﻿इय्योब.
13.
“माझ्या नेत्रांनी हे सर्व पाहिले आहे, माझ्या कानांनी ते ऐकले आणि समजले. 
जे तुम्हाला माहीत आहे, ते मलाही माहीत आहे; मी तुमच्यापेक्षा कमी दर्जाचा नाही. 
पण मी सर्वसमर्थाशी बोलावे आणि माझा वाद परमेश्वरासमोर मांडावा असे मी इच्छितो. 
तुम्ही तर मला लबाड्यांनी कलंकित करता; तुम्ही सर्व अयोग्य वैद्य आहात! 
तुम्ही गप्प राहाल तर किती बरे होईल! कारण त्यातच तुमचे शहाणपण आहे. 
आता माझा वाद ऐकून घ्या; माझ्या ओठांच्या विनंतीकडे कान द्या. 
परमेश्वराच्या वतीने तुम्ही दुष्टतेने बोलणार का? त्यांच्याकरिता तुम्ही कपटाचे भाषण कराल का? 
तुम्ही त्यांना पक्षपात दाखविणार का? परमेश्वराच्या वतीने त्यांचा वाद तुम्ही कराल काय? 
त्यांनी जर तुमची परीक्षा केली तर चांगले होईल काय? जसे मनुष्याला तसे तुम्ही परमेश्वरालाही फसवू शकाल काय? 
जर तुम्ही गुप्तपणे पक्षपात कराल तर परमेश्वर तुमच्याकडून निश्चितच हिशोब मागेल. 
त्यांचे वैभव तुम्हाला भयभीत करीत नाही का? त्यांचे भय तुम्हावर पडणार नाही का? 
तुमच्या नीतिवचनांना राखेएवढेच मोल आहे; तुमचे रक्षण हा मातीचा बचाव आहे. 
“आता गप्प राहा व मला बोलू द्या; मग माझ्यावर जे यावयाचे ते येवो. 
मी स्वतःला धोक्यात का टाकू आणि माझे जीवन माझ्याच हातात का घेऊ? 
जरी परमेश्वराने मला मारून टाकले, तरीही मी त्यांच्यावर आशा ठेवेन; व खचितच त्यांच्यासमोर मी माझ्या मार्गाचे समर्थन करेन. 
खचितच ह्यातच माझी खरी मुक्ती आहे, कारण कोणी देवहीन व्यक्ती त्यांच्यासमोर येण्याचे धाडस करणार नाही! 
मी जे सांगतो, ते लक्ष देऊन ऐका; माझे शब्द तुमच्या कानावर पडू द्या. 
मी माझा वाद तयार केला आहे, मला माहीत आहे की मी दोषमुक्त ठरेन. 
माझ्याविरुद्ध कोणी आरोप करेल काय? केलाच तर, मी शांत राहीन आणि मरून जाईन. 
“हे परमेश्वरा, मला या दोन गोष्टी द्या, आणि मग मी तुमच्यापासून लपणार नाही: 
माझ्यावरील आपला हात दूर करा, आणि तुमच्या धाकाने मला आणखी घाबरवू नका. 
मला आवाज द्या आणि मी उत्तर देईन, किंवा मी बोलेन आणि तुम्ही मला उत्तर द्या. 
मी किती चुका आणि पाप केलेत? माझे पाप आणि माझे अपराध मला दाखवा. 
तुम्ही आपले मुख का लपविता आणि मला आपला शत्रू का मानता? 
वार्‍याने उडून जाणार्‍या पानाला तुम्ही छळणार का? कोरड्या भुशाचा तुम्ही पाठलाग करणार का? 
कारण माझ्याविरुद्ध तुम्ही कटुत्वाच्या गोष्टी लिहिता, आणि माझ्या तारुण्यातील पातकांची शिक्षा मला देता. 
तुम्ही माझ्या पायात बेड्या घालता; माझ्या पायांच्या तळव्यांना चिन्ह करून माझ्या सर्व मार्गावर तुम्ही लक्ष ठेवले आहे. 
“सडलेल्या वस्तूप्रमाणे, कसरीने खाल्लेल्या वस्त्राप्रमाणे मनुष्य नष्ट होतो. 
