ je² xo⁴vi¹ a³xo⁴ je² arpa, tsa² tsi² tsa² cja⁴ˀai¹-sˀin² cjoa⁴ne³ya³, jo¹-sˀin² jcha⁴-ni³le⁴ jo³ tso² xi³ ti¹ni²cji³ˀntia¹ cao⁴ xo⁴vi¹ cao⁴ arpa.
1CO 14:8 Cˀoa⁴ tsa² je² čhjao³ corneta tsi² nta³ fa³ne³, ˀya¹ xi³ cˀoe¹yo³nta³-le⁴ cjoa⁴jchan¹.
1CO 14:9 Cˀoa⁴-ti⁴sˀin²ni³ nca³ jon², tsa² cao⁴ ni³jaon³ no²cjoa⁴-nio³ en¹ xi³ tsi²jme³ tso²ya³-ni³, jo¹-sˀin² coi⁴no¹ˀya²-ni³le⁴ jme³ xi³ no²cjoao⁴³, nca³ to⁴coi⁴no²cjoa⁴ jin³saon¹³.
1CO 14:10 A³li² to⁴ncjin² jco⁴ya³ en¹ xi³ tjin¹ i⁴ son³ˀnte³, cˀoa⁴ ni⁴jnco³-jin² xi³ tsi² tsa² tjin¹-le⁴ jo³-sˀin² nchja⁴-ni³.
1CO 14:11 To⁴nca³ tsa² an³ tsi² ˀve³ jo³ tso² je² en¹, cˀoa⁴-sˀin² cho⁴ta⁴ xi³ xin² ˀnte³-le⁴ coan⁴ nca³ an³ xi³ tˀa³tsˀe⁴ je² xi³ cˀoa⁴-sˀin² nchja⁴. Cˀoa⁴ je² xi³ nchja⁴ cho⁴ta⁴ xi³ xin² ˀnte³-le⁴ coan⁴ tˀa³tsˀan⁴.
1CO 14:12 Cˀoa⁴-ti⁴sˀin²ni³ nca³ jon² nca³ cˀoa⁴-sˀin² ni²xa¹ti¹ya³-lao⁴³ yao³-no³ nca³ me³-no³ cjoa⁴tjao²-le⁴ Espíritu Santo. Cˀoa⁴-sˀin² ti⁴xa¹ti¹yao³ nca³ si⁴quin³ncˀao³ na⁴xi⁴na³nta¹-le⁴ Cristo.
1CO 14:13 To⁴coi³ je² xi³ nchja⁴ en¹cja⁴ˀai¹, ca²ta³vˀe¹tsˀoa³ nca³ coan⁴ si⁴²cˀa³to³ya³-le⁴.
1CO 14:14 Tsa² an³ vˀe³tsˀoa²³ cao⁴ en¹cja⁴ˀai¹, je² espíritu-na⁴ vˀe¹tsˀoa³, to⁴nca³ je² cjoa⁴fa³ˀai³tsjen³-na⁴ li²coi³ vi³ncha³cao⁴.
1CO 14:15 Jme¹-ni³ tso²cˀoa⁴. Cˀoe³tsˀoa²³ cao⁴ espíritu-na⁴, to⁴nca³ cˀoa⁴-ti⁴ cˀoe³tsˀoa²³ cao⁴ cjoa⁴fa³ˀai³tsjen³-na⁴. Se³ cao⁴ espíritu-na⁴, to⁴nca³ cˀoa⁴-ti⁴ se³ cao⁴ cjoa⁴fa³ˀai³tsjen³-na⁴.
1CO 14:16 Tsa² cˀoai⁴-lai⁴ cjoa⁴nta³ Ni³na¹ cao⁴ je² espíritu-li⁴, je² xi³ ti¹jna³ xi³ tsin²-le⁴ je² cjoa⁴tjao²-vi⁴, jo¹ coi⁴tso⁴ cˀoa⁴ ca²ta³ma³ tˀa³tsˀe⁴ cjoa⁴ xi³ vˀai²-lai⁴ cjoa⁴nta³ Ni³na¹, nca³ tsi² tsa² coi³ ve³ je² xi³ cˀoa⁴ca²si³.
1CO 14:17 Cjoa⁴qui²xi⁴ ji³ nta³ vˀai²-lai⁴ cjoa⁴nta³ Ni³na¹, to⁴nca¹ je² xi³jnco³ li²jme³ xi³ coin⁴ncˀa³-ni³.
1CO 14:18 Tsjoa³-le⁴ cjoa⁴nta³ Ni³na¹ nca³ nqui²sa⁴ nchja²³ en¹cja⁴ˀai¹ cao⁴-ni³ tsa² jon² nca³tsˀio³.
1CO 14:19 To⁴nca³ ya⁴jin³-le⁴ na⁴xi⁴na³nta¹-le⁴ Cristo nqui²sa⁴ me³-na³ coi³nchja²³ aon² en¹ cao⁴ cjoa⁴fa³ˀai³tsjen³-na⁴, jme¹-ni³ nca³ nˀion¹ nta³ xin¹ya³-si¹ni³le⁴ xi³cˀa³ cao⁴-ni³ tsa² te³ jmi³ en¹ xi³ cao⁴ en¹cja⁴ˀai¹.
1CO 14:20 Ntsˀe³ a³li² cˀoa⁴-jin²sˀin² to⁴ˀnti¹ mao³ tˀa³tsˀe⁴ cjoa⁴fa³ˀai³tsjen³-no³, to⁴nca³ ˀnti¹ ca²ta³mao³ tˀa³tsˀe⁴ cjoa⁴tsˀen⁴, to⁴nca³ jchi¹nca³ ca²ta³mao³ tˀa³tsˀe⁴ cjoa⁴fa³ˀai³tsjen³-no³.
1CO 14:21 Ya⁴ cjoa⁴te¹xo³ma³ cˀoa⁴-sˀin² tji¹tˀa³: Cao⁴ xi³ cja⁴ˀai¹ en¹, cˀoa⁴ cao⁴ tsˀoa³ xi³ cja⁴ˀai¹ coi³nchja²coa⁴ je² cho⁴ta⁴na⁴xi⁴na³nta¹-vi⁴, ni⁴cˀoa⁴-jin²sˀin² cjoi⁴nčhˀoe¹-na³, tso² je² Nai³-na¹.
1CO 14:22 Cˀoa⁴-sˀin² nca³ je² en¹cja⁴ˀai¹ choa⁴ ma³, li²coi³ xi³ tˀa³tsˀe⁴ xi³ ma³cjain¹-le⁴, to⁴nca³ xi³ tˀa³tsˀe⁴ je² xi³ tsi² ma³cjain¹-le⁴, to⁴nca³ je² xi³ no²cjoa⁴ya³-ni³ li²coi³ cˀoa⁴sˀin¹ xi³ tˀa³tsˀe⁴ je² xi³ tsi² ma³cjain¹-le⁴, to⁴nca³ xi³ tˀa³tsˀe⁴ je² xi³ ma³cjain¹-le⁴.
1CO 14:23 Tsa² cˀoa⁴-la²ni³sˀin² tsa² nca³tsˀi³ na⁴xi⁴na³nta¹-le⁴ Cristo to⁴jnco³ coan⁴ña³, cˀoa⁴ tsa² en¹cja⁴ˀai¹ nchja⁴ nca³tsˀi³, cˀoa⁴ tsa² fa³ˀa³sˀen³ je² xi³ tsin²-le⁴ je² cjoa⁴tjao²-vi⁴ a³xo⁴ xi³ tsi² ma³cjain¹-le⁴, a³ tsi² coi⁴tso⁴ nca³ cˀoa⁴-sˀin² sca¹ cji³ma³-no³.
1CO 14:24 To⁴nca³ tsa² nca³tsˀi³ nchja⁴ya³, cˀoa⁴ fa³ˀa³sˀen³ jnco³ xi³ tsi² ma³cjain¹-le⁴ a³xo⁴ xi³ tsin²-le⁴ je² cjoa⁴tjao²-vi⁴, cˀoa⁴-sˀin² aon³ ma³-ni³le⁴ je¹-le⁴ xi³ to⁴tˀa³tsˀe⁴ nca³tsˀi³ xi³ nchja⁴ya³, cˀoa⁴ co³tˀa³-ni³ yao³-le⁴ ni⁴ma⁴-le⁴ jo³ cjoan³.
1CO 14:25 Je² xi³ ti¹jna³ˀma³ ya⁴jin³ ni⁴ma⁴-le⁴, cˀoa⁴-sˀin² ˀya³son²tsen³-le⁴. Cˀoa⁴-sˀin² coa¹jna³tsa³cjan²nqui³ xcon⁴, scoe⁴xcon¹ Ni³na¹, si⁴²qui²xi⁴ya³ nca³ ña³qui³ cjoa⁴qui²xi⁴ Ni³na¹ ti¹jna³jin³-no³.
1CO 14:26 Jme¹-ni³ tso²cˀoa⁴, ntsˀe³. Cˀia⁴ nca³ ma³ñao³, nca³ jnco¹jnco¹ nca³ jon² tjin¹-le⁴ en¹-le⁴ Ni³na¹, tjin¹-le⁴ cjoa⁴fa³ˀai³tsjen³ xi³ va³co¹ya³, tjin¹-le⁴ xi³ va³co¹son²tsen³, tjin¹-le⁴ en¹cja⁴ˀai¹, cˀoa⁴ tjin¹-le⁴ xi³ si¹cˀa³to³ya³. Cˀoa⁴-sˀin² ca²ta³ma³ nca³yi³je³ nca³ nta³ coin⁴ncˀa³-nio³.
1CO 14:27 Tsa² tjin¹ xi³ coi⁴nchja⁴ en¹cja⁴ˀai¹, ca²ta³nchja⁴ tsa² to⁴jao² a³xo⁴ to⁴jan²-sa³, nca³ jnco¹jnco¹ ca²ta³vˀa³cao⁴-le⁴, cˀoa⁴ jnco³ xi³ ca²ta³si¹cˀa³to³ya³ en¹.
1CO 14:28 Tsa² tsin² xi³ si¹cˀa³to³ya³, to⁴jyo¹ ca²tˀe²jna³ ya⁴jin³-le⁴ na⁴xi⁴na³nta¹-le⁴ Cristo. Ca²ta³nchja⁴ cao⁴ yao³-le⁴, cˀoa⁴ cao⁴ Ni³na¹.
1CO 14:29 Cˀoa⁴-ti⁴sˀin² je² cho⁴ta⁴ xi³ nchja⁴ya³, ca²ta³nchja⁴ nca³ to⁴jao² a³xo⁴ jan²-sa³, cˀoa⁴ xi³cˀa³ ca²ta³co³son²-ni³le⁴.
1CO 14:30 Cˀoa⁴ tsa² nqui²jnco³ xi³ cˀoa⁴-sˀin² ti¹jna³, tsa² je²-vi⁴ coan⁴tsen³ya³jin³-le⁴, jyo¹ ca²tˀe²jna³ xi³ ti¹tjon².
1CO 14:31 Nca³ coan⁴²-no³ nca³tsˀio³ nca³ coi⁴no²cjoa⁴yao³ nca³ jnco¹jnco¹³, jme¹-ni³ nca³ nca³tsˀi³ coan⁴-si¹ni³le⁴, cˀoa⁴ nca³tsˀi³ coan⁴nˀion¹jin³-si¹ni³.
1CO 14:32 Cˀoa⁴ je² espíritu-le⁴ cho⁴ta⁴ xi³ nchja⁴ya³ na³nqui³ tjio¹-le⁴ cho⁴ta⁴ xi³ nchja⁴ya³.
1CO 14:33 Ni³na¹ a³li² je²-jin² xi³ tsjoa¹ cjoa⁴si³, to⁴nca³ si¹qui³njen³nchˀan¹jin³, jo³-ni³ ya⁴jin³-le⁴ nca³tsˀi³ na⁴xi⁴na³nta¹-le⁴ xi³ tsˀe⁴ cho⁴ta⁴-le⁴ Cristo.
1CO 14:34 Je² ya¹nchjin¹-no³ to⁴jyo¹ ca²ta³tio² ya⁴jin³-le⁴ na⁴xi⁴na³nta¹-le⁴ Cristo, nca³ tsi² tsa² tjin¹-le⁴ ˀnte³ nca³ coi⁴nchja⁴, to⁴nca³ na³nqui³ ca²ta³tio², jo³ nca³ cˀoa⁴-ti⁴ tso² cjoa⁴te¹xo³ma³.
1CO 14:35 Cˀoa⁴ tsa² jme³ cjoa⁴ xi³ me³-le⁴ nca³ sco¹tˀa³ya³, ca²ta³co³na³nqui³-le⁴ je² xˀin⁴-le⁴ ya⁴ ni³ˀya³-le⁴. Chˀao³ tjin¹-ni³ cjoa⁴ nca³ nchja⁴ jnco³ chjon⁴² jña³ ma³ña³ na⁴xi⁴na³nta¹-le⁴ Cristo.
1CO 14:36 Jme¹-ni³, a³ jon² ji³tjo³jin³-no³ je² en¹-le⁴ Ni³na¹, a³xo⁴ to⁴jon² ji³cho²jin³-no³.
1CO 14:37 Tsa² jnco³ xi³ si¹cja³ˀai³tsjen³ nca³ coi³ cho⁴ta⁴ xi³ nchja⁴ya³, a³xo⁴ xi³ tjin¹-le⁴ cjoa⁴tjao²-le⁴ Espíritu Santo, ca²ta³ve³qui²xi⁴ nca³ je² xi³ ti²cji³tˀa³-no³vi⁴ nca³ coi³ cjoa⁴te¹xo³ma³-le⁴ Nai³-na¹.
1CO 14:38 To⁴nca³ tsa² jnco³ xi³ tsi²coi³ ve³ je²-vi⁴, cˀoa⁴-sˀin² ca²ta³vˀe²jna³.
1CO 14:39 Cˀoa⁴-sˀin², ntsˀe³, tˀe²-ta³con²lao⁴³ nca³ coi³no²cjoa⁴yao³. A³li² vˀe²chjoa²-jin²lao⁴³ nca³ en¹cja⁴ˀai¹ nchja⁴ xi³cˀa³.
1CO 14:40 To⁴nca³ cˀoa⁴-sˀin² nta³ ca²ta³ma³, ntia³²ntia³² ta⁴nquin¹cao⁴³ nca³yi³je³ cjoa⁴.
1CO 15:1 Ntˀai⁴ si³qui²xi⁴ya³-no³, ntsˀe³, je² en¹nta³ xi³ tˀa³tsˀe⁴ Cristo xi³ cˀoa⁴-sˀin² qui³nchja²ya³jin³-no³, jña³-le⁴ xi³ cˀoa⁴-ti⁴ qui³chjoao¹³, jña³-le⁴ xi³ cˀoa⁴-ti⁴ ti³yo³cao⁴³,
1CO 15:2 jña³-le⁴ xi³ tˀa³tsˀe⁴ vi²tjo⁴ntjai²-nio³, tsa² tsi² to⁴ya³-ni³ coan³cjain¹-no³, tsa² to⁴jo³ ntoa³nˀion¹-nio³ je² en¹ jo³-sˀin² qui³nchja²ya³-no³.
1CO 15:3 Nca⁴ je² xi³ nqui²sa⁴ nˀion¹ ma³chjen¹ xi³ cˀoa⁴-sˀin² qui³tsˀai²-na³, ti⁴coi³ tsa³ca³co³ya²³-no³: Nca³ Cristo cˀen³ xi³ tˀa³tsˀe⁴ je¹-na¹, jo³-sˀin² tji¹tˀa³ xon⁴ Escritura,
1CO 15:4 nca³ qui³sˀe³ñai³, nca³ ja³ˀa²ya³-ni³le⁴ nca³ coan³jan²-ni³ ni⁴čhjin³, jo³-sˀin² tji¹tˀa³ xon⁴ Escritura,
1CO 15:5 cˀoa⁴ nca³ tsˀa³tsen³-le⁴ Cefas, cˀia⁴ coan³scan³-ni³ je² xi³ te³jao²-ve⁴.
1CO 15:6 Coan³scan³-ni³ jnco³ cˀa²-cjoan² tsˀa³tsen³-le⁴ ntsˀe³² xi³ to⁴jnco³ tjio¹ xi³ tsˀa³to³ aon² ciento ma³-ni³. Xi³ nqui²sa⁴-sa³ ncjin² to⁴jo³ tjio¹con³, to⁴nca³ tjin¹ cˀa³ xi³ je³cˀen³.
1CO 15:7 Coan³scan³-ni³ tsˀa³tsen³-le⁴ Jacobo, coan³scan³-ni³ nca³tsˀi³ pa²stro⁴.
1CO 15:8 Cˀoa⁴ je² xi³ fe³tˀa³-ni³ nca³tsˀi³, tsˀa³tsen³-na³ nca³ an³, jo³-ni³ jnco³ ˀnti¹ xi³ to⁴qui³njen²taon³.
1CO 15:9 An³ nia¹³ pa²stro⁴ xi³ nqui²sa⁴ na³nqui³ ti¹jna³-sa³le⁴ xi³cˀa³ pa²stro⁴, nca³ tsi² tsa² va³quin²-na³ nca³ cˀoa⁴ˀmi²-na³ pa²stro⁴, nca³ co²ntran⁴ qui³-le⁴ je² na⁴xi⁴na³nta¹-le⁴ Ni³na¹.
1CO 15:10 To⁴nca³ cao⁴ cjoa⁴nta³-le⁴ Ni³na¹ cˀoa⁴²cjoan³ jo³ cjoan³. Cˀoa⁴ je² cjoa⁴nta³-le⁴ li² to⁴cjoa⁴tjao²-jin² qui³tsjoa³-na³ nca³ an³, to⁴nca³ nqui²sa⁴ nˀion¹ qui³si³xa¹³ cao⁴-ni³ tsa² nca³tsˀi³ nca³ je², to⁴nca³ li² an³-jian²³, to⁴nca³ je² cjoa⁴nta³-le⁴ Ni³na¹ xi³ ti¹jna³cao⁴-na³.
1CO 15:11 Tsa² an³, a³xo⁴ tsa² je², cˀoa⁴-sˀin² no²cjoa⁴yai³⁴-jin⁴, cˀoa⁴ cˀoa⁴-sˀin² coan³cjain¹-no³ nca³ jon².
1CO 15:12 To⁴nca³ tsa² Cristo cˀoa⁴-sˀin² no²cjoa⁴ya³-ni³ nca³ qui³ni²cja³ˀa¹ya²jin³-ni³le⁴ je² xi³ cˀen³, a³ coan⁴ cˀa³-le⁴ nca³ jon² nca³ cˀoi⁴coi⁴tso⁴ nca³ tsin² cjoa⁴fa³ˀa¹ya³ xi³ tsˀe⁴ cˀen³.
1CO 15:13 Tsa² tsin² cjoa⁴fa³ˀa¹ya³ xi³ tsˀe⁴ cˀen³, Cristo cˀoa⁴-ti⁴ ni⁴coi³-jin² qui³ni²cja³ˀa¹ya²-le⁴.
1CO 15:14 Tsa² Cristo li²coi³ qui³ni²cja³ˀa¹ya²-le⁴, to⁴ya³-jin²ni³ tso²cˀoa⁴ xi³ no²cjoa⁴yai³-jin⁴, cˀoa⁴-ti⁴ to⁴ya³-jin²ni³ xi³ ma³cjain¹-no³.
1CO 15:15 Cˀoa⁴-ti⁴ jin⁴-jin⁴ tji¹tsen³ nca³ testigo nti³so³ ni¹⁴-jin⁴ xi³ tˀa³tsˀe⁴ Ni³na¹, nca³ cˀoa⁴-sˀin² qui³tsˀai²-jin⁴ en¹-na⁴jin⁴ xi³ tˀa³tsˀe⁴ Ni³na¹ nca³ je² xi³ cˀoa⁴-sˀin² qui³si³cja³ˀa¹ya²-le⁴ Cristo, jña³-le⁴ xi³ tsi² qui³si³cja³ˀa¹ya²-le⁴, tsa² cjoa⁴qui²xi⁴ nca³ je² xi³ cˀen³ tsi² fa³ˀa¹ya³-le⁴.
1CO 15:16 Tsa² je² xi³ cˀen³ li²coi³ ni²cja³ˀa¹ya²-le⁴, cˀoa⁴-ti⁴ Cristo li²coi³ qui³ni²cja³ˀa¹ya²-ni³le⁴.
1CO 15:17 Tsa² Cristo li²coi³ qui³ni²cja³ˀa¹ya²-ni³le⁴, to⁴ya³-jin²ni³ xi³ ma³cjain¹-no³, to⁴jo³ ti³yo³jion³ je¹-no³.
1CO 15:18 Cˀoa⁴-ti⁴ je² xi³ qui³tˀa³-le⁴ Cristo xi³ je³cˀen³, cˀoa⁴-sˀin² qui³cha³.
1CO 15:19 Ña¹ xi³ vi³yo³choan³² i⁴ son³ˀnte³-vi⁴, tsa² to⁴cjoa⁴cho³ya²cao⁴cjoa⁴ xi³ tjin¹-na¹ xi³ to⁴tˀa³tsˀe⁴ Cristo, vˀa³cao⁴-na¹ nca³ nqui²sa⁴ scoe⁴ma⁴-na¹ cao⁴-ni³ tsa² nca³tsˀi³ cho⁴ta⁴.
1CO 15:20 To⁴nca³ ntˀai⁴ Cristo je³qui³ni²cja³ˀa¹ya²jin³-ni³le⁴ je² xi³ cˀen³. Je² xi³ coan³ tjon²-le⁴ je² xi³ je³cˀen³.
1CO 15:21 Jo³-sˀin² nca³ je² cjoa⁴vi³ya³ ja³ˀai³ xi³ tˀa³tsˀe⁴ jnco³ cho⁴ta⁴, cˀoa⁴-ti⁴ xi³ tˀa³tsˀe⁴ jnco³ cho⁴ta⁴ ja³ˀai³ cjoa⁴fa³ˀa¹ya³-le⁴ xi³ cˀen³.
1CO 15:22 Jo³-sˀin² xi³ tˀa³tsˀe⁴ Adán nca³tsˀi³ mˀen³, cˀoa⁴-ti⁴sˀin²ni³ tˀa³tsˀe⁴ Cristo nca³tsˀi³ si⁴cˀe¹yo³con³-ni³.
1CO 15:23 To⁴nca³ nca³ jnco¹jnco¹ jo³-sˀin² vˀa³cao⁴-le⁴, Cristo je² xi³ tjon²-le⁴ coan³, scan³ je² xi³ tsˀe⁴ Cristo, cˀia⁴ nca³ cjoa⁴ˀai¹ nca³ je².
1CO 15:24 Cˀia⁴ je² xi³ cjoe⁴tˀa³, cˀia⁴ nca³ tsjoa¹-le⁴ cjoa⁴te¹xo³ma³-le⁴ je² Ni³na¹ cˀoa⁴ Nˀai³-na¹, cˀia⁴ nca³ si⁴²qui³xo²ya³ nca³tsˀi³ xi³ tjio¹ ti¹tjon², cˀoa⁴ nca³tsˀi³ xi³ tjin¹-le⁴ nca³nˀion¹, cˀoa⁴ nca³tsˀi³ xi³ va³te¹xo³ma³.
1CO 15:25 Nca⁴ tjin¹-ni³ nca³ je² coa⁴te²xo³ma³ sa³ˀnta³ nca³ coa⁴tio²nqui³ ntso⁴co⁴ nca³tsˀi³ co²ntran⁴-le⁴.
1CO 15:26 Cˀoa⁴ je² co²ntran⁴-le⁴ xi³ fe³tˀa³-ni³ xi³ coi⁴xo⁴ya³, coi³ cjoa⁴vi³ya³.
1CO 15:27 Nca³yi³je³ cjoa⁴ qui³si³ca³tio² nqui³ntso⁴co⁴. Cˀia⁴ nca³ tso²: Nca³yi³je³ cjoa⁴ cˀoa⁴-sˀin² qui³ni²ca³tio²nqui³-le⁴ nca³ je², ña³qui³ tji¹tsen³ nca³ xin² ti¹jna³ je² xi³ qui³si³ca³tio²nqui³-le⁴ nca³ je² nca³yi³je³ cjoa⁴.
1CO 15:28 Cˀia⁴ nca³ nca³yi³je³ cjoa⁴ na³nqui³ sa⁴tio²-le⁴, cˀia⁴ ti⁴je²-ni³ ˀnti¹-le⁴ na³nqui³ cˀoe¹jna³-le⁴ je² xi³ na³nqui³ tsa³cˀe¹jna³-le⁴ nca³ je² nca³yi³je³ cjoa⁴, jme¹-ni³ nca³ Ni³na¹ coan⁴yi³je³-si¹ni³ tˀa³tsˀe⁴ nca³tsˀi³.
1CO 15:29 Tsa² tsin²-la²ni³ cˀoa⁴-sˀin², jme¹ xi³ sˀin⁴² je² xi³ sa³te²nta¹ xi³ tˀa³tsˀe⁴ cˀen³, tsa² ni⁴jo³-jin²sˀin² ni²cja³ˀa¹ya²-ni³le⁴ xi³ cˀen³. A¹-ni³ tso²cˀoa⁴ nca³ sa³te²nta¹-si¹ni³ xi³ tˀa³tsˀe⁴ cˀen³.
1CO 15:30 Cˀoa⁴-ti⁴ ña¹, a¹-ni³ nca³ xcon¹ vi³ma³-si¹nia³² to⁴jme³ hora-ni³.
1CO 15:31 Jo³-sˀin² nca³ vˀa³sje³je³ya²³ yao³-na⁴ tˀa³tsaon⁴³ nca³ ti³yo³coa⁴² Cristo Jesús, cˀoa⁴-sˀin² nca³ nchaon³nchaon³ mˀen³.
1CO 15:32 Tsa² an³ qui³scan³coa⁴ xa³ ya⁴ Efeso, jo³ sˀin¹ cho⁴ta⁴, jme¹ xi³ njen³-na³. Tsa² je² xi³ cˀen³ li²coi³ ni²cja³ˀa¹ya²-le⁴, coi⁴cha², sˀioa⁴², nca³ nchaon³-li⁴ coi⁴ya²-nia³².
1CO 15:33 A³li² chˀa²na⁴cha⁴-jin²no³. Je² mi²yo⁴ xi³ tsi² nta³, je² xi³ si¹qui³tson¹ xi³ nta³ tjin¹.
1CO 15:34 Ti⁴cja³ˀa¹-lao⁴³ yao³-no³, ti⁴cja³ˀai³tsjaon³ xi³ cjoa⁴qui²xi⁴, cˀoa⁴ a³li² je¹-jin² ti⁴vi³jnchi³-nio³, nca³ tjin¹ cˀa³ xi³ li²coi³ ve³ Ni³na¹. An³ nchja²³ nca³ si³soa³-no³.
1CO 15:35 To⁴nca³ tjin¹ cˀa³ xi³ coi⁴tso⁴: Jo¹ sˀin² si⁴cja³ˀa¹ya²-ni³le⁴ xi³ cˀen³. Jo¹ cjoan³ yao³-le⁴ xi³ cjoa⁴ˀai¹cao⁴-ni³.
1CO 15:36 A³ sca¹ya³-li². Je² xi³ vˀe²ntjai²³, tsa² tsi² to⁴nqui³-ni³ vi³ya³, li²coi³ vˀe²yo³con³.
1CO 15:37 Cˀoa⁴ je² xi³ vˀe²ntjai²³, li²coi³ cˀoa⁴cji³ yao³-le⁴ jo³ cji³ nca³ coan⁴jcha¹, to⁴nca³ vˀe²ntjai²³ je² na⁴xin⁴ nca³ to⁴cˀoa⁴cjoan³, tsa² tsˀe⁴ trigo, a³xo⁴ tsa² tsˀe⁴ xi³ cja⁴ˀai¹ na⁴xin⁴.
1CO 15:38 To⁴nca³ Ni³na¹ tsjoa¹-le⁴ yao³-le⁴ jo³-sˀin² coan³me³-le⁴, cˀoa⁴ nca³ jnco¹jnco¹ ntje⁴ ti⁴tsˀe⁴-ni³ yao³-le⁴.
1CO 15:39 Nca³yi³je³ yao³ li²coi³ to⁴nco¹son², to⁴nca³ jnco³ yao³ xi³ cjoa⁴qui²xi⁴ tsˀe⁴ cho⁴ta⁴, cˀoa⁴ nqui²jnco³ yao³ xi³ tsˀe⁴ cho⁴, cˀoa⁴ nqui²jnco³ xi³ tsˀe⁴ jti⁴, cˀoa⁴ nqui²jnco³ xi³ tsˀe⁴ ni⁴se³.
1CO 15:40 Tjin¹ yao³ xi³ tsˀe⁴ ncˀa³jmi³, cˀoa⁴ tjin¹ yao³ xi³ tsˀe⁴ son³ˀnte³, to⁴nca³ xi³ cjoa⁴qui²xi⁴ jnco³ cjoa⁴je³ya³-le⁴ xi³ tsˀe⁴ ncˀa³jmi³, to⁴nca³ cja⁴ˀai¹-nca¹ cjoan³ cjoa⁴je³ya³-le⁴ xi³ tsˀe⁴ son³ˀnte³.
1CO 15:41 Nqui²jnco³ cjoa⁴je³ya³-le⁴ tsˀoi¹, cˀoa⁴ nqui²jnco³ cjoa⁴je³ya³-le⁴ sa¹, cˀoa⁴ nqui²jnco³ cjoa⁴je³ya³-le⁴ ni³ño³, nca⁴ jnco³ ni³ño³ cja⁴ˀai¹-nca¹ cji³ cjoa⁴je³ya³-le⁴ cao⁴-ni³ tsa² tsˀe⁴ xi³ nqui²jnco³.
1CO 15:42 Cˀoa⁴-ti⁴sˀin²ni³ cao⁴ cjoa⁴fa³ˀa¹ya³-le⁴ xi³ cˀen³. Sˀe³ñai³ je² xi³ to⁴fi³tson³ya²-ni¹, to⁴nca³ ni²cja³ˀa¹ya²-le⁴ je² xi³ li²coi³ fi³tson³.
1CO 15:43 Sˀe³ñai³ cao⁴ cjoa⁴soa³, ni²cja³ˀa¹ya²-le⁴ cao⁴ cjoa⁴je³ya³. Sˀe³ñai³ cao⁴ cjoa⁴ˀi³nta³, ni²cja³ˀa¹ya²-le⁴ cao⁴ nca³nˀion¹.
1CO 15:44 Sˀe³ñai³ yao³ xi³ to⁴xquia⁴ yao³, ni²cja³ˀa¹ya²-le⁴ yao³ xi³ tsˀe⁴ espíritu. Tjin¹ yao³ xi³ to⁴xquia⁴ yao³, cˀoa⁴-ti⁴ tjin¹ yao³ xi³ tsˀe⁴ espíritu.
1CO 15:45 Cˀoa⁴-ti⁴sˀin² tji¹tˀa³: Je² ti¹tjon² xˀin⁴ xi³ Adán ˀmi², coan³ ni⁴ma⁴ xi³ ti¹jna³con³, cˀoa⁴ je² Adán xi³ je³tˀa³-ni³ coan³ espíritu xi³ si¹cˀe¹jna³con³.
1CO 15:46 To⁴nca³ je² xi³ tsˀe⁴ espíritu, a³li² je²-jin² xi³ ti¹tjon², to⁴nca³ je² xi³ to⁴xquia⁴ yao³, cˀia⁴ je² xi³ tsˀe⁴ espíritu.
1CO 15:47 Je² xˀin⁴ xi³ ti¹tjon² xi³ tsˀe⁴ son³ˀnte³-vi⁴, ni³ˀnte³ ni¹. Je² xˀin⁴ xi³ ma³jao²-ni³, xi³ je² Nai³-na¹, tsˀe⁴ ncˀa³jmi³ ni¹.
1CO 15:48 Jo³ cjoan³ je² xi³ ni³ˀnte³ coan³nta³-ni³, cˀoa⁴-ti⁴sˀin² cjoan³-sa³ je² xi³ tsˀe⁴ ni³ˀnte³. Jo³ cjoan³ je² xi³ tsˀe⁴ ncˀa³jmi³, cˀoa⁴-ti⁴sˀin² cjoan³-sa³ je² xi³ tsˀe⁴ ncˀa³jmi³.
1CO 15:49 Jo³-sˀin² nca³ tjin¹-na¹ sen¹-le⁴ xi³ tsˀe⁴ ni³ˀnte³, cˀoa⁴-ti⁴ sˀe⁴-na¹ sen¹-le⁴ xi³ tsˀe⁴ ncˀa³jmi³.
1CO 15:50 To⁴nca³ cˀoa⁴xian³ je²-vi⁴ ntsˀe³ nca³ je² yao³ cao⁴ njin¹-na¹ li²coi³ coan⁴ sˀe⁴cjoa⁴tjao²-le⁴ cjoa⁴te¹xo³ma³-le⁴ Ni³na¹, ni⁴je²-jin² xi³ fi³tson³ya² coan⁴ sˀe⁴cjoa⁴tjao²-le⁴ je² xi³ tsi² fi³tson³.
1CO 15:51 Coe⁴-ni³ an³ cˀoa⁴xin³-no³ jnco³ cjoa⁴ˀma³. Xi³ cjoa⁴qui²xi⁴, li²coi³ nca³tsˀia³² coi⁴ya², to⁴nca³ nca³tsˀi³ nia¹ ni⁴cˀa³ntjai²ya³-na¹,
1CO 15:52 xi³ nti⁴ton⁴nti⁴ton⁴ xi³ to⁴jnco³ ni²cˀa³jtsoa³² xcoan³², cˀia⁴ nca³ je² čhjao³ xi³ fe³tˀa³-ni³ cjoa⁴ne³. Cˀoa⁴-sˀin² cjoa⁴ne³ je² čhjao³, cˀoa⁴ je² xi³ cˀen³ si⁴cja³ˀa¹ya²-ni³le⁴ nca³ tsi² cjoi⁴tson², cˀoa⁴ ña¹ cˀoa⁴-sˀin² ni⁴cˀa³ntjai²ya³-na¹.
1CO 15:53 Nca⁴ cˀoa⁴-sˀin² tjin¹-ni³ je²-vi⁴ xi³ fi³tson³ya² nca³ cˀoa⁴cja¹ xi³ tsi² fi³tson³, cˀoa⁴ je² yao³ xi³ vi³ya³ nca³ cˀoa⁴cja¹ je² xi³ tsi² vi³ya³.
1CO 15:54 Cˀoa⁴ cˀia⁴ nca³ je² xi³ fi³tson³-vi⁴ cˀoa⁴-sˀin² cˀoa⁴cja¹ je² xi³ tsi² fi³tson³, cˀoa⁴ je² xi³ vi³ya³ cˀoa⁴cja¹ je² xi³ tsi² vi³ya³, cˀia⁴ coi⁴tjo³son² je² en¹ xi³ tji¹tˀa³: Je² cjoa⁴vi³ya³ je³chi³xo²ya³, nca³ je³qui³ni²qui³njen³-le⁴.
1CO 15:55 Ji³ cjoa⁴vi³ya³, jña¹ ti¹jna³ na³ˀya¹tsˀin³-li⁴. Cˀoa⁴ ji³ tsjo¹, jña¹ ti¹jna³ xi³ qui³njen²-li².
1CO 15:56 Je² na³ˀya¹tsˀin³-le⁴ cjoa⁴vi³ya³, coi³ je¹, cˀoa⁴ je² nca³nˀion¹-le⁴ je¹, coi³ cjoa⁴te¹xo³ma³.
1CO 15:57 To⁴nca³ Ni³na¹ ca²ta³vˀai²-le⁴ cjoa⁴nta³, nca³ ti¹tsjoa¹-na¹ nca³ ni²qui³njen³² xi³ to⁴tˀa³tsˀe⁴ je² Nai³-na¹ Jesucristo.
1CO 15:58 Cˀoa⁴-sˀin², ntsˀe³ xi³ tsjoa³que⁴-no³, qui²xi⁴ ti⁴yo³. A³li² ni²cˀa³ntjai²ya³-jion²³. Nqui²sa⁴ tse³ ti⁴xa¹sa³lao⁴³ Nai³-na¹ nca³ntsjai², nca⁴ ˀya³-nio¹³ nca³ je² xa¹-no³ nca³ ti³yo³cao⁴³ Nai³-na¹ a³li² to⁴cjoa⁴tjao²-jin².
1CO 16:1 Xi³ tˀa³tsˀe⁴ taon⁴ xi³ ma³ña³ xi³ tˀa³tsˀe⁴ cho⁴ta⁴-le⁴ Cristo, cˀoa⁴tˀiaon⁴³ nca³ jon² jo³-sˀin² nca³ tsa³cˀe³ne²³-le⁴ je² na⁴xi⁴na³nta¹-le⁴ Cristo ya⁴ Galacia.
1CO 16:2 Nca³ tai²nco⁴ nca³ jnco¹jnco¹ nca³ jon² tˀe²yo³tjao² tˀa³xion²³ taon⁴ ya⁴ ni³ˀya³-no³, jo³-sˀin² nca³ to⁴cjoa⁴nta³-le⁴ Ni³na¹ sˀe⁴-no³, jme¹-ni³ nca³ tsi² cˀia⁴ coan⁴ña³-si¹ni³ taon⁴, cˀia⁴ nca³ an³ cjoi³choa³.
1CO 16:3 Cˀia⁴ nca³ cjoi³choa³, je² xi³ jon² chja³ˀa²jion³, je²-vi⁴ xi³ an³ si³ca³sen¹coa⁴ xon⁴ nca³ coai⁴cao⁴ je² cjoa⁴tjao²-no³ ya⁴ Jerusalén.
1CO 16:4 Tsa² va³quin²-le⁴ cjoa⁴ma⁴-ve⁴ nca³ cˀoa⁴-ti⁴ cjoia¹³ an³, coai⁴cao⁴-na³.
1CO 16:5 Cˀoa⁴ cjoi¹con³-no³ nca³ jon², cˀia⁴ nca³ cjoe⁴ cjoa²ˀa⁴toa³ ya⁴ Macedonia, nca³ tjin¹nta³-na³ nca³ cjoa²ˀa⁴ ya⁴ Macedonia.
1CO 16:6 Cˀoa⁴ tsa² coi³ ni⁴čhjin³ coa²te⁴jna³cao⁴-no³ nca³ jon², a³xo⁴ cˀoa⁴-ti⁴ ya⁴ coa²te⁴jna³ chan⁴nchˀan¹, jme¹-ni³ nca³ jon² coi⁴ncha³cao⁴-si¹ni³nao¹³ to⁴jña³-ni³ nca³ cjoia¹³.
1CO 16:7 Nca⁴ tsi² tsa² me³-na³ ntˀai⁴-vi⁴ nca³ to⁴cjoa²ˀa⁴ co³tsen³to³-no³, nca³ co³ya²³-nia¹³ nca³ coa²te⁴jna³cao⁴-no³ jo³ tjin¹ ni⁴čhjin³ tsa² je² Nai³-na¹ tsjoa¹ˀnte³.
1CO 16:8 To⁴nca³ coa²te⁴jna³ ya⁴ Efeso sa³ˀnta³ sˀoi¹ Pentecostés,
1CO 16:9 nca⁴ qui³tjo³ˀai²ˀnte³-na³ xi³ nˀion¹ tse³ tjin¹ nca³ nˀion¹ ma³chjen¹, cˀoa⁴ ncjin² ma³-ni³ xi³ co²ntran⁴ fi².
1CO 16:10 Tsa² coi⁴cho³ Timoteo, cho¹tsen³-lao⁴³ nca³ cˀoe¹jna³cao⁴-no³, nca³ tsi² cjoa⁴jcon³ sˀe⁴-le⁴, nca⁴ cˀoa⁴²-ti⁴ je² si¹xa¹-le⁴ Nai³-na¹ jo³-ni³ nca³ an³.
1CO 16:11 To⁴coi³ ni⁴ˀya³-jin² xi³ chˀao³ ca²ta³ve³, to⁴sa³ nchˀan¹ cha⁴ni²ya⁴ntiao⁴² jme¹-ni³ nca³ cjoi⁴nčhoa³con³-si¹ni³na³, nca³ ti²co³ya²³-le⁴ cao⁴ je² ntsˀe³².
1CO 16:12 Xi³ tˀa³tsˀe⁴ ntsˀe³², Apolos, li² cˀoa⁴cji³ tsa³cˀe³tsˀoa²³-le⁴ nca³ coai⁴con³-no³ nca³ jon² cao⁴ je² ntsˀe³². To⁴nca³ ni⁴ˀi⁴tse¹-jin² coan³jyo³-le⁴ nca³ qui³ ntˀai⁴-vi⁴. To⁴nca³ coai⁴ cˀia⁴ nca³ sˀe⁴-le⁴ ˀnte³.
1CO 16:13 Ti⁴yo³chon³ˀntao³, nˀion¹ ti⁴yo³cao⁴³ xi³ ma³cjain¹-no³, cˀoa⁴ nˀion¹ ta²ja³ ti⁴yo³, cˀoa⁴ chjoao¹³ nca³nˀion¹.
1CO 16:14 Cˀoa⁴ nca³yi³je³ cjoa⁴ xi³ tsaon⁴³ cˀoa⁴ca²ta³ma³ cao⁴ cjoa⁴tjao²cha³.
1CO 16:15 Je³ˀyao³ nca³ je² ntˀia³-le⁴ Estéfanas coi³ xi³ ti¹tjon² coan³cjain¹-le⁴ ya⁴ Acaya, xi³ tsa³cˀe¹ne²-le⁴ yao³-le⁴ nca³ cˀoa⁴-sˀin² tjio¹si¹sin³-le⁴ cho⁴ta⁴-le⁴ Cristo.
1CO 16:16 Cˀoa⁴-sˀin² vˀe³tsˀoa²³-no³ ntsˀe³ nca³ cˀoa⁴-ti⁴ jon² na³nqui³ coi⁴yo³-lao⁴³ xi³ cˀoa⁴cjoan³, cˀoa⁴ nca³tsˀi³ xi³ ña³tjen⁴ si¹xa¹cao⁴-na¹, cˀoa⁴ xi³ nˀion¹ si¹xa¹.
1CO 16:17 Ma³tsjoa³-na³ nca³ ja³ˀai³ Estéfanas, cˀoa⁴ Fortunato, cˀoa⁴ Acaico, nca⁴ je²-vi⁴ xi³ qui³si³jnco³ xi³ qui³cha³-na³ nca³ tsion² nca³ jon².
1CO 16:18 Qui³si³nˀion¹con³ je² ni⁴ma⁴-na⁴, cˀoa⁴ je² xi³ tsaon⁴³. Cˀoa⁴ nta³ jcha⁴cho⁴tao⁴³ je² xi³ cˀoa⁴cjoan³.
1CO 16:19 Je² na⁴xi⁴na³nta¹-le⁴ Cristo xi³ tsˀe⁴ Asia si¹ti²ˀnta³-no³. A³li² cˀoa⁴cji³ si¹ti²ˀnta³-no³ nca³ tjio¹cao⁴ Nai³-na¹ je² Aquila cao⁴ Priscila, cao⁴ je² cho⁴ta⁴na⁴xi⁴na³nta¹-le⁴ Cristo xi³ ma³ña³ ya⁴ ni³ˀya³-le⁴.
1CO 16:20 Si¹ti²ˀnta³-no³ nca³tsˀi³ ntsˀe³². Ti⁴ti²ˀntao³ xi²nquio⁴³ nca³ jnco¹jnco¹ nca³ tsje³ tˀe²tˀa³tsˀoa³-lao⁴³ xi²nquio⁴³.
1CO 16:21 An³ xi³ Pablo ˀmi²-na³ si³ti²ˀnta³-no³ nca³ cjia³ je²-vi⁴ cao⁴ ntsa⁴.
1CO 16:22 Tsa² jnco³ xi³ tsi² tsjoa³que³ Nai³-na¹ Jesucristo, nai⁴² ca²ta³fi²cao⁴. Nai³-na¹ cjoa⁴ˀai¹.
1CO 16:23 Je² cjoa⁴nta³-le⁴ Nai³-na¹ Jesucristo ca²ta³sˀe³-no³ nca³ jon².
1CO 16:24 Je² cjoa⁴tjao²cha³-na⁴ ca²ta³sˀe³-no³ nca³tsˀio³, nca³ ti³yo³coa⁴² Cristo Jesús. Cˀoa⁴ ca²ta³ma³.
2CO 1:1 An³ nia¹³ Pablo, pa²stro⁴-le⁴ Jesucristo, jo³-sˀin² coan³me³-le⁴ Ni³na¹, cao⁴ ntsˀe³², je² Timoteo, to⁴jnco³ ti³chji²-lai²⁴jin⁴ jon² xi³ na⁴xi⁴na³nta¹-le⁴ Ni³na¹ xi³ ti³yo³ ya⁴ Corinto, cao⁴ nca³tsˀi³ cho⁴ta⁴-le⁴ Cristo xi³ tjio¹ ya⁴ nca³qui³jnta² Acaya.
2CO 1:2 Ni³na¹ je² Nˀai³-na¹ cˀoa⁴ je² Nai³-na¹ Jesucristo ca²ta³tsjoa¹-no³ cjoa⁴nta³, ca²ta³si¹qui³njen³nchˀan¹jin³ ni⁴ma⁴-no³.
2CO 1:3 Cjoa⁴nta³ ca²ta³vˀai²-le⁴ je² Ni³na¹-le⁴ cˀoa⁴ Nˀai³-le⁴ Nai³-na¹ Jesucristo, je² Nˀai³ xi³ tsˀe⁴ cjoa⁴ma⁴ta³con², cˀoa⁴ Ni³na¹ xi³ tsˀe⁴ nca³yi³je³ cjoa⁴ni²je³ta³con²,
2CO 1:4 xi³ si¹je³con³-na¹ nca³yi³je³ cjoa⁴ñˀain³-na¹, jme¹-ni³ nca³ cˀoa⁴-ti⁴ ña¹ coan⁴-si¹ni³na¹ si⁴je³ta³coan³² je² xi³ tjio¹jin³ to⁴jña³-le⁴ cjoa⁴ñˀain³-ni³ cao⁴ xi³ ti⁴coi³-ni³ cjoa⁴ni²je³ta³con², jo³-sˀin² si¹je³con³-na¹ Ni³na¹ nca³ ña¹.
2CO 1:5 Jo³-sˀin² nca³ ma³ncjin²ya³jin³-na¹ cjoa⁴ñˀain³ xi³ tsˀe⁴ Cristo, nca³ cˀoa⁴-ti⁴ vˀa³cao⁴tˀa³-na¹, cˀoa⁴-ti⁴sˀin²ni³ ma³ncjin²ya³jin³-na¹ cjoa⁴ni²je³ta³con² xi³ to⁴tˀa³tsˀe⁴ Cristo.
2CO 1:6 To⁴nca³ tsa² chja³ˀai²⁴-jin⁴ cjoa⁴ñˀain³, coi³ xi³ tˀa³tsˀe⁴ cjoa⁴ni²je³ta³con²-no³ cˀoa⁴ cjoa⁴vi³tjo³ntjai²-no³. Cˀoa⁴ tsa² ma³je³ta³coin²⁴-jin⁴, coi³ xi³ tˀa³tsˀe⁴ cjoa⁴ni²je³ta³con²-no³, cˀoa⁴ cjoa⁴vi³tjo³ntjai²-no³. Je² cjoa⁴ni²je³ta³con²-vi⁴ xi³ si¹xa¹jin³-no³ nca³ jon², cˀia⁴ nca³ jcho¹cjoa⁴-no³ xi³ ti⁴coi³-ni³ cjoa⁴ñˀain³ xi³ ti³chja³ˀai²⁴-jin⁴ nca³ jin⁴-jin⁴.
2CO 1:7 Cˀoa⁴ je² xi³ cho³ya²-lai⁴jin⁴ xi³ tˀa³tsaon⁴³ nˀion¹ ti¹jna³, nca⁴ ˀya³qui²xi⁴-jin⁴ nca³ jo³-sˀin² nca³ vˀa³cao⁴tˀa³-no³ je² cjoa⁴ñˀain³, cˀoa⁴-ti⁴sˀin²ni³ vˀa³cao⁴tˀa³-no³ je² cjoa⁴ni²je³ta³con².
2CO 1:8 Nca⁴ ntsˀe³², li²coi³ me³-na³jin⁴ nca³ tsi² jchao⁴³ xi³ tˀa³tsˀe⁴ cjoa⁴ñˀain³ xi³ coan³tˀain³⁴-jin⁴ ya⁴ Asia nca³ nqui²sa⁴ tse³ cjoa⁴ñˀain³ qui³chja³ˀai²⁴-jin⁴ cao⁴-ni³ tsa² je² xi³ coan³ qui³jcho¹cjoa⁴-na³jin⁴, sa³ˀnta³ nca³ me³cˀain³-jin⁴.
2CO 1:9 Cˀoa⁴-sˀin² coan³-na³jin⁴ jo³-ni³ tsa² xi³ cjoa⁴vi³ya³ qui³sˀe³ne²-le⁴, jme¹-ni³ nca³ tsi² nta³ ˀya³ta³con²-si¹ni³jin⁴ yao³-na⁴jin⁴ xi³ ti⁴jin⁴-ni³jin⁴, to⁴nca³ Ni³na¹ xi³ nta³ ˀya³ta³coin²⁴-jin⁴, xi³ si¹cja³ˀa¹ya³-le⁴ xi³ cˀen³.
2CO 1:10 Je² xi³ tsa³cˀa³sje³ntjai²-na³jin⁴ cjoa⁴vi³ya³ xi³ tse³, cˀoa⁴ xi³ cˀoa⁴sje³ntjai². Cˀoa⁴ cho³ya²-lai⁴jin⁴ nca³ to⁴jo³ cˀoa⁴sje³ntjai²-sa³na³jin⁴.
2CO 1:11 Nca⁴ ti³ncha³cao⁴-na³jin⁴ nca³ jon² nca³ vˀe²tsˀoa³ntjai²-na³jin⁴, jme¹-ni³ nca³ ncjin² xi³ tsjoa¹-si¹ni³ cjoa⁴nta³ xi³ tˀa³tsain⁴-jin⁴, nca³ cˀoa⁴-sˀin² qui³tsˀai²-na³jin⁴ je² cjoa⁴nta³, nca⁴ ncjin² xi³ tsa³cˀe¹tsˀoa³ntjai²-na³jin⁴.
2CO 1:12 Chˀa²sje³je³yai³⁴-jin⁴ yao³-na⁴jin⁴ tˀa³tsˀe⁴ cjoa⁴-vi⁴ nca³ je² cjoa⁴fa³ˀai³tsjen³-na⁴jin⁴ si¹qui²xi⁴ya³-na³jin⁴ nca³ tsje³-ni¹⁴jin⁴ cˀoa⁴ nca³ ña³qui³ cjoa⁴qui²xi⁴-ni¹⁴jin⁴, jo³-sˀin² qui³tsjoa³-na³jin⁴ Ni³na¹. Cˀoa⁴-sˀin² tsa³qui³yo³choin³⁴-jin⁴ i⁴ son³ˀnte³, cˀoa⁴ nqui²sa⁴ tse³ cˀoa⁴-sˀin² tsa³qui³yo³jin³cao⁴-lai²⁴jin⁴ nca³ jon², a³li² cao⁴ cjoa⁴chji⁴ne⁴-le⁴ yao³-na⁴jin⁴, to⁴nca³ cao⁴ cjoa⁴nta³-le⁴ Ni³na¹.
2CO 1:13 Nca⁴ tsi² tsa² chji³-lai²⁴jin⁴ cjoa⁴ xi³ cja⁴ˀai¹, to⁴je² xi³ vˀe²xquiao⁴³ a³xo⁴ xi³ cˀoa⁴-ti⁴ ma³cho⁴ya³-no³. Cˀoa⁴ an³ co³ya²³-le⁴ nca³ sa³ˀnta³ cjoe⁴tˀa³ coan⁴cho⁴ya³-no³,
2CO 1:14 jo³-sˀin² nca³ je³coan³cho⁴ya³cˀa³-no³, nca³ jin⁴ ni¹⁴-jin⁴ xi³ chˀa⁴sje³je³yao³, cˀoa⁴-ti⁴sˀin²ni³ jo³-sˀin² nca³ jin⁴-jin⁴ chˀa⁴sje³je³ya³-lai²⁴jin⁴ cˀia⁴ nca³ ni⁴čhjin³-le⁴ Nai³-na¹ Jesús.
2CO 1:15 Cˀoa⁴ ña³qui³ tjin¹jnco³-le⁴coan³ je²-ve⁴, coan³me³-na³ nca³ ti¹tjon² qui³con³-no³ nca³ jon², jme¹-ni³ nca³ qui³sˀe³-si¹ni³no³ xi³ coan³jao²cˀa³-ni³ cjoa⁴nta³.
2CO 1:16 Cˀoa⁴ coan³me³-na³ nca³ ja²ˀa⁴to³-no³ cˀia⁴ nca³ quia³ ya⁴ Macedonia, cˀoa⁴ nca³ ji³nčhoa³con³ nqui²jnco³cˀa²-ni³no³ cˀia⁴ nca³ ji³nčhoa³-nia³ ya⁴ Macedonia, nca³ qui³cha³ni²ya³ntia⁴²-nao¹³ cˀia⁴ nca³ quia³ ya⁴ Judea.
2CO 1:17 Cˀoa⁴ nca³ coan³me³-na³ nca³ cˀoa⁴qui³sˀian³ je²-vi⁴, a³ to⁴ˀen¹sca¹ xi³ qui³si³chjen¹³. A³xo⁴ coi³ xi³ si³cja³ˀai³tsjen³, a³ cˀoa⁴-sˀin² si³cja³ˀai³tsjen³-nia³ jo³-ni³ tsa² cho⁴ta⁴ xi³ to⁴xa¹ cjoan³-ni³, nca³ sˀe⁴jin³-si¹ni³na³ xi³ jaon³-le⁴ cˀoa⁴ xi³ mai³-le⁴.
2CO 1:18 To⁴sa³ Ni³na¹ xi³ cjoa⁴qui²xi⁴ xi³ ti¹ve³ nca³ je² en¹-na⁴jin⁴ xi³ qui³cha²cao⁴-lai²⁴jin⁴ li²coi³ cˀoa⁴jaon³-le⁴ cˀoa⁴mai³-le⁴.
2CO 1:19 Nca⁴ je² ˀnti¹-le⁴ Ni³na¹, Jesucristo, xi³ an³ cao⁴ Silvano cao⁴ Timoteo qui³no²cjoa⁴ya³jin³-lai²⁴jin⁴ nca³ jon², je²-vi⁴ li²coi³ cˀoa⁴jaon³-le⁴ cˀoa⁴mai³-le⁴, to⁴nca³ jaon³ coan³-le⁴ nca³ je².
2CO 1:20 Nca³yi³je³ jo³ tjin¹ xi³ qui³si³sˀe³nqui³ Ni³na¹ jaon³ ma³ tˀa³tsˀe⁴, cˀoa⁴ je² xi³ tso² cˀoa⁴ca²ta³ma³, cˀoa⁴ma³ tˀa³tsˀe⁴. Coi³ nca³ ña¹ vi³xoan¹ xi³ tˀa³tsˀe⁴ cjoa⁴je³ya³-le⁴ Ni³na¹ cˀoa⁴ca²ta³ma³.
2CO 1:21 Cˀoa⁴ je² xi³ si¹nˀion¹tˀa³-na¹ Cristo, jin⁴-jin⁴ cao⁴ jon², cˀoa⁴ je² xi³ qui³si³ca³njon³-na¹, je² Ni³na¹.
2CO 1:22 Je² xi³ cˀoa⁴-ti⁴ tsa³cˀe¹choa⁴-na¹, cˀoa⁴ qui³tsjoa³-na¹ je² Espíritu Santo xi³ ti¹jna³jin³ ni⁴ma⁴-na¹ jo³-ni³ xi³ qui³sˀe³jna³nqui³.
2CO 1:23 To⁴nca³ an³ nchja²³-le⁴ Ni³na¹ nca³ testigo ma³ tˀa³tsˀe⁴ ni⁴ma⁴-na⁴ nca³ cˀoa⁴-sˀin² tjin¹-na³ cjoa⁴ma⁴ta³con² xi³ tˀa³tsaon⁴³ nca³ tsi² ja²ˀa⁴nqui²ntia³ ya⁴ Corinto.
2CO 1:24 Li²coi³ nca³ jin⁴-jin⁴ va³te²xo³ma³-lai²⁴jin⁴ je² xi³ ma³cjain¹-no³, to⁴nca³ jin⁴ xi³ vi³ncha³cao⁴-lai²⁴jin⁴ xi³ tˀa³tsˀe⁴ cjoa⁴tsjoa³-no³, nca⁴ xi³ tˀa³tsˀe⁴ xi³ ma³cjain¹-no³ nˀion¹ ti³yo³-nio³.
2CO 2:1 Je²-vi⁴ xi³ qui³si³cja³ˀai³tsjen³ nca³ an³, nca³ tsi² cjoa²ˀai⁴con³ nqui²jnco³cˀa²-ni³no³ nca³ jon² cao⁴ cjoa⁴va³.
2CO 2:2 Tsa² an³ cˀoa⁴-sˀin² si³va³-no³, cˀia⁴ ˀya¹-ni³ xi³ si⁴²tsjoa³-na³, tsa² tsi² je² xi³ an³ si³va³-le⁴.
2CO 2:3 Ti⁴je²-ni³vi⁴ xi³ qui³squi³-no³, jme¹-ni³ nca³ tsi² tse³ cjoa⁴va³ tsjoa¹-si¹ni³na³ je² xi³ tjin¹-ni³le⁴ nca³ tsjoa¹-na³ cjoa⁴tsjoa³ cˀia⁴ nca³ an³ xi³ coi³choa³. Tjin¹jnco³-le⁴coan³ xi³ tˀa³tsaon⁴³ nca³tsˀio³ nca³ je² cjoa⁴tsjoa³-na⁴ ti⁴coi³-ni³ xi³ tsaon⁴³ nca³tsˀio³.
2CO 2:4 Nca⁴ qui³squi³-no³ cao⁴ xi³ tse³ nta¹xcoan³ nca³ cjai¹ tse³ cjoa⁴ñˀain³ cao⁴ cjoa⁴fao¹ xi³ qui³sˀe³-le⁴ ni⁴ma⁴-na⁴, a³li²coi³-jin² nca³ cˀoa⁴-sˀin² coan⁴va³-no³ nca³ jon², to⁴nca³ jme¹-ni³ nca³ jcha⁴-si¹nio³ jo³ cji³ tse³ cjoa⁴tjao²cha³ xi³ tjin¹-na³ tˀa³tsaon⁴³.
2CO 2:5 Tsa² jnco³ xi³ je³qui³si³va³-na³, li²coi³ qui³si³va³-na³ nca³ to⁴ˀan³, to⁴nca³ sa³ˀnta³ qui³si³cˀa³cao⁴tˀa³ i⁴tse¹-no³ nca³tsˀio³. Cˀoa⁴-sˀin² xian³, jme¹-ni³ nca³ tsi² tse³ en¹tsjo²ˀa³ si³chjen¹-si¹nia³.
2CO 2:6 Je² xi³ cˀoa⁴qui³sˀin³, to⁴coan³-la²ni³le⁴ je² cjoa⁴ñˀain³-vi⁴, nca³ ncjin² coan³ xi³ je³qui³si³cja³ˀa¹-le⁴.
2CO 2:7 To⁴sa³ jon² ti⁴cha³tˀa³-lao⁴³, cˀoa⁴ ti⁴je³ta³con²-lao⁴³, jme¹-ni³ nca³ je² xi³ cˀoa⁴qui³sˀin³ li²coi³ ya⁴ cjoe⁴jin³ cjoa⁴va³ xi³ nˀion¹ tse³.
2CO 2:8 To⁴coi³ cjoa⁴ vˀe³tsˀoa²³-ni³no³ nca³ si⁴qui²xi⁴ya³tsaon³ je² cjoa⁴tjao²cha³-no³ xi³ tˀa³tsˀe⁴ nca³ je².
2CO 2:9 Cˀoa⁴²-ti⁴ to⁴coi³ cjoa⁴-vi⁴ nca³ qui³squi³-no³ nca³ qui³sco²tˀa³-no³ nca³ jon² tsa² qui³ni²tjo³son²³ nca³yi³je³.
2CO 2:10 Cˀoa⁴ je² xi³ jon² ni²cha³tˀa³-lao⁴³, cˀoa⁴-ti⁴ an³ si³cha³tˀa³-le⁴. Je² xi³ an³ qui³si³cha³tˀa³, tsa² tjin¹ xi³ qui³si³cha³tˀa³, cˀoa⁴-sˀin² qui³sˀian³ xi³ tˀa³tsaon⁴³ nqui³xcon⁴ Cristo,
2CO 2:11 jme¹-ni³ nca³ tsi² si⁴²qui³njen³-si¹ni³na¹ Satanás, nca³ ˀya³-nia¹ cjoa⁴fa³ˀai³tsjen³ma²ña⁴-le⁴.
2CO 2:12 Cˀia⁴ nca³ je²ˀe⁴ ya⁴ Troas nca³ qui³nchja²ya³ je² en¹nta³ xi³ tˀa³tsˀe⁴ Cristo, qui³sˀe³ti⁴xˀa⁴ˀnte³-na³ tˀa³tsˀe⁴ Nai³-na¹,
2CO 2:13 to⁴nca³ li²coi³ qui³si³cja¹ya³ ni⁴ma⁴-na⁴, nca³ tsi² tsa² coan³sjai³-na³ ntsˀe³² Tito. Cˀoa⁴-sˀin² qui³si³xa³tˀa³ cho⁴ta⁴ ya⁴-ve⁴, cˀoa⁴ quia³ ya⁴ Macedonia.
2CO 2:14 To⁴nca³ Ni³na¹ ca²ta³vˀai²-le⁴ cjoa⁴nta³, nca³ je² xi³ tsjoa¹-na¹ nca³ntsjai² nca³ ni²qui³njen³² nca³ ma³nquin¹coa⁴² Cristo Jesús. Xi³ to⁴tˀa³tsan⁴² Ni³na¹ si¹cˀa³vi¹son² nca³qui³jnta² je² cjoa⁴qui²xi⁴ xi³ tˀa³tsˀe⁴ Cristo, xi³ jo³-ni³ xo³nco¹sja³ nca³ ma³nca³va³son².
2CO 2:15 Xi³ tˀa³tsˀe⁴ Ni³na¹ jta⁴nta³njen⁴-le⁴ Cristo nia¹, ya⁴jin³-le⁴ je² xi³ vi³tjo³ntjai², cˀoa⁴ ya⁴jin³-le⁴ xi³ cha³.
2CO 2:16 Xi³ tˀa³tsˀe⁴ xi³ cha³ xi³ cjoa⁴qui²xi⁴ jta⁴-le⁴ cjoa⁴vi³ya³ nia¹ xi³ tsjoa¹ cjoa⁴vi³ya³, cˀoa⁴ tˀa³tsˀe⁴ xi³cˀa³ jta⁴-le⁴ cjoa⁴vi³jna³chon³ nia¹ xi³ tsjoa¹ cjoa⁴vi³jna³chon³. Cˀoa⁴ xi³ tˀa³tsˀe⁴ je² cjoa⁴-vi⁴, ˀya¹-ni³ xi³ coan⁴-le⁴ cjoa⁴ je²-vi⁴.
2CO 2:17 Nca⁴ jin⁴-jin⁴ li²coi³ cˀoa⁴-sˀin² cjoain³-jin⁴ jo³-ni³ tsa² je² xi³ ncjin² ma³-ni³, xi³ vˀa³na⁴cha⁴ xi³ si¹qui³njen³ tˀa³-tsˀe⁴ en¹-le⁴ Ni³na¹, to⁴nca³ jin⁴-jin⁴ tjin¹qui²xi⁴ tˀa³tsain⁴-jin⁴, nca³ tsˀe⁴ Ni³na¹ ni¹⁴-jin⁴. Nqui³xcon⁴ Ni³na¹ no²cjoai⁴-jin⁴ nca³ ti³yo³coai⁴-jin⁴ Cristo.
2CO 3:1 A³ cˀoe¹tsˀia⁴cao⁴ nqui²jnco³cˀai²⁴-jin⁴ nca³ chˀa⁴sje³ntai³-jin⁴ yao³-na⁴jin⁴, a³xo⁴ jo³-ni³ cˀa³ a³ ma³chjen¹-na³jin⁴ xon⁴carta xi³ cˀoa⁴sje³nta³-na³jin⁴ xi³ tˀa³tsaon⁴³, a³xo⁴ xi³ tsaon⁴³.
2CO 3:2 Jon² nio¹³ xi³ coio³ xon⁴-na⁴jin⁴, xi³ tjio¹tˀa³ ya⁴jin³ ni⁴ma⁴-na⁴jin⁴, xi³ nca³tsˀi³ cho⁴ta⁴ ve³, cˀoa⁴ vˀe¹xquia⁴.
2CO 3:3 ˀya³son²tsen³-le⁴ nca³ jon² xon⁴-le⁴ Cristo, xi³ jin⁴ chji³-jin⁴, xi³ li²coi³ nta¹jin¹ qui³chji³-ni³, to⁴nca³ cao⁴ je² Espíritu Santo xi³ tsˀe⁴ Ni³na¹ xi³ ti¹jna³con³. Li²coi³ ya⁴ tjio¹tˀa³jon³ la⁴jao⁴, to⁴nca³ ya⁴ tjio¹tˀa³jon³ xi³ yao³ xi³ ni⁴ma⁴-le⁴ cho⁴ta⁴.
2CO 3:4 Cˀoa⁴-sˀin² nta³ tjio¹jnco³con³ ni⁴ma⁴-na⁴jin⁴ xi³ to⁴tˀa³tsˀe⁴ Cristo nqui³xcon⁴ Ni³na¹.
2CO 3:5 Li²coi³ nca³ ti⁴jin⁴-ni³ ma³-na³jin⁴ nca³ si⁴cja³ˀai³tsjain³-jin⁴ nca³ tjin¹ to⁴jme³-ni³ve⁴ xi³ to⁴tˀa³tsain⁴-jin⁴, to⁴nca³ je² xi³ to⁴tˀa³tsˀe⁴ ma³-na³jin⁴, je² Ni³na¹,
2CO 3:6 xi³ cˀoa⁴-ti⁴ qui³tsjoa³-na³jin⁴ nca³nˀion¹ nca³ ma³-na³jin⁴ ni²xa¹-lai⁴jin⁴ tˀa³tsˀe⁴ jnco³ cjoa⁴cho⁴tse⁴ xi³ tjin¹nˀion¹, li²coi³ xi³ tsˀe⁴ xi³ je³tji¹tˀa³, to⁴nca³ je² xi³ tsˀe⁴ Espíritu Santo, nca³ je² xi³ tji¹tˀa³ si¹cˀen³, to⁴nca³ je² Espíritu Santo tsjoa¹ cjoa⁴vi³jna³chon³.
2CO 3:7 Cˀoa⁴ je² cjoa⁴ xi³ qui³sco³ˀai²ˀnte²-le⁴ cjoa⁴vi³ya³, xi³ ya⁴ qui³sˀe³tˀa³jon³ la⁴jao⁴, cˀoa⁴coan³ cao⁴ cjoa⁴je³ya³, sa³ˀnta³ je² xti³-le⁴ Israel li²coi³ coan³ nˀion¹ qui³sco²tsen³-le⁴ je² ncjain¹ Moisés, to⁴tˀa³tsˀe⁴ je² cjoa⁴je³ya³-le⁴ ncjain¹. Je² cjoa⁴je³ya³ tjin¹-ni³ nca³ qui³ qui³cha³.
2CO 3:8 Jo¹-sˀin² nca³ tsi² nqui²sa⁴ nta³ coi⁴tjo³je³ya³ je² cjoa⁴ xi³ je² Espíritu Santo cjo³ˀai²ˀnte²-le⁴.
2CO 3:9 Tsa² je² cjoa⁴ xi³ qui³sco³ˀai²ˀnte²-le⁴ cjoa⁴ñˀain³ coan³ cao⁴ cjoa⁴je³ya³, nqui²sa⁴ to⁴coan⁴je³ya³ je² cjoa⁴je³ya³-le⁴ je² cjoa⁴ xi³ cjo³ˀai²ˀnte²-le⁴ cjoa⁴qui²xi⁴.
2CO 3:10 Je² xi³ qui³sˀe³-le⁴ cjoa⁴je³ya³, li²coi³ ti⁴cˀoa⁴-sˀin² tjin¹-ni³le⁴ cjoa⁴je³ya³ ntˀai⁴, nca³ tjin¹ nqui²jnco³ cjoa⁴je³ya³ xi³ to⁴nqui²sa⁴ ncˀa³ tjin¹.
2CO 3:11 Tsa² je² xi³ cha³, qui³sˀe³-le⁴ cjoa⁴je³ya³, nqui²sa⁴ to⁴sˀe⁴-le⁴ cjoa⁴je³ya³ je² xi³ vˀe²jna³ntsjai².
2CO 3:12 Cˀoa⁴-sˀin² nca³ ti³cho³ya²-le⁴² coi³ cjoa⁴-vi⁴, nˀion¹con³ ni⁴ma⁴-na¹ nca³ no²cjoa⁴-nia¹.
2CO 3:13 Li²coi³ jo³-ni³ Moisés xi³ tsa³cˀe¹jtsa³ ncjain¹ jnco³ na³jño³, jme¹-ni³ nca³ je² xti³-le⁴ Israel li²coi³ nˀion¹ qui³sco²tsen³-le⁴ jo³-sˀin² cjoe⁴tˀa³ je² xi³ tjin¹-ni³ nca³ cha⁴.
2CO 3:14 To⁴nca³ je² cjoa⁴fa³ˀai³tsjen³-le⁴ cho⁴ta⁴ Israel xi¹jin³ coan³. Sa³ˀnta³ ntˀai⁴-vi⁴ cˀia⁴ nca³ vˀe¹xquia⁴ je² cjoa⁴ xi³ jchi¹nca³ xi³ tjin¹nˀion¹, to⁴jo³ cje³ tjo³sje³jtsa³-jin²le⁴ na³jño³ xi³ ti⁴coi³-ni³, xi³ to⁴Cristo fa³ˀa¹xin².
2CO 3:15 Sa³ˀnta³ ntˀai⁴-vi⁴, je² na³jño³ to⁴jo³ cji³jtsa³ ni⁴ma⁴-le⁴, to⁴cˀia⁴-ni³ve⁴ nca³ sˀe³xquia⁴jin³-ni³ xi³ tsˀe⁴ Moisés.
2CO 3:16 To⁴nca³ cˀia⁴ nca³ si¹cˀo¹fa³ya³tˀa³-le⁴ je² Nai³-na¹, je² na³jño³ xi³ cji³jtsa³ tjo¹xin².
2CO 3:17 Je² Nai³-na¹ tso²-ni³ Espíritu Santo. Cˀoa⁴ jña³ nca³ tjin¹ je² Espíritu Santo xi³ tsˀe⁴ Nai³-na¹, ya⁴ tjin¹ cjoa⁴ntai¹.
2CO 3:18 To⁴coi³ ña¹ nca³tsˀia³² nca³ tsi² tjio¹ˀma³ ncjan³², nca³ cho¹tsen³ya³² jo³-ni³ tsa² jnco³ cho⁴tsin¹ je² cjoa⁴je³ya³-le⁴ Nai³-na¹, cˀoa⁴-sˀin² cji³vˀa³ntjai²ya³² nca³ cˀoa⁴coan⁴ cjoan³² jo³ cjoan³ Nai³-na¹, nca³ tjin¹-na¹ cjoa⁴je³ya³, cˀoa⁴ nqui²sa⁴ tse³ cjoa⁴je³ya³ nca³ nčhoa¹-ni³ je² Nai³-na¹ xi³ je² Espíritu.
2CO 4:1 To⁴coi³ nca³ tjin¹-na³jin⁴ jin⁴-jin⁴ je² xa¹-vi⁴, jo³-sˀin² Ni³na¹ coan³ma⁴que³-na³jin⁴, li²coi³ ma³ˀi³ntai³⁴-jin⁴.
2CO 4:2 To⁴nca³ qui³chja³ˀa²xin²⁴-jin⁴ je² cjoa⁴ xi³ to⁴ˀma³-sˀin² sˀin¹ xi³ tsˀe⁴ cjoa⁴soa³, nca³ tsi² cjoa⁴ma²ña⁴ coi⁴to¹mjen³coai⁴-jin⁴, nca³ tsi² si⁴cˀa³ntjai²yai³⁴-jin⁴ je² en¹-le⁴ Ni³na¹, to⁴nca³ chˀa⁴sje³son²tsain³-jin⁴ je² xi³ cjoa⁴qui²xi⁴, nca³ ti⁴jin⁴-ni³jin⁴ nta³ chˀa²sjai³⁴-jin⁴ yao³-na⁴jin⁴ tˀa³tsˀe⁴ cjoa⁴fa³ˀai³tsjen³-le⁴ nca³tsˀi³ cho⁴ta⁴ nqui³xcon⁴ Ni³na¹.
2CO 4:3 Tsa² je² en¹nta³ xi³ tˀa³tsˀe⁴ Cristo xi³ no²cjoa⁴yai³⁴-jin⁴ to⁴jo³ tji¹jtsa³ˀma³, tji¹jtsa³ˀma³jin³-le⁴ to⁴je² xi³ cha³.
2CO 4:4 Tˀa³tsˀe⁴ xi³ cha³, je² ni³na¹ xi³ tsˀe⁴ son³ˀnte³-vi⁴ ntˀai⁴-vi⁴ tsa³cˀe¹chjoa²nqui³ cjoa⁴fa³ˀai³tsjen³-le⁴ je² xi³ tsi² ma³cjain¹-le⁴, jme¹-ni³ nca³ tsi² sˀe⁴-si¹ni³le⁴ sen¹ cao⁴ cjoa⁴ˀi³sen³-le⁴ je² en¹nta³ xi³ tˀa³tsˀe⁴ cjoa⁴je³ya³-le⁴ Cristo xi³ Ni³na¹ ji³tjo³jin³.
2CO 4:5 Nca⁴ tsi²coi³ no²cjoa⁴yai³⁴-jin⁴ xi³ ti⁴tˀa³tsain⁴-ni³jin⁴, to⁴tˀa³tsˀe⁴ Jesucristo nca³ Nai³-na¹ ma³, cˀoa⁴ jin⁴-jin⁴ cho⁴ˀnta³-no³ mai³⁴-jin⁴ xi³ tˀa³tsˀe⁴ Jesús.
2CO 4:6 Nca⁴ Ni³na¹ xi³ cˀoa⁴qui³tso², je² lˀi¹ ca²ta³ma³ˀi³sen³-ni³ jña³ njion²chon³, cˀoa⁴ je² ni¹ xi³ qui³si³ˀi³sen³jin³ ni⁴ma⁴-na⁴jin⁴. Cˀoa⁴-sˀin² tˀa³tsain⁴-jin⁴ qui³si³ˀi³sen³, jme¹-ni³ nca³ jcha⁴-si¹ni³jin⁴ je² cjoa⁴je³ya³-le⁴ Ni³na¹ xi³ ncjain¹ Jesucristo ma³tsen³-ni³.
2CO 4:7 To⁴nca³ tjin¹-na³jin⁴ je² cjoa⁴-vi⁴ xi³ nˀion¹ nta³ jo³-ni³ tsa² ja⁴ya³-le⁴ jnco³ ti⁴² xi³ ni³ˀnte³, jme¹-ni³ nca³ jcha⁴-si¹ni³le⁴ nca³ je² nca³nˀion¹ xi³ nˀion¹ tse³ tsˀe⁴ Ni³na¹ ni¹, a³li² tsain⁴-jin²jin⁴.
2CO 4:8 To⁴jo³ cji³ nca³yi³je³ tjin¹-na³jin⁴ cjoa⁴ñˀain³, to⁴nca³ li²jo³ ma³-na³jin⁴. Li²coi³ ˀyai³⁴-jin⁴ jme³ xi³ sˀiain⁴-jin⁴, to⁴nca³ li²coi³ ni²cjao¹jin³-jin⁴.
2CO 4:9 Tjin¹ xi³ tjen⁴nqui³co²ntran⁴-na³jin⁴, to⁴nca³ li²coi³ qui³njion²-ta³con²na³jin⁴, ni²cˀa³tsao³-na³jin⁴, to⁴nca³ li²coi³ chai³⁴-jin⁴.
2CO 4:10 Nca³ntsjai² to⁴jña³-ni³ main¹cao⁴jin³-jin⁴ yao³-na⁴jin⁴ je² cjoa⁴vi³ya³ xi³ tsˀe⁴ Jesús, jme¹-ni³ nca³ cˀoa⁴-ti⁴ je² cjoa⁴vi³jna³chon³-le⁴ Jesús cˀoa⁴-ti⁴sˀin² coan⁴tsen³jin³-si¹ni³ yao³-na⁴jin⁴.
2CO 4:11 Nca⁴ jin⁴-jin⁴ xi³ ti³yo³choin³-jin⁴, vˀai²tˀain³ntsjai²-na³jin⁴ cjoa⁴vi³ya³ xi³ tˀa³tsˀe⁴ Jesús, jme¹-ni³ nca³ je² cjoa⁴vi³jna³chon³-le⁴ Jesús coan⁴tsen³jin³-si¹ni³ yao³-na⁴jin⁴ xi³ mˀen³.
2CO 4:12 Cˀoa⁴-sˀin² cjoa⁴vi³ya³ si¹xa¹jin³-na³jin⁴ nca³ jin⁴, to⁴-nca³ cjoa⁴vi³jna³chon³ si¹xa¹jin³-no³ nca³ jon².
2CO 4:13 To⁴nca³ to⁴nco¹son²-sˀin² ma³cjain¹-na³jin⁴ jo³-sˀin² coan³cjain¹-le⁴ je² xi³ cˀoa⁴-sˀin² qui³squi³: Coan³cjain¹-na³, to⁴coi³ cˀoa⁴-sˀin² qui³nchja²³-nia³. Jin⁴-jin⁴ cˀoa⁴-ti⁴sˀin²ni³ ma³cjain¹-na³jin⁴, to⁴coi³ cˀoa⁴-sˀin² no²cjoa⁴-ni³jin⁴.
2CO 4:14 ˀya³qui²xi⁴-ni¹⁴jin⁴ nca³ je² xi³ qui³si³cja³ˀa¹ya³-le⁴ Nai³-na¹ Jesús, cˀoa⁴-ti⁴ jin⁴-jin⁴ si⁴²cja³ˀa¹ya³-na³jin⁴ cao⁴ Jesús, cˀoa⁴ si⁴²ca³tio¹va³sen³-na³jin⁴ cao⁴ jon².
2CO 4:15 Nca³yi³je³ je² cjoa⁴-vi⁴ tˀa³tsaon⁴³ nio¹³, jme¹-ni³ nca³ coan⁴tse³ya³-si¹sa³ni³ cjoa⁴nta³ xi³ tˀa³tsˀe⁴ cho⁴ta⁴ncjin²-sa³, cˀoa⁴ jme¹-ni³ nca³ cˀoai⁴-si¹sa³ni³le⁴ cjoa⁴nta³ Ni³na¹, cˀoa⁴-sˀin² coan⁴tse³ya³-sa³ je² cjoa⁴je³ya³-le⁴ Ni³na¹.
2CO 4:16 To⁴coi³ li²coi³ ma³ˀi³nta³-ni³jin⁴. To⁴nca³ nta³ tsa² je² yao³cho⁴ta⁴-na⁴jin⁴ cˀoa⁴-sˀin² ti¹fe³nqui³, je² jo³ cjoan³ya³-na³jin⁴ cji³ma³cho⁴tse⁴ya³ ni⁴čhjin³ nca³ nchaon³.
2CO 4:17 Cˀoa⁴ je² cjoa⁴ñˀain³-na⁴jin⁴ xi³ to⁴jnco³ tjo² ntˀai⁴-vi⁴, xi³ xan⁴ tjin¹, ti¹vˀe¹nta³-na³jin⁴ xi³ nqui²sa⁴ tse³ cjoa⁴je³ya³ xi³ nca³ntsjai² xi³ li²coi³ ma³ ma³ni²nco¹son².
2CO 4:18 Nca⁴ tsi² ni²sin³-lai⁴jin⁴ cjoa⁴ xi³ ma³tsen³, to⁴nca³ je² xi³ tsi² ma³tsen³, nca³ je² cjoa⁴ xi³ ma³tsen³ to⁴fa³ˀa³to³-ni¹, to⁴nca³ je² xi³ tsi² ma³tsen³ tjio¹ nca³ntsjai².
2CO 5:1 Nca⁴ ˀya³qui²xi⁴-ni¹⁴jin⁴ tsa² je² ntˀia³son³ˀnte³ xi³ jo³-ni³ to⁴čhjoa⁴carpa jña³ vi³yo³ˀya²-ni¹⁴jin⁴ cˀoa⁴-sˀin² cjoi⁴tson¹, tjin¹-na³jin⁴ jnco³ ni³ˀya³ xi³ Ni³na¹ tsa³cˀe¹nta³-na³jin⁴, xi³ tsi² tsa² ntsja³ cho⁴ta⁴ coan³nta³-ni³, xi³ ti¹jna³ntsjai² ncˀa³jmi³.
2CO 5:2 Tse³nai²⁴-jin⁴ i⁴ ntˀia³son³ˀnte³-na⁴jin⁴, nca³ cjai¹ me³-na³jin⁴ chˀa²cja¹son²ncˀai³⁴-jin⁴ je² ntˀia³-na⁴jin⁴ xi³ cjoi⁴nčhoa³-ni³ ncˀa³jmi³.
2CO 5:3 Tsa² je³qui³chˀa²cjai¹⁴-jin⁴, cˀia⁴ li²coi³ coan⁴sjai³-jin⁴ nca³ ti³yo³jti²-jin⁴.
2CO 5:4 Nca⁴ cˀoa⁴-ti⁴sˀin²ni³ jin⁴-jin⁴ xi³ ti³yoi³⁴-jin⁴ je² ntˀia³na³jño³-vi⁴, tse³nai²⁴-jin⁴ nca³ ñˀain³ cji³ne²-na³jin⁴ cjoa⁴, li²coi³ nca³ me³-na³jin⁴ nca³ chja⁴ˀa²xin²-na³jin⁴ ntˀia³na³jño³-vi⁴, to⁴nca³ coi³ nca³ me³-na³jin⁴ chˀa⁴cja¹soin²⁴-jin⁴, jme¹-ni³ nca³ je² xi³ mˀen³ cˀoa⁴-sˀin² cˀoa⁴ntjai²ya³jin³-ni³ cao⁴ cjoa⁴vi³jna³chon³.
2CO 5:5 Cˀoa⁴ je² xi³ tsa³cˀe¹nta³-na³jin⁴ tˀa³tsˀe⁴ xi³ ti⁴coi³-ni³ je²-vi⁴, je² Ni³na¹, xi³ qui³tsjoa³-na³jin⁴ je² Espíritu Santo xi³ qui³sˀe³jna³nqui³-na³jin⁴.
2CO 5:6 Cˀoa⁴-sˀin² tjio¹jnco³ta³coin²⁴-jin⁴ nca³ntsjai², nca³ ˀya³qui²xi⁴-ni¹⁴jin⁴ nca³ ti³yo³tˀa³xin²-lai⁴jin⁴ Nai³-na¹ tjen⁴ nca³ ti³yo³jin³-jin⁴ yao³-na⁴jin⁴.
2CO 5:7 Nca⁴ ti³ma²-ni¹⁴jin⁴ xi³ tˀa³tsˀe⁴ xi³ ma³cjain¹-na³jin⁴, li²coi³ xi³ tˀa³tsˀe⁴ xi³ to⁴cho²tsain³-jin⁴.
2CO 5:8 To⁴nca³ tjio¹jnco³ta³coin²⁴-jin⁴, cˀoa⁴ nqui²sa⁴ coan⁴tsjoa³-na³jin⁴ tsa² ti³yo³tˀa³xin²-lai⁴jin⁴ yao³-na⁴jin⁴, nca³ ti³yo³coai⁴-jin⁴ Nai³-na¹.
2CO 5:9 To⁴coi³ cˀoa⁴-ti⁴ nqui²sa⁴ nˀion¹ vˀe²ta³con²-lai⁴jin⁴ nca³ nta³ sa³sen¹ta³con²-lai⁴jin⁴ nca³ je², a³xo⁴ nca³ ti³yo³tˀa³xin²⁴-jin⁴, a³xo⁴ nca³ ya⁴ ti³yo³coai⁴-jin⁴.
2CO 5:10 Cjoa⁴nˀion¹ coi⁴yoa³² nca³tsˀia³² nqui³xcon⁴ cjoa⁴te¹xo³ma³-le⁴ Cristo, jme¹-ni³ nca³ jnco¹jnco¹ cˀoai⁴-si¹ni³na¹ jo³-sˀin² qui³nˀian³² cao⁴ yao³-na¹, tsa² nta³ tjin¹ a³xo⁴ tsa² chˀao³ tjin¹.
2CO 5:11 To⁴coi³ cjoa⁴ nca³ cˀoa⁴-sˀin² xcon¹ ˀyai³⁴-jin⁴ Nai³-na¹, cˀoa⁴-sˀin² ni²ntˀe¹tˀai³⁴-jin⁴ cho⁴ta⁴, to⁴nca³ Ni³na¹ nta³ ve³son²tsen³-na³jin⁴. Cˀoa⁴ co³ya²-le⁴ nca³ cˀoa⁴-ti⁴ ˀya³son²tsen³-na³jin⁴ ya⁴jin³-le⁴ cjoa⁴fa³ˀai³tsjen³-no³.
2CO 5:12 Li²coi³ nˀo²sje³nta³ nqui²jnco³cˀa²-ni³⁴jin⁴ yao³-na⁴jin⁴ nqui³xcon³, to⁴nca³ vˀai²ˀnte²-lai²⁴jin⁴ nca³ jon² nca³ nˀo²sje³je³ya³-na³jin⁴ nca³ jin⁴-jin⁴, jme¹-ni³ nca³ sˀe⁴-si¹ni³no³ en¹ xi³ coi⁴xon¹-lao⁴³ je² xi³ vˀa³sje³je³ya³ jo³ cjoan³ yao³-le⁴, cˀoa⁴ li²coi³ vˀa³sje³je³ya³ xi³ tsˀe⁴ ni⁴ma⁴-le⁴.
2CO 5:13 Tsa² sca¹-na³jin⁴, coi³ xi³ tˀa³tsˀe⁴ Ni³na¹, cˀoa⁴ tsa² nta³ tjio¹-ta³coin²⁴jin⁴, coi³ xi³ tˀa³tsaon⁴³ nca³ jon².
2CO 5:14 Je² cjoa⁴tjao²cha³-le⁴ Cristo cjoa⁴nˀion¹ sˀin¹-na³jin⁴, nca³ je³qui³ni²cja³ˀai³tsjain³-jin⁴ je²-vi⁴, nca³ jnco³ xi³ cˀen³ xi³ tˀa³tsˀe⁴ nca³tsˀi³, coi³ tjio¹cˀen³-ni³ nca³tsˀi³.
2CO 5:15 Cˀoa⁴ cˀen³ xi³ tˀa³tsˀe⁴ nca³tsˀi³, jme¹-ni³ nca³ je² xi³ tjio¹con³, li²coi³ ti⁴coa⁴tio⁴con³-ni³ xi³ ti⁴tˀa³tsˀe⁴-ni³, to⁴nca³ xi³ tˀa³tsˀe⁴ je² xi³ cˀoa⁴-sˀin² cˀen³, cˀoa⁴ xi³ qui³ni²cja³ˀa¹ya²-ni³le⁴ xi³ tˀa³tsˀe⁴.
2CO 5:16 To⁴coi³ nca³ ntˀai⁴-vi⁴ xi³ fi²-sa³ni³ jin⁴-jin⁴ ni⁴ˀya³-jin² xi³ ˀyai³⁴-jin⁴ jo³-sˀin² tjio¹ cjoa⁴fa³ˀai³tsjen³-le⁴ cho⁴ta⁴, nta³ tsa² cˀoa⁴-sˀin² tsa³ˀyai³⁴-jin⁴ Cristo jo³-sˀin² tjio¹ cjoa⁴fa³ˀai³tsjen³-le⁴ cho⁴ta⁴, to⁴nca³ ntˀai⁴-vi⁴ li²coi³ ti⁴cˀoa⁴-sˀin²ni³ ˀya³-ni³jin⁴ nca³ je².
2CO 5:17 Cˀia⁴ tsa² jnco³ xi³ ti¹jna³cao⁴ Cristo, coan³cho⁴tse⁴ya³ nqui²ntia³-ni³. Je² cjoa⁴ nca³sˀa⁴ je³ja³ˀa³to³. Coe⁴-ni³ coan³cho⁴tse⁴ nca³yi³je³ cjoa⁴.
2CO 5:18 Cˀoa⁴ nca³yi³je³ je²-vi⁴ Ni³na¹ nčhoa¹-ni³. Xi³ to⁴tˀa³tsˀe⁴ Cristo qui³si³cjao²nta³-na¹ Ni³na¹ xi³ ti⁴tˀa³tsˀe⁴-ni³, cˀoa⁴ qui³tsjoa³-na³jin⁴ je² xa¹ nca³ si⁴cjao²nta³-ni³jin⁴.
2CO 5:19 Coi³ je²-vi⁴ nca³ Ni³na¹ tsa³cˀe²jna³cao⁴ Cristo, nca³ qui³si³cjao²nta³-ni³ son³ˀnte³ xi³ ti⁴tˀa³tsˀe⁴-ni³. Li²coi³ ya⁴ qui³si³cˀa³ je¹-le⁴, cˀoa⁴ tsa³cˀe¹jna³tˀain³-na³jin⁴ je² en¹ xi³ ni²cjao²nta³-ni³jin⁴.
2CO 5:20 Cˀoa⁴-sˀin² nca³ jin⁴-jin⁴ ti³yo³nca³jao³-lai⁴jin⁴ Cristo, jo³-ni³ tsa² Ni²na¹ xi³ vˀe¹tsˀoa³-no³ xi³ to⁴tˀa³tsain⁴-jin⁴. Vˀe²tsˀoa³-lai²⁴jin⁴ xi³ to⁴tˀa³tsˀe⁴ Cristo, cho⁴va²nta³-nio³ cao⁴ Ni³na¹.
2CO 5:21 Je² xi³ tsi² tsa³jnqui³ je¹, Ni³na¹ qui³si³nta³-ni³ je¹ xi³ tˀa³tsan⁴², jme¹-ni³ nca³ ña¹ cˀoa⁴coan³ cjoan³-nia³² je² cjoa⁴qui²xi⁴-le⁴ Ni³na¹, nca³ ti³yo³coa⁴² Cristo.
2CO 6:1 Cˀoa⁴-sˀin² nca³ jin⁴-jin⁴, xi³ to⁴jnco³ ni²xai¹⁴-jin⁴ cao⁴ Cristo, vˀe²ne²-lai²⁴jin⁴ nca³ tsi² to⁴ya⁴-ni³ chjoao¹³ je² cjoa⁴nta³-le⁴ Ni³na¹.
2CO 6:2 Nca⁴ cˀoa⁴²tso²: Cˀia⁴ ni⁴čhjin³ xi³ nta³ qui³nčhˀoe³-le²³, cˀoa⁴ je² ni⁴čhjin³ xi³ tsˀe⁴ cjoa⁴vi³tjo³ntjai², tsa³ca²sen⁴cao⁴-le²³. Coe⁴-ni³ je² ni⁴čhjin³-vi⁴ ntˀai⁴-vi⁴ xi³ nta³. Coe⁴-ni³ je² ni⁴čhjin³-vi⁴ ntˀai⁴-vi⁴ xi³ tsˀe⁴ cjoa⁴vi³tjo³ntjai².
2CO 6:3 Ni⁴ˀya³-jin² xi³ chˀao³-sˀin² main¹coai⁴-jin⁴, jme¹-ni³ nca³ je² xa¹-na⁴jin⁴ li²jme³ je¹ sˀe⁴ne²-si¹ni³le⁴.
2CO 6:4 To⁴nca³ to⁴jme³ cjoa⁴-ni³ nta³ ma³nquin¹coai⁴-jin⁴ yao³-na⁴jin⁴, jo³-ni³ xi³ si¹xa¹-le⁴ Ni³na¹, nca³ tse³ jcho¹cjoa⁴-na³jin⁴, nca³ cjoa⁴ñˀain³ chja³ˀai²⁴-jin⁴, nca³ nˀion¹ cha³-na³jin⁴, nca³ tse³ cjoa⁴ cji³ne²-na³jin⁴,
2CO 6:5 nca³ vˀe¹-na³jin⁴, nca³ jin³nto⁴ya¹ vi³yo³ˀyai²⁴-jin⁴, nca³ cjoa⁴si³ tsao³tˀa³-na³jin⁴, nca³ xa¹ nˀion¹ xi³ nˀiain²⁴-jin⁴, nca³ vi³yo³chon³ˀntai³⁴-jin⁴, nca³ vi³yo³nchjain³⁴-jin⁴,
2CO 6:6 nca³ tsje³ ti³yoi³⁴-jin⁴, nca³ chji⁴nai⁴-jin⁴, nca³ ni²cjain¹-lai⁴jin⁴, nca³ cjoa⁴nta³ tjin¹-na³jin⁴, cao⁴ Espíritu Santo, cao⁴ cjoa⁴tjao²cha³ xi³ ña³qui³ cjoa⁴qui²xi⁴,
2CO 6:7 cao⁴ en¹ xi³ cjoa⁴qui²xi⁴, cao⁴ nca³nˀion¹-le⁴ Ni³na¹, cao⁴ qui⁴cha⁴ xi³ tsˀe⁴ cjoa⁴qui²xi⁴ xi³ nca³qui²xi⁴ xi³ nca³scon¹ ma³chjen¹,
2CO 6:8 nca³ vˀa³sje³je³ya³-na³jin⁴, cˀoa⁴ nca³ chˀao³ vˀa³sje³-na³jin⁴, nca³ no²cjoa⁴ˀaon³-na³jin⁴, nca³ nta³ no²cjoa⁴-na³jin⁴, nca³ cˀoa⁴tso²-na³jin⁴ jo³-ni³ tsa² cho⁴ta⁴ xi³ vˀa³na⁴cha⁴, to⁴nca³ cho⁴ta⁴ cjoa⁴qui²xi⁴ ni¹⁴-jin⁴,
2CO 6:9 jo³-ni³ tsa² xi³ tsi² ˀya³xcon³-le⁴, to⁴nca³ nta³ ˀya³-na³jin⁴, jo³-ni³ xi³ ti³vi³yai³⁴-jin⁴, to⁴nca³ coe⁴-ni³ ti³yo³choin³⁴-jin⁴, jo³-ni³ xi³ ni²cja³ˀa¹-na³jin⁴ cjoa⁴ñˀain³, to⁴nca³ tsi² qui³ni²cˀen³-na³jin⁴,
2CO 6:10 jo³-ni³ xi³ va³-na³jin⁴, to⁴nca³ tsjoa³-na³jin⁴ nca³ntsjai², jo³-ni³ tsa² xi³ yo⁴ma⁴, to⁴nca³ ncjin² xi³ ti³ni²nchi⁴nai¹⁴-jin⁴, jo³-ni³ xi³ tsi² tsa² jme³ xi³ tjin¹-na³jin⁴, to⁴nca³ xi³ nai³-le⁴ mai³⁴-jin⁴ nca³yi³je³.
2CO 6:11 Cˀoa⁴-sˀin² ti⁴xˀa⁴-na³jin⁴ ntso⁴ˀvai³⁴-jin⁴ cao⁴ jon² xi³ cho⁴ta⁴ corintios ˀmi²-no³. Je² ni⁴ma⁴-na⁴jin⁴ cji³ma³tse³ya³.
2CO 6:12 Li²coi³ choa³ya³ ni⁴ma⁴-na⁴jin⁴ tˀa³tsaon⁴³, to⁴nca³ ti⁴tsaon⁴³-nio³ ni⁴ma⁴ xi³ choa³ya³.
2CO 6:13 To⁴nca³ cˀoa⁴-ti⁴ tˀian⁴-nio³ nca³ jon², ti⁴tse³yao³ ni⁴ma⁴-no³. (An³ fa²cao⁴-no³ jo³-ni³ tsa² xti³).
2CO 6:14 A³li² to⁴jnco³-jin² vi³yo³cjao³ cao⁴ xi³ tsi² ma³cjain¹-le⁴. Jme¹ cjoa⁴mi²yo⁴ xi³ tjin¹, je² xi³ cho⁴ta⁴cjoa⁴qui²xi⁴ cao⁴ je² xi³ tsi² cho⁴ta⁴cjoa⁴qui²xi⁴. Jo¹ coan⁴-ni³ nca³ sa³tio²cjao³ lˀi¹ cao⁴ jña³ njion² chon³.
2CO 6:15 Jo¹-sˀin² coan⁴-ni³ nca³ sa³tio²cjao³-ni³ Cristo cao⁴ Belial, a³xo⁴ jme¹ ˀnte³ xi³ to⁴jnco³ coan⁴-ni³le⁴ je² xi³ ma³cjain¹-le⁴ cao⁴ je² xi³ tsi² ma³cjain¹-le⁴.
2CO 6:16 Jo¹-sˀin² to⁴nco¹son² va³tio²-ni³ je² ntˀia³-le⁴ Ni³na¹ cao⁴ je² xco¹son². Nca⁴ jon² nio¹³ ntˀia³-le⁴ Ni³na¹ xi³ ti¹jna³con³, jo³ qui³tso² Ni³na¹: Coa²te⁴jna³coa⁴, cˀoa⁴ cˀoa³mjen³jin³-le⁴ nca³ je². Cˀoa⁴ an³ coan⁴ Ni³na¹-le⁴, cˀoa⁴ je² coan⁴ na⁴xi⁴na³nta¹-na⁴.
2CO 6:17 To⁴coi³ ti²tjo⁴jin³ va³sen³-ni³lao⁴³ nca³ je², cˀoa⁴ ti⁴ncha³tˀa³xin²-lao⁴³, tso² je² Nai³-na¹. Cˀoa⁴ li² ni²cao⁴-jion²³ je² xi³ chˀao³ cjoan³, cˀoa⁴ an³ scoe³tjao²³-no³.
2CO 6:18 Cˀoa⁴ an³ coan⁴ Nˀai³-no³, cˀoa⁴ jon² coaon⁴³ xti³xˀin⁴-na⁴ cˀoa⁴ xti³ya¹nchjin¹-na⁴, tso² je² Nai³-na¹ xi³ ma³yi³je³-le⁴.
2CO 7:1 Cˀoa⁴-sˀin² jon² xi³ tsjoa³que⁴-no³, coi³ nca³ tjin¹-na¹ coi³ cjoa⁴-vi⁴ xi³ qui³ni²sˀe³nqui³, si⁴tsje³ya³-le⁴² yao³-na¹ nca³yi³je³ xi³ chˀao³ cjoan³ xi³ tsˀe⁴ yao³-na¹, cˀoa⁴ xi³ tsˀe⁴ espíritu-na¹, nca³ ña³qui³ si⁴jncoa³² xi³ coan⁴tsje³-nia³² nca³ xcon¹cha³² Ni³na¹.
2CO 7:2 Tˀai²ˀnte³jin³-na³jin⁴ ni⁴ma⁴-no³. Ni⁴ˀya³-jin² xi³ chˀao³-sˀin² qui³ni²coai⁴-jin⁴, cˀoa⁴ ni⁴ˀya³-jin² xi³ qui³ni²qui³tsoin¹⁴-jin⁴, cˀoa⁴ ni⁴ˀya³-jin² xi³ qui³chˀa²na⁴cha⁴-lai⁴jin⁴.
2CO 7:3 Li²coi³ cˀoa⁴ti²xian³ nca³ coa³ne²³-no³ je¹, nca³ je³cˀoa⁴qui³xian³ nca³ ni⁴ma⁴-na⁴jin⁴ ti³yo³jion³, nca³ to⁴jnco³ coi⁴yoa³² tsa² coi⁴ya¹ cˀoa⁴ tsa² coi⁴yo³choan³².
2CO 7:4 A³li² cˀoa⁴cji³ nta³ ˀve³con³-no³ nca³ jon². Xi³ tˀa³tsaon⁴³ a³li² cˀoa⁴cji³ ncˀa³⁴coan³. Nˀion¹ tse³ coan³je³⁴coan³, sa³ˀnta³ tsˀa³to³ntjai² cjoa⁴tsjoa³ xi³ tjin¹-na³ cao⁴ nca³yi³je³ cjoa⁴ñˀain³-na⁴jin⁴.
2CO 7:5 Cˀia⁴ nca³ ja²ˀai⁴-jin⁴ ya⁴ Macedonia, ni⁴jme³-jin² cjoa⁴ni²cja¹ya³ qui³sˀe³-le⁴ yao³-na⁴jin⁴, to⁴sa³ cˀoa⁴-sˀin² qui³sˀe³-na³jin⁴ cjoa⁴ñˀain³ nca³yi³je³ cjoa⁴, nca³ˀi⁴ nca³jan¹ cjoa⁴si³, cˀoa⁴ ya⁴jin³ ni⁴ma⁴-na⁴jin⁴ cjoa⁴jcon³.
2CO 7:6 To⁴nca³ Ni³na¹ xi³ si¹je³con³ je² xi³ i³nta³ tjio¹con³, qui³si³je³con³-na³jin⁴ cˀia⁴ nca³ ja³ˀai³ Tito.
2CO 7:7 A³li² to⁴coi³-cjoan² nca³ ja³ˀai³ Tito, to⁴nca³ cˀoa⁴-ti⁴sˀin² qui³ni²je³ta³con²-na³jin⁴ cao⁴ xi³ ti⁴coi³-ni³ cjoa⁴ni²je³ta³con², jo³-sˀin² nca³ jon² qui³ni²je³con²³ nca³ je². Je² qui³nchja⁴jin³-na³jin⁴ jo³-sˀin² nca³ tse³ qui³ni²cjao¹jin³-nao¹³, jo³-sˀin² qui³chji³ˀntao¹³, jo³-sˀin² qui³ni²coi²nta⁴-nao¹³. Coi³ nca³ nqui²sa⁴ tse³ cjoa⁴tsjoa³ qui³sˀe³-ni³na³.
2CO 7:8 Nta³ tsa² cˀoa⁴-sˀin² qui³si³va³-no³ an³ cao⁴ xon⁴-ve⁴, li²coi³ ma³fao¹jin³-na³ (nta³ tsa² qui³si³cjao¹jin³-nia³), nca³ ti²ˀve³-nia¹³ nca³ je² xon⁴-ve⁴ qui³si³va³-no³, nta³ tsa² to⁴tji¹choa³ ni⁴čhjin³.
2CO 7:9 Ntˀai⁴-vi⁴ cji³ma³tsjoa³-na³, li²coi³-jin² nca³ cˀoa⁴-sˀin² coan³va³-no³, to⁴nca³ coi³ nca³ coan³va³-no³ sa³ˀnta³ qui³ni²cˀa³ntjai²yao³ cjoa⁴fa³ˀai³tsjen³-no³. Cˀoa⁴-sˀin² coan³va³-no³ jo³-sˀin² Ni³na¹ me³-le⁴, jme¹-ni³ nca³ ni⁴jme³-jin² xi³ qui³ni²cha³-si¹nio³ xi³ to⁴tˀa³tsain⁴-jin⁴.
2CO 7:10 Je² cjoa⁴va³ xi³ jo³-sˀin² me³-le⁴ Ni³na¹ si¹xa¹jin³-na¹ nca³ ni²cˀa³ntjai²ya³² cjoa⁴fa³ˀai³tsjen³-na¹. Cˀoa⁴-sˀin² vi²tjo⁴ntje². Cˀia⁴ nca³ cˀoa⁴-sˀin² ni²cˀa³ntjai²ya³² cjoa⁴fa³ˀai³tsjen³-na¹, li²coi³ ni²cjao²jian³². To⁴nca³ je² cjoa⁴va³-le⁴ son³ˀnte³ nˀion¹ si¹xa¹jin³-na¹ cjoa⁴vi³ya³.
2CO 7:11 Coe⁴-ni³, xi³ ti⁴coi³-ni³ cjoa⁴va³-vi⁴ jo³-sˀin² nca³ me³-le⁴ Ni³na¹, jo³ cji³ tse³ cjoa⁴xi¹ti¹ya³ qui³si³xa¹jin³-no³, jo³ nca³ qui³no²cjoa⁴ntjao²³ yao³-no³, jo³ nca³ jti³ coan³-no³, jo³ nca³ tsa³qui³jcon³, cˀoa⁴ jo³ tse³ qui³ni²cjao¹jion³, jo³ nca³ qui³ni²coi²ntao⁴³, jo³ nca³ qui³ni²toan¹ntjao². Nca³yi³je³ cjoa⁴ tsa³ca³co²³ yao³-no³ nca³ tsjao³.
2CO 7:12 Cˀoa⁴-sˀin², nta³ tsa² cˀoa⁴-sˀin² qui³squi³-no³, li²coi³ cˀoa⁴qui³sˀian³ xi³ tˀa³tsˀe⁴ xi³ cjoa⁴tsˀen⁴ qui³sˀin³, ni⁴tˀa³tsˀe⁴-jin² je² xi³ aon³ coan³-le⁴, to⁴nca³ jme¹-ni³ nca³ cˀoa⁴-sˀin² coan⁴son²tsen³-si¹ni³no³ jo³-sˀin² nca³ qui³ni²coi²ntai⁴-jin⁴ xi³ tˀa³tsaon⁴³ nqui³xcon⁴ Ni³na¹.
2CO 7:13 To⁴coi³ coan³je³con³-na³jin⁴. A³li² to⁴coi³-jin² cjoa⁴ni²je³ta³con²-na⁴jin⁴, to⁴nca³ nqui²sa⁴ nˀion¹ tse³ coan³tsjoa³-na³jin⁴ cao⁴ cjoa⁴tsjoa³-le⁴ Tito, nca³ nca³tsˀio³ nca³ jon² qui³ni²qui³njen³nchˀan¹jion³ je² ni⁴ma⁴-le⁴.
2CO 7:14 Tsa² an³ tsa³cˀa³sje³je³ya³-no³ nqui³xcon⁴ nca³ je², li²coi³ cˀoa⁴-sˀin² coan³soa³-na³. Jo³-sˀin² nca³yi³je³ xi³ tsa³qui³xon¹-lai²⁴jin⁴, coi³ xi³ cjoa⁴qui²xi⁴, cˀoa⁴-ti⁴sˀin²ni³ jo³-sˀin² nca³ qui³chˀa²sje³je³ya³-lai²⁴jin⁴ nqui³xcon⁴ Tito, cˀoa⁴-ti⁴sˀin² coan³ xi³ cjoa⁴qui²xi⁴.
2CO 7:15 Je² ni⁴ma⁴-le⁴ nqui²sa⁴ tse³ ti¹jna³ cao⁴ jon², cˀia⁴ nca³ fa³ˀai³tsjen³-le⁴ jo³-sˀin² qui³ni²qui³tjo³son²³ nca³tsˀio³, jo³-sˀin² nca³ qui³tsˀai²ˀnte²-lao⁴³ cao⁴ cjoa⁴jcon³ cao⁴ cjoa⁴fa³tse¹.
2CO 7:16 Ma³tsjoa³-na³ nca³ cˀoa⁴-sˀin² nta³ ˀve³con³-no³ nca³yi³je³.
2CO 8:1 Cˀoa⁴-ti⁴sˀin²ni³, ntsˀe³, cˀoa⁴ˀmi²ya³-lai²⁴jin⁴ je² cjoa⁴nta³-le⁴ Ni³na¹, xi³ qui³tsˀai²-le⁴ na⁴xi⁴na³nta¹-le⁴ Cristo ya⁴ Macedonia.
2CO 8:2 Cˀia⁴ nca³ tse³ qui³sco²tˀa³ cjoa⁴ñˀain³, cjoa⁴tsjoa³ xi³ tse³ qui³sˀe³-le⁴, cˀoa⁴ cjoa⁴yo⁴ma⁴ qui³sˀe³-le⁴ xi³ cjai¹nca³ tse³, to⁴nca³ ja³ˀa³to³ntjai² cjoa⁴nchi⁴na¹ xi³ tsˀe⁴ cjoa⁴nta³-le⁴.
2CO 8:3 An³ tsjoa³ en¹-na⁴ nca³ qui³tsjoa³ jo³ tjin¹ nca³nˀion¹ xi³ tjin¹-le⁴, cˀoa⁴ sa³ˀnta³ nca³ qui³tsjoa³son²-sa³ nca³nˀion¹-le⁴ nca³ ti⁴cjoa⁴tsjoa³-le⁴ni³.
2CO 8:4 Tse³ tsa³cˀe¹tsˀoa³-na³jin⁴ nca³ qui³si³je¹-na³jin⁴ nca³ sˀian⁴-lai⁴jin⁴ cjoa⁴nta³ nca³ to⁴jnco³ ca²tˀa³cao⁴tˀa³-le⁴ je² xa¹ xi³ tˀa³tsˀe⁴ cho⁴ta⁴-le⁴ Cristo.
2CO 8:5 Cˀoa⁴ li²coi³ cˀoa⁴-sˀin² coan³ jo³-sˀin² qui³cho³ya²-lai⁴jin⁴, to⁴nca³ ti¹tjon² ti⁴je² qui³tsjoa³tˀa³-le⁴ yao³-le⁴ Nai³-na¹ cao⁴ jin⁴-jin⁴, jo³-sˀin² nca³ coan³me³-le⁴ Ni³na¹.
2CO 8:6 Coi³ nca³ cˀoa⁴-sˀin² tsa³cˀe²ne²-lai⁴jin⁴ je² Tito, jo³-sˀin² nca³ tsa³cˀe¹tsˀia⁴cao⁴ nca³ ti¹tjon², cˀoa⁴-ti⁴sˀin² ca²ta³si¹cje³tˀa³-ni³ je² cjoa⁴nta³-vi⁴ ya⁴jin³-no³ nta³ tsa² jon².
2CO 8:7 To⁴coi³ jo³-sˀin² nca³ tjin¹tsˀa³to³ntjai²-no³ nca³yi³je³, jo³-sˀin² nca³ ma³cjain¹-no³, jo³-sˀin² nca³ no²cjoao⁴³, cao⁴ cjoa⁴chji⁴ne⁴, cao⁴ nca³yi³je³ cjoa⁴ni²coi²nta⁴, cao⁴ cjoa⁴tjao²cha³-no³ xi³ tˀa³tsain⁴-jin⁴, cˀoa⁴-ti⁴ tse³ ca²ta³sˀe³ tsˀa³to³ntjai²-no³ je² cjoa⁴nta³-vi⁴.
2CO 8:8 Li²coi³ nchja²³ jo³-ni³ tsa² je² xi³ va³te¹xo³ma³, to⁴nca³ jo³-sˀin² tsjoa¹nca³nˀion¹ xi³cˀa³, jme¹-ni³ nca³ cho¹tˀa³-nio³ tsa² cˀoa⁴-ti⁴ ña³qui³ cjoa⁴qui²xi⁴ je² cjoa⁴tjao²cha³-no³.
2CO 8:9 Je³ˀyao³ je² cjoa⁴nta³-le⁴ xi³ tsˀe⁴ Nai³-na¹ Jesucristo, nca³ xi³ tˀa³tsaon⁴³ coan³ yo⁴ma⁴, nta³ tsa² nchi⁴na¹, jme¹-ni³ nca³ jon² cˀoa⁴-sˀin² nchi⁴na¹ coan⁴-nio³ xi³ to⁴tˀa³tsˀe⁴ nca³ yo⁴ma⁴ coan³ nca³ je².
2CO 8:10 Cˀoa⁴ cao⁴ je² cjoa⁴-vi⁴ xin³ya²³-no³, nca³ je²-vi⁴ xi³ nta³ tjin¹-ni³no³ nca³ jon². Je² xi³ ti¹tjon² tsa³cˀe²tsˀia⁴cao⁴³ ˀnta³ ni⁴čhjin³ no¹ xi³ ja³ˀa³to³, nca³ tsi² tsa² to⁴coi³ nca³ cˀoa⁴qui³nˀian² ti¹tjon²³, to⁴nca³ cˀoa⁴-ti⁴ ti¹tjon² cˀoa⁴-sˀin² coan³me³-no³.
2CO 8:11 Ntˀai⁴-vi⁴, tso²cˀoa⁴, cˀoa⁴-ti⁴ ti⁴cje³tˀao³ je² xi³ nˀiaon²³. Jo³-sˀin² nca³ cˀoa⁴-sˀin² coan³jyo³ nti⁴ton⁴-no³, cˀoa⁴ti⁴-sˀin² ti⁴tjo³son² nti⁴ton⁴³, jo³-sˀin² nca³ tjin¹-no³.
2CO 8:12 Tsa² jnco³ xi³ jyo³nti⁴ton⁴-le⁴, cˀoa⁴-sˀin² tjoe¹ jo³ cji³ tjin¹-le⁴, li²coi³ jo³ cji³ xi³ tsin²-le⁴.
2CO 8:13 Li²coi³ cˀoa⁴xian³ je²-vi⁴, jme¹-ni³ nca³ je² xi³cˀa³ li²coi³ ñˀain³ coa⁴tio⁴-si¹ni³, cˀoa⁴ nca³ jon² ñˀain³ coi⁴yo³.
2CO 8:14 To⁴nca³ cˀoa⁴xian³ je²-vi⁴, jme¹-ni³ nca³ nco¹son² coan⁴-si¹nio³, cˀoa⁴ je² xi³ tse³ tjin¹-no³ ntˀai⁴-vi⁴, ca²ti³ncha³cao⁴ je² xi³ cha³-le⁴, jme¹-ni³ nca³ cˀoa⁴-ti⁴ je² xi³ tse³ sˀe⁴-le⁴ coi⁴ncha³cao⁴-si¹ni³no³ xi³ cha³-no³. Cˀoa⁴-sˀin² to⁴nco¹son² coaon⁴³.
2CO 8:15 Jo³-sˀin² nca³ tji¹tˀa³: Je² xi³ tse³ tsa³cˀe¹xco¹, li²jme³ xi³ qui³njen²nqui³-le⁴, cˀoa⁴ je² xi³ choa³ tsa³cˀe¹xco¹, li²jme³ xi³ qui³cha³-le⁴.
2CO 8:16 To⁴nca³ ca²ta³vˀai²-le⁴ cjoa⁴nta³ Ni³na¹ xi³ qui³tsjoa³jin³ ni⁴ma⁴-le⁴ Tito nca³ ti⁴cˀoa⁴-sˀin² qui³si³coi²nta⁴-ni³no³.
2CO 8:17 Ña³qui³ cjoa⁴qui²xi⁴ nca³ nta³ qui³scoe¹ xi³ qui³sˀe³ne²-le⁴. Cˀoa⁴-ti⁴sˀin² nˀion¹ nta³ qui³si³coi²nta⁴-no³ nca³ ti⁴je² xi³ coan³jyo³-le⁴ nca³ qui³con³-no³.
2CO 8:18 Cao⁴ Tito to⁴jnco³ qui³cha³ni²coai⁴-jin⁴ je² ntsˀe³² xi³ ti³chˀa²sje³nta³ nca³ nchja⁴ya³ je² en¹nta³ xi³ tˀa³tsˀe⁴ Cristo ya⁴jin³ nca³tsˀi³ na⁴xi⁴na³nta¹-le⁴ Cristo.
2CO 8:19 Cˀoa⁴ a³li² to⁴coi³-jin² je²-vi⁴, to⁴nca³ cˀoa⁴-ti⁴ je² na⁴xi⁴na³nta¹-le⁴ Cristo tsa³cja³ˀa¹jin³ nca³ je² nca³ to⁴jnco³ cˀoa¹mjen³cao⁴-na³jin⁴, cao⁴ cjoa⁴nta³-vi⁴, xi³ coi³ xa¹-vi⁴ tjin¹-na³jin⁴. Coi³ xi³ nˀiain²⁴-jin⁴ tˀa³tsˀe⁴ cjoa⁴je³ya³-le⁴ Nai³-na¹, cˀoa⁴ nca³ coa⁴co² jo³-sˀin² nca³ coan³jyo³ nti⁴ton⁴-no³.
2CO 8:20 Cˀoa⁴-sˀin² cˀoe¹chjoa²-lai⁴jin⁴ nca³ tsi² ˀya³ xi³ jin⁴-jin⁴ coa⁴²ne²-na³jin⁴ tˀa³tsˀe⁴ je² cjoa⁴tjao² xi³ tse³ xi³ jin⁴-jin⁴ ti³ni²xa¹coai⁴-jin⁴.
2CO 8:21 Cˀoe¹ta³con²-lai⁴jin⁴ cjoa⁴ xi³ nta³ tjin¹, a³li² to⁴coi³cjoan² ya⁴ nqui³xcon⁴ Nai³-na¹, to⁴nca³ cˀoa⁴-ti⁴ ya⁴ nqui³xcon⁴ cho⁴ta⁴.
2CO 8:22 Cˀoa⁴-ti⁴ ni²ca³sen¹coai⁴-jin⁴ ntsˀe²³ cao⁴ je², xi³ ncjin² cˀa³ qui³cho²tˀai³-jin⁴ nca³ nta³ si¹coi²nta⁴, to⁴nca³ ntˀai⁴-vi⁴ nqui²sa⁴-sa³ nta³ si¹coi²nta⁴ nca³ cˀoa⁴-sˀin² tse³ nta³ ve³con³-no³ nca³ jon².
2CO 8:23 Ntˀai⁴-vi⁴ je² xi³ vˀa³cao⁴-le⁴ Tito, mi²yo⁴-na⁴ ma³-ni³ xi³ ña³tjen⁴ si¹xa¹cao⁴-na³ tˀa³tsaon⁴³. Cˀoa⁴-ti⁴ je² xi³ vˀa³cao⁴-le⁴ ntsˀe³², je² ni¹ xi³ fi² tsjoa¹ en¹ xi³ tˀa³tsˀe⁴ je² na⁴xi⁴na³nta¹-le⁴ Cristo cˀoa⁴ cˀoa⁴sje³je³ya³ Cristo.
2CO 8:24 Ta⁴co²son²tsen³-lao⁴³ tso²cˀoa⁴, nqui³xcon⁴ je² cho⁴ta⁴-vi⁴, cˀoa⁴-ti⁴sˀin² nqui³xcon⁴ nca³tsˀi³ na⁴xi⁴na³nta¹-le⁴ Cristo, jo³-sˀin² nca³ tsjoa³chao³, cˀoa⁴ jo³-sˀin² nca³ tjin¹ cjoa⁴qui²xi⁴ nca³ chˀa²sje³je³ya³-lai²⁴jin⁴.
2CO 9:1 Cˀoa⁴ je² taon⁴ xi³ ma³xco¹ xi³ tˀa³tsˀe⁴ cho⁴ta⁴-le⁴ Cristo, li²coi³ ti⁴ma³chjen¹-ni³na³ nca³ squi³-no³ tˀa³tsˀe⁴ je²-vi⁴.
2CO 9:2 Nca³ ˀve³-nia¹³ jo³-sˀin² nca³ jyo³nti⁴ton⁴-no³. Coi³ xi³ vˀa³sje³je³ya³-ni³no³ nqui³xcon⁴ cho⁴ta⁴ ya⁴ Macedonia, nca³ Acaya je³ti¹jna³nta³ sa³ˀnta³ ni⁴čhjin³ no¹ xi³ ja³ˀa³to³. Cˀoa⁴ jo³-sˀin² nca³ qui³ni²coi²ntao⁴³, ncjin² xi³ cˀoa⁴-sˀin² qui³ni²cja³ˀa¹-lao⁴³ nca³ cji³ma³me³con³.
2CO 9:3 To⁴nca³ si³ca³sen¹³ ntsˀe³², jme¹-ni³ nca³ je² cjoa⁴je³ya³-na⁴jin⁴ xi³ tˀa³tsaon⁴³ li²coi³ to⁴xo³cˀoa⁴coan⁴ cjoa⁴-vi⁴, jme¹-ni³ nca³ coi⁴yo³nta³-si¹nio³ jon² jo³ qui³xian³,
2CO 9:4 cˀoa⁴ jme¹-ni³ nca³ tsi² tsa² to⁴jin⁴ coan⁴soa³-si¹ni³na³jin⁴, cˀoa⁴-ti⁴ coaon⁴³ nca³ jon², nca³ cˀoa⁴-sˀin² nˀion¹ nta³ tsa³ˀya³ta³con²-lai²⁴jin⁴. Cˀoa⁴ coan⁴ tsa² cjoa⁴ˀai¹cao⁴-na³ cho⁴ta⁴ macedonios, tsa² scoe⁴-no³ nca³ to⁴jo³ cje³ ti³yo³nta³-jin²nio³.
2CO 9:5 To⁴coi³ qui³si³cja³ˀai³tsjen³ nca³ coan³chjen¹-ni³na³ nca³ tsa³cˀe³ne²³-le⁴ ntsˀe³² nca³ coai⁴con³ ti¹tjon²-ni³no³ nca³ jon², cˀoa⁴ nca³ to⁴nqui³-ni³ cˀoe¹yo³nta³ ti¹tjon²³ je² cjoa⁴tjao² xi³ coan³xco¹ xi³ qui³ni²sˀe³nquio³, jme¹-ni³ nca³ to⁴tjin¹nta³-ni³ je² cjoa⁴tjao²-vi⁴ jo³-ni³ xi³ ni⁴ma⁴-no³ ji³tjo³jin³-ni³, cˀoa⁴ li²coi³ to⁴cjoa⁴nˀion¹ coan⁴-no³.
2CO 9:6 To⁴nca³ je²-vi⁴ cˀoa⁴xin³-no³: Je² xi³ choa³ vˀe¹ntje², cˀoa⁴-ti⁴ choa³ coan⁴jcha¹-le⁴. Cˀoa⁴ je² xi³ tse³ vˀe¹ntje², cˀoa⁴-ti⁴ tse³ coan⁴jcha¹-le⁴.
2CO 9:7 Nca³ jnco¹jnco¹ ca²ta³tsjoa¹ jo³-sˀin² co³son²-ni³le⁴ ni⁴ma⁴-le⁴, a³li² cao⁴ cjoa⁴va³-jin², ni⁴cao⁴ cjoa⁴nˀion¹-jin², nca⁴ Ni³na¹ tsjoa³que³ je² xi³ cao⁴ cjoa⁴tsjoa³ tsjoa¹.
2CO 9:8 Cˀoa⁴ Ni³na¹ tjin¹-le⁴ nca³nˀion¹ nca³ nqui²sa⁴ si⁴²tse³ya³-no³ nca³yi³je³ cjoa⁴nta³, nca³ sˀe⁴ntsjai²-no³ nca³yi³je³ xi³ ma³chjen¹-no³, jme¹-ni³ nca³ tse³ coan⁴ncjin²ya³-si¹ni³no³ nca³yi³je³ xa¹ xi³ nta³,
2CO 9:9 jo³-sˀin² nca³ tji¹tˀa³: Qui³si³cˀa³vi¹, qui³tsjoa³-le⁴ cho⁴ta⁴yo⁴ma⁴. Je² cjoa⁴ qui²xi⁴-le⁴ tjin¹ nca³ntsjai².
2CO 9:10 Je² xi³ tsjoa¹-le⁴ na⁴xin⁴ je² xi³ vˀe¹ntje², cˀoa⁴-ti⁴ tsjoa¹-le⁴ nio⁴xti²la⁴ xi³ vi³cha², cˀoa⁴-ti⁴ si⁴²ncjin²ya³-no³ xi³ ma³ sˀe³ntje², cˀoa⁴ si⁴²tse³ya³-sa³ xi³ coan⁴jcha¹ xi³ tsˀe⁴ cjoa⁴qui²xi⁴-no³.
2CO 9:11 Cˀoa⁴-sˀin² coan⁴nchi⁴na¹-nio³ cao⁴ nca³yi³je³, jme¹-ni³ nca³ tse³ cˀoai⁴-si¹ni³lao⁴³ nca³yi³je³ cjoa⁴nta³ xi³cˀa³, xi³ si⁴²xa¹jin³-le⁴ nca³ tsjoa¹-le⁴ cjoa⁴nta³ Ni³na¹ cˀia⁴ nca³ cha⁴ni²-lai⁴jin⁴ cjoa⁴tjao²-no³.
2CO 9:12 Cˀia⁴ nca³ vˀe¹ je² taon⁴-vi⁴ xi³ cˀoa⁴-sˀin² vi³ncha³cao⁴, a³li² to⁴coi³-cjoan² nca³ tsjoa¹ je² xi³ cha³-le⁴ cho⁴ta⁴-le⁴ Cristo, to⁴nca³ cˀoa⁴-ti⁴ ma³tse³ya³ je² cjoa⁴nta³ xi³ ncjin² ma³-ni³ xi³ tsjoa¹-le⁴ Ni³na¹.
2CO 9:13 Cˀoa⁴-sˀin² cˀoa⁴sje³je³ya³ Ni³na¹ nca³ cˀoa⁴-sˀin² ni²qui²xi⁴yao³ jo³-sˀin² ni²tjo³son²-lao⁴³ je² en¹nta³ xi³ tˀa³tsˀe⁴ Cristo, nca³ cˀoa⁴-sˀin² cho¹tˀa³-no³ nca³ vˀao²³ taon⁴-vi⁴ cˀoa⁴ nca³ tse³ ma³ cjoa⁴tjao²-no³ xi³ cˀoai⁴-lao⁴³ nca³ je² cˀoa⁴ nca³tsˀi³.
2CO 9:14 Cˀoa⁴-ti⁴sˀin²ni³ nca³ je² vˀe¹tsˀoa³ntjai²-no³. Nˀion¹ coan⁴me³con³-no³ nca³ tjin¹-no³ je² cjoa⁴nta³-le⁴ Ni³na¹ xi³ nˀion¹ tse³.
2CO 9:15 Cjoa⁴nta³ ca²ta³vˀai²-le⁴ Ni³na¹ xi³ tˀa³tsˀe⁴ je² cjoa⁴tjao²-le⁴ xi³ tsi² tsa² ˀya³ xi³ ma³jin³-le⁴.
2CO 10:1 To⁴nca³ an³ nia¹³ xi³ Pablo vˀe³tsˀoa²³-no³ cao⁴ cjoa⁴ntˀe¹ cˀoa⁴ cao⁴ cjoa⁴ˀi³nta³jin³ta³con² jo³-ni³ tsa² tsˀe⁴ Cristo, an³ xi³ cjoa⁴qui²xi⁴ na³nqui³ cjia³ cˀia⁴ nca³ ti²jna⁴ nqui³xcon³ nca³ jon², to⁴nca³ cˀia⁴ nca³ xin² ti²jna⁴, ma³nˀion¹-coan³ cao⁴ nca³ jon².
2CO 10:2 Vˀe³tsˀoa²³-no³ nca³ tsi² tsa² tjin¹ne²-na³ nca³ coan⁴nˀion¹jin³coan³ cˀia⁴ nca³ ti²jna⁴jin³-no³, jo³-sˀin² ma³nˀion¹ta³con²coa⁴ cˀa³ xi³ cˀoa⁴-sˀin² si¹cja³ˀai³tsjen³ xi³ tˀa³tsain⁴-jin⁴ nca³ ti³mai³⁴-jin⁴ jo³-sˀin² me³-le⁴ yao³-na⁴jin⁴.
2CO 10:3 Nta³ tsa² cˀoa⁴-sˀin² ti³ma³coai⁴-jin⁴ yao³-na⁴jin⁴ jo³-ni³ tsa² cho⁴ta⁴son³ˀnte³, li²coi³ vi³xcain³⁴-jin⁴ jo³-sˀin² cjan¹ cho⁴ta⁴son³ˀnte³.
2CO 10:4 Je² qui⁴cha⁴ xi³ tsˀe⁴ cjoa⁴jchan¹-na⁴jin⁴, a³li² tsˀe⁴-jin² yao³-na⁴jin⁴, to⁴nca³ tjin¹-le⁴ nca³nˀion¹ xi³ to⁴tˀa³tsˀe⁴ Ni³na¹, nca³ si⁴²qui³xo²ya³ to⁴jme³-ni³ xi³ nˀion¹ tjio¹.
2CO 10:5 Ni²qui³xo²yai³⁴-jin⁴ cjoa⁴fa³ˀai³tsjen³ xi³ ncˀa³ tjio¹ cˀoa⁴ nca³yi³je³ cjoa⁴ xi³ ncˀa³ tjin¹, xi³ vi³so¹tjen⁴ co²ntran⁴-le⁴ cjoa⁴chji⁴ne⁴-le⁴ Ni³na¹. Ntoa³nˀioin¹⁴-jin⁴ nca³yi³je³ cjoa⁴fa³ˀai³tsjen³, jme¹-ni³ nca³ si⁴²tjo³son²-si¹ni³le⁴ Cristo.
2CO 10:6 Cˀoa⁴ ti³yo³ntai³⁴-jin⁴ nca³ cˀoai⁴-lai⁴jin⁴ cjoa⁴ñˀain³ to⁴jme³ cjoa⁴-ni³ xi³ tsi² si¹tjo³son², cˀia⁴ nca³ cjoe⁴coan⁴jnco³ jo³-sˀin² ni²tjo³son²³ nca³ jon².
2CO 10:7 Jon² cho¹tsen³-lao⁴³ cjoa⁴ jo³-sˀin² nca³ ma³tsen³. Tsa² jnco³ xi³ ti⁴je² nta³ ve³con³-ni³ yao³-le⁴ nca³ tsˀe⁴ Cristo, cˀoa⁴-ti⁴ je²-vi⁴ ca²ta³si¹cja³ˀai³tsjen³ nqui²ntia³ jo³-sˀin² nca³ je² tsˀe⁴ Cristo ni¹, cˀoa⁴-ti⁴sˀin²ni³ jin⁴-jin⁴ tsˀe⁴ Cristo ni¹⁴-jin⁴.
2CO 10:8 Nta³ tsa² nqui²sa⁴ nˀion¹ tse³ vˀa³sje³je³ya³-sa³ yao³-na⁴ xi³ tˀa³tsˀe⁴ cjoa⁴te¹xo³ma³-na⁴jin⁴, li²coi³ coan⁴soa³-na³. Je² Nai³-na¹ qui³tsjoa³-na³jin⁴ cjoa⁴te¹xo³ma³ nca³ si⁴quin³ncˀa³-lai²⁴jin⁴. li²coi³ nca³ si⁴qui³xo²ya³-lai²⁴jin⁴.
2CO 10:9 Coi³ xi³ me³-na³ nca³ tsi² tsa² coi³ coan⁴tsen³ jo³-ni³ tsa² an³ xi³ me³-na³ coi³ncha³xcon¹-ni³no³ cao⁴ xon⁴carta.
2CO 10:10 Nca⁴ coi³ xi³ cˀoa⁴tso²: Je² xon⁴-le⁴ nˀion¹ nchja⁴tˀa³, cˀoa⁴ en¹-le⁴ nˀion¹jin³, to⁴nca³ cˀia⁴ nca³ ti¹jna³soa³ je², tsin²-ni³le⁴ nca³nˀion¹-jin², cˀoa⁴ en¹-le⁴ a³li²jme³-ni³ chji¹-le⁴.
2CO 10:11 Je² xo⁴cjoan³-ve⁴ xi³ cˀoa⁴tso² ca²ta³si¹cja³ˀai³tsjen³jin³ je²-vi⁴, jo³ cjoain³-jin⁴ cao⁴ en¹-na⁴jin⁴ xi³ chji³tˀai³-jin⁴ xon⁴, cˀia⁴ nca³ xin² ti³yoi³-jin⁴, cˀoa⁴-ti⁴ coan⁴ cjoain³-jin⁴ cao⁴ xi³ nˀiain²⁴-jin⁴ cˀia⁴ nca³ ti³yo³va³sain³⁴-jin⁴.
2CO 10:12 Nca⁴ tsi² ma³nˀion¹-ta³coin²⁴jin⁴ nca³ ya⁴ si⁴xqui⁴tˀai³-jin⁴ yao³-na⁴jin⁴ a³xo⁴ si⁴nco¹son²coai⁴-jin⁴ yao³-na⁴jin⁴ cao⁴ cˀa³ xi³ ti⁴je² nta³ vˀa³sje³-ni³ yao³-le⁴. Nca⁴ ti⁴je² vˀe¹cho⁴ya³-ni³ yao³-le⁴ ya⁴jin³-le⁴ xi¹ncjin¹, cˀoa⁴ si¹nco¹son² yao³-le⁴ cao⁴ xi¹ncjin¹, tsin²-le⁴ cjoa⁴fa²ˀai³tsjen³-jin².
2CO 10:13 To⁴nca³ jin⁴-jin⁴ li²coi³ si⁴cˀa³toi²⁴-jin⁴ choa⁴-le⁴ nca³ chˀa⁴sje³je³yai³⁴-jin⁴ yao³-na⁴jin⁴, to⁴nca³ jo³-sˀin² tji¹choa⁴ cjoa⁴te¹xo³ma³ xi³ Ni³na¹ qui³tsjoa³choa⁴-na³jin⁴, sa³ˀnta³ nca³ coi³cho³chon³-lai²⁴jin⁴ nca³ jon².
2CO 10:14 Nca⁴ tsi² tsa² mai¹son² tsˀa³to³-sai³⁴jin⁴ choa⁴-na⁴jin⁴, jo³-ni³ tsa² tsi²coi³ coi³cho³chon³-lai²⁴jin⁴ sa³ˀnta³ jon², nca³ jin⁴-jin⁴ xi³ ti¹tjoin²⁴-jin⁴ je³ji³cho³chon³-lai²⁴jin⁴ sa³ˀnta³ jon² cao⁴ je² en¹nta³ xi³ tˀa³tsˀe⁴ Cristo.
2CO 10:15 Nca⁴ tsi² ni²cˀa³toi²⁴-jin⁴ choa⁴-le⁴ nca³ chˀa²sje³je³yai³⁴-jin⁴ yao³-na⁴jin⁴ cao⁴ xa¹ xi³ tsˀe⁴ xi³ cja³ˀai¹. To⁴nca³ cho³ya²-lai⁴jin⁴ nca³ nqui²sa⁴ coan⁴jcha¹jin³-sa³no³ je² xi³ ma³cjain¹-no³. Cˀoa⁴-sˀin² nqui²sa⁴ coan⁴je³ya³ta³coin²⁴-jin⁴ ya⁴jin³-le⁴ nca³ jon², jo³-sˀin² choa⁴-le⁴ xa¹-na⁴jin⁴.
2CO 10:16 Cˀoa⁴ cho³ya²-lai⁴jin⁴ nca³ coi⁴no²cjoa⁴yai³⁴-jin⁴ je² en¹nta³ xi³ tˀa³tsˀe⁴ Cristo ya⁴ ˀnte³ xi³ nqui²sa⁴ cjin³tˀa³-no³ nca³ jon², nca³ tsi² chˀa⁴sje³je³yai³⁴-jin⁴ yao³-na⁴jin⁴ cao⁴ je² xi³ je³ti¹jna³nta³ ya⁴ ˀnte³-le⁴ xi³ cja⁴ˀai¹.
2CO 10:17 To⁴nca³ je² xi³ vˀa³sje³je³ya³ yao³-le⁴, to⁴sa³ ca²ta³vˀa³sje³je³ya³ yao³-le⁴ nca³ ti¹jna³cao⁴ Nai³-na¹.
2CO 10:18 Nca⁴ tsi² tsa² je² xi³ ti⁴je² vˀa³sje³nta³-ni³ yao³-le⁴, xi³ cˀoa⁴-sˀin² nta³ cho²tˀa³, to⁴nca³ je² xi³ Ni³na¹ vˀa³sje³nta³.
2CO 11:1 To⁴ma²-ni³ nca³ ni²cjain¹ˀi⁴tsao¹³ je² cjoa⁴sca¹-na⁴. Jaon³, ti⁴cjain¹-nao¹³.
2CO 11:2 Nca⁴ cˀoa⁴-sˀin² ma³chi⁴ni⁴que⁴-no³ tˀa³tsˀe⁴ Ni³na¹. Nca⁴ an³ xi³ cˀoa⁴-sˀin² qui³sˀian³ nca³ qui³ni²sˀe³nqui³-no³ jnco³ xˀin⁴, nca³ coa³sen³jna² va³sen³-no³ jo³-ni³ tsa² jnco³ chjon⁴²xo³nco¹ xi³ tsje³ tˀa³tsˀe⁴ Cristo.
2CO 11:3 To⁴nca³ tsa³cjon³-nia³ jo³-sˀin² nca³ je² ye⁴ tsa³cˀa³na⁴cha⁴-le⁴ Eva cao⁴ je² cjoa⁴ma²ña⁴-le⁴, tsa² cˀoa⁴-sˀin² cjoi⁴tson¹jin³ je² cjoa⁴fa³ˀai³tsjen³-no³ nca³ coai⁴tˀa³xin²-le⁴ nca³ tsi² ti⁴tjio¹jnco³-ni³ta³con²³ tˀa³tsˀe⁴ Cristo.
2CO 11:4 Nca⁴ tsa² je² xi³ fa³ˀai³, nchja⁴ya³-no³ xi³ nqui²jnco³ Jesús cao⁴-ni³ tsa² je² xi³ qui³no²cjoa⁴yai³⁴-jin⁴, a³xo⁴ tsa² chjoao¹³ nqui²jnco³ espíritu xi³ cja⁴ˀai¹ cao⁴-ni³ tsa² je² xi³ je³qui³chjoao¹³, a³xo⁴ nqui²jnco³ en¹nta³ xi³ tˀa³tsˀe⁴ Cristo xi³ cja⁴ˀai¹ cao⁴-ni³ tsa² je² xi³ je³qui³chjoao¹³, nta³ si⁴cjain¹-lao⁴³.
2CO 11:5 Cjoa⁴qui²xi⁴ si³cja³ˀai³tsjen³-nia¹³ nca³ ni⁴jme³-jin² xi³ na³nqui³ ti²jna⁴-le⁴ je² pa²stro⁴ xo⁴cjoan³-ve⁴ xi³ nˀion¹ ncˀa³ vˀa³sje³ yao³-le⁴.
2CO 11:6 Nta³ tsa² tsi² to⁴jo³ nta³ nchja²³, to⁴nca³ li²jme³ cjoa⁴chji⁴ne⁴ xi³ cha³-na³. Cao⁴ nca³yi³je³ cjoa⁴ cˀoa⁴-sˀin² tsa³ca³co²son²tsen³-lai²⁴jin⁴ nca³ jon² je² cjoa⁴chji⁴ne⁴.
2CO 11:7 A³ tsa³jnqui³-nia¹³ je¹ nca³ nqui²sa⁴ na³nqui³ ti⁴ˀan³ qui³si³cja³ˀa³jen³-nia³ yao³-na⁴, jme¹-ni³ nca³ jon² nqui²sa⁴ ncˀa³ coan⁴-si¹nio³, nca³ tsi²jme³ xi³ qui³sˀe³nqui³-no³ nca³ qui³nchja²ya³jin³-no³ je² en¹-le⁴ Ni³na¹.
2CO 11:8 Cˀoa⁴-sˀin² qui³si³che²³-le⁴ xi³cˀa³ na⁴xi⁴na³nta¹-le⁴ Cristo, nca³ qui³sˀe³chji¹-na³, jme¹-ni³ nca³ si³xa¹³-si¹ni³no³ nca³ jon².
2CO 11:9 Cˀia⁴ nca³ tsa³ca²te⁴jna³cao⁴-no³ nca³ jon², nca³ tjin¹ xi³ coan³chjen¹-na³, ni⁴ˀya³-jin² xi³ qui³si³chˀa¹ne²-le⁴. Je² xi³ cˀoa⁴-sˀin² qui³cha³-na³, je² ntsˀe³² xi³ ji³nčhoa³-ni³ Macedonia qui³tsjoa³-na³. Cˀoa⁴ cao⁴ nca³yi³je³ qui³si³coi²nta⁴ yao³-na⁴, cˀoa⁴ si³coi²nta⁴ yao³-na⁴, nca³ tsi² tsa² jon² si³chˀa¹ne²-no³.
2CO 11:10 Je² cjoa⁴qui²xi⁴-le⁴ Cristo ti¹jna³jin³ ni⁴ma⁴-na⁴, nca³ li²coi³ sˀe⁴chjoa²-na³ ya⁴ ˀnte³ Acaya nca³ cˀoa⁴-sˀin² vˀa³sje³je³ya³ yao³-na⁴ tˀa³tsˀe⁴ cjoa⁴ je²-vi⁴.
2CO 11:11 A¹-ni³. A³ coi³ nca³ tsi² tsjoa³que⁴-no³. Ni³na¹ ti¹ve³ nca³ tsjoa³que⁴-no³.
2CO 11:12 Je² xi³ cˀoa⁴sˀian³, to⁴jo³ cˀoa⁴sˀin³-sa³, jme¹-ni³ nca³ coa³te³chjoa²³-si¹ni³le⁴ je² cho⁴ta⁴ xi³ me³-le⁴ nca³ cˀoa⁴tso² nca³ ma³nco¹son² cao⁴ jin⁴-jin⁴. Tˀa³tsˀe⁴ je² cjoa⁴ vˀa³sje³je³ya³-ni³ yao³-le⁴.
2CO 11:13 Nca⁴ je²-vi⁴ pa²stro⁴ nti³so³ ni¹, cho⁴ta⁴ xi³ si¹xa¹ xi³ vˀa³na⁴cha⁴, nca³ si¹cˀa³ntjai²ya³ yao³-le⁴ nca³ cˀoa⁴ma³ cjoan³ jo³-ni³ pa²stro⁴ xi³ tsˀe⁴ Cristo.
2CO 11:14 Cˀoa⁴ a³li² cjoa⁴xcon¹-jin² je²-vi⁴, nca⁴ ti⁴je²-ni³ Satanás si¹cˀa³ntjai²ya³ yao³-le⁴ jo³-ni³ tsa² jnco³ a²ncje⁴ xi³ si¹ˀi³sen³.
2CO 11:15 Cˀoa⁴-sˀin² nca³ li²coi³ si¹xcon¹ tjin¹ tsa² cˀoa⁴-ti⁴ je² xi³ si¹xa¹-le⁴ si¹cˀa³ntjai²ya³ yao³-le⁴ jo³-ni³ tsa² xi³ si¹xa¹-le⁴ xi³ cjoa⁴qui²xi⁴. Cˀoa⁴ xi³ fe³tˀa³-le⁴ cˀoa⁴coan⁴ jo³-sˀin² xa¹-le⁴.
2CO 11:16 Nqui²jnco³cˀa² cˀoa⁴xian³: Ni⁴ˀya³-jin² xi³ ca²ta³si¹cja³ˀai³tsjen³ nca³ sca¹-na³, to⁴nca³ tsa² cˀoa⁴-sˀin² si⁴cja³ˀai³tsjaon³, chjo¹ve¹-nao¹³ jo³-ni³ jnco³ xi³ sca¹-le⁴, jme¹-ni³ nca³ to⁴jo³ cˀoa³sje³je³ya³ i⁴tse¹-sa³nia³ yao³-na⁴.
2CO 11:17 Je² xi³ nchja²³, li²coi³ cˀoa⁴-sˀin² nchja²³ jo³-sˀin² tsa² cjoa⁴fa³ˀai³tsjen³-le⁴ Nai³-na¹, to⁴nca³ jo³-ni³ tsa² cao⁴ cjoa⁴sca¹, nca³ cˀoa⁴-sˀin² nta³ ˀve³coan³ yao³-na⁴ xi³ vˀa³sje³je³ya³.
2CO 11:18 Ncjin² xi³ vˀa³sje³je³ya³ yao³-le⁴ xi³ to⁴tˀa³tsˀe⁴ jo³-sˀin² ma³tsen³. Coi³ nca³ an³ cˀoa⁴-ti⁴sˀin² cˀoa³sje³je³ya³ yao³-na⁴.
2CO 11:19 Cao⁴ cjoa⁴tsjoa³ nta³ ni²cjain¹-lao⁴³ je² xi³ sca¹ya³-le⁴, nca⁴ jon² xi³ chji⁴nao⁴³.
2CO 11:20 Nca⁴ ni²cjain¹-lao⁴³ tsa² jnco³ xi³ to⁴cho⁴ˀnta³ cjoa⁴nˀion¹ sˀin⁴²-no³, tsa² jnco³ xi³ cjoa⁴chˀa²na⁴cha⁴ tsoa⁴-ni³no³, tsa² jnco³ xi³ si¹che¹tˀa³-no³, tsa² jnco³ xi³ je³ya³ vˀa³sje³ yao³-le⁴, tsa² jnco³ xi³ ncjaon¹³ cˀoe⁴²ˀa³.
2CO 11:21 Si³soa³-le⁴ yao³-na⁴ nca³ cˀoa⁴xian³, nca³ jin⁴-jin⁴ jo³-ni³ tsa² tsi² qui³sˀe³-na³jin⁴ nca³nˀion¹. To⁴jme³ cjoa⁴-ni³ tsa² tjin¹ cˀa³ xi³ ma³nˀion¹con³, cˀoa⁴-ti⁴ an³ ma³nˀion¹coan³ (nchja²³ an³ jo³-ni³ xi³ sca¹-le⁴).
2CO 11:22 A³ cho⁴ta⁴ hebreos ni¹. Cˀoa⁴-ti⁴ an³. A³ cho⁴ta⁴ israelitas ni¹. Cˀoa⁴-ti⁴ an³. A³ ntje⁴-le⁴ Abraham ni¹. Cˀoa⁴-ti⁴ coi³ an³.
2CO 11:23 A³ si¹xa¹-le⁴ Cristo. An³ nqui²sa⁴-sa³ nˀion¹ si³xa¹³-le⁴, (jo³-ni³ jnco³ xi³ tso²ˀva³sca¹-sˀin² nchja²³). Cao⁴ xa¹ xi³ nqui²sa⁴-sa³ tse³, cao⁴ xi³ tsa³ca¹-na³ sa³ˀnta³ nca³ tsi² coan³xqui⁴ jo³ tjin¹ cˀa³, cao⁴ nca³ nto⁴ya¹ nqui²sa⁴ ncjin² cˀa³ tsa³ca²te⁴jna³, cˀoa⁴ ncjin² cˀa³ me³cˀen³.
2CO 11:24 Je² cho⁴ta⁴ judíos aon² cˀa³ tsa³ca¹-na³, can³ čhja³ˀaon²ño³ cˀa³ nca³ jnco¹jnco¹ cˀa³.
2CO 11:25 Jan² cˀa³ cˀoa⁴-sˀin² tsa³ca¹-na³ cao⁴ ya¹jti³. Jnco³ cˀa² nca³ la⁴jao⁴ qui³sa³te³-na³. Jan² cˀa³ qui³sca³nqui³nta¹ ya⁴ nta¹chi³con³, jnco³ ni⁴čhjin³ cao⁴ jnco³ ni⁴tjen⁴ tsa³ca²te⁴jna³jian³ ya⁴ nca³va³sen³-le⁴ nta¹chi³con³.
2CO 11:26 Ya⁴ ntia⁴²xcon¹ ncjin² cˀa³, ya⁴ xo⁴nca¹ jña³ xcon¹ chon³, xcon¹-le⁴ che¹, xcon¹-le⁴ cho⁴ta⁴ na³nqui³-na⁴, xcon¹-le⁴ cho⁴ta⁴ xi³ li² judío-jin², xcon¹-le⁴ ya⁴ na⁴xi⁴na³nta¹, xcon¹-le⁴ ya⁴ ˀnte³ tˀa³xin²tˀa³, xcon¹-le⁴ ya⁴ nta¹chi³con³, xcon¹-le⁴ ya⁴jin³-le⁴ ntsˀe³² xi³ to⁴nti³so³,
2CO 11:27 cao⁴ xa¹nˀion¹ cao⁴ cjoa⁴vi³jta², cao⁴ xi³ ncjin² cˀa³ tsa³ca²te⁴jna³con³ˀnta³, cao⁴ nca³ coan³vao³-na³ coan³fa³ti²-na³, cao⁴ nca³ ncjin² cˀa³ tsa³ca²te⁴jna³nchjan³, cao⁴ nca³ nchˀan¹ coan³-na³, cao⁴ nca³ me³ qui³sˀe³jtia²³.
2CO 11:28 Cˀoa⁴ tjin¹-sa³ cjoa⁴ xi³ cja⁴ˀai¹, cˀoa⁴ je² xi³ cˀoa⁴-sˀin² ma³jtin¹ne²-na³ nca³ nchaon³nchaon³, nca³ nˀion¹ fa³tse¹ya³ ni⁴ma⁴-na⁴ tˀa³tsˀe⁴ nca³tsˀi³ na⁴xi⁴na³nta¹-le⁴ Cristo.
2CO 11:29 ˀya¹-ni³ xi³ ma³ˀaon³-le⁴, tsa² tsi² nca³ an³ cˀoa⁴-ti⁴ ma³ˀaon³-na³. ˀya¹-ni³ xi³ ni²sa³te¹nqui³, nca³ tsi² an³ ma³jti³ntjai²-na³.
2CO 11:30 Tsa² ma³chjen¹ nca³ cˀoa³sje³je³ya³ yao³-na⁴, an³ cˀoa³sje³je³ya³-nia³ yao³-na⁴ cao⁴ cjoa⁴ˀi³nta³-na⁴.
2CO 11:31 Je² Ni³na¹ cˀoa⁴ je² Nˀai³-le⁴ Nai³-na¹ Jesucristo xi³ ma³chi³con³tˀain³ nca³ntsjai² ve³-ni¹ nca³ tsi² tsa² vˀe³nti³soa³.
2CO 11:32 Ya⁴ Damasco, je² gobernador xi³ tsˀe⁴ ˀnte³-le⁴ je² cho⁴ta⁴ti¹tjon² Aretas qui³si³coi²nta⁴ je² na⁴xi⁴na³nta¹-le⁴ cho⁴ta⁴ damascenos, jme¹-ni³ nca³ tsoa⁴-si¹ni³na³.
2CO 11:33 Tsa³cˀaon³jen³ntjai²-na³ cao⁴ jnco³ ni⁴sin⁴ya¹ ya⁴ ventana-le⁴ čhjao¹nčhˀoa¹-ve⁴. Cˀoa⁴-sˀin² qui³to²ca³ntsja³-na³.
2CO 12:1 Cjoa⁴qui²xi⁴ ni¹, li²coi³ nta³ tjin¹-ni³na³ nca³ cˀoa³sje³je³ya³-nia³ yao³-na⁴, to⁴nca³ cˀoa⁴xin³-sa³ tˀa³tsˀe⁴ je² xi³ fa³ˀa³ya³xcoan³ cˀoa⁴ xi³ ˀve³son²tsen³ xi³ Nai³-na¹ qui³tsjoa³.
2CO 12:2 ˀve³xcon³-nia¹³ jnco³ cho⁴ta⁴ xi³ fi²tˀa³-le⁴ Cristo, xi³ je³coan³ te³ño³ no¹ qui³ntoa³ nti⁴ton⁴-ni³, sa³ˀnta³ xi³ ma³jan²-ni³ ncˀa³jmi³ (tsa² ti¹jna³jin³ yao³-le⁴, li²coi³ ˀve³, cˀoa⁴ tsa² tsi² ti¹jna³jin³ yao³-le⁴, li²coi³ ˀve³. Ni³na¹ xi³ ve³).
2CO 12:3 Cˀoa⁴ ˀve³xcon³-nia¹³ je² cho⁴ta⁴-ve⁴, (tsa² ti¹jna³jin³ yao³-le⁴ a³xo⁴ tsa² tsi² ti¹jna³jin³ yao³-le⁴, li²coi³ ˀve³. Ni³na¹ xi³ ve³)
2CO 12:4 cˀoa⁴-sˀin² qui³ntoa³nti⁴ton⁴-ni³ sa³ˀnta³ ncˀa² ya⁴ jña³ paraíso ˀmi², jña³ nca³ qui³nčhˀoe¹-le⁴ en¹ xi³ nˀion¹ xcon¹, xi³ tsi² tjo³ˀnte³-le⁴ nca³ nchja⁴ cho⁴ta⁴.
2CO 12:5 Xi³ tˀa³tsˀe⁴ je² cho⁴ta⁴-ve⁴, cˀoa³sje³je³ya³ yao³-na⁴, to⁴nca³ xi³ ti⁴tˀa³tsˀan⁴-nia³ ni⁴jme³-jin² xi³ cˀoa³sje³je³ya³ yao³-na⁴, to⁴coi³ tˀa³tsˀe⁴ cjoa⁴ˀi³nta³-na⁴.
2CO 12:6 Nca⁴ tsa² me³-na³ cˀoa³sje³je³ya³ yao³-na⁴, li²coi³ sca¹ coan⁴-na³, nca⁴ cˀoa⁴²xian¹ xi³ cjoa⁴qui²xi⁴. To⁴nca³ si³cˀe¹jna²³-nia¹, jme¹-ni³ nca³ ni⁴ˀya³-jin² xi³ nqui²sa⁴ nta³ si⁴²cja³ˀai³tsjen³-si¹ni³ jo³ cjoan³ an³, cao⁴-ni³ tsa² xi³ ve³ tsˀan⁴, a³xo⁴ xi³ nčhˀoe¹-ni³na³.
2CO 12:7 Cˀoa⁴ cjai¹nca³ to⁴tse³ cjoa⁴ xi³ coan³son²tsen³-na³. To⁴coi³ cjoa⁴-vi⁴ nca³ qui³tsˀai²jin³ yao³-na⁴ jnco³ na³ˀya¹, jme¹-ni³ nca³ li²coi³ coan⁴ncˀa³con³-si¹nia³ xi³ to⁴tsˀa³to³ntjai² choa⁴-le⁴. Je² na³ˀya¹-ve⁴ jnco³ cho⁴ˀnta³-le⁴ Satanás xi³ cˀoa⁴-sˀin² vˀe¹-na³, jme¹-ni³ nca³ tsi² coan⁴ncˀa³con³-si¹nia³ xi³ to⁴tsˀa³to³ntjai² choa⁴-le⁴.
2CO 12:8 Xi³ tˀa³tsˀe⁴ coi³-vi⁴ jan² cˀa³ je³tsa³cˀe³tsˀoa²³-le⁴ Nai³-na¹ nca³ coi⁴tjo³xin²-na³.
2CO 12:9 Cˀoa⁴ je² cˀoa⁴qui³tso²-na³: Cji³ma³-ni³li² je² cjoa⁴nta³-na⁴, nca³ je² nca³nˀion¹-na⁴ nqui²sa⁴ nˀion¹ nta³ ma³tsen³-ni³ cao⁴ cjoa⁴ˀi³nta³-li⁴. To⁴coi³ cao⁴² cjoa⁴tsjoa³ to⁴sa³ cˀoa³sje³je³ya³ yao³-na⁴ xi³ tˀa³tsˀe⁴ cjoa⁴ˀi³nta³-na⁴, jme¹-ni³ nca³ je² nca³nˀion¹-le⁴ Cristo sˀe⁴jna³jin³-si¹ni³na³.
2CO 12:10 Xi³ tˀa³tsˀe⁴ Cristo to⁴coi³ nta³ tjin¹-coan³ cao⁴ cjoa⁴ˀi³nta³-na⁴, cao⁴ nca³ no²cjoa⁴ˀaon³-na³, cao⁴ cjoa⁴ñˀain³, cao⁴ nca³ fi²tjen⁴nqui³ co²ntran⁴-na³, cao⁴ xi³ li² to⁴jo³ xi³ cji³ ñˀain³ ma³-na³. To⁴cˀia⁴-ni³ nca³ i³nta³ an³, cˀia⁴ tjin¹-na³ nca³nˀion¹.
2CO 12:11 Je³cˀoa⁴-sˀin² sca¹ya³-na³ nca³ vˀa³sje³je³ya³ yao³-na⁴. Jon² nio¹³ xi³ cjoa⁴nˀion¹ qui³nˀian²-nao¹³. An³ nia¹³ xi³ tjin¹-ni³ nca³ nta³ chˀa⁴sje³-nao¹³, nca⁴ ni⁴jme³-jin² xi³ nqui²sa⁴ na³nqui³ tsa³ca²te⁴jna³-le⁴ cao⁴-ni³ tsa² je² pa²stro⁴ xi³ nˀion¹ ncˀa³ vˀa³sje³ yao³-le⁴, nta³ tsa² ni⁴jme³-jian²³.
2CO 12:12 Cjoa⁴qui²xi⁴-ni¹ nca³ je² choa⁴-le⁴ pa²stro⁴ cˀoa⁴-sˀin² cˀoa⁴coan³ ya⁴jin³-le⁴ nca³ jon² cao⁴ nca³yi³je³ cjoa⁴tse³ta³con², cao⁴ choa⁴, cao⁴ cjoa⁴ xi³ tse³, cao⁴ cjoa⁴xcon¹.
2CO 12:13 Jo¹-sˀin² nqui²sa⁴ to⁴choa³ nta³ tsa³ˀya³ta³con²-no³ nca³ jon² cao⁴-ni³ tsa² xi³cˀa³ na⁴xi⁴na³nta¹-le⁴ Cristo, tsa² tsi² xi³ to⁴coi³ nca³ ti⁴ˀan³-nia³ li²coi³ qui³si³chˀa¹ne²-no³. Ti⁴cha³tˀa³-nao¹³ xi³ cˀoa⁴-sˀin² chˀao³ qui³sˀian³.
2CO 12:14 Coe⁴-ni³ nca³ je³ti²jna⁴nta³ nca³ cjoi¹con³-no³ xi³ ma³jan²-ni³ cˀa³, cˀoa⁴ li²coi³ si³chˀa¹ne²-no³, nca³ tsi² tsa² je² tso³jmi²-no³ xi³ va³sje²³, to⁴nca³ jon² nio¹³ xi³ va³sjai²³-no³. Nca⁴ li²coi³ ma³chjen¹ nca³ je² xti³ cˀoe⁴²tjao² tˀa³tsˀe⁴ xi³jcha¹-le⁴, to⁴nca³ je² xi³jcha¹-le⁴ cˀoe⁴²tjao² xi³ tˀa³tsˀe⁴ xti³.
2CO 12:15 To⁴nca³ cao⁴ cjoa⁴tsjoa³ si³cje³jian³ nca³nˀion¹-na⁴, cˀoa⁴ ntia³ cjoe⁴jin³ nca³nˀion¹-na⁴ tˀa³tsˀe⁴ ni⁴ma⁴-no³, nta³ tsa² nqui²sa⁴ tse³ tsjoa³que⁴-no³, cˀoa⁴ jon² nqui²sa⁴ choa³ tsjoa³cha³-nao¹³.
2CO 12:16 An³ li²coi³ qui³si³chˀa¹ne²-no³, to⁴nca³ jon² vi³xon¹³ nca³ nˀion¹ ma²ña⁴ nca³ an³, nca³ to⁴cjoa⁴chˀa²na⁴cha⁴ qui³scoe¹-ni³no³.
2CO 12:17 A³ tsa³cˀa³na⁴cha⁴-no³ nca³ jon² cao⁴ jnco³ xi³ tsˀe⁴ je² xi³ qui³si³ca³sen¹con³-no³.
2CO 12:18 Tsa³cˀe³ne²³-le⁴ Tito, cˀoa⁴ qui³si³ca³sen¹jncoa³ ntsˀe³² cao⁴ je². A³ cˀoa⁴²-sˀin² tsa³cˀa³na⁴cha⁴-no³ Tito. A³ tsi² tsa² ti⁴coi³-ni³ cjoa⁴fa³ˀai³tsjen³ ti³ma³jin³-ni³jin⁴, cˀoa⁴ ti⁴coi³-ni³ ntia⁴² ti³ma³yai³⁴-jin⁴.
2CO 12:19 A³ to⁴jo³ ni²cja³ˀai³tsjen³-nio¹³ nca³ to⁴ti³no²cjoa⁴ntjai²⁴-jin⁴ yao³-na⁴jin⁴ cao⁴ jon². Nqui³xcon⁴ Ni³na¹ no²cjoai⁴-jin⁴ nca³ ti³yo³coai⁴-jin⁴ Cristo, to⁴nca³ jon² xi³ tsjoa³que⁴-no³, nca³yi³je³ no²cjoa⁴-ni³jin⁴ xi³ tˀa³tsˀe⁴ nca³ coin⁴ncˀao³.
2CO 12:20 Tsa³cjon³-nia¹³ nca³ cˀia⁴ nca³ coi³choa³, nca³ sa⁴te¹jin³-no³ jo³ cjoaon³, jo³-sˀin² nca³ tsi² sa⁴sen¹-na³, cˀoa⁴ an³ sa⁴te¹jin³-nao¹³ jo³ cjoan³ nca³ tsi² sa⁴sen¹-no³, tsa² cˀoa⁴-sˀin² tjin¹ cjoa⁴vi³xcan¹ ya⁴jin³-le⁴ nca³ jon², cao⁴ cjoa⁴xin²ta³con², cjoa⁴jti³, nca³ jao²ya³ ti³yo³, cao⁴ xi³ chˀao³ ˀmi²lao⁴³ xi²nquio⁴³, cao⁴ xi³ chja³ˀa²nqui³jmio¹³, cao⁴ cjoa⁴ncˀa³ta³con², cao⁴ cjoa⁴si³.
2CO 12:21 Tsa³cjon³-nia¹³ cˀia⁴ nca³ coi³cho³-nia³ nca³ Ni³na¹ si⁴²cja³ˀa³jen³-na³ nqui³xcon³ nca³ jon², cˀoa⁴ nca³ squi³ˀnta¹³ xi³ tˀa³tsˀe⁴ xi³ ncjin² xi³ nca³sˀa⁴ tsa³jnqui³ je¹, cˀoa⁴ nca³ cje³ si¹cja³ˀai³tsjen³jin³-jin²ni³ xi³ tˀa³tsˀe⁴ cjoa⁴jnti¹-le⁴, cao⁴ cjoa⁴cha³jnqui³-le⁴, cˀoa⁴ cao⁴ cjoa⁴chi⁴nca⁴-le⁴ xi³ qui³sˀin³.
2CO 13:1 Je² xi³ ma³jan²-ni³ cˀa³ cjoi¹con³-no³ nca³ jon². Cao⁴ xi³ jao² a³xo⁴ jan² testigo xi³ tsjoa¹ en¹-le⁴ cˀoa⁴-sˀin² sˀe⁴nta³-ni³ nca³yi³je³ cjoa⁴sˀe³nqui³.
2CO 13:2 To⁴nqui³-ni³ je³cˀoa⁴qui³xian³ nca³sˀa⁴, cˀoa⁴ ntˀai⁴ nqui²jnco³cˀa² cˀoa⁴xin³-nca¹nia³. To⁴jo³-sˀin² nca³ qui³xin³-le⁴ cˀia⁴ nca³ tsa³ca²te⁴jna³cao⁴-no³ xi³ coan³jao²-ni³ cˀa³, cˀoa⁴-sˀin² ntˀai⁴ nca³ xin² ti²jna⁴, cˀoa⁴xin³-le⁴ je² xi³ nca³sˀa⁴ tsa³jnqui³ je¹, cˀoa⁴ nca³tsˀi³ xi³cˀa³. Tsa² cjoi¹nqui²jnco³cˀa²³ li²coi³ si³cha³tˀa³-le⁴.
2CO 13:3 Coi³ nca³ me³-no³ nca³ cho¹tˀa³-nao¹³ tsa² Cristo nchja⁴jin³-na³. Je² Cristo li²coi³ i³nta³ xi³ tˀa³tsaon⁴³, to⁴nca³ tjin¹-le⁴ nca³nˀion¹ xi³ tˀa³tsaon⁴³.
2CO 13:4 Qui³sˀe³tˀa³-ni³ cro² to⁴tˀa³tsˀe⁴ cjoa⁴ˀi³nta³-le⁴, to⁴nca³ to⁴tˀa³tsˀe⁴ nca³nˀion¹-le⁴ Ni³na¹ ti¹jna³con³-ni³. Cˀoa⁴-ti⁴ ña¹ cˀoa⁴-sˀin² i³nta³ cjoan³² cao⁴ je², to⁴nca³ cao⁴ je² coi⁴yo³chon³-nia¹ xi³ tˀa³tsaon⁴³ xi³ to⁴tˀa³tsˀe⁴ nca³nˀion¹-le⁴ Ni³na¹.
2CO 13:5 Cho¹tˀao³ yao³-no³ nca³ ti⁴jon²-nio³, tsa² nta³ ti³yo³cao⁴³ xi³ ma³cjain¹-no³. Nta³ cho¹tˀao³ yao³-no³ tsa² nta³ cjoaon³. A³ tsi² nta³ ˀya³xcon³-nio³ yao³-no³ nca³ Jesucristo ti¹jna³jin³ ni⁴ma⁴-no³, to⁴nca³ li²coi³ cˀoa⁴-sˀin² ma³ tsa² tsi² nta³ ji²tjo⁴-nio³.
2CO 13:6 To⁴nca³ an³ co³ya²³ nca³ jchao⁴³ nca³ jin⁴-jin⁴ nta³ ji²tjoi⁴-jin⁴.
2CO 13:7 Cˀoa⁴ vˀe²tsˀoa³-lai⁴jin⁴ Ni³na¹ nca³ ni⁴jme³-jin² cjoa⁴ xi³ chˀao³ tjin¹ xi³ sˀiaon⁴³, a³li² coi³-jin² nca³ jin⁴-jin⁴ nta³ cho¹tˀa³-na³jin⁴, to⁴nca³ jme¹-ni³ nca³ jon² cˀoa⁴sˀian⁴-si¹nio³ je² xi³ nta³ tjin¹, nta³ tsa² jin⁴-jin⁴ xi³ li²coi³ nta³ coi²tjoi⁴-jin⁴.
2CO 13:8 Nca⁴ ni⁴jme³-jin² xi³ coan⁴-na³jin⁴ co²ntran⁴-le⁴ je² xi³ cjoa⁴qui²xi⁴, to⁴nca³ to⁴je² xi³ coan⁴-na³jin⁴ je² xi³ tˀa³tsˀe⁴ cjoa⁴qui²xi⁴.
2CO 13:9 To⁴coi³ ma³tsjoa³-ni³na³jin⁴ cˀia⁴ nca³ i³ntai³⁴-jin⁴, cˀoa⁴ cˀia⁴ nca³ jon² xi³ tjin¹-no³ nca³nˀion¹. Coi³ cjoa⁴ xi³ vˀe²tsˀoai³⁴-jin⁴, nca³ ña³qui³ qui²xi⁴ coaon⁴³.
2CO 13:10 To⁴coi³ cji³-ni³no³ je²-vi⁴, cˀia⁴ nca³ xin² ti²jna⁴, jme¹-ni³ nca³ tsi² ta²ja³jin³ si³cao⁴-si¹ni³no³ cˀia⁴ nca³ ya⁴ ti²jna⁴, jo³-sˀin² je² cjoa⁴te¹xo³ma³ xi³ Nai³-na¹ qui³tsjoa³-na³, nca³ si³quin³ncˀa³-no³, cˀoa⁴ li²coi³ nca³ si³qui³xo²ya³-no³.
2CO 13:11 Xi³ to⁴fe³tˀa³-ni³, ntsˀe³, ca²ta³sˀe³-no³ cjoa⁴tsjoa³, qui²xi⁴ ca²ta³mao³, ca²ta³sˀe³-no³ cjoa⁴ni²je³ta³con². To⁴jnco³ tja³cjao³jco³, nchˀan¹ ca²ta³ma³chon³-no³. Cˀoa⁴ je² Ni³na¹ xi³ si¹qui³njen³nchˀan¹jin³ ni⁴ma⁴-no³, cˀoa⁴ xi³ tsˀe⁴ cjoa⁴tjao²cha³ cˀoe¹jna³cao⁴-no³ nca³ jon².
2CO 13:12 Ti⁴ti²ˀntao³ xi²nquio⁴³ xi³jnco³ cao⁴ xi³cˀa³ nca³ tsje³ tˀe²tˀa³tsˀoa³-lao⁴³ xi²nquio⁴³.
2CO 13:13 Nca³tsˀi³ cho⁴ta⁴-le⁴ Cristo si¹ti²ˀnta³-no³.
2CO 13:14 Je² cjoa⁴nta³-le⁴ Nai³-na¹ Jesucristo, cˀoa⁴ je² cjoa⁴tjao²cha³-le⁴ Ni³na¹ cˀoa⁴-sˀin² ca²tˀe²yo³jin³-no³ nca³tsˀio³ cjoa⁴-vi⁴, cˀoa⁴ nca³ ña³tjen⁴ coi⁴yo³cao⁴³ Espíritu Santo. Cˀoa⁴ ca²ta³ma³.
GAL 1:1 An³ nia¹³ Pablo, xi³ pa²stro⁴, xi³ tsi² tsˀe⁴-jin² xa¹-le⁴ cho⁴ta⁴son³ˀnte³, ni⁴je²-jin² cho⁴ta⁴son³ˀnte³ xi³ qui³tsjoa³-na³ xa¹. To⁴nca³ Jesucristo, cˀoa⁴ Ni³na¹ Nˀai³-na¹ xi³ qui³si³cja³ˀa¹ya³jin³-ni³le⁴ cˀen³ Jesús, je² xi³ qui³tsjoa³-na³ xa¹.
GAL 1:2 An³ Pablo cao⁴ nca³tsˀi³ ntsˀe³² xi³ i⁴ tjio¹cao⁴-na³ ti³chji³lai²⁴-jin⁴ jon² xi³ na⁴xi⁴na³nta¹-le⁴ Cristo ˀmi²-no³ ya⁴ Galacia.
GAL 1:3 Cjoa⁴nta³ ca²ta³tsjoa¹-no³, ca²ta³si¹qui³njen³nchˀan¹jin³ ni⁴ma⁴-no³ je² Ni³na¹ Nˀai³-na¹ cao⁴ Nai³-na¹ Jesucristo.
GAL 1:4 Je² Jesucristo xi³ ti⁴je² qui³tsjoa-ni³ yao³-le⁴ tˀa³tsˀe⁴ je¹-na¹, jme¹-ni³ nca³ cˀoa⁴sje³ntjai²-si¹ni³na¹ coi³ ni⁴čhjin³ je²-vi⁴ xi³ chˀao³ tjin¹, jo³-sˀin² nca³ me³-le⁴ Ni³na¹ Nˀai³-na¹.
GAL 1:5 Je² Ni³na¹ ca²ta³vi³tjo³je³ya³ nca³ntsjai² nca³ntsjai². Cˀoa⁴ ca²ta³ma³.
GAL 1:6 Cjai¹nca³ to⁴cji³ma³xcon¹-na³ nca³ cˀoa⁴-sˀin² nti⁴ton⁴ qui³ni²cˀo¹fa³tˀa³-lao⁴³ je² xi³ qui³nchja⁴-no³ tˀa³tsˀe⁴ je² cjoa⁴nta³-le⁴ Cristo, nca³ cja⁴ˀai¹ en¹ tsa³nquin¹tˀa³-lao⁴³.
GAL 1:7 Li²coi³-jin² tjin¹ nqui²jnco³ en¹ xi³ ti⁴coi³-ni³, to⁴nca³ tjin¹ cˀa³ xi³ vi³ncha¹sca¹-no³, xi³ me³-le⁴ nca³ si⁴²cˀa³ntjai²ya³ je² en¹nta³ xi³ tˀa³tsˀe⁴ Cristo.
GAL 1:8 Cˀia⁴² tsa² jin⁴-jin⁴, a³xo⁴ tsa² jnco³ a²ncje⁴-je⁴ xi³ tsˀe⁴ ncˀa³jmi³ coi⁴nchja⁴ya³jin³-no³ xi³ cja⁴ˀai¹ en¹ xi³ tsi² tsa² coi³ xi³ jin⁴-jin⁴ qui³no²cjoa⁴ya³jin³-lai²⁴jin⁴, to⁴jña³ ca²ta³fi²cha³jin³.
GAL 1:9 Jo³ tsa³qui³xoin¹⁴-jin⁴ nca³ ti¹tjon², ntˀai⁴-vi⁴ ti⁴cˀoa⁴²ti⁴ xin³-nca¹nia³: Tsa² jnco³ xi³ coi⁴nchja⁴ya³jin³-no³ xi³ cja⁴ˀai¹ en¹ cao⁴-ni³ tsa² je² xi³ qui³chjoe¹tjao²³, to⁴jña³ ca²ta³fi²cha³jin³.
GAL 1:10 A³ tsˀe⁴ cho⁴ta⁴ je² cjoa⁴nta³ xi³ va³sje²³ ntˀai⁴ a³xo⁴ tsˀe⁴ Ni³na¹ ni¹. A³ va³sjai³-nia¹³ nca³ si³tsjoa³-le⁴ cho⁴ta⁴. Xi³ cjoa⁴qui²xi⁴ ni¹, tsa² an³ si³tsjoa³-le⁴ cho⁴ta⁴, a³li² cho⁴-ˀnta³-le⁴ Cristo-jian²³ˀni³.
GAL 1:11 To⁴nca³ si³cji³nčhˀoe¹-no³, ntsˀe³, je² en¹nta³ xi³ tˀa³-tsˀe⁴ Cristo xi³ an³ qui³nchja²ya³jian³, a³li² je²-jin² xi³ cho⁴ta⁴ nchja⁴.
GAL 1:12 Ni⁴cho⁴ta⁴-jin² qui³tsjoa³-na³, ni⁴cho⁴ta⁴-jin² tsa³ca³co¹ya³-na³, to⁴je² Jesucristo xi³ qui³si³cˀa³tsen³jin³-na³ je² en¹nta³-vi⁴.
GAL 1:13 Je³qui³no²ˀyao²³ jo³-sˀin² tsˀa³mjen³coa⁴ yao³-na⁴ nca³sˀa⁴, jo³-sˀin² sˀin¹ cho⁴ta⁴ judío, nca³ nˀion¹ qui³tjen⁴nqui³ co²ntran⁴-le⁴ je² na⁴xi⁴na³nta¹-le⁴ Ni³na¹, cˀoa⁴ coan³me³-na³ nca³ qui³si³cha³.
GAL 1:14 Ncjin² coain³-jin⁴ xi³ to⁴nco¹son² tjin¹ no¹-le⁴ cho⁴ta⁴na⁴xi⁴na³nta¹-na⁴, to⁴nca³ an³ ja²ˀa⁴ti¹tjon²-le⁴ xi³ tˀa³tseˀe⁴ cjoa⁴-le⁴ cho⁴ta⁴ judío, nca³ an³ nˀion¹ qui³si³tjo³soan²³ jo³ qui³sˀin³ cho⁴ta⁴jchi¹nca³-na⁴.
GAL 1:15 To⁴nca³ Ni³na¹ xi³ cˀoa⁴-sˀin² tsa³cjaˀa¹jin³-na³ jo³ sa³ˀnta³ nca³ cje³ tsin³-jian²³, xi³ cao⁴ cjoa⁴nta³-le⁴ qui³nchja⁴-na³. Cˀia⁴ nca³ qui³sa³sen³-le⁴
GAL 1:16 Ni³na¹ qui³si³cˀa³tsen³jin³-na³ je² ˀnti¹-le⁴, jme¹-ni³ nca³ coi³nchja²ya³jin³-si¹ni³le⁴ cho⁴ta⁴ xi³ li² judío-jin² xi³ tˀa³tseˀe⁴ je² ˀnti¹-le⁴. An³ a³li²ˀya³ xi³ qui³si³je¹ nti⁴ton⁴-le⁴ cjoa⁴qui²xi⁴-le⁴.
GAL 1:17 Ni⁴ya⁴-jin² Jerusalén qui³ co³tsen³mi³-le⁴ je² xi³ pa²stro⁴ coan³ nqui²sa⁴ ti¹tjon² cao⁴-ni³ tsa² an³, to⁴nca³ ya⁴ Arabia quia³, cˀia⁴ nqui²ntia³ je²ˀe⁴-nia³ Damasco.
GAL 1:18 Cˀia⁴ nca³ je³coan³ jan²-ni³ no¹, qui³mia³ ya⁴ Jerusalén. Qui³con³-le⁴ Pedro. Chja³ˀaon² ni⁴čhjin³ tsa³ca²te⁴jna³coa⁴.
GAL 1:19 Li²coi³ ti⁴tsa³ˀve³-nia³ xi³ cja⁴ˀai¹ pa²stro⁴, to⁴je² Jacobo ntsˀe⁴ je² Nai³-na¹ xi³ tsa³ˀve³.
GAL 1:20 Ne³⁴, nqui³xcon⁴ Ni³na¹, a³li² en¹nti³so³-jin² xi³ an³ ti²cjia³.
GAL 1:21 Cˀia⁴ coan³scan³-ni³ quia³ ya⁴ ˀnte³-le⁴ Siria cao⁴ ya⁴ Cilicia.
GAL 1:22 To⁴nca³ li²coi³ tsa³ve³xcon³-na³ je² na⁴xi⁴na³nta¹-le⁴ Cristo xi³ tjio¹ ya⁴ Judea.
GAL 1:23 To⁴coi³ xi³ qui³nčhˀoe¹ na⁴xi⁴na³nta¹-ve⁴: Je² xi³ nca³sˀa⁴ qui³tjen⁴nqui³ co²ntran⁴-na¹, ntˀai⁴-vi⁴ ti¹nchja⁴ya³jin³ je² en¹ xi³ ma³cjain¹-na¹, je² en¹-vi⁴ xi³ nca³sˀa⁴ coan³me³-le⁴ nca³ si⁴²cha³.
GAL 1:24 Cˀoa⁴-sˀin² tsˀa³sje³je³ya³ Ni³na¹ xi³ to⁴tˀa³tsˀan⁴.
GAL 2:1 Cˀia⁴ nca³ je³coan³-ni³ te³ño³ no¹, qui³mi³ nqui²ntia³-nca¹nia³ cao⁴ Bernabé ya⁴ Jerusalén. Cˀoa⁴-ti⁴ qui³-coa⁴ Tito-je⁴.
GAL 2:2 To⁴coi³ nca³ Ni³na¹ qui³si³cˀa³tsen³jin³-na³ nca³ qui³-si¹nia³. Qui³ ca³co³-le⁴ je² en¹nta³ xi³ tˀa³tsˀe⁴ Cristo xi³ nchja²ya³jin³-le⁴ cho⁴ta⁴ xi³ li² judío-jin². Tˀa³xin² tsa³ca³co³-le⁴ je² xi³ tsen³ cjoan³ nca³ ncˀa³ xa¹-le⁴, jme¹-ni³ nca³ tsi² tsa² to¹ca³-si¹nia³ xi³ to⁴cjoa⁴tjao², cˀoa⁴ jme¹-ni³ nca³ tsi² tsa² qui³to²ca³-si¹nia³ xi³ to⁴cjoa⁴tjao².
GAL 2:3 Ni⁴je²-jin² Tito xi³ ya⁴ tsa³cˀe²jna³cao⁴-na³, li²coi³ cjoa⁴nˀion¹ qui³nˀian²-le⁴ nca³ cjoa⁴circuncisión coan³-le⁴, nta³ tsa² cho⁴ta⁴ griego ni¹.
GAL 2:4 To⁴nca³ tjin¹ cˀa³ xi³ to⁴ntsˀe⁴nti³so³ xi³ qui³chja³ˀa²sˀen³cao⁴ˀma³. Ja³ˀa³sˀen³cao⁴ˀma³ jme¹-ni³ nca³ scoe⁴che¹-si¹ni³ jo³-sˀin² nca³ ntai¹ ti³yo³coa⁴² Cristo Jesús, cˀoa⁴ jme¹-ni³ nca³ si⁴²ca³tio²nˀion¹-si¹ni³na¹ jo³-ni³ tsa² cho⁴ˀnta³.
GAL 2:5 Xi³ coi³ ni⁴jnco³-jin² hora tsa³cˀai²ˀnte³-lai⁴jin⁴ nca³ na³nqui³ tsa³qui³yoi³⁴-jin⁴, jme¹-ni³ nca³ je² cjoa⁴qui²xi⁴ xi³ tsˀe⁴ je² en¹nta³ xi³ tˀa³tsˀe⁴ Cristo cˀoe¹jna³ntsjai²-si¹ni³ xi³ tˀa³tsaon⁴³.
GAL 2:6 To⁴nca³ je² xi³ tsen³ cjoan³ nca³ ncˀa³ xa¹ tjin¹-le⁴, (jo³-sˀin² tsa³ca³tio² nca³sˀa⁴ li²jme³ coi²nta⁴-na³, nca⁴ Ni³na¹ li²coi³ fa³ˀa¹jin³ jo³ cjoan³ cho⁴ta⁴) cjoa⁴qui²xi⁴ ni¹ je² xi³ ncˀa³ xa¹-le⁴ ni⁴jme³-jin²sa³ xi³ qui³tsjoa³-na³ nca³ an³.
GAL 2:7 To⁴sa³ cˀia⁴ tsa³ve³ jo³-sˀin² nca³ Pedro qui³sˀe³ne²-le⁴ xa¹ nca³ tsjoa¹-le⁴ je² cho⁴ta⁴ xi³ tsˀe⁴ cjoa⁴circuncisión je² en¹nta³ xi³ tˀa³tsˀe⁴ Cristo. Ti⁴cˀoa⁴-sˀin²ni³ qui³sˀe³ne²-na³ xa¹ nca³ an³ tsjoa³-le⁴ je² cho⁴ta⁴ xi³ tsi² tsˀe⁴ cjoa⁴circuncisión je² en¹nta³ xi³ tˀa³tsˀe⁴ Cristo.
GAL 2:8 (Je² xi³ qui³tsjoa³ nca³nˀion¹-le⁴ Pedro nca³ pa²stro⁴ coan³ xi³ tˀa³tsˀe⁴ cho⁴ta⁴ xi³ tsˀe⁴ cjoa⁴circuncisión, cˀoa⁴-ti⁴sˀin² qui³tsjoa³ nca³nˀion¹-na³ nca³ an³ nca³ pa²stro⁴ coan³ xi³ tˀa³tsˀe⁴ cho⁴ta⁴ xi³ li² judío-jin².)
GAL 2:9 Cˀia⁴ nca³ tsa³ve³ je² cjoa⁴nta³ xi³ an³ tsa³cˀai²-na³, Jacobo, cao⁴ Cefas, cao⁴ Juan, xi³ jo³-ni³ cho⁴ta⁴ti¹tjon² nca⁴ cˀoa⁴-sˀin² tjin¹-le⁴ nca³nˀion¹, qui³tsjoa³-na³jin⁴ ntsja³ nca³ tsa³qui³mai³coai⁴-jin⁴ xi²nqui⁴-jin⁴ Bernabé cao⁴ an³, jme¹-ni³ nca³ jin⁴ coa³nquin¹nčhˀoe²-si¹ni³jin⁴ cho⁴ta⁴ xi³ li² judío-jin², cˀoa⁴ je² coai⁴nčhˀoe² cho⁴ta⁴ xi³ tsˀe⁴ cjoa⁴circuncisión.
GAL 2:10 To⁴coi³ qui³si³je¹-na³jin⁴ nca³ li²coi³ cha³jin³-na³jin⁴ xi³ cho⁴ta⁴yo⁴ma⁴. Xi³ to⁴coi³ cˀoa⁴-ti⁴ an³ cjai¹nca³ nta³ qui³si³xi¹ti¹ya³-le⁴ yao³-na⁴.
GAL 2:11 To⁴nca³ cˀia⁴ nca³ ja³ˀai³ Pedro ya⁴ Antioquía, tsa³ca²te⁴jna³ta²ja³-le⁴ nca³ qui³cho³va²ˀai³⁴-jin⁴, nca⁴ je² tjin¹-le⁴ je¹.
GAL 2:12 Cˀia⁴ nca³ cje³ fa³ˀai³-jin² cˀa³ xi³ ji³nčhoa³tˀa³-ni³le⁴ Jacobo, Pedro tsa³cjen²cao⁴ cho⁴ta⁴ xi³ li² judío-jin², to⁴-nca³ coan³scan³-ni³, nca³ ja³ˀai³, qui³si³cˀo¹fa³ya³jton³-le⁴, to⁴tsa³ca³sen²xin²-ni³, nca⁴ qui³tsa³cjon¹-le⁴ cho⁴ta⁴ xi³ tsˀe⁴ cjoa⁴circuncisión.
GAL 2:13 Cˀoa⁴-ti⁴ xi³cˀa³-sa³ cho⁴ta⁴ judíos cho⁴ta⁴jao²ncjain¹ coan³ cao⁴ je². Cˀoa⁴-ti⁴sˀin² nta³ tsa² Bernabé qui³tˀa³-le⁴ cjoa⁴jao²ncjain¹-le⁴.
GAL 2:14 To⁴nca³ cˀia⁴ nca³ tsa³ˀve³ nca³ tsi²-ni³ tsa² cao⁴ cjoa⁴qui²xi⁴ xi³ tjio¹ma³-ni³ xi³ tˀa³tsˀe⁴ je² en¹nta³ xi³ tˀa³tsˀe⁴ Cristo, cˀoi⁴qui³xin³-le⁴ Pedro nqui³xcon⁴ nca³tsˀi³: Tsa² ji³, nca³ cho⁴ta⁴ judío ˀmi²-li², cˀoa⁴-ti⁴sˀin² ˀmi³coai⁴ yao³-li⁴ jo³-ni³ cho⁴ta⁴ xi³ li² judío-jin², a³li²coi³ cˀoa⁴-sˀin² jo³-ni³ cho⁴ta⁴ judío, jo¹-sˀin²ni³ nca³ cjoa⁴nˀion¹ nˀian²-ni³lai⁴ cho⁴ta⁴ xi³ li² judío-jin², nca³ cˀoe¹yo³ jo³-ni³ cho⁴ta⁴ judío.
GAL 2:15 Ña¹ xi³ qui³tsin³jin³-le⁴² cho⁴ta⁴ judíos, a³li² tsa² cho⁴ta⁴je¹-jian² xi³ tsˀe⁴ cho⁴ta⁴ xi³ li² judío-jin².
GAL 2:16 ˀya³-nia¹ nca³ cho⁴ta⁴son³ˀnte³ li²coi³ fe³tˀa³ je¹-le⁴ nca⁴ cˀoa⁴sˀin¹ jo³ tso² cjoa⁴te¹xo³ma³, to⁴nca³ coi³ nca³ ma³cjain¹-le⁴ tˀa³tsˀe⁴ Jesucristo. Cˀoa⁴-ti⁴ ña¹ coan³cjain¹-na¹ tˀa³tsˀe⁴ Jesucristo, jme¹-ni³ nca³ cjoe⁴tˀa³-si¹ni³ je¹-na¹ nca⁴ ma³cjain¹-na¹ tˀa³tsˀe⁴ Cristo, a³li² tsa² coi³ nca³ cˀoa⁴nˀian² jo³ tso² cjoa⁴te¹xo³ma³. Ni⁴ˀya³-jin² xi³ cˀoa⁴-sˀin² fe³tˀa³ je¹-le⁴ nca⁴ cˀoa⁴sˀin¹ jo³ tso² cjoa⁴te¹xo³ma³.
GAL 2:17 Tsa² cˀoa⁴-ti⁴ ña¹ coan⁴sjai³ nca³ cho⁴ta⁴je¹ ˀmi²-na¹, nca³ coi⁴jnchi¹sje² nca³ cjoe⁴tˀa³ je¹-na¹ xi³ to⁴tˀa³tsˀe⁴ Cristo, a³ si¹xa¹-le⁴ je¹ Cristo. Ni⁴ˀi⁴tse¹-jin².
GAL 2:18 Tsa² je² cjoa⁴ xi³ an³ qui³si³cji³tsoan²³, ti⁴coi³ cˀoe³nta³ya³ nqui²jnco³cˀa²-nia³, a³ tsi² coa³coa³ yao³-na⁴ nca³ cho⁴ta⁴je¹ coan³.
GAL 2:19 An³ ti²jna⁴cˀen³ xi³ to⁴tˀa³tsˀe⁴ cjoa⁴te¹xo³ma³. Je³ti²jna⁴cˀen³ xi³ tˀa³tsˀe⁴ cjoa⁴te¹xo³ma³, jme¹-ni³ nca³ coa²te⁴jna³con³-si¹nia³ xi³ tˀa³tsˀe⁴ Ni³na¹.
GAL 2:20 Cˀia⁴ nca³ Cristo tsa³cˀe²jna³ cˀen³ ya⁴tˀa³ cro², cˀoa⁴-ti⁴ an³ to⁴jo³ cˀoa⁴-sˀin² tsa³ca²te⁴jna³ cˀen³, to⁴nca³ ti²jna⁴coan³, li²coi³ ti⁴ˀan³-nia³, to⁴nca³ Cristo ti¹jna³con³ ja⁴jin³ ni⁴ma⁴-na⁴. Je² cjoa⁴vi³jna³chon³ xi³ ntˀai⁴-vi⁴ ti²jna⁴con³-nia³ yao³-na⁴, ti²jna⁴coan³ nca⁴ ma³cjain¹-na³ tˀa³tsˀe⁴ je² ˀnti¹-le⁴ Ni³na¹, xi³ coan³tsjoa³que³-na³, xi³ qui³tsjoa³ntjai² yao³-le⁴ xi³ tˀa³tsˀan⁴.
GAL 2:21 Li²coi³ si³qui³tson¹ya³ je² cjoa⁴nta³-le⁴ Ni³na¹. Tsa² to⁴tˀa³tsˀe⁴ cjoa⁴te¹xo³ma³ fe³tˀa³ je¹-na¹, cˀoa⁴ cˀia⁴² to⁴cjoa⁴tjao²-ni³ˀni³ cˀen³ Cristo.
GAL 3:1 Ne³⁴ cho⁴ta⁴ gálatas xi³ sca¹ya³-no³. Ya⁴ nqui³xcon³ nca³ jon² Jesucristo je³-sa³ qui³sa³sen³tsen³jin³-no³ jo³ coan³ nca³ tsa³cˀe²jna³ cˀen³ ya⁴tˀa³ cro². ˀya¹-ni³ xi³ tsa³cˀe¹xcon¹-no³ nca³ cˀoa⁴-sˀin² coan³chˀao³-no³.
GAL 3:2 To⁴coi³-vi⁴ xi³ me³-na³ nca³ scoe³ xi³ tˀa³tsaon⁴³: A³ qui³tjoe¹-no³ je² Espíritu Santo nca⁴ cˀoa⁴qui³nˀiaon²³ jo³ tso² cjoa⁴te¹xo³ma³, a³xo⁴ nca⁴ coan³cjain¹-no³ nca⁴ qui³no²ˀyao²³.
GAL 3:3 A³ cˀoa⁴-sˀin² sca¹ya³-no³. Tsa³cˀe²tsˀiao⁴³ xi³ to⁴tˀa³tsˀe⁴ je² Espíritu Santo, ntˀai⁴-vi⁴ a³ si⁴jnco³-nio¹³ xi³ to⁴tˀa³tsˀe⁴ yao³-no³.
GAL 3:4 A³ to⁴cjoa⁴tjao²-ni³ nca³ cˀoa⁴-sˀin² qui³chja³ˀao²³ cjoa⁴ñˀain³. Tsa² cjoa⁴qui²xi⁴ nca³ to⁴cjoa²tjao²-ni³.
GAL 3:5 Je² xi³ cˀoa⁴-sˀin² tsjoa¹jin³ ni⁴ma⁴-no³ je² Espíritu Santo, je² xi³ to⁴tse³ cjoa⁴xcon¹ qui³sˀin³jin³-no³, a³ cˀoa⁴qui³sˀin³ nca⁴ cˀoa⁴qui³tso² cjoa⁴te¹xo³ma³, a³xo⁴ nca⁴ coan³cjain¹-no³ nca⁴ qui³no²ˀyao²³.
GAL 3:6 Abraham coan³cjain¹-le⁴ xi³ tˀa³tsˀe⁴ Ni³na¹. Cˀoa⁴-sˀin² coan³xqui⁴cao⁴ nca³ tjin¹-le⁴ cjoa⁴qui²xi⁴.
GAL 3:7 Cˀoa⁴-sˀin² ˀya³-nio¹³ nca³ je² xi³ ma³cjain¹-le⁴, je² ni¹ xi³ ˀnti¹-le⁴ Abraham ma³.
GAL 3:8 Je² xon⁴ Escritura to⁴nqui³-ni³ tsa³ve³ nca³ cˀoa⁴-sˀin² Ni³na¹ si⁴²cje³tˀa³ je¹-le⁴ cho⁴ta⁴ xi³ li² judío-jin² xi³ to⁴tˀa³tsˀe⁴ nca³ coan⁴cjain¹-le⁴. To⁴nqui³-ni³ qui³nchja⁴ya³-le⁴ Abraham je² en¹nta³-vi⁴: Xi³ to⁴tˀa³tsi⁴ coan⁴chi³con³tˀain³ nca³tsˀi³ na⁴xi⁴na³nta¹ i⁴ son³ˀnte³.
GAL 3:9 Cˀoa⁴-sˀin² je² cho⁴ta⁴ xi³ ma³cjain¹-le⁴ ma³chi³con³tˀain³ cao⁴ je² Abraham, xi³ cˀoa⁴-ti⁴sˀin² coan³cjain¹-le⁴.
GAL 3:10 Je² nca³tsˀi³ xi³ ma³cjain¹-le⁴ nca³ ma³chjen¹ nca³ cˀoa⁴sˀin¹ jo³ tso² cjoa⁴te¹xo³ma³, to⁴cˀoa⁴-sˀin² ti¹jna³ne²-le⁴ cjoa⁴ñˀain³. Nca⁴ tji¹tˀa³: Ca²ta³vˀe²jna³ne²-le⁴ cjoa⁴ñˀain³ nca³tsˀi³ xi³ tsi² vˀe¹jin³con³ntsjai² nca³yi³je³ cjoa⁴ xi³ tjio¹tˀa³ je² xon⁴ xi³ tsˀe⁴ cjoa⁴te¹xo³ma³, nca³ cˀoa⁴-sˀin² si⁴²tjo³son².
GAL 3:11 To⁴nca³ je³ti¹ˀya³-le⁴ nca³ ni⁴ˀya³-jin² xi³ je² cjoa⁴te¹xo³ma³ si¹cje³tˀa³ je¹-le⁴ nqui³xcon⁴ Ni³na¹. Je² xi³ tjin¹-le⁴ cjoa⁴qui²xi⁴ nca⁴ ma³cjain¹-le⁴, cˀoa⁴-sˀin² cˀoe¹jna³con³.
GAL 3:12 Cˀoa⁴-ti⁴ je² cjoa⁴te¹xo³ma³ tˀa³xin² ti¹jna³-le⁴ xi³ ma³cjain¹-na¹, to⁴nca³ cˀoa⁴tso²: Je² cho⁴ta⁴ xi³ je³qui³si³tjo³son² je² cjoa⁴-vi⁴, cˀoa⁴-jin²sˀin² cˀoe¹jna³con³ xi³ to⁴tˀa³tsˀe⁴.
GAL 3:13 Je² Cristo tsa³cˀe¹chji¹ntjai²-na³jin⁴ tˀa³tsˀe⁴ cjoa⁴ñˀain³-le⁴ cjoa⁴te¹xo³ma³, nca³ je² tsa³cˀe²jna³ne²-le⁴ cjoa⁴ñˀain³-na⁴jin⁴. Nca⁴ tji¹tˀa³: Ña³qui³ cjoa⁴ñˀain³ ti¹jna³ne²-le⁴ to⁴ˀya³-ni³ xi³ ya⁴ tsjen³tjen⁴vˀa³nqui³tˀa³ ya¹.
GAL 3:14 Cristo tsa³cˀe¹chji¹ntjai²-na³jin⁴ jme¹-ni³ nca³ coan⁴chi³con³tˀain³-si¹ni³ xi³ to⁴tˀa³tsˀe⁴ Cristo Jesús cho⁴ta⁴ xi³ li² judío-jin², jo³-sˀin² coan³chi³con³tˀain³ Abraham, cˀoa⁴ jme¹-ni³ nca³ qui³chjoe¹-si¹nia³² je² Espíritu Santo xi³ Ni³na¹ qui³tsjoa³-na¹ tsˀoa³ nca³ tsjoa¹-na¹ xi³ to⁴tˀa³tsˀe⁴ nca³ coan³cjain¹-na¹.
GAL 3:15 ˀnti¹ntsˀe³, nchja²-nia³ jo³-sˀin² nchja⁴ cho⁴ta⁴: Cˀia⁴ nca³ ña³qui³ tji¹nta³ jnco³ cjoa⁴ xi³ cho⁴ta⁴ vˀe¹nˀion¹, a³li²ˀya³ xi³ si⁴²qui³tson²ya³, ni⁴vˀe¹tˀa³-jin²sa³ xi³ cja⁴ˀai¹ tso².
GAL 3:16 Je² Abraham xi³ cˀoa⁴-sˀin² qui³ni²sˀe³nqui³-le⁴, cao⁴ ntje⁴-le⁴. A³li²coi³ tso²: Tˀa³tsˀe⁴ nca³tsˀi³ ntje⁴, jo³-ni³ tsa² ncjin² ma³ ntje⁴, to⁴nca³ jo³-ni³ tsa² to⁴jnco³ ma³, tso²: Tˀa³-tsˀe⁴ je² to⁴jnco³ ntje⁴ xi³ tsi⁴, je² ni¹ xi³ Cristo.
GAL 3:17 Je²-vi⁴ xi³ cˀoi⁴xian³: Je² cjoa⁴te¹xo³ma³ xi³ qui³sˀe³ ño³ ciento cao⁴ can³te² no¹ coan³scan³-ni³, li²coi³ si¹qui³tson²ya³ je² cjoa⁴ xi³ Ni³na¹ je³tsa³cˀe¹nˀion¹ cao⁴ Cristo. Nca⁴ tsa² qui³si³qui³tson²ya³ je² cjoa⁴, cˀia⁴ tsi²jme³ xi³ chji¹-le⁴ tsa²cai³-ni³ je² cjoa⁴ xi³ Ni³na¹ qui³tsjoa³ tsˀoa³ nca³ tsjoa¹.
GAL 3:18 Tsa² je² cjoa⁴tjao² xi³ sˀe³-na¹, tsa² to⁴tˀa³tsˀe⁴ je² cjoa⁴te¹xo³ma³, cˀia⁴ li²coi³ to⁴tˀa³tsˀe⁴ je² xi³ Ni³na¹ qui³tsjoa³ tsˀoa³ nca³ tsjoa¹. To⁴nca³ Ni³na¹ qui³tsjoa³cjoa⁴tjao²-le⁴ Abraham, nca⁴ cˀoa⁴-sˀin² qui³tsjoa³-le⁴ tsˀoa³.
GAL 3:19 Jo¹-sˀin² ma³chjen¹ je² cjoa⁴te¹xo³ma³ tso²cˀoa⁴. To⁴tˀa³tsˀe⁴ cjoa⁴tsˀa³ntjai²cjoa⁴ qui³sˀe³jna³, sa³ˀnta³ nca³ ja³ˀai³ je² ntje⁴ xi³ Ni³na¹ qui³tsjoa³-le⁴ tsˀoa³. Je² a²ncje⁴ xi³ cˀoa⁴-sˀin² tsa³cˀe¹ne²-le⁴, cˀoa⁴ qui³ni²⁴ntsja³ je² xi³ tsa³cja³yo³jin³-le⁴.
GAL 3:20 Je² xi³ fa³yo³jin³-le⁴ a³li² to⁴jnco³-jin² xi³ fa³jin³-le⁴, to⁴nca³ Ni³na¹ to⁴jnco³-ni¹ nca³ je².
GAL 3:21 Je² cjoa⁴te¹xo³ma³, a³ co²ntran⁴-le⁴ ni¹ je² xi³ Ni³na¹ qui³tsjoa³ tsˀoa³ nca³ tsjoa¹. Ni⁴ˀi⁴tse¹-jin². Tsa² qui³tsˀai²-le⁴ cjoa⁴te¹xo³ma³ xi³ coan³-le⁴ qui³si³cˀe¹yo³con³ tsa²cai³, cjoa⁴qui²xi⁴-jin²ni¹ nca³ to⁴tˀa³tsˀe⁴ cjoa⁴te¹xo³ma³-ve⁴ fe³tˀa³ je¹-le⁴ cho⁴ta⁴.
GAL 3:22 To⁴nca³ je² xon⁴ Escritura qui³si³cˀe¹yo³nˀion¹nqui³ je¹ nca³tsˀi³ cho⁴ta⁴, jme¹-ni³ nca³ cˀoai⁴-si¹ni³le⁴ cho⁴ta⁴ je² xi³ qui³ni²sˀe³nqui³-le⁴, tsa² ma³cjain¹-le⁴ tˀa³tsˀe⁴ Jesucristo.
GAL 3:23 To⁴nca³ cˀia⁴ nca³ cje³ fa³ˀai³ai-jin²sa³ je² xi³ ma³cjain¹-na¹, to⁴ya³ tsa³qui³yo³tjao²nqui³-le⁴² cjoa⁴te¹xo³ma³. Cˀoa⁴-sˀin² tsa³qui³yo³nˀioan¹, jme¹-ni³ nca³ coan⁴cjain¹-si¹ni³na¹ tˀa³tsˀe⁴ je² xi³ sˀa⁴ coan⁴tsen³.
GAL 3:24 Cˀoa⁴-sˀin² cjoa⁴te¹xo³ma³ jo³-ni³ tsa² cho⁴ˀnta³ coan³, xi³ qui³sca³ni¹tˀa³-na¹ ya⁴ Cristo, jme¹-ni³ nca³ cjoe⁴tˀa³-si¹ni³ je¹-na¹ xi³ to⁴tˀa³tsˀe⁴ nca³ ma³cjain¹-na¹.
GAL 3:25 To⁴nca³ cˀia⁴ nca³ ja³ˀai³ xi³ ma³cjain¹-na¹, li²coi³ ti⁴ti³yo³nqui³-ni³le⁴² je² cho⁴ˀnta³-ve⁴.
GAL 3:26 Xti³-le⁴ Ni³na¹ nio¹³ nca³tsˀio³, xi³ to⁴tˀa³tsˀe⁴ nca³ ma³cjain¹-no³ tˀa³tsˀe⁴ Cristo Jesús.
GAL 3:27 Jon² nca³tsˀio³ xi³ qui³sa³te³nta³-nio³ tˀa³tsˀe⁴ Cristo, cˀoa⁴-sˀin² tsa³cˀe²tsˀiao⁴³ nca³ tsa³qui³yo³chon³tˀa³-lao⁴³ Cristo.
GAL 3:28 Tsin² cho⁴ta⁴ judío-jin², ni⁴cho⁴ta⁴ griego-jin². Tsin² xi³ cho⁴ˀnta³-jin², ni⁴ xi³ tjio¹ntai¹-jin². Tsin² xi³ xˀin⁴-jin², ni⁴ya¹nchjin¹-jin². Nca³tsˀio³ to⁴jnco³-nio¹³ nca³ ti³yo³cao⁴³ Cristo Jesús.
GAL 3:29 Cˀia⁴ tsa² jon² tsˀe⁴ Cristo mao³, ña³qui³ cjoa⁴qui²xi⁴ nca³ ntje⁴-le⁴ Abraham mao³-ˀni³, cˀoa⁴-ti⁴ tjin¹-no³ cjoa⁴tjao² jo³-sˀin² nca³ Ni³na¹ qui³tsjoa³ tsˀoa³ nca³ tsjoa¹.
GAL 4:1 Cˀoa⁴-ti⁴ xian³: Cˀia⁴ nca³ sˀa⁴ ˀnti¹ je² xi³ tsˀe⁴ cjoa⁴tjao², to⁴nco¹son² ma³ cao⁴ cho⁴ˀnta³, nta³ tsa² nai³-le⁴ nca³yi³je².
GAL 4:2 To⁴nca³ tjen⁴ ti¹jna³nqui³ xi³ si¹coi²nta⁴ nca³ je², cˀoa⁴ xi³ si¹coi²nta⁴-le⁴ tso³jmi²-le⁴, sa³ˀnta³ je² ni⁴čhjin³ xi³ tsa³-cˀe¹choa⁴ nˀai³-le⁴.
GAL 4:3 Cˀoa⁴-ti⁴ ña¹ cˀia⁴ nca³ sˀa⁴ ˀntia¹ ti³yo³nqui³ cjoa⁴nˀion¹-le⁴² cjoa⁴costumbre xi³ tjin¹ son³ˀnte³.
GAL 4:4 To⁴nca³ cˀia⁴ nca³ je³coan³jnco³ ni⁴čhjin³, Ni³na¹ qui³si³ca³sen¹ ˀnti¹-le⁴. Chjon⁴² tsa³cˀe¹. Qui³tsin³nqui³ cjoa⁴te¹xo³ma³.
GAL 4:5 Ni³na¹ qui³si³ca³sen¹ ˀnti¹-le⁴ jme¹-ni³ nca³ cˀoa⁴-sˀin² cˀoe⁴²chji¹ntjai²-si¹ni³ xi³ tjio¹nqui³ cjoa⁴te¹xo³ma³, cˀoa⁴ jme¹-ni³ nca³ xti³-le⁴ cˀoin¹-si¹ni³na³.
GAL 4:6 Ni³na¹ qui³si³ca³sen¹jin³ ni⁴ma⁴-no³ je² Espíritu-le⁴ ˀnti¹-le⁴, je² xi³ cˀoi⁴tso²: Abba, Nˀai³, nca⁴ jon² nio¹³ xti³-le⁴.
GAL 4:7 Ntˀai⁴-ntai⁴ a³li² ti⁴cho⁴ˀnta³-ni³. Ji³ ni¹³ ˀnti¹-le⁴. Tsa² ˀnti¹-le⁴, cˀoa⁴-ti⁴ sˀe⁴-li² cjoa⁴tjao² xi³ tsˀe⁴ Ni³na¹ xi³ to⁴tˀa³tsˀe⁴ Cristo.
GAL 4:8 Nca³sˀa⁴ cˀia⁴ nca³ tsi² tsa³ˀyao³ Ni³na¹, cˀoa⁴-sˀin² coan³chjen¹-lao⁴³ je² xi³ to⁴xa¹ cjoan³-ni³ nca³ li² ni³na¹-jin².
GAL 4:9 To⁴nca³ ntˀai⁴-vi⁴, nca³ je³ˀyao³ Ni³na¹, to⁴sa³ je² Ni³na¹ xi³ ve³-no³, a¹-ni³ nca³ si⁴cˀo¹fa³ya³tˀa³ nqui²ntia³-ni³lao⁴³ je² cjoa⁴costumbre xi³ yo⁴ma⁴ xi³ tsin²-le⁴ nca³nˀion¹-jin², xi³ me³-no³ nqui²ntia³ coan⁴chjen¹-nca¹ni³lao⁴³.
GAL 4:10 Nˀion¹ ti³ni²coi²ntao⁴³ sˀoi¹-le⁴ ni⁴čhjin³, cao⁴ sa¹, cao⁴ chan⁴, cao⁴ no¹.
GAL 4:11 Cjai¹nca³ tsa³cjoan³ xi³ tˀa³tsaon⁴³, nca³ to⁴cjoa⁴tjao² nca³ nˀion¹ qui³si³xa¹cao⁴-no³ nca³ jon².
GAL 4:12 ˀnti¹ntsˀe³, cˀoa⁴-sˀin² vˀe³tsˀoa²³-no³, ca²ta³mao³ jo³-ni³ tsa² an³, nca⁴ an³ coan³ jo³-ni³ jon². Ni⁴to⁴jme³-jin² cjoa⁴tsˀen⁴ qui³ni²cao⁴-nao¹³.
GAL 4:13 To⁴nca³ jon² ˀya³-nio¹³ nca³ chˀin³ tjin¹-le⁴ yao⁴-na³. Coi³ cjoa⁴ cˀoa⁴-sˀin² qui³nchja²ya³jin³-no³ je² en¹nta³ xi³ tˀa³tsˀe⁴ Cristo nca³ ti¹tjon².
GAL 4:14 A³li²coi³ coan³si³chao³, ni⁴taon³-jin² tsa³ˀyao³ je² chˀin³ xi³ tjin¹-le⁴ yao³-na³, xi³ ñˀain³ qui³sˀin³-no³. To⁴sa³ qui³chjoe¹tjao²-nao¹³ jo³-ni³ tsa² a²ncje⁴-le⁴ Ni³na¹, jo³-ni³ tsa² Cristo Jesús.
GAL 4:15 Jña¹ ti¹jna³-ˀni³ je² cjoa⁴tsjoa³-no³ xi³ nca³sˀa⁴. An³ tsjoa³ en¹-na⁴ tˀa³tsaon⁴³, tsa² coan³-la²sa³ jon² tsa²cai³, qui³chˀa²sjao³-ˀni³ xcon³, cˀoa⁴ tsa³cˀai²-nao¹³ an³.
GAL 4:16 A³ cˀoa⁴²-sˀin² co²ntran⁴ qui³-no³, nca⁴ cˀoa⁴²qui³xin³-no³ xi³ cjoa⁴qui²xi⁴.
GAL 4:17 Tjin¹ xi³ nta³ vˀa³sje³-no³, to⁴nca³ li²coi³ nta³ fi²cao⁴-no³. To⁴sa³ me³-le⁴ cˀoa⁴sje³xin²-no³, jme¹-ni³ nca³ jon² nta³ chˀa⁴sje³-si¹nio³ nca³ je².
GAL 4:18 Cjai¹nca³ to⁴nta³-ni³ nca³ nta³ chˀa⁴sje³-no³ nca³ntsjai² jña³-le⁴ cjoa⁴ xi³ nta³ tjin¹, a³li² tsa² to⁴cˀia⁴ nca³ an³ ti²jna⁴cao⁴-no³.
GAL 4:19 Jon² xi³ ˀnti¹xti³-na⁴, nˀion¹ aon³ ma³nqui³jnco³cˀa²-na³, jo³ sa³ˀnta³ cˀoa⁴²-la² ma³-le⁴ ya¹nchjin¹ cˀia⁴ nca³ vˀe¹ ˀnti¹, sa³ˀnta³ nca³ tsen³ jcha⁴-le⁴ nca³ nta³ coain¹cao⁴³ Cristo.
GAL 4:20 Cjai¹nca³ to⁴me³-na³ tsa²cai³ nca³ ya⁴ coa²te⁴jna³cao⁴-no³ ntˀai⁴-vi⁴ntai⁴. Me³-na³ si³cˀa³ntjai²ya³ jta⁴-na⁴, nca⁴ to⁴jao² tjin¹-na³ tˀa³tsaon⁴³.
GAL 4:21 Cˀoa⁴tˀin²-nao¹³ jon² xi³ me³-no³ nca³ coi⁴yo³nqui³-lao⁴³ cjoa⁴te¹xo³ma³, a³ tsi² tsa² ti³no²ˀya²-lao⁴³ cjoa⁴te¹xo³ma³.
GAL 4:22 Nca⁴ tji¹tˀa³ nca³ jao² xti³ qui³sˀe³-le⁴ Abraham, jnco³ xi³ tsˀe⁴ chjon⁴² cho⁴ˀnta³, je² xi³ nqui²jnco³ tsˀe⁴ chjon⁴²-le⁴ cjoan² xi³ tsi² cho⁴ˀnta³.
GAL 4:23 To⁴nca³ je² xi³ tsˀe⁴ chjon⁴² cho⁴ˀnta³ to⁴cˀoa⁴-sˀin² qui³tsin³ jo³-sˀin² tsin³ nca³tsˀi³ ˀnti¹, cˀoa⁴ je² xi³ tsˀe⁴ xi³ chjon⁴²-le⁴ cjoan², xi³ tsi² cho⁴ˀnta³, qui³tsin³ jo³-sˀin² Ni³na¹ qui³tsjoa³ tsˀoa³.
GAL 4:24 Je²-vi⁴ cjoa⁴xco¹son² ni¹. Je² ya¹nchjin¹-vi⁴ nco³ya³-le⁴ jao² cjoa⁴ xi³ qui³sˀe³nˀion¹, jnco³ cjoa⁴ xi³ tsˀe⁴ ni³nto³ xi³ Sinaí ˀmi², coi³ xi³ ma³nco¹son² je² chjon⁴² xi³ cˀoa⁴-sˀin² tsa³cˀe¹ ˀnti¹ xi³ cho⁴ˀnta³ coan³. Je² xi³ Agar ˀmi².
GAL 4:25 Je² Agar xi³ Sinaí xi³ jnco³ ni³nto³ xi³ ya⁴ Arabia se¹jna³, xi³ ti⁴ya⁴ nchja⁴-ni³ Jerusalén xi³ ti¹jna³ ntˀai⁴-vi⁴, nca⁴ je² cˀoa⁴-sˀin² cji³ma³chjen¹nˀion¹, nca³ cho⁴ˀnta³ ma³ cao⁴ xti³-le⁴.
GAL 4:26 To⁴nca³ je² Jerusalén xi³ tsˀe⁴ ncˀa¹, ti¹jna³ntai¹, coi³ xi³ na⁴-na¹ nca³tsˀia³².
GAL 4:27 Nca⁴ tji¹tˀa³: Ca²ta³ma³tsjoa³-li² xi³ ˀnti⁴, xi³ tsi² ˀnti¹ vˀai². Chji¹ˀntia¹coai⁴ cjoa⁴tsjoa³ ji³ xi³ tsi² ˀnti¹ ti³vˀai², nca⁴ nqui²sa⁴ ncjin² coan⁴ xti³-le⁴ chjon⁴² xi³ tsi² ti¹jna³cao⁴ xˀin⁴-le⁴ ntˀai⁴ cao⁴-ni³ tsa² je² xi³ ti¹jna³cao⁴ xˀin⁴-le⁴.
GAL 4:28 ˀnti¹ntsˀe³, cˀoa⁴-ti⁴sˀin²ni³ ña¹ jo³ni³ tsa² Isaac, ja⁴xti³-le⁴ ma³² tˀa³tsˀe⁴ xi³ Ni³na¹ qui³tsjoa³ tsˀoa³.
GAL 4:29 Je² ni⁴čhjin³-ve⁴ je² xi³ qui³tsin³ xi³ tˀa³tsˀe⁴ yao³-na¹ qui³tjen⁴nqui³ co²ntran⁴-le⁴ je² xi³ qui³tsin³ tˀa³tsˀe⁴ Espíritu Santo, cˀoa⁴-ti⁴chon³ ntˀai⁴-vi⁴.
GAL 4:30 To⁴nca³ jo¹ tso² xon⁴ Escritura. Chja⁴ˀa²xin²³ je² chjon⁴² cho⁴ˀnta³ cao⁴ ˀnti¹-le⁴, nca⁴ tsi² tsa² jme³ xi³ tjoe¹cjoa⁴tjao²-le⁴ je² ˀnti¹-le⁴ chjon⁴² cho⁴ˀnta³, to⁴sa³ tjoe¹cjoa⁴tjao²-le⁴ ˀnti¹-le⁴ chjon⁴² xi³ tsi² cho⁴ˀnta³.
GAL 4:31 Cˀoa⁴² ntˀai⁴-vi⁴ ˀnti¹ntsˀe³, a³li² xti³-le⁴ chjon⁴² cho⁴ˀnta³-jian². Ña¹ nia¹ xti³-le⁴ chjon⁴² xi³ tsi² cho⁴ˀnta³-ve⁴.
GAL 5:1 Xi³ tˀa³tsˀe⁴ je² cjoa⁴ntai¹-ve⁴ Cristo qui³si³cˀe¹yo³ntai¹-na¹. Ña³qui³ nˀion¹ ti⁴yo³jin³-lao⁴³ je² cjoa⁴ntai¹-ve⁴. A³li² ti⁴vˀai²ˀnte³-jin²nio³ nca³ ya¹ yugo sˀe⁴nqui³ nqui²jnco³cˀa² ya¹sion³ nca³ cho⁴ˀnta³ coaon⁴³.
GAL 5:2 Coe⁴-ni³ an³ Pablo xi³ xin³-no³, tsa² cjoa⁴circuncisión coan⁴-no³, Cristo li²jme³ chji¹-le⁴ tˀa³tsaon⁴³.
GAL 5:3 Nqui²ntia³ ti⁴nˀion¹ cˀoa⁴ti²xin³-nca¹ni³le⁴ nca³tsˀi³ xi³ cjoa⁴circuncisión coan⁴-le⁴, nca³ cjoa⁴nˀion¹ tjin¹-le⁴ nca³ si⁴²tjo³son² nca³yi³je³ cjoa⁴te¹xo³ma³.
GAL 5:4 Ña³qui³ qui³cha³ˀa²xin²jin³-lao⁴³ yao³-no³ Cristo, jon² xi³ to⁴tˀa³tsˀe⁴ cjoa⁴te¹xo³ma³ ni²cje³tˀao³ je¹-no³. Ña³qui³ qui³tsao³tˀa³xin²-lao⁴³ cjoa⁴nta³-le⁴ Ni³na¹.
GAL 5:5 Xi³ to⁴tˀa³tsˀe⁴ je² Espíritu Santo ña¹ ti³cho³ya²-le⁴² nca³ cjoe⁴tˀa³ je¹-na¹ xi³ to⁴tˀa³tsˀe⁴ nca³ ma³cjain¹-na¹.
GAL 5:6 Nca⁴ ti³yo³coa⁴² Cristo Jesús, ni⁴je²-jin² cjoa⁴circuncisión chji¹-le⁴, ni⁴je²-jin² xi³ tsi² cjoa⁴circuncisión, to⁴je² jo³-sˀin² ma³cjain¹-na¹ xi³ nta³ ma³chjen¹ to⁴tˀa³tsˀe⁴ nca³ tsjoa³cha³².
GAL 5:7 Cjai¹nca³ to⁴nta³ tsa³nquin¹cao⁴³ yao³-no³. Cˀoa⁴ ˀya¹-ni³ xi³ tsa³cˀe¹chjoa²-no³ nca³ tsi² tsa² ni²tjo³son²-si¹nio³ xi³ cjoa⁴qui²xi⁴.
GAL 5:8 Li²coi³ cˀoa⁴-sˀin² tsa³cˀe¹ne²-no³ je² xi³ qui³nchja⁴-no³.
GAL 5:9 I⁴tse¹ na⁴ˀyo⁴san³ xi³ sˀe³jin³ nio⁴xti²la⁴ ña³qui³ si¹jcha¹ nca³yi³je³.
GAL 5:10 An³ nˀion¹tˀa³con³-no³ xi³ to⁴tˀa³tsˀe⁴ Nai³-na¹, nca³ to⁴nco¹son²-sˀin² cho¹son²-ni³lao⁴³ jo³-ni³ tsa² an³. Je² xi³ si³ si¹cao⁴-no³, cˀoa⁴-sˀin² sˀe⁴jna³-le⁴ cjoa⁴ñˀain³, to⁴ˀya³-ni³ve⁴ to⁴jo³ cji³-ni³.
GAL 5:11 Cˀoa⁴ an³, ntsˀe³, tsa² to⁴jo³ cˀoa⁴²-sˀin² ti²nchja²ya³-nia³ xi³ cjoa⁴circuncisión tsa²cai³, a¹-ni³ to⁴jo³ tjio¹ma³tjen⁴nqui³ co²ntran⁴-si¹ni³na³ nca³ je². A³ tsi² tsa² cˀoa⁴-sˀin² ji³tjo³xin²-le⁴ je² cjoa⁴jti³cha³ xi³ tˀa³tsˀe⁴ cro².
GAL 5:12 Je² xi³ cˀoa⁴-sˀin² si¹qui³tson¹-no³, ca²ta³te³tˀa³ yao³-le⁴.
GAL 5:13 Jon² ntsˀe³, qui³no²cjoa⁴-no³ nca³ coi⁴yo³ntao¹³, to⁴nca³ a³li² ni²chjen¹-jion²³ cjoa⁴ntai¹-no³ jo³-sˀin² me³-le⁴ yao³-no³, to⁴nca³ to⁴cˀoa⁴-sˀin² ti⁴chjen¹-nca³ñao¹³ cao⁴ cjoa⁴tjao²cha³ tˀa³tsˀe⁴ xi²nquio⁴³.
GAL 5:14 Nca³yi³je³ cjoa⁴te¹xo³ma³ vi³tjo³son² cao⁴ nca³ to⁴jnco³ en¹-ve⁴: Tjao²cha³ tˀiain⁴ xi²nqui⁴ jo³-sˀin² tjao²chai³ yao³-li⁴.
GAL 5:15 Tsa² nca³ i⁴ nca³ jan¹ chi⁴ne⁴jion³ xi²nquio⁴³, ti⁴coi²ntao⁴³, a³li² cˀoi⁴-jin²sˀin² ni²cje³jon³ xi²nquio⁴³.
GAL 5:16 Cˀoi⁴xian³: Ti⁴ma³cao⁴³ nca³nˀion¹-le⁴ Espíritu Santo, a³li² to⁴je²-jin² cjoa⁴chi⁴nca⁴-le⁴ yao³-no³ si⁴tjo³son²-lao⁴³.
GAL 5:17 Je² cjoa⁴ xi³ me³-le⁴ yao³-na¹ vˀe¹chjoa²-le⁴ je² Espíritu Santo, cˀoa⁴ je² cjoa⁴ xi³ me³-le⁴ Espíritu Santo vˀe¹chjoa²-le⁴ yao³-na¹. Je² cjoa⁴-ve⁴ fi²co²ntran⁴-le⁴ xi¹ncjin¹, jme¹-ni³ nca³ tsi² cˀoa⁴sˀian⁴-si¹nio³ jo³-sˀin² nca³ me³-no³.
GAL 5:18 To⁴nca³ tsa² je² Espíritu fi²cao⁴-no³, li²coi³ na³nqui³ ti³yo³-lao⁴³ cjoa⁴te¹xo³ma³.
GAL 5:19 Je² cjoa⁴ xi³ sˀin¹ yao³-na¹, tjio¹tsen³, xi³ coi³: Cjoa⁴cha³jnqui³, cjoa⁴jnti¹, cjoa⁴chi⁴nca⁴,
GAL 5:20 xi³ ve³xcon¹ xco¹son², cjoa⁴vˀe²nta³, cjoa⁴co²ntran⁴, cjoa⁴vi³xcan², cjoa⁴chi⁴ni⁴, cjoa⁴jti³, xi³ fao¹ti³ˀa³, xi³ jao²ya³ tjin¹, xi³ xin² tjio¹-le⁴ xi¹ncjin¹,
GAL 5:21 cjoa⁴xin²ta³con², xi³ cˀen³ si¹cˀen³, xi³ cjoa⁴chˀi⁴, je² xi³ to⁴xquia⁴ sˀin¹jin³ sˀoi¹, cˀoa⁴ je² nca³yi³je³ cjoa⁴ xi³ cˀoi⁴²-sˀin² cjoan³. To⁴nqui³-ni³ mi³ncha³ˀa³-no³ nca³ chˀao³ tjin¹, jo³-sˀin² to⁴nqui³-ni³ qui³nchja²ya³jin³-no³, nca³ je² xi³ cˀoa⁴tjio¹sˀin¹ nca³ntsjai² li²coi³ sˀe⁴cjoa⁴tjao²-le⁴ cjoa⁴te¹xo³ma³-le⁴ Ni³na¹.
GAL 5:22 To⁴nca³ je² cjoa⁴nta³ xi³ tsjoa¹jin³ ni⁴ma⁴-na¹ je² Espíritu Santo, xi³ coi³: Cjoa⁴tjao²cha³, cjoa⁴tsjoa³, cjoa⁴ xi³ nchˀan¹ tjin¹, cˀoa⁴ nca³ ni²cjain¹-le⁴² xi²nquia⁴², cjoa⁴ntˀe¹, cjoa⁴nta³, cˀoa⁴ nca³ ma³cjain¹-na¹,
GAL 5:23 cjoa⁴ˀi³nta³jin³ta³con², cˀoa⁴ nca³ chjoe¹xcoa¹ yao³-na¹. Tsin² cjoa⁴te¹xo³ma³-jin² xi³ co²ntran⁴ fi²-le⁴ je² cjoa⁴-vi⁴.
GAL 5:24 Je² xi³ tsˀe⁴ Cristo jo³-ni³ tsa² xi³ cˀen³tˀa³ cro². Ntia³ qui³si³cha³nqui³ cjoa⁴fa³ˀai³tsjen³ xi³ tsˀe⁴ cjoa⁴tsˀen⁴-le⁴ cao⁴ cjoa⁴chi⁴nca⁴-le⁴.
GAL 5:25 Tsa² ti³yo³choan³² tˀa³tsˀe⁴ je² Espíritu Santo, cˀoa⁴-ti⁴ ca²ta³vi³ma³coa⁴² nca³nˀion¹-le⁴ Espíritu Santo.
GAL 5:26 A³li²coi³ ti⁴chˀa⁴sje³je³ya³-ni³le⁴² yao³-na¹ xi³ tsi²jme³ chji¹-le⁴. A³li²coi³ ti⁴si⁴jti³ xi³ˀi⁴nca³jan¹-ni³le⁴² xi²nquia⁴². A³li²coi³ ti⁴coan⁴xin²ta³con³cha³-nia³² xi²nquia⁴².
GAL 6:1 ˀnti¹ntsˀe³, tsa² jnco³ xi³ to⁴ca²ca³jin³sca¹ je¹, jon² xi³ je³nta³ ma³nquin¹cao⁴³ je² Espíritu Santo, ti⁴nta³cho⁴ta⁴ nqui²jnco³cˀao² cao⁴ cjoa⁴ˀi³nta³jin³ta³con²-no³. Nta³ ti⁴cja³ˀai³tsjen³-lao⁴³ yao³-no³ nca³ ti⁴jon²-nio³, jme¹-ni³ nca³ tsi² tsa² cˀoa⁴-ti⁴ jon² si⁴²cao⁴-si¹ni³no³.
GAL 6:2 Ti⁴ncha³cao⁴ nca³ñao¹³ cjoa⁴ xi³ jo³ chˀa¹-sˀin² cji³ne²-le⁴ xi²nquio⁴³. Cˀoa⁴-sˀin² si⁴tjo³son²³ je² cjoa⁴te¹xo³ma³-le⁴ Cristo.
GAL 6:3 Je² xi³ si¹cja³ˀai³tsjen³ nca³ to⁴je² xi³ chji¹-le⁴, cˀoa⁴ nca³ tsi² tsa² jme³-ni³ chji¹-le⁴, to⁴yao³-le⁴ vˀa³na⁴cha⁴-le⁴.
GAL 6:4 Cˀoa⁴-sˀin² jnco¹jnco¹ ca²ta³co³tˀa³ xi³ ti⁴tsˀe⁴-ni³ xa¹. Cˀia⁴² sˀe⁴-le⁴ cjoa⁴je³ya³ xi³ to⁴tˀa³tsˀe⁴ xa¹le⁴ˀni³. A³li² to⁴tˀa³tsˀe⁴ xa¹-le⁴ xi³cˀa³-jin² vˀa³sje³je³ya³-ni³ yao³-le⁴.
GAL 6:5 Nca³ jnco¹jnco¹ ca²ta³vˀa³mi³ chˀa¹ xi³ ti⁴tsˀe⁴-ni³.
GAL 6:6 Je² xi³ je³qui³sco²tˀa³ya³ je² en¹ xi³ tˀa³tsˀe⁴ Cristo, ca²ta³tsjoa¹ nca³ña¹-le⁴ je² xi³ qui³tso²ya³-le⁴. Ca²ta³tsjoa¹ jña³-le⁴ nca³yi³je³ xi³ nta³ tjin¹.
GAL 6:7 A³li² chˀa²na⁴cha⁴-jin²sa³lao⁴³ yao³-no³. Ni³na¹ a³li²coi³ taon³ ˀya³. Je² nca³yi³je³ xi³ cˀoe⁴²ntje², cho⁴ta⁴ cˀoa⁴ti⁴-sˀin² ti⁴coi³ cˀoe⁴²xco¹-ni³.
GAL 6:8 Je² xi³ tˀa³tsˀe⁴ yao³-le⁴ vˀe¹ntje², cˀoa⁴-ti⁴sˀin² tsˀe⁴ yao³-le⁴ cˀoe⁴²xco¹-ni³ xi³ chi³tson³ya³. To⁴nca³ je² xi³ tˀa³-tsˀe⁴ Espíritu Santo vˀe¹ntje², cˀoa⁴-ti⁴sˀin² tsˀe⁴ Espíritu Santo cˀoe⁴²xco¹-ni³ je² xi³ tsjoa¹-le⁴ cjoa⁴vi³jna³chon³ nca³ntsjai².
GAL 6:9 A³li² cho¹ve³-jin²na¹ nca³ nta³ sˀian⁴². Cˀia⁴ choa⁴-le⁴ cˀoe¹xcoa¹, tsa² tsi² coi⁴jta³-na¹.
GAL 6:10 Tjen⁴ nca³ sˀe⁴-sa³na¹ ˀnte³, nta³ si⁴xa¹ tˀa³tsˀe⁴ nca³tsˀi³. To⁴sa³ nˀion¹ si⁴xa¹ tˀa³tsˀe⁴ je² xi³ cˀoa⁴-ti⁴ ma³cjain¹-le⁴.
GAL 6:11 Ne³⁴-si³ cjoan³ yˀai³ letra xi³ ntsa⁴ ca²cji³-ni³no³.
GAL 6:12 Je² nca³tsˀi³ xi³ to⁴me³-le⁴ nca³ nta³ vˀa³sje³ yao³-le⁴ nqui³xcon⁴ xi³cˀa³, je²-vi⁴ xi³ nˀion¹ vˀe¹ne²-no³ nca³ cjoa⁴circuncisión coan⁴-no³, jme¹-ni³ nca³ tsi² tsa² cjoa⁴ˀa²-si¹ni³le⁴ cjoa⁴ñˀain³ xi³ to⁴tˀa³tsˀe⁴ cro²-le⁴ Cristo.
GAL 6:13 Li²coi³ si¹qui³tjo³son² cjoa⁴te¹xo³ma³, ni⁴nta³ tsa² ti⁴je²-ni³ xi³ cjoa⁴circuncisión coan³-le⁴. To⁴nca³ me³-le⁴ nca³ jon² cjoa⁴circuncisión coan⁴-no³, jme¹-ni³ nca³ cˀoa⁴-sˀin² cˀoa⁴sje³je³ya³-si¹ni³ yao³-le⁴ xi³ to⁴tˀa³tsˀe⁴ yao³-no³ nca³ jon².
GAL 6:14 To⁴nca³ an³ cjai¹nca³ to⁴xin² ti¹jna³-na³ nca³ cˀoa³sje³je³ya³ yao³-na⁴. Ni⁴jme³-jin² xi³ cja⁴ˀai¹ xi³ vˀa³sje³je³ya³-nia³ yao³-na⁴, to⁴je² cro²-le⁴ Nai³-na¹ Jesucristo. Son³ˀnte³ ya⁴ je³tˀa³-na³ nca³ an³ ya⁴tˀa³ cro², cˀoa⁴ an³ je³tˀa³-le⁴ son³ˀnte³ ya⁴tˀa³ cro².
GAL 6:15 Nca⁴ ti³yo³coa⁴² Cristo Jesús, ni⁴je²-jin² cjoa⁴circuncisión chji¹-le⁴, ni⁴je²-jin² xi³ tsi² cjoa⁴circuncisión, to⁴je² xi³ sˀe³nta³ cho⁴tse⁴ xi³ chji¹-le⁴.
GAL 6:16 Ca²ta³njen³nchˀan¹jin³ ni⁴ma⁴-le⁴, cˀoa⁴ cjoa⁴ma⁴ta³con² ca²ta³sa³co¹-le⁴ nca³tsˀi³ xi³ cˀoa⁴-sˀin² tjio¹ma³ jo³ tso² en¹ je²-vi⁴, cˀoa⁴ je² cho⁴ta⁴ Israel xi³ tsˀe⁴ Ni³na¹.
GAL 6:17 Xi³ fi²-sa³ni³, ni⁴ˀya³-jin² xi³ si⁴²jti³-na³, nca⁴ an³ yˀa³ yao³-na⁴ je² choa⁴ xi³ tˀa³tsˀe⁴ je² Nai³-na¹ Jesús.
GAL 6:18 ˀnti¹ntsˀe³, je² cjoa⁴nta³-le⁴ Nai³-na¹ Jesucristo ca²ta³sˀe³-le⁴ ni⁴ma⁴-no³. Cˀoa⁴ ca²ta³ma³.
EPH 1:1 An³ nia¹³ Pablo, pa²stro⁴-le⁴ Jesucristo, nca⁴ cˀoa⁴-sˀin² coan³me³-le⁴ Ni³na¹. Ti²cji³-no³ jon² xi³ cho⁴ta⁴-le⁴ Cristo, xi³ ti³yo³ ya⁴ Efeso. Nta³ ma³nquin¹tˀa³-lao⁴³ Cristo Jesús.
EPH 1:2 Ni³na¹ nˀai³-na¹ cao⁴ Nai³-na¹ Jesucristo ca²ta³tsjoa¹-no³ cjoa⁴nta³, cˀoa⁴ ca²ta³si¹qui³njen³nchˀan¹jin³ ni⁴ma⁴-no³.
EPH 1:3 Ca²ta³vi³tjo³je³ya³ Ni³na¹-le⁴ cao⁴ Nˀai³-le⁴ Nai³-na¹ Jesucristo, xi³ qui³si³chi³con³tˀain³-na¹ cao⁴ nca³yi³je³ cjoa⁴nta³ xi³ tsˀe⁴ ncˀa³jmi³ xi³ tˀa³tsˀe⁴ ni⁴ma⁴-na¹, nca³ ti³yo³coa⁴² Cristo.
EPH 1:4 Ni³na¹ cˀoa⁴-sˀin² tsa³cja³ˀa¹jin³-na¹ nca⁴ ti³yo³coa⁴² Cristo sa³ˀnta³ nca³ cje³ sˀe³nta³-jin² son³ˀnte³, jme¹-ni³ nca³ tsje³ coan⁴-si¹nia³² nca³ ni⁴jme³-jin² je¹ sˀe⁴-si¹ni³na¹ nqui³xcon⁴ nca³ je².
EPH 1:5 Cˀoa⁴-sˀin² coan³tsjoa³que³-na¹ nca³ to⁴nqui³-ni³ qui³sco³son²-ni³le⁴ nca³ ˀnti¹-le⁴ coi⁴tso⁴-na¹ xi³ to⁴tˀa³tsˀe⁴ Jesucristo, jo³-sˀin² coan³me³-le⁴ nca³ je²,
EPH 1:6 jme¹-ni³ nca³ nta³ coi⁴tjo³-si¹ni³ cjoa⁴je³ya³-le⁴ xi³ to⁴tˀa³tsˀe⁴ cjoa⁴nta³-le⁴. Je² cjoa⁴nta³-le⁴ qui³tsjoa³cjoa⁴tjao²-na¹ nca³ ti³yo³coa⁴² je² ˀnti¹-le⁴ xi³ tsjoa³que³.
EPH 1:7 Je² Cristo tsa³cˀe¹chji¹ntjai²-na¹ cao⁴ njin¹-le⁴. Qui³si³cha³tˀa³ je¹-na¹ nca³ cˀoa⁴-sˀin² to⁴nˀion¹ tse³ cjoa⁴nta³ xi³ tjin¹-le⁴.
EPH 1:8 Je² cjoa⁴nta³-le⁴ nˀion¹ tse³ qui³si³ncjin²ya³son²-na¹ cao⁴ nca³yi³je³ cjoa⁴chji⁴ne⁴ cao⁴ cjoa⁴fa³ˀai³tsjen³-le⁴.
EPH 1:9 Cˀoa⁴-sˀin² qui³si³cˀa³tsen³-na¹ je² xi³ je² me³-le⁴, xi³ tji¹ˀma³, jo³-sˀin² nca³ cjoa⁴tsjoa³-le⁴ni³, jo³ qui³tso² je² cjoa⁴fa³ˀai³tsjen³-le⁴ nca³ xa¹ cˀoe⁴²nta³-ni³ xi³ to⁴tˀa³tsˀe⁴,
EPH 1:10 nca³ cˀoe⁴²xco¹ nqui²ntia³ to⁴tˀa³tsˀe⁴ Cristo nca³yi³je³ tso³jmi² xi³ tjio¹ ncˀa³jmi³ cao⁴ xi³ tjio¹ i⁴ son³ˀnte³, cˀia⁴ nca³ cjoi⁴cho³ choa⁴-le⁴.
EPH 1:11 To⁴coi³ nca³ Cristo ti³yo³coa⁴², tsa³cja³ˀa¹jin³-na¹, cˀoa⁴ tsa³ca³sen¹-na¹ jo³-sˀin² nca³ to⁴nqui³-ni³ qui³sco³son²-ni³le⁴ je² xi³ vˀe¹nta³ nca³yi³je³ jo³-sˀin² si¹cja³ˀai³tsjen³, nca³ cˀoa⁴-sˀin² me³-le⁴.
EPH 1:12 Ni³na¹ tsa³cja³ˀa¹jin³-na³jin⁴ nca³ jin⁴-jin⁴ xi³ ti¹tjon² qui³cho³ya²cao⁴cjoai⁴-jin⁴ tˀa³tsˀe⁴ Cristo, jme¹-ni³ nca³ coan⁴ chˀa⁴sje³nta³-si¹ni³jin⁴ je² cjoa⁴je³ya³-le⁴.
EPH 1:13 Cˀoa⁴-ti⁴ jon² xi³ Cristo ti³yo³cao⁴³, je³qui³no²ˀya²-lao⁴³ je² en¹ xi³ cjoa⁴qui²xi⁴, je² en¹ xi³ va³co¹-no³ jo³-sˀin² vi²tjo⁴ntjao²³. Jon² xi³ je³coan³cjain¹-no³, je² Espíritu Santo xi³ qui³ni²sˀe³nqui³-no³ tsa³ca³sen¹choa⁴-no³ nca³ ti³yo³cao⁴³ Cristo.
EPH 1:14 Cˀoa⁴-sˀin² Ni³na¹ tsa³cˀe¹jna³nqui³-na¹ je² Espíritu Santo xi³ tˀa³tsˀe⁴ cjoa⁴tjao²-na¹, sa³ˀnta³ ña³qui³ sˀe⁴-na¹ xi³ tsan⁴², jme¹-ni³ nca³ chˀa⁴sje³nta³-si¹nia³² je² cjoa⁴je³ya³-le⁴.
EPH 1:15 Coi³ cjoa⁴ nca³ an³ qui³nčhˀoe³ nca³ ma³cjain¹-no³ tˀa³tsˀe⁴ je² Nai³-na¹ Jesús, cˀoa⁴ nca³ tjao²chao³ nca³tsˀi³ cho⁴ta⁴-le⁴ Cristo,
EPH 1:16 li²coi³ si³cha³jian³ nca³ tsjoa³ cjoa⁴nta³ xi³ tˀa³tsaon⁴³. Cˀoa⁴-ti⁴sˀin² si³cja³ˀai³tsjen³-no³ nca³ vˀe³tsˀoa²³.
EPH 1:17 Cˀoa⁴-sˀin² vˀe³tsˀoa²³ nca³ Ni³na¹-le⁴ Nai³-na¹ Jesucristo, je² Nˀai³-na¹ xi³ tsˀe⁴ cjoa⁴je³ya³, ca²ta³tsjoa¹jin³ ni³ma⁴-no³ cjoa⁴chji⁴ne⁴, ca²ta³si¹ˀi³sen³-no³ sa³ˀnta³ nta³ jchao⁴³ Ni³na¹.
EPH 1:18 Cˀoa⁴-sˀin² si⁴²ˀi³sen³-le⁴ cjoa⁴fa³ˀai³tsjen³-le⁴ ni⁴ma⁴-no³, jme¹-ni³ nca³ jcha⁴-nio³ jña³-le⁴ xi³ cho³ya²-ni³lao⁴³ nca³ qui³no²cjoa⁴-no³. Jcha⁴-nio¹³ jo³-sˀin² nca³ nˀion¹ tse³ cjoa⁴je³ya³ xi³ tjin¹-le⁴ je² cjoa⁴tjao² xi³ sˀe³-le⁴ Ni³na¹, xi³ je² cho⁴ta⁴-le⁴ Cristo.
EPH 1:19 Jcha⁴-nio¹³ jo³-sˀin² nca³ li² to⁴jo³ xi³ cji³ ncˀa³ ti¹jna³ nca³nˀion¹-le⁴ xi³ tˀa³tsan⁴² xi³ je³coan³cjain¹-na¹. Jcha⁴-nio¹³ jo³-sˀin² nˀion¹ si¹xa¹cao⁴ nca³nˀion¹-le⁴ xi³ tse³ tjin¹-le⁴.
EPH 1:20 Cao⁴ je² nca³nˀion¹-le⁴ qui³si³xa¹jin³-le⁴ Cristo nca³ qui³si³cja³ˀa¹ya³jin³-ni³le⁴ cˀen³, cˀoa⁴ nca³ qui³si³cˀˀe¹jna³tˀa³ nca³qui²xi⁴-le⁴ ya⁴ ncˀa³jmi³.
EPH 1:21 Nqui²sa⁴ to⁴ncˀa³ qui³si³cˀe¹jna³-le⁴ cao⁴-ni³ tsa² xi³ xa¹ti¹tjon² tjin¹-le⁴, cao⁴ nca³tsˀi³ cho⁴ta⁴xa¹, cao⁴ nca³tsˀi³ xi³ tjin¹-le⁴ nca³nˀion¹, cao⁴ nca³tsˀi³ xi³ tjin¹-le⁴ cjoa⁴te¹xo³ma³, cao⁴ nca³tsˀi³ jan³ˀain¹ xi³ i⁴ son³ˀnte³ tjin¹, a³li² tsa² to⁴je²-jin² ni⁴čhjin³-vi⁴, jo³-sa³ tjin¹ ni⁴čhjin³ xi³ sˀa⁴ nčhoa¹-sa³.
EPH 1:22 Ni³na¹ cˀoa⁴-sˀin² qui³si³cˀe¹yo³nqui³ ntso⁴co⁴ Cristo nca³yi³je³ to⁴jme³-ni³ve⁴. Ni³na¹ qui³si³cˀe¹jna³ Cristo nca³jco⁴-le⁴ nca³yi³je³ cjoa⁴ xi³ tˀa³tsˀe⁴ na⁴xi⁴na³nta¹-le⁴ Cristo.
EPH 1:23 Je² na⁴xi⁴na³nta¹-le⁴ Cristo jo³-ni³ tsa² yao³-le⁴ ma³, xi³ si¹jnco³ je² xi³ si¹jnco³ nca³yi³je³.
EPH 2:1 Je² qui³si³cˀe¹yo³con³-no³ nca³ jon² xi³ jo³-ni³ tsa² xi³ ti³yo³cˀaon³ xi³ to⁴tˀa³tsˀe⁴ cjoa⁴tsˀen⁴ cao⁴ je¹-no³.
EPH 2:2 Nca³sˀa⁴ xi³ cja⁴ˀai¹ ni⁴čhjin³ cˀoa⁴-sˀin² tsa³qui³ma³-jion³ je² cjoa⁴-ve⁴ jo³ cji³ma³chon³ son³ˀnte³, jo³-sˀin² nca³ me³-le⁴ je² xi³ nca³jco⁴-le⁴ xi³ ya⁴ tjin¹-le⁴ nca³nˀion¹ jin³sen¹. Je² ni¹ xi³ nca³jco⁴-le⁴ nai⁴² xi³ nta³jin³ xi³ ntˀai⁴-vi⁴ si¹xa¹jin³ cho⁴ta⁴ xi³ xi¹jin³.
EPH 2:3 Cˀoa⁴-ti⁴sˀin² tsa³qui³yo³coai⁴-jin⁴ yao³-na⁴jin⁴ nca³tsˀi³⁴-jin⁴ nca³sˀa⁴, jo³ tso² cjoa⁴tsjoa³-le⁴ yao³-na⁴jin⁴. Cˀoa⁴qui³nˀiain²⁴-jin⁴ to⁴jo³-sˀin² coan³me³-le⁴ yao³-na⁴jin⁴ cao⁴ cjoa⁴faˀai³tsjen³-na⁴jin⁴. To⁴xa¹ cjoan³ ni¹⁴jin⁴ cho⁴ta⁴ xi³ sˀe⁴-le⁴ cjoa⁴ñˀain³, jo³-ni³ tsa² xi³cˀa³.
EPH 2:4 To⁴nca³ Ni³na¹, nca⁴ cˀoa⁴-sˀin² to⁴tse³ cjoa⁴ma⁴ta³con² tjin¹-le⁴, cjai¹nca³ nˀion¹ coan³tsjoa³que³-na¹.
EPH 2:5 Nta³ tsa² ña¹ xi³ jo³-ni³ tsa² xi³ ti³yo³cˀen³² xi³ to⁴tˀa³tsˀe⁴ cjoa⁴tsˀen⁴-na¹, to⁴jnco³ cao⁴ Cristo qui³si³cˀe¹yo³con³-na¹. To⁴tˀa³tsˀe⁴ cjoa⁴nta³-le⁴ ji²tjo⁴ntjai²-nio³.
EPH 2:6 To⁴jnco³ qui³si³cja³ˀa¹ya³-na¹, cˀoa⁴-ti⁴sˀin² qui³si³ca³tio²tˀa³-na¹ ya⁴ ncˀa³jmi³ cao⁴ Cristo Jesús,
EPH 2:7 jme¹-ni³ nca³ je² ni⁴čhjin³ xi³ nčhoa¹-sa³ coa⁴co²-si¹ni³ je² cjoa⁴nta³-le⁴ xi³ li² to⁴jo³ xi³ cji³tse³, nca³ cˀoa⁴-sˀin² qui³sˀe³-le⁴ cjoa⁴ma⁴ta³con² tˀa³tsan⁴² nca³ ti³yo³coa⁴² Cristo Jesús.
EPH 2:8 To⁴tˀa³tsˀe⁴ cjoa⁴nta³ ji²tjo⁴ntjai²-nio³ nca³ ma³cjain¹-no³. A³li² je²-jin² xi³ tsaon⁴³ je²-vi⁴, nca⁴ cjoa⁴tjao² ni¹ xi³ Ni³na¹ tsjoa¹.
EPH 2:9 A³li² tˀa³tsˀe⁴ xa¹-jin², jme¹-ni³ nca³ ni⁴to⁴ˀya³-jin² xi³ cˀoa⁴sje³je³ya³-si¹ni³ yao³-le⁴.
EPH 2:10 Nca⁴ ña¹ nia¹ xa¹-le⁴ Ni³na¹. Ni³na¹ cˀoa⁴-sˀin² qui³si³nta³-na¹ nca³ ti³yo³coa⁴² Cristo Jesús, jme¹-ni³ nca³ nta³ si⁴xa¹-nia³² jña³-le⁴ xi³ Ni³na¹ to⁴nqui³-ni³ tsa³cˀe¹nta³ nca³ cˀoa⁴-sˀin² coi⁴ma³coa⁴² cjoa⁴-vi⁴.
EPH 2:11 Xi³ coi³, jon² xi³ cho⁴ta⁴ xi³ li² judío-jin² jo³ cjoan³ yao³-no³, cho⁴ta⁴ xi³ tsi² tsˀe⁴ cjoa⁴circuncisión tsa³cˀin²-no³. Cˀoa⁴qui³tso²-no³ je² cho⁴ta⁴ xi³ tsˀe⁴ cjoa⁴circuncisión xi³ je² ntsja³ cho⁴ta⁴ si¹nta³-ni³ yao³-le⁴.
EPH 2:12 Ti⁴cja³ˀai³tsjen³jion³ jo³-sˀin² nca³sˀa⁴ li²jme³ xi³ qui³sˀe³-no³ tˀa³tsˀe⁴ Cristo. Tˀa³xin² tsa³qui³yo³-lao⁴³ na⁴xi⁴na³nta¹-le⁴ Israel. Cho⁴ta⁴cja⁴ˀai¹ nio¹³ nca³ tsi² coan³-no³ ˀnte³ tˀa³tsˀe⁴ je² cjoa⁴ xi³ qui³sˀe³nˀion¹ xi³ Ni³na¹ qui³si³sˀe³nqui³. Li²jme³ xi³ qui³cho²ya³-lao⁴³ nca³ tsa³qui³yo³tˀa³xin²-lao⁴³ Ni³na¹ i⁴ son³ˀnte³-vi⁴.
EPH 2:13 Nca⁴ ti³yo³cao⁴³ Cristo jon² xi³ nca³sˀa⁴ cjai¹nca³ cjin³ ti³yo³, ntˀai⁴-vi⁴ je³coan³čhian³tˀao³ xi³ to⁴tˀa³tsˀe⁴ njin¹-le⁴ Cristo.
EPH 2:14 Ti⁴je²-ni³ xi³ qui³si³qui³njen³nchˀan¹ cjoa⁴ tˀa³tsan⁴². To⁴jnco³ qui³sˀin³-na¹ nca³ joa³². Qui³si³qui³xo²ya³ čhjao¹ xi³ jao²ya³ ma³-ni³na¹, xi³ coi³ cjoa⁴co²ntran⁴.
EPH 2:15 Cao⁴ yao³-le⁴ tsa³cja³ˀa¹xin² je² cjoa⁴co²ntran⁴, cˀoa⁴ je² cjoa⁴te¹xo³ma³ xi³ vˀe¹ne². Qui³si³nta³ya³cho⁴tse⁴ nca³ to⁴jnco³ coan³ nca³ jao² nca³ tjio¹cao⁴ Cristo. Cˀoa⁴-sˀin² qui³si³qui³njen³nchˀan¹jin³-le⁴.
EPH 2:16 To⁴tˀa³tsˀe⁴ cro² Cristo qui³si³cjao²nta³-ni³ Ni³na¹ cao⁴ xi³ jao²ya³ cho⁴ta⁴, nca³ to⁴jnco³ yao³ coan³ nca³ jao². Ti⁴ya⁴ tˀa³cro² qui³si³cha³jin³-ni³ cjoa⁴co²ntran⁴.
EPH 2:17 Ja³ˀai³ Jesús, qui³nchja⁴ya³ cjoa⁴ xi³ nchˀan¹ tjin¹. Qui³nchja⁴ya³jin³-no³ nca³ jon² xi³ cjin³ ti³yo³, cˀoa⁴ cao⁴ je² xi³ čhian³ tjio¹.
EPH 2:18 To⁴tˀa³tsˀe⁴-ni¹ ña¹ nca³ joa³² tjin¹-na¹ ˀnte³ nca³ cjoi³cho³chon³-le⁴² Nˀai³-na¹ xi³ to⁴tˀa³tsˀe⁴ to⁴jnco³ Espíritu Santo.
EPH 2:19 A³li²coi³ ti⁴cho⁴ta⁴cja⁴ˀai¹-nio³, ni⁴to⁴ti³ma³-jion²³. To⁴jnco³ na⁴xi⁴na³nta¹ vˀa³cao⁴-no³ cao⁴ cho⁴ta⁴-le⁴ Cristo, cˀoa⁴ xi²nqui⁴ mao³ cho⁴ta⁴-le⁴ Ni³na¹.
EPH 2:20 Cˀoa⁴-sˀin² jon² qui³sˀe³yo³son²ncˀao³ je² čhjao¹ja⁴ma⁴ xi³ je² pa²stro⁴ cao⁴ xi³ qui³nchja⁴ya³ tˀa³tsˀe⁴ Ni³na¹. Je² lao⁴ xi³ ti¹tjon² ti¹jna³ ya⁴ xi⁴nqui⁴-le⁴, ti⁴je²-ni³ Jesucristo.
EPH 2:21 Jo³-sˀin² cjio³ˀncho²-le⁴ xi¹ncjin¹ xi⁴ˀnte⁴, cˀoa⁴ tjio¹cjao²nˀion¹, cˀoa⁴-sˀin² ti¹mi³ jnco³ yo⁴nco⁴ xi³ tsje³. Cˀoa⁴ti⁴sˀin²ni³ ti³yo³cjao³cao⁴³ Nai³-na¹.
EPH 2:22 Cˀoa⁴-ti⁴ jon², nca³ ti³yo³cao⁴³ Nai³-na¹, cˀoa⁴-ti⁴sˀin² sˀe⁴cjao³nˀion¹ cao⁴ xi²nquio⁴³, jme¹-ni³ nca³ ntˀia³-le⁴ Ni³na¹ coan⁴-si¹nio³ to⁴tˀa³tsˀe⁴ je² Espíritu Santo.
EPH 3:1 Coi³ cjoa⁴ nca³ an³ Pablo, xi³ cjoa⁴ñˀain³ ti²jna⁴ tˀa³tsˀe⁴ Cristo xi³ to⁴tˀa³tsaon⁴³ jon² xi³ cho⁴ta⁴ xi³ li² judío-jion²³.
EPH 3:2 Cˀoa⁴-sˀin² qui³no²ˀyao²³ nca³ xa¹ qui³sˀe³ne²-na³ nca³ an³ xi³ tˀa³tsˀe⁴ je² cjoa⁴nta³-le⁴ Ni³na¹ xi³ qui³tsˀai²-na³ xi³ tˀa³tsaon⁴³,
EPH 3:3 jo³-sˀin² nca³ Ni³na¹ tsa³ca³co¹son²tsen³-na³ je² cjoa⁴ xi³ tji¹ˀma³, jo³-sˀin² nca³ je³qui³squia³-vi⁴ nca³ to⁴choa³ en¹ qui³si³chjen¹³.
EPH 3:4 Cˀia⁴ nca³ cˀoe¹xquiao⁴³ je²-vi⁴, cˀoa⁴²-sˀin² jchao⁴³ jo³-sˀin² ma³cho⁴ya³-na³ tˀa³tsˀe⁴ je² cjoa⁴ˀma³ xi³ tˀa³tsˀe⁴ Cristo.
EPH 3:5 Je² xi³ cja⁴ˀai¹ ni⁴čhjin³ Ni³na¹ li²coi³ tsa³ca³co¹-le⁴ ni⁴jnco³-jin² cho⁴ta⁴son³ˀnte je² cjoa⁴ˀma³, jo³-sˀin² ntˀai⁴-vi⁴ xi³ to⁴tˀa³tsˀe⁴ je² Espíritu Santo tsa³ca³co¹son²tsen³-le⁴ je² pa²stro⁴-le⁴ xi³ tsje³ cao⁴ je² xi³ qui³nchja⁴ya³ tˀa³tsˀe⁴.
EPH 3:6 Coi³ xi³ cjoa⁴ˀma³-vi⁴: Je² cho⁴ta⁴ xi³ li² judío-jin² cˀoa⁴-sˀin² to⁴jnco³ sˀe³-le⁴ je² cjoa⁴tjao² je²-vi⁴, cˀoa⁴ to⁴jnco³ yao³-le⁴ xi¹ncjin¹. To⁴jnco³ qui³ni²sˀe³nqui³-le⁴ nca³ tjio¹cao⁴ Cristo xi³ to⁴tˀa³tsˀe⁴ je² en¹nta³ tˀa³tsˀe⁴ Cristo.
EPH 3:7 Qui³tsˀai²-na³ nca³ si³xa¹³-le⁴ xi³ coi³ en¹nta³ tˀa³tsˀe⁴ Cristo, jo³-sˀin² Ni³na¹ qui³tsjoa³cjoa⁴tjao²-na³ cjoa⁴nta³-le⁴ nca³ si¹xa¹ je² nca³nˀion¹-le⁴.
EPH 3:8 Je² xi³ nqui²sa⁴-sa³ na³nqui³ tjio¹ xi³ cho⁴ta⁴-le⁴ Cristo, an³ xi³ nqui²sa⁴-sa³ nˀion¹ na³nqui³ ti²jna⁴-le⁴. An³ tsa³cˀai²-na³ cjoa⁴nta³-vi⁴ nca³ cˀoa⁴-sˀin² coi³nchja²ya³jin³-le⁴ cho⁴ta⁴ xi³ li² judío-jin² je² en¹nta³ tˀa³tsˀe⁴ je² cjoa⁴nta³ xi³ tjin¹-le⁴ Cristo xi³ li²coi³ coan⁴ jcha⁴yi³je³.
EPH 3:9 An³ si³ˀi³sen³-le⁴ nca³tsˀi³ jo³-sˀin² nca³ Ni³na¹ xa¹ tsa³cˀe¹nta³-ni³ xi³ cˀoa⁴-sˀin² tsa³cˀe¹jna³ˀma³ jo³ sa³ˀnta³ to²tsˀin³-le⁴ cjoa⁴. Ni³na¹ tsa³cˀe¹nta³ nca³yi³je³ xi³ tjin¹ son³ˀnte³.
EPH 3:10 Cˀoa⁴ coan³ jme¹-ni³ nca³ je² na⁴xi⁴na³nta¹-le⁴ Cristo coa⁴co²ya³-si¹ni³le⁴ ntˀai⁴-vi⁴ je² xi³ tjin¹-le⁴ xa¹ti¹tjon² cao⁴ xi³ tjin¹-le⁴ nca³nˀion¹ ya⁴ ncˀa³jmi³. Cao⁴co²ya³-le⁴ je² cjoa⁴ˀi³sen³ta³con²-le⁴ Ni³na¹ xi³ cjai¹ ncjin² jco⁴ya³ tjin¹.
EPH 3:11 Cˀoa⁴-sˀin² tjin¹nta³ cjoa⁴fa³ˀai³tsjen³-le⁴ Ni³na¹ nca³ntsjai², nca³ cˀoa⁴-sˀin² tsa³cˀe¹nta³ xi³ to⁴tˀa³tsˀe⁴ Cristo Jesús Nai³-na¹.
EPH 3:12 Cˀia⁴ nca³ ti³yo³coa⁴² Cristo cjai¹nca³ nta³ nˀion¹-ta³coan³², cˀoa⁴ coan⁴ coi⁴tja¹sˀen³² nca³ li²jme³ xi³ xcon¹ coan⁴-na¹, nca⁴ ma³cjain¹-na¹ tˀa³tsˀe⁴ nca³ je².
EPH 3:13 Coi³ cjoa⁴ nca³ si³je¹³-no³, a³li² ni²ˀi³nta³-jion² ni⁴ma⁴-no³ xi³ to⁴tˀa³tsˀe⁴ jña³-le⁴ cjoa⁴ñˀain³ xi³ an³ ti²fa²ˀa⁴toa³ xi³ tˀa³tsaon⁴³. Je² cjoa⁴ñˀain³-na⁴ xi³ cˀoa⁴sje³je³ya³-no³.
EPH 3:14 Coi³ cjoa⁴ va²sen⁴xco¹nchˀin³tˀa³-le⁴ nca³ vˀe³tsˀoa²³-le⁴ Nˀai³-le⁴ je² Nai³-na¹ Jesucristo.
EPH 3:15 Xi³ to⁴tˀa³tsˀe⁴ Nˀai³-na¹ nca³tsˀi³ xi¹ncjin¹ ma³ ya⁴ ncˀa³jmi³ cao⁴ i⁴ son³ˀnte³.
EPH 3:16 Cˀoa⁴-sˀin² to⁴tˀa³tsˀe⁴ je² Espíritu Santo-le⁴ ca²ta³tsjoa¹jin³ ni⁴ma⁴-no³ xi³ tse³ nca³nˀion¹, jo³-sˀin² nca³ nˀion¹ tse³ cjoa⁴je³ya³-le⁴.
EPH 3:17 Nta³ ca²ta³vˀe²jna³jin³ ni⁴ma⁴-no³ Cristo nca³ ma³cjain¹-no³. Vˀe³tsˀoa²³ nca³ nˀion¹ coi⁴yo³cao⁴³ nca³ nˀion¹tˀa³ coaon⁴³ cjoa⁴tjao²cha³,
EPH 3:18 jme¹-ni³ nca³ cˀoa⁴-sˀin² sˀe⁴-si¹ni³no³ nca³nˀion¹ nca³ ña³qui³ nta³ coan⁴cho⁴ya³-si¹ni³no³ cao⁴ nca³tsˀi³ cho⁴ta⁴-le⁴ Cristo jo³ cji³ cjoa⁴tjao²cha³-le⁴ Cristo, jo³ cji³ te³ya³, jo³ cji³ nto³, jo³ cji³ na⁴nca⁴, jo³ cji³ ncˀa³.
EPH 3:19 Cˀoa⁴-sˀin² jcha⁴-nio¹³ je² cjoa⁴tjao²cha³-le⁴ Cristo, xi³ ña³qui³ fa³ˀa³ti¹tjon²-le⁴ nca³yi³je³ cjoa⁴fa³ˀai³tsjen³, jme¹-ni³ nca³ jtse¹jin³-si¹ni³no³ nca³yi³je³ xi³ tsˀe⁴ Ni³na¹.
EPH 3:20 Ni³na¹ nqui²sa⁴ to⁴tse³ ma³-le⁴ sˀin¹ nca³yi³je³ cjoa⁴ jo³ cji³ xi³ ni²je¹, jo³-sˀin² fa³ˀai³tsjen³-na¹, to⁴tˀa³tsˀe⁴ je² nca³nˀion¹ xi³ si¹xa¹jin³-na¹.
EPH 3:21 Je² ca²ta³vi³tjo³je³ya³ ya⁴jin³-le⁴ na⁴xi⁴na³nta¹-le⁴ Cristo xi³ to⁴tˀa³tsˀe⁴ Cristo Jesús, to⁴jo³ tjin¹ ni⁴čhjin³ nca³ntsjai² nca³ntsjai². Cˀoa⁴ ca²ta³ma³.
EPH 4:1 An³ xi³ ti²jna⁴ cjoa⁴ñˀain³ xi³ ti²jna⁴coa⁴ je² Nai³-na¹, vˀe³tsˀoa²³-no³ nca³ coi⁴mao³ jo³-sˀin² ma³chjen¹ je² xa¹ xi³ qui³no²cjoa⁴-no³,
EPH 4:2 cao⁴ cjoa⁴yo⁴ma⁴ cjia³ta³con²³, cao⁴ cjoa⁴ntˀe¹, cao⁴ cjoa⁴tse³ta³con², Ti⁴cjain¹-lao⁴³ xi³nquio⁴³ nca³ tjao²chao³.
EPH 4:3 Ti⁴xi¹ti¹ya³-lao⁴³ yao³-no³ nca³ to⁴jnco³ ti⁴yo³cjao³ nca³ nchˀan¹ ti³yo³, nca³ je² Espíritu Santo tsa³cˀe¹cjao³-no³.
EPH 4:4 Jnco³ yao³ tjin¹. Jnco³ Espíritu Santo tjin¹, jo³-sˀin² nca³ cˀoa⁴-ti⁴ qui³no²cjoa⁴-no³ xi³ tˀa³tsˀe⁴ jnco³ cjoa⁴cho³ya²cao⁴cjoa⁴ xi³ qui³sˀe³-no³ nca³ qui³no²cjoa⁴-no³.
EPH 4:5 Jnco³ Nai³-na¹ tjin¹, jnco³ jo³-sˀin² nca³ ma³cjain¹-na¹, jnco³ cjoa⁴sa³te²nta¹,
EPH 4:6 jnco³ Ni³na¹, cˀoa⁴ Nˀai³-le⁴ nca³tsˀi³, je² xi³ ti¹jna³ti¹tjon²-le⁴ nca³tsˀi³, xi³ ti¹jna³cao⁴ nca³tsˀi³, xi³ ti¹jna³jin³ ni⁴ma⁴-le⁴ nca³tsˀi³.
EPH 4:7 To⁴nca³ nca³ jnco¹jncoa¹ tsa³cˀai²-na¹ cjoa⁴nta³ jo³-sˀin² choa⁴-le⁴ Cristo xi³ tsjoa¹cjoa⁴tjao²-na¹.
EPH 4:8 Je² Ni³na¹ cˀoi⁴qui³tso²: Ncjin² ma³-ni³ xi³ tjio¹tˀa³nˀion¹ xi³ qui³cao⁴ cˀia⁴ nca³ qui³mi³ncˀa³, cˀoa⁴ qui³tsjoa³-le⁴ cjoa⁴tjao² cho⁴ta⁴son³ˀnte³.
EPH 4:9 Xi³ qui³mi³ncˀa³, jo¹ tso²-ni³le⁴ tsa² tsi² ji³tjo³jen³ ya⁴ ˀnte³ xi³ nqui²sa⁴ na³nqui³ xi³ tsˀe⁴ son³ˀnte³.
EPH 4:10 Je² xi³ ji³tjo³jen³, ti⁴je²-ni³ xi³ ja³ˀa³to³-sa³le⁴ ncˀa³jmi³ nca³ qui³mi³ncˀa³, jme¹-ni³ nca³ cˀoa⁴-sˀin² si⁴²jnco³si¹ni³-le⁴ nca³yi³je³ cjoa⁴.
EPH 4:11 Ti⁴je²-ni³ xi³ qui³tsjoa³-le⁴ cˀa³ nca³ pa²stro⁴ ma³, cˀoa⁴ xi³cˀa³ nca³ vˀe¹ma³ nchja⁴ya³, cˀoa⁴ xi³cˀa³ nca³ vˀe¹ma³son² nca³ tso²ya³ tˀa³tsˀe⁴ Ni³na¹, cˀoa⁴ xi³cˀa³ nca³ pastor ma³, cˀoa⁴ nca³ maestro ma³.
EPH 4:12 Cˀoa⁴-sˀin² coan³ jme¹-ni³ nca³ cho⁴ta⁴-le⁴ Cristo nta³ coa⁴tio⁴-si¹ni³ tˀa³tsˀe⁴ xa¹-le⁴ nca³ si⁴²xa¹-le⁴ Ni³na¹. Cˀoa⁴-sˀin² je² yao³-le⁴ Cristo coin⁴ncˀa³.
EPH 4:13 Sa³ˀnta³ nca³ cjoi³choa³² nca³ to⁴jnco³ coan⁴-nia¹ nca³tsˀia³² jo³-sˀin² coan⁴cjain¹-na¹, jo³-sˀin² jcha⁴xcoan³² je² ˀnti¹-le⁴ Ni³na¹, nca³ cjoe⁴ coan⁴nca³-na¹ jo³-ni³ tsa² jnco³ cho⁴ta⁴jchi¹nca³, jo³ sa³ˀnta³ cjoi³choa³² choa⁴ nca³ cˀoa⁴ coan⁴ cjoan³² jo³ cjoan³ Cristo.
EPH 4:14 A³li² ti⁴cˀoa⁴ sˀian⁴²-nia³ jo³-ni³ tsa² ˀnti¹xti³ xi³ si¹cˀo¹fa³ya³ cjoa⁴fa³ˀai³tsjen³-le⁴, xi³ jo³-ni³ tsa² ntjao⁴ xi³ tjen⁴ nca³ i⁴ nca³ jan¹, xi³ to⁴fi²tjen⁴nqui³-le⁴ xi³ to⁴cja⁴ˀai¹ cjoa⁴fa³ˀai³tsjen³, xi³ to⁴cjoa⁴ma²ña⁴-le⁴ cho⁴ta⁴son³ˀnte³, xi³ vˀa³na⁴cha⁴ cao⁴ je² xi³ tsi² tsa² coi³ nta³ tjin¹, xi³ fi²cao⁴ tˀa³xin² jña³-le⁴ xi³ cjoa⁴qui²xi⁴.
EPH 4:15 To⁴sa³ cjoin³tjen⁴nqui³-le⁴² xi³ cjoa⁴qui²xi⁴ cao⁴ cjoa⁴tjao²cha³. Cˀoa⁴-sˀin² ca²ta³ma³jcha¹jin³-na¹ nca³yi³je³ cjoa⁴ xi³ tˀa³tsˀe⁴ nca³ je² xi³ jcoa³² ma³, xi³ je² Cristo.
EPH 4:16 Xi³ to⁴tˀa³tsˀe⁴ Cristo nca³yi³je³ yao³-le⁴ cˀoa⁴-sˀin² ma³yˀai³ ma³ncˀa³ cao⁴ cjoa⁴tjao²cha³, nca³ je³nta³ tjio¹cjao³ nca³qui³jnta² jña³ nca³ xco¹-le⁴. Cˀoa⁴-sˀin² tjin¹-le⁴ nca³nˀion¹ jo³-sˀin² nca³ nta³ si¹xa¹ jnco¹jnco¹ cˀa³ xi³ tsˀe⁴ yao³-le⁴.
EPH 4:17 Je²-vi⁴ xi³ cˀoa⁴xian³, cˀoa⁴ vˀe³ne²³ tˀa³tsˀe⁴ Nai³-na¹, nca³ tsi² tsa² ti⁴coi⁴ma³-nio³ jo³-ni³ xi³cˀa³ cho⁴ta⁴ xi³ li² judío-jin², xi³ tjio¹ma³cao⁴ cjoa⁴fa³ˀai³tsjen³-le⁴ xi³ tsi²jme³ chji¹-le⁴.
EPH 4:18 To⁴njion² tjio¹ cjoa⁴fa³ˀai³tsjen³-le⁴. Cjai¹nca³ to⁴tˀa³xin² tjio¹-le⁴ cjoa⁴vi³jna³chon³-le⁴ Ni³na¹ nca⁴ cˀoa⁴-sˀin² to⁴cjoa⁴njion² tjin¹-le⁴, cˀoa⁴ nca⁴ cjai¹nca³ xi¹jin³ ni⁴ma⁴-le⁴.
EPH 4:19 Coan³scan³-ni³ nca³ je³qui³si³cha³jin³ cjoa⁴fa³ˀai³tsjen³nta³-le⁴, to⁴cˀoa⁴-sˀin² qui³sca³ni¹taon³ yao³-le⁴ nca³ to⁴cho⁴ta⁴cjoa⁴soa³ coan³. To⁴tˀa³tsˀe⁴ cjoa⁴xin²ta³con²-le⁴ cˀoa⁴qui³sˀin³ jo³ tjin¹ jco⁴ya³ cjoa⁴jnti¹.
EPH 4:20 To⁴nca³ li²coi³ cˀoa⁴-sˀin² qui³cho²tˀa³yao³ tˀa³tsˀe⁴ Cristo.
EPH 4:21 A³ tsi² tsa³ cjoa⁴qui²xi⁴ nca³ qui³no²ˀyao²³ tˀa³tsˀe⁴ Cristo, nca³ tsa³qui³yo³cao⁴³ nca³ qui³cho²tˀa³yao³ jo³-sˀin² nca³ cjoa⁴qui²xi⁴ xi³ tjin¹ tˀa³tsˀe⁴ Cristo.
EPH 4:22 Chja⁴ˀa²xin²-lao⁴³ yao³-no³ je² ni⁴ma⁴-no³ xi³ jchi¹nca³ xi³ cjai¹nca³ to⁴coan³nca³-le⁴ cjoa⁴ xi³ chˀao³ tjin¹ jo³ tso² cjoa⁴tsjoa³-le⁴ yao³-no³ xi³ to⁴vˀa³na⁴cha⁴, jo³-sˀin² tsa³nquin¹cao⁴³ yao³-no³ nca³sˀa⁴.
EPH 4:23 Cˀoa⁴-sˀin² ca²ta³ma³cho⁴tse⁴ya³ jo³ tjin¹ cjoa⁴fa³ˀai³tsjen³-no³.
EPH 4:24 Chjoao¹³ je² ni⁴ma⁴-no³ xi³ cho⁴tse⁴, xi³ nco³ya³-le⁴ Ni³na¹ qui³sˀe³nta³-ni³ cao⁴ xi³ tjin¹-le⁴ cjoa⁴qui²xi⁴ cˀoa⁴ cao⁴ xi³ ña³qui³ tsje³.
EPH 4:25 Coi³ nca³ qui³chja³ˀa²xion²³ cjoa⁴nti³so³, cho⁴va²cao⁴³ xi²nquio⁴³ xi³ cjoa⁴qui²xi, nca³ to⁴jnco³ tji¹cjao³ yao³-na¹ nca³tsˀia³².
EPH 4:26 Nta³ tsa² ma³jti³-no³, a³li² je¹-jin² vi³jncho³. A³li² jti³-jin² ma³-no³ jo³ sa³ˀnta³ nca³ ca²ntjai² tsˀoi¹.
EPH 4:27 Ni⁴ vˀai²ˀnte³-jin²lao⁴³ nai⁴².
EPH 4:28 Je² xi³ qui³si³che¹, a³li² ti⁴si¹che¹-jin²ni³. To⁴sa³ ca²ta³si¹xa¹, cˀoa⁴-sˀin² ca²ta³si¹xa¹-ni³ ntsja³ xi³ nta³ tjin¹, jme¹-ni³ nca³ sˀe⁴-si¹ni³le⁴ xi³ tsjoa¹-le⁴ xi³ tsi²jme³ tjin¹-le⁴.
EPH 4:29 Ni⁴to⁴jnco³-jin² en¹ xi³ chˀao³ tso² nˀo¹sje³-nio³ ntso⁴ˀvao³, to⁴je² en¹ xi³ nta³ tjin¹ xi³ coi⁴ncha³cao⁴, xi³ ma³chjen¹-le⁴, jme¹-ni³ nca³ cˀoa⁴-sˀin² tsjoa¹-si¹ni³le⁴ cjoa⁴nta³ je² xi³ nčhˀoe¹.
EPH 4:30 A³li² cˀoa⁴-jin²sˀin² ni²va³-jin²lao⁴³ je² Espíritu Santo xi³ tsˀe⁴ Ni³na¹, xi³ tsa³ca³sen¹choa⁴-no³ tˀa³tsˀe⁴ cˀia⁴ ni⁴čhjin³ nca³ coan⁴chji¹ntjao²³.
EPH 4:31 Nca³yi³je³ cjoa⁴jnčha³, cjoa⁴jti³, cjoa⁴jti³cha³, xi³ nˀion¹ nchja⁴ti³, cao⁴ xi³ nchja⁴ˀaon³, ca²ta³tjo³xin²-no³, cao⁴ nca³yi³je³ cjoa⁴tsˀen⁴.
EPH 4:32 To⁴sa³ nta³ ti⁴cao⁴³ xi²nquio⁴³. Ca²ta³sˀe³-no³ cjoa⁴ma⁴ta³con². Ti⁴cha³tˀa³-lao⁴³ xi²nquio⁴³, jo³-sˀin² nca³ Ni³na¹ qui³si³cha³tˀa³-no³ nca³ ti³yo³cao⁴³ Cristo.
EPH 5:1 Chjen²nqui³-lao⁴³ Ni³na¹, jo³-ni³ tsa² ˀnti¹ xi³ cjai¹nca³ tjao²cha³.
EPH 5:2 Cao⁴ cjoa⁴tjao²cha³ ti⁴ma³cao⁴³ xi²nquio⁴³, jo³-sˀin² Cristo coan³tsjoa³que³-na¹, qui³tsjoa³ntjai²-na¹ yao³-le⁴, jo³-ni³ jnco³ cjoa⁴tjao², cˀoa⁴ jo³-ni³ xi³ qui³tsˀai²ntjai²-na¹ xi³ na³sca¹ njen⁴ nqui³xcon⁴ Ni³na¹.
EPH 5:3 A³li² ni²cˀa³xqui⁴jin³-jion²³ xi²nquio⁴³ ni⁴ˀi⁴tse¹-jin² cjoa⁴cha³jnqui³, ni⁴ nca³yi³je³ xi³ nˀion¹ chˀao³ tjin¹, ni⁴ cjoa⁴xin²ta³con²-jin². Je² cjoa⁴-vi⁴ li²coi³ ntia⁴² squen¹-le⁴ cho⁴ta⁴-le⁴ Cristo.
EPH 5:4 Ni⁴ je²-jin² en¹tsˀen⁴ no²cjoao⁴³, ni⁴ en¹chi⁴con¹-jin², ni⁴ en¹ntsjen¹ˀa³-jin², xi³ tsi² tsa² va³quin²-no³, to⁴sa³ tˀao²³ cjoa⁴nta³.
EPH 5:5 Je³ˀyao³ je²-vi⁴, nca³ ni⁴jnco³-jin² cho⁴ta⁴cha³jnqui³, ni⁴jnco³-jin² xi³ cjoa⁴jnti¹ tjio¹ma³sˀin¹, ni⁴jnco³-jin² xi³ xin²con³, xi³ ma³nco¹son² xi³ xco¹son² ve³xcon¹, ni⁴jnco³-jin² tjin¹-le⁴ ˀnte³ ya⁴ cjoa⁴te¹xo³ma³-le⁴ Cristo cao⁴ Ni³na¹.
EPH 5:6 Ni⁴to⁴ˀya³-jin² xi³ ca²ta³vˀa³na⁴cha⁴-no³ cao⁴ xi³ to⁴xquia⁴ en¹. Xi³ to⁴coi³ cjoa⁴-vi⁴ nčhoa¹ne²-le⁴ cjoa⁴jti³-le⁴ Ni³na¹ je² cho⁴ta⁴ xi³ xi¹jin³.
EPH 5:7 A³li² ya⁴-jin² ña³tjen⁴ mai¹cao⁴³ nca³ je².
EPH 5:8 Nca³sˀa⁴ njion² nio¹³, to⁴nca³ ntˀai⁴-vi⁴ntai⁴ je³ˀi³saon³ nca³ ti³yo³cao⁴³ je² Nai³-na¹. Ti⁴mao³ jo³-ni³ tsa² ˀnti¹-le⁴ xi³ i³sen³-le⁴.
EPH 5:9 (Je² Espíritu Santo tsjoa¹ntje⁴jin³ ni⁴ma⁴-na¹ je² xi³ cjoa⁴nta³, xi³ tjin¹-le⁴ cjoa⁴qui²xi⁴, cˀoa⁴ je² xi³ ña³qui³ cˀoa⁴tjin¹.)
EPH 5:10 Cho¹tˀao³ je² xi³ sa³sen¹con³ Nai³-na¹.
EPH 5:11 A³li² cˀoa⁴-jin²sˀin² nˀiaon²³ je² xa¹ xi³ tsi² coan⁴ntje⁴-no³, xi³ to⁴tsˀe⁴ cjoa⁴njion², to⁴sa³ ta⁴co²son²tsaon⁴³.
EPH 5:12 Cjai¹nca³ to⁴chˀao³ tjin¹, nta³ tsa² to⁴coi⁴no²cjoao⁴³ xi³ tˀa³tsˀe⁴ je² xi³ to⁴cjoa⁴ˀma³ sˀin¹.
EPH 5:13 Nca³yi³je³ je² cjoa⁴ xi³ va³tio²son²tsen³, cˀoa⁴-sˀin² sa³tio²son²tsen³ cao⁴ lˀi¹. Je² nca³yi³je³ xi³ cˀoa⁴-sˀin² va³tio²son²tsen³, i³sen³ jo³-ni³ tsa² lˀi¹.
EPH 5:14 Xi³ coi³ cˀoi⁴tso²: Ti⁴cja³ˀa¹-lai⁴ yao³-li⁴, ji³ xi³ ti³so³jna³fai³. Ti²so⁴tjen⁴jin³-lai⁴ cˀen³, cˀoa⁴-sˀin² si⁴²ˀi³sen³-li² Cristo.
EPH 5:15 Cho¹tsaon³, tso²cˀoa⁴, nca³ qui²xi⁴ ti⁴mao³, a³li² jo³-ni³ cho⁴ta⁴ xi³ tsin²-le⁴ cjoa⁴fa³ˀai³tsjen³-jin², to⁴nca³ jo³-ni³ cho⁴ta⁴ xi³ tjin¹-le⁴ cjoa⁴fa³ˀai³tsjen³.
EPH 5:16 A³li² ni⁴čhjin³-jin² ni²cha³-lao⁴³ yao³-no³, nca³ je² ni⁴čhjin³ cjai¹nca³ to⁴chˀao³ chon³.
EPH 5:17 Xi³ coi³, a³li² chi⁴con¹-jin² mao³, to⁴nca³ ca²ta³ma³cho⁴ya³-no³ jo³-sˀin² nca³ me³-le⁴ Nai³-na¹.
EPH 5:18 A³li² yao³-no³jin² ni²chˀi⁴-nio³ vino, nca³ cˀoa⁴-sˀin² si¹qui³xo²ya³-ni³ cjoa⁴, to⁴nca³ ca²ta³tse³jin³ ni⁴ma⁴-no³ je² Espíritu Santo.
EPH 5:19 Chja⁴cao⁴³ xi²nquio⁴³ je² en¹-le⁴ Ni³na¹ xi³ coi⁴jntao¹³, ti⁴jnta¹-lao⁴³ je² xi³ vˀa³sje³je³ya³ Ni³na¹, ti⁴jntao¹³ ja⁴jin³ ni⁴ma⁴-no³. Ti⁴jnta¹-lao⁴³, cˀoa⁴ chˀa⁴sje³je³yao³ je² Nai³-na¹ ja⁴jin³ ni⁴ma⁴-no³.
EPH 5:20 Nca³ntsjai² nca³yi³je³ tˀai²-lao⁴³ cjoa⁴nta³ Ni³na¹ Nˀai³-na¹ xi³ to⁴tˀa³tsˀe⁴ jan³ˀain¹-le⁴ Nai³-na¹ Jesucristo.
EPH 5:21 Na³nqui³ ti⁴yo³-lao⁴³ xi²nquio⁴³ nca³ jcon³ chao³ Ni³na¹.
EPH 5:22 Je² ya¹nchjin¹ na³nqui³ ca²ta³va³tio²-le⁴ xˀin⁴-le⁴, jo³-sˀin² nca³ na³nqui³ tjio¹-le⁴ Nai³-na¹.
EPH 5:23 Je² xˀin⁴-ve⁴ nca³jco⁴-le⁴ chjon⁴²-le⁴, jo³-sˀin² nca³ Cristo nca³jco⁴-le⁴ na⁴xi⁴na³nta¹-le⁴. Je² xi³ vˀa³sje³ntjai² na⁴xi⁴na³nta¹-le⁴ xi³ ti⁴je²-ni³ yao³-le⁴.
EPH 5:24 Jo³-sˀin² nca³ je² na⁴xi⁴na³nta¹-le⁴ Cristo na³nqui³ tjio¹-le⁴ Cristo, cˀoa⁴-ti⁴sˀin²ni³ nca³ je² ya¹nchjin¹ na³nqui³ tjio¹-le⁴ xˀin⁴-le⁴ nca³yi³je³.
EPH 5:25 Jon² xi³ xˀion⁴³, tsjoa³cha³ ca²ta³mao³ ya¹nchjin¹-no³, jo³-sˀin² nca³ Cristo coan³tsjoa³que³ na⁴xi⁴na³nta¹-le⁴, cˀoa⁴ qui³tsjoa³ntjai² yao³-le⁴ xi³ tˀa³tsˀe⁴,
EPH 5:26 jme¹-ni³ nca³ cˀoa⁴-sˀin² Cristo tsa³cˀe¹jna³tjao²-si¹ni³ cˀoa⁴ qui³si³tsje³-si¹ni³ na⁴xi⁴na³nta¹-le⁴, jo³-ni³ tsa² cao⁴ na³nta¹ xi³ to⁴tˀa³tsˀe⁴ en¹-le⁴,
EPH 5:27 jme¹-ni³ nca³ ti⁴je²-ni³ si⁴²ca³sen¹ va³sen³-si¹ni³le⁴ yao³-le⁴ jnco³ na⁴xi⁴na³nta¹ xi³ tsˀe⁴ xi³ cjai¹nca³ to⁴je³ya³, xi³ tsi² tsa² coi³ je² tjin¹-le⁴, xi³ tsi² tsa² yo¹ cjoan³, ni⁴to⁴cˀoa⁴cjoan³ cˀoa⁴ma³-jin², jme¹-ni³ nca³ to⁴ña³qui³ tsje³ coan⁴-si¹ni³ nca³ tsi²jme³ je¹ sˀe⁴-le⁴.
EPH 5:28 Cˀoa⁴-ti⁴sˀin² xi³ xˀin⁴ tsjoa³que³ ca²ta³ma³ ya¹nchjin¹-le⁴, jo³-ni³ tsa² ti⁴tsˀe⁴-ni³ yao³. Je² xi³ tsjoa³que³ chjon⁴²-le⁴, ti⁴je²-ni³ yao³-le⁴ xi³ tsjoa³que³.
EPH 5:29 Ni⁴jnco³-jin² xi³ ti⁴je² taon³ ve³-ni³ yao³-le⁴. To⁴cˀoa⁴sˀin² si¹jcha¹, cˀoa⁴ tjao²-le⁴, jo³-ni³ tsa² Cristo si¹jcha¹, cˀoa⁴ tjao²-le⁴ na⁴xi⁴na³nta¹-le⁴.
EPH 5:30 Nca³ ña¹ tjio¹cjao³-nia¹ yao³-le⁴ cao⁴ ni³nta³-le⁴.
EPH 5:31 Coi³ cjoa⁴-vi⁴ nca³ je² xi³ xˀin⁴ si¹ca³tio¹-ni³ nˀai³-le⁴ cao⁴ na⁴-le⁴, nca³ nta³ ti¹jna³cao⁴ chjon⁴²-le⁴. To⁴jnco³ yao³ ma³ nca³ jao².
EPH 5:32 Je²-vi⁴ jnco³ cjoa⁴ˀma³ xi³ cjai¹nca³ tse³ya³, to⁴nca³ an³ cˀoa⁴²xian³ xi³ tˀa³tsˀe⁴ Cristo, cˀoa⁴ tˀa³tsˀe⁴ na⁴xi⁴na³nta¹-le⁴.
EPH 5:33 Jnco¹jnco¹ nca³tsˀio³-vi⁴ ña³qui³ cˀoa⁴-sˀin² tsjoa³cha³ ca²ta³mao³ ya¹nchjin¹-no³, jo³-sˀin² tsjoa³chao³ yao³-no³. Je² xi³ chjon⁴² xcon¹ ca²ta³ve³ xˀin⁴-le⁴.
EPH 6:1 Jon² xi³ ˀnti¹xtio³, ti⁴tjo³-son²-lao⁴³ xi³jcha¹-no³ nca³ ti³yo³cao⁴³ Nai³-na¹. Je²-vi⁴ xi³ nta³ tjin¹.
EPH 6:2 Jcha⁴xcoin¹³ nˀai³-li⁴ cao⁴ na⁴-li⁴, nca³ je² xi³ ti¹tjon² cjoa⁴te¹xo³ma³ xi³ tjin¹-le⁴ xi³ si¹sˀe³nqui³,
EPH 6:3 jme¹-ni³ nca³ nta³ coi⁴jna³-si¹ni³, cˀoa⁴ tse³ coan⁴-si¹ni³li² i⁴ son³ˀnte³.
EPH 6:4 Jon² xi³ nˀai³ mao³, a³li² ni²jti³-jin²lao⁴³ xti³-no³. To⁴cˀoa⁴-sˀin² ti⁴jchao¹³ nca³ sin³ nca³ nta³ coa⁴co²-lao⁴³ coa⁴co²ya³nta³-lao⁴³ cjoa⁴ xi³ tso²ya³ Ni³na¹.
EPH 6:5 Jon² xi³ cho⁴ˀnta³ mao³, ti⁴tjo³son²-lao⁴³ nai³-no³ xi³ cho⁴ta⁴son³ˀnte³ cao⁴ cjoa⁴jcon³-no³ cao⁴ cjoa⁴fa³tse¹-no³, nca³ ña³qui³ nta³ tjin¹ ni⁴ma⁴-no³, jo³-ni³ tsa² Cristo ni²xa¹-lao⁴³.
EPH 6:6 A³li² cˀoa⁴-jin²sˀin² ni²xao¹³ nqui³xcon⁴ cho⁴ta⁴, jo³-sˀin² xi³ to⁴xquia⁴ si¹tsjoa³-le⁴ cho⁴ta⁴, to⁴nca³ jo³-ni³ tsa² cho⁴ˀnta³-le⁴ Cristo, to⁴cao⁴ cjoa⁴tsjoa³ cˀoa⁴tˀiaon⁴³ jo³-sˀin² me³-le⁴ Ni³na¹.
EPH 6:7 To⁴cao⁴ cjoa⁴nta³ ti⁴xao¹³, jo³-ni³ tsa² tˀa³tsˀe⁴ Nai³-na¹ Cristo, a³li²coi³ tˀa³tsˀe⁴ cho⁴ta⁴-jin².
EPH 6:8 Nta³ ˀyao³ nca³ jnco¹jnco¹ nca³ je² Nai³-na¹ tsjoa¹-nca¹nca³no³ je²-vi⁴ jme³-ve⁴ xi³ nta³ sˀiaon⁴³, tsa² cho⁴ˀnta³ cˀoa⁴ tsa² je² xi³ ntai¹ tjin¹.
EPH 6:9 Jon² xi³ nai³-le⁴ mao³, cˀoa⁴-ti⁴sˀin²ni³ ti⁴cao⁴³ nca³ je². Ti⁴njion¹³ xi³ ñˀain³ nˀian²-lao⁴³, nca³ je³ˀyao³ nca³ je² Nai³-le⁴ xi³ tsˀe⁴ cˀoa⁴ xi³ tsaon⁴³ ti¹jna³ ncˀa³jmi³, to⁴nco¹son² fi²cao⁴ nca³tsˀi³.
EPH 6:10 Xi³ fe³tˀa³, ˀnti¹ntsˀe³, ca²ta³sˀe³-no³ nca³nˀion¹ nca³ ti³yo³cao⁴³ Nai³-na¹ cao⁴ nca³yi³je³ nca³nˀion¹ xi³ tse³ tjin¹-le⁴.
EPH 6:11 Jo³-ni³ tsa² so³nta²do⁴ ti⁴nca³jon³ yao³-no³ nca³yi³je³ qui⁴cha⁴ xi³ tsˀe⁴ Ni³na¹, jme¹-ni³ nca³ coan⁴-si¹ni³ nca³ coi⁴yo³ta²ja³-lao⁴³ cjoa⁴ma²ña⁴-le⁴ je² nai⁴².
EPH 6:12 Li²coi³ cho⁴ta⁴son³ˀnte³ xi³ njin¹ xi³ yao³ tjin¹-le⁴ xi³ coi³xcan¹coa⁴². To⁴je² xi³ co²ntran⁴-na¹ xi³ xa¹ti¹tjon² tjin¹-le⁴, xi³ cjoa⁴te¹xo³ma³ tjin¹-le⁴, xi³ nai⁴²ti¹tjon² xi³ nca³qui³jnta² va³te¹xo³ma³ jña³ njion², xi³ je² nca³tsˀi³ ntjao⁴ xi³ chˀao³ sˀin¹ xi³ tsˀe⁴ ja⁴ncˀa¹.
EPH 6:13 Coi³ nca³ cˀoa⁴-sˀin² chjoe¹-nio³ nca³yi³je³ qui⁴cha⁴ xi³ tsˀe⁴ Ni³na¹, jme¹-ni³ nca³ coi⁴yo³ta²ja³-si¹ni³lao⁴³ je² ni⁴čhjin³ xi³ ñˀain³ tjin¹. Cˀoa⁴-sˀin² to⁴jo³ coi⁴yo³ta²jao³, nca³ je³cˀoa⁴-sˀin² qui³ni²jnco³ nca³yi³je³.
EPH 6:14 Cˀoa⁴-sˀin² nˀion¹ ti⁴yo³ntao³. Nta³ tˀe²cjao¹³ čhjoa⁴xin¹cja¹ntia³-no³ xi³ nco³ya³-le⁴ xi³ ña³qui³ cˀoa⁴tjin¹. Tja³cjao¹³ ˀme⁴-no³ na³jño³qui⁴cha⁴ xi³ nco³ya³-le⁴ cjoa⁴ xi³ tjin¹-le⁴ cjoa⁴qui²xi⁴.
EPH 6:15 Tja³yao³ ntso⁴co³ je² jte¹ xi³ nco³ya³-le⁴ nca³ ti³yo³ntao³ xi³ tˀa³tsˀe⁴ je² en¹nta³ xi³ tsjoa¹ xi³ nchˀan¹ tjin¹.
EPH 6:16 Je² xi³ nqui²sa⁴ ma³chjen¹, nca³ chjoao¹³ je² qui⁴cha⁴ xi³ va¹jčho³chjoa² yao³-no³ xi³ nco³ya³-le⁴ je² xi³ ma³cjain¹-na¹, jme¹-ni³ nca³ cˀoa⁴-sˀin² si⁴cji³tsˀao¹-si¹nio³ je² flecha xi³ ti¹ti² xi³ tsˀe⁴ nai⁴².
EPH 6:17 Tˀe²yao³ jco³ je² xo³mpe³qui⁴cha⁴ xi³ nco³ya³-le⁴ cjoa⁴vi³tjo³ntjai²-na¹, cao⁴ je² qui⁴cha⁴nto³ xi³ tsˀe⁴ je² Espíritu Santo, xi³ nco³ya³-le⁴ je² en¹-le⁴ Ni³na¹.
EPH 6:18 Tˀe²tsˀoa³-lao⁴³ Ni³na¹ nca³ntsjai², ti⁴je¹-lao⁴³ cjoa⁴nta³ nca³yi³je³ xi³ to⁴tˀa³tsˀe⁴ je² Espíritu Santo. Cˀoa⁴-sˀin² ti⁴yo³chon³ˀntao³ to⁴jme³ hora-ni³, nca³ vˀe²tsˀoa³ntjao²³ tˀa³tsˀe⁴ nca³tsˀi³ cho⁴ta⁴-le⁴ Cristo.
EPH 6:19 Cˀoa⁴-ti⁴sˀin² tˀe²tsˀoao³ tˀa³tsˀan⁴, jme¹-ni³ nca³ cˀoai⁴-si¹ni³na³ en¹ nca³ sco³ˀe²³ ntso⁴ˀva³, cˀoa⁴ jme¹-ni³ nca³ li²coi³ tsa³cjon³-si¹nia³ nca³ coi³nchja²ya³ je² cjoa⁴ˀma³ xi³ tsˀe⁴ en¹nta³ tˀa³tsˀe⁴ Cristo.
EPH 6:20 An³ nia¹³ xi³ cˀoi⁴²-sˀin² ti²jna⁴ nca³jao³-le⁴ Ni³na¹. Ti²jna⁴nˀion¹tˀa³ nˀo¹qui⁴cha⁴ xi³ tˀa³tsˀe⁴ je² en¹nta³ tˀa³tsˀe⁴ Cristo. Cˀoa⁴-sˀin² tˀe²tsˀoao³ tˀa³tsˀan⁴, jme¹-ni³ nca³ li²coi³ tsa³cjon³-si¹nia³ nca³ nˀion¹ coi³nchja²ya³ xi³ tˀa³tsˀe⁴, jo³-sˀin² nca³ tjin¹ne²-na³ nca³ coi³nchja²³.
EPH 6:21 Je² Tíquico, je² ntsˀe³² xi³ cjai¹nca³ tsjoa³cha³², xi³ cjai¹nca³ nta³ si¹xa¹ tˀa³tsˀe⁴ Nai³-na¹, je² cˀoa⁴coi⁴tso⁴yi³je³-no³, jme¹-ni³ nca³ jcha⁴-si¹nio³ jo³-sˀin² ti²jna⁴ cˀoa⁴ jo³-sˀin² ma³ xa¹-na⁴.
EPH 6:22 Coi³ cjoa⁴ nca³ qui³sca³ni³con³-no³ Tíquico, jme¹-ni³ nca³ jcha⁴-si¹nio³ xi³ tˀa³tsain⁴jin⁴, cˀoa⁴ jme¹-ni³ nca³ si⁴²je³con³-si¹ni³ ni⁴ma⁴-no³.
EPH 6:23 Je² Ni³na¹ Nˀai³-na¹, cˀoa⁴ je² Nai³-na¹ Jesucristo ca²ta³si¹qui³njen³nchˀan¹jin³ ni⁴ma⁴-le⁴ ntsˀe³², ca²ta³tsjoa¹-le⁴ cjoa⁴tjao²cha³ nca³ ma³cjain¹-le⁴.
EPH 6:24 Cjoa⁴nta³ ca²ta³sˀe³-le⁴ nca³tsˀi³ xi³ tsjoa³que³ Nai³-na¹ Jesucristo cao⁴ cjoa⁴tjao²cha³ xi³ ni⁴cˀia³-jin² cjoe⁴. Cˀoa⁴ ca²ta³ma³.
PHI 1:1 Jin⁴ ni¹⁴-jin⁴ Pablo cao⁴ Timoteo, cho⁴ˀnta³-le⁴ Jesucristo. Ti³chji³-lai²⁴jin⁴ nca³tsˀio³ xi³ cho⁴ta⁴-le⁴ Cristo ya⁴ Filipos. Ti³yo³cao⁴³ Cristo Jesús. Cˀoa⁴-ti⁴ ti³chji³-lai²⁴jin⁴ nca³ jon² xi³ ni²coi²ntao⁴³ cho⁴ta⁴-le⁴ Cristo, cao⁴ jon² xi³ ni²sin³-lao⁴³.
PHI 1:2 Ca²ta³tsjoa¹-no³ cjoa⁴nta³, ca²ta³si¹qui³njen³nchˀan¹jin³ ni⁴ma⁴-no³ Ni³na¹ Nˀai³-na¹ cao⁴ Nai³-na¹ Jesucristo.
PHI 1:3 Tsjoa³-le⁴ cjoa⁴nta³ Ni³na¹-na⁴ xi³ tˀa³tsˀe⁴ nca³yi³je³ xi³ fa³ˀai³tsjen³-na³ xi³ tˀa³tsaon⁴³.
PHI 1:4 Nca³ntsjai² cˀia⁴ nca³ vˀe³tsˀoa²³-le⁴ Ni³na¹, tsjoa¹ vˀe³tsˀoa²ntjai²³-no³ nca³tsˀio³.
PHI 1:5 Tsjoa³-le⁴ cjoa⁴nta³ Ni³na¹-na⁴ nca³ nta³ ti³mai¹cao⁴-nao¹³ xi³ tˀa³tsˀe⁴ je² en¹nta³ tˀa³tsˀe⁴ Cristo sa³ˀnta³ ni⁴čhjin³ nca³ qui³no²ˀya² ti¹tjon²³ sa³ˀnta³ ntˀai⁴-vi⁴ ntai⁴.
PHI 1:6 Nta³ ˀve³-coan³ nca³ Ni³na¹ xi³ cˀoa⁴-sˀin² tsa³cˀe¹tsˀia⁴cao⁴jin³ ni⁴ma⁴-no³ je² xa¹ xi³ nta³-ve⁴, to⁴sin³ to⁴nta³ si⁴²jnco³ sa³ˀnta³ ni⁴čhjin³ nca³ cjoa⁴ˀai¹ Jesucristo.
PHI 1:7 Tjin¹-na³ cjoa⁴qui²xi⁴ nca³ cˀoa⁴-sˀin² si³cja³ˀai³tsjen³ tˀa³tsaon⁴³ nca³tsˀio³, nca⁴ si³cjao¹que³-no³. Jon² nio¹³ xi³ to⁴jnco³ ti³chjoe¹cao⁴-nao¹³ cjoa⁴nta³-le⁴ Ni³na¹, nca³ ti²jna⁴ cjoa⁴ñˀain³, cˀoa⁴ nca³ nchja²ntje²³ nca³ si³qui²xi⁴ya³nta³ je² en¹nta³ xi³ tˀa³tsˀe⁴ Cristo.
PHI 1:8 Ni³na¹ je² ni¹ xi³ testigo-na⁴ jo³-sˀin² nca³ cjoa⁴qui²xi⁴ nˀion¹ tjao²que⁴-no³ cao⁴ cjoa⁴tjao²cha³-le⁴ Jesucristo.
PHI 1:9 Je²-vi⁴ xi³ vˀe³tsˀoa²ntjai²³-no³, nca³ je² cjoa⁴tjao²cha³-no³ coan⁴ncjin²ya³-ni³ cao⁴ cjoa⁴chji⁴ne⁴ cao⁴ cjoa⁴ˀi³sen³ta³con²,
PHI 1:10 jme¹-ni³ nca³ jcha⁴-si¹nio³ xi³ nta³ tjin¹, cˀoa⁴ jme¹-ni³ nca³ tsje³ coan⁴-si¹nio³, nca³ ni⁴jme³-jin² je¹ sˀe⁴-no³ cˀia⁴ ni⁴čhjin³ nca³ cjoa⁴ˀai¹ Cristo.
PHI 1:11 Vˀe³tsˀoa²ntjai²³-no³ nca³ nˀion¹ nta³ cˀoa⁴sˀiaon⁴³ je² cjoa⁴qui²xi⁴ xi³ nčhoa¹-ni³ Jesucristo. Cˀoa⁴-sˀin² chˀa⁴sje³je³yao³, cˀoa⁴ nta³ chˀa⁴sjao³ Ni³na¹.
PHI 1:12 ˀnti¹ntsˀe³², me³-na³ nca³ ca²ta³ˀyao³ nca³ to⁴tˀa³tsˀe⁴ je² cjoa⁴ xi³ cji³ma³tˀen³ nca³ an³, nqui²sa⁴-sa³ to⁴ncjin² cˀa³ qui³sca³son² je² en¹nta³ xi³ tˀa³tsˀe⁴ Cristo.
PHI 1:13 Je³ve³ nca³tsˀi³ xi³ tjio¹ i⁴ cuartel, cao⁴ nca³tsˀi³ xi³cˀa³, nca³ je¹ntjai²-le⁴ Cristo ti²jna⁴-nia¹³ cjoa⁴ñˀain³.
PHI 1:14 Ncjin² ma³-ni³ xi³ ntsˀe³² cho⁴va² nca³ ti³yo³coa⁴² Nai³-na¹. Coi³ cjoa⁴ tjio¹cjoe¹ cjoa⁴nˀion¹ta³con² nca³ cjoa⁴ñˀain³ ti²jna⁴ nca³ an³. To⁴nqui²sa⁴-sa³ ma³nˀion¹con³ nca³ nchja⁴ je² en¹-le⁴ Ni³na¹, nca³ tsin²-le⁴ cjoa⁴jcon³-jin².
PHI 1:15 Tjin¹ cˀa³ cho⁴ta⁴ xi³ cjoa⁴qui²xi⁴ nchja⁴ya³ tˀa³tsˀe⁴ Cristo nca³ ma³xin²con³, cˀoa⁴ nca³ cjan¹cao⁴ xi³cˀa³. To⁴nca³ cˀoa⁴-ti⁴ tjin¹ cˀa³ cho⁴ta⁴ xi³ ña³qui³ cao⁴ cjoa⁴nta³-le⁴ nchja⁴ya³-ni³.
PHI 1:16 Je² xi³cˀa³ nchja⁴ya³ en¹ tˀa³tsˀe⁴ Cristo, to⁴nca³ to⁴xo⁴cˀoa⁴ tjio¹sˀin¹ nca³ me³-le⁴ nca³ nqui²sa⁴ tse³ cjoa⁴ñˀain³ sca⁴ne²-na³.
PHI 1:17 To⁴nca³ je² xi³cˀa³ ña³qui³ cao⁴ cjoa⁴tjao²cha³ nchja⁴ya³-ni³, nca³ ve³-ni³ nca³ coi³ xa¹ qui³sˀe³ne²-na³ nca³ coi³nchja²ntje²³ je² en¹nta³ tˀa³tsˀe⁴ Cristo.
PHI 1:18 Jme¹ ni¹-ˀni³. To⁴jo³ tjio¹nchja⁴ya³ tˀa³tsˀe⁴ Cristo, nta³ tsa² tjin¹ cˀa³ xi³ to⁴xo⁴cˀoa⁴ tjio¹sˀin¹, cˀoa⁴ nta³ tsa² tjin¹ cˀa³ xi³ cao⁴ cjoa⁴qui²xi⁴ nchja⁴ya³-ni³. Coi³ ma³tsjoa³-na³, to⁴jo³ coan⁴tsjoa³-na³.
PHI 1:19 ˀve³-nia¹³ nca³ je²-vi⁴ cˀoa⁴-sˀin² cjoe⁴tˀain³-na³, coi²-tjo⁴ntjai²³-nia¹³ nca³ ti³vˀe²tsˀoa³ntjai²-nao¹³. Cˀoa⁴-ti⁴ je² Espíritu Santo-le⁴ Jesucristo ti¹va³sen¹cao⁴-na³.
PHI 1:20 Cˀoa⁴-sˀin² nˀion¹ me³-na³, cˀoa⁴ ti²co³ya³-le⁴ nca³ ni⁴to⁴jme³-jin² xi³ coan⁴soa³-ni³na³. To⁴sa³ cao⁴ nca³yi³je³ cjoa⁴nˀion¹ta³con² jo³-ni³ nca³ntsjai² cˀoa⁴-ti⁴ ntˀai⁴-vi⁴, nqui²sa⁴-sa³ coi⁴tjo³je³ya³ Cristo xi³ to⁴tˀa³tsˀan⁴, nta³ tsa² coa²te⁴jna³coan³, nta³ tsa² coi³ya¹³.
PHI 1:21 To⁴jnco³ ntia⁴²-le⁴ Cristo ti²fia³ nca³ ti²jna⁴coan³, cˀia⁴ tsa² mˀen³, coi⁴njen⁴-na³.
PHI 1:22 To⁴nca³ tsa² coa²te⁴jna³coan³, cˀia⁴² nta³ coi⁴tjo³ xa¹-na⁴. Li²coi³ ˀve³ an³-vi⁴ jña³-le⁴ xi³ cjoa³ˀa³jian³.
PHI 1:23 Je² nca³ jao² cjoa⁴-ve⁴ ti²jna⁴jin³ va³sen³-le⁴. Cjai¹nca³ tso²³-coan³ an³-vi⁴ nca³ coi²tjo⁴jian³ i⁴-vi⁴, nca³ coa²te⁴jna³coa⁴ Cristo, coi³ xi³ nqui²sa⁴ nˀion¹ nta³ tjin¹.
PHI 1:24 To⁴nca³ tsa² coa²te⁴jna³coan³, coi³ xi³ nqui²sa⁴ ma³chjen¹ xi³ tˀa³tsaon⁴³.
PHI 1:25 Nta³ ˀve³-coan³ je²-vi⁴. ˀve³-nia¹³ nca³ coa²te⁴jna³-sa³, nca³ to⁴jo³ coa²te⁴jna³jin³-sa³no³ nca³tsˀio³, jme¹-ni³ nca³ sˀe⁴-sa³ni³no³ cjoa⁴tsjoa³, cˀoa⁴ jme¹-ni³ nca³ coa⁴nquin¹ti¹tjon² cao⁴ nqui²sao⁴³ jo³-sˀin² ma³cjain¹-no³.
PHI 1:26 Nqui²ntia³ cjoi¹con³-no³, jme¹-ni³ nca³ nqui²sa⁴ nˀion¹ coi⁴nˀo⁴sje³je³yao³ Cristo to⁴tˀa³tsˀan⁴.
PHI 1:27 Nta³ ta³nquin¹cao⁴³ yao³-no³, jo³-sˀin² va³quin²-le⁴ je² en¹nta³ xi³ tˀa³tsˀe⁴ Cristo, jme¹-ni³ nca³ tsa² coan⁴ cjoi¹con³-no³, cˀoa⁴ tsa² tsi² tsa² cjoia¹³, cjoi³nčhˀoe³-nia¹³ xi³ tˀa³tsaon⁴³ nca³ nta³ coi⁴yo³ nca³ to⁴jnco³ cjoa⁴fa³ˀai³tsjen³ sˀe⁴-no³, cˀoa⁴ nca³ cˀoai⁴-lao⁴³ nca³nˀion¹ xi²nquio⁴³ xi³ tˀa³tsˀe⁴ en¹nta³ xi³ ma³cjain¹-na¹.
PHI 1:28 Ni⁴to⁴jme³-jin² xi³ vi³jcon³-lao⁴³ xi³ chˀao³ ve³con³-no³. Coi³ xi³ ña³qui³ cˀoa⁴-sˀin² va³co¹son²tsen³-le⁴ nca³ coai⁴cha³, to⁴nca³ jon² coi²tjo⁴ntjai²-nio¹³. Je² Ni³na¹ xi³ cˀoa⁴-sˀin² va³co¹son²tsen³.
PHI 1:29 Jon² tsa³cˀai²-no³ xi³ to⁴tˀa³tsˀe⁴ Cristo, a³li² tsa² to⁴coi³ cjoan² nca³ ma³cjain¹-no³, to⁴nca³ cˀoa⁴-ti⁴ coan⁴-no³ je¹ntjai²-le⁴ xi³ tsˀe⁴.
PHI 1:30 Cˀoa⁴-ti⁴sˀin² jon² ti³yo³jion³ cjoa⁴si³, jo³-sˀin² nca³ tsa³ˀyao³ nca³ tsa³ca²te⁴jna³jian³. Cˀoa⁴-ti⁴ ntˀai⁴-vi⁴ no²ˀya²-nio³ jme³ cjoa⁴ xi³ ti²jna⁴jian³.
PHI 2:1 Tsa² si¹nˀion¹-ta³coan³² Cristo, tsa² je² cjoa⁴tjao²cha³ vˀe¹ne²-na¹, tsa² ña³qui³ cjoa⁴qui²xi⁴ ti³yo³cjoa³² cao⁴ je² Espíritu Santo, tsa² tjin¹-na¹ cjoa⁴tjao²cha³ cao⁴ cjoa⁴ma⁴ta³con²,
PHI 2:2 ti⁴jnco³-nao¹³ cjoa⁴tsjoa³-na⁴. Tˀe²jnco³ta³con²³, ti⁴cˀoa⁴-sˀin²ni³ ca²ta³ma³tsjoa³chao³, ti⁴jnco³ yao³-no³, cˀoa⁴ to⁴jnco³ cjoa⁴fa³ˀai³tsjen³ ca²ta³sˀe³-no³.
PHI 2:3 A³li² cˀoa⁴ to⁴chˀao³ntai³ mao³. A³li² cˀoa⁴-jin² to⁴ncˀa³ta³con² mao³. To⁴sa³ cjoa⁴yo⁴ma⁴ cjia³ta³con²³ nca³ cho¹son²-ni³lao⁴³ nca³ xi³cˀa³ nqui²sa⁴ nta³ ma³-le⁴ cjoa⁴ xi³ tjin¹ cao⁴-ni³ tsa² jon².
PHI 2:4 A³li² coi²nta⁴-jin² nˀiaon²³ xi³ to⁴tsaon⁴³ cjoa⁴, to⁴nca³ cˀoa⁴-ti⁴ tˀiaon⁴³ coi²nta⁴ tsˀe⁴ xi³ cja⁴ˀai¹ cho⁴ta⁴.
PHI 2:5 Ca²ta³sˀe³-no³ nca³ jon² jña³-le⁴ cjoa⁴fa³ˀai³tsjen³ xi³ qui³sˀe³-le⁴ Cristo Jesús.
PHI 2:6 Je² Cristo nta³ tsa² ma³nco¹son² cao⁴ Ni³na¹, coan³jyo³-le⁴ nca³ qui³tsjion³tˀa³ yao³-le⁴.
PHI 2:7 Qui³tsjion³con³ yao³-le⁴, to⁴cho⁴ˀnta³ tsa³ve³con³ yao³-le⁴, cˀoa⁴ cho⁴ta⁴son³ˀnte³ coan³.
PHI 2:8 Cˀia⁴ nca³ je³cˀoa⁴cji³ jo³-ni³ jnco³ cho⁴ta⁴xˀin⁴, qui³si³cˀa³jen³jta³ yao³-le⁴, qui³si³tjo³son²-ni³ nta³ tsa² cjoa⁴vi³ya³, nta³ tsa² qui³ni²cˀen³tˀa³ cro².
PHI 2:9 Coi³ cjoa⁴ nˀion¹ nta³ tsˀa³sje³je³ya³ Cristo je² Ni³na¹. Qui³tsjoa³-le⁴ je² jan³ˀain¹ xi³ nqui²sa⁴-sa³ to⁴ti¹tjon² ti¹jna³ cao⁴-ni³ tsa² nca³yi³je³ jan³ˀain¹,
PHI 2:10 jme¹-ni³ nca³ coi⁴ncha¹xco¹nchˀin³-si¹ni³ nca³tsˀi³ xi³ tˀa³tsˀe⁴ jan³ˀain¹-le⁴ Jesús. Coi⁴ncha¹xco¹nchˀin³-le⁴ nca³tsˀi³ xi³ tjio¹ ncˀa³jmi³, cao⁴ xi³ tjio¹ i⁴ son³ˀnte³ cao⁴ xi³ tjio¹jin³ na³nqui³,
PHI 2:11 jme¹-ni³ nca³ si⁴²qui²xi⁴ya³nta³-si¹ni³ nca³tsˀi³ cho⁴ta⁴ nca³ Jesucristo je² ni¹ Nai³-na¹. Cˀoa⁴-sˀin² cˀoa⁴sje³je³ya³ Ni³na¹ Nˀai³-na¹.
PHI 2:12 Jon² xi³ cjai¹nca³ tsjoa³que⁴-no³, jo³-sˀin² nca³ qui³ ni²tjo³son²³ nca³ntsjai², a³li² to⁴cˀia⁴-jin² cˀoa⁴nˀiaon²³ cˀia⁴ nca³ an³ ti²jna⁴, to⁴jo³ cˀoa⁴tˀiaon⁴³ ntˀai⁴-vi⁴ nta³ tsa² tsian²³. Cˀoa⁴-sˀin² ti⁴chjaon¹³ cjoa⁴vi³tjo³ntjai²-no³ cao⁴ cjoa⁴jcon³ cao⁴ cjoa⁴fa³tse¹.
PHI 2:13 Je² Ni³na¹ nta³ ti¹si¹xa¹jin³ ni⁴ma⁴-no³, jo³-sˀin² nca³ me³-le⁴ cjoa⁴nta³-le⁴, jme¹-ni³ nca³ cˀoa⁴coi⁴tso⁴-si¹ni³ta³-con²³ nca³ jon², cˀoa⁴ jme¹-ni³ nca³ cˀoa⁴sˀian⁴-si¹nio³.
PHI 2:14 Nta³ cˀoa⁴tˀiaon⁴³ nca³yi³je³, a³li² no²cjoa⁴ti³cao⁴-jion²³, a³li² cho¹na³nqui³ya³-jion²³,
PHI 2:15 jme¹-ni³ nca³ ni⁴jme³-jin² je¹ xi³ sˀe⁴-si¹ni³no³, cˀoa⁴ nca³ nta³ coain¹cao⁴-si¹nio³ yao³-no³ nca³ ˀnti¹-le⁴ Ni³na¹ nio¹³ xi³ ña³qui³ tsjao³. Ti³yo³jin³-lao⁴³ cho⁴ta⁴son³ˀnte³ xi³ tsˀen⁴, xi³ chˀao³ tjio¹con³. Cˀoa⁴-sˀin² ti⁴yo³jin³ ˀi³sen³ˀi³saon³ i⁴ son³ˀnte³-vi⁴ jo³-ni³ tsa² lˀi¹.
PHI 2:16 Ti⁴cˀa³vi¹son²³ je² en¹ xi³ tˀa³tsˀe⁴ cjoa⁴vi³jna³chon³, jme¹-ni³ nca³ je² ni⁴čhjin³ nca³ cjoa⁴ˀai¹ Cristo coan⁴tsjoa³-si¹ni³na³, nca³ tsi² tsa² to⁴cjoa⁴tjao²-jin² qui³to²ca³na⁴cha⁴, ni⁴to⁴cjoa⁴tjao²-jin² qui³si³xa¹³.
PHI 2:17 Nta³ tsa² cˀoa⁴-sˀin² njin¹-na⁴ cˀoe⁴²jten³son² je² cjoa⁴tjao² xi³ vˀai²tˀao³ xi³ coi³ xa¹-no³ tˀa³tsˀe⁴ xi³ ma³cjain¹-no³, ma³tsjoa³-na³ a³li² to⁴cjoa⁴tsjoa³ xi³ tjin¹-na³ xi³ tˀa³tsaon⁴³.
PHI 2:18 Cˀoa⁴-ti⁴sˀin² ca²ta³ma³tsjoa³-no³ nca³ jon², a³li² to⁴nta³ tsjoa³ ca²ta³sˀe³-no³ xi³ tˀa³tsˀan⁴.
PHI 2:19 To⁴nca³ ti²co³ya²-le⁴ tsa² me³-le⁴ Nai³-na¹ Jesús, nca³ xi¹ti¹ si³ca³sen¹³-no³ Timoteo, jme¹-ni³ nca³ cˀoa⁴-ti⁴ an³ nta³ cˀoe³-si¹nia³ coan³ nca³ je³tjin¹jin³-na³ jo³-sˀin² ti³yo³.
PHI 2:20 Ni⁴ˀya³-jin² xi³ tjin¹-na³ xi³ ti⁴cˀoa⁴-sˀin² nco¹son² tjin¹³-con³ jo³-ni³ Timoteo, nca³ ña³qui³ si¹cjao¹que³-no³.
PHI 2:21 Nca³tsˀi³ xi³cˀa³ va¹sjai³ xi³ ti⁴tsˀe⁴-ni³, a³li² tsa² je²-jin² xi³ tsˀe⁴ Cristo Jesús.
PHI 2:22 Je³tsa³ˀyao³ jo³ tjin¹ cjoa⁴qui²xi⁴-le⁴ Timoteo, jo³-ni³ tsa² ˀnti¹-na⁴, cˀoa⁴-sˀin² qui³si³xa¹cao⁴-na³ xi³ tˀa³tsˀe⁴ je² en¹nta³ tˀa³tsˀe⁴ Cristo.
PHI 2:23 Ti²co³ya²-le⁴ nca³ si³ca³sen¹³-no³ Timoteo, cˀia⁴ nca³ scoe³nti⁴toan⁴ jme³ xi³ coan⁴tˀen³.
PHI 2:24 Ma³nˀion¹tˀa³con³-nia³ Nai³-na¹, tsa² me³-le⁴ nca³ je², cjoi¹con³ nti⁴ton⁴-no³ an³-vi⁴.
PHI 2:25 To⁴nca³ qui³si³cja³ˀai³tsjen³ nca³ coan³chjen¹ nca³ qui³si³ca³sen¹³-no³ Epafrodito, je² ntsˀe³ xi³ si¹xa¹cao⁴-na³, tso²ˀva³cao⁴-na³ jo³-ni³ tsa² so³nta²do⁴-le⁴ Ni³na¹. Je² xi³ qui³ni²ca³sen¹-nao¹³, jme¹-ni³ nca³ si⁴²xa¹-si¹ni³na³ jme³ xi³ ma³chjen¹-na³.
PHI 2:26 Cjai¹nca³ me³-le⁴ nca³ scoe⁴-no³ nca³tsˀio³. Cjai¹nca³ to⁴coan³va³-le⁴ nca³ je³qui³no²ˀyao²³ nca³ je³ti¹mˀen³ nca³ je².
PHI 2:27 Ña³qui³ cjoa⁴qui²xi⁴-ni¹ nca³ cjai¹nca³ to⁴tao¹ coan³ tsa²cai³, sa³ˀnta³ ja⁴me³ cˀen³. To⁴nca³ Ni³na¹ coan³ma⁴que³-ni¹, a³li² tsa² to⁴je²-jin², cˀoa⁴-ti⁴ coan³ma⁴que³-na³ an³, jme¹-ni³ nca³ tsi² nqui²sa⁴ tse³ sˀe⁴-si¹ni³na³ cjoa⁴va³.
PHI 2:28 Coi³ nˀion¹ nti⁴ton⁴ ti²si³ca³sen¹³-no³, jme¹-ni³ nca³ coan⁴tsjoa³-si¹ni³no³ cˀia⁴ nca³ jcha⁴nqui²ntiao³. Cˀoa⁴-sˀin² tjo¹xin² i⁴tse¹-na³ cjoa⁴va³-na⁴.
PHI 2:29 Coi³ cjoa⁴ chjoe¹tjao²³ cao⁴ nca³yi³je³ cjoa⁴tsjoa³ nca³ ti³yo³coa⁴² Nai³-na¹. Cˀoa⁴-sˀin² jcha⁴cho⁴tao⁴³ xi³ cˀoa⁴cjoan³ jo³ cjoan³ nca³ je².
PHI 2:30 Tˀa³tsˀe⁴ xa¹-le⁴ Cristo nca³ je³me³ cˀen³. Qui³tsjoa³le⁴con³ nca³ coi⁴ya², jme¹-ni³ nca³ qui³si³jnco³-si¹ni³no³ jme³-sa³ve⁴ xa¹-no³ xi³ qui³cha³ xi³ to⁴tˀa³tsˀan⁴.
PHI 3:1 Nqui²jnco³ en¹ xi³ xin²³-no³, ˀnti¹ntsˀe³. Tsjoa¹ tˀao²³ta³con²³ nca³ ti³yo³cao⁴³ Nai³-na¹. Cjoa⁴qui²xi⁴-ni¹ nca³ an³ li²coi³ ma³si³-na³ nca³ squi³-no³ xi³ ti⁴coi³-ni³ cjoa⁴. Cˀoa⁴-sˀin² sˀe⁴ nca³nˀion¹-no³.
PHI 3:2 Nta³ ti⁴coi²nta⁴-lao⁴³ yao³-no³ nia¹. Nta³ ti⁴coi²nta⁴-lao⁴³ yao³-no³ cho⁴ta⁴ xi³ chˀao³ sˀin¹. Nta³ ti⁴coi²nta⁴-lao⁴³ yao³-no³ cho⁴ta⁴ xi³ va³te³ yao³-le⁴.
PHI 3:3 Ña¹ nia¹ xi³ ña³qui³ cho⁴ta⁴ xi³ tsˀe⁴ cjoa⁴circuncisión. ˀya³xcon¹-nia¹ cao⁴ je² Espíritu xi³ tsˀe⁴ Ni³na¹, cˀoa⁴ nˀion¹ tjin¹-na¹ cjoa⁴tsjoa³ nca³ ti³yo³coa⁴² Cristo Jesús. A³li²coi³ to⁴yao³-na¹ xi³ nˀion¹tˀa³-ta³coan³².
PHI 3:4 Nta³ tsa² an³ tjin¹-na³ jo³-sˀin² nca³ ma³nˀion¹tˀa³coan³ yao³-na⁴. Tsa² jnco³ xi³ si¹cja³ˀai³tsjen³ nca³ va³quin²-le⁴ nca³ nˀion¹tˀa³con³ yao³-le⁴, an³ nia¹³ xi³ nqui²sa⁴ nta³ va³quin²-na³.
PHI 3:5 Cˀia⁴ nca³ qui³tsian³, nca³ coan³ jin³ ni⁴čhjin³-ni³, cˀia⁴ cjoa⁴circuncisión coan³-na³. An³ nia¹³ ntje⁴-le⁴ Israel, xi³ tsˀe⁴ xi¹ncjin¹ Benjamín. Ña³qui³ cho⁴ta⁴ hebreo tjen⁴-nia³ an³-vi⁴. Xi³ tˀa³tsˀe⁴ cjoa⁴te¹xo³ma³ an³ nia¹³ partido-le⁴ cho⁴ta⁴ fariseo.
PHI 3:6 Coan³cjain¹-na³ cjoa⁴-vi⁴ sa³ˀnta³ qui³tjen⁴nqui³ co²ntran⁴-le⁴ na⁴xi⁴na³nta¹-le⁴ Cristo. Xi³ tˀa³tsˀe⁴ cjoa⁴qui²xi⁴ xi³ tsˀe⁴ cjoa⁴te¹xo³ma³ ni⁴jme³-jin² je¹ tjin¹-na³.
PHI 3:7 To⁴jme³-ni³ve⁴ xi³ tsˀan⁴ xi³ je³qui³si³qui³njen³, qui³si³cha³jian³ nca³yi³je³, jme¹-ni³ nca³ coi⁴njen⁴-si¹ni³na³ Cristo.
PHI 3:8 Cjoa⁴qui²xi⁴-ni¹, cˀoa⁴-sˀin² ˀve³coan³ nca³yi³je³ cjoa⁴ nca³ li²jme³ chji¹-le⁴. Cjai¹nca³ to⁴nqui²sa⁴ chji¹-le⁴ nca³ nta³ ˀve³ Cristo Jesús, Nai³-na⁴. Tˀa³tsˀe⁴ Cristo qui³si³cha³-nia³ nca³yi³je³, to⁴jo³-ni³ tsa² tje¹ ˀve³coan³, jme¹-ni³ nca³ cˀoa⁴-sˀin² coi⁴njen⁴-si¹ni³na³ Cristo,
PHI 3:9 cˀoa⁴ jme¹-ni³ nca³ coan⁴nca³tˀa³-si¹ni³le⁴ an³ Cristo. Je² cjoa⁴qui²xi⁴ xi³ tsˀan⁴ xi³ to⁴tˀa³tsˀe⁴ nca³ si³tjo³soan²³ cjoa⁴te¹xo³ma³, li²coi³ ti⁴tjin¹-ni³na³, to⁴nca³ je³tjin¹-na³ ntˀai⁴-vi⁴ je² cjoa⁴qui²xi⁴ xi³ to⁴tˀa³tsˀe⁴ nca³ ma³cjain¹-na³ tˀa³tsˀe⁴ Cristo, je² cjoa⁴qui²xi⁴ xi³ tsˀe⁴ Ni³na¹, xi³ sa³co¹-na¹ xi³ to⁴tˀa³tsˀe⁴ nca³ ma³cjain¹-na¹.
PHI 3:10 Cˀoa⁴-sˀin² ˀve³coan³ nca³yi³je³ cjoa⁴ nca³ li²jme³ chji¹-le⁴, jme¹-ni³ nca³ scoe³-si¹nia³ Cristo cao⁴ nca³nˀion¹-le⁴ nca³ ja³ˀa³ya²-le⁴, cˀoa⁴ jme¹-ni³ nca³ cˀoa⁴coan⁴tˀain³-si¹nia³ cjoa⁴ñˀain³ nca³ fi³tˀa³-le⁴ Cristo. Cˀoa⁴ ca²ta³cjoan³ nca³ an³ jo³ cjoan³ nca³ je² nca³ cˀen³.
PHI 3:11 Tsa² cˀoa⁴-la² nqui²sa⁴-sˀin² cjoi³cho³ nčhˀoe²³ nca³ cjoa⁴ˀa¹ya³jin³-ni³na³ cˀen³.
PHI 3:12 Cje³ fi³cho³ nčhˀoe²³-jian²³ je²-vi⁴, cje³ ma³jnco³-jin²na³, to⁴nca³ cjoi¹tjen⁴nqui³-le⁴ je² cjoa⁴-vi⁴, jme¹-ni³ nca³ coi⁴njen⁴-si¹ni³na³ xi³ ti⁴coi³-ni³ cjoa⁴ nca⁴ Cristo tsˀa³sje³ntjai²-na³.
PHI 3:13 ˀnti¹ntsˀe³, an³ nia¹³ xi³ ˀve³ nca³ cje³ fi³cho³ nčhˀoe²³-jian²³, to⁴nca³ jnco³ cjoa⁴ ti²sˀian³. Ña³qui³ ti²si³cha³jian³ je² xi³ je³ja³ˀa³to³, to⁴nca³ vˀa³sje³-nia¹³ nca³nˀion¹, jme¹-ni³ nca³ cjoi³cho³ nčhˀoe²-si¹nia³ xi³ sˀa⁴ nčhoa¹.
PHI 3:14 Sˀin³-le⁴ cjoa⁴nˀion¹ yao³-na⁴, jme¹-ni³ nca³ cjoi³cho³ nčhˀoe²-si¹nia³ choa⁴ nca³ tjoe¹-na³ chji¹-na⁴ xi³ tsˀe⁴ Ni³na¹, xi³ coi³ nca³ Ni³na¹ coi⁴nchja⁴mi³-na¹ ncˀa³jmi³ nca⁴ ti³yo³coa⁴² Cristo Jesús.
PHI 3:15 Nca³tsˀia³² xi³ je³qui³sca³son² no¹-na¹, ca²ta³sˀe³-na¹ je² cjoa⁴fa³ˀai³tsjen³. Tsa² cja⁴ˀai¹ cja⁴ˀai¹ cˀoao¹³-ta³con²³ cˀoa⁴-ti⁴ coa⁴co²-no³ je²-vi⁴ Ni³na¹.
PHI 3:16 To⁴nca³ je² xi³ je³ji³cho²tjen⁴nqui³-le⁴², to⁴cˀoa⁴-sˀin² se¹ntia⁴² cjoin³cao⁴-sa³² to⁴nco¹son² cˀoe¹-ta³coan³².
PHI 3:17 ˀnti¹ntsˀe³, nca³tsˀio³ chjen¹nqui³-nao¹³ jo³ ti²sˀian³ an³-vi⁴. Cho¹tsen³-lao⁴³ je² cho⁴ta⁴ xi³ tjio¹ma³ jo³-sˀin² ti³fa³ntia⁴²-lai²⁴jin⁴ nca³ jin⁴-jin⁴.
PHI 3:18 Ncjin² ma³-ni³ cho⁴ta⁴co²ntran⁴-le⁴ cro²-le⁴ Cristo xi³ si¹ma³. Ncjin² cˀa³ cˀoa⁴qui³xin³-no³, to⁴jo³ tjen⁴ nta¹xcoan³ nca³ cˀoa⁴ti²xin³-no³ ntˀai⁴-vi⁴.
PHI 3:19 Xi³ cjoe⁴tˀa³ ni⁴čhjin³-le⁴ to⁴cha⁴-jin² yao³-le⁴. To⁴me³-le⁴ tsˀoa⁴ si¹sin³-le⁴. Je² cjoa⁴je³ya³-le⁴ to⁴cjoa⁴soa³-le⁴ ni¹. To⁴si¹cja³ˀai³tsjen³ xi³ tˀa³tsˀe⁴ cjoa⁴-le⁴ son³ˀnte³.
PHI 3:20 Ña¹-vi⁴ cho⁴ta⁴-le⁴ ncˀa³jmi³ nia¹. Ya⁴² cjoa⁴ˀai¹-ni³ Jesucristo Nai³-na¹ xi³ vˀa³sje³ntjai²-na¹, to⁴je² xi³ ti³cho³ya³-le⁴².
PHI 3:21 Je² ni¹ xi³ si⁴²cˀa³ntjai²ya³ yao³yo⁴ma⁴-na¹, jme¹-ni³ nca³ coan⁴nco¹son²-si¹nia³² jo³-sˀin² tsen³ya² cji³ yao³-le⁴ nca³ je². Ti⁴coi³ nca³nˀion¹-le⁴ si⁴²chjen¹-ni³ jo³-sˀin² si¹chjen¹ nca³ va³te¹xo³ma³ nca³yi³je³.
PHI 4:1 ˀnti¹ntsˀe³, cjai¹ tsjoa³que⁴-no³, si³cjao¹jian³ xi³ tˀa³tsaon⁴³. Jon² nio¹³ xi³ ni²tsjoa³-lao⁴³ ni⁴ma⁴-na⁴. Jon² nio¹³ jo³-ni³ tsa² corona-na⁴. Nˀion¹ ti⁴yo³cao⁴³ Nai³-na¹, jon² xi³ tsjoa³que⁴-no³.
PHI 4:2 Ti²vˀe³ne²³-le⁴ je² Evodia cao⁴ Síntique, nca³ nco¹son² ca²ta³vˀe¹³-con³ nca⁴ tjio¹cao⁴ Nai³-na¹.
PHI 4:3 Cˀoa⁴-ti⁴ ji³-lai²³ ˀnti¹ntsˀe³ xi³ ña³tjen⁴ ni²xai¹³, vˀe³ne²³-le²³ nca³ nta³ ti⁴sen⁴coai⁴ je² ya¹nchjin¹-ve⁴ xi³ qui³si³xa¹cao⁴-na³ tˀa³tsˀe⁴ je² en¹nta³ tˀa³tsˀe⁴ Cristo, cao⁴ Clemente, cao⁴ xi³cˀa³ xi³ qui³si³xa¹cao⁴-na³ xi³ ya⁴ xon⁴ xi³ tsˀe⁴ cjoa⁴vi³jna³chon³ tjio¹tˀa³ jan³ˀain¹-le⁴.
PHI 4:4 Tsjoa¹ tˀao²³-ta³con²³ nca³ntsjai² nca³ ti³yo³cao⁴³ Nai³na¹. Nqui²jnco³cˀa² cˀoa⁴xin²-nca¹ni³no³ tsjoa¹ tˀao²³-ta³con²³.
PHI 4:5 Ca²ta³ve³ nca³tsˀi³ cho⁴ta⁴ jo³-sˀin² nca³ ntˀao¹³ nca³ jon². Nai³-na¹ ti¹jna³čhian³.
PHI 4:6 A³li² cˀoa⁴-jin² ma³-no³. To⁴jme³-ni³ve⁴ xi³ ma³chjen¹-no³, ti⁴je¹-lao⁴³ Ni³na¹, tˀe²tsˀoa³-lao⁴³, cˀoa⁴ tˀai²-lao⁴³ cjoa⁴nta³. Cˀoa⁴-sˀin² ca²ta³sˀe³jin³-le⁴ Ni³na¹ jme³ xi³ ni²jao¹³.
PHI 4:7 Je² cjoa⁴nchˀan¹ta³con²-le⁴ Ni³na¹ xi³ ña³qui³ fa³ˀa³to³-le⁴ nca³yi³je³ cjoa⁴fa³ˀai³tsjen³-le⁴ cho⁴ta⁴, je² xi³ si⁴²coi²nta⁴ ni⁴ma⁴-no³ cao⁴ cjoa⁴fa³ˀai³tsjen³-no³ nca⁴ ti³yo³cao⁴³ Cristo Jesús.
PHI 4:8 Cˀoa⁴xin² nqui²jnco³-no³ en¹ xi³ fe³tˀa³-ni³, ˀnti¹ntsˀe³. Ti⁴cja³ˀai³tsjaon³ tˀa³tsˀe⁴ je² nca³yi³je³ xi³ cjoa⁴qui²xi⁴, nca³yi³je³ xi³ ña³qui³ cˀoa⁴tjin¹, nca³yi³je³ xi³ tjin¹-le⁴ cjoa⁴qui²xi⁴, nca³yi³je³ xi³ tsje³ tjin¹, nca³yi³je³ xi³ na³sca¹ tjin¹, nca³yi³je³ xi³ nta³ ti¹ˀya³-le⁴, to⁴jña³-ni³le⁴ xi³ tjin¹-le⁴ cjoa⁴nta³, to⁴jña³-ni³le⁴ xi³ tjin¹-le⁴ cjoa⁴nˀo²sje³nta³. Coi³ xi³ si⁴cja³ˀai³tsjaon³.
PHI 4:9 Je² xi³ coan³jnco³jao²-no³, je² xi³ qui³tjoe¹-no³, je² xi³ qui³no²ˀyao²³, je² xi³ tsa³ˀyao³ jo³ nca³ qui³sˀian³ an³-vi⁴, cˀoa⁴-ti⁴sˀin² tˀiaon⁴³-ˀni³. Je² Ni³na¹ xi³ si¹qui³njen³nchˀan¹jin³ ni⁴ma⁴-no³, cˀoe¹jna³cao⁴-no³.
PHI 4:10 Jo³ tsjoa¹ tsa³cˀe³⁴-coan³ nca³ ti²jna⁴coa⁴ Nai³-na¹ nca³ sˀa⁴ qui³ni²tjao²cha³ nqui²ntia³-nao¹³. Cˀoa⁴-sˀin² coan³me³ntsjai²-no³, to⁴nca³ li²coi³ qui³tjo³ˀnte²-no³.
PHI 4:11 A³li² jo³ ti²xian³ tsa² jme³ xi³ cha³-na³. Je³coan³nca³-na³ nca³ to⁴nta³ sˀe³⁴-coan³ jo³ tjin¹ xi³ tjin¹-na³.
PHI 4:12 ˀve³-nia¹³ cjoa⁴yo⁴ma⁴. ˀve³-nia¹³ cjoa⁴tse³ya³. To⁴jme³-ni³ve⁴ xi³ ma³tˀen³ an³-vi⁴, tsa² nˀion¹ ma³squia³, tsa² nˀion¹ vao³-na³, cˀoa⁴ tsa² tse³ sˀe³-na³, cˀoa⁴ tsa² tse³ si³cha³-je⁴, je³coan³nca³-na³.
PHI 4:13 Nca³yi³je³ coan⁴-na³ nca⁴ ti²jna⁴coa⁴ Cristo xi³ tsjoa¹-na³ nca³nˀion¹.
PHI 4:14 To⁴nca³ cjai¹ nta³ qui³nˀiaon²³ nca³ tsa³qui³ncha³cao⁴-nao¹³ cˀia⁴ nca³ ti²fa³ˀa³ cjoa⁴ñˀain³.
PHI 4:15 Cˀoa⁴-ti⁴ jon² xi³ cho⁴ta⁴ filipenses ˀmi²-no³, ˀya³-nio¹³ nca³ to⁴jon² nio¹³ xi³ tsa³qui³ncha³cao⁴-nao¹³ cˀia⁴ nca³ ti¹tjon² qui³chja¹cao⁴-no³ je² en¹nta³ tˀa³tsˀe⁴ Cristo, cˀia⁴ nca³ ji²tjo⁴-nia³ Macedonia. Ni⁴ˀya³-jin²sa³ xi³ cho⁴ta⁴-le⁴ Cristo xi³ tsa³ca³sen¹cao⁴-na³ cao⁴ xi³ tsjoa¹ cao⁴ xi³ tjoe¹, to⁴jon² nio¹³.
PHI 4:16 Cˀoa⁴-ti⁴ cˀia⁴ nca³ tsa³ca²te⁴jna³ ya⁴ Tesalónica, qui³ni²ca³sen¹ ya³ntia³jao²cˀa³-nao¹³ jme³ xi³ coan³chjen¹-na³.
PHI 4:17 A³li² tsa² jme³ cjoa⁴tjao²-no³ xi³ me³-na³, to⁴coi³ xi³ me³-na³ nca³ je² chji¹-no³ ca²ta³ma³tjao²-sa³no³ to⁴tˀa³tsˀe⁴ je² cjoa⁴nta³ xi³ nˀiaon²³.
PHI 4:18 Je³qui³sca³tˀa³-na³ nca³yi³je³, je³ja³ˀa³ntjai²-le⁴ xi³ tjin¹-na³. Je³to⁴coan³-ni³na³ ntˀai⁴. Je³qui³sca³tˀa³-na³ tso³jmi² xi³ qui³ni²ca³sen¹cao⁴³ Epafrodito. Jo³-ni³ tsa² jta⁴ xi³ na⁴sca¹ njen⁴, sa³sen¹-le⁴ Ni³na¹ coi³ cjoa⁴tjao²-no³ xi³ tsa³cˀai²tˀao³, cˀoa⁴ je² scoe¹.
PHI 4:19 Ni³na¹-na⁴ tsjoa¹-no³ to⁴jme³-sa³ve⁴ xi³ cha³-no³, jo³-sˀin² tjio¹ cjoa⁴nchi⁴na¹-le⁴ cao⁴ tse³ cjoa⁴je³ya³, nca⁴ ti³yo³cao⁴³ Cristo Jesús.
PHI 4:20 Je² Ni³na¹ Nˀai³-na¹ ca²ta³vi³tjo³je³ya³ nca³ntsjai² nca³ntsjai². Cˀoa⁴ ca²ta³ma³.
PHI 4:21 Ti⁴ti²ˀntao³ jnco¹jnco¹ cho⁴ta⁴-le⁴ Cristo. Je² nca³tsˀi³ ntsˀe³² xi³ i⁴ tjio¹cao⁴-na³ si¹ti²ˀnta³-no³.
PHI 4:22 Nca³tsˀi³ cho⁴ta⁴-le⁴ Cristo si¹ti²ˀnta³-no³. Je² xi³ ti¹tjon² si¹ti²ˀnta³-no³ je² xi³ tjio¹ ntˀia³-le⁴ César.
PHI 4:23 Ca²ta³sˀe³-no³ nca³tsˀio³ je² cjoa⁴nta³-le⁴ Jesucristo je² Nai³-na¹. Cˀoa⁴ ca²ta³ma³.
COL 1:1 An³ nia¹³ Pablo, pa²stro⁴-le⁴ Jesucristo, nca³ cˀoa⁴-sˀin² coan³me³-le⁴ Ni³na¹, cˀoa⁴ cao⁴ je² ntsˀe³² Timoteo
COL 1:2 ti³chji³-lai²⁴jin⁴ jon² xi³ cho⁴ta⁴-le⁴ Cristo, cao⁴ ntsˀe³² xi³ nta³ ma³nquin¹tˀa³-lao⁴³ Cristo, xi³ ti³yo³ ya⁴ Colosas. Ca²ta³tsjoa¹-no³ cjoa⁴nta³, ca²ta³si¹qui³njen³nchˀan¹jin³ ni⁴ma⁴-no³ je² Ni³na¹ Nˀai³-na¹ cao⁴ Nai³-na¹ Jesucristo.
COL 1:3 Nca³ntsjai² ti³vˀai²-lai⁴jin⁴ cjoa⁴nta³ Ni³na¹ Nˀai³-le⁴ je² Nai³-na¹ Jesucristo cˀia⁴ nca³ ti³vˀe²tsˀoa³ntjai²-lai²⁴jin⁴.
COL 1:4 Je³cˀoa⁴-sˀin² qui³no²ˀyai²⁴-jin⁴ jo³-sˀin² nca³ ma³cjain¹-no³ tˀa³tsˀe⁴ Cristo Jesús, jo³-sˀin² nca³ tjao²chao³ nca³tsˀi³ cho⁴ta⁴-le⁴ Cristo.
COL 1:5 Ti³vˀai²-lai⁴jin⁴ cjoa⁴nta³ Ni³na¹ xi³ to⁴tˀa³tsˀe⁴ cjoa⁴nta³ xi³ ti³cho³ya²-lao⁴³ xi³ ti¹jna³tjao²-no³ ncˀa³jmi³. Jon² je³qui³no²ˀyao²³ cjoa⁴ je²-vi⁴ to⁴tˀa³tsˀe⁴ je² en¹nta³ xi³ cjoa⁴qui²xi⁴ xi³ tˀa³tsˀe⁴ Cristo.
COL 1:6 Je² en¹nta³ xi³ qui³sca³tˀa³-no³, cˀoa⁴-ti⁴sˀin² tso²ˀva³son² son³ˀnte³. Cˀoa⁴-sˀin² ti¹vi³tjo³son², cji³ma³ncjin²ya³ nca³qui³jnta² son³ˀnte³, jo³-sˀin² nca³ ti¹vi³tjo³son²jin³-no³ cji³ma³ncjin²ya³jin³-no³ nca³ jon², jo³ sa³ˀnta³ ni⁴čhjin³ nca³ cjoa⁴qui²xi⁴ qui³no²ˀyao²³ cˀoa⁴ tsa³ˀyao³ cjoa⁴nta³-le⁴ Ni³na¹.
COL 1:7 Cˀoa⁴-sˀin² tsa³ca³co¹ya³-no³ Epafras, je² ˀnti¹cho⁴ta⁴ xi³ tsjoa³chai³⁴-jin⁴, xi³ to⁴jnco si¹xa¹cao⁴-na³jin⁴, xi³ cho⁴-ˀnta³-le⁴ Cristo xi³ nta³ fi²tˀa³-le⁴ xi³ tˀa³tsaon⁴³.
COL 1:8 Je² xi³ cˀoa⁴-ti⁴ tsa³cˀe¹ya³ na⁴jmi¹-na³jin⁴ jo³-sˀin² nca³ nta³ tsjoa³chao³ nca³ ti³yo³cao⁴³ je² Espíritu Santo.
COL 1:9 Xi³ coi³ cjoa⁴ sa³ˀnta³ ni⁴čchjin³ nca³ qui³no²ˀyai²⁴-jin⁴, li²coi³ ni²cha³jin³-jin⁴ ti³vˀe²tsˀoa³ntjai²-lai²⁴jin⁴. Cˀoa⁴-sˀin² ti³ni²jai¹⁴-jin⁴ nca³ ña³qui³ nta³ ca²ta³ˀyao³ nca³yi³je³ jo³-sˀin² me³-le⁴ Ni³na¹, cao⁴ nca³yi³je³ cjoa⁴ˀi³sen³ta³con²-le⁴ cao³ cjoa⁴fa³ˀai³tsjen³-le⁴ Espíritu Santo,
COL 1:10 jme¹-ni³ nca³ cˀoa⁴-sˀin² coi⁴ma³-nio³ jo³-sˀin² nca³ va³quin²-le⁴ Nai³-na¹, jña³-le⁴ nca³yi³je³ xi³ sa³sen¹-le⁴ nca³ je². Nqui²sa⁴ tse³ ca²ti³tjo³son²-no³ jña³-le⁴ xa¹ xi³ nta³ tjin¹, nca³ nqui²sa⁴ nta³ jchao⁴³ Ni³na¹.
COL 1:11 Ña³qui³ tse³ nca³nˀion¹ ca²ta³sˀe³-no³, jo³-sˀin² nca³nˀion¹-le⁴ cjoa⁴je³ya³-le⁴ Ni³na¹, jme¹-ni³ nca³ tse³ jcho¹cjoa⁴-si¹ni³no³, cˀoa⁴ jme¹-ni³ nca³ sˀe⁴-ni³no³ cjoa⁴tse³ta³con².
COL 1:12 Cao⁴ cjoa⁴tsjoa³ cˀoai⁴-lao⁴³ cjoa⁴nta³ je² Nˀai³-na¹, nca³ qui³tsjoa³-na¹ nca³nˀion¹ nca³ cˀoa⁴-ti⁴ ña¹ cˀoa⁴cao⁴-na¹ je² cjoa⁴tjao² xi³ tjin¹-le⁴ cho⁴ta⁴-le⁴ Cristo ya⁴ jña³ nca³ i³sen³.
COL 1:13 Cˀoa⁴-sˀin² tsa³cˀa³sje³ntjai²-ni³na¹ je² nca³nˀion¹-le⁴ cjoa⁴njion². Qui³si³cja³ˀa³-na¹ ya⁴ jña³ nca³ va³te¹xo³ma³ je² ˀnti¹-le⁴, xi³ cjai¹nca³ tsjoa³que³, je² Jesucristo.
COL 1:14 Je² tsa³cˀe¹chji¹ntjai²-na¹ cao⁴ njin¹-le⁴. Qui³si³cha³tˀa³ je¹-na¹.
COL 1:15 Je² xi³ ji³tjo³jin³ Ni³na¹ xi³ tsi² ma³tsen³. Je² xi³ ti¹jna³ ti¹tjon²-le⁴ nca³yi³je³ xi³ qui³sˀe³nta³.
COL 1:16 Je² tsa³cˀe¹nta³ nca³yi³je³ xi³ tjin¹ ncˀa³jmi³, cao⁴ xi³ tjin¹ i⁴ son³ˀnte³, cao⁴ xi³ ma³tsen³, cˀoa⁴ cao⁴ xi³ tsi² ma³tsen³, tsa² nca³jco⁴-le⁴, tsa² xi³ va³te¹xo³ma³, tsa² xi³ tjio¹ ti¹tjon², tsa² xi³ xa¹ tjin¹-le⁴. Ña³qui³ je² tsa³cˀe¹nta³ nca³yi³je³, cˀoa⁴-ti⁴ nca³yi³je³ qui³sˀe³nta³ xi³ tˀa³tsˀe⁴.
COL 1:17 Je² ti¹tjon² ti¹jna³-le⁴ nca³yi³je³, cˀoa⁴ je² tsjoa¹-le⁴ nca³nˀion¹ nca³yi³je³.
COL 1:18 Je² ni¹ jco⁴ yao³-le⁴. Je² yao³-le⁴ je² na⁴xi⁴na³nta¹-le⁴ Cristo ni¹. Je² Cristo xi³ to²tsˀin³-le⁴ cjoa⁴, je² xi³ ti¹tjon² ja³ˀa²ya³-ni³le⁴ cˀen³, jme¹-ni³ nca³ je² cˀoa⁴-sˀin² cˀoe¹jna³ ti¹tjon²-ni³le⁴ nca³yi³je³.
COL 1:19 Cˀoa⁴-sˀin² coan³me³-le⁴ Ni³na¹ nca³ ña³qui³ cˀoa⁴cjoan³ Cristo nca³ntsjai² jo³ cjoan³ Ni³na¹.
COL 1:20 Cao⁴ Cristo Ni³na¹ qui³si³cjao²nta³ nca³yi³je³ cjoa⁴, nca³yi³je³ xi³ tjin¹ son³ˀnte³ cao⁴ xi³ tjin¹ ncˀa³jmi³. Cˀoa⁴-sˀin² qui³si³qui³njen³nchˀan¹jin³ xi³ to⁴tˀa³tsˀe⁴ njin¹-le⁴ xi³ qui³tjo³ tˀa³ cro².
COL 1:21 Cˀoa⁴-ti⁴ jon² nca³sˀa⁴ cjai¹nca³ nta³ ji²tjo⁴xin²-lao⁴³, cˀoa⁴ co²ntran⁴ coan³-lao⁴³ cao⁴ cjoa⁴fa³ˀai³tsjen³-no³, nca³ cjoa⁴tsˀen⁴ qui³nˀiaon²³, to⁴nca³ ntˀai⁴-vi⁴ntai⁴ je³cˀoa⁴-sˀin² qui³si³cjao²nta³-no³.
COL 1:22 Qui³si³cjao²nta³-no³ xi³ to⁴tˀa³tsˀe⁴ je² yao³-le⁴ xi³ jo³ cho⁴ta⁴, xi³ qui³tsjoa³ nca³ cˀen³, jme¹-ni³ nca³ cˀoa⁴-sˀin² tsje³ coa⁴co²-si¹ni³no³, nca³ tsi² jnti¹ cjoaon³ nca³ tsi² je¹ tjin¹-no³ nqui³xcon⁴ nca³ je².
COL 1:23 Cˀoa⁴coan⁴ tsa² coa⁴nquin¹-sao⁴³, cˀoa⁴ tsa² coi⁴yo³nˀion¹³ jo³-sˀin² nca³ ma³cjain¹-no³, cˀoa⁴ tsa² tsi² nca³ i⁴ nca³ jan¹ cˀoao¹³-ta³con²³ tˀa³tsˀe⁴ je² cjoa⁴nta³ xi³ ti³cho³ya²-lao⁴³, xi³ tsˀe⁴ je² en¹nta³ tˀa³tsˀe⁴ Cristo xi³ qui³no²ˀyao²³, jña³-le⁴ xi³ qui³no²cjoa⁴ya³jin³-le⁴ nca³tsˀi³ xi³ tjio¹ i⁴ son³ˀnte³-vi⁴. An³ Pablo qui³tjoe¹-na³ coi³ xa¹ tˀa³tsˀe⁴ en¹ je²-vi⁴.
COL 1:24 Ntˀai⁴-vi⁴ntai⁴ cjai¹nca³ ma³tsjoa³-na³ nca³ cˀoi⁴-sˀin² cjoa⁴ñˀain³ ti²fa³ˀa³ xi³ tˀa³tsaon⁴³. Jin³ yao³-na⁴ si³jncoa²³ jme³-sa³ve⁴ xi³ cha³-le⁴ cjoa⁴ñˀain³ xi³ ti²fa³ˀa³ tˀa³tsˀe⁴ Cristo, cˀoa⁴ tˀa³tsˀe⁴ yao³-le⁴ xi³ je² na⁴xi⁴na³nta¹-le⁴.
COL 1:25 Xi³ tˀa³tsˀe⁴ je² na⁴xi⁴na³nta¹-le⁴ Cristo qui³tjoe¹-na³ je² xa¹ xi³ cˀoa⁴-sˀin² qui³tsjoa³-na³ Ni³na¹ xi³ tˀa³tsaon⁴³, jme¹-ni³ nca³ coi⁴tjo³son²-ni³ je² en¹-le⁴ Ni³na¹.
COL 1:26 Je² en¹ xi³ je² cjoa⁴ˀma³ xi³ ti¹jna³ˀma³ jo³ sa³ˀnta³ nca³sˀa⁴ nca³ jnco¹jnco¹ ntje⁴, to⁴nca³ ntˀai⁴-vi⁴ntai⁴ je³cˀoa⁴-sˀin² tsa³ˀya³son²tsen³-le⁴ cho⁴ta⁴-le⁴ Cristo.
COL 1:27 Ni³na¹ coan³me³-le⁴ nca³ qui³si³cji³nčhˀoe¹ je² cho⁴ta⁴-le⁴ Cristo jo³-sˀin² nˀion¹ tse³ cjoa⁴je³ya³ tjin¹-le⁴ je² cjoa⁴ˀma³-ve⁴ ya⁴jin³-le⁴ cho⁴ta⁴ xi³ li² judío-jin². Je² cjoa⁴ˀma³-ve⁴ je² Cristo xi³ ti¹jna³jin³ ni⁴ma⁴-no³. Coi³ nca³ sˀe⁴-no³ je² cjoa⁴je³ya³ xi³ ti³cho³ya²-lao⁴³.
COL 1:28 Je² Cristo xi³ no²cjoa⁴yai³⁴-jin⁴, nca³ ti³vi³ncha³ˀai²⁴-jin⁴ nca³tsˀi³, cˀoa⁴ ti³va³co²ya³-lai⁴jin⁴ cao⁴ nca³yi³je³ cjoa⁴ˀi³sen³-ta³con², jme¹-ni³ nca³ si⁴qui³ncha³-si¹ni³jin⁴ nca³tsˀi³ nca³ ña³qui³ coan³jcha¹ tˀa³tsˀe⁴ Cristo.
COL 1:29 Xi³ coi³ ti²si³xa¹³-nia³ ti²si³xi¹ti¹ya³-ni³le⁴ yao³-na⁴, jo³-sˀin² nca³nˀion¹-le⁴ Cristo nˀion¹ si¹xa¹jin³-na³.
COL 2:1 Cˀoa⁴-sˀin² me³-na³ nca³ jchao⁴³ jo³-sˀin² nˀion¹ si³xi¹ti¹ya³-le⁴ yao³-na⁴ xi³ tˀa³tsaon⁴³, cˀoa⁴ xi³ tˀa³tsˀe⁴ xi³ tjio¹ ya⁴ Laodicea, cˀoa⁴ xi³ tˀa³tsˀe⁴ jo³ tjin¹ ma³-ni³ xi³ tsi² tsa³ve³ ncjan³,
COL 2:2 jme¹-ni³ nca³ cˀoa⁴-sˀin² nta³ ca²ta³sˀe³-ni³con³ ni⁴ma⁴-le⁴, nca³ si⁴²jnco³ yao³-le⁴ nca³ tjao²que³ xi¹ncjin¹, sa³ˀnta³ ña³qui³ coan⁴cho⁴ya³yi³je³-le⁴. Cˀoa⁴-sˀin² ña³qui³ nta³ scoe⁴ Cristo xi³ je² cjoa⁴ˀma³ xi³ tsˀe⁴ Ni³na¹, cˀoa⁴ xi³ tsˀe⁴ Nˀai³-na¹.
COL 2:3 Tjio¹ˀma³ cao⁴ Cristo nca³yi³je³ nca³nˀion¹ xi³ tsˀe⁴ cjoa⁴chji⁴ne⁴ cao⁴ cjoa⁴ˀi³sen³ta³con².
COL 2:4 Coi³ cjoa⁴ cˀoa⁴xin³-ni³no³, jme¹-ni³ nca³ tsi² tsa² ˀya³ xi³ cˀoa⁴na⁴cha⁴-si¹ni³no³ cao⁴ en¹ntsjen¹ˀa³ xi³ cjoa³cao⁴-no³.
COL 2:5 Nta³ tsa² tsi² tsa² ya⁴ ti¹jna³cao⁴-no³ yao³-na⁴, to⁴nca³ ni⁴ma⁴-na⁴ ya⁴ ti¹jna³cao⁴-no³. Cji³ma³tsjoa³-na³ nca³ ti²ˀve³ nca³ nta³ ti³yo³, cˀoa⁴ nca³ cˀoa⁴-sˀin² nˀion¹ ti³yo³ nca³ ma³cjain¹-no³ tˀa³tsˀe⁴ Cristo.
COL 2:6 Coi³ cjoa⁴, jo³-sˀin² nca³ qui³chjoe¹tjao²³ je² Nai³-na¹ Jesucristo, cˀoa⁴-sˀin² ti⁴ma³cao⁴³.
COL 2:7 Cristo xi³ nˀion¹ ti³yo³cao⁴³, cˀoa⁴ je² xi³ ti¹si¹jcha¹-no³. Cˀoa⁴-sˀin² tjin¹nca³nˀion¹ ntsjai²-no³ nca³ ma³cjain¹-no³, jo³-sˀin² nca³ tsa³ca³co¹ya³-no³, nca³ nqui²sa⁴ to⁴tse³ cjoa⁴nta³ vˀao²³.
COL 2:8 Cho¹tsaon³ nca³ ni⁴ˀya³-jin² xi³ cˀoa⁴na⁴cha⁴-no³ cao⁴ cjoa⁴chji⁴ne⁴ xi³ to⁴cjoa⁴nti³so³ xi³ tsi²jme³ chji¹-le⁴, jo³-sˀin² ma³nca³-le⁴ cho⁴ta⁴, jo³-sˀin² tjio¹ma³ si¹cji³tjo³son²-le⁴ yao³-le⁴ jo³ tso² cjoa⁴-le⁴ son³ˀnte³, to⁴nca³ li²coi³ jo³ tso² Cristo.
COL 2:9 Ña³qui³ cˀoa⁴cjoan³ Cristo nca³ntsjai² cao⁴ yao³-le⁴ jo³ cjoan³ Ni³na¹.
COL 2:10 Nca⁴ ti³yo³cao⁴³ Cristo tjin¹yi³je³-no³. Je² xi³ nca³jco⁴-le⁴ nca³tsˀi³ xi³ tjio¹ ti¹tjon², xi³ xa¹ tjin¹-le⁴.
COL 2:11 Cˀoa⁴-ti⁴ cao⁴ je² coan³-no³ cjoa⁴circuncisión, a³li² tsa² je² cjoa⁴circuncisión xi³ ntsa⁴² si¹cao⁴, to⁴nca³ je² xi³ fa³-ˀa¹xin² nca³yi³je³ je¹ xi³ tjin¹-le⁴ yao³-na¹, jo³-sˀin² sˀin¹ je² cjoa⁴circuncisión xi³ tsˀe⁴ Cristo.
COL 2:12 To⁴jnco³ qui³sˀe³ñao³ cao⁴ Cristo, nca³ qui³sa³te²ntao¹³. Cˀoa⁴-ti⁴sˀin² ja³ˀa³ya²-ni³no³ cao⁴ je² nca³ coan³cjain¹-no³ tˀa³tsˀe⁴ nca³nˀion¹-le⁴ Ni³na¹ xi³ qui³sco²mi³tjen⁴jin³-le⁴ cˀen³ Cristo.
COL 2:13 Jon² xi³ jo³-ni³ tsa² xi³ ti³yo³cˀaon³ xi³ to⁴tˀa³tsˀe⁴ je¹-no³, cˀoa⁴ to⁴tˀa³tsˀe⁴ je² yao³-no³ xi³ tsi² tsa² coi³ coan³tsje³, to⁴nca³ Ni³na¹ qui³si³ca³tio²con³-no³ cao⁴ Cristo nca³ qui³-si³cha³tˀa³-no³ nca³yi³je³ je¹-no³.
COL 2:14 Je² qui³si³cha³jon³ je² xon⁴ xi³ qui³tjo³mi³tjen⁴tˀen³² jña³ tjio¹tˀa³ cjoa⁴te¹xo³ma³ xi³ co²ntran⁴-na¹. Qui³si³cha³tˀa³, ya⁴ tsa³ca¹jna³tˀa³ cro².
COL 2:15 Tsa³cja³ˀa¹xin² je² xi³ tjio¹ ti¹tjon² cao⁴ xi³ xa¹ tjin¹-le⁴, tsˀa³sje³soa³ nqui³xcon⁴ cho⁴ta⁴. Ni³na¹ qui³si³qui³njen³son²-le⁴ cao⁴ Cristo.
COL 2:16 Coi³ cjoa⁴ a³li² vˀai²ˀnte³-jin²lao⁴³ nca³ jon² cjao⁴ya³-ni³no³ jme³ xi³ chi³nao³, jme³ xi³ ˀyo³, jme³ sˀoi¹ xi³ nˀo²-sjao³ tsa² sˀoi¹-no³, tsa² sˀoi¹ sa¹cho⁴tse⁴, tsa² cˀia⁴ nca³ ni⁴čhjin³ ni²cja¹ya³.
COL 2:17 Nca³yi³je³ cjoa⁴-vi⁴ jo³-ni³ tsa² ncˀian¹-le⁴ cjoa⁴ xi³ nčhoa¹, to⁴nca³ je² xi³ tsˀe⁴ cjoan³, je² Cristo.
COL 2:18 A³li²ni²jyo³-jin²lao⁴³ xi³ cjoa⁴ˀa²xin²-no³ je² xi³ coi⁴njen⁴-no³, nca³ me³-le⁴ nca³ ma⁴ chˀa²sjao³ yao³-no³ nca³ ˀya³xcon¹³ a²ncje⁴. Vi³na³nqui³ya³ xi³ tˀa³tsˀe⁴ xi³ tsi² qui³sco²tsen³. To⁴ya⁴-ni³ nca³ jo³ je³ya³ vˀa³sje³ yao³-le⁴ xi³ to⁴tˀa³tsˀe⁴ cjoa⁴fa³ˀai³tsjen³ xi³ tsˀe⁴ son³ˀnte³-vi⁴.
COL 2:19 Li²coi³ si¹cji³tjo³son²-le⁴ jco⁴. Je² nca³yi³je³ yao³-na¹ jcoa³² ma³jcha¹-ni³, cˀoa⁴ Ni³na¹ xi³ si¹jcha¹ yao³-na¹. Ma³jcha¹ yao³-na¹ nca³ ti¹cjao² ya⁴ xco¹-le⁴ ni³nta³-na¹.
COL 2:20 Tsa² cao⁴ Cristo cˀaon³ xi³ tˀa³tsˀe⁴ cjoa⁴-le⁴ son³ˀnte³, a¹-ni³ nca³ ni²tjo³son²-si¹ni³lao⁴³ cjoa⁴te¹xo³ma³-le⁴, jo³-ni³ tsa² cjoa⁴-le⁴ son³ˀnte³ ti³yo³chon³-nio³.
COL 2:21 Je² cjoa⁴te¹xo³ma³ xi³ cˀoi⁴tso²: A³li² ni²cao⁴-jin²³, a³li² chi³ne³-jin²³, a³li² cha¹jon³-jin²³.
COL 2:22 (Je² nca³yi³je³ cjoa⁴-ve⁴ fi³tson³ya³ nca³ ni²chjen¹.) A¹-ni³ nca³ ni²tjo³son²-si¹ni³lao⁴³ cjoa⁴te¹xo³ma³-le⁴ cˀoa⁴ cjoa⁴fa³ˀai³tsjen³ xi³ va³co¹ya³ cho⁴ta⁴son³ˀnte³.
COL 2:23 Cjoa⁴qui²xi⁴ ni¹ je² nca³yi³je³ cjoa⁴ xo⁴cjoan³-ve⁴ to⁴ma³tsen³-ni¹ nca³ tjin¹-le⁴ cjoa⁴chji⁴ne⁴, nca³ cjoa⁴nˀion¹ nˀian²-le⁴² yao³-na¹ nca³ ˀya³xcoan¹, nca³ ma⁴ chˀa²sje³² yao³-na¹, cˀoa⁴ nca³ cjoa⁴ñˀain³ vˀai²-le⁴² yao³-na¹, to⁴nca³ ni⁴jme³-jin² cjoa⁴je³ya³ tjin¹-le⁴ nca³yi³je³ je²-vi⁴, to⁴tsjoa¹-le⁴ yao³-na¹ jme³ xi³ me³-le⁴.
COL 3:1 Tsa² cˀoa⁴-sˀin² ja³ˀa²ya³-no³ cao⁴ Cristo, ti⁴jnchi¹sjao³ jme³-ve⁴ xi³ tsˀe⁴ ncˀa³jmi³, jña³ ti¹jna³ Cristo. Ti¹jna³tˀa³ ntsja³ nca³qui²xi⁴ Ni³na¹.
COL 3:2 Ti⁴cja³ˀai³tsjaon³ tˀa³tsˀe⁴ jme³-ve⁴ xi³ tjin¹⁴ ncˀa¹, a³li² tˀa³tsˀe⁴-jin² jme³-ve⁴ xi³ tjin¹ i⁴ son³ˀnte³.
COL 3:3 Je³cˀaon³, cˀoa⁴ je² cjoa⁴vi³jna³chon³-no³ ya⁴ ti¹jna³-ˀma³tˀa³-le⁴ Ni³na¹ nca³ ti³yo³cao⁴³ Cristo.
COL 3:4 Cˀia⁴ nca³ Cristo, ti⁴je²-ni³ cjoa⁴vi³jna³chon³-no³, sa⁴sen¹jna³va³sen³, cˀoa⁴-ti⁴ jon²-ˀni³ si⁴ncha¹va³saon³ cao⁴ je² cao⁴ cjoa⁴je³ya³.
COL 3:5 Ti⁴ncha³chˀao³-lao⁴³ yao³-no³, jo³-ni³ tsa² ti³ni²cˀaon⁴³ yao³-no³, tˀa³tsˀe⁴ je² cjoa⁴ xi³ tjin¹ son³ˀnte³: cjoa⁴cha³jnqui³, cjoa⁴jnti³, cjoa⁴chi⁴nca⁴, cjoa⁴ xi³ me³-le⁴ xi³ chˀao³ tjio¹, cjoa⁴xin²ta³con², xi³ jo³-ni³ tsa² xi³ ve³xcon¹ xco¹son².
COL 3:6 Coi³ cjoa⁴ cjoa⁴jti³-le⁴ Ni³na¹ fa³ˀai³tsao³tˀa³-le⁴ cho⁴ta⁴tsˀa³ntjai²cjoa⁴.
COL 3:7 Cˀoa⁴-ti⁴ jon²-je⁴ nca³sˀa⁴ cˀoa⁴-ti⁴sˀin² tsa³qui³ma³jin³-lao⁴³ cjoa⁴-ve⁴, cˀia⁴ nca³ tsa³qui³yo³cao⁴³.
COL 3:8 Cˀoa⁴-ti⁴ jon²-je⁴ ntˀai⁴-vi⁴ ti⁴ca³tio¹³ nca³yi³je³ cjoa⁴-vi⁴: cjoa⁴jti³cha³ta³con², cjoa⁴jti³, cjoa⁴tsˀen⁴, cjoa⁴ˀaon³ta³con², en¹ xi³ chˀao³ tso² xi³ vi³tjo³ ntso⁴ˀvao³.
COL 3:9 A³li² en¹nti³so³-jin² vˀai²-lao⁴³ xi²nquio⁴³, nca⁴ je³qui³chja³ˀa²xin²-lao⁴³ yao³-no³ je² ni⁴ma⁴ xi³ jchi¹nca³ cao⁴ cjoa⁴ xi³ qui³sˀin³.
COL 3:10 Je³qui³chjoao¹³ je² ni⁴ma⁴ xi³ cho⁴tse⁴, xi³ je³cji³ma³cho⁴tse⁴ya³ cao⁴ cjoa⁴fa³ˀai³tsjen³ xi³ cjoa⁴qui²xi⁴ jo³ cjoan³ je² xi³ tsa³cˀe¹nta³ nca³ je².
COL 3:11 Ntˀai⁴ li²coi³ jcha⁴-le⁴ cho⁴ta⁴ griego, ni⁴ cho⁴ta⁴ judío-jin², xi³ cjoa⁴circuncisión, ni⁴ xi³ tsi² tsa² cjoa⁴circuncisión-jin², ni⁴ cho⁴ta⁴ xi³ cja⁴ˀai¹ nchja⁴-jin², ni⁴ cho⁴ta⁴ escita-jin², ni⁴ xi³ tjio¹nˀion¹, ni⁴ xi³ tjio¹ntai¹-jin². To⁴je² Cristo to⁴je²-sa³ xi³ ti¹jna³, cˀoa⁴ ti¹jna³jin³-le⁴ nca³yi³je³.
COL 3:12 Jon² nio¹³ xi³ Ni³na¹ tsa³cja³ˀa¹jin³-no³, xi³ tsjao³, xi³ Ni³na¹ tsjoa³que³-no³. Cˀoa⁴-sˀin² ti⁴cˀa³ntjai²yao³ yao³-no³, ca²ta³sˀe³-no³ cjoa⁴ma⁴ta³con², cao⁴ cjoa⁴nta³, cao⁴ cjoa⁴yo⁴ma⁴ cjia³ta³con², cao⁴ cjoa⁴ntˀe¹, cao⁴ cjoa⁴tse³ta³con².
COL 3:13 Ti⁴cjain¹-lao⁴³ xi²nquio⁴³, ti⁴cha³tˀa³ nca³ˀi⁴nca³jan¹-lao⁴³ xi²nquio⁴³, tsa² jnco³ xi³ fa³je¹tˀain³ xi¹ncjin¹. Jo³ qui³sˀin³ Cristo nca³ qui³si³cha³tˀa³-no³, cˀoa⁴tˀiaon⁴³ nca³ jon².
COL 3:14 Je² nca³ ti¹tjon²-le⁴ nca³yi³je³ cjoa⁴-vi⁴, ca²ta³ma³tsjoa³chao³ xi²nquio⁴³, nca³ je² cjoa⁴tjao²cha³ xi³ nta³ vˀe¹cjao²-na¹, cˀoa⁴ si¹jnco³-na¹.
COL 3:15 Je² cjoa⁴nchˀan¹ta³con²-le⁴ Ni³na¹ ca²ta³va³te¹xo³ma³-le⁴ ni⁴ma⁴-no³. Cˀoa⁴-sˀin² qui³no²cjoa⁴-no³ nca³ ca²ta³njen³-nchˀan¹jin³-no³, nca³ to⁴jnco³ yao³ nio¹³. Tˀao²³ cjoa⁴nta³.
COL 3:16 Je² en¹ xi³ tˀa³tsˀe⁴ Cristo ca²ta³sˀe³jin³ ni⁴ma⁴-no³, ca²ta³ma³ncjin²ya³ ja⁴jin³ ni⁴ma⁴-no³. Ta³co²ya³-lao⁴³ tˀe²ne²-lao⁴³ xi²nquio⁴³ cao⁴ nca³yi³je³ cjoa⁴ˀi³sen³ta³con². Ti⁴jnta¹-lao⁴³ Ni³na¹ je² en¹-le⁴, ti⁴jntao¹³ je² xi³ vˀa³sje³je³ya³ Ni³na¹, ti⁴jntao¹³ ja⁴jin³ ni⁴ma⁴-no³. Nca³ sin³ nca³ nta³ ti⁴jnta¹-lao⁴³ Nai³-na¹ ja⁴jin³ ni⁴ma⁴-no³, nca³ cˀoai⁴-lao⁴³ cjoa⁴nta³.
COL 3:17 Je² nca³yi³je³ xi³ nˀiaon²³, tsa² cao⁴ en¹-no³ tsa² cao⁴ ntsao⁴³, cˀoa⁴tˀiaon⁴³ nca³yi³je³ jo³-ni³ tsa² cho⁴ta⁴ xi³ yˀa³ jan³ˀain¹-le⁴ Nai³-na¹ Jesús. Tˀai²-lao⁴³ cjoa⁴nta³ Ni³na¹ Nˀai³-na¹ xi³ to⁴tˀa³tsˀe⁴ Jesús.
COL 3:18 Jon² xi³ ya¹nchjon¹ xi³ chi³xaon³, na³nqui³ ti⁴yo³-lao⁴³ xˀin⁴-no³, jo³-sˀin² va³quin²-no³ nca³ ti³yo³cao⁴³ Nai³-na¹.
COL 3:19 Jon² xi³ xˀion⁴³ xi³ chi³xaon³, tjao²cha³ ca²ta³mao³ ya¹nchjin¹-no³, a³li² tsˀen⁴cao⁴-jin² mao³.
COL 3:20 Jon² xi³ ˀnti¹tio³, ti⁴tjo³son²-lao⁴³ xi³jcha¹-no³ nca³yi³je³. Je²-vi⁴ xi³ cjai¹ sa³sen¹-le⁴ Nai³-na¹.
COL 3:21 Jon² xi³ nˀai³ ˀmi²-no³, a³li² si³-jin² ni²cao⁴³ xti³-no³, jme¹-ni³ nca³ tsi² tsa² si⁴cja³ˀa³jen³-si¹ni³con³.
COL 3:22 Jon² xi³ cho⁴ˀntao³, ti⁴tjo³son²-lao⁴³ je² nai³-no³ xi³ i⁴ son³ˀnte³ nca³yi³je³. A³li² to⁴cˀia⁴² ni²xao¹³ nca³ ti¹co³tsen³, nca³ nta³ si⁴tsjoa³-lao⁴³ nai³-no³, to⁴nca³ nˀion¹tˀa³-ta³con²³ ca²ta³mao³ nca³ vi³jcon¹-lao⁴³ Ni³na¹.
COL 3:23 To⁴jme³-ni³ xi³ sˀiaon⁴³, tsjoa¹ cˀoa⁴tˀiaon⁴³, tˀa³tsˀe⁴ Nai³-na¹ ni¹, a³li² tˀa³tsˀe⁴ cho⁴ta⁴-jin².
COL 3:24 Je³ˀyao³ nca³ je² Nai³-na¹ tsjoa¹-no³ chji¹-no³ xi³ cjoa⁴qui²xi⁴, je² cjoa⁴tjao² xi³ ti¹jna³ xi³ tˀa³tsaon⁴³, nca⁴ je² Nai³-na¹ Cristo cji³ma³chjen¹-lao⁴³.
COL 3:25 To⁴nca³ je² xi³ cjoa⁴tsˀen⁴ sˀin¹, cˀoa⁴-ti⁴sˀin² coan⁴chji¹-le⁴ xi³ tˀa³tsˀe⁴ cjoa⁴tsˀen⁴ xi³ qui³sˀin³. To⁴nco¹son²-nio³ nca³tsˀio³ nqui³xcon⁴ Ni³na¹.
COL 4:1 Jon² xi³ nai³ ˀmi²-no³, cˀoa⁴ti⁴cao⁴³ cho⁴ˀnta³-no³ jña³-le⁴ xi³ nta³ tjin¹, xi³ ña³qui³ cjoa⁴qui²xi⁴, nca³ ˀya³-nio¹³ nca³ cˀoa⁴-ti⁴ jon² tjin¹-no³ Nai³ ya⁴ ncˀa³jmi³.
COL 4:2 A³li² ni²cha³jin³-jion²³ nca³ vˀe²tsˀoa³ntsjao²³. Ti⁴yo³chon³ˀntao³ nca³ vˀe²tsˀoao³. Cˀoa⁴-ti⁴ tˀao²³ cjoa⁴nta³.
COL 4:3 Cˀoa⁴-ti⁴sˀin² tˀe²tsˀoa³ntjai²-na³jin⁴, jme¹-ni³ nca³ je² Nai³-na¹ tsjoa¹ˀnte³-si¹ni³na³jin⁴ xi³ tˀa³tsˀe⁴ en¹-vi⁴, nca³ coi⁴no²cjoai⁴-jin⁴ je² cjoa⁴ˀma³ xi³ tˀa³tsˀe⁴ Cristo. To⁴jo³ ti²jna⁴ cjoa⁴ñˀain³ to⁴tˀa³tsˀe⁴.
COL 4:4 Tˀe²tsˀoa³ntjai²-nao¹³ jme¹-ni³ nca³ si³qui²xi⁴ya³nta³-si¹nia³ je² en¹ jo³-sˀin² nca³ ma³chjen¹ nca³ coi³nchja²³.
COL 4:5 Nta³ tain¹cao⁴³ yao³-no³ cao⁴ cjoa⁴ˀi³sen³ta³con² nqui³xcon⁴ je² xi³ tso²ˀva³tˀa³xin². A³li² ni⁴čhjin³-jin² ni²chao³.
COL 4:6 Je² en¹-no³ ña³qui³ nta³ ti⁴no²cjoao⁴³ cao⁴ cjoa⁴nta³. Ca²ta³ma³-le⁴ jo³-ni³ tsa² tso³jmi² xi³ nta³ chi³ne³, jme¹-ni³ nca³ jcha⁴-si¹nio³ jo³-sˀin² ma³chjen¹ nca³ chja²cao⁴³ nca³ jnco¹jnco¹ cho⁴ta⁴.
COL 4:7 Je² nca³yi³je³ cjoa⁴-na⁴ Tíquico si⁴²cji³nčhˀoe¹-no³, je² ntsˀe³² xi³ cjai¹nca³ tjao²que⁴. Cjai¹nca³ nˀion¹tˀa³con³, si¹xa¹-na³, cˀoa⁴-ti⁴ cho⁴ˀnta³xi¹ncjin¹-le⁴ Nai³-na¹.
COL 4:8 Je² xi³ coi³ xa¹ ca²si³ca³sen¹³-nia³, jme¹-ni³ nca³ scoe³-nia³ cjoa⁴-no³ nca³ jon², cˀoa⁴ je² si⁴²je³con³-si¹ni³ ni⁴ma⁴-no³.
COL 4:9 Cˀoa⁴-ti⁴ ca²si³ca³sen¹³ Onésimo, je² ntsˀe³² xi³ cjai¹nca³ tjao²que⁴, xi³ cjai¹nca³ nta³ fi²cao⁴-na¹, je² xi³ tsaon⁴³ nca³ jon². Je² nca³ jao² si⁴²cji³nčhˀoe¹-no³ nca³yi³je³ jme³ xi³ cji³ma³ i⁴-vi⁴.
COL 4:10 Je² Aristarco, je² xi³ ti¹jna³cao⁴-na³ i⁴ nto⁴ya¹-vi⁴, si¹-ti²ˀnta³-no³, cao⁴ Marcos, ˀnti¹cja⁴ˀme³-le⁴ Bernabé. Je³ji³cho²-no³ cjoa⁴te¹xo³ma³ xi³ tˀa³tsˀe⁴. Cˀia⁴ tsa² ya⁴ cjoi⁴cho³con³-no³, tˀai²ˀnte³-lao⁴³.
COL 4:11 Cˀoa⁴-ti⁴ Jesús, je² xi³ Justo ˀmi² si¹ti²ˀnta³-no³. To⁴je² cho⁴ta⁴ xi³ tsˀe⁴ cjoa⁴circuncisión xi³ tjio¹si¹xa¹cao⁴-na³ tˀa³tsˀe⁴ cjoa⁴te¹xo³ma³-le⁴ Ni³na¹, to⁴je²-sa³ xi³ si¹je³con³-na³.
COL 4:12 Si¹ti²ˀnta³-no³ Epafras, je² xi³ tsaon⁴³ cho⁴ta⁴, cho⁴-ˀnta³-le⁴ Cristo. Si¹xi¹ti¹ya³ntsjai²-le⁴ yao³-le⁴ xi³ tˀa³tsaon⁴³ nca³ vˀe¹tsˀoa³ntjai²-no³, jme¹-ni³ nca³ nˀion¹ nta³ coan⁴-si¹ni³no³, nca³ ña³qui³ nta³ si⁴tjo³son²-si¹ni³lao⁴³ nca³yi³je³ xi³ me³-le⁴ Ni³na¹.
COL 4:13 Ti²vˀe³-no³ na⁴jmi¹ xi³ tˀa³tsˀe⁴ Epafras, nca³ cjai¹nca³ to⁴nˀion¹ si¹xa¹ xi³ tˀa³tsaon⁴³, cao⁴ xi³ tˀa³tsˀe⁴ xi³ tjio¹ ya⁴ Laodicea, cao⁴ tˀa³tsˀe⁴ xi³ tjio¹ ya⁴ Hierápolis.
COL 4:14 Si¹ti²ˀnta³-no³ je² Lucas, je² chji⁴ne⁴xqui³ xi³ cjai¹nca³ tjao²que⁴, cao⁴ Demas.
COL 4:15 Ti⁴ti²ˀntao³ nca³tsˀi³ ntsˀe³² xi³ tjio¹ ya⁴ Laodicea, cao⁴ Ninfas, cao⁴ je² cho⁴ta⁴na⁴xi⁴na³nta¹-le⁴ Cristo xi³ ma³ña³ ya⁴ ntˀia³-le⁴.
COL 4:16 Cˀia⁴ nca³ je³cˀoe¹xquia⁴jin³-lao⁴³ xi²nquio⁴³ xon⁴-vi⁴, cˀoa⁴-ti⁴ ca²ta³ma³xquia⁴jin³-le⁴ na⁴xi⁴na³nta¹-le⁴ Cristo xi³ tsˀe⁴ cho⁴ta⁴ laodicenses, cˀoa je² xon⁴ xi³ tsˀe⁴ Laodicea, cˀoa⁴-ti⁴ jon² tˀe²xquiao⁴³.
COL 4:17 Cˀoa⁴tˀin²-lao⁴³ Arquipo nca³ ca²ta³si¹tjo³son² je² xa¹ xi³ qui³tsjoa³-le⁴ Nai³-na¹.
COL 4:18 An³ xi³ Pablo ˀmi²-na³ xi³ ti²cji³-ni³no³ cao⁴ ntsa⁴. Tja³jin³-ta³con²³ nca³ cjoa⁴ñˀain³ ti²jna⁴. Cjoa⁴nta³ ca²ta³sˀe³-no³. Cˀoa⁴ ca²ta³ma³.
1TH 1:1 Jin⁴-jin⁴ Pablo cao⁴ Silvano cao⁴ Timoteo ti³chji³-lai²⁴jin⁴ nca³tsˀio³ xi³ na⁴xi⁴na³nta¹-le⁴ Cristo xi³ cho⁴ta⁴ tesalonicenses ˀmi²-no³, xi³ ti³yo³cao⁴³ Ni³na¹ Nˀai³-na¹ cao⁴ Nai³-na¹ Jesucristo: Ca²ta³tsjoa¹-no³ cjoa⁴nta³, ca²ta³si¹qui³njen³nchˀan¹jin³ ni⁴ma⁴-no³ Ni³na¹ cao⁴ Nai³-na¹ Jesucristo.
1TH 1:2 Cˀoa⁴-sˀin² vˀai²-lai⁴jin⁴ cjoa⁴nta³ nca³ntsjai² Ni³na¹ xi³ tˀa³tsaon⁴³ nca³tsˀio³. Ni²cja³ˀai³tsjen³-lai²⁴jin⁴ nca³ jon² cˀia⁴ nca³ vˀe²tsˀoai³⁴-jin⁴.
1TH 1:3 A³li² cˀia³ ni²cha³jin³-jin⁴ nca³ ni²cja³ˀai³tsjen³-lai²⁴jin⁴ nqui³xcon⁴ Ni³na¹ Nˀai³-na¹, jo³ nˀiaon²³ nca³ ma³cjain¹-no³, jo³-sˀin² ni²xao¹³ nca³ tsjoa³chao³, jo³-sˀin² tjin¹-no³ cjoa⁴tse³jta³ nca³ cho³ya²-lao⁴³ Nai³-na¹ Jesucristo.
1TH 1:4 Ntsˀe³², xi³ tjao²que³-no³ Ni³na¹, ˀya³-ni¹⁴jin⁴ nca³ je² xi³ tsa³cja³ˀa¹jin³-no³.
1TH 1:5 Je² en¹nta³ xi³ tˀa³tsˀe⁴ Cristo xi³ qui³no²cjoa⁴ya³jin³-lai²⁴jin⁴, a³li² to⁴ˀen¹-jin² xi³ ji³cho²-no³, cˀoa⁴-ti⁴ tjin¹-le⁴ nca³nˀion¹ cao⁴ Espíritu Santo, cˀoa⁴ cao⁴ cjoa⁴nˀion¹jin³ qui³no²cjoa⁴ya³-no³. Je³ˀyao³ jo³-sˀin² tsa³nquin¹coai⁴-jin⁴ yao³-na⁴jin⁴ ya⁴jin³-no³ nca³ jon², nca³ tjao²cha³-lai²⁴jin⁴.
1TH 1:6 Cˀoa⁴ jon² qui³chjen³nqui²-na³jin⁴ nca³ jin⁴-jin⁴ cao⁴ je² Nai³-na¹. Qui³chjoao¹³ en¹-le⁴ Ni³na¹ cao⁴ cjoa⁴tsjoa³ xi³ tsˀe⁴ Espíritu Santo, nta³ tsa² tse³ cjoa⁴ñˀain³ qui³cha³ˀao²³.
1TH 1:7 Cˀoa⁴-sˀin² tsa³cja³ntiao⁴² xi³ tˀa³tsˀe⁴ nca³tsˀi³ xi³ coan³cjain¹-le⁴ ya⁴ Macedonia cao⁴ ya⁴ Acaya.
1TH 1:8 Jon² xi³ cˀoa⁴-sˀin² qui³ni²cˀa³vi¹son² en¹-le⁴ Nai³-na¹, a³li² tsa² to⁴ya⁴ Macedonia cao⁴ ya⁴ Acaya, to⁴nca³ cˀoa⁴-ti⁴ nca³qui³jnta² ˀnte³ tsˀa³vi¹son² jo³-sˀin² ma³cjain¹-no³ tˀa³tsˀe⁴ Ni³na¹. Coi³ cjoa⁴ li²coi³ ma³chjen¹-na³jin⁴ nca³ coi⁴no²cjoa⁴-sai³⁴jin⁴.
1TH 1:9 Ti⁴je²ni³ cho⁴ta⁴ vˀe¹ na⁴jmi¹ jo³-sˀin² qui³chjoe¹tjao²-na³jin⁴, jo³-sˀin² qui³ni²cˀo¹fa³ya³tˀa³-lao⁴³ Ni³na¹ nca³ qui³njion²³ xco¹son², jme¹-ni³ nca³ cji³ma³chjen¹-si¹ni³lao⁴³ Ni³na¹ xi³ ti¹jna³con³, xi³ ña³qui³ Ni³na¹.
1TH 1:10 Ti³cho³ya²-lao⁴³ ˀnti¹-le⁴ Ni³na¹ xi³ cjoa⁴ˀai¹-ni³ ncˀa³jmi³, je² xi³ Ni³na¹ qui³si³cja³ˀa¹ya³-ni³le⁴ ya⁴jin³-le⁴ cˀen³, je² Jesús xi³ fa³ˀa¹xin²-na¹ cjoa⁴ñˀain³ xi³ cjoa⁴ˀai¹.
1TH 2:1 Ntsˀe³², jon² ˀyao³ nca³ li² to⁴cjoa⁴tjao²-jin² ji³cho²chon³-lai²⁴jin⁴.
1TH 2:2 Nta³ tsa² tse³ cjoa⁴ñˀain³ qui³cha³ˀai²⁴-jin⁴ nca³sˀa⁴, nta³ tsa² tjin¹ xi³ taon³ tsa³ve³-na³jin⁴ ya⁴ Filipos, jo³-sˀin² nca³ je³ˀyao³, coan³nˀion¹-ta³coin²⁴jin⁴ tˀa³tsˀe⁴ Ni³na¹-na¹, nca³ qui³no²cjoa⁴ya³jin³-lai²⁴jin⁴ je² en¹nta³ tˀa³tsˀe⁴ Ni³na¹, nta³ tsa² nˀion¹ tse³ cjoa⁴ñˀain³ qui³sˀe³.
1TH 2:3 A³li²coi³ tsa³cˀe²ne²-lai²⁴jin⁴ xi³ tsi² tsa² coi³ cˀoa⁴tjin¹, xi³ cjoa⁴jnti¹, xi³ cjoa⁴chˀa²na⁴cha⁴,
1TH 2:4 to⁴nca³ cˀoa⁴-sˀin² no²cjoai⁴-jin⁴ jo³-sˀin² nca³ qui³sco²tˀa³-na³jin⁴ Ni³na¹, jme¹-ni³ nca³ qui³sˀe³ne²-si¹ni³na³jin⁴ je² en¹nta³. A³li² cˀoa⁴-sˀin² no²cjoai⁴-jin⁴, jme¹-ni³ nca³ ma³tsjoa³-si¹ni³le⁴ cho⁴ta⁴son³ˀnte³, to⁴nca³ jme¹-ni³ nca³ ma³tsjoa³-si¹ni³le⁴ Ni³na¹, je² xi³ co³tˀa³ ni⁴ma⁴-na¹.
1TH 2:5 Je³ˀyao³ nca³ li² to⁴ˀen¹ntsjen¹-jin² qui³chˀa²sjai³⁴-jin⁴, ni⁴cao⁴-jin² cjoa⁴xin²ta³con². Je² Ni³na¹ ti¹ve³.
1TH 2:6 A³li² tsa² je² cjoa⁴je³ya³-le⁴ cho⁴ta⁴ tsa³qui³jnchi³sjai³⁴-jin⁴, ni⁴tsaon⁴³-jion²³, ni⁴to⁴ˀya³-jin²sa³ xi³ tsˀe⁴, nta³ tsa² coan³-na³jin⁴ nca³ jon² qui³ni²chˀa¹ne²-lai²⁴jin⁴, nca⁴ pa²stro⁴-le⁴ Cristo ni¹⁴-jin⁴.
1TH 2:7 To⁴sa³ coan³ˀi³nta³jin³-jin⁴ cao⁴ jon², jo³-ni³ tsa² jnco³ na⁴ xi³ si¹ca³qui³, xi³ cjoe¹tjao² ˀnti¹-le⁴.
1TH 2:8 Cˀoa⁴-sˀin² to⁴nˀion¹ tjao²cha³-lai²⁴jin⁴, nca³ me³-na³jin⁴ nca³ cˀoai⁴-lai²⁴jin⁴ a³li² tsa² to⁴je² en¹nta³ tˀa³tsˀe⁴ Ni³na¹, sa³ˀnta³ me³-na³jin⁴ cˀoai⁴-lai²⁴jin⁴ ni⁴ma⁴-na⁴jin⁴. Cjai¹nca³ tjao²cha³ coan³-lai²⁴jin⁴.
1TH 2:9 Je³tjin¹jin³-no³, ntsˀe³², je² xa¹-na⁴jin⁴, jo³-sˀin² nca³ qui³ni²qui³jtai³⁴-jin⁴ yao³-na⁴jin⁴. Qui³ni²xai¹⁴-jin⁴ ni⁴čhjin³ nca³ ni⁴tjen⁴, jme¹-ni³ nca³ tsi² ˀya³ xi³ jon² xi³ ni²chˀa¹ne²-si¹ni³lai²⁴jin⁴. Cˀoa⁴-sˀin² qui³no²cjoa⁴ya³jin³-lai²⁴jin⁴ je² en¹nta³ tˀa³tsˀe⁴ Ni³na¹.
1TH 2:10 Jon² nio¹³ cao⁴ Ni³na¹ testigo nca³ cˀoa⁴-sˀin² to⁴tsje³, nca³ cˀoa⁴-sˀin² to⁴qui²xi⁴, nca³ tsi² tsa² jme³ je¹ tjin¹-na³jin⁴, cˀoa⁴-sˀin² tsa³nquin¹jin³-lai²⁴jin⁴ nca³ jon² xi³ coan³cjain¹-no³.
1TH 2:11 Cˀoa⁴-sˀin² ˀyao³ jo³-ni³ tsa² nˀai³ cao⁴ ˀnti¹xti³-le⁴, cˀoa⁴-sˀin² tsa³cˀe²ne²-lai²⁴jin⁴ qui³ni²nˀioin¹⁴-jin⁴ ta³con² nca³ jnco¹jnco¹³.
1TH 2:12 Nˀion¹ tsa³cˀe²ne²-lai²⁴jin⁴ nca³ cˀoa⁴-sˀin² ti⁴mao³ jo³-sˀin² va³quin²-le⁴ Ni³na¹ xi³ nchja⁴-no³ tˀa³tsˀe⁴ cjoa⁴te¹xo³ma³-le⁴ cao⁴ cjoa⁴je³ya³-le⁴.
1TH 2:13 Coi³ cjoa⁴ cˀoa⁴-ti⁴ jin⁴-jin⁴ li²coi³ ni²cha³jin³-jin⁴ nca³ vˀai²-lai⁴jin⁴ cjoa⁴nta³ Ni³na¹ nca³ cˀoa⁴-sˀin² qui³cho³vao¹³ en¹-le⁴ Ni³na¹ xi³ qui³no²ˀya²-na³jin⁴. Li²coi³ qui³cho³vao¹³ jo³-ni³ tsa² en¹-le⁴ cho⁴ta⁴, to⁴nca³ jo³-ni³ tsa² en¹-le⁴ Ni³na¹ xi³ ña³qui³ cˀoa⁴tjin¹, je² xi³ ti¹si¹xa¹jin³-no³ xi³ coan³cjain¹-no³.
1TH 2:14 Jon², ntsˀe³², cˀoa⁴-sˀin² qui³chjen³nqui²-lao⁴³ je² na⁴xi⁴na³nta¹-le⁴ Ni³na¹ xi³ tjio¹cao⁴ Cristo Jesús, xi³ tjio¹ ya⁴ Judea. Xi³ tsaon⁴³ xi²nquio⁴³ qui³si³cja³ˀa¹-no³ ti⁴coi³-ni³ cjoa⁴ñˀain³ xi³ je² cho⁴ta⁴ judíos xi³ xi¹ncjin¹ ma³-ni³ qui³si³cja³ˀa¹-le⁴ na⁴xi⁴na³nta¹-le⁴ Cristo ya⁴ Judea.
1TH 2:15 Je² cho⁴ta⁴ judíos xi³ qui³si³cˀen³ Nai³-na¹ Jesús cao⁴ je² cho⁴ta⁴ xi³ qui³nchja⁴ya³ tˀa³tsˀe⁴ Ni³na¹. Cˀoa⁴ jin⁴-jin⁴ co²ntran⁴ tsa³cˀe¹ma³tjen⁴nqui³-na³jin⁴. Li²coi³ sa³sen¹-le⁴ Ni³na¹ jo³ sˀin¹ nca³ je². Ña³qui³ co²ntran⁴ tjio¹-le⁴ nca³tsˀi³ cho⁴ta⁴.
1TH 2:16 Va³te¹chjoa²-na³jin⁴ nca³ chja²coai⁴-jin⁴ cho⁴ta⁴ xi³ li² judío-jin², jme¹-ni³ nca³ coi⁴tjo³ntjai²-si¹ni³. To⁴tjio¹ma³ si¹tse³ je¹-le⁴ nca³ntsjai². Xi³ fe³tˀa³-ni³ ja³ˀai³ne²-le⁴ cjoa⁴jti³-le⁴ Ni³na¹.
1TH 2:17 Ntsˀe³², to⁴choa³ ni⁴čhjin³ nca³ xin² ti³yo³-lai²⁴jin⁴, to⁴nca³ je² ni⁴ma⁴-na⁴jin⁴ ya⁴ tjio¹cao⁴-no³. Coi³ cjoa⁴ nca³ nqui²sa⁴ nˀion¹ ni²xi¹ti¹ya³-lai⁴jin⁴ yao³-na⁴jin⁴, nca³ cjai¹nca³ me³-na³jin⁴ nca³ jchai⁴-jin⁴ ncjaon³.
1TH 2:18 Coi³ cjoa⁴ nca³ coan³me³-na³jin⁴ nca³ tsa³nquin¹chon³-lai²⁴jin⁴. Cjoa⁴qui²xi⁴ an³ Pablo jao² cˀa³ coan³me³-na³, to⁴nca³ je² Satanás tsa³cˀe¹chjoa²-na³jin⁴.
1TH 2:19 Jme¹-ni³ xi³ ti³cho³ya²-lai⁴jin⁴. Jme¹ cjoa⁴tsjoa³ xi³ sˀe⁴-na³jin⁴. Jme¹ corona xi³ sca⁴ni²ncˀa³-na³jin⁴. A³tsi² tsa² coi³ nca³ jon² xi³ coi⁴nchao³ nqui³xcon⁴ Nai³-na¹ Jesucristo nca³ cjoa⁴ˀai¹-ni³.
1TH 2:20 Jon² nio¹³ xi³ cjoa⁴je³ya³-na⁴jin⁴ cao⁴ cjoa⁴tsjoa³-na⁴jin⁴.
1TH 3:1 Coi³ cjoa⁴ nca³ tsi²coi³ coan³-na³jin⁴ qui³cho³ya²-sai³⁴jin⁴, qui³ni²cja³ˀai³tsjen³jin³-jin⁴ nca³ to⁴jin⁴-jin⁴ coi⁴yoi³⁴-jin⁴ ya⁴ Atenas.
1TH 3:2 Qui³cha³ni²⁴-jin⁴ Timoteo, je² ntsˀe³² xi³ si¹xa¹-le⁴ Ni³na¹, xi³ ti¹va³sen¹cao⁴-na³jin⁴ tˀa³tsˀe⁴ je² en¹nta³ tˀa³tsˀe⁴ Cristo, nca³ cˀoa⁴-sˀin² si⁴²nˀion¹-ta³con²no³ cˀoe⁴²ne²-no³ jo³-sˀin² coan⁴cjain¹-no³,
1TH 3:3 jme¹-ni³ nca³ tsi² tsa² ˀya³ xi³ si⁴²cˀa³ntjai²ya³ yao³-le⁴ nca³ fa³ˀa¹ je² cjoa⁴ñˀain³-vi⁴. Je³ˀyao³ nca³ jon² nca³ cˀoa⁴-sˀin² cˀoa⁴cao⁴-na¹.
1TH 3:4 Cˀia⁴ nca³ to⁴jo³ ya⁴ tsa³qui³yo³cao⁴-lai²⁴jin⁴, cˀoa⁴-sˀin² to⁴nqui³-ni³ tsa³cˀin²-lai²⁴jin⁴ nca³ cjoa⁴ñˀain³ chja⁴ˀa², jo³ cji³ma³, ne³ je³ti³ˀyao³.
1TH 3:5 Xi³ coi³ nca³ cˀoa⁴-ti⁴ an³ li²coi³ qui³sco³ya²-sa³nia³ qui³si³ca³sen¹³-nia³ nca³ scoe³-no³, jo³-sˀin² tjio¹ta³con² nca³ ma³cjain¹-no³, tsa² tsi² tsa² ya⁴ chˀao³ ti¹si¹cao⁴-no³ Satanás, tsa² tsi² tsa² to⁴cjoa⁴tjao² qui³ni²xai¹⁴-jin⁴.
1TH 3:6 Cˀia⁴ nca³ je³ji³nčhoa³tˀa³-ni³no³ Timoteo, ja³ˀai³nčhˀoe²-na³jin⁴, cˀoa⁴-sˀin² tsa³cˀe¹-na³jin⁴ na⁴jmi¹ jo³-sˀin² nca³ ma³cjain¹-no³, nca³ ma³tsjoa³chao³, nca³ nta³ fa³jin³-ta³con²na³jin⁴ nca³ntsjai², nca³ me³-no³ nca³ jcha⁴-na³jin⁴, jo³-sˀin² nca³ cˀoa⁴-ti⁴ me³-na³jin⁴ nca³ jcha⁴-lai²⁴jin⁴ nca³ jon².
1TH 3:7 Coi³ cjoa⁴ ntsˀe³², nta³ tsa² cjoa⁴fao¹ cjoa⁴ñˀain³ tjin¹-na³jin⁴, ma³jnco³-ta³coin²⁴jin⁴ xi³ tˀa³tsaon⁴³ nca³ cˀoa⁴-sˀin² to⁴nta³ ma³cjain¹-no³.
1TH 3:8 Ntˀai⁴-vi⁴ntai⁴ ti³yo³choin³⁴-jin⁴, tsa² cˀoa⁴-sˀin² nˀion¹ nta³ ti³yo³cao⁴³ Nai³-na¹.
1TH 3:9 Jme¹ cjoa⁴nta³ xi³ cˀoai⁴-lai⁴jin⁴ Ni³na¹ xi³ tˀa³tsaon⁴³, jo³-sˀin² nca³ ña³qui³ nˀion¹ nta³ tjin¹-na³jin⁴ cjoa⁴tsjoa³ xi³ tˀa³tsaon⁴³ nqui³xcon⁴ Ni³na¹-na¹.
1TH 3:10 Cjai¹nca³ nta³ ti³vˀe²tsˀoai³⁴-jin⁴ ni⁴čhjin³ nca³ ni⁴tjen⁴, jme¹-ni³ nca³ jcha⁴-si¹ni³jin⁴ ncjaon³, jme¹-ni³ nca³ si⁴jnco³-si¹ni³jin⁴ xi³ cha³-sa³le⁴ nca³ ma³cjain¹-no³.
1TH 3:11 To⁴nca³ ti⁴je²-ni³ Ni³na¹ Nˀai³-na¹ cao⁴ Nai³-na¹ Jesucristo ca²ta³si¹ca³sen¹ ya⁴ntia⁴²-na³jin⁴ nca³ coan⁴nquin¹nčhˀoe²-lai²⁴jin⁴ nca³ jon².
1TH 3:12 Ca²ta³si¹ncjin²ya³-no³ Nai³-na¹, cˀoa⁴ nqui²sa⁴-sa³ tse³ ca²ta³ma³tsjoa³chao³ xi²nquio⁴³ cao⁴ cho⁴ta⁴ nca³tsˀi³, jo³-sˀin² nca³ jin⁴-jin⁴ tsjoa³cha³-lai²⁴jin⁴ nca³ jon²,
1TH 3:13 jme¹-ni³ nca³ nˀion¹-si¹ni³con³ ni⁴ma⁴-no³, ni⁴jme³-jin² je¹ tjin¹-le⁴ nca³ tsje³ cjoan³ nqui³xcon⁴ Ni³na¹ Nˀai³-na¹, cˀia⁴ nca³ cjoa⁴ˀai¹-nca¹ni³ Nai³-na¹ Jesucristo cao⁴ nca³tsˀi³ cho⁴ta⁴-le⁴.
1TH 4:1 Je² xi³ fe³tˀa³-sa³ni³, ntsˀe³², nca³ vˀe²tsˀoa³-lai²⁴jin⁴ vˀe²ne²-lai²⁴jin⁴ nca³ ti³yo³coa⁴² Nai³-na¹ Jesús. Jo³-sˀin² nca³ tsa³cˀin²ya³-lai²⁴jin⁴, jo³-sˀin² ma³chjen¹ nca³ coi⁴mao³ jo³-sˀin² sa³sen¹-le⁴ Ni³na¹, cˀoa⁴-sˀin² ca²ta³ma³ncjin²yao³.
1TH 4:2 Je³ˀyao³ jme³ cjoa⁴te¹xo³ma³ tsa³cˀai²-lai²⁴jin⁴ xi³ tˀa³-tsˀe⁴ Nai³-na¹ Jesús.
1TH 4:3 Cˀoa⁴-sˀin² me³-le⁴ Ni³na¹ nca³ coan⁴tsjao³, nca³ chja⁴ˀa²xin²-lao⁴³ yao³-no³ cjoa⁴cha³jnqui³.
1TH 4:4 Jnco¹jnco¹ nca³ jon² tsje³ ti⁴yo³cao⁴³ ya¹nchjin¹-no³, jcha⁴xcon¹³.
1TH 4:5 A³li² to⁴coi³-jin² cjoa⁴chi⁴nca⁴ xi³ nˀian²-ni³lao⁴³, jo³-ni³ tsa² cho⁴ta⁴ xi³ li² judío-jin² xi³ tsi²coi³ ve³ Ni³na¹.
1TH 4:6 Ni⁴ˀya³-jin² xi³ vˀa³ntjai²cjoa⁴, xi³ vˀa³na⁴cha⁴-le⁴ ntsˀe⁴ je² cjoa⁴-vi⁴, nca⁴ je² Nai³-na¹ xi³ si⁴²jnta³-ni³ nca³yi³je³ cjoa⁴ je²-vi⁴, jo³-sˀin² nca³ je³cˀoa⁴tsa³cˀin²-lai²⁴jin⁴ tsa³cˀe²ne²-lai²⁴jin⁴.
1TH 4:7 Ni³na¹ li²coi³ qui³nchja⁴-na¹ jme¹-ni³ nca³ jnti¹ coan⁴-si¹nia³², to⁴nca³ ña³qui³ tsje³ coi⁴yoa³².
1TH 4:8 Je² xi³ taon³ ve³, li²coi³ taon³ ve³ cho⁴ta⁴son³ˀnte³, to⁴je² Ni³na¹ xi³ taon³ ve³, je² xi³ cˀoa⁴-ti⁴ qui³tsjoa³-na¹ Espíritu Santo-le⁴.
1TH 4:9 Li²coi³ ma³chjen¹ nca³ squi³-no³ xi³ tˀa³tsˀe⁴ cjoa⁴tjao²cha³ jo³-sˀin² nca³ ma³tsjoa³chao³ xi²nquio⁴³. Ti⁴jon²-nio³ je³cˀoa⁴-sˀin² qui³cho²tˀa³yao³ tsˀe⁴ Ni³na¹ jo³-sˀin² nca³ ma³tsjoa³chao³ xi²nquio⁴³.
1TH 4:10 Cˀoa⁴-ti⁴sˀin² tsjoa³chao³ ntsˀe³² jo³ tjin¹ ma³-ni³ xi³ tjio¹ ya⁴ nca³qui³jnta² Macedonia. To⁴nca³ ti³vˀe²tsˀoa³-lai²⁴jin⁴, ntsˀe³², nca³ nqui²sa⁴-sa³ tsjoa³chao³ xi²nquio⁴³.
1TH 4:11 Ti⁴xi¹ti¹ya³-lao⁴³ yao³-no³ nca³ nchˀan¹ coi⁴yo³, cˀoa⁴ ti⁴sin³-lao⁴³ cjoa⁴ma⁴-no³ xi³ ti⁴tsaon⁴³-nio³. Ti⁴xao¹³ cao⁴ ntsao⁴³ jo³-sˀin² nca³ tsa³cˀe²ne²-lai²⁴jin⁴,
1TH 4:12 jme¹-ni³ nca³ scoe⁴xˀin⁴-si¹ni³no³ cho⁴ta⁴ xi³ tsi² ma³cjain¹-le⁴, cˀoa⁴ jme¹-ni³ nca³ tsi² tsa² jme³ xi³ cha⁴-no³.
1TH 4:13 Ntsˀe³², cˀoa⁴-ti⁴ li²coi³ me³-na³jin⁴ nca³ tsi² sˀe⁴jin³-no³ xi³ tˀa³tsˀe⁴ xi³ cjio³fe², jme¹-ni³ nca³ tsi² tsa² coan⁴va³-si¹ni³no³, jo³-ni³ tsa² xi³cˀa³ xi³ tsi² tsa² jme³ co³ya³-le⁴.
1TH 4:14 Cˀia⁴ tsa² ma³cjain¹-na¹ nca³ Jesús cˀen³, cˀoa⁴ ja³ˀa²ya³-ni³le⁴, cˀoa⁴-ti⁴sˀin² ma³cjain¹-na¹ nca³ Ni³na¹ si⁴²cji³nčhoa¹cao⁴ Jesús je² xi³ cjio³fe² nca³ tjio¹cao⁴ Jesús.
1TH 4:15 Coi³ cjoa⁴ cˀoa⁴ˀmi²ya³-lai²⁴jin⁴ je²-vi⁴ xi³ qui³tso² je² Nai³-na¹: Ña¹ xi³ ti³yo³choan³² xi³ to⁴jo³ ti³yoa³² sa³ˀnta³ cjoa⁴ˀai¹ Nai³-na¹, a³li² ña¹ coa⁴nquin¹ti¹tjon²-le⁴² xi³ je³-tsa³cja³yo³fe².
1TH 4:16 Je² soa³ Nai³-na¹ cjoa⁴ˀai¹jen³-ni³ ncˀa³jmi³ nca³ squi¹ˀntia¹xa¹, cao⁴ jta⁴-le⁴ a²ncje⁴ nca³jco⁴, cao⁴ čhjao³-le⁴ Ni³na¹. Cˀoa⁴ je² xi³ cˀen³ xi³ tsˀe⁴ Cristo cjoa⁴ˀa¹ya³ti¹tjon²-le⁴.
1TH 4:17 Cˀia⁴ ña¹ xi³ ti³yo³choan³², xi³ to⁴jo³ ti³yoa³², cˀoa⁴-sˀin² coan⁴jncoa³² tjoe¹mi³ncˀa³jian³² yo³jvi³ cao⁴ je², nca³ coa⁴nquin¹ chˀa² Nai³-na¹ jin³sen¹. Cˀoa⁴-sˀin² coi⁴yo³coa⁴² nca³ntsjai² Nai³-na¹.
1TH 4:18 Cˀoa⁴-sˀin² nca³ˀi⁴ nca³jan¹ ti⁴je³ta³con²³ xi²nquio⁴³ cao⁴ je² en¹-vi⁴.
1TH 5:1 To⁴nca³ tˀa³tsˀe⁴ jo³ chon³ ni⁴čhjin³, jo³ chon³ son³ˀnte³, li²jme³ xi³ ma³chjen¹-no³ ntsˀe³² nca³ squi³-no³.
1TH 5:2 Je³na²nta³ ˀyao³ nca³ je² ni⁴čhjin³-le⁴ Nai³-na¹ cjoa⁴ˀai¹ jo³-ni³ tsa² che¹ nca³ ni⁴tjen⁴.
1TH 5:3 Cˀia⁴ nca³ cˀoa⁴coi⁴tso⁴: Jo³ nta³ nchˀan¹ ti³yoa³². Ni⁴jme³-jin² xi³ coan⁴-na¹. Cˀia⁴² cjoa⁴ˀai¹ne²-le⁴ˀni³ nca³ coi⁴xo⁴ya³ nti⁴ton⁴, jo³-ni³ tsa² jnco³ chjon⁴² xi³ fi³cho² hora-le⁴ nca³ ˀnti¹ cˀoe⁴². Ni⁴ˀya³-jin² xi³ cha⁴tˀa³-le⁴.
1TH 5:4 To⁴nca³ jon², ntsˀe³², li²coi³ ti³yo³njion²³, jme¹-ni³ nca³ je² ni⁴čhjin³-vi⁴ cjoa⁴ˀai¹ne²-si¹ni³no³ jo³-ni³ tsa² che¹.
1TH 5:5 Nca³tsˀio³ i³sen³ tsaon⁴³, ni⁴čhjin³ tsaon⁴³. A³li² tsa² cho⁴ta⁴ni⁴tjen⁴ cho⁴ta⁴njion²-jian².
1TH 5:6 Coi³ cjoa⁴ a³li² sa¹yo³fe²-jian² jo³-ni³ tsa² je² xi³cˀa³, to⁴sa³ coi⁴yo³chon³-nia¹, nˀion¹ to⁴jvi³ coan⁴nquin¹coa⁴² yao³-na¹.
1TH 5:7 Je² xi³ fa³yo³fe², fa³yo³fe² nca³ njion², cˀoa⁴ je² xi³ chˀi⁴, chˀi⁴ nca³ njion².
1TH 5:8 To⁴nca³ ña¹ xi³ ni⁴čhjin³ tsan⁴², nta³ tjain¹coa⁴² yao³-na¹. Je² xi³ ma³cjain¹-na¹, je² cjoa⁴tjao²cha³ ca²ta³sˀe³-na¹ jo³-ni³ tsa² chi⁴nca³qui⁴cha⁴ xi³ so³nta²do⁴ yˀa³cja¹. Je² cjoa⁴cho³ya²cao⁴cjoa⁴ nca³ coi²tjo⁴ntje² ca²ta³sˀe³-na¹ jo³-ni³ tsa² xo³mpe³qui⁴cha⁴ xi³ cji³son²-le⁴ so³nta²do⁴.
1TH 5:9 Li²coi³ xa¹ qui³si³qui³ncha³nta³-na¹ Ni³na¹ nca³ cjoa⁴jti³-le⁴ sˀe⁴-na¹, to⁴nca³ sˀe⁴-na¹ cjoa⁴vi³tjo³ntjai² xi³ to⁴tˀa³tsˀe⁴ Nai³-na¹ Jesucristo.
1TH 5:10 Jesucristo cˀen³ xi³ tˀa³tsan⁴², jme¹-ni³ nca³ cˀoa⁴-sˀin² coi⁴yo³-nia³² cao⁴ je², nta³ tsa² coi⁴yo³choan³², nta³ tsa² coi⁴yo³fe².
1TH 5:11 Cˀoa⁴-sˀin² nca³ˀi⁴ nca³jan¹ ti⁴je³ta³con² xi²nquio⁴³, tˀai²-sa³lao⁴³ nca³nˀion¹ xi²nquio⁴³, jo³-sˀin² ti³ma³nˀiaon²³.
1TH 5:12 Vˀe²tsˀoa³-lai²⁴jin⁴ ntsˀe³², nca³ jcha⁴xcon¹³ je² xi³ si¹xa¹jin³-no³ nca³ jon², xi³ vi³ncha³ti¹tjon²-no³ nca³ ti³yo³cao⁴³ Nai³-na¹, xi³ tso²ya³-no³.
1TH 5:13 Nˀion¹ nta³ jcha⁴xcon¹³, ca²ta³ma³tsjoa³chao³, xi³ to⁴tˀa³tsˀe⁴ xa¹-le⁴. Nchˀan¹ ti⁴yo³cao⁴³ xi²nquio⁴³.
1TH 5:14 Cˀoa⁴-ti⁴sˀin² vˀe²tsˀoa³-lai²⁴jin⁴, ntsˀe³², nca³ tˀe²ne²-lao⁴³ je² xi³ to⁴xquia⁴ chˀao³-sˀin² tjio¹ma³. Ti⁴nˀion¹-con²³ xi³ choa³ tjio¹con³, ti⁴ncha³cao⁴³ xi³ tsin²-le⁴ nca³nˀion¹-jin², ti⁴cjain¹-lao⁴³ nca³tsˀi³.
1TH 5:15 Ti⁴coi²ntao³ yao³-no³ nca³ ni⁴ˀya³-jin² xi³ ca²ta³si¹cˀo¹fa³-ni³ jnco³ cjoa⁴tsˀen⁴-le⁴ xi¹ncjin¹. Ti⁴xi¹ti¹yao³ nca³ nta³ ti⁴cao⁴³ xi²nquio⁴³ nca³ntsjai², cˀoa⁴-ti⁴ nta³ ti⁴cao⁴³ nca³tsˀi³ cho⁴ta⁴.
1TH 5:16 Tsjoa³ ca²ta³ma³-no³ nca³ntsjai².
1TH 5:17 Tˀe²tsˀoao³ a³li² ni²cha³jin³-jion²³ nca³ntsjai².
1TH 5:18 Tˀao²³ cjoa⁴nta³ nca³yi³je³, nca³ je²-vi⁴ xi³ me³-le⁴ Ni³na¹ tˀa³tsaon⁴³ nca³ ti³yo³cao⁴³ Cristo Jesús.
1TH 5:19 A³li² vˀe²chjoa²-jin²lao⁴³ je² Espíritu Santo.
1TH 5:20 A³li² chˀa²sje³nqui³-jion²³ je² en¹ xi³ no²cjoa⁴ya³ tˀa³tsˀe⁴ Ni³na¹.
1TH 5:21 Na²nta³ cho¹tˀa³jion³ nca³yi³je³. A³li² njion³-jion²³ jña³-le⁴ xi³ nta³ tjin¹.
1TH 5:22 Chja³ˀa²xin²-lao⁴³ yao³-no³ jña³-le⁴ nca³yi³je³ xi³ chˀao³ tjin¹.
1TH 5:23 Je² Ni³na¹ xi³ tsjoa¹ xi³ nchˀan¹ tjin¹, ti⁴je²-ni³ Ni³na¹ ca²t³si¹tsje³ya³-no³ nca³yi³je³, cˀoa⁴ je² espíritu-no³ cao⁴ ni⁴ma⁴-no³ cao⁴ yao³-no³ ca²ta³ma³coi²nta⁴ nca³ cji³jnco³, nca³ tsi²jme³ je¹ tjin¹-le⁴ cˀia⁴ nca³ cjoa⁴ˀai¹ Nai³-na¹ Jesucristo.
1TH 5:24 Je² xi³ qui³nchja⁴-no³, je² cjai¹nca³ nˀion¹tˀa³con³, cˀoa⁴ je² cˀoa⁴-ti⁴ cˀoa⁴sˀin⁴².
1TH 5:25 Ntsˀe³², tˀe²tsˀoa³ntjai²-na³jin⁴.
1TH 5:26 Ti⁴ti²ˀntao³ nca³tsˀi³ ntsˀe³², nca³ tsje³ tˀe²tˀa³tsˀoa³-lao⁴³.
1TH 5:27 An³ vˀe³ne²-no³ xi³ to⁴tˀa³tsˀe⁴ Nai³-na¹ nca³ je² xon⁴ ca²ta³sˀe³xquia⁴-le⁴ nca³tsˀi³ ntsˀe³².
1TH 5:28 Je² cjoa⁴nta³-le⁴ Nai³-na¹ Jesucristo ca²ta³sˀe³-no³. Cˀoa⁴ ca²ta³ma³.
2TH 1:1 Pablo cao⁴ Silvano cao⁴ Timoteo ti³chji³-lai²⁴jin⁴ xi³ na⁴xi⁴na³nta¹-le⁴ Cristo xi³ cho⁴ta⁴ tesalonicenses ˀmi²-no³, xi³ ti³yo³cao⁴³ Ni³na¹ Nˀai³-na¹ cao⁴ Nai³-na¹ Jesucristo.
2TH 1:2 Ca²ta³tsjoa¹-no³ cjoa⁴nta³, ca²ta³si¹qui³njen³nchˀan¹jin³ ni⁴ma⁴-no³ Ni³na¹ Nˀai³-na¹ cao⁴ Nai³-na¹ Jesucristo.
2TH 1:3 Ma³chjen¹ nca³ cˀoai⁴-lai⁴jin⁴ cjoa⁴nta³ nca³ntsjai² Ni³na¹ xi³ tˀa³tsaon⁴³, ntsˀe³², nca³ je³cji³ma³cjain¹-sa³no³, cˀoa⁴ nca³ jnco¹jnco¹ nca³tsˀio³ cjai¹nca³ nta³ tsjoa³chao³ xi²nquio⁴³.
2TH 1:4 Ti⁴jin⁴-ni³jin⁴ cjai¹nca³ ma³tsjoa³-na³jin⁴ xi³ tˀa³tsaon⁴³ ya⁴jin³-le⁴ na⁴xi⁴na³nta¹-le⁴ Ni³na¹, nca³ tjin¹-no³ cjoa⁴tse³jta³, cˀoa⁴ ma³cjain¹-no³ nta³ tsa² vi³yo³tjen⁴nqui³ co²ntran⁴-no³, nta³ tsa² cjoa⁴nˀain³ chja³ˀao²³.
2TH 1:5 Cˀoa⁴sˀin² cji³ma³tsen³ nca³ Ni³na¹ vˀe¹nta³jin³ xi³ ña³qui³ cˀoa⁴tjin¹, jme¹-ni³ nca³ coa⁴quin²-ni³no³ cjoa⁴te¹xo³ma³-le⁴ Ni³na¹, nca³ tˀa³tsˀe⁴ ti³chja³ˀao²³ cjoa⁴ñˀain³.
2TH 1:6 Tjin¹-le⁴ cjoa⁴qui²xi⁴ Ni³na¹ nca³ cˀoe⁴²chji¹-le⁴ cao⁴ cjoa⁴ñˀain³ je² xi³ tjio¹tsjoa¹-no³ cjoa⁴ñˀain³.
2TH 1:7 Cˀoa⁴-ti⁴ cˀoe⁴²chji¹-no³ nca³ jon² xi³ cjoa⁴ñˀain³ ti³chja³ˀao²³, nca³ si⁴²cˀe¹yo³cja¹ya³-no³ cao⁴ jin⁴-jin⁴ cˀia⁴ nca³ coan⁴tsen³ Nai³-na¹ Jesús, nca³ cjoi⁴nčhoa¹-ni³ ncˀa³jmi³ cao⁴ a²ncje⁴ xi³ va³co¹ nca³nˀion¹-le⁴.
2TH 1:8 Coan⁴tsen³jin³ ni⁴jen⁴lˀi¹. Tsjoa¹-le⁴ cjoa⁴ñˀain³ je² xi³ tsi² tsa³ve³ Ni³na¹, cˀoa⁴ xi³ tsi² si¹tjo³son²-le⁴ je² en¹nta³ xi³ tˀa³tsˀe⁴ Nai³-na¹ Jesucristo.
2TH 1:9 Je² xi³ tjoe¹-le⁴ cjoa⁴ñˀain³ nca³ ña³qui³ ntia³ coai⁴cha³jin³, nca³ tsi² tsa² ti⁴scoe⁴-ni³ Nai³-na¹, ni⁴cjoa⁴je³ya³-le⁴jin² xi³ tsˀe⁴ nca³nˀion¹-le⁴,
2TH 1:10 cˀia⁴ nca³ cjoa⁴ˀai¹ cˀia⁴ ni⁴čhjin³ je²-vi⁴ nca³ tjo¹sje³je³ya³ to⁴tˀa³tsˀe⁴ cho⁴ta⁴-le⁴, cˀoa⁴ nca³ to⁴xcon¹ scoe⁴ nca³tsˀi³ xi³ coan³cjain¹-le⁴. (Nca⁴ je² en¹-na⁴jin⁴ xi³ cˀoa⁴sˀin² coan³cjain¹-no³ nca³ jon².)
2TH 1:11 Coi³ cjoa⁴ nca³ cˀoa⁴sˀin² ti³vˀe²tsˀoai³⁴-jin⁴ nca³ntsjai² xi³ tˀa³tsaon⁴³, jme¹-ni³ nca³ cˀoa⁴sˀin² Ni³na¹ tsjoa¹-si¹ni³no³ cjoa⁴nta³ nca³ coa⁴quin²-no³ je² xa¹ xi³ qui³nchja⁴-no³. Cjai¹nca³ to⁴tse³-sa³ cjoa⁴nta³ ca²ta³tsjoa¹-le⁴ nca³yi³je³ cjoa⁴fa³ˀai³tsjen³-no³ xi³ nta³ tjin¹. Ca²ta³tsjoa¹-sa³le⁴ nca³nˀion¹ nca³yi³je³ xa¹-no³ nca³ ma³cjain¹-no³,
2TH 1:12 jme¹-ni³ nca³ coi⁴tjo³je³ya³jin³-si¹ni³no³ je² jan³ˀain¹-le⁴ Nai³-na¹ Jesucristo, cˀoa⁴ jon² coi²tjo⁴je³ya³-si¹nio³ cao⁴ Cristo, jo³-sˀin² tsjoa¹-no³ cjoa⁴nta³ Ni³na¹-na¹ cao⁴ Nai³-na¹ Jesucristo.
2TH 2:1 To⁴nca³ vˀe²tsˀoa³-lai²⁴jin⁴, ntsˀe³². coi³ cjoa⁴ jo³sˀin² nca³ cjoa⁴ˀai¹ Nai³-na¹ Jesucristo, cˀoa⁴ coan⁴xco¹tˀa³-le⁴²,
2TH 2:2 a³li² jnco³ tjo²-jin² mˀo¹fa³ya³-no³ cjoa⁴fa³ˀai³tsjen³-no³, a³li² ni²va³-jin²lao⁴³ ni⁴ma⁴-no³, ni⁴cao⁴-jin² en¹, ni⁴cao⁴-jin² xon⁴, xi³ cˀoa⁴tso² nca³ tsain⁴-jin⁴ je²-vi⁴ xi³ tso² nca³ je³ ni⁴čhjin³-le⁴ Nai³-na¹.
2TH 2:3 A³li² vˀa³na⁴cha⁴-jin²no³ to⁴ˀya³-ni³ ni⁴to⁴jme³ cjoa⁴-ni³. Nca⁴ li²coi³ cjoa⁴ˀai¹ ni⁴čhjin³-le⁴ Nai³-na¹, tsa² tsi² ti¹tjon² cjoa⁴ˀai¹ xi³ co²ntran⁴ coai⁴-le⁴ Jesús, cˀoa⁴ tsa² tsi² coan⁴tsen³ je² cho⁴ta⁴tsˀen⁴, je² cho⁴ta⁴ xi³ cha⁴jin³.
2TH 2:4 Cˀoe¹jna³toan¹ coi⁴so¹tjen⁴ co²ntran⁴-le⁴ nca³yi³je³ xi³ Ni³na¹ ˀmi² a³xo⁴ xi³ ˀya³xcoan¹, sa³ˀnta³ cˀoe¹jna³ ya⁴ yo⁴nco⁴ jo³-ni³ tsa² Ni³na¹, nca³ Ni³na¹ tso²-le² yao³-le⁴.
2TH 2:5 A³ tsi² tjin¹jin³-no³ nca³ cˀoa⁴na¹qui³xin³-no³ cˀia⁴ nca³ ya⁴-sa³ tsa³ca²te⁴jna³cao⁴-no³.
2TH 2:6 Je³ˀyao³ jme³ xi³ vˀe¹chjoa²-le⁴ ntˀai⁴-vi⁴, jme¹-ni³ nca³ coan⁴tsen³-si¹ni³ ni⁴čhjin³ xi³ tji¹choa⁴-le⁴.
2TH 2:7 Je³ti¹si¹xa¹ˀma³ cjoa⁴tsˀen⁴, to⁴nca³ tjin¹ xi³ vˀe¹chjoa² ntˀai⁴, jo³ sa³ˀnta³ tjo¹xin²jin³ je² xi³ ntˀai⁴ vˀe¹chjoa².
2TH 2:8 Cˀia⁴² coan⁴tsen³ je² cho⁴ta⁴tsˀen⁴, xi³ je² Nai³-na¹ si⁴²cˀen³-ni³ cao⁴ jta⁴-le⁴ tsˀoa³. Cˀia⁴ nca³ Jesucristo coan⁴tsen³ nca³ cjoa⁴ˀai¹, si⁴²qui³xo¹ya³.
2TH 2:9 Je² cho⁴ta⁴tsˀen⁴ cjoa⁴ˀai¹ jo³sˀin² si¹xa¹ Satanás. Cjoa⁴ˀai¹ cao⁴ nca³yi³je³ nca³nˀion¹ cao⁴ choa⁴ cao⁴ cjoa⁴xcon¹ nti³so³.
2TH 2:10 Ña³qui³ chˀao³sˀin² cˀoa⁴na⁴cha⁴-le⁴ je² xi³ cha⁴jin³, nca⁴ tsi² coan³tsjoa³que³ xi³ cjoa⁴qui²xi⁴, jme¹-ni³ nca³ coi⁴tjo³ntjai²-si¹ni³.
2TH 2:11 Coi³ cjoa⁴ nca³ Ni³na¹ si¹ca³sen¹-ni³le⁴ jnco³ cjoa⁴chˀa²-na⁴cha⁴ xi³ si¹xa¹jin³-le⁴ nca³ je², jme¹-ni³ nca³ cˀoa⁴sˀin² coan⁴cjain¹-si¹ni³le⁴ cjoa⁴nti³so³,
2TH 2:12 jme¹-ni³ nca³ sˀe⁴-ni³le⁴ cjoa⁴ñˀain³ nca³tsˀi³ xi³ tsi² tsa² coan³cjain¹-le⁴ xi³ cjoa⁴qui²xi⁴, xi³ to⁴sa³ qui³sa³sen³-le⁴ cjoa⁴tsˀen⁴.
2TH 2:13 To⁴nca³ jin⁴-jin⁴ ma³chjen¹-na³jin⁴ nca³ cˀoai⁴-lai⁴jin⁴ cjoa⁴nta³ Ni³na¹ nca³ntsjai² xi³ tˀa³tsaon⁴³, ntsˀe³² xi³ tjao²que³-no³ Nai³-na¹. Tsa³cja³ˀa¹jin³-no³ Ni³na¹ sa³ˀnta³ nca³ to²tsˀin³-le⁴ cjoa⁴ nca³ coi²tjo⁴ntjao²³ to⁴tˀa³tsˀe⁴ je² Espíritu Santo xi³ qui³si³tsje³ya³-no³ cˀoa⁴ to⁴tˀa³tsˀe⁴ nca³ ma³cjain¹-no³ xi³ cjoa⁴qui²xi⁴.
2TH 2:14 Tˀa³tsˀe⁴ coi³-vi⁴ Ni³na¹ qui³nchja⁴-no³ cao⁴ je² en¹nta³ xi³ tˀa³tsˀe⁴ Cristo xi³ no²cjoai⁴-jin⁴. Cˀoa⁴sˀin² sˀe⁴-no³ cjoa⁴je³ya³-le⁴ Nai³-na¹ Jesucristo.
2TH 2:15 Cˀoa⁴sˀin² ntsˀe³², nˀion¹ ti⁴yo³ tˀe²jin³-ta³con²³ je² cjoa⁴fa³ˀai³tsjen³ xi³ qui³cho²tˀa³yao³, nta³ tsa² cao⁴ en¹, nta³ tsa² cao⁴ xon⁴-na⁴jin⁴.
2TH 2:16 Ti⁴je²-ni³ Nai³-na¹ Jesucristo cao⁴ Ni³na¹ Nˀai³-na¹, je² xi³ cjai¹nca³ coan³tsjoa³que³-na¹, qui³tsjoa³-na¹ cjoa⁴je³ta³con² xi³ cˀoe¹jna³jin³ntsjai²-na¹, cˀoa⁴ xi³ nta³ ti³cho³ya²-le⁴² xi³ to⁴tˀa³tsˀe⁴ cjoa⁴nta³-le⁴.
2TH 2:17 Ca²ta³si¹je³con³ ni⁴ma⁴-no³, cˀoa⁴sˀin² nˀion¹ ca²ta³si¹ca³tio¹-no³ nca³yi³je³ en¹-no³ cao⁴ xa¹-no³ xi³ nta³ tjio¹.
2TH 3:1 Je² xi³ fe³tˀa³-ni³, ntsˀe³², nca³ tˀe²tsˀoa³ntjai²-na³jin⁴ nca³ je² en¹-le⁴ Nai³-na¹ xi¹ti¹ ca²ta³vˀa³tji³son², ca²ta³mi³ncˀa³-sa³ jo³ qui³sˀin³ ya⁴jin³-no³ nca³ jon².
2TH 3:2 Cˀoa⁴-ti⁴ tˀe²tsˀoa³ntjai²-na³jin⁴ nca³ coi²tjo⁴ntjai²-lai⁴jin⁴ cho⁴ta⁴ xi³ chˀao³ sˀin¹ cao⁴ cho⁴ta⁴tsˀen⁴, nca⁴ tsi² tsa² ma³cjain¹-le⁴ nca³tsˀi³.
2TH 3:3 Je² Ni³na¹ cjai¹nca³ nˀion¹tˀa³con³, nca³ nˀion¹ si⁴²ca³tio¹-no³, si⁴²coi²nta⁴-no³ nca³ tsi² si⁴²cao⁴-no³ je² xi³ tsˀen⁴.
2TH 3:4 Nta³ ˀya³ta³con²-lai²⁴jin⁴ nca³ ti³yo³cao⁴³ Nai³-na¹, nca³ cˀoa⁴nˀiaon²³ nca³ cˀoa⁴sˀiaon⁴³ je² xi³ vˀe²ne²-lai²⁴jin⁴.
2TH 3:5 Je² Nai³-na¹ ca²ta³tso²ya³-le⁴ ni⁴ma⁴-no³ cjoa⁴tjao²cha³-le⁴ Ni³na¹ cao⁴ cjoa⁴tse³jta³-le⁴ Cristo.
2TH 3:6 To⁴nca³ cˀoa⁴sˀin² vˀe²ne²-lai²⁴jin⁴, ntsˀe³², xi³ tˀa³tsˀe⁴ jan³ˀain¹-le⁴ Nai³-na¹ Jesucristo, nca³ coi⁴ncha³xin²-lao⁴³ nca³tsˀi³ ntsˀe³² xi³ chˀao³sˀin² tjio¹ma³cao⁴ yao³-le⁴, xi³ tsi² tsa² cˀoa⁴sˀin² fi²cao⁴ jo³ tso² cjoa⁴fa³ˀai³tsjen³ xi³ jin⁴ tsa³cˀai²-lai⁴jin⁴.
2TH 3:7 Ti⁴jon² ˀya³-nio³ jo³sˀin² ma³chjen¹ nca³ chjen¹nqui³-na³jin⁴, nca³ tsi² tsa² chˀao³sˀin² tsa³nquin¹coai⁴-jin⁴ yao³-na⁴jin⁴ ya⁴jin³-le⁴ nca³ jon².
2TH 3:8 A³li² to⁴cjoa⁴tjao²-jin² tsa³qui³chi³⁴-jin⁴ nio⁴-le⁴ xi³cˀa³, to⁴sa³ nˀion¹ qui³ni²xai¹⁴-jin⁴ qui³ni²qui³jtai³⁴-jin⁴ yao³-na⁴jin⁴ nca³ ni⁴čhjin³ nca³ ni⁴tjen⁴, jme¹-ni³ nca³ ni⁴jnco³-jin² coan⁴chˀa¹ne²-si¹nio³.
2TH 3:9 A³li² tsa² tsin²-na³jin⁴ ˀnte³, to⁴nca³ cˀoa⁴sˀin² cˀoe¹jna³choa⁴ jnco³-lai²⁴jin⁴, jme¹-ni³ nca³ chjen¹nqui³-si¹ni³na³jin⁴.
2TH 3:10 Cˀia⁴ nca³ to⁴jo³ tsa³qui³yo³cao⁴-sa³lai²⁴jin⁴, cˀoa⁴sˀin² tsa³cˀe²ne²-lai²⁴jin⁴ je²-vi⁴: Tsa² jnco³ xi³ cai³-le⁴ si¹xa¹, cˀoa⁴²-ti⁴ tsi² coa⁴cjen⁴.
2TH 3:11 Qui³no²ˀya²-ni¹⁴jin⁴ nca³ tjio¹ma³jin³ cˀa³-no³ xi³ chˀao³sˀin² tjio¹ma³, ni⁴ˀi⁴tse¹-jin² si¹xa¹, cˀoa⁴ cjoa⁴sin³cjoa⁴ vˀe²ma³-ni³.
2TH 3:12 Je² xi³ cˀoa⁴cjoan³ vˀe²ne²-lai⁴jin⁴ vˀe²tsˀoa³-lai⁴jin⁴ nca³ ti³yo³coa⁴² Nai³-na¹ Jesucristo nca³ to⁴jvi³ ca²ta³si¹xa¹, cˀoa⁴ ca²ta³cjen² nio⁴ xi³ ti⁴tsˀe⁴-ni³.
2TH 3:13 To⁴nca³ jon², ntsˀe³², a³li² vi³jta³-jin²no³ nca³ nta³ nˀiaon²³.
2TH 3:14 Tsa² jnco³ xi³ tsi² si⁴²qui³tjo³son² en¹-na⁴jin⁴ xi³ tji¹tˀa³ xon⁴-vi⁴, cho¹tsen³-lao⁴³ je² cho⁴ta⁴-vi⁴, a³li² ya⁴-jin² ni²jnco³cao⁴³ yao³-no³, jme¹-ni³ nca³ coan⁴soa³-ni³le⁴.
2TH 3:15 To⁴nca³ a³li² tsa² jo³ co²ntran⁴-no³ ˀya³ta³con²³, to⁴nca³ cˀoa⁴sˀin² tˀin²ya³-lao⁴³ jo³-ni³ tsa² ntsˀao³.
2TH 3:16 Ti⁴je²-ni³ Nai³-na¹ xi³ tsjoa¹ xi³ nchˀan¹ tjin¹ cˀoa⁴sˀin² ca²ta³si¹qui³njen³nchˀan¹jin³-no³ to⁴jme³-sa³ni³ve⁴ nca³ntsjai². Je² Nai³-na¹ ca²ta³vˀe²jna³cao⁴-no³ nca³tsˀio³.
2TH 3:17 An³ xi³ Pablo ˀmi²-na³ cao⁴ ntsa⁴ ti²cji³-ni³no³. Cˀoa⁴sˀin² yˀa³ choa⁴ nca³yi³je³ xon⁴ xi³ tsˀan⁴. Cˀoi⁴²sˀin² cjia³.
2TH 3:18 Je² cjoa⁴nta³-le⁴ Nai³-na¹ Jesucristo ca²ta³sˀe³-no³ nca³tsˀio³. Cˀoa⁴ ca²ta³ma³.
1TI 1:1 An³ nia¹³ Pablo, pa²stro⁴-le⁴ Jesucristo nca³ cˀoa⁴sˀin² tsa³cˀe¹ne²-na³ Ni³na¹ xi³ vˀa³sje³ntjai²-na¹, cao⁴ Nai³-na¹ Jesucristo xi³ ti³cho³ya²-le⁴².
1TI 1:2 Ti²cji³-le²³, ji³ Timoteo, ji³ xi³ ña³qui³ ˀnti¹-na⁴, jo³-sˀin² ma³cjain¹-na¹. Ni³na¹ Nˀai³-na¹ cao⁴ Cristo Jesús Nai³-na¹ ca²ta³tsjoa¹-li² cjoa⁴nta³, ca²ta³ma³ma⁴que³-li², ca²ta³si¹qui³njen³nchˀan¹jin³ ni⁴ma⁴-li⁴.
1TI 1:3 Jo³-sˀin² tsa³cˀe³tsˀoa²³-le²³ cˀia⁴ nca³ quia³ ya⁴ Macedonia nca³ tsa³qui³jnai³ ya⁴ Efeso, cˀoa⁴-sˀin² vˀe³tsˀoa²³-le²³ ntˀai⁴, jme¹-ni³ nca³ cˀoe¹ne²-ni³lai⁴ xi³cˀa³ nca³ tsi² tsa² cja⁴ˀai¹-nca¹ cjoa⁴fa³ˀai³tsjen³ coi⁴tso⁴ya³.
1TI 1:4 Ni⁴si¹sin³-jin²le⁴ xi³ to⁴ˀen¹, ni⁴vˀe¹xqui⁴-jin²le⁴ cho⁴ta⁴jchi¹nca³-le⁴ xi³ tsi²coi³ fe³tˀa³-le⁴. Je² cjoa⁴-vi⁴ vˀe¹ntje² xi³ to⁴cjoa⁴cho³va²ya³ti³-ni³. A³li²coi³ vˀe¹ntje² cjoa⁴-le⁴ Ni³na¹ xi³ tsˀe⁴ xi³ ma³cjain¹-na¹.
1TI 1:5 Coi³ xi³ me³-le⁴ cjoa⁴te¹xo³ma³-le⁴ Ni³na¹ nca³ tsjoa³cha³² cao⁴ ni⁴ma⁴-na¹ xi³ tsje³, cao⁴ cjoa⁴fa³ˀai³tsjen³nta³-na¹, cao⁴ nca³ ña³qui³ cjoa⁴qui²xi⁴ ma³cjain¹-na¹.
1TI 1:6 Tjin¹ cˀa³ xi³ tsa³qui³ncha³xin²-le⁴ coi³ cjoa⁴-vi⁴. Qui³tˀa³-le⁴ en¹ xi³ tsi² tsa² coi³ jme³ chji¹-le⁴.
1TI 1:7 Me³-le⁴ nca³ maestro-le⁴ cjoa⁴te¹xo³ma³ coan⁴, to⁴nca³ li²coi³ ma³cho⁴ya³-le⁴, ni⁴ xi³ nchja⁴-jin², ni⁴ xi³ si¹qui²xi⁴ya³-jin².
1TI 1:8 To⁴nca³ ˀya³-nia¹ nca³ je² cjoa⁴te¹xo³ma³ cjai¹nca³ nta³ tjin¹, tsa² cho⁴ta⁴ si⁴²chjen¹ jo³-sˀin² va³quin²-le⁴.
1TI 1:9 ˀya³-nia¹ nca³ je² cjoa⁴te¹xo³ma³ ti¹jna³va³sen³ a³li² tˀa³tsˀe⁴ cho⁴ta⁴ xi³ tjin¹-le⁴ cjoa⁴qui²xi⁴, to⁴tˀa³tsˀe⁴ cho⁴ta⁴ xi³ chˀao³ cjoan³, cao⁴ cho⁴ta⁴ xi³ ve³sin³ cjoa⁴-le⁴ Ni³na¹, cao⁴ xi³ si¹qui²ˀaon³ nˀai³-le⁴ na⁴-le⁴, cao⁴ xi³ cˀen³ si¹cˀen³,
1TI 1:10 cao⁴ cho⁴ta⁴cha³jnqui³, cao⁴ je² cho⁴ta⁴xˀin⁴ xi³ chˀao³sˀin² ma³tsjoa³que³ xˀin⁴ xi¹ncjin¹, cao⁴ xi³ si¹che¹ cho⁴ta⁴xi¹ncjin¹, cˀoa⁴ cao⁴ to⁴jme³-sa³ve⁴ cjoa⁴ xi³ co²ntran⁴-le⁴ cjoa⁴fa³ˀai³tsjen³ xi³ nta³ tjin¹.
1TI 1:11 Cˀoa⁴tso² je² en¹nta³ xi³ tˀa³tsˀe⁴ cjoa⁴je³ya³-le⁴ Ni³na¹ xi³ nˀion¹ nta³. Coi³ en¹ xi³ qui³sˀe³ne²-na³ nca³ an³.
1TI 1:12 Tsjoa³-le⁴ cjoa⁴nta³ je² xi³ qui³tsjoa³-na³ nca³nˀion¹, Cristo Jesús Nai³-na¹, nca⁴ cˀoa⁴-sˀin² nˀion¹tˀa³con³-na³ nca³ tsa³ca³se¹jna³-na³ je² xa¹-vi⁴.
1TI 1:13 Nca³sˀa⁴ qui³nchja²ˀoan³ Cristo, qui³tjen⁴nqui³co²ntran⁴-le⁴, taon³ tsa³ˀve³, to⁴nca³ tsa³ve³ma⁴con³-na³, nca⁴ tji¹chjoa² xcoan³ nca³ cˀoa⁴qui³sˀian³, nca⁴ tsi²coi³ coan³cjain¹-na³.
1TI 1:14 To⁴nca³ je² cjoa⁴nta³-le⁴ Nai³-na¹ cjai¹nca³ coan³ncjin²ya³-na³ jo³-sˀin² nca³ ma³cjain¹-na³ jo³-sˀin² nca³ tsjoa³que⁴ nca³ ti²jna⁴coa⁴ Cristo Jesús.
1TI 1:15 Je² en¹-vi⁴ xi³ ña³qui³ cˀoa⁴tjin¹, xi³ va³quin²-le⁴ nca³ chjo¹ve¹ nca³tsˀia³²: Cristo Jesús ja³ˀai³ i⁴ son³ˀnte³-vi⁴, ja³ˀai³ cˀa³sje³ntjai² cho⁴ta⁴je¹. An³ nia¹³ xi³ cho⁴ta⁴je¹ti¹tjoan²³.
1TI 1:16 Coi³ cjoa⁴ tsa³ve³ma⁴con³-na³, jme¹-ni³ nca³ cˀoa⁴-sˀin² Jesucristo coa⁴co²ti¹tjon²-si¹ni³ tˀa³tsˀan⁴ nca³yi³je³ cjoa⁴ma⁴ta³con²-le⁴. Cˀoa⁴-sˀin² tsa³ca³co¹cho⁴ya³-le⁴ je² xi³ coan⁴cjain¹-le⁴ tˀa³tsˀe⁴ Cristo, jme¹-ni³ nca³ sˀe⁴-si¹ni³le⁴ cjoa⁴vi³jna³chon³ nca³ntsjai².
1TI 1:17 Je² Cho⁴ta⁴ti¹tjon² xi³ va³te¹xo³ma³ntsjai², xi³ ni⁴cˀia³-jin² coi⁴ya², xi³ tsi² tsa² ma³tsen³-na¹, je² Ni³na¹ xi³ to⁴je² to⁴jnco³ Ni³na¹, ca²ta³sˀe³-le⁴ cjoa⁴ncˀa³ cao⁴ cjoa⁴je³ya³ nca³ntsjai² nca³ntsjai². Cˀoa⁴ ca²ta³ma³.
1TI 1:18 Ji³ ˀnti¹-na⁴, Timoteo, je² cjoa⁴te¹xo³ma³-vi⁴ vˀe³ne²³-le²³, jo³-sˀin² to⁴nqui³-ni³ qui³sˀe³ en¹ tˀa³tsi⁴ nca³sˀa⁴, jme¹-ni³ nca³ nˀion¹ nta³ coi⁴xcan³-si¹ni³ xi³ to⁴tˀa³tsˀe⁴ cjoa⁴-vi⁴.
1TI 1:19 A³li² ni²cha³jin³-jin² xi³ je³coan³cjain¹-li² cao⁴ cjoa⁴fa³ˀai³tsjen³nta³-li⁴. Tjin¹ cˀa³ xi³ tsa³cja³ˀa¹xin²-le⁴ yao³-le⁴ je² cjoa⁴fa³ˀai³tsjen³nta³-le⁴. Cˀoa⁴-sˀin² qui³si³cha³ xi³ je³coan³cjain¹-le⁴.
1TI 1:20 Cˀoa⁴²cjoan³ Himeneo cao⁴ Alejandro, je² xi³ an³ qui³tsjoa³tˀa³-le⁴ Satanás, jme¹-ni³ nca³ cao⁴ cjoa⁴ñˀain³ scoe⁴-ni³ nca³ tsi² ma³ no²cjoa⁴ˀaon³.
1TI 2:1 Cˀoa⁴-sˀin² vˀe³ne²³ ti¹tjon²-le⁴ nca³yi³je³ cjoa⁴ nca³ si⁴je¹, cˀoe¹tsˀoa³², cˀoe¹tsˀoa³ntje², cˀoe⁴² cjoa⁴nta³ xi³ tˀa³tsˀe⁴ nca³tsˀi³ cho⁴ta⁴,
1TI 2:2 xi³ tˀa³tsˀe⁴ cho⁴ta⁴ti¹tjon² cao⁴ nca³tsˀi³ xi³ ncˀa³ tjio¹, jme¹-ni³ nca³ nchˀan¹ coi⁴yo³-si¹nia³², cˀoa⁴ jme¹-ni³ nca³ to⁴jvi³ coa⁴nquin¹cao⁴-si¹nia³² yao³-na¹ nca³ jcha⁴xcoan¹ Ni³na¹ nca³ jcha⁴xcoan¹ cjoa⁴.
1TI 2:3 Je²-vi⁴ xi³ nta³ tjin¹, xi³ sa³sen¹-le⁴ Ni³na¹ xi³ vˀa³sje³ntjai²-na¹.
1TI 2:4 Je² me³-le⁴ nca³ nca³tsˀi³ cho⁴ta⁴ coi⁴tjo³ntjai², cˀoa⁴ nca³ coi⁴cho³nčhˀoe² xi³ cjoa⁴qui²xi⁴.
1TI 2:5 Jnco³ ma³-ni³ Ni³na¹, cˀoa⁴-ti⁴ jnco³ ma³-ni³ xi³ chji⁴ne⁴ˀen¹, Jesucristo cho⁴ta⁴xˀin⁴ xi³ si¹cjao²nta³ Ni³na¹ cao⁴ cho⁴ta⁴son³ˀnte³.
1TI 2:6 Je² xi³ qui³tsjoa³ yao³-le⁴ jo³-ni³ chji¹-le⁴ xi³ tsa³cˀe¹chji¹ntjai² nca³tsˀi³. Qui³tsˀai² en¹ xi³ tˀa³tsˀe⁴ je²-vi⁴ nca³ ji³cho² ni⁴čhjin³ nca³ tsˀa³cao⁴-le⁴.
1TI 2:7 Xi³ tˀa³tsˀe⁴ je² cjoa⁴ an³ qui³si³ca³sen¹jna³-na³ nca³ nchja²ya³ nca³ pa²stro⁴ coan³. (Ña³qui³ cjoa⁴qui²xi⁴ xi³ xian³, a³li²coi³ cjoa⁴nti³so³.) An³ va³co³ya²³-le⁴ cho⁴ta⁴ xi³ li² judío-jin² jo³-sˀin² ma³cjain¹-na¹ cao⁴ xi³ cjoa⁴qui²xi⁴.
1TI 2:8 Me³-na³ˀni³ nca³ nca³tsˀi³ cho⁴ta⁴xˀin⁴ cˀoe⁴²tsˀoa³ nca³qui³jnta² ˀnte³, nca³ sco¹mi³ncˀa³ ntsja³ xi³ tsje³, nca³ tsi² tsa² jti³-le⁴, ni⁴ scan³-jin².
1TI 2:9 Cˀoa⁴-ti⁴ je² xi³ ya¹nchjin¹ ca²ta³vˀa³cja¹ na³jño³ xi³ nta³ xi³ va³quin²-le⁴. Ca²ta³sˀe³ i⁴tse¹-le⁴ cjoa⁴soa³ta³con² nca³ nta³ ca²ta³fi²cao⁴ yao³-le⁴. A³li² to⁴se¹xcon¹-jin² vˀe¹nˀion¹ ntsja⁴jco⁴. A³li² taon⁴si³ne²-jin², a³li² to³fa³nqui³chji¹-jin², a³li² chˀo¹tji³chji¹-jin² si¹chjen¹.
1TI 2:10 To⁴sa³ ca²ta³sˀin¹ xa¹ xi³ nta³, jo³-sˀin² va³quin²-le⁴ ya¹nchjin¹ xi³ tso² nca³ ve³xcon¹ Ni³na¹.
1TI 2:11 Je² xi³ ya¹nchjin¹ to⁴jvi³ to⁴jvi³ ca²ta³co³tˀa³ya³, na³nqui³ ca²ta³va³tio²-le⁴ nca³yi³je³.
1TI 2:12 Li²coi³ tsjoa³ ˀnte³ nca³ ya¹nchjin¹ coi⁴tso⁴ya³-le⁴, ni⁴je²-jin² coa⁴te²xo³ma³-le⁴ cho⁴ta⁴xˀin⁴, to⁴nca³ jyo¹ ca²ta³va³tio²,
1TI 2:13 nca⁴ Adán ti¹tjon² qui³sˀe³nta³, scan³ Eva.
1TI 2:14 Adán li²coi³ qui³chˀa²na⁴cha⁴-le⁴, to⁴nca³ chjon⁴²-ve⁴ qui³chˀa²na⁴cha⁴-le⁴, ña³qui³ tsˀa³ntjai²cjoa⁴-ni³.
1TI 2:15 To⁴nca³ coi⁴tjo³ntjai²-ni¹ nca³ sˀe⁴-le⁴ xti³, tsa² ña³qui³ cˀoe¹jna³ntsjai²cao⁴ xi³ ma³cjain¹-le⁴, nca³ tsjoa³que³, nca³ tsje³, nca³ nta³ fi²cao⁴ yao³-le⁴.
1TI 3:1 Je² en¹-vi⁴ ña³qui³ cˀoa⁴²tjin¹: Tsa² jnco³ xi³ me³-le⁴ xa¹ nca³ si⁴²coi²nta⁴ na⁴xi⁴na³nta¹-le⁴ Cristo, cjai¹nca³ nta³ xa¹ xi³ me³-le⁴.
1TI 3:2 Ma³chjen¹ nca³ je² xi³ si¹coi²nta⁴ na⁴xi⁴na³nta¹-le⁴ Cristo a³li²jme³ je¹ sˀe³-le⁴. To⁴jnco³ chjon⁴² ca²ta³sˀe³-le⁴. Cho⁴ta⁴to⁴jvi³ ca²ta³ma³, cˀoa⁴ cho⁴ta⁴ˀi³nta³ta³con², cˀoa⁴ cho⁴ta⁴ xi³ nta³ si¹cho⁴ya³-le⁴ yao³-le⁴, xi³ nta³ si¹sin³-le⁴ xi³ fa³ˀai³con³-le⁴, xi³ nta³ ma³-le⁴ va³co¹ya³.
1TI 3:3 Ma³chjen¹ nca³ tsi² si¹sin³-le¹ vino, nca³ tsi² vˀe¹-le⁴ cho⁴ta⁴. A³li² cho⁴ta⁴chi⁴nca⁴-jin² ma³ tˀa³tsˀe⁴ tso³jmi², nca³ to⁴cho⁴ta⁴ntˀe¹ ni¹, nca³ li²coi³ cjoa⁴si³ si¹sin³, nca³ li²coi³ chi⁴nca⁴-le⁴ taon⁴.
1TI 3:4 Ma³chjen¹ nca³ nta³ va³te¹xo³ma³-le⁴ ni³ˀya³-le⁴, nca³ nta³ vˀe¹ne²-le⁴ xti³-le⁴ nca³ ña³qui³ nta³ ca²ta³ve³xcon¹ cjoa⁴.
1TI 3:5 (Je² xi³ tsi² tsa² ma³-le⁴ va³te¹xo³ma³ ni³ˀya³-le⁴, jo¹-sˀin² si⁴²coi²nta⁴ na⁴xi⁴na³nta¹-le⁴ Ni³na¹.)
1TI 3:6 A³li² tsa² je²-jin² xi³ to⁴sˀa⁴ coan³cjain¹-le⁴, jme¹-ni³ nca³ tsi² sca⁴jin³-si¹ni³ xi³ ti⁴coi³-ni³ cjoa⁴ñˀain³ jo³-ni³ tsa² nai⁴², nca⁴ ncˀa³con³ coan⁴.
1TI 3:7 Cˀoa⁴-ti⁴ ma³chjen¹ nca³ xi³ cja⁴ˀai¹ cho⁴ta⁴ nta³ cˀoa⁴sje³ nca³ je², jme¹-ni³ nca³ tsi² tsa² sca⁴jin³-si¹ni³ cjoa⁴soa³ cao⁴ chen⁴-le⁴ nai⁴².
1TI 3:8 Ti⁴cˀoa⁴-sˀin²ni³ je² xi³ si¹sin³-le⁴ na⁴xi⁴na³nta¹-le⁴ Cristo, tjin¹ne²-le⁴ nca³ scoe⁴xcon¹ cjoa⁴, a³li² jao²jan²-jin² vˀe¹⁴con³, a³li² to⁴xquia⁴ ˀvi³-jin² vino, a³li² cho⁴ta⁴chi⁴nca⁴-jin² ma³ tˀa³tsˀe⁴ tso³jmi².
1TI 3:9 Cˀoa⁴-sˀin² ca²ta³sˀe³-le⁴ je² cjoa⁴ˀma³ xi³ ma³cjain¹-na¹ cao⁴ cjoa⁴fa³ˀai³tsjen³ xi³ tsje³.
1TI 3:10 Cˀoa⁴-ti⁴ je² cho⁴ta⁴ xi³ si¹sin³-le⁴ na⁴xi⁴na³nta¹-le⁴ Cristo, ti¹tjon² ca²ta³cho²tˀa³, cˀia⁴² ca²ta³si¹xa¹, tsa² tsi² tsa² jme³ je¹ tjin¹-le⁴.
1TI 3:11 Ti⁴cˀoa⁴-sˀin²ni³ je² xi³ ya¹nchjin¹, tjin¹ne²-le⁴ nca³ scoe⁴xcon¹ cjoa⁴, a³li² chˀao³-jin² si¹cˀa³xqui⁴ xi¹ncjin¹. Cho⁴ta⁴ to⁴jvi³ ca²ta³ma³, nta³ ca²ta³si¹cji³tjo³son² nca³yi³je³.
1TI 3:12 Je² cho⁴ta⁴ xi³ si¹sin³-le⁴ na⁴xi⁴na³nta¹-le⁴ Cristo to⁴jnco³ chjon⁴² ca²ta³sˀe³-le⁴. Nta³ ca²ta³va³te¹xo³ma³-le⁴ xti³-le⁴ cao⁴ ni³ˀya³-le⁴.
1TI 3:13 Je² cho⁴ta⁴ xi³ nˀion¹ nta³ si¹sin³-le⁴ na⁴xi⁴na³nta¹-le⁴ Cristo, cjai¹nca³ nta³ ˀnte³ sa⁴co²-le⁴, cˀoa⁴ coan⁴nˀion¹con³, nca⁴ ma³cjain¹-le⁴ tˀa³tsˀe⁴ Cristo Jesús.
1TI 3:14 Je²-vi⁴ ti²cji³-le²³, nta³ tsa² ti²co³ya³ nca³ nti⁴ton⁴ cjoi³cho³nčhˀoe²-le²³.
1TI 3:15 Tsa² coan⁴tse³ya²-na³, ti²cji³-le²³ jme¹-ni³ nca³ jcha⁴-si¹ni³ jo³-sˀin² nca³ ma³chjen¹-li² nca³ ˀmi³coai⁴ yao³-li⁴ ya⁴ ni³ˀya³-le⁴ Ni³na¹ xi³ coi³ na⁴xi⁴na³nta¹-le⁴ Ni³na¹ xi³ ti¹jna³con³. Nca⁴ nco³ya³-le⁴ xjao¹nˀion¹ ni¹, cˀoa⁴ xjao¹ja⁴ma⁴ xi³ tsjoa¹nca³nˀion¹-le⁴ xi³ cjoa⁴qui²xi⁴.
1TI 3:16 Ña³qui³ ˀya³² nca³tsˀia³² nca³ cjai¹nca³ to⁴je³ya³ je² cjoa⁴ˀma³-ve⁴ jo³-sˀin² ˀya³xcoan¹ Ni³na¹. Ni³na¹ tsa³ˀya³-le⁴ nca³ cho⁴ta⁴yao³ cjoan³ jo³-ni³ ña¹. Xi³ to⁴tˀa³tsˀe⁴ Espíritu Santo tsa³ˀya³-le⁴ nca³ tjin¹-le⁴ cjoa⁴qui²xi⁴. Tsa³ve³ je² a²ncje⁴-ve⁴. Qui³no²cjoa⁴ya³jin³-le⁴ nca³tsˀi³ na⁴xi⁴na³nta¹. Xi³ i⁴ son³ˀnte³-vi⁴ tjio¹ coan³cjain¹-le⁴ tˀa³tsˀe⁴. Qui³tjoe¹ ncˀa³jmi³ cao⁴ cjoa⁴je³ya³.
1TI 4:1 To⁴nca³ je² Espíritu Santo nchja⁴tsen³-ni¹ nca³ je² ni⁴čhjin³ xi³ nčhoa¹, tjin¹ cˀa³ xi³ to⁴xin² ntia⁴² coai⁴-le⁴ en¹ xi³ ma³cjain¹-na¹, cjoi⁴nčhˀoe¹-le⁴ espíritu xi³ vˀa³na⁴cha⁴-le⁴, cao⁴ cjoa⁴fa³ˀai³tsjen³-le⁴ nai⁴² xi³ nta³jin³.
1TI 4:2 Jao² coai⁴-ni³ nca³ coi⁴nchja⁴ en¹nti³so³, nca³ xi¹jin³ cjoa⁴fa³ˀai³tsjen³-le⁴, jo³-ni³ xi³ qui³ti²jma²jon³.
1TI 4:3 Li²coi³ tsjoa¹ˀnte³ nca³ coi⁴xan³ cho⁴ta⁴. Cˀoa⁴-sˀin² cˀoe⁴²ne² nca³ tsi² tsa² coan⁴ chi⁴ne⁴ tso³jmi² xi³ Ni³na¹ tsa³cˀe¹nta³. Ni³na¹ tsa³cˀe¹nta³ tso³jmi² jme¹-ni³ nca³ scoe¹-si¹ni³ je² xi³ nta³ fi²tˀa³-le⁴ Ni³na¹ cao⁴ je² xi³ ve³ xi³ cjoa⁴qui²xi⁴, cˀoa⁴ tsjoa¹ cjoa⁴nta³ nca³ scoe¹.
1TI 4:4 Je² nca³yi³je³ xi³ Ni³na¹ tsa³cˀe¹nta³ nta³-ni¹. Ni⁴to⁴jme³-jin² xi³ chja⁴ˀa²xian². Coan⁴² chi⁴ne⁴² tsa² cˀoe⁴² cjoa⁴nta³.
1TI 4:5 Nca⁴ je² en¹-le⁴ Ni³na¹ cao⁴ xi³ vˀe²tsˀoa² si¹tsje³-ni³ tso³jmi²-ve⁴.
1TI 4:6 Tsa² je² cjoa⁴-vi⁴ cˀoa⁴cˀoin¹-lai⁴ ntsˀe³², cjai¹nca³ nta³ si⁴xa¹-lai⁴ Jesucristo. Coan³jcha¹coai⁴ en¹ xi³ ma³cjain¹-na¹ cao⁴ xi³ nta³ cjoa⁴fa³ˀai³tsjen³ xi³ ji³cho²tjen⁴nqui³-lai⁴.
1TI 4:7 To⁴nca³ je² xi³ to⁴xquia⁴ en¹ xi³ vˀa³sje³nqui³ cjoa⁴-le⁴ Ni³na¹, xi³ tsi²jme³ chji¹-le⁴, ti⁴sen⁴xin²-lai⁴. Chˀa⁴sjai³ nca³nˀion¹-li⁴ xi³ tˀa³tsˀe⁴ nca³ jcha⁴xcoin¹³ Ni³na¹.
1TI 4:8 Je² nca³nˀion¹ xi³ vˀa³sje³ yao³-na¹ to⁴choa³ chji¹-le⁴, to⁴nca³ cˀia⁴ nca³ ˀya³xcoan¹ Ni³na¹ chji¹-le⁴ ni¹ nca³yi³je³. A³li² to⁴cˀoa⁴²cji³ chji¹-le⁴ tˀa³tsˀe⁴ je² cjoa⁴vi³jna³chon³ xi³ qui³ni²sˀe³nqui³-na¹ ntˀai⁴-vi⁴ cao⁴ xi³ sˀa⁴ nčhoa¹.
1TI 4:9 Je² en¹-vi⁴ xi³ ña³qui³ cˀoa⁴tjin¹, xi³ va³quin²-le⁴ nca³ chjo¹ve¹.
1TI 4:10 Coi³ je²-vi⁴ ni²xa¹ntje². Cˀoa⁴-ti⁴ chja⁴ˀa²-le⁴² cjoa⁴ñˀain³ xi³ nchja⁴ˀaon³-na¹, nca⁴ cˀoa⁴-sˀin² nˀion¹ cho³ya²-le⁴² Ni³na¹ xi³ ti¹jna³con³, xi³ ma³-le⁴ vˀa³sje³ntjai² nca³tsˀi³ cho⁴ta⁴, va³sen²tsˀia³-cjoan²ni³ xi³ ma³cjain¹-le⁴.
1TI 4:11 Tˀe²nai²³, cˀoa⁴ ta⁴co²yai³ coi³ cjoa⁴-vi⁴.
1TI 4:12 Ni⁴to⁴ˀya³-jin² xi³ taon³ ca²ta³ve³-li², nta³ tsa² xti³-sai³, to⁴nca³ cˀoa⁴-sˀin² tja³ntia⁴²-lai⁴ je² cho⁴ta⁴ xi³ ma³cjain¹-le⁴ cao⁴ je² en¹-li⁴, cao⁴ jo³-sˀin² ˀmi³coai⁴ yao³-li⁴, cao⁴ jo³-sˀin² tsjoa³chai³, cao⁴ espíritu-li⁴, cao⁴ jo³-sˀin² nca³ ma³cjain¹-li², cao⁴ jo³-sˀin² nca³ tsjai³.
1TI 4:13 Cˀia⁴ ˀnta³ nca³ cjoi⁴choa³, cˀoa⁴-sˀin² tˀe²xquiai⁴, tˀe²nai²³, ta⁴co²yai³.
1TI 4:14 A³li² njion²-ta³con²jin²³ je² cjoa⁴tjao² xi³ ti¹jna³-li², xi³ tsa³cˀai²-li², jo³-sˀin² tsa³cja³ya³ta³con²-li² cˀia⁴ nca³ cho⁴ta⁴jchi¹nca³-le⁴ cho⁴ta⁴-le⁴ Cristo tsa³ca¹son²-li² ntsja³.
1TI 4:15 Cho¹tˀa³ya³coai⁴ je² cjoa⁴-vi⁴, to⁴coi³ xa¹ tˀiain⁴, jme¹-ni³ nca³ scoe⁴-si¹ni³ nca³tsˀi³ jo³-sˀin² nca³ ˀmi³ti¹tjoin²³.
1TI 4:16 Ti⁴coi²ntai⁴ yao³-li⁴, cˀoa⁴ ti⁴coi²ntai⁴ je² xi³ ti³va³co²yai³. Ña³qui³ cˀoa⁴-sˀin² nta³ tˀin³cao⁴-sai³. Cˀia⁴ nca³ cˀoa⁴nˀiain²³ nca³yi³je³ je²-vi⁴, cˀoa⁴sˀin² coi²tjo⁴ntjai²³ nca³ ti⁴ji³-ni³, cˀoa⁴-ti⁴ je² xi³ nčhˀoe¹-li².
1TI 5:1 A³li² no²cjoa⁴ti³cao⁴-jin²³ cho⁴ta⁴jchi¹nca³, to⁴tˀe²ne²-lai⁴ jo³-ni³ tsa² nˀai³-li⁴. Je² xi³ nqui²sa⁴ xti³ tˀe²ne²-lai⁴ jo³-ni³ tsa² ntsˀai³.
1TI 5:2 Je² ya¹nchjin¹ jchi¹nca³ tˀe²ne²-lai⁴ jo³-ni³ tsa² na⁴-li⁴, je² xti³ya¹nchjin¹ jo³-ni³ tsa² ti³chjai³ nca³ ña³qui³ tsje³ ca²ta³mai³.
1TI 5:3 Jcha⁴xcoin¹³ ya¹nchjin¹ xi³ cˀen³ xˀin⁴-le⁴ xi³ ña³qui³ cˀan² cjoa⁴qui²xi⁴.
1TI 5:4 Tsa² jnco³ ya¹nchjin¹cˀan² xi³ tjin¹-le⁴ xti³ cao⁴ xti³ntai⁴, ti¹tjon²-cjoa²la² ca²ta³ma³-le⁴ xti³-ve⁴ nca³ ca²ta³ve³xcon¹ cho⁴ta⁴ni³ˀya³-le⁴ jo³-sˀin² nca³ ve³xcon¹ Ni³na¹, cˀoa⁴ ca²ta³tsjoa¹ nca³jao³-le⁴ cjoa⁴tjao²cha³ xi³jcha¹-le⁴. Je²-vi⁴ xi³ nta³ tjin¹ xi³ sa³sen¹-le⁴ Ni³na¹.
1TI 5:5 Je² xi³ chjon⁴²cˀan² cjoa⁴qui²xi⁴ nca³ cˀen³ xˀin⁴-le⁴, cˀoa⁴ xi³ to⁴je² ti¹jna³, je³ti¹co³ya³ tˀa³tsˀe⁴ Ni³na¹. Cˀoa⁴sˀin² fi²cao⁴-sa³ nca³ si¹je¹ cjoa⁴nta³ nca³ vˀe¹tsˀoa³ ni⁴čhjin³ cao⁴ ni⁴tjen⁴.
1TI 5:6 To⁴nca³ je² xi³ to⁴tsjoa¹ˀnte³ qui³te³-le⁴ yao³-le⁴ xi³ cao⁴ cjoa⁴tsjoa³, nta³ tsa² ti¹jna³con³ nco³ya³-le⁴ ti¹jna³cˀen³-ni¹.
1TI 5:7 Cˀoa⁴-sˀin² tˀe²nai²³ je² cjoa⁴-vi⁴, jme¹-ni³ nca³ tsi² tsa² jme³ je¹ sˀe⁴-ni³le⁴.
1TI 5:8 Tsa² jnco³ xi³ tsi² tsa² si¹coi²nta⁴ xi¹ncjin¹, va³sen²tsˀia³cjoan²ni³ je² xi³ tsˀe⁴ ni³ˀya³-le⁴, to⁴tsa³cˀe²jna³ˀma³cao⁴ cjoa⁴ xi³ coan³cjain¹-le⁴. To⁴nqui²sa⁴ chˀao³ si¹cˀe¹jna³ yao³-le⁴ cao⁴-ni³ xi³ tsi² tsa² ma³cjain¹-le⁴.
1TI 5:9 Tja³ya³xqui⁴ tˀa³ xon⁴ jo³-ni³ ya¹nchjin¹cˀan² xi³ cˀen³ xˀin⁴-le⁴ to⁴je² xi³ je³jan²can³ no¹ tjin¹-le⁴, xi³ to⁴jnco³ xˀin⁴ qui³sˀe³-le⁴,
1TI 5:10 xi³ nta³ tsa³ˀya³-le⁴ xi³ to⁴tˀa³tsˀe⁴ xa¹-le⁴ xi³ nta³, tsa² qui³si³jcha¹ xti³, tsa² qui³si³sin³-le⁴ xi³ ja³ˀai³con³-le⁴, tsa² tsa³ca³ne¹jon³ ntso⁴co⁴ cho⁴ta⁴-le⁴ Cristo, tsa² tsa³qui³ncha²cao⁴ xi³ cjoa⁴va³ tjin¹-le⁴, tsa² cˀoa⁴-sˀin² nta³ qui³si³xa¹ nca³yi³je³ cjoa⁴.
1TI 5:11 To⁴nca³ je² ya¹nchjin¹cˀan² xi³ xti³-sa³ xi³ cˀen³ xˀin⁴-le⁴ a³li² ni²cˀa³sˀen³tˀa³-jin²³ xon⁴. Tsa² cja⁴ˀai¹-nca¹sˀin² coa⁴tio²⁴-con³, co²ntran⁴-le⁴ Cristo coai⁴-ni³. Scan³-ni³ me³-le⁴ nca³ coi⁴xan³.
1TI 5:12 Cˀoa⁴-sˀin² sa⁴co²-le⁴ cjoa⁴ñˀain³ nca⁴ li²coi³ qui³si³cji³tjo³son² xi³ coan³cjain¹-le⁴ nca³ ti¹tjon².
1TI 5:13 Cˀoa⁴²-ti⁴ ma³nca³-le⁴ nca³ ma³tsˀe², to⁴vˀe¹ma³son² ni³ˀya³ nca³ i⁴ nca³ jan¹. A³li² tsa² to⁴coi³-jin² nca³ vˀe¹ma³tsˀe², cˀoa⁴-ti⁴ to⁴cjoa⁴sin³cjoa⁴-le⁴, to⁴tsˀoa³ vˀe¹ma³cao⁴. Vˀe¹ma³nchja⁴ xi³ tsi² tsa² ma³chjen¹.
1TI 5:14 Coi³ xi³ me³-na³ nca³ je² xi³ ya¹nchjin¹cˀan² xi³ xti³-sa³ xi³ cˀen³ xˀin⁴-le⁴, ca²ta³vi³xan³, ca²ta³sˀe³-le⁴ xti³, ca²ta³va³te¹xo³ma³ ni³ˀya³-le⁴. A³li² tsjoa¹ˀnte³-jin²le⁴ co²ntran⁴-le⁴ nca³ chˀao³ coi⁴tso⁴.
1TI 5:15 Je³tjin¹ cˀa³ xi³ qui³si³cˀo¹fa³ya³-ni³ yao³-le⁴, xi³ qui³tˀa³-le⁴ Satanás.
1TI 5:16 Tsa² jnco³ cho⁴ta⁴xˀin⁴ a³xo⁴ chjon⁴² xi³ ma³cjain¹-le⁴, xi³ tjin¹ xi¹ncjin¹ xi³ ya¹nchjin¹cˀan² xi³ cˀen³ xˀin⁴-le⁴, ca²ta³si¹coi²nta⁴, jme¹-ni³ nca³ tsi² tsa² coan⁴chˀa¹ne²-si¹ni³le⁴ je² na⁴xi⁴na³nta¹-le⁴ Cristo, cˀoa⁴ jme¹-ni³ nca³ sˀe⁴-si¹ni³le⁴ xi³ ma³chjen¹-le⁴ je² xi³ ya¹nchjin¹cˀan² cjoa⁴qui²xi⁴.
1TI 5:17 Je² cho⁴ta⁴jchi¹nca³ xi³ nta³ va³te¹xo³ma³ va³quin²-le⁴ nca³ can³-ni³ cˀa³ ca²ta³ˀya³xcon¹, va³sen²tsˀia³-cjoan²ni³ xi³ tse³ xa¹ tjin¹-le⁴ nca³ nchja⁴ya³ nca³ va³co¹ya³.
1TI 5:18 Je² xon⁴ Escritura cˀoi⁴tso²: A³li² nˀo¹-jin² vˀe²ˀai³ je² nčha⁴ja⁴ntˀe¹ xi³ si¹cˀa³tji³ trigo-ve⁴. Cjai¹nca³ va³quin²-le⁴ nca³ je² xi³ si¹xa¹, ca²ta³ma³chji¹-le⁴.
1TI 5:19 A³li² ni²sin³-jin²³ xi³ va¹nqui³ cho⁴ta⁴jchi¹nca³, tsa² tsin³-le⁴ jao² jan² testigo xi³ si¹qui²xi⁴ya³ cjoa⁴.
1TI 5:20 Je² xi³ tjio¹ma³jnqui³ je¹ ti⁴no²cjoa⁴ti³coai⁴ nqui³xcon⁴ nca³tsˀi³, jme¹-ni³ nca³ xi³cˀa³ cˀoa⁴-sˀin² coan⁴xcon¹-si¹ni³le⁴.
1TI 5:21 Vˀe³ne²³-le²³ nqui³xcon⁴ Ni³na¹ cao⁴ Nai³-na¹ Jesucristo cao⁴ a²ncje⁴ xi³ qui³tjoe¹jin³, nca³ tˀe²jin³-ta³coin²³ nca³yi³je³ cjoa⁴-vi⁴. Ni⁴jme³-jin² cjoa⁴ xi³ to⁴nqui³-ni³ cˀoe¹nta³jin³, cˀia⁴ nca³ cje³ tsin² cjoa⁴qui²xi⁴. Ni⁴ˀya³-jin² cho⁴ta⁴ xi³ chja⁴ˀa²jin³ nca³ si⁴sin³-lai⁴.
1TI 5:22 A³li²ˀya³ xi³ fa³son² nti⁴ton⁴-lai⁴ ntsai⁴, nca³ cˀoai⁴-lai⁴ xa¹. A³li² ya⁴-jin² ni²jnco³coai⁴ je¹-le⁴ xi³ cja⁴ˀai¹. Ña³qui³ tsje³ ti⁴jnai³.
1TI 5:23 A³li² to⁴xquia⁴ na³nta¹-jin² ˀyoi³, to⁴nca³ ti⁴chjen¹ i⁴tsai¹³ vino xi³ tˀa³tsˀe⁴ ntsˀoai³ cao⁴ je² chˀin³ xi³ tjin¹ntsjai²-li².
1TI 5:24 Je² je¹-le⁴ cˀa³ cho⁴ta⁴ tjio¹son²tsen³-ni¹ ti¹tjon² nca³ sˀe³nta³jin³-le⁴, to⁴nca³ xi³cˀa³ scan³ coan⁴tsen³ tsˀe⁴.
1TI 5:25 Cˀoa⁴-ti⁴sˀin² je² xi³ nta³ xa¹ tjio¹son²tsen³-ni¹ ti¹tjon². Cˀoa⁴ je² xi³ cja⁴ˀai¹-sˀin² cjoan³ li²coi³ coan⁴ coa⁴tio⁴ˀma³.
1TI 6:1 Je² nca³tsˀi³ xi³ cho⁴ˀnta³ ma³ ca²ta³ve³xcon¹ nai³-le⁴, jme¹-ni³ nca³ tsi² tsa² coi⁴no²cjoa⁴ˀaon³-ni³le⁴ jan³ˀain¹-le⁴ Nai³-na¹ cao⁴ je² cjoa⁴fa³ˀai³tsjen³-le⁴.
1TI 6:2 Je² xi³ tjin¹-le⁴ nai³ xi³ ma³cjain¹-le⁴ tˀa³tsˀe⁴ Cristo, a³li² to⁴cjoa⁴-jin² ve³con³, nca⁴ cˀoa⁴²-ti⁴ ntsˀe⁴. To⁴sa³ nqui²sa⁴ nta³ ca²ta³si¹xa¹-le⁴ nca⁴ je² nai³-le⁴ cho⁴ˀnta³-ve⁴ cˀoa⁴-ti⁴ ma³cjain¹-le⁴ tˀa³tsˀe⁴ Cristo, cˀoa⁴ tjao²cha³ ma³ xi¹ncjin¹. Je² cjoa⁴-vi⁴ ta⁴co²yai³, cˀoa⁴ tˀe²nai²³.
1TI 6:3 Tsa² tjin¹ cˀa³ xi³ cja⁴ˀai¹ tso² xi³ va³co¹ya³, xi³ tsi²coi³ tji¹jnco³con³ tˀa³tsˀe⁴ je² en¹ xi³ nta³ xi³ tsˀe⁴ Nai³-na¹ Jesucristo cao⁴ je² cjoa⁴fa³ˀai³tsjen³ jo³-sˀin² nca³ ˀya³xcoan¹ Ni³na¹,
1TI 6:4 je² cho⁴ta⁴ ma³ncˀa³con³-ni¹. Ni⁴jme³-jin² xi³ ma³-le⁴, to⁴cjoa⁴sca¹ tjin¹-le⁴ tˀa³tsˀe⁴ xi³ to⁴ˀen¹ xi³ to⁴cjoa⁴cho⁴va²ti³ya³-ni³. Ya⁴ nčhoa¹-ni³ cjoa⁴xin²ta³con², cjoa⁴vi³xcan¹, en¹ˀaon³, cao⁴ xi³ to⁴cjoa⁴tjao² va¹ne²-le⁴ cjoa⁴.
1TI 6:5 Ya⁴ nčhoa¹-ni³ xi³ chˀao³-sˀin² fao¹ti³ cho⁴ta⁴ xi³ je³chi³tson³ya² cjoa⁴fa³ˀai³tsjen³-le⁴, xi³ tsin²-le⁴ cjoa⁴qui²xi⁴-jin², xi³ to⁴ve³xcon¹ Ni³na¹ tˀa³tsˀe⁴ xi³ njen³-le⁴. Chja⁴ˀa²xin²-lai⁴ yao³-li⁴ xi³ cˀoa⁴cjoan³.
1TI 6:6 Cjai¹nca³ to⁴tse³ coi⁴njen⁴-na¹ tsa² vˀe²jnco³ta³coan² nca³ ˀya³xcoan¹ Ni³na¹.
1TI 6:7 Ni⁴to⁴jme³-jin² cjoa⁴ xi³ qui³tsin³coa⁴² i⁴ son³ˀnte³. Ña³qui³ cˀoa⁴-jin² tjin¹ nca³ ni⁴jme³-jin² xi³ coan⁴-na¹ chˀa⁴sje³².
1TI 6:8 Tsa² tjin¹-na¹ xi³ chi³ne³² cao⁴ na³jño³ xi³ chˀa²cja¹, to⁴cˀoa⁴-sˀin² cˀoe¹jnco³-ta³coan².
1TI 6:9 Je² xi³ me³-le⁴ nca³ coan⁴nchi⁴na¹ sca⁴jin³ xi³ chˀao³ si⁴²cao⁴, cˀoa⁴ sca⁴nqui³ tsa² chen⁴. Sca⁴jin³ cjoa⁴xin²ta³con², cˀoa⁴ cjoa⁴sca¹ xi³ si¹qui²ˀaon³, xi³ si¹cha³jin³ xi³ si¹cji³tson¹ cho⁴ta⁴.
1TI 6:10 Je² xi³ si¹me³con³ taon⁴, ya⁴ nčhoa¹-ni³ nca³yi³je³ cjoa⁴tsˀen⁴. Je² cho⁴ta⁴ xi³ coi³ si¹me³con³, xin² ntia⁴² qui³-le⁴ en¹ xi³ ma³cjain¹-na¹. A³li² to⁴cˀoa⁴cji³ cjoa⁴so³ cjoa⁴ñˀain³ tsa³cja³ˀa¹.
1TI 6:11 To⁴nca³ ji³, cho⁴ta⁴ xi³ tsˀe⁴ Ni³na¹, ti⁴sen⁴xin²-lai⁴ cjoa⁴-vi⁴. Cˀoa⁴-sˀin² tˀin³coai⁴ yao³-li⁴ cao⁴ xi³ cjoa⁴qui²xi⁴, cao⁴ cjoa⁴xcon¹ta³con² tˀa³tsˀe⁴ Ni³na¹, cao⁴ xi³ nta³ ma³cjain¹-li², cao⁴ cjoa⁴tjao²cha³, cao⁴ cjoa⁴tse³ta³con², cao⁴ cjoa⁴ˀi³nta³jin³ta³con².
1TI 6:12 Nta³ ti⁴xcan¹tˀai³ je² cjoa⁴jchan¹ xi³ nta³ tˀa³tsˀe⁴ xi³ ma³cjain¹-na¹. Chjoai¹³ je² cjoa⁴vi³jna³chon³ xi³ nca³ntsjai², je² xi³ qui³no²cjoa⁴-ni³li² cˀia⁴ nca³ nta³ tsa³cˀai² cjoa⁴qui²xi⁴-li⁴ nqui³xcon⁴ ncjin² testigo.
1TI 6:13 Cˀoa⁴-sˀin² vˀe³ne²³-le²³ nqui³xcon⁴ Ni³na¹ xi³ tsjoa¹ntsjai²-le⁴ cjoa⁴vi³jna³chon³ nca³yi³je³, cˀoa⁴ nqui³xcon⁴ Jesucristo xi³ nta³ qui³tsjoa³ cjoa⁴qui²xi⁴-le⁴ nqui³xcon⁴ Poncio Pilato.
1TI 6:14 Nta³ ti⁴jna³coai⁴ je² cjoa⁴te¹xo³ma³-vi⁴, jme¹-ni³ nca³ tsi² jnti¹ coan⁴-si¹ni³, cˀoa⁴ nca³ tsi² chˀao³ coi⁴tjo³-si¹ni³ sa³ˀnta³ nca³ coan⁴tsen³ nqui²ntia³-ni³ Nai³-na¹ Jesucristo.
1TI 6:15 Cˀia⁴ nca³ cjoi⁴cho³ ni⁴čhjin³-le⁴, Ni³na¹ si⁴²cˀa³tsen³ Cristo. Ni³na¹ to⁴je² xi³ cˀoa⁴-sˀin² nˀion¹ nta³ ti¹jna³, xi³ to⁴je² xi³ ncˀa³ cjoa⁴te¹xo³ma³ tjin¹-le⁴, Cho⁴ta⁴ti¹tjon² xi³ ti¹tjon²-le⁴ nca³tsˀi³ cho⁴ta⁴ti¹tjon², Nai³ xi³ ti¹tjon²-le⁴ nca³tsˀi³ nai³.
1TI 6:16 To⁴je² Ni³na¹ xi³ ni⁴cˀia³-jin² mˀen³. Ya⁴ ti¹jna³jin³ lˀi¹ xi³ tsi² tsa² ˀya³ xi³ coan⁴ cjoi⁴cho³. Je² xi³ ni⁴jnco³-jin² cho⁴ta⁴ tsa³ve³, ni⁴coan⁴-jin²le⁴ scoe⁴. Je² ca²ta³sˀe³-le⁴ cjoa⁴je³ya³, ca²ta³sˀe³-le⁴ cjoa⁴te¹xo³ma³ nca³ntsjai². Cˀoa⁴ ca²ta³ma³.
1TI 6:17 Je² cho⁴ta⁴nchi⁴na¹ xi³ tjin¹ son³ˀnte³, tˀe²ne²-lai⁴. A³li² ncˀa³-ta³con²jin² ma³. A³li² si¹nˀion¹tˀa³-ta³con²jin² je² cjoa⁴nchi⁴na¹-ve⁴ xi³ tsi² cˀoa⁴tjin¹. Ca²ta³si¹nˀion¹tˀa³con³ Ni³na¹ xi³ ti¹jna³con³, xi³ cjai¹nca³ tse³ tsjoa¹-na¹ nca³yi³je³ tso³jmi², jme¹-ni³ nca³ sˀe⁴-si¹ni³na¹ cjoa⁴tsjoa³.
1TI 6:18 Je² cho⁴ta⁴nchi⁴na¹-ve⁴ cjoa⁴nta³ ca²ta³sˀin¹, nˀion¹ tse³ cjoa⁴nta³ ca²ta³sˀe³-le⁴, ca²ta³si¹tjao²cha³ xi³ yo⁴ma⁴, nca³ sin³ nca³ nta³ ca²ta³tsjoa¹.
1TI 6:19 Cˀoa⁴-sˀin² ca²ta³vˀe¹xco¹ xi³ ti⁴tˀa³tsˀe⁴-ni³ jo³-ni³ tsa² xi³ ca²sˀe³ntje² tˀa³tsˀe⁴ ni⁴čhjin³ xi³ cjoa⁴ˀai¹, jme¹-ni³ nca³ scoe¹-si¹ni³ cjoa⁴vi³jna³chon³ xi³ nca³ntsjai².
1TI 6:20 Ji³-lai²³ Timoteo, nta³ ti⁴jna³coai⁴ je² xi³ qui³sˀe³ne²-li². Ti⁴sen⁴xin²-lai⁴ na⁴jmi¹ xi³ to⁴cjoa⁴tjao², xi³ tsi²jme³ chji¹-le⁴ tˀa³tsˀe⁴ Ni³na¹, cao⁴ xi³ cjoa⁴cho³va²ya³ti³-ni³ xi³ tsˀe⁴ cjoa⁴chji⁴ne⁴nti³so³.
1TI 6:21 Tjin¹ cˀa³ xi³ si¹qui²xi⁴ya³ coi³ cjoa⁴, to⁴nca³ xin² ntia⁴² qui³-le⁴ en¹ xi³ ma³cjain¹-na¹. Ca²ta³sˀe³-li² cjoa⁴nta³. Cˀoa⁴ ca²ta³ma³.
2TI 1:1 An³ nia¹³ Pablo, pa²stro⁴-le⁴ Jesucristo nca³ cˀoa⁴-sˀin² coan³me³-le⁴ Ni³na¹. An³ nia¹³ pa²stro⁴ xi³ tˀa³tsˀe⁴ je² cjoa⁴vi³jna³chon³ xi³ Ni³na¹ qui³si³sˀe³nqui³, cˀoa⁴ xi³ Cristo Jesús tsjoa¹.
2TI 1:2 Ti²cji³-le²³ Timoteo ˀnti¹-na⁴ xi³ tsjoa³que⁴. Ni³na¹ Nˀai³-na¹ cao⁴ Jesucristo Nai³-na¹ ca²ta³tsjoa¹-li² cjoa⁴nta³, ca²ta³ma³ma⁴que³-li², ca²ta³si¹qui³njen³nchˀan¹jin³ ni⁴ma⁴-li⁴.
2TI 1:3 Tsjoa³-le⁴ cjoa⁴nta³ Ni³na¹, je² xi³ cˀoa⁴-sˀin² si¹chjen¹-na³ nca³ tsje³ tjin¹ cjoa⁴fa³ˀai³tsjen³-na⁴ jo³-sˀin² ji²tjo⁴jian³ cho⁴ta⁴jchi¹nca³-na⁴. Li²coi³ cha³jin³-na³ ni⁴čhjin³ nca³ ni⁴tjen⁴ nca³ si³cja³ˀai³tsjen³-le²³ nca³ vˀe³tsˀoa²³.
2TI 1:4 Me³-na³ nca³ scoe³-le²³, nca³ fa³ˀai³tsjen³-na³ nta¹xcoin³, jme¹-ni³ nca³ tse³ cjoa⁴tsjoa³ sˀe⁴-si¹ni³na³.
2TI 1:5 Tjin¹jin³-na³ jo³-sˀin² nca³ ña³qui³ cjoa⁴qui²xi⁴ ma³cjain¹-li², nca³ cˀoa⁴-sˀin² ti¹tjon² coan³cjain¹-le⁴ na⁴jcha¹-li⁴ Loida cao⁴ na⁴-li⁴ Eunice. Cˀoa⁴²-ti⁴ nˀion¹ nta³ ˀve³ nca³ ma³cjain¹-li².
2TI 1:6 Xi³ coi³-vi⁴ si³cja³ˀai³tsjen³-le²³ nca³ cˀoe¹tse³-sai³ je² cjoa⁴tjao²-le⁴ Ni³na¹ xi³ je³ti¹jna³jin³-li² nca³ an³ tsa³ca³son²-le²³ ntsa⁴.
2TI 1:7 Ni³na¹ li²coi³ qui³tsjoa³-na¹ cjoa⁴jcon³. To⁴cˀoa⁴-sˀin² qui³tsjoa³-na¹ nca³nˀion¹, cao⁴ cjoa⁴tjao²cha³, cao⁴ cjoa⁴fa³ˀai³tsjen³ xi³ nta³ fi²cao⁴ yao³-na¹.
2TI 1:8 Coi³ cjoa⁴ a³li² ma³soa³-jin²li² nca³ cˀoai⁴ en¹ xi³ tˀa³tsˀe⁴ Nai³-na¹, ni⁴tˀa³tsˀan⁴-jian²³ nca³ cjoa⁴ñˀain³ ti²jna⁴ xi³ tˀa³tsˀe⁴ Nai³-na¹. To⁴sa³ cˀoa⁴-ti⁴ ji³ chja⁴ˀai²³ cjoa⁴ñˀain³ xi³ tˀa³tsˀe⁴ je² en¹nta³ tˀa³tsˀe⁴ Cristo, jo³ tjin¹ nca³nˀion¹-le⁴ Ni³na¹.
2TI 1:9 Je² xi³ tsa³cˀa³sje³ntjai²-na¹, xi³ qui³nchja⁴-na¹ xi³ tˀa³tsˀe⁴ xa¹tsje³-vi⁴. A³li² tsa² cˀoa⁴-sˀin² va³quin²-le⁴ xa¹-na¹, to⁴je² xi³ cˀoa⁴-sˀin² coan³me³-le⁴ cao⁴ cjoa⁴nta³-le⁴ xi³ qui³tsˀai²-na¹ cao⁴ Cristo Jesús jo³ sa³ˀnta³ ti¹tjon² nca³ to²tsˀin³-le⁴ cjoa⁴.
2TI 1:10 Ntˀai⁴-vi⁴ je³coan³tsen³ nca³ ja³ˀai³ cˀa³tsen³ xi³ tsa³cˀa³sje³ntjai²-na¹, Jesucristo, xi³ tsa³cja³ˀa¹xin² cjoa⁴vi³ya³. To⁴tˀa³tsˀe⁴ je² en¹nta³ xi³ tˀa³tsˀe⁴ Cristo qui³si³cˀa³tsen³ cjoa⁴vi³jna³chon³ xi³ ni⁴cˀia³-jin² cjoe⁴tˀa³.
2TI 1:11 Xi³ tˀa³tsˀe⁴ je² en¹nta³-vi⁴ cˀoa⁴-sˀin² qui³sˀe³ne²-na³ nca³ nchja²ya³, nca³ pa²stro⁴ ma³, nca³ maestro ma³-le⁴ cho⁴ta⁴ xi³ li² judío-jin².
2TI 1:12 Coi³ cjoa⁴ cˀoi⁴-sˀin² ti²fa³ˀa³-nia³ cjoa⁴ñˀain³-vi⁴, to⁴nca³ li²coi³ ma³soa³-na³ nca³ ˀve³-nia¹³ Cristo xi³ je³coan³cjain¹-na³ tˀa³tsˀe⁴. Ña³qui³ tjin¹jin³-na³ nca³ to⁴je²-sa³ xi³ tjin¹-le⁴ nca³nˀion¹ nca³ cˀoe⁴²tjao² xi³ an³ qui³sca³ni²-le⁴ sa³ˀnta³ cˀia⁴ ni⁴čhjin³-ve⁴.
2TI 1:13 Nta³ tˀe²jin³-ta³coin²³ jo³ tso² je² en¹ xi³ nta³, xi³ an³ qui³no²ˀya²-nai¹³. Tˀe²jin³-ta³coin²³ jo³-sˀin² nca³ ma³cjain¹-na¹, cˀoa⁴ jo³-sˀin² nca³ tjao²cha³² nca³ ti³yo³coa⁴² Cristo Jesús.
2TI 1:14 Xi³ to⁴tˀa³tsˀe⁴ je² Espíritu Santo xi³ ti¹jna³jin³ ni⁴ma⁴-na¹, nta³ tˀe²jna³tjoai²³ je² xi³ qui³cha³ni²-li².
2TI 1:15 Je³ˀyai³ je²-vi⁴ nca³ qui³tsjion³-na³ nca³tsˀi³ xi³ tjio¹ ya⁴ Asia. Ya⁴ tjio¹jin³-le⁴ Figelo cao⁴ Hermógenes.
2TI 1:16 Je² Nai³-na¹ ca²ta³ma³ma⁴que³ cho⁴ta⁴ xi³ tsˀe⁴ ntˀia³-le⁴ Onesíforo. Cjai¹nca³ ncjin² cˀa³ qui³si³cˀe¹jna³con³-na³. Li²coi³ coan³soa³-le⁴ nca³ cjoa⁴ñˀain³ ti²jna⁴.
2TI 1:17 To⁴sa³ cˀia⁴ nca³ ji³cho² Onesíforo ya⁴ Roma, cjai¹nca³ xi¹ti¹ya³ tsa³ca¹sjai³-na³. Coan³sjai³-le⁴.
2TI 1:18 Je² Nai³-na¹ ca²ta³ma³ma⁴que³ nca³ je² cˀia⁴ ni⁴čhjin³-ve⁴. A³li² to⁴cˀoa⁴cji³ nta³ tsa³ca³sen¹cao⁴ ya⁴ Efeso, ji³ ni¹³ xi³ nqui²sa⁴ nta³ ˀyai³.
2TI 2:1 Ji³ ˀnti¹-na⁴, chˀa⁴sjai³ nca³nˀion¹, nca⁴ Cristo Jesús tsjoa¹-li² cjoa⁴nta³.
2TI 2:2 Je² xi³ qui³no²ˀya²-nai¹³ nqui³xcon⁴ testigo xi³ ncjin² ma³-ni³, je²-vi⁴ tˀe²ne²-lai⁴ cho⁴ta⁴ xi³ tjio¹jnco³con³, xi³ cˀoa⁴-ti⁴ coan⁴-le⁴ coa⁴co²ya³-le⁴ xi³cˀa³.
2TI 2:3 Cˀoa⁴-ti⁴ ji³ chja⁴ˀai²³ cjoa⁴ñˀain³, jo³-ni³ tsa² so³nta²do⁴ xi³ nta³ fi²tˀa³-le⁴ Jesucristo.
2TI 2:4 Ni⁴jnco³-jin² xi³ so³nta²do⁴ tso²ˀva³, tjo³ˀnte³-le⁴ nca³ ca³ni¹jin³ yao³-le⁴ cjoa⁴ xi³ tjin¹ son³ˀnte³, jme¹-ni³ nca³ nta³ cˀoe⁴²-ni³con³ je² xi³ cjoa⁴so³nta²do⁴ qui³tsjoa³-le⁴.
2TI 2:5 Cˀoa⁴-ti⁴sˀin² je² xi³ si¹sca¹ li²coi³ si⁴²qui³njen³ chji¹-le⁴ tsa² tsi² nta³ si⁴²sca¹, jo³-sˀin² xi³ cjoa⁴qui²xi⁴.
2TI 2:6 Je² cho⁴ta⁴ xi³ nˀion¹ nta³ si¹xa¹ cjai¹nca³ ma³chjen¹ nca³ ti¹tjon²-cjoa²la² si¹xa¹, jme¹-ni³ nca³ cˀoa⁴-sˀin²ni³ cˀoe⁴²xco¹ ntje⁴-le⁴.
2TI 2:7 Cho¹son²-ni³lai⁴ jo³ xin³-le²³. Je² Nai³-na¹ si⁴²cho⁴ya³-li² nca³yi³je³.
2TI 2:8 Ti⁴cja³ˀai³tsjain³ tˀa³tsˀe⁴ Jesucristo xi³ ji³nčhoa³-ni³ ntje⁴-le⁴ David. Ja³ˀa²ya³jin³-ni³le⁴ cˀen³ jo³ tso² je² en¹nta³ xi³ nchja²ya³.
2TI 2:9 Xi³ tˀa³tsˀe⁴ je² en¹nta³-vi⁴ ti²fa³ˀa³ cjoa⁴ñˀain³ sa³ˀnta³ nto⁴ya¹ jo³-ni³ tsa² cho⁴ta⁴tsˀen⁴. To⁴nca³ je² en¹-le⁴ Ni³na¹ li²coi³ sˀe³chjoa²-le⁴.
2TI 2:10 Coi³ cjoa⁴ nca³yi³je³ jcho¹cjoa⁴-na³ xi³ tˀa³tsˀe⁴ je² cho⁴ta⁴ xi³ qui³tjo³jin³, jme¹-ni³ nca³ cˀoa⁴-ti⁴ je² coi⁴tjo³ntjai²-si¹ni³ xi³ to⁴tˀa³tsˀe⁴ Cristo Jesús cao⁴ cjoa⁴je³ya³ xi³ nca³ntsjai².
2TI 2:11 Ña³qui³ en¹qui²xi⁴: Tsa² cˀoa⁴-sˀin² cˀen³² ña¹ cao⁴ je², cˀoa⁴-ti⁴sˀin² coi⁴yo³choan³² ña¹ cao⁴ je².
2TI 2:12 Tsa² ti¹jcho¹cjoa⁴-na¹ cao⁴ je², cˀoa⁴-ti⁴sˀin² coa⁴te²xo³ma³² cao⁴ je². Tsa² cˀoe¹ˀma³-le⁴², cˀoa⁴-ti⁴ je² cˀoe⁴²ˀma³-na¹.
2TI 2:13 Tsa² tsi² ma³cjain¹-na¹ nca³ ña¹, to⁴jo³ si¹jnco³ nca³ je². Li²coi³ coan⁴ si⁴²cˀa³ntjai²ya³ yao³-le⁴.
2TI 2:14 Ti⁴cja³ˀai³tsjen³-lai⁴ je²-vi⁴, tˀe²ne²-lai⁴ nqui³xcon⁴ Nai³-na¹ nca³ tsi² fao¹ya³-ni³ en¹-ve⁴ xi³ ni⁴to⁴jme³-jin² chji¹-le⁴. To⁴sa³ si¹sca¹ya³-le⁴ xi³ tjio¹nčhˀoe¹.
2TI 2:15 Cjai¹nca³ nta³ ti⁴xi¹ti¹yai³, jme¹-ni³ nca³ coi⁴sen⁴jna³va³sen³-si¹ni³ nca³ nta³ coi²tjoi⁴ tˀa³tsˀe⁴ Ni³na¹, jo³-ni³ jnco³ xi³ si¹xa¹ xi³ tsi² tsa² jme³ xi³ coan⁴soa³-le⁴ nca³ nta³ si¹chjen¹ je² en¹ xi³ cjoa⁴qui²xi⁴.
2TI 2:16 Ti⁴sen⁴xin²-lai⁴ xi³ to⁴xquia⁴ na⁴jmi¹ xi³ tsi²jme³ chji¹-le⁴ tˀa³tsˀe⁴ Ni³na¹. To⁴nqui²sa⁴-sa³ cjin³ sca⁴ni² cho⁴ta⁴ nca³ tsi² scoe⁴xcon¹ Ni³na¹.
2TI 2:17 Je² en¹-le⁴ to⁴coai⁴ ca³jna³ jo³-ni³ tsa² jnco³ jtse¹. Himeneo cao⁴ Fileto tjio¹jin³-le⁴ xi³ cˀoa⁴cjoan³.
2TI 2:18 Xin² ntia⁴² qui³-le⁴ cjoa⁴qui²xi⁴. Qui³tso² nca³ je² xi³ cjoa⁴ˀa¹ya³-le⁴, je³coan³. Cˀoa⁴-sˀin² si¹sca¹ya³cˀa³-le⁴ xi³ ma³cjain¹-le⁴.
2TI 2:19 To⁴nca³ je² nca³nˀion¹-le⁴ Ni³na¹ jo³ čhjao¹ja⁴ma⁴ xi³ nˀion¹ ti¹jna³. Tjin¹-le⁴ je² choa⁴-vi⁴: Je² Nai³-na¹ ve³ jña³-le⁴ xi³ tsˀe⁴. Je² nca³tsˀi³ xi³ nchja⁴ jan³ˀain¹-le⁴ Cristo ca²ta³vi³tjo³xin²-le⁴ cjoa⁴tsˀen⁴.
2TI 2:20 Ya⁴ jnco³ ni³ˀya³ xi³ je³, a³li² tsa² tso³jmi² xi³ taon⁴si³ne² taon⁴čhoa³-jin² tjin¹, to⁴nca³ cˀoa⁴²-ti⁴ tjin¹ xi³ ya¹ xi³ ni³ˀnte³ coan³nta³-ni³. Cˀoa⁴-ti⁴sˀin² tjin¹ cˀa³ xi³ ˀya³xcoan¹ cˀoa⁴ xi³ tsi² ˀya³xcoan¹.
2TI 2:21 Tsa² jnco³ xi³ coi³ cjoa⁴ si¹tsje³-ni³ yao³-le⁴, cˀoa⁴cjoan³ jo³-ni³ tsa² cho⁴tsin¹ xi³ ˀya³xcoan¹, xi³ je³coan³tsje³, xi³ coan⁴ coan⁴chjen¹-le⁴ Nai³-na¹, nca³ ti¹jna³nta³ to⁴jme³ xa¹ xi³ nta³ tjin¹.
2TI 2:22 Ti⁴sen⁴xin²-lai⁴ cjoa⁴sca¹ya³-le⁴ xti³. Cˀoa⁴-sˀin² tˀin³coai⁴ yao³-li⁴ cao⁴ xi³ cjoa⁴qui²xi, cao⁴ xi³ ma³cjain¹-na¹, cao⁴ xi³ cjoa⁴tjao²cha³, cao⁴ xi³ cjoa⁴nchˀan¹ta³con², cao⁴ je² cho⁴ta⁴ xi³ nchja⁴-le⁴ Nai³-na¹ cao⁴ ni⁴ma⁴ xi³ tsje³.
2TI 2:23 To⁴nca³ je² xi³ si¹cjan³ˀa³-ni³ en¹-le⁴ xi¹ncjin¹ xi³ tsi²jme³ chji¹-le⁴, xi³ tsin²-le⁴ cjoa⁴chji⁴ne⁴-jin², ti²tjo⁴xin²-lai⁴. Je³ˀyai³ nca³ to⁴cjoa⁴si³ vˀe¹tsˀia⁴.
2TI 2:24 Je² cho⁴ˀnta³-le⁴ Nai³-na¹ a³li²coi³ ma³chjen¹ nca³ cho⁴ta⁴cjoa⁴si³ coan⁴, to⁴nca³ ma³chjen¹ nca³ ntˀe¹ coan⁴ xi³ tˀa³tsˀe⁴ nca³tsˀi³, nca³ ma³-le⁴ va³co¹ya³, nca³ si¹cjain¹ xi³ chˀao³ si¹cao⁴.
2TI 2:25 Cao⁴ cjoa⁴nta³ ca²ta³tso²ya³nta³-le⁴ je² xi³ va³tio²ta²ja³-le⁴, tsa² tsjoa¹-sa³le⁴ Ni³na¹ nca³ si⁴²cˀa³ntjai²ya³ cjoa⁴fa³ˀai³tsjen³-le⁴, jme¹-ni³ nca³ scoe⁴-ni³ xi³ cjoa⁴qui²xi⁴.
2TI 2:26 Cˀoa⁴-sˀin² coi⁴tjo³xin²-ni³ chen⁴-le⁴ nai⁴² je² xi³ tjio¹nˀion¹-le⁴ jo³-sˀin² me³-le⁴ nca³ je².
2TI 3:1 Je²-vi⁴ cˀoa⁴-ti⁴ ca²ta³ˀyai³ nca³ je² ni⁴čhjin³ xi³ cjoe⁴tˀa³ cjoa⁴ˀai¹-na¹ cjoa⁴ñˀain³ xi³ tse³.
2TI 3:2 Sˀe⁴ cho⁴ta⁴ xi³ to⁴yao³-le⁴ tsjoa³que³ coan⁴, xi³ chˀao³ntai³, xi³ nchja⁴tˀa³ yao³-le⁴, xi³ ncˀa³con³, xi³ chˀao³ tso²-le⁴ xi¹ncjin¹, xi³ tsˀa³ntjai²cjoa⁴que³ xi³jcha¹-le⁴, xi³ ni⁴ˀi⁴tse¹-jin² tsjoa¹ cjoa⁴nta³, xi³ tsi² tsje³ tjin¹,
2TI 3:3 xi³ tsin²-le⁴ cjoa⁴tjao²cha³-jin², xi³ si¹qui³tson¹ en¹-le⁴, xi³ va¹nqui³ cao⁴ cjoa⁴nti³so³, xi³ to⁴cja⁴ˀai¹-nca¹ sˀin¹, xi³ toan¹, xi³ taon³ ve³ xi³ nta³,
2TI 3:4 xi³ jao² ncjain¹, xi³ to⁴xquia⁴ sˀin¹, xi³ to⁴si¹xcon¹ ma³-le⁴, xi³ nqui²sa⁴ ma³tsjoa³que³ cjoa⁴sca¹ cao⁴-ni³ tsa² Ni³na¹,
2TI 3:5 xi³ ma³tsen³ jo³ xi³ ve³xcon¹ Ni³na¹, to⁴nca³ tjio¹tˀa³xin²-le⁴ nca³nˀion¹-le⁴ Ni³na¹. Je² xo⁴cjoan³-vi⁴ xi³ ti⁴sen⁴xin²-lai⁴.
2TI 3:6 Tjin¹ cˀa³ xi³ tsˀe⁴ je²-vi⁴ xi³ ma³ fa³ˀa³sˀen³che¹, si¹ntˀe¹tˀa³-le⁴ ˀnti¹ ya¹nchjin¹ xi³ cjai¹nca³ tse³ je¹ yˀa³, xi³ cja⁴ˀai¹-sa³ cjoa⁴chi⁴nca⁴ fi²cao⁴ nca³ je²,
2TI 3:7 xi³ tjio¹co³tˀa³ya³ntsjai², cˀoa⁴ ni⁴cˀia³-jin² ma³-le⁴ cjoa⁴fa³ˀai³tsjen³ xi³ cjoa⁴qui²xi⁴.
2TI 3:8 Jo³-sˀin² qui³sˀin³ Janes cao⁴ Jambres nca³ ña³qui³ tsa³ca³tio²ta²ja³-le⁴ Moisés, cˀoa⁴²-ti⁴ sˀin¹ je²-vi⁴ nca³ va³tio²ta²ja³-le⁴ xi³ cjoa⁴qui²xi⁴, cho⁴ta⁴ xi³ chˀao³ tjio¹ cjoa⁴fa³ˀai³tsjen³-le⁴, xi³ tsi² nta³ ji³tjo³ tˀa³tsˀe⁴ en¹ xi³ ma³cjain¹-na¹.
2TI 3:9 To⁴nca³ li²jme³ xi³ ti⁴coi⁴njen³-ni³le⁴, nca³ je² cjoa⁴sca¹-le⁴ jcha⁴-le⁴ nca³tsˀi³, jo³-sˀin² tsa³ˀya³-le⁴ cjoa⁴sca¹-le⁴ xi³ nqui²jao²-ve⁴.
2TI 3:10 To⁴nca³ ji³ coan³cho⁴ya³-li² je² cjoa⁴fa³ˀai³tsjen³-na⁴, jo³-sˀin² tsa³ca³co³ya²³-le²³, jo³ qui³sˀian³, jme³ xi³ tsa³cˀa³mjen³ ca²sje³, jo³-sˀin² coan³cjain¹-na³, jo³-sˀin² qui³si³-cjen¹³, jo³-sˀin² coan³tsjoa³que⁴, jo³-sˀin² qui³cho¹cjoa⁴-na³,
2TI 3:11 jo³-sˀin² tsa³qui³yo³tjen⁴nqui³ co²ntran⁴-na³, jo³-sˀin² qui³si³cja³ˀa¹-na³ cjoa⁴ñˀain³, je²-vi⁴ xi³ ja³ˀai³ne²-na³ ya⁴ Antioquía, ya⁴ Iconio, ya⁴ Listra. Coi³ cjoa⁴ñˀain³ xi³ tsa³cja³ˀa³. Nai³-na¹ tsa³cˀa³sje³ntjai²-na³ nca³yi³je³.
2TI 3:12 Cˀoa⁴ je² nca³tsˀi³ xi³ me³-le⁴ nca³ tsje³ coa⁴tio²con³tˀa³-le⁴ Cristo Jesús, cˀoa⁴-ti⁴sˀin² cjoa⁴ˀa² cjoa⁴ñˀain³.
2TI 3:13 To⁴nca³ je² cho⁴ta⁴tsˀen⁴, cˀoa⁴ je² xi³ vˀa³na⁴cha⁴ to⁴ña³qui³ to⁴sin³ to⁴nta³ nqui²sa⁴-sa³ tsˀen⁴ coan⁴, cˀoa⁴na⁴cha⁴-sa³le⁴, cˀoa⁴-ti⁴ chˀa⁴na⁴cha⁴-sa³le⁴.
2TI 3:14 To⁴nca³ ji³ nta³ tˀin³coai⁴ xi³ qui³cho²tˀa³yai³, xi³ nta³ coan³cjain¹-li², nca³ je³ˀyai³ ˀya³ xi³ tsa³ca³co¹ya³-li².
2TI 3:15 Sa³ˀnta³ nca³ ˀnti¹ ti³soi³, tsa³ˀyai³ je² xon⁴ Escritura xi³ tsˀe⁴ Ni³na¹, je² xi³ nta³ si⁴²chji⁴ne⁴-li² jo³-sˀin² coi²tjo⁴ntjai²³ xi³ to⁴tˀa³tsˀe⁴ nca³ ma³cjain¹-li² tˀa³tsˀe⁴ Cristo Jesús.
2TI 3:16 Nca³yi³je³ xon⁴ Escritura Ni³na¹ ji³nčhoa³-ni³, cˀoa⁴ cjai¹nca³ nta³ ma³chjen¹ nca³ va³co¹ya³-na¹, nca³ nchja⁴ti³cao⁴-na¹, nca³ si⁴²cho⁴ya³nta³-na¹, nca³ si⁴²qui³ncha¹ya³ntia⁴²-na¹ xi³ cjoa⁴qui²xi⁴,
2TI 3:17 jme¹-ni³ nca³ je² cho⁴ta⁴-le⁴ Ni³na¹ ña³qui³ tji¹jnco³-si¹ni³, nca³ ña³qui³ tjin¹yi³je³-le⁴ xi³ ma³chjen¹-le⁴ tˀa³tsˀe⁴ nca³yi³je³ xa¹ xi³ nta³.
2TI 4:1 Vˀe³ne²³-le²³ nqui³xcon⁴ Ni³na¹ cao⁴ Nai³-na¹ Jesucristo xi³ sˀa⁴ cˀoe⁴²nta³jin³-le⁴ xi³ tjio¹con³ cao⁴ xi³ cˀen³, nca⁴ Jesucristo coan⁴tsen³, cjoa⁴ˀai¹ ca³te¹xo³ma³.
2TI 4:2 Ti⁴no²cjoa⁴yai³ en¹-vi⁴, ti⁴xi¹ti¹yai³ nca³ntsjai² ni⁴čhjin³, ti⁴cho⁴ya³-lai⁴ ti⁴no²cjoa⁴ti³coai⁴ tˀe²ne²-lai⁴ cao⁴ nca³yi³je³ cjoa⁴tse³ta³con² cao⁴ cjoa⁴fa³ˀai³tsjen³ xi³ cˀoin¹ya³-lai⁴.
2TI 4:3 Cjoi⁴cho³ ni⁴čhjin³ nca³ tsi²coi³ si⁴²cjain¹-le⁴ xi³ nta³ cjoa⁴fa³ˀai³tsjen³, to⁴sa³ cˀoe⁴²xco¹tˀa³-le⁴ yao³-le⁴ maestro jo³-sˀin² me³-le⁴ cjoa⁴chi⁴nca⁴-le⁴, cˀoa⁴ jo³-sˀin² nca³ na³sca¹ tso²-le⁴ xo⁴ño³.
2TI 4:4 Li²coi³ coi⁴ncha²ño³-le⁴ xi³ cjoa⁴qui²xi⁴, to⁴ya⁴² coai⁴ nčhˀoe² xi³ to⁴ˀen¹.
2TI 4:5 To⁴nca³ ji³ nta³ ti⁴jna³chon³ˀntai³, ti⁴cjain¹-lai⁴ cjoa⁴ñˀain³, ti⁴xai¹³, ti⁴no²cjoa⁴yai³ tˀa³tsˀe⁴ Ni³na¹, ti⁴jncoi³ xa¹-li⁴.
2TI 4:6 Je³ti²jna⁴čhian³ cjoa⁴vi³ya³-na⁴, jo³-sˀin² vˀai²tˀa³ cjoa⁴tjao². Cjai¹nca³ choa³-sa³ ma³ ni⁴čhjin³ nca³ cjoia¹³.
2TI 4:7 Nta³ qui³si³toan¹jian³ cjoa⁴jchan¹. Qui³si³jncoa³ xa¹-na⁴. Nta³ qui³si³tjo³son²-nia³ en¹ xi³ ma³cjain¹-na¹.
2TI 4:8 Je² xi³ fe³tˀa³, ti¹jna³tjao²-na³ je² cjoa⁴qui²xi⁴ xi³ jo³-ni³ jnco³ corona, xi³ cˀia⁴ ni⁴čhjin³-ve⁴ tsjoa¹-na³ je² Nai³-na¹ xi³ vˀe¹nta³jin³ cao⁴ cjoa⁴qui²xi⁴. A³li² tsa² to⁴ˀan³-jian² xi³ tsjoa¹-na³, cˀoa⁴²-ti⁴ tsjoa¹-le⁴ nca³tsˀi³ xi³ me³-le⁴ nca³ coan⁴tsen³ nca³ je².
2TI 4:9 Ti⁴xi¹ti¹yai³ nca³ nti⁴ton⁴ nčhoa¹chon³-nai¹³.
2TI 4:10 Je² Demas qui³tsjion³-na³ nca³ coan³tsjoa³que³ cjoa⁴ xi³ tjin¹ ntˀai⁴-vi⁴. Qui³ ya⁴ Tesalónica. Crescente qui³ ya⁴ Galacia. Tito qui³ ya⁴ Dalmacia.
2TI 4:11 To⁴je² Lucas xi³ ti¹jna³cao⁴-na³. Chjoai¹³ Marcos, nčhoa¹coai⁴. Cjai¹nca³ coan⁴chjen¹-na³ xi³ tˀa³tsˀe⁴ xa¹-vi⁴.
2TI 4:12 Je² Tíquico qui³sca³nia³ ya⁴ Efeso.
2TI 4:13 Cˀia⁴ nca³ cjoi⁴nčhoai³ nčhoa¹coai⁴ je² tso⁴nca⁴ xi³ tsa³cˀe³jna²³ ya⁴ Troas ya⁴ ntˀia³-le⁴ Carpo, cao⁴ xon⁴, ti¹tjon² je² xon⁴čhjoa⁴.
2TI 4:14 Alejandro je² chji⁴ne⁴qui⁴cha⁴ a³li² to⁴cˀoa⁴cji³ taon³ tsa³ve³-na³. Je² Nai³-na¹ cˀoe⁴²chji¹-le⁴ jo³ tso² je¹-le⁴.
2TI 4:15 Cˀoa⁴-ti⁴ ti⁴coi²ntai⁴ yao³-li⁴ xi³ cao⁴ je². Cjai¹nca³ to⁴ta²ja³ tsa³cˀe²jna³-le⁴ en¹-na¹.
2TI 4:16 Cˀia⁴ nca³ ti¹tjon² qui³nchja²ntje²³ yao³-na⁴ ni⁴to⁴ˀya³-jin² xi³ tsa³qui³ncha²cao⁴-na³, to⁴sa³ qui³tsjion³-na³ nca³tsˀi³. A³li² coi²nta⁴-jin² sˀin¹-le⁴.
2TI 4:17 To⁴nca³ je² Nai³-na¹ tsa³cˀe²jna³cao⁴-na³. Qui³tsjoa³-na³ nca³nˀion¹, jme¹-ni³ nca³ to⁴tˀa³tsˀan⁴ coan⁴jnco³-si¹ni³ cjoa⁴qui²xi⁴ xi³ qui³nchja²ya³, cˀoa⁴ jme¹-ni³ nca³ nca³tsˀi³ cho⁴ta⁴ xi³ li² judío-jin² cjoi⁴nčhˀoe¹-si¹ni³. Ji²tjo⁴ntjai²-nia³ tsˀoa³ xa³.
2TI 4:18 Je² Nai³-na¹ cˀoa⁴sje³ntjai²-na³ nca³yi³je³ cjoa⁴tsˀen⁴, cˀoa⁴ cˀoe⁴²tjao²-na³ xi³ tˀa³tsˀe⁴ cjoa⁴te¹xo³ma³-le⁴ ncˀa². Ca²ta³sˀe³-le⁴ cjoa⁴je³ya³ nca³ntsjai² nca³ntsjai². Cˀoa⁴ ca²ta³ma³.
2TI 4:19 Ti⁴ti²ˀntai³ Prisca cao⁴ Aquila cao⁴ nca³tsˀi³ cho⁴ta⁴ xi³ tsˀe⁴ ntˀia³-le⁴ Onesíforo.
2TI 4:20 Erasto tsa³cˀe²jna³ ya⁴ Corinto. Je² Trófimo qui³si³-cˀe¹jna³ ya⁴ Mileto nca³ ti¹mˀen³.
2TI 4:21 Ti⁴xi¹ti¹yai³ nčhoa¹nti⁴ton⁴-ni³ nca³ cje³ chan⁴nchˀan¹-jin². Eubulo, cao⁴ Pudente, cao⁴ Lino, cao⁴ Claudia, cao⁴ ntsˀe³² nca³tsˀi³ si¹ti²ˀnta³-li².
2TI 4:22 Je² Nai³-na¹ Jesucristo ca²ta³vˀe²jna³cao⁴ ni⁴ma⁴-li⁴. Cjoa⁴nta³ ca²ta³sˀe³-no³. Cˀoa⁴ ca²ta³ma³.
TIT 1:1 An³ nia¹³ Pablo, xi³ cho⁴ˀnta³-le⁴ Ni³na¹, xi³ pa²stro⁴-le⁴ Jesucristo, jme¹-ni³ nca³ coan⁴cjain¹-si¹ni³le⁴ je² xi³ Ni³na¹ tsa³cja³ˀa¹jin³, cˀoa⁴ jme¹-ni³ nca³ scoe⁴-si¹ni³ je² cjoa⁴qui²xi⁴ xi³ va³quin²-le⁴ nca³ ve³xcon¹ Ni³na¹.
TIT 1:2 Je²-vi⁴ xi³ cˀoa⁴coan⁴ nca³ ti³cho³ya²-le⁴² cjoa⁴vi³jna³chon³ nca³ntsjai². Ni³na¹ xi³ li²coi³ vˀa³na⁴cha⁴ qui³si³sˀe³nqui³ je² cjoa⁴vi³jna³chon³-ve⁴ jo³ sa³ˀnta³ nca³ ti¹tjon² nca³ cje³ nčhoa¹-jin² son³ˀnte³.
TIT 1:3 Tsa³cˀe¹son²tsen³ en¹-le⁴ nca³ ji³cho² ni⁴čhjin³-le⁴ nca³ qui³no²cjoa⁴ya³-ni³. An³ qui³nchja²ya³ jo³-sˀin² qui³sˀe³ne²-na³, nca³ cˀoa⁴-sˀin² tsa³ca³te¹xo³ma³-na³ Ni³na¹ xi³ vˀa³sje³ntjai²-na¹.
TIT 1:4 An³ ti²cji³-le²³ ji³ Tito xi³ ˀnti¹nta³-na⁴ ma³-le²³, jo³-sˀin² nca³ ma³cjain¹-na¹ nca³tsˀia³². Ca²ta³tsjoa¹-li² cjoa⁴nta³, ca²ta³ma³ma⁴que³-li², ca²ta³si¹qui³njen³nchˀan¹jin³ ni⁴ma⁴-li⁴ je² Ni³na¹ Nˀai³-na¹, cao⁴ Nai³-na¹ Jesucristo xi³ vˀa³sje³ntjai²-na¹.
TIT 1:5 Coi³ cjoa⁴ nca³ ya⁴ qui³si³cˀe¹jna³-le²³ Creta, jme¹-ni³ nca³ cˀoe¹nta³-si¹ni³ jme³-sa³ xi³ cha³, cˀoa⁴ jme¹-ni³ nca³ si⁴qui³ncha¹-si¹ni³ xa¹ cho⁴ta⁴jchi¹nca³ ya⁴ nca³yi³je³ na⁴xi⁴na³nta¹, jo³-sˀin² tsa³cˀe³ne²³-le²³ nca³ an³.
TIT 1:6 Si⁴qui³nchai¹³ xa¹ cho⁴ta⁴jchi¹nca³ xi³ tsin²-le⁴ je¹-jin², xi³ to⁴jnco³ chjon⁴² chi³xan³cao⁴, xi³ tjin¹-le⁴ xti³-le⁴ xi³ ma³cjain¹-le⁴, xi³ tsi² ˀya³ xi³ coa⁴²nqui³ nca³ to⁴sˀin¹ to⁴ma³-ni³, a³xo⁴ nca³ tsˀa³ntjai²cjoa⁴.
TIT 1:7 Cjai¹nca³ ma³chjen¹ nca³ tsin²-le⁴ je¹-jin² je² cho⁴ta⁴jchi¹nca³ xi³ si¹coi²nta⁴ na⁴xi⁴na³nta¹-le⁴ Cristo, nca⁴ je² xi³ si¹coi²nta⁴ tˀa³tsˀe⁴ Ni³na¹. Ma³chjen¹ nca³ tsi² ncˀa³con³-jin² ma³, nca³ tsi² ma³jti³ nti⁴ton⁴-jin²le⁴, nca³ tsi² ma³chˀi⁴-jin², nca³ tsi² si¹toan¹-jin², nca³ tsi² chˀao³ntai³-jin².
TIT 1:8 To⁴nca³ ca²ta³si¹sin³-le⁴ xi³cˀa³, ca²ta³ma³tsjoa³que³ xi³ nta³ tjin¹, nta³ ca²ta³fi²cao⁴ yao³-le⁴, cho⁴ta⁴cjoa⁴qui²xi⁴ ca²ta³ma³, tsje³ ca²ta³ma³, ca²ta³cjoe¹tjao² yao³-le⁴,
TIT 1:9 nta³ ca²ta³fi²cao⁴ je² en¹ xi³ cjoa⁴qui²xi⁴, jo³-sˀin² ti¹sa³co¹ya³, jme¹-ni³ nca³ cˀoa⁴-sˀin² coan⁴-ni³le⁴ cˀoe⁴²ne² cao⁴ cjoa⁴fa³ˀai³tsjen³ xi³ nta³, cˀoa⁴ jme¹-ni³ nca³ cˀoa⁴-sˀin² si⁴²cho⁴ya³-ni³le⁴ xi³ cja⁴ˀai¹ tso².
TIT 1:10 Cjai¹nca³ to⁴tjin¹ xi³ tsˀa³ntjai²cjoa⁴, cˀoa⁴ xi³ to⁴sin³-le⁴ nchja⁴ en¹ xi³ tsi²jme³ chji¹-le⁴, cˀoa⁴ xi³ vˀa³na⁴cha⁴-le⁴ cho⁴ta⁴. Je² xi³ nqui²sa⁴ ncjin² ma³-ni³ xi³ cˀoa⁴ cjoan³, tsˀe⁴ cho⁴ta⁴ circuncisión.
TIT 1:11 Cjai¹nca³ ma³chjen¹ nca³ sˀe⁴chjoa² tsˀoa³, nca⁴ si¹sca¹ya³-le⁴ nca³tsˀi³ xi³ tjio¹ nca³ jnco³ ntˀia³, nca⁴ va³co¹ya³ xi³ tsi² tsa² ma³chjen¹, jme¹-ni³ nca³ si⁴²qui³njen³-si¹ni³ xi³ chˀao³ tjin¹.
TIT 1:12 Qui³tso² jnco³ xi³ je², xi³ ya⁴ nchja⁴-ni³ tsˀe⁴, xi³ va¹jin³con³: Je² cho⁴ta⁴ cretenses nti³so³ nca³ntsjai², jo³-ni³ tsa² cho⁴ xi³ chˀao³ cjoan³, cho⁴ta⁴ tsˀe² xi³ to⁴si¹cjen² tsˀoa⁴.
TIT 1:13 Je² en¹-vi⁴ ña³qui³ cjoa⁴qui²xi⁴-ni¹. Coi³ cjoa⁴ nˀion¹ ti⁴no²cjoa⁴ti³cao⁴-ni³, jme¹-ni³ nca³ coan⁴nta³ya³-si¹ni³ nca³ nta³ coan⁴cjain¹-le⁴,
TIT 1:14 cˀoa jme¹-ni³ nca³ tsi²coi³ si⁴²sin³-si¹ni³ en¹-le⁴ cho⁴ta⁴ judíos xi³ to⁴ˀen¹, cˀoa⁴ jme¹-ni³ nca³ tsi²coi³ si⁴²sin³-si¹ni³ cjoa⁴te¹xo³ma³-le⁴ cho⁴ta⁴ xi³ vˀa³sje³xin²-le⁴ yao³-le⁴ xi³ cjoa⁴qui²xi⁴.
TIT 1:15 Nca³yi³je³ cjoa⁴ tsa² ma³chjen¹-ni³le⁴ cho⁴ta⁴ xi³ tsje³, tsje³-ni¹. To⁴nca³ li²coi³ tsje³ nca³yi³je³ cjoa⁴ xi³ ma³chjen¹-ni³le⁴ cho⁴ta⁴ xi³ fi²tˀa³-le⁴ xi³ chˀao³ tjin¹, cˀoa⁴ xi³ ma³chjen¹-ni³le⁴ cho⁴ta⁴ xi³ tsi² tsa² ma³cjain¹-le⁴. To⁴sa³ je² ni⁴ma⁴-le⁴ cao⁴ cjoa⁴fa³ˀai³tsjen³-le⁴ fi²tˀa³-le⁴ xi³ chˀao³ tjin¹.
TIT 1:16 Cˀoa⁴²tso² nca³ ve³xcon¹ Ni³na¹, to⁴nca³ je² jña³-le⁴ xa¹ xi³ sˀin¹, cja⁴ˀai¹-sˀin² tso²ya³-ni³. Cjai¹nca³ chˀao³ cjoan³, cˀoa⁴ tsˀa³ntjai²cjoa⁴, li²jme³ chji¹-le⁴ tˀa³tsˀe⁴ xa¹ xi³ nta³ tjin¹.
TIT 2:1 To⁴nca³ ji³ ti⁴no²cjoa⁴-ni¹³ jo³-sˀin² va³quin²-le⁴ xi³ nta³ cjoa⁴fa³ˀai³tsjen³.
TIT 2:2 Cˀoa⁴tˀin²-lai⁴ cho⁴ta⁴jchi¹nca³ nca³ nta³ ca²ta³cjoe¹tjao² yao³-le⁴. Cˀoa⁴tˀin²-lai⁴ nca³ tsi² to⁴xquia⁴ sˀin¹. Nta³ cjoa⁴fa³ˀai³tsjen³ ca²ta³sˀe³-le⁴. Nta³ ca²ta³va³tio² jo³-sˀin² nca³ ma³cjain¹-le⁴, cao⁴ cjoa⁴tjao²cha³, cao⁴ cjoa⁴tse³jta³.
TIT 2:3 Je² xi³ ya¹nchjin¹ jchi¹nca³, cˀoa⁴-ti⁴sˀin² nta³ ca²ta³fi²cao⁴ yao³-le⁴. Cˀoa⁴tˀin²-lai⁴ nca³ tsi²coi³ si¹cˀa³xqui⁴ xi¹ncjin¹, nca³ tsi²coi³ si⁴²nca³ˀa³ vino yao³-le⁴. Ca²ta³va³co¹ya³ xi³ nta³ tjin¹.
TIT 2:4 Je² ya¹nchjin¹ jchi¹nca³ ca²ta³va³co¹ya³-le⁴ ya¹nchjin¹ xti³ jo³-sˀin² nta³ coai⁴cao⁴ yao³-le⁴. Tsjoa³que³ ca²ta³ma³ xˀin⁴-le⁴. Tjao²que³ ca²ta³ma³ xti³-le⁴.
TIT 2:5 Ca²ta³va³co¹ya³-le⁴ nca³ nta³ cjoa⁴fa³ˀai³tsjen³ ca²ta³sˀe³-le⁴, nca³ tsje³ ca²ta³va³tio². Nta³ ca²ta³si¹coi²nta⁴ ni³ˀya³-le⁴. Cho⁴ta⁴nta³ ca²ta³ma³. Na³nqui³ ca²ta³va³tio²-le⁴ xˀin⁴-le⁴, jme¹-ni³ nca³ tsi² ˀya³ xi³ en¹-le⁴ Ni³na¹ coi⁴nchja⁴ˀaon³-si¹ni³le⁴.
TIT 2:6 Cˀoa⁴-ti⁴sˀin² tˀe²ne²-lai⁴ je² xti³xˀin⁴ nca³ nta³ cjoa⁴fa³ˀai³tsjen³ ca²ta³sˀe³-le⁴.
TIT 2:7 Ta⁴co²cho⁴yai³ xa¹-li⁴ jña³-le⁴ nca³yi³je³ xa¹ xi³ nta³ tjin¹. Cˀia⁴ nca³ va³co²yai³, nˀion¹ nta³ ta⁴co²yai³ xi³ tsje³ tjin¹, xi³ tsi² to⁴xquia⁴ sˀin¹.
TIT 2:8 Ti⁴no²cjoai⁴ en¹ xi³ nta³. Ti⁴no²cjoai⁴ xi³ tsi² coan⁴ chˀao³ cˀoin¹-le⁴, jme¹-ni³ nca³ coan⁴soa³-si¹ni³le⁴ co²ntran⁴-li⁴, nca³ ni⁴to⁴jme³-jin² xi³ chˀao³ tjin¹ xi³ coan⁴ coi⁴tso⁴ tˀa³tsaon³.
TIT 2:9 Tˀe²ne²-lai⁴ cho⁴ˀnta³ nca³ na³nqui³ ca²ta³va³tio²-le⁴ nai³-le⁴. Nta³ ca²ta³ma³tsjoa³cao⁴-le⁴ nca³yi³je³ xa¹-le⁴ nai³-le⁴. A³li² cjen³nqui²ˀa³-jin².
TIT 2:10 A³li² si¹che¹tˀa³-jin²le⁴ nai³-le⁴, to⁴sa³ ña³qui³ nta³ ca²ta³fi²tˀa³-le⁴, jme¹-ni³ nca³ si¹nˀion¹tˀa³con³-si¹ni³ cao⁴ nca³yi³je³ xa¹-le⁴ je² cjoa⁴fa³ˀai³tsjen³-le⁴ Ni³na¹ xi³ vˀa³sje³ntjai²-na¹.
TIT 2:11 Nca⁴ coan³tsen³ je² cjoa⁴nta³-le⁴ Ni³na¹ xi³ vˀa³sje³ntjai² nca³tsˀi³ cho⁴ta⁴.
TIT 2:12 Ti¹va³co¹ya³-na¹, jme¹-ni³ nca³ chja⁴ˀa²xin²-si¹ni³le⁴² yao³-na¹ nca³yi³je³ cjoa⁴ xi³ tsi² ve³xcon¹ Ni³na¹, cˀoa⁴ jme¹-ni³ nca³ chja⁴ˀa²xin²-si¹ni³le⁴² yao³-na¹ nca³yi³je³ cjoa⁴chi⁴nca⁴-le⁴ son³ˀnte³, cˀoa⁴ jme¹-ni³ nca³ nta³ coi⁴yo³-si¹nia³² son³ˀnte³-vi⁴ ntˀai⁴-vi⁴. Ti¹va³co¹ya³-na¹ jme¹-ni³ nca³ nta³ cjoin¹cao⁴-si¹nia³² yao³-na¹, jme¹-ni³ nca³ cho⁴ta⁴cjoa⁴qui²xi⁴ coan⁴-si¹nia³², jme¹-ni³ nca³ coi⁴yo³chon³tˀa³-si¹ni³le⁴² Ni³na¹.
TIT 2:13 Ti³cho³ya²-le⁴² xi³ cjai¹nca³ to⁴nta³ cjoa⁴nta³, cˀia⁴ nca³ coan⁴tsen³ cjoa⁴je³ya³-le⁴ je² Ni³na¹ xi³ nˀion¹ ncˀa³, xi³ vˀa³sje³ntjai²-na¹, xi³ ti⁴je²-ni³ Jesucristo.
TIT 2:14 Jesucristo qui³tsjoa³ yao³-le⁴ xi³ to⁴tˀa³tsan⁴², jme¹-ni³ nca³ cˀoa⁴-sˀin² tsa³cˀe¹chji¹ntjai²-si¹ni³ nca³yi³je³ je¹-na¹, jme¹-ni³ nca³ qui³si³tsje³ya³-si¹ni³ xi³ tˀa³tsˀe⁴ yao³-le⁴ jnco³ na⁴xi⁴na³nta¹ xi³ ña³qui³ tsˀe⁴. Je² na⁴xi⁴na³nta¹-ve⁴ si¹xi¹ti¹ya³-le⁴ yao³-le⁴ tˀa³tsˀe⁴ xa¹ xi³ nta³ tjin¹.
TIT 2:15 Je²-vi⁴ ti⁴no²cjoai⁴, tˀe²ne²-lai⁴, ti⁴no²cjoa⁴ti³coai⁴, jo³-sˀin² nca³ tjin¹-li² ˀnte³. A³li² vˀai²ˀnte³-jin²lai⁴ ˀya³ xi³ cˀoa⁴sje³nqui³-li².
TIT 3:1 Ti⁴cja³ˀai³tsjen³-lai⁴ nca³ na³nqui³ ca²ta³va³tio²-le⁴ cho⁴ta⁴ti¹tjon² cao⁴ cho⁴ta⁴xa¹, ca²ta³si¹tjo³son²-le⁴, ca²ta³va³tio²nta³ to⁴jme³ xa¹-ni³ xi³ nta³.
TIT 3:2 Ti⁴cja³ˀai³tsjen³-lai⁴ nca³ tsi² ca²ta³nchja⁴ˀaon³-le⁴ cho⁴ta⁴, a³li² cjan¹-jin², to⁴ntˀe¹ to⁴ˀi³nta³jin³ ca²ta³ma³ cao⁴ nca³tsˀi³ cho⁴ta⁴.
TIT 3:3 Cˀoa⁴-ti⁴ ña¹ nca³sˀa⁴ cjai¹ qui³cha³-na¹ cjoa⁴fa³ˀai³tsjen³, tsˀa³ntjai²cjoa⁴ coan³², to⁴xin² qui³cha³ni²-na¹, qui³ni²chjen¹ xi³ to⁴cjoa⁴chi⁴nca⁴ cao⁴ xi³ to⁴cjoa⁴sca¹ya³. Cjoa⁴tsˀen⁴ cao⁴ cjoa⁴xin²ta³con² tsa³qui³yo²coa⁴². Cho⁴ta⁴ coan³jti³que³-na¹. Ña¹ coan³jti³cha³² nca³ˀi⁴ nca³jan¹ xi²nquia⁴².
TIT 3:4 To⁴nca³ cˀia⁴ nca³ coan³tsen³ cjoa⁴nta³ xi³ tsˀe⁴ Ni³na¹ xi³ vˀa³sje³ntjai²-na¹, cao⁴ cjoa⁴tjao²cha³-le⁴ xi³ tˀa³tsˀe⁴ cho⁴ta⁴,
TIT 3:5 tsˀa³sje³ntjai²-na¹, a³li² coi³-jin² to⁴tˀa³tsˀe⁴-jin² xa¹ xi³ nta³ qui³nˀian². To⁴coi³ nca³ coan³ma⁴que³-na¹ tsˀa³sje³ntjai²-na¹, nca³ qui³si³tsje³ya³-na¹ jo³ xi³ nqui²jnco³cˀa² qui³tsian⁴², nca³ je² Espíritu Santo qui³si³cho⁴tse⁴ya³-na¹.
TIT 3:6 Xi³ to⁴tˀa³tsˀe⁴ Jesucristo xi³ tsa³cˀa³sje³ntjai²-na¹, Ni³na¹ cjai¹nca³ tse³ qui³tsjoa³jin³ ni⁴ma⁴-na¹ je² Espíritu Santo,
TIT 3:7 jme¹-ni³ nca³ cˀoa⁴-sˀin² sˀe⁴-si¹ni³na¹ cjoa⁴tjao², jo³-sˀin² ti³cho³ya²-le⁴² cjoa⁴vi³jna³chon³ nca³ntsjai², nca⁴ je³tˀa³ je¹-na¹ xi³ to⁴tˀa³tsˀe⁴ cjoa⁴nta³-le⁴.
TIT 3:8 En¹ xi³ cjoa⁴qui²xi⁴ je²-vi⁴. Me³-na³ nca³ nˀion¹ nta³ si⁴qui²xi⁴yai³ je² cjoa⁴-vi⁴, jme¹-ni³ nca³ nta³ si⁴²sin³-si¹ni³le⁴ xa¹ xi³ nta³ tjin¹ je² cho⁴ta⁴ xi³ je³coan³cjain¹-le⁴ tˀa³tsˀe⁴ Ni³na¹. Cjai¹nca³ nta³ je² cjoa⁴-vi⁴, cˀoa⁴ cjai¹nca³ nta³ ma³chjen¹-le⁴ nca³tsˀi³ cho⁴ta⁴.
TIT 3:9 Chja⁴ˀa²xin²-lai⁴ yao³-li⁴ cjoa⁴sca¹ xi³ fao¹ya³-ni³ cho⁴ta⁴. Chja⁴ˀa²xin²-lai⁴ yao³-li⁴ je² xi³ si¹cˀa³xqui⁴ cho⁴ta⁴jchi¹nca³co²tse³-li⁴, cao⁴ cjoa⁴si³, cao⁴ cjoa⁴cho³va²ti³ya³-ni³ tˀa³tsˀe⁴ cjoa⁴te¹xo³ma³. Ni⁴to⁴jña³-jin² ma³chjen¹ je² cjoa⁴-vi⁴, ni⁴jme³-jin² chji¹-le⁴.
TIT 3:10 Ti⁴sen⁴xin²-lai⁴ je² cho⁴ta⁴ xi³ si¹xcoa⁴ya³ cho⁴ta⁴, cˀia⁴ nca³ qui³ni²cho⁴ya³ jnco³jao²cˀa²-lai⁴.
TIT 3:11 Je³ve³-le⁴ to³coin²³ nca³ je² cho⁴ta⁴-ve⁴ to⁴sca¹ya³-le⁴, va³jnqui³ je¹, tsjoa¹-le⁴ cjoa⁴ñˀain³ yao³-le⁴.
TIT 3:12 Cˀia⁴ nca³ si³ca³sen¹-le²³ Artemas, a³xo⁴ Tíquico, ti⁴xi¹ti¹yai³ nca³ nčhoa¹nčhˀoe²-nai¹³ nca³ an³ ya⁴ Nicópolis, nca⁴ qui³sco³son²-le⁴ nca³ ya⁴ cjoa²ˀa⁴toa³ chan⁴nchˀan¹.
TIT 3:13 Ti⁴sen⁴coai⁴ nca³ nti⁴ton⁴ coai⁴-sa³ Zenas xi³ ve³ cjoa⁴te¹xo³ma³, cao⁴ Apolos. Ti⁴coi²ntai⁴ nca³ tsi² tsa² jme³ xi³ cha³-le⁴.
TIT 3:14 Cˀoa⁴-ti⁴sˀin² ca²ta³co³tˀa³ya² xi³ tsan⁴² cho⁴ta⁴, nca³ nta³ ca²ta³si¹sin³-le⁴ xa¹ xi³ nta³ tjin¹, jme¹-ni³ nca³ coi⁴ncha³cao⁴-si¹ni³ je² xi³ ma³chjen¹-le⁴, jme¹-ni³ nca³ coan⁴ncjin²ya³-si¹ni³le⁴ cjoa⁴nta³-le⁴.
TIT 3:15 Je² nca³tsˀi³ xi³ tjio¹cao⁴-na³ si¹ti²ˀnta³-li². Cˀoa⁴-ti⁴sˀin² ti⁴ti²ˀntai³ je² xi³ tjao²que³-na¹, nca³ ma³cjain¹-na¹. Ca²ta³sˀe³-no³ cjoa⁴nta³ nca³tsˀio³. Cˀoa⁴ ca²ta³ma³.
PHM 1:1 An³ nia¹³ Pablo, xi³ ti²jna⁴ nto⁴ya¹ xi³ tˀa³tsˀe⁴ Jesucristo. An³ cao⁴ ntsˀe³² Timoteo ti³chji³-lai²⁴jin⁴ Filemón. Tjao²cha³-lai²⁴jin⁴ nca³ ni²xa¹coa⁴² xi²nquia⁴².
PHM 1:2 Cˀoa⁴-ti⁴ ti³chji³-lai²⁴jin⁴ Apia xi³ tjao²chai³⁴-jin⁴, cao⁴ Arquipo xi³ to⁴jncoa³² so³nta²do⁴-le⁴ Ni³na¹, cao⁴ cho⁴ta⁴-le⁴ Cristo xi³ ma³ña³ ni³ˀya³-li⁴.
PHM 1:3 Je² Ni³na¹ Nˀai³-na¹ cao⁴ Nai³-na¹ Jesucristo ca²ta³tsjoa¹-no³ cjoa⁴nta³, ca²ta³si¹qui³njen³nchˀan¹jin³ ni⁴ma⁴-no³.
PHM 1:4 Cˀia⁴ nca³ vˀe³tsˀoa²³, nca³ntsjai² tsjoa³-le⁴ cjoa⁴nta³ Ni³na¹-na⁴, nca³ si³cja³ˀai³tsjen³-le²³ nca³ ji³.
PHM 1:5 Tsjoa³-le⁴ cjoa⁴nta³ nca³ nčˀoe³-nia¹³ jo³-sˀin² tjao²chai³, jo³-sin² ma³cjain¹-li² tˀa³tsˀe⁴ Nai³-na¹ Jesús, cˀoa⁴ tˀa³tsˀe⁴ nca³tsˀi³ cho⁴ta⁴-le⁴ Cristo.
PHM 1:6 Vˀe³tsˀoa²³ jme¹-ni³ nca³ coan⁴chjen¹-si¹ni³ je² cjoa⁴nta³ xi³ vˀai² nca³ ma³cjain¹-li², jme¹-ni³ nca³ coan⁴tsen³-si¹ni³ nca³yi³je³ cjoa⁴nta³ xi³ tjin¹-no³ tˀa³tsˀe⁴ Cristo Jesús.
PHM 1:7 Cjai¹nca³ tse³ cjoa⁴tsjoa³ cao⁴ cjoa⁴ma⁴ta³con² tjin¹-na³jin⁴ xi³ to⁴tˀa³tsˀe⁴ cjoa⁴tjao²cha³-li⁴, nca⁴ je³qui³njen³nchˀan¹jin³ ni⁴ma⁴-le⁴ cho⁴ta⁴-le⁴ Cristo, xi³ to⁴tˀa³tsi⁴, ˀnti¹ntsˀe³.
PHM 1:8 Nta³ tsa² cjai¹nca³ ma³nˀion¹coan³ cao⁴ Cristo nca³ vˀe³ne²³-le²³ jme³ xi³ ma³chjen¹,
PHM 1:9 coi³ nca³ tjao²cha³² xi²nquia⁴², to⁴sa³ vˀe³tsˀoa²³-le²³, jo³-sˀin² cjoan³ nca³ an³, xi³ Pablo jchi¹nca³, nca³ ntˀai⁴-vi⁴ nto⁴ya¹ ti²jna⁴ xi³ tˀa³tsˀe⁴ Jesucristo.
PHM 1:10 Cˀoa⁴-sˀin² vˀe³tsˀoa²³-le²³ xi³ tˀa³tsˀe⁴ ˀnti¹-na⁴ Onésimo xi³ qui³si³jcha¹³ i⁴ ya³nto⁴ya¹.
PHM 1:11 Je² xi³ nca³sˀa⁴ ni⁴to⁴jña³-jin² coan³chjen¹-li², to⁴nca³ ntˀai⁴-vi⁴ntai⁴ cji³ma³chjen¹-na¹ nca³ joa².
PHM 1:12 Je² xi³ cˀoa⁴-sˀin² si³ca³sen¹nqui²ntia³-le²³. Jo³-ni³ tsa² an³, cˀoa⁴-sˀin² ti⁴sin³-lai⁴.
PHM 1:13 Me³-na³ tsa²cai³, nca³ i⁴ cˀoe¹jna³cao⁴-na³, jme¹-ni³ nca³ je² coan⁴chjen¹-si¹ni³na³ nca³jao³⁴-li⁴ nca³ ji³ ntˀai⁴-vi⁴ nca³ ti²jna⁴ˀya³ nto⁴ya¹ to⁴tˀa³tsˀe⁴ je² en¹nta³ xi³ tˀa³tsˀe⁴ Cristo.
PHM 1:14 To⁴nca³ ni⁴to⁴jme³-jin² xi³ to⁴ˀan³ cˀoa⁴qui³sˀian³, tsa² tsi² cˀoa⁴-sˀin² coan³me³-li² nca³ ji³, jme¹-ni³ nca³ je² cjoa⁴nta³-li⁴ a³li² to⁴cjoa⁴nˀion¹-jin² sˀe⁴-si¹ni³. To⁴ji³ xi³ cˀoa⁴-sˀin² coan³me³-li².
PHM 1:15 Jo³-la²ni³ tsa² coi³ cjoa⁴ nca³ coan³cjin³tˀa³-li² jo³ tjin¹ ni⁴čhjin³, jme¹-ni³ nca³ chjoe¹tjao²-si¹ni³ nca³ntsjai².
PHM 1:16 A³li²coi³ ti⁴cˀoa⁴-sˀin²ni³ jo³-ni³ tsa² cho⁴ˀnta³ chjoe¹-tjoai²³, to⁴nqui²sa⁴ ncˀa³ cao⁴-ni³ tsa² cho⁴ˀnta³, jo³-ni³ tsa² ntsˀai³ xi³ tsjoa³chai³. A³li² to⁴tsˀan⁴-jian² ntsˀe³, to⁴nca³ nqui²sa⁴ nˀion¹ ntsˀai³ ma³-ni³ nca³ ji³. Ntsˀe³² cho³va² cao⁴ yao³-na¹, cˀoa⁴-ti⁴ tˀa³tsˀe⁴ Nai³-na¹.
PHM 1:17 Tsa² cˀoa⁴-sˀin² mi²yo⁴ cho³va², chjoe¹tjoai² jo³-ni³ tsa² an³.
PHM 1:18 Tsa² jña³-ve⁴ taon³ tsa³ve³-li², tsa² qui³tjen⁴-le⁴ tsi⁴, tˀai²tˀain³-nai¹³ coi²nta⁴.
PHM 1:19 An³ Pablo ntsa⁴ qui³squi³-nia³, an³ cˀoe³chja¹³. A³li²coi³ cˀoa⁴xin¹-le²³ nca³ nqui²sa⁴ tse³ qui³tjen⁴-li² cjoa⁴vi³jna³chon³-li⁴ xi³ tˀa³tsˀan⁴.
PHM 1:20 Jaon³, ntsˀe³, ca²ta³ma³tsjoa³ya³-na³ tˀa³tsi⁴ nca³ ti³yo³coa⁴² Nai³-na¹. Ti⁴qui³njen³nchˀan¹yai³ ni⁴ma⁴-na⁴ nca³ ti³yo³coa⁴² Nai³-na¹.
PHM 1:21 Qui³squi³-le²³ nca³ ˀve³ nca³ si⁴tjo³son²-nai¹³. ˀve³-nia¹³ nca³ nqui²sa⁴ tse³-sa³ cˀoa⁴sˀiain⁴ jo³-sˀin² ti²xin³-le²³.
PHM 1:22 Cˀoa⁴-ti⁴sˀin², ti⁴chon³nta³-nai¹³ ˀnte³ jña³ coa²te⁴jna³. An³ co³ya²-le⁴ nca³ to⁴tˀa³tsˀe⁴ nca³ ti³vˀe²tsˀoao⁴³, cjoi³cho³nčhˀoe²-no³.
PHM 1:23 Si¹ti²ˀnta³-li² Epafras, je² mi²yo⁴-na⁴ i⁴ nto⁴ya¹-vi⁴ to⁴tˀa³tsˀe⁴ Cristo Jesús.
PHM 1:24 Cˀoa⁴-ti⁴ si¹ti²ˀnta³-li² Marcos, Aristarco, Demas, cao⁴ Lucas, xi³ to⁴jnco³ si¹xa¹cao⁴-na³.
PHM 1:25 Je² cjoa⁴nta³-le⁴ Nai³-na¹ Jesucristo ca²ta³sˀe³-le⁴ ni⁴ma⁴-no³. Cˀoa⁴ ca²ta³ma³.
HEB 1:1 Ni⁴čhjin³co²tse³ a³li² cˀoa⁴cji³ ncjin² cˀa³ Ni³na¹ tsa³cja¹cao⁴ nˀai³jcha¹cjin³-na¹. Qui³si³chjen¹ cho⁴ta⁴ xi³ qui³nchja⁴ya³jin³-le⁴ nˀai³jcha¹cjin³-na¹ tˀa³tsˀe⁴. Cja⁴ˀai¹ cja⁴ˀai¹-sˀin² qui³nchja⁴.
HEB 1:2 Je² ni⁴čhjin³ xi³ sˀa⁴ ja³ˀa³to³ Ni³na¹ qui³nchja⁴cao⁴-na¹. Qui³si³chjen¹ je² ˀnti¹-le⁴ nca³ tsa³cja¹cao⁴-na¹. Ni³na¹ tsa³ca³sen¹nta³ je² ˀnti¹-le⁴ nca³ tsjoa¹cjoa⁴tjao²-le⁴ nca³yi³je³. Cao⁴ nca³ je² tsa³cˀe¹nta³-ni³ je² son³ˀnte³-vi⁴.
HEB 1:3 Ti⁴je²-ni³ Jesucristo xi³ qui³si³cˀa³tsen³ cjoa⁴je³ya³-le⁴ Ni³na¹. Cˀoa⁴-ti⁴ cjoan³-ni³ Cristo ti⁴je²-ni³ sen¹-le⁴ jo³ cjoan³ Ni³na¹. Cˀoa⁴ je² Cristo va³sen²nˀion¹-ni³ nca³yi³je³ cjoa⁴ cao⁴ en¹ xi³ tsˀe⁴ nca³nˀion¹-le⁴. Cˀia⁴ nca³ je³qui³si³tsje³ je¹-na¹, tsa³cˀe²jna³tˀa³-le⁴ ntsja³ nca³ qui²xi⁴ je² xi³ ti¹jna³je³ya³ ncˀa³jmi³.
HEB 1:4 Cristo nqui²sa⁴ ti¹tjon² coan³ cao⁴-ni³ tsa² a²ncje⁴, nca⁴ qui³tsˀai²-le⁴ jnco³ jan³ˀain¹ xi³ nqui²sa⁴ ncˀa³ cao⁴-ni³ tsa² tsˀe⁴ a²ncje⁴.
HEB 1:5 Ni³na¹ a³ cˀoa⁴qui³tso²-le⁴ a²ncje⁴ jnco³ cˀa²: Ji³ ni¹³ ˀnti¹-na⁴. Ntˀai⁴-vi⁴ ji³ xi³ cˀoa⁴-sˀin² ˀnti¹-na⁴ xin³-le²³. Nqui²jnco³cˀa²: An³ coan⁴ Nˀai³-le⁴, cˀoa⁴ je² coan⁴ ˀnti¹na⁴.
HEB 1:6 Cˀia⁴ nca³ va³sen¹va³sen³ je² ˀnti¹tjon² i⁴ son³ˀnte³, nqui²jnco³cˀa² tso²: Nca³tsˀi³ a²ncje⁴-le⁴ Ni³na¹, ca²ta³ve³xcon¹ nca³ je².
HEB 1:7 Xi³ tˀa³tsˀe⁴ a²ncje⁴ tso²: Je² xi³ cˀoa⁴sˀin¹ a²ncje⁴-le⁴ nca³ to⁴jo³ espíritu cjoan³, cˀoa⁴ je² xi³ cˀoa⁴sˀin¹ cho⁴ˀnta³-le⁴ nca³ to⁴jo³ ni⁴jen⁴lˀi¹ cjoan³.
HEB 1:8 To⁴nca³ xi³ tˀa³tsˀe⁴ ˀnti¹-le⁴ tso²: Je² ya¹xi²le⁴-li⁴, Ji³ Ni³na¹, jo³ nca³ntsjai² nca³ntsjai². Je² ni³se³-le⁴ cjoa⁴te¹xo³ma³-li⁴, ni³se³ xi³ ntia⁴²qui²xi⁴ yˀa³.
HEB 1:9 Coan³tsjoa³chai³ xi³ ntia⁴²qui²xi⁴, cˀoa⁴ coan³jti³chai³ xi³ chˀao³ tjin¹. To⁴coi³ Ni³na¹, je² Ni³na¹-li⁴, nqui²sa⁴ nˀion¹ tse³ cjoa⁴tsjoa³ xi³ qui³tsjoa³-li² cao⁴-ni³ tsa² mi²yo⁴-li⁴.
HEB 1:10 Cˀoa⁴tso²: Ji³, Nai³-na¹, sa³ˀnta³ to²tsˀin³-le⁴ cjoa⁴ qui³ni²ntai³ son³ˀnte³, cˀoa⁴ ncˀa³jmi³ tsa³cˀe²nta³-ni³ ntsai⁴.
HEB 1:11 Je² son³ˀnte³ cao⁴ ncˀa³jmi³ coi⁴xo⁴ya³, to⁴nca³ ji³ to⁴jo³ coi⁴jna³ntsjai²-ni³. Son³ˀnte³ cao⁴ ncˀa³jmi³ coan⁴jchi¹nca³-ni¹ jo³-ni³ tsa² na³jño³.
HEB 1:12 Cˀoa⁴ cjoa¹xco¹yai³ jo³-ni³ na³jño³jnčho³. Cˀoa⁴-sˀin² cˀoa⁴ntjai²ya³ jo³-ni³ na³jño³. To⁴nca³ ji³ to⁴jo³ ti⁴ji³-ni³, cˀoa⁴ je² no¹-li⁴ a³li² cˀia³ cjoe⁴tˀa³.
HEB 1:13 Ni³na¹ a³ cˀoa⁴qui³tso²-le⁴ a²ncje⁴ jnco³ cˀa²: Ti⁴jnai³ nca³ qui²xi⁴-na⁴, sa³ˀnta³ nca³ je² xi³ jti³que³-li² coa³tio³nquia³ ntso⁴coi³ jo³-ni³ ya¹te³ xi³ vi³ncha³nai²³.
HEB 1:14 A³ tsi² tsa² je² nca³tsˀi³ a²ncje⁴ xi³ espíritu xi³ si¹xa¹, xi³ ni²ca³sen¹ nca³ si¹xa¹-le⁴ je² xi³ cˀoai⁴cjoa⁴tjao²-le⁴ cjoa⁴vi³tjo³ntjai².
HEB 2:1 Coi³ je²-vi⁴, tjin¹ne²-na¹ nca³ nqui²sa⁴ nta³ coa⁴sen²sian³² je² cjoa⁴ xi³ qui³no²ˀya², jme¹-ni³ nca³ tsi² tsa² xin² ntia⁴² coan⁴nquin¹-si¹nia³².
HEB 2:2 Tsa² coan³qui²xi⁴ je² en¹ xi³ qui³tso² je² a²ncje⁴, cˀoa⁴ tsa² qui³tsˀai²-le⁴ cjoa⁴ñˀain³ xi³ tsa³quin²-le⁴ nca³tsˀi³ xi³ tsˀa³ntjai²cjoa⁴, xi³ tsi² qui³si³tjo³son²,
HEB 2:3 jo¹-sˀin² coi²tjo⁴ntje² nca³ ña¹, tsa² tsi² ma³cjain¹-na¹ cjoa⁴-le⁴ cjoa⁴vi³tjo³ntjai² xi³ nˀion¹ tse³. Je² Nai³-na¹ coan³ti¹tjon² nca³ qui³nchja⁴ya³ tˀa³tsˀe⁴ je² cjoa⁴vi³tjo³ntjai². Je² xi³ qui³nčhˀoe¹-le⁴, je²-vi⁴ qui³si³qui²xi⁴ya³-na¹.
HEB 2:4 Ni³na¹ to⁴jnco³ cao⁴ je² qui³tsjoa³ en¹-le⁴, cao⁴ choa⁴, cao⁴ cjoa⁴xcon¹, cˀoa⁴ cao⁴ cjoa⁴xcon¹ xi³ cja⁴ˀai¹nca¹ tjin¹. Cˀoa⁴ qui³tsjoa³cjoa⁴tjao² je² Espíritu Santo xi³ Ni³na¹ qui³si³cˀa³vi¹son²-le⁴ jo³-sˀin² nca³ me³-le⁴.
HEB 2:5 Nca⁴ tsi² tsa² je² a²ncje⁴ xi³ Ni³na¹ na³nqui³ tsa³cˀe¹jna³-le⁴ je² son³ˀnte³ xi³ cjoa⁴ˀai¹, coi³ xi³ cho³va¹-nia¹.
HEB 2:6 To⁴nca³ tjin¹ xi³ qui³tsjoa³ en¹-le⁴ ya⁴ jnco³ ˀnte³, qui³tso²: Jme¹-ni³ve⁴ chji¹-le⁴ cho⁴ta⁴, nca³ fa³ˀai³tsjen³-ni³li² tˀa³tsˀe⁴, a³xo⁴ je² ˀnti¹-le⁴ cho⁴ta⁴, nca³ ˀmi³ cho¹tsen³-lai⁴.
HEB 2:7 Ji³ cˀoa⁴-sˀin² to⁴jnco³ tjo² nqui²sa⁴ na³nqui³ tsa³cˀe²jna³-lai⁴ cao⁴-ni³ tsa² je² a²ncje⁴. Qui³tsˀai²-lai⁴ cjoa⁴je³ya³ cao⁴ cjoa⁴ncˀa³ jo³-ni³ tsa² corona-le⁴. Cˀoa⁴ qui³ni²cˀe¹jna³tˀain³-lai⁴ xa¹-le⁴ ntsai⁴.
HEB 2:8 Cˀoa⁴ nca³yi³je³ cjoa⁴ qui³ni²cˀe¹jna³nqui³-lai⁴ nqui³ntso⁴co⁴. Cˀia⁴ nca³ na³nqui³ tsa³cˀe¹jna³-le⁴ nca³yi³je³ cjoa⁴, ni⁴jme³-jin² xi³ tsa³cˀe¹jna³ xi³ tsi² tsa² na³nqui³ qui³sˀe³jna²-le⁴ nca³ je². To⁴nca³ to⁴jo³ li²coi³ ˀya³² nca³ tjio¹³nqui³-le⁴ nca³tsˀi³, cˀoa⁴ nca³yi³je³ cjoa⁴.
HEB 2:9 To⁴nca³ ˀya³-nia¹ je² Jesús xi³ qui³tsˀai²-le⁴ cjoa⁴je³ya³ cao⁴ cjoa⁴ncˀa³ jo³-ni³ tsa² corona-le⁴, nca⁴ tsa³cja³ˀa¹ cjoa⁴ñˀain³ nca³ cˀen³. Je² Jesús xi³ to⁴jnco³ tjo² nqui²sa⁴ na³nqui³ coan³ cao⁴-ni³ tsa² a²ncje⁴, jme¹-ni³ nca³ to⁴cjoa⁴nta³-le⁴ Ni³na¹ qui³sco²tˀa³-si¹ni³ cjoa⁴vi³ya³ xi³ tˀa³tsˀe⁴ nca³tsˀi³.
HEB 2:10 Cˀoa⁴-sˀin² tjin¹ nca³yi³je³ xi³ tˀa³tsˀe⁴ Ni³na¹. Je² xi³ tsa³cˀe¹nta³ nca³yi³je³. Cˀoa⁴-sˀin² tsa³quin²-le⁴ Ni³na¹, cˀia⁴ nca³ ja³ˀai³cao⁴ ncjin² xti³ xi³ vˀa³cao⁴-le⁴ cjoa⁴je³ya³-le⁴, nca³ ña³qui³ qui³si³jnco³-ni³ cao⁴ cjoa⁴ñˀain³ je² xi³ nca³jco⁴-le⁴ cjoa⁴vi³tjo³ntjai²-le⁴.
HEB 2:11 Je² Jesús xi³ si¹tsje³, cˀoa⁴ je² cho⁴ta⁴-le⁴ xi³ ti¹ni²tsje³, nca³tsˀi³ tsˀe⁴ to⁴jnco³ je² Ni³na¹. Coi³ li²coi³ ma³soa³-le⁴ Jesús nca³ ntsˀe⁴ tso²-le⁴.
HEB 2:12 Cˀoa⁴tso²: Coi³nchja²ya³-ni³le⁴ ntsˀe³ je² jan³ˀain¹-li⁴, ya⁴jin³-le⁴ cho⁴ta⁴-na⁴ cˀoa³sje³nta³-le²³.
HEB 2:13 Nqui²jnco³cˀa² tso²: An³ nta³ nˀion¹tˀa³coan³ nca³ je². Cˀoa⁴ nqui²jnco³cˀa² tso²: Coe⁴-ni³, an³ cao⁴ je² xti³ xi³ qui³tsjoa³-na³ Ni³na¹.
HEB 2:14 To⁴jo³-sˀin² nca³ je² xti³ qui³sˀe³-le⁴ yao³ cao⁴ njin¹, cˀoa⁴-ti⁴sˀin² qui³sˀe³-le⁴ nca³ je² xi³ ti⁴coi³-ni³, jme¹-ni³ nca³ si⁴²cje³tˀa³-si¹ni³, to⁴tˀa³tsˀe⁴ cjoa⁴vi³ya³-le⁴, je² xi³ tsa³ca³te¹xo³ma³ cjoa⁴vi³ya³, xi³ coi³ nai⁴²,
HEB 2:15 cˀoa⁴ jme¹-ni³ nca³ cˀoa⁴-sˀin² si⁴²ca³tio¹ntai¹-ni³ je² xi³ tsa³ca³tio²xcon¹ nca³ qui³tsa³cjon¹-le⁴ cjoa⁴vi³ya³ jo³ tjin¹ ni⁴čhjin³ tsa³ca³tio²con³.
HEB 2:16 Xi³ cjoa⁴qui²xi⁴ Jesús li²coi³ qui³scoe¹ a²ncje⁴ nca³ cˀoa⁴sje³ntjai², to⁴nca³ qui³scoe¹ ntje⁴-le⁴ Abraham nca³ cˀoa⁴sje³ntjai².
HEB 2:17 To⁴coi³ nca³ ña³qui³ coan³chjen¹-le⁴ nca³ cˀoa⁴ cjoan³ jo³ cjoan³ ntsˀe⁴, to⁴nca³yi³je³-ni³ cjoa⁴, jme¹-ni³ nca³ cˀoa⁴sˀin² coan⁴-si¹ni³ na⁴ˀmi³ti¹tjon² xi³ tjin¹-le⁴ cjoa⁴ma⁴ta³con², xi³ nta³ si¹tjo³son² nca³yi³je³ jña³-le⁴ xi³ tsˀe⁴ Ni³na¹, nca³ cˀoe⁴²chji¹ntjai² je¹-le⁴ cho⁴ta⁴.
HEB 2:18 Jo³-sˀin² nca³ ti⁴je²-ni³ qui³cho²tˀa³ nca³ tsa³cja³ˀa¹ cjoa⁴ñˀain³, cˀoa⁴-ti⁴sˀin² ma³-le⁴ va³sen¹cao⁴ je² xi³ cho¹tˀa³-ni³ cjoa⁴ñˀain³.
HEB 3:1 To⁴coi³ ntsˀe³ xi³ tsje³ cjoaon³, jon² xi³ cˀoa⁴-ti⁴ tsa³cja³ˀa¹jin³-no³ xi³ tˀa³tsˀe⁴ ntia⁴² xi³ tsˀe⁴ ncˀa³jmi³, nta³ ti⁴cja³ˀai³tsjen³jion³ xi³ tˀa³tsˀe⁴ je² Cristo Jesús xi³ pa²stro⁴-le⁴, cˀoa⁴ na⁴ˀmi³ti¹tjon²-le⁴ je² cjoa⁴ xi³ ni²qui²xi⁴ya³nta³-nia¹.
HEB 3:2 Je² xi³ nta³ si¹tjo³son²-le⁴ Ni³na¹ xi³ tsa³cˀe¹ne²-le⁴ xa¹, jo³-ni³ nca³ cˀoa⁴-ti⁴sˀin² qui³sˀin³ je² Moisés xi³ tˀa³tsˀe⁴ cho⁴ta⁴ni³ˀya³-le⁴ Ni³na¹.
HEB 3:3 Nqui²sa⁴ tse³ cjoa⁴je³ya³ va³quin²-le⁴ Jesús cao⁴-ni³ tsa² Moisés, jo³-sˀin² nca³ je² xi³ tsa³cˀe¹nta³ jnco³ ntˀia³ nqui²sa⁴ tjin¹-le⁴ cjoa⁴je³ya³ cao⁴-ni³ tsa² ntˀia³.
HEB 3:4 Nca³yi³je³ ntˀia³ tjin¹ jnco³ xi³ vˀe¹nta³, to⁴nca³ je² xi³ tsa³cˀe¹nta³ nca³yi³je³, je² Ni³na¹.
HEB 3:5 Xi³ cjoa⁴qui²xi⁴ je² Moisés nta³ qui³si³tjo³son² xi³ tˀa³tsˀe⁴ nca³tsˀi³ cho⁴ta⁴ni³ˀya³-le⁴ Ni³na¹, jo³-ni³ cho⁴ˀnta³, nca³ qui³tsjoa³ en¹-le⁴ tˀa³tsˀe⁴ cjoa⁴ xi³ coan⁴scan³-ni³ coi⁴no²cjoa⁴ya³.
HEB 3:6 To⁴nca³ Cristo qui³si³tjo³son² jo³-ni³ ˀnti¹ xi³ tjin¹ne²-le⁴ nca³ si¹coi²nta⁴-le⁴ cho⁴ta⁴ni³ˀya³-le⁴ Ni³na¹. Ña¹ nia¹ xi³ coi³ cho⁴ta⁴-le⁴, tsa² sa³ˀnta³ nca³ cjoe⁴tˀa³ nta³ coi⁴ntoa⁴nˀioan¹ je² cjoa⁴nˀion¹ta³con²-na¹ cˀoa⁴ je² cjoa⁴tsjoa³-na¹ xi³ tˀa³tsˀe⁴ xi³ cho²ya³-le⁴².
HEB 3:7 Coi³ xi³ cˀoa⁴tso² Espíritu Santo: Tsa² ntˀai⁴-vi⁴ coi⁴no¹ˀya²-lao⁴³ jta⁴-le⁴ Ni³na¹,
HEB 3:8 a³li² ta²ja³-jin² vˀe²yo³ ni⁴ma⁴-no³, jo³-ni³ cˀia⁴ nca³ tsa³nquin¹ co²ntran⁴-nao¹³ je² ni⁴čhjin³ cˀia⁴ nca³ qui³cho²tˀa³-nao¹³ ya⁴ ˀnte³tˀa³xin²tˀa³,
HEB 3:9 jña³ nca³ qui³sco²tˀa³-na³ je² nˀai³jcha¹cjin³-no³. Qui³sco²tˀa³-na³, cˀoa⁴ tsa³ve³ je² xa¹-na⁴ ña³chan² no¹.
HEB 3:10 Coi³ nca³ cˀoa⁴-sˀin² tsa³ca²te⁴jna³jchan¹-le⁴ je² na⁴xi⁴na³nta¹-vi⁴, cˀoa⁴ qui³xian³: Nca³ntsjai² cjoa⁴fa³ˀai³tsjen³-le⁴ to⁴xin² fi², cˀoa⁴ li²coi³ tsa³ve³xcon³ ntia⁴²-na⁴.
HEB 3:11 Qui³tsjoa³ ntso⁴ˀva³ cao⁴ cjoa⁴jti³-na⁴: Li²coi³ cjoa⁴ˀa³sˀen³ jña³ nca³ tjin¹ cjoa⁴ni²cja¹ya³ xi³ tsˀan⁴.
HEB 3:12 Ti⁴coi²ntao⁴³ yao³-no³, ntsˀe³, nca³ ni⁴ˀya³-jin² xi³ jon² xi³ sˀe³-le⁴ ni⁴ma⁴tsˀen⁴ xi³ tsi² ma³cjain¹-le⁴, nca³ to⁴xin² coai⁴-le⁴ je² Ni³na¹ xi³ ti¹jna³con³.
HEB 3:13 To⁴sa³ tˀe²ne²-lao⁴³ xi²nquio⁴³ nca³ nchaon³nchaon³, xi³ to⁴tjen⁴ nca³ ntˀai⁴-vi⁴ ˀmi², jme¹-ni³ nca³ ni⁴jnco³-jin² xi³ jon² coan⁴ta²ja³jin³cao⁴-si¹nio³ cjoa⁴chˀa¹na⁴cha⁴-le⁴ je¹.
HEB 3:14 Nca⁴ cji³tˀa³coa⁴² Cristo nca³ cˀoa⁴-sˀin² cjoan³², tsa² sa³ˀnta³ nca³ cjoe⁴tˀa³ nta³ coi⁴ntoa⁴nˀioan¹ je² cjoa⁴nˀion¹ta³con²-na¹ xi³ ti¹tjon² qui³sˀe³-na¹.
HEB 3:15 To⁴tjen⁴ nca³ cˀoa⁴tso²: Tsa² ntˀai⁴-vi⁴ntai⁴ coi⁴no¹ˀya²-lao⁴³ jta⁴-le⁴ Ni³na¹, a³li² ta²ja³-jin² vˀe²yo³ ni⁴ma⁴-no³, jo³-ni³ cˀia⁴ nca³ tsa³nquin¹ co²ntran⁴-nao¹³.
HEB 3:16 Tjin¹ cˀa³ to⁴nca³ li²coi³ nca³tsˀi³ xi³ tsa³cˀe¹tsˀia⁴ cjoa⁴si³ cˀia⁴ nca³ je³qui³nčhˀoe¹. Je²-vi⁴ tsˀe⁴ je² xi³ cao⁴ Moisés ji³tjo³-ni³ ˀnte³ Egipto.
HEB 3:17 ˀya¹cao⁴ xi³ cˀoa⁴-sˀin² coan³jti³-le⁴ ña³chan² no¹. A³ tsi² tsa² cao⁴ je² xi³ tsa³jnqui³ je¹, xi³ yao³-le⁴ qui³tsao³ ya⁴ ˀnte³tˀa³xin²tˀa³.
HEB 3:18 Cˀoa⁴ ˀya¹-ni³ xi³ Ni³na¹ qui³tsjoa³-le⁴ en¹-le⁴ nca³ tsi² tsa² cjoa⁴ˀa³sˀen³ jña³ nca³ tjin¹ cjoa⁴ni²cja¹ya³ xi³ tsˀe⁴. A³ tsi² tsa² to⁴je² xi³ tsi² tsa² qui³si³tjo³son².
HEB 3:19 Cˀoa⁴-sˀin² ˀya³-nia¹ nca³ tsi² tsa² coan³ ja³ˀa³sˀen³ nca⁴ tsi² coan³cjain¹-le⁴.
HEB 4:1 Ti⁴ˀa³-ni³ nca³ ti¹jna³-sa³ xi³ Ni³na¹ qui³si³sˀe³nqui³ nca³ coi⁴tja¹sˀen³² jña³ nca tjin¹ cjoa⁴ni²cja¹ya³ xi³ tsˀe⁴, coi⁴jcon¹cha³² tsa² jnco³ xi³ jon² cje³ fi³cho³tjen⁴nqui³-jion²³.
HEB 4:2 Cˀoa⁴²-ti⁴ ña¹ qui³no²cjoa⁴ya³-na¹ en¹ xi³ sin³ xi³ nta³, jo³-ni³ nca³ je², to⁴nca³ li²jme³ chji¹-le⁴ je² xi³ qui³nčhˀoe¹-ve⁴ nca³ tsi² tsa² coan³cjain¹-le⁴ je² xi³ qui³nčhˀoe¹.
HEB 4:3 Vi³tja³sˀen³-nia¹ jña³ nca³ tjin¹ cjoa⁴ni²cja¹ya³, ña¹ xi³ je³coan³cjain¹-na¹, jo³-sˀin² nca³ qui³tso²: Qui³tsjoa³ ntso⁴ˀva³ cao⁴ cjoa⁴jti³-na⁴ nca³ tsi² cjoa⁴ˀa³sˀen³ jña³ nca³ tjin¹ cjoa⁴ni²cja¹ya³ xi³ tsˀan⁴, nta³ tsa² je³je³tˀa³ je² xa¹ sa³ˀnta³ nca³ qui³sˀe³nta³-ni³ son³ˀnte³.
HEB 4:4 Jnco³ cˀa² cˀoa⁴-sˀin² qui³tso² xi³ tˀa³tsˀe⁴ ni⁴čhjin³ xi³ ma³ña³to³-ni³: Xi³ ma³ña³to³-ni³ ni⁴čhjin³ qui³si³cja¹ya³ Ni³na¹ nca³ je³coan³ nca³yi³je³ xa¹-le⁴
HEB 4:5 Cˀoa⁴ nqui²jnco³cˀa² ti⁴ya⁴ qui³tso²: Li²coi³ cjoa⁴ˀa³sˀen³ jña³ nca³ tjin¹ cjoa⁴ni²cja¹ya³ xi³ tsˀan⁴.
HEB 4:6 Cˀoa⁴-sˀin²ˀni³ to⁴jo³ tjin¹-ni³ nca³ cjoa⁴ˀa³sˀen³ cˀa³ ya⁴ jña³ nca³ tjin¹ cjoa⁴ni²cja¹ya³, cˀoa⁴ je² xi³ ti¹tjon² qui³no²cjoa⁴ya³-ni³le⁴ je² en¹ xi³ sin³ xi³ nta³, li²coi³ ja³ˀa³sˀen³ nca⁴ tsi² qui³si³tjo³son².
HEB 4:7 Coi³ nca³ nqui²jnco³cˀa² vˀe¹choa⁴ jnco³ ni⁴čhjin³, xi³ ntˀai⁴-vi⁴ ˀmi²-le⁴. Ncjin² ni⁴čhjin³ nca³ coan³scan³-ni³ je² David qui³tso² xi³ tˀa³tsˀe⁴, jo³-sˀin² nca³ tji¹tˀa³: Ntˀai⁴²-vi⁴ntai⁴ tsa² coi⁴no¹ˀya²-lao⁴³ jta⁴-le⁴ Ni³na¹, a³li² ta²ja³-jin² vˀe²yo³ ni⁴ma⁴-no³.
HEB 4:8 Tsa² Josué cˀoa⁴-la²ni³sˀin² qui³tsjoa³-le⁴ cjoa⁴ni²cja¹ya³ tsa²cai³, Ni³na¹ li²coi³-la⁴ qui³nchja⁴ coan³scan³-ni³ tˀa³tsˀe⁴ xi³ nqui²jnco³ ni⁴čhjin³.
HEB 4:9 To⁴coi³ to⁴jo³ ti¹jna³-ni³le⁴ na⁴xi⁴na³nta¹-le⁴ Ni³na¹ nqui²jnco³ ni⁴čhjin³ xi³ ma³ ni²cja¹ya³.
HEB 4:10 To⁴ˀya³-ni³ve⁴ xi³ cˀoa⁴-sˀin² je³ja³ˀa³sˀen³ cjoa⁴ni²cja¹ya³ xi³ tsˀe⁴, cˀoa⁴-ti⁴ je² qui³si³cja¹ya³-ni³ tˀa³ xa¹-le⁴ jo³-sˀin² Ni³na¹ qui³si³cja¹ya³-ni³ xi³ tˀa³tsˀe⁴.
HEB 4:11 Cˀoe¹nca³nˀioan¹ nca³ coi⁴tja¹sˀen³² cjoa⁴ni²cja¹ya³-ve⁴, jme¹-ni³ nca³ ni⁴ˀya³-jin² xi³ ti⁴ya⁴ tsao³jin³-ni³ ti⁴coi³-ni³ cjoa⁴ta²ja³jin³-ve⁴.
HEB 4:12 Je² en¹-le⁴ Ni³na¹ ti¹jna³con³, cˀoa⁴ nˀion¹ si¹xa¹, cˀoa⁴ nqui²sa⁴ to⁴yao³ cao⁴-ni³ tsa² jnco³ qui⁴cha⁴ntsˀan⁴ xi³ yao³ nca³ jao² ncoa³, cˀoa⁴ va³te³jin³ sa³ˀnta³ nca³ si¹xcoa⁴ya³ ja⁴jin³ ni⁴ma⁴-na¹, cˀoa⁴-ti⁴ sa³ˀnta³ espíritu-na¹, cˀoa⁴ sa³ˀnta³ xco¹-na¹, cˀoa⁴ ya⁴jin³ xi¹ne¹ni³nta³-na¹. Va¹sjai³ya³ cjoa⁴fa³ˀai³tsjen³, cˀoa⁴ jo³-sˀin² me³-le⁴ si¹xa¹ ni⁴ma⁴-na¹.
HEB 4:13 Tsin² xi³ qui³sˀe³nta³ xi³ tsi² tsa² ˀya³-le⁴ nqui³xcon⁴ Ni³na¹, to⁴nca³ nca³yi³je³ cjoa⁴ tjio¹son²tsen³-ni, cˀoa⁴ ve³-ni³ xcon⁴ je² xi³ tjin¹ne²-na¹ nca³ cˀoai⁴-le⁴² coi²nta⁴.
HEB 4:14 To⁴coi³ coi⁴ntoa⁴nˀioan¹ je² cjoa⁴ xi³ ni²qui²xi⁴ya³nta³-nia³², nca⁴ tjin¹-na¹ jnco³ na⁴ˀmi³ti¹tjon² xi³ nˀion¹ ncˀa³, xi³ ja³ˀa³sˀen³ ya⁴ ncˀa³jmi³, je² Jesús, xi³ ˀnti¹-le⁴ Ni³na¹.
HEB 4:15 Nca⁴ tsi² tsa² tjin¹-na¹ jnco³ na⁴ˀmi³ti¹tjon² xi³ tsi² tsa² coan⁴-le⁴ coan⁴ma⁴que³-na¹, nca⁴ tsi² tse³ nca³nˀion¹ xi³ tjin¹-na¹, to⁴nca³ je² qui³cho²tˀa³ nca³yi³je³ jo³-sˀin² nca³ cjoan³², to⁴nca³ li²coi³ qui³sˀe³-le⁴ je¹.
HEB 4:16 Coi⁴ncha³čhian³-le⁴², tso²cˀoa⁴, je² xi³ ti¹jna³son² ya¹xi²le⁴-le⁴, xi³ tjin¹-le⁴ cjoa⁴nta³, jme¹-ni³ nca³ chjoe¹-si¹nia³² xi³ tsˀe⁴ cjoa⁴ma⁴ta³con²-le⁴, cˀoa⁴ jme¹-ni³ nca³ coan⁴sjai³-si¹ni³na¹ cjoa⁴nta³ xi³ coa⁴sen⁴cao⁴-na¹ cˀia⁴ nca³ coan⁴chjen¹-na¹.
HEB 5:1 Nca³tsˀi³ na⁴ˀmi³ti¹tjon² to⁴cho⁴ta⁴-vi⁴ tjo³jin³-ni¹, cˀoa⁴-sˀin² ni²qui³ncha¹nta³ xi³ tˀa³tsˀe⁴ cho⁴ta⁴ nqui³xcon⁴ Ni³na¹, jme¹-ni³ nca³ tsjoa¹tˀa³-si¹ni³le⁴ Ni³na¹ cjoa⁴tjao² cao⁴ njin¹ xi³ sˀe³jten⁴ xi³ tˀa³tsˀe⁴ je¹.
HEB 5:2 Je² xi³ ma³tse³-le⁴con³ cho⁴ta⁴ xi³ ma³jnqui³ je¹ nca³ tsi² ma³cho⁴ya³-le⁴, cˀoa⁴ nca³ xin² ntia⁴² tjio¹ma³, nca⁴ je² cˀoa⁴-ti⁴ fa³ˀai³tˀa³-le⁴ cjoa⁴ˀi³nta³.
HEB 5:3 To⁴jo³-sˀin² nca³ tsjoa¹tˀa³ xi³ tˀa³tsˀe⁴ je¹-le⁴ cho⁴ta⁴, cˀoa⁴-ti⁴sˀin²ni³ tjin¹ne²-le⁴ nca³ tsjoa¹tˀa³ xi³ tˀa³tsˀe⁴ je¹ xi³ ti⁴tsˀe⁴-ni³.
HEB 5:4 Ni⁴ˀya³-jin² xi³ ti⁴je² scoe¹-ni³ xa¹ncˀa³-ve⁴, to⁴je² xi³ Ni³na¹ qui³nchja⁴-le⁴ jo³-ni³ Aarón.
HEB 5:5 Cˀoa⁴-ti⁴sˀin²ni³ Cristo li²coi³ tsa³cˀa³sje³je³ya³-ni³ yao³-le⁴, nca³ ti⁴je² coan³-ni³ na⁴ˀmi³ti¹tjon², to⁴nca³ Ni³na¹ tsa³-ca³sen¹nta³ Cristo, cˀoa⁴qui³tso²-le⁴: Ji³ ni¹³ ˀnti¹-na⁴, ji³ xi³ ntˀai⁴ cˀoa⁴-sˀin² ˀnti¹-na⁴ xin³-le²³.
HEB 5:6 Cˀoa⁴-ti⁴sˀin² tso² nqui²jnco³cˀa²: Ji³ ni¹³ na⁴ˀmi³ xi³ ti¹jna³ nca³ntsjai², jo³-sˀin² nca³ qui³sˀe³ne²-le⁴ Melquisedec.
HEB 5:7 Cˀia⁴ ni⁴čhjin³-le⁴ nca³ tsˀa³mjen³ i⁴ son³ˀnte³-vi⁴, Cristo tsa³cˀe¹tsˀoa³, cˀoa⁴ qui³si³je¹ nca³nˀion¹, qui³squi³ˀntia¹. Cˀoa⁴-sˀin² qui³tsjoa³tˀa³-le⁴ je² xi³ coan³-le⁴ tsˀa³sje³ntjai²-ni³ ya⁴ cjoa⁴vi³ya³. Qui³tsa³cjon²que³ nta³ tsa³ve³xcon¹ Ni³na¹, coi³ nca³ qui³no²ˀya²-ni³le⁴.
HEB 5:8 Nta³ tsa² cˀoa⁴-sˀin² ˀnti¹-le⁴ coan³, to⁴tˀa³-le⁴ cjoa⁴ñˀain³ xi³ tsa³cˀai²-le⁴ coan³-le⁴ nca³ nta³ qui³si³tjo³son².
HEB 5:9 Cˀia⁴ nca³ ña³qui³ cjoa⁴qui²xi⁴ je³ji³tjo³son²-le⁴, cˀia⁴ coan³ nai³-le⁴ cjoa⁴vi³tjo³ntjai² nca³ntsjai² xi³ tˀa³tsˀe⁴ nca³tsˀi³ xi³ si¹tjo³son²-le⁴.
HEB 5:10 Ni³na¹ tsa³ca³sen¹ Jesús na⁴ˀmi³ti¹tjon², jo³-sˀin² nca³ qui³sˀe³ne²-le⁴ Melquisedec.
HEB 5:11 Tse³ tjin¹ xi³ to⁴jo³ tjin¹-na³jin⁴ nca³ coi⁴no²cjoai⁴-jin⁴ xi³ tˀa³tsˀe⁴, cˀoa⁴ ñˀain³ tjin¹ nca³ ni²qui²xi⁴yai³⁴-jin⁴, nca⁴ jon² ñˀain³ no²ˀyao²³.
HEB 5:12 Je³-la⁴ cˀoa⁴-sˀin² maestro coaon⁴³ tsa²cai³, nca⁴ je³co²tse³ coan³cjain¹-no³, to⁴nca³ ma³chjen¹-no³ nca³ coa⁴co²ya³ nqui²jnco³cˀa²-no³ jña³-le⁴ cjoa⁴ xi³ ti¹tjon² tsa³cˀe¹tsˀia⁴cao⁴-ni³ je² en¹-le⁴ Ni³na¹. Cˀoa⁴-sˀin² cji³mao³ jo³-ni³ tsa² xi³ ˀnti¹, xi³ ma³chjen¹-sa³le⁴ nta¹chi³qui³, a³li²coi³ ma³chjen¹-no³ tso³jmi² xi³ ta²ja³.
HEB 5:13 Cˀoa⁴ nca³tsˀi³ xi³ cˀoa⁴-sˀin² vˀa³cao⁴tˀa³-le⁴ nta¹chi³qui³, li²coi³ tjio¹nta³ nca³ coan⁴cho⁴ya³-le⁴ je² en¹ xi³ ña³qui³ cjoa⁴qui²xi⁴, nca³ cˀoa⁴-sˀin² ˀnti¹-sa³.
HEB 5:14 To⁴nca³ je² tso³jmi² xi³ ta²ja³, coi³ xi³ ma³chjen¹-le⁴ je² xi³ je³coan³jcha¹, xi³ nˀion¹ coan³nca³cao⁴-le⁴ je² cjoa⁴fa³ˀai³tsjen³-le⁴ nca³ ma³-le⁴ fa³ˀa¹jin³ je² xi³ nta³, cˀoa⁴ je² xi³ tsˀen⁴.
HEB 6:1 To⁴coi³ si⁴cˀe¹jna³² je² xi³ ti¹tjon² qui³cho²tˀa³ya³² xi³ tˀa³tsˀe⁴ Cristo, cjoin³ti¹tjoan² jo³ sa³ˀnta³ nca³ coan⁴son²-na¹. Li²coi³ ti⁴cjoin³ chˀa²ya³ nqui²jnco³cˀa²-nia³² je² xi³ ti¹tjon² coan³-na¹ xi³ coi³ cjoa⁴-vi⁴ nca³ qui³ni²cˀa³ntjai²ya³² cjoa⁴fa³ˀai³tsjen³-na¹ xi³ tˀa³tsˀe⁴ je² xa¹ xi³ tsi² ti⁴ma³chjen¹-jin²ni³, cˀoa⁴ nca³ coan³cjain¹-na¹ tˀa³tsˀe⁴ Ni³na¹.
HEB 6:2 Li²coi³ ti⁴cjoin³ chˀa²ya³ nqui²jnco³cˀa²-nia³² cjoa⁴fa³ˀai³tsjen³ xi³ tsˀe⁴ cjoa⁴sa³te¹nta¹, cˀoa⁴ xi³ tsˀe⁴ je² cjoa⁴ xi³ va¹jna³son²-le⁴ ntsja³, cˀoa⁴ xi³ tsˀe⁴ cjoa⁴fa³ˀa¹ya³-le⁴ xi³ cˀen³, cˀoa⁴ xi³ tsˀe⁴ nca³ cˀoai⁴-le⁴ cjoa⁴ñˀain³ xi³ sˀe³jna³ntsjai².
HEB 6:3 Xi³ cjoa⁴qui²xi⁴ cˀoa⁴sˀian⁴² je²-vi⁴, tsa² Ni³na¹ tsjoa¹ˀnte³.
HEB 6:4 Tjin¹ cho⁴ta⁴ xi³ jnco³ cˀa² coan³cho⁴ya³-le⁴, cˀoa⁴ qui³sco²tˀa³ je² cjoa⁴tjao²-le⁴ ncˀa³jmi³, cˀoa⁴ tsˀa³cao⁴tˀa³-le⁴ xi³ tsˀe⁴ je² Espíritu Santo.
HEB 6:5 Cˀoa⁴-ti⁴sˀin²ni³ qui³sco²tˀa³ je² en¹nta³-le⁴ Ni³na¹, cˀoa⁴ je² nca³nˀion¹-le⁴ xi³ tsˀe⁴ ni⁴čhjin³ xi³ cjoa⁴ˀai¹.
HEB 6:6 Tsa² je² cho⁴ta⁴-vi⁴ to⁴xin² ntia⁴² qui³, ni⁴jo³-jin²sˀin² ti⁴coan⁴nta³ya³-ni³, nca³ si⁴²cˀa³ntjai²ya³ cjoa⁴fa³ˀai³tsjen³-le⁴. Je² cho⁴ta⁴-vi⁴ nqui²jnco³cˀa² va¹tˀa³ cro² ˀnti¹-le⁴ Ni³na¹ xi³ ti⁴tˀa³tsˀe⁴-ni³, cˀoa⁴ si¹cˀe¹jna³ son²tsen³-le⁴ Cristo cao⁴ cjoa⁴soa³.
HEB 6:7 Ni³na¹ si¹chi³con³tˀain³ je² na³nqui³ xi³ ˀvi³nca² na³nta¹ xi³ ncjin² cˀa³ ja³ˀai³son²-le⁴, cˀoa⁴ ma³jcha¹ xca⁴ xi³ nta³ xi³ tˀa³tsˀe⁴ ˀya³-ni³ xi³ si¹tsje³nqui³-le⁴.
HEB 6:8 To⁴nca³ tsa² ma³jcha¹-le⁴ na³ˀya¹ cao⁴ na³ˀya¹na³xo¹, li²jme³ chji¹-le⁴, to⁴jo³-ni³ tsa² na³nqui³cjoa⁴ñˀain³. Cˀoa⁴-sˀin² cjoe⁴tˀa³-ni³ nca³ coi⁴ti⁴.
HEB 6:9 Nta³ tsa² cˀoa⁴-sˀin² no²cjoai⁴-jin⁴, cho³ya²-lai²⁴jin⁴ xi³ tˀa³tsaon⁴³, nca³ jon² xi³ tsjoa³que⁴-no³, cjoa⁴ xi³ nqui²sa⁴ nta³, cˀoa⁴ xi³ nqui²sa⁴ va³quin²-le⁴ cjoa⁴vi³tjo³ntjai².
HEB 6:10 Ni³na¹ tjin¹-le⁴ cjoa⁴qui²xi⁴, li²coi³ cha³jin³-le⁴ xa¹-no³ cao⁴ je² cjoa⁴tjao²cha³ xi³ tsen³ tsa³ˀya³-ni³no³ xi³ tˀa³tsˀe⁴ jan³ˀain¹-le⁴. Coan³tsen³ cjoa⁴tjao²cha³-ve⁴ nca³ qui³ni²sin³-lao⁴³ je² cho⁴ta⁴-le⁴ Cristo, cˀoa⁴ nca³ to⁴jo³ ni²sin³-lao⁴³.
HEB 6:11 To⁴nca³ me³-na³jin⁴ nca³ ti⁴cˀoa⁴-sˀin² si⁴xi¹ti¹yao³ nca³ jnco¹jnco¹ nca³ jon² sa³ˀnta³ nca³ cjoe⁴tˀa³, jme¹-ni³ nca³ coan⁴jnco³-si¹ni³ je² xi³ cho³ya²-le⁴².
HEB 6:12 Coi³ cjoa⁴ xi³ me³-na³jin⁴, jme¹-ni³ nca³ tsi² tsˀe² ma³-si¹nio³, to⁴nca³ chjen¹nqui³-lao⁴³ je² xi³ sˀe³-le⁴ cjoa⁴tjao² xi³ qui³ni²sˀe³nqui³-le⁴ xi³ tˀa³tsˀe⁴ nca³ ma³cjain¹-le⁴, cˀoa⁴ nca³ tse³jta³.
HEB 6:13 Cˀia⁴ nca³ Ni³na¹ qui³si³sˀe³nqui³-le⁴ Abraham, ti⁴je² qui³tsjoa³-ni³ xi³ ti⁴tsˀe⁴-ni³ en¹-le⁴, nca⁴ li²coi³ coan³ qui³tsjoa³ en¹ xi³ to⁴tˀa³tsˀe⁴ xi³ cja⁴ˀai¹ xi³ nqui²sa⁴ ncˀa³.
HEB 6:14 Qui³tso²: Ña³qui³ cjoa⁴qui²xi⁴ si³chi³con³tˀain³-le²³, cˀoa⁴ si³ncjin²ya³-le²³.
HEB 6:15 Cˀoa⁴-sˀin² qui³sˀe³-le⁴ Abraham je² xi³ qui³ni²sˀe³nqui³-le⁴, nca³ tse³jta³ coan³-le⁴.
HEB 6:16 Cho⁴ta⁴ tsjoa¹ en¹-le⁴ xi³ to⁴tˀa³tsˀe⁴ xi³ nqui²sa⁴ ncˀa³ cao⁴-ni³ tsa² je². Cˀia⁴ nca³ tsjoa¹ en¹-le⁴ xi³ si¹qui²xi⁴ya³, je²-vi⁴ xi³ si¹cje³tˀa³ nca³yi³je³ en¹ xi³ cjan¹cao⁴.
HEB 6:17 Ni³na¹ coan³me³-le⁴ nca³ nqui²sa⁴ tse³ tsa³ca³co¹son²tsen³-le⁴ je² xi³ sˀe⁴-le⁴ cjoa⁴tjao² xi³ qui³si³sˀe³nqui³, jo³-sˀin² nca³ tsi² si¹cˀa³ntjai²ya³ cjoa⁴fa³ˀai³tsjen³-le⁴. Qui³si³qui²xi⁴ya³nta³ nca³ ña³qui³ cjoa⁴qui²xi⁴ xi³ qui³tso²,
HEB 6:18 jme¹-ni³ nca³ ña¹ xi³ cˀoa⁴-sˀin² tsa³nquin¹ to³ca³ nčhˀoe², nˀion¹ tse³ sˀe⁴-si¹ni³na¹ cjoa⁴nˀion¹ta³con², nca³ chjoe¹ je² xi³ cho³ya²-le⁴² xi³ nčhoa¹-na¹. Coi³ cjoa⁴ nca³ Ni³na¹ xi³ tsi² coan³-le⁴ tsa³cˀe¹nti³so³ jao² cˀa³ qui³tsjoa³ en¹-le⁴ tˀa³tsˀe⁴ cjoa⁴ xi³ tsi² ma³ vˀa³ntjai²ya³.
HEB 6:19 Je² cjoa⁴cho³ya²cao⁴cjoa⁴-vi⁴ xi³ tjin¹-na¹ cjoa⁴qui²xi⁴-ni¹, cˀoa⁴ si¹cˀe¹jna³nˀion¹ ni⁴ma⁴-na¹ jo³-ni³ tsa² jnco³ qui⁴cha⁴ˀva⁴ xi³ cji³tˀa³nˀion¹, xi³ fa³ˀa³sˀen³ ˀnte³tsje³ sa³ˀnta³ jton⁴ na³jño³ xi³ tjen⁴jčho³.
HEB 6:20 Jesús ya⁴ ja³ˀa³sˀen³ xi³ tˀa³tsan⁴² jo³-ni³ je² xi³ tjen⁴ ti¹tjon², nca³ coan³ na⁴ˀmi³ti¹tjon² xi³ nca³ntsjai², jo³-sˀin² qui³sˀe³ne²-le⁴ Melquisedec.
HEB 7:1 Je² Melquisedec, xi³ cho⁴ta⁴ti¹tjon² xi³ tsˀe⁴ Salem, xi³ na⁴ˀmi³-le⁴ Ni³na¹ xi³ nqui²sa⁴ nˀion¹ ncˀa³, qui³sa³te³cjao³ Abraham cˀia⁴ nca³ ji³nčhoa³-ni³ nca³ qui³si³qui³njen³-le⁴ nca³tsˀi³ cho⁴ta⁴ti¹tjon², cˀoa⁴ qui³si³chi³con³tˀain³ Abraham.
HEB 7:2 Abraham ti⁴cˀoa⁴-sˀin²ni³ qui³tsjoa³-le⁴ jnco³ ya² xi³ te³ ya³ tjin¹-ni³ tsˀe⁴ nca³yi³je³ xi³ tjin¹-le⁴. Je² Melquisedec ti¹tjon² cˀoa⁴ˀmi²-le⁴ cho⁴ta⁴ti¹tjon² xi³ tsˀe⁴ cjoa⁴qui²xi⁴, nca⁴ cˀoa⁴tso²-ni³ jan³ˀain¹-le⁴. Cˀoa⁴-ti⁴ cˀoa⁴ˀmi² cho⁴ta⁴ti¹tjon² xi³ tsˀe⁴ Salem, xi³ tso²-ni³ cho⁴ta⁴ti¹tjon² xi³ tsˀe⁴ cjoa⁴ xi³ nchˀan¹ tjin¹.
HEB 7:3 Tsin²-le⁴ nˀai³-jin², tsin²-le⁴ na⁴-jin², li²coi³ tji¹tˀa³ jme³ ntje⁴ ji³nčhoa³-ni³, tsin²-le⁴ ni⁴čhjin³ti¹tjon²-jin², tsin²-le⁴ ni⁴čhjin³fe³tˀa³-jin². Coan³nco¹son² cao⁴ Cristo, ˀnti¹-le⁴ Ni³na¹, nca³ na⁴ˀmi³ xi³ ti¹jna³ntsjai².
HEB 7:4 Ti⁴cja³ˀai³tsjaon³ tso²cˀoa⁴, jme¹-si³ to⁴ncˀa³ coan³-ni³ je²-vi⁴. Nta³ tsa² Abraham xi³ cho⁴ta⁴jchi¹nca³ qui³tsjoa³-le⁴ jnco³ ya² xi³ te³ ya³ tjin¹-ni³, tsˀe⁴ xi³ qui³njen²-le⁴.
HEB 7:5 Xi³ cjoa⁴qui²xi⁴ je² xi³ tsˀe⁴ xti³-le⁴ Leví xi³ cˀoa⁴-sˀin² coan³ na⁴ˀmi³, tjin¹-le⁴ cjoa⁴te¹xo³ma³ nca³ scoe¹ jnco³ ya² xi³ te³ ya³ tjin¹-ni³ xi³ tsˀe⁴ cho⁴ta⁴na⁴xi⁴na³nta¹, jo³-sˀin² vˀe¹ne² cjoa⁴te¹xo³ma³. Coi³ xi³ tso²-ni³ xi³ tsˀe⁴ ntsˀe⁴, nta³ tsa² cˀoa⁴-ti⁴ ya⁴ ji³nčhoa³-ni³ ntje⁴-le⁴ Abraham.
HEB 7:6 To⁴nca³ je² Melquisedec xi³ tsˀe⁴ ntje⁴ xi³ tsi² ma³xqui⁴tˀa³cao⁴ nca³ je², tsˀe⁴ Abraham qui³scoe¹-ni³ jnco³ ya² xi³ te³ ya³ tjin¹-ni³, cˀoa⁴ qui³si³chi³con³tˀain³ Abraham, je² xi³ tjin¹-le⁴ xi³ Ni³na¹ qui³tsjoa³-le⁴ tsˀoa³.
HEB 7:7 Li²jme³ xi³ jao² tjin¹, je² xi³ nqui²sa⁴ ncˀa³ ti¹jna³ si¹chi³con³tˀain³ xi³ na³nqui³ tjio¹.
HEB 7:8 Je² ni⁴čhjin³-vi⁴ cho⁴ta⁴cjoa⁴vi³ya³ cjoe¹ jnco³ ya² xi³ te³ ya³ tjin¹-ni³, to⁴nca³ je² ni⁴čhjin³-ve⁴ jnco³ xi³ ti¹jna³con³ xi³ qui³scoe¹, nca³ cˀoa⁴tso² en¹ xi³ tˀa³tsˀe⁴.
HEB 7:9 Cˀoa⁴-ti⁴ coan⁴ coi⁴xoan¹, je² Leví xi³ qui³scoe¹ jnco³ ya² xi³ te³ ya³ tjin¹-ni³, cˀoa⁴-ti⁴ tsa³cˀe¹chji¹ jnco³ ya² xi³ te³ ya³ tjin¹-ni³ nca³ Abraham tsa³cˀe¹chji¹ tˀa³tsˀe⁴.
HEB 7:10 Leví cje³ tsin³-jin² cˀia⁴ nca³ Melquisedec ji³tjo³ qui³sa³te³cjao³ Abraham, xi³ nˀai³jchi¹nca³-le⁴.
HEB 7:11 Tsa² je² cjoa⁴na⁴ˀmi³-le⁴ Leví ña³qui³ qui³si³jnco³ya³ cho⁴ta⁴ tsa²cai³, (nca³ qui³tsˀai²-le⁴ cho⁴ta⁴na⁴xi⁴na³nta¹ je² cjoa⁴te¹xo³ma³ cˀia⁴ nca³ coan³ cjoa⁴na⁴ˀmi³-le⁴ Leví), jo¹-sˀin² coan³chjen¹-sa³ nca³ qui³sa³sen³jna² xi³ cja⁴ˀai¹ na⁴ˀmi³, jo³-sˀin² qui³sˀe³ne²-le⁴ Melquisedec, cˀia⁴ nca³ to⁴jo³ qui³si³ncha³nta³ jo³-sˀin² qui³sˀe³ne²-le⁴ Aarón.
HEB 7:12 Cˀia⁴ nca³ vˀa³ntjai²ya³ je² cjoa⁴na⁴ˀmi³, cˀoa⁴-ti⁴ ma³chjen¹ nca³ vˀa³ntjai²ya³ cjoa⁴te¹xo³ma³.
HEB 7:13 Nca³yi³je³ je² cjoa⁴-vi⁴ tˀa³tsˀe⁴ Cristo tji¹tˀa³, to⁴nca³ Cristo nchja⁴-ni³ xi³ cja⁴ˀai¹ ntje⁴. Ni⁴ˀya³-jin² xi³ coi³ ntje⁴-ve⁴ qui³si³sin³-le⁴ son²xta².
HEB 7:14 Nca⁴ ˀya³-le⁴ nca³ je² Nai³-na¹ qui³tsin³-ni³ ntje⁴-le⁴ Judá. Ni⁴jme³-jin² xi³ qui³nchja⁴ Moisés xi³ tˀa³tsˀe⁴ je² ntje⁴-ve⁴ xi³ tˀa³tsˀe⁴ cjoa⁴na⁴ˀmi³.
HEB 7:15 Coi³ xi³ nqui²sa⁴ ˀya³-sa³le⁴, tsa² sa³sen¹jna³ xi³ cja⁴-ˀai¹ na⁴ˀmi³ xi³ cˀoa⁴cjoan³ jo³-ni³ Melquisedec.
HEB 7:16 Coi³ xi³ Cristo, xi³ tsi² tsa² cˀoa⁴-sˀin² coan³ na⁴ˀmi³ jo³ tso² cjoa⁴te¹xo³ma³ tˀa³tsˀe⁴ ntje⁴-le⁴ cho⁴ta⁴, to⁴nca³ coan³ na⁴ˀmi³ nca⁴ tjin¹-le⁴ nca³nˀion¹ xi³ tsˀe⁴ cjoa⁴vi³jna³chon³ xi³ li²coi³ fi³tson³.
HEB 7:17 Cˀoa⁴tso² en¹ xi³ tˀa³tsˀe⁴: Ji³ ni¹³ na⁴ˀmi³ xi³ ti¹jna³ nca³ntsjai², jo³-sˀin² nca³ qui³sˀe³ne²-le⁴ Melquisedec.
HEB 7:18 Xi³ cjoa⁴qui²xi⁴ je² cjoa⁴te¹xo³ma³ xi³ ti¹tjon² qui³cha²nqui³, nca⁴ tsin²-le⁴ nca³nˀion¹-jin², cˀoa⁴ nca⁴ tsi² tsa² ti⁴ma³chjen¹-ni³.
HEB 7:19 Je² cjoa⁴te¹xo³ma³-ve⁴ li²jme³ xi³ qui³si³jnco³, to⁴nca³ ja³ˀa³sˀen³ je² cjoa⁴cho³ya²cao⁴cjoa⁴ xi³ nqui²sa⁴ nta³, coi³ xi³ si¹qui³ncha²čhian³-ni³na¹ Ni³na¹.
HEB 7:20 Je² coi³-vi⁴ li²coi³ cˀoa⁴coan³ tsa² tsi² ˀya³ xi³ qui³tsjoa³ en¹-le⁴.
HEB 7:21 Xi³ cjoa⁴qui²xi⁴ a³li²ˀya³ xi³ qui³tsjoa³ en¹-le⁴ cˀia⁴ nca³ je² xi³cˀa³ cˀoa⁴-sˀin² coan³ na⁴ˀmi³, to⁴nca³ cˀia⁴ nca³ je²-vi⁴ coan³ na⁴ˀmi³, Ni³na¹ qui³tsjoa³ en¹-le⁴ nca³ qui³tso²-le⁴: Je² Nai³-na¹ qui³tsjoa³ en¹-le⁴, cˀoa⁴ ni⁴cˀia³-jin² ti⁴si⁴²cˀo¹fa³ya³-ni³ cjoa⁴fa³ˀai³tsjen³-le⁴. Ji³ ni¹³ na⁴ˀmi³ xi³ ti¹jna³ nca³ntsjai², jo³-sˀin² nca³ qui³sˀe³ne²-le⁴ Melquisedec.
HEB 7:22 Cˀoa⁴-sˀin² coan³ nca³ Jesús va³sen²nˀion¹-ni³ jnco³ cjoa⁴ xi³ nqui²sa⁴ nta³ xi³ qui³sˀe³nˀion¹.
HEB 7:23 Xi³ cjoa⁴qui²xi⁴ je² xi³cˀa³ ncjin² na⁴ˀmi³ coan³, nca⁴ li²coi³ coan³čhjin³-le⁴, nca³ cˀen³-ni¹.
HEB 7:24 To⁴nca³ Cristo, nca⁴ ti¹jna³ntsjai², na⁴ˀmi³ coan³ xi³ tsi² cˀia³ cjoe⁴tˀa³-le⁴.
HEB 7:25 To⁴coi³ ma³-le⁴ vˀa³sje³ntjai² nca³ntsjai² je² xi³ tˀa³tsˀe⁴ fi³cho¹ nqui³xcon⁴ Ni³na¹, nca⁴ ti¹jna³con³ nca³ntsjai², jme¹-ni³ nca³ vˀe¹tsˀoa³ntjai²-si¹ni³ tˀa³tsˀe⁴.
HEB 7:26 Nca⁴ tsa³quin²-na¹ jnco³ na⁴ˀmi³ti¹tjon² xi³ cˀoa⁴-sˀin² cjoan³: xi³ tsje³, xi³ tsi²jme³ je¹ tjin¹-le⁴, xi³ tsi² qui³si³jma² ni⁴ma⁴-le⁴, xi³ tˀa³xin² ti¹jna³-le⁴ cho⁴ta⁴je¹, xi³ nqui²sa⁴ ncˀa³ qui³sˀe³jna³ jo³-ni³ ncˀa³jmi³,
HEB 7:27 xi³ tsi² ma³chjen¹-le⁴ jo³-ni³ xi³cˀa³ na⁴ˀmi³ti¹tjon² nca³ nchaon³nchaon³ tsjoa¹tˀa³-cjoa²la² cjoa⁴tjao² xi³ tˀa³tsˀe⁴ xi³ ti⁴tsˀe⁴-ni³ je¹-le⁴, cˀoa⁴ scan³-ni³ xi³ tˀa³tsˀe⁴ je¹-le⁴ cho⁴ta⁴na⁴xi⁴na³nta¹, nca⁴ je²-vi⁴ to⁴jnco³ cˀa² ntia⁴² cˀoa⁴qui³sˀin³ nca³ ti⁴je² qui³tsjoa³tˀa³-ni³ yao³-le.
HEB 7:28 Je² cjoa⁴te¹xo³ma³ va³sen¹ cho⁴ta⁴xˀin⁴ xi³ tsin²-le⁴ nca³nˀion¹, jme¹-ni³ nca³ na⁴ˀmi³ti¹tjon² coan⁴-si¹ni³, to⁴nca³ je² en¹-le⁴ xi³ qui³tsjoa³ Ni³na¹ coan³scan³-ni³ nca³ je² cjoa⁴-te¹xo³ma³, va³sen¹ je² ˀnti¹-le⁴ xi³ ña³qui³ tsje³ nca³ntsjai².
HEB 8:1 Je²-vi⁴ xi³ nqui²sa⁴ nˀion¹ ma³chjen¹ xi³ tsˀe⁴ je² cjoa⁴-vi⁴ xi³ no²cjoa⁴: Tjin¹-na¹ jnco³ na⁴ˀmi³ti¹tjon² xi³ tsa³cˀe²jna³ nca³qui²xi⁴-le⁴ je² ya¹xi²le⁴ xi³ tsˀe⁴ xi³ je³ya³ ti¹jna³ ya⁴ ncˀa³jmi³.
HEB 8:2 Je² na⁴ˀmi³ti¹tjon² si¹xa¹ ya⁴ ˀnte³tsje³-ve⁴, cˀoa⁴ ya⁴ ntˀia³na³jño³ xi³ ña³qui³ cjoa⁴qui²xi⁴ xi³ je² Nai³-na¹ tsa³cˀe¹nta³, a³li²coi³ cho⁴ta⁴son³ˀnte³ tsa³cˀe¹nta³.
HEB 8:3 Nca³tsˀi³ na⁴ˀmi³ti¹tjon² cˀoa⁴-sˀin² sa³sen¹, jme¹-ni³ nca³ tsjoa¹tˀa³-si¹ni³le⁴ Ni³na¹ cjoa⁴tjao² cao⁴ njin¹ xi³ sˀe³jten⁴. Coi³ ma³chjen¹-ni³ nca³ cˀoa⁴-ti⁴ je²-vi⁴ ca²ta³sˀe³-le⁴ xi³ tsjoa¹tˀa³-le⁴ Ni³na¹.
HEB 8:4 Cˀoa⁴-sˀin² tsa² i⁴ ti¹jna³ i⁴ son³ˀnte³ tsa²cai³, li²coi³-jin² na⁴ˀmi³ coan⁴, nca⁴ to⁴jo³ tjin¹ na⁴ˀmi³ xi³ tsjoa¹tˀa³ cjoa⁴tjao² jo³-sˀin² vˀe¹ne² cjoa⁴te¹xo³ma³.
HEB 8:5 Je² na⁴ˀmi³-vi⁴ xi³ si¹xa¹-le⁴ cjoa⁴ xi³ cjen³ntia⁴²-le⁴, cˀoa⁴ xi³ jo³-ni³ ncˀian¹-le⁴ cjoa⁴ xi³ tjio¹ ncˀa³jmi³. Cˀia⁴ nca³ Moisés je³me³ vˀe¹tsˀia⁴cao⁴ nca³ vˀe¹nta³ ntˀia³na³jño³, Ni³na¹ cˀoa⁴qui³tso²-le⁴: Ti⁴coi²ntai⁴ nca³ cˀoa⁴sˀiain⁴ nca³yi³je³ cjoa⁴ jo³-sˀin² nca³ tsa³ca³co¹ya³-li² ya⁴ ni³nto³-ve⁴.
HEB 8:6 To⁴nca³ ntˀai⁴, nqui²sa⁴ nˀion¹ nta³ je² xa¹ xi³ qui³sˀe³-le⁴ Cristo, nca⁴ je² xi³ fa³jin³-le⁴ jnco³ cjoa⁴ xi³ qui³sˀe³nˀion¹ xi³ nqui²sa⁴ nta³. Coi³ xi³ cˀoa⁴-sˀin² qui³sˀe³nˀion¹-ni³ cao⁴ xi³ nqui²sa⁴ nta³ cjoa⁴ xi³ qui³ni²sˀe³nqui³.
HEB 8:7 Tsa² tsi²jme³ xi³ cha³-le⁴, tsa²cai³, je² cjoa⁴ xi³ qui³sˀe³-nˀion¹ ti¹tjon², cˀia⁴ cjoa⁴qui²xi⁴ nca³ li²coi³ coan³chjen¹ nqui²jnco³ xi³ ma³jao²-ni³.
HEB 8:8 Cˀoa⁴tso² nca³ qui³nchja⁴ti³cao⁴: Coe⁴-ni³ nčhoa¹ ni⁴čhjin³, tso² je² Nai³-na¹, cˀia⁴ nca³ cˀoe³jna² nqui²jnco³cˀa²-ni³le⁴ je² na⁴xi⁴na³nta¹-le⁴ Israel, cao⁴ na⁴xi⁴na³nta¹-le⁴ Judá jnco³ cjoa⁴cho⁴tse⁴.
HEB 8:9 A³li²coi³ tsa² jo³-ni³ je² cjoa⁴ xi³ tsa³cˀe³nˀioan¹³ cao⁴ nˀai³-le⁴ je² ni⁴čhjin³ cˀia⁴ nca³ qui³scoe¹-nia³ ntsa⁴, nca³ tsa³cˀa³sje³-nia³ ya⁴ ˀnte³ Egipto. Je² li²coi³ qui³tjen⁴nqui³-le⁴ je² cjoa⁴ xi³ tsa³cˀe³nˀion¹-nia³, cˀoa⁴ an³ qui³tsjion³con³-nia¹³ nca³ je², tso² je² Nai³-na¹.
HEB 8:10 Je² cjoa⁴-vi⁴ xi³ cˀoe³nta³coa⁴ na⁴xi⁴na³nta¹-le⁴ Israel, coan⁴scan³-ni³ nca³ je² ni⁴čhjin³-ve⁴, tso² je² Nai³-na¹: Cˀoe³jna²jian³ cjoa⁴fa³ˀai³tsjen³-le⁴, cˀoa⁴ squi³tˀa³ ja⁴jin³ ni⁴ma⁴-le⁴ cjoa⁴te¹xo³ma³-na⁴. Cˀoa⁴ an³ coan⁴-le⁴ Ni³na¹, cˀoa⁴ je² coan⁴-na³ na⁴xi⁴na³nta¹-na⁴.
HEB 8:11 Ni⁴ˀya³-jin² xi³ coa⁴co²ya³-le⁴ mi²yo⁴-le⁴, cˀoa⁴ ni⁴ˀya³-jin² xi³ coa⁴co²ya³-le⁴ ntsˀe⁴, nca³ cˀoa⁴tso²: Jcha⁴xcoin³ Nai³-na¹. Nca⁴ nca³tsˀi³ scoe⁴xcon³-na³, je² xi³ jchi¹nca³, cˀoa⁴ nta³ tsa² je² xi³ ˀnti¹.
HEB 8:12 Nca⁴ an³ si³cha³tˀa³-le⁴ cjoa⁴ xi³ chˀao³ qui³sˀin³, cˀoa⁴ li²coi³ ti⁴cjoa⁴ˀai¹tsjen³-ni³na³ je¹-le⁴.
HEB 8:13 Cˀia⁴ nca³ tso²: Cjoa⁴cho⁴tse⁴, cˀoa⁴-sˀin² vˀa³sje³jchi¹nca³ je² xi³ qui³sˀe³nˀion¹ ti¹tjon², cˀoa⁴ je² xi³ cji³ma³jchi¹nca³, cˀoa⁴ xi³ ma³xan⁴ nca³nˀion¹-le⁴, je³me³cha³.
HEB 9:1 Je² cjoa⁴ xi³ ti¹tjon² qui³sˀe³nˀion¹, cˀoa⁴-ti⁴ je² qui³sˀe³-le⁴ cjoa⁴te¹xo³ma³ jo³-sˀin² ˀya³xcon¹ Ni³na¹, cˀoa⁴ qui³sˀe³-le⁴ ˀnte³tsje³ xi³ tsˀe⁴ i⁴ son³ˀnte³-vi⁴.
HEB 9:2 Je² ntˀia³na³jño³ cˀoa⁴-sˀin² qui³sˀe³nta³: Je² xi³ ti¹tjon², jña³ nca³ tjio¹ xi³ ti²ya³ lˀi¹, cˀoa⁴ ya¹mi²xa⁴, cˀoa⁴ nio⁴xti²la⁴ xi³ ya⁴ tjio¹va³sen³. Je²-vi⁴ xi³ cˀoa⁴ˀmi²-le⁴ ˀnte³tsje³.
HEB 9:3 Jton⁴ je² na³jño³ xi³ tjen⁴jčho³ xi³ ma³jao²-ni³, tsa³cˀe²jna³ nqui²jnco³ ntˀia³na³jño³, je² xi³ cˀoa⁴ˀmi²-le⁴ ˀnte³ xi³ nˀion¹ tsje³,
HEB 9:4 jña³ nca³ ti¹jna³ son²xta² taon⁴si³ne² xi³ vˀe¹nqui³ˀnti³-le⁴ cao⁴ xo³nco¹sja³, cˀoa⁴ je² ca²xa⁴ xi³ ña³qui³ taon⁴si³ne² xi³ ya³jon³, jña³ ncha³ je² cjoa⁴ xi³ qui³sˀe³nˀion¹, cˀoa⁴ jnco³ ti⁴² taon⁴si³ne² jña³ nca³ ncha³ je² nio⁴xti²la⁴ xi³ maná ˀmi², cao⁴ je² ni³se³-le⁴ Aarón xi³ tsa³cˀe¹jtsˀen¹, cao⁴ je² la⁴jao⁴ xi³ tsˀe⁴ cjoa⁴ xi³ qui³sˀe³nˀion¹.
HEB 9:5 Cˀoa⁴ ya⁴ tjio¹son² je² ca²xa⁴-ve⁴ xco¹son²-le⁴ xi³ querubines ˀmi² xi³ tsˀe⁴ cjoa⁴je³ya³-le⁴ Ni³na¹, xi³ tsa³ca¹jtsa³son²-le⁴ je² ˀnte³ jña³ nca³ sˀe³nta³jin³con³ Ni³na¹. Je² cjoa⁴-vi⁴ li²coi³ ti⁴ma³ni²cˀa²xqui⁴-sa³ni³ ntˀai⁴ nca³ jnco¹jnco¹.
HEB 9:6 Cˀia⁴ nca³ cˀoa⁴-sˀin² je³qui³sˀe³nta³ nca³yi³je³, je² na⁴ˀmi³ fa³ˀa³sˀen³ntsjai² ya⁴ ntˀia³na³jño³ xi³ ti¹tjon², nca³ cˀoa⁴sˀin¹ xa¹-le⁴ jo³-sˀin² ˀya³xcon¹ Ni³na¹.
HEB 9:7 To⁴nca³ ya⁴ ntˀia³na³jño³ xi³ ma³jao²-ni³, je² na⁴ˀmi³ti¹tjon² to⁴je² to⁴jnco³ fa³ˀa³sˀen³ jnco³ cˀa² nca³ jnco³ no¹. Li²coi³ fa³ˀa³sˀen³ tsa² tsi² cao⁴ njin¹, xi³ cˀoa⁴-sˀin² tsjoa¹tˀa³ xi³ ti⁴tˀa³tsˀe⁴-ni³, cˀoa⁴ xi³ tˀa³tsˀe⁴ je¹-le⁴ cjoa⁴njion²ta³con²-le⁴ cho⁴ta⁴na⁴xi⁴na³nta¹.
HEB 9:8 Cˀoa⁴-sˀin² je² Espíritu Santo va³co¹ nca³ to⁴jo³ tsi²coi³ ma³tsen³ je² ntia⁴² xi³ fa³ˀa³sˀen³-ni³ ˀnte³tsje³, tjen⁴ nca³ to⁴jo³ ti¹jna³-sa³ je² ntˀia³na³jño³ xi³ ti¹tjon².
HEB 9:9 Je²-vi⁴ xi³ ma³nco¹son²cao⁴ ni⁴čhjin³ xi³ ntˀai⁴-ntai⁴. Cˀoa⁴-sˀin² vˀai²tˀa³ cjoa⁴tjao² cao⁴ njin¹ xi³ sˀe³jten⁴, xi³ tsi² tsa² ma³-le⁴ nca³ si¹qui²xi⁴ cjoa⁴fa³ˀai³tsjen³-le⁴ je² xi³ cˀoa⁴-sˀin² ve³xcon¹.
HEB 9:10 Je² cjoa⁴-vi⁴ cˀoa⁴sˀin¹ to⁴tˀa³tsˀe⁴ xi³ chi³ne³, cˀoa⁴ xi³ ˀyo², cˀoa⁴ je² xi³ cja⁴ˀai¹ cja⁴ˀai¹-sˀin² sa³ne²jon³. Je²-vi⁴ cjoa⁴te¹xo³ma³ ni¹ xi³ to⁴tˀa³tsˀe⁴ je² yao³-na¹, xi³ tjin¹ne²-na¹ sa³ˀnta³ je² ni⁴čhjin³ cˀia⁴ nca³ coan⁴ntjai²ya³-nca¹ni³.
HEB 9:11 To⁴nca³ cˀia⁴ nca³ ja³ˀai³ ca³sen¹va³sen³ Cristo xi³ na⁴ˀmi³ti¹tjon²-le⁴ je² cjoa⁴nta³ xi³ cjoa⁴ˀai¹, ja³ˀa³sˀen³ je² ntˀia³na³jño³ xi³ nqui²sa⁴ nˀion¹ nta³, cˀoa⁴ xi³ nqui²sa⁴ qui²xi⁴, xi³ tsi² ntsja³ cho⁴ta⁴ coan³nta³-ni³, coi³ xi³ tso²-ni³ nca³ li²coi³ tsˀe⁴ je² son³ˀnte³-vi⁴.
HEB 9:12 To⁴jnco³ cˀa² ntia³ ja³ˀa³sˀen³ ya⁴ ˀnte³tsje³, a³li²coi³ cao⁴ njin¹-le⁴ cha²to⁴, ni⁴tsˀe⁴ nčha⁴ja⁴ˀnti¹-jin², to⁴je² xi³ ti⁴tsˀe⁴-ni³ njin¹. Cˀoa⁴-sˀin² qui³sˀin³ nca³ tsa³cˀe¹chji¹ntjai² jo³ sa³ˀnta³ nca³ntsjai².
HEB 9:13 Tsa² je² njin¹-le⁴ toro, cˀoa⁴ xi³ tsˀe⁴ cha²to⁴, cˀoa⁴ je² chao³-le⁴ nčha⁴ja⁴ˀnti¹ chjo³jnti²jon³ je² cho⁴ta⁴ xi³ jnti¹ cjoan³, tsa² nca³yi³je³ je²-vi⁴ si¹tsje³ yao³-na¹,
HEB 9:14 je² njin¹-le⁴ Cristo a³li² to⁴cˀoa⁴cji³ nqui²sa⁴ nta³ si¹tsje³-ni³ cjoa⁴fa³ˀai³tsjen³-no³ xa¹ xi³ chˀao³ tjin¹, jme¹-ni³ nca³ si⁴xa¹-si¹ni³lao⁴³ je² Ni³na¹ xi³ ti¹jna³con³. Cristo ti⁴je² qui³tsjoa³tˀa³-ni³le⁴ Ni³na¹ yao³-le⁴ nca³ ña³qui³ tsje³, xi³ to⁴tˀa³tsˀe⁴ espíritu xi³ ti⁴tsˀe⁴-ni³ xi³ nca³ntsjai².
HEB 9:15 Cˀoa⁴-sˀin² to⁴coi³ fa³jin³-ni³le⁴ je² cjoa⁴cho⁴tse⁴ xi³ qui³sˀe³nˀion¹, jme¹-ni³ nca³ je² xi³ qui³no²cjoa⁴-le⁴ tjoe¹-si¹ni³le⁴ je² cjoa⁴tjao² xi³ nca³ntsjai² xi³ qui³ni²sˀe³nqui³-le⁴. Cˀoa⁴coan³ je²-vi⁴, nca⁴ je² cjoa⁴vi³ya³-le⁴ vˀe¹chji¹ntjai² je² cjoa⁴tsˀa³ntjai²cjoa⁴-le⁴ xi³ na³nqui³ tjio¹-le⁴ je² cjoa⁴ xi³ ti¹tjon² qui³sˀe³nˀion¹.
HEB 9:16 Cˀia⁴ nca³ tjin¹ cjoa⁴ xi³ qui³sˀe³nˀion¹, ma³chjen¹ nca³ jcha⁴-cjoa²la²le⁴ tsa² cˀen³ je² xi³ tsa³ca¹jna³ xon⁴.
HEB 9:17 Je² cjoa⁴ xi³ qui³sˀe³nˀion¹ cˀoa⁴-sˀin² je³ma³chjen¹ cˀia⁴ nca³ vi³ya³, nca⁴ ni⁴cˀia³-jin² chji¹-le⁴ cˀia⁴ tsa² ti¹jna³con³-sa³ nai³-le⁴.
HEB 9:18 To⁴coi³ ni⁴je²-jin² xi³ qui³sˀe³nˀion¹ ti¹tjon² qui³sˀe³tsˀia⁴cao⁴ nca³ coan³chjen¹, tsa² tsi² cao⁴ njin¹.
HEB 9:19 Cˀia⁴ nca³ Moisés cˀoa⁴-sˀin² qui³nchja⁴ya³jin³-le⁴ nca³tsˀi³ cho⁴ta⁴na⁴xi⁴na³nta¹ nca³yi³je³ cjoa⁴ xi³ qui³sˀe³ne²-le⁴ jo³ tso² cjoa⁴te¹xo³ma³, qui³scoe¹ je² njin¹-le⁴ xi³ tsˀe⁴ nčha⁴ja⁴ˀnti¹, cˀoa⁴ xi³ tsˀe⁴ cha²to⁴, cao⁴ na³nta¹, cao⁴ ntsja⁴va³rre² xi³ ni² qui³tsˀi³, cao⁴ ya¹ hisopo, qui³sco³jnti²jon³ ti⁴je²-ni³ xon⁴, cˀoa⁴-ti⁴ nca³tsˀi³ cho⁴ta⁴na⁴xi⁴na³nta¹.
HEB 9:20 Qui³tso²: Je²-vi⁴ njin¹-le⁴ cjoa⁴ xi³ qui³sˀe³nˀion¹ xi³ Ni³na¹ cˀoa⁴-sˀin² tsa³cˀe¹ne²-no³.
HEB 9:21 Cˀoa⁴-ti⁴ qui³sco³jnti²jon³ cao⁴ njin¹ je² ntˀia³na³jño³, cao⁴ nca³yi³je³ tso³jmi² xi³ ma³chjen¹ cˀia⁴ nca³ ˀya³xcon¹ Ni³na¹.
HEB 9:22 Cˀoa⁴ me³ nca³yi³je³ cˀoa⁴-sˀin² ma³tsje³ya³ cao⁴ njin¹, jo³-sˀin² vˀe¹ne² je² cjoa⁴te¹xo³ma³. Tsa² tsi² xi¹jten⁴ njin¹, li²coi³ coan⁴ sˀe⁴ cjoa⁴ni²cha³tˀa³.
HEB 9:23 Coan³chjen¹, tso²cˀoa⁴, nca³ coan³tsje³ je² cjoa⁴ xi³ cˀoa⁴-ti⁴ cji³-ni³ jo³ cji³ xi³ tjio¹ ncˀa³jmi³. Coan³tsje³ cao⁴ je² cjoa⁴ xi³ cˀoa⁴sˀin¹, to⁴nca³ ti⁴je²-ni³ cjoa⁴ xi³ tsˀe⁴ ncˀa³jmi³ cˀoa⁴-sˀin² coan³tsje³ cao⁴ njin¹ xi³ qui³tsjoa³tˀa³, xi³ nqui²sa⁴ nta³ cao⁴-ni³ tsa² je²-ve⁴.
HEB 9:24 Nca⁴ tsi² tsa² ja³ˀa³sˀen³ Cristo ya⁴ ˀnte³tsje³ xi³ qui³sˀe³nta³-ni³ ntsja³ cho⁴ta⁴, xi³ nco³ya²-le⁴ je² ˀnte³tsje³ xi³ cjoa⁴qui²xi⁴, to⁴nca³ ya⁴ ja³ˀa³sˀen³ ti⁴ya⁴ ncˀa³jmi³-ni³. Ya⁴ va³co¹ yao³-le⁴ ntˀai⁴-vi⁴ xi³ tˀa³tsan⁴² ya⁴ nqui³xcon⁴ Ni³na¹.
HEB 9:25 A³li²coi³ ja³ˀa³sˀen³ nca³ ncjin² cˀa³ tsjoa¹tˀa³ ti⁴je²-ni³ yao³-le⁴, jo³-sˀin² nca³ je² na⁴ˀmi³ti¹tjon² fa³ˀa³sˀen³ ya⁴ ˀnte³tsje³ nca³ jnco¹jnco¹ no¹ cao⁴ njin¹ xi³ tsˀe⁴ xi³ cja⁴ˀai¹.
HEB 9:26 Tsa² cˀoa⁴-la²ni³ tjin¹, coan³chjen¹ nca³ ncjin² cˀa³ tsa³cja³ˀa¹ cjoa⁴ñˀain³ Cristo sa³ˀnta³ nca³ qui³sˀe³nta³ son³ˀnte³, to⁴nca³ ntˀai⁴ nca³ je³je³tˀa³ je² ni⁴čhjin³-vi⁴, to⁴jnco³ cˀa²-ni¹ ntia³ tsa³ca³co¹ yao³-le⁴, jme¹-ni³ nca³ tsa³cja³ˀa¹xin²-si¹ni³ je² je¹ nca³ qui³tsjoa³tˀa³ yao³-le⁴.
HEB 9:27 To⁴jo³-sˀin² nca³ tjin¹-ni³ nca³ jnco³ cˀa² vi³ya³ cho⁴ta⁴, cˀoa⁴ coan⁴scan³-ni³ sˀe⁴nta³jin³-le⁴ cjoa⁴.
HEB 9:28 Cˀoa⁴-ti⁴sˀin²ni³ Cristo to⁴jnco³ cˀa² qui³tsˀai²tˀa³, nca³ tsa³cˀa³ je² je¹-le⁴ xi³ tsˀe⁴ xi³ ncjin² ma³-ni³. Xi³ ma³jao²-ni³ cˀa³ Cristo coan⁴tsen³-le⁴ je² xi³ co³ya³-le⁴, a³li²coi³ nca³ ti⁴cˀoa⁴-ni³ je¹, to⁴coi³ nca³ cˀoa⁴sje³ntjai².
HEB 10:1 Je² cjoa⁴te¹xo³ma³ tjin¹-le⁴ to⁴ncˀian¹-le⁴ je² cjoa⁴nta³ xi³ cjoa⁴ˀai¹, a³li²coi³ ti⁴je² soa³-ni³ je² cjoa⁴-ve⁴. Je² cjoa⁴te¹xo³ma³ ni⁴cˀia³-jin² ma³-le⁴ nca³ si¹jnco³ je² xi³ cˀoa⁴-sˀin² vi³ncha³čhian³-le⁴, xi³ tsjoa¹tˀa³cji³tˀa³ ti⁴coi³-ni³ njin¹ nca³ jnco¹jnco¹ no¹.
HEB 10:2 Tsa² cˀoa⁴-sˀin² coan³, li²coi³ ti⁴qui³tsjoa³tˀa³-ni³ tsa²cai³, nca⁴ je² xi³ cˀoa⁴-sˀin² tsa³ve³xcon¹, li²coi³ ti⁴qui³si³cja³ˀai³tsjen³-ni³ xi³ tˀa³tsˀe⁴ je¹, tsa²cai³, nca³ ña³qui³ ntia³ coan³tsje³.
HEB 10:3 To⁴nca³ je² njin¹ xi³ sˀe³jten⁴, xi³ tsjoa¹tˀa³, si¹cja³ˀai³tsjen³jin³ je² je¹ nca³ jnco¹jnco¹ no¹.
HEB 10:4 Nca⁴ je² njin¹-le⁴ toro, cˀoa⁴ xi³ tsˀe⁴ cha²to⁴ li²coi³ ma³-le⁴ fa³ˀa¹xin² je² je¹.
HEB 10:5 To⁴coi³ cˀia⁴ nca³ Cristo ja³ˀa³sˀen³ i⁴ son³ˀnte³-vi⁴, qui³tso²: Je² cjoa⁴tjao² cao⁴ njin¹ xi³ sˀe³jten⁴ xi³ vˀai²tˀa³ li²coi³ coan³me³-li², to⁴je² yao³-na⁴ tsa³cˀe²jna³ntai³.
HEB 10:6 Cjoa⁴tjao² xi³ qui³ti²yi³je³, cˀoa⁴ cjoa⁴tjao² xi³ tˀa³tsˀe⁴ cjoa⁴tsˀen⁴ li²coi³ qui³sa³sen³-ta³coin²³.
HEB 10:7 Cˀia⁴ qui³xian³: Ni³na¹, i⁴ je²ˀe⁴-vi⁴, jme¹-ni³ nca³ cˀoa⁴sˀin³-si¹nia³ jo³-sˀin² nca³ me³-li², jo³-sˀin² nca³ tji¹tˀa³ xi³ tˀa³tsˀan⁴ ya⁴ xon⁴ xi³ cjio³xco¹ya³.
HEB 10:8 Cˀia⁴ nca³ ti¹tjon² cˀoa⁴qui³tso²: Cjoa⁴tjao² cao⁴ njin¹ xi³ sˀe³jten⁴ xi³ vˀai²tˀa³, cˀoa⁴ cjoa⁴tjao² xi³ qui³ti²yi³je³, cˀoa⁴ cjoa⁴tjao² xi³ tˀa³tsˀe⁴ cjoa⁴tsˀen⁴ li²coi³ coan³me³-li², ni⁴ qui³sa³sen³-ta³con²jin². (Je² tso³jmi²-ve⁴ xi³ vˀai²tˀa³ jo³-sˀin² vˀe¹ne² cjoa⁴te¹xo³ma³.)
HEB 10:9 Cˀia⁴ qui³tso²: Ni³na¹, i⁴ je²ˀe⁴-vi⁴, jme¹-ni³ nca³ cˀoa⁴sˀin³-si¹nia³ jo³-sˀin² nca³ me³-li². Fa³ˀa¹xin² je² xi³ ti¹tjon², jme¹-ni³ nca³ si⁴²cˀe¹jna³nta³-si¹ni³ xi³ ma³jao²-ni³.
HEB 10:10 Cˀoa⁴-sˀin² coan³me³-le⁴ Ni³na¹ nca³ tsje³ coan³-nia¹ xi³ to⁴tˀa³tsˀe⁴ je² yao³-le⁴ Jesucristo xi³ qui³tsˀai²tˀa³, nca³ to⁴jnco³ cˀa² ntia³ cˀoa⁴-sˀin² coan³.
HEB 10:11 Nca³tsˀi³ na⁴ˀmi³ vi³ncha³tˀa³ xa¹-le⁴ nca³ nchaon³nchaon³ nca³ ncjin² cˀa³ tsjoa¹tˀa³ cjoa⁴tjao² xi³ ti⁴coi³-ni³ xi³ ni⁴cˀia³-jin² ma³-le⁴ fa³ˀa¹xin² je¹.
HEB 10:12 To⁴nca³ je² Jesucristo, cˀia⁴ nca³ ntia³ qui³tsjoa³tˀa³ to⁴jnco³ cjoa⁴tjao² xi³ tˀa³tsˀe⁴ je¹, tsa³cˀe²jna³tˀa³ ntsja³ nca³qui²xi⁴-le⁴ Ni³na¹.
HEB 10:13 Ti¹co³ya³-sa³ sa³ˀnta³ je² co²ntran⁴-le⁴ ya⁴ coa⁴tio⁴nqui³ jo³-ni³ tsa² ya¹ xi³ vi³ncha¹ne² ntso⁴co⁴.
HEB 10:14 Cao⁴ xi³ to⁴jnco³ cjoa⁴tjao² xi³ ntia³ qui³tsjoa³tˀa³, cˀoa⁴-sˀin² ntia³ qui³si³jnco³ nca³ntsjai² je² xi³ ma³tsje³.
HEB 10:15 Cˀoa⁴-ti⁴ je² Espíritu Santo tsjoa¹-na¹ en¹-le⁴, nca⁴ coan³scan³-ni³ nca³ qui³tso²:
HEB 10:16 Coan³scan³-ni³ nca³ je² ni⁴čhjin³-ve⁴, je² cjoa⁴-vi⁴ cˀoe³nta³coa⁴ cao⁴ je², tso² je² Nai³-na¹: Cˀoe³jna²jian³ ni⁴ma⁴-le⁴, cˀoa⁴ squi³tˀa³ ja⁴jin³ cjoa⁴fa³ˀai³tsjen³-le⁴ cjoa⁴te¹xo³ma³-na⁴,
HEB 10:17 cˀia⁴ qui³tso²son²: Ni⁴cˀia³-jin² ti⁴cjoa⁴ˀai¹tsjen³jin³-ni³na³ je¹-le⁴, cˀoa⁴ cjoa⁴tsˀa³ntjai²cjoa⁴-le⁴.
HEB 10:18 Jña³ nca³ tjin¹ cjoa⁴ni²cha³tˀa³ xi³ tˀa³tsˀe⁴ je²-vi⁴, li²coi³ ti⁴tjin¹-ni³ cjoa⁴tjao² xi³ tˀa³tsˀe⁴ je¹.
HEB 10:19 Cˀoa⁴-sˀin² ntsˀe³ tjin¹-na¹ ˀnte³ nca³ coi⁴tja¹sˀen³² ya⁴ ˀnte³tsje³ xi³ to⁴tˀa³tsˀe⁴ njin¹-le⁴ Jesucristo,
HEB 10:20 xi³ to⁴tˀa³tsˀe⁴ je² ntia⁴² xi³ cho⁴tse⁴ xi³ to⁴jnco³ cao⁴ Jesucristo ma³nquian¹, xi³ qui³sco³xˀa¹ˀnte³ ti¹tjon² Cristo, xi³ to⁴tˀa³tsˀe⁴ je² na³jño³ xi³ tjen⁴jčho³, xi³ coi³ xi³ tso²-ni³ ja⁴tˀa³tsˀe⁴ yao³-le⁴.
HEB 10:21 Cˀoa⁴ tjin¹-na¹ jnco³ na⁴ˀmi³ xi³ tse³ nca³nˀion¹ tjin¹-le⁴, xi³ va³te¹xo³ma³ ntˀia³-le⁴ Ni³na¹.
HEB 10:22 To⁴coi³ coi⁴ncha³čhian³-nia¹ nca³ tji¹qui²xi⁴ ni⁴ma⁴-na¹, nca³ nˀion¹ tji¹jnco³-ta³coan³², nca³ ña³qui³ nta³ ma³cjain¹-na¹, nca³ je² ni⁴ma⁴-na¹ je³coan³tsje³ tˀa³tsˀe⁴ cjoa⁴fa³ˀai³tsjen³ xi³ tsˀen⁴ nca³ tsa³cˀe¹jten⁴jon³ jo³-ni³ na³nta¹, cˀoa⁴ nca³ qui³sa³ne²jon³ yao³-na¹ cao⁴ na³nta¹ xi³ tsje³.
HEB 10:23 Coi⁴ntoa⁴nˀioan¹ cjoa⁴ni²qui²xi⁴ya³-na¹ xi³ tˀa³tsˀe⁴ xi³ cho³ya²-le⁴², nca³ tsi² tjin¹jen³ tjin¹cja¹ cjoa⁴fa³ˀai³tsjen³-na¹, nca⁴ Ni³na¹ xi³ qui³tsjoa³-na¹ tsˀoa³, ña³qui³ tji¹con³ nca³ si¹jnco³.
HEB 10:24 Cˀoa⁴ si⁴cja³ˀai³tsjen³jin³-nia¹ xi²nquia⁴² nca³ jnco¹jncoa¹, nca³ si⁴nˀion¹jian³² xi²nquia⁴², nca³ sˀe⁴-na¹ cjoa⁴tjao²cha³, cˀoa⁴ nca³ cˀoa⁴sˀian⁴² xa¹ xi³ nta³.
HEB 10:25 Li²coi³ si⁴cˀe¹jna³² nca³ coan⁴ña³², jo³-sˀin² nca³ tjin¹ cˀa³ xi³ cˀoa⁴-sˀin² ma³nca³-le⁴, to⁴nca³ cˀoe¹ne²-le⁴² xi²nquia⁴², to⁴nqui²sa⁴ cˀoa⁴sˀiaon⁴³ jo³-sˀin² nca³ jchao⁴³ nca³ je² ni⁴čhjin³-ve⁴ nčhoa¹čhian³.
HEB 10:26 Tsa² cˀoa⁴-sˀin² tjin¹-ta³coan³² nca³ coi⁴jncha¹ je¹ scan³-ni³ nca³ je³tjin¹-na¹ cjoa⁴fa³ˀai³tsjen³ xi³ cjoa⁴qui²xi⁴, li²coi³ ti⁴sˀe³jna³-ni³ njin¹ xi³ sˀe³jten⁴ xi³ vˀai²tˀa³ xi³ tˀa³tsˀe⁴ je¹,
HEB 10:27 to⁴nca³ cho³ya²-le⁴² cjoa⁴ñˀain³ xi³ xcon¹ tjin¹, cˀoa⁴ je² xi³ ña³qui³ cjoa⁴jti³ xi³ cao⁴ lˀi¹, xi³ cˀoa⁴-sˀin² si⁴²cje³jco³ je² xi³ co²ntran⁴-le⁴.
HEB 10:28 Je² xi³ chˀao³-sˀin² ve³con³ je² cjoa⁴te¹xo³ma³ xi³ tsˀe⁴ Moisés, vi³ya³ xi³ to⁴tˀa³tsˀe⁴ en¹-le⁴ xi³ jao² xi³ jan² testigo, nca³ tsi²jme³ cjoa⁴ma⁴ta³con² xi³ tjin¹.
HEB 10:29 Jo¹-sˀin² ni²cja³ˀai³tsjaon³ nca³ jon², a³ tsi² tsa² nqui²-sa⁴ tse³ cjoa⁴ñˀain³ va³quin²-le⁴ je² xi³ va³sen²ne² je² ˀnti¹-le⁴ Ni³na¹, cˀoa⁴ xi³ si¹cja³ˀai³tsjen³ nca³ jnti¹ cjoan³ je² njin¹ xi³ tsˀe⁴ cjoa⁴ xi³ qui³sˀe³nˀion¹, coi³ njin¹ xi³ qui³si³tsje³ nca³ je², cˀoa⁴ xi³ chˀao³ tso²-le⁴ je² Espíritu Santo xi³ tjin¹-le⁴ cjoa⁴nta³.
HEB 10:30 ˀya³-nia¹ je² xi³ qui³tso²: An³ xi³ si³jnta²³, an³ xi³ cˀoe³chja¹³, tso² je² Nai³-na¹. Cˀoa⁴ nqui²jnco³cˀa² qui³tso²: Je² Nai³-na¹ tsjoa¹-le⁴ cjoa⁴ñˀain³ je² na⁴xi⁴na³nta¹-le⁴.
HEB 10:31 Xcon¹-ni¹ nca³ sca⁴ya² ntsja³ Ni³na¹ xi³ ti¹jna³con³.
HEB 10:32 To⁴nca³ ca²ta³fa³ˀai³tsjen³jin³-ni³no³ ni⁴čhjin³ xi³ ja³ˀa³to³, coan³scan³-ni³ nca³ coan³ˀi³sen³-no³, cˀia⁴ nca³ cˀoa⁴-sˀin² qui³ni²cjain¹-lao⁴³ cjoa⁴si³ xi³ nˀion¹ tse³, nca³ qui³chja³ˀao²³ cjoa⁴ñˀain³.
HEB 10:33 Cjoa⁴qui²xi⁴-ni¹, sa³cˀoa⁴ chˀao³ qui³no²cjoa⁴-no³ nqui³xcon⁴ na⁴xi⁴na³nta¹, cˀoa⁴ cjoa⁴ñˀain³ qui³si³cja³ˀa¹-no³, cˀoa⁴ sa³cˀoa⁴ coan³mi²yo⁴-no³ nca³ jon² je² xi³ cˀoa⁴-ti⁴sˀin² chˀao³ qui³ni²cao⁴.
HEB 10:34 Cˀoa⁴-ti⁴ jon² coan³ma⁴chao³ je² xi³ tjio¹ cjoa⁴ñˀain³, cˀoa⁴ cˀia⁴ nca³ qui³ni²che¹-no³ je² tso³jmi²-no³, qui³chjoao¹³ cjoa⁴ñˀain³-ve⁴ cao⁴ cjoa⁴tsjoa³, nca³ tsa³ˀyao³ nca³ tjin¹-no³ tso³jmi² xi³ nqui²sa⁴ nta³ ya⁴ ncˀa³jmi³, cˀoa⁴ xi³ sˀe³jna³ntsjai²-no³.
HEB 10:35 A³li² ni²cha³-jion²³ tso²cˀoa⁴ xi³ nta³ nˀion¹tˀa³-ta³con²³, je² xi³ tse³ chji¹-le⁴.
HEB 10:36 Nca³ jon² ma³chjen¹-no³ nca³ jcho¹cjoa⁴jin³-no³, jme¹-ni³ nca³ coi⁴njen⁴-si¹ni³no³ je² cjoa⁴ni²sˀe³nqui³, cˀia⁴ nca³ je³qui³ni²tjo³son²³ jo³-sˀin² nca³ me³-le⁴ Ni³na¹.
HEB 10:37 Nqui²jnco³tjo²-la²ni³, je² xi³ cjoa⁴ˀai¹, cjoa⁴ˀai¹-ni¹, cˀoa⁴ li²coi³ coan⁴tse³ya³-le⁴.
HEB 10:38 Ntˀai⁴ je² xi³ cho⁴ta⁴cjoa⁴qui²xi⁴ cˀoe⁴²jna³con³-ni¹ xi³ to⁴tˀa³tsˀe⁴ nca³ ma³cjain¹-le⁴, to⁴nca³ tsa² coa⁴sen⁴tˀa³xin², li²coi³ sa³sen¹-le⁴ ni⁴ma⁴-na⁴.
HEB 10:39 To⁴nca³ ña¹ li²coi³ cˀoa⁴cjoan³² nca³ vi³ncha³tˀa³xian², nca³ cha⁴². Ña¹ cˀoa⁴cjoan³² jo³-ni³ je² xi³ ma³cjain¹-le⁴ nca³ coi⁴tjo³ntjai² ni⁴ma⁴-le⁴.
HEB 11:1 Coi³ xi³ ma³cjain¹-na¹, coi³ xi³ nta³ nˀion¹tˀa³-ta³coan³², nca³ cjoa⁴qui²xi⁴ nca³ tjio¹ je² cjoa⁴ xi³ cho³ya²-le⁴², xi³ vˀe¹jna³cho⁴ya³ tˀa³tsˀe⁴ cjoa⁴ xi³ tsi² ma³tsen³.
HEB 11:2 Coi³ nca³ coan³cjain¹-le⁴ je² cho⁴ta⁴jchi¹nca³, qui³chˀa²sje³qui²xi⁴ nqui³xcon⁴ Ni³na¹.
HEB 11:3 Coi³ nca³ ma³cjain¹-na¹, ma³cho⁴ya³-na¹ nca³ cao⁴ cjoa⁴te¹xo³ma³-le⁴ Ni³na¹ qui³sˀe³nta³-ni³ je² son³ˀnte³-vi⁴. Cˀoa⁴-sˀin² je² xi³ ma³tsen³ qui³sˀe³nta³-ni³ je² xi³ tsi² tsa² ma³tsen³.
HEB 11:4 Coi³ nca³ coan³cjain¹-le⁴ Abel, je² njin¹ xi³ sˀe³jten⁴ xi³ qui³tsjoa³tˀa³-le⁴ Ni³na¹ nqui²sa⁴ nta³-ni³ cao⁴-ni³ tsa² cjoa⁴tjao²-le⁴ Caín. To⁴coi³ cjoa⁴ nca³ qui³sˀe³jna³ en¹ nca³ cho⁴ta⁴cjoa⁴qui²xi⁴ coan³, nca³ Ni³na¹ qui³tsjoa³ en¹ tˀa³tsˀe⁴ cjoa⁴tjao²-le⁴. Nta³ tsa² cˀen³, to⁴jo³ nchja⁴-sa³ nca⁴ coan³cjain¹-le⁴.
HEB 11:5 Coi³ nca³ coan³cjain¹-le⁴ Enoc, qui³nˀo²sje³xin² i⁴ son³ˀnte³-vi⁴, nca³ tsi² tsa² cˀen³. Li²coi³ coan³sjai³, nca⁴ Ni³na¹ tsa³cˀa³sje³xin². To⁴nqui³-ni³ nca³ ji³tjo³xin², qui³sˀe³jna³ en¹ xi³ tˀa³tsˀe⁴ nca³ nta³ qui³sˀe³con³ Ni³na¹ xi³ tˀa³tsˀe⁴.
HEB 11:6 Tsa² tsi² ma³cjain¹-na¹, li²coi³ nta³ sˀe³con³ Ni³na¹ xi³ tˀa³tsan⁴². Je² xi³ fa³ˀai³con³-le⁴ Ni³na¹, ma³chjen¹ nca³ coan⁴cjain¹-le⁴ nca³ ti¹jna³ Ni³na¹, cˀoa⁴ nca³ Ni³na¹ tsjoa¹ chji¹-le⁴ je² cho⁴ta⁴ xi³ nˀion¹ va¹sjai³ nca³ je².
HEB 11:7 Coi³ nca³ coan³cjain¹-le⁴ Noé, cˀoa⁴ nca³ qui³tsa³cjon³que³, tsa³cˀe¹nta³ chi³tso³je³. Cˀoa⁴-sˀin² ji³tjo³ntjai² nca³tsˀi³ cho⁴ta⁴ni³ˀya³-le⁴, nca⁴ cˀoa⁴-sˀin² to⁴nqui³-ni³ tsa³cˀin²ya³-le⁴ xi³ tˀa³tsˀe⁴ cjoa⁴ xi³ cje³ ma³tsen³-jin²sa³. To⁴coi³ nca³ cˀoa⁴-sˀin² coan³cjain¹-le⁴ Noé, tsa³ca³co¹ nca³ tsa³quin²-le⁴ cjoa⁴ñˀain³ cho⁴ta⁴son³ˀnte³, cˀoa⁴-sˀin² tsa³cˀai²cjoa⁴tjao²-le⁴ cjoa⁴qui²xi⁴, xi³ sˀe⁴-na¹ nca³ ma³cjain¹-na¹.
HEB 11:8 Coi³ nca³ coan³cjain¹-le⁴ Abraham, cˀia⁴ nca³ qui³no²cjoa⁴-le⁴, qui³si³tjo³son² nca³ ji³tjo³ sa³ˀnta³ ya⁴ ˀnte³ xi³ cˀoa⁴-sˀin² cˀoai⁴cjoa⁴tjao²-le⁴. Cˀoa⁴ ji³tjo³ nca³ tsi² tsa² tsa³ve³ jña³-ni³ve⁴.
HEB 11:9 Coi³ nca³ coan³cjain¹-le⁴, tsa³cˀa³mjen³son² ya⁴ na³nqui³ xi³ qui³ni²sˀe³nqui³-le⁴ jo³-ni³ tsa² na³nqui³ xi³ qui³ni²quin³ya³-le⁴, cˀoa⁴ ntˀia³na³jño³ tsa³cˀe²jna³nqui³ cao⁴ Isaac cao⁴ Jacobo. Ti⁴coi³-ni³ cjoa⁴tjao² xi³ qui³ni²sˀe³nqui³-le⁴ Isaac, Jacobo, cao⁴ Abraham.
HEB 11:10 Nca⁴ qui³sco³ya²-le⁴ je² na⁴xi⁴na³nta¹tse³-ve⁴ xi³ tjin¹-le⁴ čhjao¹ja⁴ma⁴, jña³-le⁴ xi³ ti⁴je²-ni³ Ni³na¹ tsa³cˀe¹nta³, cˀoa⁴ qui³si³nta³.
HEB 11:11 Coi³ nca³ coan³cjain¹-le⁴, cˀoa⁴-ti⁴ ti⁴je²-ni³ Sara, nca³ je³ja³ˀa³to³-le⁴ ni⁴čhjin³ nca³ sˀe⁴-le⁴ xti³, qui³sˀe³-le⁴ nca³nˀion¹ nca³ coan³-le⁴ tsa³cˀe¹ ˀnti¹. Sara qui³sco³son²-le⁴ nca³ Ni³na¹ ña³qui³ tjin¹qui²xi⁴con³ cˀia⁴ nca³ qui³si³sˀe³nqui³-le⁴ jnco³ ˀnti¹.
HEB 11:12 Nta³ tsa² to⁴jnco³ ma³-ni³ Abraham, cˀoa⁴ je² jo³-ni³ tsa² cˀen³, qui³sˀe³-le⁴ ntje⁴ xi³ ncjin² ma³-ni³ jo³-ni³ ni³ño³-le⁴ ncˀa³jmi³, jo³-ni³ tso⁴mi¹ xi³ tjio¹ntai³-le⁴ nta¹chi³con³ xi³ tsi² ma³xqui⁴.
HEB 11:13 To⁴jo³ coan³cjain¹-le⁴ cˀia⁴ nca³ cˀen³ nca³tsˀi³ je²-vi⁴. Li²coi³ qui³scoe¹ je² cjoa⁴ni²sˀe³nqui³, to⁴cjin³ qui³sco²tsen³-ni³le⁴, cˀoa⁴ coan³tsjoa³-le⁴ jo³-ni³ tsa² qui³cˀa¹ya³ntia³. Qui³si³qui²xi⁴ya³ nca³ to⁴tsa³cˀa³mjen³son² i⁴ son³ˀnte³-vi⁴ nca⁴ xin² ˀnte³-le⁴.
HEB 11:14 Je² xi³ cˀoi⁴tso² je²-vi⁴, ña³qui³ tso²ya³tsen³-ni¹ nca³ va¹sjai³ jnco³ ˀnte³ xi³ ña³qui³ tsˀe⁴.
HEB 11:15 Tsa² ja³ˀai³tsjen³-la²ni³le⁴ xi³ tsˀe⁴ ˀnte³ jña³ nca³ ji³tjo³-ni³, cjoa⁴qui²xi⁴ qui³tjo³ˀnte³-le⁴ nca³ qui³si³cˀo¹fa³ya³-ni³.
HEB 11:16 To⁴nca³ qui³tjen⁴nqui³-le⁴ xi³ nqui²sa⁴ nta³ tjin¹, coi³ xi³ tso²-ni³, je² xi³ tsˀe⁴ ncˀa³jmi³. Cˀoa⁴-sˀin² Ni³na¹ li²coi³ ma³soa³-le⁴ nca³ cˀoa⁴ˀmi²-le⁴ Ni³na¹-le⁴ xi³ tsˀe⁴, nca⁴ tsa³cˀe¹nta³-le⁴ jnco³ na⁴xi⁴na³nta¹.
HEB 11:17 Coi³ nca³ coan³cjain¹-le⁴ Abraham, qui³tsjoa³tˀa³ Isaac, cˀia⁴ nca³ cˀoa⁴-sˀin² qui³cho²tˀa³. Je² xi³ qui³scoe¹tjao² cjoa⁴ni²sˀe³nqui³, qui³tsjoa³tˀa³ ˀnti¹-le⁴ xi³ to⁴jnco³ je².
HEB 11:18 cˀoa⁴-sˀin² tsa³cˀin²-le⁴ Abraham: Xi³ to⁴tˀa³tsˀe⁴ Isaac cˀoa⁴-sˀin² cˀoai⁴-li² ntje⁴ xi³ yˀa³ jan³ˀain¹-li⁴.
HEB 11:19 Qui³sco³son²-ni³le⁴ Abraham nca³ Ni³na¹ coan⁴-le⁴ si⁴²cja³ˀa¹ya³-ni³le⁴ cho⁴ta⁴, nta³ tsa² je³cˀen³. Cˀoa⁴-sˀin² qui³scoe¹ Isaac nqui²jnco³cˀa²-ni³, jo³-ni³ tsa² nco³ya³-le⁴ xi³ je³cˀen³.
HEB 11:20 Coi³ nca³ coan³cjain¹-le⁴ Isaac, qui³si³chi³con³tˀain³ Jacobo cao⁴ Esaú, xi³ tˀa³tsˀe⁴ cjoa⁴ xi³ cjoa⁴ˀai¹.
HEB 11:21 Coi³ nca³ coan³cjain¹-le⁴ Jacobo, cˀia⁴ nca³ je³ti¹vi³ya³, qui³si³chi³con³tˀain³ nca³ jnco¹jnco¹ xti³-le⁴ José, cˀoa⁴ tsa³ve³xcon¹ Ni³na¹ nca³ tsa³ca³sen²xcon¹nchˀin³ tsa³cja³jten²tˀa³ ya¹ni³se³-le⁴.
HEB 11:22 Coi³ nca³ coan³cjain¹-le⁴ José, cˀia⁴ nca³ je³ti¹vi³ya³, tsa³cˀe¹ya³ na⁴jmi¹ jo³-sˀin² coi⁴tjo³ xti³-le⁴ Israel, cˀoa⁴ qui³tsjoa³ cjoa⁴te¹xo³ma³ xi³ tˀa³tsˀe⁴ ni³nta³-le⁴.
HEB 11:23 Coi³ nca³ coan³cjain¹-le⁴ xi³jcha¹-le⁴ Moisés, cˀia⁴ nca³ qui³tsin³ Moisés, jan² sa¹ qui³si³cˀe¹jna³ˀma³, nca⁴ tsa³ve nca³ na⁴sca¹ cji³ je² ˀnti¹-ve⁴, cˀoa⁴ li²coi³ qui³tsa³cjon¹-le⁴ cjoa⁴te¹xo³ma³-le⁴ je² cho⁴ta⁴ti¹tjon².
HEB 11:24 Coi³ nca³ coan³cjain¹-le⁴ Moisés, cˀia⁴ nca³ je³jchi¹nca³, coan³cai³-le⁴ nca³ cˀoa⁴tsa³cˀin²-le⁴ ti³-le⁴ tso²ti³-le⁴ Faraón.
HEB 11:25 To⁴sa³ tsa³cja³ˀa¹jin³ nca³ tsa³cja³ˀa¹ cjoa⁴ñˀain³ cao⁴ cho⁴ta⁴-le⁴ Ni³na¹, nca⁴ li²coi³ tsa³cja³ˀa¹jin³ nca³ coan³me³con³ cjoa⁴tsjoa³-le⁴ je¹ xi³ to⁴fa³ˀa³to³.
HEB 11:26 Qui³sco³son²-ni³le⁴ nca³ nqui²sa⁴ chji¹-le⁴ cjoa⁴ nca³ qui³no²cjoa⁴ˀaon³-ni³le⁴ tˀa³tsˀe⁴ Cristo cao⁴-ni³ tsa² je² cjoa⁴nchi⁴na¹ xi³ tsˀe⁴ ya⁴ Egipto, nca⁴ qui³sco³ya³ je² chji¹-le⁴ Ni³na¹.
HEB 11:27 Coi³ nca³ coan³cjain¹-le⁴, ji³tjo³-ni³ ya⁴ Egipto. Li²coi³ qui³tsa³cjon¹-le⁴ cjoa⁴jti³-le⁴ cho⁴ta⁴ti¹tjon², nca⁴ qui³si³nˀion¹jin³ yao³-le⁴ jo³-ni³ tsa² xi³ ti¹co³tsen³-le⁴ xi³ tsi² ma³tsen³.
HEB 11:28 Coi³ nca³ coan³cjain¹-le⁴, tsˀa³sje³ sˀoi¹ pa²xco⁴ njin¹ xi¹jten⁴jon³, jme¹-ni³ nca³ je² a²ncje⁴ xi³ qui³si³cˀen³ ˀnti¹tjon² li²coi³ si⁴²cao⁴-si¹ni³ je² xti³-le⁴ Israel.
HEB 11:29 Coi³ nca³ coan³cjain¹-le⁴ je² cho⁴ta⁴ Israel, ja³ˀa³jin³ je² nta¹chi³con³ xi³ ni² ˀmi², jo³-ni³ na³nqui³qui³xi². Cˀia⁴ nca³ je² cho⁴ta⁴ Egipcios qui³sco²tˀa³ nca³ ja³ˀa³jin³, ya⁴ qui³cha³nqui³nta¹.
HEB 11:30 Coi³ nca³ coan³cjain¹-le⁴, qui³tsao³jen³ je² xjao¹lao⁴ xi³ ncha³ntai³-le⁴ ya⁴ Jericó cˀia⁴ nca³ tsa³cˀe²ma³ntai³-le⁴ ña³to³ ni⁴čhjin³.
HEB 11:31 Coi³ nca³ coan³cjain¹-le⁴ Rahab, je² chjon⁴²cha³jnqui³, li²coi³ to⁴jnco³ qui³cha³ cao⁴ xi³ tsi² ma³cjain¹-le⁴, cˀia⁴ nca³ to⁴ˀi³nta³nchˀan¹ qui³tsjoa³-le⁴ ˀnte³ je² cho⁴ta⁴-le⁴ Ni³na¹ xi³ ji³cho² co³tsen³che¹.
HEB 11:32 Cˀoa⁴ jme¹-sa³ xi³ xian¹³, nca⁴ ni⁴čhjin³ cha³-sa³na³ nca³ cˀoe³na⁴jmia¹³ xi³ tˀa³tsˀe⁴ Gedeón, xi³ tˀa³tsˀe⁴ Barac, xi³ tˀa³tsˀe⁴ Sansón, xi³ tˀa³tsˀe⁴ Jefté, xi³ tˀa³tsˀe⁴ David, xi³ tˀa³tsˀe⁴ Samuel, cˀoa⁴ xi³ tˀa³tsˀe⁴ je² cho⁴ta⁴ xi³ qui³nchja⁴ya³ tˀa³tsˀe⁴ Ni³na¹.
HEB 11:33 Coi³ nca³ coan³cjain¹-le⁴, qui³si³qui³njen³ ˀnte³, tsa³cˀe¹ne² xi³ cjoa⁴qui²xi⁴, ji³cho¹tjen⁴nqui³ xi³ qui³ni²sˀe³nqui³, tsa³cˀe¹chjoa² tsˀoa³ xa³,
HEB 11:34 qui³si³cji³tsˀao³ nca³nˀion¹-le⁴ lˀi¹, ji³tjo³chi³nca³-ni³le⁴ qui⁴cha⁴ xi³ si⁴²cˀen³. Nta² tsa² tsin²-le⁴ nca³nˀion¹-jin² yao³-le⁴ qui³sˀe³-le⁴ nca³nˀion¹. Cˀoa⁴-sˀin² nqui²sa⁴ ta²ja³ coan³ cˀia⁴ nca³ qui³scan³, qui³si³to³ca³ je² so³nta²do⁴ xi³ xin² ˀnte³-le⁴.
HEB 11:35 Je² ya¹nchjin¹ qui³scoe¹ je² cˀen³-ve⁴ nca³ ja³ˀa¹ya³-ni³le⁴. Tjin¹ cˀa³ xi³ nˀion¹ chˀao³ tjin¹ cjoa⁴ñˀain³ tsa³cja³ˀa¹, nca³ cai³-le⁴ qui³scoe¹ cjoa⁴vi³tjo³ntjai²-le⁴, jme¹-ni³ nca³ si⁴²qui³njen³-si¹ni³ cjoa⁴fa³ˀa¹ya³ xi³ nqui²sa⁴ nta³.
HEB 11:36 Xi³cˀa³ ja³ˀa³to³ cjoa⁴ñˀain³ nca³ tsa³qui³jno²cha³, cˀoa⁴ nca³ tsa³ca¹-le⁴, cˀoa⁴-ti⁴ qui³sa³tio²nˀion¹ ja⁴ya³ nto⁴ya¹.
HEB 11:37 Cˀoa⁴-sˀin² qui³sa³te³-le⁴ la⁴jao⁴, cˀoa⁴ qui⁴cha⁴ni⁴ˀño⁴ qui³si³jao²ya³-ni³, chˀao³ qui³ni²cao⁴, qui³ni²cˀen³-ni³ qui⁴cha⁴, tsa³cˀe²ma³ nca³ˀi⁴ nca³jan¹ nca³ to⁴čhjoa⁴-le⁴ va³rre² cao⁴ xi³ tsˀe⁴ ti²ntso⁴ tsa³cˀa³cja¹, yo⁴ma⁴ tsa³ca³tio², nˀion¹ tse³ cjoa⁴ñˀain³ qui³sˀe³-le⁴, cˀoa⁴ chˀao³ tsa³ˀya³ta³con².
HEB 11:38 Je² son³ˀnte³ li²coi³ tsa³quin²-le⁴ cho⁴ta⁴ xi³ cˀoa⁴ cjoan³. Cˀoa⁴-sˀin² tsa³cˀe²ma³tˀa³xin² ya⁴ ˀnte³tˀa³xin²tˀa³, jin³jña¹, nqui³nqui³jao³, cˀoa⁴ ya⁴ nca⁴jao⁴ jin³ na³nqui³.
HEB 11:39 Nca³tsˀi³ je²-vi⁴, nta³ tsa² qui³tsˀai²-le⁴ en¹ xi³ tˀa³tsˀe⁴ nca³ ña³qui³ nta³ coan³cjain¹-le⁴, li²coi³ qui³sa³co³-le⁴ je² cjoa⁴ni²sˀe³nqui³.
HEB 11:40 Ni³na¹ to⁴nqui³-ni³ tsa³cˀe¹nta³ jnco³ cjoa⁴ xi³ nqui²sa⁴ nta³ xi³ tˀa³tsan⁴², jme¹-ni³ nca³ tsi² coan⁴jnco³-si¹ni³ nca³ je², tsa² tsian² nca³ ña¹.
HEB 12:1 A³li² to⁴cˀoa⁴ cji³ ncjin² cho⁴ta⁴ testigo xi³ tjio¹ntai³ jnco³tjo³ntai³-na¹. Coi³ cjoa⁴-vi⁴ nca³ si⁴cˀe¹jna³ tˀa³xian² nca³yi³je³ xi³ ai¹, cˀoa⁴ je² je¹ xi³ si¹ñˀain³-na¹. To¹ca³-la²nta³² cao⁴ cjoa⁴tse³jta³ je² cjoa⁴to³ca³na⁴cha⁴ xi³ ti¹jna³ nqui³xcoan³².
HEB 12:2 Nta³ cho¹tsen³-le⁴² Jesús, xi³ tjen⁴ ti¹tjon²-na¹, cˀoa⁴ ña³qui³ si¹jnco³ jo³-sˀin² ma³cjain¹-na¹. Qui³cho²cjoa⁴cao⁴-le⁴ cro² xi³ tˀa³tsˀe⁴ je² cjoa⁴tsjoa³ xi³ qui³sˀe³jna³ nqui³xcon⁴, a³li²coi³ qui³si³sin³-le⁴ cjoa⁴soa³. Tsa³cˀe²jna³ nca³qui²xi⁴-le⁴ je² ya¹xi²le⁴-le⁴ Ni³na¹.
HEB 12:3 Jesús xi³ qui³cho²jta²jin³ cjoa⁴ñˀain³ cˀia⁴ nca³ cho⁴ta⁴je¹ qui³nchja⁴ˀaon³-le⁴. Nta³ ti⁴cja³ˀai³tsjen³jion³ xi³ tˀa³-tsˀe⁴, jme¹-ni³ nca³ tsi² coi⁴jta³-si¹nio³ nca³ coan⁴ˀi³nta³jin³ ni⁴ma⁴-no³.
HEB 12:4 To⁴jo³ cje³ vi³yo³ta²ja³-jion²³ sa³ˀnta³ nca³ njin¹-no³ xi¹jten⁴, nca³ vi³xcan³tˀao³ je¹.
HEB 12:5 A³ je³cˀoa⁴-sˀin² qui³cha³jin³-no³ jo³-sˀin² nca³ vˀe¹ne²-no³ xi³ fa¹cao⁴-no³ jo³-ni³ tsa² xi³ cao⁴ xti³-le⁴, nca³ tso²: ˀnti¹-na⁴, a³li² taon³-jin² ˀyai³ je² cjoa⁴ni²qui²xi⁴-le⁴ Nai³-na¹, ni⁴ma³ˀi³nta³jin³-jin² cˀia⁴ nca³ je² si¹qui²xi⁴-li².
HEB 12:6 Je² Nai³-na¹ tsjoa¹-le⁴ cjoa⁴ñˀain³ je² xi³ tsjoa³que³, cˀoa⁴ va¹-le⁴ nca³tsˀi³ ˀnti¹-le⁴ xi³ cjoe¹tjao².
HEB 12:7 Tsa² coi³ cjoa⁴ñˀain³ ti¹cho¹cjoa⁴cao⁴-no³, Ni³na¹ cˀoa⁴-sˀin² ve³con³-no³ jo³-ni³ tsa² ˀnti¹-le⁴, nca⁴ ˀya¹ ˀnti¹-ni³ve⁴, xi³ tsi² tsa² nˀai³-le⁴ tsjoa¹-le⁴ cjoa⁴ñˀain³.
HEB 12:8 To⁴nca³ tsa² xin² ti³yo³-lao⁴³ je² cjoa⁴ñˀain³-ve⁴ xi³ cˀoa⁴-sˀin² tsˀa³coa⁴-le⁴ nca³tsˀi³, cˀia⁴ ˀnti¹xin² nio¹-ˀni³, cˀoa⁴ li²coi³ ña³qui³ ˀnti¹nta³-le⁴ Ni³na¹.
HEB 12:9 Nca³tsˀia³² qui³sˀe³-na¹ nˀai³ xi³ tsˀe⁴ yao³-na¹ xi³ qui³tsjoa³-na¹ cjoa⁴ñˀain³, cˀoa⁴ tsa³ˀya³xcoan¹. A³ tsi² tsa² nqui²sa⁴ nta³ si⁴tjo³son²-si¹ni³le⁴² je² Nˀai³-le⁴ ni⁴ma⁴-na¹, cˀoa⁴ coi⁴yo³choan³².
HEB 12:10 Cˀoa⁴ je² nˀai³-na¹ve⁴ xi³ tsˀe⁴ yao³-na¹, cjoa⁴qui²xi⁴ to⁴choa³ ni⁴čhjin³ qui³tsjoa³-na¹ cjoa⁴ñˀain³ jo³-sˀin² nca³ je² qui³sco³son²-le⁴, to⁴nca³ Ni³na¹ tsjoa¹-na¹ cjoa⁴ñˀain³, jme¹-ni³ nca³ chjoe¹-si¹nia³² cjoa⁴ xi³ nta³ tjin¹, jme¹-ni³ nca³ cˀoa⁴cao⁴-si¹ni³na¹ nca³ tsje³ coan⁴², jo³-sˀin² tsje³ cjoan³ nca³ je².
HEB 12:11 Cjoa⁴qui²xi⁴-ni¹, cˀia⁴ nca³ sˀe³ cjoa⁴ñˀain³, ni⁴jme³-jin² cjoa⁴ñˀain³ xi³ tsjoa¹ cjoa⁴tsjoa³, to⁴cjoa⁴va³ xi³ tsjoa¹, to⁴-nca³ scan³-ni³ tsjoa¹-le⁴ cjoa⁴qui²xi⁴ xi³ nchˀan¹ tjin¹ je² xi³ ti¹ni²qui³ncha¹qui²xi⁴.
HEB 12:12 To⁴coi³ cho¹mi³tjaon⁴³ ntsao⁴³ xi³ tsi² ma³ si¹cjan³, cˀoa⁴ tˀai²nca³nˀion¹-lao⁴³ xco¹-no³ xi³ tsi² ti⁴ma³tin²ya³-ni³.
HEB 12:13 Cho³ˀai²ˀntao³ ntia⁴² xi³ qui²xi⁴ xi³ tˀa³tsˀe⁴ ntso⁴co³, jme¹-ni³ nca³ je² xi³ chi³ˀnque¹ li²coi³ coa⁴tji³jin³-ni³le⁴ xi¹-ncjin¹ ni³nta³ntso⁴co⁴, to⁴nca³ ca²ta³nta³-ni³.
HEB 12:14 Cao⁴ nca³tsˀi³ cho⁴ta⁴ ti⁴ncha³tjen⁴nqui³-lao⁴³ cjoa⁴ xi³ nchˀan¹ tjin¹, cˀoa⁴ cjoa⁴ xi³ ña³qui³ tsje³ cjoan³. Tsa² tsin² je² cjoa⁴-ve⁴, ni⁴ˀya³-jin² xi³ scoe⁴ je² Nai³-na¹.
HEB 12:15 Nta³ cho¹tsaon³ nca³ ni⁴ˀya³-jin² xi³ coa⁴sen⁴tˀa³xin²-le⁴ cjoa⁴nta³-le⁴ Ni³na¹, cˀoa⁴ nca³ ni⁴jme³-jin² cjoa⁴jnčha³ xi³ cjoa⁴ˀai¹jin³-no³ xi³ chˀao³-sˀin² si⁴²ca³tio¹-no³. Xi³ to⁴tˀa³tsˀe⁴ je² cjoa⁴jnčha³-ve⁴ ncjin² ma³-ni³ xi³ coan⁴tˀain³-le⁴.
HEB 12:16 Ni⁴ˀya³-jin² xi³ cha³jnqui³ ca²ta³ma³. Nca³tsˀi³ ca²ta³ve³xcon¹ Ni³na¹. A³li² cˀoa⁴-jin² ca²ta³sˀin¹ jo³-ni³ Esaú xi³ to⁴tˀa³tsˀe⁴ to⁴jnco³ tso³jmi² xi³ chi³ne³, tsa³ca³te¹na³-ni³ je² tso³jmi² xi³ tsˀa³cao⁴-le⁴ jo³-ni³ ˀnti¹tjon².
HEB 12:17 Je³ˀyao³ nca³ coan³scan³-ni³ cˀia⁴ nca³ coan³me³-le⁴ nca³ scoe¹ je² cjoa⁴tjao² xi³ tsˀe⁴, xi³ coi³ cjoa⁴ni²chi³con³tˀain³, li²coi³ qui³tjo³ˀnte³-le⁴, nca⁴ li²coi³ ti⁴qui³sˀe³-ni³le⁴ ˀnte³ nca³ qui³si³cˀa³ntjai²ya³ cjoa⁴fa³ˀai³tsjen³-le⁴, nta³ tsa² cˀoa⁴-sˀin² tsa³ca¹sjai³ cao⁴ nta¹xcon⁴.
HEB 12:18 Jon² li²coi³ ji³cho³ ya⁴ ni³nto³-ve⁴ xi³ coan³ qui³ni²cao⁴, cao⁴ je² lˀi¹ xi³ qui³ti². Jon² li²coi³ ji³cho³ xi³ chon³ va³, xi³ chon³ njion², xi³ je² jtsi¹xcon¹,
HEB 12:19 xi³ je² jta⁴-le⁴ čhjao³, xi³ jta⁴-le⁴ en¹ xi³ cˀoa⁴qui³tso² sa³ˀnta³ je² xi³ qui³nčhˀoe¹-le⁴ tsa³cˀe¹tsˀoa³ nca³ tsi² tsa² ti⁴cˀoa⁴cˀoin¹-sa³ni³le⁴ cjoa⁴-vi⁴.
HEB 12:20 Nca⁴ tsi² tsa² ti⁴coan³ qui³cho¹cjoa⁴-ni³le⁴ je² xi³ qui³sˀe³ne². Nta³ tsa² cho⁴, tsa² si⁴²cao⁴ je² ni³nto³, lao⁴ sa⁴te¹-le⁴, a³xo⁴ qui⁴cha⁴ coai⁴sˀen³cja¹-le⁴.
HEB 12:21 Cˀoa⁴ nˀion¹ xcon¹ tjin¹ cjoa⁴ xi³ coan³tsen³ sa³ˀnta³ qui³tso² Moisés: To⁴ti²jna⁴xcon¹-nia¹³, cˀoa⁴ ti²fa³tse¹-nia¹³.
HEB 12:22 To⁴nca³ jon² je³cˀoa⁴-sˀin² ji³cho³ ni³nto³ xi³ Sion ˀmi², cˀoa⁴ je² na⁴xi⁴na³nta¹-le⁴ Ni³na¹ xi³ ti¹jna³con³, je² Jerusalén xi³ tsˀe⁴ ncˀa³jmi³. Jon² ji³cho³ jña³ nca³ ncjin² jmi³ ma³-ni³ a²ncje⁴ xi³ coan³ña³,
HEB 12:23 cˀoa⁴ jña³ nca³ tjio¹jtin¹ je² xi³ ˀnti¹tjon² xi³ cˀoa⁴-sˀin² tjio¹tˀa³ jan³ˀain¹-le⁴ ya⁴ ncˀa³jmi³. Jon² ji³cho³tˀa³-lao⁴³ Ni³na¹ xi³ juez tˀa³tsˀe⁴ nca³tsˀi³, cˀoa⁴ ji³cho³tˀa³-lao⁴³ je² espíritu-le⁴ cho⁴ta⁴ xi³ tjin¹-le⁴ cjoa⁴qui²xi⁴ xi³ ña³qui³ coan³jnco³,
HEB 12:24 cˀoa⁴ ji³cho³tˀa³-lao⁴³ Jesús, je² xi³ vˀe¹nta³jin³-le⁴ cjoa⁴cho⁴tse⁴ xi³ qui³sˀe³nˀion¹, cˀoa⁴ je² njin¹ xi³ qui³chjo³jnti²va³jon³, xi³ nqui²sa⁴ nta³ nchja⁴ cao⁴-ni³ tsa² tsˀe⁴ Abel.
HEB 12:25 Na²nta³-lao⁴³ nca³ jon², jme¹-ni³ nca³ tsi² tsa² cˀoe¹chjoa²ˀa³-si¹nio³ je² xi³ nchja⁴. Tsa² je² xi³cˀa³ tsi² tsa² coan³ tsa³nca³ cˀia⁴ nca³ tsa³cˀe¹chjoa²ˀa³ je² xi³ qui³nchja⁴ya³ i⁴ son³ˀnte³-vi⁴, nqui²sa⁴ to⁴choa³ coan⁴ coi⁴yoa³² tsa² cˀoe¹chjoa²ˀa³² je² xi³ ncˀa³jmi³ nchja⁴ya³-ni³.
HEB 12:26 Je² jta⁴-le⁴ xi³ cˀia⁴ qui³si³tin²ya³ son³ˀnte³, to⁴nca³ ntˀai⁴ qui³tsjoa³ tsˀoa³ nca³ tso²: To⁴jnco³ cˀa²-sa³ an³ ntia³ si³tin²ya³, a³li² to⁴je²-jin² na³nqui³, to⁴nca³ cˀoa⁴²-ti⁴ ncˀa³jmi³.
HEB 12:27 Cˀoa⁴ je² en¹-vi⁴ xi³ tso²: To⁴jnco³ cˀa²-sa³, ntia³ va³co¹ nca³ coi⁴tjo³xin² je² tso³jmi² xi³ ma³tin²ya³ jo³-ni³ tsa² tso³-jmi² xi³ xa¹ coan³nta³-ni³, jme¹-ni³ nca³ sa⁴tio²-si¹ni³ je² tso³jmi² xi³ tsi² ma³tin²ya³.
HEB 12:28 Cˀoa⁴-sˀin² nca³ chjoe¹ je² cjoa⁴te¹xo³ma³ xi³ tsi² tsa² ma³tin²ya³, ca²ta³sˀe³-na¹ cjoa⁴nta³. Cˀoa⁴-sˀin² nta³ coan⁴chjen¹-le⁴² tˀa³tsˀe⁴ Ni³na¹, jo³-sˀin² sa³sen¹con³ nca³ je² nca³ jcon³ cha³², cˀoa⁴ nca³ xcon¹ jcha⁴².
HEB 12:29 Nca⁴ cjoa⁴qui²xi⁴ je² Ni³na¹-na¹ jo³-ni³ lˀi¹ ni¹ xi³ si¹cje³jco³-ni³.
HEB 13:1 Ca²ta³ma³tsjoa³cha³ntsjao²³ ntsˀao³.
HEB 13:2 A³li² ni²cha³jin³-jion²³ nca³ cˀoai⁴ˀnte³-lao⁴³ je² xi³ fi³cho¹con³-no³. Cˀoa⁴-sˀin² tjin¹ cˀa³ xi³ cˀoa⁴-sˀin² qui³tsjoa³ˀnte³-le⁴ a²ncje⁴, nta³ tsa² tsi² tsa³ve³.
HEB 13:3 Ti⁴cja³ˀai³tsjen³jion³ je² xi³ cjoa⁴ñˀain³ tjio¹, jo³-ni³ tsa² cˀoa⁴-ti⁴ to⁴jnco³ ti³yo³ cjoa³ñˀain³ cao⁴ je², cˀoa⁴ ti⁴cja³ˀai³tsjen³jion³ je² xi³ chˀao³ ˀya³ta³con² jo³-ni³ nca³ cˀoa⁴-ti⁴ jon² ti³yo³jin³-sa³lao⁴³ yao³-no³.
HEB 13:4 Nca³tsˀi³ ca²ta³ve³xcon¹ je² cjoa⁴vi³xan³, cˀoa⁴ je² cjoa⁴-le⁴ a³li² chˀao³-jin² ma³, to⁴nca³ je² xi³ si¹cha³jnqui³, cˀoa⁴ je² xi³ si¹cha³jnqui³tˀa³-le⁴ chjon⁴²-le⁴ a³xo⁴ xˀin⁴-le⁴, Ni³na¹ tsjoa¹-le⁴ cjoa⁴ñˀain³.
HEB 13:5 Cˀoa⁴-sˀin² ti⁴yo³ a³li² cjoa⁴nchi⁴na¹-jin² ni²me³-ta³con²³. Tˀe²jnco³-ta³con²³ cao⁴ xi³ je³tjin¹-no³, nca⁴ Ni³na¹ cˀoa⁴qui³tso²: Li²coi³ xin² coa²te⁴jna³-le²³, ni⁴tsjion³con³-jin²le²³.
HEB 13:6 Cˀoa⁴-sˀin² nca³ cˀoa⁴coi⁴xon¹-nia¹ nca³ nˀion¹-ta³coan³²: Je² Nai³-na¹ xi³ va³sen¹cao⁴-na³, li²coi³ tsa³cjon³-nia¹³. Jme¹ xi³ coan⁴ si⁴²cao⁴-na³ cho⁴ta⁴.
HEB 13:7 Ti⁴cja³ˀai³tsjen³jin³-nio³ je² xi³ va¹ntia⁴²-no³, je² xi³ qui³nchja⁴ya³-no³ je² en¹-le⁴ Ni³na¹. Chjen¹nqui³-lao⁴³ jo³-sˀin² ma³cjain¹-le⁴, nta³ ti⁴cja³ˀai³tsjen³jion³ jme³ xi³ qui³sa³co³-le⁴ jo³-sˀin² qui³cao⁴ yao³-le⁴.
HEB 13:8 Jesucristo to⁴nco¹son²-le⁴ nco²jña⁴, cˀoa⁴ ntˀai⁴, cˀoa⁴ nca³ntsjai² ni⁴čhjin³.
HEB 13:9 A³li² vˀai²ˀnte³-jin²lao⁴³ cjoa⁴fa³ˀai³tsjen³ xi³ ncjin² ma³-ni³, xi³ cja⁴ˀai¹nca¹ nca³ xin² fi²cao⁴-no³. Nta³ tjin¹ cjoa⁴ nca³ cao⁴ cjoa⁴nta³ vˀai²nca³nˀion¹-le⁴ ni⁴ma⁴-na¹. Li²coi³ vˀai²nca³nˀion¹-le⁴ ni⁴ma⁴-na¹ cao⁴ tso³jmi² xi³ chi³ne³, xi³ tsi² tsa² jme³ chji¹-le⁴ je² xi³ to⁴coi³ tjio¹-ni³.
HEB 13:10 Tjin¹-na¹ jnco³ son²xta². Je² xi³ si¹xa¹ ya⁴³ ntˀia³na³jño³ li²coi³ tjin¹-le⁴ ˀnte³ nca³ squi⁴ne⁴ je² xi³ tsˀe⁴ son²xta²-ve⁴.
HEB 13:11 Je² njin¹-le⁴ cho⁴-ve⁴ xi³ vˀai²tˀa³ tˀa³tsˀe⁴ je¹ fi²cao⁴sˀen³ ya⁴ ˀnte³tsje³ xi³ to⁴tˀa³tsˀe⁴ na⁴ˀmi³ti¹tjon², to⁴nca³ je² yao³-le⁴ cho⁴-ve⁴ ti² tˀa³xin²-le⁴ ya⁴ ˀnte³-ve⁴.
HEB 13:12 To⁴coi³ cˀoa⁴-ti⁴ Jesús tsa³cja³ˀa¹ cjoa⁴ñˀain³ nti³tsin³ xo⁴ntjoa⁴-le⁴ na⁴xi⁴na³nta¹, jme¹-ni³ nca³ qui³si³tsje³-si¹ni³ je² cho⁴ta⁴na⁴xi⁴na³nta¹ cao⁴ xi³ ti⁴tsˀe⁴-ni³ njin¹.
HEB 13:13 Cjoin³chon¹-le⁴² tso²cˀoa⁴ nca³ je² ya⁴ ˀnte³tˀa³xin²-ve⁴, cˀoa⁴ chˀa⁴² cjoa⁴ˀaon³ta³con² xi³ tˀa³tsˀe⁴.
HEB 13:14 Nca⁴ tsi² tsa² i⁴ ti¹jna³-na¹ na⁴xi⁴na³nta¹ xi³ ti¹jna³ntsjai², to⁴nca³ fa³sjai³-nia¹ je² xi³ cjoa⁴ˀai¹.
HEB 13:15 Xi³ to⁴tˀa³tsˀe⁴ Jesucristo cˀoai⁴tˀa³ntsjai²-le⁴² Ni³na¹ coi³ cjoa⁴tjao² xi³ jo³-ni³ njin¹ xi³ sˀe³tjen⁴, nca³ nta³ chˀa³sje³-nia¹ Ni³na¹, xi³ tso²-ni³, en¹-le⁴ ntso⁴ˀva³² xi³ si¹qui²xi⁴ya³ tˀa³tsˀe⁴.
HEB 13:16 A³li² ni²cha³jin³-jion²³ nca³ nta³ sˀiaon⁴³, cˀoa⁴ nca³ coi⁴ncha³cao⁴³ xi³cˀa³, nca⁴ coi³ cjoa⁴tjao² xi³ sa³sen¹-le⁴ Ni³na¹.
HEB 13:17 Ti⁴tjo³son²-lao⁴³ je² xi³ va¹ntia⁴²-no³, cˀoa⁴ na³nqui³ ti⁴yo³-lao⁴³ nca³ je², nca⁴ ti⁴je²-ni³ va³tio²con²tˀain³ xi³ tˀa³-tsˀe⁴ ni⁴ma⁴-no³, nca⁴ tjin¹ne²-le⁴ nca³ tsjoa¹ coi²nta⁴. Ti⁴tjo³son²-lao⁴³ jme¹-ni³ nca³ cˀoa⁴sˀin⁴²-si¹ni³ cao⁴ cjoa⁴tsjoa³, nca³ tsi² tsa² cao⁴ cjoa⁴fao¹, nca⁴ je²-vi⁴ li²coi³ jo³-sˀin² coan⁴chjen¹-no³.
HEB 13:18 Tˀe²tsˀoa³ntjai²-na³jin⁴, nca⁴ nta³ ˀya³-ta³coin²jin⁴ nca³ nta³ cjoa⁴fa³ˀai³tsjen³ tjin¹-na³jin⁴, nca⁴ me³-na³jin⁴ nca³ nta³ coa⁴nquin¹coai⁴-jin⁴ yao³-na⁴jin⁴ nca³yi³je³ cjoa⁴.
HEB 13:19 Cˀoa⁴ nqui²sa⁴ vˀe³tsˀoa²³-no³ nca³ cˀoa⁴-sˀin² sˀiaon⁴³, jme¹-ni³ nca³ an³ nqui²sa⁴ nti⁴ton⁴ coa²te⁴jna³cao⁴ nqui²jnco³cˀa²-si¹ni³no³.
HEB 13:20 Je² Ni³na¹ xi³ tsjoa¹ cjoa⁴ xi³ nchˀan¹ tjin¹, xi³ tsa³cˀa³sje³jin³-ni³le⁴ cˀen³ Nai³-na¹ Jesucristo, xi³ to⁴tˀa³tsˀe⁴ njin¹ xi³ tsˀe⁴ cjoa⁴ xi³ qui³sˀe³nˀion¹ nca³ntsjai². Cjai¹nca³ nta³ co³ˀnta³ va³rre² Jesucristo xi³ nˀion¹ je³ya³.
HEB 13:21 Ni³na¹ ca²ta³si¹jnco³cao⁴-no³ nca³yi³je³ xi³ nta³, jme¹-ni³ nca³ cˀoa⁴sˀian⁴-si¹nio³ jo³-sˀin² nca³ me³-le⁴ nca³ je², nca³ si¹xa¹jin³-no³ je² cjoa⁴ xi³ nqui²sa⁴ nta³ sa³sen¹-le⁴ nqui³xcon⁴ nca³ je², xi³ to⁴tˀa³tsˀe⁴ Jesucristo. Je²-vi⁴ xi³ ca²ta³sˀe³-le⁴ cjoa⁴je³ya³ xi³ nca³ntsjai² nca³ntsjai². Cˀoa⁴ ca²ta³ma³.
HEB 13:22 To⁴nca³ vˀe³tsˀoa²³-no³ ntsˀe³, nca³ ca²ta³jcho¹cjoa⁴cao⁴-no³ je² en¹ xi³ vˀe³ne²³-no³, nca⁴ to⁴choa³ qui³squi³-no³.
HEB 13:23 Ca²ta³ˀyao³ nca³ je² ntsˀe³ Timoteo coan³xan⁴-ni³le⁴ cjoa⁴ñˀain³. Tsa² je² nti⁴ton⁴ cjoa⁴ˀai¹, an³ cjoi¹co³tsen³-no³ cao⁴ je².
HEB 13:24 Ti⁴ti²ˀntao³ nca³tsˀi³ xi³ va¹ntia⁴²-no³, cˀoa⁴ nca³tsˀi³ cho⁴ta⁴-le⁴ Cristo. Je² xi³ tsˀe⁴ Italia si¹ti²ˀnta³-no³.
HEB 13:25 Cjoa⁴nta³ ca²ta³sˀe³-no³ nca³tsˀio³ nca³ jon². Cˀoa⁴ ca²ta³ma³.
JAM 1:1 An³ nia¹³ Santiago, xi³ cho⁴ˀnta³-le⁴ Ni³na¹ cao⁴ Nai³-na¹ Jesucristo, ti²cji³-no³ xi³ te³jao² ntje⁴-le⁴ Israel, xi³ cˀoa⁴-sˀin² tjio¹tsao³va³. Si³ti²ˀnta³-no³.
JAM 1:2 ˀnti¹ntsˀe³, cjai¹nca³ to⁴nta³ ca²ta³ma³tsjoa³-no³ cˀia⁴ nca³ cja⁴ˀai¹nca¹ cjoa⁴ñˀain³ sˀe⁴-no³.
JAM 1:3 ˀya³-nio¹³ cˀia⁴ nca³ cho²tˀa³-no³ xi³ tˀa³tsˀe⁴ xi³ ma³cjain¹-no³, coi³ xi³ si¹xa¹jin³-no³ cjoa⁴tse³jta³.
JAM 1:4 Je² cjoa⁴tse³jta³ ca²ta³ma³jnco³, jme¹-ni³ nca³ cˀoa⁴-sˀin² ña³qui³ nta³ coan⁴jnco³-si¹nio³, nca³ tsi²jme³ xi³ cha⁴-no³.
JAM 1:5 Tsa² jnco³ xi³ jon² xi³ cha³-le⁴ cjoa⁴ˀi³sen³-ta³con², ca²-ta³si¹je¹-le⁴ Ni³na¹, je² xi³ cjai¹nca³ tse³ tsjoa¹cjoa⁴tjao²-le⁴ nca³tsˀi³, cˀoa⁴ li²coi³ taon³ ve³. Cˀoa⁴-sˀin² cˀoai⁴-le⁴.
JAM 1:6 To⁴nca³ ca²ta³ma³cjain¹-le⁴ cˀia⁴ nca³ si¹je¹. A³li²jao²li²jan²-jin² vˀe¹⁴-con³. Je² xi³ jao² vˀe¹⁴-con³ jo³ nco³ya³-le⁴ nta¹chi³con³ cˀia⁴ nca³ ntjao⁴ fa³ˀa³ne², nca³ˀi⁴ nca³jan¹ vˀe¹tsao³va³.
JAM 1:7 Je² cho⁴ta⁴ xi³ cˀoi⁴cjoan³ a³li²coi³ si⁴²cja³ˀai³tsjen³-jin² nca³ tjin¹ xi³ Nai³-na¹ tsjoa¹-le⁴.
JAM 1:8 Je² cho⁴ta⁴ xi³ jao² vˀe¹⁴-con³ ni⁴to⁴cˀia³-jin² nˀion¹ tjin¹-le⁴ nca³yi³je³ ntia⁴²-le⁴.
JAM 1:9 Je² ntsˀe³² xi³ nqui²sa⁴ yo⁴ma⁴ ti¹jna³ ca²ta³ma³tsjoa³-le⁴ nca³ nqui²sa⁴ ncˀa³ ti¹jna³.
JAM 1:10 To⁴nca³ je² xi³ nchi⁴na¹ ca²ta³ma³tsjoa³-le⁴ nca³ yo⁴ma⁴ ti¹jna³. Cˀoa⁴-sˀin² cha⁴ nca³ je² jo³-ni³ tsa² na³xo¹-le⁴ jña¹.
JAM 1:11 Cˀia⁴ nca³ ma³ncˀa³ tsˀoi¹, ma³sjoe². Je² jña¹-ve⁴ xi², na³xo¹-le⁴ tsao³. Cˀoa⁴-sˀin² cha⁴ xi³ na³sca¹cjoan³-le⁴. Cˀoa⁴-ti⁴sˀin² cha⁴ xi³ cho⁴ta⁴nchi⁴na¹ cao⁴ nca³yi³je³ cjoa⁴ma⁴-le⁴.
JAM 1:12 Jo¹ to⁴nta³-le⁴ cho⁴ta⁴ xi³ si¹cjain¹-le⁴ cjoa⁴ñˀain³. Cˀia⁴ nca³ je³qui³cho²tˀa³-le⁴, coi⁴njen⁴-le⁴ cjoa⁴vi³jna³chon³ xi³ jo³-ni³ jnco³ corona, xi³ Ni³na¹ qui³tsjoa³ tsˀoa³ nca³ tsjoa¹-le⁴ je² xi³ tsjoa³que³ nca³ je².
JAM 1:13 Cˀia⁴ tsa² jnco³ xi³ cjoa⁴tsˀen⁴ chˀao³ si¹cao⁴, a³li² tso²-jin² tsa² je² Ni³na¹ xi³ chˀao³ si¹cao⁴ cao⁴ cjoa⁴tsˀen⁴. Je² Ni³na¹ a³li²coi³ ma³-le⁴ tjoe¹ cjoa⁴tsˀen⁴, cˀoa⁴ ni⁴jnco³-jin² xi³ je² chˀao³ si¹cao⁴ cao⁴ cjoa⁴tsˀen⁴.
JAM 1:14 To⁴nca³ jnco¹jnco¹ ti⁴tsˀe⁴-ni³ cjoa⁴chi⁴nca⁴-le⁴ xi³ chˀao³ si¹cao⁴ nca³ je². Je² cjoa⁴chi⁴nca⁴-le⁴ nchja⁴ntˀe¹-le⁴ yao³-le⁴.
JAM 1:15 Cˀia⁴ nca³ je³ji³tjo³son² cjoa⁴chi⁴nca⁴-ve⁴ vˀe¹jna³ntje² cjoa⁴tsˀen⁴. Cˀia⁴ nca³ je³coan³jnco³ cjoa⁴tsˀen⁴-ve⁴, sˀe³-le⁴ cjoa⁴vi³ya³.
JAM 1:16 ˀnti¹ntsˀe³, xi³ cjai¹ tsjoa³que⁴-no³, a³li² xin²-jin² ntia⁴² ma³nquion¹³.
JAM 1:17 Nca³yi³je³ xi³ cjoa⁴nta³, nca³yi³je³ cjoa⁴tjao² xi³ ña³qui³ nta³, nčhoa¹-ni³ ja⁴ncˀa¹, nčhoa¹jen³-ni³ Nˀai³-na¹ xi³ tsa³cˀe¹nta³ tsˀoi¹ cao⁴ sa¹ cao⁴ ni³ño³. Je² Nˀai³-na¹ li²coi³ si¹cˀa³ntjai²ya³ yao³-le⁴, ni⁴ˀi⁴tse¹-jin² si¹cˀa³ntjai²ya³ jo³-ni³ tsa² ncˀian¹.
JAM 1:18 Je² xi³ cˀoa⁴-sˀin² coan³me³-le⁴, nca³ tsa³cˀe¹ntje²-na¹ xi³ to⁴tˀa³tsˀe⁴ en¹ xi³ cjoa⁴qui²xi⁴, jme¹-ni³ nca³ ña¹ sˀe⁴jna³ti¹tjon²-nia³² nca³yi³je³ xi³ je² tsa³cˀe¹nta³.
JAM 1:19 Coi³ cjoa⁴-vi⁴ ˀnti¹ntsˀe³, xi³ cjai¹ tsjoa³que⁴-no³, nca³tsˀi³ cho⁴ta⁴ nti⁴ton⁴nti⁴ton⁴ ca²ta³nčhˀoe¹, to⁴nca³ ca²ta³cjen³jta³ nca³ nchja⁴, a³li²to⁴cjoan¹-jin² ca²ta³ma³jti³-le⁴.
JAM 1:20 Je² cho⁴ta⁴ xi³ ma³jti³-le⁴ li²coi³ sˀin¹ xi³ cjoa⁴qui²xi⁴ nqui³xcon⁴ Ni³na¹.
JAM 1:21 Coi³ cjoa⁴ tˀe²jna³-nio³ nca³yi³je³ cjoa⁴ xi³ chˀao³ tjin¹, cao⁴ xi³ tse³ cjoa⁴tsˀen⁴. To⁴ˀi³nta³jin³ chjoao¹³ je² en¹ xi³ ja³ˀa³sˀen³jin³-no³, je² xi³ coan⁴-le⁴ cˀoa⁴sje³ntjai² ni⁴ma⁴-no³.
JAM 1:22 Cˀoa⁴tˀiaon⁴³ jo³ tso² je² en¹-vi⁴, a³li² to⁴no²ˀya²-jin²lao⁴³ nca³ cˀoa⁴-sˀin² ti³chˀa²na⁴cha⁴-lao⁴³ yao³-no³.
JAM 1:23 Tsa² jnco³ xi³ nčhˀoe¹ en¹-vi⁴, cˀoa⁴ li²coi³ cˀoa⁴sˀin¹ jo³ tso², je²-vi⁴ cˀoa⁴cjoan³ jo³-ni³ tsa² jnco³ cho⁴ta⁴ xi³ jnco³ cho⁴tsin¹ co³tsen³sˀen³-ni³le⁴ ncjain¹.
JAM 1:24 Je² qui³sco²tsen³-le⁴ yao³-le⁴, qui³, qui³cha³jin³ nti⁴ton⁴-ni³le⁴ jo³ cji³.
JAM 1:25 To⁴nca³ jo¹ to⁴nta³ coan⁴-le⁴ je² xi³ nta³ va¹sjai³jin³ je² cjoa⁴te¹xo³ma³ xi³ ña³qui³ cjoa⁴qui²xi⁴, xi³ si¹cˀe¹yo³ntai¹-na¹. Jo¹ to⁴nta³ coan⁴-le⁴ je² xi³ vˀe²jna³nˀion¹jin³, nca³ tsi² tsa² to⁴nčhˀoe¹, cˀia⁴ cha³jin³-le⁴, to⁴nca³ cˀoa⁴sˀin¹ jo³ tso².
JAM 1:26 Tsa² jnco³ xi³ jon² xi³ si¹cja³ˀai³tsjen³ nca³ ve³xcon¹ Ni³na¹, xi³ li²coi³ vˀe¹chjoa²-le⁴ ni⁴jen⁴, to⁴ti¹vˀa³na⁴cha⁴-le⁴ ni⁴ma⁴-le⁴. A³li²coi³ jme³ chji¹-le⁴ jo³-sˀin² ve³xcon¹ Ni³na¹.
JAM 1:27 Cˀoa⁴-sˀin² ña³qui³ ˀya³xcoan¹ Ni³na¹ nca³ ma³nquin¹chon³-le⁴² xi³ jchˀan⁴ xi³ cˀen³ xˀin⁴-le⁴, nca³ cjoa⁴ñˀain³ tjio¹fa³ˀai³, cˀoa⁴-ti⁴ nca³ chˀa⁴sje³xin²-le⁴² yao³-na¹ cjoa⁴ xi³ tjin¹ son³ˀnte³-vi⁴. Je²-vi⁴ xi³ cjoa⁴-le⁴ Ni³na¹ xi³ tsje³ tjin¹ xi³ tsi² jma² tjin¹ nqui³xcon⁴ Nˀai³-na¹.
JAM 2:1 ˀnti¹ntsˀe³, a³li² chja³ˀa²jin³-jion²³ xi³ ni²sin³-lao⁴³, nca³ ma³cjain¹-no³ tˀa³tsˀe⁴ Nai³-na¹ Jesucristo xi³ ncˀa³ ti¹jna³.
JAM 2:2 Tsa² ya⁴ jña³ nca³ ma³ñao³ cjoa⁴ˀa³sˀen³jin³-no³ jnco³ cho⁴ta⁴ xi³ taon⁴nco³ taon⁴si³ne² tjin¹-le⁴, cao⁴ na³jño³-le⁴ xi³ nta³ cjoan³, tsa² cˀoa⁴-ti⁴ cjoi⁴cho³sˀen³jin³-no³ jnco³ cho⁴ta⁴ma⁴ xi³ jnti¹ xi³ qui³xi³jnta²jon³ cji³,
JAM 2:3 tsa² nqui²sa⁴ xcon¹ jchao⁴³ je² xi³ na³jño³ nta³ vˀa³cja¹, tsa² cˀoa⁴cˀoin¹-lao⁴³: Ti⁴jnai³ jña³ nta³ chon³-vi⁴, cˀoa⁴ tsa² cˀoa⁴cˀoin¹-lao⁴³ je² cho⁴ta⁴ma⁴-ve⁴: To⁴ya⁴-la² ti⁴sen⁴ntoi³-ve⁴, a³xo⁴ i⁴-la² ti⁴jna³tˀai³ na³nqui³-ve⁴,
JAM 2:4 a³ tsi² ti⁴jon² chja³ˀa²jin³-nio³ xi²nquio⁴³, jo³-ni³ tsa² xca²le⁴ mao³ xi³ chˀao³ tjin¹ cjoa⁴fa³ˀai³tsjen³-le⁴.
JAM 2:5 ˀnti¹ntsˀe³, xi³ cjai¹ tsjoa³que⁴-no³, ti⁴no¹ˀyao²³: Ni³na¹ a³ tsi² tsa³cja³ˀa¹jin³ cho⁴ta⁴yo⁴ma⁴ xi³ tjin¹ i⁴ son³ˀnte³-vi⁴, jme¹-ni³ nca³ nˀion¹ coan⁴cjain¹-si¹ni³le⁴ tˀa³tsˀe⁴ Ni³na¹, nca³ cˀoai⁴cjoa⁴tjao²-si¹ni³le⁴ je² cjoa⁴te¹xo³ma³ xi³ Ni³na¹ qui³tsjoa³ tsˀoa³ nca³ tsjoa¹-le⁴ je² xi³ tsjoa³que³ nca³ je².
JAM 2:6 To⁴nca³ jon² ˀya³taon³ cho⁴ta⁴yo⁴ma⁴. A³ tsi² tsa² je² cho⁴ta⁴nchi⁴na¹ xi³ si¹cja³ˀa¹-no³ cjoa⁴ñˀain³, a³ tsi² tsa² cˀoa⁴-ti⁴ je² xi³ fi²cao⁴cjoa⁴nˀion¹-no³ nqui³xcon⁴ cjoa⁴te¹xo³ma³.
JAM 2:7 A³ tsi² tsa² je² xi³ nchja⁴ˀaon³-le⁴ je² jan³ˀain¹ xi³ nta³, xi³ cˀoa⁴tsa³cˀin²-ni³no³.
JAM 2:8 Nta³ nˀiaon²³, tsa² cjoa⁴qui²xi⁴ nca³ ni²tjo³son²³ je² cjoa⁴te¹xo³ma³ xi³ ncˀa³, jo³ tso² xon⁴ Escritura: Tjao²cha³ ca²ta³mai³ xi²nqui⁴ jo³-ni³ tsa² yao³-li⁴.
JAM 2:9 To⁴nca³ tsa² chja³ˀa²jion³ xi³ ni²sin³-lao⁴³, je¹ vi³jncho³. Cˀoa⁴-sˀin² je² cjoa⁴te¹xo³ma³ ca³ni¹ne²-no³ je¹ nca³ cho⁴ta⁴tsˀa³ntjai²cjoao⁴³.
JAM 2:10 To⁴ˀya³-ni³ xi³ si¹tjo³son² nca³yi³je³ cjoa⁴te¹xo³ma³, cˀoa⁴ jnco³ cjoa⁴ fa³ˀa³ntjai²-le⁴, je²-vi⁴ tjin¹-le⁴ je¹ xi³ tˀa³-tsˀe⁴ nca³yi³je³ cjoa⁴te¹xo³ma³.
JAM 2:11 Je² xi³ cˀoa⁴qui³tso²: A³li² cha³jnqui³-jin² coain⁴, cˀoa⁴-ti⁴ qui³tso²: A³li² cˀen³-jin² ni²cˀain³. Tsa² tsi² cha³jnqui³ coain⁴, to⁴nca³ qui³tjen⁴jnco³-li² cˀen³, je³tsˀa³ntjai²jcoi³ cjoa⁴te¹xo³ma³.
JAM 2:12 Cˀoi⁴-sˀin² ti⁴no²cjoao⁴³, cˀoi⁴-sˀin² tˀiaon⁴³, jo³-ni³ tsa² cho⁴ta⁴ xi³ me³ sˀe⁴nta³jin³-le⁴ tˀa³-le⁴ je² cjoa⁴te¹xo³ma³ xi³ si¹cˀe¹yo³ntai¹-na¹.
JAM 2:13 Tjoe¹-le⁴ cjoa⁴ñˀain³, a³li²jme³ cjoa⁴ma⁴ta³con² xi³ sˀe⁴ xi³ tˀa³tsˀe⁴ je² xi³ tsi²coi³ tjin¹-le⁴ cjoa⁴ma⁴ta³con². Je² cjoa⁴ma⁴ta³con² si¹qui³njen³-le⁴ cjoa⁴ñˀain³.
JAM 2:14 ˀnti¹ntsˀe³, jme¹ chji¹-le⁴ tsa² jnco³ xi³ coi⁴tso⁴ nca³ ma³cjain¹-le⁴ tˀa³tsˀe⁴ Ni³na¹, cˀoa⁴ li²coi³ nta³ tjin¹ xa¹-le⁴. A³ vi³tjo³ntjai²-ni¹ nca³ cˀoa⁴-sˀin² ma³cjain¹-le⁴.
JAM 2:15 Tsa² jnco³ ntsˀe³² tsa² jnco³ ti²chja³² xi³ qui³xi³jnta²jon³ cji³, tsa² cjai¹nca³ ma³chjen¹-le⁴ xi³ cji³ne³ nchaon³nchaon³,
JAM 2:16 cˀoa⁴ tsa² jnco³ xi³ jon² cˀoi⁴coi⁴tso⁴-le⁴: Ta³nquin¹la²na²ntao³, ti⁴so³ yao³-no³, ti⁴cho³, to⁴nca³ tsi² tsa² vˀai²-ni³lao⁴³ˀni³ je² tso³jmi² xi³ ma³chjen¹-le⁴ yao³-le⁴, jme¹ chji¹-le⁴.
JAM 2:17 Cˀoa⁴-ti⁴sˀin² xi³ ma³cjain¹-na¹ to⁴cˀoa⁴-sˀin² cha⁴jin³, tsa² to⁴xquia⁴ ma³cjain¹-na¹, cˀoa⁴ tsa² tsi² nta³ tjin¹ xa¹-na¹.
JAM 2:18 Tjin¹ cˀa³ xi³ cˀoi⁴coi⁴tso⁴: Ji³ ma³cjain¹-li², cˀoa⁴ an³ nta³ tjin¹ xa¹-na⁴. Ta⁴co²-nai¹³ jo³-sˀin² nca³ ma³cjain¹-li², tsa² tsi² nta³ tjin¹ xa¹-li⁴, cˀoa⁴ an³ coa³co³-le²³ jo³-sˀin² nca³ ma³cjain¹-na³ nca⁴ nta³ tjin¹ xa¹-na⁴.
JAM 2:19 Ji³ ma³cjain¹-li² nca³ to⁴jnco³ Ni³na¹. Nta³ nˀiain²³. Cˀoa⁴-ti⁴ ma³cjain¹-le⁴ je² nai⁴² xi³ nta³jin³, cˀoa⁴ fa³tse¹ˀni³.
JAM 2:20 Cho⁴tai⁴ xi³ tsi²jme³ cjoa⁴fa³ˀai³tsjen³ tjin¹-li², a³ me³-li² jchai⁴ nca³ to⁴cha³jin³-ni¹ xi³ ma³cjain¹-na¹, cˀia⁴ tsa² tsi² nta³ tjin¹ xa¹-na¹.
JAM 2:21 A³ tsi² tsa² je² xa¹-le⁴ xi³ qui³si³cje³tˀa³ je¹-le⁴ Abraham, je² nˀai³jcha¹cjin³-na¹, cˀia⁴ nca³ qui³tsjoa³tˀa³ Isaac, je² ˀnti¹-le⁴, ya⁴ son²xta²-ve⁴.
JAM 2:22 A³ tsi² ˀyai³ nca³ cˀoa⁴-sˀin² Abraham qui³si³tjo³son²cao⁴ xa¹-le⁴ jo³-sˀin² coan³cjain¹-le⁴. Xi³ coan³cjain¹-le⁴ ña³qui³ coan³jnco³son²-ni¹ xi³ to⁴tˀa³tsˀe⁴ xa¹-le⁴.
JAM 2:23 Cˀoa⁴-sˀin² ji³tjo³son² xon⁴ Escritura xi³ tso²: Abraham coan³cjain¹-le⁴ tˀa³tsˀe⁴ Ni³na¹. Cˀoa⁴-sˀin² coan³xqui⁴cao⁴ cjoa⁴qui²xi⁴. Mi²yo⁴-le⁴ Ni³na¹ tsa³cˀin²-le⁴.
JAM 2:24 Je³ˀyao³-ˀni³ nca³ cho⁴ta⁴ fe³tˀa³ je¹-le⁴ xi³ to⁴tˀa³tsˀe⁴ xa¹-le⁴, a³li² tsa² to⁴coi³-jin² cˀia⁴ nca³ ma³cjain¹-le⁴.
JAM 2:25 Cˀoa⁴²-ti⁴sˀin²ni³ je² chjon⁴²sca¹ xi³ Rahab ˀmi², a³ tsi² tsa² je³tˀa³ je¹-le⁴ xi³ to⁴tˀa³tsˀe⁴ xa¹-le⁴, cˀia⁴ nca³ qui³si³sin³-le⁴ cho⁴ta⁴ xi³ ja³ˀai³cao⁴ en¹, cˀia⁴ tˀa³xin² qui³sca³ni¹ xi¹ti¹.
JAM 2:26 Jo³-sˀin² nca³ je² yao³-na¹ ti¹jna³cˀen³-ni¹, tsa² tsi² ti⁴ti¹jna³jin³-ni³le⁴ ni⁴ma⁴-le⁴, cˀoa⁴-ti⁴sˀin² je² xi³ ma³cjain¹-na¹ to⁴cha³jin³-ni¹, tsa² tsi² nta³ tjin¹ xa¹-na¹.
JAM 3:1 ˀnti¹ntsˀe³, a³li² ncjin²-jin² maestro mao³, nca³ je³ˀyao³ nca³ nqui²sa⁴ tse³ cjoa⁴ñˀain³ cˀoai⁴-na¹ xi³ maestro coan³².
JAM 3:2 Nca⁴ nca³tsˀi³ nia¹ tse³ to⁴chˀao³ nˀian². Tsa² jnco³ xi³ tsi² chˀao³ tso² en¹-le⁴, je²-vi⁴ xi³ ña³qui³ cho⁴ta⁴nta³. Cˀoa⁴-ti⁴ ma³-le⁴ va³te¹xo³ma³-le⁴ yao³-le⁴ jo³-ni³ tsa² xi³ tji¹ˀa³ freno.
JAM 3:3 Coe⁴-ni³ ña¹ vˀe²ˀa³² freno tsˀoa³ na⁴xin¹, jme¹-ni³ nca³ si⁴²tjo³son²-si¹ni³na¹. Cˀoa⁴-sˀin² ni²ntˀe¹ yao³-le⁴.
JAM 3:4 Coe⁴-ni³ cˀoa⁴-ti⁴ je² barco. Nta³ tsa² cjai¹nca³ je³, nta³ tsa² cjai¹nca³ nˀion¹ ntjao⁴ xi³ fi²cao⁴, cjai¹ to⁴ˀnti¹ cji³ ya¹te³ timón xi³ fi²cao⁴ barco to⁴jña³-ni³ve⁴ nca³ me³-le⁴ fi²cao⁴ je² xi³ ca³ni¹.
JAM 3:5 Cˀoa⁴-ti⁴sˀin² je² ni³jen³² ˀnti¹ cji³, to⁴nca³ a³li² to⁴cˀoa⁴cji³ tse³ cjoa⁴ xi³ ma³-le⁴. Coe⁴-ni³ nta³ tsa² to⁴ˀi⁴tse¹ lˀi¹, a³li² to⁴cˀoa⁴cji³ jña¹jcha¹ va³ca¹.
JAM 3:6 Je² ni³jen³² jo³ lˀi¹ ni¹, cjai¹nca³ chˀao³ sˀin¹. Cˀoa⁴-sˀin² ni³jen³² ti¹jna³jin³-le⁴ yao³-na¹, je² xi³ si¹qui³tson¹-na¹ nca³yi³je³ yao³-na¹, va³ca¹ nca³yi³je³ jo³ xa¹ cˀoa⁴ cji³ma³-ni³. Ya⁴ infierno nčhoa¹-ni³ xi³ va³ca¹ ni³jen³².
JAM 3:7 Nca³yi³je³ jo³ tjin¹ jco⁴ya³ cho⁴ xi³ tjin¹ cao⁴ ni⁴se³ cao⁴ ye⁴ cao⁴ cho⁴ jin³ na³nta¹ ma³ntˀe¹, cˀoa⁴ ni²ntˀe¹ xi³ cho⁴ta⁴son³ˀnte³ ˀmi²-na¹.
JAM 3:8 To⁴nca³ ni⁴jnco³-jin² cho⁴ta⁴ xi³ coan⁴-le⁴ si⁴²ntˀe¹ ni⁴jen⁴, nca³ je² ni³jen³² jnco³ cjoa⁴tsˀen⁴ xi³ tsi² tsa² ma³ ni²cˀe¹jyo². A³li² to⁴cˀoa⁴cji³ tjin¹-le⁴ xqui³toan¹ xi³ si¹cˀen³-ni³na¹.
JAM 3:9 Cao⁴ ni³jen³² chˀa²sje³je³ya³-nia¹ Ni³na¹ Nˀai³-na¹, cˀoa⁴ cao⁴ ni³jen³² no²cjoa⁴ˀaon³-ni³le⁴² cho⁴ta⁴ xi³ cˀoa⁴coan³ cjoan³ jo³ cji³ Ni³na¹.
JAM 3:10 Ti⁴je²-ni³ tsˀoa³ vi³tjo³-ni³ en¹nta³ cao⁴ en¹tsˀen⁴. ˀnti¹ntsˀe³, a³li²coi³ ma³chjen¹ nca³ cˀoi⁴-sˀin² ma³ je² cjoa⁴-vi⁴.
JAM 3:11 Jnco³ nca⁴jao⁴ a³ ti⁴ya⁴ vi³tjo³-ni³ na³nta¹tsje³ cao⁴ na³nta¹jnčha³.
JAM 3:12 ˀnti¹ntsˀe³ je² ya¹higo a³ va³-le⁴ to³ xi³ aceituna ˀmi², a³xo⁴ xca⁴to³tse⁴² a³ va³-le⁴ higo. Cˀoa⁴-ti⁴sˀin² ni⁴jnco³-jin² nca⁴jao⁴ na³nta¹ xi³ ti⁴ya⁴ sˀe³-ni³le⁴ na³nta¹jnčha³ cao⁴ na³nta¹tsje³.
JAM 3:13 ˀya¹-ni³ xi³ jon² xi³ chji⁴ne⁴ xi³ xˀin⁴cjoa⁴. Ca²ta³va³co¹ xa¹-le⁴ jo³-sˀin² nca³ nta³ fi²cao⁴ yao³-le⁴ cao⁴ cjoa⁴ˀi³nta³-jin³ xi³ tsˀe⁴ cjoa⁴ˀi³sen³ta³con².
JAM 3:14 Tsa² ni⁴ma⁴-no³ tjin¹-le⁴ cjoa⁴xin²ta³con² xi³ vao³ xi³ sja³, tsa² tjin¹-le⁴ cjoa⁴co²ntran⁴, a³li² chˀa²sje³nta³-jion²³ yao³-no³, ni⁴chˀa²sje³ nti³so³-jion²³ xi³ cjoa⁴qui²xi⁴.
JAM 3:15 A³li²coi³ ncˀa³ nčhoa¹-ni³ cjoa⁴ˀi³sen³ta³con² je²-vi⁴, to⁴ˀi⁴² tsˀe⁴ son³ˀnte³-vi⁴, tsˀe⁴ xi³ xa¹ cˀoa⁴cjoan³, tsˀe⁴ nai⁴².
JAM 3:16 Ya⁴ jña³ nca³ tjin¹ cjoa⁴xin²ta³con² cjoa⁴co²ntran⁴, ya⁴²-ve⁴ tjin¹ cjoa⁴si³ cao⁴ nca³yi³je³ cjoa⁴tsˀen⁴.
JAM 3:17 To⁴nca³ je² cjoa⁴ˀi³sen³ta³con² xi³ ncˀa³ nčhoa¹-ni³, ti¹tjon²-cjoan²la² tsje³, cˀia⁴ to⁴jvi³, i³nta³jin³, ntˀe¹, tse³ cjoa⁴ma⁴ta³con² xi³ tjin¹-le⁴, nta³ xa¹-le⁴, li²coi³ ve³sin³, li²coi³ nti³so³.
JAM 3:18 Je² cho⁴ta⁴ xi³ ma³-le⁴ si¹qui³njen³nchˀan¹jin³, je² ni¹ xi³ nchˀan¹-sˀin² vˀe¹ntje² cjoa⁴qui²xi⁴.
JAM 4:1 Jña¹ nčhoa¹-ni³no³ cjoa⁴jchan¹ cjoa⁴si³. A³ tsi² tsa² tsˀe⁴ cjoa⁴tsjoa³ xi³ ma³me³-le⁴ ni⁴ma⁴-no³, coi³ xi³ vi³xcan¹-jin³ yao³-no³.
JAM 4:2 Ma³xin²-ta³con²³ jon², to⁴nca³ tsin²-no³. Ni²cˀaon³, to⁴cjoa⁴xin²ta³con² ti¹ti²-nio³, to⁴nca³ li²jme³ xi³ njen⁴-no³. Ni²jchaon¹³, vi³xcaon²³, to⁴nca³ tsin²-no³ jme³ xi³ me³-no³ nca³ tsi²coi³ ni²jao¹³.
JAM 4:3 Ni²jao¹³, to⁴nca³ li²coi³ tjoe¹-no³, chˀao³ tjin¹ xi³ ni²jao¹³ jme¹-ni³ nca³ si⁴chjen¹-si¹nio³ xi³ tˀa³tsˀe⁴ cjoa⁴tsjoa³-no³.
JAM 4:4 Jon² xi³ xˀion⁴³, xi³ ya¹nchjon¹³, xi³ qui³njion²³ ntia⁴²-le⁴ Ni³na¹, a³ tsi² tsa² ˀyao³ nca³ je² xi³ mi²yo⁴-le⁴ cjoa⁴son³-ˀnte³ co²ntran⁴-le⁴ Ni³na¹ ni¹. To⁴ˀya³-ni³ xi³ me³-le⁴ si¹mi²yo⁴ cjoa⁴son³ˀnte³, co²ntran⁴-le⁴ Ni³na¹ ma³.
JAM 4:5 A³ ni²cja³ˀai³tsjen³-nio¹³ nca³ je² xon⁴ Escritura to⁴ya⁴³-ni³ cˀoi⁴tso²: Je² Espíritu xi³ ti¹jna³jin³ntsjai² ni⁴ma⁴-na¹ tjao²que³-na¹ jo³ sa³ˀnta³ ma³chi⁴ni⁴-ni¹.
JAM 4:6 To⁴nca³ je² Ni³na¹ tsjoa¹ xi³ nqui²sa⁴ tse³ cjoa⁴nta³. Coi³ cjoa⁴ cˀoi⁴tso²-ni³: Ni³na¹ vˀe²jna³ta²ja³-le⁴ xi³ ncˀa³con³, tsjoa¹-le⁴ cjoa⁴nta³ je² xi³ i³nta³jin³con³.
JAM 4:7 Ti⁴tjo³son²-lao⁴³ Ni³na¹. Ti⁴yo³ta²ja³-lao⁴³ je² nai⁴², cˀoa⁴-sˀin² coa⁴nca³ tˀa³xin²-ni³no³.
JAM 4:8 Ti⁴čhian³tˀa³-lao⁴³ Ni³na¹, cˀia⁴ cˀoa⁴-ti⁴ je² si⁴²čhian³tˀa³-no³ nca³ jon². Xi³ cho⁴ta⁴jao¹³, ti⁴tsjao³ ntsao⁴³, cˀoa⁴ jon² xi³ jao² vˀao²-ta³con²³ ti⁴tsjao³ ni⁴ma⁴-no³.
JAM 4:9 Ti⁴cjao¹jion³, ti⁴vao³, chi¹ˀntao¹³. Je² cjoa⁴vi³jno²-no³ ca²ta³vˀa³ntjai²ya³ nca³ chi¹ˀntiao¹³. Je² cjoa⁴tsjoa³-no³ cjoa⁴va³ ca²ta³ma³.
JAM 4:10 Ca²ta³fa³ˀa³jen³-no³ nqui³xcon⁴ Nai³-na¹. Cˀoa⁴ je² cˀoa⁴sje³je³ya³-no³.
JAM 4:11 ˀnti¹ntsˀe³, a³li² chˀao³-jin² ˀmi²-lao⁴³ xi²nquio⁴³. Je² xi³ chˀao³ tso²-le⁴ ntsˀe⁴, xi³ ve³sin³ ntsˀe⁴, je²-vi⁴ chˀao³ tso²-le⁴ cjoa⁴te¹xo³ma³, ve³sin³ cjoa⁴te¹xo³ma³. Tsa² ji³ ˀya³sin³ cjoa⁴te¹xo³ma³, li²coi³ ni²tjo³soin²³ cjoa⁴te¹xo³ma³-ve⁴, jo³-ni³ tsa² xca²le⁴ chˀa²sjai³ yao³-li⁴.
JAM 4:12 To⁴jnco³ ma³-ni³ je² xi³ tsjoa¹ cjoa⁴te¹xo³ma³, xi³ ma³-le⁴ vˀa³sje³ntjai², cˀoa⁴ ti⁴je²-ni³ xi³ ma³-le⁴ si¹cha³jin³ cho⁴ta⁴. ˀya¹-ni³ nca³ ji³ nca³ ˀya³sin³ xi³ cja⁴ˀai¹ cho⁴ta⁴.
JAM 4:13 Coe⁴-ni³ ntˀai⁴ jon² xi³ vi³xon¹³: Ntˀai⁴-vi⁴ cao⁴ nchaon³-li⁴ cjoian¹ na⁴xi⁴na³nta¹tse³ jan¹, jnco³ no¹ ya⁴ coi⁴yoa³², cˀoa⁴ coi⁴nta¹ tso³jmi², coi⁴njen⁴son²-na¹.
JAM 4:14 A³li²coi³ ˀyao³ jme³ xi³ coan⁴ nchaon³-li⁴ jnqui³-li⁴. Jme¹-ni³ve⁴ cjoa⁴vi³jna³chon³-no³. Ña³qui³ cjoa⁴qui²xi⁴-ni¹ nca³ jon² jo³-ni³ tsa² yo³jvi³ xi³ vˀa³tsen³ jnco³ tjo², sa³sa³ cha³-ni³.
JAM 4:15 To⁴sa³ cˀoi⁴coi⁴xon¹³: Tsa² je² Nai³-na¹ me³-le⁴, tsa² coi⁴yo³choan³², cˀoa⁴sˀian⁴² je²-vi⁴ a³xo⁴ cˀoa⁴sˀian⁴² xi³ cja⁴ˀai¹.
JAM 4:16 To⁴nca³ ntˀai⁴-vi⁴ nˀo²sje³ncˀao³ yao³-no³ xi³ tˀa³tsˀe⁴ cjoa⁴ncˀa³ta³con²-no³. Chˀao³ tjin¹ nca³yi³je³ jo³-sˀin² nˀo²sje³ncˀao³ yao³-no³.
JAM 4:17 Je² xi³ ma³-le⁴ nca³ nta³ sˀin¹, to⁴nca³ tsi² tsa² cˀoa⁴sˀin¹, je² xi³ tjin¹-le⁴ je¹.
JAM 5:1 Coe⁴-ni³ ntˀai⁴-vi⁴ jon² xi³ cho⁴ta⁴nchi⁴nao¹³, chi¹ˀntao¹³ chi¹ˀntia¹vao³ to⁴tˀa³tsˀe⁴ cjoa⁴ñˀain³ xi³ cjoa⁴ˀai¹-no³.
JAM 5:2 Cjoa⁴nchi⁴na¹-no³ je³ji³ˀnto³. Je² na³jño³-no³ je³coan³qui³xo³.
JAM 5:3 Je² taon⁴si³ne² cao⁴ taon⁴čhoa³-no³ je³coan³ntsjao¹. Je² ntsjao¹-le⁴ coan⁴ testigo xi³ co²ntran⁴-no³. Coa⁴ca²yi³je³ yao³-no³ jo³-ni³ tsa² lˀi¹. Tsa³qui³ncha³xco¹³ cjoa⁴nchi⁴na¹-no³ xi³ tˀa³tsˀe⁴ ni⁴čhjin³ xi³ cjoe⁴tˀa³.
JAM 5:4 Coe⁴-ni³ je² xi³ qui³si³xa¹ na³nqui³-no³ vˀe¹jna³tsˀin³ya³ chji¹-le⁴ xi³ qui³chˀa²na⁴cha⁴-lao⁴³ xi³ cje³ vˀe²chji¹-jin²lao⁴³. Tjio¹vˀe¹jta³ je² xi³ qui³si³xa¹. Nai³-na¹, je² xi³ nca³jco⁴-le⁴ so³nta²do⁴, qui³nčhˀoe¹ jta⁴-le⁴.
JAM 5:5 To⁴ña³qui³ cjoa⁴tsjoa³ tsa³qui³yo³jion³ i⁴ son³ˀnte³, chˀao³ tsa³nquin¹cao⁴³ yao³-no³. To⁴xquia⁴ qui³ni²ña³-ta³con²nio¹³ ni⁴ma⁴-no³ cˀia⁴ ni⁴čhjin³ nca³ qui³ni²cˀen³ xi³cˀa³.
JAM 5:6 Tsa³cˀai²-lao⁴³ cjoa⁴ñˀain³, qui³ni²cˀaon³ cho⁴ta⁴cjoa⁴qui²xi⁴, cˀoa⁴ je² li²coi³ tsa³cˀe²jna³ta²ja³-no³.
JAM 5:7 Coi³ cjoa⁴-vi⁴ ˀnti¹ntsˀe³, cho¹ya³cao⁴cjoao⁴³ jo³ sa³ˀnta³ nca³ cjoa⁴ˀai¹ Nai³-na¹. Coe⁴-ni³ je² xi³ si¹xa¹jin³ na³nqui³ co³ya³-le⁴ tso³jmi²ntje² xi³ nˀion¹ chji¹-le⁴, xi³ tsjoa¹-le⁴ na³nqui³-ve⁴. Co³ya³cao⁴cjoa⁴-le⁴ jo³ sa³ˀnta³ nca³ cjoa⁴ˀai¹-le⁴ jtsi¹tjon² cao⁴ jtsi¹ xi³ scan³ ti⁴vˀa³-nca¹ni³.
JAM 5:8 Cˀoa⁴-ti⁴sˀin² jon² cho¹ya³cao⁴cjoao⁴³. Ti⁴nˀion¹jion³ ni⁴ma⁴-no³, nca³ je³nčhoa¹čhian³ ni⁴čhjin³ nca³ cjoa⁴ˀai¹ Nai³-na¹.
JAM 5:9 ˀnti¹ntsˀe³, a³li² nca³ˀi⁴ nca³jan¹-jin² so³je¹tˀa³-lao⁴³ xi²nquio⁴³, jme¹-ni³ nca³ tsi² sˀe⁴-si¹ni³no³ cjoa⁴ñˀain³. Coe⁴-ni³ je² juez ti¹jna³jčho³ xo⁴ntjoa⁴.
JAM 5:10 ˀnti¹ntsˀe³, je² xi³ qui³nchja⁴ya³ tˀa³tsˀe⁴ jan³ˀain¹-le⁴ Nai³-na¹, tsa³cja³ˀa¹ cjoa⁴ñˀain³, qui³sco³ya²cao⁴cjoa⁴. Jo³ qui³sˀin³ nca³ je² cˀoa⁴tˀiaon⁴³ nca³ jon².
JAM 5:11 Coe⁴-ni³, jo¹ to⁴nta³-le⁴ ˀmi²-le⁴² je² xi³ jcho¹cjoa⁴-le⁴ cjoa⁴ñˀain³. Je³qui³no²ˀyao²³ nca³ cjoa⁴tse³jta³ qui³sˀe³-le⁴ Job, cˀoa⁴ tsa³ˀyao³ jo³-sˀin² coan³me³-le⁴ Nai³-na¹, nca³ je² Nai³-na¹ cjai¹nca³ tjin¹-le⁴ cjoa⁴ma⁴ta³con², ve³ma⁴-ni¹.
JAM 5:12 ˀnti¹ntsˀe³, ti¹tjon²-le⁴ nca³yi³je³ cjoa⁴, a³li² vˀai²-jion²³ en¹-no³, ni⁴cao⁴ jan³ˀain¹-le⁴ ncˀa³jmi³-jin², ni⁴tsˀe⁴ son³ˀnte³-jin², ni⁴tsˀe⁴ cja⁴ˀai¹ cjoa⁴-jin². Cˀia⁴ tsa² jaon³-no³, jaon³ ti⁴xon¹³. Cˀoa⁴ cˀia⁴ tsa² mai³-no³, mai³ ti⁴xon¹³, jme¹-ni³ nca³ tsi² sˀe⁴-si¹ni³no³ cjoa⁴ñˀain³.
JAM 5:13 A³ ti¹jna³jin³jnco³-no³ xi³ ti¹fa³ˀa¹ cjoa⁴ñˀain³. Ca²ta³-vˀe¹tsˀoa³. A³ ti¹jna³jin³jnco³-no³ xi³ tsjoa³-le⁴. Ca²ta³se³tˀa³-le⁴ Ni³na¹.
JAM 5:14 A³ ti¹jna³jin³jnco³-no³ xi³ ti¹mˀen³. Ca²ta³nchja⁴-le⁴ cho⁴ta⁴jchi¹nca³ xi³ tsˀe⁴ cho⁴ta⁴-le⁴ Cristo, ca²ta³vˀe¹tsˀoa³ntjai² xi³ tˀa³tsˀe⁴ xi³ ti¹mˀen³, ca²ta³si¹ca³jon³ si²ti⁴ cao⁴ jan³ˀain¹-le⁴ Nai³-na¹.
JAM 5:15 Tsa² ma³cjain¹-na¹ cˀia⁴ nca³ vˀe²tsˀoa³ntje², coi⁴tjo³ntjai² je² xi³ ti¹mˀen³, cˀoa⁴ je² Nai³-na¹ si⁴²qui³so¹tjen⁴. Tsa² tsa³jnqui³ je¹, cˀoa⁴-sˀin² cha⁴tˀa³-le⁴.
JAM 5:16 Chja³ˀa²ta³con²tˀa³-lao⁴³ xi²nquio⁴³, tˀe²tsˀoa³ntjao²³ xi²-nquio⁴³, jme¹-ni³ nca³ coan⁴nta³-si¹nio³. Je² cjoa⁴vˀe²tsˀoa³-le⁴ cho⁴ta⁴cjoa⁴qui²xi⁴ cjai¹ tjin¹-le⁴ nca³nˀion¹, cjai¹nca³ nta³ vi³tjo³son²-le⁴.
JAM 5:17 Elías cˀoa⁴-ti⁴ jnco³ cho⁴ta⁴ xi³ cˀoa⁴cjoan³ jo³-ni³ tsa² ña¹. Tsa³cˀe¹tsˀoa³ qui³si³je¹ nca³ tsi² cˀoa⁴ jtsi¹. Jan² no¹ va³sen³ nca³ tsi² tsˀa³ jtsi¹ son³ˀnte³.
JAM 5:18 Nqui²jnco³cˀa² tsa³cˀe¹tsˀoa³. Je² ncˀa³jmi³ qui³tsjoa³ jtsi¹, cˀoa⁴ je² na³nqui³ qui³tsjoa³ tso³jmi²ntje².
JAM 5:19 ˀnti¹ntsˀe³, tsa² jnco³ xi³ jon² xi³ xin² qui³-le⁴ ntia⁴²qui²xi⁴, cˀoa⁴ tsa² xi³jnco³ nchja⁴-le⁴ nca³ si⁴²cˀo¹fa³ya³tˀa³-ni³le⁴ Ni³na¹,
JAM 5:20 je² xi³jnco³ xi³ qui³nchja⁴-le⁴ nca³ qui³si³cˀo¹fa³ya³tˀa³-ni³le⁴ Ni³na¹ cho⁴ta⁴-ve⁴ xi³ xin² ntia⁴² qui³, ca²ta³ve³ nca³ cˀoa⁴sje³ntjai²-ni³ cjoa⁴vi³ya³ jnco³ cho⁴ta⁴. A³li² to⁴cˀoa⁴cji³ je¹ xi³ cˀoe⁴²ˀma³.
1PE 1:1 An³ nia¹³ Pedro pa²stro⁴-le⁴ Jesucristo. Ti²cji³-no³ nca³tsˀio³ xi³ cho⁴ta⁴xin²na³nquio³, xi³ tsˀa³tji³vi¹son²³ ˀnte³-ve⁴ ya⁴ Ponto, ya⁴ Galacia, ya⁴ Capadocia, ya⁴ Asia, ya⁴ Bitinia.
1PE 1:2 Qui³tjoe¹jion³ jo³-sˀin² nca³ to⁴nqui³-ni³ tsa³ve³-le⁴con³ Ni³na¹ Nˀai³-na¹. Je² Espíritu Santo qui³si³tsje³-no³, jme¹-ni³ nca³ si⁴tjo³son²-si¹ni³lao⁴³ Jesucristo, cˀoa⁴ jme¹-ni³ nca³ sˀe⁴tsao³jon³-si¹ni³no³ cao⁴ njin¹-le⁴ Jesucristo. Ca²ta³sˀe³sa³no³ cjoa⁴nta³, ca²ta³njen³nchˀan¹jin³-sa³ ni⁴ma⁴-no³.
1PE 1:3 Jo¹ to⁴nta³-le⁴ Ni³na¹ Nˀai³-le⁴ Jesucristo Nai³-na¹, xi³ cˀoa⁴-sˀin² to⁴tse³ cjoa⁴ma⁴ta³con² tjin¹-le⁴ nca³ qui³si³cho⁴tse⁴ya³-nca¹ni³na¹, jme¹-ni³ nca³ cho¹ya²-si¹ni³le⁴² xi³ ti¹jna³con³ nca³ ja³ˀa²ya³jin³-ni³le⁴ cˀen³ Jesucristo.
1PE 1:4 Coi³ cˀoa⁴-sˀin² cˀoai⁴cjoa⁴tjao²-no³ xi³ ni⁴cˀia³-jin² cjoi⁴tson¹ya³-ni³, xi³ ni⁴cˀia³-jin² coan⁴jnti¹-ni³, ni⁴xi²ntso¹-jin², xi³ ti¹jna³tjao²-no³ ya⁴ ncˀa³jmi³.
1PE 1:5 Je² nca³nˀion¹-le⁴ Ni³na¹ si¹coi²nta⁴-no³ nca³ ma³cjain¹-no³ sa³ˀnta³ sˀe⁴-no³ je² cjoa⁴vi³tjo³ntjai² xi³ ti¹jna³nta³, xi³ coan⁴tsen³ cˀia⁴ ni⁴čhjin³ xi³ cjoe⁴tˀa³.
1PE 1:6 Coi³ xi³ jon² cji³ma³tsjoa³-no³, nta³ tsa² jnco³jao² ni⁴čhjin³ ma³chjen¹ nca³ ti³chja³ˀao²³ cjoa⁴ñˀain³ xi³ cja⁴ˀai¹nca¹ tjin¹.
1PE 1:7 Cˀoa⁴-sˀin² ti¹cho²tˀa³ xi³ ma³cjain¹-no³, jme¹-ni³ nca³ nta³ tjo¹sje³-ni³, tjo¹sje³je³ya³-ni³, jcha⁴xcon¹-ni³le⁴ cˀia⁴ nca³ coan⁴tsen³ Jesucristo. Je² xi³ ma³cjain¹-no³ nqui²sa⁴ to⁴nta³ chji¹-le⁴ cao⁴-ni³ tsa² taon⁴si³ne² xi³ fi³tson³, nta³ tsa² cho²tˀa³-ni³ lˀi¹.
1PE 1:8 A³li²coi³ tsa³ˀyao³ Jesucristo, to⁴nca³ tjao²cha³-nio¹³. Ma³cjain¹-no³ xi³ tˀa³tsˀe⁴ nca³ je², nta³ tsa² tsi² ti³ˀyao³ ntˀai⁴-vi⁴. Cji³ma³tsjoa³-no³ cao⁴ jnco³ cjoa⁴tsjoa³ xi³ ni⁴ˀya³-jin² xi³ ve³, xi³ nˀion¹ tjin¹-le⁴ cjoa⁴je³ya³.
1PE 1:9 Coi³ nca³ ma³cjain¹-no³ sˀe⁴-no³ cjoa⁴vi³tjo³ntjai² tˀa³tsˀe⁴ ni⁴ma⁴-no³.
1PE 1:10 Je² cho⁴ta⁴ xi³ qui³nchja⁴ya³ tˀa³tsˀe⁴ Ni³na¹ tsa³ca¹ya³con³ je² cjoa⁴nta³ xi³ cjoa⁴ˀai¹-no³ nca³ jon². Nˀion¹ qui³tsi²na³nqui³ya² je² cho⁴ta⁴, nˀion¹ tsa³ca¹sjai³ jo³-sˀin² vi²tjo⁴ntjai²-nia¹.
1PE 1:11 Tsa³ca¹sjai³jin³ jña¹-le⁴ ni⁴čhjin³-ni³, cˀoa⁴ jo¹ coan⁴-ni³ xi³ qui³tso²-le⁴ je² Espíritu-le⁴ Cristo xi³ tsa³cˀe²jna³jin³ ni⁴ma⁴-le⁴, cˀia⁴ nca³ to⁴nqui³-ni³ tsa³ca¹ya³con³ cjoa⁴ñˀain³ xi³ cjoa⁴ˀai¹-le⁴ Cristo, cˀoa⁴ cjoa⁴je³ya³-le⁴ xi³ coan⁴scan³-ni³ sˀe⁴-le⁴.
1PE 1:12 Qui³ni²cho⁴ya³-le⁴ cho⁴ta⁴-ve⁴ nca³ li² ti⁴tˀa³tsˀe⁴-jin²ni³, to⁴nca³ tˀa³tsan⁴² qui³si³xa¹cao⁴ je² cjoa⁴ xi³ qui³no²cjoa⁴ya³jin³-no³ ntˀai⁴-vi⁴. Je² cho⁴ta⁴ xi³ qui³nchja⁴ya³jin³-no³ je² en¹nta³ xi³ tˀa³tsˀe⁴ Cristo cˀoa⁴qui³sˀin³ xi³ to⁴tˀa³tsˀe⁴ je² Espíritu Santo xi³ qui³ni²ca³sen¹-ni³ ncˀa³jmi³. Je² a²ncje⁴ me³-le⁴ scoe⁴ je² cjoa⁴-ve⁴.
1PE 1:13 Coi³ cjoa⁴-vi⁴ ti⁴ca³tio¹ntao³ cjoa⁴fa³ˀai³tsjen³-no³, to⁴jvi³ ti⁴yo³, ña³qui³ nta³ cho¹ya³-lao⁴³ je² cjoa⁴nta³ xi³ cjoa⁴ˀai¹-no³ cˀia⁴ nca³ coan⁴tsen³-no³ Jesucristo.
1PE 1:14 Jo³-ni³ ˀnti¹xti³ntˀe¹ li² ni²tjo³son²-jin²lao⁴³ cjoa⁴chi⁴nca⁴-no³ jo³-ni³ nca³sˀa⁴, cˀia⁴ nca³ tjio¹njion²-sa³ cjoa⁴fa³-ˀai³tsjen³-no³.
1PE 1:15 Jo³-sˀin² nca³ tsje³ cjoan³ je² xi³ qui³nchja⁴-no³, cˀoa⁴-ti⁴ jon² tsje³ ca²ta³mao³ jo³-sˀin² ma³nquin¹cao⁴³ yao³-no³.
1PE 1:16 Cˀoa⁴-sˀin² tji¹tˀa³ xon⁴: Tsje³ ca²ta³mao³ nca³ jon², nca⁴ tsje³ nia¹³ nca³ an³.
1PE 1:17 Tsa² Nˀai³ cˀoin¹-lao⁴³ je² xi³ to⁴nco¹son² fi²cao⁴ nca³tsˀi³ cho⁴ta⁴, nca³ vˀe¹nta³jin³ jo³ sˀin¹ xa¹-le⁴ nca³ jnco¹jnco¹, jcha⁴xcon¹³ Ni³na¹. Cˀoa⁴-sˀin² ti⁴yo³cao⁴³ yao³-no³ jo³ tjin¹ ni⁴čhjin³ ti³ma³son²³ son³ˀnte³.
1PE 1:18 Je³ˀyao³ nca³ coan³chji¹ntjao²³ jo³-sˀin² nca³ chˀao³ tsa³qui³yo³, xi³ cˀoa⁴-sˀin² qui³sˀe³-no³ jo³-ni³ tsa² cjoa⁴tjao²-le⁴ xi³jcha¹-no³. Li² tsa² coan³chji¹ntjai²-jion²³ cao⁴ tso³jmi² xi³ fi³tson³, ni⁴ cao⁴ taon⁴si³ne²-jin², ni⁴ cao⁴ taon⁴čhoa³-jin²,
1PE 1:19 to⁴nca³ coan³chji¹ntjao²³ cao⁴ je² njin¹-le⁴ Cristo xi³ nˀion¹ chji¹-le⁴, xi³ jo³-ni³ tsa² tsˀe⁴ ˀnti¹va³rre² xi³ tsi² jña³ chˀao³ cji³-le⁴ xi³ ña³qui³ tsje³.
1PE 1:20 Cristo cˀoa⁴-sˀin² to⁴nqui³-ni³ qui³sa³sen³nta³ jo³ sa³ˀnta³ nca³sˀa⁴, nca³ cje³ sˀe³nta³-jin² son³ˀnte³, to⁴nca³ je³coan³tsen³ je² ni⁴čhjin³fe³tˀa³-vi⁴ xi³ tˀa³tsaon⁴³.
1PE 1:21 Xi³ to⁴tˀa³tsˀe⁴ Cristo ma³cjain¹-no³ xi³ tˀa³tsˀe⁴ Ni³na¹, je² xi³ qui³si³cja³ˀa¹ya³jin-ni³le⁴ cˀen³, cˀoa⁴-ti⁴ je² xi³ qui³tsjoa³-le⁴ cjoa⁴je³ya³. Coi³ cjoa⁴-vi⁴ nca³ cˀoa⁴-sˀin² ma³cjain¹-no³, cˀoa⁴ cho¹ya³-lao⁴³ tˀa³tsˀe⁴ Ni³na¹.
1PE 1:22 Qui³ni²tsjao³ ni⁴ma⁴-no³ nca³ qui³ni²tjo³son²-lao⁴³ xi³ cjoa⁴qui²xi⁴ xi³ to⁴tˀa³tsˀe⁴ je² Espíritu Santo, nca³ ña³qui³ cjoa⁴qui²xi⁴ ma³tsjoa³chao³ ntsˀao³. Nˀion¹ nta³ ca²ta³ma³tsjoa³chao³ xi²nquio⁴³ cao⁴ ni⁴ma⁴-no³ xi³ tsje³ tjin¹.
1PE 1:23 Qui³tsin³ nqui²jnco³cˀao²³, a³li² tsˀe⁴ ntje⁴ xi³ fi³tson³-jin², to⁴nca³ tsˀe⁴ xi³ tsa² fi³tson³, xi³ to⁴tˀa³tsˀe⁴ en¹-le⁴ Ni³na¹ xi³ ti¹jna³con³, cˀoa⁴ xi³ cˀoe¹jna³ntsjai².
1PE 1:24 Nca³tsˀi³ cho⁴ta⁴ nco³ya³-le⁴ tsa² xca⁴, cˀoa⁴ je² cjoa⁴je³ya³-le⁴ cho⁴ta⁴son³ˀnte³ nco³ya³-le⁴ tsa² na³xo¹-le⁴ xca⁴. Xi² xca⁴-ve⁴, cˀoa⁴ na³xo¹-le⁴ tsao³.
1PE 1:25 To⁴nca³ je² en¹-le⁴ Nai³-na¹ ña³qui³ ti¹jna³ nca³ntsjai². Je² en¹-vi⁴ je² en¹nta³ xi³ tˀa³tsˀe⁴ Cristo xi³ qui³no²cjoa⁴ya³jin³-no³.
1PE 2:1 Tˀe²jnao³-ˀni³ nca³yi³je³ cjoa⁴tsˀen⁴, cao⁴ nca³yi³je³ cjoa⁴chˀa²na⁴cha⁴, cao⁴ cjoa⁴jao²ncjain¹, cao⁴ cjoa⁴xin²ta³con², cao⁴ cjoa⁴xin²ta³con², cao⁴ nca³yi³je³ xi³ no²cjoa⁴ˀaon³.
1PE 2:2 Jo³-ni³ ˀnti¹le³ xi³ sˀa⁴ ca²tsin³, ca²ta³ma³me³-no³ je² nta¹chi³qui³ xi³ tˀa³tsˀe⁴ ni⁴ma⁴-no³, xi³ ña³qui³ nta³, jme¹-ni³ nca³ cˀoa⁴-sˀin² coan⁴jcha¹-si¹nio³ nca³ coi²tjo⁴ntjao²³.
1PE 2:3 Nca⁴ qui³cho²tˀao³ nca³ je² Nai³-na¹ tjin¹-le⁴ cjoa⁴nta³.
1PE 2:4 Ti⁴čhian³tˀa³-lao⁴³ yao³-no³ Nai³-na¹, je² jo³-ni³ la⁴jao⁴ xi³ ti¹jna³con³, xi³ cho⁴ta⁴ tsa³cja³ˀa¹xin², to⁴nca³ xi³ Ni³na¹ tsa³cja³ˀa¹jin³ nca³ nˀion¹ chji¹-le⁴.
1PE 2:5 Cˀoa⁴-ti⁴ jon² jo³-ni³ tsa² la⁴jao⁴ xi³ tjio¹con³ ca²ta³mao³, jnco³ ni³ˀya³ xi³ tsˀe⁴ espíritu, cˀoa⁴ ca²ta³mao³ na⁴ˀmi³ xi³ tsje³ nca³ cˀoai⁴tˀa³-nio³ cjoa⁴tjao² xi³ tsˀe⁴ espíritu, xi³ sa³sen¹-le⁴ Ni³na¹, to⁴tˀa³tsˀe⁴ Jesucristo.
1PE 2:6 Jo³-sˀin² ti¹nchja⁴ xon⁴ Escritura: Coe⁴-ni³ ya⁴ Sión cˀoe³jna²³ xi³ lao⁴ti¹tjon² xi³ lao⁴xi⁴nqui⁴, xi³ nˀion¹ chji¹-le⁴. Coi³ la⁴jao⁴-ve⁴ Cristo ni¹. Je² xi³ coan⁴cjain¹-le⁴ xi³ tˀa³tsˀe⁴ li²coi³ coan⁴soa³-le⁴.
1PE 2:7 Cjai¹nca³ tjin¹-le⁴ cjoa⁴je³ya³ xi³ tˀa³tsaon⁴³ xi³ ma³cjain¹-no³ xi³ tˀa³tsˀe⁴. Xi³ tˀa³tsˀe⁴ je² xi³ tsi² si¹tjo³son², je² jo³-ni³ la⁴jao⁴ xi³ chji⁴ne⁴xjao¹ tsa³cja³ˀa¹xin², to⁴nca³ coan³ la⁴jao⁴xi⁴nqui⁴,
1PE 2:8 cˀoa⁴ la⁴jao⁴ xi³ sa⁴te¹nqui³, cˀoa⁴ la⁴jao⁴ˀnti¹ xi³ si¹jti³-le⁴ je² xi³ sa³te¹nqui³ to⁴tˀa³tsˀe⁴ je² en¹-le⁴ Ni³na¹ nca⁴ tsˀa³ntjai²cjoa⁴, nca³ cˀoa⁴-sˀin² tsa³cˀai²-ni³le⁴.
1PE 2:9 Jon² nio¹³ na⁴xi⁴na³nta¹ xi³ qui³tjo³jion³. Jon² nio¹³ na⁴ˀmi³ xi³ ncˀa³ xa¹-le⁴. Jon² nio¹³ na⁴xi⁴na³nta¹ xi³ tsje³, na⁴xi⁴na³nta¹ tˀa³tsˀe⁴ Ni³na¹, jme¹-ni³ nca³ coi⁴no²cjoa⁴ya³-nio³ cjoa⁴nta³ xi³ tsˀe⁴ Ni³na¹ xi³ qui³nchja⁴-no³ jña³ nca³ i³sen³xcon¹, ji²tjo⁴³ jña³ nca³ njion².
1PE 2:10 Jon² nca³sˀa⁴ a³li² na⁴xi⁴na³nta¹-jion²³, to⁴nca³ ntˀai⁴-vi⁴ Ni³na¹ no²cjoa⁴-nio³. Nca³sˀa⁴ li²coi³ coan³ma⁴que³-no³ Ni³na¹, to⁴nca³ ntˀai⁴-vi⁴ je³coan³ma⁴que³-no³.
1PE 2:11 Jon² xi³ tsjoa³que⁴-no³, vˀe³tsˀoa²³-no³ jo³-ni³ tsa² cho⁴ta⁴xin²na³nqui³ xi³ to⁴tjio¹tso³ma²son² son³ˀnte³, ta⁴te²chjoa²-lao⁴³ yao³-no³ cjoa⁴chi⁴nca⁴-le⁴ xi³ cjan¹cao⁴ ni⁴ma⁴-no³.
1PE 2:12 Nta³ ta³nquin¹cao⁴³ yao³-no³ ya⁴jin³-le⁴ cho⁴ta⁴ xi³ li² judío-jin². Nta³ tsa² jo³-ni³ cho⁴ta⁴tsˀen⁴ ve³con³-no³, cˀia⁴ tsa² scoe⁴ nca³ nta³ xa¹-no³, cˀoa⁴sje³je³ya³ Ni³na¹ coi³ ni⁴čhjin³ nca³ Ni³na¹ cjoa⁴ˀai¹con³-le⁴.
1PE 2:13 Xi³ to⁴tˀa³tsˀe⁴ Ni³na¹ ti⁴tjo³son²-lao⁴³ nca³tsˀi³ xi³ va³te¹xo³ma³-no³, tsa² cho⁴ta⁴ti¹tjon² ti⁴tjo³son²-lao⁴³ jo³-ni³ nca³jco⁴-le⁴ nca³yi³je³,
1PE 2:14 tsa² gobernador cˀoa⁴-ti⁴ ti⁴tjo³son²-lao⁴³ jo³-ni³ tsa² xi³ Ni³na¹ qui³si³ca³sen¹ nca³jao⁴-le⁴, nca³ tsjoa¹-le⁴ cjoa⁴ñˀain³ cho⁴ta⁴tsˀen⁴, cˀoa⁴ nca³ cˀoa⁴sje³nta³ xi³ nta³ sˀin¹.
1PE 2:15 Je²-vi⁴ xi³ me³-le⁴ Ni³na¹ nca³ nta³ nˀiaon²³. Cˀoa⁴-sˀin² cˀoe¹chjoao²³ cjoa⁴njion²ta³con²-le⁴ cho⁴ta⁴ xi³ tsi²jme³ cjoa⁴fa³ˀai³tsjen³ tjin¹-le⁴.
1PE 2:16 Jon² xi³ cho⁴ta⁴ntai¹ nio¹³. A³li² ni²chjen¹-jion²³ cjoa⁴ntai¹-no³ nca³ cˀoe¹ˀma³ cjoa⁴tsˀen⁴-no³, to⁴nca³ cˀoa⁴tˀiaon⁴³ jo³-ni³ tsa² je² xi³ si¹xa¹-le⁴ Ni³na¹.
1PE 2:17 Jcha⁴xcon¹³ nca³tsˀi³. Ca²ta³ma³tsjoa³chao³ ntsˀao³. Ti⁴jcon¹chao³ Ni³na¹. Jcha⁴xcon¹³ cho⁴ta⁴ti¹tjon².
1PE 2:18 Cho⁴ˀntao³, jcha⁴xcon¹³ ti⁴tjo³son²-lao⁴³ nai³-no³. A³li² to⁴je²-jin² ni²tjo³son²-lao⁴³ xi³ nta³, xi³ ve³tjao²-no³. Cˀoa⁴-ti⁴ ti⁴tjo³son²-lao⁴³ je² xi³ cao⁴ cjoa⁴tsˀen⁴ vˀe¹xa¹-no³.
1PE 2:19 Je²-vi⁴ xi³ nta³ sa³sen¹-le⁴ Ni³na¹, tsa² jnco³ xi³ to⁴tˀa³tsˀe⁴ cjoa⁴fa³ˀai³tsjen³-le⁴ nqui³xcon⁴ Ni³na¹, si¹cjain¹-le⁴ cjoa⁴ñˀain³ xi³ tsi² tsa² va³quin²-le⁴.
1PE 2:20 Jme¹ chji¹-le⁴ tsa² jcho¹cjoa⁴-no³ cˀia⁴ nca³ ma³jtsin³-no³ nca³ vi³jncho³ je¹. To⁴nca³ tsa² jcho¹cjoa⁴-no³ cˀia⁴ nca³ vˀai²-no³ cjoa⁴ñˀain³ nca³ nta³ nˀiaon²³, je²-vi⁴ xi³ cjoa⁴qui²xi⁴ sa³sen¹-le⁴ Ni³na¹.
1PE 2:21 Coi³ cjoa⁴ qui³no²cjoa⁴-ni³no³. Je² Cristo cˀoa⁴-ti⁴ tsa³cja³ˀa¹ cjoa⁴ñˀain³ xi³ tˀa³tsan⁴². Tsa³cˀe¹jna³cho⁴ya³-na¹ ntia⁴² xi³ tsˀe⁴, jme¹-ni³ nca³ cˀoa⁴-ti⁴ jon² coi⁴ma³-si¹nio³ jo³-sˀin² tsa³cˀa³mjen³ nca³ je¹.
1PE 2:22 Cristo li²coi³ tsa³jnqui³ je¹, ni⁴ qui³nchja⁴-jin² en¹chˀa²na⁴cha⁴.
1PE 2:23 Cˀia⁴ nca³ qui³no²cjoa⁴ˀaon³-le⁴ ni⁴jo³-jin² qui³tso² nca³ je². Cˀia⁴ nca³ tsa³cja³ˀa¹ cjoa⁴ñˀain³ li²coi³ qui³scan³cao⁴, to⁴ya⁴ qui³sca³ni¹tˀa³-le⁴ cjoa⁴ je² xi³ vˀe¹nta³jin³ cao⁴ cjoa⁴qui²xi⁴.
1PE 2:24 Je² soa³ tsa³cˀa³ xi³ tsan⁴² je¹, cˀia⁴ nca³ qui³tsjen³tjen⁴va³tˀa³ cro² yao³-le⁴, jme¹-ni³ nca³ coi⁴yo³chon³-si¹nia³² tˀa³tsˀe⁴ cjoa⁴qui²xi⁴, nca⁴ je³ti³yo³tˀa³xin²-le⁴² xi³ je¹ ˀmi² jo³-ni³ tsa² cˀen³. Coi³ nca³ qui³tsin²ˀaon³ nca³ je², coi³ coan³nta³-nio³.
1PE 2:25 Jon² nio¹³ jo³-ni³ va³rre² xi³ qui³cha³xcon³ ntia⁴²-le⁴, to⁴nca³ ntˀai⁴-vi⁴ je³ji³nčhoa³nčhˀoe²-nio³ nqui²ntia³ je² Pastor xi³ si¹coi²nta⁴ ni⁴ma⁴-no³.
1PE 3:1 Cˀoa⁴-ti⁴sˀin²ni³ jon² xi³ ya¹nchjon¹³, na³nqui³ ti⁴yo³-lao⁴³ xˀin⁴-no³, jme¹-ni³ nca³ je² xˀin⁴-no³ xi³ tsi² ma³cjain¹-le⁴ je² en¹-le⁴ Ni³na¹ coi⁴njen⁴tˀa³-si¹ni³le⁴ Cristo, a³li² to⁴tˀa³tsˀe⁴ en¹-le⁴ ya¹nchjin¹-le⁴jin², to⁴coi³ cjoa⁴ nca³ nta³ fi²cao⁴ yao³-le⁴ je² ya¹nchjin¹-le⁴.
1PE 3:2 Nca⁴ co³tsen³-no³ nca³ tsje³ ti³yo³cao⁴³ yao³-no³, nca³ vi³jcon³chao³.
1PE 3:3 A³li² to⁴son²ncˀa³-le⁴jin² nca³ nta³ sa³yo³-lao⁴³, nca³ jo³ nta³ vˀe²nˀion¹³ ntsja⁴-no³, nca³ vˀe²nquio³ xi³ taon⁴si³ne², nca³ jo³ xcon¹ cjoan³ na³jño³-no³,
1PE 3:4 to⁴nca³ ti⁴chjaon¹³ xi³ ti¹jna³ˀma³ ja⁴jin³ ni⁴ma⁴-na¹, xi³ tsi² tsa² fi³tson³ nca³ tsˀe⁴ ni⁴ma⁴ntˀe¹ xi³ to⁴jvi³. Je² xi³ nqui²sa⁴ tse³ chji¹-le⁴ nqui³xcon⁴ Ni³na¹.
1PE 3:5 Ni⁴čhjin³ jchi¹nca³ je² ya¹nchjin¹ xi³ tsje³ tjio¹, xi³ qui³sco³ya²-le⁴ Ni³na¹, cˀoa⁴-sˀin² qui³si³chjen¹ ni⁴ma⁴nta³-le⁴, nca³ na³nqui³ tsa³ca³tio²-le⁴ xˀin⁴-le⁴.
1PE 3:6 Jo³ qui³sˀin³ Sara nca³ qui³si³tjo³son²-le⁴ Abraham, nca³ nai³-na⁴ qui³tso²-le⁴. Jon² nio¹³ ja⁴xti³ya¹nchjin¹-le⁴ Sara, tsa² nta³ nˀiaon²³, tsa² tsi²jme³ xi³ ma³xcon¹-no³.
1PE 3:7 Jon², xi³ xˀion⁴³, cˀoa⁴-ti⁴sˀin² ti⁴yo³cao⁴³ ya¹nchjin¹-no³ jo³-sˀin² nca³ nta³ ma³cho⁴ya³-no³. Jcha⁴cho⁴tao⁴³ ya¹nchjin¹-no³ jo³-ni³ tsa² jnco³ cho⁴tsin¹ xi³ nqui²sa⁴ čhjoe³, nca⁴ to⁴jnco³ tjin¹-no³ cjoa⁴tjao² xi³ cjoa⁴vi³jna³chon³, jme¹-ni³ nca³ je² xi³ vˀe²tsˀoao³ li²coi³ sa⁴te¹chjoa²-si¹ni³.
1PE 3:8 Xi³ fe³tˀa³-ni³, nca³tsˀio³ to⁴jnco³ tˀiaon⁴³ ni⁴ma⁴-no³, ti⁴jao²-ta³con²³, tjao²cha³ ca²ta³mao³ xi²nquio⁴³ jo³-ni³ tsa² ntsˀao³, jcha⁴ma⁴ta³con²³ xi²nquio⁴³, i³nta³na³nqui³ cho⁴vao²³.
1PE 3:9 A³li² cjoa⁴tsˀen⁴-jin² ni²nco¹son²cao⁴³ xi³ cjoa⁴tsˀen⁴, a³li² cjoa⁴ˀaon³ta³con²-jin² ni²nco¹son²cao⁴³ xi³ cjoa⁴ˀaon³ta³con², to⁴sa³ nta³ ti⁴chi³con³tˀaon³. Je³ˀyao³ nca³ coi³ qui³no²cjoa⁴-no³, jme¹-ni³ nca³ sˀe⁴-si¹ni³no³ cjoa⁴ni²chi³con³tˀain³.
1PE 3:10 Je² xi³ me³-le⁴ tjao²que³ cjoa⁴vi³jna³chon³, xi³ me³-le⁴ scoe⁴ ni⁴čhjin³ xi³ nta³, ca²ta³vˀe¹chjoa²-le⁴ ni⁴jen⁴ xi³ cjoa⁴tsˀen⁴, je² čhjoa⁴tsˀoa³ a³li² nchja⁴-jin² en¹chˀa²na⁴cha⁴.
1PE 3:11 Ca²ta³va³sen²xin²-le⁴ cjoa⁴tsˀen⁴, nta³ ca²ta³sˀin¹. Ca²ta³va¹sjai³ cjoa⁴nchˀan¹ta³con², cˀoa⁴-sˀin² ca²ta³fi²tjen⁴nqui³-le⁴.
1PE 3:12 Xcon⁴ Nai³-na¹ ya⁴ ti¹co³tsen³-le⁴ xi³ qui²xi⁴ vˀe¹ma³, cˀoa⁴ xo⁴ño³ ti¹nčhˀoe¹-le⁴ xi³ vˀe¹tsˀoa³, to⁴nca³ ncjain¹ Nai³-na¹ chˀao³ ti¹va³-le⁴ xi³ sˀin¹ cjoa⁴tsˀen⁴.
1PE 3:13 ˀya¹-ni³ xi³ coan⁴-le⁴ si⁴²qui²ˀaon³-no³, tsa² jon² ma³nquin¹tjen⁴nqui³-lao⁴³ xi³ nta³ tjin¹.
1PE 3:14 Cˀoa⁴-ti⁴ tsa² cjoa⁴ñˀain³ chja³ˀao²³ xi³ to⁴tˀa³tsˀe⁴ xi³ nta³ nˀiaon²³, jo¹ to⁴nta³-no³. A³li² jcon³-jin²lao⁴³ nca³ je², a³li² cˀoa⁴-jin² ma³-no³.
1PE 3:15 To⁴nca³ ja⁴jin³ ni⁴ma⁴-no³ jcha⁴xcon¹³ Ni³na¹ xi³ Nai³-na¹. Cao⁴ cjoa⁴ntˀe¹ cao⁴ cjoa⁴xcon¹ta³con² ti⁴yo³ntao³ nca³ntsjai², nca³ coan⁴ coi⁴xon¹ya³-lao⁴³ nca³ jnco¹jnco¹ xi³ sco¹na³nqui³ya³-no³ xi³ tˀa³tsˀe⁴ cjoa⁴ xi³ ti³cho³ya²-lao⁴³.
1PE 3:16 Ca²ta³sˀe³-no³ cjoa⁴fa³ˀai³tsjen³ xi³ nta³ tjin¹, jme¹-ni³ nca³ coan⁴soa³-si¹ni³le⁴ je² xi³ fa³je¹tˀa³ tˀa³tsaon⁴³ jo³-ni³ tsa² cho⁴ta⁴tsˀaon⁴³, xi³ nchja⁴ˀaon³-no³ nca³ nta³ ti³ma³nquin¹cao⁴³ yao³-no³ tˀa³tsˀe⁴ Cristo.
1PE 3:17 Tsa² cˀoa⁴-sˀin² me³-le⁴ Ni³na¹, to⁴sa³ nqui²sa⁴ nta³ tsa² chja³ˀao²³ cjoa⁴ñˀain³ xi³ to⁴tˀa³tsˀe⁴ xi³ nta³ nˀiaon²³, cao⁴-ni³ tsa² xi³ to⁴tˀa³tsˀe⁴ xi³ chˀao³ sˀiaon⁴³.
1PE 3:18 Cˀoa⁴-ti⁴ to⁴jnco³ cˀa², ntia³ tsa³cja³ˀa¹nˀion¹ cjoa⁴ñˀain³ Cristo xi³ to⁴tˀa³tsˀe⁴ cjoa⁴tsˀen⁴. Je² xi³ tjin¹-le⁴ cjoa⁴qui²xi⁴ tsa³cja³ˀa¹ cjoa⁴ñˀain³ xi³ tˀa³tsˀe⁴ xi³ tsin²-le⁴ cjoa⁴qui²xi⁴, jme¹-ni³ nca³ coai⁴cao⁴-si¹ni³na¹ Ni³na¹. Ña³qui³ cˀen³ jo³ cjoan³ yao³-le⁴, to⁴nca³ qui³ni²cˀe¹jna³con³ jo³ cjoan³ espíritu-le⁴.
1PE 3:19 Cao⁴ coi³ espíritu-le⁴ qui³ qui³nchja⁴ya³jin³-le⁴ je² espíritu xi³ tjio¹ cjoa⁴ñˀain³,
1PE 3:20 xi³ nca³sˀa⁴ tsˀa³ntjai²cjoa⁴ coan³. Ni³na¹ cao⁴ cjoa⁴tse³jta³ qui³si³cjain¹-le⁴ je² cho⁴ta⁴tsˀa³ntjai²cjoa⁴-ve⁴ cˀia⁴ ni⁴čhjin³ nca³ Noé ti¹vˀe¹nta³ je² barco. Ja⁴ya³ barco-ve⁴ to⁴choa³ cho⁴ta⁴, to⁴jin³ ma³-ni³, xi³ ji³tjo³ntjai²jin³ na³nta¹.
1PE 3:21 Je² na³nta¹-ve⁴ nco³ya³-le⁴ je² xi³ ntˀai⁴-vi⁴ vˀa³sje³ntjai²-na¹, xi³ coi³ cjoa⁴sa³te¹nta¹. Je² cjoa⁴sa³te¹nta¹ li²coi³ fa³ˀa¹xin²-na¹ cjoa⁴tsˀen⁴-le⁴ yao³-na¹. To⁴coi³ xi³ tso² nca³ nta³ cjoa⁴fa³ˀai³tsjen³ tjin¹-na¹ nqui³xcon⁴ Ni³na¹ to⁴tˀa³tsˀe⁴ nca³ ja³ˀa²ya³-ni³le⁴ Cristo.
1PE 3:22 Qui³mi³ ncˀa³jmi³ Cristo. Ti¹jna³tˀa³ nca³ qui²xi⁴-le⁴ Ni³na¹. A²ncje⁴ cao⁴ nca³yi³je³ cjoa⁴te¹xo³ma³ cao⁴ nca³yi³je³ nca³nˀion¹ tjio¹nqui³-le⁴ nca³ je².
1PE 4:1 Xi³ tˀa³tsan⁴² Cristo tsa³cja³ˀa¹-ni³ cjoa⁴ñˀain³ yao³-le⁴. Jon² cˀoa⁴-ti⁴sˀin² chjoao¹³ nca³nˀion¹ cao⁴ xi³ ti⁴je²-ni³ cjoa⁴fa³ˀai³tsjen³. Je² xi³ tsa³cja³ˀa¹-ni³ cjoa⁴ñˀain³ yao³-le⁴, li²coi³ ti⁴je¹ va³jnqui³-ni³,
1PE 4:2 jme¹-ni³ nca³ je² vˀe²jna³-si¹ni³ jo³-sˀin² nca³ me³-le⁴ Ni³na¹ je² ni⁴čhjin³ nca³ ti¹jna³-sa³. Li²coi³ vˀe²jna³jin³ cjoa⁴chi⁴nca⁴-le⁴ cho⁴ta⁴son³ˀnte³.
1PE 4:3 Je³coan³-ni³na¹ ni⁴čhjin³ xi³ je³ja³ˀa³to³ nca³ cˀoa⁴qui³nˀian² jo³-sˀin² coan³me³-le⁴ cho⁴ta⁴ xi³ li² judío-jin², cˀia⁴ nca³ tsa³nquin¹coa⁴² yao³-na¹ nca³yi³je³ xi³ chˀao³ tjin¹, cao⁴ cjoa⁴xin²ta³con², cao⁴ cjoa⁴chˀi⁴, cao⁴ cjoa⁴vi³chi³sjoe², cao⁴ cjoa⁴vi³chi³sˀoia¹, nca³ tsa³ˀya³xcon¹ xco¹son² xi³ li²coi³ tjo³ˀnte³-na¹.
1PE 4:4 Coi³ cjoa⁴ je³cji³ma³xcon¹-ni³le⁴ nca³ tsi² tsa² ma³nquin¹cao⁴³ xi³ ti⁴je²-ni³ cjoa⁴ xi³ li²coi³ ti⁴ma³ntˀe¹-ni³, xi³ si¹qui³tson¹ya³. Tjio¹nchja⁴ˀaon³-no³.
1PE 4:5 Je² cho⁴ta⁴ xo⁴cjoan³-ve⁴ tsjoa¹-le⁴ coi²nta⁴ je² xi³ ti¹jna³nta³ nca³ cˀoe⁴²nta³jin³-ni³le⁴ xi³ tjio¹con³ cao⁴ xi³ tjio¹cˀen³.
1PE 4:6 Coi³ cjoa⁴ nca³ cˀoa⁴-ti⁴ qui³no²cjoa⁴ya³jin³-le⁴ xi³ tjio¹cˀen³ je² en¹nta³ xi³ tˀa³tsˀe⁴ Cristo, jme¹-ni³ nca³ coa⁴tio⁴con³-si¹ni³ cao⁴ espíritu jo³-sˀin² ti¹jna³con³ Ni³na¹, nta³ tsa² qui³sˀe³nta³jin³-ni³le⁴ jo³-sˀin² sˀe³nta³jin³-le⁴ cho⁴ta⁴son³ˀnte³ cˀia⁴ nca³ tjio¹con³-ni³ yao³-le⁴.
1PE 4:7 To⁴nca³ ma³čhian³-le⁴ nca³ cjoe⁴tˀa³ nca³yi³je³ cjoa⁴. To⁴jvi³ to⁴ˀi³nta³ ti⁴yo³, tˀe²tsˀoa³ntsjao²³.
1PE 4:8 Xi³ ti¹tjon²-le⁴ nca³yi³je³ cjoa⁴, nˀion¹ ca²ta³ma³tsjoa³chao³ xi²nquio⁴³, nca⁴ ncjin² cjoa⁴tsˀen⁴ vˀe¹ˀma³tˀain³ cjoa⁴tjao²cha³-ve⁴.
1PE 4:9 Tˀai²-lao⁴³ ˀnte³ xi²nquio⁴³ nca³ si⁴²cja¹ya³. Tsjoa¹ cˀoa⁴tˀiaon⁴³.
1PE 4:10 Jo³-sˀin² cjoa⁴nta³ tsa³cˀai²-le⁴, nca³ jnco¹jnco¹ ca²ta³si¹chjen¹ tˀa³tsˀe⁴ xi³ cja⁴ˀai¹. Ca²ta³si¹chjen¹ jo³-sˀin² xi³ nta³ si¹chjen¹ xi³ cja⁴ˀai¹nca¹ cjoa⁴nta³-le⁴ Ni³na¹.
1PE 4:11 Tsa² jnco³ xi³ nchja⁴, ca²ta³nchja⁴ jo³ tso² en¹-le⁴ Ni³na¹. Tsa² jnco³ xi³ si¹xa¹cao⁴, ca²ta³si¹xa¹cao⁴ jo³ tjin¹ nca³nˀion¹ xi³ tsjoa¹ Ni³na¹, jme¹-ni³ nca³ coi⁴tjo³je³ya³-si¹ni³ Ni³na¹ cao⁴ nca³yi³je³ cjoa⁴ xi³ to⁴tˀa³tsˀe⁴ Jesucristo. Tsˀe⁴ ni¹ cjoa⁴je³ya³ cao⁴ cjoa⁴te¹xo³ma³ xi³ ni⁴cˀia³-jin² cjoe⁴tˀa³. Cˀoa⁴ ca²ta³ma³.
1PE 4:12 Jon² xi³ cjai¹nca³ tsjoa³que⁴-no³, li² ma³xcon¹-jin²lao⁴³ xi³ fa³ˀai³ne²-no³, jo³-ni³ tsa² jnco³ cjoa⁴xcon¹ xi³ co³tˀa³-ni³no³ cao⁴ lˀi¹.
1PE 4:13 Tsa² chja³ˀa²cao⁴³ cjoa⁴ñˀain³ Cristo, to⁴sa³ nta³ ca²ta³ma³tsjoa³-no³, jme¹-ni³ nca³ cˀoa⁴-sˀin² cjai¹nca³ tsjoa³ coan⁴-si¹ni³no³ cˀia⁴ nca³ coan⁴tsen³ cjoa⁴je³ya³-le⁴ Cristo.
1PE 4:14 Tsa² no²cjoa⁴ˀaon³-no³ xi³ tˀa³tsˀe⁴ jan³ˀain¹-le⁴ Cristo, jo¹ to⁴nta³-no³. Je² cjoa⁴je³ya³-le⁴ cˀoa⁴ je² Espíritu xi³ tsˀe⁴ Ni³na¹ tjio¹cao⁴-no³. Cjoa⁴qui²xi⁴ ni¹ je² cho⁴ta⁴ nchja⁴ˀaon³-le⁴ Cristo, to⁴nca³ jo³ nˀiaon²³ nca³ jon² tjo¹sje³je³ya³-ni¹.
1PE 4:15 Cˀoa⁴-sˀin² ni⁴jnco³-jin² xi³ jon² cjoa⁴ˀa² cjoa⁴ñˀain³ jo³-ni³ tsa² xi³ cˀen³ qui³tjen⁴-le⁴, xi³ che¹, xi³ chˀao³ sˀin¹, a³xo⁴ xi³ ca³ni¹jin³ yao³-le⁴ xi³ tsi² tsa² je² vˀa³cao⁴-le⁴.
1PE 4:16 To⁴nca³ tsa² jnco³ xi³ fa³ˀa¹ cjoa⁴ñˀain³ nca³ cho⁴ta⁴-le⁴ Cristo, a³li² ma³soa³-jin²le⁴. To⁴sa³ nqui²sa⁴ ca²ta³vˀa³sje³je³ya³ Ni³na¹ nca³ yˀa³ jan³ˀain¹-le⁴.
1PE 4:17 Je³ji³cho² ni⁴čhjin³ nca³ cˀoe⁴²tsˀia⁴cao⁴ nca³ sˀe⁴nta³jin³-le⁴ cho⁴ta⁴-le⁴ Ni³na¹. Tsa² ti¹tjon² cˀoe⁴²tsˀia⁴cao⁴-na¹ nca³ ña¹, jo¹-sˀin² cjoe⁴tˀa³-le⁴ xi³ tsi² tsa² si¹tjo³son²-le⁴ je² en¹nta³-le⁴ Ni³na¹.
1PE 4:18 Tsa² ñˀain³ vi³tjo³ntjai² je² xi³ qui²xi⁴ vˀe¹ma³, jo¹-sˀin² coi⁴tjo³ je² xi³ tsi² ma³cjain¹-le⁴ cao⁴ xi³ cho⁴ta⁴je¹.
1PE 4:19 Coi³ cjoa⁴ je² xi³ fa³ˀa¹ cjoa⁴ñˀain³ jo³ qui³tso² Ni³na¹, nta³ ca²ta³sˀin¹, ca²ta³tsjoa¹tˀa³-le⁴ ni⁴ma⁴-le⁴ Ni³na¹ xi³ nta³ qui³si³nta³ nca³yi³je³.
1PE 5:1 Vˀe³tsˀoa²³-le⁴ nca³tsˀi³ cho⁴ta⁴jchi¹nca³ xi³ tjio¹jin³-no³, cˀoa⁴-ti⁴ an³ cho⁴ta⁴jchi¹nca³ nia¹³ cao⁴ je². An³ tsa³ˀve³ cjoa⁴ñˀain³ xi³ qui³sˀe³-le⁴ Cristo, cˀoa⁴-ti⁴ an³ sˀe³-na³ cjoa⁴je³ya³ xi³ coan⁴tsen³.
1PE 5:2 Ti⁴coi²ntao⁴³ je² cho⁴ta⁴-le⁴ Ni³na¹ xi³ tjio¹jin³-no³. A³li² cao⁴ cjoa⁴nˀion¹-jin² ni²coi²ntao⁴³, to⁴cao⁴ cjoa⁴nta³-no³ cˀoa⁴sˀiaon⁴³. A³li² tˀa³tsˀe⁴ xi³ coi⁴njen⁴-no³ xi³ chˀao³ tjin¹, to⁴cao⁴² cjoa⁴tsjoa³ cˀoa⁴sˀiaon⁴³.
1PE 5:3 A³li² tsa² nˀion¹-jin² vˀe²ne²-lao⁴³ cho⁴ta⁴ xi³ vˀa³cao⁴-no³, to⁴nca³ tja³ntia⁴²-lao⁴³ cho⁴ta⁴-le⁴ Ni³na¹.
1PE 5:4 Cˀia⁴ nca³ coan⁴tsen³ je² Pastorti¹tjon² xi³ si¹coi²nta⁴, jon² xi³ tjoe¹-no³ je² corona xi³ tsi² fi³tson³, xi³ tsˀe⁴ cjoa⁴je³ya³.
1PE 5:5 Cˀoa⁴-ti⁴ jon² xi³ na³nqui³ ti³yo³, ti⁴tjo³son²-lao⁴³ cho⁴ta⁴jchi¹nca³. Ca²ta³ma³ i³nta³jin³-ta³con²lao⁴³ xi²nquio⁴³ nca³tsˀio³, ca²ta³fa³ˀa³jen³-no³, nca⁴ Ni³na¹ vˀe²jna³ta²ja³-le⁴ xi³ ncˀa³con³. Tsjoa¹-le⁴ cjoa⁴nta³ je² xi³ i³nta³jin³-ta³con².
1PE 5:6 So³ma⁴tˀa³nqui³-lao⁴³ ntsja³ Ni³na¹ xi³ tjin¹-le⁴ nca³nˀion¹, jme¹-ni³ nca³ je² si⁴²quin³ncˀa³-si¹ni³no³ cˀia⁴ nca³ coi⁴cho³ ni⁴čhjin³-ve⁴.
1PE 5:7 Je² ti⁴cˀa³mio³ nca³yi³je³ cjoa⁴ni²cjao¹jin³-no³, nca⁴ je² ti¹si¹coi²nta⁴-no³.
1PE 5:8 To⁴jvi³ to⁴ˀi³nta³ ti⁴yo³, ti⁴yo³chon³ˀntao³, nca⁴ je² co²ntran⁴-no³, je² nai⁴², jo³-ni³ tsa² xa³ xi³ ti¹va³te¹, ti¹si¹cˀo¹tji³ntai³-no³, ti¹va¹sjai³ ˀya³ xi³ squi⁴ne⁴.
1PE 5:9 Nˀion¹ ti⁴yo³ta²ja³-lao⁴³ je² nai⁴². Nˀion¹ ti⁴yo³-lao⁴³ xi³ ma³cjain¹-no³, nca⁴ je³ˀyao³ nca³ ti⁴je²-ni³ cjoa⁴ñˀain³ cˀoa⁴-sˀin² vi³tjo³son² cao⁴ nca³tsˀi³ ntsˀao³ xi³ tjio¹ i⁴ son³ˀnte³.
1PE 5:10 To⁴nca³ Ni³na¹ xi³ tjin¹yi³je³-le⁴ cjoa⁴nta³, xi³ qui³nchja⁴-na¹ xi³ to⁴tˀa³tsˀe⁴ Jesucristo, nca³ sˀe⁴-na¹ cjoa⁴je³ya³-le⁴ xi³ ti¹jna³ nca³ntsjai². Cˀia⁴ nca³ je³qui³chja³ˀa² jnco³tjo²³ cjoa⁴ñˀain³, coan⁴scan³-ni³ je² soa³ Ni³na¹ si⁴²nta³ya³-no³, si⁴²cˀe¹jna³nta³-no³, tsjoa¹-no³ nca³nˀion¹, nta³ si⁴²cˀe¹yo³-no³.
1PE 5:11 Je² ca²ta³sˀe³-le⁴ cjoa⁴je³ya³ cao⁴ cjoa⁴te¹xo³ma³ nca³ntsjai². Cˀoa⁴ ca²ta³ma³.
1PE 5:12 Tsen³ ma³-na³ nca³ nˀion¹ tˀa³con³ ntsˀe³ Silvano, je² xi³ qui³squi³ xi³ tˀa³tsˀan⁴, nca³ an³ qui³sca³ni³ i⁴tse¹-no³ en¹. Ti²vˀe³ne²³-no³, ti²si³qui²xi⁴ya³-no³ nca³ ña³qui³ cjoa⁴nta³-le⁴ Ni³na¹ je²-vi⁴ xi³ ti³yo³jin³-lao⁴³.
1PE 5:13 Si¹ti²ˀnta³-no³ je² cho⁴ta⁴-le⁴ Cristo xi³ tjio¹ ya⁴ Babilonia, xi³ to⁴jnco³ qui³tjoe¹jin³ cao⁴ jon². Si¹ti²ˀnta³-no³ Marcos, ˀnti¹-na⁴.
1PE 5:14 Ti⁴ti²ˀntao³ xi²nquio⁴³, tˀe²tˀa³tsˀoao²³ xi²nquio⁴³, nca³ cˀoa⁴-sˀin² tsjoa³chao³ xi²nquio⁴³. Ca²ta³njen³nchˀan¹jin³ ni⁴ma⁴-no³ nca³tsˀio³ xi³ ti³yo³cao⁴³ Jesucristo. Cˀoa⁴ ca²ta³ma³.
2PE 1:1 An³ nia¹³ Simón Pedro, cho⁴ˀnta³-le⁴ cˀoa⁴ pa²stro⁴-le⁴ Jesucristo. Ti²cji³-no³ jon² xi³ to⁴nco¹son² ma³cjain¹-no³ jo³-sˀin² ma³cjain¹-na³jin⁴ nca³ jin⁴-jin⁴. Xi³ ma³cjain¹-na¹ nˀion¹ chji¹-le⁴. Cˀoa⁴-sˀin² qui³tsˀai²-na¹ xi³ to⁴tˀa³tsˀe⁴ cjoa⁴qui²xi⁴-le⁴ Jesucristo xi³ Ni³na¹-na¹ cˀoa⁴ xi³ tsa³cˀa³sje³ntjai²-na¹.
2PE 1:2 Ca²ta³sˀe³-sa³no³ cjoa⁴nta³, ca²ta³njen³nchˀan¹jin³-sa³ ni⁴ma⁴-no³, nca³ ña³qui³ nta³ ˀyao³ Ni³na¹ cao⁴ Jesús Nai³-na¹.
2PE 1:3 Je² nca³nˀion¹-le⁴ Ni³na¹ qui³tsjoa³-na¹ nca³yi³je³ xi³ ma³chjen¹-na¹ tˀa³tsˀe⁴ cjoa⁴vi³jna³chon³, cˀoa⁴ xi³ tˀa³tsˀe⁴ nca³ nta³ ˀya³xcoan¹ nca³ je². Cˀoa⁴-sˀin² qui³tsjoa³-na¹ nca³ tsa³ˀya³² je² xi³ qui³nchja⁴-na¹ to⁴tˀa³tsˀe⁴ cjoa⁴je³ya³-le⁴ cao⁴ nca³nˀion¹-le⁴.
2PE 1:4 To⁴tˀa³tsˀe⁴ coi³ cjoa⁴-ve⁴ tsa³cˀai²-ni³na¹ xi³ qui³ni²sˀe³nqui³-na¹ xi³ cjai¹nca³ nta³ tjin¹, xi³ cjai¹nca³ tse³ tjin¹, jme¹-ni³ nca³ cˀoa⁴-ti⁴sˀin² tjoe¹-si¹ni³no³ nca³ cˀoa⁴coan⁴ cjoaon³ jo³ cjoan³ Ni³na¹, nca⁴ tsa³qui³ncha³xin²-lao⁴³ je² cjoa⁴ xi³ tjio¹ i⁴ son³ˀnte³, xi³ si¹cji³tson¹-na¹, xi³ tsˀe⁴ cjoa⁴chi⁴nca⁴.
2PE 1:5 Cˀoa⁴-ti⁴ jon² nˀion¹ ti⁴sin³-lao⁴³ nca³yi³je³ je² cjoa⁴-vi⁴. Xi³ ma³cjain¹-no³ ca²ta³sˀe³-le⁴ nca³nˀion¹. Je² nca³nˀion¹-no³ ca²ta³sˀe³-le⁴ cjoa⁴chji⁴ne⁴.
2PE 1:6 Je² cjoa⁴chji⁴ne⁴-no³ ca²ta³sˀe³-le⁴ cjoa⁴ntˀe¹. Je² cjoa⁴ntˀe¹-no³ ca²ta³sˀe³-le⁴ cjoa⁴tse³jta³. Je² cjoa⁴tse³jta³-no³ ca²ta³sˀe³-le⁴ cjoa⁴xcon¹ta³con² tˀa³tsˀe⁴ Ni³na¹.
2PE 1:7 Je² cjoa⁴xcon¹ta³con²-no³ tˀa³tsˀe⁴ Ni³na¹ ca²ta³sˀe³-le⁴ cjoa⁴tjao²cha³ tˀa³tsˀe⁴ ntsˀao³. Je² cjoa⁴tjao²cha³ tˀa³tsˀe⁴ ntsˀao³ ca²ta³sˀe³-le⁴ cjoa⁴tjao²cha³ tˀa³tsˀe⁴ nca³tsˀi³.
2PE 1:8 Tsa² tjin¹-no³ je² cjoa⁴-vi⁴, tsa² ma³ncjin²ya³jin³ ni⁴ma⁴-no³ je² cjoa⁴-vi⁴, li²coi³ tsjoa¹ˀnte³-no³ nca³ coi⁴yo³tsˀao²³, nca³ ni⁴jme³-jin² xi³ sˀiaon⁴³. Cˀoa⁴-sˀin² coi⁴ma³son²cao⁴³ je² xi³ ma³cho⁴ya³-no³ tˀa³tsˀe⁴ je² Nai³-na¹ Jesucristo.
2PE 1:9 To⁴nca³ je² xi³ tsin²-le⁴ je² cjoa⁴-vi⁴, xca⁴ ni¹, a³li²coi³ nta³ ma³tsen³-le⁴. Qui³si³cha³jin³ nca³ je³coan³tsje³ ja⁴tˀa³tsˀe⁴ cjoa⁴tsˀen⁴ xi³ co²tse³ qui³sˀe³-le⁴.
2PE 1:10 Coi³ cjoa⁴ ˀnti¹ntsˀe³, nqui²sa⁴ nta³ ti⁴xi¹ti¹ya³-lao⁴³ yao³-no³ nca³ coa⁴co²son²tsaon³ nca³ Ni³na¹ qui³nchja⁴-no³ cˀoa⁴ tsa³cja³ˀa¹jin³-no³. Tsa² cˀoa⁴sˀiaon⁴³ je² cjoa⁴-vi⁴, ni⁴to⁴cˀia³-jin² tsaon⁴nquio³.
2PE 1:11 Cˀoa⁴-sˀin² cjai¹nca³ to⁴nta³ cˀoai⁴ˀnte³-no³ cˀia⁴ nca³ coi⁴tja¹sˀen³jion³ cao⁴ cjoa⁴je³ya³ je² cjoa⁴te¹xo³ma³ntsjai²-le⁴ Jesucristo xi³ Nai³-na¹ cˀoa⁴ xi³ tsa³cˀa³sje³ntjai²-na¹.
2PE 1:12 Coi³ cjoa⁴ li²coi³ coa²te⁴jna³jyoa¹³ nca³ si³cja³ˀai³tsjen³ ntsjai²-no³ je² cjoa⁴-vi⁴, nta³ tsa² je³ˀyao³, nta³ tsa² je³ti³yo³nˀion¹jin³-lao⁴³ je² cjoa⁴qui²xi⁴ xi³ je³tjin¹-no³.
2PE 1:13 Tjen⁴ nca³ ti²jna⁴jin³-sa³ je² yao³-na⁴, cˀoa⁴xian³ nca³ nta³ tjin¹ nca³ cˀoa⁴-sˀin² cˀoe³ne²³-no³, nca³ si³cja³ˀai³tsjen³-no³.
2PE 1:14 Je³ˀve³ nca³ nti⁴ton⁴ coi⁴tjo³xin²-na³ yao³-na⁴, jo³-sˀin² tsa³ca³co¹-na³ je² Nai³-na¹ Jesucristo.
2PE 1:15 Cˀoa⁴-ti⁴ cjai¹ nˀion¹ cˀoe³ne²³-le⁴ yao³-na⁴, jme¹-ni³ nca³ cjoa⁴ˀai¹tsjen³-si¹ni³no³ nca³ntsjai² je² cjoa⁴-vi⁴ cˀia⁴ nca³ cjoe⁴ coi³ya¹³ an³.
2PE 1:16 Cˀia⁴ nca³ tsa³cˀin²ya³-lai²⁴jin⁴ xi³ tˀa³tsˀe⁴ nca³nˀion¹-le⁴ Jesucristo Nai³-na¹, cˀoa⁴ jo³-sˀin² nca³ cjoa⁴ˀai¹, li²coi³ qui³ni²sin³-lai⁴jin⁴ xi³ to⁴cuento ˀmi², xi³ to⁴jin⁴ tsa³cˀe²ntai³⁴-jin⁴, to⁴nca³ je² xcoin³⁴-jin⁴ cˀoa⁴-sˀin² tsa³ve³ je² cjoa⁴je³ya³-le⁴.
2PE 1:17 Ni³na¹ Nˀai³-na¹ tsa³cˀa³sje³nta³ cˀoa⁴ tsˀa³sje³je³ya³ Jesucristo cˀia⁴ nca³ tsa³cja¹cao⁴-ni³ jta⁴ xi³ ja³ˀai³-ni³ ya⁴ jña³ nca³ je³ya³ chon³ ya⁴ ncˀa³jmi³ xi³ qui³tso²: Je²-vi⁴ ˀnti¹-na⁴ xi³ cjai¹nca³ nta³ tjao²que⁴, jo³ nta³ qui³sˀe³coan³ xi³ tˀa³tsˀe⁴.
2PE 1:18 Cˀoa⁴-ti⁴ jin⁴-jin⁴ qui³no²ˀya²-lai⁴jin⁴ jta⁴ xi³ ncˀa³jmi³ ja³ˀai³-ni³, cˀia⁴ nca³ ya⁴ to⁴jnco³ tsa³qui³yo³coai⁴-jin⁴ ya⁴ ni³nto³tsje³-ve⁴.
2PE 1:19 Cˀoa⁴-sˀin² nqui²sa⁴ nˀion¹ ti¹jna³qui²xi⁴-na³jin⁴ je² en¹ xi³ to⁴nqui³-ni³ qui³sˀe³ya³ta³coan³². Cjai¹nca³ nta³ nˀiaon²³ tsa² si⁴sion³ je² en¹-ve⁴, jo³-ni³ tsa² jnco³ ya¹lˀi¹ xi³ si¹ˀi³sen³ ˀnte³ jña³ nca³ njion², jo³ sa³ˀnta³ nca³ sˀe⁴sen¹, cˀoa⁴ sa³ˀnta³ nca³ si⁴²ˀi³sen³jin³-le⁴ ni⁴ma⁴-no³ jo³-ni³ ni³ño³tse³.
2PE 1:20 Ti¹tjon² ca²ta³ma³cho⁴ya³-no³ je²-vi⁴ nca³ ni⁴jnco³-jin² en¹ xi³ qui³sˀe³ya³ta³con², xi³ tsˀe⁴ xon⁴ Escritura, xi³ to⁴xquia⁴ cho⁴ta⁴ tsa³cˀe¹nta³.
2PE 1:21 Nca⁴ ni⁴čhjin³ co²tse³ ja³ˀai³ je² en¹ xi³ tsa³ca¹ya³con³-na¹, li²coi³-jin² nca³ cˀoa⁴-sˀin² coan³me³-le⁴ cho⁴ta⁴son³ˀnte³. To⁴sa³ qui³nchja⁴ya³ je² cho⁴ta⁴ xi³ tsje³ tjio¹ ja⁴tˀa³tsˀe⁴ Ni³na¹, jo³-sˀin² qui³si³ˀi³sen³jin³ cjoa⁴fa³ˀai³tsjen³-le⁴ je² Espíritu Santo.
2PE 2:1 Cˀoa⁴-ti⁴ ya⁴ na⁴xi⁴na³nta¹-ve⁴ tsa³ca³tio² cho⁴ta⁴nti³so³ xi³ qui³tso² nca³ qui³nchja⁴ya³ tˀa³tsˀe⁴ Ni³na¹, jo³-sˀin² sˀe⁴jin³-no³ cho⁴ta⁴nti³so³ xi³ coa⁴co²ya³. Je² sca⁴ni²jin³ˀma³-no³ cjoa⁴ xi³ si⁴²qui³tson¹-no³, cˀoa⁴ li²coi³ coan⁴cjain¹-le⁴ tˀa³tsˀe⁴ je² Nai³-na¹ xi³ tsa³cˀe¹chji¹ntjai² tˀa³tsˀe⁴. Cˀoa⁴-sˀin² coa⁴²sjai³-le⁴ yao³-le⁴ xi³ nti⁴ton⁴ cha⁴jin³.
2PE 2:2 Ncjin² xi³ coai⁴tjen⁴nqui³-le⁴ ntia⁴² xi³ chˀao³ tjin¹. Xi³ to⁴tˀa³tsˀe⁴ coi⁴nchja⁴ˀaon³-ni³le⁴ ntia⁴² xi³ qui²xi⁴.
2PE 2:3 Cao⁴ cjoa⁴xin²ta³con² si⁴²qui³njen³-ni³ xi³ to⁴tˀa³tsaon⁴³, nca³ cˀoa⁴na⁴cha⁴-no³ cao⁴ en¹ xi³ tsi² tsa² coi³ cˀoa⁴tjin¹. Sa³ˀnta³ co²tse³ ti¹jna³co³ya³ cjoa⁴ñˀain³-le⁴. Li²coi³ coan⁴tse³-le⁴, li²coi³ vˀe²jna³fe² xi³ cha⁴jin³.
2PE 2:4 Ni³na¹ li²coi³ qui³si³cha³tˀa³-le⁴ je² a²ncje⁴ xi³ tsa³jnqui³ je¹, to⁴ya⁴² qui³sca³ni¹ jña³ lˀi¹ ti¹ti², cˀoa⁴ qui³si³cˀe¹jna³nˀion¹ ya⁴ nca⁴jao⁴ jña³ njion² chon³, sa³ˀnta³ nca³ sˀe⁴nta³jin³-le⁴.
2PE 2:5 Ni³na¹ li²coi³ qui³si³cha³tˀa³-le⁴ son³ˀnte³ jchi¹nca³, to⁴nca³ qui³si³ca³sen¹ jtsi¹nˀion¹ xi³ tsa³nca³son² son³ˀnte³-le⁴ cho⁴ta⁴tsˀen⁴. Qui³si³cˀe¹yo³con³ to⁴je² Noé xi³ qui³nchja⁴ya³ xi³ cjoa⁴qui²xi⁴, cao⁴ nqui² ña³to³ cho⁴ta⁴.
2PE 2:6 Ni³na¹ qui³si³cja³ˀa¹ cjoa⁴ñˀain³ je² na⁴xi⁴na³nta¹ Sodoma cao⁴ Gomorra nca³ qui³si³qui³xo²ya³. To⁴chao³lˀi¹ tsa³qui³ncha¹ne². Cˀoa⁴-sˀin² tsa³ca³co¹cho⁴ya³-le⁴ je² xi³ tsa³ca³tio²-sa³, xi³ tsi² tsa² ve³xcon¹ Ni³na¹, je² cjoa⁴ñˀain³ xi³ cjoa⁴ˀai¹-le⁴.
2PE 2:7 Cˀoa⁴ tsa³cˀa³sje³ntjai² Lot xi³ cho⁴ta⁴cjoa⁴qui²xi⁴, xi³ si³ coan³-le⁴ to⁴tˀa³tsˀe⁴ cho⁴ta⁴tsˀen⁴ xi³ to⁴cjoa⁴chi⁴nca⁴ qui³tjen⁴nqui³-le⁴.
2PE 2:8 (Je² cho⁴ta⁴cjoa⁴qui²xi⁴-ve⁴ tsa³cˀe²jna³jin³-le⁴ cho⁴ta⁴tsˀen⁴-ve⁴. Tsa³ve³ cˀoa⁴ qui³nčhˀoe¹ xi³ cˀoa⁴qui³sˀin³ je² xi³ to⁴cjoa⁴tsˀen⁴ tjin¹-le⁴. Nchaon³nchaon³ aon³ coan³-le⁴ nca³ nta³ tjin¹ ni⁴ma⁴-le⁴ je² cho⁴ta⁴cjoa⁴qui²xi⁴-ve⁴.)
2PE 2:9 Cˀia⁴ ni⁴čhjin³ nca³ fa³ˀa¹ cjoa⁴ñˀain³, je² Nai³-na¹ ma³-le⁴ vˀa³sje³ntjai² cho⁴ta⁴ xi³ ve³xcon¹ nca³ je². Ma³-le⁴ si¹cˀe¹jna³tjao² je² xi³ tsin²-le⁴ cjoa⁴qui²xi⁴-jin², sa³ˀnta³ ni⁴čhjin³ nca³ sˀe⁴nta³jin³-le⁴, jme¹-ni³ nca³ cˀoa⁴-sˀin² sˀe⁴jna³ne²-ni³le⁴ cjoa⁴ñˀain³.
2PE 2:10 Xi³ ti¹tjon², je²-ve⁴ xi³ fi²tjen⁴nqui³-le⁴ cjoa⁴chi⁴nca⁴-le⁴ yao³-le⁴, xi³ to⁴ya⁴² tjio¹ma³jin³ cjoa⁴chˀao³cjoa⁴jnti¹-le⁴, xi³ to⁴cjoa⁴sca¹ ve³con³ cjoa⁴te¹xo³ma³, xi³ nˀion¹ xi¹jin³, cho⁴ta⁴tsˀa³ntjai²cjoa⁴, li²coi³ tsa³cjon¹ nca³ nchja⁴ˀaon³-le⁴ xi³ ncˀa³ tjio¹.
2PE 2:11 Ti⁴je²-ni³ a²ncje⁴, nta³ tsa² nqui²sa⁴ tjin¹-le⁴ nca³nˀion¹ cao⁴-ni³ je², nta³ tsa² nqui²sa⁴ ti¹tjon² tjio¹ma³ cao⁴-ni³ je², li²coi³ fi²co²ntran⁴-le⁴, li²coi³ nchja⁴ˀaon³-le⁴ nqui³xcon⁴ Nai³-na¹.
2PE 2:12 Jo³-ni³ tsa² cho⁴ xi³ li²coi³ nčhˀoe¹, xi³ to⁴xa¹ cˀoa⁴cjoan³-ni³ xi³ to⁴xa¹ qui³tsin³-ni³ nca³ coi⁴nto⁴va⁴ nca³ si⁴cˀen³, je² cho⁴ta⁴-vi⁴ nchja⁴chˀao³-le⁴ cjoa⁴ xi³ tsi² tsa² ma³cho⁴ya³-le⁴, to⁴jnco³ cao⁴ je² coi⁴ya²-ni¹ cha⁴jin³-ni¹.
2PE 2:13 Cˀoa⁴-sˀin² tjoe¹-le⁴ chji¹-le⁴ nca³ tsin²-le⁴ cjoa⁴qui²xi⁴-jin². Cˀoa⁴-sˀin² tsjoa³ ma³-le⁴, si¹ña³con³ yao³-le⁴ nta³ tsa² ni⁴čhjin³. Je² cho⁴ta⁴-ve⁴ jnti¹, tsen³ chˀao³ cjoan³. Tjin¹-le⁴ cjoa⁴tsjoa³ nca³ vˀa³na⁴cha⁴ cˀia⁴ nca³ tjio¹cjen²cao⁴-no³.
2PE 2:14 Tjin¹nqui³ntsjai² xcon⁴ cjoa⁴cha³jnqui³. Li²coi³ ma³-le⁴ tsjion¹ je¹-ve⁴. Si¹ntˀe¹tˀa³-le⁴ je¹ je² cho⁴ta⁴ xi³ to⁴ˀi⁴ to⁴jan¹ si¹cja³ˀai³tsjen³. Je³cˀoa⁴-sˀin² coan³nca³-le⁴ ni⁴ma⁴-le⁴ cjoa⁴chˀao³ntai³. ˀnti¹-le⁴ cjoa⁴taon³ ni¹.
2PE 2:15 Qui³si³cˀe¹jna³ ntia⁴²qui²xi⁴, xin² qui³-le⁴, nca³ qui³tjen⁴nqui³-le⁴ ntia⁴²-le⁴ Balaam, ˀnti¹-le⁴ Beor, je² xi³ coan³tsjoa³que³ xi³ cao⁴ cjoa⁴tsˀen⁴ qui³njen³.
2PE 2:16 Qui³no²cjoa⁴ti³cao⁴ xi³ tˀa³tsˀe⁴ cjoa⁴tsˀen⁴-le⁴. Jnco³ cho⁴chˀa¹ xi³ tsi² ma³-le⁴ en¹, qui³nchja⁴ jo³-ni³ tsa² cho⁴ta⁴xˀin⁴, tsa³cˀe¹chjoa²ˀa³ cjoa⁴sca¹-le⁴ je² Balaam xi³ qui³nchja⁴ya³ xi³ tˀa³tsˀe⁴ Ni³na¹.
2PE 2:17 Je² cho⁴ta⁴-vi⁴ jo³-ni³ tsa² nca⁴jao⁴ na³nta¹ xi³ tsin²-le⁴ na³nta¹, jo³-ni³ tsa² yo³jvi³xa⁴ xi³ fi²cao⁴ xquin¹. Xi³ tˀa³tsˀe⁴ je² cho⁴ta⁴ ti¹jna³tjao²-le⁴ cjoa⁴njion² ya⁴jin³ njion²nˀion¹-ve⁴ nca³ntsjai² ni⁴čhjin³.
2PE 2:18 Cˀia⁴ nca³ nchja⁴ en¹ncˀa³ xi³ tsi²jme³ chji¹-le⁴, cao⁴ cjoa⁴chi⁴nca⁴-le⁴ yao³-le⁴ si¹ntˀe¹tˀa³-le⁴ je¹ je² cho⁴ta⁴ xi³ cjoa⁴qui²xi⁴ ji³tjo³xin²-le⁴ xi³ tsi² nta³ tjio¹ma³.
2PE 2:19 Si¹sˀe³nqui³-le⁴ nca³ to⁴sca⁴ni²ntai¹, to⁴nca³ je² cjoa⁴chi⁴nca⁴-le⁴ va³te¹xo³ma³ntsjai²-le⁴. Je² xi³ qui³ni²qui³njen³-le⁴, na³nqui³ ti¹jna³-le⁴, jo³-ni³ cho⁴ˀnta³ ma³-le⁴ je² xi³ qui³si³qui³njen³-le⁴.
2PE 2:20 Cjoa⁴qui²xi⁴ ni¹, tsa² je² xi³ cˀoa⁴-sˀin² tsa³qui³ncha³xin²tˀa³-le⁴ je² cjoa⁴chˀao³cjoa⁴jnti¹-ve⁴ xi³ tjin¹ i⁴ son³ˀnte³, nca³ je³tsa³ve³ Nai³-na¹ xi³ tsa³cˀa³sje³ntjai²-na¹, je² Jesucristo, tsa² nqui²jnco³cˀa² tjio¹si¹cˀo¹jin³ yao³-le⁴ cjoa⁴chˀao³cjoa⁴jnti¹-ve⁴, je³qui³ni²qui³njen³-le⁴. To⁴nqui²sa⁴ chˀao³sˀin² tjio¹ xi³ fe³tˀa³-ni³ cao⁴-ni³ nca³ to²tsˀin³-le⁴ cjoa⁴.
2PE 2:21 To⁴nqui²sa⁴ nta³-ni³ tsa²cai³-ni³, tsa² tsi² tsa² tsa³ve³ ntia⁴² xi³ cjoa⁴qui²xi⁴, cao⁴-ni³ tsa² scan³-ni³ nca³ tsa³ve³, qui³si³cˀo¹fa³ya³-ni³le⁴ cjoa⁴te¹xo³ma³ xi³ tsje³, xi³ tsa³cˀai²-le⁴.
2PE 2:22 Ña³qui³ cˀoa⁴-sˀin² cji³ma³-le⁴ jo³ tso² en¹ xo⁴ tso²: Je² nia¹ qui³squi³ne³ nqui²ntia³ nta¹vi³so³-le⁴, cˀoa⁴ je² chi⁴nca⁴ xi³ je³tsa³ca³nco¹ya³ nqui²ntia³ tsa³ca³nco¹ya³ ya⁴jin³ nta¹si³.
2PE 3:1 Jon² xi³ tjao²que⁴-no³, ti²cji³-no³ ntˀai⁴-vi⁴ xi³ ma³jao²-ni³ xon⁴. Nca³ jao² xon⁴-ve⁴ vˀe³ne²³-no³ jme¹-ni³ nca³ si³cja³ˀa¹-si¹ni³le⁴ cjoa⁴fa³ˀai³tsjen³-no³ xi³ tsje³,
2PE 3:2 jme¹-ni³ nca³ cjoa⁴ˀai¹tsjen³-si¹ni³no³ je² en¹ xi³ co²tse³ tsa³ca¹ya³con³ je² cho⁴ta⁴ xi³ tsje³ tsa³ca³tio², xi³ qui³nchja⁴ya³ tˀa³tsˀe⁴ Ni³na¹, cˀoa⁴ nca³ cjoa⁴ˀai¹tsjen³-si¹ni³no³ je³ cjoa⁴te¹xo³ma³-le⁴ Nai³-na¹ xi³ tsa³cˀa³sje³ntjai²-na¹, xi³ qui³tsˀai²-no³ to⁴tˀa³tsˀe⁴ pa²stro⁴-no³.
2PE 3:3 Ti¹tjon² ma³chjen¹ nca³ ca²ta³ˀyao³ je²-vi⁴, nca³ je² ni⁴čhjin³ xi³ cjoe⁴tˀa³ cjoa⁴ˀai¹ xi³ tsjoa³-le⁴ vi³jno²que³, xi³ ti⁴tsˀe⁴-ni³ cjoa⁴chi⁴nca⁴-le⁴ cˀoe¹ma³jin³.
2PE 3:4 Cˀoi⁴coi⁴tso⁴: Jña¹ ti¹jna³ ntai⁴ xi³ qui³tsjoa³ tsˀoa³ nca³ cjoa⁴ˀai¹. Jo³ sa³ˀnta³ nca³ cˀen³ xi³jcha¹-na¹, to⁴jo³ cˀoa⁴-sˀin² chon³ jo³ sa³ˀnta³ nca³ qui³sˀe³nta³ son³ˀnte³.
2PE 3:5 Cjoa⁴qui²xi⁴ cai³-le⁴ scoe⁴ cho⁴ta⁴ nca³ cao⁴ je² en¹-le⁴ Ni³na¹ qui³sˀe³nta³-ni³ ncˀa³jmi³ ni⁴čhjin³ co²tse³, cˀoa⁴ je² na³nqui³ xi³ ji³tjo³xin²-le⁴ na³nta¹-ve⁴, xi³ vˀai²nca³nˀion¹-le⁴ cao⁴ na³nta¹.
2PE 3:6 Cao⁴ na³nta¹-ve⁴ qui³cha³ je² son³ˀnte³ xi³ qui³sˀe³ cˀia⁴ ni⁴čhjin³-ve⁴ nca³ tsa³nca³son² na³nta¹.
2PE 3:7 Ti⁴je²-ni³ en¹-le⁴ Ni³na¹ ti¹vˀe¹tjao² je² ncˀa³jmi³ cao⁴ son³ˀnte³ xi³ tjin¹ ntˀai⁴, jme¹-ni³ nca³ coi⁴ti⁴-si¹ni³ coi³ ni⁴čhjin³ nca³ sˀe⁴nta³jin³-le⁴ cjoa⁴, nca³ cha⁴ cho⁴ta⁴ xi³ tsi² ve³xcon¹ Ni³na¹.
2PE 3:8 To⁴nca³ jon² xi³ tsjoa³que⁴-no³, a³li² ni²cha³jin³-jion²³ cjoa⁴-vi⁴, nca³ jnco³ ni⁴čhjin³ jnco³ jmi³ no¹ ma³-le⁴ Nai³-na¹, cˀoa⁴ jnco³ jmi³ no¹ jnco³ ni⁴čhjin³ ma³-le⁴ Nai³-na¹.
2PE 3:9 Je² Nai³-na¹ li²coi³ si⁴²tse³ya² xi³ qui³si³sˀe³nqui³, jo³-sˀin² si¹cja³ˀai³tsjen³ cˀa³ nca³ ma³tse³ya²-le⁴, to⁴nca³ tjin¹-le⁴ cjoa⁴tse³jta³ xi³ tˀa³tsan⁴². Cai³-le⁴ nca³ jnco³ xi³ cha⁴. To⁴me³-le⁴ nca³ cjoi⁴cho² si¹cˀa³ntjai²ya³ cjoa⁴fa³ˀai³tsjen³-le⁴ nca³tsˀi³.
2PE 3:10 Je² ni⁴čhjin³-le⁴ Nai³-na¹ cjoa⁴ˀai¹ jo³-ni³ tsa² che¹ nca³njion². Cˀia⁴ je² ncˀa³jmi³ coi⁴xo⁴ya³, jo³ nˀion¹ cjoa⁴ne³ya³. Je² nca³yi³je³ xi³ si¹ˀi³sen³ ncˀa³jmi³ coi⁴ti⁴, cha⁴. Je² son³ˀnte³ cao⁴ je² tso³jmi² xi³ i⁴ tjin¹ coi⁴ti⁴.
2PE 3:11 Tsa² nca³yi³je³ cjoa⁴-vi⁴ coi⁴xo⁴ya³-ni¹, jo¹-sˀin² ma³nquin¹cao⁴³ yao³-no³ xi³ tˀa³tsˀe⁴ cjoa⁴ xi³ tsje³, cˀoa⁴ jo¹-sˀin² ˀya³xcon¹³ Ni³na¹.
2PE 3:12 Je³ti³cho³ya²cao⁴³ yao³-no³, nˀion¹ me³ta³con²³ nca³ cjoa⁴ˀai¹ ni⁴čhjin³-le⁴ Ni³na¹. Cˀia⁴ ni⁴čhjin³ coi⁴ti⁴ coi⁴xo⁴ya³ ncˀa³jmi³. Cˀoa⁴ je² nca³yi³je³ xi³ si¹ˀi³sen³ ncˀa³jmi³ coan⁴ na³nta¹-ni³ cao⁴ lˀi¹.
2PE 3:13 To⁴nca³ ti³cho³ya²-le⁴² ncˀa³jmi³ cho⁴tse⁴ cao⁴ son³ˀnte³ cho⁴tse⁴, jña³ nca³ ti¹jna³ntsjai² xi³ cjoa⁴qui²xi⁴, jo³-sˀin² nca³ qui³tsjoa³ tsˀoa³ Ni³na¹.
2PE 3:14 Coi³ cjoa⁴ nca³ ti³cho³ya²-lao⁴³ je² cjoa⁴-vi⁴, jon² xi³ tsjoa³que⁴-no³, ti⁴xi¹ti¹ya³-lao⁴³ yao³-no³ nca³ nta³ coan⁴nquin¹cao⁴³ yao³-no³, jme¹-ni³ nca³ coan⁴sjai³-si¹ni³no³ nqui³xcon⁴ Jesucristo, nca³ tsi² jme³ cjoa⁴jnti¹ tsi² jme³ je¹ sˀe⁴-no³, cˀoa⁴ nca³ nchˀan¹ coi⁴yo³.
2PE 3:15 Cjoa⁴vi³tjo³ntjai² ca²ta³ma³-no³ je² cjoa⁴tse³jta³-le⁴ Nai³-na¹. Cˀoa⁴-ti⁴sˀin² qui³squi³-no³ ntsˀe³² Pablo xi³ tjao²cha³², jo³-sˀin² tsa³cˀai²-le⁴ cjoa⁴ˀi³sen³ta³con².
2PE 3:16 Cˀoa⁴-sˀin² nca³yi³je³ xon⁴-le⁴ qui³squi³tˀa³ je² cjoa⁴-vi⁴. Tjio¹jin³ cˀa³ cjoa⁴ xi³ cjai¹nca³ ñˀain³ ma³cho⁴ya³-na¹. Je² cho⁴ta⁴ xi³ tsi² tsa² ma³cho⁴ya³-le⁴, xi³ to⁴ˀi⁴ to⁴jan¹ si¹cja³-ˀai³tsjen³, si¹cˀa³ntjai²ya³ coi³ cjoa⁴-vi⁴. Cˀoa⁴-sˀin² si¹cao⁴ xi³ cja⁴ˀai¹ xon⁴ Escrituras. Coi³ cjoa⁴ va³quin²-sa³le⁴ nca³ cha⁴.
2PE 3:17 Jon² xi³ tsjoa³que⁴-no³, nca⁴ je³qui³ni²qui³nčhˀoe¹-no³, ti⁴coi²ntao⁴³ yao³-no³, jme¹-ni³ nca³ tsi² tsa² cˀoa⁴-ti⁴ jon² xin² ntia⁴² coan⁴nquin¹-si¹nio³, nca³ cˀoa⁴na⁴cha⁴-no³ je² cho⁴ta⁴ xi³ chˀao³ cjoan³, cˀoa⁴ jme¹-ni³ nca³ tsi² tsa² tsao⁴jen³nqui³-si¹ni³ nca³nˀion¹-no³.
2PE 3:18 Ca²ta³ma³jcha¹jin³-no³ cjoa⁴nta³-le⁴ cˀoa⁴ cjoa⁴fa³ˀai³tsjen³-le⁴ Nai³-na¹ Jesucristo xi³ tsa³cˀa³sje³ntjai²-na¹. Je² ca²ta³vi³tjo³je³ya³ ntˀai⁴-vi⁴, cˀoa⁴ sa³ˀnta³ nca³ ni⁴čhjin³ xi³ tsi² cjoe⁴tˀa³. Cˀoa⁴ ca²ta³ma³.
1JO 1:1 Je² xi³ ti¹jna³ sa³ˀnta³ nca³ to²tsˀin³-le⁴ cjoa⁴, xi³ qui³no²ˀyai²⁴-jin⁴, xi³ xcoin³⁴-jin⁴ tsa³ˀya³-ni³jin⁴, xi³ qui³cho²tsen³-lai⁴jin⁴, xi³ ntsai⁴-jin⁴ qui³ni²cao⁴-ni³jin⁴, xi³ tˀa³tsˀe⁴ je² en¹ xi³ tsjoa¹ cjoa⁴vi³jna³chon³ nca³ntsjai².
1JO 1:2 (Je² cjoa⁴vi³jna³chon³-ve⁴ coan³tsen³-ni¹. Tsa³ˀyai³⁴-jin⁴. Jin⁴ ni¹⁴-jin⁴ testigo, vˀai²⁴-jin⁴ en¹, cˀoa⁴ vˀai²⁴-jin⁴ cjoa⁴qui²xi⁴ xi³ tˀa³tsˀe⁴ je² cjoa⁴vi³jna³chon³ nca³ntsjai²-ve⁴ xi³ ti¹jna³tˀa³-le⁴ Nˀai³-na¹, xi³ coan³tsen³-na³jin⁴.)
1JO 1:3 Je² xi³ tsa³ˀyai³⁴-jin⁴ xi³ qui³no²ˀyai²⁴-jin⁴, je²-vi⁴ xi³ cˀoa⁴-ti⁴sˀin² no²cjoa⁴ya³jin³-lai²⁴jin⁴, jme¹-ni³ nca³ cˀoa⁴-ti⁴ jon² coi⁴yo³cjao³-si¹nio³ cao⁴ jin⁴-jin⁴. Xi³ ña³qui³ cjoa⁴qui²xi⁴ jin⁴-jin⁴ ti³yo³cjoai³⁴-jin⁴ Nˀai³-na¹ cao⁴ ˀnti¹-le⁴ Jesucristo.
1JO 1:4 Je² cjoa⁴-vi⁴ cˀoa⁴-sˀin² chji³-lai²⁴jin⁴, jme¹-ni³ nca³ coan⁴tse³ya³-si¹ni³ cjoa⁴tsjoa³-no³.
1JO 1:5 Je² cjoa⁴qui²xi⁴ je²-vi⁴ xi³ qui³no²ˀya²-lai⁴jin⁴, xi³ no²cjoa⁴ya³jin³-lai²⁴jin⁴ nca³ jon². Je² Ni³na¹ xi³ si¹ˀi³sen³, tsin² cjoa⁴njion²-jin² xi³ tsˀe⁴ ni⁴ˀi⁴tse¹-jin².
1JO 1:6 Tsa² ña¹ xi³ cˀoa⁴coi⁴xoan¹ nca³ ti³yo³cjoa³² cao⁴ je², cˀoa⁴ to⁴ya⁴-ni¹ jña³ nca³ njion² ma³nquian¹, to⁴vˀe²nti³soa³². Li²coi³-ni³ cjoa⁴qui²xi⁴ xi³ nˀian².
1JO 1:7 Cˀia⁴ tsa² jña³ nca³ i³sen³ ma³nquian¹, jo³-sˀin² jña³ nca³ i³sen³ ti¹jna³ nca³ je², cˀoa⁴-sˀin² ti³yo³cjoa³² xi²nquia⁴², cˀoa⁴ njin¹-le⁴ Jesucristo ˀnti¹-le⁴ Ni³na¹ si¹tsje³ya³-na¹ nca³yi³je³ je¹-na¹.
1JO 1:8 Tsa² cˀoa⁴coi⁴xoan¹ nca³ tsin²-na¹ je¹, ti⁴ña¹ chˀa²na⁴cha⁴-ni³le⁴² yao³-na¹. Tsin²-na¹ xi³ cjoa⁴qui²xi⁴.
1JO 1:9 Tsa² ni²qui²xi⁴ya³nta³² je¹-na¹, Ni³na¹ nˀion¹tˀa³con³, cˀoa⁴ tjin¹-le⁴ cjoa⁴qui²xi⁴, si¹cha³tˀa³ je¹-na¹, cˀoa⁴ si¹tsje³-na¹ nca³yi³je³ xi³ li²coi³ nta³ tjin¹.
1JO 1:10 Tsa² cˀoa⁴coi⁴xoan¹ nca³ li²coi³ tsa³qui³jncha³² je¹, Ni³na¹ chˀa³sje³nti³soa³². Je² en¹-le⁴ li²coi³ vˀe²jin³ta³coan³².
1JO 2:1 Nca³tsˀio³ ˀnti¹xti³-na⁴, je² cjoa⁴-vi⁴ cji³-no³, jme¹-ni³ nca³ tsi² coi⁴jnchi³-si¹nio³ je¹. Tsa² jnco³ xi³ tsa³jnqui³ je¹, ti¹jna³jnco³-na¹ xi³ fa³jin³-na¹ nqui³xcon⁴ Nˀai³-na¹, je² Jesucristo xi³ tjin¹-le⁴ cjoa⁴qui²xi⁴.
1JO 2:2 Ti⁴je²-ni³ je¹ntjai²-na¹ coan³-le⁴, nca³ tsa³cja³ˀa¹xin² je¹-na¹. A³li² tsa² to⁴tsan⁴²-jian² je¹, to⁴nca³ cˀoa⁴²-ti⁴ tsˀe⁴ nca³tsˀi³ cho⁴ta⁴son³ˀnte³.
1JO 2:3 Coi³ ˀya³-nia¹ nca³ tsa³ˀya³² nca³ je², tsa² ni²cji³tjo³soan² cjoa⁴te¹xo³ma³-le⁴.
1JO 2:4 Je² xi³ cˀoi⁴tso²: An³-vi⁴ tsa³ˀve³ nca³ je², cˀoa⁴ li²coi³ si¹cji³tjo³son² cjoa⁴te¹xo³ma³-le⁴, je² cjai¹nca³ nti³so³. Tsin²-le⁴ cjoa⁴qui²xi⁴-jin² nca³ je².
1JO 2:5 To⁴nca³ je² xi³ si¹cji³tjo³son² en¹-le⁴, ña³qui³ coan³jnco³jin³ ni⁴ma⁴-le⁴ cjoa⁴tjao²cha³-le⁴ Ni³na¹. Coi³ cjoa⁴ nca³ ˀya³-nia¹ nca³ je² ti³yo³coa⁴².
1JO 2:6 Je² xi³ tso² nca³ ti¹jna³cao⁴ Jesucristo, ma³chjen¹ nca³ cˀoa⁴-sˀin² cˀoa¹mjen³, jo³-sˀin² tsa³cˀa³mjen³ nca³ je².
1JO 2:7 Nca³tsˀio³ ˀnti¹ntsˀe³, li²coi³ cji³-no³ cjoa⁴te¹xo³ma³ cho⁴tse⁴, to⁴je² cjoa⁴te¹xo³ma³ jchi¹nca³ xi³ ti¹jna³-no³ sa³ˀnta³ nca³ coan³cjain¹ ti¹tjon²-no³. Je² cjoa⁴te¹xo³ma³ jchi¹nca³ je² en¹ xi³ qui³no²ˀyao²³ jo³ sa³ˀnta³ nca³ ti¹tjon².
1JO 2:8 Nqui²jnco³cˀa² cji³-nca¹ni³no³ cjoa⁴te¹xo³ma³ cho⁴tse⁴, xi³ cjoa⁴qui²xi⁴ xi³ tˀa³tsˀe⁴, cˀoa⁴ xi³ tˀa³tsaon⁴³. Je² xi³ cjoa⁴njion² ti¹fa³ˀa³to³, cˀoa⁴ je² xi³ ña³qui³ lˀi¹ je³si¹ˀi³sen³.
1JO 2:9 Je² xi³ tso² nca³ i³sen³ ti¹jna³, cˀoa⁴ chˀao³que³ ntsˀe⁴, je²-vi⁴ tji¹njion²-sa³le⁴.
1JO 2:10 Je² xi³ tjao²que³ ntsˀe⁴ i³sen³ntsjai²-le⁴, cˀoa⁴ li²coi³ tjin¹-le⁴ jme³ xi³ si¹qui³tson¹.
1JO 2:11 To⁴nca³ je² xi³ chˀao³que³ ntsˀe⁴ njion² jña³ nca³ ti¹jna³, cˀoa⁴ ña³qui³ njion² ntia⁴²-le⁴. Li²coi³ ve³ jña³ fi². Je² cjoa⁴njion² tsa³cˀe¹chjoa² xcon⁴.
1JO 2:12 Cˀoa⁴-sˀin² cji³-no³ nca³ jon², ˀnti¹xti³-na⁴, nca⁴ je² je¹-no³ qui³cha³tˀa³-no³ xi³ to⁴tˀa³tsˀe⁴ jan³ˀain¹-le⁴ Cristo.
1JO 2:13 Cˀoa⁴-sˀin² cji³-no³ nca³ jon² xi³ nˀai³ ˀmi²-no³, nca⁴ tsa³ˀya³-nio¹³ je² xi³ ti¹jna³ sa³ˀnta³ nca³ to²tsˀin³-le⁴ cjoa⁴. Cˀoa⁴-sˀin² cji³-no³ nca³ jon² xi³ xti³xˀion⁴³, nca⁴ jon² qui³ni²qui³njen³-lao⁴³ je² nai⁴². Cˀoa⁴-sˀin² cji³-no³ nca³ jon², ˀnti¹xti³, nca⁴ tsa³ˀya³-nio¹³ Nˀai³-na¹.
1JO 2:14 Cˀoa⁴-sˀin² qui³squi³-no³ nca³ jon² xi³ nˀai³ ˀmi²-no³, nca⁴ tsa³ˀya³-nio¹³ je² xi³ ti¹jna³ sa³ˀnta³ nca³ to²tsˀin³-le⁴ cjoa⁴. Cˀoa⁴-sˀin² qui³squi³-no³ nca³ jon² xi³ xti³xˀion⁴³, nca⁴ tjin¹-no³ nca³nˀion¹, cˀoa⁴ je² en¹-le⁴ Ni³na¹ sˀe³jin³ntsjai²-no³, cˀoa⁴ qui³ni²qui³njen³-lao⁴³ je² nai⁴².
1JO 2:15 A³li² je²-jin² ni²me³ta³con²³ son³ˀnte³, ni⁴ nca³yi³je³ jña³-le⁴ xi³ chon³ son³ˀnte³. Tsa² jnco³ xi³ si¹me³con³ son³ˀnte³, tsin²-le⁴ cjoa⁴tjao²cha³-jin² xi³ tˀa³tsˀe⁴ Ni³na¹.
1JO 2:16 Je² nca³yi³je³ xi³ tjin¹ son³ˀnte³, je² cjoa⁴chi⁴nca⁴ xi³ tjin¹-le⁴ yao³-na¹, cao⁴ cjoa⁴chi⁴nca⁴ xi³ tjin¹-le⁴ xcoan³², cao⁴ cjoa⁴ncˀa³ta³con² xi³ tsˀe⁴ je² cjoa⁴vi³jna³chon³-na¹vi⁴, a³li² tsˀe⁴ Nˀai³-na¹, tsˀe⁴ son³ˀnte³-vi⁴.
1JO 2:17 Je² son³ˀnte³-vi⁴ fa³ˀa³to³-ni¹, cao⁴ nca³yi³je³ cjoa⁴chi⁴nca⁴-le⁴. To⁴nca³ je² xi³ si¹tjo³son² jo³ tso² Ni³na¹ ña³qui³ cˀoa⁴-sˀin² vˀe²jna³ nca³ntsjai².
1JO 2:18 ˀnti¹xti³, je³ti¹fe³tˀa³ ni⁴čhjin³. Cjoa⁴ˀai¹ xi³ Cristo tso²-le⁴ yao³-le⁴, xi³ co²ntran⁴ coai⁴-le⁴, jo³-sˀin² nca³ qui³no²ˀyao²³. Je³cˀoa⁴-sˀin² cji³ma³ ntˀai⁴-vi⁴, nca³ je³tjin¹ ncjin² xi³ Cristo tso²-le⁴ yao³-le⁴, xi³ co²ntran⁴ fi²-le⁴. Cˀoa⁴-sˀin² ˀya³-nia¹ nca³ je³ti¹fe³tˀa³ ni⁴čhjin³.
1JO 2:19 Ji³tjo³sje³jin³-na¹, to⁴nca³ li² tsan⁴²-jian² cho⁴ta⁴-ve⁴. Tsa² tsan⁴² tsa²cai³, ña³qui³ i⁴-jin² tsa³ca³tio²ntsjai²cao⁴-na¹ tsa²cai³. Coi³ cˀoa⁴-sˀin² ji³tjo³sje³jin³-na¹, nca³ cˀoa⁴-sˀin² coan⁴tsen³ nca³ li² nca³tsˀi³-jin² cho⁴ta⁴ tsan⁴².
1JO 2:20 Cˀoa⁴ tjin¹-no³ je² Espíritu Santo, xi³ je² xi³ tsje³ qui³tsjoa³-no³ jo³-ni³ si²ti⁴ xi³ qui³no²njon³ yao³-no³. Ña³qui³ ˀya³-nio¹³ jo³ tjin¹-ni³ cjoa⁴-vi⁴.
1JO 2:21 Li²coi³ cˀoa⁴-sˀin² qui³squi³-no³ nca⁴ tsi² ˀyao³ xi³ cjoa⁴qui²xi⁴, to⁴nca³ qui³squi³-no³ nca⁴ je³ˀyao³ xi³ cjoa⁴qui²xi⁴, cˀoa⁴ nca⁴ je³ˀyao³ nca³ nca³yi³je³ cjoa⁴nti³so³ li²coi³ tsˀe⁴ xi³ cjoa⁴qui²xi⁴.
1JO 2:22 ˀya¹-ni³ xi³ nti³so³. A³ tsi² tsa² je² xi³ tso² nca³ Jesús a³li² je² Cristo. Je²-vi⁴ ntˀai⁴ xi³ Cristo tso²-le⁴ yao³-le⁴, xi³ co²ntran⁴ fi²-le⁴. Je²-vi⁴ xi³ tso² nca³ je² Nˀai³-na¹ li²coi³ Ni³na¹, cˀoa⁴ Jesús li²coi³ ˀnti¹-le⁴.
1JO 2:23 To⁴ˀya³-ni³ve⁴ xi³ tso² nca³ Jesús li²coi³ ˀnti¹-le⁴ Ni³na¹, je²-vi⁴ cˀoa⁴-ti⁴ tsin²-le⁴ Nˀai³-na¹. To⁴ˀya³-ni³ve⁴ xi³ vˀe¹tsen³ en¹ nca³ Jesús ˀnti¹-le⁴ Ni³na¹, je²-vi⁴ cˀoa⁴-ti⁴ tjin¹-le⁴ Nˀai³-na¹.
1JO 2:24 Je² xi³ qui³no²ˀyao²³ sa³ˀnta³ nca³ coan³cjain¹ ti¹tjon²-no³, ca²ta³sˀe³jin³-ta³con²³ nca³ntsjai². Tsa² cˀoa⁴-sˀin² sˀe³jin³-ta³con²³ nca³ntsjai² je² xi³ qui³no²ˀyao²³ sa³ˀnta³ nca³ coan³cjain¹ ti¹tjon²-no³, cˀoa⁴-ti⁴ jon² coi⁴yo³cjao³ntsjao²³ cao⁴ ˀnti¹-le⁴ cao⁴ Nˀai³-na¹.
1JO 2:25 Je²-vi⁴ xi³ Ni³na¹ qui³tsjoa³-na¹ tsˀoa³ nca³ tsjoa¹-na¹, je² cjoa⁴vi³jna³chon³ nca³ntsjai²-ve⁴.
1JO 2:26 Cˀoa⁴-sˀin² qui³squi³-no³ je² cjoa⁴-vi⁴ xi³ tsˀe⁴ je² xi³ jon² vˀa³na⁴cha⁴-no³.
1JO 2:27 To⁴nca³ je² Espíritu Santo xi³ jon² qui³tsˀai²-no³ jo³-ni³ si²ti⁴ xi³ qui³no²njon³ yao³-no³, ti¹jna³jin³ntsjai² ni⁴ma⁴-no³. Li²ˀya³ xi³ ma³chjen¹-no³ xi³ coi⁴tso⁴ya³-no³. Ti⁴je²-ni³ Espíritu Santo xi³ tso²ya³-no³ nca³yi³je³ cjoa⁴. Je² xi³ tjin¹-le⁴ cjoa⁴qui²xi⁴ li²coi³ nti³so³. Jo³-sˀin² nca³ qui³tso²ya³-no³, cˀoa⁴-sˀin² ti⁴yo³cjao³ntsjao²³ cao⁴ Cristo.
1JO 2:28 Ntˀai⁴-vi⁴, ˀnti¹xti³, cˀoa⁴-sˀin² ti⁴yo³cjao³ntsjao²³ cao⁴ Cristo, jme¹-ni³ nca³ nta³ nˀion¹tˀa³ta³con²-si¹nia³² cˀia⁴ nca³ coan⁴tsen³ nqui²jnco³cˀa² nca³ je², cˀoa⁴ jme¹-ni³ nca³ li²coi³ coan⁴soa³-si¹ni³na¹ nqui³xcon⁴ nca³ je² cˀia⁴ nca³ cjoa⁴ˀai¹.
1JO 2:29 Tsa² ˀya³-nio¹³ nca³ je² tjin¹-le⁴ cjoa⁴qui²xi⁴, cˀoa⁴-ti⁴ ca²ta³ˀyao³ nca³ nca³tsˀi³ cho⁴ta⁴ xi³ sˀin¹ xi³ cjoa⁴qui²xi⁴, je²-vi⁴ qui³tsin³ xi³ tˀa³tsˀe⁴ Ni³na¹.
1JO 3:1 Ne² cˀoa⁴tjin¹ cjoa⁴tjao²cha³ xi³ qui³tsjoa³-na¹ Nˀai³-na¹, jme¹-ni³ nca³ ˀnti¹-le⁴ Ni³na¹ ˀmi²-si¹ni³na¹. Coi³ nca³ i⁴ son³ˀnte³ li²ˀya³ xi³ ve³-na¹, nca³ tsi²coi³ tsa³ve³ Ni³na¹.
1JO 3:2 Jon² xi³ cjai¹nca³ tsjoa³que⁴-no³, ntˀai⁴-vi⁴ ˀnti¹-le⁴ Ni³na¹ nia¹ nca³ ña¹. Cje³-sa³ ma³tsen³-jin² jo³ coan⁴ cjoan³², to⁴nca³ ˀya³-nia¹ cˀia⁴ nca³ coan⁴tsen³ nca³ je², cˀoa⁴-ti⁴ cˀoa⁴coan⁴ cjoan³² jo³ cjoan³ nca³ je², nca⁴ cˀoa⁴-sˀin² jcha⁴² jo³ cjoan³ nca³ je².
1JO 3:3 Nca³tsˀi³ xi³ tjin¹-le⁴ cjoa⁴tsjoa³ nca³ sco¹ya³-le⁴ nca³ je², coan⁴tsje³ ni⁴ma⁴-le⁴ jo³-sˀin² tsje³ cjoan³ nca³ je².
1JO 3:4 Nca³tsˀi³ xi³ je¹ ma³jnqui³, fa³ˀa³to³ntjai²-le⁴ cjoa⁴te¹xo³ma³. Je² xi³ je¹ ˀmi² xi³ fa³ˀa³to³ntjai²-le⁴ cjoa⁴te¹xo³ma³.
1JO 3:5 ˀya³-nio¹³ nca³ coi³ cjoa⁴ coan³tsen³-ni³ Cristo, jme¹-ni³ nca³ cjoa⁴ˀa²xin²-si¹ni³ je¹-na¹. Tsin²-le⁴ je¹-jin² nca³ je².
1JO 3:6 To⁴ˀya³-ni³ xi³ ti¹jna³cao⁴ Cristo nca³ntsjai², li²coi³ ma³jnqui³ je¹. To⁴ˀya³-ni³ve⁴ xi³ ma³jnqui³ je¹, li²coi³ tsa³ve³ Cristo, ni⁴ tsa³ve³xcon³-jin² Cristo.
1JO 3:7 ˀnti¹xti³, a³li² vˀai²ˀnte³-jion² nca³ ˀya³ xi³ jon² vˀa³na⁴cha⁴-no³. Je² xi³ sˀin¹ xi³ cjoa⁴qui²xi⁴, cjai¹nca³ tjin¹-le⁴ cjoa⁴qui²xi⁴, jo³-sˀin² nca³ Cristo cˀoa⁴-ti⁴ tjin¹-le⁴ cjoa⁴qui²xi⁴.
1JO 3:8 Je² xi³ ma³jnqui³ je¹, tsˀe⁴ nai⁴², nca⁴ je² nai⁴² ma³jnqui³ je¹ jo³ sa³ˀnta³ nca³ to²tsˀin³-le⁴ cjoa⁴. Coi³ nca³ tsˀa³tsen³-ni³ ˀnti¹-le⁴ Ni³na¹, jme¹-ni³ nca³ si⁴²qui³xo¹ya³-si¹ni³ xa¹-le⁴ nai⁴².
1JO 3:9 Nca³tsˀi³ xi³ qui³tsin³ xi³ tˀa³tsˀe⁴ Ni³na¹, li²coi³ je¹ ma³jnqui³, nca⁴ je² ntje⁴-le⁴ Ni³na¹ ti¹jna³jin³ntsjai² ni⁴ma⁴-le⁴. A³li²coi³ ma³-le⁴ ma³jnqui³ je¹, nca⁴ qui³tsin³ xi³ tˀa³tsˀe⁴ Ni³na¹.
1JO 3:10 Cˀoi⁴-sˀin² ˀya³-ni³le⁴ je² xi³ ˀnti¹-le⁴ Ni³na¹, cˀoa⁴ je² xi³ ˀnti¹-le⁴ nai⁴². Nca³tsˀi³ xi³ tsi² cjoa⁴qui²xi⁴ xi³ sˀin¹, xi³ tsi² tjao²que³ ntsˀe⁴, a³li² tsˀe⁴ Ni³na¹-jin².
1JO 3:11 Je² cjoa⁴qui²xi⁴ xi³ qui³no²ˀyao²³ sa³ˀnta³ nca³ coan³cjain¹ ti¹tjon²-no³, nca³ tjao²cha³ coan⁴² xi²nquia⁴².
1JO 3:12 A³li²coi³ cˀoa⁴nˀiaon²³ jo³-ni³ Caín xi³ tsˀe⁴ nai⁴², xi³ qui³si³cˀen³ ntsˀe⁴. A¹-ni³ nca³ qui³si³cˀen³-si¹ni³. A³ tsi² coi³ nca³ tsi² nta³ xa¹-le⁴, cˀoa⁴ je² xa¹-le⁴ ntsˀe⁴ tjin¹-le⁴ cjoa⁴qui²xi⁴.
1JO 3:13 Nca³tsˀio³ ˀnti¹ntsˀe³, a³li² ma³xcon¹-jin²no³ tsa² cho⁴ta⁴son³ˀnte³ chˀao³que³-no³.
1JO 3:14 Cˀoa⁴-sˀin² ˀya³² nca³ ji³tja³toa³² ni⁴čhjin³-le⁴ cjoa⁴te¹xo³ma³-le⁴ cjoa⁴vi³ya³, cˀoa⁴ ji³tja³sˀen³² ni⁴čhjin³-le⁴ cjoa⁴te¹xo³ma³-le⁴ cjoa⁴vi³jna³chon³ nca³ntsjai², nca⁴ cˀoa⁴-sˀin² tjao²cha³² ntsˀe³². Je² xi³ tsi² tjao²que³ ntsˀe⁴ cjoa⁴vi³ya³ ti¹jna³nqui³ntsjai².
1JO 3:15 To⁴ˀya³-ni³ve⁴ xi³ chˀao³que³ ntsˀe⁴, je² jo³-ni³ tsa² xi³ cˀen³ si¹cˀen³. ˀya³-nio¹³ nca³ je² xi³ cˀen³ si¹cˀen³, je² cjoa⁴vi³jna³chon³ nca³ntsjai²-ve⁴ a³li²coi³ ti¹jna³jin³ ni⁴ma⁴-le⁴.
1JO 3:16 Cˀoa⁴-sˀin² coan³cho⁴ya³-na¹ je² xi³ cjoa⁴tjao²cha³ ˀmi², nca³ Cristo qui³tsjoa³ yao³-le⁴ cao⁴ njin¹-le⁴ xi³ tˀa³tsan⁴². Cˀoa⁴-ti⁴ ña¹-je⁴ ma³chjen¹-na¹ nca³ cˀoai⁴tˀa³² yao³-na¹ cao⁴ njin¹-na¹ xi³ tˀa³tsˀe⁴ ntsˀe³².
1JO 3:17 To⁴nca³ je² xi³ tjin¹-le⁴ nca³yi³je³ xi³ ma³chjen¹-le⁴ xi³ tsˀe⁴ son³ˀnte³, cˀoa⁴ scoe⁴ jnco³ ntsˀe⁴ xi³ tsin²-le⁴ xi³ ma³chjen¹-le⁴, cˀoa⁴ cˀoe⁴²chjoa²-le⁴ ni⁴ma⁴-le⁴, a³ ti¹jna³jin³ntsjai² ni⁴ma⁴-le⁴ cjoa⁴tjao²cha³-le⁴ Ni³na¹.
1JO 3:18 Nca³tsˀio³ ˀnti¹xti³-na⁴, ña³qui³ nta³ tjao²cha³ ca²ta³ma³² xi²nquia⁴². A³li² to⁴ˀen¹ coi⁴no²cjoa⁴², to⁴nca³ je² cjoa⁴tjao²cha³ xi³ cjoa⁴qui²xi⁴ xi³ sˀian⁴².
1JO 3:19 Cˀoa⁴-sˀin² ˀya³-nia¹ nca³ ña¹-vi⁴ tsˀe⁴ xi³ cjoa⁴qui²xi⁴, cˀoa⁴ nˀion¹ nta³ ti¹jna³ ni⁴ma⁴-na¹ nqui³xcon⁴ nca³ je².
1JO 3:20 Tsa² ni⁴ma⁴-na¹ va¹nqui³-na¹, nqui²sa⁴ ncˀa³ ti¹jna³ Ni³na¹ cao⁴-ni³ tsa² ni⁴ma⁴-na¹. Je² ña³qui³ ve³ nca³yi³je³ cjoa⁴.
1JO 3:21 Jon² xi³ cjai¹nca³ tsjoa³que⁴-no³, tsa² ni⁴ma⁴-na¹ li²coi³ va¹nqui³-na¹, nta³ nˀion¹tˀa³ta³coan³² nqui³xcon⁴ Ni³na¹.
1JO 3:22 To⁴jme³-ni³ xi³ ni²je¹-le⁴², je² tsjoa¹-na¹, nca³ ni²cji³tjo³soan² cjoa⁴te¹xo³ma³-le⁴, cˀoa⁴ nca³yi³je³ cjoa⁴ xi³ sa³sen¹con³ nca³ je² cˀoa⁴nˀian² nqui³xcon⁴.
1JO 3:23 Je²-vi⁴ xi³ cjoa⁴te¹xo³ma³-le⁴: Ca²ta³ma³cjain¹-na¹ tˀa³tsˀe⁴ jan³ˀain¹-le⁴ ˀnti¹-le⁴ Ni³na¹, Jesucristo, cˀoa⁴ tjao²cha³ ca²ta³ma³² xi²nquia⁴², jo³-sˀin² tsa³ca³te¹xo³ma³-na¹ nca³ je².
1JO 3:24 Je² xi³ si¹cji³tjo³son² cjoa⁴te¹xo³ma³-le⁴, ti¹jna³cao⁴ Ni³na¹, cˀoa⁴ Ni³na¹ ti¹jna³cao⁴ nca³ je². Cˀoi⁴-sˀin² ˀya³nia¹ nca³ Ni³na¹ ti¹jna³jin³ntsjai² ni⁴ma⁴-na¹, nca⁴ qui³tsjoa³-na¹ je² Espíritu Santo.
1JO 4:1 Jon² xi³ tsjoa³que⁴-no³, a³li² ma³cjain¹-jin²no³ nca³tsˀi³ espíritu, to⁴nca³ cho¹tˀa³-nio¹³ tsa² tsˀe⁴ Ni³na¹ espíritu-ve⁴. Cjai¹nca³ to⁴ncjin² cho⁴ta⁴ xi³ cjoa⁴nti³so³ nchja⁴ya³, xi³ si¹ma³son² son³ˀnte³.
1JO 4:2 Cˀoi⁴-sˀin² ˀya³-nio¹³ je² Espíritu Santo xi³ tsˀe⁴ Ni³na¹: Nca³tsˀi³ espíritu xi³ vˀe¹tsen³ en¹ nca³ Jesucristo ja³ˀai³ cao⁴ yao³-le⁴, je²-vi⁴ xi³ tsˀe⁴ Ni³na¹.
1JO 4:3 Nca³tsˀi³ espíritu xi³ tsi² tsa² vˀe¹tsen³ en¹ nca³ Jesucristo ja³ˀai³ cao⁴ yao³-le⁴, a³li² tsˀe⁴ Ni³na¹-jin². Je²-vi⁴ ntˀai⁴ je² espíritu xi³ Cristo tso²-le⁴ yao³-le⁴, xi³ co²ntran⁴ fi²-le⁴. Cˀoa⁴-sˀin² qui³no²ˀyao²³ nca³ cjoa⁴ˀai¹, cˀoa⁴ ntˀai⁴-vi⁴ je³ti¹jna³ i⁴ son³ˀnte³-vi⁴.
1JO 4:4 Jon² nio¹³, ˀnti¹xti³-na⁴, tsˀe⁴ Ni³na¹ nio¹³, cˀoa⁴ qui³ni²qui³njen³-lao⁴³ je² xi³ nchja⁴ya³ cjoa⁴nti³so³, nca⁴ je² xi³ ti¹jna³jin³ ni⁴ma⁴-no³ nqui²sa⁴ ncˀa³ ti¹jna³ cao⁴-ni³ tsa² je² nai⁴² xi³ tso²ˀva³ i⁴ son³ˀnte³-vi⁴.
1JO 4:5 Je² xi³ nchja⁴ya³ cjoa⁴nti³so³, tsˀe⁴ son³ˀnte³ ni¹. Coi³ nchja⁴-ni¹ xi³ tsˀe⁴ son³ˀnte³, cˀoa⁴ je² son³ˀnte³ nčhˀoe¹-le⁴ nca³ je².
1JO 4:6 To⁴nca³ ña¹ tsˀe⁴ Ni³na¹ nia¹. Je² xi³ ña³qui³ nta³ ve³ Ni³na¹, nčhˀoe¹-na¹. Je² xi³ tsi² tsˀe⁴ Ni³na¹, li²coi³ nčhˀoe¹-na¹. Coi³ cjoa⁴ nca³ ˀya³-nia¹ je² espíritu xi³ cjoa⁴qui²xi⁴ cˀoa⁴ je² espíritu xi³ nti³so³.
1JO 4:7 Jon² xi³ cjai¹nca³ tsjoa³que⁴-no³, cˀoa⁴-sˀin² tjao²cha³ ca²ta³ma³² xi²nquia⁴², nca⁴ je² xi³ cjoa⁴tjao²cha³ ˀmi² tsˀe⁴ Ni³na¹. To⁴ˀya³-ni³ve⁴ xi³ tjao²que³, je² xi³ qui³tsin³ tˀa³tsˀe⁴ Ni³na¹, cˀoa⁴ ña³qui³ nta³ ve³ Ni³na¹.
1JO 4:8 Je² xi³ tsi² tjao²que³, ni⁴cˀia³-jin² tsa³ve³ Ni³na¹. Je² Ni³na¹ xi³ cjoa⁴tjao²cha³.
1JO 4:9 Cˀoa⁴-sˀin² coan³cho⁴ya³-le⁴ ni⁴ma⁴-na¹ jo³-sˀin² nca³ Ni³na¹ tjao²que³-na¹, nca⁴ qui³si³ca³sen¹ i⁴ son³ˀnte³-vi⁴ je² ˀnti¹-le⁴ xi³ to⁴jnco³ ma³-ni³, jme¹-ni³ nca³ coi⁴yo³chon³-si¹nia¹ xi³ to⁴tˀa³tsˀe⁴.
1JO 4:10 Cˀoi⁴-sˀin² tjin¹ xi³ cjoa⁴tjao²cha³: A³li² coi³-jin² nca³ ña¹ xi³ coan³tsjoa³cha³² Ni³na¹, to⁴nca³ je² Ni³na¹ xi³ coan³tsjoa³que³-na¹ nca³ ña¹. Qui³si³ca³sen¹ ˀnti¹-le⁴ xi³ je¹ntjai²-na¹ coan³-le⁴.
1JO 4:11 Jon² xi³ tsjoa³que⁴-no³, tsa² Ni³na¹ cˀoa⁴-sˀin² coan³tsjoa³que³-na¹, cˀoa⁴-ti⁴ ma³chjen¹-na¹ nca³ ña¹ nca³ tjao²cha³ coan⁴² xi²nquia⁴².
1JO 4:12 Ni⁴ˀya³-jin² xi³ qui³sco²tsen³-le⁴ Ni³na¹. Tsa² tjao²cha³ coan⁴² xi²nquia⁴², Ni³na¹ ti¹jna³jin³ntsjai² ni⁴ma⁴-na¹, cˀoa⁴ cjoa⁴tjao²cha³-le⁴ ña³qui³ coan³jnco³jin³ ni⁴ma⁴-na¹.
1JO 4:13 Cˀoa⁴-sˀin² ˀya³-nia¹ nca³ ti³yo³coa⁴² nca³ je², cˀoa⁴ je² ti¹jna³cao⁴-na¹ nca³ ña¹, nca⁴ qui³tsjoa³-na¹ je² Espíritu Santo-le⁴.
1JO 4:14 Cˀoa⁴ jin⁴-jin⁴ qui³cho²tsen³-ni¹⁴jin⁴, cˀoa⁴ testigo mai³⁴-jin⁴ nca³ vˀai²⁴-jin⁴ en¹ nca³ Nˀai³-na¹ qui³si³ca³sen¹ ˀnti¹-le⁴, nca³ je² xi³ vˀa³sje³ntjai² son³ˀnte³.
1JO 4:15 To⁴ˀya³-ni³ve⁴ xi³ vˀe¹tsen³ en¹ nca³ Jesús je² ˀnti¹-le⁴ Ni³na¹, Ni³na¹ ti¹jna³cao⁴ nca³ je², cˀoa⁴ je² ti¹jna³cao⁴ Ni³na¹.
1JO 4:16 Ña¹ tsa³ˀya³-nia¹ cˀoa⁴ coan³cjain¹-na¹ nca³ tjao²que³-na¹ Ni³na¹. Je² Ni³na¹ xi³ cjoa⁴tjao²cha³. Cˀoa⁴ to⁴ˀya³-ni³ xi³ tjin¹ntsjai²-le⁴ cjoa⁴tjao²cha³, ti¹jna³cao⁴ Ni³na¹, cˀoa⁴ Ni³na¹ ti¹jna³cao⁴ nca³ je².
1JO 4:17 Cˀoa⁴-sˀin² ma³jnco³jin³-na¹ cjoa⁴tjao²cha³, jme¹-ni³ nca³ sˀe⁴-si¹ni³na¹ cjoa⁴nˀion¹ta³con² cˀia⁴ ni⁴čhjin³ nca³ sˀe⁴nta³jin³ cjoa⁴. Jo³-sˀin² cjoan³ nca³ je², cˀoa⁴-sˀin² cjoan³² nca³ ña¹ i⁴ son³ˀnte³-vi⁴.
1JO 4:18 A³li² cjoa⁴jcon³-jin² tjin¹ cˀia⁴ nca³ tjao²cha³² xi²nquia⁴². Cˀia⁴ nca³ ña³qui³ cjoa⁴qui²xi⁴ tjao²cha³², tjo¹xin²-na¹ cjoa⁴jcon³-ve⁴. Xi³ cjoa⁴jcon³-ve⁴ tjin¹-le⁴ cjoa⁴ñˀain³. Je² xi³ tsa³cjon³ a³li²coi³ coan³jnco³jin³-le⁴ cjoa⁴tjao²cha³.
1JO 4:19 Ña¹ cjai¹nca³ tjao²cha³² Ni³na¹, nca⁴ je² tjao²que³ coan³-na¹ nca³ ti¹tjon².
1JO 4:20 Tsa² jnco³ xi³ cˀoa⁴tso²: An³ cjai¹nca³ tjao²que⁴ Ni³na¹, to⁴nca³ chˀao³ ve³ ntsˀe⁴, nti³so³ ni¹. Je² xi³ ntsˀe⁴ tsa³ve³-ni³ xcon⁴, cˀoa⁴ tsi² tjao²que³ ntsˀe⁴, jo¹-sˀin² coan⁴-ni³ nca³ tjao²que³ coan⁴-ni³ Ni³na¹, xi³ tsi² tsa² tsa³ve³-ni³ xcon⁴.
1JO 4:21 Je²-vi⁴ cjoa⁴te¹xo³ma³ xi³ Ni³na¹ qui³tsjoa³-na¹: Je² xi³ tjao²que³ Ni³na¹, cˀoa⁴-ti⁴ ma³chjen¹ nca³ tjao²que³ ntsˀe⁴.
1JO 5:1 Nca³tsˀi³ xi³ ma³cjain¹-le⁴ nca³ Jesús je² Cristo, je²-vi⁴ qui³tsin³ tˀa³tsˀe⁴ Ni³na¹. To⁴ˀya³-ni³ve⁴ xi³ tjao²que³ xi³jcha¹-le⁴ cˀoa⁴-ti⁴ tjao²que³ nca³tsˀi³ xi³ qui³tsin³ tˀa³tsˀe⁴.
1JO 5:2 Cˀoi⁴-sˀin² ˀya³-nia¹ nca³ tjao²cha³² ˀnti¹-le⁴ Ni³na¹, cˀia⁴ nca³ tjao²cha³² Ni³na¹, cˀoa⁴ ni²cji³tjo³soan² cjoa⁴te¹xo³ma³-le⁴.
1JO 5:3 Cˀoa⁴-sˀin² tjao²cha³² Ni³na¹, nca³ ni²cji³tjo³soan² cjoa⁴te¹xo³ma³-le⁴. Je² cjoa⁴te¹xo³ma³-le⁴ a³li² ñˀain³-jin² tjin¹.
1JO 5:4 Je² nca³tsˀi³ xi³ qui³tsin³ tˀa³tsˀe⁴ Ni³na¹, si¹qui³njen³-le⁴ son³ˀnte³-vi⁴. Coi³ cjoa⁴ nca³ ni²qui³njen³-le⁴² son³ˀnte³-vi⁴, nca⁴ ma³cjain¹-na¹.
1JO 5:5 ˀya¹-ni³ xi³ si¹qui³njen³ son³ˀnte³-vi⁴. A³ tsi² tsa² je² xi³ ma³cjain¹-le⁴ nca³ Jesús je² ˀnti¹-le⁴ Ni³na¹.
1JO 5:6 Je² Jesucristo ja³ˀai³-ni³ cao⁴ na³nta¹ cao⁴ njin¹. A³li² tsa² to⁴cao⁴ na³nta¹-jin² ja³ˀai³-ni³, to⁴nca³ cao⁴ na³nta¹ cao⁴ njin¹. Cˀoa⁴ je² Espíritu Santo xi³ si¹qui²xi⁴ya³ en¹, nca⁴ je² Espíritu Santo je² xi³ cjoa⁴qui²xi⁴.
1JO 5:7 Jan² ma³-ni³ xi³ si¹qui²xi⁴ya³ en¹ ya⁴ ncˀa³jmi³, je² Nˀai³-na¹, je² en¹ xi³ ti⁴je²-ni³ Cristo, cao⁴ je² Espíritu Santo. To⁴ña³qui³ jnco³ ma³ nca³ jan²-ve⁴.
1JO 5:8 Cˀoa⁴-ti⁴ jan² ma³-ni³ xi³ si¹qui²xi⁴ya³ en¹ i⁴ son³ˀnte³-vi⁴, je² Espíritu, je² na³nta¹, cao⁴ njin¹. Je² nca³ jan²-vi⁴ ma³nco¹son² en¹-le⁴.
1JO 5:9 Tsa² cˀoa⁴-sˀin² chjoe¹ en¹ xi³ si¹qui²xi⁴ya³ cho⁴ta⁴son³ˀnte³-vi⁴, je² en¹ xi³ si¹qui²xi⁴ya³ Ni³na¹ nqui²sa⁴ nta³ tjin¹. Je²-vi⁴ xi³ en¹-le⁴ Ni³na¹ xi³ qui³si³qui²xi⁴ya³ xi³ tˀa³tsˀe⁴ ˀnti¹-le⁴.
1JO 5:10 Je² xi³ ma³cjain¹-le⁴ tˀa³tsˀe⁴ ˀnti¹-le⁴ Ni³na¹, je² cjoa⁴ xi³ qui³ni²qui²xi⁴ya³ ti¹jna³jin³ ni⁴ma⁴-le⁴. Je² xi³ tsi² ma³cjain¹-le⁴ tˀa³tsˀe⁴ Ni³na¹, tsa³cˀa³sje³ nti³so³ Ni³na¹, nca³ tsi²coi³ coan³cjain¹-le⁴ je² en¹ xi³ Ni³na¹ qui³si³qui²xi⁴ya³ xi³ tˀa³tsˀe⁴ ˀnti¹-le⁴.
1JO 5:11 Je²-vi⁴ xi³ en¹-le⁴: Nca³ Ni³na¹ qui³tsjoa³-na¹ je² cjoa⁴vi³jna³chon³ nca³ntsjai²-ve⁴, cˀoa⁴ je² cjoa⁴vi³jna³chon³-vi⁴ ti¹jna³jin³ je² ˀnti¹-le⁴.
1JO 5:12 Je² xi³ tjin¹-le⁴ je² ˀnti¹-le⁴, cˀoa⁴-ti⁴ tjin¹-le⁴ je² cjoa⁴vi³jna³chon³-vi⁴. Je² xi³ tsin²-le⁴ ˀnti¹-le⁴ Ni³na¹, tsin²-le⁴ je² cjoa⁴vi³jna³chon³-vi⁴.
1JO 5:13 Je² nca³yi³je³ cjoa⁴-vi⁴ qui³squi³-no³ nca³ jon² xi³ ma³cjain¹-no³ xi³ tˀa³tsˀe⁴ jan³ˀain¹-le⁴ ˀnti¹-le⁴ Ni³na¹, jme¹-ni³ nca³ jcha⁴-si¹nio³ nca³ tjin¹-no³ je² cjoa⁴vi³jna³chon³ nca³ntsjai²-vi⁴, cˀoa⁴ jme¹-ni³ nca³ coan⁴cjain¹ntsjai²-si¹ni³no³ tˀa³tsˀe⁴ jan³ˀain¹-le⁴ ˀnti¹-le⁴ Ni³na¹.
1JO 5:14 Cˀoa⁴-sˀin² nˀion¹tˀa³ta³coan³² ntˀai⁴ nqui³xcon⁴ nca³ je². Tsa² ni²je¹ to⁴jme³-ni³ cjoa⁴ jo³-sˀin² me³-le⁴ nca³ je², je² nčhˀoe¹-na¹.
1JO 5:15 Cˀoa⁴ tsa² ˀya³² nca³ je² nčhˀoe¹-na¹, to⁴jme³-ni³ cjoa⁴ xi³ ni²je¹-le⁴², ˀya³-nia¹ nca³ tjin¹-na¹ je² cjoa⁴ xi³ qui³ni²je¹-le⁴².
1JO 5:16 Tsa² jnco³ xi³ scoe⁴ nca³ ntsˀe⁴ ti¹va³jnqui³ je¹, a³li² tsa² je² je¹ xi³ va³quin²-le⁴ cjoa⁴vi³ya³, si⁴²je¹ tˀa³tsˀe⁴ ntsˀe⁴, cˀoa⁴ cˀoai⁴-le⁴ cjoa⁴vi³jna³chon³, tsa² je² je¹ xi³ ma³jnqui³ tsi² va³quin²-le⁴ cjoa⁴vi³ya³. Tjin¹ je¹ xi³ va³quin²-le⁴ cjoa⁴vi³ya³. A³li²coi³ cˀoa⁴xian³ nca³ cˀoe⁴²tsˀoa³ ja⁴tˀa³tsˀe⁴ je² je¹-vi⁴.
1JO 5:17 Nca³yi³je³ xi³ li²coi³ nta³ tjin¹, je¹ ni¹, to⁴nca³ tjin¹ je¹ xi³ tsi² va³quin²-le⁴ cjoa⁴vi³ya³.
1JO 5:18 ˀya³-nia¹ nca³ nca³tsˀi³ xi³ qui³tsin³ tˀa³tsˀe⁴ Ni³na¹, a³li²coi³ je¹ ma³jnqui³. To⁴nca³ je² xi³ qui³tsin³ tˀa³tsˀe⁴ Ni³na¹, je² Jesucristo si¹coi²nta⁴ nca³ je², cˀoa⁴ je² nai⁴² li²coi³ tsoa⁴.
1JO 5:19 ˀya³-nia¹ nca³ ña¹ tsˀe⁴ Ni³na¹ nia¹, cˀoa⁴ i⁴ nca³qui³jnta² son³ˀnte³-vi⁴ ti¹jna³cao⁴ nai⁴².
1JO 5:20 ˀya³-nia¹ nca³ je² ˀnti¹-le⁴ Ni³na¹ ja³ˀai³-ni¹. Qui³si³cho⁴ya³-na¹ jme¹-ni³ nca³ jcha⁴-si¹nia³² je² xi³ ña³qui³ cjoa⁴qui²xi⁴. Ti³yo³coa⁴² nca³ je² xi³ ña³qui³ cjoa⁴qui²xi⁴, xi³ Jesucristo je² ˀnti¹-le⁴. Je²-vi⁴ xi³ Ni³na¹ cjoa⁴qui²xi⁴, cˀoa⁴ je²-vi⁴ xi³ cjoa⁴vi³jna³chon³ nca³ntsjai²-ve⁴.
1JO 5:21 ˀnti¹xti³-na⁴, chja⁴ˀa²xin²-lao⁴³ yao³-no³ nca³yi³je³ xi³ xco¹son² cjoan³. Cˀoa⁴ ca²ta³ma³.
2JO 1:1 An³ nia¹³ cho⁴ta⁴jchi¹nca³ ti²cji³-no³ ji³ chjon⁴² xi³ qui³tjo³jin³, cˀoa⁴ cao⁴ xti³-li⁴. Xi³ cjoa⁴qui²xi⁴ ma³tsjoa³que⁴-no³ an³, cˀoa⁴ a³li² to⁴ˀan³-jian²³, to⁴nca³ cˀoa⁴-ti⁴ nca³tsˀi³ xi³ tsa³ve³ xi³ cjoa⁴qui²xi⁴, ma³tsjoa³que³-no³.
2JO 1:2 Ti²cji³-no³ xi³ tˀa³tsˀe⁴ je² cjoa⁴qui²xi⁴ xi³ ti¹jna³jin³-na¹, cˀoa⁴ xi³ cˀoe¹jna³jin³ntsjai²-na¹.
2JO 1:3 Ca²ta³tsjoa¹-no³ cjoa⁴nta³, ca²ta³ma³ma⁴que³-no³, ca²ta³si¹qui³njen³nchˀan¹jin³ ni⁴ma⁴-no³ je² Ni³na¹ Nˀai³-na¹, cao⁴ Nai³-na¹ Jesucristo, ˀnti¹-le⁴ Nˀai³-na¹. Ca²ta³tsjoa¹-no³ cjoa⁴qui²xi⁴ cao⁴ cjoa⁴tjao²cha³.
2JO 1:4 A³li² cˀoa⁴cji³ coan³tsjoa³jin³-na³ nca³ tsa³ˀve³ cˀa³ je² xti³-li⁴, nca³ tjio¹ma³jin³ xi³ cjoa⁴qui²xi⁴, jo³-sˀin² nca³ ña¹-vi⁴ qui³tsˀai²-na¹ je² cjoa⁴te¹xo³ma³-le⁴ Nˀai³-na¹.
2JO 1:5 Cˀoa⁴ ntˀai⁴ vˀe³tsˀoa²³-le²³, chjon⁴², li²coi³ cˀoa⁴-sˀin² jo³-ni³ tsa² ti²cji³-le²³ cjoa⁴te¹xo³ma³ cho⁴tse⁴, to⁴nca³ je² xi³ ña¹ qui³sˀe³-na¹ sa³ˀnta³ nca³ coan³cjain¹ ti¹tjon²-na¹, nca³ tsjoa³cha³ coan⁴² xi²nquia⁴².
2JO 1:6 Coi³ je²-vi⁴ xi³ cjoa⁴tjao²cha³, nca³ coi⁴ma³² jo³ tso² cjoa⁴te¹xo³ma³-le⁴. Coi³ je²-vi⁴ cjoa⁴te¹xo³ma³: Ti⁴ma³cao⁴³ cjoa⁴tjao²cha³, jo³-sˀin² nca³ qui³no²ˀyao²³ sa³ˀnta³ nca³ coan³cjain¹ ti¹tjon²-no³.
2JO 1:7 Ncjin² ma³-ni³ xi³ vˀa³na⁴cha⁴ ja³ˀa³sˀen³ i⁴ son³ˀnte³-vi⁴, xi³ tsi² cˀoa⁴tso² nca³ Jesucristo ja³ˀai³-ni³ jo³ cjoan³ yao³-na¹. Je² xi³ li²coi³ cˀoa⁴tso² to⁴vˀa³na⁴cha⁴, cˀoa⁴ je² xi³ co²ntran⁴-le⁴ Cristo.
2JO 1:8 Ti⁴coi²ntao⁴³ yao³-no³, jme¹-ni³ nca³ tsi²coi³ si⁴cha³-si¹nio³ je² xi³ qui³ni²xai¹³-jin⁴, to⁴nca³ cˀoa⁴-sˀin² coan⁴chji¹tji¹chˀin³-no³.
2JO 1:9 To⁴ˀya³-ni³ xi³ fa³ˀa³ntjai²-le⁴, cˀoa⁴ xi³ li²coi³ vˀe¹yo³jin³con³ cjoa⁴fa³ˀai³tsjen³-le⁴ Cristo, li²coi³ tjin¹-le⁴ Ni³na¹. Cˀoa⁴ je² xi³ vˀe¹yo³jin³con³ cjoa⁴fa³ˀai³tsjen³-le⁴ Cristo, tjin¹-le⁴ Nˀai³-na¹ cao⁴ ˀnti¹-le⁴.
2JO 1:10 Tsa² jnco³ xi³ cjoa⁴ˀai¹con³-no³, xi³ tsi² yˀa³ cjoa⁴fa³ˀai³tsjen³-le⁴ Cristo, a³li² vˀai²ˀnte³-jin²lao⁴³ ya⁴ ni³ˀya³-no³, ni⁴ˀmi²-jin²lao⁴³: Nta³ ca²fa²ˀai⁴.
2JO 1:11 Je² xi³ tso²-le⁴: Nta³ ca²fa²ˀai⁴, vˀa³cao⁴tˀa³-le⁴ xa¹-le⁴ xi³ tsi² nta³.
2JO 1:12 Nta³ tsa² tse³ cjoa⁴ xi³ tjin¹-na³ xi³ squi³-no³, li²coi³ coan³me³-na³ nca³ si³cji³nčhˀoe²-no³ cao⁴ xon⁴ cao⁴ nta¹jin¹, to⁴nca³ sco³ya²-nia¹³ nca³ cjoi¹con³-no³, cˀoa⁴ nca³ cjoa³cao⁴nca³ˀa³-no³, jme¹-ni³ nca³ je² cjoa⁴tsjoa³-na¹ coan⁴tse³ya³-si¹ni³.
2JO 1:13 Je² xti³-le⁴ ti³chjai³ xi³ qui³tjo³jin³ si¹ti²ˀnta³-li². Cˀoa⁴ ca²ta³ma³.
3JO 1:1 An³ nia¹³ cho⁴ta⁴jchi¹nca³ ti²cji³-le²³ Gayo, xi³ nˀion¹ tsjoa³que⁴-le²³. Xi³ cjoa⁴qui²xi⁴ ma³tsjoa³que⁴-le²³ an³.
3JO 1:2 Ji³ xi³ tsjoa³que⁴-le²³, me³-na³ nca³ an³ nca³ to⁴nta³ ca²ta³ma³-li² nca³yi³je³ cjoa⁴, cˀoa⁴ nca³ nta³ ca²ta³sˀe³-le⁴ nca³nˀion¹ yao³-li⁴, jo³-sˀin² nca³ nta³ ti¹jna³ ni⁴ma⁴-li⁴.
3JO 1:3 Cjoa⁴qui²xi⁴-ni¹, cjai¹ coan³tsjoa³-na³ cˀia⁴ nca³ ja³ˀai³ je² ntsˀe³², cˀoa⁴ nca³ qui³tsjoa³ en¹ xi³ tˀa³tsˀe⁴ cjoa⁴qui²xi⁴-li⁴, jo³-sˀin² nca³ cao⁴ cjoa⁴qui²xi⁴ to²mjen³-ni³.
3JO 1:4 Tsin²-na³ cjoa⁴-jin² xi³ nqui²sa⁴ sˀe⁴-na³ cjoa⁴tsjoa³ jo³-ni³ tsa² je²-vi⁴, nca³ nčhˀoe³-nia³ nca³ je² xti³-na⁴ cao⁴ cjoa⁴qui²xi⁴ tjio¹ma³-ni³.
3JO 1:5 Ji³ xi³ tsjoa³que⁴-le²³, ña³qui³ nta³ nˀiain²³ nca³yi³je³ xi³ ni²coai⁴ xi³ tˀa³tsˀe⁴ ntsˀe³², cˀoa⁴ xi³ tˀa³tsˀe⁴ xi³ xin² tsˀe⁴.
3JO 1:6 Je² cˀoa⁴-sˀin² qui³tsjoa³ en¹ xi³ tˀa³tsˀe⁴ cjoa⁴tjao²cha³-li⁴ nqui³xcon⁴ cho⁴ta⁴-le⁴ Cristo. Tsa² coi⁴sen⁴coai⁴ je² cho⁴ta⁴-vi⁴ jo³-sˀin² nca³ va³quin²-le⁴ jo³ tso² Ni³na¹, nta³ sˀiain⁴.
3JO 1:7 Je² cho⁴ta⁴-vi⁴ ji³tjo³-ni³ nca³ coan³tsjoa³que³ jan³ˀain¹-le⁴ Cristo. Li²jme³ xi³ qui³scoe¹ xi³ tsˀe⁴ cho⁴ta⁴ xi³ li² judío-jin².
3JO 1:8 Ña¹, tso²cˀoa⁴, tjin¹ne²-na¹ nca³ cˀoai⁴nca³nˀion¹-le⁴² je² cho⁴ta⁴ xo⁴cjoan³-ve⁴, jme¹-ni³ nca³ to⁴jnco³ si⁴xa¹cao⁴-si¹nia³² xi³ tˀa³tsˀe⁴ je² xi³ cjoa⁴qui²xi⁴.
3JO 1:9 An³ xi³ qui³squi³-le⁴ cho⁴ta⁴-le⁴ Cristo, to⁴nca³ je² Diótrefes xi³ me³-le⁴ nca³ ti¹tjon² cˀoe¹jna³jin³, li²coi³ tsjoa¹ˀnte³-na³jin⁴.
3JO 1:10 Xi³ to⁴tˀa³tsˀe⁴ je² cjoa⁴-vi⁴, tsa² an³ cjoe²ˀe⁴, si³cja³ˀai³tsjen³ je² xa¹ xi³ sˀin¹ Diótrefes, nca³ nchja⁴co²ntran⁴-na³jin⁴ en¹ xi³ chˀao³ tso². Li²coi³ tjin¹jnco³con³ cao⁴ je² cjoa⁴-vi⁴. Li²coi³ tsjoa¹ˀnte³-le⁴ je² ntsˀe³², cˀoa⁴ vˀe¹chjoa²-le⁴ je² xi³ me³-le⁴ nca³ tsjoa¹ˀnte³-le⁴, cˀoa⁴ mˀaon³sje³jin³ cho⁴ta⁴-le⁴ Cristo.
3JO 1:11 Ji³ xi³ tsjoa³que⁴-le²³, a³li² je²-jin² chjen¹nqui³-lai⁴ xi³ chˀao³ tjin¹, to⁴nca³ je² xi³ nta³ tjin¹. Je² xi³ nta³ sˀin¹, tsˀe⁴ Ni³na¹ ni¹, to⁴nca³ je² xi³ chˀao³ sˀin¹, ni⁴ˀi⁴tse¹-jin² ve³ Ni³na¹.
3JO 1:12 Nca³tsˀi³, cˀoa⁴-ti⁴ sa³ˀnta³ je² xi³ cjoa⁴qui²xi⁴, tsjoa¹ en¹ xi³ tˀa³tsˀe⁴ Demetrio. Cˀoa⁴-ti⁴ an³-je⁴ tsjoa³ en¹-na⁴, cˀoa⁴ jon² je³ˀyao³ nca³ je² en¹-na⁴ cjoa⁴qui²xi⁴-ni¹.
3JO 1:13 Nta³ tsa² tse³ cjoa⁴ qui³sˀe³-na³ nca³ qui³squi³-le²³, li²coi³ me³-na³ nca³ cao⁴ nta¹jin¹ cao⁴ ni³ˀña³ squi³-le²³,
3JO 1:14 nca³ co³ya² scoe³nti⁴ton⁴-le²³, cˀoa⁴ cho⁴va²na⁴jmi¹ˀa³².
3JO 1:15 Ca²ta³njen³nchˀan¹jin³ ni⁴ma⁴-li⁴. Je² mi²yo⁴-na¹ si¹ti²ˀnta³-li². Ti⁴ti²ˀntai³ je² mi²yo⁴-na¹ nca³ jnco¹jnco¹.
JUD 1:1 An³ nia¹³ Judas, cho⁴ˀnta³-le⁴ Jesucristo, ntsˀe⁴ Jacobo, ti²cji³-no³ xi³ qui³no²cjoa⁴-no³, xi³ Ni³na¹ Nˀai³-na¹ qui³si³tsje³-no³, xi³ qui³ni²cˀe¹yo³tjao²-no³ tˀa³tsˀe⁴ Jesucristo.
JUD 1:2 Cjoa⁴ma⁴ta³con² cao⁴ cjoa⁴tjao²cha³ ca²ta³ma³ncjin²ya³jin³-no³, ca²ta³njen³nchˀan¹jin³-sa³ ni⁴ma⁴-no³.
JUD 1:3 ˀnti¹ntsˀe³ xi³ tsjoa³que⁴, cjai¹nca³ coan³me³-na³ nca³ qui³squi³-no³ tˀa³tsˀe⁴ cjoa⁴vi³tjo³ntjai²-na¹. Cjai¹nca³ coan³chjen¹-na³ nca³ qui³squi³-no³ nca³ cˀoe³ne²³-no³ nca³ nˀion¹ si⁴nchja¹cao⁴-sao³ tˀa³tsˀe⁴ xi³ ma³cjain¹-na¹, xi³ ntia³ tsa³cˀai²-le⁴ cho⁴ta⁴-le⁴ Cristo.
JUD 1:4 Tjin¹ cˀa³ cho⁴ta⁴ xi³ ja³ˀa³sˀen³jin³ˀma³, je² xi³ sa³ˀnta³ nca³sˀa⁴ je³tsa³cˀai²-le⁴ je² cjoa⁴ñˀain³-vi⁴, cho⁴ta⁴ xi³ tsi² ve³xcon¹ Ni³na¹, xi³ si¹cˀa³ntjai²ya³-ni³ cjoa⁴nta³-le⁴ Ni³na¹-na¹ cao⁴ cjoa⁴chi⁴nca⁴, xi³ tso² nca³ li²coi³ ma³cjain¹-le⁴ tˀa³tsˀe⁴ Ni³na¹ xi³ to⁴je² va³te¹xo³ma³, cˀoa⁴ tˀa³tsˀe⁴ Nai³-na¹ Jesucristo.
JUD 1:5 Me³-na³, tso²cˀoa⁴, nca³ si³cja³ˀai³tsjen³ nqui²jnco³cˀa²-no³, nta³ tsa² je³tsa³ˀyao³ je²-vi⁴, nca³ je² Nai³-na¹ tsa³cˀa³sje³ntjai²-ni³ na³nqui³ Egipto na⁴xi⁴na³nta¹-le⁴. Coan³scan³-ni³ qui³si³cha³ je² xi³ tsi² coan³cjain¹-le⁴.
JUD 1:6 Je² a²ncje⁴ xi³ tsi²coi³ qui³si³coi²nta⁴ xa¹ti¹tjon²-le⁴, xi³ qui³tsjion³con³ ˀnte³-le⁴, Ni³na¹ tsa³cˀe¹yo³tjao² ya⁴ jña³ nca³ njion² chon³ cao⁴ cadena xi³ tjio¹tˀa³ nca³ntsjai² jo³ sa³ˀnta³ nca³ coi⁴cho³ je² ni⁴čhjin³ xcon¹ nca³ sˀe⁴nta³jin³-le⁴.
JUD 1:7 Sodoma cao⁴ Gomorra, cao⁴ na⁴xi⁴na³nta¹ xi³ čhian³tˀa³, qui³si³cha³jnqui³, to⁴cjoa⁴chi⁴nca⁴-le⁴ yao³-le⁴ qui³tjen⁴nqui³-le⁴. Cˀoa⁴-sˀin² tsa³ca³tio²cho⁴ya³ nca³ tsa³cˀai²-le⁴ cjoa⁴ñˀain³, ya⁴jin³ lˀi¹ xi³ tsi² tsa² cjoe⁴tˀa³-ni³.
JUD 1:8 Je² xi³ cˀoa⁴cjoan³ cˀoa⁴ti⁴ to⁴tjin¹ni³jña¹con³, si¹qui³tson¹ yao³-le⁴, chˀao³ ve³ cjoa⁴te¹xo³ma³, nchja⁴ˀaon³-le⁴ xi³ ncˀa³ tjio¹.
JUD 1:9 Cˀia⁴ nca³ je² a²ncje⁴ti¹tjon², Miguel, qui³scan³cao⁴ je² nai⁴², nca³ tsa³cjao¹ti³ya³-ni³ xi³ tˀa³tsˀe⁴ yao³-le⁴ Moisés, a³li²coi³ coan³nˀion¹con³ nca³ tsjoa¹-le⁴ cjoa⁴ñˀain³, nca³ nchja⁴ˀaon³-le⁴, to⁴nca³ to⁴cˀoi⁴qui³tso²: Je² Nai³-na¹ ca²ta³cjan¹cao⁴-li².
JUD 1:10 To⁴nca³ je²-vi⁴ nchja⁴ˀaon³ to⁴jme³ cjoa⁴ xi³ tsi² tsa² ma³cho⁴ya³-le⁴. Fi³tson³jin³ je² cjoa⁴ xi³ to⁴je² yˀa³-ni³, jo³-ni³ tsa² cho⁴ xi³ tsi²jme³ cjoa⁴fa³ˀai³tsjen³ tjin¹-le⁴.
JUD 1:11 Ma⁴-xo¹ni³ nca³ ya⁴ qui³tjen⁴nqui³ ntia⁴²-le⁴ Caín. Cˀoa⁴ti⁴sˀin²ni³ qui³sca³ni¹ yao³-le⁴ ya⁴ cjoa⁴chˀa¹na⁴cha⁴-le⁴ Balaam, xi³ to⁴tˀa³tsˀe⁴ xi³ coi⁴njen⁴-le⁴. Qui³si³cha³jin³ yao³-le⁴ jo³-sˀin² qui³cha³ Coré xi³ tsa³cˀe²jna³toan¹-le⁴ Ni³na¹.
JUD 1:12 Je²-vi⁴ si¹qui³tson¹jin³ sˀoi¹-no³ nca³ cˀoa⁴sˀin² cjen²tse³, to⁴je² si¹sin³-le⁴ yao³-le⁴, tsin²-le⁴ cjoa⁴jcon³-jin². Je² xi³ jo³-ni³ yo³jvi³ xi³ tsin²-le⁴ na³nta¹, xi³ fi²cao⁴ ntjao⁴ nca³ i⁴ nca³ jan¹. Je² jo³-ni³ tsa² ya¹ xi³ je³qui³xi²ntso¹ cˀia⁴ nca³ je³ja³ˀa³to³ ni⁴čhjin³-le⁴, tsin²-le⁴ to³-jin², jao² cˀa³ cˀen³, xi³ qui³tjoe¹ nca³yi³je³ ja⁴ma⁴-le⁴.
JUD 1:13 Je² cho⁴ta⁴ jo³-ni³ tsa² nta¹chi³con³ xi³ nˀion¹ si¹tin²ya³ ntjao⁴xcon¹, xi³ ti⁴je²-ni³ ma³ˀnte³ cao⁴ cjoa⁴soa³-le⁴. Je² cho⁴ta⁴ jo³-ni³ tsa² ni³ño³ xi³ fa³ˀa³son², xi³ cˀoa⁴sˀin² ti¹jna³tjao²ntsjai²-le⁴ xi³ njion² jña³ tsi² i³sen³.
JUD 1:14 Xi³ tˀa³tsˀe⁴ nca³ je² cˀoa⁴-ti⁴sˀin² tsa³ca¹ya³con³ Enoc, xi³ coan³ña³to³-ni³ jco⁴ sa³ˀnta³ Adán, cˀoi⁴qui³tso²: Coe⁴²ni³vi⁴, je² Nai³-na¹ ja³ˀai³-ni³ cao⁴ ncjin² jmi³ cho⁴ta⁴-le⁴.
JUD 1:15 Ja³ˀai³ tsjoa¹-le⁴ cjoa⁴ñˀain³ nca³tsˀi³. Ja³ˀai³ si¹cho⁴ya³-le⁴ nca³tsˀi³ xi³ tsi² je² ve³xcon¹, xi³ tˀa³tsˀe⁴ xa¹-le⁴ xi³ chˀao³ qui³sˀin³ nca³ tsin²-le⁴ cjoa⁴xcon¹ta³con²-jin². Cˀoa⁴ ja³ˀai³ si¹cho⁴ya³-le⁴ xi³ tˀa³tsˀe⁴ nca³yi³je³ cjoa⁴ xi³ cjai¹nca³ chˀao³ qui³nchja⁴ co²ntran⁴-le⁴ Nai³-na¹ je² cho⁴ta⁴je¹ xi³ tsi² ve³xcon¹ Ni³na¹.
JUD 1:16 Je²-vi⁴ xi³ to⁴xquia⁴ vˀe¹ma³ fao¹ya³-ni³, chˀao³ tjio¹con³, vˀe¹ma³cao⁴ yao³-le⁴ jo³-sˀin² me³-le⁴, tsˀa³to³ntjai²cjoa⁴ nchja⁴, ti¹vˀe¹ntsjen¹cao⁴ cho⁴ta⁴, jme¹-ni³ nca³ coi⁴njen⁴-si¹ni³le⁴.
JUD 1:17 To⁴nca³ jon², xi³ tsjoa³que⁴-no³, ca²ta³sˀe³jin³-ta³con²³ je² en¹ xi³ to⁴nqui³-ni³ qui³tso² je² pa²stro⁴-le⁴ Nai³-na¹ Jesucristo,
JUD 1:18 jo³ qui³tso²-no³: Je² ni⁴čhjin³ xi³ cjoe⁴tˀa³ cjoa⁴ˀai¹ xi³ to⁴coi⁴jno⁴que³, xi³ to⁴cˀoe¹ma³cao⁴ yao³-le⁴ jo³-sˀin² coan⁴me³-le⁴ cjoa⁴tsˀen⁴-le⁴.
JUD 1:19 Je²-vi⁴ xi³ si¹jao²ya³ cho⁴ta⁴, to⁴fa³ˀai³tsjen³-le⁴ tˀa³tsˀe⁴ yao³-le⁴, tsin²-le⁴ je² Espíritu Santo-jin².
JUD 1:20 To⁴nca³ jon², xi³ tsjoa³que⁴-no³, ña³qui³ ti⁴jcha¹jion³ yao³-no³ xi³ cjai¹nca³ tsje³ xi³ ma³cjain¹-no³, tˀe²tsˀoao³ cao⁴ je² Espíritu Santo.
JUD 1:21 To⁴tˀa³tsˀe⁴ cjoa⁴tjao²cha³-le⁴ Ni³na¹ chjoe¹tjao²³ yao³-no³, nca³ ti³cho³ya²-lao⁴³ cjoa⁴ma⁴ta³con²-le⁴ Nai³-na¹ Jesucristo ja⁴tˀa³tsˀe⁴ cjoa⁴vi³jna³chon³ nca³ntsjai².
JUD 1:22 Ti⁴cho⁴ya³-lao⁴³ cao⁴ cjoa⁴ma⁴ta³con² xi³ jao² vˀe¹⁴-con³.
JUD 1:23 Chˀa⁴sje³ntjao²³ xi³cˀa³ nca³ chjen¹ˀnto¹jin³-nio³ lˀi¹. Ca²ta³sˀe³-no³ cjoa⁴ma⁴ta³con² tˀa³tsˀe⁴ xi³cˀa³ nca³ jcon³-lao⁴³ Ni³na¹, nca³ ma³jti³chao³ nta³ tsa² je² na³jño³ xi³ cji³ma³jnti¹tˀa³ cjoa⁴-le⁴ yao³-le⁴.
JUD 1:24 Je² Ni³na¹ xi³ cjai¹nca³ tjin¹-le⁴ nca³nˀion¹, nca³ va³se²chjoa²-no³ nca³ tsi² tsa² tsao⁴nquio³, nca³ si⁴²qui³ncha¹-no³ nqui³xcon⁴ cjoa⁴je³ya³-le⁴ cao⁴ cjai¹nca³ tse³ cjoa⁴tsjoa³ nca³ tsi²jme³ je¹ xi³ tjin¹-no³.
JUD 1:25 Je² Ni³na¹ xi³ ña³qui³ nca³ to⁴je² xi³ chji⁴ne⁴, xi³ vˀa³sje³ntjai²-na¹, ca²ta³vi³tjo³ncˀa³, ca²ta³ma³je³ya³, ca²ta³va³te¹xo³ma³, ca²ta³sˀe³-le⁴ nca³nˀion¹ ntˀai⁴-vi⁴ cao⁴ nca³ntsjai². Cˀoa⁴ ca²ta³ma³.
REV 1:1 Ni³na¹ qui³si³cˀa³tsen³-le⁴ Jesucristo, jme¹-ni³ nca³ coa⁴co²-si¹ni³le⁴ cho⁴ˀnta³-le⁴ je² cjoa⁴ xi³ coan⁴ nti⁴ton⁴. Cˀoa⁴-sˀin² qui³si³qui²xi⁴ya³ qui³si³ca³sen¹cao⁴ jnco³ a²ncje⁴. Qui³si³ca³sen¹-le⁴ je² Juan cho⁴ˀnta³-le⁴.
REV 1:2 Je² Juan qui³tsjoa³ en¹-le⁴ xi³ tˀa³tsˀe⁴ en¹-le⁴ Ni³na¹, cˀoa⁴ xi³ tˀa³tsˀe⁴ en¹-le⁴ Jesucristo, cˀoa⁴ xi³ tˀa³tsˀe⁴ nca³yi³je³ cjoa⁴ xi³ tsa³ve³.
REV 1:3 Jo¹ to⁴nta³-le⁴ je² xi³ vˀe¹xquia⁴, cˀoa⁴ je² xi³ nčhˀoe¹ en¹-vi⁴ xi³ cˀoa⁴-sˀin² va¹ya³con³, cˀoa⁴ xi³ si¹tjo³son²-le⁴ en¹ xi³ tjio¹tˀa³-vi⁴, nca³ je² ni⁴čhjin³-le⁴ cji³ma³čhian³.
REV 1:4 An³ xi³ Juan ˀmi²-na³ ti²cji³-no³ nca³ jon² xi³ ña³to³ na⁴xi⁴na³nta¹-le⁴ Cristo xi³ ti³yo³ ya⁴ Asia: Cjoa⁴nta³ ca²ta³sˀe³-no³, ca²ta³si¹qui³njen³nchˀan¹jin³ ni⁴ma⁴-no³ je² xi³ ti¹jna³, xi³ tsa³cˀe²jna³, cˀoa⁴ xi³ cjoa⁴ˀai¹-ni³, cˀoa⁴ je² ña³to³ espíritu xi³ tjio¹ nqui³xcon⁴ ya¹xi²le⁴-le⁴ Ni³na¹,
REV 1:5 cˀoa⁴ Jesucristo je² testigonta³, je² xi³ ti¹tjon² ja³ˀa²ya³jin³-ni³le⁴ cˀen³, je² xi³ nca³jco⁴-le⁴ cho⁴ta⁴ti¹tjon² xi³ i⁴ tjio¹ son³ˀnte³-vi⁴. Je² xi³ coan³tsjoa³que³-na¹. Je² xi³ tsa³ca³ne¹ya³-ni³ cao⁴ njin¹-le⁴ je² je¹-na¹.
REV 1:6 Cˀoa⁴-sˀin² qui³tsjoa³-na¹ nca³ cho⁴ta⁴ti¹tjon² coan³², cˀoa⁴ na⁴ˀmi³ xi³ tˀa³tsˀe⁴ Ni³na¹, Nai³-le⁴. Je² ca²tji³tjo³je³ya³, cˀoa⁴ je² ca²ta³va³te¹xo³ma³ nca³ntsjai² ni⁴čhjin³. Cˀoa⁴ ca²ta³ma³.
REV 1:7 Coe⁴-ni³ yo³jvi³ cjoi⁴nčhoa³jin³, cˀoa⁴ scoe⁴-ni³ xcon⁴ cho⁴ta⁴ nca³tsˀi³, cao⁴ xi³ qui³si³qui²ˀaon³-le⁴. Nca³tsˀi³ cho⁴ta⁴ xi³ jnco¹jnco¹ ntje⁴-le⁴ xi³ i⁴ tjio¹ son³ˀnte³-vi⁴ squi¹ˀnta¹tˀain³ nca³ je². Cˀoa⁴-sˀin² ca²ta³sˀe³. Cˀoa⁴ ca²ta³ma³.
REV 1:8 An³ nia¹³ je² Alfa cˀoa⁴ je² Omega, xi³ ti¹tjon² cˀoa⁴ xi³ fe³tˀa³, tso² je² Nai³-na¹. Je² xi³ ti¹jna³, cˀoa⁴ je² xi³ tsa³cˀe²jna³, cˀoa⁴ je² xi³ cjoa⁴ˀai¹-ni³. Je² xi³ va³te¹xo³ma³ nca³yi³je³.
REV 1:9 An³ xi³ Juan ˀmi²-na³, xi³ ntsˀao³. To⁴jnco³ ti³chja³ˀa³² cjoa⁴ñˀain³, cˀoa⁴ ti²jna⁴cao⁴-no³ ya⁴ cjoa⁴te¹xo³ma³-le⁴ cao⁴ cjoa⁴tse³jta³-le⁴ Jesucristo. An³ tsa³ca²te⁴jna³ ya⁴ ˀnte³ xi³ ti¹jna³jin³ nta¹chi³con³, ya⁴ jña³ nca³ isla Patmos ˀmi², xi³ tˀa³tsˀe⁴ en¹-le⁴ Ni³na¹, cˀoa⁴ xi³ tˀa³tsˀe⁴ en¹-le⁴ Jesucristo.
REV 1:10 An³ cˀoa⁴-sˀin² ti²jna⁴coa⁴ je² Espíritu Santo nca³ je² ni⁴čhjin³-le⁴ Nai³-na¹, cˀoa⁴ ya¹ntsˀian³ qui³nčhˀoe³-le⁴ jnco³ jta⁴ jo³-ni³ tsa² čhjao³ xi³ fa³ne³,
REV 1:11 xi³ qui³tso²: An³ nia¹³ je² Alfa cˀoa⁴ je² Omega, je² xi³ ti¹tjon² cˀoa⁴ je² xi³ fe³tˀa³. Chji¹tˀa³jncoi³ xon⁴ je² xi³ ti³ˀyai³, cˀoa⁴ ti⁴ca³sen¹-lai⁴ je² ña³to³ na⁴xi⁴na³nta¹-le⁴ Cristo xi³ tjin¹ ya⁴ Asia: ya⁴ Éfeso, cˀoa⁴ ya⁴ Esmirna, cˀoa⁴ ya⁴ Pérgamo, cˀoa⁴ ya⁴ Tiatira, cˀoa⁴ ya⁴ Sardis, cˀoa⁴ ya⁴ Filadelfia, cˀoa⁴ ya⁴ Laodicea.
REV 1:12 Qui³si³cˀo¹fa³ya³ nca³ me³-na³ scoe³ ˀya³-ni³ xi³ tsa³cja¹cao⁴-na³. Cˀia⁴ nca³ qui³si³cˀo¹fa³ya³ tsa³ˀve³ ña³to³ xi³ si³ncha²ya³ se²ra⁴ xi³ taon⁴si³ne².
REV 1:13 Cˀoa⁴ ˀncho²va³sen³-le⁴ xi³ ña³to³ xi³ si³ncha²ya³ se²ra⁴ ti¹jna³ jnco³ xi³ cˀoa⁴cji³ jo³ cji³ je² ˀnti¹-le⁴ cho⁴ta⁴. Yˀa³cja¹ jnco³ na³jño³jnčho³, tji¹cja¹ncˀa³-le⁴ jnco³ nˀo¹pa²ño⁴ xi³ taon⁴si³ne².
REV 1:14 Je² jco⁴ cˀoa⁴ je² ntsja⁴jco⁴ čhoa³ cjoan³ jo³-ni³ tsa² ntsja⁴-le⁴ va³rre², jo³-ni³ tsa² nchˀan¹, cˀoa⁴ je² xcon⁴ jo³-ni³ tsa² ni⁴jen⁴lˀi¹ cji³.
REV 1:15 Ntso⁴co⁴ cˀoa⁴cjoan³ jo³-ni³ xo⁴qui⁴cha⁴si³ne² xi³ nta³ cjoan³, xi³ fa³te³ jo³-ni³ tsa² nca⁴ja¹ lˀi¹, cˀoa⁴ jta⁴-le⁴ jo³-ni³ tsa² na³nta¹ xi³ nˀion¹ fa³ne³.
REV 1:16 Ntsja³ nca³qui²xi⁴ ña³to³ ni³ño³ tjio¹ya³, cˀoa⁴ tsˀoa³ ji³tjo³-ni³ jnco³ qui⁴cha⁴ xi³ nˀion¹ yao³ nca³ jao² ncoa³. Sen¹-le⁴ cˀoa⁴cji³ jo³ tsˀoi¹ cji³ cˀia⁴ nca³ nˀion¹ ma³fa³te³.
REV 1:17 Cˀia⁴ nca³ tsa³ˀve³, qui³sca³nquia³ nqui³ntso⁴co⁴ jo³-ni³ tsa² jnco³ cˀen³. Tsa³ca²jna³son²-na³ ntsja³ nca³qui²xi⁴, qui³tso²-na³: A³li² vi³jcon³-jin²³. An³ nia¹³ je² xi³ ti¹tjon², cˀoa⁴ je² xi³ fe³tˀa³.
REV 1:18 An³ nia¹³ xi³ ti²jna⁴coan³, cˀoa⁴ an³ nia¹³ tsa³ca²te⁴jna³cˀen³. Coe⁴-ni³ ti²jna⁴coan³ nca³ntsjai². Cˀoa⁴ ca²ta³ma³. Tjin¹-na³ yo²vi⁴ xi³ tsˀe⁴ cjoa⁴vi³ya³, cˀoa⁴ xi³ tsˀe⁴ ˀnte³ jña³ nca³ ti¹ti².
REV 1:19 Chji¹³ cjoa⁴ xi³ tsa³ˀyai³, cˀoa⁴ xi³ cji³ma³, cˀoa⁴ jo³ coan⁴ xi³ coan⁴-ni³.
REV 1:20 Je² cjoa⁴ˀma³ xi³ tˀa³tsˀe⁴ ña³to³ ni³ño³ xi³ tsa³ˀyai³ ntsa⁴qui²xia⁴, cˀoa⁴ xi³ tˀa³tsˀe⁴ ña³to³ xi³ si³ncha²ya³ se²ra⁴ xi³ taon⁴si³ne², coi³ xi³ tso²-ni³: Xi³ ña³to³ ni³ño³ a²ncje⁴ xi³ tsˀe⁴ ña³to³ na⁴xi⁴na³nta¹-le⁴ Cristo, cˀoa⁴ xi³ ña³to³ xi³ si³ncha²ya³ se²ra⁴ xi³ tsa³ˀyai³, coi³ na⁴xi⁴na³nta¹-le⁴ Cristo xi³ ña³to³ ma³-ni³.
REV 2:1 Chji¹-lai⁴ je² a²ncje⁴ xi³ tsˀe⁴ na⁴xi⁴na³nta¹-le⁴ Cristo ya⁴ Éfeso: Je² xi³ tjin¹-le⁴ je² ña³to³ ni³ño³ ntsja³ nca³qui²xi⁴, je² xi³ tso²ˀva³ nca³va³sen³-le⁴ ña³to³ xi³ si³ncha²ya³ se²ra⁴ xi³ taon⁴si³ne², tso² cjoa⁴ je²-vi⁴:
REV 2:2 An³ ˀve³nia¹³ xa¹-no³, jo³-sˀin² nˀion¹ ni²xao¹³, cao⁴ cjoa⁴tse³jta³-no³, cˀoa⁴ li²coi³ jcho¹cjoa⁴cao⁴-no³ cho⁴ta⁴tsˀen⁴. Je³qui³cho²tˀao³ je² xi³ pa²stro⁴ tso²-le⁴ yao³-le⁴, cˀoa⁴ li²coi³-ni³ coan³. Je³coan³sjai³-no³ nca³ cho⁴ta⁴nti³so³.
REV 2:3 Qui³chja³ˀao²³ cjoa⁴ñˀain³, cˀoa⁴ qui³sˀe³-no³ cjoa⁴tse³jta³, cˀoa⁴ nˀion¹ qui³ni²xao¹³ xi³ to⁴tˀa³tsˀe⁴ jan³ˀain¹-na⁴, cˀoa⁴ li²coi³ ji³jtao³.
REV 2:4 To⁴nca³ tjin¹-na³ cjoa⁴ co²ntran⁴-no³ nca³ qui³ni²cˀe¹yo³ cjoa⁴tjao²cha³ xi³ ti¹tjon².
REV 2:5 Ti⁴cja³ˀai³tsjaon³ jña³ni³ve⁴ nca³ qui³tsao³, cˀoa⁴ ti⁴cˀa³ntjai²yao³ cjoa⁴fa³ˀai³tsjen³-no³, cˀoa⁴tˀiaon⁴³ xa¹ jo³-sˀin² nca³ ti¹tjon². Cˀoa⁴ tsa² mai³-ni¹, cjoe²ˀe⁴ nčhˀoe²nti⁴ton⁴-no³, cˀoa⁴ cjoa³ˀa²xin²-nia¹³ ˀnte³-le⁴ xi³ vi³ncha³yao³ se²ra⁴-no³, cˀia⁴ tsa² cje³ ni²cˀa³ntjai²ya³-jion²³ cjoa⁴fa³ˀai³tsjen³-no³.
REV 2:6 To⁴nca³ tjin¹-no³ jon² nca³ chˀao³chao³ je² cjoa⁴-le⁴ cho⁴ta⁴ nicolaítas. Cˀoa⁴-ti⁴ an³ chˀao³que⁴.
REV 2:7 Je² xi³ tjin¹ xo⁴ño³, ca²ti³ncha²ño³-le⁴ jo³ tso²-le⁴ je² na⁴xi⁴na³nta¹-le⁴ Cristo je² Espíritu Santo. Je² xi³ si⁴²qui³njen³, an³ tsjoa³-le⁴ nca³ squi⁴ne⁴ je² to³-le⁴ ya¹ xi³ tsˀe⁴ cjoa⁴vi³jna³chon³, xi³ se¹jna³ nca³va³sen³-le⁴ ˀnte³ xi³ na³sca¹chon³ xi³ tsˀe⁴ Ni³na¹.
REV 2:8 Chji¹-lai⁴ je² a²ncje⁴ xi³ tsˀe⁴ na⁴xi⁴na³nta¹-le⁴ Cristo ya⁴ Esmirna: Je² xi³ ti¹tjon² cˀoa⁴ je² xi³ fe³tˀa³, je² xi³ cˀen³ cˀoa⁴ xi³ ja³ ˀa²ya³-le⁴, tso² cjoa⁴ je²-vi⁴.
REV 2:9 An³ ˀve³nia¹³ xa¹-no³, cˀoa⁴ cjoa⁴ñˀain³-no³, cˀoa⁴ cjoa⁴yo⁴ma⁴-no³ (to⁴nca³ jon² nchi⁴nao¹³), cˀoa⁴ jo³-sˀin² nca³ nchja⁴ˀaon³ je² cho⁴ta⁴ xi³ judío tso²-le⁴ yao³-le⁴, cˀoa⁴ li²coi³ coan³-ni³, to⁴nca³ ntˀia³ sinagoga xi³ tsˀe⁴ Satanás coan³.
REV 2:10 A³li²jme³-jin² xi³ vi³jcon³-lao⁴³ je² cjoa⁴ñˀain³ xi³ chja⁴ˀao²³. Coe⁴-ni³, je² nai⁴² sca⁴ni²cˀa³-no³ nto⁴ya¹, jme¹-ni³ nca³ cˀoa⁴-sˀin² cho¹tˀa³-si¹ni³no³, cˀoa⁴ te³ ni⁴čhjin³ sˀe⁴-no³ cjoa⁴ñˀain³. Nˀion¹ tˀiaon⁴³ta³con²³ jo³ sa³ˀnta³ nca³ coi⁴yao¹³, cˀoa⁴ an³ tsjoa³no³ cjoa⁴vi³jna³chon³ xi³ jo³-ni³ jnco³ corona.
REV 2:11 Je² xi³ tjin¹ xo⁴ño³, ca²ti³ncha²ño³-le⁴ jo³ tso²-le⁴ je² na⁴xi⁴na³nta¹-le⁴ Cristo je² Espíritu Santo. Je² xi³ si⁴²qui³njen³, li²jme³ xi³ coan⁴-le⁴ je² cjoa⁴vi³ya³ xi³ ma³jao²-ni³.
REV 2:12 Chji¹-lai⁴ je² a²ncje⁴ xi³ tsˀe⁴ na⁴xi⁴na³nta¹-le⁴ Cristo ya⁴ Pérgamo: Je² xi³ tjin¹-le⁴ qui⁴cha⁴ xi³ yao³ nca³ jao² ncoa³, tso² cjoa⁴ je²-vi⁴:
REV 2:13 An³ ˀve³nia¹³ xa¹-no³, cˀoa⁴ jña³ nca³ ti³yo³, jña³ nca³ ti¹jna³ ya¹xi²le⁴-le⁴ je² Satanás. Li²coi³ ni²cha³jion³ jan³ˀain¹-na⁴, cˀoa⁴ li²coi³ tsa³cˀe²ˀmao³ xi³ ma³cjain¹-no³ tˀa³tsˀan⁴, nta³ tsa² je² ni⁴čhjin³-le⁴ je² Antipas je² testigonta³-na⁴, je² xi³ cˀen³jin³-no³ nca³ jon², jña³ nca³ ti¹jna³ Satanás.
REV 2:14 To⁴nca³ tjin¹choa³-na³ cjoa⁴ co²ntran⁴-no³, nca³ cˀoa⁴-sˀin² tjin¹-no³ ya⁴-ve⁴ cho⁴ta⁴ xi³ ma³cjain¹-le⁴ je² cjoa⁴ xi³ tsa³ca³co¹ya³ Balaam, jña³-ni³le⁴ xi³ tsa³ca³co¹ya³-le⁴ Balac, nca³ cˀoa⁴-sˀin² qui³si³qui³tson¹ xti³-le⁴ Israel, nca³ qui³squi³ne³ je² tso³jmi² xi³ tsa³cˀai²tˀa³-le⁴ xco¹son², nca³ qui³si³cha³jnqui³tˀa³.
REV 2:15 Cˀoa⁴-ti⁴sˀin² jon² tjin¹-no³ je² cho⁴ta⁴ xi³ ma³cjain¹-le⁴ je² cjoa⁴ xi³ va³co¹ya³ cho⁴ta⁴ nicolaítas, jña³-ni³le⁴ve⁴ xi³ chˀao³que⁴.
REV 2:16 Ti⁴cˀa³ntjai²yao³ cjoa⁴fa³ˀai³tsjen³-no³. Tsa² mai³, cjoe²ˀe⁴ nčhˀoe²nti⁴ton⁴-no³, cˀoa⁴ scan³coa⁴ co²ntran⁴-le⁴ cao⁴ qui⁴cha⁴-le⁴ ntso⁴ˀva³.
REV 2:17 Je² xi³ tjin¹ xo⁴ño³, ca²ti³ncha²ño³-le⁴ jo³ tso²-le⁴ je² na⁴xi⁴na³nta¹-le⁴ Cristo je² Espíritu Santo. Je² xi³ si⁴²qui³njen³, si³cjen²³ nio⁴xti²la⁴ maná xi³ ti¹jna³ˀma³, cˀoa⁴ tsjoa³-le⁴ jnco³ la⁴jao⁴ˀnti¹ xi³ čhoa³ cji³. Cˀoa⁴ tji¹tˀa³ jnco³ jan³ˀain¹ la⁴jao⁴-ve⁴, jña³-le⁴ xi³ ni⁴ˀya³-jin² xi³ ve³, to⁴je² xi³ cjoe¹.
REV 2:18 Chji¹-lai⁴ je² a²ncje⁴ xi³ tsˀe⁴ na⁴xi⁴na³nta¹-le⁴ Cristo ya⁴ Tiatira: Je² ˀnti¹-le⁴ Ni³na¹ xi³ tjin¹ xcon⁴ xi³ cˀoa⁴cji³ ni⁴jen⁴lˀi¹ cji³, cˀoa⁴ ntso⁴co⁴ cˀoa⁴cjoan³ jo³ xo⁴qui⁴cha⁴-si³ne² xi³ nta³ cjoan³, tso² cjoa⁴ je²-vi⁴:
REV 2:19 An³ ˀve³-nia¹³ xa¹-no³, cˀoa⁴ cjoa⁴tjao²cha³-no³, cˀoa⁴ jo³-sˀin² nca³ ma³cjain¹-no³, cˀoa⁴ jo³-sˀin² ni²xao¹³, cˀoa⁴ je² cjoa⁴tse³jta³-no³. ˀve³-nia¹³ nca³ je² xa¹-no³ xi³ je³tˀa³-ni³ nqui²sa⁴ tse³ cao⁴-ni³ xi³ ti¹tjon².
REV 2:20 To⁴nca³ tjin¹-na³ cjoa⁴ co²ntran⁴-no³, nca³ vˀai²ˀnte³-lao⁴³ je² chjon⁴² xi³ Jezabel ˀmi², je² xi³ tso²-le⁴ yao³-le⁴ nca³ ma³-le⁴ va¹ya³con³. Vˀai²ˀnte³-lao⁴³ nca³ va³co¹ya³, cˀoa⁴ nca³ vˀa³na⁴cha⁴-le⁴ cho⁴ˀnta³-na⁴, jme¹-ni³ nca³ si⁴²cha³jnqui³tˀa³-si¹ni³, cˀoa⁴ nca³ squi⁴ne⁴-si¹ni³ je² tso³jmi² xi³ vˀai²tˀa³-le⁴ xco¹son².
REV 2:21 An³ qui³tsjoa³ˀnte²-le⁴ Jezabel, jme¹-ni³ nca³ si⁴²cˀa³ntjai²ya³-si¹ni³ cjoa⁴fa³ˀai³tsjen³-le⁴ xi³ tˀa³tsˀe⁴ cjoa⁴cha³jnqui³-le⁴, cˀoa⁴ coan³cai³-le⁴ si¹cˀa³ntjai²ya³ cjoa⁴fa³ˀai³tsjen³-le⁴.
REV 2:22 Coe⁴-ni³ an³ si³ca¹jna³soan³² na⁴chan³ Jezabel, cˀoa⁴ nˀion¹ tse³ cjoa⁴ñˀain³ tsjoa³-le⁴ je² xi³ to⁴nco¹son² sˀin¹ cjoa⁴cha³jnqui³ cao⁴ je², tsa² tsi² si⁴²cˀa³ntjai²ya³ cjoa⁴fa³ˀai³tsjen³-le⁴ xi³ tˀa³tsˀe⁴ cjoa⁴ xi³ qui³sˀin³.
REV 2:23 Si³cˀen²-nia¹³ ˀnti¹xti³-le⁴ cao⁴ cjoa⁴vi³ya³. Nca³tsˀi³ na⁴xi⁴na³nta¹-le⁴ Cristo scoe⁴ nca³ an³ xi³ va³sjai³jian³ cjoa⁴fa³ˀai³tsjen³-le⁴ cao⁴ ni⁴ma⁴-le⁴. Tsjoa³-le⁴ nca³ jnco¹jnco¹ nca³ jon² jo³-sˀin² xa¹ xi³ qui³nˀiaon²³.
REV 2:24 To⁴nca³ an³ xin³-no³ nca³ jon² cao⁴ xi³cˀa³-sa³ xi³ ti³yo³ ya⁴ Tiatira, to⁴ˀya³-ni³ve⁴ xi³ tsi² tsa² qui³sco²tˀa³ya³ je² cjoa⁴-vi⁴, cˀoa⁴ xi³ tsi² tsa³ve³ je² cjoa⁴ xi³ ñˀain³ ma³ xi³ tsˀe⁴ Satanás, jo³ tso² cˀa³, an³ li²coi³ si³ca³sen¹³-no³ xi³ cja⁴ˀai¹ chˀa¹.
REV 2:25 To⁴nca³ je² chˀa¹ xi³ je³tjin¹-no³, cˀoa⁴-sˀin² ca²ta³sˀe³jna³-no³ sa³ˀnta³ nca³ an³ xi³ cjoe²ˀe⁴.
REV 2:26 Je² xi³ si⁴²qui³njen³, cˀoa⁴ xi³ si⁴²tjo³son² je² xa¹-na⁴ sa³ˀnta³ nca³ cjoe⁴tˀa³, an³ tsjoa³-le⁴ ˀnte³ nca³ coa⁴te²xo³ma³ na⁴xi⁴na³nta¹-le⁴ son³ˀnte³.
REV 2:27 Coa⁴te²xo³ma³-le⁴ cao⁴ ya¹jti³qui⁴cha⁴-le⁴. Coa⁴cjan³jin³-le⁴ jo³-ni³ tsa² jnco³ ti⁴². Ti⁴cˀoa⁴-sˀin²ni³ jo³-sˀin² nca³ Nˀai³-na⁴ qui³tsjoa³-na³ cjoa⁴te¹xo³ma³.
REV 2:28 Cˀoa⁴ tsjoa³-le⁴ je² ni³ño³tse³.
REV 2:29 Je² xi³ tjin¹ xo⁴ño³, ca²ti³ncha²ño³-le⁴ jo³ tso²-le⁴ je² na⁴xi⁴na³nta¹-le⁴ Cristo je² Espíritu Santo.
REV 3:1 Chji¹-lai⁴ je² a²ncje⁴ xi³ tsˀe⁴ na⁴xi⁴na³nta¹-le⁴ Cristo ya⁴ Sardis: Je² xi³ tjin¹-le⁴ je² ña³to³ espíritu xi³ tsˀe⁴ Ni³na¹, cˀoa⁴ je² ña³to³ ni³ño³, tso² cjoa⁴ je²-vi⁴: An³ ˀve³-nia¹³ xa¹-no³, nca³ tjin¹-no³ jan³ˀain¹ nca³ ti³yo³chon³, to⁴nca³ ti³yo³cˀen³-nio¹³.
REV 3:2 Jon² ti⁴coi²ntao⁴³, cˀoa⁴ tˀai²-lao⁴³ nca³nˀion¹ je² xi³cˀa³ cjoa⁴ xi³ me³ coi⁴ya², nca³ an³ coan³sjai³-na³ nca³ je² xa¹-no³ li²coi³ tjin¹qui²xi⁴ nqui³xcon⁴ Ni³na¹.
REV 3:3 Ti⁴cja³ˀai³tsjen³jion³ je² xi³ qui³chjoao¹³ cˀoa⁴ xi³ qui³no²ˀyao²³. Ti⁴tjo³son²-lao⁴³, cˀoa⁴ ti⁴cˀa³ntjai²yao³ cjoa⁴fa³ˀai³tsjen³-no³. Tsa² tsi² si⁴coi²ntao⁴³, cjoa²ˀai⁴con³-no³ jo³-ni³ tsa² jnco³ che¹, cˀoa⁴ li²coi³ jchao⁴³ jme³ hora-ni³ cjoa²ˀai⁴con³-no³.
REV 3:4 To⁴nca³ tjin¹jnco³jao²-no³ cho⁴ta⁴ ya⁴ Sardis xi³ cje³ si¹jnti¹-jin² yao³-le⁴. An³ cˀoe¹ma³cao⁴-na³ nca³ yˀa³cja¹ na³jño³čhoa³, nca³ cˀoa⁴-sˀin² va³quin²-le⁴.
REV 3:5 Je² xi³ si⁴²qui³njen³, na³jño³čhoa³ coa¹yo³, cˀoa⁴ li²coi³ si³cha²joan³ je² jan³ˀain¹-le⁴ ya⁴tˀa³ xon⁴ xi³ tsˀe⁴ cjoa⁴vi³jna³chon³. Cˀoa⁴ an³ si³qui²xi⁴ya³nta³ jan³ˀain¹-le⁴ nqui³xcon⁴ Nˀai³-na⁴, cˀoa⁴ nqui³xcon⁴ a²ncje⁴-le⁴.
REV 3:6 Je² xi³ tjin¹ xo⁴ño³, ca²ti³ncha²ño³-le⁴ jo³ tso²-le⁴ na⁴xi⁴na³nta¹-le⁴ Cristo je² Espíritu Santo.
REV 3:7 Chji¹-lai⁴ je² a²ncje⁴ xi³ tsˀe⁴ na⁴xi⁴na³nta¹-le⁴ Cristo ya⁴ Filadelfia: Tso² cjoa⁴ je²-vi⁴ je² xi³ tsje³, je² xi³ ña³qui³ cjoa⁴qui²xi⁴, cˀoa⁴ je² xi³ tjin¹-le⁴ yo²vi⁴-le⁴ David, je² xi³ cjo³ˀai² cˀoa⁴ li²ˀya³ xi³ ma³-le⁴ vˀe¹chjoa², cˀoa⁴ vˀe¹chjoa² cˀoa⁴ li²ˀya³ xi³ ma³-le⁴ cjo³ˀai².
REV 3:8 An³ ˀve³-nia¹³ xa¹-no³. (Coe⁴-ni³ je³qui³tsjoa³jnco³-no³ xo⁴ntjoa⁴ xi³ ti⁴xˀa⁴ nqui³xcon³, jña³-ni³ nca³ ni⁴ˀya³-jin² xi³ ma³-le⁴ vˀe¹chjoa².) Tjin¹ˀi⁴tse¹-no³ nca³nˀion¹, cˀoa⁴ qui³ni²tjo³son²³ je² en¹-na⁴, cˀoa⁴ li²coi³ tsa³cˀe²ˀmao³ jan³ˀain¹-na⁴.
REV 3:9 Coe⁴-ni³, an³ cjoa⁴nˀion¹ sˀin³-le⁴ je² cho⁴ta⁴ xi³ ma³ña³ ya⁴ ntˀia³sinagoga xi³ tsˀe⁴ Satanás, je² xi³ judío tso²-le⁴ yao³-le⁴, cˀoa⁴ li²coi³ coan³-ni³, to⁴xo⁴cˀoa⁴²qui³tso². An³ cjoa⁴nˀion¹ sˀin³-le⁴ nca³ cjoi⁴nčhoa³ cˀoa⁴ nca³ scoe⁴xcon¹ coi⁴ncha³xco¹nchˀin³tˀa³-le⁴ ntso⁴co³, cˀoa⁴ nca³ scoe⁴ nca³ an³ coan³tsjoa³que⁴-no³.
REV 3:10 Coi³ nca³ qui³ni²tjo³son²³ je² en¹ xi³ tsˀe⁴ cjoa⁴tse³jta³-na⁴, cˀoa⁴-ti⁴ an³ cˀoa³sje³ntjai²-no³ cˀia⁴ nca³ coi⁴cho²-ca³ hora nca³ cho¹tˀa³-no³. Je² hora cjoa⁴ˀai¹-le⁴ nca³qui³jnta² son³ˀnte³-vi⁴, nca³ cˀoa⁴-sˀin² cho¹tˀa³ je² xi³ tjio¹ i⁴ son³ˀnte³-vi⁴.
REV 3:11 Coe⁴-ni³, cjoe²ˀe⁴nti⁴ton⁴-nia¹³. Nta³ tˀe²jin³ta³con²³ jme³-ni³ xi³ tjin¹-no³, jme¹-ni³ nca³ ni⁴ˀya³-jin² xi³ cjoa⁴ˀa³-ni³no³ corona-no³.
REV 3:12 Je² xi³ si⁴²qui³njen³, an³ coi³ncha³nta³ ya⁴ ntˀia³-le⁴ Ni³na¹-na⁴, cˀoa⁴ ni⁴nqui²jnco³-jin² ni⁴čhjin³ coi⁴tjo³ nti³tsin³. Cˀoa⁴ an³ squi³joan²³ je² jan³ˀain¹-le⁴ Ni³na¹-na⁴, cˀoa⁴ jan³ˀain¹-le⁴ je² na⁴xi⁴na³nta¹ xi³ tsˀe⁴ Ni³na¹-na⁴, je² Jerusalén cho⁴tse⁴, jña³-le⁴ xi³ fa³ˀai³jen³-ni³ ncˀa³jmi³ tsˀe⁴ Ni³na¹-na⁴, cˀoa⁴ jan³ˀain¹ cho⁴tse⁴-na⁴.
REV 3:13 Je² xi³ tjin¹ xo⁴ño³, ca²ti³ncha²ño³-le⁴ jo³ tso²-le⁴ na⁴xi⁴na³nta¹-le⁴ Cristo je² Espíritu Santo.
REV 3:14 Chji¹-lai⁴ je² a²ncje⁴ xi³ tsˀe⁴ na⁴xi⁴na³nta¹-le⁴ Cristo ya⁴ Laodicea: Coe⁴-ni³, cˀoi⁴tso² je² Amén, je² testigonta³ xi³ ña³qui³ cjoa⁴qui²xi⁴, je² xi³ tsa³cˀe¹to²tsˀin³-le⁴ cjoa⁴ xi³ Ni³na¹ qui³si³nta³.
REV 3:15 An³ ˀve³-nia¹³ xa¹-no³, nca³ ni⁴nchˀan¹-jion²³, cˀoa⁴ ni⁴sjoe²-jion²³. Jo¹ to⁴nta³ tsa² nchˀaon¹³, cˀoa⁴ tsa² sjoao²³.
REV 3:16 Coi³ nca³ to⁴so³yao³, cˀoa⁴ li²coi³ nchˀaon¹³, ni⁴sjoe²-jion²³, an³ cˀoe³čha¹³-ni³no³ ntso⁴ˀva³.
REV 3:17 Nca³ jon² cˀoi⁴coi⁴xon¹³: Ña¹ nchi⁴na¹-nia¹, cˀoa⁴ li² cˀoa⁴cji³ chji¹-na¹, cˀoa⁴ ni⁴jme³-jin² xi³ cha³-na¹. Li²coi³ ˀyao³ nca³ ñˀain³ ti³yo³, cˀoa⁴ nca³ chˀoao³, cˀoa⁴ nca³ yo⁴mao⁴³, cˀoa⁴ nca³ xcao⁴³, cˀoa⁴ nca³ ti³so³yo³jtio³.
REV 3:18 An³ coi³ncha³ˀa²-no³ nca³ an³ ti⁴nta¹tˀa³-nao¹³ taon⁴si³-ne² xi³ lˀi¹ qui³chjan¹jin³, jme¹-ni³ nca³ nchi⁴na¹ ca²ta³ma³-si¹nio³ nca³ jon². Chˀa⁴cjao¹³ na³jño³ xi³ čhoa³ cjoan³, jme¹-ni³ nca³ tsi² jcha⁴-si¹ni³le⁴ je² cjoa⁴soa³-no³ nca³ ti³so³yo³jtio³. Cˀoa⁴ ti⁴no¹jon³ xcon³ jme¹-ni³ nca³ coan⁴tsen³-si¹ni³no³.
REV 3:19 An³ nchja²ti³coa⁴, tsjoa³-le⁴ cjoa⁴ñˀain³ nca³tsˀi³ xi³ an³ tsjoa³que⁴: Ti⁴sin³-sao³ cˀoa⁴ ti⁴cˀa³ntjai²yao³ cjoa⁴fa³ˀai³tsjen³-no³.
REV 3:20 Coe⁴-ni³, an³ ti²jna⁴jčhoa³ xo⁴ntjoa⁴, cˀoa⁴ nchja²³. Tsa² ˀya³ni³ve⁴ xi³ nčhˀoe¹-le⁴ jta⁴-na⁴, cˀoa⁴ tsa² sco¹ˀai² xo⁴ntjoa⁴, cjoa²ˀa⁴sˀen³con³-le⁴, cˀoa⁴ coa²cjen⁴coa⁴, cˀoa⁴-ti⁴ je² coa⁴cjen⁴cao⁴-na³.
REV 3:21 Je² xi³ si⁴²qui³njen³, an³ tsjoa³-le⁴ nca³ cˀoe¹jna³tˀa³-na³ ya⁴ ya¹xi²le⁴-na⁴, cˀoa⁴-sˀin² jo³-sˀin² nca³ je³qui³si³qui³njen³ nca³ an³, cˀoa⁴ je³tsa³ca²te⁴jna³tˀa³-le⁴ Nˀai³-na⁴ ya⁴ ya¹xi²le⁴-le⁴.
REV 3:22 Je² xi³ tjin¹ xo⁴ño³, ca²ti³ncha²ño³-le⁴ jo³ tso²-le⁴ na⁴xi⁴na³nta¹-le⁴ Cristo je² Espíritu Santo.
REV 4:1 Coan³scan³-ni³ cjoa⁴ je²-vi⁴, qui³sco²tsen³, cˀoa⁴ coe⁴-ni³ jnco³ xo⁴ntjoa⁴ xi³ ti⁴xˀa⁴ ya⁴ ncˀa³jmi³. Je² ti¹tjon² jta⁴ xi³ qui³nčhˀoe³ jo³-ni³ tsa² jta⁴-le⁴ čhjao³ xi³ tsa³cja¹cao⁴-na³: Nčhoa¹mi³ i⁴-vi⁴, coa³co³-le²³ je² cjoa⁴ xi³ coan⁴ coan⁴scan³-ni³ je²-vi⁴.
REV 4:2 Nti⁴ton⁴ tsa³ca²te⁴jna³coa⁴ je² Espíritu Santo. Coe⁴-ni³ jnco³ ya¹xi²le⁴ xi³ ti¹jna³ ya⁴ ncˀa³jmi³, cˀoa⁴ jnco³ xi³ ya⁴ ti¹jna³ne² je² ya¹xi²le⁴.
REV 4:3 Cˀoa⁴ je² xi³ ti¹jna³ne², cˀoa⁴cji³ jo³-ni³ tsa² jnco³ la⁴jao⁴ xi³ jaspe ˀmi², cˀoa⁴ xi³ cornalina ˀmi². Cˀoa⁴ jnco³ ˀya⁴ xi³ ya⁴ se¹jna³ntai³-le⁴ je² ya¹xi²le⁴, xi³ cˀoa⁴cji³ jo³-ni³ tsa² sen¹-le⁴ la⁴jao⁴ xi³ esmeralda ˀmi².
REV 4:4 Cˀoa⁴ ya⁴ ntai³-le⁴ je² ya¹xi²le⁴ti¹tjon² tjio¹ can³ño³ ya¹xi²le⁴. Tsa³ˀve³ ya⁴son² ya¹xi²le⁴-ve⁴ can³ño³ cho⁴ta⁴jchi¹nca³ xi³ ya⁴ tjio¹ne², xi³ yˀa³cja¹ na³jño³čhoa³. Cˀoa⁴ tjio¹son² jco⁴ corona xi³ taon⁴si³ne².
REV 4:5 Ya⁴ je² ya¹xi²le⁴ti¹tjon²-ve⁴ lˀi¹chˀaon⁴ ji³tjo³, cˀoa⁴ qui³tsin³ chˀaon⁴ cao⁴ jta⁴. Ña³to³ lámpara tjio¹ti² ya⁴ nqui³xcon⁴ ya¹xi²le⁴, jña³-le⁴ xi³ coi³ ña³to³ espíritu xi³ tsˀe⁴ Ni³na¹.
REV 4:6 Cˀoa⁴ ya⁴ nqui³xcon⁴ je² ya¹xi²le⁴ ti¹qui³jna³ jnco³ nta¹chi³con³ xi³ cˀoa⁴cji³ cho⁴tsin¹ cji³, jo³-ni³ cho⁴tsin¹ xi³ nˀion¹ fa³te³. Cˀoa⁴ ya⁴tˀa³-le⁴ je² ya¹xi²le⁴, cˀoa⁴ ya⁴ntai³-le⁴ je² ya¹xi²le⁴, ño³ ma³-ni³ xi³ tjio¹con³ xi³ qui³tse³jon² xcon⁴ tsˀoa⁴ cao⁴ jton⁴ ya¹tsˀin⁴.
REV 4:7 Je² xi³ ti¹tjon²-le⁴ xi³ tjio¹con³ cˀoa⁴cji³ xa³ cji³. Je² xi³ ma³jao²-ni³le⁴ xi³ tjio¹con³ cˀoa⁴cji³ nčha⁴ja⁴ˀnti¹ cji³. Je² xi³ ma³jan²-ni³le⁴ xi³ tjio¹con³ cˀoa⁴cji³ ncjain¹ cho⁴ta⁴ cji³. Je² xi³ ma³ño³-ni³le⁴ xi³ tjio¹con³ cˀoa⁴cji³ ja⁴ xi³ ti¹fi²tjen⁴ cji³.
REV 4:8 Je² xi³ ño³ ma³-ni³ xi³ tjio¹con³ tjin¹-le⁴ nca³ jnco¹jnco¹ jaon³ jnca³ jnco³tjo³ntai³-le⁴, cˀoa⁴ ya⁴ya³-le⁴ ncjin² xcon⁴ tjin¹. Li²coi³ qui³si³cja¹ya³ nca³ njion² ni⁴nca³ ni⁴čhjin³, nca³ tso²: Tsje³, tsje³, tsje³ je² Nai³-na¹ Ni³na¹ xi³ va³te¹xo³ma³ nca³yi³je³, xi³ tsa³cˀe²jna³, xi³ ti¹jna³, cˀoa⁴ xi³ cjoa⁴ˀai¹-ni³.
REV 4:9 To⁴cˀia⁴²-ni³ nca³ je² xo⁴cjoan³-ve⁴ xi³ tjio¹con³ tsˀa³sje³je³ya³ tsa³ve³xcon¹ qui³se³tˀain³-le⁴ je² xi³ ti¹jna³ne² ya¹xi²le⁴-ve⁴, je² xi³ ti¹jna³con³ nca³ntsjai² ni⁴čhjin³,
REV 4:10 cˀia⁴ je² can³ño³ cho⁴ta⁴jchi¹nca³ tsa³cja³yo³nia²tˀa³-le⁴ je² xi³ ti¹jna³ne² ya¹xi²le⁴-ve⁴. Jo³ nca³ tsa³ve³xcon¹ je² xi³ ti¹jna³con³ nca³ntsjai² ni⁴čhjin³. Tsa³cˀe¹tsao³ corona-le⁴ nqui³xcon⁴ ya¹xi²le⁴-ve⁴, nca³ tso²:
REV 4:11 Señor, va³quin²-li² nca³ ji³ ca²tji³tjo³je³yai³, cˀoa⁴ nca³ xcon¹ ca²ta³ˀya³ta³con²-li², cˀoa⁴ ca²ta³sˀe³-li² nca³nˀion¹, nca³ ji³ qui³ni²ntai³ nca³yi³je³ tso³jmi², nca³ ji³ coan³me³ta³coin²³ nca³ qui³sˀe³, cˀoa⁴ cˀoa⁴-sˀin² coan³.
REV 5:1 Tsa³ˀve³ ya⁴ ntsja³ nca³qui²xi⁴ je² xi³ ti¹jna³ne² je² ya¹xi²le⁴ jnco³ xon⁴ xi³ sˀe³xco¹ya³ xi³ tji¹tˀa³ ya⁴ya³-le⁴ cˀoa⁴ nca³tsen³-le⁴, xi³ ña³to³ sello qui³sˀe³nˀion¹-ni³.
REV 5:2 Tsa³ˀve³jncoa³ a²ncje⁴ xi³ tjin¹-le⁴ nca³nˀion¹ xi³ nˀion¹ ti¹nchja⁴ya³: ˀya¹-ni³ xi³ va³quin²-le⁴ nca³ sco¹ˀai² je² xon⁴, cˀoa⁴ nca³ cˀoa⁴sje³tˀa³ sello-le⁴.
REV 5:3 Ni⁴ˀya³-jin² xi³ coan³-le⁴ qui³sco³ˀai² je² xon⁴, cˀoa⁴ ni⁴ˀya³-jin² xi³ coan³ qui³sco²tsen³-le⁴, ni⁴ya⁴-jin² ncˀa³jmi³, ni⁴ˀi⁴-jin² son³ˀnte³-vi⁴, ni⁴ya⁴-jin² nqui³ son³ˀnte³.
REV 5:4 Cˀoa⁴ an³ a³li² cˀoa⁴cji³ qui³squi³ˀntia¹³, nca³ tsi²ˀya³ xi³ coan³sjai³ xi³ va³quin²-le⁴ nca³ sco¹ˀai²nqui³ je² xon⁴, ni⁴ xi³ cˀoe⁴²xquia⁴, ni⁴ xi³ sco¹tsen³-le⁴.
REV 5:5 Jnco³ cho⁴ta⁴jchi¹nca³ cˀoi⁴qui³tso²-na³: A³li² chi³ˀntia¹-jin²³. Coe⁴-ni³ je² xa³-le⁴ cho⁴ta⁴ Judá, je² xi³ ntje⁴-le⁴ David, xi³ qui³njen²-le⁴ nca³ sco¹ˀai²nqui³ je² xon⁴, cˀoa⁴ nca³ cˀoa⁴sje³tˀa³ je² ña³to³ sello-le⁴.
REV 5:6 Qui³sco²tsen³. Coe⁴-ni³ ya⁴ nca³va³sen³-le⁴ ya¹xi²le⁴-ve⁴, cˀoa⁴ je² xi³ ño³ ma³-ni³ xi³ tjio¹con³, cˀoa⁴ nca³va³sen³-le⁴ je² cho⁴ta⁴jchi¹nca³, ti¹jna³ jnco³ Va³rre² jo³-ni³ xi³ cˀen³ cji³, xi³ ña³to³ nčha⁴ tjin¹-le⁴, cˀoa⁴ ña³to³ ma³ xcon⁴, xi³ je² ña³to³ espíritu xi³ tsˀe⁴ Ni³na¹ xi³ qui³ni²ca³sen¹ nca³qui³jnta² son³ˀnte³.
REV 5:7 Je² Va³rre² ja³ˀai³, cˀoa⁴ qui³scoe¹ je² xon⁴-ve⁴ ya⁴ya³ ntsja³ nca³qui²xi⁴ je² xi³ ti¹jna³ne² ya¹xi²le⁴-ve⁴.
REV 5:8 Cˀia⁴ nca³ je³qui³scoe¹ je² xon⁴, je² xi³ ño³ ma³ xi³ tjio¹con³, cˀoa⁴ je² nca³ can³ño³ cho⁴ta⁴jchi¹nca³ tsa³cja³yo³nia² nqui³xcon⁴ je² Va³rre². Jnco¹jnco¹ na³jni¹ˀarpa yˀa³, cˀoa⁴ cho⁴tsin¹ taon⁴si³ne² tjio¹qui³tse³ xqui³ xi³ nta³ njen⁴, xi³ coi³ cjoa⁴vˀe²tsˀoa³-le⁴ cho⁴ta⁴-le⁴ Cristo.
REV 5:9 Cˀoa⁴ qui³se³ jnco³ jnta³ cho⁴tse⁴, tso²: Va³quin²-li² nca³ chjoai¹³ je² xon⁴, cˀoa⁴ nca³ chˀa⁴sje³tˀai³ sello-le⁴. Nca⁴ ji³ qui³ni²cˀen³-li², nca³ cao⁴ njin¹-li⁴ ji³ tsa³cˀe²chji¹ntjai²n-a³jin⁴ xi³ tˀa³tsˀe⁴ Ni³na¹, nca³ ja²ˀai⁴-ni³jin⁴ nca³yi³je³ ntje⁴, nca³yi³je³ en¹, nca³yi³je³ na⁴xi⁴na³nta¹, nca³yi³je³ ˀnte³.
REV 5:10 Ji³ tsa³qui³ncha³-na³jin⁴ cho⁴ta⁴ti¹tjon² cˀoa⁴ na⁴ˀmi³ xi³ tˀa³tsˀe⁴ Ni³na¹. Cˀoa⁴-sˀin² coa⁴te²xo³ma³² i⁴ son³ˀnte³-vi⁴.
REV 5:11 Cˀoa⁴ qui³sco²tsen³ qui³nčhˀoe³-le⁴ jta⁴-le⁴ xi³ ncjin² a²ncje⁴ ntai³-le⁴ je² ya¹xi²le⁴, cao⁴ xi³ tsˀe⁴ je² xi³ tjio¹con³, cao⁴ xi³ tsˀe⁴ je² cho⁴ta⁴jchi¹nca³. Nca³tsˀi³ xi³ ya⁴ tjio¹ jo³ nca³ jmi³jmi³ coan³xco¹,
REV 5:12 cˀoa⁴ nˀion¹ qui³nchja⁴: Je² Va³rre² xi³ qui³ni²cˀen³ va³quin²-le⁴ nca³ je² scoe¹ cjoa⁴te¹xo³ma³ cao⁴ cjoa⁴nchi⁴na¹ cao⁴ cjoa⁴ˀi³sen³ta³con² cao⁴ nca³nˀion¹ cao⁴ cjoa⁴ncˀa³, cao⁴ cjoa⁴je³ya³, cao⁴ cjoa⁴ni²chi³con³tˀain³.
REV 5:13 An³ qui³nčhˀoe³-le⁴ nca³tsˀi³ xi³ qui³sˀe³nta³ xi³ tjio¹ ya⁴ncˀa³jmi³ cao⁴ ya⁴ son³ˀnte³ cao⁴ ya⁴ nqui³ˀnte³, cˀoa⁴ cao⁴ xi³ ya⁴ nta¹chi³con³ tjio¹jin³, cao⁴ nca³yi³je³ tso³jmi² xi³ ya⁴ tjio¹, nca³ tso²: Je² xi³ cˀoa⁴-sˀin² ti¹jna³ne² je² ya¹xi²le⁴, cˀoa⁴ je² Va³rre² ca²ta³sˀe³-le⁴ cjoa⁴ni²chi³con³tˀain³, cao⁴ cjoa⁴ncˀa³, cao⁴ cjoa⁴je³ya³, cao⁴ cjoa⁴te¹xo³ma³ nca³ntsjai² ni⁴čhjin³.
REV 5:14 Je² xi³ ño³ ma³ xi³ tjio¹con³ qui³tso²: Cˀoa⁴ ca²ta³ma³. Je² can³ño³ cho⁴ta⁴jchi¹nca³ tsa³cja³yo³nia²-le⁴ ncjain¹, cˀoa⁴ tsa³ve³xcon¹ je² xi³ ti¹jna³con³ nca³ntsjai² ni⁴čhjin³.
REV 6:1 Qui³sco²tsen³ cˀia⁴ nca³ je² Va³rre² tsa³cˀa³sje³tˀa³ xi³ ti¹tjon² sello, cˀoa⁴ qui³nčhˀoe³jnco³-le⁴ xi³ ño³ ma³-ni³ xi³ tjio¹con³, xi³ tso² jo³-ni³ jta⁴-le⁴ chˀaon⁴: Nčhoai¹³, cˀoa⁴ cho¹tsain³.
REV 6:2 Cˀoa⁴ qui³sco²tsen³. Coe⁴-ni³ jnco³ na⁴xin¹čhoa³. Je² xi³ ti¹jna³son²-le⁴ tjin¹-le⁴ jnco³ ya¹tsi³tin³. Qui³tsˀai²jnco³-le⁴ corona, cˀoa⁴ je² ji³tjo³ nca³ ti¹njen²-le⁴ jme¹-ni³ nca³ coi⁴njen⁴-si¹ni³le⁴.
REV 6:3 Cˀia⁴ nca³ je² tsa³cˀa³sje³tˀa³ je² xi³ ma³jao²-ni³ sello, qui³nčhˀoe³-le⁴ je² xi³ ma³jao²-ni³ xi³ tjio¹con³, xi³ tso²: Nčhoai¹³, cˀoa⁴ cho¹tsain⁴³.
REV 6:4 Ji³tjo³ nqui²jnco³ na⁴xin¹ xi³ ni² cji³. Je² xi³ ti¹jna³son²-le⁴ qui³tsˀai²-le⁴ ˀnte³ nca³ cjoa⁴ˀa²xin² xi³ nchˀan¹ chon³ xi³ tsˀe⁴ son³ˀnte³, nca³ si⁴²cˀen³-si¹ni³ xi¹ncjin¹. Qui³tsˀai²-le⁴ jnco³ qui⁴cha⁴spada xi³ nˀion¹ je³.
REV 6:5 Cˀia⁴ nca³ je² tsa³cˀa³sje³tˀa³ je² xi³ ma³jan²-ni³ sello, qui³nčhˀoe³-le⁴ je² xi³ ma³jan²-ni³ xi³ tjio¹con³, xi³ tso²: Nčhoai¹³, cˀoa⁴ cho¹tsain³. Qui³sco²tsen³, cˀoa⁴ coe⁴-ni³ jnco³ na⁴xin¹jma². Je² xi³ ti¹jna³son²-le⁴ tjin¹-le⁴ jnco³ ya¹libra ya⁴³ ntsja³.
REV 6:6 Qui³nčhˀoe³-le⁴ jnco³ jta⁴ ya⁴ nca³va³sen³-le⁴ xi³ ño³ ma³ xi³ tjio¹con³ xi³ tso²: Jao² libra trigo nca³ jnco³ vi²xo⁴, cˀoa⁴ jaon³ libra cebada nca³ jnco³ vi²xo⁴. A³li² ni²qui³tson¹-jin²³ je² vino ni⁴je² si²ti⁴-ve⁴.
REV 6:7 Cˀia⁴ nca³ je² tsa³cˀa³sje³tˀa³ xi³ ma³ño³-ni³ sello, qui³nčhˀoe³-le⁴ jta⁴-le⁴ xi³ ma³ño³-ni³ xi³ tjio¹con³, xi³ tso²: Nčhoai¹³, cˀoa⁴ cho¹tsain³.
REV 6:8 Cˀoa⁴ qui³sco²tsen³. Coe⁴-ni³ jnco³ na⁴xin¹ xi³ bayo cji³. Je² xi³ ti¹jna³son²-le⁴ tjin¹-le⁴ jan³ˀain¹ Cjoa⁴vi³ya³, cˀoa⁴ ya⁴ jña³ nca³ ti¹ti² qui³tjen⁴nqui³-le⁴. Cˀoa⁴ je² qui³tsˀai²-le⁴ nca³ coa⁴te²xo³ma³ jnco³ ya² xi³ ma³-ni³ ño³ ya²-le⁴ son³ˀnte³, jme¹-ni³ nca³ si⁴²cˀen³-si¹ni³ cao⁴ qui⁴cha⁴spada cao⁴ cji³nčha¹ cao⁴ cjoa⁴vi³ya³ cao⁴ je² cho⁴jña¹-le⁴ son³ˀnte³.
REV 6:9 Cˀia⁴ nca³ je² tsa³cˀa³sje³tˀa³ je² xi³ ma³ˀaon²-ni³ sello, tsa³ˀve³nqui³-le⁴ son²xta² ni⁴ma⁴-le⁴ je² xi³ qui³ni²cˀen³ xi³ to⁴tˀa³tsˀe⁴ en¹-le⁴ Ni³na¹, cˀoa⁴ xi³ to⁴tˀa³tsˀe⁴ je² en¹-le⁴ xi³ qui³tsjoa³.
REV 6:10 Jo³ nca³ nˀion¹ qui³nchja⁴ tso²: Señor xi³ tsjai³ xi³ cjoa⁴qui²xi⁴, cˀia¹ sa³ˀnta³ nca³ cˀoai⁴-lai⁴ cjoa⁴ñˀain³ je² xi³ ya⁴ tjio¹con³ son³ˀnte³, cˀoa⁴ nca³ si⁴jntai²³ njin¹-na⁴jin⁴.
REV 6:11 Cˀoa⁴ qui³tsˀai²-le⁴ na³jño³ xi³ čhoa³ cjoan³, cˀoa⁴ tsa³cˀin²-le⁴ nca³ ca²ta³si¹cja¹ya³ nqui³ jo³ tjin¹ ni⁴čhjin³, sa³ˀnta³ nca³ sˀe⁴jnco³ cao⁴ je² xi³ qui³ni²xa¹cao⁴ cˀoa⁴ cao⁴ ntsˀe⁴, xi³ cˀoa⁴-ti⁴ si⁴cˀen³ jo³-ni³ nca³ je².
REV 6:12 Qui³sco²tsen³ cˀia⁴ nca³ tsa³cˀa³sje³tˀa³ je² xi³ ma³jaon³-ni³ sello. Coe⁴-ni³ cˀoa⁴coan³ jnco³ chaon¹ xi³ nˀion¹. Je² tsˀoi¹, jma² qui³sˀe³ jo³-ni³ tsa² jnco³ na³jño³jma², cˀoa⁴ je² sa¹ coan³ njin¹ nca³yi³je³.
REV 6:13 Cˀoa⁴ je² ni³ño³-le⁴ ncˀa³jmi³ qui³tsao³ tˀa³na³nqui³ jo³-ni³ tsa² ya¹ higo xi³ tsao³nqui³ to³-le⁴ xi³ cje³ chji²-jin² cˀia⁴ nca³ jnco³ ntjao⁴ xi³ nˀion¹ fa³ˀa³.
REV 6:14 Cˀoa⁴ je² ncˀa³jmi³ qui³tˀa³xin² jo³-ni³ tsa² jnco³ xon⁴ xi³ sˀe³xco¹ya³. Nca³yi³je³ ni³nto³ cao⁴ je² ˀnte³ xi³ tjio¹ˀncho² nta¹chi³con³ qui³cha³ˀa²xin²-ni³ ˀnte³-le⁴.
REV 6:15 Je² cho⁴ta⁴ti¹tjon²-le⁴ son³ˀnte³ cao⁴ cho⁴ta⁴je³ya³, cao⁴ xi³ nchi⁴na¹ cao⁴ xi³ capitán, cao⁴ xi³ nˀion¹ tjin¹-le⁴ nca³nˀion¹, cao⁴ nca³tsˀi³ cho⁴ˀnta³ cao⁴ xi³ ntai¹ tjio¹, qui³ ca³tio¹ˀma³ nqui³nqui³jao³ cˀoa⁴ nqui³na⁴xi⁴ xi³ tjio¹jin³ jña¹jcha¹.
REV 6:16 Cˀoa⁴qui³tso²-le⁴ je² jña¹jcha¹-ve⁴ cao⁴ je² na⁴xi⁴-ve⁴: Ca²ta³tsao³jon²-na³jin⁴, cˀoa⁴ ti⁴ca³tio¹ˀma³-na³jin⁴ ncjain¹ je² xi³ ti¹jna³ne² je² ya¹xi²le⁴-ve⁴, cˀoa⁴ cjoa⁴jti³-le⁴ je² Va³rre²,
REV 6:17 nca³ je³ja³ˀai³ je² ni⁴čhjin³-le⁴ cjoa⁴jti³-le⁴. ˀya¹ xi³ coan⁴ jcho¹cjoa⁴cao⁴-le⁴.
REV 7:1 Coan³scan³-ni³ cjoa⁴ je²-vi⁴ tsa³ˀve³ ño³ a²ncje⁴ xi³ ya⁴ tjio¹ nca³ ño³ xi⁴nqui⁴-le⁴ son³ˀnte³. Tjio¹vˀe¹chjoa²-le⁴ je² ño³ ntjao⁴-le⁴ son³ˀnte³, jme¹-ni³ nca³ tsi² tsjen¹-si¹ni³ ntjao⁴ i⁴son² son³ˀnte³, ni⁴ya⁴son² nta¹chi³con³-jin², ni⁴cjoa⁴ˀa³ne²-le⁴ ni⁴jnco³-jin² ya¹.
REV 7:2 Nqui²jnco³ a²ncje⁴ tsa³ˀve³ xi³ qui³mi³-ni³ ya⁴ jña³ nca³ tjo³ tsˀoi¹, xi³ tjin¹-le⁴ sello xi³ tsˀe⁴ Ni³na¹ xi³ ti¹jna³con³. Nˀion¹ qui³nchja⁴-le⁴ je² nca³ ño³ a²ncje⁴, jña³-le⁴ xi³ cˀoa⁴-sˀin² qui³tsˀai²-le⁴ nca³ si⁴²ñˀain³-le⁴ son³ˀnte³ cao⁴ nta¹chi³con³.
REV 7:3 Tso²: A³li² ni²ñˀain³-jin²lao⁴³ son³ˀnte³, ni⁴je²-jin² nta¹chi³con³, ni⁴je²-jin² ya¹, sa³ˀnta³ nca³ cˀoe¹choai⁴-jin⁴ tjen³ cho⁴ˀnta³-le⁴ Ni³na¹-na¹.
REV 7:4 Cˀoa⁴ qui³nčhˀoe³ jo³ ncjin² xi³ qui³sˀe³choa⁴. Jnco³ ciento cao⁴-ni³ ña³chan²ño³ jmi³ ma³-ni³ xi³ qui³sˀe³choa⁴, tsˀe⁴ nca³tsˀi³ ntje⁴-le⁴ ja⁴xti³-le⁴ Israel.
REV 7:5 Xi³ tsˀe⁴ ntje⁴-le⁴ Judá, te³jao² jmi³ xi³ qui³sˀe³choa⁴. Xi³ tsˀe⁴ ntje⁴-le⁴ Rubén, te³jao² jmi³ xi³ qui³sˀe³choa⁴. Xi³ tsˀe⁴ ntje⁴-le⁴ Gad, te³jao² jmi³ xi³ qui³sˀe³choa⁴.
REV 7:6 Xi³ tsˀe⁴ ntje⁴-le⁴ Aser, te³jao² jmi³ xi³ qui³sˀe³choa⁴. Xi³ tsˀe⁴ ntje⁴-le⁴ Neftalí, te³jao² jmi³ xi³ qui³sˀe³choa⁴. Xi³ tsˀe⁴ ntje⁴-le⁴ Manasés, te³jao² jmi³ xi³ qui³sˀe³choa⁴.
REV 7:7 Xi³ tsˀe⁴ ntje⁴-le⁴ Simeón, te³jao² jmi³ xi³ qui³sˀe³choa⁴. Xi³ tsˀe⁴ ntje⁴-le⁴ Leví, te³jao² jmi³ xi³ qui³sˀe³choa⁴. Xi³ tsˀe⁴ ntje⁴-le⁴ Isacar, te³jao² jmi³ xi³ qui³sˀe³choa⁴.
REV 7:8 Xi³ tsˀe⁴ ntje⁴-le⁴ Zabulón, te³jao² jmi³ xi³ qui³sˀe³choa⁴. Xi³ tsˀe⁴ ntje⁴-le⁴ José, te³jao² jmi³ xi³ qui³sˀe³choa⁴. Xi³ tsˀe⁴ ntje⁴-le⁴ Benjamín, te³jao² jmi³ xi³ qui³sˀe³choa⁴.
REV 7:9 Coan³scan³-ni³ cjoa⁴ je²-vi⁴ qui³sco²tsen³. Coe⁴-ni³ jo³ ncjin² ma³-ni³ cho⁴ta⁴, jña³-le⁴ xi³ tsi² ma³xqui⁴-le⁴, xi³ tsˀe⁴ nca³tsˀi³ ˀnte³, cao⁴ ntje⁴, cao⁴ na⁴xi⁴na³nta¹, cao⁴ en¹. Tjio¹ nqui³xcon⁴ je² ya¹xi²le⁴-ve⁴, cˀoa⁴ ya⁴ nqui³xcon⁴ je² Va³rre². Na³jño³čhoa³ yˀa³cja¹, cˀoa⁴ xca⁴jen¹ ncha³ya³ ntsja³.
REV 7:10 Nˀion¹ qui³squi³ˀntia¹cao⁴ tso²: Cjoa⁴vi³tjo³ntjai² tjin¹-le⁴ je² Ni³na¹-na¹, xi³ ya⁴ ti¹jna³ne² je² ya¹xi²le⁴-ve⁴, cˀoa⁴ je² Va³rre².
REV 7:11 Nca³tsˀi³ a²ncje⁴ ya⁴ tjio¹ ntai³-le⁴ je² ya¹xi²le⁴-ve⁴, cˀoa⁴ je² cho⁴ta⁴jchi¹nca³, cˀoa⁴ je² xi³ ño³ ma³ xi³ tjio¹con³. Tsa³cja³yo³nia²-le⁴ ncjain¹ nqui³xcon⁴ ya¹xi²le⁴-ve⁴, cˀoa⁴ tsa³ve³xcon¹ Ni³na¹.
REV 7:12 Qui³tso²: Cˀoa⁴ ca²ta³ma³. Ni³na¹-na¹ ca²ta³sˀe³-le⁴ cjoa⁴ni²chi³con³tˀain³, cao⁴ cjoa⁴je³ya³, cao⁴ cjoa⁴ˀi³sen³ta³con², cao⁴ jña³-le⁴ cjoa⁴nta³ xi³ vˀai²-le⁴, cao⁴ cjoa⁴ncˀa³, cao⁴ cjoa⁴te¹xo³ma³, cao⁴ nca³nˀion¹ nca³ntsjai² ni⁴čhjin³. Cˀoa⁴ ca²ta³ma³.
REV 7:13 Qui³nchja⁴ jnco³ cho⁴ta⁴jchi¹nca³, qui³tso²-na³: Je² xi³ i⁴ tjio¹-vi⁴, xi³ yˀa³cja¹ na³jño³čhoa³, ˀya¹-ni³ xo⁴cjoan³-ve⁴, jña¹-ni³ ca²nčhoa¹-ni³.
REV 7:14 Cˀoa⁴ an³ qui³xin³-le⁴: Señor, ji³ ˀyai³. Cˀoa⁴ je² qui³tso²-na³: Je²-vi⁴ xi³ nˀion¹ tse³ cjoa⁴ñˀain³ tsa³cja³ˀa¹, cˀoa⁴ je³tsa³ca³ne¹jon³ na³jño³-le⁴, cˀoa⁴ je² qui³si³čhoa³ cao⁴ je² njin¹-le⁴ je² Va³rre².
REV 7:15 Coi³ nca³ i⁴ tjio¹-ni³ nqui³xcon⁴ je² ya¹xi²le⁴-le⁴ Ni³na¹. Cˀoa⁴-sˀin² si¹xa¹-le⁴ nca³ ni⁴čhjin³ cao⁴ nca³ ni⁴tjen⁴ ya⁴ yo⁴nco⁴-le⁴. Je² xi³ ti¹jna³ne² je² ya¹xi²le⁴ cˀoe¹jna³jin³-le⁴ nca³ je².
REV 7:16 Ni⁴cˀia³-jin² ti⁴coan⁴vao³-ni³le⁴, ni⁴coan⁴fa³ti²-jin²le⁴. Cˀoa⁴ je² tsˀoi¹ li²coi³ ti⁴sca⁴ne²-ni³le⁴, cˀoa⁴ ni⁴jme³-jin² xi³ ti⁴coan⁴sjoe²-ni³le⁴.
REV 7:17 Je² Va³rre² xi³ ya⁴ ti¹jna³ nca³va³sen³-le⁴ je² ya¹xi²le⁴-ve⁴, je² xi³ si⁴²cjen², je² xi³ sca⁴ni²ntia⁴²-le⁴ jña³ ti¹tjo³ na³nta¹ xi³ ti¹jna³con³. Ni³na¹ si⁴²tsje³jon² nca³yi³je³ nta¹xcon⁴ xi³ tsˀe⁴ xcon⁴.
REV 8:1 Cˀia⁴ nca³ tsa³cˀa³sje³tˀa³ je² xi³ ma³ña³to³-ni³ sello, ña³qui³ qui³sˀe³jyo¹ ya⁴ ncˀa³jmi³ va³sen³-la⁴ hora.
REV 8:2 Cˀoa⁴ tsa³ˀve³ je² ña³to³ a²ncje⁴ xi³ ya⁴ tjio¹ nqui³xcon⁴ Ni³na¹, cˀoa⁴ qui³tsˀai²-le⁴ ña³to³ čhjao³.
REV 8:3 Ja³ˀai³ xi³ nqui²jnco³ a²ncje⁴, tsa³ca³sen²jna³ nqui³xcon⁴ je² xta², tjin¹-le⁴ jnco³ čhoa⁴ˀi¹ xi³ taon⁴si³ne². A³li² cˀoa⁴cji³ tse³ xo⁴nco¹sja³ qui³tsˀai²-le⁴, jme¹-ni³ nca³ cˀoa⁴-sˀin² cˀoe⁴²son²-si¹ni³ je² cjoa⁴vˀe²tsˀoa³-le⁴ nca³tsˀi³ cho⁴ta⁴-le⁴ Cristo, ya⁴son²-le⁴ je² xta² xi³ taon⁴si³ne² xi³ ti¹jna³ nqui³xcon⁴ je² ya¹xi²le⁴.
REV 8:4 Cˀoa⁴ je² ni⁴ˀnti⁴-le⁴ je² xo⁴nco¹sja³ cao⁴ je² cjoa⁴vˀe²tsˀoa³-le⁴ je² cho⁴ta⁴-le⁴ Cristo qui³tsin³ncˀa³-ni³ ntsja³ je² a²ncje⁴ nqui³xcon⁴ Ni³na¹.
REV 8:5 Je² a²ncje⁴ qui³scoe¹ je² čhoa⁴ˀi¹, cˀoa⁴ tsa³cˀe¹qui³tse³ čhoa⁴ˀi¹ cao⁴ lˀi¹-le⁴ je² xta², cˀoa⁴ tsa³cˀe¹tsao³son² je² son³ˀnte³. A³li² cˀoa⁴cji³ chˀaon⁴ ja³ne³, cao⁴ jta⁴, cao⁴ lˀi¹chˀaon⁴, cao⁴ chaon¹.
REV 8:6 Cˀoa⁴ je² ña³to³ a²ncje⁴ xi³ tjin¹-le⁴ je² ña³to³ čhjao³, tsa³ca³tio²nta³ nca³ qui³si³cja³ne³.
REV 8:7 Je² xi³ ti¹tjon² a²ncje⁴ qui³si³cja³ne³ čhjao³, cˀoa⁴ tsˀa³ jtsi¹lao⁴ cao⁴ lˀi¹ xi³ ti¹tsˀo¹jin³ cao⁴ njin¹. Ya⁴ qui³tjo³jon² son³ˀnte³. Je² xi³ ma³-ni³ jan² ya³ jña¹jcha¹, jnco³ ya²-le⁴ qui³ti², cˀoa⁴ qui³ti² nca³yi³je³ xca⁴xcoen¹.
REV 8:8 Je² xi³ ma³jao²-ni³ a²ncje⁴ qui³si³cja³ne³ čhjao³. Jo³-ni³ tsa² jnco³ ni³nto³je³ xi³ ti¹ti² qui³ni²cˀa³tjen⁴jin³ ya⁴jin³ nta¹chi³con³. Je² xi³ ma³-ni³ jan² ya³ nta¹chi³con³, jnco³ ya²-le⁴ jo³ njin¹ qui³sˀe³.
REV 8:9 Cˀoa⁴ jnco³ ya² xi³ ma³-ni³ jan² ya³ je² cho⁴ xi³ tjio¹jin³ nta¹chi³con³, xi³ ya⁴ tsa³ca³tio²con³, cˀen³. Jnco³ ya² xi³ ma³-ni³ jan² ya³ barco qui³xo³ya².
REV 8:10 Je² xi³ ma³jan²-ni³ a²ncje⁴ qui³si³cja³ne³ čhjao³. Jnco³ ni³ño³ qui³sca³-ni³ ncˀa³jmi³ xi³ nˀion¹ je³, xi³ ti¹ti² jo³-ni³ tsa² jnco³ lˀi¹ni³cha³. Qui³sca³jin³ jnco³ ya² xi³ ma³-ni³ jan² ya³ nta¹je⁴, cˀoa⁴ ya⁴ jña³ nca³ tjio¹tjo³ na³nta¹.
REV 8:11 Cˀoa⁴ je² ni³ño³ nˀion¹ sja³ ˀmi² jan³ˀain¹-le⁴. Je² xi³ jnco³ ya² xi³ ma³-ni³ jan² ya³ je² na³nta¹ ña³qui³ coan³sja³-ni¹. A³li² cˀoa⁴cji³ cho⁴ta⁴ cˀen³-ni³ je² na³nta¹, nca³ cˀoa⁴-sˀin² nˀion¹ coan³sja³.
REV 8:12 Je² xi³ ma³ño³-ni³ a²ncje⁴ qui³si³cja³ne³ čhjao³. Qui³tsin²ˀaon³ jnco³ ya² xi³ ma³-ni³ jan² ya³ tsˀoi¹, cao⁴ sa¹, cao⁴ ni³ño³. Coan³njion² jnco³ ya² xi³ ma³-ni³ jan² ya³ nca³ je². Li²coi³ coan³ˀi³sen³ jnco³ ya² xi³ ma³-ni³ jan² ya³ ni⁴čhjin³, cˀoa⁴ cao⁴ nca³ ni⁴tjen⁴.
REV 8:13 Qui³sco²tsen³, qui³nčhˀoe³-le⁴ jnco³ a²ncje⁴ xi³ qui³tjen⁴ ya⁴ nca³va³sen³-le⁴ ncˀa³jmi³. Nˀion¹ qui³nchja⁴: Ma⁴-xo¹ni³, ma⁴-xo¹ni³, ma⁴-xo¹ni³ je² xi³ tjio¹ ya⁴ son³ˀnte³, xi³ to⁴coi³ cjoa⁴-le⁴ xi³cˀa³ jta⁴-le⁴ je² čhjao³ xi³ je² jan² a²ncje⁴ sˀa⁴ si⁴²cja³ne³.
REV 9:1 Je² xi³ ma³ˀaon²-ni³ a²ncje⁴ qui³si³cja³ne³ čhjao³. Tsa³ˀve³jncoa³ ni³ño³ xi³ qui³sca³-ni³ ncˀa³jmi³, qui³sca³tˀa³ son³ˀnte³. Cˀoa⁴ qui³tsˀai²-le⁴ je² yo²vi⁴ xi³ tsˀe⁴ nti⁴tjan⁴ jña³ nca³ ti⁴xˀa⁴jin³sen¹.
REV 9:2 Qui³sco³ˀai² je² nti⁴tjan⁴, cˀoa⁴ ji³tjo³mi³ ni⁴ˀnti⁴ ya⁴ ˀnte³-ve⁴ jo³-ni³ tsa² ni⁴ˀnti⁴-le⁴ xi³ tsˀe⁴ nca⁴ja¹ xi³ nˀion¹ yˀai³. Je² ni⁴ˀnti⁴-le⁴ nti⁴tjan⁴-ve⁴ qui³si³njion²jin³ tsˀoi¹ cao⁴ ntjao⁴.
REV 9:3 Cˀoa⁴ je² ni⁴ˀnti⁴-ve⁴ ji³tjo³jin³-ni³ chjo⁴va⁴ ya⁴son² son³ˀnte³. Cˀia⁴ qui³tsˀai² nca³nˀion¹-le⁴ jo³-ni³ nca³ cˀoa⁴-ti⁴ tjin¹-le⁴ nca³nˀion¹ cho⁴na³ˀya¹-le⁴ son³ˀnte³.
REV 9:4 Cˀoa⁴-sˀin² qui³sa³te³xo³ma³-le⁴ nca³ tsi²coi³ si⁴²qui²ˀaon³ jña¹ xi³ tsˀe⁴ son³ˀnte³, ni⁴jme³-jin² tso³jmi² xi³ xcoen¹ cjoan³, ni⁴jnco³-jin² ya¹, to⁴je² cho⁴ta⁴ xi³ tsi²coi³ tjio¹tˀa³ ya⁴ tjen³ je² sello xi³ tsˀe⁴ Ni³na¹.
REV 9:5 Li²coi³ qui³tsˀai²-le⁴ ˀnte³ nca³ si⁴²cˀen³, to⁴si⁴²jti³-le⁴ xi³ to⁴ˀaon² sa¹. Cˀoa⁴-sˀin² qui³si³qui²ˀaon³ jo³-sˀin² si¹qui²ˀaon³ cho⁴na³ˀya¹ cˀia⁴ nca³ ve¹-le⁴ cho⁴ta⁴.
REV 9:6 Cˀia⁴ je² ni⁴čhjin³-ve⁴ coa⁴jnqui³-le⁴ cjoa⁴vi³ya³ cho⁴ta⁴, cˀoa⁴ li²coi³ coan⁴sjai³-le⁴. Coan⁴me³con³ nca³ coi⁴ya², cˀoa⁴ je² cjoa⁴vi³ya³ to⁴xin² coa⁴nca³-le⁴.
REV 9:7 Je² chjo⁴va⁴ coan³tsen³ jo³-ni³ tsa² na⁴xin¹ xi³ tjio¹nta³-le⁴ cjoa⁴jchan¹, cˀoa⁴ ya⁴son² jco⁴ tjin¹-le⁴ jo³-ni³ corona xi³ cˀoa⁴cjoan³ taon⁴si³ne² cjoan³, cˀoa⁴ je² ncjain¹ jo³ cho⁴ta⁴ cjoan³.
REV 9:8 Tjin¹-le⁴ ntsja⁴jco³ jo³ ya¹nchjin¹ cjoan³, cˀoa⁴ je² ni⁴ˀño⁴ jo³-ni³ ni⁴ˀño⁴ xa³ cjoan³.
REV 9:9 Cjio³son² nta³ni⁴sin⁴-le⁴ qui⁴cha⁴ta²ja³. Je² jnca³-le⁴ jo³ nca³ nˀion¹ fa³ne³, jo³-ni³ carro xi³ ncjin² na⁴xin¹ cjen³ˀnto¹jve³, jo³ ma³ cˀia⁴ nca³ ma³ cjoa⁴jchan¹.
REV 9:10 Tjin¹-le⁴ nti³tsˀin³ xi³ cˀoa⁴cjoan³ tsˀe⁴ cho⁴na³ˀya¹ cjoan³, cˀoa⁴ tjin¹-le⁴ nti³tsˀin³ na³ˀya¹. Tjin¹-le⁴ nca³nˀion¹ cao⁴ nti³tsˀin³ nca³ aon² sa¹ cˀoe⁴²-le⁴ cho⁴ta⁴.
REV 9:11 Je² a²ncje⁴ xi³ tsˀe⁴ nti⁴tjan⁴ xi³ ti⁴xˀa⁴jin³sen¹, je² xi³ cho⁴ta⁴ti¹tjon²-le⁴ coan³. Je² jan³ˀain¹-le⁴ nca³ en¹ hebreo cˀoa⁴ˀmi² Abadón, cˀoa⁴ nca³ en¹ griego, Apolión ˀmi².
REV 9:12 Je² xi³ ti¹tjon² cjoa⁴ñˀain³ je³ja³ˀa³to³. Coe⁴-ni³ nčhoa¹ nqui²jao²-sa³ cjoa⁴ñˀain³ xi³ coan⁴scan³-ni³ je² cjoa⁴-vi⁴.
REV 9:13 Je² xi³ ma³jaon³-ni³ a²ncje⁴ qui³si³cja³ne³ čhjao³. Cˀoa⁴ qui³nčhˀoe³jta²³ xi³ nčhoa¹-ni³ je² ño³ nčha⁴-le⁴ je² son²xta² xi³ taon⁴si³ne², xi³ ti¹jna³ ya⁴ nqui³xcon⁴ Ni³na¹.
REV 9:14 Qui³tso²-le⁴ je² xi³ ma³jaon³-ni³ a²ncje⁴ xi³ tjin¹-le⁴ čhjao³: Cho¹jntai¹³ je² ño³ a²ncje⁴ xi³ tjio¹tˀa³nˀion¹ ya⁴ je² xo⁴nca¹je³ Eufrates.
REV 9:15 Cˀoa⁴ qui³tjo³jnta¹ je² ño³ a²ncje⁴ xi³ tjio¹nta³ xi³ tˀa³tsˀe⁴ je² hora, cao⁴ ni⁴čhjin³, cao⁴ sa¹, cao⁴ no¹, jme¹-ni³ nca³ si⁴²cˀen³-si¹ni³ jnco³ ya² xi³ ma³-ni³ jan² ya³ cho⁴ta⁴.
REV 9:16 Je² cho⁴ta⁴cjoa⁴jchan¹ xi³ tjio¹son² na⁴xin¹ jao² ciento millón ma³-ni³. Qui³nčhˀoe³ jo³ tjin¹ ma³-ni³.
REV 9:17 Cˀoa⁴-sˀin² tsa³ˀve³ na⁴xin¹ nca³ ja³ˀai³ya³ xcoan³, cao⁴ je² xi³ tjio¹son²-le⁴, jña³-le⁴ xi³ cjio³son² nta³ni⁴sin⁴-le⁴ qui⁴cha⁴ta²ja³, xi³ ni² jo³ lˀi¹ cji³, xi³ jo³ zafiro cji³, xi³ jo³ azufre cji³. Je² jco⁴ na⁴xin¹ cˀoa⁴cjoan³ jco⁴ xa³ cjoan³. Je² tsˀoa³ ya⁴ ji³tjo³-ni³ lˀi¹ cao⁴ ni⁴ˀnti⁴ cao⁴ azufre.
REV 9:18 Je² xi³ jan² ma³-ni³ cjoa⁴ñˀain³-ve⁴ cˀen³ jnco³ ya² xi³ ma³-ni³ jan² ya³ cho⁴ta⁴. Cˀen³-ni³ lˀi¹ cao⁴ ni⁴ˀnti⁴ cao⁴ azufre xi³ ji³tjo³-ni³ tsˀoa³ na⁴xin¹.
REV 9:19 Je² nca³nˀion¹-le⁴ ti¹jna³ˀa³ tsˀoa³ cao⁴ tjon³ nti³tsˀin³. Je² nti³tsˀin³ cˀoa⁴cjoan³ ye⁴ cjoan³, cˀoa⁴ tjin¹-le⁴ jco⁴. Cao⁴ je² si¹qui²ˀaon³.
REV 9:20 Je² xi³cˀa³ cho⁴ta⁴ xi³ tsi²coi³ cˀen³-ni³ cjoa⁴ñˀain³-vi⁴, to⁴jo³ cje³ si¹cˀa³ntjai²ya³-jin² cjoa⁴fa³ˀai³tsjen³-le⁴ xi³ tˀa³tsˀe⁴ xa¹ xi³ qui³sˀin³-ni³ ntsja³, jme¹-ni³ nca³ tsi²coi³ scoe⁴xcon¹-si¹ni³ nai⁴² xi³ nta³jin³ cao⁴ je² xco¹son² xi³ taon⁴si³ne², xi³ taon⁴čhoa³, xi³ qui⁴cha⁴, xi³ la⁴jao⁴, xi³ ya¹, jña³-le⁴ xi³ li²coi³ ma³ ve³, ni⁴nčhˀoe¹-jin², ni⁴ma³-jin² fi².
REV 9:21 Cˀoa⁴ li²coi³ qui³si³cˀa³ntjai²ya³ cjoa⁴fa³ˀai³tsjen³-le⁴ xi³ tˀa³tsˀe⁴ cˀen³ xi³ cjio³tjen⁴-le⁴, ni⁴ xi³ tˀa³tsˀe⁴ cjoa⁴tji³ˀe³-le⁴, ni⁴ xi³ tˀa³tsˀe⁴ cjoa⁴cha³jnqui³-le⁴, ni⁴ xi³ tˀa³tsˀe⁴ cjoa⁴che¹-le⁴.
REV 10:1 Tsa³ˀve³ nqui²jncoa³ a²ncje⁴ xi³ tjin¹-le⁴ nca³nˀion¹ xi³ ji³tjo³jen³-ni³ ncˀa³jmi³, xi³ qui³tsˀo¹tji³jin³ yo³jvi³, cˀoa⁴ je² ˀya⁴ xi³ tsˀe⁴ ncˀa³jmi³ ya⁴son² jco⁴. Je² ncjain¹ cˀoa⁴cji³ jo³ cji³ tsˀoi¹, cˀoa⁴ je² ntso⁴co⁴ jo³-ni³ ni⁴jen⁴lˀi¹ cji³.
REV 10:2 Cjia³ ntsja³ jnco³ xon⁴ˀnti¹ xi³ ti⁴xˀa⁴nqui³. Je² ntso⁴co⁴ nca³qui²xi⁴ ya⁴ tsa³ca³sen¹jin³ nta¹chi³con³, cˀoa⁴ je² ntso⁴co⁴ nca³scon¹ tsa³ca³sen¹son² na³nqui³.
REV 10:3 Jo³ nca³ nˀion¹ qui³nchja⁴ jo³ tso² xa³ nca³ cji³ˀntia¹. Cˀia⁴ nca³ je³qui³nchja⁴ ja³ne³ nca³ ña³to³ chˀaon⁴.
REV 10:4 Cˀia⁴ nca³ je³ja³ne³ je² chˀaon⁴ xi³ ña³to³, squi³-nia¹³ tsa²cai³, to⁴nca³ qui³nčhˀoe³jta²jncoa³ xi³ ji³nčhoa³-ni³ ncˀa³jmi³ xi³ qui³tso²-na³: Tˀe²chjoa¹nqui³ je² cjoa⁴ xi³ ca²nchja⁴ je² chˀaon⁴ xi³ ña³to³. A³li² chji³tˀa³-jin²³.
REV 10:5 Cˀoa⁴ a²ncje⁴ xi³ tsa³ˀve³ nca³ ya⁴ ti¹jna³son² nta¹chi³con³, cˀoa⁴ ya⁴son² son³ˀnte³, qui³sco²mi³ncˀa³ ntsja³ nca³qui²xi⁴,
REV 10:6 cˀoa⁴ qui³tsjoa³ en¹-le⁴ xi³ tˀa³tsˀe⁴ xi³ ti¹jna³con³ nca³ntsjai² ni⁴čhjin³, xi³ qui³si³nta³ ncˀa³jmi³ cao⁴ tso³jmi² xi³ ya⁴ tjio¹, cao⁴ son³ˀnte³ cao⁴ tso³jmi² xi³ ya⁴ tjio¹, cao⁴ nta¹chi³con³ cao⁴ tso³jmi² xi³ ya⁴ tjio¹. Qui³tsjoa³ en¹-le⁴ nca³ je³ji³cho² ni⁴čhjin³, li²coi³ tse³-sa³ sˀe³jna³.
REV 10:7 To⁴nca³ je² ni⁴čhjin³-le⁴ cˀia⁴ nca³ je² a²ncje⁴ xi³ ma³ña³to³-ni³ cˀoe⁴²tsˀia⁴cao⁴ nca³ si⁴²cja³ne³ čhjao³, je² cjoa⁴ˀma³-le⁴ Ni³na¹ coi⁴tjo³son² jo³-sˀin² nca³ je² qui³nchja⁴ya³jin³-le⁴ je² cho⁴ˀnta³-le⁴ xi³ qui³nchja⁴ya³ tˀa³tsˀe⁴.
REV 10:8 Je² jta⁴ xi³ qui³nčhˀoe³-nia³ ncˀa³jmi³ tsa³cja¹cao⁴ nqui²jnco³cˀa²-na³, cˀoa⁴qui³tso²: Tˀin³, cˀoa⁴ chjoai¹³ je² xon⁴ˀnti¹ xi³ ti⁴xˀa⁴nqui³, xi³ ya⁴ cjia³ ntsja³ je² a²ncje⁴ xi³ ya⁴ ti¹jna³son² nta¹chi³con³, cˀoa⁴ ya⁴son² son³ˀnte³.
REV 10:9 Qui³con³-le⁴ a²ncje⁴, qui³xin³-le⁴: Tˀai²nai¹³ je² xon⁴ˀnti¹. Cˀoa⁴ je² qui³tso²-na³: Chjoai¹³, cˀoa⁴ chjo¹jain³. Je² xon⁴ xi³ si⁴²sja³ ya⁴³ ntsˀoai³, to⁴nca³ je² ntso⁴ˀvai³ coan⁴ xi³ jo³-ni³ tsa² ntsjen¹.
REV 10:10 Qui³scoe²³ je² xon⁴ˀnti¹ xi³ ya⁴ cjia³ ntsja³ je² a²ncje⁴, cˀoa⁴ qui³sco²jen⁴. Jo³ nca³ xi³ˀa³ coan³ ntso⁴ˀva³ jo³-ni³ tsa² ntsjen¹. Cˀia⁴ nca³ je³qui³squi²ne⁴ coan³sja³ ya⁴³ ntsˀoa³.
REV 10:11 Cˀoa⁴ je² qui³tso²-na³: Tjin¹ne²-li² nca³ nqui²jnco³cˀa² coi⁴no²cjoa⁴yai³ tˀa³tsˀe⁴ ncjin² na⁴xi⁴na³nta¹ cao⁴ cho⁴ta⁴ cao⁴ en¹ cao⁴ cho⁴ta⁴ti¹tjon².
REV 11:1 Qui³tsˀai²-na³ jnco³ ya¹na³nca³ xi³ cˀoa⁴cji³ ya¹bastón cji³, cˀoa⁴ tsa³cˀin²-na³: Ti²so⁴tjain⁴, tˀe²cho⁴yai³ je² yo⁴nco⁴-le⁴ Ni³na¹, cao⁴ je² son²xta², cao⁴ je² xi³ ve³xcon¹ nca³ je².
REV 11:2 To⁴xin² ti⁴tja¹-lai⁴ je² nti³tsin³ xi³ ya⁴ ti¹jna³ntai³-le⁴ je² yo⁴nco⁴, a³li² vˀe²cho⁴ya³-jin², nca³ je² qui³tsˀai²-le⁴ je² cho⁴ta⁴ xi³ li² judío-jin². Ña³chan²jao² sa¹ si⁴²qui³xo¹ya³ je² na⁴xi⁴na³nta¹ xi³ tsje³.
REV 11:3 Tsjoa³ˀnte³-le⁴ je² jao² testigo-na⁴ nca³ coi⁴nchja⁴ya³ xi³ jnco³ jmi³ cao⁴-ni³ jao² ciento cao⁴ jan²can³ ni⁴čhjin³, nca³ cˀoa⁴cja¹ na³jño³jma².
REV 11:4 Je²-vi⁴ xi³ jao² ya¹ˀoliva, cˀoa⁴ je² xi³ jao² xi³ si³ncha²ya³ se²ra⁴ xi³ ya⁴ tjio¹ nqui³xcon⁴ je² Nai³-na¹ xi³ tsˀe⁴ son³ˀnte³.
REV 11:5 Tsa² jnco³ xi³ me³-le⁴ nca³ si⁴²qui²ˀaon³ nca³ je², lˀi¹ vi³tjo³-ni³ tsˀoa³, cˀoa⁴ si⁴²cˀen³ co²ntran⁴-le⁴. Tsa² jnco³ xi³ me³-le⁴ nca³ si⁴²qui²ˀaon³ nca³ je², tjin¹ne²-le⁴ nca³ ti⁴cˀoa⁴-sˀin² coi⁴ya²-ni³.
REV 11:6 Je²-vi⁴ tjin¹-le⁴ nca³nˀion¹ nca³ cˀoe⁴²chjoa² je² ncˀa³jmi³, jme¹-ni³ nca³ tsi² cˀoa⁴-si¹ni³ jtsi¹ cˀia⁴ ni⁴čhjin³-le⁴ nca³ coi⁴nchja⁴ya³. Tjin¹-le⁴ nca³nˀion¹ tˀa³tsˀe⁴ na³nta¹ nca³ njin¹ sˀin⁴², cˀoa⁴ nca³ si⁴²ñˀain³-le⁴ son³ˀnte³ cao⁴ nca³yi³je³ cjoa⁴ñˀain³, to⁴jo³ tjin¹ cˀa³ nca³ me³-le⁴.
REV 11:7 Cˀia⁴ nca³ je² jao² testigo cjoe⁴ tsjoa¹ en¹-le⁴, je² cho⁴ xi³ vi³tjo³mi³-ni³ nti⁴tjan⁴ jña³ nca³ ti⁴xˀa⁴jin³sen¹, cjoa⁴jchan¹ sˀin⁴² co²ntran⁴-le⁴ nca³ je². Si⁴²qui³njen³-le⁴, cˀoa⁴ si⁴²cˀen³.
REV 11:8 Je² yao³-le⁴ ya⁴ sˀe⁴tsao³jin³ ya⁴ nti⁴tsin⁴ xi³ tsˀe⁴ je² na⁴xi⁴na³nta¹je³, xi³ cˀoa⁴ˀmi² jo³-ni³ tsa² jan³ˀain¹-le⁴ Sodoma cao⁴ Egipto, jña³ nca³ cˀoa⁴-ti⁴ je² Nai³-na¹ qui³sˀe³tˀa³ cro².
REV 11:9 Tjin¹ cˀa³ xi³ tsˀe⁴ nca³tsˀi³ na⁴xi⁴na³nta¹, cˀoa⁴ xi³ tsˀe⁴ jnco¹jnco¹ ntje⁴, cˀoa⁴ xi³ tsˀe⁴ nca³yi³je³ en¹, cˀoa⁴ xi³ tsˀe⁴ cho⁴ta⁴ xi³ li² judío-jin², xi³ scoe⁴ je² yao³-le⁴ nca³ jan² ni⁴čhjin³ va³sen³. Li²coi³ tsjoa¹ˀnte³ nca³ je² yao³-le⁴ sˀe⁴ñai³.
REV 11:10 Je² xi³ tjio¹ son³ˀnte³ jo³ nca³ coan⁴tsjoa³tˀain³-le⁴, cˀoa⁴ jo³ tsjoa³ coa⁴tio⁴con³. Jo³ nca³ tsjoa¹-le⁴ cjoa⁴tjao² xi¹ncjin¹, nca⁴ je² jao² xi³ qui³nchja⁴ya³ cˀoa⁴-sˀin² qui³si³ñˀain³-le⁴ je² xi³ tjio¹ son³ˀnte³.
REV 11:11 Xi³ cjoe⁴coan⁴ xi³ jan² ni⁴čhjin³ va³sen³, je² espíritu xi³ tsjoa¹ cjoa⁴vi³jna³chon³ xi³ Ni³na¹ qui³si³ca³sen¹, ja³ˀa³sˀen³jin³-le⁴ nca³ je², cˀoa⁴ tsa³qui³ncha³nto³. Jo³ qui³tsa³cjon¹ je² xi³ tsa³ve³.
REV 11:12 Qui³nčhˀoe¹-le⁴ jnco³ jta⁴ nˀion¹ xi³ nčhoa¹-ni³ ncˀa³jmi³, xi³ qui³tso²-le⁴: Nčhoa¹mio³ i⁴-vi⁴. Cˀoa⁴ qui³mi³jin³ yo³jvi³ ya⁴ ncˀa³jmi³. Je² co²ntran⁴-le⁴ tsa³ve³.
REV 11:13 Cˀia⁴ coi³ hora-ve⁴ jnco³ chaon¹ ja³ˀa³ xi³ nˀion¹. Je² xi³ jnco³ ya² nca³ ma³-ni³ te³ ya² na⁴xi⁴na³nta¹je³ chi³xo²ya³, cˀoa⁴ cˀen³ ña³to³ jmi³ cho⁴ta⁴ cao⁴ je² chaon¹ xi³ ja³ˀa³. Je² xi³cˀa³ jo³ nca³ qui³si³ncha³xcon¹, cˀoa⁴ jo³ nca³ tsˀa³sje³je³ya³ je² Ni³na¹ xi³ tsˀe⁴ ncˀa³jmi³.
REV 11:14 Je² xi³ ma³jao²-ni³ cjoa⁴ñˀain³ je³ja³ˀa³to³. Coe⁴-ni³, je² cjoa⁴ñˀain³ xi³ ma³jan²-ni³ nčhoa¹nti⁴ton⁴.
REV 11:15 Je² xi³ ma³ña³to³-ni³ a²ncje⁴ qui³si³cja³ne³ čhjao³. Jo³ nca³ ncjin² jta⁴ xi³ nˀion¹ qui³nchja⁴ ya⁴ ncˀa³jmi³, xi³ qui³tso²: Je² cjoa⁴te¹xo³ma³-le⁴ son³ˀnte³ je³cˀoa⁴-sˀin² coan³ tsˀe⁴ Nai³-na¹, cˀoa⁴ tsˀe⁴ Cristo-le⁴. Je² coa⁴te²xo³ma³ nca³ntsjai² ni⁴čhjin³.
REV 11:16 Je² xi³ can³ño³ cho⁴ta⁴jchi¹nca³ xi³ tjio¹ne² ya¹xi²le⁴-le⁴ nqui³xcon⁴ Ni³na¹ tsa³cja³yo³nia²-le⁴ ncjain¹, cˀoa⁴ tsa³ve³xcon¹ Ni³na¹.
REV 11:17 Qui³tso²: Ti³vˀai²-lai²⁴jin⁴ cjoa⁴nta³, Señor Ni³na¹ xi³ va³te²xo³mai³ nca³yi³je³, nca³ ji³ xi³ ti³jnai³, cˀoa⁴ xi³ tsa³qui³jnai³, cˀoa⁴ xi³ cjoa²ˀai⁴-ni³, nca³ je³qui³chjoai¹³ je² cjoa⁴te¹xo³ma³-li⁴ xi³ nˀion¹ ncˀa³, cˀoa⁴ je³tsa³ca³te²xo³mai³.
REV 11:18 Coan³jti³-le⁴ na⁴xi⁴na³nta¹, cˀoa⁴ je² cjoa⁴jti³-li⁴ je³ja³ˀai³, cˀoa⁴ je² ni⁴čhjin³-le⁴ cˀia⁴ nca³ cˀoai⁴-le⁴ cjoa⁴ñˀain³ je² xi³ cˀen³, cˀoa⁴ je² ni⁴čhjin³ nca³ cˀoe¹chji¹-lai⁴ je² cho⁴ˀnta³-li⁴ je² xi³ qui³nchja⁴ya³, cao⁴ cho⁴ta⁴-le⁴ Cristo, cao⁴ xi³ ve³xcon¹ jan³ˀain¹-li⁴, ˀnti¹xti³ cao⁴ xi³ jchi¹nca³, cˀoa⁴ je² ni⁴čhjin³ nca³ si⁴qui³tsoin¹³ je² xi³ si⁴²qui³tson¹ son³ˀnte³.
REV 11:19 Je² yo⁴nco⁴-le⁴ Ni³na¹ qui³sˀe³ti⁴xˀa⁴ ya⁴ ncˀa³jmi³, cˀoa⁴ je² ca²xa⁴ jña³ nca³ qui³jna³ya³ en¹-le⁴ coan³tsen³ ya⁴³ yo⁴nco⁴-le⁴. Jo³ nca³ coan³fa³te³ lˀi¹chˀaon⁴ cao⁴ jta⁴ cao⁴ chˀaon⁴ cao⁴ chaon¹ cao⁴ jtsi¹lao⁴tsian³.
REV 12:1 Jnco³ choa⁴ xi³ tse³, coan³tsen³ ya⁴ ncˀa³jmi³. Jnco³ chjon⁴² xi³ yˀa³cja¹-ni³ tsˀoi¹, cˀoa⁴ je² sa¹ ya⁴nqui³ ntso⁴co⁴, cˀoa⁴ jnco³ corona tji¹son² jco⁴ xi³ te³jao² ni³ño³ tjio¹tˀa³.
REV 12:2 Yˀa³ ˀnti¹ chjon⁴²-ve⁴, jo³ nca³ nˀion¹ qui³squi³ˀntia¹ nca³ coan³chan⁴²-le⁴. A³li² to⁴cˀoa⁴cji³ cjoa⁴ñˀain³ tsa³cja³ˀa¹ nca³ tsa³cˀe¹ ˀnti¹.
REV 12:3 Coan³tsen³ nqui²jnco³ choa⁴ ya⁴ ncˀa³jmi³. Coe⁴-ni³ jnco³ cho⁴toan¹ xi³ nˀion¹ je³, xi³ ni² cji³, xi³ tjin¹-le⁴ ña³to³ jco⁴ cao⁴ te³ nčha⁴, cˀoa⁴ ya⁴ jco⁴ ña³to³ corona tjio¹son².
REV 12:4 Je² nti³tsˀin³ qui³squi³ˀnto¹jve³ jnco³ ya² xi³ ma³-ni³ jan² ya³ ni³ño³ xi³ tjio¹ ncˀa³jmi³, cˀoa⁴ tsa³cˀe¹tsao³ tˀa³na³nqui³. Cˀoa⁴ je² cho⁴toan¹-ve⁴ tsa³ca³sen²jna³ˀnta³ je² chjon⁴² xi³ me³ vˀe¹ ˀnti¹, jme¹-ni³ nca³ squi⁴ne⁴-si¹ni³ ˀnti¹-le⁴ cˀia⁴ nca³ jtsin¹.
REV 12:5 Cˀoa⁴ je² tsa³cˀe¹ jnco³ ˀnti¹xˀin⁴, jña³-le⁴ xi³ coa⁴te²xo³ma³-le⁴ nca³tsˀi³ cho⁴ta⁴ cao⁴ ya¹jti³ xi³ qui⁴cha⁴. Cˀoa⁴ qui³chjoe¹mi³ ˀnti¹-le⁴ nqui³xcon⁴ Ni³na¹ jña³ ti¹jna³ ya¹xi²le⁴-le⁴.
REV 12:6 Je² chjon⁴²-ve⁴ tsa³nca³ jña³ tˀa³xin²tˀa³, jña³ ˀnte³ xi³ Ni³na¹ tsa³ca¹nta³-le⁴, jme¹-ni³ nca³ ya⁴ coa⁴jnqui³ˀa³-si¹ni³ jnco³ jmi³ cao⁴-ni³ jao² ciento cao⁴ jan²can³ ni⁴čhjin³.
REV 12:7 Cˀoa⁴ coan³ jnco³ cjoa⁴jchan¹ xi³ nˀion¹ coan³ ya⁴ ncˀa³jmi³. Miguel cao⁴ a²ncje⁴-le⁴ qui³scan³cao⁴ je² cho⁴toan¹. Cˀoa⁴ qui³scan³ cho⁴toan¹-vi⁴ cao⁴ a²ncje⁴-le⁴.
REV 12:8 Li²coi³ qui³njen³-le⁴, ni⁴ˀnte³-le⁴jin² ti⁴coan³sjai³-ni³le⁴ ya⁴ ncˀa³jmi³.
REV 12:9 Qui³cha³ni²tˀa³xin² je² cho⁴toan¹-ve⁴, je² ye⁴ jchi¹nca³ xi³ cˀoa⁴tsa³cˀin² je² nai⁴² cao⁴ Satanás, jña³-le⁴ xi³ vˀa³na⁴cha⁴ nca³tsˀi³. Qui³ni²cˀa³tjen⁴nqui³ ya⁴ son³ˀnte³, cˀoa⁴ a²ncje⁴-le⁴ qui³tsao³cao⁴.
REV 12:10 Qui³nčhˀoe³jncoa³ jta⁴ nˀion¹ ya⁴ ncˀa³jmi³, xi³ qui³tso²: Ntˀai⁴-vi⁴ntai⁴ je³ja³ˀai³ cjoa⁴vi³tjo³ntjai², cao⁴ nca³nˀion¹, cao⁴ cjoa⁴te¹xo³ma³-le⁴ Ni³na¹-na¹, cao⁴ cjoa⁴te¹xo³ma³-le⁴ Cristo-le⁴, nca³ je² nai⁴² xi³ tsa³ca¹nqui³ ntsˀe³² je³qui³ni²cˀa³tjen⁴nqui³, jña³-le⁴ xi³ tsa³ca¹nqui³ ntsˀe³² nqui³xcon⁴ Ni³na¹-na¹ ni⁴čhjin³ cao⁴ ni⁴tjen⁴.
REV 12:11 Cˀoa⁴ je² ntsˀe³² qui³si³qui³njen³-le⁴ xi³ to⁴tˀa³tsˀe⁴ je² njin¹-le⁴ je² Va³rre², cˀoa⁴ xi³ to⁴tˀa³tsˀe⁴ je² en¹-le⁴ xi³ qui³tsjoa³. Li²coi³ coan³tsjoa³que³ cjoa⁴vi³jna³chon³-le⁴ nta³ tsa² qui³ni²cˀen³.
REV 12:12 Xi³ to⁴coi³-vi⁴, ca²ta³ma³tsjoa³-no³ ncˀa³jmi³ cao⁴ xi³ ya⁴ ti³yo³. Ma⁴-xo¹ni³ xi³ tjio¹ son³ˀnte³ cao⁴ ya⁴ nta¹chi³con³, nca³ je² nai⁴² je³cˀoa⁴-sˀin² ji³tjo³jen³jin³-no³ nca³ jon². A³li² to⁴cˀoa⁴cji³ jti³ ma³-le⁴, nca³ ve³ nca³ to⁴choa³ ni⁴čhjin³ tjin¹-le⁴.
REV 12:13 Cˀia⁴ nca³ tsa³ve³ je² cho⁴toan¹-ve⁴ nca³ je³cˀoa⁴-sˀin² qui³ni²cˀa³tjen⁴nqui³ son³ˀnte³, tsa³nca³tjen⁴nqui³-le⁴ je² chjon⁴² xi³ tsa³cˀe¹ jnco³ ˀnti¹xˀin⁴.
REV 12:14 Cˀoa⁴ je² chjon⁴²-ve⁴ qui³tsˀai²-le⁴ jao² jnca³-le⁴ ja⁴tse³, jme¹-ni³ nca³ coai⁴tjen⁴ tˀa³xin²-si¹ni³le⁴ je² ye⁴-ve⁴. Qui³tjen⁴ ya⁴ ˀnte³ tˀa³xin²tˀa³, ya⁴ ˀnte³ jña³ nca³ vi³jnchi³ˀa² xi³ jnco³ ni⁴čhjin³, xi³ jao² ni⁴čhjin³, cao⁴ xi³ to⁴va³sen³ ni⁴čhjin³.
REV 12:15 Cˀoa⁴ je² ye⁴-ve⁴ na³nta¹ tsa³cˀa³sje³-ni³ tsˀoa³ jo³-ni³ nta¹je⁴ jton⁴ ya¹tsˀin³ chjon⁴²-ve⁴, jme¹-ni³ nca³ coai⁴cao⁴-si¹ni³ nta¹je⁴.
REV 12:16 Cˀoa⁴ je² na³nqui³ tsa³ca³sen¹cao⁴ je² chjon⁴²-ve⁴, je² na³nqui³ qui³tjo³ˀai², ya⁴ qui³sˀen³ nta¹je⁴ xi³ tsa³cˀa³sje³-ni³ tsˀoa³ je² cho⁴toan¹.
REV 12:17 Cˀia⁴ je² cho⁴toan¹-ve⁴ a³li² cˀoa⁴cji³ coan³jti³que³ chjon⁴²-ve⁴. Qui³ sˀin¹ cjoa⁴jchan¹, co²ntran⁴ qui³-le⁴ je² xi³cˀa³ ntje⁴-le⁴ chjon⁴²-ve⁴, jña³-le⁴ xi³ si¹tjo³son² je² cjoa⁴te¹xo³ma³-le⁴ Ni³na¹, cˀoa⁴ tsjoa¹ en¹ tˀa³tsˀe⁴ Jesucristo.
REV 13:1 An³ tsa³ca²sen⁴jna³jian³ ya⁴son² tso⁴mi¹ xi³ tsˀe⁴ nta¹chi³con³. Cˀoa⁴ tsa³ˀve³jncoa³ cho⁴ xi³ ji³tjo³mi³jin³ nta¹chi³con³, xi³ tjin¹-le⁴ ña³to³ jco⁴ cao⁴ te³ nčha⁴, cˀoa⁴ ya⁴son² nčha⁴-le⁴ te³ corona, cˀoa⁴ ya⁴jon³ jco⁴ tji¹tˀa³ jan³ˀain¹ xi³ nchja⁴ˀaon³.
REV 13:2 Je² cho⁴ xi³ tsa³ˀve³ cˀoa⁴cji³ xa³ˀi³nto³ cji³, cˀoa⁴ je² ntso⁴co⁴ jo³-ni³ tsˀe⁴ oso, cˀoa⁴ je² tsˀoa³ jo³-ni³ tsˀoa³ xa³. Je² cho⁴toan¹-ve⁴ qui³tsjoa³-le⁴ cho⁴-ve⁴ je² nca³nˀion¹-le⁴, cao⁴ je² ya¹xi²le⁴-le⁴, cao⁴ tse³ cjoa⁴te¹xo³ma³.
REV 13:3 Tsa³ˀve³jncoa³ jco⁴ jo³-sˀin² nca³ qui³tsin²ˀaon³ sa³ˀnta³ nca³ cˀen³, cˀoa⁴ ya⁴ jña³ qui³tsin²ˀaon³ coan³nta³-ni³. Jo³ nca³ to⁴coan³xcon¹-le⁴ nca³tsˀi³ son³ˀnte³ xi³ tˀa³tsˀe⁴ cho⁴-ve⁴.
REV 13:4 Cˀoa⁴ nca³tsˀi³ tsa³ve³xcon¹ je² cho⁴toan¹-ve⁴ xi³ cˀoa⁴-sˀin² qui³tsjoa³-le⁴ cjoa⁴te¹xo³ma³-le⁴ je² cho⁴ xi³jnco³. Cˀoa⁴ tsa³ve³xcon¹ je² cho⁴, qui³tso²: ˀya¹ xi³ ti⁴cˀoa⁴cji³-ni³le⁴ cho⁴-vi⁴, cˀoa⁴ ˀya¹ xi³ coan⁴ scan³cao⁴.
REV 13:5 Qui³tjo³ˀai²ˀnte³-le⁴ tsˀoa³ nca³ coi⁴nchja⁴ en¹ncˀa³ xi³ qui³nchja⁴ˀaon³. Qui³tsˀai²-le⁴ cjoa⁴te¹xo³ma³ nca³ si⁴²xa¹ ña³chan²jao² sa¹.
REV 13:6 Qui³sco³ˀai² tsˀoa³ qui³nchja⁴ˀaon³-le⁴ Ni³na¹. Qui³nchja⁴ˀaon³-le⁴ jan³ˀain¹-le⁴ cao⁴ ntˀia³na³jño³-le⁴, cao⁴ xi³ tjio¹ ya⁴ ncˀa³jmi³.
REV 13:7 Qui³tsˀai²ˀnte³-le⁴ nca³ qui³si³toan¹cao⁴ cho⁴ta⁴-le⁴ Cristo, cˀoa⁴ nca³ qui³si³qui³njen³-le⁴. Cˀoa⁴-ti⁴ qui³tsˀai²-le⁴ cjoa⁴te¹xo³ma³ xi³ tˀa³tsˀe⁴ nca³yi³je³ ntje⁴, cao⁴ nca³yi³je³ na⁴xi⁴na³nta¹, cao⁴ nca³yi³je³ en¹, cao⁴ nca³yi³je³ ˀnte³.
REV 13:8 Nca³tsˀi³ xi³ tjio¹ son³ˀnte³ tsa³ve³xcon¹, jña³-le⁴ jan³ˀain¹ xi³ li²coi³ tjio¹tˀa³ xon⁴-le⁴ cjoa⁴vi³jna³chon³ xi³ tsˀe⁴ je² Va³rre², xi³ cˀoa⁴-sˀin² cˀen³ sa³ˀnta³ nca³ to²tsˀin³-le⁴ cjoa⁴.
REV 13:9 Tsa² ˀya³-ni³ve⁴ xi³ tjin¹ xo⁴ño³, ca²ti³ncha²ño³.
REV 13:10 Je² xi³ cˀoa⁴-sˀin² ca³ni¹jin³ cjoa⁴ñˀain³, cˀoa⁴-ti⁴sˀin² fi²jin³ cjoa⁴ñˀain³. Je² xi³ qui⁴cha⁴ si¹cˀen³-ni³, tjin¹ne²-le⁴ nca³ ti⁴cˀoa⁴-sˀin² coi⁴ya²-ni³. To⁴coi³ cjoa⁴-vi⁴ nca³ ma³chjen¹-le⁴ cho⁴ta⁴-le⁴ Cristo cjoa⁴tse³jta³ cao⁴ xi³ ma³cjain¹-le⁴.
REV 13:11 Coan³scan³-ni³ tsa³ˀve³ nqui²jnco³ cho⁴ xi³ ji³tjo³mi³jin³-ni³ na³nqui³. Tjin¹-le⁴ jao² nčha⁴ xi³ cˀoa⁴cjoan³ tsˀe⁴ va³rre² cjoan³, to⁴nca³ qui³nchja⁴ jo³-ni³ cho⁴toan¹.
REV 13:12 Cˀoa⁴-sˀin² va³te¹xo³ma³ jo³-sˀin² tsa³ca³te¹xo³ma³ ti¹tjon² cho⁴ ya⁴ nqui³xcon⁴ nca³ je². Cˀoa⁴-sˀin² vˀe¹ne²-le⁴ je² son³ˀnte³ cao⁴ je² xi³ tjio¹ son³ˀnte³ nca³ scoe⁴xcon¹ je² cho⁴ xi³ ti¹tjon², jña³-le⁴ xi³ cˀoa⁴-sˀin² coan³nta³-ni³ jña³ nca³ qui³tsin²ˀaon³.
REV 13:13 Tse³ cjoa⁴xcon¹ xi³ sˀin¹, sa³ˀnta³ lˀi¹ ca³ni¹jen³-ni³ ncˀa³jmi³ son³ˀnte³ nqui³xcon⁴ cho⁴ta⁴.
REV 13:14 Vˀa³na⁴cha⁴-le⁴ je² xi³ tjio¹ son³ˀnte³ cao⁴ je² cjoa⁴xcon¹ xi³ qui³tsˀai²ˀnte³-le⁴ nca³ qui³sˀin³ nqui³xcon⁴ cho⁴-ve⁴. Vˀe¹ne² je² xi³ tjio¹ son³ˀnte³ nca³ ca²ta³si¹nta³ xco¹son² xi³ cˀoa⁴cji³-ni³le⁴ cho⁴ xi³ qui³tsin²ˀaon³-ni³ qui⁴cha⁴, to⁴nca³ tsa³cˀe²jna³con³.
REV 13:15 Cˀoa⁴ qui³tsˀai²ˀnte³-le⁴ nca³ si⁴²cˀe¹jna³con³ je² xco¹son² xi³ tsˀe⁴ cho⁴-ve⁴, jme¹-ni³ nca³ je² xco¹son²-le⁴ cho⁴-ve⁴ coi⁴nchja⁴-si¹ni³. Tsa² jnco³ xi³ tsi² scoe⁴xcon¹ je² xco¹son² xi³ tsˀe⁴ cho⁴-ve⁴, ni²cˀen³-ni³.
REV 13:16 Tsa³cˀe¹ne² nca³ qui³sˀe³yo³tˀa³-le⁴ choa⁴ nca³tsˀi³ ntsja³ nca³qui²xi⁴ cao⁴ tjen³, je² xi³ xti³ cao⁴ xi³ jchi¹nca³, je² xi³ nchi⁴na¹ cao⁴ xi³ yo⁴ma⁴, je² xi³ tjio¹ntai¹ cao⁴ xi³ cho⁴ˀnta³.
REV 13:17 Ni⁴ˀya³-jin² xi³ coan⁴ coa³tse³, ni⁴coan⁴-jin² coa⁴te²na³, tsa² tsi² tjio¹choa⁴ cao⁴ je² jan³ˀain¹-le⁴ cho⁴-ve⁴ a³xo⁴ je² número-le⁴ jan³ˀain¹-le⁴.
REV 13:18 Je²-vi⁴ xi³ cjoa⁴ˀi³sen³ta³con². Je² xi³ tjin¹-le⁴ cjoa⁴fa³ˀai³tsjen³, ca²ta³vˀe¹xqui⁴ je² número-le⁴ cho⁴-ve⁴, nca³ número-le⁴ cho⁴ta⁴ ni¹. Coi³ número-le⁴ cho⁴-ve⁴ jaon³ ciento cao⁴ jan²can³ cao⁴-ni³ jaon³.
REV 14:1 Qui³sco²tsen³, coe⁴-ni³ je² Va³rre² ya⁴ ti¹jna³son² ni³nto³ xi³ Sión ˀmi², cˀoa⁴ tjio¹cao⁴ nca³ je² jnco³ ciento cao⁴ ña³chan²ño³ jmi³ xi³ tjin¹-le⁴ jan³ˀain¹-le⁴ Va³rre² cao⁴ jan³ˀain¹-le⁴ Nˀai³-le⁴. Tjio¹tˀa³ ya⁴ tjen³.
REV 14:2 Qui³nčhˀoe³jncoa³ jta⁴ xi³ ji³nčhoa³-ni³ ncˀa³jmi³, jo³ na³nta¹ xi³ nˀion¹ ti¹fa³ne³, cˀoa⁴ jo³-sˀin² fa³ne³ya³ chˀaon⁴ xi³ nˀion¹ tsin³. Je² xi³ qui³nčhˀoe³ jo³-ni³ xi³ si¹cja³ne³ arpa ma³.
REV 14:3 Qui³se³ jnco³ jnta³ cho⁴tse⁴ nqui³xcon⁴ je² ya¹xi²le⁴, cˀoa⁴ nqui³xcon⁴ je² xi³ ño³ ma³ xi³ tjio¹con³, cao⁴ je² cho⁴ta⁴jchi¹nca³. Ni⁴ˀya³-jin² xi³ coan³-le⁴ jnta³-ve⁴, to⁴je² xi³ jnco³ ciento cao⁴-ni³ ña³chan²ño³ jmi³ ma³-ni³, jña³-le⁴ xi³ cˀoa⁴-sˀin² coan³chji¹ntjai² ya⁴jin³ cho⁴ta⁴son³ˀnte³.
REV 14:4 Je²-vi⁴ xi³ tsi² tsa² ya¹nchjin¹ coan³cha³jnqui³cao⁴ nca³ tsje³ ni¹. Je²-vi⁴ xi³ fi²tjen⁴nqui³-le⁴ je² Va³rre² to⁴jña³-ni³ve⁴ nca³ coai⁴. Je²-vi⁴ xi³ coan³chji¹ntjai² ya⁴jin³-le⁴ cho⁴ta⁴, nca³ ˀnti¹tjon² coan³ xi³ tsˀe⁴ Ni³na¹ cao⁴ je² Va³rre².
REV 14:5 Cˀoa⁴ tsˀoa³ ni⁴jme³-jin² cjoa⁴nti³so³ qui³nchja⁴, nca³ je² xi³ tsi²jme³ je¹ tjin¹-le⁴ nqui³xcon⁴ je² ya¹xi²le⁴-le⁴ Ni³na¹.
REV 14:6 Tsa³ˀve³ nqui²jncoa³ a²ncje⁴ xi³ qui³tjen⁴jin³va³sen³-le⁴ ncˀa³jmi³, xi³ tjin¹-le⁴ je² en¹nta³ xi³ tjin¹ nca³ntsjai², nca³ coi⁴nchja⁴ya³jin³-le⁴ je² xi³ tjio¹ son³ˀnte³, cao⁴ nca³yi³je³ na³nqui³, cao⁴ nca³yi³je³ ntje⁴, cao⁴ nca³yi³je³ en¹, cao⁴ nca³yi³je³ na⁴xi⁴na³nta¹.
REV 14:7 Nˀion¹ qui³nchja⁴: Jcha⁴xcon¹³ Ni³na¹, chˀa⁴sje³je³yao³, nca³ je² hora-le⁴ nčhoa¹čhian³ nca³ tsjoa¹ cjoa⁴ñˀain³. Jcha⁴xcon¹³ je² xi³ qui³si³nta³ ncˀa³jmi³, cao⁴ son³ˀnte³, cao⁴ nta¹chi³con³, cao⁴ nca⁴jao⁴ jña³ vi³tjo³ na³nta¹.
REV 14:8 Cˀoa⁴ nqui²jnco³ a²ncje⁴ qui³tjen⁴nqui³-le⁴ qui³tso²: Je³ca²vi³xo¹jen³, je³ca²vi³xo¹jen³ Babilonia, je² na⁴xi⁴na³nta¹ xi³ cˀoa⁴-sˀin² to⁴je³, nca³ je² xi³ qui³si³cˀi³ nca³qui³jnta² ˀnte³ je² vino xi³ tsˀe⁴ cjoa⁴cha³jnqui³-le⁴ xi³ sˀe⁴-le⁴ cjoa⁴jti³-le⁴ Ni³na¹.
REV 14:9 Je² xi³ ma³jan²-ni³ a²ncje⁴ qui³tjen⁴nqui³-le⁴, nˀion¹ qui³nchja⁴: Tsa² ˀya³-ni³ve⁴ xi³ ve³xcon¹ je² cho⁴-ve⁴ cao⁴ xco¹son²-le⁴, cˀoa⁴ tsa² cjoe¹ choa⁴-le⁴ to²tjen³ cao⁴ ya⁴ ntsja³,
REV 14:10 cˀoa⁴-ti⁴ je²-vi⁴ scˀoi¹ je² vino xi³ tsˀe⁴ cjoa⁴jti³-le⁴ Ni³na¹, jña³-le⁴ xi³ qui³sˀe³ya³ je² tasa-ve⁴ xi³ ña³qui³ coi³ cjoa⁴jti³-le⁴ Ni³na¹. Sˀe⁴-le⁴ cjoa⁴ñˀain³, cao⁴ lˀi¹, cao⁴ azufre nqui³xcon⁴ je² a²ncje⁴ xi³ tsje³, cˀoa⁴ nqui³xcon⁴ je² Va³rre².
REV 14:11 Je² ni⁴ˀnti⁴-le⁴ cjoa⁴ñˀain³-le⁴ coai⁴mi³ nca³ntsjai² ni⁴čhjin³. Je² xi³ ve³xcon¹ je² cho⁴-ve⁴ cao⁴ xco¹son²-le⁴ li²coi³ si¹cja¹ya³ ni⁴čhjin³ cao⁴ ni⁴tjen⁴, cˀoa⁴ to⁴ˀya³-ni³ve⁴ xi³ cjoe¹ choa⁴-le⁴ je² jan³ˀain¹-le⁴ li²coi³ si¹cja¹ya³.
REV 14:12 Xi³ to⁴coi³ cjoa⁴-vi⁴ nca³ cjoa⁴tse³jta³ xi³ ma³chjen¹-le⁴ cho⁴ta⁴-le⁴ Cristo. Ma³chjen¹-le⁴ nca³ si¹tjo³son² cjoa⁴te¹xo³ma³-le⁴ Ni³na¹, cˀoa⁴ nca³ ma³cjain¹-le⁴ tˀa³tsˀe⁴ Jesús.
REV 14:13 Qui³nčhˀoe³jncoa³ jta⁴ xi³ ji³nčhoa³-ni³ ncˀa³jmi³, xi³ qui³tso²-na³: Chji¹tˀai³: Jo¹ to⁴nta³-le⁴ je² xi³ cˀen³ je² ni⁴čhjin³ xi³ fi²-sa³ni³, xi³ vi³ya³ nca³ ma³cjain¹-le⁴ tˀa³tsˀe⁴ Nai³-na¹. Jaon³, tso² je² Espíritu Santo, nca³ si⁴²cja¹ya³ xi³ tˀa³tsˀe⁴ xa¹-le⁴. Je² xa¹-le⁴ fi²tjen⁴nqui³-le⁴.
REV 14:14 Qui³sco²tsen³. Coe⁴-ni³ jnco³ yo³jvi³ čhoa³. Cˀoa⁴ ya⁴son² je² yo³jvi³-vi⁴ ti¹jna³ jnco³ xi³ cˀoa⁴cji³ ˀnti¹-le⁴ cho⁴ta⁴ cji³. Tji¹son² jco⁴ jnco³ corona xi³ taon⁴si³ne², cˀoa⁴ cjia³ ntsja³ jnco³ qui⁴cha⁴ˀva⁴ xi³ yao³.
REV 14:15 Nqui²jnco³ a²ncje⁴ ji³tjo³-ni³ ya⁴ yo⁴nco⁴, nˀion¹ qui³nchja⁴-le⁴ je² xi³ ti¹jna³son² yo³jvi³-ve⁴: Cha⁴ni²sˀen³jin³ qui⁴cha⁴ˀva⁴-li⁴, cˀoa⁴ tˀe²xcoi¹³, nca³ je³ji³cho²-li² ni⁴čhjin³-le⁴ nca³ sˀe³xco¹, nca³ je³coan³jcha¹ je² ntje⁴-le⁴ son³ˀnte³.
REV 14:16 Je² xi³ ti¹jna³son² yo³jvi³ qui³sca³ni¹jin³ qui⁴cha⁴ˀva⁴-le⁴ nca³qui³jnta², cˀoa⁴ nca³qui³jnta² son³ˀnte³ qui³sˀe³xco¹.
REV 14:17 Nqui²jnco³ a²ncje⁴ ji³tjo³-ni³ ya⁴ yo⁴nco⁴ xi³ ti¹jna³ ya⁴ ncˀa³jmi³, cˀoa⁴-ti⁴ tjin¹-le⁴ jnco³ qui⁴cha⁴ˀva⁴ xi³ yao³.
REV 14:18 Nqui²jnco³ a²ncje⁴ ji³tjo³-ni³ ya⁴ son²xta², xi³ tjin¹-le⁴ nca³nˀion¹ xi³ tˀa³tsˀe⁴ je² lˀi¹. Nˀion¹ qui³nchja⁴-le⁴ je² xi³ tjin¹-le⁴ qui⁴cha⁴ˀva⁴ xi³ yao³, qui³tso²: Cha⁴ni²sˀen³jin³ qui⁴cha⁴ˀva⁴-li⁴ xi³ yao³, cˀoa⁴ ti⁴cha¹tˀai³ en¹-le⁴ to³-le⁴ ya¹ uva xi³ tsˀe⁴ son³ˀnte³-ve⁴, nca³ je³qui³chji² to³tse⁴².
REV 14:19 Je² a²ncje⁴-ve⁴ qui³sca³ni¹sˀen³jin³ qui⁴cha⁴ˀva⁴-le⁴ xi³ yao³ ya⁴ son³ˀnte³, cˀoa⁴ tsa³ca³te³tˀa³ to³-le⁴ ya¹ uva xi³ tsˀe⁴ son³ˀnte³. Je² to³tse⁴² qui³si³cˀa³tsao³jin³ je² ya¹tsˀion³ xi³ tsˀe⁴ cjoa⁴jti³-le⁴ Ni³na¹.
REV 14:20 Cˀoa⁴ je² ya¹tsˀion³ ti¹jna³ntai³-le⁴ na⁴xi⁴na³nta¹, ya⁴ qui³si³tsˀion³nta¹. Cˀoa⁴ ya¹tsˀion³-ve⁴ njin¹ ji³tjo³-ni³, sa³ˀnta³ je² freno-le⁴ je² na⁴xin¹. Ja⁴me³ jan² ciento jmi³ metro ji³tjo³-ni³.
REV 15:1 Tsa³ˀve³ nqui²jncoa³ cjoa⁴xcon¹, xi³ nˀion¹ tse³, xi³ nˀion¹ xcon¹, ya⁴ ncˀa³jmi³. Ña³to³ ma³-ni³ a²ncje⁴ xi³ tjin¹-le⁴ ña³to³ cjoa⁴ñˀain³ xi³ cjoe⁴tˀa³-ni³. Coi³ xi³ cjoe⁴tˀa³-ni³ cjoa⁴jti³-le⁴ Ni³na¹.
REV 15:2 Cˀoa⁴ tsa³ˀve³jncoa³ nta¹chi³con³ xi³ cho⁴tsin¹ cji³, tji¹tsˀo¹jin³ cao⁴ lˀi¹. Je² xi³ qui³si³qui³njen³-le⁴ je² cho⁴-ve⁴, cao⁴ xco¹son²-le⁴, cao⁴ choa⁴-le⁴, cao⁴ je² número-le⁴ jan³ˀain¹-le⁴, ya⁴ tsa³ca³tio²jin³ nta¹chi³con³ xi³ cho⁴tsin¹. Tjin¹-le⁴ arpa xi³ tsˀe⁴ Ni³na¹.
REV 15:3 Cˀoa⁴ se³ je² jnta³-le⁴ Moisés, cho⁴ˀnta³-le⁴ Ni³na¹, cao⁴ je² jnta³-le⁴ je² Va³rre², tjio¹tso²: Nˀion¹ tse³ xcon¹ je² xa¹-li⁴, Señor Ni³na¹ xi³ va³te²xo³mai³ nca³yi³je³. Je² ntia⁴²-li⁴ ña³qui³ cˀoa⁴tjin¹, ña³qui³ cjoa⁴qui²xi⁴. Ji³ xi³ nca³jco⁴-le⁴ cho⁴ta⁴-le⁴ Cristo.
REV 15:4 ˀya¹ xi³ tsi² tsa³cjon¹-li², Señor, ˀya¹ xi³ tsi² cˀoa⁴sje³je³ya³ jan³ˀain¹-li⁴. To⁴jnco³ ji³ xi³ tsjai³. To⁴coi³ nca³yi³je³ ˀnte³ cjoa⁴ˀai¹-ni³, scoe⁴xcon¹-li². Je² cjoa⁴qui²xi⁴-li⁴ je³cji³ma³tsen³.
REV 15:5 Coan³scan³-ni³ je² cjoa⁴-vi⁴ qui³sco²tsen³. Coe⁴-ni³ je² yo⁴nco⁴ jña³ tjio¹ je² en¹-le⁴ Ni³na¹ qui³tjo³ˀai² ya⁴ ncˀa³jmi³.
REV 15:6 Ji³tjo³-ni³ yo⁴nco⁴-le⁴ Ni³na¹ je² ña³to³ a²ncje⁴ xi³ tjin¹-le⁴ je² ña³to³ cjoa⁴ñˀain³. Yˀa³cja¹ na³jño³ lino xi³ tsje³ xi³ čhoa³, cˀoa⁴ tjio¹cja¹son²-le⁴ nta³ni⁴sin⁴-le⁴ nˀo¹pa²ño⁴ xi³ taon⁴si³ne².
REV 15:7 Jnco³ xi³ ño³ ma³ xi³ tjio¹con³ qui³tsjoa³-le⁴ je² ña³to³ a²ncje⁴ ña³to³ cho⁴tsin¹ xi³ taon⁴si³ne², xi³ tjio¹qui³tse³-ni³ cjoa⁴jti³-le⁴ Ni³na¹ xi³ ti¹jna³con³ nca³ntsjai² ni⁴čhjin³.
REV 15:8 Xi³ to⁴tˀa³tsˀe⁴ je² cjoa⁴je³ya³-le⁴ Ni³na¹ cˀoa⁴ xi³ to⁴tˀa³tsˀe⁴ nca³nˀion¹-le⁴, yo⁴nco⁴-ve⁴ ña³qui³ qui³tse³-ni³ ni⁴ˀnti⁴. Ni⁴ˀya³-jin² xi³ coan³ qui³sˀen³ ya⁴ yo⁴nco⁴, sa³ˀnta³ nca³ je³coan³jnco³ je² ña³to³ cjoa⁴ñˀain³ xi³ tsˀe⁴ ña³to³ a²ncje⁴.
REV 16:1 Qui³nčhˀoe³jncoa³ jta⁴ ya⁴ yo⁴nco⁴-le⁴ Ni³na¹ xi³ qui³tso²-le⁴ je² ña³to³ a²ncje⁴: Ta³nquion¹³, tˀe²jten⁴ntjao²³ je² ña³to³ cho⁴tsin¹ xi³ tsˀe⁴ cjoa⁴jti³-le⁴ Ni³na¹ ya⁴son² son³ˀnte³.
REV 16:2 Qui³ je² a²ncje⁴ xi³ ti¹tjon², tsa³cˀe¹jten⁴ntjai² je² cho⁴tsin¹-le⁴ ya⁴son² son³ˀnte³. Ja³ˀai³ jnco³ cjoa⁴ñˀain³ xi³ nˀion¹ tse³, cˀoa⁴ xi³ qui³si³qui²ˀaon³ je² cho⁴ta⁴ xi³ tjin¹-le⁴ je² choa⁴-le⁴ je² cho⁴, xi³ tsa³ve³xcon¹ xco¹son²-le⁴.
REV 16:3 Je² xi³ ma³jao²-ni³ a²ncje⁴ tsa³cˀe¹jten⁴ntjai² cho⁴tsin¹-le⁴ ja⁴jin³ nta¹chi³con³. Coan³ njin¹ jo³-ni³ tsa² tsˀe⁴ jnco³ cˀen³. Nca³tsˀi³ xi³ tjio¹con³ ya⁴jin³ nta¹chi³con³ cˀen³.
REV 16:4 Je² xi³ ma³jan²-ni³ a²ncje⁴ tsa³cˀe¹jten⁴ntjai² cho⁴tsin¹-le⁴ ja⁴jin³ nta¹je⁴, cao⁴ ya⁴ jña³ tjio¹tjo³ na³nta¹. Coan³ njin¹.
REV 16:5 Qui³nčhˀoe³-le⁴ je² a²ncje⁴ xi³ tsˀe⁴ na³nta¹, qui³tso²: Cjai¹nca³ tjin¹-li² cjoa⁴qui²xi⁴ Señor, ji³ xi³ ti³jnai³, xi³ tsa³qui³jnai³, ji³ xi³ tsjai³, nca³ cˀoa⁴-sˀin² qui³tsˀai²-lai⁴ cjoa⁴ñˀain³ tˀa³tsˀe⁴ je² cjoa⁴-vi⁴.
REV 16:6 Nca⁴ je² xi³ tsa³cˀe¹jten⁴ njin¹-le⁴ cho⁴ta⁴-le⁴ Cristo cao⁴ je² xi³ qui³nchja⁴ya³, cˀoa⁴-ti⁴ ji³ qui³tsˀai²-lai⁴ nca³ qui³tsˀi³ njin¹. Cˀoa⁴-sˀin² va³quin²-le⁴.
REV 16:7 Cˀoa⁴ qui³nčhˀoe³ nqui²jnco³-nia³ ya⁴ son²xta² xi³ qui³tso²: Ña³qui³ cˀoa⁴tjin¹ Señor Ni³na¹ xi³ va³te²xo³mai³ nca³yi³je³, je² cjoa⁴ñˀain³ xi³ vˀai²³ ña³qui³ cjoa⁴qui²xi⁴-ni¹, ña³qui³ cˀoa⁴tjin¹.
REV 16:8 Je² xi³ ma³ño³-ni³ a²ncje⁴ tsa³cˀe¹jten⁴ntjai² cho⁴tsin¹-le⁴ ya⁴ son²ncˀa³-le⁴ tsˀoi¹. Cˀoa⁴-sˀin² qui³tsˀai²-le⁴ nca³ tsa³ca³ca¹ cho⁴ta⁴ cao⁴ lˀi¹.
REV 16:9 Cho⁴ta⁴ qui³ti²-ni³ cao⁴ ntoa¹nˀion¹, cˀoa⁴ qui³nchja⁴ˀaon³-le⁴ jan³ˀain¹-le⁴ Ni³na¹ xi³ tjin¹-le⁴ nca³nˀion¹ xi³ tˀa³tsˀe⁴ je² cjoa⁴ñˀain³. Li²coi³ qui³si³cˀa³ntjai²ya³ cjoa⁴fa³ˀai³tsjen³-le⁴ nca³ tsa³cˀa³sje³je³ya³ Ni³na¹ tsa²cai³.
REV 16:10 Cˀoa⁴ je² xi³ ma³ˀaon²-ni³ a²ncje⁴ tsa³cˀe¹jten⁴ntjai² cho⁴tsin¹-le⁴ ya⁴son² ya¹xi²le⁴-le⁴ cho⁴-ve⁴. Je² ˀnte³-le⁴ coan³njion²-ni¹. Cho⁴ta⁴ qui³squi³ne³tjon² ni⁴jen⁴ nca³ cˀoa⁴-sˀin² aon³ coan³-le⁴.
REV 16:11 Qui³nchja⁴ˀaon³-le⁴ Ni³na¹ xi³ tsˀe⁴ ncˀa³jmi³ nca³ cˀoa⁴-sˀin² aon³ coan³-le⁴, nca³ tse³ cjoa⁴ñˀain³ xi³ tsa³cja³ˀa¹. Li²coi³ qui³si³cˀa³ntjai²ya³ cjoa⁴fa³ˀai³tsjen³-le⁴ xi³ tˀa³tsˀe⁴ cjoa⁴ xi³ qui³sˀin³.
REV 16:12 Je² xi³ ma³jaon³-ni³ a²ncje⁴ tsa³cˀe¹jten⁴ntjai² cho⁴tsin¹-le⁴ ya⁴jin³ je² nta¹je⁴ Eufrates. Je² na³nta¹-le⁴ qui³xi²ya³, jme¹-ni³ nca³ cˀoa⁴-sˀin² sˀe⁴nta³-si¹ni³ ntia⁴²-le⁴ cho⁴ta⁴ti¹tjon² xi³ nčhoa¹-ni³ jña³ nca³ tjo³-ni³ tsˀoi¹.
REV 16:13 Tsa³ˀve³ nca³ ji³tjo³-ni³ tsˀoa³ je² cho⁴toan¹, cao⁴ tsˀoa³ cho⁴ xi³jnco³, cao⁴ tsˀoa³ je² xi³ to⁴ˀen¹nti³so³ qui³nchja⁴ya³, ji³tjo³-ni³ jan² ntjao⁴ xi³ nta³jin³ xi³ cˀoa⁴cjoan³ xque⁴ cjoan³.
REV 16:14 Coi³ ntjao⁴ xi³ tsˀe⁴ nai⁴² xi³ nta³jin³, xi³ sˀin¹ cjoa⁴xcon¹, nca³ fi² cˀe¹xco¹ya³ cho⁴ta⁴ti¹tjon² xi³ tsˀe⁴ nca³qui³jnta² son³ˀnte³ xi³ tˀa³tsˀe⁴ cjoa⁴jchan¹ cˀia⁴ ni⁴čhjin³je³ xi³ tsˀe⁴ Ni³na¹ xi³ va³te¹xo³ma³ nca³yi³je³.
REV 16:15 Coe⁴-ni³ an³ nčhoa¹³ jo³-ni³ tsa² che¹. Jo¹ to⁴nta³-le⁴ je² xi³ ti¹jna³con³ˀnta³, xi³ si¹coi²nta⁴ na³jño³-le⁴, jme¹-ni³ nca³ tsi² cjoa¹jti²-si¹ni³, cˀoa⁴ scoe⁴-si¹ni³ cjoa⁴soa³-le⁴.
REV 16:16 Tsa³cˀe¹xco¹ ya⁴ ˀnte³ xi³ cˀoa⁴ ˀmi² Armagedón nca³ en¹ hebreo.
REV 16:17 Je² xi³ ma³ña³to³-ni³ a²ncje⁴ tsa³cˀe¹jten⁴ntjai² cho⁴tsin¹-le⁴ ya⁴ jin³sen¹. Jnco³ jta⁴ nˀion¹ ji³tjo³-ni³ yo⁴nco⁴ xi³ tsˀe⁴ ncˀa³jmi³, ya⁴ ya¹xi²le⁴-le⁴, qui³tso²: Je³coan³.
REV 16:18 Cˀia⁴ coan³fa³te³ lˀi¹chˀaon⁴, cao⁴ jta⁴, cao⁴ chˀaon⁴, cˀoa⁴ ja³ˀai³ jnco³ chaon¹ nˀion¹ xi³ tsi² cˀia³ cˀoa⁴coan³ sa³ˀnta³ nca³ tsa³ca³tio² cho⁴ta⁴ son³ˀnte³-vi⁴.
REV 16:19 Je² na⁴xi⁴na³nta¹ xi³ nˀion¹ je³ coan³xcoa⁴ jan² ya³ coan³, cˀoa⁴ nca³yi³je³ na⁴xi⁴na³nta¹ xi³ tsˀe⁴ xi³cˀa³ ˀnte³ qui³tsao³. Cˀoa⁴ Ni³na¹ ja³ˀai³tsjen³jin³-le⁴ je² Babilonia xi³ nˀion¹ je³ nca³ cˀoa⁴-sˀin² qui³tsjoa³-le⁴ cho⁴tsin¹-le⁴ xi³ tsˀe⁴ vino xi³ tsˀe⁴ cjoa⁴jti³-le⁴.
REV 16:20 Nca³yi³je³ ˀnte³ xi³ tjio¹jin³ nta¹chi³con³ qui³cha³, cˀoa⁴ je² ni³nto³ li²coi³ ti⁴coan³tsen³-ni³.
REV 16:21 Cˀoa⁴ ja⁴jon³ cho⁴ta⁴ qui³tsao³-ni³ ncˀa³jmi³ jtsi¹lao⁴ nˀion¹, jo³-ni³ aon²-la⁴ kilo ˀai¹. Cˀoa⁴ cho⁴ta⁴ qui³nchja⁴ˀaon³-le⁴ Ni³na¹ xi³ to⁴tˀa³tsˀe⁴ je² cjoa⁴ñˀain³ je² jtsi¹lao⁴, nca³ je² cjoa⁴ñˀain³-le⁴ nˀion¹ tse³ coan³.
REV 17:1 Ja³ˀai³ jnco³ xi³ ña³to³ ma³-ni³ a²ncje⁴ xi³ yˀa³ ña³to³ cho⁴tsin¹, qui³nchja⁴cao⁴-na³: Nčhoai¹³ i⁴-vi⁴, cˀoa⁴ coa³co³-le²³ je² cjoa⁴ñˀain³-le⁴ je² chjon⁴²cha³jnqui³ xi³ nˀion¹ sca¹-le⁴, xi³ ti¹jna³son² xi³ nˀion¹ ncjin² cˀa³ na³nta¹.
REV 17:2 Je² chjon⁴²-ve⁴ xi³ cho⁴ta⁴ti¹tjon² son³ˀnte³ qui³si³cha³jnqui³cao⁴, cˀoa⁴ je² xi³ tjio¹ son³ˀnte³ cji³ma³chˀi⁴-ni³ cao⁴ je² vino xi³ tsˀe⁴ cjoa⁴cha³jnqui³-le⁴.
REV 17:3 Cˀoa⁴ qui³cao⁴-na³ ya⁴ ˀnte³ tˀa³xin²tˀa³ nca³ ti¹jna³cao⁴-na³ je² Espíritu Santo. Tsa³ˀve³jncoa³ chjon⁴² xi³ ti¹jna³son² jnco³ cho⁴ xi³ ni² cji³, xi³ qui³tse³jon³ jan³ˀain¹ xi³ nchja⁴ˀaon³, cˀoa⁴ ña³to³ ma³ jco⁴, cˀoa⁴ te³ nčha⁴ tjin¹-le⁴.
REV 17:4 Je² chjon⁴²-ve⁴ yˀa³cja¹ ña³jño³ xi³ jco³ cji³ cao⁴ xi³ ni² cji³. Coan³nta³jon³-ni³ cao⁴ taon⁴si³ne², cao⁴ la⁴jao⁴ xi³ na⁴sca¹ cjoan³ cao⁴ to³fa³nqui³ xi³ čhoa³ cjoan³. Cjia³ ntsja³ jnco³ cho⁴tsin¹ xi³ taon⁴si³ne², tji¹qui³tse³-ni³ cjoa⁴nai⁴², cao⁴ cjoa⁴jnti¹ xi³ tsˀe⁴ cjoa⁴cha³jnqui³-le⁴.
REV 17:5 Ya⁴ tjen³ tji¹tˀa³ jnco³ jan³ˀain¹, jnco³ cjoa⁴ˀma³: Babilonia xi³ nˀion¹ je³, xi³ na⁴-le⁴ cho⁴ta⁴cha³jnqui³ cao⁴ cjoa⁴nai⁴² xi³ tsˀe⁴ son³ˀnte³.
REV 17:6 Tsa³ˀve³ chjon⁴²-ve⁴ nca³ chˀi⁴ cao⁴ njin¹-le⁴ cho⁴ta⁴-le⁴ Cristo, cao⁴ njin¹-le⁴ je² xi³ cˀen³ xi³ tˀa³tsˀe Jesús. Cˀia⁴ nca³ tsa³ˀve³ jo³ to⁴coan³xcon¹-na³.
REV 17:7 Cˀoa⁴ je² a²ncje⁴ qui³tso²-na³: A¹-ni³ nca³ ma³xcon¹-si¹ni³li². An³ cˀoa⁴xin¹-le²³ je² cjoa⁴ˀma³ xi³ tˀa³tsˀe⁴ chjon⁴²-vi⁴, cˀoa⁴ xi³ tˀa³tsˀe⁴ cho⁴ xi³ ti¹jna³son², xi³ ña³to³ ma³ jco⁴ cˀoa⁴ te³ nčha⁴ tjin¹-le⁴.
REV 17:8 Je² cho⁴ xi³ ca²ˀyai³ tsa³cˀe²jna³, cˀoa⁴ li²coi³ ti⁴ti¹jna³-ni³. Ya⁴ cjoi⁴nčhoa³mi³-ni³ nti⁴tjan⁴ jña³ nca³ ti⁴xˀa⁴jin³sen¹, cˀoa⁴ coai⁴ cha⁴. Je² xi³ tjio¹ son³ˀnte³ xi³ jan³ˀain¹-le⁴ li²coi³ tjio¹tˀa³ ya⁴ xon⁴ xi³ tsˀe⁴ cjoa⁴vi³jna³chon³ sa³ˀnta³ nca³ qui³sˀe³nta³ son³ˀnte³, coan⁴xcon¹-le⁴ cˀia⁴ nca scoe⁴ cho⁴-ve⁴ xi³ tsa³cˀe²jna³, cˀoa⁴ li²coi³ ti⁴ti¹jna³-ni³, cˀoa⁴ cjoa⁴ˀai¹-nca¹ni³.
REV 17:9 Cˀoa⁴-sˀin² ma³chjen¹ cjoa⁴fa³ˀai³tsjen³ xi³ tjin¹-le⁴ cjoa⁴ˀi³sen³ta³con². Je² xi³ ña³to³ ma³ jco⁴, coi³ xi³ ña³to³ ni³nto³, xi³ chjon⁴²-ve⁴ ti¹jna³ne².
REV 17:10 Cˀoa⁴-ti⁴ ña³to³ ma³-ni³ cho⁴ta⁴ti¹tjon². Aon² ma³-ni³ xi³ qui³tsao³nqui³. Jnco³ ti¹jna³, je² xi³ nqui²jnco³ cje³ fa³ˀai³-jin². Cˀia⁴ nca³ cjoa⁴ˀai¹, tjin¹ne²-le⁴ nca³ to⁴choa³ ni⁴čhjin³ cˀoe¹jna³.
REV 17:11 Cˀoa⁴ je² cho⁴ xi³ tsa³cˀe²jna³, cˀoa⁴ li²coi³ ti⁴ti¹jna³-ni³, je² xi³ ma³jin³-ni³. Cˀoa⁴-ti⁴ tsˀe⁴ xi³ ña³to³ ma³-ni³, cˀoa⁴-ti⁴ coai⁴ cha⁴.
REV 17:12 Cˀoa⁴ je² xi³ te³ ma³ nčha⁴ xi³ ca²ˀyai³, je² xi³ te³ cho⁴ta⁴ti¹tjon² xi³ cje³ tjin¹-jin²le⁴ cjoa⁴te¹xo³ma³, to⁴nca³ sˀe⁴-le⁴ cjoa⁴te¹xo³ma³ xi³ to⁴jnco³ hora jo³-ni³ cho⁴ta⁴ti¹tjon², cao⁴ je² cho⁴.
REV 17:13 Je²-vi⁴ xi³ to⁴jnco³ cjoa⁴fa³ˀai³tsjen³ tjin¹-le⁴, cˀoa⁴ tsjoa¹-le⁴ cho⁴-ve⁴ je² nca³nˀion¹-le⁴ cao⁴ cjoa⁴te¹xo³ma³-le⁴.
REV 17:14 Je² xi³ cˀoa⁴-sˀin² scan³cao⁴ je² Va³rre², cˀoa⁴ je² Va³rre² si⁴²qui³njen³. Je² ni¹ je² Nai³ti¹tjon²-le⁴ xi³ nai³ ma³, cˀoa⁴ nca³jco⁴-le⁴ je² xi³ cho⁴ta⁴ti¹tjon². Je² xi³ tjio¹cao⁴ cˀoa⁴-sˀin² qui³no²cjoa⁴-le⁴, cˀoa⁴-sˀin² qui³tjo³jin³, cˀoa⁴ nˀion¹tˀa³con³.
REV 17:15 Je² qui³tso²-na³: Je² na³nta¹ xi³ ca²ˀyai³-vi⁴, jña³ nca³ chjon⁴²cha³jnqui³-ve⁴ ti¹jna³son², coi³ na⁴xi⁴na³nta¹, cˀoa⁴ cho⁴ta⁴ncjin², cˀoa⁴ ˀnte³, cˀoa⁴ en¹.
REV 17:16 Je² nčha⁴ xi³ te³ ma³-ni³ xi³ ca²ˀyai³ cao⁴ cho⁴-ve⁴, je²-vi⁴ xi³ ma³jti³que³ chjon⁴²cha³jnqui³-ve⁴. Cjoa⁴ˀa³-le⁴ nca³yi³je³, cˀoa⁴ si⁴²ca¹jna³jti², cˀoa⁴ squi⁴ne⁴ je² yao³-le⁴, cˀoa⁴ coa⁴ca²jin³ lˀi¹.
REV 17:17 Ni³na¹ cˀoa⁴-sˀin² qui³tsjoa³-le⁴ cho⁴ta⁴-ve⁴ ni⁴ma⁴ xi³ cˀoa⁴-sˀin² si⁴²tjo³son²-le⁴ jo³-sˀin² me³-le⁴ Ni³na¹, nca³ cˀoa⁴-sˀin² tjio¹jnco³con³ nca³ tsjoa¹-le⁴ cjoa⁴te¹xo³ma³-le⁴ je² cho⁴-ve⁴ jo³ sa³ˀnta³ coi⁴tjo³son² je² en¹-le⁴ Ni³na¹.
REV 17:18 Je² chjon⁴² xi³ ca²ˀyai³ je² na⁴xi⁴na³nta¹je³ xi³ va³te¹xo³ma³ cho⁴ta⁴ti¹tjon² xi³ tjio¹ son³ˀnte³.
REV 18:1 Coan³scan³-ni³ je² cjoa⁴-vi⁴ tsa³ˀve³ nqui²jncoa³ a²ncje⁴ xi³ ji³tjo³jen³-ni³ ncˀa³jmi³, xi³ nˀion¹ tse³ nca³nˀion¹ tjin¹-le⁴. Cˀoa⁴ je² son³ˀnte³ coan³ˀi³sen³-ni³ cjoa⁴je³ya³-le⁴.
REV 18:2 Nˀion¹ qui³nchja⁴: Chi³xo¹jen³, chi³xo¹jen³ je² Babilonia xi³ je³. ˀnte³-le⁴ nai⁴² xi³ nta³jin³ coan³, cˀoa⁴ ya⁴ tjio¹nˀion¹ ntjao⁴ xi³ nta³jin³, cˀoa⁴ tjio¹nˀion¹ nca³yi³je³ ni⁴se³ xi³ chˀao³ cjoan³, xi³ chˀao³ ˀya³-le⁴.
REV 18:3 Nca³tsˀi³ cho⁴ta⁴ cˀoa⁴-sˀin² qui³tsˀi³ je² vino xi³ tsˀe⁴ cjoa⁴cha³jnqui³-le⁴ xi³ sˀe⁴-le⁴ cjoa⁴jti³-le⁴ Ni³na¹. Je² cho⁴ta⁴ti¹tjon² xi³ tsˀe⁴ son³ˀnte³ qui³si³cha³jnqui³cao⁴ je², cˀoa⁴ je² xi³ sˀin¹ cjoa⁴ma⁴ cˀoa⁴-sˀin² coan³ nchi⁴na¹ xi³ to⁴tˀa³tsˀe⁴ nca³nˀion¹-le⁴ cjoa⁴tsjoa³-le⁴.
REV 18:4 Qui³nčhˀoe³ nqui²jncoa³ jta⁴ xi³ nčhoa¹-ni³ ncˀa³jmi³, xi³ qui³tso²: Ti²tjo⁴jin³-lao⁴³, na⁴xi⁴na³nta¹-na⁴, jme¹-ni³ nca³ tsi² sˀian⁴-si¹nio³ cjoa⁴tsˀen⁴-le⁴, cˀoa⁴ nca³ tsi² cˀoa⁴cao⁴-si¹ni³no³ cjoa⁴ñˀain³-le⁴.
REV 18:5 Je² cjoa⁴tsˀen⁴-le⁴ cˀoa⁴-sˀin² ji³cho² sa³ˀnta³ ncˀa³jmi³, cˀoa⁴ Ni³na¹ ja³ˀai³tsjen³-le⁴ cjoa⁴nai⁴²-le⁴.
REV 18:6 Cˀoa⁴-ti⁴ ti⁴cao⁴³ jo³-sˀin² qui³si³cao⁴-no³. Jao² ya³ cˀoa⁴tjin¹ tˀai²-lao⁴³ cjoa⁴ñˀain³ jo³ tjin¹ xa¹-le⁴. Je² cho⁴tsin¹ xi³ qui³si³cˀi³ya³-no³, jao² ya³ ti⁴cˀi³ya³nqui²ntiao⁴³.
REV 18:7 Jo³-sˀin² tsa³cˀa³sje³je³ya³ yao³-le⁴ sa³ˀnta³ cao⁴ cjoa⁴tsjoa³-le⁴, nqui² cˀoa⁴tjin¹ tˀai²-lao⁴³ cjoa⁴ñˀain³, ca²ta³cji³ˀntia¹. Nca³ ni⁴ma⁴-le⁴ xo⁴tso²: An³ reina ti²jna⁴, a³li² chjon⁴²cˀan³-jian²³, cˀoa⁴ ni⁴cˀia³-jin² squi³ˀntia¹³.
REV 18:8 Coi³ cjoa⁴ nca³ to⁴jnco³ ni⁴čhjin³ cjoa⁴ˀai¹-ni³ je² cjoa⁴ñˀain³-le⁴, cjoa⁴vi³ya³-le⁴, cˀoa⁴ squi¹ˀntia¹, cao⁴ cji³nčha¹. Coi⁴ti⁴jin³ lˀi¹, nca³ je² Nai³-na¹ Ni³na¹ xi³ tjin¹-le⁴ nca³nˀion¹ nca³ tsjoa¹-le⁴ cjoa⁴ñˀain³.
REV 18:9 Je² cho⁴ta⁴ti¹tjon²-le⁴ son³ˀnte³ xi³ qui³si³cha³jnqui³cao⁴ xi³ to⁴cjoa⁴tsjoa³-le⁴ tsa³ca³tio²cao⁴ squi¹ˀnta¹tˀain³ chjon⁴²-ve⁴ cˀia⁴ nca³ scoe⁴ ni⁴ˀnti⁴-le⁴ nca³ coi⁴ti⁴jin³ lˀi¹.
REV 18:10 Cjin³ coa⁴tio⁴ tsa³cjon¹-le⁴ cjoa⁴ñˀain³-le⁴, tso²: Ma⁴-xo¹ni³, ma⁴-xo¹ni³ ji³ na⁴xi⁴na³nta¹ Babilonia xi³ nˀion¹ jai³, xi³ nˀion¹ ti³jnai³, nca³ to⁴jnco³ tjo² ja³ˀai³-ni³ cjoa⁴ñˀain³-li⁴.
REV 18:11 Je² xi³ sˀin¹ cjoa⁴ma⁴ ja⁴son³ˀnte³ cji³ˀnta¹tˀain³ nca³ je², nca³ tsi² ti⁴ˀya³ xi³ coa⁴tse³-ni³le⁴ tso³jmi² xi³ va³te¹na³,
REV 18:12 tso³jmi² xi³ taon⁴si³ne², cao⁴ xi³ taon⁴čhoa³, cao⁴ la⁴jao⁴ xi³ na⁴sca¹ cjoan³, cao⁴ to³fa³nqui³ xi³ čhoa³, cao⁴ na³jño³ lino xi³ nˀion¹ chji¹, cao⁴ na³jño³ xi³ jco³ cjoan³, cao⁴ xi³ seda, cao⁴ xi³ ni² cjoan³, cao⁴ nca³yi³je³ jco⁴ya³ ya¹ xi³ na⁴sca¹ njen⁴, cao⁴ nca³yi³je³ jco⁴ya³ tso³jmi² xi³ ni³nta³ čhoa³ cjoan³, cao⁴ nca³yi³je³ jco⁴ya³ tso³jmi² xi³ ya¹ xi³ nˀion¹ chji¹ cjoan³, cao⁴ qui⁴cha⁴si³ne², cao⁴ qui⁴cha⁴ta²ja³, cao⁴ lao⁴chi³con³,
REV 18:13 cao⁴ canela, cao⁴ xi³ sˀe³jin³ tso³jmi², cao⁴ xo⁴nco¹sja³, cao⁴ xqui³xi¹ne¹, cao⁴ si²ti⁴ xi³ ti² yo⁴nco⁴, cao⁴ vino, cao⁴ si²ti⁴, cao⁴ scoan⁴nio⁴xti²la⁴, cao⁴ trigo, cao⁴ cho⁴, cao⁴ va³rre², cao⁴ na⁴xin¹, cao⁴ ya¹carro, cao⁴ cho⁴ˀnta³, cao⁴ ni⁴ma⁴-le⁴ cho⁴ta⁴.
REV 18:14 Je² cjoa⁴ xi³ coan³me³ta³con² ni⁴ma⁴-li⁴, qui³tˀa³xin²-li², cˀoa⁴ nca³yi³je³ tso³jmi²chji¹-li⁴, cao⁴ cjoa⁴je³ya³-li⁴ qui³cha³-li². Ni⁴cˀia³-jin² ti⁴sa³co²-ni³li².
REV 18:15 Je² cho⁴ta⁴cjoa⁴ma⁴ xi³ va³te¹na³ je² tso³jmi²-vi⁴, xi³ coan³nchi⁴na¹-ni³, cjin³ coai⁴tˀa³xin²-le⁴, nca³ tsa³cjon¹-le⁴ cjoa⁴ñˀain³-le⁴, cˀoa⁴ squi¹ˀnta¹.
REV 18:16 Cˀoa⁴coi⁴tso⁴: Ma⁴-xo¹ni³, ma⁴-xo¹ni³, je² na⁴xi⁴na³nta¹ xi³ je³, xi³ tsa³cˀa³cja¹ na³jño³ lino xi³ chji¹, cao⁴ na³jño³ xi³ jco³ cjoan³, cao⁴ xi³ ni² cjoan³, cao⁴ xi³ taon⁴si³ne² coan³nˀion¹jon³-ni³, cao⁴ la⁴jao⁴ xi³ na⁴sca¹ cjoan³, cao⁴ to³fa³nqui³ xi³ čhoa³.
REV 18:17 Nca³ to⁴jnco³ tjo² cˀoa⁴-sˀin² qui³cha³ tse³ cjoa⁴nchi⁴na¹. Nca³tsˀi³ nai³-le⁴ chi³tso³, cao⁴ nca³tsˀi³ xi³ nta¹chi³con³ vˀe¹ma³jin³, cao⁴ xi³ si¹ma³cao⁴ chi³tso³, cao⁴ nca³tsˀi³ xi³ si¹xa¹jin³ nta¹chi³con³, cjin³ tsa³ca³tio².
REV 18:18 Tsa³ve³ ni⁴ˀnti⁴-le⁴ nca³ qui³ti²jin³ lˀi¹, qui³squi³ˀntia¹xa¹, qui³tso²: Jme¹ na⁴xi⁴na³nta¹ xi³ cˀoa⁴cji³ tse³ jo³ cji³ je²-vi⁴.
REV 18:19 Cˀoa⁴ chao³ tsa³cˀe¹tsao³jon³ jco⁴, cˀoa⁴ qui³squi³ˀntia¹xa¹, qui³squi³ˀnta¹, qui³tso²: Ma⁴-xo¹ni³, ma⁴-xo¹ni³ je² na⁴xi⁴na³nta¹ xi³ je³, jña³ nca³ nca³tsˀi³ xi³ tjin¹-le⁴ chi³tso³ ya⁴jin³ nta¹chi³con³ cˀoa⁴-sˀin² coan³nchi⁴na¹-ni³ cjoa⁴nchi⁴na¹-le⁴. To⁴jnco³ tjo² qui³cha³-ni³ na⁴xi⁴na³nta¹ je²-ve⁴.
REV 18:20 Ti⁴tsjoa³ya³-lao⁴³ ta³con²³ xi³ tˀa³tsˀe⁴ na⁴xi⁴na³nta¹-ve⁴, ji³ ncˀa³jmi³, cˀoa⁴ jon² xi³ cho⁴ta⁴-le⁴ Cristo, cˀoa⁴ jon² xi³ pa²stro⁴, cˀoa⁴ jon² xi³ no²cjoa⁴yao³ tˀa³tsˀe⁴ Ni³na¹, nca³ Ni³na¹ cˀoa⁴-sˀin² qui³si³jnta³-le⁴ je² na⁴xi⁴na³nta¹ xi³ to⁴tˀa³tsaon⁴³.
REV 18:21 Jnco³ a²ncje⁴ xi³ tjin¹-le⁴ nca³nˀion¹ qui³scoe¹ jnco³ la⁴jao⁴ xi³ nˀion¹ je³ jo³-ni³ la⁴jao⁴ na⁴tsi¹, qui³si³cˀa³tjen⁴-jin³ nta¹chi³con³, qui³tso²: Je² na⁴xi⁴na³nta¹ Babilonia xi³ je³ xi³ cˀoa⁴-sˀin² cao⁴ ti⁴coi³-ni³ nca³nˀion¹ coi⁴xo⁴jen³ni³. Ni⁴cˀia³-jin² ti⁴coan⁴sjai³-ni³.
REV 18:22 Cˀoa⁴ jta⁴-le⁴ je² xi³ si¹cja³ne³ arpa, cao⁴ čhjao³, cao⁴ xi³ si¹cja³ne³ xo³vi¹ cao⁴ trompeta li²coi³ ti⁴coi⁴no¹ˀya²-ni³lai⁴ nca³ ji³. Cˀoa⁴ nca³tsˀi³ cho⁴ta⁴ xi³ si¹xa¹ xi³ to⁴jme³ xa¹-ni³, li²coi³ ti⁴sˀe⁴-ni³li² nca³ ji³. Cˀoa⁴ xi³ vˀao³ya³ li²coi³ ti⁴coi⁴no¹ˀya²-ni³lai⁴, ji³.
REV 18:23 Cˀoa⁴ lˀi¹ni³cha³ li²coi³ ti⁴coan⁴ˀi³sen³-ni³li² nca³ ji³. Jta⁴-le⁴ xˀin⁴ cao⁴ chjon⁴²-le⁴ li²coi³ ti⁴coi⁴no¹ˀya²-ni³lai⁴. Nca⁴ je² cho⁴ta⁴cjoa⁴ma⁴-li⁴ xi³ cho⁴ta⁴ti¹tjon² coan³ i⁴ son³ˀnte³-vi⁴. Nca⁴ je² cjoa⁴vˀe²nta³-li⁴ tsa³cˀa³na⁴cha⁴-le⁴ nca³tsˀi³ na⁴xi⁴na³nta¹.
REV 18:24 Cˀoa⁴ ya⁴ na⁴xi⁴na³nta¹-ve⁴ coan³sjai³ je² njin¹-le⁴ cho⁴ta⁴ xi³ qui³nchja⁴ya³ tˀa³tsˀe⁴ Ni³na¹ cao⁴ xi³ tsˀe⁴ cho⁴ta⁴-le⁴ Cristo, cao⁴ xi³ tsˀe⁴ nca³tsˀi³ xi³ cˀoa⁴-sˀin² je³cˀen³ i⁴ son³ˀnte³-vi⁴.
REV 19:1 Coan³scan³-ni³ cjoa⁴ je²-vi⁴ qui³nčhˀoe³jncoa³ jta⁴ xi³ nˀion¹, xi³ tsˀe⁴ xi³ ncjin² ma³-ni³ ya⁴ ncˀa³jmi³, xi³ qui³tso²: To⁴ma¹-ni³. Je² xi³ cjoa⁴vi³tjo³ntjai², cao⁴ xi³ cjoa⁴je³ya³, cao⁴ xi³ cjoa⁴ncˀa³, cao⁴ cjoa⁴te¹xo³ma³ tsˀe⁴ Nai³-na¹ Ni³na¹.
REV 19:2 Je² cjoa⁴ñˀain³ xi³ tsjoa¹ ña³qui³ cjoa⁴qui²xi⁴-ni¹, cˀoa⁴ cˀoa⁴²tjin¹. Cˀoa⁴-sˀin² qui³tsjoa³-le⁴ cjoa⁴ñˀain³ je² chjon⁴²cha³jnqui³ xi³ qui³si³qui³tson¹jin³ son³ˀnte³ cao⁴ je² cjoa⁴cha³jnqui³-le⁴. Ni³na¹ qui³si³cˀe¹chji¹-ni³ ntsja³ chjon⁴²-ve⁴ njin¹-le⁴ cho⁴ˀnta³-le⁴.
REV 19:3 Nqui²jnco³cˀa² qui³tso²: To⁴ma¹-ni³. Je² ni⁴ˀnti⁴-le⁴ chjon⁴²-ve⁴ qui³mi³ nca³ntsjai² ni⁴čhjin³.
REV 19:4 Xi³ can³ño³ cho⁴ta⁴jchi¹nca³ cao⁴ je² xi³ tjio¹con³ xi³ ño³ ma³-ni³ tsa³cja³yo³nia²tˀa³-le⁴ Ni³na¹ tsa³ve³xcon¹ Ni³na¹ xi³ ti¹jna³son² ya¹xi²le⁴-le⁴, qui³tso²: Cˀoa⁴ ca²ta³ma³. To⁴ma¹-ni³.
REV 19:5 Ya⁴ ya¹xi²le⁴ ji³tjo³ jnco³ jta⁴ xi³ qui³tso²: Ti⁴jnta¹tˀaon³ Ni³na¹-na¹, nca³tsˀio³ xi³ cho⁴ˀnta³ mao³, cˀoa⁴ jon² xi³ jcon³chao³ Ni³na¹, cˀoa⁴-sˀin² xi³ xti³ cao⁴ xi³ jchi¹nca³.
REV 19:6 Qui³nčhˀoe³jncoa³ jta⁴ xi³ jo³-ni³ tsa² tsˀe⁴ xi³ ncjin² ma³-ni³, jo³-ni³ jta⁴-le⁴ na³nta¹ xi³ nˀion¹ fa³ne³, jo³-ni³ chˀaon⁴ xi³ nˀion¹ fa³ne³, xi³ qui³tso²: To⁴ma¹-ni³. Tsa³ca³te¹xo³ma³ Nai³-na¹ Ni³na¹ xi³ va³te¹xo³ma³ nca³yi³je³.
REV 19:7 Ca²ta³ma³tsjoa³-na¹, cjoa¹ya³tsjoa³ ta³coan³², cˀoa⁴ chˀa⁴sje³je³ya³², nca³ je³ja³ˀai³ cjoa⁴vi³xan³-le⁴ je² Va³rre², cˀoa⁴ je² chjon⁴²-le⁴ je³ti¹jna³nta³.
REV 19:8 Cˀoa⁴ qui³tsˀai²-le⁴ nca³ cˀoa⁴cja¹ na³jño³ lino xi³ nˀion¹ chji¹, xi³ tsje³, cˀoa⁴ xi³ fa³te³. Je² na³jño³ lino xi³ nˀion¹ chji¹ jnco³ ya³-le⁴ je² cjoa⁴qui²xi⁴-le⁴ cho⁴ta⁴-le⁴ Cristo.
REV 19:9 Cˀoa⁴ qui³tso²-na³: Chji¹³: Jo¹ to⁴nta³-le⁴ je² xi³ cˀoa⁴-sˀin² qui³no²cjoa⁴-le⁴ cjoa⁴vi³xan³-le⁴ nca³ coa⁴cjen⁴cao⁴ je² Va³rre². Cˀoa⁴ qui³tso²-na³: Je² en¹-le⁴ Ni³na¹ xo⁴tso²-vi⁴ ña³qui³ cjoa⁴qui²xi⁴-ni¹.
REV 19:10 An³ qui³sca³nquia³ ntso⁴co⁴ nca³ tsa³ˀve³xcoan¹³. Cˀoa⁴ je² qui³tso²-na³: A³li² cˀoa⁴-jin² nˀiain²³. Cˀoa⁴-ti⁴ an³ cho⁴ˀnta³ nia¹³ jo³-ni³ ji³, cao⁴ je² ntsˀai³ xi³ tjin¹-le⁴ je² en¹ xi³ tˀa³tsˀe⁴ Jesús. Jcha⁴xcoin¹³ Ni³na¹, nca³ je² en¹ xi³ tˀa³tsˀe⁴ Jesús coi³ cjoa⁴ xi³ no²cjoa⁴ya³-ni³.
REV 19:11 Tsa³ˀve³ ncˀa³jmi³ nca³ qui³sˀe³ti⁴xˀa⁴. Coe⁴-ni³ jnco³ na⁴xin¹ xi³ čhoa³ cji³. Je² xi³ ti¹jna³son²-le⁴ cˀoa⁴ tsa³cˀin²: Nˀion¹tˀa³con³ cao⁴ cjoa⁴qui²xi⁴. Tsjoa¹ cjoa⁴ñˀain³ xi³ tjin¹qui²xi⁴, cˀoa⁴ cao⁴ cjoa⁴qui²xi⁴ cjan¹cao⁴.
REV 19:12 Xcon⁴ cˀoa⁴cjoan³ ni⁴jen⁴lˀi¹ cjoan³. Ya⁴son² jco⁴ ncjin² corona tjio¹son². Cˀoa⁴ jnco³ jan³ˀain¹ tji¹tˀa³ xi³ ni⁴ˀya³-jin² xi³ ma³cho⁴ya³-le⁴, to⁴je² xi³ ve³.
REV 19:13 Yˀa³cja¹ na³jño³ xi³ njin¹ qui³tsˀi³jin³. Je² jan³ˀain¹-le⁴ cˀoa⁴ˀmi²: En¹-le⁴ Ni³na¹.
REV 19:14 Je² so³nta²do⁴ xi³ tjio¹ ya⁴ ncˀa³jmi³ qui³tjen⁴nqui³-le⁴ tjio¹son² na⁴xin¹ xi³ čhoa³. Yˀa³cja¹ na³jño³ lino xi³ nˀion¹ nta³ cjoan³, xi³ čhoa³, xi³ tsje³.
REV 19:15 Ya⁴ tsˀoa³ vi³tjo³-ni³ jnco³ qui⁴cha⁴nto³ xi³ yao³ xcon¹. Cao⁴ je² si¹qui²ˀaon³-ni³ cho⁴ta⁴na⁴xi⁴na³nta¹. Je² coa⁴te²xo³ma³ cao⁴ ya¹ni³se³-le⁴ xi³ qui⁴cha⁴. Je² coa⁴sen⁴ne² ya¹tsˀion³ xi³ tsˀe⁴ vino-le⁴ cjoa⁴toan¹ cao⁴ cjoa⁴jti³-le⁴ Ni³na¹ xi³ va³te¹xo³ma³ nca³yi³je³.
REV 19:16 Tji¹tˀa³ na³jño³-le⁴ cˀoa⁴ nca³so³-le⁴ je² jan³ˀain¹-vi⁴: Nai³ti¹tjon²-le⁴ xi³ nai³ ma³, cˀoa⁴ nca³jco⁴-le⁴ je² xi³ cho⁴ta⁴ti¹tjon².
REV 19:17 Tsa³ˀve³jncoa³ a²ncje⁴ xi³ ti¹jna³jin³ tsˀoi¹, cˀoa⁴ nˀion¹ qui³nchja⁴-le⁴ nca³tsˀi³ ni⁴se³ xi³ qui³tjen⁴ jin³sen¹: Nčhoao¹³, ca²ta³ma³xco¹tˀao³ xi³ coi⁴cho³njion²³ xi³ tsˀe⁴ je² Ni³na¹ xi³ nˀion¹ je³ya³,
REV 19:18 jme¹-ni³ nca³ chi⁴ne⁴-si¹nio³ yao³-le⁴ cho⁴ta⁴ti¹tjon² cao⁴ yao³-le⁴ capitanes, cao⁴ yao³-le⁴ cho⁴ta⁴ta²ja³, cao⁴ yao³-le⁴ na⁴xin¹, cao⁴ yao³-le⁴ je² xi³ tjio¹son², cao⁴ yao³-le⁴ nca³tsˀi³, xi³ tjio¹ntai¹ cao⁴ xi³ cho⁴ˀnta³, xi³ xti³ cao⁴ xi³ jchi¹nca³.
REV 19:19 Tsa³ˀve³ je² cho⁴, cao⁴ cho⁴ta⁴ti¹tjon² xi³ tsˀe⁴ son³ˀnte³ cao⁴ so³nta²do⁴-le⁴, xi³ to⁴jnco³ tjio¹ nca³ cˀoa⁴-sˀin² sˀin⁴² cjoa⁴jchan¹. Co²ntran⁴ coai⁴-le⁴ je² xi³ ti¹jna³son² na⁴xin¹, cˀoa⁴ co²ntran⁴ coai⁴-le⁴ je² so³nta²do⁴-le⁴.
REV 19:20 Je² cho⁴-ve⁴ tsa³cˀe²jna³nˀion¹, cao⁴ je² xi³ en¹nti³so³ qui³nchja⁴ya³, xi³ cjoa⁴xcon¹ qui³sˀin³ nqui³xcon⁴ cho⁴-ve⁴. Cˀoa⁴-sˀin² tsa³cˀa³na⁴cha⁴-le⁴ je² xi³ qui³scoe¹ choa⁴-le⁴ cho⁴-ve⁴, xi³ tsa³ve³xcon¹ xco¹son²-le⁴. Qui³ni²cˀa³tsao³jin³ nca³ tjio¹con³ nca³ jao² ya⁴ jnco³ jnčho¹lˀi¹ xi³ ti¹ti² cao⁴ azufre.
REV 19:21 Cˀoa⁴ je² xi³cˀa³ qui³ni²cˀen³-ni³ qui⁴cha⁴nto³ xi³ ji³tjo³-ni³ tsˀoa³ je² xi³ ti¹jna³son² na⁴xin¹. Nca³tsˀi³ ni⁴se³ coan³squi³-ni³ yao³-le⁴.
REV 20:1 Tsa³ˀve³jncoa³ a²ncje⁴ xi³ nčhoa¹-ni³ ncˀa³jmi³ xi³ tjin¹-le⁴ yo²vi⁴-le⁴ nti⁴tjan⁴ xi³ ti⁴xˀa⁴jin³sen¹, cao⁴ jnco³ nˀo¹qui⁴cha⁴ cadena xi³ cjia³ ntsja³.
REV 20:2 Tsa³cˀe¹tˀa³nˀion¹ je² cho⁴toan¹-ve⁴, je² ye⁴jcha¹-ve⁴, xi³ ti⁴coi³-ni³ nai⁴² xi³ Satanás. Jnco³ jmi³ no¹ qui³sˀe³tˀa³nˀion¹.
REV 20:3 Qui³si³cˀa³tjen⁴sˀen³ nti⁴tjan⁴ xi³ ti⁴xˀa⁴jin³sen¹, cˀoa⁴ tsa³cˀe¹chjoa²jčho³. Tsa³ca³sen¹jon³ sello, jme¹-ni³ nca³ tsi² ti⁴cˀoa⁴na⁴cha⁴-si¹ni³le⁴ na⁴xi⁴na³nta¹ sa³ˀnta³ nca³ jnco³ jmi³ no¹ coan⁴jnco³. Xi³ coan⁴scan³-ni³ je²-vi⁴ tjin¹ne²-le⁴ nca³ cˀoa¹mjen³ntai¹ xi³ to⁴choa³ ni⁴čhjin³.
REV 20:4 Tsa³ˀve³ ya¹xi²le⁴, cˀoa⁴ tsa³ca³tio²son² je² xi³ qui³tsˀai²-le⁴ nca³ tsjoa¹ cjoa⁴ñˀain³. Tsa³ˀve³ ni⁴ma⁴-le⁴ je² xi³ qui³ti³sin³ xi³ to⁴tˀa³tsˀe⁴ je² en¹-le⁴ Jesús, cˀoa⁴ xi³ to⁴tˀa³tsˀe⁴ en¹-le⁴ Ni³na¹, xi³ tsi² tsa³ve³xcon¹ je² cho⁴-ve⁴, ni⁴je²-jin² xco¹son²-le⁴jin², xi³ tsi² tsa² qui³sˀe³choa⁴ tjen³, ni⁴ya⁴ ntsja³-jin². Tsa³cˀe¹yo³con², jnco³ jmi³ no¹ tsa³ca³te¹xo³ma³ cao⁴ Cristo.
REV 20:5 Je² xi³cˀa³ xi³ cˀen³ li²coi³ ti⁴tsa³cˀe¹yo³con²-ni³ sa³ˀnta³ nca³ coan⁴ jnco³ jmi³ no¹. Je²-vi⁴ xi³ ti¹tjon² ja³ˀa²ya³-le⁴.
REV 20:6 Jo¹ to⁴nta³-le⁴, jo¹ to⁴tsje³, je² xi³ cˀoa⁴cao⁴tˀa³-le⁴ nca³ cjoa⁴ˀa¹ya³ti¹tjon²-le⁴. Je² cjoa⁴vi³ya³ xi³ ma³jao²-ni³ li²coi³ tjin¹-le⁴ nca³nˀion¹ xi³ tˀa³tsˀe⁴ nca³ je². To⁴sa³ na⁴ˀmi³-le⁴ Ni³na¹ cao⁴ xi³ tsˀe⁴ Cristo coan⁴. Coa⁴te²xo³ma³cao⁴ jnco³ jmi³ no¹.
REV 20:7 Cˀia⁴ nca³ coan⁴jnco³ je² xi³ jnco³ jmi³ no¹, je² nai⁴² tjo¹jnta³ˀño¹ cjoa⁴ñˀain³-le⁴.
REV 20:8 Coi⁴tjo³ nca³ cˀoa⁴na⁴cha⁴-le⁴ na⁴xi⁴na³nta¹ xi³ tjio¹ nca³ ño³ xi⁴nqui⁴-le⁴ son³ˀnte³, ya⁴ Gog cˀoa⁴ ya⁴ Magog, jme¹-ni³ nca³ cˀoa⁴-sˀin² cˀoe⁴²xco¹-si¹ni³ xi³ tˀa³tsˀe⁴ cjoa⁴jchan¹. Je² xi³ cˀoa⁴tjin¹ ma³-ni³ jo³-ni³ tsa² tso⁴mi¹-le⁴ nta¹chi³con³.
REV 20:9 Tsa³cˀe¹ma³son² nca³qui³jnta² son³ˀnte³, cˀoa⁴ tsa³cˀo¹tji³ntai³ ˀnte³-le⁴ cho⁴ta⁴-le⁴ Cristo, cˀoa⁴ je² na⁴xi⁴na³nta¹ xi³ tsjoa³cha³². Ni³na¹ qui³sca³ni¹jen³-ni³ lˀi¹ ncˀa³jmi³, cˀoa⁴ qui³ti² nca³tsˀi³.
REV 20:10 Je² nai⁴² xi³ tsa³cˀa³na⁴cha⁴-le⁴, ya⁴ qui³ni²cˀa³tjen⁴jin³ ya⁴ jnčho¹lˀi¹ cao⁴ azufre, jña³ nca³ tjio¹ je² cho⁴-ve⁴ cao⁴ je² xi³ en¹nti³so³ qui³nchja⁴ya³. Ya⁴ cjoa⁴ˀa² cjoa⁴ñˀain³ ni⁴čhjin³ cao⁴ ni⁴tjen⁴ nca³ntsjai² nca³ntsjai².
REV 20:11 Tsa³ˀve³jncoa³ ya¹xi²le⁴ xi³ čhoa³ cji³ cao⁴ je² xi³ ti¹jna³son². Nqui³xcon⁴ nca³ je² tsa³nca³tˀa³xin²-le⁴ son³ˀnte³ cao⁴ ncˀa³jmi³. Li²coi³ ti⁴coan³sjai³-ni³le⁴ ˀnte³-le⁴ nca³ je².
REV 20:12 Tsa³ˀve³ je² xi³ cˀen³, xi³ jchi¹nca³ cao⁴ xi³ xti³, xi³ tjio¹ nqui³xcon⁴ Ni³na¹. Je² xon⁴ qui³tjo³ˀai². Cˀoa⁴ je² xi³ nqui²jnco³ xon⁴ qui³tjo³ˀai², xi³ tsˀe⁴ cjoa⁴vi³jna³chon³. Cˀoa⁴-sˀin² je² xi³ cˀen³ qui³tsˀai²-le⁴ cjoa⁴ñˀain³ tˀa³tsˀe⁴ je² cjoa⁴ xi³ tjio¹tˀa³ ya⁴ xon⁴, jo³-sˀin² xa¹-le⁴.
REV 20:13 Je² nta¹chi³con³ qui³tsjoa³ je² xi³ cˀen³ xi³ ya⁴ tjio¹jin³. Cˀoa⁴ je² cjoa⁴vi³ya³ cao⁴ ya⁴ ˀnte³ jña³ nca³ tjio¹ xi³ cˀen³ qui³tsjoa³ je² xi³ ya⁴ tjio¹jin³. Cˀoa⁴-sˀin² qui³tsˀai²-le⁴ cjoa⁴ñˀain³ nca³ jnco¹jnco¹ jo³-sˀin² xa¹-le⁴.
REV 20:14 Je² ˀnte³ jña³ nca³ tjio¹ xi³ cˀen³ cao⁴ cjoa⁴vi³ya³ qui³ni²cˀa³tsao³jin³ ya⁴ jnčho¹lˀi¹. Je²-vi⁴ cjoa⁴vi³ya³ xi³ ma³jao²-ni³.
REV 20:15 Je² xi³ tsi² coan³sjai³tˀa³ ya⁴ xon⁴ xi³ tsˀe⁴ cjoa⁴vi³jna³chon³, cˀoa⁴-sˀin² qui³ni²cˀa³tjen⁴jin³ ya⁴ jnčho¹lˀi¹-ve⁴.
REV 21:1 Tsa³ˀve³jncoa³ ncˀa³jmi³ cho⁴tse⁴ cao⁴ jnco³ son³ˀnte³ cho⁴tse⁴. Je² ncˀa³jmi³ ti¹tjon² cao⁴ son³ˀnte³ ti¹tjon² qui³-ni³, cˀoa⁴ nta¹chi³con³ li²coi³ ti⁴tjin¹-ni³.
REV 21:2 An³ xi³ Juan ˀmi²-na³ tsa³ˀve³ je² na⁴xi⁴na³nta¹ xi³ tsje³, Jerusalén cho⁴tse⁴, xi³ ji³tjo³jen³-ni³ ncˀa³jmi³ tsˀe⁴ Ni³na¹. Ti¹jna³nta³ jo³-ni³ tsa² jnco³ chjon⁴² xi³ ti¹jna³nta³ xi³ tˀa³tsˀe⁴ xˀin⁴-le⁴.
REV 21:3 Qui³nčhˀoe³jncoa³ jta⁴ nˀion¹ ya⁴ ncˀa³jmi³, xi³ qui³tso²: Coe⁴-ni³ je² ni³ˀya³-le⁴ Ni³na¹ qui³jna³jin³-le⁴ cho⁴ta⁴, cˀoa⁴ Ni³na¹ cˀoe¹jna³cao⁴. Cho⁴ta⁴ na⁴xi⁴na³nta¹-le⁴ coan⁴. Ti⁴je²-ni³ Ni³na¹ Ni³na¹-le⁴ coan⁴.
REV 21:4 Ni³na¹ cˀoe⁴²jon³ nca³yi³je³ nta¹xcon⁴ xi³ tsˀe⁴ xcon⁴. Li²coi³ ti⁴sˀe⁴-ni³ cjoa⁴vi³ya³. Li²coi³ ti⁴sˀe⁴-ni³ cjoa⁴va³, ni⁴je²-jin² xi³ cji³ˀntia¹, ni⁴je²-jin² xi³ aon³ ma³-le⁴, nca³ je² cjoa⁴ xi³ ti¹tjon² je³ja³ˀa³to³.
REV 21:5 Je² xi³ ti¹jna³son² ya¹xi²le⁴, qui³tso²: Coe⁴-ni³ an³ si³cho⁴tse⁴ nca³yi³je³. Cˀoa⁴ qui³tso²-na³: Chji¹³, nca³ je² en¹-vi⁴ nta³-ni¹, cˀoa⁴ cjoa⁴qui²xi⁴-ni¹.
REV 21:6 Cˀoa⁴ je² qui³tso²-na³: Je³cˀoa⁴qui³sˀe³. An³ nia¹³ je² Alfa cˀoa⁴ je² Omega, xi³ ti¹tjon² cˀoa⁴ xi³ fe³tˀa³. Tsa² jnco³ xi³ fa³ti²-le⁴, an³ tsjoa³-le⁴ na³nta¹ xi³ tsjoa¹ cjoa⁴vi³jna³chon³, xi³ to⁴cjoa⁴tjao².
REV 21:7 Je² xi³ si⁴²qui³njen³ scoe¹cjoa⁴tjao² nca³yi³je³ tso³jmi². An³ coan⁴ Ni³na¹-le⁴, cˀoa⁴ je² coan⁴ ˀnti¹-na⁴.
REV 21:8 To⁴nca³ je² xi³ tsa³cjon¹, je² xi³ tsi² ma³cjain¹-le⁴, cˀoa⁴ je² xi³ chˀao³ cjoan³, je² xi³ si¹cˀen³, cao⁴ xi³ si¹cha³jnqui³, cao⁴ xi³ vˀe¹nta³, cao⁴ xi³ xco¹son² ve³xcon¹, cao⁴ nca³tsˀi³ xi³ nti³so³, ya⁴ ˀnte³-le⁴ coan⁴ ya⁴ jnčho¹lˀi¹ xi³ ti¹ti² cao⁴ azufre, je² cjoa⁴vi³ya³ xi³ ma³jao²-ni³.
REV 21:9 Ji³nčhoa³jnco³-na³ je² xi³ ma³ña³to³-ni³ a²ncje⁴, xi³ tjin¹-le⁴ ña³to³ cho⁴tsin¹ xi³ tjio¹qui³tse³-ni³ ña³to³ cjoa⁴ñˀain³ xi³ fe³tˀa³. Tsa³cja¹cao⁴-na³, qui³tso²: Nčhoai¹³ i⁴-vi⁴, an³ coa³co³-le²³ je² xi³ chjon⁴²-le⁴ coan⁴ Va³rre².
REV 21:10 Cˀoa⁴ qui³cao⁴-na³ jña³ nca³ jnco³ ni³nto³ xi³ nˀion¹ ncˀa³ nca³ ti¹jna³cao⁴-na³ je² Espíritu Santo. Tsa³ca³co¹-na³ je² na⁴xi⁴na³nta¹ xi³ je³ xi³ tsje³, je² Jerusalén, xi³ ji³tjo³jen³-ni³ ncˀa³jmi³ tsˀe⁴ Ni³na¹.
REV 21:11 Tjin¹-le⁴ cjoa⁴ˀi³sen³-le⁴ Ni³na¹. Je² lˀi¹-le⁴ cˀoa⁴cji³ jnco³ la⁴jao⁴ xi³ nˀion¹ na⁴sca¹ cji³, jo³-ni³ la⁴jao⁴ xi³ jaspe ˀmi², xi³ fa³te³ jo³-ni³ tsa² cho⁴tsin¹.
REV 21:12 Tjin¹-le⁴ čhjao¹lao⁴ xi³ nˀion¹ je³, cˀoa⁴ xi³ ncˀa³, cao⁴ te³jao² xo⁴ntjoa⁴. Tjio¹jčho³ xo⁴ntjoa⁴-le⁴ te³jao² a²ncje⁴. Tjio¹tˀa³ xo⁴ntjoa⁴-ve⁴ jan³ˀain¹-le⁴, xi³ coi³ te³jao² ntje⁴ xi³ tsˀe⁴ xti³-le⁴ Israel.
REV 21:13 Ya⁴ jña³ nca³ vi³tjo³-ni³ tsˀoi¹, jan² xo⁴ntjoa⁴. Cˀoa⁴ nca³scon¹-le⁴ jan² xo⁴ntjoa⁴. Cˀoa⁴ nca³qui²xi⁴-le⁴ jan² xo⁴ntjoa⁴. Cˀoa⁴ nca³ ca³ntjai²-ni³ tsˀoi¹ jan² xo⁴ntjoa⁴.
REV 21:14 Cˀoa⁴ čhjao¹lao⁴-le⁴ na⁴xi⁴na³nta¹-ve⁴ tjin¹-le⁴ te³jao² čhjao¹ja⁴ma⁴. Ya⁴ tjio¹tˀa³ te³jao² jan³ˀain¹-le⁴ je² xi³ te³jao² pa²stro⁴ xi³ tsˀe⁴ Va³rre².
REV 21:15 Je² xi³ tsa³cja¹cao⁴-na³ tjin¹-le⁴ jnco³ ya¹na³nca³ xi³ taon⁴si³ne² xi³ vˀe¹cho⁴ya³-ni³ na⁴xi⁴na³nta¹ cao⁴ xo⁴ntjoa⁴-le⁴ cao⁴ čhjao¹lao⁴-le⁴.
REV 21:16 Je² na⁴xi⁴na³nta¹ cˀoa⁴-sˀin² qui³jna³ nca³ ño³ xi⁴nqui⁴-le⁴, ti⁴cˀoa⁴cji³ nto³-ni³ jo³ cji³ te³ya³. Tsa³cˀe¹cho⁴ya³ na⁴xi⁴na³nta¹-ve⁴ cao⁴ je² ya¹na³nca³ xi³ jao² millón metro ma³-ni³. Jo³ cji³ nto³, jo³ cji³ ncˀa³, jo³ cji³ te³ya³ to⁴nco¹son² cjoan³.
REV 21:17 Tsa³cˀe¹cho⁴ya³ čhjao¹lao⁴-le⁴, jnco³ ciento cao⁴ ña³chan²ño³ nta³ ma³-ni³, xi³ choa⁴-le⁴ xˀin⁴, xi³ tsˀe⁴ a²ncje⁴.
REV 21:18 Je² xi³ tji¹nta³-ni³ je² čhjao¹lao⁴-ve⁴ coi³ xi³ jaspe ˀmi². To⁴nca³ je² na⁴xi⁴na³nta¹ ña³qui³ taon⁴si³ne² ni¹, cˀoa⁴cji³ cho⁴tsin¹ xi³ fa³te³ cji³.
REV 21:19 Je² čhjao¹ja⁴ma⁴-le⁴ je² čhjao¹lao⁴-ve⁴ xi³ tsˀe⁴ na⁴xi⁴na³nta¹-ve⁴, tjin¹yi³je³-le⁴ la⁴jao⁴ xi³ na⁴sca¹ cjoan³. Je² xi³ ti¹tjon² čhjao¹ja⁴ma⁴, coi³ xi³ jaspe; xi³ ma³jao²-ni³, zafiro; xi³ ma³jan²-ni³, ágata; xi³ ma³ño³-ni³, esmeralda;
REV 21:20 xi³ ma³ˀaon²-ni³, ónice; xi³ ma³jaon³-ni³, cornalina; xi³ ma³ña³to³-ni³, crisólito; xi³ ma³jin³-ni³, berilo; xi³ ma³ña³jan³-ni³, topacio; xi³ ma³te³-ni³, crisopraso; xi³ ma³te³jnco³-ni³, jacinto; xi³ ma³te³jao²-ni³, amatista.
REV 21:21 Je² te³jao² xo⁴ntjoa⁴ te³jao² to³fa³nqui³ xi³ čhoa³ cjoan³. Jnco¹jnco¹ xo⁴ntjoa⁴ jnco³ to³fa³nqui³. Je² nti³tsin³-le⁴ je² na⁴xi⁴na³nta¹ ña³qui³ taon⁴si³ne² ni¹, jo³-ni³ cho⁴tsin¹ xi³ ma³tsen³ya².
REV 21:22 Ni⁴jnco³-jin² yo⁴nco⁴ tsa³ˀve³ ya⁴-ve⁴, nca³ je² Nai³-na¹ Ni³na¹ xi³ va³te¹xo³ma³ nca³yi³je³, cao⁴ je² Va³rre² ti⁴je²-ni³ xi³ yo⁴nco⁴-le⁴.
REV 21:23 Je² na⁴xi⁴na³nta¹-ve⁴ li²coi³ ma³chjen¹-le⁴ tsˀoi¹ ni⁴sa¹-jin², jme¹-ni³ nca³ si⁴²ˀi³sen³-si¹ni³le⁴, nca³ je² cjoa⁴ˀi³sen³-le⁴ Ni³na¹ xi³ si¹ˀi³sen³-le⁴, cˀoa⁴ je² Va³rre² je² lˀi¹-le⁴.
REV 21:24 Je² na⁴xi⁴na³nta¹ xi³ ji³tjo³ntjai² cˀoe¹ma³jin³ lˀi¹-le⁴. Je² cho⁴ta⁴ti¹tjon² xi³ tsˀe⁴ son³ˀnte³ cjoa⁴ˀai¹ tsjoa¹-le⁴ cjoa⁴je³ya³-le⁴, cao⁴ cjoa⁴ncˀa³-le⁴.
REV 21:25 Je² xo⁴ntjoa⁴-le⁴ ni⁴cˀia³-jin² sˀe⁴chjoa² nca³ ni⁴čhjin³, nca³ ya⁴ li²coi³ coan⁴njion².
REV 21:26 Nca³tsˀi³ cho⁴ta⁴ cjoa⁴ˀai¹ tsjoa¹-le⁴ cjoa⁴je³ya³-le⁴ cao⁴ cjoa⁴ncˀa³-le⁴.
REV 21:27 Ya⁴ li²coi³ cjoa⁴ˀa³sˀen³ ni⁴to⁴jme³-jin² xi³ jnti¹ cjoan³, xi³ chˀao³ sˀin¹, xi³ nti³so³, to⁴ña³qui³ to⁴je²-ni¹ xi³ tjio¹tˀa³ ya⁴ xon⁴ xi³ tsˀe⁴ cjoa⁴vi³jna³chon³, xon⁴-le⁴ je² Va³rre².
REV 22:1 Coan³scan³-ni³ tsa³ca³co¹-na³ jnco³ nta¹je⁴ xi³ tsje³ xi³ tsˀe⁴ cjoa⁴vi³jna³chon³, xi³ fa³te³jin³ jo³-ni³ cho⁴tsin¹, xi³ ji³tjo³-ni³ ya¹xi²le⁴-le⁴ Ni³na¹ cao⁴ Va³rre².
REV 22:2 Ya⁴ nca³va³sen³-le⁴ ntia⁴²-le⁴, ya⁴ nca³ jao² ncoa³-le⁴ nta¹je⁴ ncha³ ya¹-le⁴ cjoa⁴vi³jna³chon³ xi³ te³jao² jco⁴ya³ to³ tsjoa¹. Jnco¹jnco¹ sa¹ tsjoa¹ to³-le⁴. Xca⁴-le⁴ ya¹-ve⁴ ma³xqui³-ni³le⁴ nca³tsˀi³ na⁴xi⁴na³nta¹.
REV 22:3 Li²coi³ ti⁴sˀe³-ni³ cjoa⁴ˀaon³ta³con². To⁴je² ya¹xi²le⁴-le⁴ Ni³na¹ cao⁴ je² Va³rre² se¹jna³, cˀoa⁴ cho⁴ˀnta³-le⁴ scoe⁴xcon¹.
REV 22:4 Scoe⁴ ncjain¹. Je² jan³ˀain¹-le⁴ sˀe³jna³tˀa³ tjen³.
REV 22:5 Cˀoa⁴ ya⁴-ve⁴ li²coi³ ti⁴coan⁴njion²-ni³. Li²coi³ ma³chjen¹-le⁴ lˀi¹ni³cha³, ni⁴tsˀoi¹-jin². Nca⁴ je² Nai³-na¹ Ni³na¹ xi³ si⁴²ˀi³sen³-le⁴. Cˀoa⁴ cho⁴ˀnta³-le⁴ coa⁴te²xo³ma³ nca³ntsjai² nca³ntsjai².
REV 22:6 Cˀoa⁴ je² qui³tso²-na³: Je² en¹-vi⁴ ña³qui³ nta³-ni¹ cˀoa⁴ cjoa⁴qui²xi⁴-ni¹. Je² Nai³-na¹ Ni³na¹ xi³ tsˀe⁴ ni⁴ma⁴-le⁴ je² xi³ qui³nchja⁴ya³ tˀa³tsˀe⁴ cˀoa⁴-sˀin² qui³si³ca³sen¹ je² a²ncje⁴-le⁴, jme¹-ni³ nca³ coa⁴co²-si¹ni³le⁴ je² cho⁴ˀnta³-le⁴ je² cjoa⁴ xi³ ma³chjen¹-ni¹ nca³ cˀoa⁴coan⁴ nti⁴ton⁴.
REV 22:7 Coe⁴-ni³ an³ cjoe²ˀe⁴ nti⁴toan⁴. Jo¹ to⁴nta³-le⁴ je² xi³ si¹tjo³son² je² en¹ xi³ qui³no²cjoa⁴ya³jin³-ni³ xon⁴-vi⁴.
REV 22:8 An³ xi³ Juan ˀmi²-na³ qui³nčhˀoe³ cˀoa⁴ tsa³ˀve³ je² cjoa⁴-vi⁴. Coan³scan³-ni³ nca³ je³qui³nčhˀoe³ cˀoa⁴ nca³ tsa³ˀve³, qui³sca³nquia³ ntso⁴co⁴ a²ncje⁴ xi³ tsa³ca³co¹-na³ je² cjoa⁴-vi⁴ nca³ tsa³ˀve³xcoan¹³.
REV 22:9 Je² qui³tso²-na³: Coe⁴-ni³, a³li² cˀoa⁴-jin² nˀiain²³. Cˀoa⁴-ti⁴ an³ cho⁴ˀnta³ nia¹³ jo³-ni³ ji³, cao⁴ je² ntsˀai³ xi³ nchja⁴ya³ tˀa³tsˀe⁴ Ni³na¹, cao⁴ je² xi³ si¹tjo³son² je² en¹ xi³ tsˀe⁴ xon⁴-vi⁴. Jcha⁴xcoin¹³ Ni³na¹.
REV 22:10 Cˀoa⁴ je² qui³tso²-na³: A³li² vˀe²chjoa²nqui³-jin²³ je² en¹ xi³ nchja⁴ya³-ni³ je² xon⁴-vi⁴, nca³ je² ni⁴čhjin³-le⁴ nčhoa¹čhian³.
REV 22:11 Je² xi³ tsin²-le⁴ cjoa⁴qui²xi⁴-jin², to⁴jo³ li²coi³ cjoa⁴qui²xi⁴ coan⁴. Je² xi³ jnti¹, ca²ta³si¹jnti¹-sa³ yao³-le⁴. Je² xi³ tjin¹-le⁴ cjoa⁴qui²xi⁴, to⁴jo³ cjoa⁴qui²xi⁴ ca²ta³sˀin¹. Je² xi³ tsje³, ca²ta³ma³tsje³ya²-sa³.
REV 22:12 Coe⁴-ni³ an³ cjoe²ˀe⁴ nti⁴toan⁴, cˀoa⁴ cao⁴ je² xi³ cˀoe³chji¹³-le⁴, nca³ cˀoa⁴-sˀin² tsjoa³-le⁴ nca³ jnco¹jnco¹ jo³-sˀin² nca³ qui³si³xa¹.
REV 22:13 An³ nia¹³ je² Alfa cˀoa⁴ je² Omega, xi³ ti¹tjon² cˀoa⁴ xi³ fe³tˀa³, je² xi³ to²tsˀin³-le⁴ cˀoa⁴ je² xi³ ˀnta³tjon²-le⁴.
REV 22:14 Jo¹ to⁴nta³-le⁴ je² xi³ va³ne¹ na³jño³-le⁴, jme¹-ni³ nca³ tjin¹-si¹ni³le⁴ ˀnte³ cao⁴ ya¹-le⁴ cjoa⁴vi³jna³chon³, cˀoa⁴ cjoa⁴ˀa³sˀen³-si¹ni³ ya⁴ xo⁴ntjoa⁴-le⁴ na⁴xi⁴na³nta¹.
REV 22:15 To⁴nca³ ya⁴ nti³tsin³-le⁴ coa⁴tio⁴ nia¹, cao⁴ xi³ vˀe¹nta³, cao⁴ xi³ si¹cha³jnqui³, cao⁴ xi³ si¹cˀen³, cao⁴ xi³ ve³xcon¹ xco¹son², cao⁴ to⁴ˀya³-ni³ xi³ tsjoa³que³ cjoa⁴nti³so³.
REV 22:16 An³ Jesús qui³si³ca³sen¹³ a²ncje⁴-na⁴ nca³ tsjoa¹-no³ en¹ xi³ tˀa³tsˀe⁴ je² cjoa⁴-vi⁴ ya⁴jin³-le⁴ na⁴xi⁴na³nta¹-na⁴. An³ nia¹³ xi²nquia⁴ cˀoa⁴ ntje⁴-le⁴ David, je² ni³ño³tse³ xi³ ta⁴njion²ya³ tjo³.
REV 22:17 Je² Espíritu Santo cˀoa⁴ je² chjon⁴²-le⁴ Va³rre² tso²: Nčhoai¹³. Cˀoa⁴ je² xi³ nčhˀoe¹, ca²ta³tso²: Nčhoai¹³. Cˀoa⁴ je² xi³ fa³ti²-le⁴, ca²ta³nčhoa¹. Cˀoa⁴ je² xi³ me³-le⁴, ca²ta³ˀvi³ na³nta¹ xi³ tsjoa¹ cjoa⁴vi³jna³chon³, xi³ to⁴cjoa⁴tjao².
REV 22:18 An³ tsjoa³-le⁴ en¹-na⁴ nca³tsˀi³ xi³ nčhˀoe¹ je² en¹ xi³ nchja⁴ya³-ni³ je² xon⁴-vi⁴: Tsa² jnco³ xi³ cˀoe⁴²son²-sa³le⁴ je² cjoa⁴-vi⁴, Ni³na¹ cˀoa⁴-sˀin² tsjoa¹son²-le⁴ cjoa⁴ñˀain³ xi³ tjio¹tˀa³ je² xon⁴-vi⁴.
REV 22:19 Cˀoa⁴ tsa² jnco³ xi³ cjoa⁴ˀa²xin² je² en¹ xi³ nchja⁴ya³-ni³ xon⁴-vi⁴, Ni³na¹ cjoa⁴ˀa²xin²-le⁴ ˀnte³-le⁴ ya⁴ ya¹ xi³ tsˀe⁴ cjoa⁴vi³jna³chon³, cˀoa⁴ cao⁴ ˀnte³-le⁴ ya⁴ na⁴xi⁴na³nta¹ tsje³, cˀoa⁴ cao⁴ ˀnte³-le⁴ xi³ tsˀe⁴ cjoa⁴ xi³ tjio¹tˀa³ je² xon⁴-vi⁴.
REV 22:20 Je² xi³ tsjoa¹ en¹-le⁴ xi³ tˀa³tsˀe⁴ je² cjoa⁴-vi⁴, tso²: Ña³qui³ cjoa⁴qui²xi⁴ an³ cjoe²ˀe⁴ nti⁴toan⁴. Cˀoa⁴ ca²ta³ma³, cˀoa⁴ ca²ta³sˀe³. Nčhoai¹³, Señor Jesús.
REV 22:21 Je² cjoa⁴nta³-le⁴ Nai³-na¹ Jesucristo cˀoa⁴-sˀin² ca²ta³sˀe³-no³ nca³tsˀio³. Cˀoa⁴ ca²ta³ma³.
